Kinh tạng Tây Tạng (Kangyur Đại Học) — 055_མདོ་སྡེ།_ད

༄༅། །མདོ་སྡེ་ད་བ་བཞུགས་སོ། །

༄༅༅། །རྒྱ་གར་སྐད་དུ། ཨཱརྱ་སརྦ་དྷརྨ་སྭ་བྷཱ་བ་ས་མ་ཏཱ་བི་པཉྩི་ཏ་ས་མཱ་དྷི་རཱ་ཛ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་
པ་ཏིང་ངེ་འཛིན་གྱི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན།
བཅོམ་ལྡན་འདས་རྒྱལ་པོའི་ཁབ་ན། བྱ་རྒོད་ཀྱི་ཕུང་པོའི་རི་ལ་དགེ་སློང་འབུམ་དུ་ཚང་བའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་སོ། །བྱང་ཆུབ་སེམས་དཔའ་བྱེ་བ་ཁྲག་ཁྲིག་ཕྲག་
བརྒྱད་ཅུ་དང་ཡང་ཐབས་ཅིག་སྟེ། ཐམས་ཅད་ཀྱང་སྐྱེ་བ་གཅིག་གིས་ཐོགས་པ། མངོན་པར་ཤེས་པས་མངོན་པར་ཤེས་པ། ཕྱོགས་བཅུའི་འཇིག་རྟེན་གྱི་ཁམས་དག་ནས་འདུས་པ། གཟུངས་དང་མདོ་
སྡེ་རྟོགས་པར་ཁོང་དུ་ཆུད་པ། སེམས་ཅན་ཐམས་ཅད་ལ་ཆོས་ཀྱི་སྦྱིན་པས་ཚིམ་པར་བྱེད་པ། མངོན་པར་ཤེས་པ་ཆེན་པོའི་ཡེ་ཤེས་བརྗོད་པ་ལ་མཁས་པ། ཕ་རོལ་ཏུ་ཕྱིན་པ་ཐམས་ཅད་ཀྱི་དམ་པའི་ཕ་

རོལ་ཏུ་སོན་པ། བྱང་ཆུབ་སེམས་དཔའི་ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་རྣམ་པར་གཞག་པ་ཤེས་པ་ལ་མཁས་པ། སངས་རྒྱས་ཐམས་ཅད་ཀྱིས་བསྟོད་ཅིང་བསྔགས་ཏེ་རབ་ཏུ་བཀུར་བ། སངས་རྒྱས་ཀྱི་ཞིང་ཐམས་ཅད་དུ་རྫུ་
འཕྲུལ་གྱིས་འགྲོ་བ་ལ་མཁས་པ། བདུད་ཐམས་ཅད་སྐྲག་པར་བྱ་བའི་ཤེས་པ་ལ་མཁས་པ། ཆོས་ཐམས་ཅད་ཇི་ལྟ་བ་བཞིན་དུ་ཤེས་པ་ལ་མཁས་པ། སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པ་ལ་མཁས་པ། སངས་རྒྱས་ཐམས་
ཅད་ལ་མཆོད་པའི་ལས་ཡང་དག་པར་སྒྲུབ་པ་ཤེས་པ་ལ་མཁས་པ། འཇིག་རྟེན་པའི་ཆོས་ཐམས་ཅད་ཀྱིས་མི་གོས་པ། ལུས་དང་ངག་དང་སེམས་ཡང་དག་པར་བརྒྱན་པ། བྱམས་པ་ཆེན་པོ་དང་སྙིང་རྗེ་ཆེན་པོའི་གོ་ཆ་བགོས་པ། བསྐལ་པ་གྲངས་མེད་པར་ཡིད་
མི་སྐྱོ་བར་བརྩོན་འགྲུས་ཆེ་བ། སེང་གེའི་སྒྲ་ཆེན་པོ་སྒྲོག་པ། ཕས་ཀྱི་རྒོལ་བ་ཐམས་ཅད་ཀྱི་ཟིལ་གྱིས་མི་ནོན་པ། ཕྱིར་མི་ལྡོག་པའི་ཕྱག་རྒྱས་བཏབ་པ། སངས་རྒྱས་ཐམས་ཅད་ཀྱི་ཆོས་ཀྱི་དབང་བསྐུར་བ་ཐོབ་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་
དཔའ་སེམས་དཔའ་ཆེན་པོ་ལྷུན་པོ་དང་རབ་ཏུ་ལྷུན་པོ་དང་ལྷུན་པོའི་རྩེ་མོ་འཛིན་དང་ལྷུན་པོ་མར་མེའི་རྒྱལ་པོ་དང་ལྷུན་པོ་བརྩེགས་པ་དང་ལྷུན་པོའི་རྒྱལ་མཚན་དང་ལྷུན་པོའི་རྒྱལ་པོ་དང་ལྷུན་པོའི་རྩེ་མོ་ཀུན་གཡོ་བར་བྱེད་པའི་རྒྱལ་པོ་དང་ལྷུན་པོའི་དབྱངས་དང་།
སྤྲིན་གྱི་རྒྱལ་པོ་དང་རྔ་དབྱངས་དང་རིན་པོ་ཆེའི་འབྱུང་གནས་དང་རིན་པོ་ཆེའི་ཏོག་དང་རིན་པོ་ཆེའི་རྩེ་མོ་དང་རིན་པོ་ཆེ་འབྱུང་བ་དང་། རིན་པོ་ཆེ་སྣང་བ་དང་རིན་པོ་ཆེའི་འཁར་བ་དང་ལག་ན་ཕྱག་རྒྱ་རིན་པོ་ཆེ་དང་རིན་པོ་ཆེའི་བཀོད་པ་དང་རིན་པོ་ཆེའི་དྲ་བ་དང་རིན་པོ་ཆེའི་འོད་དང་རིན་པོ་ཆེའི་

གླིང་དང་། དགའ་བར་བྱེད་པ་དང་ཆོས་བཀོད་པ་དང་བཀོད་པའི་རྒྱལ་པོ་དང་མཚན་གྱིས་ཀུན་ཏུ་བརྒྱན་པ་དང་དབྱངས་བཀོད་པ་དང་དབྱངས་རྣམ་པར་དག་པའི་འོད་དང་རིན་པོ་ཆེ་བརྩེགས་པ་དང་ཉི་མ་མེའི་འོད་འཕྲོ་ཅན་དང་སྐར་མ་ལ་དགའ་བ་དང་ཟླ་བའི་འོད་ཟེར་དང་། སེམས་བསྐྱེད་མ་ཐག་ཏུ་ཆོས་ཀྱི་
འཁོར་ལོ་སྐོར་བ་དང་གསེར་བཟང་པོ་རྣམ་པར་དག་པའི་འོད་དང་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་མི་འཇིགས་སྦྱིན་ཞེས་བྱ་བ་དང་། བྱང་ཆུབ་སེམས་དཔའ་མི་ཕམ་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང་། འཇམ་
དཔལ་ལ་སོགས་པ་སེམས་དཔའ་དཔེ་མེད་པ་དྲུག་ཅུ་དང་། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་དང་། རྒྱལ་པོ་ཆེན་པོ་བཞི་ལ་སོགས་པ་རྒྱལ་ཆེན་བཞིའི་རིས་ཀྱི་ལྷའི་བུ་རྣམས་དང་། ཚངས་པ་ལ་སོགས་པ་ཚངས་རིས་ཀྱི་ལྷའི་བུ་རྣམས་ཀྱི་བར་དུ་དེ་བཞིན་དུ་སྦྱར་ཏེ། དེ་མ་ཡིན་པ་
གཞན་ཡང་དབང་ཆེ་བ་དང་དབང་ཆེ་བར་གྲགས་པའི་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་རྒྱ་ཆེ་ཞིང་རླབས་ཆེ་བ་དག་དང་ཐབས་ཅིག་གོ། །བཅོམ་ལྡན་འདས་ལ་བཀུར་སྟིར་བྱས། བླ་མར་བྱས། རི་མོར་བྱས།
མཆོད་པར་བྱས། རྗེད་པར་བྱས། གསོལ་བར་བྱས་ཏེ། འཁོར་བཞི་དང་ལྷར་བཅས་པའི་འཇིག་རྟེན་གྱིས་ཀྱང་ཕྱག་བྱ་བ། མཆོད་པར་བྱ་བ། བཀུར་སྟིར་བྱ་བ། བླ་མར་བྱ་བ། རི་མོར་བྱ་བ། རྗེད་པར་བྱ་བ། གསོལ་བར་བྱ་བར་གྱུར་ཏོ། །དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་
ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །དེའི་ཚེ་
འཁོར་ཚོགས་པ་དེ་ཉིད་དུ་ཟླ་འོད་གཞོན་ནུར་གྱུར་པ་ཞེས་བྱ་བ་སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་བསྐྱེད་པ། སྐྱེ་བ་དྲན་པ། སྤོབས་པ་ཐོབ་པ། ཐེག་པ་ཆེན་པོ་ལ་ཡང་དག་པར་ཞུགས་པ། སྙིང་རྗེ་ཆེན་པོ་ལ་བརྩོན་པ་ཞིག་འདུས་ཏེ་འདུག་པར་གྱུར་ཏོ། །དེ་ནས་ཟླ་འོད་གཞོན་ནུར་གྱུར་

པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་
ལྡན་འདས་ཀྱིས་བདག་ལ་སྐབས་ཕྱེ་ན་བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་གཞོན་ནུ་ཁྱོད་ཅི་དང་ཅི་འདོད་པ་དྲིས་ཤིག་དང་དྲི་བ་དྲིས་པ་དེ་དང་དེ་ཉིད་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །གཞོན་ནུ་ང་ནི་ཐམས་ཅད་མཁྱེན་པ། ཐམས་ཅད་གཟིགས་པ། ཆོས་ཐམས་ཅད་ལ་སྟོབས་དང་མི་
འཇིགས་པས་ཁྱུ་མཆོག་ཏུ་གྱུར་པ་རྗེས་སུ་ཐོབ་པ། སྒྲིབ་པ་མེད་པའི་རྣམ་པར་ཐར་པའི་ཡེ་ཤེས་དང་ལྡན་པ་སྟེ། གཞོན་ནུ་འཇིག་རྟེན་གྱི་ཁམས་མཐའ་ཡས་མུ་མེད་པ་ན་དེ་བཞིན་གཤེགས་པ་ལ་མི་མཁྱེན་པའམ། མི་གཟིགས་པའམ། མི་གསན་པའམ། ཐུགས་སུ་མ་ཆུད་པའམ།
མངོན་སུམ་དུ་མ་མཛད་པའམ། མངོན་པར་རྫོགས་པར་སངས་མ་རྒྱས་པ་ཅིའང་མེད་དེ། གཞོན་ནུ་དེ་བཞིན་གཤེགས་པ་ལ་དྲི་བ་དང་ཡོངས་སུ་དྲི་བའི་ཕྱིར་ཁྱོད་ལ་རྟག་ཏུ་སྐབས་ཕྱེས། དྲི་བ་དྲིས་པ་དེ་དང་དེ་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་ནས་བཅོམ་ལྡན་འདས་ཀྱིས་
སྐབས་ཕྱེ་བ་དང་། ཟླ་འོད་གཞོན་ནུར་གྱུར་པས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག་རྟེན་མགོན་པོ་རྫོགས་སངས་རྒྱས། །འོད་མཛད་ཇི་ལྟར་སྤྱད་པ་ཡིས། །བསམ་གྱིས་མི་ཁྱབ་ཡེ་ཤེས་འཐོབ། །ཕན་མཛད་ལུང་ཡང་བསྟན་དུ་གསོལ། །མི་ཡི་ཁྱུ་མཆོག་མི་དང་ལྷས་
མཆོད་པ། །མི་དབང་བདེན་གསུངས་ཇི་ལྟར་སྤྱད་པ་ཡིས། །ཐེག་མཆོག་དམ་པ་གཞལ་མེད་ཐོབ་པར་འགྱུར། །མགོན་པོ་གསུང་མཆོག་ཞུས་པ་ལུང་བསྟན་གསོལ། །བདག་ལ་གཡོ་ནི་མ་མཆིས་ཏེ། །ལྷག་པའི་བསམ་པས་ཞུ་བ་ལགས། །སྐྱེས་བུ་དམ་པ་མ་གཏོགས་པར། །བདག་གི་

དབང་ནི་གཞན་མ་མཆིས། །འདུན་དང་སྨོན་ལམ་རྒྱ་ཆེ་བདག་ལ་མཆིས། །བདག་གི་སྤྱོད་པ་ཤཱཀྱ་སེང་གེས་མཁྱེན། །བདག་ནི་ཚིག་ལ་གཙོར་འཛིན་མ་ལགས་ཀྱིས། །མི་དབང་སྒྲུབ་པ་བདག་ལ་མྱུར་དུ་གསུངས། །སངས་རྒྱས་ཐེག་པར་གཅེས་སྤྲས་བགྱིད། །ཡོངས་སུ་སྡུད་པའི་ཆོས་
རྣམས་གང་། །ཆོས་རྣམས་ཀུན་གྱི་མཐར་ཕྱིན་པ། །དཔའ་བོ་ཆེན་པོ་ལུང་བསྟན་གསོལ། །ཅི་ནས་མིས་བསྟེན་ཤེས་རབ་རྣོར་འགྱུར་ཞིང་། །མི་བཟད་འཇིགས་དང་བྲལ་ཏེ་མི་སྐྲག་པས། །ཚུལ་ཁྲིམས་ཕུང་པོ་གཏོང་བར་མི་བགྱིད་ཅིང་། །རྒྱགས་དང་ཞེ་སྡང་གཏི་མུག་ཆགས་བྲལ་ཏེ། །
ཉེས་པ་ཀུན་ཞི་སྤྱད་པ་སྤྱོད་པ་ཡི། །ཕན་པར་བགྱིད་པའི་ཆོས་རྣམས་བདག་ལ་གསུངས། །ཇི་ལྟར་ཚུལ་ཁྲིམས་མི་གཏོང་ཞིང་། །ཇི་ལྟར་བསམ་གཏན་འདོར་མི་འགྱུར། །དགོན་པ་ལ་ནི་ཇི་ལྟར་བསྟེན། །ཤེས་རབ་དག་གིས་ཇི་ལྟར་འཕེལ། །ཇི་ལྟར་སྟོབས་བཅུའི་བསྟན་པ་རྒྱ་ཆེ་ལ། །
ཚུལ་ཁྲིམས་སྲུང་ཞིང་མངོན་དགའ་རྙེད་པར་འགྱུར། །ཇི་ལྟར་ཚུལ་ཁྲིམས་ཕུང་པོ་སྐྱོན་མེད་འགྱུར། །ཇི་ལྟར་འདུས་བྱས་རང་བཞིན་འཇལ་བར་འགྱུར། །ཇི་ལྟར་ལུས་དང་ངག་གིས་ཀྱང་། །མཁས་པ་རྣམ་པར་དག་པར་འགྱུར། །ཀུན་ནས་ཉོན་མོངས་མེད་སེམས་ཀྱིས། །སངས་རྒྱས་
ཡེ་ཤེས་ཚོལ་བར་འགྱུར། །ལུས་ཀྱི་ལས་ནི་ཇི་ལྟར་རྣམ་དག་འགྱུར། །ཚིག་གི་སྐྱོན་ནི་ཇི་ལྟར་སྤངས་པར་འགྱུར། །ཇི་ལྟར་སེམས་ལ་ཉོན་མོངས་མེད་པར་འགྱུར། །སྐྱེས་མཆོག་ཞུས་པ་བདག་ལ་ལུང་བསྟན་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཟླ་འོད་གཞོན་
ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཅིག་དང་ལྡན་ན་ཡོན་ཏན་འདི་དག་ཐོབ་པར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཆོས་གཅིག་པོ་གང་ཞེ་ན།
གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ལ་སེམས་སྙོམས་པ་ཡིན། ཕན་པའི་སེམས་དང་ཁོང་ཁྲོ་བ་མེད་པའི་སེམས་དང་མི་མཉམ་པ་མེད་པའི་སེམས་ཡིན་ཏེ། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཅིག་པོ་འདི་དང་

ལྡན་ན་ཡོན་ཏན་འདི་དག་ཐོབ་པར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཟླ་འོད་གཞོན་ནུར་གྱུར་པ་ལ་ཚིགས་སུ་བཅད་དེ་གསུངས་པ། ཆོས་གཅིག་ཡང་དག་བླངས་ནས་ནི། །
བྱང་ཆུབ་སེམས་དཔའ་གང་གནས་པ། །ཡོན་ཏན་འདི་དག་ངེས་ཐོབ་སྟེ། །མྱུར་དུ་བྱང་ཆུབ་འཚང་ཡང་རྒྱ། །དེ་ཡི་སེམས་ནི་གང་ལའང་ཞེ་མི་སྡང་། །ཞེ་སྡང་མེད་སེམས་བྱང་ཆུབ་སེམས་དཔའ་གང་། །ཐ་བ་མི་སྐྱེད་ཞེ་སྡང་མེད་པ་དག །ཁྱད་པར་ཇི་སྐད་བརྗོད་པ་ཐོབ་པར་འགྱུར། །
མཉམ་པའི་སེམས་ལ་བསྟེན་པ་ཡིས། །རྣམ་པར་སྨིན་པ་མཉམ་པར་འགྱུར། །རྐང་པའི་མཐིལ་ཡང་མཉམ་པ་དང་། །ཆོ་ག་སྤྱོད་ཡུལ་མཉམ་པར་འགྱུར། །མཉམ་ཞིང་མི་མཉམ་མ་ཡིན་སེམས་བསྒོམས་ནས། །ཐ་བའི་སྐྱོན་བྲལ་ནེམ་ནུར་རབ་སྤངས་ན། །དེ་ཡི་རྐང་ལག་མཐིལ་ཡང་
མཉམ་འགྱུར་ཏེ། །མཆོག་ཏུ་འོད་གསལ་དག་ཅིང་བལྟ་ན་སྡུག །བྱང་ཆུབ་སེམས་དཔའ་ཕྱོགས་བཅུར་ལྷང་ངེར་སྣང་། །སངས་རྒྱས་ཞིང་དུ་དཔལ་དང་འོད་ཀྱིས་ཁྱབ། །ནམ་དེས་ཞི་བའི་ས་ནི་ཐོབ་པའི་ཚེ། །སངས་རྒྱས་མཁྱེན་ལ་སེམས་ཅན་མང་པོ་འགོད། །གཞོན་ནུ་དེ་ལ་བྱང་ཆུབ་
སེམས་དཔའ་སེམས་ཅན་ཐམས་ཅད་ལ་སེམས་སྙོམས་པ་དང་། ཕན་པར་སེམས་པ་དང་། སེམས་ཁོང་ཁྲོ་བ་མེད་པ་དང་སེམས་མི་མཉམ་པ་མེད་པ་ནི་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པ་ཞེས་བྱ་བའི་ཏིང་ངེ་འཛིན་ཐོབ་པར་འགྱུར་རོ། །གཞོན་ནུ་ཆོས་ཐམས་ཅད་
ཀྱི་རང་བཞིན་མཉམ་པ་ཉིད་རྣམ་པར་སྤྲོས་པ་ཞེས་བྱ་བའི་ཏིང་ངེ་འཛིན་གང་ཞེ་ན། འདི་ལྟ་སྟེ། ལུས་ཀྱི་སྡོམ་པ་དང་ངག་གི་སྡོམ་པ་དང་ཡིད་ཀྱི་སྡོམ་པ་དང་ལས་ཡོངས་སུ་དག་པ་དང་དམིགས་པ་ལས་ཡང་དག་པར་འདའ་བ་དང་ཕུང་པོ་ཡོངས་སུ་ཤེས་པ་དང་། ཁམས་མཉམ་པ་ཉིད་དང་སྐྱེ་
མཆེད་སེལ་བ་དང་སྲེད་པ་སྤོང་བ་དང་མི་སྐྱེ་བ་མངོན་སུམ་དུ་བྱེད་པ་ལ་འཇུག་པ་དང་རྒྱུ་གསལ་བར་བྱེད་པ་དང་ལས་ཀྱི་འབྲས་བུ་ཆུད་མི་གསོན་པ་དང་ཆོས་མཐོང་བ་དང་ལམ་སྒོམ་པ་དང་དེ་བཞིན་གཤེགས་པ་ལ་སྟེན་པ་དང་ཤེས་རབ་རྣོ་བ་དང་བདེན་པའི་རྗེས་སུ་འཇུག་པ་དང་ཆོས་ཤེས་པ་དང་སོ་སོ་ཡང་དག་

པར་རིག་པ་ལ་འཇུག་པ་ཤེས་པ་དང་ཡི་གེ་དང་ཚིག་རབ་ཏུ་དབྱེ་བ་ཤེས་པ་དང་དངོས་པོ་རྣམས་ལས་ཡང་དག་པར་འདའ་བ་དང་། སྒྲ་ཡོངས་སུ་ཤེས་པ་དང་དགའ་བ་རབ་ཏུ་ཐོབ་པ་དང་ཆོས་ཀྱི་དགའ་བ་རྗེས་སུ་མྱོང་བ་དང་དྲང་བ་དང་། མཉེན་པ་དང་ཤུགས་དྲང་བ་དང་གྱ་གྱུ་མེད་པ་དང་ཁྲོས་
གཉེར་དང་བྲལ་བ་དང་དེས་པ་དང་ངང་ཚུལ་དགེ་བ་དང་བྱམས་པར་འཛིན་པ་དང་འཇམ་པ་དང་བཞིན་འཛུམ་པ་དང་གསོང་པོར་སྨྲ་བ་དང་ལེགས་པར་འོངས་སོ། །ཚུར་ཤོག་ཅེས་སྨྲ་བ་དང་ལེ་ལོ་མེད་པ་དང་བླ་མ་ལ་གུས་པ་དང་བླ་མ་ལ་སྲི་ཞུ་ཆེ་བ་དང་སྐྱེ་བས་ཆོག་ཤེས་པ་དང་ཆོས་དཀར་པོས་
མི་ངོམས་པ་དང་འཚོ་བ་རྣམ་པར་དག་པ་དང་དགོན་པ་ལ་གནས་པ་མི་གཏོང་བ་དང་ས་རྣམ་པར་བཞག་པ་ཤེས་པ་དང་དྲན་པ་ཆུད་མི་གཟོན་པ་དང་། ཕུང་པོ་ལ་མཁས་པ་དང་ཁམས་ལ་མཁས་པ་དང་སྐྱེ་མཆེད་ལ་མཁས་པ་དང་མངོན་པར་ཤེས་པ་མངོན་སུམ་དུ་བྱ་བ་ལ་འཇུག་པ་དང་།
ཉོན་མོངས་པ་སེལ་བ་དང་བག་ཆགས་ཀྱི་མཚམས་སྦྱོར་བ་ཡང་དག་པར་འཇོམས་པ་དང་། ཁྱད་པར་དུ་འགྲོ་བ་དང་བསྒོམ་པའི་རྒྱུ་འཐུན་པ་དང་ཉེས་པ་ལས་དབྱུང་བ་ལ་མཁས་པ་དང་ཀུན་ནས་ལྡང་བ་གནོན་པ་དང་བག་ལ་ཉལ་སྤོང་བ་དང་སྲིད་པ་ལས་ཡང་དག་པར་འདའ་བ་དང་སྐྱེ་བ་དྲན་
པ་དང་ལས་ཀྱི་རྣམ་པར་སྨིན་པ་ལ་ནེམ་ནུར་མེད་པ་དང་ཆོས་སེམས་པ་དང་ཐོས་པ་ཚོལ་བ་དང་། ཡེ་ཤེས་རྣོ་བ་དང་ཡེ་ཤེས་ལ་སྲེད་པ་དང་ཡེ་ཤེས་རྗེས་སུ་རྟོགས་པ་དང་ཅང་ཤེས་ཀྱི་ས་དང་སེམས་རི་ལྟ་བུ་དང་མི་སྒུལ་བ་དང་མི་གཡོ་བ་དང་ཕྱིར་མི་ལྡོག་པའི་ས་རྣམ་པར་གཞག་པ་ཤེས་པ་དང་།
དགེ་བའི་ཆོས་ཀྱི་རྒྱུ་འཐུན་པ་དང་སྡིག་པའི་ཆོས་ལ་སྨོད་པ་དང་ཉོན་མོངས་པ་རྣམས་ཀྱི་རྒྱུ་བ་མེད་པ་དང་བསླབ་པ་ཡོངས་སུ་མི་གཏོང་བ་དང་། ཏིང་ངེ་འཛིན་རྣམ་པར་འཇོག་པ་དང་སེམས་ཅན་རྣམས་ཀྱི་བསམ་པ་ཤེས་པ་དང་། སྐྱེ་བའི་ཁྱད་པར་ཤེས་པ་དང་མཉམ་པ་ཉིད་ཤེས་པ་དང་ཚིག་གི་མཚམས་
སྦྱར་བ་ཤེས་པ་དང་ཁྱིམ་ན་གནས་པ་ཡོངས་སུ་གཏོང་བ་དང་། ཁམས་གསུམ་ལ་མངོན་པར་མི་དགའ་བ་དང་སེམས་ཞུམ་པ་མེད་པ་དང་ཆོས་ལ་མངོན་པར་ཞེན་པ་མེད་པ་དང་དམ་པའི་ཆོས་ཡོངས་སུ་འཛིན་པ་དང་ཆོས་སྲུང་བ་དང་ལས་ཀྱི་རྣམ་པར་སྨིན་པ་ལ་ཡིད་ཆེས་པ་དང་འདུལ་བ་ལ་མཁས་

པ་དང་རྩོད་པའི་གཞི་ཞི་བར་བྱེད་པ་དང་འགྱེད་པ་མེད་པ་དང་རྩོད་པ་མེད་པ་དང་བཟོད་པའི་ས་དང་བཟོད་པ་ཡང་དག་པར་འཛིན་པ་དང་འགྲོ་བ་མཉམ་པ་དང་ཆོས་རབ་ཏུ་དབྱེ་བ་ལ་མཁས་པ་དང་ཆོས་གཏན་ལ་དབབ་པ་ལ་མཁས་པ་དང་ཆོས་ཀྱི་ཚིག་རབ་ཏུ་དབྱེ་བ་ཤེས་པ་དང་ཆོས་ཀྱི་ཚིག་
ངེས་པར་དགོད་པ་ལ་མཁས་པ་དང་། སྔོན་གྱི་མཐའ་ཤེས་པ་དང་ཕྱི་མའི་མཐའ་ཤེས་པ་དང་ད་ལྟར་བྱུང་བ་ཤེས་པ་དང་དུས་གསུམ་མཉམ་པ་ཉིད་ཤེས་པ་དང་འཁོར་གསུམ་ཡོངས་སུ་དག་པ་ཤེས་པ་དང་། ལུས་གནས་པ་ཤེས་པ་དང་སེམས་གནས་པ་ཤེས་པ་དང་སྤྱོད་ལམ་སྲུང་བ་དང་སྤྱོད་
ལམ་མི་འཁྲུགས་པ་དང་སྤྱོད་ལམ་མི་འཆོས་པ་དང་སྤྱོད་ལམ་མཛེས་པ་དང་དོན་དང་དོན་མ་ཡིན་པ་ལ་མཁས་ཤིང་ཤེས་པ་དང་རིགས་པར་སྨྲ་བ་དང་། འཇིག་རྟེན་ཤེས་པ་དང་ལྷུག་པར་གཏོང་བ་དང་ལག་བརྐྱང་བ་དང་སེམས་ཀྱིས་འཛིན་པ་མེད་པ་དང་ངོ་ཚ་ཤེས་པ་དང་ཁྲེལ་ཡོད་པ་དང་།
མི་དགེ་བའི་སེམས་ལ་སྨོད་པ་དང་སྦྱངས་པའི་ཡོན་ཏན་མི་གཏོང་བ་དང་ཆོ་ག་ཡང་དག་པར་འཛིན་པ་དང་དགའ་བར་སྤྱོད་པ་དང་བླ་མ་ལ་ལྡང་ཞིང་སྟན་འདིང་བ་དང་ང་རྒྱལ་ཚར་གཅོད་པ་དང་སེམས་ཡང་དག་པར་རབ་ཏུ་འཛིན་པ་དང་སེམས་སྐྱེ་བ་ཤེས་པ་དང་དོན་རྟོགས་པར་ཤེས་པ་དང་ཡེ་ཤེས་
རྗེས་སུ་རྟོགས་པ་དང་། མི་ཤེས་པ་མེད་པར་གྱུར་པ་དང་སེམས་ལ་འཇུག་པ་ཤེས་པ་དང་སེམས་ཀྱི་རང་བཞིན་རྗེས་སུ་རྟོགས་པ་ཤེས་པ་དང་། སྒྲུབ་པ་དང་ངེས་པར་སྒྲུབ་པ་ལ་མཁས་པའི་ཤེས་པ་དང་སྒྲ་སྐད་ཐམས་ཅད་ཤེས་པ་དང་ངེས་པའི་ཚིག་རྣམ་པར་གཞག་པ་ཤེས་པ་དང་དོན་
གཏན་ལ་དབབ་པར་ཤེས་པ་དང་གནོད་པ་རྣམ་པར་སྤོང་བ་དང་། སྐྱེས་བུ་དམ་པ་དང་འགྲོགས་པ་དང་སྐྱེས་བུ་ངན་པ་རྣམ་པར་སྤོང་བ་དང་བསམ་གཏན་རྣམས་སྒྲུབ་ཅིང་དེ་ལ་རོ་མྱོང་བར་མི་བྱེད་པ་དང་མངོན་པར་ཤེས་པས་རྣམ་པར་འཕྲུལ་པ་དང་། མིང་དང་བརྡ་དང་གདགས་པའི་ངོ་བོ་ཉིད་
ལ་འཇུག་པ་ཤེས་པ་དང་། བཏགས་པ་ཡང་དག་པར་འཇོམས་པ་དང་འདུ་བྱེད་རྣམས་ལ་སྐྱོ་བ་དང་བཀུར་སྟི་མི་འདོད་པ་དང་བཀུར་སྟི་མེད་པ་ལ་བཏང་སྙོམས་སུ་བྱེད་པ་དང་རྙེད་པ་ལ་དོན་དུ་མི་གཉེར་བ་དང་རྙེད་པ་མེད་པ་ལ་ཞུམ་པ་མེད་པ་དང་སྙན་པ་མི་འདོད་པ་དང་མི་སྙན་པ་ལ་ཁོང་ཁྲོ་བ་མེད་

པ་དང་བསྟོད་པ་ལ་དགའ་བ་མེད་པ་དང་སྨད་པ་ལ་མི་དགའ་བ་མེད་པ་དང་བདེ་བ་ལ་མངོན་པར་མ་ཆགས་པ་དང་སྡུག་བསྔལ་ལ་ཡིད་འབྱུང་བར་མི་བྱེད་པ་དང་འདུ་བྱེད་རྣམས་ལེན་པར་མི་བྱེད་པ་དང་བསྔགས་པ་ཡང་དག་པ་ལ་མ་ཆགས་པ་དང་བསྔགས་པ་ཡང་དག་པ་མ་ཡིན་པ་ལ་མི་མཇེད་པ་
དང་། ཁྱིམ་པ་དང་རབ་ཏུ་བྱུང་བ་དག་དང་མི་སྟེན་པ་དང་། སྤྱོད་ཡུལ་མ་ཡིན་པ་རྣམ་པར་སྤོང་བ་དང་སྤྱོད་ཡུལ་དུ་རྒྱུ་བ་དང་སྤྱོད་པ་ཕུན་སུམ་ཚོགས་པ་དང་སྤྱོད་པ་མ་ཡིན་པ་རྣམ་པར་སྤོང་བ་དང་། རིགས་སུན་པར་མི་བྱེད་པ་དང་བསྟན་པ་སྲུང་བ་དང་སྨྲ་བ་ཉུང་ཞིང་མཉེན་པ་དང་དལ་གྱིས་སྨྲ་བ་དང་།
ཚིག་གི་ལན་བླ་ན་པ་ལ་མཁས་པ་དང་ཕྱིར་རྒོལ་བ་ཚར་གཅོད་པ་དང་དུས་སུ་འགྲོ་བར་བྱེད་པ་དང་སོ་སོའི་སྐྱེ་བོ་ལ་ཡིད་མི་རྟོན་པ་དང་སྡུག་བསྔལ་བ་རྣམས་ཁྱད་དུ་གསོད་པར་མི་བྱེད་ཅིང་དེ་དག་ལ་ནོར་སྦྱིན་པ་དང་། དབུལ་པོ་རྣམས་ལ་བརྙས་པར་མི་བྱེད་པ་དང་ཚུལ་ཁྲིམས་འཆལ་པ་ལ་སྙིང་རྗེ་བ་དང་
ཕན་པའི་དངོས་པོ་དང་སྙིང་བརྩེ་བའི་བློ་དང་ཆོས་ཀྱིས་ཕན་འདོགས་པ་དང་ཟང་ཟིང་ཡོངས་སུ་གཏོང་བ་དང་། མི་སྩོགས་པར་གནས་པ་དང་ཚུལ་ཁྲིམས་ལ་སྟོད་ཅིང་འཆལ་པའི་ཚུལ་ཁྲིམས་ལ་སྨོད་པ་དང་ཚུལ་ཁྲིམས་དང་ལྡན་པ་ལ་གཡོ་མེད་པར་སྟེན་པ་དང་། བདོག་པ་ཐམས་ཅད་ཡོངས་སུ་
གཏོང་བ་དང་ལྷག་པའི་བསམ་པས་གཉེར་བ་དང་། ཇི་སྐད་སྨྲས་པ་བཞིན་བྱེད་པ་དང་རྒྱུན་མི་ཆད་པར་སྦྱོར་བ་དང་གུས་པར་བྱས་ཏེ་དགའ་བ་མྱོང་བར་བྱེད་པ་དང་། དཔེ་ཤེས་པ་དང་སྔོན་བྱུང་བ་ལ་མཁས་པ་དང་དགེ་བའི་རྩ་བ་སྔོན་དུ་འགྲོ་བ་དང་ཐབས་ལ་མཁས་པ་དང་མཚན་མ་སྤོང་བ་དང་འདུ་
ཤེས་ཟློག་པ་དང་དངོས་པོ་རྣམས་ཡོངས་སུ་ཤེས་པ་དང་། མདོ་སྡེ་མངོན་པར་སྒྲུབ་པ་དང་འདུལ་བ་ལ་མཁས་པ་དང་བདེན་པ་གཏན་ལ་འབེབས་པ་དང་རྣམ་པར་གྲོལ་བ་མངོན་སུམ་དུ་བྱ་བ་ལ་འཇུག་པ་དང་། ཚིག་མགོ་གཅིག་ཏུ་སྨྲ་བ་དང་ཇི་ལྟ་བ་བཞིན་དུ་ཤེས་ཤིང་མཐོང་བ་མི་གཏོང་བ་དང་།
ནེམ་ནུར་མེད་པའི་ཚིག་དང་སྟོང་པ་ཉིད་ལ་སྟེན་པ་དང་མཚན་མ་མེད་པ་ལ་སྟེན་པ་དང་སྨོན་པ་མེད་པའི་ངོ་བོ་ཉིད་རྟོགས་པར་བྱེད་པ་དང་མི་འཇིགས་པ་ཐོབ་པ་དང་ཡེ་ཤེས་ཀྱིས་སྣང་བར་བྱེད་པ་དང་ཚུལ་ཁྲིམས་དམ་པ་དང་། སྙོམས་པར་འཇུག་པ་ལ་གཞོལ་བ་དང་། གཅིག་པུར་དགའ་བ་དང་།

བདག་ཤེས་པ་དང་ཤེས་ཀྱི་ཁེ་ཉུང་ངུས་ཆོག་ཤེས་པ་དང་སེམས་ལ་རྙོག་པ་མེད་པ་དང་ལྟ་བར་གྱུར་པ་རྣམ་པར་སྤོང་བ་དང་། གཟུངས་ཐོབ་པ་དང་ཡེ་ཤེས་ལ་འཇུག་པ་དང་གནས་དང་གནས་མ་ཡིན་པ་དང་། འཇུག་པ་དང་སྒྲུབ་པ་ཤེས་པ་དང་གཏན་ཚིགས་དང་། རིགས་
པ་དང་ཚུལ་དང་སྒོ་དང་རྒྱུ་དང་ལམ་དང་ནན་ཏན་དང་སྒྲུབ་པ་དང་ཕྲིན་དང་གདམས་པ་དང་བསྟེན་པ་ལ་སྤྱོད་པ་དང་། རྗེས་སུ་འཐུན་པའི་བཟོད་པ་དང་བཟོད་པའི་ས་དང་མི་བཟོད་པ་དང་བྲལ་བ་དང་ཡེ་ཤེས་ཀྱི་ས་དང་མི་ཤེས་པ་སྤོང་བ་དང་ཤེས་པ་ལ་གནས་པ་དང་རྣལ་འབྱོར་སྤྱོད་པའི་ས་དང་
བྱང་ཆུབ་སེམས་དཔའི་སྤྱོད་ཡུལ་དང་། སྐྱེས་བུ་དམ་པ་ལ་བསྟེན་པ་དང་སྐྱེས་བུ་དམ་པ་མ་ཡིན་པ་སྤོང་བ་དང་། ཆོས་ཐམས་ཅད་ཀྱི་ངོ་བོ་ཉིད་རྟོགས་ཤིང་ཁོང་དུ་ཆུད་པར་ཤེས་པ་དང་། དེ་བཞིན་གཤེགས་པས་གསུངས་པའི་སངས་རྒྱས་ཀྱི་ས་དང་མཁས་པ་རྣམས་ཀྱིས་རྗེས་སུ་ཡི་
རང་བ་དང་བྱིས་པ་རྣམས་ཀྱིས་སྤངས་པ་དང་ཉན་ཐོས་རྣམས་ཀྱིས་ཤེས་པར་དཀའ་བ་དང་རང་སངས་རྒྱས་རྣམས་ཀྱིས་མི་ཤེས་པ་དང་མུ་སྟེགས་ཅན་གྱི་ས་མ་ཡིན་པ་དང་བྱང་ཆུབ་སེམས་དཔའ་རྣམས་ཀྱིས་ཡོངས་སུ་གཟུང་བ་དང་སྟོབས་བཅུ་དག་གིས་རྗེས་སུ་རྟོགས་པ་དང་། ལྷ་རྣམས་ཀྱིས་མཆོད་
པར་བྱ་བ་དང་ཚངས་པས་ཕྱག་བྱ་བ་དང་བརྒྱ་བྱིན་རྣམས་ཀྱིས་སྔོན་དུ་འགྲོ་བར་བྱ་བ་དང་། ཀླུ་རྣམས་ཀྱིས་ཕྱག་བྱ་བ་དང་། གནོད་སྦྱིན་རྣམས་ཀྱིས་རྗེས་སུ་ཡི་རང་བར་བྱ་བ་དང་། མིའམ་ཅི་རྣམས་ཀྱིས་བསྟོད་པར་བྱ་བ་དང་། ལྟོ་འཕྱེ་ཆེན་པོ་རྣམས་ཀྱིས་བསྔགས་པར་བྱ་བ་དང་།
བྱང་ཆུབ་སེམས་དཔའ་རྣམས་ཀྱིས་བསྒོམ་པར་བྱ་བ་དང་། མཁས་པ་རྣམས་ཀྱིས་ཀུན་ཆུབ་པར་བྱ་བ་དང་། བླ་ན་མེད་པའི་ནོར་དུ་གྱུར་པ་དང་། ཟང་ཟིང་མེད་པའི་སྦྱིན་པ་དང་། ནད་པ་རྣམས་ཀྱི་སྨན་དུ་གྱུར་པ་དང་། ཡེ་ཤེས་ཀྱི་མཛོད་དུ་གྱུར་པ་དང་། སྤོབས་པ་མི་ཟད་པ་དང་།
མདོ་སྡེ་རྣམས་ཀྱི་ཚུལ་དུ་གྱུར་པ་དང་། དཔའ་བོ་དག་གི་གཡུལ་དུ་གྱུར་པ་དང་། ཁམས་གསུམ་ཡོངས་སུ་ཤེས་པ་དང་། ཕ་རོལ་ཏུ་འགྲོ་བ་དག་ལ་གཟིངས་ལྟ་བུ་དང་། ཆུ་བོའི་ནང་དུ་ཞུགས་པ་དག་ལ་གྲུ་ལྟ་བུ་དང་། གྲགས་པ་འདོད་པ་དག་གི་གྲགས་པ་དང་། སངས་རྒྱས་རྣམས་

ཀྱིས་བསྟོད་པ་དང་། དེ་བཞིན་གཤེགས་པ་རྣམས་ཀྱིས་བསྔགས་པ་དང་། སྟོབས་བཅུ་རྣམས་ཀྱིས་བསྟོད་པ་དང་། བྱང་ཆུབ་སེམས་དཔའ་དག་གི་ཡོན་ཏན་དང་། སྙིང་རྗེ་ཅན་དག་གི་བཏང་སྙོམས་དང་། ཉེས་པ་ཞི་བར་འདོད་པ་དག་གི་བྱམས་པ་དང་། ཐེག་པ་ཆེན་པོ་དག་གི་
དབུགས་འབྱིན་པ་དང་། སེང་གེའི་སྒྲ་སྒྲོགས་པ་རྣམས་ཀྱི་ནན་ཏན་དང་། སངས་རྒྱས་ཀྱི་ཡེ་ཤེས་ཀྱི་ལམ་དང་། ཆོས་ཐམས་ཅད་ཀྱི་ཕྱག་རྒྱ་དང་། ཐམས་ཅད་མཁྱེན་པའི་ཡེ་ཤེས་ཡོངས་སུ་གྲུབ་པ་དང་། བྱང་ཆུབ་སེམས་དཔའ་རྣམས་ཀྱི་སྐྱེད་མོས་ཚལ་དུ་གྱུར་པ་དང་། བདུད་ཀྱི་སྡེ་རྣམས་སྐྲག་
པར་བྱེད་པ་དང་། བདེ་བར་འགྲོ་བ་རྣམས་ཀྱི་རིག་པ་དང་། དོན་སྒྲུབ་པ་རྣམས་ཀྱི་དོན་དང་། དགྲའི་ནང་དུ་སོང་བ་དག་གི་སྐྱབས་དང་། ཕྱིར་རྒོལ་བ་རྣམས་ཆོས་དང་འཐུན་པས་ཚར་གཅོད་པ་དང་། མི་འཇིགས་པ་རྣམས་ཀྱི་བདེན་པའི་རྣམ་པ་དང་། སྟོབས་རྣམས་ཡང་དག་པར་ཚོལ་
བ་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་སྔ་ལྟས་སུ་གྱུར་པ་དང་། ཆོས་ཀྱི་སྐུའི་རྒྱན་དང་སྤྱོད་པ་རྣམས་ཀྱི་རྒྱུ་འཐུན་པ་དང་། སངས་རྒྱས་ཀྱི་སྲས་རྣམས་ཀྱི་རྒྱན་དང་། ཐར་པ་འདོད་པ་རྣམས་ཀྱི་དགའ་བ་དང་། སྲས་ཐུ་བོ་རྣམས་ཀྱི་དགའ་བ་དང་། སངས་རྒྱས་ཀྱི་ཡེ་ཤེས་
ཡོངས་སུ་རྫོགས་པ་དང་། ཉན་ཐོས་དང་རང་སངས་རྒྱས་ཐམས་ཅད་ཀྱི་ས་མ་ཡིན་པ་དང་། སེམས་རྣམ་པར་དག་པ་དང་། ལུས་ཡོངས་སུ་དག་པ་དང་། རྣམ་པར་ཐར་པའི་སྒོ་རྣམས་ཡོངས་སུ་རྫོགས་པ་དང་། སངས་རྒྱས་ཀྱི་ཡེ་ཤེས་ཀུན་ནས་ཉོན་མོངས་པ་མེད་པ་དང་། འདོད་
ཆགས་འབྱུང་བ་མེད་པ་དང་། ཞེ་སྡང་དང་བྲལ་བ་དང་། གཏི་མུག་གི་ས་མ་ཡིན་པ་དང་། ཡེ་ཤེས་འབྱུང་བ་དང་། རིག་པ་སྐྱེ་བ་དང་། མ་རིག་པ་སྤོང་བ་དང་། རྣམ་པར་གྲོལ་བ་སྙིང་པོར་བྱེད་པ་རྣམས་ཀྱི་ཚིམ་པ་དང་། ཏིང་ངེ་འཛིན་སྙིང་པོར་བྱེད་པ་རྣམས་ཀྱི་དགའ་བ་དང་།
ལྟ་འདོད་པ་རྣམས་ཀྱི་མིག་ཏུ་གྱུར་པ་དང་། རྣམ་པར་འཕྲུལ་པར་འདོད་པ་རྣམས་ཀྱི་མངོན་པར་ཤེས་པ་དང་། མངོན་པར་སྒྲུབ་པར་འདོད་པ་རྣམས་ཀྱི་རྫུ་འཕྲུལ་དང་ཐོས་པ་དོན་དུ་གཉེར་བ་རྣམས་ཀྱི་གཟུངས་དང་། དྲན་པ་མི་བརྗེད་པ་དང་སངས་རྒྱས་རྣམས་ཀྱི་བྱིན་གྱིས་བརླབས་

དང་། འདྲེན་པ་རྣམས་ཀྱི་ཐབས་མཁས་པ་དང་། མི་བརྩོན་པ་རྣམས་ཀྱི་ཕྲ་བ་དང་། ཤེས་པར་དཀའ་བ་དང་མ་གྲོལ་བ་དག་གིས་མི་ཤེས་པ་དང་། ཡི་གེ་རྣམས་ལྡོག་པ་དང་། སྒྲ་ཤེས་པར་དཀའ་བ་དང་། རྟོགས་པ་རྣམས་ཀྱིས་ཀུན་ཤེས་པ་དང་། དེས་པ་རྣམས་ཀྱིས་
ཤེས་པ་དང་། འདོད་པ་ཆུང་བ་རྣམས་ཀྱིས་རབ་ཏུ་རྟོགས་པ་དང་། བརྩོན་འགྲུས་བརྩམས་པ་རྣམས་ཀྱིས་གཟུང་བ་དང་། དྲན་པ་དང་ལྡན་པ་རྣམས་ཀྱིས་བཅངས་པ་དང་། སྡུག་བསྔལ་ཟད་པ་དང་ཆོས་ཐམས་ཅད་སྐྱེ་བ་མེད་པ་དང་སྲིད་པའི་འགྲོ་བ་དང་སྐྱེ་བའི་གནས་ཐམས་ཅད་གཅིག་
ཏུ་ངེས་པར་བསྟན་པ་སྟེ། གཞོན་ནུ་འདི་ནི་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ཅེས་བྱའོ། །ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པ་ཞེས་བྱ་བའི་ཏིང་ངེ་འཛིན་བསྟན་པ་འདི་བཅོམ་ལྡན་འདས་ཀྱིས་བཤད་པ་ན་ལྷ་དང་མིའི་སྐྱེ་དགུ་
སྔོན་ཡོངས་སུ་སྦྱང་བ་བྱས་པ་ཁྲག་ཁྲིག་ཕྲག་བརྒྱད་ཅུས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཁྲག་ཁྲིག་ཕྲག་དགུ་བཅུ་རྩ་དྲུག་གིས་རྗེས་སུ་འཐུན་པའི་བཟོད་པ་ཐོབ་པར་གྱུར་ཏོ། །ཁྲག་ཁྲིག་ཕྲག་དགུ་བཅུ་རྩ་གསུམ་གྱིས་སྒྲའི་རྗེས་སུ་འབྲང་བའི་བཟོད་པ་ཐོབ་པར་གྱུར་ཏོ། །དགེ་
སློང་སྟོང་དུ་ཚང་བ་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །ལྷ་དང་མིའི་སྐྱེ་དགུ་ལས་སྲོག་ཆགས་སྟོང་ཕྲག་དྲུག་ཅུས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །དགེ་སློང་མ་བརྒྱད་ཁྲི་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །དགེ་
བསྙེན་ལྔ་བརྒྱས་ཕྱིར་མི་འོང་བའི་འབྲས་བུ་ཐོབ་པར་གྱུར་ཏོ། །དགེ་བསྙེན་མ་དྲུག་སྟོང་གིས་ལན་ཅིག་ཕྱིར་འོང་བའི་འབྲས་བུ་ཐོབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས། རབ་ཏུ་གཡོས་ཀུན་ཏུ་རབ་ཏུ་གཡོས། འགུལ་རབ་ཏུ་
འགུལ་ཀུན་ཏུ་རབ་ཏུ་འགུལ། ལྡེག་རབ་ཏུ་ལྡེག་ཀུན་ཏུ་རབ་ཏུ་ལྡེག །འཁྲུགས་རབ་ཏུ་འཁྲུགས་ཀུན་ཏུ་རབ་ཏུ་འཁྲུགས། ཆེམ་ཆེམ་རབ་ཏུ་ཆེམ་ཆེམ་ཀུན་ཏུ་རབ་ཏུ་ཆེམ་ཆེམ། འུར་འུར་རབ་ཏུ་འུར་འུར་ཀུན་ཏུ་རབ་ཏུ་འུར་འུར་ཏེ། ཤར་ཕྱོགས་དམའ་ན་ནུབ་ཕྱོགས་མཐོ།

ནུབ་ཕྱོགས་དམའ་ན་ཤར་ཕྱོགས་མཐོ། །བྱང་ཕྱོགས་དམའ་ན་ལྷོ་ཕྱོགས་མཐོ། །ལྷོ་ཕྱོགས་དམའ་ན་བྱང་ཕྱོགས་མཐོ། །མཐའ་དམའ་ན་དབུས་མཐོ། །དབུས་དམའ་ན་མཐའ་མཐོ་སྟེ། ཚད་མེད་པའི་སྣང་བ་འཇིག་རྟེན་དུ་བྱུང་ནས་འཇིག་རྟེན་གྱི་བར་མུན་ནག་སྨག་ཏུ་གྱུར་
པ་གང་ཡིན་པ་དེ་དག་ཀྱང་སྣང་བ་དེས་གསལ་བར་གྱུར་ཏོ། །སེམས་ཅན་གང་དག་དེར་སྐྱེས་པ་དེ་དག་གཅིག་གིས་གཅིག་ཤེས་པར་གྱུར་ཏེ། འདི་སྐད་དུ་ཀྱེ་སེམས་ཅན་གཞན་དག་ཀྱང་འདིར་སྐྱེས་པར་གྱུར་ཏོ་ཞེས་འཛེར་ཏེ། མནར་མེད་པའི་སེམས་ཅན་དམྱལ་བ་ཆེན་པོའི་བར་དུ་
ཡང་དེ་བཞིན་ནོ། །གླེང་གཞིའི་ལེའུ་སྟེ་དང་པོའོ།། །།དེའི་ཚེ་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་ངས་དྲན་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་འཁོར་ལོས་སྒྱུར་བའི་རྒྱལ་པོར་གྱུར་ཏེ། །ཏིང་ངེ་འཛིན་འདི་འདོད་
ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་བྱ་རྒོད་ཀྱི་ཕུང་པོའི་རི་འདི་ཉིད་ལ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྲངས་མེད་དཔག་ཏུ་མེད་པ་རྣམས་ལ་ངས་
རིན་པོ་ཆེ་ཐམས་ཅད་དང་མེ་ཏོག་དང་སྤོས་དང་དྲི་དང་ཕྲེང་བ་དང་བྱུག་པ་དང་ཕྱེ་མ་དང་གདུགས་དང་རྒྱལ་མཚན་དང་བ་དན་དང་སིལ་སྙན་དང་ཕེག་རྡོབ་པ་དང་རྣམ་པར་རྒྱལ་བའི་བ་དན་དང་རིན་པོ་ཆེའི་གཙུག་ལག་ཁང་རྣམ་པ་སྣ་ཚོགས་རྣམ་པར་བཀྲ་བ་བྱེ་བ་ཁྲག་ཁྲིག་ཕྲག་བརྒྱ་སྟོང་དུ་མའི་བཀོད་
པ་ཐམས་ཅད་ཀྱིས་བཀུར་སྟིར་བྱས་བླ་མར་བྱས་རི་མོར་བྱས་མཆོད་པར་བྱས་རྗེད་པར་བྱས་གསོལ་བར་བྱས་ཏེ། གཞོན་ནུ་ངས་དེ་བཞིན་གཤེགས་པ་དེ་དག་ཐམས་ཅད་ལས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་རྒྱས་པར་ཐོས་ཏེ། བཟུང་ངོ་། །
དྲིས་སོ། །བཅངས་སོ། །བཀླགས་སོ། །རབ་ཏུ་བཏོན་ཏོ། །ཉོན་མོངས་པ་མེད་པའི་སྒོམ་པས་བསྒོམས་སོ། །མང་དུ་བྱས་ཤིང་གཞན་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་ཏོ། །གཞོན་ནུ་དེ་བཞིན་གཤེགས་པ་དེ་དག་ཐམས་ཅད་ཀྱི་ཐ་མ་ནི་དེ་བཞིན་གཤེགས་པ་དགྲ་

བཅོམ་པ་ཡང་དག་པར་རྫོགས་པའི་སངས་རྒྱས་སཱ་ལའི་དབང་པོའི་རྒྱལ་པོ་ཞེས་བྱ་བ་ཞིག་བྱུང་སྟེ། གཞོན་ནུ་དེ་བཞིན་གཤེགས་པ་སཱ་ལའི་དབང་པོའི་རྒྱལ་པོ་དེའི་ཉན་ཐོས་དང་བྱང་ཆུབ་སེམས་དཔའ་ཁྲག་ཁྲིག་བརྒྱ་སྟོང་གི་དགེ་འདུན་བྱུང་སྟེ། དེ་དག་གི་ཚེའི་
ཚད་ནི་ལོ་འབུམ་ཕྲག་བདུན་ཅུ་རྩ་དྲུག་ཏུ་གྱུར་ཏོ། །གཞོན་ནུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སཱ་ལའི་དབང་པོའི་རྒྱལ་པོ་དེ་ལ་ངས་ལོ་བྱེ་བ་སྟོང་ཕྲག་བཅྭ་བརྒྱད་དུ་མཆོད་པ་དང་རིམ་གྲོ་བྱས་ཏེ་ལྷའི་ཙན་དན་དང་རིན་པོ་ཆེའི་གཙུག་ལག་ཁང་བྱེ་བ་བྱས་
སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སཱ་ལའི་དབང་པོའི་རྒྱལ་པོ་དེའི་ཚེའི་ཚད་ནི་ལོ་བྱེ་བ་སྟོང་ཕྲག་བདུན་ཅུ་རྩ་དྲུག་ཏུ་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
སཱ་ལའི་དབང་པོའི་རྒྱལ་པོ་དེའི་དྲུང་དུ་ང་རབ་ཏུ་བྱུང་ནས་ལོ་བྱེ་བ་སྟོང་ཕྲག་བཅུ་བཞིར་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་མཉན་ཅིང་བཟུང་སྟེ་དྲིས་སོ། །བཅངས་སོ། །བཀླགས་སོ། །རབ་ཏུ་བཏོན་ཏོ། །ཉོན་མོངས་པ་མེད་པའི་སྒོམ་པས་བསྒོམས་
སོ། །མང་དུ་བྱས་ཤིང་གཞན་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་ཏོ། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ཏིང་ངེ་འཛིན་འདི་འདོད་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་འཚང་རྒྱ་བར་འདོད་ན་ཁྱོད་ཀྱིས་ཀྱང་ང་བཞིན་དུ་དེ་བཞིན་གཤེགས་པ་ཐམས་ཅད་ལ་མཆོད་པ་དང་རིམ་གྲོ་དང་གཡོག་བྱ་བ་ལ་བརྩོན་པར་བྱའོ། །གཞོན་ནུ་དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་དག་གིས་དེ་བཞིན་གཤེགས་པ་ཐམས་ཅད་ལ་མཆོད་པ་དང་
རིམ་གྲོ་དང་གཡོག་བྱས་པའི་རྒྱུ་འཐུན་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་རྙེད་པར་དཀའ་བ་མ་ཡིན་ན་ཏིང་ངེ་འཛིན་འདི་ལྟ་ཅི་སྨོས། གཞོན་ནུ་དེ་ལྟ་བས་ན་ཁྱོད་ཀྱིས་དེ་བཞིན་གཤེགས་པ་ཐམས་ཅད་ལ་མཆོད་པ་དང་རིམ་གྲོ་དང་གཡོག་བྱས་པ་ལ་རྟག་ཏུ་ཡིད་ཡོངས་སུ་མི་

སྐྱོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཟླ་འོད་གཞོན་ནུར་གྱུར་པ་ལ་སྔོན་བྱུང་བའི་ལེའུ་འདི་ཉིད་རྒྱས་པར་ཚིགས་སུ་བཅད་པའི་དབྱངས་ཀྱིས་རྒྱ་ཆེར་ཡང་དག་པར་རབ་ཏུ་བསྟན་ཏོ། །དྲན་པ་སྟོབས་བཅུ་བྱེ་བ་དྲུག་ཅུ་དག །སྔོན་ཚེ་བྱ་རྒོད་ཕུང་པོའི་རི་ལ་བཞུགས། །ང་སྔོན་བྱང་
ཆུབ་སྤྱད་པ་སྤྱོད་པའི་ཚེ། །ཏིང་འཛིན་ཞི་བའི་མཆོག་འདི་བཤད་བྱས་ཏེ། །དེ་དག་གི་ཡང་ཐ་མ་ནི། །འཇིག་རྟེན་མགོན་པོ་འོད་བྱེད་པ། །སཱ་ལའི་དབང་རྒྱལ་ཞེས་བྱ་སྟེ། དེ་ལ་ང་ཡིས་ཡོངས་སུ་དྲིས། །ང་ཡང་རྒྱལ་རིགས་ཉིད་གྱུར་ཏེ། །རྒྱལ་པོ་ས་བདག་གཙོ་བོ་ཡིན། །ང་ཡི་བུ་ཡང་ལྔ་བརྒྱ་
སྟེ། དེ་དག་ལས་ནི་མི་ཉུང་བྱུང་། །སངས་རྒྱས་དེ་ཡི་གཙུག་ལག་ཁང་། །ཙན་དན་ཁྱད་པར་ཅན་རྣམས་དང་། །ཁ་ཅིག་རིན་ཆེན་བརྩེགས་པ་ཡི། །བྱེ་བ་སྙེད་ནི་ངས་བྱས་ཏེ། །སྐྱེ་བོ་མང་པོ་དགའ་ཞིང་ཡིད་འོང་བ། །འཇིགས་པའི་བླ་མ་ཞེས་བྱ་རྒྱལ་པོར་གྱུར། །སངས་རྒྱས་ལ་ནི་
མཆོད་པ་དམ་པ་དག །ལོ་སྟོང་བྱེ་བ་བཅྭ་བརྒྱད་བར་དུ་བྱས། །རྣམ་པར་འདྲེན་པ་སཱ་ལའི་དབང་པོ་རྒྱལ། །རྐང་གཉིས་གཙོ་བོ་རྒྱལ་བ་མ་སྨད་པ། །དེ་ཡི་དུས་ན་དེ་ཡི་ཚེ་ཚད་ནི། །ལོ་བྱེ་སྟོང་ཕྲག་བདུན་ཅུ་དྲུག་ཏུ་གྱུར། །ཉན་ཐོས་མཚུངས་པ་ཁྲག་ཁྲིག་བརྒྱད་ཅུ་སྟེ། །གསུམ་རིག་
མངོན་ཤེས་དྲུག་ལྡན་དབང་པོ་ཐུལ། །ཟག་པ་ཟད་ཅིང་ཐ་མའི་ལུས་འཛིན་པ། །དེ་ཚེ་མི་མཆོག་གི་ནི་དགེ་འདུན་བྱུང་། །ལྷར་བཅས་འཇིག་རྟེན་དག་ལ་ཕན་པའི་ཕྱིར། །དེ་ཚེ་ཏིང་འཛིན་འདི་ནི་བདག་འདོད་པས། །རྒྱལ་བ་རྐང་གཉིས་གཙོ་བོ་དེ་དག་ལ། །མཆོད་པ་རྣམ་པ་མང་པོ་ངས་བྱས་
ཏེ། རྒྱལ་བ་སཱ་ལའི་དབང་རྒྱལ་དྲུང་དུ་ཡང་། །ང་ནི་བཙུན་མོ་སྲས་བཅས་རབ་ཏུ་བྱུང་། །ལོ་ཡང་བྱེ་བ་སྟོང་ཕྲག་བཅུ་བཞིར་ནི། །ཏིང་ངེ་འཛིན་འདི་ངས་ཀྱང་ཡོངས་དྲིས་ཏེ། །ཚིགས་བཅད་ཁྲག་ཁྲིག་སྟོང་ཕྲག་བརྒྱད་ཅུ་དང་། །གཞན་ཡང་དཀྲིགས་ཕྲག་བྱེ་བ་བརྒྱ་རྣམས་ནི། །ཏིང་འཛིན་
འདི་ཉིད་ཀྱི་ནི་ལེའུ་གཅིག་པོ། །ངས་ནི་བདེ་བར་གཤེགས་པ་དེ་ལས་བླངས། །ཏིང་འཛིན་དམ་པ་འདི་ནི་འདོད་པའི་ཕྱིར། །མགོ་དང་རྐང་ལག་ཆུང་མ་དེ་བཞིན་བུ། །རིན་ཆེན་མང་པོ་དེ་བཞིན་བཟའ་བཅའ་རྣམས། །སྔོན་ཆད་ངས་ནི་མ་བཏང་ཆུང་ཟད་མེད། །སངས་རྒྱས་དག་ནི་བྱེ་བ་ཕྲག་

སྟོང་དང་། །དེ་ལས་ལྷག་པར་གང་གཱའི་བྱེ་མ་སྙེད། །གང་དག་བྱ་རྒོད་ཕུང་པོ་འདིར་བཞུགས་ནས། །ཏིང་འཛིན་ཞི་མཆོག་འདི་སྟོན་ངས་དྲན་ཏེ། །དེ་ཀུན་མཚན་ཀྱང་ཤཱཀྱ་ཁྱུ་མཆོག་ཡིན། །ཀུན་གྱི་སྲས་ཀྱང་དགྲ་གཅན་ཟིན་ཅེས་བྱ། །ཞབས་འབྲིང་བ་ཡི་མིང་ཡང་
ཀུན་དགའ་བོ། །སེར་སྐྱའི་གྲོང་ནས་ཐམས་ཅད་རབ་ཏུ་བྱུང་། །འཕྲུལ་མཆོག་ཤཱ་རིའི་བུ་དང་པང་ནས་སྐྱེས། །སྐྱོབ་པ་ཀུན་ཀྱང་མཚན་ནི་འཐུན་པར་གྱུར། །དེ་ཚེ་འཇིག་རྟེན་ཁམས་ཀྱང་མིང་འདྲ་སྟེ། །ཐམས་ཅད་ཀྱང་ནི་སྙིགས་མའི་དུས་སུ་བྱུང་། །བྱང་ཆུབ་སྤྱད་པ་འདི་ནི་སྤྱོད་
པའི་ཚེ། །མི་དབང་དེ་ཀུན་ང་ཡིས་བཀུར་སྟིར་བྱས། །ཏིང་འཛིན་འདི་ནི་ཡོངས་སུ་ཚོལ་བའི་ཚེ། །རྒྱལ་ལ་མཆོད་པ་མ་བྱས་ཅི་ཡང་མེད། །ནན་ཏན་གྱིས་ནི་ཏིང་འཛིན་འདི་རྙེད་དེ། །ནན་ཏན་དག་ཀྱང་རྣམ་པ་མང་དུ་གསུངས། །ཡོན་ཏན་ཀུན་ལ་རབ་ཏུ་གནས་པ་དག །དེ་ལ་ཏིང་འཛིན་
འདི་ནི་རྙེད་མི་དཀའ། །བྲོ་བ་དག་ལ་མ་ཞེན་མི་བསྐམ་ཞིང་། །ཁྱིམ་རྣམས་ལ་ཡང་མ་ཆགས་ཕྲག་དོག་མེད། །བྱམས་ལ་གནས་ཤིང་ཁྲོ་བ་མེད་པ་གང་། །དེ་ལ་ཏིང་འཛིན་འདི་ནི་རྙེད་མི་དཀའ། །རྙེད་དང་བཀུར་སྟི་དག་ཀྱང་མི་འདོད་ཅིང་། །འཚོ་བ་གཙང་ཞིང་ཅི་ཡང་མི་འཆང་བ། །
ཚུལ་ཁྲིམས་རྣམ་པར་དག་ཅིང་འཇིགས་མེད་པ། །དེ་ལ་ཏིང་འཛིན་འདི་ནི་རྙེད་མི་དཀའ། །གཡེལ་བ་མེད་ཅིང་བརྩོན་འགྲུས་བརྩམས་པ་དང་། །དགོན་པར་གནས་ཤིང་སྦྱངས་ལ་གནས་གྱུར་དང་། །བདག་མེད་བཟོད་པ་ལ་ཡང་རབ་གནས་པ། །དེ་ལ་ཏིང་འཛིན་འདི་ནི་རྙེད་མི་དཀའ། །རྒོད་
པ་མེད་ཅིང་ཤིན་ཏུ་དུལ་བའི་སེམས། །སྤྱོད་དང་སྤྱོད་ལམ་དག་ལ་རབ་ཏུ་གནས། །གཏོང་ལ་མོས་ཤིང་སེར་སྣ་མེད་པ་དག །དེ་ལ་ཏིང་འཛིན་འདི་ནི་རྙེད་མི་དཀའ། །ཏིང་འཛིན་ཞི་བ་འདི་ནི་གང་འཛིན་པ། །དེ་ལ་དཔེ་བྱད་བཟང་དང་མཚན་རྣམས་དང་། །འདྲེན་པས་སངས་རྒྱས་ཆོས་ནི་
བཅྭ་བརྒྱད་དང་། །སྟོབས་དང་མི་འཇིགས་གང་བརྗོད་རྙེད་མི་དཀའ། །སངས་རྒྱས་སྤྱན་གྱིས་གཟིགས་པའི་སེམས་ཅན་གང་། །དེ་དག་དུས་གཅིག་སངས་རྒྱས་ཉིད་གྱུར་ལ། །དེ་རྣམས་རེ་རེའི་ཚེ་ཡི་ཚད་ཀྱང་ནི། །བསྐལ་པ་བྱེ་བ་སྟོང་ཕྲག་བསམ་མི་ཁྱབ། །དེ་དག་རེ་རེ་ལ་ཡང་མགོ་

བོ་ནི། །རྒྱ་མཚོ་ཀུན་གྱི་བྱེ་མ་དེ་སྙེད་ཡོད། །མགོ་བོ་ཇི་སྙེད་ཡོད་པ་ཐམས་ཅད་ལ། །དེ་སྙེད་ལྕེ་ཡང་མགོ་བོ་ཀུན་ལ་ཡོད། །དེ་དག་ཀུན་གྱིས་ཏིང་འཛིན་འདི་ལས་གང་། །ཚིགས་བཅད་འཛིན་འདིའི་ཕན་ཡོན་བརྗོད་ཀྱང་ནི། །ཅུང་ཟད་ཡོངས་སུ་བརྗོད་པར་མི་འགྱུར་ན། །གང་གིས་
བསླབས་ཤིང་གཟུང་བ་ཅི་ཞིག་སྨོས། །ཏིང་འཛིན་བལྟ་དཀའ་ཞི་བ་གང་འཛིན་པ། །སྦྱངས་པའི་ཡོན་ཏན་བླངས་ཤིང་སྤྱོད་པ་དག །དེ་ལ་ལྷ་དང་ལྷ་མིན་གནོད་སྦྱིན་སྨོན། །རྒྱལ་པོ་དག་ཀྱང་ཕྱི་བཞིན་འབྲང་བར་བྱེད། །ཏིང་འཛིན་ཞི་བ་རྙེད་དཀའ་གང་འཛིན་པ། །རྒྱལ་བ་དག་གིས་
ཡོངས་སུ་གཟུང་བར་འགྱུར། །ལྷ་དང་ཀླུ་རྣམས་རྟག་ཏུ་རྗེས་སུ་འབྲང་། །ཕས་ཀྱི་རྒོལ་བས་དེ་ཡི་གཟི་མི་བཟོད། །ཏིང་འཛིན་ཞི་བ་འདི་ནི་གང་འཛིན་པ། །དེ་ཡི་སྤོབས་པ་དག་ནི་མཐའ་ཡས་འགྱུར། །མདོ་སྡེ་དག་ནི་སྟོང་རྣམས་རབ་སྟོན་ཀྱང་། །དེ་ལ་ནམ་ཡང་རྒྱུན་ནི་འཆད་མི་
འགྱུར། །གང་རྣམས་མི་བཟད་ཆེན་པོའི་ཕྱི་དུས་ན། །ཏིང་ངེ་འཛིན་འདི་ཐོས་ནས་འཛིན་པ་རྣམས། །སངས་རྒྱས་འདྲེན་པ་སྣང་བ་དཔག་མེད་དང་། །བདེ་ལྡན་འཇིག་རྟེན་ཁམས་ཀྱང་མཐོང་བར་འགྱུར། །ཕན་ཡོན་འདི་དག་རབ་ཏུ་བསྟན་མཛད་ནས། །ཡོངས་སུ་མྱ་ངན་ང་འདས་ཕྱི་
མའི་ཚེ། །ཏིང་འཛིན་རྣམ་པར་དག་པ་འདི་ཟུང་ཞེས། །རང་བྱུང་སྟོན་པ་བདག་ཉིད་གསོལ་བ་འདེབས། །ཡོངས་སུ་མྱ་ངན་གང་འདས་སངས་རྒྱས་དང་། །གང་རྣམས་མ་བྱོན་ད་ལྟར་བྱུང་བ་ཡི། །རྒྱལ་བ་ཐམས་ཅད་ཏིང་འཛིན་འདི་བསླབས་ནས། །བྱང་ཆུབ་རྡུལ་བྲལ་འདུས་མ་བྱས་པ་རྟོགས། །
སཱ་ལའི་དབང་པོའི་རྒྱལ་པོའི་ལེའུ་སྟེ་གཉིས་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། །གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་རྣམས་ཀྱིས་སངས་རྒྱས་ཀྱི་ཡོན་ཏན་བརྗོད་པ་ཡང་དག་པར་བསྟན་པ་དང་། དོན་དང་འབྲུ་ཡོངས་སུ་མི་ཟད་པར་བྱ་བ་དང་བདག་གི་ཚིག་ཐམས་ཅད་སངས་རྒྱས་ཀྱིས་ཡོངས་སུ་གཟུང་ཞིང་འབྱུང་བར་འདོད་ན། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་

སེམས་ཅན་ཐམས་ཅད་ཀྱི་དོན་དུ་ཏིང་ངེ་འཛིན་འདི་གཟུང་བར་བྱ། །ཀུན་ཆུབ་པར་བྱ། བཅང་བར་བྱ། བཀླག་པར་བྱ། རབ་ཏུ་གདོན་པར་བྱ། ལུང་མནོད་པར་བྱ། ཁ་ཏོན་དུ་བྱ། ཉོན་མོངས་པ་མེད་པའི་སྒོམ་པས་བསྒོམ་པར་བྱ། མང་དུ་བྱ་གཞན་དག་ལ་ཡང་
རྒྱ་ཆེར་རབ་ཏུ་བསྟན་པར་བྱའོ། །གཞོན་ནུ་དེ་བཞིན་གཤེགས་པའི་སངས་རྒྱས་ཀྱི་ཡོན་ཏན་ཡང་དག་པ་གང་ཡིན་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགོན་པ་ན་འདུག་ཀྱང་རུང་། ཤིང་དྲུང་ན་འདུག་ཀྱང་རུང་། བླ་གབ་མེད་པ་ན་འདུག་ཀྱང་རུང་།
ཁྱིམ་སྟོང་པ་ན་འདུག་ཀྱང་རུང་འདི་ལ་ཡང་དག་པར་སློབ་སྟེ། འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་
བ། བླ་ནི་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སོ། །དེ་བཞིན་གཤེགས་པ་དེ་ནི་བསོད་ནམས་དག་གི་རྒྱུ་འཐུན་པ། དགེ་བའི་རྩ་བ་རྣམས་ཆུད་མི་ཟ་བ། བཟོད་པས་བརྒྱན་པ། བསོད་ནམས་ཀྱི་གཏེར་རྣམས་ཀྱི་གཞི། དཔེ་བྱད་བཟང་པོ་རྣམས་
ཀྱིས་སྤྲས་པ། མཚན་གྱི་མེ་ཏོག་རྒྱས་པ། སྤྱོད་ཡུལ་རན་པར་འཐུན་པ། མཐོང་ན་མི་འཐུན་པ་མེད་པ། དད་པས་མོས་པ་རྣམས་མངོན་པར་དགའ་བ། ཤེས་རབ་ཟིལ་གྱིས་མི་ནོན་པ། སྟོབས་རྣམས་ལ་རྫི་བ་མེད་པ། སེམས་ཅན་ཐམས་ཅད་ཀྱི་སྟོན་པ། བྱང་ཆུབ་སེམས་
དཔའ་རྣམས་ཀྱི་ཡབ། འཕགས་པའི་གང་ཟག་རྣམས་ཀྱི་རྒྱལ་པོ་ལས་དང་པོ་པ་རྣམས་ཀྱི་དེད་དཔོན། ཡེ་ཤེས་དཔག་ཏུ་མེད་པ། སྤོབས་པ་བསམ་གྱིས་མི་ཁྱབ་པ། གསུང་རྣམ་པར་དག་པ། དབྱངས་སྙན་པ། སྐུ་བྱད་བལྟ་བས་ཆོག་མི་ཤེས་པ། སྐུ་མཚུངས་པ་མེད་པ། འདོད་
པ་དག་གིས་མ་གོས་པ། གཟུགས་དག་གིས་ཉེ་བར་མ་གོས་པ། གཟུགས་མེད་པ་དག་དང་མ་འདྲེས་པ། ཕུང་པོ་དག་ལས་རབ་ཏུ་རྣམ་པར་གྲོལ་བ། ཁམས་རྣམས་དང་མི་ལྡན་པ། སྐྱེ་མཆེད་རྣམས་བསྡམས་པ། མདུད་པ་རྣམས་ཤིན་ཏུ་བཅད་པ། ཡོངས་སུ་གདུང་བ་

དག་ལས་རྣམ་པར་གྲོལ་བ། སྲིད་པ་ལས་ཡོངས་སུ་གྲོལ་བ། ཆུ་བོ་ལས་རྒལ་བ། ཡེ་ཤེས་ཡོངས་སུ་རྫོགས་པ། འདས་པ་དང་མ་བྱོན་པ་དང་ད་ལྟར་གྱི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ལ་གནས་པ། མྱ་ངན་ལས་འདས་པ་ལ་མི་གནས་པ། ཡང་དག་པ་ཉིད་
ཀྱི་མཐའ་ལ་གནས་པ། སེམས་ཅན་ཐམས་ཅད་ལ་གཟིགས་པའི་ས་ལ་བཞུགས་པ་སྟེ། གཞོན་ནུ་འདི་དག་ནི་དེ་བཞིན་གཤེགས་པའི་སངས་རྒྱས་ཀྱི་ཡོན་ཏན་ཡང་དག་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་སངས་རྒྱས་ཀྱི་ཡོན་ཏན་དང་། བསྔགས་པ་འདི་
དག་དང་ལྡན་ཞིང་ཏིང་ངེ་འཛིན་འདི་ལ་བརྟེན་ནས་སྤོབས་པ་རྒྱུན་མི་འཆད་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་སངས་རྒྱས་ཀྱི་ཡོན་ཏན་དང་བསྔགས་པ་ཡང་དག་པར་བསྟན་ན་དོན་དང་འབྲུ་ཡོངས་སུ་ཟད་པར་མི་འགྱུར་ཏེ། དེའི་ཚིག་
ཐམས་ཅད་ཀྱང་སངས་རྒྱས་ཀྱིས་ཡོངས་སུ་གཟུང་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་དོན་དེ་ཉིད་གསལ་བར་བྱ་བའི་ཕྱིར་ཟླ་འོད་གཞོན་ནུར་གྱུར་པ་ལ་རྒྱས་པར་ཚིགས་སུ་བཅད་པའི་དབྱངས་ཀྱིས་རྒྱ་ཆེར་ཡང་དག་པར་རབ་ཏུ་བཤད་དོ། །བསྐལ་པ་སྟོང་ཕྲག་མང་པོར་
རབ་བཤད་ཀྱང་། །རྒྱལ་བའི་བསྔགས་པ་ཐམས་ཅད་བརྗོད་མི་སླ། །ཏིང་འཛིན་ཞི་མཆོག་འདི་ནི་ཚོལ་བའི་ཕྱིར། །རྒྱལ་བས་དེ་ལྟའི་ཡོན་ཏན་ཡང་དག་བསྒྲུབས། །ངས་ནི་ཏིང་འཛིན་ཞི་མཆོག་འདི་ཚོལ་བས། །སྔོན་ཚེ་ཞུམ་པ་མེད་པའི་ཡིད་ཀྱིས་སུ། །བུ་མོ་གཟུགས་བཟང་
ཤིན་ཏུ་བལྟ་ན་སྡུག །ལེགས་པར་ལུས་བརྒྱན་ཡིད་དུ་འོང་བ་བྱིན། །ངས་ནི་ཏིང་འཛིན་ཞི་མཆོག་འདི་ཚོལ་བས། །སྔོན་ཚེ་ཞུམ་པ་མེད་པའི་ཡིད་ཀྱིས་སུ། །དེ་བཞིན་བྲན་ཕོ་བྲན་མོ་ནོར་དང་འབྲུ། །དེ་བཞིན་ནོར་བུ་མུ་ཏིག་གསེར་དངུལ་བྱིན། །ངས་ནི་ཏིང་འཛིན་ཞི་མཆོག་
འདི་ཚོལ་བས། །ནོར་བུ་རིན་ཆེན་སྣ་ཚོགས་མུ་ཏིག་ཕྲེང་། །གོས་དང་གདུ་བུ་གསེར་སྐུད་མཛེས་པ་དག །སྔོན་ཚེ་འདྲེན་པ་རྣམས་ལ་ངས་བཏང་བྱས། །བསྐལ་པ་བྱེ་བ་མཐའ་ཡས་དཔག་མེད་པར། །དྲི་མཆོག་དྲི་ལྡན་དབྱར་གྱི་མེ་ཏོག་དག །རབ་ཏུ་བླ་ན་མེད་པའི་སེམས་བསྐྱེད་

ནས། རྒྱལ་བའི་མཆོད་རྟེན་དག་ལ་ང་ཡིས་ཕུལ། །འཁོར་གྱི་ནང་དུ་རི་མོ་བསྐྱེད་ནས་ཀྱང་། །དེ་བཞིན་ཆོས་ཀྱི་སྦྱིན་པ་ངས་བྱིན་ཏེ། །ཆོས་ཀྱི་སྦྱིན་པ་བྱིན་པས་ང་གྲགས་སྙམ། །ང་ལ་ནམ་ཡང་དེ་འདྲའི་སེམས་མ་སྐྱེས། །སྡུག་པའི་མཆོག་བྱིན་བདག་ཉིད་སྤྱད་པར་
ནི། །དེ་སྙམ་ཆགས་པ་ང་ལ་ཡོང་མ་བྱུང་། །སྦྱིན་པའི་ཆོས་ནི་མང་དུ་ངས་བྱིན་ཏེ། །རྟག་ཏུ་སངས་རྒྱས་ཡེ་ཤེས་ངས་ཐོབ་སྙམ། །སྦྱངས་པའི་ཡོན་ཏན་དག་ཀྱང་ངས་སྔོན་བསྒྲུབས། །ནགས་མཆོག་སྒྲ་ཉུང་རྟག་ཏུ་གནས་བྱས་ཏེ། །ཐམས་ཅད་དུས་སུ་སྙིང་རྗེ་མང་བར་གྱུར། །རྟག་
ཏུ་སངས་རྒྱས་ཡེ་ཤེས་ངས་ཐོབ་སྙམ། །བྱམས་ཤིང་འཇམ་ལ་འགེད་པའི་ངང་ཚུལ་ཅན། །ཐོས་པ་འཛིན་ཅིང་བཞིན་འཛུམ་ཚིག་ཀྱང་འཇམ། །ཤིན་ཏུ་ཚིག་སྙན་མང་པོ་ཀུན་ཀྱང་དགའ། །ང་ལ་སྐྱེ་བོ་ཀུན་ལྟ་ངོམས་མི་འགྱུར། །སེར་སྣ་ཅན་དུ་སྐད་ཅིག་མ་གྱུར་ཏེ། །སྲིད་པ་མང་པོར་
ནམ་ཡང་སེར་སྣ་མེད། །རྟག་ཏུ་བསོད་སྙོམས་དག་ལ་ང་དགའ་སྟེ། །མགྲོན་དུ་བོས་པ་ཐམས་ཅད་མ་ལུས་སྤངས། །འདི་ལས་རྩ་བཞི་ཚིགས་བཅད་གཅིག་བཟུང་ན། །མང་དུ་ཐོས་ཤིང་ཐོས་པ་འཛིན་པར་འགྱུར། །དེས་ནི་ང་ལ་བླ་ན་མེད་པ་ཡི། །དད་པའི་མཆོག་བསྐྱེད་རྟག་ཏུ་བཀུར་
སྟི་བྱས། །ངས་ནི་ཏིང་འཛིན་ཞི་མཆོག་འདི་ཚོལ་ཕྱིར། །རྣམ་པར་འདྲེན་ལ་མཆོད་པ་མང་པོ་བྱས། །སྦྱིན་པ་རྣམ་པ་མང་པོ་མཐའ་ཡས་བྱིན། །དེ་བཞིན་ཚུལ་ཁྲིམས་དག་ཀྱང་ཡུན་རིང་བསྲུངས། །འཇིག་རྟེན་ཁམས་ཡངས་སྣ་ཚོགས་མཐའ་ཡས་པ། །ནོར་བུ་རིན་ཆེན་བཀང་སྟེ་སྦྱིན་བྱིན་
པས། །ཏིང་འཛིན་འདི་ལས་ཚིགས་བཅད་གཅིག་བཟུང་ན། །དེ་བས་བསོད་ནམས་འདི་ནི་རྒྱ་ཆེར་འཕགས། །བསྐལ་པ་མཐའ་ཡས་དཔག་མེད་མང་པོར་ཡང་། །མེ་ཏོག་མང་པོ་ཇི་སྙེད་ཡོད་པ་དང་། །དེ་བཞིན་སྤོས་རྣམས་ཡིད་འོང་རྒྱ་ཆེ་བ། །བསོད་ནམས་འདོད་ཕྱིར་རྒྱལ་བ་མཆོད་
པ་དང་། །བསྐལ་པ་མཐའ་ཡས་དཔག་མེད་མང་པོར་ནི། །སིལ་སྙན་མང་པོ་ཇི་སྙེད་ཡོད་པ་དང་། །དེ་བཞིན་སྣང་གསལ་ཞལ་ཟས་ན་བཟའ་ཡིས། །བསོད་ནམས་འདོད་ཕྱིར་རྒྱལ་བ་མཆོད་པ་བས། །རང་བྱུང་རྒྱལ་བ་ཆོས་རྗེར་བདག་གྱུར་ཅེས། །མི་གང་བྱང་ཆུབ་ཏུ་ནི་སེམས་བསྐྱེད་

ནས། །མཉམ་པར་གཞག་པས་ཚིགས་བཅད་གཅིག་བཟུང་ན། །དེ་བས་བསོད་ནམས་འདི་ནི་རྒྱ་ཆེར་འཕགས། །གང་གཱའི་བྱེ་མ་མང་པོ་ཇི་སྙེད་པ། །བསྐལ་པ་དེ་སྙེད་དུ་ཡང་ཕན་ཡོན་རྣམས། །བརྗོད་ཀྱང་ཡོངས་སུ་ཟད་པར་མི་ནུས་ཏེ། །ཏིང་འཛིན་འདི་བཟུང་བསོད་ནམས་
ཤིན་ཏུ་ཆེ། །དེ་ཕྱིར་སངས་རྒྱས་ཕན་ཡོན་དག །ཤིན་ཏུ་བཟང་པོ་འདི་ཐོས་ནས། །སངས་རྒྱས་བསྔགས་པའི་ཏིང་འཛིན་འདི། །མྱུར་དུ་ལུང་ཡང་མནོད་པར་གྱིས། །སངས་རྒྱས་བྱེ་བ་བདུན་ཅུ་གསུམ། །སྔོན་གྱི་སྐྱེ་བར་བཀུར་སྟི་བྱས། །སངས་རྒྱས་དེ་དག་ཐམས་ཅད་ཀྱིས། །
མདོ་སྡེ་འདི་ནི་རབ་ཏུ་བཤད། །མདོ་སྡེ་འདི་ཡི་མིང་ཡང་ནི། །སྙིང་རྗེ་ཆེན་པོར་འཇུག་ཅེས་བྱ། །འདི་ལ་མང་དུ་ཐོས་བསླབས་ན། །སངས་རྒྱས་ཆོས་ནི་རྙེད་མི་དཀའ། །འཇིག་རྟེན་འདྲེན་པ་མྱ་ངན་འདས། །ཕྱི་མའི་དུས་ན་དགེ་སློང་ནི། །སྡོམ་པ་མེད་པ་མང་པོ་དག །མང་དུ་ཐོས་པ་མི་
འདོད་འབྱུང་། །ཚུལ་ཁྲིམས་བསྔགས་པ་རྗོད་བྱེད་ལ། །ཚུལ་ཁྲིམས་དོན་དུ་གཉེར་བ་མེད། །ཏིང་འཛིན་བསྔགས་པ་རྗོད་བྱེད་ལ། །ཏིང་འཛིན་དོན་དུ་གཉེར་བ་མེད། །ཤེས་རབ་བསྔགས་པ་རྗོད་བྱེད་ལ། །ཤེས་རབ་དོན་དུ་གཉེར་བ་མེད། །རྣམ་གྲོལ་བསྔགས་པ་རྗོད་བྱེད་ལ། །རྣམ་
གྲོལ་དོན་དུ་གཉེར་བ་མེད། །ཇི་ལྟར་སྐྱེས་བུ་ལ་ལ་དག །ཙན་དན་དག་ནི་འདི་འདྲ་སྟེ། །སྤོས་ཀྱི་རྣམ་པ་ཡིད་འོང་ཞེས། །ཙན་དན་དག་གི་ཡོན་ཏན་བརྗོད། །དེ་ནས་མི་གཞན་ལ་ལ་ཡིས། །དེ་ལྟར་བསྔགས་པ་བརྗོད་པ་ཡི། །ཙན་དན་ཆུང་ཟད་སྲེལ་ཏམ་ཞེས། །སྐྱེས་བུ་ལ་ལས་
དེ་དྲིས་ན། །སྐྱེས་བུ་དེ་ལ་སླར་སྨྲས་པ། །གང་གིས་འཚོ་བར་བྱེད་པ་ཡི། །སྤོས་ཀྱི་བསྔགས་པ་ང་བརྗོད་པ། །སྤོས་དེ་ང་ལ་མེད་ཅེས་སྨྲ། །དེ་བཞིན་རྣལ་འབྱོར་མི་བརྩོན་པ། །ཚུལ་ཁྲིམས་བསྔགས་པས་འཚོ་བ་དག །ཕྱི་མའི་དུས་ལ་འབྱུང་འགྱུར་ཏེ། །དེ་དག་ལ་ནི་ཚུལ་ཁྲིམས་
མེད། །དེ་བཞིན་རྣལ་འབྱོར་མི་བརྩོན་པ། །ཏིང་འཛིན་བསྔགས་པས་འཚོ་བ་དག །ཕྱི་མའི་དུས་ལ་འབྱུང་འགྱུར་ཏེ། །དེ་དག་ལ་ནི་ཏིང་འཛིན་མེད། །དེ་བཞིན་རྣལ་འབྱོར་མི་བརྩོན་པ། །ཤེས་རབ་བསྔགས་པས་འཚོ་བ་དག །ཕྱི་མའི་དུས་ལ་འབྱུང་འགྱུར་ཏེ། །དེ་དག་ལ་ནི་ཤེས་

རབ་མེད། །དེ་བཞིན་རྣལ་འབྱོར་མི་བརྩོན་པ། །རྣམ་གྲོལ་བསྔགས་པས་འཚོ་བ་དག །ཕྱི་མའི་དུས་ལ་འབྱུང་འགྱུར་ཏེ། །དེ་དག་ལ་ནི་རྣམ་གྲོལ་མེད། །ཇི་ལྟར་སྐྱེས་བུ་དབུལ་པོ་ལ་ལ་ཞིག །སྐྱེ་བོ་མང་པོས་ཡོངས་སུ་བརྙས་གྱུར་ལ། །དེ་ཡིས་ཕྱིས་གདོད་ནོར་གྱི་གཏེར་
རྙེད་ནས། །ནོར་ཡོད་རིག་པས་སྐྱེ་བོ་རི་མོར་བྱེད། །དེ་བཞིན་ཏིང་འཛིན་འདི་ནི་མ་ཐོབ་ན། །བྱང་ཆུབ་སེམས་དཔའ་དེ་ཡང་ལྷ་མི་དང་། །གྲུལ་བུམ་སྲིན་པོ་མང་པོས་མི་བཀུར་ཏེ། །ཇི་ལྟར་སྐྱེས་བུ་དབུལ་པོ་ནོར་མེད་བཞིན། །མཁས་པས་གཞལ་དུ་མེད་པའི་ཆོས་ཀྱི་གཏེར། །ས་འདི་
ནམ་ཞིག་རབ་ཏུ་ཐོབ་གྱུར་ན། །ལྷ་དང་མི་དག་དེ་ལ་རེ་བ་སྐྱེད། །དེས་ཀྱང་སྐྱེ་དགུ་བླ་མེད་ནོར་རྣམས་བྱིན། །དེ་ཕྱིར་རྒྱལ་བ་དག་གིས་བརྗོད་པ་ཡི། །ཕན་ཡོན་དམ་པ་བཟང་པོ་འདི་ཐོས་ནས། །ཤེས་ཀྱི་ཁེ་དང་བདེ་རྙེད་ཀུན་སྤངས་ཏེ། །ཏིང་འཛིན་ཞི་མཆོག་འདི་ནི་ལུང་ནོད་གྱིས། །སངས་
རྒྱས་སུ་དག་ཕྱོགས་སུ་མྱ་ངན་འདས། །གང་དག་ད་ལྟར་བྱུང་དང་མ་འོངས་པ། །དེ་དག་ཐམས་ཅད་ཏིང་འཛིན་འདི་བསླབས་ནས། །བྱང་ཆུབ་བསམ་ཡས་མཚུངས་མེད་རྣམ་སངས་རྒྱས། །ཟླ་འོད་གཞོན་ནུར་གྱུར་པ་སེམས་དགའ་ནས། །སངས་རྒྱས་སྤྱན་སྔར་འདུག་སྟེ་ཚིག་སྨྲས་པ། །
སྐྱེས་བུ་དམ་པ་མྱ་ངན་ཡོངས་འདས་ནས། །མ་རུངས་དུས་ན་བདག་གིས་མདོ་འདི་གཟུང་། །བདག་གིས་ལུས་དང་སྲོག་ཀྱང་ཡོངས་བཏང་སྟེ། །འཇིག་རྟེན་སྐྱེད་པ་ཅི་མཆིས་ཀུན་བཏང་ལ། །བདག་གིས་འཇིགས་པ་ཆེན་པོའི་དུས་དེར་ཡང་། །ཏིང་འཛིན་ཞི་མཆོག་འདི་ནི་གཟུང་བར་
བགྱི། །སེམས་ཅན་མང་ལ་སྙིང་རྗེ་ཆེར་སྐྱེད་དེ། །སེམས་ཅན་སྡུག་བསྔལ་མགོན་མེད་མཐོང་ནས་ཀྱང་། །དེ་དག་ལ་ནི་བྱམས་པ་ཉེར་སྦྱར་ཞིང་། །ཏིང་འཛིན་ཞི་མཆོག་འདི་ནི་གཟུང་བར་བགྱི། །དེ་ཡི་ཚེ་ན་ཏིང་འཛིན་འཛིན་པ་དག །ལྔ་བརྒྱ་ལས་ནི་མི་ཉུང་དེར་བྱུང་སྟེ། །
མདོ་སྡེ་མཆོག་འདི་རྒྱ་ཆེར་གཟུང་བ་ལ། །དེ་དག་སྔོན་དུ་འདྲེན་པ་གཞོན་ནུ་ཡིན། །སངས་རྒྱས་ཀྱི་ཡོན་ཏན་ཡང་དག་པར་བསྔགས་པའི་ལེའུ་སྟེ་གསུམ་པའོ།། །།འཕགས་པ་ཏིང་ངེ་འཛིན་གྱི་རྒྱལ་པོ། བམ་པོ་གཉིས་པ། དེ་ནས་ཟླ་འོད་གཞོན་ནུར་གྱུར་

པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། །བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་
ཀྱིས་བདག་ལ་སྐབས་ཕྱེ་ན་བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་ཁྱོད་ལ་དེ་
བཞིན་གཤེགས་པས་རྟག་ཏུ་སྐབས་ཕྱེས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཁྱོད་ཅི་དང་ཅི་འདོད་པ་དྲིས་ཤིག །དེ་སྐད་ཅེས་བཀའ་སྩལ་ཏེ་བཅོམ་ལྡན་འདས་ཀྱིས་སྐབས་ཕྱེ་བ་དང་། བཅོམ་ལྡན་འདས་ལ་ཟླ་འོད་གཞོན་ནུར་གྱུར་པས་འདི་
སྐད་ཅེས་གསོལ་ཏོ། །བཅོམ་ལྡན་འདས་ཏིང་ངེ་འཛིན་ཏིང་ངེ་འཛིན་ཅེས་བགྱི་བ་དེ་ཆོས་གང་གི་ཚིག་བླ་དགས་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་ཏིང་ངེ་འཛིན་ཏིང་ངེ་འཛིན་ཅེས་བྱ་
བ་ནི་འདི་ལྟ་སྟེ། སེམས་ངེས་པར་རྟོགས་པ་དང་། སྐྱེ་བ་མེད་པ་དང་མཚམས་སྦྱོར་བ་མེད་པ་དང་མཚམས་སྦྱོར་བ་ཤེས་པ་དང་ཁུར་བོར་བ་དང་དེ་བཞིན་གཤེགས་པའི་ཡེ་ཤེས་དང་སངས་རྒྱས་ཀྱི་ཁྱུ་མཆོག་ཏུ་གྱུར་པ་དང་། འདོད་ཆགས་གསོ་བ་དང་ཞེ་སྡང་ཉེ་བར་ཞི་བ་དང་གཏི་མུག་བསལ་
བ་དང་རིགས་པར་རྣལ་འབྱོར་དུ་བྱེད་པ་དང་། མི་རིགས་པ་རྣམ་པར་སྤོང་བ་དང་དགེ་བའི་ཆོས་ལ་འདུན་པ་དང་འཁོར་བ་ལས་ཐར་བར་འདོད་པ་དང་ལྷག་པའི་བསམ་པས་སྒྲུབ་པ་དང་། མི་ཉལ་བ་ལ་སྟེན་པ་དང་སྤོང་བ་མི་གཏོང་བ་དང་ཆོས་དཀར་པོ་རྣམས་ཡོངས་སུ་སྲུང་བ་དང་སྐྱེ་བོ་རྣམས་ལ་ཡིད་
མི་རྟོན་པ་དང་ལས་རྣམས་ལ་མངོན་པར་འདུ་མི་བྱེད་པ་དང་ནང་གི་སྐྱེ་མཆེད་རྣམས་ཡིད་ལ་མི་བྱེད་པ་དང་། ཕྱིའི་སྐྱེ་མཆེད་རྣམས་ལ་ཀུན་ཏུ་མི་སྤྱོད་པ་དང་བདག་ལ་མི་སྟོད་པ་དང་གཞན་ལ་མི་སྨོད་པ་དང་ཁྱིམ་ལ་ཆགས་པ་མེད་པ་དང་སོ་སོའི་སྐྱེ་བོ་ལ་ཡིད་མི་རྟོན་པ་དང་། ཚུལ་ཁྲིམས་ཀྱི་རྒྱུ་འཐུན་

པ་དང་བསྙེན་པར་དཀའ་བ་དང་གཟི་ཆེན་པོ་དང་བདག་ཤེས་པ་དང་མི་རྒོད་པ་དང་སྤྱོད་ལམ་ཕུན་སུམ་ཚོགས་པར་གནས་པ་དང་གནོད་སེམས་མེད་པ་དང་མི་རྩུབ་པ་དང་གཞན་ལ་མི་གནོད་པ་དང་། བཤེས་གཉེན་རྣམས་ལ་རྗེས་སུ་སྲུང་བ་དང་གསང་བའི་སྔགས་ཀུན་སྲུང་བ་
དང་ཚུལ་ཁྲིམས་དང་ལྡན་པ་ལ་རྣམ་པར་མི་འཚེ་ཞིང་གནོད་པ་མེད་པ་དང་འཇམ་པོར་སྨྲ་བ་དང་ཁམས་གསུམ་ཐམས་ཅད་ལ་མི་གནས་པ་དང་ཆོས་ཐམས་ཅད་ལ་སྟོང་པ་ཉིད་ཀྱི་རྗེས་སུ་འཐུན་པའི་བཟོད་པ་དང་ཐམས་ཅད་མཁྱེན་པའི་ཡེ་ཤེས་ལ་ཤིན་ཏུ་འདུན་པ་ནི་གཞོན་ནུ་ཏིང་ངེ་འཛིན་ཅེས་བྱ་སྟེ།
གཞོན་ནུ་གང་དེ་ལྟ་བུའི་ཆོས་དེ་དག་ལ་སྒྲུབ་པར་བྱེད་ཀྱི་ལོག་པར་སྒྲུབ་པར་མི་བྱེད་པ་འདི་ནི་ཏིང་ངེ་འཛིན་ཅེས་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་ཉིད་སྟོན་ཅིང་དེའི་ཚེ་ཟླ་འོད་གཞོན་ནུར་གྱུར་པ་ལ་རྒྱས་པར་
ཚིགས་སུ་བཅད་པའི་དབྱངས་ཀྱིས་རྒྱ་ཆེར་ཡང་དག་པར་རབ་ཏུ་བསྟན་ཏོ། །ངས་ནི་བདུད་རྩིའི་སྒོ་ཡང་རབ་ཏུ་ཕྱེ། །ཆོས་ཀྱི་རང་བཞིན་ཅི་འདྲ་དེ་བཞིན་བཤད། །སྐྱེ་བ་དག་ཀྱང་ཅི་འདྲ་ངས་བསྟན་ཏེ། །མྱ་ངན་འདས་པ་ཕན་ཡོན་བཅས་པ་བཤད། །སྡིག་པའི་གྲོགས་པོ་རྟག་
ཏུ་རྣམ་པར་སྤང་། །དགེ་བའི་བཤེས་གཉེན་ལ་ཡང་བསྙེན་པར་བྱ། །འདུ་བ་སྤངས་ཏེ་ནགས་ཁྲོད་གནས་བཅའ་ཞིང་། །བྱམས་པའི་སེམས་ནི་རྟག་ཏུ་བསྒོམ་པར་བྱ། །ཚུལ་ཁྲིམས་དག་པ་རྟག་ཏུ་བསྲུང་བྱས་ཏེ། །སྦྱངས་ལ་དགའ་བའང་རྟག་ཏུ་ཐོབ་པར་བྱ། །གཏོང་བ་དང་
ནི་ཤེས་རབ་བསྙེན་བྱས་ན། །ཏིང་འཛིན་འདི་ནི་རྙེད་པར་དཀའ་མི་འགྱུར། །ཉན་ཐོས་མང་པོ་ཡི་ནི་ས་མིན་པ། །ཞི་བའི་ས་འདི་དག་ཀྱང་ཐོས་ནས་ནི། །བདེ་བར་གཤེགས་པའི་ཆོས་ལ་མངོན་སུམ་གྱུར། །སངས་རྒྱས་ཡོན་ཏན་བསམ་ཡས་ཐོབ་པར་འགྱུར། །སྐྱེས་བུ་བློ་ལྡན་སྣོད་
འགྱུར་མཐོང་ནས་ཀྱང་། །དེ་དག་བྱང་ཆུབ་སེམས་ལ་ཡང་དག་ཆུད། །བླ་མེད་ཡེ་ཤེས་ལ་ནི་རབ་བཀོད་ན། །ཏིང་འཛིན་རྒྱལ་པོ་འདི་ནི་རྙེད་མི་དཀའ། །ཡོངས་སུ་ཚོལ་དང་ཀུན་དུ་ལོངས་སྤྱོད་དང་། །ཁ་ཟས་རྒྱུ་འཐུན་དག་ནི་གང་གི་ཕྱིར། །ཕྲག་དོག་སྐྱེས་པ་དེ་ལ་རབ་ཏུ་རྟོགས། །

ཏིང་འཛིན་འདི་ནི་རྙེད་པར་ཡོང་མི་དཀའ། །ཏིང་འཛིན་རྒྱལ་པོ་སྟོང་པ་འདི་སྒོམ་པ། །ཚུལ་ཁྲིམས་དག་པའི་མགོ་ལ་དེ་འདུག་སྟེ། །ཆོས་རྣམས་རང་བཞིན་རྟག་ཏུ་མཉམ་བཞག་ན། །བྱིས་པ་མི་རིགས་བརྩོན་པས་མི་ཤེས་སོ། །སུ་དག་ཏིང་འཛིན་ཞི་བ་འདི་འདོད་པ། །དེ་ལ་ནམ་ཡང་
འཇིགས་པའི་བློ་མི་འབྱུང་། །རབ་ཏུ་ཞི་བའི་ས་འདི་བསྟེན་ནས་ནི། །མི་མཆོག་རྣམས་ཀྱང་རྟག་ཏུ་མཐོང་བར་འགྱུར། །དེ་བཞིན་གཤེགས་པའི་སྐུ་བྱད་གང་དྲན་པ། །དེ་ནི་ཡིད་ཞི་དབང་པོ་ཞི་བར་འགྱུར། །སེམས་ལ་འཁྲུལ་མེད་རྟག་ཏུ་མཉམ་པར་བཞག །ཐོས་དང་ཤེས་པ་དག་
ནི་རྒྱ་མཚོ་བཞིན། །ཏིང་འཛིན་འདི་ལ་རབ་ཏུ་གནས་ནས་ནི། །བྱང་ཆུབ་སེམས་དཔའ་འཆག་སར་སུ་འཆགས་པ། །དེས་ནི་སངས་རྒྱས་བྱེ་བ་ཕྲག་སྟོང་དང་། །དེ་བས་ལྷག་པར་གང་གཱའི་བྱེ་སྙེད་མཐོང་། །སུ་དག་སངས་རྒྱས་ཆོས་ལ་ཚད་འཛིན་པ། །མི་དེའི་སེམས་ནི་ཤིན་ཏུ་མྱོས་པར་
འགྱུར། །ཚད་ལས་འདས་པ་ལ་ནི་ཚད་གཟུང་མེད། །འདྲེན་པ་ཡོན་ཏན་ཐམས་ཅད་བསམ་མི་ཁྱབ། །ཕྱོགས་བཅུ་དག་ན་སེམས་ཅན་སུ་ཡང་ནི། །འཇིག་རྟེན་མགོན་དང་མཉམ་མེད་སུ་ཞིག་ལྷག །ཐམས་ཅད་མཁྱེན་པའི་ཡོན་ཏན་ཀུན་ལྡན་པ། །སངས་རྒྱས་ཡེ་ཤེས་འདོད་
ཅིང་ཐོབ་པར་གྱིས། །སྐུ་ལུས་དག་ནི་གསེར་གྱི་མདོག་འདྲ་བས། །འཇིག་རྟེན་མགོན་པོ་ཀུན་ནས་རབ་ཏུ་མཛེས། །དམིགས་པ་འདི་ལ་གང་གི་སེམས་འཇུག་པ། །བྱང་ཆུབ་སེམས་དཔའ་དེ་ནི་མཉམ་གཞག་ཡིན། །མཁས་པས་འདུས་བྱས་འདུས་མ་བྱས་རིག་སྟེ། །མཚན་མའི་
འདུ་ཤེས་དག་ནི་རྣམ་བཤིག་ནས། །མཚན་མ་མེད་པ་ལ་ནི་དེ་གནས་ན། །ཆོས་རྣམས་ཐམས་ཅད་སྟོང་པར་རབ་ཏུ་ཤེས། །གང་དག་ཆོས་ཀྱི་སྐུ་ལ་གནས་གྱུར་པ། །དེ་ནི་དངོས་པོ་ཐམས་ཅད་དངོས་མེད་ཤེས། །དེ་ཡིས་དངོས་པོའི་འདུ་ཤེས་རྣམ་བཤིག་ནས། །རྒྱལ་བའི་དབང་པོ་
གཟུགས་ཀྱི་སྐུར་མི་ལྟ། །ཁྱོད་ལ་བསྒོ་ཞིང་ཁོང་དུ་ཆུད་པར་བྱ། །ཇི་ལྟར་མི་དག་མང་དུ་རྟོག་བྱེད་པ། །དེ་ལ་གནས་པའི་རྟོག་པ་དེ་དག་གིས། །དེ་བཞིན་དུ་ནི་དེ་ལ་སེམས་གཞོལ་འགྱུར། །དེ་བཞིན་རྒྱལ་བ་ཡི་ནི་སྐུ་བྱད་དང་། །ཡེ་ཤེས་དཔག་ཏུ་མེད་པར་ཐུབ་དབང་དྲན། །རྟག་པར་

རྗེས་སུ་དྲན་པ་བསྒོམ་བྱས་ན། །དེ་ལ་སེམས་གཞོལ་རབ་ཏུ་འབབ་པར་འགྱུར། །དེ་ནི་འཆགས་འདུག་འགྲེང་ཞིང་གནས་པའི་ཚེ། །སྐྱེས་བུ་དམ་པའི་ཡེ་ཤེས་རབ་ཏུ་འདོད། །འཇིག་རྟེན་རྒྱལ་བ་བླ་མེད་བདག་འགྱུར་བར། །འདོད་པས་བྱང་ཆུབ་ཏུ་ཡང་སྨོན་ལམ་
འདེབས། །དེས་ནི་སངས་རྒྱས་ཤེས་ཤིང་སངས་རྒྱས་མཐོང་། །སངས་རྒྱས་ཆོས་ཉིད་ལ་ཡང་སོ་སོར་རྟོག །ཏིང་འཛིན་འདི་ལ་རབ་ཏུ་གནས་བྱས་ནས། །མཐུ་ཆེན་སངས་རྒྱས་ལ་ནི་ཕྱག་ཀྱང་འཚལ། །ལུས་དང་ངག་དང་ཡིད་རབ་དང་བ་ཡིས། །རྟག་ཏུ་སངས་རྒྱས་དག་གི་བསྔགས་
པ་བརྗོད། །དེ་ལྟར་དེས་ནི་སེམས་ཀྱི་རྒྱུད་བསྒོམས་པས། །ཉིན་མཚན་དུ་ཡང་འཇིག་རྟེན་མགོན་པོ་མཐོང་། །ནམ་ཞིག་དེ་ནི་ན་ཞིང་མི་བདེ་ནས། །ཤི་ལ་ཐུག་པའི་སྡུག་བསྔལ་ཚོར་བྱུང་ན། །སངས་རྒྱས་ལ་ནི་དྲན་པ་མི་ཉམས་ཏེ། །སྡུག་བསྔལ་ཚོར་བས་འཕྲོགས་པར་ཡོང་མི་འགྱུར། །
དེ་ལྟར་དེ་དག་ཡེ་ཤེས་རྣམ་བརྟགས་པས། །འོངས་དང་མ་འོངས་ཆོས་རྣམས་སྟོང་པར་ཤེས། །དེ་འདྲའི་ཆོས་ཀྱི་ཚུལ་ལ་དེ་གནས་པ། །སྤྱོད་པ་ཡོངས་སུ་སྤྱོད་པས་སེམས་མི་སྐྱོ། །དེ་ཕྱིར་ཕན་ཡོན་འདི་དག་ཐོས་ནས་ནི། །མཚུངས་མེད་བྱང་ཆུབ་ལ་ཡང་མོས་པ་སྐྱེད། །བདེ་
གཤེགས་དམ་པ་མཐོང་བ་རྙེད་དཀའ་ཡིས། །ཕྱི་མའི་དུས་ན་འགྱོད་པ་སྐྱེས་ས་རེ། །ངས་ནི་རབ་ཏུ་བཟང་བའི་ཆོས་བཤད་ཀྱང་། །ཁྱེད་ཀྱིས་ཐོས་ནས་ཡང་དག་མ་སྤྱད་ན། །ནད་པ་སྨན་གྱི་རྒྱལ་བ་ཐོགས་པ་དག །བདག་གི་ནད་ནི་གསོ་བར་མི་ནུས་བཞིན། །དེ་ཕྱིར་མཁས་པ་
ཤིན་ཏུ་རྟོགས་པ་དག །རྟག་ཏུ་ཏིང་འཛིན་འདི་ནི་འདོད་པ་ཡིས། །ཚུལ་ཁྲིམས་ཐོས་པ་གཏོང་བ་བསྙེན་བྱས་ན། །ཏིང་འཛིན་འདི་ནི་རྙེད་པར་ཡོང་མི་དཀའ། །ཏིང་ངེ་འཛིན་གྱི་ལེའུ་སྟེ་བཞི་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་
ལ་བཀའ་སྩལ་པ། གཞོན་ནུ་དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་འདི་འདོད་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་མགོ་དང་གོས་ལ་མེ་འབར་བ་ལྟ་བུའི་སེམས་ཀྱིས་ཕ་དང་མ་དང་

བུ་དང་བུ་མོ་དང་ཉེ་དུ་དང་སྣག་གི་གཉེན་མཚམས་དང་གཉེན་དང་རྩ་ལག་དང་ཆུང་མ་ལ་སོགས་པ་མེ་བཞིན་དུ་སྤངས་ལ་རྒྱལ་སྲིད་ཀྱི་བདེ་བ་ཐམས་ཅད་མཆིལ་མའི་ཐལ་བ་བཞིན་དུ་བོར་ཏེ། དགོན་པ་ལ་མངོན་དུ་ཕྱོགས་ཤིང་ཁྱིམ་གྱི་གནས་ནས་མངོན་པར་འབྱུང་བར་བྱའོ། །དེ་
ཅིའི་ཕྱིར་ཞེ་ན། གཞོན་ནུ་དགོན་པ་ལ་མངོན་དུ་ཕྱོགས་ཤིང་ཁྱིམ་གྱི་གནས་ནས་མངོན་པར་འབྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་རྙེད་པར་དཀའ་བ་མ་ཡིན་ན་ཏིང་ངེ་འཛིན་འདི་ལྟ་ཅི་སྨོས་ཏེ། གཞོན་ནུ་དེ་ལྟ་བས་
ན་བུ་དང་མཛའ་བོ་དང་། ཉེ་དུ་དང་སྣག་གི་གཉེན་མཚམས་དང་གཉེན་དང་རྩ་ལག་དང་ཆུང་མ་ལ་སོགས་པ་མེ་བཞིན་དུ་སྤངས་ལ་རྒྱལ་སྲིད་ཀྱི་བདེ་བ་ཐམས་ཅད་མཆིལ་མའི་ཐལ་བ་བཞིན་དུ་བོར་ཏེ། དགོན་པ་ལ་མངོན་དུ་ཕྱོགས་ཤིང་། ཁྱིམ་གྱི་གནས་ནས་མངོན་པར་འབྱུང་བར་བྱའོ་
ཞེས་གཞོན་ནུ་ཁྱོད་ཀྱིས་དེ་ལྟར་རྟག་ཏུ་བསླབ་པར་བྱའོ། །གཞོན་ནུ་དེ་ལྟ་བས་ན་རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། གཞོན་ནུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ། རྒྱ་ཆེ་བ། དཔག་ཏུ་མེད་པ། བསམ་གྱིས་མི་
ཁྱབ་པ་གཞལ་དུ་མེད་པར་གྱུར་པ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་
བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ་། །གཞོན་ནུ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་དེའི་ཉན་ཐོས་འདུས་པ་དང་པོ་ནི་ཐམས་ཅད་
ཀྱང་དགྲ་བཅོམ་པ་ཤ་སྟག་བྱེ་བ་ཕྲག་བརྒྱད་ཅུ་བྱུང་ངོ་། །ཉན་ཐོས་འདུས་པ་གཉིས་པ་ནི་དགྲ་བཅོམ་པ་བྱེ་བ་ཕྲག་བདུན་ཅུ་བྱུང་ངོ་། །འདུས་པ་གསུམ་པ་ནི་དགྲ་བཅོམ་པ་བྱེ་བ་ཕྲག་དྲུག་ཅུ་བྱུང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་དམ་པའི་ཆོས་ཡོངས་སུ་འཛིན་

པ་ཡང་དཔག་ཏུ་མེད་པ་དག་བྱུང་ངོ་། །གཞོན་ནུ་དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་དེའི་ཚེའི་ཚད་ནི་ལོ་བཞི་ཁྲིར་གྱུར་ཏོ། །འཛམ་བུའི་གླིང་འདི་ཡང་འབྱོར་པ་རྒྱས་པ་བདེ་བ། ལོ་ལེགས་
པ། ཉམས་དགའ་བ། སྐྱེ་བོ་དང་མི་མང་པོས་གང་བར་གྱུར་ཏོ། །འཛམ་བུའི་གླིང་འདི་ན་རྒྱལ་པོ་སྟོབས་བརྟན་དང་། སྟོབས་ཆེན་ཞེས་བྱ་བ་གཉིས་ཡོད་དེ། དེ་ལ་གཅིག་ནི་འཛམ་བུའི་གླིང་འབྱོར་པ། རྒྱས་པ་བདེ་བ་ལོ་ལེགས་པ། ཉམས་དགའ་བ། སྐྱེ་བོ་དང་མི་མང་
པོས་གང་བའི་ཕྱེད་ལ་དབང་ངོ་། །ཅིག་ཤོས་ཀྱང་དེའི་ཕྱེད་ལ་དབང་ངོ་། །གཞོན་ནུ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་དེ་རྒྱལ་པོ་སྟོབས་ཆེན་གྱི་རྣམ་པར་རྒྱལ་བའི་སར་བྱུང་སྟེ། གཞོན་ནུ་དེ་
ལྟར་རྒྱལ་པོ་སྟོབས་ཆེན་གྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་དེ་བྱང་ཆུབ་སེམས་དཔའི་དགེ་འདུན་དང་དགེ་སློང་གི་དགེ་འདུན་དང་བཅས་པ་ལ་ན་བཟའ་དང་བསོད་སྙོམས་དང་། སྙུན་གསོས་ཀྱི་སྨན་དང་ཡོ་བྱད་
བརྟགས་པ་ཀུན་དུ་སྤྱད་པར་རུང་བ། ཁ་ན་མ་ཐོ་བ་མེད་པ་ལ་ལོ་བརྒྱ་སྟོང་ཚང་བར་སྤྱན་དྲངས་སོ། །གཞོན་ནུ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་དེ་བྱང་ཆུབ་སེམས་དཔའི་དགེ་འདུན་དང་བཅས་པ་
ཉན་ཐོས་ཀྱི་དགེ་འདུན་དང་བཅས་པ་རྙེད་པ་དང་བཀུར་སྟི་དང་གྲགས་པ་ཆེ་བར་གྱུར་ཏོ། །བྲམ་ཟེ་དང་ཁྱིམ་བདག་དད་པ་དག་གིས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་བྱང་ཆུབ་སེམས་དཔའི་དགེ་འདུན་དང་
བཅས། ཉན་ཐོས་ཀྱི་དགེ་འདུན་དང་བཅས་པ་ལ་རྙེད་པ་དང་བཀུར་སྟི་ཆེར་བྱས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་ལ་བྲམ་ཟེ་དང་ཁྱིམ་བདག་དེ་དག་གིས་ཀྱང་འདི་ལྟ་སྟེ། རྒྱལ་པོ་སྟོབས་ཆེན་གྱི་རྗེས་

སུ་སློབ་ཅིང་འཇིག་རྟེན་གྱི་ཟང་ཟིང་གི་མཆོད་པས་རྙེད་པ་དང་བཀུར་སྟི་བྱ་བའི་ཕྱིར་བརྩོན་པར་གྱུར་ཏོ། །གཞོན་ནུ་དེ་ལྟ་བས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་འདི་སྙམ་དུ་གྱུར་ཏེ། ཀྱེ་མའོ་སེམས་ཅན་འདི་
དག་ནི་ཚུལ་ཁྲིམས་དང་གསོ་སྦྱོང་ཡང་དག་པར་བླང་བ་དང་དེ་བཞིན་གཤེགས་པ་རྣམས་ཀྱི་དྲུང་དུ་ཉེ་བར་འགྲོ་བ་དང་། དེ་བཞིན་གཤེགས་པ་ལ་བསྙེན་བཀུར་བྱ་བ་དང་། ཚངས་པར་སྤྱོད་པ་ལ་གནས་པ་དང་རབ་ཏུ་བྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་བ་ལས་
ཡོངས་སུ་ཉམས་པར་འགྱུར་ཏེ། སེམས་ཅན་འདི་དག་ནི་དེའི་འོག་ཏུ་བདེ་བ་ལ་ལྷུར་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་དེའི་འོག་ཏུ་བདེ་བ་ནི་འདི་ལྟ་སྟེ། འཇིག་རྟེན་གྱི་ཟང་ཟིང་གི་མཆོད་པ་ནི་འདི་ཡིན་ཏེ། སེམས་ཅན་འདི་དག་ནི་འདི་ལྟ་སྟེ། མཐོ་རིས་ཀྱི་འཇིག་རྟེན་
ལ་དམིགས་ཤིང་ཚེ་འདི་ལྷུར་བྱེད་པ། ཚེ་ཕྱི་མ་ལྷུར་མི་བྱེད་པ་སྟེ། དགེ་བའི་རྩ་བ་ཤིན་ཏུ་མཐར་གཏུགས་པའི་ཕྱིར་ནི་མ་ཡིན་ནོ། །གཞོན་ནུ་དེ་ལ་དགེ་བའི་རྩ་བ་ཤིན་ཏུ་མཐར་གཏུགས་པ་གང་ཞེ་ན། འདི་ལྟ་སྟེ། ཤིན་ཏུ་རྣམ་པར་དག་པ་དང་ཚངས་པར་སྤྱོད་པ་ལ་ཤིན་ཏུ་གནས་
པ་དང་ཤིན་ཏུ་མཐར་ཕྱིན་པ་དང་ཤིན་ཏུ་མཐར་གཏུགས་པའོ། །ངས་སེམས་ཅན་དེ་དག་ལ་ཅི་ནས་ཀྱང་བླ་ན་མེད་པའི་ཆོས་ཀྱི་མཆོད་པ་དང་ཆོས་ཀྱི་ནན་ཏན་གྱིས་དེ་བཞིན་གཤེགས་པ་ལ་མཆོད་པར་འགྱུར་བ་དེ་ལྟ་དེ་ལྟར་ཆོས་བཤད་པར་བྱའོ་སྙམ་མོ། །གཞོན་ནུ་དེ་ནས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་གྱིས་དེའི་ཚེ་རྒྱལ་པོ་སྟོབས་ཆེན་དང་བྲམ་ཟེ་དང་ཁྱིམ་བདག་དེ་དག་སྐྱོ་བར་བྱ་བར་དགོངས་པས་ཚིགས་སུ་བཅད་པ་འདི་དག་གསུངས་སོ། །སྦྱིན་པ་རབ་བྱིན་གཅིག་ལ་གཅིག་བསྟེན་པ། །དེ་དག་ཕན་ཚུན་རི་མོར་བྱེད་མི་
འགྱུར། །མཁས་པ་བག་ཆགས་རབ་ཏུ་སྤངས་པ་ཡི། །སངས་རྒྱས་དག་གིས་བསྟེན་པ་དེ་མི་བསྔགས། །གང་དག་སྲོགས་ཆགས་ཕན་ཕྱིར་ཆོས་སྟོན་པ། །དེ་འདྲའི་མི་དེས་ཤིན་ཏུ་བསྟེན་པ་ཡིན། །དེ་དག་གཅིག་ལ་གཅིག་ཀྱང་མི་ཕྱེད་མཛའ། །བྱེ་བ་སྙེད་ཀྱི་བདུད་ཀྱིས་

དབྱེ་མི་ནུས། །འཇིག་རྟེན་ཟང་ཟིང་དག་གིས་སྟེན་པའི་མི། །དེ་དག་ཚེ་འདིའི་དོན་དུ་ཀུན་འགྱུར་གྱི། །ཟང་ཟིང་མེད་པའི་ཆོས་ལ་བསྟེན་པ་ནི། །མི་དག་གི་ཡང་རབ་ཏུ་དོན་ཆེར་འགྱུར། །ཟང་ཟིང་མེད་པའི་སེམས་ནི་ཉེར་བཞག་སྟེ། །ཟང་ཟིང་མེད་པའི་ཆོས་རྣམས་རབ་བཤད་
ལ། །གང་དག་ཟང་ཟིང་མེད་པའི་དགའ་ལྡན་པ། །དེ་འདྲ་དེ་དག་མྱུར་དུ་སངས་རྒྱས་འགྱུར། །འདོད་པ་དག་ལ་རབ་ཏུ་སྟེན་བྱེད་ཅིང་། །བུ་དང་ཆུང་མ་ལ་ཡང་སྲིད་བསྐྱེད་ནས། །ཁྱིམ་གནས་སྨད་པ་ཉིད་ལ་སྟེན་བྱེད་ན། །བླ་མེད་བྱང་ཆུབ་མཆོག་དེས་ཡོང་མི་འཐོབ། །སུ་དག་མེ་མུར་བཞིན་དུ་
འདོད་སྤོང་ཞིང་། །བུ་དང་ཆུང་མ་ལ་ཡང་སྲིད་སྤངས་ནས། །སྐྲག་ཅིང་དངངས་པས་ཁྱིམ་ནས་མངོན་བྱུང་བ། །དེ་དག་བྱང་ཆུབ་མཆོག་འདི་རྙེད་མི་དཀའ། །གང་དག་ཁྱིམ་གྱི་དབུས་ན་འདུག་བཞིན་དུ། །བྱང་ཆུབ་དམ་པ་མཆོག་འདི་ཐོབ་པ་ནི། །དེ་འདྲའི་སངས་རྒྱས་གང་ཡང་སྔོན་མ་བྱུང་། །
མ་བྱོན་པ་དང་ད་ལྟར་བཞུགས་པའང་མེད། །རྒྱལ་སྲིད་མཆིལ་མ་བཞིན་དུ་རབ་སྤངས་ལ། །དབེན་པ་འདོད་པས་དགོན་པར་གནས་པར་གྱིས། །ཉོན་མོངས་རབ་སྤངས་བདུད་ཀྱང་རྣམ་བཅོམ་ན། །བྱང་ཆུབ་རྡུལ་མེད་འདུས་མ་བྱས་པ་རྟོགས། །སངས་རྒྱས་དཔའ་བོ་གང་གཱའི་བྱེ་མ་སྙེད། །
བསྐལ་པ་བྱེ་མང་རིམ་གྲོ་སུས་བྱས་པས། །གང་ཞིག་ཡོངས་སུ་སྐྱོ་བའི་ཡིད་ཀྱིས་ནི། །ཁྱིམ་ནས་མངོན་པར་བྱུང་ན་འདི་མཆོག་འགྱུར། །ཇི་ལྟར་རབ་ཏུ་བྱུང་ནས་ཆོས་སྤྱོད་པ། །དེ་ལྟར་ཟས་དང་སྐོམ་དང་ཆོས་གོས་དང་། །མེ་ཏོག་དང་ནི་སྤོས་དང་བྱུག་པ་ཡིས། །མི་མཆོག་རྒྱལ་བ་རིམ་གྲོ་བྱས་
མ་ཡིན། །སུ་དག་བྱང་ཆུབ་ཏུ་ཡང་འདོད་མོས་ཤིང་། །སེམས་ཅན་དོན་ཕྱིར་འདུས་བྱས་ཡོངས་སྐྱོ་ནས། །དགོན་པར་བལྟས་ཏེ་གོམ་པ་བདུན་བོར་ན། །དེ་བས་བསོད་ནམས་འདི་ནི་ཁྱད་པར་འཕགས། །དེ་ནས་གཞོན་ནུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་དབྱངས་བྱིན་གྱིས་ཁྱིམ་ནས་མངོན་པར་འབྱུང་བ་དང་ལྡན་པའི་གཏམ་བརྗོད་པ་དེ་ལྟ་བུ་རྒྱལ་པོ་སྟོབས་ཆེན་གྱིས་ཐོས་སོ། །ཐོས་ནས་ཀྱང་ཇི་ལྟར་བདག་གིས་བཅོམ་ལྡན་འདས་ཀྱིས་བཤད་པའི་དོན་ཤེས་པ་ལྟར་ན་བཅོམ་ལྡན་འདས་ནི་སྦྱིན་པའི་ཕ་རོལ་ཏུ་ཕྱིན་པའི་བསྔགས་པ་མི་

བརྗོད་ཀྱི་བཅོམ་ལྡན་འདས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཤིན་ཏུ་མཐར་གཏུགས་པའི་བསྔགས་པ་བརྗོད་དེ། བཅོམ་ལྡན་འདས་ཀྱིས་ཤིན་ཏུ་རྣམ་པར་དག་པ་དང་ཚངས་པར་སྤྱོད་པ་ལ་ཤིན་ཏུ་གནས་པ་དང་ཤིན་ཏུ་ཡོངས་སུ་མྱ་ངན་ལས་འདས་པ་བསྔགས་སོ་ཞེས་བསམས་ནས་དེ་འདི་སྙམ་དུ་ཁྱིམ་
ན་གནས་པས་བླ་ན་མེད་པའི་ཆོས་ཀྱི་ནན་ཏན་སྒྲུབ་པའམ། དོན་རྗེས་སུ་ཐོབ་པར་འགྱུར་བ་འདི་ནི་སླ་བ་མ་ཡིན་ཏེ། བླ་ན་མེད་པའི་ཆོས་ཀྱི་ནན་ཏན་ལས་བདག་ཡོངས་སུ་ཉམས་པར་འགྱུར་གྱིས། བདག་ནི་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་
སྙམ་མོ། །གཞོན་ནུ་དེ་ནས་རྒྱལ་པོ་སྟོབས་ཆེན་བྲམ་ཟེ་དང་ཁྱིམ་བདག་བརྒྱད་ཁྲིས་བསྐོར་ཅིང་མདུན་དུ་བདར་ཏེ། དེ་དག་དང་ལྷན་ཅིག་ཏུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་
ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འདུག་གོ། །དེ་ནས་གཞོན་ནུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་རྒྱལ་པོ་སྟོབས་ཆེན་གྱི་ལྷག་པའི་བསམ་པ་མཁྱེན་ནས་
ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་བཤད་དོ། །དེ་ནས་གཞོན་ནུ་རྒྱལ་པོ་སྟོབས་ཆེན་ཏིང་ངེ་འཛིན་འདི་ཐོས་ནས་དགའ་བ་དང་མགུ་བ་དང་རངས་པ་དང་རབ་ཏུ་མོས་པ་དང་ཡིད་བདེ་བ་སྐྱེས་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་ཡང་དག་
པར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ཏོ། །དེ་དེ་ལྟར་རབ་ཏུ་བྱུང་ནས་ཏིང་ངེ་འཛིན་འདི་བཟུང་སྟེ་བཟུང་ཞིང་ཀུན་ཆུབ་པར་བྱས། བཅངས་ཤིང་བཀླགས་ནས་བསྒོམ་པའི་རྣལ་འབྱོར་ལ་རྗེས་སུ་བརྩོན་པར་གནས་པར་གྱུར་ཏོ། །དེ་དགེ་བའི་རྩ་བ་དེ་ཉིད་ཀྱིས་བསྐལ་པ་
བྱེ་བ་ཕྲག་བཅུའི་བར་དུ་ནམ་ཡང་ངན་འགྲོ་ལོག་པར་ལྟུང་བར་མ་སོང་སྟེ། སངས་རྒྱས་བྱེ་བ་ཕྲག་ཉི་ཤུ་ལ་བསྙེན་བཀུར་བྱས་ཤིང་དེ་བཞིན་གཤེགས་པ་དེ་དག་ཐམས་ཅད་ལས་ཀྱང་ཏིང་ངེ་འཛིན་འདི་ཐོས་སོ། །སངས་རྒྱས་དེ་དག་ལས་ཐོས་ནས་དེས་བཟུང་སྟེ། ཀུན་ཆུབ་པར་བྱས། བཅངས་

ཤིང་བཀླགས་ནས་བསྒོམ་པའི་རྣལ་འབྱོར་ལ་རྗེས་སུ་བརྩོན་པར་གནས་སོ། །དེ་དེའི་འོག་ཏུ་དགེ་བའི་རྩ་བ་དེ་ཉིད་ཀྱིས་བསྐལ་པ་བྱེ་བ་ཕྲག་བཅུ་འདས་པ་དང་། བསྐལ་པ་འབུམ་ཚང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་
གྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་དཔའ་བ་ཞེས་བྱ་བར་གྱུར་ནས་དེས་སེམས་ཅན་དཔག་ཏུ་མེད་པ་རྣམས་ཀྱི་དོན་བྱས་ཏེ། ཕྱིས་སངས་རྒྱས་ཀྱི་མྱ་ངན་ལས་འདའ་བས་ཡོངས་སུ་མྱ་ངན་ལས་འདས་པར་གྱུར་ཏོ། །གཞོན་ནུ་དེ་ནས་
སྲོག་ཆགས་བརྒྱ་སྟོང་ཕྲག་བརྒྱད་ཅུ་རྒྱལ་པོ་སྟོབས་ཆེན་དང་ལྷན་ཅིག་ཏུ་བཅོམ་ལྡན་འདས་དེ་བཞིན་གཤེགས་པ་དབྱངས་བྱིན་གྱི་དྲུང་དུ་འོངས་པ་དེ་དག་ཐམས་ཅད་ཀྱིས་ཀྱང་ཏིང་ངེ་འཛིན་འདི་ཐོས་ནས་དགའ་མགུ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་སྐྲ་དང་
ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་ཡང་དག་པར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ཏོ། །དེ་ལྟར་དེ་དག་ཀྱང་རབ་ཏུ་བྱུང་ནས་ཏིང་ངེ་འཛིན་འདི་བཟུང་སྟེ། ཀུན་ཆུབ་པར་བྱས། བཅངས་ཤིང་བཀླགས་ནས་བསྒོམ་པའི་རྣལ་འབྱོར་ལ་རྗེས་སུ་བརྩོན་པར་གནས་སོ། །
དགེ་བའི་རྩ་བ་དེ་ཉིད་ཀྱིས་དེ་དག་བསྐལ་པ་བྱེ་བ་ཕྲག་ཉི་ཤུའི་བར་དུ་ནམ་ཡང་ངན་འགྲོ་ལོག་པར་ལྟུང་བར་མ་སོང་སྟེ། བསྐལ་པ་ཐམས་ཅད་ལ་ཡང་སངས་རྒྱས་བྱེ་བ་རྣམས་མཉེས་པར་བྱས་ནས། དེ་བཞིན་གཤེགས་པ་དེ་དག་ཐམས་ཅད་ལས་ཏིང་ངེ་འཛིན་འདི་ཐོས་ནས་ཏིང་ངེ་འཛིན་འདི་བཟུང་སྟེ།
ཀུན་ཆུབ་པར་བྱས་བཅངས་ཤིང་བཀླགས་ནས་བསྒོམ་པའི་རྣལ་འབྱོར་ལ་རྗེས་སུ་བརྩོན་པར་གནས་ཏེ། སྔོན་གྱི་དགེ་བའི་རྩ་བ་དེ་ཉིད་ཀྱིས་བསྐལ་པ་བྱེ་བ་ཕྲག་ཉི་ཤུ་འདས་པ་དང་། དེའི་འོག་ཏུ་བསྐལ་པ་འབུམ་ཚང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
སངས་རྒྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་དཔའ་བརྟན་ཞེས་བྱ་བ་ཤ་སྟག་འཇིག་རྟེན་དུ་བྱུང་སྟེ། དེ་དག་གིས་ཀྱང་སེམས་ཅན་དཔག་ཏུ་མེད་པ་ཡོངས་སུ་སྨིན་པར་བྱས་ཤིང་། དེ་དག་གི་དོན་བྱས་ནས་དེའི་འོག་ཏུ་སངས་རྒྱས་ཀྱི་མྱ་

ངན་ལས་འདའ་བས་ཡོངས་སུ་མྱ་ངན་ལས་འདས་པར་གྱུར་ཏོ། །གཞོན་ནུ་དེ་ལྟ་བས་ན་རྣམ་གྲངས་འདི་ཉིད་ཀྱིས་འདི་ལྟར་ཏིང་ངེ་འཛིན་འདི