Kinh tạng Tây Tạng (Kangyur Đại Học) — 058_མདོ་སྡེ།_ཕ

ངས་རྒྱས་ཀྱི་མཐུས་བྱང་ཆུབ་སེམས་དཔའི་ཚུལ་བཞིན་ལ་སྦྱོར་བ་འདི་དེ་ལྟར་བསྟན་པ་ནི་ལེགས་སོ་ལེགས་
སོ། །བྱང་ཆུབ་སེམས་དཔའ་གང་དག་ཐེག་པ་ཆེན་པོ་འདི་ལ་ཚུལ་བཞིན་དེ་ལྟ་བུ་ལ་རབ་ཏུ་བརྩོན་པ་དེ་དག་ནི་ཐམས་ཅད་མཁྱེན་པ་ཉིད་དུ་ངེས་པ་ཡིན་པར་བལྟའོ། །དེ་ནས་བཅོམ་ལྡན་འདས་ལ་ཀླུའི་རྒྱལ་པོའི་བུ་རྣམ་པར་འཕྲུལ་པས་འདི་སྐད་ཅེས་གསོལ་ཏོ། །
བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཟང་ཟིང་མ་མཆིས་པའི་སེམས་ཀྱིས་སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་མཆིས་པ་ལགས། བཀའ་སྩལ་པ། རིགས་ཀྱི་བུ་གང་གི་ཕྱིར་བྱང་ཆུབ་སེམས་དཔས་ཆོས་
ཐམས་ཅད་བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གང་ཟག་མེད་པར་ཤེས་ནས་གཟུགས་སུ་མ་ཡིན། མཚན་དུ་མ་ཡིན། ཆོས་སུ་མ་ཡིན་པར་དེ་བཞིན་གཤེགས་པ་ཡང་དག་པར་རྗེས་སུ་མཐོང་བ་དེ་ལྟ་བུ་ནི་ཟང་ཟིང་མེད་པའི་སེམས་

ཀྱིས་སངས་རྒྱས་ལ་སྐྱབས་སུ་སོང་བ་ཡིན་ནོ། །དེ་བཞིན་གཤེགས་པའི་ཆོས་ཉིད་གང་ཡིན་པ་དེ་ནི་ཆོས་ཀྱི་དབྱིངས་སོ། །ཆོས་ཀྱི་དབྱིངས་གང་ཡིན་པ་དེ་ནི་ཐམས་ཅད་ཀྱི་རྗེས་སུ་སོང་བ་ཞེས་བྱ་སྟེ། དེ་ལྟར་ཆོས་ཐམས་ཅད་ཆོས་ཀྱི་དབྱིངས་ཀྱི་རྗེས་
སུ་སོང་བར་མཐོང་བ་དེ་ལྟ་བུ་ནི་ཟང་ཟིང་མེད་པའི་སེམས་ཀྱིས་ཆོས་ལ་སྐྱབས་སུ་སོང་བ་ཡིན་ནོ། །གང་ཆོས་ཀྱི་དབྱིངས་འདུས་མ་བྱས་པར་རབ་ཏུ་བསྒོམ་པ་དང་། ཉན་ཐོས་ཀྱི་ཐེག་པ་ལ་འདུས་མ་བྱས་པ་སྟོན་པ་དང་། འདུས་བྱས་དང་། འདུས་མ་
བྱས་གཉིས་སུ་མེད་པ་འདི་ལྟ་བུ་ནི་ཟང་ཟིང་མེད་པའི་སེམས་ཀྱིས་དགེ་འདུན་ལ་སྐྱབས་སུ་སོང་བ་ཡིན་ནོ། །བསྟན་པ་འདི་བཤད་པའི་ཚེ་ཀླུའི་རྒྱལ་པོའི་བུ་རྣམ་པར་འཕྲུལ་པས་རྗེས་སུ་འཐུན་པའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །དེ་ནས་ཀླུའི་རྒྱལ་པོ་
མ་དྲོས་པ་ཆུང་མའི་འཁོར་དང་བཅས། བུ་དང་བཅས། གཉེན་དང་འཁོར་དུ་བཅས་ཏེ། དངོས་པོ་ཐམས་ཅད་ཀྱིས་སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་སོང་ནས་རང་གི་གནས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་
ཕུལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་སྨོན་ལམ་འདེབས་པ་ནི་འདི་ལགས་ཏེ། གང་བདག་གི་གནས་འདི་ནས་ཀླུང་ཆེན་པོ་བཞི་འབབ་པ་རྒྱ་མཚོ་ཆེན་པོ་བཞིར་འབབ་པའི་རྒྱ་མཚོ་ཆེན་པོ་དེ་དག་དང་། བཅོམ་ལྡན་འདས་ཀླུང་ཆེན་པོ་འདི་དག་
ལ་འཚལ་བའི་སེམས་ཅན་རྐང་གཉིས་པ་དང་། རྐང་བཞི་པ་དང་། རྐང་མངས་དང་། རི་དགས་དང་། བྱ་གང་ལགས་པ་དེ་དག་རྒྱུ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གྱུར་ཅིག །གང་དག་བྱང་ཆུབ་ཏུ་སྨོན་པ་དེ་དག་ཀྱང་རྒྱུ་དེས་རྣམ་པར་གྲོལ་
བར་གྱུར་ཅིག །དེ་ནས་དེའི་ཚེ་སངས་རྒྱས་བཅོམ་ལྡན་འདས་ཀྱིས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པའི་ཆོས་ཉིད་དེ། དེ་ནས་བཅོམ་ལྡན་འདས་ཀྱི་ཞལ་གྱི་སྒོ་ནས་ཁ་དོག་དུ་མའི་འོད་ཟེར་བྱུང་ནས་མཐའ་

ཡས་མུ་མེད་པའི་འཇིག་རྟེན་གྱི་ཁམས་འོད་ཀྱིས་ཁྱབ་པར་བྱས་ཏེ། སླར་ལོག་ནས་དེ་བཞིན་གཤེགས་པའི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། །
མཚུངས་པ་མ་མཆིས་གཟུགས་མངའ་མཐོང་ན་དགའ། །སྐྱེས་མཆོག་བཅོམ་ལྡན་སྐྱེས་བུ་ཁྱུ་མཆོག་པ། །འཇིག་རྟེན་འདས་ལ་འཇིག་རྟེན་སྒྲོན་མ་ཡི། །འོད་གཟི་བཞད་པའི་དོན་འདི་བདག་ལ་གསུངས། །བསོད་ནམས་བརྒྱ་མངའ་བསོད་ནམས་ལྷག་པ་
པོ། །ཡེ་ཤེས་ཀྱིས་འཕགས་ཡེ་ཤེས་སྣང་མཛད་པ། །ཆོས་དབང་མི་མཚུངས་ཆོས་ཀྱི་བཀའ་མཆིད་ཅན། །བཅོམ་ལྡན་ཅི་ཡི་དོན་དུ་བཞད་པ་སྟོན། །བདེན་པ་གཟིགས་ཤིང་རྟག་ཏུ་བདེན་ལ་དགྱེས། །དབང་པོ་ཞི་བ་ཞི་གནས་ཕ་རོལ་ཕྱིན། །ཞི་ལ་རབ་ཞི་
ཞི་གནས་དགྱེས་པ་པོ། །བཞད་དོན་ཡོན་ཏན་མཐར་ཕྱིན་བདག་ལ་གསུངས། །འཇམ་པའི་གསུང་ཅན་ཚངས་པའི་དབྱངས་འབྱིན་པ། །བྱ་མཆོག་མང་པོའི་སྒྲ་དང་སིལ་སྙན་སྒྲ། །སྒྲ་དབྱངས་ཡན་ལག་ཐམས་ཅད་རྫོགས་པའི་དབྱངས། །ཐུབ་པ་བཞད་
པར་སྦྱོར་བ་བདག་ལ་གསུངས། །ཐུབ་པ་ཤེས་རབ་འབྱུང་གནས་ཤེས་རབ་གྲོལ། །རྟག་ཏུ་མཉམ་གཞག་འཁྲུལ་པའི་ཐུགས་མི་མངའ། །ཐམས་ཅད་མཁྱེན་པ་སེམས་ཅན་སྤྱོད་ལ་མཁས། །མཚུངས་མེད་བཞད་པའི་དོན་ནི་ལེགས་པར་གསུངས། །
ཡེ་ཤེས་མི་ཕྱེད་དབང་གི་མཐར་ཕྱིན་པ། །རྫུ་འཕྲུལ་མཐའ་ཡས་པ་ཡི་སྟོབས་སྟོན་ཅིང་། །སྟོབས་བཅུ་མངའ་བ་དབང་གི་ཕ་རོལ་གཤེགས། །བདེ་བར་གཤེགས་ཁྱོད་ཅི་སླད་འདིར་འཛུམ་སྟོན། །སྐུ་འོད་དཔལ་གྱིས་སྣང་བ་མཛད་པ་པོ། །ཁྱོད་ཀྱི་
འོད་ཀྱིས་གཞན་འོད་གསལ་མི་འགྱུར། །ཇི་ལྟར་རྒྱལ་བའི་འོད་ནི་མངའ་བ་ལྟར། །ཉི་ཟླ་ཞུགས་དང་ནོར་བུའི་མ་ལགས་སོ། །བསོད་ནམས་ཆེན་པོ་ཐེ་ཙོམ་མི་མངའ་བ། །རྫོགས་པའི་བྱང་ཆུབ་སེམས་དཔའ་ཕྱོགས་གསལ་མཛད། །བཅོམ་ལྡན་

ཅི་སླད་བཞད་པ་སྟོན་པ་དེ། །མི་མཚུངས་ཡེ་ཤེས་མངའ་བས་བདག་ལུང་སྟོན། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཀླུའི་རྒྱལ་པོ་མ་དྲོས་པ་དེ་བཞིན་གཤེགས་
པ་ལ་འདི་འདྲ་བའི་བཀོད་པ་འདི་དག་གིས་མཆོད་པ་བྱེད་པ་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀླུའི་རྒྱལ་པོ་མ་དྲོས་པ་འདིས་བྱང་ཆུབ་བསྒྲུབ་པའི་ཕྱིར་སངས་རྒྱས་བྱེ་བ་ཕྲག་དགུ་བཅུ་
རྩ་དགུའི་གན་དུ་ཚངས་པར་སྤྱོད་པ་སྤྱད་དོ། །གང་གི་ཚེ་དེ་བཞིན་གཤེགས་པ་མར་མེ་མཛད་ཀྱིས་ང་ལ་ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ལུང་བསྟན་པ་
དེའི་ཚེ་དེའི་དུས་ན་ཀླུའི་རྒྱལ་པོ་འདི་ཚོང་དཔོན་གྱི་བུ་རྣམ་པར་དག་པའི་བློ་གྲོས་ཞེས་བྱ་བར་གྱུར་ཏེ། དེས་ང་ལུང་བསྟན་པ་ཐོས་ནས་སྨོན་ལམ་བཏབ་པ། བདག་ཀྱང་མ་འོངས་པའི་དུས་ན་ཇི་ལྟར་ཁྱེའུ་བློ་གྲོས་བཟང་པོ་འདི་ལུང་བསྟན་པ་བཞིན་དུ་ལུང་སྟོན་པར་གྱུར་ཅིག་
ཅེས་སྨྲས་སོ། །ཀུན་དགའ་བོ་ཀླུའི་རྒྱལ་པོ་མ་དྲོས་པ་འདི་ཇི་ལྟར་ད་ལྟར་ང་ལ་འབུལ་བ་དེ་བཞིན་དུ་བསྐལ་པ་བཟང་པོའི་དེ་བཞིན་གཤེགས་པ་ཐམས་ཅད་ལ་ཡང་རང་གི་གནས་བརྒྱན་ནས་འབུལ་བར་འགྱུར་ཏེ། དེ་བཞིན་གཤེགས་པ་དེ་དག་ཐམས་ཅད་ཀྱིས་ཀྱང་
དེའི་ལྷག་པའི་བསམ་པ་མཁྱེན་ནས་རྣམ་པར་དག་པའི་ལམ་གྱི་ཆོས་ཀྱི་རྣམ་གྲངས་འདི་འཆད་པར་འགྱུར་རོ། །ས་ཕྱོགས་འདི་ཉིད་དུ་དེ་བཞིན་གཤེགས་པ་ལོག་པར་དད་སེལ་དང་། གསེར་ཐུབ་དང་། འོད་སྲུང་ཡང་བཞུགས་ནས་རྣམ་པར་དག་པའི་ལམ་གྱི་ཆོས་ཀྱི་
སྒོའི་ལེའུ་འདི་གསུངས་སོ། །ཀླུའི་བདག་པོ་མ་དྲོས་པ་འདི་བསྐལ་པ་བཟང་པོའི་དེ་བཞིན་གཤེགས་པ་ཐམས་ཅད་ལ་མཆོད་པ་བྱེད་པར་འགྱུར་རོ། །ཆོས་ཀྱང་ཉན་པར་འགྱུར་རོ། །དེའི་འོག་ཏུ་དེ་བཞིན་གཤེགས་པ་གྲངས་མེད་པ་མཉེས་པར་བྱེད་པར་འགྱུར།

ཚངས་པར་སྤྱད་པ་ཡང་སྤྱོད་པར་འགྱུར། དམ་པའི་ཆོས་ཀྱང་ཡོངས་སུ་འཛིན་པར་འགྱུར་ཏེ། བསྐལ་པ་གྲངས་མེད་པ་བདུན་སྟོང་ལྔ་བརྒྱ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་དྲོས་པ་ཞེས་བྱ་བ་
ཉིད་དུ་འགྱུར་རོ། །ཀུན་དགའ་བོ་དེ་བཞིན་གཤེགས་པ་མ་དྲོས་པ་བྱང་ཆུབ་ཐོབ་པའི་ཚེ་སེམས་ཅན་གང་ཡང་འདོད་ཆགས་ཀྱི་གདུང་བའམ། ཞེ་སྡང་གི་གདུང་བའམ། གཏི་མུག་གི་གདུང་བའམ། ཕ་རོལ་གྱི་གདུང་བས་གདུང་བར་མི་འགྱུར་ཏེ། སེམས་
ཅན་དེ་དག་ཐམས་ཅད་ཀྱང་ངེས་པར་ཚེའི་ཚད་དུ་འགྱུར་རོ། །ཀུན་དགའ་བོ་དེ་བཞིན་གཤེགས་པ་མ་དྲོས་པའི་ཚེའི་ཚད་ནི་ལོ་བྱེ་བ་ཕྲག་བརྒྱད་ཅུར་འགྱུར་རོ། །ཀུན་དགའ་བོ་དེ་བཞིན་གཤེགས་པ་མ་དྲོས་པའི་སངས་རྒྱས་ཀྱི་ཞིང་ནི་བཻདཱུརྱ་ལས་གྲུབ་པར་འགྱུར་ཏེ། ས་
ཆེན་པོ་དེ་ནི་འཛམ་བུའི་གླིང་གི་གསེར་གྱི་པད་མས་ཁེབས་པར་འགྱུར། ལྷ་དང་མི་དེ་དག་གི་ལོངས་སྤྱོད་དང་། ཡོངས་སུ་སྤྱད་པ་དང་། བཟའ་བ་དང་། བཏུང་བ་ཡང་བསམས་པ་ཙམ་གྱིས་འབྱོར་བར་འགྱུར། མི་དེ་དག་ཐམས་ཅད་མངོན་པར་ཤེས་པ་
ལྔས་ནམ་མཁའ་ལ་འགྲོ་བར་འགྱུར། དགའ་ལྡན་གྱི་ལྷ་རྣམས་ཀྱི་ལོངས་སྤྱོད་དང་། ཡོངས་སུ་སྤྱོད་པ་ཅི་འདྲ་བར་མི་དེ་དག་གི་ཡང་དེ་འདྲ་བར་འགྱུར་རོ། །སེམས་ཅན་དེ་དག་གཉིས་ཀྱིས་གཉིས་སྦྱོར་བ་མ་ཡིན་གྱི། དེ་དག་ཐམས་ཅད་ཆོས་ཀྱི་དགའ་བ་ལ་
དགའ་ཞིང་མོས་པར་འགྱུར། ཉོན་མོངས་པ་རྣམས་ཀྱང་རབ་ཏུ་ཞི་བར་འགྱུར་རོ། །དེ་བཞིན་གཤེགས་པ་དེ་ཡང་ཡོངས་སུ་མི་སྐྱོ་བར་ཆོས་སྟོན་པར་འགྱུར་རོ། །ཇི་ལྟར་ད་ལྟར་ང་རྫུ་འཕྲུལ་གྱི་ཆོ་འཕྲུལ་ཐམས་ཅད་ཀྱིས་ཆོས་སྟོན་པ་ལྟར་དེ་ཤ་ཐང་བར་ཆོས་སྟོན་པར་མི་
འགྱུར་རོ། །སེམས་ཅན་དེ་དག་ཀྱང་ཆོས་བརྗོད་པ་ཙམ་གྱིས་འདུལ་བར་འགྱུར་རོ། །དེ་ཅིའི་ཕྱིར་ཞེ་ན། ས་འདི་ལྟར་སངས་རྒྱས་ཀྱི་ཞིང་དེ་ན་ལྷ་དང་མི་རྣམས་ལ་ཆོས་ཀྱི་གཏམ་གཅིག་སྟོན་པར་འགྱུར་བའི་ཕྱིར་རོ། །སངས་རྒྱས་ཀྱི་ཞིང་དེ་ན་ཉིན་མཚན་ཞེས་སོ་སོར་བགྲང་དུ་

མེད་པར་འགྱུར། དེ་ཅིའི་ཕྱིར་ཞེ་ན། ཀུན་དགའ་བོ་དེ་བཞིན་གཤེགས་པ་མ་དྲོས་པ་དེའི་རང་གི་ལུས་ལས་འོད་བཀྱེ་བས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་དེ་གསལ་བས་ཁྱབ་པར་འགྱུར་རོ། །དེ་ནས་སེམས་ཅན་དེ་དག་འདི་སྙམ་དུ་དེ་བཞིན་གཤེགས་པ་ཆོས་
ཀྱི་བཀའ་མཆིད་མཛད་པར་འགྱུར་རོ་སྙམ་དུ་སེམས་པར་འགྱུར་ཞིང་དེ་དག་འོད་དེས་བསྐུལ་བ་དང་། ཆོས་ཉན་པའི་ཕྱིར་ནམ་མཁའ་ལས་འདོང་བར་འགྱུར་རོ། །དེ་ལྟར་དེ་དག་འདུས་ནས་དེ་བཞིན་གཤེགས་པ་དེ་ཤིང་ཏ་ལ་བདུན་སྲིད་དུ། སྟེང་གི་བར་སྣང་ལ་
འཕགས་ཏེ། ནམ་མཁའ་ལ་གནས་པའི་སེང་གེའི་ཁྲི་ལ་འདུག་ནས། སེམས་ཅན་དེ་དག་ལ་ཆོས་སྟོན་པར་འགྱུར་རོ། །དེ་དེར་འདུག་པ་དང་སངས་རྒྱས་ཀྱི་ཞིང་དེ་ཐམས་ཅད་དུ་སྣང་བར་འགྱུར་ཏེ། དཔེར་ན་ཟླ་བ་ཉ་བའི་དཀྱིལ་འཁོར་བཞིན་ནོ། །དེ་ན་
དགེ་བའི་རྩ་བ་ཡོངས་སུ་སྨིན་པའི་སེམས་ཅན་དེ་དག་འདི་སྙམ་དུ་ཇི་ལྟར་བཅོམ་ལྡན་འདས་དེའི་སེང་གེའི་ཁྲི་གནས་མེད་པ་དེ་བཞིན་དུ་ཆོས་ཐམས་ཅད་ཀྱང་གནས་མེད་དེ་ནམ་མཁའི་ངོ་བོ་ཉིད་དོ་སྙམ་དུ་སེམས་པར་འགྱུར་ཏེ། དེ་དག་དེ་ཉིད་ཀྱིས་མངོན་པར་རྟོགས་པར་
འགྱུར། བཟོད་པ་ཡང་རབ་ཏུ་འཐོབ་པར་འགྱུར་རོ། །དེ་བཞིན་གཤེགས་པ་དེ་ནི་རྡོ་རྗེའི་སྒོ་ལ་འཇུག་པ་ཞེས་བྱ་བའི་ཆོས་ཀྱི་རྣམ་གྲངས་སྟོན་ཏོ། །འདི་ལྟ་སྟེ། དཔེར་ན་རྡོ་རྗེ་ནི་གང་དང་གང་དུ་བབ་པ་དེ་དང་དེ་དག་འཇོམས་སོ། །དེ་བཞིན་དུ་དེ་བཞིན་གཤེགས་
པ་དེའི་ཆོས་བསྟན་པ་ཡང་བག་ལ་ཉལ་དང་ཀུན་ནས་ལྡང་བ་ཐམས་ཅད་འཇོམས་སོ། །ཀུན་དགའ་བོ་དེ་བཞིན་གཤེགས་པ་མ་དྲོས་པ་དེ་གང་གི་ཚེ་ཡོངས་སུ་མྱ་ངན་ལས་འདའ་བ་དེའི་ཚེ་བྱང་ཆུབ་སེམས་དཔའ་སྨོན་ལམ་ཁྱད་པར་འཕགས་ཞེས་བྱ་བ་འདི་ངའི་འོག་ཏུ་དེ་བཞིན་
གཤེགས་པ་ཀུན་དུ་སྣང་བ་ཞེས་བྱ་བར་འགྱུར་ཏེ། སངས་རྒྱས་ཀྱི་ཞིང་ཡང་འདི་འདྲ་བ་ཉིད་དུ་འགྱུར་རོ། །ཞེས་བྱང་ཆུབ་སེམས་དཔའ་སྨོན་ལམ་ཁྱད་པར་འཕགས་པ་ལུང་བསྟན་ནས་ཡོངས་སུ་མྱ་ངན་ལས་འདའོ། །དེ་ནས་ཀླུའི་རྒྱལ་པོ་མ་དྲོས་པའི་བུ་རྟག་ཏུ་དད་

པ་ཐོབ་ཅེས་བྱ་བ་དེས་ནོར་བུ་རིན་པོ་ཆེའི་གདུགས་རིན་པོ་ཆེས་སྤྲས་པ་དེ་བཞིན་གཤེགས་པ་ལ་ཕུལ་ལོ། །ཕུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེའི་ཚེ་དེའི་དུས་ན་བྱང་ཆུབ་སེམས་དཔའ་སྨོན་ལམ་ཁྱད་པར་འཕགས་ཞེས་
བགྱི་བར་འགྱུར་བ་དེ་གང་ལགས། དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོའི་བུ་རྟག་ཏུ་དད་པ་ཐོབ་ཀྱི་ལྷག་པའི་བསམ་པ་མཁྱེན་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དེའི་ཚེ་དེའི་དུས་ན་བྱང་ཆུབ་སེམས་དཔའ་སྨོན་ལམ་ཁྱད་པར་
འཕགས་ཞེས་བྱ་བར་འགྱུར་བ་དེ་གཞན་ཡིན་པ་སྙམ་དུ་ཁྱོད་སེམས་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཀུན་དགའ་བོ་ཀླུའི་རྒྱལ་པོའི་བུ་རྟག་ཏུ་དད་པ་ཐོབ་པ་འདི་ཉིད་དེའི་ཚེ་དེའི་ཚེ་དུས་ན་བྱང་ཆུབ་སེམས་དཔའ་སྨོན་ལམ་ཁྱད་པར་འཕགས་ཞེས་བྱ་བར་འགྱུར་
ཏེ། བཅོམ་ལྡན་འདས་མ་དྲོས་པ་དེའི་འོག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་དུ་སྣང་བ་ཞེས་བྱ་བ་འཇིག་རྟེན་དུ་འབྱུང་ངོ་། །བཅོམ་ལྡན་འདས་ཀྱིས་ཞུས་པ་ལུང་བསྟན་ཅིང་རྣམ་པར་དག་པའི་ལམ་གྱི་ཆོས་ཀྱི་རྣམ་གྲངས་
འདི་མཐར་ཕྱིན་པའི་དུས་ཤེས་ནས་ཕྱོགས་བཅུ་ནས་འདུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་
ཅི་དང་། ལྟོ་འཕྱེ་ཆེན་པོ་རྣམས་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་མངོན་པར་དགའ་སྟེ་སྟན་ལས་ལངས་ནས། བཅོམ་ལྡན་འདས་ལ་ཚུལ་བཞིན་དུ་མཆོད་དེ། རང་རང་གི་སངས་རྒྱས་ཀྱི་ཞིང་དང་རང་རང་གི་གནས་སུ་དོང་ངོ་། །དེ་ནས་
ཀླུའི་རྒྱལ་པོ་མ་དྲོས་པ་བུ་དང་བཅས། ཆུང་མ་དང་བཅས། གཉེན་དང་འཁོར་དུ་བཅས་ཏེ་ཀླུའི་རྒྱལ་པོ་ལྷ་སྲུང་དུ་མངོན་པར་སྤྲུལ་ནས་བཅོམ་ལྡན་འདས་ཀྱི་གཞལ་མེད་ཁང་རྣམ་པའི་མཆོག་ཐམས་ཅད་དང་ལྡན་པ་ཡང་མངོན་པར་སྤྲུལ་ཏེ། བཅོམ་ལྡན་འདས་དེར་བཞུགས་སུ་གསོལ་ནས།

བྱང་ཆུབ་སེམས་དཔའི་དགེ་འདུན་དང་བཅས། ཉན་ཐོས་ཀྱི་དགེ་འདུན་དང་བཅས་པར་བཀོད་དེ་རང་གི་གནས་ནས་བྱུང་ནས་བཅོམ་ལྡན་འདས་ཀྱི་ཞབས་འབྲིང་དུ་སོང་སྟེ། དེས་བཅོམ་ལྡན་འདས་བྱང་ཆུབ་སེམས་དཔའ་དང་བཅས། ཉན་ཐོས་ཀྱི་དགེ་འདུན་དང་བཅས་པ་བྱ་རྒོད་ཕུང་པོའི་རི་ལ་
བསྐྱལ་ནས་བཅོམ་ལྡན་འདས་ཀྱིས་གནང་སྟེ་རང་གི་གནས་སུ་སོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ཟུང་ཤིག །གསོལ་པ། བདག་གིས་གཟུང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ།
ཀུན་དགའ་བོ་དེའི་ཕྱིར་རྣམ་པར་དག་པའི་ལམ་གྱི་ཆོས་ཀྱི་རྣམ་གྲངས་འདི་འཁོར་བཞི་པོ་དག་ལ་རྒྱུན་མི་འཆད་པར་སྟོན་ཅིག །དེ་ལྟར་ན་ཁྱོད་དམ་པའི་ཆོས་ཡོངས་སུ་གཟུང་བ་བྱས་པར་འགྱུར་རོ། །དེ་ནས་བཅོམ་ལྡན་འདས་ཀླུའི་རྒྱལ་པོ་མ་དྲོས་པའི་གནས་ནས་བྱ་རྒོད་ཕུང་པོའི་རི་ལ་
གཤེགས་སོ་ཞེས་རྒྱལ་པོའི་ཁབ་ཀྱི་བྲམ་ཟེ་དང་། ཁྱིམ་བདག་རྣམས་ཀྱིས་ཐོས་ནས་དེ་དག་ཐམས་ཅད་དད་པ་ཐོབ་སྟེ། ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་ངོ་། །དེ་དག་དེ་ལྟར་ཕྱིན་པ་དང་། སངས་རྒྱས་བཅོམ་ལྡན་འདས་ཀྱིས་རྣམ་པར་དག་པའི་ལམ་གྱི་ཆོས་ཀྱི་རྣམ་གྲངས་
འདི་ཉིད་ལས་བརྩམས་ཏེ། དེ་ལྟ་དེ་ལྟར་ཆོས་བསྟན་ནས་འཁོར་དེ་ལས་སྲོག་ཆགས་ཁྲིས་བྱང་ཆུབ་ཏུ་སེམས་བསྐྱེད་དོ། །སྲོག་ཆགས་ལྔ་སྟོང་ནི་ཆོས་ལ་ཆོས་ཀྱི་མིག་སྐྱེས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོ་དང་། ཉན་
ཐོས་ཆེན་པོ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་ཀླུའི་རྒྱལ་པོ་མ་དྲོས་པས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་
རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། བན་དེ་ཡེ་ཤེས་སྡེ་དང་། ཡི་གེ་པ་དགོན་གླིང་རྨ་ལ་སོགས་པས་ཞུ་ཆེན་བགྱིས་ཏེ་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་དྲུ་མ་ཀི་ནན་ར་རཱ་ཛ་པ་རི་པྲཱིཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་མི(་,)འམ་ཅིའི་རྒྱལ་པོ་སྡོང་པོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་
ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་རི་བྱ་རྒོད་ཀྱི་ཕུང་པོ་ལ་དགེ་སློང་དྲུག་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཕལ་ཆེར་ཕྱོགས་བཅུའི་
འཇིག་རྟེན་གྱི་ཁམས་ནས་འདུས་པ་བདུན་ཁྲི་ཉིས་སྟོང་ཐམས་ཅད་ཀྱང་མངོན་པར་ཤེས་པས་མངོན་པར་ཤེས་པ། གཟུངས་རབ་ཏུ་ཐོབ་པ། སྤོབས་པ་ཆགས་པ་མེད་པ། ཏིང་ངེ་འཛིན་རབ་ཏུ་ཐོབ་པ། དྲན་པ་དང་། བློ་གྲོས་དང་། རྟོགས་པ་དང་། མོས་པ་དང་། ངོ་ཚ་ཤེས་པ་
དང་། ཁྲེལ་ཡོད་པ་ཕུན་སུམ་ཚོགས་པ། བསམ་པ་རྡོ་རྗེ་ལྟར་བརྟན་ཞིང་མི་ཕྱེད་པ། སངས་རྒྱས་ཀྱི་ཆོས་ཐམས་ཅད་ལ་སྦྱོར་བ་ཕུན་སུམ་ཚོགས་པ། ལྷག་པའི་བསམ་པ་ཁྱད་པར་དུ་འཕགས་པ་ལ་ཞུགས་པ། བདག་ཉིད་བྱང་ཆུབ་ཀྱི་སེམས་མི་འདོར་བ། སེམས་
ཅན་གཞན་བྱང་ཆུབ་ཀྱི་སེམས་ཡང་དག་པར་འཛིན་དུ་འཇུག་པ། སྦྱིན་པ་དང་། དུལ་བ་དང་། སྡོམ་པ་དང་། དེས་པ་དང་། བཟོད་པ་དང་། སྡུག་པའི་དངོས་པོ་ཐམས་ཅད་ཡོངས་སུ་གཏོང་བ་དང་། ཡོངས་སུ་བསྔོ་བའི་ཆོ་ག་ཤེས་པ། ལུས་དང་། ངག་དང་། སེམས་
དང་། ཚུལ་ཁྲིམས་ཀྱི་རྒྱན་གྱིས་ལེགས་པར་བརྒྱན་པ། སེམས་ཅན་ཐམས་ཅད་ལ་སེམས་སྙོམས་པ་དང་། བཟོད་པ་དང་། དེས་པའི་སྟོབས་ཀྱི་གོ་ཆ་ཤིན་ཏུ་བགོས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གྲངས་མེད་པར་བརྩོན་འགྲུས་ཤིན་ཏུ་བརྩམས་པ། བསམ་
གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པའི་ཡེ་ཤེས་ཀྱིས་རྣམ་པར་རོལ་པ། ཚིག་ཐམས་ཅད་རབ་ཏུ་དབྱེ་བ་ལ་སྤོབས་པ་ཆགས་པ་མེད་པའི་ཤེས་རབ་དང་། ཡེ་ཤེས་ལ་མཁས་པ། རི་རབ་ཀྱི་རི་ལྟར་

སེམས་གཡོ་བ་མེད་པ། ས་དང་། ཆུ་དང་། མེ་དང་། རླུང་དང་། རི་ལྟར་རྗེས་སུ་ཆགས་པ་དང་། ཁོང་ཁྲོ་བ་དང་བྲལ་བ་བྱམས་པ་ཆེན་པོ་ལ་གནས་ཏེ་འོད་ཟེར་ཐོགས་པ་མེད་པ། སྙིང་རྗེ་ཆེན་པོ་ལ་གནས་ཏེ་སེམས་ཅན་ཐམས་ཅད་ཀྱི་བྱ་བ་གཅིག་ལ་བརྩོན་པ། དགའ་
བ་ཆེན་པོ་ལ་གནས་ཏེ་ཆོས་ལ་དགའ་ཞིང་མགུ་བ་དང་ལྡན་པ། བཏང་སྙོམས་ཆེན་པོ་ལ་གནས་པར་བརྩོན་པ། གཉིས་སུ་མེད་པའི་ཡེ་ཤེས་རབ་ཏུ་ཐོབ་པ། འཇིག་རྟེན་གྱི་ཆོས་བརྒྱད་པོ་རྙེད་པ་དང་། མ་རྙེད་པ་དང་། གྲགས་པ་དང་། མ་གྲགས་པ་དང་།
བསྟོད་པ་དང་། སྨད་པ་དང་། བདེ་བ་དང་། སྡུག་བསྔལ་ལས་རབ་ཏུ་འདས་པ། ཕ་རོལ་རྒོལ་བ་ངན་པའི་ཚོགས་ཅན་གྱི་ཚོགས་ཐམས་ཅད་ཀུན་དུ་རབ་ཏུ་འཇོམས་པ། བདུད་དང་ཕྱིར་རྒོལ་བ་བཅོམ་པ། ཨུ་དུམ་བཱ་རའི་མེ་ཏོག་མཐོང་བ་ལྟར་ཤིན་ཏུ་འབྱུང་བར་དཀའ་
བ། གསོལ་བ་མ་བཏབ་པར་སེམས་ཅན་ཐམས་ཅད་ལ་དགེ་བའི་བཤེས་གཉེན་བྱེད་པ། རབ་ཏུ་ཡོངས་སུ་མྱ་ངན་ལས་འདའ་བའི་བཤེས་གཉེན་བྱེད་པ། སེང་གེའི་སྒྲ་ཆེན་པོ་སྒྲོགས་པ། སངས་རྒྱས་ཀྱི་ཆོས་ཟབ་མོ་དང་མི་འཇིགས་པ་སྒྲོགས་པ། དེ་བཞིན་གཤེགས་
པའི་ཕྱག་རྒྱས་བཏབ་པ། མི་འཁྲུགས་པར་ཕྱད་པར་ལུང་སྟོན་པ། ཇི་ལྟར་སྨྲས་པ། དེ་བཞིན་བྱེད་པ། དེ་ཁོ་ནའི་ཆོས་ཀྱི་ཚུལ་ལ་བརྩོན་པ་འོད་ཀྱིས་ཉི་མ་དང་ཟླ་བ་མོག་མོག་པོར་བྱེད་པ། ཕྱོགས་བཅུར་སྒྲ་བསྒྲགས་པ། སངས་རྒྱས་ཀྱི་ཆོས་ཐམས་ཅད་ལ་སེམས་པ།
ཆོས་དཀོན་མཆོག་གི་མཛོད་ཡང་དག་པར་འཛིན་པ། དཀོན་མཆོག་གསུམ་གྱི་རིགས་མི་གཅོད་པར་ཡིད་ལ་བྱེད་པ། སངས་རྒྱས་ཀྱི་ཞིང་མཐའ་ཡས་པ་འདའ་བ་ལ་མཁས་པ། ཤིན་ཏུ་རྣམ་པར་ཕྱེ་བ་རྣམ་པར་འབྱེད་པ་གནས་པའི་བློ་དང་ལྡན་པ་མཐོང་བ་དང་། ཐོས་
པ་དོན་ཡོད་པས་རྣམ་པར་གནོན་པ། རྟག་པར་རྒྱུན་དུ་སེམས་ཅན་ཡོངས་སུ་སྨིན་པར་བྱེད་པ་ལ་བརྩོན་པ། ཤེས་རབ་དང་ཐབས་ལ་མཁས་པའི་མཆོག་ཐོབ་པ། སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པས་ཅི་རིགས་པར་ཆོས་སྟོན་པ།

སེམས་ཅན་ཐམས་ཅད་ཀྱི་སྤྱོད་པ་ལ་ལྟ་བའི་ཆོ་ག་ལ་མཁས་པ། སེམས་ཅན་ཐམས་ཅད་ཀྱི་འཇུག་པ་དང་བཏགས་པ་ལ་བདེ་བླག་ཏུ་མཁས་པ། མི་འཇིགས་པ་ཆེན་པོས་འཇིགས་པ་མེད་པ། རྒ་བ་དང་། ན་བ་དང་། འཆི་བ་དང་། ཉོན་མོངས་
པ་རབ་ཏུ་ཞི་བར་བྱེད་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་ལ་དགེ་བའི་རྩ་བ་བསྐྲུན་པ། མཚན་དང་དཔེ་བྱད་བཟང་པོ་ཡོངས་སུ་རྫོགས་པའི་བསོད་ནམས་དང་། ཡེ་ཤེས་ཀྱི་ཚོགས་བསགས་པ། སྟོང་པ་ཉིད་དང་། མཚན་མ་མེད་པ་དང་།
སྨོན་པ་མེད་པའི་ཆོས་ཐམས་ཅད་ལ་མོས་པ་ལ། སྨོན་པ་མེད་པ་སེམས་ཅན་དང་། ཆོས་ཐམས་ཅད་སྒྱུ་མ་དང་། སྨིག་རྒྱུ་དང་། རྨི་ལམ་དང་། ཆུ་ཟླ་དང་། མིག་ཡོར་དང་། བྲག་ཅ་དང་། ནམ་མཁའ་དང་མཚུངས་པར་མོས་པ། སྒྲ་སྐད་ཐམས་ཅད་ངེས་པའི་
ཚིག་གིས་སྟོན་པའི་ཡེ་ཤེས་ལ་མཁས་པ། ཆོས་དང་། དོན་དང་ངེས་པའི་ཚིག་དང་། སྤོབས་པ་སོ་སོ་ཡང་དག་པར་རིག་པ་ཐོབ་པ། འཇིག་རྟེན་ལས་འདས་པའི་ཤེས་རབ་ཀྱི་དབང་པོ་མངོན་སུམ་དུ་གྱུར་པ། ཤུགས་ཆེན་པོ་འཛིན་པའི་སྟོབས་བཅུ་ལ་ཉེ་བར་གྱུར་པ།
ཤའི་མིག་དང་། ལྷའི་མིག་དང་། ཤེས་རབ་ཀྱི་མིག་དང་། ཆོས་ཀྱི་མིག་དང་། སངས་རྒྱས་ཀྱི་སྤྱན་སྣང་བ་ཐོབ་པ། ལམ་གྱི་ཡན་ལག་གི་ཚོགས་ཤིན་ཏུ་བསགས་པའི་ལམ་ཐམས་ཅད་ལ་འཇུག་པའི་ཡེ་ཤེས་ལ་མཁས་པ། བྱང་ཆུབ་སེམས་དཔའི་སྡེ་སྣོད་སྣང་བ་ལ་
འཇུག་པའི་ཆོ་ག་ཤེས་པ། ཕྱིར་མི་ལྡོག་པའི་ཆོས་ཀྱི་འཁོར་ལོ་བསྐོར་བ། མཚན་ཉིད་ཀྱི་ཕྱག་རྒྱའི་ཏིང་ངེ་འཛིན་རབ་ཏུ་ཐོབ་པ། རྡོ་རྗེ་དཀྱིལ་འཁོར་གྱི་ཏིང་ངེ་འཛིན་ལ་འཇུག་པའི་ཡེ་ཤེས་ལ་མཁས་པ། ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་མངོན་དུ་གྱུར་པ། ཆོས་
དཀོན་མཆོག་གི་སྒྲོན་མ་འཛིན་པ། སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་རྣམ་པར་ལྟ་བ། སེམས་ཅན་ཐམས་ཅད་ཀྱི་སེམས་ཀྱི་བསམ་པ་ལ་རྣམ་པར་ལྟ་བར་མཁས་པ། སེམས་ཅན་ཐམས་ཅད་ལ་སངས་རྒྱས་ཀྱི་ཡེ་ཤེས་ཀྱི་བྱ་བས་སོ་སོར་ཉེ་བར་གནས་པ་རྣམ་

པའི་མཆོག་ཐམས་ཅད་དང་ལྡན་པའི་ཡོན་ཏན་རིན་པོ་ཆེ་ཐམས་ཅད་ཀྱིས་བརྒྱན་པ། བསྐལ་པ་ཐམས་ཅད་དུ་བསྔགས་པ་ཡོངས་སུ་བརྗོད་ཀྱང་མཐར་མི་ཕྱིན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་དང་། དགའ་འབྱུང་དང་།
ལག་ན་རིན་པོ་ཆེ་དང་། རིན་ཆེན་མེ་ཏོག་དང་། རིན་པོ་ཆེའི་ཏོག་དང་། མཐོང་དགའ་དང་། མིག་གིས་མཐོང་དགའ་དང་། མཛེས་པའི་བློ་གྲོས་དང་། དགའ་ཞིང་མཆོག་ཏུ་དགའ་བྱེད་དང་། ས་འཛིན་དང་། སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་དང་།
དཔལ་ཆེན་དང་། བདུད་ཐུལ་དང་། མེ་ཏོག་མན་དཱ་ར་བའི་དྲི་དང་། རླུང་ལྷ་དང་། བདེན་དགའ་དང་། མཉམ་ལྟ་དང་། རི་རབ་རྩེ་འཛིན་དང་། རི་རབ་བརྩེགས་དང་། རི་རབ་མཆོག་དང་། དྲ་བ་ཅན་གྱི་འོད་དང་། རྒྱལ་བའི་བློ་གྲོས་དང་། སྐྱེ་བར་ཚིམ་བྱེད་
དང་། འགྲོ་བ་འཛིན་དང་། ལྷའི་རྒྱལ་པོས་མཆོད་དང་། མཆོག་གི་བློ་གྲོས་དང་། ཐོགས་མེད་སེམས་དང་། སྐྱ་རིང་བློ་གྲོས་དང་། མི་སྐྱོབ་པ་དང་། དཔག་མེད་རིན་ཆེན་མཛོད་དང་། འོད་ཀྱི་ཏོག་དང་། འོད་དཔལ་དང་། སྒྲོན་མའི་རྒྱལ་པོ་དང་། བྱང་ཆུབ་བློ་གྲོས་དང་།
འོད་ཀྱིས་ཡང་དག་བརྒྱན་དང་། སྣ་ཚོགས་མེ་ཏོག་དང་། ལྷའི་རྒྱལ་པོ་དང་། ལྷའི་ཚུལ་གྱིས་ལྟ་བ་དང་། དཔུང་བཟང་དང་། ལེགས་པར་བསམ་པ་སེམས་པ་དང་། འཁོར་ལོ་རབ་གནས་རྐང་པ་དང་། མི་གཡོ་རྐང་པས་རྣམ་པར་གནོན་དང་། རྡོ་རྗེའི་རྐང་པས་རྣམ་པར་
གནོན་དང་། རྐང་པས་འཇིག་རྟེན་གསུམ་རྣམ་པར་གནོན་དང་། དགའ་སྤོབས་དང་། སྤོབས་མྱུར་དང་། སྤོབས་པ་མི་འཆད་པ་དང་། སྤོབས་པ་བྱིན་གྱིས་བརླབས་དང་། འཇམ་སྒྲ་དང་། སེམས་ཅན་ཐམས་ཅད་ཚིམ་བྱེད་དང་། ཚངས་དབྱངས་དང་། བཟང་སྐྱོང་
དང་། རིན་ཆེན་འབྱུང་གནས་དང་། དེད་དཔོན་བཟང་པོ་དང་། མིས་བྱིན་དང་། ཆུ་ལྷ་དང་། བྱམས་པ་དང་། འཇམ་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ལ་སོགས་པ་བྱང་ཆུབ་སེམས་དཔའ་བདུན་ཁྲི་ཉིས་སྟོང་

དང་ཐབས་ཅིག་ཏུ་བཞུགས་སོ། །གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། དེ་ལས་གཞན་པ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་
ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་རྣམས་བཅོམ་ལྡན་འདས་ལ་ལྟ་བ་དང་། ཕྱག་བྱ་བ་དང་། བསྙེན་བཀུར་བ་དང་། ཆོས་མཉན་པའི་ཕྱིར་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། །དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་ལྷའི་ཅོད་པན་ཞེས་བྱ་བ་འཁོར་དེ་ཉིད་དུ་འདུས་པ་དེས། བྱང་ཆུབ་སེམས་དཔའི་འཁོར་ཆེན་པོ་དེ་འདུས་པར་རིག་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་
གསུམ་བསྐོར་བ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འཇིག་རྟེན་འདས་པ་འཇིག་རྟེན་སྒྲོན་མ་མཛད། །ཁྱོད་ནི་
འཇིག་རྟེན་དོན་མཛད་བློ་གྲོས་ལྡན། །སྣང་བ་བརྙེས་ཤིང་ཉོན་མོངས་དྲི་བསལ་བ། །འཇིག་རྟེན་སྣང་མཛད་ཁྱོད་ལ་ཕྱག་འཚལ་ལོ། །སྦྱིན་ལ་དགྱེས་ཤིང་སྟོབས་བཅུ་མཆོག་མངའ་བ། །དུལ་བ་འདུལ་བ་གདུལ་བའི་ཕ་རོལ་ཕྱིན། །བཅོམ་ལྡན་ལྷ་དང་མི་དང་ཀླུས་མཆོད་པ། །གདུལ་
བའི་མཐར་ཕྱིན་ཁྱོད་ལ་ཕྱག་འཚལ་ལོ། །མཚན་མཆོག་འགྲོ་བ་མང་པོའི་དོན་མཛད་པ། །འདོམ་གང་འོད་ནི་གསེར་གྱི་ཁ་དོག་ལྟ། །དགེ་བའི་མཚན་གྱི་དམ་པའི་གཟུགས་མངའ་བ། །སྲིད་གསུམ་མཚུངས་མེད་ཁྱོད་ལ་ཕྱག་འཚལ་ལོ། །ཕ་རོལ་ཕྱིན་པས་གཞན་གྱི་
ཚོགས་འཇོམས་ཤིང་། །ཕ་རོལ་རྒོལ་བའི་རྒོལ་འཇོམས་མི་གཡོ་བ། །སེམས་ཅན་གཞན་གྱི་སེམས་དང་སྤྱོད་ལ་མཁས། །ཐུགས་རྗེ་མཆོག་མངའ་ཁྱོད་ལ་ཕྱག་འཚལ་ལོ། །དགྲ་བཅོམ་རྒྱལ་པོ་ཉོན་མོངས་རྡུལ་བསལ་བ། །འཚོ་བ་དག་ཅིང་བརྟུལ་ཞུགས་ཚུལ་ཁྲིམས་

གནས། །ལྷ་ཡི་ལྷ་མཆོག་དྲི་མེད་དྲི་མ་བྲལ། །ཕ་རོལ་ཚོགས་འཇོམས་ཁྱོད་ལ་ཕྱག་འཚལ་ལོ། །བདེ་གཤེགས་རིན་ཆེན་མཆོག་ཏུ་དགའ་མཛད་པ། །དགོན་པར་རྟག་གནས་རྟག་ཏུ་དགོན་པར་དགྱེས། །རྡུལ་སྐྱོན་གཏི་མུག་རྙོག་པ་མི་མངའ་བ། །ནམ་མཁའ་མཉམ་ཐུགས་
ཁྱོད་ལ་ཕྱག་འཚལ་ལོ། །ཆུ་བོ་བཞི་རྒལ་བདེན་བཞི་བཀའ་མཆིད་གསུང་། །མིག་སྦྱིན་བདུད་རྩི་ཆོས་ཀྱི་བཀའ་མཆིད་ཅན། །འགྲོ་བའི་དོན་མཛད་འཇིག་རྟེན་གསུམ་རྒྱུ་བ། །འཁོར་ལོ་ཞབས་མངའ་ཁྱོད་ལ་ཕྱག་འཚལ་ལོ། །ལྷ་དང་མིས་མཆོད་པ་ཡི་མཐུ་བོ་ཆེ། །མགོན་
པོ་ལྷ་ཡི་དབང་པོ་བདུན་འཇོམས་པ། །མི་དང་ལྷ་ཀླུ་ཚོགས་ཀྱིས་མནོད་པ་ཡི། །མི་མཆོག་དམ་པ་ཁྱོད་ལ་ཕྱག་འཚལ་ལོ། །རྟག་ཏུ་བདེ་སྡུག་དམ་པའི་ཆོས་ལ་དགྱེས། །མཉམ་ཐུགས་འགྲོ་བ་ཀུན་ལ་བྱམས་པའི་ཐུགས། །ཆོས་ལ་མཉམ་གནས་མི་རྣམས་ཁ་ལོ་སྒྱུར། །
ཡོན་ཏན་མཐར་ཕྱིན་ཁྱོད་ལ་ཕྱག་འཚལ་ལོ། །སྙན་པའི་སྒྲ་དབྱངས་རྣམ་པར་དག་དང་ལྡན། །ཚངས་པའི་སྒྲ་དབྱངས་ལྟ་བུར་འཇམ་པའི་གསུང་། །ཐམས་ཅད་དབྱངས་ཀྱི་ཡན་ལག་གསུང་ཚུལ་རྫོགས། །བདེན་པ་སྙན་གསུང་ཁྱོད་ལ་ཕྱག་འཚལ་ལོ། །སྟོང་པ་མཚན་མ་མེད་
ཅིང་སྨོན་དང་བྲལ། །ཟབ་མོ་བལྟ་དཀའ་ཤིན་ཏུ་རྟོགས་པར་དཀའ། །ཐར་ལ་འཇུག་པར་མཁས་པ་བློ་གྲོས་ལྡན། །ཐར་པའི་ལམ་དགྱེས་ཁྱོད་ལ་ཕྱག་འཚལ་ལོ། །རྒྱུ་ལ་རྟེན་པ་མཁས་པའི་བཅོམ་ལྡན་འདས། །མཐའ་གཉིས་ལྟ་བ་རྟག་ཏུ་མི་མངའ་བ། །ལས་ཀྱི་རྣམ་
སྨིན་འབྲས་བུ་ཁོ་ན་གསུང་། །ལྟ་བའི་མུན་བྲལ་ཁྱོད་ལ་ཕྱག་འཚལ་ལོ། །གང་ནས་མ་བྱོན་གང་དུའང་གཤེགས་མ་ལགས། །རྟག་ཏུ་དབེན་པའི་ཆོས་རྣམས་རབ་གསུང་བ། །སྨིག་རྒྱུ་རྒྱུ་བཞིན་ང་ཡི་མི་མངའ་བ། །དགེ་བའི་ཆོས་ཚུལ་ཁྱོད་ལ་ཕྱག་འཚལ་ལོ། །སྐྱེ་བ་མི་
སྐྱེ་གང་དུའང་སྐྱེ་མ་ལགས། །སྐྱེ་དང་འཇིག་དང་གང་དུའང་མི་བས་པ། །ཆོས་ཀྱི་གནས་ཉིད་ཇི་ལྟའི་གནས་ལ་གནས། །གནས་ལ་མི་གནས་རྒྱལ་ལ་ཕྱག་འཚལ་ལོ། །དེ་བཞིན་ཁོ་ན་དེ་བཞིན་ཡང་དག་གསུང་། །རྟག་ཏུ་མི་གཡོ་དེ་བཞིན་ཉིད་ལ་བཞུགས། །རི་རབ་རྒྱལ་མཚན་

རྡོ་རྗེ་འདྲ་བའི་སྐུ། །མི་གཡོ་རི་རབ་མཚུངས་ལ་ཕྱག་འཚལ་ལོ། །སྐུ་ནི་དབེན་ཞིང་མཉམ་ཐུགས་བློ་ལྡན་པ། །གྲགས་པ་མཐའ་ཡས་འཇིག་རྟེན་གསུམ་གྲགས་པ། །སྐྱེས་བུ་མཆོག་ལ་ཞུ་བ་ཞུས་པ་རྣམས། །འཇིག་རྟེན་ཟླ་བས་མྱུར་དུ་སྐབས་དབྱེར་
གསོལ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་བདག་གིས་ཞུས་པ་ལུང་
བསྟན་པའི་སླད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྐབས་དབྱེ་བར་གནང་ན་བཅོམ་ལྡན་འདས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་
སེམས་དཔའ་ཆེན་པོ་ལྷའི་ཅོད་པན་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང་། ངས་དྲི་བ་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་
རངས་པར་བྱའོ། །དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་ཇི་ལྟར་ན་བྱང་ཆུབ་སེམས་དཔའ་སྤོབས་པ་སྣ་ཚོགས་ཀྱི་རྒྱན་དང་ལྡན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཆོས་ཟབ་མོ་རྣམ་པར་གདོན་མི་ཟ་བ་ལ་འཇུག་པ་ཤེས་པ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་ཅན་ཐམས་
ཅད་ཀྱི་དབང་པོ་མཆོག་དང་མཆོག་མ་ལགས་པ་ཤེས་པ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སོ་སོ་ཅི་རིགས་པར་ཆོས་སྟོན་པ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ལ་སེམས་ཀྱི་བསམ་པ་མཉམ་

ཞིང་སྤྱོད་པ་ཤེས་པ་ལ་འཇུག་པར་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་རྒྱུ་དང་དབྱེ་བ་དང་། ལས་ཀྱི་རྣམ་པར་སྨིན་པ་ལ་འཇུག་པ་ཤེས་པ་ལ་བརྗེད་པ་མ་མཆིས་པར་སྤྱོད་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སྦྱིན་པའི་རྒྱན་གྱིས་
བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཚུལ་ཁྲིམས་ཀྱི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་བཟོད་པའི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་བརྩོན་འགྲུས་ཀྱི་རྒྱན་གྱིས་བརྒྱན་པ་
རྣམས་ལགས། ཇི་ལྟར་ན་བྱང་ཆུབ་སེམས་དཔའ་བསམ་གཏན་གྱི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཤེས་རབ་ཀྱི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཚངས་པའི་ལམ་ལ་མཁས་པ་རྣམས་ལགས།
ཇི་ལྟར་ན་བྱང་ཆུབ་སེམས་དཔའ་མངོན་པར་ཤེས་པ་ལས་མི་ཉམས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་གཡུལ་ལས་རྣམ་པར་རྒྱལ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་རྒལ་ནས་ཕ་རོལ་ཐང་ལ་གནས་པ་རྣམས་ལགས། ཇི་ལྟར་ན་
བྱང་ཆུབ་སེམས་དཔའ་ཉན་ཐོས་དང་། རང་སངས་རྒྱས་ཐམས་ཅད་དང་། སེམས་ཅན་ཐམས་ཅད་ཀྱི་སྤྱོད་ལམ་ཡང་སྟོན་ལ་མཚུངས་པར་སྤྱོད་པར་ཡང་རྣམ་པར་མི་རྟོག་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་འཁོར་བ་ལ་ཡང་ལྟ་ལ་མྱ་ངན་ལས་འདས་པ་
ལ་ཡང་མི་གནས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཁམས་སྣ་ཚོགས་ལ་ཡང་རྣམ་པར་ལྟ་ལ་ཆོས་ཀྱི་དབྱིངས་ལས་ཀྱང་མི་གཡོ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་དོན་ཡང་མི་འདོར་ལ་གནོད་པར་ཡང་ཀུན་དུ་གདའ་བ་རྣམས་ལགས།
ཇི་ལྟར་ན་བྱང་ཆུབ་སེམས་དཔའ་བསོད་ནམས་ཀྱི་ནོར་དང་ལྡན་ལ་ཐབས་ཀྱིས་ནོར་མ་མཆིས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཨ་ཞེས་བགྱི་བའི་སྒོས་རྣམ་པ་མ་མཆིས་པའི་སྒོར་འཇུག་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སངས་

རྒྱས་ཀྱི་ཆོས་ཐམས་ཅད་མངོན་སུམ་དུ་འགྱུར་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཆོས་རྣམ་པར་གདོན་མི་ཟ་བ་རྣམས་ལ་རྣམ་པར་ཕྱེ་བ་ཤིན་ཏུ་རྣམ་པར་འབྱེད་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་འཇིག་རྟེན་གྱི་བྱ་བ་དང་
འཐུན་པར་ཞུགས་ཀྱང་ཉོན་མོངས་པ་ཐམས་ཅད་ཀྱིས་མི་གོས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་གཞན་དག་གིས་བལྟར་མི་མཐོང་བའི་ཆོས་ཀྱི་དབང་ཕྱུག་རྣམས་ལགས། ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པ་མཐོང་བ་དང་མི་འབྲལ་བ་
རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཤིན་ཏུ་དུལ་ཞིང་མི་འཁྲུགས་པའི་ཆོས་ཅན་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཆོས་རྣམས་བླངས་པ་མ་མཆིས་པར་སློབ་དཔོན་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་ཅན་ཐམས་ཅད་
ཀྱི་སྟོན་པར་གྱུར་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་རྗེས་སུ་བསྐོར་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་དབང་བསྐུར་བ་ཐོབ་པ་རྣམས་ལགས། དེ་སྐད་
ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་ལ་ལེགས་སོ་ཞེས་བྱ་བ་གནང་སྟེ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་
ལ་སྙིང་བརྩེ་བ་དང་། སྐྱེ་བོ་ཕལ་པོ་ཆེའི་དོན་དང་། ལྷ་དང་མི་རྣམས་ལ་ཕན་པ་དང་། བདེ་བའི་ཕྱིར་ཞུགས་པ་དང་། རིགས་ཀྱི་བུ་ཁྱོད་ད་ལྟར་གྱི་དང་། མ་འོངས་པའི་སེམས་ཅན་རྣམས་རྗེས་སུ་གཟུང་བ་དང་། ཐེག་པ་ཆེན་པོ་འདི་ཡུན་རིང་དུ་གནས་པར་བྱ་བའི་ཕྱིར། རིགས་
ཀྱི་བུ་ཁྱོད་དེ་བཞིན་གཤེགས་པ་ལ་གང་དོན་འདི་ཡོངས་སུ་འདྲི་བར་སེམས་པ་ནི་ལེགས་སོ། །རིགས་ཀྱི་བུ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དངངས་ཁྱོད་ལ་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས། བྱང་ཆུབ་སེམས་དཔའ་སེམས་དཔའ་

ཆེན་པོ་ལྷའི་ཅོད་པན་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སྤོབས་པ་སྣ་ཚོགས་ཀྱི་རྒྱན་དང་ལྡན་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ།
སེམས་ཅན་ཐམས་ཅད་ལ་འོད་ཟེར་ཐོགས་པ་མེད་པ་རྣམས་རིན་པོ་ཆེ་དང་སྡུག་པའི་དངོས་པོ་ཐམས་ཅད་ཡོངས་སུ་གཏོང་ཞིང་ཡིད་འགྱོད་པ་མེད་པ་རྣམས་ཡིན། ཆོས་སྨྲ་བ་གཞན་དག་གིས་བཤད་པ་མི་ཟློག་ཅིང་རྗེས་སུ་ཡི་རང་སྟེ་དགའ་བ་དང་། མགུ་བ་དང་། དང་
བ་དང་མཆོག་ཏུ་དགའ་བ་ཐོབ་ནས་ལེགས་སོ་ཞེས་བྱ་བ་སྦྱིན་པ་དང་། ཆོས་མཉན་པའམ། ཆོས་བགྲོ་བའམ། དེ་བཞིན་གཤེགས་པའི་མཆོད་རྟེན་གྱི་ཕྱིར་རམ། མཚན་མོ་འདུག་པར་བསྐུལ་ན་མཆོག་ཏུ་དགའ་བ་དང་ལྡན་པ་དང་། བྱང་ཆུབ་ཀྱི་སེམས་ཀྱི་ལྷག་པའི་
བསམ་པ་དང་། ཟང་ཟིང་མེད་པའི་སེམས་ཀྱི་ཆོས་ཀྱི་སྦྱིན་པ་སྦྱིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སྤོབས་པ་སྣ་ཚོགས་རྒྱན་དང་ལྡན་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཆོས་ཟབ་མོ་རྣམ་པར་གདོན་མི་
ཟ་བ་ལ་འཇུག་པ་ཤེས་པ་ལ་མཁས་པ་རྣམས་ཡིན་ནོ། །བཞི་གང་ཞེ་ན། རྟེན་ཅིང་འབྲེལ་པར་འབྱུང་བ་དང་རྗེས་སུ་འཐུན་པ་དང་། བདག་གི་རང་བཞིན་ལྟར་སེམས་ཅན་ཐམས་ཅད་ཀྱི་རང་བཞིན་རྟོགས་པ་དང་། འདུ་བྱེད་ཐམས་ཅད་གར་ཡང་མི་འགྲོ། གང་ནས་ཀྱང་མ་འོངས་
པར་རབ་ཏུ་ཤེས་པ་དང་། ཆོས་ཐམས་ཅད་ནམ་མཁའི་ཕྱག་རྒྱས་བཏབ་པར་མོས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཆོས་ཟབ་མོ་རྣམ་པར་གདོན་མི་ཟ་བ་ལ་འཇུག་པ་ཤེས་པ་ལ་མཁས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་
དཔའ་ཆོས་བཞི་དང་ལྡན་ན་སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པ་ལ་མཁས་པ་རྣམས་ཡིན་ནོ། །བཞི་གང་ཞེ་ན། ཆོས་ཀྱི་དབྱིངས་ཀྱི་སྒོ་ཤིན་ཏུ་སྦྱངས་པ་དང་། སྒྲིབ་པ་མེད་པའི་སྒོ་མངོན་སུམ་དུ་གྱུར་པ་དང་། མངོན་པར་ཤེས་པས་རྣམ་

པར་རྩེ་བ་ཤེས་པ་དང་། སེམས་ལས་སུ་རུང་ཞིང་ཏིང་ངེ་འཛིན་ཕུན་སུམ་ཚོགས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སེམས་ཅན་ཐམས་ཅད་ཀྱི་དབང་པོ་མཆོག་དང་། མཆོག་མ་ཡིན་པ་ཤེས་པ་ལ་མཁས་པ་རྣམས་ཡིན་ནོ། །རིགས་
ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སོ་སོ་ཅི་རིགས་པར་ཆོས་སྟོན་པ་ལ་མཁས་པ་རྣམས་ཡིན་ནོ། །བཞི་གང་ཞེ་ན། སོ་སོ་ཡང་དག་པར་རིག་པ་ཤེས་པ་དང་། སེམས་ཅན་གཟུད་པ་ཤེས་པ་དང་། ཆོས་རབ་ཏུ་རྣམ་པར་འབྱེད་པའི་ཤེས་པ་དང་། བདག་
གིས་སེམས་སྦྱངས་པས་སེམས་ཅན་ཐམས་ཅད་ཀྱི་སེམས་སྦྱངས་པར་རབ་ཏུ་ཤེས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སོ་སོ་ཅི་རིགས་པར་ཆོས་སྟོན་པ་ལ་མཁས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་
ལྡན་ན་སེམས་ཅན་ཐམས་ཅད་ལ་སེམས་ཀྱི་བསམ་པ་མཉམ་ཞིང་སྤྱོད་པ་ཤེས་པ་ལ་འཇུག་པར་མཁས་པ་རྣམས་ཡིན་ནོ། །བཞི་གང་ཞེ་ན། ཤེས་རབ་ཀྱི་འཛུད་པ་དང་། ཡེ་ཤེས་ཆགས་པ་མེད་པ་དང་། ཐབས་ཀྱིས་ཞུགས་པས་སྒྲིབ་པ་ཐམས་ཅད་རྒྱུན་བཅད་པ་དང་། བློ་ཤིན་
ཏུ་སྦྱངས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སེམས་ཅན་ཐམས་ཅད་ལ་སེམས་ཀྱི་བསམ་པ་མཉམ་ཞིང་། སྤྱོད་པ་ཤེས་པ་ལ་འཇུག་པར་མཁས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་རྒྱུ་དང་། བྱ་བ་དང་
ལས་ཀྱི་རྣམ་པར་སྨིན་པ་ལ་འཇུག་པར་ཤེས་པ་ལ་བརྗེད་པ་མེད་པར་སྤྱོད་པ་རྣམས་ཡིན་ནོ། །བཞི་གང་ཞེ་ན། ཆད་པར་སྨྲ་བ་མ་ཡིན་པ་དང་། རྟག་པར་སྨྲ་བ་མ་ཡིན་པ་དང་། རྒྱུ་དང་བྱ་བ་དང་ལས་ཀྱི་འབྲས་བུ་ལ་ཡང་དག་པར་ཇི་ལྟ་བ་བཞིན་དུ་འཇུག་པ་དང་། ཆོས་ལ་ཆོས་
ཉིད་དུ་བྱེད་ཅིང་ཆོས་ལ་ཆོས་སུ་སྨྲའི་འདི་ལ་བདག་དང་བདག་གིར་མི་སྨྲ་བ་སྟེ། དེ་ལྟར་བྱ་བ་ལ་འཇུག་པས་རྒྱུ་དང་བྱ་བ་དང་། ལས་ཀྱི་འབྲས་བུ་མ་རུང་བར་མི་བྱེད་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། རྒྱུ་དང་བྱ་བ་དང་ལས་ཀྱི་རྣམ་པར་སྨིན་པ་

ལ་འཇུག་པ་ཤེས་པ་ལ་བརྗེད་པ་མེད་པར་སྤྱོད་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སྦྱིན་པའི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། མཚན་གྱིས་ལེགས་པར་བརྒྱན་པ་རྣམས་ཡིན། དཔེ་བྱད་བཟང་པོས་རྣམ་པར་སྤྲས་
པ་རྣམས་ཡིན། གཟུགས་ལྟ་བས་མི་ངོམས་པ་རྣམས་ཡིན། ལག་ན་རིན་པོ་ཆེ་ཐོབ་པས་ལོངས་སྤྱོད་མི་ཟད་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སྦྱིན་པའི་རྒྱན་གྱིས་བརྒྱན་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་
དང་ལྡན་ན། ཚུལ་ཁྲིམས་ཀྱི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། འཁོར་ལོས་སྒྱུར་བའི་རྒྱལ་པོར་འགྱུར་ཞིང་བྱང་ཆུབ་ཀྱི་སེམས་ཀྱིས་བརྒྱན་པ་དང་། ལྷའི་དབང་པོ་བརྒྱ་བྱིན་དུ་འགྱུར་ཞིང་བྱང་ཆུབ་ཀྱི་སེམས་ཀྱིས་བརྒྱན་པ་དང་། མི་མཇེད་ཀྱི་བདག་
པོ་ཚངས་པར་འགྱུར་ཞིང་བྱང་ཆུབ་ཀྱི་སེམས་ཀྱིས་བརྒྱན་པ་དང་། ངན་འགྲོ་ཐམས་ཅད་ཡང་དག་པར་བཅད་ནས་ལྷ་དང་མིར་སྐྱེ་བ་ཡོངས་སུ་བཟུང་བར་གྱུར་ཅིང་བྱང་ཆུབ་ཀྱི་སེམས་ཀྱིས་བརྒྱན་པ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཚུལ་
ཁྲིམས་ཀྱི་རྒྱན་གྱིས་བརྒྱན་པ་རྣམས་སུ་རིག་པར་བྱའོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་བཟོད་པའི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། ཚངས་པའི་སྐད་དང་སྒྲ་དབྱངས་ལྟ་བུ་དང་ལྡན་པ་རྣམས་ཡིན། ཀ་ལ་པིང་ཀའི་སྒྲ་དང་།
རྔ་སྒྲ་ལྟ་བུ་དང་ལྡན་པ་རྣམས་ཡིན། སྐྱེ་བོ་མང་པོས་མཐོང་ན་སྡུག་ཅིང་ཡིད་དུ་འོང་བ་རྣམས་ཡིན། དགེ་བའི་ཆོས་རྣམས་ལ་ཡི་དམ་ལ་བརྟན་པ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་བཟོད་པའི་རྒྱན་གྱིས་བརྒྱན་པ་རྣམས་སུ་རིག་པར་
བྱའོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་བརྩོན་འགྲུས་ཀྱི་རྒྱན་གྱིས་བརྒྱན་པར་རིག་པར་བྱའོ། །བཞི་གང་ཞེ་ན། དམ་བཅས་པ་ཉམས་འོག་ཏུ་ཆུད་པར་བྱ་བའི་ཆོག་ཤེས་པས་དགེ་བའི་ཆོས་རྣམས་ལ་ཡི་དམ་ལ་བརྟན་པ་རྣམས་ཡིན། ཕ་རོལ་གྱིས་མནན་

པ་མེད་པས་རྡོ་རྗེའི་ལུས་རབ་ཏུ་ཐོབ་པ་རྣམས་ཡིན། བྱ་བ་ཅི་ཡོད་ཅེས་བྱ་བ་ལ་མོས་པས་གསོལ་བ་མ་བཏབ་པར་སེམས་ཅན་ཐམས་ཅད་ལ་དགེ་བའི་བཤེས་གཉེན་བྱེད་པ་རྣམས་ཡིན། ཐོས་པའི་ཚོགས་བསགས་པས་མི་ངོམས་པའི་ཕྱིར་ཡིད་ཡོངས་སུ་མི་
སྐྱོ་བ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། བརྩོན་འགྲུས་ཀྱི་རྒྱན་གྱིས་བརྒྱན་པ་རྣམས་སུ་རིག་པར་བྱའོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་བསམ་གཏན་གྱི་རྒྱན་གྱིས་བརྒྱན་པ་རྣམས་ཡིན་ནོ། །
བཞི་གང་ཞེ་ན། མི་རྒོད་པ་རྣམས་ཡིན། མ་ཁེངས་པ་རྣམས་ཡིན། མུ་ཅོར་སྨྲ་བ་མེད་པ་རྣམས་ཡིན། ཅང་ཤེས་ཀྱི་སེམས་མི་འདོར་བ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་བསམ་གཏན་གྱི་རྒྱན་གྱིས་བརྒྱན་པ་རྣམས་ཡིན་
ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཤེས་རབ་ཀྱི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། བདག་དང་སེམས་ཅན་དང་། སྲོག་དང་གསོ་བ་དང་། སྐྱེས་བུ་དང་། གང་ཟག་ཏུ་སྨྲ་བ་མེད་པ་རྣམས་ཡིན། སྤོབས་
པ་ཆགས་པ་མེད་པ་རྣམས་ཡིན། ཚིག་ཐམས་ཅད་རབ་ཏུ་དབྱེ་བ་བསྟན་པ་ཤེས་པ་ལ་མཁས་པ་རྣམས་ཡིན། ཆོས་ཐམས་ཅད་ལ་སོམ་ཉི་མེད་ཅིང་ཐེ་ཙོམ་དང་བྲལ་བ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཤེས་རབ་ཀྱི་རྒྱན་
གྱིས་བརྒྱན་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཚངས་པའི་ལམ་ལ་མཁས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་དཔུང་གཉེན་བྱ་བའི་ཕྱིར་མངོན་པར་བསྒྲུབས་པའི་བྱམས་པ་དང་།
སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་མངོན་པར་བསྒྲུབས་པའི་སྙིང་རྗེ་ཆེན་པོ་དང་། ཆོས་ཐམས་ཅད་ལ་དགའ་བས་མངོན་པར་བསྒྲུབས་པའི་དགའ་བ་དང་། དེ་བཞིན་གཤེགས་པའི་ཡེ་ཤེས་ཀྱི་ཕྱིར་མངོན་པར་བསྒྲུབས་པའི་བཏང་སྙོམས་ཏེ། རིགས་

ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཚངས་པའི་ལམ་ལ་མཁས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་མངོན་པར་ཤེས་པ་ལས་མི་ཉམས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། བསམ་གཏན་བཞི་
སྡུད་པའི་ཤེས་པ་དང་། གཟུགས་མེད་པའི་སྙོམས་པར་འཇུག་པ་བཞི་བསྒྲུབས་པའི་ཐབས་ཤེས་པ་དང་། རང་གིས་སེམས་ལ་དབང་སྒྱུར་བའི་ཆོས་ཤེས་པ་དང་། སངས་རྒྱས་ལ་བལྟ་བའི་ཕྱིར་སངས་རྒྱས་ཀྱི་ཞིང་མཐའ་ཡས་པར་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་
དཔའ་ཆོས་འདི་བཞི་དང་ལྡན་ན་མངོན་པར་ཤེས་པ་ལས་མི་ཉམས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་གཡུལ་ལས་རྣམ་པར་རྒྱལ་བ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། ནང་ཉེ་བར་ཞི་བ་དང་། ཕྱི་རོལ་དུ་མི་རྒྱུ་བ་དང་།
ཆོས་ཐམས་ཅད་ལ་སྒྱུ་མ་ལྟ་བུ་རབ་ཏུ་རྟོག་པའི་ཤེས་པ་དང་། ཡེ་ཤེས་ཀྱི་སྟོབས་ཅན་ཡིན་གྱི་ཉོན་མོངས་པའི་སྟོབས་ཅན་མ་ཡིན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་གཡུལ་ལས་རྣམ་པར་རྒྱལ་བ་རྣམས་ཡིན་ནོ། །རིགས་ཀྱི་བུ་བྱང་ཆུབ་
སེམས་དཔའ་ཆོས་བཞི་དང་ལྡན་ན་རྒལ་ནས་ཕ་རོལ་ཐང་ལ་གནས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། འདོད་པའི་ཆུ་བོ་ཡང་རབ་ཏུ་ཤེས་ལ་འདོད་ཆགས་དང་བྲལ་བ་ཡང་མངོན་སུམ་དུ་མི་བྱེད་པ་དང་། སྲིད་པའི་ཆུ་བོ་ཡང་རབ་ཏུ་ཤེས་ལ་བསམས་བཞིན་
དུ་ཡང་སྐྱེ་བ་དང་། ལྟ་བའི་ཆུ་བོ་ཡང་རབ་ཏུ་ཤེས་ལ་ལྟ་བའི་བཅིང་བས་བཅིངས་པ་ཡང་མི་འདོར་བ་དང་། མ་རིག་པའི་ཆུ་བོ་ཡང་རབ་ཏུ་ཤེས་ལ་རྟེན་ཅིང་འབྲེལ་བར་འབྱུང་བའི་རྗེས་སུ་འཐུན་པར་ཡང་བྱེད་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་
ལྡན་ན་རྒལ་ནས་ཕ་རོལ་ཐང་ལ་གནས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཉན་ཐོས་དང་རང་སངས་རྒྱས་ཐམས་ཅད་དང་། སེམས་ཅན་ཐམས་ཅད་ཀྱི་སྤྱོད་ལམ་ཡང་སྟོན་ལ་མཚུངས་པར་སྤྱོད་པ་ཡང་རྣམ་པར་མི་རྟོག་

པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སྒྱུ་མ་ལྟ་བུའི་ཏིང་ངེ་འཛིན་ཤིན་ཏུ་ཡོངས་སུ་བསྒྲུབས་པ་དང་། ཆོས་ཐམས་ཅད་རྣམ་པར་བསྒྲུབས་པས་སོ་སོར་ཉེ་བར་གནས་པའི་མཚན་ཉིད་དུ་ཤིན་ཏུ་བརྟགས་པ་དང་། མངོན་པར་ཤེས་པ་
ལྔས་རྣམ་པར་རྩེ་བ་ཤེས་པ་དང་ལྡན་པ་དང་། ཡིད་ཀྱི་ལུས་མངོན་པར་བསྒྲུབས་པ་ལ་མཁས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཉན་ཐོས་དང་། རང་སངས་རྒྱས་ཐམས་ཅད་དང་། སེམས་ཅན་ཐམས་ཅད་ཀྱི་སྤྱོད་ལམ་ཡང་
སྟོན་ལ་མཚུངས་པར་སྤྱོད་པར་ཡང་རྣམ་པར་མི་རྟོག་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་འཁོར་བ་ལ་ཡང་ལྟ་ལ་མྱ་ངན་ལས་འདས་པ་ལ་ཡང་མི་གནས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སངས་རྒྱས་
ཀྱི་བྱིན་གྱི་རླབས་དང་། སྙིང་རྗེ་ཆེན་པོའི་སེམས་དང་། ཐབས་ལ་མཁས་པ་དང་། སྔོན་གྱི་ཡི་དམ་མི་འདོར་བ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་འཁོར་བ་ལ་ཡང་ལྟ་ལ་མྱ་ངན་ལས་འདས་པ་ཡང་མི་གནས་པ་རྣམས་ཡིན་ནོ། །རིགས་ཀྱི་
བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཁམས་སྣ་ཚོགས་ལ་ཡང་རྣམ་པར་ལྟ་ལ་ཆོས་ཀྱི་དབྱིངས་ལས་ཀྱང་མི་གཡོའོ། །བཞི་གང་ཞེ་ན། འདི་ལྟ་སྟེ། སེམས་ཅན་རང་བཞིན་མེད་པས་ཆོས་རང་བཞིན་མེད་པར་རྟོག་པ་དང་། ཆོས་རང་བཞིན་མེད་པས་སེམས་
ཅན་རང་བཞིན་མེད་པར་རྟོག་པ་དང་། སེམས་ཅན་རང་བཞིན་མེད་པས་སངས་རྒྱས་ཀྱི་ཆོས་རང་བཞིན་མེད་པར་མོས་པ་དང་། སེམས་ཅན་རང་བཞིན་མེད་པ་ལ་སོམ་ཉི་མེད་ཅིང་ཐེ་ཙོམ་དང་བྲལ་བ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཁམས་སྣ་
ཚོགས་ལ་ཡང་རྣམ་པར་ལྟ་ལ་ཆོས་ཀྱི་དབྱིངས་ལས་ཀྱང་མི་གཡོའོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་དོན་ཡང་མི་འདོར་ལ་གནོད་པར་ཡང་ཀུན་དུ་སྣང་ངོ་། །བཞི་གང་ཞེ་ན། འདི་ལྟ་སྟེ། བསམ་པ་མྱ་ངན་ལས་འདས་པར་སོང་བ་རྣམས་ཡིན།

སྦྱོར་བ་འཁོར་བར་སོང་བ་རྣམས་ཡིན། སངས་རྒྱས་ཀྱི་ཆོས་ཐམས་ཅད་ཡོངས་སུ་བསྐང་བ་ལ་བསམ་པ་སོང་བ་རྣམས་ཡིན། ཉན་ཐོས་དང་། རང་སངས་རྒྱས་ཀྱི་ཡུལ་ལ་ཡང་ཀུན་ཏུ་སྣང་བ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་
ན་དོན་ཡང་མི་འདོར་ལ་གནོད་པར་ཡང་ཀུན་དུ་སྣང་ངོ་། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་བསོད་ནམས་ཀྱིས་ནོར་དང་ལྡན་ལ་ཐབས་ཀྱིས་ནོར་མེད་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། རྒྱ་ཆེན་པོ་ལ་མོས་པའི་སེམས་ཅན་འདུལ་བའི་
ཕྱིར་བསོད་ནམས་ཀྱིས་འཁོར་ལོས་སྒྱུར་བ་དང་། བརྒྱ་བྱིན་དང་ཚངས་པའི་བསོད་ནམས་ཀྱང་ཉེ་བར་སྟོན་པ་དང་། འགྲོ་བ་ཕལ་པ་འདུལ་བའི་ཕྱིར་དབུལ་ཞིང་དམན་པར་ཡང་ཉེ་བར་སྟོན་པ་དང་། སློང་བ་མཐོང་ན་བདོག་པ་ཐམས་ཅད་གཏོང་ཞིང་། ནོར་མེད་པར་
ཡང་འགྱུར་བ་དང་། ནོར་ཆེན་པོ་དང་ལྡན་པ་མཐོང་ན་བསོད་ནམས་ཀྱིས་ལོངས་སྤྱོད་ཟད་མི་ཤེས་པར་ཡང་ཉེ་བར་སྟོན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་བསོད་ནམས་ཀྱིས་ནོར་དང་ལྡན་པ་ཡིན་ལ། ཐབས་ཀྱིས་ནོར་མེད་པ་རྣམས་
ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཨ་ཞེས་བྱ་བའི་སྒོས་རྣམ་པ་མེད་པའི་སྒོ་ལ་འཇུག་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། འདུ་བྱེད་ཐམས་ཅད་མི་རྟག་པར་ཤེས་པ་སྦྱོང་བ་དང་། འདུ་བྱེད་ཐམས་ཅད་གཟོད་མ་ནས་སྡུག་
བསྔལ་ལོ་ཞེས་བྱང་ཆུབ་རབ་ཏུ་རྙེད་པ་དང་། ཆོས་ཐམས་ཅད་བདག་མེད་དོ་ཞེས་ལྟ་བར་གྱུར་པ་ཡོངས་སུ་སྦྱོང་བ་དང་། མྱ་ངན་ལས་འདས་པ་ནི་གཟོད་མ་ནས་ཞི་བ་ཞེས་ཡེ་ཤེས་ལ་འཇུག་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། ཨ་
ཞེས་བྱ་བའི་སྒོས་རྣམ་པ་མེད་པའི་སྒོ་ལ་འཇུག་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སངས་རྒྱས་ཀྱི་ཆོས་ཐམས་ཅད་མངོན་སུམ་དུ་འགྱུར་བ་ཡིན་ནོ། །བཞི་གང་ཞེ་ན། འདི་ལྟ་སྟེ། ཤེས་རབ་ཀྱི་མིག་ཤིན་ཏུ་རྣམ་པར་དག་པ་རྣམས་ཡིན།

ཆོས་ཀྱི་མིག་གིས་སྣང་བ་ཐོབ་པ་རྣམས་ཡིན། སངས་རྒྱས་ཀྱི་སྤྱན་མངོན་སུམ་དུ་གྱུར་པ་རྣམས་ཡིན། སངས་རྒྱས་ཀྱི་ཆོས་ཐམས་ཅད་ལ་དབང་བསྐུར་བ་ཐོབ་པ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སངས་རྒྱས་ཀྱི་
ཆོས་ཐམས་ཅད་མངོན་སུམ་དུ་འགྱུར་བ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན། ཆོས་རྣམ་པར་གདོན་མི་ཟ་བ་རྣམས་ལ་རྣམ་པར་ཕྱེ་བ་ཤིན་ཏུ་རྣམ་པར་འབྱེད་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སོ་སོ་ཡང་དག་པར་
རིག་པ་ཤེས་པ་སྒྲིབ་པ་མེད་པ་དང་། བདེན་པ་བཞི་རྣམ་པར་དགོད་པ་ཤེས་པ་དང་། རྟོན་པ་ལ་གནས་སུ་ཤེས་པ་དང་། གཟུངས་ལ་གཡེང་བ་མེད་པར་ཤེས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཆོས་རྣམ་པར་གདོན་མི་ཟ་བ་རྣམས་ལ་
རྣམ་པར་ཕྱེ་བ་ཤིན་ཏུ་རྣམ་པར་འབྱེད་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་འཇིག་རྟེན་གྱི་བྱ་བ་དང་། འཐུན་པར་ཞུགས་ཀྱང་ཉོན་མོངས་པ་ཐམས་ཅད་ཀྱིས་མི་གོས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། འཇིག་རྟེན་
གྱི་ཆོས་མངོན་སུམ་དུ་གྱུར་པ་དང་། འཇིག་རྟེན་ལས་སེམས་ཅན་ཡང་དག་པར་སྒྲོལ་བ་དང་། རྗེས་སུ་ཆགས་པ་དང་། ཁོང་ཁྲོ་བ་སྤོང་བ་དང་། གཟོད་མ་ནས་རྣམ་པར་དག་ཅིང་འོད་གསལ་བས་ཀྱང་རང་བཞིན་གྱིས་ཀུན་ནས་ཉོན་མོངས་པ་མེད་པ་ཡིན་ཏེ། རིགས་ཀྱི་
བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་འཇིག་རྟེན་གྱི་བྱ་བ་དང་འཐུན་པར་ཞུགས་ཀྱང་ཉོན་མོངས་པ་ཐམས་ཅད་ཀྱིས་མི་གོས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་གཞན་དག་གིས་བལྟར་མི་མཐོང་བའི་ཆོས་ཀྱི་དབང་
ཕྱུག་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཀྱི་དབང་ཕྱུག་དང་། ཤེས་རབ་ཀྱི་དབང་ཕྱུག་དང་། ཡེ་ཤེས་ཀྱི་དབང་ཕྱུག་དང་། ཐབས་ཀྱི་དབང་ཕྱུག་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་གཞན་དག་གིས་བལྟར་

མི་མཐོང་བའི་ཆོས་ཀྱི་དབང་ཕྱུག་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན། དེ་བཞིན་གཤེགས་པ་མཐོང་བ་དང་མི་འབྲལ་བ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཅན་རྣམས་སངས་རྒྱས་མཐོང་བ་ཡང་དག་པར་
འཛིན་དུ་འཇུག་པ་དང་། སེམས་ཅན་རྣམས་ཆོས་ཉན་པ་ཡང་དག་པར་འཛིན་དུ་འཇུག་པ་དང་། སེམས་ཅན་རྣམས་བྱང་ཆུབ་ཀྱི་སེམས་ཡང་དག་པར་འཛིན་དུ་འཇུག་པ་དང་། སངས་རྒྱས་རྗེས་སུ་དྲན་པའི་ཏིང་ངེ་འཛིན་དང་མི་འབྲལ་བ་ཡིན་ཏེ། རིགས་ཀྱི་བུ་བྱང་
ཆུབ་སེམས་དཔའ་ཆོས་འདི་བཞི་དང་ལྡན་ན་དེ་བཞིན་གཤེགས་པ་མཐོང་བ་དང་མི་འབྲལ་བ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཤིན་ཏུ་དུལ་ཞིང་མི་འཁྲུགས་པའི་ཆོས་ཅན་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། འཕགས་
པ་འཇིག་རྟེན་ལས་འདས་པའི་ཤེས་རབ་ཀྱིས་རྣམ་པར་གྲོལ་བ་ཡེ་ཤེས་མཐོང་བ་མངོན་སུམ་དུ་གྱུར་པ་དང་། བདེན་པ་ལ་ཉེ་བར་བརྟགས་པས་ཆོས་ཐམས་ཅད་ཇི་ལྟ་བ་བཞིན་པ་དང་། བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་གཅོད་པ་ལ་མཁས་
པར་གྱུར་པ་དང་། ཉོན་མོངས་པས་མི་འཁྲུགས་པའི་ཆོས་ཅན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཤིན་ཏུ་དུལ་ཞིང་མི་འཁྲུགས་པའི་ཆོས་ཅན་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཆོས་རྣམས་བླངས་
པ་མེད་པར་སློབ་དཔོན་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་ཕན་པའི་དངོས་པོ་ཕུན་སུམ་ཚོགས་པ་རྣམས་ཡིན། སེམས་ཅན་ཡོངས་སུ་སྨིན་པར་བྱ་བ་ལ་བརྟན་ཞིང་བསམ་པ་སྒྱུ་མེད་པ་རྣམས་ཡིན། བདག་གིས་བདེ་བ་ལ་མི་
ཆགས་པ་རྣམས་ཡིན། གང་ཡེ་ཤེས་ཡོངས་སུ་ཚོལ་བ་དེ་ཡང་། སེམས་ཅན་ཐམས་ཅད་ཀྱི་ཆེད་དུ་ཡིན་གྱི་བདག་འབའ་ཞིག་གི་ཕྱིར་མ་ཡིན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཆོས་རྣམས་བླངས་པ་མེད་པར་སློབ་དཔོན་རྣམས་ཡིན་ནོ། །

རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སེམས་ཅན་ཐམས་ཅད་ཀྱི་སྟོན་པར་གྱུར་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། བདག་གི་དོན་གཏོང་ཞིང་གཞན་གྱི་དོན་བྱེད་པ་རྣམས་ཡིན། བདག་གི་བདེ་བ་ཐམས་ཅད་གཏོང་
ཞིང་། སེམས་ཅན་རྣམས་ལ་ཆོས་ཀྱི་བདེ་བ་སྦྱིན་པ་རྣམས་ཡིན། ཇི་ལྟར་ཐོས་པའི་ཆོས་སྟོན་པ་ལ་ངལ་བ་མེད་པ་རྣམས་ཡིན། ཆོས་ཀྱི་འཚོ་བས་འཚོའི་ཟང་ཟིང་གིས་འཚོ་བ་མ་ཡིན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སེམས་
ཅན་ཐམས་ཅད་ཀྱི་རྟོན་པར་གྱུར་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན། སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་རྗེས་སུ་བསྐོར་བ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། གཟུངས་རབ་ཏུ་ཐོབ་པ་དང་། སྤོབས་པ་རྒྱུན་
མི་འཆད་པ་དང་། སེམས་ཅན་གྱི་བསམ་པ་ཤེས་པ་ལ་འཇུག་པ་དང་། མྱ་ངན་ལས་འདས་པའི་ལམ་དུ་ཁྲིད་ཅིང་མི་ཕྱེད་པའི་ཆོས་སྟོན་པ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་རྗེས་སུ་བསྐོར་
བ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སངས་རྒྱས་ཀྱི་ཆོས་ཐམས་ཅད་ལ་དབང་བསྐུར་བ་ཐོབ་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སྤྱོད་པ་ཐམས་ཅད་ལས་རབ་ཏུ་འདས་པ་རྣམས་ཡིན། བྱང་ཆུབ་སེམས་དཔའི་
སྤྱོད་པ་ལས་མི་ལྡོག་ཅིང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་རྣམས་ཡིན། བསམས་བཞིན་དུ་ཚེ་དང་། འཆི་འཕོ་དང་། སྐྱེ་བ་ཡང་སྟོན་ལ་ཕྱིར་མི་ལྡོག་པའི་ཕྱག་རྒྱས་ཀྱང་བཏབ་པ་རྣམས་ཡིན། དེ་བཞིན་གཤེགས་པའི་ཕྱག་རྒྱ་ལ་ཡང་དག་པར་གཞོལ་ཞིང་ས་བཅུར་
ངེས་པར་བྱུང་ན། ས་ནས་སར་འཕར་བ་ལ་མཁས་པ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། སངས་རྒྱས་ཀྱི་ཆོས་ཐམས་ཅད་ལ་དབང་བསྐུར་བ་ཐོབ་པ་རྣམས་ཡིན་ནོ། །བཅོམ་ལྡན་འདས་ཀྱིས་བཞི་པ་བསྒྲུབ་པའི་ཆོས་ཀྱི་རྣམ་གྲངས་འདི་

བཤད་པ་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ནས་སྣང་བ་ཆེན་པོས་ཀྱང་འཇིག་རྟེན་གྱི་ཁམས་ཁྱབ་པར་གྱུར་ཏོ། །སྟེང་གི་བར་སྣང་ལས་ལྷ་བྱེ་བ་ཁྲག་ཁྲིག་བརྒྱ་སྟོང་གིས་ལྷའི་གླུ་དབྱངས་བླངས་ཏེ། ལྷའི་མེ་ཏོག་མན་དཱ་
ར་བའི་ཆར་རབ་ཏུ་ཕབ་ནས་འདི་སྐད་ཅེས་ཀྱེ་མའོ་བཅོམ་ལྡན་འདས་ཀྱིས་འདིར་སངས་རྒྱས་བཅོམ་ལྡན་འདས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཞི་པ་བསྒྲུབ་པའི་ཆོས་ཀྱི་རྣམ་གྲངས་འདི་ལས་བསྟན་པ་འདི་ནི་བསྐལ་པ་བྱེ་བ་ཁྲག་ཁྲིག་གྲངས་མེད་
པ་ནས་བསྒྲུབས་པ་ལགས་སོ། །བཅོམ་ལྡན་འདས་གང་བཞི་པ་སྒྲུབ་པའི་ཆོས་ཀྱི་རྣམ་གྲངས་འདི་ཉན་པ་དང་། མཉན་ནས་མོས་པ་དང་། མོས་ནས་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བགྱིད་པ་དང་། གཞན་དག་ལ་ཡང་སྟོན་པ་དང་།
བྱང་ཆུབ་ཀྱི་སེམས་དང་མི་འབྲལ་བའི་སེམས་ཅན་དེ་དག་ནི། དགེ་བའི་རྩ་བ་ངན་ངོན་དང་ལྡན་པ་མ་ལགས་ཏེ། དེ་དག་ནི་ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་སེང་གེའི་སྒྲ་སྒྲོག་པ་བཞིན་དུ་ལྷ་དང་། མི་དང་། ལྷ་མ་
ཡིན་གྱི་འཇིག་རྟེན་གྱི་མདུན་དུ་སེང་གེའི་སྒྲ་སྒྲོག་པར་འགྱུར་རོ། །བཅོམ་ལྡན་འདས་བདག་ཅག་ཀྱང་བཞི་པ་བསྒྲུབ་པའི་ཆོས་ཀྱི་རྣམ་གྲངས་འདི་ཐོས་པས་རྙེད་པ་ལེགས་པར་རྙེད་དོ། །ཞེས་ཆེད་དུ་རྗོད་པ་ཆེད་དུ་བརྗོད་དོ། །བཅོམ་ལྡན་འདས་ཀྱིས་བཞི་པ་བསྒྲུབ་པའི་
ཆོས་ཀྱི་རྣམ་གྲངས་འདི་བཤད་པ་ན། ལྷ་དང་མིའི་སྲོག་ཆགས་བརྒྱད་ཁྲི་བཞི་སྟོང་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ཁྲི་ཉིས་སྟོང་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །དེ་ནས་
བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་འདི་འཛིན་པ་དང་། གཞན་དག་ལ་རྒྱ་ཆེར་

རབ་ཏུ་སྟོན་པའི་བྱང་ཆུབ་སེམས་དཔའ་དེ་དག་ཆོས་དུ་དང་ལྡན་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་དག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་འདི་འཛིན་པ་དང་།
གཞན་དག་ལ་ཡང་རྒྱ་ཆེར་ཡང་དག་པར་སྟོན་པའི་བྱང་ཆུབ་སེམས་དཔའ་དེ་དག་ནི་ཆོས་བརྒྱད་དང་ལྡན་པར་འགྱུར་རོ། །བརྒྱད་གང་ཞེ་ན། འདི་ལྟ་སྟེ། དེ་དག་ཡང་དག་པར་རྫོགས་པའི་བྱང་ཆུབ་ལ་བསམ་པ་ངེས་ཏེ། བསམ་པ་ཕུན་སུམ་ཚོགས་པར་འགྱུར་བ་དང་། སེམས་
ཅན་ཐམས་ཅད་ལ་ཞེ་སྡང་བའི་སེམས་མེད་དེ། ཤིན་ཏུ་བྱམས་པ་བསྒོམ་པ་བསྒོམས་པར་འགྱུར་བ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་གནས་ཏེ། སྙིང་རྗེ་ཆེན་པོ་ལ་གནས་པར་འགྱུར་བ་དང་། ཆོས་འདོད་དེ་ཆོས་དོན་དུ་གཉེར་བར་འགྱུར་
བ་དང་། ཐོས་པ་ཚོལ་བས་མི་ངོམས་ཏེ་མཚོ་ཆེན་རྒྱ་མཚོ་ལྟ་བུར་འགྱུར་བ་དང་། ལུས་དང་སྲོག་འདོར་ཞིང་དམ་པའི་ཆོས་ཡོངས་སུ་འཛིན་པར་འགྱུར་བ་དང་། བསོད་ནམས་ཀྱི་ཚོགས་བསགས་ཏེ། དགེ་བའི་རྩ་བ་བརྟན་པར་འགྱུར་བ་དང་། སངས་རྒྱས་ཀྱི་བྱིན་གྱི་
རླབས་ཀྱིས་བྱིན་གྱིས་བརླབས་ཏེ། སྨོན་ལམ་གྱིས་ཡང་དག་པར་བྱུང་བར་འགྱུར་བ་དང་། འཁོར་གྱི་ནང་དུ་འཇིགས་པ་མེད་པས་བདུད་དང་ཕྱིར་རྒོལ་བ་བཅོམ་པར་འགྱུར་བ་སྟེ། རིགས་ཀྱི་བུ་གང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་
བུ་འདི་འཛིན་པ་དང་། གཞན་དག་ལ་རྒྱ་ཆེར་སྟོན་པའི་བྱང་ཆུབ་སེམས་དཔའ་དེ་དག་ནི་ཆོས་བརྒྱད་པོ་འདི་དག་དང་ལྡན་པར་འགྱུར་རོ། །དེ་ནས་དེའི་ཚེ་སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་པར་གྱུར་ཏོ། །
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གང་དག་ས་ཕྱོགས་མཐོན་དམན་ཅན་དང་། རི་ནག་པོ་དང་། ཆུ་མིག་དང་། མཚོ་དང་། ལྟེང་ཀ་དང་། རྒྱ་མཚོ་ཆེན་པོ་དེ་དག་ཐམས་ཅད་མི་སྣང་བར་གྱུར་ཏོ། །ས་ཆེན་པོ་འདི་ཐམས་ཅད་ཀྱང་ལག་མཐིལ་

ལྟར་མཉམ་པར་གནས་པར་གྱུར་ཏོ། །ཆུ་ན་གནས་པའི་སེམས་ཅན་རྣམས་ལ་ཡང་གནོད་པ་མེད་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཤིང་སྐམ་གང་དག་ལོ་བརྒྱ་ལོན་པ་དེ་དག་ཐམས་ཅད་ལས་ཀྱང་མེ་ཏོག་དང་། འབྲས་བུ་སྣ་
ཚོགས་སྐྱེས་པར་གྱུར་ནས། བཅོམ་ལྡན་འདས་ག་ལ་བ་དེ་ལོགས་སུ་བཏུད་མངོན་པར་བཏུད་ནས་ཕྱག་འཚལ་བར་གྱུར་ཏོ། །དེ་མ་ཡིན་པ་ཤིང་གཞན་ཐམས་ཅད་ལས་ཀྱང་མེ་ཏོག་དང་འབྲས་བུ་སྣ་ཚོགས་སྐྱེས་ནས་བཅོམ་ལྡན་འདས་ག་ལ་བ་དེ་ལོགས་སུ་བཏུད་མངོན་པར་བཏུད་ནས་
ཕྱག་འཚལ་བར་གྱུར་ཏོ། །ས་ཆེན་པོ་ལས་པད་མ་ཚད་ཤིང་རྟའི་འཁོར་ལོ་ཙམ་སྣ་ཚོགས་བལྟ་ན་སྡུག་པ་ཁ་དོག་དང་ལྡན་པ་དྲི་དང་ལྡན་པ་ཡིད་དུ་འོང་བ་སྐྱེས་སོ། །སྣང་བ་ཆེན་པོས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གསལ་བར་གྱུར་ཏོ། །
མི་སྣང་ཞིང་མ་དཀྲོལ་བར་སྟེང་གི་བར་སྣང་ལས་ལྷའི་སིལ་སྙན་དང་། གླུ་དབྱངས་ཀྱི་སྒྲ་བྱུང་སྟེ་གྲགས་པར་གྱུར་ཏོ། །རིའི་རྒྱལ་པོ་གངས་ཅན་དང་། རིའི་རྒྱལ་པོ་སྤོས་ཀྱི་ངད་ལྡང་ལས་ཀྱང་ལྷའི་མེ་ཏོག་སྣ་ཚོགས་སྔོན་དྲི་མི་མནམ་པ་རྣམས་ཀྱང་མཆོག་གི་དྲི་ལངས་པར་
གྱུར་ཏེ། དྲི་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་དྲི་ཞིམ་པོ་བསྣམ་པར་གྱུར་ཏོ། །རིའི་རྒྱལ་པོ་གངས་ཅན་དང་། རིའི་རྒྱལ་པོ་སྤོས་ཀྱི་ངད་ལྡང་དེ་ལས་མེ་ཏོག་གི་ཆར་ཆེན་པོ་བབ་སྟེ། དེ་དག་བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་
གང་ན་བ་དེར་མངོན་པར་བབས་ནས་ས་ཆེན་པོ་འདིར་མེ་ཏོག་གི་ཆར་དེ་དག་གིས་པུས་མོ་མན་ཅད་ནུབ་པར་གྱུར་ཏོ། །མེ་ཏོག་གི་ཤིང་དེ་དག་ལས་མེ་ཏོག་སྣ་ཚོགས་ཀྱི་ཆར་རབ་ཏུ་འབབ་ཅིང་། སིལ་སྙན་དང་། གླུ་དབྱངས་སྣ་ཚོགས་ཀྱི་སྒྲ་དག་ཀྱང་བྱུང་ངོ་། །སྟེང་གི་བར་
སྣང་ལ་རིན་པོ་ཆེ་སྣ་ཚོགས་ཀྱི་གདུགས་དཔག་ཚད་བརྒྱ་སྟོང་ཕྲག་བཅུའི་ཚད་ཙམ་ཀུན་དུ་གནས་པར་གྱུར་ཏོ། །རིན་པོ་ཆེའི་གདུགས་དེ་ལས་མུ་ཏིག་གི་དོ་ཤལ་དང་། རིན་པོ་ཆེའི་དྲིལ་བུ་གཡེར་ཀའི་དྲིལ་བུ་སྣ་ཚོགས་ཀྱི་དྲ་བ་འཕྱང་བར་གྱུར་ཏོ། །དྲིལ་བུ་གཡེར་ཀའི་དྲ་བའི་སྒྲ་ཡིད་

དུ་འོང་བ། ཡིད་དགའ་བར་བྱེད་པ། ཆགས་པར་བྱེད་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གོ་བར་བྱས་པར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
དགའ་བར་བགྱིད་པ། མགུ་བར་བགྱིད་པའི་མཚན་མ་རྒྱ་ཆེན་པོ་འདི་ལྟ་བུ་འདི་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྒྱན་ཐམས་ཅད་ཀྱིས་བརྒྱན་པར་གྱུར་པ་གདའ་བ་འདི་སུའི་སྔ་ལྟས་ལགས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་
བུ་འདི་ནི་མིའམ་ཅིའི་རྒྱལ་པོ་སྡོང་པོ་རི་སྤོས་ཀྱི་ངད་ལྡང་ནས་འཁོར་མིའམ་ཅི་སྟོང་ཕྲག་དུ་མ་དང་འཁོར་དྲི་ཟ་སྟོང་ཕྲག་དུ་མ་དང་། འཁོར་ལྷ་སྟོང་ཕྲག་དུ་མ་དང་བཅས་ཏེ་འོང་བ་དེའི་སྔ་ལྟས་སོ། །དེ་སྐད་གསུངས་མ་ཐག་ཏུ་དེ་ནས་སྐད་ཅིག་དེ་ལ་མིའམ་ཅིའི་རྒྱལ་པོ་སྡོང་
པོ་སིལ་སྙན་དང་། གླུ་དབྱངས་ལེན་པ་བརྒྱད་ཁྲི་བཞི་སྟོང་དང་། འཁོར་བརྒྱ་སྟོང་དུ་མས་བསྐོར་ནས་སྟེང་གི་བར་སྣང་ལ་མེ་ཏོག་གི་ཆུ་བོའི་ཆར་འབེབས་ཤིང་། བཅོམ་ལྡན་འདས་ག་ལ་བ་དེར་འོངས་ཏེ་ཕྱིན་ནས་འཁོར་དང་བཅས་པས། བཅོམ་ལྡན་འདས་ཀྱི་
ཞབས་ལ་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་བཅོམ་ལྡན་འདས་ཀྱི་སྤྱན་སྔར་མིའམ་ཅིའི་རྒྱལ་པོ་སྡོང་པོ་བདག་ཉིད་ཀྱིས་པི་བང་གི་ཁོག་པ་བཻདཱུརྱ་ལས་བྱས་པ། འཛམ་བུའི་གླིང་
གི་གསེར་གྱི་སབ་ལེའུ་ཅན། ས་ལེ་སྦྲམ་དང་། ནོར་བུ་དང་། རིན་པོ་ཆེ་དུ་མས་སྤྲས་པ། སྔོན་གྱི་ལས་ཀྱི་རྣམ་པར་སྨིན་པས་ཡོངས་སུ་སྦྱངས་པ་བླངས་ཏེ། སིལ་སྙན་བརྒྱད་ཁྲི་བཞི་སྟོང་པོ་དེ་དག་དང་ལྷན་ཅིག་ཏུ་གྲག་པར་བྱེད་དོ། །མིའམ་ཅིའི་རྒྱལ་པོ་སྡོང་པོས་པི་
བང་དེ་བླངས་མ་ཐག་ཏུ་དེ་ནས་པི་བང་གི་སྒྲ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དབྱངས་ཀྱིས་གོ་བར་གྱུར་ཏོ། །པི་བང་གི་སྒྲ་དེས་འདོད་པ་ན་སྤྱོད་པའི་རྒྱུད་ཀྱི་སྒྲ་དང་། གླུའི་སྒྲ་དང་། ལྷའི་གླུ་དབྱངས་ཀྱི་སྒྲ་རྣམས་ཟིལ་གྱིས་མནན་ཏེ་མི་གསལ་བར་གྱུར་ཏོ། །

དེ་ནས་པི་བང་གི་སྒྲ་བསྐུལ་བས་འདོད་པ་ན་སྤྱོད་པའི་ལྷའི་བུ་དེ་དག་གིས། ལྷའི་རོལ་མོ་བོར་ཏེ་བཅོམ་ལྡན་འདས་ག་ལ་བ་དེར་ལྷགས་སོ། །མིའམ་ཅིའི་རྒྱལ་པོ་སྡོང་པོས་པི་བང་དེ་བླངས་མ་ཐག་ཏུ་དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ཤིང་དང་། རིའི་རྒྱལ་
པོ་རི་རབ་དང་། གངས་ཅན་དང་། སྤོས་ཀྱི་ངད་ལྡང་དང་། བཏང་བཟུང་དང་། བཏང་བཟུང་ཆེན་པོ་དང་། དེ་མ་ཡིན་པ་གཞན་རི་ནག་པོ་རྣམས་དང་། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་ཇི་སྙེད་པ་དེ་དག་ཐམས་ཅད་ལྡེག །རབ་ཏུ་ལྡེག །ཀུན་ཏུ་རབ་
ཏུ་ལྡེག་གོ། །གཡོ་རབ་ཏུ་གཡོ། ཀུན་ཏུ་རབ་ཏུ་གཡོའོ། །འགུལ་རབ་ཏུ་འགུལ། ཀུན་ཏུ་རབ་ཏུ་འགུལ་ལོ། །འདི་ལྟ་སྟེ་དཔེར་ན་ཆང་གིས་ར་རོ་བའི་མི་འཁྱར། རབ་ཏུ་འཁྱར། ཀུན་ཏུ་རབ་ཏུ་འཁྱར་བ་དེ་བཞིན་དུ་ཤིང་དེ་དག་ཐམས་ཅད་དང་། རི་ཐམས་ཅད་ཀྱང་འདུད་རབ་ཏུ་འདུད།
ཀུན་ཏུ་རབ་ཏུ་འདུད་དོ།། །།བམ་པོ་གཉིས་པ། མིའམ་ཅིའི་རྒྱལ་པོ་སྡོང་པོས་པི་བང་ཁོག་པ་བཻདཱུརྱ་ལས་བྱས་པ་བླངས་མ་ཐག་ཏུ། དེ་ནས་བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་དེར་འདུས་པའི་ནང་ནས་ཕྱིར་མི་ལྡོག་པའི་བྱང་ཆུབ་སེམས་དཔའ་མ་གཏོགས་
པར་འདོད་ཆགས་དང་བྲལ་བའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་།
འཇིག་རྟེན་སྐྱོང་བ་དང་། མི་དང་། མི་མ་ཡིན་པ་དང་། རྣམ་པར་ཐར་པ་བརྒྱད་ལ་བསམ་གཏན་པའི་དགྲ་བཅོམ་པ་དང་། ཐམས་ཅད་དང་ལྡན་པའི་འཁོར་གྱིས་པི་བང་གི་སྒྲ་དེ་ཐོས་པ་དང་། པི་བང་གི་སྒྲ་དེ་མ་བཟོད་ནས་རང་རང་གི་སྟན་ལས་ལངས་ཏེ་འདར། རབ་ཏུ་འདར་
ཀུན་ཏུ་རབ་ཏུ་འདར་རོ། །འདུད་རབ་ཏུ་འདུད། ཀུན་དུ་རབ་ཏུ་འདུད་དོ། །གར་བྱེད་རབ་ཏུ་གར་བྱེད། ཀུན་དུ་རབ་ཏུ་གར་བྱེད་དོ། །ཉན་ཐོས་ཆེན་པོ་དེ་དག་ཐམས་ཅད་ཀྱང་རང་རང་གི་སྟན་ལ་མི་དགའ་སྟེ། འགུལ། རབ་ཏུ་འགུལ་ཞིང་སྤྱོད་ལམ་ཡང་འཁྲུགས་ནས་

བྱིས་པ་ཆུང་ངུ་བཞིན་དུ་གར་བྱེད་པ་ལྟ་བུར་སྟོན་ཏོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་ཉན་ཐོས་ཆེན་པོ་དེ་དག་ཐམས་ཅད་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཉན་ཐོས་ཆེན་པོ་དག་ཉོན་མོངས་པ་དང་བྲལ་བ། རྣམ་པར་ཐར་པ་བརྒྱད་
ལ་བསམ་གཏན་པ་བདེན་པ་བཞི་མཐོང་བར་གྱུར་པ་ཡིན་ན། ཅིའི་ཕྱིར་རང་གི་ལུས་འཇོག་པར་མི་ནུས་ཤིང་། ཚེ་དང་ལྡན་པ་དག་བྱིས་པ་ཆུང་ངུ་བཞིན་དུ་གར་བྱེད་པ་ལྟ་བུར་སྟོན། ཉན་ཐོས་ཆེན་པོ་དེ་དག་གིས་སྨྲས་པ། རིགས་ཀྱི་བུ་མིའམ་ཅིའི་རྒྱལ་པོ་སྡོང་པོས་པི་བང་
འདི་བླངས་པ་དང་། སིལ་སྙན་དང་། གླུ་དབྱངས་སྦྱར་བས་པི་བང་གི་སྒྲ་དེས་བདག་ཅག་ལ་དབང་མེད་པར་བདག་ཅག་གི་ལུས། རང་རང་གི་སྟན་ལ་འདུག་པར་མི་དགའ་ཞིང་འདར། རབ་ཏུ་འདར། ཀུན་དུ་རབ་ཏུ་འདར་ཏེ། སེམས་རྣམ་པར་གཞག་པར་ཡང་མ་ནུས་སོ། །
དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་གནས་བརྟན་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་ཆེན་པོ་རྒས་གཏུགས་འཁོགས་པ། འདོད་པ་ཉུང་བ་ཆོག་ཤེས་པ། སྦྱངས་པའི་ཡོན་ཏན་འཛིན་པ་དང་། ལྷ་དང་། མི་དང་། ལྷ་མ་ཡིན་དུ་བཅས་
པའི་འཇིག་རྟེན་གྱི་མཆོད་རྟེན་དུ་གྱུར་པ་ཡིན་ན། ཅིའི་ཕྱིར་རང་གི་ལུས་འཛིན་པར་མི་ནུས་ཤིང་། གནས་བརྟན་དུ་གྱུར་ཀྱང་བྱིས་པ་ཆུང་ངུ་བཞིན་དུ་གར་བྱེད་པ་ལྟ་བུར་སྟོན། གནས་བརྟན་འོད་སྲུང་ཆེན་པོས་སྨྲས་པ། རིགས་ཀྱི་བུ་དཔེར་ན་དམུ་རླུང་ཕྱད་པའི་རླུང་ལངས་
པ་ན་ཤིང་དང་། ནགས་དང་། རི་ཐམས་ཅད་གང་གིས་བདག་རྣམ་པར་གཞག་པའི་སྟོབས་མེད་མཐུ་མེད་དེ། དེ་དག་ཐམས་ཅད་མི་འདོད་བཞིན་དུ་གཡོ་རབ་ཏུ་གཡོ། འགུལ་རབ་ཏུ་འགུལ་ལོ། །རིགས་ཀྱི་བུ་དེ་བཞིན་དུ་གང་འདི་མིའམ་ཅིའི་རྒྱལ་པོ་སྡོང་པོས་པི་བང་
བླངས་པ་དེའི་སྒྲ་ཐོས་པས་བདག་ཅག་དམུ་རླུང་ཕྱད་པས་རི་ཆེན་པོ་བདས་པ་བཞིན་དུ་བདག་འཛིན་མ་ནུས་པར་གྱུར་ཏོ། །དེ་ཅིའི་ཕྱིར་ཞེ་ན། སྐྱེས་བུ་དམ་པ་འདིའི་སྨོན་ལམ་དང་། བསོད་ནམས་དང་། ཡེ་ཤེས་ཀྱི་ཁྱད་པར་ནི་འདི་འདྲ་སྟེ། དེས་ཉན་ཐོས་ཀྱི་བསོད་ནམས་

དང་ཡེ་ཤེས་དང་། གཟི་བརྗིད་ཐམས་ཅད་ཟིལ་གྱིས་ནོན་ཏོ། །བྱང་ཆུབ་སེམས་དཔའ་ལྷའི་ཅོད་པན་གྱིས་སྨྲས་པ། བཙུན་པ་འོད་སྲུང་ཆེན་པོ་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ཀྱི་དཔལ་དང་། གཟི་བརྗིད་དང་། སྟོབས་ལ་གང་གི་ཕྱིར་པི་བང་གི་སྒྲ་དེས་
བསྐུལ་བའམ། བསྐྱོད་པར་མི་ནུས་པས་བཙུན་པ་འོད་སྲུང་ཆེན་པོ་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེད། དེ་ཅིའི་ཕྱིར་ཞེ་ན། གང་ཉི་ཚེའི་ཡེ་ཤེས་དང་ལྡན་པ་རྣམས་ཀྱི་སྟོབས་དང་། གཟི་བརྗིད་དེ་ནི་པི་བང་གི་སྒྲ་འདིས་ཟིལ་གྱིས་ནོན་
ཏོ། །གང་ཐེག་པ་ཆེན་པོ་ལ་ཞུགས་པ་རྣམས་ཀྱི་སྟོབས་དང་། གཟི་བརྗིད་དེ་ལ་ནི་ཟིལ་གྱིས་གནོན་པར་མི་ནུས་པ་ལ་ལྟོས། དེ་ནས་མིའམ་ཅིའི་རྒྱལ་པོ་སྡོང་པོས་པི་བང་གི་སྒྲ་དེ་སྒྲོག་པ་ན་སངས་རྒྱས་ཀྱི་མཐུ་དང་། མིའམ་ཅིའི་རྒྱལ་པོ་སྡོང་པོའི་སྔོན་གྱི་སྨོན་
ལམ་གྱི་བྱིན་གྱི་རླབས་ཀྱིས་པི་བང་དེ་དང་སིལ་སྙན་བརྒྱད་ཁྲི་བཞི་སྟོང་པོ་དེ་དག་ལས་ཚིགས་སུ་བཅད་པ་འདི་དག་བྱུང་ངོ་། །ཐ་མ་འབྲིང་དང་དེ་བཞིན་མཆོག་རྣམས་ཀྱི། །ཆོས་རྣམས་ཐམས་ཅད་མཉམ་ཞིང་ཆོས་རྣམས་དབེན། །ཞི་བ་སྟོང་པ་མི་འགྱུར་འཁྲུགས་པ་མེད། །
གཟོད་ནས་དག་སྟེ་དྲི་མེད་ནམ་མཁའ་བཞིན། །གང་དག་ད་ལྟར་གྱི་དང་འདས་པ་ཡི། །སེམས་ཅན་ཀུན་མཉམ་སེམས་ཅན་སེམས་ཅན་མེད། །སེམས་ཅན་སྐད་དུ་སྒྲ་རྣམས་འབྱུང་བ་ཡང་། །ཆོས་ཀྱི་སྒྲ་དང་མཚུངས་ཏེ་དེ་ཡང་མེད། །ཞིང་རྣམས་ཐམས་ཅད་
ཞིང་མཉམ་ཞིང་མིན་ཏེ། །བར་སྣང་དང་ནི་མཚུངས་ཤིང་མཉམ་པར་སྣང་། །འཕེལ་བ་མ་ཡིན་མི་ཟད་མ་སྐྱེས་ཏེ། །གསོབ་གསོག་ནམ་མཁའ་ལྟ་བུར་རྣམ་པར་དག །སངས་རྒྱས་ཀུན་མཉམ་སངས་རྒྱས་སངས་རྒྱས་མིན། །ཆོས་དབྱིངས་ངེས་པར་འདྲེས་པ་
མེད་པ་སྟེ། །ཚུལ་ཁྲིམས་ཤེས་རབ་ཡེ་ཤེས་རྣམ་གྲོལ་མཉམ། །མཚན་ཉིད་གཅིག་སྟེ་མཚན་མཉམ་མཚན་ཉིད་མེད། །ཉོན་མོངས་ཐམས་ཅད་ཉོན་མོངས་མ་ཡིན་གྲོལ། །རྟོག་དང་རྟོག་པ་ཀུན་རྟོག་རྣམ་པར་རྟོག །ནང་ན་རྒྱུ་བ་མ་ཡིན་ཕྱི་རོལ་མིན། །འདུ་

ཤེས་མདུད་པ་ཕྱིན་ཅི་ལོག་ལས་གྱུར། །རྣམ་པར་རྟོག་པས་ཆོས་དབྱིངས་མིང་བཏགས་པ། །མིང་དེ་ཉིད་ཀྱང་གཞན་མིན་དེ་བཞིན་མིན། །མིང་དང་གཟུགས་ཀྱི་རང་བཞིན་རྗེས་རྟོགས་པ། །དེ་དག་རྟག་ཏུ་མི་ཆགས་འཇིག་རྟེན་སྤྱོད། །གང་རྣམས་འདས་
པའི་བདེ་གཤེགས་གྲངས་མེད་པ། །དེ་དག་གིས་ནི་གང་གསུངས་ཆོས་མང་པོ། །གཟོད་ནས་ཟད་ཅིང་དེངས་དང་འཇིགས་ལས་དབེན། །དེ་དག་ཡུལ་དང་ཕྱོགས་སུ་འགྲོ་མ་ཡིན། །ཆོས་འདི་དག་ནི་ཡི་གེ་ལས་བྱུང་སྟེ། །ཡི་གེ་གང་དག་ཟད་ཅན་ཟད་པའི་ཆོས། །
ཡི་གེ་ཟད་པའི་ཆོས་ཉིད་ཤེས་པས་ན། །ཆོས་རྣམས་ཀུན་ལ་རྣམ་པར་རྟོག་མི་བྱེད། །སེམས་ཀྱི་རྒྱུད་ནི་རྒྱུད་མཉམ་རྒྱུད་མ་ཡིན། །རང་བཞིན་གཞན་དང་གཞན་ཏེ་ཆགས་པ་མེད། །སེམས་དང་སེམས་བྱུང་ཆོས་མཐའ་མེད་ཤེས་པས། །འཕགས་པ་རྣམས་
ནི་མཉམ་པའི་ཆོས་ལ་འཇུག །མཐའ་དང་