Kinh tạng Tây Tạng (Kangyur Đại Học) — 044_དཀོན་བརྩེགས།_ཆ

་མུན་པ་མུན་གནག་བསལ་ལོ་སྙམ་དུ་མི་སེམས་མོད་ཀྱི་འོན་ཀྱང་མར་མེ་ལ་བརྟེན་ནས་མུན་པ་མུན་གནག་མེད་པར་འགྱུར་རོ། །
འོད་སྲུང་དེ་ལ་མར་མེ་གང་ཡིན་པ་དང་། མུན་པ་མུན་གནག་གང་ཡིན་པ་དེ་གཉི་ག་སྟོང་པ་སྟེ། གཟུང་དུ་མེད་ཅིང་བྱེད་པ་མེད་དོ། །འོད་སྲུང་དེ་བཞིན་དུ་ཡེ་ཤེས་སྐྱེས་ན་མི་ཤེས་པ་མེད་པར་འགྱུར་ཡང་མི་ཤེས་པ་དེ་གང་ནས་ཀྱང་འོང་བ་འམ་འགྲོ་བ་མེད་དེ། ཤར་ཕྱོགས་དང་།
ལྷོ་དང་། ནུབ་དང་། བྱང་ཕྱོགས་སུ་ཡང་འགྲོ་བའམ་འོང་བ་མེད་དོ། །ཡང་འོད་སྲུང་ཡེ་ཤེས་ཀྱང་འདི་སྙམ་དུ་བདག་གིས་མི་ཤེས་པ་བསལ་ལོ་སྙམ་དུ་མི་སེམས་མོད་ཀྱི་འོན་ཀྱང་ཡེ་ཤེས་ལ་བརྟེན་ནས་མི་ཤེས་པ་མེད་པར་འགྱུར་རོ། །འོད་སྲུང་དེ་ལ་ཡེ་ཤེས་གང་ཡིན་པ་དང་
མི་ཤེས་པ་གང་ཡིན་པ་དེ་གཉི་ག་སྟོང་པ་སྟེ་གཟུང་དུ་མེད་ཅིང་བྱེད་པ་མེད་དོ། །དེ་ལ་འདི་སྐད་ཅེས་བྱ་སྟེ། དཔེར་ན་སྒྲོན་མས་མུན་པ་མུན་གནག་ཀུན། །མེད་པར་གྱུར་ཀྱང་འོང་བ་འམ་འགྲོ་བ་མེད། །དེ་བཞིན་ཤེས་བྱུང་མི་ཤེས་མེད་འགྱུར་ཡང་། །དེ་ནི་གང་ནས་འོང་བ་
འམ་འགྲོ་བ་མེད། །སྒྲོན་མས་མུན་པ་བསལ་སྙམ་མི་སེམས་ཀྱང་། །སྣང་བ་བྱུང་ནས་མུན་པ་མེད་པར་འགྱུར། །སྟོང་པ་གཟུང་མེད་ནམ་མཁའི་མེ་ཏོག་འདྲ། །དེ་བཞིན་ཡེ་ཤེས་མི་ཤེས་གཉི་ག་སྟོང་། །འོད་སྲུང་འདི་ལྟ་སྟེ། དཔེར་ན་ཁྱིམ་དང་། ཁང་པ་དང་། ཁང་ཕྲན་

ལོ་འབུམ་འདས་པར་སུས་ཀྱང་ལན་འགའ་ཡང་མར་མེ་མ་བུས་པ་དེར་མི་ལ་ལ་ཞིག་གིས་མར་མེ་བུས་ན་འོད་སྲུང་འདི་ཇི་སྙམ་དུ་སེམས། མུན་པ་མུན་གནག་དེ་འདི་སྙམ་དུ་བདག་ནི་ལོ་འབུམ་དུ་བསགས་པ་ཡིན་ཏེ། བདག་འདི་ནས་མི་འགྲོའོ་སྙམ་དུ་སེམས་
སམ། གསོལ་པ་བཅོམ་ལྡན་འདས་དེ་ནི་མི་སེམས་ལགས་ཏེ། མར་མེ་བུས་ན་མུན་པ་མུན་གནག་ལ་མི་འཆི་བའི་མཐུ་མ་མཆིས་ཀྱི་གདོན་མི་འཚལ་བར་མ་མཆིས་པར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་ལས་དང་ཉོན་མོངས་པ་བསྐལ་
པ་འབུམ་དུ་བསགས་པ་ཡང་ཚུལ་བཞིན་དུ་ཡིད་ལ་བྱེད་པའི་སོ་སོར་རྟོག་པ་གཅིག་གིས་མེད་པར་འགྱུར་རོ། །འོད་སྲུང་མར་མེ་ཞེས་བྱ་བ་དེ་ནི་འཕགས་པའི་ཤེས་རབ་ཀྱི་དབང་པོའི་ཚིག་བླ་དགས་སོ། །འོད་སྲུང་མུན་པ་མུན་གནག་ཅེས་བྱ་བ་དེ་ནི་འཕགས་པ་མ་ཡིན་པའི་ལས་དང་ཉོན་
མོངས་པའི་ཚིག་བླ་དགས་སོ། །དེ་ལ་འདི་སྐད་ཅེས་བྱ་སྟེ། དཔེར་ན་ཁྱིམ་དུ་མི་འགའ་ལ་ལ་ཡིས། །རིང་ཞིག་ལོན་ནས་མར་མེ་བུས་བྱས་ན། །དེ་ལ་མུན་པ་བདག་གནས་རིང་ལོན་གྱིས། །འདི་ནས་མི་འགྲོ་སྙམ་དུ་སེམས་པ་མེད། །མར་མེ་ཕྱུང་ན་མུན་པ་མུན་གནག་ལ། །
མེད་པར་མི་འགྱུར་བ་ཡི་ནུས་མེད་དེ། །མར་མེ་བརྟེན་ནས་མུན་པ་མེད་པར་འགྱུར། །གཉི་ག་སྟོང་བ་རློམ་སེམས་ཅི་ཡང་མེད། །དེ་བཞིན་ཟག་མེད་འཕགས་པའི་ཡེ་ཤེས་བརྟེན། །མི་ཤེས་ཉོན་མོངས་བསགས་པ་མེད་པར་འགྱུར། །ཡེ་ཤེས་དང་ནི་ཉོན་མོངས་རྟག་
པར་ཡང་། །དེ་དག་ལན་འགའ་ཙམ་ཡང་འགྲོགས་པ་མེད། །ཡེ་ཤེས་མི་ཤེས་མེད་བྱ་མི་སེམས་ཀྱང་། །ཡེ་ཤེས་བརྟེན་ནས་མི་ཤེས་མེད་པར་འགྱུར། །གཉི་ག་གཟུང་མེད་ནམ་མཁའི་མེ་ཏོག་བཞིན། །དེ་བཞིན་ཡེ་ཤེས་མི་ཤེས་གཉི་ག་སྟོང་། །འོད་སྲུང་འདི་ལྟ་
སྟེ། དཔེར་ན་ནམ་མཁའ་ལ་ནི་ས་བོན་རྣམས་མི་སྐྱེའོ། །འོད་སྲུང་དེ་བཞིན་དུ་གང་འདུས་མ་བྱས་ལས་བྱང་ཆུབ་སེམས་དཔའི་སངས་རྒྱས་ཀྱི་ཆོས་རྣམས་སྐྱེ་བ་ནི་མ་བྱུང་མི་འབྱུང་ངོ་། །དེ་ལ་འདི་སྐད་ཅེས་བྱ་སྟེ། དཔེར་ན་མཁའ་ལས་ས་བོན་སྐྱེ་བ་ནི། །འདས་དང་

མ་འོངས་པ་དང་ད་ལྟར་མེད། །དེ་བཞིན་འདུས་མ་བྱས་ལས་སངས་རྒྱས་ཆོས། །སྐྱེ་བ་གང་དུའང་མ་བྱུང་འབྱུང་མི་འགྱུར། །འོད་སྲུང་འདི་ལྟ་སྟེ་དཔེར་ན་ལུད་ཀྱིས་གང་བའི་ས་ལ་ནི་ས་བོན་ཐམས་ཅད་སྐྱེའོ། །འོད་སྲུང་དེ་བཞིན་དུ་ཉོན་མོངས་པའི་ལུད་ཀྱིས་གང་བའི་འཇིག་
རྟེན་གནས་པ་ལས་བྱང་ཆུབ་སེམས་དཔའི་སངས་རྒྱས་ཀྱི་ཆོས་རྣམས་སྐྱེའོ། །དེ་ལ་འདི་སྐད་ཅེས་བྱ་སྟེ། དཔེར་ན་ལུད་བཅས་རླན་དང་བཅས་པ་ལ། །ས་བོན་སྐྱེ་ཡི་དགོན་དུང་རྣམས་ལ་མིན། །དེ་བཞིན་ཉོན་མོངས་ལོག་ལྡན་སྐྱེ་བོ་ལ། །རྒྱལ་སྲས་རྣམས་ཀྱི་རྒྱལ་བའི་
ཆོས་རྣམས་སྐྱེ། །འོད་སྲུང་འདི་ལྟ་སྟེ། དཔེར་ན་འབྲོག་དགོན་པ་དགོན་དུང་རྣམས་ན་ནི་པད་མ་མི་སྐྱེའོ། །འོད་སྲུང་དེ་བཞིན་དུ་གང་འདུས་མ་བྱས་ལ་བྱང་ཆུབ་སེམས་དཔའི་སངས་རྒྱས་ཀྱི་ཆོས་རྣམས་སྐྱེ་བ་ནི་མ་བྱུང་མི་འབྱུང་ངོ་། །དེ་ལ་འདི་སྐད་ཅེས་བྱ་སྟེ། དཔེར་ན་པད་
མ་ཆུ་རྫིང་རྣམས་ན་སྐྱེ། །དགོན་དུང་དག་ན་ནམས་ཀྱང་སྐྱེ་མི་འགྱུར། །དེ་བཞིན་འདུས་མ་བྱས་ལ་སངས་རྒྱས་ཆོས། །སྐྱེ་བ་གང་དུའང་མ་བྱུང་འབྱུང་མི་འགྱུར། །འོད་སྲུང་འདི་ལྟ་སྟེ། དཔེར་ན་ལུད་ཡོད་པའི་འདམ་རྫབ་ནས་པད་མ་སྐྱེའོ། །འོད་སྲུང་དེ་བཞིན་དུ་ཉོན་མོངས་
པའི་ལུད་ཡོད་པའི་འདམ་རྫབ་ལོག་པ་ཉིད་དུ་ངེས་པའི་སེམས་ཅན་རྣམས་ལ་བྱང་ཆུབ་སེམས་དཔའི་སངས་རྒྱས་ཀྱི་ཆོས་རྣམས་སྐྱེའོ། །དེ་ལ་འདི་སྐད་ཅེས་བྱ་སྟེ། དཔེར་ན་ལུད་བཅས་འདམ་རྫབ་ཆུ་ལས་ནི། །པད་མ་སྐྱེ་ཡི་ཐང་ལས་ནམ་ཡང་མིན། །དེ་བཞིན་ཉོན་མོངས་ལོག་ལྡན་
སྐྱེ་བོ་ལ། །རྒྱལ་སྲས་རྣམས་ཀྱི་རྒྱལ་བའི་ཆོས་རྣམས་སྐྱེ། །འོད་སྲུང་འདི་ལྟ་སྟེ་དཔེར་ན་རྒྱ་མཚོ་ཆེན་པོ་བཞི་མར་སར་གྱིས་ཡོངས་སུ་གང་བར་གྱུར་པ་དེ་བཞིན་དུ་བྱང་ཆུབ་སེམས་དཔའི་དགེ་བའི་རྩ་བ་མངོན་པར་འདུས་བྱས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་
རྒྱ་མཚོ་བཞི་པོ་མར་སར་གྱིས། །ཡོངས་གང་གཙང་ཞིང་ཀུན་ནས་ཡིད་དུ་འོང་། །དེ་བཞིན་བྱང་ཆུབ་སེམས་དཔའ་བདེ་གཤེགས་སྲས། །དགེ་བའི་རླུང་གིས་རྟག་ཏུ་གང་བར་བལྟ། །འོད་སྲུང་འདི་ལྟ་སྟེ། དཔེར་ན་མི་ལ་ལ་ཞིག་གིས་སྐྲ་ཚལ་པ་བརྒྱར་གཤགས་པའི་རྩེ་མོས་

རྒྱ་མཚོ་ཆེན་པོ་བཞི་ལས། ཆུ་ཐིགས་པ་གཅིག་བླངས་པ་དེ་བཞིན་དུ་འོད་སྲུང་ཉན་ཐོས་ཀྱི་དགེ་བའི་རྩ་བ་མངོན་པར་འདུས་བྱས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་ཆུ་ཡི་ཕུང་པོ་དེ་ལས་ནི། །སྐྲ་ཚལ་བརྒྱ་ཡི་རྩེ་མོས་ཐིགས་བླངས་
པ། །དེ་བཞིན་ཉན་ཐོས་རྣམས་ཀྱིས་དགེ་བྱས་པའི། །དགེ་བ་དག་དང་ལྡན་པར་བལྟ་བར་བྱ། །འོད་སྲུང་འདི་ལྟ་སྟེ། དཔེར་ན་ཡུངས་འབྲུ་སྲིན་བུས་ཟོས་པའི་ནང་གི་ནམ་མཁའ་བཞིན་དུ་ཉན་ཐོས་ཀྱི་འདུས་མ་བྱས་ཤེས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་
ན་ཡུངས་འབྲུ་སྲིན་བུས་ཟོས་པ་ཡི། །ནང་གི་ནམ་མཁའ་དེ་ནི་ཆུང་བ་ཡིན། །ཉན་ཐོས་འདུས་མ་བྱས་པ་ཤེས་པ་ཡང་། །དེ་བཞིན་ཆུང་ཞིང་ཤིན་ཏུ་ཆུང་བར་བལྟ། འོད་སྲུང་འདི་ལྟ་སྟེ། དཔེར་ན་ཕྱོགས་བཅུའི་ནམ་མཁའི་ཁམས་བཞིན་དུ་བྱང་ཆུབ་སེམས་དཔའི་འདུས་
མ་བྱས་ཤེས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་ཕྱོགས་བཅུའི་འཇིག་རྟེན་ཐམས་ཅད་ན། །ནམ་མཁའི་ཁམས་ནི་སྒྲིབ་པ་མེད་པར་འདུག །བྱང་ཆུབ་སེམས་དཔའི་འདུས་མ་བྱས་ཤེས་པ། །འགྲོ་བ་ཀུན་གྱི་མཆོག་ཀྱང་དེ་ལྟར་བལྟའོ། །འོད་སྲུང་འདི་
ལྟ་སྟེ་དཔེར་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་བཙུན་མོ་དམ་པ་སྐྱེས་པ། དབུལ་པོ་དང་ཉལ་ནས་ཕྱིས་དེ་ལ་བུ་བྱུང་བར་གྱུར་ན། འོད་སྲུང་འདི་ཇི་སྙམ་དུ་སེམས། དེ་རྒྱལ་པོའི་བུ་ཞེས་བྱའམ། གསོལ་པ། བཅོམ་ལྡན་འདས་དེ་ནི་མི་འགྱུར་ལགས་སོ། །བཅོམ་ལྡན་
འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་ངའི་ཉན་ཐོས་རྣམས་ཆོས་ཀྱི་དབྱིངས་ལས་སྐྱེས་མོད་ཀྱི། དེ་དག་དེ་བཞིན་གཤེགས་པའི་སྲས་དབང་བསྐུར་བའི་འོས་ཞེས་མི་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་རྒྱལ་པོའི་བཙུན་མོ་ཡིད་འོང་བ། །སྐྱེས་པ་དབུལ་པོ་དང་
ནི་ཉལ་གྱུར་ཏེ། །དེ་ཕྱིར་དེ་ལ་བུ་བྱུང་གང་ཡིན་པ། །དེ་ནི་རྒྱལ་པོའི་བུ་མིན་དབང་བསྐུར་མིན། །དེ་བཞིན་ཉན་ཐོས་འདོད་ཆགས་བྲལ་གྱུར་པ། །དེ་དག་ང་བུ་དབང་བསྐུར་འོས་མ་ཡིན། །དེ་ལྟར་དེ་དག་བདག་ལ་ཕན་ཕྱིར་བརྩོན། །བདག་གཞན་གཉི་གའི་དོན་བྱེད་

སངས་རྒྱས་སྲས། །འོད་སྲུང་འདི་ལྟ་སྟེ་དཔེར་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་བྲན་མོ་ངན་པ་དང་ཉལ་བ་དེ་ལས་དེའི་བུ་བྱུང་ན། འོད་སྲུང་དེ་བྲན་མོ་ངན་པ་ལས་བྱུང་དུ་ཟིན་ཀྱང་དེ་ལ་རྒྱལ་པོའི་སྲས་ཞེས་བྱའོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་
དང་པོ་བསྐྱེད་པ་འཁོར་བ་ན་འཁོར་ཞིང་སེམས་ཅན་རྣམས་འདུལ་བའི་མཐུ་མ་ཐོབ་ཏུ་ཟིན་ཀྱང་དེ་ནི་དེ་བཞིན་གཤེགས་པའི་སྲས་ཞེས་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་འཁོར་ལོས་སྒྱུར་བ་བྲན་མོ་དང་། །ཉལ་བར་གྱུར་པ་དེ་ལས་བུ་བྱུང་བ། །བྲན་མོ་ལས་ནི་བྱུང་བར་
གྱུར་ཀྱང་དེ། །རྒྱལ་པོའི་སྲས་ཞེས་འཇིག་རྟེན་ཟེར་བ་ལྟར། །བྱང་ཆུབ་སེམས་དཔའ་དང་པོ་སེམས་བསྐྱེད་པ། །སྲིད་པ་གསུམ་ན་འཁོར་ཞིང་མཐུ་ཆུང་སྟེ། །སྦྱིན་དང་ཐབས་ཀྱིས་སེམས་ཅན་མི་འདུལ་ཡང་། །སེམས་ཅན་དག་པ་རྒྱལ་བའི་སྲས་ཞེས་བྱ། །
བམ་པོ་གཉིས་པ་སྟེ་ཐ་མ། འོད་སྲུང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་ལ་བུ་གཞོན་ནུ་སྟོབས་ཆེ་ཞིང་མགྱོགས་པའི་ཤུགས་དང་ལྡན་པ་མཐུ་རྙེད་པ་སྟོང་ཡོད་པར་གྱུར་ལ། དེ་དག་གང་ཡང་འཁོར་ལོས་སྒྱུར་བའི་མཚན་དང་མི་ལྡན་ན་
དེ་དག་ལ་འཁོར་ལོས་སྒྱུར་བའི་རྒྱལ་པོའི་སྲས་སུ་འདུ་ཤེས་མི་སྐྱེད་པ་དེ་བཞིན་དུ། འོད་སྲུང་དེ་བཞིན་གཤེགས་པའི་ཞབས་འབྲིང་བ་ཉན་ཐོས་བྱེ་བ་བརྒྱ་སྟོང་དེ་དག་གང་ཡང་བྱང་ཆུབ་སེམས་དཔར་མ་གྱུར་ན་དེ་དག་ལ་དེ་བཞིན་གཤེགས་པའི་སྲས་སུ་འདུ་ཤེས་མི་སྐྱེད་དོ། །དེ་ལ་
འདི་སྐད་ཅེས་བྱ་སྟེ། དཔེར་ན་མི་དབང་རྒྱལ་པོའི་སྲས་སྟོང་པོ། །འགའ་ཡང་བུ་ཡི་མཚན་དང་མི་ལྡན་ན། །དེ་ཕྱིར་དེ་དག་གཅེས་བྱེད་མི་ནུས་པས། །དེ་ལ་མི་མཆོག་བུ་ཡི་འདུ་ཤེས་མེད། །དེ་བཞིན་སངས་རྒྱས་ཞབས་འབྲིང་བྱེ་བ་མང་། །འགའ་ཡང་བྱང་ཆུབ་
སེམས་དཔའ་མ་ཡིན་ན། །དེ་ན་བྱང་ཆུབ་སེམས་དཔའ་འགའ་མེད་ཕྱིར། །དེ་ལ་བདེ་གཤེགས་སྲས་སུ་དགོངས་མི་མཛད། །འོད་སྲུང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོའི་བཙུན་མོ་དམ་པའི་མངལ་དུ་གཞོན་ནུ་འཁོར་ལོས་སྒྱུར་བའི་མཚན་དང་ལྡན་པ་ཆགས་

ནས་ཞག་བདུན་ལོན་ཏེ་འབྱུང་བ་ཆེན་པོ་མེར་མེར་པོར་འདུག་ཀྱང་ཤིན་ཏུ་སྟོབས་དང་ལྡན་པས་དེ་ལ་ལྷ་རྣམས་རེ་བ་སྐྱེད་ཀྱི། གཞོན་ནུ་སྟོབས་ཆེ་ལ་མགྱོགས་པའི་ཤུགས་དང་ལྡན་ཞིང་མཐུ་རྙེད་པ་དེ་དག་ལ་ནི་མ་ཡིན་ནོ། །དེ་ཅིའི་ཕྱིར་ཞེ་ན། དེ་ནི་འཁོར་ལོས་སྒྱུར་བའི་
རིགས་མི་འཆད་པར་གནས་པའི་ཕྱིར་རོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དང་པོ་བསྐྱེད་པ་དབང་པོ་ཡོངས་སུ་མ་སྨིན་པ། ཉོན་མོངས་པའི་འབྱུང་བ་ཆེན་པོ་མེར་མེར་པོར་གྱུར་པ་འཁོར་བ་ན་འཁོར་ཞིང་སངས་རྒྱས་ཀྱི་ཆོས་རྣམས་ཡང་དག་པར་སྒྲུབ་པ་ཡང་
ཤིན་ཏུ་སྟོབས་དང་ལྡན་པས་དེ་ལ་སྔོན་སངས་རྒྱས་མཐོང་བའི་ལྷ་རྣམས་རེ་བ་སྐྱེད་ཀྱི། དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དེ་དག་ལ་ནི་མ་ཡིན་ནོ། །དེ་ཅིའི་ཕྱིར་ཞེ་ན། དེ་སངས་རྒྱས་ཀྱི་གདུང་མི་འཆད་པར་གནས་པའི་ཕྱིར་རོ། །དེ་ལ་འདི་སྐད་ཅེས་བྱ་
སྟེ། དཔེར་ན་འཁོར་ལོས་སྒྱུར་བའི་བཙུན་མོ་མཆོག །དེ་མངལ་བསོད་ནམས་མཚན་ལྡན་སེམས་ཅན་ཆགས། །སྟོབས་དང་ལྡན་པས་ལྷ་རྣམས་རེ་བ་སྐྱེད། །གཞོན་ནུ་མཐུ་ཐོབ་རྣམས་ལ་མ་ཡིན་ལྟར། །བྱང་ཆུབ་སེམས་དཔའ་རྩེ་གཅིག་སེམས་གནས་ཤིང་། །
འཁོར་བར་གནས་ཏེ་བྱང་ཆུབ་ཚོལ་བྱེད་པ། །དེ་ལ་ལྷ་དང་ཀླུ་རྣམས་རེ་བ་སྐྱེད། །རྣམ་ཐར་བརྒྱད་པོས་བསམ་གཏན་བྱེད་ལ་མིན། །འོད་སྲུང་འདི་ལྟ་སྟེ་དཔེར་ན་ནོར་བུ་རིན་པོ་ཆེ་བཻདཱུརྱ་གཅིག་གིས་མཆིང་བུའི་ནོར་བུའི་ཕུང་པོ་རི་རབ་ཙམ་ཟིལ་གྱིས་གནོན་ཏོ། །འོད་སྲུང་དེ་
བཞིན་དུ་བྱང་ཆུབ་སེམས་དཔའ་སེམས་དང་པོ་བསྐྱེད་པས་ཀྱང་ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་གནོན་ཏོ། །དེ་ལ་འདི་སྐད་ཅེས་བྱ་སྟེ། དཔེར་ན་འོད་གསལ་རིན་ཆེན་བཻདཱུརྱས། །མཆིང་བུའི་ནོར་བུ་མང་པོ་ཟིལ་གྱིས་གནོན། །བྱང་ཆུབ་སེམས་དཔའ་ཐོག་
མར་སེམས་བསྐྱེད་པས། །ཉན་ཐོས་སྟོང་ཡང་དེ་ལྟར་ཟིལ་གྱིས་གནོན། །འོད་སྲུང་འདི་ལྟ་སྟེ། དཔེར་ན་བྱ་ཀ་ལ་པིང་ཀའི་ཕྲུག་གུ་སྒོ་ངའི་སྦུབས་ན་འདུག་པ་མིག་མ་བྱེ་བ་ཡང་འདི་ལྟ་སྟེ། ཟབ་ཅིང་སྙན་པའི་སྒྲ་སྐད་ཀྱིས་བྱའི་ཚོགས་ཐམས་ཅད་ཟིལ་གྱིས་གནོན་ཏོ། །འོད་

སྲུང་དེ་བཞིན་དུ་བྱང་ཆུབ་སེམས་དཔའ་སེམས་དང་པོ་བསྐྱེད་པ་མ་རིག་པའི་སྒོ་ངའི་སྦུབས་ན་འདུག་པ་ལས་དང་ཉོན་མོངས་པའི་མུན་པ་དང་རབ་རིབ་ཀྱི་ལིང་ཏོག་གིས་མིག་ཁེབས་པ་ཡང་འདི་ལྟ་སྟེ། དགེ་བའི་རྩ་བ་ཡོངས་སུ་བསྔོ་བའི་སྦྱོར་བའི་སྒྲ་སྐད་ཀྱིས་ཉན་ཐོས་དང་རང་
སངས་རྒྱས་ཐམས་ཅད་ཟིལ་གྱིས་གནོན་ཏོ། །འོད་སྲུང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོའི་བཙུན་མོ་དམ་པ་ལས་གཞོན་ནུ་འཁོར་ལོས་སྒྱུར་བའི་མཚན་དང་ལྡན་པ་བཙས་མ་ཐག་ཏུ་ཚོང་དཔོན་དང་གྲོང་རྡལ་གྱི་མི་དང་། ཡུལ་གྱི་མི་ཐམས་ཅད་དང་། རྒྱལ་ཕྲན་ཐམས་
ཅད་ཕྱག་འཚལ་བར་འགྱུར་རོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དང་པོ་སྐྱེད་པ་ལ་ཡང་ལྷ་དང་བཅས་པའི་འཇིག་རྟེན་ཕྱག་འཚལ་ལོ། །དེ་ལ་འདི་སྐད་ཅེས་བྱ་སྟེ། དཔེར་ན་ས་བདག་ཆེན་པོ་རྒྱལ་པོ་ལ། །མཚན་གྱིས་ལུས་སྤྲས་བུ་ཞིག་ཡོད་གྱུར་ན། །
གཞོན་ནུ་དེ་ནི་བཙས་པར་མཐོང་མ་ཐག །གྲོང་ཁྱེར་མི་དང་རྒྱལ་ཕྲན་ཐམས་ཅད་འདུད། །དེ་བཞིན་བྱང་ཆུབ་སེམས་ནི་བསྐྱེད་མ་ཐག །མཚན་ལྡན་རྒྱལ་བའི་སྲས་པོ་དེ་ལ་ནི། །ལྷ་དང་བཅས་པའི་འཇིག་རྟེན་ཕྱག་འཚལ་ཞིང་། །དང་བའི་སེམས་ཀྱི་ཤིན་ཏུ་གཅེས་
པར་འཛིན། །འོད་སྲུང་འདི་ལྟ་སྟེ་དཔེར་ན་རིའི་རྒྱལ་པོ་གངས་རི་ལ་སྨན་གང་དག་སྐྱེས་པ་དེ་དག་ཐམས་ཅད་ནི་ང་ཡིར་བྱ་བ་མེད། རིས་སུ་བཅད་པ་མེད། རྣམ་པར་རྟོག་པ་མེད་དེ། ནད་གང་ལ་བཏང་ཡང་ནད་དེ་རབ་ཏུ་ཞི་བར་བྱེད་དོ། །འོད་སྲུང་དེ་བཞིན་དུ་བྱང་ཆུབ་
སེམས་དཔའ་ཡེ་ཤེས་ཀྱི་སྨན་གང་ཡང་དག་པར་སྒྲུབ་པ་དེ་ཐམས་ཅད་རྣམ་པར་མི་རྟོག་པར་སྒྲུབ་ཅིང་། སེམས་ཅན་ཐམས་ཅད་ལ་སྙོམས་པའི་སེམས་ཀྱིས་གསོ་བར་རབ་ཏུ་སྦྱོར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་རི་རྒྱལ་གངས་ཀྱི་རི་བོ་ལ། །སྨན་སྐྱེས་དེ་
དག་མི་རྟོག་ངར་འཛིན་མེད། །གང་ལ་བཏང་བ་དེ་ཀུན་ཞི་བར་བྱེད། །ཁ་ཅིག་ནད་དང་རྒ་བ་འང་སེལ་བར་བྱེད། །དེ་བཞིན་རྒྱལ་བའི་སྲས་པོ་ཡེ་ཤེས་སྨན། །ཡང་དག་སྒྲུབ་པ་འང་རྣམ་པར་རྟོག་སྤངས་ནས། །སེམས་ཅན་ཕན་ཕྱིར་ཐམས་ཅད་ཡང་དག་སྒྲུབ། །

སྙོམས་པའི་སེམས་ཀྱིས་སེམས་ཅན་གསོ་བར་བྱེད། །འོད་སྲུང་འདི་ལྟ་སྟེ་དཔེར་ན་ཟླ་བ་ཚེས་པ་ལ་ཕྱག་འཚལ་བ་ལྟར་ཉ་བ་ལ་ནི་མ་ཡིན་ནོ། །འོད་སྲུང་དེ་བཞིན་དུ་གང་དག་ང་ལ་རབ་ཏུ་དད་པ་དེ་དག་གིས་བྱང་ཆུབ་སེམས་དཔའ་རྣམས་ལ་ཕྱག་བྱའི་དེ་བཞིན་
གཤེགས་པ་རྣམས་ལ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་ནི་དེ་བཞིན་གཤེགས་པ་རྣམས་འབྱུང་ངོ་། །དེ་བཞིན་གཤེགས་པ་ལས་ནི་ཉན་ཐོས་དང་རང་སངས་རྒྱས་ཐམས་ཅད་འབྱུང་ངོ་། །དེ་ལ་འདི་སྐད་ཅེས་བྱ་སྟེ། ཟླ་བ་ཚེས་ལ་ཐམས་
ཅད་ཕྱག་འཚལ་གྱི། །ཟླ་བ་ཉ་ལ་དེ་ལྟར་ཕྱག་མི་འཚལ། །དེ་བཞིན་གང་དག་ང་དད་དེ་དག་གིས། །རྒྱལ་སྲས་བྱང་ཆུབ་སེམས་དཔའ་ཕྱག་འཚོལ་ཅིག །འོད་སྲུང་འདི་ལྟ་སྟེ། དཔེར་ན་ཡི་གེའི་ཕྱི་མོ་རྣམས་ནི་བསྟན་བཅོས་ཐམས་ཅད་འཛིན་པ་ཤེས་པའི་སྔོན་དུ་འགྲོའོ། །
འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དང་པོ་བསྐྱེད་པ་ཡང་སངས་རྒྱས་ཀྱི་རྣམ་པར་སྤྲུལ་པ་དང་། བྱིན་གྱི་རླབས་ཐམས་ཅད་འཛིན་པའི་ཡེ་ཤེས་བླ་ན་མེད་པའི་སྔོན་དུ་འགྲོའོ། །འོད་སྲུང་འདི་ལྟ་སྟེ། དཔེར་ན་ཟླ་བའི་དཀྱིལ་འཁོར་བཏང་སྟེ་སུས་ཀྱང་སྐར་མའི་གཟུགས་
ལ་ནམ་ཡང་སྔོན་ཕྱག་མ་བྱས་སོ། །འོད་སྲུང་དེ་བཞིན་དུ་མཁས་པ་རྣམས་ཀྱང་བྱང་ཆུབ་སེམས་དཔའ་བདག་ལ་ཕན་པ་དང་གཞན་ལ་ཕན་པའི་སྙིང་རྗེ་ཆེན་པོ་དང་ལྡན་པ་ངའི་བསླབ་པ་ལ་ཞུགས་པ་བཏང་སྟེ། ཉན་ཐོས་ལ་ནམ་ཡང་ཕྱག་མི་འཚལ་ལོ། །དེ་ལ་འདི་
སྐད་ཅེས་བྱ་སྟེ། སུས་ཀྱང་ཟླ་བ་རྣམ་པར་སྤངས་ནས་སུ། །སྐར་མའི་ཚོགས་ལ་ནམ་ཡང་ཕྱག་མ་བྱས། །དེ་བཞིན་བསླབ་ལ་ཞུགས་པ་ནམ་དུ་ཡང་། །ང་སྲས་བཏང་སྟེ་ཉན་ཐོས་ཕྱག་མི་འཚལ། འོད་སྲུང་འདི་ལྟ་སྟེ་དཔེར་ན་ལྷ་དང་བཅས་པའི་འཇིག་རྟེན་གྱིས་
མཆིང་བུའི་ནོར་བུ་བྱི་དོར་བྱས་ཀྱང་མཆིང་བུའི་ནོར་བུ་ནམ་ཡང་ནོར་བུ་རིན་པོ་ཆེ་བཻདཱུརྱ་མི་འགྱུར་རོ། །འོད་སྲུང་དེ་བཞིན་དུ་ཉན་ཐོས་ཚུལ་ཁྲིམས་དང་། བསླབས་པ་དང་། སྦྱངས་པའི་ཡོན་ཏན་དང་། ཡོ་བྱད་བསྙུངས་པ་དང་། ཏིང་ངེ་འཛིན་ཐམས་ཅད་དང་ལྡན་ཡང་

བྱང་ཆུབ་ཀྱི་སྙིང་པོ་ལ་འདུག་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནམ་ཡང་མི་འགྱུར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་ལྷ་དང་བཅས་པའི་འཇིག་རྟེན་གྱིས། །མཆིང་བུའི་ནོར་བུ་བྱི་དོར་བྱས་ཀྱང་ནི། །མཆིང་བུ་དག་སྟེ་
བཻདཱུརྱ་མི་འགྱུར། །འདི་འདྲ་དེ་ཉིད་དེའི་རང་བཞིན་ཡིན། །དེ་བཞིན་ཉན་ཐོས་ཁྲིམས་དང་ཐོས་པ་དང་། །བསམ་གཏན་ལྡན་ཞིང་སྦྱངས་པ་ཀུན་ལྡན་ཡང་། །བྱང་ཆུབ་སྙིང་པོར་འདུག་སྟེ་བདུད་བཏུལ་ནས། །བྱང་ཆུབ་རེག་སྟེ་བདེ་གཤེགས་འགྱུར་བ་མེད། །
འོད་སྲུང་འདི་ལྟ་སྟེ། དཔེར་ན་ནོར་བུ་རིན་པོ་ཆེ་བཻདཱུ་རྱ་བྱི་དོར་བྱས་ན་དེ་ཀཱར་ཥ་པཱ་ཎ་བརྒྱ་སྟོང་མང་པོ་འབྱུང་བའི་སྒོར་འགྱུར་རོ། །འོད་སྲུང་དེ་བཞིན་དུ་བྱང་ཆུབ་སེམས་དཔའི་ཡོན་ཏན་བྱི་དོར་བྱས་ན་དེ་ཉན་ཐོས་དང་རང་སངས་རྒྱས་བརྒྱ་སྟོང་མང་པོ་འབྱུང་བའི་སྒོར་འགྱུར་རོ། །དེ་ལ་
འདི་སྐད་ཅེས་བྱ་སྟེ། རིན་ཆེན་བཻདཱུརྱ་སྦྱང་བྱས་ན། ཀཱར་ཥ་པཱ་ཎ་མང་པོ་འབྱུང་བར་འགྱུར། །དེ་བཞིན་སངས་རྒྱས་སྲས་ཀྱིས་སྦྱང་བྱས་ན། །ཉན་ཐོས་མང་པོ་འབྱུང་བའི་སྒོར་འགྱུར་རོ། །དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་བཀའ་
སྩལ་པ། འོད་སྲུང་ཡུལ་གང་དུ་སྲིན་བུ་རྔ་མོ་དུད་ཀ་ཞེས་བྱ་བ་མགོ་ནག་གན་རྐྱལ་དུ་ཉལ་བ་བྱུང་ན་ཡུལ་དེ་འཇིགས་པ་དང་བཅས། འཚེ་བ་དང་བཅས། ཉེ་བའི་ཉོན་མོངས་པ་དང་བཅས། འཁྲུག་པ་དང་བཅས་པར་འགྱུར་རོ། །འོད་སྲུང་གལ་ཏེ་ཡུལ་དེར་བྱང་ཆུབ་
སེམས་དཔའི་བྱུང་ན་ཡུལ་དེ་འཇིགས་པ་མེད་པ་དང་། འཚེ་བ་མེད་པ་དང་། ཉེ་བའི་ཉོན་མོངས་པ་མེད་པ་དང་། འཁྲུག་པ་མེད་པར་འགྱུར་རོ། །འོད་སྲུང་དེ་ལྟ་བས་ན་བྱང་ཆུབ་སེམས་དཔའ་སེམས་ཅན་གྱི་དོན་ལ་བརྩོན་པར་བྱ་སྟེ། དེས་དགེ་བའི་རྩ་བ་ཐམས་ཅད་
ཡང་དག་པར་བསྒྲུབ་པར་བྱའོ། །དགེ་བའི་རྩ་བ་ཐམས་ཅད་ཡང་དག་པར་བསྒྲུབས་ནས་སེམས་ཅན་ཐམས་ཅད་ལ་གཏང་བར་བྱའོ། །ཡེ་ཤེས་ཀྱི་སྨན་གང་ཚོལ་བ་དེས་ཕྱོགས་བཞིར་སོང་སྟེ་སེམས་ཅན་རྣམས་ལ་ཡང་དག་པའི་གསོ་བ་བྱའོ། །ཡང་དག་པའི་གསོ་བས་

སེམས་ཅན་རྣམས་གསོ་བར་བྱའོ། །འོད་སྲུང་དེ་ལ་ཡང་དག་པའི་གསོ་བ་གང་ཞེ་ན། འདི་ལྟ་སྟེ། འདོད་ཆགས་ལ་མི་སྡུག་པ་དང་། ཞེ་སྡང་ལ་བྱམས་པ་དང་། གཏི་མུག་ལ་རྟེན་ཅིང་འབྲེལ་པར་འབྱུང་བ་དང་། ལྟ་བར་གྱུར་པ་ཐམས་ཅད་ལ་སྟོང་
པ་ཉིད་དང་། རྟོག་པ་དང་། རྣམ་པར་རྟོག་པ་དང་། མཚན་མའི་དམིགས་པ་ཡིད་ལ་བྱེད་པ་ཐམས་ཅད་ལ་མཚན་མ་མེད་པ་དང་། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཐམས་ཅད་ལ་གནས་པ་སྤངས་པའི་ཕྱིར་སྨོན་པ་མེད་
པ་དང་། ཕྱིན་ཅི་ལོག་ཐམས་ཅད་སྤང་བའི་ཕྱིར་ཕྱིན་ཅི་མ་ལོག་པ་བཞི་སྟེ། བཞི་གང་ཞེ་ན་མི་རྟག་པ་ལ་རྟག་པར་འདུ་ཤེས་པ་ལ་འདུ་བྱེད་ཐམས་ཅད་མི་རྟག་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་ལ། འདུ་བྱེད་ཐམས་ཅད་སྡུག་བསྔལ་བ་དང་། བདག་མེད་པ་ལ་བདག་ཏུ་
འདུ་ཤེས་པ་ལ་ཆོས་ཐམས་ཅད་བདག་མེད་པ་དང་། མི་སྡུག་པ་ལ་སྡུག་པར་འདུ་ཤེས་པ་ལ་མྱ་ངན་ལས་འདས་པ་ཞི་བས་གསོ་བ་དང་། ལུས་དང་། ཚོར་བ་དང་། སེམས་དང་། ཆོས་ལ་གནས་པ་རྣམས་ལ་དྲན་པ་ཉེ་བར་གཞག་པ་བཞི་སྟེ། དེ་ལ་ལུས་ལ་ལུས་
ཀྱི་རྗེས་སུ་ལྟ་བ་ཅན་དུ་གནས་ཀྱང་ལུས་ཀྱི་རྗེས་སུ་ལྟ་བས་བདག་ཏུ་ལྟ་བར་མི་ལྟུང་བ་དང་། ཚོར་བ་རྣམས་ལ་ཚོར་བའི་རྗེས་སུ་ལྟ་བ་ཅན་དུ་གནས་ཀྱང་ཚོར་བའི་རྗེས་སུ་ལྟ་བས་བདག་ཏུ་ལྟ་བར་མི་ལྟུང་བ་དང་། སེམས་ལ་སེམས་ཀྱི་རྗེས་སུ་ལྟ་བ་ཅན་དུ་གནས་ཀྱང་སེམས་
ཀྱི་རྗེས་སུ་ལྟ་བས་བདག་ཏུ་ལྟ་བར་མི་ལྟུང་བ་དང་། ཆོས་ལ་ཆོས་ཀྱི་རྗེས་སུ་ལྟ་བ་ཅན་དུ་གནས་ཀྱང་ཆོས་ཀྱི་རྗེས་སུ་ལྟ་བས་བདག་ཏུ་ལྟ་བར་མི་ལྟུང་བས་གསོ་བ་དང་། ཡང་དག་པར་སྤོང་བ་བཞིས་ནི་མི་དགེ་བའི་ཆོས་ཐམས་ཅད་སྤོང་བ་དང་། དགེ་བའི་ཆོས་ཐམས་ཅད་ཡོངས་
སུ་རྫོགས་པར་འགྱུར་བ་དང་། རྫུ་འཕྲུལ་གྱི་རྐང་པ་བཞིས་ནི་ལུས་དང་སེམས་ལ་རིལ་པོར་འཛིན་པ་འདོར་བར་འགྱུར་བ་དང་། དབང་པོ་ལྔ་དང་། སྟོབས་ལྔས་ནི་མ་དད་པ་དང་། ལེ་ལོ་དང་། བརྗེད་ངས་པ་དང་། རྣམ་པར་གཡེང་བ་དང་། ཤེས་བཞིན་མེད་པ་རྣམས་

གསོ་བ་དང་། བྱང་ཆུབ་ཀྱི་ཡན་ལག་བདུན་གྱིས་ནི་ཆོས་ལ་ཤིན་ཏུ་རྨོངས་ཤིང་མི་ཤེས་པ་གསོ་བ་དང་། འཕགས་པའི་ལམ་ཡན་ལག་བརྒྱད་པས་ནི་འཆལ་པའི་ཤེས་རབ་དང་། ཕས་ཀྱི་རྒོལ་བ་ཐམས་ཅད་དང་། ལམ་ངན་པར་ཞུགས་པ་རྣམས་གསོ་བ་སྟེ། འོད་
སྲུང་འདི་ནི་ཡང་དག་པའི་གསོ་བ་ཞེས་བྱའོ། །འོད་སྲུང་བྱང་ཆུབ་སེམས་དཔའ་གསོ་བ་འདི་ལ་བསླབ་པར་བརྩོན་པར་བྱའོ། །འོད་སྲུང་འཛམ་བུའི་གླིང་ན་སྨན་པ་དང་། སྨན་པའི་སློབ་མ་ཇི་སྙེད་ཡོད་པ་དེ་དག་གི་ནང་ན་འཚོ་བྱེད་ནི་མཆོག་ཅེས་བྱའོ། །འོད་སྲུང་གལ་ཏེ་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་སྨན་པའི་རྒྱལ་པོ་འཚོ་བྱེད་དང་འདྲ་བར་གྱུར་ཀྱང་དེ་དག་ལ་ལ་ཞིག་གིས་ལྟ་བ་དང་འགྱོད་པ་ལ་གནས་པ་གསོ་བའི་སྨན་གང་ཡིན་ཞེས་དྲིས་ན། དེ་དག་གིས་ཤེས་པ་འམ། བསྟན་པ་
འམ། བསྒོ་བར་མི་ནུས་སོ། །འོད་སྲུང་དེ་ལ་བྱང་ཆུབ་སེམས་དཔས་འདི་སྙམ་དུ་བདག་ནི་འཇིག་རྟེན་གྱི་སྨན་ཙམ་གྱི་ཆོག་པར་མི་བྱའི། བདག་གིས་འཇིག་རྟེན་ལས་འདས་པའི་ཡེ་ཤེས་ཀྱི་སྨན་ཡོངས་སུ་བཙལ་བར་བྱའོ། །དགེ་བའི་རྩ་བ་ཐམས་ཅད་ཀྱང་ལེགས་པར་
ཡང་དག་པར་བསྒྲུབ་པར་བྱའོ་སྙམ་དུ་བརྟག་པར་བྱའོ། །དེ་ལྟར་བརྟགས་ནས་འཇིག་རྟེན་ལས་འདས་པའི་ཡེ་ཤེས་ཀྱི་སྨན་གང་ཚོལ་བ་དེས་ཕྱོགས་བཞིར་སོང་ལ་སེམས་ཅན་རྣམས་ལ་ཡང་དག་པའི་གསོ་བ་བྱ་སྟེ། ཡང་དག་པའི་གསོ་བས་སེམས་ཅན་རྣམས་གསོ་བར་
བྱའོ། །འོད་སྲུང་དེ་ལ་འཇིག་རྟེན་ལས་འདས་པའི་ཡེ་ཤེས་ཀྱི་སྨན་གང་ཞེ་ན། འདི་ལྟ་སྟེ། རྒྱུ་རྐྱེན་ལ་འཇུག་པ་ཤེས་པ་དང་། བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་། གང་ཟག་མེད་པའི་ཆོས་རྣམས་
ལ་མོས་པའི་ཤེས་པ་དང་། སྟོང་པ་ཉིད་ཀྱིས་མི་དམིགས་པའི་ཆོས་རྣམས་ལ་མི་སྡང་བ་དང་། སེམས་ཅན་ཡོངས་སུ་ཚོལ་བའི་བརྩོན་འགྲུས་སོ། །དེ་འདི་ལྟར་སེམས་ཡོངས་སུ་ཚོལ་ཏེ། འདོད་ཆགས་པར་འགྱུར་བ་འམ། ཞེ་སྡང་བར་འགྱུར་བ་འམ། གཏི་མུག་པར་

འགྱུར་བའི་སེམས་དེ་གང་ཡིན། ཅི་འདས་པའམ། མ་འོངས་པའམ། ད་ལྟར་བྱུང་བ་ཞིག་ཡིན་ནམ། དེ་ལ་སེམས་འདས་པ་གང་ཡིན་པ་དེ་ནི་ཟད་པའོ། །མ་འོངས་པ་གང་ཡིན་པ་དེ་ནི་མ་ཕྱིན་པའོ། །ད་ལྟར་བྱུང་བ་ནི་གནས་པ་མེད་དོ་
སྙམ་མོ། །འོད་སྲུང་སེམས་ནི་ནང་ན་ཡང་མེད། ཕྱི་རོལ་ན་ཡང་མེད། གཉི་ག་མེད་པ་ལ་ཡང་མི་དམིགས་སོ། །འོད་སྲུང་སེམས་ནི་དཔྱད་དུ་མེད་པ། བསྟན་དུ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་པ་མེད་པའོ། །
འོད་སྲུང་སེམས་ནི་སངས་རྒྱས་ཐམས་ཅད་ཀྱིས་ཀྱང་མ་གཟིགས། མི་གཟིགས། གཟིགས་པར་མི་འགྱུར་རོ། །ལོག་པར་ཞུགས་པའི་འདུ་ཤེས་ལས་ཆོས་རྣམས་འབྱུང་བ་མ་གཏོགས་པར་སེམས་ནི་སངས་རྒྱས་ཐམས་ཅད་ཀྱིས་ཀྱང་མ་གཟིགས། མི་གཟིགས།
གཟིགས་པར་མི་འགྱུར་བ་གང་ཡིན་པ་དེའི་རྒྱུ་བ་ཅི་འདྲ་བར་བལྟ་ཞེ་ན། འོད་སྲུང་སེམས་ནི་སྒྱུ་མ་དང་མཚུངས་ཏེ། ཡང་དག་པ་མ་ཡིན་པ་ཀུན་བརྟགས་པས་སྐྱེ་བ་རྣམ་པ་མང་པོ་ཡོངས་སུ་འཛིན་ཏོ། །འོད་སྲུང་སེམས་ནི་འབབ་ཆུའི་རྒྱུན་དང་མཚུངས་ཏེ། མི་གནས་པ་སྐྱེས་
ནས་འཇིག་ཅིང་འཇུག་པའོ། །འོད་སྲུང་སེམས་ནི་རླུང་དང་མཚུངས་ཏེ། རིང་དུ་འགྲོ་ཞིང་གཟུང་དུ་མེད་པར་རྒྱུ་བའོ། །འོད་སྲུང་སེམས་ནི་མར་མེའི་འོད་འཕྲོ་བ་དང་མཚུངས་ཏེ། རྒྱུ་དང་རྐྱེན་ལས་འབྱུང་བའོ། །འོད་སྲུང་སེམས་ནི་ནམ་མཁའ་དང་མཚུངས་ཏེ། ཉེ་བའི་ཉོན་
མོངས་པ་གློ་བུར་བ་རྣམས་ཀྱིས་ཉེ་བར་ཉོན་མོངས་པའོ། །འོད་སྲུང་སེམས་ནི་གློག་དང་མཚུངས་ཏེ། སྐད་ཅིག་ཏུ་འཇིག་ཅིང་མི་གནས་པའོ། །འོད་སྲུང་སེམས་ནི་སྤྲེའུ་དང་མཚུངས་ཏེ། ཡུལ་ཐམས་ཅད་འདོད་པའོ། །འོད་སྲུང་སེམས་ནི་ལས་རྣམ་པ་སྣ་ཚོགས་
མངོན་པར་འདུ་བྱེད་པའི་ཕྱིར་རི་མོ་མཁན་དང་མཚུངས་སོ། །འོད་སྲུང་སེམས་ནི་ཉོན་མོངས་པ་ཐ་དད་པ་འབྱུང་བའི་ཕྱིར་མི་གནས་པའོ། །འོད་སྲུང་སེམས་ནི་གཉིས་པ་མཚམས་སྦྱོར་བ་མེད་པའི་ཕྱིར་གཅིག་པུ་རྒྱུ་སྟེ་གཉིས་སུ་མེད་པའོ། །འོད་སྲུང་སེམས་ནི་ཆོས་ཐམས་

ཅད་ལ་དབང་བྱེད་པའི་ཕྱིར་རྒྱལ་པོ་དང་མཚུངས་སོ། །འོད་སྲུང་སེམས་ནི་སྡུག་བསྔལ་ཐམས་ཅད་སྐྱེད་པའི་ཕྱིར་མི་མཛའ་བ་དང་མཚུངས་སོ། །འོད་སྲུང་སེམས་ནི་དགེ་བའི་རྩ་བ་ཐམས་ཅད་འཇིག་པར་བྱེད་པའི་ཕྱིར་བྱེ་མའི་ཁང་པ་དང་མཚུངས་སོ། །འོད་སྲུང་སེམས་ནི་མི་རྟག་པ་ལ་
རྟག་པར་འདུ་ཤེས་པའི་ཕྱིར་ཟིལ་པ་དང་མཚུངས་སོ། །འོད་སྲུང་སེམས་ནི་སྡུག་བསྔལ་ལ་བདེ་བར་འདུ་ཤེས་པའི་ཕྱིར་ཉའི་མཆིལ་པ་དང་མཚུངས་སོ། །འོད་སྲུང་སེམས་ནི་བདག་མེད་པ་ལ་བདག་ཏུ་འདུ་ཤེས་པའི་ཕྱིར་རྨི་ལམ་དང་མཚུངས་སོ། །འོད་སྲུང་སེམས་ནི་མི་གཙང་བ་
ལ་གཙང་བར་འདུ་ཤེས་པའི་ཕྱིར་སྦྲང་མ་སྔོན་པ་དང་མཚུངས་སོ། །འོད་སྲུང་སེམས་ནི་གནོད་པ་རྣམ་པ་མང་པོ་བྱེད་པས་ཕྱིར་རྒོལ་བ་དང་མཚུངས་སོ། །འོད་སྲུང་སེམས་ནི་རྟག་ཏུ་ཀླན་ཀ་ཚོལ་བའི་ཕྱིར་གནོད་སྦྱིན་མདངས་འཕྲོག་པ་དང་མཚུངས་སོ། །འོད་སྲུང་སེམས་ནི་
རྟག་ཏུ་གླགས་ལྟ་བས་དགྲ་དང་མཚུངས་སོ། །འོད་སྲུང་སེམས་ནི་རྗེས་སུ་ཆགས་པ་དང་ཁོང་ཁྲོ་བ་དང་ལྡན་པས་རྟག་པར་མཐོ་དམའ་ཅན་ནོ། །འོད་སྲུང་སེམས་ནི་དགེ་བའི་རྩ་བ་ཐམས་ཅད་རྐུ་བས་ཆོམ་རྐུན་དང་མཚུངས་སོ། །འོད་སྲུང་སེམས་ནི་གཟུགས་ལ་དགའ་བས་ཕྱི་བྱི་ཞྭ་
ལའི་མིག་དང་མཚུངས་སོ། །འོད་སྲུང་སེམས་ནི་སྒྲ་ལ་དགའ་བས་གཡུལ་གྱི་རྔ་དང་མཚུངས་སོ། །འོད་སྲུང་སེམས་ནི་ཕག་མི་གཙང་བའི་དྲི་ལ་དགའ་བ་བཞིན་དུ་དྲི་ལ་དགའོ། །འོད་སྲུང་སེམས་ནི་རོ་ལ་དགའ་བས་ཟས་ཀྱི་ལྷག་མ་ཟ་བའི་བྲན་མོ་དང་མཚུངས་སོ། །
འོད་སྲུང་སེམས་ནི་རེག་པ་ལ་དགའ་བས་སྦྲང་མ་འབྲུ་མར་གྱི་སྣོད་ལ་ཆགས་པ་དང་མཚུངས་སོ། །འོད་སྲུང་སེམས་ནི་ཀུན་ཏུ་བཙལ་ན་མི་རྙེད་དོ། །གང་མི་རྙེད་པ་དེ་ནི་མི་དམིགས་སོ། །གང་མི་དམིགས་པ་དེ་ནི་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་
བ་ཡང་མ་ཡིན་ནོ། །གང་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་པ་དེ་ནི་དུས་གསུམ་ལས་ཡང་དག་པར་འདས་པའོ། །གང་དུས་གསུམ་ལས་ཡང་དག་པར་འདས་པ་དེ་ནི་ཡོད་པ་ཡང་མ་ཡིན། མེད་པ་ཡང་མ་ཡིན་ནོ། །

གང་ཡོད་པ་ཡང་མ་ཡིན། མེད་པ་ཡང་མ་ཡིན་པ་དེ་ནི་མ་སྐྱེས་པའོ། །གང་མ་སྐྱེས་པ་དེ་ལ་ངོ་བོ་ཉིད་མེད་དོ། །གང་ངོ་བོ་ཉིད་མེད་པ་དེ་ལ་འབྱུང་བ་མེད་དོ། །གང་འབྱུང་བ་མེད་པ་དེ་ལ་འགག་པ་མེད་དོ། །གང་འགག་པ་མེད་པ་དེ་ལ་འབྲལ་བ་མེད་
དོ། །གང་འབྲལ་བ་མེད་པ་དེ་ལ་འོང་བ་ཡང་མེད། འགྲོ་བ་ཡང་མེད། འཆི་འཕོ་ཡང་མེད། སྐྱེ་བ་ཡང་མེད་དོ། །གང་ལ་འོང་བ་ཡང་མེད། འགྲོ་བ་ཡང་མེད། འཆི་འཕོ་ཡང་མེད། སྐྱེ་བ་ཡང་མེད་པ་དེ་ལ་འདུ་བྱེད་གང་ཡང་མེད་དོ། །གང་ལ་འདུ་བྱེད་
གང་ཡང་མེད་པ་དེ་ནི་འདུས་མ་བྱས་པའོ། །གང་འདུས་མ་བྱས་པ་དེ་ནི་འཕགས་པ་རྣམས་ཀྱི་རིགས་སོ། །འཕགས་པ་རྣམས་ཀྱི་རིགས་གང་ཡིན་པ་དེ་ལ་བསླབ་པ་ཡང་མེད་བསླབ་པ་ལས་འདས་པ་ཡང་མེད་དོ། །གང་ལ་བསླབ་པ་ཡང་མེད་བསླབ་པ་ལས་འདས་པ་ཡང་མེད་པ་དེ་ལ་རྒྱུ་བ་
ཡང་མེད་མི་རྒྱུ་བ་ཡང་མེད། རབ་ཏུ་རྒྱུ་བ་ཡང་མེད། གང་ལ་རྒྱུ་བ་ཡང་མེད། མི་རྒྱུ་བ་ཡང་མེད། རབ་ཏུ་རྒྱུ་བ་ཡང་མེད་པ་དེ་ལ་སེམས་ཀྱང་མེད། སེམས་ལས་བྱུང་བའི་ཆོས་རྣམས་ཀྱང་མེད་དོ། །གང་ལ་སེམས་ཀྱང་མེད། སེམས་ལས་བྱུང་བའི་ཆོས་རྣམས་ཀྱང་མེད་པ་དེ་ལ་ལས་ཀྱང་མེད། ལས་ཀྱི་
རྣམ་པར་སྨིན་པ་ཡང་མེད་དོ། །གང་ལ་ལས་ཀྱང་མེད། ལས་ཀྱི་རྣམ་པར་སྨིན་པ་ཡང་མེད་པ་དེ་ལ་བདེ་བ་ཡང་མེད། སྡུག་བསྔལ་ཡང་མེད་དོ། །གང་ལ་བདེ་བ་ཡང་མེད། སྡུག་བསྔལ་བ་ཡང་མེད་པ་དེ་ནི་འཕགས་པ་རྣམས་ཀྱི་རིགས་ཏེ། འཕགས་པ་རྣམས་ཀྱི་
རིགས་གང་ཡིན་པ་དེ་ལ་ནི་ལས་ཀྱང་མེད། ལས་མངོན་པར་འདུ་བྱེད་པ་ཡང་མེད་དོ། །གང་ལ་ལས་ཀྱང་མེད། ལས་མངོན་པར་འདུ་བྱེད་པ་ཡང་མེད་པའི་རིགས་དེ་ལ་ནི་ལུས་ཀྱིས་ལས་བྱེད་པ་མེད་དོ། །ངག་གིས་མ་ཡིན། ཡིད་ཀྱིས་མ་ཡིན་ནོ། །རིགས་དེ་ལ་
ཐ་མ་དང་འབྲིང་དང་མཆོག་ཏུ་རྣམ་པར་གཞག་པ་ཡང་མེད་དོ། །དེ་ཅིའི་ཕྱིར་ཞེ་ན། རིགས་དེ་ནི་ནམ་མཁའ་དང་མཚུངས་པའི་ཕྱིར་མཉམ་པའོ། །རིགས་དེ་ནི་ཆོས་ཐམས་ཅད་རོ་གཅིག་པའི་ཕྱིར་ཁྱད་པར་མེད་པའོ། །རིགས་དེ་ནི་ལུས་དང་སེམས་དབེན་པའི་ཕྱིར་དབེན་པའོ་

རིགས་དེ་ནི་མྱ་ངན་ལས་འདས་པ་དང་འཐུན་པའོ། །རིགས་དེ་ནི་ཉོན་མོངས་པ་ཐམས་ཅད་ཀྱི་དྲི་མ་དང་བྲལ་བའི་ཕྱིར་དྲི་མ་མེད་པའོ། །རིགས་དེ་ནི་ངར་འཛིན་པ་དང་། ང་ཡིར་འཛིན་པས་ངའི་བ་མེད་པའོ། །རིགས་དེ་ནི་ཡང་དག་པ་དང་། ཡང་དག་པ་མ་ཡིན་པ་མཉམ་
པ་ལས་བྱུང་བ་སྟེ། མི་མཉམ་པ་མེད་པའོ། །རིགས་དེ་ནི་དོན་དམ་པའི་བདེན་པ་ཡིན་པས་བདེན་པའོ། །རིགས་དེ་ནི་གཏན་དུ་མི་སྐྱེ་བའི་ཕྱིར་མི་ཟད་པའོ། །རིགས་དེ་ནི་རྟག་ཏུ་ཆོས་ཐམས་ཅད་དེ་བཞིན་ཉིད་ཀྱི་ཕྱིར་རྟག་པའོ། །རིགས་དེ་ནི་མྱ་ངན་ལས་འདས་པ་
མཆོག་གི་ཕྱིར་བདེ་བའོ། །རིགས་དེ་ནི་རྣམ་པ་ཐམས་ཅད་དུ་དྲི་མ་མེད་པའི་ཕྱིར་དགེ་བའོ། །རིགས་དེ་ནི་བདག་ཡོངས་སུ་བཙལ་ཏེ་མ་རྙེད་པའི་ཕྱིར་བདག་མེད་དོ། །རིགས་དེ་ནི་རབ་ཏུ་རྣམ་པར་དག་པའི་ཕྱིར་རྣམ་པར་དག་པའོ། །འོད་སྲུང་ནང་དུ་ཡོངས་སུ་ཚོལ་ལ་ཕྱི་རོལ་
དུ་མ་རྒྱུག་ཤིག །འོད་སྲུང་མ་འོངས་པའི་དུས་ན་དགེ་སློང་ཁྱི་རྡོ་ལ་སྙེགས་པ་དང་མཚུངས་པ་དག་འབྱུང་ངོ་། །འོད་སྲུང་ཇི་ལྟར་ན་དགེ་སློང་ཁྱི་རྡོ་ལ་སྙེགས་པ་དང་མཚུངས་པ་ཡིན་ཞེ་ན། འོད་སྲུང་འདི་ལྟ་སྟེ་དཔེར་ན་ཁྱི་ནི་རྡོས་འཇིགས་ལ་རྡོ་དེ་ཉིད་ཀྱི་ཕྱིར་སྙེགས་ཀྱི་རྡོ་དེ་སུས་འཕངས་
པ་དེ་ལ་ནི་མི་སྙེགས་སོ། །འོད་སྲུང་དེ་བཞིན་དུ་དགེ་སྦྱོང་དང་བྲམ་ཟེ་ཁ་ཅིག་གཟུགས་དང་། སྒྲ་དང་། དྲི་དང་། རོ་དང་། རེག་བྱས་འཇིགས་ཤིང་སྐྲག་ནས་དགོན་པའི་གནས་རྣམས་ན་གནས་ཤིང་དེ་དག་དེ་ན་གཅིག་པུ་གཉིས་སུ་མེད་པར་ལུས་རབ་ཏུ་དབེན་པར་འདུག་
སྟེ། ཆགས་པར་འགྱུར་བའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་སྣང་བར་གྱུར་ན་དེ་དག་དེ་ལ་བཏང་སྙོམས་སུ་འཇོག་ཅིང་བསོད་ཉམས་སུ་སྦྱོར་བ་དང་ལྡན་པར་གནས་ཀྱི་ནང་དུ་སོ་སོར་རྟོག་པ་ལ་མངོན་པར་མི་བརྩོན་ཏེ། དེ་དག་གཟུགས་
དང་། སྒྲ་དང་། དྲི་དང་། རོ་དང་། རེག་བྱ་རྣམས་ལས་ཅིས་འབྱུང་བ་མི་ཤེས་ཤིང་ཁོང་དུ་མི་ཆུད་དོ། །དེ་དག་གིས་དེ་མ་ཤེས་ཤིང་ཁོང་དུ་མ་ཆུད་པས་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་

དག་ཏུ་སོང་ན་ཡང་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་ཀྱིས་གནོད་པར་འགྱུར་རོ། །གལ་ཏེ་དེ་དག་དགོན་པ་ན་གནས་པ་ལས་འཆི་བའི་དུས་བྱས་པར་གྱུར་ན་འཇིག་རྟེན་པའི་སྡོམ་པ་ལ་གནས་པ་དེ་དག་མཐོ་རིས་ཀྱི་འཇིག་རྟེན་དུ་
སྐྱེ་བར་འགྱུར་ཏེ། དེར་ཡང་དེ་དག་ལྷའི་འདོད་པའི་ཡོན་ཏན་ལྔ་པོ་དག་གིས་གནོད་པར་འགྱུར་རོ། །དེ་དག་དེ་ནས་ཤི་འཕོས་ནས་ངན་སོང་བཞི་ལས་ཡོངས་སུ་མ་གྲོལ་བར་འགྱུར་ཏེ། བཞི་གང་ཞེ་ན། འདི་ལྟ་སྟེ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་
དང་། གཤིན་རྗེའི་འཇིག་རྟེན་དང་། ལྷ་མ་ཡིན་ནོ། །འོད་སྲུང་དེ་ལྟར་ན་དགེ་སློང་ཁྱི་རྡོ་ལ་སྙེགས་པ་དང་མཚུངས་པ་དག་ཡིན་ནོ། །འོད་སྲུང་ཇི་ལྟར་ན་ཁྱི་རྡོ་ལ་སྙེགས་པ་དང་མི་འདྲ་བ་ཡིན་ཞེ་ན། འོད་སྲུང་གང་གཤེ་ཡང་སླར་མི་གཤེ །ཁྲོས་ཀྱང་སླར་མི་
ཁྲོ། མཚང་བྲུས་ཀྱང་སླར་མཚང་མི་འདྲུ། བརྡེགས་ཀྱང་སླར་མི་རྡེག །བསྡིགས་ཀྱང་སླར་མི་སྡིགས། སྨད་ཀྱང་སླར་མི་སྨོད་ཅིང་ནང་དུ་སེམས་ལ་སོ་སོར་རྟོག་སྟེ། འདི་ལ་གཤེ་བ་འམ། ཁྲོས་པའམ། བརྡེགས་པའམ། བསྡིགས་པའམ། སྨད་པ་
འམ། མཚང་བྲུས་པ་དེ་དག་གང་ཡིན་སྙམ་དུ་སོ་སོར་རྟོག་པའོ། །འོད་སྲུང་དེ་ལྟར་ན་དགེ་སློང་ཁྱི་རྡོ་ལ་སྙེགས་པ་དང་མི་འདྲ་བ་ཡིན་ནོ། །དེ་ལ་འདི་སྐད་ཅེས་བྱ་སྟེ། དཔེར་ན་ཁྱི་ནི་རྡོ་བས་སྐྲག་གྱུར་ཀྱང་། །སུས་འཕངས་མི་སྙེགས་རྡོ་ལ་སྙེགས་པར་བྱེད། །དེ་
བཞིན་དགེ་སྦྱོང་བྲམ་ཟེ་ལ་ལ་དག །གཟུགས་ལ་སོགས་པས་སྐྲག་ནས་དགོན་པར་གནས། །དེ་དག་དགོན་པ་དེ་ལ་གནས་གྱུར་ཀྱང་། །གཟུགས་ལ་སོགས་པ་སྡུག་པ་མཐོང་གྱུར་ན། །བཏང་སྙོམས་འཇོག་ཅིང་ནང་གི་ཚུལ་མི་ཤེས། །དེ་ཡི་ཉེས་ལས་བྱུང་བ་
གང་ཡིན་པ། །མི་ཤེས་པས་ན་སླར་ཡང་གྲོང་དུ་གནས། །གཟུགས་ལ་སོགས་པས་དེར་ཡང་གནོད་པར་འགྱུར། །འདིར་ཡང་ལྷ་ཡི་ལོངས་སྤྱོད་སྤྱད་གྱུར་ཏེ། །ལྷ་དང་མི་ལས་ཁ་ཅིག་ཤི་འཕོས་ནས། །དེ་དག་ངན་སོང་སར་ནི་ལྟུང་བར་འགྱུར། །བླུན་པོ་དེ་

དག་ཤི་འཕོས་སྡུག་བསྔལ་འགྱུར། །དེ་ལྟར་སྡུག་བསྔལ་བརྒྱ་ལྡན་དེ་དག་ནི། །ཁྱི་རྡོ་སྙེགས་པ་འདྲ་ཞེས་བདེ་གཤེགས་གསུངས། །སྤྱོས་ཀྱང་མི་གཤེ་བརྡེགས་ཀྱང་མི་རྡེག་དང་། །སུ་ཞིག་སྨད་ཀྱང་སྨོད་པར་མི་བྱེད་དང་། །དེ་བཞིན་མཚང་བྲུས་མཚང་
འདྲུ་མི་བྱེད་དང་། །ཁྲོས་ཀྱང་དེས་པ་ཁྲོ་བར་མི་བྱེད་ཅིང་། །ནང་གི་སེམས་ཀྱི་གཉེན་པོར་གྱུར་པ་དག །ཚོལ་ཞིང་ཡིད་ཞི་དྲན་དང་ལྡན་གྱུར་པ། །དེ་འདྲའི་ཚུལ་ཁྲིམས་བརྟུལ་ཞུགས་ལྡན་པ་ནི། །རྡོ་སྙེགས་ཁྱི་མི་འདྲ་ཞེས་རྒྱལ་བས་གསུངས། །འོད་
སྲུང་འདི་ལྟ་སྟེ་དཔེར་ན་རྟའི་འདུལ་སྦྱོང་ལ་མཁས་པས་རྟ་དེ་གང་དང་གང་དུ་གཡོ་བྱེད་ཅིང་མ་བྱང་བ་དེ་དང་དེ་རབ་ཏུ་སྦྱོང་ངོ་། །འོད་སྲུང་དེ་བཞིན་དུ་དགེ་སློང་རྣལ་འབྱོར་སྤྱོད་པ་ཡང་གང་དང་གང་དུ་སེམས་འགྱུར་བར་མཐོང་བ་དེ་དང་དེར་རབ་ཏུ་སྦྱོང་བ་ལ་འཇུག་སྟེ། དེ་ཅི་ནས་ཕྱིས་
འཁྲུག་པར་མི་འགྱུར་བ་དེ་ལྟར་སེམས་རབ་ཏུ་འཆོས་སོ། །དེ་ལ་འདི་སྐད་ཅེས་བྱ་སྟེ། དཔེར་ན་རྟ་ཡི་འདུལ་སྦྱོང་མཁས་པ་ཞིག །བྱང་ཞིང་གཡོ་མེད་ཚུལ་དུ་རབ་ཏུ་འདུལ། །རྣལ་འབྱོར་པ་ཡང་སེམས་ནི་འགྱུར་མཐོང་ནས། །ཇི་ལྟར་ཕྱིས་འཁྲུག་མི་འགྱུར་དེ་
ལྟར་འཆོས། །འོད་སྲུང་འདི་ལྟ་སྟེ་དཔེར་ན་ལྐོག་ནད་ལྷ་འོར་གྱིས་ནི་སྲོག་གི་དབང་པོ་འགག་པར་བྱེད་དོ། །འོད་སྲུང་དེ་བཞིན་དུ་ལྟ་བར་གྱུར་པ་ཐམས་ཅད་ཀྱི་ནང་ན་བདག་ཏུ་འཛིན་པ་ནི་ཆོས་ཀྱི་སྲོག་གི་དབང་པོ་འགག་པར་བྱེད་པའོ། །དེ་ལ་འདི་སྐད་ཅེས་བྱ་སྟེ། དཔེར་ན་ལྷ་འོར་སྲོག་གི་
དབང་པོ་ལ། །གནོད་ཅིང་དེ་ལ་བདེ་བ་སྦྱིན་པ་མིན། །དེ་བཞིན་ལྟ་གྱུར་ནང་ན་བདག་ལྟ་བ། །དེ་ནི་ཆོས་སྲོག་རྣམ་པར་འཇིག་པར་བྱེད། །འོད་སྲུང་འདི་ལྟ་སྟེ། དཔེར་ན་མི་ནི་གང་དང་གང་དུ་བཅིངས་པ་དེ་དང་དེ་ཉིད་ལས་དགྲོལ་བར་བྱ་བ་ཡིན་ནོ། །འོད་སྲུང་དེ་བཞིན་དུ་རྣལ་འབྱོར་སྤྱོད་པའི་
སེམས་གང་དང་གང་ལ་ཆགས་པ་དེ་དང་དེ་ལས་དགྲོལ་བར་བྱ་བ་ཡིན་ནོ། །དེ་ལ་འདི་སྐད་ཅེས་བྱ་སྟེ། དཔེར་ན་མི་ནི་གང་དུ་བཅིངས་གྱུར་པ། །དེ་དང་དེ་ལས་དགྲོལ་བར་བྱ་བ་ཡིན། །དེ་བཞིན་སེམས་རྨོངས་གང་དང་གང་ཆགས་པ། །རྣལ་འབྱོར་པས་ནི་དེ་དང་དེ་ལས་

དགྲོལ། །འོད་སྲུང་འདི་གཉིས་ནི་རབ་ཏུ་བྱུང་བའི་ནམ་མཁའ་ལ་ཡོངས་སུ་ཆགས་པ་སྟེ། གཉིས་གང་ཞེ་ན། འཇིག་རྟེན་རྒྱང་ཕན་པའི་གསང་ཚིག་ཡོངས་སུ་ཚོལ་བ་དང་། ལྷུང་བཟེད་དང་ཆོས་གོས་ལྷག་པར་འཆང་བ་སྟེ། འདི་གཉིས་སོ། །
དེ་ལ་འདི་སྐད་ཅེས་བྱ་སྟེ། འཇིག་རྟེན་རྒྱང་ཕན་གོམས་བྱེད་བརྩོན་པ་དང་། །ལྷུང་བཟེད་ཆོས་གོས་ལྷག་པར་འཆང་བྱེད་པ། །འདི་གཉིས་ནམ་མཁའ་ལ་ནི་ཆགས་པ་སྟེ། །དེ་དག་བྱང་ཆུབ་སེམས་དཔས་སྤང་བར་བྱ། །འོད་སྲུང་འདི་གཉིས་ནི་རབ་ཏུ་བྱུང་བའི་འཆིང་བ་དམ་
པོ་སྟེ། གཉིས་གང་ཞེ་ན། ལྟ་བར་གྱུར་པའི་འཆིང་བ་དང་། རྙེད་པ་དང་། བཀུར་སྟི་དང་། ཚིགས་སུ་བཅད་པའི་འཆིང་བ་སྟེ། འདི་གཉིས་སོ། །དེ་ལ་འདི་སྐད་ཅེས་བྱ་སྟེ། ལྟ་གྱུར་འཆིང་དང་རྙེད་དང་བཀུར་སྟི་དང་། །གྲགས་པའི་འཆིང་བ་རབ་ཏུ་བྱུང་བ་ཡི། །འཆིང་
བ་དམ་ཞེས་འཕགས་པ་རྣམས་ཀྱིས་གསུངས། །དེ་དག་རྟག་ཏུ་རབ་ཏུ་བྱུང་བས་སྤང་། །འོད་སྲུང་འདི་གཉིས་ནི་རབ་ཏུ་བྱུང་བའི་བར་དུ་གཅོད་པའི་ཆོས་ཏེ། གཉིས་གང་ཞེ་ན། ཁྱིམ་པའི་ཕྱོགས་ལ་སྟེན་པ་དང་། འཕགས་པའི་ཕྱོགས་ལ་སྨོད་པར་སེམས་པ་སྟེ་འདི་གཉིས་སོ། །
དེ་ལ་འདི་སྐད་ཅེས་བྱ་སྟེ། ཁྱིམ་པའི་ཕྱོགས་ལ་སྟེན་པར་བྱེད་པ་དང་། །འཕགས་པའི་ཕྱོགས་ལ་རྣམ་པར་སྨོད་བྱེད་པ། །འདི་གཉིས་རབ་བྱུང་བར་ཆད་བགེགས་བྱེད་ཡིན། །བྱང་ཆུབ་སེམས་དཔས་དེ་དག་རྣམ་པར་སྤང་། །འོད་སྲུང་འདི་གཉིས་ནི་རབ་ཏུ་བྱུང་བའི་དྲི་མ་
སྟེ། གཉིས་གང་ཞེ་ན། ཉོན་མོངས་པ་ལ་མི་མཇེད་པ་དང་། མཛའ་བོའི་ཁྱིམ་དང་ཟས་སྟེར་བའི་ཁྱིམ་ཡོངས་སུ་འཛིན་པ་སྟེ་འདི་གཉིས་སོ། །དེ་ལ་འདི་སྐད་ཅེས་བྱ་སྟེ། རབ་ཏུ་བྱུང་བ་ཉོན་མོངས་མི་མཇེད་དང་། །མཛའ་བོའི་ཁྱིམ་དང་ཟས་སྟེར་ཁྱིམ་སྟེན་པ། །
དེ་གཉིས་དྲི་མར་རྒྱལ་བའི་དབང་པོས་གསུངས། །བྱང་ཆུབ་སེམས་དཔས་དེ་དག་རྣམ་པར་སྤང་། །འོད་སྲུང་འདི་གཉིས་ནི་རབ་ཏུ་བྱུང་བའི་སེར་བ་འབབ་པ་སྟེ། གཉིས་གང་ཞེ་ན། དམ་པའི་ཆོས་སྤོང་བ་དང་། ཚུལ་ཁྲིམས་ལས་ཉམས་ཀྱང་དད་པས་སྦྱིན་པ་ཡོངས་སུ་

སྤྱོད་པ་སྟེ། འདི་གཉིས་སོ། །དེ་ལ་འདི་སྐད་ཅེས་བྱ་སྟེ། དམ་པའི་ཆོས་ནི་སྤོང་བ་དང་། །ཚུལ་ཁྲིམས་ཉམས་ཀྱང་སྤྱོད་པ་སྟེ། །སེར་བ་འབབ་པ་འདི་གཉིས་ནི། །རྒྱལ་སྲས་རྣམས་ཀྱིས་སྤང་བར་བྱ། །འོད་སྲུང་འདི་གཉིས་ནི་རབ་ཏུ་བྱུང་བའི་རྨ་ཡིན་ཏེ། གཉིས་
གང་ཞེ་ན། ཕ་རོལ་གྱི་ཉེས་པ་ལ་སོ་སོར་རྟོག་པ་དང་། བདག་གི་ཉེས་པ་འཆབ་པ་སྟེ་འདི་གཉིས་སོ། །དེ་ལ་འདི་སྐད་ཅེས་བྱ་སྟེ། བདག་གི་སྐྱོན་ནི་འཆབ་བྱེད་དང་། །ཕ་རོལ་ཉེས་ལ་རྟོག་བྱེད་པ། །འདི་གཉིས་དུག་གི་མེ་དང་འདྲ། །རྟོག་པ་རྣམས་ཀྱི་རྨ་
འདི་སྤང་། །འོད་སྲུང་འདི་གཉིས་ནི་རབ་ཏུ་བྱུང་བའི་ཡོངས་སུ་གདུང་བ་སྟེ། གཉིས་གང་ཞེ་ན། རྙོག་པ་དང་བཅས་པའི་སེམས་ཀྱིས་ངུར་སྨྲིག་འཆང་བ་དང་། ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་ལས་བསྙེན་བཀུར་དང་རིམ་གྲོར་བྱ་བ་བདག་གིར་བྱེད་
པ་སྟེ་འདི་གཉིས་སོ། །དེ་ལ་འདི་སྐད་ཅེས་བྱ་སྟེ། རྙོག་དང་བཅས་པའི་སེམས་ཀྱིས་ངུར་སྨྲིག་འཆང་བ་དང་། །བསྙེན་བཀུར་རིམ་གྲོ་བྱེད་དང་གུས་པར་སྨྲ་བ་དག །ཚུལ་ཁྲིམས་ལྡན་པ་རྣམས་ལ་སྟེན་པར་བྱེད་པ་སྟེ། །ཆོས་གཉིས་འདི་དག་ཡོངས་སུ་སྤང་
བར་བྱ་བ་ཡིན། །འོད་སྲུང་འདི་གཉིས་ནི་རབ་ཏུ་བྱུང་བའི་ཟུག་རྔུ་སྟེ། གཉིས་གང་ཞེ་ན། བསླབ་པའི་གཞི་ལས་འགལ་བ་དང་། སྙིང་པོ་མ་བླངས་པར་འཆི་བའི་དུས་བྱེད་པ་སྟེ། འདི་གཉིས་སོ། །དེ་ལ་འདི་སྐད་ཅེས་བྱ་སྟེ། བསླབ་པའི་གཞི་ལས་འགལ་བར་
གྱུར་པ་དང་། །སྙིང་པོ་མ་བླངས་པར་ནི་དུས་བྱེད་པ། །འདི་གཉིས་རབ་ཏུ་བྱུང་བའི་ཟུག་རྔུ་ཞེས། །ལྷ་མིའི་སྟོན་པ་ཐམས་ཅད་མཁྱེན་པས་གསུངས། །འོད་སྲུང་འདི་གཉིས་ནི་རབ་ཏུ་བྱུང་བའི་ནད་གསོར་མི་རུང་བ་སྟེ། གཉིས་གང་ཞེ་ན། མངོན་པའི་ང་རྒྱལ་གྱིས་སེམས་
ངེས་པར་སེམས་པ་དང་ཐེག་པ་ཆེན་པོ་ལ་ཡང་དག་པར་ཞུགས་པའི་གང་ཟག་རྣམས་ཀྱི་འདུན་པ་ཟློག་པ་སྟེ་འདི་གཉིས་སོ། །དེ་ལ་འདི་སྐད་ཅེས་བྱ་སྟེ། མངོན་པའི་ང་རྒྱལ་སེམས་ལ་ངེས་སེམས་དང་། །སངས་རྒྱས་ཐེག་པ་ལས་ནི་འདུན་པ་ཟློག །འདི་གཉིས་རབ་ཏུ་བྱུང་བའི་

ནད་ཡིན་ཞེས། །གང་ཟག་མཚུངས་པ་མེད་པའི་རྒྱལ་བས་གསུངས། །འོད་སྲུང་དགེ་སྦྱོང་དགེ་སྦྱོང་ཞེས་བྱ་བ་ཇི་ཙམ་གྱིས་ན་དགེ་སྦྱོང་དགེ་སྦྱོང་ཞེས་བྱ་ཞེ་ན། འོད་སྲུང་བཞི་པོ་འདི་དག་ནི་དགེ་སྦྱོང་སྟེ། བཞི་གང་ཞེ་ན། ཁ་དོག་དང་རྟགས་དང་དབྱིབས་ཀྱི་དགེ་སྦྱོང་དང་
ཆོ་ག་སྲུང་ཞིང་ཚུལ་འཆོས་པའི་དགེ་སྦྱོང་དང་བརྗོད་པའི་སྒྲ་ཚིགས་སུ་བཅད་པའི་དགེ་སྦྱོང་དང་། ཡང་དག་པར་སྒྲུབ་པའི་དགེ་སྦྱོང་ངོ་། །འོད་སྲུང་དེ་ལ་ཁ་དོག་དང་རྟགས་དང་དབྱིབས་ཀྱི་དགེ་སྦྱོང་གང་ཞེ་ན། འོད་སྲུང་འདི་ལ་དགེ་སྦྱོང་ཁ་ཅིག་ཁ་དོག་དང་རྟགས་དང་དབྱིབས་དང་ལྡན་པར་གྱུར་ཏེ།
ཆོས་གོས་སྣམ་སྦྱར་གྱོན་ཅིང་མགོ་བྲེགས་ཏེ། ལག་ན་ལྷུང་བཟེད་ཐོགས་མོད་ཀྱི་དེ་ལུས་ཀྱི་ལས་ཡོངས་སུ་མ་དག་པར་སྤྱོད། ངག་གི་ལས་ཡོངས་སུ་མ་དག་པར་སྤྱོད། ཡིད་ཀྱི་ལས་ཡོངས་སུ་མ་དག་པར་སྤྱོད་ཅིང་མ་དུལ་བ་མ་ཞི་བ། མ་བསྲུངས་པ། མ་བྱང་བ། འཚོ་བ་ཡོངས་སུ་མ་
དག་པ། བརྐམ་པ། ལེ་ལོ་ཅན། ཚུལ་ཁྲིམས་འཆལ་པ། སྡིག་པའི་ཆོས་ཅན་ཡིན་ཏེ། འོད་སྲུང་དེ་ནི་ཁ་དོག་དང་རྟགས་དང་དབྱིབས་ཀྱི་དགེ་སྦྱོང་ཞེས་བྱའོ། །འོད་སྲུང་དེ་ལ་ཆོ་ག་སྲུང་ཞིང་ཚུལ་འཆོས་པའི་དགེ་སྦྱོང་གང་ཞེ་ན། འོད་སྲུང་འདི་ལ་དགེ་སྦྱོང་ཁ་ཅིག་ཆོ་ག་དང་། སྤྱོད་ཡུལ་
དང་། སྤྱོད་པ་ཕུན་སུམ་ཚོགས་ཤིང་སྤྱོད་ལམ་བཞིར་ཤེས་བཞིན་དུ་སྤྱོད་ལ། ཟས་དང་སྐོམ་ངན་པ་ཟ་འཐུང་། འཕགས་པའི་རིགས་བཞི་པོ་དག་གིས་ཆོག་པར་འཛིན། བས་མཐའི་གནས་མལ་ལ་མངོན་པར་དགའ། ཁྱིམ་པ་དང་རབ་ཏུ་བྱུང་བ་རྣམས་དང་མི་འདྲེ་ལ་ཚིག་ཉུང་ཞིང་སྨྲ་བ་
ཉུང་མོད་ཀྱི་དེའི་སྤྱོད་ལམ་དེ་དག་ཀྱང་ཚུལ་འཆོས་པ་དང་། ཁ་གསག་གིས་ཡོངས་སུ་བརྟགས་པ་ཡིན་ཏེ། སེམས་ཡོངས་སུ་དག་པར་བྱ་བའི་ཕྱིར་མ་ཡིན། དུལ་བར་བྱ་བའི་ཕྱིར་མ་ཡིན། ཉེ་བར་ཞི་བར་བྱ་བའི་ཕྱིར་མ་ཡིན་གྱི། དམིགས་པར་ལྟ་བ་ཡིན་ཏེ། ངར་འཛིན་པ་དང་
ང་ཡིར་འཛིན་པ་ལ་གནས་ཤིང་སྟོང་པ་ཉིད་ཀྱིས་མི་དམིགས་པའི་ཆོས་རྣམས་ལ་གཡང་སར་འདུ་ཤེས་པ་ཡིན། སྟོང་པ་ཉིད་སྨྲ་བའི་དགེ་སློང་རྣམས་ལ་ཡང་དགྲར་འདུ་ཤེས་པ་ཡིན་ཏེ། འོད་སྲུང་དེ་ནི་ཆོ་ག་སྲུང་ཞིང་ཚུལ་འཆོས་པའི་དགེ་སྦྱོང་ཞེས་བྱའོ། །འོད་སྲུང་དེ་ལ་བརྗོད་པའི་སྒྲ་

ཚིགས་སུ་བཅད་པའི་དགེ་སྦྱོང་གང་ཞེ་ན། འོད་སྲུང་འདི་ལ་དགེ་སྦྱོང་ཁ་ཅིག་ཇི་ལྟར་བདག་ཚུལ་ཁྲིམས་དང་ལྡན་པར་གཞན་གྱིས་ཤེས་པར་འགྱུར་སྙམ་དུ་སོ་སོར་བརྟགས་ནས་ཚུལ་ཁྲིམས་སྲུང་། ཇི་ལྟར་མང་དུ་ཐོས་པར་གཞན་གྱིས་ཤེས་པར་འགྱུར་སྙམ་དུ་སོ་སོར་བརྟགས་
ནས་ཐོས་པ་འཛིན། ཇི་ལྟར་བདག་དགོན་པར་གཞན་གྱིས་ཤེས་པར་འགྱུར་སྙམ་དུ་སོ་སོར་བརྟགས་ནས་དགོན་པ་ལ་གནས་ཤིང་སོ་སོར་བརྟགས་ནས་འདོད་པ་ཉུང་ལ་ཆོག་ཤེས་པ་དང་། རབ་ཏུ་དབེན་པར་གྱུར་ཏེ། འདི་ལྟར་གཞན་ལ་བསྟན་པའི་ཕྱིར་ཡིན་གྱི་སྐྱོ་བར་བྱ་
བའི་ཕྱིར་མ་ཡིན། འདོད་ཆགས་དང་བྲལ་བར་བྱ་བའི་ཕྱིར་མ་ཡིན། འགོག་པར་བྱ་བའི་ཕྱིར་མ་ཡིན། ཉེ་བར་ཞི་བར་བྱ་བའི་ཕྱིར་མ་ཡིན། རྫོགས་པར་བྱང་ཆུབ་པར་བྱ་བའི་ཕྱིར་མ་ཡིན། དགེ་སྦྱོང་གི་ཕྱིར་མ་ཡིན། ཚངས་པའི་ཕྱིར་མ་ཡིན། མྱ་ངན་ལས་འདས་པའི་
ཕྱིར་མ་ཡིན་ཏེ། འོད་སྲུང་དེ་ནི་བརྗོད་པའི་སྒྲ་ཚིགས་སུ་བཅད་པའི་དགེ་སྦྱོང་ཞེས་བྱའོ། །འོད་སྲུང་དེ་ལ་ཡང་དག་པར་སྒྲུབ་པའི་དགེ་སྦྱོང་གང་ཞེ་ན། འོད་སྲུང་གང་ལུས་དང་སྲོག་ལ་ཡང་མི་ལྟ་བ་ཡིན་ན་རྙེད་པ་དང་། བཀུར་སྟི་དང་། ཚིགས་སུ་བཅད་པ་ལ་ལྟ་ཅི་སྨོས། སྟོང་
པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་རྣམས་ཐོས་ནས་དགའ་ཞིང་དེ་བཞིན་ཉིད་དུ་ཞུགས་པ་ཡིན། མྱ་ངན་ལས་འདས་པ་ལ་ཡང་འདོད་པ་མེད་པར་སྤྱད་པ་སྤྱོད་ན་ཁམས་གསུམ་པ་ལ་མངོན་པར་དགའ་བ་ལྟ་ཅི་སྨོས། སྟོང་པ་ཉིད་དུ་ལྟ་བ་ཡང་མི་
འདོད་པ་ཡིན་ན། བདག་དང་སེམས་ཅན་དང་སྲོག་དང་སྐྱེ་བ་པོ་དང་གསོ་བ་དང་སྐྱེས་བུ་དང་གང་ཟག་ཏུ་ལྟ་བ་ལྟ་ཅི་སྨོས། དོན་ལ་རྟོན་གྱི་ཚིག་འབྲུ་ལ་རྟོན་པ་མ་ཡིན། ཉོན་མོངས་པ་རྣམས་ལས་རྣམ་པར་ཐར་པ་ནང་དུ་ཚོལ་གྱི་ཕྱི་རོལ་དུ་རྒྱུག་པ་མ་ཡིན། ཆོས་ཐམས་ཅད་
ཤིན་ཏུ་ཡོངས་སུ་དག་ཅིང་རང་བཞིན་གྱིས་ཀུན་ནས་ཉོན་མོངས་པ་མེད་པར་མཐོང་བས་བདག་ཉིད་སྐྱབས་ཡིན་གྱི། གཞན་སྐྱབས་མ་ཡིན། དེ་དེ་བཞིན་གཤེགས་པ་ལ་ཆོས་ཉིད་དུ་ཡང་མི་ལྟ་ན་གཟུགས་ཀྱི་སྐུར་ལྟ་ཅི་སྨོས། ཆོས་ལ་འདོད་ཆགས་དང་བྲལ་བར་ཡང་མི་ལྟ་ན་སྨྲ་

བའི་ཚིག་གི་ལམ་ནས་བརྗོད་པར་ལྟ་ཅི་སྨོས། འཕགས་པ་འདུས་མ་བྱས་པའི་དགེ་འདུན་ལ་ཡང་རྣམ་པར་མི་རྟོག་ན་མང་པོ་འདུས་པར་ལྟ་ཅི་སྨོས། ཆོས་གང་སྤང་བར་བྱ་བའི་ཕྱིར་བརྩོན་པ་མ་ཡིན། བསྒོམ་པར་བྱ་བའི་ཕྱིར་མ་ཡིན། མངོན་སུམ་དུ་
བྱ་བའི་ཕྱིར་མ་ཡིན། འཁོར་བར་ཡང་མི་སྐྱེ། མྱ་ངན་ལས་འདས་པ་ལ་ཡང་མངོན་པར་དགའ་བ་མ་ཡིན། ཐར་པ་ཡང་མི་དམིགས་སོ། །བཅིང་བ་ཡང་མ་ཡིན་ལ་ཆོས་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་རིག་ནས་ཀུན་ཏུ་མི་འཁོར། ཡོངས་
སུ་མྱ་ངན་ལས་མི་འདའ་བ་ཡིན་ཏེ། འོད་སྲུང་དེ་ནི་ཡང་དག་པར་སྒྲུབ་པའི་དགེ་སྦྱོང་ཞེས་བྱའོ། །འོད་སྲུང་ཡང་དག་པར་སྒྲུབ་པའི་དགེ་སྦྱོང་དུ་འགྱུར་བར་བརྩོན་པར་བྱའི་མིང་གིས་གནོད་པར་ནི་མི་བྱ་སྟེ། འོད་སྲུང་དགེ་སྦྱོང་ནི་བཞི་པོ་དེ་དག་གོ །དེ་ལ་འདི་སྐད་ཅེས་བྱ་སྟེ། གང་
ཞིག་ལུས་དང་ངག་དང་སེམས་མ་དག །མ་དུལ་མ་བསྲུངས་མ་བྱང་འདོད་ཆེན་ཅན། །མགོ་བྲེགས་ཆོས་གོས་ལྷུང་བཟེད་ལག་ན་ཐོགས། །དེ་ནི་དབྱིབས་རྟགས་དགེ་སྦྱོང་ཡིན་ཞེས་བསྟན། །ཆོ་ག་སྤྱོད་པ་ལ་སོགས་ལྡན་གྱུར་ཅིང་། །ཁ་ཟས་ངན་ཟ་ཚུལ་
འཆོས་ལ་སོགས་སྟེན། །འདུ་འཛི་རྒྱང་རིང་ཡོངས་སུ་སྤོང་བྱེད་ཅིང་། །སྤྱོད་ལམ་འཕགས་པའི་རིགས་དང་ལྡན་གྱུར་ཀྱང་། །དེ་ཡི་དེ་ཀུན་དུལ་བར་བྱ་ཕྱིར་མིན། །ཞི་ཕྱིར་མ་ཡིན་སྐྱོ་བར་བྱ་ཕྱིར་མིན། །སྟོང་པ་མཚན་མེད་གཡང་སར་འདུ་ཤེས་པ། །ཆོ་ག་སྲུང་
ཞིང་ཚུལ་འཆོས་གཉིས་པ་ཡིན། །ཚུལ་ཁྲིམས་ཏིང་འཛིན་སྦྱངས་པའི་ཡོན་ཏན་ཐོས། །གཞན་དག་ངོ་མཚར་འཛིན་དུ་གཞུག་ཕྱིར་བྱེད། །ཞི་ཕྱིར་མ་ཡིན་སྐྱོ་བར་བྱ་ཕྱིར་མིན། །བརྗོད་དང་གྲགས་འདོད་དགེ་སྦྱོང་གསུམ་པ་ཡིན། །གང་ཞིག་ལུས་སྲོག་དོན་དུ་མི་གཉེར་
ཞིང་། །རྙེད་དང་བཀུར་སྟི་ལ་ནི་རྒྱབ་ཀྱིས་ཕྱོགས། །རྣམ་པར་ཐར་པ་བསྐྱེད་པའི་སྒོ་ཐོས་ནས། །སྲིད་པའི་འགྲོ་བ་ཐམས་ཅད་དོན་མི་གཉེར། ཆོས་རྣམས་ཤིན་ཏུ་སྟོང་པར་ཡོངས་བརྟགས་ནས། །མྱ་ངན་འདས་དང་མ་འདས་མཐོང་མི་འགྱུར། །ཆོས་ལ་

འདོད་ཆགས་བྲལ་བར་རྟག་ཏུ་རྟོག །མ་བྱས་ཆོས་རྟོགས་མྱ་ངན་འདས་པར་འགྱུར། །འོད་སྲུང་འདི་ལྟ་སྟེ། དཔེར་ན་མི་དབུལ་པོ་ཞིག་ལ་མཛོད་འབྱོར་པ་ཞེས་མིང་བཏགས་ན། འོད་སྲུང་འདི་ཇི་སྙམ་དུ་སེམས། མི་དབུལ་པོ་དེ་དང་མིང་དེ་འཐུན་པ་ཡིན་ནམ། གསོལ་
པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་གང་དགེ་སྦྱོང་དང་། བྲམ་ཟེ་གང་དག་དགེ་སྦྱོང་དང་། བྲམ་ཟེའི་ཡོན་ཏན་དང་མི་ལྡན་པ་དེ་དག་ནི་གསུང་རབ་འདི་ལ་མི་དབུལ་པོ་ཞེས་ངས་བཤད་དོ། །དེ་
ལ་འདི་སྐད་ཅེས་བྱ་སྟེ། དཔེར་ན་དབུལ་པོར་གྱུར་པའི་མི་ཞིག་ལ། །མཛོད་ལྡན་མིང་བཏགས་དེ་ལ་མཛེས་མ་ཡིན། །དགེ་སྦྱོང་ཉམས་ལ་དགེ་སྦྱོང་མིང་མི་མཛེས། །དབུལ་ལ་ཕྱུག་ཅེས་བཏགས་པའི་དཔེ་དང་མཚུངས། །འོད་སྲུང་འདི་ལྟ་སྟེ་དཔེར་ན་མི་ལ་ལ་ཞིག་རྒྱ་
མཚོའི་ཆུ་ཆེན་པོས་ཁྱེར་ལ་ཆུས་སྐོམ་བཞིན་དུ་འཆི་བའི་དུས་བྱེད་པ་དེ་བཞིན་དུ་འོད་སྲུང་འདི་ལ་དགེ་སྦྱོང་དང་བྲམ་ཟེ་ཁ་ཅིག་ཆོས་མང་པོ་བླངས་ཏེ་ཀུན་ཆུབ་པར་བྱས་ཀྱང་འདོད་ཆགས་ལ་སྲེད་པ་མི་སེལ། ཞེ་སྡང་ལ་སྲེད་པ་མི་སེལ། གཏི་མུག་ལ་སྲེད་པ་མི་སེལ་བ་དེ་དག་
ཆོས་ཀྱི་རྒྱ་མཚོས་ཁྱེར་ལ། ཉོན་མོངས་པའི་སྐོམ་པས་འཆི་བའི་དུས་བྱེད་པར་འགྱུར་ཏེ། ངན་འགྲོར་འགྲོ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་མི་ཞིག་རྒྱ་མཚོའི་ཆུས་ཁྱེར་ལ། །དེ་ནི་སྐོམ་བཞིན་འཆི་བའི་དུས་བྱེད་གྱུར། །དེ་བཞིན་ཆོས་མང་སྲེད་
པས་བག་མེད་པ། །ཆོས་ཀྱི་རྒྱ་མཚོར་གནས་ཀྱང་ངན་སོང་འགྲོ། །འོད་སྲུང་འདི་ལྟ་སྟེ་དཔེར་ན་སྨན་པ་སྨན་སྒྲོ་ཐོགས་ཏེ། ཕྱོགས་དང་ཕྱོགས་མཚམས་སུ་རྒྱུ་བ་དེ་ནད་ཅིག་གིས་བཏབ་ནས་ནད་དེ་གསོ་མི་ནུས་ན་དེའི་སྨན་དེ་ནི་དོན་མེད་པ་ཡིན་ནོ། །འོད་སྲུང་དེ་བཞིན་དུ་མང་དུ་ཐོས་
པའི་ཉོན་མོངས་པའི་ནད་དུ་བལྟ་སྟེ། གང་མང་དུ་ཐོས་པ་དེས་བདག་ཉོན་མོངས་པའི་ནད་ལས་གསོ་མི་ནུས་ན་དེའི་མང་དུ་ཐོས་པ་དེ་ནི་དོན་མེད་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། དཔེར་ན་སྨན་པའི་སྨན་སྒྲོར་བཅུག་པའི་སྨན། །འཇིག་རྟེན་ཀུན་ཏུ་ཡོངས་སུ་

རྒྱུ་བྱེད་ཀྱང་། །ནད་ཀྱིས་བཏབ་པ་བཟློག་པར་མི་ནུས་ན། །དེ་ཡི་སྨན་དེ་དོན་མེད་གྱུར་པ་ཡིན། །དེ་བཞིན་དགེ་སློང་ཚུལ་ཁྲིམས་ཡོན་ཏན་ལྡན། །ཐོས་དང་ལྡན་ཡང་ཚུལ་བཞིན་མ་ཡིན་པའི། །ཉོན་མོངས་བྱུང་བའི་ནད་དེ་མི་སེལ་ན། །དེ་ཡི་
ཐོས་ལ་བརྩོན་པ་དོན་མེད་ཡིན། །འོད་སྲུང་འདི་ལྟ་སྟེ་དཔེར་ན་མི་ནད་པ་ཞིག་ལ་རྒྱལ་པོ་ལ་འོས་པའི་སྨན་བཏང་ལ་ཆོ་ག་བཞིན་མ་བྱས་པས་འཆི་བའི་དུས་བྱེད་པ་དེ་བཞིན་དུ་འོད་སྲུང་གང་མི་སྡོམ་པ་དེས་འཆི་བའི་དུས་བྱེད་པ་དེ་ཡང་མང་དུ་ཐོས་པའི་ཉོན་མོངས་པའི་ནད་དུ་བལྟའོ། །
དེ་ལ་འདི་སྐད་ཅེས་བྱ་སྟེ། དཔེར་ན་རྒྱལ་པོ་འོས་པའི་སྨན་བཏང་ནས། །ཆོ་ག་མ་བྱས་མི་དེ་ཤི་བར་གྱུར། །དེ་བཞིན་གང་མི་སྡོམ་པས་འདིར་ཤི་བ། །དེ་ནི་མང་དུ་ཐོས་པའི་ཉོན་མོངས་ནད། །འོད་སྲུང་འདི་ལྟ་སྟེ་དཔེར་ན་ནོར་བུ་རིན་པོ་ཆེ་མི་གཙང་བའི་ནང་དུ་
ལྷུང་ན་སྨད་པར་འགྱུར་ཞིང་མཁོ་བར་མི་འགྱུར་རོ། །འོད་སྲུང་དེ་བཞིན་དུ་མང་དུ་ཐོས་པ་རྙེད་པ་དང་བཀུར་སྟིའི་མི་གཙང་བའི་ནང་དུ་ལྷུང་བར་བལྟ་སྟེ། ཅི་ཡང་མེད་པ་ལ་ནི་ལྷ་དང་མི་རྣམས་དགའ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་རིན་ཆེན་མི་གཙང་
ལྷུང་བ་སྨད། །ཇི་ལྟར་སྔོན་བཞིན་དུ་ནི་ཕྱིས་མ་ཡིན། །དགེ་སློང་མང་དུ་ཐོས་པར་གྱུར་པ་ཡང་། །བཀུར་སྟིའི་མི་གཙང་ལྷུང་བ་དེ་འདྲར་བཤད། །འོད་སྲུང་འདི་ལྟ་སྟེ་དཔེར་ན་མི་རོའི་མགོ་ལ་གསེར་གྱི་ཕྲེང་བ་བཏགས་པ་དེ་བཞིན་དུ་ཚུལ་ཁྲིམས་འཆལ་པ་
ངུར་སྨྲིག་གྱོན་པར་བལྟའོ། །དེ་ལ་འདི་སྐད་ཅེས་བྱ་སྟེ། དཔེར་ན་མི་རོ་མགོ་ལ་གསེར་ཕྲེང་ངམ། །ཡང་ན་མེ་ཏོག་ཕྲེང་བ་བཏགས་བྱས་པ། །དེ་བཞིན་ཁྲིམས་མེད་ངུར་སྨྲིག་གྱོན་པ་ཡང་། །མཐོང་ནས་དེ་ལ་ཡིད་ནི་དད་མི་འགྱུར། །འོད་སྲུང་འདི་ལྟ་སྟེ་
དཔེར་ན་ཚོང་དཔོན་གྱི་བུ་ཞིག་ལེགས་པར་ཁྲུས་བྱས་ཏེ། ལེགས་པར་རྣམ་པར་བྱུགས་ལ། སྐྲ་དང་སེན་མོ་བྲེགས་ནས་གོས་དཀར་པོ་བགོས་ཏེ་ཙན་དན་མཆོག་གིས་བསྐུས་པའི་མགོ་ལ་ཙམ་པ་ཀའི་མེ་ཏོག་གི་ཕྲེང་བ་ཐོགས་པ་དེ་བཞིན་དུ་འོད་སྲུང་ཚུལ་ཁྲིམས་དང་ལྡན་ཞིང་མང་དུ་ཐོས་

པ་ངུར་སྨྲིག་གྱོན་པར་བལྟའོ། །དེ་ལ་འདི་སྐད་ཅེས་བྱ་སྟེ། ལེགས་བཀྲུས་ལེགས་པར་བྱུགས་པ་ཡི། །ཚོང་དཔོན་བུ་ཡི་མགོ་བོ་ལ། །ཙམ་པ་ཀ་ཡི་མེ་ཏོག་ཕྲེང་། །དྲི་ཞིམ་ཡིད་འོང་བཏགས་པར་མཛེས། །དེ་བཞིན་ཚུལ་ཁྲིམས་ལྡན་གྱུར་ཅིང་། །མང་ཐོས་
ཚུལ་ཁྲིམས་ཕུན་སུམ་ཚོགས། །རྒྱལ་བའི་སྲས་པོ་ཡོན་ཏན་ལྡན། །དེ་ལ་ངུར་སྨྲིག་དེ་བཞིན་མཛེས། །འོད་སྲུང་བཞི་པོ་འདི་དག་ནི་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་པ་ཡིན་ཏེ། བཞི་གང་ཞེ་ན། འོད་སྲུང་འདི་ལ་དགེ་སློང་ཁ་ཅིག་ཚུལ་
ཁྲིམས་དང་ལྡན་པ་ཡིན་ཏེ། སོ་སོར་ཐར་པའི་སྡོམ་པས་བསྡམས་ཤིང་གནས། ཆོ་ག་དང་སྤྱོད་ཡུལ་ཕུན་སུམ་ཚོགས། ཁ་ན་མ་ཐོ་བ་ཕྲ་རབ་རྣམས་ལ་ཡང་འཇིགས་པར་ལྟ། ཡང་དག་པར་བླངས་ཏེ་བསླབ་པའི་གཞི་རྣམས་ལ་སློབ་ཅིང་ལུས་ཀྱི་ལས་དང་། ངག་
གི་ལས་དང་། ཡིད་ཀྱི་ལས་ཡོངས་སུ་དག་པ་དང་ལྡན་པར་གནས་པས་འཚོ་བ་ཡོངས་སུ་དག་ཀྱང་དེ་བདག་ཏུ་སྨྲ་བ་ཡིན་ཏེ། འོད་སྲུང་དེ་ནི་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་པ་དང་པོའོ། །འོད་སྲུང་གཞན་ཡང་འདི་ལ་དགེ་སློང་ཁ་ཅིག་འདུལ་བ་འཛིན་
ཅིང་འདུལ་བ་ལ་ཞུགས་ཏེ། འདུལ་བའི་ཚུལ་ལ་གནས་པ་ཡིན་ཡང་འཇིག་ཚོགས་ལ་ལྟ་བ་ལས་མ་བསྐྱོད་པ་ཡིན་ཏེ། འོད་སྲུང་དེ་ནི་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་པ་གཉིས་པའོ། །འོད་སྲུང་གཞན་ཡང་འདི་ལ་དགེ་སློང་ཁ་ཅིག་བྱམས་པ་
ལ་གནས་པ་ཡིན་ཏེ། སེམས་ཅན་ལ་དམིགས་པའི་བྱམས་པ་དང་ལྡན་པ་ཡིན་ཡང་འདུ་བྱེད་ཐམས་ཅད་ལ་སྐྱེ་བ་མེད་པ་ཐོས་ནས་སྐྲག་སྟེ། ཀུན་ཏུ་དངང་བར་འགྱུར་ཞིང་ཀུན་ཏུ་རབ་ཏུ་དངང་བར་འགྱུར་བ་དེ་ནི་འོད་སྲུང་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་
པ་གསུམ་པའོ། །འོད་སྲུང་གཞན་ཡང་འདི་ལ་དགེ་སློང་ཁ་ཅིག་སྦྱངས་པའི་ཡོན་ཏན་བཅུ་གཉིས་ཡང་དག་པར་བླངས་ཀྱང་དམིགས་པར་ལྟ་བ་ཡིན་ཏེ། ངར་འཛིན་པ་དང་། ང་ཡིར་འཛིན་པ་ལ་གནས་པ་དེ་ནི་འོད་སྲུང་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་

ལྟར་བཅོས་པ་བཞི་པ་སྟེ་འོད་སྲུང་བཞི་པོ་དེ་དག་ནི་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་པ་ཡིན་ནོ། །འོད་སྲུང་ཚུལ་ཁྲིམས་ཚུལ་ཁྲིམས་ཞེས་བྱ་བ་ནི་གང་ལ་བདག་མེད་པ་དང་། བདག་གི་བ་མེད་པ་དང་། བྱ་བ་མེད་པ་དང་། མི་བྱ་བ་ཡང་མེད་པ་དང་། བྱེད་པ་མེད་པ་དང་། བྱེད་པ་མེད་
པ་ཡང་མ་ཡིན་པ་དང་རྒྱུ་བ་མ་ཡིན་པ་དང་། མི་རྒྱུ་བ་ཡང་མ་ཡིན་པ་དང་། རབ་ཏུ་སྤྱོད་པ་མེད་པ་དང་། རབ་ཏུ་སྤྱོད་པ་མེད་པ་ཡང་མ་ཡིན་པ་དང་། མིང་མེད་པ་དང་། གཟུགས་མེད་པ་དང་། མཚན་མ་མེད་པ་དང་། མཚན་མ་མེད་པ་ཡང་མ་ཡིན་པ་དང་རབ་ཏུ་ཞི་བ་མ་ཡིན་པ་དང་། རབ་ཏུ་ཞི་བ་མ་ཡིན་པ་ཡང་མ་ཡིན་པ་
དང་། འཛིན་པ་མེད་པ་དང་། འདོར་བ་མེད་པ་དང་། གཟུང་བ་མེད་པ་དང་། གཟུང་བ་མེད་པ་ཡང་མ་ཡིན་པ་དང་། སེམས་ཅན་མེད་པ་དང་། སེམས་ཅན་དུ་འདོགས་པ་མེད་པ་དང་། ཚིག་མེད་པ་དང་། ཚིག་ཏུ་འདོགས་པ་མེད་པ་དང་། སེམས་མེད་པ་དང་། སེམས་སུ་འདོགས་པ་མེད་པ་དང་། འཇིག་རྟེན་མེད་པ་
དང་། འཇིག་རྟེན་མེད་པ་ཡང་མ་ཡིན་པ་དང་། རྟེན་མེད་པ་དང་། རྟེན་མེད་པ་ཡང་མ་ཡིན་པ་དང་། བདག་གི་ཚུལ་ཁྲིམས་ལ་མི་སྟོད་པ་དང་། གཞན་གྱི་ཚུལ་ཁྲིམས་ལ་མི་སྨོད་པ་དང་། ཚུལ་ཁྲིམས་ཀྱིས་རློམ་སེམས་སུ་མི་བྱེད་པ་དང་། ཚུལ་ཁྲིམས་ལ་མི་རྟོག་པ་ཡིན་ཏེ། དེ་ནི་འཕགས་པ་རྣམས་ཀྱི་ཚུལ་
ཁྲིམས་ཟག་པ་མེད་པ། གཏོགས་པ་མ་ཡིན་པ། ཁམས་གསུམ་པ་དང་བྲལ་བ། རྟེན་ཐམས་ཅད་མེད་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །ཚུལ་ཁྲིམས་ལྡན་ལ་དྲི་མ་མེད་ཅིང་ཅི་ཡང་མེད། །ཚུལ་ཁྲིམས་ལྡན་ལ་རྒྱགས་པ་མེད་དེ་རྟེན་པ་མེད། །ཚུལ་
ཁྲིམས་ལྡན་ལ་མུན་པ་མེད་ཅིང་འཆིང་བ་མེད། །ཚུལ་ཁྲིམས་ལྡན་ལ་རྡུལ་རྣམས་མེད་དེ་ཉེས་པ་མེད། །ཞི་བ་རབ་ཏུ་ཞི་བ་ཉེ་བར་ཞི་བའི་ཡིད། །རྟོག་དང་རྣམ་པར་རྟོག་དང་བྲལ་ཞིང་ཉོན་མོངས་མེད། །གཡོ་བ་དང་ནི་རློམ་སེམས་ཀུན་དང་རྣམ་བྲལ་བ། །དེ་ནི་འོད་སྲུང་སངས་རྒྱས་བསྟན་ལ་ཚུལ་
ཁྲིམས་ལྡན། །ལུས་ལ་མི་ལྟ་སྲོག་ལ་ཕངས་པར་འཛིན་མི་བྱེད། །སྲིད་པ་རྣམས་སུ་སྐྱེ་བ་ཀུན་ལ་འདོད་པ་མེད། །ཡང་དག་ཞུགས་ཤིང་དེ་ཉིད་ཚུལ་ལ་རབ་གནས་པ། །དེ་ནི་འོད་སྲུང་སངས་རྒྱས་བསྟན་ལ་ཚུལ་ཁྲིམས་ལྡན། །འཇིག་རྟེན་མ་གོས་འཇིག་རྟེན་དག་ལ་གནས་པ་མེད། །སྣང་བ་

ཐོབ་ཅིང་བདག་གི་མེད་དེ་ཅི་ཡང་མེད། །བདག་ཏུ་འདུ་ཤེས་མེད་ཅིང་གཞན་དུ་འདུ་ཤེས་མེད། །འདུ་ཤེས་ཡོངས་སུ་ཤེས་པས་ཚུལ་ཁྲིམས་རྣམ་པར་དག །གང་ལ་ཚུ་རོལ་མེད་ཅིང་ཕ་རོལ་དབུས་ཀྱང་མེད། །ཕ་རོལ་ཚུ་རོལ་དག་ལ་ནམས་ཀྱང་མི་ཆགས་ཤིང་། །བཅིངས་དང་ཆགས་མེད་ཚུལ་
འཆོས་མེད་ཅིང་ཟག་པ་མེད། །དེ་ནི་འོད་སྲུང་སངས་རྒྱས་བསྟན་ལ་ཚུལ་ཁྲིམས་ལྡན། །མིང་དང་གཟུགས་རྣམས་ལ་ཡང་ཆགས་པ་མེད་པའི་ཡིད། །དེ་ནི་མཉམ་པར་བཞག་ཅིང་ཤིན་ཏུ་དུལ་བའི་སེམས། །གང་ལ་བདག་མེད་བདག་གིར་འཛིན་པ་མེད་པ་ནི། །དེ་ཙམ་གྱིས་ན་ཚུལ་ཁྲིམས་
གནས་ཤེས་བརྗོད་པ་ཡིན། །སོ་སོར་ཐར་པའི་སློབ་པས་རློམ་སེམས་བྱེད་པ་མེད། །དེས་ནི་འདི་ན་དེ་ལ་ཆགས་པར་མི་འགྱུར་ཏེ། །དེ་ཡི་གོང་དུ་འཕགས་པའི་ལམ་རྣམས་ཚོལ་བྱེད་པ། །དེ་ནི་ཚུལ་ཁྲིམས་རྣམ་པར་དག་པའི་མཚན་མའོ། །ཚུལ་ཁྲིམས་གཙོ་བོར་མ་ཡིན་ཏིང་འཛིན་དེར་ཆགས་མེད། །དེ་
ཡི་གོང་དུ་ཤེས་རབ་བསྒོམ་པ་ཡོངས་སུ་ཚོལ། །དམིགས་པ་མེད་པ་འཕགས་པ་རྣམས་ཀྱི་རིགས་ཡིན་ཏེ། །ཚུལ་ཁྲིམས་དེ་ནི་བདེ་བར་གཤེགས་པས་རབ་ཏུ་བསྔགས། །འཇིག་པའི་ཚོགས་ལ་ལྟ་ལས་རྣམ་པར་གྲོལ་བའི་ཡིད། །དེ་འདིར་ང་དང་ང་ཡི་སྙམ་དུ་འགྱུར་བ་མེད། །སངས་རྒྱས་སྤྱོད་
ཡུལ་སྟོང་པ་ཉིད་ལ་ལྷག་པར་མོས། །དེ་ཡི་ཚུལ་ཁྲིམས་དེ་ནི་མཉམ་པ་མེད་པའོ། །ཚུལ་ཁྲིམས་ལ་ནི་གནས་ནས་ཏིང་ངེ་འཛིན་ཀྱང་ཐོབ། །ཏིང་ངེ་འཛིན་རྣམས་ཐོབ་ནས་ཤེས་རབ་ཤིན་ཏུ་སྒོམ། །ཤེས་རབ་ཀྱིས་ནི་ཡེ་ཤེས་རྣམ་པར་དག་པ་འཐོབ། །ཡེ་ཤེས་རྣམ་པར་དག་པས་ཚུལ་ཁྲིམས་
ཕུན་སུམ་ཚོགས། །ཚིགས་སུ་བཅད་པ་མངོན་པར་སྒྲུབ་པ་འདི་དག་གསུངས་པའི་ཚེ་དགེ་སློང་བརྒྱད་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྲོག་ཆགས་སུམ་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པ་རྣམ་པར་དག་གོ །དགེ་སློང་
བསམ་གཏན་ཐོབ་པ་ལྔ་བརྒྱ་ནི་ཆོས་བསྟན་པ་ཟབ་མོ་འདི་ལ་མི་འཇུག་སྟེ། མ་རྟོགས་མ་མོས་པས་སྟན་ལས་ལངས་ཏེ་དོང་ངོ་། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་བསམ་གཏན་ཐོབ་པ་ལྔ་བརྒྱ་པོ་འདི་དག་ཆོས་

བསྟན་པ་ཟབ་མོ་འདི་ལ་མི་འཇུག་སྟེ། མ་རྟོགས་མ་མོས་པས་སྟན་ལས་ལངས་ཏེ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་འདི་ལྟར་དགེ་སློང་མངོན་པའི་ང་རྒྱལ་ཅན་འདི་དག་ནི་ཚུལ་ཁྲིམས་རྣམ་པར་དག་པ་ཟག་པ་མེད་པ་འདི་ལ་མི་འཇུག་སྟེ། མ་རྟོགས་མི་
མོས་ཤིང་སྐྲག་སྟེ་ཀུན་དུ་དངངས། ཀུན་ཏུ་རབ་ཏུ་དངངས་སོ། །འོད་སྲུང་ཚིགས་སུ་བཅད་པ་མངོན་པར་སྒྲུབ་པ་ཟབ་པས་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ཟབ་སྟེ། དེ་ལ་དགེ་བའི་རྩ་བ་མ་བསྐྱེད་པ། སྡིག་པའི་གྲོགས་པོས་ཡོངས་སུ་ཟིན་པ་དང་། མོས་པ་མི་མང་བ་དག་གིས་མོས་
པར་མི་ནུས་སོ། །འོད་སྲུང་དགེ་སློང་ལྔ་བརྒྱ་པོ་འདི་དག་ནི་དེ་བཞིན་གཤེགས་པ་འོད་སྲུང་གི་གསུང་རབ་ལ་མུ་སྟེགས་ཅན་གྱི་ཉན་ཐོས་སུ་གྱུར་ཏེ་དེ་དག་དེ་བཞིན་གཤེགས་པ་འོད་སྲུང་ལས་རྒལ་བའི་བསམ་པས་ཆོས་བསྟན་པ་གཅིག་ཐོས་སོ། །ཐོས་ནས་དད་པའི་སེམས་གཅིག་རྙེད་དེ། ཇི་
ཙམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་འཇམ་ཞིང་སྙན་པར་གསུང་བ་ངོ་མཚར་ཏོ་སྙམ་མོ། །དེ་དག་འཆི་བའི་དུས་བྱས་ནས་དད་པའི་སེམས་གཅིག་རྙེད་པ་དེས་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་སྐྱེས་སོ། །དེ་དག་དེ་ནས་ཤི་འཕོས་
ནས་འདིར་སྐྱེས་ཏེ། རྒྱུ་དེ་ཉིད་ཀྱིས་ངའི་བསྟན་པ་འདི་ལ་རབ་ཏུ་བྱུང་སྟེ། འོད་སྲུང་དགེ་སློང་ལྔ་བརྒྱ་པོ་ལྟ་བར་བྱིང་བ་འདི་དག་ནི་ཆོས་བསྟན་པ་ཟབ་མོ་འདི་ལ་མི་འཇུག་སྟེ། མི་རྟོགས་མི་མོས་ཤིང་སྐྲག་སྟེ། ཀུན་ཏུ་དངངས། ཀུན་ཏུ་རབ་ཏུ་དངངས་སོ། །ཡང་འདི་དག་ནི་ཆོས་བསྟན་པ་འདིས་
ཡོངས་སུ་སྦྱང་བ་བྱས་ཏེ་ཕྱིས་ངན་འགྲོ་ལོག་པར་ལྟུང་བར་མི་འགྱུར་ཞིང་ཕུང་པོ་འདི་དག་ཉིད་ཀྱིས་ཡོངས་སུ་མྱ་ངན་ལས་འདའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར་ཁྱོད་སོང་ལ་དགེ་སློང་དེ་དག་ཀུན་ཤེས་པར་བྱོས་ཤིག །རབ་འབྱོར་
གྱིས་གསོལ་པ། བཅོམ་ལྡན་འདས་ཉིད་ཀྱིས་འདི་དག་ལ་བཤད་ན་ཡང་འཐུན་པར་མི་བགྱིད་ན་བདག་ལ་ལྟ་སྨོས་ཀྱང་ཅི་འཚལ། དེ་ནས་བཅོམ་ལྡན་འདས་ཀྱིས་དགེ་སློང་དེ་དག་ལམ་གང་ནས་འདོང་བའི་ལམ་དེར་དགེ་སློང་གཉིས་ཤིག་སྤྲུལ་པ་སྤྲུལ་ཏོ། །དེ་ནས་དགེ་སློང་ལྔ་

བརྒྱ་པོ་དེ་དག་སྤྲུལ་པའི་དགེ་སློང་དེ་གཉིས་ལམ་གང་ནས་འདོང་བའི་ལམ་དེར་དོང་སྟེ་ཕྱིན་པ་དང་འདི་སྐད་ཅེས་སྨྲས་སོ། །ཚེ་དང་ལྡན་པ་དག་གར་འདོང་། དེ་གཉིས་ཀྱིས་སྨྲས་པ། ཁོ་བོ་ཅག་ནི་དགོན་པའི་གནས་རྣམས་སུ་བསམ་གཏན་གྱི་བདེ་བ་ལ་རེག་པར་གནས་པར་བྱ་བར་
འདོང་ངོ་། །དེ་ཅིའི་ཕྱིར་ཞེ་ན། ཁོ་བོ་ཅག་ནི་བཅོམ་ལྡན་འདས་ཀྱིས་ཆོས་བསྟན་པ་གང་ཡིན་པའི་ཆོས་བསྟན་པ་དེ་ལ་མི་འཇུག་སྟེ། མ་རྟོགས་མ་མོས་ཤིང་སྐྲག་སྟེ་ཀུན་ཏུ་དངངས། ཀུན་ཏུ་རབ་ཏུ་དངངས་པར་གྱུར་ནས་ཁོ་བོ་ཅག་དགོན་པའི་གནས་རྣམས་སུ་བསམ་གཏན་གྱི་བདེ་
བ་ལ་རེག་པར་གནས་པ་རྣམས་ཀྱིས་གནས་པར་བྱའོ། །དགེ་སློང་ལྔ་བརྒྱ་པོ་དེ་དག་གིས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཁོ་བོ་ཅག་ཀྱང་བཅོམ་ལྡན་འདས་ཀྱིས་ཆོས་བཤད་པ་ལ་མི་འཇུག་སྟེ། མ་རྟོགས་མ་མོས་ཤིང་སྐྲག་སྟེ་ཀུན་ཏུ་དངངས། ཀུན་ཏུ་རབ་ཏུ་དངངས་པར་གྱུར་
ཏོ། །དེའི་ཕྱིར་ཁོ་བོ་ཅག་ཀྱང་དགོན་པའི་གནས་རྣམས་སུ་བསམ་གཏན་གྱི་བདེ་བ་ལ་རེག་པར་གནས་པ་རྣམས་ཀྱིས་གནས་པར་བྱའོ། །སྤྲུལ་པ་དག་གིས་སྨྲས་པ་ཚེ་དང་ལྡན་པ་དག་དེའི་ཕྱིར་བདག་ཅག་ཡང་དག་པར་འགྲོ་བར་བྱའོ། །རྩོད་པར་མི་བྱའོ། །རྩོད་པ་མེད་པ་ལྷུར་ལེན་པ་ནི་དགེ་
སྦྱོང་གི་ཆོས་སོ། །ཚེ་དང་ལྡན་པ་དག་གང་འདི་ཡོངས་སུ་མྱ་ངན་ལས་འདས་པ་ཞེས་བྱ་བ་གང་ཡོངས་སུ་མྱ་ངན་ལས་འདའ་བར་འགྱུར་བའི་ཆོས་དེ་གང་། ལུས་འདི་ལ་བདག་གམ། སེམས་ཅན་ནམ། སྲོག་གམ། སྐྱེ་བ་པོ་འམ། སྐྱེས་བུ་འམ། གང་ཟག་གམ། ཤེད་ལས་སྐྱེས་
སམ། ཤེད་བུ་འམ། གང་ཡོངས་སུ་མྱ་ངན་ལས་འདའ་བར་འགྱུར། གང་ཟད་པས་ཡོངས་སུ་མྱ་ངན་ལས་འདའ། དེ་དག་གིས་སྨྲས་པ། འདོད་ཆགས་ཟད་ཞེ་སྡང་ཟད། གཏི་མུག་ཟད་པས་ཡོངས་སུ་མྱ་ངན་ལས་འདའོ། །སྤྲུལ་པ་གཉིས་ཀྱིས་སྨྲས་པ། ཚེ་དང་ལྡན་པ་དག་
འདོད་ཆགས་དང་ཞེ་སྡང་དང་གཏི་མུག་ཡོད་པ་ཡིན་ནམ་ཅི་ནམ་དེ་ཟད་པར་བྱ། དེ་དག་གིས་སྨྲས་པ། དེ་དག་ནི་ནང་ན་ཡང་མེད། ཕྱི་རོལ་ན་ཡང་མེད། གཉི་ག་མེད་པ་ལ་ཡང་མི་དམིགས་ཏེ། དེ་དག་ནི་ཡོངས་སུ་མ་བརྟགས་པ་ལས་ཀྱང་མི་སྐྱེའོ། །སྤྲུལ་པ་གཉིས་ཀྱིས་

སྨྲས་པ། ཚེ་དང་ལྡན་པ་དག་དེ་ལྟ་བས་ན་མ་རྟོག་རྣམ་པར་མ་རྟོག་ཤིག །ཚེ་དང་ལྡན་པ་དག་ནམ་མི་རྟོག་རྣམ་པར་མི་རྟོག་པ་དེ་ནི་ཆགས་པར་ཡང་མི་འགྱུར་ཆགས་པ་དང་བྲལ་བར་ཡང་མི་འགྱུར་རོ། །ཆགས་པ་མེད་ཅིང་ཆགས་པ་དང་བྲལ་བ་ཡང་མེད་པ་གང་
ཡིན་པ་དེ་ནི་ཞི་བ་ཞེས་བྱའོ། །ཚེ་དང་ལྡན་པ་དག་ཚུལ་ཁྲིམས་ནི་མི་འཁོར་ཞིང་ཡོངས་སུ་མྱ་ངན་ལས་མི་འདའོ། །ཚེ་དང་ལྡན་པ་དག་ཏིང་ངེ་འཛིན་དང་། ཤེས་རབ་དང་རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བ་ཡང་མི་འཁོར་ཞིང་ཡོངས་སུ་མྱ་ངན་ལས་མི་འདའོ། །
ཚེ་དང་ལྡན་པ་དག་ཆོས་དེ་དག་གིས་ཡོངས་སུ་མྱ་ངན་ལས་འདའ་བར་སྟོན་ན་ཆོས་དེ་དག་ཀྱང་སྟོང་པ་དབེན་པ་གཟུང་དུ་མེད་པའོ། །ཚེ་དང་ལྡན་པ་དག་འདི་ལྟ་སྟེ་མྱ་ངན་ལས་འདས་པའི་འདུ་ཤེས་སྤོངས་ཤིག །འདུ་ཤེས་ལ་ཡང་འདུ་ཤེས་སུ་མ་བྱེད་ཅིག །འདུ་ཤེས་ལ་འདུ་
ཤེས་ཀྱིས་ཡོངས་སུ་ཤེས་པར་མ་བྱེད་ཅིག །གང་འདུ་ཤེས་ལ་འདུ་ཤེས་ཀྱིས་ཡོངས་སུ་ཤེས་པ་དེ་ནི་དེའི་འདུ་ཤེས་ཀྱིས་བཅིངས་པ་ཡིན་ནོ། །ཚེ་དང་ལྡན་པ་དག་འདུ་ཤེས་དང་ཚོར་བ་འགོག་པའི་སྙོམས་པར་འཇུག་པ་ལ་སྙོམས་པར་ཞུགས་ཤིག །ཚེ་དང་ལྡན་པ་དག་འདུ་
ཤེས་དང་ཚོར་བ་འགོག་པའི་སྙོམས་པར་འཇུག་པ་ལ་སྙོམས་པར་ཞུགས་པ་ལས་གང་ན་བྱ་བ་མེད་དོ་ཞེས་སྨྲའོ། །ཆོས་ཀྱི་རྣམ་གྲངས་འདི་བཤད་པའི་ཚེ་དགེ་སློང་ལྔ་བརྒྱ་པོ་དེ་དག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་དག་སེམས་རྣམ་པར་གྲོལ་ནས་
བཅོམ་ལྡན་འདས་ག་ལ་བ་དེར་དོང་སྟེ་ལྷགས་པ་དང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་ཚེ་དང་ལྡན་པ་རབ་འབྱོར་གྱིས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་གར་དོང་དོང་། གང་ནས་ལྷགས་དེ་དག་
གིས་སྨྲས་པ། བཙུན་པ་རབ་འབྱོར་གང་དུ་ཡང་འགྲོ་བ་མེད་པ་དང་། གང་ནས་ཀྱང་འོང་བ་མེད་པའི་ཕྱིར་བཅོམ་ལྡན་འདས་ཀྱིས་ཆོས་བསྟན་ཏོ། །སྨྲས་པ། ཚེ་དང་ལྡན་པ་དག་ཁྱོད་ཀྱི་སྟོན་པ་གང་ཡིན། སྨྲས་པ། གང་མ་སྐྱེས་ཤིང་ཡོངས་སུ་མྱ་ངན་ལས་མི་འདའ་བའོ། །

སྨྲས་པ། ཁྱེད་ཀྱིས་ཇི་ལྟར་ཆོས་ཐོས། སྨྲས་པ། བཅིངས་པའི་ཕྱིར་ཡང་མ་ཡིན་ཐར་བའི་ཕྱིར་ཡང་མ་ཡིན་ནོ། །སྨྲས་པ། ཁྱོད་སུས་བཏུལ། སྨྲས་པ། སུ་ལ་ལུས་མེད་ཅིང་སེམས་མེད་པས་སོ། །སྨྲས་པ། ཁྱེད་ཇི་ལྟར་བརྩོན། སྨྲས་པ། མ་རིག་པ་སྤང་བའི་ཕྱིར་
ཡང་མ་ཡིན་རིག་པ་བསྐྱེད་པའི་ཕྱིར་ཡང་མ་ཡིན་ནོ། །སྨྲས་པ། ཁྱེད་ཇི་ལྟར་རྣམ་པར་གྲོལ། སྨྲས་པ། སྦྱོར་བའི་ཕྱིར་ཡང་མ་ཡིན་སྤང་བའི་ཕྱིར་ཡང་མ་ཡིན་ནོ། །སྨྲས་པ། ཁྱེད་སུའི་ཉན་ཐོས། སྨྲས་པ། གང་གིས་ཐོབ་པ་མེད་ཅིང་མངོན་པར་རྫོགས་པར་
སངས་རྒྱས་པ་མེད་པའི་འོ། །སྨྲས་པ། ཁྱེད་ཀྱི་ཚངས་པ་མཚུངས་པར་སྤྱོད་པ་གང་། སྨྲས་པ། གང་དག་ཁམས་གསུམ་ནི་མི་རྒྱུ་བ་རྣམས་སོ། །སྨྲས་པ། ཚེ་དང་ལྡན་པ་དག །ཁྱེད་ཇི་སྲིད་ཅིག་ན་ཡོངས་སུ་མྱ་ངན་ལས་འདའ། སྨྲས་པ། དེ་བཞིན་
གཤེགས་པའི་སྤྲུལ་པ་ནམ་ཡོངས་སུ་མྱ་ངན་ལས་འདའ་བ་ནའོ། །སྨྲས་པ། ཁྱེད་ཀྱིས་བྱ་བ་བྱས་སམ། སྨྲས་པ། ངར་འཛིན་པ་དང་། ང་ཡིར་འཛིན་པ་ཡོངས་སུ་ཤེས་པས་སོ། །སྨྲས་པ། ཁྱེད་ཀྱི་ཉོན་མོངས་པ་ཟད་དམ། སྨྲས་པ། ཆོས་ཐམས་ཅད་གཏན་དུ་
ཟད་པའི་ཕྱིར་རོ། །སྨྲས་པ། ཁྱེད་ཀྱིས་བདུད་བཏུལ་ལམ། སྨྲས་པ། ཕུང་པོའི་བདུད་མི་དམིགས་པའི་ཕྱིར་རོ། །སྨྲས་པ། ཁྱེད་ཀྱིས་སྟོན་པ་ལ་བསྙེན་བཀུར་བྱས་སམ། སྨྲས་པ། ལུས་ཀྱིས་ཀྱང་མ་བྱས་ངག་གིས་ཀྱང་མ་བྱས། སེམས་ཀྱིས་ཀྱང་མ་བྱས་སོ། །
སྨྲས་པ། ཁྱེད་ཀྱིས་སྦྱིན་པའི་གནས་ཀྱིས་སྦྱངས་སམ། སྨྲས་པ། འཛིན་པ་མེད་ཅིང་སྡུད་པ་མེད་པས་སོ། །སྨྲས་པ། ཁྱེད་འཁོར་བ་ལས་རྒལ་ཏམ། སྨྲས་པ། ཆད་པ་མེད་ཅིང་རྟག་པ་མེད་པའི་ཕྱིར་རོ། །སྨྲས་པ། ཁྱེད་སྦྱིན་པའི་གནས་ཀྱི་སར་ཞུགས་སམ། །
སྨྲས་པ། འཛིན་པ་ཐམས་ཅད་ལས་རྣམ་པར་གྲོལ་བའི་ཕྱིར་རོ། །སྨྲས་པ། ཚེ་དང་ལྡན་པ་དག་གར་འགྲོ། སྨྲས་པ། དེ་བཞིན་གཤེགས་པའི་སྤྲུལ་པ་གང་དུ་བཞུད་པར་རོ། །དེ་ལྟར་ཚེ་དང་ལྡན་པ་རབ་འབྱོར་གྱིས་ཡོངས་སུ་དྲིས་ཏེ་དགེ་སློང་དེ་དག་གིས་ལན་བཏབ་ནས་

འཁོར་དེའི་དགེ་སློང་བརྒྱད་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྲོག་ཆགས་སུམ་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་ཀུན་ཏུ་སྣང་བ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་ལ་སློབ་པར་འཚལ་བའི་བྱང་ཆུབ་སེམས་དཔས་ཇི་ལྟར་བསླབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཚར་གཅད་ཅིང་ཚར་བཅད་
ནས་ཆོས་ཀྱི་རྣམ་གྲངས་འདིར་བསླབ་པ་བསྟན་ཏེ། ཆོས་ཀྱི་རྣམ་གྲངས་འདི་ནི་སྐྱེས་བུ་དམ་པ་ནན་ཏན་སྙིང་པོར་བྱེད་པ་རྣམས་ཀྱི་དོན་ཆེན་པོར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་མི་ལ་ལ་ཞིག་ཁམ་པའི་གྲུར་ཞུགས་ཏེ། གང་གཱའི་ཀླུང་ཆེན་པོ་རྒལ་བར་འདོད་པར་གྱུར་
ན་རིགས་ཀྱི་བུ་འདི་ཇི་སྙམ་དུ་སེམས། མི་དེས་ཅི་འདྲ་བའི་བརྩོན་འགྲུས་ཀྱིས་གྲུ་དེ་བཙལ་བར་བྱ། གསོལ་པ། བཅོམ་ལྡན་འདས་སྟོབས་དང་ལྡན་པའི་བརྩོན་འགྲུས་ཀྱིས་བགྱིའོ། །དེ་ཅིའི་སླད་དུ་ཞེ་ན། བདག་ནི་ཆུ་བོ་ཆེན་པོའི་ནང་དུ་ཞུགས་ཀྱི་བདག་འགྲམ་དུ་མ་ཕྱིན་པར་
བར་མ་དོར་གྲུ་ཞིག་ཏུ་འོང་ངོ་སྙམ་དུ་སེམས་པའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་སྣང་བ་དེ་ལྟར་བྱང་ཆུབ་སེམས་དཔས་དེ་བས་ཆེས་སྟོབས་དང་ལྡན་པའི་བརྩོན་འགྲུས་ཀྱིས་ཆོས་ཀྱི་རྣམ་གྲངས་འདི་ལ་བསླབ་པར་བྱ་སྟེ། སྟོབས་ཆེན་པོ་དང་ལྡན་པའི་
བརྩོན་འགྲུས་ཀྱིས་སངས་རྒྱས་ཀྱི་ཆོས་ཐམས་ཅད་ཡང་དག་པར་བསྒྲུབ་པར་བྱའོ། །ཀྱེ་མའོ་ལུས་འདི་ནི་མི་རྟག་པ་སྟེ་བདག་གིས་སྙིང་པོ་མ་བླངས་པར་བར་མ་དོར་འཆི་བའི་དུས་བྱས་སུ་འོང་ངོ་ཞེས་ཡིད་ལ་བྱེད་པ་དེ་ལྟ་བུས་བདག་ནི་ཆུ་བོ་ཆེན་པོར་ཞུགས་ཀྱིས་ཆུ་བོ་བཞིར་ཞུགས་པའི་སེམས་

ཅན་རྣམས་ཆུ་བོ་ཆེན་པོར་ཞུགས་པ་ལས་བསྒྲལ་བའི་ཕྱིར་དམ་པའི་ཆོས་ཀྱི་གྲུ་གང་གིས་སེམས་ཅན་འཁོར་བའི་རྒྱ་མཚོས་ཁྱེར་བ་ཐམས་ཅད་བསྒྲལ་བར་བྱ་བའི་དམ་པའི་ཆོས་ཀྱི་གྲུ་ཆེན་པོ་སྦྱར་བར་བྱའོ། །ཀུན་ཏུ་སྣང་བ་དེ་ལ་བྱང་ཆུབ་སེམས་དཔས་དམ་པའི་ཆོས་ཀྱི་གྲུ་ཆེན་པོ་སྦྱར་བར་བྱ་བ་དེ་ཅི་
འདྲ་ཞེ་ན་འདི་ལྟ་སྟེ། སེམས་ཅན་ཐམས་ཅད་ལ་སེམས་མཉམ་པ་ཉིད་དེ་བསོད་ནམས་ཀྱི་ཚོགས་མཐའ་ཡས་པ་བསགས་པ། ཚུལ་ཁྲིམས་ཀྱི་སྣམ་གྱིས་སྦྱར་བ་སྦྱིན་པའི་འཁོར་གྱི་རྒྱན་གྱིས་བརྒྱན་པ་བསམ་པ་དང་ལྷག་པའི་བསམ་པའི་བཅིང་བ་སྲ་བས་དམ་པོར་སྦྲེལ་བ། བཟོད་པ་དང་དེས་པ་
དང་དྲན་པའི་སྦྱོར་ཀས་ལེགས་པར་སྦྱར་བ། བྱང་ཆུབ་ཀྱི་ཡན་ལག་བདུན་གྱི་ཚོགས་ཅན། བརྩོན་འགྲུས་བརྟན་པ་དང་དགེ་བའི་ཆོས་ཀྱི་ཤིང་གིས་ཡང་དག་པར་སྦྱར་བ་བསམ་གཏན་གྱི་སེམས་ཀྱིས་ལས་སུ་རུང་བར་བྱས་པ། དུལ་བ་དང་ཞི་བ་དང་ཅང་ཤེས་ཀྱི་དགེ་བའི་བཟོས་ལེགས་པར་ཟིན་
པར་བྱས་པ། ཤིན་ཏུ་མི་འཁྲུགས་པའི་ཆོས་ཅན་སྙིང་རྗེ་ཆེན་པོས་ཡང་དག་པར་ཟིན་པ། བསྡུ་བའི་དངོས་པོ་དང་དཔའ་བར་འགྲོ་བས་བསྟར་བ། ཤེས་རབ་དང་ཡེ་ཤེས་ཀྱིས་ཕྱིར་རྒོལ་བ་ལེགས་པར་བསྲུངས་པ། ཐབས་མཁས་པས་རྣམ་པར་བསགས་པ་ལེགས་པར་བྱས་པ། ཚངས་པའི་
གནས་པ་བཞིས་ལེགས་པར་ཡོངས་སུ་སྦྱངས་པ། དྲན་པ་ཉེ་བར་གཞག་པ་བཞིས་ལེགས་པར་རྣམ་པར་བསམས་པའི་ལུས་ཀྱིས་བསྟན་པ་ཡང་དག་པའི་སྤོང་བས་འགྲོ་བ། རྫུ་འཕྲུལ་གྱི་རྐང་པའི་མགྱོགས་པའི་ཤུགས་དང་ལྡན་པ་དབང་པོས་ལེགས་པར་བརྟགས་པས་ལྟ་བ་ངན་པའི་ཤིང་ཡོན་པོ་མེད་པ། སྟོབས་ཀྱི་
ཤུགས་ཡང་དག་པར་འབྱུང་བས་བར་ཤག་ཤིག་མེད་པ། བྱང་ཆུབ་ཀྱི་ཡན་ལག་གིས་འགྲོ་བ་རྣམ་པར་དག་པ། གཅུགས་ཅན་དགྲ་ཉོན་མོངས་པའི་བདུད་ཀྱི་ལམ་འདོར་བར་བྱེད་པ། ལམ་དུ་འཇུག་པར་བྱེད་པ། ཕ་རོལ་གྱི་ངོགས་སུ་ཕྱིན་པར་བྱེད་པ།