Kinh tạng Tây Tạng (Kangyur Đại Học) — 058_མདོ་སྡེ།_ཕ

ཁམས་བཞི་དེ་དག་གདུག་པའི་སྦྲུལ་དང་འདྲ་བར་གསུངས། །བདག་གིས་ལུས་བོར་བྱས་ཏེ་དུག་མེད་འགྱུར་བར་བྱ། །ཉོན་མོངས་

དུག་ཞི་ནས་ནི་རང་བྱུང་སངས་རྒྱས་འགྱུར། །སྲིད་གསུམ་འཇིག་རྟེན་འདི་ནི་ལུས་བདེ་འགྱུར་བའི་གཞི། །འདོད་པའི་ཟས་རྒྱུ་ཅུང་ཟད་ཇི་སྙེད་འཇིགས་པ་སྟེ། །བདག་གིས་ལུས་བཏང་འཇིགས་པ་མེད་པར་འགྱུར་བར་བྱ། །བགྲང་བ་འདི་ལ་ཞུགས་པ་དེ་དག་གནོད་
པ་བཟོད། །ནག་པོའི་ཕྱོགས་ལ་གྲོགས་ནི་བརྒྱ་སྟོང་ཕྲག་ཀྱང་མང་། །དཀར་པོའི་ཕྱོགས་ནི་གང་ལའང་གྲོགས་པོ་གཅིག་པུར་འགྱུར། །བདག་ནི་མི་དགེ་རྣམས་དང་རྩོད་པར་མི་བྱ་སྟེ། །སངས་རྒྱས་བཟོད་པ་གསུངས་པས་བཟོད་པ་བདག་གི་གྲོགས། །ཕྱོགས་
བཅུའི་སངས་རྒྱས་དེ་དག་འདིར་ནི་བདག་གི་དཔང་། །ཇི་ལྟར་སངས་རྒྱས་སྐུ་ལ་སེམས་ནི་མི་ཕྱེད་དེ། །སངས་རྒྱས་དང་ནི་བདག་ཉིད་ཆེ་ལྷ་བདག་གི་གྲོགས། །གནོད་པ་བཟོད་པར་བྱ་ཡི་སྡང་བར་མི་བྱའོ། །གནོད་པ་ལུས་དང་ངག་ཡིད་རྣམ་པ་གསུམ་དུ་གསུངས། །གང་
བཟོད་དཔའ་བོ་དེ་ནི་མི་ཕྱེད་བཟོད་པ་ཡིན། །ལུས་ཀྱི་སྡུག་བསྔལ་རྣམ་པ་མཐའ་ཡས་ཡོད་པ་དག །གལ་ཏེ་ལུས་ལ་བཟོད་པ་ལུས་གནོད་དག་པར་འགྱུར། །ལུས་ནི་དུམ་བུ་དུམ་བུར་གཏུབས་ཏེ་རྣམ་གཏོར་ཚེ། །ཐབས་ལྡན་ཆེ་བའི་བདག་ཉིད་ཕ་རོལ་ཕྱིན་རྫོགས་
འགྱུར། །སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་བསམ་གཏན་དང་། །ཤེས་རབ་ཁྱད་འཕགས་དམ་པ་སྐད་ཅིག་ཙམ་གྱིས་འཛིན། །ལུས་དང་ལུས་ལ་སྲེད་པའི་ཉོན་མོངས་རྣམས་ཀྱང་འདོར། །སྦྱིན་དང་རབ་ཏུ་ལྡན་པའི་ཕ་རོལ་ཕྱིན་པར་འགྱུར། །བྱམས་
པས་འཇིག་རྟེན་ཁྱབ་བྱེད་ཚུལ་ཁྲིམས་ཉམས་མི་འགྱུར། །བྱང་ཆུབ་རྗེས་སུ་འགྲོ་བས་ཚུལ་ཁྲིམས་དག་པ་འཛིན། །བཟོད་པའི་སྟོབས་བསྐྱེད་ཡན་ལག་རྣམས་དང་ཉིང་ལག་གཅོད། །དེ་ཡང་དེ་ཡི་བཟོད་པའི་ཕ་རོལ་ཕྱིན་ལ་སྦྱོར། །བརྩོན་འགྲུས་གཅེས་པ་མ་ཞུམ་
བར་སྐབས་སྒྱིད་ལུག་མེད། །ལུས་ནི་རྣམ་པར་འཐོར་ཞིང་བརྩོན་འགྲུས་ཕ་རོལ་འགྲོ། །བྱང་ཆུབ་སེམས་ཀྱི་བསམ་པ་དྲན་པ་མི་འདོར་ཞིང་། །ཉོན་མོངས་མུན་པའི་རྡུལ་རྣམས་བསལ་ཕྱིར་རབ་ཏུ་བརྩོན། །ལུས་བཤིག་ནས་ནི་བསམ་གཏན་སྟོབས་དང་རྣམ་ཐར་འཐོབ། །

འདིར་ཡང་རྡུལ་བྲལ་བསམ་གཏན་ཕ་རོལ་ཕྱིན་ལ་སྦྱོར། །བདག་གི་ལུས་ནི་བདག་མེད་རྨི་ལམ་གློག་དང་འདྲ། །འདི་ལ་བྱེད་པ་པོ་མེད་ཚོར་བ་པོ་ཡང་མེད། །ལུས་ཀྱི་གཟིངས་པས་བཅིངས་པའི་སེམས་ཅན་བདག་གིས་དགྲོལ། །ཤེས་རབ་
འདི་ནི་ཁྱད་འཕགས་ཕ་རོལ་ཕྱིན་པ་མཆོག །གང་ཞིག་འདི་ལ་སྦྱོར་ཞིང་ཚུལ་བཞིན་ཆོས་སེམས་ལ། །ལུས་ཀྱི་གནོད་པ་བཟོད་ཅིང་རབ་སྡང་མི་བྱེད་དེ། །མི་སྙན་པ་དང་སྨད་དང་བཤུང་བའི་ཚིག་ཐོས་ཀྱང་། །དེ་ནི་ཞེ་སྡང་མི་འགྱུར་བྱམས་ལྡན་སེམས་ཀྱང་དུལ། །ཐ་བ་
རབ་ཏུ་ཞེ་སྡང་བོར་འདི་སྦྱིན་པ་དག །བྱམས་པའི་ཡིད་དུ་གྱུར་པ་འདི་ནི་ཚུལ་ཁྲིམས་དག །བཟོད་པའི་སྟོབས་བསྐྱེད་འདི་ནི་བཟོད་པ་དག་པ་ཡིན། །སངས་རྒྱས་ཡེ་ཤེས་འདོད་ནས་བརྩོན་འགྲུས་ཕྱིར་ཞིང་སྐྱེད། །སེམས་དང་ཡིད་རབ་ཞི་བ་འདི་ནི་བསམ་གཏན་དག །སྒྲ་སྐད་
མི་རྙེད་འདི་ནི་ཤེས་རབ་དག་པ་ཡིན། །མི་ཡི་ཚིག་ཐོས་ནས་ནི་གང་ཆོས་འདི་སེམས་པ། །དེ་འདིར་གནོད་བཟོད་དག་གི་སྐྱོན་ལ་ཆགས་པ་མེད། །བདུད་དང་མུ་སྟེགས་ཅན་གྱི་ལྟ་གྱུར་བརྒྱ་སྟོང་གིས། །གནས་འདི་རྙེད་དཀས་སྦྱོར་བ་འོང་བརྗོད་ཀྱང་། །མི་སྐྲག་ཞུམ་པ་མེད་ཅིང་
ཕྱི་ཕྱིར་མཐུ་བསྐྱེད་དེ། །མཁས་པ་དེ་ནི་གནོད་དང་སེམས་གནོད་མཐའ་ཡས་བཟོད། །གང་ཞིག་བཟོད་དང་བརྩོན་འགྲུས་རབ་གནས་རི་རབ་འདྲ། །སེམས་ཅན་ཀུན་ནང་དཔའ་བོ་དེ་འདིར་གནོད་པ་བཟོད། །སྟོབས་བཅུ་རྣམས་ཀྱི་སྦྱང་བ་དང་ནི་གནོད་ཤེས་ནས། །བྱང་ཆུབ་རྗེས་སུ་
འགྲོ་བས་ཕྱི་ནས་ལུང་སྟོན་ཏོ། །བློ་གྲོས་རྒྱ་མཚོ་དེ་ལ་ཐམས་ཅད་མཁྱེན་པར་སེམས་བསྐྱེད་པ་རིན་པོ་ཆེ་དེའི་འབིགས་པ་གང་ཞེ་ན། བློ་གྲོས་རྒྱ་མཚོ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་མཁྱེན་པར་སེམས་བསྐྱེད་པ་རིན་པོ་ཆེ་དེས་རློམ་སེམས་སུ་མི་བྱེད་
དེ། ཐམས་ཅད་མཁྱེན་པའི་སེམས་དེ་ལ་བརྟེན་པར་མི་བྱེད་གནས་པར་མི་བྱེད། ལེན་པར་མི་བྱེད། འདོར་བར་མི་བྱེད། སྤྲོས་པར་མི་བྱེད། རྟོག་པར་མི་བྱེད། རྣམ་པར་རྟོག་པར་མི་བྱེད་ཀྱི་རྣམ་པར་རྟོག་པར་ཉེ་བར་ཞི་བ་ལ་གནས་པ་ཡིན་ཏེ། དེ་ཆོས་ཟབ་

མོ་རྣམས་ལ་བློས་རྣམ་པར་དཔྱོད་དོ། །ཆོས་ཟབ་མོ་དེ་དག་གང་ཞེ་ན། འདི་ལྟ་སྟེ། རྟེན་ཅིང་འབྲེལ་པར་འབྱུང་བའི་ལུགས་སུ་འབྱུང་བ་དང་། རྒྱུ་ལ་དམིགས་པ་ཁོང་དུ་ཆུད་པ་དང་། རྟག་པ་མ་ཡིན་པ་དང་། ཆད་པ་མ་ཡིན་པ་དང་། མཐར་ལྟ་བ་དང་བྲལ་བ་
དང་། རང་བཞིན་གྱིས་བདག་མེད་པ་དང་། བདག་ངོ་བོ་ཉིད་མེད་པས་ཆོས་ཐམས་ཅད། ངོ་བོ་ཉིད་མེད་པ་དང་། གདོད་མ་ནས་མ་སྐྱེས་པ་དང་། མ་བྱུང་བ་དང་། སྟོང་པ་ཉིད་ལ་མོས་པ་དང་། མཚན་མ་མེད་པ་ལ་ཡིད་ཆེས་པ་དང་། སྨོན་པ་མེད་པ་ལ་སོམ་ཉི་
མེད་པ་དང་། མངོན་པར་འདུ་བྱེད་པ་མེད་པ་ལ་དེ་ཁོ་ནའི་བློ་དང་ལྡན་པ་དང་། ཤིན་ཏུ་མི་རྟག་པ་ཉིད་དང་། གཟུགས་དབུབ་དང་མཚུངས་པ་ཉིད་དང་། ཚོར་བ་ཆུ་བུར་དང་འདྲ་བ་ཉིད་དང་། འདུ་ཤེས་སྨིག་རྒྱུ་དང་མཚུངས་པ་སྟེ་གཉིས་སུ་མེད་པ་ཉིད་དང་། འདུ་བྱེད་
རྣམས་ལ་ཆུ་ཤིང་དང་མཚུངས་པར་སོ་སོར་རྟོག་པ་དང་། རྣམ་པར་ཤེས་པ་སྒྱུ་མ་ལྟ་བུའི་ཆོས་ཉིད་དང་། ཁམས་རྣམས་གཡོ་བ་མེད་པ་ཉིད་དང་། སྐྱེ་མཆེད་རྣམས་ཕན་ཚུན་དུ་ཤེས་པ་མེད་པ་ཉིད་དང་། སེམས་གནས་པ་མེད་པ་དང་། ང་རྒྱལ་ཡིད་ལ་མི་བྱེད་པ་དང་།
ལྷག་པར་བྱེད་པ་ལྷག་པར་མི་བྱེད་པ་དང་། མཉམ་པ་ཉིད་ལ་མཉམ་པ་ཉིད་དུ་རྟོགས་པ་དང་། ཐ་དད་དུ་བྱ་བ་མེད་པ་དང་། རོ་གཅིག་པ་དང་། བགྲོད་པ་གཅིག་པུའི་ལམ་ལ་རབ་ཏུ་གནས་པ་དང་། ལམ་གྱི་ཚོགས་ཤེས་པ་ཡོངས་སུ་ཚོལ་བ་དང་། ངེས་པའི་དོན་གྱི་དོན་ལ་
རྟོན་པ་དང་། དོན་གྱི་རྗེས་སུ་ཞུགས་པའི་བློ་དང་། སྐད་ཐམས་ཅད་ལ་སྐད་མེད་པར་འཇུག་པ་དང་། སྒྲ་ཐམས་ཅད་ལ་སྔོན་གྱི་མཐའ་དང་ཕྱི་མའི་མཐའ་ཡོངས་སུ་ཆད་པར་ཤེས་པ་དང་། དོན་དང་ཚིག་འབྲུ་གཉིས་སུ་མེད་པ་ལ་འཇུག་པ་ཤེས་པས་དོན་བརྗོད་དུ་མེད་
པར་རྟོགས་པ་དང་། སྡུག་བསྔལ་ཤེས་པ་ངར་འཛིན་པ་མེད་པ་དང་། ཀུན་འབྱུང་བ་ཤེས་པ་དེ་ཤིན་ཏུ་ཟད་པ་དང་། འགོག་པ་ཤེས་པ་སྒྲོ་བཏགས་པ་མེད་པ་དང་། ལམ་ཤེས་པ་འདུས་བྱས་དང་། འདུས་མ་བྱས་མཉམ་པ་ཉིད་དུ་འཇུག་པ་དང་། ལུས་ལ་ཞུགས་པའི་

དྲན་པ་སྔོན་གྱི་མཐའ་དང་། ཕྱི་མའི་མཐར་འཕོ་བ་མེད་པ་དང་། ཚོར་བ་ལ་ཞུགས་པའི་དྲན་པ་སྐྱེ་བ་དང་འཇིག་པར་མི་གནས་པ་དང་། སེམས་ལ་ཞུགས་པའི་དྲན་པ་དམིགས་པ་ལ་ཤིན་ཏུ་བརྟགས་པ་དང་། ཆོས་ལ་ཞུགས་པའི་དྲན་པ་ཆོས་ཀྱི་
དབྱིངས་ལ་མ་ཡིན་པ་དང་། ཡང་དག་པར་སྤོང་བ་མཉམ་པས་མཉམ་པ་དང་། རྫུ་འཕྲུལ་གྱི་རྐང་པ་སེམས་ལ་དབང་སྒྱུར་བར་གྱུར་པ་དང་། དད་པའི་དབང་པོ་ཆགས་པ་ཐམས་ཅད་ལས་ཤིན་ཏུ་འདས་པ་དང་། བརྩོན་འགྲུས་ཀྱི་དབང་པོ་དབེན་པས་ངེས་པར་བྱུང་བ་དང་།
དྲན་པའི་དབང་པོ་དྲན་པ་མེད་པ་དང་། ཏིང་ངེ་འཛིན་གྱི་དབང་པོ་ཡིད་ལ་བྱེད་པ་མེད་པ་དང་། ཤེས་རབ་ཀྱི་དབང་པོ་སྤྲོས་པ་ལས་ཤིན་ཏུ་འདས་པ་དང་། དད་པའི་སྟོབས་གཞན་གྱི་དྲིང་མི་འཇོག་པ་དང་། བརྩོན་འགྲུས་ཀྱི་སྟོབས་དམིགས་པ་རྟོགས་པ་མེད་པ་དང་། དྲན་
པའི་སྟོབས་ཉམས་པ་མེད་པ་དང་ལྡན་པ་དང་། ཏིང་ངེ་འཛིན་གྱི་སྟོབས་ངེས་པར་སེམས་པར་གྱུར་པ་དང་། ཤེས་རབ་ཀྱི་སྟོབས་མི་འཁྲུགས་པའི་རྒྱུ་འཐུན་པ་དང་། དྲན་པ་ཡང་དག་བྱང་ཆུབ་ཀྱི་ཡན་ལག་དྲན་པ་མེད་ཅིང་བརྗེད་པ་མེད་པ་དང་། ཆོས་རྣམ་པར་
འབྱེད་པ་ཡང་དག་བྱང་ཆུབ་ཀྱི་ཡན་ལག་ཆོས་ཐམས་ཅད་མཉམ་པ་ཉིད་དུ་འཇུག་པ་དང་། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ལེན་པ་མེད་ཅིང་འདོར་བ་མེད་པ་དང་། དགའ་བ་ཡང་དག་བྱང་ཆུབ་ཀྱི་ཡན་ལག་དབའ་རླབས་མེད་པ་དང་། རབ་ཏུ་སྦྱངས་པ་ཡང་དག་
བྱང་ཆུབ་ཀྱི་ཡན་ལག་ལུས་དང་སེམས་ལ་ཞུགས་པ་དང་། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་མཉམ་པ་ཉིད་ཁོང་དུ་ཆུད་པ་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་གཉིས་དང་བྲལ་བ་དང་། ཡང་དག་པའི་ལྟ་བ་ལྟ་བ་ཐམས་ཅད་སྤོང་བ་དང་། ཡང་
དག་པའི་རྟོག་པ་རྟོག་པ་དང་རྣམ་པར་རྟོག་པ་དང་། ཡོངས་སུ་རྟོག་པ་ཐམས་ཅད་དང་བྲལ་བ་དང་། ཡང་དག་པའི་ངག་སྒྲ་སྐད་ཐམས་ཅད་མཉམ་པ་ཉིད་ལ་འཇུག་པ་དང་། ཡང་དག་པའི་ལས་ཀྱི་མཐའ་ལུས་དང་། སེམས་ཀྱི་ལས་དང་བྲལ་བ་དང་། ཡང་དག་པའི་འཚོ་བ་ཚོལ་བ་

ཐམས་ཅད་རྒྱུན་བཅད་པ་དང་། ཡང་དག་པའི་རྩོལ་བ་འདེག་པ་མེད་ཅིང་འཇོག་པ་མེད་པ་དང་། ཡང་དག་པའི་དྲན་པ་དགེ་བ་དང་མི་དགེ་བའི་རྣམ་པར་རིག་པ་ལ་མི་འཇུག་པ་དང་། ཡང་དག་པའི་ཏིང་ངེ་འཛིན་སེམས་ཀྱི་དམིགས་པ་མཉམ་པ་ཉིད་ལ་འཇུག་པ་དང་། ཞི་
བ་ཞི་གནས་ཀྱི་མཐར་སོང་བ་དང་། ལྷག་མཐོང་ལྟ་བ་རྣམ་པར་དག་པ་དང་། སྐྱེ་བ་མེད་པའི་དོན་མི་རྟག་པའི་དོན་དང་། གདོད་མ་ནས་སྐྱེ་བ་མེད་པའི་དོན་སྡུག་བསྔལ་གྱི་དོན་དང་། རྒྱུ་བ་མེད་པའི་དོན་བདག་མེད་པའི་དོན་དང་། ཉེ་བར་ཞི་བའི་དོན་ཞི་བའི་དོན་དང་། དུལ་བས་སྦྱིན་པ་
དང་། བསིལ་བའི་དངོས་པོར་གྱུར་པའི་ཚུལ་ཁྲིམས་དང་། ཟད་པའི་ཆོས་དང་ལྡན་པའི་བཟོད་པ་དང་། ཤིན་ཏུ་རྣམ་པར་ཕྱེ་བས་རྣམ་པར་འབྱེད་པའི་བརྩོན་འགྲུས་དང་། ནད་ཉེ་བར་ཞི་བའི་བསམ་གཏན་དང་། ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པའི་མཚན་ཉིད་ཀྱི་
ཤེས་རབ་དང་། སེམས་ཅན་གདོད་མ་ནས་རྣམ་པར་དག་པའི་བྱམས་པ་དང་། ནམ་མཁའ་དང་མཚུངས་པའི་སྙིང་རྗེ་དང་། དགའ་བ་མེད་པའི་དགའ་བ་དང་། རྩོད་པ་ཐམས་ཅད་རྒྱུན་བཅད་པའི་བཏང་སྙོམས་དང་། ཆོས་ཐམས་ཅད་འཁོར་གསུམ་ཡོངས་སུ་དག་པ་དང་།
སྔོན་གྱི་མཐའ་ནས་སྟོང་པ་དང་། ཕྱི་མའི་མཐར་དབེན་པ་དང་། ད་ལྟར་བྱུང་བ་ན་བདག་མེད་པའོ། །བློ་གྲོས་རྒྱ་མཚོ་དེ་ལྟར་གང་ཆོས་ཟབ་མོ་རྒྱུན་ཆད་པ་ཚིག་འབྲུ་དང་བྲལ་བ་ནམ་མཁའ་དང་མཚུངས་པ། འདི་ལྟ་བུ་འདི་དག་རྟོགས་པ་དང་ཁོང་དུ་ཆུད་པ་དང་འཇུག་པ་ཤེས་པ་ལ་
དཔྱོད་པ་དང་། སེམས་པ་དང་འཇལ་བ་དང་བགྲང་བ་དང་། ཉེ་བར་རྟོག་པ་དང་ནན་ཏན་བྱེད་པ་འདི་ནི་ཐམས་ཅད་མཁྱེན་པར་སེམས་བསྐྱེད་པ་རིན་པོ་ཆེ་དེ་འབིགས་པའོ། །དེ་ལྟར་ཐམས་ཅད་མཁྱེན་པར་སེམས་བསྐྱེད་པ་རིན་པོ་ཆེ་དེ་ཕིགས་ན། ཆོས་ཐམས་ཅད་ལ་དབང་
སྒྱུར་བ་ཉིད་ལྷུན་གྱིས་གྲུབ་པ་ཉིད་དུ་འཐོབ་པར་འགྱུར་རོ། །བློ་གྲོས་རྒྱ་མཚོ་འདི་ལྟ་སྟེ་དཔེར་ན། ཟླ་བ་དང་ཉི་མའི་གཞལ་མེད་ཁང་ལྷུན་གྱིས་གྲུབ་པར་རྣམ་པར་རྒྱུ་ཞིང་འཛམ་བུའི་གླིང་ཐམས་ཅད་དུ། སྣང་བར་བྱེད་ཀྱང་ལྷའི་བུ་ཉི་མ་དང་ཟླ་བ་འདི་སྙམ་དུ་བདག་ཅག་འགྲོའམ་

འོན་ཏེ་ལྡོག་སྙམ་དུ་མི་སེམས་པར་སེམས་ཅན་རྣམས་ཀྱི་བསོད་ནམས་ཀྱི་འབྲས་བུ་རྣམ་པར་སྨིན་པས་དེ་དག་འགྲོའོ། །བློ་གྲོས་རྒྱ་མཚོ་དེ་བཞིན་དུ་རབ་ཏུ་ཕིགས་པའི་ཤེས་པ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ལྷུན་གྱིས་གྲུབ་
པར་སངས་རྒྱས་ཀྱི་ཞིང་ཚད་མེད་པ་དག་ན་སེམས་ཅན་གྱི་དོན་བྱེད་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་ཡང་མངོན་པར་འདུ་བྱེད་པ་མེད་པར་བྱ་བ་དེ་དག་ཀུན་ཏུ་སྟོན་ཏོ། །བློ་གྲོས་རྒྱ་མཚོ་དེ་ལ་བྱང་ཆུབ་སེམས་དཔའི་འབིགས་པ་ཤེས་པ་གང་ཡིན་པ་དེ་ནི། བསམ་
གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པར་ཡོངས་སུ་བཙལ་བར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་མཉམ་པར་བཞག་ན་ལྷག་མཐོང་གི་ཆོས་རྣམས་མཐོང་གི་མཉམ་པར་མ་བཞག་པས་ནི་མ་ཡིན་ནོ། །དེའི་མཐོང་བ་གང་ཡིན་པ་དེ་
ནི་ཤེས་རབ་སྟེ། ཤེས་རབ་དེས་མངོན་སུམ་དུ་འགྱུར་རོ། །གང་མངོན་སུམ་དུ་འགྱུར་ཞེ་ན། ཆོས་རྣམས་ཀྱི་ཡང་དག་པའི་མཚན་ཉིད་ལ་མངོན་སུམ་དུ་འགྱུར་རོ། །ཆོས་རྣམས་ཀྱི་ཡང་དག་པའི་མཚན་ཉིད་གང་ཞེ་ན། མཚན་ཉིད་ཀྱི་གཞི་དེ་ལ་ཀུན་ཏུ་མི་སྤྱོད་པའོ། །
ཆོས་རྣམས་ཀྱི་མཚན་ཉིད་ཀྱི་གཞི་གང་ཞེ་ན། འདི་ལྟ་སྟེ་རྣམ་པར་རིག་པ་ནི་ཆོས་རྣམས་ཀྱི་མཚན་ཉིད་ཀྱི་གཞིའོ། །རྣམ་པར་རིག་པ་དེའི་ཡང་དག་པ་ཇི་ལྟ་བའི་མཚན་ཉིད་གང་ཡིན་པ་དེ་ཉིད་ནི་ཆོས་རྣམས་ཀྱི་ཡང་དག་པའི་མཚན་ཉིད་ཅེས་བྱའོ། །གང་གི་ཚེ་ཚོར་བ་ཐམས་
ཅད་རྒྱུན་བཅད་པར་གྱུར་པ་དེའི་ཚེ་སྣང་བར་ཡང་མི་བྱེད། མི་སྣང་བར་མི་བྱེད་དོ། །དེ་ལ་སྣང་བ་ནི་གང་། མི་སྣང་བ་ནི་གང་ཞེ་ན། སྣང་བ་ཞེས་བྱ་བ་ནི་སྐྱེ་བའོ། །མི་སྣང་བ་ཞེས་བྱ་བ་ནི་འགག་པའོ། །གང་གི་ཚེ་སྣང་བར་ཡང་མི་བྱེད་མི་སྣང་བར་ཡང་མི་བྱེད་པ་དེའི་ཚེ། སྐྱེ་བར་
ཡང་མི་བྱེད་འགག་པར་ཡང་མི་བྱེད་དོ། །གང་གི་ཚེ་སྐྱེ་བར་ཡང་མི་བྱེད་འགག་པར་ཡང་མི་བྱེད་པ་དེའི་ཚེ་ཆོས་ཉིད་ལ་གནས་པ་ཡིན་ཏེ་ཆོས་ཀྱི་དབྱིངས་འཁྲུགས་པར་མི་བྱེད། དེ་བཞིན་ཉིད་ལས་མི་གཡོ། ཡང་དག་པའི་མཐའ་འཇིག་པར་མི་བྱེད་དོ། །དེ་ལ་ཆོས་ཀྱི་དབྱིངས་ཞེས་བྱ་བ་ནི་

རྟེན་ཅིང་འབྲེལ་པར་འབྱུང་བ་རྗེས་སུ་རྟོགས་པའོ། །དེ་བཞིན་ཉིད་ནི་དེ་ཁོ་ནའི་མཚན་ཉིད་ཁོང་དུ་ཆུད་པའོ། །ཡང་དག་པའི་མཐའ་ནི་གཉིས་སུ་མེད་པའི་ཡང་དག་པར་མངོན་པར་རྟོགས་པའོ། །བློ་གྲོས་རྒྱ་མཚོ་དེ་ལྟར་མངོན་སུམ་དུ་ཤེས་པ་རིག་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་ནི་ཤིན་ཏུ་ཕིགས་པ་ཤེས་པ་ཞེས་བྱའོ། །སྦྱང་བ་དང་གནོད་པ་དང་ངེས་པར་འབིགས་པའི་ལེའུ་འདི། བཅོམ་ལྡན་འདས་ཀྱིས་བཤད་པའི་ཚེ། ལྷ་དང་མིའི་སྐྱེ་དགུའི་སྲོག་ཆགས་ཁྲག་ཁྲིག་ཕྲག་བཅུ་གཉིས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
སེམས་བསྐྱེད་དོ། །སྲོག་ཆགས་ཁྲི་དྲུག་སྟོང་གིས་བཟོད་པ་རབ་ཏུ་ཐོབ་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །ཆོས་ཀུན་ངེས་པར་རྟོགས་པ་ཡི། །བྱང་ཆུབ་སེམས་ནི་སྒྲོགས་པར་བྱེད། །དེ་ཚེ་དེས་རྟོགས་ཡེ་ཤེས་
ཀྱིས། །ཆོས་རྣམས་ཀུན་ལ་ཆགས་པ་མེད། །ཟབ་མོའི་ཆོས་རྣམས་ཁོང་དུ་ཆུད། །མཁས་པ་སྐྲག་པར་འགྱུར་བ་མེད། །སྐྲག་མེད་ཀུན་ཏུ་འཇིགས་མེད་པས། །ཁྱད་པར་འཕགས་པར་འགྱུར་བ་ཡིན། །རྒྱུ་ལ་དམིགས་པའི་ཚུལ་གྱིས་ནི། །བརྟེན་པའི་ཆོས་རྣམས་ཁོང་
དུ་ཆུད། །ཤེས་རབ་ལྡན་དེ་རྗེས་འཐུན་བྱེད། །མཐའ་ལྟ་བ་ནི་མི་འཛིན་ཏོ། །རྟག་པ་དང་ནི་ཆད་པ་ལ། །བློ་ནི་ཐོགས་པ་ཡོད་མ་ཡིན། །ཡང་དག་མཐའ་ནི་བསམ་ཡས་པའི། །དབུ་མའི་མཐའ་ནི་རྟོགས་པར་འགྱུར། །བདག་གིས་མཐའ་ཡི་རང་བཞིན་གྱིས། །ཆོས་
རྣམས་བདག་མེད་ངོ་བོ་ཉིད། །ཆོས་ཀུན་དེ་ཡི་རང་བཞིན་ཏེ། །གདོད་ནས་མ་སྐྱེས་འགག་པ་མེད། །སྐྱེས་པ་མེད་ཅིང་འབྱུང་བ་མེད། །སྟོང་པ་གཟུང་མེད་དྲི་མ་མེད། །མཚན་མ་མེད་ཅིང་སྤྲོས་པ་མེད། །ནམ་མཁའ་དང་ནི་མཚུངས་ཤིང་འདྲ། །དེ་དག་སེམས་ཀྱིས་མི་སྨོན་པར། །
འདོད་ཅིང་ཆགས་པ་རྣམ་པར་སྤངས། །གཟུགས་ཀྱི་རང་བཞིན་མངོན་སུམ་དུ། །དབུབ་ལྟ་བུར་རབ་ཏུ་ཤེས། །ཚོར་བ་ཆུ་བུར་འདྲ་བ་སྟེ། །འདུ་ཤེས་སྨིག་རྒྱུའི་མཚན་ཉིད་དོ། །འདུ་བྱེད་ཆུ་ཤིང་སྙིང་པོ་འདྲ། །རྣམ་པར་ཤེས་པ་སྒྱུ་མ་འདྲ། །ཁམས་བཞི་གཡོ་བ་མེད་པ་སྟེ། །

ནམ་མཁའ་མཚུངས་པའི་ཁམས་ཡིན་ནོ། །གང་དག་སྐྱེ་མཆེད་ཐམས་ཅད་ནི། །བེམས་པོ་ཕན་ཚུན་སྤྱོད་ཡུལ་ལོ། །སེམས་ནི་ནང་ན་མ་ཡིན་ཏེ། །ཕྱི་རོལ་དུ་ཡང་མི་དམིགས་སོ། །ཡིད་ལ་ང་ཡི་ཡོད་མ་ཡིན། །རྣམ་པར་ཤེས་པ་གནས་པ་མེད། །ཆོས་
རྣམས་ཡིད་ལ་མི་བྱེད་དེ། །ལྷག་པར་བྱེད་པ་རྣམ་པར་སྤོང་། །ཆོས་རྣམས་ཐམས་ཅད་མཉམ་ཉིད་དུ། །ཡང་དག་ཉིད་དུ་ཁོང་དུ་ཆུད། །ཐ་དད་མེད་ཅིང་རོ་གཅིག་སྟེ། །གཅིག་པུ་བགྲོད་ལམ་མཉམ་པ་ཉིད། །ལམ་གྱི་ཤེས་པ་རབ་ཏུ་རྟོགས། །ངེས་པའི་དོན་གྱི་དོན་རྣམས་
མཐོང་། །བློ་ནི་དོན་གྱི་རྗེས་སུ་ཞུགས། །སྐད་ནི་སྐད་མེད་ཁོང་དུ་ཆུད། །སྒྲ་རྣམས་ཀུན་ལ་སྔོན་མཐའ་དང་། །ཕྱི་མའི་མཐའ་མར་ཡོངས་སུ་གཅོད། །དོན་དང་ཚིག་འབྲུ་རྣམས་ལ་མཁས། །ཆོས་རྣམས་གཉིས་སུ་མེད་པར་རྟོགས། །བརྗོད་དུ་མེད་པའི་དོན་ལ་ནི། །འདི་
ཉིད་ཡང་དག་ཁོང་དུ་ཆུད། །སྐྱེ་བ་མེད་པར་སྡུག་བསྔལ་ཤེས། །ཀུན་འབྱུང་བ་ལ་མཉམ་པའི་བློ། །འགོག་པ་ཤེས་པ་ཟད་པར་བསྟན། །ལམ་ཤེས་པ་ནི་འདུས་མ་བྱས། །ལུས་དང་ཚོར་བ་སེམས་དང་ནི། །ཆོས་ལ་ཆོས་སུ་རྗེས་སུ་རྟོགས། །དྲན་མེད་ཡིད་ལ་བྱེད་མེད་པའི། །
དྲན་པ་ཉེ་བར་གཞག་པ་སྟོན། །ཆོས་ཀྱི་དབྱིངས་ནི་དབྱིངས་མིན་པར། །ཡང་དག་ཉིད་ནི་མཉམ་པས་མཉམ། །སྤོང་བས་སྤང་དུ་མེད་པ་ནི། །ཡང་དག་སྤོང་བར་རབ་ཏུ་བསྟན། །སེམས་ལ་དབང་ནི་ཐོབ་པ་ཡི། །རྫུ་འཕྲུལ་རྐང་པ་རབ་ཏུ་བསྟན། །ཆགས་པ་ཀུན་ལས་རབ་
འདས་པ། །དེ་ནི་དད་པའི་དབང་པོ་ཡིན། །ཆོས་རྣམས་ཐམས་ཅད་རྣམ་དབེན་པ། །དེ་ནི་བརྩོན་འགྲུས་དབང་པོ་ཡིན། །དྲན་པ་མེད་ཅིང་དྲན་འཇུག་པ། །དེ་ནི་དྲན་པའི་དབང་པོ་ཡིན། །ཆོས་རྣམས་ཡིད་ལ་མི་བྱེད་པ། །དེ་ནི་ཏིང་འཛིན་དབང་པོ་ཡིན། །སྤྲོས་ལས་ཤིན་
ཏུ་རབ་འདས་པ། །དེ་ནི་ཤེས་རབ་དབང་པོ་ཡིན། །ཡང་དག་ཉིད་ནི་རྟོགས་ནས་དེ། །གཞན་གྱི་དད་པས་འགྲོ་མ་ཡིན། །སེམས་ནི་གཡོ་བ་ཡོད་མིན་པ། །དད་པའི་སྟོབས་ནི་འདི་འདྲའོ། །ཡང་དག་ཤེས་ལས་ཉམས་པ་མེད། །དྲན་པའི་སྟོབས་ནི་འདི་འདྲའོ། །ཏིང་ངེ་འཛིན་

གྱི་སྟོབས་མཛོད་ནི། །དེས་པར་སེམས་ལ་དགའ་བ་ཡིན། །མི་རྟོག་རྣམ་པར་མི་རྟོག་པ། །ཤེས་རབ་སྟོབས་ནི་འདི་འདྲའོ། །ཆོས་རྣམས་རྟོགས་པའི་དོན་དུ་ནི། །བྱང་ཆུབ་ཡན་ལག་རབ་ཏུ་བསྟན། །མཉམ་སྟེ་མི་མཉམ་མེད་པའི་ཆོས། །ཡང་དག་ལྟ་བ་ཡིན་ཞེས་
བརྗོད། །གཉིས་མེད་ཆོས་ལ་བསྒོམ་པ་ནི། །སྐྱེ་བ་མེད་པའི་ལམ་བསྒོམ་ཡིན། །སྐྱེ་བ་མེད་པ་མི་རྟག་དོན། །འབྱུང་བ་མེད་པ་སྡུག་བསྔལ་ཏེ། །རྒྱུ་བ་མེད་པ་བདག་མེད་དོན། །ཞི་དོན་ཉེ་བར་ཞི་བའི་གནས། །དུལ་བའི་སེམས་ནི་སྦྱིན་པ་ཡིན། །ཞི་བའི་སེམས་ནི་ཚུལ་
ཁྲིམས་ལྡན། །ཟད་པའི་ཆོས་རྟོགས་བཟོད་པ་ཡིན། །བརྩོན་འགྲུས་རྣམ་པར་ཕྱེ་བས་རྟོགས། །ཤིན་ཏུ་ཞི་བའི་བསམ་གཏན་ཏེ། །ཤེས་རབ་ཡང་དག་རབ་ཤེས་པ། །སེམས་ཅན་གདོད་ནས་རྣམ་དག་དོན། །བྱམས་པ་ཞེས་ནི་བརྗོད་པ་ཡིན། །སྙིང་རྗེ་ནམ་མཁའ་འདྲ་
བ་སྟེ། །དགའ་བ་སྤྱོད་པ་དགའ་བ་ཡིན། །རྩོམ་པ་ཐམས་ཅད་རྒྱུན་ཆད་པ། །བཏང་སྙོམས་ཞེས་ནི་རབ་ཏུ་བསྟན། །འཁོར་གསུམ་ཡོངས་སུ་ཆད་པར་ནི། །ཆོས་རྣམས་ཐམས་ཅད་རབ་ཏུ་ཤེས། །ཆོས་རྣམས་ངེས་པར་འབིགས་འདི་ནི། །ལྟ་བའི་མདུད་པ་གཅོད་པ་ཡིན། །
བསམ་གཏན་ཤེས་རབ་གང་ཡིན་པ། །དེར་ནི་ངེས་པར་འབིགས་པ་བསྟན། །ཚད་མེད་པ་ལ་འཇུག་པ་ནི། །ཆོས་ཤེས་པ་ཞེས་བརྗོད་པ་ཡིན། །གནོད་པ་བཟོད་པ་དང་ངེས་པར་འབིགས་པ་ཞེས་བྱ་བའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་
ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་རྒྱ་མཚོ་ལ་བཀའ་སྩལ་པ། བློ་གྲོས་རྒྱ་མཚོ་དེ་ལྟར་ན་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དག་པ་དང་ཡོངས་སུ་དག་པར་འགྱུར་ཏེ། བསམ་པ་བཅོས་མ་མ་ཡིན་ཞིང་སེམས་ཅན་ཐམས་ཅད་ཀྱིས་གནོད་པར་བྱས་ཀྱང་
ཞེ་འགྲས་པ་མེད་ལ། ཤིན་ཏུ་ངེས་པར་ཕིགས་པའི་ཡེ་ཤེས་སུ་གྱུར་ཅིང་། ཤེས་རབ་རྣམ་པར་གདོན་མི་ཟ་བ་ཐོབ་པ་དེའི་ཚེ། ཤིན་ཏུ་དཀར་བ་དྲི་མ་མེད་པའི་ཕྱག་རྒྱའི་ཏིང་ངེ་འཛིན་གྱི་རྩ་བའི་གནས་ལ་རབ་ཏུ་གནས་པ་ཡིན་ནོ། །དེ་ལ་ཏིང་ངེ་འཛིན་འདིའི་རྩ་བའི་གནས་གང་ཞེ་ན།

འདི་ལྟ་སྟེ། སེམས་ཅན་ཐམས་ཅད་ལ་ཞེ་སྡང་མེད་པའི་སྙིང་རྗེ་ཆེན་པོའོ། །དེ་སེམས་ཅན་ཐམས་ཅད་ཀྱིས་བསྟི་སྟང་དུ་བྱས་ཀྱང་ཁེངས་པར་མི་འགྱུར། སེམས་ཅན་ཐམས་ཅད་ཀྱིས་བསྟི་སྟང་དུ་མ་བྱས་ཀྱང་དུད་པར་མི་འགྱུར་རོ། །ཁེངས་པ་མེད་པ་དང་
དུད་པ་མེད་པ་དེ་ནི་ཤེས་པ་ལས་ངེས་པར་བྱུང་བ་ཡིན་གྱི་ང་རྒྱལ་ལས་ངེས་པར་བྱུང་བ་ནི་མ་ཡིན་ནོ། །ཁེངས་པ་མེད་པ་དང་དུད་པ་མེད་པ་དེ་ནི་ཆོས་དང་ལྡན་པ་ཡིན་གྱི་གཏི་མུག་དང་ལྡན་པ་ནི་མ་ཡིན་ནོ། །ཆོས་ཐམས་ཅད་ཤེས་པ་ལས་ངེས་པར་བྱུང་བས་ཡེ་ཤེས་སྔོན་དུ་འགྲོ་བའི་
ལུས་ཀྱི་ལས་དང་ལྡན་པ་ཡིན། ཡེ་ཤེས་སྔོན་དུ་འགྲོ་བའི་ངག་གི་ལས་དང་ལྡན་པ་ཡིན། ཡེ་ཤེས་སྔོན་དུ་འགྲོ་བའི་ཡིད་ཀྱི་ལས་དང་ལྡན་པ་ཡིན་ཏེ། དེ་ལུས་སམ་ངག་གམ་ཡིད་ཀྱི་ལས་གང་བྱེད་ཀྱང་དེ་དག་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ་། །དེ་ལ་
བྱང་ཆུབ་སེམས་དཔའི་ལུས་ཀྱི་ལས་ཡེ་ཤེས་སྔོན་དུ་འགྲོ་བ་གང་ཞེ་ན། གང་གཟུགས་ཀྱི་ལས་ཀུན་ཏུ་བསྟན་པས་སེམས་ཅན་རྣམས་ཡོངས་སུ་སྨིན་པར་བྱེད་འདུལ་བར་བྱེད་དོ། །སྤྱོད་ལམ་ཇི་ལྟ་བུས་སེམས་ཅན་རྣམས་འདུལ་བར་འགྱུར་བ་དེ་ལྟ་བུ་ཉིད་དུ་དེའི་སྤྱོད་ལམ་ལྷུན་གྱིས་གྲུབ་
ཅིང་ཡོངས་སུ་བརྟགས་པ་མེད་པར་ཀུན་ཏུ་གནས་སོ། །ལུས་ཀྱི་སྐྱོན་དང་། ལུས་ལ་ཆགས་པ་དང་། ལུས་ཀྱི་འགྱུར་བ་དང་། ལུས་ཀྱི་ཚུལ་འཆོས་པ་དང་། ལུས་ཀྱི་འཁྲུགས་པ་དང་། ལུས་ཀྱི་ཡོངས་སུ་རྟོགས་པ་གང་ཡིན་པ་དེ་དག་བྱང་ཆུབ་སེམས་དཔའ་དེས་ཡང་དག་
པར་བཅོམ་པ་ཡིན་ཏེ། ཤིང་ཏ་ལའི་མགོ་གཅད་པ་བཞིན་དུ་རྩ་བ་ནས་ཆད་ནས་མ་འོངས་པ་ན་མི་སྐྱེ་བའི་ཆོས་ཅན་དུ་འགྱུར་རོ། །དེ་ལུས་ཡོངས་སུ་དག་པ་ཡིན་ཏེ་ལུས་མཚན་ཉིད་ཀྱིས་ལེགས་པར་བརྒྱན་པ་དང་། ལག་པ་དང་རྐང་པ་འཇམ་ཞིང་མཉེན་པ་དང་། བསོད་ནམས་
ཀྱི་རྒྱུ་འཐུན་པའི་ལུས་ཤིན་ཏུ་རྣམ་པར་ཕྱེ་བ་དང་། དབང་པོ་མ་ཚང་བ་མེད་པ་དང་། ཡན་ལག་དང་ཉིང་ལག་ཐམས་ཅད་ཡོངས་སུ་རྫོགས་པ་ཡིན་ཡང་གཟུགས་ཀྱིས་རྒྱགས་ཤིང་དྲེགས་པ་མེད་པ་ཡིན་ཏེ། ལུས་ཆེ་བའི་ཚུལ་དང་ལྡན་པ་མ་ཡིན་ནོ། །དེ་ཆོས་འཛིན་པ་ཉེ་བར་

བཟུང་ནས་སེམས་ཅན་ཇི་ཙམ་དུ་དམན་པ་གཟུགས་མ་ཚང་བ་རྣམས་ལ་ཡང་འདུད་དོ། །རབ་ཏུ་འདུད་དོ། །དེ་རང་གིས་ལུས་ཀྱི་ཆོས་ཉིད་ཀྱིས་སེམས་ཅན་ཐམས་ཅད་ཀྱི་ལུས་ཀྱི་ཆོས་མཉམ་པ་ཉིད་དུ་ཤེས་པ་ལ་འཇུག་གོ། །དེ་ལུས་ལ་ལུས་ཀྱི་ཆོས་ཉིད་ཤེས་ནས་ཆོས་ཀྱི་ལུས་ཡིན་གྱི་ཟང་
ཟིང་གི་ལུས་མ་ཡིན་ནོ། །དེ་ལ་ལུས་ཀྱི་ཆོས་ཉིད་གང་ཞེ་ན། གང་བསམ་གཏན་གྱི་ཟས་ཟ་བ་ཡིན་ཏེ། ཟང་ཟིང་གི་ཟས་ཟ་བ་མ་ཡིན་ཏེ། འཇིག་རྟེན་དང་འཐུན་པར་བྱ་བ་དང་སེམས་ཅན་ལ་སྙིང་བརྩེ་བའི་ཕྱིར་ཟས་ཟའི། ལུས་ཉམ་ཆུང་བའི་ཕྱིར་ནི་མ་ཡིན་ནོ། །དེ་ཆོས་ཀྱི་ལུས་སུ་གྱུར་
ནས་ཆོས་ཀྱིས་སྲོག་འཚོའི་ཟང་ཟིང་གིས་སྲོག་འཚོ་བ་ནི་མ་ཡིན་ནོ། །དེ་ལ་ཆོས་ཀྱིས་སྲོག་འཚོ་བ་གང་ཞེ་ན། གང་སྲོག་གི་ཕྱིར་ཡང་བྱ་བ་མ་ཡིན་པར་མི་བྱེད་པ་དང་། འཕགས་པའི་ཚུལ་ལས་མི་འདའ་བའོ། །དེ་ལ་འཕགས་པ་རྣམས་ཀྱི་ཚུལ་གང་ཞེ་ན། འདི་ལྟ་སྟེ། ཆགས་
པ་མེད་པ་དང་། སྡང་བ་མེད་པ་དང་། རྨོངས་པ་མེད་པ་དང་། ཉོན་མོངས་པ་ཐམས་ཅད་དང་བྲལ་བ་དང་། ཇི་ལྟར་བསླབ་པ་བཅས་པ་བཞིན་དུ་ཀུན་ཏུ་བསྲུང་བ་དང་། སྦེད་པ་དང་རབ་ཏུ་གནས་པ་འདི་ནི་འཕགས་པ་རྣམས་ཀྱི་ཚུལ་ཞེས་བྱའོ། །དེ་ལ་བྱང་ཆུབ་སེམས་
དཔའ་ཡེ་ཤེས་སྔོན་དུ་འགྲོ་བའི་ལུས་ཀྱི་ལས་དང་ལྡན་པས་མངོན་པར་ཤེས་པ་དང་། རྫུ་འཕྲུལ་གྱི་སྟོབས་ཐམས་ཅད་དང་ལྡན་པ་ཡིན་ཏེ། དེ་ལྷུན་གྱིས་གྲུབ་པར་སངས་རྒྱས་ཀྱི་ཞིང་ཐམས་ཅད་དུ་སྣང་བར་བྱེད་ཅིང་སངས་རྒྱས་ཀྱི་ཞིང་དེ་དག་ན་སེམས་ཅན་དེ་དག་གི །གཟུགས་དང་
མཚན་དང་གཟི་བརྗིད་དང་རྒྱན་རྣམས་ཅི་འདྲ་བར་བྱང་ཆུབ་སེམས་དཔའ་དེའི་ཡང་ལྷུན་གྱིས་གྲུབ་ཅིང་ཡོངས་སུ་བརྟགས་པ་མེད་པར་དེ་འདྲ་བར་གནས་སོ། །དེ་འོད་བཀོད་པའི་ལུས་དང་ལྡན་པ་ཡིན་ཏེ། དེ་གང་གི་ཚེ་ལུས་ལས་འོད་རབ་ཏུ་གཏོང་བ་དེའི་ཚེ་སངས་རྒྱས་ཀྱི་ཞིང་གྲངས་མེད་དཔག་ཏུ་
མེད་པ་རྣམས་སྣང་བས་ཁྱབ་པར་བྱེད་དོ། །དེའི་འོད་དེ་ནི་བདེ་བ་སྐྱེད་པ་སྟེ། སེམས་ཅན་དམྱལ་བ་ངན་སོང་བའི་སེམས་ཅན་ཐམས་ཅད་བདེ་བར་བྱེད་པའོ། །དེའི་འོད་དེ་ནི་བདེ་བ་ལ་རེག་པ་བྱེད་པ་སྟེ། ཉོན་མོངས་པས་གདུངས་པའི་སེམས་ཅན་ཐམས་ཅད་རབ་ཏུ་ཞི་བར་བྱེད་པའོ། །

དེའི་འོད་དེ་ནི་རབ་ཏུ་སིམ་པར་བྱེད་པ་སྟེ། སེམས་ཅན་རྣམས་ཀྱི་ལུས་དང་སེམས་དགའ་བ་བསྐྱེད་པའོ། །དེ་ལུས་ཉིད་ཀྱི་སེམས་ཅན་རྣམས་ལ་སངས་རྒྱས་ཀྱི་མཛད་པ་བྱེད་དེ། འདི་ནི་བྱང་ཆུབ་སེམས་དཔའི་ལུས་ཀྱི་ལས་ཡེ་ཤེས་སྔོན་དུ་འགྲོ་བའོ། །
བློ་གྲོས་རྒྱ་མཚོ་དེ་ལ་བྱང་ཆུབ་སེམས་དཔའི་ངག་གི་ལས་ཡེ་ཤེས་སྔོན་དུ་འགྲོ་བ་གང་ཞེ་ན། བློ་གྲོས་རྒྱ་མཚོ་འདི་ལ་བྱང་ཆུབ་སེམས་དཔའ་ནི་ཚིག་འཁྲུལ་པའི་སྐྱོན་ཐམས་ཅད་སྤངས་པར་ངག་གི་ལས་འབྱུང་ངོ་། །བློ་གྲོས་རྒྱ་མཚོ་དེ་ལ་ཚིག་འཁྲུལ་པའི་སྐྱོན་དེ་དག་གང་ཞེ་ན།
བློ་གྲོས་རྒྱ་མཚོ་བྱང་ཆུབ་སེམས་དཔའ་ནི་ཚིག་འཁྲུལ་པའི་སྐྱོན་དྲུག་ཅུ་རྩ་བཞི་དང་བྲལ་ཞིང་རྣམ་པར་སྤངས་པར་ངག་གི་ལས་འབྱུང་སྟེ། དྲུག་ཅུ་རྩ་བཞི་གང་ཞེ་ན། བློ་གྲོས་རྒྱ་མཚོ་འདི་ལ་བྱང་ཆུབ་སེམས་དཔའ་ནི་ཚིག་རྩུབ་པོ་མེད་པ་ཡིན། ཚིག་རྙོག་པ་མེད་པ་ཡིན། གྱོ་མོའི་སྒྲ་ལྟ་བུ་
མེད་པ་ཡིན། གྲུམ་པའི་སྒྲ་ལྟ་བུ་མེད་པ་ཡིན། སྒྲ་ཧ་ཅང་ཆེ་བ་མ་ཡིན། སྒྲ་ཧ་ཅང་ཆུང་བ་མ་ཡིན། སྒྲ་ཧ་ཅང་དྲག་པོ་མ་ཡིན། ཚིག་བརླང་པོ་མེད་པ་ཡིན། ཚིག་དིབ་དིབ་པོ་མེད་པ་ཡིན། ཚིག་ཅལ་ཅལ་པོ་མེད་པ་ཡིན། ཚིག་ཏབ་ཏབ་པོ་མེད་པ་ཡིན། ཁས་བུབ་
པའི་ཚིག་ལྟ་བུ་མེད་པ་ཡིན། ཚིག་ཉམས་པ་མེད་པ་ཡིན། ཟུར་དབྱུང་དགོས་པའི་ཚིག་མེད་པ་ཡིན། ཚིག་ཞུམ་པ་མེད་པ་ཡིན། ཚིག་སུབ་སུབ་པོ་མེད་པ་ཡིན། བྱིས་པའི་ཚིག་ལྟ་བུ་མེད་པ་ཡིན། ཚིག་ནོག་ནོག་པོ་མེད་པ་ཡིན། འབར་བར་བྱེད་པའི་ཚིག་མེད་པ་ཡིན།
ཅོ་འདྲི་བའི་ཚིག་མེད་པ་ཡིན། དུས་མི་ཤེས་པའི་ཚིག་མེད་པ་ཡིན། ཚོད་མི་ཤེས་པའི་ཚིག་མེད་པ་ཡིན། འདོད་ཆགས་ཀྱིས་རྗེས་སུ་ཆགས་པའི་ཚིག་མེད་པ་ཡིན། ཞེ་སྡང་གིས་ཞེ་འགྲས་པའི་ཚིག་མེད་པ་ཡིན། གཏི་མུག་གིས་རྨོངས་ཤིང་ལྐུགས་པའི་ཚིག་མེད་པ་
ཡིན། དམན་པའི་ཚིག་མེད་པ་ཡིན། མི་འཐུན་པ་དང་བརྙས་པའི་ཚིག་མེད་པ་ཡིན། འབྱེད་པར་བྱེད་པའི་ཚིག་མེད་པ་ཡིན། གཡོ་དང་འདྲེས་པའི་ཚིག་མེད་པ་ཡིན། ང་རྒྱལ་གྱིས་ཁེངས་པའི་ཚིག་མེད་པ་ཡིན། ཁྱད་དུ་གསོད་པའི་ཚིག་མེད་པ་ཡིན། ངོ་ཟ་རིང་

གི་ཚིག་མེད་པ་ཡིན། ཚིག་མི་སྙན་ཅིང་ཞེར་འདེབས་པའི་ཚིག་མེད་པ་ཡིན། མེད་པས་གླེང་བའི་ཚིག་མེད་པ་ཡིན། འཁྲུལ་ཅིང་གཤེ་བའི་ཚིག་མེད་པ་ཡིན། ཡང་དག་པ་མ་ཡིན་པའི་ཚིག་མེད་པ་ཡིན། འཕྲལ་དུ་བརྫུན་སྨྲ་བའི་ཚིག་མེད་པ་ཡིན། ཕྲ་མའི་ཚིག་
མེད་པ་ཡིན། ངག་རྩུབ་པོའི་ཚིག་མེད་པ་ཡིན། ཚིག་ཀྱལ་པའི་ཚིག་མེད་པ་ཡིན། མཛའ་བོ་དང་འབྱེད་པའི་ཚིག་མེད་པ་ཡིན། ཧ་ཅང་རྣོ་བའི་ཚིག་མེད་པ་ཡིན། ཧ་ཅང་མཉེན་པའི་ཚིག་མེད་པ་ཡིན། ཕལ་པའི་ཚིག་མེད་པ་ཡིན། ཀུན་ཏུ་མ་བསྲུངས་པའི་ཚིག་མེད་
པ་ཡིན། དུས་ལས་ལྷག་པར་སྨྲ་བའི་ཚིག་མེད་པ་ཡིན། གནོད་སེམས་འབར་བའི་ཚིག་མེད་པ་ཡིན། འཐབ་པ་དང་རྩོད་པ་དང་འགྱེད་པའི་ཚིག་མེད་པ་ཡིན། ཐོབ་ཀྱིས་འཇལ་བའི་ཚིག་མེད་པ་ཡིན། ཚིག་འགྱུར་བ་མེད་པ་ཡིན། ཚིག་མི་བརྟན་པ་མེད་པ་ཡིན། མུ་ཅོར་
སྨྲ་བའི་ཚིག་མེད་པ་ཡིན། གར་གྱི་ལྟད་མོའི་ཚིག་ལྟ་བུ་མེད་པ་ཡིན། ཆོས་དང་འགལ་བའི་ཚིག་མེད་པ་ཡིན། གསང་འཕེལ་བའི་ཚིག་མེད་པ་ཡིན། སེམས་ཅན་ལ་གནོད་པའི་ཚིག་མེད་པ་ཡིན། བདག་ལ་སྟོད་པའི་ཚིག་མེད་པ་ཡིན། གཞན་ལ་སྨོད་པའི་ཚིག་མེད་པ་
ཡིན། འཕྱ་བ་དང་སྟིང་བའི་ཚིག་མེད་པ་ཡིན། སངས་རྒྱས་དང་ཆོས་དང་དགེ་འདུན་ལ་འགལ་བའི་ཚིག་མེད་པ་ཡིན། འཕགས་པ་ལ་སྐུར་པ་འདེབས་པའི་ཚིག་མེད་པ་ཡིན། ངོ་མི་ཆོད་པའི་ཚིག་མེད་པ་ཡིན། ཚིག་འཁྲུལ་པའི་སྐྱོན་ཐམས་ཅད་དང་བྲལ་བའི་ཚིག་ཉིད་
ནི་ཚིག་དྲུག་ཅུ་རྩ་བཞི་པ་ཡིན་ཏེ། བློ་གྲོས་རྒྱ་མཚོ་བྱང་ཆུབ་སེམས་དཔའ་ངག་གི་ལས་ནི་ཚིག་འཁྲུལ་པའི་སྐྱོན་དྲུག་ཅུ་རྩ་བཞི་པོ་དེ་དག་དང་བྲལ་ཞིང་ཡོངས་སུ་དག་པར་འབྱུང་ངོ་། །དེའི་ངག་དེ་ནི་ཕྱད་པར་ལུང་སྟོན་པ་དང་། ཡང་དག་པར་ལུང་སྟོན་པ་དང་། དེ་ཁོ་ན་ལུང་
སྟོན་པ་དང་། བདེན་པ་རྣམ་པར་དགོད་པ་ལུང་སྟོན་པ་དང་། བདེན་པའི་རྗེས་སུ་འབྲང་བ་དང་། སེམས་ཅན་ཐམས་ཅད་ཀྱི་སྐད་ལ་འཇུག་པ་དང་། སེམས་ཅན་ཐམས་ཅད་ཀྱི་བསམ་པ་ལུང་སྟོན་པ་དང་། སེམས་ཅན་ཐམས་ཅད་ཚིམ་པར་བྱེད་པ་དང་། སེམས་ཅན་

ཐམས་ཅད་ཀྱི་དབང་པོ་སྐུལ་བར་བྱེད་པ་དང་། ཉོན་མོངས་པ་ཐམས་ཅད་རབ་ཏུ་ཞི་བར་བྱེད་པ་དང་། སངས་རྒྱས་ཀྱི་བྱིན་གྱིས་བརླབས་པ་དང་། ཆོས་དང་མི་འགལ་བ་དང་། བསོད་ནམས་ཀྱི་རྒྱུ་འཐུན་པ་ཤིན་ཏུ་རྣམ་པར་ཕྱེ་བ་དང་། ཟླ་བ་ལྟར་དྲི་མ་
མེད་ཅིང་སྙན་པ་དང་། འདོད་ཆགས་ཀུན་ཏུ་སྐྱེད་པ་མ་ཡིན་པ་དང་། ཚར་གཅད་ནས་ཡོན་ཏན་སྨྲ་བ་དང་། ཞེ་སྡང་མི་སྐྱེད་པ་དང་། ཟབ་ཅིང་གཏིང་དཔག་དཀའ་བ་དང་། གཏི་མུག་ཀུན་ཏུ་མི་སྐྱེད་པ་དང་། ཕྱོགས་བཅུར་གོ་བར་བྱེད་ཅིང་རྒྱས་པར་འགེངས་པ་དང་། ཚིག་དོན་
མེད་པ་མ་ཡིན་པ་དང་། ཐམས་ཅད་ཀྱི་རྗེས་སུ་ཞུགས་པ་དང་། མངོན་པར་འདུ་བྱ་བ་མེད་པའི་མཚན་ཉིད་དུ་འབྱུང་སྟེ། བློ་གྲོས་རྒྱ་མཚོ་འདི་ནི་བྱང་ཆུབ་སེམས་དཔའི་ངག་གི་ལས་ཡེ་ཤེས་སྔོན་དུ་འགྲོ་བའོ། །བློ་གྲོས་རྒྱ་མཚོ་དེ་ལ་བྱང་ཆུབ་སེམས་དཔའི་ཡིད་ཀྱི་ལས་ཡེ་ཤེས་
སྔོན་དུ་འགྲོ་བ་གང་ཞེ་ན། བློ་གྲོས་རྒྱ་མཚོ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཀྱི་འཇུག་པ་གཅིག་གིས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང་གཡོ་བ་རྣམས་རབ་ཏུ་ཤེས་སོ། །མཉམ་པར་བཞག་ཀྱང་སྤྱོད་ལམ་ཐམས་ཅད་ཀུན་ཏུ་སྟོན་ཅིང་ཏིང་ངེ་འཛིན་
དེ་ལས་ལྡང་བའང་མེད་དོ། །དེའི་སེམས་ཀྱི་ལས་ནི་བདུད་ཐམས་ཅད་ཀྱིས་ཀྱང་མི་ཤེས་སོ། །དེའི་སེམས་ཀྱི་འཇུག་པ་ནི་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་མི་ཤེས་སོ། །བྱང་ཆུབ་སེམས་དཔའ་དེ་ནི་བདག་ལ་གནོད་པར་བྱ་བ་དང་། གཞན་ལ་གནོད་པར་བྱ་བ་དང་།
གཉི་ག་ལ་གནོད་པར་བྱ་བ་མི་སེམས་སོ། །དེའི་སེམས་དང་ཡིད་དང་རྣམ་པར་ཤེས་པ་ནི་ཆོས་གང་ལ་ཡང་ཐོགས་པ་མེད་དོ། །དེ་ཆོས་ཐམས་ཅད་རིག་པར་ཡེ་ཤེས་མཐོང་བ་སྐྱེའོ། །སེམས་དང་ཡིད་དང་རྣམ་པར་ཤེས་པ་དེས་རིག་པ་མེད་པར་ཚོར་བ་ཡང་སོ་སོར་མྱོང་ལ། སངས་
རྒྱས་ཀྱི་ཆོས་རྣམས་ཡོངས་སུ་མ་རྫོགས་ཀྱི་བར་དུ་ཚོར་བ་འགོག་པ་མངོན་སུམ་དུ་ཡང་མི་བྱེད་དེ། བློ་གྲོས་རྒྱ་མཚོ་འདི་ནི་བྱང་ཆུབ་སེམས་དཔའི་ཡིད་ཀྱི་ལས་ཡེ་ཤེས་སྔོན་དུ་འགྲོ་བའོ། །བློ་གྲོས་རྒྱ་མཚོ་འདི་ནི་ཤིན་ཏུ་དཀར་བའི་དྲི་མ་མེད་པའི་ཕྱག་རྒྱའི་ཏིང་ངེ་འཛིན་དེའི་རྩ་བའི་གནས་ཏེ།

འདི་ལྟ་སྟེ། ཡེ་ཤེས་སྔོན་དུ་འགྲོ་བའི་ལུས་ཀྱི་ལས་དང་། ཡེ་ཤེས་སྔོན་དུ་འགྲོ་བའི་ངག་གི་ལས་དང་། ཡེ་ཤེས་སྔོན་དུ་འགྲོ་བའི་ཡིད་ཀྱི་ལས་སོ། །བློ་གྲོས་རྒྱ་མཚོ་གང་གི་ཚེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་སྔོན་དུ་འགྲོ་བའི་ལུས་དང་ངག་དང་ཡིད་ཀྱི་
ལས་རྣམས་དང་ལྡན་པར་གྱུར་པ་དེའི་ཚེ་ཤིན་ཏུ་དཀར་བའི་དྲི་མ་མེད་པའི་ཕྱག་རྒྱའི་ཏིང་ངེ་འཛིན་འདི་རབ་ཏུ་འཐོབ་བོ། །བློ་གྲོས་རྒྱ་མཚོ་དེ་ལ་ཆོས་བཅུ་ཤིན་ཏུ་དཀར་བའི་ཕྱིར་ཏིང་ངེ་འཛིན་འདི་ནི་ཤིན་ཏུ་དཀར་བ་ཞེས་བྱ་སྟེ། ཆོས་བཅུ་པོ་དེ་དག་གང་ཞེ་ན། འདི་ལྟ་སྟེ། བསམ་
པ་དང་ལྷག་པའི་བསམ་པ་ཡོངས་སུ་དག་པས་འཇུག་པའི་སྤྱོད་པ་ཤིན་ཏུ་དཀར་བ་ཡིན། ཕ་རོལ་ཏུ་ཕྱིན་པ་དྲུག་ཡོངས་སུ་དག་པས་བྱང་ཆུབ་སེམས་དཔའི་སྤྱོད་པ་ཤིན་ཏུ་དཀར་བ་ཡིན། དགེ་བའི་ཆོས་ཐམས་ཅད་ཡོངས་སུ་དག་པས་དཀར་པོ་རྣམ་པར་མཐོང་བའི་སྤྱོད་པ་ཤིན་ཏུ་རྣམ་
པར་དག་པ་ཡིན། གཏན་པ་མེད་པའི་མཆོད་སྦྱིན་བྱེད་པ་ཡོངས་སུ་དག་པས་མཚན་དང་དཔེ་བྱད་བཟང་པོ་ཡོངས་སུ་རྫོགས་པར་བྱེད་པའི་སྤྱོད་པ་ཤིན་ཏུ་དཀར་བ་ཡིན། ཇི་ལྟར་ཐོས་པའི་ཆོས་བསྒྲུབ་ཅིང་གཞན་ལ་གོ་བར་བྱེད་པ་ལ་མཁས་པ་ཡོངས་སུ་དག་པས་གཟུངས་དང་སྤོབས་པ་རབ་
ཏུ་འཐོབ་པའི་སྤྱོད་པ་ཤིན་ཏུ་དཀར་བ་ཡིན། འཁྲུལ་པ་དང་། སྒྲིབ་པ་དང་ཆོད་པ་དང་ཀུན་ནས་ལྡང་བ་ཐམས་ཅད་དང་བྲལ་བ་ཡོངས་སུ་དག་པས་དྲན་པ་དང་། ཏིང་ངེ་འཛིན་དང་། གཡེང་བ་མེད་པའི་ཤེས་པ་ཤིན་ཏུ་དཀར་བ་ཡིན། བག་ཡོད་པ་ཡོངས་སུ་དག་པས་བྱང་ཆུབ་ཀྱི་ཕྱོགས་
ཀྱི་ཆོས་ཤེས་པ་ཤིན་ཏུ་དཀར་བ་ཡིན། སེམས་དང་ཡིད་དང་རྣམ་པར་ཤེས་པ་ཡོངས་སུ་དག་པས་ཞི་གནས་དང་ལྷག་མཐོང་ཤེས་པ་ཤིན་ཏུ་དཀར་བ་ཡིན། ཕྱོགས་དང་མི་འཐུན་པའི་ཕྱོགས་དང་རྒྱུན་ཆད་པ་དང་ཆགས་པ་ལས། ཤིན་ཏུ་འདས་པ་ཡོངས་སུ་དག་པས་ས་བཅུ་གནོན་པའི་
ཡེ་ཤེས་ཤིན་ཏུ་དཀར་བ་ཡིན། མི་དགེ་བའི་ཆོས་ཐམས་ཅད་སྤང་བའི་ཕྱིར་དགེ་བའི་ཆོས་ཐམས་ཅད་ཡོངས་སུ་དག་པས་བྱང་ཆུབ་ཀྱི། སྙིང་པོའི་རྒྱན་གྱི་ཡེ་ཤེས་ཤིན་ཏུ་དཀར་བ་ཡིན་ཏེ། བློ་གྲོས་རྒྱ་མཚོ་ཆོས་བཅུ་པོ་དེ་དག་ཤིན་ཏུ་དཀར་བའི་ཕྱིར་ཏིང་ངེ་འཛིན་འདི་ཤིན་ཏུ་དཀར་

བ་ཞེས་བྱའོ།། །།འཕགས་པ་བློ་གྲོས་རྒྱ་མཚོས་ཞུས་པ། བམ་པོ་གསུམ་པ། བློ་གྲོས་རྒྱ་མཚོ་ཅིའི་ཕྱིར་དྲི་མ་མེད་པའི་ཕྱག་རྒྱ་ཞེས་བྱ་ཞེ་ན། བློ་གྲོས་རྒྱ་མཚོ་ཉི་ཤུ་པོ་འདི་དག་ནི་དྲི་མ་མེད་པའི་ཕྱག་རྒྱའི་སྒོ་ཡིན་ཏེ། དེ་དག་གིས་
ནི་ཏིང་ངེ་འཛིན་འདི་དྲི་མ་མེད་པའི་ཕྱག་རྒྱ་ཞེས་བྱའོ། །ཉི་ཤུ་པོ་དེ་དག་གང་ཞེ་ན། འདི་ལྟ་སྟེ། ངར་འཛིན་པ་ཡོངས་སུ་དག་པས་ནང་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། ང་ཡིར་འཛིན་པ་ཡོངས་སུ་དག་པས་ཕྱི་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། ལྟ་བར་སོང་བ་
ཐམས་ཅད་ཡོངས་སུ་དག་པས་འཇིག་ཚོགས་ཀྱི་ངོ་བོ་ཉིད་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། གདོད་མ་ནས་ཡོངས་སུ་དག་པའི་ཕྱིར་སེམས་ཅན་ཐམས་ཅད་བདག་མེད་པ་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། རོ་གཅིག་པའི་ཕྱིར་ཆོས་ཐམས་ཅད་མཉམ་པ་ཉིད་དུ་རྟོགས་པ་
ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། རྣམ་པར་ཐར་པ་ཐམས་ཅད་ཡོངས་སུ་དག་པའི་ཕྱིར་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། ཤིན་ཏུ་ཡོངས་སུ་དག་པའི་ཕྱིར་ནམ་མཁའ་ཡོངས་སུ་དག་པ་དྲི་མ་མེད་པའི་
ཕྱག་རྒྱ་དང་། ཐ་དད་དུ་བྱ་བ་མེད་པའི་ཕྱིར་སེམས་ཅན་གྱི་ཁམས་དང་ཆོས་ཀྱི་དབྱིངས་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། རང་གི་མངོན་པར་ཤེས་པ་ཡོངས་སུ་དག་པའི་ཕྱིར་མངོན་སུམ་དུ་ལེགས་པར་མཐོང་བ་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། རྟག་ཏུ་སྣང་བ་ཡོངས་
སུ་དག་པའི་ཕྱིར་ཉི་མའི་དཀྱིལ་འཁོར་ལྟར་རབ་ཏུ་གསལ་བ་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། ཆགས་པ་ཐམས་ཅད་དང་བྲལ་བ་ཡོངས་སུ་དག་པའི་ཕྱིར་དུས་གསུམ་ལ་ཆགས་པ་མེད་པའི་ཡེ་ཤེས་མཐོང་བ་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། རྣམ་པར་ཤེས་པ་དང་
ཡེ་ཤེས་གནས་པ་མེད་པའི་ཕྱིར་རྣམ་པར་རིག་པའི་སྒོ་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། འདུས་བྱས་ཀྱི་ངོ་བོ་ཉིད་ཡོངས་སུ་དག་པའི་ཕྱིར་འདུས་མ་བྱས་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། རྐྱེན་ཤིན་ཏུ་བརྟགས་པའི་ཕྱིར་རྟེན་ཅིང་འབྲེལ་པར་འབྱུང་བ་རྟོགས་པ་ཡོངས་སུ་

དག་པ་དྲི་མ་མེད་པའི་ཕྱག་རྒྱ་དང་། ཡང་དག་པར་ཤེས་པ་རྫི་བ་མེད་པ་ཡོངས་སུ་དག་པའི་ཕྱིར་སྟོབས་དང་མི་འཇིགས་པ་དང་། སངས་རྒྱས་ཀྱི་ཆོས་ཀྱི་རྗེས་སུ་འགྲོ་བ་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། སྔོན་ཡོངས་སུ་སྦྱང་བ་བྱས་པ་ཡོངས་སུ་དག་པའི་ཕྱིར།
སངས་རྒྱས་ཀྱི་ཆོས་རྟོགས་པའི་མཚན་ཉིད་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། སེམས་ཅན་ཐམས་ཅད་ཡོངས་སུ་མི་གཏོང་བའི་ཕྱིར་བྱམས་པ་ཆེན་པོ་དང་སྙིང་རྗེ་ཆེན་པོ་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། མཐའ་ཐམས་ཅད་དང་བྲལ་བ་ཡོངས་སུ་དག་པའི་ཕྱིར།
བདུད་དང་ཕྱིར་རྒོལ་བ་བཅོམ་པ་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། ཆོས་རྣམས་ཀྱི་རང་བཞིན་ཡོངས་སུ་དག་པའི་ཕྱིར་ཉོན་མོངས་པའི་བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་འཇོམས་པ་ཡོངས་སུ་དག་པ་དྲི་མ་མེད་པའི་ཕྱག་རྒྱ་དང་། ཡང་དག་པར་བླངས་པ་
ཡོངས་སུ་རྫོགས་པར་བྱེད་པ་ཡོངས་སུ་དག་པའི་ཕྱིར་སེམས་ཀྱི་སྐད་ཅིག་གཅིག་གིས་སངས་རྒྱས་ཀྱི་ཆོས་ཐམས་ཅད་ཀྱི་སྒོ་རྟོགས་པ་ཡོངས་སུ་དག་པ་དྲི་མ་མེད་པའི་ཕྱག་རྒྱ་སྟེ། བློ་གྲོས་རྒྱ་མཚོ་དྲི་མ་མེད་པའི་ཕྱག་རྒྱའི་སྒོ་ཉི་ཤུ་པོ་དེ་དག་གིས་ཏིང་ངེ་འཛིན་འདི་དྲི་མ་མེད་པའི་ཕྱག་རྒྱ་ཞེས་
བྱ་སྟེ། བློ་གྲོས་རྒྱ་མཚོ་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་ནས་ཏིང་ངེ་འཛིན་གང་རབ་ཏུ་འཐོབ་པའི་ཏིང་ངེ་འཛིན་འདི་ནི་ཤིན་ཏུ་དཀར་བ་དྲི་མ་མེད་པའི་ཕྱག་རྒྱ་ཞེས་བྱའོ། །ཏིང་ངེ་འཛིན་འདི་ཐོབ་མ་ཐག་ཏུ་ཤུགས་ཆེན་པོ་མ་འདྲེས་པ་བརྒྱད་འབྱུང་བར་འགྱུར་ཏེ། བརྒྱད་གང་
ཞེ་ན། འདི་ལྟ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་རྡོ་རྗེར་གནས་པར་འགྱུར་བ་འདི་ནི་ཤུགས་ཆེན་པོ་མ་འདྲེས་པ་འབྱུང་བ་དང་པོའོ། །ཤིང་ལྗོན་པ་ཐམས་ཅད་ལ་ལོ་མ་དང་། མེ་ཏོག་དང་། འབྲས་བུ་སྣ་ཚོགས་ཆགས་ཏེ་བྱང་ཆུབ་ཀྱི་ཤིང་
ག་ལ་བ་དེ་ལོགས་སུ་འདུད་ཅིང་འདུད་ལ་རབ་ཏུ་འདུད་དེ་མངོན་པར་རབ་ཏུ་འདུད་པར་འགྱུར་བ་དང་། སེམས་ཅན་ཐམས་ཅད་ཀྱང་སྐད་ཅིག་དེ་ལ་ཉོན་མོངས་པ་ཐམས་ཅད་ཀྱི་གནོད་པར་མི་འགྱུར་བ་དང་། ངན་སོང་བའི་སེམས་ཅན་ཐམས་ཅད་ཀྱིས་བྱང་ཆུབ་ཀྱི་སྙིང་པོ་ལ་འདུག་པའི་བྱང་ཆུབ་

སེམས་དཔའ་མཐོང་སྟེ། མཐོང་ནས་ཀྱང་བདེ་བ་ཐམས་ཅད་ཀྱིས་ཚིམ་པར་འགྱུར་བ་དང་། འཇིག་རྟེན་གྱི་ཁམས་ཐམས་ཅད་དུ་ཡང་བར་གྱི་འཇིག་རྟེན་གྱི་ཁམས་རྣམས་གསེར་གྱི་ཁ་དོག་ལྟ་བུའི་འོད་ཀྱིས་ཁྱབ་པར་འགྱུར་བ་དང་། ས་གཡོ་བ་ཆེན་པོ་འཇིག་རྟེན་
དུ་འབྱུང་བར་འགྱུར་ཞིང་སེམས་ཅན་གང་ལའང་རྣམ་པར་གནོད་པར་མི་འགྱུར་བ་དང་། ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ཞལ་སྟོན་ཅིང་མི་འཇིགས་པས་དབུགས་འབྱིན་པར་མཛད་དེ། དེད་དཔོན་ཆེན་པོ་རྒྱལ་བར་གྱུར་ཅིག །རྒྱལ་བར་གྱུར་ཅིག་ཅེས་
གསུང་བརྗོད་པར་འགྱུར་བ་དང་། སེམས་ཀྱི་སྐད་ཅིག་གཅིག་ལ་སངས་རྒྱས་ཀྱི་ཆོས་ཐམས་ཅད་ཆུབ་པར་འགྱུར་བ་སྟེ། བློ་གྲོས་རྒྱ་མཚོ་ཤིན་ཏུ་དཀར་བ་དྲི་མ་མེད་པའི་ཕྱག་རྒྱའི་ཏིང་ངེ་འཛིན་ཐོབ་མ་ཐག་ཏུ་ཤུགས་ཆེན་པོ་མ་འདྲེས་པ་བརྒྱད་པོ་དེ་དག་འབྱུང་བར་འགྱུར་རོ། །འདི་
ལྟར་ཏིང་ངེ་འཛིན་འདིའི་མཐུས་འདིར་ཡོན་ཏན་གྱི་རྒྱུ་དཔག་ཏུ་མེད་པར་ཡང་ཀུན་ཏུ་སྣང་ངོ་། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །ཆོས་འདི་དྲི་མེད་དག་དགེ་རང་བཞིན་འོད་གསལ་ཏེ། །ནམ་མཁའ་མཚུངས་ཤིང་མཉམ་ལ་གདོད་ནས་
བྱུང་བ་མེད། །མ་སྐྱེས་མ་བྱུང་གནས་པ་མེད་ཅིང་འགགས་པ་མེད། །འདི་ནི་རྒྱལ་བའི་ཕྱག་རྒྱ་དྲི་མེད་གཡོ་བ་མེད། །དེ་ཡི་རྩ་བའི་གནས་ནི་དབྱེ་བ་མེད་པའི་གཟུངས། །བྱམས་པ་དང་ནི་སྙིང་རྗེ་སྒོམ་པ་ཟུང་དུ་འབྲེལ། །དེས་ན་འགྲོ་བ་ཀུན་གྱིས་བཀུར་ཀྱང་དགའ་བ་མེད། །བསྟི་
སྟང་མ་བྱས་ཡི་འཆད་མེད་དེ་མཉམ་པའི་བློ། །དེ་ནི་མཉམ་པའི་ཆོས་ལས་ཡེ་ཤེས་སྐྱེས་གྱུར་ནས། །གཏི་མུག་མུན་པ་ཐམས་ཅད་བཅོམ་སྟེ་རྨོངས་པ་མེད། །ཡེ་ཤེས་ལྡན་པ་ཡིན་གྱིས་ང་རྒྱལ་ལྡན་པ་མིན། །ངེས་བསམ་མཉམ་ཆོས་ཤེས་ནས་ཤིན་ཏུ་རྣམ་པར་དག །མཁས་
པ་ལུས་ངག་ཡིད་ཀྱིས་ལས་ནི་གང་བྱེད་པ། །ཐམས་ཅད་ཤེས་པས་བྱས་ཏེ་འགྲོ་ལ་བདེ་བ་བྱེད། །དེ་ལུས་རྣམ་པར་དག་པ་སེམས་ཅན་མང་པོས་མཐོང་། །རྒྱལ་བའི་ཡེ་ཤེས་རྡུལ་མེད་བླ་ན་མེད་ལ་སྨོན། །དེ་ཡི་སྤྱོད་ལམ་རྟག་ཏུ་བསྡམས་ཏེ་འཁྲུལ་པ་མེད། །ལྷུན་གྱིས་གྲུབ་

སྟེ་ཐ་མར་མི་རྟོག་རྣམ་རྟོག་མེད། །ལུས་ཀྱི་ཉེས་པ་མཐའ་ཡས་ཇི་ཙམ་གང་བརྗོད་པ། །དེ་དག་དེ་ལ་ཆད་དེ་གདོད་ནས་སྐྱེས་པ་མེད། །དེ་ལུས་མཚན་གྱིས་བརྒྱན་ཏེ་ཤིན་ཏུ་རྣམ་པར་ཕྱེ། །དེ་ཡི་རྐང་མཐིལ་འཇམ་ཞིང་བསོད་ནམས་རྣམས་ལས་བྱུང་། །དབང་པོ་ཐམས་ཅད་ཡོངས་སུ་རྫོགས་
པས་ལུས་མཛེས་ཀྱང་། །མཁས་པ་གཟུགས་ཀྱིས་རྒྱགས་པས་རློམ་སེམས་བྱེད་པ་མེད། །དམན་ཞིང་དབུལ་བས་སྡུག་བསྔལ་སེམས་ཅན་མང་པོ་གང་། །དེ་དག་ལ་ཡང་གུས་བཅས་འདུད་ཅིང་རབ་ཏུ་འདུད། །བདག་ནི་ཆོས་འཛིན་གྱུར་ཅིག་སྙམ་སྟེ་ང་རྒྱལ་མེད། །ཆོས་མཉན་
དེས་ནི་བྱང་ཆུབ་དམ་པ་ཐོབ་པར་འགྱུར། །དེ་ཡིས་རང་གི་ལུས་ཀྱི་ཆོས་ཉིད་ཤེས་ནས་ནི། །དེ་ཡི་སེམས་ཅན་ཀུན་ལུས་དེ་ལྟར་རྟོགས་པས་ན། །དེ་ནི་ཆོས་ལུས་རྡུལ་དང་བྲལ་བ་ཐོབ་འགྱུར་ཏེ། །ཟང་ཟིང་ལུས་མིན་ཉོན་མོངས་རྣམས་ལས་ཤིན་ཏུ་གྲོལ། །རྟག་ཏུ་ཏིང་འཛིན་སྤྱོད་ཡུལ་བསམ་
གཏན་ཟས་ཅན་འགྱུར། །གཟི་བརྗིད་ཆེན་པོ་ལ་ནི་ཟང་ཟིང་ལུས་མི་སྲིད། །སེམས་ཅན་དོན་དུ་ཁ་ཟས་ཟ་ཡི་སྟོབས་ཕྱིར་མིན། །འཆི་མེད་དོན་དུ་དེ་ནི་ཆོས་ཀྱིས་སྲོག་ཀྱང་འཚོ། །འཕགས་པ་ཚུལ་ནི་རྟག་བསྲུང་ཤིན་ཏུ་རབ་ཏུ་ཞི། །འདོད་ཆགས་ཞེ་སྡང་གཏི་མུག་ཤིན་ཏུ་རྣམ་པར་ཕྱེ། །
བསླབ་པ་སྦེད་པར་གནས་ཤིང་རྒོད་མེད་འཐུན་པར་བྱེད། །མཁས་པ་བདག་གཏོང་བྱེད་ཀྱི་སྡིག་པ་བྱེད་མ་ཡིན། །རྫུ་འཕྲུལ་གྱིས་ནི་བྱེ་བ་ཕྲག་མང་ཞིང་སོང་ནས། །སེམས་ཅན་ལུས་དང་འཐུན་པར་བྱས་ཏེ་ཆོས་ཀྱང་སྟོན། །འགྲོ་བའི་གཟུགས་དང་མཚན་དང་རྟགས་ནི་ཅི་འདྲ་བ། །དེ་
ཡི་ལུས་ནི་དེ་ལྟ་བུ་དང་མཚུངས་པར་འགྱུར། །དེ་ཡི་ལུས་ལས་ཤིན་ཏུ་རྣམ་དག་འོད་བྱུང་སྟེ། །དེས་ནི་ཕྱོགས་བཅུ་མཐའ་ཡས་ཞིང་རྣམས་ཁྱབ་པར་བྱེད། །དེ་ཡི་འོད་དེ་བསོད་ནམས་གཟི་ལྡན་རེག་ན་འཇམ། །སྲོག་ཆགས་ཉོན་མོངས་གདུང་བ་ཐམས་ཅད་ཞི་བར་བྱེད། །སེམས་
དམྱལ་རྣམས་ན་སེམས་ཅན་བརྒྱ་དག་སྡུག་བསྔལ་བ། །དེ་དག་འོད་ཀྱིས་རེག་མ་ཐག་ཏུ་བདེ་བར་འགྱུར། །ལུས་དང་ཡིད་ཀྱང་དགའ་བར་འགྱུར་བ་རབ་ཏུ་འཐོབ། །དེ་ནི་སེམས་ཅན་དམྱལ་ལས་རབ་ཏུ་ཐར་བའི་རྒྱུ། །འདི་དག་དང་ནི་གཞན་ཡང་ལུས་ལས་ཡོངས་སྦྱངས་པ། །

མཐའ་ཡས་ལུས་རྣམས་ཡེ་ཤེས་ཀྱིས་ནི་རྣམ་པར་ཕྱེ། །མཁས་པ་ཤིན་ཏུ་དུལ་བ་སངས་རྒྱས་མཛད་པ་བྱེད། །རྡུལ་བྲལ་རྣམས་ཀྱི་ལུས་ཀྱི་ལས་འདི་དེ་འདྲའོ། །དེ་དག་ཚིག་ནི་རྣམ་དག་སྒྲ་སྙན་ཡིད་དུ་འོང་། །དེས་ནི་ལྷ་དང་ལྷ་མིན་འགྲོ་ཀུན་ཚིམ་པར་བྱེད། །
དེ་སྨྲ་བ་ན་འཆད་པ་དོན་མེད་མི་འགྱུར་ཏེ། །ཐེག་པ་བདུད་རྩི་འདུས་བྱས་མིན་འདིར་ངེས་པར་འབྱུང་། །དག་ལས་ངག་གིས་ཉེས་པ་ངེས་མང་གང་ཡོད་པ། །དེ་དག་དེ་ཡི་བསོད་ནམས་དག་པས་ཀུན་ཏུ་ཆད། །སྐད་རྣམས་མཚུངས་ཤིང་སྒྲ་མཚུངས་གྱུར་པས་སེམས་ཅན་རྣམས། །
སྒྲ་དང་ངག་ལས་ཇི་སྙེད་ཀུན་གྱིས་ཚིམ་པར་བྱེད། །དེ་ཡི་ངག་ནི་ཕྱད་ཅིང་མཉམ་ལ་ཡང་དག་མིན། །ཡང་དག་ལུང་སྟོན་བསྒྲིབས་པ་མེད་ཅིང་མཉམ་པར་བཞག །ཚིག་གང་སྨྲས་པ་དེ་ཡང་དེ་བཞིན་འགྱུར་བ་སྟེ། །བདེན་པའི་རྗེས་སུ་འབྲང་བའི་ཤེས་པས་ཤིན་ཏུ་དག །ཉོན་
མོངས་ཐ་བ་མེད་ཅིང་འདོད་ཆགས་རབ་ཏུ་ཞི། །ཚར་བཅད་ཡོན་ཏན་སྨྲ་ཞིང་སྐྱོན་ལས་ཤིན་ཏུ་གྲོལ། །ཟབ་ཅིང་གཏིང་དཔག་དཀའ་ལ་ཤིན་ཏུ་ཆད་པ་སྟེ། །དོན་རྣམས་བྱེད་ཅིང་ཞིང་སྟོང་དག་ཏུ་ཁྱབ་པར་བྱེད། །རྟོག་པ་མེད་པར་ཚིག་འདི་རབ་ཏུ་སྨྲ་བར་བྱེད། །རང་གི་ངང་གིས་བྱུང་ནས་
ཇི་ལྟར་ཐར་འགྱུར་སྨྲ། །རྟག་ཏུ་ས་བཞིན་སེམས་ཅན་དབང་པོ་ཚིམ་པར་བྱེད། །རྣམ་པར་སྤྱོད་བྱེད་ཚིག་མཆོག་འདིས་ནི་ཤེས་པས་བྱས། །དེ་ཡི་ཡིད་ལས་རྟག་ཏུ་བསྒྲིབས་མེད་ལེགས་པར་བྱས། །སེམས་ཀྱི་སྐད་ཅིག་གཅིག་གིས་འགྲོ་བའི་སེམས་རྣམས་ཤེས། །དེ་ནི་གཡེང་མེད་
ཏིང་ངེ་འཛིན་ལས་ཉམས་པ་མེད། །ཁྱུ་མཆོག་དེ་ཡི་རྒྱུ་བ་བདུད་ཀྱིས་ཤེས་མ་ཡིན། །དེ་ཡི་སེམས་ཡིད་རྣམ་རྟོག་ཤིན་ཏུ་ཟབ་པ་སྟེ། །རང་རྒྱལ་རྣམས་དང་ཉན་ཐོས་ཀུན་གྱིས་ཤེས་པར་དཀའ། །བདག་དང་གཞན་ལ་རྣམ་པར་མི་འཚེ་རྗེས་ཆགས་མེད། །ཁོང་ཁྲོ་མེད་ཅིང་ཁེངས་
པ་མེད་ཅིང་མཉམ་པའི་བློ། །མཁས་པ་དེ་ནི་འགྲོ་ལ་རིགས་བཞིན་ཤེས་པ་འཇུག །ཚོར་བ་མ་ཡིན་སེམས་པ་མ་ཡིན་རྣམ་རྟོག་མིན། །འཆི་མེད་དོན་དུ་བྱང་ཆུབ་གནས་སུ་ཕྱིན་བར་དུ། །ཚོར་བ་འགོག་ལ་བདེ་བར་རྟོགས་པ་བྱེད་མ་ཡིན། །ཆོས་བཅུ་དེ་དག་གང་ལ་རྟག་ཏུ་དག་

གྱུར་པ། །ཁྱུ་མཆོག་དེ་ལ་ཏིང་འཛིན་འདི་ནི་མངོན་དུ་གྱུར། །གང་ཚེ་འཇུག་པའི་སྤྱོད་པ་རྣམ་པར་སྦྱངས་གྱུར་པ། །དཀར་པོའི་ལམ་རྣམས་ཀུན་གྱིས་འཕགས་ཤིང་ཡོངས་སུ་དག །ས་རྣམས་ཇི་བཞིན་ཕ་རོལ་ཕྱིན་པ་ཀུན་སྦྱངས་ཏེ། །དགེ་བ་རྒྱ་ཆེན་ཐམས་ཅད་ཀྱིས་ནི་མངོན་
པར་འཕགས། །བསོད་ནམས་འབྲས་བུས་མཚན་ཀུན་ཤིན་ཏུ་རྣམ་པར་དག །སྤོབས་པས་ཀྱང་ནི་གཟུངས་རྣམས་མཐར་ཐུག་མེད་པར་འགྱུར། །མཁས་པ་རྟག་ཏུ་ཐོས་པའི་ཆོས་རྣམས་སྒྲུབ་པར་གནས། །མཁས་པ་རྟག་ཏུ་དྲན་ལ་མཉམ་བཞག་འཁྲུལ་པ་མེད། །དེ་ལ་ཀུན་
ནས་ལྡང་བ་རྣམས་དང་འཁྲུལ་པ་ནི། །ཕྲ་རབ་མཐོང་བར་མི་ནུས་སྒྲིབ་ཀུན་རྣམ་པར་དག །བྱང་ཆུབ་ཕྱོགས་ཆོས་རྒྱ་ཆེན་མཐའ་ཡས་གང་ཡིན་པ། །ཐམས་ཅད་དེ་ཡི་བག་ཡོད་པ་ལ་འདུ་བར་འགྱུར། །ཞི་གནས་མཐར་གྱུར་ལྷག་མཐོང་གིས་ནི་རྟག་ཏུ་ཤེས། །ས་བཅུ་པོ་ནི་
གནོན་པར་འགྱུར་ཞིང་ཆགས་པ་མེད། །བྱང་ཆུབ་སྙིང་པོ་སྤྱད་ཕྱིར་ཤིན་ཏུ་རྫོགས་པར་སྨྲ། །དེ་ནི་མི་དགེ་ཀུན་སྤངས་དགྲ་ལས་རྒྱལ་བར་འགྱུར། །དགེ་བའི་ཆོས་རྣམས་ཀུན་གྱིས་འཕགས་པ་རི་རབ་བཞིན། །དེ་ནི་བསམ་ཡས་དྲི་མེད་འོད་འདི་རབ་ཏུ་ཐོབ། །ཏིང་འཛིན་
འདི་ཐོབ་མཁས་དེ་བསོད་ནམས་བྱས་ནས་ནི། །ཡོངས་སུ་དག་པའི་ཆོས་མཆོག་ཉི་ཤུ་རབ་ཏུ་འཐོབ། །དེ་དག་གི་ནི་འགྲོ་བ་ཀུན་ནའང་ཉི་བཞིན་ལྷང་། །རྒྱལ་བའི་ཡེ་ཤེས་བླ་ན་མེད་པའི་བྱང་ཆུབ་རེག །ཤིང་གི་དྲུང་དུ་ཤུགས་བརྒྱད་བསམ་དུ་མེད་ཐོབ་ནས། །དེ་དག་གིས་ནི་
ཞིང་བརྒྱ་དག་ན་འགྲོ་དོན་བྱེད། །སངས་རྒྱས་མི་འཇིགས་བྱིན་ཞིང་འགྲོ་བའི་དཔའ་བོ་དེ། །བདུད་རྣམས་བཏུལ་བར་བྱས་ནས་བྱང་ཆུབ་མཆོག་ལ་རེག །རྒྱལ་བའི་ཕྱག་རྒྱ་སྤྱངས་པ་ཐོབ་པར་གྱུར་ནས་ནི། །ཡོན་ཏན་འདི་འདྲ་དེ་ཀུན་བསམ་གྱིས་མི་ཁྱབ་འགྱུར། །དེ་ལྟ་
བས་ན་མི་གང་ཡོན་ཏན་ཕྲེང་འདོད་པ། །དེ་མྱུར་བྱང་ཆུབ་སེམས་ལ་བརྩོན་འགྲུས་བརྟན་པ་བསྐྱེད། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་རྒྱ་མཚོ་ལ་བཀའ་སྩལ་པ། བློ་གྲོས་རྒྱ་མཚོ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་

ཆེན་པོ་ཤིན་ཏུ་དཀར་བ་དྲི་མ་མེད་པའི་ཕྱག་རྒྱའི་ཏིང་ངེ་འཛིན་འདི་ཐོབ་པར་འདོད་པས་རྙོག་པ་མེད་པའི་སེམས་དང་། འཁྲུགས་པ་མེད་པའི་སེམས་ཀྱིས་ཤིན་ཏུ་དཀར་ཞིང་དྲི་མ་མེད་པའི་བློ་དང་ལྡན་པར་བྱའོ། །དེ་ལ་རྙོག་པ་མེད་པའི་སེམས་དེ་ནི་གང་སེམས་རང་
བཞིན་གྱིས་འོད་གསལ་བ་ལ་གློ་བུར་གྱིས་ཉོན་མོངས་པ་རྣམས་ཀྱི་སྐབས་མེད་པ་དང་། འོད་གསལ་བའི་ཆོས་མི་འགྱུར་བ་ཉིད་དང་། ཡིད་ལ་བྱེད་པ་ཐམས་ཅད་ཀུན་ཏུ་མི་འབྱུང་བ་དང་། འདོད་ཆགས་དང་བྲལ་ཏེ་རྡུལ་མེད་པ་དང་། ཞེ་སྡང་དང་བྲལ་ཏེ་རྟོག་པ་མེད་པ་
དང་། གཏི་མུག་དང་བྲལ་ཏེ་མུན་པ་མེད་པ་དང་། དག་པ་དང་། རྣམ་པར་དག་པ་དང་། ཤིན་ཏུ་དྲི་མ་མེད་པ་དང་། རྣམ་པར་གྲོལ་བ་ལས་བྱུང་བ་དང་། རྣམ་པར་གྲོལ་བ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ཏེ། དེ་བཞིན་ཉིད་དང་མཉམ་པའི་རྗེས་སུ་ཞུགས་
པ་དང་། རྣམ་པར་གྲོལ་བ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ཏེ་ཆོས་ཀྱི་དབྱིངས་དང་མཉམ་པའི་རྗེས་སུ་ཞུགས་པ་དང་། རྣམ་པར་གྲོལ་བ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ཏེ། ཡང་དག་པའི་མཐའ་དང་མཉམ་པའི་རྗེས་སུ་ཞུགས་པ་དང་། རྣམ་པར་གྲོལ་བ་
ཇི་ལྟ་བར་ཆོས་ཐམས་ཅད་ཀྱང་དེ་བཞིན་ཏེ། སྟོང་པ་ཉིད་དུ་མཉམ་པའི་རྗེས་སུ་ཞུགས་ཤིང་མཚན་མ་མེད་པ་དང་སྨོན་པ་མེད་པ་དང་། མངོན་པར་འདུ་བྱ་བ་མེད་པ་དང་། མ་སྐྱེས་པ་དང་། སྐྱེ་བ་མེད་པ་དང་། འགག་པ་མེད་པར་མཉམ་པའི་རྗེས་སུ་ཞུགས་པ་དང་། རྣམ་པར་
གྲོལ་བ་ཇི་ལྟ་བར་འདུས་བྱས་ཀྱི་ཆོས་ཐམས་ཅད་དེ་བཞིན་ཏེ། དེ་བཞིན་དུ་འདུས་མ་བྱས་ཀྱི་ཆོས་མཉམ་པ་ཉིད་ཀྱིས་མཉམ་པའི་རྗེས་སུ་ཞུགས་པ་སྟེ། གང་འདི་ལ་མཉམ་པ་ཉིད་ཀྱི་རྗེས་སུ་འགྲོ་བའི་ཡེ་ཤེས་གདེགས་པ་དང་གཞག་པ་མེད་པ་འདི་ནི་རྙོག་པ་མེད་པའི་སེམས་ཞེས་བྱའོ། །
གང་གི་ཚེ་ཆོས་འདི་དག་སེམས་ཅན་གཞན་དང་། གང་ཟག་གཞན་དག་ལ་སྟོན་ཀྱང་བདག་དང་གཞན་དུ་རྣམ་པར་འཁྲུགས་པ་མེད་པ་འདི་ནི་རྙོག་པ་མེད་པའི་སེམས་སོ། །གང་གི་ཚེ་བྱང་ཆུབ་སེམས་དཔའ་སེམས་རྙོག་པ་མེད་ཅིང་འཁྲུགས་པ་མེད་པར་གྱུར་པ་དེའི་ཚེ་ཤིན་ཏུ་དཀར་བ་དྲི་

མ་མེད་པའི་ཕྱག་རྒྱའི་ཏིང་ངེ་འཛིན་འདི་རབ་ཏུ་འཐོབ་བོ། །བློ་གྲོས་རྒྱ་མཚོས་གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་ཟབ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་རྒྱ་མཚོ་གཏིང་མི་དམིགས་པའི་ཕྱིར་རོ། །གསོལ་པ་བཅོམ་ལྡན་འདས་ཏིང་
ངེ་འཛིན་འདི་ནི་བལྟ་དཀའ་བ་ལགས་སོ། །བཀའ་སྩལ་པ། གཉིས་དང་བྲལ་བའི་ཕྱིར་རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་རྟོགས་པར་དཀའ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ང་རྒྱལ་གྱིས་ལྷག་པར་སེམས་པ་ལྷག་པར་མི་ཕྱེད་པའི་ཕྱིར་རོ། །
གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་རྣམ་པར་འཚལ་བར་དཀའ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྣམ་པར་ཤེས་པ་དང་ཡེ་ཤེས་མཉམ་པ་ཉིད་དུ་རྟོགས་པའི་ཕྱིར་རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་གསལ་བ་ལགས་
སོ། །བཅོམ་ལྡན་འདས་ཀྱིས་བཀའ་སྩལ་པ། སྒྲིབ་པ་མེད་པའི་རྣམ་པར་ཐར་པ་རབ་ཏུ་ཐོབ་པའི་ཕྱིར་རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་ཤིན་ཏུ་ཕྲ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དཔེ་རྣམ་པར་གཞག་པ་དང་བྲལ་བའི་ཕྱིར་
རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་སྙིང་པོ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྡོ་རྗེ་ལྟ་བུའི་ཡེ་ཤེས་རབ་ཏུ་ཐོབ་པའི་ཕྱིར་རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་དབྱེར་མ་མཆིས་པ་ལགས་སོ། །བཅོམ་ལྡན་འདས་ཀྱིས་
བཀའ་སྩལ་པ། སྔོན་གྱི་མཐའ་དང་ཕྱི་མའི་མཐའ་དབྱེར་མེད་པའི་ཕྱིར་རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་ཆགས་པ་མ་མཆིས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཆགས་པའི་ལམ་ཐམས་ཅད་ལས་ཤིན་ཏུ་འདས་པའི་ཕྱིར་
རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་སྣང་བར་གྱུར་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གཏི་མུག་གི་མུན་པ་དང་བྲལ་བའི་ཕྱིར་རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་རྣམ་པར་དག་པ་ལགས་སོ། །བཅོམ་

ལྡན་འདས་ཀྱིས་བཀའ་སྩལ་པ། ཤིན་ཏུ་ཀུན་ནས་ཉོན་མོངས་པ་མེད་པའི་ཕྱིར་རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་དྲི་མ་མ་མཆིས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འདོད་ཆགས་ཀྱི་རྡུལ་དང་བྲལ་བའི་ཕྱིར་རོ། །
གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་རྒྱུ་བ་མ་མཆིས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁམས་གསུམ་དུ་མི་རྒྱུ་བའི་ཕྱིར་རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་སྤྲོས་པ་མ་མཆིས་པ་ལགས་སོ། །བཅོམ་ལྡན་འདས་
ཀྱིས་བཀའ་སྩལ་པ། སྤྲོས་པ་ཐམས་ཅད་དང་བྲལ་བའི་ཕྱིར་རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་ནི་མི་གཡོ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་མཐར་ཐུག་པའི་ཕྱིར་རོ། །གསོལ་པ། བཅོམ་ལྡན་འདས་ཏིང་ངེ་འཛིན་འདི་
ནི་ཐམས་ཅད་ཀྱི་རྗེས་སུ་ཞུགས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ནམ་མཁའ་དང་མཚུངས་ཤིང་མཉམ་པའི་ཕྱིར་རོ། །བློ་གྲོས་རྒྱ་མཚོས་གསོལ་པ། བཅོམ་ལྡན་འདས་བརྩོན་འགྲུས་བརྩམས་པ་ཅི་འདྲ་བ་ཞིག་གིས་ཤིན་ཏུ་དཀར་བ་དྲི་མ་མེད་པའི་
ཕྱག་རྒྱའི་ཏིང་ངེ་འཛིན་འདི་ཐོབ་པར་ནུས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་རྒྱ་མཚོ་འདི་ལྟ་སྟེ། དཔེར་ན། སྐྱེས་བུ་ལ་ལ་ཞིག་ནམ་མཁའ་དང་གཡུལ་འགྱེད་པ་འདོད་པར་གྱུར་ན་དེས་ནམ་མཁའི་གོ་ཆ་ཉིད་བགོ་བར་བྱའོ། །བློ་གྲོས་རྒྱ་མཚོ་དེ་བཞིན་དུ་ཤིན་ཏུ་
དཀར་བ་དྲི་མ་མེད་པའི་ཕྱག་རྒྱའི་ཏིང་ངེ་འཛིན་ཐོབ་པར་འདོད་པས་ཆོས་ཐམས་ཅད་མཉམ་པ་ཉིད་ཀྱི་གོ་ཆ་ཉིད་བགོ་བར་བྱའོ། །དེ་ཅིའི་ཕྱིར་ཞེ་ན། བློ་གྲོས་རྒྱ་མཚོ་འགོད་པ་ཅི་འདྲ་བར་འཐོབ་པའང་དེ་འདྲ་བའི་ཕྱིར་རོ། །བློ་གྲོས་རྒྱ་མཚོ་དེ་ལ་རྣམ་པར་ཤེས་པ་ནི་འདུས་བྱས་ཀྱི་ས་
བོན་ནོ། །རྣམ་པར་རིག་པ་མེད་པ་ནི་འདུས་མ་བྱས་ཀྱི་ས་བོན་ཏེ། ཏིང་ངེ་འཛིན་འདི་ནི་རྣམ་པར་རིག་པ་མེད་པའི་ས་བོན་ནོ། །ཏིང་ངེ་འཛིན་འདི་ནི་མིག་གི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་ནོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་

ཤེས་པས་རྣམ་པར་ཤེས་པར་བྱ་བ་མ་ཡིན་ནོ། །ཏིང་ངེ་འཛིན་འདི་ནི་རྣམ་པར་རིག་པས་རྟོགས་པར་བྱ་བ་མ་ཡིན་ནོ། །ཚོར་བས་མ་ཡིན་ཏེ། ཏིང་ངེ་འཛིན་འདི་ནི་ཚོར་བ་དང་། རྣམ་པར་རིག་པ་མེད་པའི་མཚན་ཉིད་དོ། །ཆོས་ཐམས་ཅད་མཉམ་པ་ཉིད་དུ་རྟོགས་
པས་དེའི་ཕྱིར་ཡང་དག་པར་རྫོགས་པའི་སངས་རྒྱས་ཞེས་བྱའོ། །བློ་གྲོས་རྒྱ་མཚོ་ངས་ནི་མཚན་ཉིད་གཞན་གྱིས་ཀུན་ནས་ཉོན་མོངས་པ་མངོན་པར་རྫོགས་པར་སངས་རྒྱས་པ་མ་ཡིན། མཚན་ཉིད་གཞན་གྱིས་རྣམ་པར་བྱང་བ་མངོན་པར་རྫོགས་པར་སངས་རྒྱས་པ་མ་
ཡིན་ནོ། །དེ་ཅིའི་ཕྱིར་ཞེ་ན། ཀུན་ནས་ཉོན་མོངས་པའི་མཚན་ཉིད་གང་ཡིན་པ་དེ་ཉིད་རྣམ་པར་བྱང་བའི་མཚན་ཉིད་དེ་འདི་ལྟ་སྟེ། རང་བཞིན་གྱིས་རྣམ་པར་དག་པའི་མཚན་ཉིད་དོ། །རང་བཞིན་གྱིས་རྣམ་པར་དག་པའི་མཚན་ཉིད་གང་ཡིན་པ་དེ་མཚན་ཉིད་མེད་པའོ། །མཚན་
ཉིད་མེད་པ་གང་ཡིན་པ་དེ་མཚན་མ་མེད་པའོ། །མཚན་མ་མེད་པ་གང་ཡིན་པ་དེ་ལ་སོ་སོར་རྣམ་པར་རིག་པ་གང་ཡང་མེད་དོ། །བློ་གྲོས་རྒྱ་མཚོ་ཆོས་ཐམས་ཅད་ནི་རྣམ་པར་རིག་པ་མེད་ཅིང་རྣམ་པར་རིག་པར་བྱ་བ་མ་ཡིན་པའོ། །ཆོས་གང་རྣམ་པར་རིག་པ་མེད་ཅིང་རྣམ་པར་
རིག་པར་བྱ་བ་མ་ཡིན་པ་དེ་ལ་ཡི་གེ་རྣམས་ཀུན་ཏུ་མི་འབྱུང་ངོ་། །གང་ལ་ཡི་གེ་རྣམས་ཀུན་ཏུ་མི་འབྱུང་བ་དེ་ཇི་ལྟ་བ་བཞིན་ནོ། །ཇི་ལྟ་བ་བཞིན་གང་ཞེ་ན། སྔོན་གྱི་ཇི་ལྟ་བར་ཕྱིས་ཀྱང་དེ་བཞིན་བར་དུ་ཡང་དེ་བཞིན་ཏེ། དེའི་ཕྱིར་ཆོས་ཐམས་ཅད་ནི་དུས་གསུམ་དུ་སྟོང་པ་ཞེས་བྱའོ། །
ཅིའི་ཕྱིར་སྟོང་པ་ཉིད་ཅེས་བྱ་ཞེ་ན། དེ་ནི་མ་བྱས་པ་བྱ་བར་འགྱུར་བ་མ་ཡིན་པ། བྱ་བ་མ་ཡིན་པ་རྣམ་པར་བྱ་བ་མ་ཡིན་པ་སྟེ། དེའི་ཕྱིར་སྟོང་པ་ཉིད་ཅེས་བྱའོ། །བྱ་བ་མ་ཡིན་པ་གང་ཞེ་ན། འདི་ལྟ་སྟེ། མངོན་པར་འདུ་བྱ་བ་མེད་པ་སྟེ། དེ་ལྟར་མི་བྱེད་པས་བྱས་པའི་
ཆོས་གང་ཡང་མེད་དོ། །དེའི་ཕྱིར་དེ་ནི་བྱ་བར་འགྱུར་བ་མེད་པ་ཞེས་བྱའོ། །མངོན་པར་འདུ་བྱ་བ་མེད་པ་གང་ཞེ་ན། གང་ལ་ལུས་ཀྱིས་མངོན་པར་འདུ་བྱ་བ་མེད་པ་དང་། ངག་གིས་མངོན་པར་འདུ་བྱ་བ་མེད་པ་དང་། ཡིད་ཀྱིས་མངོན་པར་འདུ་བྱ་བ་མེད་པ་སྟེ། འདི་ནི་མངོན་

པར་འདུ་བྱ་བ་མེད་པ་ཞེས་བྱའོ། །མངོན་པར་འདུ་བྱ་བ་མེད་པ་གང་ཡིན་པ་དེ་འདུས་མ་བྱས་ཏེ། དེ་ལ་ནི་སྐྱེ་བ་མེད། འཇིག་པ་མེད། གནས་པ་མེད་དོ། །གང་ལ་སྐྱེ་བ་མེད། འཇིག་པ་མེད། གནས་པ་མེད་པ་དེ་དག་གནས་མེད་པའོ། །གང་ལ་
གནས་དེ་མེད་ཅེ་ན། མངོན་པར་འདུ་བྱ་བ་ཐམས་ཅད་ལ་གནས་དེ་མེད་དེ། དེའི་ཕྱིར་གནས་དེ་མེད་པ་ཞེས་བྱའོ། །དེ་ལ་ནི་གཟུགས་ལ་སོང་བའི་རྣམ་པར་ཤེས་པ་མི་གནས། ཚོར་བ་ལ་སོང་བ་དང་། འདུ་ཤེས་ལ་སོང་བ་དང་། འདུ་བྱེད་ལ་སོང་བ་དང་། རྣམ་པར་ཤེས་
པ་ལ་སོང་བའི་རྣམ་པར་ཤེས་པ་མི་གནས་སོ། །རྣམ་པར་ཤེས་པ་མི་གནས་པ་གང་ཡིན་པ་དེ་ཡེ་ཤེས་དང་ལྡན་པའོ། །ཡེ་ཤེས་དང་ལྡན་པ་གང་ཡིན་པ་དེ་ཡེ་ཤེས་ཀྱིས་རློམ་སེམས་སུ་མི་བྱེད་པའོ། །གང་རློམ་སེམས་སུ་མི་བྱེད་པ་དེ་མངོན་པར་རློམ་སེམས་སུ་མི་བྱེད་དོ། །
གང་མངོན་པར་རློམ་སེམས་སུ་མི་བྱེད་པ་དེ་མི་རྩོད་དོ། །གང་མི་རྩོད་པ་དེ་ཀུན་ཏུ་མི་འབར་རོ། །གང་ཀུན་ཏུ་མི་འབར་བ་དེ་ཀུན་ཏུ་གདུང་བ་མ་ཡིན་ནོ། །གང་ཀུན་ཏུ་གདུང་བ་མ་ཡིན་པ་དེ་རབ་ཏུ་འབར་བ་མ་ཡིན་ནོ། །གང་རབ་ཏུ་འབར་བ་མ་ཡིན་པ་དེ་ཞི་བའོ། །ཞི་བ་གང་
ཡིན་པ་དེ་རབ་ཏུ་ཞི་བའོ། །རབ་ཏུ་ཞི་བ་གང་ཡིན་པ་དེ་ཉེ་བར་ཞི་བའོ། །ཉེ་བར་ཞི་བ་གང་ཡིན་པ་དེ་ཐུབ་པ་ཞེས་བྱའོ། །སྟོན་པ་ཞེས་བྱའོ། །བློ་གྲོས་རྒྱ་མཚོ་ཆོས་འདི་དག་ནི་འདི་ལྟར་ཟབ་པའོ། །འདི་ལྟར་བལྟ་དཀའ་བའོ། །འདི་ལྟར་རྟོགས་པར་དཀའ་བའོ། །གང་
དག་གིས་ཆོས་འདི་དག་ཐོས་ནས་མོས་པར་བྱེད་པ་དེ་དག་ཐམས་ཅད་ཕྱིན་ཅི་ལོག་པ་དང་ཉེ་བའི་ཉོན་མོངས་པ་དང་། ཡོངས་སུ་འཛིན་པ་དང་། འཆིང་བ་ཐམས་ཅད་ལས་རྣམ་པར་གྲོལ་ཏེ། འདི་དག་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་
འདས་རྣམས་ཀྱི་ཆོས་ཀྱི་མཛོད་འཛིན་པ་དག་གོ། །དེ་དང་དེ་དག་ནི་དེད་དཔོན་ཆེན་པོ་སྟེ། སེམས་ཅན་ཐམས་ཅད་ལ་ལམ་ཚད་མེད་པ་སྟོན་པ་དག་གོ། །དེ་དང་དེ་དག་ནི་སྨན་པའི་རྒྱལ་པོ་སྟེ། ཉོན་མོངས་པ་གཟུགས་ཅན་མ་ཡིན་པའི་ནད་ལས་རབ་ཏུ་ཐར་བར་བྱེད་པ་དག་གོ། །དེ་དང་

དེ་དག་ནི་མཆོད་པ་མཆོག་གིས་དེ་བཞིན་གཤེགས་པ་ལ་མཆོད་པར་བྱེད་པ་དག་སྟེ། དེ་དག་ནི་རིང་པོ་མི་ཐོགས་པ་ཤིན་ཏུ་དཀར་བ་དྲི་མ་མེད་པའི་ཕྱག་རྒྱའི་ཏིང་ངེ་འཛིན་འདི་ཐོབ་པར་འགྱུར་རོ། །དེ་དག་ནི་ཐེག་པ་ཆེན་པོ་འདིར་ངེས་པར་བྱས་པ་དག་གོ། །དེ་དག་ནི་ཆོས་ཀྱི་གྲུ་ཆེན་
པོ་ཡང་དག་པར་སྦྱར་བ་དག་གོ། །དེ་དག་ནི་སེམས་ཅན་ཚད་མེད་པ་དག་འཁོར་བའི་ཆུ་བོ་ཆེན་པོ་ལས་སྒྲོལ་བར་འགྱུར་བ་དག་གོ། །དེ་དག་ནི་ཡང་བདུད་ཀྱི་ཡུལ་དུ་བརྗོད་པ་མ་ཡིན་པ་དག་གོ། །སྐྱེས་བུ་དམ་པ་དེ་དག་ནི་བདུད་དང་ཕྱིར་རྒོལ་བ་བཅོམ་པ་དག་གོ། །ཏིང་ངེ་
འཛིན་བསྟན་པའི་ལེའུ་སྟེ། གསུམ་པའོ།། །།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་རྒྱ་མཚོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་བདུད་ཕྱིར་རྒོལ་བ་བཅོམ་པ་ལགས།
བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་རྒྱ་མཚོ་གང་གི་ཚེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་འཛིན་པ་ཐམས་ཅད་དོན་དུ་མི་གཉེར་བ་དེའི་ཚེ་བདུད་ཕྱིར་རྒོལ་བ་བཅོམ་པ་ཡིན་ནོ། །གང་གི་ཚེ་མཚན་མ་དང་དམིགས་པ་ཐམས་ཅད་དོན་དུ་མི་གཉེར་བ་
དེའི་ཚེ་བདུད་ཕྱིར་རྒོལ་བ་བཅོམ་པ་ཡིན་ནོ། །བློ་གྲོས་རྒྱ་མཚོ་བདུད་ནི་བཞི་པོ་འདི་དག་སྟེ། བཞི་གང་ཞེ་ན། ཕུང་པོའི་བདུད་དང་། ཉོན་མོངས་པའི་བདུད་དང་། འཆི་བདག་གི་བདུད་དང་། ལྷའི་བུའི་བདུད་དེ་བཞི་པོ་འདི་དག་ནི་བདུད་དོ། །དེ་ལ་སྒྱུ་མའི་ཆོས་སུ་སོ་སོར་
རྟོག་པས་ཕུང་པོའི་བདུད་འཇོམས་སོ། །སྟོང་པ་ཉིད་ངེས་པར་སེམས་པ་ལ་སོ་སོར་རྟོག་པས་ཉོན་མོངས་པའི་བདུད་འཇོམས་སོ། །སྐྱེ་བ་མེད་པ་དང་འབྱུང་བ་མེད་པར་སོ་སོར་རྟོག་པས་འཆི་བདག་གིས་བདུད་འཇོམས་སོ། །ང་རྒྱལ་གྱིས་སྒྲོ་བཏགས་པ་ཐམས་ཅད་འགོག་པར་འགྱུར་
བའི་ལམ་གྱིས་ལྷའི་བུའི་བདུད་འཇོམས་སོ། །གཞན་ཡང་སྡུག་བསྔལ་ཡོངས་སུ་ཤེས་པས་ཕུང་པོའི་བདུད་འཇོམས་སོ། །ཀུན་འབྱུང་བ་སྤོང་བས་ཉོན་མོངས་པའི་བདུད་འཇོམས་སོ། །འགོག་པ་མངོན་སུམ་དུ་བྱེད་པས་འཆི་བདག་གི་བདུད་འཇོམས་སོ། །ལམ་སྒོམ་པས་ལྷའི་

བུའི་བདུད་འཇོམས་སོ། །གཞན་ཡང་འདུ་བྱེད་ཐམས་ཅད་ལ་སྡུག་བསྔལ་དུ་སོ་སོར་རྟོག་པས་ཕུང་པོའི་བདུད་འཇོམས་སོ། །འདུ་བྱེད་ཐམས་ཅད་ལ་མི་རྟག་པར་སོ་སོར་རྟོག་པས་ཉོན་མོངས་པའི་བདུད་འཇོམས་སོ། །ཆོས་ཐམས་ཅད་ལ་བདག་མེད་པར་སོ་
སོར་རྟོག་པས་འཆི་བདག་གི་བདུད་འཇོམས་སོ། །མྱ་ངན་ལས་འདས་པ་ལ་ཞི་བར་སོ་སོར་རྟོག་པས་ལྷའི་བུའི་བདུད་འཇོམས་སོ། །བློ་གྲོས་རྒྱ་མཚོ་གཞན་ཡང་གང་གི་ཚེ་བྱང་ཆུབ་སེམས་དཔའ་ནང་གི་ཉོན་མོངས་པའི་དྲི་མ་སྤངས་ཏེ་བྱང་ཆུབ་ཀྱི་སེམས་མ་བརྗེད་པར་
སྦྱིན་པ་བྱིན་ནས། ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་པ་དེའི་ཚེ་ཕུང་པོའི་བདུད་ཚར་གཅོད་པ་ཡིན་ནོ། །གང་གི་ཚེ་ལུས་ལ་མི་ལྟ་ཞིང་ལུས་ལ་མ་ཆགས་པར་སྦྱིན་པ་བྱིན་ནས་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་པ་དེའི་ཚེ་ཉོན་མོངས་པའི་
བདུད་ཚར་གཅོད་པ་ཡིན་ནོ། །གང་གི་ཚེ་ཀྱེ་མ་ལོངས་སྤྱོད་འདི་དག་ནི་མི་རྟག་པ་ཐུན་མོང་བ་སྟེ། དེ་དག་ལས་བདག་གིས་སྙིང་པོ་བླངས་པར་འགྱུར་རོ་སྙམ་སྟེ་སྦྱིན་པ་བྱིན་ནས་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་པ་དེའི་ཚེ་འཆི་བདག་གི་བདུད་ཚར་གཅོད་
པ་ཡིན་ནོ། །གང་གི་ཚེ་སེམས་ཅན་ཐམས་ཅད་ལ་སྙིང་རྗེ་ཆེན་པོ་བསྐྱེད་ནས། སེམས་ཅན་ཐམས་ཅད་བསྡུ་བའི་ཕྱིར་རབ་ཏུ་ཐར་བར་བྱ་བའི་བློས་སྦྱིན་པ་བྱིན་ནས་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་པ་དེའི་ཚེ། ལྷའི་བུའི་བདུད་ཚར་གཅོད་པ་ཡིན་ནོ། །བློ་
གྲོས་རྒྱ་མཚོ་གཞན་ཡང་བྱང་ཆུབ་སེམས་དཔའ་སྲིད་པར་འགྲོ་བའི་སྐྱེ་བ་ལ་མངོན་པར་འདོད་པ་མེད་པར་ཚུལ་ཁྲིམས་སྲུང་བས་ཕུང་པོའི་བདུད་ཚར་གཅོད་དོ། །བདག་མེད་པར་ལྟ་བ་ལ་གནས་ཏེ་ཚུལ་ཁྲིམས་སྲུང་བས་ཉོན་མོངས་པའི་བདུད་ཚར་གཅོད་དོ། །ཚུལ་ཁྲིམས་
ཡོངས་སུ་དག་སྟེ་རྒ་ཤི་ལས་བཟླ་བའི་ཕྱིར་ཚུལ་ཁྲིམས་སྲུང་བས་འཆི་བདག་གི་བདུད་ཚར་གཅོད་དོ། །བདག་གིས་ཚུལ་ཁྲིམས་འཆལ་པའི་སེམས་ཅན་རྣམས་འཕགས་པའི་ཚུལ་ཁྲིམས་ལ་རབ་ཏུ་དགོད་པར་བྱའོ་སྙམ་སྟེ། ཚུལ་ཁྲིམས་སྲུང་བས་ལྷའི་བུའི་བདུད་ཚར་གཅོད་

དོ། །བློ་གྲོས་རྒྱ་མཚོ་གཞན་ཡང་བྱང་ཆུབ་སེམས་དཔའ་བདག་མི་དམིགས་པར་བཟོད་པ་སྒོམ་པས་ཕུང་པོའི་བདུད་ཚར་གཅོད་དོ། །སེམས་ཅན་མི་དམིགས་པར་བཟོད་པ་སྒོམ་པས་ཉོན་མོངས་པའི་བདུད་ཚར་གཅོད་དོ། །འཁོར་བ་མི་དམིགས་པར་བཟོད་པ་སྒོམ་པས་འཆི་བདག་གི་བདུད་ཚར་གཅོད་དོ། །མྱ་ངན་ལས་
འདས་པ་མི་དམིགས་པར་བཟོད་པ་སྒོམ་པས་ལྷའི་བུའི་བདུད་ཚར་གཅོད་དོ། །བློ་གྲོས་རྒྱ་མཚོ་གཞན་ཡང་བྱང་ཆུབ་སེམས་དཔའ་ལུས་དབེན་པར་བརྩོན་འགྲུས་རྩོམ་པས་ཕུང་པོའི་བདུད་ལས་ཤིན་ཏུ་འདའོ། །སེམས་དབེན་པར་བརྩོན་འགྲུས་རྩོམ་པས་ཉོན་མོངས་པའི་བདུད་ལས་ཤིན་ཏུ་འདའོ། །སྐྱེ་བ་མེད་
པ་དང་འབྱུང་བ་མེད་པར་བརྩོན་འགྲུས་རྩོམ་པས་འཆི་བདག་གི་བདུད་ལས་ཤིན་ཏུ་འདའོ། །འཁོར་བས་ཡོངས་སུ་མི་སྐྱོ་བས་སེམས་ཅན་ཡོངས་སུ་སྨིན་པར་བྱ་བ་དང་། དམ་པའི་ཆོས་ཡོངས་སུ་གཟུང་བའི་ཕྱིར་བརྩོན་འགྲུས་རྩོམ་པས་ལྷའི་བུའི་བདུད་ལས་ཤིན་ཏུ་འདའོ། །
བློ་གྲོས་རྒྱ་མཚོ་གཞན་ཡང་བྱང་ཆུབ་སེམས་དཔའ་ཕུང་པོ་ལ་མི་གནས་པར་བསམ་གཏན་བྱེད་པས་ཕུང་པོའི་བདུད་ལས་ཤིན་ཏུ་འདའོ། །ཁམས་ལ་མི་གནས་པར་བསམ་གཏན་བྱེད་པས་ཉོན་མོངས་པའི་བདུད་ལས་ཤིན་ཏུ་འདའོ། །སྐྱེ་མཆེད་ལ་མི་གནས་པར་བསམ་གཏན་
བྱེད་པས་འཆི་བདག་གིས་བདུད་ལས་ཤིན་ཏུ་འདའོ། །བསམ་གཏན་གྱི་ཡན་ལག་དེ་དག་བྱང་ཆུབ་ཏུ་ཡོངས་སུ་སྔོ་བར་བྱེད་པས་ལྷའི་བུའི་བདུད་ལས་ཤིན་ཏུ་འདའོ། །བློ་གྲོས་རྒྱ་མཚོ་གཞན་ཡང་བྱང་ཆུབ་སེམས་དཔའ་ཤེས་རབ་ཀྱིས་ཕུང་པོ་ལ་མཁས་པར་གྱུར་པས་ཕུང་
པོའི་བདུད་ལས་རྒྱལ་ལོ། །ཤེས་རབ་ཀྱིས་ཁམས་ལ་མཁས་པར་གྱུར་པས་ཉོན་མོངས་པའི་བདུད་ལས་རྒྱལ་ལོ། །ཤེས་རབ་ཀྱིས་སྐྱེ་མཆེད་ལ་མཁས་པར་གྱུར་པས་འཆི་བདག་གི་བདུད་ལས་རྒྱལ་ལོ། །ཤེས་རབ་ཀྱིས་རྟེན་ཅིང་འབྲེལ་བར་འབྱུང་བ་ལ་མཁས་པར་གྱུར་
པས་ཡང་དག་པའི་མཐའ་ཡང་མངོན་སུམ་མི་བྱེད་པས་ལྷའི་བུའི་བདུད་ལས་རྒྱལ་ལོ། །བློ་གྲོས་རྒྱ་མཚོ་གཞན་ཡང་བྱང་ཆུབ་སེམས་དཔའ་ཆོས་ཐམས་ཅད་ལ་སྟོང་པར་མོས་པས་ཕུང་པོའི་བདུད་ཀྱིས་སྐབས་མི་རྙེད་དོ། །ཆོས་ཐམས་ཅད་ལ་མཚན་མ་མེད་པར་ཡིད་ཆེས་

པས་ཉོན་མོངས་པའི་བདུད་ཀྱིས་སྐབས་མི་རྙེད་དོ། །ཆོས་ཐམས་ཅད་སྨོན་པ་མེད་པར་སོམ་ཉི་མེད་པས་འཆི་བདག་གི་བདུད་ཀྱིས་སྐབས་མི་རྙེད་དོ། །ཆོས་ཐམས་ཅད་ལ་མངོན་པར་འདུ་བྱ་བ་མེད་པར་ཐེ་ཚོམ་མེད་ལ་དགེ་བའི་རྩ་བ་མངོན་པར་འདུ་བྱ་བས་
ཀྱང་མི་ངོམས་པས་ལྷའི་བུའི་བདུད་ཀྱིས་སྐབས་མི་རྙེད་དོ། །བློ་གྲོས་རྒྱ་མཚོ་གཞན་ཡང་གང་གི་ཚེ་བྱང་ཆུབ་སེམས་དཔའ་ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་ཞིང་། ལུས་དང་ལྷན་ཅིག་སོང་བའི་རྣམ་པར་རྟོག་པས་ཀྱང་རྣམ་པར་མི་རྟོག་པ་དེའི་ཚེ་ཕུང་
པོའི་བདུད་ཡང་དག་པར་འཇོམས་སོ། །གང་གི་ཚེ་ཚོར་བ་རྣམས་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་ཞིང་། ཚོར་བ་དང་ལྷན་ཅིག་སོང་བའི་རྣམ་པར་རྟོག་པས་ཀྱང་རྣམ་པར་མི་རྟོག་པ་དེའི་ཚེ་ཉོན་མོངས་པའི་བདུད་ཡང་དག་པར་འཇོམས་སོ། །གང་
གི་ཚེ་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་ཞིང་། སེམས་དང་ལྷན་ཅིག་སོང་བའི་རྣམ་པར་རྟོག་པས་ཀྱང་རྣམ་པར་མི་རྟོག་པ་དེའི་ཚེ་འཆི་བདག་གི་བདུད་ཡང་དག་པར་འཇོམས་སོ། །གང་གི་ཚེ་ཆོས་རྣམས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་
པ་སྒོམ་ཞིང་ཆོས་དང་། ལྷན་ཅིག་སོང་བའི་རྣམ་པར་རྟོག་པས་ཀྱང་རྣམ་པར་མི་རྟོག་ལ་བྱང་ཆུབ་ཀྱི་བསམ་པ་ཡང་འཁྲུགས་པར་མི་བྱེད་པ་དེའི་ཚེ་ལྷའི་བུའི་བདུད་ཡང་དག་པར་འཇོམས་སོ། །བློ་གྲོས་རྒྱ་མཚོ་བདུད་ཀྱི་ལས་འདི་དག་ཐམས་ཅད་ནི་བདག་གིས་ཀུན་ནས་ལྡང་བས་ཀུན་
ནས་ལངས་པ་དག་སྟེ། དེ་ལ་བྱང་ཆུབ་སེམས་དཔའ་བདག་གིས་ཀུན་ནས་ལྡང་བ་ཀུན་ནས་ལངས་པར་མི་བྱེད་དོ། །བདག་གང་ཡིན་པ་དེ་ནི་བདག་མ་ཡིན་ཞིང་བདག་མེད་པ་སྟེ་དེ་ལ་ཆོས་གང་གིས་ཀུན་ནས་ལྡང་བ་ཡང་མེད་དོ། །དེ་དེ་ལྟར་སོ་སོར་རྟོག་པའི་ཡེ་ཤེས་ཀྱིས་རིག་
ནས་གང་གི་ཚེ་སེམས་ཅན་མི་ཤེས་པ་རྣམས་ཀྱི་ཆེད་དུ་ཐེག་པ་ཆེན་པོའི་གོ་ཆ་གྱོན་པར་བྱེད་པ་དེའི་ཚེ་བདག་ཏུ་སྒྲོ་འདོགས་པ་དང་། གཞན་དུ་སྒྲོ་འདོགས་པའི་ཕྱིར་གོ་ཆ་མི་གྱོན་ནོ། །གོ་ཆ་བགོས་ནས་ཀྱང་ཇི་ལྟར་ན་བདག་གི་གོ་ཆ་འདི་དོན་ཡོད་པར་འགྱུར་སྙམ་དུ་དཔྱོད་དེ། དེ་

འདི་སྙམ་དུ་བདག་གི་གོ་ཆ་འདི་ནི་བདག་རྣམ་པར་གཞིག་པའི་ཕྱིར་གོ་ཆ་བགོས་པ་མ་ཡིན། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་རྣམ་པར་གཞིག་པའི་ཕྱིར་བགོས་པ་མ་ཡིན་གྱི་སེམས་ཅན་དག་གང་ལ་བརྟེན་ནས་བདག་དང་། སེམས་
ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་ཏུ་ལྟ་བ་ལ་གནས་པར་བྱེད་པའི་གནས་པ་དེ་བདག་གིས་སྤང་བར་བྱའོ་སྙམ་དུ་སེམས་སོ་གནས་དེ་གང་ཞེ་ན། འདི་ལྟ་སྟེ། ཕྱིན་ཅི་ལོག་ནི་གནས་སོ། །ཕུང་པོ་དང་། ཁམས་དང་། སྐྱེ་མཆེད་ནི་
གནས་སོ། །དེ་འདི་ལྟར་སེམས་ཕྱིན་ཅི་ལོག་ཏུ་གྱུར་ཏེ་མི་རྟག་པ་ལ་རྟག་པར་འདུ་ཤེས་པ། སྡུག་བསྔལ་བ་ལ་བདེ་བར་འདུ་ཤེས་པ། བདག་མེད་པ་ལ་བདག་ཏུ་འདུ་ཤེས་པ། མི་སྡུག་པ་ལ་སྡུག་པར་འདུ་ཤེས་པ་རྣམས་ལ་འདུ་ཤེས་ཡོངས་སུ་ཤེས་པར་བྱ་བའི་ཕྱིར་ཆོས་སྟོན་
ཏེ། དེ་ལ་འདུ་ཤེས་ཡོངས་སུ་ཤེས་པ་གང་ཞེ་ན། འདི་ལྟ་སྟེ། འཛིན་པ་མེད་པ་དང་། མཆོག་ཏུ་འཛིན་པ་མེད་པའོ། །གང་འཛིན་པ་མེད་པ་དེ་མཆོག་ཏུ་འཛིན་པར་མི་བྱེད་དོ། །གང་མཆོག་ཏུ་འཛིན་པར་མི་བྱེད་པ་དེ་ཀུན་ཏུ་རྨོངས་པ་མེད་དོ། །དེ་ཀུན་ཏུ་རྨོངས་པ་མེད་པས་འདུ་ཤེས་ཡོངས་སུ་ཤེས་
སོ། །གསོལ་པ་ཅི་ལགས་འདས་པ་རྣམས་ཀྱིའམ། མ་འོངས་པ་རྣམས་ཀྱིའམ། ད་ལྟར་བྱུང་བ་རྣམས་ཀྱིའམ། འདུ་ཤེས་གང་ཡོངས་སུ་འཚལ། བཀའ་སྩལ་པ། འདས་པ་རྣམས་ཀྱི་ཡང་མ་ཡིན། མ་འོངས་པ་རྣམས་ཀྱི་ཡང་མ་ཡིན། ད་ལྟར་བྱུང་བ་རྣམས་
ཀྱི་ཡང་མ་ཡིན་ནོ། །དེ་ཅིའི་ཕྱིར་ཞེ་ན། འདས་པའི་འདུ་ཤེས་ནི་ཟད་པའོ། །མ་འོངས་པ་ནི་མ་ཕྱིན་པའོ། །ད་ལྟར་བྱུང་བའི་འདུ་ཤེས་རྣམས་ནི་གནས་པ་མེད་པ་སྟེ། གང་དུས་གསུམ་དུ་འདུ་ཤེས་མི་དམིགས་པ་ནི་འདུ་ཤེས་ཡོངས་སུ་ཤེས་པའོ། །དེ་འདུ་ཤེས་ཡོངས་སུ་ཤེས་
པ་དང་ལྡན་པར་བྱང་ཆུབ་སེམས་དཔའི་སྤྱོད་པ་ཡོངས་སུ་དག་པ་སྤྱོད་དོ། །དེ་སེམས་ཅན་ཐམས་ཅད་ཀྱི་སྤྱོད་པ་ཡང་རབ་ཏུ་ཤེས་སོ། །བློ་གྲོས་རྒྱ་མཚོ་བྱང་ཆུབ་སེམས་དཔའ་ནི་ཇི་སྲིད་དུ་སེམས་ཅན་ཐམས་ཅད་ཀྱི་སྤྱོད་པ་རབ་ཏུ་མི་ཤེས་པ། དེ་སྲིད་དུ་བྱང་ཆུབ་སེམས་དཔའི་

སྤྱོད་པ་ཡོངས་སུ་དག་པ་ལ་སྤྱོད་པ་མ་ཡིན་ཏེ། གང་གི་ཚེ་སེམས་ཅན་ཐམས་ཅད་ཀྱི་སྤྱོད་པ་རབ་ཏུ་ཤེས་པ་དེའི་ཚེ། བྱང་ཆུབ་སེམས་དཔའི་སྤྱོད་པ་ཡོངས་སུ་དག་པ་ལ་སྤྱད་དོ། །ཇི་ལྟར་དེ་དག་གི་སྤྱོད་པ་རྣམས་རབ་ཏུ་ཤེས་པ་དེ་ལྟར་ཆོས་སྟོན་ཏོ། །སེམས་
ཅན་སྤྱོད་པ་ཇི་ལྟ་བ་རྣམས་ཀྱི་སྤྱོད་པ་དེ་བཟློག་པའི་ཕྱིར་ཡང་ཉེ་བར་སྟོན་ཏོ། །བློ་གྲོས་རྒྱ་མཚོ་འདོད་ཆགས་ཀྱི་བསམ་པ་ཅན་ལ་ཞེ་སྡང་ལ་སྦྱོར་བའི་བསམ་པ་ཅན་དག་ཀྱང་ཡོད། ཞེ་སྡང་གི་བསམ་པ་ཅན་ལ་འདོད་ཆགས་ལ་སྦྱོར་བ་དག་ཀྱང་ཡོད། ཞེ་སྡང་གི་བསམ་པ་ཅན་
ལ་གཏི་མུག་ལ་སྦྱོར་བ་དག་ཀྱང་ཡོད། གཏི་མུག་གི་བསམ་པ་ཅན་ལ་ཞེ་སྡང་ལ་སྦྱོར་བ་དག་ཀྱང་ཡོད། གཏི་མུག་གི་བསམ་པ་ཅན་ལ་འདོད་ཆགས་ལ་སྦྱོར་བ་དག་ཀྱང་ཡོད། འདོད་ཆགས་ཀྱི་བསམ་པ་ཅན་ལ་གཏི་མུག་ལ་སྦྱོར་བ་དག་ཀྱང་ཡོད། འདོད་ཆགས་དང་ཞེ་སྡང་གི་
བསམ་པ་ཅན་ལ་གཏི་མུག་ལ་སྦྱོར་བ་དག་ཀྱང་ཡོད། ཞེ་སྡང་དང་གཏི་མུག་གི་བསམ་པ་ཅན་ལ་འདོད་ཆགས་ལ་སྦྱོར་བ་དག་ཀྱང་ཡོད། གཏི་མུག་དང་འདོད་ཆགས་ཀྱི་བསམ་པ་ཅན་ལ་ཞེ་སྡང་ལ་སྦྱོར་བ་དག་ཀྱང་ཡོད་དོ། །བློ་གྲོས་རྒྱ་མཚོ་འདོད་ཆགས་བཅོས་མ་ཅན་ལ་ཞེ་སྡང་
ཚར་གཅད་པར་བྱ་བའི་སེམས་ཅན་དག་ཀྱང་ཡོད། ཞེ་སྡང་བཅོས་མ་ཅན་ལ་འདོད་ཆགས་ཚར་གཅད་པར་བྱ་བ་དག་ཀྱང་ཡོད། ཞེ་སྡང་བཅོས་མ་ཅན་ལ་གཏི་མུག་ཚར་གཅད་པར་བྱ་བ་དག་ཀྱང་ཡོད། གཏི་མུག་བཅོས་མ་ཅན་ལ་ཞེ་སྡང་ཚར་གཅད་པར་བྱ་བ་དག་ཀྱང་ཡོད། གཏི་
མུག་བཅོས་མ་ཅན་ལ་འདོད་ཆགས་ཚར་གཅད་པར་བྱ་བ་དག་ཀྱང་ཡོད། འདོད་ཆགས་བཅོས་མ་ཅན་ལ་གཏི་མུག་ཚར་གཅད་པར་བྱ་བ་དག་ཀྱང་ཡོད། འདོད་ཆགས་དང་ཞེ་སྡང་བཅོས་མ་ཅན་ལ་གཏི་མུག་ཚར་གཅད་པར་བྱ་བ་དག་ཀྱང་ཡོད། ཞེ་སྡང་དང་གཏི་མུག་བཅོས་མ་ཅན་
ལ་འདོད་ཆགས་ཚར་གཅད་པར་བྱ་བ་དག་ཀྱང་ཡོད། གཏི་མུག་དང་འདོད་ཆགས་བཅོས་མ་ཅན་ལ་ཞེ་སྡང་ཚར་གཅད་པར་བྱ་བ་དག་ཀྱང་ཡོད་དོ། །བློ་གྲོས་རྒྱ་མཚོ་སྔར་འདོད་ཆགས་ཅན་ལ་ཕྱིས་ཞེ་སྡང་ཅན་དང་། སྔར་ཞེ་སྡང་ཅན་ལ་ཕྱིས་འདོད་ཆགས་ཅན་དང་། སྔར་ཞེ་སྡང་

ཅན་ལ་ཕྱིས་གཏི་མུག་ཅན་དང་། སྔར་གཏི་མུག་ཅན་ལ་ཕྱིས་ཞེ་སྡང་ཅན་དང་། སྔར་གཏི་མུག་ཅན་ལ་ཕྱིས་འདོད་ཆགས་ཅན་དང་། སྔར་འདོད་ཆགས་ཅན་ལ་ཕྱིས་གཏི་མུག་ཅན་དང་། སྔར་འདོད་ཆགས་དང་ཞེ་སྡང་ཅན་ལ་ཕྱིས་གཏི་མུག་ཅན་དང་། སྔར་ཞེ་སྡང་དང་
གཏི་མུག་ཅན་ལ་ཕྱིས་འདོད་ཆགས་ཅན་དང་། སྔར་གཏི་མུག་དང་འདོད་ཆགས་ཅན་ལ་ཕྱིས་ཞེ་སྡང་ཅན་གྱི་སེམས་ཅན་དག་ཀྱང་ཡོད་དོ། །བློ་གྲོས་རྒྱ་མཚོ་གཟུགས་ལ་འདོད་ཆགས་ཅན་ལ་སྒྲ་ལ་ཞེ་སྡང་ཅན་དང་། སྒྲ་ལ་འདོད་ཆགས་ཅན་ལ་གཟུགས་ལ་ཞེ་སྡང་ཅན་དང་། དྲི་
ལ་འདོད་ཆགས་ཅན་ལ་རོ་ལ་ཞེ་སྡང་ཅན་དང་། རོ་ལ་འདོད་ཆགས་ཅན་ལ་དྲི་ལ་ཞེ་སྡང་ཅན་དང་། རེག་པ་ལ་འདོད་ཆགས་ཅན་ལ་ཆོས་ལ་ཞེ་སྡང་ཅན་དང་། ཆོས་ལ་འདོད་ཆགས་ཅན་ལ་རེག་པ་ལ་ཞེ་སྡང་ཅན་གྱི་སེམས་ཅན་དག་ཀྱང་ཡོད་དོ། །བློ་གྲོས་རྒྱ་མཚོ་གཟུགས་ལས་
དབེན་པས་འདུལ་བར་འགྱུར་གྱི་སྒྲ་ལས་དབེན་པས་ནི་མ་ཡིན་པའི་སེམས་ཅན་དག་ཀྱང་ཡོད