Kinh tạng Tây Tạng (Kangyur Đại Học) — 059_མདོ་སྡེ།_བ

ཆོས་ཐམས་ཅད་མཉམ་པ་ཉིད་དུ་ཤེས་པའི་རྗེས་སུ་འཇུག་པ། སངས་རྒྱས་ཐམས་ཅད་ཀྱི་ཡེ་ཤེས་ལ་འཇུག་པ། བྱིན་གྱི་རླབས་ཐོགས་པ་མེད་པའི་སྒོ་ལ་འཇུག་པ་ཆོས་ཐམས་ཅད་ཅི་ལྟ་བ་བཞིན་དུ་རྣམ་པར་གདོན་མི་
ཟ་བར་སྟོན་པ། མི་རྟོག་རྣམ་པར་མི་རྟོག་ལ་མཉམ་པ་ཉིད་དུ་འཇུག་པ་རྟེན་ཅིང་འབྲེལ་པར་འབྱུང་བ་ཟབ་མོ་ཁོང་དུ་ཆུད་པ་བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་སོགས་པ། སངས་རྒྱས་ཀྱི་སྐུ་དང་། གསུང་དང་། ཐུགས་མཉམ་པ་ཉིད་ཀྱི་རྒྱན་དང་ལྡན་པ། དྲན་པ་དང་། བློ་གྲོས་དང་།
མོས་པ་དང་། རྟོགས་པ་དང་། ཤེས་རབ་མི་ཟད་པ་མངོན་པར་སྒྲུབ་པ། ཉན་ཐོས་ཀྱི་ཐེག་པས་འདུལ་བའི་ཕྱིར་འཕགས་པའི་བདེན་པའི་ཚུལ་ལ་འཇུག་པ། རང་སངས་རྒྱས་ཀྱི་ཐེག་པས་འདུལ་བའི་ཕྱིར་ལུས་དང་སེམས་རབ་ཏུ་དབེན་པར་ཤེས་པ་ཐེག་པ་ཆེན་པོས་འདུལ་བའི་ཕྱིར་ཐམས་ཅད་

མཁྱེན་པའི་ཡེ་ཤེས་ཀྱི་སར་དབང་བསྐུར་བ་འཐོབ་པ། དེ་བཞིན་གཤེགས་པའི་ཡོན་ཏན་བརྗོད་པའི་ཕྱིར། ཆོས་ཐམས་ཅད་ལ་དབང་བྱེད་པའི་ཚུལ་ལ་འཇུག་པ་བརྗོད་དོ། །སྟོན་ཏོ་རབ་ཏུ་སྟོན་ཏོ། །འཛིན་དུ་འཇུག་གོ། །མོས་པར་མཛད་དོ། །ལེན་དུ་འཇུག་གོ། །ཤེས་པར་མཛད་དོ། །
རྣམ་པར་ཤེས་པར་མཛད་དོ། །རབ་ཏུ་ཤེས་པར་མཛད་དོ། །རབ་ཏུ་འཇུག་གོ། །རྣམ་པར་འགྲེལ་ཏོ། །རྣམ་པར་འབྱེད་དོ། །གསལ་བར་མཛད་དོ། །ཡང་དག་པར་རབ་ཏུ་སྟོན་ཏོ། །དེ་ནས་བཅོམ་ལྡན་འདས་ཀྱིས་ཤིན་ཏུ་རྣམ་པར་གདོན་མི་ཟ་བའི་དོན་གྱི་ཆོས་ཀྱི་རྣམ་གྲངས་
འདི་ལྟ་བུ་རྒྱ་ཆེར་ཡང་དག་པར་རབ་ཏུ་སྟོན་པ་ན། འཁོར་དེ་ཉིད་དུ་བུ་མོ་རིན་ཆེན་ཞེས་བྱ་བ་ཞིག་འདུས་པར་གྱུར་ཏེ་འདུག་པ་དེ་སྟན་ལས་ལངས་ཏེ། ལག་པ་གཡས་པར་མུ་ཏིག་གི་སེ་མོ་དོ་ཐོགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་
བདེན་པ་དང་། བདེན་པའི་ཚིག་གང་གིས་སེམས་ཅན་ཆེན་པོ་འདི་དག་གིས་བསྟན་པའི་ཆོས་ཀྱི་རྣམ་གྲངས་འདུས་པའི་ལེའུ་འདི་བས་པར་ཆུབ་པར་འཛིན་པར་འགྱུར་བ་དང་། ཕྱོགས་བཅུ་རྣམས་སུ་ཡང་རྒྱས་པར་བགྱིད་པར་འགྱུར་བ་དང་། སེམས་ཅན་དཔག་ཏུ་མ་མཆིས་པ་རྣམས་
བླ་ན་མེད་པའི་ཆོས་དཀོན་མཆོག་གིས་མཐར་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འགོད་པར་འབྱུང་བའི་བདེན་པ་དང་། བདེན་པའི་ཚིག་དེས་བདག་གིས་མུ་ཏིག་གི་སེ་མོ་དོ་འདི་དེ་བཞིན་གཤེགས་པ་ལ་འབུལ་ལགས་ཏེ། དེ་དེ་བཞིན་གཤེགས་པ་དང་། བྱང་ཆུབ་སེམས་
དཔའ་ཐམས་ཅད་ཀྱི་དབུའི་གཙུག་གི་མཚམས་སུ་མུ་ཏིག་གི་སེ་མོ་དོའི་ཁང་པ་བརྩེགས་པ་ཀུན་དུ་གནས་ཤིང་བཀོད་པ་ཅི་འདྲ་བས་སྐྱེས་བུ་དམ་པ་དེ་དག་བྱང་ཆུབ་མངོན་པར་རྫོགས་པར་འཚང་རྒྱ་བ་དང་། དེ་དག་གིས་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཅི་འདྲ་བར་འགྱུར་བ་དེ་འདྲ་བ་
དག་ཁང་པ་བརྩེགས་པ་དེ་དག་ལས་ཀུན་དུ་དགའ་ཞིང་འཁོར་ཐམས་ཅད་ཀྱིས་བཀོད་པ་འདི་མཐོང་ནས་ཡི་རངས་པར་གྱུར་ཅིག །དེ་ནས་བུ་མོ་རིན་ཆེན་གྱིས་མུ་ཏིག་གི་སེ་མོ་དོ་དེ་བཅོམ་ལྡན་འདས་ག་ལ་བ་དེ་ལོགས་སུ་བོར་རོ། །མུ་ཏིག་གི་སེ་མོ་དོ་དེ་བོར་མ་ཐག་ཏུ་དེ་ནས་སངས་རྒྱས་ཀྱི་

མཐུ་དང་བུ་མོ་རིན་ཆེན་གྱི་བདེན་པའི་བྱིན་གྱི་རླབས་ཀྱིས། བཅོམ་ལྡན་འདས་ཀྱི་དབུའི་གཙུག་གི་མཚམས་དང་། བྱང་ཆུབ་སེམས་དཔའ་ཐམས་ཅད་ཀྱི་སྤྱི་གཙུག་གི་མཚམས་སུ་ཁང་པ་བརྩེགས་པ་ཆེན་པོ་ཤིན་ཏུ་ཡངས་པ་རྒྱ་ཆེ་བ་རྣམ་པར་བཀྲ་བ་བལྟ་ན་སྡུག་པ། ངོས་
མཉམ་པ་ཤིན་ཏུ་རྣམ་པར་ཕྱེ་བ་ལེགས་པར་གྲུབ་པ་གནས་པར་གྱུར་ཏེ། བྱང་ཆུབ་སེམས་དཔའ་དེ་དག་སྔོན་བདག་ཅག་གི་སངས་རྒྱས་ཀྱི་ཞིང་གི་ཡོན་ཏན་བཀོད་པ་འདི་འདྲ་བར་གྱུར་ཅིག །བྱང་ཆུབ་ཀྱི་སྙིང་པོ་འདི་འདྲ་བར་གྱུར་ཅིག་ཅེས་སྨོན་ལམ་བཏབ་པའི་ཁྱད་པར་ཅི་འདྲ་བ་དེ་ལྟ་བུའི་བཀོད་པ་
དག་ཀྱང་བྱང་ཆུབ་སེམས་དཔའ་དེ་དག་གིས་ཁང་པ་བརྩེགས་པ་དེ་དག་ལས་མཐོང་ངོ་། །མཐོང་ནས་ཀྱང་ངོ་མཚར་དུ་གྱུར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་ཇི་ཙམ་དུ་བདག་ཅག་གིས་བསྐལ་པ་གྲངས་མ་མཆིས་པར་སྨོན་ལམ་
མངོན་པར་འདུས་བགྱིས་པར་ཐམས་ཅད་བུ་མོ་རིན་ཆེན་གྱི་སྐད་ཅིག་གཅིག་ལ་བསྟན་པ་ནི་བུ་མོ་རིན་ཆེན་འདི་བདེན་པའི་བྱིན་གྱི་རླབས་ཀྱི་སྟོབས་ཅན་ལགས་ཏེ་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །སྐྱེས་བུ་དམ་པ་དག་ཇི་སྐད་སྨྲས་པ་དེ་བཞིན་ཏེ།
བུ་མོ་རིན་ཆེན་འདི་བདེན་པའི་བྱིན་གྱི་རླབས་ལས་ངེས་པར་བྱུང་བའོ། །སྐྱེས་བུ་དམ་པ་དག་བུ་མོ་རིན་ཆེན་གྱིས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དྲུག་ལས་དགེ་བའི་རྩ་བ་བསྐྲུན་ནས་བདེན་པའི་བྱིན་གྱི་རླབས་འདི་ཡོངས་སུ་བླངས་ཏེ། དེ་ནས་བུ་མོ་རིན་ཆེན་འདིས་
ཇི་སྐད་སྨྲས་པ་དེ་ལྟར་ཀུན་དུ་གནས་སོ། །གལ་ཏེ་བུ་མོ་རིན་ཆེན་གྱིས་ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནི་མེ་ཏོག་གིས་རབ་ཏུ་གང་བར་ཀུན་དུ་གནས་པར་གྱུར་ཅིག་ཅེས་སྨྲས་ན་ཡང་དེ་དེ་བཞིན་དུ་འགྱུར་རོ། །དེ་བཞིན་དུ་སྤོས་དང་།
ཕྲེང་བ་དང་། བྱུག་པ་དང་། ཕྱེ་མ་དང་། གོས་ཀྱིས་རབ་ཏུ་གང་བར་ཀུན་དུ་གནས་པར་གྱུར་ཅིག་ཅེ་ན་ཡང་དེ་དེ་བཞིན་དུ་འགྱུར་རོ། །གལ་ཏེ་བར་སྣང་འདི་ཐམས་ཅད་གདུགས་དང་། རྒྱལ་མཚན་དང་། བ་དན་གྱིས་བརྒྱན་པར་ཀུན་དུ་གནས་པར་གྱུར་ཅིག་ཅེ་ན་ཡང་དེ་

དེ་བཞིན་དུ་འགྱུར་རོ། །ཆུས་འཇིག་པ་བྱུང་བ་ལ་མེ་ཡིས་འཇིག་པར་གྱུར་ཅིག་ཅེ་ན་ཡང་དེ་དེ་བཞིན་དུ་འགྱུར་རོ། །གལ་ཏེ་མེ་ཡིས་འཇིག་པ་བྱུང་བ་ལ་ཆུ་ཡིས་འཇིག་པར་གྱུར་ཅིག་ཅེ་ན་ཡང་དེ་དེ་བཞིན་དུ་འགྱུར་རོ། །ཐམས་ཅད་དང་ལྡན་པའི་འཁོར་འདི་འཁོར་ལོས་སྒྱུར་བའི་ཁ་དོག་དང་།
གཟུགས་སུ་གྱུར་ཅིག་ཅེ་ན་ཡང་དེ་དེ་བཞིན་དུ་འགྱུར་རོ། །དེ་བཞིན་དུ་འཇིག་རྟེན་སྐྱོང་བའི་ཁ་དོག་དང་། གཟུགས་དང་། བརྒྱ་བྱིན་དང་། ཚངས་པ་དང་། དབང་ཕྱུག་ཆེན་པོའི་ཁ་དོག་དང་། གཟུགས་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མའི་
ཁ་དོག་དང་། གཟུགས་སུ་གྱུར་ཅིག་ཅེ་ན་ཡང་དེ་དེ་བཞིན་དུ་འགྱུར་རོ། །གལ་ཏེ་བདུད་རེ་རེ་ལ་ཡང་ལག་ན་མཚོན་ཐོགས་པའི་བདུད་ཀྱི་སྡེ་བྱེ་བ་ཕྲག་བརྒྱ་ལྷག་པ་ལ་བདུད་དང་། བདུད་ཀྱི་རིས་ཐམས་ཅད་ཀྱི་རལ་གྲི་དང་། མདུང་ཐུང་དང་། མདའ་བོ་ཆེ་དང་། མཚོན་རྩེ་
གཉིས་པ་དང་། མཚོན་ཆ་སྣ་ཚོགས་གང་ཡིན་པ་དེ་དག་ཐམས་ཅད་རིན་པོ་ཆེ་སྣ་ཚོགས་ཀྱིས་སྤྲས་པའི་མུ་ཏིག་གི་སེ་མོ་དོར་ཀུན་དུ་གནས་པ་དང་། སྣ་མའི་མེ་ཏོག་དང་། ཨུཏྤ་ལ་དང་། པ་རི་ཤ་ཀ་དང་། ཙམ་པ་ཀའི་ལྡ་ལྡིར་ཀུན་དུ་གནས་པར་གྱུར་ཅིག་ཅེ་ན་ཡང་དེ་དེ་
བཞིན་དུ་འགྱུར་རོ། །གལ་ཏེ་འབྲོག་དགོན་པར་བཟའ་བ་དང་། བཏུང་བ་དང་། ཁ་ཟས་མེད་པ་དག་ཏུ་ཁྱིམ་བྱེ་བ་ཕྲག་བཅྭ་བརྒྱད་པའི་གྲོང་ཁྱེར་ཆེན་པོ་ཀུན་དུ་གནས་ཤིང་། བཟའ་བ་དང་། བཏུང་བ་དང་། ཁ་ཟས་མང་པོ་བྱུང་བར་གྱུར་ཅིག་ཅེ་ན་ཡང་དེ་དེ་བཞིན་དུ་འགྱུར་རོ། །
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གཟུགས་སུ་སྣང་བ་དེ་དག་དེ་བཞིན་གཤེགས་པའི་གཟུགས་སུ་ཀུན་དུ་གནས་པར་གྱུར་ཅིག་ཅེ་ན་ཡང་དེ་དེ་བཞིན་དུ་འགྱུར་རོ། །འཁོར་འདི་ཐམས་ཅད་ནམ་མཁའ་ལ་གནས་པར་གྱུར་ཅིག་ཅེ་ན་ཡང་དེ་དེ་བཞིན་དུ་འགྱུར་རོ། །རིགས་
ཀྱི་བུ་དག་གལ་ཏེ་བུ་མོ་རིན་ཆེན་གྱིས་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་སངས་རྒྱས་བཅོམ་ལྡན་འདས་ཆོས་སྟོན་པར་འཇུག་པ་ཇི་སྙེད་པ་དེ་བར་སྣང་འདི་ལས་ལྷག་ཆད་མེད་ཅིང་མཐའ་དག་རྫོགས་པར་རྣམ་པའི་མཆོག་ཐམས་ཅད་དང་ལྡན་པར་བྱུང་བར་གྱུར་

ཅིག་ཅེ་ན་ཡང་དེ་དེ་བཞིན་དུ་འགྱུར་ཏེ། གང་བུ་མོ་རིན་ཆེན་གྱི་ལས་དེ་ཆུང་ཟད་ཀྱང་དོན་མེད་པ་མ་ཡིན་ནོ། །དེ་ནས་བུ་མོ་རིན་ཆེན་གྱིས་བདེན་པའི་བྱིན་གྱི་རླབས་དང་། རྫུ་འཕྲུལ་གྱི་སྟོབས་དང་། རྣམ་པར་འཕྲུལ་པ་དང་། ཆོ་འཕྲུལ་གྱི་རྣམ་པ་འདི་ལྟ་བུ་འདི་ཀུན་དུ་
བསྟན་ནས། བཅོམ་ལྡན་འདས་ལ་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །རིན་ཆེན་འབྱུང་གནས་ཡེ་ཤེས་རིན་ཆེན་མངའ། །རིན་ཆེན་མཆོག་སྟོན་ཡོན་ཏན་མཐའ་ཡས་པ། །རྒྱལ་པོའི་རྒྱལ་པོ་དགྲ་དང་ཤར་གཉེར་གཅོད། །བྱང་ཆུབ་ཡན་
ལག་རིན་ཆེན་ནོར་བདུན་སྦྱིན། །རིན་ཆེན་འོད་ཀྱི་འོད་ནི་མཐའ་ཡས་པ། །ནོར་བུ་རིན་ཆེན་རྣམ་པ་སྣ་ཚོགས་འོད། །རིན་ཆེན་དམ་པ་རྒྱལ་བ་རིན་ཆེན་ཏོག །བདེ་གཤེགས་ཁྱོད་ལ་རིན་ཆེན་རྣམས་ཀྱིས་མཆོད། །རྡོ་ཡི་སྙིང་པོ་ས་སྙིང་ནོར་བུ་གང་། །སྣང་འོད་དྲི་མེད་སྙིང་པོ་ནོར་བུ་དང་། །
རིན་པོ་ཆེ་དང་ཉི་མ་ཟླ་བའི་འོད། །ཁྱོད་ཀྱི་སྐུ་ཡི་འོད་ཀྱིས་ཟིལ་དུ་རླག །ཐུབ་པ་ཁྱོད་ཀྱི་སྐུ་ཚད་བརྟག་པར་ནི། །ས་བཅུའི་བར་ལ་གནས་པས་མི་དམིགས་སོ། །འཇིག་རྟེན་གཙོ་ཁྱོད་ས་ལ་བཞུགས་ཀྱང་གོ། །རྫུ་འཕྲུལ་ཡོན་ཏན་སྲིད་པའི་རྩེར་གནས་མཐོང་། །རྒྱལ་བའི་འཁོར་
རྣམས་ཐམས་ཅད་རེ་རེས་ཀྱང་། །རྒྱལ་བ་རང་རང་མདུན་ན་བཞུགས་པར་ཤེས། །ཐམས་ཅད་ཕྱོགས་ནས་མངོན་སུམ་མངོན་པར་ཡང་། །ཀུན་ནས་སྒོ་ནས་མཚུངས་པ་མེད་པ་མཐོང་། །ལ་ལས་བཞུགས་དང་མནལ་དང་འཆགས་པ་དང་། །འཁོར་རྣམས་ལ་ལས་བདེ་
གཤེགས་གསུང་བ་དང་། །མི་གསུང་བཞུགས་ཤིང་བསམ་གཏན་དགྱེས་པ་དང་། །མཚུངས་མེད་ཁྱོད་ཀྱི་སྤྱོད་ལམ་མཐའ་ཡས་མཐོང་། །ཁྱོད་ཀྱི་བ་སྤུ་རེ་ནས་འོད་ཟེར་མཆོག །གཏང་མ་ཐག་ཏུ་ཕྱོགས་བཅུ་ཐམས་ཅད་རྒྱས། །རྒྱལ་བའི་སྐུ་ནི་པད་མའི་འབྱུང་གནས་འདྲ། །
བསམ་པ་ཇི་བཞིན་ཡིད་ཀྱང་དགའ་བར་མཛད། །བདེན་ལ་གནས་ཤིང་རྟག་ཏུ་བདེན་ལ་དགྱེས། །བདེན་པ་ལྷུར་མཛད་ཅི་གསུང་དེ་བཞིན་མཛོད། །ཆོས་ཀྱི་འབྱུང་གནས་དོན་དང་འདུལ་ལ་མཁས། །ཡོན་ཏན་ཀུན་མཐར་ཕྱིན་ལ་ཕྱག་འཚལ་ལོ། །དེ་ནས་བུ་མོ་རིན་ཆེན་གྱིས་

བཅོམ་ལྡན་འདས་ལ་ཚུལ་དང་འཐུན་པའི་ཚིགས་སུ་བཅད་པ་དེ་དག་གིས་མངོན་པར་བསྟོད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཞུས་ནས་ཞུས་པ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་དབྱེ་བར་གནང་
ན། བདག་འདུས་པའི་ལེའུའི་ཆོས་ཀྱི་རྣམ་གྲངས་ལ་བཀའ་མཆིད་ཀྱི་རྒྱུད་འགའ་ཞིག་བརྩམས་ཏེ་ཞུའོ། །བཅོམ་ལྡན་འདས་ཀྱིས་བཀའ་སྩལ་པ། བུ་མོ་ཁྱོད་དེ་བཞིན་གཤེགས་པ་ལ་ཅི་དང་ཅི་འདོད་པ་དྲིས་ཤིག་དང་། ངས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་
རངས་པར་བྱའོ། །དེ་ནས་དེ་བཞིན་གཤེགས་པས་སྐབས་ཕྱེ་བ་དང་། བུ་མོ་རིན་ཆེན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་བདེན་པ་སྨྲ་རྣམས་གང་ལགས། དེ་བཞིན་གཤེགས་པས་བྱང་ཆུབ་སེམས་དཔའ་
རྣམས་ལ་བདེན་པར་གསུངས་པ་ནི་གང་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ཆོས་སྨྲ་བ་རྣམས་གང་ལགས། དེ་བཞིན་གཤེགས་པས་བྱང་ཆུབ་སེམས་དཔའ་རྣམས་ལ་ཆོས་སུ་གསུངས་པ་ནི་གང་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་
དོན་སྨྲ་བ་རྣམས་གང་ལགས། དེ་བཞིན་གཤེགས་པས་བྱང་ཆུབ་སེམས་དཔའ་རྣམས་ལ་དོན་དུ་གསུངས་པ་ནི་གང་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་འདུལ་བ་སྨྲ་བ་རྣམས་གང་ལགས། དེ་བཞིན་གཤེགས་པས་བྱང་ཆུབ་སེམས་དཔའ་ལ་འདུལ་བར་གསུངས་
པ་ནི་གང་ལགས། དེ་ནས་བཅོམ་ལྡན་འདས་ཀྱིས་བུ་མོ་རིན་ཆེན་ལ་ལེགས་སོ་ཞེས་བྱ་བ་གནང་སྟེ། བུ་མོ་ལེགས་སོ། །ལེགས་སོ། །ཁྱོད་ཀྱི་རྟོགས་པ་བཟང་ངོ་། །དྲི་བ་ཚུལ་བཞིན་ཡིན་ནོ། །སྤོབས་པ་དགེའོ། །བུ་མོ་དེ་བས་ན་ལེགས་པར་ཤིན་ཏུ་ཉོན་ལ་ཡིད་ལ་ཟུང་ཤིག་
དང་ངས་ཁྱོད་ལ་བཤད་དོ། །བུ་མོ་རིན་ཆེན་གྱིས་བཅོམ་ལྡན་འདས་ལེགས་སོ། །ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བུ་མོ་གསུམ་པོ་འདི་དག་ནི་བྱང་ཆུབ་སེམས་དཔའི་བདེན་པ་སྟེ། གསུམ་གང་ཞེ་

ན། གང་སངས་རྒྱས་ལ་མི་སླུ་བ་དང་། བདག་ལ་མི་སླུ་བ་དང་། སེམས་ཅན་ཐམས་ཅད་ལ་མི་སླུ་བའོ། །བུ་མོ་བྱང་ཆུབ་སེམས་དཔའ་སངས་རྒྱས་དང་། བདག་དང་། སེམས་ཅན་ཐམས་ཅད་ལ་སླུ་བ་ཇི་ལྟ་བུ་ཞེ་ན། བུ་མོ་གལ་ཏེ་བྱང་ཆུབ་སེམས་དཔའ་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ་ཉན་ཐོས་ཀྱི་སའམ། རང་སངས་རྒྱས་ཀྱི་ས་འདོད་པར་བྱེད་ཅིང་སྨོན་ཏེ། མངོན་པར་དགའ་བ་དེ་ལྟ་བུ་ནི་བུ་མོ་བྱང་ཆུབ་སེམས་དཔའ་སངས་རྒྱས་དང་། བདག་དང་། སེམས་ཅན་ཐམས་ཅད་ལ་སླུ་བའོ། །
བུ་མོ་བྱང་ཆུབ་སེམས་དཔའ་སངས་རྒྱས་དང་། བདག་དང་། སེམས་ཅན་ཐམས་ཅད་ལ་མི་སླུ་བ་ཅི་ལྟ་བུ་ཞེ་ན། བུ་མོ་གང་གི་ཚེ་བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་ནས་བདུད་དང་དམིགས་པ་ཅན་ཐམས་ཅད་ཀྱིས་ཇི་ཙམ་དུ་ཚེགས་ཕྱུང་ཞིང་ཇི་ཙམ་དུ་གནོད་པར་བྱས་
པ་དང་། ཕས་ཀྱི་རྒོལ་བ་ཐམས་ཅད་ཀྱིས་ཐོ་བཙམས་ཤིང་ཅོ་དྲིས་ཏེ་འབྲེལ་བར་བྱེད་ཅིང་རལ་གྲི་དང་། མདུང་ཐུང་དང་། མཚོན་རྩེ་གཉིས་པས་ཕུག་པ་དང་། མ་ཐོབ་པ་དང་། མ་གྲགས་པ་དང་། སྨད་པ་དང་། སྡུག་བསྔལ་བས་ཀྱང་མི་གཡོ། མི་འཁྲུལ། རྣམ་པར་
མི་འཁྲུལ། མི་ཞུམ། སྒྱིད་ལུག་པར་མི་འགྱུར། ཀུན་དུ་མི་སྐྲག །ཀུན་དུ་སྐྲག་པར་མི་འགྱུར། ཡི་མུག་པར་མི་འགྱུར། འགྱོད་པར་མི་འགྱུར་བར་ཐོག་མའི་ལྷག་པའི་བསམ་པ་དེ་ཡང་མི་གཏོང་ཞིང་བརྟན་པར་ཡང་དག་པར་འཛིན་ལ། བྱང་ཆུབ་ཀྱི་སེམས་རིན་པོ་ཆེ་བསྐྱེད་པ་དང་།
འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་སེམས་བསྐྱེད་པ་དང་། སེམས་ཅན་ཐམས་ཅད་ཀྱི་སྐྱབས་དང་། མགོན་དང་། དཔུང་གཉེན་གྱི་སེམས་བསྐྱེད་པ་དང་། མཚུངས་པ་མེད་ཅིང་འདྲ་བ་མེད་པའི་སེམས་བསྐྱེད་པ་དེ་ལས་ཀྱང་མི་ཉམས་མི་ནུར་ཏེ། ཐེག་པ་
གཞན་ལ་འདོད་པའི་སེམས་ལན་འགའ་ཡང་མི་སྐྱེད་པར་སངས་རྒྱས་དྲན། ཆོས་ཀྱི་འཁོར་ལོ་ལ་རྟོན། སེམས་ཅན་ཐམས་ཅད་མངོན་དུ་བྱེད། སྟོབས་ཉེ་བར་སྟོན། མཐུ་སྐྱེད་པར་བྱེད། རྩལ་གྱིས་རྣམ་པར་གནོན། བརྩོན་འགྲུས་རྩོམ་སྟེ། ཕ་རོལ་གྱི་ཚིག་གིས་གནོད་པར་མི་ནུས་པ་

དེ་ལྟ་བུ་ནི་བུ་མོ་བྱང་ཆུབ་སེམས་དཔའ་སངས་རྒྱས་དང་། བདག་དང་། སེམས་ཅན་ཐམས་ཅད་ལ་མི་སླུ་བའོ། །བྱང་ཆུབ་སེམས་དཔའ་སངས་རྒྱས་དང་། བདག་དང་། སེམས་ཅན་ཐམས་ཅད་ལ་མི་སླུ་བ་གང་ཡིན་པ་འདི་ནི་བྱང་ཆུབ་སེམས་དཔའི་བདེན་པའི་མཆོག་གོ། །
དེ་རྣམ་པ་བཞིས་སངས་རྒྱས་ལ་མི་སླུ་སྟེ། བརྟན་པ་དང་། སྟོབས་དང་། བརྩོན་འགྲུས་རྟུལ་བའོ། །དེ་རྣམ་པ་བཞིས་བདག་ལ་མི་སླུ་སྟེ། བསམ་པ་དང་། ལྷག་པའི་བསམ་པ་དང་། གཡོ་མེད་པ་དང་། སྒྱུ་མེད་པའོ། །དེ་རྣམ་པ་བཞིས་སེམས་ཅན་ཐམས་ཅད་མི་
སླུ་སྟེ། སྦྱོར་བ་དང་། བྱམས་པ་དང་། སྙིང་རྗེ་དང་། སྡུད་པ་སྟེ། བུ་མོ་གང་འདི་བྱང་ཆུབ་སེམས་ཡོངས་སུ་མི་གཏོང་ཞིང་སྔོན་དམ་བཅས་པ་ལས་མི་ཉམས་པ་འདི་ནི་བྱང་ཆུབ་སེམས་དཔའི་བདེན་པ་ལ་འཇུག་པ་དང་པོའོ། །བུ་མོ་གཞན་ཡང་བྱང་ཆུབ་སེམས་དཔའི་བདེན་པ་ནི་གང་
འདི་ངག་བསྡམས་པ་དང་། ངག་བསྲུངས་པ་དང་། ངག་འཁྲུལ་པ་མེད་པ་དང་། ཚིག་བདེན་པ་སྟེ། དེ་གཅིག་པུ་ཡང་རུང་། སྐྱེ་བོ་མང་པོའི་ནང་དུ་གནས་ཀྱང་རུང་། ཚིག་བདེན་པར་སྨྲ་སྟེ། དེ་རྒྱལ་སྲིད་ཀྱི་ཕྱིར་ཡང་བརྫུན་གྱི་ཚིག་མི་སྨྲ། སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་རིན་པོ་ཆེས་རབ་ཏུ་བཀང་བས་བྲིད་ཀྱང་བརྫུན་གྱི་ཚིག་མི་སྨྲ་བའོ། །བུ་མོ་དེ་ལ་བྱང་ཆུབ་སེམས་དཔའི་བདེན་པ་ནི་རྣམ་པ་སུམ་ཅུ་རྩ་གཉིས་ཡོངས་སུ་དག་པ་སྟེ། རྣམ་པ་སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། ངོ་ཚ་ཤེས་པའི་རྣམ་པ་དང་། ཡོན་ཏན་གྱི་རྣམ་
པ་དང་། ཁྲེལ་ཡོད་པའི་རྣམ་པ་དང་། དེས་པའི་རྣམ་པ་དང་། བཅོས་མ་མ་ཡིན་པའི་རྣམ་པ་དང་། མ་སྨད་པའི་རྣམ་པ་དང་། མི་དམིགས་པའི་རྣམ་པ་དང་། ལྷས་རྣམ་པར་རིག་པའི་རྣམ་པ་དང་། འཇིགས་པ་མེད་པའི་རྣམ་པ་དང་། ངན་འགྲོ་གཅོད་པའི་རྣམ་པ་དང་། བདེ་འགྲོ་འབྱེད་
པའི་རྣམ་པ་དང་། འཕགས་པའི་སྐྱེ་བོ་མངོན་པར་དགའ་བའི་རྣམ་པ་དང་། མཁས་པས་མཆོད་པར་འོས་པའི་རྣམ་པ་དང་། ནང་དག་པའི་རྣམ་པ་དང་། ཕྱི་རོལ་ལེགས་པར་བྱས་པའི་རྣམ་པ་དང་། གཟུང་བར་འོས་པའི་ཚིག་གི་རྣམ་པ་དང་། ཚིག་མི་བརླང་བའི་རྣམ་པ་དང་།

འཇམ་པའི་ཚིག་གི་རྣམ་པ་དང་། ཁྱད་པར་ཅན་གྱི་ཚིག་གི་རྣམ་པ་དང་། ཁ་དྲི་རབ་ཏུ་ཞིམ་པའི་ཚིག་གི་རྣམ་པ་དང་། བཀའ་བློ་བདེ་བའི་རྣམ་པ་དང་། སླུ་བ་མེད་པའི་རྣམ་པ་དང་། གདུང་བ་མེད་པའི་རྣམ་པ་དང་། དགའ་ཞིང་མཆོག་ཏུ་དགའ་བའི་རྣམ་པ་
དང་། བདག་ལ་ངེས་པར་སེམས་པའི་རྣམ་པ་དང་། གཞན་ལ་ངེས་པར་སེམས་པའི་རྣམ་པ་དང་། འཁྲུལ་པ་མེད་པའི་རྣམ་པ་དང་། ཁ་ན་མ་ཐོ་བ་མེད་པའི་རྣམ་པ་དང་། སྦྱིན་པའི་གནས་ཀྱི་སའི་རྣམ་པ་དང་། སངས་རྒྱས་མཉེས་པར་བྱེད་པའི་རྣམ་པ་དང་།
བདེན་པའི་རྗེས་སུ་འཐུན་པའི་ངག་རབ་ཏུ་འཐོབ་པའི་རྣམ་པ་སྟེ། བུ་མོ་འདི་དག་ནི་བདེན་པའི་རྣམ་པ་ཡོངས་སུ་དག་པ་སུམ་ཅུ་རྩ་གཉིས་སོ། །བུ་མོ་གཞན་ཡང་བྱང་ཆུབ་སེམས་དཔའི་བདེན་པ་ནི་གང་དམ་བཅས་པ་ཡོངས་སུ་རྫོགས་པའོ། །དེ་ཅིའི་ཕྱིར་ཞེ་ན། བྱང་ཆུབ་
ནི་བྱང་ཆུབ་སེམས་དཔའ་སྦྱིན་པ་ལ་མོས་པ་དག་གི་ཡིན་གྱི། སེར་སྣ་ཅན་དག་གི་མ་ཡིན་ཏེ། འདི་ནི་དེའི་དམ་བཅས་པའོ། །གང་བདོག་པ་ཐམས་ཅད་ཡོངས་སུ་གཏོང་བར་ཀུན་ཏུ་སྣང་བ་འདི་ནི་དེའི་བདེན་པའོ། །བྱང་ཆུབ་ནི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་
དག་གི་ཡིན་གྱི། ངང་ཚུལ་ངན་པ་དག་གི་མ་ཡིན་ཏེ། འདི་ནི་དེའི་དམ་བཅས་པའོ། །གང་ཚུལ་ཁྲིམས་ཡོངས་སུ་དག་པར་ཀུན་དུ་སྣང་བ་འདི་ནི་དེའི་བདེན་པའོ། །བྱང་ཆུབ་ནི་བྱང་ཆུབ་སེམས་དཔའ་བཟོད་པའི་སྟོབས་རབ་ཏུ་འཐོབ་པ་དག་གི་ཡིན་གྱི། གནོད་སེམས་ཅན་དག་
གི་མ་ཡིན་ཏེ། འདི་ནི་དེའི་དམ་བཅས་པའོ། །གང་བཟོད་པ་དང་དེས་པར་ཀུན་དུ་སྣང་བ་འདི་ནི་དེའི་བདེན་པའོ། །བྱང་ཆུབ་ནི་བྱང་ཆུབ་སེམས་དཔའ་བརྩོན་འགྲུས་བརྩམས་པ་དག་གི་ཡིན་གྱི། ལེ་ལོ་ཅན་དག་གི་མ་ཡིན་ཏེ། འདི་ནི་དེའི་དམ་བཅས་པའོ། །གང་དགེ་བའི་རྩ་བ་
ཐམས་ཅད་བརྩོན་པར་ཀུན་དུ་སྣང་བ་འདི་ནི་དེའི་བདེན་པའོ། །བྱང་ཆུབ་ནི་བྱང་ཆུབ་སེམས་དཔའ་བསམ་གཏན་ལ་རབ་ཏུ་གནས་པ་དག་གི་ཡིན་གྱི་སེམས་གཡེང་བ་དག་གི་མ་ཡིན་ཏེ། འདི་ནི་དེའི་དམ་བཅས་པའོ། །གང་བསམ་གཏན་གྱི་ཡན་ལག་ཡང་དག་པར་སྒྲུབ་པར་ཀུན་དུ་

སྣང་བ་འདི་ནི་དེའི་བདེན་པའོ། །བྱང་ཆུབ་ནི་བྱང་ཆུབ་སེམས་དཔའ་ཤེས་རབ་དང་ལྡན་པ་དག་གི་ཡིན་གྱི་ཤེས་རབ་འཆལ་པ་དག་གི་མ་ཡིན་ཏེ། འདི་ནི་དེའི་དམ་བཅས་པའོ། །གང་ཤེས་རབ་དང་ཡེ་ཤེས་ལ་ཀུན་དུ་སྣང་བ་འདི་ནི་དེའི་བདེན་པའོ། །གོང་མ་བཞིན་དུ་སྦྱར་ཏེ། བྱང་ཆུབ་ཀྱི་
ཕྱོགས་ཀྱི་ཆོས་ཐམས་ཅད་དང་། བསྡུ་བའི་དངོས་པོ་དང་། ཚངས་པའི་གནས་པ་དང་། མངོན་པར་ཤེས་པ་དང་། རིག་པ་དང་། ཞི་གནས་དང་། ལྷག་མཐོང་ལ་ཡང་དེ་བཞིན་ནོ། །བྱང་ཆུབ་ནི་བྱང་ཆུབ་སེམས་དཔའ་དགེ་བའི་ཆོས་ཐམས་ཅད་དང་ལྡན་པ་དག་གི་ཡིན་གྱི། དགེ་
བའི་ཆོས་རྣམ་པར་སྤངས་པ་དག་གི་མ་ཡིན་ཏེ། འདི་ནི་དེའི་དམ་བཅས་པའོ། །གང་དགེ་བའི་ཆོས་ཐམས་ཅད་ལ་ཀུན་དུ་སྣང་བ་འདི་ནི་དེའི་བདེན་པའོ། །བུ་མོ་གཞན་ཡང་འཕགས་པའི་རྣམ་པའི་བདེན་པ་དེ་ལ་བྱང་ཆུབ་སེམས་དཔའ་བརྩོན་པར་བྱ་སྟེ། གང་འདི་སྡུག་བསྔལ་ཤེས་པ་
དང་། ཀུན་འབྱུང་བ་སྤོང་བ་དང་། འགོག་པ་ཤེས་པ་དང་། ལམ་སྒོམ་པའོ། །དེ་ལ་སྡུག་བསྔལ་ཤེས་པ་ནི་གང་ཕུང་པོ་རྣམས་ལ་རང་བཞིན་གྱིས་མི་སྐྱེ་བར་ཤེས་པའོ། །ཀུན་འབྱུང་བ་སྤོང་བ་ནི་སྲིད་པ་གང་གིས་ཕུང་པོ་རྣམས་ཡང་དག་པར་འགྲུབ་པར་འགྱུར་བའི་སྲེད་པ་དེ་
ཤིན་ཏུ་མི་འབྱུང་ཞིང་ཆགས་པ་དང་བྲལ་བ་མངོན་པར་དགའ་བ་མེད་པ་སྟེ་གང་མངོན་པར་དགའ་བ་མེད་པ་དེ་ནི་གདོད་མ་ནས་འོང་བ་མེད་པའོ། །གང་གདོད་མ་ནས་འོང་བ་མེད་པ་དེ་ནི་ཆོས་ཉིད་མ་སྤངས་པའོ། །གང་ཆོས་ཉིད་མ་སྤངས་པ་དེ་ནས་ཀུན་འབྱུང་བ་སྤངས་པའོ། །དེ་ལ་འགོག་པ་ཤེས་
པ་ནི་གང་མཚན་མ་དང་དམིགས་པ་ཤིན་ཏུ་ཟད་ཅིང་འགོག་པ་སྟེ། གང་འགོག་པའི་ཚེ་དངོས་པོ་འཇིག་པར་འགྱུར་བ་ཡང་མེད་ལ། དངོས་པོ་ཡོད་པ་དང་། དངོས་པོ་མེད་པ་མཚུངས་ཤིང་མཉམ་པར་གྱུར་པའི་ཆོས་ཐམས་ཅད་ལ་གང་མཉམ་པར་མཐོང་བ་ནི་འགོག་པའི་བདེན་པ་ཞེས་བྱ་བའོ། །
དེ་ལ་ལམ་ནི་གང་མཉམ་པར་ལྟ་ཞིང་མཉམ་པར་སྦྱོར་བ་མི་རྟོག་པ་མི་མཉམ་པའི་མཚན་ཉིད་མ་ཡིན་པ་ཉོན་མོངས་པ་ཐམས་ཅད་མི་ཚོལ་བ་བདག་གི་མེད་པ། ཡོངས་སུ་འཛིན་པ་མེད་པ། ལེན་པ་མེད་པ། མ་བྱས་པ། རྣམ་པར་མ་བྱས་པ་འདི་ནི་ལམ་ཞེས་བྱའོ། །འདི་ལ་གང་བདེན་

པ་ཤེས་པའི་ཡེ་ཤེས་དང་། སེམས་ཅན་རྣམས་ཡང་དག་པར་ཐོབ་པར་བྱེད་ཀྱང་བདག་མངོན་སུམ་དུ་མི་བྱེད་པ་འདི་ཡང་བྱང་ཆུབ་སེམས་དཔའི་བདེན་པ་ཞེས་བྱའོ། །བདེན་པ་བསྟན་པ་འདི་བཤད་པ་ན་བྱང་ཆུབ་སེམས་དཔའ་ཁྲིས་བདེན་པ་ཤེས་པ་ཡོངས་སུ་བསྒོམ་པའི་
བཟོད་པ་རབ་ཏུ་ཐོབ་བོ། །བུ་མོ་དེ་ལ་ཇི་ལྟར་ན་བྱང་ཆུབ་སེམས་དཔའ་ཆོས་སྨྲ་བ་ཡིན་ཞེ་ན་གང་གི་ཚེ་ཆོས་ལ་རྟོན་པར་འགྱུར་བ་དང་། ཆོས་སྨྲ་བ་དང་། ཆོས་སེམས་པ་དང་། ཆོས་བསམ་པ་དང་། ཆོས་སྤྱོད་ཡུལ་བ་དང་། ཆོས་སྤྱོད་པ་དང་། ཆོས་དོན་དུ་གཉེར་བ་དང་། ཆོས་འདོད་
པ་དང་། ཆོས་ལ་དགའ་བས་དགའ་མོས་པ་དང་། ཆོས་ཀྱི་དཔུང་དང་། ཆོས་ཀྱི་ཏོག་དང་། ཆོས་ཀྱི་མཚོན་ཆ་དང་། ཆོས་ཀྱི་གོ་ཆ་བགོས་པ་དང་། ཆོས་ཀྱི་ཡ་ལད་བགོས་པ་དང་། ཆོས་ཀྱི་སྣང་བ་དང་། ཆོས་ཀྱི་མར་མེ་དང་། ཆོས་ཀྱི་དྲན་པ་དང་། ཆོས་ཀྱི་བློ་གྲོས་དང་། ཆོས་རྟོག་
པ་དང་། ཆོས་དཔྱོད་པ་དང་། ཆོས་ལ་སྦྱོར་བ་དང་། ཆོས་སྤྱོད་པར་གྱུར་པ་དང་། ཆོས་ཀྱིས་ཉལ་བ་དང་། ཆོས་ཀྱི་སྤྱོད་ལམ་དང་། ཆོས་བསྲུང་བ་དང་། ཆོས་ཀྱི་ནོར་དང་། ཆོས་མི་ཟད་པ་དང་། ཆོས་རྒྱ་ཆེ་བ་དང་། ཆོས་ཀྱི་བྱ་བ་བྱེད་པ་དང་། ཆོས་ཀྱི་ལུས་དང་། ཆོས་ཀྱི་ངག་དང་།
ཆོས་ཀྱི་ཡིད་ལ་བྱེད་པ་མི་གཏོང་བ་སྟེ། ཆོས་སྤྱོད་པ་རྣམ་པ་འདི་ལྟ་བུ་དང་ལྡན་པ་དེ་ནི་ཆོས་སྨྲ་བ་ཡིན་ཏེ། ཆོས་མ་ཡིན་པ་སྨྲ་བ་མ་ཡིན་ནོ། །དེ་ལ་ཆོས་སྨྲ་བ་གང་ཞེ་ན། བདེན་པ་གང་ཡིན་པ་དེ་བདེན་པར་སྨྲ་བ་དང་། སངས་རྒྱས་ལ་བསྔགས་པ་སྨྲ་བ་དང་། ཆོས་ལ་སྲུང་བར་སྨྲ་བ་དང་། དགེ་
འདུན་ལ་བླ་མ་དང་སྲི་ཞུ་བྱ་བར་སྨྲ་བ་དང་། བྱང་ཆུབ་ཀྱི་སེམས་ལ་མོས་པར་བྱ་བ་བསྙད་པ་སྨྲ་བ་དང་། བསམ་པ་མི་འདོར་བ་སྨྲ་བ་དང་། ལྷག་པའི་བསམ་པ་ལ་དམིགས་པ་སྨྲ་བ་དང་། སྦྱོར་བ་མི་ཉམས་པར་སྨྲ་བ་དང་། འཕགས་པ་རྣམས་ཀྱི་ལྟ་བ་སྨྲ་བ་དང་། དགེ་བའི་བཤེས་གཉེན་
རྣམས་ལ་བསྟེན་པ་སྨྲ་བ་དང་། ང་རྒྱལ་མེད་པས་གུས་པ་དང་། རི་མོ་བྱ་བ་སྨྲ་བ་དང་། རྟག་ཏུ་བསྔགས་པ་སྨྲ་བ་དང་། ཆོས་སྟོན་པ་ན་བསྟི་སྟང་དུ་བྱས་ཏེ་མཉམ་པ་སྨྲ་བ་དང་། ཆོས་ཀུན་དུ་ཚོལ་བས་མི་ངོམས་པ་སྨྲ་བ་དང་། ཆོས་སྟོན་པ་ལ་སྙོམ་ལས་མེད་པ་སྨྲ་བ་དང་། སློབ་དཔོན་

ཆོས་འཆབ་པ་མེད་པ་སྨྲ་བ་དང་། བྱས་པ་གཟོ་བ་དང་། བྱས་པ་ཤེས་པ་དང་། བྱས་པ་ཆུད་མི་གསོན་པ་སྨྲ་བ་དང་། ལན་ལ་མི་རེ་བ་སྨྲ་བ་དང་། དགོན་པ་ལ་སྐྲག་པ་མེད་པ་སྨྲ་བ་དང་། འཕགས་པའི་རིགས་མ་ཉམས་པ་སྨྲ་བ་དང་། སྦྱངས་པའི་ཡོན་ཏན་མི་གཏོང་བ་སྨྲ་བ་དང་། དགེ་བ་བཅུའི་
ལས་ཀྱི་ལམ་ལ་འཇུག་པ་སྨྲ་བ་དང་། སྦྱིན་པའི་བསྔགས་པ་སྨྲ་བ་དང་། བྱང་ཆུབ་ཏུ་ཡོངས་སུ་བསྔོ་བ་སྨྲ་བ་དང་། ཚུལ་ཁྲིམས་ཀྱི་དབྱེ་བ་སྨྲ་བ་དང་། བཟོད་པའི་སྟོབས་སྨྲ་བ་དང་། བརྩོན་འགྲུས་ཀྱི་ཞུམ་པ་མེད་པ་སྨྲ་བ་དང་། བསམ་གཏན་རྣམས་ཀྱི་རབ་ཏུ་ཞི་བ་སྨྲ་བ་དང་། ཤེས་རབ་ཀྱི་ཁོང་
དུ་ཆུད་པ་སྨྲ་བ་དང་། ཐབས་ཀྱི་ཡོངས་སུ་གསལ་བར་བྱེད་པ་སྨྲ་བ་དང་། བྱམས་པའི་སྐྱབས་སྨྲ་བ་དང་། སྙིང་རྗེ་ལ་འཇུག་པ་སྨྲ་བ་དང་། དགའ་བའི་མཆོག་ཏུ་དགའ་བ་སྨྲ་བ་དང་། བཏང་སྙོམས་ཀྱི་གཉིས་དང་བྲལ་བ་སྨྲ་བ་དང་། བདེན་པ་རྣམས་ཀྱི་རྗེས་སུ་འཐུན་པ་སྨྲ་བ་དང་། སོ་སོ་ཡང་
དག་པར་རིག་པ་བསྙད་པ་སྨྲ་བ་དང་། མངོན་པར་ཤེས་པ་རྣམས་ཀྱི་བསྐྱེད་པ་སྨྲ་བ་དང་། རྟོན་པ་རྣམས་ཀྱི་ཆོས་སྨྲ་བ་དང་། ཆོས་ཀྱི་མདོ་རྣམས་ཀྱི་ཁོང་དུ་ཆུད་པ་སྨྲ་བ་དང་། དྲན་པ་ཉེ་བར་གཞག་པ་རྣམས་ཀྱི་དྲན་པ་བརྗེད་པ་མེད་པ་སྨྲ་བ་དང་། ཡང་དག་པའི་སྤོང་བ་རྣམས་ཀྱི་ཡང་
དག་པའི་ནན་ཏན་སྨྲ་བ་དང་། རྫུ་འཕྲུལ་གྱི་རྐང་པ་རྣམས་ཀྱི་མངོན་པར་བསྐྱེད་པ་སྨྲ་བ་དང་། དབང་པོ་རྣམས་ཀྱི་རྣོ་བ་སྨྲ་བ་དང་། སྟོབས་རྣམས་ཀྱི་མི་རྫི་བ་སྨྲ་བ་དང་། བྱང་ཆུབ་ཀྱི་ཡན་ལག་རྣམས་ཀྱི་རྗེས་སུ་རྟོགས་པ་སྨྲ་བ་དང་། ལམ་གྱི་སྒྲོལ་བ་སྨྲ་བ་དང་། ཞི་གནས་ཀྱི་འཇུག་པ་སྨྲ་
བ་དང་། ལྷག་མཐོང་གི་དེ་ཁོ་ན་ཤེས་པ་སྨྲ་བ་དང་། རིག་པ་དང་རྣམ་པར་གྲོལ་བ་ཡོངས་སུ་གསལ་བར་བྱེད་པ་སྨྲ་བ་དང་། ཉན་ཐོས་ཀྱི་ཐེག་པའི་ས་ཇི་ལྟ་བ་སྨྲ་བ་དང་། རང་སངས་རྒྱས་ཀྱི་ཐེག་པ་སྟོན་པ་སྨྲ་བ་དང་། ཐེག་པ་ཆེན་པོའི་ཡོན་ཏན་ཐམས་ཅད་ཡོངས་སུ་བསྒྲགས་པ་སྨྲ་བ་དང་། རྟེན་
ཅིང་འབྲེལ་པར་འབྱུང་བའི་ལུགས་དང་འཐུན་པ་སྨྲ་བ་དང་། སྟོང་པ་ཉིད་ལ་སྐྲག་པ་མེད་པ་སྨྲ་བ་དང་། མཚན་མ་མེད་པ་ལ་བསྙད་པ་སྨྲ་བ་དང་། སྨོན་པ་མེད་པ་ལ་སོ་སོར་རྟོག་པ་སྨྲ་བ་དང་། ཕུང་པོ་རྣམས་ལ་སྒྱུ་མར་བསྟན་པ་སྨྲ་བ་དང་། ཁམས་རྣམས་ལ་ནམ་མཁའི་ཁམས་དང་མཚུངས་པ་ཉིད་སྨྲ་

བ་དང་། སྐྱེ་མཆེད་རྣམས་ཀྱི་རང་བཞིན་གྱིས་སྟོང་པ་ཉིད་སྨྲ་བ་དང་། ནོར་བདུན་སྨྲ་བ་དང་། རྗེས་སུ་དྲན་པ་དྲུག་སྨྲ་བ་དང་། གུས་པ་དང་བཅས་པ་སྨྲ་བ་དང་། ཡང་དག་པར་དགའ་བར་བྱ་བ་དྲུག་སྨྲ་བ་དང་། མངོན་པར་ཤེས་པ་དྲུག་སྨྲ་བ་དང་། ཕ་རོལ་ཏུ་ཕྱིན་པ་
དྲུག་སྨྲ་བ་དང་། མིག་ལྔ་སྨྲ་བ་དང་། དོན་དམ་པ་སྨྲ་བ་དང་། ཀུན་རྫོབ་ལ་འཇུག་པ་སྨྲ་བ་དང་། ལེགས་པར་བྱས་པའི་ལས་སྨྲ་བ་དང་། སེམས་ཅན་ཐམས་ཅད་ལ་སེམས་སྙོམས་པར་སྨྲ་བ་དང་། སངས་རྒྱས་ཀྱི་ཆོས་ཐམས་ཅད་ཀྱི་ཡོན་ཏན་དང་བསྔགས་པ་ཚད་མེད་པ་སྨྲ་བའོ། །བུ་མོ་གཞན་
ཡང་བྱང་ཆུབ་སེམས་དཔའ་ཆོས་སྨྲ་བ་ནི་བདག་ཏུ་སྨྲ་བ་མ་ཡིན། སེམས་ཅན་དུ་སྨྲ་བ་མ་ཡིན། སྲོག་ཏུ་སྨྲ་བ་མ་ཡིན། གང་ཟག་ཏུ་སྨྲ་བ་མ་ཡིན། ཆད་པར་སྨྲ་བ་མ་ཡིན། རྟག་པར་སྨྲ་བ་མ་ཡིན། འབྱུང་བར་ལྟ་བ་སྨྲ་བ་མ་ཡིན། འཇིག་པར་ལྟ་བ་སྨྲ་བ་མ་ཡིན། མཐའ་ཁས་ལེན་པ་སྨྲ་བ་མ་
ཡིན། དབུས་ལ་མངོན་པར་ཞེན་པ་སྨྲ་བ་མ་ཡིན། མི་འཐུན་པ་སྨྲ་བ་མ་ཡིན། འགལ་བ་སྨྲ་བ་མ་ཡིན། རྩོད་པ་སྨྲ་བ་མ་ཡིན། ཕྱོགས་ཡོངས་སུ་འཛིན་པ་སྨྲ་བ་མ་ཡིན། དམིགས་པ་སྨྲ་བ་མ་ཡིན། ལྟ་བ་ཀུན་ནས་དཀྲིས་པ་དང་། ཐེ་ཙོམ་དང་། སྒྲིབ་པ་དང་། ཆོད་པ་དང་། བག་ལ་
ཉལ་དང་། ཁོང་ཁྲོ་བ་སྨྲ་བ་མ་ཡིན། ཆོས་དང་འགལ་བ་སྨྲ་བ་མ་ཡིན། ཆོས་འཇིག་པ་སྨྲ་བ་མ་ཡིན། ཆོས་སྤོང་བ་སྨྲ་བ་མ་ཡིན། ཆོས་ལ་མངོན་པར་རློམ་སེམས་སུ་བྱེད་པ་སྨྲ་བ་མ་ཡིན། ཆོས་ལ་ལོག་པར་འཇུག་པར་སྨྲ་བ་མ་ཡིན་ཏེ། ཆོས་སྨྲ་བའི་བྱང་ཆུབ་སེམས་དཔའ་ནི་ཆོས་ཀྱི་རྗེས་སུ་
འཐུན་པའི་ཆོས་སྒྲུབ་པ་སྨྲ་བ་དང་། ཡང་དག་པར་སྨྲ་བ་དང་། ཆོས་སྨྲ་བ་དང་། ཕས་ཀྱི་རྒོལ་བ་ཐམས་ཅད་ཀྱིས་མི་ཚུགས་པ་སྨྲ་བའོ། །བྱང་ཆུབ་སེམས་དཔའ་ཆོས་སྨྲ་བ་ནི་ཆོས་ཐམས་ཅད་སྣང་བ་དང་འབྲེལ་བས་ཕྱིར་བསྐྱར་བར་དཀའ་བ་ཡིན། བྱང་ཆུབ་སེམས་དཔའ་ཆོས་སྨྲ་བ་ནི་
དམིགས་པ་མེད་པའི་སྤྱོད་ཡུལ་བས་སྟོང་པ་ཉིད་སྨྲ་བ་ཡིན། མི་འཁྲུགས་པའི་ཆོས་ཅན་པས་མཚན་མ་མེད་པའི་སྨྲ་བ་ཡིན། ཁམས་གསུམ་དང་མ་འདྲེས་པས་སྨོན་པ་མེད་པ་སྨྲ་བ་ཡིན། འདུས་བྱས་ཀྱི་སྐྱོན་མཐོང་བས་མངོན་པར་འདུ་མི་བྱེད་པ་སྨྲ་བ་ཡིན་ནོ། །བྱང་ཆུབ་སེམས་དཔའ་ཆོས་སྨྲ་

བ་ནི་ཆོས་ཀྱི་དོན་རང་བཞིན་གྱིས་དབེན་པའི་ཕྱིར་སྐྱེ་བ་མེད་པ་དང་། འབྱུང་བ་མེད་པ་སྨྲ་བ་ཡིན་ནོ། །བུ་མོ་ཆོས་ཞེས་བྱ་བ་ནི་བརྗོད་དུ་མེད་པ། ཡི་གེ་མེད་པ། བསྙད་དུ་མེད་པ། སྨྲར་མེད་པ། གཟུགས་མེད་པ། བསྟན་དུ་མེད་པ། ཐོགས་པ་མེད་པ་རྣམ་པར་རིག་པ་མ་ཡིན་པ། རྣམ་
པར་ཤེས་པར་བྱ་བ་མ་ཡིན་པ། སེམས་དང་། ཡིད་དང་། རྣམ་པར་ཤེས་པ་དང་བྲལ་བ། རྡུལ་མེད་པ། རྡུལ་དང་བྲལ་བ། འདོད་ཆགས་དང་བྲལ་བ། མུན་པ་མེད་པ། སྣང་བ་མེད་པ། བདག་གི་མེད་པ། ཡོངས་སུ་འཛིན་པ་མེད་པ། འཛིན་པ་མ་ཡིན་པ། འཛིན་པ་དང་བྲལ་
བ་ཡུལ་མེད་པ། ཡུལ་མ་ཡིན་པ། ཡུལ་ཐམས་ཅད་དང་མ་འདྲེས་པ། ཞི་བ་གྲོལ་བ་བལྟ་དཀའ་བ། ཁོང་དུ་ཆུད་པར་དཀའ་བ། རྟོག་གེ་མ་ཡིན་པ། རྟོག་གེས་མི་ཆུད་པ། འཕགས་པ་མཁས་པས་ཤེས་ཤིང་རྟོགས་པ། ཚོར་བ་མེད་པ། ཚོར་བ་ཐམས་ཅད་ཀྱི་རྒྱུན་བཅད་པ།
ཇི་ལྟ་བ་བཞིན་དུ་དུས་གསུམ་དུ་སྟོང་པ། འཆི་འཕོ་མེད་པ། འཕོ་བར་འགྱུར་བ་མ་ཡིན་པ། འཕོ་བ་མེད་པ། སྐྱེ་བ་མེད་པ། ཕུན་སུམ་ཚོགས་པ་མ་ཡིན་པ། རྒུད་པ་མ་ཡིན་པ། འབྱུང་བ་མེད་པ། འཇིག་པ་མེད་པ། མི་སྲིད་པ། འབྱུང་བར་མི་འགྱུར་བ། འཇིག་པར་མི་
འགྱུར་བ། བསྐྱེད་པ་མ་ཡིན་པ། གཞིག་པ་མ་ཡིན་པ། མི་རྟོགས་པ། ཀུན་དུ་མི་རྟོགས་པ། རྣམ་པར་མི་རྟོགས་པ། མཚན་ཉིད་དང་སྣང་བ་མ་ཡིན་པ། མཚན་ཉིད་མེད་པར་སྣང་བ་མ་ཡིན་པ། མཚན་ཉིད་གཅིག་པ། མཚན་ཉིད་མེད་པ། ཀུན་གཞི་མེད་པ། ཀུན་གཞི་དང་
བྲལ་བ། འདྲེ་བ་མེད་པ། ཆགས་པ་མེད་པ། བཅིངས་པ་མེད་པ། གྲོལ་བ་མེད་པ། བདག་གི་མེད་པ། ཡོངས་སུ་འཛིན་པ་མེད་པ། སྦྱོར་བ་མེད་པ། ཟག་པ་མེད་པ། འདྲ་བ་མེད་པ། མཚུངས་པ་མེད་པ། མི་མཉམ་པ་དང་མཉམ་པ་མི་བདེན་པ་དང་མི་རྫུན་པ། བདེ་བ་མེད་པ། སྡུག་
བསྔལ་མེད་པ། འདུ་བ་མེད་པ། འབྲལ་བ་མེད་པ། ལྡན་པ་མེད་པ། མི་ལྡན་པ་མེད་པ། མིང་མེད་པ། གཟུགས་མེད་པ། སྦྱར་བ་མེད་པ། བསལ་བ་མེད་པ། སྙིང་པོ་མེད་པ། སྙིང་པོ་མེད་པ་མ་ཡིན་པ། དབྱེར་མེད་པ། དབྱེར་མེད་པ་མ་ཡིན་པ། རྡོ་རྗེ་མ་ཡིན་པ། འབིགས་པའི་

མཚན་ཉིད་མ་ཡིན་པ། དེ་ཁོ་ན་དེ་བཞིན་ཉིད་གཞན་མ་ཡིན་པ་ཉིད། རིང་བ་མ་ཡིན་པ། ཉེ་བ་མ་ཡིན་པ། ཁ་དོག་མེད་པ། རྟགས་མེད་པ། དབྱིབས་མེད་པ། མཚན་མ་མེད་པ། འདི་ན་མ་ཡིན་པ། ཕ་བི་ན་མ་ཡིན་པ། དེ་ལས་མ་ཡིན་པ། གཞན་ལས་མ་ཡིན་པ།
ནང་མ་ཡིན་པ། ཕྱི་མ་ཡིན་པ། གཉི་ག་མ་ཡིན་པ། གཞན་མ་ཡིན་པ། གཞན་མ་ཡིན་པ་ཡང་མ་ཡིན་པ། གཞན་དང་གཞན་མ་ཡིན་པ་ཡང་མ་ཡིན་པ། མཐོང་བ་མེད་པ་ཐོས་པ་མེད་པ། དྲན་པ་མེད་པ། བརྗེད་པ་མེད་པ། ཤེས་པ་མེད་པ། རྣམ་པར་ཤེས་པ་མེད་པ།
རྣམ་པར་ཤེས་པར་བྱ་བ་དང་། རྣམ་པར་ཤེས་པ་དང་བྲལ་བ། གྲངས་མེད་པ། གྲངས་མེད་པ་མ་ཡིན་པ། གྲངས་ཐམས་ཅད་དང་བྲལ་བ་སྟེ། བུ་མོ་འདི་ནི་ཆོས་ཞེས་བྱའོ། །གང་འདི་འདྲ་བའི་ཆོས་སྐད་དང་། བརྡ་སྣ་ཚོགས་ཀྱིས་འཆད་ཅིང་ཡང་དག་པར་རབ་ཏུ་སྟོན་པ་འདི་
ནི་བྱང་ཆུབ་སེམས་དཔའ་ཆོས་སྨྲ་བ་ཞེས་བྱའོ། །གཞན་ཡང་ཆོས་སྨྲ་བ་ནི་སྨྲ་བ་ཐམས་ཅད་ལས་རྣམ་པར་ལོག་པ་ཡིན་ནོ། །ཆོས་སྨྲ་བ་ནི་སུ་དང་ཡང་མི་རྩོད་དོ། །ཆོས་སྨྲ་བ་ནི་གཞན་ལ་ཤིན་ཏུ་རློམ་སེམས་མེད་དོ། །ཆོས་སྨྲ་བ་ནི་མ་བསླབས་པ་ལ་མི་བརྙས་སོ། །ཆོས་སྨྲ་བ་ནི་བསླབས་
པ་རྣམས་ལ་མི་འདུད་པ་མ་ཡིན་ནོ། །བདག་བསྟོད་པ་མ་ཡིན་ནོ། །ཆོས་ཉིད་དང་འགལ་བར་མི་བྱེད་དོ། །ཟང་ཟིང་གིས་མ་སྦགས་པའི་རྒྱུད་ཀྱིས་ཆོས་སྟོན་ཏོ། །གཞན་དག་ལ་འགྱོད་པ་མི་སྐྱེད་དོ། །གཞན་གྱི་ལྟུང་བ་གླེང་བར་མི་བྱེད་དོ། །ཆོས་ལ་ཁྱད་དུ་གསོད་པར་མི་བྱེད་དོ། །
ཆོས་ཀྱི་བར་ཆད་མི་བྱེད་དོ། །ཆོས་སྨྲ་བ་ནི་བྱང་ཆུབ་ཀྱི་ཕྱིར་མི་འདྲ་བར་ཆོས་གང་ཡང་མི་མཐོང་ངོ་། །སྟོང་པ་ཉིད་ལས་གྲོལ་བའི་ཆོས་མི་སྟོན་ཏོ། །མཚན་མ་མེད་པ་དང་། སྟོན་པ་མེད་པ་ལས་རྣམ་པར་གྲོལ་བའི་ཆོས་མི་སྟོན་ཏོ། །ཆོས་ཀྱི་དབྱིངས་ཐ་དད་དུ་མི་བྱེད་དོ། །དེ་བཞིན་ཉིད་
ལས་མི་གཡོའོ། །ཡང་དག་པའི་མཐའ་ལས་ཤིན་ཏུ་མི་འདའོ། །ཚིག་འབྲུ་ལ་རྟོན་པ་མ་ཡིན་ནོ། །རྣམ་པར་ཤེས་པ་ལ་རྟོན་པ་མ་ཡིན་ནོ། །དྲང་བ་ལ་རྟོན་པ་མ་ཡིན་ནོ། །གང་ཟག་ལ་རྟོན་པ་མ་ཡིན་ནོ། །དོན་དང་འགལ་བ་མ་ཡིན་ནོ། །ཚིག་འབྲུ་དང་འགལ་བ་མ་ཡིན་

ནོ། །ཡེ་ཤེས་དང་འགལ་བ་མ་ཡིན་ནོ། །རྣམ་པར་ཤེས་པ་དང་འགལ་བ་མ་ཡིན་ནོ། །ངེས་པའི་དོན་དང་འགལ་བ་མ་ཡིན་ནོ། །དྲང་བའི་དོན་དང་འགལ་བ་མ་ཡིན་ནོ། །ཆོས་ཉིད་དང་འགལ་བ་མ་ཡིན་ནོ། །གང་ཟག་དང་འགལ་བ་མ་ཡིན་ནོ། །ཕྱོགས་ཡོངས་སུ་འཛིན་པར་
མི་བྱེད་དོ། །རྟེན་ཅིང་འབྲེལ་པར་འབྱུང་བ་དང་འགལ་བར་མི་བྱེད་དོ། །ཆོས་སྨྲ་བ་ནི་འཇིག་རྟེན་གྱི་ཆོས་གང་གིས་ཀྱང་རྣམ་པར་དག་པར་མི་ཤེས་སོ། །སེར་སྣའི་ཉོན་མོངས་པས་བསྒྲིབས་པ་མ་ཡིན་ནོ། །ཚུལ་ཁྲིམས་ལས་ཉམས་པ་མ་ཡིན་ནོ། །ངང་ཚུལ་ངན་པའི་སེམས་ཅན་
འདོར་བ་མ་ཡིན་ནོ། །ཁྲོ་བ་དང་། གནོད་སེམས་དང་། ཐ་བ་ཅན་མ་ཡིན་ནོ། །ལེ་ལོའི་དྲི་མ་དང་ལྷན་ཅིག་གནས་པ་མ་ཡིན་ནོ། །ཆོས་སྨྲ་བ་ནི་བྱང་ཆུབ་ཀྱི་སེམས་བརྗེད་པ་མ་ཡིན་ནོ། །ཤེས་རབ་ཀྱི་རྩ་བ་ཉན་པ་ཆུད་གསོན་པ་མ་ཡིན་ནོ། །གཞན་ལ་སྨོད་པ་མ་ཡིན་ནོ། །གང་
ཟག་ལ་སྡང་བ་དང་། ཆོས་ལ་སྡང་བར་མི་བྱེད་དོ། །མདོ་སྡེ་དང་མདོ་སྡེ་འགལ་བར་མི་བྱེད་དོ། །འདུལ་བ་ལ་འདུལ་བ་མ་ཡིན་པར་མི་བྱེད་དོ། །ཆོས་ཉིད་དང་འགལ་བར་མི་བྱེད་དོ། །ཚུལ་བཞིན་སྦྱོར་བའི་ཆོས་གང་ལ་ཡང་ཆོས་མ་ཡིན་པར་མི་མཐོང་ངོ་། །ང་རྒྱལ་གྱིས་ང་རྒྱལ་
འཕེལ་བར་མི་བྱེད་དོ། །ཆོས་ལས་ཉམས་པ་མ་ཡིན་ནོ། །བྱས་པ་ཆུད་གསོན་པ་མ་ཡིན་ནོ། །བག་ལ་ཉལ་མི་འཛིན་ཏོ། །བསྟི་སྟང་ལ་རྗེས་སུ་ཆགས་པ་མ་ཡིན་ནོ། །བསྟི་སྟང་མེད་པ་ལ་ཁོང་ཁྲོ་བ་མ་ཡིན་ནོ། །མཛའ་བ་དང་། མི་མཛའ་བ་ལ་གཉིས་སུ་འདུ་ཤེས་མི་བྱེད་དོ། །རྒྱུ་དང་འབྲས་བུ་
ཆུད་མི་གསོན་ཏོ། །ཆོས་སྨྲ་བ་ནི་ལས་ཀྱི་རྣམ་པར་སྨིན་པ་ལ་མི་མོས་པ་མ་ཡིན་ནོ། །སྨྲས་པའི་ལན་མི་སྟེར་བ་མ་ཡིན་ནོ། །ཆོས་སྨྲ་བ་ནི་དགྲ་མེད་པའོ། །འཁྲུལ་པ་མི་ཚོལ་ལོ། །ལྕེ་གཉིས་མེད་དོ། །ལུས་དང་། ངག་དང་། སེམས་ལ་ཚུལ་འཆོས་པ་མེད་དོ། །ཆོས་
ལ་ཚུལ་འཆོས་པ་མེད་དོ། །ཆོས་སྨྲ་བ་ནི་གཞན་ལ་ཉེ་བར་བསྟན་པའི་ཕྱིར་དགོན་པར་གནས་པ་མ་ཡིན་ནོ། །འཐོབ་པར་འདོད་པའི་ཕྱིར་འདོད་པ་ཆུང་བ་ལྟར་སྟོན་པ་མ་ཡིན་ནོ། །འདོད་ཆེན་ཆེ་བས་སྡིག་པ་མ་ཡིན་ནོ། །ཆོས་སྨྲ་བ་ནི། སངས་རྒྱས་ཀྱི་བྱང་ཆུབ་གཞན་གྱིས་བྱས་པ་མི་སྟོན་ཏོ། །

མི་མཉམ་པར་ལེན་པ་མི་རྩོམ་མོ། །ནོར་བདུན་མ་རུང་བར་མི་བྱེད་དོ། །ཤ་ཟ་བ་མ་ཡིན་ནོ། །ཕའི་རིགས་གཅོད་པ་མ་ཡིན་ནོ། །གཞན་གྱི་ཡོན་ཏན་མ་རུང་བར་མི་བྱེད་དོ། །བདག་གི་ཡོན་ཏན་བརྗོད་པ་མ་ཡིན་ནོ། །སངས་རྒྱས་ཀྱི་ཆོས་ཚད་ཡོད་པར་སྟོན་པ་མ་
ཡིན་ནོ། །ང་ཆོས་སྨྲ་བ་ནི་ཐེག་པ་ཆེན་པོའི་བསྔགས་པ་བརྗོད་པས་མི་ངོམས་ཏེ། དེའི་ཕྱིར་ན་ཆོས་སྨྲ་བ་ཞེས་བྱའོ། །བུ་མོ་དེ་ལ་ཇི་ལྟར་ན་བྱང་ཆུབ་སེམས་དཔའ་དོན་སྨྲ་བ་ཡིན་ཞེ་ན། དོན་ཞེས་བྱ་བ་ནི་བསམ་པས་བཅོས་མ་མ་ཡིན་པ་ནི་དོན་ཏོ། །སྦྱོར་བས་དགེ་བའི་རྩ་བ་
ཐམས་ཅད་ཡང་དག་པར་སྒྲུབ་པ་ནི་དོན་ཏོ། །ལྷག་པའི་བསམ་པའི་ཁྱད་པར་ནི་དོན་ཏོ། །གཞན་བྱང་ཆུབ་ཀྱི་སེམས་ཡང་དག་པར་འཛིན་དུ་འཇུག་པ་ནི་དོན་ཏོ། །སྦྱིན་པས་རྣམ་པར་སྨིན་པ་ལ་མི་རེ་བ་ནི་དོན་ཏོ། །སེམས་ཅན་རྣམས་བདེ་བ་མྱོང་བར་བྱེད་པ་ནི་དོན་ཏོ། །ཚུལ་
ཁྲིམས་ལས་ཉམས་པ་མེད་པ་ནི་དོན་ཏོ། །བཟོད་པས་མ་རྨས་པ་ནི་དོན་ཏོ། །བརྩོན་འགྲུས་ཀྱིས་དགོས་པ་ཐམས་ཅད་མཐར་འབྱིན་པ་ནི་དོན་ཏོ། །བསམ་གཏན་གྱིས་ཉེ་བར་ཞི་བ་ནི་དོན་ཏོ། །ཤེས་རབ་ཀྱིས་ཐེ་ཙོམ་མེད་པ་ནི་དོན་ཏོ། །བྱམས་པས་སེམས་ཅན་ཐམས་ཅད་ལ་
སེམས་སྙོམས་པ་ནི་དོན་ཏོ། །སྙིང་རྗེས་སེམས་ཅན་ཐམས་ཅད་ཀྱི་ཅི་བྱ་བ་བྱེད་པ་ནི་དོན་ཏོ། །དགའ་བས་ཆོས་ལ་དགའ་ཞིང་མོས་པ་ནི་དོན་ཏོ། །བཏང་སྙོམས་ཀྱིས་བདེ་བ་དང་སྡུག་བསྔལ་ཐམས་ཅད་མི་འབྱེད་པ་ནི་དོན་ཏོ། །སྦྱིན་པས་འགྱོད་པ་མེད་པ་ནི་དོན་ཏོ། །སྙན་པར་
སྨྲ་བས་ཁོང་ཁྲོ་བ་མེད་པ་ནི་དོན་ཏོ། །དོན་བྱེད་པས་ཆོས་དང་ལྡན་པའི་བསམ་པ་ཡོངས་སུ་རྫོགས་པར་བྱེད་པ་ནི་དོན་ཏོ། །དོན་འཐུན་པས་སེམས་ཅན་རྣམས་ཐེག་པ་ཆེན་པོ་ཡང་དག་པར་འཛིན་དུ་འཇུག་པ་ནི་དོན་ཏོ། །བསྡུ་བའི་དངོས་པོ་རྣམས་ཀྱིས་སེམས་ཅན་ཡོངས་སུ་སྨིན་
པར་བྱེད་པ་ནི་དོན་ཏོ། །འདུ་བྱེད་ཐམས་ཅད་མི་རྟག་པ་དང་སྡུག་བསྔལ་བ་ནི་དོན་ཏོ། །ཆོས་ཐམས་ཅད་བདག་མེད་པ་ནི་དོན་ཏོ། །ཉོན་མོངས་པ་ཐམས་ཅད་ཞི་བ་ནི་དོན་ཏོ། །ཚིག་འབྲུ་ལས་དོན་ལ་རྟོན་པ་ནི་དོན་ཏོ། །རྣམ་པར་ཤེས་པ་ལས་ཡེ་ཤེས་ལ་རྟོན་པ་ནི་དོན་ཏོ། །

མདོ་སྡེ་ཐམས་ཅད་ལས་ངེས་པའི་དོན་གྱི་མདོ་སྡེ་ལ་རྟོན་པ་ནི་དོན་ཏོ། །སྲོག་དང་གང་ཟག་གི་སྒྲ་ལས་ཆོས་ཉིད་ལ་རྟོན་པ་ནི་དོན་ཏོ། །དོན་སོ་སོ་ཡང་དག་པར་རིག་པས་བསྟན་པ་མི་ཟད་པ་ནི་དོན་ཏོ། །ཆོས་སོ་སོ་ཡང་དག་པར་རིག་པས་ཆོས་ཀྱི་དབྱིངས་འདྲེས་པ་མེད་པ་
ནི་དོན་ཏོ། །ངེས་པའི་ཚིག་སོ་སོ་ཡང་དག་པར་རིག་པས་ཕུང་པོ་མ་ལུས་པའི་ཡེ་ཤེས་ཀྱི་རྗེས་སུ་འཇུག་པ་ནི་དོན་ཏོ། །སྤོབས་པ་སོ་སོ་ཡང་དག་པར་རིག་པས་ཅི་རིགས་པར་ཆོས་སྟོན་པ་ནི་དོན་ཏོ། །སྦྱིན་པའི་ཚོགས་ཀྱིས་མི་ངོམས་པ་ནི་དོན་ཏོ། །ཚུལ་ཁྲིམས་ཀྱི་ཚོགས་ལས་
སྨོན་ལམ་ཡོངས་སུ་རྫོགས་པར་བྱེད་པ་ནི་དོན་ཏོ། །ཐོས་པའི་ཚོགས་ལས་ནན་ཏན་སྙིང་པོར་བྱེད་པ་ནི་དོན་ཏོ། །བསོད་ནམས་ཀྱི་ཚོགས་ལས་མཚན་ཡོངས་སུ་རྫོགས་པར་བྱེད་པ་ནི་དོན་ཏོ། །ཡེ་ཤེས་ཀྱི་ཚོགས་ལས་སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་
ཡིན་པ་ཤེས་པ་ནི་དོན་ཏོ། །ཞི་གནས་ཀྱི་ཚོགས་ལས་སེམས་ལས་སུ་རུང་བ་ནི་དོན་ཏོ། །ལྷག་མཐོང་གི་ཚོགས་ལས་རིག་པ་དང་རྣམ་པར་གྲོལ་བ་ནི་དོན་ཏོ། །དྲན་པ་ཉེ་བར་གཞག་པ་རྣམས་ཀྱིས་དྲན་པ་ཉེ་བར་གནས་པ་ནི་དོན་ཏོ། །ཡང་དག་པར་སྤོང་བ་རྣམས་ཀྱིས་
དགེ་བའི་ཆོས་ཐམས་ཅད་སྐྱེད་པ་ནི་དོན་ཏོ། །རྫུ་འཕྲུལ་གྱི་རྐང་པ་རྣམས་ཀྱིས་ཕྱོགས་བཅུར་བགྲོད་པ་ནི་དོན་ཏོ། །དབང་པོ་རྣམས་ཀྱིས་ཚིག་རབ་ཏུ་འབྱེད་པ་ནི་དོན་ཏོ། །སྟོབས་རྣམས་ཀྱིས་ཉོན་མོངས་པ་ཐམས་ཅད་འདུལ་བ་ནི་དོན་ཏོ། །བྱང་ཆུབ་ཀྱི་ཡན་ལག་རྣམས་ཀྱིས་ཆོས་
ཐམས་ཅད་ཁོང་དུ་ཆུད་པ་ནི་དོན་ཏོ། །ལམ་གྱིས་ཆོས་ཐམས་ཅད་མི་འཁྲུགས་པ་ནི་དོན་ཏོ། །མངོན་པར་ཤེས་པ་རྣམས་ལས་ཤིན་ཏུ་ཉམས་པ་མེད་པ་ནི་དོན་ཏོ། །དེ་ལྟར་ན་གང་ཆོས་རྣམ་པ་འདི་ལྟ་བུ་ལས་དོན་རབ་ཏུ་མྱོང་བ་དེ་ནི་འདི་ལྟར་དོན་སྨྲ་བ་ཡིན་ཏེ། དོན་མ་ཡིན་པ་སྨྲ་བ་མ་ཡིན་ནོ། །
དེ་ལྟར་ན་བྱང་ཆུབ་སེམས་དཔའ་དོན་སྨྲ་བ་ཡིན་ནོ། །བུ་མོ་གཞན་ཡང་དམིགས་པར་ལྟ་བ་ཐམས་ཅད་རབ་ཏུ་ཞི་བར་བྱ་བའི་ཕྱིར་སྟོང་པ་ཉིད་ཀྱི་དོན་ནི་དོན་ཏེ། བྱང་ཆུབ་སེམས་དཔའ་སྟོང་པ་ཉིད་དུ་སྨྲ་བ་ནི་དོན་སྨྲ་བ་ཡིན་ནོ། །རྟོག་པ་དང་རྣམ་པར་རྟོག་པ་ཐམས་ཅད་སྤང་བའི་ཕྱིར་མཚན་མ་མེད་པའི་

དོན་ནི་དོན་ཏོ། །བྱང་ཆུབ་སེམས་དཔའ་མཚན་མ་མེད་པ་སྨྲ་བ་ནི་དོན་སྨྲ་བ་ཡིན་ནོ། །ཁམས་གསུམ་པ་ཐམས་ཅད་ཀྱི་སྨོན་ལམ་དང་བྲལ་བའི་ཕྱིར་སྨོན་པ་མེད་པའི་དོན་ནི་དོན་ཏེ། བྱང་ཆུབ་སེམས་དཔའ་སྨོན་པ་མེད་པ་སྨྲ་བ་ནི་དོན་སྨྲ་བ་ཡིན་ནོ། །དེ་བཞིན་དུ་བསྡུས་ཏེ་
འདུ་བྱེད་ཐམས་ཅད་ཀྱི་རྒྱུན་གཅད་པའི་ཕྱིར་མངོན་པར་འདུ་མི་བྱེད་པའི་དོན་ནི་དོན་ཏོ། །སྐྱེ་བ་ཐམས་ཅད་ཉེ་བར་ཞི་བར་བྱ་བའི་ཕྱིར་སྐྱེ་བ་མེད་པའི་དོན་ནི་དོན་ཏོ། །སྐྱེ་བ་ཉེ་བར་ལེན་པའི་སྐྱེ་བ་ཐམས་ཅད་མི་སྐྱེ་མི་འབྱུང་བའི་དོན་ནི་དོན་ཏོ། །བྱང་ཆུབ་སེམས་དཔའ་མི་སྐྱེ་བ་སྨྲ་བ་ནི་དོན་སྨྲ་བ་ཡིན་
ནོ། །སྡུག་བསྔལ་དང་། ཀུན་འབྱུང་བ་དང་། ལམ་དང་། འགོག་པའི་དོན་ནི་དོན་ཏོ། །འགོག་པ་སྨྲ་བ་དང་། ཆོས་ཐམས་ཅད་ལ་གང་ཟག་མེད་པའི་དོན་ནི་དོན་ཏེ། གང་ཟག་མེད་པ་སྨྲ་བ་དང་སྐད་དང་། ཚིག་ཐམས་ཅད་བརྗོད་དུ་མེད་པའི་དོན་ནི་དོན་ཏོ། བརྗོད་དུ་མེད་པ་སྨྲ་བ་
དང་། བརྟུལ་ཞུགས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་བདེན་པའི་དོན་ནི་དོན་ཏོ། །བདེན་པ་སྨྲ་བ་དང་། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ལ་བག་ཡོད་པའི་དོན་ནི་དོན་ཏོ། །བག་ཡོད་པ་སྨྲ་བ་དང་། ཐོས་པའི་དོན་ཐམས་ཅད་ལ་ནན་ཏན་བྱེད་པའི་དོན་
ནི་དོན་ཏོ། །ནན་ཏན་བྱེད་པ་སྨྲ་བ་དང་། ཐེག་པ་ཐམས་ཅད་ཐེག་པ་ཆེན་པོའི་དོན་ནི་དོན་ཏོ། །བྱང་ཆུབ་སེམས་དཔའ་ཐེག་པ་ཆེན་པོ་སྨྲ་བ་ནི་དོན་སྨྲ་བ་ཡིན་ནོ། །བུ་མོ་གཞན་ཡང་དབྱེར་མེད་པའི་དོན་ནི་དོན་ཏོ། །སེམས་ཅན་མེད་པའི་དོན་ནི་དོན་ཏོ། །རོ་གཅིག་པའི་དོན་ནི་དོན་ཏོ། །ཐ་དད་
པ་མེད་པའི་དོན་ནི་དོན་ཏོ། །ཚུལ་གཅིག་པའི་དོན་ནི་དོན་ཏོ། །ཚིག་མེད་པའི་དོན་ནི་དོན་ཏོ། །མི་ཟད་པའི་དོན་ནི་དོན་ཏོ། །མི་སྲིད་པའི་དོན་ནི་དོན་ཏོ། །མི་སྐྱེ་མི་འབྱུང་བའི་དོན་ནི་དོན་ཏོ། །འོང་བ་མེད་པ་དང་འགྲོ་བ་མེད་པའི་དོན་ནི་དོན་ཏོ། །མི་སྐྱེ་མི་འགག་པའི་དོན་ནི་དོན་ཏོ། །རྗེས་སུ་
འགྲོ་བའི་དོན་ནི་དོན་ཏོ། །གདེག་པ་མེད་ཅིང་གཞག་པ་མེད་པའི་དོན་ནི་དོན་ཏོ། །མངོན་པར་འདུ་མི་བྱེད་པའི་དོན་ནི་དོན་ཏོ། །འདུས་མ་བྱས་པའི་དོན་ནི་དོན་ཏོ། །སྒྲོ་བཏགས་པ་མེད་པའི་དོན་ནི་དོན་ཏོ། །རྣམ་པར་རིག་པ་མེད་པའི་དོན་ནི་དོན་ཏོ། །འཁོར་གསུམ་ཡོངས་སུ་སྦྱོང་བའི་དོན་ནི་

དོན་ཏོ། །དུས་གསུམ་མཉམ་པ་ཉིད་ཀྱི་དོན་ནི་དོན་ཏོ། །འཁོར་གསུམ་ཡོངས་སུ་དག་པའི་དོན་ནི་དོན་ཏོ། །འགྲོ་བ་མེད་པའི་དོན་ནི་དོན་ཏོ། །འཇིག་པ་མེད་པའི་དོན་ནི་དོན་ཏོ། །ཐུན་མོང་མ་ཡིན་པའི་དོན་ནི་དོན་ཏོ། །ཡོངས་སུ་གདུང་བ་མེད་པའི་དོན་ནི་དོན་ཏོ། །ཉེ་བར་ཞི་བའི་
དོན་ནི་དོན་ཏོ། །འདྲི་བ་མེད་པའི་དོན་ནི་དོན་ཏོ། །རྒྱུ་བ་མེད་པའི་དོན་ནི་དོན་ཏོ། །གཟུང་བ་མེད་པའི་དོན་ནི་དོན་ཏོ། །སྔོན་གྱི་མཐའ་དང་ཕྱི་མའི་མཐའ་ཡོངས་སུ་མ་ཆད་པའི་དོན་ནི་དོན་ཏོ། །མི་འཁྲུགས་པའི་དོན་ནི་དོན་ཏོ། །ཆོས་དང་ཆོས་མ་ཡིན་པ་ལ་རྣམ་པར་མི་རྟོག་པའི་དོན་ནི་
དོན་ཏོ། །མཐའ་དང་མཐའ་མེད་པ་དང་། ཆད་པ་དང་རྟག་པ་མཉམ་པ་ཉིད་ཀྱི་ཡེ་ཤེས་ལ་འཇུག་པའི་དོན་ནི་དོན་ཏོ། །ཡི་གེ་དང་ངེས་པའི་ཚིག་དང་། སྒྲ་དང་། ཚིག་གི་ལམ་ཐམས་ཅད་ཇི་ལྟ་བ་བཞིན་དུ་ནན་ཏན་བྱ་བ་དང་། ཁོང་དུ་ཆུད་པར་བྱ་བའི་དོན་ནི་དོན་ཏོ། །སེམས་དང་། ཡིད་
དང་། རྣམ་པར་ཤེས་པ་དང་། སྤྲོས་པ་ལ་མི་རྒྱུ་བའི་དོན་ནི་དོན་ཏོ། །འདོད་ཆགས་དང་། ཞེ་སྡང་དང་། གཏི་མུག་གི་ཉོན་མོངས་པ་ལ་རྣམ་པར་མི་རྟོག་པའི་དོན་ནི་དོན་ཏོ། །ཆོས་ཐམས་ཅད་མཉམ་པ་ཉིད་དེ་ཐ་མི་དད་ཅིང་སྣ་ཚོགས་མེད་པའི་དོན་ནི་དོན་ཏོ། །སྟོང་པ་ཉིད་དང་།
མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་བྱ་བ་མེད་པའི་དོན་ནི་དོན་ཏོ། །དོན་དམ་པའི་བདེན་པའི་དོན་ནི་དོན་ཏོ། །གཞན་གྱི་དྲིང་ལ་མི་འཇོག་པའི་དོན་ནི་དོན་ཏོ། །རྣམ་པར་རིག་པ་མེད་པའི་མཚན་ཉིད་ཀྱི་དོན་ནི་དོན་ཏོ། །ཤིན་ཏུ་བརྟགས་པའི་མཚན་ཉིད་ཀྱི་དོན་
ནི་དོན་ཏོ། །སྡུག་བསྔལ་བའི་མཚན་ཉིད་ཀྱི་དོན་ནི་དོན་ཏོ། །དབེན་པའི་མཚན་ཉིད་ཀྱི་དོན་ནི་དོན་ཏོ། །གནས་མེད་པའི་མཚན་ཉིད་ཀྱི་དོན་ནི་དོན་ཏོ། །དོན་བྱ་བ་མ་རུང་བར་མི་བྱེད་པའི་དོན་ནི་དོན་ཏོ། །དབྱེར་མེད་པའི་མཚན་ཉིད་ཀྱི་དོན་ནི་དོན་ཏོ། །དེ་ཁོ་ན་དང་དེ་བཞིན་ཉིད་དང་གཞན་
མ་ཡིན་པ་དེ་ཁོ་ནའི་མཚན་ཉིད་ཀྱི་དོན་ནི་དོན་ཏོ། །ཤིན་ཏུ་དུལ་བ་ངེས་པའི་དོན་གྱི་མཚན་ཉིད་ཀྱི་དོན་ནི་དོན་ཏོ། །ཕུང་པོ་སྒྱུ་མའི་ངོ་བོ་ཉིད་ཀྱི་མཚན་ཉིད་ཀྱི་དོན་ནི་དོན་ཏོ། །ཁམས་ཆོས་ཀྱི་དབྱིངས་ཀྱི་མཚན་ཉིད་ཀྱི་དོན་ནི་དོན་ཏོ། །སྐྱེ་མཆེད་དབེན་པའི་མཚན་ཉིད་ཀྱི་དོན་ནི་དོན་ཏོ། །

ནང་ཉེ་བར་ཞི་བའི་མཚན་ཉིད་ཀྱི་དོན་ནི་དོན་ཏོ། །ཕྱི་རོལ་དུ་རྒྱུ་བ་མེད་པའི་མཚན་ཉིད་ཀྱི་དོན་ནི་དོན་ཏོ། །སྦྱིན་པ་དང་། དུལ་བ་དང་། ཉེ་བར་ཞི་བའི་མཚན་ཉིད་ཀྱི་དོན་ནི་དོན་ཏོ། །བདེན་པ་ཡང་དག་པ་སླུ་བ་མེད་པའི་མཚན་ཉིད་ཀྱི་དོན་ནི་དོན་ཏོ། །ཉོན་མོངས་པ་ཐམས་ཅད་ཅི་
ཡང་མ་ཡིན་པའི་དོན་ནི་དོན་ཏོ། །རྡོ་རྗེ་ལྟར་སྲ་བ་མི་ཕྱེད་པའི་མཚན་ཉིད་ཀྱི་དོན་ནི་དོན་ཏོ། །འཇིག་རྟེན་ཐམས་ཅད་དང་མི་འགལ་བའི་མཚན་ཉིད་ཀྱི་དོན་ནི་དོན་ཏོ། །ལེགས་པར་བྱས་པ་ཤིན་ཏུ་མཐར་གཏུགས་པའི་མཚན་ཉིད་ཀྱི་དོན་ནི་དོན་ཏོ། །ཐམས་ཅད་ཀྱི་རྗེས་སུ་སོང་བ་ཁོང་དུ་ཆུད་
པའི་མཚན་ཉིད་ཀྱི་དོན་ནི་དོན་ཏོ། །རྣམ་པར་ཐར་པའི་སྒྲིབ་པ་མེད་པའི་མཚན་ཉིད་ཀྱི་དོན་ནི་དོན་ཏོ། །འགྲོ་བ་ཐམས་ཅད་དུ་ཡང་དག་པར་ཞུགས་ཤིང་སངས་རྒྱས་ཀྱི་ཆོས་ཐམས་ཅད་ཀྱི་རྗེས་སུ་འཇུག་པའི་མཚན་ཉིད་ཀྱི་དོན་ནི་དོན་ཏོ། །མཉམ་པ་དང་མི་མཉམ་པ་ཉིད་དུ་ཡང་དག་པར་སྟོན་
པའི་མཚན་ཉིད་ཀྱི་དོན་ནི་དོན་ཏོ། །ཏིང་ངེ་འཛིན་དང་ཤེས་རབ་ལས་ངེས་པར་བྱུང་བའི་མཚན་ཉིད་ཀྱི་དོན་ནི་དོན་ཏོ། །ངེས་པའི་ཚིག་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་མཚན་ཉིད་ཀྱི་དོན་ནི་དོན་ཏོ། །ཡེ་ཤེས་ཀྱི་རྒྱུ་འཐུན་པའི་མཚན་ཉིད་ཀྱི་དོན་ནི་དོན་
ཏོ། །བརྟགས་པ་རྣམ་པར་རིག་པའི་མཚན་ཉིད་ཀྱི་དོན་ནི་དོན་ཏོ། །ཡང་དག་པའི་ཤེས་པས་ལན་འདེབས་པའི་མཚན་ཉིད་ཀྱི་དོན་ནི་དོན་ཏོ། །དོན་ཐམས་ཅད་ཡང་དག་པར་འདུ་བའི་མཚན་ཉིད་ཀྱི་དོན་ནི་དོན་ཏོ། །བྱང་ཆུབ་སེམས་དཔའ་གང་དོན་འདི་ལྟ་བུ་དང་ལྡན་པས་དོན་གང་
བསྟན་པ་དེ་དག་ཐམས་ཅད་ནི་དོན་བསྟན་པ་སྟེ་དེའི་ཕྱིར་དོན་སྨྲ་བ་ཞེས་བྱའོ། །བུ་མོ་དེ་ལ་ཇི་ལྟར་ན་བྱང་ཆུབ་སེམས་དཔའ་འདུལ་བ་སྨྲ་བ་ཡིན་ཞེ་ན། འདུལ་བ་ནི་དེ་བཞིན་གཤེགས་པས་གཉིས་སུ་གསུངས་ཏེ་གཉིས་གང་ཞེ་ན། ལྟུང་བ་འདུལ་བ་དང་། ཉོན་མོངས་པ་འདུལ་བའོ། །
དེ་ལ་ལྟུང་བ་ནི་གང་། ལྟུང་བ་འདུལ་བ་ནི་གང་ཞེ་ན། ལྟུང་བ་ཞེས་བྱ་བ་ནི་ཡོངས་སུ་རྟོག་པའི་རྩ་བ་ལས་བྱུང་བ། ཚུལ་བཞིན་མ་ཡིན་པའི་རྩ་བ་ལས་བྱུང་བ། མ་རིག་པའི་རྩ་བ་ལས་བྱུང་བ། ཕྱིན་ཅི་ལོག་གི་རྩ་བ་ལས་བྱུང་བ། ཡང་དག་པ་མ་ཡིན་པའི་རྩ་བ་ལས་བྱུང་བ།

ཡོད་པ་མ་ཡིན་པའི་རྩ་བ་ལས་བྱུང་བ། འཇིག་ཚོགས་ཀྱི་རྩ་བ་ལས་བྱུང་བ། སེམས་ཅན་དུ་མངོན་པར་ཞེན་པའི་རྩ་བ་ལས་བྱུང་བ། འགྱོད་པའི་རྩ་བ་ལས་བྱུང་བ། འབྱུང་བ་མ་ཡིན་པའི་རྩ་བ་ལས་བྱུང་བ། ཐེ་ཚོམ་གྱི་རྩ་བ་ལས་བྱུང་བ། ཞེན་ཅིང་རྨོངས་པའི་རྩ་བ་ལས་བྱུང་
བ། ཤེས་རབ་ཉམ་ཆུང་བའི་རྩ་བ་ལས་བྱུང་བ་སྟེ། འདི་ནི་ལྟུང་བ་ཞེས་བྱའོ། །དེ་ལ་ལྟུང་བ་འདུལ་བ་གང་ཞེ་ན། ཐེ་ཚོམ་མེད་པ་ལ་རབ་ཏུ་གནས་པའི་འབྱུང་བ་སྟེ། ལྟུང་བ་ནི་ཡུལ་ན་མི་གནས་པ། ཕྱོགས་ན་མི་གནས་པ། ཕུང་པོར་མ་གྱུར་པ། གཟུང་བ་མེད་པ་སྣང་བ་
མེད་པའོ། །སེམས་གང་གིས་ལྟུང་བར་གྱུར་པ་དེ་ཡང་ཟད་པ་དང་བྲལ་བ། རྣམ་པར་གྱུར་པ། ཡུལ་ན་མི་གནས་པ། ཕྱོགས་ན་མི་གནས་པ། ཕུང་པོར་མ་གྱུར་པ། གཟུང་བ་མེད་པ། སྣང་བ་མེད་པའོ། །སེམས་ཇི་ལྟ་བར་ལྟུང་བ་ཡང་དེ་བཞིན་ནོ། །ལྟུང་བ་ཇི་ལྟ་བར་ཆོས་
ཐམས་ཅད་ཀྱང་དེ་བཞིན་ཏེ། རྩ་བ་མེད་དོ། །མི་གནས་པའོ། །གང་སེམས་སོམ་ཉི་མེད་པ་དང་། རྙོག་པ་མེད་པ་དང་། ཡང་བ་དང་། ཞི་བ་དང་། ཡོངས་སུ་གདུང་བ་མེད་པ་དང་། གསལ་བ་དང་། ཤིན་ཏུ་བྱང་བ་དང་། བླ་མའི་ཚིག་ལ་མོས་པ་དང་། གཅིག་ཏུ་ངེས་པར་ཐེ་
ཚོམ་མེད་ཅིང་གཅིག་ཏུ་ཡིད་ཆེས་པ་འདི་ནི་ལྟུང་བ་འདུལ་བ་ཞེས་བྱའོ། །དེ་ལ་ཉོན་མོངས་པ་ནི་གང་ཉོན་མོངས་པ་འདུལ་བ་ནི་གང་ཞེ་ན། ཉོན་མོངས་པ་ཞེས་བྱ་བ་ནི་འདོད་ཆགས་དང་། ཞེ་སྡང་དང་། གཏི་མུག་དང་། མ་རིག་པ་དང་། སྲེད་པ་དང་། ལེན་པ་དང་། སྲིད་པའི་ཡན་
ལག་བཅུ་གཉིས་དང་། གང་དག་ལ་འདུས་བྱས་འཇུག་པ་འདི་ནི་ཉོན་མོངས་པ་ཞེས་བྱའོ། །དེ་ལ་ཉོན་མོངས་པ་འདུལ་བ་གང་ཞེ་ན། འདི་ལྟ་སྟེ། ཆོས་ཐམས་ཅད་ནི་ཤིན་ཏུ་དུལ་བའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་སྟོང་པ་ཉིད་ཀྱིས་དུལ་བ་སྟེ། དེ་ལ་འདོད་
ཆགས་ཀུན་དུ་རྒྱུ་བ་མེད་དོ། །ཞེ་སྡང་མེད་དོ། །གཏི་མུག་མེད་དོ། །ཆོས་ཐམས་ཅད་ནི་མཚན་མ་མེད་པས་དུལ་བ་སྟེ། དེ་ལ་ཉོན་མོངས་པ་ཐམས་ཅད་ཀུན་དུ་རྒྱུ་བ་མེད་དོ། །ཆོས་ཐམས་ཅད་ནི་སྨོན་པ་མེད་པས་དུལ་བ་སྟེ། དེ་ལ་ཀུན་དུ་རྒྱུ་བ་ཐམས་ཅད་ཀུན་དུ་རྒྱུ་བ་མེད་དོ། །

ཆོས་ཐམས་ཅད་ནི་མངོན་པར་འདུ་བྱ་བ་མེད་པས་དུལ་བ་སྟེ། དེ་ལ་མངོན་པར་འདུ་བྱེད་པ་ཐམས་ཅད་ཀུན་དུ་རྒྱུ་བ་མེད་དོ། །ཆོས་ཐམས་ཅད་ནི་རྐྱེན་གྱི་ཁ་ན་ལས་པ་སྟེ། དེ་ལ་ལྟ་བར་སོང་བ་ཐམས་ཅད་ཀུན་དུ་རྒྱུ་བ་མེད་དོ། །གང་རྟེན་ཅིང་འབྲེལ་པར་འབྱུང་
བའི་ཆོས་ཐམས་ཅད་ལ་ངེས་པ་དང་། ཡང་དག་པ་ཁོ་ན་དང་། ཉོན་མོངས་པ་ཐམས་ཅད་ཉོན་མོངས་པ་མ་ཡིན་པ་དང་། ཤིན་ཏུ་ཞི་བ་དང་། སྟོང་པ་ཉིད་གང་གིས་བྱང་ཆུབ་སྟོང་པའི་སྟོང་པ་ཉིད་དེས་ཉོན་མོངས་པ་ཐམས་ཅད་སྟོང་པར་གང་དེ་ལྟར་སྟོང་པ་ཉིད་ཁོང་དུ་ཆུད་པ་
འདི་ནི་ཉོན་མོངས་པ་འདུལ་བ་ཞེས་བྱ་སྟེ། གང་འདི་སྐད་སྨྲ་བ་འདི་ནི་འདུལ་བ་སྨྲ་བ་ཡིན་ནོ། །བདག་འདུལ་བའི་ཕྱིར་འདུལ་ཞིང་གང་བདག་འདུལ་བ་ཤེས་པ་དེ་ནི་ཉོན་མོངས་པ་འདུལ་བ་ཤེས་པའོ། །དེ་ལ་བདག་འདུལ་བ་གང་ཞེ་ན། གང་བདག་ལ་བདག་མེད་པར་ཤེས་པ་
དང་། བདག་གི་ངོ་བོ་ཉིད་ཤེས་པ་དང་། བདག་དབེན་པར་ཤེས་པ་དང་། བདག་ཇི་ལྟ་བ་བཞིན་དང་། བདག་མི་འཁྲུགས་པ་དང་། བདག་སྟོང་པ་ཉིད་དང་། བདག་དངོས་པོ་མེད་པ་ཉིད་དང་། བདག་དེ་བཞིན་ཉིད་དང་། བདག་མི་དམིགས་པ་དང་། བདག་རྒོད་པ་
མེད་པ་དང་། བདག་སྒྲོ་བཏགས་པ་མེད་པ་དང་། བདག་རྟག་ཏུ་སྐྱེ་བ་མེད་པར་ཤེས་པ་སྟེ། གང་དེ་ལྟར་བདག་ཤེས་པ་ནི་ཉོན་མོངས་པ་རྣམ་པ་ཐམས་ཅད་ཤེས་པའོ། །ཇི་ལྟར་བདག་མེད་པ་ལ་བདག་ཏུ་འདུ་ཤེས་ཕྱིན་ཅི་ལོག་པ་དེ་བཞིན་དུ་ཉོན་མོངས་པ་མེད་པ་ལ་ཉོན་
མོངས་པར་འདུ་ཤེས་ཕྱིན་ཅི་ལོག་གོ། །ཇི་ལྟར་བདག་རང་བཞིན་གྱིས་བདག་མེད་པ་དེ་བཞིན་དུ་ཉོན་མོངས་པ་ཡང་རང་བཞིན་གྱིས་ཉོན་མོངས་པ་མེད་པ་སྟེ། གང་དེ་ལྟར་ལྷག་མཐོང་གིས་ཤེས་པ་དེ་ནི་ཉོན་མོངས་པ་འདུལ་བ་ཞེས་བྱའོ། །དེ་ལ་འདས་པའི་ཉོན་མོངས་པ་དུལ་
བ་མ་ཡིན། མ་འོངས་པའང་མ་ཡིན། ད་ལྟར་བྱུང་བའང་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དུ་རྒྱུ་བ་མེད་ཅིང་ཡིད་ལ་བྱེད་པ་མེད་པ་དེ་ནི་ཉོན་མོངས་པ་འདུལ་བའོ། །གང་ཀུན་དུ་རྒྱུ་བ་མེད་ཅིང་ཡིད་ལ་བྱེད་པ་མེད་པ་དེ་ནི་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་

ཡིན་ནོ། །ཇི་ལྟར་སེམས་གཟུགས་ཅན་མ་ཡིན་ཏེ། ནང་ན་མ་ཡིན། ཕྱི་རོལ་ན་མ་ཡིན། གཉིས་ཀ་མེད་པ་ལ་ཡང་མི་དམིགས་པ། དེ་བཞིན་དུ་ཉོན་མོངས་པ་ཡང་གཟུགས་ཅན་མ་ཡིན་ཏེ། ནང་ན་མ་ཡིན། ཕྱི་རོལ་ན་མ་ཡིན། གཉིས་ཀ་མེད་པར་ཡང་
མི་དམིགས་སོ། །མི་དམིགས་པའི་ཕྱིར་ཉོན་མོངས་པ་ཐམས་ཅད་ནི་གནོད་པ་མེད་པའོ། །ཞི་བ་མེད་པའོ། །བྱ་བ་མེད་པའོ། །རྣམ་པར་བྱ་བ་མེད་པའོ། །བྱེད་པ་མེད་པའོ། །རྣམ་པར་བྱེད་པ་མེད་པའོ། །གང་དེ་ལྟར་ཉོན་མོངས་པ་རྣམས་འབྱུང་བ་དང་། འཇིག་
པ་མེད་པར་ཤེས་པ་འདི་ཡང་ཉོན་མོངས་པ་འདུལ་བའོ། །བདེན་པ་དང་། ཆོས་དང་དོན་དང་། འདུལ་བ་བསྟན་པ་འདི་བཤད་པ་ན། བྱང་ཆུབ་སེམས་དཔའ་ཁྲི་མི་སྐྱེ་བའི་ཆོས་ལ་བཟོད་པ་སྐྱེས་སོ། །བུ་མོ་རིན་ཆེན་ནི་ཚིམ་ཞིང་མགུ་སྟེ། ཡི་རངས་ཤིང་རབ་ཏུ་དགའ་ནས།
དགའ་བ་དང་ཡིད་བདེ་བ་སྐྱེས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་དེ་བཞིན་གཤེགས་པས་བདེན་པ་དང་། ཆོས་དང་དོན་དང་། འདུལ་བ་བསྟན་པ་འདི་ལེགས་པར་གསུངས་པ་ནི་ངོ་མཚར་ཏོ། །བཅོམ་ལྡན་འདས་བྱང་ཆུབ་
སེམས་དཔའ་གང་འདི་ལྟར་སྨྲ་བར་འགྱུར་བ་དེ་དག་ནི་རྩོད་པ་མ་མཆིས་པ་ལྷུར་ལེན་པ་སྟེ། སེམས་ཅན་ཐམས་ཅད་ཀྱི་རྩོད་པ་སྤོང་བའི་སླད་དུ་ཆོས་སྟོན་པར་འགྱུར་རོ། །བུ་མོ་བྱང་ཆུབ་སེམས་དཔའ་གང་འདི་ལྟར་ཉོན་མོངས་པ་ཤིན་ཏུ་བཏུལ་བ། དེ་གཞན་དག་གི་ཉོན་
མོངས་པ་ཡང་འདུལ་བའི་ཕྱིར་ཆོས་སྟོན་པས་དེའི་ཕྱིར་འདུལ་བ་སྨྲ་བ་ཞེས་བྱའོ། །བདེན་པ་བསྟན་པའི་ལེའུའོ།། །།བམ་པོ་གཉིས་པ། དེ་ནས་ཚེ་དང་ལྡན་པ་ཤཱ་རིའི་བུས་བུ་མོ་རིན་ཆེན་ལ་འདི་སྐད་ཅེས་སྨྲས་སོ། །བུ་མོ་ཁྱོད་ཅི་བདེན་པ་དང་། ཆོས་དང་
དོན་དང་། འདུལ་བ་སྨྲ་བ་ཡིན་ནམ། བུ་མོ་རིན་ཆེན་གྱིས་སྨྲས་པ། བཙུན་པ་ཤཱ་རིའི་བུ་བདེན་པ་ནི་བསྙད་དུ་མེད་པའོ། །ཆོས་ནི་འདོད་ཆགས་དང་བྲལ་བའོ། །དོན་ནི་བརྗོད་དུ་མེད་པའོ། །འདུལ་བ་ནི་ལུས་དང་སེམས་དབེན་པ་སྟེ། དེ་ནི་ལན་གདབ་པར་མི་ནུས་སོ། །

བཙུན་པ་ཤཱ་རིའི་བུ་གཞན་ཡང་བདེན་པ་ནི་འགོག་པའི་བདེན་པའོ། །ཆོས་ནི་བདེན་པའི་མཚན་ཉིད་དོ། །དོན་ནི་ཚིག་འབྲུ་དང་བྲལ་བའོ། །འདུལ་བ་ནི་རྣམ་པར་གྲོལ་བའི་མཚན་ཉིད་དོ། །དེ་ནི་བརྗོད་པས་ལན་གདབ་པར་མི་ནུས་སོ། །བཙུན་པ་ཤཱ་རིའི་
བུ་གཞན་ཡང་བདེན་པ་ནི་དེ་བཞིན་ཉིད་དོ། །ཆོས་ནི་གཞན་མ་ཡིན་པ་དེ་བཞིན་ཉིད་དོ། །དོན་ནི་གཉིས་སུ་མེད་པའི་དོན་ཏོ། །འདུལ་བ་ནི་བྱ་བ་མེད་པའི་དོན་ཏོ། །དེ་ནི་བརྗོད་པ་མེད་པ་བསྟན་དུ་མེད་པའོ། །ཚེ་དང་ལྡན་པ་ཤཱ་རིའི་བུས་ཡང་བུ་མོ་རིན་ཆེན་ལ་འདི་སྐད་ཅེས་སྨྲས་
སོ། །བུ་མོ་ཁྱོད་ཀྱིས་རིན་པོ་ཆེ་ཅི་འདྲ་བ་ཞིག་བླངས་ནས་དེས་ཁྱོད་རིན་ཆེན་ཞེས་བྱ། དེ་སྐད་ཅེས་སྨྲས་པ་དང་། བུ་མོ་རིན་ཆེན་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་སུམ་ཅུ་རྩ་གཉིས་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་
མངོན་དུ་སེམས་བསྐྱེད་པ་རིན་པོ་ཆེ་སྟེ། གང་ཉན་ཐོས་དང་རང་སངས་རྒྱས་ཐམས་ཅད་ལ་མེད་པའོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ་འགྲོ་བ་ཐམས་ཅད་ཡོངས་སུ་བསྐྱབ་པའི་ཕྱིར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་དང་། སངས་རྒྱས་ཀྱི་གདུང་
སོབ་པའི་སེམས་བསྐྱེད་པ་རིན་པོ་ཆེ་དང་། ཆོས་ཀྱི་རིགས་ཀུན་དུ་འཛིན་པའི་སེམས་བསྐྱེད་པ་རིན་པོ་ཆེ་དང་། དགེ་འདུན་གྱི་རིགས་ཡོངས་སུ་སྒྲུབ་པ་རྒྱུན་མི་གཅོད་པའི་སེམས་བསྐྱེད་པ་རིན་པོ་ཆེ་དང་། སེམས་ཅན་ཐམས་ཅད་འཕགས་པའི་བདེན་པ་ལ་དགོད་པའི་
ཕྱིར་བྱམས་པ་ཆེན་པོའི་སེམས་བསྐྱེད་པ་རིན་པོ་ཆེ་དང་། སེམས་ཅན་ཐམས་ཅད་ཀྱི་ཉོན་མོངས་པ་སྤང་བའི་ཕྱིར་སྡུག་བསྔལ་ཐམས་ཅད་སེལ་བ་སྙིང་རྗེ་ཆེན་པོའི་སེམས་བསྐྱེད་པ་རིན་པོ་ཆེ་དང་། བདོག་པ་ཐམས་ཅད་ཡོངས་སུ་གཏོང་ཞིང་སེམས་ཅན་སེར་སྣ་ཅན་
རྣམས་ཡོངས་སུ་སྨིན་པར་བྱ་བའི་ཕྱིར་ནང་དང་ཕྱིའི་དངོས་པོ་ལ་མི་ལྟ་བའི་སེམས་བསྐྱེད་པ་རིན་པོ་ཆེ་དང་། བདག་ཀྱང་ཚུལ་ཁྲིམས་ལ་གནས་པ་དང་། ཚུལ་ངན་པའི་སེམས་ཅན་ཡོངས་སུ་སྨིན་པར་བྱེད་པའི་སེམས་བསྐྱེད་པ་རིན་པོ་ཆེ་དང་། བཟོད་པའི་སྟོབས་དང་།

དེས་པ་དང་། བདེ་བ་དང་། དུལ་བ་དང་། ཞི་བ་དང་། སྡོམ་པ་དང་ལྡན་ཞིང་སེམས་ཅན་གནོད་སེམས་དང་། ཐ་བ་དང་། ཁྲོ་བ་དང་། ང་རྒྱལ་དང་། རྒྱགས་པ་དང་། འཆབ་པ་དང་ལྡན་པ་རྣམས་ཀྱི་གཙོ་བོ་དང་། མཐུ་དང་ལྡན་པར་གྱུར་ཀྱང་ལན་མི་བྱེད་ཅིང་བཟོད་པ་
ཉིད་བསྐྱེད་ལ། བྱང་ཆུབ་སེམས་དཔའ་སེམས་ཅན་ལ་ལྟ་བའི་བཟོད་པའི་སྟོབས་ཀྱི་སེམས་བསྐྱེད་པ་རིན་པོ་ཆེ་དང་། ཞུམ་པ་མེད་ཅིང་ཞན་པ་མེད་ལ་ལེ་ལོ་མེད་དེ། བརྩོན་འགྲུས་བརྩམ་ཞིང་ཐེག་པ་ཆེན་པོ་ལས་ཕྱིར་མི་ལྡོག་ལ་ཚོགས་ལ་ཡོངས་སུ་མི་སྐྱོ་ཞིང་སེམས་ཅན་ལེ་ལོ་ཅན་
ཡོངས་སུ་སྨིན་པར་བྱ་བའི་ཕྱིར་བརྩོན་འགྲུས་ཆེན་པོའི་སེམས་བསྐྱེད་པ་རིན་པོ་ཆེ་དང་། དྲན་པ་དང་། བློ་གྲོས་དང་། རྟོགས་པ་དང་། བྱམས་པ་དང་། བསམ་གཏན་གྱི་མཆོག་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་ཁྱད་པར་ཁོང་དུ་
ཆུད་ལ་སེམས་ཅན་ཡོངས་སུ་སྨིན་པར་བྱ་བའི་ཕྱིར། འདོད་པའི་ཁམས་ལ་ཡང་དམིགས་ཤིང་ཐབས་ཀྱིས་བསམ་གཏན་ལས་ཕྱིར་མི་ལྡོག་པའི་སེམས་བསྐྱེད་པ་རིན་པོ་ཆེ་དང་། ཤེས་རབ་རབ་ཏུ་དབྱེ་བ་ཆོས་ཐམས་ཅད་ལ་རབ་རིབ་མེད་ཅིང་ཇི་ལྟ་བ་བཞིན་དུ་གཉིས་སུ་མེད་པ་
ཚུལ་གཅིག་པ་ལ་འཇུག་པའི་ཕྱིར་ཤེས་རབ་ཀྱིས་རྣམ་པར་འཕྲུལ་པའི་སེམས་བསྐྱེད་པ་རིན་པོ་ཆེ་དང་། སེམས་ཅན་ཐམས་ཅད་ལ་སེམས་སྙོམས་པ་ཞེ་འགྲས་པ་མེད་པའི་བློ་དང་ལྡན་པ་ཐ་དད་པ་མེད་ཅིང་རོ་གཅིག་པ་ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར་བྱེད་པའི་
སེམས་བསྐྱེད་པ་རིན་པོ་ཆེ་དང་། རྗེས་སུ་ཆགས་པ་དང་། ཁོང་ཁྲོ་བ་དང་བྲལ་ཞིང་བསྟི་སྟང་བྱས་པ་དང་། བསྟི་སྟང་མ་བྱས་པ་མཚུངས་པར་གྱུར་ཅིང་མ་ཁེངས་ལ་མ་དུད་པར་ལེགས་པར་གནས་པ། ཡིད་གཡོ་བ་མེད་པ། བདེ་བ་དང་། སྡུག་བསྔལ་གྱིས་མི་གཡོས་
པ། སེམས་ཅན་རྗེས་སུ་སྲུང་བའི་སེམས་བསྐྱེད་པ་རིན་པོ་ཆེ་དང་། འཇིགས་ཤིང་དངང་པ་དང་། སྐྲག་པ་དང་བྲལ་ལ་རྟེན་ཅིང་འབྲེལ་པར་འབྱུང་བ་ཟབ་མོ་ལ་འཇུག་པ་ལ་མཁས་པ་མཐའ་དང་། མཐའ་མེད་པར་ལྟ་བ་དང་བྲལ་བའི་སེམས་བསྐྱེད་པ་རིན་པོ་ཆེ་དང་།

བསོད་ནམས་ཀྱི་ཚོགས་སོགས་པས་ངོམས་མི་ཤེས་ཤིང་མཚན་དང་དཔེ་བྱད་བཟང་པོ་ཡོངས་སུ་རྫོགས་པར་བྱེད་པའི་སེམས་བསྐྱེད་པ་རིན་པོ་ཆེ་དང་། སངས་རྒྱས་མཐོང་བར་འདོད་ཅིང་སངས་རྒྱས་མཐོང་བ་དང་མི་འབྲལ་བའི་སེམས་བསྐྱེད་པ་རིན་པོ་ཆེ་དང་། ཆོས་
མཉན་པ་ཡོངས་སུ་ཚོལ་ལ་ཐོས་པ་ལ་དཔྱོད་ཅིང་དོན་ལ་ཡོངས་སུ་འཇལ་བའི་སེམས་བསྐྱེད་པ་རིན་པོ་ཆེ་དང་། ཇི་ལྟར་ཐོས་པའི་ཆོས་སྟོན་ཅིང་ཟང་ཟིང་མེད་པའི་སེམས་བསྐྱེད་པ་རིན་པོ་ཆེ་དང་། ཟིན་པའི་ཆོས་ལ་སློབ་དཔོན་འཆབ་པ་མེད་པའི་སེམས་བསྐྱེད་པ་རིན་པོ་ཆེ་
དང་། ལོག་པར་ཞུགས་ཤིང་གནས་ཏེ། ཆོས་དང་ཚུལ་ཁྲིམས་ལས་ཉམས་པ། རྟག་ཏུ་རྗེས་སུ་འཛིན་པའི་སེམས་བསྐྱེད་པ་རིན་པོ་ཆེ་དང་། མ་བསླབས་པ་ལས་དང་པོ་པ་ལ་བརྙས་པ་མེད་པའི་སེམས་བསྐྱེད་པ་རིན་པོ་ཆེ་དང་། ང་རྒྱལ་དང་། མངོན་པའི་ང་རྒྱལ་དང་། ལོག་
པའི་ང་རྒྱལ་དང་བྲལ་ཞིང་ང་རྒྱལ་མེད་པ། བཀའ་བློ་བདེ་བ། འཐུན་པར་འཛིན་པ། སེམས་ཅན་ཐམས་ཅད་ལ་འདུད་པའི་སེམས་བསྐྱེད་པ་རིན་པོ་ཆེ་དང་། རླབས་པོ་ཆེའི་སེམས་དབང་པོ་རྣོ་བ། ཐེག་པ་ངན་པ་དམན་པ་དང་བྲལ་ཞིང་ཐེག་པ་ཆེན་པོ་ལ་མོས་པ། སངས་རྒྱས་ཀྱི་
དགོངས་པའི་སེམས་བསྐྱེད་པ་རིན་པོ་ཆེ་དང་། བདུད་ཀྱི་ལས་དང་བྲལ་ཞིང་ཉེ་བའི་ཉོན་མོངས་པ་དག་སྟེ། གཙང་ཞིང་དྲི་མ་མེད་ལ་རྙོག་པ་མེད་ཀྱང་འདོད་ཆགས་ཀྱི་རྡུལ་དང་། ཉོན་མོངས་པ་དང་ལྡན་པའི་འདུས་བྱས་ལ་དགའ་ཞིང་ཡོངས་སུ་མི་སྐྱོ་བའི་སེམས་བསྐྱེད་པ་རིན་
པོ་ཆེ་དང་། རྟག་ཏུ་རྒྱུན་མི་ཆད་པར་དབེན་པར་སྤྱོད་ཅིང་དགོན་པའི་ཡོན་ཏན་མཐོང་སྟེ། ལུས་དང་སེམས་དབེན་པ་ལ་དབེན་པར་སྤྱོད་ཀྱང་འཁོར་བའི་འདུ་འཛི་དང་འདྲེ་བ་ལ་མི་སྨོད་པ་སྙིང་རྗེ་ཆེན་པོའི་སེམས་བསྐྱེད་པ་རིན་པོ་ཆེ་དང་། ལྷ་དང་མིའི་བདེ་བ་དང་། བསམ་གཏན་གྱི་
བདེ་བ་དང་། རང་གི་བདེ་བ་ཐམས་ཅད་འདོར་ཞིང་སེམས་ཅན་སྡུག་བསྔལ་བ་རྣམས་ཡོངས་སུ་སྨིན་པར་བྱ་བའི་ཕྱིར་སྡུག་བསྔལ་མྱོང་བས་ཡོངས་སུ་མི་སྐྱོ་བའི་སེམས་བསྐྱེད་པ་རིན་པོ་ཆེ་དང་། ཟག་པ་མེད་པའི་ཆོས་ཐོབ་པའི་ནུས་པ་དང་། སྐལ་བ་དང་། དབང་པོ་དང་།

བཟོད་པ་དང་ལྡན་ཡང་ལག་མཐིལ་དུ་འོངས་པའི་རྣམ་པར་གྲོལ་བ་མི་འདོད་ཅིང་འདུས་བྱས་མི་སྤོང་སྟེ། སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པའི་སེམས་བསྐྱེད་པ་རིན་པོ་ཆེ་དང་། ཆོས་རྣམས་ལ་མི་རྟག་པ་དང་། སྡུག་བསྔལ་བ་དང་། བདག་མེད་པར་ཡང་
སོ་སོར་རྟོག་ལ་སྐྱོ་བ་ཡང་མེད། ཆགས་པར་འགྱུར་བ་ཡང་མེད་པར་དགའ་ཞིང་བྱང་ཆུབ་ཀྱི་ཕྱོགས་ཀྱི་ཆོས་ཡང་དག་པར་སྒྲུབ་པའི་སེམས་བསྐྱེད་པ་རིན་པོ་ཆེ་དང་། ཆོས་ཐམས་ཅད་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་
འདུ་བྱེད་པ་མེད་པར་སོ་སོར་རྟོག་ཅིང་སེམས་ཅན་ལ་ལྟ་ཡང་ཆོས་དེ་མངོན་སུམ་དུ་ཡང་མི་བྱེད་ལ་སེམས་ཅན་ལ་ལྟ་བའི་སེམས་བསྐྱེད་པ་རིན་པོ་ཆེ་དང་། འགྲོ་བ་ཐམས་ཅད་ཀྱིས་སྐྲག་ཅིང་མགོའི་ཐོད་ལ་མེ་འབར་བ་ལྟ་བུའི་བརྩོན་འགྲུས་དང་ལྡན་ཞིང་ཐམས་ཅད་
མཁྱེན་པའི་ཡེ་ཤེས་ཀྱི་ཕྱིར་བསྐལ་པ་གྲངས་མེད་པར་འཁོར་བ་ལ་ཡོངས་སུ་མི་སྐྱོ་བ་འདི་ནི་བྱང་ཆུབ་སེམས་དཔའི་སེམས་བསྐྱེད་པ་རིན་པོ་ཆེའོ། །ཇི་ལྟ་ཇི་ལྟ་བུར་བྱང་ཆུབ་ལ་ཉེ་བར་འགྱུར་བ་དེ་ལྟ་དེ་ལྟ་བུར་དེ་ལུས་དང་ལོངས་སྤྱོད་དང་། ཡེ་ཤེས་ཤིན་ཏུ་
རྒྱ་ཆེར་འགྱུར་ཡང་དེ་ཆེ་བ་ཉིད་ཀྱི་ཆོས་དེ་ཡང་འདོར་ཞིང་སྙིང་རྗེས་དབུལ་པོའི་རྗེས་སུ་འཇུག་སྟེ། སྨོན་པ་མེད་ཅིང་སྐྱོ་བ་མེད་པ་འདི་ཡང་བྱང་ཆུབ་སེམས་དཔའི་སེམས་བསྐྱེད་པ་རིན་པོ་ཆེའོ། །གང་སེམས་ཅན་ཡོངས་སུ་སྨིན་པར་བྱེད་པ་དེ་དག་ཐོག་མ་ཁོ་ནར་
བདག་བྱང་ཆུབ་པར་མི་འདོད་ལ། ལྷག་པའི་བསམ་པ་བརྟན་པའི་སེམས་བསྐྱེད་པ་རིན་པོ་ཆེ་སྟེ། བཙུན་པ་ཤ་ར་དྭ་ཏིའི་བུ་སུམ་ཅུ་རྩ་གཉིས་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་རིན་པོ་ཆེ་སྟེ། དེས་ན་བྱང་ཆུབ་སེམས་དཔའ་རིན་པོ་ཆེའི་འབྱུང་གནས་ཞེས་
བྱའོ། །དེ་ནས་བཅོམ་ལྡན་འདས་ཀྱིས་བུ་མོ་རིན་ཆེན་ལ་ལེགས་སོ་ཞེས་བྱ་བ་གནང་སྟེ། བུ་མོ་ཁྱོད་ཀྱིས་བྱང་ཆུབ་སེམས་དཔའ་དག་གི་སེམས་བསྐྱེད་པ་རིན་པོ་ཆེ་ལ་འཇུག་པ་འདི་ལེགས་པར་སྨྲས་པ་ནི་ལེགས་སོ་ལེགས་སོ། །བུ་མོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་

ཆུབ་ཏུ་སེམས་བསྐྱེད་པ་དེ་དག་ནི་སྐྱེས་བུ་དམ་པ་ཡིན་ཏེ། ཡོན་ཏན་བསྟན་པ་མཐའ་ཡས་སོ། །དེ་ཅིའི་ཕྱིར་ཞེ་ན། ཉན་ཐོས་རིན་པོ་ཆེ་དང་། རང་སངས་རྒྱས་རིན་པོ་ཆེ་ལས་སངས་རྒྱས་དཀོན་མཆོག་མི་འབྱུང་གི །སངས་རྒྱས་དཀོན་མཆོག་ལས་ཉན་
ཐོས་དང་རང་སངས་རྒྱས་རིན་པོ་ཆེ་འབྱུང་ངོ་། །བྱང་ཆུབ་ཀྱི་སེམས་རིན་པོ་ཆེ་ལས་སངས་རྒྱས་དང་། ཆོས་དང་། དགེ་འདུན་དཀོན་མཆོག་འབྱུང་ངོ་། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བུ་མོ་རིན་
ཆེན་གྱི་ཤེས་རབ་དང་། སྤོབས་པ་བསྟན་པ་དང་། ཇི་ལྟར་འདི་སོ་སོ་ཡང་དག་པར་རིག་པ་ཐོབ་པ་བསྟན་པ་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་འདི་ལ་ཇི་སྙམ་དུ་སེམས། བུ་མོ་རིན་ཆེན་གྱིས་སོ་སོ་ཡང་དག་པར་རིག་པ་མ་ཐོབ་
བོ་སྙམ་ན། དེ་ལྟར་མི་བལྟ་སྟེ། བུ་མོ་རིན་ཆེན་གྱིས་སོ་སོ་ཡང་དག་པར་རིག་པ་དང་། སྤོབས་པ་རྒྱུན་མི་ཆད་པ་འཐོབ་བོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་བུ་མོ་རིན་ཆེན་ལ་འདི་སྐད་ཅེས་སྨྲས་སོ། །བུ་མོ་ཁྱོད་ཀྱིས་སོ་སོ་ཡང་དག་པར་རིག་པ་བསྟན་པ་ལས་
བརྩམས་ཏེ། སྤོབས་པར་གྱིས་ཤིག །བུ་མོ་རིན་ཆེན་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་སོ་སོ་ཡང་དག་པར་རིག་པ་ནི་ཐམས་ཅད་དུ་ཆོས་ལ་དཔྱོད་པ་དང་སྟོན་པའི་ལས་བྱེད་དེ། བཙུན་པ་ཤ་ར་དྭ་ཏིའི་བུ་བྱང་ཆུབ་ཀྱི་སེམས་ཞེས་བྱ་བ་དེ་ནི་སོ་སོ་ཡང་དག་པར་རིག་
པ་བསྟན་པའི་ཚིག་གོ། །དེ་ཅིའི་ཕྱིར་ཞེ་ན། དོན་ཐམས་ཅད་ཀྱིས་ཡང་དག་པར་བསྡུས་པའི་སེམས་བསྐྱེད་པ་འདི་ནི་དོན་སོ་སོ་ཡང་དག་པར་རིག་པའོ། །ཆོས་ཀྱི་དབྱིངས་སུ་ཡང་དག་པར་འདུ་བའི་སེམས་དེ་བསྐྱེད་པ་འདི་ནི་ཆོས་སོ་སོ་ཡང་དག་པར་རིག་པའོ། །དེ་ལས་
བྱུང་བའི་དཔྱོད་པ་ཐམས་ཅད་དང་ངེས་པའི་ཚིག་ཐམས་ཅད་པོ་འདི་ནི་ངེས་པའི་ཚིག་སོ་སོ་ཡང་དག་པར་རིག་པའོ། །སེམས་བསྐྱེད་པ་དེ་ཐོགས་པ་མེད་པར་སྟོན་ཅིང་སྤོབས་པ་རྒྱུན་མི་འཆད་པ་འདི་ནི་སྤོབས་པ་སོ་སོ་ཡང་དག་པར་རིག་པའོ། །རྒྱུ་བ་མེད་ཅིང་

གནས་པ་མེད་པའི་དོན་ནི་དོན་ཏེ། འདི་ནི་དོན་སོ་སོ་ཡང་དག་པར་རིག་པའོ། །སྒྱུ་མའི་སེམས་ཀྱིས་ཆོས་ཉིད་ནི་ཆོས་སོ་སོ་ཡང་དག་པར་རིག་པའོ། །རྣམ་པར་རིག་པའི་སྒོ་ནས་ངེས་པའི་ཚིག་ནི་ངེས་པའི་ཚིག་སོ་སོ་ཡང་དག་པར་རིག་པའོ། །ཡུལ་དྲུག་ལ་སེམས་མི་
ཆགས་ཤིང་སྤོབས་པ་ཐོགས་པ་མེད་པ་འདི་ནི་སྤོབས་པ་སོ་སོ་ཡང་དག་པར་རིག་པའོ། །དོན་ནི་ངེས་པའི་དོན་ཏོ། །ཆོས་ནི་དབེན་པ་ལ་ལྟ་བའོ། །ངེས་པའི་ཚིག་ནི་སྒྲ་ཙམ་མོ། །སྤོབས་པ་ནི་སྒྲ་རྣམ་པར་རིག་པའོ། །སངས་རྒྱས་ཞེས་བྱ་བ་དེ་ནི་ཁོང་དུ་ཆུད་པའི་དོན་
གྱི་ཚིག་གོ། །དེ་ལས་ངེས་པར་བྱུང་བ་ནི་ཆོས་སོ། །ཆོས་དེ་ནི་ངེས་པའི་ཚིག་གིས་རབ་ཏུ་ཕྱེ་བའོ། །སྤོབས་པ་བསྟན་པ་ནི་སྤོབས་པ་སོ་སོ་ཡང་དག་པར་རིག་པའོ། །ཆོས་ཀྱི་དོན་ནི་དོན་ཏོ། །འདོད་ཆགས་དང་བྲལ་བའི་ཆོས་ཉིད་ནི་ཆོས་སོ། །ཆོས་ལ་དཔྱོད་
པ་ནི་ངེས་པའི་ཚིག་གོ། །ཆོས་ལ་སྤོབས་པ་ནི་སྤོབས་པ་སོ་སོ་ཡང་དག་པར་རིག་པའོ། །དགེ་འདུན་གྱི་དོན་དང་འདུས་མ་བྱས་པའི་དོན་ནི་དོན་སོ་སོ་ཡང་དག་པར་རིག་པའོ། །དགེ་འདུན་དང་དོན་རོ་གཅིག་པ་ནི་ཆོས་སོ། །དགེ་འདུན་ལ་དཔྱོད་པ་ནི་ངེས་པའི་ཚིག་གོ། །
གང་རབ་ཏུ་སྟོན་པ་དེ་ནི་སྤོབས་པ་སོ་སོ་ཡང་དག་པར་རིག་པའོ། །བཙུན་པ་ཤ་ར་དྭ་ཏིའི་བུ་དེ་ལྟར་ན་ཆོས་ཐམས་ཅད་ཀྱི་ཚིག་བསྟན་པ་ནི་སོ་སོ་ཡང་དག་པར་རིག་པར་བལྟའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་
འདས་བུ་མོ་རིན་ཆེན་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ནས་ནི་ཅི་སྲིད་ཅིག་ལགས། དེ་བཞིན་གཤེགས་པ་ནི་གང་གི་གསུང་རབ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་
ཅེས་བཀའ་སྩལ་ཏོ། །ཤ་ར་དྭ་ཏིའི་བུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེར་གྲངས་མེད་པར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཞེས་བྱ་བ། མཁྱེན་པ་དང་

ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ་། །ཤ་ར་དྭ་ཏིའི་བུ་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རྣམ་པར་གཟིགས་དེའི་སངས་རྒྱས་ཀྱི་ཞིང་ནི་འཇིག་རྟེན་གྱི་ཁམས་ཤིན་ཏུ་རྣམ་པར་དག་པ་ཞེས་བྱ་བར་གྱུར་ཏོ། །ཤ་ར་དྭ་ཏིའི་བུ་འཇིག་རྟེན་གྱི་ཁམས་ཤིན་ཏུ་རྣམ་པར་དག་པའི་ལོངས་སྤྱོད་ནི་དགའ་ལྡན་གྱི་ལྷའི་ལོངས་སྤྱོད་དང་འདྲ་
བར་གྱུར་ཏོ། །བཅོམ་ལྡན་འདས་དེའི་བྱང་ཆུབ་སེམས་དཔའི་དགེ་འདུན་ནི་བྱང་ཆུབ་སེམས་དཔའ་དག་པ་ཤ་སྟག་སྟེ། །བྱང་ཆུབ་སེམས་དཔའ་བྱེ་བ་ཕྲག་བདུན་ཅུ་རྩ་དྲུག་ཐམས་ཅད་ཀྱང་ཕྱིར་མི་ལྡོག་པ་གཟུངས་དང་སྤོབས་པ་ལས་ངེས་པར་བྱུང་བ་ཤ་སྟག་གོ། །ཤ་ར་
དྭ་ཏིའི་བུ་དེའི་ཚེ་དེའི་དུས་ན་དེ་བཞིན་གཤེགས་པ་རྣམ་པར་གཟིགས་ཀྱི་གསུང་རབ་ལ་འཁོར་ལོས་སྒྱུར་བའི་རྒྱལ་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་དབང་ཕྱུག་རིན་པོ་ཆེའི་མཛོད་མཐའ་ཡས་པ་དང་ལྡན་པ། བསོད་ནམས་ཀྱི་རྣམ་པར་སྨིན་པ་
ཡོངས་སུ་དག་པ་ཞེས་བྱ་བ་ཞིག་བྱུང་ངོ་། །ཤ་ར་དྭ་ཏིའི་བུ་རྒྱལ་པོ་བསོད་ནམས་ཀྱི་རྣམ་པར་སྨིན་པ་ཡོངས་སུ་དག་པ་ལ་བཙུན་མོའི་འཁོར་གྱི་བུད་མེད་སྟོང་ཕྲག་བརྒྱད་ཁྲི་བཞི་སྟོང་ཡོད་དེ། དེ་དག་ཐམས་ཅད་ཀྱང་ཡུལ་གྱི་བཟང་མོ་ཤ་སྟག་གོ། །དེ་ལ་བུ་ཕོ་ཁྲི་
ཡོད་དེ་ཐམས་ཅད་ཀྱང་མཐུ་བོ་ཆེའི་སྟོབས་དང་ལྡན་པ་ཤ་སྟག་གོ། །ཤ་ར་དྭ་ཏིའི་བུ་དེ་ལྟར་རྒྱལ་པོ་བསོད་ནམས་ཀྱི་རྣམ་པར་སྨིན་པ་ཡོངས་སུ་དག་པས་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་བྱང་ཆུབ་སེམས་དཔའི་དགེ་འདུན་དང་བཅས་པ་
དེ་ལ་ཡིད་དུ་འོང་བའི་ན་བཟའ་དང་། ཞལ་ཟས་དང་། གཟིམས་ཆ་དང་། སྙུན་གསོས་ཀྱི་རྐྱེན་སྨན་དང་། ཡོ་བྱད་དང་། བདེ་བར་སྦྱར་བ་ཐམས་ཅད་ཀྱིས་ལོ་བྱེ་བ་ཕྲག་སུམ་ཅུ་རྩ་དྲུག་ཏུ་བསྙེན་བཀུར་བྱས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་

བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་དེའི་སྐུ་ཚེའི་ཚད་ཅི་ཙམ། བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་དེ་བཞིན་གཤེགས་པ་རྣམ་པར་གཟིགས་དེའི་སྐུ་ཚེའི་ཚད་
ནི་བར་གྱི་བསྐལ་པ་བཅུ་ཐུབ་བོ། །ཤ་ར་དྭ་ཏིའི་བུ་དེ་ལྟར་རྒྱལ་པོ་བསོད་ནམས་ཀྱི་རྣམ་པར་སྨིན་པ་ཡོངས་སུ་དག་པའི་དེ་བཞིན་གཤེགས་པ་རྣམ་པར་གཟིགས་དེ་ལ་མཆོད་པ་དཔག་ཏུ་མེད་པ་བྱས་ན། བཙུན་མོའི་འཁོར་དང་བཅས། བུ་དང་བཅས། གཡོག་
དང་བཅས་ཏེ་སྲོག་ཆགས་ཁྲག་ཁྲིག་དགུ་བཅུ་རྩ་གཉིས་ཀྱིས་མདུན་དུ་བདར་ནས་དེ་བཞིན་གཤེགས་པ་རྣམ་པར་གཟིགས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བྱེ་བ་བརྒྱ་སྟོང་གིས་ཤིན་ཏུ་སྤྲས་པའི་མུ་
ཏིག་གི་སེ་མོ་དོས་མངོན་པར་བཀབ་ནས་ཐལ་མོ་སྦྱར་ཏེ། དེ་བཞིན་གཤེགས་པ་རྣམ་པར་གཟིགས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་འདས་ལ་མཆོད་པ་ཐམས་ཅད་ཀྱིས་མཆོད་པ་བགྱིས་ན། བདག་གིས་དེ་བཞིན་
གཤེགས་པ་ལ་མཆོད་པ་མ་བགྱིས་པའི་མཆོད་པ་ཁྱད་པར་དུ་འཕགས་པ་གཞན་ལ་ལ་མཆིས་སམ། དེ་སྐད་ཅེས་གསོལ་པ་དང་། དེ་བཞིན་གཤེགས་པ་རྣམ་པར་གཟིགས་ཀྱིས་རྒྱལ་པོ་བསོད་ནམས་ཀྱི་རྣམ་པར་སྨིན་པ་ཡོངས་སུ་དག་པ་དེ་ལ་འདི་སྐད་ཅེས་བཀའ་
སྩལ་ཏོ། །རྒྱལ་པོ་ཆེན་པོ་གང་ཁྱོད་ཀྱིས་དེ་བཞིན་གཤེགས་པ་ལ་མཆོད་པ་མ་བྱས་པའི་མཆོད་པ་དམ་པ་ཁྱད་པར་ཅན་གྱ་ནོམ་པ་ཁྱོད་ཀྱི་མཆོད་པ་འདིས་དེའི་བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུ་ཡང་མི་བཟོད་པ་གཞན་ཡོད་དོ། །དེ་ཡང་གང་ཞེ་ན། དེ་ནས་
དེ་བཞིན་གཤེགས་པ་རྣམ་པར་གཟིགས་དེས་རྒྱལ་པོ་འཁོར་དང་བཅས་པ་དེའི་བསམ་པ་མཁྱེན་ནས་ཚིགས་སུ་བཅད་པ་འདི་དག་གསུངས་སོ། །ཞིང་རྣམས་བྱེ་བ་ཁྲག་ཁྲིག་བརྒྱ་སྟོང་དུ་མ་གང་གཱའི་བྱེ་མ་སྙེད། །གང་གིས་རིན་ཆེན་བཀང་སྟེ་བསྐལ་པ་བྱེ་བརྒྱར་རྟག་

རྒྱུན་བྱིན་པ་ཡི། །བསོད་ནམས་དེས་ནི་གང་ཞིག་སེམས་ཅན་དོན་ཕྱིར་སྙིང་བརྩེ་སྙིང་རྗེ་བསྐྱེད། །བྱང་ཆུབ་ཞུགས་པའི་བསོད་ནམས་དེ་ཡི་གྲངས་ཆ་གང་དུའང་འགྱུར་མ་ཡིན། །སངས་རྒྱས་བྱེ་བ་ཁྲག་ཁྲིག་སྟོང་ཕྲག་དུ་མ་གང་གཱའི་བྱེ་སྙེད་ལ། །བསྐལ་
པ་བྱེ་བ་ཁྲག་ཁྲིག་མང་པོར་མེ་ཏོག་སྤོས་ཀྱིས་མཆོད་པ་བས། །བྱང་ཆུབ་བརྟན་པ་ཕན་བྱེད་གང་ཞིག་གོམ་པ་བདུན་ནི་རབ་བོར་བས། །རྒྱལ་བ་མཆོད་པ་འདི་ནི་དམ་པ་གཙོ་བོ་གྱ་ནོམ་མཆོག་གི་ཕུལ། །གང་ཞིག་བྱང་ཆུབ་སེམས་བསྐྱེད་འཇིག་རྟེན་འདྲེན་པར་འགྱུར་
བར་སྨོན་བཏབ་པ། །དེ་ནི་སྦྱིན་པ་དེ་བཞིན་ཚུལ་ཁྲིམས་གཞལ་ཡས་བཟོད་པའི་སྟོབས་ཀྱི་མཆོག །དེ་ནི་བརྩོན་འགྲུས་བརྟན་པ་ཏིང་འཛིན་གཞལ་ཡས་ཤེས་རབ་མི་གཡོས་པ། །དེ་ནི་མཐའ་ཡས་བསགས་པའི་བསོད་ནམས་ལམ་སྟེ་ཟད་པར་འགྱུར་མ་ཡིན། །
གང་ཞིག་བསམ་པས་ཡིད་རབ་དགའ་ཞིང་ཐམས་ཅད་མཁྱེན་ལ་རབ་འཇུག་པ། །བསྔགས་དང་བརྗོད་དང་གྲགས་དང་གཟུགས་དང་གཡོག་ནི་ཤིན་ཏུ་མཛེས་པ་འཐོབ། །དེས་ནི་ལོངས་སྤྱོད་དབང་ཕྱུག་སྟོབས་རྣམས་རྟག་འཐོབ་སེམས་དང་དྲན་པ་འཕགས། །དེ་ནི་འཁོར་
ལོས་སྒྱུར་རྒྱལ་སྟོབས་ལྡན་དེ་ལྟར་བརྒྱ་བྱིན་ཚངས་པར་འགྱུར། །མི་གང་ལ་ལ་བྱང་ཆུབ་རྡུལ་དང་བྲལ་བ་བླ་མེད་ཞི་འཇུག་པ། །དེ་ནི་ངན་སོང་ངན་འགྲོ་ལམ་དང་མི་ཁོམ་བརྒྱད་པོ་ཐམས་ཅད་གཅོད།