Kinh tạng Tây Tạng (Kangyur Đại Học) — 045_མདོ་སྡེ།_ཀ

་བརྗིད་ཡིད་དུ་འཐད་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །དགུ་བཅུ་རྩ་དགུ་ལྗོན་པའི་དབང་པོ་ཡབ། །མེ་ཏོག་སྒྲོན་མ་ཞེས་བྱ་རྒྱལ་བའི་ཡུམ། །སྲས་པོ་ཙམ་ཀ་མཆོག་མ་རིམ་གྲོ་པ། །བརྟུལ་ཞུགས་ལྷ་ཞེས་བྱ་བ་མཁས་པ་སྟེ། །
བཀོད་པ་མི་འཁྲུགས་པ་ནི་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་རྩ་ལྔ་ལ། །དགྲ་བཅོམ་ཐམས་ཅད་ཐ་བ་སྤངས་པ་པོ། །ས་དག་དང་ནི་མཚུངས་པ་ཤ་སྟག་གོ། །མི་ཚེ་ལོ་གྲངས་ཉི་ཁྲི་སུམ་སྟོང་ཡིན། །རྒྱལ་བ་མྱ་ངན་འདས་ནས་དམ་ཆོས་དག །ལོ་གྲངས་
བརྒྱད་ཁྲིའི་བར་དུ་གནས་པར་འགྱུར། །རྒྱལ་བའི་མཆོད་རྟེན་དཔག་ཚད་བཅུ་གཅིག་པ། །རིན་ཆེན་བརྒྱ་ཡི་དྲ་བས་མཛེས་པར་བྱས། །དེ་བཞིན་གཤེགས་པ་དོན་དག་གསུང་བ་ཡི། །སྐྱེ་བའི་ཡུལ་ནི་སྨྲ་བ་གསལ་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་

ཚད། །དཔག་ཚད་ཉིས་སྟོང་ཡབ་ནི་ཟླ་བཟངས་ཡིན། །སྤྲིན་གྱི་འོད་ཅེས་བྱ་བ་རྒྱལ་བའི་ཡུམ། །སྲས་པོ་གློག་ལྡན་སྣང་བ་རིམ་གྲོ་པ། །སྣང་བ་བྱེད་ཅེས་བྱ་བ་བློ་ཅན་ཏེ། །ཡིད་འོང་གསལ་ཞེས་བྱ་བ་རྫུ་འཕྲུལ་ཅན། །འདུས་པ་དག་ནི་ལན་གྲངས་ཐེར་འབུམ་ཕྲག །བཅུ་སྟེ་
ཐམས་ཅད་ལ་ཡང་བསམ་གཏན་པ། །ཐེར་འབུམ་ཐེར་འབུམ་དག་ནི་འདུས་པར་འགྱུར། །མི་ཚེ་ལོ་གྲངས་དག་ནི་འབུམ་ཡང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་སྟོང་སྙེད་ཁོ་ནར་གནས་པར་འགྱུར། །འགྲོ་ལ་ཕན་ཕྱིར་རྒྱལ་བའི་སྐུ་གདུང་དག །རྒྱས་འགྱུར་
ཞིང་རྣམས་རྣམ་པར་གང་བར་འགྱུར། །དེ་བཞིན་གཤེགས་པ་དགྱེས་པ་གསལ་བ་ཡི། །སྐྱེ་བའི་ཡུལ་ནི་དགའ་བྱེད་མཆོག་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་འབུམ་ཡོད་མི་འཁྲུགས་པ་ནི་ཡབ། །བདུད་རྩིའི་འོད་ཅེས་བྱ་བ་རྒྱལ་བའི་ཡུམ། །སྲས་པོ་བདུད་
རྩི་རྣམ་གྲོལ་རིམ་གྲོ་པ། །སེང་གེའི་ང་རོ་ཞེས་བྱ་མཁས་པ་སྟེ། །གནས་པ་མི་འཁྲུགས་པ་ནི་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་དྲུག་ཀུན་ལའང་། །ཐམས་ཅད་གནས་ཤེས་པ་ལ་མཁས་པ་པོ། །བྱེ་བ་ཕྲག་ནི་སུམ་ཅུ་ལྔ་ལྔ་ཡོད། །མི་ཚེ་ལོ་གྲངས་སུམ་ཁྲི་དྲུག་སྟོང་ཡིན། །
ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་དྲུག་ཁྲི་དྲུག་སྟོང་བར་དུ་གནས། །སྐུ་གདུང་མཆོད་རྟེན་དཔག་ཚད་གསུམ་པ་གཅིག །རིན་ཆེན་མཆོག་གི་དྲ་བས་མཛེས་པར་བྱས། །དེ་བཞིན་གཤེགས་པ་སེང་གེའི་ཞལ་སྐྱེ་བའི། །ཡུལ་ནི་སྨྲ་བའི་མཆོད་རྟེན་ཞེས་ཀྱང་
བྱ། །དེའི་རིགས་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་སྟོང་ཡོད་ཡབ་ནི་གཟི་བརྗིད་བཟང་། །གོས་ལ་དགའ་ཞེས་བྱ་བ་རྒྱལ་བའི་ཡུམ། །སྲས་པོ་ཁ་སྒྱུར་ལེགས་གནས་རིམ་གྲོ་པ། །ཡེ་ཤེས་ཟིལ་གྱིས་གནོན་པ་མཁས་པ་སྟེ། །མྱ་ངན་མེད་པར་གནས་པ་རྫུ་འཕྲུལ་ཅན། །
འདུས་པ་ལན་གྲངས་བདུན་ཅུ་ཀུན་ལ་ཡང་། །གཏི་མུག་མེད་པའི་ཕ་མཐར་ཕྱིན་འཕགས་པ། །བྱེ་བ་ཕྲག་ནི་བདུན་ཅུ་བརྒྱད་བརྒྱད་ཡོད། །མི་ཚེ་ལོ་གྲངས་བདུན་ཁྲི་བཞི་སྟོང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་བདུན་ཁྲིའི་བར་དུ་གནས་པར་འགྱུར། །

འགྲོ་བའི་དོན་དང་ཕན་ཕྱིར་རྒྱལ་བ་ཡི། །སྐུ་གདུང་དག་ནི་རྣམ་པར་རྒྱས་པར་འགྱུར། །མི་ཡི་འདྲེན་པ་གཙུག་ཕུད་སྐྱེ་བ་ཡི། །ཡུལ་ནི་རིན་ཆེན་བརྩེགས་པ་ཞེས་ཀྱང་བྱ། །དེའི་རིགས་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་བདུན་ཅུ་ཡབ་ནི་ཏོག་བཟངས་ཡིན། །སྣང་བ་སྦྱིན་ཞེས་བྱ་བ་
རྒྱལ་བའི་ཡུམ། །སྲས་པོ་ལྷ་ལེགས་སྒྲ་གཅན་རིམ་གྲོ་པ། །སྤོབས་པ་དྲན་པ་བློ་གྲོས་ཅན་ཡིན་ཏེ། །རྣམ་པར་སྤྲུལ་པའི་ཏོག་ནི་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་དྲུག་ཀུན་ལའང་། །འཇིགས་པ་མེད་པའི་གནས་མཆོག་ཐོབ་པ་པོ། །བྱེ་བ་ཕྲག་ནི་བརྒྱད་ཅུ་བདུན་བདུན་
ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །རྒྱལ་བ་མྱ་ངན་འདས་ནས་དམ་ཆོས་དག །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །རྒྱལ་བ་ཐུགས་རྗེ་ཆེན་པོ་མཚུངས་མེད་པའི། །སྐུ་གདུང་དག་ནི་རྣམ་པར་རྒྱས་པར་འགྱུར། །མི་ཡི་འདྲེན་པ་སྣང་བ་མཛད་པ་ཡི། །
སྐྱེ་བའི་ཡུལ་ནི་གཟི་བརྗིད་གྲགས་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཏུ་མེད་པ་ཡབ་ནི་ལེགས་མཐོང་ཡིན། །བལྟ་བར་འོས་ཞེས་བྱ་བ་རྒྱལ་བའི་ཡུམ། །སྲས་པོ་མཐུ་རྩལ་མངར་ཅན་རིམ་གྲོ་པ། །སྣང་བར་བྱེད་པ་བློ་གྲོས་ཅན་ཡིན་ཏེ། །ཆགས་མེད་
གཏི་མུག་མེད་པ་རྫུ་འཕྲུལ་ཅན། །འདུས་པ་ཐུན་མོང་མ་ཡིན་དཔག་ཏུ་མེད། །མི་རྣམས་དག་གི་ཚེ་ཚད་དཔག་ཏུ་མེད། །སངས་རྒྱས་དགུ་བརྒྱ་དགུ་བཅུ་རྩ་དགུ་ཡི། །མཛད་པ་ཇི་སྙེད་པ་ཀུན་དེས་མཛད་འགྱུར། །འཇིག་རྟེན་ཕན་ཕྱིར་སེམས་ཅན་སྙིང་པོ་དག །མྱ་ངན་འདས་ནས་
དམ་ཆོས་གནས་འགྱུར་བའི། །ལོ་གྲངས་སྟོང་ཕྲག་དག་ནི་མཐའ་ཡང་ཡས། །རྒྱལ་བའི་སྐུ་གདུང་དག་ནི་རྒྱས་པར་འགྱུར། །དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་མཆོག་ཏུ་དགའ་བའི་རྒྱལ་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་ལེགས་སོ་ལེགས་སོ། །བསྐལ་པ་བཟང་པོ་པའི་སངས་རྒྱས་བཅོམ་ལྡན་འདས་རྣམས་ཀྱིས་སངས་རྒྱས་བཅོམ་ལྡན་འདས་དེ་དག་གང་དང་གང་དག་ལ་དང་པོར་བྱང་ཆུབ་ཏུ་སེམས་བསྐྱེད་པ་དང་། དགེ་བའི་རྩ་བ་གང་དང་གང་དག་གིས་དེ་བཞིན་གཤེགས་པ་དེ་དག་ལ་བཀུར་སྟི་

བགྱིས་ནས། བྱང་ཆུབ་ཏུ་སེམས་བསྐྱེད་པ་དག་ལུང་བསྟན་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཆོག་ཏུ་དགའ་བའི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །མཆོག་ཏུ་དགའ་བའི་རྒྱལ་པོ་དེའི་ཕྱིར་ལེགས་པར་རབ་
ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །བྱང་ཆུབ་སེམས་དཔའ་མཆོག་ཏུ་དགའ་བའི་རྒྱལ་པོས་བཙུན་པ་བཅོམ་ལྡན་འདས་དེ་ལྟ་ལེགས་སོ་ཞེས་གསོལ་ནས་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་
འཁོར་བ་འཇིག་གིས་ནི། །དེ་བཞིན་གཤེགས་པ་མི་ཡི་ཟླ་དེ་ལ། །གསེར་ལས་བྱས་པའི་གདུགས་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་གསེར་ཐུབ་ཕྲེང་རྒྱུད་ཚེ། །དེ་བཞིན་གཤེགས་པ་སེང་གེའི་སྟབས་དེ་ལ། །སྣ་མའི་མེ་ཏོག་
དག་གི་ཕྲེང་བ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འོད་སྲུང་བྲམ་ཟེའི་བུར་གྱུར་ཚེ། །དེ་བཞིན་གཤེགས་པ་ཙམ་པའི་མཆོག་དེ་ལ། །སྐ་རགས་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །ང་ནི་སྔོན་ཚེ་སྨན་པར་གྱུར་པ་
ན། །དེ་བཞིན་གཤེགས་པ་ཤཱཀྱ་ཐུབ་དེ་ལ། །འཇམས་གང་ཞིག་ནི་དབུལ་བར་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བྱང་ཆུབ་སེམས་དཔའ་བྱམས་པ་འཁོར་ལོས་སྒྱུར་བ་ཡི། །རྒྱལ་པོ་རྣམ་པར་སྣང་བྱེད་ཅེས་བྱར་གྱུར་པ་ན། །བདེ་གཤེགས་མཐུ་ཆེན་
གདུགས་ཚོད་དག་ལ་སྤྱན་དྲངས་ནས། །དང་པོར་བླ་མེད་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སེང་གེ་དག་གིས་ནི། །དེ་བཞིན་གཤེགས་པ་ང་རོ་སྙན་དེ་ལ། །ཕྱག་དར་ཁྲོད་ཀྱི་ལྷན་པ་ཐལ་མོ་ཙམ། །ཕུལ་ནས་དང་པོར་བྱང་ཆུབ་སེམས་བསྐྱེད་དོ། །བདེ་གཤེགས་
རབ་གསལ་ཚོང་པར་གྱུར་པའི་ཚེ། །དེ་བཞིན་གཤེགས་པ་མཐའ་ཡས་འོད་དེ་ལ། །ནོར་བུ་རིན་པོ་ཆེ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཐུབ་པ་དག་གིས་ནི། །དེ་བཞིན་གཤེགས་པ་ཡིད་འཐད་གཟིགས་དེ་ལ། །མུ་ཏིག་དག་

ལས་བྱས་པའི་གདུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མེ་ཏོག་གྲོང་ཁྱེར་རྟེན་པའི་ཚེ། །དེ་བཞིན་གཤེགས་པ་ཁ་ལོ་སྒྱུར་དེ་ལ། །ལ་དུ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་
མེ་ཏོག་གཉིས་པ་ཡིས། །བདེ་གཤེགས་མངོན་པར་འཕགས་པའི་དཔལ་དེ་ལ། །ཚེམས་ཤིང་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སྤྱན་ལེགས་ཁྱིམ་བདག་ཚེ། །དེ་བཞིན་གཤེགས་པ་ལེགས་པར་སྒྲ་སྒྲོགས་
ལ། །ཁང་པ་བརྩེགས་པ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དེད་དཔོན་དག་གིས་ནི། །དེ་བཞིན་གཤེགས་པ་བདེན་པ་མཐོང་དེ་ལ། །ཙན་དན་དམར་པོའི་ཁྲིའུ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་
བསྐྱེད་དོ། །བདེ་གཤེགས་ལག་ཆེན་རོལ་མོ་མཁན་གྱུར་ཚེ། །དེ་བཞིན་གཤེགས་པ་མཆོག་གྲགས་གྲོང་ཁྱེར་དུ། །བདེ་གཤེགས་དེ་ལ་གླིང་བུས་མཆོད་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྟོབས་ཆེན་སྤོས་འཚོང་བུར་གྱུར་ཚེ། །བདེ་
གཤེགས་སེང་བློ་གྲོང་ཁྱེར་གཤེགས་པ་ན། །ཨ་ག་རུ་ཡི་རྡོག་མ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྒྱུ་སྐར་རྒྱལ་པོ་ཕྱུགས་རྫིའི་ཚེ། །དེ་བཞིན་གཤེགས་པ་དབྱངས་བྱིན་དེ་ལ་ནི། །ཁ་ལའི་མེ་ཏོག་དག་ནི་ཕུལ་ནས་ཀྱང་། །དང་པོར་བྱང་
ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྩི་སྨན་ཤིང་རྟ་མཁན་གྱུར་ཚེ། །དེ་བཞིན་གཤེགས་པ་དྲི་ཞིམ་དེ་ལ་ནི། །ཏིང་ལོ་མར་མེ་བཅས་པ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྙན་པ་ཐ་ག་པར་གྱུར་ཚེ། །དེ་བཞིན་གཤེགས་པ་མར་མེའི་གློག་
འགྱུ་ལ། །རས་ཀྱི་ཁ་ཚར་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་ཏོག་ཞིང་པར་གྱུར་པའི་ཚེ། །དེ་བཞིན་གཤེགས་པ་པད་མོའི་འོད་ཟེར་ལ། །མེ་ཏོག་སིལ་མ་དག་གིས་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་

གཤེགས་འོད་ཆེན་གྲོང་ཁྱེར་རྟེན་པའི་ཚེ། །དེ་བཞིན་གཤེགས་པ་སྒྲོན་མ་ཆེན་པོ་སྟེ། །དྲང་སྲོང་དེ་ལ་མར་མེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གྲོལ་ཕུང་ལྷམ་མཁན་གྱུར་པའི་ཚེ། །དེ་བཞིན་གཤེགས་པ་ཚངས་པའི་དབྱངས་
དེ་ལ། །མཆིལ་ལྷམ་ཟུང་ཅིག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྣམ་སྣང་འཁོར་ལོས་སྒྱུར་བའི་ཚེ། །དེ་བཞིན་གཤེགས་པ་ཡིད་གཉིས་འཇོམས་དེ་ལ། །ཏ་ལི་བ་ཏི་བརྒྱད་ཁྲི་བཞི་སྟོང་ཕུལ། །དང་པོར་བྱང་ཆུབ་ཏུ་ནི་སེམས་
བསྐྱེད་དོ། །བདེ་གཤེགས་ཉི་སྙིང་བྲམ་ཟེའི་བུར་གྱུར་ཚེ། །དེ་བཞིན་གཤེགས་པ་གཟི་བརྗིད་མཐའ་ཡས་ལ། །ཀོ་ཤ་ཏ་ཀའི་མེ་ཏོག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཟླ་བ་གསེར་མགར་བུར་གྱུར་ཚེ། །དེ་བཞིན་གཤེགས་པ་ཟླ་བའི་
ཞལ་དེ་ལ། །རིན་པོ་ཆེ་ཡི་སྡོང་བུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འོད་འཕྲོ་གྲོང་ཁྱེར་རྟེན་པའི་ཚེ། །དེ་བཞིན་གཤེགས་པ་མཐའ་ཡས་འོད་དེ་ལ། །རྩྭ་ཡི་སྒྲོན་མ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་འོད་བཟངས་ནགས་ཚལ་སྲུང་གྱུར་ཚེ། །དེ་བཞིན་གཤེགས་པ་ཡིད་འོང་གཟི་བརྗིད་ལ། །ཙམ་པ་ཀ་ཡི་མེ་ཏོག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མྱ་ངན་མེད་པ་ཚོང་དཔོན་བུས། །དེ་བཞིན་གཤེགས་པ་ཡིད་གཉིས་རྣམ་འཇིག་ལ། །
ཀར་ནི་ཀ་ཡི་མེ་ཏོག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྐར་རྒྱལ་ཁྱིམ་བདག་བུར་གྱུར་ཚེ། །དེ་བཞིན་གཤེགས་པ་བསོད་ནམས་སྒྲོན་དེ་ལ། །ནོར་བུ་རིན་ཆེན་མཆིལ་ལྷམ་ཟུང་ཅིག་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་རབ་གསལ་རྒྱ་མཚོའི་ཚོང་པའི་ཚེ། །དེ་བཞིན་གཤེགས་པ་ལེགས་པར་མཐོང་དེ་ལ། །ཙན་དན་དམར་པོའི་གཟིམས་ཁྲི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཕྲེང་ཐོགས་ཁྱིམ་བདག་བུར་གྱུར་ཚེ། །དེ་བཞིན་གཤེགས་པ་ཡིད་

འོང་གཟི་བརྗིད་ལ། །ཀ་ཀ་ནི་ཡའི་བདུག་སྤོས་གསོལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་འོད་ནི་གསེར་རྟོག་ཚེ། །དེ་བཞིན་གཤེགས་པ་མཚུངས་པ་མེད་དེ་ལ། །མེ་ཏོག་གཅིག་ཅིག་དབུལ་བ་བྱས་ནས་ཀྱང་། །དང་པོར་བྱང་
ཆུབ་ཏུ་ནི་སེམས་བསྐྱེད་དོ། །བདེ་གཤེགས་དོན་གཟིགས་འཁོར་ལོས་སྒྱུར་རྒྱལ་ཚེ། །དེ་བཞིན་གཤེགས་པ་འོད་དཔག་མེད་མཛོད་ལ། །ཁང་པ་བརྩེགས་པ་སྟོང་སྙེད་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མར་མེ་སྤོས་འབྲུ་མར་འཚོངས་
བུར་གྱུར་ཚེ། །དེ་བཞིན་གཤེགས་པ་རྣམ་པར་རོལ་པར་སྣང་བ་གང་། །བྱེ་བ་དྲུག་ཅུའི་འཁོར་བཅས་དག་ལ་ཁྲུས་ཁང་གཅིག །ཕུལ་ནས་དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཐུ་ལྡན་གོས་འཚོང་གྱུར་པའི་ཚེ། །དེ་བཞིན་གཤེགས་པ་གྲགས་པ་རྒྱས་དེ་ལ། །
རས་བཅོས་ལེབ་ལེབ་ཕོ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྨན་པ་སྨན་པའི་བུར་གྱུར་ཚེ། །དེ་བཞིན་གཤེགས་པ་རྒྱལ་མཚན་བྲལ་དེ་ལ། །སྤོས་ཀྱི་རི་ལུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་དེས་པ་འབྲུ་མར་མཁན་གྱི་ཚེ། །དེ་བཞིན་གཤེགས་པ་འཕགས་འཇོམས་མཛད་དེ་ལ། །མར་མེ་ཁ་ཅིག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཛོད་སྤུ་ཕྲེང་རྒྱུད་མཁན་གྱི་ཚེ། །དེ་བཞིན་གཤེགས་པ་ཀུན་ཏུ་གཟིགས་
དེ་ལ། །ཨུད་པལ་དམར་པོ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བརྟན་ལྡན་སྟོབས་ཀྱི་འཁོར་ལོས་སྒྱུར་བའི་ཚེ། །དེ་བཞིན་གཤེགས་པ་གཞན་གྱིས་མི་ཐུབ་དེ་ལ་ནི། །རིན་པོ་ཆེ་ལས་བྱས་པའི་གདན་ཁྲི་གྲངས་བརྒྱད་ཅུ། །རྩ་བཞི་
ཕུལ་ནས་དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལྷ་དཔལ་རྒྱ་མཚོའི་ཚོང་པར་གྱུར་པའི་ཚེ། །དེ་བཞིན་གཤེགས་པ་གཟི་བརྗིད་ཕུང་པོའི་འོད་དེ་ལ། །ནོར་བུ་རིན་ཆེན་བླ་རེ་དཔག་ཚད་གཅིག་སྣང་བ། །ཕུལ་ནས་དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་

གཤེགས་གདུལ་དཀའ་ཤིང་འཚོང་གྱུར་པའི་ཚེ། །དེ་བཞིན་གཤེགས་པ་བརྟན་པར་གཤེགས་དེ་ལ། །ཚེམས་ཤིང་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཡོན་ཏན་རྒྱལ་མཚན་ཆུའི། །སྦྱིན་བདག་
གྱུར་ཚེ་བདེ་གཤེགས་ཡིད་འོང་གྲགས། །དེ་ལ་ཆུ་སྣོད་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྒྲ་གཅན་ཕྲེང་རྒྱུད་མཁན་བུའི་ཚེ། །དེ་བཞིན་གཤེགས་པ་མཐའ་ཡས་གཟུགས་དེ་ལ། །གསེར་གྱི་མཆིལ་ལྷམ་ཟུང་ཅིག་ཕུལ་ནས་
ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཚོགས་ཅན་ཁྲུས་པར་གྱུར་པའི་ཚེ། །དེ་བཞིན་གཤེགས་པ་ཐུགས་རབ་དང་བ་ལ། །ཁྲུས་ཀྱི་ཆལ་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཚངས་དབྱངས་
ཕྱུགས་རྫིར་གྱུར་པའི་ཚེ། །དེ་བཞིན་གཤེགས་པ་དབྱངས་སྙན་དང་པོར་མངོན་རྫོགས་པར། །སངས་རྒྱས་གྱུར་པའི་ཚེ་ན་དེ་ལ་ཕྱེ་བྲེ་གང་། །ཕུལ་ནས་དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཚིགས་བརྟན་འགྲོན་བུ་འཚོང་བའི་བུར། །གྱུར་ཚེ་བདེ་གཤེགས་མི་
གཡོར་གཤེགས་པ་ལ། །འགྲོན་བུ་སྤར་གང་གཏོར་དེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མི་འགྱིང་རྒྱལ་བུ་དགའ་འདོད་ཚེ། །དེ་བཞིན་གཤེགས་པ་བཀོད་པ་མཐའ་ཡས་ལ། །གླུ་དབྱངས་དག་གིས་མཆོད་པ་བྱས་ནས་ཀྱང་། །
དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འོད་མཛད་འཁོར་ལོ་སྒྱུར་རྒྱལ་ཚེ། །དེ་བཞིན་གཤེགས་པ་གཟི་བརྗིད་བརྩེགས་འོད་ལ། །ན་བཟའ་རིན་པོ་ཆེ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ལྷུན་པོ་ཆེན་
པོ་ཡིས། །དེ་བཞིན་གཤེགས་པ་བློ་གནས་དེ་ལ་ནི། །མེ་ཏོག་མྱ་ངན་འཚང་བ་བདུན་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྡོ་རྗེ་ལྷ་དབང་བརྒྱ་བྱིན་དུ། །གྱུར་ཚེ་དེ་བཞིན་གཤེགས་པ་བརྟན་པ་ལ། །མེ་ཏོག་མན་དཱ་ར་བའི་ཆར་ཕབ་ནས། །

དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སྡོམ་ཅན་འཛམ་གླིང་གི། །རྒྱལ་པོར་གྱུར་ཚེ་བདེ་གཤེགས་ཐར་དགྱེས་ལ། །གསེར་ལས་བྱས་པའི་བླ་རེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མི་བསྙེངས་རོལ་མོ་མཁན་
གྱུར་ཚེ། །དེ་བཞིན་གཤེགས་པ་མི་འཇིགས་སྦྱིན་དེ་ལ། །རོལ་མོའི་བཀུར་སྟིས་རྔ་ཆེན་བརྡུངས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་བློ་མཆོག་གྱུར་པའི་ཚེ། །དེ་བཞིན་གཤེགས་པ་བདུད་རྩི་མཛོད་དེ་ལ། །སྤོས་ཀྱིས་བསྒོས་པའི་ཕྲེང་
བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་པད་ལྡན་འཁྲུལ་འཁོར་མཁན་གྱུར་ཚེ། །དེ་བཞིན་གཤེགས་པ་ཀུན་ཏུ་གཟིགས་དེ་ལ། །ཁྲིའུ་བཟངས་གཅིག་ཅིག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་སྟོབས་བདེ་རྒྱལ་པོའི་སྨན་པའི་ཚེ། །དེ་བཞིན་གཤེགས་པ་བཞོན་པ་ཆེ་ལྡན་ལ། །སྐྱུ་རུ་ར་ཡི་འབྲས་བུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མེ་ཏོག་འོད་ཟེར་གསེར་མགར་གྱི། །བུར་གྱུར་ཚེ་ན་བདེ་གཤེགས་ཀུན་གཟིགས་ལ། །
རིན་པོ་ཆེ་ཡི་ཕྲེང་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཤེས་དགྱེས་བྱིས་པའི་རྒྱན་བྱེད་ཚེ། །དེ་བཞིན་གཤེགས་པ་ཡུལ་ཕྱོགས་ཀུན་མཆོད་ལ། །མིག་དང་བདུག་པ་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་གཟི་ཆེན་ཚོང་དཔོན་བུར་གྱུར་ཚེ། །དེ་བཞིན་གཤེགས་པ་འོད་རབ་དཔལ་དེ་ལ། །ན་བཟའི་བླ་རེ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཚངས་པ་བག་ཆོས་མཁན་གྱུར་ཚེ། །དེ་བཞིན་གཤེགས་པ་སྟོན་པ་བླ་མ་ལ། །ཤ་ཁ་
ར་ཡི་རི་ལུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འོད་དཔག་མེད་པ་གླ་མིའི་ཚེ། །དེ་བཞིན་གཤེགས་པ་བཀོད་པའི་འོད་དེ་ལ། །གདུགས་གཅིག་ཅིག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་

གཤེགས་པ་ཀླུ་སྦྱིན་ཕྲེང་རྒྱུད་ཚེ། །དེ་བཞིན་གཤེགས་པ་སེང་གེ་རྣམ་བསྒྱིངས་ལ། །མེ་ཏོག་དག་གི་ཆུན་པོ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བརྟན་གཤེགས་ནོར་བུ་མཁན་གྱུར་ཚེ། །དེ་བཞིན་གཤེགས་པ་ཡིད་གཉིས་སྤོང་དེ་ལ། །
རིན་པོ་ཆེ་ཡི་དྲ་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དོན་ཡོད་མཐོང་བ་ནད་པའི་གསོས་སྨན་ལ། །སྦྱོར་མཁན་བུར་གྱུར་ཚེ་ན་དགེ་སློང་དགེ་འདུན་དག །སྤྱན་དྲངས་ནད་སྨན་སྦྱར་ནས་བདེ་གཤེགས་ལེགས་མཐོང་ལ། །དང་པོ་ཁོ་ནར་བྱང་ཆུབ་ཏུ་ནི་
སེམས་བསྐྱེད་དོ། །བདེ་གཤེགས་བརྩོན་འགྲུས་སྦྱིན་པ་འཁོར་ལོས་སྒྱུར་རྒྱལ་ཚེ། །ཙན་དན་དམར་པོ་དག་ལས་གཙུག་ལག་ཁང་བརྒྱ་སྟོང་། །བྱས་ཏེ་རས་བཅོས་གཡོགས་ནས་དེ་བཞིན་གཤེགས་པ་པོ། །བདུད་རྩིའི་སྟབས་ལ་དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་བཟང་སྐྱོང་གིས་ནི་བདེ་གཤེགས་ཟླ་བའི་འོད། །ཉན་ཐོས་བཅས་པའི་དགེ་འདུན་འཁོར་བཅས་ཁྲི་ཕྲག་བཅུ། །ཞག་བདུན་བར་དུ་ཞལ་ཟས་རོ་ནི་བརྒྱ་ལྡན་པས། །ཚིམ་པར་མཛད་དེ་དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དགའ་བོ་རྩལ་ཆེན་བྲམ་ཟེའི་
བུར། །གྱུར་ཚེ་དེ་བཞིན་གཤེགས་པ་མཆོག་གྲགས་ལ། །ཡུ་བ་ནོར་བུས་སྤྲས་པའི་རྔ་ཡབ་གཅིག །ཕུལ་ནས་དང་པོར་བྱང་ཆུབ་སེམས་བསྐྱེད་དོ། །དེ་བཞིན་གཤེགས་པ་འཆི་མེད་རྒྱལ་པོ་ཡི། །ཕོ་ཉར་གྱུར་ཚེ་བདེ་གཤེགས་དབང་སྦས་ལ། །པན་ཙ་ལི་ཡི་འབྲས་བུ་
ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སེང་གེའི་རྒྱལ་མཚན་ཞིང་པའི་ཚེ། །དེ་བཞིན་གཤེགས་པ་ང་རོ་གསལ་དེ་ལ། །སྐྱུ་རུ་ར་ཡི་འབྲས་བུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྒྱལ་བ་
ཚལ་གྱི་ལས་བྱེད་ཚེ། །དེ་བཞིན་གཤེགས་པ་ཐོགས་མེད་འཁོར་ལོ་ལ། །ཨ་རུ་ར་ཡི་འབྲས་བུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཆོས་ལྡན་དཔའ་བོའི་ཚེ། །དེ་བཞིན་གཤེགས་པ་བདུད་རྩིའི་ང་རོ་ལ། །རྒྱལ་

མཚན་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཆོག་དགའ་རྒྱལ་པོ་སྤོས་འཚོང་ཚེ། །དེ་བཞིན་གཤེགས་པ་ཡེ་ཤེས་མཆོད་རྟེན་ལ། །ཕྱེ་མ་སྤར་གང་ཕུལ་ཏེ་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་ཁ་ལོ་སྒྱུར་བ་བྱིས་པའི་ཚེ། །དེ་བཞིན་གཤེགས་པ་གཟི་བརྗིད་རྫུ་འཕྲུལ་ལ། །པ་ལ་བ་ཏ་གསུམ་ཞིག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དགའ་གཤེགས་རྒྱལ་པོའི་བུར་གྱུར་ཚེ། །དེ་བཞིན་གཤེགས་པ་ཡོན་ཏན་རྒྱལ་པོ་ལ། །
དངུལ་གྱི་མེ་ཏོག་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཆུ་ལྷ་ཚོང་པའི་ཚེ། །དེ་བཞིན་གཤེགས་པ་ཁ་དོག་དཔག་མེད་ལ། །ལྷུང་བཟེད་སྦྲང་རྩིས་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་
ཡོན་ཏན་ལག་ནི་རྩེ་བའི་ཚེ། །དེ་བཞིན་གཤེགས་པ་སྟོབས་ཆེན་དེ་ལ་ནི། །འཆག་ས་ཁྲུ་བརྒྱད་ཁོར་ཡུག་བཀྲམ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤོས་གླང་སྤོས་འཚོང་བུར་གྱུར་ཚེ། །དེ་བཞིན་གཤེགས་པ་བཀོད་པ་རྣམ་གྲོལ་གྱི། །འཆག་ས་
སྤོས་ཀྱི་ཆུ་ཡིས་ཆག་ཆག་བཏབ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྣམ་གཟིགས་གོས་འཚོང་གྱུར་པའི་ཚེ། །དེ་བཞིན་གཤེགས་པ་གཟིགས་པ་སྒྲིབ་མེད་ལ། །མེ་ཏོག་གི་ནི་གདུགས་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་འབྲུག་སྒྲ་རྫ་མཁན་གྱུར་པའི་ཚེ། །དེ་བཞིན་གཤེགས་པ་སེང་གེའི་སྟབས་དེ་ལ། །སྤོས་དང་རིལ་བ་གཅིག་ཅིག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལེགས་སེམས་ཁྱེའུ་ལོ་གསུམ་ལོན་པའི་ཚེ། །དེ་བཞིན་གཤེགས་པ་ཀུན་ཏུ་རྣམ་
གཟིགས་ལ། །པད་མ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡིད་བཟང་ཚོང་དཔོན་བུར་གྱུར་ཚེ། །དེ་བཞིན་གཤེགས་པ་རྩལ་སྦྱིན་དེ་ལ་ནི། །སྣ་མའི་མེ་ཏོག་ཕྲེང་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་

དོ། །བདེ་གཤེགས་དྲི་མེད་ཐ་ག་པར་གྱུར་ཚེ། །དེ་བཞིན་གཤེགས་པ་ལེགས་མཐོང་དེ་ལ་ནི། །འབའ་ཤ་ཀ་གཅིག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཟླ་བ་གླང་ཆེན་འདུལ་བའི་ཚེ། །དེ་བཞིན་གཤེགས་པ་
གཟུགས་བཟང་དེ་ལ་ནི། །མེ་ཏོག་ཕྲེང་བ་ཁྲུ་གང་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གྲགས་ཆེན་གྲོང་ཁྱེར་རྟེན་པའི་ཚེ། །དེ་བཞིན་གཤེགས་པ་བློ་གྲོས་གྲགས་དེ་ལ། །མེ་ཏོག་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་
ཏུ་ནི་སེམས་བསྐྱེད་དོ། །བདེ་གཤེགས་གཙུག་ན་ནོར་བུ་ཁྱེའུ་ཡི་ཚེ། །དེ་བཞིན་གཤེགས་པ་རིན་ཆེན་བཀོད་དེ་ལ། །ས་རྡུལ་སྤར་གང་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དྲག་ཤུལ་ལྷའི་བུའི་ཚེ། །དེ་བཞིན་གཤེགས་
པ་སྤ་བའི་འོད་དེ་ལ། །ལྷ་ཡི་གཞལ་མེད་ཁང་གཅིག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སེང་སྟབས་གདུགས་མཁན་གྱུར་པའི་ཚེ། །དེ་བཞིན་གཤེགས་པ་ཐར་པར་བཞུད་དེ་ལ། །ཚ་བའི་དུས་ཚེ་ལོ་མའི་གདུགས་ཕུལ་ནས། །དང་
པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ལྗོན་པ་ཕྱུགས་རྫིའི་ཚེ། །དེ་བཞིན་གཤེགས་པ་ཡོན་ཏན་བཀོད་དེ་ལ། །ལམ་གྱི་ཤིང་དྲུང་དག་ཏུ་བེའུ་རས་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྣམ་རྒྱལ་བ་ལང་རྫི་ཡི་ཚེ། །དེ་བཞིན་
གཤེགས་པ་ངེས་པའི་བློ་དེ་ལ། །ལྷུང་བཟེད་འོ་མས་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཤེས་རབ་བརྩེགས་པ་དགེ་སློང་ཚེ། །དེ་བཞིན་གཤེགས་པ་ཡེ་ཤེས་ཏོག་དེ་ལ། །ཉིན་གཅིག་རངས་པར་ཆོས་ཀྱི་གདན་ཕུལ་
ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལེགས་གནས་ལྷམ་མཁན་གྱུར་པའི་ཚེ། །དེ་བཞིན་གཤེགས་པ་མི་གཡོའི་བློ་དེ་ལ། །མཆིལ་ལྷམ་རིམ་པ་གཅིག་པ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་

པ་བློ་གྲོས་ལས་བྱེད་ཚེ། །དེ་བཞིན་གཤེགས་པ་སྤྱོད་པའི་བློ་གྲོས་ལ། །རོ་དང་ལྡན་པའི་བཏུང་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡན་ལག་སྐྱེས་ནི་མི་འཛིན་ཚེ། །དེ་བཞིན་གཤེགས་པ་གཟུགས་བཟང་དེ་ལ་ནི། །ཁྲུས་རས་དག་ནི་དབུལ་
བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་བློ་མཐའ་ཡས་པ་ནི། །ལམ་སྟོན་གྱུར་ཚེ་བདེ་གཤེགས་བདེན་སྨྲ་ལ། །ཤིང་དྲུང་གནས་མལ་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་གཟུགས་
བཟང་སྡེ་དཔོན་ཚེ། །དེ་བཞིན་གཤེགས་པ་སྐད་དབྱངས་དེ་ལ་ནི། །མེ་ཏོག་ཨུད་པལ་ལྔ་ཞིག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཁྱེན་ལྡན་དགོན་གནས་དགེ་སློང་ཚེ། །དེ་བཞིན་གཤེགས་པ་ལེགས་པར་མཐོང་དེ་ཡི། །འཆག་ས་བྱི་དོར་
དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འོད་ཟེར་ཤིང་རྟ་མཁན་གྱུར་ཚེ། །དེ་བཞིན་གཤེགས་པ་གཟི་བརྗིད་མཐའ་ཡས་ལ། །ཉལ་ཁྲི་སྟོང་རི་བ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་
བརྟུལ་ཞུགས་བརྟན་པ་ནི། །ཕྲེང་རྒྱུད་མཁན་ཚེ་བདེ་གཤེགས་ཡིད་འོང་སེམས། །དེ་ལ་མེ་ཏོག་བླ་རེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་བཀྲ་ཤིས་ཤིང་ཐུན་ཚེ། །དེ་བཞིན་གཤེགས་པ་གྲགས་པའི་ཤིང་རྟ་ལ། །བུ་ཡུག་ལངས་ཚེ་
སྣང་མ་བལྟམ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་བདེན་ཏོག་ཁྲུས་པའི་ཚེ། །དེ་བཞིན་གཤེགས་པ་ཡོན་ཏན་མེ་ཏོག་ལ། །ཁ་གདོང་བཀྲུ་བ་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་པད་མ་ཚོང་
དཔོན་བུར་གྱུར་ཚེ། །དེ་བཞིན་གཤེགས་པ་མེ་ཏོག་འོད་ཟེར་ལ། །པད་མ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སྲེད་མེད་བུ་ནི་སྤོས་འཚོང་ཚེ། །དེ་བཞིན་གཤེགས་པ་གདུལ་བར་དཀའ་ཞེས་བྱ་བ་དེའི། །ཁང་པ་བརྩེགས་

པ་ཙན་དན་དམར་པོས་བྱུགས་ནས་ཀྱང་། །དང་པོ་ཁོ་ནར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ལག་བཟངས་རྒྱལ་པོའི་ཕོ་ཉའི་ཚེ། །དེ་བཞིན་གཤེགས་པ་དབྱངས་སྙན་སྒྲོགས་པར་མཛད་པ་གང་། །འཁོར་བཅས་བྱེ་བ་དག་ལ་ཆོས་གོས་གསུམ་
ཕུལ་ནས། །དང་པོ་ཁོ་ནར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཡེ་ཤེས་འབྱུང་གནས་ནི། །ཚན་པོ་ཆེར་གྱུར་གཡུལ་ངོར་ཆས་པའི་ཚེ། །བདེ་གཤེགས་ལེགས་མཐོང་ལ་ནི་རྒྱལ་མཚན་གཅིག །ཕུལ་ནས་དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་
གཤེགས་པ་འོད་འཕྲོ་སྨན་པའི་ཚེ། །དེ་བཞིན་གཤེགས་པ་སྐྱེ་བོའི་མཆོད་རྟེན་ལ། །སྤོས་ཀྱི་རེང་བུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཚངས་བྱིན་ལམ་སྟོན་ཚེ། །དེ་བཞིན་གཤེགས་པ་འོད་ཆེན་ཞེས་བྱ་བ། །དེ་ལ་ལམ་
དག་མཚོན་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་འབྱུང་གནས་མཉན་པའི་ཚེ། །དེ་བཞིན་གཤེགས་པ་བརྫི་བ་མེད་གཤེགས་དེ། །ཉན་ཐོས་འཁོར་བཅས་བྱེ་བ་བསྒྲལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་ལྷ་ཡི་མེ་ཏོག་ནོར་བུ་མཁན། །གྱུར་ཚེ་དེ་བཞིན་གཤེགས་པ་བློ་གསལ་ལ། །ནོར་བུ་རིན་ཆེན་སྤྲས་པའི་གདུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དོན་ལེགས་སེམས་པ་རྒྱལ་བུའི་ཚེ། །དེ་བཞིན་གཤེགས་པ་གསུང་སྙན་དེ་ལ་
ནི། །ནོར་བུ་རིན་ཆེན་སྤྲས་པའི་བླ་རེ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཆོས་ཀྱི་དབང་ཕྱུག་ཤིང་མཁན་གྱི། །བུར་གྱུར་ཚེ་ན་བདེ་གཤེགས་སྐར་འོད་ཀྱི། །གཤེགས་ཟམ་དག་ནི་བཤམ་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །
བདེ་གཤེགས་བློ་གྲགས་ཀུན་དགའ་ར་སྲུངས་ཚེ། །དེ་བཞིན་གཤེགས་པ་ཟླ་བའི་སྒྲོན་དེ་ལ། །མོན་སྲན་གྲེའུ་ཡི་མེ་ཏོག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤོབས་བརྩེགས་ཚོང་པའི་བུར་གྱུར་ཚེ། །དེ་བཞིན་གཤེགས་པ་ཡེ་ཤེས་ཏོག་དེ་

ལ། །སྦྱིན་པ་ཕུན་སུམ་ཚོགས་པས་སྤྱན་དྲངས་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རྡོ་རྗེའི་རྒྱལ་མཚན་ནི། །ཚལ་གྱི་ལས་བྱེད་ཚེ་ན་དེ་བཞིན་གཤེགས། །བསོད་ནམས་བཀོད་དེ་ལ་ནི་ཨ་མྲ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་
བཞིན་གཤེགས་པ་ཕན་བཞེད་གྲོང་དཔོན་བུར་གྱུར་ཚེ། །དེ་བཞིན་གཤེགས་པ་བསོད་ནམས་འོད་ཅེས་བྱ་བ་ལས། །ཉིན་གཅིག་སྲོག་གཅོད་སྤོང་བའི་བསླབ་གཞི་མནོས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྣམ་རོལ་གྲོང་རྡལ་བྱིས་པའི་ཚེ། །དེ་
བཞིན་གཤེགས་པ་ཡེ་ཤེས་འབྱུང་གནས་ལ། །ལྷུང་བཟེད་སྦྲང་རྩིས་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མུན་དང་བྲལ་བ་ཡིས། །དེ་བཞིན་གཤེགས་པ་སྲིད་མཐའ་གཟིགས་དེ་ལ། །མོན་སྲན་གྲེའུ་འབྲུ་མར་མེ་བཞག་ཕུལ་
ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྒྲ་གཅན་ལྷ་ནི་གྲོང་རྟེན་ཚེ། །དེ་བཞིན་གཤེགས་པ་དགའ་བར་གཟིགས་དེ་ལ། །ཧ་སྟ་བ་ཤ་ཀ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རི་བོའི་རྒྱལ་མཚན་ཚོགས་ལྡན་
གྱི། །ཁྱེའུར་གྱུར་ཚེ་བདེ་གཤེགས་མཐའ་ཡས་འོད། །དེ་ལ་མེ་ཏོག་ཆུན་པོ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཚོགས་ཅན་འོད་ནི་ཕྲེང་རྒྱུད་ཚེ། །དེ་བཞིན་གཤེགས་པ་ཡིད་འོང་དབྱངས་དེ་ལ། །མེ་ཏོག་ལས་བྱས་བླ་རེ་ཕུལ་ནས་ཀྱང་། །
དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་སྙིང་པོ་ཁྲུས་པའི་ཚེ། །དེ་བཞིན་གཤེགས་པ་སྣ་ཚོགས་གསུང་བ་ལ། །ཁ་གདོང་བཀྲུ་བ་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཤིན་ཏུ་མཐོར་གཤེགས་གྲོང་ཁྱེར་
རྟེན་པའི་ཚེ། །དེ་བཞིན་གཤེགས་པ་ཚུལ་ཁྲིམས་སྟབས་དེ་གྲོང་ཁྱེར་དུ། །གཤེགས་པའི་ཚེ་ན་གདན་དག་བཤམས་ཏེ་བཏིང་ནས་ཀྱང་། །དང་པོ་ཁོ་ནར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྐར་རྒྱལ་ད་ནུར་མཁན་གྱི་ཚེ། །དེ་བཞིན་གཤེགས་པ་ཡུལ་འཁོར་ལྷ་

དེ་ལ། །ཞལ་ཟས་བཅའ་བ་རྣམས་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རུ་རིངས་གཞན་གྱི་ཁོལ་གྱུར་ཚེ། །དེ་བཞིན་གཤེགས་པ་གཟི་བརྗིད་དགའ་དེ་ལ། །ལྷུང་བཟེད་འཇམས་ཀྱིས་བཀང་སྟེ་ཕུལ་ནས་ཀྱང་། །དང་པོར་བྱང་
ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་གྲགས་པ་བསོད་སྙོམས་ཚེ། །དེ་བཞིན་གཤེགས་པ་འོད་ཟེར་མཐའ་ཡས་ལ། །གོས་ཀྱི་རས་མ་སོར་བཞི་ཙམ་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཉི་ཟླས་བདེ་གཤེགས་སྲིད་སྦྱིན་
དེ། །འཁོར་བཅས་བྱེ་བ་སུམ་ཅུ་དག་ལ་གཙུག་ལག་ཁང་། །བཟང་པོར་ལོངས་སྤྱོད་ཕྱིར་དང་དཔག་ཚད་བཅུ་པའི་གོས། །གདིང་བ་ཕུལ་ནས་དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཉི་འོད་གཞན་གྱི་ཁོལ་གྱུར་ཚེ། །དེ་བཞིན་གཤེགས་པ་ལྷུན་པོ་ཆེ་དེ་ལ། །
ལྕགས་ཀྱི་སྣོད་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྐར་མཁན་ཚོང་པའི་བུར་གྱུར་ཚེ། །དེ་བཞིན་གཤེགས་པ་ཕྱོགས་གསལ་དེ་ལ་ནི། །ནོར་བུ་རིན་ཆེན་དཔག་ཚད་གཅིག་འོད་ལྡན། །ཕུལ་ནས་དང་པོར་བྱང་ཆུབ་ཏུ་ནི་
སེམས་བསྐྱེད་དོ། །དེ་བཞིན་གཤེགས་པ་སེང་ཏོག་དེད་དཔོན་གྱི། །བུར་གྱུར་ཚེ་ན་དེ་བཞིན་གཤེགས་པ་པོ། །བློ་གྲོས་བཟང་ལ་ཕྲེང་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དུས་མཁྱེན་རྒྱལ་པོ་ནི། །སྙན་དངགས་མཁན་ཚེ་བདེ་
གཤེགས་ཙམ་མཆོག་ལ། །ཚིགས་སུ་བཅད་པའི་དབྱངས་ཀྱིས་བསྟོད་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དཔལ་གྱི་སྙིང་པོ་ཡིས། །གཞན་གྱི་དགེ་འདུན་བཤོས་གསོལ་ཡི་རང་ནས། །དེ་བཞིན་གཤེགས་པ་བཀོད་པ་ཆེན་པོ་ལ། །དང་
པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྲིད་མཐའ་གཟིགས་པ་ཚལ་དག་གི། །ལས་བྱེད་ཚེ་ན་དེ་བཞིན་གཤེགས་པ་པོ། །ཁྱད་པར་སེམས་ལ་ཆབ་གཙང་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གློག་འོད་རྔོན་པའི་བུར་གྱུར་ཚེ། །དེ་

བཞིན་གཤེགས་པ་དཔའ་བོའི་སེམས་དེ་ལ། །རྩྭ་ཡི་སྟན་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སེང་གེས་བྱིན་པ་ཁྱིམ་བདག་གི། །བུར་གྱུར་ཚེ་ན་བདེ་གཤེགས་པད་སྙིང་ལ། །སྣ་མའི་མེ་ཏོག་ཡོད་པའི་ས་གཞི་ཕུལ། །དང་པོར་
བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གཞན་གྱིས་མི་ཐུབ་རྒྱལ་མཚན་གྱིས། །འཇིགས་བཅས་ལམ་དུ་འདྲོན་པའི་བསེལ་བྱས་ནས། །དེ་བཞིན་གཤེགས་པ་སྲེད་མེད་བུ་དེ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཆོག་དགའ་གྲགས་པ་བུ་རམ་ཤིང་། །
འཚིར་གྱུར་ཚེ་ན་དེ་བཞིན་གཤེགས་པ་པོ། །བློ་རྣམ་འབྱེད་ལ་བུ་རམ་བཅུད་ཁུ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བརྩོན་འགྲུས་བརྟན་པ་བྲམ་ཟེའི་བུར། །གྱུར་ཚེ་བདེ་གཤེགས་འོད་ཟེར་མཐའ་ཡས་ལ། །ཁྲུས་རྐྱེན་འདག་པའི་ཚལ་དག་ཕུལ་ནས་ཀྱང་། །
དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གྲགས་རྫོགས་ཆང་འཚོང་བུར་གྱུར་ཚེ། །དེ་བཞིན་གཤེགས་པ་སེང་གེའི་ང་རོ་ལ། །ལོ་མའི་སྣོད་ནས་ཆུ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བསྙེངས་བྲལ་རྒྱལ་པོའི་བུར་གྱུར་ཚེ། །
དེ་བཞིན་གཤེགས་པ་རྒྱལ་པོའི་ང་རོ་ལ། །ལོ་མའི་སྣོད་ནས་བར་ཤའི་མེ་ཏོག་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཆོད་འོས་ལྷ་ནི་བློན་མཆོག་གྱུར་པའི་ཚེ། །བདེ་གཤེགས་ཡིད་འོང་བློ་འོད་དག་ལ་དཔག་ཚད་གཅིག །ཁོར་ཡུག་ཙམ་གྱི་སྐྱེད་
མོས་ཚལ་ཕུལ་ཨ་ག་རུའི། །བདུག་པས་བདུགས་ཏེ་དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྒྲོན་ཆེན་མི་བཀྲེན་གྱུར་པའི་ཚེ། །དེ་བཞིན་གཤེགས་པ་བསོད་ནམས་འོད་དེ་ལ། །རྩྭ་ཡི་སྒྲོན་མ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་
དོ། །བདེ་གཤེགས་འཇིག་རྟེན་འོད་ནི་ལྷའི་བུའི་ཚེ། །དེ་བཞིན་གཤེགས་པ་ཟླ་བའི་འོད་དེ་ལ། །མེ་ཏོག་མན་དཱ་ར་བའི་གདུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤོས་དྲི་ཞིམ་པ་གྱད་གྱུར་ཚེ། །དེ་བཞིན་གཤེགས་པ་ཡན་ལག་མཛེས་དེ་

ལ། །ཁྲུས་རས་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་མཆོག་འཛིན་སྨན་པའི་ཚེ། །དེ་བཞིན་གཤེགས་པ་རྙོག་པ་མེད་དོན་ལ། །བདུག་པ་དང་ནི་དར་ཡུག་ཕུལ་ནས་ཀྱང་། །དང་པོར་བྱང་ཆུབ་
ཏུ་ནི་སེམས་བསྐྱེད་དོ། །བདེ་གཤེགས་མུན་དད་རྣམ་བྲལ་རྒྱལ་པོ་ཡི། །མདུན་འདོན་བུར་གྱུར་ཚེ་ན་དེ་བཞིན་གཤེགས། །དགྲ་བཅོམ་གཟི་ལ་མུ་ཏིག་རྒྱན་ཕྲེང་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སེང་གེའི་འགྲམ་པ་ཡིས། །དེ་བཞིན་
གཤེགས་པ་དོན་གྲུབ་བློ་དེ་ལ། །འདམ་རྫབ་དག་ཏུ་ཤིང་ཟམ་བཙུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་གྲགས་པ་སྤོས་འཚོང་གི། །བུར་གྱུར་ཚེ་ན་བདེ་གཤེགས་དབྱངས་མངའ་ལ། །ཕྱེ་མ་སྤར་གང་དག་ནི་གཏོར་ཕུལ་
ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྐྱོན་རབ་ཞི་བ་རྒྱལ་བུའི་ཚེ། །གསད་བྱ་བཙོན་དག་འབྲོས་སུ་བཏང་ནས་ཀྱང་། །དེ་བཞིན་གཤེགས་པ་ས་མཆོག་དེ་ལ་ནི། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བདུད་རྩི་འཆང་བ་གྲོང་
དཔོན་ཚེ། །དེ་བཞིན་གཤེགས་པ་འོད་འབར་དེ་ལ་ནི། །བཻ་དཱུརྱ་ཡི་གདུགས་སྟོང་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མི་ཟླ་ཕྲེང་རྒྱུད་མཁན་བུའི་ཚེ། །དེ་བཞིན་གཤེགས་པ་ངེས་པར་སེམས་དེ་ལ། །ཨུད་པ་ལ་ཡི་ཕྲེང་བ་ཕུལ་ནས་ཀྱང་། །
དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཤིན་ཏུ་གཟིགས་པ་ནི། །འདུན་དཔོན་ཚེ་ན་དེ་བཞིན་གཤེགས་པ་པོ། །བདེན་པར་གསུང་བ་དེ་ལ་ཕྲེང་བ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རབ་བརྒྱན་གྲོང་ཁྱེར་ལ་རྟེན་པའི། །བུར་གྱུར་ཚེ་
ན་བདེ་གཤེགས་མདངས་འོད་ཀྱི། །གྲོང་ཁྱེར་སྒོ་དག་མཛེས་པར་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ནོར་འོད་བརྒྱ་བྱིན་གྱུར་པའི་ཚེ། །བདེ་གཤེགས་གཟི་བརྗིད་མེ་ཏོག་རྒྱས་པ་ལ། །དཔག་ཚད་ཁོར་ཡུག་མེ་ཏོག་ཆར་ཕབ་ནས། །དང་པོར་

བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཆོས་ཀྱི་འབྱུང་གནས་ཀྱིས། །བདེ་གཤེགས་གྲགས་ཏོག་ཤེས་རབ་ཕ་རོལ་ཕྱིན། །གསུང་ཚེ་ལེགས་གསུངས་ཞེས་ནི་ཡི་རང་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དོན་ངེས་ལྡན་པ་ཐ་ག་པར། །
གྱུར་ཚེ་བདེ་གཤེགས་ཡོན་ཏན་གསལ་བ་ལ། །རས་ཀྱི་ཁ་ཚར་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཚེམས་སྦྱིན་བློ་ཆེན་བུར་གྱུར་ཚེ། །དེ་བཞིན་གཤེགས་པ་ཆོས་ཀྱི་སྒྲོན་དེ་ལ། །བསིལ་ཡབ་དག་ནི་དབུལ་བ་བྱས་ནས་ཀྱང་། །དང་
པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་འབྱུང་གནས་གཞུ་མཁན་ཚེ། །དེ་བཞིན་གཤེགས་པ་གསལ་རབ་དཔལ་དེ་ལ། །མེ་ཏོག་སྙིམ་པ་བཀང་སྟེ་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྐྱེ་དབང་མཚུངས་པ་རྫ་མཁན་
ཚེ། །དེ་བཞིན་གཤེགས་པ་ཞལ་སྡུག་སྡེ་བདག་ལ། །སྣོད་དག་ཆུ་ཡིས་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྟབས་གཤེགས་ཞིང་པའི་བུར་གྱུར་ཚེ། །དེ་བཞིན་གཤེགས་པ་སེང་གེའི་སྟབས་བཞུད་ལ། །ཟམ་སྟེགས་དག་ནི་
གཟུགས་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བློ་གནས་ཤིང་སྲུངས་བུར་གྱུར་ཚེ། །དེ་བཞིན་གཤེགས་པ་སྐྱེ་བོའི་མཆོད་རྟེན་ལ། །སེའུ་འབྲུ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་
གདུགས་མཛེས་བློན་པོའི་བུར་གྱུར་ཚེ། །དེ་བཞིན་གཤེགས་པ་རྒྱ་མཚོའི་བློ་དེ་ལ། །ཙམ་པའི་མེ་ཏོག་ཕྲེང་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་གཙོ་བོ་གསེར་མགར་ཚེ། །དེ་བཞིན་གཤེགས་པ་པད་མའི་སྙིང་པོ་ལ། །
བདུག་པས་བདུགས་པའི་མེ་ཏོག་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཤིན་ཏུ་འཕགས་དཔལ་སྤོས་འཚོང་བུར། །གྱུར་ཚེ་དེ་བཞིན་གཤེགས་པ་གདུགས་སྡེ་ཡི། །འཆག་ས་སྤོས་ཆུས་ཆག་ཆག་བཏབ་ནས་ཀྱང་། །དང་

པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སེང་གེའི་སྒྲ་ནི་རྔ་མཁན་ཚེ། །དེ་བཞིན་གཤེགས་པ་སཱ་ལའི་རྒྱལ་པོ་ལ། །རྔ་བོ་ཆེ་དག་བརྡུང་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྣམ་རོལ་ལྡན་པ་དུང་འབུད་མཁན། །
གྱུར་ཚེ་བདེ་གཤེགས་ཉི་མའི་སྙིང་པོ་དེ། །གྲོང་ཁྱེར་གཤེགས་ཚེ་དུང་དག་བུས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ།། །།འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་ཉི་ཤུ་བཞི་པ། དེ་བཞིན་གཤེགས་པ་
ཀླུ་འོད་ཟླ་བའི་ཚེ། །དེ་བཞིན་གཤེགས་པ་བྱང་ཆུབ་དགའ་དེ་ལ། །རྔ་བོ་ཆེ་དག་བརྡུང་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མེ་ཏོག་རི་བོ་གར་མཁན་བུར། །གྱུར་ཚེ་བདེ་གཤེགས་དབང་པོ་ཞི་དེ་ཡི། །སྤྱན་སྔར་བྲོ་གར་དག་གིས་མཆོད་
ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཀླུ་དགའ་གར་མཁན་བུར་གྱུར་ཚེ། །དེ་བཞིན་གཤེགས་པ་ཉི་མའི་འོད་དེ་ལ། །རོལ་མོའི་སྒྲ་དག་བསྒྲགས་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤོས་ཀྱི་དབང་ཕྱུག་
རྒྱལ་པོ་ཡི། །སྲས་མོར་གྱུར་ཚེ་དེ་བཞིན་གཤེགས་པ་པོ། །པད་དཀར་སྤོས་ལ་མུ་ཏིག་རྒྱན་ཕྲེང་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཤིན་ཏུ་གྲགས་པ་ཚོང་དཔོན་གྱི། །ཆུང་མར་གྱུར་ཚེ་དེ་བཞིན་གཤེགས་པ་པོ། །ལྷུན་པོའི་འོད་ཟེར་སྤྱི་བོར་བླ་རེ་
ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྟོབས་ལྷ་གྲོང་ཁྱེར་རྟེན་པའི་ཚེ། །དེ་བཞིན་གཤེགས་པ་ཟླ་བའི་ཞལ་དེ་ལ། །བཤོས་དྲོན་ལྷུང་བཟེད་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཡོན་ཏན་
ཕྲེང་ལྡན་གྱིས། །དེ་བཞིན་གཤེགས་པ་བསྒྱིངས་ལྡན་བཞུད་དེ་ལ། །སངས་རྒྱས་ཕྱག་འཚལ་ཐལ་མོ་ལན་གསུམ་སྦྱར། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཀླུ་ལག་གྲོང་ཁྱེར་གྱི། །སྒོ་སྲུངས་ཚེ་ན་ཕྱག་དར་བྱས་ནས་ཀྱང་། །དེ་བཞིན་

གཤེགས་པ་ཕྱོགས་རྣམས་ལྟ་དེ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མིག་བརྒྱན་རྒྱལ་བུའི་ཚེ། །དེ་བཞིན་གཤེགས་པ་ཆོས་ཀྱི་འོད་དེ་ལ། །ཆུ་དང་སྐྱུ་རུ་ར་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་
ཚུལ་ཁྲིམས་གསལ་དེ་སྔ་དྲོ་ཞིག །དེ་བཞིན་གཤེགས་པ་ལེགས་པར་སྦྱངས་པའི་བློས། །དགའ་བས་སངས་རྒྱས་རྗེས་སུ་དྲན་བྱས་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཟིལ་གནོན་ཡེ་ཤེས་ཀྱིས། །ངན་འགྲོར་འགྲོ་བ་ཚུལ་ཁྲིམས་ལ་
བཀོད་ནས། །དེ་བཞིན་གཤེགས་པ་མཐའ་ཡས་བློ་དེ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཐའ་ཡས་སྤྱན་ནི་གོས་འཚོང་ཚེ། །དེ་བཞིན་གཤེགས་པ་མཐའ་ཡས་གཟུགས་དེ་ལ། །རས་བཅོས་བླ་རེ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་
ནི་སེམས་བསྐྱེད་དོ། །བདེ་གཤེགས་བདེན་གསུང་ཁྱིམ་བདག་བུར་གྱུར་ཚེ། །དེ་བཞིན་གཤེགས་པ་བརྩོན་འགྲུས་བརྟན་དེ་ལ། །མེ་ཏོག་དག་ལས་བྱས་པའི་གདུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཉི་འོད་བཅའ་བ་མཁན་བུའི་ཚེ། །
དེ་བཞིན་གཤེགས་པ་ལྷ་ཡིས་མཆོད་དེ་ལ། །ལ་དུ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དེས་བློ་བཟོ་མཁན་ཚེ། །དེ་བཞིན་གཤེགས་པ་ཀུན་ནས་བློ་དེ་ལ། །གདིང་བ་དག་ནི་དབུལ་བ་བྱས་ནས་ཀྱང་། །དང་པོར་
བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཐའ་ཡས་གཟུགས་ནི་ཤིང་རྟ་མཁན། །གྱུར་ཚེ་དེ་བཞིན་གཤེགས་པ་འོད་ཞི་ལ། །པ་ལ་ཤི་ཀ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྣམ་པར་སྣང་མཛད་ཁར་བ་མཁན། །གྱུར་ཚེ་
བདེ་གཤེགས་མི་ཡི་གཟི་བྱིན་ལ། །མེ་ལོང་གཅིག་ཅིག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་ཏོག་ནི་ནོར་བུ་མཁན་གྱུར་ཚེ། །དེ་བཞིན་གཤེགས་པ་བསོད་ནམས་སྟེགས་བཟང་ལ། །ནོར་བུ་དག་ནི་དབུལ་བ་བྱས་ནས་ཀྱང་། །

དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཐེ་ཙོམ་སྤངས་པ་རྒྱལ་པོ་ཡི། །བཙུན་མོར་གྱུར་ཚེ་བདེ་གཤེགས་བརྩོན་བརྟན་ལ། །མེ་ཏོག་སྐྱེད་མོས་ཚལ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འཇིག་རྟེན་
འདས་པ་མ་མི་ཁར། །གྱུར་ཚེ་བདེ་གཤེགས་ཐུབ་པར་གྲགས་དེ་ལ། །དབུ་ཞུ་གཅིག་ཅིག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དོན་ཡོད་རྣམ་གནོན་མི་མཇེད་བདག །ཚངས་ཚེ་བདེ་གཤེགས་གྲགས་པ་རྒྱལ་མཚན་ལ། །ཆོས་
ཀྱི་འཁོར་ལོ་བསྐོར་བར་གསོལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རྟོགས་པར་མཛད་པ་པོས། །དེ་བཞིན་གཤེགས་པ་དགྲ་བཅོམ་འོད་དེ་ལ། །སྤོས་ཀྱི་རི་ལུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་མེ་ཏོག་རྒྱལ་མཚན་རྒྱལ་བུའི་ཚེ། །དེ་བཞིན་གཤེགས་པ་ཀུན་ནས་གསལ་དེ་ལ། །རྩྭ་ཡིས་བཀབ་པའི་ཁང་བཟངས་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རི་དབང་རྒྱལ་པོ་འདྲེག་མཁན་ཚེ། །དེ་བཞིན་གཤེགས་པ་གཟི་བརྗིད་
ཆེ་དེ་ཡི། །དབུ་སྐྲ་ལེགས་པར་བྲེག་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གཟི་བརྗིད་ཆེན་པོ་འབྲུ་མར་མཁན། །གྱུར་ཚེ་བདེ་གཤེགས་དགྲ་བཅོམ་མཆོད་འོས་ཀྱི། །གཙུག་ལག་ཁང་དུ་སྤོས་བསྒོས་འབྲུ་མར་ཕུལ། །དང་པོར་བྱང་ཆུབ་ཏུ་ནི་
སེམས་བསྐྱེད་དོ། །བདེ་གཤེགས་དོན་མཛད་གཟིགས་པ་ཏ་ལ་བའི་ཚེ། །དེ་བཞིན་གཤེགས་པ་དཔལ་གྱི་མཆོག་དེ་ལ། །ལྷང་ཚེར་ལེབ་ལེབ་པོ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གྲགས་པ་མཐའ་ཡས་འཁོར་ལོས་སྒྱུར་རྒྱལ་ཚེ། །
དེ་བཞིན་གཤེགས་པ་དོན་གྲུབ་སེམས་དཔའ་དེ་ལ་ནི། །འཛམ་བུའི་ཆུ་བོའི་གསེར་གྱི་གདུགས་སྟོང་ཕུལ་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རིན་ཆེན་ལྷ་ནི་འཛམ་གླིང་གི། །རྒྱལ་པོར་གྱུར་ཚེ་དེ་བཞིན་གཤེགས་པ་དགའས་མཆོད་ལ། །

འབྲས་བུའི་སྐྱེད་མོས་ཚལ་དག་དབུལ་བ་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དོན་གནས་མཁྱེན་པ་ཆང་འཚོང་གི། །བུར་གྱུར་ཚེ་ན་དེ་བཞིན་གཤེགས་པ་ཀུན་ཏུ་སྦེད། །སྲང་དུ་གཤེགས་ཚེ་ཐལ་མོ་སྦྱར་ཏེ་ཕྱག་བྱས་ནས། །དང་པོ་
ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་བློ་རྫོགས་རྒྱལ་བུའི་ཚེ། །དེ་བཞིན་གཤེགས་པ་རབ་ཏུ་དང་བ་ལ། །མེ་ཏོག་དག་ལས་བྱས་པའི་གདུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མྱ་ངན་མེད་པ་དཔའ་བོའི་ཚེ། །དེ་བཞིན་
གཤེགས་པ་བློ་གྲོས་སེམས་པ་དེ། །འཇིགས་པ་མེད་པའི་ཚུལ་གྱིས་སྤྱན་དྲངས་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དྲི་མ་བྲལ་བ་ཡིས། །སེམས་ཅན་ཀུན་ལ་ཡུད་ཙམ་བྱམས་བསྒོམས་ནས། །དེ་བཞིན་གཤེགས་པ་ངེས་བྱུང་བློ་དེ་ལ། །དང་
པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཚངས་ལྷ་ཤིང་སྲུངས་ཚེ། །དེ་བཞིན་གཤེགས་པ་ལྷུན་པོའི་དབྱངས་དེ་ལ། །བུ་རམ་ཤིང་གི་སྡོང་བུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ས་ཡི་དབང་ཕྱུག་ནི། །དགེ་
སློང་གྱུར་ཚེ་དེ་བཞིན་གཤེགས་པ་པོ། །སྣ་ཚོགས་གསུང་བའི་ཆོས་གདན་བཏིང་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མེ་ཏོག་སྤྱན་ནི་རྒྱལ་པོ་ཡི། །མིར་གྱུར་ཚེ་ན་བདེ་གཤེགས་འབྲུག་སྒྲ་ལ། །ཨུད་པལ་དམར་པོ་དག་ནི་ཕུལ་ནས་ཀྱང་། །དང་པོར་
བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྣམ་འབྱེས་སྐུ་ནི་བཙོ་བླག་མཁན། །གྱུར་ཚེ་བདེ་གཤེགས་འོད་ཆེན་ཕུང་པོ་ཡི། །ན་བཟའ་དག་ནི་བཀྲུ་བཤལ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཆོས་འོད་ཀྱིས་ནི་གྲོང་དག་དང་། །
ཡུལ་འཁོར་རྣམས་སུ་ཕ་རོལ་ཕྱིན་དྲུག་སྒྲ་བསྒྲགས་ནས། །དེ་བཞིན་གཤེགས་པ་དཔལ་ནི་བརྩེགས་པ་དེ་ལ་ཡང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཀུན་གཟིགས་སྟོབས་ཀྱི་འཁོར་ལོས་སྒྱུར་བའི་ཚེ། །གཙུག་ལག་ཁང་མཆོག་བྱེ་བ་དྲུག་ཅུ་བྱེད་

བཅུག་ནས། །དེ་བཞིན་གཤེགས་པ་མྱ་ངན་མེད་པར་དགའ་དེ་ལ། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་འོད་གསལ་ཕྱག་དར་པར། །གྱུར་ཚེ་བདེ་གཤེགས་ཡུལ་འཁོར་ལྷ་དེ་ལ། །རྡོ་ལེབ་གདན་དག་དབུལ་བ་བྱས་ནས་ཀྱང་། །
དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཟླ་ཞལ་བྲམ་ཟེའི་བུར་གྱུར་ཚེ། །དེ་བཞིན་གཤེགས་པ་སེང་གེ་དགའ་བའི་དབྱངས་དེ་ལ། །ཀན་ཏ་ར་ཡི་མེ་ཏོག་དག་ནི་གཏོར་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་འོད་ནི་དེད་
དཔོན་ཚེ། །དེ་བཞིན་གཤེགས་པ་འོད་མཐའ་ཡས་དེ་ལ། །རིན་པོ་ཆེ་ཡི་སྒྲོན་མ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་ཏོག་ནི་ལྕགས་མགར་ཚེ། །དེ་བཞིན་གཤེགས་པ་མཐོང་ན་དགའ་དེ་ལ། །ལྗགས་བཞར་དག་ནི་དབུལ་བ་བྱས་ནས་ཀྱང་། །
དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་གྲགས་བླ་ཆང་ཚོང་ཚེ། །དེ་བཞིན་གཤེགས་པ་སྒྲོན་མའི་རྒྱལ་པོ་ལ། །འཛམ་བུའི་རོ་བྲོ་བ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འོད་བྱེད་ཚོང་དཔོན་བུར་གྱུར་ཚེ། །དེ་བཞིན་གཤེགས་
པ་དཔལ་གྱི་ཏོག་དེ་ལ། །མུ་ཤི་ཀག་ཤའི་མེ་ཏོག་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གཟི་བརྗིད་དཔག་མེད་ཕྲེང་རྒྱུད་ཚེ། །དེ་བཞིན་གཤེགས་པ་ཕྱོགས་སུ་རྣམ་གྲགས་ལ། །པད་མ་འདབ་བརྒྱ་པ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་
སེམས་བསྐྱེད་དོ། །དེ་བཞིན་གཤེགས་པ་དུས་མཁྱེན་གོས་འཚོང་ཚེ། །དེ་བཞིན་གཤེགས་པ་སྤྱན་སྡུག་དེ་ལ་ནི། །རས་ཡུག་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སེང་གེའི་སྐུ་ནི་སྤོས་འཚོང་ཚེ། །དེ་བཞིན་གཤེགས་པ་ཟླ་བའི་ཏོག་དེ་ལ། །སྤོས་ཀྱི་ཕུར་
མ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཁས་བློ་ཚོང་དཔོན་ཁོལ་པོའི་ཚེ། །དེ་བཞིན་གཤེགས་པ་འཇིགས་མེད་སྦྱིན་དེ་ལ། །མེ་ཏོག་ཆུན་པོ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རྒྱལ་དཀའ་ལྷའི་བུའི་ཚེ། །

དེ་བཞིན་གཤེགས་པ་རྒྱུ་སྐར་རྒྱལ་པོ་ལ། །མེ་ཏོག་མན་དཱ་ར་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཡོན་ཏན་ཕུང་པོ་ནི། །སཱལ་ཆེན་ལྟ་བུའི་བྲམ་ཟེའི་བུར་གྱུར་ཚེ། །དེ་བཞིན་གཤེགས་པ་ཟླ་བ་ལྷ་དེ་ལ། །ཕྲེང་ཕུལ་དང་པོར་བྱང་ཆུབ་
སེམས་བསྐྱེད་དོ། །དེ་བཞིན་གཤེགས་པ་ཟླ་ཏོག་སྤོས་འཚོང་ཚེ། །དེ་བཞིན་གཤེགས་པ་ཉི་མའི་འོད་དེ་ཡི། །ཁང་པ་བརྩེགས་པར་སྤོས་བྱུག་ཕྱིར་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མཐུ་ཐོབ་ཤིང་སྲུངས་ཚེ། །དེ་བཞིན་གཤེགས་པ་
གྲགས་པ་ཆེ་དེ་ལ། །དགུན་ཤིང་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཐུ་རྩལ་མཐའ་ཡས་ཚོང་དཔོན་གྱི། །བུ་ཚེ་དེ་བཞིན་གཤེགས་པ་འཇམ་དབྱངས་ལ། །སེ་འབྲུ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་
བསྐྱེད་དོ། །བདེ་གཤེགས་ཟླ་བ་བྲམ་ཟེའི་བུར་གྱུར་ཚེ། །དེ་བཞིན་གཤེགས་པ་སྟོན་པར་དགྱེས་དེ་ལ། །ཨུད་པལ་ཆང་པ་གང་ཞིག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དྲི་མེད་ཚོང་དཔོན་གྱི། །བུ་ཚེ་དེ་བཞིན་གཤེགས་པ་
གྲགས་བླ་ལ། །མེ་ཏོག་བར་ཤིག་སྐྱེ་བའི་ས་གཞི་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དོན་ཀུན་གཟིགས་པ་དེད་དཔོན་ཚེ། །དེ་བཞིན་གཤེགས་པ་ལྷ་ཡི་རྒྱལ་པོ་ལ། །མུ་ཏིག་དག་གི་ཕྲེང་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་
དོ། །དེ་བཞིན་གཤེགས་པ་དཔའ་བོ་སྤོས་འཚོང་ཚེ། །དེ་བཞིན་གཤེགས་པ་དམར་སེར་འོད་དེ་ལ། །ཙན་དན་དག་གི་གདན་ཁྲི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འབྱོར་ལྡན་ཚོང་འདུས་པ་ཡི་ཚེ། །དེ་བཞིན་གཤེགས་པ་བདེ་བར་འདུད་དེ་
ལ། །སྙུན་རྐྱེན་གསོས་སྨན་མར་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བསོད་ནམས་བ་ལང་རྫི་ཡི་ཚེ། །དེ་བཞིན་གཤེགས་པ་བློ་གྲོས་སེམས་དེ་ལ། །སྣོད་དག་ཞོ་ཡིས་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །

བདེ་གཤེགས་སྒྲོན་མ་ཚལ་གྱི་ལས་བྱེད་ཚེ། །དེ་བཞིན་གཤེགས་པ་དབྱིག་གསལ་དེ་ལ་ནི། །ཨ་མྲའི་འབྲས་བུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཡོན་ཏན་འོད་འཕྲོ་ནི། །རོ་བྲོ་འཚོང་ཚེ་དེ་བཞིན་གཤེགས་པ་པོ། །
སྐྱོན་ཞི་དེ་ལ་ཁ་རའི་དུམ་བུ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་བློ་ཡངས་ཀུན་རྒྱུའི་ཚེ། །དེ་བཞིན་གཤེགས་པ་རྒྱུ་སྐར་རྒྱལ་པོ་ལ། །ལོ་མ་དག་གི་རི་ལུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལེགས་སྐྱེས་རྒྱ་མཚོའི་
ཚོང་པའི་ཚེ། །དེ་བཞིན་གཤེགས་པ་བསྙེངས་དང་བྲལ་དེ་ལ། །ན་བཟའ་སྟོང་ཕྲག་བརྒྱ་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ནོར་ལྷ་ཤིང་འཚོང་ཚེ། །དེ་བཞིན་གཤེགས་པ་བློ་གསལ་དེ་ལ་ནི། །རྩྭ་བམ་སྒྲོན་མེ་དག་ནི་ཕུལ་ནས་ཀྱང་། །དང་
པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡིད་གཉིས་སྤོང་བ་གསེར་མགར་ཚེ། །དེ་བཞིན་གཤེགས་པ་ཡིད་གཉིས་སེལ་མཛད་ལ། །གསེར་གྱི་མེ་ཏོག་དག་ནི་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འཛིན་པ་དཔག་མེད་གསེར་
རྟོག་ཚེ། །དེ་བཞིན་གཤེགས་པ་བྱམས་པའི་དཔལ་དེ་ལ། །གསེར་ནི་སྤར་གང་གཏོར་ཏེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མཆོག་སྲིད་སྡེ་དཔོན་གྱི། །བུ་ཚེ་དེ་བཞིན་གཤེགས་པ་གཙོ་མཆོག་ལ། །གསེར་ལས་བྱས་པའི་གདུགས་དག་ཕུལ་
ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཆོམས་མེད་ལྕགས་མགར་ཚེ། །དེ་བཞིན་གཤེགས་པ་སྣ་ཚོགས་གསུང་དེ་ལ། །ཨ་ཧ་ཏ་ཀ་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མི་གནས་གྲོང་ཁྱེར་རྟེན་
པའི་ཚེ། །དེ་བཞིན་གཤེགས་པ་ཀུན་ཏུ་གཟིགས་དེ་ལ། །མེ་ཏོག་རངས་པ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དེར་གནས་ཐགས་མཁན་ཚེ། །དེ་བཞིན་གཤེགས་པ་ཟླ་བ་གཟིགས་དེ་ལ། །སྐུ་རེགས་དག་ནི་དབུལ་བ་

བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཚོགས་ཆེན་གཙོ་བོ་མགོན་མེད་བུར་གྱུར་ཚེ། །དེ་བཞིན་གཤེགས་པ་བདུད་ཟིལ་གནོན་པ་དེ་ལ་ནི། །མོན་སྲན་གྲེའུ་ཡི་འབྲུ་མར་མར་མེ་ཕུལ་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །
བདེ་གཤེགས་འགྲོ་བའི་འོད་ཟེར་འཁོར་ལོས་སྒྱུར་བའི་ཚེ། །བདེ་གཤེགས་ཤིང་རྟ་ཆེན་པོ་འཁོར་བཅས་བྱེ་སྟོང་ལ། །རྒྱལ་པོའི་ཞལ་ཟས་དག་ནི་བྲིམ་པ་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཕལ་ཆེན་འཁོར་ལོས་
སྒྱུར་བའི་ཚེ། །དེ་བཞིན་གཤེགས་པ་སེང་གེའི་སྟོབས་ཀྱིས་གཤེགས་དེ་ལ། །དཔག་ཚད་བཅུ་གཉིས་ཁྱོན་ཙམ་སྐྱེད་མོས་ཚལ་ཕུལ་ནས། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྒྱལ་ནི་འབྲུ་མར་མཁན་གྱི་ཚེ། །དེ་བཞིན་གཤེགས་པ་འོད་ཟེར་
ཚིམ་དེ་ལ། །ཞབས་བསྐུ་བ་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་གཟི་བརྗིད་མཐའ་ཡས་ཁྲུས་པའི་ཚེ། །དེ་བཞིན་གཤེགས་པ་ཀུན་ཏུ་སྦེད་པ་དེ་ལ་ནི། །འདག་པའི་ཆལ་གྱིས་སྣོད་དག་བཀང་སྟེ་ཕུལ་ནས་ཀྱང་། །
དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དོན་གྱི་བློ་གྲོས་ནད་པའི་ཚེ། །དེ་བཞིན་གཤེགས་པ་དོན་གྲུབ་མཐུ་རྩལ་ལ། །ཁ་རའི་དུམ་བུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྨན་པའི་རྒྱལ་པོ་ཕྱེ་འཚོང་
ཚེ། །དེ་བཞིན་གཤེགས་པ་ཉི་མའི་འོད་དེ་ལ། །ཕྱེ་ཡི་བསོད་སྙོམས་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཐ་བ་སྤངས་པ་སྨན་པའི་ཚེ། །དགེ་འདུན་དག་ལ་མར་ཁུ་ཕུལ་ནས་ཀྱང་། །དེ་བཞིན་གཤེགས་པ་གཟིགས་པའི་
ཕུང་པོ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིམས་མེད་ཤིང་བཟོ་མཁན་གྱི་ཚེ། །དེ་བཞིན་གཤེགས་པ་རྣམ་དག་བློ་དེ་ལ། །ཤིང་རྟ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ལེགས་བྱིན་

བྲམ་ཟེའི་བུར་གྱུར་ཚེ། །དེ་བཞིན་གཤེགས་པ་ཚོགས་ཅན་མྱ་ངན་འདས་པ་ན། །མར་མེའི་ཕྲེང་བ་དངར་བ་སྟོང་སྙེད་ཕུལ་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་གྲགས་བྱིན་གྲོང་ཁྱེར་མཆོད་རྟེན་ལ། །རྟེན་པའི་ཚེ་ན་དེ་
བཞིན་གཤེགས་པ་ནོར་བུ་གསལ། །གྲོང་ཁྱེར་དག་ཏུ་གཤེགས་ཀར་མེ་ཏོག་གཏོར་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མེ་ཏོག་བྱིན་པ་ནི། །ནོར་བུ་མཁན་ཚེ་དེ་བཞིན་གཤེགས་པ་པོ། །ཡོན་ཏན་འོད་ལ་ནོར་བུའི་བླ་རེ་ཕུལ། །དང་
པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྐྱེས་བུས་བྱིན་པ་ཐགས་མཁན་ཚེ། །དེ་བཞིན་གཤེགས་པ་ཉི་མའི་སྒྲོན་དེ་ལ། །རས་ཀྱི་ཁ་ཚར་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རྡོ་རྗེའི་སྡེ་ནི་ཕྲེང་རྒྱུད་ཀྱི། །བུ་མོར་
གྱུར་ཚེ་བདེ་གཤེགས་འབྱོར་ལྡན་འོད་ཟེར་ལ། །མེ་ཏོག་མྱ་ངན་འཚང་དག་དབུལ་བ་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཕལ་ཆེན་བྱིན་ནི་གར་མཁན་ཚེ། །དེ་བཞིན་གཤེགས་པ་སྟོན་པར་དགྱེས་དེ་ལ། །ཚིགས་སུ་བཅད་པ་གཅིག་
གིས་བསྟོད་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཞི་བའི་བློ་གྲོས་རྒྱལ་པོའི་ཚེ། །དེ་བཞིན་གཤེགས་པ་ལེགས་པར་དོན་སེམས་ལ། །བར་ཤི་མེ་ཏོག་དྲི་ལྡན་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་
པ་སྤོས་གླང་གདུགས་མཁན་ཚེ། །དེ་བཞིན་གཤེགས་པ་ཀུན་ཏུ་གཟིགས་དེ་ལ། །གྲོ་བ་དག་ལས་བྱས་པའི་གདུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སྲེད་མེད་བུ་ནི་ཁྱིམ་བདག་ཚེ། །འབྲོག་དགོན་དག་ཏུ་དགེ་སློང་དགེ་འདུན་
བཏུང་ཆུ་ཕུལ། །དེ་བཞིན་གཤེགས་པ་སེང་གེའི་རྒྱལ་མཚན་དེ་ལ་ནི། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དེས་པ་དམན་ལས་བྱེད་བུའི་ཚེ། །བསླབ་པའི་གཞི་ལྔ་དག་ལས་གཟུང་བ་བྱས་ནས་ཀྱང་། །དེ་བཞིན་གཤེགས་པ་མཉམ་པར་གནས་

པ་དེ་ལ་ནི། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མི་ཚུགས་ནད་པ་མགོན་མེད་བོར་བའི་ཚེ། །དེ་བཞིན་གཤེགས་པ་མཐུ་རྩལ་ཆེན་པོ་དེ་ཡི་ལམ། །ལག་མཐིལ་ཙམ་ཞིག་ཕྱག་དར་ལེགས་པར་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་
བསྐྱེད་དོ། །དེ་བཞིན་གཤེགས་པ་ཉི་ཟླ་གཽ་ཏམ་ཚེ། །དེ་བཞིན་གཤེགས་པ་མཁས་མཆོག་པད་སྤྱན་ལ། །དབྱར་གནས་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་གློག་ཏོག་རྒྱ་མཚོའི་ཚོང་པའི་ཚེ། །ཁྲུ་བརྒྱད་
ཀྱིས་བསྐོར་སྤུག་ལས་བྱས་པའི་གདུགས་ཕུལ་ནས། །དེ་བཞིན་གཤེགས་པ་ཉི་མའི་འོད་ཟེར་དེ་ལ་ནི། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མཆོད་པ་ལས་བྱེད་ཚེ། །དེ་བཞིན་གཤེགས་པ་གསལ་བ་མཐའ་ཡས་ལ། །ལས་བཏང་བྱས་
པས་རྙེད་པ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དཔལ་སྦས་ཤིང་སྲུངས་ཚེ། །དེ་བཞིན་གཤེགས་པ་མཐའ་ཡས་གཟུགས་དེ་ལ། །ཨ་མྲ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་ཡེ་ཤེས་ཉི་མ་རྫ་མཁན་ཚེ། །དེ་བཞིན་གཤེགས་པ་ལྷ་ཡི་གདུགས་དེ་ལ། །ལྷུང་བཟེད་དང་ནི་གུན་དྷེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དོན་གྲུབ་སྨན་པའི་ཚེ། །དེ་བཞིན་གཤེགས་པ་རིན་ཆེན་འོད་ཟེར་ལ། །སྤོས་ཀྱི་རེང་
བུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ལྷུན་བརྩེགས་ཁྲལ་མིའི་ཚེ། །བདེ་གཤེགས་ཡུལ་འཁོར་ཁ་ལོ་སྒྱུར་དེ་ལ། །ལྷགས་པའི་དུས་སུ་ཤིང་ཁུར་གཅིག་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་
པ་དགྲ་འདུལ་ཡ་ང་བའི། །དཔྱད་མཁན་ཚེ་ན་བདེ་གཤེགས་ལེགས་མཐོང་དག །འབྲོག་དགོན་བཞུགས་ཚེ་ལྷང་ཚེར་གདུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་པད་མ་ཕྲེང་རྒྱུད་ཚེ། །དེ་བཞིན་གཤེགས་པ་བཤེས་གཉེན་བཞེད་དེ་ལ། །པད་མ་དག་ནི་དབུལ་བ་བྱས་ནས་

ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དགྲ་བཅོམ་གྲགས་པ་ནི། །ནོར་བུ་མཁན་ཚེ་བདེ་གཤེགས་སྐལ་བཞེད་ལ། །ནོར་བུ་རིན་ཆེན་མེ་ཤེལ་གཅིག་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡེ་ཤེས་འགྲོས་ནི་ཀླུ་རྒྱལ་ཚེ། །
བདེ་གཤེགས་ཉི་ཞལ་སོས་ཀའི་དུས་དག་ཏུ། །ལམ་དུ་ཞུགས་ཚེ་ཆར་པ་ཕབ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཉོན་མོངས་བྲལ་བ་གར་མཁན་ཚེ། །དེ་བཞིན་གཤེགས་པ་ཐོགས་མེད་སྤྱན་དེ་ལ། །མེ་ཏོག་ཆུན་པོ་དག་ནི་ཕུལ་ནས་ཀྱང་། །དང་པོར་བྱང་ཆུབ་
ཏུ་ནི་སེམས་བསྐྱེད་དོ། །བདེ་གཤེགས་འདམ་བུ་དབུལ་པོའི་བུར་གྱུར་ཚེ། །དགོན་པར་བདེ་གཤེགས་སེང་གེའི་སྟབས་དེ་ལ། །བཤོས་དྲོན་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤོས་བཟངས་བྲམ་ཟེའི་བུར་གྱུར་ཚེ། །དེ་བཞིན་
གཤེགས་པ་སྒྲོན་མ་ཆེ་དེ་ལ། །ལོ་མ་དག་ལས་བྱས་པའི་གདུགས་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡུལ་འཁོར་རངས་ནི་ཤིང་སྲུངས་ཚེ། །དེ་བཞིན་གཤེགས་པ་བཞོན་པར་མཛད་དེ་ལ། །བསིལ་ཡབ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་
ཏུ་ནི་སེམས་བསྐྱེད་དོ། །བདེ་གཤེགས་ལྷ་གྲགས་གྲོང་ཁྱེར་རྟེན་པའི་ཚེ། །དེ་བཞིན་གཤེགས་པ་ཡོན་ཏན་གསལ་དེ་ལ། །སོ་རས་ན་བཟའ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྲིད་མཐའ་གཟིགས་པ་ལམ་སྟོན་ཚེ། །དེ་བཞིན་གཤེགས་པ་
བསོད་ནམས་སྙིང་པོ་ཡི། །ལམ་སྲང་དག་ནི་མཚོན་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཟླ་བ་སྤོས་འཚོང་ཚེ། །དེ་བཞིན་གཤེགས་པ་ཆོས་དེ་འཆག་པའི་ཚེ། །དུས་ཀྱི་རྗེས་འབྲང་སྤོས་ནི་ཞོ་གཅིག་ཕུལ། །དང་པོར་བྱང་ཆུབ་ཏུ་ནི་སེམས་
བསྐྱེད་དོ། །དེ་བཞིན་གཤེགས་པ་སྒྲ་གཅན་ལས་མིའི་ཚེ། །དེ་བཞིན་གཤེགས་པ་ལྷ་དགའ་དེ་ལ་ནི། །ཕྱག་འཁར་གཅིག་ཅིག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་ཟླ་བ་རྒྱལ་བུའི་ཚེ། །དེ་བཞིན་གཤེགས་པ་བསྙེངས་མེད་དགྱེས་

དེ་ལ། །ཏ་ལ་པ་ཏ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སེང་གེའི་རྒྱལ་མཚན་རྫ་མཁན་ཚེ། །དེ་བཞིན་གཤེགས་པ་ཤེས་རབ་རྒྱལ་མཚན་ལ། །སུམ་པ་ཀ་ཡི་ལྷུང་བཟེད་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་
བསམ་གཏན་དགྱེས་པ་གྲོང་ཁྱེར་གྱི། །ཕོ་ཉའི་ཚེ་ན་བདེ་གཤེགས་མདངས་འོད་ལ། །མེ་ཏོག་ཆུན་པོ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རྫོགས་ལྡན་རྔོན་པའི་ཚེ། །དེ་བཞིན་གཤེགས་པ་ཟླས་བྱིན་དེ་ལ་ནི། །མིག་མི་འཛུམས་པར་བལྟ་བ་
བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རྣམ་རོལ་རྒྱལ་བུའི་ཚེ། །དེ་བཞིན་གཤེགས་པ་ཡོན་ཏན་དབྱིག་དེ་ལ། །དཔག་ཚད་ཁོར་ཡུག་མེ་ཏོག་ཆལ་བཀྲམ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་རིན་
ཆེན་ལྗོངས་གཙོའི་ཚེ། །དེ་བཞིན་གཤེགས་པ་མཐའ་ཡས་འོད་དེ་ལ། །མེ་ཏོག་ཙམ་པ་ཀ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དགྲ་བཅོམ་གྲགས་པ་མཉན་པའི་ཚེ། །དེ་བཞིན་གཤེགས་པ་དེས་པ་པོ་དེ་ནི། །གྲུ་དག་གིས་ནི་བསྒྲལ་བ་
བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་པ་དངོས་འབྲུ་མར་མཁན་གྱི་ཚེ། །དེ་བཞིན་གཤེགས་པ་གྲགས་པའི་ཏོག་དེ་ལ། །དྲི་ཞིམ་ཞབས་བསྐུ་བ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཛོད་སྤུ་ལྡན་པ་ཚོང་
པའི་ཚེ། །དེ་བཞིན་གཤེགས་པ་བསྙེངས་མེད་ང་རོ་ལ། །ལྷུང་བཟེད་ཞོ་ཡིས་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤོས་གྲགས་ཚོང་པའི་ཁོལ་པོའི་ཚེ། །དེ་བཞིན་གཤེགས་པ་ཀུན་ཏུ་ཡོན་ཏན་ལ། །ལན་ཚ་སྲང་འགའ་ཞིག་ནི་ཕུལ་ནས་ཀྱང་། །
དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རྡོ་རྗེ་ནོར་བུ་ཡིས། །དེ་བཞིན་གཤེགས་པ་འབར་བའི་ཏོག་དེ་ལ། །ཚོད་སྔོན་ཆང་པ་གང་ཞིག་བསོད་སྙོམས་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཚེ་དཔག་མེད་ནི་སྨན་པའི་ཚེ། །དེ་བཞིན་

གཤེགས་པ་སྲེད་མེད་བུ་དེ་ལ། །མིག་སྨན་རི་ལུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ནོར་བུ་བཀོད་པ་ཁྱེའུའི་ཚེ། །དེ་བཞིན་གཤེགས་པ་རིན་ཆེན་གསལ་བ་ཡི། །ལམ་སྲང་དག་ཏུ་མེ་ཏོག་དཀར་པོ་ཕུལ། །དང་པོར་བྱང་ཆུབ་ཏུ་ནི་
སེམས་བསྐྱེད་དོ། །དེ་བཞིན་གཤེགས་པ་དབང་ཆེན་གྱད་ཀྱི་ཚེ། །དེ་བཞིན་གཤེགས་པ་ཀུན་ཏུ་དགོངས་དེ་ལ། །ཀོ་དྲ་བ་ཡི་འབྲུ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་འབྱུང་གནས་བྲམ་ཟེའི་ཚེ། །དེ་བཞིན་གཤེགས་པ་ལེགས་སེམས་དེ་
ལ་ནི། །རིལ་པ་གཅིག་ཅིག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ལྷུན་པོ་གྲགས་པ་ཡིས། །ཕྱོགས་བཞིའི་དགེ་འདུན་དག་ལ་རྫིང་ཕུལ་ནས། །དེ་བཞིན་གཤེགས་པ་བློ་གྲོས་བཟང་པོ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །
དེ་བཞིན་གཤེགས་པ་འོད་ཟེར་བཅུ་པ་ལྷ་བུའི་ཚེ། །བདེ་གཤེགས་གཟི་བརྗིད་མཐའ་ཡས་བྱང་ཆུབ་སྙིང་པོར་ནི། །སྙོམས་པར་ཞུགས་པའི་ཚེ་ན་སོར་མོ་ལྔ་བསྲེགས་ནས། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མ་སྨད་ཤིང་རྟ་མཁན་གྱི་ཚེ། །དེ་བཞིན་གཤེགས་པ་སེང་
གེའི་ཕྱག་དེ་ལ། །ལོ་མ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གླང་པོའི་འགྲོས་ནི་གྲོང་ཁྱེར་དུ། །རྟེན་པའི་ཚེ་ན་བདེ་གཤེགས་བློ་སྣང་ལ། །ཤ་མ་ཀ་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་
གཤེགས་ཡིད་འཐད་གནག་ལྷས་སྲུང་བའི་ཚེ། །དེ་བཞིན་གཤེགས་པ་ལྷ་ཡི་རྒྱལ་པོ་ལ། །དར་བ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རིན་ཆེན་ཟླ་བ་ལམ་སྟོན་ཚེ། །བདེ་གཤེགས་བདེན་པའི་ཏོག་གི་ལམ་དག་ཏུ། །གོས་ཀྱི་གདན་དག་
གདིང་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཞི་བ་སྨན་པའི་ཚེ། །དེ་བཞིན་གཤེགས་པ་ལེགས་པར་གནས་དེ་ལ། །ཨུད་པ་ལ་ཡི་བཀྲུ་སྨན་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རབ་གསལ་རྒྱལ་པོ་

སྤོང་བརྩོན་པའི། །དགེ་སློང་ཚེ་ན་བདེ་གཤེགས་དཔག་མེད་པའི། །ལྷ་ལ་ཨ་ཡོ་ག་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཁ་ལོ་སྒྱུར་བ་དེད་དཔོན་ཚེ། །དེ་བཞིན་གཤེགས་པ་འཕགས་པའི་མེ་ཏོག་ལ། །ཙན་དན་དམར་པོའི་ཁང་བཟངས་ཕུལ་ནས་ཀྱང་། །
དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དགའ་བའི་དབང་ཕྱུག་ཕྱུག་པོའི་ཚེ། །དེ་བཞིན་གཤེགས་པ་མཆོད་སྦྱིན་ཆེན་པོ་ལ། །རོལ་མོའི་སྒྲ་ཡིས་མཆོད་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གཙུག་ན་རིན་ཆེན་རྩིས་པ་ཡི། །ཁྱེའུ་ཚེ་དེ་
བཞིན་གཤེགས་པ་ཏོག་ཆེན་ལ། །མཚུངས་པ་མེད་པའི་ཕྱེ་མ་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་བསྙེངས་བྲལ་རྩྭ་འཚོང་ཚེ། །དེ་བཞིན་གཤེགས་པ་ཉི་མའི་འོད་དེ་ལ། །ཀ་པིད་ཏ་ཡི་ཕུར་མ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་
བསྐྱེད་དོ། །བདེ་གཤེགས་སྒྲ་གཅན་ལྷ་ནི་ཤིང་འཚོང་ཚེ། །དེ་བཞིན་གཤེགས་པ་རིན་ཆེན་འོད་དེ་ལ། །རྩྭ་ལས་བྱས་པའི་མཆིལ་ལྷམ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས