Kinh tạng Tây Tạng (Kangyur Đại Học) — 044_དཀོན་བརྩེགས།_ཆ

ི་གྲོགས་པོ་སྤོང་བས་ན། །མི་ཟད་གཏེར་འཛིན་ཐོབ་པར་འགྱུར། །མང་ཐོས་ཡོངས་སུ་སྐྱོ་མེད་པར། །རབ་བརྩོན་ཆོས་ནི་གཉེར་བར་
བྱེད། །ཇི་སྐད་ཐོས་བཞིན་སྟོན་བྱེད་པས། །རྙེད་པ་དག་ལ་རེ་ཚོལ་མེད། །སྤོབས་པ་རྣམ་དག་གང་ཐོབ་པ། །འཁོར་མང་དགའ་བར་བྱེད་པས་ན། །ཆོས་སྦྱིན་པ་ལ་རབ་མོས་ཤིང་། །སེར་སྣ་ཕྲག་དོག་སྤོང་བར་བྱེད། །ཆོས་སྤྱོད་མངོན་པར་ཞེན་མེད་
ཅིང་། །གཟུངས་ནི་གང་ཞིག་ཐོབ་འགྱུར་བ། །ཁྲིམས་སྲུང་རང་ལུས་ལྟ་བས་ན། །གཞན་གྱི་ཉེས་སྐྱོན་ཡོང་མི་ཚོལ། །བྱམས་དང་སྙིང་རྗེ་གནས་གྱུར་ཅིང་། །དུས་མིན་ཚིག་ནི་མི་སྨྲ་བས། །ཐོགས་མེད་སྤོབས་པ་ཐོབ་གྱུར་ནས། །སྤྲོ་ཚིག་ཕ་རོལ་
ཕྱིན་པ་སྟོན། །ཆོས་ནི་ལེགས་པར་སྨྲ་བ་ལ། །མཁན་པོ་བཞིན་དུ་གུས་པར་བྱེད། །སྐྱོན་འཆབ་ཉེས་པ་སྤོང་སྐུལ་བས། །མི་ཟད་ཀུན་འཛིན་རྒྱ་མཚོ་འཐོབ། །གཞན་ཡང་བུ་མོ་བྱང་ཆུབ་སེམས་དཔའ་ནི་ཆོས་རྣམ་པ་བརྒྱད་དང་ལྡན་པའི་ཕྱིར་སངས་རྒྱས་

རྣམས་ཀྱི་སྤྱན་སྔར་པད་མ་ལས་རྫུས་ཏེ་སྐྱེ་བར་འགྱུར་རོ། །བརྒྱད་གང་ཞེ་ན། སྲོག་ལ་བབ་པར་གྱུར་ཀྱང་གཞན་གྱི་ཉེས་པ་མི་རྗོད་པ་དང་། སེམས་ཅན་རྣམས་དཀོན་མཆོག་གསུམ་ལ་སྐྱབས་སུ་འགྲོ་བར་སྐུལ་བ་དང་། ཐམས་ཅད་བྱང་ཆུབ་ཀྱི་སེམས་ལ་
འགོད་པ་དང་། ཚངས་པར་སྤྱོད་པ་ལ་གོས་པ་མེད་པ་དང་། དེ་བཞིན་གཤེགས་པའི་སྐུ་གཟུགས་དག་བྱས་ནས་པད་མོའི་གདན་ལ་འཇོག་པ་དང་། སེམས་ཅན་མྱ་ངན་བྱེད་པ་དག་གི་མྱ་ངན་སེལ་བར་བྱེད་པ་དང་། ཁེངས་ཤིང་ང་རྒྱལ་བྱེད་པ་དག་གི་མདུན་དུ་
རྟག་པར་བདག་ཉིད་དམན་པར་བྱེད་པ་དང་། གཞན་ལ་འཚེ་བར་མི་བྱེད་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། གལ་ཏེ་སྡུག་བསྔལ་གཟིར་གྱུར་ཀྱང་། །ནམ་ཡང་གཞན་གྱི་སྐྱོན་མི་སྨྲ། །རྟག་པར་
དཀོན་མཆོག་གང་བསྔགས་པ། །སངས་རྒྱས་སྤྱན་སྔར་རྫུས་ཏེ་སྐྱེ། །བྱང་ཆུབ་སེམས་ནི་བསྐྱེད་པ་དང་། །ཐམས་ཅད་མཁྱེན་པ་གཉེར་བསྐུལ་ནས། །རྟག་པར་ཚངས་པར་གང་སྤྱོད་པ། །སངས་རྒྱས་སྤྱན་སྔར་རྫུས་ཏེ་སྐྱེ། །གསེར་གྱིས་སངས་རྒྱས་གཟུགས་
བརྒྱན་ཏེ། །རིན་ཆེན་པད་མའི་གདན་ལ་བཞག །སེམས་ཅན་མྱ་ངན་གང་སེལ་བ། །སངས་རྒྱས་སྤྱན་སྔར་རྫུས་ཏེ་སྐྱེ། །ང་རྒྱལ་བྱེད་པ་དེ་དག་ལ། །སློབ་མ་བཞིན་དུ་བདག་དམན་ཞིང་། །གཞན་ལ་གང་ཞིག་མི་འཚེ་བ། །སངས་རྒྱས་སྤྱན་སྔར་རྫུས་ཏེ་སྐྱེ། །
གཞན་ཡང་བུ་མོ་བྱང་ཆུབ་སེམས་དཔའ་ཆོས་རྣམ་པ་བརྒྱད་དང་ལྡན་པར་གྱུར་ན་སྦྱངས་པའི་ཡོན་ཏན་ཕུན་སུམ་ཚོགས་པར་འགྱུར་ཞིང་རྟག་པར་དགོན་པ་ན་གནས་པ་ལ་མོས་པར་འགྱུར་རོ། །བརྒྱད་གང་ཞེ་ན། འདོད་པ་ཆུང་བ་དང་། ཆོག་ཤེས་པ་དང་། དགེ་
བའི་ཆོས་ཡོངས་སུ་རྫོགས་པར་གྱུར་པ་དང་། དགེ་བས་བདག་ཉིད་གསོ་བར་བྱེད་པ་དང་། རྟག་པར་འཕགས་པའི་རིགས་ཡོངས་སུ་འཛིན་པ་དང་། འཁོར་བའི་ཉེས་དམིགས་མཐོང་བས་སེམས་ལ་རྟག་པར་སྐྱོ་བ་དང་། རྟག་པར་མི་རྟག་པ་དང་། སྡུག་བསྔལ་བ་དང་།

སྟོང་པ་དང་། བདག་མེད་པར་ལྟ་བ་དང་། དད་པ་ཤིན་ཏུ་བརྟན་ཞིང་གཞན་གྱི་དྲིང་ལ་མི་འཇོག་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། འདོད་པ་ཆུང་ཞིང་ཆོག་ཤེས་པས། །ཆོས་དགའ་
དགེ་མང་བདག་ཉིད་གསོ། །རྟག་པར་འཕགས་རིགས་སྒྲུབ་ལ་མོས། །འཁོར་བའི་སྐྱོན་མཐོང་སེམས་ལ་སྐྲག །སྦྱངས་པ་དག་ལ་རྟག་མོས་པས། །བསེ་རུ་གཅིག་ལྟར་གྲོགས་ཀྱང་མེད། །འདུས་བྱས་སྡུག་བསྔལ་བདག་མེད་ཅེས། །བློ་ཡིས་རབ་
དང་བརྩོན་འགྲུས་གནས། །ཆོས་མཐོང་གཞན་གྱི་རྗེས་མི་འབྲང་། །རྟག་པར་དབེན་གནས་སངས་རྒྱས་བསྔགས། །སྦྱངས་པས་ཐག་བསྲིངས་གདུང་བ་མེད། །རྩོད་པ་ཉེས་དམིགས་མང་པོ་མེད། །གཉེན་བཤེས་ཡོངས་སྤངས་བསྔགས་པ་རྗོད། །དེས་ན་
དགོན་པར་གནས་ལ་མོས། །གཞན་ཡང་བུ་མོ་བྱང་ཆུབ་སེམས་དཔའི་ནི་ཆོས་རྣམ་པ་བརྒྱད་དང་ལྡན་པའི་ཕྱིར་བདུད་ཀྱི་དཔུང་རབ་ཏུ་ཕམ་པར་བྱེད་དོ། །བརྒྱད་གང་ཞེ་ན། ངོ་བོ་ཉིད་སྟོང་པ་ཉིད་ལ་ཞུགས་པ་དང་། མཚན་མ་མེད་པ་ལ་མངོན་པར་ཡིད་ཆེས་པ་
དང་། སྨོན་པ་མེད་པ་ལ་མངོན་པར་ཡིད་ཆེས་པ་དང་། མངོན་པར་འདུ་བྱ་བ་མེད་པར་རབ་ཏུ་ཤེས་པ་དང་། དེ་ལ་ཐེ་ཚོམ་དང་སོམ་ཉི་མེད་པ་དང་། སྐྱེ་བ་མེད་པར་རབ་ཏུ་བཟོད་པ་དང་། ངོ་བོ་ཉིད་མེད་པར་རབ་ཏུ་རྟོགས་པ་དང་། ཐབས་ལ་མཁས་པས་
ཆོས་ཐམས་ཅད་ལ་སོ་སོར་རྟོག་ཅིང་དེ་བཞིན་ཉིད་འཇིག་པར་མི་བྱེད་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། སྟོང་དང་མཚན་མ་མེད་དང་སྨོན་མེད་པ། །རྣམ་ཐར་གསུམ་ཐོབ་བདུད་དཔུང་རབ་ཏུ་འཇོམས། །
འདུས་བྱས་འདུས་མིན་མཚན་ཉིད་གཉིས་སུ་མེད། །སྐྱེ་མེད་ཐོབ་པས་རྣམ་པར་གྲོལ་བར་འགྱུར། །ཆོས་རྣམས་སྐྱེ་མེད་དེ་ལྟར་གང་བཟོད་པ། །དེ་དག་བདུད་དཔུང་རབ་ཏུ་ཕམ་པར་བྱེད། །སྐྱེ་བ་མེད་དང་འགག་མེད་འདི་དག་དང་། །ཕུང་པོ་ཁམས་ལ་བདག་

མེད་སྒྱུ་མ་འདྲ། །ཆོས་ལ་ངོ་བོ་ཉིད་མེད་རབ་ཏུ་རྟོགས། །དེ་བཞིན་ཉིད་ནི་མི་འཇིག་ཐབས་མཁས་པས། །ཆོས་རྣམས་བདུད་ཀྱི་ལས་ཞེས་གང་འབྱེད་པ། །རྣམ་རྟོག་སྤངས་ནས་བདུད་ནི་ཕམ་པར་བྱེད། །ཐབས་དང་ཤེས་རབ་གཉིས་ཀ་རབ་སྤྱོད་ཅིང་། །ཡོད་དང་སྟོང་
ལ་གནས་པ་མེད་པར་ནི། །དེ་ལྟར་ཆོས་མཆོག་གང་ཞིག་སྒོམ་བྱེད་པ། །ཐབས་མཁས་གཟུགས་ལུས་མཛེས་པ་འཐོབ་པར་འགྱུར། །གཞན་ཡང་བུ་མོ་བྱང་ཆུབ་སེམས་དཔའ་ནི། ཆོས་རྣམ་པ་བརྒྱད་དང་ལྡན་པའི་ཕྱིར་བྱང་ཆུབ་དང་ནམ་ཡང་འབྲལ་བར་མི་འགྱུར་
རོ། །བརྒྱད་གང་ཞེ་ན། ཡང་དག་པའི་ལྟ་བས་ལོག་པར་ལྟ་བའི་སེམས་ཅན་ཡོངས་སུ་སྨིན་པར་བྱེད་པ་དང་། ཡང་དག་པའི་དྲན་པས་ལོག་པར་སེམས་པའི་སེམས་ཅན་ལ་སྙིང་བརྩེ་བར་བྱེད་པ་དང་། ཡང་དག་པའི་ངག་གིས་ལོག་པར་སྨྲ་བ་རྣམས་ལ་སྙིང་
བརྩེ་བར་བྱེད་པ་དང་། ཡང་དག་པའི་ལས་ཀྱི་མཐས་ལོག་པའི་ལས་ཅན་རྣམས་ཡོངས་སུ་སྡུད་པ་དང་། ཡང་དག་པའི་རྩོལ་བས་ལོག་པར་རྩོལ་བ་རྣམས་ཡོངས་སུ་ཟློག་པ་དང་ཡང་དག་པའི་འཚོ་བས་ལོག་པར་འཚོ་བའི་སེམས་ཅན་རྣམས་སྤོང་བར་མི་བྱེད་པ་དང་།
ཡང་དག་པའི་རྟོག་པས་ལོག་པར་ཡིད་ལ་བྱེད་པ་སྤོང་བར་བྱེད་པ་དང་། ཡང་དག་པའི་ཏིང་ངེ་འཛིན་གྱིས་ལོག་པའི་ཏིང་ངེ་འཛིན་ལ་གནས་པ་དག་བསླང་ནས་གོང་དུ་རྩོལ་དུ་གཞུག་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་
སྩལ་པ། ཡང་དག་ལྟ་དང་གང་ལྡན་པ། །ལོག་ལྟ་དེ་དག་སྨིན་པར་བྱེད། །རྟག་པར་ཡང་དག་དྲན་སྒོམ་པ། །ལོག་སེམས་དག་ལ་བརྩེ་བར་བྱེད། །རྣམ་དག་ཡང་དག་དག་གིས་ནི། །ལོག་སྨྲ་རྣམས་ལ་བརྩེ་བར་བྱེད། །ཡང་དག་ལས་མཐའ་གནས་
པ་ཡིས། །ལོག་པའི་ལས་ཅན་སྡུད་པར་བྱེད། །རྟག་པར་ཡང་དག་རྩོལ་བསྒོམས་ནས། །ལོག་བརྩོན་དག་ནི་སྤོང་བར་བྱེད། །ཡང་དག་འཚོ་བས་རྗེས་འཐུན་པས། །ལོག་འཚོ་གང་ཡིན་སྡུད་པར་བྱེད། །བློ་ལྡན་ཡང་དག་རྟོག་པ་ཡིས། །ལོག་པར་

ཡིད་བྱེད་བརྩེ་བར་སེམས། །ཡང་དག་ཏིང་འཛིན་རྟག་གནས་ནས། །ལོག་པའི་ཏིང་འཛིན་སྡུད་པར་བྱེད། །བླ་མེད་ཡང་དག་ལམ་བརྒྱད་ཀྱིས། །ཆུ་བོ་དག་ལ་སྒྲོལ་བར་བྱེད། །རྒྱུན་ཕྱོགས་དེད་པ་ཟློག་བྱེད་པས། །དེ་ནི་བྱང་ཆུབ་ལམ་ཆེན་
ཡིན། །ཉན་ཐོས་དང་ནི་རང་རྒྱལ་རྣམས། །རྩྭ་ཡི་གཟིངས་བཞིན་བདག་ཉིད་ཟློས། །བྱང་ཆུབ་སེམས་དཔའ་ཀུན་ཟློས་པས། །དཔེར་ན་གྲུ་ཆེན་འདྲེན་མཁན་འདྲ། །གཞན་ཡང་བུ་མོ་བྱང་ཆུབ་སེམས་དཔའ་ནི་ཆོས་རྣམ་པ་བརྒྱད་དང་ལྡན་པའི་ཕྱིར། བདུད་རྩིའི་
ལམ་མངོན་སུམ་དུ་བྱེད་པར་འགྱུར་རོ། །བརྒྱད་གང་ཞེ་ན། རྩོད་པ་མེད་པའི་ཆོས་ལ་གནས་པ་དང་། ཐོགས་པའི་སེམས་ལེགས་པར་རབ་ཏུ་སྲུང་བར་བྱེད་པ་དང་། རྟག་པར་དེ་ཁོ་ན་ཉིད་ཀྱི་དོན་ལ་ལྟ་བར་བྱེད་པ་དང་། བྱང་ཆུབ་ཀྱི་སེམས་ལ་རབ་ཏུ་གནས་
ནས། རྗེས་སུ་དྲན་པ་དྲུག་སྒོམ་པར་བྱེད་པ་དང་། ནན་ཏན་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྣམས་སྒོམ་པར་བྱེད་པ་དང་། དགེ་བའི་རྩ་བ་བསགས་ནས་སེམས་ཅན་ཡོངས་སུ་སྨིན་པར་བྱེད་པ་དང་། སྙིང་རྗེ་ཆེན་པོ་ལ་གནས་ནས་ཡང་དག་པའི་ཆོས་
ཡོངས་སུ་སྡུད་པར་བྱེད་པ་དང་། མི་སྐྱེ་བའི་ཆོས་ལ་བཟོད་པ་ཐོབ་ནས། ཕྱིར་མི་ལྡོག་པ་ལ་རབ་ཏུ་གནས་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། རྟག་པར་རྩོད་མེད་སྤྱོད་བསྒྲུབས་ནས། །དགེ་སྦྱོང་ཆེན་པོའི་
ཆོས་ལ་གནས། །ཞེ་སྡང་ཉེས་པ་ཡོངས་སྤངས་ནས། །དགེ་བའི་རྩ་བ་སོགས་པར་བྱེད། །ཡང་དག་དོན་ལ་རབ་ལྟ་བས། །མི་ཟད་སྤོབས་རྣམས་འཐོབ་པར་བྱེད། །བྱང་ཆུབ་སེམས་ལ་རབ་གནས་ནས། །རྟག་པར་དྲན་བྱེད་རྗེས་སུ་དྲན། །ཕ་རོལ་ཕྱིན་པ་
ཐམས་ཅད་ལ། །རབ་བརྩོན་བསྒྲུབས་པས་ལོག་པ་མེད། །ཐབས་མཁས་སྟོབས་རྣམས་ཐོབ་པས་ན། །དེས་ནི་སེམས་ཅན་སྒྲོལ་བར་བྱེད། །ཆོས་ཀྱི་མངའ་བདག་ནོར་གྱིས་ནི། །བརྩེ་སེམས་ཐམས་ཅད་ཀུན་སྡུད་པས། །མྱུར་དུ་མི་སྐྱེ་བཟོད་ཐོབ་ནས། །བྱང་

ཆུབ་ལས་ནི་ལྡོག་མི་འགྱུར། །གལ་ཏེ་དེ་ལྟར་སྤྱོད་ནུས་ན། །སངས་རྒྱས་ཆོས་ནི་ཐོབ་མི་དཀའ། །རིང་པོར་མི་ཐོགས་བདུད་བཏུལ་ནས། །བྱང་ཆུབ་མཆོག་ནི་ཐོབ་པར་འགྱུར། །དེ་ནས་བུ་མོ་དེས་ཆོས་དེ་ལྟ་བུ་ཐོས་ནས་དགའ་མགུ་རངས་པར་གྱུར་ནས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་དུ་དང་ལྡན་པར་གྱུར་ན་བུད་མེད་ཀྱི་དངོས་པོ་ལས་ལྡོག་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། བུ་མོ་ཆོས་བརྒྱད་དང་ལྡན་པར་གྱུར་ན་བུད་མེད་ཀྱི་དངོས་པོ་ལས་ལྡོག་པར་འགྱུར་རོ། །
བརྒྱད་གང་ཞེ་ན། ཕྲག་དོག་མི་བྱེད་པ་དང་། སེར་སྣ་མི་བྱེད་པ་དང་། གཡོ་སྒྱུ་མེད་པ་དང་། ཁོང་ཁྲོ་བ་མེད་པ་དང་། བདེན་པར་སྨྲ་བ་དང་། ངག་རྩུབ་པོ་མི་སྨྲ་བ་དང་། འདོད་ཆགས་སྤངས་པ་དང་། ལོག་པར་ལྟ་བ་རྣམས་སྤངས་པ་གང་ཡིན་པ་སྟེ། བུ་
མོ་ཆོས་བརྒྱད་པོ་འདི་དག་མངོན་པར་བསྒྲུབས་ན། མྱུར་དུ་བུད་མེད་ཀྱི་དངོས་པོ་ལས་ལྡོག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། གཞན་ལ་ཕྲག་དོག་མི་བྱེད་ཅིང་། །སེར་སྣ་སྤངས་ནས་ཆོས་མོས་དང་། །གཡོ་སྒྱུ་དག་
ནི་མི་སྤྱོད་ཅིང་། །བུད་མེད་ལུས་ལ་སྐྱོ་བ་དང་། །བྱམས་སེམས་ཞེ་སྡང་རབ་སྤངས་ནས། །རྟག་པར་བདེན་ཚིག་སྨྲ་བ་དང་། །འདོད་བསལ་ངག་རྩུབ་སྤངས་ནས་ནི། །ཡང་དག་ལྟ་ལ་གནས་པར་བྱ། །གང་གིས་བུད་མེད་ལུས་སྐྱོ་ནས། །འདི་འདྲའི་ཆོས་ནི་སྒྲུབ་
བྱེད་ན། །མྱུར་དུ་བུད་མེད་དངོས་སྤངས་ནས། །སྐྱེས་པའི་ལུས་བཟང་ལེན་པར་འགྱུར། །གཞན་ཡང་བུ་མོ་ཆོས་བརྒྱད་དང་ལྡན་པར་གྱུར་ན། བུད་མེད་ཀྱི་དངོས་པོ་ལས་ལྡོག་པར་འགྱུར་རོ། །བརྒྱད་གང་ཞེ་ན། སངས་རྒྱས་ལ་བླ་མར་བྱེད་ཅིང་། ཆོས་ལ་
ཤིན་ཏུ་མོས་པ་དང་། ཚུལ་ཁྲིམས་དང་། བཟོད་པ་དང་། མང་དུ་ཐོས་པ་དང་ལྡན་པའི་དགེ་སྦྱོང་དང་བྲམ་ཟེ་དག་ལ་བསྙེན་བཀུར་དང་རིམ་གྲོར་བྱེད་པ་དང་། སྐྱེས་པ་དང་། བུད་མེད་དང་། ཁྱིམ་གྱི་དངོས་པོ་དག་ལ་མངོན་པར་ཞེན་ཅིང་། ཆགས་པ་མེད་པ་དང་།

བསླབ་པའི་དངོས་པོ་ཡང་དག་པར་བླངས་པ་རྣམས་འཇིག་པར་མི་བྱེད་པ་དང་། སྲོག་ཆགས་རྣམས་ལ་ལོག་པའི་བསམ་པ་མི་སྐྱེད་པ་དང་། ལྷག་པའི་བསམ་པས་བུད་མེད་ཀྱི་དངོས་པོ་ལ་ཡོངས་སུ་སྐྱོ་བར་འགྱུར་བ་དང་།
བྱང་ཆུབ་ཀྱི་སེམས་ཀྱིས་སྐྱེས་བུ་ཆེན་པོའི་ཆོས་ལ་གནས་པ་དང་། འཇིག་རྟེན་པའི་ཁྱིམ་གྱི་འཚོ་ཚིས་རྣམས་ལ་སྒྱུ་མ་ལྟ་བུ་དང་རྨི་ལམ་ལྟ་བུར་ལྟ་བ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། སངས་རྒྱས་རབ་གུས་
ཆོས་ལ་མོས། །ཚུལ་ཁྲིམས་མང་ཐོས་བླ་མར་བྱེད། །འདོད་ཆགས་སྲེད་སེམས་མི་སྐྱེད་ན། །བུད་མེད་དངོས་པོ་མྱུར་དུ་སྤོང་། །ཁྲིམས་སྲུང་ངོ་ཚ་ཁྲེལ་ཡོད་ལྡན། །གཞན་ལ་མི་བདེན་བསམ་མི་བྱེད། །བྱང་ཆུབ་སེམས་ལ་རབ་གནས་ནས། །ཐེག་པ་གཞན་ལ་
མོས་མེད་ན། །དེས་ནི་མྱུར་བ་ཁོ་ནར་ཡང་། །མི་གཙང་བུད་མེད་དངོས་པོ་སྤོང་། །བསམ་པ་མཆོག་གིས་སེམས་སྐྱོ་ནས། །ཐམས་ཅད་སྒྱུ་མ་ལྟ་བུ་དང་། །ཆོས་རྣམས་རང་བཞིན་གཡོ་མེད་དང་། །རྒྱུ་རྐྱེན་རང་བཞིན་སྟོང་དབེན་ཞེས། །ནན་ཏན་ཡང་དག་ཆོས་
བསྒོམས་ན། །མྱུར་དུ་སྐྱེས་པའི་ལུས་འཐོབ་འགྱུར། །དེ་ནས་བུ་མོ་རྣམ་དག་དད་པས་གསེར་གྱི་ཕྲེང་བ་ཐོགས་པ་དེ་དག་བཅོམ་ལྡན་འདས་ལ་མངོན་པར་གཏོར་བ་དང་། །སྟེང་གི་བར་སྣང་ལ་གསེར་ཡང་དག་པའི་གཞལ་མེད་ཁང་། ཁང་པ་བརྩེགས་པ་
དག་ཏུ་གྱུར་ནས་གཞལ་མེད་ཁང་དེ་དག་གི་ནང་ན་སྤྲུལ་པའི་དེ་བཞིན་གཤེགས་པ་གསེར་གྱི་གདན་ལ་བཞུགས་པ། ཤ་སྟག་མངོན་དུ་བྱུང་བར་གྱུར་ཏོ། །དེ་ནས་བུ་མོ་ལྔ་བརྒྱ་པོ་དེ་དག་གིས་ཀྱང་སོ་སོ་ནས། ལུས་ཀྱི་རྒྱན་རྣམས་བཀྲོལ་ནས་བཅོམ་ལྡན་འདས་ལ་
མངོན་པར་གཏོར་བ་དང་། སྟེང་གི་བར་སྣང་ལ་གསེར་གྱི་གཞལ་མེད་ཁང་དང་། རིན་པོ་ཆེའི་གུར་དང་། རིན་པོ་ཆེའི་གདུགས་དང་། བཀོད་པ་རྣམ་པ་སྣ་ཚོགས་སུ་གྱུར་ཏོ། །དེ་ནས་བུ་མོ་ལྔ་བརྒྱ་པོ་དེ་དག་གིས་དེ་ལྟ་བུའི་ཆོ་འཕྲུལ་ཆེན་པོ་མཐོང་བ་དང་། སྐད་

འཐུན་པར་ཚིགས་སུ་བཅད་དེ་སྨྲས་པ། བཅོམ་ལྡན་མི་མཆོག་ཁྱད་པར་འཕགས་པས་ན། །ཐུགས་རྗེས་སེམས་ཅན་རྣམས་ལ་སྨན་པར་མཛད། །བདག་ཅག་དེང་ནི་བྱང་ཆུབ་སེམས་བསྐྱེད་ནས། །མོས་པ་རྗེས་འཐུན་རབ་ཏུ་དུལ་ལ་གནས། །བཅོམ་ལྡན་འདྲེན་
པ་བདེ་བ་རབ་སྩོལ་བ། །བདག་ཅག་མི་མཆོག་ལ་ནི་མཆོད་པར་བགྱི། །ཆོས་ཐོས་དབང་གིས་རྡུལ་རྣམས་རབ་སྤངས་ནས། །བདག་ཅག་ཐེ་ཚོམ་ནེམ་ནུར་ཡོངས་མ་མཆིས། །དེས་ན་བུད་མེད་ཉོན་མོངས་མང་སྤངས་ནས། །ཉོན་མོངས་གཏན་བཅོམ་བདུད་ནི་ཕམ་
པར་བགྱི། །ཕྱོགས་བཅུའི་སངས་རྒྱས་བྱེ་བ་ཚད་མེད་རྣམས། །བདག་ཅག་དགའ་བས་རྟག་ཏུ་མཆོད་པར་འཚལ། །སྦྱིན་དང་ཚུལ་ཁྲིམས་བརྩོན་འགྲུས་རབ་གནས་ནས། །བཟོད་དང་བསམ་གཏན་སེམས་ནི་རབ་ཏུ་བགྱི། །ཐབས་དང་ཤེས་རབ་སེམས་ཅན་ཡོངས་
བསྡུས་ནས། །བྱང་ཆུབ་མཆོག་ལམ་གང་ལགས་མངོན་དུ་བགྱི། །ལྷ་མིའི་འཁོར་ནི་ཚད་མེད་སྨན་བཏགས་ནས། །ཐམས་ཅད་ཐེག་ཆེན་སེམས་ནི་བསྐྱེད་པར་བསྐུལ། །བདག་ཅག་སེང་གེའི་སྒྲ་ནི་སྒྲོགས་པར་འགྱུར། །བདག་ཅག་ལྷ་མིའི་སྟོན་པ་བགྱིད་པར་
མཆི། །དེ་ནས་བཅོམ་ལྡན་འདས་འཛུམ་པ་མཛད་དོ། །སངས་རྒྱས་རྣམས་ཀྱི་ཆོས་ཉིད་ནི་ནམ་འཛུམ་པ་མཛད་པ་ན་འོད་ཟེར་ཁ་དོག་རྣམ་པ་སྣ་ཚོགས་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། དངུལ་དང་། ཤེལ་
གྱི་ཁ་དོག་ལྟ་བུ་དག་དེ་བཞིན་གཤེགས་པའི་ཞལ་གྱི་སྒོ་ནས་བྱུང་སྟེ། འཇིག་རྟེན་གྱི་ཁམས་ཚད་མེད་དཔག་ཏུ་མེད་པ་དག་ནས། ཚངས་པའི་འཇིག་རྟེན་གྱི་བར་དུ་ཁྱབ་པར་སྣང་བར་བྱས་ནས། དེ་བཞིན་གཤེགས་པ་ལ་ལན་གསུམ་བསྐོར་བ་བྱས་ཏེ། དེ་བཞིན་
གཤེགས་པའི་དབུའི་གཙུག་ཏུ་ཐིམ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུ་རྐྱེན་གང་གི་སླད་དུ་འཛུམ་པ་འདི་ལྟ་བུ་བསྟན་པར་མཛད་ལགས། བཅོམ་ལྡན་འདས་ཀྱིས་

བཀའ་སྩལ་པ། ཀུན་དགའ་བོ་ཁྱོད་ཀྱིས་བུ་མོ་རྣམ་དག་དད་པ་འདི་མཐོང་ངམ། ཀུན་དགའ་བོས་གསོལ་པ། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་བུ་མོ་རྣམ་དག་དད་པ་ལ་སོགས་པ་བུ་མོ་ལྔ་བརྒྱ་པོ་འདི་དག་ནི།
འདི་ནས་ཚེ་ཟད་པ་དང་། བུད་མེད་ཀྱི་ལུས་སྤངས་ནས་དགའ་ལྡན་གྱི་ལྷའི་རིས་སུ་སྐྱེ་སྟེ། བཅོམ་ལྡན་འདས་བྱམས་པ་དང་། བསྐལ་པ་བཟང་པོའི་དེ་བཞིན་གཤེགས་པ་ཐམས་ཅད་ལ་བཀུར་སྟི་དང་། རིམ་གྲོ་དང་། མཆོད་པ་བྱེད་པར་འགྱུར་བས་བུ་མོ་རྣམ་དག་དད་པས་
བསྐལ་པ་བྱེ་བ་ཁྲག་ཁྲིག་བརྒྱད་ཁྲི་བཞི་སྟོང་འདས་པའི་འོག་ཏུ་འཇིག་རྟེན་གྱི་ཁམས་གློག་གི་འོད་ཅེས་བྱ་བར་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་འོད་ཟེར་གྱི་བཀོད་པ་ཞེས་བྱ་བར་འགྱུར་རོ། །བསྐལ་པའི་མིང་ནི་རྟག་པར་སྣང་བ་ཞེས་
བྱའོ། །དེ་བཞིན་གཤེགས་པ་དེའི་སྐུ་ཚེའི་ཚད་ནི་དགའ་ལྡན་གྱི་ལྷ་བཞིན་དུ། ཚེ་ལོ་སྟོང་ཕྲག་བཅུ་གཉིས་ཐུབ་པར་འགྱུར་རོ། །འཇིག་རྟེན་གྱི་ཁམས་དེ་ན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འབའ་ཞིག་གི་འཁོར་ཚད་མེད་དཔག་ཏུ་མེད་པ་དག་གིས་འཁོར་
བྱེད་པར་འགྱུར་རོ། །བུ་མོ་ལྔ་བརྒྱ་པོ་འདི་དག་ཀྱང་འཁོར་དེ་དག་གི་ནང་ན་གཙོ་བོ་མཆོག་བྱེད་པར་འགྱུར་ཏེ། ཇི་ལྟར་ད་ལྟར་ངའི་ཚེ་བྱང་ཆུབ་སེམས་དཔའ་འཇམ་དཔལ་ལ་སོགས་པ་དྲུག་ཅུ་པོ་འདི་དག་གཙོ་བོར་གྱུར་པ་བཞིན་ནོ། །ཀུན་དགའ་བོ་བུད་མེད་གང་ལ་ལ་
ཞིག་ཆོས་ཀྱི་རྣམ་གྲངས་འདི་ཐོས་ནས་ཡོངས་སུ་འཛིན་པར་བྱེད། ཀློག་པར་བྱེད། ཁ་ཏོན་དུ་འདོན་པར་བྱེད་ན་བུད་མེད་ཀྱི་ལུས་འདི་དག་གཏུགས་ནས་ཕྱིས་ཡང་ལེན་པར་མི་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་
འཚང་རྒྱ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བུ་མོ་རྣམ་དག་དད་པ་ལ་སོགས་པ་བུ་མོ་ལྔ་བརྒྱ་པོ་དེ་དག་དང་། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་རབ་ཏུ་དགའ་

ནས་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་བུ་མོ་རྣམ་དག་དད་པས་ཞུས་པའི་ལེའུ་སྟེ་བཞི་བཅུ་པ་རྫོགས་སོ།། །།འཕགས་པ་དཀོན་
མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་གཅིག་པ་སྟེ། འཕགས་པ་བྱམས་པས་ཞུས་པ་ལུང་བསྟན་པ། བམ་པོ་གཅིག་པ། རྒྱ་གར་སྐད་དུ། ཨཱརྱ་མཻ་ཏྲི་ཡ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ།
འཕགས་པ་བྱམས་པས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་བརྒ་ན་ཆུ་སྲིན་བྱིས་པ་གསོད་ལྟ་བུའི་རི་
འཇིགས་སུ་རུང་བའི་ནགས་རི་དགས་ཀྱི་ནགས་ན་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་མངོན་པར་ཤེས་པ་མངོན་པར་ཤེས་པ་གནས་བརྟན་ཉན་ཐོས་ཆེན་པོ་ཤ་སྟག་ལ། འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽ་ཌི་ནྱ་དང་། ཚེ་དང་ལྡན་པ་རྟ་ཐུལ་དང་།
ཚེ་དང་ལྡན་པ་རླངས་པ་དང་། ཚེ་དང་ལྡན་པ་མིང་ཆེན་དང་། ཚེ་དང་ལྡན་པ་བཟང་ལྡན་དང་། ཚེ་དང་ལྡན་པ་དྲི་མ་མེད་དང་། ཚེ་དང་ལྡན་པ་གང་པོ་དང་། ཚེ་དང་ལྡན་པ་བ་ལང་བདག་དང་། ཚེ་དང་ལྡན་པ་རི་དགས་མགོ་དང་། ཚེ་དང་ལྡན་པ་ལྟེང་རྒྱས་འོད་སྲུང་
དང་། ཚེ་དང་ལྡན་པ་ཆུ་ཀླུང་འོད་སྲུང་དང་། ཚེ་དང་ལྡན་པ་ག་ཡ་འོད་སྲུང་དང་། ཚེ་དང་ལྡན་པ་བྱིན་པ་འོད་སྲུང་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་དོན་ཡོད་རྒྱལ་པོ་དང་། ཚེ་དང་ལྡན་པ་བློ་གྲོས་བཟང་དང་། ཚེ་དང་ལྡན་པ་ཤཱ་རིའི་
བུ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་རི་རྒྱལ་དང་། ཚེ་དང་ལྡན་པ་དགའ་བོ་དང་། ཚེ་དང་ལྡན་པ་ཉེ་དགའ་དང་། ཚེ་དང་ལྡན་པ་ཀུན་དགའ་བོ་དང་། ཚེ་དང་ལྡན་པ་སྒྲ་གཅན་ཟིན་དང་། དེ་དག་ལ་སོགས་པ་དགེ་སློང་ལྔ་བརྒྱ་

ཙམ་དང་ཐབས་ཅིག་ཏུ་བཞུགས་སོ། །བྱམས་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་མངོན་པར་ཤེས་པ་ཁྲི་དང་ཡང་ཐབས་ཅིག་ལ་འདི་ལྟ་སྟེ། བྱང་ཆུབ་སེམས་དཔའ་བློ་གྲོས་འཕེལ་དང་། བྱང་ཆུབ་
སེམས་དཔའ་བློ་གྲོས་བཟང་དང་། བྱང་ཆུབ་སེམས་དཔའ་བློ་གྲོས་བརྟན་དང་། བློ་གྲོས་ཡངས་པ་དང་། སྤོབས་པ་བརྩེགས་དང་། སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་དང་། ཏོག་དཔལ་དང་། འཇམ་དཔལ་དང་། མངོན་པར་ཤེས་པའི་མེ་
ཏོག་ཤིན་ཏུ་རྒྱས་པ་དང་། དམིགས་པ་མེད་པ་ཡིད་ལ་བྱེད་པ་དང་། དད་ལྡན་དང་། རིན་པོ་ཆེའི་ཏོག་དང་། དབང་པོའི་ལྷ་དང་། ཆུ་ལྷ་དང་། སྒྲ་དབྱངས་སྙན་དང་། ཞིང་རྣམ་པར་སྦྱོང་དང་། ལྷུན་པོ་བརྩེགས་དང་། སྤོབས་པ་ཕུན་སུམ་ཚོགས་དང་། དབང་པོའི་
དཔལ་དང་། ས་འཛིན་དང་། སེམས་ཅན་དམྱལ་བ་སྐེམས་དང་། ངན་སོང་སྤོང་དང་། རིན་ཆེན་ཟེ་བ་ཅན་དང་དེ་དག་ལ་སོགས་པ་བྱང་ཆུབ་སེམས་དཔའ་ཁྲི་དང་ཐབས་ཅིག་སྟེ། དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་
བལྟས་ནས་ཆོས་སྟོན་ཏོ། །དེའི་ཚེ་བྱང་ཆུབ་སེམས་དཔའ་བྱམས་པ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ །དེ་ནས་བྱང་ཆུབ་སེམས་དཔའ་བྱམས་པས་བྱང་ཆུབ་སེམས་དཔའི་འཁོར་ཆེན་པོ་དེ་འདུས་པར་རིག་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་
ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་

དྲི་བ་ལུང་བསྟན་པའི་ཕྱིར། དེ་བཞིན་གཤེགས་པས་རྟག་ཏུ་སྐབས་ཕྱེས། བྱམས་པ་ཁྱོད་ཅི་དང་ཅི་འདོད་པ་དྲིས་ཤིག་དང་། དྲིས་པ་དེ་དང་དེའི་ལུང་བསྟན་པས། སེམས་རངས་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་
པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཆོས་དུ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་སུག་པར་མཆི་བར་མི་འགྱུར་ལ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་འཚང་རྒྱ་བར་འགྱུར་བ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་ཁྱོད་ནི་འདི་ལྟར་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་
བསྐྱེད་པ། ཚེ་རབས་དྲན་པ། སྤོབས་པ་ཐོབ་པ། ཡུན་རིང་པོ་ནས་ཚངས་པར་སྤྱོད་པ་སྤྱད་པ་སྟེ། བྱམས་པ་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་།
ཕན་པ་དང་། བདེ་བ་དང་། བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་། རིགས་ཀྱི་བུ་མོ་ད་ལྟར་གྱི་དང་། མ་འོངས་པ་རྣམས་ཡོངས་སུ་གཟུང་བའི་ཕྱིར་ཞུགས་ནས་ཁྱོད་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་ལེགས་སོ་ལེགས་སོ། །བྱམས་པ་
དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བྱམས་
པ་བྱང་ཆུབ་སེམས་དཔའ་ཆོས་གཅིག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། ཆོས་གཅིག་གང་ཞེ་ན། འདི་ལྟ་སྟེ། ལྷག་པའི་བསམ་པ་ཕུན་

སུམ་ཚོགས་པའི་བྱང་ཆུབ་ཀྱི་སེམས་ཏེ། བྱམས་པ་བྱང་ཆུབ་སེམས་དཔའ་ཆོས་གཅིག་པོ་དེ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ཆོས་གཉིས་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། གཉིས་གང་ཞེ་ན། འདི་ལྟ་སྟེ།
ཞི་གནས་ཡོངས་སུ་ཚོལ་བ་དང་། ལྷག་མཐོང་ལ་མཁས་པ་སྟེ། བྱང་ཆུབ་སེམས་དཔའ་ཆོས་གཉིས་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ཆོས་གསུམ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། གསུམ་གང་ཞེ་ན། འདི་ལྟ་
སྟེ། སྙིང་རྗེ་ཆེན་པོ་ཐོབ་པ་དང་། སྟོང་པ་ཉིད་ཀྱི་ཆོས་ངེས་པར་སེམས་པ་དང་། དེས་ཀྱང་རློམ་སེམས་མི་བྱེད་པ་སྟེ། བྱམས་པ་བྱང་ཆུབ་སེམས་དཔའ་ཆོས་གསུམ་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ། མྱུར་
དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་འཚང་རྒྱ་སྟེ། བཞི་གང་ཞེ་ན། འདི་ལྟ་སྟེ། ཚུལ་ཁྲིམས་ལ་གནས་པ་ཡིན། ཆོས་ཐམས་ཅད་ལ་སོམ་ཉི་མེད་པ་ཡིན། དགོན་པ་ལ་མངོན་པར་དགའ་བ་ཡིན། ཡང་དག་པར་ཞུགས་ཤིང་ཡང་དག་པར་བླངས་པ་ལས་མི་གཡོ་བ་ཡིན་

ཏེ། བྱམས་པ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་
སེམས་དཔའ་ཆོས་ལྔ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། ལྔ་གང་ཞེ་ན། འདི་ལྟ་སྟེ། སྟོང་པ་ཉིད་ལ་གནས་པ་དང་། གཞན་དག་གི་
འཁྲུལ་པ་མི་ཚོལ་བ་དང་། བདག་ལྟ་རྟོག་པ་དང་། ཆོས་ལ་མངོན་པར་དགའ་བ་དང་། གཞན་ལ་ཕན་འདོགས་པར་ཞུགས་པ་ཡིན་ཏེ། བྱམས་པ་བྱང་ཆུབ་སེམས་དཔའ་ཆོས་ལྔ་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་
མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ཆོས་དྲུག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དྲུག་གང་ཞེ་ན། འདི་ལྟ་སྟེ། བརྐམ་པ་མེད་པ་ཡིན། སྡང་བ་མེད་པ་ཡིན། རྨོངས་པ་མེད་པ་ཡིན། དྲིས་མ་ཐག་ཏུ་ཡང་དག་པ་ཇི་ལྟ་བ་བཞིན་དུ་ལན་ལྡོན་པ་ཡིན། བསྙེན་པར་དཀའ་བ་མེད་པ་ཡིན། སྟོང་པ་
ཉིད་སྤྱོད་ཡུལ་བ་ཡིན་ཏེ། བྱམས་པ་བྱང་ཆུབ་སེམས་དཔའ་ཆོས་དྲུག་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་
ཡང་བྱང་ཆུབ་སེམས་དཔའ་ཆོས་བདུན་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བདུན་གང་ཞེ་ན། འདི་ལྟ་སྟེ། དྲན་པ་ལ་མཁས་པ་

ཡིན། ཆོས་ལ་མཁས་པ་ཡིན། བརྩོན་འགྲུས་བརྩམས་པ་ཡིན། དགའ་བ་ཐོབ་པ་ཡིན། ཤིན་ཏུ་སྦྱངས་པ་དང་ལྡན་པ་ཡིན། ཏིང་ངེ་འཛིན་ལ་མཁས་པ་ཡིན། ཤེས་རབ་ཀྱིས་རབ་ཏུ་དབྱེ་བ་ལ་མཁས་པ་ཡིན་ཏེ། བྱམས་པ་བྱང་
ཆུབ་སེམས་དཔའ་ཆོས་བདུན་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་
ཆོས་བརྒྱད་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བརྒྱད་གང་ཞེ་ན། འདི་ལྟ་སྟེ། ཡང་དག་པའི་ལྟ་བ་ཅན་ཡིན། ཡང་དག་པའི་རྟོག་པ་
ཅན་ཡིན། ཡང་དག་པའི་ངག་ཅན་ཡིན། ཡང་དག་པའི་ལས་ཀྱི་མཐའ་ཅན་ཡིན། ཡང་དག་པའི་འཚོ་བ་ཅན་ཡིན། ཡང་དག་པའི་རྩོལ་བ་ཅན་ཡིན། ཡང་དག་པའི་དྲན་པ་ཅན་ཡིན། ཡང་དག་པའི་ཏིང་ངེ་འཛིན་ཅན་ཡིན་ཏེ། བྱམས་པ་ཆོས་བརྒྱད་པོ་དེ་དག་དང་
ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ཆོས་དགུ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་
པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དགུ་གང་ཞེ་ན། འདི་ལྟ་སྟེ། བྱམས་པ་འདི་ལ་བྱང་ཆུབ་སེམས་དཔའ་ནི་འདོད་པ་དག་ལས་དབེན་པ། སྡིག་པ་མི་དགེ་བའི་ཆོས་རྣམས་
ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་བསྒྲུབས་ཏེ་གནས་སོ། །རྟོག་པ་དང་དཔྱོད་པ་དང་བྲལ་ཞིང་ནང་རབ་ཏུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ།

དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་བསྒྲུབས་ཏེ་གནས་སོ། །དགའ་བའི་འདོད་ཆགས་དང་བྲལ་བས། བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་ལ། འཕགས་
པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ། །ཞེས་བརྗོད་པ་སྟེ། དགའ་བ་མེད་པ་བསམ་གཏན་གསུམ་པ་བསྒྲུབས་ཏེ་གནས་སོ། །བདེ་བ་ཡང་སྤངས་ཏེ། སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་ཡིད་མི་བདེ་བ་ཡང་
ནུབ་པས་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ། བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་བསྒྲུབས་ཏེ་གནས་སོ། །རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ། ཐོགས་པའི་འདུ་ཤེས་རྣམས་
ནུབ་པར་གྱུར་ཅིང་སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་བསྒྲུབས་ཏེ་གནས་སོ། །རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། རྣམ་པར་ཤེས་པ་
མཐའ་ཡས་སོ་སྙམ་ནས་རྣམ་ཤེས་མཐའ་ཡས་སྐྱེ་མཆེད་བསྒྲུབས་ཏེ་གནས་སོ། །རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅི་ཡང་མེད་དོ་སྙམ་ནས་ཅི་ཡང་མེད་པའི་སྐྱེ་མཆེད་བསྒྲུབས་ཏེ་གནས་སོ། །རྣམ་པ་ཐམས་ཅད་དུ་ཅི་
ཡང་མེད་པའི་སྐྱེ་མཆེད་ལས་ཡང་དག་པར་འདས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་བསྒྲུབས་ཏེ་གནས་སོ། །རྣམ་པ་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་ནས་འདུ་ཤེས་དང་ཚོར་བ་འགོག་པ་བསྒྲུབས་ནས་གནས་པ་སྟེ།
བྱམས་པ་བྱང་ཆུབ་སེམས་དཔའ་ཆོས་དགུ་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་

ཆོས་བཅུ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བཅུ་གང་ཞེ་ན། འདི་ལྟ་སྟེ། རྡོ་རྗེ་ལྟ་བུའི་ཏིང་ངེ་འཛིན་དང་ལྡན་
པ་ཡིན། གནས་དང་གནས་མ་ཡིན་པ་ལ་མངོན་པར་བརྩོན་པའི་ཏིང་ངེ་འཛིན་དང་ལྡན་པ་ཡིན། ཐབས་ཀྱིས་འགྲོ་བའི་ཏིང་ངེ་འཛིན་དང་ལྡན་པ་ཡིན། རྣམ་པར་སྣང་བྱེད་ཀྱི་ཏིང་ངེ་འཛིན་དང་ལྡན་པ་ཡིན། ཀུན་ནས་སྣང་བའི་ཏིང་ངེ་འཛིན་དང་ལྡན་པ་ཡིན།
ཀུན་དུ་གསལ་བའི་ཏིང་ངེ་འཛིན་དང་ལྡན་པ་ཡིན། རིན་ཆེན་ཟླ་བའི་ཏིང་ངེ་འཛིན་དང་ལྡན་པ་ཡིན། ཟླ་བ་སྒྲོན་མའི་ཏིང་ངེ་འཛིན་དང་ལྡན་པ་ཡིན། ཉོན་མོངས་པ་མེད་པའི་ཏིང་ངེ་འཛིན་དང་ལྡན་པ་ཡིན། རྒྱལ་མཚན་གྱི་རྩེ་མོའི་དཔུང་རྒྱན་གྱི་ཏིང་ངེ་འཛིན་དང་
ལྡན་པ་ཡིན་ཏེ། བྱམས་པ་བྱང་ཆུབ་སེམས་དཔའ་ཆོས་བཅུ་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་
ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སྔོན་ཅད་སྦྱིན་པ་སྦྱིན་མཛད་པ། །སྡུག་པའི་བུ་དང་ཟས་དང་སྐོམ། །མགོ་དང་མིག་ཀྱང་བཏང་མཛད་དེ། །སངས་རྒྱས་
སྦྱིན་ཀུན་ཕ་རོལ་ཕྱིན། །གཡག་རྔ་བཞིན་དུ་ཡུན་རིང་ནས། །ཁྱོད་ཀྱིས་ཚུལ་ཁྲིམས་མ་ཉམས་བསྲུངས། །ཁྲིམས་ཀྱིས་ཁྱོད་འདྲ་མ་མཆིས་ཏེ། །སངས་རྒྱས་ཁྲིམས་ལེགས་ཕ་རོལ་ཕྱིན། །བཟོད་པའི་སྟོབས་ནི་བསྐྱེད་མཛད་ནས། །བྱིས་པས་ནོངས་པ་བགྱིས་པ་

བཟོད། །བཟོད་པའི་སྟོབས་རྣམས་ཀུན་དང་ལྡན། །སངས་རྒྱས་བཟོད་ལེགས་ཕ་རོལ་ཕྱིན། །བརྩོན་འགྲུས་སྟོབས་ནི་བསྐྱེད་མཛད་ནས། །ཞི་བདེ་བླ་ན་མེད་པ་བརྙེས། །བརྩོན་འགྲུས་སྟོབས་ཀྱིས་སྟོབས་དང་ལྡན། །སངས་རྒྱས་བརྩོན་ལེགས་ཕ་རོལ་ཕྱིན། །
སྡིག་པ་ཐམས་ཅད་བསྲེག་མཛད་ནས། །འདྲེན་པ་སྐྱེས་ཆེན་བསམ་གཏན་དགྱེས། །བསམ་གཏན་སྟོབས་ཀྱིས་སྟོབས་དང་ལྡན། །སངས་རྒྱས་བསམ་ལེགས་ཕ་རོལ་ཕྱིན། །ཆོས་རྣམས་དེ་དག་རང་བཞིན་སྟོང་། །ངོ་བོ་ཉིད་ཀྱིས་གང་མི་སྐྱེ། །ཤེས་རབ་ཀྱིས་
ནི་ཕ་རོལ་གཤེགས། །སངས་རྒྱས་ཤེས་ལེགས་ཕ་རོལ་ཕྱིན། །མཁྱེན་ཆེན་བྱང་ཆུབ་ཤིང་དྲུང་དུ། །སྡེར་བཅས་བདུད་ནི་ཁྱོད་ཀྱིས་བཏུལ། །དོན་གྱི་མཆོག་ཀྱང་བརྙེས་པར་གྱུར། །སངས་རྒྱས་བདུད་ཀྱི་ཚོགས་ངན་འཇོམས། །སྐྱེས་ཆེན་བཱ་ར་ཎཱ་སིར་ནི། །
ཆོས་ཀྱི་འཁོར་ལོ་རབ་ཏུ་བསྐོར། །མུ་སྟེགས་ཚོགས་ངན་སྐྲག་པར་མཛད། །སངས་རྒྱས་མུ་སྟེགས་ཅན་ཚོགས་འཇོམས། །ཤེས་རབ་ཆེན་པོ་བླ་ན་མེད། །ཀུན་ནས་ཟླ་དཔེ་ཡོང་མ་མཆིས། །དཀོན་མཆོག་ཆོས་དེ་སྟོན་པར་མཛད། །འདྲེན་པ་སངས་རྒྱས་འོད་མཛད་
ལགས། །སྦྱིན་པ་དང་ནི་ཁྲིམས་སྟོབས་དང་། །བཟོད་བརྩོན་ཁྱོད་དང་འདྲ་མ་མཆིས། །ཀུན་གྱི་ཕ་རོལ་ཕྱིན་པར་གྱུར། །སངས་རྒྱས་ཡོན་ཏན་མང་པོས་འཕགས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བཅོམ་ལྡན་འདས་ལ་ཚུལ་དང་འདྲ་
བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་ཕྱོགས་གཅིག་ཏུ་འདུག་གོ །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་འདི་ལྟར་
སྤོབས་པ་ཕུན་སུམ་ཚོགས་པ་དང་། འདི་ལྟར་ཤིན་ཏུ་རྣམ་པར་ངེས་པའི་ཚིག་གིས་ཆོས་སྟོན་པ་དང་། འདི་ལྟར་ཚིག་དང་ཡི་གེ་མཚུངས་པའི་ཆོས་སྟོན་པ་དང་། འདི་ལྟར་ཟབ་མོའི་ཚིག་གིས་ཆོས་སྟོན་པ་དང་། འདི་ལྟར་ལེགས་པར་འབྲེལ་པའི་ཚིག་གིས་ཆོས་སྟོན་པ་

དང་། དྲན་པའི་ཚིག་གིས་ཆོས་སྟོན་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། བྱང་ཆུབ་སེམས་དཔའ་བྱམས་པ་སྤོབས་པ་ཕུན་སུམ་ཚོགས་པ་དང་ལྡན་ཞིང་བྱང་ཆུབ་སེམས་
དཔའ་བྱམས་པ་ཤིན་ཏུ་རྣམ་པར་ངེས་པའི་ཚིག་གིས་ཆོས་སྟོན་པ་ནས་རྗེས་སུ་དྲན་པའི་ཚིག་གི་བར་གྱིས་ཆོས་སྟོན་པ་ནི་ངོ་མཚར་ཏོ། །ཀུན་དགའ་བོ་བྱང་ཆུབ་སེམས་དཔའ་བྱམས་པ་ནི་ད་ལྟར་ང་ལ་ཚུལ་དང་འདྲ་བའི་ཚིགས་སུ་བཅད་པ་དག་གིས་བསྟོད་པར་ཡང་མ་ཟད་དེ། དེ་ཅིའི་
ཕྱིར་ཞེ་ན། ཀུན་དགའ་བོ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བཅུར་ཚང་བར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ།
སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སྣང་བས་རྣམ་པར་རོལ་པའི་མངོན་པར་ཤེས་པ་ཞེས་བྱ་བ་འཇིག་རྟེན་དུ་བྱུང་སྟེ། དེའི་ཚེ་བྲམ་ཟེའི་ཁྱེའུ་བཟང་དག་ཅེས་བྱ་བ་གཟུགས་བཟང་བ། མཛེས་པ།
བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་ཡོད་པ་དེ་སྐྱེད་མོས་ཚལ་དུ་འགྲོ་སྟེ། གྲོང་བར་དུ་ཕྱིན་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བས་རྣམ་པར་རོལ་པའི་མངོན་པར་ཤེས་པ་མཛེས་པ།
དད་པར་བྱ་བ། དབང་པོ་ཞི་བ། ཐུགས་ཞི་བ། དུལ་བ་དང་ཞི་གནས་ཀྱི་མཆོག་བརྙེས་པ། དུལ་བ་དང་ཞི་གནས་ཀྱི་དམ་པ་བརྙེས་པ། དབང་པོ་བསྲུངས་པ། གླང་པོ་ཆེ་དབང་པོ་ཐུལ་བ་ལྟ་བུ། མཚོ་ལྟར་དང་ཞིང་རྙོག་པ་མེད་ལ་གསལ་བ། སྐྱེས་བུ་ཆེན་པོའི་
མཚན་སུམ་ཅུ་རྩ་གཉིས་པོ་དག་གིས་སྐུ་ལེགས་པར་བརྒྱན་པ། དཔེ་བྱད་བཟང་པོ་བརྒྱད་ཅུ་པོ་དག་གིས་སྐུ་རྣམ་པར་སྤྲས་པ། ཤིང་སཱ་ལའི་རྒྱལ་པོ་མེ་ཏོག་ཤིན་ཏུ་རྒྱས་པ་འདྲ་བ། རིའི་རྒྱལ་པོ་རི་རབ་ལྟར་མངོན་པར་འཕགས་པ། ཞལ་ཟླ་བའི་དཀྱིལ་འཁོར་ལྟར་ཞི་བ།

ཉི་མའི་དཀྱིལ་འཁོར་ལྟར་ལྷམ་མེ་ལྷན་ནེ་ལྷང་ངེ་བ། ཤིང་ནྱ་གྲོ་དྷ་ལྟར་ཆུ་ཞེང་གབ་པ་འོད་འབར་བའི་སྐུ་དཔལ་ཆེན་པོས་འབར་བ་མཐོང་ངོ་། །མཐོང་ནས་ཀྱང་དེ་བཅོམ་ལྡན་འདས་ལ་སེམས་དད་པར་གྱུར་ཏོ། །དེ་སེམས་དད་ནས་འདི་སྙམ་དུ་སེམས་ཏེ། ཨ་ལ་ལ་དེ་བཞིན་
གཤེགས་པའི་སྐུ་འདི་རྣམ་པར་སྤྲས་ཤིང་ཁ་དོག་དང་གཟི་བརྗིད་དང་། དཔལ་དང་མཚན་རྣམས་ཀྱིས་འབར་ཞིང་ལྷམ་མེ་ལྷན་ནེ་ལྷང་ངེ་བ་ངོ་མཚར་ཏོ། །སྙམ་མོ་དེ་ནས་བྲམ་ཟེའི་ཁྱེའུ་བཟང་དག་གིས་འདི་སྐད་ཅེས་སྨྲས་ཏེ། ཨ་ལ་ལ་བདག་ཀྱང་མ་འོངས་པའི་དུས་ན་ལུས་
འདི་འདྲ་བ་དང་ལྡན་པར་གྱུར་ཅིག་ཁ་དོག་དང་། གཟི་བརྗིད་དང་། དཔལ་དང་། མཚན་རྣམས་ཀྱིས་འདི་ལྟར་འབར་ཞིང་ལྷམ་མེ་ལྷན་ནེ་ལྷང་ངེ་བར་གྱུར་ཅིག་ཅེས་དེས་སྨོན་ལམ་དེ་སྐད་བཏབ་ནས་ས་ལ་ཉལ་ཏེ་འདི་སྙམ་དུ་བསམས་སོ། །གལ་ཏེ་བདག་ཀྱང་མ་འོངས་པའི་
དུས་ན་འདི་ལྟ་བུའི་ལུས་དང་ལྡན་པར་གྱུར་ཏེ། ཁ་དོག་དང་། གཟི་བརྗིད་དང་། དཔལ་དང་། མཚན་རྣམས་ཀྱིས་འབར་ཞིང་ལྷམ་མེ་ལྷན་ནེ་ལྷང་ངེར་འགྱུར་ཞེ་ན། དེ་བཞིན་གཤེགས་པའི་ཞབས་བདག་གི་ལུས་ལ་རེག་པར་གྱུར་ཅིག་སྙམ་མོ། །ཀུན་དགའ་བོ་དེ་
ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བས་རྣམ་པར་རོལ་པའི་མངོན་པར་ཤེས་པ་དེས་བྲམ་ཟེའི་ཁྱེའུ་བཟང་དག་གི་ལྷག་པའི་བསམ་པ་མཁྱེན་ནས་བྲམ་ཟེའི་ཁྱེའུ་བཟང་དག་ག་ལ་བ་དེར་གཤེགས་ཏེ། བྲམ་ཟེའི་ཁྱེའུ་
བཟང་དག་ལ་ཞབས་ཀྱིས་རེག་པར་མཛད་དོ། །དེ་བཞིན་གཤེགས་པ་སྣང་བས་རྣམ་པར་རོལ་པའི་མངོན་པར་ཤེས་པ་དེས་བྲམ་ཟེའི་ཁྱེའུ་བཟང་དག་ལ་ཞབས་ཀྱིས་རེག་པར་མཛད་མ་ཐག་ཏུ། དེ་ནས་དེའི་ཚེ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཀུན་དགའ་
བོ་དེ་ནས་དེ་བཞིན་གཤེགས་པ་སྣང་བས་རྣམ་པར་རོལ་པའི་མངོན་པར་ཤེས་པ་དེས་སྣམ་ལོགས་སུ་གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་གང་གིས་ཀྱང་བྲམ་ཟེའི་ཁྱེའུ་བཟང་དག་དེའི་ལུས་ལ་རྐང་པས་མ་རྫི་ཤིག །དེ་ཅིའི་ཕྱིར་ཞེ་ན། བྱང་

ཆུབ་སེམས་དཔའ་སེམས་དཔའ་ཆེན་པོ་འདི་མི་སྐྱེ་བའི་ཆོས་ལ་བཟོད་པ་ཐོབ་པའི་ཕྱིར་རོ། །དེ་ནས་དེ་ཉིད་ཀྱི་ཚེ་བྲམ་ཟེའི་ཁྱེའུ་བཟང་དག་གིས་ལྷའི་མིག་དང་། ལྷའི་རྣ་བ་དང་། ཕ་རོལ་གྱི་སེམས་ཤེས་པ་དང་། སྔོན་གྱི་གནས་རྗེས་སུ་
དྲན་པ་མངོན་སུམ་དུ་བྱ་བའི་ཤེས་པ་ཐོབ་བོ། །རྫུ་འཕྲུལ་ཡང་མངོན་པར་བསྒྲུབས་སོ། །དེས་དེ་བཞིན་གཤེགས་པ་སྣང་བས་རྣམ་པར་རོལ་པའི་མངོན་པར་ཤེས་པའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་པ་དག་གིས་ཀྱང་མངོན་པར་བསྟོད་དོ། །
ཕྱོགས་དང་ཕྱོགས་མཚམས་རྣམས་སུ་བསྐོར་ཏེ་བཙལ་བགྱིས་ཀྱང་། །འཇིག་རྟེན་དག་ན་མི་དབང་ཁྱོད་འདྲ་ཡོད་མ་མཆིས། །འགྲོ་བ་ཀུན་ན་རྫོགས་པའི་སངས་རྒྱས་མངོན་པར་འཕགས། །རྣམ་པར་འདྲེན་པ་རང་བྱུང་ཁྱོད་ལ་བདག་ཕྱག་འཚལ། །དཔེར་ན་
བར་སྣང་ན་ནི་ཉི་མ་ལྷན་ནེ་ལྟར། །ཕྱོགས་དང་ཕྱོགས་མཚམས་ཀུན་གྱི་འཇིག་རྟེན་ཁམས་རྣམས་ན། །འཇིག་རྟེན་འདི་དག་ཐམས་ཅད་འོད་ཀྱིས་ལྷམ་མེར་གྱུར། །སངས་རྒྱས་ཡོན་ཏན་གཟི་མངའ་ཁྱོད་ལ་བདག་ཕྱག་འཚལ། །ཇི་ལྟར་སེང་གེ་ནགས་ཁྲོད་དག་ན་
སྒྲ་སྒྲོགས་པ། །ཝ་ཚོགས་ཕལ་ཆེན་ཐམས་ཅད་ཟིལ་གྱིས་གནོན་པར་བགྱིད། །དེ་ལྟར་མི་ཡི་དམ་པ་མཐུ་ཆེན་མངའ་བ་ཡང་། །མུ་སྟེགས་ཅན་མང་འདུས་པ་ཐམས་ཅད་ཟིལ་གྱིས་གནོན། །བདེ་བར་གཤེགས་པ་སྨིན་མཚམས་བར་གྱི་མཛོད་སྤུ་དཀར། །
དངུལ་དང་ཁ་བའི་ཚོགས་བཞིན་མཐའ་ཡས་གཟི་བརྗིད་ཅན། །དེས་ནི་འཇིག་རྟེན་འདི་དག་ཐམས་ཅད་སྣང་བར་བགྱིས། །འཇིག་རྟེན་ཀུན་ན་སངས་རྒྱས་ཁྱོད་ནི་མི་མཉམ་མཉམ། །སྐྱེས་བུ་ཁྱུ་མཆོག་ཞབས་ལ་ལྷ་ཡི་འཁོར་ལོ་མངའ། །གསལ་ཞིང་མཛེས་ལ་
རྩིབས་སྟོང་ཚང་ཞིང་མུ་ཁྱུད་འཁོར། །དེ་དག་གིས་ནི་རི་དང་ནགས་བཅས་ས་འདི་རྣམས། །རབ་ཏུ་གཡོ་བགྱིད་ཐུབ་པ་གང་ཟག་མཚུངས་མེད་པ། །ཉོན་མོངས་ཤས་ཆེན་དོར་བར་བགྱི་བ་ཐམས་ཅད་བོར། །འཕགས་པ་ངེས་པར་འབྱིན་པའི་ལམ་ནི་རབ་ཏུ་བརྙེས། །

ནོར་རྣམས་ཀུན་དང་ལྡན་ཞིང་ཡོན་ཏན་རྣམས་ཀྱིས་ཕྱུག །བསམ་པ་བཞིན་དུ་འཕགས་པའི་ནོར་རྣམས་བཀོད་པ་མཛད། །ས་དང་མཚུངས་ཤིང་སྦྱིན་པའི་གནས་གྱུར་མཚུངས་མ་མཆིས། །ཡོན་ཏན་ཀུན་ལ་མངའ་བརྙེས་ཚུལ་ཁྲིམས་རྣམ་དག་པ། །ཇི་ལྟར་
ནམ་མཁར་ལག་པ་མི་ཐོགས་མི་ཆགས་ལྟར། །འཇིག་རྟེན་དག་ན་ཁྱོད་ལ་རྗེས་ཆགས་ཁྲོ་མི་མངའ། །བཟོད་པ་ཟད་ཀྱིས་གཏུགས་པ་དོན་དང་ཆོས་རྣམས་ཀུན། །སྙིང་པོ་མ་མཆིས་པ་དང་གསོབ་དང་གསོག་ཏུ་མཁྱེན། །སྲིད་པའི་འགྲོ་བ་ཐམས་ཅད་དག་ན་
གང་རྣམས་ལ། །རློམ་སེམས་འགྱུར་བའི་སེམས་ཅན་སྲོག་དང་དངོས་མ་བརྙེས། །ཁམས་དང་སྤྱོད་པ་དག་དང་སྦྱོར་དང་བསམ་པ་མཁྱེན། །རྨད་དུ་བྱུང་དང་རྣམ་པར་འབྱེད་མཛད་སྒྲོན་མར་གྱུར། །ཆུ་བོ་ཆེན་པོས་དེད་པའི་འགྲོ་བ་གཟིགས་གྱུར་ནས། །སྔོན་
ཆད་བརྩོན་འགྲུས་སྟོབས་བརྟན་མཐུ་ནི་བསྐྱེད་པ་མཛད། །སྐྱེ་བ་སྤངས་ཤིང་ཉོན་མོངས་ཞི་བའི་ཐུགས་དང་ལྡན། །ཐུགས་རྒྱ་ཆེན་པོ་སྐྱེ་དང་རྒ་ཤི་མཐའ་མར་འབྱིན། །ནམ་མཁའི་དཀྱིལ་དང་མཚུངས་པར་ཆགས་པ་མི་མངའ་རྒྱུ། །འཇིག་རྟེན་ཆོས་ཀྱིས་མི་
གོས་འཇིག་རྟེན་གསུམ་ན་རྒྱུ། །བདག་ཉིད་ཆེན་པོ་ཤེས་རབ་ཀྱིས་ནི་སྣང་བར་མཛད། །མུན་པ་མུན་གནག་གྱུར་པ་ཐམས་ཅད་རྣམ་པར་སེལ། །འདོད་ཆགས་རྡུལ་ཞི་མཛད་ཅིང་ཞེ་སྡང་གཏི་མུག་གི །དྲི་མ་སྣ་ཚོགས་མུན་བསལ་ཁྱོད་ལ་ཕྱག་འཚལ་ལོ། །ཀུན་
དགའ་བོ་དེ་ཚུན་ཆད་བྲམ་ཟེའི་ཁྱེའུ་བཟང་དག་དེའི་རྫུ་འཕྲུལ་རྣམས་སམ། མངོན་པར་ཤེས་པ་རྣམས་ཡོངས་སུ་ཉམས་པར་མ་གྱུར་ཏོ། །ཀུན་དགའ་བོ་དེའི་ཚེ་དེའི་དུས་ན་བྲམ་ཟེའི་ཁྱེའུ་བཟང་དག་ཅེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་དོགས་ཤིང་ཡིད་
གཉིས་ཟ་འམ། ཐེ་ཚོམ་ཟ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་ཉིད་དེའི་ཚེ་དེའི་དུས་ན་བྲམ་ཟེའི་ཁྱེའུ་བཟང་དག་ཅེས་བྱ་བར་གྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་

པའི་སངས་རྒྱས་སྣང་བས་རྣམ་པར་རོལ་པའི་མངོན་པར་ཤེས་པ་དེ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །
བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་གལ་ཏེ་ཡུན་རིང་པོ་དེ་སྲིད་ནས་མི་སྐྱེ་བའི་ཆོས་ལ་བཟོད་པ་ཐོབ་པ་ལགས་ན། ཅིའི་སླད་དུ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས།
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་བྱང་ཆུབ་སེམས་དཔའ་རྣམས་ཀྱི་བཀོད་པ་དང་ཡོངས་སུ་གཟུང་བ་ནི་གཉིས་པོ་འདི་དག་སྟེ། གཉིས་གང་ཞེ་ན། སེམས་ཅན་
བཀོད་པ་དང་སེམས་ཅན་ཡོངས་སུ་གཟུང་བ་དང་། ཞིང་བཀོད་པ་དང་ཞིང་ཡོངས་སུ་གཟུང་བ་དང་། གཉིས་པོ་འདི་དག་ཡིན་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་ཞིང་བཀོད་པ་རྣམ་པར་སྦྱངས་
ཤིང་ཡོངས་སུ་གཟུང་བ་ཡོངས་སུ་བཟུང་ངོ་། །ཀུན་དགའ་བོ་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། ངས་ནི་སེམས་ཅན་བཀོད་པ་རྣམ་པར་སྦྱངས། སེམས་ཅན་ཡོངས་སུ་གཟུང་བ་ཡོངས་སུ་བཟུང་། ཞིང་བཀོད་པ་ཡང་རྣམ་པར་སྦྱངས། ཞིང་
ཡོངས་སུ་གཟུང་བ་ཡང་ཡོངས་སུ་བཟུང་ངོ་། །ཀུན་དགའ་བོ་ངས་མངོན་པར་ཤེས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཡང་དག་པར་ཞུགས་ནས་བསྐལ་པ་བཞི་བཅུ་རྩ་གཉིས་ལོན་པའི་འོག་ཏུ་ངས་གདོད་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་སེམས་བསྐྱེད་དེ། ཀུན་དགའ་བོ་བསྐལ་པ་བཟང་པོ་འདི་འདས་ནས་བསྐལ་པ་དགུ་བཅུ་རྩ་བཞི་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་རིགས་པ་ལས། ཀུན་དགའ་བོ་ངས་བརྩོན་འགྲུས་འབར་བར་

བྱས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཀུན་དགའ་བོ་ངས་བརྩོན་འགྲུས་རླབས་པོ་ཆེས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །ཀུན་དགའ་
བོ་ཆོས་བཅུ་པོ་འདི་དག་གིས་ང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། བཅུ་གང་ཞེ་ན། བདོག་པ་ཕངས་པ་ཐམས་ཅད་ཡོངས་སུ་བཏང་བ་དང་། ཆུང་མ་ཕངས་པ་ཡོངས་སུ་བཏང་བ་དང་། བུ་ཕངས་པ་ཡོངས་
སུ་བཏང་བ་དང་། མགོ་ཕངས་པ་ཡོངས་སུ་བཏང་བ་དང་། མིག་ཕངས་པ་ཡོངས་སུ་བཏང་བ་དང་། རྒྱལ་སྲིད་ཕངས་པ་ཡོངས་སུ་བཏང་བ་དང་། ལོངས་སྤྱོད་ཕངས་པ་ཡོངས་སུ་བཏང་བ་དང་། ཁྲག་ཕངས་པ་ཡོངས་སུ་བཏང་བ་དང་། རུས་པ་དང་རྐང་
ཕངས་པ་ཡོངས་སུ་བཏང་བ་དང་། ཡན་ལག་ཕངས་པ་ཐམས་ཅད་ཡོངས་སུ་བཏང་བས་ང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཀུན་དགའ་བོ་ཆོས་བཅུ་པོ་དེ་དག་གིས་ང་མྱུར་དུ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་གཞན་ཡང་ང་ཆོས་བཅུས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། བཅུ་གང་ཞེ་ན། ཀུན་དགའ་བོ་ང་ཚུལ་ཁྲིམས་ཀྱི་ཡོན་ཏན་གྱི་
ཆོས་ལ་གནས་ཏེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ང་བཟོད་པའི་སྟོབས་དང་ལྡན་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་
བོ་ང་བརྩོན་འགྲུས་འབར་བ་བརྩམས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ང་བསམ་གཏན་གྱི་ཡོན་ཏན་ལ་གནས་ཏེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་

པར་སངས་རྒྱས་སོ། །ཀུན་དགའ་བོ་ང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ཏེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ངས་སེམས་ཅན་ཐམས་ཅད་ཡོངས་སུ་མ་བཏང་བས་
མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ང་ཐབས་ལ་མཁས་པ་ལ་གནས་ཏེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ང་སེམས་ཅན་
ཐམས་ཅད་ལ་སེམས་སྙོམས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ངས་སྟོང་པ་ཉིད་ཀྱི་ཆོས་རྟོགས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །
ཀུན་དགའ་བོ་ངས་མཚན་མ་མེད་པ་དང་། སྨོན་པ་མེད་པའི་ཆོས་རྟོགས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཀུན་དགའ་བོ་ཆོས་བཅུ་པོ་དེ་དག་གིས་ང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ངས་ཚོར་བ་སྡུག་བསྔལ་བ་དྲག་པ་རྩུབ་པ་ཇི་ལྟ་བུ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ། གལ་ཏེ་ཁྱོད་ཀྱིས་ཤེས་སུ་ཟིན་ན་ཀུན་དགའ་བོ་
ཁྱོད་སྤོབས་པར་མི་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་སྔོན་བྱུང་བ་འདས་པའི་དུས་ན་རྒྱལ་བུ་གཞོན་ནུ་ནོར་ཐམས་ཅད་སྦྱིན་པ་ཞེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ། །རྒྱས་པ་མཆོག་དང་ལྡན་པ། རྒྱལ་
པོའི་འབྱོར་པ་ཆེན་པོ་དང་རྒྱལ་པོའི་མཐུ་ཆེན་པོ་དང་ལྡན་པ་ཞིག་ཡོད་པ་དེ་སྐྱེད་མོས་ཚལ་དུ་འགྲོ་སྟེ། གྲོང་བར་དུ་ཕྱིན་པ་དང་གནོད་པས་ཉེན་ཅིང་སྡུག་བསྔལ་ལ་ནད་ཚབས་ཆེན་པོས་བཏབ་པའི་མི་ཞིག་མཐོང་ངོ་། །མཐོང་ནས་ཀྱང་དེ་སྙིང་རྗེ་བར་གྱུར་ཏེ། དེ་མི་དེ་ག་ལ་བ་དེར་

སོང་སྟེ་ཕྱིན་ནས་འདི་སྐད་ཅེས་སྨྲས་སོ། །ཀྱེ་མི་ཁྱོད་ཅི་སྡུག་བསྔལ་ལམ། དེས་སྨྲས་པ། ལྷ་བདག་ནི་ནད་ཀྱིས་བཏབ་བོ། །དེས་སྨྲས་པ། ཀྱེ་མི་ཁྱོད་ཀྱི་ནད་ཅིས་ཞི་བར་འགྱུར། ཁྱོད་ལ་ཅི་སྦྱིན། དེས་འདི་སྐད་ཅེས་སྨྲས་སོ། །གལ་ཏེ་བདག་གིས་ལྷ་ཁྱོད་ཀྱི་ལུས་
ལས་ཇི་ཙམ་གྱིས་ཚིམ་པར་འགྱུར་བའི་ཁྲག་ཅིག་བཏུང་དུ་ཐོབ་པ་ལྟ་ན་བདག་གི་ནད་ཞི་བར་འགྱུར་རོ། །ཀུན་དགའ་བོ་དེ་ནས་རྒྱལ་བུ་གཞོན་ནུ་ནོར་ཐམས་ཅད་སྦྱིན་པ་དེས་མཚོན་རྣོན་པོ་བླངས་ཏེ། རང་གིས་ལུས་ཕུག་ནས་ཁྲག་གཟགས་ཏེ་མི་དེ་ལ་བཏུང་བར་བྱིན་ནོ། །
ཀུན་དགའ་བོ་མི་དེས་དེ་འཐུངས་མ་ཐག་ཏུ་མི་དེའི་ནད་སོས་པར་གྱུར་ཏོ། །ཀུན་དགའ་བོ་རྒྱལ་བུ་གཞོན་ནུ་ནོར་ཐམས་ཅད་སྦྱིན་པས་རང་གི་ལུས་ཕུག་སྟེ་ཁྲག་ཐམས་ཅད་གཟགས་ཀྱང་འགྱོད་པའི་སེམས་གཅིག་ཀྱང་མེད་དོ། །ཀུན་དགའ་བོ་དེའི་ཚེ་དེའི་དུས་ན་རྒྱལ་བུ་གཞོན་
ནུ་ནོར་ཐམས་ཅད་སྦྱིན་པར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཡིད་གཉིས་སམ། ཐེ་ཚོམ་ཟ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་བུ་གཞོན་ནུ་ནོར་ཐམས་ཅད་སྦྱིན་པ་ཞེས་བྱ་བར་གྱུར་ཏོ། །ཀུན་དགའ་བོ་རྒྱ་མཚོ་ཆེན་པོ་
བཞིའི་ཆུའི་ཕུང་པོ་ནི་ཚད་གཟུང་དུ་ཡོད་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཡོངས་སུ་ཚོལ་ཞིང་ངས་སྔོན་སེམས་ཅན་རྣམས་ལ་ཁྲག་བྱིན་པ་ནི་ཚད་མེད་དོ། །ཀུན་དགའ་བོ་སྔོན་བྱུང་བ་འདས་པའི་དུས་ན་རྒྱལ་བུ་གཞོན་ནུ་མེ་ཏོག་ཅེས་བྱ་བ་གཟུགས་བཟང་བ། མཛེས་
པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་མཐུ་ཆེན་པོ་དང་ལྡན་པ་ཞིག་ཡོད་པ་དེ་སྐྱེད་མོས་ཚལ་གྱི་སར་འགྲོ་སྟེ། གྲོང་བར་དུ་ཕྱིན་པ་དང་སྐྱ་རྦབ་ཀྱིས་ནད་ཀྱིས་བཏབ་པའི་མི་གནོད་པས་ཉེན་པ།
སྡུག་བསྔལ་བ། ནད་ཚབས་ཆེན་པོ་ཞིག་མཐོང་ངོ་། །དེས་དེ་མཐོང་ནས་ཀྱང་སྙིང་རྗེ་བར་གྱུར་ཏེ། དེ་མི་དེ་ག་ལ་བ་དེར་སོང་སྟེ། འདི་སྐད་ཅེས་སྨྲས་སོ། །ཀྱེ་ཅི་ཞིག་གིས་མི་ཁྱོད་ཀྱི་ནད་འདི་ཞི་བར་འགྱུར། ཁྱོད་ལ་ཅི་ཞིག་སྦྱིན། དེས་འདི་སྐད་ཅེས་སྨྲས་སོ། །

གལ་ཏེ་བདག་གིས་ལྷ་ཁྱོད་ཀྱི་ལུས་ལས་ཇི་ཙམ་གྱིས་ཚིམ་པར་འགྱུར་བའི་རྐང་ཞིག་ཐོབ་པ་ལྟ་ན་བདག་གི་ནད་ཞི་བར་འགྱུར་རོ། །དེ་ནས་རྒྱལ་བུ་གཞོན་ནུ་མེ་ཏོག་དེ་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས་བདེ་བ་དང་ཡིད་བདེ་བ་སྐྱེས་ཏེ།
རང་གི་ལུས་བརྡུངས་ནས་རྐང་བྲུས་ཏེ་མི་དེའི་ལུས་ལ་བསྐུས་སོ། །ཀུན་དགའ་བོ་བསྐུས་མ་ཐག་ཏུ་མི་དེའི་ནད་སོས་པར་གྱུར་ཏོ། །ཀུན་དགའ་བོ་རྒྱལ་བུ་གཞོན་ནུ་མེ་ཏོག་གིས་རང་གི་ལུས་བརྡུངས་ཏེ། རྐང་གཟགས་ཀྱང་སེམས་ལ་འགྱོད་པ་མེད་པར་གྱུར་ཏོ། །
ཀུན་དགའ་བོ་དེའི་ཚེ་དེའི་དུས་ན་རྒྱལ་བུ་གཞོན་ནུ་མེ་ཏོག་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཡིད་གཉིས་སམ་ཐེ་ཚོམ་ཟ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་བུ་གཞོན་ནུ་མེ་ཏོག་ཅེས་བྱ་བར་གྱུར་
ཏོ། །ཀུན་དགའ་བོ་རྒྱ་མཚོ་ཆེན་པོ་བཞིའི་ཆུའི་ཕུང་པོ་ནི་ཚད་བཟུང་དུ་ཡོད་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཡོངས་སུ་ཚོལ་ཞིང་ངས་སྔོན་སེམས་ཅན་རྣམས་ལ་རྐང་བྱིན་པ་ནི་ཚད་མེད་དོ། །ཀུན་དགའ་བོ་སྔོན་བྱུང་བ་འདས་པའི་དུས་ན་རྒྱལ་པོ་ཟླ་འོད་
ཅེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། རྒྱལ་པོའི་འབྱོར་པ་ཆེན་པོ་དང་རྒྱལ་པོའི་མཐུ་ཆེན་པོ་དང་ལྡན་པ་ཞིག་ཡོད་པ་དེ་སྐྱེད་མོས་ཚལ་དུ་འགྲོ་སྟེ། གྲོང་བར་དུ་ཕྱིན་པ་དང་། མི་མིག་མེད་པ་ལོང་བ། དབུལ་པོ།
བཀྲེན་པ། སློངས་མོ་བྱེད་པ་ཞིག་མཐོང་ངོ་། །མཐོང་ནས་ཀྱང་དེ་སྙིང་རྗེ་བར་གྱུར་ཏོ། །དེ་ནས་མི་དེ་རྒྱལ་པོ་ཟླ་འོད་ག་ལ་བ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །ལྷ་ཁྱོད་ནི་སྐྱིད་དོ། །ལྷ་ཁྱོད་ནི་དགྱེས་སོ། །བདག་ནི་སྡུག་བསྔལ་ལོ། །ལོང་ངོ་། །
མིག་མ་མཆིས་སོ། །དབུལ་ལོ་བཀྲེན་ནོ། །སློངས་མོ་པའོ། །མགོན་མ་མཆིས་པའོ། །ཀུན་དགའ་བོ་དེ་ནས་རྒྱལ་པོ་ཟླ་འོད་ཀྱིས་མི་དེ་ཡང་མཐོང་། ཚིག་ཀྱང་ཐོས་ནས་ངུས་ཏེ་མཆི་མ་ཟག་བཞིན་དུ་དེ་ལ་འདི་སྐད་ཅེས་སྨྲས་སོ། །ཀྱེ་མི་ཁྱོད་ལ་ཅི་དགོས།

ཁྱོད་ལ་བཟའ་བ་དང་། བཏུང་བ་དང་། བཞོན་པ་དང་། རྒྱན་དང་། གསེར་དང་། ནོར་བུ་དང་། མུ་ཏིག་དང་། རིན་པོ་ཆེ་སྣ་ཚོགས་སྦྱིན་པར་བྱ་འམ། ཁྱོད་ལ་གང་དགོས་པ་དེ་སྨྲོས་ཤིག །མི་དེས་སྨྲས་པ། བདག་ལ་མིག་འཚལ་ན་བདག་ལ་མིག་སྩལ་དུ་གསོལ།
ཀུན་དགའ་བོ་དེ་ནས་རྒྱལ་པོ་ཟླ་འོད་དེས་རང་གི་མིག་ཕྱུང་སྟེ་མི་དེ་ལ་བྱིན་ནོ། །ཀུན་དགའ་བོ་དེ་ནས་རྒྱལ་པོ་ཟླ་འོད་ཀྱིས་རང་གི་མིག་ཕྱུང་སྟེ་མི་དེ་ལ་བྱིན་ཡང་དེའི་སེམས་ལ་འགྱོད་པ་མེད་པར་གྱུར་ཏོ། །ཀུན་དགའ་བོ་དེའི་ཚེ་དེའི་དུས་ན་རྒྱལ་པོ་ཟླ་འོད་ཅེས་བྱ་བར་གྱུར་
པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཡིད་གཉིས་སམ་ཐེ་ཚོམ་ཟ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་པོ་ཟླ་འོད་ཅེས་བྱ་བར་གྱུར་ཏོ། །ཀུན་དགའ་བོ་རིའི་རྒྱལ་པོ་རི་རབ་ལ་ནི་ཚད་གཟུང་དུ་ཡོད་ཀྱི་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་འདི་ཡོངས་སུ་ཚོལ་ཞིང་ངས་སེམས་ཅན་རྣམས་ལ་མིག་བྱིན་པ་ནི་ཆེས་མང་སྟེ་ཚད་མེད་དོ། །ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཐེག་པ་བདེ་བ། འཇུག་པ་
བདེ་བ། ལམ་བདེ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་སོ། །ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་ལག་པ་ཡོངས་སུ་བཏང་བ་མ་བྱས། རྐང་
པ་ཡོངས་སུ་བཏང་བ་མ་བྱས། རྐང་ཡོངས་སུ་བཏང་བ་མ་བྱས། ཆུང་མ་ཕངས་པ་ཡོངས་སུ་བཏང་བ་མ་བྱས། བུ་ཕངས་པ་ཡོངས་སུ་བཏང་བ་མ་བྱས། གྲོང་དང་། གྲོང་རྡལ་དང་། གྲོང་ཁྱེར་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་
འཁོར་ཕངས་པ་ཡོངས་སུ་བཏང་བ་མ་བྱས་ཏེ། ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཐབས་མཁས་པས་ཡོངས་སུ་ཟིན་པས་ཐེག་པ་བདེ་བ། འཇུག་པ་བདེ་བ། ལམ་བདེ་བས་བླ་ན་

མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་
ཐབས་ལ་མཁས་པ་གང་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པའི་ཐབས་ལ་མཁས་པ་དེ་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་
བཀའ་སྩལ་ཏོ། །ཀུན་དགའ་བོ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། ཉིན་ལན་གསུམ་མཚན་ལན་གསུམ་དུ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་
ཏེ་ཐལ་མོ་སྦྱར་ནས་སངས་རྒྱས་ཐམས་ཅད་མངོན་སུམ་དུ་བྱས་ཏེ་ཚིག་འདི་སྐད་ཅེས་སྨྲས་སོ། །སངས་རྒྱས་ཀུན་ལ་ཕྱག་འཚལ་ལོ། །དྲང་སྲོང་ལྷ་མིག་ལྡན་པ་ཡི། །བྱང་ཆུབ་སེམས་དཔའ་རྣམས་དང་ཡང་། །ཉན་ཐོས་རྣམས་ལ་ཕྱག་འཚལ་ལོ། །ངན་འགྲོ་ཐམས་
ཅད་ཟློག་བགྱིད་ཅིང་། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བགྱིད་པ། །བྱང་ཆུབ་སེམས་ལ་ཕྱག་འཚལ་ལོ། །སེམས་ཀྱི་དབང་དུ་གྱུར་པས་ན། །བདག་གིས་སྡིག་པ་ཅི་བགྱིས་པ། །སངས་རྒྱས་སྤྱན་སྔར་མཆིས་ནས་སུ། །བདག་གིས་དེ་
དག་བཤགས་པར་བགྱི། །བདག་ལས་རྣམ་པ་གསུམ་གང་གིས། །བསོད་ནམས་ཚོགས་ནི་སྐྱེད་པ་དེ། །བདག་གི་ཀུན་མཁྱེན་ས་བོན་ཏེ། །བདག་གི་བྱང་ཆུབ་མི་ཟད་ཤོག །ཕྱོགས་བཅུ་དག་གི་ཞིང་རྣམས་སུ། །སངས་རྒྱས་མཆོད་པ་གང་བྱུང་བ། །
སངས་རྒྱས་མཁྱེན་པ་ཡི་རང་བས། །དེ་ལ་བདག་ནི་ཡི་རང་ངོ་། །སྡིག་པ་ཐམས་ཅད་བཤགས་པར་བགྱི། །བསོད་ནམས་ཀུན་ལ་ཡི་རང་ངོ་། །སངས་རྒྱས་ཀུན་ལ་ཕྱག་འཚལ་ལོ། །བདག་ནི་ཡེ་ཤེས་མཆོག་ཐོབ་ཤོག །ཕྱོགས་བཅུ་དག་གི་ཕྱོགས་རྣམས་

ན། །ས་བཅུ་དག་ལ་གནས་པ་ཡི། །བྱང་ཆུབ་སེམས་དཔའ་བྱང་ཆུབ་མཆོག །འཚང་རྒྱ་བགྱིད་པར་སྐུལ་མ་འདེབས། །བྱང་ཆུབ་དམ་པར་སངས་རྒྱས་ཤིང་། །སྡེ་དང་བཅས་པའི་བདུད་བཏུལ་ནས། །སྲོག་ཆགས་ཀུན་ལ་སྨན་སླད་དུ། །ཆོས་
ཀྱི་འཁོར་ལོ་སྐོར་གྱུར་ཅིག །ཆོས་རྔ་ཆེན་པོའི་སྒྲ་ཡིས་ནི། སྡུག་བསྔལ་སེམས་ཅན་ཐར་བགྱིད་ཤོག །བསྐལ་པ་བྱེ་བ་བསམ་ཡས་སུ། །ཆོས་སྟོན་མཛད་ཅིང་བཞུགས་གྱུར་ཅིག །འདོད་པའི་འདམ་དུ་བྱིང་གྱུར་ཅིང་། །སྲེད་པའི་སྲད་བུས་དམ་བཅིངས་པ། །
འཆིང་བ་ཀུན་གྱིས་བཅིངས་བདག་ལ། །རྐང་གཉིས་མཆོག་རྣམས་གཟིགས་སུ་གསོལ། །སེམས་ཀྱི་དྲི་མར་བགྱིས་པ་ལ། །སངས་རྒྱས་རྣམས་ནི་སྨོད་མི་མཛད། །སེམས་ཅན་རྣམས་ལ་བྱམས་ཐུགས་ལྡན། །སྲིད་པའི་མཚོ་ལས་སྒྲོལ་བར་ཤོག །རྫོགས་པའི་
སངས་རྒྱས་གང་བཞུགས་དང་། །གང་དག་འདས་དང་མ་བྱོན་པ། །ད་དག་རྗེས་སུ་བདག་སློབ་ཅིང་། །བྱང་ཆུབ་སྤྱད་པ་སྤྱོད་གྱུར་ཅིག །ཕ་རོལ་ཕྱིན་དྲུག་རྫོགས་བགྱིས་ནས། །འགྲོ་དྲུག་སེམས་ཅན་ཐར་བགྱིད་ཤོག །མངོན་ཤེས་དྲུག་པོ་མངོན་བགྱིས་ནས། །
བླ་མེད་བྱང་ཆུབ་རེག་གྱུར་ཅིག །མ་སྐྱེས་པ་དང་མི་འབྱུང་དང་། །རང་བཞིན་མ་མཆིས་གནས་མ་མཆིས། །རྣམ་རིག་མ་མཆིས་དངོས་མ་མཆིས། །སྟོང་པའི་ཆོས་ནི་རྟོགས་པར་ཤོག །སངས་རྒྱས་དྲང་སྲོང་ཆེན་པོ་ལྟར། །སེམས་ཅན་མ་མཆིས་སྲོག་མ་མཆིས། །
གང་ཟག་མ་མཆིས་གསོ་མ་མཆིས། །བདག་མ་མཆིས་པའི་ཆོས་རྟོགས་ཤོག །བདག་འཛིན་བདག་གིར་འཛིན་པར་ནི། །དངོས་པོ་ཀུན་ལ་མི་གནས་པར། །སེམས་ཅན་ཀུན་ལ་བདེ་སླད་དུ། །སེར་སྣ་མ་མཆིས་སྦྱིན་གཏོང་ཤོག །དངོས་པོ་དངོས་པོ་མ་
མཆིས་པས། །བདག་གི་ལོངས་སྤྱོད་ལྷུན་གྲུབ་ཤོག །དངོས་པོ་ཐམས་ཅད་རྣམ་འཇིག་པས། །སྦྱིན་པའི་ཕ་རོལ་ཕྱིན་རྫོགས་ཤོག །ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་

ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག །ས་འམ་ཡང་ན་ཆུ་འམ་མེ། །རླུང་གི་ཁམས་ལྟར་མི་གནས་ཤིང་། །བཟོད་པའམ་ཁྲོ་བ་མ་མཆིས་པར། །བཟོད་པའི་ཕ་རོལ་ཕྱིན་རྫོགས་ཤོག །བརྩོན་འགྲུས་བརྩམས་པའི་བརྩོན་
འགྲུས་ཀྱིས། །བརྟན་སྤྲོ་ལེ་ལོ་མ་མཆིས་ཤིང་། །སྟོབས་དང་ལྡན་པའི་ལུས་སེམས་ཀྱིས། །བརྩོན་འགྲུས་ཕ་རོལ་ཕྱིན་རྫོགས་ཤོག །སྒྱུ་མ་ལྟ་བུའི་ཏིང་འཛིན་དང་། །དཔའ་བར་འགྲོ་བའི་ཏིང་འཛིན་དང་། །རྡོ་རྗེ་ལྟ་བུའི་ཏིང་འཛིན་གྱིས། །བསམ་གཏན་
ཕ་རོལ་ཕྱིན་རྫོགས་ཤོག །རྣམ་པར་ཐར་པའི་སྒོ་གསུམ་དང་། །དུས་གསུམ་མཉམ་པ་ཉིད་དང་ཡང་། །རིག་གསུམ་མངོན་སུམ་བགྱིས་པ་ཡིས། །ཤེས་རབ་ཕ་རོལ་ཕྱིན་རྫོགས་ཤོག །སངས་རྒྱས་ཀུན་གྱིས་བསྔགས་པ་དང་། །འོད་དང་གཟི་བརྗིད་འབར་
བ་དང་། །བྱང་ཆུབ་སེམས་དཔའི་བརྩོན་འགྲུས་ཀྱིས། །བདག་གི་བསམ་པ་རྫོགས་གྱུར་ཅིག །དེ་ལྟར་སྤྱད་པ་སྤྱོད་བྱེད་ཅིང་། །བྱམས་པ་གྲགས་དང་ལྡན་པ་ཡིས། །ཕ་རོལ་ཕྱིན་དྲུག་རྫོགས་བྱས་ནས། །ས་བཅུ་པོ་ལ་རབ་ཏུ་གནས། །ཀུན་དགའ་བོ་བྱང་
ཆུབ་སེམས་དཔའ་སེམས་དཔའ་ཆེན་པོ་བྱམས་པས་གང་ལ་གནས་ནས་ཐབས་ལ་མཁས་པས་ཐེག་པ་བདེ་བ། འཇུག་པ་བདེ་བ། ལམ་བདེ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པའི་ཐབས་ལ་མཁས་པ་ནི་དེ་ཡིན་ནོ། །
ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་ཅན་རྣམས་འདོད་ཆགས་ཆུང་བ་དང་། ཞེ་སྡང་ཆུང་བ་དང་། གཏི་མུག་ཆུང་བ་དང་། དགེ་བ་བཅུའི་ལས་ཀྱི་ལམ་དང་ལྡན་པར་གྱུར་ལ།
ཕྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ན་ཅི་མ་རུང་ཞེས་དེ་ལྟར་ཞིང་རྣམ་པར་སྦྱངས་སོ། །ཀུན་དགའ་བོ་དུས་དེ་དང་ཚོད་དེ་འབྱུང་བ་ཡོད་དེ། དེའི་ཚེ་དེའི་དུས་ན་སེམས་ཅན་དག་འདོད་ཆགས་ཆུང་བ་དང་། །ཞེ་སྡང་ཆུང་བ་

དང་། གཏི་མུག་ཆུང་བ་དང་། དགེ་བ་བཅུའི་ལས་ཀྱི་ལམ་དང་ལྡན་པ་དག་འབྱུང་བར་འགྱུར་ཏེ། དེའི་འོག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་སྨོན་ལམ་གྱི་དབང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
འཚང་རྒྱ་བར་འགྱུར་རོ། །ཀུན་དགའ་བོ་ངས་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྙིགས་མ་ལྔ་དང་ལྡན་པའི་འཇིག་རྟེན་གནས་པའི་ཚེ་སེམས་ཅན་འདོད་ཆགས་ཀྱི་ཤས་ཆེ་བ་དང་། ཞེ་སྡང་གི་ཤས་ཆེ་བ་དང་། གཏི་མུག་གི་ཤས་ཆེ་བ་དང་། འདོད་
ཆགས་བདོ་བ་དང་། ཞེ་སྡང་བདོ་བ་དང་། གཏི་མུག་བདོ་བ་དང་། ཆོས་མ་ཡིན་པ་ལ་ཆགས་ཤིང་ཞེན་པ་དང་། ཆགས་པའི་ཡ་ང་བས་ཟིལ་གྱིས་ནོན་པ་དང་། ཆོས་ལོག་པས་ཡོངས་སུ་ཟིན་པ་དང་། ཕ་ལ་འཁུ་བ་དང་། མ་ལ་འཁུ་བ་དང་། སྤུན་ལ་འཁུ་བ་
དང་། མིང་སྲིང་ལ་འཁུ་བ་དང་། ཁྱོ་ཤུག་ལ་འཁུ་བ་དང་། ཉེ་དུ་ལ་འཁུ་བ་དང་། འཕགས་པ་ལ་འཁུ་བ་དང་། མཁན་པོ་དང་། སློབ་དཔོན་ལ་འཁུ་བ་དང་། བདག་ལ་འཁུ་བ་དང་། མི་གཞན་ལ་འཁུ་བ་དང་། མི་དྲི་མ་ཅན་དང་། མི་དམུ་རྒོད་དང་། མི་ཅང་ཤེས་
མ་ཡིན་པ་རྣམས་ཀྱི་ནང་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ན་ཅི་མ་རུང་ཞེས་དེ་ལྟར་སྨོན་ལམ་ཡོངས་སུ་སྦྱོངས་ཏེ། དུས་ཡ་ང་བ་འདི་ལྟ་བུ་ལ་གནས་ནས་ཀུན་དགའ་བོ་ངས་སྙིང་རྗེ་ཆེན་པོ་མདུན་དུ་བྱས་ཏེ། སྙིང་རྗེ་ཆེན་
པོ་དང་ལྡན་པས་ང་ད་ལྟར་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་སུ་ཞུགས་ཏེ་ཆོས་སྟོན་པ་ན། ང་ལ་ཁ་ངན་ཟེར་ཞིང་གཤེ་རྒྱ་སྟེ་ཚོགས་པར་མི་དབྱུང་བ་རྩུབ་པ་བརླང་པོས་སྨྲ་བར་བྱེད་དོ། །ཀུན་དགའ་བོ་ང་
ལ་ཆད་པར་སྨྲ་བ་ཡིན་ནོ་ཞེས་ཀྱང་ཟེར་རོ། །རྟག་པར་སྨྲ་བ་ཡིན་ནོ་ཞེས་ཀྱང་ཟེར་རོ། །འཁོར་འདོད་པ་མང་ངོ་ཞེས་ཀྱང་གླེང་ངོ་། །འདོད་པ་ཆེའོ་ཞེས་ཀྱང་གླེང་ངོ་། །ཁྱིམ་གྱི་ནང་དུ་ཞུགས་ན་ཡང་ང་ལ་སས་ཀྱང་འཐོར་རོ། །དུག་དང་བསྲེས་པའི་ཟས་ཀྱང་བྱིན་ནོ། །མེའི་ཕུང་པོ་ཡང་

ཉེ་བར་བསྒྲུབས་སོ། །འདི་ལྟ་སྟེ། སངས་རྒྱས་སུ་གྱུར་ཀྱང་མཛེས་ལྡན་མ་དང་ཞེས་བྱ་བ་ལྟ་བུ་འཁྲིག་པའི་ཆོས་དང་ལྡན་པས་ང་ལ་སྐུར་པ་ཡང་བཏབ་བོ། །ཀུན་དགའ་བོ་ང་ནི་སྙིང་རྗེ་ཆེན་པོ་མདུན་དུ་བྱས་ཏེ། སྙིང་རྗེ་ཆེན་པོ་དང་ལྡན་པས་ད་ལྟར་སེམས་ཅན་དེ་ལྟ་བུ་དེ་དག་ལ་ཆོས་
སྟོན་ཏོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་དེ་ལྟ་བུ་དེ་དག་ལ་ཆོས་སྟོན་པར་མཛད་པ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་དུལ་བ་
འདུལ་བ། ཁུར་ཆེན་པོ་བསྣམས་པ། དཀའ་བ་མཛད་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་མ་དུལ་བ་འདུལ་བ། ཁུར་ཆེན་པོ་བསྣམས་པ། དགེ་བའི་ཆོས་ཐམས་ཅད་དང་ལྡན་པ་གང་དག་སེམས་ཅན་དེ་ལྟ་བུ་དག་ལ་ཆོས་སྟོན་པ་ནི་དཀའ་བ་མཛད་པའོ། །དེ་ཅིའི་ཕྱིར་ཞེ་ན། འདི་ལྟར་སྙིང་རྗེ་ཆེན་པོས་ཡོངས་སུ་ཟིན་པའི་ཕྱིར་རོ། །དེ་སྐད་ཅེས་བཀའ་
སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་ཆོས་ཀྱི་རྣམ་གྲངས་འདི་མཛེས་པ་དང་། བདག་གིས་ཆོས་ཀྱི་རྣམ་གྲངས་འདི་ཐོས་ཤིང་བཅོམ་ལྡན་འདས་ཀྱི་ཁྱུ་མཆོག་གི་གནས་འདི་ཐོས་ནས་སྤུ་ཟིང་ཞེས་བགྱིད་པ་ནི་ངོ་མཚར་ལགས་སོ། །
བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་སྔོན་གྱི་སྨོན་ལམ་ཡང་དག་པར་འཕགས་པ་ཞེས་བྱ་བར་ཟུང་ཤིག །དེ་བཞིན་གཤེགས་པ་ཡང་དག་པར་འབྱུང་བ་ཞེས་བྱ་བར་
ཡང་ཟུང་ཤིག །བྱང་ཆུབ་ཀྱི་དགོངས་པ་འབྱུང་བ་ཞེས་བྱ་བར་ཡང་ཟུང་ཤིག །བྱམས་པས་ཞུས་པ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་བྱང་ཆུབ་སེམས་དཔའ་བྱམས་པ་དང་། དགེ་སློང་ལྔ་བརྒྱ་པོ་དེ་དག་དང་ཐམས་

ཅད་དང་ལྡན་པའི་འཁོར་དེ་དང་། ལྷ་དང་མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་བྱམས་པས་
ཞུས་པའི་ལེའུ་ཞེས་བྱ་སྟེ་བཞི་བཅུ་རྩ་གཅིག་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།འཕགས་པ་དཀོན་མཆོག་བརྩེགས་པ་
ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་གཉིས་པ་སྟེ་འཕགས་པ་བྱམས་པས་ཆོས་བརྒྱད་ཞུས་པ་ལུང་བསྟན་པ། བམ་པོ་ཕྱེད་པ། རྒྱ་གར་སྐད་དུ། ཨཱརྱ་མཻ་ཏྲི་ཡ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བྱམས་པས་ཞུས་པ་ཞེས་བྱ་བ་
ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་
སེམས་དཔའ་ཁྲི་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ །དེ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་

ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང་། དྲིས་པ་དེ་དང་དེའི་ལུང་བསྟན་
པས་ངས་ཁྱོད་ཀྱི་སེམས་རངས་པར་བྱའོ། །དེ་ནས་བཅོམ་ལྡན་འདས་ཀྱིས་སྐབས་ཕྱེ་བས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་
དུ་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ཆོས་ཅན་དུ་འགྱུར་ཞིང་མི་ཉམས་ལ་ཡོངས་སུ་མི་ཉམས་ཏེ། ཁྱད་པར་ཐོབ་པར་འགྱུར་བ་དང་། བདུད་ཕྱིར་རྒོལ་བ་བཅོམ་པར་འགྱུར་བ་དང་། བྱང་ཆུབ་སེམས་དཔའི་སྤྱད་པ་
སྤྱོད་པ་ན་ཆོས་ཐམས་ཅད་ཀྱི་ངོ་བོ་ཉིད་ཀྱི་མཚན་ཉིད་ཇི་ལྟ་བ་བཞིན་དུ་རྟོགས་ནས་འཁོར་བ་ན་ཡོངས་སུ་མི་སྐྱོ་བ་དང་། ཡོངས་སུ་མི་སྐྱོ་བའི་ཡིད་དང་ལྡན་པར་གྱུར་ནས་ཀྱང་གཞན་གྱི་ཁ་ན་མ་ལས་པའི་ཡེ་ཤེས་ཀྱིས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་འཚང་རྒྱ་བར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་ལེགས་སོ། །བྱམས་པ་ཁྱོད་དེ་བཞིན་གཤེགས་པ་
ལ་དོན་འདི་འདྲི་བར་སེམས་པ་ཁྱོད་ཡང་ལེགས་སོ། །བྱམས་པ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་དེ་ལྟ