Kinh tạng Tây Tạng (Kangyur Đại Học) — 059_མདོ་སྡེ།_བ

ི་སེམས་མཉམ་པ་ཉིད་ཀྱིས་རང་གི་སེམས་མཉམ་པ་ཉིད་དུ་ཁོང་དུ་ཆུད་པ་ཡིན་ནོ། །ལུས་ཐམས་ཅད་གཟུགས་བརྙན་ལྟ་བུའི་ཕྱིར་རང་གི་ལུས་ཀྱི་ཆོས་ཉིད་ཀྱིས་སེམས་ཅན་ཐམས་ཅད་ཀྱི་ལུས་ཀྱི་ཆོས་ཉིད་ཁོང་དུ་ཆུད་པ་ཡིན་ནོ། །སེམས་ཅན་ཐམས་ཅད་ཀྱི་
ལུས་ཀྱི་ཆོས་ཉིད་ཀྱི་རང་གི་ལུས་ཀྱི་ཆོས་ཉིད་ཁོང་དུ་ཆུད་པ་ཡིན་ནོ། །རང་གི་ལུས་སེམས་ཅན་ཐམས་ཅད་ཀྱི་ལུས་ཀྱི་རྗེས་སུ་འཇུག་ཅིང་ཡང་དག་པར་འདུལ་བ་ཡིན་ནོ། །སེམས་ཅན་ཐམས་ཅད་ཀྱི་ལུས་རང་གི་ལུས་ཀྱི་རྗེས་སུ་འཇུག་ཅིང་ཡང་དག་པར་འདུལ་བ་ཡིན་ནོ། །སེམས་
ཅན་ཐམས་ཅད་ཀྱི་ལུས་སངས་རྒྱས་ཀྱི་སྐུར་བྱིན་གྱིས་རློབ་བོ། །དེའི་བྱིན་གྱི་རླབས་དེ་ནི་ལྷ་དང་བཅས་པའི་འཇིག་རྟེན་དང་། བདུད་དུ་བཅས་པ་དང་། ཚངས་པར་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང་། ལྷ་དང་། མི་དང་ལྷ་མ་ཡིན་དུ་བཅས་པའི་འཇིག་རྟེན་གང་

གིས་ཀྱང་གཡོས་པ་དང་། བསྐྱོད་པར་མི་ནུས་ཏེ། བུ་མོ་འདི་ནི་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅྭ་ལྔ་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན་འདས་པའི་དེ་བཞིན་གཤེགས་པ་རྣམས་ཀྱི་ཡི་གེས་ཆགས་པ་མེད་པ་
ཐོས་ན་མོས་ཤིང་ཡིད་ཆེས་ཏེ། ཐེ་ཚོམ་མི་ཟ་ནེམ་ནུར་མེད་ཅིང་མི་དངང་ལ་ཀུན་དུ་མི་དངང་ཞིང་མི་སྐྲག་ལ་ཀུན་དུ་སྐྲག་པར་མི་འགྱུར་ཏེ། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་ལ་ཡང་མོས་པ་ཡིན་ནོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་
གི་ལུས་ཀྱི་ལས་དང་། ལུས་ཀྱི་སྤྱོད་ལམ་ཡོངས་སུ་དག་པ། ཆགས་པ་མེད་ཅིང་སྒྲིབ་པ་མེད་པ། འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་རྗེས་སུ་སོང་བ་ལ་མོས་སོ། །འདས་པའི་དེ་བཞིན་གཤེགས་པ་དེ་དག་གི་ངག་གི་ལས་འཇིག་རྟེན་གྱི་ཁམས་ཐམས་ཅད་དུ་ཁྱབ་པའི་དབྱངས་སྒྲ་
བརྗོད་པ་ཆགས་པ་མེད་ཅིང་སྒྲིབ་པ་མེད་ལ་བསམ་གྱིས་མི་ཁྱབ་པ་ཐམས་ཅད་དང་། སངས་རྒྱས་ཀྱི་སྒྲ་སྐད་དང་། དབྱངས་དང་། ཆོས་ཀྱི་སྒོ་ཚད་མེད་པ་བསྟན་པ་ཐམས་ཅད་ཀྱི་རྗེས་སུ་སོང་བ་ལ་མོས་སོ། །འདས་པའི་དེ་བཞིན་གཤེགས་པ་དེ་དག་གི་སེམས་ཀྱི་ལས་དུས་ཐམས་
ཅད་དང་། ཞིང་ཐམས་ཅད་དང་། སངས་རྒྱས་ཐམས་ཅད་དང་། ཆོས་ཐམས་ཅད་དང་། སེམས་ཅན་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་དང་། འགྲོ་བ་ཐམས་ཅད་ཀྱི་ལས་ཀྱི་རྣམ་པར་སྨིན་པ་ཤིན་ཏུ་རྣམ་པར་ཕྱེ་བ་རྣམ་པར་
འབྱེད་པ་ལ་མོས་སོ། །འདས་པའི་དེ་བཞིན་གཤེགས་པ་དེ་དག་གི་འོད་ཟེར་གྱི་དྲ་བ་བཀོད་པ་ཆགས་པ་མེད་ཅིང་སྒྲིབ་པ་མེད་པ་ལ་ཡང་མོས་ཤིང་ཡིད་ཆེས་ཏེ། ཐེ་ཚོམ་མི་ཟ་ནེམ་ནུར་མེད་ཅིང་མི་དངང་ལ་ཀུན་ཏུ་མི་དངང་མི་སྐྲག་ལ་ཀུན་ཏུ་སྐྲག་པར་མི་འགྱུར་ཏེ། སངས་རྒྱས་ཀྱི་ཡུལ་བསམ་གྱིས་མི་
ཁྱབ་པ་ལ་ཡང་མོས་སོ། །སེམས་ཅན་གཞན་དག་ཀྱང་མོས་པའི་ཆོས་ཉིད་རྣམ་པ་འདི་ལྟ་བུ་ཡང་དག་པར་འཛིན་དུ་འཇུག་གོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན་འདས་པའི་དུས་ལ་དེ་བཞིན་གཤེགས་པའི་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་

པ་ལ་འཇུག་པ་ཞེས་བྱ་སྟེ། དེ་ལ་དེ་ཡོད་དོ། །དཔའ་བར་འགྲོ་བའི་ཏིང་ངེ་འཛིན་ཤིན་ཏུ་བསྒོམས་པ་དང་། གཟི་བརྗིད་དང་ལྡན་པའི་གཟུངས་ལ་མཁས་པས་དེ་བཞིན་གཤེགས་པ་འདས་པའི་དེ་བཞིན་གཤེགས་པ་རྣམས་ཀྱི་མཚན་ཐ་དད་པ་དང་། ཚེའི་ཚད་ཐ་དད་པ་གོ་རིམས་བཞིན་དུ་
བརྡ་སྤྲོད་པའི་མཐའ་ནི་མི་རྟོགས་སོ། །དེ་བཞིན་དུ་འདས་པའི་བྱང་ཆུབ་སེམས་དཔའ་རྣམས་དང་། ཉན་ཐོས་རྣམས་དང་། རང་སངས་རྒྱས་རྣམས་དང་། སེམས་ཅན་རྣམས་དང་། སེམས་ཅན་གྱི་སྤྱོད་པ་རྣམས་དང་། སེམས་ཅན་གྱི་སྤྱོད་པ་བྱེད་པའི་ལས་ཀྱི་རྣམ་པར་སྨིན་པ་སོ་སོར་མྱོང་
བ་རྣམས་དང་། དེ་བཞིན་དུ་འདས་པའི་བསྐལ་པ་ཐམས་ཅད་དེ། བསྐལ་པ་གང་དག་སངས་རྒྱས་དང་བཅས་པ་དག་དང་། བསྐལ་པ་གང་དག་སངས་རྒྱས་མེད་པ་དག་དང་། བསྐལ་པ་གང་དག་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་
སྙེད་བྱུང་བའི་བསྐལ་པ་དེ་དག་གོ་རིམས་བཞིན་དུ་བརྡ་སྤྲོད་པའི་མཐའ་ནི་མི་རྟོགས་སོ། །དེ་བཞིན་དུ་འདས་པའི་འཇིག་རྟེན་གྱི་ཁམས་ཐམས་ཅད་ཀྱི་མིང་ཐ་དད་པ་དང་། གང་དག་ཀུན་ནས་ཉོན་མོངས་པ་ཅན་དག་དང་། གང་དག་རྣམ་པར་དག་པ་དག་དང་། གང་དག་ཆུང་བ་དག་དང་།
གང་དག་ཆེར་གྱུར་པ་དག་དང་། གང་དག་ཕྲ་བ་དག་དང་། གང་དག་རགས་པ་དག་དང་། གང་དག་རྡུལ་ཕྲ་རབ་ལ་འཇུག་པའི་རྗེས་སུ་ཞུགས་པ་དག་དང་། གང་དག་སྤྱིའུ་ཚུགས་པ་དག་དང་། གང་དག་འཐུན་པ་དག་དང་། གང་དག་ཕྱོགས་དང་ཕྱོགས་མཚམས་རྣམ་པར་གཞག་པ་དང་།
མིག་འཕྲུལ་རྣམ་པར་དབྱེ་བ་ལ་འཇུག་པའི་རྗེས་སུ་ཞུགས་པ་ལ་འདས་པའི་འཇིག་རྟེན་གྱི་ཁམས་དེ་དག་ཐམས་ཅད་གོ་རིམས་བཞིན་དུ་བརྡ་སྤྲོད་པའི་མཐའ་ནི་མི་རྟོགས་སོ། །དེ་ལ་དེ་བཞིན་གཤེགས་པ་ལུང་བསྟན་པ་ཐམས་ཅད་ལ་རྨོངས་པ་མེད་དེ་ལག་མཐིལ་དང་། སོར་མོ་ལྔ་
མཐོང་བའི་ཚུལ་དུ་དེ་བཞིན་གཤེགས་པའི་ཡེ་ཤེས་ཀྱིས་ཐམས་ཅད་ཤེས་ཏེ། བུ་མོ་འདི་ནི་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་དྲུག་པའོ། །བུ་མོ་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པ་ན། མ་འོངས་པའི་དེ་བཞིན་གཤེགས་

པ་རྣམས་ཀྱི་ཡེ་ཤེས་ཆགས་པ་མེད་པ་ཐོས་ན་མོས་ཤིང་ཡིད་ཆེས་ཏེ། ཐེ་ཚོམ་མི་ཟ་ནེམ་ནུར་མེད་ཅིང་མི་དངང་མི་སྐྲག་སྐྲག་པར་མི་འགྱུར་ཏེ། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་ལ་ཡང་མོས་པ་ཡིན་ནོ། །མ་འོངས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་དེ་དག་གི་ལུས་དང་། ལུས་ཀྱི་ལས་དང་། ལུས་ཀྱི་སྤྱོད་ལམ་ཡོངས་སུ་དག་པ་ཆགས་པ་མེད་ཅིང་སྒྲིབ་པ་མེད་པ། འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་རྗེས་སུ་སོང་བ་ལ་མོས་སོ། །མ་འོངས་པའི་དེ་བཞིན་གཤེགས་པ་དེ་དག་གི་ངག་གི་ལས་འཇིག་རྟེན་
གྱི་ཁམས་ཐམས་ཅད་དུ་ཁྱབ་པའི་དབྱངས་སྒྲ་བརྗོད་པ་ཆགས་པ་མེད་ཅིང་སྒྲིབ་པ་མེད་པ་ལ་བསམ་གྱིས་མི་ཁྱབ་པ་ཐམས་ཅད་དང་། སངས་རྒྱས་ཀྱི་སྒྲ་སྐད་དང་། དབྱངས་དང་། ཆོས་ཀྱི་སྒོ་ཚད་མེད་པ་བསྟན་པ། ཐམས་ཅད་ཀྱི་རྗེས་སུ་སོང་བ་ལ་མོས་སོ། །མ་འོངས་པའི་དེ་བཞིན་
གཤེགས་པ་དེ་དག་གི་སེམས་ཀྱིས་ལས་སུ་དུས་ཐམས་ཅད་དང་། ཞིང་ཐམས་ཅད་དང་། སངས་རྒྱས་ཐམས་ཅད་དང་། ཆོས་ཐམས་ཅད་དང་། སེམས་ཅན་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། ཉན་ཐོས་དང་རང་སངས་རྒྱས་ཐམས་ཅད་དང་། འགྲོ་བ་ཐམས་ཅད་
ཀྱི་ལས་ཀྱི་རྣམ་པར་སྨིན་པ་ཤིན་ཏུ་རྣམ་པར་ཕྱེ་བ་རྣམ་པར་འབྱེད་པ་ལ་མོས་སོ། །མ་འོངས་པའི་དེ་བཞིན་གཤེགས་པ་དེ་དག་གི་འོད་ཟེར་གྱི་དྲ་བ་བཀོད་པ་ཆགས་པ་མེད་ཅིང་སྒྲིབ་པ་མེད་པ་ལ་ཡང་དག་པར་མོས་ཤིང་ཡིད་ཆེས་ཏེ། ཐེ་ཚོམ་མི་ཟ་ནེམ་ནུར་མེད་ཅིང་མི་དངང་མི་སྐྲག་སྐྲག་
པར་མི་འགྱུར་ཏེ། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་ལ་མོས་པ་ཡིན་ནོ། །སེམས་ཅན་གཞན་དག་ཀྱང་མོས་པའི་ཆོས་ཉིད་རྣམ་པ་འདི་ལྟ་བུ་ཡང་དག་པར་འཛིན་དུ་འཇུག་གོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན་མ་འོངས་པའི་དུས་ལ་དེ་
བཞིན་གཤེགས་པའི་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པ་འཇུག་པ་ཞེས་བྱ་སྟེ། དེ་ལ་དེ་ཡོད་དོ། །སྙིང་རྗེ་ཆེན་པོའི་སྟོབས་དང་། སྨོན་ལམ་ཡང་དག་པར་འཕགས་པའི་ཏིང་ངེ་འཛིན་ཤིན་ཏུ་བསྒོམས་པ་དང་། སེང་གེ་རྣམ་པར་བསྒྱིངས་པའི་གཟུངས་ལ་མཁས་པས་

དེ་བཞིན་གཤེགས་པ་མ་འོངས་པའི་དེ་བཞིན་གཤེགས་པ་ཐམས་ཅད་ཀྱི་མཚན་ཐ་དད་པ་དང་། ཚེའི་ཚད་ཐ་དད་པ་གོ་རིམས་བཞིན་དུ་བརྡ་སྤྲད་པའི་མཐའ་ནི་མི་རྟོགས་སོ། །དེ་བཞིན་དུ་མ་འོངས་པའི་བྱང་ཆུབ་སེམས་དཔའ་རྣམས་དང་། ཉན་ཐོས་རྣམས་དང་། རང་སངས་རྒྱས་རྣམས་དང་། སེམས་ཅན་རྣམས་
དང་། སེམས་ཅན་གྱི་སྤྱོད་པ་རྣམས་དང་། སེམས་ཅན་གྱི་ལས་རྣམས་དང་། སེམས་ཅན་གྱི་རྣམ་པར་སྨིན་པ་སོ་སོར་མྱོང་བ་རྣམས་དང་། དེ་བཞིན་དུ་མ་འོངས་པའི་བསྐལ་པ་ཐམས་ཅད་དེ། བསྐལ་པ་གང་དག་སངས་རྒྱས་དང་བཅས་པ་དག་དང་། གང་དག་སངས་རྒྱས་མེད་པ་དག་དང་། བསྐལ་
པ་གང་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་འབྱུང་བར་འགྱུར་བའི་བསྐལ་པ་དེ་དག་གོ་རིམས་བཞིན་དུ་བརྡ་སྤྲོད་པའི་མཐའ་ནི་མི་རྟོགས་སོ། །དེ་བཞིན་དུ་མ་འོངས་པའི་འཇིག་རྟེན་གྱི་ཁམས་ཐམས་ཅད་ཀྱི་མིང་ཐ་དད་པ་དང་། གང་དག་
ཀུན་ནས་ཉོན་མོངས་པ་ཅན་དག་དང་། གང་དག་རྣམ་པར་དག་པ་དང་། གང་དག་ཆུང་བ་དག་དང་། གང་དག་ཆེར་གྱུར་པ་དག་དང་། གང་དག་ཕྲ་བ་དག་དང་། གང་དག་རགས་པ་དག་དང་། གང་དག་རྡུལ་ཕྲ་རབ་ལ་འཇུག་པའི་རྗེས་སུ་ཞུགས་པ་དག་དང་། གང་དག་སྤྱིའུ་ཚུགས་པ་དག་
དང་། གང་དག་འཐུན་པ་དག་དང་། གང་དག་ཕྱོགས་དང་། ཕྱོགས་མཚམས་རྣམ་པར་གཞག་པ་དང་། མིག་འཕྲུལ་རྣམ་པར་དབྱེ་བ་ལ་འཇུག་པའི་རྗེས་སུ་ཞུགས་པ་མ་འོངས་པའི་འཇིག་རྟེན་གྱི་ཁམས་དེ་དག་ཐམས་ཅད་གོ་རིམས་བཞིན་དུ་བརྡ་སྤྲོད་པའི་མཐའ་ནི་མི་རྟོགས་སོ། །དེ་ལ་དེ་བཞིན་
གཤེགས་པ་ལུང་བསྟན་པ་ཐམས་ཅད་ལ་རྨོངས་པ་མེད་དེ། ལག་མཐིལ་དང་སོར་མོ་ལྔ་མཐོང་བའི་ཚུལ་དུ་དེ་བཞིན་གཤེགས་པའི་ཡེ་ཤེས་ཀྱིས་ཐམས་ཅད་ཤེས་ཏེ། བུ་མོ་འདི་ནི་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་བདུན་པའོ། །བུ་མོ་གཞན་ཡང་བྱང་ཆུབ་སེམས་དཔའ་
བྱང་ཆུབ་སེམས་དཔའི་སྤྱད་པ་སྤྱོད་པ་ན་ད་ལྟར་བྱུང་བའི་སངས་རྒྱས་རྣམས་ཀྱི་ཡེ་ཤེས་ཆགས་པ་མེད་པ་ཐོས་ན་མོས་ཤིང་ཡིད་ཆེས་ཏེ། ཐེ་ཚོམ་མི་ཟ་ནེམ་ནུར་མེད་ཅིང་མི་དངང་མི་སྐྲག་སྐྲག་པར་མི་འགྱུར་ཏེ། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་ལ་ཡང་མོས་པ་ཡིན་ནོ། །ད་ལྟར་བྱུང་བའི་

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་ལུས་ཀྱི་ལས་དང་། ལུས་ཀྱི་སྤྱོད་ལམ་ཡོངས་སུ་དག་པ་ཆགས་པ་མེད་ཅིང་སྒྲིབ་པ་མེད་པ་འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་རྗེས་སུ་སོང་བ་ལ་མོས་སོ། །ད་ལྟར་བྱུང་བའི་དེ་བཞིན་གཤེགས་པ་
དེ་དག་གི་ངག་གི་ལས་འཇིག་རྟེན་གྱི་ཁམས་ཐམས་ཅད་དུ་ཁྱབ་པའི་དབྱངས་སྒྲ་བརྗོད་པ་ཆགས་པ་མེད་ཅིང་སྒྲིབ་པ་མེད་ལ་བསམ་གྱིས་མི་ཁྱབ་པ་ཐམས་ཅད་དང་། སངས་རྒྱས་ཀྱི་སྒྲ་སྐད་དང་། དབྱངས་དང་། ཆོས་ཀྱི་སྒོ་ཚད་མེད་པ་བསྟན་པ་ཐམས་ཅད་ཀྱི་རྗེས་སུ་སོང་བ་ལ་མོས་སོ། །
ད་ལྟར་བྱུང་བའི་དེ་བཞིན་གཤེགས་པ་དེ་དག་གི་སེམས་ཀྱི་ལས་དུས་ཐམས་ཅད་དང་། ཞིང་ཐམས་ཅད་དང་། ཆོས་ཐམས་ཅད་དང་། སེམས་ཅན་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་དང་། འགྲོ་བ་ཐམས་ཅད་ཀྱི་ལས་
ཀྱི་རྣམ་པར་སྨིན་པ་ཤིན་ཏུ་རྣམ་པར་ཕྱེ་བ། རྣམ་པར་འབྱེད་པ་ལ་མོས་སོ། །ད་ལྟར་བྱུང་བའི་དེ་བཞིན་གཤེགས་པ་དེ་དག་གི་འོད་ཟེར་གྱི་དྲ་བ་བཀོད་པ་ཆགས་པ་མེད་ཅིང་སྒྲིབ་པ་མེད་པ་ལ་ཡང་མོས་ཤིང་ཡིད་ཆེས་ཏེ། ཐེ་ཚོམ་མི་ཟ་ནེམ་ནུར་མེད་ཅིང་མི་དངང་མི་སྐྲག་སྐྲག་པར་མི་འགྱུར་
ཏེ། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་ལ་ཡང་མོས་པ་ཡིན་ནོ། །སེམས་ཅན་གཞན་དག་ཀྱང་མོས་པའི་ཆོས་ཉིད་རྣམ་པ་འདི་ལྟ་བུ་ཡང་དག་པར་འཛིན་དུ་འཇུག་གོ། །དེ་ཆོས་ཡང་དག་པར་བླངས་པ་འདི་དང་ལྡན་པས་བྱང་ཆུབ་ཐོབ་པ་ན། ད་ལྟར་བྱུང་བའི་དུས་ལ་དེ་བཞིན་གཤེགས་
པའི་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པ་འཇུག་པ་ཞེས་བྱ་སྟེ། དེ་ལ་དེ་ཡོད་དོ། །ཤིན་ཏུ་དཀར་བ་དྲི་མ་མེད་པའི་ཕྱག་རྒྱའི་ཏིང་ངེ་འཛིན་ཤིན་ཏུ་བསྒོམས་པ་དང་། རྡོ་རྗེའི་དཀྱིལ་འཁོར་གྱི་གཟུངས་ལ་མཁས་པའི་དེ་བཞིན་གཤེགས་པ་ད་ལྟར་བྱུང་བའི་དེ་བཞིན་གཤེགས་
པ་ཐམས་ཅད་ཀྱི་མཚན་ཐ་དད་པ་དང་། ཚེའི་ཚད་ཐ་དད་པ་གོ་རིམས་བཞིན་དུ་བརྡ་སྤྲོད་པའི་མཐའ་ནི་མི་རྟོགས་སོ། །དེ་བཞིན་དུ་ད་ལྟར་བྱུང་བའི་བྱང་ཆུབ་སེམས་དཔའ་རྣམས་དང་། ཉན་ཐོས་རྣམས་དང་། རང་སངས་རྒྱས་རྣམས་དང་། སེམས་ཅན་རྣམས་དང་། སེམས་ཅན་གྱི་སྤྱོད་པ་རྣམས་དང་།

ལས་རྣམས་དང་། ལས་ཀྱི་རྣམ་པར་སྨིན་པ་སོ་སོར་མྱོང་བ་རྣམས་གོ་རིམས་བཞིན་དུ་བརྡ་སྤྲོད་པའི་མཐའ་ནི་མི་རྟོགས་སོ། །དེ་བཞིན་དུ་ད་ལྟར་བྱུང་བའི་བསྐལ་པ་ཐམས་ཅད་དེ། བསྐལ་པ་གང་དག་སངས་རྒྱས་དང་བཅས་པ་དག་དང་། གང་དག་སངས་རྒྱས་
མེད་པ་དག་དང་། བསྐལ་པ་གང་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་འབྱུང་བའི་བསྐལ་པ་དེ་དག་གོ་རིམས་བཞིན་དུ་བརྡ་སྤྲོད་པའི་མཐའ་ནི་མི་རྟོགས་སོ། །དེ་བཞིན་དུ་ད་ལྟར་བྱུང་བའི་འཇིག་རྟེན་གྱི་ཁམས་ཐམས་ཅད་ཀྱི་མིང་ཐ་དད་
པ་དང་། གང་དག་ཀུན་ནས་ཉོན་མོངས་པ་ཅན་དག་དང་། གང་དག་རྣམ་པར་དག་པ་དག་དང་། གང་དག་ཆུང་བ་དག་དང་། གང་དག་ཆེར་གྱུར་པ་དག་དང་། གང་དག་ཕྲ་བ་དག་དང་། གང་དག་རགས་པ་དག་དང་། གང་དག་རྡུལ་ཕྲ་རབ་ལ་རབ་ཏུ་འཇུག་པའི་རྗེས་སུ་ཞུགས་
པ་དག་དང་། གང་དག་སྤྱིའུ་ཚུགས་པ་དག་དང་། གང་དག་འཐུན་པ་དག་དང་། གང་དག་ཕྱོགས་དང་ཕྱོགས་མཚམས་རྣམ་པར་གཞག་པ་དག་དང་། མིག་འཕྲུལ་རྣམ་པར་དབྱེ་བ་ལ་འཇུག་པའི་རྗེས་སུ་ཞུགས་པ་ད་ལྟར་བྱུང་བའི་འཇིག་རྟེན་གྱི་ཁམས་དེ་དག་ཐམས་ཅད་གོ་རིམས་བཞིན་
དུ་བརྡ་སྤྲོད་པའི་མཐའ་ནི་མི་རྟོགས་སོ། །དེ་ལ་དེ་བཞིན་གཤེགས་པ་ལུང་བསྟན་པ་ཐམས་ཅད་ལ་རྨོངས་པ་མེད་དེ། ལག་མཐིལ་དང་སོར་མོ་ལྔ་མཐོང་བའི་ཚུལ་དུ་དེ་བཞིན་གཤེགས་པའི་ཡེ་ཤེས་ཀྱིས་ཐམས་ཅད་ཤེས་ཏེ། བུ་མོ་འདི་ནི་དེ་བཞིན་གཤེགས་པའི་སངས་རྒྱས་ཀྱི་
ཆོས་མ་འདྲེས་པ་བཅྭ་བརྒྱད་པའོ། །བཅྭ་བརྒྱད་པོ་འདི་དག་ལ་སོགས་པ་སངས་རྒྱས་ཀྱི་ཆོས་མ་འདྲེས་པ་ཐམས་ཅད་ཐོབ་སྟེ་ཐམས་ཅད་གང་ཞེ་ན་འདི་ལྟ་སྟེ། ལུས་ཚད་མེད་པ་དང་། ཐམས་ཅད་ཟིལ་གྱིས་གནོན་ཅིང་ཐམས་ཅད་དུ་ཁྱད་པར་དུ་འཕགས་པའི་ཕྱིར་སྤྱི་གཙུག་བལྟར་མི་མཐོང་བ་
དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་དང་། ལུས་རྩི་སྨན་དང་འདྲ་བའི་ཕྱིར་མཐོང་མ་ཐག་ཏུ་སེམས་ཅན་རྣམས་ཀྱི་སྐྱོན་ཞི་བར་བྱེད་པ་དང་། ཐམས་ཅད་དུ་ཁ་ན་མ་ཐོ་བ་མེད་པས་འཁོར་ཐམས་ཅད་ལས་མངོན་པར་འཕགས་པ་དང་། མི་འཇིགས་པ་རབ་ཏུ་ཐོབ་པས་

བག་ཚ་བ་མེད་པ་དང་། ཡང་དག་པར་སྦྱོར་བས་སློབ་མ་བསམ་པ་ཅན་དང་། གདམས་ངག་ཅན་དང་རྗེས་སུ་བསྟན་པ་དང་། འཐུན་པས་སློབ་མ་མི་ཕྱེད་པ་དང་། སེམས་ཅན་ཐམས་ཅད་ལ་མཚུངས་པར་གནས་པས་སློབ་མ་ཤིན་ཏུ་དུལ་བ་དང་། ཆོས་བསྟན་པ་ལ་ཐེ་ཚོམ་མེད་པས་
སྤོབས་པ་མྱུར་བ་དང་། གླེང་བ་མེད་པས་སེམས་ཅན་ཐམས་ཅད་ཚིམ་པར་བྱེད་པ་དང་། དོན་ཡོད་པའི་ཆོས་སྟོན་པ་དང་། གདུལ་བྱ་རྣམས་ཀྱི་དབང་པོ་ཡོངས་སུ་སྨིན་པས་འཁོར་ཐམས་ཅད་རྩེ་གཅིག་ཏུ་སེམས་པ་ལ་སངས་རྒྱས་ཀྱི་སྒྲ་སྐད་འབྱིན་པ་དང་། ཆོ་འཕྲུལ་བསམ་གྱིས་མི་
ཁྱབ་པས་འཁོར་གྱི་དཀྱིལ་འཁོར་ཐམས་ཅད་ཀྱིས་མངོན་དུ་ལྟ་བ་དང་། དེ་བཞིན་གཤེགས་པའི་སྐུ་བསོད་ནམས་ཚད་མེད་པ་བརྟན་པའི་ཕྱིར་བལྟ་བས་མི་ངོམས་པ་དང་། ཡང་དག་པར་ཁོང་དུ་ཆུད་པས་འབྲས་བུ་ཡོད་པའི་ཆོས་སྟོན་པ་དང་། སྤྱོད་ལམ་མི་འཁྲུགས་པས་གླང་པོའི་ལྟ་
སྟངས་ཀྱིས་ལྟ་བ་དང་། སྤྲོ་བ་ཆེ་བས་སེང་གེ་ལྟར་རྣམ་པར་བསྒྱིངས་པ་དང་། ལུས་ཀྱི་ལས་ཡེ་ཤེས་སྔོན་དུ་འགྲོ་བས་དོན་ཡོད་པར་རྣམ་པར་འགྲོ་བ་དང་། ངག་གི་ལས་ཡེ་ཤེས་སྔོན་དུ་འགྲོ་བས་ངག་ལ་དབང་བ་དང་། ཡིད་ཀྱི་ལས་ཡེ་ཤེས་སྔོན་དུ་འགྲོ་བས་ཀུན་ནས་མིག་དང་ལྡན་པ་དང་།
སྤོབས་པ་མྱུར་བས་གཟུང་བར་འོས་པའི་ཚུལ་དང་ལྡན་པ་དང་། བླ་ན་མེད་པའི་སྦྱིན་གནས་སུ་གྱུར་པའི་རྙེད་པའི་མཆོག་དང་། གྲགས་པའི་མཆོག་དང་ལྡན་པ་དང་། ཆོས་ཀྱི་དབྱིངས་ཀྱིས་ཀླས་ཤིང་མཐས་གཏུགས་པས་བསོད་ནམས་ཟད་མི་ཤེས་པ་དང་། མཐུ་བོ་ཆེ་ཆེན་པོའི་ལུས་
དང་། སྟོབས་བཅུ་དང་། མི་འཇིགས་པའི་མཆོག་ཐོབ་པས་རྫི་བ་མེད་པ་དང་། སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པས་སེམས་ཅན་ལ་བདེ་བ་བསྐྱེད་པ་ལས་མི་ལྡོག་ཅིང་འཁྲུགས་པ་མེད་ལ་བྲེལ་ཕོངས་པ་མེད་པ་དང་། འཇིག་རྟེན་ཐམས་ཅད་
ཀྱི་སྟོན་པར་གྱུར་པས། ཆོས་དང་གཙུག་ལག་མང་པོ་ཤེས་པ་དང་། ཆོས་ཀྱི་སྐུས་རབ་ཏུ་ཕྱེ་བས་ཚེ་དཔག་ཏུ་མེད་པ་དང་། ཤིན་ཏུ་མུར་ཐུག་ཅིང་མཐས་ཀླས་པས་མཐོང་བ་དང་། རིག་པ་དང་། བསྙེན་བཀུར་བྱས་པ་དང་། དྲན་པ་དང་། ཐོས་པ་དོན་ཡོད་པ་དང་། དུས་གསུམ་མཉམ་

པ་ཉིད་དུ་ཁོང་དུ་ཆུད་པས་ཤེས་རབ་མི་འཁྲུགས་པ་དང་། ཆོས་སྨྲ་ཞིང་ཉེས་པར་སྨྲ་བ་མེད་པས་གཏམ་རྒྱུན་ཆགས་པ་དང་། མི་དགེ་བའི་ཆོས་ཐམས་ཅད་མ་ལུས་པ་སྤངས་པས་བག་ཆགས་ཐམས་ཅད་ཡང་དག་པར་བཅོམ་པ་དང་། སངས་རྒྱས་ཀྱི་ཆོས་རང་བྱུང་
བས་སློབ་དཔོན་མེད་པ་དང་། སངས་རྒྱས་ཀྱི་ཆོས་མ་ལུས་པར་ཁོང་དུ་ཆུད་པས་རྣམ་པ་ཐམས་ཅད་ཤེས་པ་སྟེ། སངས་རྒྱས་ཀྱི་ཆོས་མ་འདྲེས་པ་འདི་དག་ཐམས་ཅད་རབ་ཏུ་འཐོབ་བོ།། །།བམ་པོ་བཞི་པ་སྟེ་ཐ་མ། དེ་ནས་བཅོམ་ལྡན་འདས་ལ་བུ་མོ་རིན་ཆེན་གྱིས་འདི་སྐད་
ཅེས་གསོལ་ཏོ། །བཅོམ་ལྡན་འདས་གང་དེ་བཞིན་གཤེགས་པའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་འདི་དག་སྔོན་དགེ་བའི་རྩ་བའི་ཚོགས་གང་དག་ལ་ཞུགས་ནས་དེ་བཞིན་གཤེགས་པའི་སྐུ་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་མངོན་པར་གྲུབ། དེ་སྐད་ཅེས་གསོལ་
པ་དང་། བཅོམ་ལྡན་འདས་ཀྱིས་བུ་མོ་རིན་ཆེན་ལ་འདི་སྐད་ཅེས་བཀའ་སྩལ་ཏོ། །བུ་མོ་སྔོན་དགེ་བའི་རྩ་བའི་ཚོགས་ཚད་མེད་གྲངས་མེད་པ་དག་ལ་ཞུགས་པས་དེ་བཞིན་གཤེགས་པའི་སྐུ་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་མངོན་པར་གྲུབ་སྟེ། དེ་དག་ལས་ཆུང་ཟད་ཙམ་ཞིག་
བསྟན་པར་བྱའོ། །དེ་བཞིན་གཤེགས་པའི་སྐྱེས་བུ་ཆེན་པོའི་མཚན་ཞབས་ཤིན་ཏུ་གནས་པ་འདི་ནི་སྔོན་དམ་བཅས་པ་ལ་བརྟན་པས་མངོན་པར་གྲུབ་བོ། །དེ་བཞིན་གཤེགས་པའི་སྐྱེས་བུ་ཆེན་པོའི་མཚན་ཞབས་ཀྱི་མཐིལ་འཁོར་ལོའི་མཚན་དང་ལྡན་པ་འདི་ནི་སྔོན་སྦྱིན་པ་སྣ་ཚོགས་
བསགས་པས་མངོན་པར་གྲུབ་བོ། །ཞབས་ཀྱི་རྟིང་པ་ཡངས་ཤིང་ཞབས་བྱིན་གྱིས་མཐོ་བ་ནི་སྔོན་སེམས་ཅན་གཞན་དག་ཁྱད་དུ་མ་བསད་པས་གྲུབ་བོ། །སོར་མོ་རིང་བ་ནི་སྔོན་སེམས་ཅན་རྣམས་ཆོས་ཀྱིས་བསྲུངས་ཤིང་བསྐྱབས་ཏེ་སྦས་པ་བྱས་པས་གྲུབ་བོ། །ཕྱག་དང་ཞབས་
དྲ་བར་འབྲེལ་བ་ནི་སྔོན་གཞན་གྱི་གཡོག་འཁོར་མ་ཕྱེ་བས་གྲུབ་བོ། །ཕྱག་དང་ཞབས་གཞོན་ཞིང་འཇམ་པ་ནི་སྔོན་བགོ་བ་སྣ་ཚོགས་བྱིན་པས་གྲུབ་བོ། །བདུན་མཐོ་བ་ནི་སྔོན་བཟའ་བ་དང་བཏུང་བ་རྒྱ་ཆེན་པོ་བྱིན་པས་གྲུབ་བོ། །བྱིན་པ་རི་དགས་ཨེ་ནེ་ཡའི་བྱིན་པ་ལྟ་བུ་ནི་སྔོན་སངས་

རྒྱས་ཀྱི་ཆོས་ཡོངས་སུ་བཟུང་བས་གྲུབ་བོ། །གསང་བའི་གནས་སྦུབས་སུ་ནུབ་པ་ནི་སྔོན་གསང་བའི་ཚིག་བསྲུངས་ཤིང་འཁྲིག་པའི་ཆོས་སྤངས་པས་གྲུབ་བོ། །རོ་སྟོད་སེང་གེའི་རོ་སྟོད་ལྟ་བུ་ནི་སྔོན་དགེ་བའི་ལས་རྒྱ་ཆེན་པོ་མཐར་གྱིས་སྤྱད་པས་གྲུབ་བོ། །ཐལ་གོང་རྒྱས་པ་ནི་སྔོན་
དགེ་བའི་ཆོས་ཡང་དག་པར་སྤྱད་པས་གྲུབ་བོ། །དཔུང་མགོ་ཤིན་ཏུ་ཟླུམ་པ་ནི་སྔོན་མི་འཇིགས་པས་གཞན་དབུགས་ཕྱུང་བས་གྲུབ་བོ། །ཕྱག་མ་བཏུད་ཅིང་རིང་བ་ནི་སྔོན་གཞན་གྱིས་ཅི་བྱའོ་ཅོག་བྱེད་པ་ལ་སྤྲོ་བས་གྲུབ་བོ། །སྐུ་རྣམ་པར་དག་པ་ནི་སྔོན་དགེ་བ་བཅུའི་ལས་ཀྱི་ལམ་ལ་
ངོམས་མི་མྱོང་བར་ཡང་དག་པར་སྤྱད་པས་གྲུབ་བོ། །མགུར་དུང་ལྟ་བུ་ནི་སྔོན་ནད་པ་རྣམས་ལ་སྨན་སྣ་ཚོགས་བྱིན་པས་གྲུབ་བོ། །འགྲམ་པ་སེང་གེའི་འགྲམ་པ་ལྟ་བུ་ནི་སྔོན་དགེ་བའི་རྩ་བ་ལ་སྤྱོད་པ་ཡོངས་སུ་རྫོགས་པར་བྱས་པས་གྲུབ་བོ། །ཚེམས་བཞི་བཅུར་ཚང་བ་ནི་སྔོན་སེམས་
ཅན་ལ་བསམ་པ་མཉམ་པར་སྤྱོད་པས་གྲུབ་བོ། །ཚེམས་ཐགས་བཟང་བ་ནི་སྔོན་སེམས་ཅན་མི་འདུམ་པ་རྣམས་ཀྱི་བསྡུམས་བྱས་པས་གྲུབ་བོ། །ཚེམས་མཉམ་པ་ནི་སྔོན་ཡིད་དུ་འོང་བའི་ནོར་བུ་བྱིན་པས་གྲུབ་བོ། །ཚེམས་མཆེ་བ་དཀར་བ་ནི། སྔོན་ལུས་དང་ངག་དང་ཡིད་ཀྱི་
ལས་ཤིན་ཏུ་བསྲུངས་པས་གྲུབ་བོ། །ལྗགས་ཤིན་ཏུ་རིང་བ་ནི་སྔོན་བདེན་པའི་ཚིག་ཀུན་དུ་བསྲུངས་པས་གྲུབ་བོ། །རོ་བྲོ་བའི་མཆོག་དང་ལྡན་པ་ནི་སྔོན་བསོད་ནམས་ཚད་མེད་པས་བརྟན་ཅིང་ཡིད་དུ་འོང་བའི་རོ་བྲོ་བ་བྱིན་པས་གྲུབ་བོ། །ཚངས་པའི་དབྱངས་དང་ཀ་ལ་པིང་ཀའི་སྒྲ་
དབྱངས་དང་ལྡན་པ་ནི་སྔོན་སེམས་ཅན་ལ་འཇམ་པའི་ཚིག་སྨྲས་པ་དང་། ཚིག་བསྡམས་པ་དང་། ཀུན་དགའ་བའི་ཚིག་བསྒྲགས་པས་གྲུབ་བོ། །སྤྱན་མཐོན་མཐིང་དང་ལྡན་པ་ནི་སྔོན་བྱམས་པ་དང་ལྡན་ཞིང་ཐམས་ཅད་བསྲུངས་པས་གྲུབ་བོ། །སྤྱན་གྱི་རྫི་མ་བའི་རྫི་མ་ལྟ་བུ་ནི་
སྔོན་བསམ་པ་སྒྱུ་མེད་པས་གྲུབ་བོ། །དཔྲལ་བའི་སྨིན་མཚམས་ཀྱི་སྤུ་ཤིན་ཏུ་དཀར་བ་ནི་སྔོན་བསྔགས་པར་འོས་པ་རྣམས་ཀྱི་བསྔགས་པ་བརྗོད་པས་གྲུབ་བོ། །དབུ་གཙུག་ཏོར་དང་ལྡན་པ་ནི་སྔོན་བླ་མ་ལ་གུས་ཤིང་འདུད་པས་གྲུབ་བོ། །པགས་པ་སྲབ་པ་ནི་སྔོན་ཆོས་ཡང་དག་པར་སྡུད་

པའི་སེམས་ལས་སུ་རུང་བས་གྲུབ་བོ། །པགས་པའི་མདོག་གསེར་འདྲ་བ་ནི་སྔོན་ཡིད་དུ་འོང་བའི་གོས་དང་མལ་སྟན་བྱིན་པས་གྲུབ་བོ། །སྤུའི་ཁུང་བུ་ནས་བ་སྤུ་རེ་རེ་སྐྱེས་པ་ནི་སྔོན་འདུ་འཛི་ཡོངས་སུ་སྤངས་པས་གྲུབ་བོ། །སྤུའི་རྩེ་མོ་གཡས་སུ་འཁྱིལ་བ་ནི་སྔོན་
མཁན་པོ་དང་། སློབ་དཔོན་དང་། དགེ་བའི་བཤེས་གཉེན་གྱི་གདམས་ངག་འཐུན་པར་འཛིན་པས་གྲུབ་བོ། །དབུ་སྐྲ་ཨིན་དྲ་ནཱི་ལ་ལྟ་བུ་ནི་སྔོན་སྲོག་ཆགས་ཐམས་ཅད་ལ་སྙིང་བརྩེ་ཞིང་རྡོ་དབྱུག་དང་མཚོན་ཆ་བོར་བས་གྲུབ་བོ། །ཤིང་ནྱ་གྲོ་དྷ་ལྟར་ཆུ་ཞེང་གབ་པ་ནི་
སྔོན་བདག་དང་སེམས་ཅན་གཞན་དག་ཀྱང་ཏིང་ངེ་འཛིན་ལ་སྦྱོར་བས་གྲུབ་བོ། །དེ་བཞིན་གཤེགས་པའི་སྐྱེས་བུ་ཆེན་པོའི་མཚན་མཐུ་བོ་ཆེ་ཆེན་པོའི་ལུས་ཀུན་ནས་མཛེས་པ་འདི་ནི་སྔོན་དེ་བཞིན་གཤེགས་པའི་སྐུ་གཟུགས་བྱེད་པ་དང་། མཆོད་རྟེན་ཞིག་པ་བཅོས་པ་
དང་། གཞན་འཇིགས་པ་དག་དབུགས་ཕྱུང་བ་དང་། སེམས་ཅན་མི་འདུམ་པའི་བསྡུམས་བྱས་པས་གྲུབ་སྟེ། བུ་མོ་སྔོན་དགེ་བའི་རྩ་བའི་ཆོས་ཚད་མེད་གྲངས་མེད་པ་འདི་དག་སྤྱད་པས་དེ་བཞིན་གཤེགས་པའི་སྐུ་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་མངོན་པར་
གྲུབ་བོ། །དེ་ནས་བཅོམ་ལྡན་འདས་ལ་བུ་མོ་རིན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་དེ་དེ་བཞིན་གཤེགས་པས་སྔོན་གྱི་རྒྱུ་ལས་བྱུང་བའི་དགེ་བའི་རྩ་བ་ལས་བརྩམས་ཏེ། སངས་རྒྱས་ཀྱི་ཆོས་ཐམས་ཅད་བཀའ་སྩལ་པ་འདི་ནི་ངོ་མཚར་ཏོ། །
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བུ་མོ་རིན་ཆེན་ལ་འདི་སྐད་ཅེས་བཀའ་སྩལ་ཏོ། །བུ་མོ་དེ་དེ་བཞིན་ཏེ། བུ་མོ་དེ་བཞིན་གཤེགས་པས་སངས་རྒྱས་ཀྱི་ཆོས་ཐམས་ཅད་བསྟན་པ་འདི་ལས་བསྟན་ཏོ། །བུ་མོ་གང་དག་དེ་བཞིན་གཤེགས་པའི་སྔོན་གྱི་
རྒྱུ་ལས་བྱུང་བའི་དགེ་བའི་རྩ་བ་ལས་བརྩམས་ཏེ། །སངས་རྒྱས་ཀྱི་ཆོས་ཐམས་ཅད་བསྟན་པ་འདི་ཐོས་ལ་ཐོས་ནས་ཀྱང་དེ་བཞིན་ཉིད་དུ་གྲུབ་པ་དེ་དག་ཐམས་ཅད་སངས་རྒྱས་ཀྱི་ཆོས་ཐམས་ཅད་ཀྱི་རྣམ་པའི་མཆོག་ཐམས་ཅད་དང་ལྡན་པར་འགྱུར་བའི་བྱང་ཆུབ་སེམས་

དཔའ་རྙེད་པ་ལེགས་པར་རྙེད་པ་དེ་དག་ལ་ལྟོས། དེ་བཞིན་གཤེགས་པའི་སྟོབས་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་དང་། མཚན་རབ་ཏུ་དབྱེ་བ་བསྟན་པའི་ཆོས་ཀྱི་སྒོའི་ལེའུ་འདི་བཅོམ་ལྡན་འདས་ཀྱིས་བཤད་པ་ན་ཕྱོགས་བཅུའི་འཇིག་རྟེན་
གྱི་ཁམས་ཐམས་ཅད་རབ་ཏུ་གཡོས་ཏེ། སྣང་བ་ཆེན་པོས་ཁྱབ་པར་གྱུར་ནས་སེམས་ཅན་ཚད་མེད་གྲངས་མེད་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་ཉི་ཁྲི་ལྔ་སྟོང་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །སྟེང་
གི་བར་སྣང་ལས་ཀྱང་ལྷ་བརྒྱ་སྟོང་གིས་མེ་ཏོག་གི་ཆར་རབ་ཏུ་ཕབ་སྟེ། སིལ་སྙན་ཡང་དཀྲོལ་ནས་གང་དེ་བཞིན་གཤེགས་པའི་སྟོབས་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་དང་། མཚན་རབ་ཏུ་དབྱེ་བ་བསྟན་པའི་ཆོས་ཀྱི་སྒོའི་ལེའུ་འདི་ཐོས་
ལ་ཐོས་ནས་ཀྱང་མོས་ཤིང་ཡིད་ཆེས་ཏེ། འཛིན་ཅིང་དེ་བཞིན་ཉིད་དུ་སྒྲུབ་པའི་སེམས་ཅན་དེ་དག་ནི་དགེ་བའི་རྩ་བ་ངན་ངོན་དང་ལྡན་པར་མི་འགྱུར་ཏེ། དེ་དག་ནི་ཇི་ལྟར་ད་ལྟར་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞིན་དུ་ལྷར་བཅས་
པའི་འཇིག་རྟེན་གྱི་མདུན་དུ་སེང་གེའི་སྒྲ་སྒྲོགས་པར་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་འདི་ནི་སེམས་ཅན་དམན་པ་ལ་མོས་ཤིང་ནན་ཏན་ལ་མི་གནས་པ་རྣམས་ཀྱི་སུག་པར་མཆི་བར་མི་འགྱུར་གྱི་བཅོམ་ལྡན་འདས་སྤྱོད་པ་ཡོངས་སུ་དག་པ་རྣམས་ཀྱི་
སུག་པར་མཆི་བར་འགྱུར་ཏེ། བཅོམ་ལྡན་འདས་ཡོངས་སུ་དག་པར་སྤྱོད་པ་དང་། ཆོས་སྤྱོད་པའི་སེམས་ཅན་རྣམས་ནི་ཆོས་འདི་ལ་དགའ་བར་འགྱུར་ཏེ། ཡིད་ལ་འབབ་ཅིང་མངོན་པར་དགའ་བར་ཡང་འགྱུར་རོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་
བཅོམ་ལྡན་འདས་ལ་བུ་མོ་རིན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་སྔོན་གྱི་རྒྱུ་ལས་བྱུང་བའི་དགེ་བའི་རྩ་བའི་སངས་རྒྱས་ཀྱི་ཆོས་ཐམས་ཅད་བཀའ་སྩལ་པ་ནི་ངོ་མཚར་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཆོས་སྤྱོད་

པར་འགྱུར་བའི་ཆོས་སྤྱོད་པ་ནི་ཇི་ལྟ་བུ་ལགས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ཀྱི་ཆོས་སྤྱོད་པ་ལེགས་པར་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བུ་མོ་རིན་ཆེན་ལ་འདི་སྐད་ཅེས་བཀའ་སྩལ་ཏོ། །བུ་མོ་
བསམ་པ་རྣམ་པར་དག་པ་ནི་ཆོས་སྤྱོད་པའོ། །མཛའ་བ་བརྟན་པ་དང་། བྱས་པ་གཟོ་བ་དང་། བྱས་པ་ཤེས་པ་དང་། སྙིང་བརྩེ་བ་དང་བཅས་པ་དང་། སྐྱབས་སུ་སོང་བ་ཡོངས་སུ་མི་གཏོང་བ་དང་། ཉམ་ཆུང་བ་ལ་བཟོད་ཅིང་དང་དུ་ལེན་པ་དང་། གཏང་བར་དཀའ་བ་ཡོངས་
སུ་གཏོང་བ་དང་། ཕན་པའི་དངོས་པོ་དང་། ཕན་འདོགས་པའི་བློ་དང་། ངང་ཚུལ་ངན་པ་རྗེས་སུ་སྲུང་བ་དང་། ཆོས་ངེས་པར་སེམས་པ་དང་། ཆོས་ཀུན་དུ་སྲུང་བ་དང་། ཆོས་འདོད་པ་དང་། དམ་པའི་ཆོས་སྲུང་བ་དང་། དབེན་པ་དང་། གཅིག་པུར་དགའ་བ་དང་། དགོན་པའི་གནས་
ལ་ཡོངས་སུ་མི་སྐྱོ་བ་དང་། དགོན་པའི་ཡོན་ཏན་ལ་ཡོངས་སུ་འཇལ་བ་དང་། འདུ་འཛི་ཡོངས་སུ་སྤོང་བ་དང་། སེམས་ཅན་རྗེས་སུ་སྲུང་བ་དང་། འཁྲུལ་པ་ལ་ལྟ་བ་དང་། བྱམས་པ་ལ་སྦྱོར་བ་དང་། སྙིང་རྗེ་ཆེན་པོ་ལ་འཇུག་པ་དང་། དགའ་བས་ཆོས་ལ་དགའ་ཞིང་མཆོག་ཏུ་དགའ་
བ་དང་། བཏང་སྙོམས་ལ་བསམ་གཏན་འཆའ་བ་དང་། སེམས་ཅན་གཞན་དག་བྱང་ཆུབ་ཀྱི་སེམས་ལ་སྦྱོར་བ་དང་། ཐེག་པ་ཆེན་པོའི་བསྔགས་པ་སྨྲ་བ་དང་། ཁུར་བླངས་པ་ཁྱེར་བ་དང་། སེམས་མི་ཞུམ་པ་དང་། རུང་བའི་ཚོད་ཤེས་པ་དང་། ཚོར་བ་མེད་པ་དང་།
སྡིག་པ་མི་འདོད་པ་དང་། ཕྲག་དོག་མེད་པ་དང་། འདོད་པའི་འཐོབ་པ་སྤོང་བ་དང་། འཕགས་པའི་རིགས་ཆོག་ཤེས་པ་དང་། སྦྱངས་པའི་ཡོན་ཏན་དང་ཡོ་བྱད་བསྙུངས་པ་དང་། འཐབ་པ་མེད་པ་དང་། རྩོད་པ་མེད་པ་དང་། གནོད་སེམས་མེད་པ་དང་། ཁྲོ་བ་མེད་པ་དང་།
བཟོད་པ་དང་། དེས་པ་དང་། རྒྱུའི་བྱེད་པ་ཁོང་དུ་ཆུད་པ་དང་། ལས་ཀྱི་རྣམ་པར་སྨིན་པ་ལ་ཡིད་ཆེས་པ་དང་། དད་པ་དང་། ཚུལ་ཁྲིམས་དང་། ཐོས་པ་དང་། གཏོང་བ་དང་། ཁྲེལ་ཡོད་པ་དང་། ངོ་ཚ་ཤེས་པ་དང་། ཤེས་རབ་ཀྱི་ནོར་གྱི་རྗེས་སུ་འཇུག་པ་དང་། བླ་མ་ལ་གུས་

པ་དང་། དགེ་བའི་བཤེས་གཉེན་ལ་བསྟེན་པ་དང་། བཀའ་བློ་བདེ་བ་དང་། འཐུན་པར་འཛིན་པ་དང་། ང་རྒྱལ་མེད་པ་དང་། འདུད་པ་དང་། སེམས་དམའ་བ་དང་། བདག་ལ་མི་སྟོད་པ་དང་། གཞན་ལ་མི་སྨོད་པ་དང་། རང་གི་ཡོན་ཏན་མི་བརྗོད་པ་དང་། གཞན་གྱི་ཡོན་ཏན་
ལ་མི་སྨོད་པ་དང་། འདོད་ཆགས་ཀྱི་རྡུལ་འཕྱག་པ་དང་། ཞེ་སྡང་གི་ཐ་བ་རྣམ་པར་སྤང་བ་དང་། གཏི་མུག་གི་མུན་པ་མུན་ནག་མེད་པ་དང་། ང་རྒྱལ་བཅོམ་པ་དང་། སྤྱོད་ལམ་དང་སྤྱོད་པ་ལ་ནན་ཏན་བྱེད་པ་དང་། ཆོས་ལ་རིམ་གྲོ་བྱེད་དེ་དགའ་ཞིང་དང་ལ་མཆོག་ཏུ་དགའ་
བ་དང་། སངས་རྒྱས་ལ་མི་ཕྱེད་པ་དང་། ཆོས་ལ་མོས་པ་དང་། དགེ་འདུན་ལ་སྟོན་པ་ལྟར་འཛིན་པ་དང་། སྦྱིན་པ་དང་། དུལ་བ་དང་། སྡོམ་པ་དང་། ཁྱིམ་ནས་བྱུང་བ་དང་། ཚངས་པར་སྤྱོད་པ་ལ་གནས་པ་དང་། རྙེད་པ་དང་། མ་རྙེད་པ་དང་། གྲགས་པ་དང་། མ་གྲགས་པ་དང་
བསྟོད་པ་དང་། སྨད་པ་དང་། བདེ་བ་དང་། སྡུག་བསྔལ་གྱིས་མི་གཡོས་པ་དང་། འཇིག་རྟེན་གྱི་ཆོས་ལས་ཤིན་ཏུ་འདའ་བ་དང་། བྱམས་སྡང་ལ་མཚུངས་པར་ལྟ་བ་དང་། འདོར་ཏེ་གསོང་པོར་སྨྲས་པ་དང་། བཞིན་འཛུམ་པ་དང་། ཁྲོ་གཉེར་མེད་པ་དང་། ཚུལ་འཆོས་པ་མེད་པ་
དང་། ཁ་གསག་པ་མེད་པ་དང་། གཡོ་མེད་པ་དང་། སྒྱུ་མེད་པ་དང་། བཅོས་མ་མ་ཡིན་པ་དང་། བསམ་པ་ཤིན་ཏུ་དག་པ་དང་། སྦྱིན་པ་དང་། སྙན་པར་སྨྲ་བ་དང་། དོན་བྱེད་པ་དང་། དོན་འཐུན་པ་དང་། དགའ་བར་འགྱུར་བའི་ཆོས་ཉིད་དང་། སངས་རྒྱས་རྗེས་སུ་དྲན་
པ་དང་། ཆོས་རྗེས་སུ་དྲན་པ་དང་། དགེ་འདུན་རྗེས་སུ་དྲན་པ་དང་། གཏོང་བ་རྗེས་སུ་དྲན་པ་དང་། ཚུལ་ཁྲིམས་རྗེས་སུ་དྲན་པ་དང་། ལྷ་རྗེས་སུ་དྲན་པ་དང་། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་
རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་དང་། ཐབས་མཁས་པ་མངོན་པར་སྒྲུབ་པ་དང་། དགེ་བའི་རྩ་བ་ཐམས་ཅད་རྣམ་པར་དག་པ་དང་། སེམས་ཅན་རྣམས་ཀྱི་ལུས་དང་། ངག་དང་། སེམས་རྣམ་པར་དག་པར་བྱེད་པ་དང་། དགེ་བ་བཅུའི་ལས་ཀྱི་ལམ་སྲུང་

བ་དང་། མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་། གང་ཟག་མེད་པར་མོས་པ་དང་། སྟོང་པ་ཉིད་ངེས་པར་སེམས་པ་དང་། མཚན་མ་མེད་པ་ལ་གནས་པ་དང་། སྨོན་པ་
མེད་པ་ཤེས་པ་དང་། ཁམས་གསུམ་ལ་མི་གནས་པ་དང་། དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་ལ་འཇུག་པ་དང་། ཞི་གནས་དང་། ལྷག་མཐོང་གིས་སོ་སོར་
རྟོག་པ་ནི་ཆོས་སྤྱོད་པའོ། །བུ་མོ་གཞན་ཡང་ཆོས་སྤྱོད་པ་ནི་གང་ན་མིག་ལ་མི་སྤྱོད་པ་དང་། གཟུགས་ལ་མི་སྤྱོད་པ་དང་། གཟུགས་ཀྱི་མཚན་མ་ལ་མི་སྤྱོད་པ་དང་། རྣ་བ་ལ་མི་སྤྱོད་པ་དང་། སྒྲ་ལ་མི་སྤྱོད་པ་དང་། སྒྲའི་མཚན་མ་ལ་མི་སྤྱོད་པ་དང་། སྣ་ལ་མི་སྤྱོད་
པ་དང་། དྲི་ལ་མི་སྤྱོད་པ་དང་། དྲིའི་མཚན་མ་ལ་མི་སྤྱོད་པ་དང་། ལྕེ་ལ་མི་སྤྱོད་པ་དང་། རོ་ལ་མི་སྤྱོད་པ་དང་། རོའི་མཚན་མ་ལ་མི་སྤྱོད་པ་དང་། ལུས་ལ་མི་སྤྱོད་པ་དང་། རེག་པ་ལ་མི་སྤྱོད་པ་དང་། རེག་པའི་མཚན་མ་ལ་མི་སྤྱོད་པ་དང་། ཡིད་ལ་མི་སྤྱོད་པ་དང་། ཆོས་ལ་མི་སྤྱོད་
པ་དང་། ཆོས་ཀྱི་མཚན་མ་ལ་མི་སྤྱོད་པ་ནི་ཆོས་སྤྱོད་པའོ། །གཟུགས་ལ་མི་སྤྱོད་པ་དང་། གཟུགས་ཀྱི་མཚན་མ་ལ་མི་སྤྱོད་པ་དང་། གཟུགས་ཀྱི་མི་རྟག་པ་ལ་མི་སྤྱོད་པ་དང་། གཟུགས་ཀྱི་སྡུག་བསྔལ་བ་ལ་མི་སྤྱོད་པ་དང་། གཟུགས་ཀྱི་བདག་མེད་པ་ལ་མི་སྤྱོད་པ་དང་།
གཟུགས་ཀྱི་ཞི་བ་ལ་མི་སྤྱོད་པ་དང་། གཟུགས་ཀྱི་སྟོང་པ་ཉིད་ལ་མི་སྤྱོད་པ་དང་། གཟུགས་ཀྱི་མཚན་མ་མེད་པ་ལ་མི་སྤྱོད་པ་དང་། གཟུགས་ཀྱི་སྨོན་པ་མེད་པ་ལ་མི་སྤྱོད་པ་དང་། གཟུགས་ཀྱི་མངོན་པར་འདུ་བྱ་བ་མེད་པ་ལ་མི་སྤྱོད་པ་དང་། གཟུགས་ཀྱི་དབེན་པ་ལ་མི་
སྤྱོད་པ་དང་། གཟུགས་ཀྱི་རང་བཞིན་ལ་མི་སྤྱོད་པ་དང་། གཟུགས་ཀྱི་ཇི་ལྟ་བ་བཞིན་ལ་མི་སྤྱོད་པ་དང་། གཟུགས་ཀྱི་མ་སྐྱེས་པ་ལ་མི་སྤྱོད་པ་དང་། གཟུགས་ཀྱི་འབྱུང་བ་མེད་པ་ལ་མི་སྤྱོད་པ་དང་། གཟུགས་ཀྱི་གཞི་མེད་པ་ལ་མི་སྤྱོད་པ་དང་། གཟུགས་ཀྱི་གནས་མེད་པ་ལ་

མི་སྤྱོད་པ་དང་། གཟུགས་ཀྱི་དེ་བཞིན་ཉིད་ལ་མི་སྤྱོད་པ་ནི་ཆོས་སྤྱོད་པའོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མི་སྤྱོད་པ་ནི་ཆོས་སྤྱོད་པའོ། །རྣམ་པར་ཤེས་པ་མི་རྟག་པ་ལ་མི་སྤྱོད་པ་དང་། རྣམ་པར་ཤེས་པའི་སྡུག་
བསྔལ་བ་ལ་མི་སྤྱོད་པ་དང་། རྣམ་པར་ཤེས་པའི་བདག་མེད་པ་ལ་མི་སྤྱོད་པ་དང་། རྣམ་པར་ཤེས་པའི་ཞི་བ་ལ་མི་སྤྱོད་པ་དང་། རྣམ་པར་ཤེས་པའི་སྟོང་པ་ལ་མི་སྤྱོད་པ་དང་། རྣམ་པར་ཤེས་པའི་མཚན་མ་མེད་པ་ལ་མི་སྤྱོད་པ་དང་། རྣམ་པར་ཤེས་པའི་སྨོན་པ་མེད་པ་ལ་མི་སྤྱོད་
པ་དང་། རྣམ་པར་ཤེས་པའི་མངོན་པར་འདུ་བྱ་བ་མེད་པ་ལ་མི་སྤྱོད་པ་དང་། རྣམ་པར་ཤེས་པའི་དབེན་པ་ལ་མི་སྤྱོད་པ་དང་། རྣམ་པར་ཤེས་པའི་རང་བཞིན་ལ་མི་སྤྱོད་པ་དང་། རྣམ་པར་ཤེས་པའི་ཇི་ལྟ་བ་བཞིན་ལ་མི་སྤྱོད་པ་དང་། རྣམ་པར་ཤེས་པའི་མ་སྐྱེས་པ་ལ་མི་སྤྱོད་
པ་དང་། རྣམ་པར་ཤེས་པའི་འབྱུང་བ་མེད་པ་ལ་མི་སྤྱོད་པ་དང་། རྣམ་པར་ཤེས་པའི་གཞི་མེད་པ་ལ་མི་སྤྱོད་པ་དང་། རྣམ་པར་ཤེས་པའི་གནས་མེད་པ་ལ་མི་སྤྱོད་པ་དང་། རྣམ་པར་ཤེས་པའི་དེ་བཞིན་ཉིད་ལ་མི་སྤྱོད་པ་ནི་ཆོས་སྤྱོད་པའོ། །ཁམས་ལ་མི་སྤྱོད་པ་དང་། སྐྱེ་
མཆེད་ལ་མི་སྤྱོད་པ་དང་། འདོད་པ་དང་། གཟུགས་དང་། གཟུགས་མེད་པ་ལ་མི་སྤྱོད་པ་དང་། གང་སྤྱོད་པ་མེད་ཅིང་རབ་ཏུ་སྤྱོད་པ་མེད་པ་འདི་ནི་ཆོས་སྤྱོད་པ་ཞེས་བྱའོ། །གང་ན་སྤྱོད་པ་མེད་ཅིང་རྣམ་པར་སྤྱོད་པ་མེད་པ་དང་། འགྲོ་བ་མེད་པ་དང་། གནས་པ་མེད་པ་དང་།
འཇུག་པ་མེད་པ་དང་། གང་ན་སེམས་དང་། ཡིད་དང་། རྣམ་པར་ཤེས་པ་ལ་མི་སྤྱོད་པ་དང་། མཐོང་བ་དང་། ཐོས་པ་དང་། བྱེ་བྲག་ཕྱེད་པ་དང་། རྣམ་པར་ཤེས་པ་ལ་མི་སྤྱོད་པ་དང་། གང་ན་འདོད་པ་དང་། འདུ་བྱེད་ལ་མི་སྤྱོད་པ་དང་། གང་ན་ཆོས་ལ་ཡང་མི་སྤྱོད་ལ་ཆོས་
མ་ཡིན་པ་ལ་ཡང་མི་སྤྱོད་པ་དང་། གང་ན་གཉིས་ལ་མི་སྤྱོད་པ་དང་། སྣ་ཚོགས་ལ་མི་སྤྱོད་པ་དང་། གང་ན་འདས་པ་དང་། མ་འོངས་པ་ལ་མི་སྤྱོད་པ་དང་། ད་ལྟར་བྱུང་བ་ལ་མི་སྤྱོད་པ་དང་། གང་ན་ཕུང་པོ་དང་། ཁམས་དང་། སྐྱེ་མཆེད་ལ་མི་སྤྱོད་པ་འདི་ནི་ཆོས་སྤྱོད་

པའོ། །གང་ན་ཀུན་ནས་ཉོན་མོངས་པ་དང་། རྣམ་པར་བྱང་བའི་རློམ་སེམས་ལ་མི་སྤྱོད་པ་དང་། གང་ན་རིལ་པོ་དང་། རྫས་ལ་མི་སྤྱོད་པ་དང་། གང་ན་བདག་དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་
སྐྱེས་པ་དང་། ཤེད་བུར་འཛིན་པ་དང་། སྒྲོ་འདོགས་པ་ལ་མི་སྤྱོད་པ་དང་། གང་ན་སྐྱེ་བ་དང་། འཇིག་པ་དང་། གནས་པ་ལ་མི་སྤྱོད་པ་དང་། གང་ན་ངར་འཛིན་པ་དང་། ང་ཡིར་འཛིན་པ་ལ་མི་སྤྱོད་པ་དང་། གང་ན་རྟག་པ་དང་ཆད་པ་ལ་མི་སྤྱོད་པ་དང་། མཐར་འཛིན་པར་
ལྟ་བ་ལ་མི་སྤྱོད་པ་དང་། དབུས་ལ་མངོན་པར་ཞེན་པ་ལ་མི་སྤྱོད་པ་དང་། བདག་དང་ཆོས་ཀྱི་ངོ་བོ་ཉིད་ཀྱི་གནས་དང་གནས་མེད་པའི་གནས་དང་། ཆོས་ཀྱི་རང་བཞིན་གྱི་གནས་དང་། ཆོས་ཐམས་ཅད་ཀྱི་གནས་དང་། སྟོང་པ་དང་མི་སྟོང་པའི་གནས་དང་། ཤིན་ཏུ་གནས་པའི་གནས་
དང་། ཆོས་ཐམས་ཅད་མི་གཡོ་བ་དང་། མི་གནས་པ་དང་། གནས་པ་མེད་པ་དང་། ངོ་བོ་ཉིད་མེད་པ་དང་། རྒྱུ་བ་མེད་པ་དང་། སྤྲོས་པ་མེད་པ་དང་། བླང་བ་མེད་པ་དང་། དོར་བ་མེད་པ་དང་། ཁས་ལེན་པ་མེད་པ་དང་། ལེན་པ་མེད་པ་དང་། གང་ཆོས་འདི་ལ་ཤེས་ལ་ཤེས་པས་
རློམ་སེམས་ཀྱང་མེད་པ་འདི་ནི་ཡང་དག་པ་དང་། དེ་ཁོ་ན་དང་། དེ་བཞིན་ཉིད་དང་། ཆོས་ཤེས་པ་ཞེས་བྱའོ། །བུ་མོ་བྱང་ཆུབ་སེམས་དཔའ་གང་འདི་ལྟ་བུར་ཆོས་ཐམས་ཅད་ཁོང་དུ་ཆུད་ནས་སེམས་ཅན་གཞན་དག་འདུལ་བའི་ཕྱིར་འཁོར་བ་ལ་ཡང་སྤྱོད་ལ། མྱ་ངན་ལས་འདས་པའི་
ཆོས་ཉིད་ལས་ཀྱང་མི་གཡོ་བ་འདི་ནི་བྱང་ཆུབ་སེམས་དཔའི་སྤྱོད་པ་ཡང་དག་ཕུལ་ཡིན་ནོ། །ཆོས་སྤྱོད་པ་བསྟན་པ་འདི་བཤད་པ་ན་བྱང་ཆུབ་སེམས་དཔའ་བརྒྱད་སྟོང་ནི་བཟོད་པ་རབ་ཏུ་ཐོབ་པར་གྱུར་ཏོ། །བུ་མོ་རིན་ཆེན་གྱིས་ནི་མུ་ཏིག་གི་སེ་མོ་དོ་བྱེ་བ་བརྒྱ་སྟོང་རི་བ་བཅོམ་
ལྡན་འདས་ལ་ཕུལ་ནས་ཚིག་འདི་སྐད་ཅེས་སྨྲས་སོ། །བཅོམ་ལྡན་འདས་བྱང་ཆུབ་སེམས་དཔའ་གང་ཆོས་སྤྱོད་པ་འདི་ལ་བརྩོན་པ་འདི་ནི་སངས་རྒྱས་ཀྱི་ཆོས་ཐམས་ཅད་ལ་བརྩོན་པ་ལགས་སོ། །དེའི་ལུང་བསྟན་པ་ནི་འདི་ལགས་ཏེ། བྱང་ཆུབ་ཀྱི་སྙིང་པོ་ལ་གནས་ནས་

བདུད་དང་ཕྱིར་རྒོལ་བ་བཅོམ་སྟེ། ཕྱིར་མི་ལྡོག་པའི་ཕྱག་རྒྱས་བཏབ་པར་བལྟའོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་བུ་མོ་རིན་ཆེན་ལ་འདི་སྐད་ཅེས་སྨྲས་སོ། །བུ་མོ་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་ཕྱིར་མི་ལྡོག་པའི་ཕྱག་རྒྱ་ཤེས་སམ། དེ་ནས་བུ་མོ་རིན་ཆེན་གྱིས་
དེའི་ཚེ་ཚེ་དང་ལྡན་པ་ཤ་ར་དྭ་ཏིའི་བུ་ལ་ཚིགས་སུ་བཅད་པ་འདི་དག་སྨྲས་སོ། །འདི་ལ་ཆོས་དབྱིངས་སེམས་ཅན་ཁམས། །ཡང་དག་ཉིད་ཀྱིས་མཉམ་རྟོགས་ནས། །གཉིས་མེད་རྟོགས་པ་གང་ཡིན་པ། །དེ་ནི་མི་ལྡོག་ཕྱག་རྒྱ་ཡིན། །གང་དག་འདས་པའི་སངས་རྒྱས་དང་། །
ད་ལྟར་བྱུང་དང་མ་བྱོན་པ། །ཐམས་ཅད་ཆོས་ཀྱི་དབྱིངས་མཉམ་པར། །རྟོགས་པ་དེ་དག་ཕྱིར་མི་ལྡོག །གང་ཡང་འདུས་བྱས་ཁམས་རྣམས་དང་། །གང་ཡང་འདུས་མ་བྱས་པའི་ཁམས། །དབེན་པའི་དོན་གྱིས་སྟོང་པར་ནི། །ཁོང་དུ་ཆུད་པ་ཕྱིར་མི་ལྡོག །སྔོན་གྱི་མཐའ་ནི་
མཐའ་ཡས་པ། །དེ་ཡི་ཚད་ནི་མི་དམིགས་པ། །སེམས་ཀྱི་སྐད་ཅིག་གཅིག་ལྡན་པ། །ཁོང་དུ་དེ་ཆུད་ཕྱིར་མི་ལྡོག །འཇིག་རྟེན་པ་ཡི་ཆོས་གང་དག །སྤྱོད་པར་བཏགས་པའི་སྤྱོད་ཡུལ་རྣམས། །ཤེས་རབ་ཀྱིས་ནི་དེ་རྟོགས་པ། །གང་ཡིན་དེ་དག་ཕྱིར་མི་ལྡོག །བདུད་ཀྱི་ཡུལ་ནི་ཇི་སྙེད་
པ། །གང་གིས་སངས་རྒྱས་ཡུལ་རྣམས་དང་། །དེ་དག་མི་གཉིས་ཤེས་པ་ནི། །ཕྱག་རྒྱ་འདི་ཡིས་བཏབ་པ་ཡིན། །འདོད་ཆགས་ཞེ་སྡང་གཏི་མུག་གང་། །ཉོན་མོངས་གང་དག་མཐའ་ཡས་པ། །གང་གིས་རྟོག་པའི་རྩ་བ་ལས། །བྱུང་བར་ཤེས་པ་ཕྱིར་མི་ལྡོག །འཁོར་བ་
དང་ནི་མྱ་ངན་འདས། །བྱང་ཆུབ་ཞི་བར་བསྟན་པ་ཡང་། །ཐ་དད་མ་ཡིན་ཀུན་མཉམ་པར། །ཁོང་དུ་ཆུད་པ་ཕྱིར་མི་ལྡོག །ཕུང་པོ་ཇི་བཞིན་བྱང་ཆུབ་སྟེ། །ཕུང་པོ་བྱང་ཆུབ་མི་གཉིས་ཤིང་། །སྒྱུ་མ་འདྲ་བར་མཉམ་ཤེས་ཏེ། །རྣམ་རྟོག་མེད་པ་དེ་དག་མཁས། །གང་ཡང་
ཁམས་རྣམས་བཞི་པོ་དག །ནམ་མཁའ་མཚུངས་པའི་ཁམས་ཡིན་ཏེ། །གཟུང་མེད་ཁོང་དུ་ཆུད་པ་ནི། །ཡང་དག་ཕྱག་རྒྱས་བཏབ་པ་ཡིན། །མིག་ནི་བྱང་ཆུབ་བྱང་ཆུབ་མིན། །སངས་རྒྱས་ཀྱིས་ནི་སྟོང་བར་གསུངས། །ཇི་ལྟར་མིག་བཞིན་བྱང་ཆུབ་སྟེ། །རྟག་ཏུ་མཉམ་

པ་ཉིད་ཀྱིས་མཉམ། །དེ་ལྟར་སྐྱེ་མཆེད་ཐམས་ཅད་ཀྱང་། །རྟག་ཏུ་སྟོང་སྟེ་བྱང་ཆུབ་མཉམ། །ཚུལ་འདི་རབ་ཏུ་ཤེས་པ་དག །ཕྱག་རྒྱ་དེ་ཡིས་བཏབ་པ་ཡིན། །སེམས་ཅན་རྣམས་ནི་ཀུན་གྱི་སེམས། །སེམས་གཅིག་གིས་ནི་རབ་ཤེས་པ། །དེ་ནི་རྫོགས་
པའི་བྱང་ཆུབ་ལས། །ཕྱིར་མི་ལྡོག་པར་ཐེ་ཚོམ་མེད། །སེམས་ཅན་ཀུན་གྱི་དབང་པོ་ནི། །རབ་དང་འབྲིང་དང་ཐ་མ་ཡི། །ཕ་རོལ་ཕྱིན་པ་གང་ཡིན་པ། །དེ་དག་ཕྱིར་མི་ལྡོག་པ་ཡིན། །ཐོགས་པ་མེད་པའི་སྤོབས་པ་ཡིན། །རྒྱུན་མི་ཆད་པར་རྒྱུན་དུ་ཡང་། །བསྐལ་པ་བྱེ་
བར་བརྗོད་ཀྱང་གོ། །དེ་ཡི་བསྔགས་པ་དེ་མི་ཟད། །ནམ་མཁའི་ཁམས་ནི་ཟད་འགྱུར་ལ། །རླུང་ནི་ཞགས་པས་གཟུང་འགྱུར་སྲིད། །དེ་ཡི་སྤོབས་པ་འཇིག་རྟེན་གྱི། །ཟད་པར་བྱ་བར་ཡོང་མི་ནུས། །གང་གིས་སེམས་ནི་མི་རྨོངས་ཤིང་། །ཐོས་པའང་ཆུད་ཟར་མི་འགྱུར་
ལ། །ཆོས་རྣམས་ཐམས་ཅད་འཛིན་པ་ཡི། །གཟུངས་ནི་དེ་དག་སྤྱོད་ཡུལ་ཡིན། །ཕྱོགས་བཅུ་ཀུན་གྱི་འདྲེན་པ་ཡི། །དམ་པའི་ཆོས་ནི་གང་བཤད་པ། །གཟུངས་ཐོབ་པས་ནི་དེ་ཐམས་ཅད། །དྲན་པ་དང་ནི་ཤེས་པས་འཛིན། །གཟུངས་ནི་ཤིན་ཏུ་བསླབས་པས་ན། །སྔོན་གྱི་
བསྐལ་པ་བྱེ་བར་ནི། །སྐྱོབ་པ་རྣམས་ཀྱི་ཆོས་ཐོས་པ། །དེ་དག་དྲིས་ནས་སྟོན་པར་འགྱུར། །ཕྱིར་མི་ལྡོག་པ་གང་ཡིན་པ། །དེ་དག་གཟུངས་ནི་འདི་འདྲ་སྟེ། །སྤོབས་པ་དག་ཀྱང་འདི་འདྲ་ཞིང་། །དེ་དག་ཡེ་ཤེས་འདི་འདྲའོ། །ཆོས་རྣམས་ཕྱག་རྒྱ་སྟོང་པ་ཉིད། །རྣམ་སྨིན་
མེད་ཅིང་བསལ་མེད་པ། །སྟོང་པའི་ཕྱག་རྒྱས་གང་བཏབ་པ། །དེ་དག་ཕྱིར་མི་ལྡོག་པར་བསྟན། །ནམ་མཁའི་ཕྱག་རྒྱས་བཏབ་པའི་ཆོས། །རང་བཞིན་གྱིས་ནི་འབྱུང་མེད་པར། །མཐའ་ནི་ཁོང་དུ་རབ་ཆུད་ལ། །ཕྱག་རྒྱས་བཏབ་པ་ཕྱིར་མི་ལྡོག །ཆོས་ནི་རྟེན་ནས་འབྱུང་བ་སྟེ། །
རྒྱུ་མེད་པ་ཡི་ཆོས་མེད་དོ། །ཆོས་གང་རྒྱུ་ལས་བྱུང་བ་དག །དེ་ཡི་མཚན་ཉིད་འགོག་པའོ། །ཆོས་རྣམས་ཀུན་གྱི་མཚན་ཉིད་ནི། །ནམ་མཁའ་མཉམ་པའི་མཚན་ཉིད་དེ། །མཚན་ཉིད་ཕྱག་རྒྱ་དེ་འདྲ་བའི། །ཕྱག་རྒྱས་གང་བཏབ་ཕྱིར་མི་ལྡོག །ཕྱིར་མི་ལྡོག་པ་གང་ཡིན་པ། །སེམས་ཅན་

ཀུན་གྱི་སྤྱོད་པ་དང་། །གཟུགས་དང་སྤྱོད་ལམ་དུས་རྣམས་ཀྱང་། །སྐད་ཅིག་གཅིག་ལ་རབ་ཏུ་སྟོན། །སྦྱིན་པའི་ཚོགས་ནི་མཐའ་ཡས་ཏེ། །བསོད་ནམས་རྟག་ཏུ་མི་ཟད་པ། །གལ་ཏེ་རོ་གཅིག་འགྱུར་ན་ནི། །ནམ་མཁའི་ཁམས་ཀྱང་གང་བར་འགྱུར། །དེ་དག་ཚུལ་ཁྲིམས་
ཆེ་བ་ཉིད། །སངས་རྒྱས་ཚུལ་ཁྲིམས་འབྱུང་གནས་ཏེ། །དཔག་ཏུ་མེད་ཅིང་མཐའ་ཡང་མེད། །ནམ་མཁའ་ཡི་ནི་དབྱིངས་དང་འདྲ། །སེམས་ཅན་ཀུན་དང་ཉན་ཐོས་དང་། །རྒྱལ་བ་རེ་རེའི་ཚུལ་ཁྲིམས་ནི། །ཕྱིར་མི་ལྡོག་པའི་ཚུལ་ཁྲིམས་ཀྱི། །བཅུ་དྲུག་ཆ་ཡི་རིན་མི་ཆོག །
དེ་དག་བཟོད་པ་མི་ཟད་དེ། །དེ་དག་སྐྱེ་བ་མེད་པས་བསྐྱེད། །བཟོད་པ་མི་ཟད་ཕུན་སུམ་ཚོགས། །ཕྱིར་མི་ལྡོག་པར་འགྱུར་བ་ཡིན། །དེ་དག་བརྩོན་འགྲུས་ཆེ་བ་ཉིད། །ཡང་དག་བརྩོན་པ་དཔག་ཏུ་མེད། །རྟུལ་བ་དཔག་ཏུ་མེད་པ་སྟེ། །སེམས་ཅན་ཐམས་ཅད་ཚིམ་པར་བྱེད། །བརྟེན་པ་
རྟག་ཏུ་མཉམ་པར་བཞག །གཡེང་བ་མེད་ཅིང་ཤིན་ཏུ་བསྡམ། །བྱ་བ་རྣམས་ནི་ཀུན་སྟོན་ཀྱང་། །མཉམ་པར་བཞག་ལས་གཡོ་བ་མེད། །ཤེས་རབ་ཀྱིས་ནི་ཆགས་མེད་ཐོབ། །ལྟ་བའི་བག་ཆགས་རྣམ་པར་སྦྱང་། །སངས་རྒྱས་སྤྱོད་ཡུལ་རྫོགས་པར་ཐོབ། །ཕུན་སུམ་ཚོགས་
པའི་ཞིང་ཡང་སྦྱངས། །སངས་རྒྱས་ཕྱག་རྒྱས་བཏབ་པ་དེ། །ཡེ་ཤེས་ཕ་རོལ་ཕྱིན་པ་ཐོབ། །ཐབས་ཆེན་དག་ཀྱང་ཤིན་ཏུ་བསླབ། །བྱང་ཆུབ་ཀྱི་ནི་སྤྱད་པ་སྤྱོད། །སེམས་ཅན་ཡོངས་སུ་སྨིན་བྱེད་པ། །དེ་དག་སྤྱོད་ཡུལ་མཐའ་ཡས་ཏེ། །སྤྱོད་པ་ཅི་འདྲ་བསམ་ཅི་འདྲ། །དེ་དག་སྤྱོད་པ་ཤེས་པ་མེད། །
དགྲ་བཅོམ་དག་དང་རང་རྒྱལ་དང་། །བདུད་དང་མུ་སྟེགས་གཞན་ཀུན་གྱིས། །དེ་དག་སྤྱོད་ཡུལ་ཚད་མེད་པ། །ཤེས་པར་ནུས་པ་མ་ཡིན་ནོ། །དེ་དག་བསམ་གཏན་རྫུ་འཕྲུལ་དང་། །རྣམ་འཕྲུལ་འདུ་བྱེད་བཅས་པ་མིན། །དཔའ་བོ་ལྷུན་གྱིས་གྲུབ་པར་ནི། །བྱ་བ་དེ་དག་ཀུན་ལ་འཇུག །ཚེ་དང་འཇུག་
དང་འཆི་འཕོ་དང་། །བྱང་ཆུབ་ཀྱི་ནི་སྙིང་པོ་དང་། །ཆོས་ཀྱི་འཁོར་ལོ་རབ་བསྐོར་དང་། །སངས་རྒྱས་ཀྱི་ནི་གཟུགས་ཀྱང་སྟོན། །སངས་རྒྱས་ཀུན་གྱི་སྤྱན་སྔ་ན། །ཞིང་རྣམས་ཀུན་ན་སྣང་བ་ནི། །ཉི་ཟླ་ལྟ་བུར་གསལ་བ་སྟེ། །དེ་དག་ནམ་མཁའ་མཚུངས་པར་ལྡན། །ཐེག་པ་མོས་པ་ཅི་བཞིན་པར། །མྱ་ངན་འདས་

པའང་སྟོན་མོད་ཀྱི། །མི་ལྡོག་ཕྱག་རྒྱ་གང་ཡིན་པ། །ཕྱག་རྒྱ་དེ་ནི་འདོར་མ་ཡིན། །ནམ་མཁས་ཅི་ཙམ་ཁྱབ་པ་དག །དེ་སྲིད་ཡེ་ཤེས་ཁྱབ་པར་བྱེད། །ཕྱག་རྒྱ་ལས་ནི་མི་ལྡོག་པ། །སངས་རྒྱས་ཀྱིས་ནི་དེ་དག་མཁྱེན། །ཕྱིར་མི་ལྡོག་པའི་ཕྱག་རྒྱ་འདི་བཤད་པ་ན་སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་འདི་རབ་ཏུ་གཡོས་སོ། །བྱང་ཆུབ་སེམས་དཔའ་ལྔ་སྟོང་ནི་ཕྱིར་མི་ལྡོག་པའི་ཕྱག་རྒྱས་ལུང་བསྟན་པར་གྱུར་ཏོ། །བཅོམ་ལྡན་འདས་ཀྱིས་ཀྱང་བུ་མོ་རིན་ཆེན་ལ་ལེགས་སོ་ཞེས་བྱ་བ་གནང་སྟེ། བུ་མོ་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་ཕྱིར་མི་ལྡོག་པར་
བསྟན་པ་འདི་ལེགས་པར་སྨྲས་པ་ནི་ལེགས་སོ། །ལེགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བུ་མོ་རིན་ཆེན་གྱི་སྤོབས་པ་འདི་འདྲ་བ་ལས་ན་དེ་ཕྱིར་མི་ལྡོག་པའི་ཕྱག་རྒྱས་བཏབ་པ་ལགས་ཏེ། ཐེ་ཚོམ་མ་མཆིས་སོ། །
བཅོམ་ལྡན་འདས་ཆོས་འདི་མངོན་སུམ་དུ་མ་གྱུར་པ་འདི་འདྲ་བའི་བསྟན་པ་སྟོན་པར་ནུས་པ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། བུ་མོ་རིན་ཆེན་གྱིས་ནི་ཕྱིར་མི་ལྡོག་པའི་ཕྱག་རྒྱས་བཏབ་པ། བཟོད་པ་རབ་ཏུ་ཐོབ་པ།
ཐེག་པ་ཆེན་པོའི་གཏིང་ཐོབ་པའོ། །དེ་ནས་བཅོམ་ལྡན་འདས་ལ་བུ་མོ་རིན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐེག་པ་ཆེན་པོ་ཐེག་པ་ཆེན་པོ་ཞེས་བགྱི་བ་ཅིའི་སླད་དུ་ཐེག་པ་ཆེན་པོ་ཞེས་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བུ་མོ་རིན་ཆེན་ལ་འདི་སྐད་
ཅེས་བཀའ་སྩལ་ཏོ། །བུ་མོ་ཐེག་པ་ཆེན་པོ་དེ་ནི་སེམས་ཅན་ཐམས་ཅད་ལ་སྐབས་འབྱེད་པས་རྒྱ་ཆེ་བའོ། །དགེ་བའི་རྩ་བ་ཐམས་ཅད་ཀུན་དུ་སྟོན་པས་ཐེག་པ་དེ་ནི་སྒྲིབ་པ་མེད་པའོ། །ཉོན་མོངས་པའི་མུན་པ་མུན་ནག་དང་བྲལ་བས་ཐེག་པ་དེ་ནི་དྲི་མ་མེད་པའོ། །ཐམས་ཅད་དུ་རྣམ་པར་
གྲོལ་བའི་སྒོའི་མཚན་ཉིད་ཡིན་པས་ཐེག་པ་དེ་ནི་ཀུན་དུ་སྣང་བའོ། །གདོད་མ་ནས་ཀུན་ནས་ཉོན་མོངས་པ་ཅན་མ་ཡིན་པས་ཐེག་པ་དེ་ནི་འོད་གསལ་བའོ། །བག་ཆགས་དང་བྲལ་བའི་ཕྱིར་ཐེག་པ་དེ་ནི་ཡོངས་སུ་དཀར་བའོ། །ཚུལ་ཁྲིམས་ཀྱི་ཕུང་པོ་ཤིན་ཏུ་བསྲུངས་པའི་ཕྱིར་ཐེག་པ་དེ་ནི་ཡོངས་

སུ་དག་པའོ། །ཏིང་ངེ་འཛིན་གྱི་ཕུང་པོ་ཤིན་ཏུ་བརྟགས་པའི་ཕྱིར་ཐེག་པ་དེ་ནི་མཉམ་པར་ལེགས་པར་གནས་པའོ། །ཤེས་རབ་ཀྱི་ཕུང་པོས་ལེགས་པར་བརྟགས་པའི་ཕྱིར་ཐེག་པ་དེ་ནི་ཟག་པ་མེད་པའོ། །རྣམ་པར་གྲོལ་བའི་ཕུང་པོ་ཤིན་ཏུ་དཀར་བར་བྱས་པའི་ཕྱིར་ཐེག་པ་དེ་ནི་ངེས་པར་གྲོལ་བའོ། །
རྣམ་པར་གྲོལ་བའི་ཡེ་ཤེས་མཐོང་བ་ཤིན་ཏུ་རྟོགས་པའི་ཕྱིར་ཐེག་པ་དེ་ནི་ཆོས་ཐམས་ཅད་མཉམ་པ་ཉིད་དུ་སྟོན་པའོ། །སྟོབས་བཅུས་ཤིན་ཏུ་ཡོངས་སུ་ཟིན་པས་ཐེག་པ་དེ་ནི་མི་ཐུལ་བའོ། །མི་འཇིགས་པ་བཞིས་སེང་གེའི་སྒྲ་སྒྲོགས་པའི་ཕྱིར་ཐེག་པ་དེ་ནི་འཇིགས་པ་མེད་པའོ། །
སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱིས་ཤིན་ཏུ་ཡོངས་སུ་ཟིན་པས་ཐེག་པ་དེ་ནི་བྱིན་གྱི་རླབས་ཐོགས་པ་མེད་པར་འགྲོ་བའོ། །སེམས་ཅན་ཐམས་ཅད་ལ་བྱམས་པའི་སེམས་ཀྱི་ཕྱིར་ཐེག་པ་དེ་ནི་མཉམ་པའོ། །ཆོས་དང་འཐུན་པས་བདུད་དང་ཕས་ཀྱི་རྒོལ་བ་ཐམས་ཅད་ཚར་གཅོད་པའི་ཕྱིར་ཐེག་
པ་དེ་ནི་ཆོས་ཆོས་དང་འཐུན་པས་ངེས་པར་འཇོམས་པའོ། །བདུད་ཀྱི་ཕྱོགས་ཐམས་ཅད་ལས་རྣམ་པར་རྒྱལ་བས་ཐེག་པ་དེ་ནི་རྣམ་པར་འཇིག་པར་བྱེད་པའོ། །ཐེག་པ་དེ་ནི་ཉོན་མོངས་པའི་བདུད་རབ་ཏུ་ཞི་བར་བྱེད་པའོ། །ཐེག་པ་དེ་ནི་ཕུང་པོའི་བདུད་ཡོངས་སུ་ཤེས་པའོ། །ཐེག་པ་དེ་ནི་འཆི་
བདག་གི་བདུད་དང་བྲལ་བའོ། །ཐེག་པ་དེ་ནི་ལྷའི་བུའི་བདུད་རྣམ་པར་སྤངས་པའོ། །སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པས་ཐེག་པ་དེ་ནི་འབྱོར་པའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པས་ཐེག་པ་དེ་ནི་ཡོངས་སུ་གདུང་བ་མེད་པའོ། །བཟོད་པའི་ཕ་རོལ་ཏུ་ཕྱིན་པ་
ཡོངས་སུ་རྫོགས་པས་ཐེག་པ་དེ་ནི་བདུད་དང་ཕྱིར་རྒོལ་བ་བཅོམ་པའོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པས་ཐེག་པ་དེ་ནི་བརྟན་པ་མི་ཕྱེད་པའོ། །དྲང་པོ་མ་ཡིན་པ་དང་སྙོམ་ལས་ཐམས་ཅད་དང་བྲལ་བས་ཐེག་པ་དེ་ནི་སྐྱོན་མེད་པའོ། །བསམ་གཏན་གྱི་ཕ་རོལ་ཏུ་ཕྱིན་པ་ཡོངས་
སུ་རྫོགས་པས་ཐེག་པ་དེ་ནི་སེམས་ཀྱི་གདུང་བའི་སྐྱོན་དང་བྲལ་བའོ། །ཐེག་པ་དེ་ནི་ལམ་བཟང་པོ་ཐམས་ཅད་ཀྱི་གནས་སུ་འགྲོ་བའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ཕྱིར་ཐེག་པ་དེ་ནི་ཐམས་ཅད་ལ་མཁས་པ་དང་། ཐམས་ཅད་ལ་མཁྱེན་པའི་ཡེ་ཤེས་དང་། འཇིག་

རྟེན་པ་ཐམས་ཅད་དང་། འཇིག་རྟེན་ལས་འདས་པའི་ཆོས་ཐམས་ཅད་སོ་སོ་ཡང་དག་པར་རིག་པའོ། །ཐབས་ལ་མཁས་པ་ཡོངས་སུ་རྫོགས་པའི་ཕྱིར་ཐེག་པ་དེ་ནི་ཐེག་པ་ཐམས་ཅད་ཀྱིས་ཅི་རིགས་པར་འབྱུང་བའོ། །མྱ་ངན་ལས་འདས་པའི་འགྲོས་ཀྱིས་ཐེག་པ་དེ་ནི་
འོང་བ་དང་། འགྲོ་བ་མེད་པའོ། །འཕགས་པའི་ལམ་ཡན་ལག་བརྒྱད་པ་གྱ་ནོམ་པས་ཐེག་པ་དེ་ནི་བདེ་བར་འགྲོ་བའོ། །ཞི་གནས་དང་ལྷག་མཐོང་གི་རླུང་གི་ཤུགས་དང་ལྡན་པས་ཐེག་པ་དེ་ནི་བྱིན་གྱི་རླབས་ཀྱིས་འགྲོ་བའོ། །ཕས་ཀྱི་རྒོལ་བ་ཐམས་ཅད་ཀྱིས་བལྟར་མི་
མཐོང་བས་ཐེག་པ་དེ་ནི་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་གི་ཁ་ཁྱེར་གྱིས་ཡོངས་སུ་བསྐོར་བའོ། །སངས་རྒྱས་ཀྱི་ཞིང་ཐམས་ཅད་བདེ་བར་ལྟ་བའི་ཕྱིར་ཐེག་པ་དེ་ནི་རྫུ་འཕྲུལ་གྱི་རྐང་པ་བཞིས་འགྲོ་བའོ། །དགེ་བའི་ཆོས་ཐམས་ཅད་དང་ལྡན་པའི་ཕྱིར་ཐེག་པ་
དེ་ནི་ཡང་དག་པར་སྤོང་བ་ལ་མཉམ་པར་ལེགས་པར་གནས་པའོ། །བར་མི་ཕྱེད་པས་ཐེག་པ་དེ་ནི་དྲན་པ་ཉེ་བར་གཞག་པ་ཤིན་ཏུ་ཡོངས་སུ་སྦྱང་བ་བྱས་པའོ། །ཟག་པ་མེད་པའི་ཆོས་འོང་བའི་ཕྱིར་ཐེག་པ་དེ་ནི་ཁམས་གསུམ་ལས་བྱུང་བའོ། །འདུས་བྱས་ཀྱི་ཁམས་ཀྱི་སྣང་
བ་ཐོབ་པས་ཐེག་པ་དེ་ནི་འདུས་བྱས་ཀྱི་ཁམས་འདུས་མ་བྱས་པའོ། །ཉན་ཐོས་དང་རང་སངས་རྒྱས་ཐམས་ཅད་ཀྱི་ཐེག་པ་མི་འདོད་པས་ཐེག་པ་དེ་ནི་བྱང་ཆུབ་ཀྱི་སེམས་མི་བརྗེད་ཅིང་ཁ་ལོ་སྒྱུར་ཏེ་ལེགས་པར་ཁྲིད་པའོ། །སྤྱི་གཙུག་བལྟར་མི་མཐོང་བས་ཐེག་པ་དེ་ནི་མངོན་པར་
འཕགས་པའོ། །ཐེག་པ་དེ་ནི་བསོད་ནམས་ཀྱི་ཚོགས་ཀྱིས་བརྒྱན་པའོ། །ཐེག་པ་དེ་ནི་ཡེ་ཤེས་ཀྱི་ཚོགས་ཀྱིས་སེམས་ཅན་གྱི་བསམ་པ་རབ་ཏུ་ཤེས་པའོ། །གཏན་པ་མེད་པའི་མཆོད་སྦྱིན་བྱེད་པས་ཐེག་པ་དེ་ནི་སྒོ་ཕྱེ་བའོ། །སངས་རྒྱས་ཀྱི་ཡེ་ཤེས་མཉམ་པའི་ཕྱིར་ཐེག་
པ་དེ་ནི་རོ་གཅིག་པའོ། །གྲགས་པ་ཕྱོགས་བཅུར་གྲགས་པའི་ཕྱིར་ཐེག་པ་དེ་ནི་བསྒྲགས་པའོ། །ལེགས་པར་བྱས་པའི་ལས་ཀྱི་ཕྱིར་ཐེག་པ་དེ་ནི་ལྷ་ཐམས་ཅད་ཀྱིས་ཕྱག་བྱས་པའོ། །བསྔགས་པ་མཐའ་ཡས་པས་ཐེག་པ་དེ་ནི་བརྒྱ་བྱིན་དང་། ཚངས་པ་དང་། འཇིག་རྟེན་

སྐྱོང་བ་ཐམས་ཅད་ཀྱིས་མངོན་པར་བསྟོད་པའོ། །སྦྱིན་པ་སྔོན་དུ་འགྲོ་བས་ཐེག་པ་དེ་ནི་སེར་སྣ་ཅན་རྣམས་ལ་གཏོང་བ་སྦྱིན་པའོ། །སྙིང་རྗེ་ཆེན་པོས་ཤིན་ཏུ་ཟིན་པས་ཐེག་པ་དེ་ནི་ངང་ཚུལ་ངན་པ་རྣམས་ལ་ཚུལ་ཁྲིམས་སྦྱིན་པའོ། །སེམས་ཅན་ཐམས་ཅད་ལ་ཁོང་ཁྲོ་བའི་
སེམས་མེད་པས་ཐེག་པ་དེ་ནི་གནོད་པའི་སེམས་དང་ལྡན་པ་རྣམས་བཟོད་པ་སྦྱིན་པའོ། །གོ་ཆ་བརྟན་པ་མི་འདོར་བས་ཐེག་པ་དེ་ནི་ལེ་ལོ་ཅན་རྣམས་ལ་བརྩོན་འགྲུས་སྦྱིན་པའོ། །སེམས་དུལ་ཞིང་ཞི་ལ་ལས་སུ་རུང་བས་ཐེག་པ་དེ་ནི་སེམས་གཡེང་བ་རྣམས་ལ་བསམ་གཏན་སྦྱིན་པའོ། །
སེམས་ཅན་ཐམས་ཅད་ཐོས་པ་ལ་སྦྱོར་བས་ཐེག་པ་དེ་ནི་ཤེས་རབ་འཆལ་པ་རྣམས་ལ་ཤེས་རབ་སྦྱིན་པའོ། །སྡིག་པ་ཐམས་ཅད་མི་བྱེད་པས་ཐེག་པ་དེ་ནི་བདེ་བ་ཐམས་ཅད་སྒྲུབ་ཅིང་སྡུག་བསྔལ་ཐམས་ཅད་སེལ་བའོ། །ཐེག་པ་དེ་ནི་ཆགས་པ་མེད་པའི་ཡེ་ཤེས་ཀྱིས་སངས་
རྒྱས་ཀྱི་ཡེ་ཤེས་དང་། ཆགས་པ་མེད་པའི་ཡེ་ཤེས་ཀུན་དུ་སྟོན་པ། ཐེག་པ་ཐམས་ཅད་ཀྱི་སྤྱི་བོར་ཕྱིན་པ་སྟེ། དེའི་ཕྱིར་ཐེག་པ་ཆེན་པོ་ཞེས་བྱའོ། །ཆོས་ཀྱི་རྣམ་གྲངས་འདི་བཤད་པ་ན་སྲོག་ཆགས་ཁྲི་ཉིས་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས།
འདི་སྐད་ཅེས་བདག་ཀྱང་ཐེག་པ་ཆེན་པོ་ལ་ཞུགས་ཏེ། སེམས་ཅན་ཚད་མ་མཆིས་པ་ཐེག་པ་ཆེན་པོ་འདི་ལ་དགོད་པར་བགྱིའོ་ཞེས་སྨྲས་སོ། །དེ་ནས་བཅོམ་ལྡན་འདས་ལ་བུ་མོ་རིན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གིས་ཐམས་ཅད་མཁྱེན་པར་མྱུར་དུ་
ངེས་པར་མི་འབྱུང་བ་ཐེག་པ་ཆེན་པོའི་བར་དུ་གཅོད་པ་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བུ་མོ་རིན་ཆེན་ལ་འདི་སྐད་ཅེས་བཀའ་སྩལ་ཏོ། །བུ་མོ་ཐེག་པ་ཆེན་པོའི་བར་དུ་གཅོད་པ་སུམ་ཅུ་རྩ་གཉིས་ཏེ། བར་དུ་གཅོད་པ་དེ་དག་གིས་ཐམས་ཅད་མཁྱེན་
པ་མྱུར་དུ་ངེས་པར་མི་འབྱུང་ངོ་། །སུམ་ཅུ་རྩ་གཉིས་གང་ཞེ་ན་འདི་ལྟ་སྟེ། ཉན་ཐོས་ཀྱི་ཐེག་པ་འདོད་པ་དང་། རང་སངས་རྒྱས་ཀྱི་ཐེག་པ་འདོད་པ་དང་། བརྒྱ་བྱིན་དང་། ཚངས་པ་ཉིད་མངོན་པར་འདོད་པ་དང་། སྐྱེ་བ་ལ་གནས་ཏེ་ཚངས་པར་སྤྱོད་པ་དང་། དགེ་བའི་རྩ་བ་གཅིག་ལ་ཆགས་

པ་དང་། ལོངས་སྤྱོད་བདོག་པ་རྣམས་ལ་སེར་སྣ་བྱེད་པ་དང་། སེམས་ཅན་རྣམས་ལ་མཉམ་པར་མི་སྦྱིན་པ་དང་། ཚུལ་ཁྲིམས་ལྷོད་པ་དང་། བྱང་ཆུབ་ཀྱི་སེམས་མི་སྲུང་བ་དང་། གནོད་སེམས་དང་ཁོང་ཁྲོ་བ་བག་ལ་ཉལ་བར་བྱེད་པ་དང་། སེམས་ཞུམ་པ་དང་བརྗེད་ངས་
པ་དང་། ཐོས་པ་དོན་དུ་མི་གཉེར་བ་དང་། དཔྱོད་པ་མེད་པ་དང་། འཕགས་པ་མ་ཡིན་པ་དང་། ང་རྒྱལ་ལས་ཀྱང་ང་རྒྱལ་འཕེལ་བ་དང་། ལུས་དང་ངག་དང་། སེམས་ཀྱི་ལས་ཡོངས་སུ་མ་དག་པ་དང་དམ་པའི་ཆོས་མི་སྲུང་བ་དང་། སློབ་དཔོན་ཆོས་འཆབ་པ་དང་། བསྡུ་བའི་དངོས་པོ་
རྣམས་འདོར་བ་དང་། ཡང་དག་པར་དགའ་བར་འགྱུར་བའི་ཆོས་གཏོང་བ་དང་། སྡིག་པའི་གྲོགས་པོ་སྟེན་པ་དང་། བྱང་ཆུབ་ཏུ་ཡོངས་སུ་མི་སྔོ་སྟེ། ཕུང་པོ་གསུམ་པ་དང་མི་འཐུན་པ་དང་། དགེ་བའི་རྩ་བ་ཆུང་ངུས་རློམ་སེམས་སུ་བྱེད་པ་དང་། ཐབས་མེད་པར་ལྷུང་བའི་བློ་
དང་། ཕྱིར་ཞིང་དཀོན་མཆོག་གསུམ་གྱི་བསྔགས་པ་མི་སྨྲ་བ་དང་། བྱང་ཆུབ་སེམས་དཔའ་ལ་གནོད་པར་སེམས་པ་དང་། མ་ཐོས་པའི་ཆོས་སྤོང་བ་དང་། བདུད་ཀྱི་ལས་ཁོང་དུ་མི་ཆུད་པ་དང་། འཇིག་རྟེན་རྒྱང་འཕེན་པའི་གསང་ཚིག་འཛིན་པ་དང་། སེམས་ཅན་ཡོངས་སུ་སྨིན་པར་མི་
བྱེད་པ་དང་། འཁོར་བས་ཡོངས་སུ་སྐྱོ་བ་སྟེ། བུ་མོ་སུམ་ཅུ་རྩ་གཉིས་པོ་དེ་དག་ནི་ཐེག་པ་ཆེན་པོའི་བར་དུ་གཅོད་པ་ཡང་དག་ཕུལ་ཡིན་ཏེ། བར་དུ་གཅོད་པ་དེ་དག་གིས་ཐམས་ཅད་མཁྱེན་པར་མྱུར་དུ་ངེས་པར་མི་འབྱུང་ངོ་། །དེ་ལྟ་མོད་ཀྱི་འོན་ཀྱང་བུ་མོ་ཐེག་པ་ཆེན་པོའི་ཡོན་ཏན་ཇི་ཙམ་
པ་བར་དུ་གཅོད་པ་ཡང་དེ་ཙམ་མོ། །དེ་ཅིའི་ཕྱིར་ཞེ་ན། འདུས་བྱས་ཀྱི་སྐྱོན་ཇི་ཙམ་པ་ཐེག་པ་ཆེན་པོའི་བར་དུ་གཅོད་པ་ཡང་དེ་ཙམ་མོ། །མྱ་ངན་ལས་འདས་པའི་ཡོན་ཏན་ཇི་ཙམ་པ་ཐེག་པ་ཆེན་པོའི་ཡོན་ཏན་དང་བསྔགས་པ་ཡང་དེ་ཙམ་མོ། །ཐེག་པ་ཆེན་པོའི་ཡོན་ཏན་དང་བསྔགས་པ་
ཇི་ཙམ་པ་དེ་བཞིན་གཤེགས་པས་སེམས་ཀྱི་ཉེ་བའི་ཉོན་མོངས་པ་རབ་ཏུ་མཁྱེན་པ་ཡང་དེ་ཙམ་སྟེ། དེ་དག་ཐམས་ཅད་ནི་ཐེག་པ་ཆེན་པོའི་བར་དུ་གཅོད་པའོ། །དེ་བཞིན་གཤེགས་པས་སངས་རྒྱས་ཀྱི་ཡོན་ཏན་རབ་ཏུ་མཁྱེན་པ་ཇི་ཙམ་པ་ཐེག་པ་ཆེན་པོའི་བསྔགས་པ་དང་ཡོན་

ཏན་ཡང་དེ་ཙམ་མོ། །བུ་མོ་དེ་ལྟ་བས་ན་ཅི་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོའི་ཉོན་མོངས་པར་གྱུར་པའི་ཆོས་ཡོངས་སུ་སྤང་བར་བྱའོ། །ཆོས་གང་དག་གིས་ཐེག་པ་ཆེན་པོ་རྣམ་པར་དག་པར་འགྱུར་བའི་ཆོས་དེ་དག་ལ་བསྟེན་པར་བྱ། བསྒོམ་པར་
བྱ། མང་དུ་བྱའོ། །དེ་ལ་ཐེག་པ་ཆེན་པོ་རྣམ་པར་དག་པར་འགྱུར་བའི་ཆོས་དེ་གང་ཞེ་ན། བུ་མོ་ཆོས་སུམ་ཅུ་རྩ་གཉིས་པོ་འདི་དག་ནི་ཐེག་པ་ཆེན་པོ་རྣམ་པར་དག་པར་འགྱུར་བ་སྟེ། སུམ་ཅུ་རྩ་གཉིས་གང་ཞེ་ན་འདི་ལྟ་སྟེ། གསོལ་བ་མ་བཏབ་པར་སེམས་ཅན་ཐམས་ཅད་ལ་དགེ་བའི་བཤེས་
གཉེན་དུ་གྱུར་པ་དང་། གཞན་གྱིས་བྱས་པ་རྣམས་ལ་མངོན་པར་དགའ་བ་མེད་པ་དང་། དགེ་བའི་རྩ་བའི་ཚོགས་ཐམས་ཅད་ལ་བསམ་པ་བརྟན་པ་དང་། བྱ་བ་ཐམས་ཅད་ཡོངས་སུ་གྲུབ་པ་ལ་ཞུམ་པ་མེད་པ་དང་། བསམ་པ་དག་པས་སེམས་རྙོག་པ་མེད་པ་དང་སྤྱོད་ལམ་ཐམས་ཅད་
དུ་རྣམ་པར་མི་རྟོག་པས་ལུས་ཡོངས་སུ་དག་པ་དང་། ཇི་སྐད་སྨྲས་པ་དེ་བཞིན་དུ་བྱེད་པས་ངག་ཡོངས་སུ་དག་པ་དང་། བྱང་ཆུབ་ཀྱི་སེམས་མི་འདོར་བས་སེམས་ཡོངས་སུ་དག་པ་དང་། ལན་ལ་མི་རེ་བས་སྦྱིན་པ་ཡོངས་སུ་དག་པ་དང་། ངང་ཚུལ་ངན་པ་ཡོངས་སུ་སྐྱོབ་པས་
ཚུལ་ཁྲིམས་ཡོངས་སུ་དག་པ་དང་། ལུས་དང་སྲོག་ལ་མི་ལྟ་བས་བཟོད་པ་ཡོངས་སུ་དག་པ་དང་། སྟོབས་བཅུ་དང་མི་འཇིགས་པ་བཞི་ཡོངས་སུ་རྫོགས་པར་བྱེད་པས། བརྩོན་འགྲུས་ཡོངས་སུ་དག་པ་དང་། ཉོན་མོངས་པ་ཐམས་ཅད་ཀྱིས་ཟིལ་གྱིས་མི་ནོན་པས་བསམ་
གཏན་ཡོངས་སུ་དག་པ་དང་། བག་ཆགས་ཐམས་ཅད་ཡང་དག་པར་འཇོམས་པས་ཤེས་རབ་ཡོངས་སུ་དག་པ་དང་། བདུད་ཀྱི་ལས་ཐམས་ཅད་ཡོངས་སུ་སྤོང་བས་སེམས་པ་དང་། ཁ་འོག་ཏུ་ལུས་འཁྲུས་པར་བྱེད་པས་ཡི་དམ་ལ་བརྟན་པ་དང་། སེམས་ཅན་ཡོངས་སུ་སྨིན་
པར་བྱེད་པས་བསྡུ་བའི་དངོས་པོ་རྣམས་མི་འདོར་བ་དང་། དམ་པའི་ཆོས་ཡོངས་སུ་སྲུང་བས་སངས་རྒྱས་ལ་བྱས་པ་གཟོ་བ་དང་། བྱང་ཆུབ་ཀྱི་ཕྱོགས་ཀྱི་ཆོས་རབ་ཏུ་རྫོགས་པར་བྱེད་པས་ཡོངས་སུ་མི་སྐྱོ་བ་དང་། ཤེས་རབ་དང་། ཡེ་ཤེས་རབ་ཏུ་རྫོགས་པར་བྱ་བའི་ཕྱིར་ཐོས་པས་མི་

ངོམས་པ་དང་། གོང་མའི་ཁྱད་པར་ཁོང་དུ་ཆུད་པས་དེ་ལ་མི་ཆགས་པ་དང་། སྤྱི་གཙུག་བལྟར་མི་མཐོང་བར་བྱ་བའི་ཕྱིར་ང་རྒྱལ་མེད་པར་ཉན་པ་དང་། རྒྱུ་དང་རྐྱེན་ཚོགས་པ་ཤིན་ཏུ་མཐོང་བའི་ཕྱིར་ཆོས་ཐམས་ཅད་དང་འགལ་བ་མེད་པ་དང་། འཕགས་པའི་ནོར་བདུན་རབ་ཏུ་ཐོབ་
པའི་ཕྱིར་དབུལ་བ་མེད་པ་དང་། བདག་ལ་དབང་བས་རང་དབང་ཡོད་དེ་བྲན་མ་ཡིན་པ་དང་། བསོད་ནམས་དང་ཡེ་ཤེས་ཀྱི་ཚོགས་མངོན་པར་བསྒྲུབས་པའི་མངོན་པར་ཤེས་པ་རྣམས་ཀྱིས་སེམས་ཅན་ཐམས་ཅད་ཀྱི་ཉོན་མོངས་པ་ཞི་བར་བྱེད་པ་དང་། དེ་བཞིན་གཤེགས་པའི་རིག་
པ་དང་། རྣམ་པར་གྲོལ་བ་བསྒྲུབས་པས་ཞི་གནས་ཀྱི་ཚོགས་དང་། ལྷག་མཐོང་གི་ཚོགས་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་སྒོམ་པའི་ཕྱིར་རྣམ་པར་ཐར་པའི་སྒོ་གསུམ་གྱི་སྒོ་མོ་ཀུན་དུ་སྟོན་པ་དང་། སེམས་ཅན་ཐམས་ཅད་
སྙེད་ཀྱི་ཡེ་ཤེས་ཁོང་དུ་ཆུད་པས་ནང་ཉེ་བར་ཞི་བ་དང་། མི་སྐྱེ་བའི་ཆོས་ལ་བཟོད་པའི་ཕྱིར་ཟད་པ་དང་མི་སྐྱེ་བ་ཤེས་པ་དང་། ཆོས་ཐམས་ཅད་ལ་ནན་ཏན་སྙིང་པོར་བྱེད་ཅིང་གནས་པ་ལུང་བསྟན་པ་སྟེ། བུ་མོ་ཆོས་སུམ་ཅུ་རྩ་གཉིས་པོ་དེ་དག་ནི་ཐེག་པ་ཆེན་པོ་རྣམ་པར་དག་པར་
འགྱུར་བའོ། །ཐེག་པ་ཆེན་པོ་རྣམ་པར་དག་པའི་ལེའུའི་ཆོས་ཀྱི་རྣམ་གྲངས་འདི་བཤད་པ་ན་ལྷ་དང་མིའི་སྐྱེ་དགུ་སྲོག་ཆགས་བདུན་ཁྲི་ཉིས་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་ཁྲི་ཉིས་སྟོང་ནི་མི་སྐྱེ་བའི་ཆོས་ལ་བཟོད་
པ་རབ་ཏུ་ཐོབ་པར་གྱུར་ཏོ། །སྟེང་གི་བར་སྣང་ལས་ཀྱང་ལྷ་བརྒྱ་སྟོང་གིས་ཅ་ཅོ་དང་། ག་ཞའི་སྒྲ་ཕྱུང་སྟེ་མེ་ཏོག་ཀྱང་གཏོར། སིལ་སྙན་ཡང་དཀྲོལ་ནས་གང་ཐེག་པ་ཆེན་པོའི་ཡོན་ཏན་དང་བསྔགས་པ་བསྟན་པའི་ཆོས་ཀྱི་སྒོའི་ལེའུ་འདི་ཐོས་ལ་ཐོས་ནས་ཀྱང་མོས་པ་དང་མོས་ནས་
ཀྱང་ལེན་ཅིང་འཛིན་ཏེ། །ཡང་དག་པར་ནན་ཏན་བྱེད་པའི་སེམས་ཅན་དེ་དག་ནི་སངས་རྒྱས་ཀྱི་ཡོན་ཏན་ལ་ངེས་པར་གནས་པར་འགྱུར་རོ་ཞེས་ཆེད་དུ་བརྗོད་པ་དེ་སྐད་ཆེད་དུ་བརྗོད་དོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་།

རྒྱལ་པོ་ཆེན་པོ་བཞིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱེ་མའོ་ཇི་ཙམ་དུ་ཆོས་ཀྱི་རྣམ་གྲངས་དོན་མང་པོ་དང་ལྡན་པ། སྒྲིབ་པའི་ཉོན་མོངས་པ་ཞི་བར་བགྱིད་པ། ངེས་པའི་དོན་དང་ལྡན་པ། བདུད་དང་ཕྱིར་རྒོལ་བ་བཅོམ་པ། ཕས་ཀྱི་རྒོལ་བ་ཐམས་ཅད་རབ་ཏུ་
འདུལ་བ། སངས་རྒྱས་ཀྱི་ཆོས་ཐམས་ཅད་ཀུན་དུ་འཛིན་པ། ཤིན་ཏུ་གདོན་མི་འཚལ་བ། ཟབ་མོ་ངེས་པའི་ཚིག་བསྟན་པ་འདི་བསྟན་པ་ངོ་མཚར་ཏོ། །བཅོམ་ལྡན་འདས་བདག་ཅག་གིས་ཀྱང་ཆོས་ཀྱི་རྣམ་གྲངས་འདི་བླང་བར་བགྱི། གཟུང་བར་བགྱིའོ། །ཆོས་ཀྱི་རྣམ་གྲངས་
འདི་ཆོས་སྨྲ་བ་གང་གི་སུག་པར་མཆིས་པ་དང་། མཛོད་དུ་ཚུད་པ་དང་། གླེགས་བམ་དུ་མཆིས་པར་འགྱུར་བ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་གང་དག་ཆོས་ཀྱི་རྣམ་གྲངས་འདི་ལ་མོས་པ་དང་། འཛིན་པར་འགྱུར་བ་དེ་དག་ཡོངས་སུ་གཟུང་བའི་སུག་ལས་བགྱིའོ། །
གང་སེམས་སྡང་བས་སྐབས་ཚོལ་བ་དེ་དག་ཅི་ནས་ཀྱང་ཆོས་སྨྲ་བ་དེ་དག་ཅི་ལྟ་བུར་མི་འགྱུར་བར་ཤིན་ཏུ་ཚར་དགུམ་པར་བགྱིའོ། །དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། འཇིག་རྟེན་སྐྱོང་བ་བཞི་ལ་ལེགས་སོ་ཞེས་བྱ་བ་གནང་
སྟེ་གྲོགས་པོ་དག་ཆོས་སྨྲ་བ་ཡོངས་སུ་གཟུང་བའི་ཕྱིར་དམ་བཅས་པར་གྱུར་པ་ནི་ལེགས་སོ་ལེགས་སོ། །གྲོགས་པོ་དག་ཆོས་སྨྲ་བ་ཡོངས་སུ་གཟུང་བས། དམ་པའི་ཆོས་ཡོངས་སུ་གཟུང་བ་ཡིན་ནོ། །དམ་པའི་ཆོས་ཡོངས་སུ་གཟུང་བས་སེམས་ཅན་ཐམས་ཅད་ཡོངས་སུ་
གཟུང་བ་བྱས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་བུ་མོ་རིན་ཆེན་གྱིས་དམ་པའི་ཆོས་ཡོངས་སུ་དྲིས་པའི་ཆོས་ཀྱི་རྣམ་གྲངས་འདི་ཟུང་ཤིག །ཆོངས་ཤིག །ལྷོགས་ཤིག །གཞན་ལ་ཡང་རྒྱ་
ཆེར་རབ་ཏུ་སྟོན་ཅིག །ཀུན་དགའ་བོ་བྱང་ཆུབ་སེམས་དཔའ་སྦྱིན་པ་ལ་མོས་པ། དམིགས་པ་ལ་གནས་པའི་བཟོད་པས་བསྐལ་པ་བརྒྱ་སྟོང་དུ་སྦྱིན་པ་བྱིན་པ་བས་གང་ཡང་བྱང་ཆུབ་སེམས་དཔའ་གཞན་ཞིག་ཆོས་ཀྱི་རྣམ་གྲངས་འདི་ལ་ཞུགས་ཏེ། གཞན་དག་ལ་ཡང་རབ་ཏུ་སྟོན་ཅིང་།

སེམས་ཅན་རབ་ཏུ་ཐར་བར་བྱ་བ་ལ་དམིགས་ནས་སྙིང་རྗེ་ཆེན་པོ་ལ་གནས་པ་དང་། གང་བྱམས་པ་ཆེན་པོ་དང་ལྡན་ཞིང་ཆོས་ངེས་པར་སེམས་པའི་བཟོད་པ་ལ་རབ་ཏུ་ཞུགས་ན། དེ་དེ་བས་བསོད་ནམས་ཆེས་མང་དུ་འཕེལ་ཏེ། འདི་ལྟར་ཐེག་པ་ཆེན་པོ་ལ་ཆེས་མྱུར་དུ་ངེས་པར་འབྱུང་བར་འགྱུར་རོ། །
དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཆོས་ཀྱི་རྣམ་གྲངས་འདི་གཟུང་ལགས་ན། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཅི་ལྟར་གཟུང་བར་བགྱི། བཅོམ་ལྡན་
འདས་ཀྱིས་བཀའ་སྩལ་པ། ཀུན་དགའ་བོ་དེ་བས་ན་ཆོས་ཀྱི་རྣམ་གྲངས་འདི་བདེན་པ་དང་། ཆོས་དང་། དོན་དང་། འདུལ་བ་ལ་མཁས་པའི་སྒོའི་ལེའུ་ཞེས་བྱ་བར་ཟུང་ཤིག །ཡོན་ཏན་རིན་པོ་ཆེ་མཐའ་ཡས་པར་སེམས་བསྐྱེད་པ་བསྟན་པ་ཞེས་བྱ་བ་དང་། དེ་བཞིན་གཤེགས་པའི་སྟོབས་དང་། མི་
འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་དང་། མཚན་རབ་ཏུ་དབྱེ་བ་བསྟན་པ་ཞེས་བྱ་བ་དང་། བྱང་ཆུབ་སེམས་དཔའི་ཆོས་སྤྱོད་པ་མཐའ་དག་ཅེས་བྱ་བ་དང་། ཕྱིར་མི་ལྡོག་པའི་ཕྱག་རྒྱ་བསྟན་པ་ཞེས་བྱ་བ་དང་། ཐེག་པ་ཆེན་པོའི་མན་ངག་ཅེས་བྱ་བ་དང་། འདུལ་བའི་ལེའུ་ཞེས་བྱ་བ་དང་། བུ་མོ་རིན་ཆེན་
གྱིས་ཞུས་པ་ཞེས་བྱ་བར་ཡང་ཟུང་ཤིག །ཀུན་དགའ་བོ་ཁྱོད་ཀྱིས་ཆོས་ཀྱི་སྒོའི་ལེའུ་འདི་བཟུང་ཞིང་། གཞན་དག་ལ་ཡང་བཤད་ན་ཡོན་ཏན་གྱི་ཆོས་དཔག་ཏུ་མེད་པ་ལ་ཆོས་ཀྱི་སྣང་བ་ཐོབ་པར་འགྱུར་རོ། །སེམས་ཅན་རྣམས་ལ་སངས་རྒྱས་ཀྱི་མཛད་པས་ཉེ་བར་གནས་པར་འགྱུར་རོ། །དེ་ཅིའི་ཕྱིར་ཞེ་ན། འདས་པ་དང་། མ་
བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ནི་འདིར་འདུས་པའི་ཕྱིར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོ་དང་། བུ་མོ་རིན་ཆེན་དང་། ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱིས་གསུངས་པ་ལ་
ཡི་རངས་ཏེ་མངོན་པར་བསྟོད་དོ།། །།འཕགས་པ་ཐེག་པ་ཆེན་པོའི་མན་ངག་ཅེས་བྱ་བ་ཐེག་པ་ཆེན་པོའི་མདོ་རྫོགས་སྟོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་ཤྲཱི་མ་ཏཱི་བྲཱཧྨ་ཎཱི་པ་རི་པྲྀཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བྲམ་ཟེ་མོ་དཔལ་ལྡན་མས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་
གིས་ཐོས་པ་དུས་གཅིག་ན། བཅོམ་ལྡན་འདས་བཱ་རཱ་ཎ་སཱི་ན་དྲང་སྲོང་ལྷུང་བ་རི་དགས་ཀྱི་ནགས་ན། དགེ་སློང་བདུན་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་
སྔ་དྲོའི་དུས་ཀྱི་ཚེ་ཆོས་གོས་དང་ཤམ་ཐབས་མནབས་ཏེ་ལྷུང་བཟེད་བསྣམས་ནས། ཕྱི་བཞིན་འབྲང་བའི་དགེ་སློང་ཚེ་དང་ལྡན་པ་ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་དང་། ཐབས་ཅིག་ཏུ་གྲོང་ཁྱེར་བཱ་རཱ་ཎ་སཱིར་བསོད་སྙོམས་ཀྱི་ཕྱིར་གཤེགས་སོ། །
དེ་ནས་བཅོམ་ལྡན་འདས་གྲོང་ཁྱེར་བཱ་རཱ་ཎ་སཱིར་མཐར་འཆགས་སུ་བསོད་སྙོམས་མཛད་ཅིང་། བྲམ་ཟེ་མོ་དཔལ་ལྡན་མའི་ཁྱིམ་ག་ལ་བ་དེར་གཤེགས་ཏེ་བྱོན་ནས། བསོད་སྙོམས་ཀྱི་ཕྱིར་ཕྱོགས་གཅིག་ཏུ་བཞུགས་པ་དང་། བྲམ་ཟེ་མོ་དཔལ་ལྡན་མས་བཅོམ་ལྡན་འདས་མཛེས་པ་དད་པར་
བྱ་བ། དབང་པོ་ཞི་བ། ཐུགས་ཞི་བ། དུལ་བ་དང་ཞི་གནས་ཀྱི་ཕ་རོལ་དུ་སོན་པ། ཞི་གནས་མཆོག་གི་ཕ་རོལ་དུ་བྱོན་པ། ཞི་བ་དུལ་བ། བསྲུངས་པ་དང་། སྡིག་པ་མེད་པ་དབང་པོ་དུལ་བ། ཁ་དོག་བཟང་པོ་རྒྱས་པ་མཆོག་དང་ལྡན་པ། མཚོ་ལྟར་དང་ཞིང་གསལ་ལ་རྙོག་པ་མེད་པ།
གསེར་གྱི་མཆོད་སྡོང་ལྟར་མངོན་པར་འཕགས་པ་མི་བསྐྱོད་པ། མི་གཡོ་བ། བརྙེས་པ་དཔལ་གྱིས་འབར་བ། ལྷམ་མེ། ལྷན་ནེ། ལྷང་ངེ་ཞིང་གཤེགས་པ་རྒྱང་རིང་པོ་དེ་ཉིད་ནས་མཐོང་ངོ་། །མཐོང་ནས་ཀྱང་སེམས་དང་བར་གྱུར་ཏེ། དེ་སེམས་དང་བས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས།
བཅོམ་ལྡན་འདས་ཀྱི་ཞབས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པའི་རྐང་པ་ལ་ཕྱག་འཚལ་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས་ལེགས་པར་བྱོན་ཏོ། །

བཅོམ་ལྡན་འདས་ལེགས་པར་བྱོན་ཏོ། །བཅོམ་ལྡན་འདས་གདན་བཤམས་པ་འདི་ལ་བཞུགས་སུ་གསོལ་ཞེས་གསོལ་པ་དང་། བཅོམ་ལྡན་འདས་དང་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་སོ་སོ་ཅི་རིགས་པར་བཞུགས་སོ། །དེ་ནས་བྲམ་ཟེ་མོ་
དཔལ་ལྡན་མས་བཅོམ་ལྡན་འདས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་བདེ་བར་བཞུགས་པར་རིག་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གྲོང་ཁྱེར་བཱ་
རཱ་ཎ་སཱིར་དྲང་སྲོང་ལྷུང་བ་རི་དགས་ཀྱི་ནགས་འདིར་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་ཏོ་ཞེས་བདག་གིས་ཐོས་ན། བཅོམ་ལྡན་འདས་བཅོམ་ལྡན་འདས་ཀྱིས་གང་བསྐོར་བའི་ཆོས་ཇི་ལྟ་བུ་ཞིག་ལགས་དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྲམ་ཟེ་མོ་དཔལ་ལྡན་
མ་ལ་འདི་སྐད་ཅེས་བཀའ་སྩལ་ཏོ། །དཔལ་ལྡན་མ་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་རྣམས་ཀྱི་རྐྱེན་གྱིས་རྣམ་པར་ཤེས་པ་དང་། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ།
རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུགས་པ་རྣམས་
འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་དག་འབྱུང་བར་འགྱུར་རོ། །མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་
འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་

འགག །སྐྱེ་བ་འགགས་པས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུགས་པ་རྣམས་འགགས་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ་ཞེས་བྱ་བ་དཔལ་ལྡན་མ་དགེ་སྦྱོང་ངམ། བྲམ་
ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་འཐུན་པར་འཇིག་རྟེན་དུ་མ་བསྐོར་བའི་ཆོས་ཀྱི་འཁོར་ལོ་འདི་གྲོང་ཁྱེར་བཱ་རཱ་ཎ་སཱིར་དྲང་སྲོང་ལྷུང་བ་རི་དགས་ཀྱི་ནགས་སུ་དེ་བཞིན་གཤེགས་པས་བསྐོར་ཏོ། །དེ་སྐད་ཅེས་བཀའ་སྩལ་པ་དང་། བྲམ་ཟེ་མོ་དཔལ་ལྡན་
མས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་མ་རིག་པ་ནང་ན་མཆིས་སམ། སླད་རོལ་ན་མཆིས། བཅོམ་ལྡན་འདས་ཀྱིས་བཀའ་སྩལ་པ། དཔལ་ལྡན་མ་དེ་ནི་མ་ཡིན་ནོ། །གསོལ་པ། བཅོམ་ལྡན་འདས་གལ་ཏེ་མ་རིག་པ་ནང་དང་སླད་རོལ་ན་
མ་མཆིས་པ་ལགས་ན་མ་མཆིས་པ་དེ་ཇི་ལྟར་འདུ་བྱེད་རྣམས་ཀྱི་རྐྱེན་དུ་འགྱུར་ཏེ། བཅོམ་ལྡན་འདས་ཆོས་གང་ཡང་འཇིག་རྟེན་ཕ་རོལ་ན་མཆིས་ལགས་སམ། བཀའ་སྩལ་པ། དཔལ་ལྡན་མ་དེ་ནི་མ་ཡིན་ནོ། །གསོལ་པ། བཅོམ་ལྡན་འདས་མ་རིག་པའི་རྣམ་པ་མཆིས་ལགས་སམ།
བཅོམ་ལྡན་འདས་ཀྱིས་བཀའ་སྩལ་པ། དཔལ་ལྡན་མ་དེ་ནི་མེད་དེ། དཔལ་ལྡན་མ་མ་རིག་པ་ནི་ཡང་དག་པ་མ་ཡིན་པའི་རྣམ་པར་འབྱུང་གི་ཡང་དག་པའི་རྣམ་པར་ནི་མི་འབྱུང་ངོ་། །དཔལ་ལྡན་མ་མ་རིག་པ་ནི་ཕྱིན་ཅི་ལོག་གི་རྣམ་པར་འབྱུང་གི། ཕྱིན་ཅི་མ་ལོག་པའི་རྣམ་པར་མི་
འབྱུང་ངོ་། །གསོལ་པ། བཅོམ་ལྡན་འདས་མ་རིག་པ་མ་མཆིས་ན། འདུ་བྱེད་རྣམས་ཅི་ལས་འབྱུང་། སྡུག་བསྔལ་ཡང་ཅི་ལས་འབྱུང་། བཅོམ་ལྡན་འདས་འདི་ལྟ་སྟེ་དཔེར་ན་ཞུགས་ཤིང་ནྱ་གྲོ་དྷའི་རྩ་བ་མ་མཆིས་ན་དེའི་ཡལ་ག་དང་། ལོ་མ་དང་། ཡལ་ག་ཕྲེའུ་ཅི་ལྟར་
མངོན་པར་འགྱུར། བཅོམ་ལྡན་འདས་དེ་བཞིན་དུ་མ་རིག་པ་མ་བྱུང་ཞིང་མཆིས་པ་མ་ལགས་ན་མ་རིག་པ་འདུ་བྱེད་རྣམས་ཀྱི་རྐྱེན་ཀྱང་ལགས་པར་ཇི་ལྟར་འཚལ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་ཏེ། དཔལ་ལྡན་མ་རང་གི་མཚན་ཉིད་སྟོང་པ་ཉིད་ཀྱིས་

ཆོས་ཐམས་ཅད་སྟོང་ན་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་མི་ཤེས་པ་མ་རྟོགས་པ་དག་ལས་མངོན་པར་འདུ་བྱེད་དེ། ལས་རྣམས་ཡོད་པས་སྲིད་པ་མངོན་པར་འགྲུབ་པར་བྱེད་དོ། །སྲིད་པ་ཡོད་པས་སྡུག་བསྔལ་མྱོང་བར་ཟད་དེ། འདི་ལ་ལས་མངོན་པར་འདུ་བྱེད་པ་
ཡང་སུ་ཡང་མེད་ཅིང་སྲིད་པ་མངོན་པར་འགྲུབ་པར་བྱེད་པ་ཡང་མེད་དེ། དེ་ནི་ཆོས་རྣམས་ཀྱི་དོན་དམ་པའོ། །དཔལ་ལྡན་མ་འོན་ཀྱང་སེམས་ཅན་རྣམས་ཇི་ལྟར་དོན་དམ་པ་རྟོགས་པར་འགྱུར་སྙམ་ནས་ཐ་སྙད་ཉེ་བར་བཟུང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་རྣམས་སེམས་ཅན་རྣམས་ལ་ཆོས་སྟོན་ཏོ། །དཔལ་ལྡན་མ་ཐ་སྙད་ནི་ཡང་དག་པ་མ་ཡིན་ཏེ། དེ་ཅིའི་ཕྱིར་ཞེ་ན། དེ་ལ་ཁོང་དུ་ཆུད་པར་བྱེད་པ་པོ་ཡང་མེད། དེ་ལ་ཤེས་པར་བྱེད་པ་ཡང་མེད་པའི་ཕྱིར་རོ། །དཔལ་ལྡན་མ་འདི་ལྟ་སྟེ་དཔེར་ན། དེ་བཞིན་
གཤེགས་པས་སྤྲུལ་པ་སྤྲུལ་ཏེ། དེ་བཞིན་གཤེགས་པས་སྤྲུལ་པ་དེས་ཀྱང་