Kinh tạng Tây Tạng (Kangyur Đại Học) — 058_མདོ་སྡེ།_ཕ

མཐའ་མེད་ཀུན་ཆད་རྣམ་པར་ཆད། །ཐོག་མ་ཐ་མ་བར་མ་མཉམ་གྱུར་པ། །དུས་གསུམ་དག་ནི་དབེན་པས་ཤེས་པ་མཉམ། །ཤེས་པ་དེ་ཡང་མཐའ་ཡོད་མ་ཡིན་ནོ། །སྐྱེ་བོ་རྟག་ཏུ་མིང་དང་གཟུགས་ལ་ཆགས། །
མཐའ་དང་མཐའ་མེད་ལྟ་བས་གོས་པ་རྣམས། །རྒྱུ་དང་རྐྱེན་ལས་བྱུང་བར་ཤེས་པས་ན། །བདག་དང་སེམས་ཅན་རྣམ་པར་རྟོག་མ་ཡིན། །བདག་ལས་ལྡང་བ་རྟག་ཏུ་ལྡང་མ་ཡིན། །ཆོས་དེ་ཀུན་ནས་བསླང་བ་མེད་པ་སྟེ། །གང་དག་ལྡང་དང་ལྡང་བ་མེད་རྟོག་པ། །
དེ་དག་བཟོད་པ་མཉམ་ཉིད་རྗེས་འཐུན་པ། །ཆོས་ཀུན་རྟག་ཏུ་བདག་མེད་རང་བཞིན་ཏེ། །སྤྲིན་དང་གློག་དང་ནམ་མཁའ་ལྟ་བུ་གསོག །བདག་དང་སེམས་ཅན་རྟག་ཏུ་རང་བཞིན་སྟོང་། །འདི་ནི་གཟུངས་ཀྱི་ཕྱག་རྒྱར་འཇུག་པའོ། །ཆོས་རྣམས་མཚན་ཉིད་གཅིག་སྟེ་
མཚན་ཉིད་མེད། །གང་གིས་ཐར་པའི་སྒོ་གསུམ་རྣམ་རྟོགས་ནས། །ཐུག་པ་མེད་པའི་ཆོས་རྣམས་སྟོན་བྱེད་ཀྱང་། །ཆོས་ལ་ཡོངས་སུ་རྟོག་པ་མི་བྱེད་དོ། །ཐ་མ་འབྲིང་དང་དེ་བཞིན་མཆོག་རྣམས་ཀྱི། །ཆོས་འདི་དག་ནི་ཡི་གེ་ལས་བྱུང་སྟེ། །ཡི་གེ་རྣམས་ལ་

རྣམ་པར་རྟོག་མི་བྱེད། །དེ་ལྟ་བུར་ནི་དོན་རྣམས་བཤད་པ་ཡིན། །དོན་དང་ཚིག་འབྲུ་གཉིས་ལ་མི་འཇུག་སྟེ། །གཉིས་མེད་རྟག་ཏུ་དོན་ནི་སྒྲ་དང་བྲལ། །གང་གིས་མཐའ་འདི་དབེན་པར་ཤེས་པ་ནི། །དེ་ཡི་སྔོན་གྱི་མཐའ་ནི་ཉེ་བར་ཆད། །གང་དག་སྔོན་མཐའ་ཉེ་བར་ཆད་པ་
རྣམས། །འགྲོ་བའི་དོན་དུ་འདུས་བྱས་རྣམས་ལ་སྤྱོད། །ཡང་དག་མཐའ་ནི་རྟག་ཏུ་མཐའ་མེད་ཤེས། །དེ་ཡི་བྱམས་དང་སྙིང་རྗེ་ཤིན་ཏུ་དག །གང་གི་བྱམས་དང་སྙིང་རྗེ་རྣམ་དག་པ། །སྡུག་བསྔལ་དང་ནི་བདེ་བ་མཚུངས་མཉམ་སྦྱོར། །རྒོད་དང་ཁེངས་པ་མ་ཡིན་བརྟན་པ་
ཡི། །སྐྱེས་བུ་མཆོག་དེ་དོན་གྱི་ཆོ་ག་ཤེས། །ཆོས་ཀྱི་ཚུལ་འདི་ཞི་ཞིང་དབེན་པ་སྟེ། །འཆང་བ་ན་ནི་དགའ་བ་འཐོབ་པར་འགྱུར། །ནམ་ཡང་འཕེལ་བ་མེད་ཅིང་འབྲི་བ་མེད། །ཆོས་ཉིད་འདི་ནི་ངར་འཛིན་མེད་ཅིང་ཞི། །བར་སྣང་ལམ་གྱི་སྒྲ་ནི་གཟུང་མེད་དེ། །གང་གིས་བཤད་
པ་མེད་ཀྱང་གྲགས་པར་གྱུར། །གང་གིས་བཤད་དང་གང་ལ་བཤད་པ་རྣམས། །དེ་དག་ཐམས་ཅད་དབང་ཅན་བརྫུན་པ་ཡིན། །ཚིགས་སུ་བཅད་པ་མངོན་པར་བསྒྲུབ་པ་འདི་བཤད་པ་ན། བྱང་ཆུབ་སེམས་དཔའ་བརྒྱ་སྟོང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །དེ་ནས་
བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཚིགས་སུ་བཅད་པ་འདི་ལྟ་བུ་འདི་དག་ག་ལས་བྱུང་། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་མིའམ་ཅིའི་རྒྱལ་པོ་སྡོང་པོ་ལ་དྲིས་ཤིག་
དང་། དེས་དེའི་ལན་གློན་པར་འགྱུར་རོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་མིའམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་སྨྲས་སོ། །མིའམ་ཅིའི་བདག་པོ་ཚིགས་སུ་བཅད་པ་མངོན་པར་བསྒྲུབ་པ་འདི་དག་ག་ལས་བྱུང་། སྨྲས་པ། སེམས་ཅན་
ཐམས་ཅད་ཀྱི་སྒྲ་ག་ལས་བྱུང་ངོ་། །སྨྲས་པ། མིའམ་ཅིའི་བདག་པོ་སེམས་ཅན་ཐམས་ཅད་ཀྱི་སྒྲ་ག་ལས་བྱུང་། སྨྲས་པ། རིགས་ཀྱི་བུ་སེམས་ཅན་ཐམས་ཅད་ཀྱི་སྒྲ་ནི་ནམ་མཁའ་ལས་འབྱུང་ངོ་། །སྨྲས་པ། མིའམ་ཅིའི་བདག་པོ་སེམས་ཅན་ཐམས་ཅད་ཀྱི་

སྒྲ་ཁོང་པའི་ནང་ནས་མི་འབྱུང་ངམ། སྨྲས་པ། རིགས་ཀྱི་བུ་དེ་ལ་ཇི་སྙམ་དུ་སེམས། སེམས་ཅན་ཐམས་ཅད་ཀྱི་སྒྲ་ལུས་ཀྱི་ནང་གི་ཁོང་ནས་བྱུང་ངམ། འོན་ཏེ་སེམས་ལས་བྱུང་། སྨྲས་པ། མིའམ་ཅིའི་བདག་པོ་ལུས་ལས་ཀྱང་མ་ཡིན། སེམས་ལས་ཀྱང་མ་
ཡིན་ནོ། །དེ་ཅིའི་ཕྱིར་ཞེ་ན། ལུས་ནི་བེམས་པོ་གཡོ་བ་མེད་པ། བྱེད་པ་མེད་པ་རྩྭ་དང་བོང་བ་དང་རྩིག་པ་དང་། ཤིང་དང་། མིག་ཡོར་ལྟ་བུའོ། །སེམས་ནི་གཟུགས་མེད་པ། བསྟན་དུ་མེད་པ། ཐོགས་པ་མེད་པ། རྣམ་པར་རིག་པ་མེད་པ་སྟེ། སྒྱུ་མ་ལྟ་བུའོ། །སྨྲས་པ། རིགས་
ཀྱི་བུ་ལུས་དང་སེམས་མ་གཏོགས་པར་གཞན་གང་ནས་སྒྲ་འབྱུང་བར་འགྱུར། སྨྲས་པ། མིའམ་ཅིའི་བདག་པོ་སེམས་ཅན་རྣམས་ཀྱི་སྒྲ་ནི་ཡིད་ལ་བྱེད་པ་ལས་འབྱུང་བར་བཏགས་སོ། །སྨྲས་པ། གལ་ཏེ་ནམ་མཁའ་མེད་ན་སྒྲ་ག་ལས་འབྱུང་། སྨྲས་པ། མིའམ་ཅིའི་བདག་པོ་ནམ་མཁའ་
མ་གཏོགས་པར་གཞན་གང་ནས་སྒྲ་འབྱུང་བར་འགྱུར། སྨྲས་པ། རིགས་ཀྱི་བུ་དེའི་ཕྱིར་རྣམ་གྲངས་འདིས་སྒྲ་ཇི་སྙེད་པ་དེ་དག་ཐམས་ཅད་ནི་ནམ་མཁའ་ལས་འབྱུང་བར་རིག་པར་བྱའོ། །ནམ་མཁའི་ངོ་བོ་ཉིད་ནི་སྒྲ་སྟེ། རྣམ་པར་རིག་མ་ཐག་ཏུ་འགག་གོ། །འགགས་ནས་ནམ་མཁའི་ངོ་
བོ་ཉིད་དུ་ཡང་དག་གནས་སོ། །དེའི་ཕྱིར་ཆོས་ཐམས་ཅད་ནི་ནམ་མཁའ་དང་མཉམ་ཞེས་བྱ་སྟེ་རྣམ་པར་རིག་པ་མེད་པ་རྣམ་པར་ཤེས་པར་བྱ་བ་མ་ཡིན་མོད་ཀྱི་སྒྲ་དང་སྒྲའི་བརྡས་བརྗོད་དོ། །བརྗོད་པ་དེ་ཡང་ཐ་སྙད་དོ། །གང་སྒྲས་བརྗོད་པ་འདི་འདྲ་བར་རབ་ཏུ་ཤེས་པ་དེ་ནི་ཆོས་གང་ལ་
ཡང་མངོན་པར་མི་ཆགས་སོ། །གང་མངོན་པར་མི་ཆགས་པ་དེ་ནི་རྣམ་པར་མི་འཕྲོའོ། །གང་རྣམ་པར་མི་འཕྲོ་བ་དེ་མི་འཁོར་རོ། །གང་མི་འཁོར་བ་དེ་མི་ཕྱེད་པའོ། །གང་མི་ཕྱེད་པ་དེ་མི་སྐྱེའོ། །གང་མི་སྐྱེ་བ་དེ་མི་འཇིག་པར་འདོད་དོ། །གང་མི་འཇིག་པ་དེ་དང་བའོ། །གང་དང་བ་
དེ་དག་པའོ། །གང་དག་པ་དེ་དྲི་མ་མེད་པའོ། །གང་དྲི་མ་མེད་པ་དེ་འོད་གསལ་བའོ། །གང་འོད་གསལ་བ་དེ་སེམས་ཀྱི་རང་བཞིན་ནོ། །སེམས་ཀྱི་རང་བཞིན་གང་ཡིན་པ་དེ་འཇུག་པའོ། །གང་འཇུག་པ་དེ་མཚན་མ་ཐམས་ཅད་གནོན་པའོ། །གང་མཚན་མ་ཐམས་ཅད་གནོན་པ་དེ་

སྐྱོན་མེད་པ་ལ་འཇུག་པ་ཞེས་བྱའོ། །བྱང་ཆུབ་སེམས་དཔའི་སྐྱོན་མེད་པ་ལ་འཇུག་པ་གང་ཡིན་པ་དེ་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་སྟེ། དེས་ན་སྐྱོན་མེད་པ་ལ་ཞུགས་པའི་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་ཞེས་བྱའོ། །གང་བཟོད་པ་རབ་ཏུ་ཐོབ་
པ་དེས་ཐམས་ཅད་བཟོད་དེ། དེ་སྟོང་པར་ཡང་བཟོད་དེ་གང་ཟག་ཏུ་ཡང་བཟོད་དོ། །དེ་ཅིའི་ཕྱིར་ཞེ་ན། གང་ཟག་ལས་སྟོང་པ་གཞན་མ་ཡིན་ཏེ། གང་ཟག་ཉིད་སྟོང་པའོ། །དེ་མཚན་མར་ཡང་བཟོད་དེ་མཚན་མ་མེད་པར་བཟོད་པའོ། །དེ་ཅིའི་ཕྱིར་ཞེ་ན། མཚན་མའི་ངོ་བོ་ཉིད་
མཚན་མ་མེད་པའོ། །དེ་སྨོན་པར་ཡང་བཟོད། དེ་སྨོན་པ་མེད་པ་ཡང་བཟོད་དོ། །དེ་ཅིའི་ཕྱིར་ཞེ་ན། སྨོན་ལམ་གྱི་ངོ་བོ་ཉིད་ཀྱི་མཚན་ཉིད་སྨོན་པ་མེད་པའོ། །དེ་སེམས་ཅན་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་ཡང་བཟོད་དེ་སེམས་ཅན་རྣམས་འཆི་འཕོ་བ་
དང་སྐྱེ་བར་ཡང་བཟོད་དོ། །དེ་ཅིའི་ཕྱིར་ཞེ་ན། འཆི་འཕོ་དང་སྐྱེ་བ་ནི་སྒྱུ་མའི་ངོ་བོ་ཉིད་དོ། །རིགས་ཀྱི་བུ་དེ་ལྟར་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པའི་བྱང་ཆུབ་སེམས་དཔའ་ནི་འགག་པ་མེད་པ་སྟེ། ཆོས་ཐམས་ཅད་དང་འགལ་བ་མེད་པ་ཡིན་ནོ། །བདག་བཟོད་པའི་རྗེས་སུ་
འགྲོ་ཡང་སེམས་ཅན་ཐམས་ཅད་ཀྱི་རྗེས་སུ་འགྲོ་བས་ཀྱང་འགྲོ། བདག་བཟོད་པ་རྗེས་སུ་འགྲོ་ཡང་ཆོས་ཐམས་ཅད་ཀྱི་རྗེས་སུ་འགྲོ་བས་ཀྱང་འགྲོ་སྟེ། འོང་བ་ཡང་མེད། འགྲོ་བ་ཡང་མེད་དོ། །ཆོས་ཐམས་ཅད་ཆོས་ཀྱི་དབྱིངས་ལ་གནས་པར་ཡང་ཡང་དག་པ་ཇི་ལྟ་བ་བཞིན་
དུ་རབ་ཏུ་ཤེས་སོ། །ཇི་ལྟར་ཆོས་ཀྱི་དབྱིངས་ལ་གནས་པ་དེ་ལྟར་སེམས་ཅན་ཐམས་ཅད་གནས་ཏེ། གང་གི་གནས་དེ་འཐོབ་པའི་གནས་མེད་པའི་ཚུལ་གྱིས་རྗེས་སུ་ཐོབ་པ་དེ་སྒྲའི་བརྡའི་ཐ་སྙད་ཀྱི་སྒྲ་ཉེ་བར་བཟུང་ནས། མི་སྐྱེ་བའི་ཆོས་ལ་བཟོད་པ་དང་ལྡན་པ་ཞེས་བྱའོ། །མི་
སྐྱེ་བའི་ཆོས་ལ་བཟོད་པ་ནི་གང་གིས་ཀྱང་བརྗོད་པའམ། བསྙད་པའམ། བསྟན་པར་མི་ནུས་སོ། །དེ་ཅིའི་ཕྱིར་ཞེ་ན། དོན་དེ་ནི་བརྗོད་དུ་མེད་པ། སྒྲ་མེད་པ། བཤད་དུ་མེད་པ་ཡིན་ཡང་བརྗོད་དུ་མེད་པའི་དོན་བརྗོད་པས་བསྟན་པ་འདི་ནི་རིགས་ཀྱི་བུ་དེ་བཞིན་

གཤེགས་པའི་ཆེ་བ་ཉིད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱེ་མ་མིའམ་ཅིའི་རྒྱལ་པོ་སྡོང་པོ་འདི་ཇི་ཙམ་དུ་ཆོས་ཟབ་མོ་ལ་བཟོད་པ་སྟོན་པར་སྤོབས་པ་དང་། འདི་ལྟ་བུར་
རྒྱ་ཆེ་བའི་ཡུལ་ལ་ཉེ་བར་སྤྱོད་ཅིང་ལོངས་སྤྱོད་པས་འབྱོར་བ་དང་། ཆོས་སྟོན་པས་ཟབ་མོའི་བཟོད་པ་འདི་ལྟ་བུ་དང་ལྡན་པ་ནི་ངོ་མཚར་ཏོ། །བཅོམ་ལྡན་འདས་མིའམ་ཅིའི་རྒྱལ་པོ་སྡོང་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་དགེ་བའི་རྩ་བ་
བསྐྲུན་ན་དེས་འདི་སྤོབས་པ་འདི་ལྟ་བུ་གྲུབ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་སྐར་མའི་གཟུགས་ཇི་སྙེད་པ་བགྲང་བའི་ཚུལ་གྱིས་ཚད་གཟུང་བར་ནུས་སམ། དེ་བཞིན་དུ་མིའམ་ཅིའི་རྒྱལ་པོ་སྡོང་པོ་
འདིས་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་དགེ་བའི་རྩ་བ་བསྐྲུན་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཙལ་བའི་ཕྱིར་དེ་བཞིན་གཤེགས་པ་དེ་དག་གི་གནན་ཚངས་པར་སྤྱོད་པ་སྤྱད་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་དེ་དག་ཀྱང་ཚད་གཟུང་བར་མི་ནུས་ཏེ། དེས་ན་འདིའི་སྤོབས་པ་འདི་འདྲའོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་མིའམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་སྨྲས་སོ། །མིའམ་ཅིའི་བདག་པོ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་མང་པོ་དེ་དག་ལས་དགེ་བའི་རྩ་བ་བསྐྲུན་པའི་དགེ་བའི་རྩ་བ་མང་པོ་དེ་ལྟ་བུ་བསྡོམས་པས་ཅི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའམ། མིའམ་ཅིའི་རྒྱལ་པོ་སྡོང་པོས་སྨྲས་པ། རིགས་ཀྱི་བུ་བྱང་ཆུབ་སེམས་དཔའ་རྣམས་
དགེ་བའི་རྩ་བ་ཡང་དག་པར་སྒྲུབ་པ་ན། གང་དག་གིས་ནམ་དུ་ཡང་ངོམས་པར་མི་འགྱུར་བ་བྱང་ཆུབ་སེམས་དཔའ་རྣམས་ཀྱི་མི་ངོམས་པ་བཅུ་གཉིས་པོ་འདི་དག་སྟེ། བཅུ་གཉིས་གང་ཞེ་ན། འདི་ལྟ་སྟེ། དེ་བཞིན་གཤེགས་པ་ལ་མཆོད་པ་དང་། རིམ་གྲོ་བྱ་བས་མི་ངོམས་

པ་དང་། ཆོས་མཉན་པས་མི་ངོམས་པ་དང་། དམ་པའི་ཆོས་ཡོངས་སུ་གཟུང་བས་མི་ངོམས་པ་དང་། ཆོས་རྒྱ་ཆེར་རབ་ཏུ་བསྟན་པས་མི་ངོམས་པ་དང་། སེམས་ཅན་ཡོངས་སུ་སྨིན་པར་བྱ་བས་མི་ངོམས་པ་དང་། དགེ་བའི་རྩ་བ་ཡང་དག་པར་བསྒྲུབ་པས་མི་ངོམས་པ་དང་། དགོན་
པ་ལ་གནས་པས་མི་ངོམས་པ་དང་། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་བསྐང་བས་མི་ངོམས་པ་དང་། ཡེ་ཤེས་མངོན་པར་རབ་ཏུ་དང་ཞིང་ཡོངས་སུ་སྨིན་པར་བྱ་བས་མི་ངོམས་པ་དང་། ཆོས་ངེས་པར་སེམས་ཤིང་ཚུལ་བཞིན་ལ་རབ་ཏུ་སྦྱོར་བས་མི་ངོམས་པ་དང་། བསོད་ནམས་
དང་ཡེ་ཤེས་ཀྱི་ཚོགས་ཡོངས་སུ་བཙལ་བས་མི་ངོམས་པ་དང་། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཡང་དག་པར་བསྒྲུབ་པས་མི་ངོམས་པའོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔའ་རྣམས་དགེ་བའི་རྩ་བ་ཡང་དག་པར་བསྒྲུབ་པ་ན་གང་དག་ནམ་དུ་ཡང་ངོམས་པར་མི་
འགྱུར་བ་བྱང་ཆུབ་སེམས་དཔའ་རྣམས་ཀྱི་མི་ངོམས་པ་བཅུ་གཉིས་ཏེ། དེས་ན་བྱང་ཆུབ་སེམས་དཔའ་རྣམས་དགེ་བའི་ཚོགས་བསགས་པ་ལ་མི་ངོམས་པ་ཞེས་བྱའོ། །དེ་ནས་བཅོམ་ལྡན་འདས་ལ་མིའམ་ཅིའི་རྒྱལ་པོ་སྡོང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་
ཆུབ་སེམས་དཔའ་རྣམས་ཀྱི་ཏིང་ངེ་འཛིན་དཀོན་མཆོག་འབྱུང་གནས་ཞེས་བགྱི་བ་མཆིས་ཏེ། བྱང་ཆུབ་སེམས་དཔའ་ཏིང་ངེ་འཛིན་དེ་ལ་བརྟེན་ན་ཡོན་ཏན་རིན་པོ་ཆེའི་ཁྱད་པར་གྱི་ཆོས་ཐམས་ཅད་འཐོབ་པར་འགྱུར་རོ་ཞེས་བགྱི་བ་ཞིག་བདག་གིས་ཐོས་ན། བཅོམ་ལྡན་འདས་གང་ཐོས་པས།
བྱང་ཆུབ་སེམས་དཔའ་རྣམས་ཡོན་ཏན་རིན་པོ་ཆེའི་ཁྱད་པར་གྱི་ཆོས་ཐམས་ཅད་འཐོབ་པར་འགྱུར་བར་བགྱི་བའི་སླད་དུ། བྱང་ཆུབ་སེམས་དཔའི་ཏིང་ངེ་འཛིན་དཀོན་མཆོག་འབྱུང་གནས་དེ་བཞིན་གཤེགས་པས་ལེགས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་
པ། མིའམ་ཅིའི་བདག་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། བྱང་ཆུབ་སེམས་དཔའི་ཏིང་ངེ་འཛིན་དཀོན་མཆོག་འབྱུང་གནས་ངས་ཁྱོད་ལ་བཤད་དོ། །མིའམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ལ་ལེགས་སོ་ཞེས་གསོལ་ནས། བཅོམ་

ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །མིའམ་ཅིའི་བདག་པོ་འདི་ལ་བྱང་ཆུབ་སེམས་དཔའ་ནི་སངས་རྒྱས་དཀོན་མཆོག་རྒྱུན་མི་འཆད་པ་དང་། ཆོས་དཀོན་མཆོག་རྒྱུན་མི་འཆད་པ་དང་། དགེ་འདུན་དཀོན་མཆོག་
རྒྱུན་མི་འཆད་པར་བྱ་བའི་ཕྱིར་སེམས་བསྐྱེད་པ་རིན་པོ་ཆེ་བརྒྱད་ཅུ་པོ་འདི་དག་ལ་འཇུག་གོ། །བརྒྱད་ཅུ་གང་ཞེ་ན། འདི་ལྟ་སྟེ། དེ་ཐམས་ཅད་མཁྱེན་པའི་སེམས་རིན་པོ་ཆེ་མི་བརྗེད་པ་དང་། ལྷག་པའི་བསམ་པའི་སེམས་རིན་པོ་ཆེ་མི་གཏོང་བ་དང་། དགེ་བ་རིན་པོ་ཆེ་ཐམས་ཅད་ཀྱི་སེམས་མི་
འདོར་བ་དང་། དགེ་བ་རིན་པོ་ཆེ་ཐམས་ཅད་ལ་རབ་ཏུ་སྦྱོར་བའི་སེམས་མི་འདོར་བ་དང་། ཡི་དམ་ལ་བརྟན་པའི་སེམས་རིན་པོ་ཆེ་ཡོངས་སུ་མི་འདོར་བ་དང་། བདོག་པ་ཐམས་ཅད་ཡོངས་སུ་གཏོང་བའི་སེམས་རིན་པོ་ཆེ་བྱང་ཆུབ་ཏུ་ཡོངས་སུ་སྔོ་བས་རྣམ་པར་སྨིན་པ་ལ་མི་རེ་བའི་སེམས་
རིན་པོ་ཆེ་ལ་འཇུག་པ་དང་། མི་དགེ་བའི་རྩ་བ་རྣམ་པ་གསུམ་རྣམ་པར་སྤངས་པས། ལུས་ཀྱི་རྒྱན་གྱི་སེམས་རིན་པོ་ཆེ་དང་། ངག་གི་སྐྱོན་རྣམ་པ་བཞི་རྣམ་པར་སྤངས་པས་ངག་གི་རྒྱན་གྱི་སེམས་རིན་པོ་ཆེ་དང་། བརྣབ་སེམས་དང་གནོད་སེམས་དང་ལོག་པར་ལྟ་བ་དང་བྲལ་
བས་སེམས་ཀྱི་རྒྱན་གྱི་སེམས་རིན་པོ་ཆེ་དང་། ཚུལ་ཁྲིམས་མ་ཉམས་ཤིང་སྐྱོན་མེད་དེ་འདྲེན་མ་མ་ཡིན་ཞིང་ཐུན་ཚགས་མ་ཡིན་པས་ཚུལ་ཁྲིམས་ཀྱི་རྒྱན་གྱི་སེམས་རིན་པོ་ཆེ་དང་། སེམས་ཅན་ཐམས་ཅད་ལ་སེམས་སྙོམས་པས་ཁོང་ཁྲོ་བ་མེད་པའི་སེམས་རིན་པོ་ཆེ་དང་། སེམས་
ཅན་ཐམས་ཅད་ཀྱིས་ཉེས་པར་བྱས་པ་ལ་ཅི་མི་སྙམ་པས་བཟོད་པ་དང་ངེས་པའི་སེམས་རིན་པོ་ཆེ་དང་། བྱང་ཆུབ་ཀྱི་ཡན་ལག་ལ་ལྟ་བས་ལུས་དང་སྲོག་ལ་མི་ལྟ་བའི་སེམས་རིན་པོ་ཆེ་དང་། མཐོ་དམན་མེད་པས་རྗེས་སུ་ཆགས་པ་དང་ཁོང་ཁྲོ་བ་དང་བྲལ་བའི་སེམས་རིན་པོ་ཆེ་དང་།
ཞུམ་པ་མེད་པས་བརྩོན་འགྲུས་བརྟན་པའི་གོ་ཆའི་སེམས་རིན་པོ་ཆེ་དང་། ལྷོད་པ་མེད་པའི་བརྩོན་པ་ཐམས་ཅད་ཉམས་འོག་ཏུ་ཆུད་པར་བྱེད་པའི་སེམས་རིན་པོ་ཆེ་དང་། བྱང་ཆུབ་ཀྱི་ལམ་གྱི་ཚོགས་བསགས་པས་དྲན་པ་དང་། བློ་གྲོས་དང་། རྟོགས་པ་དང་། ངོ་ཚ་ཤེས་པ་དང་

མོས་པ་བརྗེད་པ་མེད་པའི་སེམས་རིན་པོ་ཆེ་དང་། སེམས་ལ་དབང་བྱེད་པས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་བསྐྱེད་པའི་སེམས་རིན་པོ་ཆེ་དང་། དམ་པའི་ཆོས་བསགས་པས་ཆོས་ཡོངས་སུ་ཚོལ་བའི་སེམས་རིན་པོ་ཆེ་དང་།
འཇིགས་པ་མེད་ཅིང་སྤོབས་པས་ཐོས་པ་འཛིན་པའི་སེམས་རིན་པོ་ཆེ་དང་། སྡིག་པ་འདོད་པ་མེད་པས་ཟང་ཟིང་མེད་པར་ཆོས་སྟོན་པའི་སེམས་རིན་པོ་ཆེ་དང་། ཆགས་པའི་སེམས་མེད་པས་སློབ་དཔོན་ཆོས་མི་འཆབ་པའི་སེམས་རིན་པོ་ཆེ་དང་། ནན་ཏན་སྙིང་པོར་བྱེད་པས་ཚུལ་བཞིན་
དུ་ཡང་ཡིད་ལ་བྱེད་པའི་སེམས་རིན་པོ་ཆེ་དང་། དེ་ལྟར་བྱེད་པས་ཇི་ལྟར་ཐོས་པའི་ཆོས་རྣམས་ལ་ནན་ཏན་བྱེད་པའི་སེམས་རིན་པོ་ཆེ་དང་། གཞན་གྱི་དྲིང་ལ་མི་འཇོག་པས་ཤེས་རབ་ཀྱིས་སོ་སོར་རྟོག་པའི་སེམས་རིན་པོ་ཆེ་དང་། སེམས་ཅན་ཐམས་ཅད་ལ་བྱམས་པས་ཁྱབ་པས་བྱམས་པ་ཆེན་
པོའི་སེམས་རིན་པོ་ཆེ་དང་། སེམས་ཅན་ཐམས་ཅད་ལ་ལྟ་བས་སྙིང་རྗེ་ཆེན་པོའི་སེམས་རིན་པོ་ཆེ་དང་། ཆོས་ལ་དགའ་མོས་དད་པས་དགའ་བ་ཆེན་པོའི་སེམས་རིན་པོ་ཆེ་དང་། ཆོས་ཐམས་ཅད་ངེས་པར་སེམས་པས་བཏང་སྙོམས་ཆེན་པོའི་སེམས་རིན་པོ་ཆེ་དང་། དགེ་བའི་རྩ་བ་
བསགས་པས་འཁོར་བ་ན་ཡོངས་སུ་མི་སྐྱོ་བའི་སེམས་རིན་པོ་ཆེ་དང་། བདག་གི་བདེ་བ་ལ་མི་ཆགས་པས་སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་སེམས་རིན་པོ་ཆེ་དང་། ཆོས་འཛིན་པས་བསྡུ་བའི་དངོས་པོའི་སེམས་རིན་པོ་ཆེ་དང་། ཐམས་ཅད་དུ་རྣམ་པར་འཕྲུལ་
པས་མངོན་པར་ཤེས་པ་ཆེན་པོའི་སེམས་རིན་པོ་ཆེ་དང་། མ་ཐོས་པའི་ཆོས་མཉན་པའི་ཕྱིར་དགེ་བའི་བཤེས་གཉེན་ལ་བསྟེན་པའི་སེམས་རིན་པོ་ཆེ་དང་། དགེ་བའི་རྩ་བ་ཐམས་ཅད་སོགས་པས་སྡིག་པའི་གྲོགས་པོ་སྤོང་བའི་སེམས་རིན་པོ་ཆེ་དང་། ཐ་དད་པ་མེད་པས་སེམས་ཅན་
ཐམས་ཅད་ལ་སྦྱོར་བ་མཉམ་པའི་སེམས་རིན་པོ་ཆེ་དང་། སེམས་ཅན་ཐམས་ཅད་ཀྱི་བསམ་པ་ལ་འཇུག་པས། སེམས་ཅན་ཐམས་ཅད་ཀྱི་ཉོན་མོངས་པའི་ནད་ཡོངས་སུ་ཤེས་པའི་སེམས་རིན་པོ་ཆེ་དང་། སེམས་ཅན་ཐམས་ཅད་ཀྱི་ཉོན་མོངས་པའི་ནད་རབ་ཏུ་ཞི་བར་བྱེད་པས་

ཆོས་ཀྱི་སྨན་ཐམས་ཅད་ཡོངས་སུ་ཚོལ་བའི་སེམས་རིན་པོ་ཆེ་དང་། ཆོས་ཀྱི་བདག་ཉིད་པས་མ་བསླབས་པ་རྣམས་ལ་མི་བརྙས་པའི་སེམས་རིན་པོ་ཆེ་དང་། སེམས་ཅན་ཐམས་ཅད་ལ་འདུད་པས་ང་རྒྱལ་མེད་པའི་སེམས་རིན་པོ་ཆེ་དང་། འཆོས་པ་མེད་པའི་
གཡོ་དང་སྒྱུ་མེད་པའི་སེམས་རིན་པོ་ཆེ་དང་། དམ་པའི་ཆོས་ཡུན་རིང་དུ་གནས་པས་ཆོས་ལ་དགའ་བའི་སེམས་རིན་པོ་ཆེ་དང་། སངས་རྒྱས་ཐམས་ཅད་ལ་བྱས་པ་གཟོ་བས་དམ་པའི་ཆོས་ཡོངས་སུ་འཛིན་པའི་སེམས་རིན་པོ་ཆེ་དང་། བརྟན་པའི་གྲོགས་པོའི་ཕྱིར་བྱས་པ་ཤེས་ཤིང་
བྱས་པ་གཟོ་བའི་སེམས་རིན་པོ་ཆེ་དང་། ལྟོས་པ་མེད་པས་ལན་དུ་ཕན་འདོགས་པ་ལ་མི་རེ་བའི་སེམས་རིན་པོ་ཆེ་དང་། དཀར་པོའི་ཕྱོགས་སྲུང་བས་དགོན་པ་ལ་དགའ་བའི་སེམས་རིན་པོ་ཆེ་དང་། ལས་བྱས་པ་ཆུད་མི་གསོན་པས་རྟག་ཏུ་རབ་ཏུ་འབྱུང་བའི་སེམས་རིན་པོ་ཆེ་དང་།
སྡོམ་པའི་སྤྱོད་པ་སོགས་པས་འཕགས་པའི་རིགས་ལ་དགའ་བའི་སེམས་རིན་པོ་ཆེ་དང་། སེམས་ཅན་ཐམས་ཅད་མགུ་བར་བྱེད་པས་སྦྱངས་པའི་ཡོན་ཏན་ཐམས་ཅད་དང་ཡོ་བྱད་བསྙུངས་པའི་སེམས་རིན་པོ་ཆེ་དང་། ཤེས་རབ་ཀྱིས་མི་ངོམས་པས་འདོད་པ་ཆུང་ཞིང་ཆོག་ཤེས་པའི་སེམས་
རིན་པོ་ཆེ་དང་། ལུས་དང་སེམས་དབེན་པས་དགའ་བ་ལ་དབེན་པའི་སེམས་རིན་པོ་ཆེ་དང་། མཚན་དང་དཔེ་བྱད་བཟང་པོ་ཡོངས་སུ་རྫོགས་པར་བྱེད་པས་བསོད་ནམས་ཀྱི་ཚོགས་ཀྱིས་མི་ངོམས་པའི་སེམས་རིན་པོ་ཆེ་དང་། སེམས་ཅན་ཐམས་ཅད་ཀྱི་ཐེ་ཚོམ་གཅད་པའི་ཕྱིར་ཡེ་
ཤེས་ཀྱི་ཚོགས་ཡོངས་སུ་ཚོལ་བའི་སེམས་རིན་པོ་ཆེ་དང་། སངས་རྒྱས་མཐོང་བ་དང་མི་འབྲལ་བའི་ཕྱིར་སངས་རྒྱས་རྗེས་སུ་དྲན་པའི་སེམས་རིན་པོ་ཆེ་དང་། ཆོས་མཉན་པ་དང་མི་འབྲལ་བའི་ཕྱིར་ཆོས་རྗེས་སུ་དྲན་པའི་སེམས་རིན་པོ་ཆེ་དང་། ཕྱིར་མི་ལྡོག་པའི་དགེ་འདུན་
ལ་གཞོལ་བའི་ཕྱིར་དགེ་འདུན་རྗེས་སུ་དྲན་པའི་སེམས་རིན་པོ་ཆེ་དང་། བྱང་ཆུབ་ཀྱི་སེམས་ལས་མི་གཡོ་བའི་ཕྱིར་ཚུལ་ཁྲིམས་རྗེས་སུ་དྲན་པའི་སེམས་རིན་པོ་ཆེ་དང་། ཉོན་མོངས་པ་ཐམས་ཅད་ཡོངས་སུ་བོར་བས་གཏོང་བ་རྗེས་སུ་དྲན་པའི་སེམས་རིན་པོ་ཆེ་དང་། སྐྱེ་བ་གཅིག་

གིས་ཐོགས་པའི་བྱང་ཆུབ་སེམས་དཔའ་རྗེས་སུ་དྲན་པའི་ཕྱིར་ལྷ་རྗེས་སུ་དྲན་པའི་སེམས་རིན་པོ་ཆེ་དང་། མཚུངས་པར་བྱེད་པའི་ཕྱིར་བྱང་ཆུབ་སེམས་དཔའ་རྗེས་སུ་དྲན་པའི་སེམས་རིན་པོ་ཆེ་དང་། དོན་ཐམས་ཅད་རྟོགས་པས་དོན་སོ་སོ་ཡང་དག་པར་རིག་པའི་སེམས་རིན་པོ་ཆེ་
དང་། ཆོས་ཀྱི་དབྱིངས་འདྲེས་པ་མེད་པས་ཆོས་སོ་སོ་ཡང་དག་པར་རིག་པའི་སེམས་རིན་པོ་ཆེ་དང་། སེམས་ཅན་གྱི་ཚིག་ཐམས་ཅད་རྟོགས་པས་ངེས་པའི་ཚིག་སོ་སོ་ཡང་དག་པར་རིག་པའི་སེམས་རིན་པོ་ཆེ་དང་། ཚིག་འབྲུའི་རང་བཞིན་རྗེས་སུ་རྟོགས་པས་སྤོབས་པ་སོ་སོ་ཡང་དག་
པར་རིག་པའི་སེམས་རིན་པོ་ཆེ་དང་། རྣམ་པར་ཤེས་པ་སྒྱུ་མ་ལྟ་བུར་ཡོངས་སུ་ཤེས་པའི་ཚུལ་གྱིས་ཡེ་ཤེས་ལ་རྟོན་པའི་སེམས་རིན་པོ་ཆེ་དང་། བཀྲི་བའི་དོན་གྱི་མདོ་སྡེ་ལས་དང་བྱ་བ་དང་འགལ་བས་ངེས་པའི་དོན་གྱི་མདོ་སྡེ་ལ་རྟོན་པའི་སེམས་རིན་པོ་ཆེ་དང་། གང་ཟག་གི་རང་
བཞིན་རྗེས་སུ་རྟོག་པས་ཆོས་ཉིད་ལ་རྟོན་པའི་སེམས་རིན་པོ་ཆེ་དང་། ཁམས་གསུམ་ཐམས་ཅད་ལ་མངོན་པར་ཞེན་པས་འཇིགས་པའི་ཕྱིར་འདུ་བྱེད་ཐམས་ཅད་ལ་མི་རྟག་པ་དང་། སྡུག་བསྔལ་བར་སོ་སོར་རྟོག་པའི་སེམས་རིན་པོ་ཆེ་དང་། སེམས་ཅན་ཐམས་ཅད་ལ་བདག་མེད་
པས་ཆོས་ཐམས་ཅད་ལ་བདག་མེད་པར་སོ་སོར་རྟོག་པའི་སེམས་རིན་པོ་ཆེ་དང་། འདོད་པའི་ཁམས་ལས་ཤིན་ཏུ་འདའ་བས་མི་གཙང་བར་སོ་སོར་རྟོག་པའི་སེམས་རིན་པོ་ཆེ་དང་། ཤིན་ཏུ་ཞི་ཞིང་ཉེ་བར་ཞི་བས་མྱ་ངན་ལས་འདས་པ་ལ་ཞི་བར་སོ་སོར་རྟོག་པའི་སེམས་རིན་པོ་ཆེ་དང་།
བདུད་རྩིའི་སྒོ་ལ་ཡང་དག་པར་གཞོལ་བས་རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ལ་མོས་པའི་སེམས་རིན་པོ་ཆེ་དང་། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པས་ཆོས་ཐམས་ཅད་ལ་མ་སྐྱེས་པ་དང་མ་བྱུང་བས་མོས་པའི་སེམས་
རིན་པོ་ཆེ་དང་། ལྟ་བ་ཐམས་ཅད་ལ་མངོན་པར་ཞེན་པ་མེད་པས་ཆོས་ཐམས་ཅད་ལ་སྒྱུ་མ་དང་། སྨིག་རྒྱུ་དང་། ཆུ་ཟླ་དང་། མིག་ཡོར་དང་། རྨི་ལམ་ལྟ་བུར་ཡང་དག་པར་གཞོལ་བའི་སེམས་རིན་པོ་ཆེ་དང་། རྟག་པ་དང་ཆད་པ་དང་བྲལ་བས་རྟེན་ཅིང་འབྲེལ་བར་

འབྱུང་བ་དང་འཐུན་པའི་སེམས་རིན་པོ་ཆེ་དང་། གཉིས་དང་བྲལ་བས་མཐར་ལྟ་བ་ཐམས་ཅད་སེལ་བའི་སེམས་རིན་པོ་ཆེ་དང་། ཐེག་པ་གཅིག་ཏུ་ཁོང་དུ་ཆུད་པས་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའི་སེམས་རིན་པོ་ཆེ་དང་། སྐྱོན་མེད་པ་ལ་འཇུག་པས་
སྤྱོད་པ་ཐམས་ཅད་ལས་ལྡོག་པའི་སེམས་རིན་པོ་ཆེ་དང་། ཆོས་ཐམས་ཅད་མཉམ་པ་ཉིད་ཀྱི་ཕྱིར་ཡང་དག་པར་སྐྱོན་མེད་པ་ལ་སོ་སོར་རྟོག་པའི་སེམས་རིན་པོ་ཆེ་དང་། སངས་རྒྱས་ཀྱི་ཆོས་ཐམས་ཅད་སྐྱེ་བ་མེད་པའི་ཕྱིར་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཡང་དག་པར་སྒྲུབ་པའི་
སེམས་རིན་པོ་ཆེ་སྟེ། འདི་དག་ནི་ཆོས་རིན་པོ་ཆེ་བརྒྱད་ཅུའོ། །མིའམ་ཅིའི་བདག་པོ་དེ་ལྟར་གང་ཆོས་བརྒྱད་ཅུ་པོ་འདི་ལ་འཇུག་པ་དང་ཐོབ་པ་དང་། ནན་ཏན་བྱེད་པ་དེ་ནི་དཀོན་མཆོག་འབྱུང་གནས་ཏིང་ངེ་འཛིན་ཅེས་བྱའོ། །ཆོས་འདི་དག་ནི་ཏིང་ངེ་འཛིན་སྒྲུབ་པའོ། །བྱང་
ཆུབ་སེམས་དཔས་གང་གི་ཚེ་དཀོན་མཆོག་འབྱུང་གནས་ཏིང་ངེ་འཛིན་འདི་རབ་ཏུ་ཐོབ་པར་གྱུར་པ་དེའི་ཚེ། དེས་གང་ལ་དབང་ཐོབ་པར་མ་གྱུར་པའི་རིན་པོ་ཆེའི་འཇིག་རྟེན་གྱིའམ། འཇིག་རྟེན་ལས་འདས་པ་དེ་གང་ཡང་མེད་དོ། །མིའམ་ཅིའི་བདག་པོ་དེ་ལ་འཇིག་རྟེན་གྱི་རིན་
པོ་ཆེ་ནི་གང་། འཇིག་རྟེན་ལས་འདས་པའི་རིན་པོ་ཆེ་ནི་གང་ཞེ་ན། མིའམ་ཅིའི་བདག་པོ་དེ་ལ་འཇིག་རྟེན་གྱི་རིན་པོ་ཆེ་ནི་འདི་ལྟ་སྟེ། ལྷ་དང་མི་རྣམས་ཀྱི་ཆེ་བ་ཉིད་དང་། བརྒྱ་བྱིན་དང་། ཚངས་པའི་ཆེ་བ་ཉིད་དང་། འཇིག་རྟེན་སྐྱོང་བའི་ཆེ་བ་ཉིད་དང་། འཁོར་ལོས་
སྒྱུར་བའི་ཆེ་བ་ཉིད་དང་། ཚོང་དཔོན་དང་། ཁྱིམ་བདག་དང་། བྲམ་ཟེ་དང་། རྒྱལ་རིགས་ཤིང་སཱ་ལ་ཆེན་པོ་ལྟ་བུའི་ཆེ་བ་ཉིད་དོ། །དེ་དེ་ལྟར་ལྷ་དང་མི་རྣམས་ཀྱི་ཆེ་བ་ཉིད་རབ་ཏུ་ཐོབ་ཀྱང་རྒྱགས་པ་མི་སྐྱེད། བག་མེད་པ་མི་སྐྱེད་དོ། །དེ་བག་ཡོད་པར་གྱུར་པས། བྱང་
ཆུབ་སྒྲུབ་པར་བྱེད་པའི་ཆོས་རྣམས་ཡང་དག་པར་བསྒྲུབ་པ་སྟེ། འདི་ནི་འཇིག་རྟེན་གྱི་རིན་པོ་ཆེ་ཞེས་བྱའོ། །དེ་ལ་འཇིག་རྟེན་ལས་འདས་པའི་རིན་པོ་ཆེ་གང་ཞེ་ན། འདི་ལྟ་སྟེ། འཇིག་རྟེན་ལས་འདས་པའི་ཆོས་རིན་པོ་ཆེའོ། །འཇིག་རྟེན་ལས་འདས་པའི་ཆོས་

རིན་པོ་ཆེ་གང་ཞེ་ན། ཆོས་གང་འཇིག་རྟེན་ལས་སྒྲོལ་བའོ། །འཇིག་རྟེན་ལས་སྒྲོལ་བའི་ཆོས་གང་ཞེ་ན། འདི་ལྟ་སྟེ། འཕགས་པ་འཇིག་རྟེན་ལས་འདས་པའི་ཤེས་རབ་སྟེ། ཤེས་རབ་ཀྱི་འཇིག་རྟེན་ལས་སྒྲོལ་ལོ། །ཤེས་རབ་རིན་པོ་ཆེས་ནི་འཇིག་རྟེན་ལས་འདས་པའི་
ཆོས་ཐམས་ཅད་བསྡུས་ཏེ། ཤེས་རབ་ནི་འཇིག་རྟེན་ལས་འདས་པའི་ཆོས་ཐམས་ཅད་ཀྱི་གཙོ་བོ་ཡིན་ནོ། །མིའམ་ཅིའི་བདག་པོ་འདི་ལྟ་སྟེ་དཔེར་ན་ཀླུང་ཐམས་ཅད་ཀྱི་གཙོ་བོ་ནི་རྒྱ་མཚོ་ཆེན་པོའོ། །རི་ཐམས་ཅད་ཀྱི་གཙོ་བོ་ནི་རིའི་རྒྱལ་པོ་རི་རབ་བོ། །སྐར་མ་ཐམས་ཅད་ཀྱི་
གཙོ་བོ་ནི་ཟླ་བའོ། །སྣང་བ་ཐམས་ཅད་ཀྱི་གཙོ་བོ་ནི་ཉི་མའོ། །རི་དགས་ཐམས་ཅད་ཀྱི་གཙོ་བོ་ནི་སེང་གེའོ། །སྐྱེ་དགུ་ཐམས་ཅད་ཀྱི་གཙོ་བོ་ནི་རྒྱལ་པོའོ། །སུམ་ཅུ་རྩ་གསུམ་པ་ཐམས་ཅད་ཀྱི་གཙོ་བོ་ནི་བརྒྱ་བྱིན་ནོ། །ཚངས་པ་ལ་དབང་དུ་བྱ་བ་རྣམས་ཀྱི་གཙོ་བོ་ནི་ཚངས་པ་ཆེན་
པོའོ། །མིའམ་ཅིའི་བདག་པོ་དེ་བཞིན་དུ་འཇིག་རྟེན་ལས་འདས་པའི་ཆོས་ཐམས་ཅད་ཀྱི་གཙོ་བོ་ནི་ཤེས་རབ་སྟེ། དེའི་ཕྱིར་ཤེས་རབ་ནི་ཆོས་ཐམས་ཅད་ཀྱི་རྒྱལ་པོ་ཞེས་བྱའོ། །མུ་སྟེགས་ལ་གནས་པ་བསྒྲལ་བའི་ཕྱིར་བདེ་བར་འགྲོ་བས་ལམ་མོ། །ཉོན་མོངས་པའི་མུན་
པ་སེལ་བའི་ཕྱིར་སྒྲོན་མའོ། །གཡུལ་ལས་རྒྱལ་བའི་ཕྱིར་དཔའ་བོའོ། །སྨན་རབ་ཏུ་སྦྱོར་བའི་ཕྱིར་སྨན་པའོ། །གཙུག་ལག་ཐམས་ཅད་ཤེས་པའི་ཕྱིར་སློབ་དཔོན་ནོ། །ཆོས་ཐམས་ཅད་ཕིགས་པའི་ཕྱིར་མདའོ། །ཉོན་མོངས་པ་གཅོད་པའི་ཕྱིར་རལ་གྲིའོ། །ཉོན་མོངས་
པའི་ཚང་ཚིང་དྲལ་བའི་ཕྱིར་ཐོང་གཤོལ་ལོ། །མཉམ་པའི་ཕྱིར་མི་འགལ་བའོ། །འཐབ་པ་མེད་པའི་ཕྱིར་རྩོད་པ་མེད་པའོ། །འབྱུང་བ་མེད་པའི་ཕྱིར་མི་འགག་པའོ། །བདེན་པའི་དོན་རྣམས་ཡོངས་སུ་ཤེས་པའི་མཐར་ཐུག་པའི་ཕྱིར་མི་འཁྲུགས་པའོ། །དྲན་པ་ཉེ་བར་གཞོག་
པའི་ཕྱིར་དྲན་པའོ། །ཡང་དག་པར་སྤོང་བ་རྣམས་ལ་མཉམ་པ་ཉིད་དོ། །རྫུ་འཕྲུལ་གྱི་རྐང་པ་རྣམས་བསྐྱེད་པའོ། །དབང་པོ་རྣམས་སྦེད་པའོ། །སྟོབས་རྣམས་ཀྱིས་མི་རྫི་བའོ། །བྱང་ཆུབ་ཀྱི་ཡན་ལག་རྣམས་རྗེས་སུ་རྟོག་པའོ། །ལམ་སྟོན་པའོ། །ཞི་གནས་ཞི་

བར་བྱེད་པའོ། །ལྷག་མཐོང་རིག་པར་བྱེད་པའོ། །རབ་རིབ་མེད་པའི་ཕྱིར་སྣང་བར་བྱེད་པའོ། །ཆོས་ཀྱི་སྣང་བས་མུན་པ་སེལ་བའོ། །རྡུལ་དང་བྲལ་བའི་ཕྱིར་རྡུལ་མེད་པའོ། །བརྙས་ཐབས་དང་བྲལ་བའི་ཕྱིར་མཐོ་བར་སེམས་པ་མེད་པའོ། །ཡ་ང་བའི་
ལམ་ལས་རབ་ཏུ་འདས་པའི་ཕྱིར་ཀུན་ཏུ་མཐོང་བར་བྱེད་པའོ། །ཕྱི་ནང་དང་བྲལ་བའི་ཕྱིར་ཡུལ་མེད་པའོ། །ལྟ་བས་བྱས་པ་མེད་པའི་ཕྱིར་སྟོང་པ་སྒྲོལ་བའོ། །རྣམ་པར་རྟོག་པ་ཉེ་བར་ཞི་བའི་ཕྱིར། མཚན་མ་མེད་པས་རབ་ཏུ་ཕྱེ་བའོ། །ཁམས་གསུམ་པ་ལས་རྣམ་པར་འདས་པའི་
ཕྱིར་སྨོན་པ་མེད་པའི་མཚན་ཉིད་དོ། །མཚན་ཉིད་མེད་པའི་ཕྱིར་མཚན་ཉིད་གཅིག་པའོ། །མཚུངས་པ་མེད་པའི་ཕྱིར་ནམ་མཁའི་མཚན་ཉིད་དོ། །བདུད་ཀྱི་ལས་དང་བྲལ་བའི་ཕྱིར་གཡོ་བ་དང་རློམ་སེམས་འཇོམས་པའོ། །མི་རྟོག་པའི་སྦྱིན་པའོ། །མི་གནས་པའི་ཚུལ་
ཁྲིམས་སོ། །རབ་ཏུ་མི་གནས་པའི་བཟོད་པའོ། །བླང་བ་མེད་པ་དང་དོར་བ་མེད་པའི་བརྩོན་འགྲུས་སོ། །སྒྲོ་བཏགས་པ་མེད་པའི་བསམ་གཏན་ནོ། །རྣམ་པར་རིག་བྱེད་མ་ཡིན་པའི་སྒོའོ། །ཐམས་ཅད་ལ་མངོན་དུ་ཕྱོགས་པའོ། །ཐབས་དང་འབྲེལ་བའོ། །སེམས་
ཅན་ལ་བདག་མེད་པར་ཡང་དག་པར་གཞོལ་བའོ། །དགེ་བའི་རྩ་བ་བསགས་པའོ། །བྱ་བ་མེད་པའོ། །བྱ་བ་དང་བྲལ་བ་སྟེ། མིའམ་ཅིའི་བདག་པོ་འདི་ནི་ཤེས་རབ་རིན་པོ་ཆེའོ། །ཤེས་རབ་རིན་པོ་ཆེ་འདི་ནི་དཀོན་མཆོག་འབྱུང་གནས་ཏིང་ངེ་འཛིན་ཐོབ་པའི་བྱང་
ཆུབ་སེམས་དཔས་འཐོབ་བོ། །འདི་འཐོབ་པ་ན་རིན་པོ་ཆེ་ཐམས་ཅད་ཡང་དག་པར་འདུ་བ་ཡིན་ནོ། །མིའམ་ཅིའི་བདག་པོ་འདི་ལྟ་སྟེ། དཔེར་ན་ཆུ་བོ་ཐམས་ཅད་ཀྱི་སྒོ་ནི་རྒྱ་མཚོ་ཆེན་པོ་སྟེ། རིན་པོ་ཆེ་ཐམས་ཅད་སོགས་པ་རིན་པོ་ཆེ་ཐམས་ཅད་ཡང་དག་པར་འདུ་བ་སྟེ། དེ་
ལས་རིན་པོ་ཆེ་ཐམས་ཅད་འབྱུང་ངོ་། །མིའམ་ཅིའི་བདག་པོ་དེ་བཞིན་དུ་དཀོན་མཆོག་འབྱུང་གནས་ཏིང་ངེ་འཛིན་རབ་ཏུ་ཐོབ་པའི་བྱང་ཆུབ་སེམས་དཔའ་ཡང་རིན་པོ་ཆེ་ཐམས་ཅད་ཀྱི་སྒོ་ཡིན་ཏེ། ཆོས་དཀོན་མཆོག་ཐམས་ཅད་སོགས་པ་རིན་པོ་ཆེ་ཐམས་ཅད་ཡང་དག་པར་འདུ་

བའོ། །དཀོན་མཆོག་འབྱུང་གནས་ཏིང་ངེ་འཛིན་ལས་དཀོན་མཆོག་གསུམ་འབྱུང་སྟེ། སངས་རྒྱས་དཀོན་མཆོག་དང་། ཆོས་དཀོན་མཆོག་དང་། དགེ་འདུན་དཀོན་མཆོག་གོ། །དེས་ན་དཀོན་མཆོག་འབྱུང་གནས་ཏིང་ངེ་འཛིན་ནི་རིན་པོ་ཆེ་ཐམས་ཅད་སོགས་པ་ཞེས་བྱའོ། །
དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མིའམ་ཅིའི་རྒྱལ་པོ་སྡོང་པོ་འདིས་དཀོན་མཆོག་འབྱུང་གནས་ཏིང་ངེ་འཛིན་འདི་ཐོབ་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་
ཀྱི་བུ་ཁྱོད་ཀྱིས་དེ་མིའམ་ཅིའི་རྒྱལ་པོ་སྡོང་པོ་ལ་དྲིས་ཤིག་དང་དེས་ཁྱོད་ལ་སྟོན་པར་འགྱུར་རོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་མིའམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་སྨྲས་སོ། །མིའམ་ཅིའི་བདག་པོ་ཁྱོད་ཀྱིས་དཀོན་མཆོག་འབྱུང་གནས་ཏིང་ངེ་འཛིན་
འདི་ཐོབ་བམ། སྨྲས་པ། རིགས་ཀྱི་བུ་ཏིང་ངེ་འཛིན་འདི་ནི་ཐོབ་པའམ། དམིགས་པར་སོ་སོར་ཉེ་བར་གནས་པ་མ་ཡིན་ནོ། །ཏིང་ངེ་འཛིན་འདི་ནི་སུས་ཀྱང་མི་ཐོབ་བོ། །ཏིང་ངེ་འཛིན་འདི་ནི་གཟུགས་སུ་བགྲང་བའམ། ཚོར་བ་དང་། འདུ་ཤེས་དང་། འདུ་བྱེད་
དང་། རྣམ་པར་ཤེས་པར་བགྲང་བ་མ་ཡིན་ནོ། །ཏིང་ངེ་འཛིན་འདི་ནི་གཟུགས་སུ་སྣང་བ་མ་ཡིན་ནོ། །ཏིང་ངེ་འཛིན་འདི་ནི་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པའི་གཟུང་བ་མ་ཡིན། སྐྱེ་བའི་མཚན་ཉིད་མ་ཡིན།
འཇིག་པའི་མཚན་ཉིད་མ་ཡིན། གནས་པའི་མཚན་ཉིད་མ་ཡིན། རྒྱུན་འཆད་པའི་མཚན་ཉིད་མ་ཡིན། མཚན་ཉིད་གཅིག་པ་མ་ཡིན། མཚན་ཉིད་ཐ་དད་པ་མ་ཡིན། མཚན་ཉིད་མ་ཡིན། མཚན་ཉིད་དང་བྲལ་བ་མ་ཡིན། མཚན་ཉིད་མེད་པ་ཡང་མ་ཡིན་ཏེ།
བརྗོད་པར་བྱ་བ་མ་ཡིན་ནོ། །ཏིང་ངེ་འཛིན་འདི་ནི་ཡོངས་སུ་རྟོགས་པར་མི་ནུས་ཏེ། ཀུན་ཏུ་རྟོགས་པར་མ་ཡིན་རྣམ་པར་རྟོགས་པར་མ་ཡིན་ནོ། །དེ་ཅིའི་ཕྱིར་ཞེ་ན། གལ་ཏེ་ཏིང་ངེ་འཛིན་འདི་ཡོངས་སུ་རྟོགས་པའམ། ཀུན་ཏུ་རྟོགས་པའམ། རྣམ་པར་རྟོགས་པར་

གྱུར་ན་ནི་བརྟག་པའི་གཞི་ཉིད་དུ་འགྱུར་གྱི་ཏིང་ངེ་འཛིན་མ་ཡིན་ནོ། །རིགས་ཀྱི་བུ་ཏིང་ངེ་འཛིན་ཅེས་བྱ་བ་ནི་ཆོས་ཐམས་ཅད་མཉམ་པ་ཉིད་དོ། །ཆོས་ཐམས་ཅད་ཀྱི་མཉམ་པ་ཉིད་གང་ཡིན་པ་དེ་དང་ང་མཉམ་མོ། །དེ་དང་སེམས་ཅན་ཐམས་ཅད་ཀྱང་མཉམ་
མོ། །རིགས་ཀྱི་བུ་དེའི་ཕྱིར་ཏིང་ངེ་འཛིན་འདི་དང་སེམས་ཅན་ཐམས་ཅད་མཉམ་མོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ནི་སྟོང་པ་སྟེ། སྟོང་པའི་མཚན་ཉིད་ནི་ཏིང་ངེ་འཛིན་འདིའོ། །སེམས་ཅན་ཐམས་ཅད་ནི་མཚན་ཉིད་མེད་པ་སྟེ། མཚན་ཉིད་མེད་པའི་མཚན་ཉིད་
ནི་ཏིང་ངེ་འཛིན་འདིའོ། །སེམས་ཅན་ཐམས་ཅད་ནི་སྨོན་པ་མེད་པ་སྟེ། སྨོན་པ་མེད་པའི་མཚན་ཉིད་ནི་ཏིང་ངེ་འཛིན་འདིའོ། །སེམས་ཅན་ཐམས་ཅད་ནི་དབེན་པ་སྟེ། དབེན་པའི་མཚན་ཉིད་ནི་ཏིང་ངེ་འཛིན་འདིའོ། །སེམས་ཅན་ཐམས་ཅད་ནི་བདག་མེད་པ་སྟེ། བདག་མེད་
པའི་མཚན་ཉིད་ནི་ཏིང་ངེ་འཛིན་འདིའོ། །དེ་ནི་ལུས་དང་ངག་དང་སེམས་ཀྱིས་རེག་པར་མི་ནུས་སོ། །གང་ལ་ལ་དག་ཆོས་ལ་རེག་པར་བྱེད་པ་དང་། མཉམ་པར་བྱེད་པ་དང་། མངོན་པར་མཉམ་པར་བྱེད་པ་དེ་དག་ཐམས་ཅད་ནི་ལེགས་པར་གསུངས་པའི་ཆོས་འདུལ་བ་ལ་ང་རྒྱལ་
ཅན་དུ་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མིའམ་ཅིའི་རྒྱལ་པོ་སྡོང་པོའི་སྤྱོད་པ་བག་མཆིས་པ་འདི་ལྟ་བུ་དང་། ཆོས་ལ་སྤོབས་པ་འདི་ལྟ་བུ་ནི་ངོ་མཚར་ཏོ། །བཅོམ་ལྡན་འདས་ཀྱིས་
བཀའ་སྩལ་པ། རིགས་ཀྱི་བུ་བྱ་བ་ཐམས་ཅད་ཀྱང་ཀུན་ཏུ་སྟོན་ལ་བྱ་བ་ཐམས་ཅད་ཀྱིས་ཀྱང་མི་གོས་པ་འདི་ནི་ཐབས་དང་ཤེས་རབ་ལས་བྱུང་བའི་བྱང་ཆུབ་སེམས་དཔའ་རྣམས་ཀྱི་སའོ། །རིགས་ཀྱི་བུ་མིའམ་ཅིའི་རྒྱལ་པོ་སྡོང་པོ་འདིས་རྒྱུད་ཀྱི་སྒྲ་དང་། གླུའི་སྒྲ་དང་། སིལ་སྙན་
དང་། ཕེག་རྡོབ་པ་བྱས་པའི་ཚུལ་འདིས་མིའམ་ཅི་བྱེ་བ་ཕྲག་བདུན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དྲི་ཟ་བྱེ་བ་ཕྲག་སུམ་ཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ལྟོ་འཕྱེ་ཆེན་པོ་བྱེ་བ་

ཕྲག་བཞི་བཅུ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །རང་གི་འཁོར་གྱི་སྲོག་ཆགས་བརྒྱད་ཁྲི་བཞི་སྟོང་ཡང་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ཤེས་རབ་དང་ཐབས་ཀྱི་ཡེ་ཤེས་འདི་དང་ལྡན་པའི་བྱང་ཆུབ་སེམས་དཔའ་ནི་གང་
དང་གང་གི་ཚེ་འཁོར་གྱི་ཆེ་བ་ཉིད་ཐོབ་པ་དེ་དང་དེའི་ཚེ། སེམས་ཅན་གྲངས་མེད་དཔག་ཏུ་མེད་པ་ཡོངས་སུ་སྨིན་པར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱུ་མེད་པར་མེ་མི་འབར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དབེན་པ་ན་གནས་པ་ཡང་སེམས་ཅན་
ཡོངས་སུ་སྨིན་པར་བྱ་བ་མི་འབར་རོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱུ་ཡོད་ན་མེ་འབར་རོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བོ་ཕལ་པོ་ཆེའི་ནང་ན་འདུག་ན། སེམས་ཅན་ཡོངས་སུ་སྦྱིན་པར་བྱ་བ་འབར་རོ། །རིགས་ཀྱི་བུ་དེའི་ཕྱིར་
རྣམ་གྲངས་འདིས་འདི་ལྟར་བྱང་ཆུབ་སེམས་དཔའ་ཇི་ལྟ་ཇི་ལྟ་བུར་ཡུལ་དང་འཁོར་ཆེན་པོ་འབྱོར་པར་གྱུར་པ། དེ་ལྟ་དེ་ལྟ་བུར་སེམས་ཅན་དཔག་ཏུ་མེད་པ་ཡོངས་སུ་སྨིན་པར་བྱེད་པར་རིག་པར་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་
ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་མིའམ་ཅིའི་རྒྱལ་པོ་སྡོང་པོས་རྒྱུད་ཀྱི་སྒྲ་དང་། གླུའི་སྒྲ་དང་། སིལ་སྙན་དང་། ཕེག་རྡོབ་པ་བགྱིས་པས་སེམས་ཅན་ཡོངས་སུ་སྨིན་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་
བུ་མིའམ་ཅི་དང་། དྲི་ཟ་དང་། ལྟོ་འཕྱེ་ཆེན་པོ་གླུ་དང་། རོལ་མོའི་དབྱངས་སྒྲ་ལ་མོས་པ་རྣམས་ལ་མིའམ་ཅིའི་རྒྱལ་པོ་སྡོང་པོས་གང་གི་ཚེ་པི་བང་གི་སྒྲ་ཐོས་པར་བྱེད་ཅིང་སིལ་སྙན་དང་། གླུ་དབྱངས་སྦྱོར་བ་དེ་ན་མིའམ་ཅི་དང་། དྲི་ཟ་དང་། ལྟོ་འཕྱེ་ཆེན་པོ་དེ་དག་དགའ་བ་
དང་། རབ་ཏུ་མགུ་བ་ཆེན་པོ་འཐོབ་བོ། །དེ་དག་དགའ་བ་དང་། མོས་པ་དང་། རབ་ཏུ་མགུ་བ་ཐོབ་ནས་རྒྱུད་ཀྱི་སྒྲ་དང་། སིལ་སྙན་གྱི་སྒྲ་དང་། གླུ་དབྱངས་ཀྱི་སྒྲ་དེ་དག་ལས་སངས་རྒྱས་ཀྱི་སྒྲ་འབྱུང་ངོ་། །ཆོས་ཀྱི་སྒྲ་དང་དགེ་འདུན་གྱི་སྒྲ་འབྱུང་ངོ་། །བྱང་ཆུབ་ཀྱི་སེམས་ལ་

དགའ་བ་དང་། ཐམས་ཅད་མཁྱེན་པའི་སེམས་བསྐྱེད་པར་སྦྱོར་བའི་སྒྲ་འབྱུང་ངོ་། །སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་སྒྲ་འབྱུང་ངོ་། །བྱམས་པ་དང་། སྙིང་རྗེ་དང་།
དགའ་བ་དང་། བཏང་སྙོམས་ཀྱི་སྒྲ་དང་། དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་དང་ཞི་གནས་དང་། ལྷག་མཐོང་དང་། བསམ་གཏན་དང་།
རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་སྒྲ་འབྱུང་ངོ་། །མི་རྟག་པ་དང་། སྡུག་བསྔལ་བ་དང་། བདག་མེད་པའི་སྒྲ་འབྱུང་ངོ་། །སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་བྱེད་པ་མེད་པ་དང་།
སྐྱེ་བ་མེད་པ་དང་། འབྱུང་བ་མེད་པ་དང་། དངོས་པོ་མེད་པའི་སྒྲ་འབྱུང་ངོ་། །བྱང་ཆུབ་སེམས་དཔའ་སྡེ་སྣོད་ཀྱི་ཆོས་ཀྱི་རྣམ་གྲངས་དང་། གཟུངས་དང་རྡོ་རྗེའི་ཚིག་དང་། འཁོར་གསུམ་ཡོངས་སུ་སྦྱོང་བའི་སྒྲ་འབྱུང་ངོ་། །ཕྱིར་མི་ལྡོག་པའི་ཆོས་ཀྱི་འཁོར་ལོ་རབ་ཏུ་བསྐོར་
བའི་སྒྲ་དང་། ཆོས་ཐམས་ཅད་ལ་རྣམ་པར་གདོན་མི་ཟ་བའི་རྒྱལ་པོའི་ཏིང་ངེ་འཛིན་གྱི་སྒྲ་དང་། རྒྱ་མཚོའི་ཕྱག་རྒྱའི་ཏིང་ངེ་འཛིན་གྱི་སྒྲ་དང་། ཆོས་ཐམས་ཅད་ལ་ཡང་དག་པར་གཞོལ་བའི་ཏིང་ངེ་འཛིན་གྱི་སྒྲ་དང་། ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་གྱི་སྒྲ་
དང་། རྣམ་པར་བཀོད་པའི་ཏིང་ངེ་འཛིན་གྱི་སྒྲ་དང་། རིན་ཆེན་སྒྲོན་མའི་ཏིང་ངེ་འཛིན་གྱི་སྒྲ་དང་། རིན་ཆེན་འབྱུང་གནས་ཏིང་ངེ་འཛིན་གྱི་སྒྲ་དང་། རིན་ཆེན་བརྩེགས་པའི་ཏིང་ངེ་འཛིན་གྱི་སྒྲ་དང་། ཉོན་མོངས་པ་སྤོང་བའི་ཏིང་ངེ་འཛིན་གྱི་སྒྲ་དང་། དགའ་བྱེད་ཏིང་ངེ་
འཛིན་གྱི་སྒྲ་དང་། པད་མ་བཀོད་པའི་ཏིང་ངེ་འཛིན་གྱི་སྒྲ་དང་། པད་མ་བླ་མའི་ཏིང་ངེ་འཛིན་གྱི་སྒྲ་དང་། ནམ་མཁའི་མཛོད་ཀྱི་ཏིང་ངེ་འཛིན་གྱི་སྒྲ་དང་། ཐམས་ཅད་ཀྱི་རྗེས་སུ་འགྲོ་བའི་ཏིང་ངེ་འཛིན་གྱི་སྒྲ་དང་། དམ་པའི་ཆོས་པུཎྜ་རཱི་ཀའི་ཏིང་ངེ་འཛིན་གྱི་སྒྲ་དང་།

ཁྱད་པར་ཅན་གྱི་ཏིང་ངེ་འཛིན་གྱི་སྒྲ་དང་། རྣམ་པར་རྒྱལ་བར་དབང་བྱེད་ཏིང་ངེ་འཛིན་གྱི་སྒྲ་དང་། ཆེར་བསྒྱིངས་ཏིང་ངེ་འཛིན་གྱི་སྒྲ་དང་། རྣམ་པ་ལ་སེམས་དབང་བྱེད་པའི་ཏིང་ངེ་འཛིན་གྱི་སྒྲ་དང་། སེང་གེ་བསྒྱིངས་པའི་ཏིང་ངེ་འཛིན་གྱི་སྒྲ་དང་། ཉི་མ་སྒྲོན་མའི་ཏིང་ངེ་འཛིན་གྱི་སྒྲ་
དང་། མཐའ་ཡས་འཁྱིལ་པའི་ཏིང་ངེ་འཛིན་གྱི་སྒྲ་དང་། རྒྱུན་གྱི་རྗེས་སུ་སོང་བའི་ཏིང་ངེ་འཛིན་གྱི་སྒྲ་དང་། རྡོ་རྗེའི་དཀྱིལ་འཁོར་ཏིང་ངེ་འཛིན་གྱི་སྒྲ་དང་། རྡོ་རྗེའི་རྒྱལ་མཚན་ཏིང་ངེ་འཛིན་གྱི་སྒྲ་དང་། རྡོ་རྗེ་ལྟ་བུའི་ཏིང་ངེ་འཛིན་གྱི་སྒྲ་དང་། རྡོ་རྗེ་ལྟེ་བའི་ཏིང་ངེ་འཛིན་གྱི་སྒྲ་དང་།
ས་འཛིན་ཏིང་ངེ་འཛིན་གྱི་སྒྲ་དང་། རི་རབ་སྒྲོན་མའི་ཏིང་ངེ་འཛིན་གྱི་སྒྲ་དང་། རི་རབ་རྒྱལ་མཚན་ཏིང་ངེ་འཛིན་གྱི་སྒྲ་དང་། རིན་ཆེན་མཛོད་ཀྱི་ཏིང་ངེ་འཛིན་གྱི་སྒྲ་དང་། སེམས་ལ་དབང་བྱེད་ཏིང་ངེ་འཛིན་གྱི་སྒྲ་དང་། སེམས་ཅན་ཐམས་ཅད་ཀྱི་སེམས་ལ་རྣམ་པར་ལྟ་བའི་ཏིང་ངེ་འཛིན་གྱི་སྒྲ་
དང་། སྤྱོད་པ་ཐམས་ཅད་ཀྱི་ཡུལ་ལས་ངེས་པར་འབྱུང་བའི་ཏིང་ངེ་འཛིན་གྱི་སྒྲ་དང་། ཟབ་མོ་སྦེད་པར་སྦྱོར་བའི་ཏིང་ངེ་འཛིན་གྱི་སྒྲ་དང་། སྤོབས་པ་སྣ་ཚོགས་ཀྱི་ཏིང་ངེ་འཛིན་གྱི་སྒྲ་དང་། བལྟར་མི་མཐོང་བའི་ཏིང་ངེ་འཛིན་གྱི་སྒྲ་དང་། ཆོས་ཐམས་ཅད་ལ་རྣམ་པར་ལྟ་བའི་ཏིང་ངེ་འཛིན་
གྱི་སྒྲ་དང་། རྣམ་པར་རོལ་བའི་ཏིང་ངེ་འཛིན་གྱི་སྒྲ་དང་། མངོན་པར་ཤེས་པ་ཐམས་ཅད་ལས་ངེས་པར་འབྱུང་བའི་ཏིང་ངེ་འཛིན་གྱི་སྒྲ་དང་། བདུད་ཀྱི་དཀྱིལ་འཁོར་འཇིག་པའི་ཏིང་ངེ་འཛིན་གྱི་སྒྲ་དང་། གཟུགས་ཐམས་ཅད་ཀུན་ཏུ་སྟོན་པའི་ཏིང་ངེ་འཛིན་གྱི་སྒྲ་དང་། སྒྲ་ཐམས་ཅད་
ལ་འཇུག་པའི་ཏིང་ངེ་འཛིན་གྱི་སྒྲ་དང་། ལུས་ཐམས་ཅད་རྣམ་པར་གཞིག་པའི་ཏིང་ངེ་འཛིན་གྱི་སྒྲ་དང་། སྤྱོད་པ་ཐམས་ཅད་ལ་དབང་བའི་ཏིང་ངེ་འཛིན་གྱི་སྒྲ་དང་། ཤེས་རབ་སྒྲོན་མའི་ཏིང་ངེ་འཛིན་གྱི་སྒྲ་དང་། ལག་ན་སྒྲོན་མའི་ཏིང་ངེ་འཛིན་གྱི་སྒྲ་དང་། བྱང་ཆུབ་མངོན་སུམ་སྣང་
བྱེད་ཏིང་ངེ་འཛིན་གྱི་སྒྲ་དང་། སོ་སོ་ཡང་དག་པར་རིག་པ་ལ་འཇུག་པ་སྟོན་པའི་ཏིང་ངེ་འཛིན་གྱི་སྒྲ་དང་། ཡོན་ཏན་གྱི་རྣམ་པ་ཐམས་ཅད་ལ་འཇུག་པའི་ཏིང་ངེ་འཛིན་གྱི་སྒྲ་འབྱུང་ངོ་། །རིགས་ཀྱི་བུ་དེ་ལྟར་རྒྱུད་ཀྱི་སྒྲ་དང་། སིལ་སྙན་གྱི་སྒྲ་དང་། གླུ་དབྱངས་ཀྱི་སྒྲ་དེ་དག་ལས་ཆོས་ཀྱི་སྒྲ་

འདི་ལྟ་བུ་འདི་དང་ཏིང་ངེ་འཛིན་གྱི་སྒྲ་འབྱུང་ངོ་། །སྒྲ་དེ་དག་གིས་སེམས་ཅན་དེ་དག་ཡོངས་སུ་སྨིན་པར་བྱེད་པར་འགྱུར་ཏེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ངོ་མཚར་རྨད་དུ་བྱུང་བའི་ཆོས་འདི་ལྟ་བུ་དང་ལྡན་པ་ཡིན་ནོ། །མིའམ་ཅིའི་རྒྱལ་
པོ་སྡོང་པོའི་ཡོན་ཏན་བསྔགས་པ་བསྟན་པ་འདི་བཤད་པ་ན། སངས་རྒྱས་ཀྱི་མཐུས་ཐམས་ཅད་དང་ལྡན་པའི་འཁོར་གྱི་ལག་པར་ལྷའི་མེ་ཏོག་མན་དཱ་རའི་ཕུར་མ་གྲུབ་ནས། དེ་དག་གིས་མེ་ཏོག་གི་ཕུར་མ་དེ་དག་མིའམ་ཅིའི་རྒྱལ་པོ་སྡོང་པོ་ལ་གཏོར་ཏོ། །དེ་ནས་མིའམ་ཅིའི་རྒྱལ་པོ་
སྡོང་པོས་བྱིན་གྱི་རླབས་ཇི་ལྟ་བུས་མེ་ཏོག་དེ་དག་ལག་པ་གཡས་པར་བླངས་ཏེ། མེ་ཏོག་གཅིག་ཀྱང་ས་ལ་མ་ལྟུང་བར་དེ་ལྟ་བུའི་བྱིན་གྱི་རླབས་ཀྱི་བྱིན་གྱིས་བརླབས་ནས་མེ་ཏོག་བླངས་པ་དེ་དག་བཅོམ་ལྡན་འདས་ལ་མངོན་པར་གཏོར་ཏོ། །དེ་ནས་མེ་ཏོག་དེ་དག་གཏོར་མ་ཐག་ཏུ་སངས་རྒྱས་
ཀྱི་མཐུས་སྐད་ཅིག་དེ་ལ་སྟོང་གི་འཇིག་རྟེན་གྱི་ཁམས་མེ་ཏོག་རིན་པོ་ཆེའི་གདུགས་གཅིག་གིས་ཁེབས་པར་གྱུར་ཏོ། །མེ་ཏོག་རིན་པོ་ཆེའི་གདུགས་དེ་ལས་མུ་ཏིག་གི་དོ་ཤལ་བྱེ་བ་ཁྲག་ཁྲིག་བརྒྱ་སྟོང་ཕྲག་རབ་ཏུ་འཕྱང་ངོ་། །མེ་ཏོག་གི་དོ་ཤལ་འཕྱང་བ་རེ་རེ་ལས་ཀྱང་འོད་ཟེར་བྱེ་བ་ཁྲག་ཁྲིག་
བརྒྱ་སྟོང་ཕྲག་དུ་མ་བྱུང་ངོ་། །འོད་ཟེར་ཐམས་ཅད་ཀྱི་རྩེ་མོ་ལས་ཀྱང་པད་མ་སྣ་ཚོགས་བལྟ་ན་སྡུག་པ། ཁ་དོག་དག་དང་ལྡན་པ་དྲི་དང་ལྡན་པ། ཡིད་དུ་འོང་བ་དག་བྱུང་བར་གྱུར་ཏོ། །པད་མ་ཐམས་ཅད་ལ་ཡང་བཅོམ་ལྡན་འདས་ཤཱཀྱ་ཐུབ་པའི་སྐུ་ཅི་འདྲ་བ་དེ་འདྲ་བའི་དེ་བཞིན་གཤེགས་
པའི་སྐུ་སྐྱིལ་མོ་ཀྲུང་བཅས་ཤིང་བཞུགས་པར་ཀུན་ཏུ་སྣང་ངོ་། །སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱིས་ཀྱང་མིའམ་ཅིའི་རྒྱལ་པོ་སྡོང་པོ་ལ་ལེགས་སོ་ཞེས་བྱ་བ་གནང་སྟེ། སྐྱེས་བུ་དམ་པ་ཁྱོད་ཀྱིས་སེམས་ཅན་མང་པོ་ཡོངས་སུ་སྨིན་པར་བྱས་སོ། །སེམས་ཅན་
ཡོངས་སུ་སྨིན་པར་བྱ་བའི་ཕྱིར་གང་ཡུལ་ལས་རྣམ་པར་གྲོལ་ཡང་ཡུལ་ཐམས་ཅད་ཀྱང་སྟོན། འཁོར་བ་ལས་གྲོལ་ཡང་བསམས་བཞིན་དུ་སྲིད་པར་སྐྱེ་བ་ཀུན་ཏུ་སྟོན། མྱ་ངན་ལས་འདས་པའི་སྐྱོན་མེད་པ་ཐོབ་ཀྱང་། ཁམས་གསུམ་ན་ཉེ་བར་སྤྱོད་པ་འདི་ལྟ་བུ་ནི་བྱང་ཆུབ་སེམས་

དཔའི་བྱ་བ་ཡིན་ཏེ། ལེགས་སོ་ལེགས་སོ། །དེ་ནས་མིའམ་ཅིའི་རྒྱལ་པོ་སྡོང་པོ་འདི་སྙམ་དུ་སེམས་ཏེ། བདག་གིས་དེ་བཞིན་གཤེགས་པ་དེ་དག་ཐམས་ཅད་ཀྱི་དབུ་ལ་རིན་པོ་ཆེའི་གདུགས་གཞན་དག་བྱིན་གྱིས་བརླབ་པོ་སྙམ་མོ། །དེ་ནས་མིའམ་ཅིའི་རྒྱལ་པོ་སྡོང་པོ་དེའི་ཚེ་རིན་
པོ་ཆེའི་གདུགས་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །མིའམ་ཅིའི་རྒྱལ་པོ་སྡོང་པོ་རིན་པོ་ཆེའི་གདུགས་བཀོད་པའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ། དེ་ནས་དེ་བཞིན་གཤེགས་པ་ཐམས་ཅད་ཀྱི་དབུའི་ཐད་དྲང་གི་སྟེང་ན་རིན་པོ་ཆེའི་གདུགས་རྣམས་
གནས་པར་ཀུན་ཏུ་སྣང་ངོ་། །འཁོར་དེར་ཐམས་ཅད་ཀྱི་ལག་པ་གཡས་པ་ནས་ཀྱང་རིན་པོ་ཆེའི་གདུགས་རྣམས་བྱུང་བར་གྱུར་ཏེ། དེ་དག་གིས་རིན་པོ་ཆེའི་གདུགས་དེ་དག་སངས་རྒྱས་བཅོམ་ལྡན་འདས་དེ་དག་ལ་མངོན་པར་བཀབ་བོ།། །།བམ་པོ་གསུམ་པ། མིའམ་
ཅིའི་རྒྱལ་པོ་སྡོང་པོ་འདི་སྙམ་དུ་སེམས་ཏེ། འདི་ལྟར་བདག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཉན་ཐོས་དང་། བྱང་ཆུབ་སེམས་དཔའི་དགེ་འདུན་བཅས་པར་བཤོས་ལ་སྤྱན་དྲངས་ཏེ། འདི་ལྟར་བདག་
གིས་བཅོམ་ལྡན་འདས་འཁོར་དང་བཅས་པར་རིའི་རྒྱལ་པོ་སྤོས་ཀྱི་ངད་ལྡང་དུ་བདག་གི་གནས་སུ་གཤེགས་པར་གསོལ་ཏོ། །དེ་ལྟར་ན་བདག་གི་གནས་ཡོངས་སུ་སྤྱད་པར་འགྱུར་རོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་།
མིའམ་ཅི་དང་། ལྟོ་འཕྱེ་ཆེན་པོའི་ཚོགས་ཚད་མེད་པ་ལ་ཕན་བཏགས་པར་ཡང་འགྱུར་རོ། །དེ་དག་ཀྱང་བཅོམ་ལྡན་འདས་ལ་བསྙེན་བཀུར་བྱ་བ་དང་། ཡོངས་སུ་སྤྱད་པར་བྱ་བར་སྤྲོ་བར་འགྱུར་ཏེ། དེའི་ཕྱིར་དེ་དག་གི་ཡུན་རིང་པོའི་དོན་དང་ཕན་པ་དང་། གྲུབ་པ་དང་། བདེ་བ་
དང་། བྱང་ཆུབ་སེམས་དཔའི་བསྒྲུབ་པ་འཐོབ་པར་འགྱུར་རོ་སྙམ་མོ། །དེ་ནས་མིའམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བ་དང་།

སེམས་ཅན་ཚད་མ་མཆིས་པའི་དགེ་བའི་རྩ་བ་སྤེལ་བའི་སླད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔའི་དགེ་འདུན་དང་། ཉན་ཐོས་ཀྱི་དགེ་འདུན་དང་ཐབས་ཅིག་ཏུ་རི་སྤོས་ཀྱི་ངད་ལྡང་གི་ངོས་ལ་བདག་གི་
གནས་སུ་དགུང་བདུན་ཞིག་བཞུགས་པར་བདག་ལ་གནང་བར་མཛད་དུ་གསོལ། །བཅོམ་ལྡན་འདས་བདག་ཅག་ནི་དེ་བཞིན་གཤེགས་པའི་འཁོར་དང་བཅས་པ་ལ་བསྙེན་བཀུར་དང་ཡོངས་སུ་སྤྱད་པར་བགྱི་བར་སྤྲོའོ། །བཅོམ་ལྡན་འདས་ཀྱིས་མིའམ་ཅིའི་རྒྱལ་པོ་སྡོང་པོ་ལ་ཐུགས་བརྩེ་
བའི་ཕྱིར་བྱང་ཆུབ་སེམས་དཔའ་དང་། ཉན་ཐོས་ཀྱི་ཚོགས་དང་བཅས་པ་ལ་ཞག་བདུན་རི་སྤོས་ཀྱི་ངད་ལྡང་གི་ངོས་ལ་བཞུག་པར་གནང་ངོ་། །དེ་ནས་མིའམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ཀྱིས་གནང་བར་རིག་ནས། ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ་དགའ་བ་དང་
ཡིད་བདེ་བ་སྐྱེས་ནས་དཔུང་དང་བཅས་གཡོག་འཁོར་དང་བཅས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ། སིལ་སྙན་དང་རོལ་མོའི་དབྱངས་སྒྲ་བྱས་ནས་བཅོམ་ལྡན་འདས་ལ་མཆོད་པ་བྱས་ཏེ། འཁོར་གྱི་དཀྱིལ་འཁོར་དེ་
ནས་སོང་ནས་རིའི་རྒྱལ་པོ་སྤོས་ཀྱི་ངད་ལྡང་བ་ལ་གནས་སོ། །དེ་ནས་མིའམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་རང་གི་ཁྱིམ་རྒྱན་ཐམས་ཅད་ཀྱིས་བརྒྱན་ཏེ། འཁོར་གྱི་ཁྱམས་རྒྱར་ཀུན་ནས་དཔག་ཚད་ལྔ་བརྒྱ་པ། བཻདཱུརྱ་སྔོན་པོ་དང་། འཛམ་
བུའི་ཀླུང་གི་གསེར་གྱི་པད་མས་ལེགས་པར་བརྒྱན་པ། རིན་པོ་ཆེ་དུ་མས་རྣམ་པར་སྤྲས་པ་བྱས་སོ། །འཁོར་གྱི་ཁྱམས་དེར་གདན་ཁྲི་རྩ་བ་རིན་པོ་ཆེ་ལས་བྱས་པ། ལྷའི་རས་བརྒྱ་སྟོང་བཏིང་བ་བརྒྱ་སྟོང་ཕྲག་མང་པོ་བཤམས་སོ། །བཅོམ་ལྡན་འདས་ཀྱི་གདན་སེང་གེའི་ཁྲི་འཕང་དུ་
དཔག་ཚད་བཅུ་གཉིས་པ་རིན་པོ་ཆེ་ཐམས་ཅད་ཀྱིས་སྤྲས་པ། རིན་པོ་ཆེའི་ཁ་ཁྱེར་གྱིས་བསྐོར་བ། གདུགས་དང་། རྒྱལ་མཚན་དང་། བ་དན་བསྒྲེང་བ། སྙིང་པོ་མཆོག་གི་བདུག་པས་བདུགས་པ། བླ་རེ་བྲེས་པ། དར་གྱི་ལྡ་ལྡི་མང་པོ་བྲེས་པ་ལྷའི་མེ་ཏོག་གཏོར་བ་བཤམས་

སོ། །སེང་གེའི་ཁྲི་དེའི་ཕྱོགས་བཞིར་རིན་པོ་ཆེའི་ཤིང་ལྗོན་པ་སྣ་ཚོགས་བལྟ་ན་སྡུག་པ་བཞི་སྤྲུལ་ཏེ། སྐྱེ་བོ་ཐམས་ཅད་བསྡུས་ནས་ཚིགས་སུ་བཅད་པ་འདི་དག་སྨྲས་སོ། །ཨུ་དུམ་བཱ་རའི་མེ་ཏོག་ཇི་བཞིན་དུ། །སངས་རྒྱས་འབྱུང་བ་བརྒྱ་ལམ་རྙེད་འགྱུར་བ། །མི་མཆོག་དེ་ནི་ད་ལྟར་
བྱུང་གྱུར་གྱིས། །སྐྱོབ་ལ་གུས་དང་བཅས་པས་མཆོད་པ་གྱིས། །ང་རྒྱལ་དག་དང་རྒྱགས་དང་གཡོ་སྤོངས་ལ། །ཕྲག་དོག་སེར་སྣ་དེ་བཞིན་སྒྱུ་རྣམས་དང་། །རྒོད་པ་ཐམས་ཅད་ཡོངས་སུ་སྤོང་བྱོས་ལ། །སྟོན་ལ་གུས་དང་བཅས་པས་མཆོད་པ་གྱིས། །སྤོས་ངད་ལྡང་བ་འདི་ན་
ལྷ་ཡུལ་བའི། །མེ་ཏོག་ཁྱད་པར་འཕགས་པ་ཇི་སྙེད་པ། །དེ་དག་ཐམས་ཅད་གཅིག་ཏུ་བསྡུས་ནས་སུ། །སྐྱེས་བུ་ཁྱུ་མཆོག་ལ་ནི་མཆོད་པ་གྱིས། །སེམས་ཅན་མཆོག་ལ་མཆོད་པ་བྱ་བའི་ཕྱིར། །དྲི་ཞིམ་ཡིད་འོང་ཁྱད་པར་འཕགས་པའི་དྲི། །དུས་ཀྱི་རྗེས་སུ་འབྲང་བའི་ཙན་
དན་གྱིས། །སྤོས་ཀྱི་ངད་ལྡང་འདི་ལ་བདུག་པ་གྱིས། །གླུ་དབྱངས་སིལ་སྙན་རྣམ་མང་ཡིད་འོང་བ། །མིའམ་ཅི་དག་རྟག་རྩེན་གར་བྱེད་པ། །ལྡན་པར་བྱོས་ལ་དགའ་ཞིང་དང་བ་ཡིས། །རྐང་གཉིས་མཆོག་ལ་མཆོད་པ་རབ་ཏུ་གྱིས། །མཚུངས་པ་མེད་པ་མཐོང་བ་རྙེད་དཀའ་
བ། །དེ་བཞིན་གཤེགས་ལ་ལྷ་ཡི་གདུགས་རྣམས་དང་། །བ་དན་དག་དང་རྒྱལ་མཚན་ཆོས་གོས་དང་། །བླ་རེ་མང་པོ་ཡིད་འོང་གཟུང་བར་བྱོས། །སངས་རྒྱས་མཆོད་པས་བདེ་འགྲོར་འགྲོ་བར་འགྱུར། །བརྒྱ་བྱིན་དང་ནི་འཇིག་རྟེན་སྐྱོང་བར་འགྱུར། །ཚངས་པ་དག་དང་དབང་བྱེད་
དབང་ཕྱུག་དང་། །ལྷ་དང་མི་ཡི་བདག་པོ་ཆེན་པོར་འགྱུར། །མི་མཆོག་མཆོད་པས་གཟུགས་དང་ཁ་དོག་དང་། །གྲགས་དང་བརྗོད་དང་འཁོར་དང་ལོངས་སྤྱོད་དང་། །དེ་བཞིན་དབང་ཕྱུག་དང་ནི་སྙན་ཚིག་དང་། །དེ་བཞིན་གཟུང་བར་འོས་པའི་ཚིག་ཏུ་འགྱུར། །གང་དག་འདིར་ནི་
ལྷ་དང་དེ་བཞིན་དུ། །མི་རྣམས་ཀྱི་ནི་འདུས་བྱས་བདེ་བ་དང་། །བདེ་བ་བདེ་བས་ཚིམ་པར་འདོད་པ་རྣམས། །འཇིག་རྟེན་མགོན་པོ་དེ་ལ་མཆོད་པ་གྱིས། །རང་རྒྱལ་བྱང་ཆུབ་དེ་བཞིན་ཉན་ཐོས་དང་། །དེ་ལྟར་དམ་པ་མཆོག་གི་ཐེག་པ་དང་། །བདུད་ཀྱི་དཔུང་རྣམས་རབ་

འཇོམས་གང་འདོད་པས། །སེམས་ཅན་མཆོག་དེ་ལ་ནི་མཆོད་པ་གྱིས། །དེ་ནས་མིའམ་ཅིའི་རྒྱལ་པོ་སྡོང་པོས་རང་གི་གཡོག་འཁོར་ཐམས་ཅད་ལ་གོ་བར་བྱས་ཏེ། མེ་ཏོག་དང་། དྲི་དང་། ཕྲེང་བ་དང་། བྱུག་པ་བསྔོགས་ནས་རོ་བརྒྱ་པའི་ཞལ་ཟས་
བཤམས་ཏེ། རིའི་རྒྱལ་པོ་སྤོས་ཀྱི་ངད་ལྡང་གི་ལྷོ་ཕྱོགས་ཀྱི་ངོས་ལ་འདུག་ནས་སིལ་སྙན་དང་གླུ་དབྱངས་བླངས་ཏེ། རྒྱུད་ཀྱི་སྒྲ་དང་གླུའི་སྒྲ་དང་ལྡན་པའི་ཚིགས་སུ་བཅད་པ་འདི་དག་གིས་དབྱངས་ལས་ཚིགས་སུ་བཅད་དེ། བཅོམ་ལྡན་འདས་ལ་དུས་བསྐུལ་བ། ཕན་པ་མཛད་ཅིང་
བདེ་མཛད་དགའ་མཛད་བཅོམ་ལྡན་འདས། །ཞལ་ཡང་རབ་འཛུམ་ཟླ་བའི་ངོས་ལྟར་དྲི་མི་མངའ། །སྐྱེ་མཆོག་དགེ་སྦྱོང་དམ་པ་ལྷ་དང་མིས་མཆོད་པ། །བདེ་བར་གཤེགས་ཁྱོད་འདིར་གཤེགས་པ་ཡི་དུས་འདི་ལགས། །སྟོབས་བཅུ་རྣམས་ཀྱི་སྟོབས་མངའ་ཕ་རོལ་དཔུང་འཇོམས་པ། །
གཞན་གྱི་ཚོགས་རྣམས་འཇོམས་ཤིང་འགྲོ་ལ་ཕན་པ་མཛད། །འཇོ་དང་རྙོག་པ་རྣམས་དང་དྲི་མ་ཐ་སྤངས་པ། །ཕན་པ་མཛད་པ་ཁྱོད་འདིར་གཤེགས་པའི་དུས་འདི་ལགས། །སྦྱངས་པའི་ཡོན་ཏན་རྡུལ་སྦྱངས་ཐེ་ཚོམ་རྣམ་པར་གཏོར། །དྲན་དང་བློ་གྲོས་བློ་ཡངས་མོས་རྟོགས་བློ་གྲོས་
ལྡན། །འགྲོ་རྒྱལ་རྟག་ཏུ་འགྲོ་བ་འགྲོ་མེད་འགྲོ་བ་སྤངས། །ཕན་པ་མཛད་ཅིང་དགའ་མཛད་རབ་ཏུ་དགྱེས་པའི་ཐུགས། །ཉི་མ་ཟླ་བ་ནོར་བུ་གློག་རྣམས་མཛེས་པའི་འོད། །བརྒྱ་བྱིན་ཚངས་པ་སྲིད་གསུམ་ལྷ་ཚོགས་འོད་འཕྲོག་ཅིང་། །འོད་མཛད་དཔལ་སྟུག་ཐུབ་ཁྱོད་འོད་ནི་ཕན་
བགྱིད་པས། །འོད་འདི་བསལ་ནས་རྒྱལ་བའི་འོད་ནི་ལྷག་གེ་ཡི། །ཁྱོད་ཀྱི་ལྷ་སྐད་ཀླུ་སྐད་མི་ཅིའི་གླུ་སྒྲ་ཡིས། །ཡང་དང་ཡང་དུ་འབར་བའི་ཉོན་མོངས་ཞི་བར་བགྱིད། །སྐད་མཆོག་ཡངས་པ་ཚངས་པ་རྣམས་ཀྱི་སྒྲ་སྐད་ཀྱིས། །ཉོན་མོངས་ཐམས་ཅད་ཞི་བར་བགྱིད་པས་འབར་
མ་ལགས། །སྨན་པ་གང་དག་ཕྱོགས་བཅུར་རྒྱུ་ཡང་དེ་དག་གིས། །གང་དུའང་འགྲོ་བའི་ཉོན་མོངས་ཞི་བར་བགྱིད་མི་ནུས། །སྨན་པའི་རྒྱལ་པོ་བླ་མེད་གང་ཚེ་གསུང་བརྗོད་པ། །དེ་ཚེ་ཉོན་མོངས་ཀུན་ཞི་བདེ་བ་ཐམས་ཅད་སྦྱིན། །ཤིན་ཏུ་ངོ་མཚར་འོད་དང་སྟོབས་མཆོག་

མཚུངས་མེད་སྟོབས། །གསུང་ནི་སྐྱོན་བྲལ་འཁྲུལ་པ་མི་མངའ་དགྲ་འདུལ་བ། །རྡུལ་མེད་རབ་རིབ་བདག་གི་མུན་པ་ཤིན་ཏུ་བཅོམ། །དགྲ་བྲལ་ཕན་མཛད་ཁྱེད་ཀྱི་དུས་ལགས་འདིར་གཤེགས་གསོལ། །སྦྱིན་དང་དུལ་དང་ལེགས་སྤྱོད་མི་མཉམ་མཚུངས་དང་མཉམ། །ཚུལ་
ཁྲིམས་བརྟུལ་ཞུགས་མི་འཁྲུགས་བརྟུལ་ཞུགས་དཀའ་ཐུབ་དགྱེས། །བཟོད་དང་དུལ་དང་ཤིན་ཏུ་དགེ་ལ་ངེས་པའི་ཐུགས། །དགའ་གསུང་དགྲ་རྣམས་ཀྱི་ནི་དགའ་སྤོང་གཤེགས་སུ་གསོལ། །དབང་པོ་སྟོབས་དང་ལམ་དགྱེས་བསམ་གཏན་མངོན་མཁྱེན་རོལ། །དྲན་དང་བློ་གྲོས་རྟོགས་
དང་མོས་ལ་གནས་པའི་ཐུགས། །འོད་ནི་རབ་ཏུ་ལྷག་གེ་ཤིན་ཏུ་དགྱེས་པའི་ཐུགས། །ཡོན་ཏན་མངའ་བ་ཁྱོད་འདིར་གཤེགས་པའི་དུས་འདི་ལགས། །བྱམས་དང་སྙིང་རྗེ་དགའ་དང་བཏང་སྙོམས་བསྒོམས་པའི་ཐུགས། །སྐྱོན་གྱི་མུན་པ་བཅོམ་ཞིང་བག་ལ་ཉལ་དང་བྲལ། །
ཚངས་པའི་ལམ་ནི་རབ་བསླབས་རྒྱལ་བའི་ལམ་ལ་གནས། །དགའ་མཛད་བདེ་བར་གཤེགས་པ་དུས་ལགས་གཤེགས་སུ་གསོལ། །དེ་ནས་བཅོམ་ལྡན་འདས་ཀྱིས་མིའམ་ཅིའི་རྒྱལ་པོ་སྡོང་པོས་དུས་བསྐུལ་བའི་ཚིགས་སུ་བཅད་པ་གསན་ནས་དགེ་སློང་གི་དགེ་འདུན་ལ་
བཀའ་སྩལ་པ། དགེ་སློང་དག་མིའམ་ཅིའི་རྒྱལ་པོ་སྡོང་པོས་དུས་བསྐུལ་གྱིས་ལྷུང་བཟེད་དང་། ཆོས་གོས་ཐོགས་ལ་ཞག་བདུན་གནས་པའི་གཙུག་ལག་ཁང་སྐྱོང་ཡང་སྐོས་ཤིག །དེ་ནས་བྱང་ཆུབ་སེམས་དཔའ་ལྷའི་ཅོད་པན་འདི་སྙམ་དུ་སེམས་ཏེ། འདི་ལྟར་བདག་གིས་
ཁང་པ་བརྩེགས་པ། བཀོད་པ་འདི་ལྟ་བུ་སྤྲུལ་ལ་ཁང་པ་བརྩེགས་པ་དེར། བཅོམ་ལྡན་འདས་བྱང་ཆུབ་སེམས་དཔའ་དང་ཉན་ཐོས་ཀྱི་ཚོགས་དང་བཅས་པ་བཞུགས་ཏེ། རིན་པོ་ཆེ་བཀོད་པའི་སེང་གེའི་ཁྲི་ལ་བཞུགས་པའི་ཁང་པ་བརྩེགས་པ་བདག་གིས་ལག་པ་གཡས་
པར་བླངས་ཏེ། ནམ་མཁའི་ངོས་ལས་རིའི་རྒྱལ་པོ་སྤོས་ཀྱི་ངད་ལྡང་དུ་བཀུར་བར་བྱིན་གྱིས་བརླབ་བོ་སྙམ་མོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་དེའི་ཚེ་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་བཅོམ་ལྡན་འདས་

ཀྱི་སྤྱན་སྔར་ཁང་པ་བརྩེགས་པ་ཚད་དཔག་ཚད་བཅུ་པ་བཀྲ་བ་བལྟ་ན་སྡུག་པ། གྲུ་བཞི་པ། ཀ་བ་བཞི་ཟུག་པ། ཆ་མཉམ་པ། ཤིན་ཏུ་རྣམ་པར་ཕྱེ་བ་བྱུང་ངོ་། །ཁང་པ་བརྩེགས་པ་དེར་སྟོབས་དང་ལྡན་པའི་པད་མ་བཀོད་པའི་ཁྲི་རྣམས་ཀྱང་བྱུང་ངོ་། །
ཁང་པ་བརྩེགས་པ་དེར་བཅོམ་ལྡན་འདས་ཀྱི་གདན་རིན་པོ་ཆེའི་པད་མ་བཀོད་པའི་སེང་གེའི་ཁྲི་འཕང་དུ་མི་བདུན་ཡོད་པ་བྱུང་ངོ་། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་ཁང་པ་བརྩེགས་པ་བཀོད་པ་དང་། སེང་གེའི་ཁྲི་བཀོད་པ་འདི་ལྟ་བུ་འདི་བྱས་ནས། བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བདག་ལ་ཐུགས་བརྩེ་བའི་སླད་དུ་བཅོམ་ལྡན་འདས་བྱང་ཆུབ་སེམས་དཔའ་དང་ཉན་ཐོས་ཆེན་པོ་འདི་དག་དང་ཐབས་ཅིག་ཏུ་ཁང་པ་བརྩེགས་པ་སེང་གེའི་ཁྲི་བཤམས་པ་འདིར་བཞུགས་སུ་གསོལ། བཅོམ་ལྡན་འདས་བདག་གིས་ཁང་པ་
བརྩེགས་པ་འདི་སུག་པ་གཡས་པས་བླངས་ཏེ། རིའི་རྒྱལ་པོ་སྤོས་ཀྱི་ངད་ལྡང་དུ་འཚལ་ནས་གཞག་པར་བགྱིའོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་ལྷའི་ཅོད་པན་ལ་ཐུགས་བརྩེ་བའི་ཕྱིར། བྱང་ཆུབ་སེམས་དཔའ་དང་ཉན་ཐོས་ཆེན་པོ་དེ་དག་དང་ཐབས་
ཅིག་ཏུ་ཁང་པ་བརྩེགས་པ་དེར་ཇི་ལྟར་ཁྲི་བཤམས་པ་དེ་དག་ལ་བཞུགས་སོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་ཁང་པ་བརྩེགས་པ་དེ་ལག་མཐིལ་གཡས་པར་བླངས་ཏེ། སྟེང་གི་ནམ་མཁའ་ལས་རྫུ་འཕྲུལ་གྱིས་སོང་ངོ་། །དེ་ནས་འདོད་པ་ན་སྤྱོད་པའི་ལྷའི་བུ་དང་།
གཟུགས་ན་སྤྱོད་པའི་ལྷའི་བུ་རྣམས་ཀྱིས་བྱང་ཆུབ་སེམས་དཔའ་ལྷའི་ཅོད་པན་གྱི་རྫུ་འཕྲུལ་གྱི་ཆོ་འཕྲུལ་འདི་མཐོང་ནས་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ་དགའ་བ་དང་། ཡིད་བདེ་བ་སྐྱེས་ནས་བཅོམ་ལྡན་འདས་དང་བྱང་ཆུབ་སེམས་དཔའ་སེམས་དཔའ་ཆེན་
པོ་ལྷའི་ཅོད་པན་ལ་མཆོད་པའི་ལས་ཀྱི་ཕྱིར་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་ཐམས་ཅད་ཐོགས་ཏེ། སིལ་སྙན་དང་ཕེག་རྡོབ་པ་བྱས་ནས་བཅོམ་ལྡན་འདས་ཁང་པ་བརྩེགས་པ་ན་བཞུགས་ཤིང་། ནམ་མཁའི་ངོས་ལས་གཤེགས་

པ་ལ་མཆོད་པ་བྱས་ཏེ། རིའི་རྒྱལ་པོ་སྤོས་ཀྱི་ངད་ལྡང་དུ་ཕྱིན་ཏོ། །མིའམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ཁང་པ་བརྩེགས་པ་ན་བཞུགས་ཤིང་ནམ་མཁའི་ངོས་ལས་གཤེགས་པ་མཐོང་ངོ་། །མཐོང་ནས་མིའམ་ཅི་དང་། དྲི་ཟ་བརྒྱད་ཁྲི་བཞི་སྟོང་གིས་བསྐོར་ཏེ།
མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་ཐམས་ཅད་ཐོགས་ནས་སིལ་སྙན་དང་། ཕེག་རྡོབ་པ་དང་གླུ་དབྱངས་ལེན་པའི་བཀོད་པ་བྱས་ཏེ། བཅོམ་ལྡན་འདས་བསུ་བའི་ཕྱིར་བྱུང་ངོ་། །དེ་ནས་མིའམ་ཅིའི་རྒྱལ་པོ་སྡོང་པོ་དཔུང་དང་བཅས་འཁོར་
དང་བཅས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཇི་ལྟར་ཐོགས་པའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དེ་དག་དང་། སིལ་སྙན་དང་། ཕེག་རྡོབ་པ་དང་། གླུ་དབྱངས་ལེན་པས་བཅོམ་ལྡན་འདས་ལ་མཆོད་པ་
བྱས་སོ། །དེ་ནས་བཅོམ་ལྡན་འདས་ཀྱིས་དུས་ལ་བབ་པར་མཁྱེན་ནས། བྱང་ཆུབ་སེམས་དཔའ་དང་། ཉན་ཐོས་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། དེ་མ་ཡིན་པ་གཞན་ལྷའི་བུ་རྣམས་དང་། ཐབས་ཅིག་ཏུ་མིའམ་ཅིའི་རྒྱལ་པོ་སྡོང་
པོས་འཁོར་གྱི་ཁྱམས་བཀོད་པ་ག་ལ་བ་དེར་གཤེགས་ཏེ་རང་གི་སེང་གེའི་ཁྲི་ཇི་ལྟར་བཤམས་པ་ལ་བཞུགས་སོ། །བྱང་ཆུབ་སེམས་དཔའི་ཚོགས་དང་ཉན་ཐོས་ཀྱི་ཚོགས་ཐམས་ཅད་སོ་སོ་ཅི་རིགས་པར་འཁོད་དོ། །མིའམ་ཅིའི་རྒྱལ་པོ་སྡོང་པོས་བརྒྱ་བྱིན་དང་། ཚངས་པ་དང་།
འཇིག་རྟེན་སྐྱོང་བ་དང་། འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་དེ་དག་ལ་སྨྲས་པ། གྲོགས་པོ་དག་དེ་བཞིན་གཤེགས་པ་དང་ཐབས་ཅིག་ཏུ་གདུགས་ཚོད་གསོལ་གྱིས། ཁྱེད་ཐམས་ཅད་འདུས་ལ་ཚུར་སྤྱོན། དེ་ནས་མིའམ་ཅིའི་རྒྱལ་པོ་སྡོང་པོ་སླས་
དང་བཅས། བུ་དང་བཅས། རང་གི་སྐྱེ་བོ་དང་བཅས། འཁོར་དང་བཅས། གཡོག་དང་བཅས་ཏེ་རང་རང་གི་ལག་གིས་བཟའ་བ་དང་། བཅའ་བ་གྱ་ནོམ་པ་མང་པོ་རོ་དང་ལྡན་པ། རོ་བརྒྱ་པའི་ཞལ་ཟས་སྣ་ཚོགས་བཅོམ་ལྡན་འདས་དང་། བྱང་ཆུབ་སེམས་དཔའི་

དགེ་འདུན་དང་། དགེ་སློང་གི་དགེ་འདུན་དང་། འཁོར་ལ་བྲིམས་ནས་བདེ་བར་བསྟབས་ཏེ་ཚིམ་པར་བྱས་སོ། །ཚིམ་པར་བྱས་ནས་བཅོམ་ལྡན་འདས་ཀྱིས་ལྷུང་བཟེད་བཞག་སྟེ། ཕྱག་བཅབས་པར་རིག་ནས། དཔུང་དང་བཅས་གཡོག་དང་བཅས་
ཏེ། ཆོས་ཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་ཇི་ལྟར་བདག་ལ་འོས་པའི་སྟན་ལ་འདུག་གོ། །དེ་ནས་བཅོམ་ལྡན་འདས་ཀྱིས་མིའམ་ཅིའི་རྒྱལ་པོ་སྡོང་པོ་དང་སྐྱེ་བོའི་ཚོགས་ཕལ་པོ་ཆེ་དེ་དག་ལ་ཆོས་ཀྱི་གཏམ་ཡང་དག་པར་སྟོན་ཏོ། །ཡང་དག་པར་འཛིན་དུ་བཅུག་གོ། །
གཟེངས་བསྟོད་དོ། །རབ་ཏུ་དགའ་བར་མཛད་དོ། །དེ་ནས་བཅོམ་ལྡན་འདས་ཀྱིས་ཆོས་ཀྱི་གཏམ་ནི་འདི་ཡིན་ཏེ། མིའམ་ཅིའི་བདག་པོ་རྣམ་པ་སུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །རྣམ་
པ་སུམ་ཅུ་རྩ་གཉིས་གང་འདི་ལྟ་སྟེ། མིའམ་ཅིའི་བདག་པོ་བྱང་ཆུབ་སེམས་དཔའ་སྦྱིན་པ་སྦྱིན་པ་ན་བྱང་ཆུབ་ཀྱི་སེམས་སྔོན་དུ་འགྲོ་བའི་སྦྱིན་པ་དེ་སྦྱིན་པ་དང་། ཐེག་པ་ཆུང་ངུ་སྤངས་པའི་སེམས་ཀྱིས་སྦྱིན་པ་དེ་སྦྱིན་པ་དང་། སློང་བ་ལ་ཞེ་སྡང་བ་མེད་པའི་སེམས་ཀྱིས་སྦྱིན་
པ་དེ་སྦྱིན་པ་དང་། ལེན་པ་རྣམས་ལ་སྦྱིན་གནས་སུ་འདུ་ཤེས་བསྐྱེད་དེ་སྦྱིན་པ་དེ་སྦྱིན་པ་དང་། ལེན་པ་རྣམས་ལ་དགེ་བའི་བཤེས་གཉེན་དུ་འདུ་ཤེས་བསྐྱེད་དེ་སྦྱིན་པ་དེ་སྦྱིན་པ་དང་། ནང་གི་ཀུན་ནས་ཉོན་མོངས་པའི་དྲི་མ་སྤངས་ཏེ་སྦྱིན་པ་དེ་སྦྱིན་པ་དང་། ཀུན་ཏུ་འཛིན་པ་མེད་
པའི་སེམས་ཀྱི་དགའ་བ་དང་། དང་བ་དང་མཆོག་ཏུ་དགའ་བ་ཐོབ་ནས་སྦྱིན་པ་དེ་སྦྱིན་པ་དང་། ལག་པ་བརྐྱང་སྟེ་གྲོལ་བས་གཏོང་བ་རྣམ་པར་གཏོང་བ་ལ་དགའ་བས་སྦྱིན་པ་དེ་སྦྱིན་པ་དང་། རྒྱ་ཆེན་པོ་ལ་མོས་ཏེ་ཞུམ་པ་མེད་པའི་སེམས་ཀྱིས་སྦྱིན་པ་དེ་སྦྱིན་པ་དང་། སྣོད་ཐམས་
ཅད་ལ་མི་གནས་པར་སྦྱིན་པ་དེ་སྦྱིན་པ་དང་། རྣམ་པར་སྨིན་པ་ལ་རེ་བ་མེད་པར་སྦྱིན་པ་དེ་སྦྱིན་པ་དང་། ལན་ལ་རེ་བ་མེད་པའི་བློས་སྦྱིན་པ་དེ་སྦྱིན་པ་དང་། སངས་རྒྱས་ཀྱི་ཆོས་ཚོལ་བའི་བློས་སྦྱིན་པ་དེ་སྦྱིན་པ་དང་། ཐམས་ཅད་མཁྱེན་པའི་ཡེ་ཤེས་སུ་བསྔོས་ཏེ་སྦྱིན་པ་དེ་

སྦྱིན་པ་དང་། གདུང་བ་མེད་པའི་སེམས་ཀྱིས་སྦྱིན་པ་དེ་སྦྱིན་པ་དང་། བསྡུ་བའི་དངོས་པོ་སྔོན་དུ་འགྲོ་བས་སྦྱིན་པ་དེ་སྦྱིན་པ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་སྦྱིན་པ་དེ་སྦྱིན་པ་དང་། ཆོས་འཛིན་པར་གྱུར་ཅིག་སྙམ་སྟེ་སྦྱིན་པ་དེ་སྦྱིན་པ་དང་། དེ་བཞིན་གཤེགས་
པའི་གསུང་དང་འཐུན་པར་གྱུར་ཅིག་སྙམ་སྟེ་སྦྱིན་པ་དེ་སྦྱིན་པ་དང་། བདག་བདུད་ཀྱི་ཕྱོགས་ཚར་གཅོད་པར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང་། བདག་བྱང་ཆུབ་ཀྱི་ལམ་རྣམ་པར་སྤྱོད་པར་གྱུར་ཅིག་ཅེས་སྦྱིན་པ་དེ་སྦྱིན་པ་དང་། བདག་སྐྱེས་བུ་དམ་པའི་ལས་བྱེད་པར་གྱུར་
ཅིག་ཅེས་སྦྱིན་པ་དེ་སྦྱིན་པ་དང་། བདག་ཡི་དགས་ཀྱི་ལམ་རྣམ་པར་སྤོང་བར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང་། བདག་གི་བདོག་པ་ཐམས་ཅད་ཡོངས་སུ་གཏོང་བའི་རྒྱུར་གྱུར་ཅིག་ཅེས་སྦྱིན་པ་དེ་སྦྱིན་པ་དང་། བདག་གིས་ལོངས་སྤྱོད་ཆེན་པོར་འགྱུར་བའི་བསྒྲུབ་པ་རབ་
ཏུ་བཟུང་བར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང་། ཆོས་ལ་དགའ་བར་རབ་ཏུ་གནས་པར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང་། བདག་ལ་དགེ་བའི་བཤེས་གཉེན་དཀོན་པར་མ་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང་། བདག་ལ་སེམས་ཅན་ཐམས་ཅད་དགའ་བའི་མིག་
དང་ལྡན་པར་གྱུར་ཅིག་ཅེས་ཏེ་སྦྱིན་པ་སྦྱིན་པ་དང་། བདག་གི་སྦྱིན་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པར་གྱུར་ཅིག་ཅེས་སྦྱིན་པ་སྦྱིན་པ་དང་། བྱང་ཆུབ་སེམས་དཔའ་གཏོང་བ་ཕུན་སུམ་ཚོགས་པ་གཞན་རྣམས་ཀྱི་རྗེས་སུ་སློབ་པར་མ་གྱུར་ཅིག་ཅེས་
ཏེ་སྦྱིན་པ་སྦྱིན་པ་དང་། བདག་མཚན་དང་དཔེ་བྱད་བཟང་པོ་བསགས་པ་ཡོངས་སུ་འཛིན་པར་གྱུར་ཅིག་ཅེས་ཏེ་སྦྱིན་པ་སྦྱིན་པ་དང་། བདག་སངས་རྒྱས་ཀྱི་ཞིང་ཡོངས་སུ་སྦྱོང་བ་དང་། བདག་སངས་རྒྱས་ཀྱི་ཆོས་ཐམས་ཅད་མངོན་སུམ་དུ་གྱུར་ཅིག་ཅེས་ཏེ་སྦྱིན་པ་སྦྱིན་པ་སྟེ། མི་
འམ་ཅིའི་བདག་པོ་རྣམ་པ་སུམ་ཅུ་རྩ་གཉིས་པོ་འདི་དག་གིས། བྱང་ཆུབ་སེམས་དཔའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ་རྣམ་པ་སུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་

ཡོངས་སུ་དག་པ་ཡིན་ནོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་དང་བྲལ་བས་ལུས་ཡོངས་སུ་དག་པའི་ཚུལ་ཁྲིམས་དང་། བདག་གི་ལྷ་སངས་རྒྱས་ལ་མི་སླུ་བའི་མཚན་ཉིད་ཀྱིས་ངག་ཡོངས་སུ་དག་
པའི་ཚུལ་ཁྲིམས་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་མེད་པས་སེམས་ཡོངས་སུ་དག་པའི་ཚུལ་ཁྲིམས་དང་། ལྷ་དང་མིའི་ཕུན་སུམ་ཚོགས་པ་མྱོང་བས་དགེ་བ་བཅུའི་ལས་ཀྱི་ལམ་ཡོངས་སུ་དག་པའི་ཚུལ་ཁྲིམས་དང་། ཉི་ཚེ་བའི་ས་ཐམས་
ཅད་མི་སྟོན་པས་བྱང་ཆུབ་ཀྱི་སེམས་དང་། བསམ་པ་མི་བརྗེད་པའི་ཚུལ་ཁྲིམས་དང་། ཤིན་ཏུ་ཉམས་པ་མེད་ཅིང་གཡོ་དང་བྲལ་བས་ལྷག་པའི་བསམ་པ་ཡོངས་སུ་དག་པའི་ཚུལ་ཁྲིམས་དང་། སྐྱེ་བོ་ཕལ་པ་ཐམས་ཅད་སྡུད་པས་འཕགས་པའི་སྐྱེ་བོས་བསྔགས་པའི་ཚུལ་
ཁྲིམས་དང་། སེམས་ཅན་ཐམས་ཅད་ལ་སེམས་སྙོམས་པར་བྱམས་པ་སྔོན་དུ་འགྲོ་བའི་ཚུལ་ཁྲིམས་དང་། སེམས་ཅན་ཐམས་ཅད་ཡོངས་སུ་སྐྱོབ་པས་སྙིང་རྗེ་ཆེན་པོ་ལ་རབ་ཏུ་སྦྱོར་བའི་ཚུལ་ཁྲིམས་དང་། དམ་བཅས་པའི་སྟོབས་ཀྱིས་བསླབ་པ་རྫོགས་པ་མེད་པ་ཡང་དག་
པར་འཛིན་པའི་ཚུལ་ཁྲིམས་དང་། ཁ་ན་མ་ཐོ་བ་ཆུང་ངུ་ལ་ཡང་འཇིགས་པར་ལྟ་བས་ངོ་ཚ་ཤེས་ཤིང་ཁྲེལ་ཡོད་པ་ཕུན་སུམ་ཚོགས་པའི་ཚུལ་ཁྲིམས་དང་། ཤིན་ཏུ་མི་གཏོང་བས་སྐྱོན་མེད་པའི་ཚུལ་ཁྲིམས་དང་། སྤྱོད་པ་ཤིན་ཏུ་དག་པས་ཐུན་ཚགས་མ་ཡིན་པའི་ཚུལ་ཁྲིམས་
དང་། སངས་རྒྱས་ཀྱི་ཞིང་གཞན་དུ་འགྲོ་བས་རང་གི་རྣམ་པ་མང་པོ་ལ་དབང་བྱེད་པའི་ཚུལ་ཁྲིམས་དང་། སྐྱེ་བོ་མཁས་པས་རིག་པའི་ཕྱིར་སྔགས་པའི་ཚུལ་ཁྲིམས་དང་། ངན་སོང་ངན་འགྲོ་ཐམས་ཅད་ཀྱི་ལམ་ལས་སྒྲོལ་བའི་ཚུལ་ཁྲིམས་དང་། བདེ་བའི་དངོས་པོ་ཐམས་ཅད་
ལ་རབ་ཏུ་གནས་པའི་ཚུལ་ཁྲིམས་དང་། སངས་རྒྱས་ཀྱི་ཚུལ་ཁྲིམས་ཡོངས་སུ་རྫོགས་པར་བྱེད་པས་སངས་རྒྱས་ཀྱིས་གནང་བའི་ཚུལ་ཁྲིམས་དང་། ཡི་དམ་ལ་བརྟན་པས་མི་ལྷོད་པའི་ཚུལ་ཁྲིམས་དང་། རང་གི་སེམས་ངེས་པར་སེམས་པས་བདག་ལ་མི་སྟོད་གཞན་ལ་

མི་སྨོད་པའི་ཚུལ་ཁྲིམས་དང་། ཉོན་མོངས་པ་མེད་པས་ངེས་པར་སེམས་པའི་སྙིང་རྗེའི་ཚུལ་ཁྲིམས་དང་། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ལ་ཉེ་བར་བྱེད་པའི་ཚུལ་ཁྲིམས་དང་། རབ་ཏུ་དགའ་བར་བྱེད་པ་ལ་དགའ་བར་བྱེད་པའི་ཚུལ་ཁྲིམས་དང་། འདོད་པ་དང་། ཆགས་
པ་མེད་པས་ཆོག་ཤེས་པར་བྱེད་པའི་ཚུལ་ཁྲིམས་དང་། ནན་ཏན་སྙིང་པོར་བྱེད་པས་བསྒྲུབ་པ་རླབས་པོ་ཆེའི་ཚུལ་ཁྲིམས་དང་། ཁྱིམ་གྱི་གནས་ཐམས་ཅད་ལ་མི་ལྟ་བའི་རབ་ཏུ་འབྱུང་བ་ལ་གཞོལ་བའི་ཚུལ་ཁྲིམས་དང་། ཆོས་ཀྱི་དགའ་བ་ལ་དགའ་མོས་པས་དགོན་པ་ལ་དགའ་
བ་དང་ལྡན་པའི་ཚུལ་ཁྲིམས་དང་། འཕགས་པའི་རིགས་ལ་རྟོན་པས་འདོད་པ་ཉུང་ཞིང་ཆོག་ཤེས་པ་ལ་ངེས་པའི་ཚུལ་ཁྲིམས་དང་། སྡིག་པ་འདོད་པ་ཐམས་ཅད་དང་བྲལ་བས་སྦྱངས་པའི་ཡོན་ཏན་ལ་ཡང་དག་པར་རབ་ཏུ་སྦྱོར་བའི་ཚུལ་ཁྲིམས་དང་། སེམས་ཅན་མེད་པར་
རྣམ་པར་སྤྱོད་པས་དམིགས་པ་མེད་པར་སྦྱོར་བའི་ཚུལ་ཁྲིམས་དང་། ཆད་པ་དང་རྟག་པ་ཡོངས་སུ་སྤོང་བས་ལྟ་བར་སོང་བ་ཐམས་ཅད་དང་གཏི་མུག་སེལ་བའི་ཚུལ་ཁྲིམས་དང་། རྟེན་ཅིང་འབྲེལ་པར་འབྱུང་བ་དང་མི་འགལ་བས་བྱང་ཆུབ་ཀྱི་རྗེས་སུ་འཐུན་པའི་ཚུལ་ཁྲིམས་ཏེ།
མི་འམ་ཅིའི་བདག་པོ་རྣམ་པ་སུམ་ཅུ་རྩ་གཉིས་པོ་འདི་དག་གིས་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ་རྣམ་པ་སུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའ་རྣམས་ཀྱི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་དག་པ་
ཡིན་ནོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། ལུས་ལ་མི་ལྟ་བས་བཟོད་པར་བལྟ་བ་དང་། སྲོག་ལ་མི་ཆགས་པར་བཟོད་པར་བལྟ་བ་དང་། ཞེ་སྡང་བའི་སེམས་མེད་པར་བཟོད་པར་བལྟ་བ་དང་། ཉེས་པར་སྨྲས་པའི་ཚིག་དང་དུ་ལེན་པས་བཟོད་པར་བལྟ་བ་
དང་། ཉམ་ཆུང་བའི་སེམས་ཅན་ལ་སྙིང་རྗེ་སྐྱེད་པས་བཟོད་པར་བལྟ་བ་དང་། མ་བསླབས་པ་ལ་མི་བརྙས་པས་བཟོད་པར་བལྟ་བ་དང་། གནོད་པ་བྱེད་པ་རྣམས་ལ་ལན་གླན་པའི་མཐུ་ཡོད་ཀྱང་ལན་མི་ལྡོན་པས་བཟོད་པར་བལྟ་བ་དང་། ཡན་ལག་དང་ཉིང་ལག་

ཐམས་ཅད་བཅད་ཀྱང་མི་འཁྲུགས་ཤིང་གནོད་སེམས་མེད་པས་བཟོད་པར་བལྟ་བ་དང་། བརླང་བ་མེད་པས་བཟོད་པར་བལྟ་བ་དང་། གཤེ་བ་ལ་སླར་མི་གཤེ་བས་བཟོད་པར་བལྟ་བ་དང་། བསམ་པ་དག་པས་བཟོད་པར་བལྟ་བ་དང་། རྙོག་པའི་སེམས་
མེད་པས་བཟོད་པར་བལྟ་བ་དང་། དཀྲུགས་པའི་སེམས་མེད་པས་བཟོད་པར་བལྟ་བ་དང་། གཞན་གྱི་སེམས་བསྲུང་བས་བཟོད་པར་བལྟ་བ་དང་། སེམས་ཅན་ཐམས་ཅད་ལ་ཕན་པའི་དངོས་པོས་བཟོད་པར་བལྟ་བ་དང་། སྙིང་རྗེའི་བློ་དང་ལྡན་པས་བཟོད་པར་བལྟ་བ་དང་།
ང་རྒྱལ་མེད་པས་བཟོད་པར་བལྟ་བ་དང་། སེམས་ཅན་ཐམས་ཅད་ལ་བརྙས་ཐབས་མེད་ཅིང་འདུད་པས་བཟོད་པར་བལྟ་བ་དང་། འབར་བ་མེད་པས་བཟོད་པར་བལྟ་བ་དང་། ཉེ་བར་ཞི་བས་བཟོད་པར་བལྟ་བ་དང་། ངེས་པར་སེམས་པས་བཟོད་པར་བལྟ་བ་དང་། བདག་གི་
འཁྲུལ་པ་ལ་སོ་སོར་རྟོག་པས་བཟོད་པར་བལྟ་བ་དང་། གཞན་གྱི་འཁྲུལ་པའི་སྐྱོན་ལ་མི་ལྟ་བས་བཟོད་པར་བལྟ་བ་དང་། སངས་རྒྱས་རྗེས་སུ་དྲན་པ་བསྒོམས་པས་བཟོད་པར་བལྟ་བ་དང་། ཆོས་ལ་སེམས་སྦྱོར་བས་བཟོད་པར་བལྟ་བ་དང་། དང་བའི་དངོས་པོས་བཟོད་པར་
བལྟ་བ་དང་། སེམས་ལ་གདུང་བ་མེད་པས་བཟོད་པར་བལྟ་བ་དང་། བཞིན་འཛུམ་ཞིང་ཁྲོ་གཉེར་མེད་པས་བཟོད་པར་བལྟ་བ་དང་། གསོང་པོ་སྨྲ་བས་བཟོད་པར་བལྟ་བ་དང་། རྣམ་པར་ཐར་པའི་སྒོ་གསུམ་ལ་དངང་བ་མེད་པས་བཟོད་པར་བལྟ་བ་དང་། མ་སྐྱེས་པ་དང་
མ་བྱུང་བ་ལ་མོས་པས་བཟོད་པར་བལྟ་བ་དང་། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པས་བཟོད་པར་བལྟ་བ་སྟེ། མིའམ་ཅིའི་བདག་པོ་རྣམ་པ་སུམ་ཅུ་རྩ་གཉིས་པོ་འདི་དག་གིས། བྱང་ཆུབ་སེམས་དཔའ་རྣམས་ཀྱི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །
མི་འམ་ཅིའི་བདག་པོ་རྣམ་པ་སུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་སངས་རྒྱས་ཀྱི་རིགས་རྒྱུན་མི་

འཆད་པར་བྱ་བའི་ཕྱིར་བརྩོན་འགྲུས་རྩོམ་པ་དང་། ཆོས་ཀྱི་རིགས་རྒྱུན་མི་འཆད་པར་བྱ་བའི་ཕྱིར་བརྩོན་འགྲུས་རྩོམ་པ་དང་། དགེ་འདུན་གྱི་རིགས་རྒྱུན་མི་འཆད་པར་བྱ་བའི་ཕྱིར་བརྩོན་འགྲུས་རྩོམ་པ་དང་། སེམས་ཅན་ཚད་མེད་པ་ཡོངས་སུ་སྨིན་པར་བྱ་བའི་ཕྱིར་བརྩོན་འགྲུས་
རྩོམ་པ་དང་། འཁོར་བ་ཚད་མེད་པ་ཡོངས་སུ་གཟུང་བའི་ཕྱིར་བརྩོན་འགྲུས་རྩོམ་པ་དང་། སངས་རྒྱས་ཚད་མེད་པ་ལ་མཆོད་པ་དང་རིམ་གྲོ་བྱ་བའི་ཕྱིར་བརྩོན་འགྲུས་རྩོམ་པ་དང་། དགེ་བའི་རྩ་བ་ཚད་མེད་པ་བསགས་པའི་ཕྱིར་བརྩོན་འགྲུས་རྩོམ་པ་དང་། ཐོས་པ་ཚད་མེད་
པ་གཟུང་བའི་ཕྱིར་བརྩོན་འགྲུས་རྩོམ་པ་དང་། སེམས་ཅན་ཐམས་ཅད་ལ་ལེགས་པར་སྨྲ་བ་སྨྲ་བའི་ཕྱིར་བརྩོན་འགྲུས་རྩོམ་པ་དང་། སེམས་ཅན་ཐམས་ཅད་ལ་རབ་ཏུ་གདིང་བར་བྱེད་པའི་ཕྱིར་བརྩོན་འགྲུས་རྩོམ་པ་དང་། སེམས་ཅན་ཐམས་ཅད་ལ་བྱ་བ་ཅི་ཡོད་ཅེས་བྱ་བ་ལ་སྤྲོ་
བའི་ཕྱིར་བརྩོན་འགྲུས་རྩོམ་པ་དང་། སེམས་ཅན་ཐམས་ཅད་ཡོངས་སུ་མི་གཏོང་བའི་ཕྱིར་བརྩོན་འགྲུས་རྩོམ་པ་དང་། སེམས་ཅན་ཐམས་ཅད་ཚུལ་ཁྲིམས་ཀྱི་བསླབ་པ་ལ་གཟུད་པའི་ཕྱིར་བརྩོན་འགྲུས་རྩོམ་པ་དང་། བཟོད་པའི་སྟོབས་ཐམས་ཅད་དང་། དེས་པ་མི་ཉམས་
པར་བྱ་བའི་ཕྱིར་བརྩོན་འགྲུས་རྩོམ་པ་དང་། བསམ་གཏན་དང་རྣམ་པར་ཐར་པ་དང་ཏིང་ངེ་འཛིན་དང་། སྙོམས་པར་འཇུག་པ་ཐམས་ཅད་བསྐྱེད་པའི་ཕྱིར་བརྩོན་འགྲུས་རྩོམ་པ་དང་། ཆགས་པ་མེད་པའི་ཤེས་རབ་མཆོག་ཡོངས་སུ་བསྐང་བའི་ཕྱིར་བརྩོན་འགྲུས་རྩོམ་པ་དང་།
བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཚངས་པའི་གནས་པའི་གནས་པ་ཡོངས་སུ་བསྐང་བའི་ཕྱིར་བརྩོན་འགྲུས་རྩོམ་པ་དང་། མངོན་པར་ཤེས་པ་ཐམས་ཅད་ལ་བརྩོན་འགྲུས་བསྐྱེད་པའི་ཕྱིར་བརྩོན་འགྲུས་རྩོམ་པ་དང་། སངས་རྒྱས་ཀྱི་ཞིང་
ཐམས་ཅད་ཀྱི་ཡོན་ཏན་བཀོད་པ་རང་གི་སངས་རྒྱས་ཀྱི་ཞིང་ཡོངས་སུ་བསྡུ་བའི་ཕྱིར་བརྩོན་འགྲུས་རྩོམ་པ་དང་། བདུད་ཐམས་ཅད་གཞོམ་པའི་ཕྱིར་བརྩོན་འགྲུས་རྩོམ་པ་དང་། སྟོབས་བརྟན་པ་ཆེན་པོས་ཕ་རོལ་གནོན་པའི་ཕྱིར་བརྩོན་འགྲུས་རྩོམ་པ་དང་། ཕ་རོལ་རྒོལ་བ་ཐམས་

ཅད་ཆོས་དང་འཐུན་པས་ཚར་གཅད་པའི་ཕྱིར་བརྩོན་འགྲུས་རྩོམ་པ་དང་། སྟོབས་བཅུ་དང་མི་འཇིགས་པ་དང་། སངས་རྒྱས་ཀྱི་ཆོས་ཡོངས་སུ་བསྐང་བའི་ཕྱིར་བརྩོན་འགྲུས་རྩོམ་པ་དང་། ལུས་དང་ངག་དང་སེམས་ཀྱི་རྒྱན་གྱི་ཕྱིར་བརྩོན་འགྲུས་རྩོམ་པ་
དང་། བྱ་བ་ཐམས་ཅད་ཉམས་འོག་ཏུ་ཆུད་པར་བྱེད་ཅིང་བརྩོན་པ་མི་གཏོང་བའི་ཕྱིར་བརྩོན་འགྲུས་རྩོམ་པ་དང་། སེམས་ཞུམ་པ་མེད་པར་བྱ་བའི་ཕྱིར་བརྩོན་འགྲུས་རྩོམ་པ་དང་། ཉོན་མོངས་པ་ཐམས་ཅད་ཀྱིས་མི་རྫི་བའི་ཕྱིར་བརྩོན་འགྲུས་རྩོམ་པ་དང་། མ་རྒལ་བ་སྒྲོལ།
མ་གྲོལ་བ་དགྲོལ། དབུགས་མ་ཕྱིན་པ་དབུགས་དབྱུང་། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་བཟླ་བའི་ཕྱིར་བརྩོན་འགྲུས་རྩོམ་པ་དང་། བསོད་ནམས་བརྒྱ་པའི་མཚན་གྱི་ཚོགས་བསགས་པའི་ཕྱིར་བརྩོན་འགྲུས་རྩོམ་པ་དང་། སངས་རྒྱས་ཐམས་
ཅད་ཀྱི་དམ་པའི་ཆོས་ཡོངས་སུ་གཟུང་བའི་ཕྱིར་བརྩོན་འགྲུས་རྩོམ་པ་དང་། སངས་རྒྱས་ཀྱི་ཞིང་མཐའ་ཡས་པར་རྫུ་འཕྲུལ་གྱིས་འགྲོ་ཞིང་སངས་རྒྱས་ལ་བལྟ་བའི་ཕྱིར་བརྩོན་འགྲུས་རྩོམ་པ་དང་། སེམས་དང་ལུས་དབེན་པའི་ཕྱིར་དེའི་བརྩོན་འགྲུས་དེ་དབེན་པ་ལས་ངེས་པར་བྱུང་
བ་དང་། ཐམས་ཅད་མཁྱེན་པའི་ཡེ་ཤེས་ལ་འཇུག་པའི་ཕྱིར་དེའི་བརྩོན་འགྲུས་དེ་བླང་བ་མེད་ཅིང་དོར་བ་མེད་ལ། གདེག་པ་མེད་ཅིང་གཞག་པ་མེད་དེ། སྐྱེ་བ་མེད་ཅིང་འབྱུང་བ་མེད་པས་བསྡུས་པ་ཡིན་ཏེ། མི་འམ་ཅིའི་བདག་པོ་རྣམ་པ་སུམ་ཅུ་རྩ་གཉིས་པོ་འདི་དག་གིས། བྱང་
ཆུབ་སེ