Kinh tạng Tây Tạng (Kangyur Đại Học) — 037_ཕལ་ཆེན།_ག

མ་པར་རྩེ་བ་སྣ་ཚོགས་ཀྱིས་སེམས་ཅན་རྣམས་སྐྱོ་བར་བྱ་བ་དང་། སྡིག་པ་ལས་གྱེན་དུ་བསྐྱོད་པ་དང་། འཁོར་བས་འཇིགས་པར་བྱ་བ་དང་། སྲིད་པའི་ལམ་གྱི་རྒྱུད་ཐམས་ཅད་ནས་གྱེན་དུ་
བསྐྱོད་དེ་གནས་མེད་པ་ལ་རབ་ཏུ་གནས་པར་བྱ་བ་དང་། བྱང་ཆུབ་ཀྱི་སེམས་ལ་སེམས་ཅན་རྣམས་རབ་ཏུ་དགོད་པ་དང་། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་རྣམ་པར་དག་པར་བྱ་བ་དང་། བྱང་ཆུབ་སེམས་དཔའ་རྣམས་ཕ་
རོལ་ཏུ་ཕྱིན་པ་ལ་རབ་ཏུ་དགོད་པར་བྱ་བ་དང་། བྱང་ཆུབ་སེམས་དཔའི་ས་ལ་རབ་ཏུ་གཟུང་བ་དང་། བྱང་ཆུབ་སེམས་དཔའ་རྣམས་ཀྱིས་སངས་རྒྱས་ཀྱི་ཆོས་ཀྱི་ཚུལ་སྣང་བ་ཡོངས་སུ་བསྐྱེད་པ་དང་། ཆོས་ཀྱི་ཚུལ་རྣམ་པར་དགོད་པ་སྣ་ཚོགས་ཀྱིས་
སེམས་ཀྱི་སྐད་ཅིག་རེ་རེ་ཞིང་ཆོས་ཀྱི་དབྱིངས་རྒྱས་པར་འགེངས་པར་བྱེད་པ། ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །རྒྱབ་ཀྱི་གཞུང་ནས་ཉན་ཐོས་དང་། རང་སངས་རྒྱས་མང་པོ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས་
ཉན་ཐོས་དང་། རང་སངས་རྒྱས་ཀྱིས་འདུལ་བའི་སེམས་ཅན་བདག་ཏུ་མངོན་པར་ཞེན་པ་རྣམས་ལ་བདག་མེད་པ་དང་། སེམས་ཅན་མེད་པ་ཡོངས་སུ་བརྗོད་པ་བྱེད་ཅིང་། རྟག་པར་མངོན་པར་ཞེན་པ་རྣམས་ལ་འདུ་བྱེད་ཐམས་ཅད་མྱི་རྟག་པར་ཡོངས་སུ་བསྟན་
པ་དང་། འདོད་ཆགས་ཀྱི་སྤྱོད་པ་ཅན་རྣམས་ལ་མྱི་སྡུག་པ་དང་། ཞེ་སྡང་གི་སྤྱོད་པ་ཅན་རྣམས་ལ་བྱམས་པ་དང་། གཏི་མུག་གི་སྤྱོད་པ་ཅན་རྣམས་ལ་རྐྱེན་ལས་བྱུང་བའི་རྟེན་ཅིང་འབྲེལ་བར་འབྱུང་བ་བརྗོད་པ་དང་། ཆ་མཉམ་པའི་སྤྱོད་པ་ཅན་རྣམས་ལ་ཡེ་
ཤེས་ཀྱི་ཡུལ་དང་ལྡན་པའི་ཆོས་ཀྱི་ཚུལ་མངོན་པར་བསྟན་པ་དང་། ཡུལ་ལ་མངོན་པར་དགའ་བ་རྣམས་ལ་གནས་མེད་པ་རབ་ཏུ་བརྗོད་པ་དང་། ཞི་བ་ལ་གནས་སུ་སེམས་པ་རྣམས་ལ་སྨོན་ལམ་གྱི་ཁྱད་པར་གྱིས་སྤྲོ་བ་བསྐྱེད་པ་དང་། ཕྱོགས་ཀྱི་རྒྱུད་དང་སྒོ་ཐམས་

ཅད་དུ་ཆོས་ཀྱི་ཚུལ་རྒྱ་མཚོའི་རྒྱུད་དང་། སྒོ་ཐམས་ཅད་སེམས་ཅན་ཐམས་ཅད་ཀྱི་དོན་དུ་བརྗོད་པར་བྱེད་ཅིང་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །ཕྲག་པའི་ལྷུན་གཉིས་ལས་གནོད་སྦྱིན་དང་།
སྲིན་པོའི་དབང་པོ་དབྱིབས་སྣ་ཚོགས་དང་ལྡན་ཞིང་ལུས་མི་སྡུག་པ་ཁ་དོག་དང་ཆུ་ཞེང་སྣ་ཚོགས་ཅན་སྤྱོད་ལམ་གྱི་རྣམ་པ་སྣ་ཚོགས་དང་ལྡན་པ། བཞོན་པ་སྣ་ཚོགས་ལ་ཞོན་པ། འཁོར་སྣ་ཚོགས་ཀྱིས་ཡོངས་སུ་བསྐོར་བ། སེམས་ཅན་གྱི་ཁམས་ཡོངས་སུ་བསྐྱང་
བ་ལ་བརྩོན་པ། འོད་སྣ་ཚོགས་ཀྱིས་སྣང་བར་བྱ་བ་ལ་བརྩོན་པ། དབྱངས་སྣ་ཚོགས་རབ་ཏུ་སྒྲོག་པ། སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས་ཐབས་མངོན་པར་བསྒྲུབ་པ་སྣ་ཚོགས་མ་འདྲེས་པས་ཕྱོགས་དང་ཕྱོགས་མཚམས་
ཀུན་གྱི་ནམ་མཁའ་རྒྱས་པར་འགེངས་ཤིང་དགེ་བའི་སྤྱོད་པ་ཐམས་ཅད་ཡོངས་སུ་བསྲུང་བ་དང་། འཕགས་པའི་དཀྱིལ་འཁོར་ཐམས་ཅད་ཡོངས་སུ་བསྲུང་བ་དང་། བྱང་ཆུབ་སེམས་དཔའ་ཐམས་ཅད་ཡོངས་སུ་གཟུང་བ་དང་། ལག་ན་རྡོ་རྗེའི་ལས་ཀྱིས་
ཡང་དག་པར་སོང་བ་དང་། ཡང་དག་པར་ཞུགས་པ་ཐམས་ཅད་ཡོངས་སུ་བསྲུང་བ་དང་། སངས་རྒྱས་ཐམས་ཅད་ལ་མཆོད་པ་དང་རིམ་གྲོ་བྱ་བ་དང་། སེམས་ཅན་ལོག་པར་ལྟུང་བ་རྣམས་ཀྱི་ངན་སོང་གི་ལམ་གྱི་རྒྱུད་ཐམས་ཅད་རྣམ་པར་བཟློག་པ་དང་། འཇིག་རྟེན་
ཐམས་ཅད་ཀྱི་ནད་དང་། གནོད་པ་དང་འཇིགས་པ་ཐམས་ཅད་ཞི་བར་བྱེད་པའི་དོན་དུ་བརྩོན་པ། སེམས་ཅན་གྱི་དོན་བྱ་བས་འཇིག་རྟེན་ཡོངས་སུ་བསྐྱང་བ་ལ་བརྩོན་པ་རྣམས་བསོད་ནམས་དང་། ཡེ་ཤེས་ཀྱི་འཁོར་ལོ་ཡོངས་སུ་རྫོགས་པར་བྱ་བ་
དང་། ཆོས་ཀྱི་འཁོར་ལོའི་རྗེས་སུ་འབྲང་བར་བྱ་བ་དང་། ཕས་ཀྱི་རྒོལ་བའི་འཁོར་ཚར་གཅོད་པར་བྱེད་ཅིང་། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་བྱེད་པ། ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །མདུན་གྱི་ལྟོ་ནས་མྱི་འམ་

ཅིའི་དབང་པོ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་མིའམ་ཅིའི་དབང་པོའི་བུ་མོའི་འཁོར་བརྒྱ་སྟོང་གྲངས་མེད་པ་ཅན་དང་། དྲི་ཟའི་དབང་པོ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད། དྲི་ཟའི་དབང་པོའི་བུ་མོའི་འཁོར་
བརྒྱ་སྟོང་གྲངས་མེད་པ་ཅན་དག་བྱུང་ནས། ལྷའི་རོལ་མོ་བརྒྱ་སྟོང་གྲངས་མེད་པའི་སྒྲ་སྙན་པ་དང་། གླུའི་དབྱངས་ཀྱིས་ཆོས་ཀྱི་རང་བཞིན་དང་ལྡན་པའི་སངས་རྒྱས་ཀྱི་བསྟོད་པ་བརྗོད་པ་བྱེད་ཅིང་། བྱང་ཆུབ་ཀྱི་སེམས་ཡོངས་སུ་བསྔགས་པ་དང་། བྱང་ཆུབ་
སེམས་དཔའི་སྤྱོད་པ་ཡོངས་སུ་བརྗོད་པ་དང་། མངོན་པར་རྫོགས་པར་འཚང་རྒྱ་བའི་སྒོ་ཐམས་ཅད་ལ་མངོན་པར་བསྟོད་པ་དང་། ཆོས་ཀྱི་འཁོར་ལོའི་སྒོ་ཐམས་ཅད་དུ་འཇུག་པ་དང་། རྣམ་པར་འཕྲུལ་པའི་སྒོ་ཐམས་ཅད་ལ་མངོན་པར་སྤྲོ་བར་བྱ་བ་དང་
ཡོངས་སུ་མྱ་ངན་ལས་འདའ་བའི་སྒོ་ཐམས་ཅད་ཡོངས་སུ་བརྗོད་པ་དང་། སངས་རྒྱས་ཀྱིས་བསྟན་པའི་སྒོ་ཐམས་ཅད་ཡོངས་སུ་གཟུང་བ་དང་། སེམས་ཅན་གྱི་སྒོ་ཐམས་ཅད་རབ་ཏུ་དགའ་བར་བྱ་བ་དང་། སངས་རྒྱས་ཀྱི་ཞིང་གི་སྒོ་ཐམས་ཅད་ཡོངས་
སུ་དག་པར་བྱ་བ་དང་། ཆོས་ཀྱི་སྒོ་ཐམས་ཅད་མངོན་པར་བསྟན་པར་བྱ་བ་དང་། སྒྲིབ་པའི་སྒོ་ཐམས་ཅད་རྣམ་པར་བཟློག་པར་བྱ་བ་དང་། དགེ་བའི་རྩ་བའི་སྒོ་ཐམས་ཅད་ཡོངས་སུ་བསྐྱེད་པ་བྱེད་ཅིང་། ཆོས་ཀྱི་དབྱིངས་རྒྱས་པར་འགེངས་པ་ཚོང་
དཔོན་གྱི་བུ་ནོར་བཟངས་ཀྱིས་མཐོང་ངོ་། །ཁའི་སྒོ་ནས་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་བདུན་དང་ལྡན་ཞིང་སྟོབས་ཀྱི་ཡན་ལག་བཞིའི་ཚོགས་ཀྱི་འཁོར་དང་ལྡན་པ་བྱུང་ནས། སྦྱིན་པ་ཆེན་པོའི་འོད་ཟེར་གྱི་རྒྱན་རབ་ཏུ་འགྱེད་ཅིང་རིན་པོ་ཆེའི་
འབྱུང་གནས་ཐམས་ཅད་ཡོངས་སུ་གཏང་བ་དང་། ནོར་བུ་རིན་པོ་ཆེའི་ཚོགས་ཐམས་ཅད་སྦྱིན་པ་དང་། དབུལ་པོ་རྣམས་ནོར་དང་ལྡན་པར་བྱ་བ་དང་། སྲོག་གཅོད་པ་ལས་འཇིག་རྟེན་རྣམ་པར་བཟློག་པ་དང་། བྱམས་པའི་སེམས་ལ་སེམས་ཅན་

རབ་ཏུ་དགོད་པ་དང་། མ་བྱིན་པར་ལེན་པ་དང་། རབ་ཏུ་དབྲལ་བ་དང་། རྒྱན་གྱིས་ཤིན་ཏུ་བརྒྱན་པའི་བུ་མོ་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་གཏང་བ་དང་། འདོད་པས་ལོག་པར་གཡེམ་པ་ལས་རྣམ་པར་བཟློག་པ་དང་།
ཚངས་པའི་སྤྱོད་པ་ལ་རབ་ཏུ་དགོད་པ་དང་། བརྫུན་དུ་སྨྲ་བ་ལས་རྣམ་པར་བཟློག་པ་དང་། བསླུ་བ་མྱེད་པ་ལ་གཞོལ་བར་རབ་ཏུ་དགོད་པ་དང་། ཕྲ་མའི་ཚིག་ལས་རྣམ་པར་བཟློག་པ་དང་། གཞན་འདུམ་པར་བརྩོན་པའི་ཚིག་རབ་ཏུ་བརྗོད་པ་དང་།
ཞེ་གཅོད་པའི་ཚིག་ལས་འཇིག་རྟེན་རྣམ་པར་བཟློག་པ་དང་། འཇམ་ཞིང་ཡིད་དུ་འོང་བའི་ཚིག་རབ་ཏུ་བརྗོད་པ་དང་། གནོད་པའི་ཆོས་དང་ལྡན་པའི་བྱུང་རྒྱལ་དུ་སྨྲ་བ་ལས་སེམས་ཅན་རྣམ་པར་བཟློག་པ་དང་། དོན་ཟབ་མོའི་ཚིག་
རབ་ཏུ་དབྱེ་བ་གདོན་མི་ཟ་བ་ལ་ཡང་དག་པར་དགོད་པ་དང་། ངག་གི་ཉེས་པ་ཐམས་ཅད་ལས་འཇིག་རྟེན་རྣམ་པར་བཟློག་པ་དང་། སྙིང་རྗེ་དང་ལྡན་པའི་ཚིག་རབ་ཏུ་བརྗོད་པར་བྱ་བ་དང་། འཇིག་རྟེན་གྱི་སྙིང་གི་དྲི་མ་ཡོངས་སུ་སེལ་ཅིང་འདོད་པ་ཆུང་བ་
དང་། ཆོག་ཤེས་པ་ལ་བརྩོན་པར་སེམས་ཅན་རབ་ཏུ་དགོད་པ་དང་། ཆགས་སེམས་ལས་འཇིག་རྟེན་རྣམ་པར་བཟློག་པ་དང་། གཞན་གྱི་སེམས་ཀྱི་རྒྱུད་དགའ་བར་བྱེད་པ་ལ་རབ་ཏུ་དགོད་པ་དང་། ལྟ་བའི་དྲ་བ་ཐམས་ཅད་ལས་འཇིག་རྟེན་རབ་
ཏུ་གདོན་པ་དང་། ཡིད་གཉིས་ཀྱི་ར་བ་ཐམས་ཅད་རྣམ་པར་གཏོར་བ་དང་། ཐེ་ཙོམ་གྱི་སྤོ་ཐམས་ཅད་ཡང་རབ་ཏུ་གཞོམ་པ་དང་། ནེམ་ནུར་དང་སོམ་ཉིའི་རབ་རིབ་ཡོངས་སུ་བསྩལ་བ་དང་། ཆོས་རྣམ་པར་དབྱེ་བའི་འཇིག་རྟེན་དུ་རབ་ཏུ་དབྱེ་
བ་དང་། རྐྱེན་ལས་བྱུང་བ་རབ་ཏུ་བརྗོད་པ་དང་། རང་བཞིན་གྱིས་བདེན་པའི་ཚུལ་ལ་སེམས་ཅན་རབ་ཏུ་དགོད་པ་དང་། སྒྲིབ་པ་ཐམས་ཅད་རྣམ་པར་བཟློག་པ་དང་། སྒྲིབ་པ་མེད་པའི་ཚུལ་ལ་གཟུང་བ་དང་། སངས་རྒྱས་ཀྱི་དོན་གྱི་ཚུལ་སྣ་ཚོགས་བརྗོད་

པ་བྱེད་ཅིང་། ཕྱོགས་བཅུའི་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །མིག་གཉིས་ནས་ཉི་མའི་དཀྱིལ་འཁོར་བརྒྱ་སྟོང་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། སེམས་ཅན་དམྱལ་བ་
ཆེན་པོ་ཐམས་ཅད་ཡོངས་སུ་སྣང་བར་བྱེད་ཅིང་འཇིག་རྟེན་གྱི་མུན་པ་ཆེན་པོ་སེལ་བ་དང་། སེམས་ཅན་རྣམས་ཀྱི་གཏི་མུག་གི་རབ་རིབ་སེལ་བ་དང་། གྲང་བའི་སེམས་ཅན་དམྱལ་བ་ན་འཁོད་པའི་སེམས་ཅན་རྣམས་ཀྱི་གྲང་བའི་སྡུག་བསྔལ་རབ་ཏུ་ཞི་བར་བྱེད་པ་དང་།
སའི་རང་བཞིན་གྱི་ཞིང་རྣམས་སུ་འོད་ཁ་དོག་དཀར་པོ་ཅན་རབ་ཏུ་འགྱེད་པ་དང་། གསེར་གྱི་རང་བཞིན་གྱི་ཞིང་རྣམས་སུ་འོད་བཻ་ཌཱུརྱའི་ཁ་དོག་ཅན་རབ་ཏུ་འགྱེད་པ་དང་། བཻ་ཌཱུརྱའི་རང་བཞིན་གྱི་ཞིང་རྣམས་སུ་འོད་དངུལ་གྱི་ཁ་དོག་ཅན་རབ་ཏུ་འགྱེད་པ་དང་། དངུལ་གྱི་རང་བཞིན་གྱི་
ཞིང་རྣམས་སུ་འོད་གསེར་གྱི་ཁ་དོག་ཅན་རབ་ཏུ་འགྱེད་པ་དང་། གསེར་གྱི་རང་བཞིན་གྱི་ཞིང་རྣམས་སུ་འོད་ཤེལ་གྱི་ཁ་དོག་ཅན་རབ་ཏུ་འགྱེད་པ་དང་། གསེར་གྱི་རང་བཞིན་གྱི་ཞིང་རྣམས་སུ་འོད་མུ་ཏིག་དམར་པོའི་ཁ་དོག་ཅན་རབ་ཏུ་འགྱེད་པ་དང་། ཨ་སྨྲ་གརྦྷའི་རང་བཞིན་གྱི་ཞིང་རྣམས་
སུ་འོད་གསེར་གྱི་ཁ་དོག་ཅན་རབ་ཏུ་འགྱེད་པ་དང་། གསེར་གྱི་རང་བཞིན་གྱི་ཞིང་རྣམས་སུ་འོད་ཨ་སྨ་གརྦྷའི་ཁ་དོག་ཅན་རབ་ཏུ་འགྱེད་པ་དང་། ཨིན་དྲ་ནཱི་ལའི་རང་བཞིན་གྱི་ཞིང་རྣམས་སུ་འོད་རིན་པོ་ཆེའི་རྒྱལ་པོ་ཉི་མའི་སྙིང་པོའི་ཁ་དོག་ཅན་རབ་ཏུ་འགྱེད་པ་དང་། རིན་པོ་ཆེའི་རྒྱལ་པོ་
ཉི་མའི་སྙིང་པོའི་རང་བཞིན་གྱི་ཞིང་རྣམས་སུ་འོད་རིན་པོ་ཆེའི་རྒྱལ་པོ་ཨིན་དྲ་ནཱི་ལའི་ཁ་དོག་ཅན་རབ་ཏུ་འགྱེད་པ་དང་། མུ་ཏིག་དམར་པོའི་རང་བཞིན་གྱི་ཞིང་རྣམས་སུ་འོད་རིན་པོ་ཆེའི་རྒྱལ་པོ་ཟླ་བའི་འོད་ཟེར་གྱི་དྲ་བ་དང་དཀྱིལ་འཁོར་གྱི་སྙིང་པོའི་ཁ་དོག་ཅན་རབ་ཏུ་འགྱེད་པ་དང་།
རིན་པོ་ཆེའི་རྒྱལ་པོ་ཟླ་བའི་འོད་ཟེར་གྱི་དྲ་བ་དང་དཀྱིལ་འཁོར་གྱི་སྙིང་པོའི་རང་བཞིན་གྱི་ཞིང་རྣམས་སུ་འོད་མུ་ཏིག་དམར་པོའི་ཁ་དོག་ཅན་རབ་ཏུ་འགྱེད་པ་དང་། རིན་པོ་ཆེ་གཅིག་གི་རང་བཞིན་གྱི་ཞིང་རྣམས་སུ་འོད་རིན་པོ་ཆེ་སྣ་ཚོགས་ཀྱི་ཁ་དོག་ཅན་རབ་ཏུ་འགྱེད་

པ་དང་། རིན་པོ་ཆེ་སྣ་ཚོགས་ཀྱི་རང་བཞིན་གྱི་ཞིང་རྣམས་སུ་འོད་རིན་པོ་ཆེ་གཅིག་གི་ཁ་དོག་ཅན་རབ་ཏུ་འགྱེད་པ་དང་། དེ་བཞིན་དུ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དུ་སེམས་
ཅན་གྱི་དོན་ཚད་མེད་པ་ལ་བརྩོན་ཞིང་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །སྨིན་མཚམས་ཀྱི་མཛོད་སྤུ་ནས་ཟླ་བ་མང་པོ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། ལྷའི་དབང་པོ་
ཐམས་ཅད་ཟིལ་གྱིས་གནོན་ཅིང་། འཇིག་རྟེན་ཐམས་ཅད་ཀྱི་འདོད་པའི་དགའ་བ་རྣམ་པར་བཟློག་པ་དང་། སངས་རྒྱས་བལྟ་བར་དགའ་བ་ལ་རྗེས་སུ་བསྔགས་པ་བྱེད་ཅིང་། སེམས་ཅན་ཚད་མྱེད་པ་གདུལ་བ་ལ་བརྩོན་པར་ཕྱོགས་བཅུའི་ཆོས་ཀྱི་དབྱིངས་
རྒྱས་པར་འགེངས་པར་མཐོང་ངོ་། །འཕྲལ་བ་ནས་ཚངས་པ་ཆེན་པོ་སྤྱོད་ལམ་རབ་ཏུ་ཞི་བ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་བ་ནས། ཚངས་པའི་དབྱངས་སུ་བརྗོད་དེ། སངས་རྒྱས་ཐམས་ཅད་ལ་གསོལ་བ་གདབ་པ་དང་
བྱང་ཆུབ་སེམས་དཔའ་ཐམས་ཅད་རབ་ཏུ་དགའ་བར་བྱ་བ་བྱེད་ཅིང་སེམས་ཅན་གྱི་དོན་ཚད་མེད་པ་ལ་བརྩོན་པར་ཕྱོགས་བཅུའི་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །མགོ་ནས་བྱང་ཆུབ་སེམས་དཔའ་སངས་རྒྱས་
ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། ཁ་དོག་དང་དབྱིབས་སྣ་ཚོགས་ཀྱིས་བརྒྱན་པའི་ལུས་ཡོངས་སུ་སྟོན་ཅིང་། དཔེ་བྱད་བཟང་པོས་རྣམ་པར་བྲིས་པའི་ལུས་རབ་ཏུ་སྟོན་པ་དང་། འོད་ཀྱི་དཀྱིལ་འཁོར་གྱི་སྤྲིན་མཐའ་དང་
དབུས་མེད་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་སངས་རྒྱས་ཐམས་ཅད་ཀྱི་སྔོན་གྱི་བྱང་ཆུབ་སེམས་དཔའི་སྤྱོད་པ་ནས་བཟུང་སྟེ། གཏོང་བ་དང་ལེན་པ་དང་། དངོས་པོ་ཡོངས་སུ་གཏོང་བའི་སྤྲིན་མང་པོ་རབ་ཏུ་དགྱེ་བ་དང་། ཕ་

རོལ་ཏུ་ཕྱིན་པ་སྣ་ཚོགས་དང་ལྡན་པའི་སྔོན་གྱི་སྦྱོར་བ་རྒྱ་མཚོ་ཡོངས་སུ་བསྟན་པ་དང་། སྦྱིན་པའི་སྤྱོད་པ་འཇིག་རྟེན་དུ་ཡོངས་སུ་བརྗོད་པ་དང་། སེར་སྣའི་དྲི་མ་རྣམ་པར་བཟློག་པ་དང་། ཆགས་པ་ཐམས་ཅད་སྤང་བ་ལ་སེམས་ཅན་རབ་ཏུ་དགོད་པ་དང་།
འཇིག་རྟེན་རིན་པོ་ཆེ་སྣ་ཚོགས་ཐམས་ཅད་ཀྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། སྦྱིན་པའི་ཕ་རོལ་ཏུ་ཕྱིན་པ་ལ་སེམས་ཅན་རབ་ཏུ་དགོད་པ་དང་། མཚན་ཐམས་ཅད་ཀྱི་ཡོན་ཏན་ཡང་དག་པར་བརྗོད་པ་དང་། སངས་རྒྱས་ཀྱི་མཚན་འབྱུང་བའི་རྒྱུ་སྟོན་པ་
བྱེད་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གྲངས་མྱེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་། བ་སྤུའི་བུ་ག་ཐམས་ཅད་ནས་སངས་རྒྱས་ཐམས་ཅད་ཀྱི་ཚུལ་ཁྲིམས་ཀྱི་ཕ་
རོལ་ཏུ་ཕྱིན་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་ཡོངས་སུ་བསྟན་པ་དང་། སེམས་ཅན་ཐམས་ཅད་ལམ་གྱི་རྒྱུད་དང་ཡུལ་ལས་ཕྱིར་ཕྱོགས་པར་བྱས་ཏེ། དེ་བཞིན་གཤེགས་པའི་ཡུལ་ལ་མངོན་དུ་ཕྱོགས་པར་བྱ་བ་དང་། འཇིག་རྟེན་གྱི་འདོད་པ་ལ་རྣམ་
པར་སྨད་པ་དང་། འཇིག་རྟེན་གྱི་ཕྱིན་ཅི་ལོག་གི་ལིང་ཏོག་རྣམ་པར་བསལ་བ་དང་། ལོག་པའི་རྣམ་པར་རྟོག་པ་རབ་ཏུ་ཞི་བར་བྱས་ནས་བྱང་ཆུབ་སེམས་དཔའི་ཚུལ་ཁྲིམས་ལ་ཡང་དག་པར་དགོད་པ་དང་། སྙིང་རྗེ་ཆེན་པོའི་ཚུལ་ཁྲིམས་ཡོངས་
སུ་བརྗོད་ཅིང་དེ་བཞིན་གཤེགས་པའི་ཚུལ་ཁྲིམས་རབ་ཏུ་ཐོབ་པར་བྱ་བའི་ཕྱིར། སངས་རྒྱས་ཀྱི་ལམ་ནན་ཏན་དུ་བྱ་བའི་ཚུལ་ཁྲིམས་ལ་སེམས་ཅན་རབ་ཏུ་དགོད་པ་དང་། སྲིད་པའི་ལམ་གྱི་རྒྱུད་རྨི་ལམ་ལྟ་བུར་སེམས་ཅན་རྣམས་ལ་རབ་ཏུ་
བརྗོད་ཅིང་། རྨི་ལམ་གྱི་ཚུལ་དང་མཉམ་པར་ཡོངས་སུ་གཞོལ་བར་བྱ་བའི་ཕྱིར་ཡུལ་ཡོངས་སུ་འཛིན་པ་དང་ཉོན་མོངས་པ་ལ་དབང་བསྒྱུར་བར་སེམས་ཅན་རྣམས་རབ་ཏུ་དགོད་པ་བྱེད་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་

ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། འཇིག་རྟེན་རྣམས་ལ་མདོག་གསེར་གྱི་ཁ་དོག་ལྟ་བུ་མངོན་པར་སྟོན་ཅིང་། ཁྲོ་བ་མེད་པ་དང་། འཁྲུག་པ་མེད་པ་དང་། ཤར་གཉེར་བ་མེད་པ་དང་། ཞེ་སྡང་བ་མེད་
པ་དང་། ཆུད་གསོན་པ་མེད་པ་དང་། ཁོང་ཁྲོ་བ་མེད་པའི་སེམས་ལ་སེམས་ཅན་རབ་ཏུ་དགོད་པ་དང་། བྱོལ་སོང་གི་སྐྱེ་གནས་ཀྱི་ལམ་གྱི་རྒྱུད་ཐམས་ཅད་ཡོངས་སུ་གཅོད་པའི་ཕྱིར། བ་སྤུའི་སྒོ་ཐམས་ཅད་ནས་བཟོད་པའི་ཕ་རོལ་ཏུ་ཕྱིན་པ་དང་
ལྡན་པའི་དེ་བཞིན་གཤེགས་པའི་སྔོན་གྱི་སྦྱོར་བའི་སྤྲིན་རབ་ཏུ་འགྱེད་ཅིང་བཟོད་པའི་སྟོབས་ལ་སེམས་ཅན་རབ་ཏུ་དགོད་པ་དང་། ཆོས་ལ་དབང་བསྒྱུར་བ་ལ་སེམས་ཅན་རབ་ཏུ་སྣང་བར་བྱེད་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་
ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། བྱང་ཆུབ་སེམས་དཔའི་བརྩོན་འགྲུས་ཀྱི་སྟོབས་མཐའ་ཡས་པ་ཤིན་ཏུ་སྟོན་ཅིང་། ཐམས་ཅད་མཁྱེན་པ་ཉིད་དུ་བརྩམས་པ་ལས་ཕྱིར་མྱི་ལྡོག་པའི་སྟོབས་ཀྱིས་ཐོས་པ་རྒྱ་མཚོ་ཡོངས་སུ་བཙལ་
བས་མི་སྐྱོ་བར་བྱ་བ་ཡོངས་སུ་བརྗོད་པ་དང་། དེ་བཞིན་གཤེགས་པ་ཐམས་ཅད་མཆོད་ཅིང་རིམ་གྲོ་བྱ་བ་ལ་སེམས་ཅན་རབ་ཏུ་གཟུད་པ་དང་། སྡུག་བསྔལ་གྱི་ཕུང་པོ་ཐམས་ཅད་རྣམ་པར་བཟློག་པའི་བརྩོན་འགྲུས་ཆེན་པོ་ལ་སེམས་ཅན་རབ་ཏུ་
དགོད་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་སྔོན་གྱི་སྦྱོར་བ་མང་པོའི་སྤྲིན་ལུས་ཐམས་ཅད་ལས་རབ་ཏུ་འགྱེད་ཅིང་བྱང་ཆུབ་སེམས་དཔའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་བསྟན་པ་དང་། སེམས་
ཅན་རྣམས་ཀྱི་ལེ་ལོའི་རི་རྣམ་པར་གཏོར་བ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སེམས་ཅན་རབ་ཏུ་དགོད་པ་དང་ལས་ལ་དབང་བསྒྱུར་བ་ལ་འཇིག་རྟེན་རབ་ཏུ་གཟུད་པ་དང་། རྒྱུན་མི་ཆད་པར་བརྩོན་པར་བྱེད་པ་མཐོང་ངོ་། །ཡང་བྱང་ཆུབ་

སེམས་དཔའ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། བྱང་ཆུབ་སེམས་དཔའ་རྣམས་ཀྱི་རྗེས་སུ་དྲན་པའི་ལམ་ལ་སེམས་ཅན་ཐམས་ཅད་རབ་ཏུ་དགོད་ཅིང་སྒྲིབ་པ་དང་། བར་དུ་གཅོད་པ་དང་། རབ་རིབ་ཐམས་ཅད་རྣམ་
པར་སེལ་བ་དང་། རློམ་པ་དང་བག་མེད་པ་ཐམས་ཅད་ལས་སེམས་ཅན་རྣམ་པར་བཟློག་པ་དང་། བག་ཡོད་པའི་ཆོས་ལ་རབ་ཏུ་དགོད་པ་དང་། ཁེངས་པ་འགྱིང་བ་དང་། ང་རྒྱལ་གྱི་རྒྱལ་མཚན་རབ་ཏུ་སྙོལ་བ་དང་། སངས་རྒྱས་ཀྱི་བསམ་
གཏན་གྱི་ཡན་ལག་རྒྱ་མཚོ་བརྗོད་པ་དང་། འཇིག་རྟེན་རྣམས་ལ་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་བསྔགས་པ་དང་། བ་སྤུའི་བུ་ག་ཐམས་ཅད་ནས་བསམ་གཏན་གྱི་ཕ་རོལ་ཏུ་ཕྱིན་པ་དང་ལྡན་པའི་སྔོན་གྱི་ཚུལ་མང་པོའི་སྤྲིན་རབ་ཏུ་དགྱེ་
བ་དང་། སེམས་ལ་དབང་བསྒྱུར་བ་ལ་སེམས་ཅན་རབ་ཏུ་དགོད་པ་བྱེད་ཅིང་སྐད་ཅིག་རེ་རེ་ལ་ཆོས་ཀྱི་དབྱིངས་རྒྱས་པར་འགེངས་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་
བྱུང་སྟེ། བ་སྤུའི་བུ་ག་ཐམས་ཅད་ནས་སངས་རྒྱས་ཀྱི་ཆོས་ཡོངས་སུ་ཚོལ་བ་དང་ལྡན་པའི་སྔོན་གྱི་སྦྱོར་བ་མང་པོའི་སྤྲིན་རབ་ཏུ་དགྱེ་བ་དང་། དབྱངས་ཀྱི་ཡན་ལག་རྒྱ་མཚོའི་སྐད་ཐམས་ཅད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་སྤྲིན་གྱི་འབྲུག་སྒྲ་སྒྲོག་པ་དང་།
ཡང་དག་པར་ལྟ་བའི་གློག་རབ་ཏུ་འགྱེད་པ་དང་། ཆོས་ཀྱི་རང་བཞིན་གྱི་སྒྲ་དབྱངས་རབ་ཏུ་བསྒྲག་པ་དང་། སེམས་ཅན་རྣམས་ཀྱི་བདག་ཏུ་ལྟ་བའི་རིའི་ལྷུན་རབ་ཏུ་གཞིག་པ་དང་། ལྟ་བ་ཐམས་ཅད་ཀྱི་ཟུག་རྔུ་དབྱུང་བ་དང་། ཐེ་ཙོམ་དང་ཡིད་
གཉིས་དང་ནེམ་ནུར་གྱི་རབ་རིབ་རྣམ་པར་བསྩལ་བ་དང་། ཡེ་ཤེས་ཀྱི་དབང་ཡང་དག་པར་བསྔགས་པ་བྱེད་ཅིང་། སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་རྒྱས་པར་འགེངས་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་

གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། སངས་རྒྱས་ཐམས་ཅད་ཀྱི་ཐབས་མཁས་པའི་ཚུལ་གྱི་དཀྱིལ་འཁོར་རབ་ཏུ་བརྗོད་པ་བྱེད་ཅིང་བ་སྤུའི་བུ་ག་ཐམས་ཅད་ནས་ཐབས་མཁས་པ་དང་ལྡན་པའི་སྔོན་གྱི་སྦྱོར་བ་མང་
པོའི་སྤྲིན་རབ་ཏུ་དགྱེ་བ་དང་། འཇིག་རྟེན་རྣམས་ལ་ཐབས་མཁས་པའི་སྤྱོད་པ་རབ་ཏུ་བརྗོད་པ་དང་། ཐེག་པ་ཆེན་པོའི་འབྱུང་བ་མངོན་པར་བསྟན་པ་དང་། སངས་རྒྱས་ཐམས་ཅད་ཀྱི་དཀྱིལ་འཁོར་ཡང་དག་པར་བསྔགས་པ་དང་། འཁོར་བ་
དང་མྱ་ངན་ལས་འདས་པ་ཐ་མྱི་དད་པའི་བྱང་ཆུབ་སེམས་དཔའི་སྤྱོད་པ་ཡོངས་སུ་བསྟན་པ་དང་། བྱང་ཆུབ་སེམས་དཔའ་རྣམས་ཀྱི་ཐབས་མཁས་པའི་ཕ་རོལ་ཏུ་ཕྱིན་པ་ལ་སེམས་ཅན་རབ་ཏུ་དགོད་པ་དང་། འཇིག་རྟེན་རྣམས་ལ་བྱང་ཆུབ་སེམས་
དཔའི་དབང་གི་དཀྱིལ་འཁོར་རབ་ཏུ་བསྟན་པ་བྱེད་ཅིང་། སེམས་བསྐྱེད་པ་རེ་རེ་ལ་ཆོས་ཀྱི་དབྱིངས་རྒྱས་པར་འགེངས་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། བ་སྤུའི་བུ་ག་ཐམས་ཅད་
ནས་དེ་བཞིན་གཤེགས་པ་ཐམས་ཅད་ཀྱི་མཚན་རྒྱ་མཚོའི་སྤྲིན་གྱི་འབྲུག་སྒྲ་སྒྲོག་ཅིང་། བ་སྤུའི་བུ་ག་ཐམས་ཅད་ནས་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་དག་པ་དང་ལྡན་པའི་སྔོན་གྱི་སྦྱོར་བ་མང་པོའི་སྤྲིན་
རབ་ཏུ་དགྱེ་བ་དང་། སྨོན་ལམ་གྱི་ཕ་རོལ་ཏུ་ཕྱིན་པ་ཡང་དག་པར་བསྔགས་པ་དང་། བྱང་ཆུབ་སེམས་དཔའི་དབང་ཐམས་ཅད་ལ་སེམས་ཅན་རབ་ཏུ་དགོད་པ་དང་། སྨོན་ལམ་ཆེན་པོའི་ཤིང་རྟའི་འཁོར་ལོ་ཕྱི་མའི་མཐའི་མུར་ཐུག་པར་འདྲིལ་
བ། ཆོས་ཐམས་ཅད་ཀྱི་རྗེས་སུ་འབྲང་བ་ཉོན་མོངས་པ་ཐམས་ཅད་རྣམ་པར་བཟློག་པ། མི་ཤེས་པའི་རི་རྣམ་པར་འཐོར་བ། འཇིག་རྟེན་དུ་རབ་ཏུ་བརྗོད་པ་བྱེད་ཅིང་། སྨོན་ལམ་སྣ་ཚོགས་ཀྱི་རྣམ་པར་འཕྲུལ་པས། སེམས་ཀྱི་སྐད་ཅིག་རེ་རེ་

ལ་ཆོས་ཀྱི་དབྱིངས་རྒྱས་པར་འགེངས་པ་མཐོང་ངོ་།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་སུམ་ཅུ་པ། ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་
བྱུང་སྟེ། བྱང་ཆུབ་སེམས་དཔའི་སྟོབས་རབ་ཏུ་སྣང་བར་བྱ་བ་དང་། བྱང་ཆུབ་སེམས་དཔའི་སྟོབས་ཡོངས་སུ་བསྒྲུབ་པའི་སྒྲ་རབ་ཏུ་དབྱུང་བ་དང་། བ་སྤུའི་བུ་ག་ཐམས་ཅད་ནས་སྟོབས་ཀྱི་ཕ་རོལ་ཏུ་ཕྱིན་པའི་སྒྲུབ་ཅིང་འབྱིན་པའི་སྔོན་གྱི་སྦྱོར་བ་མང་པོའི་
སྤྲིན་རབ་ཏུ་དགྱེ་བ་དང་། བདུད་དང་ཕས་ཀྱི་རྒོལ་བ་ཐམས་ཅད་ཀྱིས་མི་ཐུབ་པའི་སྟོབས་ཡོངས་སུ་བསྟན་པ་དང་། ཁོར་ཡུག་དང་རྡོ་རྗེའི་རི་ཐམས་ཅད་ལུས་ཀྱི་སྟེང་དུ་རྡིབ་ཀྱང་མི་ཉམས་པའི་སྟོབས་རབ་ཏུ་བརྗོད་པ་དང་། བསྐལ་པས་
ཚིག་པ་ཐམས་ཅད་ཀྱི་མེ་རྒྱ་མཚོའི་ནང་ན་གནས་ཀྱང་ལུས་ལ་གནོད་པ་མེད་པའི་སྟོབས་ཡོངས་སུ་བསྟན་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་ལག་པའི་མཐིལ་གྱི་ནམ་མཁའི་དབྱིངས་སུ་སྟོན་པའི་སྟོབས་ཡོངས་སུ་སྟོན་པ་བྱེད་
ཅིང་། སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་སུ་འགེངས་པས་རྒྱུན་མི་གཅོད་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། སེམས་ཅན་རྣམས་ལ་ཡེ་ཤེས་ཀྱི་དཀྱིལ་འཁོར་སྟོན་ཅིང་
བ་སྤུའི་བུ་ག་ཐམས་ཅད་ནས་ཡེ་ཤེས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་དང་ལྡན་པའི་སྔོན་གྱི་སྦྱོར་བ་མང་པོའི་སྤྲིན་རབ་ཏུ་དགྱེ་བ་དང་། འཇིག་རྟེན་རྣམས་ལ་སངས་རྒྱས་ཐམས་ཅད་ཀྱི་ཡོན་ཏན་དང་། ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་
ཀྱིས་རབ་ཏུ་བརྗོད་པ་དང་། སངས་རྒྱས་ཐམས་ཅད་ཀྱི་མཚན་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་མངོན་པར་བསྟན་པ་དང་། སྨོན་ལམ་ཐམས་ཅད་མངོན་པར་བསྒྲུབ་པའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་ཡོངས་སུ་བརྗོད་པ་དང་།

སེམས་ཅན་ཐམས་ཅད་ཡོངས་སུ་བསྡུ་བའི་སྨོན་ལམ་མངོན་པར་བསྒྲུབ་པའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་ཤིན་ཏུ་ཡངས་པར་བྱ་བ་དང་། སེམས་ཅན་ཐམས་ཅད་བདག་མྱེད་པའི་རང་བཞིན་ལ་གཟུད་པ་
མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་རྣམ་པར་བསྟན་པ་དང་། སེམས་ཅན་ཐམས་ཅད་ཀྱི་སེམས་རྒྱ་མཚོ་རྣམ་པར་བལྟ་བ་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་རབ་ཏུ་བརྗོད་པ་དང་། སེམས་ཅན་ཐམས་ཅད་ཀྱི་དབང་པོ་རྣམ་པར་
དབྱེ་བའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་རབ་ཏུ་དབྱེ་བ་དང་། སེམས་ཅན་ཐམས་ཅད་ཀྱི་བསམ་པ་དང་མོས་པ་རྣམ་པར་བལྟ་བའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་ཡང་དག་པར་བརྗོད་པ་དང་། སེམས་ཅན་
ཐམས་ཅད་ཀྱི་ལས་རྒྱ་མཚོ་ལ་འཇུག་པའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་རྣམ་པར་གྲོལ་བ་དང་། སེམས་ཅན་ཐམས་ཅད་ཀྱི་སྨོན་ལམ་རྒྱ་མཚོ་ལ་འཇུག་པའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་ཡོངས་སུ་བསྟན་
པ་བྱེད་ཅིང་། སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །སྤྱི་བོའི་གཙུག་ཏོར་གྱི་གསེབ་ནས་དེ་བཞིན་གཤེགས་པའི་སྐུ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་
མཚན་དམ་པ་དང་། དཔེ་བྱད་བཟང་པོ་རྣམ་པར་དག་པས་བརྒྱན་པ། འཛམ་བུ་ཆུ་ཀླུང་གི་གསེར་གྱི་རི་བོ་ཤིན་ཏུ་འབར་བ་ལྟར་སྣང་བ་འོད་ཀྱི་དཀྱིལ་འཁོར་ཕྱོགས་བཅུར་སྤ་ཞིང་ཚད་མེད་པར་འབར་བ་དང་། ཆོས་ཀྱི་དབྱིངས་ཚུལ་གྱིས་རྒྱས་པར་འགེངས་པའི་
དབྱངས་མངའ་བ། སངས་རྒྱས་ཀྱི་རྣམ་པར་འཕྲུལ་པ་མཐའ་དང་དབུས་མེད་པ་ཡོངས་སུ་སྟོན་པ་འགྲོ་བ་ཐམས་ཅད་ལ་ཐ་མི་དད་པར་ཆོས་ཀྱི་སྤྲིན་གྱི་ཆར་མངོན་པར་འབེབས་པ་སྟེ། འདི་ལྟར་སྙིང་པོ་བྱང་ཆུབ་མཆོག་ཏུ་ཕྱིན་པའི་བྱང་ཆུབ་སེམས་དཔའ་

རྣམས་ལ་ཆོས་ཀྱི་དབྱིངས་ཀྱི་གཞིའི་བྱེ་བྲག་མངོན་སུམ་དུ་ཤེས་པའི་སྤྲིན་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་དབང་བསྐུར་བ་ཐོབ་པ་རྣམས་ལ་གཞི་ཀུན་ཏུ་རྟེན་པའི་སྤྲིན་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་
དང་། བྱང་ཆུབ་སེམས་དཔའ་ཆོས་ཆེན་པོའི་རྒྱལ་ཚབ་ཏུ་དབང་བསྐུར་བ་རྣམས་ལ་སྒོ་ཀུན་ནས་འཇུག་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་གཞོན་ནུར་གྱུར་པ་རྣམས་ལ་ཀུན་ནས་བརྒྱན་པ་ཞེས་བྱ་བའི་ཆོས་ཀྱི་
སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་ཕྱིར་མི་ལྡོག་པ་རྣམས་ལ་སྙིང་རྗེ་ཆེན་པོའི་ཚོགས་ཤིན་ཏུ་བརྟན་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་ལྷག་པའི་བསམ་པ་དག་པ་རྣམས་
ལ་ཆོས་ཐམས་ཅད་ཀྱི་རང་བཞིན་གྱི་བྱེ་བྲག་ཤེས་པའི་རྡོ་རྗེ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་སྔོན་གྱི་སྦྱོར་བ་དང་ལྡན་པ་རྣམས་ལ་འགྲོ་བ་ཡོངས་སུ་སྡུད་པས་ཀུན་ནས་བརྒྱན་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་
པ་དང་། བྱང་ཆུབ་སེམས་དཔའ་ཆེར་སྐྱེས་པ་རྣམས་ལ་དུས་གསུམ་གྱི་དེ་བཞིན་གཤེགས་པའི་དཀྱིལ་འཁོར་མངོན་སུམ་དུ་དམིགས་པའི་སྤྲིན་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་རྣལ་འབྱོར་ལ་སྤྱོད་
པ་རྣམས་ལ་ཆོས་ཐམས་ཅད་ཀྱི་རང་བཞིན་དང་གཞི་རབ་ཏུ་སྒྲོག་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་ལས་དང་པོ་པ་རྣམས་ལ་སྙིང་རྗེ་ཆེན་པོའི་ཚུལ་དང་ཐབས་ཀྱི་སྙིང་པོའི་སྤྲིན་ཀུན་ཏུ་འབྱུང་བ་ཞེས་བྱ་བའི་
ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་སེམས་དང་པོ་བསྐྱེད་པ་རྣམས་ལ་དགའ་བར་བགྱི་བའི་མཛོད་ཤིན་ཏུ་བསྩགས་པའི་སྙིང་པོ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་

ཡངས་པ་ལ་མོས་པ་རྣམས་ལ་རྣམ་པར་ཐར་པ་མི་ཟད་པ་དང་། དེ་བཞིན་གཤེགས་པའི་སྨོན་ལམ་གྱིས་དགའ་བར་བྱེད་པའི་མཛོད་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། གཟུགས་ལ་སྤྱོད་པའི་སེམས་ཅན་
རྣམས་ལ་གཞི་ཀུན་ཏུ་མི་ཟད་པའི་མཛོད་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། ཚངས་པའི་རིས་ཀྱི་ལྷ་རྣམས་ལ་ཚུལ་རྒྱ་མཚོ་ཚད་མེད་པའི་འབྲུག་སྒྲའི་དབྱངས་ཤེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། དབང་བསྒྱུར་གྱི་
ལྷ་རྣམས་ལ་སྟོབས་འབྱུང་བའི་ཆོས་ཀྱི་ཡོ་བྱད་མི་ཟད་པའི་མཛོད་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བདུད་ཀྱི་རིས་ཀྱི་ལྷ་རྣམས་ལ་ཐམས་ཅད་མཁྱེན་པ་ཉིད་ཀྱི་ཚོགས་རྒྱལ་མཚན་སྣ་ཚོགས་ཅན་ཡང་དག་པར་བསྒྲུབ་པའི་དབྱངས་ཤེས་
བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། འཕྲུལ་དགའི་ལྷ་རྣམས་ལ་ཡེ་ཤེས་རིན་པོ་ཆེ་སྣ་ཚོགས་ལ་བརྩོན་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། དགའ་ལྡན་གྱི་ལྷ་རྣམས་ལ་བྱང་ཆུབ་སེམས་དཔའི་སྨོན་
ལམ་རིན་པོ་ཆེ་སྣ་ཚོགས་ཀྱི་རྒྱལ་མཚན་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། མཚེ་མའི་ལྷ་རྣམས་ལ་དེ་བཞིན་གཤེགས་པ་ཐམས་ཅད་རྗེས་སུ་དྲན་པའི་མཛོད་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་།
ལྷའི་དབང་པོ་བརྒྱ་བྱིན་གྱི་གནས་སུ་དེ་བཞིན་གཤེགས་པ་མཐོང་བས་དགེ་བའི་ཤུགས་འབྱུང་བ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། གནོད་སྦྱིན་གྱི་དབང་པོའི་གནས་སུ་ཆོས་ཀྱི་དབྱིངས་ཀྱི་ནམ་མཁའ་ལ་དེ་བཞིན་གཤེགས་
པའི་གནས་རྣམ་པར་འཕྲུལ་པས་རྒྱས་པར་འགེངས་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། དྲི་ཟའི་དབང་པོའི་གནས་སུ་དེ་བཞིན་གཤེགས་པ་ཐམས་ཅད་ཀྱི་ཆོས་ཡང་དག་པར་བགྲོ་བ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་

དབབ་པ་དང་། ལྷ་མ་ཡིན་གྱི་གནས་སུ་ཡེ་ཤེས་ཀྱི་ཚུལ་རྡོ་རྗེའི་དཀྱིལ་འཁོར་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། ནམ་མཁའ་ལྡིང་གི་དབང་པོའི་གནས་སུ་དེ་བཞིན་གཤེགས་པ་ཐམས་ཅད་འབྱུང་བའི་ཐབས་ཀྱི་སྤྲིན་ཅེས་བྱ་
བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། མིའམ་ཅིའི་དབང་པོའི་གནས་སུ་ཆོས་ཀྱི་སྤྲིན་ཡང་དག་པར་འགྲོ་བ་ཐམས་ཅད་ཀྱི་དབྱངས་ཤེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། ཀླུའི་དབང་པོའི་གནས་སུ་བྱང་ཆུབ་སེམས་དཔའི་
རྣམ་པར་འཕྲུལ་པ་སྒྲོག་ཅིང་སྲིད་པའི་ལམ་གྱི་རྒྱུད་ལས་སྐྱོ་བ་བསྐྱེད་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། ལྟོ་འཕྱེ་ཆེན་པོའི་དབང་པོའི་གནས་སུ་དགའ་བ་རྒྱ་མཚོ་རྣམ་པར་འཕེལ་བར་བྱེད་པའི་ཤུགས་ཤེས་བྱ་བའི་ཆོས་ཀྱི་སྤྲིན་གྱི་ཆར་
མངོན་པར་དབབ་པ་དང་། མྱིའི་གནས་སུ་འགྲོ་བ་ཐམས་ཅད་ལས་ཁྱད་པར་དུ་འཕགས་པའི་ཡེ་ཤེས་རྣམ་པར་འབྱེད་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། སེམས་ཅན་དམྱལ་བའི་འཇིག་རྟེན་དུ་འཁོར་བའི་སྡུག་བསྔལ་ཐམས་ཅད་
རབ་ཏུ་ཞི་བའི་དབྱངས་དང་། འཕགས་པའི་ལམ་གྱི་ཚིག་གི་རྒྱུད་ཀྱིས་བརྒྱན་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱོལ་སོང་གི་སྐྱེ་གནས་སུ་ལས་ཀྱི་ལམ་ཁ་ན་མ་ཐོ་བ་མེད་པ་ལ་ནན་ཏན་དུ་བྱ་བའི་དབྱངས་དང་། དེ་བཞིན་
གཤེགས་པ་རྗེས་སུ་དྲན་པའི་སྤྲིན་གྱི་དཀྱིལ་འཁོར་གྱི་ལྷུན་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། གཤིན་རྗེའི་འཇིག་རྟེན་དུ་དེ་བཞིན་གཤེགས་པ་ཐམས་ཅད་ཀྱི་ཕ་རོལ་ཏུ་ཕྱིན་པ་བསྒྲག་པ། སེམས་ཅན་ཐམས་ཅད་
ཀྱི་གཏོང་བའི་སེམས་འབྱུང་བ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། སེམས་ཅན་ལོག་པར་ལྟུང་བ་རྣམས་ལ་སྡུག་བསྔལ་ཐམས་ཅད་ཞི་བ་རབ་ཏུ་འཐོབ་པས་དབུགས་འབྱུང་བའི་དབྱངས་ཀྱི་ང་རོ་ཞེས་བྱ་བའི་ཆོས་ཀྱི་སྤྲིན་གྱི་ཆར་

མངོན་པར་དབབ་པ་མཛད་ཅིང་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་འོད་ཟེར་གྱི་དྲ་བ་དང་། དཀྱིལ་འཁོར་གྱི་ཁ་དོག་དང་
གཟུགས་ཀྱི་གློང་དང་རྒྱན་གྲངས་མེད་པ་ཅན་དགོས་པ་སྣ་ཚོགས་གྲངས་མེད་པ་ལ་སྟ་གོན་དུ་གནས་པ། སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། ཕྱོགས་བཅུའི་ཆོས་ཀྱི་དབྱིངས་རྒྱས་པར་འགེངས་པ་མཐོང་སྟེ། འདི་
ལྟར་བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་ལས་ནི་སྦྱིན་པའི་སྤྱོད་པ་སྐྱོན་མེད་པས། བདོག་པ་ཐམས་ཅད་ཡོངས་སུ་གཏོང་བ་རྣམ་པར་འཕྲུལ་པ་མཐོང་ངོ་། །བ་སྤུའི་སྒོའི་དྲ་བ་དང་། དཀྱིལ་འཁོར་ལ་ལ་ལས་ནི་དུས་གསུམ་
གྱི་བྱང་ཆུབ་སེམས་དཔའ་ཐམས་ཅད་ཀྱི་ཚུལ་ཁྲིམས་དང་བརྟུལ་ཞུགས་དང་། ཡི་དམ་དང་ཚུལ་ཁྲིམས་ཀྱི་དཀྱིལ་འཁོར་དུ་རྣམ་པར་འཕྲུལ་པ་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་ལས་ནི་བྱང་ཆུབ་སེམས་
དཔའ་ཐམས་ཅད་བཟོད་པའི་སྤྱོད་པའི་རྣམ་པ་དུས་གསུམ་དུ་བྱུང་བའི་བྱང་ཆུབ་སེམས་དཔའ་རྣམས་རྐ་ལག་དང་། ཡན་ལག་གི་དམ་པ་བཅད་ཀྱང་ཉམས་སུ་བཟོད་པ་བྱེད་པའི་རྣམ་པར་འཕྲུལ་པ་དང་། ཁུ་ཚུར་དང་དབྱིག་པས་བསྣུན་ཏེ། མཚོན་
གྱིས་ལུས་ལ་བཏབ་ཀྱང་ཉམས་སུ་བཟོད་པར་བྱེད་པའི་རྣམ་པར་འཕྲུལ་པ་དང་། ལུས་ཐམས་ཅད་གཤེགས་སམ། སྙིང་དང་མྱིག་ཕྱུང་ཡང་ཉམས་སུ་བཟོད་པ་བྱེད་པའི་རྣམ་པར་འཕྲུལ་པ་མཐོང་ངོ་། །བྱང་ཆུབ་སེམས་དཔའ་དུས་གསུམ་དུ་བྱུང་
བ་རྣམ་པར་བརྟགས་པའི་ལུས་དང་ལྡན་པ་གཞན་དག་གིས་ཐམས་ཅད་མཁྱེན་པ་ཉིད་ཡོངས་སུ་བཙལ་བའི་ཆེད་དུ་ལུས་དང་། སེམས་ལ་གནོད་པ་ཐམས་ཅད་དང་ཡན་ལག་དང་ཉིང་ལག་བཅད་པ་ཐམས་ཅད་ཀྱང་སྙིང་རྗེ་ཆེན་པོས་དབང་དུ་བྱས་པའི་ཕྱིར་ཉམས་

སུ་བཟོད་པར་བྱས་པ་དང་། བག་ལ་ཞ་བར་བྱས་པ་དང་བཏང་སྙོམས་སུ་བཞག་པའི་བྱང་ཆུབ་སེམས་དཔའི་བཟོད་པའི་སྤྱོད་པ་རྣམ་པར་འཕྲུལ་པའི་གཟུགས་བརྙན་གྱི་གཟུགས་དེ་ལྟ་བུ་དག་ཀྱང་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བ་དང་།
དཀྱིལ་འཁོར་ལ་ལ་ལས་ནི་བྱང་ཆུབ་སེམས་དཔའ་ཐམས་ཅད་ཀྱི་བརྩོན་འགྲུས་ཀྱི་སྤྱོད་པ་རྣམ་པ་ཐ་དད་པ་རྣམ་པར་ཕྱེ་བའི་གཟུགས་དང་། བྱང་ཆུབ་སེམས་དཔའ་འདས་པ་དང་། མ་འོངས་པ་དང་ད་ལྟར་བྱུང་བའི་བརྩོན་འགྲུས་ཀྱི་རྣམ་
པར་འཕྲུལ་པ་འཇིག་རྟེན་ཡོངས་སུ་བསྐྱོད་པ་དང་རྒྱ་མཚོ་ཡོངས་སུ་བསྐྱོད་པ་དང་། སེམས་ཅན་ཡོངས་སུ་སྐྱོ་བར་བྱ་བ་དང་། མུ་སྟེགས་ཅན་ཐམས་ཅད་ཡོངས་སུ་ཚར་གཅད་པ་དང་། བདུད་ཐམས་ཅད་སྤ་དགོང་བ་དང་། ཆོས་ཀྱི་ཕྱོགས་སྣང་བར་
བྱ་བའི་བྱང་ཆུབ་སེམས་དཔའི་མཐུ་ཆེན་པོར་རྣམ་པར་འཕྲུལ་པ་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་ལས་ནི་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་རྣམ་པར་རྒྱུ་བའི་རྣམ་གྲངས་ཇི་སྙེད་པ་དང་ལུས་ཉེ་བར་ལེན་པ་ཇི་
སྙེད་པ་དང་། རིགས་སུ་སྐྱེ་བ་ཡོངས་སུ་བཟུང་བ་ཅི་སྙེད་པ་དང་། གཟུགས་ཀྱི་ལུས་ཡོངས་སུ་གྲུབ་པ་ཇི་སྙེད་པ་དང་། དགེ་བའི་བཤེས་གཉེན་གྱིས་རྗེས་སུ་བསྟན་པ་ཡོངས་སུ་བཟུང་བ་ཇི་སྙེད་པ་དང་། དགེ་བའི་བཤེས་གཉེན་གྱིས་མན་ངག་ལ་ནན་ཏན་དུ་བྱ་བའི་གནས་ཇི་སྙེད་པ་དང་། དེ་བཞིན་གཤེགས་པའི་བསམ་
གཏན་གྱི་ཡན་ལག་ཡོངས་སུ་བསྒྲུབ་པ་དང་། འཐུན་པའི་གཙུག་ལག་ཁང་དང་། གནས་དང་། གཞལ་མེད་ཁང་དང་། ཡུལ་དང་། རིའི་སུ་ལ་ཇི་སྙེད་པ་དང་། བསམ་གཏན་གྱི་ཡན་ལག་དེ་དག་སུས་ཡོངས་སུ་བསྒྲུབ་པའི་དྲང་སྲོང་གི་ལུས་ཇི་སྙེད་པ་དང་། རྒྱལ་པོའི་ཐབས་ཇི་སྙེད་
པ་དང་། འབྱུང་བ་ལ་མངོན་པར་མོས་པ་ཇི་སྙེད་པ་དང་། བརྟུལ་ཞུགས་དང་ཡི་དམ་དང་། ཚུལ་དང་སྤྱོད་ལམ་ཇི་སྙེད་པ་དེ་དག་ཐམས་ཅད་ཀྱང་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་

ལས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྤྱོད་པ་ལ་རྣམ་པར་སྤྱོད་ཅིང་། ཆོས་ཐམས་ཅད་ཡོངས་སུ་ཚོལ་བ་དང་ལྡན་པའི་ལུས་ཡོངས་སུ་བཟུང་བ་མཐོང་སྟེ། ལུས་གང་གིས་ཆོས་ཀྱི་ཚིག་གཅིག་གི་དོན་དུ་ཡང་བ་དོག་པ་ཐམས་ཅད་ཡོངས་
སུ་བཏང་སྟེ། སེམས་ཅན་ཐམས་ཅད་ལས་ཡོངས་སུ་བཙལ་བ་དང་རིམ་གྲོ་དང་། བཀུར་སྟི་ཐམས་ཅད་ཀྱིས་དགེ་བའི་བཤེས་གཉེན་ཐམས་ཅད་ལས་ཡོངས་སུ་བཙལ་བ་དང་། དད་པ་དང་སྲི་ཞུས་ལུས་རབ་ཏུ་བཏུད་དེ། དེ་བཞིན་གཤེགས་པ་རྣམས་
ལས་ཡོངས་སུ་བཙལ་བ་དང་། ཆོས་ཀྱི་ཚིག་གཅིག་ལ་ཇི་ལྟ་བ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་ཀྱི་ཚིག་ཐམས་ཅད་ལའང་དེ་བཞིན་ཏེ། འགྲོ་བ་ཐམས་ཅད་དུ་གཟུགས་བརྙན་བྱུང་བའི་ལུས་ཐམས་ཅད་ཀྱི་ཡོངས་སུ་བཙལ་བ་དེ་དག་
ཐམས་ཅད་ཀྱང་ཚོང་དཔོན་གྱི་བུ་ནོར་བཟངས་ཀྱིས་བ་སྤུའི་སྒོ་གཅིག་གི་འོད་ཟེར་གྱི་དྲ་བ་དང་དཀྱིལ་འཁོར་ལས་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་ལས་ནི་བྱང་ཆུབ་སེམས་དཔའ་ཐམས་ཅད་ཀྱི་སེམས་ཅན་ཡོངས་སུ་སྨིན་
པར་བྱ་བའི་ཐབས་འགྲོ་བའི་རྒྱུད་རྒྱ་མཚོ་ཐམས་ཅད་དུ་འབྱམ་ཀླས་པ། སེམས་ཅན་ཐམས་ཅད་ཡོངས་སུ་བསྡུ་བའི་སྦྱོར་བར་མཐོང་ངོ་། །སེམས་ཅན་རེ་རེ་ལ་ཡང་ལུས་དང་སྤྱོད་པའི་ཚུལ་གྱི་སྒོ། སྔོན་གྱི་ལུས་ཉེ་བར་བླངས་པ་ཐབས་མཁས་
པའི་སྤྱོད་པ་ལ་བརྩོན་པ། སེམས་ཅན་ཐམས་ཅད་ཀྱི་ལུས་དང་འདྲ་བས་ཡོངས་སུ་སྡུད་པ་ཡང་བ་སྤུའི་སྒོའི་འོད་ཟེར་གྱི་དྲ་བའི་དཀྱིལ་འཁོར་གཅིག་ལས་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བའི་དཀྱིལ་འཁོར་ལ་ལ་ལས་ནི་སྔོན་བཅོམ་ལྡན་འདས་ཀྱི་
བསྐལ་པ་ཐམས་ཅད་ཀྱི་སྨོན་ལམ་མངོན་པར་བསྒྲུབས་པའི་སྤྱོད་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་སྨོན་ལམ་མངོན་པར་བསྒྲུབས་པའི་སྤྱོད་པ་དང་། ཞིང་ཐམས་ཅད་ཡོངས་སུ་དག་པར་བྱ་བའི་སྨོན་ལམ་མངོན་པར་བསྒྲུབས་པ་མཛད་

པ་ཇི་སྙེད་པ་དང་། སྨོན་ལམ་ཐམས་ཅད་མངོན་པར་བསྒྲུབས་པའི་དཀྱིལ་འཁོར་ཇི་སྙེད་ཅིག་དེ་བཞིན་གཤེགས་པ་དེ་དང་དེ་དག་གི་ཞབས་ཀྱི་དྲུང་དུ་འཁོར་བའི་སྐྱོན་ཐམས་ཅད་ལས་སོ་སོའི་རེ་རེའི་གཉེན་པོར་མངོན་པར་བསྒྲུབས་པར་མཛད་པ། དེ་དག་ཐམས་
ཅད་ཀྱང་ཚོང་དཔོན་གྱི་བུ་ནོར་བཟངས་ཀྱིས་བ་སྤུའི་སྒོའི་འོད་ཟེར་གྱི་དྲ་བའི་དཀྱིལ་འཁོར་གཅིག་ལས་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བའི་དཀྱིལ་འཁོར་ལ་ལ་ལས་ནི་སྟོབས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཐམས་ཅད་དང་ལྡན་པའི་སྔོན་གྱི་སྦྱོར་
བ་རྒྱ་མཚོ་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བའི་དཀྱིལ་འཁོར་ལ་ལ་ལས་ནི་ཡེ་ཤེས་ཀྱི་སྤྱོད་པ་རྣམ་པར་རྒྱུ་བ་ཐམས་ཅད་དང་ལྡན་པ་མི་ཤེས་པའི་གཉིད་ཀྱིས་ལོག་པའི་སེམས་ཅན་སད་པར་བྱེད་པའི་རང་བཞིན་དང་ལྡན་པའི་སྔོན་གྱི་སྦྱོར་བ་རྒྱ་མཚོ་
མཐོང་བར་གྱུར་ཏོ། །དེ་ནས་ཚོང་དཔོན་གྱི་བུ་ནོར་བཟངས་དགེ་སློང་རྒྱ་མཚོའི་རྒྱལ་མཚན་དེ་ལྟར་མཉམ་པར་བཞག་པ་ལ་སེམས་ཤིང་རྟོག་པ་དང་། ཏིང་ངེ་འཛིན་གྱི་རྣམ་པར་ཐར་པའི་དཀྱིལ་འཁོར་དེ་རྗེས་སུ་དྲན་པར་བྱ་བ་དང་། བྱང་ཆུབ་
སེམས་དཔའི་ཏིང་ངེ་འཛིན་གྱི་ཁྱུ་མཆོག་གི་མཐུ་ཕྱུང་བ་དེ་ལ་རྗེས་སུ་རྣམ་པར་བསམ་པ་དང་། སེམས་ཅན་གྱི་དོན་གྱི་ཚུལ་རྒྱ་མཚོ་དེ་ལ་འཇུག་པར་བྱ་བ་དང་། མངོན་པར་འདུ་བྱ་བའི་སྒོ་རྒྱུད་ཀུན་ལ་མངོན་དུ་གནས་པའི་རྒྱན་དེའི་རྗེས་སུ་འབྲང་ཞིང་ཁོང་
དུ་ཆུད་པར་བྱ་བ་དང་། ཆོས་ཀྱི་དབྱིངས་ཀྱི་རྒྱན་རྣམ་པར་དག་པའི་ཡེ་ཤེས་ཀྱི་སྒོ་དེ་ལ་འཇུག་པར་བྱ་བ་དང་། སངས་རྒྱས་ཀྱི་བྱིན་གྱི་རླབས་ཡང་དག་པར་མནོད་པའི་ཡེ་ཤེས་དེ་ལ་རབ་ཏུ་བརྟག་པ་དང་། བྱང་ཆུབ་སེམས་དཔའི་དབང་གི་
སྟོབས་དེ་ཡོངས་སུ་བསྐྱེད་པ་དང་། བྱང་ཆུབ་སེམས་དཔའི་སྨོན་ལམ་གྱི་སྟོབས་དེ་བརྟན་པར་བྱ་བ་དང་། བྱང་ཆུབ་སེམས་དཔའི་སྤྱོད་པའི་སྟོབས་དེ་ཤིན་ཏུ་རྒྱས་པར་བྱ་བ་བྱེད་ཅིང་། དགེ་སློང་རྒྱ་མཚོའི་རྒྱལ་མཚན་གྱི་མདུན་དུ་ཉིན་ཞག་གཅིག་

ཀྱང་ལོན་ནོ། །ཉིན་ཞག་གཉིས་དང་བདུན་ཡང་ལོན་ནོ། །ཟླ་བ་ཕྱེད་དང་ཟླ་བ་གཅིག་དང་། ཟླ་བ་གཉིས་དང་ཟླ་བ་དྲུག་གི་བར་དང་། ཉིན་ཞག་ཀྱང་དྲུག་ཏུ་དགེ་སློང་རྒྱ་མཚོའི་རྒྱལ་མཚན་གྱི་མདུན་དུ་ལོན་ཏེ། དེ་ལྟར་ཟླ་བ་དྲུག་དང་།
ཉིན་ཞག་དྲུག་འདས་ནས་དགེ་སློང་རྒྱ་མཚོའི་རྒྱལ་མཚན་ཏིང་ངེ་འཛིན་དེ་ལས་ལངས་སོ། །དེ་ནས་ནོར་བཟངས་ཀྱིས་སྨྲས་པ། འཕགས་པ་ཏིང་ངེ་འཛིན་འདི་དེ་ལྟར་ཟབ་ལ། དེ་ལྟར་རྒྱ་ཆེ་ཞིང་དེ་ལྟར་ཚད་མ་མཆིས་པའི་ཡུལ་དང་ལྡན་པ་དང་། དེ་ལྟར་བསམ་གྱིས་
མི་ཁྱབ་པའི་རྒྱན་དང་ལྡན་པ་དང་། དེ་ལྟར་སྣང་བ་མཚུངས་པ་མ་མཆིས་པ་དང་། དེ་ལྟར་གྲངས་མ་མཆིས་པའི་རྒྱན་དང་ལྡན་པ་དང་། དེ་ལྟར་མི་འཕྲོགས་པའི་སྤྱོད་ཡུལ་དང་ལྡན་པ་དང་། དེ་ལྟར་མ་འདྲེས་པའི་ཡུལ་དང་ལྡན་པ་དང་། དེ་ལྟར་ཕྱོགས་ཀུན་ཏུ་རྣམ་པར་སྣང་བ་དང་། ཏིང་ངེ་
འཛིན་འདི་དེ་ལྟར་སེམས་ཅན་གྱི་དོན་ཚད་མ་མཆིས་པ་རབ་ཏུ་སྒྲུབ་པར་གྱུར་པ་ནི་ངོ་མཚར་ཏེ། དེ་ནི་སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་ཚད་མ་མཆིས་པ་རྣམ་པར་ཞི་བར་བགྱི་བ་ལ་སྟ་གོན་དུ་གནས་པ་སྟེ། འདི་ལྟར་དབུལ་བའི་སྡུག་བསྔལ་
ཞི་བར་བགྱི་བ་ལ་སྟ་གོན་དུ་གནས་སོ། །སེམས་ཅན་དམྱལ་བའི་ལམ་གྱི་རྒྱུད་རྒྱུན་བཅད་པ་དང་། བྱོལ་སོང་གི་སྐྱེ་གནས་ཀྱི་ལམ་གྱི་རྒྱུད་ལས་ཡོངས་སུ་བསྐྱབ་པ་དང་། མི་ཁོམ་པའི་ལམ་གྱི་རྒྱུད་ཀྱི་སྒོ་ཐམས་ཅད་གཅད་པ་དང་། མཐོ་རིས་ཀྱི་ལམ་གྱི་རྒྱུད་
དུ་ཕྱིན་པར་བགྱི་བ་དང་། ལྷ་དང་མིའི་དགའ་བ་དང་། བདེ་བ་འབྱུང་བར་བགྱི་བ་དང་། བསམ་གཏན་གྱི་ཡུལ་གྱིས་དགའ་བ་ཉམས་སུ་མྱོང་བར་བགྱི་བ་དང་། འདུས་བྱས་ལ་སྤྱོད་པའི་བདེ་བ་ཡོངས་སུ་འཕེལ་བར་བགྱི་བ་དང་། ཁམས་གསུམ་པ་
ལས་འབྱུང་བའི་སྒོ་ཡོངས་སུ་བསྟན་པ་ལ་སྟ་གོན་དུ་གནས་སོ། བྱང་ཆུབ་ཀྱི་སེམས་ཡང་དག་པར་སྐྱེ་བའི་རྒྱུ་ཡོངས་སུ་བརྗོད་པ་ལ་སྟ་གོན་དུ་གནས་སོ། །བསོད་ནམས་དང་ཡེ་ཤེས་ཀྱི་ཚོགས་ཡང་དག་པར་སྐྱེ་བའི་རྒྱུ་རྣམ་པར་འཕེལ་བར་བགྱི་བ་དང་།

སྙིང་རྗེ་ཆེན་པོའི་ཤུགས་རྒྱ་ཆེན་པོ་རྣམ་པར་འཕེལ་བར་བགྱི་བ་དང་། སྨོན་ལམ་ཆེན་པོའི་སྟོབས་ཡོངས་སུ་བསྐྱེད་པར་བགྱི་བ་དང་། བྱང་ཆུབ་སེམས་དཔའི་ལམ་སྣང་བ་རབ་ཏུ་ཐོབ་པར་བགྱི་བ་དང་། ཕ་རོལ་ཏུ་ཕྱིན་པ་ཆེན་པོའི་ཐེག་པ་རྣམ་པར་དགོད་
པ་དང་། ཐེག་པ་ཆེན་པོའི་ཁྱད་པར་ལ་འཇུག་པ་མངོན་པར་བསྒྲུབ་པ་དང་། ཀུན་ཏུ་བཟང་པོའི་སྤྱོད་པ་ཤེས་ཤིང་སྣང་བར་བགྱི་བ་དང་། བྱང་ཆུབ་སེམས་དཔའི་ས་ཤེས་ཤིང་སྣང་བ་ཐོབ་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་
ལམ་དང་སྤྱོད་པ་དང་། འབྱུང་བའི་རྒྱན་རྣམ་པར་དག་པ་ཡོངས་སུ་བསྒྲུབ་པ་དང་། ཐམས་ཅད་མཁྱེན་པའི་ས་གནན་པ་ལ་ཐོགས་པ་མ་མཆིས་པར་བགྱི་བ་ལ་སྟ་གོན་དུ་གནས་པའོ། །འཕགས་པ་ཏིང་ངེ་འཛིན་དེའི་མིང་ཅི་ཞེས་བགྱི་སྨྲས་པ།
རིགས་ཀྱི་བུ་ཤེས་རབ་ཀྱི་ཕ་རོལ་ཏུ་ཕྱིན་པ་ཀུན་ནས་ལྟ་བའི་བཏང་སྙོམས་ཡོངས་སུ་ཐོབ་པ་ཞེས་བྱ་བ་ཡོད་དེ། ཏིང་ངེ་འཛིན་འདི་ནི་དེའི་སྣང་བ་སྟེ། སྒོ་ཀུན་ནས་རྣམ་པར་དག་པའི་རྒྱན་ཅེས་བྱའོ། །རིགས་ཀྱི་བུ་ཤེས་རབ་ཀྱི་ཕ་རོལ་ཏུ་ཕྱིན་པ་ཀུན་
ནས་ལྟ་བའི་བཏང་སྙོམས་རབ་ཏུ་ཐོབ་པའི་སྣང་བ་ལས་སྐྱེས་པའི་ཏིང་ངེ་འཛིན་སྒོ་ཀུན་ནས་རྣམ་པར་དག་པའི་རྒྱན་ཅེས་བྱ་བ་འདི་ཤིན་ཏུ་བསྒོམས་ན་སྒོ་ཀུན་ནས་རྣམ་པར་དག་པའི་རྒྱན་ལ་སྩོགས་པ་ཏིང་ངེ་འཛིན་བརྒྱ་སྟོང་གྲངས་མེད་པ་ཕྲག་བཅུ་ཚང་བ་
ཡོངས་སུ་འགྲུབ་པར་འགྱུར་རོ། །སྨྲས་པ། འཕགས་པ་ཏིང་ངེ་འཛིན་འདིའི་ཡུལ་དེར་བས་སམ་མ་བས། སྨྲས་པ། རིགས་ཀྱི་བུ་ཏིང་ངེ་འཛིན་འདི་ལ་སྙོམས་པར་ཞུགས་པ་ལ་ནི་འཇིག་རྟེན་གྱི་ཁམས་རྣམ་པར་དམིགས་པ་ལ་ཐོགས་པ་མེད་དོ། །
འཇིག་རྟེན་གྱི་ཁམས་སུ་འཇུག་པར་བྱ་བ་ལ་ཐོགས་པ་མེད་དོ། །འཇིག་རྟེན་གྱི་ཁམས་རྣམ་པར་གནོན་པ་ལ་ཐོགས་པ་མེད་དོ། །འཇིག་རྟེན་གྱི་ཁམས་ཡོངས་སུ་བརྒྱན་པ་ལ་ཐོགས་པ་མེད་དོ། །འཇིག་རྟེན་གྱི་ཁམས་ཡོངས་སུ་སྦྱང་བ་ལ་

ཐོགས་པ་མེད་དོ། །འཇིག་རྟེན་གྱི་ཁམས་ཡོངས་སུ་དག་པར་བྱ་བ་ལ་ཐོགས་པ་མེད་དོ། །སངས་རྒྱས་བལྟ་ཞིང་རྣམ་པར་དམིགས་པར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་བདག་ཉིད་ཆེ་བ་བརྟག་པ་ལ་ཐོགས་
པ་མེད་དོ། །སངས་རྒྱས་ཀྱི་རྣམ་པར་འཕྲུལ་པ་ཡོངས་སུ་ཤེས་པར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་སྟོབས་ལ་འཇུག་ཅིང་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་ཡོན་ཏན་རྒྱ་མཚོར་འཇུག་པ་ལ་ཐོགས་པ་མེད་དོ། །སངས་
རྒྱས་ཀྱི་ཆོས་ཀྱི་སྤྲིན་གྱི་ཆར་ཡོངས་སུ་གཟུང་བ་ལ་ཐོགས་པ་མེད་དོ། །སངས་རྒྱས་ཀྱི་ཆོས་ཀྱི་འཁོར་ལོ་འཁོར་མ་འདྲེས་པ་ཤེས་ཤིང་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་འཁོར་གྱི་དཀྱིལ་འཁོར་རྒྱ་མཚོ་ལ་འཇུག་ཅིང་
ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །ཕྱོགས་བཅུར་འཇུག་ཅིང་རྗེས་སུ་བགྲང་བར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་ཆོས་བསྟན་པ་རྗེས་སུ་བརྟག་པར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་ཕྱོགས་རྗེས་སུ་བརྟག་པར་བྱ་བ་ལ་
ཐོགས་པ་མེད་དོ། །སྙིང་རྗེ་ཆེན་པོའི་ཕྱོགས་རྣམ་པར་མི་སྤང་བ་ལ་ཐོགས་པ་མེད་དོ། །བྱམས་པས་ཕྱོགས་རྒྱས་པར་དགང་བ་ལ་ཐོགས་པ་མེད་དོ། །སངས་རྒྱས་བལྟ་བའི་ཕྱོགས་ལ་འཇུག་པས་མི་ངོམས་པར་བྱ་བ་ལ་ཐོགས་པ་མེད་དོ། །
སེམས་ཅན་རྒྱ་མཚོ་ཐམས་ཅད་དུ་འཇུག་ཅིང་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སེམས་ཅན་གྱི་དབང་པོ་རྒྱ་མཚོ་ཐམས་ཅད་ཤེས་ཤིང་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སེམས་ཅན་གྱི་དབང་པོ་ཐ་དད་པ་ཐམས་ཅད་ཤེས་པར་བྱ་བ་ལ་ཐོགས་
པ་མེད་དོ། །རིགས་ཀྱི་བུ་ཁོ་བོས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་འདི་ཤེས་སུ་ཟད་ན། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་རྒྱ་མཚོ་ལ་ཞུགས་པ་ཆོས་ཀྱི་དབྱིངས་ཀྱི་ཡུལ་ལ་བློ་གྲོས་རྣམ་པར་

དག་པ། ཆོས་ཐམས་ཅད་ལ་རིག་པ་རྗེས་སུ་འབྲང་བའི་ཡེ་ཤེས་ཅན། བློ་ཤིན་ཏུ་ཡངས་པས་ཚད་མེད་པའི་ཡུལ་རྒྱས་པར་འགེངས་པ་གཟུངས་ཆེན་པོའི་སྣང་བ་ལ་དབང་བསྒྱུར་བ། ཏིང་ངེ་འཛིན་གྱི་དཀྱིལ་འཁོར་སྣང་བ་ཐམས་ཅད་ཤིན་ཏུ་དག་པ་
མངོན་པར་ཤེས་པ་རྣམ་པར་འགྲུལ་བ་དང་། ཁྱུ་མཆོག་གི་མཐུ་འབྱིན་པ་ལ་ཤིན་ཏུ་བྱུང་བ་སོ་སོ་ཡང་དག་པར་རིག་པ་མི་ཟད་པའི་རྒྱ་མཚོ་ལ་ཞུགས་པ། ངག་སྙན་པ་སའི་སྙིང་པོ་དང་ལྡན་པ་བརྗོད་པ་འགྲོ་བ་ཐམས་ཅད་ཀྱི་རྟེན་དུ་གྱུར་པ་རྣམས་ཀྱི་སྤྱོད་
པ་ཤེས་པའམ། ཡོན་ཏན་བརྗོད་པའམ། སྤྱོད་ཡུལ་བསྟན་པའམ། ཡུལ་རབ་ཏུ་བརྗོད་པའམ། སྨོན་ལམ་ཆེན་པོའི་སྟོབས་ཡང་དག་པར་བསྔགས་པའམ། འབྱུང་བའི་སྒོ་ཡོངས་སུ་སྣང་བར་བྱ་བ་འམ། ཡང་དག་པར་བསྒྲུབ་པ་མངོན་པར་
བརྗོད་པའམ། ལམ་ཡོངས་སུ་བསྟན་པའམ། ཏིང་ངེ་འཛིན་གྱི་རྒྱུན་གྱི་རྗེས་སུ་འབྲང་བར་བྱ་བའམ། སེམས་ཀྱི་ཡུལ་ཤེས་པར་བྱ་བའམ། ཡེ་ཤེས་མཉམ་པ་ཉིད་ཁོང་དུ་ཆུད་པར་བྱ་བར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་
ཕྱོགས་ཀྱི་གནས་རྒྱ་མཚོ་རྣམ་པར་རློབ་པ་ཞེས་བྱ་བ་ཡོད་དེ། དེ་ན་བཟའ་ཤིང་གི་ར་བ་ཀུན་ནས་རྣམ་པར་བརྒྱན་པ་ཞེས་བྱ་བ་ཞིག་གྲོང་ཁྱེར་འོད་ཆེན་པོ་ཞེས་བྱ་བའི་ཤར་ཕྱོགས་ལོགས་ན་ཡོད་དེ། དེ་ན་ཤེད་ལས་སྐྱེས་པའི་རྒྱལ་པོ་འོད་བཟངས་ཀྱི་ཆུང་
མ་དགེ་བསྙེན་མ་ཡིད་བཞིན་ཞེས་བྱ་བ་ཡོད་ཀྱིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་དགའ་རངས་ཏེ།
མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། དགེ་སློང་རྒྱ་མཚོའི་རྒྱལ་མཚན་ལས་སྙིང་པོ་ཡོངས་སུ་བླངས་ཏེ། ཆོས་ཀྱི་ཉེ་བར་འཚོ་བ་བྱས་པ། ཏིང་ངེ་འཛིན་གྱི་ཡུལ་ལ་ཞུགས་པ། སྣང་བ་ཐོབ་པ་ཡེ་ཤེས་ཀྱིས་སྣང་བར་གྱུར་པ། ཏིང་ངེ་

འཛིན་གྱི་སྣང་བ་རབ་ཏུ་ཐོབ་པ། མོས་པ་རྣམ་པར་དག་པ་ཁོང་དུ་ཆུད་པ། སེམས་ཅན་ཆོས་ཀྱི་ཚུལ་གྱིས་སྣང་བའི་རྗེས་སུ་སོང་བ། རྣམ་པར་དག་པའི་སྒོས་སྣང་བ་དང་ལྡན་པར་གྱུར་པ། ཕྱོགས་སུ་ཡེ་ཤེས་ཀྱི་སྣང་བ་རབ་
ཏུ་འདལ་བ་དེས། དགེ་སློང་རྒྱ་མཚོའི་རྒྱལ་མཚན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། དགེ་སློང་རྒྱ་མཚོའི་རྒྱལ་མཚན་ལ་བཏུད་དེ་ཕྱག་འཚལ་ནས། ཡང་དང་ཡང་ལྟ་ཞིང་
ཡང་དང་ཡང་མངོན་པར་བལྟ་བ་དང་། ཕྱག་བྱ་བ་དང་། རབ་ཏུ་གདུད་པ་དང་། གུས་པར་བྱ་བ་དང་། རིམ་གྲོར་བྱ་བ་དང་། ཡིད་ལ་བྱ་བ་དང་། བསམ་པ་དང་། བསྒོམ་པ་དང་། ཡོངས་སུ་བསྒོམ་པ་དང་། ལེགས་པར་བརྗོད་པ་དང་། ངོ་མཚར་དུ་བྱ་བ་
དང་། ཡོན་ཏན་མངོན་དུ་བྱ་བ་དང་། རྗེས་སུ་བསྔགས་པ་དང་། རྗེས་སུ་འབྲང་བར་བྱ་བ་དང་། རྗེས་སུ་དྲན་པར་བྱ་བ་དང་། བརྟན་པར་བྱ་བ་དང་། མི་གཏང་བ་དང་། ཡིད་ལ་བསམ་པ་དང་། རྗེས་སུ་འབྲང་བར་བྱ་བ་དང་། སྨོན་ལམ་གྱི་རྗེས་སུ་འཇུག་པར་བྱ་བ་
དང་། མཐོང་བར་དགའ་བ་དང་། དབྱངས་ཀྱི་མཚན་མ་གཟུང་བ་དང་། གཟུངས་ཀྱི་རྗེས་སུ་བསམ་པ་དང་། མིང་ཡོངས་སུ་གཟུང་བའི་རྗེས་སུ་སོང་བའི་སེམས་དང་ལྡན་པར་བྱ་བ་དང་། ཁ་དོག་དང་། དབྱིབས་རྗེས་སུ་དྲན་པར་བྱ་བ་དང་། ཡེ་ཤེས་ཀྱི་ཡུལ་རྗེས་སུ་
བསམ་པ་དང་། ཏིང་ངེ་འཛིན་གྱི་ཡུལ་ལ་རྗེས་སུ་འཇུག་པར་བྱ་བ་དང་། སྨོན་ལམ་གྱི་ཡུལ་ལ་རྗེས་སུ་འབྲང་བར་བྱ་བ་དང་། སྤྱོད་ཡུལ་གྱི་ཡུལ་རྣམ་པར་སྦྱང་བར་བྱ་བ་དང་། ཡེ་ཤེས་ཀྱི་སྣང་བ་ཡོངས་སུ་གཟུང་བ་བྱེད་ཅིང་། དགེ་སློང་རྒྱ་མཚོའི་
རྒྱལ་མཚན་གྱི་དྲུང་ནས་སོང་ངོ་།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་སོ་གཅིག་པ། །དེ་ནས་ཚོང་དཔོན་གྱི་བུ་ནོར་བཟངས་དགེ་བའི་བཤེས་གཉེན་གྱི་ཡོན་ཏན་གྱིས་ནི་མགུ། དགེ་

བའི་བཤེས་གཉེན་གྱིས་ནི་ཡང་དག་པར་བསྔགས་ཏེ་བཏང་། དགེ་བའི་བཤེས་གཉེན་མཐོང་བའི་བྱིན་གྱིས་ནི་བྱིན་དུ་བརླབས། དགེ་བའི་བཤེས་གཉེན་གྱི་གདམས་ངག་ལ་ནི་ནན་ཏན་དུ་བྱེད། དགེ་བའི་བཤེས་གཉེན་ཡིད་དུ་འོང་བ་ནི་རྗེས་སུ་
སེམས། དགེ་བའི་བཤེས་གཉེན་ལ་ནི་སངས་རྒྱས་ཀྱི་ཆོས་ཀྱི་འབྱུང་གནས་ཙམ་དུ་ལྟ། དགེ་བའི་བཤེས་གཉེན་ནི་སངས་རྒྱས་ཀྱི་ཆོས་སྟོན་པ་ཡིན་པར་ཡང་དག་པར་ལྟ། དགེ་བའི་བཤེས་གཉེན་ནི་ཐམས་ཅད་མཁྱེན་པ་ཉིད་ཀྱི་ཆོས་ལ་རྗེས་
སུ་ལྟ། དགེ་བའི་བཤེས་གཉེན་ནི་སངས་རྒྱས་ནམ་མཁའ་བལྟ་བ་ལ་མིག་ཙམ་ཏུ་ལྟ་ཞིང་མཐར་གྱིས་ཕྱོགས་ཀྱི་གནས་རྒྱ་མཚོ་རྣམ་པར་རློབ་པའི་བཟའ་ཤིང་གི་ར་བ་ཀུན་ནས་རྣམ་པར་བརྒྱན་པ། གང་ན་བ་དེར་ཕྱིན་ནས་དེས་མཐོང་བ། བཟའ་ཤིང་གི་རབ་ཀུན་ནས་རྣམ་པར་བརྒྱན་
པ། རིན་པོ་ཆེ་ཐམས་ཅད་ཀྱི་ར་བས་ཀུན་ནས་བསྐོར་བ། རིན་པོ་ཆེའི་ཤིང་གི་ཕྲེང་བ་སྤེལ་བ་ལེགས་པས་ཡོངས་སུ་བརྒྱན་པ། རིན་པོ་ཆེ་ཐམས་ཅད་ཀྱི་ཤིང་གི་ཕྲེང་བའི་མེ་ཏོག་སྲབ་བུ་ཡིད་དུ་འོང་བའི་སྤྲིན་རབ་ཏུ་འབྲུལ་བས་གཞི་རྒྱས་པ། རིན་པོ་ཆེ་ཐམས་ཅད་ཀྱི་ཤིང་གིས་ཡང་དག་པར་བརྒྱན་
པ། ཤིང་ཐམས་ཅད་ཀྱི་མེ་ཏོག་ཤིན་ཏུ་རྒྱས་པ་སྣ་ཚོགས་ཀྱིས་ཡོངས་སུ་གང་བ། སྤོས་སྣ་ཚོགས་ཀྱི་ཤིང་གི་ཕྲེང་བ་ལས་ཕྱོགས་ཀུན་ཏུ་སྤོས་ཀྱི་ངད་ཞིམ་པ་རིན་པོ་ཆེའི་ཕྲེང་བའི་ཤིང་སྣ་ཚོགས་ཀྱི་ལྷུན་ལས་རིན་པོ་ཆེ་སྣ་ཚོགས་ཀྱི་ཕྲེང་བ་འཕྱང་བ། རབ་ཏུ་འབྱུང་
ཞིང་ཆར་ལྟར་མངོན་པར་བབ་པ། རིན་པོ་ཆེའི་རྒྱལ་པོ་ཐམས་ཅད་ཀྱི་ཤིང་དང་ནོར་བུ་རིན་པོ་ཆེ་སྣ་ཚོགས་ཀྱིས་མཛེས་ཤིང་སྤ་ལ། རྒྱ་ཆེར་བརྒྱན་པའི་གཞི་ཅན་ཡིད་བཞིན་གྱི་གོས་ཀྱི་ཤིང་ཐམས་ཅད་ལས་ཁ་དོག་སྣ་ཚོགས་ཀྱི་གོས་འབྱུང་བས་གམ་ཡོ་ཁེབས་ཤིང་
མཛེས་པར་བརྒྱན་པ། སིལ་སྙན་གྱི་ཤིང་ཐམས་ཅད་ལས་ལྷ་རྫས་ལས་ཀྱང་འཕགས་པའི་སིལ་སྙན་རླུང་གིས་བསྐྱོད་ཅིང་སྒྲ་འབྱིན་པའི་དབྱངས་སྙན་པར་འབྱུང་བ། སའི་གཞི་མཐོན་དམན་མེད་པར་གནས་པ་རྒྱན་གྱི་ཤིང་སྣ་ཚོགས་ཀྱི་གསེབ་ནས། རྒྱན་སྣ་

ཚོགས་རྣམ་པ་ཐ་དད་པ་རྒྱུན་ཏུ་འབྱུང་ཞིང་འཕྱང་བས། རབ་ཏུ་བརྒྱན་པའི་རྒྱན་དང་ལྡན་པ་མཐོང་སྟེ། བཟའ་ཤིང་གི་ར་བ་ཆེན་པོ་ཀུན་ནས་རྣམ་པར་བརྒྱན་པ་དེའི་ནང་ན་ཁང་པ་བྱེ་བ་བརྒྱ་སྟོང་ཕྲག་བཅུ་ཀུན་ཀྱང་ནོར་བུ་རིན་པོ་ཆེ་
དམ་པ་སྣ་ཚོགས་ཀྱི་བ་གམ་གྱིས་རྣམ་པར་བརྒྱན་པ་དང་། ཁང་པ་བརྩེགས་པ་བརྒྱ་སྟོང་ཕྲག་བཅུ་འཛམ་བུ་ཆུ་ཀླུང་གི་གསེར་ལས་བརྩེགས་པའི་བད་དང་ལྡན་པ་དང་། གཞལ་མེད་ཁང་བརྒྱ་སྟོང་ཕྲག་བཅུ་ཀ་གདུང་རིན་པོ་ཆེ་རྣམ་པར་སྣང་བ།
ལས་བྲེས་པ། རྫིང་བུ་བརྒྱ་སྟོང་ཕྲག་བཅུ་རིན་པོ་ཆེ་ཐམས་ཅད་ལས་གཞི་བླངས་ཏེ། རིན་པོ་ཆེ་སྣ་ཚོགས་ཀྱི་ཕ་གུས་མུ་ཁྱུད་བྱས་པ། རིན་པོ་ཆེ་ཐམས་ཅད་ཀྱི་ཐེམ་སྐས་བཏགས་པ། རིན་པོ་ཆེ་སྣ་ཚོགས་ཀྱི་སྟེགས་བུས་བསྐོར་བ། ལྷ་
རྫས་ཀྱི་ཙན་དན་གྱི་དྲི་དང་ལྡན་པའི་ཆུས་གང་བ། གསེར་གྱི་བྱེ་མས་ཀུན་ཏུ་གྲམ་པ། གཞི་ནོར་བུ་རིན་པོ་ཆེ་ཆུ་འདང་ཀུན་ཏུ་བཀྲམ་པ། ཕྱོགས་བཞི་ནས་ཐེམ་སྐས་རྣམ་པར་བྲེས་པ། ཡན་ལག་བརྒྱད་དང་ལྡན་པའི་ཆུས་གང་བ། ང་དུར་དང་།
རྨ་བྱ་དང་། ཁུ་བྱུག་དང་། ཁྲུང་ཁྲུང་དང་། ཀ་ལ་པིང་ཀ་དང་། ཀུ་ན་ལའི་སྒྲ་སྐད་སྙན་པའི་དབྱངས་དང་ལྡན་པ། རིན་པོ་ཆེའི་ཏ་ལའི་ཕྲེང་བས་ཀུན་ནས་བརྒྱན་པ། གསེར་གྱི་དྲིལ་བུའི་དྲ་བས་ཀུན་ནས་ཡོག་པ། རླུང་གིས་བསྐྱོད་པའི་
སྒྲ་ཡིད་དུ་འོང་བ་འབྱུང་བ། སྟེང་ནས་རིན་པོ་ཆེའི་བླ་རེ་ཆེན་པོ་བྲེས་པ། རིན་པོ་ཆེ་སྣ་ཚོགས་ཀྱི་ཤིང་གི་ར་བས་ཡོངས་སུ་བསྐོར་བ། རིན་པོ་ཆེའི་དྲ་བས་བརྒྱན་པའི་གདུགས་དང་རྒྱལ་མཚན་ལེགས་པར་བསྒྲེང་བ། ལུ་མ་བརྒྱ་སྟོང་ཕྲག་བཅུ་དུས་དང་མཐུན་པའི་ཙན་དན་གྱི་འདམ་གྱིས་
མཐའ་འཁོར་བ་རིན་པོ་ཆེ་སྣ་ཚོགས་ཀྱི་ཁ་དོག་ཏུ་འདུག་པའི་པད་མོས་ཡོངས་སུ་ཁྱབ་པ། རིན་པོ་ཆེའི་པད་མོའི་འོད་ཆེན་པོས་སྣང་བར་གྱུར་པའི་ཆུ་དྲི་མ་མེད་པ་དང་ལྡན་པ་ཡོད་པ་སྟེ། བཟའ་ཤིང་གི་ར་བ་དེའི་དབུས་ན་གཞལ་མེད་ཁང་ཆེན་པོ་

རྒྱལ་མཚན་སྣ་ཚོགས་ཞེས་བྱ་བ། སའི་གཞི་རིན་པོ་ཆེ་རྒྱ་མཚོའི་སྙིང་པོ་ལས་བླངས་པ། ནོར་བུ་རིན་པོ་ཆེའི་ཀ་བ་བཀྱེ་བ་འཛམ་བུ་ཆུ་ཀླུང་གི་གསེར་གྱི་ལྷུན་མངོན་པར་འཕགས་པ་ནོར་བུ་རིན་པོ་ཆེ་འགྲོ་བར་རྣམ་པར་སྣང་བའི་སྤང་ལེབ་བཀྱེ་བས་
བརྒྱན་པ། གཞི་ནོར་བུ་རིན་པོ་ཆེ་འབར་བ་གྲངས་མེད་པའི་དྲ་བས་བྲེས་པ། རིན་པོ་ཆེའི་རྒྱལ་པོ་མི་ཕམ་པའི་སྤོས་ཀྱི་དྲིས་གམ་ཡོ་ཀུན་ནས་བདུགས་པ། རིན་པོ་ཆེའི་རྒྱལ་པོ་སྒྲ་སྙན་པ་འབྱིན་པའི་དྲི་ངད་ཀུན་ཏུ་ལྡང་བ། རིན་པོ་ཆེའི་རྒྱལ་པོ་དྲི་རྣམ་
པར་གསལ་བར་བྱེད་པས་དབང་པོ་རྣོ་བའི་བག་ཆགས་རྣམ་པར་བསྒྲུབ་པ་དང་ལྡན་ཞིང་གཞལ་མེད་ཁང་ཆེན་པོ་རྒྱལ་མཚན་སྣ་ཚོགས་དེར་སྟན་གྲངས་མེད་ཅིང་ཚད་མེད་པ་བཏིང་བར་གྱུར་པ་འདི་ལྟ་སྟེ་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་ཕྱོགས་སྣང་
བར་བྱེད་པའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་རྣམ་པར་སྣང་བའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་འགྲོ་བ་ཡིད་དུ་འོང་བའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་མཛོད་སྣ་ཚོགས་ཀྱི་པད་མོའི་སྙིང་པོ་ཅན་དང་། རིན་
པོ་ཆེ་སེང་གེའི་ཤིང་ཐགས་ཀྱི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་དྲི་མ་མྱེད་པའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེས་བརྒྱན་པའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་སྒོ་ཀུན་ནས་བརྒྱན་པའི་པད་མོའི་སྙིང་པོ་ཅན་དང་། ནོར་བུ་རིན་
པོ་ཆེ་འོད་ཀྱི་རྒྱན་གྱི་པད་མའི་སྙིང་པོ་ཅན་དང་། ནོར་བུ་རིན་པོ་ཆེ་རྒྱ་མཚོའི་གནས་རྣམ་པར་དག་པའི་རིན་པོ་ཆེས་རྣམ་པར་བརྒྱན་པའི་འོད་ཟེར་ཀུན་ཏུ་འབྱུང་བའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་རྡོ་རྗེའི་སེང་གེས་གནོན་པའི་
པད་མོའི་སྙིང་པོ་ཅན་དག་བཤམས་ཤིང་བཏིང་བ་སྟེ། གཞལ་མེད་ཁང་ཆེན་པོ་རྒྱལ་མཚན་སྣ་ཚོགས་དེའི་བ་གམ་མང་པོ་ཡང་། རིན་པོ་ཆེ་བསམ་གྱིས་མི་ཁྱབ་པ་ལས་བྱས་པ་རིན་པོ་ཆེ་སྣ་ཚོགས་ཀྱིས་རྣམ་པར་བརྒྱན་པ། ཁ་དོག་བསམ་

གྱིས་མི་ཁྱབ་པར་མཛེས་ཤིང་གཟུགས་ཡིད་དུ་འོང་བ་དག་གོ །བཟའ་ཤིང་གི་ར་བ་ཀུན་ནས་བརྒྱན་པ་དེ། སྟེང་ནས་བླ་རེ་ཆེན་པོ་བརྒྱ་སྟོང་ཕྲག་བཅུས་ཀུན་ནས་ཁེབས་པ་སྟེ། འདི་ལྟར་གོས་ཀྱི་བླ་རེ་དང་ཁྲི་ཤིང་གི་བླ་རེ་དང་
མེ་ཏོག་གི་བླ་རེ་དང་། ཕྲེང་བའི་བླ་རེ་དང་། སྤོས་ཀྱི་བླ་རེ་དང་། ནོར་བུ་རིན་པོ་ཆེའི་བླ་རེ་དང་། གསེར་གྱི་བླ་རེ་དང་། རྒྱན་གྱི་བླ་རེ་དང་། རིན་པོ་ཆེ་རྡོ་རྗེ་སྣང་བའི་བླ་རེ་དང་། གླང་པོའི་ཤུགས་དང་ལྡན་པས་སྤྲུལ་པའི་ལྷ་མོའི་བླ་རེ་དང་། ནོར་བུ་རིན་པོ་ཆེ་བརྒྱ་བྱིན་
མངོན་པར་དགའ་བའི་བླ་རེ་དང་། དེ་དག་ལ་སོགས་པ་བླ་རེ་བརྒྱ་སྟོང་ཕྲག་བཅུས་ཀུན་ནས་ཁེབས་པར་བྱས་པའོ། །རིན་པོ་ཆེའི་དྲ་བ་བརྒྱ་སྟོང་ཕྲག་བཅུས་ཀུན་ནས་ཡོག་པ་སྟེ། འདི་ལྟར་རིན་པོ་ཆེ་དམ་པའི་དྲིལ་བུའི་དྲ་བ་དང་། རིན་པོ་ཆེའི་
གདུགས་ཀྱི་དྲ་བ་དང་། རིན་པོ་ཆེའི་འབྲུའི་དྲ་བ་དང་། མུ་ཏིག་རྒྱ་མཚོའི་སྙིང་པོའི་དྲ་བ་དང་། ནོར་བུ་རིན་པོ་ཆེ་བཻཌཱུརྱ་སྔོན་པོའི་དྲ་བ་དང་། སེང་གེའི་ཁྲི་ཤིང་གི་དྲ་བ་དང་། ནོར་བུ་རིན་པོ་ཆེ་ཆུ་ཤེལ་གྱི་དྲ་བ་དང་། སྤོས་ཀྱི་གཟུགས་ཀྱི་དྲ་བ་དང་།
རིན་པོ་ཆེའི་ཅོད་པན་དང་། རིན་པོ་ཆེའི་ཕྲེང་བའི་དྲ་བ་དང་། དེ་དག་ལ་སོགས་པ་རིན་པོ་ཆེའི་དྲ་བ་བརྒྱ་སྟོང་ཕྲག་བཅུས་ཀུན་ནས་ཡོག་པ། སྣང་བ་ཆེན་པོ་བརྒྱ་སྟོང་ཕྲག་བཅུས་ཀྱང་ཀུན་ནས་ཡོག་པ་སྟེ། འདི་ལྟར་ནོར་བུ་རིན་པོ་ཆེ་སྐར་མའི་འོད་ཟེར་གྱི་
སྣང་བ་དང་། ནོར་བུ་རིན་པོ་ཉི་མའི་སྙིང་པོའི་སྣང་བ་དང་། ནོར་བུ་རིན་པོ་ཆེ་ཟླ་བའི་རྒྱལ་མཚན་གྱི་སྣང་བ་དང་། ནོར་བུ་རིན་པོ་ཆེ་སྤོས་ཀྱི་དུད་པ་འོད་འཕྲོ་བའི་སྣང་བ་དང་། ནོར་བུ་རིན་པོ་ཆེ་དཔལ་གྱི་སྙིང་པོའི་སྣང་བ་དང་། ནོར་བུ་རིན་པོ་ཆེ་
པད་མོའི་སྙིང་པོའི་སྣང་བ་དང་། ནོར་བུ་རིན་པོ་ཆེ་སྐར་མའི་རྒྱལ་མཚན་གྱི་སྣང་བ་དང་། ནོར་བུ་རིན་པོ་ཆེ་སྒྲོན་མ་ཆེན་པོའི་སྣང་བ་དང་། ནོར་བུ་རིན་པོ་ཆེ་ཕྱོགས་ཀུན་ཏུ་རྣམ་པར་སྣང་བའི་སྣང་བ་དང་། ནོར་བུ་རིན་པོ་ཆེ་སྤོས་ཀྱི་སྤྲིན་ཆེན་པོ་དང་།

ཀློག་གི་ཕྲེང་བ་འབྱུང་བའི་སྣང་བ་དང་། དེ་དག་ལ་སོགས་པ་ནོར་བུ་རིན་པོ་ཆེའི་སྣང་བ་ཆེན་པོ་བརྒྱ་སྟོང་ཕྲག་བཅུས་རྟག་ཏུ་སྣང་བར་བྱས་པའོ། །བཟའ་ཤིང་གི་ར་བ་དེ་ནི་རྒྱན་ཆེན་པོའི་སྤྲིན་བརྒྱ་སྟོང་ཕྲག་བཅུའི་ཆར་འབབ་པའི་རྒྱན་དང་ལྡན་པ་སྟེ། དུས་
དང་མཐུན་པའི་ཙན་དན་གྱི་སྤྲིན་བརྒྱ་སྟོང་ཕྲག་བཅུའི་འབྲུག་སྒྲ་རབ་ཏུ་འབྱུང་བ། ལྷ་རྫས་ལས་འདས་པའི་ཕྲེང་བ་དང་། ལྡ་ལྡིའི་སྤྲིན་ཆེན་པོ་ཀུན་ཏུ་མཆེད་པས་རབ་ཏུ་བརྒྱན་པ། ལྷ་རྫས་ལས་འདས་པའི་གོས་ཚོན་སྣ་ཚོགས་དང་ལྡན་པའི་སྤྲིན་
བརྒྱ་སྟོང་ཕྲག་བཅུའི་སྤྲིན་མངོན་པར་འབབ་པ། ལྷ་རྫས་ལས་འདས་པའི་རྒྱན་གྱི་སྤྲིན་བརྒྱ་སྟོང་ཕྲག་བཅུས་རྣམ་པར་ཀླུབས་པ། ལྷའི་བུ་བརྒྱ་སྟོང་ཕྲག་བཅུ་མཐོང་བར་དགའ་སྟེ། འོག་ཏུ་ལྟ་ཞིང་རབ་ཏུ་འདུད་པའི་ཕྱག་ཆར་བཞིན་དུ་འབབ་པ། ལྷ་
མོའི་སྤྲིན་བརྒྱ་སྟོང་ཕྲག་བཅུ་སྔོན་གྱི་སྤྱོད་པའི་སྐལ་བ་མཉམ་པས་རང་རང་གི་ལུས་འབུལ་བའི་ཆར་མངོན་པར་འབབ་པ། བྱང་ཆུབ་སེམས་དཔའི་སྤྲིན་བརྒྱ་སྟོང་ཕྲག་བཅུ་ཆོས་མཉན་པས། སྐོམ་ཞིང་འོང་བའི་ཆར་མངོན་པར་འབབ་སྟེ། དེ་ན་དགེ་
བསྙེན་མ་ཡིད་བཞིན་གསེར་གྱི་སྙིང་པོའི་ཁྲི་ཆེན་པོ་ལ་འདུག་ཅིང་། མུ་ཏིག་རྒྱ་མཚོའི་སྙིང་པོའི་དྲ་བས་བརྒྱན་པའི་ཅོད་པན་ཐོགས་པ། ལག་པ་ལ་ལྷ་རྫས་ལས་འདས་པའི་གསེར་གྱི་དཔུང་རྒྱན་དང་། གདུབ་བུ་ཐོགས་པ། ལག་པ་ནོར་བུ་རིན་པོ་ཆེ་
དཔལ་གྱི་རང་བཞིན་གྱི་འོད་ཟེར་གྱིས་རྣམ་པར་མཛེས་པར་གྱུར་པ། རྣ་ཆ་རིན་པོ་ཆེ་མཐོན་ཏིང་དྲི་མ་མེད་པ་རབ་ཏུ་འཕྱང་བ། མགོ་ནོར་བུ་རིན་པོ་ཆེའི་དྲ་བས་མཛེས་པར་བརྒྱན་པ། ནོར་བུ་རིན་པོ་ཆེ་སེང་གེའི་གདོང་གི་རྣ་བའི་གོང་རྒྱན་ཐོགས་པ།
ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོའི་མགུལ་ཀོར་ཐོགས་པ། ལུས་རིན་པོ་ཆེ་ཐམས་ཅད་ཀྱི་དྲ་བས་ཡོག་ཅིང་འོད་རབ་ཏུ་འབར་བ། སྲོག་ཆགས་བྱེ་བ་ཁྲག་ཁྲིག་གི་ལུས་རབ་ཏུ་བཏུད་དེ། ཕྱག་བྱ་བ་ཞིག་འདུག་སྟེ། དགེ་བསྙེན་མ་ཡིད་

བཞིན་དེའི་དྲུང་དུ་ཤར་ཕྱོགས་ནས་ཚངས་པ་ཆེན་པོའམ། ཚངས་ལྷ་ཉེ་ཕན་དང་། ཚངས་པའི་རིས་སུ་གཏོགས་པའམ། དབང་བྱེད་དམ། གཞན་འཕྲུལ་དབང་བྱེད་ཀྱི་རིས་སུ་གཏོགས་པའམ། རབ་འཕྲུལ་དགའ་
འམ། འཕྲུལ་དགའི་རིས་སུ་གཏོགས་པའམ། རབ་དགའ་ལྡན་ནམ། དགའ་ལྡན་གྱི་རིས་སུ་གཏོགས་པ་འམ། རབ་མཚེ་མ་འམ། མཚེ་མའི་རིས་སུ་གཏོགས་པའམ། ལྷའི་དབང་པོ་འམ། སུམ་ཅུ་རྩ་གསུམ་གྱི་རིས་སུ་གཏོགས་པའམ།
གནོད་སྦྱིན་གྱི་དབང་པོའམ། གནོད་སྦྱིན་ནམ། དྲི་ཟའི་དབང་པོའམ། དྲི་ཟ་འམ། གྲུལ་བུམ་གྱི་དབང་པོའམ། གྲུལ་བུམ་འམ། ཀླུའི་དབང་པོ་འམ། ཀླུའམ། ལྷ་མ་ཡིན་གྱི་དབང་པོའམ། ལྷ་མ་ཡིན་ནམ། ནམ་མཁའ་ལྡིང་གི་དབང་པོའམ། ནམ་མཁའ་
ལྡིང་ངམ། མིའམ་ཅིའི་དབང་པོའམ། མི་འམ་ཅི་འམ། ལྟོ་འཕྱེ་ཆེན་པོའི་དབང་པོའམ། ལྟོ་འཕྱེ་ཆེན་པོ་འམ། གཤིན་རྗེ་འམ། གཤིན་རྗེའི་བུ་མོ་འམ། ཡི་དགས་རྫུ་འཕྲུལ་ཆེན་པོའམ། ཡི་དགས་སམ། མིའི་དབང་པོའམ། མིའང་རུང་སྟེ། སེམས་
ཅན་ཚད་མེད་གྲངས་མེད་པ་དག་འོང་བ་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་
གི་ཕྱོགས་མཚམས་དང་། འོག་དང་སྟེང་གི་ཕྱོགས་ནས་ཀྱང་། ཚངས་པ་ཆེན་པོའམ། ཚངས་ལྷ་ཉེ་ཕན་ནམ། ཚངས་པའི་རིས་སུ་གཏོགས་པའམ། དབང་བྱེད་དམ། དབང་བྱེད་ཀྱི་རིས་སུ་གཏོགས་པ་ནས། མིའི་དབང་པོའམ། མིའི་བར་གྱི་སེམས་ཅན་མང་པོ་
འོང་བ། དེ་དག་ནད་སྣ་ཚོགས་ཞིག་གིས་བཏབ་པའམ། ཉོན་མོངས་པ་སྣ་ཚོགས་ཀྱིས་ཀུན་ནས་འཁོར་ཏམ། ལྟ་བའི་རྣམ་པ་སྣ་ཚོགས་ལ་མངོན་པར་ཞེན་ཏམ། ལས་ཀྱི་སྒྲིབ་པས་བསྒྲིབས་པ་ཞིག་ཡོད་ནའང་། དེ་དག་གིས་དགེ་བསྙེན་མ་ཡིད་

བཞིན་དེ་མཐོང་མ་ཐག་ཏུ་ནད་ཐམས་ཅད་ཀྱང་རབ་ཏུ་ཞི་བར་གྱུར། སེམས་ཅན་གྱི་ཉོན་མོངས་པའི་དྲི་མ་དང་ཡང་བྲལ་བར་གྱུར། ལྟ་བའི་གསལ་ཤིང་ཡང་ཕྱིན་པར་གྱུར། སྒྲིབ་པའི་རི་ཐམས་ཅད་ཀྱང་རྣམ་པར་བཤིག་པར་གྱུར། རྣམ་པར་དག་པའི་
དཀྱིལ་འཁོར་བསྒྲིབས་པ་མེད་པ་ཡང་ཁོང་དུ་ཆུད་པར་གྱུར་ཏེ། རྣམ་པར་དག་པའི་དཀྱིལ་འཁོར་དེ་ཡོད་པས་ནི་དགེ་བའི་རྩ་བ་ཐམས་ཅད་ཀྱང་རབ་ཏུ་བྱང་བར་གྱུར། དབང་པོའི་མྱུ་གུ་ཐམས་ཅད་ཀྱང་རྣམ་པར་འཕེལ་བར་གྱུར། ཐམས་ཅད་
མཁྱེན་པའི་ཡེ་ཤེས་ཀྱི་ཚུལ་རྒྱ་མཚོ་ལ་ཡང་དག་པར་གཞོལ་བར་གྱུར། གཟུངས་ཀྱི་སྒོ་རྒྱ་མཚོ་ཐམས་ཅད་ལའང་འཇུག་པར་གྱུར། ཏིང་ངེ་འཛིན་གྱི་སྒོ་དང་ཚུལ་རྒྱ་མཚོ་ཐམས་ཅད་ཀྱང་མངོན་སུམ་དུ་གྱུར། སྨོན་ལམ་གྱི་སྒོ་ཐམས་
ཅད་ཀྱང་ཡང་དག་པར་སྐྱེ་བར་གྱུར། སྤྱོད་པའི་སྒོ་ཐམས་ཅད་ཀྱང་རབ་ཏུ་བྱུང་བར་གྱུར། ཡོན་ཏན་མངོན་པར་བསྒྲུབ་པའི་སྒོ་ཐམས་ཅད་ཀྱང་རྣམ་པར་དག་པར་གྱུར། སེམས་རྒྱ་ཆེན་པོ་ཡང་མངོན་པར་ཤེས་པ་ཐམས་ཅད་དང་
ལྡན་པའི་ཚུལ་དུ་བྱུང་བར་གྱུར། ལུས་ཐོགས་པ་མེད་པས་ཀྱང་ཐམས་ཅད་དུ་རྗེས་སུ་འགྲོ་བར་གྱུར་ཏོ། །དེ་ནས་ཚོང་དཔོན་གྱི་བུ་ནོར་བཟངས་བཟའ་ཤིང་གི་ར་བ་ཀུན་ནས་རྣམ་པར་བརྒྱན་པའི་ནང་དུ་ཕྱིན་ཏེ་བལྟས་ནས། དགེ་བསྙེན་མ་
ཡིད་བཞིན་ཁྲི་བཟང་པོ་ལ་འདུག་པ་མཐོང་ནས། དེ་དགེ་བསྙེན་མ་ཡིད་བཞིན་གང་ན་བ་དེར་སོང་སྟེ། ཕྱིན་ནས་དགེ་བསྙེན་མ་ཡིད་བཞིན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་བསྙེན་མ་ཡིད་བཞིན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། འདི་སྐད་ཅེས་སྨྲས་སོ། །
འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་

མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་ཐོས་ན། འཕགས་མ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་
བདག་ལ་བཤད་དུ་གསོལ། །དེས་སྨྲས་པ་རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་མྱ་ངན་མེད་པ་བདེ་བའི་རྒྱལ་མཚན་ཐོབ་པ་སྟེ། རིགས་ཀྱི་བུ་ཁོ་མོ་ནི་དེའི་མཐུས་མཐོང་ན་དོན་ཡོད་པའོ། །མཉན་ན་དོན་ཡོད་པའོ། །རིམ་གྲོར་
བྱས་ན་དོན་ཡོད་པའོ། །གནས་གཅིག་ན་འགྲོགས་པ་དོན་ཡོད་པའོ། །རྗེས་སུ་དྲན་པར་བྱས་པ་དོན་ཡོད་པའོ། །རིགས་ཀྱི་བུ་ཁོ་མོ་ནི་སེམས་ཅན་དགེ་བའི་རྩ་བ་མ་བསྐྱེད་པ། དགེ་བའི་བཤེས་གཉེན་གྱིས་ཡོངས་སུ་མ་ཟིན་པ། ཡང་དག་པར་རྫོགས་
པའི་སངས་རྒྱས་ཀྱིས་མ་དགོངས་པ་རྣམས་ཀྱིས་མཐོང་ཞིང་རྣམ་པར་དམིགས་པར་མིག་ལམ་དུ་འོང་བར་མི་འགྱུར་ཏེ། རིགས་ཀྱི་བུ་ཁོ་མོ་མཐོང་བ་ཙམ་གྱིས་ནི་སེམས་ཅན་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་
འགྱུར་རོ། །གཞན་ཡང་རིགས་ཀྱི་བུ་ཁོ་མོའི་དྲུང་དུ་ཤར་ཕྱོགས་ནས་དེ་བཞིན་གཤེགས་པ་དག་བྱོན་ཅིང་། གདན་རིན་པོ་ཆེའི་ཁྲི་འདི་ལ་བཞུགས་ནས་ཆོས་སྟོན་ཏོ། །ཤར་ཕྱོགས་ནས་ཇི་ལྟ་བ་བཞིན་དུ་ཕྱོགས་བཅུ་ནས་ཀྱང་དེ་བཞིན་ཏེ།
རིགས་ཀྱི་བུ་དེ་ལྟ་བས་ན། ཁོ་མོ་ནི་དེ་བཞིན་གཤེགས་པ་མཐོང་བ་དང་མི་འབྲལ་བའོ། །ཆོས་མཉན་པ་དང་མི་འབྲལ་བའོ། །བྱང་ཆུབ་སེམས་དཔའ་དང་འགྲོགས་པ་དང་མི་འབྲལ་བའོ། །རིགས་ཀྱི་བུ་ཁོ་མོ་དང་སྤྱོད་པའི་སྐལ་བ་མཉམ་
བའི་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པོ་བཟའ་ཤིང་གི་ར་བ་ཀུན་ནས་རྣམ་པར་བརྒྱན་པ་འདི་ན་གནས་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤ་སྟག་གོ །རིགས་

ཀྱི་བུ་སེམས་ཅན་གཞན་གང་འདི་ན་གནས་པ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ། ཕྱིར་མི་ལྡོག་པའི་དགེ་འདུན་དུ་གཏོགས་པ་ཤ་སྟག་སྟེ། ཁོ་མོ་དང་སྤྱོད་པའི་སྐལ་བ་མཉམ་པ་དག་གོ །སྨྲས་པ་ལས་
འཕགས་མ་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡུན་ཇི་སྲིད་ཅི་གནས་ཐུགས་བསྐྱེད། སྨྲས་པ་རིགས་ཀྱི་བུ་ཁོ་མོ་ནི་སྔོན་གྱི་གནས་རྗེས་སུ་དྲན་ནོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མར་མེ་མཛད་ཅེས་བྱ་བ་བྱུང་བ་དེ་བཞིན་གཤེགས་པ་དེའི་དྲུང་དུ་ཁོ་མོས་ཚངས་པའི་སྤྱོད་པ་སྤྱད་དོ། །དེ་བཞིན་གཤེགས་པ་དེ་ཁོ་མོས་མཆོད་དོ། །དེ་བཞིན་གཤེགས་པ་དེ་ལས་ཆོས་བསྟན་པ་ཁོ་མོས་ཡོངས་སུ་བཟུང་ངོ་། །དེའི་
སྔ་རོལ་དུ་དེ་བཞིན་གཤེགས་པ་དྲི་མ་མེད་པ་ཞེས་བྱ་བ་བྱུང་སྟེ། དེའི་བསྟན་པ་ལའང་ཁོ་མོ་རབ་ཏུ་བྱུང་ངོ་། །ཆོས་ཀྱི་འཁོར་ལོ་ཡང་ཁོ་མོས་བཟུང་ངོ་། །དེའི་སྔ་རོལ་དུ་དེ་བཞིན་གཤེགས་པ་དཔལ་ཞེས་བྱ་བ་བྱུང་སྟེ། དེ་ཡང་ཁོ་མོས་བསྙེན་
བཀུར་ཏོ། །དེའི་སྔ་རོལ་ཏུ་དེ་བཞིན་གཤེགས་པ་རི་རབ་དཔལ་ཞེས་བྱ་བ་བྱུང་ངོ་། །དེའི་སྔ་རོལ་ཏུ་དེ་བཞིན་གཤེགས་པ་པད་མོའི་སྙིང་པོ་ཞེས་བྱ་བ་བྱུང་ངོ་། །དེའི་སྔ་རོལ་ཏུ་དེ་བཞིན་གཤེགས་པ་རྣམ་པར་སྣང་མཛད་ཅེས་བྱ་བ་བྱུང་ངོ་། །
དེའི་སྔ་རོལ་ཏུ་དེ་བཞིན་གཤེགས་པ་ཀུན་ཏུ་གཟིགས་པ་ཞེས་བྱ་བ་བྱུང་ངོ་། །དེའི་སྔ་རོལ་ཏུ་དེ་བཞིན་གཤེགས་པ་ཚངས་པ་དག་པ་ཞེས་བྱ་བ་བྱུང་ངོ་། །དེའི་སྔ་རོལ་ཏུ་དེ་བཞིན་གཤེགས་པ་རྡོ་རྗེའི་གཙུག་ཅེས་བྱ་བ་བྱུང་ངོ་། །དེའི་ཀུན་སྔ་
རོལ་ཏུ་དེ་བཞིན་གཤེགས་པ་ཆུ་བོའི་ལྷ་ཞེས་བྱ་བ་བྱུང་སྟེ། རིགས་ཀྱི་བུ་གཞུང་དེ་ལྟར་ཚེ་གཅིག་ནས་གཅིག་ཏུ་བརྒྱུད་པ་དང་། བསྐལ་པ་གཅིག་ནས་གཅིག་ཏུ་བརྒྱུད་པའི་སངས་རྒྱས་གཅིག་ནས་གཅིག་ཏུ་བརྒྱུད་པ། དེ་བཞིན་གཤེགས་

པའི་མཚམས་འདབས་ཆགས་སུ་བསམས་ཏེ། དྲན་པར་བྱས་ན། གང་ཁོ་མོས་རིམ་གྲོར་བྱས་ཏེ། བསྙེན་བཀུར་བ་དང་། མཆོད་པ་དང་། བསྟི་སྟང་དུ་བྱས་པ་དང་། གང་གི་སྤྱན་སྔར་ཁོ་མོས་ཆོས་ཐོས་པར་གྱུར་པ་དང་། གང་གི་བསྟན་
པ་ལ་ཁོ་མོས་ཚངས་པའི་སྤྱོད་པ་སྤྱད་པའི་དེ་བཞིན་གཤེགས་པ་ཆུ་ཀླུང་གང་གཱ་སུམ་ཅུ་རྩ་དྲུག་གི་བྱེ་མ་སྙེད་རྗེས་སུ་དྲན་ཏེ། རིགས་ཀྱི་བུ་དེ་ཕན་ཅད་དུ་ཁོ་མོས་དེ་བཞིན་གཤེགས་པ་ཇི་སྙེད་ཅིག་བསྙེན་བཀུར་བ་ནི། དེ་བཞིན་གཤེགས་པ་རྣམས་ཀྱིས་
མཁྱེན་ཏོ། །རིགས་ཀྱི་བུ་སེམས་དང་པོ་བསྐྱེད་མ་ཐག་ཏུ་ཆོས་ཀྱི་དབྱིངས་རྒྱས་པར་འགེངས་པས་བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་སྙིང་རྗེ་ཆེན་པོའི་ཁོངས་སུ་འགྲོ་བ་ཐམས་ཅད་ཆུད་པས། བྱང་ཆུབ་སེམས་
དཔའ་རྣམས་ནི་ཚད་མེད་པའོ། །རིགས་ཀྱི་བུ་སྨོན་ལམ་ཆེན་པོས་ཕྱོགས་བཅུའི་ཆོས་ཀྱི་དབྱིངས་ཀྱི་གཞི་ཟད་ཟད་དུ་འགྲོ་བས་བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་བྱམས་པ་ཆེན་པོས་འགྲོ་བ་ཐམས་ཅད་རྒྱས་པར་
འགེངས་པའི་ཕྱིར། བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་བྱང་ཆུབ་སེམས་དཔའི་སྤྱོད་པས་ཞིང་ཐམས་ཅད་དུ་བསྐལ་པ་ཐམས་ཅད་ཡོངས་སུ་སྡུད་པས། བྱང་ཆུབ་སེམས་དཔའ་རྣམས་ནི་ཚད་མེད་པའོ། །
རིགས་ཀྱི་བུ་ཏིང་ངེ་འཛིན་གྱི་སྟོབས་ཀྱིས་བྱང་ཆུབ་སེམས་དཔའི་ལམ་ལས་ཕྱིར་མི་ལྡོག་པས་བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་གཟུངས་ཀྱི་སྟོབས་ཀྱིས་འགྲོ་བ་ཐམས་ཅད་ཡོངས་སུ་འཛིན་པའི་གཟུངས་ཀྱི་ཚུལ་
ཁོང་དུ་ཆུད་པར་བྱེད་པས་བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་ཡེ་ཤེས་སྣང་བའི་སྟོབས་ཀྱིས་དུས་གསུམ་གྱི་ཡེ་ཤེས་ཀྱི་ཚུལ། ཁོང་དུ་ཆུད་པར་བྱེད་ཅིང་། ཡང་དག་པར་འཛིན་པས་བྱང་ཆུབ་སེམས་དཔའ་རྣམས་ནི་ཚད་མེད་

པའོ། །རིགས་ཀྱི་བུ་མངོན་པར་ཤེས་པའི་སྟོབས་ཀྱིས་ཞིང་ཐམས་ཅད་དུ་སེམས་ཅན་རྣམས་ཀྱི་བསམ་པ་དང་། མོས་པ་ཅི་ལྟ་བ་བཞིན་དུ་འོད་ཀྱི་དྲ་བའི་འཁོར་ལོ་མངོན་པར་བསྒྲུབ་པས་བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་
བུ་སོ་སོ་ཡང་དག་པར་རིག་པའི་སྟོབས་ཀྱིས་ཚིག་གཅིག་བརྗོད་ཀྱང་འགྲོ་བ་ཐམས་ཅད་ཤིན་ཏུ་ཚིམ་པར་བྱེད་པས། བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་ལུས་རྣམ་པར་དག་པས། སངས་རྒྱས་ཀྱི་ཞིང་
ཐམས་ཅད་རང་གི་ལུས་ཀྱིས་རྒྱས་པར་འགེངས་པས། བྱང་ཆུབ་སེམས་དཔའ་རྣམས་ནི་ཚད་མེད་པའོ། །ནོར་བཟངས་ཀྱིས་སྨྲས་པ། འཕགས་མ་ཁྱོད་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་
པར་འཚང་རྒྱ་བར་འགྱུར། །སྨྲས་པ་རིགས་ཀྱི་བུ་འདི་ལྟ་སྟེ། སེམས་ཅན་གཅིག་ཅིག་ལ་དམིགས་ཤིང་གདུལ་བར་བྱ་བ་དང་། སྨིན་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་ཏེ། སེམས་
ཅན་བརྒྱའི་ཕྱིར་མ་ཡིན། སེམས་ཅན་སྟོང་གི་ཕྱིར་མ་ཡིན། སེམས་ཅན་བརྒྱ་ཕྲག་སྟོང་གི་ཕྱིར་མ་ཡིན། སེམས་ཅན་བྱེ་བའི་ཕྱིར་མ་ཡིན། སེམས་ཅན་བྱེ་བ་བརྒྱའི་ཕྱིར་མ་ཡིན། སེམས་ཅན་བྱེ་བ་སྟོང་གི་ཕྱིར་མ་ཡིན། སེམས་ཅན་བྱེ་བ་བརྒྱ་ཕྲག་སྟོང་གི་ཕྱིར་མ་ཡིན་ཏེ།
སེམས་ཅན་བྱེ་བ་ཁྲག་ཁྲིག་བརྒྱ་ཕྲག་སྟོང་གི་དོན་དུ། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་ནོ། །སེམས་ཅན་ཐམས་ཐམས་ཅད་ཀྱི་ཕྱིར་མ་ཡིན། སེམས་ཅན་ཁྲག་ཁྲིག་གི་ཕྱིར་མ་ཡིན། །སེམས་ཅན་གང་
ཡའི་ཕྱིར་མ་ཡིན། སེམས་ཅན་བན་བུན་གྱི་ཕྱིར་མ་ཡིན། སེམས་ཅན་ཕྱར་ཕྱུར་གྱི་ཕྱིར་མ་ཡིན། སེམས་ཅན་བྱང་བྱིང་གི་ཕྱིར་མ་ཡིན། སེམས་ཅན་ཉེར་འཇལ་གྱི་ཕྱིར་མ་ཡིན། སེམས་ཅན་ཕྱལ་ཕྱོལ་གྱི་ཕྱིར་མ་ཡིན།

སེམས་ཅན་ཡལ་ཡོལ་གྱི་ཕྱིར་མ་ཡིན། སེམས་ཅན་ལྗད་ལྗོད་ཀྱི་ཕྱིར་མ་ཡིན། སེམས་ཅན་ཕྱོད་ཟིམ་གྱི་ཕྱིར་མ་ཡིན། སེམས་ཅན་ཕྱད་ཕྱོད་ཀྱི་ཕྱིར་མ་ཡིན། སེམས་ཅན་ལྡམ་ལྡེམ་གྱི་ཕྱིར་མ་ཡིན། སེམས་ཅན་ཡ་གངས་ཀྱི་
ཕྱིར་མ་ཡིན། སེམས་ཅན་ཆོ་མའི་ཕྱིར་མ་ཡིན། སེམས་ཅན་ཁྲམ་ཁྲིམ་གྱི་ཕྱིར་མ་ཡིན། སེམས་ཅན་ནབ་ནུབ་ཀྱི་ཕྱིར་མ་ཡིན། སེམས་ཅན་བརྒྱུད་ཡས་ཀྱ