Kinh tạng Tây Tạng (Kangyur Đại Học) — 059_མདོ་སྡེ།_བ

།དེ་ནི་ལྷ་དང་མི་ཡི་ལམ་རྣམས་རབ་ཏུ་འབྱེད་ཅིང་རྣམ་པར་
སྦྱངས། །ལོང་བར་མི་འགྱུར་འོན་པར་མ་ཡིན་དབང་པོ་ཐམས་ཅད་ཚང་བར་འགྱུར། །གང་ཞིག་བྱང་ཆུབ་འཇུག་ཅིང་བློ་གྲོས་ལྡན་པ་སེམས་ཅན་སྐྱབས་གཉེར་བ། །སངས་རྒྱས་མཐོང་ཞིང་དེ་དག་ལ་ཡང་མཆོད་བྱེད་མཁས་པ་ཆོས་ཀྱང་ཉན། །ཤེས་རབ་ཡེ་ཤེས་ལྡན་
ཞིང་བློ་ནི་ཤིན་ཏུ་རླབས་ཆེ་ཆེན་པོར་འགྱུར། །ཐེ་ཚོམ་ནེམ་ནུར་མེད་ཅིང་ང་རྒྱལ་བྲལ་བ་རྟག་ཏུ་དྲང་པོར་འགྱུར། །གང་ཞིག་བྱང་ཆུབ་སེམས་བསྐྱེད་འདི་འདྲའི་དཔལ་གྱི་བྱང་ཆུབ་འཇུག་པ་དེ། །འདོད་པའི་དགའ་ལ་དགའ་བ་རྙེད་པར་མི་འགྱུར་ཆོས་ལ་དགའ་བ་རྙེད། །དེ་ནི་

འཇིག་རྟེན་དྲི་མས་གོས་པར་མི་འགྱུར་ཆུ་ལས་པད་མ་བཞིན། །ཤེས་རབ་ཡེ་ཤེས་ཡོན་ཏན་རྣམས་ཀྱིས་མི་ངོམས་ཕྱིར་ཞིང་ཚོལ་བར་བྱེད། །བྱང་ཆུབ་ཞུགས་ནས་སྙིང་རྗེས་མཐའ་ཡས་གང་ཞིག་ཟད་པར་མི་ནུས་པ། །སྐྱབས་དང་གླིང་དང་དཔུང་གཉེན་དག་དང་སེམས་ཅན་
རྣམས་ཀྱི་ཕ་མར་འགྱུར། །དེ་ནི་འགྲོ་བའི་སྨན་པ་སློབ་དཔོན་བླ་མ་དེད་དཔོན་ཆེན་པོར་འགྱུར། །འཇིག་རྟེན་དང་ནི་འཇིག་རྟེན་འདས་པའི་སྨན་སྦྱིན་ནད་རྣམས་ཞི་བར་བྱེད། །ཤ་ར་དྭ་ཏིའི་བུ་དེ་ནས་རྒྱལ་པོ་བསོད་ནམས་ཀྱི་རྣམ་པར་སྨིན་པ་ཡོངས་སུ་དག་པ་དེས་དེ་བཞིན་གཤེགས་
པ་རྣམ་པར་གཟིགས་དེ་ལས་བྱང་ཆུབ་ཀྱི་སེམས་ཀྱི་ཡོན་ཏན་དང་ཕན་ཡོན་དང་། བསོད་ནམས་ཚད་མེད་པ་འདི་ཐོས་ནས་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་སེམས་བསྐྱེད་དེ། བུད་མེད་ཀྱི་འཁོར་དེ་དག་དང་། བུ་ཐུ་བོ་དང་། བློན་པོ་དང་། མཁར་གྱི་རྒྱལ་པོ་དང་། སྐྱེ་བོའི་ཚོགས་ཆེན་པོ་དེ་ལ་ཚིགས་སུ་བཅད་པ་འདི་དག་སྨྲས་སོ། །སེམས་ཅན་དག་ལ་སྙིང་རྗེ་བྱམས་བསྐྱེད་ནས། །ང་ནི་བྱང་ཆུབ་དམ་པ་མཆོག་
ལ་ཞུགས། །གང་ཞིག་གང་ལ་དགའ་བ་ཡིད་འོང་འདོད། །དེས་ནི་བྱང་ཆུབ་སེམས་བརྟན་ཡང་དག་སྐྱེད། །མི་རིགས་སྦྱོར་བ་སྡུག་བསྔལ་གྱུར་པ་ཡིས། །སྔོན་ཆད་འཁོར་བ་བྱེ་བ་མ་ཤེས་ཀྱིས། །བྱང་ཆུབ་མཆོག་གི་ལམ་དུ་ཞུགས་ཤིག་དང་། །སེམས་ཅན་དོན་བརྩོན་སྡུག་
བསྔལ་བདེ་བར་འགྱུར། །གང་དག་རྫུ་འཕྲུལ་སྤོབས་པ་ཡེ་ཤེས་དང་། །ཤེས་རབ་འཁོར་དང་དེ་བཞིན་མཆོད་པ་དང་། །སངས་རྒྱས་རྣམ་གཟིགས་ཡོན་ཏན་དཔག་མེད་པ། །འདི་དག་ཐམས་ཅད་མཁྱེན་པའི་སེམས་ལས་བྱུང་། །ལྷ་མིའི་འཇིག་རྟེན་བདེ་བ་
གང་དག་དང་། །བརྒྱ་བྱིན་ཚངས་པ་འཁོར་ལོས་སྒྱུར་བ་དང་། །གང་དག་ཟག་བཅས་ཟག་པ་མེད་པའི་བདེ། །འདི་དག་ཐམས་ཅད་མཁྱེན་པའི་སེམས་ལས་བྱུང་། །བསྡུ་དང་བསམ་གཏན་དེ་ལྟར་ཚད་མེད་གང་། །དེ་བཞིན་གང་དག་ཕ་རོལ་ཕྱིན་ལམ་དང་། །

མངོན་ཤེས་རིག་དང་སོ་སོ་ཡང་དག་རིག །འདི་དག་ཐམས་ཅད་མཁྱེན་པའི་སེམས་ལས་བྱུང་། །སྟོབས་བཅུ་སངས་རྒྱས་ཁ་དོག་བསམ་ཡས་དང་། །གང་དག་དེ་བཞིན་གཤེགས་པའི་མི་འཇིགས་དང་། །གང་དག་སངས་རྒྱས་ཆོས་ཡངས་དཔག་
མེད་པ། །དེ་ཀུན་རྣམ་དག་སེམས་ལས་ངེས་པར་བྱུང་། །གང་ཞིག་ཞིང་རྣམས་བྱེ་བ་བསྐྱོད་པ་དང་། །ཐམས་ཅད་དབྱངས་ཀྱིས་གོ་བར་བྱེད་པ་དང་། །འོད་དང་བཀོད་པས་དྲི་མེད་རྒྱས་འདོད་པ། །མཁས་པ་དེས་ནི་བྱང་ཆུབ་སེམས་བསྐྱེད་ཅིག །མཁས་པ་གང་
ཞིག་བྱང་ཆུབ་སེམས་བསྐྱེད་པ། །ཕྱོགས་རྣམས་ཀུན་དུ་མཆོད་པའི་འོས་སུ་འགྱུར། །དེ་བཞིན་གཤེགས་པ་རྣམས་ཀྱིས་བསྔགས་པར་འགྱུར། །གསོལ་བ་མ་བཏབ་འགྲོ་བའི་བཤེས་སུ་འགྱུར། །གལ་ཏེ་སངས་རྒྱས་ཐམས་ཅད་གཟིགས་པ་ཡིས། །
བསྐལ་པ་མང་པོར་བསྔགས་པ་བརྗོད་ཀྱང་ངོ་། །བྱང་ཆུབ་སེམས་ལས་བསོད་ནམས་གང་བྱུང་བ། །བརྗོད་པས་ཟད་པར་འགྱུར་བ་མ་ཡིན་ནོ། །རྒྱལ་པོ་བསོད་ནམས་ཀྱི་རྣམ་པར་སྨིན་པ་ཡོངས་སུ་དག་པས་ཚིགས་སུ་བཅད་པ་དེ་དག་སྨྲས་མ་ཐག་ཏུ་དེ་ནས་
སྲོག་ཆགས་ཁྲག་ཁྲིག་ཕྲག་དགུ་བཅུ་རྩ་གཉིས་པོ་དེ་དག་དང་། རྒྱལ་པོའི་བཙུན་མོའི་འཁོར་དེ་དང་། བུ་ཁྲི་པོ་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཡང་རྣམ་པ་དྲུག་ཏུ་རབ་
ཏུ་གཡོས་སོ། །ལྷ་བྱེ་བ་ཕྲག་བཞི་བཅུས་ཀྱང་རྗེས་སུ་ཡི་རང་ངོ་ཞེས་སྒྲ་ཕྱུང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འཁོར་ལོས་སྒྱུར་བའི་རྒྱལ་པོ་དེས་ཕྱིས་ཀྱང་ལོ་བྱེ་བ་ཕྲག་བཅུར་དེ་བཞིན་གཤེགས་པ་རྣམ་པར་གཟིགས་དེ་ལ་བདེ་བར་སྦྱར་བ་
ཐམས་ཅད་ཀྱིས་བསྟི་སྟང་དུ་བྱས་སོ། །བླ་མར་བྱས་སོ། །རི་མོར་བྱས་སོ། །མཆོད་དོ། །ཚངས་པར་སྤྱད་པའི་བསླབ་པའི་གནས་ལྔ་ཡོངས་སུ་བླངས་སོ། །རྟག་ཏུ་རྒྱུན་མི་ཆད་པར་དེ་བཞིན་གཤེགས་པ་དེ་ལ་ཆོས་ཉན་པའི་ཕྱིར་གཡོག་དང་བཅས་ཏེ་དོང་ནས་ཆོས་ཉན་ཏོ། །

དེས་ཕྱི་ཞིག་ན་བུ་ཐུ་བོ་རྒྱལ་པོར་བཅུག་ནས་སྐྲ་དང་། བ་སྤུ་བྲེགས་ཏེ་གོས་ངུར་སྨྲིག་བགོས་ནས་ཡང་དག་པར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་དེ་ལྟར་རབ་ཏུ་བྱུང་ནས་འདི་ལྟ་སྟེ་བདེན་པའི་ཚིག་དང་། ཆོས་ཀྱི་ཚིག་དང་། དོན་གྱི་ཚིག་དང་།
འདུལ་བའི་ཚིག་དང་། ཚིག་མི་ཟད་པ་བཞི་པོ་འདི་དག་གི་ཡི་གེའི་མཚམས་སྦྱར་བ་ལས་ཡོངས་སུ་འཇལ་ལོ། །དེ་ལོ་བྱེ་བ་ཚངས་པར་སྤྱོད་པ་ལ་མཁས་པའི་རྗེས་སུ་སོང་ངོ་། །རྒྱལ་པོ་རབ་ཏུ་བྱུང་བ་དེས་རྗེས་སུ་བསླབས་ནས། དེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་ཀྱི་སེམས་ཅན་བགྲང་བ་ལས་ཤིན་ཏུ་འདས་པ་དག་དེ་བཞིན་གཤེགས་པ་རྣམ་པར་གཟིགས་དེའི་གསུང་རབ་ལ་རབ་ཏུ་བྱུང་ངོ་། །ཤ་ར་དྭ་ཏིའི་བུ་དེའི་ཚེ་དེའི་དུས་ན་རྒྱལ་པོ་བསོད་ནམས་ཀྱི་རྣམ་པར་སྨིན་པ་ཡོངས་སུ་དག་པ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་
སེམས་ན་དེ་ལྟར་མི་བལྟ་སྟེ། བུ་མོ་རིན་ཆེན་འདི་ཉིད་དོ། །དེ་ནས་དེ་བཞིན་གཤེགས་པ་རྣམ་པར་གཟིགས་དེ་ལས་བུ་མོ་རིན་ཆེན་འདིས་བྱང་ཆུབ་ཏུ་སེམས་བསྐྱེད་དོ། །ཤ་ར་དྭ་ཏིའི་བུས་གསོལ་པ། བཅོམ་ལྡན་འདས་ལས་ཀྱི་སྒྲིབ་པ་ཇི་ལྟ་བུ་ཞིག་གིས་བུ་མོ་འདིས་བུད་
མེད་ཀྱི་དངོས་པོ་ཡོངས་སུ་བཟུང་། བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་བྱང་ཆུབ་སེམས་དཔའ་དག་ནི་ལས་ཀྱི་སྒྲིབ་པས་བུད་མེད་ཀྱི་དངོས་པོ་ཡོངས་སུ་མི་འཛིན་ཏོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་བྱང་ཆུབ་སེམས་དཔའ་དག་ནི་སེམས་ཅན་ཡོངས་སུ་
སྨིན་པར་བྱ་བའི་ཕྱིར་མངོན་པར་ཤེས་པ་དང་། རིག་པ་དང་། ཡེ་ཤེས་དང་ཐབས་དང་ཤེས་རབ་ཀྱི་སྟོབས་ཀྱིས་བུད་མེད་ཀྱི་དངོས་པོ་ཡོངས་སུ་འཛིན་ཏོ། །ཤ་ར་དྭ་ཏིའི་བུ་འདི་ལ་ཇི་སྙམ་དུ་སེམས། བུ་མོ་རིན་ཆེན་འདི་བུད་མེད་དོ་སྙམ་ན་ཡང་དེ་ལྟར་མི་བལྟའི། ཤ་ར་དྭ་ཏིའི་
བུ་འདི་ནི་མངོན་པར་ཤེས་པའི་སྟོབས་ཅན་གྱི་བྱང་ཆུབ་སེམས་དཔར་བལྟ་སྟེ་དེ་ལ་ནི་བུད་མེད་ཀྱི་ཆོས་དང་། སྐྱེས་པའི་ཆོས་མེད་དོ། །བུ་མོ་འདི་ནི་དགེ་བའི་ཆོས་ཐམས་ཅད་དང་ལྡན་ནོ། །འོང་བ་མེད་དོ། །འགྲོ་བ་མེད་དོ། །ཤ་ར་དྭ་ཏིའི་བུ་བུ་མོ་རིན་ཆེན་འདིས་ནི་འཛམ་བུའི་

གླིང་འདིར་བུ་མོ་གཞོན་ནུ་དགུ་ཁྲི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་ནས་བུ་མོ་རིན་ཆེན་གྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་བུད་མེད་ཀྱི་ལུས་ཀྱིས་སེམས་ཅན་རྣམས་
ལ་ཆོས་སྟོན་སྤྱད་པ་མི་སྤྱོད་དམ། ཤ་ར་དྭ་ཏིའི་བུས་སྨྲས་པ། བུ་མོ་བདག་ནི་སྐྱེས་པའི་ལུས་འདི་ཉིད་ཀྱང་མི་འདོད་ན་བུད་མེད་ཀྱི་ལུས་ཡོངས་སུ་གཟུང་བ་ལྟ་ཅི་སྨོས། བུ་མོས་སྨྲས་པ། བཙུན་པ་ཤ་ར་དྭ་ཏིའི་བུ་ལུས་ལ་སྨོད་དམ། སྨྲས་པ་བུ་མོ་སྨོད་དོ། །སྨྲས་པ། དེ་བས་ན་
བཙུན་པ་ཤ་ར་དྭ་ཏིའི་བུ་བྱང་ཆུབ་སེམས་དཔའ་ནི་སེམས་ཅན་ཐམས་ཅད་ལས་ཁྱད་པར་དུ་འཕགས་སོ། །དེ་ཅིའི་ཕྱིར་ཞེ་ན། འདི་ལྟར་གང་ཉན་ཐོས་ཀྱིས་སྨད་པ་དེ་ལ་ནི་བྱང་ཆུབ་སེམས་དཔའ་མི་སྨོད་དོ། །ཉན་ཐོས་ཀྱིས་སྨད་ཀྱི་བྱང་ཆུབ་སེམས་དཔས་མ་ཡིན་པ་གང་ཞེ་
ན། ཕུང་པོ་དང་། ཁམས་དང་། སྐྱེ་མཆེད་ལ་ཉན་ཐོས་སྨོད་ཀྱི་བྱང་ཆུབ་སེམས་དཔའ་ནི་མ་ཡིན་ནོ། །ལུས་ཡོངས་སུ་གཟུང་བ་ལ་ཉན་ཐོས་སྨོད་ཀྱི་བྱང་ཆུབ་སེམས་དཔའ་ནི་མ་ཡིན་ནོ། །འཁོར་བ་ཡོངས་སུ་གཟུང་བ་ལ་ཉན་ཐོས་སྨོད་ཀྱི། བྱང་ཆུབ་སེམས་དཔའ་ནི་མ་ཡིན་ནོ། །
སྐྱེ་བའི་གནས་པ་ལ་ཉན་ཐོས་སྨོད་ཀྱི། བསམས་བཞིན་དུ་སྐྱེ་བ་ཡོངས་སུ་གཟུང་བ་ལ་བྱང་ཆུབ་སེམས་དཔའ་ནི་མ་ཡིན་ནོ། །བསོད་ནམས་མངོན་པར་འདུ་བྱ་བ་ལ་ཉན་ཐོས་སྨོད་ཀྱི། བསོད་ནམས་ཀྱི་ཚོགས་སོགས་པས་མི་ངོམས་པ་ལ་བྱང་ཆུབ་སེམས་དཔའ་ནི་མ་ཡིན་ནོ། །
སེམས་ཅན་དང་འདྲེ་བ་ལ་ཉན་ཐོས་སྨོད་ཀྱི། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་འདུ་འཛི་ལ་བྱང་ཆུབ་སེམས་དཔའ་ནི་མ་ཡིན་ནོ། །གྲོང་དང་གྲོང་ཁྱེར་དུ་འཇུག་པ་ལ་ཉན་ཐོས་སྨོད་ཀྱི། གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། ཕོ་བྲང་
འཁོར་དུ་འཇུག་པ་ལ་བྱང་ཆུབ་སེམས་དཔའ་ནི་མ་ཡིན་ནོ། །རང་གི་ཉོན་མོངས་པ་ལ་ཉན་ཐོས་སྨོད་ཀྱི། སེམས་ཅན་ཐམས་ཅད་ཀྱི་ཉོན་མོངས་པ་ལ་བྱང་ཆུབ་སེམས་དཔའ་ནི་མ་ཡིན་ཏེ། བཙུན་པ་ཤ་ར་དྭ་ཏིའི་བུ་དེ་ལྟར་ན་གང་དང་གང་ལ་ཉན་ཐོས་སྨོད་པ་དེ་དང་དེ་ལ་བྱང་ཆུབ་སེམས་

དཔའ་ནི་མ་ཡིན་ནོ། །ཤ་ར་དྭ་ཏིའི་བུས་སྨྲས་པ། བུ་མོ་སྟོབས་གང་གིས་དེ་སྨོད་པར་མི་འགྱུར་བའི་བྱང་ཆུབ་སེམས་དཔའི་སྟོབས་གང་ཡིན། བུ་མོས་སྨྲས་པ། བཙུན་པ་ཤ་ར་དྭ་ཏིའི་བུ་བརྒྱད་པོ་འདི་དག་ནི་བྱང་ཆུབ་སེམས་དཔའི་སྟོབས་ཏེ། དེས་དེ་སྨོད་པར་མི་འགྱུར་རོ། །
བརྒྱད་གང་ཞེ་ན། ཁོང་ཁྲོ་བ་མེད་པའི་སེམས་ཀྱིས་བྱམས་པའི་སྟོབས་དང་། སེམས་ཅན་ཡོངས་སུ་སྨིན་པར་བྱེད་པས་སྙིང་རྗེའི་སྟོབས་དང་། བཅོས་མ་མ་ཡིན་པས་ལྷག་པའི་བསམ་པའི་སྟོབས་དང་། ཉོན་མོངས་པ་དང་བྲལ་བས་ཤེས་རབ་ཀྱི་སྟོབས་དང་།
ཡོངས་སུ་མི་སྐྱོ་བས་ཐབས་ཀྱི་སྟོབས་དང་། ཞུམ་པ་མེད་པས་བསོད་ནམས་ཀྱི་སྟོབས་དང་། གཏི་མུག་དང་བྲལ་བས་ཡེ་ཤེས་ཀྱི་སྟོབས་དང་། སྔོན་དམ་བཅས་པ་ཉམས་འོག་ཏུ་ཆུད་པར་བྱེད་པས་བརྩོན་འགྲུས་ཀྱི་སྟོབས་ཏེ། བཙུན་པ་ཤ་ར་དྭ་ཏིའི་བུ་བརྒྱད་པོ་དེ་དག་ནི་བྱང་ཆུབ་
སེམས་དཔའི་སྟོབས་ཏེ། སྟོབས་དེ་དག་གིས་དེ་མི་སྨོད་དོ། །གནས་བརྟན་གྱིས་སྨྲས་པ། ཅི་བུ་མོ་ཁྱོད་སྟོབས་འདི་ལྟ་བུ་དང་ལྡན་ནམ། བུ་མོས་སྨྲས་པ། བཙུན་པ་ཤ་ར་དྭ་ཏིའི་བུ་ལྡན་ཏེ་གང་མཉམ་པ་ཉིད་ཀྱིས་ལྡན་ནོ། །གང་མཉམ་པ་ཉིད་ཀྱིས་མཉམ་པར་གནས་སོ། །བཙུན་
པ་ཤ་ར་དྭ་ཏིའི་བུ་གང་མཉམ་པ་དེ་ནི་སྟོབས་མ་ཡིན། ཉམ་ཆུང་བ་མ་ཡིན་ཏེ། དེ་ནི་མཉམ་པ་ཉིད་དོ། །གང་མཉམ་པ་ཉིད་དེ་ལ་ནི་ཐ་དད་དུ་བྱ་བ་ཆུང་ཟད་ཀྱང་མེད་དོ། །མཉམ་པ་ཞེས་བྱ་བ་ནི་ནམ་མཁའ་སྟེ། ཆོས་ཐམས་ཅད་ནི་ནམ་མཁའ་དང་མཉམ་མོ། །ཇི་ལྟར་ན་ནམ་མཁའ་
སྣང་བ་མེད་ཅིང་བླ་གབ་མེད་པ་དེ་བཞིན་དུ་ཆོས་ཐམས་ཅད་ཀྱང་ནམ་མཁའ་ལྟར་སྣང་བ་མེད་ཅིང་བླ་གབ་མེད་པའོ། །གང་དེ་ལྟར་མཉམ་པ་དེ་ནི་ཉམ་ཆུང་བ་ཡང་མ་ཡིན། སྟོབས་དང་ལྡན་པ་ཡང་མ་ཡིན་མོད་ཀྱི། འོན་ཀྱང་བཙུན་པ་ཤ་ར་དྭ་ཏིའི་བུ་བྱང་ཆུབ་སེམས་དཔའ་གང་ཉམ་
ཆུང་བ་དེ་ནི་སྟོབས་དང་ལྡན་པའོ། །དེ་ཅིའི་ཕྱིར་ཞེ་ན། གང་ཉོན་མོངས་པ་ཉམ་ཆུང་བ་དེ་ནི་ཡེ་ཤེས་ཀྱི་སྟོབས་དང་ལྡན་པའོ། །གང་སེར་སྣ་ཉམ་ཆུང་བ་དེ་ནི་སྦྱིན་པའི་སྟོབས་དང་ལྡན་པའོ། །གང་ངང་ཚུལ་ངན་པ་ཉམ་ཆུང་བ་དེ་ནི་ཚུལ་ཁྲིམས་ཀྱི་སྟོབས་དང་ལྡན་པའོ། །གང་གནོད་

སེམས་ཉམ་ཆུང་བ་དེ་ནི་བཟོད་པའི་སྟོབས་དང་ལྡན་པའོ། །གང་ལེ་ལོ་ཉམ་ཆུང་བ་དེ་ནི་བརྩོན་འགྲུས་ཀྱི་སྟོབས་དང་ལྡན་པའོ། །གང་གཡེང་བ་ཉམ་ཆུང་བ་དེ་ནི་བསམ་གཏན་གྱི་སྟོབས་དང་ལྡན་པའོ། །གང་འཆལ་པའི་ཤེས་རབ་ཉམ་ཆུང་བ་དེ་ནི་ཤེས་རབ་ཀྱི་སྟོབས་དང་ལྡན་
པའོ། །དེ་བཞིན་དུ་ཆོས་ཐམས་ཅད་དེ་གང་དང་གང་ལས་བྱང་ཆུབ་སེམས་དཔའ་མི་དགེ་བ་ཉམ་ཆུང་བ་དེ་དང་དེ་ལས་དེ་དགེ་བའི་སྟོབས་དང་ལྡན་པའོ། །དེ་ནས་བཅོམ་ལྡན་འདས་ཀྱིས་བུ་མོ་རིན་ཆེན་ལ་ལེགས་སོ་ཞེས་བྱ་བ་གནང་སྟེ། བུ་མོ་ལེགས་སོ། །ལེགས་སོ། །ཇི་སྟེ་བསྟན་
པ་ལྟ་ན་དེ་ལྟར་བསྟན་པར་བྱའོ། །བསྟན་པ་འདི་བཤད་པ་ན་བྱང་ཆུབ་སེམས་དཔའ་ལྔ་བརྒྱ་བཟོད་པ་སྐྱེས་སོ། །དེ་ནས་བཅོམ་ལྡན་འདས་ལ་བུ་མོ་རིན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དེ་བཞིན་གཤེགས་པའི་སྟོབས་བཅུ་པོ་དེ་དག་དགེ་བའི་རྩ་བ་
གང་གིས་དེ་བཞིན་གཤེགས་པའི་སྟོབས་བཅུ་དང་ལྡན་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བུ་མོ་རིན་ཆེན་ལ་འདི་སྐད་ཅེས་བཀའ་སྩལ་ཏོ། །བུ་མོ་བྱང་ཆུབ་སེམས་དཔའ་གང་གི་ཕྱིར་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཐེག་པ་དམན་པ་འདོད་
ཅིང་བྱ་བ་མ་ཡིན་པ་བྱེད་པར་འགྱུར་བ་འདི་ནི་གནས་མ་ཡིན་ཏེ་སྐབས་མེད་དོ། །དེ་ཡི་དམ་ལ་བརྟན་པའི་སྟོབས་འདི་དང་ལྡན་པས་བྱང་ཆུབ་ཀྱི་སྙིང་པོ་མཆོག་དམ་པར་སོང་ནས་གནས་དང་གནས་མ་ཡིན་པ་མཁྱེན་པའི་སྟོབས་ཐོབ་སྟེ། གནས་ལ་ཡང་གནས་དང་གནས་མ་ཡིན་པ་ལ་ཡང་
གནས་མ་ཡིན་པར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་དེ་བཞིན་གཤེགས་པའི་སྟོབས་དང་པོ་སྟེ། སྟོབས་དེ་ཐོབ་པས་དེ་བཞིན་གཤེགས་པ་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་སྟེ། ཁྱུ་མཆོག་གི་གནས་སུ་དམ་འཆའ་ཞིང་། དགེ་སྦྱོང་ངམ། བྲམ་ཟེའམ། ལྷའམ། བདུད་
དམ། ཚངས་པའམ། གང་གིས་ཀྱང་འཇིག་རྟེན་དུ་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་རབ་ཏུ་བསྐོར་ཏོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། རང་གི་ལས་ལས་གྱུར་པ། ལས་ཀྱི་རྣམ་པར་སྨིན་པ་ལ་རྟོན་པ་ཡིན་ཏེ། དེ་ལས་ཀྱི་རྣམ་པར་སྨིན་

པའི་སྟོབས་འདི་དང་ལྡན་པས་བྱང་ཆུབ་ཐོབ་པ་ནས་འདས་པ་དང་། མ་འོངས་པ་དང་། ད་ལྟར་བྱུང་བའི་ལས་དང་། ལས་ཡང་དག་པར་བླངས་པ་རྣམས་ཀྱི་རྣམ་པར་སྨིན་པ་མཁྱེན་པ་གནས་དང་རྒྱུས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་དེ་བཞིན་གཤེགས་པའི་སྟོབས་གཉིས་པ་
སྟེ། སྟོབས་དེ་ཐོབ་པས་དེ་བཞིན་གཤེགས་པ་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་སྟེ། ཁྱུ་མཆོག་གི་གནས་སུ་དམ་འཆའ་ཞིང་། དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། གང་གིས་ཀྱང་འཇིག་རྟེན་དུ་ཆོས་དང་འཐུན་པར་མ་བསྐོར་
བའི་ཚངས་པའི་འཁོར་ལོ་རབ་ཏུ་བསྐོར་ཏོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། སེམས་ཅན་རྣམས་ཀྱི་དབང་པོ་ལ་བརྟགས་ནས་ཆོས་སྟོན་ཏེ། དེ་དག་ཤེས་ནས་དབང་པོ་རྣམས་ཇི་ལྟ་བ་བཞིན་དུ་འཇུག་ཅིང་དབང་པོ་རྣམས་ཇི་ལྟ་བ་དང་ལྡན་ཏེ།
དེ་དབང་པོའི་རིམ་པ་མཁྱེན་པའི་སྟོབས་འདི་དང་ལྡན་པས་བྱང་ཆུབ་ཐོབ་པ་ན་སེམས་ཅན་གཞན་རྣམས་དང་གང་ཟག་གཞན་དག་གི་དབང་པོ་དང་། བརྩོན་འགྲུས་ཀྱི་རིམ་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། བུ་མོ་དེ་བཞིན་གཤེགས་པས་གང་སེམས་ཅན་གཞན་རྣམས་དང་། གང་
ཟག་གཞན་དག་གི་དབང་པོ་དང་བརྩོན་འགྲུས་ཀྱི་རིམ་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་དེ་བཞིན་གཤེགས་པའི་སྟོབས་གསུམ་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་ཅན་རྣམས་ཀྱི་ཁམས་ལ་འཇུག་སྟེ། ཞུགས་
ནས་སེམས་ཅན་རྣམས་ཀྱི་མོས་པ་ཇི་ལྟ་བ་དང་། ཁམས་ཇི་ལྟ་བ་དེ་བཞིན་དུ་གནས་སོ། །དེ་ཁམས་ལ་འཇུག་པའི་སྟོབས་འདི་དང་ལྡན་པས་བྱང་ཆུབ་ཐོབ་པ་ན་ཁམས་དུ་མ་དང་། ཁམས་སྣ་ཚོགས་པའི་འཇིག་རྟེན་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་དེ་
བཞིན་གཤེགས་པའི་སྟོབས་བཞི་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། སེམས་ཅན་མོས་པ་ཐ་དད་པ་རྣམས་ཀྱི་མོས་པ་དང་། རྣམ་པར་གྲོལ་བའི་ཡེ་ཤེས་ཀུན་ཏུ་ཚོལ་ཏེ། དེ་ལྟར་མོས་པ་ལ་མི་སྨོད་དོ། །དེ་མོས་པའི་སྟོབས་

འདི་དང་ལྡན་པས་བྱང་ཆུབ་ཐོབ་པ་ན་སེམས་ཅན་གཞན་རྣམས་དང་། གང་ཟག་གཞན་དག་གི་མོས་པ་དུ་མ་དང་། མོས་པ་སྣ་ཚོགས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་དེ་བཞིན་གཤེགས་པའི་སྟོབས་ལྔ་པའོ། །བུ་མོ་གཞན་ཡང་བྱང་ཆུབ་སེམས་དཔའ་
བྱང་ཆུབ་སེམས་དཔའི་སྤྱད་པ་སྤྱོད་པ་ན། འདུས་བྱས་དང་། འདུས་མ་བྱས་དང་། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོ་ཐམས་ཅད་དུ་ཡེ་ཤེས་གཏོང་ངོ་། །དེ་ཀུན་དུ་འགྲོ་བ་མཁྱེན་པས་སྟོབས་འདི་དང་ལྡན་པས། བྱང་ཆུབ་ཐོབ་པ་ན་ཀུན་དུ་འགྲོ་
བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་དེ་བཞིན་གཤེགས་པའི་སྟོབས་དྲུག་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན་བསམ་གཏན་དང་། ཏིང་ངེ་འཛིན་ལྷུར་ལེན་པ་ཡིན་ཏེ། སེམས་ངེས་པར་རྟོག་ཅིང་ཉོན་མོངས་པ་དང་
བྲལ་ཏེ་དུལ་ཞིང་ཅང་ཤེས་སོ། །དེ་ཅང་ཤེས་ཀྱི་སྟོབས་འདི་དང་ལྡན་པས་བྱང་ཆུབ་ཐོབ་པ་ན་སེམས་ཅན་གཞན་རྣམས་དང་། གང་ཟག་གཞན་དག་གི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། ཀུན་ནས་ཉོན་མོངས་པ་དང་། རྣམ་པར་
བྱང་བ་དང་ལྡན་པ་ཐམས་ཅད་མཁྱེན་པའི་སྟོབས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་དེ་བཞིན་གཤེགས་པའི་སྟོབས་བདུན་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། སྔོན་གྱི་རྒྱུ་ལས་བྱུང་བའི་དགེ་བའི་རྩ་བ་ཆུད་མི་
གསོན་ཏེ། བག་ཡོད་པ་ཡིན། སྔོན་དམ་བཅས་པ་ལས་མི་ཉམས་པ་ཡིན་ནོ། །དེ་སྔོན་གྱི་རྒྱུ་ལས་བྱུང་བའི་དགེ་བའི་རྩ་བ་ཆུད་མི་གསོན་པའི་སྟོབས་འདི་དང་ལྡན་པས་བྱང་ཆུབ་ཐོབ་པ་ན། བདག་དང་སེམས་ཅན་གཞན་རྣམས་དང་གང་ཟག་གཞན་དག་གི་སྔོན་གྱི་གནས་རྣམ་པ་དུ་མ་
རྗེས་སུ་དྲན་པ་མཁྱེན་པའི་སྟོབས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་དེ་བཞིན་གཤེགས་པའི་སྟོབས་བརྒྱད་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་ཅན་གང་ཡང་སྤ་འགོང་བར་མི་བྱེད་ལ་མ་བསླབས་པ་ལ་དབང་མི་

ཟ་ཞིང་སེམས་ཅན་ཐམས་ཅད་ལ་སྣང་བར་གྱུར་པ་ཡིན་ནོ། །དེ་སྣང་བའི་སྟོབས་འདི་དང་ལྡན་པས་བྱང་ཆུབ་ཐོབ་པ་ན་ལྷའི་མིག་གི་ཤེས་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་དེ་བཞིན་གཤེགས་པའི་སྟོབས་དགུ་པའོ། །བུ་མོ་གཞན་ཡང་བྱང་ཆུབ་སེམས་དཔའ་
བྱང་ཆུབ་སེམས་དཔའི་སྤྱད་པ་སྤྱོད་པ་ན། སེམས་ཅན་གང་གི་ཟག་པ་འཕེལ་བའི་ཕྱིར་ཡང་གནས་པ་མ་ཡིན་གྱིས་ཟག་པ་ཟད་པར་བྱ་བའི་ཕྱིར་སེམས་ཅན་རྣམས་ལ་ཆོས་སྟོན་ཏེ། ཟག་པ་འཕེལ་བར་བྱ་བའི་ཕྱིར་མ་ཡིན་གྱི་ཟག་པ་མེད་པའི་ལམ་གྱིས་སེམས་ཅན་རྣམས་ལ་ལམ་ཉེ་བར་སྟོན་ཏོ། །
དེ་མོས་པ་ཟག་པ་མེད་པའི་སྟོབས་འདི་དང་ལྡན་པས་བྱང་ཆུབ་ཐོབ་པ་ནི་ཟག་པ་ཐམས་ཅད་ཟད་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་དེ་བཞིན་གཤེགས་པའི་སྟོབས་བཅུ་པའོ། །བུ་མོ་དེ་དག་ནི་དེ་བཞིན་གཤེགས་པའི་སྟོབས་བཅུ་སྟེ། བྱང་ཆུབ་སེམས་
དཔའ་དེ་དག་རྫོགས་པར་བྱས་ནས་སྟོབས་བཅུ་དང་ལྡན་པའི་དེ་བཞིན་གཤེགས་པར་འགྱུར་རོ། །བུ་མོ་དེ་ལྟ་བས་ན་བྱང་ཆུབ་སེམས་དཔས་དེ་བཞིན་གཤེགས་པའི་སྟོབས་བཅུ་རབ་ཏུ་དབྱེ་བ་འདི་དག་ཐོས་ནས་དེ་བཞིན་གཤེགས་པའི་སྟོབས་བཅུ་པོ་འདི་དག་ཡོངས་སུ་རྫོགས་པར་
བྱ་བའི་ཕྱིར་ཅི་ནས་ཀྱང་དགེ་བའི་རྩ་བ་རྣམས་ལ་འཇུག་པར་བྱའོ། །བཅོམ་ལྡན་འདས་ལ་བུ་མོ་རིན་ཆེན་གྱིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་གང་མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་པོ་འདི་དག་དང་ཇི་ལྟར་ལྡན་ན་བྱང་ཆུབ་
སེམས་དཔའ་མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་རབ་ཏུ་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། བུ་མོ་འདི་ལ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན་གཞན་གྱིས་ཤེས་པར་མི་བྱའོ་སྙམ་ནས་སློབ་དཔོན་ནམ་
ཡང་ཆོས་འཆབ་པར་མི་བྱེད་དེ། སེམས་ཅན་ཐམས་ཅད་ལ་སེམས་སྙོམས་པ་ཡིན། བདོག་པ་ཐམས་ཅད་ཡོངས་སུ་གཏོང་ཞིང་ཆོས་མཉམ་པ་ཉིད་དུ་མཐོང་བ་ཡིན། ཐ་དད་པའི་འདུ་ཤེས་དང་བྲལ་བ་ཡིན་ཏེ། དེ་བྱང་ཆུབ་ཐོབ་པ་ན་སེང་གེའི་སྒྲ་ཡང་དག་པར་སྒྲོག་སྟེ། ང་ཡང་དག་པར་

རྫོགས་པར་སངས་རྒྱས་སོ་ཞེས་དམ་བཅས་པ་ལ་ཆོས་འདི་ལྟ་བུ་ཞིག་མངོན་པར་རྫོགས་པར་སངས་མ་རྒྱས་སོ་ཞེས་འདིར་ང་ལ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ་སུ་ཡང་རུང་སྟེ། འཇིག་རྟེན་ན་ཆོས་དང་འཐུན་པས་རྒོལ་བར་འགྱུར་བའི་མཚན་
མ་ཡང་དག་པར་རྗེས་སུ་མི་མཐོང་ངོ་། །མཚན་མ་དེ་ཡང་དག་པར་རྗེས་སུ་མ་མཐོང་བས་དེ་བཞིན་གཤེགས་པ་བདེ་བ་བརྙེས་པ་དང་། འཇིགས་པ་མེད་པ་བརྙེས་པ་དང་། མི་འཇིགས་པ་བརྙེས་པ་ཡིན་ཏེ། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་ཅིང་། ཁྱུ་མཆོག་གི་
གནས་སུ་དམ་འཆའ་སྟེ། དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། གང་གིས་ཀྱང་འཇིག་རྟེན་དུ་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་རབ་ཏུ་བསྐོར་བ་འདི་ནི་བུ་མོ་དེ་བཞིན་གཤེགས་པའི་མི་འཇིགས་པ་དང་པོའོ། །བུ་མོ་གཞན་ཡང་
བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། བར་དུ་གཅོད་པ་ལ་བར་དུ་གཅོད་པའི་ཆོས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། དེ་བར་དུ་གཅོད་པའི་ཆོས་ལ་མི་སྟོན་ཏོ། །མི་འཇུག་གོ། །མི་སྤྱོད་དོ། །གཞན་དག་ལ་ཡང་མི་འཆད་དོ། །མི་སྟོན་ཏོ། །
བར་དུ་གཅོད་པའི་ཆོས་སུ་ཤེས་ནས་སྤོང་ངོ་། །དེ་བྱང་ཆུབ་ཐོབ་པ་ན་སེང་གེའི་སྒྲ་སྒྲོག་སྟེ། གང་ངས་བར་དུ་གཅོད་པའི་ཆོས་སུ་གསུངས་པ་དེ་དག་ལ་སྟེན་པ་ལ་ནི་བར་དུ་གཅོད་པ་མ་ཡིན་ནོ། །ཞེས་བྱ་བའི་གནས་མེད་དེ། འདིར་ང་ལ་གང་ཡང་རྒོལ་བར་འགྱུར་བ་
ཞེས་བྱ་བ་ནི་སྔ་མ་བཞིན་ཏེ། འདི་ནི་མི་འཇིགས་པ་གཉིས་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། རྟག་ཏུ་རྒྱུན་མི་འཆད་པར་དཀར་པོའི་ཆོས་ལ་མོས་པ་ཡིན་ཏེ། རྣམ་པར་བྱང་བའི་ལམ་དུ་ཞུགས་ཤིང་སེམས་ཅན་ཐམས་ཅད་ལ་རྣམ་
པར་དག་པའི་ཆོས་སྟོན་ཏེ། ཡོན་ཏན་གྱི་ཆོས་ཉིད་མངོན་སུམ་དུ་གྱུར་པ་ཡིན་ནོ། །ཡན་ལག་གི་ཚོགས་གང་དག་གིས་རྣམ་པར་བྱང་བར་རྣམ་པར་དག་པའི་ལམ་གནོན་པར་འགྱུར་བའི་ཡན་ལག་གི་ཚོགས་དེ་དག་ལ་བདག་ཀྱང་སྤྱོད། སེམས་ཅན་གཞན་ལ་ཡང་སྟོན་ཏོ། །དེ་བྱང་ཆུབ་

ཐོབ་པ་ན་སེང་གེའི་སྒྲ་སྒྲོག་སྟེ། གང་ངས་རྣམ་པར་བྱང་བ་རྣམ་པར་དག་པའི་ཆོས་སུ་གསུངས་པ་དེ་དག་ལ་སྟེན་པ་ལ་ནི་རྣམ་པར་དག་པ་མ་ཡིན་ནོ་ཞེས་བྱ་བའི་གནས་མེད་དོ། །འདིར་ང་ལ་སུའང་རུང་རྒོལ་བར་འགྱུར་ཞེས་བྱ་བ་ནི་སྔ་མ་བཞིན་ཏེ། འདི་ནི་མི་འཇིགས་པ་གསུམ་པའོ། །
བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་གིས་ཤེས་ཤིང་མཐོང་གི་གཞན་གྱིས་མི་ཤེས་མི་མཐོང་ངོ་ཞེས་མངོན་པའི་ང་རྒྱལ་དུ་ནམ་དུ་ཡང་མི་ལྟུང་སྟེ། རྟག་ཏུ་རྒྱུན་མི་ཆད་པར་མངོན་པའི་ང་རྒྱལ་མེད་ཅིང་སྡིག་པ་འབྱེད་པ་བློ་སྦྱང་བ་
ཡིན་ནོ། །དེ་ཆོས་ཀྱི་སྦྱིན་པ་འདི་དང་ལྡན་པས་བྱང་ཆུབ་ཐོབ་པ་ན་སེང་གེའི་སྒྲ་སྒྲོག་སྟེ། ང་ཟག་པ་ཟད་དོ་ཞེས་དམ་བཅས་པ་ལ་ཟག་པ་འདི་ལྟ་བུ་ཞིག་ཡོངས་སུ་མ་ཟད་དོ་ཞེས་བྱ་བར་དེ་ལྟ་བུའི་གནས་མེད་དེ། འདིར་ང་ལ་སུ་ཡང་རྒོལ་བར་འགྱུར་བ་ཞེས་བྱ་བ་ནི་སྔ་མ་བཞིན་ཏེ་འདི་ནི་མི་འཇིགས་པ་
བཞི་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། རྟག་ཏུ་རྒྱུན་མི་ཆད་པར་ལམ་སྟོར་བའི་སེམས་ཅན་རྣམས་ལ་ལམ་ཚོལ་བར་བྱེད་དེ། ལམ་གྱི་གམ་ཡོ་ནས་མཐོ་དམན་མི་མཉམ་པ་མཉམ་པར་བྱེད་དོ། །ཟམ་པ་དང་རྡོ་
སྟེགས་ཀྱང་འདོགས་སོ། །མཚན་མོ་མུན་པ་མུན་ནག་གི་ནང་ན་དེ་བཞིན་གཤེགས་པའི་མཆོད་རྟེན་ལ་མར་མེ་ཡང་འབུལ་ལོ། །སེམས་ཅན་ལྟུང་བའི་འགྱོད་པ་ལ་གནས་པ་རྣམས་ཀྱི་ལྟུང་བའི་འགྱོད་པ་སེལ་ཏོ། །ཀུན་ནས་ལྡང་བ་མེད་པར་བྱེད་དོ། །གཞན་གྱི་འགྱོད་པ་མི་སྐྱེད་དོ། །
གཞན་གྱི་ལྟུང་བ་བྱུང་བ་གླེང་བར་མི་བྱེད་དོ། །ཆོས་ལ་དོགས་པ་སྐྱེས་པའི་སེམས་ཅན་རྣམས་ལ་དོགས་པ་ཐམས་ཅད་གཅད་པའི་ཕྱིར་ཆོས་སྟོན་ཏོ། །ཐེ་ཚོམ་དང་། ཡིད་གཉིས་དང་། ནེམ་ནུར་མེད་པར་བྱེད་དོ། །ཆོས་ཀྱི་སྣང་བ་སྒྲུབ་པོ། །ཤེས་རབ་ཀྱི་སྣང་བ་ཆེན་པོ་ཡང་དག་པར་སྐྱེད་དོ། །
སངས་རྒྱས་དང་། བྱང་ཆུབ་སེམས་དཔའ་དང་། ཆོས་སྨྲ་བ་ཐམས་ཅད་ལ་ཆོས་བསྟན་པར་གསོལ་བ་འདེབས་ཏེ། ཆོས་ཡང་དག་པར་འཛིན་ཅིང་སྒྱུ་མེད་པར་ལེགས་སོ་ཞེས་བྱ་བ་བརྗོད་དོ། །སེམས་ཅན་གང་ལ་ཡང་མི་འཕྱའོ། །འཐིང་སླད་མི་བྱེད་དོ། །ཆོས་ལ་ཤེད་མི་འབྱེ་བ་དང་།

སྡང་བ་དང་། མགོ་མྱོས་པ་དང་། རྨོངས་པར་མི་བྱེད་དོ། །སྐྱེ་བོའི་ངེས་པའི་ཚིག་ལ་དབང་ཟ་བར་མི་བྱེད་དོ། །ཚིག་ཐམས་ཅད་སངས་རྒྱས་ཀྱི་གསུང་དུ་མོས་སོ། །ཡི་གེ་གསོག་དང་ཡི་གེ་སྟོང་པ་ཉིད་ཀྱིས་ཚིག་ཏུ་བརྗོད་པ་ཐམས་ཅད་ལ་སྐྱོན་དུ་ལྟ་བ་མ་ཡིན་ནོ། །
འཁྲུག་པའི་སྐབས་མི་ཚོལ་ལོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན་འཁྲུག་པ་མེད་པ་ཞེས་བྱ་སྟེ། དྲིས་པ་ཐམས་ཅད་ལུང་བསྟན་པ་སྟོན་པ་དག་ལ་དེ་ལ་དེ་མེད་ཅིང་ཀུན་དུ་སྣང་བའི་ཏིང་ངེ་འཛིན་དེ་ཀུན་དུ་བསྒོམ་པའི་ཕྱིར་སྒྲ་སྐད་ཐམས་ཅད་དུ་འཇུག་པའི་
གཟུངས་ལ་མཁས་པས་རྟག་ཏུ་རྒྱུན་མི་ཆད་པར་དེ་བཞིན་གཤེགས་པ་འཁྲུལ་པ་མེད་པའི་ཚིག་གིས་ཆོས་སྟོན་ཏེ། ཐམས་ཅད་དུ་ཕྱད་པར་ལུང་སྟོན་པ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་དང་པོའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་
སྤྱད་པ་སྤྱོད་པ་ན། ཚིག་གི་སྐྱོན་ཐམས་ཅད་སྤངས་པ་ཡིན་ཏེ། བདེན་པ་སྨྲ། ཆོས་སྨྲ། དོན་སྨྲ། འདུལ་བ་སྨྲ་ཞིང་། མུ་ཅོར་མི་སྨྲ། བྱུང་རྒྱལ་དུ་མི་སྨྲ་སྟེ། འཕགས་པ་མ་ཡིན་པའི་གཏམ་ཐམས་ཅད་སྤངས་ནས་འཕགས་པའི་མི་སྨྲ་བ་ཐོབ་ཅིང་དགེ་སྦྱོང་གི་ཆོས་ཀྱི་བྱ་བ་རྩོད་པ་མེད་པ་ལ་
ཞུགས་ཏེ། ཆོས་གང་ཉན་ཅིང་ཡོངས་སུ་ཚོལ་བ་དང་། གཞན་ལ་ཡང་སྟོན་པ་དེ་དག་ཐམས་ཅད་བདག་དང་གཞན་དག་ཞི་བ་དང་། ཉེ་བར་ཞི་བར་བྱ་བའི་བསམ་པས་ཡོངས་སུ་ཚོལ་ལོ། །རྩོད་པ་མེད་པ་ལྷུར་ལེན་པ་མེད་པའི་ཕྱིར་དེ་སུ་དང་ཡང་མི་འཐབ་མི་རྩོད་དོ། །དགྲར་མི་
ཚོལ་ལོ། །དགྲ་མེད་པའི་ཆོས་ལ་མོས་པ་ཡིན་ནོ། །བརྗོད་དུ་མེད་པའི་ཆོས་རྣམས་ལ་འཇུག་གོ། །དེ་བཞིན་གཤེགས་པའི་ཡེ་ཤེས་ལྷུན་གྱིས་གྲུབ་པ་ལ་མངོན་པར་དད་དོ། །སེམས་ཅན་གཞན་ཡང་ཆོས་ཉིད་འདི་ཡང་དག་པར་འཛིན་དུ་འཇུག་གོ། །དེ་ཆོས་ཡང་དག་པར་
བླངས་པ་འདི་དང་ལྡན་པས་བྱང་ཆུབ་ཐོབ་པ་ན་ཅ་ཅོ་མེད་པ་ཞེས་བྱ་སྟེ། དེ་ལ་དེ་མེད་པ་ཡིན་ནོ། །དེ་ཡི་གེ་འབྲུ་གཅིག་ཀྱང་མི་རྗོད་ཅིང་མི་སྨྲ་ལ་སྒྲ་སྐད་ཐམས་ཅད་དང་། ངེས་པའི་ཚིག་གིས་བསྟན་པ་དག་ལ་ཡང་ལྷུན་གྱིས་གྲུབ་པ་ཉིད་དུ་ལེགས་པར་བཤད་པས་འཁོར་ཚིམ་པར་

བྱེད་དོ། །རྣམ་པར་འཕྲུལ་པའི་རྒྱལ་པོའི་ཏིང་ངེ་འཛིན་ཤིན་ཏུ་བསྒོམས་པ་དང་། སྒོ་མཐའ་ཡས་པ་སྒྲུབ་པའི་གཟུངས་ལ་མཁས་པས་དེ་བཞིན་གཤེགས་པའི་གནས་ཐམས་ཅད་དང་། མཚན་ཐམས་ཅད་དང་། དཔེ་བྱད་བཟང་པོ་ཐམས་ཅད་དང་། སྤུ་ཡི་ཁུང་བུ་ཐམས་
ཅད་ནས་སངས་རྒྱས་ཀྱི་ཆོས་ཀྱི་སྒྲ་དབྱངས་བསམ་གྱིས་མི་ཁྱབ་པ་འབྱུང་སྟེ། ཐ་ན་སྒྲ་གཅིག་གིས་ཀྱང་འཁོར་ཐམས་ཅད་ཀྱི་སེམས་ཚིམ་པར་བྱེད་པའི་ཆོས་ཀྱི་སྒོ་དཔག་ཏུ་མེད་པ་བསྟན་པ་འབྱུང་ཞིང་སྔོན་གྱི་སྨོན་ལམ་གྱི་བྱིན་གྱི་རླབས་དང་། ཡེ་ཤེས་ཀྱི་སྟོབས་ཀྱིས་དེ་ན་དེ་བཞིན་
གཤེགས་པ་རྣམ་པར་མི་རྟོག་ཅིང་བཏང་སྙོམས་དེ་ལྷུན་གྱིས་གྲུབ་པ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་གཉིས་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། འདི་ལྟ་སྟེ། སངས་རྒྱས་རྗེས་སུ་དྲན་པ་དང་།
ཆོས་རྗེས་སུ་དྲན་པ་དང་། དགེ་འདུན་རྗེས་སུ་དྲན་པ་དང་། ཚུལ་ཁྲིམས་རྗེས་སུ་དྲན་པ་དང་། གཏོང་བ་རྗེས་སུ་དྲན་པ་དང་། ལྷ་རྗེས་སུ་དྲན་པའི་རྗེས་སུ་དྲན་པ་དྲུག་པོ་དང་མི་འབྲལ་བ་ཡིན་ནོ། །སེམས་ཅན་གཞན་ཡང་རྗེས་སུ་དྲན་པ་འདི་དག་ཡང་དག་པར་འཛིན་དུ་འཇུག་གོ། །
དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན་དེ་བཞིན་གཤེགས་པ་ལ་བསྙེལ་བ་མེད་པ་ཞེས་བྱ་སྟེ། དེ་ལ་དེ་མེད་པ་ཡིན་ནོ། །ཆོས་ཐམས་ཅད་ལ་དབང་སྒྱུར་བའི་ཏིང་ངེ་འཛིན་ཤིན་ཏུ་བསྒོམ་པ་དང་། ཆོས་ཀྱི་སྒྲོན་མའི་གཟུངས་ལ་མཁས་པས་རྟག་ཏུ་རྒྱུན་མི་
ཆད་པར་དེ་བཞིན་གཤེགས་པ་ལ་བསྙེལ་བ་མེད་པའི་ཆོས་ཅན་ཡིན་ནོ། །གལ་ཏེ་སེམས་ཅན་ཐམས་ཅད་ཀྱིས་བསྐལ་པར་བསམས་ཏེ། སྔ་ཕྱི་མེད་པར་ཐེ་ཚོམ་དྲི་བ་ཐ་དད་པ་དེ་བཞིན་གཤེགས་པ་ལ་ཡོངས་སུ་དྲིས་ཀྱང་དེ་འདི་བཤད་དོ། །འདི་བསྟན་ཏོ་སྙམ་དུ་མི་སེམས་མི་རྟོག་ལ་
རྟག་ཏུ་མ་རྨོངས་ཤིང་དྲན་པའི་དབང་པོས་སྐད་ཅིག་ཐང་ཅིག་ཡུད་ཙམ་ཅིག་ལ་ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་གསུམ་པའོ། །བུ་མོ་གཞན་ཡང་བྱང་ཆུབ་སེམས་དཔའ་

བྱང་ཆུབ་སེམས་དཔའི་སྤྱད་པ་སྤྱོད་པ་ན། རྟག་ཏུ་རྒྱུན་མི་འཆད་པར་ཕ་རོལ་གྱི་སེམས་སྲུང་བ་ཡིན་ཏེ། གཞན་གྱི་སེམས་འཁྲུགས་པར་མི་བྱེད། སེམས་གདུང་བར་མི་བྱེད། སེམས་ལ་དམིགས་པར་མི་བྱེད། དགེ་བའི་རྩ་བའི་བར་དུ་གཅོད་པར་མི་བྱེད། ཆོས་ལ་དམིགས་
པར་མི་བྱེད་ཅིང་ཆོས་ཐམས་ཅད་སྒྱུ་མ་ལྟ་བུར་མོས་ཏེ། གཡོ་བ་མེད་རློམ་སེམས་མེད་ཅིང་སེམས་ཅན་ཐམས་ཅད་ལ་སེམས་སྙོམས་པ་ཡིན། ཆོས་ཐམས་ཅད་མཉམ་པ་ཉིད་དུ་མཐོང་སྟེ། ཆོས་ཀྱི་དབྱིངས་འདྲེས་པ་མེད་ཅིང་རོ་གཅིག་པ་ལ་ཞུགས་པ་ཡིན་ནོ། །དེ་ཆོས་ཡང་དག་པར་
བླངས་པ་འདི་དང་ལྡན་པས་བྱང་ཆུབ་ཐོབ་པ་ན་སེམས་བསྐྱེད་པ་གཅིག་ཙམ་ཡང་མཉམ་པར་མ་བཞག་པ་མེད་པ་ཡིན་ཏེ། ཆོས་ཐམས་ཅད་རང་བཞིན་གྱིས་མཉམ་པ་ཉིད་རྣམ་པར་སྤྲོས་པ་མེད་པའི་ཏིང་ངེ་འཛིན་ཤིན་ཏུ་བསྒོམས་པ་དང་། ཀུན་ནས་འཁྱིལ་པའི་སྒོའི་གཟུངས་ལ་མཁས་པས་
མཉམ་པར་བཞག་ཅིང་ལྷུན་གྱིས་གྲུབ་པའི་ཚུལ་གྱིས་དེ་བཞིན་གཤེགས་པའི་སངས་རྒྱས་ཀྱི་མཛད་པ་ལ་འཇུག་པ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཞི་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཕྱིན་ཅི་ལོག་
གི་འདུ་ཤེས་མེད་པ་ཡིན་ཏེ། སེམས་ཕྱིན་ཅི་ལོག་མེད། ལྟ་བ་ཕྱིན་ཅི་ལོག་མེད། མེད་པ་ལ་སྒྲོ་འདོགས་པའི་ཕྱིན་ཅི་ལོག་མེད་པ་ཡིན། བདག་ཏུ་འདུ་ཤེས་པ་མ་ཡིན། སེམས་ཅན་དུ་འདུ་ཤེས་པ་མ་ཡིན། སྲོག་ཏུ་འདུ་ཤེས་པ་མ་ཡིན། གསོ་བར་འདུ་ཤེས་པ་མ་ཡིན། གང་ཟག་ཏུ་འདུ་ཤེས་
པ་མ་ཡིན། ཤེད་ལས་སྐྱེས་པར་འདུ་ཤེས་པ་མ་ཡིན། ཤེད་བུར་འདུ་ཤེས་པ་མ་ཡིན། ཆད་པར་འདུ་ཤེས་པ་མ་ཡིན། རྟག་པར་འདུ་ཤེས་པ་མ་ཡིན། འབྱུང་བར་འདུ་ཤེས་པ་མ་ཡིན། འཇིག་པར་འདུ་ཤེས་པ་མ་ཡིན། དགེ་བ་དང་། མི་དགེ་བ་དང་། ཁ་ན་མ་ཐོ་བ་དང་བཅས་པ་དང་། ཁ་ན་
མ་ཐོ་བ་མེད་པ་དང་། ཟག་པ་དང་བཅས་པ་དང་། ཟག་པ་མེད་པ་དང་། འཇིག་རྟེན་པ་དང་། འཇིག་རྟེན་ལས་འདས་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། འཁོར་བ་དང་། མྱ་ངན་ལས་འདས་པ་ལ་གཉིས་སུ་འདུ་ཤེས་པ་མ་ཡིན་ལ། འདུ་ཤེས་ལ་ཆགས་ཤིང་ཞེན་

པའི་སེམས་ཅན་རྣམས་ལ་འདུ་ཤེས་ཕྱིན་ཅི་ལོག་སྤོང་བར་སྟོན་ཀྱང་ཆེ་བ་དང་ཐ་དད་པའི་འདུ་ཤེས་དང་བྲལ་བ་ཡིན། མཐར་ལྟ་བ་ཐམས་ཅད་རྣམ་པར་སྤངས་ཏེ་དབུ་མའི་ལམ་ལ་ཞུགས་པ་ཡིན། ཆོས་མཉམ་པ་ཉིད་མཐོང་བ་ཡིན་ནོ། །དེ་ཆོས་ཡང་དག་པར་བླངས་པ་འདི་དང་ལྡན་
པས་བྱང་ཆུབ་ཐོབ་པ་ན་དེ་བཞིན་གཤེགས་པ་ལ་ཐ་དད་པའི་འདུ་ཤེས་མེད་པ་ཞེས་བྱ་སྟེ། དེ་ལ་དེ་མེད་པ་ཡིན་ནོ། །མཚན་མ་མེད་པའི་ཏིང་ངེ་འཛིན་ཤིན་ཏུ་བསྒོམས་པ་དང་། མི་ཟད་པའི་ཟ་མ་ཏོག་གི་གཟུངས་ལ་མཁས་པས་དེ་བཞིན་གཤེགས་པ་མཚན་མ་མེད་པའི་གནས་ལ་གནས་
ཀྱང་མཚན་མ་ཐམས་ཅད་ལ་འདུ་ཤེས་ཀྱིས་འཛིན་པ་དང་། རྣམ་པར་རྟོག་པ་ལ་སྤྱོད་པའི་སེམས་ཅན་རྣམས་ལ་སྙིང་རྗེ་ཆེན་པོ་མི་ལྡོག་སྟེ། སེམས་ཅན་འདུལ་བའི་དུས་ལ་ཡང་རུབ་ཅིང་ཆོས་སྟོན་པའི་རྒྱུན་ཡང་མི་གཅོད་པ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་
པ་ལྔ་པའོ།། །།བམ་པོ་གསུམ་པ། བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན་རྟག་ཏུ་རྒྱུན་མི་འཆད་པར་བཏང་སྙོམས་པ་ཡིན་ཏེ། འཁོར་བ་ན་སྤྱོད་པའི་ཉོན་མོངས་ཤིང་སྡུག་བསྔལ་བའི་ཆོས་ཐམས་ཅད་ལ་དེ་བཏང་སྙོམས་པས་བདེ་བ་
དང་། ཡིད་བདེ་བ་ཐམས་ཅད་ཀྱི་གནས་ཀྱི་ཆོས་ལ་རྗེས་སུ་ཆགས་པ་ཡང་མེད། སྡུག་བསྔལ་བ་དང་། ཡིད་མི་བདེ་བའི་གནས་ཀྱི་ཆོས་ཐམས་ཅད་ལ་ཁོང་ཁྲོ་བ་ཡང་མེད་དོ། །དེ་རྗེས་སུ་ཆགས་པ་དང་། ཁོང་ཁྲོ་བ་དང་བྲལ་བས་དོན་ཐམས་ཅད་རྙེད་ཅིང་འབྱོར་ཀྱང་ཁེངས་པར་མི་
འགྱུར་དོན་ཐམས་ཅད་ཡོངས་སུ་ཉམས་ཀྱང་དུད་པར་མི་འགྱུར་གྱི་འདུ་བྱེད་ཐམས་ཅད་ལ་མི་རྟག་པ་དང་། སྡུག་བསྔལ་བར་སོ་སོར་རྟོག་ཅིང་བདག་མེད་པ་དང་། མྱ་ངན་ལས་འདས་པ་ནི་ཞི་བའོ་ཞེས་མོས་ཏེ་བཏང་སྙོམས་པ་ཡིན་ནོ། །སེམས་ཅན་གཞན་ཡང་བཏང་སྙོམས་ཀྱི་ཆོས་
ཉིད་དེ་ལྟ་བུ་ཡང་དག་པར་འཛིན་དུ་འཇུག་གོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ནི་དེ་བཞིན་གཤེགས་པ་ལ་སོ་སོར་མ་བརྟགས་པའི་བཏང་སྙོམས་མེད་པ་ཞེས་བྱ་སྟེ། དེ་ལ་བཏང་སྙོམས་དེ་མེད་པ་ཡིན་ནོ། །གཉིས་ལ་ཆགས་པ་ལས་རྣམ་པར་གྲོལ་བའི་

ཏིང་ངེ་འཛིན་ཤིན་ཏུ་བསྒོམས་པ་དང་། རྒྱ་མཚོའི་ཕྱག་རྒྱའི་གཟུངས་ལ་མཁས་པས་དེ་བཞིན་གཤེགས་པ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་།
འཇིག་རྟེན་སྐྱོང་བ་དང་། མི་དང་མི་མ་ཡིན་པ་ཐམས་ཅད་ཀྱིས་བསྟོད་ཅིང་བསྟི་སྟང་དུ་བྱས་ཏེ། མཆོད་ཅིང་རི་མོར་བྱས་ཀྱང་རྗེས་སུ་ཆགས་པ་མེད། བདུད་དང་། གཞན་མུ་སྟེགས་ཅན་དང་། ཕས་ཀྱིས་རྒོལ་བ་དང་། འཚེ་བ་ཅན་གྱི་སེམས་ཅན་ཐམས་ཅད་ཀྱིས་དཀྲུགས་ཤིང་གནོད་པར་བྱས་
ཀྱང་ཁོང་ཁྲོ་བ་མེད་ལ། སེམས་མཚུངས་ཤིང་མཉམ་པ་ཡིན་ཏེ་ཕན་འདོགས་པ་དང་། གནོད་པར་བྱས་པ་ལ་ས་དང་མཚུངས་པའི་སེམས་དང་། ཆུ་དང་མཚུངས་པའི་སེམས་དང་། མེ་དང་མཚུངས་པའི་སེམས་དང་། རླུང་དང་མཚུངས་པའི་སེམས་ཀྱིས་ཁེངས་པར་མི་འགྱུར། གདུང་བར་མི་འགྱུར་
ཞིང་མི་འཁྲུགས་ཏེ། ནམ་མཁའ་དང་མཚུངས་པའི་སེམས་ཀྱིས་མཉམ་པ་ཉིད་དུ་སྦྱོར་ཞིང་སེམས་ཅན་ཐམས་ཅད་ལ་བཏང་སྙོམས་པར་གནས་པ་ཡིན་ནོ། །དེ་ཆོས་ངེས་པར་སེམས་པའི་བཏང་སྙོམས་འདི་དང་ལྡན་པས་སེམས་ཅན་ཐམས་ཅད་ལ་སྙིང་རྗེ་ཆེན་པོ་ཕྱིར་མི་ལྡོག་སྟེ། སེམས་ཅན་
འདུལ་བའི་དུས་ལ་ཡང་རུབ་ཅིང་། ཅི་རིགས་པར་ཆོས་སྟོན་པའི་རྒྱུན་ཡང་མི་གཅོད་པ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱིས་ཆོས་མ་འདྲེས་པ་དྲུག་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། རྟག་ཏུ་རྒྱུན་མི་འཆད་པར་མོས་
པ་དྲག་པ་ཡིན་ཏེ། དགེ་བའི་རྩ་བ་ཐམས་ཅད་ཡོངས་སུ་ཚོལ་བ་ལ་མོས་པ་རླབས་པོ་ཆེ་དང་། མོས་པ་ཆེན་པོ་དང་། མོས་པ་ཟབ་མོས་དགེ་བའི་རྩ་བ་སྣ་ཚོགས་བསྐྲུན་པར་མོས་སོ། །ཉན་ཐོས་དང་། རང་སངས་རྒྱས་ཀྱིས་ཡོངས་སུ་སྤོང་བར་མོས་སོ། །ཐེག་པ་ཆེན་པོ་ལས་ཕྱིར་མི་
ལྡོག་པར་མོས་སོ། །སེམས་ཅན་ཐམས་ཅད་ལ་སྙིང་རྗེ་ཆེན་པོ་བཏང་བ་ཡིད་ལ་བྱེད་པ་མི་འདོར་བར་མོས་སོ། །རང་གིས་རྟོག་ཅིང་གྲུབ་ཀྱི། གཞན་གྱི་དྲིང་ལ་མི་འཇོག་པར་སངས་རྒྱས་ཀྱི་ཆོས་ཡང་དག་པར་བསྒྲུབ་པར་མོས་ཏེ། བདུད་དང་གཞན་མུ་སྟེགས་ཅན་དམིགས་པ་ཅན་ལྟ་བ་ལ་

མངོན་པར་ཞེན་པ་ཐམས་ཅད་དང་། སེམས་ཅན་ཐམས་ཅད་ཀྱིས་དེ་མོས་པ་དེ་ལས་མོས་པ་དང་དབྲལ་བར་མི་ནུས་སོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན་དེ་བཞིན་གཤེགས་པ་མོས་པ་ཉམས་པ་མེད་པ་ཞེས་བྱ་སྟེ། དེ་ལ་དེ་མེད་པ་ཡིན་ནོ། །མོས་པའི་
ཏིང་ངེ་འཛིན་འདུ་བྱེད་ཀྱི་ཏིང་ངེ་འཛིན་ཤིན་ཏུ་བསྒོམས་པ་དང་། རྡོ་རྗེ་རྒྱལ་མཚན་གྱི་གཟུངས་ལ་མཁས་པས་དབང་བསྐུར་བའི་ཕྱིར་ཆོས་ཐམས་ཅད་ཀྱི་ནང་ནས་གང་བསྟན་པར་བྱ་བ་དེ་སྟོན་ཏོ། །གང་དུ་སྐད་ཅིག་ཐང་ཅིག་ཡུད་ཙམ་གྱིས་དུས་གང་དང་། ཉི་ཚོད་གང་དང་། ཡུལ་གཞན་
གང་དང་། སེམས་ཅན་གྱི་སེམས་ཀྱི་རྒྱུད་གང་དང་གང་ལ་སྣོད་ཇི་ལྟ་བ་བཞིན་དུ་ཅི་རིགས་པར་ཆོས་སྟོན་ཀྱང་མཉམ་པར་བཞག་པའི་གནས་ཀྱང་མི་འདོར་བ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བདུན་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་
དཔའི་སྤྱད་པ་སྤྱོད་པ་ན། རྟག་ཏུ་རྒྱུན་མི་འཆད་པར་བརྩོན་འགྲུས་བརྩམས་པ་ཡིན་ཏེ། དེ་རྟག་ཏུ་བརྩོན་པ་མི་འདོར། དགེ་བའི་རྩ་བ་ཡང་དག་པར་སྒྲུབ་ཅིང་སྦྱོར་བས་ངོམས་མི་མྱོང་། བྱིན་གྱིས་བརླབས་པའི་རྩོམ་པ་ལ་རྟུན་ཅིང་བླ་མ་དང་དགེ་བའི་བཤེས་གཉེན་དང་། ཆོས་སྨྲ་བ་དང་། སངས་
རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་གན་དུ་འགྲོ་ལ། ཡོངས་སུ་འདྲི་བ་དང་། བསྙེན་བཀུར་བ་དང་། མཆོད་པའི་ལས་དང་། བསྐལ་པ་ཚད་མེད་པར་འཁོར་བ་ཡོངས་སུ་གཟུང་བར་བྱ་བ་དང་། སེམས་ཅན་ཚད་མེད་པ་ཡོངས་སུ་སྨིན་པར་བྱ་བ་དང་། སངས་རྒྱས་ཀྱི་ཞིང་ཚད་མེད་པ་
ཡོངས་སུ་སྦྱང་བ་དང་། སངས་རྒྱས་ཚད་མེད་པ་ལ་མཆོད་ཅིང་རིམ་གྲོ་བྱ་བ་དང་། སངས་རྒྱས་ཀྱི་ཆོས་ཚད་མེད་པ་ཡང་དག་པར་གཟུང་བ་དང་། སངས་རྒྱས་ཀྱི་ཆོས་ཚད་མེད་པ་མངོན་པར་རྫོགས་པར་བྱང་ཆུབ་པར་བྱ་བ་དང་། སེམས་ཅན་གྱི་སྤྱོད་པ་ཚད་མེད་པ་ལ་འཇུག་པར་བྱ་བ་དང་།
སངས་རྒྱས་ཀྱི་ཆོས་ཚད་མེད་པ་བསྟན་པ་ལ་མཁས་པར་བྱ་བའི་ཕྱིར་ཏེ། བརྩོན་འགྲུས་དེ་ཚད་མེད་པར་བྱས་པ་ཡིན་ནོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན་དེ་བཞིན་གཤེགས་པ་ལ་བརྩོན་འགྲུས་ཉམས་པ་མེད་པ་ཞེས་བྱ་སྟེ། དེ་ལ་དེ་མེད་

པ་ཡིན་ནོ། །བརྩོན་འགྲུས་ཀྱི་ཏིང་ངེ་འཛིན་དང་འདུ་བྱེད་ཀྱི་ཏིང་ངེ་འཛིན་ཤིན་ཏུ་བསྒོམས་པས་སེམས་ཅན་ཚད་མེད་པ་གཟུད་ཅིང་གདུལ་བའི་ཕྱིར་དེ་བཞིན་གཤེགས་པའི་རྫུ་འཕྲུལ་གྱིས་རྫུ་འཕྲུལ་གྱི་ཆོ་འཕྲུལ་རྣམ་པར་འཕྲུལ་པ་ཁྱུ་མཆོག་ཏུ་གྱུར་པ་ཚད་མེད་པ་སྟོན་ཀྱང་རྫུ་འཕྲུལ་
དེ་ཆགས་པ་མེད། སྒྲིབ་པ་མེད། ཐོགས་པ་མེད་པར་སངས་རྒྱས་ཀྱི་ཞིང་ཐམས་ཅད་དུ་འགྲོ་སྟེ། མངོན་པར་ཕྱོགས་ཀྱང་མངོན་པར་འདུ་བྱེད་པ་མེད་ཅིང་ཐམས་ཅད་དུ་རྒྱུ་བ་ནམ་མཁས་ཀླས་པ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བརྒྱད་པའོ། །བུ་མོ་
གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། རྟག་ཏུ་རྒྱུན་མི་འཆད་པར་དྲན་པ་ཕུན་སུམ་ཚོགས་ཤིང་། དྲན་པ་དང་ཤེས་བཞིན་མཆོག་དང་ལྡན་པ་ཡིན་ཏེ། དེའི་དྲན་པ་དེ་བརྗེད་པ་མེད་པ་ཡིན། འཇིག་རྟེན་པ་དང་། འཇིག་རྟེན་ལས་འདས་པའི་ཆོས་
ཐམས་ཅད་ལ་དྲན་པ་ཉེ་བར་གཞག་པ་བསྒོམས་པའི་རྣལ་འབྱོར་ལ་བརྩོན་པ་མ་ཡིན་ནོ། །དེ་ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། མི་སྡུག་པའི་རྣམ་པར་ཡིད་ལ་བྱེད་ཅིང་སྦྱོར་རོ། །ཕྱིའི་ལུས་དང་། ཕྱི་
ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། མི་སྡུག་པའི་རྣམ་པར་ཡིད་ལ་བྱེད་ཅིང་སྦྱོར་རོ། །ནང་གི་ཚོར་བ་རྣམས་ལ་ཚོར་བའི་རྗེས་སུ་ལྟ་ཞིང་གནས་ཏེ། སྟོང་པའི་རྣམ་པར་ཡིད་ལ་བྱེད་ཅིང་སྦྱོར་རོ། །དེ་བཞིན་དུ་ཕྱིའི་ཚོར་
བ་དང་། ཕྱི་ནང་གི་ཚོར་བ་རྣམས་ལ་ཚོར་བའི་རྗེས་སུ་ལྟ་ཞིང་གནས་ཏེ། སྟོང་པའི་རྣམ་པར་ཡིད་ལ་བྱེད་ཅིང་སྦྱོར་རོ། །ནང་གི་སེམས་ལ་སེམས་ཀྱི་རྗེས་སུ་ལྟ་ཞིང་གནས་ཏེ། མཚན་མ་མེད་པའི་རྣམ་པར་ཡིད་ལ་བྱེད་ཅིང་སྦྱོར་རོ། །ཕྱིའི་སེམས་དང་། ཕྱི་ནང་གི་སེམས་ལ་
སེམས་ཀྱི་རྗེས་སུ་ལྟ་ཞིང་གནས་ཏེ། མཚན་མ་མེད་པའི་རྣམ་པར་ཡིད་ལ་བྱེད་ཅིང་སྦྱོར་རོ། །ནང་གི་ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་གནས་ཏེ། སྨོན་པ་མེད་པའི་རྣམ་པར་ཡིད་ལ་བྱེད་ཅིང་སྦྱོར་རོ། །ཕྱིའི་ཆོས་དང་། ཕྱི་ནང་གི་ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་

གནས་ཏེ། སྨོན་པ་མེད་པའི་རྣམ་པར་ཡིད་ལ་བྱེད་ཅིང་སྦྱོར་རོ། །ལུས་ལ་ཞུགས་པའི་དྲན་པ་ཉེ་བར་གཞག་པ་སྒོམ་སྟེ། མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། མི་སྡུག་པའི་རྣམ་པར་ཡིད་ལ་བྱེད་ཅིང་སྦྱོར་རོ། །ཡང་དེ་བཞིན་གཤེགས་པའི་སྐུ་ཡོངས་
སུ་བསྒྲུབས་པའི་ཕྱིར་ལུས་ཀྱི་ལས་ལེགས་པར་སྦྱོར་བའི་རྒྱུན་ཀྱང་མི་གཅོད་དོ། །ཚོར་བ་ལ་ཞུགས་པའི་དྲན་པ་ཉེ་བར་གཞག་པ་སྒོམ་སྟེ། སྟོང་པའི་རྣམ་པར་ཡིད་ལ་བྱེད་ཅིང་སྦྱོར་ཡང་ངན་སོང་ཐམས་ཅད་དུ་སྐྱེས་པའི་སེམས་ཅན་རྣམས་ལ་ལྟ་བས་སྡུག་བསྔལ་གྱི་ཚོར་བ་ཐམས་ཅད་
རྒྱུན་གཅད་པའི་ཕྱིར་སེམས་ཅན་དེ་དག་ལ་སྙིང་རྗེ་ཆེན་པོའི་རྒྱུན་ཀྱང་མི་གཅོད་དོ། །སེམས་ལ་ཞུགས་པའི་དྲན་པ་ཉེ་བར་གཞག་པ་སྒོམ་སྟེ། མཚན་མ་མེད་པའི་རྣམ་པར་ཡིད་ལ་བྱེད་ཅིང་སྦྱོར་ཡང་བྱང་ཆུབ་ཀྱི་སེམས་ཀྱང་མི་བརྗེད་ལ་ཐེག་པ་ཆེན་པོའི་ཚོགས་ཡང་དག་པར་སྒྲུབ་པའི་
རྒྱུན་ཀྱང་མི་གཅོད་དོ། །ཆོས་ལ་ཞུགས་པའི་དྲན་པ་ཉེ་བར་གཞག་པ་སྒོམ་སྟེ། སྨོན་པ་མེད་པའི་རྣམ་པར་ཡིད་ལ་བྱེད་ཅིང་སྦྱོར་ཡང་འདོད་ཆགས་དང་བྲལ་བའི་ཆོས་ཉིད་ཀྱང་མངོན་སུམ་དུ་མི་བྱེད་ལ། སངས་རྒྱས་ཀྱི་ཆོས་དང་ཡང་འཚམ་པ་ཡིན་ཏེ། ཆོས་ཀྱི་དབྱིངས་མཐའ་དང་དབུས་མེད་
པ་ལ་ཡང་དག་པར་འཇུག་གོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན་དེ་བཞིན་གཤེགས་པ་ལ་དྲན་པ་ཉམས་པ་མེད་པ་ཞེས་བྱ་སྟེ། དེ་ལ་དེ་མེད་པ་ཡིན་ནོ། །སྤོང་བའི་འདུ་བྱེད་དང་ལྡན་པའི་ཏིང་ངེ་འཛིན་ཤིན་ཏུ་བསྒོམས་པས་དེ་བཞིན་གཤེགས་པ་ཀུན་བསྟན་
པའི་ཆོ་འཕྲུལ་གྱིས་སེམས་ཅན་ཐམས་ཅད་ཀྱི་སྔོན་གྱི་མཐའ་དང་། ཕྱི་མའི་མཐའ་དང་། ད་ལྟར་བྱུང་བའི་སེམས་གཅིག་ནས་གཅིག་ཏུ་བརྒྱུད་པ་དང་། དབང་པོ་དང་། ཁམས་དང་། མོས་པ་གཅིག་ནས་གཅིག་ཏུ་བརྒྱུད་པ་དང་། ཉོན་མོངས་པ་སྤྱོད་པའི་བག་ཆགས་དང་།
བསམ་པ་དང་། བག་ལ་ཉལ་བ་དང་། ཀུན་ནས་དཀྲིས་པ་དང་། དགེ་བ་དང་། མི་དགེ་བའི་ལས་ཀྱི་རྣམ་པར་སྨིན་པ་གཅིག་ནས་གཅིག་ཏུ་བརྒྱུད་པ་དང་། ཚེ་དང་། འཆི་འཕོ་དང་། སྐྱེ་བ་གཅིག་ནས་གཅིག་ཏུ་བརྒྱུད་པ་དང་། བསྐལ་པ་དང་། ཞིང་དུ་སངས་རྒྱས་གཅིག་ནས་གཅིག་ཏུ་

བརྒྱུད་པ་དང་། ཉན་ཐོས་འདུས་པ་དང་། བྱང་ཆུབ་སེམས་དཔའི་སྤྱོད་པ་ལུང་བསྟན་པ་གཅིག་ནས་གཅིག་ཏུ་བརྒྱུད་པ་དང་། ཕ་མ་དང་། ཉེ་དུ་དང་། སྣག་གི་གཉེན་མཚམས་གཅིག་ནས་གཅིག་ཏུ་བརྒྱུད་པ་བསྟན་པ་ལ་དྲན་པའི་དབང་པོ་ཐོགས་པ་མེད་ཅིང་རྨོངས་པ་མེད་པ་
ཡིན་ཏེ། ཐམས་ཅད་དུ་ཕྱད་པར་ལུང་སྟོན་པ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་དགུ་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། རྟག་ཏུ་རྒྱུན་མི་འཆད་པར་ཤེས་རབ་སྤྱོད་པ་ཡིན་ཏེ། ཤེས་རབ་ཀྱི་འོད་དང་།
ཤེས་རབ་ཀྱི་སྣང་བ་དང་། ཤེས་རབ་ཀྱི་དཔྱོད་པ་དང་། ཤེས་རབ་ཀྱི་དབང་པོ་དང་། རྣོ་བའི་ཤེས་རབ་དང་། ཟབ་པའི་ཤེས་རབ་དང་། ངེས་པར་རྟོག་པའི་ཤེས་རབ་དང་། མི་ཐུལ་བའི་ཤེས་རབ་དང་། ཟིལ་གྱིས་མི་ནོན་པའི་ཤེས་རབ་དང་། ཉན་ཐོས་དང་། རང་སངས་རྒྱས་ཐམས་
ཅད་ཀྱིས་གཏིང་དཔག་དཀའ་བའི་ཤེས་རབ་དང་། ཡངས་ཤིང་རྒྱ་ཆེ་ལ་སེམས་སྙོམས་པའི་ཤེས་རབ་དང་། ལྷག་པའི་ཤེས་རབ་དང་། བདག་ཚུལ་བཞིན་ཡིད་ལ་བྱེད་ཀྱི་ལུང་མནོས་པ་མེད་པའི་ཤེས་རབ་དང་། ཐོས་པ་ཚོལ་བས་ངོམས་མི་མྱོང་བའི་ཤེས་རབ་ཅན་ཏེ། ཐོས་
ནས་ཀྱང་ཤེས་རབ་ཀྱིས་ཁོང་དུ་ཆུད་ཅིང་རྟོགས་ཏེ། མགོའི་ཐོད་ལ་མེ་འབར་བ་བཞིན་དུ་བསྟི་སྟང་བྱེད་ཅིང་ཐོས་པ་ཚོལ་ལ་ཐོས་པ་སྙིང་པོར་བྱེད་པ་ཡིན། ཐོས་པ་བསགས་པ་ཡིན། ཆོས་འདོད་ཅིང་ཆོས་ཀྱི་ཀུན་དགའ་བས་དགའ་བ་མོས་པ་ཡིན། དམ་པའི་ཆོས་ཡོངས་སུ་ཚོལ་བ་ལ་
བརྩོན་པ་ཡིན་ཏེ། དེ་ཆོས་འདོད་པ་དེས་ཕྱི་ནང་གི་དངོས་པོ་གང་ཡང་ཡོངས་སུ་མི་གཏོང་བ་མེད་དོ། །དེ་བླ་མ་ལ་རིམ་གྲོ་བྱ་བ་མི་བྱེད་པ་གང་ཡང་མེད་དོ། །དེ་སྡུག་བསྔལ་གྱི་ཕུང་པོ་མི་བཟོད་པ་གང་ཡང་མེད་དོ། །དེ་བདེ་བའི་ཡོ་བྱད་མི་འདོད་པ་གང་ཡང་མེད་དོ། །དེ་ཆོས་འདོད་
པ་དེས་ཚིག་བཞི་པའི་ཚིགས་སུ་བཅད་པ་གཅིག་ཉན་པ་ལ་ཤིན་ཏུ་དགའ་བ་ཡིན་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེས་ཡོངས་སུ་བཀང་བ་ལ་ནི་མ་ཡིན་ནོ། །ཆོས་ཀྱི་ཚིག་གཅིག་ལ་ཤིན་ཏུ་དགའ་བ་ཡིན་ཏེ། འཁོར་ལོས་སྒྱུར་བའི་རྒྱལ་པོ་ཐོབ་

པ་ལ་ནི་མ་ཡིན་ནོ། །ཕ་རོལ་ཏུ་ཕྱིན་པའི་ལམ་ཉན་པ་ལ་ཤིན་ཏུ་དགའ་བ་ཡིན་ནོ། །བརྒྱ་བྱིན་དང་། ཚངས་པ་ཐོབ་པ་ལ་ནི་མ་ཡིན་ནོ། །ཚིག་བཞི་པའི་ཚིགས་སུ་བཅད་པ་གཅིག་གཞན་དག་ལ་སྟོན་པར་བྱེད་པ་ལ་ཤིན་ཏུ་དགའ་བ་ཡིན་ཏེ། གང་གཱའི་ཀླུང་གི་བྱེ་མ་སྙེད་
ཀྱི་གཏན་པ་མེད་པའི་མཆོད་སྦྱིན་བྱེད་པ་ལ་ནི་མ་ཡིན་ནོ། །གཞན་ལ་བྱང་ཆུབ་ཀྱི་སེམས་ཡང་དག་པར་འཛིན་དུ་འཇུག་པ་ལ་ཤིན་ཏུ་དགའ་བ་ཡིན་ཏེ། འཁོར་ལོས་སྒྱུར་བའི་རྒྱལ་སྲིད་གང་གཱའི་ཀླུང་གི་བྱེ་མ་སྙེད་ཐོབ་པ་ལ་ནི་མ་ཡིན་ནོ། །གཞན་དག་ལ་ཕ་རོལ་ཏུ་ཕྱིན་
པ་དང་། རབ་ཏུ་ལྡན་པའི་ཆོས་ཀྱི་གཏམ་རབ་ཏུ་སྟོན་པ་ལ་དགའ་བ་ཡིན་ཏེ། བརྒྱ་བྱིན་དང་། ཚངས་པ་གང་གཱའི་ཀླུང་གི་བྱེ་མ་སྙེད་ཐོབ་པ་ལ་ནི་མ་ཡིན་ནོ། །དེ་ལྷག་པའི་བསམ་པ་དེ་ལྟ་བུ་ལ་ཞུགས་པས་བསྟི་སྟང་དུ་བྱེད་ཅིང་ཆོས་ཉན་ཏོ། །བསྟི་སྟང་དུ་བྱེད་ཅིང་གཞན་ལ་
སྟོན་ཏོ། །དེ་ལྟར་མངོན་པར་བརྩོན་པས་ཚེགས་ཆུང་ངུར་དེ་ལྷ་ཐམས་ཅད་ཀྱིས་ཡོངས་སུ་བཟུང་བ་ཡིན། སངས་རྒྱས་ཐམས་ཅད་ཀྱིས་དགོངས་པ་ཡིན་ནོ། །དེ་ལས་ཡོངས་སུ་བཟུང་ཞིང་སངས་རྒྱས་ཀྱིས་དགོངས་པས་འཇིག་རྟེན་པ་དང་འཇིག་རྟེན་ལས་འདས་པའི་གཙུག་
ལག་ཐམས་ཅད་བདག་ཉིད་ལ་མངོན་སུམ་དུ་འགྱུར་བ་ཡིན་ནོ། །དེ་ཤེས་རབ་ཀྱི་སྣང་བའི་སྒོ་ཟད་མི་ཤེས་པས་སྣང་བ་མ་ཡིན་ནོ། །དེ་ཆོས་ཀྱི་སྣང་བའི་སྒོ་འདི་དང་ལྡན་པས་བྱང་ཆུབ་ཐོབ་པ་ན་དེ་བཞིན་གཤེགས་པ་ལ་ཤེས་རབ་ཉམས་པ་མེད་པ་ཞེས་བྱ་སྟེ། དེ་ལ་དེ་མེད་པ་
ཡིན་ནོ། །སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ཤེས་པ་དང་། དགེ་བ་དང་། མི་དགེ་བ་དང་། ལུང་དུ་མ་བསྟན་པ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། ཟག་པ་དང་བཅས་པ་དང་། ཟག་པ་མེད་པ་དང་། འཇིག་རྟེན་པ་དང་།
འཇིག་རྟེན་ལས་འདས་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། འཁོར་བ་དང་། མྱ་ངན་ལས་འདས་པ་དང་། ཆོས་ཀྱི་སྒོ་ཐམས་ཅད་ཁོང་དུ་ཆུད་ཅིང་རྟོགས་པ་བསྟན་པ་ཤེས་པ་དང་། ཞིང་ཐམས་ཅད་ཀྱི་རྡུལ་ཕྲ་རབ་ཐམས་ཅད་དང་མཉམ་

པའི་བསྐལ་པ་བསྟན་པ་ཤེས་པ་དག་ལ་དེའི་ཤེས་རབ་དེ་ཐོགས་པ་མེད་ཅིང་སྒྲིབ་པ་མེད་པ་ཡིན་ནོ། །དེའི་ཤེས་རབ་དེ་སྔོན་གྱི་མཐའ་དང་། ཕྱི་མའི་མཐའ་དང་། ད་ལྟར་བྱུང་བའི་དུས་ལ་ཆགས་པ་མེད་ཅིང་སྒྲིབ་པ་མེད་དེ་ཐམས་ཅད་དུ་ཐོགས་པ་མེད་དོ། །ཕྱི་མའི་མཐར་
དེ་བཞིན་གཤེགས་པ་རྣམས་ལ་བསྟན་ཀྱང་ཐུག་པ་མེད་དོ། །དཔྱོད་པའི་འདུ་བྱེད་ཀྱི་ཏིང་ངེ་འཛིན་ཤིན་ཏུ་བསྒོམས་པས་རྗེས་སུ་བསྟན་པའི་ཆོ་འཕྲུལ་གྱིས་དེ་བཞིན་གཤེགས་པའི་ཆོས་ཀྱི་སྒོ་གཅིག་ལས་ཆོས་ཀྱི་སྒོ་ཐམས་ཅད་སྣང་ཞིང་། ཆོས་ཀྱི་སྒོ་ཐམས་ཅད་ཆོས་ཀྱི་སྒོ་
གཅིག་གིས་ཡང་དག་པར་སྒྲུབ་པ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། རྟག་ཏུ་རྒྱུན་མི་འཆད་པར་ཁྱིམ་གྱི་གནས་དོན་དུ་མི་གཉེར་བ་ཡིན། འདོད་པ་དོན་དུ་
མི་གཉེར་བ་ཡིན་ཏེ། དེ་ཁྱིམ་ནས་འབྱུང་བར་དགའ་ཞིང་རབ་ཏུ་འབྱུང་བ་མང་བ་ཡིན། དབེན་པ་ལ་གཞོལ། དབེན་པ་ལ་འབབ། དབེན་པ་ལ་བབ་ཅིང་ཆོས་ཟབ་མོ་སྒོམ་པའི་རྣལ་འབྱོར་ལ་བརྩོན་ཏེ། དེ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་།
རྣམ་པར་ཐར་པའི་སྒོ་གསུམ་པོ་འདི་དག་སྒོམ་མོ། །གང་ཕས་ཀྱི་རྒོལ་བ་ཐམས་ཅད་ཀྱི་ཡུལ་མ་ཡིན་ཞིང་མི་རྟོགས་པ་དང་། དམིགས་པར་ལྟ་བ་མཚན་མ་ལ་མངོན་པར་དགའ་བ་ཐམས་ཅད་ཀྱིས་རྟོགས་པར་མི་འགྱུར་བའི་རྣམ་པར་ཐར་པའི་སྒོ་གསུམ་པོ་དེ་དག་བསྒོམས་
པས་སྒྲིབ་པ་མེད་པ་ཞེས་བྱ་བའི་རྣམ་པར་ཐར་པ་ཀུན་ཏུ་སྐྱེའོ། །ཆགས་པ་མེད་པའི་ཡེ་ཤེས་ཀྱི་སྣང་བ་ཡང་རབ་ཏུ་འཐོབ་བོ། །བདུད་ཀྱི་ཡུལ་ལས་ཀྱང་ཤིན་ཏུ་འདའོ། །ཡེ་ཤེས་ཀྱི་ཡུལ་ཡང་ཡོངས་སུ་རྫོགས་པར་བྱེད་དོ། །སྒྲིབ་པ་དང་ཆོད་པ་དང་ཀུན་ནས་དཀྲིས་པ་
དང་། ལྟ་བ་དང་ཉོན་མོངས་པ་དང་མཚན་མ་ཐམས་ཅད་ལ་མི་སྤྱོད་དོ། །དེ་སྒྲིབ་པ་མེད་པའི་རྣམ་པར་ཐར་པ་རབ་ཏུ་ཐོབ་ཅིང་རྣམ་པར་ཐར་པའི་སྒོ་གསུམ་ལ་རྣམ་པར་རྩེན་པས་ཆོས་ཟབ་མོ་སྟོན་པ་ཡིན་ནོ། །དོན་ལ་རྟོན་པ་ཡིན་གྱི་ཚིག་འབྲུ་ལ་རྟོན་པ་མ་ཡིན་ནོ། །ཡེ་ཤེས་

ལ་རྟོན་པ་ཡིན་གྱི་རྣམ་པར་ཤེས་པ་ལ་རྟོན་པ་མ་ཡིན་ནོ། །ངེས་པའི་དོན་ལ་རྟོན་པ་ཡིན་གྱི་དྲང་བའི་དོན་ལ་རྟོན་པ་མ་ཡིན་ནོ། །ཆོས་ཉིད་ལ་རྟོན་པ་ཡིན་གྱི་གང་ཟག་ལ་རྟོན་པ་མ་ཡིན་ནོ། །སེམས་ཅན་ཐམས་ཅད་ཀྱི་རྟེན་དུ་གྱུར་པ་ཡིན་ཏེ། ཡི་གེ་དང་རྣམ་པར་རྟོག་པ་ལ་
ཆགས་ཞེན་པ་ལ་དོན་ལ་རྟོན་པ་བསྟན་ནས་ཡོངས་སུ་ཐར་བར་བྱེད་དོ། །རྣམ་པར་ཤེས་པའི་མཚན་མ་ལ་ཆགས་ཞེན་པ་ལ་ཡེ་ཤེས་ལ་རྟོན་པ་བསྟན་ནས་ཡོངས་སུ་ཐར་བར་བྱེད་དོ། །དྲང་བར་སྒྲོ་བཏགས་པ་ལ་ཆགས་ཞེན་པ་ལ། ངེས་པའི་དོན་ལ་རྟོན་པ་བསྟན་ནས་ཡོངས་སུ་
ཐར་བར་བྱེད་དོ། །གང་ཟག་ལ་མངོན་པར་ཞེན་ཅིང་ཆགས་ཞེན་པ་ལ། ཆོས་ཉིད་ལ་རྟོན་པ་བསྟན་ནས་ཡོངས་སུ་ཐར་བར་བྱེད་དོ། །ལྟ་བར་སོང་བ་དྲུག་ཅུ་རྩ་གཉིས་ལ་ཆགས་ཞེན་པ་ལ་སྟོང་པ་ཉིད་བསྟན་ནས་ཡོངས་སུ་ཐར་བར་བྱེད་དོ། །རྣམ་པར་རྟོག་པའི་སྒྲིབ་པ་
ཐམས་ཅད་ལ་ཆགས་ཞེན་པ་ལ་མཚན་མ་མེད་པ་བསྟན་ནས་ཡོངས་སུ་ཐར་བར་བྱེད་དོ། །ཁམས་གསུམ་ལ་ཆགས་ཞེན་པ་ལ་སྨོན་པ་མེད་པ་བསྟན་ནས་ཡོངས་སུ་ཐར་བར་བྱེད་དོ། །འདོད་ཆགས་ཀྱི་ཆགས་ཞེན་པ་ལ་མི་སྡུག་པའི་རྣམ་པ་བསྟན་ནས་ཡོངས་སུ་ཐར་
བར་བྱེད་དོ། །ཞེ་སྡང་སྤྱོད་པ་ལ་ཆགས་ཞེན་པ་ལ་བྱམས་པ་བསྟན་ནས་ཡོངས་སུ་ཐར་བར་བྱེད་དོ། །གཏི་མུག་སྤྱོད་པ་ལ་ཆགས་ཞེན་པ་ལ་རྟེན་ཅིང་འབྲེལ་བར་འབྱུང་བ་བསྟན་ནས་ཡོངས་སུ་ཐར་བར་བྱེད་དོ། །སེར་སྣ་ལ་ཆགས་ཞེན་པ་ལ་སྦྱིན་པའི་ཕ་རོལ་ཏུ་ཕྱིན་པ་བསྟན་
ནས་ཡོངས་སུ་ཐར་བར་བྱེད་དོ། །ངན་པའི་ངང་ཚུལ་ལ་ཆགས་ཞེན་པ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྟན་ནས་ཡོངས་སུ་ཐར་བར་བྱེད་དོ། །གནོད་སེམས་ལ་ཆགས་ཞེན་པ་ལ་བཟོད་པའི་ཕ་རོལ་ཏུ་ཕྱིན་པ་བསྟན་ནས་ཡོངས་སུ་ཐར་བར་བྱེད་དོ། །ལེ་ལོ་ལ་ཆགས་ཞེན་པ་ལ་བརྩོན་
འགྲུས་ཀྱི་ཕ་རོལ་ཏུ་ཕྱིན་པ་བསྟན་ནས་ཡོངས་སུ་ཐར་བར་བྱེད་དོ། །གཡེང་བ་ལ་ཆགས་ཞེན་པ་ལ་བསམ་གཏན་གྱི་ཕ་རོལ་ཏུ་ཕྱིན་པ་བསྟན་ནས་ཡོངས་སུ་ཐར་བར་བྱེད་དོ། །འཆལ་པའི་ཤེས་རབ་ལ་ཆགས་ཞེན་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་ནས་ཡོངས་སུ་ཐར་བར་བྱེད་དོ། །

སོ་སོའི་སྐྱེ་བོ་རྣམས་ལ་ཆགས་ཞེན་པ་ལ་འཕགས་པའི་བདེན་པ་བསྟན་ནས་ཡོངས་སུ་ཐར་བར་བྱེད་དོ། །ཕྱིན་ཅི་ལོག་ལ་ཆགས་ཞེན་པ་ལ་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། ཞི་བ་བསྟན་ནས་ཡོངས་སུ་ཐར་བར་བྱེད་དོ། །སྒྲིབ་པ་དང་ཆོད་པ་
དང་ཀུན་ནས་དཀྲིས་པ་དང་། ལྟ་བ་ཐམས་ཅད་ལ་ཆགས་ཞེན་པ་ལ་སྒྲིབ་པ་མེད་པའི་རྣམ་པར་ཐར་པ་བསྟན་ནས་ཡོངས་སུ་ཐར་བར་བྱེད་དོ། །ཉོན་མོངས་པ་ཅན་ཐམས་ཅད་ལ་ཆགས་ཞེན་པ་ལ་བྱང་ཆུབ་ཀྱི་ཕྱོགས་ཀྱི་ཆོས་བསྟན་ནས་ཡོངས་སུ་ཐར་བར་བྱེད་དོ། །དེ་ཆོས་ཡང་དག་པར་བླངས་
པ་འདི་དང་ལྡན་པས་བྱང་ཆུབ་ཐོབ་པ་ན་དེ་བཞིན་གཤེགས་པ་ལ་རྣམ་པར་གྲོལ་བར་ཉམས་པ་མེད་པ་ཞེས་བྱ་སྟེ། དེ་ལ་དེ་མེད་པ་ཡིན་ནོ། །དེའི་རྣམ་པར་གྲོལ་བ་དེ་མི་འཁྲུགས་ཤིང་ཤིན་ཏུ་མཐར་ཐུག་སྟེ། དབའ་རླབས་མེད་ལ་ཤིན་ཏུ་བསིལ་བའི་དངོས་པོར་གྱུར་ཅིང་ཟབ་སྟེ། ཉན་ཐོས་དང་
རང་སངས་རྒྱས་ཐམས་ཅད་ཀྱིས་གཏིང་དཔག་དཀའ་བ་ཡིན་སངས་རྒྱས་ཐམས་ཅད་དང་མཉམ་པ་ཉིད་ཀྱི་རྗེས་སུ་སོང་བ་ཡིན། དྲི་མ་མེད་ཅིང་དྲི་མ་དང་བྲལ་ཏེ་རྙོག་པ་མེད་པའི་ཤིན་ཏུ་ཡོངས་སུ་དག་པ་ཡིན། ཞི་གནས་དང་ལྷག་མཐོང་གི་ས་རྣམས་ལ་ཤིན་ཏུ་ཡོངས་སུ་སྦྱང་བ་བྱེད་པས་ཟད་མི་
ཤེས་པ་ཡིན། བསྟན་པ་མཐའ་ཡས་མུ་མེད་པ་ཡིན། ཆགས་པ་མེད་ཅིང་སྒྲིབ་པ་མེད་པ་ཡིན། ནམ་མཁའི་དབྱིངས་སུ་ཡང་དག་པར་འདུ་བ་ཡིན་ཏེ། དྲི་མ་མེད་པའི་སྙིང་པོའི་ཏིང་ངེ་འཛིན་ཤིན་ཏུ་བསྒོམས་པ་དང་། ཆོས་ཐམས་ཅད་སྣང་བ་དང་ལྡན་པས་གཟུངས་ལ་མཁས་པས་དེ་བཞིན་
གཤེགས་པ་ཐམས་ཅད་ཀྱིས་རྣམ་པར་གྲོལ་བའི་མཚན་ཉིད་ཀྱི་ཆོས་བསྟན་པ་དང་རྒྱུ་འཐུན་པ་ཡིན་ཏེ། ཐམས་ཅད་ལས་བྱུང་ཞིང་ཆོས་ཐམས་ཅད་ཀྱི་སྣང་བ་དང་ལྡན་པ་ཡིན། མྱ་ངན་ལས་འདས་པ་ལ་གཞོལ་བ་ཡིན། མྱ་ངན་ལས་འདས་པ་ལ་འབབ་པ་ཡིན། མྱ་ངན་ལས་འདས་པ་ལ་
བབ་པ་ཡིན་ཏེ། ཤིན་ཏུ་མཐར་ཐུག་ཅིང་ཤིན་ཏུ་མཐར་ཕྱིན་པ་འདི་ནི་བུ་མོ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་གཅིག་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡེ་ཤེས་ལྷུར་ལེན་པ་ཡིན་ཏེ། ཡེ་ཤེས་ཀྱི་སྟོབས་

དང་། ཡེ་ཤེས་ལ་འབབ་པ་དང་། ཡེ་ཤེས་ཀྱི་བྱིན་དང་ལྡན་པ་ཡིན་ཏེ། དེའི་ཡེ་ཤེས་དེ་ནི་ཉམས་པ་མེད་པ་འགྲོ་བའི་མངོན་པར་ཤེས་པ་ཡོངས་སུ་སྦྱང་བ་བྱས་པ་ལས་ངེས་པར་བྱུང་བའོ། །ཐམས་ཅད་མཁྱེན་པའི་ཡེ་ཤེས་ཀྱིས་རྣམ་པར་དཔྱོད་པའི་བློ་དང་ལྡན་པ་ཡིན་ཏེ། ཐམས་ཅད་
མཁྱེན་པའི་ཡེ་ཤེས་ཀྱིས་རྣམ་པར་དཔྱོད་པའི་བློ་དང་ལྡན་པས་འདོད་ཆགས་དང་བཅས་པའི་སེམས་ལ་ཡང་འདོད་ཆགས་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་ཡང་འདོད་ཆགས་དང་བྲལ་བའི་སེམས་སུ་ཡང་དག་
པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་བཞིན་དུ་ཞེ་སྡང་དང་བཅས་པ་དང་། ཞེ་སྡང་མེད་པ་དང་། གཏི་མུག་དང་བཅས་པ་དང་། གཏི་མུག་མེད་པ་དང་། ཉོན་མོངས་པ་དང་བཅས་པ་དང་། ཉོན་མོངས་པ་མེད་པ་དང་། འཁོར་བྱེད་དང་བཅས་པ་དང་། འཁོར་བྱེད་མེད་པ་དང་། ཟང་
ཟིང་དང་བཅས་པ་དང་། ཟང་ཟིང་མེད་པ་དང་། མཆོག་ཏུ་འཛིན་པ་དང་། མཆོག་ཏུ་འཛིན་པ་མེད་པ་དང་། བླ་མ་དང་བཅས་པ་དང་། བླ་མ་མེད་པ་དང་། སྒྲིབ་པ་དང་བཅས་པ་དང་། སྒྲིབ་པ་མེད་པ་དང་། ལུང་དུ་བསྟན་པ་དང་། ལུང་དུ་མ་བསྟན་པ་དང་། དགེ་བ་དང་། མི་དགེ་བ་དང་།
ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། ཟག་པ་དང་བཅས་པ་དང་། ཟག་པ་མེད་པ་དང་། འཇིག་རྟེན་པ་དང་། འཇིག་རྟེན་ལས་འདས་པ་དང་། ཀུན་ནས་ཉོན་མོངས་པ་ཅན་དང་། ཀུན་ནས་ཉོན་མོངས་པ་ཅན་མ་ཡིན་པ་དང་། རྣམ་པར་དག་པ་དང་། རྣམ་པར་མ་དག་པ་
དང་། ཆུང་ངུ་དང་ཆེར་གྱུར་པ་དང་། མཐའ་དང་བཅས་པ་དང་། མཐའ་ཡས་པ་དང་། སེར་སྣ་དང་ལྡན་པ་དང་། གཏོང་བ་དང་ལྡན་པ་དང་། ངང་ཚུལ་ངན་པའི་སེམས་དང་། ཚུལ་ཁྲིམས་ལ་སྦྱོར་བའི་སེམས་དང་། གནོད་སེམས་ཀྱི་བག་ལ་ཉལ་དང་། གནོད་སེམས་མེད་
པ་དང་། ལེ་ལོ་དང་། བརྩོན་འགྲུས་དང་ལྡན་པ་དང་། གཡེང་བ་དང་ལྡན་པ་དང་། མཉམ་པར་བཞག་པ་དང་། འཆལ་པའི་ཤེས་རབ་དང་། ཤེས་རབ་དང་ལྡན་པ་དང་། སོ་སོའི་སྐྱེ་བོའི་སེམས་དང་། ལོག་པ་ཉིད་དུ་ངེས་པ་དང་། ཡང་དག་པ་ཉིད་དུ་ངེས་པ་དང་། ཉན་ཐོས་

ཀྱི་ཐེག་པར་ངེས་པ་དང་། རང་སངས་རྒྱས་ཀྱི་ཐེག་པར་ངེས་པ་དང་། ཐེག་པ་ཆེན་པོར་ངེས་པ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདི་ནི་སྡུག་བསྔལ་འཕགས་པའི་བདེན་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདི་ནི་སྡུག་
བསྔལ་ཀུན་འབྱུང་བ། འདི་ནི་སྡུག་བསྔལ་འགོག་པ། འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་མི་སྐྱེ་བ་ཤེས་པས་སྡུག་བསྔལ་འཕགས་པའི་བདེན་པ་རབ་ཏུ་ཤེས་སོ། །ཤིན་ཏུ་ཀུན་དུ་མི་རྒྱུ་བའི་ཤེས་པའི་ཀུན་འབྱུང་བ་
རབ་ཏུ་ཤེས་སོ། །ཆད་པ་མེད་ཅིང་རྟག་པ་མེད་པ་ཤིན་ཏུ་སྐད་ཅིག་པ། འགོག་པ་ཤེས་པས་འགོག་པར་རབ་ཏུ་ཤེས་སོ། །ཐམས་ཅད་ཀྱི་རྗེས་སུ་སོང་བ་ནམ་མཁའ་ཡང་དག་པར་འདུ་བ་བདག་གི་བ་མེད་ཅིང་ཡོངས་སུ་འཛིན་པ་མེད་པ། ཤིན་ཏུ་རྣམ་པར་དག་པའི་ཤེས་པས་ལམ་
རབ་ཏུ་ཤེས་སོ། །དེ་འཕགས་པའི་བདེན་པ་བཞི་པོ་འདི་དག་དེ་ལྟར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་མངོན་སུམ་དུ་ཡང་མི་བྱེད་ལ་བདེན་པ་ཡོངས་སུ་ཤེས་པ་དང་། སྤངས་པ་དང་། བསྒོམས་པ་དང་། མངོན་སུམ་དུ་བྱ་བའི་
ཕྱིར་སེམས་ཅན་རྣམས་ལ་ཆོས་སྟོན་ཏོ། །དེའི་ཆོས་བསྟན་པ་དེ་བདེན་པའི་རྗེས་སུ་འཐུན་པ་ཡིན། རྟེན་ཅིང་འབྲེལ་པར་འབྱུང་བ་དང་འགལ་བ་མེད་པ་ཡིན། མཐར་ལྟ་བ་ཐམས་ཅད་ཡོངས་སུ་སྤངས་པ་ཡིན། དབུ་མའི་ལམ་ལ་ཞུགས་པ་ཡིན། རྟེན་པའི་ཆོས་མངོན་སུམ་དུ་གྱུར་པ་ཡིན་
ཏེ། དེ་ཆོས་ཐམས་ཅད་རྒྱུ་དང་བཅས་ཤིང་རྐྱེན་དང་བཅས་པའི་ཁ་ན་ལས་ཀྱི། བདག་གི་ཁ་ན་ལས་པ་མ་ཡིན། སེམས་ཅན་གྱི་ཁ་ན་ལས་པ་མ་ཡིན། སྲོག་གི་ཁ་ན་ལས་པ་མ་ཡིན། གསོ་བའི་ཁ་ན་ལས་པ་མ་ཡིན། སྐྱེས་བུའི་ཁ་ན་ལས་པ་མ་ཡིན། གང་ཟག་གི་ཁ་ན་ལས་
པ་མ་ཡིན་པར་རབ་ཏུ་ཤེས་སོ། །དེ་མ་རིག་པའི་རྐྱེན་གྱིས་འདུ་བྱེད་རྣམས་སུ་རབ་ཏུ་ཤེས་སོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་དང་། རྣམ་པར་ཤེས་པའི་རྐྱེན་གྱིས་མིང་དང་གཟུགས་དང་། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་དང་། སྐྱེ་མཆེད་དྲུག་གི་རྐྱེན་གྱིས་

རེག་པ་དང་། རེག་པའི་རྐྱེན་གྱིས་ཚོར་བ་དང་། ཚོར་བའི་རྐྱེན་གྱིས་སྲེད་པ་དང་། སྲེད་པའི་རྐྱེན་གྱིས་ལེན་པ་དང་། ལེན་པའི་རྐྱེན་གྱིས་སྲིད་པ་དང་། སྲིད་པའི་རྐྱེན་གྱིས་སྐྱེ་བ་དང་། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་།
ཡིད་མི་བདེ་བ་དང་། འཁྲུག་པ་རྣམས་འབྱུང་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་མ་འདྲེས་པ་འདི་འབྱུང་བར་འགྱུར་བར་རབ་ཏུ་ཤེས་སོ། །དེ་མ་རིག་པ་འགག་པ་ནས་རྒ་ཤི་འགག་པའི་བར་དང་། དེ་ལྟར་སྡུག་བསྔལ་གྱི་ཕུང་པོ་ཆེན་པོ་མ་འདྲེས་པ་འདི་འགག་པར་འགྱུར་
བར་རབ་ཏུ་ཤེས་སོ། །དེ་འདི་ཡང་དག་པར་སློབ་པ་ན་གང་མ་རིག་པའི་རྐྱེན་ལས་བྱུང་བ་དེ་ནི་བདག་གི་རྐྱེན་ལས་བྱུང་བ་མ་ཡིན། སེམས་ཅན་གྱི་རྐྱེན་ལས་བྱུང་བ་མ་ཡིན། སྲོག་དང་གསོ་བ་དང་། གང་ཟག་གི་རྐྱེན་ལས་བྱུང་བ་མ་ཡིན་ནོ། །གང་བདག་གི་རྐྱེན་ལས་བྱུང་བ་མ་ཡིན་
པ་ནས། གང་ཟག་གི་རྐྱེན་ལས་བྱུང་བ་མ་ཡིན་པའི་བར་དེ་ནི་སྟོང་པའོ། །སྟོང་པ་གང་ཡིན་པ་དེ་ནི་ཆད་པ་མ་ཡིན། རྟག་པ་མ་ཡིན་ནོ། །ཆད་པ་མ་ཡིན། རྟག་པ་མ་ཡིན་པ་གང་ཡིན་པ་དེ་ནི་གདོད་མ་ཉིད་ནས་མ་སྐྱེས་མ་བྱུང་བའོ། །གདོད་མ་ཉིད་ནས་མ་སྐྱེས་མ་བྱུང་བ་གང་
ཡིན་པ་དེ་ནི་དུས་གསུམ་དུ་བརྗོད་དུ་མེད་དོ། །དུས་གསུམ་དུ་བརྗོད་དུ་མེད་པ་གང་ཡིན་པ་དེ་ནི་དངོས་པོ་མེད་པའི་ངོ་བོ་ཉིད་དོ། །དངོས་པོ་མེད་པའི་ངོ་བོ་ཉིད་གང་ཡིན་པ་དེ་ནི་བགྲང་བ་མེད་ཅིང་བགྲང་བ་ལས་ཤིན་ཏུ་འདས་པའོ། །བགྲང་བ་མེད་ཅིང་བགྲང་བ་ལས་ཤིན་ཏུ་འདས་པ་གང་ཡིན་པ་དེ་ནི་དོན་
དམ་པའོ། །དོན་དམ་པ་གང་ཡིན་པ་དེ་ནི་སངས་རྒྱས་ཀྱི་བཀའ་ཡང་དག་པའོ། །སངས་རྒྱས་ཀྱི་བཀའ་ཡང་དག་པ་གང་ཡིན་པ་དེ་ནི་འཐབ་པ་མེད་ཅིང་རྩོད་པ་མེད་པའོ། །འཐབ་པ་མེད་ཅིང་རྩོད་པ་མེད་པ་གང་ཡིན་པ་དེ་ནི་དགེ་སྦྱོང་གི་ཆོས་སོ། །དགེ་སྦྱོང་གི་ཆོས་གང་ཡིན་པ་
དེ་ནི་ནམ་མཁའ་དང་མཚུངས་པའི་རང་བཞིན་དུ་དེས་དེ་ལྟར་ཤེས་ཤིང་གནས་ཏེ། ཚུལ་བཞིན་མ་ཡིན་པ་ཀུན་འབྱུང་བས་མ་རིག་པ་ཀུན་འབྱུང་བར་རབ་ཏུ་ཤེས་སོ། །མ་རིག་པ་འགག་པ་ནས་རྒ་ཤི་འགག་པའི་བར་དུ་རབ་ཏུ་ཤེས་ཏེ། རྒྱུ་དང་རྐྱེན་ཚོགས་པའི་ཤེས་པས་ཆད་པར་ལྟ་

བར་སྦྱོར་བ་མ་ཡིན་གྱི། བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གང་ཟག་མེད་པའི་ཆོས་ཀྱི་རྗེས་སུ་སོང་བ་ཡིན་ཏེ། མཐའ་ཁས་མི་ལེན། ཉེ་བར་མི་འཛིན་མི་དམིགས་སོ། །མཐའ་མི་དམིགས་པས་དབུས་ཡང་དག་པར་རྗེས་
སུ་མི་མཐོང་ངོ་། །ཆོས་གང་ལ་མཐའ་མི་དམིགས་པ་དེ་ལ་དབུས་ཡོད་པར་ག་ལ་འགྱུར་ཏེ། དེའི་མཐའ་ཅི་འདྲ་བ་ཞིག་སྙམ་ནས། དེ་མཐའ་དང་དབུས་མེད་པའི་ཆོས་རྣམས་ལ་འཇུག་གོ། །ཆོས་ཀྱི་དབྱིངས་མཐའ་དང་དབུས་དང་བྲལ་བས་མཐའ་དང་དབུས་མེད་པའི་ཆོས་སྟོན་
པ་ཡིན་ནོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ནི་དེ་བཞིན་གཤེགས་པ་ལ་རྣམ་པར་གྲོལ་བའི་ཡེ་ཤེས་མཐོང་བ་མཉམ་པ་མེད་པ་ཞེས་བྱ་སྟེ། དེ་ལ་དེ་མེད་པ་ཡིན་ནོ། །སྟོབས་བཀོད་པའི་ཏིང་ངེ་འཛིན་ཤིན་ཏུ་བསྒོམས་པ་དང་། མཐའ་ཡས་འཁྱིལ་
པའི་གཟུངས་ལ་མཁས་པས་དེའི་རྣམ་པར་གྲོལ་བ་ཡེ་ཤེས་མཐོང་བ་དེ་ཆོས་ཀྱི་དབྱིངས་མཐའ་དང་དབུས་མེད་པར་ཡང་དག་པར་འདུ་བ་ཡིན། གནས་དང་གནས་མ་ཡིན་པ་བསྟན་པ་རྣམས་ལ་ནམ་མཁའི་དབྱིངས་ལྟར་རྒྱ་ཆེ་ཞིང་རྣམ་པར་མི་རྟོག་ལ་ལྷུན་གྱིས་གྲུབ་པ་ཡིན། འདས་
པ་དང་མ་འོངས་པ་དང་། ད་ལྟར་བྱུང་བའི་ལས་ཡང་དག་པར་བླངས་པ་ཤེས་པ་བསྟན་པ་རྣམས་ལ་རྣམ་པར་སྨིན་པ་ཆུད་མི་ཟ་བར་སྟོན་པ་ཡིན། སེམས་ཅན་ཐམས་ཅད་ཀྱི་དབང་པོ་དང་། བརྩོན་འགྲུས་ཀྱི་རིམ་པ་ཤེས་པ་བསྟན་པ་རྣམས་ལ་མངོན་སུམ་དུ་གྱུར་པ་ཡིན། ཁམས་
དུ་མ་དང་། ཁམས་སྣ་ཚོགས་པའི་འཇིག་རྟེན་བསྟན་པ་རྣམས་ལ་ཤིན་ཏུ་རྣམ་པར་གདོན་མི་ཟ་བར་སྟོན་པ་ཡིན། མོས་པ་དུ་མ་པ་དང་། མོས་པ་སྣ་ཚོགས་ཤེས་པ་བསྟན་པ་རྣམས་ལ་མི་ཟད་པར་སྟོན་ཅིང་འཇུག་པ་ཡིན། ཀུན་དུ་འགྲོ་བའི་ལམ་ཤེས་པ་བསྟན་པ་རྣམས་ལ་
ཕྱོགས་ཀྱི་དྲ་བ་ཐམས་ཅད་རྣམ་པར་དབྱེ་བ་རྒྱས་པར་བྱེད་ཅིང་ཕྱད་པར་ལུང་སྟོན་པ་ཡིན། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་ལྡན་པ་ཤེས་པ་བསྟན་པ་རྣམས་ལ་ཆོས་ཀྱི་

སྒོ་བསམ་གྱིས་མི་ཁྱབ་པ་རྣམ་པར་གཞག་པ་སྟོན་པ་ཡིན། སྔོན་གྱི་གནས་རྣམ་པ་དུ་མ་རྗེས་སུ་དྲན་པ་ཤེས་པ་བསྟན་པ་རྣམས་ལ་སེམས་ཅན་ཐམས་ཅད་ཀྱི་འཆི་འཕོ་དང་། ཚེ་དང་། སྐྱེ་བ་རབ་འབྲིང་ཐ་མ་དང་། ཐོག་མའི་མཐར་ཆགས་པ་མེད་ཅིང་སྒྲིབ་པ་མེད་པའི་ཡེ་ཤེས་སྟོན་པ་ཡིན།
ཐོགས་པ་མེད་ཅིང་སྒྲིབ་པ་མེད་པའི་ལྷའི་མིག་ཤེས་པ་བསྟན་པ་རྣམས་ལ་ཀུན་ཏུ་རྣམ་པར་ལྟ་བ་ཐམས་ཅད་དུ་ཤིན་ཏུ་ཡོངས་སུ་སྦྱང་བའི་ལུང་བསྟན་པ་སྟོན་པ་ཡིན། ཟག་པ་ཐམས་ཅད་ཟད་པ་ཤེས་པ་བསྟན་པ་རྣམས་ལ་བག་ཆགས་ཀྱི་མཚམས་སྦྱོར་བ་མ་ལུས་པར་སྤང་བར་
ཤེས་པ་སྟོན་པ་ཡིན། མི་འཇིགས་པ་ཤེས་པ་བསྟན་པ་རྣམས་ལ་ཟིལ་གྱིས་མི་ནོན་པ་སྟོན་པ་ཡིན། སྙིང་རྗེ་ཆེན་པོའི་སྟོབས་ཤེས་པ་བསྟན་པ་རྣམས་ལ་སངས་རྒྱས་ཀྱི་མཛད་པ་ཐམས་ཅད་དུ་ཐ་དད་དུ་བྱ་བ་མེད་ཅིང་སྦྱོར་བ་མཚུངས་པ་མཉམ་པ་རྒྱུན་མི་གཅོད་པ་སྟོན་པ་ཡིན། སོ་སོ་ཅི་རིགས་པར་
ཆོས་བསྟན་པ་རྣམས་ལ་ལྷུན་གྱིས་གྲུབ་པའི་ཡེ་ཤེས་ཀྱིས་རྣམ་པར་འཕྲུལ་པ་སྟོན་པ་ཡིན། སེམས་ཅན་ཐམས་ཅད་ཡོངས་སུ་སྨིན་པར་བྱེད་ཅིང་འདུལ་བའི་ཕྱིར། མི་ཟད་པའི་ཆོས་ཀྱི་འཁོར་ལོ་རབ་ཏུ་བསྐོར་བའི་ཡེ་ཤེས་ཀྱི་ཡུལ་བསྟན་པ་རྣམས་ལ་ཟབ་མོ་དང་། སྣ་ཚོགས་དང་། འཕྲུགས་
པ་དང་། སྣྲེལ་ཞིར་རྒྱུ་བ་དང་། ཤེས་རབ་དང་། ཐབས་དང་། སྟོབས་དང་། རྣམ་པར་འཕྲུལ་པའི་ཡེ་ཤེས་སྟོན་པ་ཡིན། ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ཡིན་པ་ཡིན་ཏེ། བུ་མོ་འདི་ནི་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་
གཉིས་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཡེ་ཤེས་ཀྱིས་བྱས་པའི་ལས་རྣམས་བྱེད་ཀྱི་ང་རྒྱལ་གྱིས་བྱས་པ་རྣམས་མི་བྱེད་དེ། དེ་ཡེ་ཤེས་ཀྱི་ལུས་ཀྱིས་ལས་བྱེད་པ་ནི་འདི་ལྟ་སྟེ། འཁུ་བ་དང་། གཡོ་དང་། གྱ་གྱུ་དང་། ཚུལ་
འཆོས་པ་ཐམས་ཅད་མི་བྱེད་དོ། །སྡང་བ་མེད་ཅིང་ཆགས་པ་མེད་པ་ཡིན། རྟག་ཏུ་ཚངས་པར་སྤྱོད་ཅིང་དེ་ལུས་ཀྱི་ལས་ཀྱི་བརྩོན་འགྲུས་བརྩམས་པས་བྱང་ཆུབ་དང་འཐུན་ཏེ། བདག་དང་གཞན་ལ་གནོད་པ་མི་བྱེད་པ་ཡིན། ཕ་རོལ་ཏུ་ཕྱིན་པའི་རྒྱུན་འཐུན་པ་སྙིང་རྗེ་ཆེན་པོ་ལ་སྦྱོར་ཞིང་རྟག་ཏུ་

སེམས་ཅན་གྱི་དོན་ལ་བརྩོན་ཏེ། ལུས་ཀྱིས་ལས་དེ་ལྟ་བུ་དང་ལྡན་པ་ཡིན་ནོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན་དེ་བཞིན་གཤེགས་པའི་ལུས་ཀྱི་ལས་ཐམས་ཅད་སྔོན་དུ་ཡེ་ཤེས་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་ཞེས་བྱ་སྟེ། དེ་ལ་དེ་ཡོད་དོ། །གཟུགས་
ཐམས་ཅད་ཀུན་ཏུ་སྟོན་པའི་ཏིང་ངེ་འཛིན་ཤིན་ཏུ་བསྒོམས་པ་དང་། ཀུན་ནས་སྣང་བའི་གཟུངས་ལ་མཁས་པས་དེ་བཞིན་གཤེགས་པ་ཁ་དོག་དུ་མ་དང་། ཁ་དོག་སྣ་ཚོགས་དང་། གཟུགས་དང་། དབྱིབས་དང་། ཆུ་ཞེང་སྟོན་པའི་ལུས་ཀྱིས་ལྷ་དང་། ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་
དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། སྲོག་ཆགས་
བརྒྱ་སྟོང་དུ་མ་ལྷགས་པའི་འཁོར་འདུས་པ་ཐམས་ཅད་དུ་སྤྱོད་ལམ་ཚད་མེད་པ་དང་། ཁ་དོག་དང་། རྟགས་དང་། དབྱིབས་གནས་པ། མཆོག་དམ་པ། གཙོ་བོ། གྱ་ནོམ་པའི་ལུས་བསྟན་ནས་ཐམས་ཅད་དང་ལྡན་པས། འཁོར་ལ་ཆོས་ཀྱི་གཏམ་ཀུན་དུ་སྟོན་ཏོ། །ཡང་དག་པར་
འཛིན་དུ་འཇུག་གོ། །ཡང་དག་པར་གཟེངས་སྟོད་དོ། །ཡང་དག་པར་རབ་ཏུ་དགའ་བར་བྱེད་དོ། །ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་མི་སྣང་བར་བྱེད་དོ། །མི་སྣང་བར་གྱུར་ཀྱང་སོང་བར་
ཤེས་པ་ཡང་མེད་དོ། །འཁོར་འདུས་པ་དེ་དག་ཏུ་འདུས་ཤིང་འདུག་སྟེ། སྨྲའམ་ཅང་མི་སྨྲ་ཡང་རུང་འོངས་པར་ཤེས་པ་ཡང་མེད་དོ། །དེ་ལ་ལྟ་བས་ཀྱང་ངོམས་མི་མྱོང་ངོ་། །དེས་བསྟན་པ་ལ་དགའ་བ་དང་། མཆོག་ཏུ་དགའ་བ་རབ་ཏུ་རྒྱ་ཆེན་པོ་ཡང་རྙེད་དོ། །འདོད་པ་ལ་དགའ་ཞིང་རྩེ་བ་དང་། ཡུལ་དང་
ལོངས་སྤྱོད་ཐམས་ཅད་ལ་མི་ལྟ་བ་ཡིད་ལ་བྱེད་ཅིང་སྦྱར་རོ། །མི་སྣང་བར་གྱུར་ན་བལྟ་བ་དང་མཉན་པའི་ཕྱིར་སྐོམ་པར་འགྱུར་རོ། །དེ་ལ་ལྟ་བས་སྐོམ་པ་དང་། ལྟ་འདོད་པ་དང་། ཆོས་ཉན་པས་སྐོམ་པ་དང་། ཆོས་ཉན་འདོད་པ་དེ་ཡང་ཟག་པ་མེད་པའི་ལུས་ཀྱི་ལས་དང་། ངག་གི་ལས་དང་། ཡིད་ཀྱི་

ལས་འཐོབ་པའི་རྒྱུར་འགྱུར་ཏེ། བུ་མོ་འདི་ནི་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་གསུམ་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཡེ་ཤེས་ཀྱིས་བྱས་པའི་ལས་རྣམས་བྱེད་ཀྱི། ང་རྒྱལ་གྱིས་བྱས་པ་རྣམས་
མི་བྱེད་དེ། དེ་ཡེ་ཤེས་ཀྱི་ངག་གི་ལས་བྱེད་པ་ནི་འཁུ་བ་དང་། གཡོ་དང་། གྱ་གྱུ་དང་། ཚུལ་འཆོས་པ་ཐམས་ཅད་མི་བྱེད་དེ། བདེན་པར་སྨྲ་ཞིང་ཕྲ་མ་དང་། ངག་རྩུབ་པོ་དང་། ཚིག་ཀྱལ་པ་མི་སྨྲ་བ་ཡིན། ཕན་པའི་ཚིག་དང་། རན་པའི་ཚིག་དང་། ཆོས་ཀྱི་ཚིག་དང་། དེ་ཚིག་
དེ་དག་སྨྲ་སྟེ། ཚིག་དེས་བདག་དང་གཞན་ལ་གདུང་བར་མི་འགྱུར་རོ། །ཚིག་གང་སངས་རྒྱས་ཀྱིས་རྗེས་སུ་གནང་བ་དོན་དང་ལྡན་པའི་ཚིག་སྨྲ་སྟེ། ཚིག་དེས་སེམས་ཅན་ཐམས་ཅད་ཚིམ་པར་བྱེད་དོ། །དེ་མི་གཤེ་མི་འཚིག་སྟེ། ཡེ་ཤེས་དང་རབ་ཏུ་ལྡན་པའི་ཚིག་དང་ལྡན་པ་ཡིན་གྱི།
ང་རྒྱལ་དང་རབ་ཏུ་ལྡན་པ་མ་ཡིན་ནོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན་དེ་བཞིན་གཤེགས་པ་ངག་གི་ལས་ཐམས་ཅད་སྔོན་དུ་ཡེ་ཤེས་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་ཞེས་བྱ་སྟེ། དེ་ལ་དེ་ཡོད་དོ། །རིན་པོ་ཆེའི་འབྱུང་གནས་ཀྱི་ཏིང་ངེ་འཛིན་ཤིན་ཏུ་
བསྒོམས་པ་དང་། འཁོར་གསུམ་གྱི་གཟུངས་ལ་མཁས་པས་དེ་བཞིན་གཤེགས་པ་ངག་གི་ལས་ཅི་ཡང་མི་བརྗོད་ཀྱང་། དེ་སྐད་ཐམས་ཅད་ལ་སྒྲ་སྙན་དང་། འཁོར་ཐམས་ཅད་ཀྱི་སེམས་ཀྱི་བསམ་པ་ཚིམ་པར་བྱེད་པའི་སྒྲ་འབྱུང་ངོ་། །དེ་བཞིན་གཤེགས་པ་དེ་དག་ཐམས་ཅད་ཀྱི་གསུང་
སྒྲ་དང་དབྱངས་ནི་དོན་དང་ལྡན་པ། ཆོས་དང་ལྡན་པ། བདེན་པ་དང་འཐུན་པ་རྟེན་ཅིང་འབྲེལ་པར་འབྱུང་བ་དང་མི་འགལ་བ། ཡིད་འབྱུང་བ་དང་འདོད་ཆགས་དང་བྲལ་བ་དང་འཐུན་པ། ཉེ་བར་ཞི་བར་འགྱུར་བ། འབྲས་བུ་ཡོད་པ་ནས་མྱ་ངན་ལས་འདས་པའི་བར་གྱི་རྒྱུར་གྱུར་པ་ཡིན་ཏེ། བུ་མོ་
འདི་ནི་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་བཞི་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། རྟག་ཏུ་རྒྱུན་མི་འཆད་པར་ཡེ་ཤེས་ཀྱིས་བྱས་པའི་ལས་རྣམས་བྱེད་ཀྱི། ང་རྒྱལ་གྱིས་བྱས་པའི་ལས་རྣམས་མི་བྱེད་དེ།

དེ་ཡེ་ཤེས་ཀྱིས་ཡིད་ཀྱི་ལས་བྱེད་པ་ནི་འཁུ་བ་དང་། གཡོ་དང་། གྱ་གྱུ་དང་། ཚུལ་འཆོས་པ་ཐམས་ཅད་མི་བྱེད་དོ། །བརྣབ་སེམས་དང་། གནོད་སེམས་དང་། ལོག་པར་ལྟ་བ་དང་བྲལ་ཞིང་ཡང་དག་པར་ལྟ་བ་ཡིན། བྱམས་པ་དང་། སྙིང་རྗེ་ལ་གནས་ཏེ། སེམས་
ཅན་ཐམས་ཅད་ལ་སེམས་སྙོམས་ཤིང་བྱང་ཆུབ་ཀྱི་སེམས་བརྗེད་པ་མེད་པ་ཡིན་ནོ། །དེ་ཡེ་ཤེས་དང་རབ་ཏུ་ལྡན་པའི་ཡིད་དང་ལྡན་པ་ཡིན་གྱི། ང་རྒྱལ་དང་རབ་ཏུ་ལྡན་པ་མ་ཡིན་ནོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན་དེ་བཞིན་གཤེགས་པའི་ཡིད་ཀྱི་ལས་
ཐམས་ཅད་སྔོན་དུ་ཡེ་ཤེས་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་ཞེས་བྱ་སྟེ། དེ་ལ་དེ་ཡོད་དོ། །ད་ལྟར་བྱུང་བའི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་ཤིན་ཏུ་བསྒོམས་པ་དང་། བརྣག་པ་རྙོག་པ་མེད་པའི་གཟུངས་ལ་མཁས་པས་དེ་བཞིན་གཤེགས་པའི་སེམས་གཅིག་གིས་
སེམས་ཅན་ཐམས་ཅད་ཀྱི་སེམས་རབ་ཏུ་ཤེས་སོ། །སེམས་ཅན་ཐམས་ཅད་སྒྱུ་མ་ལྟ་བུ་དང་། སེམས་ཅན་ཐམས་ཅད་རང་བཞིན་གྱིས་འོད་གསལ་བའི་ཕྱིར་རང་གི་སེམས་མཉམ་པ་ཉིད་ཀྱིས་སེམས་ཅན་ཐམས་ཅད་ཀྱི་སེམས་མཉམ་པ་ཉིད་དུ་ཁོང་དུ་ཆུད་པ་ཡིན་ནོ། །སེམས་
ཅན་ཐམས་ཅད་ཀྱ