Kinh tạng Tây Tạng (Kangyur Đại Học) — 059_མདོ་སྡེ།_བ

དང་། སྡུག་བསྔལ་དང་། སྡུག་པ་དང་། མི་སྡུག་པ་དང་། བདག་དང་། བདག་མེད་པར་བྱེད་པ་ནི་ལྷག་པར་བྱེད་པ་ཡིན་ནོ། །སྟོང་པ་ཞེས་བྱ་

བ་དང་། གང་ཟག་ཅེས་བྱ་བ་དེ་ནི་ལྷག་པར་བྱེད་པ་ཡིན་ནོ། །མཚན་མ་མེད་པ་ཞེས་བྱ་བ་དང་། སྨོན་པ་མེད་པ་ཞེས་བྱ་བ་འདི་ནི་ལྷག་པར་བྱེད་པ་ཡིན་ནོ། །སྒྱུ་མ་དང་། རྨི་ལམ་དང་། མིག་ཡོར་དང་། གཟུགས་བརྙན་དང་། བྲག་ཅ་དང་། ཆུ་ཟླ་དང་། སྨིག་རྒྱུ་དང་།
སྤྲུལ་པའི་དཔེ་ཉེ་བར་དགོད་པ་དག་གི་ཆོས་རྣམ་པར་འཇོག་པར་བྱེད། མཚོན་པར་བྱེད། འཇུག་པར་བྱེད། སྟོན་པར་བྱེད་པ་དེ་ནི་ལྷག་པར་བྱེད་པ་ཡིན་ནོ། །དེ་ཇི་ཙམ་དུ་ཆོས་རྣམ་པར་འཇོག་པར་བྱེད་པ་དེ་ཙམ་དུ་ལྷག་པར་བྱེད་པ་ཡིན་ཏེ། ཀུན་ནས་ཉོན་མོངས་པ་ལ་སྐྱོན་དུ་བྱེད་པ་དང་། རྣམ་
པར་བྱང་བ་ལ་སྐྱོན་མེད་པར་བྱེད་པ་དེ་ནི་ལྷག་པར་བྱེད་པ་ཡིན་ནོ། །འཁོར་བ་ལ་སྐྱོན་དུ་ལྟ་བར་བྱེད་པ་དང་། མྱ་ངན་ལས་འདས་པ་ལ་ཕན་ཡོན་དུ་ལྟ་བར་བྱེད་པ་དེ་ནི་ལྷག་པར་བྱེད་པ་ཡིན་ཏེ། ལྷའི་བུ་དེ་དག་ནི་ལྷག་པའི་ང་རྒྱལ་ཅན་རྣམས་ཀྱིས་ལྷག་པར་བྱེད་པ་དག་ཡིན་ནོ། །ལྷའི་བུས་སྨྲས་པ།
འཇམ་དཔལ་ཇི་ལྟར་ན་ལྷག་པའི་ང་རྒྱལ་མེད་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གིས་ངེས་པར་འབྱུང་བའི་དབྱིངས་རྟོགས་ཤིང་། ཉོན་མོངས་པ་ཐམས་ཅད་འགོག་པ་བསྒྲུབས་ཏེ། གནས་ཀྱང་འགོག་པ་འགོག་པར་ཡང་མི་བྱེད་ལ། སྐྱེ་བ་མེད་པ་སྐྱེད་པར་ཡང་མི་
བྱེད་ཅིང་། སྒྲ་ཐམས་ཅད་ཀྱིས་སྐྲག་པར་ཡང་མི་བྱེད་ལ། ཀུན་ནས་ཉོན་མོངས་པའི་རང་བཞིན་གང་ཡིན་པ་དེ་ཉིད་རྣམ་པར་བྱང་བའི་རང་བཞིན་ཡིན་པ་དེ་ལྟར་ཤེས་ཤིང་། ཆོས་ཐམས་ཅད་ལ་གཉིས་དང་བྲལ་བ་དང་། བླང་བ་མེད་པ་དང་། དོར་བ་མེད་པ་ཐོབ་པ་དེ་ནི་ལྷའི་བུ་ལྷག་པའི་ང་
རྒྱལ་མེད་པ་ཡིན་ནོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན་ལྷའི་བུ་ཉི་ཁྲི་ཉིས་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །དགེ་སློང་ལྔ་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་ཉི་ཁྲི་
ཉིས་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་སྟོང་ཕྲག་རབ་ཏུ་མང་པོ་དག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དགེ་བསྙེན་སྟོང་ཡང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །ཁྱིམ་

པ་དང་རབ་ཏུ་བྱུང་བ་ལས་བུད་མེད་ཉིས་སྟོང་ཡང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །དེ་ནས་ལྷའི་བུ་རབ་རྩལ་སེམས་ཀྱིས་ཉན་ཐོས་ཆེན་པོ་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཁྱེད་ཅག་ཀྱང་ཐེ་ཙོམ་ཅི་ཡོད་པ་དག་འཇམ་དཔལ་གཞོན་ནུར་གྱུར་
པ་ལ་དྲིས་ཤིག །དེ་ནས་གནས་བརྟན་འོད་སྲུང་ཆེན་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དགེ་སློང་རྣམ་པར་ཐར་པ་བརྒྱད་ལ་བསམ་གཏན་བྱེད་པ་ཇི་ཞིག་ལ་བསམ་གཏན་བྱེད་པ་ཡིན། འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་དགེ་
སློང་རྣམ་པར་ཐར་པ་བརྒྱད་ལ་བསམ་གཏན་བྱེད་པ་ནི་རྩ་བ་མེད་པ་དང་། མཐའ་མེད་པ་དང་། གནས་མེད་པ་ལ་བསམ་གཏན་བྱེད་པ་དང་། མི་འཁྲུགས་པ་ལ་བསམ་གཏན་བྱེད་པ་དང་། ཡང་དག་པ་ལ་བསམ་གཏན་བྱེད་པ་ཡིན་ནོ། །འོད་སྲུང་ཆེན་པོས་སྨྲས་པ། འཇམ་དཔལ་ཅི་
ལས་བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་རྩ་བ་ནི་རང་གི་ལུས་ཡིན། མཐའ་ནི་ངར་འཛིན་པ་ཡིན། གནས་ནི་ཁམས་གསུམ་པ་ཡིན། འཁྲུགས་པ་ནི་ཉོན་མོངས་པ་རྣམས་ཡིན། མི་མཉམ་པ་ནི་གཉིས་ཡིན་ཏེ། དེ་ལ་དེས་ལུས་ནི་རྩ་བ་མེད་
པར་ཤེས། ངར་འཛིན་པ་ནི་མཐའ་མེད་པར་ཤེས། ཁམས་གསུམ་ནི་གནས་མེད་པར་ཤེས། ཉོན་མོངས་པ་རྣམས་ནི་མི་འཁྲུགས་པར་ཤེས། བསམ་གཏན་རྣམས་ནི་གཉིས་སུ་མེད་པར་ཤེས་པས་ན། བཙུན་པ་འོད་སྲུང་ཆེན་པོ་ཁོ་བོས་དེ་ལས་བསམས་ནས་དགེ་སློང་རྣམ་
པར་ཐར་པ་བརྒྱད་ལ་བསམ་གཏན་བྱེད་པ་ནི་རྩ་བ་མེད་པ་དང་། མཐའ་མེད་པ་དང་། གནས་མེད་པ་ལ་བསམ་གཏན་བྱེད་པ་དང་། མི་འཁྲུགས་པ་ལ་བསམ་གཏན་བྱེད་པ་དང་། ཡང་དག་པ་ལ་བསམ་གཏན་བྱེད་པ་ཡིན་ནོ་ཞེས་སྨྲས་སོ། །ཤཱ་རིའི་བུས་སྨྲས་པ། འཇམ་དཔལ་
ཇི་ལྟར་ན་བྱང་ཆུབ་སེམས་དཔའ་ཆགས་པ་མེད་པའི་ཤེས་རབ་དང་ལྡན་པ་ཡིན། འཇམ་དཔལ་གྱིས་སྨྲས་པ། བཙུན་པ་ཤཱ་རིའི་བུ་བྱང་ཆུབ་སེམས་དཔའ་གང་ཆགས་པ་ཐམས་ཅད་ལ་སྤྱོད་པར་བྱེད་ཀྱང་ཆགས་པ་ཐམས་ཅད་ཀྱིས་གོས་པར་མི་འགྱུར་ཞིང་། ཉོན་མོངས་པ་ཐམས་

ཅད་ལ་མངོན་སུམ་དུ་བྱེད་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར། ཉོན་མོངས་པ་དེ་དག་གི་རང་བཞིན་གང་ཡིན་པའི་ཉོན་མོངས་པ་དེ་དག་ཀྱང་སྤོང་བར་མི་བྱེད་ན། དེ་ཙམ་གྱིས་ན་བྱང་ཆུབ་སེམས་དཔའ་ཆགས་པ་མེད་པའི་ཤེས་རབ་དང་ལྡན་པ་ཡིན་ནོ། །མཽད་གལ་
གྱི་བུ་ཆེན་པོས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་རྫུ་འཕྲུལ་ཆེ་བ་ཡིན། འཇམ་དཔལ་གྱིས་སྨྲས་པ། བཙུན་པ་མཽད་གལ་གྱི་བུ་ཆེན་པོ་བྱང་ཆུབ་སེམས་དཔའ་གང་འདུས་བྱས་ཀྱང་མ་ཐོབ། འདུས་མ་བྱས་ཀྱང་མ་ཐོབ་ལ། སློབ་པ་དང་མི་སློབ་པ་རྣམས་
ཀྱང་འདུལ་བར་བྱེད་ན། དེ་ཙམ་གྱིས་ན་བྱང་ཆུབ་སེམས་དཔའ་རྫུ་འཕྲུལ་ཆེ་བ་ཡིན་ནོ། །རབ་འབྱོར་གྱིས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཉོན་མོངས་པ་མེད་པར་གནས་པ་ཡིན། འཇམ་དཔལ་གྱིས་སྨྲས་པ། བཙུན་པ་རབ་འབྱོར་གང་གི་ཚེ་བྱང་ཆུབ་
སེམས་དཔའ་ཆོས་ཐམས་ཅད་སྒྲིབ་པ་མེད་པར་ཤེས་པར་བྱེད་ལ། ཕ་རོལ་དང་ཚུ་རོལ་དང་བྲལ་བར་བྱེད་ཅིང་། བྱང་ཆུབ་ཀྱི་སྒྲིབ་པ་ཡང་མི་སྤོང་ལ་ཏིང་ངེ་འཛིན་ལས་ཀྱང་མི་ལྡང་ཞིང་། བྱ་བ་ཐམས་ཅད་ཀྱང་སྟོན་པར་བྱེད་ན། དེ་ཙམ་གྱིས་ན་བྱང་ཆུབ་སེམས་དཔའ་ཉོན་མོངས་པ་
མེད་པར་གནས་པ་ཡིན་ནོ། །བྱམས་མའི་བུ་གང་པོས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཆོས་སྨྲ་བ་ཡིན། འཇམ་དཔལ་གྱིས་སྨྲས་པ། བཙུན་པ་གང་པོ་གང་གི་ཚེ་བྱང་ཆུབ་སེམས་དཔའ་དབང་པོ་ཐམས་ཅད་ཀྱིས་སྤོབས་པར་བྱེད་ཅིང་། འདུ་བྱེད་ཐམས་
ཅད་མི་རྟག་གོ་ཞེས་འབྲས་བུ་ཡོད་པར་ཆོས་སྟོན་པར་བྱེད་ལ། བསྐལ་པ་སྟོང་ཕྲག་རྣམས་སུ་དོན་དང་། ཚིག་དང་། ཡི་གེ་སྟོན་པ་རྣམས་ཀྱིས་རྒྱས་པར་སྟོན་པར་བྱེད་ཀྱང་མཐར་ཐུག་པར་མི་འགྱུར་ན། དེ་ཙམ་གྱིས་ན་བྱང་ཆུབ་སེམས་དཔའ་ཆོས་སྟོན་པ་ཡིན་ནོ། །ནམ་གྲུས་སྨྲས་པ།
འཇམ་དཔལ་ཇི་ལྟར་ན་བྱང་ཆུབ་སེམས་དཔའ་བསམ་གཏན་པ་ཡིན། འཇམ་དཔལ་གྱིས་སྨྲས་པ། བཙུན་པ་ནམ་གྲུ་གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་རང་བཞིན་གྱིས་མཉམ་པར་གཞག་པ་ཉིད་ཡིན་པར་ཡང་ཤེས་པར་བྱེད་ལ། སེམས་རྣམ་པར་གཡེངས་པ་རྣམས་

ལ་སྙིང་རྗེ་ཆེན་པོ་བསྐྱེད་དེ། ཕྱི་མའི་མཐའི་མུར་ཐུག་པའི་བར་དུ་སྤྱོད་པར་བྱེད་ཅིང་། བསམ་གཏན་ལ་གནས་པ་ལས་གཡོ་བར་མི་འགྱུར་ན། དེ་ཙམ་གྱིས་ན་བྱང་ཆུབ་སེམས་དཔའ་བསམ་གཏན་པ་ཡིན་ནོ། །ཉེ་བར་འཁོར་གྱིས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་
འདུལ་བ་འཛིན་པ་ཡིན། འཇམ་དཔལ་གྱིས་སྨྲས་པ། བཙུན་པ་ཉེ་བར་འཁོར་གང་གི་ཚེ་བྱང་ཆུབ་སེམས་དཔའ་ཆོས་རྣམས་གཏན་དུལ་བ་ཉིད་དུ་ཡང་ཤེས་པར་བྱེད་ཅིང་ལྟུང་བ་དང་ཉོན་མོངས་པ་དང་བྲལ་ལ། ལྟུང་བ་དང་ཉོན་མོངས་པ་གདུལ་བའི་ཕྱིར་ཆོས་སྟོན་པར་ཡང་བྱེད་ཅིང་།
དེ་ལྟར་ཉོན་མོངས་པ་རྣམས་རྟོགས་པར་ཡང་བྱེད་ལ་བྱང་ཆུབ་ཀྱང་ཚོལ་བར་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་འདུལ་བ་འཛིན་པ་ཡིན་ནོ། །མ་འགགས་པས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ལྷའི་མིག་དང་ལྡན་པ་ཡིན། འཇམ་དཔལ་གྱིས་སྨྲས་པ།
བཙུན་པ་མ་འགགས་པ་གང་གི་ཚེ་བྱང་ཆུབ་སེམས་དཔའ་ཕྱོགས་བཅུའི་གཟུགས་སྣང་བ་ཐམས་ཅད་ཀྱང་མཐོང་བར་བྱེད་ལ། གཟུགས་དབེན་པར་མཐོང་བས་ཆོས་ཐམས་ཅད་དབེན་པར་མཐོང་བ་རྗེས་སུ་རྟོགས་པར་བྱེད་ན། དེ་ཙམ་གྱིས་ན་བྱང་ཆུབ་སེམས་དཔའ་ལྷའི་མིག་དང་ལྡན་པ་
ཡིན་ནོ། །བ་ཀུ་ལས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་དབང་པོ་བསྲུང་བ་ཡིན། འཇམ་དཔལ་གྱིས་སྨྲས་པ། གང་གི་ཚེ་བྱང་ཆུབ་སེམས་དཔའ་ཡུལ་ཐམས་ཅད་སངས་རྒྱས་ཀྱི་ཡུལ་ཡིན་པར་ལྟ་ཞིང་། སངས་རྒྱས་ཀྱི་ཡུལ་ཡང་ཡུལ་མེད་པར་ལྟ་ན་དེ་ཙམ་གྱིས་
ན་བྱང་ཆུབ་སེམས་དཔའ་དབང་པོ་བསྲུང་བ་ཡིན་ནོ། །སོར་མོའི་ཕྲེང་བས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་དབང་པོ་རྣོ་བ་ཡིན། འཇམ་དཔལ་གྱིས་སྨྲས་པ། གང་གི་ཚེ་བྱང་ཆུབ་སེམས་དཔའ་བྱང་ཆུབ་རང་བཞིན་གྱིས་མ་སྐྱེས་པའི་ཕྱིར། མཚམས་མེད་པ་དང་
མཉམ་པར་ལྟ་བར་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་དབང་པོ་རྣོ་བ་ཡིན་ནོ། །ཀཱ་ཏྱཱའི་བུ་ཆེན་པོས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་མདོ་སྡེ་རྣམ་པར་འབྱེད་པ་ལ་མཁས་པ་ཡིན། འཇམ་དཔལ་གྱིས་སྨྲས་པ། བཙུན་པ་ཀཱ་ཏྱཱའི་བུ་ཆེན་པོ་གང་གི་ཚེ་

བྱང་ཆུབ་སེམས་དཔའ་སོ་སོ་ཡང་དག་པར་རིག་པ་མི་ཟད་པ་བཞི་ཐོབ་ཅིང་། ཚིག་གཅིག་གིས་ཀྱང་བསྐལ་པ་འབུམ་གྱི་བར་དུ་རྒྱ་ཆེར་རྣམ་པར་འབྱེད་ཅིང་སྟོན་ལ། ཅི་ནས་ཀྱང་ཀུན་ནས་ཉོན་མོངས་པ་སྤོང་བར་མི་བྱེད་པ་དང་། རྣམ་པར་བྱང་བ་ལེན་པར་མི་བྱེད་པ་
དེ་ལྟར་སྟོན་པར་བྱེད་པ་དང་། ཆོས་ཉིད་གནས་པ་ལས་ཀྱང་མི་གཡོ་ལ་གནས་ཐམས་ཅད་ལ་ཡང་མི་རྟེན་པ་དེ་ལྟར་སྟོན་པར་བྱེད་ན། དེ་ཙམ་གྱིས་ན་བྱང་ཆུབ་སེམས་དཔའ་མདོ་སྡེ་རྣམ་པར་འབྱེད་པ་ལ་མཁས་པ་ཡིན་ནོ། །གསུས་པོ་ཆེ་ཆེན་པོས་སྨྲས་པ། འཇམ་དཔལ་ཇི་ལྟར་ན་
བྱང་ཆུབ་སེམས་དཔའ་སོ་སོ་ཡང་དག་རིག་པ་ཐོབ་པ་ཡིན། འཇམ་དཔལ་གྱིས་སྨྲས་པ། གང་གི་ཚེ་བྱང་ཆུབ་སེམས་དཔའ་བརྗོད་དུ་མེད་པའི་དོན་གྱིས་དོན་སོ་སོ་ཡང་དག་པར་རིག་པ་སྟོན་པ་དང་། ཆོས་ཀྱི་དབྱིངས་གནས་པ་ཉིད་ཀྱིས་ཆོས་སོ་སོ་ཡང་དག་པར་རིག་པ་སྟོན་པ་དང་། མིང་
དང་མཚན་མ་མེད་པ་ཉིད་ཀྱིས་ངེས་པའི་ཚིག་སོ་སོ་ཡང་དག་པར་རིག་པ་སྟོན་པ་དང་། བྲག་ཅ་དང་མཉམ་པ་ཉིད་ཀྱིས་སྤོབས་པ་སོ་སོ་ཡང་དག་པར་རིག་པ་སྟོན་པར་བྱེད་ན། དེ་ཙམ་གྱིས་ན་བྱང་ཆུབ་སེམས་དཔའ་སོ་སོ་ཡང་དག་པར་རིག་པ་ཐོབ་པ་ཡིན་ནོ། །སྒྲ་གཅན་ཟིན་གྱིས་སྨྲས་པ།
འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཚུལ་ཁྲིམས་དང་ལྡན་པ་ཡིན། འཇམ་དཔལ་གྱིས་སྨྲས་པ། བཙུན་པ་སྒྲ་གཅན་ཟིན་གང་གི་ཚེ་བྱང་ཆུབ་སེམས་དཔའ་ཚུལ་ཁྲིམས་དང་བརྟུལ་ཞུགས་ཡང་དག་པར་བླངས་ཤིང་། སེམས་ཅན་ཡོངས་སུ་སྨིན་པར་བྱ་བའི་ཕྱིར། ཚུལ་
ཁྲིམས་འཆལ་པའི་འགྲོ་བ་གང་ཡིན་པར་འགྲོ་བར་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་ཚུལ་ཁྲིམས་དང་ལྡན་པ་ཡིན་ནོ། །ཀུན་དགའ་བོས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་མང་དུ་ཐོས་པ་ཡིན། འཇམ་དཔལ་གྱིས་སྨྲས་པ། བཙུན་པ་ཀུན་དགའ་
བོ་གང་གི་ཚེ་བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱིས་གསུངས་པར་ཉན་པར་བྱེད་ཅིང་ཐོས་པ་ཐམས་ཅད་ཀྱི་དོན་ཀྱང་རྟོགས་པར་བྱེད་ལ། ཇི་ལྟར་ཐོས་པ་ཡང་འཛིན་པར་བྱེད་ཅིང་། ཇི་ལྟར་གཟུང་བ་བཞིན་སྟོན་པར་ཡང་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་མང་དུ་ཐོས་པ་

ཡིན་ནོ། །དེ་ནས་ལྷའི་བུ་རབ་རྩལ་སེམས་ཀྱིས་ཉན་ཐོས་ཆེན་པོ་དེ་དག་ལ་འདི་སྐད་སྨྲས་སོ། །ཚེ་དང་ལྡན་པ་དག་ཁྱེད་ཅག་འཇམ་དཔལ་གཞོན་ནུར་གྱུར་པས་འདི་སྐད་བསྟན་པ་དེ་ལྟ་བུའི་ཆོས་འགའ་དང་ལྡན་ནམ། དེ་དག་གིས་སྨྲས་པ། ལྷའི་བུ་བདག་ཅག་ལ་ནི་ཆོས་དེ་དག་ལས་འགའ་ཙམ་
ཡང་མེད་དོ། །ལྷའི་བུས་སྨྲས་པ། ཚེ་དང་ལྡན་པ་དག་དེ་ལྟ་ན་ཁྱེད་ཅག་ཉན་ཐོས་ཆེན་པོ་མཆོག་ཏུ་གྱུར་པ་མ་ཡིན་པར་མི་འགྱུར་རམ། ཤཱ་རིའི་བུས་སྨྲས་པ། ལྷའི་བུ་འདི་ལྟ་སྟེ་དཔེར་ན། གནག་རྗེས་ལས་བརྟེན་ན་རྫིང་བུ་མཆོག་ཡིན་པ་དེ་བཞིན་དུ་ཉན་ཐོས་གཞན་དག་ལས་བརྟེན་ན་ཁོ་བོ་ཅག་ཀྱང་
མཆོག་ཡིན་ནོ། །འདི་ལྟ་སྟེ་དཔེར་ན། རྒྱ་མཚོ་ཆེན་པོ་ལས་བརྟེན་ན་འོག་གི་ཆུའི་ཕུང་པོ་མཆོག་ཡིན་པ་དེ་བཞིན་དུ་ཉན་ཐོས་དང་། རང་སངས་རྒྱས་ཐམས་ཅད་ལས་བརྟེན་ན་བྱང་ཆུབ་སེམས་དཔའ་མཆོག་ཡིན་ནོ། །ལྷའི་བུས་སྨྲས་པ། བཙུན་པ་ཤཱ་རིའི་བུས་དེ་ནི་ཉན་ཐོས་མངོན་པའི་ང་རྒྱལ་མེད་
པ་རྣམས་ཀྱིས་བསྟན་པ་ཡིན་ཏེ། ལེགས་སོ་ལེགས་སོ། །འཇམ་དཔལ་གྱིས་སྨྲས་པ། ལྷའི་བུ་དེ་དེ་བཞིན་ཏེ། ཉན་ཐོས་ནི་ལྷག་པའི་ང་རྒྱལ་མེད་པ་ཡིན་ནོ། །བྱང་ཆུབ་སེམས་དཔའ་ནི་ལྷག་པའི་ང་རྒྱལ་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལས་བསམས་ཏེ་དེ་སྐད་
སྨྲ། འཇམ་དཔལ་གྱིས་སྨྲས་པ། ལྷའི་བུ་འདི་ལྟར་ཉན་ཐོས་རྣམས་ནི་རང་སངས་རྒྱས་ལ་བརྟེན་ནས་ང་རྒྱལ་སྤངས་པ་ཡིན་གྱི། བྱང་ཆུབ་སེམས་དཔའ་ནི་ལྷག་པའི་ང་རྒྱལ་ཅན་ཡིན་ལ། ང་རྒྱལ་དེས་སངས་རྒྱས་ཀྱི་ཆོས་རྣམས་ཡང་དག་པར་སྒྲུབ་པར་བྱེད་པས་ན། དེའི་ཕྱིར་
བྱང་ཆུབ་སེམས་དཔའ་ནི་ལྷག་པའི་ང་རྒྱལ་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ་ལྷག་པའི་ང་རྒྱལ་ཅན་ནི་བདག་ལ་སྟོད་པར་བྱེད་ཅིང་གཞན་ལ་སྨོད་པར་བྱེད་པ་ཡིན་ན། བྱང་ཆུབ་སེམས་དཔའ་ཡང་དེ་ལྟ་བུར་མི་འགྱུར་རམ། འཇམ་དཔལ་གྱིས་སྨྲས་པ། ལྷའི་བུ་
དེ་བཞིན་ཏེ། བྱང་ཆུབ་སེམས་དཔའ་ནི་བདག་ལ་སྟོད་པར་བྱེད་ཅིང་གཞན་ལ་སྨོད་པར་བྱེད་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའ་ནི་རྣམ་གྲངས་དུ་མར་ཐེག་པ་ཆེན་པོའི་བསྔགས་

པ་རྗོད་པར་བྱེད་ཅིང་། ཉན་ཐོས་ཀྱི་ཐེག་པ་པའི་བསྔགས་པ་མ་ཡིན་པར་རྗོད་པར་བྱེད་པ་དང་། ཇི་ལྟར་སེམས་ཅན་རྣམས་བྱང་ཆུབ་ཏུ་སེམས་སྐྱེད་པར་འགྱུར་སྙམ་ནས་བདག་ཉིད་ཀྱི་ཡོན་ཏན་གྱི་ཆོས་རྗོད་པར་བྱེད་ཅིང་། འདི་ལ་དགའ་བའི་སེམས་སྐྱེད་པར་མི་འགྱུར་བར་བྱའོ། །
སྙམ་ནས་ཐེག་པ་དམན་པ་ལ་རྣམ་པར་སྡང་བར་བྱེད་པ་ཡིན་པས་ལྷའི་བུ་དེ་ལྟར་ན་བྱང་ཆུབ་སེམས་དཔའ་ནི་ཐེག་པ་ཆེན་པོ་ལ་སྟོད་པར་བྱེད་པ་དང་། ཉན་ཐོས་ཀྱི་ཐེག་པ་ལ་སྨོད་པར་བྱེད་པ་ཡིན་ནོ། །ལྷའི་བུས་སྨྲས་པ། འཇམ་དཔལ་དེ་ལྟར་ན་བྱང་ཆུབ་སེམས་དཔའ་ལྟུང་བ་དང་བཅས་པར་མི་འགྱུར་
རམ། འཇམ་དཔལ་གྱིས་སྨྲས་པ། ལྷའི་བུ་གང་གིས་ནོར་བུ་མཆིང་བུའི་བསྔགས་པ་མ་ཡིན་པར་རྗོད་ཅིང་། ནོར་བུ་རིན་པོ་ཆེ་བཻ་དཱུརྱའི་བསྔགས་པ་བརྗོད་པར་གྱུར་ན་དེ་ཡང་ལྟུང་བ་དང་བཅས་པར་འགྱུར་རམ། ལྷའི་བུས་སྨྲས་པ། འཇམ་དཔལ་དེ་ནི་མི་འགྱུར་རོ། །འཇམ་དཔལ་གྱིས་སྨྲས་
པ། ལྷའི་བུ་དེ་བཞིན་དུ་བྱང་ཆུབ་སེམས་དཔའི་ཐེག་པ་ཆེན་པོའི་བསྔགས་པ་རྗོད་པར་བྱེད་ཅིང་ཉན་ཐོས་ཀྱི་ཐེག་པའི་བསྔགས་པ་མ་ཡིན་པ་རྗོད་པར་བྱེད་པ་ཡང་ལྟུང་བ་དང་བཅས་པར་མི་འགྱུར་རོ། །ལྷའི་བུ་འདི་ལྟ་སྟེ་དཔེར་ན། སྐྱེས་བུ་ཤིན་ཏུ་སྟོབས་དང་ལྡན་པ་གང་ཞིག་གིས་འཁོར་ལོས་སྒྱུར་
བའི་རྒྱལ་པོའི་བསྔགས་པ་རྗོད་ཅིང་ཁམས་ཀྱི་རྒྱལ་པོ་ལ་དེ་ལྟ་མ་ཡིན་ན། དེ་སྨད་པའི་འོས་སུ་འགྱུར་བ་ཡིན་སྙམ་མམ། ལྷའི་བུས་སྨྲས་པ། འཇམ་དཔལ་དེ་ལྟ་མ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་དེ་བཞིན་དུ་བྱང་ཆུབ་སེམས་དཔའ་ཐེག་པ་ཆེན་པོ་ལ་སྟོད་པར་བྱེད་
ཅིང་ཉན་ཐོས་ཀྱི་ཐེག་པ་ལ་སྨོད་པར་བྱེད་པ་ཡང་སྨད་པའི་འོས་སུ་མི་འགྱུར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་སོ། །ཁྱོད་ཀྱི་ཚིག་དེ་ནི་ལེགས་པར་སྨྲས་ཏེ། འཇམ་དཔལ་ཐེག་
པ་ཆེན་པོའི་བསྔགས་པ་བརྗོད་པས་ནི་ཐེག་པ་ཐམས་ཅད་ཀྱི་བསྔགས་པ་བརྗོད་པར་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ་ཐེག་པ་ཐམས་ཅད་ནི་དེ་ལས་ངེས་པར་བྱུང་བ་ཡིན་པའི་ཕྱིར་རོ། །གཞན་ཡང་ལྷའི་བུ་རབ་རྩལ་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་

ཅེས་སྨྲས་སོ། །འཇམ་དཔལ་བྱང་ཆུབ་སེམས་དཔའ་གང་ལ་བརྟེན་ནས་བྱང་ཆུབ་ཏུ་སེམས་སྐྱེད་པར་བྱེད་དོ། །འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའ་ནི་སེམས་ཅན་ཐམས་ཅད་ཀྱི་ཉོན་མོངས་པ་ལ་བརྟེན་ནས་བྱང་ཆུབ་ཏུ་སེམས་སྐྱེད་པར་བྱེད་དོ། །ལྷའི་
བུས་སྨྲས་པ། འཇམ་དཔལ་ཅིའི་ཕྱིར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་ཉོན་མོངས་པ་ལ་བརྟེན་ནས་བྱང་ཆུབ་ཏུ་སེམས་སྐྱེད་པར་བྱེད། འཇམ་དཔལ་གྱིས་སྨྲས་པ། ལྷའི་བུ་གལ་ཏེ་སེམས་ཅན་རྣམས་ཀྱི་ཉོན་མོངས་པ་དག་བྱང་ཆུབ་ཀྱི་ཐེག་པ་མ་ཡིན་དུ་ཟིན་ན་ནི་བྱང་ཆུབ་
སེམས་དཔའ་ཡང་བྱང་ཆུབ་ཏུ་སེམས་བསྐྱེད་ནས་གོ་ཆ་གྱོན་པར་མི་འགྱུར་རོ། །ལྷའི་བུས་སྨྲས་པ། འཇམ་དཔལ་བྱང་ཆུབ་ཀྱི་སེམས་ཅི་ཞིག་ལ་རྟེན། འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ལ་རྟེན་ཏོ། །དེ་ཅིའི་ཕྱིར་ཞེ་ན།
ལྷའི་བུ་སངས་རྒྱས་ཀྱི་ཆོས་ཐམས་ཅད་ནི་བྱང་ཆུབ་ཀྱི་སེམས་ཀྱི་རྩ་བ་ལ་བརྟེན་ནས་སྐྱེ་བར་འགྱུར་བའི་ཕྱིར་རོ། །ལྷའི་བུས་སྨྲས་པ། འཇམ་དཔལ་ཆོས་ཐམས་ཅད་ཅི་ལ་རྟེན། འཇམ་དཔལ་གྱིས་སྨྲས་པ། ལྷའི་བུ་ཆོས་ཐམས་ཅད་ནི་རྩ་བ་མེད་པའི་གནས་ལ་རྟེན་པ་ཡིན་ནོ། །དེ་ཅིའི་
ཕྱིར་ཞེ་ན། ལྷའི་བུ་ཆོས་ཐམས་ཅད་ནི་མཐའ་ཡས་པའི་ཕྱིར་རྩ་བ་མེད་པ་དང་། མངོན་པར་སྐབས་ཡོད་པ་དང་། ནམ་མཁའ་ལ་རྟེན་པ་ཡང་ཡིན་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་སངས་རྒྱས་ཀྱི་ཆོས་རྣམས་ཇི་སྙེད་ཡོད། འཇམ་དཔལ་གྱིས་སྨྲས་པ། ལྷའི་བུ་
ཆོས་ཐམས་ཅད་ཇི་སྙེད་པ་དེ་སྙེད་ཡོད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ནི་ཆོས་ཐམས་ཅད་སངས་རྒྱས་པས་ན། ལྷའི་བུ་དེའི་ཕྱིར་ཆོས་ཐམས་ཅད་ཇི་སྙེད་པ་སངས་རྒྱས་ཀྱི་ཆོས་རྣམས་ཀྱང་དེ་སྙེད་དོ། །ལྷའི་བུས་སྨྲས་པ། འཇམ་དཔལ་འོ་ན་ཅི་འདོད་ཆགས་དང་། ཞེ་སྡང་
དང་། གཏི་མུག་རྣམས་ཀྱང་སངས་རྒྱས་ཀྱི་ཆོས་ཡིན་ནམ། འཇམ་དཔལ་གྱིས་སྨྲས་པ། ལྷའི་བུ་དེ་དེ་བཞིན་ཏེ། འདོད་ཆགས་དང་། ཞེ་སྡང་དང་། གཏི་མུག་རྣམས་ཀྱང་སངས་རྒྱས་ཀྱི་ཆོས་ཡིན་ནོ། །དེ་ཅིའི་ཕྱིར་ཞེ་ན། ཉོན་མོངས་པ་དེ་དག་གི་རྩ་བའི་གནས་རྗེས་སུ་རྟོགས་པ་ནི་སངས་

རྒྱས་ཡིན་ནོ་ཞེས་སྟོན་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་གང་གིས་སེམས་ཅན་ཐམས་ཅད་སངས་རྒྱས་སུ་འགྱུར་བའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ལྷའི་བུ་རྣམ་གྲངས་མེད་པས་སེམས་ཅན་ཐམས་ཅད་སངས་རྒྱས་སུ་འགྱུར་གྱིས་རྣམ་གྲངས་
ཀྱིས་ནི་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ནི་སེམས་ཅན་ཐམས་ཅད་རྟོགས་པར་ཐུགས་སུ་ཆུད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་ཇི་ལྟར་རྟོགས་པར་ཐུགས་སུ་ཆུད། འཇམ་དཔལ་གྱིས་སྨྲས་པ། ལྷའི་བུ་སེམས་ཅན་མེད་པའི་རྣམ་པ་དང་སྟོང་པ་ཉིད་
ཀྱིས་རྣམ་པས་སོ། །ལྷའི་བུས་སྨྲས་པ། འཇམ་དཔལ་སྟོང་པ་ཉིད་ཀྱིས་ཅི་ཞིག་རྟོགས་པར་བྱེད། འཇམ་དཔལ་གྱིས་སྨྲས་པ། ལྷའི་བུ་གལ་ཏེ་ཅུང་ཟད་རྗེས་སུ་རྟོགས་པར་བྱེད་ན་ནི་དེ་སྟོང་པ་ཉིད་དུ་མི་འགྱུར་རོ། །དེ་ཅིའི་ཕྱིར་ཞེ་ན། ལྷའི་བུ་སྟོང་པ་ཉིད་ནི་རྣམ་པར་རྟོག་པ་མེད་པ་དང་རྩོལ་
བ་མེད་པ་ཡིན་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་དེ་བཞིན་གཤེགས་པས་སྟོང་པ་ཉིད་རྗེས་སུ་རྟོགས་པ་ནི་བྱང་ཆུབ་ཡིན་ནོ་ཞེས་མ་གསུངས་སམ། འཇམ་དཔལ་གྱིས་སྨྲས་པ། ལྷའི་བུ་སྟོང་པ་ཉིད་གང་ཡིན་པ་དེ་ཉིད་བྱང་ཆུབ་ཡིན་པས་ན་བཅོམ་ལྡན་འདས་ཀྱིས་ཀྱང་སྟོང་པ་
ཉིད་རྗེས་སུ་རྟོགས་པ་ཁོ་ན་བྱང་ཆུབ་ཡིན་ནོ་ཞེས་གསུངས་སོ། །ལྷའི་བུས་སྨྲས་པ། འཇམ་དཔལ་སྟོང་པ་ཉིད་ལ་གནས་པ་ཇི་ཞིག་ལ་གནས་པ་ཡིན། འཇམ་དཔལ་གྱིས་སྨྲས་པ། ལྷའི་བུ་སྟོང་པ་ཉིད་ལ་གནས་པ་ནི་འདོད་པ་དང་། གཟུགས་དང་། གཟུགས་མེད་པ་ལ་གནས་པ་མ་
ཡིན། ཕུང་པོ་དང་། ཁམས་དང་། སྐྱེ་མཆེད་ལ་གནས་པ་མ་ཡིན། ལུས་དང་སེམས་ལ་གནས་པ་མ་ཡིན་ནོ། །དེ་ཅིའི་ཕྱིར་ཞེ་ན། ལྷའི་བུ་དེ་གནས་པ་གང་གིས་གནས་པར་འགྱུར་བའི་གནས་པ་དེ་ཡང་སྟོང་པས་ན། སྟོང་པ་ཉིད་ནི་སྟོང་པ་ཉིད་ལ་མི་གནས་པའི་ཕྱིར་རོ། །ལྷའི་བུས་
སྨྲས་པ། འཇམ་དཔལ་དེ་བཞིན་གཤེགས་པ་དོན་དམ་པ་སྟོང་པ་ཉིད་ཀྱི་གནས་པས་གནས་པར་མི་མཛད་དམ། འཇམ་དཔལ་གྱིས་སྨྲས་པ། ལྷའི་བུ་དེ་བཞིན་གཤེགས་པ་ཉིད་སྟོང་པ་ཉིད་ཡིན་ལ། སྟོང་པ་ཉིད་གང་ཡིན་པ་དེ་ནི་གཉིས་སུ་མེད་པ་ཡིན་པས་ན། དེ་བཞིན་གཤེགས་པ་ནི་

གཉིས་སུ་མེད་པའི་གནས་པས་གནས་པར་མཛད་དོ། །ལྷའི་བུས་སྨྲས་པ། འཇམ་དཔལ་གཉིས་སུ་མེད་པའི་གནས་པ་གང་ཡིན། འཇམ་དཔལ་གྱིས་སྨྲས་པ། ལྷའི་བུ་གཉིས་སུ་མེད་པའི་གནས་པ་ནི་གཉིས་སུ་མེད་པ་ཉིད་ཡིན་གྱི། དེ་ལ་གནས་པ་གཞན་མེད་དེ། དེའི་གནས་
པ་གཉིས་སུ་མེད་པ་ལས་གཞན་མེད་པ་དེ་ཉིད་ཀྱང་གཉིས་སུ་མེད་པ་ཉིད་ཡིན་ནོ། །ལྷའི་བུས་སྨྲས་པ། འཇམ་དཔལ་གཉིས་ཞེས་བྱ་བ་ནི་གང་། གཉིས་སུ་མེད་པ་ཞེས་བྱ་བ་ནི་གང་། འཇམ་དཔལ་གྱིས་སྨྲས་པ། ལྷའི་བུ་འདོད་ཆགས་དང་། འདོད་ཆགས་དང་བྲལ་བར་བྱེད་པ་དེ་ནི་གཉིས་སོ།
འདོད་ཆགས་ཀྱི་རང་བཞིན་ནི་གཉིས་སུ་མེད་པའོ། །ཞེ་སྡང་དང་། ཞེ་སྡང་མེད་པར་བྱེད་པ་དེ་ནི་གཉིས་སོ། །ཞེ་སྡང་གི་རང་བཞིན་ནི་གཉིས་སུ་མེད་པའོ། །གཏི་མུག་དང་། གཏི་མུག་མེད་པར་བྱེད་པ་དེ་ནི་གཉིས་སོ། །གཏི་མུག་གི་རང་བཞིན་ནི་གཉིས་སུ་མེད་པའོ། །ཉོན་མོངས་པ་དང་། ཉོན་
མོངས་པ་མེད་པར་བྱེད་པ་དེ་ནི་གཉིས་སོ། །ཉོན་མོངས་པའི་རང་བཞིན་ནི་གཉིས་སུ་མེད་པའོ། །བདག་དང་བདག་མེད་པར་བྱེད་པ་དེ་ནི་གཉིས་སོ། །བདག་གི་རང་བཞིན་ནི་གཉིས་སུ་མེད་པའོ། །ལྷའི་བུས་སྨྲས་པ། འཇམ་དཔལ་བདག་གི་རང་བཞིན་གང་ཡིན། འཇམ་དཔལ་གྱིས་སྨྲས་པ།
ལྷའི་བུ་བདག་གི་རང་བཞིན་ནི་གཟོད་མ་ནས་དག་པའི་ཕྱིར་བདག་མེད་པ་ཉིད་ཡིན་ནོ། །བདག་གི་རང་བཞིན་ནི་གཟོད་མ་ནས་དག་པའི་ཕྱིར་གཟོད་མ་ནས་དབེན་པ་ཉིད་དང་། གཟོད་མ་ནས་མ་སྐྱེས་པ་ཉིད་དང་། གཟོད་མ་ནས་མ་བྱུང་བ་ཉིད་ཡིན་ནོ། །ལྷའི་བུས་སྨྲས་པ། འཇམ་དཔལ་ཅིའི་ཕྱིར་རང་བཞིན་
ཞེས་བྱ། འཇམ་དཔལ་གྱིས་སྨྲས་པ། ལྷའི་བུ་དེ་ནི་འགྱུར་བ་མེད་པས་དེའི་ཕྱིར་རང་བཞིན་ཞེས་བྱའོ། །དེ་ནི་གཟོད་མ་ཉིད་ནས་གསལ་ཞིང་ཉོན་མོངས་པ་ཅན་མ་ཡིན་པས་དེའི་ཕྱིར་རང་བཞིན་ཞེས་བྱའོ། །དེ་ནི་ནམ་མཁའ་དང་མཉམ་པ་ཉིད་ཀྱིས་མཉམ་ཞིང་ཚད་མེད་པས་དེའི་ཕྱིར་རང་བཞིན་ཞེས་བྱའོ། །
དེ་ནི་སྤྲོས་པ་དང་བྲལ་བ་དང་། དེ་ནི་རྒྱུ་བ་དང་བྲལ་བ་དང་། དེ་ནི་འོད་གསལ་བས་དེའི་ཕྱིར་རང་བཞིན་ཞེས་བྱའོ། །དེ་ནི་བླང་བ་མེད་པ་དང་དོར་བ་མེད་པས་དེའི་ཕྱིར་རང་བཞིན་ཞེས་བྱའོ། །ལྷའི་བུས་སྨྲས་པ། འཇམ་དཔལ་རང་བཞིན་མི་ཤེས་པ་དག་གང་ཡིན། འཇམ་དཔལ་གྱིས་སྨྲས་པ།

ལྷའི་བུ་གང་དག་ཆོས་རྣམས་ཀྱི་རང་བཞིན་མི་ཤེས་པ་དག་གོ། །ལྷའི་བུས་སྨྲས་པ། འཇམ་དཔལ་རང་བཞིན་ཤེས་པ་དག་གང་ཡིན། འཇམ་དཔལ་གྱིས་སྨྲས་པ། ལྷའི་བུ་གང་དག་དེ་དག་གི་རང་བཞིན་ཤེས་པ་དག་གོ། །ལྷའི་བུས་སྨྲས་པ། འཇམ་དཔལ་དད་པ་དང་ལྡན་པའི་
མཚན་ཉིད་གང་ཡིན། འཇམ་དཔལ་གྱིས་སྨྲས་པ། ལྷའི་བུ་དད་པ་དང་ལྡན་པའི་མཚན་ཉིད་ནི་ཆགས་པ་ཐམས་ཅད་ལས་ཡང་དག་པར་འདས་པ་ཡིན་ནོ། །ལྷའི་བུས་སྨྲས་པ། འཇམ་དཔལ་དགེ་སློང་དད་པ་དང་མི་ལྡན་པ་ཇི་ལྟར་དད་པས་བྱིན་པ་ལ་དད་པར་བྱེད། འཇམ་དཔལ་གྱིས་སྨྲས་པ། ལྷའི་བུ་
དད་པ་དང་མི་ལྡན་པ་ཞེས་བྱ་བ་ནི་གང་མངོན་སུམ་དུ་གྱུར་པའི་ཆོས་ཐམས་ཅད་ལ་གཞན་གྱི་དྲིང་མི་འཇོག་ཅིང་། གཞན་གྱི་དད་པས་ཡང་དང་ཡང་དུ་མི་འགྲོ་བ་ཡིན་པས་དེའི་ཕྱིར་དད་པ་དང་མི་ལྡན་པ་ཞེས་བྱ་སྟེ། དེ་ནི་དད་པས་བྱིན་པ་སྤྱོད་པར་མི་བྱེད་དོ། །དེ་ཅིའི་ཕྱིར་ཞེ་ན། གཟོད་མ་ནས་དག་པའི་ཕྱིར་རོ། །
ལྷའི་བུས་སྨྲས་པ། འཇམ་དཔལ་དགེ་སློང་གང་། དགེ་འདུན་དང་ལྷན་ཅིག་མི་གནས་པ་དེ་ལ་ཇི་སྐད་ཅེས་བྱ། འཇམ་དཔལ་གྱིས་སྨྲས་པ། ལྷའི་བུ་དགེ་སློང་གང་དགེ་འདུན་དང་ལྷན་ཅིག་མི་གནས་པ་དེ་ནི་དེས་ན་འཇིག་རྟེན་གྱི་སྦྱིན་གནས་སུ་འགྱུར་རོ། །དེ་ཅིའི་ཕྱིར་ཞེ་ན། ལྷའི་བུ་དགེ་འདུན་ནི་
འདུས་མ་བྱས་པ་ཡིན་ལ། བྱང་ཆུབ་སེམས་དཔའ་ནི་འདུས་མ་བྱས་དང་ལྷན་ཅིག་མི་གནས་པས་དེའི་ཕྱིར་དེ་ནི་འཇིག་རྟེན་གྱི་སྦྱིན་གནས་སུ་འགྱུར་བ་ཡིན་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་གལ་ཏེ་བྱང་ཆུབ་སེམས་དཔའ་འདུས་མ་བྱས་དང་ལྷན་ཅིག་གནས་པར་གྱུར་ན་ཉེས་པ་ཅིར་འགྱུར།
འཇམ་དཔལ་གྱིས་སྨྲས་པ། ལྷའི་བུ་འདུས་མ་བྱས་ཐོབ་ནས་སེམས་ཅན་རྣམས་སྐྱོབ་པར་མི་བྱེད་ཅིང་ཉན་ཐོས་སུ་འགྱུར་བས་དེའི་ཉེས་པ་ནི་དེར་འགྱུར་རོ། །ལྷའི་བུས་སྨྲས་པ། འཇམ་དཔལ་འདུས་བྱས་ནི་སོ་སོ་སྐྱེ་བོའི་ས་ཡིན་ལ། འདུས་མ་བྱས་ནི་འཕགས་པ་རྣམས་ཀྱི་ས་ཡིན་ན། འོ་ན་
ཇི་ལྟར་བྱང་ཆུབ་སེམས་དཔའ་འཕགས་པའི་ས་སྤངས་ཤིང་། སོ་སོ་སྐྱེ་བོའི་ས་ལ་གནས་པ་འཇིག་རྟེན་གྱི་སྦྱིན་གནས་སུ་འགྱུར། འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའ་འདུས་བྱས་ལ་ཡང་མི་གནས། འདུས་མ་བྱས་ལ་ཡང་མི་གནས་པས་དེའི་ཕྱིར་དེ་ནི་འཇིག་རྟེན་

གྱི་སྦྱིན་གནས་སུ་འགྱུར་རོ། །དེ་ཅིའི་ཕྱིར་ཞེ་ན། ལྷའི་བུ་བྱང་ཆུབ་སེམས་དཔའ་ནི་འདུ་བྱེད་ལས་ཡིད་བསྐྱོད་པ་དང་། འདུས་མ་བྱས་ལ་མི་གནས་པ་ཡིན་པས་འདུས་བྱས་ཀྱི་སྐྱོན་དང་བྲལ་བ་དང་། འདུས་མ་བྱས་ཤེས་པ་རྟོགས་པ་ཡིན་ཏེ། དེ་འདུས་བྱས་ཀྱི་སྐྱོན་དང་བྲལ་བས་ནི་འདུས་བྱས་
ལ་མི་གནས་ལ། འདུས་མ་བྱས་ཤེས་པ་རྟོགས་པས་ནི་འདུས་མ་བྱས་སུ་མི་ལྟུང་བའི་ཕྱིར་རོ། །ལྷའི་བུ་འདི་ལྟ་སྟེ་དཔེར་ན། ཚན་པོ་ཆེ་ཆེན་པོས་སྟེང་གི་བར་སྣང་ལ་མདའ་འཕངས་པར་གྱུར་ལ། དེ་ནས་མདའ་དེ་ནམ་མཁའ་ལ་མི་གནས་པར་འདུག་ཅིང་ས་ལ་ཡང་མི་ལྟུང་ན། ལྷའི་བུ་དེ་ལ་དཀའ་བ་ཅུང་
ཟད་ཡོད་དམ། ལྷའི་བུས་སྨྲས་པ། འཇམ་དཔལ་དཀའོ། །འཇམ་དཔལ་གྱིས་སྨྲས་པ། ལྷའི་བུ་དེ་བས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འདུས་བྱས་ཀྱང་མི་སྤོང་ཞིང་། འདུས་མ་བྱས་ཀྱང་ཐོབ་པར་བྱེད་ལ། འདུས་མ་བྱས་སུ་ཡང་མི་ལྟུང་ཞིང་། འདུས་བྱས་
ཐོབ་པ་རྣམས་ཀྱང་ཡོངས་སུ་སྨིན་པར་བྱེད་པ་ནི་ཆེས་དཀའ་བ་ཡིན་ནོ། །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའི་འཇིག་པ་འདུས་བྱས་སམ། འོན་ཏེ་འདུས་མ་བྱས་སམ། གང་ལས་འབྱུང་བར་འགྱུར། འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའི་འཇིག་པ་ནི་འདུས་
བྱས་ལས་ཀྱང་འབྱུང་བར་འགྱུར། འདུས་མ་བྱས་ལས་ཀྱང་འབྱུང་བར་འགྱུར་རོ། །དེ་ཅིའི་ཕྱིར་ཞེ་ན། ལྷའི་བུ་འདུས་བྱས་ལས་ནི་ཉོན་མོངས་པའི་འཇིག་པ་འབྱུང་ལ། འདུས་མ་བྱས་ལས་ནི་ཉོན་མོངས་པ་མེད་པའི་འཇིག་པ་འབྱུང་བའི་ཕྱིར་རོ། །ལྷའི་བུས་སྨྲས་པ། འཇམ་དཔལ་ཉོན་
མོངས་པ་མེད་པས་འཇིག་པ་ཅི་ཡོད། འཇམ་དཔལ་གྱིས་སྨྲས་པ། ལྷའི་བུ་ཁམས་གསུམ་ན་ནི་ཉོན་མོངས་པའི་འཇིག་པ་ཡོད་ལ། བྱང་ཆུབ་སེམས་དཔའ་གང་ཁམས་གསུམ་དུ་ཉོན་མོངས་པར་མི་བྱེད་ན། དེ་ནི་ཉན་ཐོས་སུ་འགྱུར་རོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་
སེམས་དཔའ་འཇིག་པ་མེད་པ་ཡིན། འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའ་གང་ཤེས་རབ་ཀྱི་ཤེས་པས་འདུས་བྱས་ལ་སྤྱོད་པར་བྱེད་ཅིང་། ཐབས་ཀྱི་ཤེས་པས་འདུས་མ་བྱས་སུ་མི་ལྟུང་བ་དེ་ལྟ་ན། ལྷའི་བུ་བྱང་ཆུབ་སེམས་དཔའ་འཇིག་པ་མེད་པ་ཡིན་ནོ། །ལྷའི་

བུ་གཞན་ཡང་གང་གི་ཚེ་བྱང་ཆུབ་སེམས་དཔའ་སེམས་ཅན་ལ་ལྟ་བས་འདུས་བྱས་སྤོང་བར་མི་བྱེད་ཅིང་། སངས་རྒྱས་ཀྱི་ཆོས་ལ་ལྟ་བས་འདུས་མ་བྱས་སུ་མི་ལྟུང་བ་དེ་ལྟ་ན། ལྷའི་བུ་བྱང་ཆུབ་སེམས་དཔའ་འཇིག་པ་མེད་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་
དཔའ་བསོད་ནམས་ཀྱི་ཚོགས་ཉེ་བར་བསགས་པའི་ཕྱིར། འདུས་བྱས་ལ་སྦྱོར་བར་བྱེད་ཅིང་། སངས་རྒྱས་ཀྱི་ཡེ་ཤེས་ཀྱི་ཚོགས་ཉེ་བར་བསགས་པའི་ཕྱིར། འདུས་མ་བྱས་སུ་མི་ལྟུང་བ་དེ་ལྟ་ན། བྱང་ཆུབ་སེམས་དཔའ་འཇིག་པ་མེད་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་
ཆུབ་སེམས་དཔའ་འདུས་མ་བྱས་ལ་གནས་ཏེ། བསམ་གཏན་རྣམས་སྐྱེད་པར་བྱེད་ཅིང་། ཐབས་ལ་གནས་ཏེ་བསམ་གཏན་རྣམས་ལས་ལྡོག་པར་བྱེད་པ་དེ་ལྟ་ན། བྱང་ཆུབ་སེམས་དཔའ་འཇིག་པ་མེད་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་
བྱང་ཆུབ་ཀྱི་སེམས་ལ་གནས་ཏེ་དགེ་བའི་རྩ་བ་ཉེ་བར་སོགས་པར་བྱེད་ཅིང་། སྙིང་རྗེ་ཆེན་པོ་ལ་གནས་ཏེ་སེམས་ཅན་རྣམས་ཡོངས་སུ་སྨིན་པར་བྱེད་པ་དེ་ལྟ་ན། བྱང་ཆུབ་སེམས་དཔའ་འཇིག་པ་མེད་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་དབེན་པ་ལ་
གནས་ཏེ་བདུད་ཀྱི་ལས་རྣམས་རྟོགས་པར་བྱེད་ཅིང་། ཐབས་ལ་གནས་ཏེ་བདུད་ཀྱི་ལས་རྣམས་སྤོང་བར་བྱེད་པ་དེ་ལྟ་ན། བྱང་ཆུབ་སེམས་དཔའ་འཇིག་པ་མེད་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་བྱམས་པ་ཆེན་པོ་ལ་གནས་ཏེ་ཆོས་སྟོན་པར་བྱེད་ཅིང་། །
སྙིང་རྗེ་ཆེན་པོ་ལ་གནས་ཏེ། ཟང་ཟིང་གི་སྦྱིན་པ་སྦྱིན་པར་བྱེད་པ་དེ་ལྟ་ན། བྱང་ཆུབ་སེམས་དཔའ་འཇིག་པ་མེད་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་འཁོར་བ་ལ་གནས་ཏེ། མྱ་ངན་ལས་འདས་པ་ཡོངས་སུ་སྤྱད་པའི་ལས་བྱེད་ཅིང་། མྱ་ངན་ལས་འདས་
པ་ལ་གནས་ཏེ། འཁོར་བ་ཡོངས་སུ་སྤྱད་པའི་ལས་བྱེད་པ་དེ་ཙམ་གྱིས་ན། བྱང་ཆུབ་སེམས་དཔའ་འཇིག་པ་མེད་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་སྐྱེ་བ་མེད་པས་སྐྱེ་བར་བྱེད་ཅིང་། འཕོ་བ་མེད་པས་འབྱུང་བར་བྱེད་པ་དང་། ཆོས་ལ་ལྟ་

བས་སྣང་བར་བྱེད་ཅིང་། ཕུང་པོ་དང་། ཁམས་དང་། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན་པ་དང་། ཐམས་ཅད་དང་རྗེས་སུ་འབྲེལ་ཞིང་ཞི་བ་དང་། ཉེ་བར་ཞི་བར་གྱུར་པ་དང་། འབར་བར་བྱེད་ཅིང་། འབར་བས་ཚིག་པར་མི་བྱེད་པ་དང་། ཉོན་མོངས་པ་ཐམས་ཅད་ལ་ཡོངས་སུ་སྦྱོང་བར་
བྱེད་ཅིང་། ཉོན་མོངས་པའི་སྐྱོན་རྣམས་ཀྱིས་མི་གོས་པ་དང་། སློབ་པ་དང་། མི་སློབ་པ་རྣམས་འདུལ་བར་བྱེད་ཅིང་། ཉན་ཐོས་ཀྱི་རྣམ་པར་གྲོལ་བ་ལ་རེག་པར་མི་བྱེད་པ་དང་། སེམས་ཅན་རྣམས་ཀྱི་བསམ་པ་ལ་འཇུག་ཅིང་། ཆོས་ཀྱི་བསམ་པ་སྤོང་བར་མི་བྱེད་པ་དང་། བདུད་ཀྱི་ལྕགས་
ཀྱུ་ཤེས་པར་བྱེད་ཅིང་། ཆོས་ཀྱི་ལྕགས་ཀྱུ་སྤོང་བར་མི་བྱེད་པ་དང་། ཤེས་པས་འཇུག་པར་བྱེད་ཅིང་། ཐབས་ཀྱིས་ལྡོག་པར་བྱེད་པ་དང་། འཕགས་པའི་རྣམ་པ་སྟོན་པར་བྱེད་ཅིང་། འཕགས་པ་མ་ཡིན་པ་ཡོངས་སུ་སྨིན་པར་བྱ་བ་ལ་སྤྲོ་བར་བྱེད་པ་དང་། སངས་རྒྱས་མཐོང་བ་ལ་
མངོན་པར་དགའ་བར་བྱེད་ཅིང་། ཆོས་མཐོང་བ་ལ་ཀུན་ཏུ་འདོད་པར་བྱེད་པ་དེ་ཙམ་གྱིས་ན། བྱང་ཆུབ་སེམས་དཔའ་འཇིག་པ་མེད་པ་ཡིན་ནོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན། ལྷའི་བུ་ལྔ་ཁྲི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །
ལྷའི་བུ་ཉི་ཁྲི་ལྔ་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་སྔོན་དགེ་བའི་རྩ་བ་བསྐྱེད་པ་ལྔ་ཁྲི་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཉི་ཁྲི་ནི་སྤོབས་པ་ཐོགས་པ་མེད་པ་སྐྱེས་སོ། །ལྷ་དང་མི་རྣམས་ཀྱི་སྐྱེ་དགུ་
ལས་སྲོག་ཆགས་སྟོང་ཕྲག་རབ་ཏུ་མང་པོ་དག་གིས་ནི་བྱང་ཆུབ་ཏུ་སེམས་བསྐྱེད་ནས། དེ་བཞིན་གཤེགས་པ་དང་། འཇམ་དཔལ་གཞོན་ནུར་གྱུར་པ་ལ་ལྷའི་མཆོད་པ་དག་བྱས་སོ། །གཞན་ཡང་ལྷའི་བུ་རབ་རྩལ་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །
འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ལམ་ལ་གནས་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ། བྱང་ཆུབ་སེམས་དཔའ་འདོད་ཆགས་སྤང་བའི་ཕྱིར་ཡང་ཆོས་སྟོན་པར་བྱེད་ལ། འདོད་ཆགས་དང་བྲལ་བ་མངོན་དུ་ཡང་མི་བྱེད་པ་དང་། ཞེ་སྡང་སྤང་བའི་ཕྱིར་

ཡང་ཆོས་སྟོན་པར་བྱེད་ལ། ཞེ་སྡང་སྤོང་བ་མངོན་དུ་ཡང་མི་བྱེད་པ་དང་། གཏི་མུག་སྤང་བའི་ཕྱིར་ཡང་ཆོས་སྟོན་པར་བྱེད་ལ། གཏི་མུག་སྤོང་བ་མངོན་དུ་ཡང་མི་བྱེད་པ་དང་། ཉོན་མོངས་པ་སྤང་བའི་ཕྱིར་ཆོས་སྟོན་པར་ཡང་བྱེད་ལ། ཉོན་མོངས་པ་སྤོང་བ་མངོན་དུ་ཡང་མི་བྱེད་
པ་དེ་ཙམ་གྱིས་ན། ལྷའི་བུ་བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་སེམས་ཅན་རྣམས་ལ་སྟོང་པ་ཉིད་སྟོན་པར་ཡང་བྱེད་ལ། སྟོང་པ་ཉིད་མངོན་དུ་ཡང་མི་བྱེད་པ་དང་། སེམས་ཅན་རྣམས་ལ་མཚན་མ་མེད་པ་སྟོན་པར་ཡང་
བྱེད་ལ། མཚན་མ་མེད་པ་མངོན་དུ་ཡང་མི་བྱེད་པ་དང་། སེམས་ཅན་རྣམས་ལ་སྨོན་པ་མེད་པ་སྟོན་པར་ཡང་བྱེད་ལ། སྨོན་པ་མེད་པ་མངོན་དུ་ཡང་མི་བྱེད་པ་དང་། དེ་བཞིན་དུ་སེམས་ཅན་རྣམས་ལ་མངོན་པར་འདུ་བྱེད་པ་མེད་པ་དང་། སྐྱེ་བ་མེད་པ་དང་། འབྱུང་བ་མེད་པ་དང་། དངོས་པོ་
མེད་པ་དང་། འདོད་ཆགས་དང་བྲལ་བ་དང་མི་ལྡན་པ་དང་། འགོག་པའི་ཆོས་སྟོན་པར་ཡང་བྱེད་ལ། འགོག་པ་མངོན་དུ་ཡང་མི་བྱེད་པ་དེ་ཙམ་གྱིས་ན། བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་ཡོངས་སུ་མི་གཏོང་བས་སྦྱིན་
པའི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང་། ཚུལ་ཁྲིམས་ལས་ཡང་དག་པར་འདའ་བས། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང་། གནོད་སེམས་ཀྱིས་བཟོད་པའི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང་། ལེ་ལོས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང་།
བརྗེད་ངས་པས་བསམ་གཏན་གྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང་། བེམས་པོ་དང་། ལུག་ལྟར་ལྐུགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དེ་ཙམ་གྱིས་ན། བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལས་བསམས་
ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། ལྷའི་བུ་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱིས་ཡོངས་སུ་མི་གཏོང་བ་ཡིན་ཏེ། བཞི་གང་ཞེ་ན། སེམས་ཅན་ཡོངས་སུ་མི་གཏོང་བ་དང་། ཆོས་ཡོངས་སུ་མི་གཏོང་བ་དང་། བྱང་ཆུབ་ཀྱི་སེམས་ཡོངས་སུ་མི་གཏོང་བ་

དང་། དགེ་བའི་ཆོས་ཐམས་ཅད་ཡོངས་སུ་མི་གཏོང་བ་སྟེ། བྱང་ཆུབ་སེམས་དཔའ་ནི་ཆོས་བཞི་པོ་དེ་དག་ཡོངས་སུ་མི་གཏོང་བས། སྦྱིན་པའི་ཕ་རོལ་ཏུ་ཕྱིན་པ་སྒྲུབ་པར་བྱེད་དོ། །ལྷའི་བུ་ཚུལ་ཁྲིམས་ལས་ཡང་དག་པར་འདའ་བ་ཞེས་བྱ་བ་དེ་ནི་དེའི་རང་བཞིན་མ་ཡིན་པའི་ཚིག་བླ་དགས་ཏེ།
ཚུལ་ཁྲིམས་ལས་ཡང་དག་པར་འདའ་བས་ཏིང་ངེ་འཛིན་དང་། ཏིང་ངེ་འཛིན་ལས་ཡང་དག་པར་འདའ་བས་ཤེས་རབ་དང་། ཤེས་རབ་ལས་ཡང་དག་པར་འདའ་བས། རྣམ་པར་གྲོལ་བ་ཤེས་པ་སྒྲུབ་པར་བྱེད་དེ། ལྷའི་བུ་ཁྱོད་ཀྱིས་རྣམ་གྲངས་དེས། གང་ཚུལ་ཁྲིམས་ལས་ཡང་
དག་པར་འདའ་བ་དེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་ཡིན་པར་རིག་པར་བྱའོ། །ལྷའི་བུ་བྱང་ཆུབ་སེམས་དཔའ་གང་གནོད་སེམས་ལ་ཞུགས་པ་ནི། ཉན་ཐོས་ཀྱི་ཐེག་པ་ལས་ལོག་པར་ཞུགས་པ་དང་། རང་སངས་རྒྱས་ཀྱི་ཐེག་པ་ལས་ལོག་པར་ཞུགས་
པ་ཡིན་པས། དེ་ནི་ཐེག་པ་ཆེན་པོ་ལ་ལེགས་པར་ཞུགས་པ་ཡིན་ཏེ། གང་ཐེག་པ་ཆེན་པོ་ལ་ལེགས་པར་ཞུགས་པ་དེ་ནི་བཟོད་པའི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་ཡིན་ནོ། །ལྷའི་བུ་གང་གི་ཚེ། བྱང་ཆུབ་སེམས་དཔའ་ལུས་ཀྱི་རྟུལ་བར་མི་བྱེད་ཅིང་། ངག་དང་། སེམས་ཀྱིས་རྟུལ་
བར་མི་བྱེད་པ་དེ་ནི་ལེ་ལོ་ཅན་ཡིན་ལ། གང་དེ་ལྟར་ཆོས་ལ་མངོན་པར་བརྩོན་པ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་ཡིན་ནོ། །ལྷའི་བུ་གཞན་ཡང་བྱང་ཆུབ་སེམས་དཔའ་ནི། རྨི་ལམ་ན་ཡང་ས་གཉིས་པོ་དག་ལ་དགའ་བའི་སེམས་སྐྱེད་པར་མི་བྱེད་པས། དེ་ནི་བརྗེད་ངས་པ་ཡིན་
ལ། གང་ཉན་ཐོས་དང་། རང་སངས་རྒྱས་ཀྱི་ཐེག་པ་ལ་བརྗེད་ངས་པ་དེ་ནི། ཐེག་པ་ཆེན་པོ་ལ་མཉམ་པར་བཞག་པ་ཡིན་པས། དེ་ནི་བསམ་གཏན་གྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་ཡིན་ནོ། །ལྷའི་བུ་ཆོས་ཐམས་ཅད་ནི་བེམས་པོ་སྟེ། རྩྭ་དང་། ཤིང་དང་། རྩིག་པ་དང་། ལམ་དང་། མིག་ཡོར་
དང་། ལུག་ལྟར་ལྐུགས་པ་དང་འདྲ་བར། རང་བཞིན་གྱིས་ནུས་པ་མེད་པ་ཡིན་པས། གང་གི་ཚེ། བྱང་ཆུབ་སེམས་དཔའ་ཤེས་རབ་དང་། ཡེ་ཤེས་ཀྱིས་དེ་ལྟར་ཆོས་ཐམས་ཅད་བེམས་པོ་དང་། ལུག་ལྟར་ལྐུགས་པ་ལྟ་བུས་བྱང་ཆུབ་སྒྲུབ་པར་བྱེད་པ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་

སྒྲུབ་པར་བྱེད་པ་ཡིན་ཏེ། དེ་ལྟར་ཞུགས་པའི་བྱང་ཆུབ་སེམས་དཔའ་ནི་ལམ་སྒྲུབ་པར་བྱེད་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་འཁོར་བའི་ལམ་ཡང་མི་སྤོང་ལ། མྱ་ངན་ལས་འདས་པའི་ལམ་ཡང་ཚོལ་བར་བྱེད་པ་དང་། ལམ་
གྱི་ལས་ཀྱི་རྒྱུན་ཡང་མི་གཅོད་ཅིང་། ལམ་གྱི་བྱ་བ་ཡང་སྒྲུབ་པར་བྱེད་པ་དང་། ལམ་ངན་པར་ཞུགས་པའི་སེམས་ཅན་རྣམས་ཀྱང་ལམ་ལ་འགོད་པར་བྱེད་པ་དེ་ལྟ་ན། བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་སེམས་
ཅན་ཐམས་ཅད་དང་། ཆོས་ཐམས་ཅད་བཙལ་ཡང་མི་རྙེད་པ་དང་། བྱང་ཆུབ་ཀྱི་ལམ་སྤོང་བར་མི་བྱེད་པ་དང་། འབྲས་བུ་ཡོད་པ་བསམ་གཏན་བྱེད་པ་དེ་ལྟ་ན། བྱང་ཆུབ་སེམས་དཔའ་བྱང་ཆུབ་ཀྱི་ལམ་ཐོབ་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་
དཔའ་ཉན་ཐོས་ཀྱི་ལམ་ཡང་རབ་ཏུ་ཤེས་ལ། ཉན་ཐོས་ཀྱི་ལམ་གྱིས་ངེས་པར་འབྱུང་བར་ཡང་མི་བྱེད་པ་དང་། རང་སངས་རྒྱས་ཀྱི་ལམ་ཡང་རབ་ཏུ་ཤེས་ལ། རང་སངས་རྒྱས་ཀྱི་ལམ་གྱིས་ངེས་པར་འབྱུང་བར་མི་བྱེད་པ་དང་། བྱང་ཆུབ་སེམས་དཔའི་ལམ་ཡང་ཐོབ་པར་བྱེད་ལ་ལམ་
དེས་ཀྱང་དབང་པོ་ཡོངས་སུ་མ་རྫོགས་པར་ངེས་པར་འབྱུང་བར་མི་བྱེད་པ་དེ་ལྟ་ན། བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་དགེ་བའི་རྩ་བ་ཐམས་ཅད་མངོན་པར་འདུ་བྱེད་པ་དང་། མངོན་པར་འདུ་བྱ་བའི་འབྲས་བུ་
དོན་དུ་མི་གཉེར་བ་དང་། མངོན་པར་འདུ་བྱེད་པའི་སྐྱོན་གྱིས་མི་གོས་པ་དང་། དགེ་བའི་རྩ་བ་མངོན་པར་འདུ་བྱ་བ་ཐམས་ཅད་བྱང་ཆུབ་ཏུ་ཡོངས་སུ་སྔོ་བར་བྱེད་པ་དང་། བྱང་ཆུབ་ཀྱི་ཕྱིར་འཕེལ་བ་ཡང་དག་པར་རྗེས་སུ་མི་མཐོང་བ་དང་། འབྲི་བ་ཡང་དག་པར་རྗེས་སུ་མི་མཐོང་བ་
དེ་ལྟ་ན། བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུ་གཞན་ཡང་གང་གི་ཚེ། བྱང་ཆུབ་སེམས་དཔའ་ལམ་ངན་པ་ལས་ལམ་ཡོངས་སུ་ཚོལ་བར་བྱེད་པ་དང་། ལམ་ཡོངས་སུ་བཙལ་ནས་ཀྱང་ངེས་པར་འབྱུང་བར་མི་བྱེད་པ་དེ་ལྟ་ན། བྱང་ཆུབ་སེམས་དཔའ་

ལམ་ལ་གནས་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ལམ་ངན་པ་ལས་ལམ་ཡོངས་སུ་ཚོལ་བར་བྱེད། འཇམ་དཔལ་གྱིས་སྨྲས་པ། ལྷའི་བུ་ལམ་ངན་པ་ཞེས་བྱ་བ་ནི་འཁོར་བ་སྟེ། བྱང་ཆུབ་སེམས་དཔའ་ནི་དེ་ལ་གནས་ནས། སེམས་
ཅན་ངེས་པར་འབྱུང་བའི་ཕྱིར་ལམ་ཡོངས་སུ་ཚོལ་བར་བྱེད་ཀྱི། བདག་ཉིད་ངེས་པར་འབྱུང་བའི་ཕྱིར་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའི་སྤྱོད་པ་ནི་འཇིག་རྟེན་ཐམས་ཅད་དང་མི་འཐུན་པ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་འདི་ལྟར་
བྱང་ཆུབ་སེམས་དཔའ་རྣམས་ནི་འཇིག་རྟེན་ན་སྤྱོད་ཀྱང་། འཇིག་རྟེན་གྱི་ཆོས་རྣམས་ཀྱིས་མི་གོས་པ་དང་། ཉོན་མོངས་པ་མེད་པ་སྟོན་པར་བྱེད་ཀྱང་། ཉོན་མོངས་པ་མེད་པ་ཉིད་དུ་མི་ལྟུང་བ་དང་། རྒ་བ་དང་། འཆི་བ་སྟོན་པར་བྱེད་ཀྱང་། ཆོས་ཐམས་ཅད་སྐྱེ་བ་མེད་པ་དང་འབྱུང་
བ་མེད་པར་ཤེས་ཤིང་། སྐྱོན་མེད་པ་མངོན་དུ་མི་བྱེད་པ་དང་། ཕུང་པོ་དང་། ཁམས་དང་། སྐྱེ་མཆེད་ལ་ཡོངས་སུ་སྤྱོད་པར་བྱེད་ཀྱང་། ཕུང་པོ་དང་། ཁམས་དང་། སྐྱེ་མཆེད་དོན་དུ་མི་གཉེར་བ་དང་། ཕུང་པོ་དང་། ཁམས་དང་། སྐྱེ་མཆེད་ཡོངས་སུ་ཤེས་པར་བྱ་
བའི་ཕྱིར། སེམས་ཅན་རྣམས་ལ་ཆོས་སྟོན་ཀྱང་། ཡོངས་སུ་ཤེས་པ་དེ་དག་ཡོངས་སུ་ཤེས་པར་མི་བྱེད་པ་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་སྒྲུབ་པར་བྱེད་ཅིང་། སེམས་རྣམ་པར་
གཡེངས་པ་རྣམས་ཉེ་བར་འཇོག་པར་བྱེད་ཀྱང་། ཉེ་བར་འཇོག་པ་ལ་འབྱུང་བར་མི་བྱེད་པ་དང་། བདུད་ཀྱི་ཡུལ་ཉེ་བར་སྟོན་པར་བྱེད་ཀྱང་། བདུད་ཀྱི་ལས་རྣམས་ཀྱིས་མི་འཕྲོགས་པ་དང་། སངས་རྒྱས་ཀྱི་ཡུལ་སྤོང་བར་མི་བྱེད་པ་དང་། བདུད་ཀྱི་ཡུལ་གྱི་རྗེས་སུ་མི་འཇུག་
པ་དང་། ཆོས་ཀྱི་དབྱིངས་ཀྱི་ཡུལ་ལས་ལྡོག་པར་མི་བྱེད་པ་དང་། སེམས་ཅན་གྱི་ཁམས་ཀྱི་ཡུལ་ཉེ་བར་ལེན་པར་བྱེད་པས་ན། དེའི་ཕྱིར་སེམས་ཅན་ཆེན་པོ་དེ་དག་གི་སྤྱོད་པ་ནི་འཇིག་རྟེན་ཐམས་ཅད་དང་མི་འཐུན་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཁྱོད་བྱང་ཆུབ་

སེམས་དཔའ་རྣམས་ཀྱི་སྤྱོད་པ་ལ་སྤོབས་པར་གྱིས་ཤིག །འཇམ་དཔལ་གྱིས་སྨྲས་པ། ལྷའི་བུ་བསམ་པ་ཡོངས་སུ་དག་ཅིང་། ནང་དང་། ཕྱི་རོལ་དབེན་པ་ཉིད་ཀྱིས་ལྷག་པའི་བསམ་པ་ལ་སྤྱོད་པ་དང་། རབ་ཏུ་སྤྱོད་པ་མེད་པ་ཉིད་ཀྱིས་སྦྱོར་བ་ལ་སྤྱོད་པ་དང་།
སེམས་མི་བརྗེད་པ་ཉིད་ཀྱིས་བྱང་ཆུབ་ཀྱི་སེམས་མི་བརྗེད་པ་ལ་སྤྱོད་པ་དང་། སེམས་དུལ་བ་ཉིད་ཀྱིས་སྦྱིན་པ་ལ་སྤྱོད་པ་དང་། སེམས་ཞི་བ་ཉིད་ཀྱིས་ཚུལ་ཁྲིམས་ལ་སྤྱོད་པ་དང་། རྨས་པ་མེད་པ་ཉིད་ཀྱིས་བཟོད་པ་ལ་སྤྱོད་པ་དང་། ལུས་དང་སེམས་དབེན་པ་ཉིད་ཀྱིས་བརྩོན་
འགྲུས་ལ་སྤྱོད་པ་དང་། ཆོས་ཀྱི་དབྱིངས་རྣམ་པར་གཡེང་བ་མེད་པ་ཉིད་ཀྱིས་བསམ་གཏན་ལ་སྤྱོད་པ་དང་། སྤྲོས་པ་མེད་པ་ཉིད་ཀྱིས་ཤེས་རབ་ལ་སྤྱོད་པ་དང་། སེམས་ཅན་ལ་བདག་མེད་པ་ཉིད་ཀྱིས་བྱམས་པ་ལ་སྤྱོད་པ་དང་། ཉོན་མོངས་པ་ཡོད་པ་མ་ཡིན་པར་རབ་ཏུ་ཞི་བ་
ཉིད་ཀྱིས་སྙིང་རྗེ་ལ་སྤྱོད་པ་དང་། རང་བཞིན་གྱིས་རྣམ་པར་གྲོལ་བའི་ཕྱིར་དགའ་བ་ལ་སྤྱོད་པ་དང་། མཐའ་གཉིས་དང་བྲལ་བའི་ཕྱིར་བཏང་སྙོམས་ལ་སྤྱོད་པ་དང་། གཟོད་མ་ནས་མ་སྐྱེས་པའི་ཕྱིར་མི་རྟག་པ་ལ་སོ་སོར་རྟོག་པ་ལ་སྤྱོད་པ་དང་། ཡོངས་སུ་རྟོག་པ་སྡུག་བསྔལ་
བའི་ཕྱིར་སྡུག་བསྔལ་ལ་སོ་སོར་རྟོག་པ་ལ་སྤྱོད་པ་དང་། ཕྱིན་ཅི་ལོག་རང་བཞིན་མེད་པའི་ཕྱིར་བདག་མེད་པ་ལ་སོ་སོར་རྟོག་པ་ལ་སྤྱོད་པ་དང་། འདུ་ཤེས་ཡོངས་སུ་ཤེས་པའི་ཕྱིར་ཞི་བ་ལ་སོ་སོར་རྟོག་པ་ལ་སྤྱོད་པ་དང་། ཕུང་པོ་སྒྱུ་མ་ལྟ་བུར་ཡོངས་སུ་ཤེས་པའི་ཕྱིར་སྡུག་བསྔལ་ཡོངས་སུ་ཤེས་
པ་ལ་སྤྱོད་པ་དང་། མ་རིག་པ་སྔོན་དུ་འགྲོ་བའི་ཕྱིར་ཀུན་འབྱུང་བ་ཤེས་པ་ལ་སྤྱོད་པ་དང་། རང་བཞིན་གྱིས་འགགས་པའི་ཕྱིར་འགོག་པ་ཤེས་པ་ལ་སྤྱོད་པ་དང་། འདུས་བྱས་ལ་མངོན་པར་ཞེན་པ་མེད་པའི་ཕྱིར་ལམ་ཤེས་པ་ལ་སྤྱོད་པ་དང་། འབྲས་བུ་ཡོངས་སུ་ཤེས་པ་ཉིད་ཀྱིས་རྒྱུ་
ཤེས་པ་ལ་སྤྱོད་པ་དང་། རྟེན་ཅིང་འབྲེལ་པར་འབྱུང་བའི་ཕྱིར་རྐྱེན་ཤེས་པ་ལ་སྤྱོད་པ་དང་། དུ་མའི་ཕྱིར་ཚོགས་པ་ལ་སྤྱོད་པ་དང་། བརྗོད་དུ་མེད་པའི་ཕྱིར་དོན་སོ་སོ་ཡང་དག་པར་རིག་པ་ལ་སྤྱོད་པ་དང་། ཆོས་ཀྱི་དབྱིངས་དབྱེར་མེད་པའི་ཕྱིར་ཆོས་སོ་སོ་ཡང་དག་པར་རིག་པ་ལ་སྤྱོད་པ་

དང་། མིང་དང་གཟུགས་འབྱུང་བ་མེད་པའི་ཕྱིར་ངེས་པའི་ཚིག་སོ་སོ་ཡང་དག་པར་རིག་པ་ལ་སྤྱོད་པ་དང་། སྒྲ་བྲག་ཅ་དང་མཚུངས་པའི་ཕྱིར་སྤོབས་པ་སོ་སོ་ཡང་དག་པར་རིག་པ་ལ་སྤྱོད་པ་དང་། ཚིག་འབྲུ་གསལ་བ་ཉིད་ཀྱིས་དོན་ལ་རྟོན་པ་ལ་སྤྱོད་པ་དང་། རྣམ་པར་ཤེས་པའི་སྤྱོད་ཡུལ་མ་སྤངས་པ་ཉིད་ཀྱིས་ཡེ་
ཤེས་ལ་རྟོན་པ་ལ་སྤྱོད་པ་དང་། ལས་ཀྱི་རྣམ་པར་སྨིན་པ་སྟོང་པ་ཉིད་ཀྱིས་ངེས་པའི་དོན་གྱི་མདོ་སྡེ་ལ་རྟོན་པ་ལ་སྤྱོད་པ་དང་། གང་ཟག་ཡོངས་སུ་སྨིན་པར་བྱ་བ་ཉིད་ཀྱིས་ཆོས་ལ་རྟོན་པ་ལ་སྤྱོད་པ་དང་། ལས་རྣམ་པར་དག་པའི་ཕྱིར་ལྷའི་མིག་ལ་སྤྱོད་པ་དང་། ཚུལ་ཁྲིམས་རྣམ་པར་དག་པའི་ཕྱིར་སྤྱོད་པ་དང་།
ཏིང་ངེ་འཛིན་རྣམ་པར་དག་པའི་ཕྱིར་ཕ་རོལ་གྱི་སེམས་ཤེས་པ་ལ་སྤྱོད་པ་དང་། དུས་གསུམ་མཉམ་པ་ཉིད་ཀྱི་ཕྱིར་སྔོན་གྱི་གནས་རྗེས་སུ་དྲན་པ་ཤེས་པ་ལ་སྤྱོད་པ་དང་། སེམས་ལ་དབང་སྒྱུར་བའི་ཕྱིར་རྫུ་འཕྲུལ་མངོན་པར་བསྒྲུབ་པ་ལ་སྤྱོད་པ་དང་། མི་ཕྱེད་པའི་ཕྱིར་སྤྱོད་པ་བརྟན་པ་ལ་སྤྱོད་པ་དང་།
མི་ལྷོད་པའི་ཕྱིར་སྤྱོད་པ་སྲ་བ་ལ་སྤྱོད་པ་དང་། བསྐྱོད་དུ་མེད་པའི་ཕྱིར་གནས་པ་མེད་པ་ལ་སྤྱོད་པ་དང་། ཐ་དད་པ་མེད་པ་ཉིད་ཀྱིས་སྤྱོད་པ་མཉམ་པ་ལ་སྤྱོད་པ་དང་། ཐམས་ཅད་རྗེས་སུ་མ་བརྟགས་པའི་ཕྱིར་ས་དང་། ཆུ་དང་། མེ་དང་། རླུང་དང་། ནམ་མཁའ་ལྟ་བུར་སྤྱོད་པ་དང་། རྣམ་
པར་བསྒྲུབ་པའི་མཚན་ཉིད་ཀྱི་ཕྱིར་སྒྱུ་མ་ལྟ་བུ་ལ་སྤྱོད་པ་དང་། ཡང་དག་པ་མ་ཡིན་པའི་མཚན་ཉིད་ཀྱིས་རྨི་ལམ་ལྟ་བུ་ལ་སྤྱོད་པ་དང་། རྣམ་པར་རྨོངས་པའི་མཚན་ཉིད་ཀྱིས་སྨིག་རྒྱུ་ལྟ་བུ་ལ་སྤྱོད་པ་དང་། བདག་མི་སྦེད་པའི་མཚན་ཉིད་ཀྱིས་སྟོང་པ་ཉིད་ལ་སྤྱོད་པ་དང་། སེམས་རང་བཞིན་མེད་
པའི་མཚན་ཉིད་ཀྱིས་མཚན་མ་མེད་པ་ལ་སྤྱོད་པ་དང་། ཁམས་གསུམ་རང་བཞིན་མེད་པའི་མཚན་ཉིད་ཀྱིས་སྨོན་པ་མེད་པ་ལ་སྤྱོད་པ་དང་། འདུས་བྱས་རང་བཞིན་མེད་པའི་མཚན་ཉིད་ཀྱིས་མངོན་པར་འདུ་བྱེད་པ་མེད་པ་ལ་སྤྱོད་པ་དང་། སེམས་དང་ཡིད་དང་རྣམ་པར་ཤེས་པ་འཇུག་པ་མེད་པའི་མཚན་ཉིད་ཀྱིས་བདུད་
ཚར་བཅད་པ་ལ་སྤྱོད་པ་དང་། སྤྱོད་པ་ཐམས་ཅད་རྣམ་པར་བསྒྲུབ་པའི་མཚན་ཉིད་ཀྱིས་དཀོན་མཆོག་གསུམ་གྱི་གདུང་རྒྱུན་མི་གཅོད་པ་ལ་སྤྱོད་པ་སྟེ། ལྷའི་བུ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་སྤྱད་པ་ལ་སྤྱོད་པ་ཡིན་ནོ།། །།བམ་པོ་གསུམ་པ་སྟེ་ཐ་མ།

ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའི་སྤྱོད་པ་དེ་ནི་ཉན་ཐོས་དང་རང་སངས་རྒྱས་ཐམས་ཅད་ལས་ཡང་དག་པར་འདས་པ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་དེ་དེ་བཞིན་ཏེ། ལྷའི་བུ་ཁོ་བོ་ནི་བྱང་ཆུབ་སེམས་དཔའ་གང་དད་པས་
རྗེས་སུ་འབྲང་བ་མ་ཡིན་པ་དང་། ཆོས་ཀྱི་རྗེས་སུ་འབྲང་བ་མ་ཡིན་པ་དང་། གང་བརྒྱད་པ་མ་ཡིན་པ་དང་། རྒྱུན་དུ་ཞུགས་པ་མ་ཡིན་པ་དང་། ལན་ཅིག་ཕྱིར་འོང་བ་མ་ཡིན་པ་དང་། ཕྱིར་མི་འོང་བ་མ་ཡིན་པ་དང་། དགྲ་བཅོམ་པ་མ་ཡིན་པ་དང་། གང་ཉན་ཐོས་མ་ཡིན་པ་དང་། རང་སངས་
རྒྱས་མ་ཡིན་པ་དང་། གང་སངས་རྒྱས་བཅོམ་ལྡན་འདས་མ་ཡིན་པ་དང་། དེ་བཞིན་གཤེགས་པ་མ་ཡིན་པ་དང་། ཡང་དག་པར་རྫོགས་པའི་སངས་རྒྱས་མ་ཡིན་པ་དང་། སྟོན་པ་མ་ཡིན་པ་དེ་ནི་བྱང་ཆུབ་སེམས་དཔའ་ཡིན་པར་མི་སྨྲའོ། །ལྷའི་བུ་ཁོ་བོ་ནི་བྱང་ཆུབ་སེམས་དཔའ་
གང་སོ་སོ་སྐྱེ་བོའི་ཆོས་ཅན་མ་ཡིན་པ་དང་། འདོད་ཆགས་ཀྱི་ཆོས་ཅན་མ་ཡིན་པ་དང་། ཞེ་སྡང་གི་ཆོས་ཅན་མ་ཡིན་པ་དང་། གཏི་མུག་གི་ཆོས་ཅན་མ་ཡིན་པ་དང་། གང་འཁོར་བའི་ཆོས་ཅན་མ་ཡིན་པ་དང་། ཡོངས་སུ་མྱ་ངན་ལས་འདའ་བའི་ཆོས་ཅན་མ་ཡིན་པ་དེ་ནི་བྱང་ཆུབ་
སེམས་དཔའ་ཡིན་པར་མི་སྨྲའོ། །ལྷའི་བུས་སྨྲས་པ། འཇམ་དཔལ་ཇི་ལས་བསམས་ཏེ་དེ་སྐད་སྨྲ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་དད་པས་རྗེས་སུ་འབྲང་བ་དང་། ཆོས་ཀྱི་རྗེས་སུ་འབྲང་བ་དང་། བརྒྱད་པ་དང་། རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་
དང་། ཕྱིར་མི་འོང་བ་དང་། དགྲ་བཅོམ་པ་དང་། ཉན་ཐོས་དང་། རང་སངས་རྒྱས་དང་། སངས་རྒྱས་བཅོམ་ལྡན་འདས་དང་། དེ་བཞིན་གཤེགས་པ་དང་། ཡང་དག་པར་རྫོགས་པའི་སངས་རྒྱས་དང་། སྟོན་པ་དང་། སོ་སོ་སྐྱེ་བོའི་ཆོས་ཅན་དང་། འདོད་ཆགས་ཀྱི་ཆོས་ཅན་དང་།
ཞེ་སྡང་གི་ཆོས་ཅན་དང་། གཏི་མུག་གི་ཆོས་ཅན་དང་། འཁོར་བའི་ཆོས་ཅན་དང་། ཡོངས་སུ་མྱ་ངན་ལས་འདའ་བའི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་ལ་དད་པར་བྱེད་པ་དང་། ཆགས་པ་ཐམས་ཅད་

ལ་དད་པར་བྱེད་ཀྱང་དེ་ལ་ཆགས་པར་མི་འགྱུར་བ་དང་། གཞན་གྱི་དད་པས་མི་འགྲོ་བ་དང་། ཕ་རོལ་ཏུ་ཕྱིན་པ་དྲུག་གི་ལམ་ལ་དད་པ་སྐྱེད་ཅིང་འཛིན་པར་བྱེད་པ་དང་། ཆགས་པས་ཆགས་པར་གྱུར་པ་རྣམས་ཐར་པར་བྱེད་པ་དང་། ཆགས་པ་མེད་པའི་ཡེ་ཤེས་ཡོངས་སུ་ཚོལ་
བར་བྱེད་པ་དང་། འཁོར་བ་ལ་ཆགས་པར་མི་བྱེད་པ་དང་། མྱ་ངན་ལས་འདས་པར་མི་ལྟུང་བ་དེ་ཙམ་གྱིས་ན་ལྷའི་བུ་བྱང་ཆུབ་སེམས་དཔའ་དད་པས་རྗེས་སུ་འབྲང་བ་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཆོས་ཀྱི་རྗེས་སུ་འབྲང་བ་ཡིན།
འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱིས་གསུངས་པ་འཛིན་པར་བྱེད་པ་དང་། ཀུན་འཛིན་པར་བྱེད་པ་དང་། ཆོས་ཀྱི་ཟས་དང་ལྡན་ཞིང་ཟང་ཟིང་གི་ཟས་མེད་པ་དང་། ཆོས་ལ་གནས་ཀྱི་ཉོན་མོངས་པ་ལ་མི་གནས་པ་དང་།
ཆོས་ཀྱི་སྟོབས་ཅན་ཡིན་གྱི་ང་རྒྱལ་གྱི་སྟོབས་ཅན་མ་ཡིན་པ་དང་། ཆོས་སྨྲ་བ་ཡིན་གྱི་འཇིག་རྟེན་རྒྱང་པན་པའི་གཏམ་སྨྲ་བ་མ་ཡིན་པ་དང་། ཆོས་ཀྱི་དབང་ཕྱུག་ཡིན་གྱི་ཉོན་མོངས་པའི་དབང་ཕྱུག་མ་ཡིན་པ་དང་། ཆོས་ལ་རྟོན་པ་ཡིན་གྱི་གང་ཟག་ལ་རྟོན་པ་མ་ཡིན་པ་དང་། ཆོས་སྨྲ་
བ་ཡིན་གྱི་ཆོས་མ་ཡིན་པར་མི་སྨྲ་བ་དང་། ཆོས་ཀྱི་རྗེས་སུ་འཐུན་པའི་ཆོས་ལ་རྟོན་པ་ཡིན་གྱི་བརྩོན་པ་བཏང་བའི་ཆོས་ལ་མི་གནས་པ་དང་། ཆོས་སྐྱོན་མེད་པ་ཉིད་དུ་ཆོས་ཐམས་ཅད་ཤེས་པར་བྱེད་པ་དང་། གཟུངས་ཀྱི་སྒོ་ཆགས་པ་མེད་པ་དང་ལྡན་པ་དང་། ནོར་བདུན་དང་ལྡན་པ་དང་།
དམ་པའི་ཆོས་ཡོངས་སུ་འཛིན་པར་བྱེད་པ་དང་། ཆོས་ཀྱི་ཁྱད་པར་ལ་གནས་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་ཆོས་ཀྱི་རྗེས་སུ་འབྲང་བ་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་བརྒྱད་པ་ཡིན། འཇམ་དཔལ་གྱིས་སྨྲས་པ། ལྷའི་བུ་
གང་གི་ཚེ་བྱང་ཆུབ་སེམས་དཔའ་ལོག་པ་ཉིད་བརྒྱད་ལས་ཡང་དག་པར་འདས་པ་དང་། ཡང་དག་པ་ཉིད་བརྒྱད་ལ་རབ་ཏུ་གནས་པ་དང་། ལམ་ཡན་ལག་བརྒྱད་པ་རྣམ་པར་སྦྱང་བ་ལ་མཁས་པ་དང་། སྦྱོར་བ་ཡོངས་སུ་མ་རྫོགས་པར་ལམ་དེས་ངེས་པར་འབྱུང་བར་མི་བྱེད་པ་དང་།

མི་ཁོམ་པ་བརྒྱད་དུ་སྐྱེས་པའི་སེམས་ཅན་རྣམས་དལ་བ་ཕུན་སུམ་ཚོགས་པ་དག་ལ་འགོད་པར་བྱེད་པ་དང་། སྐྱེས་བུ་དམ་པའི་རྣམ་པར་རྟོགས་པ་བརྒྱད་ལ་གནས་པ་དང་། རྣམ་པར་ཐར་པ་བརྒྱད་ལ་བསམ་གཏན་བྱེད་པ་དང་། བྱང་ཆུབ་སེམས་དཔའི་ལྷག་
པའི་བསམ་པ་མི་སྤོང་བ་དེ་ལྟ་ན་ལྷའི་བུ་བྱང་ཆུབ་སེམས་དཔའ་བརྒྱད་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་རྒྱུན་དུ་ཞུགས་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་སེམས་ཅན་རྒྱུན་ཕྱོགས་སུ་
དད་པ་རྣམས་རྒྱུན་ལས་ཟློག་པར་བྱེད་པ་དང་། འཁོར་བའི་རྒྱུན་ཐམས་ཅད་ཀྱང་གཅོད་པར་བྱེད་ལ་འཁོར་བ་མི་གཅོད་པ་དང་། ངན་སོང་ཐམས་ཅད་རྒྱུན་གཅོད་པར་བྱེད་པ་དང་། སེམས་ཅན་རྣམས་བདེ་འགྲོ་དང་མྱ་ངན་ལས་འདས་པ་མངོན་དུ་བྱ་བའི་ལམ་ལ་འགོད་པར་བྱེད་པ་དང་།
མཚམས་བཅད་པ་དང་། ལྷ་དང་མི་ལ་གཞོལ་བ་དང་། བདེན་པ་སྟོན་པར་བྱེད་པ་དང་། རློམ་སེམས་སུ་མི་ལྟུང་བ་དང་། ཐེ་ཙོམ་དང་བྲལ་བ་དང་། ངེས་པ་དང་། སངས་རྒྱས་ཀྱི་ཆོས་ལ་གཞོལ་བ་དང་། སོ་སོ་སྐྱེ་བོའི་ལམ་ལས་ཡང་དག་པར་འདས་པ་དང་། སངས་རྒྱས་ཀྱི་ཆོས་ཀྱི་ལམ་
ལ་རབ་ཏུ་གནས་པ་དང་། འཁོར་བའི་གཏིང་རྙེད་པ་དང་། མྱ་ངན་ལས་འདས་པ་ལ་མངོན་དུ་ཕྱོགས་པར་གྱུར་པ་དང་། འཇིག་རྟེན་གྱི་སྦྱིན་གནས་སུ་གྱུར་པ་དང་། འདུས་བྱས་ལ་སྣང་བ་དང་། འདུས་མ་བྱས་པས་རབ་ཏུ་ཕྱེ་བ་དང་། ཕྱིར་ལྡོག་པར་མི་འགྱུར་བ་དང་། དགེ་འདུན་ལ་
ཡང་དག་པར་གཞོལ་བ་དེ་ལྟ་ན་ལྷའི་བུ་བྱང་ཆུབ་སེམས་དཔའ་རྒྱུན་དུ་ཞུགས་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ལན་ཅིག་ཕྱིར་འོང་བ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་འོང་
བ་མེད་པ་དང་འགྲོ་བ་མེད་པར་ཤེས་ནས་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསམ་བཞིན་དུ་འོང་བ་དང་། སེམས་ཅན་རྣམས་ཡོངས་སུ་སྨིན་པར་བྱེད་པ་དང་། འོང་བ་དང་། འགྲོ་བར་སྟོན་པར་བྱེད་པ་དང་། ཆོས་ཉིད་ལ་འོང་བ་དང་འགྲོ་བ་མེད་པར་མཐོང་བ་དང་། འོང་ཡང་ཉོན་མོངས་

པ་མེད་པས་འོང་བ་དང་། རང་གི་ལས་ཡོངས་སུ་དག་པས་འགྲོ་བ་དང་། འོང་བ་མཉམ་པ་ཉིད་མི་སྤོང་བ་དང་། བདུད་ཀྱི་དབང་གིས་མི་འགྲོ་བ་དང་། བྱང་ཆུབ་ཀྱི་ལམ་ཉེ་བར་སྟོན་པའི་ཕྱིར་འོང་བ་དང་། ཉེ་བར་བླངས་པའི་སེམས་ཅན་བསྒྲལ་བའི་ཕྱིར་འོང་བ་དང་། བྱང་ཆུབ་ཀྱི་ལྷག་པའི་
བསམ་པ་སྲ་ཞིང་མི་ཕྱེད་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་ལན་ཅིག་ཕྱིར་འོང་བ་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཕྱིར་མི་འོང་བ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ལྟ་བ་རྣམས་དང་།
ཕྱིན་ཅི་ལོག་རྣམས་དང་། སྒྲིབ་པ་རྣམས་སུ་ཡང་མི་འོང་བ་དང་། འདུན་པ་དང་། འདོད་ཆགས་དང་། ཞེ་སྡང་དང་། འཇིགས་པ་དང་། གཏི་མུག་གིས་ཡང་འོང་བ་དང་། འགྲོ་བར་མི་འགྱུར་བ་དང་། བྱས་པ་ངེས་པར་མ་གྱུར་ཅིང་སངས་རྒྱས་ཀྱི་ཆོས་རྣམས་མ་རྫོགས་པར་མི་འོང་
བ་དང་། འོང་བ་མེད་པ་དང་། འཕོ་བ་མེད་པ་ལ་མཁས་པ་དང་། རྒ་ཤི་མེད་པ་ལ་ཐོབ་པ་དང་། མཐར་གནས་པ་དང་། བྱས་པ་ངེས་པ་དང་། ལུང་བསྟན་པ་ཐོབ་པ་དང་། དམིགས་སུ་མེད་པ་དང་། རྣམ་པ་མེད་པ་ཐོབ་པ་དང་། ཤེས་པས་གཞན་ལ་རག་མ་ལས་པ་དེ་ལྟ་ན་ལྷའི་བུ་བྱང་
ཆུབ་སེམས་དཔའ་ཕྱིར་མི་འོང་བ་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་དགྲ་བཅོམ་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ཆགས་པ་མེད་ཅིང་འདོད་ཆགས་གདུལ་བའི་ཕྱིར་སེམས་ཅན་རྣམས་ལ་
ཆོས་སྟོན་པ་དང་། སྡང་བ་མེད་ཅིང་ཞེ་སྡང་གདུལ་བའི་ཕྱིར་སེམས་ཅན་རྣམས་ལ་ཆོས་སྟོན་པ་དང་། རྨོངས་པ་མེད་ཅིང་གཏི་མུག་གདུལ་བའི་ཕྱིར་སེམས་ཅན་རྣམས་ལ་ཆོས་སྟོན་པ་དང་། ཆོས་ཐམས་ཅད་ལ་ཉོན་མོངས་པ་མེད་པར་གནས་པ་དང་། སེམས་ཅན་ཐམས་ཅད་ལ་སེམས་
མ་བཏང་བ་དང་། སངས་རྒྱས་ཀྱི་ཆོས་ཐམས་ཅད་ལ་བརྩོན་འགྲུས་བརྩམས་པ་དང་། འདོད་པའི་ལོངས་སྤྱོད་ཐམས་ཅད་ལ་དགའ་བ་མེད་པས་དགའ་བ་དང་། དགྲ་བཅོམ་པ་དང་པད་མ་བཞིན་དུ་ཉོན་མོངས་པ་ཐམས་ཅད་ཀྱིས་མ་གོས་པ་དང་། ཤེས་པས་འཕགས་པ་དང་མཉམ་པ་དང་།

ཐབས་ཀྱིས་འཕགས་པ་མ་ཡིན་པར་གནས་པ་དང་། ཉེ་བར་ལེན་པ་ཐམས་ཅད་ལ་བདག་གིར་མེད་ཅིང་ཡོངས་སུ་འཛིན་པ་མེད་པ་དང་། སངས་རྒྱས་ཀྱི་ཆོས་ཐམས་ཅད་ལ་བདག་གིར་བྱེད་ཅིང་ཡོངས་སུ་འཛིན་པ་དང་། རང་གི་སེམས་ཀྱི་རྒྱུད་དག་ལ་ཟག་པ་མེད་
པའི་སེམས་དང་ལྡན་པ་དང་། གཞན་གྱི་སེམས་ཀྱི་རྒྱུད་དག་ལ་ཟག་པ་མེད་པར་གནས་པར་བྱེད་པ་དང་། སྔོན་དམ་བཅས་པ་དག་ལ་བརྣག་པ་ཡོངས་སུ་རྫོགས་པ་དང་། ཚུ་རོལ་དང་ཕ་རོལ་ལ་གནས་པ་རྣམས་ཀྱི་ཕ་རོལ་ཏུ་སོན་པ་དང་། ཚུ་རོལ་གྱི་གནས་མ་སྤངས་པ་དང་།
གཞན་གྱིས་སེམས་ཅན་གཞན་ཐར་བར་བྱེད་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་དགྲ་བཅོམ་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཉན་ཐོས་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་སེམས་
ཅན་ཐམས་ཅད་ལ་མ་ཐོས་པའི་ཆོས་སྒྲོགས་པར་བྱེད་ཅིང་ཡུལ་རྣམས་ལ་སྤྱོད་པར་མི་བྱེད་པ་དང་། ཡང་དག་པའི་དམ་པའི་ཆོས་དང་། སྐྱེ་བ་མེད་པ་དང་། འགག་པ་མེད་པའི་ཆོས་སྒྲོགས་པར་བྱེད་པ་དང་། རྒྱུ་དང་། རྐྱེན་དང་། བདག་མེད་པ་དང་། སེམས་ཅན་མེད་པ་དང་།
རང་བཞིན་གྱིས་གཡོ་བ་མེད་པར་སྒྲོགས་པར་བྱེད་པ་དང་། སངས་རྒྱས་ཀྱི་ཆོས་ཚད་མེད་པ་དང་། ནམ་མཁའ་དང་མཉམ་པའི་ཆོས་རྣམས་སྒྲོགས་པར་བྱེད་པ་དང་། སངས་རྒྱས་ཀྱི་ཡེ་ཤེས་དང་། ཡེ་ཤེས་ཆེན་པོ་ལ་ཆོས་ཐམས་ཅད་རྒྱུས་ཉེ་བར་འགྲོ་བར་རྩོམས་ཤིག་ཅེས་སྒྲོགས་
པར་བྱེད་པ་དང་། སྒྲོགས་པ་ཡང་གཞན་གྱི་དྲིང་མི་འཇོག་པ་དང་། ཐོས་པས་ཀྱང་རློམ་སེམས་མི་བྱེད་པ་དང་། སྒྲོགས་པ་ཐམས་ཅད་ཀྱི་སྔོན་དང་ཕྱི་མའི་མཐའ་མི་ཆད་པ་ཡོངས་སུ་ཤེས་པ་དང་། སོ་སོ་ཡང་དག་པར་རིག་པ་མི་ཟད་པ་ཐོབ་པ་དང་། དོན་དང་ཚིག་དང་ཡིག་འབྲུ་མི་ཟད་པ་
དང་། སེམས་ཅན་ཐམས་ཅད་ཀྱི་སེམས་དང་། སྤྱོད་པ་དང་། ཤེས་པར་སྟོན་པར་བྱེད་པ་དང་། སོ་སོ་ཅི་རིགས་པར་ཆོས་སྟོན་པར་བྱེད་པ་དང་། ཞི་བའི་ས་ལ་གནས་པ་དང་། སྤྲོས་པ་མེད་པ་དང་། སྔོན་གྱི་སྨོན་ལམ་གྱི་སྤྱོད་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་ཉན་ཐོས་ཡིན་

ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་རང་སངས་རྒྱས་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་རྐྱེན་ལ་རག་ལས་པ་དང་། སེམས་ཅན་མེད་པ་དང་། སྲོག་མེད་པ་དང་། གང་ཟག་མེད་
པ་དང་། བདག་པོ་མེད་པ་དང་། རྣམ་པར་བསྒྲུབ་པ་ཉེ་བར་གནས་པའི་མཚན་ཉིད་དུ་ཤེས་པ་དང་། དེས་རྐྱེན་རྣམས་ལེགས་པར་མཐོང་བའི་ཕྱིར་བྱང་ཆུབ་འདྲེན་པར་བྱེད་པའི་རྐྱེན་འདི་ལྟ་སྟེ། ཕ་རོལ་ཏུ་ཕྱིན་པ་ཐམས་ཅད་ཀྱི་ཕྱོགས་དང་། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་
ཕྱོགས་དང་། བསྡུ་བའི་དངོས་པོ་བཞིའི་ཕྱོགས་དང་། ཚད་མེད་པ་བཞིའི་ཕྱོགས་དང་། མངོན་པར་ཤེས་པའི་ཕྱོགས་ཡང་དག་པར་སྒྲུབ་པར་བྱེད་པ་དང་། དེ་རྐྱེན་ཉེ་བར་སྒྲུབ་པར་བྱེད་ཅིང་གཞན་གྱི་དྲིང་མི་འཇོག་པས་བྱང་ཆུབ་མངོན་པར་རྫོགས་པར་འཚང་རྒྱ་བར་བྱེད་པ་དང་། ས་ངན་པ་དག་
ལས་སེམས་སྐྱོ་བར་བྱེད་པ་དང་། ཉི་ཚེ་བའི་ཤེས་པ་འདུལ་བ་ལ་མཁས་པ་དང་། ཐེག་པ་ཆེན་པོ་ལ་ལེགས་པར་རབ་ཏུ་གནས་པ་དང་། ཆོས་ཐམས་ཅད་ལ་མངོན་དུ་གྱུར་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་རང་སངས་རྒྱས་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་
བྱང་ཆུབ་སེམས་དཔའ་སངས་རྒྱས་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་གཟོད་མ་ནས་དབེན་པ་ཉིད་དུ་རྟོགས་པར་བྱེད་པ་དང་། སེམས་ཅན་ཐམས་ཅད་གཟོད་མ་ནས་བདག་མེད་པ་ཉིད་དུ་རྟོགས་པར་བྱེད་པ་དང་། མིང་མངོན་པར་
རྟོགས་པར་བྱ་བའི་ཕྱིར་སྤྱོད་པ་དམན་པ་དང་། མཆོག་དང་། བར་མ་ཐམས་ཅད་རྟོགས་པར་བྱེད་པ་དང་། རང་གི་ཉོན་མོངས་པ་སྟོང་པ་ཉིད་ཀྱིས་ཉོན་མོངས་པ་ཐམས་ཅད་རྟོགས་པར་བྱེད་པ་དང་། སྐད་ཅིག་གཅིག་ལ་རྗེས་སུ་རྟོགས་པའི་རིམ་གྱི་ས་དང་སྤྱོད་པ་སྣ་ཚོགས་སྟོན་པར་བྱེད་པ་དང་།
སེམས་ཅན་གྱི་དབང་པོ་དང་། མོས་པས་ཆོས་སྟོན་པར་བྱེད་པ་དང་། འབྲས་བུ་ཡོད་པར་ཆོས་སྟོན་པར་བྱེད་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་སངས་རྒྱས་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པ་ཡིན། འཇམ་དཔལ་གྱིས་

སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་དེ་བཞིན་གཤེགས་པའི་ལམ་དུ་འགྲོ་བ་དང་། དེ་བཞིན་ཉིད་མི་བརྗེད་པ་དང་། དེ་བཞིན་ཉིད་ལ་རབ་ཏུ་གནས་པ་དང་། དེ་བཞིན་ཉིད་ཀྱི་སྦྱིན་པ་དང་། དེ་བཞིན་ཉིད་ཀྱི་ཚུལ་ཁྲིམས་དང་། དེ་བཞིན་ཉིད་ཀྱི་བཟོད་པ་
དང་། དེ་བཞིན་ཉིད་ཀྱི་བརྩོན་འགྲུས་དང་། དེ་བཞིན་ཉིད་ཀྱི་བསམ་གཏན་དང་། དེ་བཞིན་ཉིད་ཀྱི་ཤེས་རབ་དང་། དེ་བཞིན་ཉིད་ཀྱི་ཐབས་དང་། དེ་བཞིན་ཉིད་ཀྱི་སྨོན་ལམ་དང་། དེ་བཞིན་ཉིད་ཀྱི་སྟོབས་དང་། དེ་བཞིན་ཉིད་ཀྱི་ཡེ་ཤེས་དང་ལྡན་པ་དང་། དེ་བཞིན་ཉིད་ཀྱི་སེམས་ཅན་
མེད་པ་དང་། སེམས་ཅན་ཡོངས་སུ་ཐར་བར་བྱེད་པ་དང་། སེམས་ཅན་གྱི་གནས་དང་། འཁོར་བ་ན་ཡང་སྤྱོད་ལ་སྤྱོད་པ་ཐམས་ཅད་ལས་ཀྱང་ཡང་དག་པར་འདས་པ་དང་། སྤྱོད་པ་ལས་སྒྲོལ་བར་བྱེད་པ་དང་། དེ་ན་ཡང་ཡིན་ལ་དེ་ན་ཡང་མ་ཡིན་པ་དང་། འདི་ན་ཡང་ཡིན་ལ་འདི་ན་
ཡང་མ་ཡིན་པ་དང་། གཉིས་ཀ་ལས་དག་པ་དང་། མུན་པ་དང་བྲལ་བ་དང་། རྟག་ཏུ་གསལ་བ་དང་། མུན་པ་མེད་པ་དང་། མུན་པའི་ལིང་ཏོག་དང་བྲལ་བ་དང་། དེ་བཞིན་ཉིད་ཀྱི་རྗེས་སུ་སོང་བ་དང་། དེ་བཞིན་གཤེགས་པའི་སའི་རྗེས་སུ་སོང་བ་དེ་ལྟར་ན་ལྷའི་བུ་བྱང་ཆུབ་སེམས་དཔའ་དེ་
བཞིན་གཤེགས་པ་ཞེས་བྱའོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་བཅོམ་ལྡན་འདས་ཞེས་བྱ། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ཉོན་མོངས་པ་བཅོམ་པ་དང་། ཆུ་བོ་ལས་རྒལ་བ་དང་། སྲིད་པ་མཐོང་བ་དང་།
སེམས་ཅན་ཐམས་ཅད་ཀྱི་ཁུར་དང་། སྲིད་པ་འཇོམས་པ་དང་། སྲིད་པའི་འདུ་ཤེས་དང་བྲལ་བ་དང་། བདུད་བཅོམ་པ་དང་། ཁུར་བོར་བ་དང་། སྲིད་པའི་འགྲོ་བར་འཆི་འཕོ་བ་དང་། སྐྱེ་བ་དང་། བྱ་བ་ཤེས་པ་དང་། སྲིད་པའི་འདོད་ཆགས་བསལ་བ་དང་། ལུས་དང་སེམས་སྒོམ་པ་
དང་། ཚུལ་ཁྲིམས་དང་། ཤེས་རབ་བསྒོམས་པ་དང་། སྲིད་པའི་སྐྱོན་ལེགས་པར་མཐོང་བ་དང་། སྲིད་པའི་སྲེད་པ་དང་བྲལ་བ་དང་། སེམས་ཅན་ལ་བསམ་པ་མ་བཏང་བ་དང་། སྲིད་པའི་རྒྱ་མཚོ་ལས་སྒྲོལ་བ་དང་། ཆུ་ལོན་དང་ཟམ་པ་ལེགས་པར་བྱས་པ་དང་། མི་གནས་པས་

ལེགས་པར་མཐོང་བ་དང་། རྟག་ཏུ་སྒོམ་པ་ལ་ཡིད་ཀྱིས་བརྩོན་པ་དང་། སེམས་ཅན་གྱི་སྲིད་པ་ཟད་པར་བྱེད་པ་དང་། སྲིད་པ་ཐམས་ཅད་ལས་རྣམ་པར་ལོག་པ་དང་། ཐབས་ལ་མཁས་པ་དང་། ཉོན་མོངས་པ་ཐམས་ཅད་ཐལ་བར་རློག་པར་བྱེད་པ་དང་། སྲིད་པས་རྣམ་པར་རྩེ་
བ་ལ་མཁས་པ་དང་། སྲིད་པ་གསུམ་ན་ཡོད་པ་རྣམས་ཀྱིས་མཆོད་པ་དེ་ལྟར་ན་ལྷའི་བུ་བྱང་ཆུབ་སེམས་དཔའ་བཅོམ་ལྡན་འདས་ཞེས་བྱའོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཡང་དག་པར་རྫོགས་པའི་སངས་རྒྱས་ཡིན། འཇམ་དཔལ་
གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་མཚམས་མེད་པ་གང་དང་མཉམ་པ་བྱང་ཆུབ་ཀྱང་དེ་དང་མཉམ་པས་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པར་བྱེད་པ་དང་། ལྟ་བའི་རྣམ་པ་རྣམས་དང་། ཕྱིན་ཅི་ལོག་རྣམས་དང་། སྒྲིབ་པ་རྣམས་དང་། ཆོད་པ་རྣམས་དང་།
ཀུན་ནས་ལྡང་བ་རྣམས་གང་དང་མཉམ་པ་བྱང་ཆུབ་ཀྱང་དེ་དང་མཉམ་པས་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པར་བྱེད་པ་དང་། འདོད་ཆགས་དང་། ཞེ་སྡང་དང་། གཏི་མུག་དང་མཉམ་པ་དང་། ཉོན་མོངས་པ་ཐམས་ཅད་གང་དང་མཉམ་པ་བྱང་ཆུབ་ཀྱང་དེ་དང་མཉམ་པས་
མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པར་བྱེད་པ་དང་། སོ་སོའི་སྐྱེ་བོའི་ཆོས་རྣམས་དང་། སློབ་པའི་ཆོས་རྣམས་དང་། ཉན་ཐོས་ཀྱི་ཆོས་རྣམས་དང་། རང་སངས་རྒྱས་ཀྱི་ཆོས་རྣམས་དང་། བྱང་ཆུབ་སེམས་དཔའི་ཆོས་རྣམས་གང་དང་མཉམ་པ་བྱང་ཆུབ་ཀྱང་དེ་དང་མཉམ་
པས་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པར་བྱེད་པ་དང་། མཉམ་པ་ཉིད་རྣམ་པར་འཁྲུག་པར་མི་བྱེད་པ་དང་། རྣམ་པར་ཐར་པའི་སྒོ་གསུམ་མཉམ་པ་ཉིད་ཀྱིས་མཉམ་པ་ཉིད་དུ་ལྟ་བར་བྱེད་པ་དང་། ཆོས་ཐམས་ཅད་གཟོད་མ་ནས་དག་པའི་ཕྱིར་རྐྱེན་ལ་རག་ལས་པ་དང་།
ཡོད་པ་མ་ཡིན་པའི་ཡོངས་སུ་རྟོག་པས་ཀུན་ནས་བསླང་བ་ནམ་མཁའ་དང་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པར་བྱེད་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་ཡང་དག་པར་རྫོགས་པའི་སངས་རྒྱས་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་

སྟོན་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་གང་ལ་སྟོན་པ་དང་། རབ་ཏུ་སྟོན་པ་དང་། རྗེས་སུ་སྟོན་པར་བྱེད་པ་དེ་དག་ཐམས་ཅད་མི་གཡོས་པའི་ཆོས་ཅན་དུ་འགྱུར་བ་དང་། བསྟན་པ་ཡོངས་སུ་འཛིན་པར་འགྱུར་བ་དང་།
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སྟོན་པ་དང་། རབ་ཏུ་སྟོན་པ་དང་། སྟོན་པ་གཅིག་པུར་འགྱུར་བ་དང་། སེམས་ཅན་ཐམས་ཅད་ཀྱི་སྐྱབས་དང་། གླིང་དང་། དཔུང་གཉེན་དུ་འགྱུར་བ་དང་། མཚན་མ་ཐམས་ཅད་ཞི་བ་དང་རབ་ཏུ་ཞི་བ་དང་། ཉེ་བར་ཞི་བར་འགྱུར་བ་དང་།
ཐེ་ཙོམ་དང་བྲལ་བ་དང་། སེམས་ཅན་ཐམས་ཅད་ཀྱི་ཐེ་ཙོམ་གཅོད་པ་ལ་མཁས་པ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་གིས་ཕྱག་བྱས་པ་དང་། ཡང་དག་པར་སྨྲ་བ་དང་། ཁམས་གསུམ་པས་ཕྱག་བྱས་པ་དང་། སེམས་ནམ་མཁའ་དང་མཉམ་ཞིང་ཁེངས་པ་
མེད་པ་དང་། ཡང་དག་པའི་མཐའ་ལེགས་པར་མཐོང་བའི་ཕྱིར་སྨད་པ་དང་། བརྡེག་པ་དང་། དགོད་པ་དང་། བཤུང་བ་དང་། ཁྲོ་བ་དང་། སྐྱོ་བ་དང་། བསྡིགས་པ་ཐམས་ཅད་དང་། རློམ་སེམས་ཐམས་ཅད་ཀྱིས་ཞུམ་པར་མི་འགྱུར་བ་དང་། སེམས་ཅན་གྱི་རང་བཞིན་ལེགས་པར་
མཐོང་བའི་ཕྱིར་སེམས་ཅན་ཐམས་ཅད་ལ་ཕན་ཞིང་སྙིང་བརྩེ་བ་དང་། འཇིག་རྟེན་ལ་སྟོན་པར་གྲགས་པར་འགྱུར་བ་དེ་ལྟ་ན་ལྷའི་བུ་བྱང་ཆུབ་སེམས་དཔའ་སྟོན་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་སོ་སོ་སྐྱེ་བོའི་ཆོས་ཅན་ཡིན། འཇམ་
དཔལ་གྱིས་སྨྲས་པ། ལྷའི་བུ་གང་གི་ཚེ། བྱང་ཆུབ་སེམས་དཔའ་ཐབས་ཀྱི་སོ་སོ་སྐྱེ་བོའི་སྤྱོད་པ་ཐམས་ཅད་ཀྱང་སྟོན་པར་བྱེད་ལ་ཤེས་པས་སོ་སོ་སྐྱེ་བོའི་སྤྱོད་པ་ཐམས་ཅད་ལ་ཆགས་པར་ཡང་མི་འགྱུར་བ་དེ་ལྟ་ན་ལྷའི་བུ་བྱང་ཆུབ་སེམས་དཔའ་སོ་སོ་སྐྱེ་བོའི་ཆོས་ཅན་ཡིན་ནོ། །ལྷའི་
བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་འདོད་ཆགས་ཀྱི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་རྟག་ཏུ་སངས་རྒྱས་ཀྱི་ཆོས་རྣམས་ལ་རྗེས་སུ་ཆགས་པར་འགྱུར་བ་དང་། རྟག་ཏུ་སངས་རྒྱས་ཀྱི་སྐུ་ལ་ཀུན་ཏུ་ཆགས་

པར་འགྱུར་བ་དང་། བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་བསྒྲུབ་པའི་ཕྱིར་རྟག་ཏུ་དགོན་པར་གནས་པ་ལ་རྗེས་སུ་ཆགས་པར་འགྱུར་བ་དང་། སེམས་ཅན་རྣམས་བསྡུ་བའི་དངོས་པོ་བཞིས་བསྡུ་བ་ལ་རྟག་ཏུ་རྗེས་སུ་ཆགས་པར་འགྱུར་བ་དང་། སེམས་
ཅན་ཐམས་ཅད་ལ་ཞེ་འགྲས་པའི་སེམས་མེད་པར་འགྱུར་བ་དེ་ལྟ་ན་ལྷའི་བུ་བྱང་ཆུབ་སེམས་དཔའ་འདོད་ཆགས་ཀྱི་ཆོས་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཞེ་སྡང་གི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ་གང་
གི་ཚེ་བྱང་ཆུབ་སེམས་དཔའ་འདུས་བྱས་རྣམས་ལ་གཅིག་ཏུ་ཉེས་པའི་སྐྱོན་ཆགས་པར་ལྟ་བར་བྱེད་པ་དང་། ཉན་ཐོས་དང་རང་སངས་རྒྱས་ཀྱི་ཐེག་པ་ལ་སྡང་བར་བྱེད་པ་དང་། ཉོན་མོངས་པ་ཐམས་ཅད་དང་། འདུ་བྱེད་ཐམས་ཅད་ལ་སྐྱོན་དུ་ཡང་འདུ་ཤེས་ལ་ཉོན་མོངས་པ་རྣམས་
དང་འདུ་བྱེད་རྣམས་སྤོང་བར་ཡང་མི་བྱེད་པ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་བརྩོན་འགྲུས་རྒྱུན་གཅོད་པར་མི་བྱེད་པ་དང་། སྙིང་རྗེ་ཆེན་པོས་ཡང་དག་པར་ཟིན་པའི་ཡིད་ཀྱིས་སྙིང་བརྩེ་བ་རྒྱ་ཆེན་པོ་ཡང་དག་པར་སྐྱེད་པར་བྱེད་པ་དང་། སེམས་ཅན་ཡོངས་སུ་སྨིན་
པར་བྱ་བའི་ཕྱིར་སེམས་ཅན་རྣམས་ཉོན་མོངས་པའི་འདམ་རྫབ་ལས་འབྱིན་པར་བྱེད་པ་དང་། སེམས་ཅན་ཞེ་སྡང་ཅན་རྣམས་ལ་བཟོད་པ་ཉེ་བར་སྒྲུབ་པར་བྱེད་ཅིང་ཉོན་མོངས་པ་རྣམས་ལ་ཉེས་པ་སྦྱིན་པར་བྱེད་པ་དང་། འཆི་འཕོའི་ཐབས་ཐམས་ཅད་དང་། འཁོར་བ་སུན་འབྱིན་པར་
བྱེད་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་ཞེ་སྡང་གི་ཆོས་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་གཏི་མུག་གི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ་གཏི་མུག་ཅེས་བྱ་བ་ནི་གང་ཅུང་ཟད་ཀྱང་མི་ཤེས་པ་ཡིན་པས་དེ་ལ་
གང་གི་ཚེ་བྱང་ཆུབ་སེམས་དཔའ་ཆོས་ཀྱི་ངོ་བོ་ཉིད་ལ་སྙོམས་པར་འཇུག་པ་དེ། ཤེས་པར་མི་བྱེད། རྣམ་པར་ཤེས་པར་མི་བྱེད། ཀུན་ཏུ་ཤེས་པར་མི་བྱེད། ལེན་པར་མི་བྱེད། སྤོང་བར་མི་བྱེད། འབྱུང་བར་མི་བྱེད། འཇིག་པར་མི་བྱེད། གཡོ་བར་མི་བྱེད། རློམ་སེམས་

སུ་མི་བྱེད། སྐྱོད་པར་མི་བྱེད་ཅིང་། ཆོས་ཀྱི་རང་བཞིན་གྱིས་འགོག་པ་ལ་སྙོམས་པར་འཇུག་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་གཏི་མུག་གི་ཆོས་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་འཁོར་བའི་ཆོས་ཅན་
ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་འཁོར་བ་ལས་ཀྱང་མི་གཡོ་ལ་དེ་ཉིད་ལས་ཀྱང་སངས་རྒྱས་ཀྱི་ཆོས་རྣམས་ཚོལ་བར་ཡང་བྱེད་པ་དང་། བདུད་ཐམས་ཅད་དང་ཐུན་མོང་མ་ཡིན་ཞིང་སྤྱོད་པ་དམན་པ་རྣམས་དང་། མ་འདྲེས་པ་དང་།
སེམས་ཅན་རྣམས་སྤྱོད་པ་དམན་པ་ལས་ཕྲལ་ཞིང་སྤྱོད་པ་རྒྱ་ཆེན་པོ་ལ་འགོད་པར་བྱེད་པ་དང་། དོན་འཐུན་པར་བྱེད་པ་དང་། མི་དགེ་བ་ཐམས་ཅད་ལ་མི་བསྔགས་པ་རྗོད་པར་བྱེད་ཅིང་འདུན་པ་བཟློག་པ་དང་། ཕྱིར་ཟློག་པར་བྱེད་པ་དང་། བྱང་ཆུབ་འཁོར་བ་ལ་གཞོལ་བར་ཤེས་པར་
བྱེད་པ་དང་། འཁོར་བ་མཉམ་པ་ཉིད་ཀྱིས་སངས་རྒྱས་མཉམ་པ་ཉིད་དུ་ལྟ་བར་བྱེད་པ་དང་། འཁོར་བ་ལས་མི་གཡོ་ཞིང་གནས་པ་ཡང་མི་བྱེད་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་འཁོར་བའི་ཆོས་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་
ཡོངས་སུ་མྱ་ངན་ལས་འདས་པའི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་སེམས་ཅན་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་ལྟ་བར་བྱེད་པ་དང་། ཆོས་ཐམས་ཅད་རང་བཞིན་གྱིས་ཉེ་བར་ཞི་བར་ཤེས་པར་བྱེད་པ་
དང་། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བ་དང་ཉེ་བར་ཞི་བར་བྱ་བའི་ཕྱིར་ཆོས་སྟོན་པར་བྱེད་པ་དང་། སེམས་ཅན་དཔག་ཏུ་མེད་པ་མེ་གསུམ་གྱིས་འབར་བར་གྱུར་པ་རྣམས་ཉེ་བར་ཞི་བར་བྱེད་ཅིང་ཡོངས་སུ་མྱ་ངན་ལས་འདའ་བར་བྱེད་པ་དང་། ཡོངས་སུ་མྱ་ངན་ལས་
འདས་པ་ལ་ཡང་སྤྱོད་པར་བྱེད་ལ། གཏན་དུ་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་ཡང་མི་བྱེད་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་ཡོངས་སུ་མྱ་ངན་ལས་འདའ་བའི་ཆོས་ཅན་ཡིན་ཏེ། ཐབས་ལ་མཁས་པ་དང་། ཐབས་ཤེས་པ་ལ་ངེས་པར་སྐྱེས་པ་དང་།

སེམས་ཅན་ཐམས་ཅད་ལ་ཕན་པ་དང་། རྗེས་སུ་སྙིང་བརྩེ་བ་དང་ལྡན་པ་ཡིན་ནོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན་སྲོག་ཆགས་འབུམ་ལྷག་ཙམ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །སྲོག་ཆགས་
དྲུག་ཁྲི་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྔོན་དགེ་བའི་རྩ་བ་བསྐྱེད་ཅིང་སངས་རྒྱས་མང་པོ་ལ་བསྙེན་བཀུར་བྱས་པའི་སེམས་ཅན་རྣམས་ཀྱིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཉི་ཁྲི་ལྔ་སྟོང་གིས་ནི་
མི་ཟད་པའི་རྣམ་པའི་མཛོད་ཅེས་བྱ་བའི་གཟུངས་སོ་སོར་ཐོབ་པར་གྱུར་ཏོ། །སྲོག་ཆགས་ས་ཡ་ཕྲག་གཉིས་དང་ལྔ་འབུམ་གྱིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སྟེང་གི་བར་སྣང་ལས་ཀྱང་བཅོམ་ལྡན་འདས་དང་། འཇམ་དཔལ་གཞོན་ནུར་
གྱུར་པ་ལ་མཆོད་པ་བྱ་བའི་ཕྱིར་མེ་ཏོག་གི་ཆར་དག་མངོན་པར་རབ་ཏུ་ཕབ་བོ། །དེ་ནས་ལྷའི་བུ་རབ་རྩལ་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཐབས་དང་ཤེས་རབ་ཀྱིས་ངེས་པར་འབྱུང་བ་ཡིན།
དེ་ནས་འཇམ་དཔལ་གཞོན་ནུར་གྱུར་པས་ལྷའི་བུ་རབ་རྩལ་སེམས་ལ་ཚིགས་སུ་བཅད་དེ་སྨྲས་པ། གང་ཚེ་སེམས་ནི་ཆགས་མེ