Kinh tạng Tây Tạng (Kangyur Đại Học) — 044_དཀོན་བརྩེགས།_ཆ

ས་དང་བྲལ་བའི་ཕྱིར་ཏེ། འོན་ཀྱང་བྱང་ཆུབ་སེམས་དཔའ་སྲིད་པ་ཐམ་པས་ནི་བཙུན་མོ་དང་། སླས་དང་བུའི་འཁོར་གདོན་མི་ཟ་བར་བསྟན་པར་བྱ་དགོས་ཏེ་སེམས་ཅན་གང་དག་འདི་སྙམ་དུ་བྱང་ཆུབ་སེམས་དཔའ་ནི་སྐྱེས་བུ་དམ་པ་མ་ཡིན་གྱི་ཟ་མའི་
རིགས་ཤིག་ཡིན་ནོ་སྙམ་དུ་སེམས་པར་གྱུར་ན། དེ་དག་ཡུན་རིང་པོར་དོན་མེད་པ་དང་། གནོད་པ་དང་། སྡུག་བསྔལ་བ་དང་། ལོག་པར་ལྟུང་བར་འགྱུར་བས་སེམས་ཅན་དེ་དག་གི་ཐེ་ཚོམ་གཅད་པ་དང་། འདི་ལྟ་སྟེ་སྲས་སྒྲ་གཅན་ཟིན་ཀུན་ཏུ་བསྟན་པར་བྱ་བའི་ཕྱིར་བྱང་ཆུབ་སེམས་དཔས་ཤཱཀྱའི་བུ་མོ་
ས་འཚོ་མ་བླངས་སོ། །གང་དག་འདི་སྙམ་དུ་སྲས་སྒྲ་གཅན་ཟིན་ནི་ཡབ་དང་ཡུམ་གྱི་མེར་མེར་པོ་ལས་སྐྱེས་པ་ཡིན་ནོ་སྙམ་དུ་སེམས་ན་དེ་ལྟར་མི་ལྟའོ། །དེ་ཅིའི་ཕྱིར་ཞེ་ན། སྒྲ་གཅན་ཟིན་འདི་ནི་སྔོན་འདི་སྐད་དུ་བདག་སྲིད་པ་ཐམ་པའི་བུར་གྱུར་ཅིག་ཅེས་སྨོན་ལམ་བཏབ་པས་ན་སྒྲ་གཅན་ཟིན་ནི་ལྷ་
ཡུལ་ནས་ཤི་འཕོས་ནས་འདིར་རྫུས་ཏེ་སྐྱེས་པ་ཡིན་གྱི། ཕ་དང་མའི་མེར་མེར་པོ་ལས་སྐྱེས་པ་ནི་མ་ཡིན་པའི་ཕྱིར་རོ། །ཤཱཀྱའི་བུ་མོ་ས་འཚོ་མ་ཡང་སྔོན་གྱི་སྨོན་ལམ་གྱི་དབང་གིས་བླངས་པ་ཡིན་ཏེ། དེས་དེ་བཞིན་གཤེགས་པ་མར་མེ་མཛད་ཀྱི་སྤྱན་སྔར་བྲམ་ཟེའི་ཁྱེའུ་ཁྱོད་སྲིད་པ་ཐ་མ་པར་

གྱུར་པ་ན་བདག་གི་ཁྱིམ་ཐབ་ཏུ་གྱུར་ལ། བདག་ཀྱང་ཁྱོད་ཀྱི་བཙུན་མོར་གྱུར་ཅིག་ཅེས་སྨོན་ལམ་བཏབ་པའི་ཕྱིར་རོ། དེའི་ཚེ་ན་བྱང་ཆུབ་སེམས་དཔས་ཀྱང་འདི་སྐད་ཅེས་བཟང་མོ་ང་ནི་འདོད་པ་རྣམས་དོན་དུ་གཉེར་བ་མ་ཡིན་མོད་ཀྱི། འོན་ཀྱང་ཁྱོད་ཀྱི་བསམ་པ་ཇི་ལྟ་བ་བཞིན་དུ་གྱུར་ཅིག་ཅེས་ཨུད་པ་
ལའི་ཕྱིར་ཁས་བླངས་ཏེ། སངས་རྒྱས་ཀྱི་སྤྱན་སྔར་དགེ་བའི་རྩ་བ་བསྐྱེད་པ་དེ་ནི་མི་སླུ་བ་ཡིན་པས་ན་བྱང་ཆུབ་སེམས་དཔས་ཤཱཀྱའི་བུ་མོ་ས་འཚོ་མ་བླངས་སོ། །གཞན་ཡང་བྱང་ཆུབ་སེམས་དཔའ་སྲིད་པ་ཐམ་པས་ནི་བཙུན་མོའི་འཁོར་དང་། གཡོག་འཁོར་གདོན་མི་ཟ་བར་ཀུན་དུ་བསྟན་
པར་བྱ་དགོས་ཏེ། འདི་ལྟར་ཤཱཀྱའི་བུ་མོ་ས་འཚོ་མས་ཀྱང་བྱང་ཆུབ་སེམས་དཔའི་གཟུགས་ཕུན་སུམ་ཚོགས་པ་དང་། ལྷའི་མཆོད་པ་ཕུན་སུམ་ཚོགས་པ་དང་། མངོན་པར་འབྱུང་བ་ཕུན་སུམ་ཚོགས་པ་མཐོང་ནས་འདི་སྐད་དུ་ཀྱེ་མ་བདག་ཀྱང་ཡོན་ཏན་གྱི་ཆོས་འདི་ལྟ་བུ་དང་ལྡན་པར་གྱུར་ཅིག་
ཅེས་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་པའི་ཕྱིར་ཏེ། དེ་ལྟར་ན་ཤཱཀྱའི་བུ་མོ་ས་འཚོ་མ་བྱང་ཆུབ་ཀྱི་སེམས་བརྟན་པར་སྐྱེད་དུ་གཞུག་པའི་ཕྱིར་ཡང་བྱང་ཆུབ་སེམས་དཔས་ཤཱཀྱའི་བུ་མོ་ས་འཚོ་མ་བླངས་སོ། །གཞན་
ཡང་སེམས་ཅན་གང་དག་འདོད་པ་དང་། བྲན་དང་། ཆུང་མ་དང་། ལས་ཀྱི་མཐའ་དང་། ཁང་ཁྱིམ་དང་། ནོར་རྫས་ཀྱི་འདུ་འཛིས་སྦགས་ནས་ཡོངས་སུ་འཛིན་པ་སྤངས་ཏེ་རབ་ཏུ་འབྱུང་བར་མི་ནུས་པའི་སེམས་ཅན་དེ་དག་ལ་འདོད་པའི་སྲེད་པ་དང་། ལོངས་སྤྱོད་དང་། ནོར་
རྫས་དང་། ཆུང་མ་ལ་མི་ལྟ་བ་ཀུན་དུ་བསྟན་པར་བྱ་བའི་ཕྱིར་ཡང་བྱང་ཆུབ་སེམས་དཔས་ཤཱཀྱའི་བུ་མོ་ས་འཚོ་མ་བླངས་ནས་ཁང་ཁྱིམ་དང་ནོར་རྫས་དང་། ཆུང་མ་དང་། འཁོར་རྣམས་ལ་མི་ལྟ་བར་སྤངས་ཏེ་མངོན་པར་བྱུང་ན། སེམས་ཅན་དེ་དག་ཀྱང་འདི་སྙམ་དུ་གཞོན་
ནུ་དོན་ཐམས་ཅད་གྲུབ་པ་འདི་ཡང་དེ་ལྟར་བཙུན་མོ་དང་། ནོར་རྫས་དང་། འཁོར་དང་། ལོངས་སྤྱོད་རྒྱ་ཆེན་པོ་དག་ལ་མི་ལྟ་བར་སྤངས་ཏེ། རབ་ཏུ་བྱུང་ན་དེའི་ཕྱིར་བདག་ཅག་ཀྱང་ཅིའི་ཕྱིར་རབ་ཏུ་འབྱུང་བར་མི་བྱ་སྙམ་དུ་སེམས་པར་བྱ་བའི་ཕྱིར་རོ།། །།

བམ་པོ་གསུམ་པ། གཞན་ཡང་བྱང་ཆུབ་སེམས་དཔས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བུད་མེད་གཞོན་ནུ་བསྙེན་བཀུར་མ་གང་དག་དགེ་བའི་ཆོས་རྣམས་ཀྱིས་ཡོངས་སུ་སྨིན་པར་བྱས་ཤིང་ཡིད་གཅུགས་པར་གྱུར་པ་དེ་དག་གིས་འདི་སྐད་ཅེས་བདག་ཅག་
ཁྱོད་སྲིད་པ་ཐམ་པར་གྱུར་པའི་བར་ཚུན་ཆད་ཀྱི་བཙུན་མོར་གྱུར་ཅིག་ཅེས་སྨོན་ལམ་བཏབ་པས་ན་དེ་དག་གི་དཀར་པོའི་ཆོས་རྒྱ་ཆེར་སྨིན་པར་བྱ་བའི་ཕྱིར་ཡང་བྱང་ཆུབ་སེམས་དཔས་འཁོར་རྣམས་བླངས་ཏེ། དེ་ན་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་དུ་གནས་པའི་བུད་མེད་བཞི་
ཁྲི་ཉིས་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ལྷག་མ་རྣམས་ནི་ལོག་པར་མི་ལྟུང་བའི་ཆོས་ཅན་དུ་བྱས་ཏེ། རྣམ་གྲངས་དེས་ཀྱང་བྱང་ཆུབ་སེམས་དཔས་འཁོར་རྣམས་བླངས་སོ། །གཞན་ཡང་བུད་མེད་གང་དག་འདོད་ཆགས་ཀྱིས་ཡོངས་སུ་
གདུང་བ་ཆེན་པོས་ཡོངས་སུ་གདུངས་པར་གྱུར་པ་དེ་དག་གིས་བྱང་ཆུབ་སེམས་དཔའ་མཐོང་མ་ཐག་ཏུ་བདག་ཉིད་འདོད་ཆགས་དང་བྲལ་བར་ཀུན་ཤེས་པར་བྱ་བའི་ཕྱིར་རོ། །གཞན་ཡང་བྱང་ཆུབ་སེམས་དཔས་བདག་ཉིད་ཀྱི་ཆུ་ཞེང་དང་། ཁ་དོག་དང་། དབྱིབས་ཅི་འདྲ་བ་དེ་འདྲ་བའི་སྤྲུལ་
པ་མངོན་པར་སྤྲུལ་ནས། སྤྲུལ་པ་དེ་དང་བུད་མེད་དེ་དག་ལྷན་ཅིག་དགའ་བ་དང་། རྩེ་བ་དང་། དགའ་མགུར་སྤྱོད་པར་བྱེད་པ་ན་དེ་དག་སོ་སོ་ནས་འདི་སྙམ་དུ་བདག་ནི་བྱང་ཆུབ་སེམས་དཔའ་དང་ལྷན་ཅིག་དགའ་བ་དང་། རྩེ་བ་དང་། དགའ་མགུར་སྤྱོད་པར་བྱེད་དོ་སྙམ་དུ་སེམས་པར་ཟད་
ཀྱི། བྱང་ཆུབ་སེམས་དཔའ་ནི་བསམ་གཏན་གྱི་དགའ་བའི་གནས་པས་གནས་པར་བྱེད་དོ། །སྤྲུལ་པའི་འདོད་པའི་ལོངས་སྤྱོད་ཇི་ལྟ་བ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཚུན་ཆད་ནས། བྱང་ཆུབ་སེམས་དཔའི་འདོད་པའི་
ལོངས་སྤྱོད་ཀྱང་དེ་དང་འདྲ་བར་བལྟ་བར་བྱའོ། །ཤཱཀྱའི་བུ་འདུན་པ་དང་། རྟ་བསྔགས་ལྡན་གཉིས་ཀྱང་དེ་གཉིས་ཀྱི་སྔོན་གྱི་སྨོན་ལམ་ཉིད་ཡིན་པར་བལྟ་བར་བྱ་སྟེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་པར་བལྟ་བར་བྱའོ། །ཅིའི་ཕྱིར་བྱང་ཆུབ་སེམས་དཔའ་

ཤིང་འཛམ་བུའི་གྲིབ་མ་ལ་བསམ་གཏན་བྱེད་ཅེ་ན། བྱང་ཆུབ་སེམས་དཔའ་དེ་ན་གནས་པས་ལྷ་བྱེ་བ་ཕྲག་བདུན་ཅུ་གདུལ་བ་དང་ཡབ་དང་ཡུམ་དག་ཡང་དག་པར་བསྟན་པར་བྱ་བ་དང་། བྱང་ཆུབ་སེམས་དཔའ་བདག་རབ་ཏུ་འབྱུང་བའི་ཕྱིར་མངོན་པར་འབྱུང་བ་དང་། ཤེས་རབ་ཆེ་
བ་ཉིད་གདོན་མི་ཟ་བར་ཀུན་ཏུ་བསྟན་པར་བྱ་དགོས་པ་དང་། ཤིང་འཛམ་བུའི་གྲིབ་མས་མ་བཏང་བ་ཉིད་ཀྱང་ཀུན་ཏུ་བསྟན་པར་བྱ་བའི་ཕྱིར་ཏེ། གང་གི་ཕྱིར་བྱང་ཆུབ་སེམས་དཔའ་ཤིང་འཛམ་བུའི་གྲིབ་མ་ལ་བསམ་གཏན་བྱེད་པའི་རྒྱུ་ནི་དེ་ཡིན། རྐྱེན་ནི་དེ་ཡིན་ཏེ། དེ་ཡང་བྱང་ཆུབ་
སེམས་དཔའི་ཐབས་ལ་མཁས་པ་ཡིན་ནོ། །བྱང་ཆུབ་སེམས་དཔའ་དགའ་བ་དང་། རྩེད་མོ་ཐམས་ཅད་དོན་དུ་མི་གཉེར་བ་ཅིའི་ཕྱིར་སྐྱེད་མོས་ཚལ་གྱི་སར་བྱུང་ཞེ་ན། རྒན་པོ་དང་། ནད་པ་དང་། ཤི་བ་ཀུན་ཏུ་བསྟན་པར་བྱ་བ་དང་། ཉེ་དུ་རྣམས་ཀྱིས་འདི་ལྟར་བྱང་ཆུབ་སེམས་
དཔའ་ནི་ཉེ་དུ་རྣམས་མི་འདོད་པ་མ་ཡིན་གྱི། རྒ་བ་དང་། ན་བ་དང་། འཆི་བས་འཇིགས་ཤིང་སྐྲག་པ་དང་། ཁྱིམ་ན་གནས་པ་ནི་ཉེས་པ་མང་པོའི་སྐྱོན་ཆགས་པས་གནས་མ་ཡིན་པར་རིག་ནས་མངོན་པར་བྱུང་བ་ཡིན་ནོ་ཞེས་ཤེས་པར་འགྱུར་བ་ཀུན་ཏུ་བསྟན་པར་བྱ་བ་དང་། སེམས་
ཅན་ཐམས་ཅད་ཀྱང་རྒ་བ་དང་། ན་བ་དང་། འཆི་བས་འཇིགས་པ་ཀུན་ཏུ་བསྟན་པར་བྱ་བའི་ཕྱིར་ཏེ། དེའི་ཕྱིར་ན་བྱང་ཆུབ་སེམས་དཔའ་དགའ་བ་དང་། རྩེད་མོ་དོན་དུ་མི་གཉེར་བ་ཡང་སྐྱེད་མོས་ཚལ་གྱི་སར་བྱུང་སྟེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་
ཕྱིར་བྱང་ཆུབ་སེམས་དཔའ་ནམ་ཕྱེད་ཀྱི་དུས་ཀྱི་ཚེ་མངོན་པར་བྱུང་ལ་ཉིན་མོ་མ་ཡིན་ཞེ་ན་སེམས་ཅན་རྣམས་གང་ལ་གནས་ན། དགེ་བའི་རྩ་བ་འཕེལ་བར་འགྱུར་བའི་དགེ་བའི་རྩ་བ་ཀུན་ཏུ་བསྟན་པར་བྱ་བའི་ཕྱིར་ཏེ། དཀར་པོའི་ཆོས་དོན་དུ་གཉེར་བའི་རིགས་ཀྱི་བུས་ནི་བདེ་བ་རྒྱ་ཆེན་པོ་ཇི་སྙེད་
པ་ཡང་ཡོངས་སུ་སྤངས་ཏེ་ནམ་ཕྱེད་ཀྱི་དུས་ཀྱི་ཚེ་ན་མ་དྲིས་མི་ལྟོས་པར་མངོན་པར་འབྱུང་བར་བྱ་བ་དང་བདེ་བའི་ཡོ་བྱད་ཇི་སྙེད་པ་དག་ཀྱང་ཡོངས་སུ་སྤང་བར་བྱ་བ་དང་། དཀར་པོའི་ཕྱོགས་ཡོངས་སུ་ཉམས་པར་མི་བྱ་བའི་ཕྱིར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །

ཅིའི་ཕྱིར་བྱང་ཆུབ་སེམས་དཔས་སྐྱེ་བོ་རྣམས་གཉིད་ལོག་པར་བྱས་ཏེ་མངོན་པར་བྱུང་ཞེ་ན། སྐྱེ་བོ་རྣམས་ནི་ལྷ་རྣམས་ཀྱིས་གཉིད་ལོག་པར་བྱས་པས་ལྷ་རྣམས་ཀྱིས་ཉེས་པར་ཀུན་ཏུ་བསྟན་པའི་ཕྱིར་ཏེ། བྱང་ཆུབ་སེམས་དཔའ་ལ་ཉེ་དུ་རྣམས་དང་། སྐྱེ་བོ་རྣམས་
ཐ་བ་དང་། ཞེ་སྡང་གི་སེམས་བསྐྱེད་པར་གྱུར་ན་དེ་དག་ལ་ཡུན་རིང་པོར་དོན་མེད་པ་དང་། གནོད་པ་དང་། སྡུག་བསྔལ་བ་དང་། ལོག་པར་ལྟུང་བར་འགྱུར་གྱི། དེ་དག་གི་སྐྱེ་བོ་རྣམས་ལྷ་རྣམས་ཀྱིས་གཉིད་ལོག་པར་བྱས་ཤིང་ལྷ་རྣམས་ཀྱིས་སྒོ་ཕྱེ་སྟེ། བར་སྣང་ལ་ཁྱེར་བས་དེ་ནི་
བྱང་ཆུབ་སེམས་དཔས་མཉེས་སོ་ཞེས་ཤེས་པར་གྱུར་ན། དེ་དག་བྱང་ཆུབ་སེམས་དཔའ་ལ་དད་པ་རྒྱ་ཆེན་པོ་འཐོབ་པར་འགྱུར་བས་དོན་གྱི་དབང་དེ་མཐོང་བའི་ཕྱིར་སྐྱེ་བོ་རྣམས་གཉིད་ལོག་པར་བྱས་ནས་མངོན་པར་བྱུང་སྟེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །
ཅིའི་ཕྱིར་བྱང་ཆུབ་སེམས་དཔས་རྟ་དང་རྒྱན་རྣམས་ཤཱཀྱའི་བུ་འདུན་པ་ལ་ཕྱིར་བསྐུར་ཞེ་ན། འདི་ལྟ་སྟེ་ཆོག་ཤེས་པ་ཀུན་ཏུ་བསྟན་པར་བྱ་བའི་ཕྱིར་ཏེ། གཞན་དག་འདི་སྐད་ཅེས་བྱང་ཆུབ་སེམས་དཔའ་ནི་དངོས་པོ་ཐམས་ཅད་ལ་མི་ལྟ་བར་རབ་ཏུ་བྱུང་བས་ན་གསེར་དང་། དངུལ་དག་
དོན་དུ་གཉེར་བ་མ་ཡིན་ནོ། །ཞེས་བརྗོད་པར་བྱ་བ་དང་གཞན་ཡང་བྱང་ཆུབ་སེམས་དཔའ་ཕྱི་མའི་སྐྱེ་བོ་དག་རྗེས་སུ་སློབ་ཏུ་གཞུག་པར་བྱ་བའི་ཕྱིར་ཏེ། འདི་ལྟར་གང་དག་བསྟན་པ་འདི་ལ་རབ་ཏུ་བྱུང་བར་འགྱུར་བ་དེ་དག་གིས་ནི་ངའི་རྗེས་སུ་བསླབ་ཅིང་དངོས་པོ་ཐམས་ཅད་ལ་མི་ལྟ་བར་
འཕགས་པའི་རིགས་བཞི་ལ་བརྟེན་ནས་རབ་ཏུ་འབྱུང་བར་བྱ་སྟེ། རབ་ཏུ་འབྱུང་བས་ནི་དང་པོ་ཁོ་ན་ནས་འཚོ་བ་ལ་ལྟོས་ཤིང་རབ་ཏུ་འབྱུང་བར་མི་བྱའོ། །ཞེས་བསྟན་པར་བྱ་བའི་ཕྱིར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་
བདག་ཉིད་ཀྱིས་རལ་གྲིས་སྐྲ་བྲེགས་ཏེ། རབ་ཏུ་བྱུང་ཞེ་ན་རིགས་ཀྱི་བུ་འདི་ལྟར་གང་གིས་བྱང་ཆུབ་སེམས་དཔའི་དཔལ་དང་གཟི་བརྗིད་ཟིལ་གྱིས་མནན་ཏེ། སྐྲ་འདྲེག་པར་བཟོད་པའི་ལྷའམ། ཀླུའམ། གནོད་སྦྱིན་ནམ། དྲི་ཟའམ། མིའམ། མི་མ་ཡིན་པ་ནི་སྟོང་གསུམ་གྱི་སྟོང་

ཆེན་པོའི་འཇིག་རྟེན་གྱི་ཁམས་ན་འགའ་ཡང་མེད་པ་དང་། བྱང་ཆུབ་སེམས་དཔའ་དེ་ཉིད་རབ་ཏུ་འབྱུང་བ་དོན་དུ་གཉེར་བས་ན་དད་པ་དང་ལྡན་པ་ཡིན་ནོ་ཞེས་ཀུན་ཏུ་བསྟན་པ་དང་། བདག་ཉིད་ཀྱིས་སྐྲ་བྲེགས་ཏེ་རབ་ཏུ་བྱུང་ན་རྒྱལ་པོ་ཟས་གཙང་ཡང་སུས་ངའི་བུའི་སྐྲ་བྲེགས་དེ་ཆད་པས་གཅད་དོ་
ཞེས་མི་དགའ་བར་མི་འགྱུར་བ་དང་། བྱང་ཆུབ་སེམས་དཔའ་བདག་ཉིད་ཀྱིས་རང་གི་རལ་གྲིས་སྐྲ་བྲེགས་སོ་ཞེས་རྒྱལ་པོ་ཟས་གཙང་གིས་ཐོས་ནས་ཅང་མི་ཟེར་བར་འགྱུར་བར་བྱ་བའི་ཕྱིར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་
སེམས་དཔའ་ཡེ་ཤེས་དམ་པ་ལ་བཀའ་སྩལ་པ། རིགས་ཀྱི་བུ་གཞན་ཡང་གང་གི་ཕྱིར་བྱང་ཆུབ་སེམས་དཔས་ལོ་དྲུག་ཏུ་དཀའ་བ་སྤྱོད་པ་སྤྱད་པ་ཡང་ཉོན་ཅིག །འདི་ལྟར་བྱང་ཆུབ་སེམས་དཔའ་ནི་ཐབས་ལ་མཁས་པས་སེམས་ཅན་རྣམས་ཀྱི་མི་དགེ་བའི་ལས་ཀྱི་བྱ་བ་དག་ལ་ངེས་པར་སྐྱོ་བར་
བྱ་ཞིང་འདུན་པར་བྱ་བའི་ཕྱིར་ཏེ། རིགས་ཀྱི་བུ་འདི་ལྟར་བྱང་ཆུབ་སེམས་དཔས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་ཚིག་འདི་སྐད་ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་
པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་པ་དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་དང་། ལྡེམ་པོའི་ངག་ཡིན་པར་བལྟ་བར་བྱ་སྟེ། ལས་ཀྱི་སྒྲིབ་པ་དེའི་རྒྱུས་བྱང་ཆུབ་སེམས་དཔའ་ལོ་དྲུག་ཏུ་དཀའ་བ་སྤྱད་པ་སྤྱོད་དོ། །བྱང་ཆུབ་སེམས་དཔས་ཅི་ལས་བསམས་
ཏེ་ཚིག་དེ་སྐད་ཅེས་སྨྲས་ཤེ་ན། རིགས་ཀྱི་བུ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་བྲམ་ཟེའི་ཁྱེའུ་འོད་ཟེར་ཕྲེང་དེ་ལ་ནེའུ་ལྡངས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་བྱང་ཆུབ་སེམས་དཔའི་ཐེག་པ་ལ་ཡང་
དག་པར་ཞུགས་པ་ལྔ་ཞིག་ཡོད་པ་དེ་དག་སྡིག་པའི་གྲོགས་པོའི་དབང་དང་། སྡིག་པའི་གྲོགས་པོ་དང་ཕྲད་པས་བྱང་ཆུབ་ཀྱི་སེམས་དག་བརྗེད་པར་གྱུར་ནས་དེའི་ཚེ་རིགས་ཀྱི་བུ་ལྔ་པོ་དེ་དག་མུ་སྟེགས་ཅན་གྱི་བརྟུལ་ཞུགས་སྤྱོད་པར་གྱུར་ཅིང་སངས་རྒྱས་ཀྱི་བརྟུལ་ཞུགས་མི་སྤྱོད་པ་དང་། མུ་སྟེགས་

ཅན་གྱི་གསང་སྔགས་ལ་བརྩོན་ཞིང་སངས་རྒྱས་ཀྱི་གསང་སྔགས་ལ་མི་བརྩོན་པ་དང་། མུ་སྟེགས་ཅན་ལ་མོས་ཤིང་མུ་སྟེགས་ཅན་གྱི་དབང་གིས་བྱང་ཆུབ་ནི་བདག་ཅག་ལ་ཡོད་དེ། བདག་ཅག་ཀྱང་སངས་རྒྱས་ཡིན་ནོ་ཞེས་བདག་ཉིད་སྟོན་པ་ཡིན་པར་ཁས་འཆེ་བར་བྱེད་དོ། །
བྲམ་ཟེའི་ཁྱེའུ་འོད་ཟེར་ཕྲེང་གིས་རིགས་ཀྱི་བུ་དེ་དག་སྣོད་ཡིན་པར་རིག་ནས་དེ་ཐབས་ལ་མཁས་པས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ལྔ་པོ་དེ་དག་རིམ་གྱིས་མུ་སྟེགས་ཅན་དེ་དག་གི་དྲུང་ནས་ཕྱིར་བཟློག་པར་འདོད་པས་དེ་ཐབས་ལ་མཁས་པས་རྫ་མཁན་བུམ་བྱེད་ལ་ཚིག་འདི་སྐད་
ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་ཏེ། རིགས་ཀྱི་བུ་དེའི་ཚེ་བྲམ་ཟེའི་ཁྱེའུ་འོད་ཟེར་ཕྲེང་དེ་ཕྱོགས་གཞན་ཞིག་ཏུ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ལྔ་པོ་དེ་དག་
དང་ལྷན་ཅིག་ཏུ་འཁོད་དོ། །དེ་ནས་རྫ་མཁན་བུམ་བྱེད་དེ་ས་ཕྱོགས་ག་ལ་བ་དེར་སོང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྔགས་པ་བརྗོད་ཅིང་བསྔགས་པ་བརྗོད་ནས་བྲམ་ཟེའི་ཁྱེའུ་འོད་ཟེར་ཕྲེང་ལ་འདི་སྐད་ཅེས་སྨྲས་སོ། །ཀྱེ་འོད་
ཟེར་ཕྲེང་ཚུར་ཤོག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་འདོང་ངོ་། །རིགས་ཀྱི་བུ་དེ་ནས་བྲམ་ཟེའི་ཁྱེའུ་འོད་ཟེར་ཕྲེང་འདི་སྙམ་དུ་སེམས་ཏེ། ཀྱེ་མ་བྲམ་ཟེའི་ཁྱེའུ་འདི་དག་ནི་དགེ་བའི་རྩ་བ་ཡོངས་སུ་མ་སྨིན་པ་ཡིན་པས་གལ་ཏེ་
བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་དང་། བྱང་ཆུབ་ཀྱི་བསྔགས་པ་བརྗོད་ཅིང་མུ་སྟེགས་ཅན་རྣམས་ཀྱི་བསྔགས་པ་མ་ཡིན་པར་བརྗོད་པར་གྱུར་ན་རིགས་ཀྱི་བུ་འདི་དག་ཡོངས་སུ་དོགས་པར་གྱུར་ནས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་འགྲོ་བར་མི་འགྱུར་བའི་གནས་དེ་ལྟ་བུ་ཡོད་དོ་སྙམ་ནས་བྲམ་ཟེའི་ཁྱེའུ་འོད་ཟེར་ཕྲེང་དེ་སྔར་དམ་བཅས་པ་དེ་ཉིད་རྗེས་སུ་སྲུང་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་འཐུན་པའི་ཐབས་ལ་མཁས་པས་ཚིག་འདི་སྐད་ཅེས་དགེ་

སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་སོ། །ཇི་ལྟར་ན་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་འཐུན་པའི་ཐབས་ལ་མཁས་པ་ཡིན་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་
པའི་བྱང་ཆུབ་སེམས་དཔའ་ལ་ནི་བྱང་ཆུབ་ཀྱི་འདུ་ཤེས་ཀྱང་མེད། སངས་རྒྱས་ཀྱི་འདུ་ཤེས་ཀྱང་མེད། སངས་རྒྱས་ཞེས་བྱ་བའི་སངས་རྒྱས་ཀྱང་ཡང་དག་པར་རྗེས་སུ་མི་མཐོང་། བྱང་ཆུབ་ཀྱང་ཡང་དག་པར་རྗེས་སུ་མི་མཐོང་སྟེ། བྱང་ཆུབ་ནི་ནང་དུ་ཡང་ཡང་དག་པར་རྗེས་སུ་མི་མཐོང་།
བྱང་ཆུབ་ནི་ཕྱི་རོལ་དུ་ཡང་དག་པར་རྗེས་སུ་མི་མཐོང་། བྱང་ཆུབ་ནི་ནང་དང་ཕྱི་རོལ་དུ་ཡང་ཡང་དག་པར་རྗེས་སུ་མི་མཐོང་བའི་ཕྱིར་རོ། །དེ་ལྟར་ཆོས་ཐམས་ཅད་མ་སྐྱེས་མི་དམིགས་པའི་ཕྱིར་བྱང་ཆུབ་ནི་གཏན་སྟོང་པ་ཉིད་ཡིན་པས་བྲམ་ཟེའི་ཁྱེའུ་འོད་ཟེར་ཕྲེང་གིས་ཤེས་རབ་ཀྱི་ཕ་རོལ་ཏུ་
ཕྱིན་པའི་རྒྱུ་འཐུན་པའི་ཐབས་ལ་མཁས་པ་དེས་ཚིག་འདི་སྐད་ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་སོ། །དེ་ནས་དུས་གཞན་ཞིག་གི་ཚེ་ན་བྲམ་ཟེའི་ཁྱེའུ་འོད་ཟེར་ཕྲེང་
དེ་ནེའུ་ལྡངས་ལྔ་པོ་དེ་དག་དང་ཆུ་འགྲམ་ཞིག་ན་འཁོད་པར་གྱུར་པ་དང་། དེ་ནས་སངས་རྒྱས་ཀྱི་མཐུས་རིགས་ཀྱི་བུ་ལྔ་པོ་དེ་དག་གདུལ་བའི་དབང་གི་ཕྱིར་རྫ་མཁན་བུམ་བྱེད་ཆུ་འགྲམ་དེ་ག་ལ་བ་དེར་སོང་སྟེ་བྲམ་ཟེའི་ཁྱེའུ་འོད་ཟེར་ཕྲེང་དེ་ལ་འདི་སྐད་ཅེས་སྨྲས་སོ། །ཀྱེ་འོད་ཟེར་ཕྲེང་ཚུར་ཤོག་
སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་བ་ནི་ཤིན་ཏུ་རྙེད་པར་དཀའ་བ་ཡིན་གྱིས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་འདོང་ངོ་། །བྲམ་ཟེའི་ཁྱེའུ་འོད་ཟེར་ཕྲེང་
གིས་སྨྲས་པ། དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས། དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་ཏེ། བྲམ་ཟེའི་ཁྱེའུ་འོད་ཟེར་ཕྲེང་དེས་དེ་བཞིན་གཤེགས་པ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་

བྱ་བའི་ཕྱིར་འགྲོར་མ་བཏུབ་པ་དང་། དེ་ནས་རྫ་མཁན་བུམ་བྱེད་དེས་བྲམ་ཟེའི་ཁྱེའུ་འོད་ཟེར་ཕྲེང་གི་ཐོར་ཏོ་ནས་བཟུང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ག་ལ་བ་དེར་ཁྲིད་དེ་སོང་ངོ་། །བྲམ་ཟེའི་ཁྱེའུ་ལྔ་པོ་
དེ་དག་གིས་ཀྱང་བྲམ་ཟེའི་ཁྱེའུ་འོད་ཟེར་ཕྲེང་ལ་ཡོངས་སུ་བསྐོར་ཏེ་ཡིད་འདུན་པར་བྱས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ག་ལ་བ་དེར་དོང་ངོ་། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ལོག་པར་ལྟ་བའི་ཁྱིམ་དུ་
སྐྱེས་པ་ལྔ་པོ་དེ་དག་ཆེར་འདུན་པར་གྱུར་ནས། འདི་སྙམ་དུ་འདི་ལྟར་བྲམ་ཟེའི་ཁྱེའུ་འོད་ཟེར་ཕྲེང་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། དྲུང་དུ་འགྲོ་བ་དང་། དགེ་བའི་ཆོས་
ཡོངས་སུ་རྫོགས་པར་བྱ་བའི་ཕྱིར་རྫ་མཁན་བུམ་བྱེད་འདིས་ཐོར་ཏོ་ནས་བཟུང་བཞིན་དུ་ཡང་བདག་ཉིད་ཀྱི་སྲོག་ཡོངས་སུ་བཏང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་འགྲོ་བར་འགྱུར་བའི་སངས་རྒྱས་དེ་ནི་ཅི་འདྲ་བ་ཞིག་
ཡིན། སངས་རྒྱས་ཀྱི་ཆོས་དེ་ནི་ཅི་འདྲ་བ་ཞིག་ཡིན་སྙམ་ནས། དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ལྔ་པོ་དེ་དག་གིས་འདུན་པ་བྱས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ལ་བལྟ་བའི་ཕྱིར་དེ་བཞིན་གཤེགས་པ་
འོད་སྲུང་གི་ཐད་དུ་དོང་ངོ་། །དེ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་མཐོང་མ་ཐག་ཏུ་སྔོན་གྱི་དགེ་བའི་རྩ་བས་ཡང་དག་པར་བསྐུལ་བས་དད་པ་ཐོབ་པར་གྱུར་ཏོ། །དེ་དག་གིས་དད་པ་ཐོབ་ནས་བྲམ་ཟེའི་ཁྱེའུ་འོད་ཟེར་ཕྲེང་ལ་
སྨྲས་པ། སྟོན་པའི་ཡོན་ཏན་འདི་ལྟ་བུ་དག་ཁྱོད་ཀྱིས་སྔོན་ཆད་ཁོ་བོ་ཅག་ལ་མ་སྨྲས་སོ་ཞེས་སྤྱོས་སོ། །རིགས་ཀྱི་བུ་དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ལྔ་པོ་དེ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་དཔལ་

དང་གཟི་བརྗིད་ཀྱང་མཐོང་། སྤོབས་པ་ཡང་ཐོས། ཚངས་པའི་སྒྲ་དབྱངས་བསྒྲགས་པ་ཡང་ཐོས་ནས་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རིགས་ཀྱི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་འོད་སྲུང་གིས་རིགས་ཀྱི་བུ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས། དེའི་ཚེ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཕྱིར་མི་ལྡོག་པའི་འཁོར་ལོའི་གཟུངས་རྡོ་རྗེའི་ཚིག་ཆོས་ཐམས་ཅད་སྐྱེ་བ་མེད་པ་ཞེས་བྱ་བ་དེ་ལྟ་དེ་ལྟར་ཡང་དག་
པར་བསྟན་པར་མཛད་དེ། དེས་རིགས་ཀྱི་བུ་ལྔ་པོ་དེ་དག་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །རིགས་ཀྱི་བུ་དེ་ལྟར་ན་ང་ནི་སངས་རྒྱས་ཀྱི་ཡེ་ཤེས་ཐོགས་པ་མི་མངའ་བས་ཁྱེད་ཅག་ལ་གལ་ཏེ་བྲམ་ཟེའི་ཁྱེའུ་འོད་ཟེར་ཕྲེང་དེས་རིགས་ཀྱི་བུ་དེ་དག་གི་མདུན་དུ་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྔགས་པ་བརྗོད་ཅིང་མུ་སྟེགས་ཅན་རྣམས་ཀྱི་བསྔགས་པ་མ་ཡིན་པ་བརྗོད་པར་གྱུར་ན། དེས་ནི་རིགས་ཀྱི་བུ་དེ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་
གི་སྤྱན་སྔར་འགྲོ་བའི་གནས་དང་སྐབས་ཀྱང་མེད་ན་དད་པ་འཐོབ་པར་འགྱུར་བ་ལྟ་ཅི་སྨོས་ཏེ་དེ་ནི་གནས་མེད་དོ། །ཞེས་ལུང་བསྟན་ཏོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུ་ལྔ་པོ་དེ་དག་ཡོངས་སུ་སྨིན་པར་བྱ་བའི་ཕྱིར་བྲམ་
ཟེའི་ཁྱེའུ་འོད་ཟེར་ཕྲེང་གིས་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་འཐུན་པའི་ཐབས་ལ་མཁས་པས་ཚིག་འདི་སྐད་ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་པར་ཟད་ཀྱི།
རིགས་ཀྱི་བུ་ཕྱིར་མི་ལྡོག་པའི་བྱང་ཆུབ་སེམས་དཔའ་ནི་སངས་རྒྱས་ལ་ནེམ་ནུར་མེད་ཅིང་བྱང་ཆུབ་ལ་ཡང་སོམ་ཉི་མེད། སངས་རྒྱས་ཀྱི་ཆོས་རྣམས་ལ་ཡང་སོམ་ཉི་མེད་དེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་

དེ་དག་ཡོངས་སུ་སྨིན་པར་བྱས་ཤིང་ལས་ཀྱི་རྣམ་པར་སྨིན་པ་བསྟན་པ་གང་ཡིན་པའི་ལས་ཀྱི་རྣམ་པར་སྨིན་པ་དེས་ཀྱང་ངས་ལོ་དྲུག་ཏུ་དཀའ་བ་སྤྱོད་པ་སྤྱད་པར་གྱུར་པས་སེམས་ཅན་མི་ཤེས་པར་སྤྱོད་པ་གཞན་དག་གིས་ནི་དགེ་སྦྱོང་དང་བྲམ་ཟེ་ཚུལ་ཁྲིམས་དང་ལྡན་པ་
དག་ལ་ལྐོག་ནས་ཚིག་རྩུབ་པོ་སྨྲས་ལ། དེ་དག་གིས་ཤེས་ཀྱང་རུང་མི་ཤེས་ཀྱང་རུང་། ཤེས་པ་དང་ལྡན་ཡང་རུང་། ཤེས་པ་དང་མི་ལྡན་ཡང་རུང་སྟེ། བརྗོད་པར་གྱུར་ན་དེ་དག་ཡུན་རིང་པོར་དོན་མེད་པ་དང་། གནོད་པ་དང་སྡུག་བསྔལ་བ་དང་། ལོག་པར་ལྟུང་བར་འགྱུར་
བས་ན་སེམས་ཅན་དེ་དག་ལ་ལས་ཀྱི་བྱ་བ་བསྟན་པའི་ཕྱིར་དེ་བཞིན་གཤེགས་པས་དེ་ལ་དེའི་ལས་ཀུན་ཏུ་སྟོན་པར་ཟད་ཀྱི། བྱང་ཆུབ་སེམས་དཔའ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མེད་དོ། །གཞན་ཡང་སེམས་ཅན་གང་དག་དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་པ་དག་
ལ་ཚིག་རྩུབ་པོ་སྨྲས་ནས། བདག་ལ་ནི་ཐར་པའི་སྐལ་བ་མེད་དོ་སྙམ་ནས་འགྱོད་པ་ལ་གནས་ཤིང་ཕྱིན་ཆད་རྩོལ་བར་མི་བྱེད་པའི་སེམས་ཅན་དེ་དག་གི་འགྱོད་པ་བསལ་བར་བྱ་བའི་ཕྱིར་ཡང་ལས་དེ་ཀུན་ཏུ་བསྟན་ཏེ། དེ་དག་འདི་སྙམ་དུ་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་
པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་ཚིག་འདི་སྐད་ཅེས་བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་ཀྱང་དེ་ལ་རྣམ་པར་གྲོལ་བའི་སྐལ་བ་ཡོད་པར་གྱུར་ན།
བདག་ཅག་མི་ཤེས་པ་རྣམས་ལྟ་སྨོས་ཀྱང་ཅི་དགོས་སྙམ་དུ་སེམས་ཞིང་དེ་དག་སྡིག་པའི་ལས་ཀྱི་ཉེས་པ་དེ་ཡང་འཆགས་ལ་གཞན་དག་ཀྱང་མངོན་པར་འདུ་མི་བྱེད་པར་འགྱུར་བའི་ཕྱིར་རོ། །རིགས་ཀྱི་བུ་གཞན་ཡང་མུ་སྟེགས་ཅན་དག་གདུལ་བའི་ཕྱིར་བྱང་ཆུབ་སེམས་དཔས་ལོ་དྲུག་ཏུ་
དཀའ་བ་སྤྱོད་པ་ཀུན་ཏུ་བསྟན་གྱི་ལས་ཀྱི་སྒྲིབ་པའི་རྒྱུས་ནི་མ་ཡིན་ནོ། །དེ་ཅིའི་ཕྱིར་ཞེ་ན། དགེ་སྦྱོང་དང་བྲམ་ཟེ་རྒྱ་ཤུག་དང་ཏིལ་དང་འབྲས་འབྲུ་གཅིག་ཙམ་ཟ་ཞིང་ཟས་གཞན་མི་ཟ་བས་རྣམ་པར་དག་པར་འགྱུར་བར་འདོད་པ་དག་ཡོད་པས་དེ་དག་ཚར་གཅད་པའི་ཕྱིར་བྱང་ཆུབ་སེམས་

དཔས་འཕགས་པའི་ལམ་ལ་མ་བརྟེན་པར་རྒྱ་ཤུག་དང་ཏིལ་དང་འབྲས་འབྲུ་གཅིག་ཙམ་གྱི་ཟས་ངན་པ་ཟ་བས་རྣམ་པར་དག་པར་མི་ནུས་པར་བསྟན་པའི་ཕྱིར་ཏེ། འདི་ལྟར་བྱང་ཆུབ་སེམས་དཔའ་ཚིག་འདི་སྐད་ཅེས་བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་
ལ་བྱང་ཆུབ་གལ་ཡོད་ཅེས་སྨྲ་བའི་རྒྱུ་ནི་དེ་ཡིན་རྐྱེན་ནི་དེ་ཡིན་ཏེ། ལས་ཀྱི་བྱ་བ་དེ་ལ་དམིགས་ནས་ལོ་དྲུག་ཏུ་དཀའ་བ་སྤྱད་པ་བསྟན་ཏོ། །བྱང་ཆུབ་སེམས་དཔས་ལོ་དྲུག་ཏུ་དཀའ་བ་སྤྱད་པ་བསྟན་པས་ལྷ་དང་ཕྱི་རོལ་པའི་དྲང་སྲོང་ངན་པ་ལ་མོས་པ་ས་ཡ་ཕྲག་བཞི་དང་ཉིས་འབུམ་
ཡང་ཁ་ཟས་ངན་པ་དེས་བཏུལ་ནས་དེ་དག་གིས་ཡེ་ཤེས་མངོན་པར་རྟོགས་པར་གྱུར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔས་ཟས་ལ་ཡོངས་སུ་ལོངས་སྤྱད་དེ། ལུས་ཀྱི་སྟོབས་དང་། ཤུགས་དང་མཐུ་ཡང་དག་པར་བསྐྱེད་ནས་
བྱང་ཆུབ་ཀྱི་ཤིང་དྲུང་དུ་སོང་གི །ལུས་ཉམས་པ་དང་། ལུས་ཉམ་ཆུང་བཞིན་དུ་མ་སོང་ཞེ་ན། བྱང་ཆུབ་སེམས་དཔས་ནི་ཟས་མ་ཟོས་ཤིང་ལུས་ཉམས་པ་དང་། ལུས་ཉམ་ཆུང་བས་ཀྱང་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ནུས་ན་ཟས་ངན་པ་ཟོས་པས་ལྟ་ཅི་སྨོས་ཏེ། འོན་
ཀྱང་སྐྱེ་བོ་ཕྱི་མ་དགེ་བའི་རྩ་བ་ཡོངས་སུ་མ་སྨིན་པ་ཟས་མི་ཟ་བས་བྱང་ཆུབ་ཡོངས་སུ་བཙལ་བར་སེམས་པ་དེ་དག་བཀྲེས་པས་ཡོངས་སུ་གདུང་བས་ཡེ་ཤེས་བསྒྲུབ་པར་མི་ནུས་པ་དེ་དག་ལ་སྙིང་བརྩེ་བའི་ཕྱིར་བྱང་ཆུབ་སེམས་དཔས་ཟས་ལ་ཡོངས་སུ་ལོངས་སྤྱད་དོ། །དེ་ཅིའི་ཕྱིར་ཞེ་
ན། བདེ་བར་གྱུར་པ་རྣམས་ཀྱིས་ནི་ཆོས་མངོན་པར་བརྗོད་པར་ནུས་ཀྱི། སྡུག་བསྔལ་བར་གྱུར་པ་རྣམས་ཀྱིས་ནི་མི་ནུས་པས་ངས་སེམས་ཅན་དེ་དག་ལ་བདེ་བའི་ཡེ་ཤེས་རྟོགས་པ་ཀུན་ཏུ་བསྟན་པར་བྱ་བའི་ཕྱིར་ཏེ། ཇི་ལྟ་ཞེ་ན། བྱང་ཆུབ་སེམས་དཔའ་ཉིད་ཀྱང་གྲོང་མིའི་བུ་མོའི་
ཟས་ལ་ཡོངས་སུ་ལོངས་སྤྱད་ནས་ཟས་ཀྱི་བདེ་བ་ཉིད་ཀྱིས་བྱང་ཆུབ་ཐོབ་པོ་ཞེས་སེམས་ཅན་རྣམས་ངའི་རྗེས་སུ་སློབ་པར་འགྱུར་བའི་ཕྱིར་རོ། །དེ་ནས་བྱང་ཆུབ་སེམས་དཔས་གྲོང་མིའི་བུ་མོ་ལེགས་སྐྱེས་མའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བ་དང་། སྐྱེ་

བོ་ཕྱི་མ་རྣམས་ལ་རྗེས་སུ་སྙིང་བརྩེ་བའི་ཕྱིར་བྱང་ཆུབ་སེམས་དཔས་དེའི་ཁ་ཟས་ཡོངས་སུ་ལོངས་སྤྱད་ནས་བྱང་ཆུབ་ཐོབ་པར་ཀུན་ཏུ་བསྟན་པར་ཟད་ཀྱི། རིགས་ཀྱི་བུ་བྱང་ཆུབ་སེམས་དཔས་ནི་བསམ་གཏན་དང་ཏིང་ངེ་འཛིན་གྱི་དགའ་བ་དང་། མཆོག་ཏུ་དགའ་བ་
གཅིག་གིས་ཀྱང་བསྐལ་པ་འབུམ་ཕྲག་མང་པོར་ཁ་ཟས་མེད་པར་གནས་པར་ནུས་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་རྩྭ་དག་སློང་བར་བྱེད་ཅེ་ན། སྔོན་གྱི་དེ་བཞིན་གཤེགས་པ་དེ་དག་ཀྱང་རྩྭའི་གདིང་བ་ལ་མོས་
ཤིང་གདན་ལ་གདུབ་མ་ཡིན་པས་ཆོག་ཤེས་པ་ཉིད་ཀྱི་ཕྱིར་དང་། རྩྭ་འཚོང་བཀྲ་ཤིས་པའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་རོ། །དེས་ཀྱང་བྱང་ཆུབ་སེམས་དཔའ་ལ་རྩྭ་དག་ཕུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་པས་ན། དེ་ཡང་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡུལ་བྲལ་ཞེས་བྱ་བར་འགྱུར་རོ་ཞེས་ངས་ལུང་བསྟན་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་
བྱང་ཆུབ་ཀྱི་ཤིང་དྲུང་དུ་འདུག་ནས་བདུད་སྡིག་ཅན་མ་འོངས་པར་མྱུར་བ་མྱུར་བར་བྱང་ཆུབ་མངོན་པར་རྫོགས་པར་འཚང་རྒྱ་བར་མི་བྱེད་ཅེ་ན། རིགས་ཀྱི་བུ་བྱང་ཆུབ་སེམས་དཔས་སྐབས་མ་ཕྱེ་བར་བདུད་སྡིག་ཅན་བྱང་ཆུབ་ཀྱི་ཤིང་དྲུང་དུ་འོང་བ་ནི་གནས་མེད་ཅིང་སྐབས་མེད་དེ། དེ་ནི་
གནས་མེད་མོད་ཀྱི་རིགས་ཀྱི་བུ་འོན་ཀྱང་བྱང་ཆུབ་སེམས་དཔའ་བྱང་ཆུབ་ཀྱི་ཤིང་དྲུང་དུ་འདུག་པ་ན་འདི་སྙམ་དུ་སེམས་ཏེ། གླིང་ཆེན་པོ་བཞི་པའི་འདོད་པའི་ཁམས་འདི་ན་དབང་ཕྱུག་ནི་སུ་ཡིན། སེམས་ཅན་འདི་དག་ནི་སུའི་དབང་དུ་སོང་སྙམ་པ་དང་། དེ་འདི་སྙམ་དུ་སེམས་ཏེ།
དེ་ནི་བདུད་སྡིག་ཅན་ཡིན་ཏེ། དེའི་དབང་དུ་སོང་ངོ་སྙམ་ནས། དེ་ནས་བྱང་ཆུབ་སེམས་དཔའ་འདི་སྙམ་དུ་སེམས་ཏེ། བདག་གིས་བདུད་སྡིག་ཅན་དང་གཡུལ་སྤྲད་དེ། དེ་ལས་རྒྱལ་བར་བྱས་ན་འདོད་པའི་ཁམས་ཐམས་ཅད་ལས་ཀྱང་རྒྱལ་བར་འགྱུར་ལ། བདུད་ཀྱི་འཁོར་མང་པོ་

ཡང་འདུ་བར་འགྱུར། གནོད་སྦྱིན་གྱི་འཁོར་དང་། སྲིན་པོའི་འཁོར་དང་། དྲི་ཟའི་འཁོར་དང་། ལྷ་མ་ཡིན་གྱི་འཁོར་ཀྱང་འདུ་བར་འགྱུར་ཞིང་འཁོར་མང་པོ་འདུས་པ་དག་གིས་བྱང་ཆུབ་སེམས་དཔའི་སེང་གེའི་རྣམ་པར་རྩེ་བ་མཐོང་ན། བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་སེམས་བསྐྱེད་ཅིང་སྨོན་ལམ་འདེབས་པར་ཡང་འགྱུར་ལ་གཞན་གང་དག་གིས་མཐོང་བ་དེ་དག་ལ་ཡང་ཡོངས་སུ་མྱ་ངན་ལས་འདའ་བའི་བར་གྱི་རྒྱུར་འགྱུར་རོ་སྙམ་སྟེ། རིགས་ཀྱི་བུ་དེ་ནས་བྱང་ཆུབ་སེམས་དཔའ་བྱང་ཆུབ་ཀྱི་ཤིང་དྲུང་ན་འདུག་པས་མཛོད་སྤུ་ནས་འོད་རབ་ཏུ་བཀྱེའོ། །
འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བར་བྱས་ཤིང་ཉི་མ་དང་ཟླ་བ་དག་གི་འོད་ཀྱང་ཡོངས་སུ་གཏུགས་ཏེ་བདུད་ཀྱི་གནས་ཐམས་ཅད་སྤ་བཀོང་ནས་འོད་དེ་ལས་སྒྲ་འདི་ལྟ་བུ་བྱུང་ངོ་། །ཤཱཀྱའི་སྲས་པོ་དེ་ཤཱཀྱའི་ཁབ་ནས་མངོན་པར་བྱུང་སྟེ། དེ་ནི་ང་བྱང་
ཆུབ་མངོན་པར་རྫོགས་པར་འཚང་རྒྱ་བར་འགྱུར་བས་བདུད་ཀྱི་ཡུལ་ལས་ཡང་དག་པར་འདའ་ཞིང་སེམས་ཅན་བརྒྱ་སྟོང་དཔག་ཏུ་མེད་པ་གཞན་དག་ཀྱང་བདུད་ཀྱི་ཡུལ་ལས་ཡང་དག་པར་འདའ་བར་བྱེད་པར་འགྱུར་བས་བདུད་ཀྱི་ཕྱོགས་ཉུང་བ་དང་། བདུད་ཀྱི་འཁོར་ཉུང་བར་འགྱུར་གྱིས།
ཁྱོད་སོང་ལ་དེ་དང་གཡུལ་སྤྲོད་ཅིག །རིགས་ཀྱི་བུ་དེ་ནས་འོད་དེས་བདུད་སྡིག་ཅན་ལ་ཡང་དག་པར་བསྐུལ་བ་ན་དེ་མྱ་ངན་གྱི་ཟུག་རྔུ་ཆེན་པོས་གཟིར་བར་གྱུར་ཏེ། ཁྲོ་ཞིང་རྔམ་བཞིན་དུ་དེའི་མོད་ལ་དཔུང་གི་ཚོགས་ཡན་ལག་བཞི་པ་བཤམས་ཞིང་བསྡུས་ནས། བྱང་ཆུབ་ཀྱི་ཤིང་དྲུང་
ག་ལ་བ་དེར་སོང་སྟེ། བྱང་ཆུབ་སེམས་དཔའ་ལ་བགེགས་བྱ་བའི་ཕྱིར་དཔག་ཚད་སུམ་ཅུ་རྩ་གཉིས་ཀྱི་ཁོར་ཡུག་ཏུ་བདུད་ཀྱི་དམག་གིས་གང་བར་བྱས་སོ། །དེ་ནས་བྱང་ཆུབ་སེམས་དཔའ་ཤེས་རབ་ཆེན་པོ་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་ལ་གནས་ནས་ཤེས་རབ་རིན་
པོ་ཆེ་ལས་ངེས་པར་བྱུང་བའི་ཕྱག་གསེར་གྱི་ཁ་དོག་ལྟ་བུས་ས་གཞི་ཆེན་པོ་ལ་བརྡབས་ཏེ་བྱམས་པའི་སྟོབས་ཀྱིས་བདུད་ཀྱི་སྡེ་ཐམས་ཅད་ཕམ་པར་མཛད་དོ། །བདུད་ཀྱི་སྡེ་ཕམ་པར་མཛད་མ་ཐག་ཏུ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མིའམ་ཅི་དང་། ལྟོ་

འཕྱེ་ཆེན་པོ་དང་། གྲུལ་བུམ་བྱེ་བ་ཕྲག་བརྒྱད་ཅུ་རྩ་བཞིས་བྱང་ཆུབ་སེམས་དཔའི་དཔལ་དང་། གཟི་བརྗིད་དང་། སྐུ་མདོག་དང་། གཟུགས་དང་། དབྱིབས་ཀྱང་མཐོང་། སྟོབས་དང་། ཤུགས་དང་། མཐུ་དང་། སེང་གེའི་རྣམ་པར་རྩེ་བ་ཡང་མཐོང་
ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པས་བྱང་ཆུབ་བརྙེས་ནས་ཞག་བདུན་དུ་སྐྱིལ་མོ་ཀྲུང་མི་འཇིག་པར་ཤིང་གི་རྒྱལ་པོ་ལ་སྤྱན་མི་འཛུམས་
པར་གཟིགས་ཤེ་ན། དེ་ན་གཟུགས་ན་སྤྱོད་པའི་ལྷའི་བུ་རབ་ཏུ་ཞི་བར་སྤྱོད་པ་དག་ཀྱང་འཁོད་ལ། དེ་དག་གིས་དེ་བཞིན་གཤེགས་པ་སྐྱིལ་མོ་ཀྲུང་གི་བཞུགས་པ་མཐོང་ནས་དགའ་བ་དང་། དང་བ་དང་། མཆོག་ཏུ་དགའ་བ་རྒྱ་ཆེན་པོ་སྐྱེས་ཤིང་། དགའ་བ་དང་། དང་བ་དང་།
མཆོག་ཏུ་དགའ་བ་སྐྱེས་པ་དེ་དག་འདི་སྙམ་དུ་སེམས་ཏེ། བདག་ཅག་གིས་དགེ་སྦྱོང་གཽ་ཏ་མའི་སེམས་ཅི་ལ་བརྟེན་པ་ངེས་པར་བརྟག་པར་བྱའོ། །སྙམ་ནས་དེ་དག་གིས་ཞག་བདུན་དུ་སེམས་གཅིག་ཏུ་བསྡུས་ཏེ་བརྟགས་ཀྱང་། དེ་བཞིན་གཤེགས་པའི་ཐུགས་ཅི་ལ་བརྟེན་པ་མ་
རྟོགས་ནས། དེ་དག་དགའ་བ་དང་། དང་བ་དང་། མཆོག་ཏུ་དགའ་བ་རྒྱ་ཆེན་པོ་སྐྱེས་ནས། ལྷའི་བུ་སུམ་ཁྲི་ཉིས་སྟོང་གིས་བདག་ཅག་ཀྱང་མ་འོངས་པའི་དུས་ན་འདི་ལྟར་རབ་ཏུ་ཞི་བའི་སྤྱོད་པས་བྱང་ཆུབ་ཀྱི་ཤིང་ལ་རྟོག་པར་གྱུར་ཅིག །ཅེས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏེ། གང་གི་ཕྱིར་དེ་བཞིན་གཤེགས་པས་བྱང་ཆུབ་བརྙེས་ནས། ཞག་བདུན་དུ་སྐྱིལ་མོ་ཀྲུང་མི་འཇིག་པར་ཤིང་གི་རྒྱལ་པོ་ལ་སྤྱན་མི་འཛུམས་པར་གཟིགས་པའི་རྒྱུ་ནི་དེ་ཡིན། རྐྱེན་ནི་དེ་ཡིན་ཏེ། དེ་ནི་དེ་བཞིན་གཤེགས་པའི་ཐབས་
ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པས་བསྐལ་པ་གྲངས་མེད་པ་ནས་རྣམ་པར་ཐར་པའི་སྒོས། སེམས་ཅན་ཐམས་ཅད་དབུགས་ཕྱུང་ཞིང་འགྲོན་དུ་གཉེར་ནས་ཚངས་པས་གསོལ་བ་མ་བཏབ་པར་ཆོས་སྟོན་པར་མི་མཛད་ཅེ་ན། རིགས་ཀྱི་བུ་འདི་ལ་དེ་བཞིན་

གཤེགས་པ་འདི་སྙམ་དུ་དགོངས་ཏེ། ལྷ་དང་མིར་བཅས་པའི་འཇིག་རྟེན་ནི་ཕལ་ཆེར་ཚངས་པ་ལ་བརྟེན་ཅིང་། ཚངས་པ་གཙོ་བོར་འཛིན་པ་ཡིན་པས་དེ་དག་འདི་སྙམ་དུ་བདག་ཅག་ནི་ཚངས་པས་སྤྲུལ་ཏོ། །བདག་ཅག་ནི་ཚངས་པ་ལས་སྐྱེས་ཏེ། ཚངས་པ་མ་གཏོགས་པར་འཇིག་
རྟེན་གྱི་བྱེད་པ་པོ་གཞན་ཡང་མེད་ལ། སྟོན་པ་ཡང་གཞན་མེད་དོ་སྙམ་དུ་སེམས་པས་དེས་ན། དེ་བཞིན་གཤེགས་པ་འདི་སྙམ་དུ་དགོངས་ཏེ། བདག་གིས་ཚངས་པ་འོང་བར་བྱས་ཤིང་ཚངས་པ་ལ་བསྡད་དེ། ཚངས་པས་ཕྱག་བྱས་ན་ཚངས་པ་ལ་བརྟེན་པ་ལྷ་དང་བཅས་པའི་
འཇིག་རྟེན་ཡང་དེ་བཞིན་གཤེགས་པ་ལ་ཕྱག་འཚལ་བར་འགྱུར་ལ། ཚངས་པས་གསོལ་བ་བཏབ་ན་དེ་བཞིན་གཤེགས་པ་ཆོས་སྟོན་པར་མཛད་ཀྱི། མ་གསོལ་བར་བསྟན་ན་དེ་དག་ངའི་ཆོས་ཀྱང་འཛིན་དུ་མ་ངེས་སོ་སྙམ་དུ་དགོངས་པའི་ཕྱིར་ཏེ། ཚངས་པ་ཡང་དེ་བཞིན་
གཤེགས་པ་ཉིད་ཀྱི་མཐུས་འདི་ལྟ་སྟེ། ཆོས་ཀྱི་འཁོར་ལོ་བསྐོར་བར་གསོལ་བ་གདབ་པའི་ཕྱིར་འོངས་པར་ཟད་ཀྱི། ཚངས་པ་ཉིད་ལ་ནི་བདག་གིས་དེ་བཞིན་གཤེགས་པ་ལ་གསོལ་བ་གདབ་པར་བྱའོ། །ཞེས་ཡིད་ལ་བྱེད་པའི་སེམས་གཅིག་ཙམ་ཡང་མེད་དོ། །དེ་ལྟར་ན་ཚངས་
པ་ལ་རྟེན་པའི་སེམས་ཅན་རྣམས་ཀྱི་ཚངས་པ་ལ་ངེས་པ་སྤང་བའི་ཕྱིར། དེ་བཞིན་གཤེགས་པས་ཚངས་པ་འོང་བར་མཛད་ཅིང་ཚངས་པ་ལ་གཞེས་ཏེ། གང་གི་ཚེ་ཚངས་པས་ཆོས་ཀྱི་འཁོར་ལོ་བསྐོར་བར་བསྐུལ་བའི་ཕྱིར། དེ་བཞིན་གཤེགས་པ་ལ་གསོལ་བ་བཏབ་པ་དེའི་ཚེ་
ན་ཚངས་པ་དྲུག་ཁྲི་བརྒྱད་སྟོང་གིས་སངས་རྒྱས་བཅོམ་ལྡན་འདས་འདི་ནི་སེམས་ཅན་ཐམས་ཅད་ཀྱི་མཆོག་ཡིན་ནོ། །འདི་ནི་གཙོ་བོ་ཡིན་ནོ། །འདི་ནི་རབ་མཆོག་ཡིན་ཏེ། བདག་ཅག་ཀྱང་ཡེ་ཤེས་འདི་ལྟ་བུ་དང་། ཡོན་ཏན་འདི་ལྟ་བུ་དང་ལྡན་པར་གྱུར་ཅིག་ཅེས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་ཡེ་ཤེས་དམ་པ་ལ་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པས་སེམས་ཅན་རྣམས་ལ་

ལས་ཀྱི་རྒྱུད་བཅུ་པོ་འདི་དག་བསྟན་པ་དེ་ཡང་བྱང་ཆུབ་སེམས་དཔའ་དང་། དེ་བཞིན་གཤེགས་པས་ཐབས་ལ་མཁས་པ་ཡིན་པར་ཡང་བལྟ་བར་བྱ། ལྡེམ་པོའི་ངག་ཡིན་པར་ཡང་བལྟ་བར་བྱ་སྟེ། རིགས་ཀྱི་བུ་བྱང་ཆུབ་སེམས་དཔའི་ནི་མི་དགེ་བ་ཐ་ན་
སྐྲའི་རྩེ་མོའི་ཆ་ཤས་ཙམ་དུ་ཕྲ་བ་འགའ་དང་ལྡན་ན་ཡང་བྱང་ཆུབ་ཀྱི་སྙིང་པོར་བྱང་ཆུབ་ཀྱི་ཤིང་དྲུང་དུ་འདུག་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བའི་གནས་མེད། སྐབས་མ་ཡིན་ཏེ། དེ་ནི་གནས་མེད་དོ། །དེ་ཅིའི་
ཕྱིར་ཞེ་ན། རིགས་ཀྱི་བུ་དེ་བཞིན་གཤེགས་པ་ནི་དགེ་བའི་ཆོས་ཐམས་ཅད་དང་ལྡན་ཞིང་མི་དགེ་བའི་ཆོས་སྤང་བ་ཐམས་ཅད་སྤངས་པ་སྟེ། རིགས་ཀྱི་བུ་དེ་བཞིན་གཤེགས་པ་ལ་ནི་སྡིག་པའི་ལས་མངོན་པར་འདུ་བྱ་བའི་ལྷག་མ་མ་སྤངས་པའི་བག་ཆགས་ཀྱི་མཚམས་སྦྱོར་བ་
ཙམ་ཡང་མི་མངའ་ན་ལས་ཀྱི་སྒྲིབ་པ་ལྟ་སྨོས་ཀྱང་ཅི་དགོས་ཏེ། དེ་ནི་གནས་མེད་པའི་ཕྱིར་རོ། །འོན་ཀྱང་སེམས་ཅན་གང་དག་ལས་ཀྱི་རྣམ་པར་སྨིན་པ་ཆུད་གསོན་ཅིང་ལས་ཀྱི་རྣམ་པར་སྨིན་པ་ལ་མ་དད་པའི་སེམས་ཅན་དེ་དག་ལ་ལས་ཀྱི་རྣམ་པར་སྨིན་པ་ཀུན་ཏུ་བསྟན་པར་བྱ་བའི་
ཕྱིར་དེ་བཞིན་གཤེགས་པས་ལས་ཀྱི་རྒྱུད་ཀུན་ཏུ་སྟོན་པར་ཡང་མཛད་དེ། ཆོས་ཀྱི་བདག་པོ་ང་ལ་ཡང་ལས་ཀྱི་རྣམ་པར་སྨིན་པར་འགྱུར་ན། ཁྱེད་ཅག་ལ་ལྟ་ཅིའི་ཕྱིར་ལས་རྣམ་པར་སྨིན་པར་མི་འགྱུར་ཞེས་དེ་དག་ལ་ལས་ཀྱི་རྣམ་པར་སྨིན་པར་ཀུན་ཏུ་བསྟན་པར་བྱ་བའི་ཕྱིར་དེ་
བཞིན་གཤེགས་པ་ལས་ཀྱི་རྒྱུད་སྟོན་པར་མཛད་ཀྱི། དེ་བཞིན་གཤེགས་པ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མི་མངའོ། །རིགས་ཀྱི་བུ་འདི་ལྟ་སྟེ་དཔེར་ན་ཡི་གེ་དང་། གྲངས་དང་། ལག་རྩིས་ལེགས་པར་བསླབ་པའི་སློབ་དཔོན་ནི་བྱིས་པ་རྣམས་བསླབས་པའི་
དོན་དུ་བྱིས་པ་རྣམས་བོད་པའི་ཚུལ་གྱིས་ཡི་གེའི་ཕྱི་མོ་དག་ཀློག་ཏུ་འཇུག་པར་ཟད་དེ། དེ་ནི་དེ་ལ་མ་ཤེས་པ་དང་སྒྲིབ་པ་མེད་མོད་ཀྱི། འོན་ཀྱང་བྱིས་པ་རྣམས་ཀྱིས་བདག་ལས་ཐོས་ནས་ཅི་ནས་ཀྱང་ཡི་གེ་དང་། གྲངས་དང་། ལག་རྩིས་དང་། བགྲང་བ་དག་གི་རྗེས་སུ་

སློབ་ཅིང་བྱང་བར་བྱ་བ་དེའི་ཆེད་དུ་ཡི་གེའི་ཕྱི་མོ་དག་ཀློག་ཏུ་འཇུག་པ་དེ་བཞིན་དུ་རིགས་ཀྱི་བུ་དེ་བཞིན་གཤེགས་པ་ཆོས་ཐམས་ཅད་ལ་ལེགས་པར་བསླབ་པ་དེ་ཡང་ཇི་ལྟ་ཇི་ལྟར་སེམས་ཅན་གཞན་དག་གི་ལས་ཡོངས་སུ་དག་པར་འགྱུར་བ། དེ་ལྟ་དེ་ལྟར་གསུང་ཞིང་དེ་ལྟ་དེ་ལྟར་ལས་
ཉེ་བར་སྟོན་པར་ཡང་མཛད་དོ། །རིགས་ཀྱི་བུ་འདི་ལྟ་སྟེ་དཔེར་ན། སྨན་པ་ནད་ཐམས་ཅད་རབ་ཏུ་ཞི་བར་བྱ་བ་ལ་ལེགས་པར་བསླབས་པ་ནི་ནད་མེད་བཞིན་དུ་སེམས་ཅན་ནད་པ་རྣམས་ཀྱི་མདུན་དུ་སྨན་ཚ་བ་དག་གི་རོ་མྱོང་བར་བྱེད་ཅིང་བསྔགས་པ་རྗོད་པར་ཡང་བྱེད། རབ་ཏུ་
བསྔགས་པ་རྗོད་པར་ཡང་བྱེད་དེ། ནད་པ་རྣམས་ཀྱིས་དེ་མཐོང་ནས་སྨན་ཚ་བ་དེ་དག་འཐུང་བར་བྱེད། ཡོངས་སུ་ལོངས་སྤྱོད་པར་བྱེད་ཅིང་དེ་དག་ནད་དེ་དག་ལས་ཡོངས་སུ་ཐར་བར་འགྱུར་བ་དེ་བཞིན་དུ་རིགས་ཀྱི་བུ་དེ་བཞིན་གཤེགས་པ་སྨན་པའི་རྒྱལ་པོ་ཆེན་པོ་ཉོན་མོངས་
པའི་ནད་ཐམས་ཅད་ལས་ཡོངས་སུ་ཐར་བ། ཆོས་ཐམས་ཅད་ལ་སྒྲིབ་པ་མི་མངའ་བ་བརྙེས་པ་ཡང་ལས་དགེ་བ་དང་མི་དགེ་བ་འདིའི་འབྲས་བུ་རྣམ་པར་སྨིན་པ་ནི་འདི་ཡིན་ནོ། །ཞེས་ལས་ཀུན་ཏུ་སྟོན་པར་མཛད་ཅིང་། ཇི་ལྟར་ན་སེམས་ཅན་རྣམས་ལས་ཀྱི་སྒྲིབ་པས་
འཇིགས་ཤིང་སྐྲག་པ་དང་། ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་ཡོངས་སུ་དག་པར་འགྱུར་སྙམ་ནས་བསམས་བཞིན་དུ་ལས་ཀུན་ཏུ་སྟོན་པར་ཡང་མཛད་དོ། །རིགས་ཀྱི་བུ་འདི་ལྟ་སྟེ་དཔེར་ན། ཚོང་དཔོན་གྱི་བུའམ་ཁྱིམ་བདག་གི་བུ་བཙས་ནས་
རིང་པོར་མ་ལོན་པ་ཞིག་ལ་ཕ་མ་དག་གིས་མ་མ་ཞིག་བྱིན་པར་གྱུར་ན། མ་མ་དེ་ནད་མེད་པར་གྱུར་བཞིན་དུ་འདི་ལྟ་སྟེ། ཁྱེའུ་དེའི་འོ་མ་ཡོངས་སུ་དག་པར་བྱའོ། །སྙམ་ནས་སྨན་ཁ་བ་དང་། བསྐ་བ་དག་སོ་སོར་བརྟགས་ཞིང་འཐུང་བར་བྱེད་པ་དེ་བཞིན་དུ་རིགས་ཀྱི་
བུ་དེ་བཞིན་གཤེགས་པ་འཇིག་རྟེན་ཐམས་ཅད་ཀྱི་ཡབ་ཀྱང་སྙུན་མི་མངའ་བ་བརྙེས་བཞིན་དུ་ལས་ཀྱི་བྱ་བ་ཆུད་གསོན་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་ལས་ཀུན་ཏུ་སྟོན་པར་མཛད་དེ། ལས་ཆེ་གེ་མོ་ཞིག་གི་རྣམ་པར་སྨིན་པ་ནི་འདི་ཡིན་ནོ་ཞེས་ཐོས་ནས་སེམས་

ཅན་དེ་དག་ཡིད་བྱུང་བ་འཐོབ་པར་འགྱུར་ཞིང་དེ་དག་ཡིད་བྱུང་ན་སྡིག་པའི་ལས་མངོན་པར་འདུ་བྱེད་པར་མི་འགྱུར་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་ཡེ་ཤེས་
དམ་པ་ལ་བཀའ་སྩལ་པ། རིགས་ཀྱི་བུ་སྔོན་བྱུང་བ་འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱི་ཕ་རོལ་གྱི་ཡང་ཆེས་ཕ་རོལ་ན་ཚོང་པ་ནོར་འདོད་པ་ལྔ་བརྒྱ་ཙམ་ཞིག་རྒྱ་མཚོ་ཆེན་པོར་ཞུགས་པ་དང་།
དེའི་ཚེ་ན་འདྲོན་པ་དེ་དག་ཉིད་ཀྱི་ནང་ན་མི་ལས་ནག་པོ་བྱེད་པ། སྡིག་པའི་ལས་བྱེད་པ། འཕོང་རྩལ་གྱི་རིག་པ་ལེགས་པར་བསླབས་པ། ཆོམ་རྐུན་བྱེད་པ། ཚོང་པའི་ཆ་ལུགས་ཀྱི་གཞན་གྱི་ནོར་འཕྲོག་པ་ཞིག་ཀྱང་གྲུ་བོ་ཆེ་དེ་ཉིད་ཀྱི་ནང་དུ་ཞུགས་པར་གྱུར་ཏོ། །དེ་
ནས་དེ་འདི་སྙམ་དུ་སེམས་ཏེ། བདག་གིས་གང་གི་ཚེ་ཚོང་པ་འདི་དག་དོན་གྲུབ་ཅིང་བྱ་བ་བྱས་པ་དེའི་ཚེ་ན་ཚོང་པ་འདི་དག་ཐམས་ཅད་སྲོག་དང་ཕྲལ་ལ་ནོར་རྫས་ཀྱི་རྣམ་པ་ཐམས་ཅད་ཁྱེར་ཏེ་འཛམ་བུའི་གླིང་དུ་འགྲོའོ་སྙམ་དུ་སེམས་སོ། །རིགས་ཀྱི་བུ་དེ་ནས་ཚོང་པ་དེ་དག་
དོན་གྲུབ་སྟེ་ཕ་རོལ་དུ་འགྲོ་འདོད་པར་གྱུར་པ་དང་། དེ་ནས་མི་གཡོན་ཅན་གྱི་རང་བཞིན་ཅན་དེ་འདི་སྙམ་དུ་སེམས་ཏེ། ད་ནི་བདག་གིས་ཚོང་པ་འདི་དག་ཐམས་ཅད་སྲོག་དང་ཕྲལ་ལ་ནོར་རྫས་ཀྱི་རྣམ་པ་འདི་དག་ཐམས་ཅད་ཁྱེར་ཏེ་འཛམ་བུའི་གླིང་དུ་འགྲོ་བའི་དུས་ལ་བབ་
པོ་སྙམ་པ་དང་། དེའི་ཚེ་ན་དེད་དཔོན་སྙིང་རྗེ་ཆེན་པོ་དང་ལྡན་པ་ཞེས་བྱ་བ་ཞིག་ཀྱང་གྲུ་བོ་ཆེ་དེ་ཉིད་ཀྱི་ནང་དུ་ཞུགས་པར་གྱུར་ཏེ། དེ་ནས་དེད་དཔོན་སྙིང་རྗེ་ཆེན་པོ་དང་ལྡན་པ་ཞེས་བྱ་བ་དེ་གཉིད་ལོག་སྟེ་རྨི་ལམ་རྨི་བ་ན་རྒྱ་མཚོ་ཆེན་པོ་དེ་ཉིད་ན་གནས་པའི་ལྷ་གང་ཡིན་པ་དེས་
དེའི་རྨི་ལམ་དུ་བསྟན་པ། འདྲོན་པ་འདི་ཉིད་ཀྱི་ནང་ན་མིའི་མིང་ནི་འདི་ཞེས་བྱ། གཟུགས་ནི་འདི་འདྲ། ཆ་བྱད་དང་། ཁ་དོག་དང་། དབྱིབས་ནི་འདི་འདྲ་བ། ཆོམ་རྐུན་པ། འཁུ་བ། གཞན་གྱི་ནོར་འཕྲོག་པ་ཞིག་འདུག་པ་དེས་འདི་ལྟར་སེམས་བསྐྱེད་དེ།

བདག་གིས་ཚོང་པ་འདི་དག་ཐམས་ཅད་སྲོག་དང་ཕྲལ་ལ་ནོར་རྫས་ཀྱི་རྣམ་པ་འདི་དག་ཐམས་ཅད་ཁྱེར་ཏེ་འཛམ་བུའི་གླིང་དུ་འགྲོའོ་སྙམ་དུ་སེམས་པས། གལ་ཏེ་མི་འདིས་ཚོང་པ་འདི་དག་ཐམས་ཅད་སྲོག་དང་བྲལ་བར་གྱུར་ན་ནི་དེའི་ཚེ་སྡིག་པའི་ལས་དམ་པོ་བྱས་པར་འགྱུར་རོ། །
དེ་ཅིའི་ཕྱིར་ཞེ་ན། འདི་ལྟར་ཚོང་པ་ལྔ་བརྒྱ་ཙམ་པོ་འདི་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་ཤིང་བྱང་ཆུབ་ལས་ཕྱིར་མི་ལྡོག་པ་ཤ་སྟག་ཡིན་པའི་ཕྱིར་ཏེ། གལ་ཏེ་མི་འདིས་བྱང་ཆུབ་སེམས་དཔའ་འདི་དག་
བསད་པར་གྱུར་ན་དེ་ལས་ཀྱི་སྒྲིབ་པའི་ཉེས་པ་དེས་བྱང་ཆུབ་སེམས་དཔའ་རེ་རེའི་ཕྱིར་ཡང་བྱང་ཆུབ་སེམས་དཔའ་གཅིག་གིས་ཡུན་རིང་པོ་ཇི་སྲིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབ་པར་འགྱུར་བའི་ཡུན་རིང་པོ་དེ་སྲིད་དུ་སེམས་ཅན་
དམྱལ་བ་ཆེན་པོ་རྣམས་སུ་སྲེག་པར་འགྱུར་བས། དེ་ལ་དེད་དཔོན་ཁྱོད་ཀྱིས་དེ་ལྟ་བུ་ལས་བརྟེན་ཏེ། ཅི་ནས་ཀྱང་མི་འདིས་ཚོང་པ་ལྔ་བརྒྱ་ཙམ་པོ་འདི་དག་བསད་པར་མི་འགྱུར་བ་དང་། འདི་ཡང་སེམས་ཅན་དམྱལ་བ་ཆེན་པོ་རྣམས་སུ་འགྲོ་བར་མི་འགྱུར་བ་དེ་ལྟ་བུའི་
ཐབས་ལ་མཁས་པ་བསམ་པར་གྱིས་ཤིག་ཅེས་བསྟན་ཏོ། །རིགས་ཀྱི་བུ་དེ་ནི་དེད་དཔོན་སྙིང་རྗེ་ཆེན་པོ་དང་ལྡན་པ་དེ་སད་ནས་འདི་སྙམ་དུ་སེམས་ཏེ། མི་འདིས་ཚོང་པ་ལྔ་བརྒྱ་ཙམ་པོ་འདི་དག་ཀྱང་བསད་པར་མི་འགྱུར་ལ། འདི་ཡང་སེམས་ཅན་དམྱལ་བ་ཆེན་པོ་རྣམས་སུ་
འགྲོ་བར་མི་འགྱུར་བའི་ཐབས་ཅི་ཡོད་སྙམ་ནས། དེ་ཞག་བདུན་གྱི་བར་དུ་འཛམ་བུའི་གླིང་དུ་འགྲོ་བ་དང་མི་འཐུན་པའི་རླུང་ལངས་ཏེ་སྡོད་པའི་ཚེ། ཞག་བདུན་དུ་སུ་ལ་ཡང་མི་སྨྲ་བར་སེམས་པ་ལ་ཞུགས་པར་གྱུར་པ་ན་དེ་འདི་སྙམ་དུ་སེམས་ཏེ། འདི་ལ་ཚོང་པ་འདི་
དག་ཀྱང་བསད་པར་མི་འགྱུར་ལ། མི་འདི་ཡང་སེམས་ཅན་དམྱལ་བ་ཆེན་པོ་རྣམས་སུ་འགྲོ་བར་མི་འགྱུར་བའི་ཐབས་ནི་མི་འདི་ཉིད་སྲོག་དང་དབྲལ་བར་བྱ་བ་མ་གཏོགས་པར་གཞན་མེད་དོ་སྙམ་ནས་དེ་འདི་སྙམ་དུ་སེམས་ཏེ། གལ་ཏེ་བདག་གིས་དོན་འདི་ཚོང་པ་ཐམས་

ཅད་ལ་བསྒྲགས་པར་གྱུར་ན་ནི་འདི་དག་གིས་རབ་ཏུ་སྡང་བའི་སེམས་ཀྱིས་མི་འདི་ཡང་སྲོག་དང་ཕྲལ་ཞིང་བསད་པར་འགྱུར་ལ་འདི་དག་ཐམས་ཅད་ཀྱང་སེམས་ཅན་དམྱལ་བ་ཆེན་པོ་རྣམས་སུ་འགྲོ་བར་འགྱུར་རོ་སྙམ་ནས་དེ་ཡང་འདི་སྙམ་དུ་སེམས་ཏེ།
འདི་ལྟར་བདག་གིས་མི་འདི་སྲོག་དང་ཕྲལ་ན་གཞི་དེས་བདག་བསྐལ་པ་འབུམ་དུ་སེམས་ཅན་དམྱལ་བ་ཆེན་པོ་རྣམས་སུ་སྲེག་པར་འགྱུར་ཡང་བདག་གིས་སེམས་ཅན་དམྱལ་བ་ཆེན་པོའི་སྡུག་བསྔལ་མྱོང་བར་འགྱུར་བ་དེ་ལ་སྤྲོ་བར་བྱའི། ཚོང་པ་ལྔ་བརྒྱ་ཙམ་པོ་འདི་དག་
སྲོག་དང་ཕྲལ་བར་གྱུར་ན་ཡང་མི་རུང་ན། མི་འདི་ལ་སྡིག་པའི་ལས་དེ་སྙེད་ཅིག་རབ་ཏུ་འཕེལ་བར་གྱུར་ན་ཡང་མི་རུང་བས་བདག་རང་གིས་མི་འདི་སྲོག་དང་འབྲལ་བར་བྱའོ་སྙམ་ནས། རིགས་ཀྱི་བུ་དེ་ལྟར་དེད་དཔོན་སྙིང་རྗེ་ཆེན་པོ་དང་ལྡན་པ་དེས་ཚོང་པ་ལྔ་བརྒྱ་ཙམ་པོ་དེ་
དག་ཀུན་ཏུ་བསྲུང་བ་དང་། མི་དེ་ཡང་སེམས་ཅན་དམྱལ་བ་ཆེན་པོ་རྣམས་སུ་འགྲོ་བ་ལས་ཀུན་ཏུ་བསྲུང་བའི་ཕྱིར་སྙིང་རྗེ་ཆེན་པོ་དེ་དང་ཐབས་ལ་མཁས་པ་དེས་བསམས་བཞིན་དུ་ཆོམ་རྐུན་པའི་མི་དེ་མདུང་ཐུང་གིས་བཏབ་སྟེ། སྲོག་དང་ཕྲལ་ནས་འདྲོན་པ་ཐམས་ཅད་ཀྱང་
དོན་གྲུབ་ཅིང་རང་རང་གི་གྲོང་ཁྱེར་དུ་ཕྱིན་པར་གྱུར་ཏོ། །རིགས་ཀྱི་བུ་དེའི་ཚེ་དེའི་དུས་ན་དེད་དཔོན་སྙིང་རྗེ་ཆེན་པོ་དང་ལྡན་པ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་ཡིད་གཉིས་དང་ཐེ་ཚོམ་ཟ་བར་གྱུར་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་
ན་དེད་དཔོན་སྙིང་རྗེ་ཆེན་པོ་དང་ལྡན་པ་ཞེས་བྱ་བ་དེར་གྱུར་པའི་ཕྱིར་རོ། །ཚོང་པ་ལྔ་བརྒྱ་ཙམ་པོ་གང་དག་གྲུ་བོ་ཆེ་དེ་ཉིད་དུ་ཞུགས་པར་གྱུར་པ་དེ་དག་ནི་གང་དག་བསྐལ་པ་བཟང་པོ་འདི་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་
འགྱུར་བ་བསྐལ་པ་བཟང་པོའི་བྱང་ཆུབ་སེམས་དཔའ་ལྔ་བརྒྱ་ཡིན་ནོ། །རིགས་ཀྱི་བུ་ངས་ཐབས་ལ་མཁས་པ་དེ་དང་། སྙིང་རྗེ་ཆེན་པོ་དེས་བསྐལ་པ་འབུམ་དུ་འཁོར་བ་བསྙིལ་ཏེ་བོར་བར་གྱུར་ཏོ། །ཆོམ་རྐུན་པ་དེ་ཡང་དེ་ནས་ཤི་འཕོས་ནས་མཐོ་རིས་ཀྱི་འཇིག་རྟེན་དུ་

སྐྱེས་སོ། །རིགས་ཀྱི་བུ་འདི་ཇི་སྙམ་དུ་སེམས། གང་གི་ཕྱིར་ཐབས་ལ་མཁས་པ་དེ་དང་། སྙིང་རྗེ་ཆེན་པོ་དེས་བསྐལ་པ་འབུམ་གྱི་འཁོར་བ་བསྙིལ་ཏེ་བོར་བར་གྱུར་པའི་དོན་དེ་བྱང་ཆུབ་སེམས་དཔའི་ལས་ཀྱི་སྒྲིབ་པ་ཡིན་པར་བལྟའམ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ།
དེ་ནི་ཐབས་ལ་མཁས་པ་ཉིད་ཡིན་པར་བལྟ་བར་བྱའོ།། །།བམ་པོ་བཞི་པ་སྟེ་ཐ་མ། རིགས་ཀྱི་བུ་དེ་བཞིན་གཤེགས་པས་སེམས་ཅན་ལས་ཀྱི་བྱ་བ་ལ་གཟུད་པའི་ཕྱིར་ཐབས་ལ་མཁས་པས་སེང་ལྡེང་གི་ཚལ་པ་ཞབས་ལ་ཟུག་པར་བསྟན་ཏེ། དེ་
བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་པ་གང་ཡིན་པ་དེ་ཡང་སངས་རྒྱས་ཀྱི་མཐུ་ཉིད་ཡིན་པར་བལྟ་བར་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྐུ་ནི་རྡོ་རྗེ་མཁྲེགས་པ་ལྟར་མི་ཤིགས་པའི་སྐུ་ཡིན་པའི་ཕྱིར་རོ། །རིགས་ཀྱི་བུ་འོན་ཀྱང་
མཉན་ཡོད་ཀྱི་གྲོང་ཁྱེར་ཆེན་པོ་འདི་ཉིད་ན་སྲིད་པ་ཐ་མ་པའི་མི་ཉི་ཤུ་དང་། མི་ཉི་ཤུ་པོ་དེ་དག་ཉིད་ཀྱི་དགྲ་བོ་མི་ཉི་ཤུ་ཞིག་ཀྱང་ཡོད་པར་གྱུར་ཏེ། དེ་ནས་མི་དགྲ་བོ་ཉི་ཤུ་པོ་དེ་དག་རང་རང་གི་སྒྱུ་དག་གིས་འདི་ལྟ་བུའི་རྣམ་པར་རྟོག་པ་སྐྱེས་པར་གྱུར་ཏེ། བདག་ཅག་གིས་མཛའ་
བཤེས་ལྟར་བཅོས་ཏེ། རང་རང་གི་དགྲ་བོ་རྣམས་ཀྱི་ཁྱིམ་དུ་ཞུགས་ལ་དེ་དག་སྲོག་དང་དབྲལ་བར་བྱའོ་སྙམ་དུ་བསམས་ཏེ། གཅིག་ལ་གཅིག་ཚིག་ཏུ་ནི་མ་སྨྲས་སོ། །རིགས་ཀྱི་བུ་དེ་ནས་སངས་རྒྱས་ཀྱི་མཐུས་སྲིད་པ་ཐ་མ་པའི་མི་ཉི་ཤུ་པོ་གང་དག་ཡིན་པ་དེ་དག་དང་།
མི་དེ་དག་གི་དགྲ་བོ་གསོད་པ་པོའི་མི་ཉི་ཤུ་པོ་གང་དག་ཡིན་པ་དེ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ག་ལ་བ་དེར་དོང་ངོ་། །རིགས་ཀྱི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་
མི་བཞི་བཅུ་པོ་དེ་དག་གདུལ་བའི་དབང་གི་ཕྱིར་དང་། སྐྱེ་བོ་ཕལ་པོ་ཆེ་གཞན་དག་ཀྱང་གདུལ་བའི་དབང་གི་ཕྱིར་གནས་བརྟན་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཆེན་པོ་དེ་ངས་ཕྱོགས་འདི་ནས་སེང་ལྡེང་གི་ཚལ་པ་ཞིག་འབྱུང་བར་འགྱུར་ཏེ། དེས་དེ་

བཞིན་གཤེགས་པའི་ཞབས་གཡས་པའི་མཐིལ་དུ་ཟུག་པར་འགྱུར་རོ། །དེ་བཞིན་གཤེགས་པས་དེ་སྐད་ཅེས་བཀའ་སྩལ་ནས་རིང་པོ་མ་ལོན་པར་དེ་ནས་དེའི་མོད་ལ་ས་ཕྱོགས་དེ་ཉིད་ནས་སེང་ལྡེང་གི་ཚལ་པ་རྣོན་པོ་མཐོ་གང་ཙམ་གྱི་ཚད་ཅིག་བྱུང་བར་གྱུར་
ཏོད། །དེ་ནས་བཅོམ་ལྡན་འདས་ལ་གནས་བརྟན་མཽང་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་སེང་ལྡེང་གི་ཚལ་པ་འདི་འཇིག་རྟེན་གྱི་ཁམས་གཞན་དུ་དོར་བར་བགྱི་ལགས་སོ། །ངས་དེ་ལ་འདི་སྐད་ཅེས་བཀའ་སྩལ་ཏོ། །མཽང་གལ་
གྱི་བུ་ཆེན་པོ་ཁྱོད་ཀྱིས་སེང་ལྡེང་གི་ཚལ་པ་འདི་ས་ཕྱོགས་འདི་ནས་གཞན་དུ་དོར་བར་མི་ནུས་སོ། །རིགས་ཀྱི་བུ་དེ་ནས་གནས་བརྟན་མཽད་གལ་གྱི་བུ་ཆེན་པོས་སྟོབས་ཀྱི་ཤུགས་ཀྱིས་སེང་ལྡེང་གི་ཚལ་པ་དེ་བཟུང་བ་དང་། འདི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་འདི་ཁ་གྱེན་དུ་བལྟས་ཏེ་རབ་ཏུ་གཡོས་པར་གྱུར་ཀྱང་སེང་ལྡེང་གི་ཚལ་པ་དེ་ནི་ཐ་ན་སྐྲའི་རྩེ་མོའི་ཆ་ཤས་ཙམ་ཡང་མི་འགུལ་ལོ། །རིགས་ཀྱི་བུ་དེ་ནས་དེ་བཞིན་གཤེགས་པ་རྫུ་འཕྲུལ་གྱི་སྟོབས་ཀྱིས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་གནས་སུ་གཤེགས་པ་དང་།
སེང་ལྡེང་གི་ཚལ་པ་དེ་ཡང་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་གནས་སུ་འོངས་སོ། །དེ་ནས་དེ་བཞིན་གཤེགས་པ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་སུ་རི་རབ་ཀྱི་སྟེང་དུ་གཤེགས་པ་དང་། སེང་ལྡེང་གི་ཚལ་པ་དེ་ཡང་རི་རབ་ཀྱི་སྟེང་དུ་འོངས་སོ། །དེ་ནས་དེ་བཞིན་
གཤེགས་པ་འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་གནས་སུ་ཡང་གཤེགས། ཚངས་པའི་འཇིག་རྟེན་གྱི་བར་དུ་ཡང་གཤེགས་པ་དང་། སེང་ལྡེང་གི་ཚལ་པ་དེ་ཡང་ཚངས་པའི་འཇིག་རྟེན་གྱི་བར་དུ་འོངས་སོ། །
དེ་ནས་དེ་བཞིན་གཤེགས་པ་ཚངས་པའི་འཇིག་རྟེན་ནས་བབས་ཏེ་གདན་ལ་བཞུགས་པ་དང་། སེང་ལྡེང་གི་ཚལ་པ་དེ་ཡང་ཚངས་པའི་འཇིག་རྟེན་ནས་བབས་ཏེ་བཅོམ་ལྡན་འདས་ཀྱི་སྤྱན་སྔར་འདུག་གོ །རིགས་ཀྱི་བུ་དེ་ནས་དེ་བཞིན་གཤེགས་པས་ཕྱག་གཡས་པས་ཞབས་

གཡས་པ་བཟུང་སྟེ་སེང་ལྡེང་གི་ཚལ་པ་རྩེ་མོ་ཡ་གཅིག་ས་ལ་ཟུག་ལ་རྩེ་མོ་ཡ་གཅིག་ས་ལས་གྱེན་དུ་ལྟ་བ་དེའི་སྟེང་དུ་ཞབས་བཞག་གོ །བཅོམ་ལྡན་འདས་ཀྱིས་སེང་ལྡེང་གི་ཚལ་པའི་སྟེང་དུ་ཞབས་བཞག་མ་ཐག་ཏུ་དེ་ནས་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་འདི་རབ་ཏུ་གཡོས་པར་གྱུར་ཏོ། །དེ་ནས་ང་ལ་གནས་བརྟན་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བཅོམ་ལྡན་འདས་ཀྱིས་སྔོན་ཕྲིན་ལས་ཀྱི་སྒྲིབ་པ་ཅི་ཞིག་མཛད་ལགས་ན། དེའི་རྣམ་པར་སྨིན་པ་འདི་ལྟ་བུར་
གྱུར་ལགས། ངས་དེ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ང་སྔོན་རྒྱ་མཚོ་ཆེན་པོའི་ནང་དུ་སོང་བ་ན་ཚོང་པ་གཡོན་ཅན་ཞིག་མདུང་ཐུང་གིས་བཏབ་སྟེ་སྲོག་དང་ཕྲལ་བར་གྱུར་པས་འདི་ནི་ལས་དེའི་ལྷག་མ་ཡིན་ནོ། །རིགས་ཀྱི་བུ་དེ་ནས་མི་ཉི་ཤུ་པོ་དེ་དག་གསོད་
པར་འདོད་པའི་མི་མཛའ་བཤེས་ལྟར་བཅོས་པ་ཉི་ཤུ་པོ་གང་དག་ཡིན་པ་དེ་དག་འདི་སྙམ་དུ་སེམས་ཏེ། དེ་བཞིན་གཤེགས་པ་ཆོས་ཀྱི་བདག་པོ་ལ་ཡང་ལས་རྣམ་པར་སྨིན་པར་འགྱུར་ན། བདག་ཅག་ལྟ་ལ་ཅིའི་ཕྱིར་རྣམ་པར་སྨིན་པར་མི་འགྱུར་སྙམ་ནས་དེ་དག་གིས་དེའི་
མོད་ལ་དེ་བཞིན་གཤེགས་པའི་སྤྱན་སྔར་བཙུན་པ་བཅོམ་ལྡན་འདས་བདག་ཅག་ཀྱང་སྲོག་ཆགས་འགུམས་པ་དང་། རྗེས་སུ་འགུམས་པར་འཚལ་བ་ལགས་ཏེ། བདག་ཅག་བཅོམ་ལྡན་འདས་ཀྱི་སྤྱན་སྔར་ནོངས་པ་དེ་དག་ནོངས་པར་འཆགས་ཤིང་མཆིས་ན། བཙུན་
པ་བཅོམ་ལྡན་འདས་ཀྱིས་བདག་ཅག་གིས་ནོངས་པ་ལ་ནོངས་པར་བཤགས་པ་དེ་དག་རྗེས་སུ་གཟུང་དུ་གསོལ། ཞེས་ཉེས་པ་ལ་ཉེས་པར་བཤགས་སོ། །དེ་བཞིན་གཤེགས་པས་དེ་དག་ལ་ལས་ཀྱི་བྱ་བ་དང་། ལས་ཟད་པར་འགྱུར་བ་ལས་བརྩམས་ཏེ་དེ་ལྟ་དེ་ལྟར་
ཆོས་བསྟན་པས་མི་བཞི་བཅུ་པོ་གང་དག་ཡིན་པ་དེ་དག་གིས་ནི་ཡེ་ཤེས་མངོན་པར་རྟོགས་པར་གྱུར་ཏོ། །སྲོག་ཆགས་གཞན་བཞི་ཁྲིས་ནི་ཆོས་མངོན་པར་རྟོགས་པར་གྱུར་ཏོ། །གང་གི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་

ཞབས་ལ་སེང་ལྡེང་གི་ཚལ་པས་ཟུག་པར་གྱུར་པའི་རྒྱུ་ནི་དེ་ཡིན། རྐྱེན་ནི་དེ་ཡིན་ཏེ། དེ་ཡང་བྱང་ཆུབ་སེམས་དཔའ་དང་། དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པ་སྙུན་དང་བྲལ་བ་སྨན་པའི་རྒྱལ་པོ་འཚོ་
བྱེད་ལས་བཀྲུ་སྨན་ཨུད་པ་ལ་ཧསྟ་གན་དྷ་བསླངས་ཏེ་གསོལ་བར་མཛད་ཅེ་ན། རིགས་ཀྱི་བུ་དེའི་ཚེ་ན་སོ་སོར་ཐར་པའི་བསླབ་པ་བཅས་ནས་རིང་པོ་མ་ལོན་པ་ཞིག་ན་དགེ་སློང་རྣམ་པར་གྲོལ་བར་འགྱུར་བའི་སྲིད་པ་ཐ་མ་པ་ལྔ་བརྒྱ་ཞིག་ནགས་ཁྲོད་ཅིག་ན་གནས་པ་དེ་དག་ལ་
འདི་ལྟར་སྨན་བཀུས་ཏེ་བོར་བས་འཚོ་བར་མི་ནུས་པ་དེ་ལྟ་བུའི་ནད་བྱུང་བར་གྱུར་ནས་དེ་དག་དེ་བཞིན་གཤེགས་པ་ལ་གུས་པས་སྨན་གཞན་སྟེན་པར་མི་བྱེད། ཚོལ་བར་མི་བྱེད་དོ། །རིགས་ཀྱི་བུ་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། ངས་དགེ་སློང་དེ་དག་སྨན་
གཞན་ཚོལ་ཞིང་སྟེན་པར་རྗེས་སུ་གནང་བར་བྱ་བའི་ཐབས་ནི་ཅི་ཡོད། རྣམ་གྲངས་ནི་ཅི་ཡོད་སྙམ་དུ་དགོངས་སོ། །དེ་ཅིའི་ཕྱིར་ཞེ་ན། འདི་ལྟར་གལ་ཏེ་དེ་བཞིན་གཤེགས་པས་དགེ་སློང་རྣམས་ལ་སྨན་གཞན་དག་རྗེས་སུ་མ་གནང་ན། ཕྱི་མའི་དུས་ཀྱི་དགེ་སློང་རྣམས་
འཕགས་པའི་རིགས་ཀྱི་རྗེས་སུ་འཇུག་པར་མི་འགྱུར་ཞིང་འཕགས་པའི་རིགས་འདྲལ་བར་འགྱུར་བའི་ཕྱིར་ཏེ། དེ་བས་ན་དེ་བཞིན་གཤེགས་པས་ཐབས་ལ་མཁས་པས་སྨན་པའི་རྒྱལ་པོ་འཚོ་བྱེད་ལས་བཀྲུ་སྨན་ཨུད་པ་ལ་ཧསྟ་གན་དྷ་བསླངས་ཏེ་གསོལ་པ་དང་། དེ་ནས་
གནས་གཙང་མའི་རིས་ཀྱི་ལྷའི་བུ་རྣམས་ཀྱིས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཁྱེད་ཅག་སྨན་གཞན་དག་ཚོལ་ལ་འཆི་བའི་དུས་བྱེད་པར་མི་འགྱུར་བར་གྱིས་ཤིག །དགེ་སློང་དེ་དག་གིས་འདི་སྐད་ཅེས་སྨྲས་སོ། །ལྷའི་བུ་དག་ཁོ་བོ་ཅག་ནི་དེ་
བཞིན་གཤེགས་པའི་བསླབ་པ་ལས་ཡང་དག་པར་འདའ་བའི་མཐུ་མེད་ཅིང་དབང་མེད་པ་ཡིན་པས་ཤི་བར་གྱུར་ཀྱང་ཁོ་བོ་ཅག་ནི་དེ་བཞིན་གཤེགས་པའི་བསླབ་པ་ལས་ཡང་དག་པར་འདའ་བར་མི་བྱེད་དོ། །དེ་ནས་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་དགེ་སློང་དེ་དག་

ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་དེ་བཞིན་གཤེགས་པ་ཆོས་ཀྱི་བདག་པོ་དེ་ཉིད་ཀྱིས་ཀྱང་སྨན་བཀུས་ཏེ་བོར་བ་སྤངས་ནས་སྨན་གཞན་བཙལ་གྱིས་ཁྱེད་ཅག་ཀྱང་སྨན་གཞན་ཚོལ་ཅིག །དེ་ནས་དགེ་སློང་དེ་དག་འགྱོད་པ་དང་བྲལ་ནས་སྨན་གཞན་བཙལ་ཏེ་བསྟེན་པ་
དང་། དེ་དག་ནད་དེ་ལས་ཡོངས་སུ་ཐར་ནས་ནད་དང་བྲལ་བ་དེ་དག་གིས་ཞག་བདུན་གྱིས་དགྲ་བཅོམ་པ་ཉིད་མངོན་དུ་བྱས་སོ། །རིགས་ཀྱི་བུ་གལ་ཏེ་དེ་བཞིན་གཤེགས་པས་སྨན་གཞན་བཙལ་བ་མ་མཛད་དུ་ཟིན་ན་དགེ་སློང་དེ་དག་ཀྱང་སྨན་གཞན་ཚོལ་བར་མི་བྱེད་པས་དེ་དག་
ནད་དེ་ལས་ཐར་པ་དང་། ཉོན་མོངས་པ་རྣམས་ལས་གྲོལ་ཞིང་དགྲ་བཅོམ་པ་ཉིད་འཐོབ་པར་འགྱུར་བའི་གནས་མེད་ལ། སྐབས་མ་ཡིན་ཞིང་དེ་ནི་གནས་མེད་དེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པ་བསོད་ནམས་
ཐམས་ཅད་དང་ལྡན་པ་གྲོང་དུ་བསོད་སྙོམས་ཀྱི་ཕྱིར་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་ཡང་བྱུང་བར་གྱུར་ཅེ་ན། རིགས་ཀྱི་བུ་དེ་ལ་དེ་བཞིན་གཤེགས་པ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མི་མངའ་མོད་ཀྱི། འོན་ཀྱང་དེ་བཞིན་གཤེགས་པས་ནི། སྐྱེ་བོ་
ཕྱི་མ་རྣམས་ལ་ཐུགས་བརྩེ་བ་དང་། རྗེས་སུ་བསྲུང་བར་བྱ་དགོས་ཏེ། དགེ་སློང་བསོད་སྙོམས་པ་གང་ལ་ལ་དག་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ཏུ་བསོད་སྙོམས་ཀྱི་ཕྱིར་ཞུགས་པ་ན་དེ་དག་བདག་ཉིད་
བསོད་ནམས་ཆུང་བས་བསོད་སྙོམས་མི་རྙེད་པ་དེའི་ཚེ་ན་དེ་དག་དེ་བཞིན་གཤེགས་པ་ཡིད་ལ་བྱེད་པར་འགྱུར་ཏེ། དེ་བཞིན་གཤེགས་པ་བསོད་ནམས་ཐམས་ཅད་ཀྱི་གཟི་བརྗིད་ཀྱིས་མངོན་པར་འཕགས་པ་དེ་ཉིད་ཀྱང་གྲོང་དུ་བསོད་སྙོམས་ཀྱི་ཕྱིར་ཇི་ལྟར་ལྷུང་བཟེད་བཀྲུས་པས་
ཞུགས་པ་བཞིན་དུ་བསོད་སྙོམས་མ་བརྙེས་པས་ཕྱིར་བྱུང་བར་གྱུར་ན། བདག་ཅག་དགེ་བའི་རྩ་བ་ཆུང་ངུ་དང་ལྡན་པ་རྣམས་ལྟ་ལ་སྨོས་ཀྱང་ཅི་དགོས་ཏེ། དེ་བས་ན་བདག་ཅག་བསོད་སྙོམས་མ་རྙེད་པ་ཡི་ཆད་པ་བསྐྱེད་པར་མི་བྱའོ། །སྙམ་དུ་སེམས་པར་འགྱུར་བའི་ཕྱིར་

ཏེ། དོན་གྱི་དབང་དེ་གཟིགས་པས་ན་དེ་བཞིན་གཤེགས་པ་བསོད་སྙོམས་ཀྱི་ཕྱིར་ཇི་ལྟར་ལྷུང་བཟེད་བཀྲུས་པས་གྲོང་དུ་ཞུགས་པ་བཞིན་དུ་ཕྱིར་ཡང་བྱུང་བར་གྱུར་ཏོ། །གཞན་ཡང་གང་ལ་ལ་དག་འདི་སྐད་ཅེས་གང་དག་གིས་དེ་བཞིན་གཤེགས་པ་ལ་བསོད་
སྙོམས་མ་ཕུལ་བའི་བྲམ་ཟེ་དང་། ཁྱིམ་བདག་དེ་དག་ནི་བདུད་སྡིག་ཅན་གྱིས་བྱིན་གྱིས་བརླབས་སོ། །ཞེས་སྨྲ་ན་རིགས་ཀྱི་བུ་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བདུད་སྡིག་ཅན་གྱིས་ནི་དེ་བཞིན་གཤེགས་པ་ལ་བར་ཆད་བྱ་བར་མི་ནུས་པའི་ཕྱིར་ཏེ།
གཞན་དུ་ན་དེ་བཞིན་གཤེགས་པ་ཉིད་ཀྱི་བྱིན་གྱིས་བརླབས་ཀྱིས་བདུད་སྡིག་ཅན་གྱིས་བྲམ་ཟེ་དང་། ཁྱིམ་བདག་དེ་དག་བྱིན་གྱིས་བརླབས་པར་ཟད་ཀྱི་རང་གི་བློས་ནི་མ་ཡིན་ནོ། །དེ་ལ་དེ་བཞིན་གཤེགས་པ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མི་མངའ་མོད་ཀྱི། སེམས་
ཅན་དེ་དག་ཉིད་ཡོངས་སུ་སྨིན་པར་བྱ་བའི་ཕྱིར་དེ་བཞིན་གཤེགས་པ་ཇི་ལྟར་ལྷུང་བཟེད་བཀྲུས་པས་གྲོང་དུ་ཞུགས་པ་བཞིན་དུ་ཕྱིར་ཡང་བྱུང་བར་གྱུར་ཏོ། །ཞལ་ཟས་བཅད་པ་དེའི་ཚེ་ན་དེ་བཞིན་གཤེགས་པ་དང་། དགེ་སློང་གི་དགེ་འདུན་ལ་ཡིད་མི་བདེ་བ་མེད་ཅིང་སྔོན་ཇི་ལྟ་
བ་བཞིན་དུ་ཕྱིས་ཀྱང་དེ་བཞིན་ཏེ། མཐོ་བ་མེད། དམའ་བ་ཡང་མེད་པར་གྱུར་ཏོ། །དེ་ནས་དེའི་མོད་ལ་ལྷའི་བུ་བདུན་ཁྲིས་དད་པ་ཐོབ་པར་གྱུར་ནས། དེ་བཞིན་གཤེགས་པ་ལ་རབ་ཏུ་བཏུད་པ་དང་། དེ་བཞིན་གཤེགས་པས་ཀྱང་དེ་དག་ལ་ཅི་ནས་ཀྱང་དེ་དག་
ཐམས་ཅད་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པར་འགྱུར་བ་དེ་ལྟ་དེ་ལྟར་ཆོས་བསྟན་ཏོ། །བྲམ་ཟེ་དང་ཁྱིམ་བདག་དེ་དག་གིས་ཀྱང་དུས་གཞན་ཞིག་གི་ཚེ་ན་སྟོན་པ་བཅོམ་ལྡན་འདས་ཀྱི་ཡོན་ཏན་དང་། ཆོག་ཤེས་པ་དག་
མཐོང་ནས་བཅོམ་ལྡན་འདས་ཀྱི་སྤྱན་སྔར་ལྷགས་ཏེ། ཉེས་པ་ལ་ཉེས་པར་བཤགས་པ་དང་། དེ་བཞིན་གཤེགས་པས་ཀྱང་དེ་དག་ལ་འཕགས་པའི་བདེན་པ་བཞིའི་གཏམ་ཡང་དག་པར་བསྟན་པ་མཛད་པས། དེ་ནས་ལྷ་དང་མི་རྣམས་ཀྱི་སྐྱེ་དགུ་ལས་སྲོག་

ཆགས་ཉི་ཁྲི་ཉིས་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་སྟེ། གང་གི་ཕྱིར་དེ་བཞིན་གཤེགས་པ་བྲམ་ཟེའི་གྲོང་ཤིང་སཱ་ལ་ཆེན་པོ་ཅན་དུ་བསོད་སྙོམས་ཀྱི་ཕྱིར་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་བྱུང་བའི་རྒྱུ་
ནི་དེ་ཡིན། རྐྱེན་ནི་དེ་ཡིན་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྲམ་ཟེའི་བུ་མོ་དྲེགས་མས་ཤིང་གི་གཞོང་བུ་ལྟོ་བར་བཅིངས་ཏེ། དགེ་སྦྱོང་ཁྱོད་ཀྱིས་ཁོ་མོ་སྦྲུམ་པར་བྱས་ཀྱིས། ཁོ་མོ་ལ་ཟས་དང་གོས་བྱིན་
ཅིག །ཅེས་དེ་བཞིན་གཤེགས་པ་ལ་སྐུར་པ་བཏབ་པར་གྱུར་ཅེ་ན། རིགས་ཀྱི་བུ་དེ་བཞིན་གཤེགས་པ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མི་མངའ་སྟེ། དེ་བཞིན་གཤེགས་པས་བྲམ་ཟེའི་བུ་མོ་དྲེགས་མ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་
སྙེད་དུ་འཕང་བར་ཡང་སྤྱོད་མོད་ཀྱི། དེ་བཞིན་གཤེགས་པ་དེས་མཁྱེན་བཞིན་དུ་བཏང་སྙོམས་མཛད་ཅིང་། ཐབས་ལ་མཁས་པས་ལས་ཀྱི་བྱ་བ་ཀུན་ཏུ་བསྟན་པ་མཛད་དོ། །དེ་ཅིའི་ཕྱིར་ཞེ་ན། ཕྱི་མའི་དུས་ན་བསྟན་པ་འདི་ལ་རབ་ཏུ་བྱུང་བའི་དགེ་སློང་
དག་འབྱུང་བར་འགྱུར་ཏེ། དེ་དག་ལ་ཡང་དག་པ་མ་ཡིན་པའི་སྐུར་བ་བཏབ་པས་དེ་དག་འགྱོད་པ་དང་། སེམས་ཞུམ་པར་འགྱུར་ཞིང་། དེ་དག་མངོན་པར་མི་དགའ་བ་དང་། ཉམས་པ་ལ་འཇུག་པར་འགྱུར་བས། དེ་དག་སྐུར་བ་བཏབ་པའི་ཚེ་ན་འདི་སྐད་
དུ། དེ་བཞིན་གཤེགས་པ་དཀར་པོའི་ཆོས་ཐམས་ཅད་དང་ལྡན་པ་དེ་ཉིད་ཀྱིས་ཀྱང་སྐུར་བ་བརྙེས་པར་གྱུར་ན། བདག་ཅག་གིས་ལྟ་ཅིའི་ཕྱིར་མི་རྙེད་ཅེས་དེ་བཞིན་གཤེགས་པ་རྗེས་སུ་དྲན་པར་བྱེད་ཅིང་། དེ་དག་དེའི་ཚེ་ན་སྐུར་བ་དེ་ཟིལ་གྱིས་མནན་
ནས་ཚངས་པར་སྤྱོད་པ་ཡོངས་སུ་དག་པ། ཡོངས་སུ་བྱང་བར་སྤྱོད་པར་འགྱུར་བ་དང་། ཉམས་པ་ལ་འཇུག་པར་མི་འགྱུར་བར་བྱ་བའི་ཕྱིར་རོ། །བྲམ་ཟེའི་བུ་མོ་དྲེགས་མ་ནི་རེ་ཤིག་སྡིག་པའི་ལས་ཀུན་ཏུ་རྒྱས་པ་དང་། རང་བཞིན་གྱིས་མ་དད་པ་མང་

བ་ཡིན་པས་དེ་ལྟར་ལས་ཀྱི་སྒྲིབ་པས་བསྒྲིབས་པ་དེས་ན་ཕུང་པོ་དང་། ཁམས་དང་། སྐྱེ་མཆེད་དེ་དག་ཉིད་ཀྱིས་བསྟན་པ་འདི་ལ་གདོན་མི་ཟ་བར་རྨ་འབྱིན་པར་བྱེད་པ་ཡིན་ཏེ། དེ་སྡིག་པའི་ལས་ཀུན་དུ་རྒྱས་པ་དེས་གལ་ཏེ་རྨི་ལམ་
ན་དེ་བཞིན་གཤེགས་པ་ལ་སྐུར་བ་བཏབ་པར་གྱུར་ན་ཡང་། དེ་ཉིད་ཀྱིས་སད་པའི་ཚེ་ན་དྲི་མར་ཡང་འགྱུར་རོ། །རིགས་ཀྱི་བུ་གལ་ཏེ་དེ་བཞིན་གཤེགས་པས་ཐབས་འགའ་ཞིག་གིས་དེ་མི་དགེ་བའི་ལས་མངོན་པར་འདུ་བྱེད་པ་དེ་ལས་ཟློག་པར་སྤྱོད་ན་ནི་ཟློག་
པར་ཡང་མཛད་ལ། དེ་བཞིན་གཤེགས་པས་བསྲུང་བར་སྤྱོད་ན་སྲུང་བར་ཡང་མཛད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་སེམས་ཅན་འགའ་ཡང་ཡོངས་སུ་མ་བཏང་བའི་ཕྱིར་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་
ནོ། །ཅིའི་ཕྱིར་དེ་བཞིན་གཤེགས་པ་ཐམས་ཅད་མཁྱེན་པས་ཀུན་ཏུ་རྒྱུ་མཛེས་མ་ཀུན་ཏུ་རྒྱུ་དག་གིས་སྲོག་དང་ཕྲལ་ཏེ། རྒྱལ་བུ་རྒྱལ་བྱེད་ཀྱི་ཚལ་གྱི་འོབས་ཀྱི་ནང་དུ་བོར་བ་བཏང་སྙོམས་སུ་མཛད་ཅེ་ན། དེ་བཞིན་གཤེགས་པ་ནི་ཐམས་ཅད་མཁྱེན་པ་ཐོགས་
པ་མི་མངའ་བའི་ཡེ་ཤེས་གཟིགས་པ་དང་ལྡན་པ་ཡིན་པས། དེ་བཞིན་གཤེགས་པས་དེ་དེ་ལྟར་འགྱུར་བར་མཁྱེན་ཅིང་། དེ་བཞིན་གཤེགས་པས་དེ་ལྟ་བུའི་བྱིན་གྱི་རླབས་བྱིན་གྱིས་རློབ་པར་ཡང་སྤྱོད་མོད་ཀྱི། ཀུན་ཏུ་རྒྱུ་མཛེས་མ་ཉིད་ཚེའི་ཚད་ཟད་ཅིང་གདོན་
མི་ཟ་བར་གཞན་གྱི་གནོད་པས་ཚུལ་མ་ཡིན་པས་འཆི་བའི་དུས་བྱེད་པར་འགྱུར་བའི་ཕྱིར་ཏེ་རྣམ་གྲངས་དེས་ན་གཞན་མུ་སྟེགས་ཅན་དག་འདི་ལྟར་སངས་རྒྱས་ཀྱི་ཡེ་ཤེས་དེ་ནི། ཇི་ལྟ་ཇི་ལྟར་སེམས་ཅན་རྣམས་ཀྱི་དཀར་པོའི་ཆོས་རྣམ་པར་འཕེལ་བ་དང་། དགེ་བའི་རྩ་
བ་རྣམ་པར་འཕེལ་བར་འགྱུར་བ་དང་། ཇི་ལྟ་ཇི་ལྟར་དེ་ལ་གཞག་པར་བྱ་བ་དེ་ལྟ་དེ་ལྟར་དེ་ལ་འཇོག་པར་མཛད་དོ། །ཞེས་བདག་ཉིད་ཀྱི་རང་གི་ཉེས་པས་ཤིན་ཏུ་ཚར་གཅོད་པར་འགྱུར་རོ། །དེའི་ཚེ་བཅོམ་ལྡན་འདས་ཞག་བདུན་གྱི་བར་དུ་གྲོང་ཁྱེར་དུ་མ་ཞུགས་

པར་ལྷ་བྱེ་བ་ཕྲག་དྲུག་ཅུ་བཏུལ་ནས་ཞག་བདུན་པོ་དེ་འདས་པ་དང་། བཅོམ་ལྡན་འདས་ཀྱི་ཐད་དུ་འཁོར་བཞི་པོ་དག་ལྷགས་ནས་བཅོམ་ལྡན་འདས་ཀྱིས་ཅི་ནས་སྲོག་ཆགས་བརྒྱད་ཁྲི་བཞི་སྟོང་དག་ཡེ་ཤེས་མཐོང་བ་སྐྱེས་པར་གྱུར་པ་དེ་ལྟ་དེ་ལྟར་དེ་དག་ལ་ཆོས་
བསྟན་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་ཉོན་མོངས་མེད་ཀྱི་ལྗོངས་སུ་དབྱར་གནས་པར་ཞལ་གྱིས་བཞེས་པ་ན། ཟླ་བ་གསུམ་དུ་སྐྱེ་བོ་རྣམས་
ལ་བག་ཕབ་སྟེ། བྲམ་ཟེ་ཉོན་མོངས་མེད་ཀྱི་རྟ་ཆས་ཀྱི་ནས་དག་གསོལ་ཅེ་ན། རིགས་ཀྱི་བུ་དེ་བཞིན་གཤེགས་པས་ཇི་ལྟར་ཁྱིམ་བདག་དེས་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་སྤྱན་དྲངས་ནས། རི་མོ་མི་བྱེད་པར་ཡང་མཁྱེན་མོད་
ཀྱི། དེས་མཁྱེན་བཞིན་དུ་དང་དུ་བླངས་ཤིང་བཏང་སྙོམས་མཛད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པས་དབྱར་ཟླ་བ་གསུམ་དུ་གང་དག་གི་རྟ་ཆས་ཀྱི་ནས་དག་གསོལ་བའི་རྟ་ལྔ་བརྒྱ་པོ་གང་དག་ཡིན་པ་དེ་དག་ཐམས་
ཅད་ནི། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ་ཤ་སྟག་ཡིན་ཏེ། དེ་དག་སྡིག་པའི་གྲོགས་པོའི་དབང་གིས་སྡིག་པའི་ལས་དང་། ལས་དམན་པ་བྱས་ཤིང་མངོན་པར་འདུ་བྱས་པས།
ལས་དེས་དེ་དག་དུད་འགྲོའི་སྐྱེ་གནས་སུ་སྐྱེས་ཏེ། རྟ་ལྔ་བརྒྱ་པོ་དེ་དག་གི་ནང་ན་རྟ་ཅང་ཤེས་ཅིག་ཡོད་པ་གང་ཡིན་པ་དེ་ནི། བྱང་ཆུབ་སེམས་དཔའ་ཉི་མའི་སྙིང་པོ་ཞེས་བྱ་བ་སྨོན་ལམ་གྱི་དབང་གིས་བསམས་བཞིན་དུ་དེར་སྐྱེས་པ་ཡིན་ལ། རྟ་ལྔ་བརྒྱ་
པོ་དེ་དག་ཐམས་ཅད་ཀྱང་སྔོན་མིར་གྱུར་པ་ན་བྱང་ཆུབ་སེམས་དཔའ་ཉི་མའི་སྙིང་པོ་དེ་ཉིད་ཀྱིས་བྱང་ཆུབ་ཡང་དག་པར་འཛིན་དུ་བཅུག་པ་ཡིན་པས། དེ་དེ་དག་ཡོངས་སུ་ཐར་བར་བྱ་བ་དང་། ཡོངས་སུ་སྨིན་པར་བྱ་བའི་ཕྱིར་དེར་སྐྱེས་ཏེ། རྟ་ཅང་ཤེས་དེ་

ཡིད་ཀྱི་མཐུས་རྟ་ལྔ་བརྒྱ་པོ་དེ་དག་ཐམས་ཅད་ཀྱིས་སྔོན་གྱི་ཚེ་རབས་རྗེས་སུ་དྲན་པར་གྱུར་ཅིང་དེ་དག་གི་བྱང་ཆུབ་ཀྱི་སེམས་དེ་ཡང་མངོན་དུ་གྱུར་བའི་ཕྱིར་ཏེ། རིགས་ཀྱི་བུ་དེ་ལྟ་བས་ན་དེ་བཞིན་གཤེགས་པ་བྱང་ཆུབ་སེམས་དཔའ་རྟར་གྱུར་པ་
ལྔ་བརྒྱ་པོ་དེ་དག་ལ་ཐུགས་བརྩེ་བའི་ཕྱིར། དེ་བཞིན་གཤེགས་པ་དུད་འགྲོའི་སྐྱེ་གནས་སུ་སྐྱེས་པ་དེ་དག་གི་དོན་དུ་དབྱར་ཟླ་བ་གསུམ་དེར་གནས་པར་ཞལ་གྱིས་བཞེས་སོ། །དེ་ན་རྟ་ལྔ་བརྒྱ་པོ་དག་གིས་ཆས་ཀྱི་ནས་གང་དག་ཡིན་པ་དེ་དག་ལས་ཕྱེད་ཕྱེད་ནི་
དགེ་སློང་ལྔ་བརྒྱ་པོ་དེ་དག་ལ་འབུལ་ལོ། །རྟ་ཅང་ཤེས་ཀྱི་ཆས་ཀྱི་ནས་གང་དག་ཡིན་པ་དེ་དག་ལས་ཕྱེད་ནི་དེ་བཞིན་གཤེགས་པ་ལ་འབུལ་ལོ། །ཕྱེད་ནི་རྟ་ཅང་ཤེས་དེ་ཉིད་ཟ་ཞིང་རྟ་ཅང་ཤེས་དེས་རྟའི་སྐད་ཀྱིས་རྟ་ལྔ་བརྒྱ་པོ་དེ་དག་ཐམས་ཅད་སྡིག་པ་འཆགས་སུ་
བཅུག་ཅིང་། སངས་རྒྱས་ལ་སོགས་པ་དགེ་སློང་གི་དགེ་འདུན་དེ་དག་ལ་ཕྱག་འཚལ་དུ་ཡང་བཅུག་གོ །རྟ་ཅང་ཤེས་དེས་རྟ་ལྔ་བརྒྱ་པོ་དེ་དག་ལ་འདི་སྐད་ཅེས། ཁྱེད་ཅག་གི་ཆས་ཀྱི་ནས་དག་ལས་ཕྱེད་ཕྱེད་དེ་བཞིན་གཤེགས་པ་དང་། དགེ་སློང་གི་
དགེ་འདུན་གྱིས་གསོལ་ཏོ། །ཞེས་གོ་བར་ཡང་བྱས་སོ། །དེ་ལྟར་རྟ་ལྔ་བརྒྱ་པོ་དེ་དག་གིས་སྡིག་པ་བཤགས་ཤིང་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་དད་པ་བསྐྱེད་ནས། ཟླ་བ་གསུམ་པོ་དེ་དག་འདས་པའི་འོག་ཏུ་དུས་གཞན་གྱི་ཚེ་ན་རྟ་ལྔ་བརྒྱ་
པོ་དེ་དག་ཐམས་ཅད་ཤི་འཕོས་ཏེ། དགའ་ལྡན་གྱི་ལྷ་རྣམས་དང་སྐལ་བ་མཉམ་པར་སྐྱེས་ནས་ལྷར་གྱུར་པ་དེ་དག་གིས་ཡང་དེ་བཞིན་གཤེགས་པ་ལ་ཞལ་ཟས་ཕུལ་ཞིང་བཀུར་སྟིར་བྱས། བླ་མར་བྱས། རི་མོར་བྱས། མཆོད་པར་བྱས་པ་དང་། དེ་
བཞིན་གཤེགས་པས་ཀྱང་དེ་དག་ལ་ཅི་ནས་ཀྱང་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་དེ་ལྟ་དེ་ལྟར་ཆོས་བསྟན་ཏོ། །རྟ་ལྔ་བརྒྱ་པོ་དེ་དག་འདུལ་ཞིང་འཚོ་བར་བྱེད་པའི་རྟ་རྫི་གང་ཡིན་པ་དེ་ཡང་དེ་བཞིན་གཤེགས་པས་རང་སངས་རྒྱས་

རབ་ཏུ་སེམས་དུལ་ཞེས་བྱ་བར་འགྱུར་རོ། །ཞེས་ལུང་བསྟན་ཏོ། །དེ་བཞིན་གཤེགས་པས་རྟ་ཅང་ཤེས་དེ་ཡང་སངས་རྒྱས་བཅོམ་ལྡན་འདས་དཔག་ཏུ་མེད་པ་ལ་མཆོད་པ་བྱས་ཤིང་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱས་ནས། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རབ་ཏུ་སེམས་དུལ་ཞེས་བྱ་བར་འགྱུར་ཏེ། འཇིག་རྟེན་དུ་འབྱུང་བར་འགྱུར་རོ་ཞེས་ལུང་བསྟན་ཏོ། །རིགས་ཀྱི་བུ་དེ་ལྟ་མོད་ཀྱི་མིའི་ཁ་ཟས་གང་ཡིན་པ་དེ་དག་ནི་དེ་བཞིན་གཤེགས་པ་ལ་མི་
བསོད་པ་ཅུང་ཟད་ཀྱང་མེད་དེ། རིགས་ཀྱི་བུ་ཡོངས་སུ་བརྟག་པ་ཉེ་བར་བཟུང་ན་གལ་ཏེ་དེ་བཞིན་གཤེགས་པས་ཤིང་དང་། བོང་བ་དང་། གསེག་མ་དང་། གྱོ་མོ་དག་ཞལ་ཟས་ཀྱི་ཕྱིར་ཡོངས་སུ་ལོངས་སྤྱད་པར་གྱུར་ན་ཡང་ཤིང་དང་། བོང་བ་
དང་། གསེག་མ་དང་། གྱོ་མོ་ལ་སོགས་པ་དེ་དག་གི་རོ་དེ་ལྟ་བུ་དང་། རོ་བྲོ་བའི་མཆོག་གི་ཁྱད་པར་གང་དག་ཡིན་པ་དེ་ལྟ་བུ་དག་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཡང་འགའ་ཡང་མེད་དོ། །དེ་ཅིའི་ཕྱིར་ཞེ་ན། རིགས་ཀྱི་
བུ་འདི་ལྟར་དེ་བཞིན་གཤེགས་པ་ནི་སྐྱེས་བུ་ཆེན་པོའི་མཚན་རོ་བྲོ་བའི་མཆོག་དང་ལྡན་པ་ཡིན་པས་ན། དེ་བཞིན་གཤེགས་པའི་སྐུ་ལ་ཞལ་ཟས་མི་བསོད་པ་ཐམས་ཅད་གསོལ་མ་ཐག་ཏུ་ཡང་། ལྷའི་ཁ་ཟས་ལས་ཡང་དག་པར་འདས་པའི་རོ་དང་ལྡན་
པར་འགྱུར་བའི་ཕྱིར་ཏེ། རིགས་ཀྱི་བུ་དེའི་ཕྱིར་རྣམ་གྲངས་དེས་ན་ཁྱོད་ཀྱིས་འདི་ལྟར། དེ་བཞིན་གཤེགས་པའི་ཞལ་ཟས་ཐམས་ཅད་ནི་བསོད་པ་ཡིན་པར་རིག་པར་བྱའོ། །རིགས་ཀྱི་བུ་དེའི་ཚེ་ན་དགེ་སློང་ཀུན་དགའ་བོ་འདི་སྙམ་དུ། དེ་བཞིན་
གཤེགས་པ་འདིས་འཁོར་ལོས་སྒྱུར་བའི་རྒྱལ་སྲིད་སྤངས་ཏེ། རབ་ཏུ་བྱུང་ནས་ད་རྟ་ཆས་ཀྱི་ནས་དག་གསོལ་བར་མཛད་པ་ལྟ་ཞེས་ཡིད་མི་བདེ་བར་གྱུར་པ་དང་། དེ་བཞིན་གཤེགས་པས་དེའི་སེམས་ལ་རྣམ་པར་གཟིགས་ནས། ཀུན་དགའ་བོ་འདི་

ཅིའི་རོ་ཡིན་ཤེས་སམ། ཞེས་ནས་ཀྱི་འབྲུ་གཅིག་བྱིན་པ་དང་། དེས་དེ་ཟོས་ནས་ངོ་མཚར་དུ་འཛིན་པར་གྱུར་ཏེ། ང་ལ་འདི་སྐད་ཅེས་བཅོམ་ལྡན་འདས་བདག་ནི་རྒྱལ་པོའི་ཁྱིམ་དུ་སྐྱེས་ཤིང་། རྒྱལ་པོའི་ཁྱིམ་དུ་ལེགས་པར་རྒྱས་
པ་ལགས་ན། བཅོམ་ལྡན་འདས་བདག་གིས་རོའི་མཆོག་འདི་ལྟ་བུ་ནི་སྔན་ཆད་མ་འཚལ་མ་མྱོང་ལགས་སོ། །ཞེས་ཟེར་ཏེ། དེའི་བྱིན་གྱིས་དགེ་སློང་ཀུན་དགའ་བོ་ཟས་གཞན་མི་ཟ་བར་དགའ་བ་དང་། བདེ་བས་ཞག་བདུན་འདས་པར་གྱུར་ཏོ། །རིགས་
ཀྱི་བུ་རྣམ་གྲངས་དེས་ན་ཁྱོད་ཀྱིས་འདི་ལྟར་དེ་ནི་དེ་བཞིན་གཤེགས་པའི་ཐབས་ལ་མཁས་པ་ཡིན་གྱིས། ལས་ཀྱི་སྒྲིབ་པ་མ་ཡིན་པར་རིག་པར་བྱའོ། །རིགས་ཀྱི་བུ་གཞན་ཡང་སེམས་ཅན་གང་དག་དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་པ་དག་མགྲོན་དུ་
གཉེར་ལ་སེམས་རྣམ་པར་གཡེངས་པས་རི་མོ་མི་བྱེད་པའི་སེམས་ཅན་དེ་དག་ལ་ཇི་སྐད་སྨྲས་པ་དེ་བཞིན་བྱེད་པ་ཉིད་ཀུན་ཏུ་བསྟན་པར་བྱ་བའི་ཕྱིར། ལས་ཀྱི་རྒྱུད་དེ་ལྟ་བུ་དག་ཀུན་ཏུ་སྟོན་པར་མཛད་དོ། །རིགས་ཀྱི་བུ་གང་གིས་དེ་བཞིན་གཤེགས་པ་སྤྱན་དྲངས་
ལ། རི་མོ་མ་བྱས་པ་དེ་ཡང་དེ་བཞིན་གཤེགས་པས་ལོག་པར་ལྟུང་བར་མི་འགྱུར་བའི་ཆོས་སུ་ལུང་བསྟན་པའི་དེ་བཞིན་གཤེགས་པ་རྣམས་