Kinh tạng Tây Tạng (Kangyur Đại Học) — 055_མདོ་སྡེ།_ད

ཀྱི་སྟོན་པར་འགྱུར། །རིན་ཆེན་བདུན་གྱི་དབང་ཕྱུག་ཆེ། །འཁོར་ལོས་སྒྱུར་བ་རྒྱལ་དབང་འགྱུར། །རྒྱལ་པོར་གནས་ནས་སངས་རྒྱས་ལ། །ཕྱི་ཕྱིར་བསྟི་སྟང་བྱེད་པར་འགྱུར། །ཤི་འཕོས་ནས་ནི་
མཐོ་རིས་འགྲོ། །སངས་རྒྱས་བསྟན་ལ་དད་པར་འགྱུར། །རི་རབ་རྩེ་མོའི་དབང་ཕྱུག་པོ། །ལྷ་ཡི་དབང་པོ་བརྒྱ་བྱིན་འགྱུར། །ལྷ་དབང་འཐབ་བྲལ་རབ་ཏུ་འགྱུར། །དེ་བཞིན་ཡོངས་སུ་དགའ་ལྡན་འགྱུར། །ལྷ་དབང་རབ་ཏུ་འཕྲུལ་པ་དང་། །དབང་བྱེད་འཇིགས་པ་མེད་པར་འགྱུར། །
ཚུལ་འདིར་ཡི་རང་བྱས་པ་ནི། །ཚངས་པའི་འཇིག་རྟེན་ཚངས་པའི་མཆོག །མཁས་པ་ལྷ་རྣམས་བྱེ་བ་ཡིས། །མཆོད་པ་བྱ་བའི་དབང་ཕྱུག་འགྱུར། །གང་ཞིག་མདོ་སྡེ་དཀོན་མཆོག་འདིར། །ཕྱི་ཕྱིར་རྗེས་སུ་ཡི་རང་ན། །སུས་ཀྱང་དེ་ཡི་ཡོན་ཏན་མཐའ། །བརྗོད་པར་ནུས་པ་མ་
ཡིན་ནོ། །བྱང་ཆུབ་ཏུ་ནི་སེམས་བསྐྱེད་ན། །བསྐལ་པ་བྱེ་བ་རྣམས་སུ་ཡང་། །ནམ་དུའང་ལོང་ཐེང་མི་འགྱུར་ཏེ། །སྟོན་པ་བླ་ན་མེད་པར་འགྱུར། །རྩྭ་ཤིང་རི་དང་སྡོང་པོ་དང་། །འཁྲི་ཤིང་སྨན་ཡང་དེ་བཞིན་ཏེ། །མེ་ཏོག་འབྲས་ལྡན་ལྗོན་ཤིང་ཡང་། །གང་དུ་འགྲོ་བར་འདུད་པར་
འགྱུར། །མར་མེ་མཛད་ནས་བཟུང་ནས་སུ། །བརྟུལ་ཞུགས་བཟང་པོ་གང་འགྲོ་བར། །ཕྱོགས་བཅུ་དག་གི་འཇིག་རྟེན་ཁམས། །མཐའ་ཡས་འོད་ཀྱིས་སྣང་བར་བྱེད། །གང་དག་འདས་པའི་བར་དེ་དང་། །གང་དག་མ་འོངས་ཤིང་རྣམས་ཀྱི། །མེ་ཏོག་འབྲས་བུ་ལོ་མ་
དག། །དེ་དག་རྣམ་པར་ཤེས་པར་ནུས། །སངས་རྒྱས་བྱེ་བ་ཕྲག་སྟོང་དང་། །ཁྲག་ཁྲིག་ཕྲག་བརྒྱ་རྣམས་ཀྱིས་ཀྱང་། །དེ་དག་གི་ནི་ཡོན་ཏན་མཐའ། །བརྗོད་པར་ནུས་པ་མ་ཡིན་ནོ། །བྱང་ཆུབ་སེམས་དཔའ་གང་དག་ནི། །མདོ་འདི་ཕྱིར་ཞིང་མོས་བྱེད་པ། །དེ་ཡི་

བསྔགས་པའི་ཕྲེང་བ་ཡི། །མཐའ་མ་བརྗོད་པར་མི་ནུས་སོ། །མདོ་སྡེ་ཡོན་ཏན་གང་བརྗོད་པ། །དེ་དག་ཐམས་ཅད་དེ་དང་ལྡན། །དེ་བས་རབ་ཏུ་ལྷག་ཡོད་དེ། །དེ་ཡི་ཡོན་ཏན་མཐའ་ཐུག་མེད། །མི་གང་དེ་ལ་དགའ་བར་མི་བྱེད་ཅིང་། །ཡོད་པ་མིན་དང་
བསྔགས་པ་མི་སྨྲ་དང་། །མི་གང་ཁྲོས་ནས་མི་སྙན་སྨྲ་བ་འམ། །ཡང་ན་དེ་ལ་འཁྲུགས་པ་བྱེད་པ་དག །སེམས་ཅན་དམྱལ་བར་སྐྱེ་འགྱུར་ཏེ། །ལུས་ནི་ཆེན་པོར་གྱུར་ནས་སུ། །དེ་ནི་སྡུག་བསྔལ་མྱོང་འགྱུར་ཏེ། །ཡིད་རབ་མི་བདེ་མ་རུང་འགྱུར། །དཔག་ཚད་ལྔ་བརྒྱའི་ཚད་
ཙམ་དུ། །དེ་ཡི་ལུས་ནི་སྐྱེ་བར་འགྱུར། །སྡིག་པའི་ལས་ཀྱིས་རྟག་ཏུ་ཡང་། །བྱེ་བས་བསྐོར་ནས་ཟ་བར་འགྱུར། །བསྐལ་པ་དག་ནི་དུ་མར་ཡང་། །ལུས་ནི་དཔག་ཚད་ལྔ་བརྒྱར་འགྱུར། །དེ་ལ་མགོ་ཡང་ལྔ་བརྒྱ་སྟེ། །དེ་ལས་ཉུང་བར་མི་འགྱུར་རོ། །མགོ་རྣམས་རེ་རེ་དག་ལ་ཡང་། །ལྔ་
བརྒྱའི་ལྕེ་ལས་མི་ཉུང་སྟེ། །ལྕེ་གཅིག་ལ་ཡང་ཐོང་གཤོལ་ནི། །ལྔ་བརྒྱར་ཚང་སྟེ་མི་ཉུང་བ། །འབར་བས་དེ་ལ་རྨོ་བྱེད་དེ། །སྐུར་འདེབས་སྡིག་པའི་ལས་ཀྱིས་སོ། །ཚིག་རྩུབ་དག་ནི་སྨྲས་པས་ན། །ཤིན་ཏུ་ཚ་བར་སྲེག་པར་འགྱུར། །གང་དག་སྡོམ་པར་མི་བྱེད་ཅིང་། །བྱང་ཆུབ་སེམས་
དཔའ་གནོད་བྱེད་པ། །དེ་ནི་སེམས་ཅན་དམྱལ་སྐྱེ་སྟེ། །དུད་འགྲོའི་སྐྱེ་གནས་འགྲོ་བར་འགྱུར། །ཚུལ་འདི་སྤོང་བར་བྱེད་པ་ནི། །བསྐལ་པ་བྱེ་བ་སྟོང་རྣམས་དང་། །བརྒྱ་དང་ཁྲག་ཁྲིག་རྣམས་སུ་ཡང་། །མནར་མེད་པར་ནི་སྡུག་བསྔལ་རྙེད། །དེ་ནས་ཤི་འཕོས་རབ་གདུག་ཅིང་། །ཤིན་
ཏུ་མི་བཟད་སྦྲུལ་དུ་འགྱུར། །བཀྲེས་ཤིང་སྐོམ་པས་མངོན་གཟིར་ཀྱང་། །ཤིན་ཏུ་མི་བཟད་ལས་རྣམས་བྱེད། །བཟའ་བ་རྙེད་ཀྱང་སྡིག་པ་ཡིས། །ནམ་ཡང་ཚིམ་པར་མི་འགྱུར་རོ། །གལ་ཏེ་དེ་ནས་ཤི་འཕོས་ནས། །མི་ཡི་ནང་དུ་སྐྱེ་ན་ཡང་། །ཡིད་མི་གཞུངས་ཤིང་དམུས་ལོང་འགྱུར། །
གནོད་པར་སེམས་ཤིང་སྡོམ་པ་མེད། །ཉེས་པའི་ཚིག་རྣམས་སྨྲས་ནས་ནི། །འཕགས་པ་མཉེས་པར་མི་བྱེད་པ། །མི་ཡི་ནང་ནས་ཤི་འཕོས་ནས། །སླར་ཡང་ངན་འགྲོར་འགྲོ་བར་འགྱུར། །བསྐལ་པ་བྱེ་བ་སྟོང་རྣམས་སུ། །ནམ་ཡང་སངས་རྒྱས་མཐོང་མི་འགྱུར། །གང་ཞིག་

བྱང་ཆུབ་སེམས་དཔའ་ལ། །གནོད་པར་མི་བྱེད་རབ་བསྡམས་དང་། །གང་ཞིག་ཆོས་དང་ལྡན་པ་ཡི། །ཆོས་སྨྲ་དེ་དག་སྲུང་བྱེད་པ། །ངན་འགྲོ་རྣམས་ནི་ཀུན་སྤངས་ནས། །བརྒྱ་བྱིན་རྫུ་འཕྲུལ་ཆེན་པོར་འགྱུར། །ཚངས་པ་འཐབ་བྲལ་དགའ་ལྡན་དང་། །དབང་བྱེད་པར་ཡང་དེ་འགྱུར་རོ། །
གལ་ཏེ་མིར་ནི་གྱུར་ན་ཡང་། །རྟག་ཏུ་འཁོར་ལོས་སྒྱུར་བར་འགྱུར། །ཚོང་དཔོན་དང་ནི་ཁྱིམ་བདག་འགྱུར། །རྟག་ཏུ་སྐྱིད་ཅིང་ནོར་ཆེར་འགྱུར། །ཇི་ལྟར་གང་གཱའི་བྱེ་སྙེད་ཀྱི། །བསྐལ་པ་དེ་སྙེད་རྟག་ཏུ་ཡང་། །འཇིགས་མེད་དྲན་པ་ཕུན་སུམ་ཚོགས། །བདེ་དང་ལྡན་ཞིང་གནོད་པ་
མེད། །ཚེ་རབས་ཚེ་རབས་ཕྱི་ཕྱིར་ཞིང་། །རྟག་ཏུ་སངས་རྒྱས་མཆོད་པར་འགྱུར། །བློ་ལྡན་གང་ཞིག་སངས་རྒྱས་ལ། །བསྐལ་པ་དེ་སྙེད་མཆོད་པ་བས། །ཕྱི་དུས་ཆོས་ནི་འཇིག་པ་ན། །གང་དག་མདོ་སྡེ་འདི་འཛིན་པ། །ཆོས་གང་འཇིག་རྟེན་མགོན་པོ་ཡིས། །བསྟན་པའི་མདོ་སྡེ་
འདི་ལ་དེས། །ཉིན་ཞག་གཅིག་ཏུ་བཟུང་བ་ཡི། །དེ་ནི་བསོད་ནམས་ཁྱད་པར་འཕགས། །ཕྱོགས་བཅུའི་སངས་རྒྱས་གང་བཞུགས་པ། །དེ་དག་ཀུན་ལ་མཆོད་པར་འགྱུར། །མདོ་སྡེ་འདི་འདྲ་འཛིན་པ་ནི། །གང་དག་མ་འོངས་སངས་རྒྱས་དང་། །འདས་པའི་སངས་རྒྱས་གང་དག་
དང་། །དེ་དག་དེ་ཡིས་མཆོད་པར་འགྱུར། །འཇམ་དཔལ་བྱང་ཆུབ་སེམས་དཔའ་གང་ལ་ལ་ཞིག་རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་ལ་མོས་པའི་བྱང་ཆུབ་སེམས་དཔའ་ལ་གནོད་སེམས་དང་། ཐ་བ་དང་ཁྲོ་བ་སྐྱེད་དམ། འདུམ་པར་མི་བྱེད་དམ། བརྙས་
ཐབས་གང་ཡང་རུང་བས་བརྙས་ཏེ། ངན་པའི་རིགས་སུ་སྐྱེས་པ་ཞེའམ། རྙེད་པ་ཆུང་བ་ཞེའམ། ཡིད་གཞུངས་པ་ཆུང་བ་ཞེའམ། ཤེས་རབ་ཆུང་བ་ཞེས་བརྙས་སམ་ཅི་ཡང་རུང་སྟེ། ཚུལ་ཁྲིམས་ཀྱི་ཡན་ལག་ཉམས་པ་ཞེའམ། མདོག་ངན་པ་ཞེའམ། གཟུགས་དང་མི་
ལྡན་པ་ཞེའམ། གཟི་བརྗིད་ཆུང་བ་ཞེས་བརྙས་སམ། ཐ་ན་ཡུད་ཙམ་ཞིག་ཁྲོས་ཏེ་ལྟ་ན་ཡང་དེ་མི་དགེ་བའི་ལས་དེས་བསྐལ་པ་བྱེ་བ་གྲངས་མེད་པ་ཚང་བར་ངན་སོང་རྣམས་སུ་སྲེག་པར་འགྱུར་རོ། །འཇམ་དཔལ་ངས་ནི་ཇི་ལྟར་བྱང་ཆུབ་སེམས་དཔའ་ལ་ཁོང་ཁྲོ་བའི་སེམས་

གཅིག་བསྐྱེད་པ་ལས་ཁ་ན་མ་ཐོ་བ་ཆེ་བའི་ཆོས་དེ་ལྟ་བུ་གཅིག་ཀྱང་མ་མཐོང་ངོ་། །འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གང་ལ་ལས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་མཚོན་གྱིས་བཏབ་བམ། དབྱུག་
པས་བརྡེགས་པ་བས་རིགས་ཀྱི་བུའམ། རིགས་ཀྱི་བུ་མོ་གཞན་གང་གིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་ཐ་ན་གནོད་སེམས་སམ། ཐ་བའམ། ཞེ་སྡང་གི་སེམས་གཅིག་བསྐྱེད་དམ། ཁྲོས་ཏེ་བརྙས་པའི་སེམས་བསྐྱེད་ན་དེ་དེ་བས་སྡིག་པ་ཆེས་མང་དུ་
སྐྱེད་དོ། །འཇམ་དཔལ་བྱང་ཆུབ་སེམས་དཔས་བྱང་ཆུབ་སེམས་དཔའ་ལ་ཁོང་ཁྲོ་བའི་སེམས་བསྐྱེད་པའམ། བརྙས་པའི་སེམས་བསྐྱེད་པ་ཇི་ཙམ་པ་དེ་སྙེད་ཀྱི་བསྐལ་པར་བྱང་ཆུབ་སེམས་དཔའ་དེས་སེམས་ཅན་དམྱལ་བ་རྣམས་སུ་གནས་པར་གོ་ཆ་བགོ་བར་བྱའོ། །འཇམ་
དཔལ་བྱང་ཆུབ་སེམས་དཔའ་ལ་སྐུར་པ་བཏབ་པ་མ་གཏོགས་པར། བྱང་ཆུབ་སེམས་དཔའ་ལས་གཞན་གང་གིས་ཀྱང་ལོག་པར་ལྟུང་བར་བྱེད་མི་ནུས་སོ། །འཇམ་དཔལ་འདི་ལྟ་སྟེ་དཔེར་ན་ནོར་བུ་རིན་པོ་ཆེ་རྡོ་རྗེ་ནི་རྡོ་རྗེ་ཉིད་མ་གཏོགས་པར་ཤིང་ངམ། བོང་བའམ། དབྱུག་པའམ།
རྡོ་བའམ། མཚོན་ཆས་གཅག་པར་མི་ནུས་སོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཡང་བྱང་ཆུབ་སེམས་དཔའ་ལ་སྐུར་པ་བཏབ་པ་མ་གཏོགས་པར་ལས་གཞན་གྱིས་ལོག་པར་ལྟུང་བར་བྱེད་མི་ནུས་སོ། །འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གང་ལ་
ལས་ལྷའི་བསྐལ་པ་བྱེ་བར་ཕྱོགས་བཅུའི་འཇིག་རྟེན་གྱི་ཁམས་རེ་རེར་འཁོར་བཞི་ལ་ཅི་འདོད་པ་སྦྱིན་པ་བྱིན་པ་བས་རིགས་ཀྱི་བུའམ། རིགས་ཀྱི་བུ་མོ་གང་གཞན་གྱིས། འཐུན་པར་བྱ་བའི་དོན་དུ་གཡོས་དེ་བཞིན་གཤེགས་པ་ནི་རྟག་པའོ། །དེ་བཞིན་གཤེགས་པ་ནི་
གཡུང་དྲུང་ངོ་ཞེས་ཚིག་ཏུ་སྨྲ་ན་ཡང་དེ་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་བྱང་ཆུབ་སེམས་དཔའ་གང་ལ་ལས་ལྷའི་ལོ་སྟོང་དུ་དཀོན་མཆོག་གསུམ་ལ་ཅི་དགོས་པ་བྱིན་པ་བས། བྱང་ཆུབ་སེམས་དཔའ་གང་གཞན་ཞིག་ཐ་ན་སེ་གོལ་

གཏོགས་པ་སྲིད་དུ་འདུ་བྱེད་ཐམས་ཅད་ནི་མི་རྟག་པའོ། །འདུ་བྱེད་ཐམས་ཅད་ནི་སྡུག་བསྔལ་བའོ། །འདུ་བྱེད་ཐམས་ཅད་ནི་སྟོང་པའོ། །འདུ་བྱེད་ཐམས་ཅད་ནི་བདག་མེད་པའོ། །སྙམ་དུ་དཔྱོད་ན་དེ་དེ་བས་བསོད་ནམས་ཆེས་གྲངས་མེད་པར་སྐྱེད་དོ། །ཆོས་ཀྱི་རྣམ་གྲངས་འདི་བཤད་
པ་ན་ལྷའི་བུ་བརྒྱད་སྟོང་ནི་བྱང་ཆུབ་ཏུ་སེམས་བསྐྱེད་དོ། །དགེ་སློང་མ་ལྔ་བརྒྱ་ནི་ཐེག་པ་གཅིག་ཏུ་ཡང་དག་པར་འདུ་བའི་ཏིང་ངེ་འཛིན་ཐོབ་བོ། །བྱང་ཆུབ་སེམས་དཔའ་སྟོང་ཉིས་བརྒྱ་ནི་མི་སྐྱེ་བའི་ཆོས་ལ་བཟོད་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་
རྣམ་པ་དྲུག་ཏུ་རབ་ཏུ་གཡོས་སོ། །ཆོས་ཀྱི་རྣམ་གྲངས་འདི་དང་བཅོམ་ལྡན་འདས་ཤཱཀྱ་ཐུབ་པ་ལ་མཆོད་པའི་ལས་ཀྱི་ཕྱིར་སྟེང་གི་བར་སྣང་ལས་ལྷའི་མེ་ཏོག་ཨུད་པ་ལ་དང་པད་མ་དང་ཀུ་མུ་ད་དང་པད་མ་དཀར་པོ་རྣམས་ཀྱི་ཆར་ཆེན་པོ་ཡང་རབ་ཏུ་བབ་བོ། །ཙན་དན་སྦྲུལ་གྱི་སྙིང་པོའི་
སྤོས་ཀྱི་ཆར་ཆེན་པོ་ཡང་མངོན་པར་རབ་ཏུ་བབ་བོ། །གོས་ཀྱི་ཆར་དང་རིན་པོ་ཆེའི་ཆར་དང་རྒྱན་གྱི་ཆར་ཆེན་པོ་ཡང་རབ་ཏུ་བབ་བོ། །འཇིག་རྟེན་གྱི་ཁམས་གྲངས་མེད་བརྗོད་དུ་མེད་པའི་རྡུལ་ཕྲ་རབ་ཀྱི་རྡུལ་སྙེད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་དེའི་ཚེ། བྱང་
ཆུབ་སེམས་དཔའ་སེམས་དཔའ་ཆེན་པོ་རེ་རེས་ཀྱང་ཕྱོགས་བཅུའི་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་ལག་པ་མངོན་པར་སྤྲུལ་ཏེ། ལག་པ་རེ་རེས་ཀྱང་ལྷའི་འཇིག་རྟེན་གྱི་ཁམས་ཀྱི་ཚད་ཙམ་གྲངས་མེད་བསམ་གྱིས་མི་ཁྱབ་མཚུངས་པ་མེད། གཞལ་དུ་མེད་པའི་
གདུགས་ཀྱི་སྤྲིན་དང་། རྒྱལ་མཚན་གྱི་སྤྲིན་དང་། བ་དན་གྱི་སྤྲིན་དང་། མེ་ཏོག་གི་སྤྲིན་དང་། ཙན་དན་སྦྲུལ་གྱི་སྙིང་པོའི་སྤྲིན་དང་། རྒྱན་གྱི་སྤྲིན་དང་། སེང་གེའི་རྒྱལ་མཚན་ཟླ་བའི་སྤྲིན་དང་། ནོར་བུ་རིན་པོ་ཆེ་སྣང་བ་ཐམས་ཅད་བསགས་པའི་སྤྲིན་དང་། ནོར་བུ་རིན་པོ་ཆེ་དབང་
གི་རྒྱལ་པོའི་སྤྲིན་རྣམས་ཀྱིས་ཆོས་ཀྱི་རྣམ་གྲངས་འདི་ལ་མཆོད་དོ། །བཅོམ་ལྡན་འདས་ཤཱཀྱ་ཐུབ་པ་ལ་ཡང་གཏོར་ཅིང་མངོན་པར་གཏོར་ནས་ཚིག་འདི་སྐད་ཅེས་བཅོམ་ལྡན་འདས་ལེགས་པར་གསུངས་སོ། །བདེ་བར་གཤེགས་པས་ལེགས་པར་གསུངས་ཏེ། ཆོས་ཀྱི་རྣམ་གྲངས་འདི་འཇིག་

རྟེན་དུ་ཡུན་རིང་དུ་གནས་པར་གྱུར་ཅིག་ཅེས་སྨྲས་སོ། །སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དང་། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་བསམ་གྱིས་མི་ཁྱབ། གཞལ་དུ་མེད་བརྗོད་དུ་
མེད་པ་རྣམས་ཀྱིས་ཀྱང་ལྷའི་མེ་ཏོག་མན་དཱ་ར་བ་དང་མན་དཱ་ར་བ་ཆེན་པོ་དང་། མཉྫུ་ཥ་ཀ་དང་ཡིད་དགའ་དང་པ་རུ་ཥ་ཀ་དང་ཏ་ར་ཎི་དང་བ་ལ་ལ་ཀི་དང་། ཀོ་ཏ་ར་ཎི་དང་དྲི་མཆོག་དང་དྷ་ནུ་སྐ་རི་དེ་བ་དང་ཨུད་པལ་དང་པད་མ་དང་ཀུ་མུ་ད་དང་པད་མ་དཀར་པོ་དང་། མེ་ཏོག་འཁོར་ལོ་དང་
འཁོར་ལོ་ཆེན་པོ་ལ་སོགས་པ་ལྷའི་མེ་ཏོག་གི་ཆར་ཆེན་པོ་རབ་ཏུ་ཕབ་བོ། །ལྷའི་གོས་དང་གདུགས་དང་རྒྱལ་མཚན་དང་བ་དན་གྱི་ཆར་རབ་ཏུ་ཕབ་བོ། །ལྷའི་ཙན་དན་སྦྲུལ་གྱི་སྙིང་པོའི་ཆར་དང་རིན་པོ་ཆེའི་སྤྲིན་གྱི་ཆར་དང་རྒྱན་གྱི་སྤྲིན་གྱི་ཆར་རབ་ཏུ་ཕབ་བོ། །བརྒྱ་བྱིན་དང་ཚངས་པ་
དང་འཇིག་རྟེན་སྐྱོང་བ་བྱེ་བ་ཁྲག་ཁྲིག་བརྒྱ་སྟོང་བགྲང་བ་ལས་ཤིན་ཏུ་འདས་པ་གྲངས་མེད་པས་ཀྱང་ཆོས་ཀྱི་རྣམ་གྲངས་འདི་ལ་མཆོད་པའི་ལས་ཀྱི་ཕྱིར་འཛམ་བུའི་གླིང་གི་ཚད་ཙམ་གྱི་མེ་ཏོག་གི་སྤྲིན་དང་། གོས་ཀྱི་སྤྲིན་དང་རིན་པོ་ཆེའི་སྤྲིན་གྱི་ཆར་རབ་ཏུ་ཕབ་བོ། །དེ་བཞིན་དུ་ཀླུ་
དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་བསམ་གྱིས་མི་ཁྱབ་གཞལ་དུ་མེད། ཚད་མེད་པ་དག་གིས་ཀྱང་ལྷའི་མེ་ཏོག་གི་ཆར་དང་། སྤོས་དང་གོས་དང་རིན་པོ་ཆེའི་ཆར་མངོན་པར་ཕབ་སྟེ།
ལྷའི་རོལ་མོའི་དབྱངས་སྒྲ་བསམ་གྱིས་མི་ཁྱབ་པ་བྱས་ནས་ཚིག་འདི་སྐད་ཅེས་བཅོམ་ལྡན་འདས་ལེགས་པར་གསུངས་སོ། །བདེ་བར་གཤེགས་པས་ལེགས་པར་གསུངས་ཏེ། ཀྱེ་མའོ་བདག་ཅག་གིས་སྔོན་མ་ཐོས་པའི་ཆོས་ཀྱི་རྣམ་གྲངས་འདི་ཐོས་སོ། །ཀྱེ་མའོ་ཆོས་ཀྱི་
རྣམ་གྲངས་འདི་ཡུན་རིང་དུ་གནས་པར་གྱུར་ཅིག་ཅེས་སྨྲས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་གྲངས་མེད་པ་དག་དང་། བཟང་སྐྱོང་ལ་སོགས་པ་

དགེ་བསྙེན་སྟོང་ཕྲག་དཔག་ཏུ་མེད་པ་དག་དང་། ཉན་ཐོས་ཆེན་པོ་དག་དང་། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོ་བརྒྱ་ཕྲག་གྲངས་མེད་པ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་
བསྟོད་དོ། །འཕགས་པ་རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་དཱ་ན་ཤཱི་ལ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་
ཀྱང་བཅོས་ནས་གཏན་ལ་ཕབ་པ།། །། ༄༅༅། །རྒྱ་གར་སྐད་དུ། ཨཱརྱ་མཱ་ཡོ་པ་མ་ས་མཱ་དྷི་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སྒྱུ་མ་ལྟ་བུའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་
མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོང་ཁྱེར་བཱ་རཱ་ཎ་སཱི་ན་དྲང་སྲོང་ལྷུང་བ་རི་དགས་ཀྱི་ནགས་ན། དགྲ་བཅོམ་པ་ཉི་ཁྲིའི་དགེ་སློང་གི་
དགེ་འདུན་ཆེན་པོ་དང་། བྱང་ཆུབ་སེམས་དཔའ་ཁྲི་ཉིས་སྟོང་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་སེང་གེ་དང་། སེང་གེའི་བློ་གྲོས་དང་། ལེགས་པར་གནས་པའི་བློ་གྲོས་དང་། དཔེ་མེད་བློ་གྲོས་དང་། ས་འཛིན་དང་། མེས་བྱིན་དང་། ཆུ་
ལྷ་དང་། དཀོན་མཆོག་འབྱུང་གནས་དང་། ཕུག་སྦས་དང་བཟང་སྐྱོང་དང་གློག་ལྷ་དང་། རྣམ་པར་སྣང་བྱེད་དང་། འཇམ་དཔལ་གཞོན་ནུར་གྱུར་པ་དང་། ཡེ་ཤེས་འབྱུང་གནས་དང་། བརྩོན་པ་མི་གཏོང་དང་། མཐོང་བ་དོན་ཡོད་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་བྱམས་པ་ལ་སོགས་པ་ཁྲི་ཉིས་སྟོང་དང་ཐབས་ཅིག་ཏུ་བཞུགས་སོ། །ལྷའི་བུ་མཚམས་བཟང་དང་ལེགས་པར་གནས་པའི་བློ་གྲོས་ལ་སོགས་པ་ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པ་ཉི་ཁྲི་དང་ཡང་ཐབས་ཅིག་གོ། །དེ་ནས་བཅོམ་

ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་
བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །པད་མའི་དཔལ་གྱི་སྙིང་པོ་ཁྱོད་ལ་དེ་བཞིན་གཤེགས་པས་
དྲིས་པ་ལུང་བསྟན་པའི་ཕྱིར། རྟག་ཏུ་སྐབས་ཕྱེས་པད་མའི་དཔལ་གྱི་སྙིང་པོ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང་ངས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་
ནས། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དང་མངོན་པར་
ཤེས་པ་ལྔ་དང་ལྡན་པ་དང་། སྒྱུ་མ་ལྟ་བུའི་ཏིང་ངེ་འཛིན་ཀྱང་འཐོབ་ཅིང་། ཏིང་ངེ་འཛིན་དེ་ཐོབ་མ་ཐག་ཏུ་ཇི་ལྟ་ཇི་ལྟར་སེམས་ཅན་རྣམས་ཀྱི་དགེ་བའི་རྩ་བ་ཡོངས་སུ་རྫོགས་པར་འགྱུར་བ་དེ་ལྟ་དེ་ལྟར་ལུས་མངོན་པར་སྤྲུལ་ནས་སེམས་ཅན་རྣམས་ཀྱི་མོས་པ་ཇི་ལྟ་བ་དེ་བཞིན་དུ་ཆོས་སྟོན་
པ་དང་། ཅི་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ལགས། དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོ་ལ་འདི་སྐད་ཅེས་བཀའ་

སྩལ་ཏོ། །པད་མའི་དཔལ་གྱི་སྙིང་པོ་ལེགས་སོ་ལེགས་སོ། །པད་མའི་དཔལ་གྱི་སྙིང་པོ་ཁྱོད་ནི་འདི་ལྟར་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསགས་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་བྱས་པ་སྟེ། ཁྱོད་འདི་ལྟར་སེམས་
ཅན་ཐམས་ཅད་ལ་སྙིང་བརྩེ་བ་དང་། སྙིང་རྗེ་བར་ཞུགས་པས་པད་མའི་དཔལ་གྱི་སྙིང་པོ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དོན་འདི་འདྲི་བར་སེམས་པ་ནི་ལེགས་སོ། །པད་མའི་དཔལ་གྱི་སྙིང་པོ་ཁྱོད་དེའི་ཕྱིར་ལེགས་པར་རབ་ཏུ་ཉོན་ལ་
ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོས་བཅོམ་ལྡན་འདས་ལ་ལེགས་སོ་ཞེས་གསོལ་ནས། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །པད་
མའི་དཔལ་གྱི་སྙིང་པོ་ཆོས་གཅིག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དང་། མངོན་པར་ཤེས་པ་ལྔ་དང་ལྡན་པ་དང་། སྒྱུ་མ་ལྟ་བུའི་ཏིང་ངེ་འཛིན་ཀྱང་འཐོབ་ཅིང་ཏིང་ངེ་འཛིན་དེ་ཐོབ་མ་
ཐག་ཏུ་ཇི་ལྟ་ཇི་ལྟར་སེམས་ཅན་རྣམས་ཀྱི་དགེ་བའི་རྩ་བ་ཡོངས་སུ་རྫོགས་པར་འགྱུར་བ་དེ་ལྟ་དེ་ལྟར་ལུས་མངོན་པར་སྤྲུལ་ནས། སེམས་ཅན་རྣམས་ཀྱི་མོས་པ་ཇི་ལྟ་བ་དེ་བཞིན་དུ་ཆོས་སྟོན་པ་དང་། ཅི་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བར་འགྱུར་རོ། །ཆོས་གཅིག་པོ་གང་ཞེ་ན། པད་མའི་དཔལ་གྱི་སྙིང་པོ་འདི་ལ་བྱང་ཆུབ་སེམས་དཔའ་ཁམས་གསུམ་པ་ཐམས་ཅད་ལ་མི་གནས་པ་ཡིན་ཏེ། ནང་ངམ་ཕྱི་རོལ་ལ་གནས་པར་མི་བྱེད་དོ། །དེ་གནས་པ་མེད་པས་ཡང་དག་པ་མཐོང་བར་འགྱུར་
རོ། །ཡང་དག་པ་མཐོང་བས་ཡང་དག་པ་ལ་སྦྱོར་བར་འགྱུར་རོ། །ཡང་དག་པ་ལ་སྦྱོར་བས་ཅི་ལ་ཡང་བློ་ཐོགས་པར་མི་འགྱུར་རོ། །དེ་བློ་ཐོགས་པ་མེད་པས་ཡང་དག་པའི་བྱ་བ་ལ་སྤྱོད་དོ། །ཡང་དག་པའི་བྱ་བ་ལ་སྤྱོད་པ་དེ་གང་ཞེ་ན། འདི་ལྟ་སྟེ། ཆོས་ཐམས་ཅད་

ནི་རྟེན་ཅིང་འབྲེལ་པར་འབྱུང་བ་སྟེ། ཆོས་གང་ཡང་ཐེར་ཟུག་ཏུ་གནས་པ་མ་ཡིན་ནོ། །ཆོས་ཐམས་ཅད་ནི་རྐྱེན་ལས་འབྱུང་བ་སྟེ། རྐྱེན་མེད་པར་འབྱུང་བའི་ཆོས་ནི་གང་ཡང་མེད་དོ། །ཆོས་གང་རྟེན་ཅིང་འབྲེལ་པར་འབྱུང་བ་དེ་ནི་མ་སྐྱེས་པའོ། །དེ་ལྟར་
ན་ཆོས་ཐམས་ཅད་ནི་སྐྱེ་བ་མེད་པ་སྟེ། ཆོས་ཐམས་ཅད་མ་སྐྱེས་པར་རྟོགས་པར་གྱུར་པ་དེ་ནི་བྱང་ཆུབ་སེམས་དཔའི་ལམ་ལ་འཇུག་པ་རྟོགས་པ་འཐོབ་བོ། །འདི་ལྟར་སེམས་ཅན་ཐམས་ཅད་ལ་ཕན་པའི་དངོས་པོ་དང་། སྙིང་རྗེའི་སེམས་ཀྱི་རྗེས་སུ་འཇུག་པ་རབ་ཏུ་འཐོབ་
བོ། །དེ་དེ་ལྟར་མོས་པས་ཆོས་ཐམས་ཅད་སྒྱུ་མ་ལྟ་བུར་རབ་ཏུ་ཤེས་སོ། །ཆོས་ཐམས་ཅད་ནི་ཡོངས་སུ་བརྟགས་པས་སྤྲུལ་པ་སྟེ། ཡོངས་སུ་བརྟགས་པ་དེ་ཡང་ཤིན་ཏུ་སྟོང་པའོ། །ཆོས་ཐམས་ཅད་སྟོང་པར་རྟོགས་པ་དེ་ནི་སྒྱུ་མ་ལྟ་བུའི་ཏིང་ངེ་འཛིན་འཐོབ་སྟེ། ཏིང་ངེ་
འཛིན་དེ་ཐོབ་མ་ཐག་ཏུ་ཇི་ལྟ་ཇི་ལྟར་སེམས་ཅན་རྣམས་དགེ་བའི་རྩ་བ་ཡོངས་སུ་རྫོགས་པར་འགྱུར་བ་དེ་ལྟ་དེ་ལྟར་ལུས་མངོན་པར་སྤྲུལ་ནས་སེམས་ཅན་རྣམས་ཀྱི་མོས་པ་ཇི་ལྟ་བ་དེ་བཞིན་དུ་ཆོས་སྟོན་པ་དང་། ཅི་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྱུ་མ་
ལྟ་བུའི་ཏིང་ངེ་འཛིན་འདི་ཐོབ་པ་གང་ལ་ལ་དག་འཁོར་འདིར་འདུས་པ་ལྟ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། པད་མའི་དཔལ་གྱི་སྙིང་པོ་འཁོར་འདི་ན་བསམས་བཞིན་དུ་གོ་ཆ་བགོས་པ་གང་དག་སྒྱུ་མ་ལྟ་བུའི་ཏིང་ངེ་འཛིན་འདི་ཐོབ་པ་སྐྱེས་བུ་དམ་པ་དྲུག་ཅུ་ཡོད་དེ།
བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། འཇམ་དཔལ་གཞོན་ནུར་གྱུར་པ་ལ་སོགས་པ་སྐྱེས་བུ་དམ་པ་དྲུག་ཅུ་པོ་དག་སྒྱུ་མ་ལྟ་བུའི་ཏིང་ངེ་འཛིན་འདི་ཐོབ་པ་ཡིན་ནོ། །གསོལ་པ། བཅོམ་ལྡན་འདས་སྐྱེས་བུ་དམ་པ་འདི་དག་གིས་འཇིག་རྟེན་གྱི་ཁམས་འདི་ཉིད་དུ་

སྒྱུ་མ་ལྟ་བུའི་ཏིང་ངེ་འཛིན་འདི་ཐོབ་པ་ལགས་སམ། འོན་ཏེ་འཇིག་རྟེན་གྱི་ཁམས་གཞན་དག་ན་ཡང་གང་དག་སྒྱུ་མ་ལྟ་བུའི་ཏིང་ངེ་འཛིན་འདི་ཐོབ་པའི་སྐྱེས་བུ་དམ་པ་དག་ཀྱང་མཆིས། བཅོམ་ལྡན་འདས་ཀྱིས་བཀའ་སྩལ་པ། པད་མའི་དཔལ་གྱི་སྙིང་པོ་སངས་རྒྱས་ཀྱི་ཞིང་འདི་
ནས་ནུབ་ཀྱི་ཕྱོགས་ཆ་ལོགས་སུ་སངས་རྒྱས་ཀྱི་ཞིང་བྱེ་བ་བརྒྱ་སྟོང་འདས་པ་ན་འཇིག་རྟེན་གྱི་ཁམས་བདེ་བ་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཅེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་
ཆོས་ཀྱང་སྟོན་ཏོ། །སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ཅེས་བྱ་བ་དང་གཉིས་ཏིང་ངེ་འཛིན་འདི་ཐོབ་པ་ཡིན་ཏེ། པད་མའི་དཔལ་གྱི་སྙིང་པོ་སྐྱེས་
བུ་དམ་པ་དེ་གཉིས་ལས་བྱང་ཆུབ་སེམས་དཔའ་སེམས་དཔའ་ཆེན་པོ་གང་གཞན་དག་ནུབ་བདུན་དུ་འདྲི་བའི་ལན་ཉན་པ་དེ་དག་སྒྱུ་མ་ལྟ་བུའི་ཏིང་ངེ་འཛིན་ཐོབ་བོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་
དཔལ་གྱི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་ཀྱི་ཞིང་དེ་ན་སྒྱུ་མ་ལྟ་བུའི་ཏིང་ངེ་འཛིན་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་མང་དུ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་སངས་རྒྱས་ཀྱི་ཞིང་དེར་སྐྱེས་པའི་
བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་སྒྲིམ་མི་འཚལ་བར་སྐྱེས་བུ་དམ་པ་དེ་གཉིས་ལས་ཆོས་འདྲི་བའི་ལན་ཉན་པའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། པད་མའི་དཔལ་གྱི་སྙིང་པོ་ཇི་སྐད་ཟེར་བ་དེ་དེ་བཞིན་ཏེ། དེ་ན་བྱང་ཆུབ་སེམས་དཔའ་སེམས་
དཔའ་ཆེན་པོ་གང་དག་སྒྱུ་མ་ལྟ་བུའི་ཏིང་ངེ་འཛིན་ལ་གནས་པ་དག་ནི་ཚད་མེད་གྲངས་མེད་དོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཇི་ལྟ་བུའི་སེམས་ཀྱི་མཚན་མ་བསྟན་པས། སྐྱེས་བུ་དམ་པ་དེ་གཉིས་འཇིག་རྟེན་གྱི་ཁམས་མི་མཇེད་འདིར་མཆི་བར་འགྱུར་བ་དང་། བདེ་བ་ཅན་གྱི་འཇིག་རྟེན་གྱི་ཁམས་དེ་དང་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ་ཡང་འཇིག་རྟེན་གྱི་ཁམས་འདི་ན་གདའ་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་མཛད་པ་ལེགས་པར་མཛད་དུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས་སྐྱེས་བུ་དམ་པ་དེ་གཉིས་
སངས་རྒྱས་ཀྱི་ཞིང་འདིར་མཆིས་ན། བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་། རིགས་ཀྱི་བུ་མོ་རྣམས་ཀྱང་དགེ་བའི་རྩ་བ་ཡོངས་སུ་རྫོགས་པར་འགྱུར། སྐྱེས་བུ་དམ་པ་དེ་གཉིས་ལས་ཆོས་འདྲི་བའི་ལན་ཐོས་པས། སྒྱུ་མ་ལྟ་བུའི་ཏིང་ངེ་འཛིན་ཀྱང་ཐོབ་པར་
འགྱུར། སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་བདེ་བ་ཅན་དེ་དང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ་ཡང་མཐོང་སྟེ། མཐོང་ནས་ཀྱང་རིགས་ཀྱི་བུའམ་རིགས་ཀྱི་བུ་མོ་དག་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་སེམས་བསྐྱེད་ནས། སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་འདེབས་པ་དང་། དེར་སྐྱེས་མ་ཐག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བའི་སླད་དུའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་
པོ་པད་མའི་དཔལ་གྱི་སྙིང་པོས་གསོལ་བ་བཏབ་པར་མཁྱེན་ནས། མཛོད་སྤུ་ནས་འོད་རབ་ཏུ་བཀྱེ་སྟེ། འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གསེར་གྱི་ཁ་དོག་གི་སྣང་བ་ཆེན་པོས་ཁྱབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
འདི་ན། རིའི་ཚོགས་དང་ཤིང་ལྗོན་པ་དང་རིའི་རྒྱལ་པོ་རི་རབ་དང་། རི་བཏང་བཟུང་དང་བཏང་བཟུང་ཆེན་པོ་དང་ཁོར་ཡུག་དང་ཁོར་ཡུག་ཆེན་པོ་གང་དག་ཡོད་པ་དང་། གང་དག་འཇིག་རྟེན་གྱི་བར་གྱི་མུན་པ་མུན་ནག་དེ་དག་ཐམས་ཅད་ཀྱང་གསེར་གྱི་ཁ་དོག་གི་སྣང་བ་དེས་ཁྱབ་

པར་གྱུར་ཏོ། །ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ། འདི་ལྟར་དབང་ཆེ་བར་གྲགས་པ་འདི་དག་ཀྱང་མིག་གི་དབང་པོ་ལ་སྣང་བར་མ་གྱུར་ཏོ། །ནུབ་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་བརྒྱ་སྟོང་ལས་ཐལ་ནས། འཇིག་རྟེན་གྱི་ཁམས་བདེ་བ་ཅན་
དེ་ཐམས་ཅད་གསེར་གྱི་ཁ་དོག་གི་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་འོད་དེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱི་ཞབས་ལ་ཕྱག་འཚལ་ཏེ། ལན་བདུན་བསྐོར་བ་བྱས་ནས། བཅོམ་ལྡན་འདས་
དེའི་སྤྱན་སྔར་མི་སྣང་བར་གྱུར་ཏོ། །དེ་ནས་གང་དག་འཇིག་རྟེན་གྱི་ཁམས་བདེ་བ་ཅན་དེར་སྐྱེས་པའི་སེམས་ཅན་རྣམས་དང་། བྱང་ཆུབ་སེམས་དཔའ་རྣམས་དང་ཉན་ཐོས་ཆེན་པོ་དེ་དག་གིས་ཀྱང་འཇིག་རྟེན་གྱི་ཁམས་མི་མཇེད་འདིར་མཐོང་ཞིང་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་ཉན་ཐོས་ཀྱི་དགེ་འདུན་གྱིས་བལྟས་པ་དེ་ཡང་མཐོང་སྟེ། དཔེར་ན་སྐྱུ་རུ་རའི་འབྲས་བུ་ལག་མཐིལ་དུ་བཞག་པ་ལྟར་མཐོང་ནས། དེ་དག་དགའ་བ་དང་མཆོག་ཏུ་དགའ་
བ་རྒྱ་ཆེར་སྐྱེས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་ཚིག་དེ་སྐད་ཀྱང་བརྗོད་དོ། །འཇིག་རྟེན་གྱི་ཁམས་མི་མཇེད་འདིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཤཱཀྱ་ཐུབ་པའི་འཁོར་གྱི་དཀྱིལ་འཁོར་དུ་གང་དག་འདུས་པ་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་དང་། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་། མིའམ་ཅི་དང་ལྟོ་འཕྱེ་ཆེན་པོ་དང་མི་དང་། མི་མ་ཡིན་
པ་དང་། བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་དང་། བྱང་ཆུབ་སེམས་དཔའ་འདུས་པ་དེ་དག་གིས་ཀྱང་འཇིག་རྟེན་གྱི་ཁམས་བདེ་བ་ཅན་དེ་དང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་བྱང་ཆུབ་སེམས་དཔའི་

ཚོགས་ཀྱིས་ཡོངས་སུ་བསྐོར་ཅིང་ཉན་ཐོས་ཀྱི་དགེ་འདུན་གྱིས་མདུན་གྱིས་བལྟས་ཏེ། རིའི་རྒྱལ་པོ་བཞིན་དུ་འབར་བ་དེ་དང་ཐམས་ཅད་དང་ལྡན་པའི་སངས་རྒྱས་ཀྱི་ཞིང་དེ་ཡང་ས་ལེར་མཐོང་སྟེ། འདི་ལྟ་སྟེ་དཔེར་ན། སྐྱེས་བུ་མིག་དང་ལྡན་པས། འདོམ་གང་ཙམ་
གྱི་ཕྱོགས་ན་སྐྱེས་བུ་ཅིག་ཤོས་ཀྱི་བཞིན་གྱི་དཀྱིལ་འཁོར་སྒྲིམ་མི་དགོས་པར་མཐོང་བ་དེ་བཞིན་དུ། འཇིག་རྟེན་གྱི་ཁམས་འདི་དང་སངས་རྒྱས་ཀྱི་ཞིང་འདི་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་མཐོང་ངོ་། །འཇིག་རྟེན་གྱི་
ཁམས་བདེ་བ་ཅན་ཡོན་ཏན་བྱེ་བ་ཁྲག་ཁྲིག་བརྒྱ་སྟོང་དུ་མས་གང་བ་ཡོན་ཏན་གྱི་བཀོད་པ་ཆེན་པོ་དང་ལྡན་པ་དེ་ཡང་སྣང་ངོ་། །མཐོང་ནས་ཀྱང་དགའ་བ་དང་མཆོག་ཏུ་དགའ་བ་རྒྱ་ཆེན་པོ་སྐྱེས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་འོད་དཔག་མེད་ལ་ཕྱག་འཚལ་ལོ་ཞེས་ཚིག་དེ་སྐད་ཀྱང་བརྗོད་དོ། །སངས་རྒྱས་ཀྱི་ཞིང་ཡང་དག་པར་བསྟན་པར་མཛད་པ་ན་སངས་རྒྱས་ཀྱི་ཞིང་འདི་ན་སྔོན་སེམས་མ་བསྐྱེད་པའི་སྲོག་ཆགས་བརྒྱད་ཁྲི་བཞི་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །
འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དགེ་བའི་རྩ་བ་ཡོངས་སུ་བསྔོའོ། །འཇིག་རྟེན་གྱི་ཁམས་བདེ་བ་ཅན་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དང་ཉན་ཐོས་ཆེན་པོ་གང་དག་འཁོད་པ་དེ་དག་གིས།
འཇིག་རྟེན་གྱི་ཁམས་མི་མཇེད་འདི་མཐོང་ནས། ངོ་མཚར་དུ་གྱུར་ཏེ། ཐལ་མོ་སྦྱར་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ཞིང་ཚིག་འདི་སྐད་ཅེས་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་ཀྱང་བརྗོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་དང་ཉན་ཐོས་ཆེན་པོ་དེ་དག་གིས་ཚིག་དེ་བརྗོད་མ་ཐག་ཏུ་དེའི་ཚེ། ཐམས་ཅད་དང་ལྡན་པའི་འཇིག་རྟེན་གྱི་ཁམས་དེ་རྣམ་པ་དྲུག་ཏུ་

འགུལ། རབ་ཏུ་འགུལ། ཀུན་ཏུ་རབ་ཏུ་འགུལ། གཡོས་རབ་ཏུ་གཡོས། ཀུན་ཏུ་རབ་ཏུ་གཡོས། ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག །འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར། འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། ཆེམ་ཆེམ། རབ་ཏུ་
ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་འོད་དཔག་མེད་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཞེ་ས་དང་བཅས་པར་ཕྱོགས་གཅིག་ཏུ་འཁོད་དོ། །སྐྱེས་བུ་དམ་པ་དེ་གཉིས་ཕྱོགས་གཅིག་ཏུ་འཁོད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་མཐུ་བརྟན་པ་བརྙེས་པ་ནི། བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར། བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེའི་མཚན་བརྗོད་པ་ཙམ་གྱིས་སེམས་པ་མ་མཆིས་པའི་དོག་ས་འདི་ཡང་རྣམ་པ་དྲུག་ཏུ་གཡོས་པའི་སྙད་དུའོ། །དེ་སྐད་ཅེས་གསོལ་པ་དང་། དེ་བཞིན་གཤེགས་པ་འོད་དཔག་མེད་ཀྱིས་སྐྱེས་བུ་དམ་པ་དེ་གཉིས་
ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་སངས་རྒྱས་ཀྱི་ཞིང་འདི་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་མཚན་བརྗོད་པར་མ་ཟད་ཀྱི། སངས་རྒྱས་ཀྱི་ཞིང་གཞན་དུ་མ་དག་ན་ཡང་བཅོམ་ལྡན་
འདས་དེའི་མཚན་ཡོངས་སུ་བརྗོད་དོ། །སངས་རྒྱས་ཀྱི་ཞིང་དེ་དག་ཐམས་ཅད་ཀྱང་འོད་དེས་རེག་པས་རྣམ་པ་དྲུག་ཏུ་རབ་ཏུ་གཡོས་སོ། །སངས་རྒྱས་ཀྱི་ཞིང་དེ་དག་ན་སེམས་ཅན་ཚད་མེད་གྲངས་མེད་པ་དག་དེ་བཞིན་གཤེགས་པ་ཤཱཀྱ་ཐུབ་པའི་མཚན་ཐོས་ནས། དགེ་བའི་རྩ་བ་

ཡོངས་སུ་རྫོགས་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་བྱང་ཆུབ་སེམས་དཔའི་འཁོར་དེ་ལས་བྱང་ཆུབ་སེམས་དཔའ་བྱེ་བ་ཕྲག་བཞི་བཅུ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་མཚན་
ཐོས་སོ། །ཐོས་ནས་ཀྱང་དེ་དག་ཐམས་ཅད་འདུས་ནས་མགྲིན་གཅིག་ཏུ་དགེ་བའི་རྩ་བ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་དག་ཀྱང་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ལུང་བསྟན་
ཏོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ཀྱིས་འདི་སྐད་ཅེས་
གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེས་སྔོན་མ་མཐོང་མ་ཐོས་པའི་འོད་འདི་བཏང་བ་རྒྱུ་མ་མཆིས་རྐྱེན་མ་མཆིས་པར་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་འདི་ལྟར་
ཡིད་དུ་མཆི་བ་དང་། འདི་ལྟར་བལྟ་ན་སྡུག་པའི་འོད་མི་གཏོང་ན་གང་གི་སླད་དུ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེས་འདི་ལྟར་ཡིད་དུ་མཆི་བ་དང་། འདི་ལྟར་བལྟ་ན་སྡུག་པའི་འོད་བཀྱེ་བ་འདིའི་རྒྱུ་ནི་གང་ལགས་རྐྱེན་ནི་ཅི་ལགས། དེ་སྐད་ཅེས་གསོལ་པ་དང་།
དེ་བཞིན་གཤེགས་པ་འོད་དཔག་མེད་ཀྱིས་སྐྱེས་བུ་དམ་པ་དེ་གཉིས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཇི་སྐད་སྨྲས་པ་དེ་དེ་བཞིན་ཏེ། རྒྱུ་མེད་རྐྱེན་མེད་པར་བཅོམ་ལྡན་འདས་དེས་འདི་ལྟར་ཡིད་དུ་འོང་བ་དང་། འདི་ལྟར་བལྟ་ན་སྡུག་པའི་འོད་མི་བཀྱེའོ། །དེ་ཅིའི་
ཕྱིར་ཞེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་དེང་བྱང་ཆུབ་སེམས་དཔའ་འཇུག་པ་ཞེས་བྱ་བའི་ཏིང་ངེ་འཛིན་རིན་པོ་ཆེ་བསྒྲུབ་པའི་ཆོས་ཀྱི་རྣམ་གྲངས་སྟོན་པར་འགྱུར་ཏེ། དེའི་ཕྱིར་བཅོམ་ལྡན་འདས་

ཤཱཀྱ་ཐུབ་པ་དེས་ཆོས་བསྟན་པ་དེའི་སྔ་ལྟས་སུ་འདི་ལྟར་ཡིད་དུ་འོང་བ་དང་། འདི་ལྟར་བལྟ་ན་སྡུག་པའི་འོད་འདི་བཀྱེའོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་
དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་མཆོད་པ་དང་བསྙེན་བཀུར་
བགྱི་བ་དང་ཆོས་བསྟན་པ་དེ་ཡང་མཉན་པའི་སླད་དུ། བཅོམ་ལྡན་འདས་བདག་ཅག་འཇིག་རྟེན་གྱི་ཁམས་མི་མཇེད་དེར་མཆིའོ། །བཀའ་སྩལ་པ། རིགས་ཀྱི་བུ་དག་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ཁྱོད་ཉིད་ལས་བརྩམས་ཏེ། ཆོས་སྟོན་པར་འགྱུར་གྱིས་དེའི་
དུས་ལ་དབབ་པར་ཤེས་པ། ཁྱེད་དེང་ཤིག་ཅེས་སྐབས་ཕྱེ་བས་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ཀྱིས། བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དེའི་ཉིན་
འཁོར་ན་འཁོད་པའི་བྱང་ཆུབ་སེམས་དཔའ་བྱེ་བ་ཕྲག་བཞི་བཅུ་པོ་རྣམས་ལ་སྨྲས་པ། རིགས་ཀྱི་བུ་དག་ཚུར་ཤོག །ཁྱེད་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བྱ་བ་དང་མཆོད་པ་དང་
བསྙེན་བཀུར་བྱ་བ་དང་། ཆོས་བསྟན་པ་དེ་ཡང་མཉན་པའི་ཕྱིར་འཇིག་རྟེན་གྱི་ཁམས་མི་མཇེད་དེར་འདོང་ངོ་། །དེ་ཅིའི་ཕྱིར་ཞེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ནི་སངས་རྒྱས་ཀྱི་ཞིང་ཡོངས་སུ་དག་པ་
གཞན་དང་གཞན་དག་ན་ཡོད་པ་སྤངས་ནས། སྨོན་ལམ་དང་ཐུགས་རྗེ་ཆེན་པོས་སངས་རྒྱས་ཀྱི་ཞིང་ཉོན་མོངས་པ་ཅན་དེར་བྱུང་སྟེ། སེམས་ཅན་དམན་པ་ལ་མོས་པ་འདོད་ཆགས་ཀྱི་ཤས་ཆེ་བ། ཞེ་སྡང་གི་ཤས་ཆེ་བ། གཏི་མུག་གི་ཤས་ཆེ་བ་རྣམས་ཀྱི་ནང་དུ། བླ་ན་མེད་པ་ཡང་

དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ནི་དཀའ་བ་མཛད་པའི་ཕྱིར་རོ། །སྐྱེས་བུ་དམ་པ་དེ་གཉིས་ཀྱིས། ཚིག་འདི་སྨྲས་མ་ཐག་ཏུ་འཇིག་རྟེན་གྱི་ཁམས་བདེ་བ་ཅན་དེའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་
ལྷན་ཅིག་འདུས་ནས། མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་སེམས་ཅན་གང་དག་གིས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེའི་མཚན་ཐོས་པ་དེ་དག་ཀྱང་རྙེད་པ་ལེགས་པར་རྙེད་པ་ལགས་ན། གང་དག་གིས་ཤའི་མིག་གིས་དེ་མངོན་སུམ་དུ་མཐོང་
ལ་མཐོང་ནས་ཀྱང་དད་པ་རྙེད་པ་དག་ལྟ་སྨོས་ཀྱང་ཅི་འཚལ། བཅོམ་ལྡན་འདས་བདག་ཅག་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་བསྙེན་བཀུར་བགྱི་བ་དང་། ཆོས་
བསྟན་པ་དེ་ཡང་མཉན་པའི་སླད་དུ་འཇིག་རྟེན་གྱི་ཁམས་མི་མཇེད་དེར་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་ཁྱེད་དེའི་དུས་ལ་དབབ་པར་ཤེས་ན་དེང་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་།
བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ། བྱང་ཆུབ་སེམས་དཔའ་བྱེ་བ་ཕྲག་བརྒྱད་ཅུ་རྩ་བཞིས་ཡོངས་སུ་བསྐོར་ཏེ། མདུན་དུ་བདར་ནས། འཇིག་རྟེན་གྱི་ཁམས་བདེ་བ་ཅན་དེ་ནས་དོང་ངོ་། །དེ་ནས་དེའི་ཚེ་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་
པར་འདུ་བྱས་པས། བྱང་ཆུབ་སེམས་དཔའ་བྱེ་བ་ཕྲག་བརྒྱད་ཅུ་རྩ་བཞི་པོ་དེ་དག་ཐམས་ཅད་རེ་རེ་ལ་ཡང་ཁང་པ་བརྩེགས་པ་བྱེ་བ་ཕྲག་བརྒྱད་ཅུ་རྩ་བཞི་སྤྲུལ་པ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱས་སོ། །ཁང་པ་བརྩེགས་པ་དེ་དག་ཀྱང་གྲུ་བཞི་ལྷམ་
པ་ཀ་བ་བཞི་ཟུག་པ། ཆ་མཉམ་པར་ལེགས་པར་རྣམ་པར་ཕྱེ་བ་ལེགས་པར་ཟིན་པ་ཤ་སྟག་གོ། །ཁང་པ་བརྩེགས་པ་རེ་རེ་ཡང་འཕང་དུ་ནི་དཔག་ཚད་བཅུ་གཉིས། རྒྱར་ནི་དཔག་ཚད་བརྒྱད་དོ། །ཁང་པ་བརྩེགས་པ་དག་གསེར་ལས་བྱས་པ་དག་ཀྱང་ཡོད། དངུལ་

ལས་བྱས་པ་དག་ཀྱང་ཡོད། བཻ་དཱུརྱ་ལས་བྱས་པ་དག་ཀྱང་ཡོད། ཤེལ་ལས་བྱས་པ་དག་ཀྱང་ཡོད། མུ་ཏིག་དམར་པོ་དང་རྡོའི་སྙིང་པོ་དང་། སྤུག་ལས་བྱས་པ་དག་ཀྱང་ཡོད་དོ། །རིན་པོ་ཆེ་གསེར་དང་དངུལ་དང་སྣ་གཉིས་པ་དག་ཀྱང་ཡོད། རིན་པོ་ཆེ་གསེར་དང་དངུལ་
དང་བཻ་དཱུརྱ་དང་སྣ་གསུམ་པ་དག་ཀྱང་ཡོད། རིན་པོ་ཆེ་གསེར་དང་དངུལ་དང་བཻ་དཱུརྱ་དང་ཤེལ་དང་སྣ་བཞི་པ་དག་ཀྱང་ཡོད། རིན་པོ་ཆེ་གསེར་དང་དངུལ་དང་བཻ་དཱུརྱ་དང་ཤེལ་དང་མུ་ཏིག་དམར་པོ་དང་སྣ་ལྔ་པའི་ཁང་པ་བརྩེགས་པ་དག་ཀྱང་ཡོད། རིན་པོ་ཆེ་གསེར་དང་དངུལ་དང་བཻ་དཱུརྱ་དང་
ཤེལ་དང་མུ་ཏིག་དམར་པོ་དང་སྤུག་དང་སྣ་དྲུག་པའི་ཁང་པ་བརྩེགས་པ་དག་ཀྱང་ཡོད། རིན་པོ་ཆེ་གསེར་དང་དངུལ་དང་བཻ་དཱུརྱ་དང་ཤེལ་དང་མུ་ཏིག་དམར་པོ་དང་སྤུག་དང་རྡོའི་སྙིང་པོ་དང་སྣ་བདུན་པའི་ཁང་པ་བརྩེགས་པ་དག་ཀྱང་ཡོད། ཙན་དན་དམར་པོ་ལས་བྱས་པའི་ཁང་པ་
བརྩེགས་པ་དག་ཀྱང་ཡོད། ཙན་དན་སྦྲུལ་གྱི་སྙིང་པོ་ལས་བྱས་པ་དག་ཀྱང་ཡོད། ཨ་ཀ་རུ་དང་ཙན་དན་ལས་བྱས་པ་དག་ཀྱང་ཡོད། ཨ་ག་རུ་ནག་པོ་དང་ཙན་དན་ལས་བྱས་པ་དག་ཀྱང་ཡོད། ཙན་དན་ཐམས་ཅད་ལས་བྱས་པའི་ཁང་པ་བརྩེགས་པ་དག་ཀྱང་ཡོད། མེ་ཏོག་
ཨུད་པ་ལ་དང་པད་མ་དང་ཀུ་མུ་ད་དང་པད་མ་དཀར་པོ་ལས་བྱས་པའི་ཁང་པ་བརྩེགས་པ་དག་ཀྱང་ཡོད། སྣ་མའི་མེ་ཏོག་དང་བར་ཤ་ཀ་དང་ཙམ་པ་ཀ་དང་། སྐྱ་སྣར་དང་ཨ་ཏི་མུག་ཏ་ཀ་དང་ཏ་ར་ནི་དང་གོ་ཏ་ར་ནི་ལས་བྱས་པའི་ཁང་པ་བརྩེགས་པ་དག་ཀྱང་ཡོད། མེ་ཏོག་ད་ནུ་སྐ་
རི་ལས་བྱས་པའི་ཁང་པ་བརྩེགས་པ་དག་ཀྱང་ཡོད། མེ་ཏོག་མན་དཱ་ར་དང་མན་དཱ་ར་ཆེན་པོ་ལས་བྱས་པའི་ཁང་པ་བརྩེགས་པ་དག་ཀྱང་ཡོད། མེ་ཏོག་པ་རུ་ཥ་ཀ་དང་པ་རུ་ཥ་ཀ་ཆེན་པོ་དང་མཉྫུ་ཥ་ཀ་དང་མཉྫུ་ཥ་ཀ་ཆེན་པོ་དང་། མདོག་མཛེས་དང་མདོག་མཛེས་ཆེན་པོ་དང་། མེ་
ཏོག་འཁོར་ལོ་དང་འཁོར་ལོ་ཆེན་པོ་དང་ཀུན་ཏུ་འཁོར་ལོ་དང་། ཤིན་ཏུ་མཛེས་པའི་འཁོར་ལོ་དང་མེ་ཏོག་ཟླ་བ་དང་ཟླ་བ་ཆེན་པོ་དང་། ཤིན་ཏུ་མཛེས་པའི་ཟླ་བ་དང་ཟླ་བ་མཆོག་དང་། སྠ་ལ་དང་སྠ་ལ་ཆེན་པོ་དང་། ཤིན་ཏུ་མཛེས་པའི་སྠ་ལ་ལས་བྱས་པའི་ཁང་པ་བརྩེགས་པ་

དག་ཀྱང་ཡོད། མེ་ཏོག་ཐམས་ཅད་ལས་བྱས་པའི་ཁང་པ་བརྩེགས་པ་དག་ཀྱང་ཡོད། ཁ་དོག་དུ་མ་པ་ཁ་དོག་སྣ་ཚོགས་ཁ་དོག་བརྒྱ་སྟོང་དུ་མ་པ་བཀྲ་བ། བལྟ་ན་སྡུག་པ་ཡོངས་སུ་དག་པ། འོད་གསལ་བ་དག་ཀྱང་ཡོད་དོ། །ཁང་པ་བརྩེགས་པ་རེ་རེར་ཡང་
ལྷའི་བུ་མོ་བརྒྱད་ཁྲི་བཞི་སྟོང་མངོན་པར་སྤྲུལ་ཏེ། དེ་ན་ལྷའི་བུ་མོ་ཁ་ཅིག་གི་ལག་ན་དུང་དང་རྔ་བོ་ཆེ་དང་རྫ་རྔ་དང་ཁར་རྔ་དང་པི་བང་རྒྱུད་གཅིག་པ་དང་། གླུ་དབྱངས་སྒྲ་སྙན་པ་དང་གླིང་བུ་དང་རྒྱུད་ཅན་པི་བང་དང་པི་བང་རྒྱུད་གསུམ་པ་རྣམས་ཐོགས་ཏེ། སིལ་སྙན་དང་གླུ་དབྱངས་དང་
རོལ་མོའི་སྒྲ་སྐད་རྣམ་པ་མང་པོ་དེ་ལྟ་བུ་ལེན་ཅིང་འཁོད་དོ། །ལྷའི་བུ་མོ་ཁ་ཅིག་ནི་ཙན་དན་དམར་པོའི་ཕྱེ་མའི་ཕུར་མ་ཐོགས་ཤིང་འཁོད་དོ། །ལྷའི་བུ་མོ་ཁ་ཅིག་ནི་ཙན་དན་སྦྲུལ་གྱི་སྙིང་པོའི་ཕྱེ་མའི་ཕུར་མ་ཐོགས་ཤིང་འཁོད་དོ། །ལྷའི་བུ་མོ་ཁ་ཅིག་ནི་ཨ་ག་རུ་དང་ཙན་དན་གྱི་ཕྱེ་མའི་
ཕུར་མ་ཐོགས་ཤིང་འཁོད་དོ། །ལྷའི་བུ་མོ་ཁ་ཅིག་ནི་ཨ་ག་རུ་ནག་པོ་དང་ཙན་དན་གྱི་ཕྱེ་མའི་ཕུར་མ་ཐོགས་ཤིང་འཁོད་དོ། །ལྷའི་བུ་མོ་ཁ་ཅིག་ནི་ཙན་དན་ཐམས་ཅད་ཀྱི་ཕྱེ་མའི་ཕུར་མ་ཐོགས་ཤིང་འཁོད་དོ། །ལྷའི་བུ་མོ་ཁ་ཅིག་ནི་ཨུད་པ་ལ་དང་པད་མ་དང་ཀུ་མུ་ད་དང་པད་མ་དཀར་
པོའི་མེ་ཏོག་གི་ཕྱེ་མའི་ཕུར་མ་ཐོགས་ཤིང་འཁོད་དོ། །ལྷའི་བུ་མོ་ཁ་ཅིག་ནི་མེ་ཏོག་མན་དཱ་ར་དང་མན་དཱ་ར་ཆེན་པོ་དང་པ་རུ་ཥ་ཀ་དང་པ་རུ་ཥ་ཀ་ཆེན་པོ་དང་མཉྫུ་ཥ་ཀ་དང་མཉྫུ་ཥ་ཀ་ཆེན་པོ་དང་། མེ་ཏོག་མདོག་མཛེས་དང་མདོག་མཛེས་ཆེན་པོ་དང་། མེ་ཏོག་འཁོར་ལོ་དང་འཁོར་ལོ་ཆེན་
པོ་དང་། ཀུན་ཏུ་འཁོར་ལོ་དང་ཤིན་ཏུ་མཛེས་པའི་འཁོར་ལོ་དང་། མེ་ཏོག་ཟླ་བ་དང་ཟླ་བ་ཆེན་པོ་དང་། ཤིན་ཏུ་མཛེས་པའི་ཟླ་བ་དང་ཟླ་བ་མཆོག་དང་། སྠ་ལ་དང་སྠ་ལ་ཆེན་པོ་དང་ཤིན་ཏུ་མཛེས་པའི་སྠ་ལའི་མེ་ཏོག་གི་ཕྱེ་མའི་ཕུར་མ་ཐོགས་ཤིང་འཁོད་དོ། །ལྷའི་བུ་མོ་ཁ་ཅིག་ནི་
མེ་ཏོག་ཐམས་ཅད་དང་བདུག་པ་དང་སྤོས་དང་མེ་ཏོག་ཕྲེང་དང་བྱུག་པ་དང་ཕྱེ་མའི་ཕུར་མ་ཐོགས་ཤིང་འཁོད་དོ། །ཁང་པ་བརྩེགས་པ་རེ་རེར་ཡང་བཀོད་པ་ཆེན་པོའི་སེང་གེའི་ཁྲི་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་སྐུ་ལེགས་པར་བརྒྱན་པའི་དེ་བཞིན་གཤེགས་

པའི་སྐུ་མངོན་པར་སྤྲུལ་ཏོ། །ཁང་པ་བརྩེགས་པ་རེ་རེར་ཡང་མུ་ཏིག་དཀར་པོ་དང་མུ་ཏིག་དམར་པོ་དང་མུ་ཏིག་མཐོན་ཀའི་མུ་ཏིག་གི་ཕྲེང་བ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །ཁང་པ་བརྩེགས་པ་རེ་རེར་ཡང་ལྷའི་རས་བཅོས་བུའི་རྒྱལ་མཚན་གསེར་གྱི་དྲིལ་བུ་གཡེར་ཀའི་དྲ་བས་
གཡོགས་པ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །ཁང་པ་བརྩེགས་པ་རེ་རེར་ཡང་སྤོས་ཀྱི་ཕུར་མ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །ཁང་པ་བརྩེགས་པ་རེ་རེར་ཡང་གདུགས་ཁ་དོག་དུ་མ་པ་ཁ་དོག་སྣ་ཚོགས་པ། ཁ་དོག་བརྒྱ་སྟོང་དུ་མ་བཀྲ་བ། བལྟ་ན་སྡུག་པ།
ལེགས་པར་ལས་སུ་བྱས་པ། དབྱིབས་ཤིན་ཏུ་ལེགས་པ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །ཁང་པ་བརྩེགས་པ་རེ་རེར་ཡང་ཤིང་ཏ་ལའི་ཕྲེང་བ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །ཁང་པ་བརྩེགས་པ་རེ་རེར་ཡང་རིན་པོ་ཆེའི་ཤིང་ལྗོན་པ་བརྒྱད་ཁྲི་བཞི་སྟོང་མངོན་པར་
སྤྲུལ་ཏོ། །ཁང་པ་བརྩེགས་པ་རེ་རེར་ཡང་དྲིལ་བུ་གཡེར་ཀའི་དྲ་བ་གང་དག་རླུང་གིས་བསྐྱོད་པ་ན་འདི་ལྟ་བུའི་སྒྲ་དག་འབྱུང་བ་འདི་ལྟ་སྟེ་དཔེར་ན། ལྷའི་སིལ་སྙན་ཡན་ལག་བྱེ་བ་བརྒྱ་སྟོང་དང་ལྡན་པ་མཁས་པ་དག་གིས་ལེགས་པར་བླངས་ནས་སྒྲ་འབྱུང་བ་དེ་བཞིན་དུ་དྲིལ་བུ་གཡེར་ཀའི་དྲ་བ་
དེ་དག་ཀྱང་རླུང་གིས་བསྐྱོད་ན་སྒྲ་སྙན་པ་ཡིད་དུ་འོང་བ་དག་འབྱུང་བ་བརྒྱད་ཁྲི་བཞི་སྟོང་མངོན་པར་སྤྲུལ་ཏོ། །ཁང་པ་བརྩེགས་པ་རེ་རེར་ཡང་རྫིང་བུ་གཞི་གསེར་གྱི་བྱེ་མ་བདལ་བ། བཻ་དཱུརྱ་དང་ཤེལ་གྱིས་སྤྲས་པ། རིན་པོ་ཆེ་སྣ་བདུན་གྱི་ཁ་ཁྱེར་གྱིས་བསྐོར་བ། མེ་ཏོག་ཨུད་
པ་ལ་དང་པད་མ་དང་ཀུ་མུ་ད་དང་པད་མ་དཀར་པོས་གང་བ། ངུར་པ་སྒྲ་འབྱིན་པ། ཡན་ལག་བརྒྱད་དང་ལྡན་པའི་ཆུས་གང་བ། བྱ་རོག་གིས་བཏུང་དུ་རུང་བར་མུ་དང་ཁ་ད་ཆད་དུ་གང་བ་དག་སྤྲུལ་ཏོ། །ཁང་པ་བརྩེགས་པ་རེ་རེར་ཡང་རིན་པོ་ཆེའི་ཤིང་ལྗོན་པའི་ཕྲེང་བ་རིམ་པ་
བདུན་གྱིས་བསྐོར་ཏོ། །རིན་པོ་ཆེའི་སྐུད་པ་བརྒྱད་ཁྲི་བཞི་སྟོང་གིས་ཀུན་ནས་དཀྲིས་སོ། །རིན་པོ་ཆེའི་ཁང་པ་བརྩེགས་པ་རེ་རེའི་འོད་ཀྱིས་ཀྱང་དཔག་ཚད་བརྒྱད་ཁྲི་བཞི་སྟོང་དུ་སྣང་བར་གྱུར་ཏོ། །དེ་བཞིན་དུ་ཁང་པ་བརྩེགས་པ་ཐམས་ཅད་ཀྱི་བཀོད་པ་དག་སོ་སོར་བྱས་སོ། །

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ཀྱིས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་ཁང་པ་བརྩེགས་པ་བཀོད་པ་ཇི་སྙེད་ཡོད་པ། ཁང་པ་
བརྩེགས་པ་དེ་དག་ཐམས་ཅད་ཀྱི་ནང་ན་བཀོད་པ་ཆེན་པོ་གང་དག་ཡོད་པ་དེ་དག་ཐམས་ཅད་ཁང་པ་བརྩེགས་པ་རེ་རེར་མངོན་པར་སྤྲུལ་ཏོ། །སྔ་མ་བཞིན་དུ་སྦྱར་ཏེ། ཁང་པ་བརྩེགས་པ་རེ་རེར་ཡང་དེ་ལྟར་བཀོད་པ་རྣམས་མངོན་པར་སྤྲུལ་ནས། བཀོད་པ་དེ་ལྟ་བུ་དེས་བྱང་ཆུབ་
སེམས་དཔའ་བྱེ་བ་ཕྲག་བརྒྱད་ཁྲི་བཞི་སྟོང་དང་ལྷན་ཅིག་ཏུ་འདི་ལྟ་སྟེ་དཔེར་ན། སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་རྐྱོང་བ་དང་། བརྐྱང་བ་ལས་སྐུམ་པ་ཙམ་གྱིས་དེ་དག་སྐད་ཅིག་ཐང་ཅིག་ཡུད་ཙམ་གྱིས་འཇིག་རྟེན་གྱི་ཁམས་བདེ་བ་ཅན་དེ་ནས་མི་སྣང་བར་
གྱུར་ཏེ། འཇིག་རྟེན་གྱི་ཁམས་མི་མཇེད་འདིར་ཕྱིན་ཏོ། །དེ་ནས་བྱང་ཆུབ་སེམས་དཔའ་དེ་གཉིས་ཀྱིས་དེའི་ཚེ་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་བྱས་པས། འཇིག་རྟེན་གྱི་ཁམས་མི་མཇེད་འདི་ལག་མཐིལ་བཞིན་དུ་མཉམ་པར་གྱུར་པ། དེ་ལྟ་བུའི་རྫུ་འཕྲུལ་
མངོན་པར་འདུ་བྱ་བ་མངོན་པར་བྱས་སོ། །བྱང་ཆུབ་སེམས་དཔའ་དེ་དག་ཀྱང་ཁང་པ་བརྩེགས་པ་བྱེ་བ་ཕྲག་བརྒྱད་ཅུ་རྩ་བཞིས་ཡོངས་སུ་བསྐོར་ཏེ་མདུན་དུ་བདར་ནས། ཡོན་ཏན་གྱི་བཀོད་པ་ཆེན་པོ་དང་ལྡན་པས་ཤིན་ཏུ་ལྷག་གེའོ། །ཁང་པ་བརྩེགས་པ་དེ་དག་གི་འོད་ཀྱིས་ཀྱང་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བས་ཁྱབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་དེ་གཉིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་དོང་སྟེ་ཕྱིན་ནས། བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ། ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས། སྐྱེས་བུ་དམ་པ་དེ་གཉིས་ཀྱིས་

ཚིག་འཐུན་པར་སྒྲ་དབྱངས་གཅིག་ཏུ་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །གཟི་བརྗིད་མཚུངས་མེད་ཡོན་ཏན་ཕུང་པོ་གཅིག་ལ་ཕྱག་འཚལ་ལོ། །དྲང་སྲོང་ཆེན་པོ་ཀུན་མཁྱེན་ཡོན་ཏན་ཀུན་གྱི་ཕ་རོལ་གཤེགས། །ཐམས་ཅད་ཟིལ་
གནོན་སྲིད་པ་གསུམ་གྱི་ཆགས་པའི་ལམ་ལས་འདས། །ཤཱཀྱ་ཁྱུ་མཆོག་དྲི་བྲལ་ཟླ་བའི་ཞལ་ལ་ཕྱག་འཚལ་ལོ། །ཉི་མ་དྲི་མེད་ལྟ་བུའི་སྐུ་དང་ལྡན་པ་རྣམ་པར་མཛེས། །མཚན་མཆོག་སུམ་ཅུ་རྩ་གཉིས་དག་གི་གོ་ཆ་མནབས་གྱུར་ཅིང་། །དཔེ་བྱད་བཟང་པོ་རྣམས་ཀྱིས་སྤྲས་པ་
འཇིག་རྟེན་ཀུན་ཏུ་གསལ། །མི་མཆོག་ཁྱོད་མཚུངས་འཇིག་རྟེན་གསུམ་ན་གང་ཡང་ཡོད་མ་མཆིས། །བདེ་བར་གཤེགས་པའི་སྐུ་ཡི་འོད་ཀྱིས་གང་ཚེ་རེག་གྱུར་པ། །དེ་ཚེ་འཇིག་རྟེན་ཉི་མ་ཟླ་བ་ནོར་བུ་ཞུགས་རྣམས་དང་། །བརྒྱ་བྱིན་ཚངས་པ་ལྷ་དང་དེ་བཞིན་མི་ཅི་རྣམས་ཀྱི་འོད། །
སྣག་ཚའི་ཕུང་པོ་བཞིན་དུ་མོག་མོག་མི་སྣང་གསལ་མ་མཆིས། །རྒྱལ་བ་ཞིང་གཅིག་ན་ནི་ཡང་དག་བཞུགས་པར་གདའ་བཞིན་དུ། །འགྲོ་བའི་དོན་དུ་སྐད་ཅིག་གཅིག་གིས་མཐའ་ཡས་ཞིང་དུ་གཤེགས། །སྟོན་པའི་བཞུད་དང་བྱོན་པ་འཚལ་བ་སུ་ཡང་ཡོད་མ་མཆིས། །མཛད་
པ་དག་དང་འདུལ་བ་སྣ་ཚོགས་དག་གིས་སེམས་ཅན་འདུལ། །སྤུ་ཡི་ཁུང་གཅིག་ནང་དུ་མཐའ་ཡས་ཞིང་རྣམས་སྟོན་མཛད་ཀྱང་། །འཕེལ་བ་དང་ནི་བྲི་བར་གྱུར་པ་གང་ཡང་ཡོད་མ་མཆིས། །འདི་ནི་ཇི་བཞིན་ལས་དང་བྱེད་པ་རྒྱུ་དང་འབྲས་གདའ་ལ། །སེམས་ཅན་རྣམས་ལ་
གནོད་པ་མ་མཆིས་འདྲེས་པར་གྱུར་མ་མཆིས། །གང་ན་སེམས་ཅན་དམྱལ་བ་དུད་འགྲོ་ཡི་དགས་མ་མཆིས་ཤིང་། །རྒྱལ་བའི་སྲས་པོ་གྲགས་པ་ཆེན་པོ་དག་གིས་ཡོངས་གང་ལ། །མི་ཁོམ་བརྒྱད་པོ་དག་དང་བྲལ་ཏེ་མཆོག་ཏུ་ཉམས་དགའ་བའི། །ཡོངས་དག་ཞིང་དེ་དག་ཀྱང་
མི་མཆོག་ལ་ལར་སྟོན་པ་མཛད། །ལྷ་མི་གང་དག་མི་འཇིགས་བག་མ་མཆིས་པ་བཀང་སླད་དུ། །སེམས་དམྱལ་དུད་འགྲོ་ཡི་དགས་འགྲོ་བ་ཤིན་ཏུ་མི་བཟད་པའི། །ཀུན་ནས་ཉོན་མོངས་ཞིང་རྣམས་ལ་ལ་དག་ཀྱང་བསྟན་མཛད་ནས། །དེ་དག་ཐམས་ཅད་བདེ་བར་གཤེགས་ལ་

སྐྱབས་སུ་ཉེ་བར་མཆི། །ཞིང་གཞན་ལ་ལ་དག་ཀྱང་ནམ་མཁའ་ལྟ་བུར་སྟོན་པར་མཛད། །དེ་བཞིན་གཞན་ཡང་ཞུགས་ཀྱིས་གཏམ་ཞིང་མེ་ལྕེ་འཁྲུགས་པ་དང་། །ཞིང་གཞན་དག་ཀྱང་ཆབ་ཀྱིས་ཡོངས་སུ་གཏམས་པར་སྟོན་པ་མཛད། །རྣམ་འཕྲུལ་འདི་ནི་ཐམས་ཅད་
མཁྱེན་པའི་ཡེ་ཤེས་ཡུལ་ལགས་སོ། །འདུལ་བའི་དོན་དུ་གཟུགས་ཀྱི་རྣམ་པ་མཐའ་ཡས་སྟོན་མཛད་པ། །ལ་ལར་འདོད་པའི་དབང་ཕྱུག་འོད་ཆགས་གཟུགས་དང་ལྡན་པར་འགྱུར། །ཚངས་པའི་བདག་པོ་མཆོག་ཏུ་ཞི་བའི་ཏིང་འཛིན་རྙེད་པ་དང་། །སུམ་ཅུ་རྩ་གསུམ་དབང་ཕྱུག་མིག་
སྟོང་རྡོ་རྗེ་འབར་བ་དང་། །སྲོག་ཆགས་བརྒྱ་ཕྲག་མང་པོ་རབ་ཏུ་དགའ་བས་མཆོད་བགྱིད་ཅིང་། །དགེ་བ་བཅུ་པོ་དག་གིས་སེམས་ཅན་མཐའ་ཡས་འདུལ་བགྱིད་པ། །བློན་པོ་ཚོང་དཔོན་དག་དང་བཀའ་ལ་གཏོགས་པའི་གཙོར་གྱུར་ཅིང་། །ཤིན་ཏུ་འཇིགས་མེད་དགྲ་ཚོགས་ཕབ་ནས་ཆད་པས་
མི་གཅོད་ལ། །བསྡུ་བའི་དངོས་པོ་བཞི་པོས་སེམས་ཅན་རྣམས་ནི་སྡུད་བགྱིད་ཅིང་། །རྫོགས་པའི་བྱང་ཆུབ་ལམ་ལ་སེམས་ཅན་རབ་ཏུ་འཇོག་བགྱིད་པ། །བསོད་ནམས་ལས་ཀྱིས་རིན་ཆེན་བདུན་དང་ལྡན་པར་གྱུར་པ་ཡི། །གླིང་བཞི་དག་གི་དབང་ཕྱུག་འཁོར་ལོས་སྒྱུར་བ་དག་ཏུ་གྱུར། །
འཇིག་རྟེན་འདི་ན་ལ་ལར་བལྟམ་པ་ལྟ་བུར་སྟོན་མཛད་དེ། །དོག་ས་ལ་ནི་གོམ་པ་བདུན་དག་བོར་ཞིང་གཤེགས་ནས་ཀྱང་། །ང་ནི་སྐྱེས་ནས་སྐྱེ་དང་འཆི་བའི་ཐ་མར་དབྱུང་ངོ་ཞེས། །ཡིད་འོང་ཡན་ལག་བརྒྱད་དང་ལྡན་པའི་གསུང་མཆོག་བརྗོད་པ་མཛད། །མར་མེ་མཛད་པ་ཚུན་ཆད་དྲི་
མ་ཐམས་ཅད་སྤང་ལགས་ཀྱང་། །འགྲོ་རྣམས་སངས་རྒྱས་ཡེ་ཤེས་མཆོག་ལ་ཡོངས་སྨིན་མཛད་སླད་དུ། །ལ་ལར་སེམས་ཅན་དག་པ་བཙུན་མོའི་འཁོར་ན་བཞུགས་པར་གདའ། །མི་ཡི་དབང་པོ་བཙུན་མོ་དག་དང་སྲས་ཀྱང་སྟོན་པ་མཛད། །ཡབ་ཡུམ་དག་དང་གཉེན་གྱི་རྩ་ལག་
སྡུག་པའི་འཁོར་རྣམས་དང་། །ཡུལ་འཁོར་འབྱོར་དང་རིན་ཆེན་གཏེར་མཛོད་མང་པོ་བཏང་མཛད་ནས། །བརྒྱ་བྱིན་ཚངས་པ་དག་དང་ལྷ་མིན་རྣམས་ཀྱིས་ཕྱག་བགྱིས་ཤིང་། །དྲང་སྲོང་ཆེན་པོ་མངོན་པར་བྱུང་སྟེ་ནགས་ན་བཞུགས་པར་གདའ། །འགྲོ་ལ་སྨན་སླད་དགུང་ལོ་དྲུག་ཏུ་

དཀའ་བ་སྤྱད་ནས་ནི། །བསམ་གཏན་མཁའ་ཁྱབ་རིན་ཆེན་མཆོག་ལ་བསམ་གཏན་མཛད་པར་གདའ། །མུ་སྟེགས་ཅན་གྱི་ཚོགས་རྣམས་ཐམས་ཅད་ཚར་གཅད་མཛད་སླད་དུ། །སེམས་ཅན་དག་པ་བྱང་ཆུབ་ཤིང་དྲུང་དུ་ཡང་གཤེགས་པར་གདའ། །འགྲོ་རྣམས་སངས་རྒྱས་ཡེ་
ཤེས་མཆོག་ཏུ་ཡོངས་སྨིན་མཛད་སླད་དུ། །མི་དབང་སྒྱུ་མ་ལྟ་བུའི་ཏིང་འཛིན་མཆོག་ལ་བཞུགས་མཛད་ནས། །སྐུ་ཡི་ཚུལ་ནི་གང་གིས་འཇིག་རྟེན་རྣམ་པར་འདུལ་འགྱུར་བ། །རྒྱལ་བ་དེ་འདྲ་ཉིད་ཀྱི་སྐུ་ཡི་ཆ་ལུགས་འཛིན་པར་མཛད། །ཇི་ལྟར་སྒྱུ་མ་མཁན་གྱིས་འགྲོ་བ་རྨོངས་པར་
བགྱི་སླད་དུ། །སྒྱུ་མ་མང་པོའི་རྣམ་པར་འཕྲུལ་པ་རབ་ཏུ་སྟོན་བགྱིད་པ། །དེ་བཞིན་འགྲོ་བ་སྒྲོན་མས་སེམས་ཅན་འདུལ་བར་མཛད་སླད་དུ། །སངས་རྒྱས་ཉིད་ཀྱི་རྣམ་པར་འཕྲུལ་པ་མང་པོ་རྣམས་ཀྱང་སྟོན། །ཐུབ་པ་དཔའ་བོ་ལ་ལར་དཔུང་དང་བཅས་པའི་བདུད་འདུལ་སྟོན། །གང་
ལ་ཕ་རོལ་མུ་སྟེགས་ཚོགས་ཀྱི་འགྲོ་བ་མ་མཆིས་ཤིང་། །རྡུལ་བྲལ་མྱ་ངན་མ་མཆིས་ཐམས་ཅད་མཁྱེན་པ་ཉིད་ཐོབ་པ། །བླ་ན་མེད་པ་འགྱུར་བ་མ་མཆིས་འཁོར་ལོ་རབ་ཏུ་བསྐོར། །ཁྱོད་ཀྱིས་བསྐལ་པ་བྱེ་བ་ཁྲག་ཁྲིག་མང་ནས་བྱང་ཆུབ་བརྙེས། །ཕྱོགས་ཀྱི་ལམ་རྣམས་ཐམས་
ཅད་དུ་ཡང་འཁོར་ལོ་བསྐོར་བ་མཛད། །མི་ཡི་དབང་པོ་ཀུན་ནས་ཞལ་ལྡན་ཆུ་ཟླ་བཞིན་དུ་བཞུགས། །བདེ་གཤེགས་རང་བྱུང་མཐའ་ཡས་ཡུལ་ལ་བདག་ཅག་ཕྱག་འཚལ་ལོ། །ལ་ལ་དག་ལ་སངས་རྒྱས་ཆོས་ཀྱི་སྐུ་ནི་སྟོན་མཛད་པ། །རྟག་པ་བརྟན་པ་ཐེར་ཟུག་འགྱུར་བ་མ་
མཆིས་གྱུར་པ་དང་། །མ་བགྱིས་མ་སྐྱེས་དྲི་མ་མ་མཆིས་འགོག་པ་མ་མཆིས་ཆོས། །མིག་ཡོར་འདྲ་བས་ཕྱོགས་བཅུ་དག་ནི་ཤིན་ཏུ་རྒྱས་པར་འགེངས། །རིང་པོར་མི་ཐོགས་པར་ནི་སྡུག་པ་དག་དང་འབྲལ་འགྱུར་གྱིས། །འདུས་བྱས་འདི་ལ་ཁྱེད་ཅག་ཡིད་བརྟན་བྱ་བའི་མི་རིགས་
ཞེས། །འགྲོ་བ་ཐམས་ཅད་རྨི་ལམ་སྒྱུ་མ་སྨིག་རྒྱུ་འདྲ་བ་དང་། །མི་རྟག་མི་བརྟན་སྐད་ཅིག་པར་ཡང་ལ་ལ་དག་ལ་སྟོན། །བདེ་གཤེགས་སྐུ་ཡི་ཕྲིན་ལས་མཐའ་དང་ཕ་རོལ་ཡོད་མ་མཆིས། །གསུང་དང་ཐུགས་ཀྱི་འཇུག་པའི་སྤྱོད་ཡུལ་དག་ཀྱང་དཔག་མི་ལང་། །ནམ་མཁའ་

ལྟ་བུར་རྒྱ་ཆེ་ཚད་མ་མཆིས་པ་སྟོན་མཛད་དེ། །རྒྱལ་བའི་སྤྱོད་ཡུལ་སེམས་ཅན་རྣམས་ཀྱིས་འཚལ་བར་ནུས་མ་ལགས། །ཕྱོགས་བཅུ་དག་ན་མཆིས་པའི་སེམས་ཅན་མ་ལུས་ཇི་སྙེད་པ། །དེ་དག་ཤཱ་རིའི་བུ་དང་འདྲ་བར་ཤེས་རབ་ལྡན་གྱུར་ཀྱང་། །རྒྱལ་བ་ཆོས་ཀྱི་
རྒྱལ་པོའི་དངོས་པོའི་ཡུལ་ཚད་མ་མཆིས་པ། །རྒྱལ་བའི་སྤྱོད་ཡུལ་ཐམས་ཅད་དེ་དག་རྣམས་ཀྱིས་རིག་མི་ནུས། །རྫོགས་སངས་རྒྱས་ཀྱི་ཡེ་ཤེས་མཁའ་འདྲ་ཕ་རོལ་མཐའ་མ་མཆིས། །དེ་ལྟར་རྒྱལ་བའི་ཡུལ་ནི་བསམ་གྱིས་མི་ཁྱབ་མ་ལུས་པ། །འདི་ན་རྒྱལ་བའི་སྲས་
རྣམས་ཀུན་དང་ཉན་ཐོས་རྣམས་དང་ནི། །རྐྱེན་གྱི་རྒྱལ་བ་འདུས་པ་རྣམས་ཀྱིས་འཚལ་བར་ནུས་མ་ལགས། །དེ་ལྟར་འདི་དག་ལ་སོགས་མཐའ་ཡས་ཐབས་དང་ལྡན་པ་ཡི། །འདུལ་བའི་དོན་དུ་སྐུ་ཡི་མཛད་པ་མཐའ་ཡས་སྟོན་པར་མཛད། །ནམ་མཁའི་ཁམས་དང་མཚུངས་པར་
མཐའ་ཡས་སྐུ་དང་ལྡན་གྱུར་པ། །མགོན་པོ་རྟོག་དང་རྣམ་པར་རྟོག་དང་བྲལ་ལ་ཕྱག་འཚལ་ལོ། །སྡུག་བསྔལ་རྒྱ་མཚོ་རྒྱ་ཆེན་ཕ་རོལ་རབ་ཏུ་རྒལ་གྱུར་པ། །ཉོན་མོངས་ཐུལ་བ་རྒྱལ་བ་འགྲོ་བའི་གཙོ་ལ་བསྟོད་པ་ཡི། །བསོད་ནམས་ཅི་མཆིས་དེས་ནི་འདི་ན་འགྲོ་བ་མ་ལུས་པ། །
བྱང་ཆུབ་རིན་ཆེན་རབ་མཆོག་ཞི་ཞིང་བདེ་ལ་རེག་པར་ཤོག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ཀྱིས་ཚུལ་དང་འཐུན་པའི་ཚིགས་སུ་བཅད་པ་དག་གིས་བཅོམ་ལྡན་
འདས་ལ་མངོན་པར་བསྟོད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་བཅོམ་ལྡན་འདས་ལ་གནོད་པ་ཆུང་ངམ་ཞེས་སྙུན་གསོལ་ལོ། །ཉམ་ང་བ་ཉུང་
ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་ཀྱང་སྙུན་གསོལ་ལོ། །འདི་སྐད་ཅེས་བཅོམ་ལྡན་འདས་ཀྱི་ཉན་ཐོས་དག་འཇིག་རྟེན་གྱི་ཁམས་ཉམས་དགའ་བ་ལ་བལྟར་སྩོལ་ཅིག་ཅེས་ཀྱང་གསུང་ངོ་། །དེ་ནས་འཇིག་རྟེན་གྱི་ཁམས་མི་མཇེད་འདིའི་

བྱང་ཆུབ་སེམས་དཔའ་དང་། ཉན་ཐོས་ཆེན་པོ་དེ་དག་གིས་འཇིག་རྟེན་གྱི་ཁམས་འདི་ཁང་པ་བརྩེགས་པའི་བཀོད་པ་ཆེན་པོ་དེས་ཡོངས་སུ་ཁྱབ་པ་དང་། རིན་པོ་ཆེ་སྣ་ཚོགས་དག་ཀྱང་མཐོང་ནས་ངོ་མཚར་དུ་འཛིན་ཅིང་དེ་དག་འདི་སྙམ་དུ་སེམས་ཏེ། གང་དག་འཇིག་རྟེན་གྱི་ཁམས་བདེ་བ་
ཅན་ནས་འདིར་ལྷགས་པ་འདི་དག་ཅི་དེ་བཞིན་གཤེགས་པའི་མཐུའམ། འོན་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་གི་མཐུ་ཡིན་སྙམ་མོ། །དེ་ནས་དེའི་ཚེ་སངས་རྒྱས་ཀྱི་མཐུས་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོས། བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །འདི་ལྟར་འཇིག་རྟེན་གྱི་ཁམས་མི་མཇེད་འདི་ཁང་པ་བརྩེགས་པ་སྣ་ཚོགས་དུ་མས་བརྒྱན་ཅིང་ཡོངས་སུ་ཁྱབ་པར་གདའ་བ་ནི་བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་མཆོག་ཏུ་ངོ་མཚར་ཏོ། །གང་དག་འཇིག་རྟེན་གྱི་ཁམས་བདེ་བ་ཅན་ནས་
འཇིག་རྟེན་གྱི་ཁམས་མི་མཇེད་འདིར་ལྷགས་པ་དག་ཅི་དེ་བཞིན་གཤེགས་པའི་མཐུ་ལགས་སམ། འོན་ཏེ་བྱང་ཆུབ་སེམས་དཔའ་འདི་དག་གི་མཐུ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོ་ལ་
འདི་སྐད་ཅེས་བཀའ་སྩལ་ཏོ། །པད་མའི་དཔལ་གྱི་སྙིང་པོ་འཇིག་རྟེན་གྱི་ཁམས་མི་མཇེད་འདི་རིན་པོ་ཆེ་སྣ་ཚོགས་ཀྱི་ཁང་པ་བརྩེགས་པ་དུ་མས་བརྒྱན་ཅིང་ཡོངས་སུ་ཁྱབ་པར་སྣང་བ་འདི་ནི་དེ་བཞིན་གཤེགས་པའི་མཐུ་མ་ཡིན་གྱི། འདི་ནི་བྱང་ཆུབ་སེམས་དཔའ་སེམས་དཔའ་ཆེན་
པོ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ཀྱི་མཐུ་ཡིན་ནོ། །གསོལ་པ་འདི་ལྟར་འདི་དག་གིས་མཐུས་འཇིག་རྟེན་གྱི་ཁམས་མི་མཇེད་འདི་རིན་པོ་ཆེ་སྣ་ཚོགས་ཀྱི་ཁང་པ་བརྩེགས་པ་དུ་མས་བརྒྱན་ཅིང་ཡོངས་སུ་ཁྱབ་པར་
གདའ་བ་ནི་སྐྱེས་བུ་དམ་པ་འདི་གཉིས་ཀྱི་སྨོན་ལམ་དག་དང་། དགེ་བའི་རྩ་བ་དག་ཡོངས་སུ་སྦྱངས་པ་བསམ་གྱིས་མི་ཁྱབ་སྟེ། བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་མཆོག་ཏུ་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། པད་མའི་དཔལ་གྱི་

སྙིང་པོ་ཇི་སྐད་སྨྲས་པ་དེ་དེ་བཞིན་ཏེ། སྐྱེས་བུ་དམ་པ་འདི་གཉིས་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ནས་དགེ་བའི་རྩ་བ་དག་ཡོངས་སུ་སྦྱངས་པ་ཡིན་ནོ། །པད་མའི་དཔལ་གྱི་སྙིང་པོ་སྐྱེས་བུ་དམ་པ་འདི་གཉིས་ནི་སྒྱུ་མ་ལྟ་བུའི་ཏིང་ངེ་འཛིན་ཐོབ་པ་ཡིན་ཏེ།
འདི་གཉིས་སྒྱུ་མ་ལྟ་བུའི་ཏིང་ངེ་འཛིན་ལ་གནས་ནས། རྫུ་འཕྲུལ་གྱི་རྣམ་པར་སྤྲུལ་པ་འདི་ལྟ་བུ་འདི་དག་སྟོན་ཏོ། །པད་མའི་དཔལ་གྱི་སྙིང་པོ་ཁྱོད་ཤར་གྱི་ཕྱོགས་ཆ་ལོགས་སུ་དེ་ན་ཅི་སྣང་ལྟོས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོས་བྱང་
ཆུབ་སེམས་དཔའི་ལྷའི་མིག་སྒྲིབ་པ་མེད་པས་བལྟས་ན་ཤར་ཕྱོགས་སུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ན། སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་མཐོང་ངོ་། །སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱི་ཞབས་ལ་བྱང་ཆུབ་སེམས་དཔའ་
སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་གཉིས་ཕྱག་འཚལ་ནས་ཚིག་འདི་སྐད་ཅེས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད། བཅོམ་ལྡན་འདས་
ལ་གནོད་པ་ཆུང་ངམ་ཞེས་སྙུན་གསོལ་ལོ། །ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་ཀྱང་སྙུན་གསོལ་ལོ་ཞེས་སྨྲའོ། །དེ་བཞིན་དུ་ལྷོའི་ཕྱོགས་ཆ་དང་། དེ་བཞིན་དུ་ནུབ་དང་། དེ་བཞིན་དུ་བྱང་དང་། དེ་བཞིན་དུ་འོག་དང་།
དེ་བཞིན་དུ་སྟེང་དང་། དེ་བཞིན་དུ་ཕྱོགས་བཅུ་ཀུན་ཏུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ན་རིན་པོ་ཆེ་སྣ་ཚོགས་ཀྱི་ཁང་པ་བརྩེགས་པའི་བཀོད་པ་ཆེན་པོ་དུ་མས་བརྒྱན་ཅིང་ཡོངས་སུ་ཁྱབ་པར་མཐོང་ངོ་། །སངས་རྒྱས་ཀྱི་ཞིང་དེ་དག་ཐམས་ཅད་ན་སངས་རྒྱས་བཅོམ་ལྡན་
འདས་དག་ཀྱང་མཐོང་ངོ་། །སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱི་སྤྱན་སྔ་ན་སྐྱེས་བུ་དམ་པ་དེ་གཉིས་ཞབས་ལ་ཕྱག་འཚལ་བར་ཡང་མཐོང་ངོ་། །མཐོང་ནས་ཀྱང་དེ་ཤིན་ཏུ་ངོ་མཚར་ཆེར་འཛིན་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་

པད་མའི་དཔལ་གྱི་སྙིང་པོ་ངོ་མཚར་དུ་གྱུར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འདི་ལྟར་སྐྱེས་བུ་དམ་པ་འདི་གཉིས་ཀྱིས་སྒྱུ་མ་ལྟ་བུའི་ཏིང་ངེ་འཛིན་མངོན་པར་བསྒྲུབས་པ་ནི་བསམ་གྱིས་མི་ཁྱབ་སྟེ། བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་མཆོག་ཏུ་ངོ་
མཚར་ཏོ། །དེ་ཅིའི་སླད་དུ་ཞེ་ན། འདི་ལྟར་སྐྱེས་བུ་དམ་པ་འདི་གཉིས་ཏིང་ངེ་འཛིན་འདི་ལ་གནས་ཏེ། སངས་རྒྱས་ཀྱི་ཞིང་ཐམས་ཅད་ན་གདའ་བའི་སླད་དུའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་མཛད་པས། བྱང་ཆུབ་
སེམས་དཔའ་པད་མའི་དཔལ་གྱི་སྙིང་པོས་ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་དག་མཐོང་བ་དང་། སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་དག་དང་སྐྱེས་བུ་དམ་པ་དེ་གཉིས་སངས་རྒྱས་བཅོམ་ལྡན་འདས་ཀྱི་ཞབས་ལ་ཕྱག་འཚལ་བ་མཐོང་བ་དང་། དེ་བཞིན་དུ་
ཐམས་ཅད་དང་ལྡན་པའི་འཁོར་དེས་ཀྱང་ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་དག་མཐོང་བ་དང་། སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་དག་དང་། སྐྱེས་བུ་དམ་པ་དེ་གཉིས་སངས་རྒྱས་བཅོམ་ལྡན་འདས་དག་གི་ཞབས་ལ་ཕྱག་འཚལ་བ་མཐོང་བ་དང་། མཐོང་
ནས་ཀྱང་བཅོམ་ལྡན་འདས་ཀྱི་འཁོར་སྲོག་ཆགས་སུམ་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་མཛད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་པད་མའི་དཔལ་གྱི་སྙིང་
པོས་འདི་སྐད་ཅེས་གསོལ་ཏོ། །བཅོམ་ལྡན་འདས་སྐྱེས་བུ་དམ་པ་འདི་གཉིས་དེ་བཞིན་གཤེགས་པ་གང་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཇི་སྲིད་ཅིག་ལགས། དེའི་མཚན་ནི་ཅི་ཞེས་བགྱི། བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལེགས་པར་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འདི་ལྟར་བྱང་ཆུབ་སེམས་དཔའ་གཞན་དག་ཀྱང་དེའི་བྱ་བ་དང་། དེའི་སྤྱོད་པ་དང་། དེའི་སྨོན་ལམ་ཡོངས་སུ་རྫོགས་པར་བྱེད་པར་

འགྱུར་ཏེ། དེ་ལྟ་བས་ན་པད་མའི་དཔལ་གྱི་སྙིང་པོ་ཁྱོད་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་བཤད་དོ། །བྱང་ཆུབ་སེམས་དཔའ་པད་མའི་དཔལ་གྱི་སྙིང་པོས་བཅོམ་ལྡན་འདས་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་
ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །པད་མའི་དཔལ་གྱི་སྙིང་པོ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ་ཡངས་པ་ཚད་མེད་པ་བསམ་གྱིས་མི་ཁྱབ་པ་འཇིག་རྟེན་གྱི་ཁམས་བརྒྱ་སྟོང་གི་རྡུལ་ཕྲ་རབ་ཇི་སྙེད་ཡོད་པ་དེ་སྙེད་དུ་ཚད་མེད་པ། དེ་
སྙེད་དུ་བསམ་གྱིས་མི་ཁྱབ་པ། རྡུལ་ཕྲ་རབ་ཀྱི་རྡུལ་ཇི་ཙམ་ཡོད་པ་དེ་བས་ཀྱང་ཆེས་མང་བའི་བསྐལ་པ་བྱུང་བ་དེའི་ཚེ་དེའི་དུས་ན་འཇིག་རྟེན་གྱི་ཁམས་ཡོན་ཏན་རིན་ཆེན་བསགས་པ་དཔག་ཏུ་མེད་པ་བདེ་བ་ཀུན་ཏུ་སྟོན་པ་ཞེས་བྱ་བ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གསེར་འོད་སེང་གེའི་རྣམ་པར་རོལ་པའི་རྒྱལ་པོ་ཞེས་བྱ་བ་
བྱུང་སྟེ། པད་མའི་དཔལ་གྱི་སྙིང་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འོད་སེང་གེ་རྣམ་པར་རོལ་པའི་རྒྱལ་པོ་ཞེས་བྱ་བ་དེའི་སངས་རྒྱས་ཀྱི་ཞིང་ན་ཡོན་ཏན་བཀོད་པ་གང་དག་ཡོད་པ་དེ་དག་དཔེ་ཅུང་ཟད་ཙམ་གྱིས་ཅུང་ཟད་ཅིག་
བརྗོད་པར་བྱ་ཡིས་ཉོན་ཅིག །པད་མའི་དཔལ་གྱི་སྙིང་པོ་འདི་ཇི་སྙམ་དུ་སེམས། འཇིག་རྟེན་གྱི་ཁམས་བདེ་བ་ཅན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་མང་ངམ། གསོལ་པ། བཅོམ་ལྡན་
འདས་མང་ལགས་སོ། །བསམ་གྱིས་མི་ཁྱབ་པ། ཚད་མ་མཆིས་ཏེ། ངག་གི་ལས་ཀྱིས་ལན་གདབ་པར་སླ་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། པད་མའི་དཔལ་གྱི་སྙིང་པོ་འདི་ལྟ་སྟེ། དཔེར་ན་མི་ལ་ལ་ཞིག་གིས་སྐྲའི་རྩེ་མོ་བརྒྱར་གཤགས་པའི་རྩེ་

མོས་རྒྱ་མཚོ་ཆེན་པོ་ལས་ཆུ་ཐིགས་པ་གཅིག་བླངས་ན་པད་མའི་དཔལ་གྱི་སྙིང་པོ་འདི་ཇི་སྙམ་དུ་སེམས། ཆུ་བླངས་པ་དང་། ལྷག་མ་ལུས་པ་དེ་གང་མང་། གསོལ་པ། བཅོམ་ལྡན་འདས་བླངས་པ་ནི་ཉུང་། ལྷག་མ་ལུས་པ་ནི་ཚད་མ་མཆིས་སོ། །བཀའ་སྩལ་པ། པད་མའི་དཔལ་
གྱི་སྙིང་པོ་ཁྱོད་མོས་པར་བྱའོ། །ཁྱོད་ཀྱི་ཁོང་དུ་ཆུད་པར་བྱའོ། །མི་དེས་སྐྲའི་རྩེ་མོ་བརྒྱར་གཤགས་པའི་རྩེ་མོ་དེས་རྒྱ་མཚོ་ཆེན་པོ་ལས་ཆུའི་ཐིགས་པ་གཅིག་བླངས་པ་ཇི་སྙེད་པ་དེ་ཙམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱི་སངས་རྒྱས་
ཀྱི་ཞིང་གི་ཡོན་ཏན་བཀོད་པར་བལྟའོ། །རྒྱ་མཚོ་ཆེན་པོའི་ཆུའི་ཕུང་པོ་ཇི་སྙེད་པ་དེ་ཙམ་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འོད་སེང་གེ་རྣམ་པར་རོལ་པའི་རྒྱལ་པོ་དེའི་སངས་རྒྱས་ཀྱི་ཞིང་གི་ཡོན་ཏན་རིན་ཆེན་བསགས་པ་དཔག་
ཏུ་མེད་པ་བདེ་བ་ཀུན་ཏུ་སྟོན་པའི་འཇིག་རྟེན་གྱི་ཁམས་ཀྱི་ཡོན་ཏན་བཀོད་པར་བལྟའོ། །དེའི་ཉན་ཐོས་ཀྱི་དགེ་འདུན་ཡང་དཔག་ཏུ་མེད་དེ། ཇི་ལྟར་ད་ལྟར་ན་དེ་བཞིན་གཤེགས་པ་འོད་དཔག་མེད་ཀྱི་ཉན་ཐོས་ཀྱི་དགེ་འདུན་དཔག་ཏུ་མེད་དོ་ཞེས་བྱ་ན། དེ་ལས་བརྒྱ་སྟོང་དུ་བསྒྲེས་པ་བས་ཀྱང་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འོད་སེང་གེ་རྣམ་པར་རོལ་པའི་རྒྱལ་པོ་དེའི་ཉན་ཐོས་ཀྱི་དགེ་འདུན་ཆེས་མང་ངོ་། །དེ་བཞིན་དུ་བྱང་ཆུབ་སེམས་དཔའི་དགེ་འདུན་ཡང་དེ་སྙེད་དོ། །བཅོམ་ལྡན་འདས་དེ་བཞིན་གཤེགས་པ་དེ་ནི་
ཐེག་པ་གསུམ་ཁོ་ན་ལས་བརྩམས་ཏེ་ཆོས་སྟོན་ཏོ། །པད་མའི་དཔལ་གྱི་སྙིང་པོ་ངས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འོད་སེང་གེ་རྣམ་པར་རོལ་པའི་རྒྱལ་པོ་དེའི་སངས་རྒྱས་
ཀྱི་ཞིང་གི་ཡོན་ཏན་བཀོད་པ་དང་། ཉན་ཐོས་ཀྱི་ཡོན་ཏན་བཀོད་པ་དང་། བདེ་བའི་རྒྱུ་ལས་བརྩམས་ཏེ་ཆོས་བསྟན་པར་འདོད་ཀྱང་། ངའི་སྤོབས་པ་ཡང་ཟད་པར་མི་འགྱུར། སངས་རྒྱས་ཀྱི་ཞིང་གི་ཡོན་ཏན་བཀོད་པ་དེའི་མཐར་ཕྱིན་པར་ཡང་མི་འགྱུར་རོ། །པད་མའི་དཔལ་གྱི་སྙིང་

པོ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་གསེར་འོད་སེང་གེ་རྣམ་པར་རོལ་པའི་རྒྱལ་པོ་དེའི་གསུང་རབ་ལ་འཇིག་རྟེན་གྱི་ཁམས་སྟོང་གི་དབང་ཕྱུག་ཆོས་དང་ལྡན་པ་ཆོས་ཀྱི་རྒྱལ་པོ་དཔལ་གྱི་གཟི་བརྗིད་ཅེས་བྱ་བའི་རྒྱལ་པོ་ཞིག་བྱུང་སྟེ། པད་མའི་དཔལ་
གྱི་སྙིང་པོ་རྒྱལ་པོ་དཔལ་གྱི་གཟི་བརྗིད་དེ་ལ་བུ་བྱེ་བ་ཕྲག་བརྒྱ་ཡོད་དེ། རྒྱལ་བུ་གཞོན་ནུ་དེ་དག་ཐམས་ཅད་ཀྱང་སྐྱེས་བུ་ཆེན་པོའི་མཚན་ཉི་ཤུ་རྩ་བརྒྱད་དང་ལྡན་པར་གྱུར་ཏོ། །དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པར་གྱུར་ཏོ། །
པད་མའི་དཔལ་གྱི་སྙིང་པོ་རྒྱལ་པོ་དཔལ་གྱི་གཟི་བརྗིད་ཀྱི་ཡོངས་སུ་ལོངས་སྤྱོད་པའི་སྐྱེད་མོས་ཚལ་ནི་བདུན་ཁྲི་དྲུག་སྟོང་ཡོད་དོ། །རྒྱལ་བུ་རེ་རེ་ལ་ཡང་ལོངས་སྤྱོད་ཀྱི་སྐྱེད་མོས་ཚལ་ཁྲི་ཁྲི་ཡོད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་པད་མའི་དཔལ་གྱི་སྙིང་པོས་འདི་སྐད་
ཅེས་གསོལ་ཏོ། །བཅོམ་ལྡན་འདས་སངས་རྒྱས་ཀྱི་ཞིང་དེ་ན་བུད་མེད་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། པད་མའི་དཔལ་གྱི་སྙིང་པོ་དེ་ནི་མེད་དོ། །སངས་རྒྱས་ཀྱི་ཞིང་དེ་ན་བུད་མེད་མིང་ཡང་མི་གྲག་སྟེ། རྒྱལ་བུ་གཞོན་ནུ་དེ་དག་ཐམས་ཅད་ཀྱང་ཚངས་
པར་སྤྱོད་པ་ལས་གྱུར་པ། བརྫུས་ཏེ་བྱུང་བ་ཤ་སྟག་གོ། །སེམས་ཅན་དེ་དག་ཐམས་ཅད་ཀྱང་བསམ་གཏན་གྱི་དགའ་བ་དང་། ཆོས་ཀྱི་དགའ་བའི་ཟས་ཅན་ཡིན་ཏེ། སངས་རྒྱས་ཀྱི་ཞིང་དེ་ན་ཁ་ཟས་རགས་པ་མེད་པར་གྱུར་ཏོ། །པད་མའི་དཔལ་གྱི་སྙིང་པོ་རྒྱལ་པོ་དཔལ་གྱི་གཟི་བརྗིད་དེ་ནི་ལས་
གཞན་མེད་དེ་བུ་དེ་རྣམས་དང་ལྷན་ཅིག་བཅོམ་ལྡན་འདས་དེ་ལ་ལོ་བྱེ་བ་སྟོང་ཕྲག་བརྒྱད་ཁྲི་བཞི་སྟོང་གི་བར་དུ་བསྙེན་བཀུར་བྱས་སོ། །བཅོམ་ལྡན་འདས་དེ་བཞིན་གཤེགས་པ་དེས་དེའི་ལྷག་པའི་བསམ་པ་མཁྱེན་ནས་ཚད་མེད་པའི་ཕྱག་རྒྱ་ཞེས་བྱ་བའི་ཆོས་ཀྱི་ཚུལ་ལ་མཁས་པ་ཡང་
དག་པར་རབ་ཏུ་བསྟན་ཏོ། །པད་མའི་དཔལ་གྱི་སྙིང་པོ་ཚད་མེད་པའི་ཕྱག་རྒྱ་ཞེས་བྱ་བའི་ཆོས་ཀྱི་ཚུལ་ལ་མཁས་པ་གང་ཞེ་ན། པད་མའི་དཔལ་གྱི་སྙིང་པོ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སྤྱོད་པ་ཚད་མེད་པ་དག་དོན་ཏུ་གཉེར་བར་མི་བྱ་བ་དེ་གང་ཡང་མེད་དོ། །

རྟུལ་བ་ཚད་མེད་པ་གང་དག་བརྩམ་པར་མི་བྱ་བ་དེ་གང་ཡང་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་ཀྱི་སྦྱིན་པ་ནི་ཚད་མེད་དོ། །ཚུལ་ཁྲིམས་ནི་ཚད་མེད། བཟོད་པ་ནི་ཚད་མེད། བརྩོན་འགྲུས་ནི་ཚད་མེད། བསམ་གཏན་ནི་ཚད་མེད། ཤེས་རབ་ནི་ཚད་མེད། འཁོར་བ་
ཡོངས་སུ་འཛིན་པ་ནི་ཚད་མེད། སེམས་ཅན་དག་ལ་བྱམས་པ་ནི་ཚད་མེད། ཞིང་གི་བཀོད་པ་དག་ནི་ཚད་མེད། ཉན་ཐོས་དག་ནི་ཚད་མེད། གཟུགས་ཡོངས་སུ་གྲུབ་པ་དག་ནི་ཚད་མེད། དབྱངས་ནི་ཚད་