Kinh tạng Tây Tạng (Kangyur Đại Học) — 044_དཀོན་བརྩེགས།_ཆ

མུ་སྟེགས་ཅན་ངན་པའི་མུ་སྟེགས་འདོར་བར་བྱེད་པ། ཞི་གནས་
ཀྱི་ངེས་པར་སེམས་པ་བརྟན་པ། ལྷག་མཐོང་གིས་སྦྱོར་བ་མཐའ་གཉིས་ལ་མ་ཆགས་པར་འཇུག་པ། རྒྱུའི་ཆོས་དང་ཡང་དག་པར་ལྡན་པ། སྒྲ་གྲགས་པ་ཡངས་ཤིང་རྒྱ་ཆེ་ལ་མི་ཟད་ཅིང་ཚད་མེད་པ་ཚུར་ཤོག །དམ་པའི་ཆོས་ཀྱི་གྲུ་ཆེན་པོ་མྱ་ངན་ལས་འདས་པའི་གྲོང་ཁྱེར་དུ་འགྲོ་བ་བདེ་བར་འགྲོ་བ།

འཇིགས་པ་མེད་པར་འགྲོ་བ་ལམ་དུ་འགྲོ་བ། འཇིག་ཚོགས་ལ་ལྟ་བ་འདོར་བར་ཞུགས་ལ་ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་ལྟ་བ་ཐམས་ཅད་སེལ་བ། གཙེ་བ་མེད་པའི་མྱ་ངན་ལས་འདས་པར་མྱུར་དུ་སོང་ཤིག་ཅེས་ཕྱོགས་བཅུར་སྒྲས་གོ་བར་བྱེད་པ་སྟེ། རིགས་ཀྱི་བུ་སེམས་
ཅན་ཐམས་ཅད་ཀྱི་དོན་གྱི་ཕྱིར་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་ཡིད་ཡོངས་སུ་མི་སྐྱོ་བར་བྱང་ཆུབ་སེམས་དཔའ་དམ་པའི་ཆོས་ཀྱི་གྲུ་ཆེན་པོ་འདི་འདྲ་བ་དེ་སྦྱར་བར་བྱའོ། །དམ་པའི་ཆོས་ཀྱི་གྲུ་འདིས་ཆུ་བོ་བཞིས་ཁྱེར་བའི་སེམས་ཅན་ཐམས་ཅད་བསྒྲལ་བར་བྱའོ། །ཀུན་ཏུ་སྣང་བ་དེ་ལ་
འདིར་བྱང་ཆུབ་སེམས་དཔའི་མངོན་པར་ཤེས་པ་མྱུར་བ་གང་ཞེ་ན། གང་འདི་སེམས་ཅན་ཐམས་ཅད་ལ་བཅོས་མ་མ་ཡིན་པའི་སྦྱོར་བ་སྟེ་བསམ་པ་དག་པས་རབ་ཏུ་འདུན་པ་དང་། དགེ་བའི་རྩ་བ་ཐམས་ཅད་ཡང་དག་པར་བསྒྲུབ་པའི་ཕྱིར་བརྩོན་འགྲུས་འབར་བ་དང་། ཚུལ་བཞིན་ཡིད་ལ་བྱེད་པས་དགེ་བ་
ལ་འདུན་པ་དང་ཤེས་རབ་ཡོངས་སུ་རྫོགས་པར་བྱ་བའི་ཕྱིར་ཐོས་པས་མི་ངོམས་པ་དང་། ཡེ་ཤེས་བརྟན་པར་བྱ་བའི་ཕྱིར་ང་རྒྱལ་མེད་པ་དང་ཡོན་ཏན་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་རབ་ཏུ་འབྱུང་བ་ལ་གཞོལ་བ་དང་། ལུས་དང་སེམས་དབེན་པར་དགོན་པ་ན་གནས་པ་དང་། སྐྱེ་བོ་མི་སྲུན་
པ་རྣམ་པར་སྤངས་པས་འདུ་འཛི་མེད་པ་དང་། དོན་དམ་པ་ལ་རྟོན་པས་ཆོས་དོན་དུ་གཉེར་བ་དང་ཤིན་ཏུ་མི་འཁྲུགས་པས་ཡེ་ཤེས་ཀྱི་དོན་དང་། ཡེ་ཤེས་ཀྱི་དོན་ཡིན་པས་ཆོས་ཀྱི་དོན་དང་མི་འཁྲུགས་པས་བདེན་པའི་དོན་དང་། ཡང་དག་པར་སྦྱོར་བར་བྱ་བས་སྟོང་པ་ཉིད་ཀྱི་དོན་དང་། ཤིན་ཏུ་ཉེ་བར་ཞི་བའི་དོན་ཡིན་པས་
དབེན་པའི་དོན་ཡིན་ཏེ་རིགས་ཀྱི་བུ་འདི་ནི་འདིར་བྱང་ཆུབ་སེམས་དཔའི་མངོན་པར་ཤེས་པ་མྱུར་བའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །འདི་ལྟར་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་ཐེག་པ་ཆེན་པོ་ལ་ཡང་དག་པར་ཞུགས་པའི་
རིགས་ཀྱི་བུའམ་རིགས་ཀྱི་བུ་མོ་རྣམས་ལ་ཕན་འདོགས་པར་གྱུར་པ་ནི་བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་ཙམ་བསྟན་ན་རིགས་ཀྱི་བུ་འམ་རིགས་ཀྱི་བུ་མོ་དེ་

བསོད་ནམས་ཀྱི་ཕུང་པོ་ཇི་ཙམ་སྐྱེད་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་རིན་པོ་ཆེ་སྣ་བདུན་གྱིས་རབ་
ཏུ་གང་བར་བྱས་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་སྦྱིན་པ་བྱིན་པ་དང་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་རྣམས་ལས་དེ་བཞིན་གཤེགས་པ་རེ་རེའི་གཙུག་ལག་ཁང་རིན་པོ་ཆེ་སྣ་བདུན་ལས་བྱས་པ་གང་གཱའི་ཀླུང་གི་བྱེ་མ་སྙེད་
བརྩིགས་པ་དང་། སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་རྣམས་ལས་དེ་བཞིན་གཤེགས་པ་རེ་རེའི་ཉན་ཐོས་ཀྱི་དགེ་འདུན་དཔག་ཏུ་མེད་པ་དག་ལ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་པ་དང་། དེ་བཞིན་གཤེགས་པ་ཡོངས་སུ་མྱ་
ངན་ལས་འདས་པ་དེ་དག་གི་མཆོད་རྟེན་རིན་པོ་ཆེ་སྣ་བདུན་ལས་བྱས་པ་བས་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པ་གཞན་ཞིག་གིས་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་ཙམ་ལུང་མནོས་ཏེ། ལུང་མནོས་ནས་ཀྱང་མི་སྤོང་ན་དེ་ནི་
དེ་བས་ཆེས་བསོད་ནམས་མང་དུ་སྐྱེད་དོ། །བུད་མེད་གང་ཞིག་ལུང་འབོག་ན་དེ་ནམ་ཡང་ལོག་པར་ལྟུང་བར་མི་འགྱུར་ཏེ། དེ་ཉིད་དེའི་བུད་མེད་ཀྱི་ལུས་ཀྱི་ཐ་མ་ཡིན་ནོ། །ས་ཕྱོགས་གང་དུ་ཆོས་ཀྱི་རྣམ་གྲངས་འདི་བཤད་པ་འམ་བསྟན་པ་འམ། ཡི་གེར་འདྲི་བ་འམ་ཡི་གེར་བྲིས་ནས་གླེགས་བམ་དུ་བྱས་ཏེ་
བཞག་པའི་ས་ཕྱོགས་དེ་ལྷ་དང་བཅས་པའི་འཇིག་རྟེན་གྱི་མཆོད་རྟེན་དང་འདྲ་བར་འགྱུར་རོ། །སུ་ཞིག་ཆོས་སྨྲ་བ་ལས་ཆོས་ཀྱི་རྣམ་གྲངས་འདི་ཉན་པ་འམ། འཛིན་པ་འམ་ཡི་གེར་འདྲི་བ་དེ་ལ་འདི་ལྟ་སྟེ། དེ་བཞིན་གཤེགས་པ་ལ་ཇི་ལྟར་བྱ་བ་དེ་བཞིན་དུ་གུས་པར་བྱའོ། །འོད་སྲུང་རིགས་ཀྱི་བུ་འམ།
རིགས་ཀྱི་བུ་མོ་གང་ཞིག་དེ་བཞིན་གཤེགས་པའི་ཆོས་སྨྲ་བ་ལ་བཀུར་སྟིར་བྱེད་པ་དང་། བཙུན་པར་བྱེད་པ་དང་། རི་མོར་བྱེད་པ་དང་། མཆོད་པར་བྱེད་པ་དེ་ལ་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ། །དེ་འཆི་བའི་དུས་ཀྱི་ཚེ་དེ་བཞིན་གཤེགས་པ་མཐོང་བར་འགྱུར་རོ། །དེ་བཞིན་

གཤེགས་པ་མཐོང་ནས་ཀྱང་ལུས་ཀྱི་ལས་ཡོངས་སུ་དག་པ་བཅུ་འཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། ཚོར་བས་སེམས་ཀུན་ཏུ་མ་ཟིན་པར་འཆི་བའི་དུས་བྱེད་པ་དང་། དེ་མིག་འཁྲུལ་པར་མི་འགྱུར་བ་དང་། ལག་པ་གཡོབ་པར་མི་བྱེད་པ་དང་། རྐང་པ་འཕྲ་བར་མི་བྱེད་པ་དང་།
གཅིན་མི་གཏོར་བ་དང་། ཕྱི་ས་མི་འབྱུང་བ་དང་། དེའི་སྙིང་ཁར་རྡུལ་མི་འབྱུང་བ་དང་། ཁུ་ཚུར་མི་འཆང་བ་དང་། ནམ་མཁའ་ལ་མི་སྙེགས་པ་དང་། ཇི་ལྟར་འདུག་པ་དེ་བཞིན་དུ་ཚེའི་འདུ་བྱེད་འདོར་བར་འགྱུར་བ་སྟེ། ལུས་ཀྱི་ལས་ཡོངས་སུ་དག་པ་བཅུ་པོ་དེ་དག་འཐོབ་པར་འགྱུར་རོ། །ངག་གི་ལས་ཡོངས་
སུ་དག་པ་བཅུ་འཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། གདངས་སྙན་པའི་ཚིག་དང་། མཉེན་པའི་ཚིག་དང་། འཇམ་པའི་ཚིག་དང་། དགའ་བའི་ཚིག་དང་། སྣུམ་པའི་ཚིག་དང་། སླར་བཟློག་པ་མ་ཡིན་པའི་ཚིག་དང་། གཟུང་བར་འོས་པའི་ཚིག་དང་། བཙུན་པའི་ཚིག་དང་། ལྷ་དང་མིས་ཡོངས་
སུ་གཟུང་བའི་ཚིག་དང་། སངས་རྒྱས་ཀྱིས་ཡོངས་སུ་གཟུང་བའི་ཚིག་སྟེ་ངག་གི་ལས་ཡོངས་སུ་དག་པ་བཅུ་པོ་དེ་དག་འཐོབ་པར་འགྱུར་རོ། །ཡིད་ཀྱི་ལས་ཡོངས་སུ་དག་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། ཁྲོ་བར་མི་འགྱུར་བ་དང་། འཁོན་དུ་འཛིན་པ་མེད་པ་དང་། འཆབ་
པར་མི་འགྱུར་བ་དང་། འཚིག་པར་མི་འགྱུར་བ་དང་། ཉེས་པ་ལ་མི་དགའ་བ་དང་། འཁོན་གཅུགས་ལ་མི་དགའ་བ་དང་། འདུ་ཤེས་ཕྱིན་ཅི་ལོག་ཏུ་མི་འགྱུར་བ་དང་། སྤོང་བ་ལ་བག་ཡོད་པར་འགྱུར་བ་དང་། མ་ཞུམ་པའི་སེམས་ཀྱིས་སངས་རྒྱས་ཀྱི་ཞིང་ཡོངས་སུ་དག་པ་འཛིན་པ་དང་། ང་རྒྱལ་
དང་ཆེ་བའི་ང་རྒྱལ་མེད་པར་སངས་རྒྱས་ཀྱི་ཆོས་ཐམས་ཅད་མངོན་པར་སྒྲུབ་པའི་ཏིང་ངེ་འཛིན་ཐོབ་པར་འགྱུར་བ་སྟེ། ཡིད་ཀྱི་ལས་ཡོངས་སུ་དག་པ་བཅུ་པོ་དེ་དག་འཐོབ་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། ཚོར་བས་ཉེན་ཅིང་འཆི་བའི་དུས་མི་བྱེད། །དེ་ཡི་མིག་ལ་འཁྲུལ་པར་འགྱུར་བ་མེད། །
ལག་པ་མི་གཡོ་བ་རྐང་པ་འཕྲ་མི་འགྱུར། །དེ་ནི་བཤང་གཅི་གཏོར་བར་ཡོད་མི་འགྱུར། །དེ་ཡི་སྙིང་ཁར་རྡུལ་ཡང་འབྱུང་མི་འགྱུར། །ཁུ་ཚུར་མི་འཆང་ནམ་མཁར་སྙེགས་མི་འགྱུར། །འདུག་བཞིན་བདེ་བར་འཆི་བའི་དུས་བྱེད་དེ། །ལུས་ལས་ཡོངས་སུ་དག་པ་འདི་བཅུ་འཐོབ། །གདངས་

སྙན་ཕུན་སུམ་ཚོགས་ཤིང་འཇམ་མཉེན་ཚིག །སྣུམ་ཞིང་ཡིད་འོང་དེ་བཞིན་དགའ་བར་འགྱུར། །གཞན་གྱིས་སླར་མི་བཟློག་ཅིང་གཟུང་འོས་ཚིག །སྐྱེ་བོས་བཙུན་པར་བྱ་བའི་ཚིག་ཏུ་འགྱུར། །དེ་ཡི་ཚིག་ནི་ལྷ་དང་ཀླུ་དག་དང་། །མི་འམ་ཅི་དང་དེ་བཞིན་རྒྱལ་བས་བསྔགས། །དེས་བཤད་པ་ཡི་དོན་ཀྱང་འཛིན་བྱེད་དེ། །
དེས་ནི་ངག་ལས་དག་པ་དེ་དག་འཐོབ། །ཁྲོ་བ་མེད་ཅིང་འཁོན་དུ་འཛིན་པ་མེད། །བརྟན་པ་འཆབ་པ་མེད་ཅིང་འཚིག་པ་མེད། །ཉེས་ལ་མི་དགའ་འཁོན་གཅུགས་དགའ་བ་མེད། །དེ་ཡི་འདུ་ཤེས་ཕྱིན་ཅི་ལོག་མི་འགྱུར། །བསླབ་པ་ཡང་དག་བླངས་ལ་སེམས་མི་ཞུམ། །སྤོང་བ་ལ་ནི་བག་མེད་མི་འགྱུར་ཏེ། །ཞུམ་པ་
མེད་པའི་སེམས་ཀྱིས་ཞིང་སྦྱོང་བྱེད། །ང་རྒྱལ་ལས་ཀྱང་ང་རྒྱལ་ཡོངས་སྤངས་ནས། །ཏིང་འཛིན་འབྱོར་པ་ཐམས་ཅད་མངོན་བསྒྲུབས་ཤིང་། །ཡིད་ཀྱི་མངོན་པར་བསྒྲུབས་པའི་ཆོས་རྣམས་འཐོབ། །ཆོས་རྣམས་འདི་དག་ལྡན་པར་གྱུར་པ་ལ། །སངས་རྒྱས་དངོས་པོ་དཀོན་པར་མི་འགྱུར་རོ། །འོད་སྲུང་གང་ལ་ལ་བདེ་
བའི་ཡོ་བྱད་ཐམས་ཅད་ཀྱིས་ང་ལ་བཀུར་སྟི་བྱེད་པར་འདོད་པ་དང་མཆོད་པ་ཐམས་ཅད་ཀྱིས་མཆོད་པར་འདོད་པ་དེས་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་གཟུང་བར་བྱ། ཀུན་ཆུབ་པར་བྱ། ཡི་གེར་བྲི་བར་བྱ། བཀླག་པར་བྱ། བཅང་བར་བྱའོ། །འོད་སྲུང་དེ་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རྣམས་ལ་མཆོད་པ་བླ་ན་མེད་པ་བྱས་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་འོད་སྲུང་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་སྣ་ཚོགས་ནས་འདུས་པ་དེ་དག་དང་། དགེ་སློང་དེ་དག་
དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་འོད་སྲུང་གི་ལེའུ་ཞེས་
བྱ་སྟེ་བཞི་བཅུ་རྩ་གསུམ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། ཤཱི་ལེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་བཞི་པ་སྟེ། འཕགས་པ་རིན་པོ་ཆེའི་ཕུང་པོ་ལུང་བསྟན་པ། བམ་པོ་དང་པོ། རྒྱ་གར་སྐད་དུ། ཨཱརྱ་རད་ན་རཱ་ཤི་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་རིན་པོ་ཆེའི་ཕུང་པོ་
ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ། དགེ་སློང་བརྒྱད་སྟོང་ཙམ་གྱི་དགེ་སློང་གི་དགེ་འདུན་ཆེན་པོ་དང་། སངས་རྒྱས་ཀྱི་ཞིང་
སྣ་ཚོགས་ནས་འདུས་པའི་བྱང་ཆུབ་སེམས་དཔའ་ཁྲི་དྲུག་སྟོང་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་གཅིག་གིས་ཐོགས་པ་ཕྱིར་མི་ལྡོག་པའི་བཟོད་པ་ཐོབ་པ་ཤ་སྟག་གོ །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་
སྐད་ཅེས་གསོལ་ཏོ། །བཅོམ་ལྡན་འདས་དགེ་སྦྱོང་དགེ་སྦྱོང་ཞེས་བགྱི་བ་ཇི་ཙམ་གྱིས་ན་དགེ་སྦྱོང་དགེ་སྦྱོང་ཞེས་བགྱི་བ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་དགེ་སྦྱོང་དགེ་སྦྱོང་ཞེས་བྱ་བ་ནི། ཞི་བ་དང་།
དུལ་བ་དང་། ཅང་ཤེས་པ་དང་། ཚུལ་ཁྲིམས་ཀྱི་ཕུང་པོ་ཡོངས་སུ་དག་པ་དང་། ཏིང་ངེ་འཛིན་ལ་འཇུག་པ་ཤེས་པས་དགེ་སྦྱོང་ཞེས་བྱ་སྟེ། ཤེས་རབ་དང་ལྡན་པ་དང་། རྣམ་པར་གྲོལ་བའི་སྙིང་པོ་ལྷུར་ལེན་པ་དང་། རྣམ་པར་ཐར་པའི་སྒོ་གསུམ་ལ་སོམ་ཉི་མེད་ཅིང་ཐེ་ཚོམ་མི་ཟ་བ་དང་། འཕགས་པའི་
སྤྱོད་ཡུལ་ལ་གནས་པ་དང་། དྲན་པ་ཉེ་བར་གཞག་པ་བཞི་ལ་གནས་པ་དང་། ཡང་དག་པར་སྤོང་བ་བཞི་ལ་གནས་པ་དང་། རྫུ་འཕྲུལ་གྱི་རྐང་པ་བཞི་བསྒོམ་པ་བསྒོམས་པ་དང་། དད་པའི་དབང་པོ་དང་ལྡན་པ་དང་། སངས་རྒྱས་ལ་དད་པ་མི་ཕྱེད་པ་དང་། ཆོས་ལ་དད་པ་མི་ཕྱེད་པ་དང་། དགེ་འདུན་
ལ་དད་པ་མི་ཕྱེད་པ་དང་། སངས་རྒྱས་དང་། ཆོས་དང་། དགེ་འདུན་ལ་ཤེས་པས་དད་པ་དང་ལྡན་པ་དང་། གཞན་གྱི་དྲིང་ལ་མི་འཇོག་པའི་ཤེས་པ་དང་ལྡན་པ་དང་། དགེ་བའི་ཆོས་རྣམས་ལ་བརྩོན་འགྲུས་བརྩམས་པ་དང་། སྲིད་པ་བཅོམ་པ་དང་། ཡང་དག་པར་ཞུགས་པ་དང་། དྲན་པ་དང་།

ཤེས་བཞིན་ལ་མཁས་པ་དང་། སེམས་རྩེ་གཅིག་པ་དང་། ཤེས་རབ་ཀྱིས་ལྷག་མཐོང་ལ་མཁས་པ་དང་། སྟོབས་ལྔ་དང་ལྡན་པ་དང་། ཉོན་མོངས་པ་ཐམས་ཅད་ཀྱིས་མི་རྫི་བ་དང་། བྱང་ཆུབ་ཀྱི་ཡན་ལག་བདུན་ལ་བསམ་གཏན་པ་དང་། ཆོས་རྣམས་ཀྱི་བརྟེན་པ་ཤེས་པ་ལ་མཁས་པ་དང་། ལམ་
ཤེས་པ་དང་། ལམ་ལ་མཁས་པ་དང་། ཡང་དག་པར་ལྟ་བ་དང་། ཡང་དག་པའི་ཏིང་ངེ་འཛིན་དང་། ཞི་གནས་དང་། ལྷག་མཐོང་སྒོམ་པ་ལ་མཁས་པ་དང་། སོ་སོ་ཡང་དག་པར་རིག་པ་བཞི་ལ་གཞན་གྱི་དྲིང་མི་འཇོག་པའི་ཤེས་རབ་དང་ལྡན་པ་དང་། དོན་ལ་རྟོན་གྱི་ཚིག་འབྲུ་ལ་མི་རྟོན་
པ་དང་། ཡེ་ཤེས་ལ་རྟོན་གྱི་རྣམ་པར་ཤེས་པ་ལ་མི་རྟོན་པ་དང་། ངེས་པའི་དོན་གྱི་མདོ་སྡེ་ལ་རྟོན་གྱི་དྲང་བའི་དོན་གྱི་མདོ་སྡེ་ལ་མི་རྟོན་པ་དང་། ཆོས་ཉིད་ལ་རྟོན་གྱི་གང་ཟག་ལ་མི་རྟོན་པ་དང་། བདུད་བཞིའི་ལམ་ལས་ཤིན་ཏུ་འདས་པ་དང་། ཕུང་པོ་ཡོངས་སུ་ཤེས་པ་སྲུང་བ་
དང་། ཉོན་མོངས་པ་བསལ་བ་དང་། ཐ་མའི་ལུས་འཛིན་པ་དང་། འཆི་བདག་གི་ལམ་ལས་ཡང་དག་པར་འདས་པ་དང་། སྡུག་བསྔལ་ཡང་དག་པར་ཡོངས་སུ་ཤེས་པ་དང་། ཀུན་འབྱུང་བ་ཐམས་ཅད་སྤངས་པ་དང་། འགོག་པ་མངོན་སུམ་དུ་བྱ་བ་ལ་ཞུགས་པ་དང་། ལམ་སྒོམ་
པའི་རྣལ་འབྱོར་གྱི་རྗེས་སུ་ཞུགས་པ་དང་། འཕགས་པའི་བདེན་པ་བཞི་མཐོང་བ་དང་། གཞན་གྱི་དྲིང་ལ་མི་འཇོག་པ་དང་། སྟོན་པའི་བསྟན་པ་ལ་བྱ་བ་བྱས་པ་དང་། བྱེད་པ་བྱས་པ་དང་། ཟག་པ་ཟད་པ་དང་། རྣམ་པར་ཐར་པ་བརྒྱད་ལ་བསམ་གཏན་པ་དང་།
བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བས་བསུ་བ་དང་། སྔོན་གྱི་སྤྱོད་པ་དང་། བསམ་པ་ཕུན་སུམ་ཚོགས་པ་དང་། དགོན་པ་ལ་གནས་པར་མངོན་པར་དགའ་བ་དང་། འཕགས་པའི་རིགས་ལ་གནས་པ་དང་། སྦྱངས་པའི་ཡོན་ཏན་ལ་གནས་པ་དང་།
བློ་གྱ་གྱུ་མེད་པ་དང་། རབ་ཏུ་བྱུང་ནས། ཁྱིམ་གྱི་གནས་དང་མི་འདྲེ་བ་དང་། བསེ་རུ་ལྟར་གཅིག་པུ་རྒྱུ་བ་དང་། འདུ་འཛིས་འཇིགས་སྐྲག་པ་དང་། ཁམས་གསུམ་མ་ལུས་པ་ལས་རྣམ་པར་གྲོལ་བ་དང་། རྟག་ཏུ་འཇིགས་པའི་ཡིད་དང་ལྡན་པ་དང་། ཡང་དག་པའི་དགེ་སྦྱོང་གི་ཚུལ་ལ་གནས་པ་

དང་། ཐམས་ཅད་ལ་འདོད་པ་མེད་པ་དང་། འཇིག་རྟེན་གྱི་ཆོས་བརྒྱད་པོ་རྙེད་པ་དང་མ་རྙེད་པ་དང་། གྲགས་པ་དང་མ་གྲགས་པ་དང་། བདེ་བ་དང་སྡུག་བསྔལ་བ་དང་། བསྟོད་པ་དང་། སྨད་པ་རྣམས་ལས་ཡང་དག་པར་འདས་པ་དང་། ས་དང་མཚུངས་པའི་སེམས་ཀྱིས་
ཉེ་བར་བསྒྲུབས་ཏེ་གནས་པ་དང་། བདག་དང་གཞན་རྗེས་སུ་སྲུང་བ་དང་། འཁྲུལ་པ་མེད་པ་དང་། འཁྲུག་པ་མེད་པ་དང་། ཡང་དག་པར་ཞུགས་པ་དང་། ནམ་མཁའ་དང་མཚུངས་པའི་སེམས་ཀྱིས་ཉེ་བར་བསྒྲུབས་ཏེ་གནས་པ་དང་། མཚན་མ་ཐམས་ཅད་ལ་དེའི་སེམས་མི་ཆགས་མི་འཆིང་
སྟེ་དཔེར་ན་ནམ་མཁའ་ལ་ལག་མཐིལ་བཞིན་དུ་མི་ཆགས་མི་འཆིང་བ་ཡིན་ཏེ། འོད་སྲུང་དགེ་སྦྱོང་གི་ཆོས་རྣམ་པ་དེ་ལྟ་བུ་དེ་དག་དང་ལྡན་ན་དགེ་སྦྱོང་དགེ་སྦྱོང་ཞེས་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཡང་དག་པའི་དགེ་སྦྱོང་གི་ཡོན་ཏན་འདི་དག་ཡང་དག་པར་རབ་ཏུ་བསྟན་པ་ནི་ངོ་མཚར་ཏོ། །བཅོམ་ལྡན་འདས་མ་མཆིས་པའི་དུས་ན་གང་དག་དེ་བཞིན་གཤེགས་པའི་བྱང་ཆུབ་བསྐལ་པ་གྲངས་མ་མཆིས་པར་ཡང་
དག་པར་བསྒྲུབས་པ་ནུས་པར་བགྱིད་པ་དགེ་སྦྱོང་མ་ལགས་ལ་དགེ་སྦྱོང་དུ་མཆིད་ཀྱིས་འཆེ་ཞིང་། ཚངས་པར་སྤྱོད་པ་མ་ལགས་པར་ཚངས་པར་སྤྱོད་པར་མཆིད་ཀྱིས་འཆེ་བའི་དགེ་སློང་གང་ལ་ལ་དག་འབྱུང་བར་འགྱུར་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ང་
དང་། ཁྱོད་དང་ཉན་ཐོས་ཆེན་པོ་འདི་དག་ཀྱང་ཡོངས་སུ་མྱ་ངན་ལས་འདས་ཤིང་། བྱང་ཆུབ་སེམས་དཔའ་འདི་དག་ཀྱང་སངས་རྒྱས་ཀྱི་ཞིང་གཞན་དུ་དོང་ནས་བསྟན་པ་འདི་རབ་ཏུ་འཇིག་པར་འགྱུར་བ་ནི་ཚིག་གིས་བསྟན་པར་མི་ནུས་སོ། །འོད་སྲུང་དེ་ལ་དགེ་སློང་ལུས་མ་བསྒོམས་པ། ཚུལ་
ཁྲིམས་མ་བསྒོམས་པ། སེམས་མ་བསྒོམས་པ། ཤེས་རབ་མ་བསྒོམས་པ། བྱིས་པ་དམན་པ། གླེན་པ། རྨོངས་པ། རབ་ཏུ་མ་ཞི་བ། མ་དུལ་བ་ཁ་ཅིག་འབྱུང་བར་འགྱུར་ཏེ། དེ་དག་གི་གཡོ་དང་། སྒྱུ་དང་། མི་དྲང་བ་དང་། གྱ་གྱུ་དང་། དགེ་སྦྱོང་གི་དྲི་མ་དང་། དགེ་སྦྱོང་གི་སྐྱོན་

རྣམས་བརྗོད་པར་བྱའོ། །འོད་སྲུང་དེ་ལ་དགེ་སྦྱོང་གི་དྲི་མ་རྣམས་གང་ཞེ་ན། འོད་སྲུང་སུམ་ཅུ་རྩ་གཉིས་པོ་འདི་དག་ནི་དགེ་སྦྱོང་གི་དྲི་མ་སྟེ། དེ་དག་སྤངས་ན་དགེ་སྦྱོང་དགེ་སྦྱོང་ཞེས་བྱའོ། །སུམ་ཅུ་རྩ་གཉིས་གང་ཞེ་ན། འདོད་པ་ལ་རྣམ་པར་རྟོག་པ་དགེ་སྦྱོང་གི་དྲི་མ་དང་། གནོད་སེམས་ཀྱི་རྣམ་
པར་རྟོག་པ་དགེ་སྦྱོང་གི་དྲི་མ་དང་། རྣམ་པར་འཚེ་བའི་རྣམ་པར་རྟོག་པ་དགེ་སྦྱོང་གི་དྲི་མ་དང་། བདག་ལ་བསྟོད་པ་དགེ་སྦྱོང་གི་དྲི་མ་དང་། གཞན་ལ་བརྙས་པ་དགེ་སྦྱོང་གི་དྲི་མ་དང་། མི་འཐུན་པའི་རྙེད་པ་ཀུན་དུ་ཚོལ་བ་དགེ་སྦྱོང་གི་དྲི་མ་དང་། རྙེད་པས་རྙེད་པར་བྱེད་འདོད་པ་དགེ་སྦྱོང་གི་དྲི་མ་དང་།
དད་པས་བྱིན་པ་ཆུད་གཟོན་པ་དགེ་སྦྱོང་གི་དྲི་མ་དང་། ལྟུང་བ་འཆབ་པ་དགེ་སྦྱོང་གི་དྲི་མ་དང་། ཁྱིམ་པ་ལ་སྟེན་པ་དགེ་སྦྱོང་གི་དྲི་མ་དང་། རབ་ཏུ་བྱུང་བ་དང་སྟེན་པ་དགེ་སྦྱོང་གི་དྲི་མ་དང་། འདུ་འཛི་ལ་མངོན་པར་དགའ་བ་དགེ་སྦྱོང་གི་དྲི་མ་དང་། རྙེད་པ་ཡོངས་སུ་མ་གྲུབ་པར་རྟོག་པ་དགེ་སྦྱོང་གི་དྲི་
མ་དང་། བདག་གི་རྙེད་པས་ཆོག་པར་མི་འཛིན་པ་དགེ་སྦྱོང་གི་དྲི་མ་དང་། ཕ་རོལ་བསོད་སྙོམས་རྙེད་པ་ལ་ཕྲག་དོག་དང་སེར་སྣ་བྱེད་པ་དགེ་སྦྱོང་གི་དྲི་མ་དང་། ཕ་རོལ་གྱི་རྙེད་པ་ལ་འདོད་པ་དགེ་སྦྱོང་གི་དྲི་མ་དང་། བདག་གི་འཁྲུལ་པ་ལ་མི་རྟོག་པ་དགེ་སྦྱོང་གི་དྲི་མ་དང་། གཞན་གྱི་འཁྲུལ་པ་ཡོངས་
སུ་ཚོལ་བ་དགེ་སྦྱོང་གི་དྲི་མ་དང་། སོ་སོར་ཐར་པ་དང་འདུལ་བ་མི་སྲུང་བ་དགེ་སྦྱོང་གི་དྲི་མ་དང་། ཁྭ་ལྟར་མུ་ཅོར་སྨྲ་བ་དགེ་སྦྱོང་གི་དྲི་མ་དང་། མ་གུས་པ་དང་། རྒོད་པ་དང་། ཁེངས་པ་དགེ་སྦྱོང་གི་དྲི་མ་དང་། ལྟ་བས་ཀུན་ནས་དཀྲིས་པ་དགེ་སྦྱོང་གི་དྲི་མ་དང་། རྟེན་ཅིང་འབྲེལ་བར་འབྱུང་བ་དང་
འགལ་བ་དགེ་སྦྱོང་གི་དྲི་མ་དང་། མཐར་ལྟ་བ་ལ་གནས་པ་དགེ་སྦྱོང་གི་དྲི་མ་དང་། འཁོར་བ་ལ་མངོན་པར་དགའ་བ་དགེ་སྦྱོང་གི་དྲི་མ་དང་། མྱ་ངན་ལས་འདས་པ་ལ་མངོན་པར་མི་དགའ་བ་དགེ་སྦྱོང་གི་དྲི་མ་དང་། འཇིག་རྟེན་རྒྱང་པན་པའི་གསང་ཚིག་འཛིན་པ་དགེ་སྦྱོང་གི་དྲི་མ་དང་། སྒྲིབ་
པས་ཀུན་ནས་དཀྲིས་པ་དགེ་སྦྱོང་གི་དྲི་མ་དང་། ལས་ཀྱི་རྣམ་པར་སྨིན་པ་དང་འགལ་བ་དགེ་སྦྱོང་གི་དྲི་མ་དང་། རྣམ་པར་ཐར་པའི་སྒོ་གསུམ་གྱིས་སྐྲག་པ་དགེ་སྦྱོང་གི་དྲི་མ་དང་། ཆོས་ཟབ་མོ་སྤོང་བ་དགེ་སྦྱོང་གི་དྲི་མ་དང་། ཆོས་དང་འགལ་བར་གནས་པ་དགེ་སྦྱོང་གི་དྲི་མ་དང་། དཀོན་མཆོག་

གསུམ་ལ་མི་གུས་པ་དགེ་སྦྱོང་གི་དྲི་མ་སྟེ། འོད་སྲུང་སུམ་ཅུ་རྩ་གཉིས་པོ་དེ་དག་ནི་དགེ་སྦྱོང་གི་དྲི་མ་སྟེ། དེ་དག་སྤངས་ན་དགེ་སྦྱོང་དགེ་སྦྱོང་ཞེས་བྱའོ། །འོད་སྲུང་བརྒྱད་པོ་འདི་དག་ནི་དགེ་སྦྱོང་གི་ཆོས་ཀྱི་སྒྲིབ་པ་སྟེ། བརྒྱད་གང་ཞེ་ན་འདི་ལྟ་སྟེ། བླ་མ་རྣམས་ལ་མི་གུས་པ་དང་།
ཆོས་རྣམས་ལ་རིམ་གྲོ་མེད་པ་དང་། ཚུལ་བཞིན་མ་ཡིན་པ་ཡིད་ལ་བྱེད་པ་དང་། མ་ཐོས་པའི་མདོ་སྡེ་སྤོང་བ་དང་། བདག་མེད་པ་སེམས་ཅན་མེད་པ། སྲོག་མེད་པ། གང་ཟག་མེད་པའི་ཆོས་ཀྱིས་སྐྲག་པ་དང་། འདུས་མ་བྱས་ཀྱི་ཆོས་བསྟན་པ་ལ་མི་འཇུག་པར་འདུས་བྱས་ཉིད་ཀྱི་རྗེས་སུ་
སྙེགས་པ་དང་། འདུ་བྱེད་རྣམས་མ་སྐྱེས་པ་ཞེས་ཐོས་ན་སྐྲག་པ་དང་། ཆོས་ཐམས་ཅད་རང་བཞིན་གྱིས་མ་སྐྱེས་པ་ཞེས་ཐོས་ན་གཡང་ས་ཆེན་པོར་ལྟུང་བ་བཞིན་དུ་ལྟུང་བ་སྟེ། འོད་སྲུང་བརྒྱད་པོ་དེ་དག་ནི་དགེ་སྦྱོང་གི་ཆོས་ཀྱི་སྒྲིབ་པ་སྟེ། རབ་ཏུ་བྱུང་བས་དེ་དག་ཡོངས་སུ་སྤང་བར་བྱའོ། །
འོད་སྲུང་དགེ་སྦྱོང་ནི་ཁ་དོག་དང་རྟགས་ཀྱི་དབྱིབས་ཀྱིས་དགེ་སྦྱོང་ཞེས་ང་མི་འཆད་ཀྱི། ཡོན་ཏན་གྱི་ཆོས་ལ་ནན་ཏན་བྱེད་པའི་དགེ་སྦྱོང་ནི་དགེ་སྦྱོང་ངོ་ཞེས་ངས་བཤད་དོ། །འོད་སྲུང་དགེ་སྦྱོང་གིས་ནི་རྙོག་པ་མེད་པའི་སེམས་ཀྱིས་ལུས་ལ་ངུར་སྨྲིག་དག་བཅང་བར་བྱའོ། །དེ་ཅིའི་ཕྱིར་ཞེ་ན།
འོད་སྲུང་རྙོག་པ་མེད་པ་ལ་ངས་ངུར་སྨྲིག་གནང་གི །འོད་སྲུང་གང་རྙོག་པ་དང་བཅས་པས་ལུས་ལ་ངུར་སྨྲིག་དག་འཆང་བ་དེ་དག་ཐམས་ཅད་ནི་ངུར་སྨྲིག་ཚིག་པའོ་ཞེས་བཤད་དེ། བསམ་པས་མོས་པ་རྣམས་ནི་མ་གཏོགས་སོ། །དེ་ཅིའི་ཕྱིར་ཞེ་ན། དེ་ནི་འཕགས་པ་རྣམས་ཀྱི་རྒྱལ་མཚན་
ཡིན་པའི་ཕྱིར་ཏེ། སྐྱོ་ཞིང་འདོད་ཆགས་དང་བྲལ་བར་སྤྱོད་པ་རྣམས་ཀྱི་གོས་འདི་དག་ནི་ཉེ་བར་ཞི་བའི་རྗེས་སུ་འཐུན་པ་བྱམས་པའི་རྗེས་སུ་ཞུགས་པའོ། །འོད་སྲུང་དེ་ལ་འཕགས་པ་རྣམས་ཀྱི་རྒྱལ་མཚན་གང་ཞེ་ན། འོད་སྲུང་བཅུ་གཉིས་པོ་འདི་དག་ནི་འཕགས་པ་རྣམས་ཀྱི་རྒྱལ་མཚན་ཏེ། བཅུ་གཉིས་
གང་ཞེ་ན། འོད་སྲུང་ཚུལ་ཁྲིམས་འཕགས་པ་རྣམས་ཀྱི་རྒྱལ་མཚན་དང་། ཏིང་ངེ་འཛིན་འཕགས་པ་རྣམས་ཀྱི་རྒྱལ་མཚན་དང་། ཤེས་རབ་འཕགས་པ་རྣམས་ཀྱི་རྒྱལ་མཚན་དང་། རྣམ་པར་གྲོལ་བ་འཕགས་པ་རྣམས་ཀྱི་རྒྱལ་མཚན་དང་། རྣམ་པར་གྲོལ་བའི་ཡེ་ཤེས་མཐོང་བ་འཕགས་

པ་རྣམས་ཀྱི་རྒྱལ་མཚན་དང་། བདེན་པ་ལ་འཇུག་པ་འཕགས་པ་རྣམས་ཀྱི་རྒྱལ་མཚན་དང་། རྟེན་ཅིང་འབྲེལ་པར་འབྱུང་བ་ལ་འཇུག་པ་འཕགས་པ་རྣམས་ཀྱི་རྒྱལ་མཚན་དང་། བསམ་གཏན་བཞི་འཕགས་པ་རྣམས་ཀྱི་རྒྱལ་མཚན་དང་། ཚད་མེད་པ་བཞི་འཕགས་པ་རྣམས་
ཀྱི་རྒྱལ་མཚན་དང་། གཟུགས་མེད་པའི་སྙོམས་པར་འཇུག་པ་བཞི་འཕགས་པ་རྣམས་ཀྱི་རྒྱལ་མཚན་དང་། སྐྱོན་མེད་པ་ལ་འཇུག་པ་འཕགས་པ་རྣམས་ཀྱི་རྒྱལ་མཚན་དང་། ཟག་པ་ཟད་པ་འཕགས་པ་རྣམས་ཀྱི་རྒྱལ་མཚན་ཏེ། འོད་སྲུང་བཅུ་གཉིས་པོ་དེ་དག་ནི་འཕགས་པ་
རྣམས་ཀྱི་རྒྱལ་མཚན་ནོ། །འོད་སྲུང་གང་ལ་ལ་རྒྱལ་མཚན་འདི་དག་དང་མི་ལྡན་པར་འཕགས་པའི་རིགས་གོས་ངུར་སྨྲིག་དག་འཆང་བ་དེ་ནི་ནོར་པའི་ཆོས་ལ་ཞུགས་པའོ་ཞེས་ངས་བཤད་དོ། །ཆོས་དང་འགལ་བར་གནས་པ་ཞེས་བཤད་དོ། །དེ་བཞིན་གཤེགས་པའི་བསྟན་པ་ལས་
རིང་དུ་གནས་པ་ཞེས་བཤད་དོ། །མྱ་ངན་ལས་འདས་པའི་ཕྱོགས་ཀྱི་མི་འཐུན་པའི་ཕྱོགས་ལ་གནས་པ་ཞེས་བཤད་དོ། །འཁོར་བའི་ཕྱོགས་དང་འཐུན་པ་ཞེས་བཤད་དོ། །ང་རྒྱལ་གྱི་མཆིལ་པས་ཟིན་པ་ཞེས་བཤད་དོ། །སྙིང་པོ་མ་བླངས་པ་ཞེས་བཤད་དོ། །ཆོས་ལས་ཉམས་པ་
ཞེས་བཤད་དོ། །ཉམ་ང་བའི་ལམ་ལ་གནས་པ་ཞེས་བཤད་དོ། །འོད་སྲུང་དེ་ལྟ་བས་ན་དགེ་སྦྱོང་གིས་ལུས་ལ་ངུར་སྨྲིག་དག་འཆང་བ་ན་རྙོག་པ་མེད་པའི་སེམས་སུ་བྱའོ། །གལ་ཏེ་དེས་འབྲས་བུ་ཐོབ་པར་མ་གྱུར་ན་དེས་གུས་པ་བརྒྱད་ཀྱིས་ལུས་ལ་ངུར་སྨྲིག་དག་བཅང་བར་བྱ་སྟེ། བརྒྱད་
གང་ཞེ་ན། མཆོད་རྟེན་གྱི་འདུ་ཤེས་དང་། སྟོན་པའི་འདུ་ཤེས་དང་། ཉེ་བར་ཞི་བའི་འདུ་ཤེས་དང་། བྱམས་པའི་འདུ་ཤེས་དང་། སངས་རྒྱས་ལ་གུས་པའི་འདུ་ཤེས་དང་། ངོ་ཚ་ཤེས་པའི་འདུ་ཤེས་དང་། ཁྲེལ་ཡོད་པའི་འདུ་ཤེས་དང་། རྙོག་པ་མེད་པར་བྱའོ་སྙམ་པ་སྟེ། དགེ་སྦྱོང་
གི་ཚུལ་དང་འཐུན་པའི་ཕྱིར་གུས་པ་བརྒྱད་པོ་དེ་དག་གིས་ལུས་ལ་ངུར་སྨྲིག་དག་བཅང་བར་བྱའོ། །འོད་སྲུང་གང་དག་ལྷོད་ཅིང་ཡང་དག་པར་མ་སྡོམ་པ་དང་། དགེ་སྦྱོང་གི་ཡོན་ཏན་གྱི་ཆོས་འདི་དག་ལས་ཉམས་པར་ལུས་ལ་ངུར་སྨྲིག་དག་འཆང་བ་རྣམས་ནི་གུས་པ་འདི་དག་མི་སྐྱེད་

དོ། །འོད་སྲུང་དགེ་སྦྱོང་གི་ཁ་དོག་དང་གཟུགས་ཅན་ལ་གནོད་པ་བྱེད་པ་ཞེས་བྱ་བ་ཉི་ཚེ་བའི་སེམས་ཅན་དམྱལ་བ་ཡོད་དེ། འོད་སྲུང་ཉི་ཚེ་བའི་སེམས་ཅན་དམྱལ་བ་དེར་དགེ་སྦྱོང་གི་གཟུགས་སུ་གྱུར་བཞིན་དུ་གོས་འབར་བ་དག་དང་། མགོ་འབར་བ་དག་དང་། ལྷུང་བཟེད་
འབར་བ་དག་དང་། སྟན་འབར་བ་དག་དང་། མལ་ཆ་འབར་བ་དག་གནོད་པ་བྱེད་དེ། དེ་དག་གི་ལོངས་སྤྱོད་དང་ཡོངས་སུ་སྤྱད་པ་གང་ཅི་ཡོད་པ་དེ་དག་ཐམས་ཅད་འབར་རབ་ཏུ་འབར་ཏེ་ཀུན་དུ་རབ་ཏུ་མཆེད་ཅིང་འབར་ལ་དེ་མེར་གྱུར་ཏེ། དགེ་སྦྱོང་གི་ཁ་དོག་དང་གཟུགས་ཀྱིས་གནོད་པ་
དེ་དག་མྱོང་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ལུས་དང་ངག་དང་ཡིད་ཀྱི་ལས་ཡོངས་སུ་མ་དག་པ་དང་ལྡན་པའི་ཕྱིར་ཏེ། ལུས་དང་ངག་དང་ཡིད་ཀྱི་ལས་ཡོངས་སུ་མ་དག་པ་དང་ལྡན་པ་དེ་དག་གི་འགྲོ་བ་ཡང་ཡོངས་སུ་མ་དག་པ་ཉིད་དུ་འགྱུར་རོ། །འོད་སྲུང་དགེ་སྦྱོང་
མ་ཡིན་ལ་དགེ་སྦྱོང་དུ་ཁས་འཆེ་བ་དང་། ཚངས་པར་སྤྱོད་པ་མ་ཡིན་ལ་ཚངས་པར་སྤྱད་པར་ཁས་འཆེ་བ་གང་ཞིག་ཚུལ་ཁྲིམས་དང་ལྡན་པ་རྣམས་དང་། ཡོན་ཏན་དང་ལྡན་པ་རྣམས་ཀྱིས་ཕྱག་བྱས་པ་བདག་གིར་བྱེད་ན་དེ་མི་དགེ་བའི་ལས་དེས་བརྙས་པ་བརྒྱད་འཐོབ་སྟེ། བརྒྱད་
གང་ཞེ་ན། བེམས་པོ་ལྟ་བུར་འགྱུར་བ་དང་། གོ་དཀའ་ཞིང་ལེ་ལོ་ཅན་དུ་འགྱུར་བ་དང་། སྐྱེ་བོ་མང་པོས་བགད་པའི་བུད་མེད་དུ་འགྱུར་བ་དང་། རང་དབང་མེད་ཅིང་བྲན་དུ་འགྱུར་བ་དང་། མདོག་ངན་ཞིང་མི་སྡུག་པར་འགྱུར་བ་དང་། མདོག་ངན་ཞིང་དབང་ཆུང་བར་གྲགས་པར་
འགྱུར་བ་དང་། དེ་ལ་སུ་ཡང་སྩུ་བར་མི་འགྱུར་བ་དང་། སྦྱིན་གནས་རྣམས་ལ་མགུ་བར་མི་བྱེད་པ་སྟེ། བརྙས་པ་བརྒྱད་པོ་དེ་དག་འཐོབ་བོ། །འོད་སྲུང་དེ་ལྟ་བས་ན་བཟང་པོ་མ་ཡིན་པའི་ཆོས་འདི་ལྟ་བུ་འདི་དག་ཐོས་ནས་དགེ་སྦྱོང་སྡིག་པ་ཅན་གྱིས་གཞན་གྱིས་ཕྱག་བྱས་པ་བདག་གིར་
མི་བྱའི། འོད་སྲུང་གང་དགེ་སྦྱོང་མ་ཡིན་ལ་དགེ་སྦྱོང་དུ་ཁས་འཆེ་བ་དང་། ཚངས་པར་སྤྱོད་པ་མ་ཡིན་ལ་ཚངས་པར་སྤྱོད་པར་ཁས་འཆེ་བ་ནི་ཐ་ན་ས་ཆེན་པོ་འདི་ལ་མཆིལ་མའི་ཐལ་བ་ཙམ་འདོར་བ་དེ་ཡང་ངས་རྙེད་པར་མི་འགྱུར་ན་གོམ་པ་འདེག་པ་དང་འཇོག་པ་ལྟ་ཅི་སྨོས། དེ་

ཅིའི་ཕྱིར་ཞེ་ན། འོད་སྲུང་ཆེན་པོ་འདི་ནི་སྔོན་གྱི་རྒྱལ་པོ་རྣམས་ཀྱིས་ཚུལ་ཁྲིམས་དང་ལྡན་པ་རྣམས་དང་། ཡོན་ཏན་དང་ལྡན་པ་རྣམས་དང་། སྦྱིན་གནས་རྣམས་ལ་ཀུན་ཏུ་སྤྱད་པའི་དོན་དུ་ཕུལ་བའི་ཕྱིར་རོ། །འོད་སྲུང་དེ་ལ་མི་བླུན་པོ་དེ་ནི་གོམ་པ་འཇོག་པ་དང་འདོར་བ་གང་ཡིན་པ་དེ་ནི་
ཐམས་ཅད་ཀྱང་དད་པས་བྱིན་པ་ལ་མི་དབང་བཞིན་དུ་གོམ་པ་འདོར་ཞིང་འཇོག་པ་ཡིན་ན་དགེ་འདུན་གྱི་འམ། ཕྱོགས་བཞིའི་དགེ་འདུན་གྱི་ཁྲི་འམ། ཁྲིའུ་འམ། འཆག་ས་འམ། གདིང་བ་འམ། གནས་ཁང་ངམ། གཙུག་ལག་ཁང་ངམ། ཀུན་དགའ་ར་བའམ། ཀུན་དགའ་
ར་བའི་གཞི་འམ། ཡོངས་སུ་སྤྱད་པ་འམ། ལྷུང་བཟེད་དམ། ཆོས་གོས་སམ། བསོད་སྙོམས་སམ། མལ་ཆ་འམ། ན་བའི་གསོས་སྨན་ནམ། ཡོ་བྱད་ཀྱང་རུང་སྟེ། ཐམས་ཅད་དད་པས་བྱིན་པ་ལ་མི་དབང་བར་སྤྱོད་པ་ཡིན་པ་ལྟ་ཅི་སྨོས། འོད་སྲུང་ཁྱོད་མོས་པར་བྱའོ། །ཁྱོད་
ཀྱིས་ཁོང་དུ་ཆུད་པར་བྱའོ། །འོད་སྲུང་དགེ་སྦྱོང་མ་ཡིན་ལ་དགེ་སྦྱོང་དུ་ཁས་འཆེ་བ་དང་། ཚངས་པར་སྤྱོད་པ་མ་ཡིན་ལ་ཚངས་པར་སྤྱོད་པར་ཁས་འཆེ་བས་ནི་དད་པས་བྱིན་པ་སྐྲའི་རྩེ་མོའི་ཆ་ཙམ་ཡང་ཡོངས་སུ་དག་པར་བྱ་མི་ནུས་སོ། །དེ་ཅིའི་ཕྱིར་ཞེ་ན། འོད་སྲུང་འཕགས་པའི་དགེ་འདུན་
ནི་ངས་རྒྱ་མཚོ་ཆེན་པོ་ལྟ་བུ་དང་། བསོད་ནམས་ཀྱི་ཞིང་དང་། སྦྱིན་གནས་རྣམས་ཀྱི་མཆོག་ཏུ་བསྟན་པའི་ཕྱིར་རོ། །འོད་སྲུང་བྲམ་ཟེའམ་ཁྱིམ་བདག་དད་པ་གང་དག་དེ་ལ་ཡོན་འབུལ་བ་དེ་དག་ཚད་མེད་པའི་འདུ་ཤེས་ཀྱིས་འབུལ་བ་དེ་ལ་འོད་སྲུང་མི་བླུན་པོ་ཚུལ་ཁྲིམས་འཆལ་པས་
ཐ་ན་སྐྲའི་རྩེ་མོ་བརྒྱར་གཤེགས་པའི་ཆ་ཙམ་ཞིག་དད་པས་བྱིན་པ་ཡོངས་སུ་སྤྱད་ན་ཡང་སྦྱིན་པ་པོ་དང་། སྦྱིན་བདག་དེའི་ཡོངས་སུ་སྦྱང་བའི་ཕྱིར་དད་པས་བྱིན་པ་སྐྲའི་རྩེ་མོའི་ཆ་ཙམ་ཇི་སྙེད་ལ་སྤྱད་པ་དེ་སྙེད་ཀྱི་ལས་ཀྱི་རྒྱ་མཚོ་ཆེན་པོ་སོགས་པར་འགྱུར་རོ། །འོད་སྲུང་དེ་ལྟ་བས་ན་ཚུལ་
ཁྲིམས་ཡོངས་སུ་དག་པས་དད་པས་བྱིན་པ་ཡོངས་སུ་སྤྱད་པར་བྱའོ་ཞེས་ཁྱོད་ཀྱིས་དེ་ལྟར་བསླབ་པར་བྱའོ། །བསྟན་པ་འདི་བཤད་པ་ན་རྣལ་འབྱོར་སྤྱོད་པའི་དགེ་སློང་ཉིས་བརྒྱས་བསྟན་པ་འདི་ཐོས་ནས་རབ་ཏུ་ངུས་ཏེ་མཆི་མ་ཟག་ཅིང་ཚིག་འདི་སྐད་ཅེས་བདག་ཅག་ནི་གུམ་

ཡང་རུང་སྟེ། འབྲས་བུ་མ་ཐོབ་ཀྱི་བར་དུ་དད་པས་སྩལ་བའི་བསོད་སྙོམས་གཅིག་ཙམ་ཡང་ཡོངས་སུ་སྤྱད་པར་མི་བགྱིའོ་ཞེས་སྨྲས་སོ། །བཅོམ་ལྡན་འདས་ཀྱིས་བཀའ་སྩལ་པ། སྐྱེས་བུ་དམ་པ་དག་ལེགས་སོ་ལེགས་སོ། །ངོ་ཚ་ཤེས་པ་དང་། འགྱོད་པ་དང་ལྡན་
པ་དང་། འཇིག་རྟེན་ཕ་རོལ་ཏུ་ཁ་ན་མ་ཐོ་བས་འཇིགས་པར་ལྟ་བ་རྣམ་པ་འདི་ལྟ་བུ་དག་གིས་གསུང་རབ་འདི་མཛེས་སོ། །འོད་སྲུང་ངས་དགེ་སློང་གཉིས་ལ་དད་པས་བྱིན་པ་གནང་སྟེ། གཉིས་གང་ཞེ་ན་ལྡན་པ་དང་། གྲོལ་བའོ། །ཡང་གཉིས་ཏེ། འདུ་བྱེད་ཐམས་ཅད་ལ་
མི་རྟག་པར་ལྟ་བ་དང་གང་ཡང་སེམས་རྣམ་པར་གྲོལ་བ་བྱམས་པ་ལ་སྙོམས་པར་འཇུག་པའོ། །དགེ་སློང་དག་དེ་ལ་དགེ་སློང་ལྡན་པ་རྣལ་འབྱོར་སྤྱོད་པ་ངའི་བསྟན་པ་ལ་ཞུགས་པ་གང་ཞིག་སྦྱིན་པ་པོ་དང་། སྦྱིན་བདག་ལས་ཆོས་གོས་དང་། བསོད་སྙོམས་དང་། མལ་ཆ་དང་། ན་བའི་
གསོས་སྨན་དང་། ཡོ་བྱད་རྣམས་ཡོངས་སུ་སྤྱད་ནས་འཁོར་བའི་སྐྱོན་མཐོང་། འདུ་བྱེད་ཐམས་ཅད་མི་རྟག་པར་མཐོང་། འདུ་བྱེད་ཐམས་ཅད་སྡུག་བསྔལ་བར་རིག །ཆོས་ཐམས་ཅད་ལ་བདག་མེད་པར་མོས། མྱ་ངན་ལས་འདས་པ་ཞི་བར་རྟོགས་པས་ནི་རི་རབ་ཙམ་གྱི་ཁམ་དག་གི་དད་པས་བྱིན་
པ་ཡོངས་སུ་སྤྱད་ཀྱང་དེའི་ཡོན་ཤིན་དུ་ཡོངས་སུ་དག་པར་འགྱུར་རོ། །སྦྱིན་པ་པོ་དང་། སྦྱིན་བདག་གང་དག་ལས་དད་པས་བྱིན་པ་ཡོངས་སུ་སྤྱད་པ་དེ་ལས་དེ་དག་གིས་བསོད་ནམས་ཀྱི་རྣམ་པར་སྨིན་པ་འབྱོར་པ་ཆེན་པོ་དང་། ཕན་ཡོན་ཆེན་པོར་འགྱུར་རོ། །དེ་ཅིའི་ཕྱིར་ཞེ་ན། དགེ་
སློང་དག་རྫས་ལས་བྱུང་བའི་བསོད་ནམས་བྱ་བའི་དངོས་པོ་རྣམས་ལས་གང་བྱམས་པའི་སེམས་ལ་སྙོམས་པར་འཇུག་པ་དེ་མཆོག་ཡིན་པའི་ཕྱིར་རོ། །དགེ་སློང་དག་དགེ་སློང་གང་ཞིག་སྦྱིན་པ་པོ་དང་། སྦྱིན་བདག་གི་ཆོས་གོས་དང་། བསོད་སྙོམས་དང་། མལ་ཆ་དང་། ཡོ་བྱད་
རྣམས་ཡོངས་སུ་སྤྱད་ནས་སེམས་རྣམ་པར་གྲོལ་བ་ཚད་མེད་པ་ལ་སྙོམས་པར་འཇུག་ན་སྦྱིན་པ་པོ་དང་། སྦྱིན་བདག་དེའི་རྣམ་པར་སྨིན་པ་ཡང་ཚད་མེད་པར་ཤེས་པར་བྱའོ། །འོད་སྲུང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཡོད་པའི་རྒྱ་མཚོ་ཆེན་པོ་རྣམས་ནི་ཡོངས་

སུ་ཟད་པར་འགྱུར་ཡང་སྲིད་ཀྱི་དེའི་བསོད་ནམས་ཀྱི་རྒྱུ་འཐུན་པ་ནི་ཡོངས་སུ་ཟད་པར་གང་ཡང་མི་འགྱུར་རོ། །འོད་སྲུང་གང་ཞིག་སྦྱིན་པ་པོ་དང་། སྦྱིན་བདག་གི་དད་པས་བྱིན་པ་ཡོངས་སུ་སྤྱད་ནས་འཆལ་བའི་ཚུལ་ཁྲིམས་ཀྱིས་ལོག་པར་ལྟུང་བར་བྱེད་ན་མི་གཏི་མུག་པ་དེ་གནོད་པ་ཇི་
ཙམ་གྱི་ཕྱིར་ཞུགས་པ་ལ་ལྟོས། འོད་སྲུང་དེ་ལྟ་བས་ན་དགེ་སྦྱོང་གི་དྲི་མ་དང་། དགེ་སྦྱོང་གི་སྐྱོན་དང་། དགེ་སྦྱོང་གི་མི་དྲང་བ་དང་། དགེ་སྦྱོང་གི་གཡོ་དང་། དགེ་སྦྱོང་གི་སྒྱུ་དང་། དགེ་སྦྱོང་གི་གྱ་གྱུ་རྣམ་པ་དེ་ལྟ་བུ་དེ་དག་ནི་དགེ་སྦྱོང་བསམ་པ་དག་པས་ཡོངས་སུ་སྤོང་བར་བྱའོ། །
འོད་སྲུང་དགེ་སྦྱོང་དགེ་སྦྱོང་ཞེས་བྱ་བ་ནི་གང་མིག་ནས་མི་ཟག་ཅིང་རྣ་བ་ནས་མ་ཡིན། སྣ་ནས་མ་ཡིན། ལྕེ་ནས་མ་ཡིན། ལུས་ལས་མ་ཡིན། ཡིད་ནས་ཀྱང་མི་ཟག་པ་སྟེ། དེའི་ཕྱིར་དགེ་སྦྱོང་དགེ་སྦྱོང་ཞེས་བྱའོ། །སྐྱེ་མཆེད་དྲུག་རིག་པ་དང་མངོན་པར་ཤེས་པ་དྲུག་དང་།
རྗེས་སུ་དྲན་པ་དྲུག་དང་ལྡན་པ་དང་། དམ་པ་རྣམས་ལ་གུས་པར་གནས་པ་དང་། ཕ་རོལ་དུ་འགྲོ་བའི་ཆོས་དྲུག་ལ་གནས་པ་སྟེ། དེའི་ཕྱིར་དགེ་སྦྱོང་དགེ་སྦྱོང་ཞེས་བྱའོ། །དགེ་སྦྱོང་གི་ལེའུ་སྟེ་དང་པོའོ།། །།འོད་སྲུང་དགེ་སློང་དགེ་སློང་ཞེས་བྱ་བ་ནི།
ཉོན་མོངས་པ་བཅོམ་པའི་ཕྱིར་དགེ་སློང་ཞེས་བྱའོ། །བདག་ཏུ་འདུ་ཤེས་པ་བཅོམ་པ་དང་། སེམས་ཅན་དུ་འདུ་ཤེས་པ་དང་། སྲོག་ཏུ་འདུ་ཤེས་པ་དང་། གསོ་བར་འདུ་ཤེས་པ་དང་། གང་ཟག་ཏུ་འདུ་ཤེས་པ་དང་། སྐྱེས་པར་འདུ་ཤེས་པ་དང་། བུད་མེད་དུ་འདུ་ཤེས་པ་དང་།
ཁྱེའུར་འདུ་ཤེས་པ་དང་། བུ་མོར་འདུ་ཤེས་པ་བཅོམ་པ་སྟེ། དེའི་ཕྱིར་དགེ་སློང་དགེ་སློང་ཞེས་བྱའོ། །ལུས་བསྒོམས་པ་དང་། ཚུལ་ཁྲིམས་བསྒོམས་པ་དང་། སེམས་བསྒོམས་པ་དང་། ཤེས་རབ་བསྒོམས་པ་དང་། འཇིགས་སྐྲག་པ་མེད་པ་དང་། སྲིད་པའི་ཆུ་བོ་ལས་
རྒལ་བ་དང་། འབྱུང་བ་དང་། འཇིག་པ་ལ་ལྟ་བ་དང་། འཇིགས་པ་ཐམས་ཅད་དང་བྲལ་བ་དང་། འཇིགས་པ་མེད་པའི་ལམ་ལ་གནས་པ་སྟེ། དེའི་ཕྱིར་དགེ་སློང་དགེ་སློང་ཞེས་བྱའོ། །འོད་སྲུང་གང་ལ་ལ་ཞིག་ཆོས་འདི་དག་དང་མི་ལྡན་ལ་བདག་ནི་དགེ་སློང་དགེ་སློང་ངོ་སྙམ་དུ་

ཁས་འཆེ་ན་བསམ་པས་མོས་པ་མ་གཏོགས་པར་ང་ཡང་དེའི་སྟོན་པ་མ་ཡིན་ལ་དེ་ཡང་ངའི་ཉན་ཐོས་མ་ཡིན་ནོ། །འོད་སྲུང་སྡིག་པ་ཅན་གྱི་དགེ་སློང་དག་ཕལ་ཆེར་ངའི་བསྟན་པ་འདི་ནུབ་པར་བྱེད་པར་འགྱུར་ཏེ། འོད་སྲུང་ཡ་མཚན་ཅན་དགུ་བཅུ་རྩ་ལྔ་དང་། ཕས་ཀྱི་རྒོལ་
བ་ཐམས་ཅད་ཀྱིས་ནི་ངའི་བསྟན་པ་འདི་ནུབ་པར་བྱེད་མི་ནུས་སོ། །གཞན་དུ་ན་ངའི་བསྟན་པ་འདི་ལས་མི་གཏི་མུག་པ་ངེས་པར་མི་སེམས་པ་གང་དག་འབྱུང་བ་དེ་དག་གིས་ངའི་བསྟན་པ་ནུབ་པར་བྱེད་པར་འགྱུར་རོ། །འོད་སྲུང་འདི་ལྟ་སྟེ་དཔེར་ན་རི་དགས་ཀྱི་རྒྱལ་པོ་སེང་གེ་ཤི་བའི་ཤ་ལ་གཅན་
གཟན་ནམ་བྱ་གང་གིས་ཀྱང་ཟ་བར་མི་ནུས་ཀྱི་སེང་གེའི་རོ་དེ་ཉིད་ལས་སྲིན་བུ་གང་དག་འབྱུང་བ་དེ་དག་རི་དགས་ཀྱི་རྒྱལ་པོ་སེང་གེའི་ཤ་ལ་ཟའོ། །འོད་སྲུང་དེ་བཞིན་དུ་ངའི་བསྟན་པ་འདི་ཉིད་ལ་མི་བླུན་པོ་བརྐམ་པ། ཆགས་པས་ཟིལ་གྱིས་ནོན་པ། ཆོས་མ་ཡིན་པ་ལ་ལྟ་བ། ངེས་པར་མི་སེམས་
པ། ལྷོད་པ། བརྫུན་དུ་སྨྲ་བ་གང་དག་འབྱུང་བ་དེ་དག་ངའི་བསྟན་པ་ནུབ་པར་བྱེད་པར་འགྱུར་རོ། །འོད་སྲུང་ཆོས་བཞི་དང་ལྡན་ན་སྡིག་པ་ཅན་གྱི་དགེ་སློང་དུ་རིག་པར་བྱ་སྟེ། བཞི་གང་ཞེ་ན། ཆགས་པ་དང་། ཞེ་སྡང་དང་། གཏི་མུག་དང་། ངའོ་སྙམ་པའི་ང་རྒྱལ་ཏེ། བཞི་པོ་དེ་དག་གོ །གཞན་
ཡང་བཞི་སྟེ། བཞི་གང་ཞེ་ན། ཁེངས་པ་དང་། མུ་ཆོར་སྨྲ་བ་དང་། བྱ་ཁྭ་ལྟ་བུ་དང་། ཚིག་འཆལ་པ་སྟེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། རྒོད་པ་དང་། ཕོ་ཐེག་ཅན་དང་། རྙེད་པ་འདོད་པ་དང་། ཆོས་མ་ཡིན་པ་འདོད་པ་སྟེ། བཞི་པོ་དེ་དག་གོ །གཞན་ཡང་བཞི་སྟེ།
བཞི་གང་ཞེ་ན། གཡོ་ཅན་དང་། སྒྱུ་ཅན་དང་། མི་འཐུན་པས་འཚོ་བ་དང་། མི་གཙིགས་པར་སྨྲ་བ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། བྱས་པ་མི་གཟོ་བ་དང་། བྱས་པ་ལ་སྨོད་པ་དང་། སྔོན་བྱས་པ་མི་དྲན་པ་དང་། མཛའ་བོ་ལ་འཁུ་བ་ཡིན་ཏེ། བཞི་པོ་དེ་དག་
གོ། །གཞན་ཡང་བཞི་སྟེ། བཞི་གང་ཞེ་ན་དད་པས་བྱིན་པ་ལོག་པར་ལྟུང་བར་བྱེད་པ་དང་། ཚུལ་ཁྲིམས་མི་སྲུང་བ་དང་། སོ་སོར་ཐར་པ་ཁྱད་དུ་གསོད་པ་དང་། འདུལ་བ་མི་སྲུང་བ་སྟེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། བདག་ཏུ་སྨྲ་བ་ཡིན། སེམས་ཅན་དུ་སྨྲ་བ་

ཡིན། སྲོག་ཏུ་སྨྲ་བ་ཡིན། གང་ཟག་ཏུ་སྨྲ་བ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། སངས་རྒྱས་ལ་མི་གུས་པ་ཡིན། ཆོས་ལ་མི་གུས་པ་ཡིན། དགེ་འདུན་ལ་མི་གུས་པ་ཡིན། བསླབ་པ་རྣམས་ལ་མི་གུས་པ་ཡིན་ཏེ། བཞི་པོ་དེ་དག་གོ །གཞན་ཡང་བཞི་
སྟེ། བཞི་གང་ཞེ་ན། དགེ་འདུན་འཐུན་པ་ལ་མི་དགའ་བ་ཡིན། གཙུག་ལག་ཁང་ལ་དགའ་བ་མི་རྙེད་པ་ཡིན། འདུ་འཛི་ལ་མངོན་པར་དགའ་བ་ཡིན། འཇིག་རྟེན་རྒྱང་པ་ན་པའི་གསང་ཚིག་རྗོད་པ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། རྙེད་པ་འདོད་པ་
ཡིན། གྲགས་པ་འདོད་པ་ཡིན། གཉེན་བཤེས་འདོད་པ་ཡིན། ཆོས་ལ་མཆོག་ཏུ་དགའ་བ་མི་རྙེད་པ་ཡིན་ཏེ་བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། བདུད་ཀྱིས་ཟིན་པ་ཡིན། བདུད་ཀྱིས་ནོན་པ་ཡིན། རྨུགས་པ་དང་གཉིད་མང་བ་ཡིན། འཕགས་པའི་རིགས་
རྣམས་ལ་མི་གནས་པ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། ལུས་རུལ་ཅིང་བརྒྱན་པ་དང་། ཉོན་མོངས་པས་སྣད་པ་དང་། མྱ་ངན་ལས་འདས་པ་ལ་རྒྱབ་ཀྱིས་བལྟས་པ་དང་། འབྲས་བུ་ཐོབ་པ་མེད་པ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ།
བཞི་གང་ཞེ་ན། འདོད་ཆགས་ཀྱི་ཡོངས་སུ་གདུང་བས་ཡོངས་སུ་གདུངས་པ་དང་། ཞེ་སྡང་གི་ཡོངས་སུ་གདུང་བས་ཡོངས་སུ་གདུངས་པ་དང་། གཏི་མུག་གི་ཡོངས་སུ་གདུང་བས་ཡོངས་སུ་གདུངས་པ་དང་། ཉོན་མོངས་པ་ཐམས་ཅད་ཀྱི་ཡོངས་སུ་གདུང་བས་ཡོངས་སུ་གདུངས་
པ་སྟེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། ལམ་ངན་པ་ལ་གནས་ཏེ་འབྱུང་བ་མི་མཐོང་བ་ཡིན། སེར་སྣ་ཅན་དུ་གྱུར་ཏེ་ཀུན་མི་བགེད་པའི་ངང་ཚུལ་ཅན་ཡིན། ཐམས་ཅད་ཡོངས་སུ་འཛིན་པར་འདོད་ཅིང་ཆོག་མི་ཤེས་པ་ཡིན། ངོམས་མི་མྱོང་ཞིང་ཐོས་པའི་
ནན་ཏན་དང་བྲལ་བ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། མུན་པར་གཞོལ་བས་མུན་པར་གྱུར་པ་ཡིན། རྨོངས་པ་ལ་གཞོལ་བས་རྨོངས་པར་གྱུར་པ་ཡིན། ལོག་པའི་ཆོས་ཀྱིས་དཀྲིས་པས་ཆོས་མ་ཡིན་པ་མཐོང་བ་ཡིན། མྱ་ངན་ལས་འདས་

པའི་སྒོ་བཅད་པས་འཁོར་བའི་འཆིང་བས་བཅིངས་པ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། ལུས་ཀྱི་ཚུལ་འཆོས་པ་ཡིན། ངག་གི་ཚུལ་འཆོས་པ་ཡིན། སེམས་ཀྱི་ཚུལ་འཆོས་པ་ཡིན། སྤྱོད་ལམ་གྱི་ཚུལ་འཆོས་པ་ཡིན་ཏེ།
བཞི་པོ་དེ་དག་གོ །དེ་ལ་ལུས་ཀྱི་ཚུལ་འཆོས་པ་ནི་དལ་གྱིས་འགྲོ་བར་ཚུལ་འཆོས་པ་ཡིན། མགོ་སྨད་པར་ཚུལ་འཆོས་པ་ཡིན། གཉའ་ཤིང་གང་ཙམ་དུ་ལྟ་བར་ཚུལ་འཆོས་པ་ཡིན། གོས་ཚགས་ལེགས་པར་གྱོན་པར་ཚུལ་འཆོས་པ་ཡིན། དགོན་པ་ལ་གནས་པའི་ཡོན་
ཏན་མི་ཚོལ་བར་དགོན་པ་ལ་གནས་པ་ལྟར་ཚུལ་འཆོས་པ་ཡིན། གོང་བུར་འདུ་ཤེས་པ་མི་སེལ་བར་བསོད་སྙོམས་ལེན་པ་ལྟར་ཚུལ་འཆོས་པ་ཡིན། ངོ་ཚ་ཤེས་པ་དང་ཁྲེལ་ཡོད་པའི་རྗེས་སུ་མི་འཇུག་པར་ཕྱག་དར་ཁྲོད་འཆང་བ་ལྟར་ཚུལ་འཆོས་པ་ཡིན། རྟེན་ཅིང་འབྲེལ་བར་
འབྱུང་བ་ལ་མི་འཇུག་པར་རི་དྲུང་དང་ཤིང་དྲུང་དུ་གནས་པ་ལྟར་ཚུལ་འཆོས་པ་ཡིན། ཆོས་བདུད་རྩིའི་སྨན་མི་ཚོལ་བར་བཀུས་ཏེ་བོར་བའི་སྨན་ཚོལ་བ་ལྟར་ཚུལ་འཆོས་པ་ཡིན་ཏེ། འདི་ནི་ལུས་ཀྱི་ཚུལ་འཆོས་པ་ཞེས་བྱའོ། །དེ་ལ་ངག་གི་ཚུལ་འཆོས་པ་གང་ཞེ་ན། ཆེ་གེ་མོ་ཞེས་བྱ་
བས་ཁོ་བོ་ཤེས་ཤིང་ཆེ་གེ་མོ་ཞེས་བྱ་བས་ཁོ་བོ་མགྲོན་དུ་བོས་ཏེ། ཁོ་བོས་གང་འདོད་པ་རྙེད་ཅིང་བསྟི་སྟང་དུ་བྱས་ནས་རྙེད། ཁོ་བོས་བཟང་པོ་རྙེད། ཁོ་བོས་ལན་མང་དུ་རྙེད། ཁོ་བོས་མང་དུ་ཐོས། ཁོ་བོ་ཚུལ་ཁྲིམས་དང་ལྡན་ཞིང་དགེ་བའི་ཆོས་ཅན་ཡིན། ཁོ་བོ་ནི་བོད་པར་འོས་
པ་ཡིན། ཁོ་བོ་ནི་སླར་ལན་གདབ་པའི་འོས་ཡིན། ཁོ་བོ་ནི་ནུས་པ་དང་ལྡན་ཞིང་སྐལ་བ་ཡོད་ལ་མཐུ་ཡོད་པ་ཡིན། ཁོ་བོ་ནི་དོན་རྣམ་པར་ངེས་པ་བསྟན་པ་ལ་མཁས་པ་ཡིན། གང་ཆེ་གེ་མོ་ཞེས་བྱ་བས་ཁོ་བོ་ལ་འདི་སྐད་ཅེས་སྨྲས་ཏེ། ཁོ་བོས་དེ་ལ་འདི་སྐད་ཅེས་སྨྲས་ནས་ཚར་
བཅད་དེ་སྤོབས་པ་མེད་པར་བྱས། ཁོ་བོས་འཁོར་མགུ་བར་བྱས། ཁོ་བོས་ལེགས་སོ་ཞེས་བྱ་བ་ཐོབ། ཁོ་བོས་དེ་ལས་བགོ་བ་ཐོབ། ཡང་འོང་བར་བྱ་བའི་ཕྱིར་ཁོ་བོ་མགྲོན་དུ་གཉེར་ཅེས་བྱ་བ་སྟེ། འོད་སྲུང་ངེས་པར་མི་སེམས་པའི་སེམས་དང་ལྡན་པ་ལས་ཚིག་འཆལ་

པ་དེ་ལྟ་བུ་གང་ཅི་འབྱུང་བ་དེ་ཐམས་ཅད་ནི་ངག་གི་ཚུལ་འཆོས་པ་སྟེ། མི་རིགས་པ་རྣམས་ཀྱི་ཡིན་གྱི་རིགས་པ་རྣམས་ཀྱི་མ་ཡིན་ཏེ། འདི་ནི་ངག་གི་ཚུལ་འཆོས་པ་ཞེས་བྱའོ། །འོད་སྲུང་དེ་ལ་སེམས་ཀྱི་ཚུལ་འཆོས་པ་གང་ཞེ་ན། གང་སེམས་ཀྱིས་ཆོས་གོས་དང་བསོད་
སྙོམས་རྙེད་ཀྱང་རུང་བར་ཡོངས་སུ་རྟོག་ལ་ཚིག་གིས་བདག་ལ་ཅི་ཡང་མི་དགོས་སོ་ཞེས་ཟེར་བ་དང་། གང་སེམས་ཀྱིས་རྙེད་པར་འདོད་ལ་འདོད་པ་ཉུང་བ་སྐད་དུ་སྨྲ་བ་འདི་ནི་སེམས་ཀྱི་ཚུལ་འཆོས་པ་ཞེས་བྱའོ། །དེ་ལ་འདི་སྐད་ཅེས་བྱ་སྟེ། སེམས་ཀྱིས་རྙེད་ཀྱང་ཅི་མ་རུང་སྙམ་
སེམས། །ཚིག་ཏུ་བདག་ལ་ཅི་ཡང་དགོས་མེད་སྨྲ། །མེད་པའི་ངོ་བོའི་ཡིད་ཀྱིས་དེ་སྨྲས་ཏེ། །ནམ་ཡང་བདེ་བ་རྙེད་པར་འགྱུར་མ་ཡིན། །སེམས་ཀྱི་ཚུལ་འཆོས་བསམ་པས་ལྷ་རྣམས་དང་། །ཀླུ་དང་ལྷ་མིག་ཅན་རྣམས་སླུ་བར་བྱེད། །སྨྲས་པའི་སེམས་ཀྱིས་ནམས་ཀྱང་དག་
མི་འགྱུར། །དེ་བཞིན་གཤེགས་པ་ཀུན་གྱིས་དེ་མཁྱེན་ཏོ། །འོད་སྲུང་དེ་ལྟར་ན་དགེ་སློང་ཆོས་མ་ཡིན་པ་དང་ལྡན་པ་སྡིག་པ་ཅན་རྣམས་ཀྱི་ཆོག་མ་ཡིན་པའི་སྤྱོད་ཡུལ་ལ་སྤྱོད་པ་འདི་ལྟ་བུ་གང་ཡིན་པ་འདི་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་
འཇིག་རྟེན་དུ་འགྲོ་བར་འགྱུར་བའོ། །དགེ་སློང་གི་ལེའུ་སྟེ་གཉིས་པའོ།། །།འོད་སྲུང་དེ་ལ་དགེ་སྦྱོང་གདོལ་པ་ལྟ་བུ་གང་ཞེ་ན། འོད་སྲུང་འདི་ལྟ་སྟེ་དཔེར་ན་གདོལ་པ་ནི་རྟག་ཏུ་དུར་ཁྲོད་སྤྱོད་ཡུལ་པ་ཡིན་ཏེ། ཤི་བ་ལ་རེ་བ་དང་། བྱམས་པ་མེད་པའི་
མིག་གིས་འགྲོ་བ་ལ་ལྟ་བ་དང་། ཤི་བ་ལ་དགའ་བ་ཡིན་ནོ། །འོད་སྲུང་དེ་བཞིན་དུ་དགེ་སྦྱོང་གདོལ་པ་ལྟ་བུ་ཡང་རྟག་ཏུ་མཛའ་བཤེས་ཀྱི་ཁྱིམ་དང་། སློང་བ་སྟེར་བའི་ཁྱིམ་ལ་གདུ་བ་ཡིན་ཏེ། དེ་ནས་རྙེད་པ་དང་བཀུར་སྟིས་ཉེ་བར་འཚོ་ཞིང་ཁྱིམ་པ་དེ་དག་ཆོས་སམ། འདུལ་བ་ཡང་
དག་པར་འཛིན་དུ་མི་འཇུག་པ་དང་། དེ་རྙེད་པའི་ཆེད་དུ་འདྲིས་པར་བྱེད་ཀྱི་དོན་གྱི་ཆེད་དུ་མ་ཡིན་པ་དང་། མཛའ་བའི་སེམས་མེད་ཅིང་རྟག་ཏུ་རྙེད་པ་ལ་རེ་བ་ཡིན་ཏེ། འོད་སྲུང་འདི་ནི་དགེ་སྦྱོང་གདོལ་པ་ལྟ་བུ་ཞེས་བྱའོ། །འོད་སྲུང་འདི་ལྟ་སྟེ། དཔེར་ན་གདོལ་པ་ནི་ཚོང་དཔོན་

དང་། ཁྱིམ་བདག་དང་། བློན་པོ་དང་། ཁམས་ཀྱི་རྒྱལ་པོ་དག་དང་། བྲམ་ཟེ་དང་། རྒྱལ་རིགས་དང་། གྲོང་རྡལ་གྱི་མི་དང་ཡུལ་གྱི་མི་རྣམས་ཀྱིས་རྟག་ཏུ་ཡོངས་སུ་སྤང་བར་བྱ་བའི་འོས་ཡིན་ཏེ། གདོལ་པར་རིག་ནས་ཐག་རིང་པོ་བས་ཀྱང་རིང་པོར་ཡོངས་
སུ་སྤོང་ངོ་། །འོད་སྲུང་དེ་བཞིན་དུ་དགེ་སྦྱོང་གདོལ་པ་ལྟ་བུ་ཡང་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་རྣམས་ཀྱིས་ཡོངས་སུ་སྤང་བར་བྱ་བའི་འོས་ཡིན་ཏེ། དགེ་སྦྱོང་གདོལ་པ་ལྟ་བུ་སྡིག་པའི་ཆོས་ཀུན་དུ་
སྤྱོད་ཅིང་ཚུལ་ཁྲིམས་འཆལ་པར་རིག་ནས་ཐག་རིང་པོ་བས་ཀྱང་རིང་པོར་ཡོངས་སུ་སྤོང་ངོ་། །འོད་སྲུང་འདི་ལྟ་སྟེ། དཔེར་ན་གདོལ་པའི་ཁ་ཕྱིས་སམ། གོས་སམ། ཡོངས་སུ་སྤྱད་པ་དེ་ཐམས་ཅད་ལ་ནི་སྐྱེ་བོ་ཡ་རབས་རྣམས། མི་རེག་ཅིང་ཡོངས་སུ་མི་སྤྱོད་དོ། །འོད་
སྲུང་དེ་བཞིན་དུ་དགེ་སྦྱོང་གདོལ་པ་ལྟ་བུའི་ལྷུང་བཟེད་དམ། ཆོས་གོས་སམ། ཡོངས་སུ་སྤྱད་པ་དེ་ཐམས་ཅད་ནི་མི་འཐུན་པའི་འཚོ་བས་ཡོངས་སུ་བཙལ་བ། ལུས་དང་སེམས་རྨས་པས་ཡོངས་སུ་བཙལ་བ་ཡིན་པས་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་དེ་ལ་མི་
རེག་ཅིང་མི་སྤྱོད་དོ། །འོད་སྲུང་འདི་ལྟ་སྟེ་དཔེར་ན་གདོལ་པ་ནི་ཁ་ཕྱིས་ཐོགས་ཏེ། ཞུམ་ཞུམ་པོར་བྱས་ནས་གཞན་གྱི་ཁྱིམ་དུ་འགྲོའོ། །འོད་སྲུང་དེ་བཞིན་དུ་དགེ་སྦྱོང་གདོལ་པ་ལྟ་བུ་ཡང་ཞུམ་ཞུམ་པོར་བྱས་ནས། དེ་བཞིན་གཤེགས་པའི་མཆོད་རྟེན་ལ་ཕྱག་འཚལ་ལོ། །
ཞུམ་ཞུམ་པོར་བྱས་ནས་འཁོར་གྱི་ནང་དུ་འགྲོའོ། །ཞུམ་ཞུམ་པོར་བྱས་ནས་གཙུག་ལག་ཁང་དང་། གནས་ཁང་དང་། གཞན་གྱི་ཁྱིམ་དུ་འགྲོའོ། །ཞུམ་ཞུམ་པོར་བྱས་ནས་འགྲོ་བ་དང་། འདུག་པ་དང་། ཉལ་བར་བྱེད་དོ། །འོད་སྲུང་དེ་ལྟར་ན་ཞུམ་ཞུམ་པོར་བྱས་པ། སྡིག་པ་
འཆབ་པ་དེའི་སྤྱོད་ལམ་གང་ཡིན་པ་དེ་ཐམས་ཅད་ནི་རུང་བ་མ་ཡིན་པ་ལས་ཡོངས་སུ་བརྟགས་པའོ། །འོད་སྲུང་འདི་ལྟ་སྟེ། དཔེར་ན་གདོལ་པའི་སེམས་ནི་བདེ་འགྲོའི་སྐྱེ་བ་ལ་མི་གནས་སོ། །དེ་ཅིའི་ཕྱིར་ཞེ་ན། འདི་ལྟར་དེ་རང་གི་ལས་ཀྱི་ཉེས་པའི་ཕྱིར་རོ། །འོད་སྲུང་དེ་

བཞིན་དུ་དགེ་སྦྱོང་གདོལ་པ་ལྟ་བུའི་སེམས་ཀྱང་བདེ་འགྲོར་འགྲོ་བར་བྱ་བའི་ཕྱིར་མི་གནས་ཤིང་། དེའི་འཇིག་རྟེན་ཕ་རོལ་རྣམ་པར་ཞི་གསལ། དེ་ངན་འགྲོ་གསུམ་དུ་གནས་པར་སྒྲིབ་པ་མེད་དེ། འོད་སྲུང་འདི་ནི་དགེ་སྦྱོང་གདོལ་པ་ལྟ་བུ་ཞེས་བྱའོ། །འོད་སྲུང་དེ་ལ་དགེ་སྦྱོང་རུལ་པ་གང་
ཞེ་ན། འོད་སྲུང་འདི་ལྟ་སྟེ་དཔེར་ན་རྒྱལ་པོ་ལ་འོས་པའི་བཏུང་བའི་རོ་མཆོག་དང་ལྡན་པ་ལས་གང་སྙིང་ཁུའི་མཆོག་བཅུས་པ་དེའི་ལྷག་མ་ནི་རུལ་ཅིང་མི་གཙང་བར་གྱུར་པ་སྟེ་མྱང་བར་བྱ་བ་མ་ཡིན་ནོ། །འོད་སྲུང་དེ་བཞིན་དུ་དགེ་སྦྱོང་རུལ་པ་ཡང་ཆོས་ཀྱི་མཆོག་གི་སྙིང་ཁུའི་རོ་བྲོ་བ་དང་
བྲལ་བ་ཡིན་ཏེ། དྲི་ང་བ་དང་། ཡོངས་སུ་སྤང་བར་བྱ་བའི་འོས་ཡིན། ཉོན་མོངས་པ་དང་། གཡོ་སྒྱུ་འཛིན་པ་དང་། འཆལ་པའི་ཚུལ་ཁྲིམས་ཀྱི་དྲི་མི་ཞིམ་པ་དང་ལྡན་ཞིང་ཚུལ་ཁྲིམས་ཀྱི་དྲི་དང་བྲལ་བ་ཡིན། ཉོན་མོངས་པའི་དྲིས་བསྒོས་པ་ཡིན་ཏེ། དེ་གང་དང་གང་དུ་
འགྲོ་བ་དེ་དང་དེ་ཉིད་དུ་ཡང་བདག་ལ་ཕན་པའི་ཕྱིར་ཞུགས་ཀྱི་གཞན་ལ་ཕན་པའི་ཕྱིར་མ་ཡིན་ཏེ། འོད་སྲུང་འདི་ནི་དགེ་སྦྱོང་རུལ་པ་ཞེས་བྱའོ། །འོད་སྲུང་འདི་ལྟ་སྟེ་དཔེར་ན་རུལ་པ་ཞེས་བྱ་བ་ནི་གང་ཟོས་པ་དང་འཐུངས་པ་དང་། འཆོས་པ་གཟགས་པ་དེ་ནི་རུལ་ཞིང་དྲི་ང་བ་ཡིན་ཏེ། སྐྱེ་བོ་ཡ་རབས་ཐམས་ཅད་ཀྱིས་
ཡོངས་སུ་སྤང་བར་བྱ་བའི་འོས་ཡིན་ནོ། །འོད་སྲུང་དེ་བཞིན་དུ་དགེ་སྦྱོང་རུལ་པ་ཡང་གཟགས་པ་དང་མཚུངས་ཏེ། ལུས་དང་ངག་དང་སེམས་ཀྱི་ཀུན་ཏུ་སྤྱོད་པ་ཡོངས་སུ་མ་དག་པས་འཕགས་པའི་སྐྱེ་བོས་ཡོངས་སུ་སྤང་བར་བྱ་བ་ཡིན་ཏེ། འདི་ནི་དགེ་སྦྱོང་རུལ་པ་ཞེས་བྱའོ། །འོད་སྲུང་འདི་
ལྟ་སྟེ། དཔེར་ན་ས་བོན་རུལ་པ་གང་ཡིན་པ་དེ་ནི་ས་ཆེན་པོ་ལས་སྐྱེར་མི་རུང་ངོ་། །འོད་སྲུང་དེ་བཞིན་དུ་དགེ་སྦྱོང་རུལ་པ་ཡང་སངས་རྒྱས་ཀྱི་བསྟན་པ་འདི་ལ་མི་སྐྱེ་ཞིང་འཕགས་པའི་ཆོས་རྣམ་པར་གྲོལ་བའི་ས་བོན་ནུས་པ་མ་ཡིན་ལ་འབྲས་བུ་ཐོབ་པར་མི་འགྱུར་ཏེ། འོད་སྲུང་འདི་ནི་དགེ་
སྦྱོང་རུལ་པ་ཞེས་བྱའོ། །འོད་སྲུང་དེ་ལ་དགེ་སྦྱོང་ཟ་མ་ཏོག་ལྟ་བུ་གང་ཞེ་ན། འོད་སྲུང་འདི་ལྟ་སྟེ་དཔེར་ན་ཟ་མ་ཏོག་ཕྱི་རོལ་ཤིན་ཏུ་བྱི་དོར་བྱས་ལ་ནང་མི་གཙང་བ་སྣ་ཚོགས་ཀྱིས་གང་བ་ཞིག་ཡོད་པ་དེ་བཞིན་དུ་འོད་སྲུང་དགེ་སྦྱོང་ཟ་མ་ཏོག་ལྟ་བུ་ཡང་དགེ་སྦྱོང་ལྟར་བཅོས་ཤིང་ཕྱི་རོལ་གཙང་སྦྲ་

སྤྱོད་པར་གྱུར་ལ། ནང་འདོད་ཆགས་དང་། ཞེ་སྡང་དང་། གཏི་མུག་གིས་ཡོངས་སུ་གང་བ་ཡིན་ཏེ། འོད་སྲུང་འདི་ནི་དགེ་སྦྱོང་ཟ་མ་ཏོག་ལྟ་བུ་ཞེས་བྱའོ། །འོད་སྲུང་དེ་ལ་དགེ་སྦྱོང་ཀུ་ར་ཎ་ཌཱ་ཀ་ལྟ་བུ་གང་ཞེ་ན། འོད་སྲུང་འདི་ལྟ་སྟེ་དཔེར་ན་ཀུ་ར་ཎ་ཌཱ་ཀ་ཞེས་བྱ་བའི་མེ་ཏོག་
ནི་ཁ་དོག་བལྟ་ན་སྡུག་ལ་རེག་ན་རྩུབ་པ་ལྕི་བའི་སྦྲང་མའི་དྲི་མ་ནམ་ཞིང་ཤི་ལ་བར་ཀའི་རྩ་བའི་དྲི་མ་ནམ་སྟེ། མཁས་པ་མཛངས་པ་རྣམས་ནི་མེ་ཏོག་དེ་ལྟ་བུ་ལ་མི་རེག །མི་ལེན་མི་སྣོམ་གྱི། གང་དག་བྱིས་པའི་རང་བཞིན་ཅན་དུ་གྱུར་པ་དེའི་སྐྱོན་མི་ཤེས་པ། དེ་དག་ནི་མེ་ཏོག་དེ་ལྟ་
བུ་ལེན་ཅིང་སྣོམ་མོ། །འོད་སྲུང་དེ་བཞིན་དུ་དགེ་སྦྱོང་ཀུ་ར་ཎ་ཌཱ་ཀ་ལྟ་བུ་ཡང་དགེ་སྦྱོང་གི་ཁ་དོག་དང་། གཟུགས་དང་ལྡན་པར་གྱུར་ཀྱང་མི་དེས་པ་ཡིན། ཚིག་བརླང་བ་ཡིན། འཆལ་པའི་ཚུལ་ཁྲིམས་ཀྱི་དྲི་མི་ཞིམ་པ་ཡིན། འཚོ་བ་ཉམས་པ་ཡིན། སྤྱོད་པ་ཉམས་པ་
ཡིན། ལྟ་བ་ཉམས་པ་ཡིན་ཏེ། མཛངས་པ་མཁས་པ་རྣམས་ནི་ཀུ་ར་ཎ་ཌཱ་ཀ་ལྟ་བུའི་དགེ་སྦྱོང་དེ་ལྟ་བུ་ལ་སྟེན་པའམ། སྙེན་པའམ། བསྙེན་བཀུར་མི་བྱེད་ཀྱི། དེའི་ཚུལ་རིག་པས་ཐག་རིང་པོ་བས་ཀྱང་རིང་པོར་ཡོངས་སུ་སྤོང་ངོ་། །གང་དག་བྱིས་པའི་རང་བཞིན་ཅན་དུ་གྱུར་
པ་དེ་དག་ནི་ཀུ་ར་ཎ་ཌཱ་ཀ་ལྟ་བུའི་དགེ་སྦྱོང་དེ་ལྟ་བུ་ལ་སྟེན་ཅིང་སྙེན་ལ་བསྙེན་བཀུར་བྱེད་དེ། ཀུ་ར་ཎ་ཌཱ་ཀའི་མེ་ཏོག་བྱིས་པའི་ལག་ན་འདུག་པ་བཞིན་དུ་དེ་དང་འཐུན་པ་ཉིད་དུ་འགྱུར་ཏེ། འོད་སྲུང་འདི་ནི་ཀུ་ར་ཎ་ཌཱ་ཀ་ལྟ་བུའི་དགེ་སྦྱོང་ཞེས་བྱའོ། །འོད་སྲུང་དེ་ལ་ཆོམ་རྐུན་ལྟ་བུའི་དགེ་སྦྱོང་
གང་ཞེ་ན། འོད་སྲུང་འདི་ལྟ་སྟེ་དཔེར་ན། མི་གཡོ་ཅན་གྱི་རང་བཞིན་ཅན། རྟག་ཏུ་བརྐམ་པ། ཆགས་པའི་ཟིལ་གྱིས་ནོན་པ། བདག་གི་རྙེད་པས་ཆོག་པར་མི་འཛིན་པ། གཞན་གྱི་ནོར་ལ་རེ་བ། དྲག་ཤུལ་ཅན། དབྱུག་པ་དང་། མཚོན་ཆ་དང་དགྲ་ཆ་ཐོགས་པ། ངོ་ཚ་མེད་པ།
སྙིང་རྗེ་མེད་པ། རྟག་ཏུ་གདུག་ཅིང་རབ་ཏུ་གདུག་པའི་སེམས་དང་ལྡན་པ་ནི་དེ་གང་གི་ཚེ་གྲོང་བར་རམ། གྲོང་ངམ། གྲོང་ཁྱེར་རམ། གྲོང་རྡལ་ལམ། ཡུལ་དུ་འཇུག་པ་དེའི་ཚེ་དེ་འདི་སྙམ་དུ་གཞན་དག་གི་ནོར་གྱི་ཕུང་པོ་གང་ཡིན་པ་དེ་བདག་གིར་གྱུར་ན་རེ་སྟེས་སྙམ་དུ་སེམས་

ཤིང་དེ་ཟིན་དུ་འོང་ཞེས་མཁྱུན་བུ་མཁྱུན་བུར་རྒྱུ་བ་ཡིན་ནོ། །འོད་སྲུང་དེ་བཞིན་དུ་ཆོམ་རྐུན་ལྟ་བུའི་དགེ་སྦྱོང་ཡང་རྟག་ཏུ་བརྐམ་པ། ཆགས་པའི་ཟིལ་གྱིས་ནོན་པ། བདག་གི་རྙེད་པས་ཆོག་མི་ཤེས་པ། གཞན་གྱི་རྙེད་པ་ལ་རེ་བ་ཡིན་ཏེ། དེ་གང་གི་ཚེ་གྲོང་བར་རམ། གྲོང་ངམ། གྲོང་ཁྱེར་
རམ། གྲོང་རྡལ་ལམ། ཡུལ་དུ་འཇུག་པ་དེའི་ཚེ། དེ་རྙེད་པའི་ཕྱིར་འཇུག་གི་ཆོས་ཀྱི་ཕྱིར་མ་ཡིན་ཏེ། སྤྱོད་ལམ་ཐམས་ཅད་ཀྱང་ཆོམ་རྐུན་ལྟ་བུར་སྟོན་པ་ཡིན། འཆབ་ཅིང་སྦེད་པ་ཡིན་ཏེ། བདག་དགེ་སློང་གཞན་གྱིས་ཚུལ་ཁྲིམས་འཆལ་བར་ཤེས་ན་མི་རུང་སྟེ། ཤེས་
པར་གྱུར་ན་སོ་སོར་ཐར་པའི་མདོ་འདོན་པ་ལས་བསྐྲད་པར་འགྱུར་རོ་སྙམ་ནས་རྟག་ཏུ་སྐྲག་ཅིང་རྟག་ཏུ་འཇིགས་ཏེ། སྤྱོད་ལམ་ཐམས་ཅད་ཀྱང་གཡོས་སྤྱོད་པས། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དག་གིས་ཆོམ་རྐུན་འོང་ངོ་། །ཆོམ་རྐུན་འགྲོའོ། །ཆོམ་རྐུན་
འགྲེང་ངོ་། །ཆོམ་རྐུན་འཆག་གོ །ཆོམ་རྐུན་འདུག་གོ །ཉལ་ལོ། །ཆོས་གོས་ལེན་ཏོ། །ཆོམ་རྐུན་གྲོང་དུ་འགྲོའོ། །གྲོང་ནས་འབྱུང་ངོ་། །ཆོམ་རྐུན་ཟའོ། །ཆོམ་རྐུན་འཐུང་ངོ་། །ཆོམ་རྐུན་སྐྲ་འདྲེག་གོ་ཞེས་རིག་པར་འགྱུར་རོ། །འོད་སྲུང་དེ་ལྟར་ན་ལྷ་དང་། ཀླུ་དང་།
གནོད་སྦྱིན་དང་། དྲི་ཟ་རྣམས་ཀྱིས་དེའི་སྤྱོད་ལམ་གང་ཡིན་པ་དེ་ཐམས་ཅད་རུང་བ་མ་ཡིན་ལ། ཡོངས་སུ་བརྟགས་པ་ཡིན་པར་རིག་པར་འགྱུར་ཏེ། རིག་ནས་ཀྱང་དེ་ལ་སྙིང་རྗེ་ཆེན་པོ་སྐྱེད་ཅིང་ཀྱེ་མ་འདི་མཚར་ཅིག་སྡིག་པ་ཅན་གྱི་དགེ་སློང་འདི་ལྟ་བུ་དག་གིས་བཅོམ་ལྡན་
འདས་ཤཱཀྱ་ཐུབ་པའི་བསྟན་པ་ནུབ་པར་བྱེད་པར་འགྱུར་ཞེས་འཕྱ་ཞིང་མི་སྙན་པར་ཟེར་རོ། །ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་རྣམས་ལ་ནི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་རྣམས་ཀྱིས་ཀྱང་འདི་དག་ནི་བསྟན་པ་ཡོངས་སུ་འཛིན་པའོ་ཞེས་གུས་པ་ཆེན་
པོ་བྱེད་དོ། །འོད་སྲུང་ཆོམ་རྐུན་པ་ལྟ་བུའི་དགེ་སྦྱོང་བསྟན་པ་འདི་ལ་རབ་ཏུ་བྱུང་བ་ནི་སྐྱོ་བ་དང་། འདོད་ཆགས་དང་བྲལ་བའི་སེམས་གཅིག་ཀྱང་མི་སྐྱེད་ན་འབྲས་བུ་ཐོབ་པ་ལྟ་ཅི་སྨོས་ཀྱི་དེ་ནི་གནས་མེད་དོ། །འོད་སྲུང་འདི་ནི་ཆོམ་རྐུན་ལྟ་བུའི་དགེ་སྦྱོང་ཞེས་བྱའོ། །འོད་སྲུང་དེ་

ལ་དགེ་སློང་ཤིན་ཏེ་མ་གང་ཞེ་ན། འོད་སྲུང་འདི་ལྟ་སྟེ། དཔེར་ན་འབྲུའི་ནང་ན་གང་དག་མ་སྨིན་པ་དང་། མི་གྲུང་བ་དང་། འོངས་མེད་ཅིང་འབྲུ་འདྲ་བ་དེ་དག་ནི་ཤིན་ཏེ་མ་ཞེས་བྱའོ། །འོད་སྲུང་དེ་བཞིན་དུ་དགེ་སྦྱོང་ཤིན་ཏེ་མ་ཡང་ཡང་ཞིང་མཐུ་ཆུང་
ལ་བདུད་ཀྱིས་ཟིན་པ། བདུད་ཀྱིས་ནོན་པ། ཉོན་མོངས་པ་ཐམས་ཅད་ཀྱིས་ནོན་པ། ཉོན་མོངས་པ་ཐམས་ཅད་ཀྱིས་འཕྲོགས་པ། རླུང་གིས་གཡེངས་པ་ལྟ་བུ་སྟེ། འོད་སྲུང་དགེ་སྦྱོང་ཤིན་ཏེ་མ་ཞེས་བྱ་བ་དེ་ནི་དགེ་སློང་ཚུལ་ཁྲིམས་འཆལ་པ་སྡིག་པ་ཅན་རྣམས་ཀྱི་ཚིག་བླ་
དགས་ཏེ། དེ་དག་ནི་ངས་དགེ་སྦྱོང་ཤིན་ཏེ་མ་ཞེས་བཏགས་སོ། །འོད་སྲུང་དེ་ལ་དགེ་སྦྱོང་སུན་པར་བྱེད་པ་གང་ཞེ་ན། འོད་སྲུང་འདི་ལྟ་སྟེ། དཔེར་ན་ནས་ཀྱི་ལྗང་བུ་ཕུན་སུམ་ཚོགས་པའི་ནང་ན་ནས་ལ་གནོད་པ་ཞིག་སྐྱེས་ནས་དེ་ལྗང་བུའི་ཁ་དོག་འདྲ་ཞིང་རྟགས་དང་དབྱིབས་
ཀྱང་འདྲ་བས་དེ་ལ་ནས་ཀྱི་བདག་པོ་དེ་དག་འདི་སྙམ་དུ་འདི་དག་ཐམས་ཅད་ནི་ནས་ཡིན་ནོ་སྙམ་པའི་འདུ་ཤེས་སྐྱེད་སྐྱེད་པ་ལས་གང་གི་ཚེ་ན་ནས་ཀྱི་ལྗང་བུ་ལས་སྙེ་མ་བྱུང་བར་གྱུར་པ་དེའི་ཚེ་ནས་ལ་གནོད་པ་དེ་ལ་ནས་ཀྱི་འདུ་ཤེས་མི་འབྱུང་ངོ་། །འོད་སྲུང་དེ་བཞིན་དུ་དགེ་སྦྱོང་
སུན་པར་བྱེད་པའི་དགེ་སློང་དགེ་སློང་གི་དགེ་འདུན་གྱི་ནང་ན་འདུག་པ་ཡང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། སྦྱིན་པའི་གནས་སུ་གྱུར་པ་རྣམས་དང་ཁ་དོག་དང་རྟགས་ཀྱི་དབྱིབས་འདྲ་བས་དེ་ལ་སྦྱིན་པ་པོ་དང་། སྦྱིན་བདག་དེ་དག་དགེ་སྦྱོང་ངོ་
སྙམ་པའི་འདུ་ཤེས་སྐྱེད་ཅིང་སྦྱིན་གནས་སུ་འདུ་ཤེས་བསྐྱེད་པ་ལས་དེ་ནས་གལ་ཏེ་མི་གཏི་མུག་པ་དགེ་སྦྱོང་མ་ཡིན་པ་ལ་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་ལ་ཚངས་པར་སྤྱོད་པར་ཁས་འཆེ་བ། ནང་རུལ་ཅིང་ཟག་པ་དེ་འཁོར་གྱི་ནང་ནས་བྱུང་སྟེ། ཤི་
འཕོས་ཤིང་འཆི་བའི་དུས་བྱས་ནས་སེམས་ཅན་དམྱལ་བར་འགྲོ་བར་འགྱུར་ཏེ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་ལྷའི་མིག་དང་ལྡན་པ་རྣམས་ཀྱིས་དེ་སེམས་ཅན་དམྱལ་བར་སྐྱེས་པར་མཐོང་སྟེ། མཐོང་ནས་ཀྱང་མི་གཏི་མུག་པ་འདི་ནི་སྔོན་དགེ་སྦྱོང་གི་ཁ་དོག་དང་

གཟུགས་ཀྱིས་སྡིག་པའི་ལས་བྱས་པས། དེ་སེམས་ཅན་དམྱལ་བ་ཆེན་པོར་སྐྱེས་ཏེ། ནས་ལ་གནོད་པ་ལ་ནས་ཀྱི་ཡོན་ཏན་མེད་པ་ལྟར་འདི་ལ་ཡང་དགེ་སྦྱོང་གི་ཡོན་ཏན་གྱི་འབྲས་བུ་མེད་དོ། །ཞེས་སྙིང་རྗེ་ཆེན་པོ་སྐྱེད་དེ། འོད་སྲུང་འདི་ནི་དགེ་སྦྱོང་སུན་པར་བྱེད་པ་ཞེས་བྱའོ། །
འོད་སྲུང་དེ་ལ་དགེ་སྦྱོང་ལྟར་བཅོས་པ་གང་ཞེ་ན། འོད་སྲུང་འདི་ལྟ་སྟེ་དཔེར་ན་ར་གན་ཆེན་པོ་ཞེས་བྱ་བའི་ལྕགས་ཤིག་ཡོད་དེ། ཤིན་ཏུ་ཡོངས་སུ་སྦྱང་བ་བྱས་ཤིང་ཤིན་ཏུ་ཡོངས་སུ་དག་པར་བྱས་ན་གསེར་འདྲ་བར་འགྱུར་ཏེ། འོན་ཀྱང་གསེར་གྱི་རིན་ཐང་དང་། གསེར་གྱི་ཁ་དོག་
དང་། བདར་འཕྲོ་དང་། སྲང་ལ་གཅལ་བའི་ལྕིད་འདྲ་བ་ནི་མ་ཡིན་ནོ། །འོད་སྲུང་དེ་བཞིན་དུ་དགེ་སྦྱོང་ལྟར་བཅོས་པའི་དགེ་སྦྱོང་ཡང་ལུས་ཤིན་ཏུ་བཀྲུས་ཤིང་གོས་བཟང་པོ་མཛེས་པ་གྱོན་ལ། དགེ་སྦྱོང་གི་ཕྱི་རོལ་གྱི་སྤྱོད་པ་ཐམས་ཅད་ཡོངས་སུ་དག་སྟེ། འགྲོ་བ་དང་།
འོང་བ་དང་མདུན་དུ་ལྟ་བ་དང་། གཡས་གཡོན་ལྟ་བ་དང་བསྐུམ་པ་དང་བརྐྱང་བ་དང་ཆོས་གོས་སྣམ་སྦྱར་དང་ལྷུང་བཟེད་དང་། ཆོས་གོས་འཛིན་པ་ཤེས་བཞིན་དུ་སྤྱོད་ཀྱང་དེ་འདོད་ཆགས་ཀྱིས་བཅོམ་པ་དང་། ཞེ་སྡང་གིས་བཅོམ་པ་དང་། གཏི་མུག་གིས་བཅོམ་པ་དང་།
ཉོན་མོངས་པས་བཅོམ་པ་དང་། རྙེད་པ་དང་བཀུར་སྟིས་བཅོམ་པ་དང་། ང་རྒྱལ་དང་། ཆེ་བའི་ང་རྒྱལ་དང་། ང་རྒྱལ་ལས་ཀྱང་ང་རྒྱལ་དང་། ངའོ་སྙམ་པའི་ང་རྒྱལ་དང་། མངོན་པའི་ང་རྒྱལ་དང་། ཅུང་ཟད་སྙམ་པའི་ང་རྒྱལ་དང་། ལོག་པའི་ང་རྒྱལ་གྱིས་བཅོམ་པ་དང་། ཉོན་
མོངས་པས་འཁོལ་བ་དང་། བསྙེན་བཀུར་ལྷུར་ལེན་གྱི་ཆོས་ལྷུར་མི་ལེན་པ་དང་། ལུས་ཆ་བར་སྦྱོར་བ་ལ་བརྩོན་གྱི་ཚུལ་ཁྲིམས་ཀྱིས་ཆ་བར་སྦྱོར་བ་ལ་མི་བརྩོན་པ་དང་། ཟས་དང་གོས་ལྷུར་ལེན་གྱི་འཕགས་པའི་ཆོས་ལྷུར་མི་ལེན་པ་དང་། འཇིག་རྟེན་ཕ་རོལ་དུ་ཁ་ན་མ་ཐོ་
བས་འཇིགས་པར་མི་ལྟ་བ་དང་། ཚེ་འདི་ལྷུར་ལེན་གྱི་ཚེ་ཕྱི་མ་ལྷུར་མི་ལེན་པ་དང་། ལུས་གསོ་བ་དང་། རྙེད་པ་དང་། བཀུར་སྟི་དང་། གྲགས་པ་ལ་རྟེན་གྱི་ཆོས་ལ་རིམ་གྲོར་བྱ་བ་ལ་མི་རྟེན་པ་དང་། སྦག་པ་སྣ་ཚོགས་ཀྱིས་སྦག་པ་དང་། སྡིག་པས་བསྒོས་པ་དང་། ཁྱིམ་

གྱི་ལས་ཀྱི་མཐའ་ལ་མངོན་པར་བརྩོན་པ་དང་། ཁྱིམ་པ་དང་མཚུངས་པའི་སེམས་དང་ལྡན་པས་བདེ་བ་དག་གིས་ཀྱང་བདེ་ཞིང་སྡུག་བསྔལ་དག་གིས་ཀྱང་སྡུག་བསྔལ་བ་དང་། རྗེས་སུ་ཆགས་པ་དང་ཁོང་ཁྲོ་བས་བཅོམ་པ་ཡིན་ཏེ། དེའི་དགེ་སྦྱོང་གི་ཆོ་ག་དང་།
སྤྱོད་ལམ་ཐམས་ཅད་དང་སེམས་དང་སེམས་ལས་བྱུང་བའི་ཆོས་ཐམས་ཅད་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་གཞོལ་བ་ཡིན་ཞིང་དགེ་སྦྱོང་གི་རིན་ཐང་དང་། རི་བ་དང་། དགེ་སྦྱོང་གི་སྲང་ཁ་དང་མི་མཉམ་པ་སྟེ། འོད་སྲུང་འདི་
ནི་དགེ་སྦྱོང་ལྟར་བཅོས་པ་ཞེས་བྱའོ། །འོད་སྲུང་དེ་ལ་ཇི་ལྟར་ན་དགེ་སློང་གཟི་འཕྲོགས་པ་ཡིན་ཞེ་ན། འོད་སྲུང་འདི་ལྟ་སྟེ་དཔེར་ན་སྐྱེས་པ་འམ། བུད་མེད་དམ། ཁྱེའུ་འམ། བུ་མོ་གང་ལ་ལ་ཞིག་མི་མ་ཡིན་པས་མདངས་ཕྲོགས་པར་གྱུར་ན། དེ་དབང་ཆུང་བར་གྲགས་ཤིང་མདོག་
ངན་ལ་མི་སྡུག་པར་འགྱུར་ཏེ། དེ་ལྟར་ན་མདངས་ཕྲོགས་པ་རྣམས་ལ་ནི་སྨན་ཏམ། གསང་སྔགས་སམ། རིག་སྔགས་རྣམས་ཀྱིས་མི་སློན་ཏེ། དེ་འཆི་བར་འགྱུར་བ་མ་གཏོགས་པར་ཐ་མར་གཞན་དུ་མི་འགྱུར་རོ། །འོད་སྲུང་དེ་བཞིན་དུ་དགེ་སློང་གང་ལ་ཚུལ་ཁྲིམས་ཀྱི་གཟི་
མེད་པ་དང་། ཏིང་ངེ་འཛིན་གྱི་གཟི་མེད་པ་དང་། ཤེས་རབ་ཀྱི་གཟི་མེད་པ་དང་། རྣམ་པར་གྲོལ་བའི་གཟི་མེད་པ་དང་། རྣམ་པར་གྲོལ་བའི་ཡེ་ཤེས་མཐོང་བའི་གཟི་མེད་པ་དང་། བྱམས་པའི་གཟི་མེད་པ་དང་། སྙིང་རྗེའི་གཟི་མེད་པ་དང་། དགའ་བའི་གཟི་མེད་པ་དང་།
བཏང་སྙོམས་ཀྱི་གཟི་མེད་པ་དང་། སྦྱིན་པ་དང་ཡང་དག་པར་སྡོམ་པ་དང་ངེས་པའི་གཟི་མེད་པ་དང་། དགེ་སྦྱོང་གི་ཡོན་ཏན་གྱི་གཟི་མེད་པ་དང་། འཕགས་པའི་རིགས་ལ་གནས་པའི་གཟི་མེད་པ་དང་། སྦྱངས་པའི་ཡོན་ཏན་དང་ཡོ་བྱད་བསྙུངས་པའི་གཟི་མེད་པ་དང་། ལུས་དང་ངག་དང་སེམས་
ཡོངས་སུ་དག་པའི་གཟི་མེད་པ་འདི་ནི་འོད་སྲུང་དགེ་སློང་གཟི་ཕྲོགས་པ་ཞེས་བྱ་སྟེ། འོད་སྲུང་གཟི་ཕྲོགས་པ་དེ་ལྟ་བུ་རྣམས་ལ་ནི་དེ་བཞིན་གཤེགས་པས་སྦྱར་བའི་སྨན་གྱིས་མི་ཚུགས་ཏེ། འདི་ལྟ་སྟེ། འདོད་ཆགས་ལ་མི་སྡུག་པའི་སྨན་དང་། ཞེ་སྡང་ལ་བྱམས་པ་དང་།

གཏི་མུག་ལ་རྟེན་ཅིང་འབྲེལ་བར་འབྱུང་བ་དང་། ཉོན་མོངས་པ་རྣམས་ལ་ཚུལ་བཞིན་ཡིད་ལ་བྱ་བ་དང་། འདུ་འཛི་ལས་དབེན་པར་དགའ་བ་དང་། འཛིན་པ་ཐམས་ཅད་སྤང་བའི་ཕྱིར་དགོན་པར་གནས་པ་དང་། གསུམ་བསྡམ་པའི་ཕྱིར་ལུས་དང་ངག་དང་སེམས་ཡོངས་སུ་
དག་པ་དང་། སེམས་ལས་སུ་རུང་བར་བྱ་བའི་ཕྱིར་ཏིང་ངེ་འཛིན་ཡོངས་སུ་དག་པའི་སྨན་དེ་བཞིན་གཤེགས་པས་སྦྱར་བ་འདི་ལྟ་བུ་འདི་དག་གིས་དེ་ལ་མི་ཚུགས་ཏེ། དེ་ཤི་ནས་སེམས་ཅན་དམྱལ་བ་ཉིད་དུ་འགྱུར་གྱི་དེའི་ཐ་མ་གཞན་དུ་མི་འགྱུར་རོ། །གང་དག་ཡང་འཇིག་རྟེན་
ལས་འདས་པའི་སྨན་འདི་ལྟ་སྟེ། ཕུང་པོ་ཤེས་པ་དང་། ཁམས་ཤེས་པ་དང་། སྐྱེ་མཆེད་ཤེས་པ་དང་། རྟེན་ཅིང་འབྲེལ་བར་འབྱུང་བ་ཤེས་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ཤེས་པ་འཇིག་རྟེན་ལས་འདས་པའི་སྨན་འདི་ལྟ་བུ་འདི་དག་
གིས་ཀྱང་དེ་ལ་མི་ཚུགས་ཏེ། དེ་ཤི་ནས་སེམས་ཅན་དམྱལ་བ་ཉིད་དུ་འགྱུར་གྱི་དེའི་ཐ་མ་གཞན་དུ་མི་འགྱུར་རོ། །བསྟན་པ་འདི་བཤད་པ་ན་དགེ་སློང་རྣལ་འབྱོར་སྤྱོད་པ་ལྔ་བརྒྱ་བདག་ཅག་ཚུལ་ཁྲིམས་ཡོངས་སུ་མ་དག་བཞིན་དུ་དད་པས་ཕྱིན་པ་སྤྱོད་པར་གྱུར་ན་མི་རུང་ཞེས་ཉམས་
པར་བྱས་ཏེ་སླར་ཁྱིམ་དུ་དོང་ངོ་། །དེ་ལ་དགེ་སློང་གཞན་དག་ཅིག་འདི་སྐད་དུ་དགེ་སློང་ཆེ་བའི་བདག་ཉིད་ཅན་རྣལ་འབྱོར་སྤྱོད་པ་འདི་དག་བསྟན་པ་ལས་ཉམས་པ་ནི་ཤིན་ཏུ་མ་ལེགས་སོ་ཞེས་འཕྱའོ། །བཅོམ་ལྡན་འདས་ཀྱིས་དགེ་སློང་དེ་དག་ལ་འདི་སྐད་ཅེས་བཀའ་སྩལ་ཏོ། །
དགེ་སློང་དག་ཁྱེད་འདི་སྐད་དུ་དགེ་སློང་ཆེ་བའི་བདག་ཉིད་ཅན་འདི་དག་འདི་ལྟར་བསྟན་པ་ལས་ཤིན་ཏུ་ཉམས་པ་འདི་ནི་ཤིན་ཏུ་མ་ལེགས་སོ་ཞེས་མ་སྨྲ་ཤིག །དེ་ཅིའི་ཕྱིར་ཞེ་ན། དགེ་སློང་དག་མངོན་པར་མི་དགའ་ནས་ཁྱིམ་ན་གནས་པ་འདི་ནི་དད་པ་ཅན་རྣམས་ཀྱི་ཆོས་ཡིན་
ཏེ། དགེ་སློང་དད་པ་དང་མོས་པ་མང་བ་འགྱོད་པ་དང་ལྡན་པ་འདི་དག་གིས་བསྟན་པ་འདི་ཐོས་ནས་བདག་ཅག་ཚུལ་ཁྲིམས་ཡོངས་སུ་མ་དག་བཞིན་དུ་དད་པས་བྱིན་པ་ཡོངས་སུ་སྤྱད་ན་མི་རུང་ངོ་ཞེས་ཉམས་པར་གྱུར་ཏོ། །འོད་སྲུང་ང་ལུང་སྟོན་ཏེ། དགེ་སློང་འདི་དག་ནི་འདི་ནས་

ཤི་འཕོས་ནས་དགའ་ལྡན་གྱི་ལྷའི་རིས་སུ་སྐྱེ་བར་འགྱུར་ཏེ། དེ་དག་དེ་བཞིན་གཤེགས་པ་བྱམས་པའི་ཉན་ཐོས་ཐོག་མར་འདུས་པའི་གྲངས་སུ་ཆུད་པར་འགྱུར་རོ། །དགེ་སྦྱོང་གདོལ་པ་ལྟ་བུའི་ལེའུ་སྟེ་གསུམ་པའོ།། །།བམ་པོ་གཉིས་པ་
སྟེ་ཐ་མ། དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་ཇི་ལྟ་བུ་ཞལ་ཏ་བགྱི་བ་ལགས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ངས་ཞལ་ཏ་བྱ་བར་གནང་བའི་དགེ་སློང་གཉིས་ཏེ། གཉིས་གང་ཞེ་
ན། དགེ་སློང་ཡོངས་སུ་དག་པ་འཇིག་རྟེན་ཕ་རོལ་དུ་ཁ་ན་མ་ཐོ་བས་འཇིགས་པར་ལྟ་བ། ལས་ཀྱི་རྣམ་པར་སྨིན་པ་ལ་རྟོན་པ། འཛེམ་པ་དང་ལྡན་ཞིང་འགྱོད་པ་དང་ལྡན་པ་དང་། གང་ཡང་ཟག་པ་ཟད་པ་དགྲ་བཅོམ་པར་གྱུར་པ་སྟེ། འོད་སྲུང་དགེ་སློང་མ་ཉམས་པ་འདི་གཉིས་
ཞལ་ཏ་བྱེད་པར་ངས་གནང་ངོ་། །དེ་ཅིའི་ཕྱིར་ཞེ་ན། འོད་སྲུང་ལེགས་པར་གསུངས་པའི་ཆོས་འདུལ་བ་འདི་ལ་རིགས་སྣ་ཚོགས་ལས་རབ་ཏུ་བྱུང་བ། སེམས་ཀྱི་མོས་པ་སྣ་ཚོགས་དང་ལྡན་པ། སྤོང་བའི་ཕྱིར་རྣལ་འབྱོར་སྣ་ཚོགས་ལ་གནས་པ། ཁ་ཅིག་ནི་དགོན་པ་པ་ཞི་བའི་མལ་
སྟན་ལ་མངོན་པར་དགའ་བ། ཁ་ཅིག་ནི་བསོད་སྙོམས་པ། ཁ་ཅིག་ནི་གྲོང་འདབ་ན་གནས་པ། ཁ་ཅིག་ནི་འཚོ་བ་ཡོངས་སུ་དག་པ། ཁ་ཅིག་ནི་མང་དུ་ཐོས་པ་ལ་མངོན་པར་བརྩོན་པ། ཁ་ཅིག་ནི་ཆོས་སྨྲ་བ། ཁ་ཅིག་ནི་འདུལ་བ་འཛིན་པ། ཁ་ཅིག་ནི་མ་མོ་འཛིན་པ། ཁ་ཅིག་
ནི་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། ཕོ་བྲང་འཁོར་དག་ཏུ་ཞུགས་ནས་ཆོས་སྟོན་པ་སྟེ། སེམས་ཅན་གཞན་དག་གི་སེམས་ཀྱི་སྤྱོད་པ་རྣམས་སྲུང་དཀའ་བའི་ཕྱིར་རོ། །འོད་སྲུང་དེ་ལ་དགེ་སློང་ཞལ་ཏ་བྱེད་པས་དགེ་སློང་གི་དགེ་འདུན་ཐམས་ཅད་ཀྱི་སེམས་
མགུ་བར་བྱའོ། །འོད་སྲུང་དེ་ལ་དགེ་སློང་དགོན་པ་པའི་བས་མཐའི་མལ་སྟན་གང་ཡིན་པ་དེ་དག་ནི་དགེ་སློང་ཞལ་ཏེ་བྱེད་པས་ཡོངས་སུ་བསྐོ་བར་མི་བྱའོ། །ཞལ་ཏ་བྱེད་པས་དགེ་སློང་དགོན་པ་པ་དེ་དག་བསྲུང་བར་བྱ་སྟེ། དུས་མ་ཡིན་པར་གསོལ་བར་མི་བྱ། དུས་མ་ཡིན་པར་གཏང་

བར་མི་བྱའོ། །འོད་སྲུང་གལ་ཏེ་དགེ་སློང་དགོན་པ་བ་ལ་དགེ་འདུན་གྱི་བྱ་བར་གཏོགས་པ་སློབ་པའི་ལས་རེས་བབ་ན་དགེ་སློང་ཞལ་ཏ་བྱེད་པ་དེ་ལས་དེ་བདག་ཉིད་ཀྱིས་བྱའོ། །ཡང་ན་དགེ་སློང་གཞན་ཞིག་བསྐོས་ལ་ལས་དེ་བྱེད་དུ་གཞུག་སྟེ་དགེ་སློང་དགོན་པ་པ་ལ་གནོད་པར་མི་བྱའོ། །
འོད་སྲུང་དེ་ལ་དགེ་སློང་བསོད་སྙོམས་སྤྱོད་པ་གང་ཡིན་པ་དེ་ལ་དགེ་སློང་ཞལ་ཏ་བྱེད་པ་དེས་ཁ་ཟས་བསོད་པ་བགོ་བཤའ་བྱའོ། །འོད་སྲུང་དེ་ལ་དགེ་སློང་རྣལ་འབྱོར་སྤྱོད་པ་གང་ཡིན་པ་དེ་དག་ལ་དགེ་སློང་ཞལ་ཏ་བྱེད་པས་འཐུན་པའི་འཚོག་ཆས་དང་། ན་བའི་གསོས་སྨན་དང་། ཡོ་
བྱད་རྣམས་སྦྱིན་པར་བྱའོ། །དགེ་སློང་རྣལ་འབྱོར་སྤྱོད་པ་དེ་ས་ཕྱོགས་ག་ལ་གནས་པའི་ས་ཕྱོགས་དེར་དགེ་སློང་ཞལ་ཏ་བྱེད་པ་དེས་སྒྲ་ཆེན་པོ་དང་། སྐད་དྲག་པོ་མི་དབྱུང་ཞིང་བྱེད་དུ་ཡང་མི་གཞུག་གོ །དགེ་སློང་ཞལ་ཏ་བྱེད་པས་དགེ་སློང་རྣལ་འབྱོར་སྤྱོད་པ་དེ་བསྲུང་ཞིང་མལ་ཆ་ཡང་
སྦྱར་བར་བྱའོ། །ཁ་ཟས་བསོད་པ་དང་། ཡི་གར་འོང་བ་དང་། རྣལ་འབྱོར་སྤྱོད་པའི་ས་དང་འཐུན་པའི་བཟའ་བ་དང་བཅའ་བ་རྣམས་སྦྱིན་པར་བྱའོ། །དགེ་སློང་དེ་ལ་དགེ་སློང་འདི་ནི་དེ་བཞིན་གཤེགས་པའི་བསྟན་པ་རྟོན་པའི་ཕྱིར་གནས་པ་ཡིན་ཏེ། དེ་ལ་བདག་གིས་རྗེས་སུ་འཐུན་
པའི་ཡོ་བྱད་ཐམས་ཅད་མང་དུ་སྦྱར་བར་བྱའོ་སྙམ་དུ་ཤིན་ཏུ་ཕངས་པའི་འདུ་ཤེས་བསྐྱེད་པར་བྱའོ། །འོད་སྲུང་དེ་ལ་དགེ་སློང་མང་དུ་ཐོས་པ་ལ་མངོན་པར་བརྩོན་པ་གང་ཡིན་པ་དེ་དག་ལ་དགེ་སློང་ཞལ་ཏ་བྱེད་པས་ལུང་ནོས་ཤིག །ལྷོགས་ཤིག །ཁ་ཏོན་གྱིས་ཤིག །ཁོ་བོ་ནི་ཁྱོད་ཀྱི་
རིམ་གྲོ་བྱེད་པ་ཡིན་གྱིས། ཁྱོད་ཇི་ལྟ་ཇི་ལྟ་བུར་མང་དུ་ཐོས་པར་གྱུར་པ་དེ་ལྟ་དེ་ལྟ་བུར་དགེ་སློང་གི་དགེ་འདུན་མཛེས་པར་འགྱུར་བར་གྱིས་ཤིག །འདུག་ལ་བརྗོད་པས་མཛེས་པར་གྱིས་ཤིག །བདག་ཉིད་ཀྱི་ཤེས་རབ་ཀྱང་མཆོག་ཏུ་འགྱུར་བར་གྱིས་ཤིག་ཅེས་སྤྲོ་བ་བསྐྱེད་པར་
བྱའོ། །འོད་སྲུང་དེ་ལ་དགེ་སློང་ཞལ་ཏ་བྱེད་པས་དེ་དག་དུས་མ་ཡིན་པར་གཏང་བར་མི་བྱ། ལས་སུ་བསྐོ་བར་མི་བྱའོ། །དགེ་སློང་ཞལ་ཏ་བྱེད་པ་དེས་དགེ་སློང་མང་དུ་ཐོས་པ་དེ་དག་བསྲུང་བར་བྱའོ། །འོད་སྲུང་དེ་ལ་ཆོས་སྨྲ་བའི་དགེ་སློང་གང་ཡིན་པ་དེ་དག་ལ་དགེ་སློང་ཞལ་ཏ་བྱེད་

པས་ལས་སུ་མི་བསྐོ་བར་བྱའོ། །གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ཏུ་འཇུག་ཏུ་བཅུག་ལ་ཆོས་འཆད་དུ་གཞུག་གོ །ཆོས་ཉན་པ་དག་བསྐོ་བར་བྱའོ། །འཁོར་གྱི་དཀྱིལ་འཁོར་རྣམ་པར་དག་པར་བྱའོ། །འབེལ་
བའི་ཆོས་ཀྱི་གཏམ་གྱི་ཕྱིར་དཀྱིལ་འཁོར་དུ་གཞག་པར་བྱའོ། །ཆོས་སྨྲ་བའི་དགེ་སློང་ལ་དགེ་སློང་གང་དག་གནོད་པ་བྱེད་པའི་དགེ་སློང་དེ་དག་དགེ་སློང་ཞལ་ཏ་བྱེད་པས་བཟློག་པར་བྱའོ། །དགེ་སློང་ཞལ་ཏ་བྱེད་པས་ཆོས་སྨྲ་བའི་དགེ་སློང་ལ་རྟག་ཏུ་བསུ་བར་བྱ། ལེགས་སོ་ཞེས་བྱ་བ་མང་དུ་
བྱའོ། །འོད་སྲུང་དེ་ལ་དགེ་སློང་གང་དག་འདུལ་བ་འཛིན་པ་དང་། མ་མོ་འཛིན་པར་གྱུར་པ་དེ་དག་གི་གན་དུ་དགེ་སློང་ཞལ་ཏ་བྱེད་པ་དེ་སོང་ལ་ཇི་ལྟར་ན་བདག་རྨ་མེད་ཅིང་མ་ཉམས་པ་དང་། ཇི་ལྟར་ན་བདག་ལྟུང་བ་མེད་པའི་ཆོས་ཀྱི་ཞལ་ཏ་བྱ་ཞེས་ཡོངས་སུ་དྲི་བར་བྱའོ། །དེ་ནས་འདུལ་བ་
འཛིན་པ་དང་། མ་མོ་འཛིན་པའི་དགེ་སློང་དེ་དག་གིས་དགེ་སློང་ཞལ་ཏ་བྱེད་པ་དེའི་བསམ་པ་རིག་ནས་དེའི་བྱ་བ་དང་། འབྱུང་བ་གང་ཡིན་པ་དང་། བྱེད་པ་གང་ཡིན་པ་དེ་བསྟན་པར་བྱའོ། །དགེ་སློང་ཞལ་ཏ་བྱེད་པས་འདུལ་བ་འཛིན་པ་དང་། མ་མོ་འཛིན་པའི་དགེ་སློང་དེ་དག་ལ་
ཕངས་པར་བྱ་བ་དང་། དད་པ་དང་། གུས་པ་དང་། རྗེས་རབ་ཏུ་བསྐྱེད་པར་བྱའོ། །དགེ་འདུན་གྱི་རྙེད་པ་གང་ཡིན་པ་དེ་དགེ་སློང་ཞལ་ཏ་བྱེད་པས་དུས་དུས་སུ་དགེ་སློང་གི་དགེ་འདུན་ལ་དབུལ་བར་བྱའི། དགེ་འདུན་གྱི་རྙེད་པ་བསགས་ཤིང་སྦ་བར་མི་བྱ་སྟེ། ཇི་ལྟར་རྙེད་པ་བཞིན་དུ་
སྦྱིན་པར་བྱ། མ་སྐུལ་བར་སྦྱིན་པར་བྱ། གནོད་པ་མེད་པར་སྦྱིན་པར་བྱའོ། །དེས་འདུན་པ་དང་། ཞེ་སྡང་དང་། གཏི་མུག་དང་། འཇིགས་པས་འགྲོ་བར་མི་བྱའོ། །དགེ་སློང་གི་དགེ་འདུན་ལ་རྟོན་པར་བྱའི། ཁྱིམ་པའི་ཕྱོགས་ལ་རྟོན་པར་མི་བྱའོ། །དགེ་འདུན་གྱི་བྱ་བ་ལ་རྟོན་
པར་བྱའི། བདག་གི་བྱ་བ་ལ་རྟོན་པར་མི་བྱའོ། །དངོས་པོ་གང་ལ་ཡང་དབང་བྱ་བའི་འདུ་ཤེས་བསྐྱེད་པར་མི་བྱའི། བྱ་བ་ཇི་ཙམ་དུ་ཆུང་བ་ཡང་དགེ་འདུན་གྱི་གྲོས་བཞིན་བྱ་ཞིང་རང་དགར་མི་བྱའོ། །དགེ་འདུན་གྱི་འམ། ཕྱོགས་བཞིའི་དགེ་འདུན་གྱི་འམ། མཆོད་རྟེན་གྱི་ཡོ་བྱད་གང་

ཅི་ཡང་རུང་སྟེ། ཇི་ལྟ་བ་བཞིན་དུ་གཞག་པར་བྱ་སྟེ། དགེ་འདུན་གྱི་དང་ཕྱོགས་བཞིའི་དགེ་འདུན་གྱི་བསྲེ་བར་མི་བྱའོ། །ཕྱོགས་བཞིའི་དགེ་འདུན་གྱི་རྙེད་པ་ཡང་དགེ་འདུན་གྱི་དང་བསྲེ་བར་མི་བྱའོ། །དགེ་འདུན་གྱི་དང་ཕྱོགས་བཞིའི་དགེ་འདུན་གྱི་རྙེད་པ་མཆོད་རྟེན་གྱི་དང་བསྲེ་བར་མི་
བྱའོ། །མཆོད་རྟེན་གྱི་རྙེད་པ་ཡང་དགེ་འདུན་གྱི་དང་ཕྱོགས་བཞིའི་དགེ་འདུན་གྱི་དང་བསྲེ་བར་མི་བྱའོ། །གལ་ཏེ་ཕྱོགས་བཞིའི་དགེ་འདུན་ལ་བྲེལ་ཕོངས་སུ་གྱུར་ལ། དགེ་འདུན་གྱི་རྙེད་པ་ཆེ་བར་གྱུར་ན་དགེ་སློང་ཞལ་ཏ་བྱེད་པས་དགེ་སློང་གི་དགེ་འདུན་བསྡུས་ལ་གྲོས་འཐུན་པར་བགྱིས་
ཏེ། དགེ་འདུན་གྱི་རྙེད་པ་དེ་ལས་ཕྱོགས་བཞིའི་དགེ་འདུན་ལ་བཤུག་པར་བྱའོ། །གལ་ཏེ་དེ་བཞིན་གཤེགས་པའི་མཆོད་རྟེན་ཞིག་རལ་དུ་གྱུར་ལ། དགེ་འདུན་གྱི་དང་ཕྱོགས་བཞིའི་དགེ་འདུན་གྱི་རྙེད་པ་ཆེ་བར་གྱུར་ན་དགེ་སློང་ཞལ་ཏ་བྱེད་པས་དགེ་སློང་གི་དགེ་འདུན་ཐམས་ཅད་བསྡུས་
ལ་གྲོས་འཐུན་པར་བགྱིས་ཏེ། འདི་སྐད་ཅེས་དེ་བཞིན་གཤེགས་པའི་མཆོད་རྟེན་འདི་ནི་ཞིག་རལ་དུ་གྱུར་ལ། དགེ་འདུན་གྱི་དང་ཕྱོགས་བཞིའི་དགེ་འདུན་གྱི་རྙེད་པ་ནི་ཆེ་བར་གྱུར་ན། གལ་ཏེ་ཚེ་དང་ལྡན་པ་རྣམས་གནོད་པ་མེད་ཅིང་དད་པ་དང་ལྡན་ལ་བཟོད་ཅིང་གནང་ན་བདག་གིས་དགེ་
འདུན་གྱི་དང་། ཕྱོགས་བཞིའི་དགེ་འདུན་གྱི་རྙེད་པ་འདི་ལས་དངོས་པོ་ཅུང་ཟད་ཅིག་ཁྱེར་ཏེ་དེ་བཞིན་གཤེགས་པའི་མཆོད་རྟེན་འདི་བཅོས་པར་བྱའོ་ཞེས་བརྗོད་པར་བྱའོ། །གལ་ཏེ་དགེ་འདུན་གྱི་གནང་ན་དགེ་སློང་ཞལ་ཏ་བྱེད་པ་དེས་དེ་བཞིན་དུ་བྱའོ། །ཅི་སྟེ་དགེ་འདུན་གྱིས་མ་གནང་
ན་དགེ་སློང་ཞལ་ཏ་བྱེད་པ་དེས་སྦྱིན་པ་པོ་དང་། སྦྱིན་བདག་རྣམས་ལ་གསོལ་བ་ཐོབ་ལ་དེ་བཞིན་གཤེགས་པའི་མཆོད་རྟེན་གསོ་བར་བྱའོ། །འོད་སྲུང་གལ་ཏེ་མཆོད་རྟེན་གྱི་རྙེད་པ་ཇི་ལྟར་མང་དུ་གྱུར་ཏུ་ཟིན་ཀྱང་དགེ་སློང་ཞལ་ཏ་བྱེད་པས་དགེ་འདུན་དང་ཕྱོགས་བཞིའི་དགེ་འདུན་ལ་བཤུག་པར་
མི་བྱའོ། །དེ་ཅིའི་ཕྱིར་ཞེ་ན། དད་ཅིང་དང་བ་མང་པོ་དག་གིས་མཆོད་རྟེན་ལ་ཕུལ་བ་ནི་ཐ་ན་རས་ཀྱི་ཁ་ཚར་གཅིག་ཙམ་གང་ཡིན་པ་དེ་ཡང་ལྷ་དང་བཅས་པའི་འཇིག་རྟེན་གྱི་མཆོད་རྟེན་ཡིན་ན་རིན་པོ་ཆེའམ། རིན་པོ་ཆེར་སྨོས་པ་དག་ལྟ་སྨོས་ཀྱང་ཅི་དགོས། མཆོད་རྟེན་ལ་གོས་ཕུལ་བ་

གང་ཡིན་པ་དེ་ནི་དེ་བཞིན་གཤེགས་པའི་མཆོད་རྟེན་དེ་ཉིད་དུ་རླུང་དང་། ཉི་མ་དང་། ཆར་པས་དེངས་ཀྱང་སླའི། མཆོད་རྟེན་ལ་ཕུལ་བའི་གོས་དབྱིག་གམ་དབྱིག་གི་རིན་དུ་བསྒྱུར་བར་མི་བྱའོ། །དེ་ཅིའི་ཕྱིར་ཞེ་ན། མཆོད་རྟེན་གྱི་ནི་རིན་ཐང་ཅུང་ཟད་ཀྱང་མེད་
ལ། མཆོད་རྟེན་ནི་ཅིས་ཀྱང་བྲེལ་བ་མེད་པའི་ཕྱིར་རོ། །འོད་སྲུང་དགེ་སློང་ཞལ་ཏ་བྱེད་པས་དེ་ལྟར་ཡོངས་སུ་དག་པར་བྱ་སྟེ། དེས་དཀོན་མཆོག་གསུམ་གྱི་དང་མ་འབགས་པར་བྱའོ། །བདག་གི་རྙེད་པས་ཆོག་ཤེས་པར་བྱའོ། །དཀོན་མཆོག་གསུམ་གྱིས་བྱིན་གྱིས་བརླབས་
པའི་དངོས་པོ་རྣམས་ལ་བདག་གིར་འདུ་ཤེས་མི་བྱའོ། །འོད་སྲུང་དགེ་སློང་ཞལ་ཏ་བྱེད་པ་རབ་ཏུ་སྡང་བའི་སེམས་དང་ལྡན་པ་གང་ལ་ལ་ཞིག་གིས་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། སྦྱིན་གནས་རྣམས་ལ་སེམས་ཁྲོས་སམ། དབང་བྱེད་ཅིང་བསྒོ་བླག་བྱེད་ན་དེ་མི་དགེ་བའི་
ལས་དེས་སེམས་ཅན་དམྱལ་བར་འགྲོ་བར་འགྱུར་རོ། །གལ་ཏེ་མིའི་འཇིག་རྟེན་དུ་འོངས་ན་ཡང་བྲན་དང་གཞན་གྱི་ལས་བྱེད་པར་འགྱུར་བ་དང་། ཁུ་ཚུར་དང་། ཐལ་ལྕག་དང་། ལག་ཆ་སྙེམས་པས་བརྡེགས་པ་དང་ཕྲད་པར་འགྱུར་རོ། །འོད་སྲུང་གཞན་ཡང་དགེ་སློང་ཞལ་ཏ་བྱེད་པ་དགེ་འདུན་
གྱི་བྱ་བ་ལས་འདས་ཏེ་རང་དགར་དགེ་སློང་རྣམས་ལ་དབང་བྱེད་ཅིང་བསྒོ་བ་དང་། ཆད་པས་གཅོད་པ་དང་། འཇ