Kinh tạng Tây Tạng (Kangyur Đại Học) — 059_མདོ་སྡེ།_བ

་ཀྱི་སྦྱིན་པ་རྒྱས་པ་ལགས། བཀའ་སྩལ་པ། ནམ་སེམས་ཅན་ཐམས་ཅད་ཐམས་ཅད་མཁྱེན་པའི་སེམས་ལ་མོས་
པར་བྱེད་པའོ། །གསོལ་པ་ཇི་ལྟར་ན། ཚུལ་ཁྲིམས་དང་ལྡན་པ་རྣམས་ལགས། བཀའ་སྩལ་པ། ནམ་ཐམས་ཅད་མཁྱེན་པའི་སེམས་མི་འདོར་བའོ། །གསོལ་པ། ཇི་ལྟར་ན་བཟོད་པ་དང་ལྡན་པ་རྣམས་ལགས། བཀའ་སྩལ་པ། ནམ་ཐམས་ཅད་མཁྱེན་པའི་སེམས་མི་

ཟད་པར་མཐོང་བ་རྣམས་སོ། །གསོལ་པ། ཇི་ལྟར་ན་བརྩོན་འགྲུས་དང་ལྡན་པ་རྣམས་ལགས། བཀའ་སྩལ་པ། ནམ་ཐམས་ཅད་མཁྱེན་པའི་སེམས་ལ་བརྟགས་ནས་མི་དམིགས་པའོ། །གསོལ་པ། ཇི་ལྟར་ན་བསམ་གཏན་པ་རྣམས་ལགས། བཀའ་སྩལ་པ། ནམ་ཐམས་ཅད་མཁྱེན་
པའི་སེམས་རང་བཞིན་གྱིས་ཞི་བར་རབ་ཏུ་རྟོགས་པའོ། །གསོལ་པ། ཇི་ལྟར་ན་ཤེས་རབ་དང་ལྡན་པ་རྣམས་ལགས། བཀའ་སྩལ་པ། ནམ་ཆོས་ཐམས་ཅད་ལ་སྤྲོས་པར་མི་བྱེད་པའོ། །གསོལ་པ། ཇི་ལྟར་ན་བྱམས་པ་ལ་གནས་པ་རྣམས་ལགས། བཀའ་སྩལ་པ། ནམ་སེམས་
ཅན་དུ་འདུ་ཤེས་འཇུག་པར་མི་བྱེད་པའོ། །གསོལ་པ། ཇི་ལྟར་ན་སྙིང་རྗེ་ལ་གནས་པ་རྣམས་ལགས། བཀའ་སྩལ་པ། ནམ་ཆོས་ཐམས་ཅད་ལ་འདུ་ཤེས་འཇུག་པར་མི་བྱེད་པའོ། །གསོལ་པ། ཇི་ལྟར་ན་དགའ་བ་ལ་གནས་པ་རྣམས་ལགས། བཀའ་སྩལ་པ། ནམ་བདག་ཏུ་འདུ་
ཤེས་འཇུག་པར་མི་བྱེད་དོ། །གསོལ་པ། ཇི་ལྟར་ན་བཏང་སྙོམས་ལ་གནས་པ་རྣམས་ལགས། བཀའ་སྩལ་པ། ནམ་བདག་དང་གཞན་དུ་འདུ་ཤེས་འཇུག་པར་མི་བྱེད་པའོ། །གསོལ་པ། ཇི་ལྟར་ན་དད་པ་ལ་གནས་པ་རྣམས་ལགས། བཀའ་སྩལ་པ། ནམ་ཆོས་ཐམས་ཅད་བརྗོད་དུ་
མེད་པར་མོས་པའོ། །གསོལ་པ། ཇི་ལྟར་ན་ཐོས་པ་ལ་གནས་པ་རྣམས་ལགས། བཀའ་སྩལ་པ། ནམ་སྒྲ་ཐམས་ཅད་ལ་མངོན་པར་མི་ཆགས་པའོ། །གསོལ་པ། ཇི་ལྟར་ན་ངོ་ཚ་འཚལ་བ་དང་ལྡན་པ་རྣམས་ལགས། བཀའ་སྩལ་པ། ནང་ཡོངས་སུ་ཤེས་པས་སོ། །གསོལ་པ།
ཇི་ལྟར་ན་ཁྲེལ་མཆིས་པ་ཕུན་སུམ་ཚོགས་པ་རྣམས་ལགས། བཀའ་སྩལ་པ། ཕྱི་རོལ་གྱི་སྐྱེ་མཆེད་འདོར་བས་སོ། །གསོལ་པ། བཅོམ་ལྡན་འདས་བྱང་ཆུབ་སེམས་དཔའ་རྣམས་ཇི་ལྟར་ན་ཡོན་ཏན་ཐམས་ཅད་ཚོགས་ཤིང་ཀུན་ཏུ་འགྲོ་བ་རྣམས་ལགས། བཅོམ་ལྡན་འདས་ཀྱིས་
བཀའ་སྩལ་པ། ལུས་དང་། ངག་དང་། ཡིད་ཀྱི་ལས་ཡོངས་སུ་དག་པས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ལུས་ནི་རྣམ་པར་དག་ཅིང་སྡིག་པ་མི་བྱེད་དེ། །ངག་ཀྱང་རྣམ་པར་དག་པས་རྟག་ཏུ་རྫུན་རྣམས་སྤངས། །ཡིད་ཀྱང་གཙང་

བས་རྟག་ཏུ་བསམ་པ་དྲི་མ་མེད། །དེ་ཕྱིར་དེ་ནི་རྒྱལ་བས་ཀུན་ཏུ་འགྲོ་བར་གསུངས། །མི་སྡུག་སྒོམ་ཞིང་འདོད་ཆགས་ཀྱིས་ཀྱང་ཆགས་པ་མེད། །བྱམས་ལ་གནས་ཤིང་ཞེ་སྡང་གིས་ནི་གཏུམ་པ་མེད། །ཤེས་རབ་དག་ལ་གནས་ཤིང་གཏི་མུག་བླུན་མ་ཡིན། །མཁས་པ་རྣམས་
ནི་དེ་ལ་ཀུན་ཏུ་འགྲོ་བར་གསུངས། །དེ་ནི་གྲོང་དུ་ཅི་བཞིན་དེ་བཞིན་སྒོམ་པ་ཡང་། །དགོན་པ་དང་ནི་གྲོང་དང་འཁོར་དུ་དེ་འདྲ་བར། །དེ་ནི་སྤྱོད་ལམ་རྣམ་པར་འགྱུར་བ་མི་བྱེད་དེ། །དེ་ཕྱིར་རྒྱལ་བས་དེ་ལ་ཀུན་ཏུ་འགྲོ་བར་བརྗོད། །རྒྱལ་བ་ཀུན་གྱི་ཆོས་ཉིད་ལ་ནི་དེ་མོས་ཏེ། །མཁས་པས་ཆོས་
ཉིད་ལ་ཡང་འདོད་ཆགས་བྲལ་བ་དང་། །དགེ་འདུན་ལ་ཡང་འདུས་མ་བྱས་པར་ཤིན་ཏུ་མོས། །དེ་ཕྱིར་རྒྱལ་བ་རྣམས་ཀྱིས་ཀུན་ཏུ་འགྲོ་བར་གསུངས། །འདོད་ཆགས་མོས་པ་དག་གི་སྤྱོད་པ་རབ་ཏུ་ཤེས། །ཞེ་སྡང་མོས་པ་རྣམས་དང་དེ་བཞིན་གཏི་མུག་དང་། །སྤྱོད་པ་རྣམ་པར་འགྱུར་བ་ལ་
ཡང་དེ་མཁས་ཏེ། །དེ་ཕྱིར་དེ་ནི་རྒྱལ་བས་ཀུན་ཏུ་འགྲོ་བར་བསྟན། །འདོད་པའི་ཁམས་ལ་ཤིན་ཏུ་གནས་པར་མི་བྱེད་དེ། །གཟུགས་ཀྱི་ཁམས་ལ་ཡང་ནི་གནས་པར་མི་འགྱུར་རོ། །དེ་ནི་གཟུགས་མེད་པ་ཡི་ཁམས་ལ་མི་གནས་ཏེ། །དེ་ཕྱིར་དེ་ནི་རྒྱལ་བས་ཀུན་ཏུ་འགྲོ་བར་བརྗོད། །རྟག་ཏུ་
མཚན་མ་དང་ནི་སྨོན་པས་གསོག་གྱུར་དང་། །དངོས་པོ་ཐམས་ཅད་སྟོང་པ་ཉིད་དུ་དེ་མོས་ཏེ། །ཟག་པ་རྣམས་ནི་བར་དུ་ཟད་པར་མི་བྱེད་དེ། །དེ་ཕྱིར་དེ་ནི་རྒྱལ་བས་ཀུན་ཏུ་འགྲོ་བར་བསྟན། །དེ་ནི་རང་རྒྱལ་ཐེག་པ་ལ་ཡང་མཁས་པ་ཡིན། །སྒྲ་ཕྱིར་འབྲང་བ་ཉན་ཐོས་འགྱུར་བའང་དེ་ཡིས་ཤེས། །
རྫོགས་པའི་སངས་རྒྱས་ཐེག་པའི་ཕ་རོལ་སོང་བ་ཡིན། །དེ་ཕྱིར་བདེ་བར་གཤེགས་པས་ཀུན་ཏུ་འགྲོ་བར་བརྗོད། །དེ་དག་རྟག་པར་ཀུན་ཏུ་བློ་གྲོས་དྲི་མ་མེད། །དེ་དག་ཚུལ་དང་ཚུལ་མ་ཡིན་ལ་མི་རྨོངས་ཏེ། །མཛའ་བ་དང་ནི་མི་མཛའ་བ་ལ་མཉམ་པའི་ཡིད། །དེ་ཕྱིར་བྱང་ཆུབ་སེམས་དཔའ་
ཀུན་ཏུ་འགྲོ་བ་ཡིན། །འདས་པ་དག་གི་ཆོས་ལའང་རྣམ་པར་མི་རྟོག་ཅིང་། །མ་འོངས་པ་དང་ད་ལྟར་གྱི་ལའང་དེ་བཞིན་ཏེ། །ཐམས་ཅད་དུ་ཡང་དཔའ་བོ་རྣམ་པར་མི་རྟོག་སྤྱོད། །དེ་ཕྱིར་སེམས་ཅན་དག་པ་ཀུན་ཏུ་འགྲོ་བའོ།། །།བམ་པོ་གཉིས་པ། དེ་ནས་བཅོམ་ལྡན་འདས་ལ་

ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཆོས་རྣམས་ལས་ཤིན་ཏུ་འདའ། འཇིག་རྟེན་གྱི་ཆོས་ཀྱི་ནང་ནའང་གདའ་ལ་འཇིག་རྟེན་གྱི་ཆོས་རྣམས་ཀྱིས་ཀྱང་མི་གོས། འཇིག་རྟེན་གྱི་
ཆོས་ཀྱི་འཇུག་པ་ཡང་རབ་ཏུ་འཚལ་ལ་འཇིག་རྟེན་གྱི་ཆོས་ཀྱི་འཇུག་པར་ཡང་མི་མཆི། འཇིག་རྟེན་གྱི་ཆོས་ཀྱི་འཇུག་པས་ཀྱང་སེམས་ཅན་རྣམས་འཇིག་རྟེན་གྱི་ཆོས་ལས་ཡོངས་སུ་ཐར་བར་བགྱིད། འཇིག་རྟེན་གྱི་ཆོས་ཀྱི་མཉམ་པ་ཉིད་ཀྱང་ཐོབ་ལ་འཇིག་རྟེན་ན་ཡང་རྣམ་པར་སྤྱོད་ཅིང་འཇིག་རྟེན་
གྱི་ཆོས་རྣམས་ཀྱང་རྣམ་པར་འཇིག་པར་མི་བགྱིད་པ་ལགས། དེ་ནས་བཅོམ་ལྡན་འདས་ཀྱིས་ཚངས་པ་ཁྱད་པར་སེམས་ལ་ཚིགས་སུ་བཅད་པ་དག་གིས་སླར་བཀའ་སྩལ་པ། འཇིག་རྟེན་ཕུང་པོར་ངས་བཤད་དེ། །འཇིག་རྟེན་དག་ནི་འདི་ལ་གནས། །འདི་ལ་གནས་པར་མ་བྱས་ན། །འཇིག་རྟེན་
ཆོས་ལས་རྣམ་པར་གྲོལ། །བྱང་ཆུབ་སེམས་དཔའ་མཁས་པ་དེར། །འཇིག་རྟེན་རང་བཞིན་ཉིད་ཤེས་ནས། །ཕུང་པོ་རྣམས་དང་རབ་ལྡན་ཡང་། །འཇིག་རྟེན་ཆོས་དང་ལྡན་པ་ཡི། །རྙེད་པ་དང་ནི་མ་རྙེད་དང་། །དེ་བཞིན་གྲགས་དང་མ་གྲགས་དང་། །བསྟོད་སྨད་བདེ་དང་སྡུག་བསྔལ་དང་། །
དེ་དག་གིས་ནི་འཇིག་རྟེན་སྐྱོང་། །ཤེས་རབ་ཆེན་པོ་བརྟེན་དེ་རྣམས། །འཇིག་རྟེན་ཆོས་རྣམས་རབ་རྟོགས་ཤིང་། །འཇིག་རྟེན་འཇིག་པ་མཐོང་ནས་ནི། །འདི་དག་ལ་ཡང་གཡོ་མི་འགྱུར། །རྙེད་པས་ཐོས་པར་མི་སེམས་ཏེ། །མ་རྙེད་པས་ཀྱང་ངོམས་པ་མེད། །རི་རབ་བཞིན་དུ་མཐུ་
བརྟན་པ། །རྣམ་པ་ཀུན་ཏུ་གནོད་མི་འགྱུར། །དེ་བཞིན་གྲགས་དང་མ་གྲགས་ཀྱང་། །རྟག་ཏུ་མཚུངས་པར་འགྱུར་བ་ཡིན། །བདེ་དང་སྡུག་བསྔལ་བསྟོད་སྨད་ལ། །མཉམ་པ་ཉིད་དུ་གནས་པར་འགྱུར། །འཇིག་རྟེན་འདི་ནི་གཉིས་ལས་བྱུང་། །ཕྱིན་ཅི་ལོག་ལས་ཀུན་ཏུ་ལངས། །དེ་ཕྱིར་
འཇིག་རྟེན་འགྲོ་རྟོགས་ནས། །མཁས་པ་རྣམས་ནི་འགྲོ་མེད་འགྲོ། །འཇིག་རྟེན་འདི་འགྲོ་གང་ཡིན་པ། །འགྲོ་བ་དེ་ནི་དེ་དག་ཤེས། །དེ་ཕྱིར་འཇིག་རྟེན་འགྲོར་ཞུགས་ནས། །མི་བདེ་བ་ལས་སྐྱེ་བོ་འགྲོལ། །དཔའ་བོ་དེ་དག་འཇིག་རྟེན་སྤྱོད། །པད་མོ་བཞིན་དུ་ཆགས་པ་མེད། །

ཆོས་ཀྱི་དབྱིངས་ལ་རབ་གནས་ནས། །འཇིག་རྟེན་དག་ཀྱང་འཇིག་མི་བྱེད། །འཇིག་རྟེན་ཆོས་ཉིད་མི་ཤེས་པར། །འཇིག་རྟེན་གང་ལ་སྤྱོད་པ་ཡང་། །འཇིག་རྟེན་མཚན་ཉིད་ཤེས་ནས་ནི། །མཁས་པ་དེ་དག་ཉིད་ན་སྤྱོད། །འཇིག་རྟེན་ནམ་མཁའི་མཚན་ཉིད་
དེ། །ནམ་མཁའ་ལ་ཡང་མཚན་ཉིད་མེད། །དེ་དག་དེ་ཡི་འགྲོ་རིག་ནས། །འཇིག་རྟེན་ཆོས་ཀྱིས་གོས་པ་མེད། །ཇི་ལྟར་འཇིག་རྟེན་རབ་ཤེས་པ། །དེ་བཞིན་སྲོག་ཆགས་རྣམས་ལ་སྨྲ། །ཆོས་ཀྱི་རང་བཞིན་ཤེས་ནས་ནི། །འཇིག་རྟེན་དག་ཀྱང་འཇིག་མི་བྱེད། །ཕུང་
པོ་རྣམས་ལ་རང་བཞིན་མེད། །འདི་ནི་འཇིག་རྟེན་ཆོས་ཉིད་དོ། །གང་རྣམས་དེ་ལྟར་མི་ཤེས་པ། །དེ་དག་རྟག་ཏུ་འཇིག་རྟེན་གནས། །མ་སྐྱེས་པ་དང་མ་བྱུང་བར། །གང་གི་ཕུང་པོ་ཀུན་ཤེས་པ། །དེ་དག་འཇིག་རྟེན་སྤྱོད་འགྱུར་ཡང་། །འཇིག་རྟེན་འདི་ལའང་མི་གནས་སོ། །འཇིག་
རྟེན་ཆོས་རྣམས་མི་ཤེས་ཤིང་། །འདུ་ཤེས་གཉིས་ལ་གང་གནས་པ། །འདི་བདེན་འདི་ནི་བརྫུན་ནོ་ཞེས། །མི་མཁས་དེ་དག་རྩོད་པར་འགྱུར། །འདི་ལྟར་འཇིག་རྟེན་ཆོས་རྣམས་ཀྱི། །ཡང་དག་ཆོས་ཉིད་ངས་ཤེས་པས། །ང་ནི་འཇིག་རྟེན་རྣམས་དང་ཡང་། །ནམས་ཀྱང་རྩོད་
པར་མི་བྱེད་དོ། །རྩོད་པ་མེད་པའི་ཆོས་འདི་ནི། །སངས་རྒྱས་ཀུན་གྱིས་བཤད་པ་སྟེ། །འཇིག་རྟེན་མཉམ་པ་ཉིད་ཤེས་ན། །འདི་ལ་བདེན་པའམ་བརྫུན་པ་མེད། །བརྫུན་པའམ་ཡང་ན་བདེན་པ་ཞིག །བསྟན་པ་ལ་ནི་རྙེད་གྱུར་ན། །མཐར་འཛིན་པར་ནི་ང་འགྱུར་ཏེ། །མུ་སྟེགས་
ཅན་དང་ཁྱད་པར་མེད། །གང་ཕྱིར་ཆོས་རྣམས་ཡང་དག་མིན། །བདེན་པ་དང་ནི་བརྫུན་པ་མེད། །དེ་ཕྱིར་འཇིག་རྟེན་འདས་པའི་ཆོས། །ངས་འདི་གཉིས་སུ་མེད་པར་བཤད། །འཇིག་རྟེན་ཆོས་ཉིད་ཇི་ལྟ་བར། །གང་གི་འཇིག་རྟེན་འདི་ཤེས་པ། །མཁས་པ་དེ་དག་བདེན་པའམ། །
བརྫུན་པའི་ལྟ་བའང་མི་འཛིན་ཏོ། །ནམ་མཁའ་ལྟ་བུར་རྣམ་དག་པར། །གང་གི་འཇིག་རྟེན་འདི་ཤེས་པ། །གྲགས་པ་ཆེན་པོའི་འཇིག་རྟེན་གྱི། །སྣང་བ་ལྟ་བུར་གྱུར་པ་ཡིན། །ང་ཉིད་ཀྱིས་ནི་མཐོང་བ་ལྟར། །དེ་ལྟར་གང་གིས་འཇིག་རྟེན་མཐོང་། །ཕྱོགས་དང་ཕྱོགས་མཚམས་

གང་བཞུགས་པ། །རྫོགས་པའི་སངས་རྒྱས་དེ་དག་གཟིགས། །ཆོས་རྣམས་ངོ་བོ་ཉིད་མེད་པར། །བརྟེན་པའི་ཆོས་རྣམས་རབ་ཏུ་ཤེས། །གང་རྣམས་བརྟེན་པ་ཤེས་པ་ནི། །དེ་དག་ཆོས་ཉིད་ཤེས་པ་ཡིན། །གང་རྣམས་ཆོས་ཉིད་རབ་ཤེས་པ། །དེ་དག་སྟོང་པ་ཉིད་དེ་ཤེས། །
གང་རྣམས་སྟོང་ཉིད་རབ་ཤེས་པ། །དེ་ཡི་འདྲེན་པ་དེ་རྣམས་མཐོང་། །གང་རྣམས་འཇིག་རྟེན་བསྟན་པ་འདི། །རྣ་ལམ་གྲགས་པར་འགྱུར་བ་ནི། །དེ་དག་འཇིག་རྟེན་སྤྱོད་མོད་ཀྱི། །འཇིག་རྟེན་འདི་ལ་གནས་མ་ཡིན། །ལྟ་ལ་གནས་པ་གང་སུ་དག །གཞན་གྱི་ས་ནི་འདི་མ་ཡིན། །
འཇིག་རྟེན་དུ་ནི་སྤྱོད་བྱེད་ཀྱང་། །འཇིག་རྟེན་འདི་ལ་གནས་པ་མེད། །སངས་རྒྱས་མྱ་ངན་འདས་ནས་ཀྱང་། །གང་རྣམས་བཟོད་པ་འདིར་མོས་པ། །དེ་བཞིན་གཤེགས་པ་ཆོས་ཀྱི་སྐུ། །རྫོགས་པའི་སངས་རྒྱས་དེ་ལ་བཞུགས། །གང་གིས་ཚུལ་འདི་ཤེས་པ་ནི། །དེས་ནི་ང་ཡི་ཆོས་
བཟུང་སྟེ། །དེ་ཡིས་ང་ལ་རྟག་ཏུ་མཆོད། །དེ་དག་འཇིག་རྟེན་སྟོན་པའོ། །གང་ཞིག་འཇིག་རྟེན་བསྟན་པ་འདི། །རྣ་ལམ་གྲགས་པར་གྱུར་པ་ནི། །སྡིག་ཅན་བདུད་ཀྱིས་དེ་དག་ལ། །གླགས་ཀྱང་རྙེད་པར་མི་འགྱུར་རོ། །གང་གིས་རྣམ་པ་འདི་ཤེས་པ། །དེ་དག་ཕྱུག་ཅིང་ལོངས་སྤྱོད་ཆེ། །
དེ་དག་སྦྱིན་ལ་རྟག་པར་དགའ། །དེ་དག་ཚུལ་ཁྲིམས་ཕུན་སུམ་ཚོགས། །གང་གིས་འཇིག་རྟེན་འདི་ཤེས་པ། །དེ་དག་བཟོད་པའི་སྟོབས་ལྡན་པ། །དེ་དག་བརྩོན་འགྲུས་རྟོགས་པར་རིགས། །མཁས་པ་དེ་དག་བསམ་གཏན་དགའ། །གང་གིས་རྣམ་པ་འདི་ཤེས་པ། །དེ་དག་ཏིང་འཛིན་
ཕུན་སུམ་ཚོགས། །དེ་དག་ཉེ་བར་བཞི་ལ་དགའ། །བསྟན་པ་དེ་དག་ཤེས་རབ་འཕགས། །གང་ན་འདི་འདྲ་གྲགས་པ་ཡི། །ཕྱོགས་དེ་སངས་རྒྱས་སྟོངས་མ་ཡིན། །སེམས་དཔའ་ཆེན་པོ་རིང་མི་ཐོགས། །བྱང་ཆུབ་སྙིང་པོར་འགྲོ་བར་འགྱུར། །གང་རྣམས་འཇིག་རྟེན་བསྟན་པ་འདི། །
རྣ་ལམ་གྲགས་པར་འགྱུར་བ་དག །གཡོན་ཅན་བདུད་རྣམས་བཅོམ་ནས་ནི། །བྱང་ཆུབ་མཆོག་ཏུ་རྫོགས་འཚང་རྒྱ། །དེ་ནས་བཅོམ་ལྡན་འདས་ཀྱིས་ཚངས་པ་ཁྱད་པར་སེམས་ལ་འདི་སྐད་ཅེས་བཀའ་སྩལ་ཏོ། །ཚངས་པ་དེ་བཞིན་གཤེགས་པ་འཇིག་རྟེན་གྱི་ཡུལ་ལས་འདས་པས་

འཇིག་རྟེན་དང་། འཇིག་རྟེན་ཀུན་འབྱུང་བ་དང་། འཇིག་རྟེན་འགོག་པ་དང་། འཇིག་རྟེན་འགོག་པར་འགྲོ་བའི་ལམ་དུ་ཡང་འདོགས་སོ། །ཚངས་པ་དེ་ལ་འཇིག་རྟེན་ཞེས་བྱ་བ་ནི་ཕུང་པོ་ལྔ་རྣམས་སོ། །གང་དེ་ལ་ཆགས་པ་དེ་ནི་འཇིག་རྟེན་ཀུན་འབྱུང་བའོ། །གང་ཕུང་
པོ་རྣམས་ཀྱི་ཟད་པ་དང་འགག་པ་དེ་ནི་འཇིག་རྟེན་འགག་པའོ། །གང་ཕུང་པོ་རྣམས་ཚོལ་བ་དང་མི་ཚོལ་བ་གཉིས་སུ་མེད་པ་དེ་ནི་ལམ་མོ། །གཞན་ཡང་ཚངས་པ་ཕུང་པོ་རྣམས་ཕུང་པོ་རྣམས་ཞེས་ཐ་དད་དུ་འདོགས་པ་ལ། གང་སྨྲ་བ་དང་། སྨྲ་བར་ལྟ་བ་འདི་ནི་འཇིག་རྟེན་ནོ། །གང་
ལྟ་བ་དེའི་རྗེས་སུ་འབྲང་བ་འདི་ནི་འཇིག་རྟེན་ཀུན་འབྱུང་བའོ། །གང་ལྟ་བ་དེ་ཇི་ལྟ་བ་བཞིན་དུ་མཚན་ཉིད་འགག་པ་དེ་ནི་འཇིག་རྟེན་འགག་པ་ཞེས་བྱའོ། །ལམ་གང་གིས་ལྟ་བ་དེ་དག་མི་འཛིན་པ་དེ་ནི་འཇིག་རྟེན་འགོག་པར་འགྲོ་བའི་ལམ་སྟེ། ཚངས་པ་ངས་འདི་ལ་བསམ་ནས་ང་ནི་ལུས་
འདོམ་གང་བ་འདི་ལ་འཇིག་རྟེན་དང་། འཇིག་རྟེན་ཀུན་འབྱུང་བ་དང་། འཇིག་རྟེན་འགག་པ་དང་། འཇིག་རྟེན་འགག་པར་འགྲོ་བའི་ལམ་དུ་འདོགས་སོ་ཞེས་ཚིག་དེ་སྐད་བཤད་དོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་
འདས་དེ་བཞིན་གཤེགས་པས་གང་འདི་འཕགས་པའི་བདེན་པ་བཞི་བསྟན་ན། བཅོམ་ལྡན་འདས་འཕགས་པ་རྣམས་ཀྱི་བདེན་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཚངས་པ་འདི་ནི་སྡུག་བསྔལ་བའོ་ཞེས་བྱ་བ་དེ་ནི་འཕགས་པ་རྣམས་ཀྱི་བདེན་པ་མ་ཡིན་ནོ། །
ཚངས་པ་འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་བྱ་བ་དེ་ནི་འཕགས་པ་རྣམས་ཀྱི་བདེན་པ་མ་ཡིན་ནོ། །དེ་ཅིའི་ཕྱིར་ཞེ་ན། ཚངས་པ་འདི་ནི་སྡུག་བསྔལ་བའོ། །ཞེས་བྱ་བ་ཅི་སྟེ་འཕགས་
པ་རྣམས་ཀྱི་བདེན་པ་ཡིན་དུ་ཟིན་ན། དེ་ནི་བྱོལ་སོང་བ་ལང་དང་། བོང་བུ་དང་། སེམས་ཅན་དམྱལ་བ་པ་ཐམས་ཅད་ཀྱི་ཡང་འཕགས་པའི་བདེན་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ནི་སྡུག་བསྔལ་བའི་ཚོར་བ་རྣམས་མྱོང་ངོ་། །ཚངས་པ་འདི་ནི་སྡུག་བསྔལ་ཀུན་

འབྱུང་བ་ཞེས་བྱ་བ་དེ་ཇི་སྟེ། འཕགས་པ་རྣམས་ཀྱི་བདེན་པ་ཡིན་དུ་ཟིན་ན་དེ་ནི་གང་འགྲོ་བ་རྣམས་སུ་འབྱུང་བའི་འགྲོ་བ་ཐམས་ཅད་དུ་སྐྱེས་པའི་སེམས་ཅན་རྣམས་ཀྱི་ཡང་འཕགས་པའི་བདེན་པར་འགྱུར་རོ། །འདི་ནི་འགོག་པའོ་ཞེས་བྱ་བ་དེ་ཇི་སྟེ་འཕགས་པའི་བདེན་པ་ཡིན་དུ་ཟིན་ན།
དེ་ནི་གང་རྣམས་དངོས་པོ་བཤིགས་པས་མྱ་ངན་ལས་འདས་པ་ཚོལ་བ་དང་འགོག་པར་ལྟ་བར་ལྟུང་བ་ཆད་པར་སྨྲ་བ་ཐམས་ཅད་ལ་ཡང་འཕགས་པའི་བདེན་པར་འགྱུར་རོ། །འདི་ནི་ལམ་མོ་ཞེས་བྱ་བ་དེ་ཅི་སྟེ། འཕགས་པ་རྣམས་ཀྱི་བདེན་པ་ཡིན་དུ་ཟིན་ན། འདི་ནི་འདུས་བྱས་ཀྱི་འདུ་
བྱས་ལས་འབྱུང་བར་ཚོལ་བ་འདུས་བྱས་ལམ་དུ་དམིགས་པ་ཐམས་ཅད་ལ་ཡང་འཕགས་པའི་བདེན་པར་འགྱུར་ཏེ། དེ་བས་ན་ཚངས་པ་རྣམ་གྲངས་འདིས་ཇི་ལྟར་སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་རྣམས་འཕགས་པ་རྣམས་ཀྱི་བདེན་པ་མ་ཡིན་པར་
ཁྱོད་ཀྱིས་རིག་པར་བྱའོ། །དེ་ལྟ་མོད་ཀྱི་ཚངས་པ་གང་སྡུག་བསྔལ་མི་སྐྱེ་བ་དེ་ནི་འཕགས་པ་རྣམས་ཀྱི་བདེན་པའོ། །གང་ཀུན་འབྱུང་བ་ལ་མི་འཇུག་པ་འདི་ནི་འཕགས་པ་རྣམས་ཀྱི་བདེན་པའོ། །གང་ཆོས་ཐམས་ཅད་ཤིན་ཏུ་འགག་པ་ལ་མི་སྐྱེ་མི་འགོག་པ་འདི་ནི་འཕགས་པ་རྣམས་ཀྱི་
བདེན་པའོ། །གང་ཆོས་ཐམས་ཅད་ལ་མཉམ་པ་ཉིད་དང་གཉིས་སུ་མེད་པའི་ལམ་སྒོམ་པ་འདི་ནི་འཕགས་པ་རྣམས་ཀྱི་བདེན་པའོ། །ཚངས་པ་གང་བདེན་པ་བདེན་པ་ཞེས་བྱ་བ་ནི་གང་བདེན་པ་ཡང་མ་ཡིན། བརྫུན་པ་ཡང་མ་ཡིན་པའོ། །བརྫུན་པ་གང་ཞེ་ན། བདག་ཏུ་འཛིན་པ་དང་། སེམས་
ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པ་དང་། ཆད་པར་འཛིན་པ་དང་། རྟག་པར་འཛིན་པ་དང་། འབྱུང་བར་འཛིན་པ་དང་། འཇུག་པར་འཛིན་པ་དང་། སྐྱེ་བར་འཛིན་པ་དང་། འགག་པར་འཛིན་པ་དང་། འཁོར་བར་འཛིན་པ་དང་། མྱ་ངན་ལས་འདས་པར་འཛིན་པ་
དེ་ནི་བརྫུན་པ་ཞེས་བྱའོ། །གང་འཛིན་པ་འདི་དག་ལ་མི་འཛིན་ཅིང་མཆོག་ཏུ་མི་སྙེམས་པ་འདི་ནི་བདེན་པ་ཞེས་བྱའོ། །སྡུག་བསྔལ་ཡོངས་སུ་ཤེས་པ་ཞེས་བྱ་བ་ནི་བརྫུན་ནོ། །ཀུན་འབྱུང་བ་རབ་ཏུ་སྤོང་ངོ་ཞེས་བྱ་བ་ནི་བརྫུན་ནོ། །འགོག་པ་མངོན་དུ་བྱའོ་ཞེས་བྱ་བ་ནི་བརྫུན་ནོ། །ལམ་སྒོམ་

མོ་ཞེས་བྱ་བ་ནི་བརྫུན་ནོ། །དེ་ཅིའི་ཕྱིར་ཞེ་ན། དེ་དག་ནི་སངས་རྒྱས་ཀྱིས་བཀའ་སྩལ་པའི་དྲན་པ་ལས་ཉམས་པ་ཡིན་ཏེ། དེའི་ཕྱིར་བརྫུན་པ་ཞེས་བྱའོ། །སངས་རྒྱས་ཀྱིས་བཀའ་སྩལ་པའི་དྲན་པ་ཞེས་བྱ་བ་གང་ཞེ་ན། གང་ཆོས་ཐམས་ཅད་ལ་མི་དྲན་ཞིང་ཡིད་ལ་མི་བྱེད་པ་
འདི་ནི་སངས་རྒྱས་ཀྱིས་བཀའ་སྩལ་པའི་དྲན་པ་ཞེས་བྱ་སྟེ། གང་དྲན་པ་དེ་ལ་གནས་པ་དེ་ནི་མཚན་མ་ཐམས་ཅད་ལ་མི་གནས་པའོ། །གང་མཚན་མ་ཐམས་ཅད་ལ་མི་གནས་པ་དེ་ནི་ཡང་དག་པའི་མཐའ་ལ་གནས་པའོ། །གང་ཡང་དག་པའི་མཐའ་ལ་གནས་པ་དེ་ནི་ཡིད་མི་གནས་པའོ། །
གང་མི་གནས་པ་དེ་ནི་བདེན་པར་སྨྲ་བ་ཡང་མ་ཡིན། བརྫུན་པར་སྨྲ་བ་ཡང་མ་ཡིན་ཏེ། དེའི་ཕྱིར་ཚངས་པ་རྣམ་གྲངས་འདིས་གང་ལ་བདེན་པའང་མེད། བརྫུན་པའང་མེད་པ་དེ་ནི། འཕགས་པ་རྣམས་ཀྱི་བདེན་པ་ཡིན་པར་རིག་པར་བྱའོ། །ཚངས་པ་བདེན་པ་ཞེས་བྱ་བ་དེ་ནི་ནམ་ཡང་མི་བདེན་
པ་མ་ཡིན་ཏེ། དེ་བཞིན་གཤེགས་པ་རྣམས་སྐྱེས་ཀྱང་རུང་། མ་སྐྱེས་ཀྱང་རུང་ཆོས་ཀྱི་དབྱིངས་འདི་ནི་གནས་པའོ། །དེ་བཞིན་དུ་འཁོར་བ་དང་། དེ་བཞིན་དུ་མྱ་ངན་ལས་འདས་པ་ཡང་རྟག་ཏུ་རྒྱུན་མི་ཆད་པར་འཕགས་པ་རྣམས་ཀྱི་བདེན་པའོ། །དེ་ཅིའི་ཕྱིར་ཞེ་ན། ཚངས་པ་འཁོར་བ་སྤང་
བའི་ཕྱིར་འཕགས་པ་རྣམས་ཀྱི་བདེན་པ་མ་ཡིན། མྱ་ངན་ལས་འདས་པ་ཐོབ་པར་བྱ་བའི་ཕྱིར་ཡང་འཕགས་པ་རྣམས་ཀྱི་བདེན་པ་མ་ཡིན་ཏེ། ཚངས་པ་གང་དག་གིས་འཕགས་པའི་བདེན་པ་བཞི་པོ་འདི་རྣམས་དེ་ལྟར་མངོན་པར་རྟོགས་པ་མངོན་དུ་བྱས་པ་དེ་དག་ནི་བདེན་པར་སྨྲ་བ་ཡིན་ནོ། །ཡང་
ཚངས་པ་མ་འོངས་པའི་དུས་ན་དགེ་སློང་། ལུས་མ་བསྒོམས་པ། སེམས་མ་བསྒོམས་པ། ཚུལ་ཁྲིམས་མ་བསྒོམས་པ། ཤེས་རབ་མ་བསྒོམས་པ་ཁ་ཅིག་འབྱུང་སྟེ། དེ་དག་ནི་སྡུག་བསྔལ་སྐྱེ་བ་ལ་སྡུག་བསྔལ་འཕགས་པའི་བདེན་པ་ཞེས་སྨྲ་བར་འགྱུར་རོ། །ཀུན་འབྱུང་བའི་ཕྱིར་ཀུན་འབྱུང་བ་འཕགས་
པའི་བདེན་པ་ཞེས་སྨྲ་བར་འགྱུར་རོ། །དངོས་པོ་འཇིག་པའི་ཕྱིར་འགོག་པ་འཕགས་པའི་བདེན་པ་ཞེས་སྨྲ་བར་འགྱུར་རོ། །ལམ་གྱིས་འབྱུང་བའི་ཕྱིར་ལམ་འཕགས་པའི་བདེན་པ་གཉིས་སུ་སྨྲ་བར་འགྱུར་ཏེ། སྐྱེས་བུ་བླུན་པོ་དེ་དག་ནི་ཉན་ཐོས་མུ་སྟེགས་ཅན་ཞེས་ངས་བཤད་དོ། །གང་

རྣམས་དངོས་པོ་འཇིག་པས་འགོག་པ་འཕགས་པའི་བདེན་པའོ་ཞེས་སྨྲ་བར་འགྱུར་བ་དེ་དག་ནི་ལམ་ལོག་པར་ཞུགས་པ་ཡིན་ཏེ། ང་ཡང་དེ་དག་གི་སྟོན་པ་མ་ཡིན། དེ་དག་ཀྱང་ངའི་ཉན་ཐོས་མ་ཡིན་ནོ། །ཚངས་པ་ལྟོས་ཤིག་ང་བྱང་། །ཆུབ་ཀྱི་སྙིང་པོར་འདུག་ནས་བདེན་པའམ། བརྫུན་པ་ཞེས་
བྱ་བ་ཁོང་དུ་མ་ཆུད་དོ། །ཆོས་གང་ངས་ཁོང་དུ་མ་ཆུད་པའི་ཆོས་དེ་དེ་བཞིན་གཤེགས་པ་གཞན་ལ་སྟོན་པར་མཛད་དམ། འཆད་པར་མཛད་དམ། གསོལ་པ། བཅོམ་ལྡན་འདས་དེ་ལྟ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་གཤེགས་པ་རྣམས་ཀྱིས་བྱང་ཆུབ་
ནི་མི་དམིགས་པ་སྟེ། མ་ཟིན་པ་སྲིད་པའི་འགྲོ་བ་ཐམས་ཅད་དང་བྲལ་བའོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་སྟེ་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་ཞུགས་ནས། ཆོས་གང་ཡང་མ་དམིགས་ན། ཇི་
མངོན་པར་བརྟགས་པས་དེ་བཞིན་གཤེགས་པ་བྱང་ཆུབ་བརྙེས་ཤིང་ཡང་དག་པར་རྫོགས་པར་སངས་རྒྱས་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། ཚངས་པ་འདི་ཅི་སྙམ་དུ་སེམས། གང་ངས་འདུས་བྱས་སམ་འདུས་མ་བྱས་ཀྱི་ཆོས་བཤད་པ་འདི་དག་དེ་བཞིན་ནམ་དེ་ལྟ་མ་
ཡིན། གསོལ་པ། བཅོམ་ལྡན་འདས་མ་མཆིས་པ་ལགས་སོ། །བདེ་བར་གཤེགས་པ་མ་མཆིས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཚངས་པ་ཆོས་གང་རྣམས་མེད་པ་དེ་དག་ཡོད་དམ། འོན་ཏེ་མེད་གསོལ་པ། བཅོམ་ལྡན་འདས་གང་མ་མཆིས་པ་དེ་ནི་
མཆིས་པའམ་མ་མཆིས་པ་ཞེས་མི་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཆོས་གང་ཡང་ཡོད་པ་ཡང་མ་ཡིན། མེད་པ་ཡང་མ་ཡིན་པ་དེ་ལ་མངོན་པར་རྫོགས་པར་བྱང་ཆུབ་པ་གང་ཡང་ཡོད་དམ། གསོལ་པ། བཅོམ་ལྡན་འདས་དེ་ལ་མངོན་པར་རྫོགས་པར་བྱང་ཆུབ་པ་
གང་ཡང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཚངས་པ་དེ་ལྟར་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་ཞུགས་ནས་མེད་པ་ཕྱིན་ཅི་ལོག་ལས་བྱུང་བའི་ཀུན་ནས་ཉོན་མོངས་པ་ཤིན་ཏུ་རང་བཞིན་གྱིས་མི་སྐྱེ་བའི་ངོ་བོ་ཉིད་དུ་མཁྱེན་ཏེ། ཇི་ལྟར་ཤིན་ཏུ་མི་མཁྱེན་པ་ཡང་

ཤིན་ཏུ་རྣམ་པར་མི་དམིགས་པ་དེ་ལྟར་མཁྱེན་ཏོ། །དེ་ཅིའི་ཕྱིར་ཞེ་ན། ཚངས་པ་ངས་འདི་ལྟར་ཆོས་གང་ཡང་མངོན་པར་སངས་རྒྱས་པ་དེ་ནི་མ་མཐོང་། མ་ཐོས། མི་དྲན། མ་རྟོགས། རྣམ་པར་མི་རིག་ཅིང་། གཟུང་བ་ཡང་མེད། སྦྱར་བ་ཡང་མེད། བརྗོད་དུ་ཡང་
མེད། རྗེས་སུ་སྦྱོར་བ་ཡང་མེད། ཡུལ་ཐམས་ཅད་ལས་འདས་པ། སྨྲར་མེད་པ། རབ་ཏུ་སྨྲར་མེད་པ། དཔྱོད་པ་མེད་པ། རྟོགས་པར་མི་རུང་བ། ཡི་གེ་མེད་པ། ཚིག་གི་ལམ་མེད་པ། རྣམ་པར་རིག་པ་མེད་པ་ཡིན་ཏེ། ཚངས་པ་དེ་ལྟར་ཆོས་གང་ནམ་མཁའ་དང་འདྲ་བའི་
ཆོས་དེ་མངོན་པར་རྟོགས་པར་འདོད་དམ། གསོལ་པ། བཅོམ་ལྡན་འདས་དེ་མ་ལགས་སོ། །བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ཀྱིས་ཐུགས་རྗེ་ཆེན་པོ་བསམ་གྱིས་མི་ཁྱབ་པའི་ཆོས་དང་ལྡན་ཏེ། དེ་ལྟར་རབ་ཏུ་ཞི་བའི་ཆོས་མངོན་པར་སངས་རྒྱས་ནས་ཡི་གེ་དང་
ངེས་པའི་ཚིག་གིས་གཞན་དག་ལ་གོ་བར་མཛད་པ་ངོ་མཚར་ཏོ། །བཅོམ་ལྡན་འདས་གང་དེ་བཞིན་གཤེགས་པས་བསྟན་པའི་ཆོས་ལ་མངོན་པར་དད་པའི་སེམས་ཅན་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་འདི་ནི་འཇིག་རྟེན་
ཐམས་ཅད་དང་མི་འཐུན་པའོ། །བཀའ་སྩལ་པ། ཚངས་པ་ཇི་ལྟར་འཇིག་རྟེན་ཐམས་ཅད་དང་མི་འཐུན་པ་ཡིན། གསོལ་པ། བཅོམ་ལྡན་འདས་ཇི་ལྟར་འཇིག་རྟེན་ནི་བདེན་པ་ལ་མངོན་པར་ཆགས་ན། ཆོས་འདི་ནི་བདེན་པ་ཡང་མ་ལགས། བརྫུན་པ་ཡང་མ་ལགས་སོ། །འཇིག་རྟེན་ནི་
ཆོས་ལ་མངོན་པར་ཆགས་ན་ཆོས་འདི་ནི་ཆོས་ཀྱང་མ་ལགས། ཆོས་མ་ལགས་པའང་མ་ལགས་སོ། །འཇིག་རྟེན་ནི་མྱ་ངན་ལས་འདས་པ་ལ་ཆགས་ན། ཆོས་འདི་ལ་ནི་འཁོར་བ་ཡང་མ་མཆིས། མྱ་ངན་ལས་འདས་པ་ཡང་མ་མཆིས་སོ། །འཇིག་རྟེན་ནི་དགེ་བ་ལ་མངོན་པར་ཆགས་ན་
འདི་ལ་ནི་དགེ་བ་ཡང་མ་མཆིས། མི་དགེ་བ་ཡང་མ་མཆིས་སོ། །འཇིག་རྟེན་ནི་བདེ་བ་ལ་མངོན་པར་ཆགས་ན། འདི་ལ་ནི་བདེ་བ་ཡང་མ་མཆིས། སྡུག་བསྔལ་བ་ཡང་མ་མཆིས་སོ། །འཇིག་རྟེན་ནི་སངས་རྒྱས་འབྱུང་བ་ལ་མངོན་པར་ཆགས་ན་འདི་ལ་སངས་

རྒྱས་འབྱུང་བ་ཡང་མ་མཆིས། མྱ་ངན་ལས་འདས་པ་ཡང་མ་མཆིས་སོ། །ཆོས་བསྟན་ཀྱང་དེ་བརྗོད་དུ་མ་མཆིས་པའོ། །དགེ་འདུན་བསྟན་ཀྱང་འདུས་མ་བགྱིས་པའོ། །དེའི་སླད་དུ་ཆོས་འདི་ནི་འཇིག་རྟེན་ཐམས་ཅད་དང་མི་འཐུན་པ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་
ན། མེ་དང་ཆུའམ། ཆུ་དང་མེའི་གནས་འདི་ནི་མི་འཐུན་པའོ། །དེ་བཞིན་དུ་ཉོན་མོངས་པ་དང་བྱང་ཆུབ་འམ། བྱང་ཆུབ་དང་ཉོན་མོངས་པ་ནི་མི་འཐུན་པའོ། །དེ་ཅིའི་སླད་དུ་ཞེ་ན། ཉོན་མོངས་པ་མ་མཆིས་པར་དེ་བཞིན་གཤེགས་པས་མངོན་པར་སངས་རྒྱས་སོ། །བཤད་ཀྱང་སྣང་
བའི་གཟུགས་མ་ལགས། ཀུན་མཁྱེན་ཀྱང་རྣམ་པར་མཁྱེན་པ་མ་མཆིས། བསྒོམ་ཀྱང་གཉིས་སུ་མ་བགྱིས། མངོན་དུ་བགྱིས་ཀྱང་ཐོབ་པ་མ་མཆིས། མྱ་ངན་ལས་བཟླས་ཀྱང་ཞི་བ་ཡང་མ་མཆིས་ཏེ། བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་གང་རྣམས་ཆོས་ཀྱི་ཚུལ་
གྱི་རྣམ་པ་འདི་ལ་མོས་པ་དེ་དག་ནི་ལྟ་བར་གྱུར་པ་ཐམས་ཅད་ལས་རྣམ་པར་གྲོལ་བར་འགྱུར་རོ། །དེ་བཞིན་གཤེགས་པ་ལ་བསྙེན་བཀུར་བགྱིས་ཤིང་སྔོན་གྱི་རྒྱལ་བ་ལ་ལྷག་པར་བགྱི་བ་བགྱིས་པ་ལགས་སོ། །དེ་དག་དགེ་བའི་བཤེས་གཉེན་གྱིས་ཡོངས་སུ་བཟུང་བ་ལགས་སོ། །
དེ་དག་དགེ་བའི་རྩ་བ་འབར་བའི་སླད་དུ་རྒྱ་ཆེན་པོ་ལས་མོས་པར་འགྱུར་རོ། །དེ་དག་དེ་བཞིན་གཤེགས་པའི་མཛོད་འཆང་བའི་སླད་དུ་གཏེར་རབ་ཏུ་རྙེད་པར་འགྱུར་རོ། །དེ་དག་ལེགས་པར་བགྱི་བའི་ལས་བགྱིད་པའི་སླད་དུ་ལས་ཀྱི་མཐའ་ཤིན་ཏུ་འཐུན་པར་འགྱུར་རོ། །དེ་དག་སངས་
རྒྱས་ཀྱི་རིགས་འཛིན་པའི་སླད་དུ་རིགས་བཙུན་པར་འགྱུར་རོ། །དེ་དག་ཉོན་མོངས་པ་ཐམས་ཅད་ཡོངས་སུ་བཏང་བའི་སླད་དུ་གཏོང་བ་ཆེན་པོ་དང་ལྡན་པར་འགྱུར་རོ། །དེ་དག་ཚུལ་ཁྲིམས་ཀྱི་སྟོབས་དང་ལྡན་པར་འགྱུར་ཏེ། ཉོན་མོངས་པའི་སྟོབས་ཅན་མ་ལགས། ལུས་སྲོག་བོར་བའི་སླད་
དུ་དེ་དག་བཟོད་པའི་སྟོབས་ཅན་དུ་འགྱུར་རོ། །དེ་དག་ཡིད་ཡོངས་སུ་སྐྱོ་བ་མ་མཆིས་པའི་སླད་དུ་བརྩོན་འགྲུས་ཀྱི་སྟོབས་ཅན་དུ་འགྱུར་རོ། །དེ་དག་སྡིག་པའི་ལས་བསྲེགས་པའི་སླད་དུ་བསམ་གཏན་གྱི་སྟོབས་ཅན་དུ་འགྱུར་རོ། །དེ་དག་སྡིག་པར་ལྟ་བ་རྣམས་དང་བྲལ་བའི་སླད་དུ་ཤེས་རབ་

ཀྱི་སྟོབས་ཅན་དུ་འགྱུར་རོ། །དེ་དག་བདུད་རྣམས་ཀྱིས་རབ་ཏུ་ཐུབ་པར་དཀའ་བར་འགྱུར་རོ། །དེ་དག་ཕྱིར་རྒོལ་བ་རྣམས་ཀྱིས་མི་རྫི་བར་འགྱུར་རོ། །དེ་དག་དེ་བཞིན་གཤེགས་པ་རྣམས་ལ་མི་སླུ་བར་འགྱུར་རོ། །དེ་དག་ཆོས་ཀྱི་རང་བཞིན་སྟོན་པ་ལ་མཁས་པའི་སླད་དུ་
ཡང་དག་པར་སྨྲ་བར་འགྱུར་རོ། །དེ་དག་དོན་དམ་པའི་ཆོས་སྟོན་པའི་སླད་དུ་བདེན་པར་སྨྲ་བར་འགྱུར་རོ། །དེ་དག་དེ་བཞིན་གཤེགས་པ་རྣམས་ཀྱིས་ཡོངས་སུ་བཟུང་བར་འགྱུར་རོ། །དེ་དག་འགྲོགས་ན་བདེ་བའི་སླད་དུ་དེས་པར་འགྱུར་རོ། །དེ་དག་འཕགས་པའི་ནོར་རྣམས་ཀྱི་ནོར་དང་ལྡན་
པར་འགྱུར་རོ། །དེ་དག་འཕགས་པའི་རིགས་རྣམས་ཀྱིས་མཆོག་འཚལ་བར་འགྱུར་རོ། །གསོ་སླ་ཞིང་དགང་སླ་བར་འགྱུར་རོ། །དེ་དག་ཕ་རོལ་ཏུ་མཆི་བའི་སླད་དུ་དབུགས་འབྱིན་པ་ཐོབ་པར་འགྱུར་རོ། །དེ་དག་མ་རྒལ་བ་རྣམས་སྒྲོལ་བར་འགྱུར་རོ། །དེ་དག་མ་གྲོལ་བ་རྣམས་གྲོལ་
བར་བགྱིད་པར་འགྱུར་རོ། །དེ་དག་དབུགས་འབྱིན་པ་མ་མཆིས་པ་རྣམས་ཀྱི་དབུགས་འབྱིན་པར་འགྱུར་རོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་ཟློ་བར་འགྱུར་རོ། །དེ་དག་ལམ་སྟོན་པར་འགྱུར་རོ། །དེ་དག་མྱ་ངན་ལས་འདས་པ་སྟོན་པར་འགྱུར་རོ། །དེ་
དག་སྨན་ཐམས་ཅད་ཡོངས་སུ་འཚལ་བའི་སླད་དུ་སྨན་པ་རྣམས་ཀྱི་རྒྱལ་པོར་འགྱུར་རོ། །དེ་དག་ནད་ཐམས་ཅད་རབ་ཏུ་ཞི་བར་བགྱིད་པའི་སླད་དུ་སྨན་ལྟ་བུར་འགྱུར་རོ། །དེ་དག་ཡེ་ཤེས་ཀྱི་སྟོབས་དང་ལྡན་པར་འགྱུར་རོ། །དེ་དག་མཐུས་སྤྲོ་བ་དང་ལྡན་པར་འགྱུར་རོ། །དེ་དག་གཞན་
གྱི་དྲིང་ལ་མི་འཇོག་པའི་སླད་དུ་རྩལ་དང་ལྡན་པར་འགྱུར་རོ། །དེ་དག་འཇིགས་པས་སྤུ་ལྡང་བ་མ་མཆིས་པའི་སླད་དུ་སེང་གེ་ལྟ་བུར་འགྱུར་རོ། །དེ་དག་ཅང་ཤེས་པའི་སླད་དུ་བ་ལང་ལྟ་བུར་འགྱུར་རོ། །དེ་དག་སེམས་རབ་ཏུ་དུལ་བའི་སླད་དུ་གླང་པོ་ཆེར་འགྱུར་རོ། །དེ་དག་འཁོར་མང་
པོ་ཡོངས་སུ་སྡུད་པའི་སླད་དུ་ཁྱུ་མཆོག་ཏུ་འགྱུར་རོ། །དེ་དག་བདུད་དང་ཕྱིར་རྒོལ་བ་རྣམས་རབ་ཏུ་བཅོམ་པའི་སླད་དུ་དཔའ་བོར་འགྱུར་རོ། །དེ་དག་འཁོར་གྱིས་འཇིགས་པ་མ་མཆིས་པའི་སླད་དུ་བརྟན་པར་འགྱུར་རོ། །དེ་དག་མི་འཇིགས་པ་ཐོབ་པའི་སླད་དུ་མི་ཐུབ་པར་འགྱུར་རོ། །དེ་

དག་བདེན་པ་བསྟན་པ་རྣམས་ལ་འཇིགས་པ་མ་མཆིས་པར་འགྱུར་རོ། །དེ་དག་དཀར་པོའི་ཕྱོགས་ཡོངས་སུ་རྒྱས་པའི་སླད་དུ་ཟླ་བ་དང་མཚུངས་པར་འགྱུར་རོ། །དེ་དག་ཤེས་རབ་ཀྱི་སྣང་བར་བགྱིད་པས་ཉི་མ་ལྟ་བུར་འགྱུར་རོ། །དེ་དག་མུན་པ་ཆེན་པོ་དང་བྲལ་བའི་སླད་དུ་སྒྲོན་མ་ལྟ་བུར་
འགྱུར་རོ། །དེ་དག་མཛའ་བ་དང་ཁོང་ཁྲོ་བ་མ་མཆིས་པའི་སླད་དུ་གཞི་རྟེན་ལྟ་བུར་འགྱུར་རོ། །དེ་དག་སེམས་ཅན་ཐམས་ཅད་ཉེ་བར་འཚོ་བའི་སླད་དུ་ས་དང་མཚུངས་པར་འགྱུར་རོ། །དེ་དག་ཆོས་ཐམས་ཅད་ལ་མི་གནས་པའི་སླད་དུ་རླུང་དང་མཚུངས་པར་འགྱུར་རོ། །དེ་དག་ཉོན་མོངས་
པའི་དྲི་མ་ཐམས་ཅད་འཁྲུ་བའི་སླད་དུ་ཆུ་དང་མཚུངས་པར་འགྱུར་རོ། །དེ་དག་རློམ་སེམས་ཐམས་ཅད་ཡང་དག་པར་འཇོམས་པའི་སླད་དུ་མེ་དང་མཚུངས་པར་འགྱུར་རོ། །དེ་དག་བསྐྱོད་མི་ནུས་པའི་སླད་དུ་རི་རབ་དང་མཚུངས་པར་འགྱུར་རོ། །དེ་དག་ལྷག་པའི་བསམ་པ་བརྟན་ཞིང་མི་ཕྱེད་
པའི་སླད་དུ་རྡོ་རྗེ་ལྟར་སྲ་བའི་ཁོར་ཡུག་གི་རི་ལྟ་བུར་འགྱུར་རོ། །དེ་དག་ཕས་ཀྱི་རྒོལ་བ་ཐམས་ཅད་ཀྱིས་གདུལ་དཀའ་བར་འགྱུར་རོ། །དེ་དག་ཉན་ཐོས་དང་། རང་སངས་རྒྱས་ཐམས་ཅད་ཀྱིས་གཏིང་དཔག་དཀའ་བར་འགྱུར་རོ། །དེ་དག་ཆོས་རིན་པོ་ཆེ་ཐམས་ཅད་འདུ་བའི་སླད་དུ་རྒྱ་མཚོ་
ལྟ་བུར་འགྱུར་རོ། །དེ་དག་ཉོན་མོངས་པ་ཐམས་ཅད་བས་པའི་སླད་དུ་གཏིང་དང་འདྲ་བར་འགྱུར་རོ། །དེ་དག་ཆོས་ཡོངས་སུ་ཚོལ་བས་ཆོག་མི་ཤེས་པར་འགྱུར་རོ། །དེ་དག་ཤེས་རབ་ཀྱིས་ངོམས་པར་འགྱུར་རོ། །དེ་དག་ཆོས་ཀྱི་འཁོར་ལོ་རབ་ཏུ་བསྐོར་བས་རྒྱལ་པོ་དང་མཚུངས་པར་
འགྱུར་རོ། །དེ་དག་གཟུགས་འཛིན་པའི་སླད་དུ་བརྒྱ་བྱིན་དང་མཚུངས་པར་འགྱུར་རོ། །དེ་དག་དབང་སྒྱུར་བའི་སླད་དུ་ཚངས་པ་དང་མཚུངས་པར་འགྱུར་རོ། །དེ་དག་ཆོས་མངོན་པར་སྒྲོག་པའི་སླད་དུ་སྤྲིན་དང་འདྲ་བར་འགྱུར་རོ། །དེ་དག་བདུད་རྩིའི་ཆར་རབ་ཏུ་འབེབས་པའི་སླད་དུ་ཆར་དང་འདྲ་བར་
འགྱུར་རོ། །དེ་དག་དབང་པོ་དང་སྟོབས་དང་། བྱང་ཆུབ་ཀྱི་ཡན་ལག་རྣམས་རྣམ་པར་འཕེལ་བར་བགྱིད་པར་འགྱུར་རོ། །དེ་དག་འཁོར་བའི་འདམ་ལས་རྒལ་བར་འགྱུར་རོ། །དེ་དག་སངས་རྒྱས་ཀྱི་ཡེ་ཤེས་ལ་ཞུགས་པར་འགྱུར་རོ། །དེ་དག་སངས་རྒྱས་ཀྱི་བྱང་ཆུབ་ལ་ཉེ་བར་འགྱུར་རོ། །

དེ་དག་བློས་མཉམ་པ་མ་མཆིས་པར་འགྱུར་རོ། །དེ་དག་ཐོས་པས་མི་མཉམ་པ་དང་མཉམ་པར་འགྱུར་རོ། །དེ་དག་གཞལ་བ་ལས་འདས་པའི་སླད་དུ་མཚུངས་པ་མ་མཆིས་པར་འགྱུར་རོ། །དེ་དག་སྤོབས་པས་ཐོགས་པ་མ་མཆིས་པར་འགྱུར་རོ། །དེ་དག་གཟུངས་
རབ་ཏུ་ཐོབ་པའི་སླད་དུ་དྲན་པ་དང་ལྡན་པར་འགྱུར་རོ། །དེ་དག་དོན་རྟོགས་པའི་སླད་དུ་འབྲང་བས་རྟོགས་པ་དང་ལྡན་པར་འགྱུར་རོ། །དེ་དག་ཆོས་ལ་ཚུལ་བཞིན་དུ་སོ་སོར་རྟོག་པའི་སླད་དུ་བློ་གྲོས་དང་ལྡན་པར་འགྱུར་རོ། །དེ་དག་སེམས་ཅན་གྱི་བསམ་པ་རྣམས་ལ་མཁས་པར་
འགྱུར་རོ། །དེ་དག་འཇིག་རྟེན་ལ་ཕན་པར་བགྱི་བའི་སླད་དུ་བརྩོན་པར་འགྱུར་རོ། །དེ་དག་འཇིག་རྟེན་ལས་འཕགས་པར་འགྱུར་རོ། །དེ་དག་པད་མོ་ལྟ་བུར་མི་ཆགས་པར་འགྱུར་རོ། །དེ་དག་འཇིག་རྟེན་གྱི་ཆོས་རྣམས་ཀྱིས་ཡོངས་སུ་མ་ཟིན་པར་འགྱུར་རོ། །དེ་དག་མཁས་པ་རྣམས་
དགའ་བར་འགྱུར་རོ། །དེ་དག་མང་དུ་ཐོས་པ་རྣམས་ཀྱིས་ཆེར་བཀུར་བར་འགྱུར་རོ། །དེ་དག་རིག་པ་རྣམས་ཀྱིས་རི་མོ་བགྱི་བར་འགྱུར་རོ། །དེ་དག་ལྷ་དང་མི་རྣམས་ཀྱིས་མཆོད་པར་འགྱུར་རོ། །དེ་དག་འཇིག་རྟེན་རྣམས་ཀྱིས་ཕྱག་བགྱི་བར་འགྱུར་རོ། །དེ་དག་འཕགས་པ་རྣམས་
ཀྱིས་བཀུར་སྟི་བགྱི་བར་འགྱུར་རོ། །དེ་དག་ཉན་ཐོས་དང་། རང་སངས་རྒྱས་རྣམས་ཀྱིས་སྨོན་པར་བགྱིད་པར་འགྱུར་རོ། །དེ་དག་ཉི་ཚེར་སྤྱོད་པ་ལ་རེ་བ་མ་མཆིས་པར་འགྱུར་རོ། །དེ་དག་ཆགས་པ་མ་མཆིས་པའི་སླད་དུ་ཚུལ་མི་འཆོས་པར་འགྱུར་རོ། །དེ་དག་སྤྱོད་ལམ་མཛེས་པར་འགྱུར་
རོ། །དེ་དག་གཟུགས་བལྟ་ན་སྡུག་པར་འགྱུར་རོ། །དེ་དག་གཟི་བརྗིད་ཀྱིས་ཡིད་ཆགས་པར་འགྱུར་རོ། །དེ་དག་མཚན་རྣམས་ཀྱིས་བརྒྱན་པར་འགྱུར་རོ། །དེ་དག་དཔེ་བྱད་བཟང་པོ་རྣམས་ཀྱིས་རྣམ་པར་སྤྲས་པར་འགྱུར་རོ། །དེ་དག་སངས་རྒྱས་ཀྱི་རིགས་ཡང་དག་པར་འཛིན་པར་
འགྱུར་རོ། །དེ་དག་ཆོས་ཀྱི་རིགས་ཡོངས་སུ་སྲུང་བར་འགྱུར་རོ། །དེ་དག་དགེ་འདུན་གྱི་རིགས་ཀུན་ཏུ་སྲུང་བར་འགྱུར་རོ། །དེ་དག་ནི་སངས་རྒྱས་ཐམས་ཅད་ཀྱིས་གཟིགས་སོ། །དེ་དག་གིས་ཆོས་ཀྱི་སྤྱན་རབ་ཏུ་ཐོབ་བོ། །དེ་དག་སངས་རྒྱས་ཀྱི་ཡེ་ཤེས་སུ་ལུང་བསྟན་པར་འགྱུར་རོ། །

དེ་དག་གི་བཟོད་པ་གསུམ་ཡོངས་སུ་རྫོགས་པར་བགྱིས་སོ། །དེ་དག་བྱང་ཆུབ་ཀྱི་སྙིང་པོ་ཡོངས་སུ་རྫོགས་པ་ལ་གནས་སོ། །དེ་དག་གིས་བདུད་ཀྱི་སྡེ་རབ་ཏུ་བཅོམ་མོ། །དེ་དག་ཐམས་ཅད་མཁྱེན་པ་ཉིད་ཐོབ་བོ། །དེ་དག་ཆོས་ཀྱི་འཁོར་ལོ་རབ་ཏུ་སྐོར་བར་འགྱུར་རོ། །དེ་དག་
བཅོམ་ལྡན་འདས་སངས་རྒྱས་ཀྱིས་མཛད་པ་བགྱིད་པར་འགྱུར་ཏེ། བཅོམ་ལྡན་འདས་གང་ཆོས་ཀྱི་ཚུལ་ཟབ་མོ་འདི་ཐོས་ནས་མི་སྐྲག་མི་དངང་ཤིན་ཏུ་དངང་བར་མི་འགྱུར་བ་དང་། གང་དེ་བཞིན་གཤེགས་པ་རྣམས་ཀྱིས་བྱང་ཆུབ་འདི་ལྟར་ཟབ་པ། འདི་ལྟར་ཤེས་དཀའ་བ།
འདི་ལྟར་བལྟ་དཀའ་བ། འདི་ལྟར་ཁོང་དུ་ཆུད་པར་དཀའ་བ་འདི་ཐོས་ནས་མོས་པར་འགྱུར་བ་དང་། འཛིན་པར་འགྱུར་བ་དང་། འཆང་བར་འགྱུར་བ་དང་། གཞན་ལ་ཡང་རྒྱས་པར་བགྱིད་པར་འགྱུར་བ་དང་། ཆོས་འདི་ལ་རབ་ཏུ་ཞུགས་ཤིང་གཞན་ཡང་ནན་ཏན་ལ་འགོད་པར་
བགྱིད་པའི་སྐྱེས་བུ་དམ་པ་དེ་དག་གི་བསྔགས་པ་བསྐལ་པའམ། བསྐལ་པ་ལས་ལྷག་པར་བརྗོད་ཅིང་ཡོན་ཏན་ཡོངས་སུ་བསྒྲགས་ཀྱང་བཅོམ་ལྡན་འདས་བདག་གིས་སྐྱེས་བུ་དམ་པ་དེ་དག་གི་ཡོན་ཏན་མཐར་མི་ཕྱིན་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཚངས་པ་
ཁྱོད་ཀྱིས་སྐྱེས་བུ་དམ་པ་དེ་དག་གི་བསྔགས་པའམ་ཡོན་ཏན་ཇི་ཙམ་དུ་ཤེས། ཚངས་པས་གསོལ་པ། དེ་བཞིན་གཤེགས་པས་ཟག་པ་མ་མཆིས་པའི་སངས་རྒྱས་ཀྱི་ཡེ་ཤེས་ཇི་སྙེད་པ་མཁྱེན་པ་དང་། དེ་དག་གི་ཡོན་ཏན་དེ་དག་དང་དེ་ལས་ལྷག་པར་ཡང་འཚལ་བར་བགྱི་སྟེ།
གང་དེ་བཞིན་གཤེགས་པས་བཤད་པའི་དོན་དང་། ཚིག་དང་། ཡི་གེ་ཟབ་མོ་རྣམས་རྟོགས་པར་རིག་པ་དང་། ལྡེམ་པོ་ངག་འཚལ་བ་དང་། འཐུན་པར་བགྱིད་ཅིང་འགལ་བར་མི་བགྱིད་པ་དང་། ཡང་དག་པར་སྦྱོར་ཞིང་སུན་འབྱིན་པར་མི་བགྱིད་པ་དང་། དོན་རྟོགས་པར་རིག་ཅིང་ཡི་
གེའི་ཕྱིར་མི་སྙེགས་པ་དེ་དག་ནི་བརྗོད་པ་གང་གིས་དེ་བཞིན་གཤེགས་པ་རྣམས་ཆོས་གསུང་བ་དང་། ལྡེམ་པོ་ངག་གང་གིས་དེ་བཞིན་གཤེགས་པ་ཆོས་གསུང་བ་དང་། ཐབས་གང་དང་། ཚུལ་གང་དང་། སྙིང་རྗེ་ཆེན་པོ་གང་གིས་དེ་བཞིན་གཤེགས་པ་ཆོས་སྟོན་པར་ངེས་པའི་ཚིག་བརྗོད་པ་

རབ་ཏུ་འཚལ་ཏོ། །བཀའ་སྩལ་པ། ཚངས་པ་བྱང་ཆུབ་སེམས་དཔའ་གང་ལ་ལ་དེ་བཞིན་གཤེགས་པའི་སྟོབས་ལྔའི་སྦྱོར་བ་འདི་ཤེས་ན་བྱང་ཆུབ་སེམས་དཔའ་དེ་ནི་སངས་རྒྱས་ཀྱི་མཛད་པས་སེམས་ཅན་རྣམས་ལ་ཉེ་བར་གནས་པ་ཞེས་བྱའོ། །གསོལ་པ།
བཅོམ་ལྡན་འདས་དེ་བཞིན་གཤེགས་པའི་སྟོབས་ལྔའི་སྦྱོར་བ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཆོས་སྨྲ་བ་དང་། ལྡེམ་པོ་ངག་ཏུ་སྨྲ་བ་བསྟན་པ་དང་། ཐབས་ཀྱི་ཆོས་ལ་མོས་པར་བྱེད་པ་དང་། ཚུལ་ཉེ་བར་བསྟན་པ་དང་། སྙིང་རྗེ་ཆེན་པོའི་རྗེས་སུ་
འཇུག་པ་སྟེ། ཚངས་པ་འདི་དག་ནི་གང་ཉན་ཐོས་དང་རང་སངས་རྒྱས་ཐམས་ཅད་ཀྱི་ས་མ་ཡིན་པར་དེ་བཞིན་གཤེགས་པའི་སྟོབས་ལྔའི་སྦྱོར་བའོ། །གསོལ་པ། བཅོམ་ལྡན་འདས་གསུང་བ་གང་གིས་དེ་བཞིན་གཤེགས་པ་ཆོས་རྣམས་གསུངས། བཅོམ་ལྡན་འདས་ཀྱིས་བཀའ་
སྩལ་པ། ཚངས་པ་འདས་པ་སྨྲ་བ་དང་། མ་འོངས་པ་སྨྲ་བ་དང་། ད་ལྟར་བྱུང་བ་སྨྲ་བ་དང་། ཀུན་ནས་ཉོན་མོངས་པ་སྨྲ་བ་དང་། རྣམ་པར་བྱང་བ་སྨྲ་བ་དང་། དགེ་བ་དང་མི་དགེ་བ་སྨྲ་བ་དང་། འཇིག་རྟེན་པ་དང་འཇིག་རྟེན་ལས་འདས་པ་སྨྲ་བ་དང་། ཟག་པ་དང་བཅས་པ་དང་
ཟག་པ་མེད་པར་སྨྲ་བ་དང་། ཁ་ན་མ་ཐོ་བ་དང་བཅས་པ་དང་ཁ་ན་མ་ཐོ་བ་མེད་པ་སྨྲ་བ་དང་། འདུས་བྱས་དང་འདུས་མ་བྱས་སྨྲ་བ་དང་། བདག་དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་སྨྲ་བ་དང་། ཐོབ་པ་མངོན་དུ་བྱེད་པ་སྨྲ་བ་དང་། འཁོར་
བ་དང་མྱ་ངན་ལས་འདས་པ་སྨྲ་བ་སྟེ། ཚངས་པ་སྨྲ་བ་དེ་དག་ཀྱང་ཡོངས་སུ་མ་གྲུབ་པའི་ཚུལ་གྱིས་སྨྲ་བ་སྒྱུ་མ་ལྟ་བུར་བལྟའོ། །མེད་པར་མཐོང་བའི་ཚུལ་གྱིས་སྨྲ་བ་རྨི་ལམ་ལྟ་བུར་བལྟའོ། །ནམ་མཁའི་སྒྲ་སྐད་ཀྱི་ཚུལ་གྱིས་སྨྲ་བ་བྲག་ཅ་ལྟ་བུར་བལྟའོ། །རྐྱེན་འདུས་པའི་ཚུལ་
གྱིས་སྨྲ་བ་མིག་ཡོར་ལྟ་བུར་བལྟའོ། །རྒྱུ་མི་འཕོ་བའི་ཚུལ་གྱིས་སྨྲ་བ་གཟུགས་བརྙན་ལྟ་བུར་བལྟའོ། །ཕྱིན་ཅི་ལོག་ཏུ་མཐོང་བའི་ཚུལ་གྱིས་སྨྲ་བ་སྨིག་རྒྱུ་ལྟ་བུར་བལྟའོ། །མི་འབྱུང་མི་འཇིག་པའི་ཚུལ་གྱིས་སྨྲ་བ་ནམ་མཁའ་ལྟ་བུར་བལྟའོ། །བརྗོད་དུ་མེད་པའི་ཚུལ་གྱིས་སྨྲ་

བ་སྨྲར་མེད་པར་བལྟའོ། །ཚངས་པ་བྱང་ཆུབ་སེམས་དཔའ་གང་ཆོས་སྨྲ་བ་འདི་ཤེས་ན་བྱང་ཆུབ་སེམས་དཔའ་དེ་དག་ནི་སྨྲ་བ་ཐམས་ཅད་སྨྲ་ཡང་ཆོས་གང་ལ་ཡང་མངོན་པར་མི་ཆགས་སོ། །དེ་མངོན་པར་མ་ཆགས་པས་ཡེ་ཤེས་ཐོགས་པ་མེད་པའི་སྤོབས་པ་གང་གིས་བསྐལ་
པ་གང་གཱའི་ཀླུང་གི་བྱེ་མ་སྙེད་དུ་ཆོས་བཤད་ཀྱང་རྒྱུན་མི་ཆད་པ་དང་། སྨྲ་བ་ཐམས་ཅད་ཀྱང་ཆོས་ཀྱི་དབྱིངས་དང་ཐ་མི་དད་པར་སྨྲ་བ་དང་། ཆོས་རྣམས་ཀྱི་ཐ་མི་དད་པ་ལ་ཡང་མངོན་པར་ཆགས་པར་མི་འགྱུར་བའི་ཡེ་ཤེས་ཐོགས་པ་མེད་པའི་སྤོབས་པ་ཐོབ་པོ། །ཚངས་པ་དེ་བཞིན་
གཤེགས་པས་དེ་ལྟར་གསུངས་པས་ཆོས་རྣམས་བརྗོད་དོ། །ཚངས་པ་དེ་ལ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པའི་ལྡེམ་པོ་ངག་ལ་མཁས་པ་ཁོང་དུ་ཆུད་ཅེ་ན། ཚངས་པ་འདི་ལ་དེ་བཞིན་གཤེགས་པ་ཀུན་ནས་ཉོན་མོངས་པ་ཡང་རྣམ་པར་བྱང་བར་སྟོན།
རྣམ་པར་བྱང་བ་ཡང་ཀུན་ནས་ཉོན་མོངས་པར་སྟོན་ཏེ། དེ་ལས་བྱང་ཆུབ་སེམས་དཔའ་ལྡེམ་པོ་ངག་ཏུ་ཤེས་པར་བྱའོ། །ཚངས་པ་དེ་བཞིན་གཤེགས་པ་ཀུན་ནས་ཉོན་མོངས་པ་ལ་རྣམ་པར་བྱང་བར་ཇི་ལྟར་སྟོན་ཅེ་ན། ཀུན་ནས་ཉོན་མོངས་པའི་ངོ་བོ་ཉིད་རློམ་སེམས་མེད་པའི་
ཕྱིར་ཀུན་ནས་ཉོན་མོངས་པ་རྣམ་པར་བྱང་བར་སྟོན་ཏོ། །རྣམ་པར་བྱང་བ་ཀུན་ནས་ཉོན་མོངས་པར་ཇི་ལྟར་སྟོན་ཅེ་ན། རྣམ་པར་བྱང་བའི་ངོ་བོ་ཉིད་རློམ་སེམས་མེད་པའི་ཕྱིར་ཏེ། དེ་ལྟར་རྣམ་པར་བྱང་བ་ཀུན་ནས་ཉོན་མོངས་པར་སྟོན་ཏོ། །ཚངས་པ་ང་སྦྱིན་པས་མྱ་ངན་ལས་འདས་པར་སྟོན་
ཏེ། དེ་ནི་བྱིས་པ་དག་གིས་མི་ཤེས་ཀྱི་དེ་ལ་བྱང་ཆུབ་སེམས་དཔའ་ལྡེམ་པོ་ངག་ལ་མཁས་པ་ནི་སྦྱིན་པ་ཡང་ཕྱི་མའི་ཚེ། སྐྱིད་པ་ཆེན་པོར་འགྱུར་ཡང་འདི་ལ་ཆོས་གང་ཡང་འཕོ་བ་མེད་དོ། །མི་འཕོ་བས་ན་མྱ་ངན་ལས་འདས་པའོ། །མངོན་པར་འདུ་མི་བྱེད་པའི་ཚུལ་གྱིས་ཚུལ་
ཁྲིམས་ཀྱིས་མྱ་ངན་ལས་འདས་པའོ། །སྐད་ཅིག་པའི་ཚུལ་གྱིས་བཟོད་པས་མྱ་ངན་ལས་འདས་པའོ། །བླང་བ་དང་དོར་བ་མེད་པའི་ཚུལ་གྱིས་བརྩོན་འགྲུས་ཀྱིས་མྱ་ངན་ལས་འདས་པའོ། །རྣམ་པར་མི་རྟོག་པའི་ཚུལ་གྱིས་བསམ་གཏན་གྱིས་མྱ་ངན་ལས་འདས་པའོ། །ཐོགས་

པ་མེད་པའི་ཚུལ་གྱིས་ཤེས་རབ་ཀྱིས་མྱ་ངན་ལས་འདས་པའོ། །ཆོས་ཀྱི་དབྱིངས་འདོད་ཆགས་དང་བྲལ་བས་ན་འདོད་ཆགས་ནི་འདོད་ཆགས་དང་བྲལ་བའི་མཐའོ། །ཆོས་ཀྱི་དབྱིངས་ལ་གཏུམ་པ་མེད་པས་ཞེ་སྡང་ནི་ཡང་དག་པའི་མཐའོ། །ཆོས་རྣམས་ལ་
རྨོངས་པ་མེད་པའི་ཕྱིར་གཏི་མུག་ནི་གཏི་མུག་མེད་པའི་མཐའོ། །ཤི་འཕོ་མེད་པ་དང་སྐྱེ་བ་མེད་པའི་ཚུལ་གྱིས་འཁོར་བ་ཡང་མྱ་ངན་ལས་འདས་པའོ། །མངོན་པར་ཆགས་པ་མེད་པའི་ཚུལ་གྱིས་མྱ་ངན་ལས་འདས་པ་ཡང་འཁོར་བའོ། །ཐ་སྙད་དུ་འདོགས་པའི་ལྟ་བས་
བདེན་པ་ཡང་བརྫུན་པའོ། །མངོན་པའི་ང་རྒྱལ་ཅན་རྣམས་ལ་ནི་བརྫུན་པ་ཡང་བདེན་པའོ་ཞེས་དེ་ལྟར་ཤེས་སོ། །གཞན་ཡང་ཚངས་པ་དེ་བཞིན་གཤེགས་པ་ནི་ལྡེམ་པོ་ངག་གི་རྣམ་གྲངས་ཀྱིས་བདག་ཉིད་རྟག་པར་སྨྲ་བར་ཞལ་གྱིས་བཞེས་སོ། །བདག་ཉིད་ཀུན་ནས་ཉོན་
མོངས་པར་སྨྲ་བ་དང་། ཆད་པར་སྨྲ་བ་དང་། བྱ་བ་མེད་པར་སྨྲ་བ་དང་། ལོག་པར་སྨྲ་བ་དང་། མ་དད་པ་དང་། བྱས་པ་མི་གཟོ་བ་དང་། མཚམས་གཅོད་པ་དང་། སྐྱུག་པ་ཟ་བ་དང་། གོ་སྐབས་མི་ཕྱེད་པར་ཞལ་གྱིས་བཞེས་ཀྱང་དེ་བཞིན་གཤེགས་པ་ནི་བཤད་པ་འདི་
དག་ལ་མི་འབྱུང་མི་སྣང་ངོ་། །ལྡེམ་པོ་ངག་གང་གིས་སེམས་ཅན་རྣམས་ལྷག་པའི་ང་རྒྱལ་འཛིན་པ་འདོད་པར་འགྱུར་བའི་ལྡེམ་པོ་ངག་དེ་དེ་བཞིན་གཤེགས་པ་སྟོན་ཏེ། དེ་ནི་དེ་བཞིན་གཤེགས་པའི་ལྡེམ་པོ་ངག་གོ། །ཚངས་པ་དེ་ལྟར་ན་དེ་བཞིན་གཤེགས་པ་ལྡེམ་པོ་ངག་ཏུ་ཆོས་
སྟོན་ཏེ། དེ་ལ་བྱང་ཆུབ་སེམས་དཔས་སྤྱོད་པ་ལ་མཁས་པར་བློ་དཔྱད་པར་བྱའོ། །དེ་དེ་ལྟར་མཐར་ཕྱིན་པས་བསྟན་པ་ཐམས་ཅད་ལ་མཁས་པར་འགྱུར་རོ། །དེ་སེམས་ཅན་རྣམས་ལ་གཟུགས་ཀྱི་སྐུ་བསྟན་པས་སངས་རྒྱས་བྱུང་ངོ་སྙམ་དུ་མོས་པར་འགྱུར་རོ། །ཆོས་ཀྱི་སྐུས་རབ་ཏུ་
ཕྱེ་བའི་ཕྱིར་དེ་བཞིན་གཤེགས་པ་མ་བྱུང་བའོ་ཞེས་མོས་པར་འགྱུར་རོ། །ཡི་གེ་རྣམ་པར་རིག་པ་ལྷུར་བྱེད་པའི་སེམས་ཅན་རྣམས་ལ་དེ་བཞིན་གཤེགས་པས་ཆོས་བསྟན་ཏོ་ཞེས་མོས་པར་འགྱུར་རོ། །ཆོས་ཉིད་བརྗོད་དུ་མེད་པར་ངེས་པར་བྱས་ནས་ཆོས་བསྟན་དུ་མེད་དོ། །ཞེས་

མོས་པར་འགྱུར་རོ། །ཕྱིན་ཅི་ལོག་ལས་བྱུང་བའི་ཉོན་མོངས་པ་ཡོངས་སུ་མྱ་ངན་ལས་བཟླ་བའི་ཕྱིར། ཡོངས་སུ་མྱ་ངན་ལས་འདས་པ་ཡོད་དོ་ཞེས་མོས་པར་འགྱུར་རོ། །མ་སྐྱེས་པའི་ཆོས་རྣམས་མི་འཇིག་པའི་ཕྱིར་མྱ་ངན་ལས་འདས་པ་མེད་དོ་ཞེས་མོས་པར་འགྱུར་རོ། །
ཀུན་རྫོབ་ལ་འཇུག་པས་སེམས་ཅན་ཡོད་དོ་ཞེས་མོས་པར་འགྱུར་རོ། །དོན་དམ་པ་བསྟན་པ་སེམས་ཅན་མེད་དོ་ཞེས་མོས་པར་འགྱུར་ཏེ། ཚངས་པ་དེ་ལྟར་ན་དེ་བཞིན་གཤེགས་པས་ལྡེམ་པོ་ངག་བསྟན་པས་ཆོས་སྟོན་ཏོ། །དེ་ལ་བྱང་ཆུབ་སེམས་དཔས་བསྟན་པ་ཐམས་ཅད་ལ་མི་
སྐྲག་པར་བྱའོ། །དེ་ལ་ཚངས་པ་དེ་བཞིན་གཤེགས་པ་ཐབས་གང་གིས་སེམས་ཅན་རྣམས་ལ་ཆོས་སྟོན་ཅེ་ན། སྦྱིན་པས་ལོངས་སྤྱོད་འཐོབ་པ་དང་། ཚུལ་ཁྲིམས་ཀྱིས་མཐོ་རིས་སུ་སྐྱེ་བ་དང་། བཟོད་པས་གཟུགས་བཟང་པོ་འཐོབ་པ་དང་། བརྩོན་འགྲུས་ཀྱིས་ཡེ་ཤེས་ཐོབ་པ་
དང་། བསམ་གཏན་གྱིས་རབ་ཏུ་དབེན་པ་འཐོབ་པ་དང་། ཤེས་རབ་ཀྱིས་ཉོན་མོངས་པ་འདོར་བ་འཐོབ་པ་དང་། ཐོས་པའི་ཤེས་རབ་འཐོབ་པ་དང་། དགེ་བ་བཅུའི་ལས་ཀྱི་ལམ་གྱིས་མི་དང་ལྷའི་ཕུན་སུམ་ཚོགས་པ་རྣམས་འཐོབ་པ་དང་། བྱམས་པ་དང་། སྙིང་རྗེ་དང་། དགའ་
བ་དང་། བཏང་སྙོམས་ཀྱིས་ཚངས་པའི་འཇིག་རྟེན་དུ་སྐྱེ་བ་འཐོབ་པ་དང་། ཞི་གནས་ཀྱིས་ལྷག་མཐོང་འཐོབ་པ་དང་། སློབ་པའི་སས་མི་སློབ་པའི་ས་ཐོབ་པ་དང་། རང་སངས་རྒྱས་ཀྱི་སས་སྦྱིན་པ་ཡོངས་སུ་སྤྱད་པ་དང་། སངས་རྒྱས་ཀྱི་སས་ཚད་མེད་པའི་ཡེ་ཤེས་འཐོབ་པ་དང་།
མྱ་ངན་ལས་འདས་པས་སྡུག་བསྔལ་ཐམས་ཅད་ཉེ་བར་ཞི་བ་འཐོབ་པར་འགྱུར་རོ། །ཞེས་ཚངས་པ་ང་ནི་ཐབས་ཀྱིས་སེམས་ཅན་རྣམས་ཆོས་འདི་ལ་མོས་པར་བྱེད་དེ། དེ་བཞིན་གཤེགས་པ་ནི་བདག་གམ། སེམས་ཅན་ནམ། སྲོག་གམ། གང་ཟག་ཏུ་མི་དམིགས་སོ། །དེ་
བཞིན་གཤེགས་པ་ནི་སྦྱིན་པ་ཡང་མི་དམིགས། སྦྱིན་པའི་འབྲས་བུ་ཡང་མི་དམིགས། སེར་སྣ་ཡང་མི་དམིགས། སེར་སྣའི་འབྲས་བུ་ཡང་མི་དམིགས། ཚུལ་ཁྲིམས་ཀྱང་མི་དམིགས། ཚུལ་ཁྲིམས་ཀྱི་འབྲས་བུ་ཡང་མི་དམིགས། ངང་ཚུལ་ངན་པ་ཡང་མི་དམིགས།

ངང་ཚུལ་ངན་པའི་འབྲས་བུ་ཡང་མི་དམིགས། བཟོད་པ་ཡང་མི་དམིགས། བཟོད་པའི་འབྲས་བུ་ཡང་མི་དམིགས། གནོད་སེམས་ཀྱང་མི་དམིགས། གནོད་སེམས་ཀྱི་འབྲས་བུ་ཡང་མི་དམིགས། བརྩོན་འགྲུས་ཀྱང་མི་དམིགས། བརྩོན་འགྲུས་ཀྱི་འབྲས་
བུ་ཡང་མི་དམིགས། ལེ་ལོ་ཡང་མི་དམིགས། ལེ་ལོའི་འབྲས་བུ་ཡང་མི་དམིགས། བསམ་གཏན་ཡང་མི་དམིགས། བསམ་གཏན་གྱི་འབྲས་བུ་ཡང་མི་དམིགས། གཡེང་བ་ཡང་མི་དམིགས། གཡེང་བའི་འབྲས་བུ་ཡང་མི་དམིགས། ཤེས་རབ་ཀྱང་མི་དམིགས། ཤེས་
རབ་ཀྱི་འབྲས་བུ་ཡང་མི་དམིགས། འཆལ་པའི་ཤེས་རབ་ཀྱང་མི་དམིགས། འཆལ་པའི་ཤེས་རབ་ཀྱི་འབྲས་བུ་ཡང་མི་དམིགས། བདེ་བ་ཡང་མི་དམིགས། སྡུག་བསྔལ་ཡང་མི་དམིགས། རྒྱུན་དུ་ཞུགས་པའི་འབྲས་བུ་ཡང་མི་དམིགས་པ་ནས་བྱང་ཆུབ་ཀྱི་བར་དུ་ཡང་མི་
དམིགས། ཡོངས་སུ་མྱ་ངན་ལས་འདས་པ་ཡང་མི་དམིགས་ཏེ། ཚངས་པ་སེམས་ཅན་དེ་དག་དེ་ལྟར་བསྟན་པས་སྦྱོར་ཞིང་རྩོལ་ཏེ་འབད་ཀྱང་གང་གི་ཕྱིར་སྦྱོར་བ་དང་། རྩོལ་བ་དང་། འབད་པའི་ཆོས་དེ་དག་ཁོང་དུ་མི་ཆུད་ཅིང་མི་འཐོབ་སྟེ། གང་འདི་རྒྱུན་དུ་ཞུགས་པའི་འབྲས་
བུ་ནས་དགྲ་བཅོམ་པ་ཉིད་ཀྱི་བར་དང་། རང་བྱང་ཆུབ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནས་མྱ་ངན་ལས་འདས་པའི་བར་དུ་ཁོང་དུ་མི་ཆུད་མི་འཐོབ་བོ། །ཚངས་པ་འདི་ནི་དེ་བཞིན་གཤེགས་པའི་ཐབས་ཀྱིས་ཆོས་བསྟན་པ་ཡིན་ཏེ། སེམས་ཅན་རྣམས་དམ་
པའི་ཆོས་ཡོངས་སུ་འཛིན་དུ་གཞུག་པའི་ཕྱིར། བྱང་ཆུབ་སེམས་དཔས་ཐབས་མཁས་པ་ལ་སྦྱོར་བར་བྱའོ། །ཚངས་པ་དེ་ལ་དེ་བཞིན་གཤེགས་པའི་ཚུལ་བསྟན་པ་གང་ཞེ་ན། མིག་ནི་ཐར་པའི་ཚུལ་ལོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་
རྣམས་ནི་ཐར་པའི་ཚུལ་ལོ། །དེ་ཅིའི་ཕྱིར་ཞེ་ན། མིག་ནི་བདག་དང་བདག་གིས་སྟོང་སྟེ། དེའི་རང་བཞིན་འདི་ཡིན་ནོ། །དེ་བཞིན་དུ་ཡིད་ཀྱི་བར་དུ་བདག་དང་བདག་གིས་སྟོང་སྟེ། དེའི་རང་བཞིན་འདི་ཡིན་ནོ། །ཚངས་པ་མི་སླུ་བའི་ཕྱིར། སྐྱེ་མཆེད་ཐམས་ཅད་ནི་སེམས་ཅན་

རྣམས་ཀྱིས་ཐར་པའི་ཚུལ་དུ་རིག་པར་བྱའོ། །འདི་ནི་སེམས་ཅན་རྣམས་ཀྱི་ཐར་པ་ལ་བརྩོན་པར་མི་སླུ་བ་སྟེ། གཟུགས་དང་། སྒྲ་དང་། དྲི་དང་། རོ་དང་། རེག་དང་། ཆོས་རྣམས་ཀྱང་དེ་བཞིན་ནོ། །ཆོས་ཐམས་ཅད་ཀྱི་ཚུལ་འདི་ཡིན་ཏེ། གང་འདི་སྟོང་པ་ཉིད་ཀྱི་ཚུལ་དང་།
མཚན་མ་མེད་པའི་ཚུལ་དང་། སྨོན་པ་མེད་པའི་ཚུལ་དང་། མངོན་པར་འདུ་མི་བྱེད་པའི་ཚུལ་དང་། མི་སྐྱེ་བའི་ཚུལ་དང་། མི་འགག་པའི་ཚུལ་དང་། འགྲོ་བ་མེད་ཅིང་འོང་བ་མེད་པའི་ཚུལ་དང་། ཤི་འཕོ་མེད་ཅིང་སྐྱེ་བ་མེད་པའི་ཚུལ་དང་། རང་བཞིན་གྱིས་འོད་གསལ་བའི་ཚུལ་
དང་། དབེན་པའི་ཚུལ་ལོ། །རང་བཞིན་གྱིས་བེམས་པོ་ཡིན་པའི་ཕྱིར་ཕན་ཚུན་མི་ཕྲད་པས་ན་དེ་བཞིན་གཤེགས་པས་ཡི་གེ་ཐམས་ཅད་ལས་ཐར་པའི་སྒོའི་ཚུལ་སྨོས་སོ། །ཚངས་པ་ཡི་གེ་ཐམས་ཅད་ལ་བདེན་པའི་གཏམ་དུ་ལྟ་སྟེ། གཏམ་ཐམས་ཅད་ནི་དེ་བཞིན་གཤེགས་པའི་
ཐར་པའི་ཚུལ་བདེན་པ་བསྟན་པ་བསྟན་ཏོ། །དེ་བཞིན་གཤེགས་པའི་ཆོས་བསྟན་པ་གང་ཀུན་ནས་ཉོན་མོངས་པར་འགྱུར་བ་དེ་གང་ཡང་མེད་དོ། །ཆོས་བསྟན་ཏོ་ཅོག་ཏུ་ཐར་པར་འདྲེན་ཅིང་། མྱ་ངན་འདས་པ་སྟོན་ཏོ། །ཚངས་པ་འདི་ནི་དེ་བཞིན་གཤེགས་པའི་ཚུལ་བསྟན་པ་ཡིན་ཏེ།
དེ་ལ་བྱང་ཆུབ་སེམས་དཔས་བསླབ་པར་བྱའོ། །ཚངས་པ་དེ་ལ་དེ་བཞིན་གཤེགས་པ་སྙིང་རྗེ་ཇི་ལྟ་བུས་སེམས་ཅན་རྣམས་ལ་ཆོས་སྟོན་ཅེ་ན། སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་རྣམ་པ་སུམ་ཅུ་རྩ་གཉིས་དང་ལྡན་པ་སྐྱེའོ། །སུམ་ཅུ་རྩ་གཉིས་གང་ཞེ་
ན། ཆོས་ཐམས་ཅད་ནི་བདག་མེད་པ་ཡིན་ན་སེམས་ཅན་རྣམས་ནི་བདག་མེད་པར་མ་མོས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་སེམས་ཅན་མེད་པ་ཡིན་ན། སེམས་ཅན་རྣམས་ནི་སེམས་ཅན་དུ་སྨྲ་སྟེ། དེའི་
ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་སྲོག་མེད་པ་ཡིན་ན་སེམས་ཅན་རྣམས་ནི་སྲོག་ཏུ་ལྟའོ་ཞེས་དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་གང་ཟག་མེད་པ་ཡིན་ན་སེམས་

ཅན་རྣམས་ནི་གང་ཟག་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་ངོ་བོ་ཉིད་མེད་པ་ཡིན་ན་སེམས་ཅན་རྣམས་ནི་ངོ་བོར་ལྟ་སྟེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་
པོ་སྐྱེའོ། །ཆོས་ཐམས་ཅད་ནི་གནས་མེད་པ་ཡིན་ན་སེམས་ཅན་རྣམས་ནི་གནས་ལ་རྟེན་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་ཀུན་གཞི་མེད་པར་ཡིན་ན་སེམས་ཅན་རྣམས་ནི་ཀུན་གཞི་ལ་མངོན་པར་དགའ་སྟེ།
དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་ང་ཡིར་བྱ་བ་མེད་པ་ཡིན་ན་སེམས་ཅན་རྣམས་ནི་ང་ཡིར་འཛིན་པ་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་
ཅད་ནི་བདག་པོ་མེད་པ་ཡིན་ན་སེམས་ཅན་རྣམས་ནི་ཡོངས་སུ་འཛིན་པ་ལ་བརྩོན་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་དངོས་པོ་མེད་པ་ཡིན་ན་སེམས་ཅན་རྣམས་ནི་དངོས་པོ་ལ་རྟེན་ཏེ། དེའི་ཕྱིར་སེམས་ཅན་རྣམས་
ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་མ་སྐྱེས་པ་ཡིན་ན་སེམས་ཅན་རྣམས་ནི་སྐྱེ་བ་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་མ་འཕོས་མ་བྱུང་བ་ཡིན་ན་སེམས་ཅན་རྣམས་ནི་འཆི་
འཕོ་དང་སྐྱེ་བ་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་ཀུན་ནས་ཉོན་མོངས་པར་གྱུར་པ་ཡོད་པ་མ་ཡིན་ན། སེམས་ཅན་རྣམས་ནི་ཀུན་ནས་ཉོན་མོངས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་
པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་འདོད་ཆགས་དང་བྲལ་བ་ཡིན་ན་སེམས་ཅན་རྣམས་ལ་ཆགས་པར་བྱེད་དེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་ཞེ་སྡང་དང་བྲལ་བ་ཡིན་ན་སེམས་ཅན་རྣམས་ནི་ཞེ་སྡང་

བར་བྱེད་དེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་གཏི་མུག་དང་བྲལ་བ་ཡིན་ན་སེམས་ཅན་རྣམས་ནི་གཏི་མུག་པར་གྱུར་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་
ཐམས་ཅད་ནི་འོང་བ་མེད་པ་ཡིན་ན་སེམས་ཅན་རྣམས་ནི་འོང་བ་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་འགྲོ་བ་མེད་པ་ཡིན་ན་སེམས་ཅན་རྣམས་ནི་འགྲོ་བ་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་
གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་མངོན་པར་འདུ་མི་བྱེད་པ་ཡིན་ན་སེམས་ཅན་རྣམས་ནི་མངོན་པར་འདུ་བྱེད་པ་ལ་སྤྱོད་དེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་སྤྲོས་པ་མེད་པ་ཡིན་ན་སེམས་ཅན་
རྣམས་ནི་སྤྲོས་པ་ལ་དགའ་སྟེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་སྟོང་པ་ཉིད་ཡིན་ན་སེམས་ཅན་རྣམས་ནི་ལྟ་བར་ཞུགས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་
ཐམས་ཅད་ནི་མཚན་མ་མེད་པ་ཡིན་ན་སེམས་ཅན་རྣམས་ནི་མཚན་མ་ལ་སྤྱོད་ཡུལ་བར་གྱུར་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་སྨོན་པ་མེད་པ་ཡིན་ན་སེམས་ཅན་རྣམས་ནི་སྨོན་ལམ་ལ་སྤྱོད་དེ། དེའི་ཕྱིར་སེམས་
ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཀྱེ་མ་འཇིག་རྟེན་གནས་པ་འདི་ནི་ཕན་ཚུན་རྩོད་པས་ཡོངས་སུ་ཟིན་ཅིང་གནོད་སེམས་ཀྱི་ཐ་བའི་སྐྱོན་ལ་ཞུགས་པར་གཟིགས་ནས། དེ་དག་ལ་གནོད་སེམས་ཀྱི་ཐ་བའི་སྐྱོན་སྤང་བའི་ཕྱིར་ཆོས་སྟོན་ཏོ་ཞེས་སེམས་
ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཀྱེ་མ་འཇིག་རྟེན་གནས་པ་འདི་ནི་ཕྱིན་ཅི་ལོག་དང་ལྡན་ཞིང་ལམ་ཉམ་ང་བར་ཞུགས་པ་ལམ་གོལ་བ་ལ་གནས་པ་ཡིན་ཏེ། དེ་དག་ཡང་དག་པའི་ལམ་དུ་གཟུད་པར་བྱའོ་ཞེས་སེམས་ཅན་རྣམས་ལ་དེ་བཞིན་གཤེགས་

པའི་སྙིང་རྗེ་ཆེན་པོ་སྐྱེའོ། །ཀྱེ་མ་འཇིག་རྟེན་གནས་པ་འདི་ནི་བརྐམ་ཞིང་ཆགས་པའི་ཟིལ་གྱིས་གནོན་པ་ཆོག་མི་ཤེས་ཤིང་གཞན་གྱི་ནོར་འཕྲོག་པ་ཡིན་ཏེ། དེ་དག་འཕགས་པའི་ནོར་དད་པ་དང་། ཚུལ་ཁྲིམས་དང་། ཐོས་པ་དང་། གཏོང་བ་དང་། ཤེས་
རབ་དང་། ངོ་ཚ་ཤེས་པ་དང་། ཁྲེལ་ཡོད་པའི་ནོར་ལ་དགོད་དོ་ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཀྱེ་མ་སེམས་ཅན་འདི་དག་ནོར་དང་། འབྲུ་དང་། ཁྱིམ་དང་། བུ་དང་། ཆུང་མ་ལ་སྲེད་པས་འཁོལ་ཅིང་སྙིང་པོ་མེད་པ་ལ་སྙིང་པོར་འཛིན་
ཏེ། དེ་དག་ལ་ཤིན་ཏུ་མི་རྟག་པ་ཉིད་བསྟན་ཏོ་ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཀྱེ་མ་སེམས་ཅན་འདི་དག་མ་རིག་པས་འཚོ་ཞིང་གཅིག་ལ་གཅིག་འདྲིད་པ་ལ་གནས་ཏེ། དེ་དག་འཚོ་བ་ཡོངས་སུ་དག་པར་བྱ་བའི་ཕྱིར་ཆོས་བསྟན་ཏོ། །
ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཀྱེ་མ་སེམས་ཅན་འདི་དག་མི་མཛའ་བ་ཡིན་ན་ཁེ་དང་། བཀུར་སྟིས་རྒྱས་ནས་བདག་ཅག་མཛའོ་སྙམ་དུ་སེམས་ཏེ། དེ་དག་གི་གང་འདི་སྡུག་བསྔལ་རྣམ་པར་ཞི་བའི་བདེ་བ་མྱ་ངན་ལས་འདས་པ་ལ་
ཤིན་ཏུ་ཡང་དག་པའི་དགེ་བའི་བཤེས་གཉེན་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཀྱེ་མ་སེམས་ཅན་འདི་དག་ནི་ཤིན་ཏུ་ཉོན་མོངས་པར་གྱུར་ཅིང་སྡུག་བསྔལ་གྱི་ཆོས་མང་བ་ཁྱིམ་གྱི་གནས་ལ་མངོན་པར་དགའ་བ་དེ་དག་ཁམས་
གསུམ་ལས་བཟླ་བའི་ཕྱིར་འབྱུང་བའི་ཆོས་བསྟན་ཏོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་རྒྱུས་ཉེ་བར་འགྲོ་བ་རྣམ་པར་བསྒྲུབས་པས་ཉེ་བར་གནས་པའི་མཚན་ཉིད་དེ། འཕགས་པའི་རྣམ་པར་གྲོལ་བ་དེ་ལ་ལེ་ལོ་
བྱེད་དོ་ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །སེམས་ཅན་རྣམས་ནི་ཆགས་པ་མེད་པའི་སངས་རྒྱས་ཀྱི་ཡེ་ཤེས་མཆོག་ཁྱད་པར་དུ་འཕགས་པའི་ཡོངས་སུ་མྱ་ངན་ལས་འདས་པ་འདི་བཏང་ཞིང་། གང་འདི་ཐེག་པ་དམན་པ་ཉན་

ཐོས་དང་རང་སངས་རྒྱས་ཀྱི་ཐེག་པ་ཚོལ་ཏེ། དེ་དག་གང་འདི་སངས་རྒྱས་ཀྱི་ཡེ་ཤེས་ལ་དམིགས་པར་བྱ་བའི་ཕྱིར་རྒྱ་ཆེན་པོ་ལ་སེམས་མོས་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཚངས་པ་སེམས་ཅན་རྣམས་ལ་དེ་བཞིན་
གཤེགས་པའི་སྙིང་རྗེ་རྣམ་པ་སུམ་ཅུ་རྩ་གཉིས་པོ་དེ་དག་དང་ལྡན་པར་སྐྱེ་སྟེ། དེའི་ཕྱིར་དེ་བཞིན་གཤེགས་པ་སྙིང་རྗེ་ཆེན་པོ་ལ་གནས་པ་ཞེས་བྱའོ། །ཚངས་པ་བྱང་ཆུབ་སེམས་དཔའ་གང་ལ་ལ་སྙིང་རྗེ་ཆེན་པོ་རྣམ་པ་སུམ་ཅུ་རྩ་གཉིས་པོ་འདི་དག་དང་ལྡན་པར་སེམས་ཅན་
རྣམས་ལ་འཇུག་ན། ཚངས་པ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི་བསོད་ནམས་ཀྱི་ཞིང་གཟི་བརྗིད་ཆེན་པོ་ཡོངས་སུ་རྒྱས་པ། ཕྱིར་མི་ལྡོག་པ། སེམས་ཅན་གྱི་དོན་ལ་བརྩོན་པར་ཤེས་པར་བྱའོ། །ཡང་སྙིང་རྗེ་ཆེན་པོའི་ཆོས་ཀྱི་སྒོའི་ལེའུ་འདི་བཤད་པ་ན་
སྲོག་ཆགས་སྟོང་ཕྲག་སུམ་ཅུ་རྩ་གཉིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །སྲོག་ཆགས་བརྒྱ་སྟོང་གིས་ནི་བཟོད་པ་རབ་ཏུ་ཐོབ་པར་གྱུར་ཏོ། །ལྷའི་བུ་སྟོང་ཕྲག་བདུན་ཅུ་རྩ་གཉིས་ནི་ཆོས་རྣམས་ལ་རྡུལ་མེད་ཅིང་དྲི་མ་དང་བྲལ་བའི་ཆོས་ཀྱི་མིག་
རྣམ་པར་དག་གོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཚངས་པ་ཁྱད་པར་སེམས་འདི་དེ་བཞིན་གཤེགས་པའི་ཐུགས་རྗེ་ཆེན་པོ་དང་ལྡན་པའི་ཆོས་བསྟན་པ་འདི་ཐོས་ན་དགའ་བར་མི་བགྱིད་
རངས་པར་མི་འགྱུར་རོ། །ཁྱད་པར་སེམས་ཀྱིས་སྨྲས་པ། རིགས་ཀྱི་བུ་གང་གི་རྣམ་པར་ཤེས་པ་གཉིས་དང་ལྡན་པ་དེ་དག་ལ་ནི་དགའ་བའམ་རངས་པ་ཡང་འགྱུར་གྱི་གཉིས་སུ་མེད་པ་ཡང་དག་པའི་མཐའ་ལ་གནས་པ་ལ་དགའ་བ་ཡང་མེད། རངས་པ་ཡང་མེད་དོ། །རིགས་
ཀྱི་བུ་འདི་ལྟ་སྟེ་དཔེར་ན་སྒྱུ་མས་སྤྲུལ་པའི་སྐྱེས་བུ་ནི་སྒྱུ་མ་གར་བྱེད་པར་ཞུགས་པ་ལ་དགའ་བ་ཡང་མེད། རངས་པ་ཡང་མེད་དོ། །རིགས་ཀྱི་བུ་དེ་བཞིན་དུ་ཆོས་ཐམས་ཅད་སྒྱུ་མའི་མཚན་ཉིད་ཀྱི་རང་བཞིན་དང་ལྡན་པའི་ཕྱིར་དེ་བཞིན་གཤེགས་པའི་ཆོ་འཕྲུལ་ལ་དགའ་བ་ཡང་མི་སྐྱེ།

རངས་པར་ཡང་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་དེ་བཞིན་གཤེགས་པའི་སྤྲུལ་པས་དེ་བཞིན་གཤེགས་པའི་སྤོབས་པ་ཐོས་ན་དགའ་བར་མི་བྱེད། རངས་པར་མི་འགྱུར་རོ། །རིགས་ཀྱི་བུ་དེ་བཞིན་དུ་ཆོས་རྣམས་སྤྲུལ་པའི་རང་བཞིན་དུ་ཤེས་
ནས། དེ་བཞིན་གཤེགས་པ་ལ་ལྷག་པར་དགའ་བ་ཡང་མི་སྐྱེའོ། །སེམས་ཅན་གཞན་དག་ལ་ཡང་དམན་པར་མི་འཛིན་ཏོ། །དྲ་བ་ཅན་གྱི་འོད་ཀྱིས་སྨྲས་པ། ཚངས་པ་ཁྱོད་ཀྱི་ཆོས་ཐམས་ཅད་སྒྱུ་མས་སྤྲུལ་པའི་རང་བཞིན་དུ་ཤེས་སམ་སྨྲས་པ། རིགས་ཀྱི་བུ་གང་
རྣམས་གཉིས་སུ་རྣམ་པར་བཞག་པ་སྤྱོད་པ་དེ་དག་ལ་དྲིས་ཤིག །སྨྲས་པ། ཚངས་པ་ཁྱོད་གང་ལ་སྤྱོད། སྨྲས་པ། གང་ལ་བྱིས་པ་སོ་སོའི་སྐྱེ་བོ་ཐམས་ཅད་སྤྱོད་པ་དེ་ལ་ང་ཡང་སྤྱོད་དོ། །སྨྲས་པ། ཚངས་པ་བྱིས་པ་སོ་སོའི་སྐྱེ་བོ་རྣམས་ནི་འདོད་ཆགས་དང་། ཞེ་
སྡང་དང་། གཏི་མུག་རྣམས་ལ་སྤྱོད་དོ། །འཇིག་ཚོགས་ལ་ལྟ་བ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། ཐེ་ཙོམ་དང་། ངར་འཛིན་པ་དང་། ང་ཡིར་འཛིན་པ་དང་། འདོད་པ་དང་། འདོད་ཆེན་དང་། ལོག་པར་སྦྱོར་བ་རྣམས་ལ་སྤྱོད་པ་ན་ཇི་ཁྱོད་ཀྱང་
དེ་དག་ལ་སྤྱོད་དམ། སྨྲས་པ། རིགས་ཀྱི་བུ་ཁྱོད་སོ་སོའི་སྐྱེ་བོ་རྣམས་ཀྱི་སོ་སོའི་སྐྱེ་བོའི་ཆོས་ཡོངས་སུ་གྲུབ་པར་འདོད་དམ། སྨྲས་པ། སོ་སོའི་སྐྱེ་བོ་ཉིད་ཀྱང་ང་མི་འདོད་ན་དེ་དག་གི་ཆོས་ཡོངས་སུ་གྲུབ་པར་ག་ལ་འདོད། སྨྲས་པ། རིགས་ཀྱི་བུ་གང་འདི་ཆོས་ཡོངས་སུ་
མ་གྲུབ་པའི་ཆོས་དེ་ལ་ཆགས་པའམ། ཞེ་སྡང་བའམ། གཏི་མུག་པར་བྱ་བ་ཁྱོད་འདོད་དམ། སྨྲས་པ་དེ་ནི་མ་ཡིན་ནོ། །སྨྲས་པ། རིགས་ཀྱི་བུ་ཆོས་ཐམས་ཅད་ནི་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་བའི་སྤྱོད་པ་ཡང་དེའི་མཚན་ཉིད་དོ། །རིགས་ཀྱི་
བུ་དེ་ལྟར་སྤྱོད་པ་གཉིས་སུ་མེད་པའི་ཕྱིར་སོ་སོའི་སྐྱེ་བོའི་སྤྱོད་པ་གང་ཡིན་པ་དེ་ཉིད་འཕགས་པ་རྣམས་ཀྱི་སྤྱོད་པའོ། །རིགས་ཀྱི་བུ་ཡང་སྤྱོད་པ་ཐམས་ཅད་ནི་སྤྱོད་པ་མ་ཡིན་ནོ། །འདོགས་པ་ཐམས་ཅད་ནི་འདོགས་པ་མ་ཡིན་ནོ། །འགྲོ་བ་ཐམས་ཅད་ནི་འགྲོ་བ་མ་ཡིན་པའོ། །སྨྲས་

པ་ཚངས་པ་དེ་ཇི་ལྟར་ན་སྤྱོད་པ་ཐམས་ཅད་སྤྱོད་པ་མ་ཡིན། སྨྲས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་སྤྱད་ཀྱང་ཆོས་ཀྱི་དབྱིངས་ལ་བྲི་བའམ་གང་བར་མི་དམིགས་ཏེ། དེའི་ཕྱིར་སྤྱོད་པ་ཐམས་ཅད་སྤྱོད་པ་མ་ཡིན་ནོ། །སྨྲས་པ། ཚངས་པ་དེ་ཇི་ལྟར་ན་འདོགས་པ་
ཐམས་ཅད་འདོགས་པ་མ་ཡིན་ཞེ་ན། སྨྲས་པ། རིགས་ཀྱི་བུ་ཆོས་ཐམས་ཅད་འདོགས་པ་མ་ཡིན་པས་བཏགས་པ་སྟེ། དེའི་ཕྱིར་ཆོས་ཐམས་ཅད་དུ་འདོགས་པ་ནི་འདོགས་པ་མ་ཡིན་པའོ། །སྨྲས་པ། ཚངས་པ་དེ་ཇི་ལྟར་ན་འགྲོ་བ་ཐམས་ཅད་འགྲོ་བ་མ་ཡིན་ཞེ་ན། སྨྲས་པ།
གར་ཡང་མི་འགྲོ་བའི་ཕྱིར་འགྲོ་བ་ཐམས་ཅད་འགྲོ་བ་མ་ཡིན་པའོ། །དེ་ནས་བཅོམ་ལྡན་འདས་ཀྱིས་ཚངས་པ་ཁྱད་པར་སེམས་ལ་ཚངས་པ་ལེགས་སོ། །ལེགས་སོ། །གལ་ཏེ་བཤད་པར་བྱ་བ་དེ་ལྟར་བཤད་པར་བྱའོ། །ཞེས་ལེགས་སོ། །ཞེས་བྱ་བ་བྱིན་ནོ། །དེ་ནས་
གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་ཚངས་པ་ཁྱད་པར་སེམས་ལ་འདི་སྐད་ཅེས་སྨྲས་སོ། །ཚངས་པ་ཁྱོད་གང་འདི་སྐད་དུ་གང་ལ་བྱིས་པ་སོ་སོའི་སྐྱེ་བོ་ཐམས་ཅད་སྤྱོད་པ་དེ་ཉིད་ལ་བདག་སྤྱོད་དོ་ཞེས་ཟེར་ན་སྤྱོད་པ་དེ་ཁྱོད་ཀྱིས་ཐོབ་པ་ཡིན་ནོ། །སྨྲས་པ། རིགས་ཀྱི་བུ་གལ་
ཏེ་བདག་ལ་སྐྱེ་བའི་རྒྱུ་ཡོད་ན་ནི། བདག་གི་སྤྱོད་པ་ཡང་ཐོབ་པར་འགྱུར་རོ། །སྨྲས་པ། ཚངས་པ་དེ་གལ་ཏེ་མི་སྐྱེ་ན། ཇི་ལྟར་སེམས་ཅན་རྣམས་ཡོངས་སུ་སྨིན་པར་བྱེད་སྨྲས་པ། རིགས་ཀྱི་བུ་དེ་བཞིན་གཤེགས་པས་སྤྲུལ་པའི་སྐྱེ་བ་ཇི་ལྟ་བ་བདག་གི་སྐྱེ་བའང་དེ་དང་འདྲའོ། །
སྨྲས་པ། དེ་ནི་དེ་བཞིན་གཤེགས་པས་སྤྲུལ་པ་ལ་སྐྱེ་བ་གང་ཡང་མེད་དོ། །སྨྲས་པ་ཅི་དེ་བཞིན་གཤེགས་པས་སྤྲུལ་པས་སྣང་ངམ། སྨྲས་པ། སངས་རྒྱས་ཁྱུ་མཆོག་ལྟ་བུར་གྱུར་པའི་ཕྱིར་སྣང་ངོ་། །སྨྲས་པ། རིགས་ཀྱི་བུ་ལས་ཁྱུ་མཆོག་ལྟ་བུར་གྱུར་པའི་ཕྱིར་བདག་གི་
སྐྱེ་བ་ཡང་དེ་བཞིན་དུ་བལྟའོ། །སྨྲས་པ། ཚངས་པ་ཇི་ལས་མངོན་པར་འདུ་བྱེད་པ་ལ་སྤྱོད་དམ། སྨྲས་པ། རིགས་ཀྱི་བུ་བདག་ནི་ལས་མངོན་པར་འདུ་བྱེད་པ་ལ་མི་སྤྱོད་དོ། །སྨྲས་པ། ལས་མེད་པ་ལ་དེ་ཇི་ལྟར་ལས་ཁྱུ་མཆོག་ལྟ་བུར་འགྱུར། སྨྲས་པ། ལས་ཇི་ལྟ་བ་བཞིན་དུ་

དེའི་ཁྱུ་མཆོག་ཀྱང་དེ་བཞིན་ཉིད་ལས་མི་འདའོ། །དེ་ནས་བཅོམ་ལྡན་འདས་ལ་གནས་བརྟན་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་གླང་པོ་ཆེ་འདི་དག་གི་ལྡེམ་པོ་དག་ལ་གང་འཇུག་པར་འགྱུར་བ་དེ་དག་ནི་བསོད་ནམས་མང་དུ་སྐྱེད་པར་
འགྱུར་རོ། །དེ་ཅིའི་ཕྱིར་ཞེ་ན། བཅོམ་ལྡན་འདས་སྐྱེས་བུ་དམ་པ་དེ་དག་གི་མིང་ཙམ་ཐོས་པ་ཡང་ལེགས་པར་ཐོས་པ་ལགས་ན། ཆོས་བསྟན་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་འདི་ལྟ་སྟེ་དཔེར་ན། ཤིང་ལྗོན་པ་ས་ཆེན་པོ་ལ་མ་བརྟེན་པར་རྩ་བ་དང་། སྡོང་
པོ་དང་། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་སྟོན་པ་ལྟར་བཅོམ་ལྡན་འདས་སྐྱེས་བུ་དམ་པ་འདི་དག་གི་སྤྱོད་པའི་མཚན་ཉིད་ཀྱང་དེ་བཞིན་དུ་བལྟའོ། །འདི་ལྟར་ཆོས་ཐམས་ཅད་ལ་མི་གནས་ཤིང་། སྤྱོད་པ་དང་། སྐྱེ་བ་དང་། འབྱུང་བ་དང་། འཕོ་བ་
དང་། འཆི་བ་ཡང་སྟོན་ལ་སངས་རྒྱས་ཀྱི་ཞིང་དག་ན་ཡང་གདའ་བ་དེ་དག་ལ་ལྷག་པར་ཤེས་རབ་ཀྱི་སྤོབས་པ་འདི་ལྟ་བུ་ཡང་སྤོབས་པར་འགྱུར་རོ། །བཅོམ་ལྡན་འདས་ཤེས་རབ་ཀྱི་སྤོབས་པས་རྣམ་པར་འཕྲུལ་པ་འདི་ལྟ་བུ་མཐོང་ན་རིགས་ཀྱི་བུའམ་རིགས་ཀྱི་བུ་མོ་སུ་
ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེད།། །།བམ་པོ་གསུམ་པ། ཡང་དེའི་ཚེ་བྱང་ཆུབ་སེམས་དཔའ་ཀུན་ཏུ་མེ་ཏོག་ཅེས་བྱ་བ་འཁོར་དེར་འདུས་ཤིང་འདུག་པར་གྱུར་ཏེ། དེས་གནས་བརྟན་ཤཱ་རིའི་བུ་ལ་འདི་སྐད་ཅེས་སྨྲས་སོ། །གནས་
བརྟན་ནི་དེ་བཞིན་གཤེགས་པས་ཤེས་རབ་ཅན་གྱི་མཆོག་ཏུ་གསུངས་ན། འདི་ལྟར་ཤེས་རབ་ཀྱི་སྤོབས་པས་རྣམ་པར་འཕྲུལ་པ་འདི་ལྟ་བུས་རྣམ་པར་འཕྲུལ་མི་ནུས་པ་ཅི་གནས་བརྟན་གྱིས་ཆོས་ཀྱི་དབྱིངས་ཁོང་དུ་མ་ཆུད་དམ། གནས་བརྟན་གྱིས་སྨྲས་པ། ཀུན་ཏུ་མེ་ཏོག་
བཅོམ་ལྡན་འདས་ཀྱི་ཉན་ཐོས་རྣམས་ནི་ཡུལ་ཇི་ལྟ་བ་བཞིན་དུ་སྟོན་ཏོ། །སྨྲས་པ། བཙུན་པ་ཤཱ་རིའི་བུ་ཆོས་ཀྱི་དབྱིངས་ཡུལ་དུ་བགྲང་ངམ། སྨྲས་པ་དེ་ནི་མ་ཡིན་ནོ། །སྨྲས་པ། འོ་ན་ཇི་ལྟར་གནས་བརྟན་ཤཱ་རིའི་བུ་ཡུལ་ཇི་ལྟ་བ་བཞིན་དུ་སྟོན། སྨྲས་པ། ཉན་ཐོས་ཀྱི་

ཁོང་དུ་ཆུད་པ་ཇི་ཙམ་པ་བསྟན་པའང་དེ་ཙམ་མོ། །སྨྲས་པ། ཅི་གནས་བརྟན་གྱིས་ཆོས་ཀྱི་དབྱིངས་ཀྱི་ཡུལ་རྣམ་པ་ཚད་མེད་པ་ཁོང་དུ་ཆུད་དམ། སྨྲས་པ། རིགས་ཀྱི་བུ་དེ་དེ་བཞིན་ནོ། །སྨྲས་པ། ཆོས་ཀྱི་དབྱིངས་ལ་ཚད་ཡོད་པ་མ་ཡིན་པས་ན་ཆོས་ཀྱི་དབྱིངས་ནི་ཚད་མེད་པ་
ཡིན་ཏེ། བཙུན་པ་ཤཱ་རིའི་བུ་ཇི་ལྟར་ཚད་མེད་པར་ཁོང་དུ་ཆུད་པ་དེ་བཞིན་དུ་ཚད་མེད་པར་བསྟན་པ་ཡིན་ན། དེ་ཇི་ལྟར་གང་གིས་ཁོང་དུ་ཆུད་པ་ཇི་འདྲ་བར་དེའི་བསྟན་པ་ཡང་དེ་འདྲ་བར་འགྱུར། སྨྲས་པ། ཀུན་ཏུ་མེ་ཏོག་ཆོས་ཀྱི་དབྱིངས་ནི་ཁོང་དུ་ཆུད་པའི་མཚན་ཉིད་མ་ཡིན་
ནོ། །སྨྲས་པ། བཙུན་པ་ཤཱ་རིའི་བུ་ཆོས་ཀྱི་དབྱིངས་ཁོང་དུ་ཆུད་པའི་མཚན་ཉིད་མ་ཡིན་ན་ཅི་ཁྱོད་ཆོས་ཀྱི་དབྱིངས་དང་ཐ་དད་དུ་རྣམ་པར་གྲོལ་ལམ། སྨྲས་པ། དེ་ནི་མ་ཡིན་ནོ། །སྨྲས་པ། ཅིའི་ཕྱིར་སྨྲས་པ། ཆོས་ཀྱི་དབྱིངས་ཐ་དད་པར་འགྱུར་བའི་ཕྱིར་རོ། །
སྨྲས་པ། བཙུན་པ་ཤཱ་རིའི་བུ་དེའི་ཕྱིར་ཁོང་དུ་ཆུད་པ་ཇི་ལྟ་བ་བཞིན་དུ་ཆོས་ཀྱི་དབྱིངས་ཀྱང་དེ་བཞིན་ནོ། །སྨྲས་པ། ཀུན་ཏུ་མེ་ཏོག་བདག་ནི་སྟོན་འདོད་པ་མ་ཡིན་གྱི་བདག་ནི་ཉན་དུ་འདོད་པའོ། །སྨྲས་པ། བཙུན་པ་ཤཱ་རིའི་བུ་ཆོས་ཐམས་ཅད་ཆོས་ཀྱི་དབྱིངས་མི་འགྱུར་བར་
ངེས་པ་ལ་ཇི་ལྟར་བཤད་པར་བྱ་བའམ། མཉན་པར་བྱ་བའམ། སྨྲས་པ་དེ་ནི་མ་ཡིན་ནོ། །སྨྲས་པ། འོ་ན་ཅིའི་ཕྱིར་ཁྱོད་བདག་ནི་ཉན་པར་འདོད་པ་ཡིན་གྱི་སྟོན་པར་འདོད་པ་མ་ཡིན་སྙམ་དུ་སེམས། སྨྲས་པ། རིགས་ཀྱི་བུ་དེ་བཞིན་གཤེགས་པས་ཀྱང་གང་གུས་པར་
ཆོས་བསྟན་པ་དང་། གང་གུས་པར་ཆོས་ཉན་པ་གང་ཟག་གཉིས་ནི་བསོད་ནམས་མང་དུ་བསྐྱེད་དོ་ཞེས་གསུངས་ཀྱིས། དེའི་ཕྱིར་ཁྱོད་ཀྱིས་ཤོད་ཅིག་བདག་གིས་མཉན་ཏོ། །སྨྲས་པ། གནས་བརྟན་ཤཱ་རིའི་བུ་འདུ་ཤེས་དང་ཚོར་བ་ཐམས་ཅད་ལ་འགོག་པར་སྙོམས་པར་ཞུགས་
ལ་ཆོས་ཉན་ནུས་སམ། སྨྲས་པ། རིགས་ཀྱི་བུ་གང་གིས་མཉན་པར་བྱ་བའི་གཉིས་ལ་འཇུག་པ་འགོག་པ་ལ་མེད་དོ། །སྨྲས་པ། གནས་བརྟན་ཤཱ་རིའི་བུ་ཆོས་ཐམས་ཅད་རང་བཞིན་གྱིས་འགག་པར་འདོད་དམ། སྨྲས་པ། རིགས་ཀྱི་བུ་དེ་བཞིན་ཏེ། ཆོས་ཐམས་ཅད་ནི་ཤིན་ཏུ་

འགག་པའོ། །སྨྲས་པ། དེའི་ཕྱིར་གནས་བརྟན་ཤཱ་རིའི་བུ་རྟག་ཏུ་མི་ཆད་པར་ཆོས་མཉན་པའི་སྐལ་བ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་རང་བཞིན་གྱིས་འགག་པའི་ཕྱིར་རོ། །སྨྲས་པ། རིགས་ཀྱི་བུ་ཁྱོད་ཏིང་ངེ་འཛིན་ལས་མ་ལངས་པར་
ཆོས་སྟོན་ནུས་སམ། སྨྲས་པ། གནས་བརྟན་ཤཱ་རིའི་བུ་གང་རྟག་ཏུ་མཉམ་པར་མ་བཞག་པའི་ཆོས་གང་ཡང་དམིགས་སམ། སྨྲས་པ། དེ་ནི་མ་ཡིན་ནོ། །སྨྲས་པ། འོ་ན་བྱིས་པ་སོ་སོའི་སྐྱེ་བོ་ཐམས་ཅད་ཀྱང་མཉམ་པར་བཞག་པར་འགྱུར་རོ། །སྨྲས་པ། རིགས་ཀྱི་བུ་ཏིང་ངེ་
འཛིན་གང་ལ་བྱིས་པ་སོ་སོའི་སྐྱེ་བོ་རྣམས་མཉམ་པར་བཞག་པ་ཡིན། སྨྲས་པ། ཆོས་ཀྱི་དབྱིངས་མི་འཁྲུགས་པའི་ཏིང་ངེ་འཛིན་ལའོ། །སྨྲས་པ། ཀུན་ཏུ་མེ་ཏོག་དེ་ལྟ་ཡིན་དུ་ཟིན་ན་སོ་སོའི་སྐྱེ་བོ་རྣམས་དང་། འཕགས་པ་རྣམས་སུ་བྱེ་བྲག་མེད་པར་འགྱུར་རོ། །སྨྲས་པ།
བཙུན་པ་ཤཱ་རིའི་བུ་དེ་དེ་བཞིན་ཏེ། ང་ནི་འཕགས་པ་དང་། སོ་སོའི་སྐྱེ་བོ་རྣམས་ཐ་དད་དུ་དབྱེ་བར་མི་འདོད་དོ། །དེ་ཅིའི་ཕྱིར་ཞེ་ན། འཕགས་པ་རྣམས་ཀྱིས་ཀྱང་ཆོས་གང་ཡང་མ་འགགས། བྱིས་པ་སོ་སོའི་སྐྱེ་བོ་རྣམས་ཀྱིས་ཀྱང་ཆོས་གང་ཡང་མ་བསྐྱེད་དེ་ཆོས་ཀྱི་
དབྱིངས་མཉམ་པ་ཉིད་དེ་གང་ཡིན་པ་དེ་ཉིད་ལས་ཀྱང་མི་འདའོ། །སྨྲས་པ། རིགས་ཀྱི་བུ་ཆོས་རྣམས་ཀྱི་མཉམ་པ་ཉིད་གང་ཡིན། སྨྲས་པ། གང་གནས་བརྟན་གྱིས་ཡོངས་སུ་ཤེས་པ་དེ་སྟོན་ཏེ། གནས་བརྟན་གྱིས་ཀྱང་འཕགས་པའི་ཆོས་རྣམས་བསྐྱེད་དམ། སྨྲས་
པ་དེ་མ་ཡིན་ནོ། །སྨྲས་པ། ཇི་ཁྱོད་ཀྱིས་སོ་སོའི་སྐྱེ་བོ་རྣམས་འགག་པར་བྱས་སམ། སྨྲས་པ་དེ་མ་ཡིན་ནོ། །སྨྲས་པ་འོ་ན་ཁྱོད་ཀྱིས་འཕགས་པའི་ཆོས་རྣམས་ཐོབ་བམ། སྨྲས་པ། དེ་མ་ཡིན་ནོ། །སྨྲས་པ། འོ་ན་ཅི་ཁྱོད་ཀྱིས་སོ་སོའི་སྐྱེ་བོའི་ཆོས་རྣམས་ཡོངས་སུ་ཤེས་
སམ། སྨྲས་པ་དེ་མ་ཡིན་ནོ། །སྨྲས་པ་འོ་ན་གནས་བརྟན་གྱིས་ཡོངས་སུ་ཤེས་པས་ཅི་མངོན་པར་རྟོགས། སྨྲས་པ། བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ཀྱི་དེ་བཞིན་ཉིད་གང་ཡིན་པ་རྣམ་པར་གྲོལ་མ་ཐག་པའི་དེ་བཞིན་ཉིད་ཀྱང་དེ་ཡིན། ཡོངས་སུ་མྱ་ངན་

ལས་འདས་པའི་དེ་བཞིན་ཉིད་ཀྱང་དེ་ཡིན་ནོ། །སྨྲས་པ། བཙུན་པ་ཤཱ་རིའི་བུ་དེ་བཞིན་ཉིད་དེ་ནི་མ་ལོག་པ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། མི་འགྱུར་བ་དེ་བཞིན་ཉིད་དང་། མི་འཁྲུག་པ་དེ་བཞིན་ཉིད་དེ། བཙུན་པ་ཤཱ་རིའི་བུ་དེ་བཞིན་ཉིད་འདིས་
ཆོས་ཐམས་ཅད་ཀྱི་དེ་བཞིན་ཉིད་རྗེས་སུ་རིག་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་སྟེ། དཔེར་ན་མེའི་ཕུང་པོ་རབ་ཏུ་འབར་བའི་མེ་ལྕེ་ཐམས་ཅད་ནི་སྲེག་པར་ཉེ་བར་གནས་པ་ལགས་
སོ། །བཅོམ་ལྡན་འདས་དེ་བཞིན་དུ་རིགས་ཀྱི་བུ་འདི་དག་གིས་བསྟན་པ་ཐམས་ཅད་ཆོས་ཀྱི་དབྱིངས་བསྟན་པ་སྟེ། ཆོས་བསྟན་པ་ཐམས་ཅད་ཀྱང་ཉོན་མོངས་པ་ཐམས་ཅད་སྲེག་པར་ཉེ་བར་གནས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དེ་
དེ་བཞིན་ནོ། །དེ་ནི་ཇི་སྐད་སྟོན་པ་དེ་བཞིན་ཏེ། རིགས་ཀྱི་བུ་འདི་དག་གིས་བསྟན་པ་ཐམས་ཅད་ཆོས་ཀྱི་དབྱིངས་བསྟན་པ་སྟེ། ཆོས་བསྟན་པ་ཐམས་ཅད་ཀྱང་ཉོན་མོངས་པ་ཐམས་ཅད་སྲེག་པར་ཉེ་བར་གནས་པ་ཡིན་ནོ། །དེ་ནས་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་གནས་
བརྟན་ཤཱ་རིའི་བུ་ལ་འདི་སྐད་ཅེས་སྨྲས་སོ། །གནས་བརྟན་ཤཱ་རིའི་བུ་བཅོམ་ལྡན་འདས་ཀྱིས་ཤེས་རབ་དང་ལྡན་པ་རྣམས་ཀྱི་ནང་ན་མཆོག་ཏུ་གསུངས་ན། གནས་བརྟན་ཤཱ་རིའི་བུ་ཤེས་རབ་གང་གིས་ཤེས་རབ་དང་ལྡན་པའི་མཆོག་ཏུ་གསུངས་པའི་ཤེས་རབ་དེ་གང་ཡིན། སྨྲས་
པ། དྲ་བ་ཅན་གྱི་འོད་གང་ཉན་ཐོས་སྒྲའི་རྗེས་སུ་འབྲང་བ། རང་གི་རྒྱུད་སྣང་བའི་མཚན་ཉིད། ཉེ་ཚེ་བའི་ཡེ་ཤེས་ཀྱིས་རྣམ་པར་གྲོལ་བ་རྣམས་ཀྱི་ཤེས་རབ་སྟེ། ཤེས་རབ་དེས་བདག་ཤེས་རབ་དང་ལྡན་པ་རྣམས་ཀྱི་མཆོག་ཏུ་གསུངས་ཀྱི་བྱང་ཆུབ་སེམས་དཔའི་ཤེས་རབ་
ཀྱིས་ནི་མ་ཡིན་ནོ། །སྨྲས་པ། ཅི་ཤེས་རབ་སྤྲོས་པའི་མཚན་ཉིད་དམ། སྨྲས་པ་དེ་མ་ཡིན་ནོ། །སྨྲས་པ་འོ་ན་ཤེས་རབ་མཉམ་པ་ཉིད་རྗེས་སུ་སྤྱོད་པའམ། སྨྲས་པ། རིགས་ཀྱི་བུ་དེ་དེ་བཞིན་ནོ། །སྨྲས་པ། གནས་བརྟན་ཤཱ་རིའི་བུ་མཉམ་པ་ཉིད་ཀྱི་རྗེས་སུ་སྤྱོད་པའི་ཤེས་

རབ་ཀྱིས་ཇི་ལྟར་ཤེས་རབ་ཚད་ཅན་དུ་བཤད། སྨྲས་པ། རིགས་ཀྱི་བུ་ཆོས་ཀྱི་དབྱིངས་ཀྱི་རྒྱུས་ནི་ཤེས་རབ་ཚད་མེད་དོ། །ཡུལ་ཇི་ལྟ་བ་བཞིན་དུ་ཡེ་ཤེས་འཇུག་པས་ནི་ཚད་ཟིན་པའོ། །སྨྲས་པ། བཙུན་པ་ཤཱ་རིའི་བུ་ཡེ་ཤེས་ཚད་མེད་པའམ། འོན་
ཏེ་ཚད་ཡོད་པ་ཡིན། སྨྲས་པ། རིགས་ཀྱི་བུ་ཡེ་ཤེས་ནི་ཚད་མེད་པའོ། །སྨྲས་པ། འོ་ན་ཚད་མེད་པ་ཇི་ལྟར་ཚད་ཟིན་པ་སྟོན། དེ་ནས་གནས་བརྟན་ཤཱ་རིའི་བུ་ཅང་མི་ཟེར་བར་གྱུར་ཏོ། །དེ་ནས་སངས་རྒྱས་ཀྱི་མཐུས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་
སྐད་ཅེས་གསོལ་ཏོ། །བཅོམ་ལྡན་འདས་གཞོན་ནུར་གྱུར་པ་དྲ་བ་ཅན་གྱི་འོད་ལ་ཅིའི་སླད་དུ་དྲ་བ་ཅན་གྱི་འོད་ཅེས་བགྱི། དེ་ནས་བཅོམ་ལྡན་འདས་ཀྱིས་དྲ་བ་ཅན་གྱི་འོད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གང་གིས་ལྷ་དང་བཅས་པའི་འཇིག་རྟེན་འདི་དགའ་བར་
གྱུར་ནས་དགེ་བའི་རྩ་བ་ཡོངས་སུ་སྨིན་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བའི་འོད་རང་གི་དགེ་བའི་རྩ་བས་ཡོངས་སུ་སྦྱངས་པ་ཁྱོད་ཀྱིས་སྟོན་ཅིག །དེ་ནས་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་བཅོམ་ལྡན་འདས་ལ་ལེགས་
སོ། །ཞེས་གསོལ་ཏེ་མཉན་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས། ལག་པ་གཡས་པ་དྲ་བ་ཅན་གྱི་སེན་མོ་ཟངས་ལྟ་བུ་ལས་འོད་ཟེར་བྱུང་ནས་འོད་ཟེར་དེས་
ཚད་མེད་མུ་མེད་པའི་འཇིག་རྟེན་གྱི་ཁམས་ཐལ་ནས་ཕྱོགས་བཅུའི་སངས་རྒྱས་ཀྱི་ཞིང་ཚད་མེད་པ་རྣམས་འོད་ཀྱིས་ཁྱབ་པར་བྱས་ཏེ། འོད་དེས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་པ་ན་སེམས་ཅན་དམྱལ་བ་པའི་སེམས་ཅན་ནམ། དུད་འགྲོའི་སྐྱེ་གནས་
སུ་སྐྱེས་པའམ། གཤིན་རྗེའི་འཇིག་རྟེན་པའམ། ལོང་བའམ། འོན་པའམ། ཐེང་པོའམ། ལག་ཞའམ། ནད་བུ་ཅན་ནམ། ཆགས་པའམ། གཏུམ་པའམ། རྨོངས་པའམ། གཅེར་བུའམ། ལྟོགས་པའམ། སྐོམ་པའམ། བཅིངས་པའམ། གཟུང་བའམ། དབུལ་བའམ།

རིད་པའམ། རྒས་པའམ། འཆི་བའི་ཆོས་ཅན་ནམ། སེར་སྣ་ཅན་ནམ། གནོད་པར་སེམས་པའམ། ངང་ཚུལ་ངན་པ་ཅན་ནམ། འཛུད་པའམ། དྲན་པ་ཉམས་པའམ། འཆལ་པའི་ཤེས་རབ་ཅན་ནམ། མ་དད་པའམ། ཐོས་པ་ཉུང་བའམ། བསོད་ནམས་ཆུང་བའམ།
ངོ་ཚ་མི་ཤེས་པའམ། ཁྲེལ་