Kinh tạng Tây Tạng (Kangyur Đại Học) — 037_ཕལ་ཆེན།_ག

བ་དང་། ཆོས་ཀྱི་དབྱིངས་ཟབ་མོའི་གསུང་ཤིན་ཏུ་འཕགས་པ་ཆོས་ཀྱི་དབྱིངས་
སུ་སྣང་བའི་སྤྲིན་གྱི་མེ་ཏོག་རིན་པོ་ཆེའི་ཟེ་བ་ཅན་ཡོངས་སུ་རྒྱས་པས་ཆོས་ཀྱི་དབྱིངས་དང་། ནམ་མཁའི་དབྱིངས་ཀྱི་མཚན་ཉིད་རྒྱ་མཚོ་རྒྱས་པར་ཁྱབ་པའི་སྤྲིན་མཚན་ཉིད་གཅིག་པ། རྒྱ་མཚོ་ལ་སངས་རྒྱས་ཐམས་ཅད་ཀྱི་གནས་རྒྱ་མཚོ་རབ་ཏུ་སྣང་
ཞིང་སངས་རྒྱས་ཀྱི་རྣམ་པར་འཕྲུལ་པ་དང་། བྱང་ཆུབ་སེམས་དཔའ་ཆོས་ཀྱི་དབྱིངས་རྒྱ་མཚོ་ལ་འཇུག་པ་ཤིན་ཏུ་བསྟན་པ་མི་ཟད་པའི་རྒྱུད་ཆོས་ཀྱི་དབྱིངས་ཀྱི་གཞིར་ཐུག་པར་ཀུན་ཏུ་སྣང་བའི་སྤྲིན་ཅེས་བྱ་བ་མངའོ། །དེ་བཞིན་གཤེགས་པའི་
ཞབས་ལ་གསེར་རྣམ་པར་དག་ཅིང་ཡིད་དུ་འོང་བ་ཁ་དོག་བཟང་པོའི་སྤྲིན་འཛམ་བུ་ཆུ་ཀླུང་གི་འོད་ཟེར་ལས་སངས་རྒྱས་ཀྱི་སྤྲིན་ཀུན་ཏུ་ཁྱབ་པ་ཞིང་གི་རྒྱུད་དང་། ཀློང་རྣམ་པར་བཀོད་པར་རྣམ་པར་འཕྲུལ་ཞིང་། བྱང་ཆུབ་སེམས་དཔའི་ཆོས་སྣང་བ། རྒྱ་
མཚོའི་གཞིར་ཐུག་པ་མི་ཟད་པས་སངས་རྒྱས་ཐམས་ཅད་ཀྱི་ཡོན་ཏན་དང་མཐུ་ཕྱོགས་བཅུ་ཀུན་ཏུ་རྣམ་པར་སྣང་ཞིང་བྱང་ཆུབ་སེམས་དཔའི་སྙིང་པོ་ལ། ཀློང་མེད་པའི་ཆོས་ཀྱི་དབྱིངས་རིན་པོ་ཆེའི་སྤྲིན་ཏུ་སྣང་བའི་རྒྱན་རབ་ཏུ་སྟོན་པའི་སྤྲིན་ཅེས་བྱ་བ་

མངའ་འོ། །དེ་བཞིན་གཤེགས་པའི་ཞབས་ལ་དེ་བཞིན་གཤེགས་པའི་མཚན། སངས་རྒྱས་ཀྱི་འོད་ཟེར་ཟླ་བ་འོད་འཕྲོ་བས་རབ་ཏུ་བརྒྱན་པའི་སྙིང་པོ་ཅན། རིན་པོ་ཆེའི་རྒྱལ་པོ་ཀུན་ཏུ་དྲི་ཞིམ་ཞིང་འོད་འབྱུང་བའི་འོད་ཟེར་གྱི་
དཀྱིལ་འཁོར་རྒྱ་མཚོའི་གཞི་རིན་པོ་ཆེའི་འཁོར་ལོ་ཐམས་ཅད་དུ་འབྱུང་བ་སྣ་ཚོགས་རིན་པོ་ཆེ་ཐམས་ཅད་ཀྱི་ཁ་དོག་དང་མདོག་དང་། འོད་ཟེར་གྱི་འཁོར་ལོ་ཁོངས་སུ་ཆུད་པའི་གཞིར་འཇིག་རྟེན་གྱི་ཁམས་རྒྱ་མཚོ་དང་། སངས་རྒྱས་རྒྱ་མཚོ་ཁོངས་སུ་ཆུད་པར་
རྣམ་པར་སྣང་ཞིང་འབར་བས། འཇིག་རྟེན་གྱི་ཁམས་ཐམས་ཅད་དུ་བྱང་ཆུབ་སེམས་དཔའ་ཤིན་ཏུ་སྟོན་པའི་སྒོ། སངས་རྒྱས་ཀྱི་ཆོས་རྒྱ་མཚོ་ཐམས་ཅད་ཀྱི་སྤྲིན་གྱི་སྒྲའི་ང་རོ་རབ་ཏུ་གཏོང་བས། དེ་བཞིན་གཤེགས་པའི་ཞབས་ཀྱི་མཐིལ་ལ་མཚན་ཐམས་
ཅད་ཀྱིས་རབ་ཏུ་བརྒྱན་པའི་རྒྱན་སངས་རྒྱས་ཀྱི་རྣམ་པར་འཕྲུལ་པ་ཐམས་ཅད་རབ་ཏུ་སྟོན་པའི་སྤྲིན་ཅེས་བྱ་བ་མངའ་སྟེ། དེ་བཞིན་གཤེགས་པ་རྣམ་པར་སྣང་མཛད་ཀྱི་སྐུའི་ཡན་ལག་དང་། ཉིང་ལག་ཐམས་ཅད་ནི་དེ་དག་ལ་སོགས་པ་དེ་བཞིན་གཤེགས་པའི་མཚན་མང་པོའི་
སྤྲིན་འཇིག་རྟེན་གྱི་ཁམས་གཞི་དང་། སྙིང་པོ་མེ་ཏོག་གི་རྒྱན་གྱིས་བརྒྱན་པ། རྒྱ་མཚོ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་རིན་པོ་ཆེ་སྣ་ཚོགས་ཐམས་ཅད་ཀྱི་མཚན་རིན་པོ་ཆེས་རབ་ཏུ་བརྒྱན་པའོ། །ཤིན་ཏུ་རྒྱས་པ་ཆེན་པོའི་མདོ། །སངས་རྒྱས་ཕལ་པོ་
ཆེ་ཞེས་བྱ་བ་ལས་དེ་བཞིན་གཤེགས་པའི་སྐུའི་མཚན་རྒྱ་མཚོ་བསྟན་པའི་ལེའུ་སྟེ་བཞི་བཅུ་པའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་དྲུག་པ། །དེ་ནས་བཅོམ་
ལྡན་འདས་ཀྱིས་བྱང་ཆུབ་སེམས་དཔའ་ལག་ན་རིན་པོ་ཆེ་ལ་བཀའ་སྩལ་པ། ལག་ན་རིན་པོ་ཆེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དཔེ་བྱད་བཟང་པོ་འོད་འཛིན་པ་དང་ལྡན་པའི་རྒྱལ་པོ་ཞེས་བྱ་བ་མངའ་སྟེ། དེ་ལས་འོད་ཟེར་བར་

ཆད་མེད་པར་ཤིན་ཏུ་འབར་བ་ཞེས་བྱ་བ། འོད་ཟེར་གྱི་འཁོར་བརྒྱ་སྟོང་གྲངས་མེད་པ་ཕྲག་བདུན་ཅུ་དང་ལྡན་པ་འབྱུང་སྟེ། དེ་ནམ་བྱང་ཆུབ་སེམས་དཔའ་དགའ་ལྡན་གྱི་གནས་ནས། རང་གི་ལུས་འདོར་བ་དེའི་ཚེ་འོད་ཟེར་དཔལ་གྱི་རྒྱལ་པོ་ཞེས་བྱ་བ་གཏོང་སྟེ།
དེས་འཇིག་རྟེན་གྱི་ཁམས་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་རབ་ཏུ་སྣང་བར་བྱེད་དོ། །འཇིག་རྟེན་གྱི་ཁམས་དེ་དག་ན་སེམས་ཅན་དམྱལ་བ་ཆེན་པོ་ཇི་སྙེད་ཡོད་པ་དེ་དག་ཀྱང་ཡོངས་སུ་སྣང་བར་བྱེད་དོ། །དེ་དག་ཏུ་སེམས་ཅན་ཇི་སྙེད་སྐྱེས་པ་དེ་
དག་ཀྱང་ཡོངས་སུ་སྣང་བར་བྱེད་དེ། དེ་དག་གིས་ཀྱང་སྣང་བ་དེ་མཐོང་ཞིང་ཤེས་ཏེ། སེམས་ཅན་དེ་དག་གི་སེམས་ཅན་དམྱལ་བའི་སྡུག་བསྔལ་དེ་དག་ཐམས་ཅད་ཀྱང་རྩེ་ཟིལ་བར་འགྱུར་རོ། །སེམས་ཅན་དེ་དག་གི་མྱིག་ཡོངས་སུ་སྦྱང་བ་རྣམ་པ་བཅུ་འང་རྣམ་པར་
དག་པར་འགྱུར་རོ། །དེ་བཞིན་དུ་རྣ་བ་དང་སྣ་དང་། ལྕེ་དང་ལུས་དང་ཡིད་ཡོངས་སུ་སྦྱང་བ་དག་ཀྱང་རྣམ་པར་དག་པར་གྱུར་ཏེ། སེམས་ཅན་དམྱལ་བ་དེ་དག་ཀྱང་དགའ་བ་དང་ཉམས་བདེ་བ་ཆེན་པོ་དང་ལྡན་པར་འགྱུར་རོ། །སེམས་ཅན་དམྱལ་བ་དེ་དག་
ནས་ཤི་འཕོས་ནས་ཀྱང་དགའ་ལྡན་གྱི་ལྷ་དག་དང་སྐལ་བ་མཉམ་པར་སྐྱེ་སྟེ། དེ་དག་དེར་སྐྱེས་ནས་ཀྱང་ལྷའི་རྔ་དགའ་བ་མེད་པ་ཞེས་བྱ་བ་སྒྲ་འབྱིན་པ་ཐོས་པར་འགྱུར་ཏེ། ཀྱེ་གྲོགས་པོ་དག་བག་ཡོད་པ་དང་། དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པ་དང་
སྔོན་དགེ་བའི་བཤེས་གཉེན་བསྙེན་བཀུར་བ་དང་ལྡན་པའི་དགེ་བའི་རྩ་བའི་སྟོབས་དང་ཤུགས་ཀྱིས་འདིར་སྐྱེས་སོ། །དེ་ཉིད་ཀྱི་ཕྱིར་སེམས་ཅན་དམྱལ་བ་དག་ནས་ཤི་འཕོས་ནས། དེ་བཞིན་གཤེགས་པ་རྣམ་པར་སྣང་མཛད་ཀྱི་མཐུས་ལྷའི་འཇིག་རྟེན་འདིར་སྐྱེས་སོ། །
དེ་བཞིན་གཤེགས་པའི་ཞབས་ཀྱི་མཐིལ་གྱི་འཁོར་ལོ་རྩིབས་སྟོང་དང་ལྡན་པ་ལ་ཀུན་ཏུ་སྣང་ཞིང་མཛེས་པའི་འོད་ཟེར་ཡོད་དེ། དེ་ལ་འོད་འཛིན་པ་དང་ལྡན་པ་ཞེས་བྱ་བའི་དཔེ་བྱད་བཟང་པོའི་འོད་ཡོད་དོ། །དེ་ལས་འོད་ཟེར་བཞི་བཅུ་འབྱུང་སྟེ། དེའི་ནང་ནས་

འོད་ཟེར་གཅིག་ཡོན་ཏན་ཡོངས་སུ་དག་པའི་འོད་ཅེས་བྱ་སྟེ། དེ་ནི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་གི་རྡུལ་ཤིན་ཏུ་ཕྲ་བ་སྙེད་སྣང་བར་བྱེད་དོ། །ཡུལ་ཇི་ལྟ་བ་དང་བསམ་པ་ཇི་ལྟ་བ་དང་། ཡོངས་སུ་སྨིན་
པའི་ཁྱད་པར་ཇི་ལྟ་བ་བཞིན་དུ། མནར་མེད་པའི་སེམས་ཅན་དམྱལ་བ་ཆེན་པོའི་སེམས་ཅན་རྣམས་ཀྱང་སྣང་བར་བྱེད་དེ། དེ་དག་དེ་ནས་ཤི་འཕོས་ནས་དགའ་ལྡན་གྱི་ལྷ་དང་སྐལ་བ་མཉམ་པར་སྐྱེའོ། །དེ་དག་དེར་སྐྱེས་ནས་ཀྱང་ལྷའི་རྔའི་སྒྲ་ལས། ཀྱེ་བཙུན་པ་
ལྷའི་སྲས་པོ་དག་ལེགས་ཀྱིས་བྱང་ཆུབ་སེམས་དཔའ་རྣམ་པར་སྣང་མཛད་དེ་ཉིད་ལ་ཕྱག་འཚོལ་ཅིག །བྱང་ཆུབ་སེམས་དཔའ་རྣམ་པར་སྣང་མཛད་ནི་འདི་ཡིན་ཏེ། དྲི་མ་དང་བྲལ་བ་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་ཅིང་བཞུགས་སོ་ཞེས་བྱ་བའི་
སྒྲ་ཐོས་པར་འགྱུར་རོ། །དེ་ནས་ལྷའི་བུ་དེ་དག་རྔ་དེས་བསྐུལ་བ་དང་། ཡིད་དུ་འོང་བའི་སྒྲ་འདི་ལྟ་བུ་གང་ནས་བྱུང་ཞེས་ངོ་མཚར་དུ་འཛིན་པར་འགྱུར་རོ། །དེ་ནས་ཡང་རྔ་དེ་ཉིད་ལས་སྒྲ་འདི་སྐད་དུ་འབྱུང་བར་འགྱུར་ཏེ། ལྷའི་སྲས་པོ་དག་བདག་ནི་ལྷའི་རྔ་ཞེས་བྱ་
བ་སྟེ། དགེ་བའི་རྩ་བའི་སྟོབས་དང་ཤུགས་ཀྱིས་གྲུབ་པའོ། །ལྷའི་སྲས་པོ་དག་འདི་ལྟ་སྟེ། དཔེར་ན། ལྷའི་རྔ་ཁོ་བོ་ནི་བདག་ཅེས་བྱ་བའི་སྒྲ་རྗོད་ཀྱང་བདག་ལ་བདག་ཏུ་བྱ་བ་རྒྱུ་བ་མེད་དོ། །ལྷའི་སྲས་པོ་དག་དེ་བཞིན་དུ་སངས་རྒྱས་བཅོམ་ལྡན་འདས་རྣམས་
ཀྱང་ང་ནི་སངས་རྒྱས་ཞེས་གསུང་སྟེ། དེ་དག་ལ་བདག་ཏུ་བྱ་བ་མི་མངའ་འོ། །བདག་གིར་བྱ་བ་མི་མངའ་འོ། །ལྷའི་སྲས་པོ་དག་འདི་ལྟ་སྟེ་དཔེར་ན། བདག་གི་སྒྲ་ནི་ཤར་ཕྱོགས་ནས་ཀྱང་མ་འོངས། ལྷོ་ཕྱོགས་ནས་ཀྱང་མ་ཡིན། ནུབ་ཕྱོགས་ནས་ཀྱང་མ་ཡིན།
བྱང་ཕྱོགས་ནས་ཀྱང་མ་ཡིན་ཏེ། ཕྱོགས་བཅུ་ཀུན་ནས་ཀྱང་འོངས་པ་མེད་དོ། །ལྷའི་སྲས་པོ་དག་དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱི་ཕྲིན་ལས་རྣམ་པར་སྨིན་པ་ཡང་ཤར་ཕྱོགས་ནས་མ་འོངས། ལྷོ་ཕྱོགས་ནས་མ་ཡིན། ནུབ་ཕྱོགས་ནས་མ་ཡིན།

བྱང་ཕྱོགས་ནས་མ་ཡིན་ཏེ། ཕྱོགས་བཅུ་ཀུན་ནས་ཀྱང་འོངས་པ་མེད་དོ། །ལྷའི་སྲས་པོ་དག་འདི་ལྟ་སྟེ་དཔེར་ན། ཁྱེད་ཀྱི་སྔོན་གྱི་མཐའི་སེམས་ཅན་དམྱལ་བ་རྣམས་ནི། ཤར་ཕྱོགས་ནས་མ་འོངས། །ལྷོ་ཕྱོགས་ནས་མ་ཡིན། ནུབ་
ཕྱོགས་ནས་མ་ཡིན། བྱང་ཕྱོགས་ནས་མ་ཡིན་ཏེ། ཕྱོགས་བཅུ་ཀུན་ནས་ཀྱང་འོངས་པ་མེད་དོ། །འོན་ཀྱང་ཕྱིན་ཅི་ལོག་གི་ལས་བྱེད་པ་གཏི་མུག་གི་དྲ་བ་ཅན་རྣམས་ལ། ལུས་སུ་སྣང་བ་མི་འབྱུང་བ་ཡང་མ་ཡིན་ཏེ། དེ་དག་ཀྱང་རྩ་བ་མྱེད་ཅིང་
གནས་པ་མྱེད་པའོ། །བྱང་ཆུབ་སེམས་དཔའ་རྣམ་པར་སྣང་མཛད་ཀྱི་མཐུས་སྣང་བ་ཆེན་པོ་བྱུང་བའི་འོད་ཟེར་དེ་དག་ཀྱང་། ཤར་ཕྱོགས་ནས་མ་འོངས། ལྷོ་ཕྱོགས་ནས་མ་ཡིན། ནུབ་ཕྱོགས་ནས་མ་ཡིན། བྱང་ཕྱོགས་ནས་མ་ཡིན་ཏེ། ཕྱོགས་བཅུ་
ཀུན་ནས་ཀྱང་འོངས་པ་མེད་དོ། །ལྷའི་སྲས་པོ་དག་དེ་བཞིན་དུ་བདག་ཀྱང་ལྷའི་རྔ་ཏིང་ངེ་འཛིན་དང་། དགེ་བའི་རྩ་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དབྱངས་རྣམ་པར་དག་པའི་མཐུས་བྱུང་བ་སྟེ། ཆོ་འཕྲུལ་གྱི་རྣམ་པ་འདི་འདྲ་བདག་སྟོན་ཏོ། །ལྷའི་
སྲས་པོ་དག་འདི་ལྟ་སྟེ་དཔེར་ན། རིའི་རྒྱལ་པོ་རི་རབ་འདི་ནི་ཤར་ཕྱོགས་ནས་མ་འོངས། ལྷོ་ཕྱོགས་ནས་མ་ཡིན། ནུབ་ཕྱོགས་ནས་མ་ཡིན། བྱང་ཕྱོགས་ནས་མ་ཡིན་ཏེ། ཕྱོགས་བཅུ་ཀུན་ནས་ཀྱང་འོངས་པ་མྱེད་དོ། །ལྷའི་སྲས་པོ་དག་འོན་ཀྱང་
སུམ་ཅུ་རྩ་གསུམ་པའི་ལྷ་རྣམས་ལོངས་སྤྱོད་པ་དང་། ཡོངས་སུ་སྤྱོད་པ་དང་། བདེ་བའི་རིམ་གྲོའི་ཕྱིར་རྣམ་པ་འདི་ལྟ་བུས་ཉེ་བར་གནས་སོ། །ལྷའི་སྲས་པོ་དག་བདག་ཀྱང་ལྷའི་རྔ་སྟེ། དེ་བཞིན་དུ་མཁྱེན་པར་མཛོད་ཅིག །ལྷའི་སྲས་པོ་དག་འདི་
ལྟ་སྟེ་དཔེར་ན། འཇིག་རྟེན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་གི་རྡུལ་ཤིན་ཏུ་ཕྲ་བ་སྙེད་ཅིག་ཐམས་ཅད་རྡུལ་ཤིན་ཏུ་ཕྲ་མོར་བླགས་ཏེ། རྡུལ་ཕྲ་མོ་ཇི་སྙེད་བྱུང་བ་དེ་སྙེད་ཀྱི་སེམས་ཅན་ཞིག་ཡོངས་སུ་རྟོག་པ་ཉེ་བར་བཟུང་སྟེ། ཚོགས་ཤིང་འདུས་

པར་གྱུར་ཀྱང་། བདག་ནི་དེ་དག་ཐམས་ཅད་བསམ་པ་ཇི་ལྟ་བ་བཞིན་དུ་ལེགས་པར་བཤད་པས་ཚིམ་པར་བྱེད་དེ། བདག་ལ་སྐྱོ་བའམ་ཉམ་ཆུང་བར་འགྱུར་བའམ། དྲེགས་པའམ། རློམ་པ་མེད་དོ། །ལྷའི་སྲས་པོ་དག་
དེ་བཞིན་དུ་བྱང་ཆུབ་སེམས་དཔའ་རྣམ་པར་སྣང་མཛད་དྲི་མ་དང་བྲལ་བའི་ཏིང་ངེ་འཛིན་ལ་བཞུགས་པའི་ཕྱག་གཡས་པའི་མཐིལ་གྱི་དཔེ་བྱད་བཟང་པོ་གཅིག་ལས་འོད་ཟེར་གཅིག་བྱུང་བ་ཡང་དེ་སྙེད་དུ་རྣམ་པར་འཕྲུལ་ཞིང་འབྱུང་སྟེ། དེ་ནི་ཉན་ཐོས་དང་རང་སངས་
རྒྱས་རྣམས་ཀྱིས་ཀྱང་ཤེས་པར་དཀའ་ན། སེམས་ཅན་རྣམས་ཀྱིས་ལྟ་ཅི་སྨོས། ལྷའི་སྲས་པོ་དག་ལེགས་སོ་ལེགས་སོ། །བྱང་ཆུབ་སེམས་དཔའ་བལྟ་བའི་དོན་དུ་བཞུད་ཅིག །ཉེ་བར་བཞུད་ཅིག །བསྙེན་བཀུར་མཛོད་ཅིག །བསྟེན་པར་
མཛོད་ཅིག །དགེ་བའི་རྩ་བ་དག་གི་བར་ཆད་དུ་གྱུར་ཏ་རེ། ལྷའི་སྲས་པོ་དག་འདི་ལྟ་སྟེ་དཔེར་ན། བསྐལ་པའི་མེ་བྱུང་བའི་ཚེ། རིའི་རྒྱལ་པོ་རི་རབ་ལྟ་བུ་ཡང་རྨེག་མེད་པར་མི་སྣང་བར་འགྱུར་རོ། །ལྷའི་སྲས་པོ་དག་དེ་བཞིན་དུ་འདོད་ཆགས་
ཀྱིས་ཀུན་ནས་འཁོར་བའི་སེམས་སུ་གྱུར་ན་སངས་རྒྱས་རྗེས་སུ་དྲན་པ་རྣམ་པར་བཀོད་པ་ཙམ་ཡང་མེད་པར་འགྱུར་གྱིས། དེའི་ཕྱིར་ལྷའི་སྲས་པོ་དག་ཁྱེད་ཀྱིས་དྲིན་དུ་གཟོ་བར་མཛོད་ལ། དྲིན་དུ་མི་གཟོ་བ་མེད་པར་མཛོད་ཅིག །ལྷའི་བུ་བྱས་པ་མི་དྲན་
པ་དག་ནི་ལྷ་མ་ཡིན་གྱི་གཡུལ་དུ་ཕལ་ཆེར་གཞན་གྱིས་གསད་ཅིང་འཆི་བར་འགྱུར་ཏེ། འདི་ནས་ཤི་འཕོས་ནས་ཀྱང་དྲིན་དུ་མི་གཟོ་བའི་སེམས་ཅན་དེ་དག་ནི་ཕལ་ཆེར་སེམས་ཅན་དམྱལ་བར་འདོང་བར་འགྱུར་རོ། །ལྷའི་སྲས་པོ་དག་ཁྱེད་འོད་ཟེར་ཆེན་པོ་
སྣང་བ་གང་གི་མཐུས། སེམས་ཅན་དམྱལ་བ་དེ་དག་ནས་ཤི་འཕོས་ཏེ། འདིར་སྐྱེས་པར་གྱུར་པའི་དགེ་བའི་རྩ་བ་དེ་ཉིད་རྒྱ་ཆེར་ཡོངས་སུ་བསྔོ་བ་མཛོད་ཅིག །ལྷའི་སྲས་པོ་དག་ལྷའི་རྔ་བདག་ནི་བུད་མེད་མ་ཡིན། སྐྱེས་པ་མ་ཡིན་ཏེ། བསོད་

ནམས་ཀྱི་སྤྱོད་པ་བརྒྱ་ཕྲག་འདི་སྙེད་ཀྱང་ཡོངས་སུ་བརྗོད་དོ། །ལྷའི་སྲས་པོ་དག་འདི་ན་ལྷའི་བུ་དང་ལྷའི་བུ་མོ་དག་གི་ལོངས་སྤྱོད་གཞལ་མེད་ཁང་གི་ལོངས་སྤྱོད་དམ། བཟའ་ཤིང་གི་ར་བའི་ལོངས་སྤྱོད་གང་ཡོད་པ་དེ་དག་ཀྱང་མཚན་ཉིད་དེ་ལྟ་བུར་བལྟའོ། །
ལྷའི་སྲས་པོ་དག་ཇི་ལྟར་བདག་མ་སྐྱེས་མ་འགགས་པ་དེ་བཞིན་དུ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དག་ཀྱང་མ་སྐྱེས་མ་འགགས་པར་མཁྱེན་པར་མཛོད་ཅིག །ལྷའི་སྲས་པོ་དག་འདི་ནི་ཏིང་ངེ་
འཛིན་གནས་མྱེད་པའི་ཕྱག་རྒྱ་ཞེས་བྱ་བ་ལ་འཇུག་པར་རྟོགས་པར་མཛོད་ཅིག །དེ་ནས་ལྷའི་བུ་དེ་དག་ངོ་མཚར་དང་རྨད་དུ་གྱུར་ཏེ། མེ་ཏོག་གི་སྤྲིན་སྟོང་ཕྲག་བཅུ་དང་སྤོས་ཀྱི་སྤྲིན་སྟོང་ཕྲག་བཅུ་དང་། རོལ་མོའི་སྤྲིན་སྟོང་ཕྲག་བཅུ་དང་། རྒྱལ་
མཚན་གྱི་སྤྲིན་སྟོང་ཕྲག་བཅུ་དང་། གདུགས་ཀྱི་སྤྲིན་སྟོང་ཕྲག་བཅུ་དང་། བསྟོད་པའི་སྤྲིན་སྟོང་ཕྲག་བཅུ་དག་མངོན་པར་སྤྲུལ་ཏེ། བྱང་ཆུབ་སེམས་དཔའ་རྣམ་པར་སྣང་མཛད་ཀྱི་གཞལ་མེད་ཁང་གང་ན་བ་དེར་དོང་སྟེ། ཕྱིན་ནས་ཀྱང་གཞལ་
མེད་ཁང་ལ་ཕྱག་འཚལ་ཞིང་གནས་པར་གྱུར་ཀྱང་། བྱང་ཆུབ་སེམས་དཔའ་དེ་མ་མཐོང་བ་དང་། ལྷའི་བུ་ལ་ལ་འདི་སྐད་ཅེས་འཛེར་ཏེ། ཀྱེ་གྲོགས་པོ་དག་བྱང་ཆུབ་སེམས་དཔའ་དེ་ནི་ལྷའི་ཡུལ་འདི་ནས་ཤི་འཕོས་ཏེ། མིའི་འཇིག་རྟེན་དུ་རྒྱལ་
བོ་ཟས་གཙང་མའི་ཁྱིམ་དུ། ལྷ་མོ་སྒྱུ་མའི་དཀུ་ན་ཙན་དན་གྱི་ཁང་པ་བརྩེགས་པ་ཡོད་པར་བརྫུས་ཏེ་སྐྱེས་ཀྱིས། ལྷའི་བུ་དག་ལྷའི་མིག་གིས་ལེགས་པར་ལྟོས་ཤིག་ཅེས་ནས། དེ་དག་གིས་བལྟས་པ་དང་། བྱང་ཆུབ་སེམས་དཔའ་དེ་ཚངས་པའི་རིས་ཀྱི་ལྷའི་
བུ་རྣམས་དང་། དེ་བཞིན་དུ་འདོད་པ་ལ་སྤྱོད་པའི་ལྷའི་བུ་ཐམས་ཅད་ཀྱིས་མཆོད་ཅིང་རིམ་གྲོར་བྱས་ཏེ། དེ་ན་འདུག་པ་མཐོང་ངོ་། །དེ་ནས་ལྷའི་བུ་དེ་དག་འདི་སྙམ་དུ་གྱུར་ཏེ། བདག་ཅག་གིས་བྱང་ཆུབ་སེམས་དཔའ་དེ་མ་མཐོང་ངམ། དེ་དང་མ་སྨྲས་

ཏེ། བག་དབབ་པ་མ་ཐོབ་ན། སེམས་སྐད་ཅིག་དུ་ཡང་དགའ་ལྡན་གྱི་གནས་ན་འཁོད་པར་དགའ་བའི་སེམས་བསྐྱེད་པའི་མི་ཆས། འཛམ་བུའི་གླིང་དུ་མི་འདོད་དུ་མི་རུང་ངོ་ཞེས་ནས། ལྷའི་བུ་དེ་དག་རེ་རེ་ཞིང་ཡང་ལྷའི་
བུ་མོ་བྱེ་བ་ཕྲག་བཅུའི་འཁོར་དང་བཅས་ཏེ། འདོད་པར་བྱས་པ་དང་། ལྷའི་བུ་དེ་དག་གིས་དེ་ལྟར་འདོད་པའི་སེམས་བསྐྱེད་མ་ཐག་ཏུ་ལྷའི་རྔ་དེ་ལས་སྒྲ་འབྱུང་བ། ལྷའི་སྲས་པོ་དག་བྱང་ཆུབ་སེམས་དཔའ་དེ་ནི་སྐྱེ་བ་འང་མེད། ཤི་འཕོ་བའང་མྱེད་དེ།
བྱང་ཆུབ་སེམས་དཔའ་སེམས་དཔའ་ཆེན་པོ་དག་ནི་ཤི་འཕོ་བ་མེད་པའི་མངོན་པར་ཤེས་པ་དང་ལྡན་པ་དག་སྟེ། དེ་དག་ནི་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་མིག་ལམ་དུ་སྣང་བར་འགྱུར་རོ། །ལྷའི་སྲས་པོ་དག་འདི་ལྟ་སྟེ་དཔེར་ན། བདག་
ནི་ཁྱེད་ཀྱི་མིག་གི་ལམ་གྱིས་མྱི་མཐོང་སྟེ། མྱིག་གི་ལམ་ལས་འདས་ཀྱང་། ལྷའི་སྲས་པོ་ཁྱེད་ལ་སྒྲ་བརྗོད་དོ། །ལྷའི་སྲས་པོ་དག་དེ་བཞིན་དུ་བྱང་ཆུབ་སེམས་དཔའ་ཏིང་ངེ་འཛིན་དྲི་མ་དང་བྲལ་བ་ལ་མཉམ་པར་བཞག་པ་ནི། མྱིག་གིས་སྣང་བ་མ་
ཡིན་ཡང་སྐྱེ་བའི་སྐྱེ་མཆེད་ཐམས་ཅད་དུ་སྣང་སྟེ། འོན་ཀྱང་བྱང་ཆུབ་སེམས་དཔའ་ལ་རྟོག་པ་མྱེད་དོ། །རྣམ་པར་རྟོག་པ་མྱེད་དོ། །གཡོ་བ་མྱེད་དོ། །སེམས་པ་མྱེད་དོ། །དེ་བས་ན་ལྷའི་སྲས་པོ་དག་ཁྱེད་ཀྱིས་བླ་ན་མྱེད་པ་ཡང་དག་པར་རྫོགས་
པའི་བྱང་ཆུབ་ཏུ་སེམས་བསྐྱེད་ལ། བསམ་པ་ཡོངས་སུ་སྦྱོང་སྟེ། སྤྱོད་པ་ལ་མནོས་ལ། ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། རྣམ་པར་སྨིན་པའི་སྒྲིབ་པ་དང་། ལྟ་བའི་སྒྲིབ་པ་བཤགས་པར་གྱིས་ཏེ། ལུས་ཀྱི་ལས་
དང་ངག་གི་ལས་དང་། ཡིད་ཀྱི་ལས་ཀུན་ཏུ་བཟང་པོ་ཆོས་ཀྱི་དབྱིངས་ཀྱིས་ཀླས་པས། སེམས་ཅན་གྱི་ཁམས་སུ་མྱིང་དང་ལུས་བྱིན་གྱིས་རློབས་ཤིག །སེམས་ཅན་གྱི་ཁམས་དང་མཉམ་པའི་ལུས་ཀྱིས་སེམས་ཅན་གྱི་ཁམས་དང་། མཉམ་

པའི་མགོ་བྱིན་གྱིས་རློབས་ཤིག །སེམས་ཅན་གྱི་ཁམས་དང་མཉམ་པའི་མ་གོས་སེམས་ཅན་གྱི་ཁམས་དང་མཉམ་པའི་ལྕེ་བྱིན་གྱིས་རློབས་ཤིག །སེམས་ཅན་གྱི་ཁམས་དང་མཉམ་པའི་ལྕེས་སྒྲིབ་པ་དེ་དག་ཉེས་པ་ལ་ཉེས་པར་ཤོགས་ཤིག །
དེ་སྐད་ཅེས་བརྗོད་པ་དང་། ལྷའི་བུ་དེ་དག་ངོ་མཚར་དང་རྨད་དུ་གྱུར་ཏེ། རབ་ཏུ་དགའ་ཞིང་སེམས་བདེ་བར་གྱུར་ནས། ཡང་ལྷའི་རྔ་དེ་ལས་བྱང་ཆུབ་སེམས་དཔའ་རྣམས་སྡིག་པ་འཆགས་པའི་རྣམ་པ་ཇི་ལྟ་བུ་ཞིག་ཡོད་ཅེས་ཕྱིར་འདྲིའོ། །དེ་ནས་
ལྷའི་རྔ་དེ་བྱང་ཆུབ་སེམས་དཔའ་དེའི་ཏིང་ངེ་འཛིན་གྱི་བྱིན་གྱི་རླབས་དང་། ལྷའི་བུ་དེ་དག་གི་དགེ་བའི་རྩ་བའི་སྟོབས་དང་། བྱིན་གྱི་རླབས་ཀྱིས་རྣམ་པ་འདི་ལྟ་བུའི་སྒྲ་འབྱིན་ཏོ། །ལྷའི་སྲས་པོ་དག་ལས་ནི་ཤར་ཕྱོགས་ནས་མ་འོངས་ཏེ། སེམས་
ལ་གནས་པ་མ་ཡིན། འདུག་པ་མ་ཡིན། ཚོགས་སུ་བསྩགས་པ་མ་ཡིན། ཕུང་པོར་གྱུར་པ་མ་ཡིན་ཏེ། ལྷོ་ཕྱོགས་ནས་མ་ཡིན། ནུབ་ཕྱོགས་ནས་མ་ཡིན། བྱང་ཕྱོགས་ནས་མ་ཡིན། ལས་དེ་ནི་ཕྱོགས་བཅུ་ཀུན་ནས་ཀྱང་འོངས་ཏེ་གནས་
པ་མ་ཡིན་ནོ། །དེ་ལྟར་དེ་ནི་བྱང་ཆུབ་སེམས་དཔས་ཕྱིན་ཅི་ལོག་ལས་བྱུང་བ་སྟེ། གནས་མྱེད་པར་ཡང་དག་པར་ཤེས་པས། དེའི་ཕྱིར་དེ་ལ་འགྱོད་པ་མེད་དོ། །ལྷའི་སྲས་པོ་དག་འདི་ལྟ་སྟེ་དཔེར་ན། ལྷའི་རྔ་བདག་ནི་ལས་ཀྱི་རྣམ་པར་སྨིན་
པ་ཇི་ལྟ་བ་དང་། སྤྱོད་པ་ཇི་ལྟ་བ་དང་། ཚུལ་ཁྲིམས་ཇི་ལྟ་བ་དང་། དགའ་བ་ཇི་ལྟ་བ་དང་། ཤིན་ཏུ་བྱང་བ་ཇི་ལྟ་བ་དང་། ཏིང་ངེ་འཛིན་ཇི་ལྟ་བ་བཞིན་དུ་བདག་ཅེས་བརྗོད་དོ། །ལྷའི་སྲས་པོ་དག་དེ་བཞིན་དུ་སངས་རྒྱས་བཅོམ་ལྡན་འདས་
རྣམས་དང་། བྱང་ཆུབ་སེམས་དཔའ་རྣམས་ཀྱང་བདག་ཅེས་བྱ་བའམ། བདག་གི་ཞེས་བྱ་བ་འམ། སེམས་ཅན་ཞེས་བྱ་བར་གསུང་རྗོད་ཅིང་འདོད་ཆགས་དང་ཞེ་སྡང་དང་གཏི་མུག་དང་། ལས་དང་བྱ་བའི་གསུང་ཡང་རྗོད་དེ། ལྷའི་སྲས་པོ་

དག་བདག་ཅེས་བྱ་བ་མེད་དོ། །བདག་མྱེད་པར་བདག་གི་ཞེས་བྱ་བ་མྱི་དམྱིགས་སོ། །དེ་དག་གི་ལས་ཀྱི་རྣམ་པ་ལམ་གྱི་རྒྱུད་དྲུག་ཏུ་རྣམ་པར་སྨིན་པར་འགྱུར་བ་བྱས་པ་དེ་དག་ཀྱང་ཤར་ཕྱོགས་ནས་མི་དམིགས་སོ། །ལྷོ་
ཕྱོགས་ནས་མ་ཡིན། ནུབ་ཕྱོགས་ནས་མ་ཡིན། བྱང་ཕྱོགས་ནས་མ་ཡིན་ཏེ། ཕྱོགས་བཅུ་ཀུན་ནས་ཀྱང་དམིགས་པར་མི་རུང་ངོ་། །ལྷའི་སྲས་པོ་དག་འདི་ལྟ་སྟེ། དཔེར་ན། བདག་གི་སྒྲ་ནི་ལྷའི་བུ་ཡོངས་སུ་མ་དག་པ་རྣམས་ཀྱི་རྣ་ལམ་དུ་མི་འགྲོ་
བས། སེམས་ཅན་དམྱལ་བ་རྣམས་བསྐུལ་ཀྱང་ཐོས་པར་མི་འགྱུར་ཏེ། སྒྲ་དེ་ནི་མ་སྐྱེས་མ་འགགས་པའོ། །ལྷའི་སྲས་པོ་དག་དེ་བཞིན་དུ་ལས་ཐམས་ཅད་ཀྱང་མ་སྐྱེས་མ་འགགས་པ་སྟེ། ཇི་ལྟར་ཡོངས་སུ་སྦྱངས་པ་དང་། ཇི་ལྟར་བསྩགས་པའི་
ཚུལ་དུ་འབྲས་བུ་ཡང་རྣམ་པར་སྨིན་པར་བྱེད་དེ། ལྷའི་སྲས་པོ་དག་འདི་ལྟ་སྟེ། དཔེར་ན། བདག་གི་སྒྲ་ནི་བསྐལ་པ་ཁྲག་ཁྲིག་དུ་བརྗོད་ཀྱང་རྣམ་པར་རྟོག་པ་མེད་པས་ཟད་པ་མེད་དོ། །ཐུག་པ་མེད་དོ། །འགྲོ་བ་མེད་དོ། །འོང་བ་མེད་དོ། །ལྷའི་
སྲས་པོ་དག་གང་ལ་འགྲོ་བ་དང་། འོང་བ་ཡོད་པ་དེ་དག་ལ་ནི་རྟག་པའམ། ཆད་པ་དག་ཀྱང་ཡོད་པར་སྣང་སྟེ། སངས་རྒྱས་བཅོམ་ལྡན་འདས་རྣམས་ནི་ལྡེམ་པོ་དག་གིས་སེམས་ཅན་སྨིན་པར་མཛད་པའི་དོན་དུ་སྟོན་པ་མ་གཏོགས་པར་རྟག་པ་འམ་ཆད་པའི་
ཆོས་སྟོན་པ་མི་མཛད་དོ། །ལྷའི་སྲས་པོ་དག་འདི་ལྟ་སྟེ་དཔེར་ན། སྒྲ་དེ་ནི་བསམ་པ་ཇི་ལྟ་བ་བཞིན་དུ་འཇིག་རྟེན་གྱི་ཁམས་ཚད་མེད་པར་དབྱངས་ཀྱིས་གོ་བར་བྱེད་དོ། །ལྷའི་སྲས་པོ་དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་སེམས་ཅན་རྣམས་
ཀྱི་བསམ་པ་ཇི་ལྟ་བ་བཞིན་དུ་མངོན་དུ་སྟོན་པ་མཛད་དོ། །ལྷའི་སྲས་པོ་དག་འདི་ལྟ་སྟེ་དཔེར་ན། ཤེལ་གྱི་མེ་ལོང་གི་དཀྱིལ་འཁོར་སྒྲོན་མ་ཞེས་བྱ་བ་འཇིག་རྟེན་གྱི་ཁམས་བཅུའི་ཚད་དང་མཉམ་པ་དག་ཅིང་གསལ་ལ་མདོག་ཤིན་ཏུ་བཟང་བ་ཡོད་དེ། དེ་

ལ་འཇིག་རྟེན་གྱི་ཁམས་ཚད་མེད་པ་དག་ནས་ཀྱང་། རི་ཐམས་ཅད་ཀྱི་གཟུགས་བརྙན་དང་། སེམས་ཅན་དེ་དག་ཐམས་ཅད་ཀྱི་གཟུགས་བརྙན་ཀྱང་རབ་ཏུ་སྣང་ན། ལྷའི་སྲས་པོ་དག་དེ་ལ་ཇི་སྙམ་དུ་སེམས། དེ་ལྟར་མེ་ལོང་གི་དཀྱིལ་འཁོར་དེ་ལ་སེམས་ཅན་དམྱལ་
བ་པ་དང་། བྱོལ་སོང་གི་སྐྱེ་གནས་པ་དང་། གཤིན་རྗེའི་འཇིག་རྟེན་པའི་སེམས་ཅན་མང་པོ་སྣང་བས། ཡོངས་སུ་མ་དག་པར་མི་འགྱུར་རམ། ལུས་ཤིན་ཏུ་མི་སྡུག་པར་གནས་པ་དེ་དག་ཀྱང་། མེ་ལོང་དེ་ལ་འཕོས་པའམ་གནས་པའམ། སེམས་དང་
ལྡན་པར་གྱུར་པ་ཡོད་དམ་མྱེད། སྨྲས་པ་དེ་ལྟ་བུ་ནི་མེད་དོ། །སྨྲས་པ་ལྷའི་སྲས་པོ་དག་དེ་བཞིན་དུ། ལས་རྣམས་ཀྱང་འཕོ་བ་འང་མྱེད་འགྲོ་བའང་མྱེད། གནས་པ་འང་མྱེད་དེ། དགེ་བའི་རྩ་བ་རྣམ་པར་སྨིན་པ་ཡང་མི་སྣང་བ་མ་ཡིན་ནོ། །འདི་ལྟ་སྟེ་དཔེར་
ན། སྒྱུ་མས་ནི་མིག་བསླབ་བྱེད་དོ། །ལྷའི་སྲས་པོ་དག་དེ་བཞིན་དུ་གང་གིས་ལས་རྣམས་ཤེས་ཏེ་མཐོང་བ་དང་། ཁོང་དུ་ཆུད་པ་དེ་དག་གི་སྡིག་པ་བཤགས་པ་ནི་ཤིན་ཏུ་རྣམ་པར་དག་པར་འགྱུར་རོ། །ཤིན་ཏུ་བསྟན་པ་འདི་བསྟན་པའི་ཚེ། འཇིག་རྟེན་
གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་གི་རྡུལ་ཤིན་ཏུ་ཕྲ་བ་སྙེད་ཀྱི་དགའ་ལྡན་གནས་ཀྱི་ལྷའི་བུ་དེ་དག་ཐམས་ཅད་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །འདོད་པ་ལ་སྤྱོད་པའི་ལྷའི་རིས་དྲུག་གི་ལྷའི་བུ་ཚད་མྱེད་གྲངས་མེད་བསམ་
གྱིས་མྱི་ཁྱབ་པ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འདོད་པ་ན་སྤྱོད་པའི་ལྷའི་རིས་དྲུག་པོ་དེ་དག་གི་ལྷའི་བུ་མོ་རྣམས་ཀྱང་བུད་མེད་ཀྱི་ལུས་དེ་ལས་གྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏོ། །
དེ་ནས་ལྷའི་བུ་དེ་དག་གིས་ཀུན་ཏུ་བཟང་པོའི་ཡོངས་སུ་བསྔོ་བས་རྒྱ་ཆེར་གཤེགས་ཏེ། ས་བཅུ་འཐོབ་པ་དང་། ཏིང་ངེ་འཛིན་སྟོབས་ཀྱི་རྒྱན་ཡོངས་སུ་འཐོབ་པའི་དོན་དུ། སེམས་ཅན་གྱི་ཁམས་དང་། མཉམ་པའི་ལུས་ཀྱི་ལས་དང་། ངག་གི་ལས་

དང་། ཡིད་ཀྱི་ལས་ཀྱིས་རྒྱ་ཆེར་བཤགས་པ་བྱས་ནས། དེ་དག་ལས་ཀྱི་སྒྲིབ་པ་རྣམ་པར་དག་པ་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་རིན་པོ་ཆེ་སྣ་བདུན་གྱི་པདྨོ་རྡུལ་ཤིན་ཏུ་ཕྲ་བ་སྙེད་ལ་འཁོད་ཅིང་། འོད་
ཆེན་པོ་རབ་ཏུ་གཏོང་བ་མཐོང་བར་གྱུར་ཏེ། དེ་དག་གི་དཔེ་བྱད་བཟང་པོ་རེ་རེ་ནས་ཀྱང་སེམས་ཅན་གྱི་ཁམས་དང་། མཉམ་པའི་འོད་ཟེར་མང་པོ་བྱུང་སྟེ། འོད་ཟེར་དེ་དག་ལ་ཡང་སེམས་ཅན་གྱི་ཁམས་དང་། མཉམ་པའི་དེ་བཞིན་གཤེགས་པ་བཞུགས་
ཤིང་། སེམས་ཅན་རྣམས་ལ་བསམ་པ་ཇི་ལྟ་བ་བཞིན་དུ་ཆོས་སྟོན་པ་མཐོང་བར་གྱུར་ཀྱང་། དེ་ཙམ་གྱིས་ཏིང་ངེ་འཛིན་དྲི་མ་དང་བྲལ་བའི་སྤྱོད་ཡུལ་གྱི་ཆ་ཤས་ཙམ་ཡང་ལེགས་པར་མཐོང་བར་མ་གྱུར་ཏོ། །དེ་ནས་ལྷའི་བུ་དེ་དག་གིས་མེ་ཏོག་གི་སྤྲིན་ལ་སྩོགས་
པ། སྔ་མ་དེ་དག་དང་བ་སྤུའི་བུ་ག་རེ་རེ་ནས་ཀྱང་སེམས་ཅན་གྱི་ཁམས་དང་། མཉམ་པའི་མེ་ཏོག་གི་སྤྲིན་མངོན་པར་སྤྲུལ་ཏེ། བྱང་ཆུབ་སེམས་དཔའ་རྣམ་པར་སྣང་མཛད་དང་། དེ་བཞིན་གཤེགས་པ་མཐའ་ཡས་པ་ལ་མཆོད་པ་བྱེད་པར་གྱུར་ཏོ། །མེ་
ཏོག་ཇི་སྙེད་ཅིག་གཏོང་བ་དེ་དག་ཐམས་ཅད་ཀྱང་། དེ་བཞིན་གཤེགས་པའི་སྐུ་གཟུགས་སུ་གནས་པར་གྱུར་ཏོ། །སྤོས་ཀྱི་སྤྲིན་གྱི་ཆར་རབ་ཏུ་ཕབ་པ་དེ་དག་གིས་འཇིག་རྟེན་གྱི་ཁམས་སངས་རྒྱས་ཀྱི་ཞིང་ཚད་མེད་པའི་རྡུལ་ཤིན་ཏུ་ཕྲ་བ་སྙེད་དུ། སེམས་
ཅན་གང་གི་ལུས་ལ་བབ་པ། དེ་དག་ཀྱང་འདི་ལྟ་སྟེ་དཔེར་ན། བསམ་གཏན་བཞི་བ་ལ་མཉམ་པར་བཞག་པའི་དགེ་སློང་གི་ལུས་ཀྱི་བདེ་བ་དེ་ལྟ་བུ་དང་ལྡན་པར་གྱུར་ཏོ། །གང་ལ་ལས་ཀྱི་སྒྲིབ་པའི་ཉེས་པ་མེད་པ་དེ་དག་ནི། སྤོས་ཀྱི་དྲི་དེ་ཚོར་བ་ཙམ་གྱིས་
གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལས་བྱུང་བའི་ཉོན་མོངས་པ་ཐམས་ཅད་བྱང་བར་གྱུར་ཏེ། ནང་གི་དངོས་པོའི་ཉོན་མོངས་པ་ལྔ་བརྒྱ་དང་། ཕྱི་རོལ་གྱི་དངོས་པོའི་ཉོན་མོངས་པ་ལྔ་བརྒྱ་དང་། འདོད་ཆགས་ལ་སྤྱོད་པའི་ཉོན་མོངས་པ་སྟོང་

ཕྲག་ཉི་ཤུ་རྩ་གཅིག་དང་། ཞེ་སྡང་ལ་སྤྱོད་པའི་ཉོན་མོངས་པ་སྟོང་ཕྲག་ཉི་ཤུ་རྩ་གཅིག་དང་། གཏི་མུག་ལ་སྤྱོད་པའི་ཉོན་མོངས་པ་སྟོང་ཕྲག་ཉི་ཤུ་རྩ་གཅིག་དང་། ཆ་མཉམ་པ་ལ་སྤྱོད་པའི་ཉོན་མོངས་པ་སྟོང་ཕྲག་ཉི་ཤུ་རྩ་གཅིག་དང་། དེ་བཞིན་དུ་འཕྲལ་གྱི་
འདོད་ཆགས་ལ་སྤྱོད་པ་དང་། འཕྲལ་གྱི་ཞེ་སྡང་ལ་སྤྱོད་པ་དང་། འཕྲལ་གྱི་གཏི་མུག་ལ་སྤྱོད་པ་དང་། འཕྲལ་གྱི་ཆ་མཉམ་པ་ལ་སྤྱོད་པའི་ཉོན་མོངས་པ་དང་། མི་ཤེས་པ་དེ་དག་ཐམས་ཅད་ཀྱང་བྱང་བར་གྱུར་ཏོ། །གང་གིས་འོད་ཟེར་སྤོས་ཀྱི་ཕུང་པོ་གཟི་
བརྗིད་རྣམ་པར་འཕྲུལ་པའི་འོད་རབ་ཏུ་འཐོབ་པའི་དོན་དུ། དགེ་བའི་རྩ་བ་ཡོངས་སུ་སྦྱངས་ཤིང་། བསྐྱེད་པ་དེ་དག་གིས་གདུགས་ཀྱི་སྤྲིན་དེ་དག་མིག་ལམ་དུ་མཐོང་བར་གྱུར་ཏེ། དེ་དག་གིས་ཀྱང་འཁོར་ལོས་སྒྱུར་བ། ཆུ་ཀླུང་གང་གཱའི་བྱེ་མ་སྙེད་ཀྱི་དགེ་བའི་
རྩ་བ་བསྐྱེད་པར་གྱུར་ཏོ། །དེ་ནི་འདི་ལྟར་འཁོར་ལོས་སྒྱུར་བའི་ས་གསེར་གྱི་དྲ་བས་དག་པ་འཐོབ་པའི་ཕྱིར། དགེ་བའི་རྩ་བ་རབ་ཏུ་བསྐྱེད་པར་གྱུར་ཏེ། དེ་ལ་གནས་པའི་བྱང་ཆུབ་སེམས་དཔའ་ནི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་
བརྒྱ་སྟོང་གི་རྡུལ་ཤིན་ཏུ་ཕྲ་བ་སྙེད་དུ་འཁོར་ལོས་སྒྱུར་བར་བྱེད་དོ། །དེར་སེམས་ཅན་མང་པོ་ཡོངས་སུ་སྨིན་པར་འགྱུར་རོ། །འདི་ལྟ་སྟེ་དཔེར་ན། བཅོམ་ལྡན་འདས་དེ་བཞིན་གཤེགས་པ་འཁོར་ལོའི་བློ་གྲོས་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མེ་ལོང་
གི་དཀྱིལ་འཁོར་ལྟར་སྣང་བ་ཞེས་བྱ་བ་དེ་ན་བཅོམ་ལྡན་འདས་དེའི་སྤྲུལ་པ་དགེ་སློང་ཕ་དང་། དགེ་སློང་མ་དང་། དགེ་བསྙེན་ཕ་དང་། དགེ་བསྙེན་མའི་གཟུགས་དང་གཞུང་དེ་བཞིན་དུ་སྐྱེས་པའི་རབས་ཀྱི་སྡེའི་ཁྱད་པར་ཐམས་ཅད་ཀྱིས་འཇིག་རྟེན་གྱི་ཁམས་ཚད་
མེད་པ་དག་ཏུ་མི་འགྲོ་བ་དེ་ལྟ་བུས་སྐད་ཅིག་མེད་དོ། །ཐང་ཅིག་མེད་དོ། །ཡུད་ཙམ་མེད་དོ། །དེ་བཞིན་གཤེགས་པ་དེའི་མཚན་ཀྱང་གྲག་སྟེ། ཐོས་ནས་ཀྱང་སངས་རྒྱས་ཀྱི་ཞིང་དེར་སྐྱེ་བར་འགྱུར་རོ། །དེ་བཞིན་དུ་འཁོར་ལོས་སྒྱུར་བའི་ས་གསེར་གྱི་དྲ་བས་

དག་པ་ལ་གནས་པའི་བྱང་ཆུབ་སེམས་དཔའི་རྣམ་པར་འཕྲུལ་པ་ཤིན་ཏུ་གསལ་བའི་མཚམས་མེད་པའི་འོད་ཟེར་གྱིས་ཕོག་པའི་སེམས་ཅན་དེ་དག་ཐམས་ཅད་ཀྱང་། དགེ་བའི་རྩ་བ་དེ་དག་གིས་སེམས་ཅན་ཡོངས་སུ་འདུལ་ཞིང་ས་བཅུ་
འཐོབ་པར་འགྱུར་རོ། །འདི་ལྟ་སྟེ་དཔེར་ན། ཚད་མེད་པའི་བསམ་གཏན་ཐོབ་པ་ནི། ཇི་སྲིད་དུ་བསམ་གཏན་ཡོངས་སུ་ཉམས་པར་མ་གྱུར་པ་དེ་སྲིད་དུ་ཚངས་པའི་གཞལ་མེད་ཁང་ཡང་མཐོང་ལ། ཚངས་པའི་འཇིག་རྟེན་ན་བདེ་བ་གང་ཡོད་པ་དེ་དག་ཀྱང་མྱོང་
བ་ཡིན། དེ་བཞིན་དུ་བྱང་ཆུབ་སེམས་དཔའ་འཁོར་ལོས་སྒྱུར་བའི་ས་གསེར་གྱི་དྲ་བས་དག་པ་ལ་གནས་པའི་གཙུག་གི་རིན་པོ་ཆེའི་འོད་ཀྱིས་སུ་ལ་ཕོག་པར་གྱུར་པ་དེ་དག་ས་བཅུ་འཐོབ་པར་འགྱུར་ཏེ། ཆོས་ཚད་མེད་པ་ལ་སྣང་བ་ཆེན་པོ་ཡང་རབ་ཏུ་འཐོབ་པར་
འགྱུར་རོ། །སྟོབས་རྣམ་པར་དག་པའི་ཏིང་ངེ་འཛིན་ཤིན་ཏུ་བསྒྲུབས་པའི་ཕྱིར་མིག་ཡོངས་སུ་སྦྱངས་པ་བཅུ་ཡང་རབ་ཏུ་འཐོབ་པར་འགྱུར་རོ། །གཞུང་དེ་བཞིན་དུ་ཡིད་ཡོངས་སུ་སྦྱངས་པ་བཅུ་ཡང་རབ་ཏུ་འཐོབ་སྟེ། ཤའི་མིག་རྣམ་པར་དག་པ་འདི་ལྟ་
སྟེ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་གི་རྡུལ་ཤིན་ཏུ་ཕྲ་བ་སྙེད་ཅིག་རྡུལ་ཤིན་ཏུ་ཕྲ་བར་བྱས་ཏེ། རྡུལ་ཤིན་ཏུ་ཕྲ་མོ་དེ་དག་བྱང་ཆུབ་སེམས་དཔའ་དེ་དག་གི་ལག་པ་གཡོན་པས་བླངས་ཏེ་ཁྱེར་ལ་དེ་སྙེད་ཀྱི་འཇིག་རྟེན་གྱི་
ཁམས་འདས་པ་དང་། རྡུལ་གཅིག་པོར་ཏེ། དེ་ལྟར་གཅིག་ནས་གཅིག་ཏུ་བཞག་པའི་ཚུལ་དང་། ཐབས་དེ་ལྟ་བུ་བགྲང་བའི་ཚུལ་གྱིས་ཤར་ཕྱོགས་སུ་རྡུལ་དེ་དག་ཐམས་ཅད་ཟད་པར་གྱུར་ལ་དེ་ལྟ་བུའི་ཚུལ་དུ་གང་དུ་བོར་བ་དང་། གང་དུ་མ་བོར་བའི་
འཇིག་རྟེན་གྱི་ཁམས་དེ་དག་ཐམས་ཅད་ཤིན་ཏུ་ཕྲ་བའི་རྡུལ་དུ་བླགས་ལ། དེ་ལྟར་མང་བའི་རྡུལ་ཤིན་ཏུ་ཕྲ་བ་དེ་དག་ཀྱང་ཁྱེར་ཏེ། ཤར་ཕྱོགས་ལོགས་སུ་འཇིག་རྟེན་གྱི་ཁམས་འདས་ནས། རྡུལ་ཤིན་ཏུ་ཕྲ་བ་གཅིག་བོར་ལ་ཚུལ་དེ་འདྲ་བར་ཕྱོགས་བཅུ་ཀུན་ཏུ་

རྡུལ་ཤིན་ཏུ་ཕྲ་བ་དེ་དག་ཟད་པར་གྱུར་ནས། །དེ་སྙེད་ཀྱི་འཇིག་རྟེན་དེ་དག་ཐམས་ཅད་གཅིག་ཏུ་བསྡོམས་ཏེ། སངས་རྒྱས་ཀྱི་ཞིང་གཅིག་གི་ཆུ་ཞེང་དུ་གྱུར་ན། ལག་ན་རིན་པོ་ཆེ་དེ་ལ་ཇི་སྙམ་དུ་སེམས། སངས་རྒྱས་
ཀྱི་ཞིང་དེ་ཆེ་ཞིང་ཚད་མེད་ལ་བསམ་གྱིས་མྱི་ཁྱབ་པ་ཡིན་ནམ། གསོལ་པ་བཅོམ་ལྡན་འདས་དེ་ནི་དེ་བཞིན་ཏེ། བཙུན་པ་བཅོམ་ལྡན་འདས་གང་གིས་དཔེ་བསྟན་པ་འདི་ཐོས་པར་གྱུར་ལ། ཐོས་ནས་ཀྱང་གློ་བ་ཆེས་ཤིང་
ངོ་མཚར་གྱི་འདུ་ཤེས་དང་། རྨད་ཀྱི་འདུ་ཤེས་བསྐྱེད་པ་མཆིས་ན། སེམས་ཅན་དེ་དག་ཀྱང་ངོ་མཚར་དང་ལྡན་པར་འགྱུར་རོ། །བཀའ་སྩལ་པ། ལག་ན་རིན་པོ་ཆེ་དེ་དེ་བཞིན་ནོ། །དེ་དེ་བཞིན་ཏེ། ལག་ན་རིན་པོ་ཆེ་ཁྱོད་ཀྱིས་ཇི་
སྐད་དུ་སྨྲས་པ་བཞིན་ནོ། །ལག་ན་རིན་པོ་ཆེ་རིགས་ཀྱི་བུ་དང་། རིགས་ཀྱི་བུ་མོ་དེ་དག་ནི། ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ལྟ་བུ་དག་ནི་སངས་རྒྱས་ཀྱི་ཡེ་ཤེས་ཐོབ་པར་གྱུར་ཏོ། །རེང་ངོ་། །
འགྱུར་རོ། །ལག་ན་རིན་པོ་ཆེ་འདི་ལྟ་སྟེ་དཔེར་ན། སངས་རྒྱས་ཀྱི་ཞིང་བྱེ་བ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་ཇི་སྙེད་པ་དེ་སྙེད་ཀྱི་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་དཔེར་རྣམ་པར་བཀོད་
པ་དེ་དག་ཐམས་ཅད་ཀྱང་རྡུལ་ཤིན་ཏུ་ཕྲ་བར་བླགས་ལ། སངས་རྒྱས་ཀྱི་ཞིང་རེ་རེ་ཞིང་ཡང་སངས་རྒྱས་ཀྱི་ཞིང་དེ་དག་ན། རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་སྙེད་ཀྱི་སངས་རྒྱས་ཀྱི་ཞིང་ཞིག་ཡོད་པར་གྱུར་ཏེ། ཞིང་དེ་དག་
ན་ཇི་ལྟ་བ་དེ་བཞིན་དུ་ཞིང་ཐམས་ཅད་ནའང་། དེ་སྙེད་ཅིག་ཡོད་པར་གྱུར་ལ་རྡུལ་དེ་དག་ཐམས་ཅད་ཀྱང་ཚུལ་དེ་བཞིན་དུ་བཀོད་དེ། རྣམ་གྲངས་འདི་འདྲ་བར་རྡུལ་ཤིན་ཏུ་ཕྲ་བར་བཀོད་པའི་ཚུལ་གྱིས་ལན་བརྒྱད་ཅུར་

བསྒྲེས་ཏེ། རྡུལ་གྱི་འབྲུ་རེ་རེ་ལ་ཡང་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འབྲས་བུ་མངོན་པར་གྲུབ་པར་གྱུར་ཀྱང་། དེ་དག་ཐམས་ཅད་བྱང་ཆུབ་སེམས་དཔའི་ཤའི་མིག་གིས་བསྒྲིབས་པ་མེད་པར་མཐོང་སྟེ། ལག་ན་རིན་པོ་
ཆེ་བྱང་ཆུབ་སེམས་དཔའི་ཤའི་མིག་ལས་ཀྱི་རྣམ་པར་སྨིན་པས་ཡོངས་སུ་གྲུབ་པ་དེས་ནི། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱའི་རྡུལ་ཤིན་ཏུ་ཕྲ་བ་སྙེད་ཀྱི་དེ་བཞིན་གཤེགས་པ་སེམས་སྐད་ཅིག་གིས་མཐོང་སྟེ། དེ་ནི་འཇིག་རྟེན་གྱི་ཁམས་བཅུའི་རྡུལ་
ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་ལ་དབང་བསྒྱུར་ཞིང་། འཁོར་ལོས་སྒྱུར་བའི་རྒྱལ་པོའི་ས་གསེར་གྱི་དྲ་བས་དག་པ་ཐོབ་པའི་བསོད་ནམས་རྣམ་པར་སྨིན་པ་དང་། དགེ་བའི་རྩ་བ་དང་། ཏིང་ངེ་འཛིན་གྱིས་ཡོངས་སུ་གྲུབ་པའི་ཤེལ་གྱི་མེ་ལོང་
སྒྲོན་མ་ཞེས་བྱ་བ་མདོག་དག་སྟེ་བཟང་ཞིང་གསལ་བ་བཞིན་ནོ། །ཤིན་ཏུ་རྒྱས་པ་ཆེན་པོའི་མདོ་སངས་རྒྱས་ཕལ་པོ་ཆེ་ཞེས་བྱ་བ་ལས། དཔེ་བྱད་བཟང་པོའི་འོད་ཟེར་བསྟན་པའི་ལེའུ་སྟེ་བཞི་བཅུ་གཅིག་པའོ།། །།སངས་རྒྱས་རྨད་
གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་བདུན་པ། དེ་ནས་ཡང་བྱང་ཆུབ་སེམས་དཔའ་ཀུན་ཏུ་བཟང་པོས། བྱང་ཆུབ་སེམས་དཔའ་དེ་དག་ལ་སྨྲས་པ། ཀྱེ་རྒྱལ་བའི་སྲས་དག་དེ་ནི་སེམས་ཅན་གྱི་སྣོད་ཇི་ལྟ་བ་བཞིན་དུ་ཡང་
དག་པར་རྫོགས་པའི་སངས་རྒྱས་ལ་དམིགས་ཏེ་རྡུལ་ཙམ་ཞིག་བརྗོད་དུ་ཟད་དོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དག་སེམས་ཅན་མི་མཁས་པ་འགྱོད་པས་ཀུན་ནས་ནོན་པ། བདག་དང་བདག་གིར་བྱ་བ་ལ་མངོན་པར་ཞེན་པ། འཇིག་ཚོགས་
ལ་ཤིན་ཏུ་ཆགས་པ། ཕྱིན་ཅི་ལོག་ལ་རབ་ཏུ་རྟེན་པ། ཐེ་ཚོམ་ལ་རབ་ཏུ་གཞོལ་བ། ལོག་པར་ལྟ་བ་ཡོངས་སུ་རྟོག་པས་བྱུང་བ། རྨོངས་པས་བསྒྲུབས་པ། འཁོར་བའི་རྒྱུད་དུ་གཞོལ་བ། དེ་བཞིན་གཤེགས་པའི་ལམ་དང་མི་ལྡན་པ་རྣམས་ཀྱི་དོན་དུ། །

སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་ངོ་། །ཀྱེ་རྒྱལ་བའི་སྲས་དག་འདི་ལྟ་སྟེ། བྱང་ཆུབ་སེམས་དཔའ་གཞན་ལ་ཞེ་སྡང་བ་སྐྱེད་པ་ཙམ་དུ་ཁ་ན་མ་ཐོ་བ་ཆེ་བའི་ཆོས་ནི་འགའ་ཙམ་ཡང་བདག་གིས་མ་མཐོང་སྟེ། དེ་ཅིའི་ཕྱིར་ཞེ་ན། ཀྱེ་
རྒྱལ་བའི་སྲས་དག་གཞན་ལ་ཁོང་ཁྲོ་བ་བསྐྱེད་པའི་བྱང་ཆུབ་སེམས་དཔའ་ནི་བསྒྲིབས་པའི་ཆོས་ཀྱི་སྒོ་བརྒྱ་སྟོང་ཕྲག་བཅུ་པོ་འདི་དག་ཡོངས་སུ་འཛིན་པར་འགྱུར་ཏེ། བརྒྱ་སྟོང་ཕྲག་བཅུ་གང་ཞེ་ན་འདི་ལྟ་སྟེ། བྱང་ཆུབ་སེམས་དཔའ་མི་མཐོང་བ་འཛིན་པར་
འགྱུར་རོ། །ཆོས་མི་ཐོས་པ་འཛིན་པར་འགྱུར་རོ། །འཇིག་རྟེན་གྱི་ཁམས་ཀུན་ནས་ཉོན་མོངས་པར་སྐྱེ་བ་འཛིན་པར་འགྱུར་རོ། །ངན་སོང་དུ་གནས་པ་འཛིན་པར་འགྱུར་རོ། །མི་ཁོམ་པར་སྐྱེ་བ་འཛིན་པར་འགྱུར་རོ། །ནད་མང་བ་འཛིན་
པར་འགྱུར་རོ། །སྐུར་བ་མང་བར་འཛིན་པར་འགྱུར་རོ། །དང་ཚུལ་མི་གསལ་བ་འཛིན་པར་འགྱུར་རོ། །བརྗེད་ངས་པ་འཛིན་པར་འགྱུར་རོ། །བློ་ཆུང་བ་འཛིན་པར་འགྱུར་རོ། །མིག་གི་བསྒྲིབས་པ་འཛིན་པར་འགྱུར་རོ། །རྣ་བའི་བསྒྲིབས་པ་
འཛིན་པར་འགྱུར་རོ། །སྣའི་བསྒྲིབས་པ་འཛིན་པར་འགྱུར་རོ། །ལྕེའི་བསྒྲིབས་པ་འཛིན་པར་འགྱུར་རོ། །ལུས་ཀྱི་བསྒྲིབས་པ་འཛིན་པར་འགྱུར་རོ། །ཡིད་ཀྱི་བསྒྲིབས་པ་འཛིན་པར་འགྱུར་རོ། །སྡིག་པའི་བཤེས་གཉེན་འཛིན་པར་འགྱུར་རོ། །སྡིག་པའི་
གྲོགས་པོ་འཛིན་པར་འགྱུར་རོ། །ཐེག་པ་དམའ་བ་དང་འདྲེ་བ་འཛིན་པར་འགྱུར་རོ། །སྐྱེ་བོ་མ་རབས་དང་ཕྲད་པ་འཛིན་པར་འགྱུར་རོ། །བདག་ཉིད་ཆེ་བའི་སྐྱེ་བོ་ལ་མོས་པ་མེད་པ་འཛིན་པར་འགྱུར་རོ། །ཡང་དག་པའི་ལྟ་བ་མི་མཐོང་མི་
རྙེད་པ་འཛིན་པར་འགྱུར་རོ། །མུ་སྟེགས་ཅན་གཞན་གྱི་ནང་དུ་སྐྱེ་བ་འཛིན་པར་འགྱུར་རོ། །བདུད་ཀྱི་ཡུལ་དང་བསྟན་པ་འཛིན་པར་འགྱུར་རོ། །སངས་རྒྱས་ཀྱི་བསྟན་པ་དང་རིང་དུ་འགྱུར་བ་འཛིན་པར་འགྱུར་རོ། །དགེ་བའི་བཤེས་གཉེན་མྱི་

མཐོང་བ་འཛིན་པར་འགྱུར་རོ། །དགེ་བའི་རྩ་བའི་བར་ཆད་དུ་འགྱུར་བ་འཛིན་པར་འགྱུར་རོ། །མི་དགེ་བའི་ཆོས་རྣམ་པར་འཕེལ་བ་འཛིན་པར་འགྱུར་རོ། །སྐྱེ་མཆེད་དམའ་བ་འཐོབ་པ་འཛིན་པར་འགྱུར་རོ། །མཐའ་འཁོབ་ཀྱི་
ཡུལ་དུ་གནས་པ་འཛིན་པར་འགྱུར་རོ། །མིའི་ནང་ན་རྐུ་ལྔོ་བྱེད་པར་སྐྱེ་བ་འཛིན་པར་འགྱུར་རོ། །ལྷའི་ནང་ན་མི་བསྲུན་པར་སྐྱེ་བ་འཛིན་པར་འགྱུར་རོ། །ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་། མིའམ་ཅི་དང་ལྟོ་འཕྱེ་ཆེན་པོ་དང་། སྲིན་པོ་མི་
བསྲུན་པར་སྐྱེ་བ་འཛིན་པར་འགྱུར་རོ། །སངས་རྒྱས་ཀྱི་ཆོས་ལ་དད་པ་མེད་པ་འཛིན་པར་འགྱུར་རོ། །བྱིས་པའི་ཆོས་ལ་སྟེན་པ་འཛིན་པར་འགྱུར་རོ། །ཐེག་པ་དམའ་བ་ལ་མོས་པ་འཛིན་པར་འགྱུར་རོ། །ཐེག་པ་ཆེན་པོ་ལ་ཡིད་མི་ཆེས་པ་འཛིན་པར་འགྱུར་རོ། །
བསྐལ་པར་གནས་པས་འཇིག་པ་མང་བ་འཛིན་པར་འགྱུར་རོ། །འཁོར་བས་སྐྱོ་བ་འཛིན་པར་འགྱུར་རོ། །དེ་བཞིན་གཤེགས་པའི་ཆོས་ལ་སྤོང་བ་འཛིན་པར་འགྱུར་རོ། །སངས་རྒྱས་ཀྱི་རྣམ་པར་འཕྲུལ་པ་ཡོངས་སུ་མི་འཛིན་པ་འཛིན་པར་འགྱུར་རོ། །
བྱང་ཆུབ་སེམས་དཔའི་དབང་པོ་ལ་དགའ་བ་མེད་པ་འཛིན་པར་འགྱུར་རོ། །བྱང་ཆུབ་སེམས་དཔའ་དང་སྤྱོད་པ་ལ་ཐུན་མོང་དུ་སྤྱད་པ་མི་འཐོབ་པ་འཛིན་པར་འགྱུར་རོ། །བྱང་ཆུབ་སེམས་དཔའི་བསམ་པ་ཡོངས་སུ་མ་དག་པ་འཛིན་པར་འགྱུར་རོ། །བྱང་ཆུབ་སེམས་
དཔའི་ལྷག་པའི་བསམ་པ་ཞུམ་ཞིང་དམའ་བ་འཛིན་པར་འགྱུར་རོ། །ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཡོངས་སུ་མི་འདུས་པ་འཛིན་པར་འགྱུར་རོ། །ཡོངས་སུ་སྒྱིད་ལུག་པས་རབ་ཏུ་ཞིག་པ་འཛིན་པར་འགྱུར་རོ། །ལས་ཀུན་ནས་ཉོན་མོངས་པ་
འཛིན་པར་འགྱུར་རོ། །རྣམ་པར་སྨིན་པ་མ་དག་པ་འཛིན་པར་འགྱུར་རོ། །ཡེ་ཤེས་ཀྱི་སྟོབས་བདག་ཉིད་ཆེ་བ་མ་ཡིན་པ་འཛིན་པར་འགྱུར་རོ། །ཡེ་ཤེས་ཀྱི་རྒྱུད་བྱང་བར་མི་ནུས་པ་འཛིན་པར་འགྱུར་རོ། །བྱང་ཆུབ་སེམས་དཔའི་སྤྱོད་པ་རྒྱུན་ཆད་

པ་འཛིན་པར་འགྱུར་རོ། །ཐམས་ཅད་མཁྱེན་པའི་གདམས་ངག་ཡོངས་སུ་མི་ཟིན་པ་འཛིན་པར་འགྱུར་རོ། །སངས་རྒྱས་ཀྱི་བྱང་ཆུབ་ཏུ་འགྲུབ་པར་མི་འགྱུར་བ་འཛིན་པར་འགྱུར་རོ། །དེ་བཞིན་གཤེགས་པའི་ཡུལ་དང་རིང་བ་འཛིན་པར་འགྱུར་རོ། །
བདུད་ཀྱི་ཡུལ་ལ་གནས་པ་འཛིན་པར་འགྱུར་རོ། །དེ་བཞིན་གཤེགས་པའི་ཡུལ་ལ་མི་གནས་པ་འཛིན་པར་འགྱུར་རོ། །བྱང་ཆུབ་སེམས་དཔའི་གོ་ཅ་ལ་མོས་པ་མྱེད་པ་འཛིན་པར་འགྱུར་རོ། །བྱང་ཆུབ་སེམས་དཔའི་གནས་ཀྱིས་འཇིགས་པ་འཛིན་པར་
འགྱུར་རོ། །བྱང་ཆུབ་སེམས་དཔའི་དགེ་བའི་ལས་ཀྱིས་སྐྱོ་བ་འཛིན་པར་འགྱུར་རོ། །ལྟ་བ་དང་ཐེ་ཙོམ་ལ་མངོན་པར་ཞེན་པ་འཛིན་པར་འགྱུར་རོ། །སེམས་ཡོངས་སུ་རྨོངས་པས་བསྒྲིབས་པ་འཛིན་པར་འགྱུར་རོ། །བྱང་ཆུབ་སེམས་དཔའ་དང་འགྲོགས་
པའི་ལས་དྲུངས་ཕྱུང་བ་འཛིན་པར་འགྱུར་རོ། །དེ་བཞིན་གཤེགས་པའི་ཚུལ་ཁྲིམས་ཉམས་པར་གྱུར་པས། ཚུལ་ཁྲིམས་ངན་པ་འཛིན་པར་འགྱུར་རོ། །བཟོད་པའི་སྒོའི་མཐར་མ་ཕྱིན་པས་གནོད་སེམས་དང་གཏི་མུག་དང་ཁྲོ་བ་འཛིན་པར་འགྱུར་རོ། །
བྱང་ཆུབ་སེམས་དཔའི་བརྩོན་འགྲུས་ཆེན་པོ་ལས་མི་ལྡོག་པར་བྱ་བ་ལ་ཞུམ་པ་འཛིན་པར་འགྱུར་རོ། །ཏིང་ངེ་འཛིན་མི་འཐོབ་པའི་འཁྲུག་པ་འཛིན་པར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་དང་མི་མཐུན་པའི་ཕྱོགས་ཤེས་རབ་འཆལ་པ་འཛིན་པར་འགྱུར་རོ། །གནས་
དང་གནས་མ་ཡིན་པ་ལ་མི་མཁས་པ་འཛིན་པར་འགྱུར་རོ། །སེམས་ཅན་གྱི་ཐབས་ལ་ཐབས་མི་མཁས་པ་འཛིན་པར་འགྱུར་རོ། །བྱང་ཆུབ་སེམས་དཔའི་ཡེ་ཤེས་ལ་རྣམ་པར་མི་དཔྱོད་པ་འཛིན་པར་འགྱུར་རོ། །བྱང་ཆུབ་སེམས་དཔའི་ཆོས་ཀྱིས་འབྱུང་བ་ཁོང་
དུ་མི་ཆུད་པར་འཛིན་པར་འགྱུར་རོ། །བྱང་ཆུབ་སེམས་དཔའ་མིག་འབྱམ་ཀླས་པ་བཅུ་མི་འགྲུབ་པའི་དམུས་ལོང་ལྟ་བུ་འཛིན་པར་འགྱུར་རོ། །བསྒྲིབས་པ་མེད་པའི་ཆོས་ཀྱི་རྒྱུད་མངོན་པར་བསྒྲུབ་པ་ལ་གླེན་ཞིང་ལྐུགས་པ་འཛིན་པར་འགྱུར་རོ། །དབང་པོ་གཞན་དང་

ནོར་བའི་དབང་པོ་འཛིན་པས་སྣ་ཡོངས་སུ་ཉམས་པ་འཛིན་པར་འགྱུར་རོ། །སེམས་ཅན་ཕ་རོལ་གྱི་ཚིག་གི་རྒྱུད་མི་ཤེས་པས་ལྕེའི་བསྒྲིབས་པ་འཛིན་པར་འགྱུར་རོ། །སེམས་ཅན་གང་ཟག་ཕ་རོལ་ལ་ཞེ་སྡང་བས་ལས་ཀྱི་བསྒྲིབས་པ་འཛིན་པར་འགྱུར་རོ་
སྨྱོས་པའི་སེམས་འཐོབ་པར་འགྱུར་བས་སེམས་ཀྱི་བསྒྲིབས་པ་འཛིན་པར་འགྱུར་རོ། །སྡོམ་པ་གསུམ་དང་མི་ལྡན་པས་ལས་ཀྱི་བསྒྲིབས་པ་འཛིན་པར་འགྱུར་རོ། །ངག་གི་ཉེས་པ་བཞིས་ཀུན་ནས་ཉོན་མོངས་པས་སྐྱེ་མཆེད་ཀྱི་བསྒྲིབས་པ་འཛིན་པར་འགྱུར་རོ། །ཆགས་
སེམས་དང་གནོད་སེམས་དང་ལོག་པར་ལྟ་བ་མང་བས་ཡིད་ཀྱི་ལས་ཀྱི་བསྒྲིབས་པ་འཛིན་པར་འགྱུར་རོ། །ཆོས་ཡོངས་སུ་བཙལ་བ་ལ་རྐུ་སེམས་འཛིན་པར་འགྱུར་རོ། །བྱང་ཆུབ་སེམས་དཔའི་དམིགས་པ་ལ་ཐོགས་པ་འཛིན་པར་འགྱུར་རོ། །བྱང་ཆུབ་སེམས་དཔའི་
མཐུ་ལ་ཤིན་ཏུ་ཞུམ་པ་འཛིན་པར་འགྱུར་རོ། །བྱང་ཆུབ་སེམས་དཔའི་སྐྱོན་མེད་པ་ལ་སྒྱིད་ལུག་པ་འཛིན་པར་འགྱུར་རོ། །བྱང་ཆུབ་སེམས་དཔའི་ཡེ་ཤེས་ཀྱི་སྒོ་སྣང་བ་རྒྱུན་འཆད་པ་འཛིན་པར་འགྱུར་རོ། །དྲན་པའི་སྟོབས་དང་། ཤུགས་ཉམ་ཆུང་བ་འཛིན་
པར་འགྱུར་རོ། །དེ་བཞིན་གཤེགས་པའི་བསྟན་པ་ཡོངས་སུ་མི་འཛིན་པ་འཛིན་པར་འགྱུར་རོ། །བྱང་ཆུབ་སེམས་དཔའི་སྐྱོན་མེད་པའི་གནས་རྣམ་པར་སྤོང་བ་འཛིན་པར་འགྱུར་རོ། །བྱང་ཆུབ་སེམས་དཔའི་ཆུད་མི་ཟ་བའི་གནས་ལ་མི་སྟེན་པ་འཛིན་པར་འགྱུར་
རོ། །ཉན་ཐོས་དང་རང་སངས་རྒྱས་ཀྱི་སྐྱོན་མེད་པ་ཡིད་ཀྱིས་མཆོད་པ་འཛིན་པར་འགྱུར་རོ། །འདས་པ་དང་མ་འོངས་པ་དང་ད་ལྟར་བྱུང་བའི་བྱང་ཆུབ་སེམས་དཔའི་ཚུལ་དང་། དེ་བཞིན་གཤེགས་པའི་རིགས་དང་རིང་བ་འཛིན་པར་འགྱུར་རོ། །ཀྱེ་རྒྱལ་བའི་སྲས་
དག་དེ་ལྟར་བྱང་ཆུབ་སེམས་དཔའ་གཅིག་ལ་གཅིག་ངན་སེམས་བསྐྱེད་པ་ནི་དེ་དག་ལ་སོགས་པ་བསྒྲིབས་པའི་ཆོས་ཀྱི་སྒོ་བརྒྱ་སྟོང་ཕྲག་བཅུ་རྣམས་འཛིན་པར་འགྱུར་རོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་ཐེག་པ་ལ་ཞུགས་པ་རྣམས་

ནི་ཕན་ཚུན་དུ་ངན་སེམས་ཀྱི་སེམས་བསྐྱེད་པ་ལྟ་བུར་ཁ་ན་མ་ཐོ་བ་ཆེ་བའི་ཆོས་འགའ་ཙམ་ཡང་མ་མཐོང་ངོ་། །དེ་བས་ན་རྒྱལ་བའི་སྲས་དག་བྱང་ཆུབ་སེམས་དཔའི་སྤྱོད་པ་མྱུར་དུ་རྫོགས་པར་བྱ་བར་འདོད་པའི་བྱང་ཆུབ་སེམས་དཔའ་ཆོས་བཅུ་ལ་བརྩོན་པར་བྱའོ།། །།
བཅུ་གང་ཞེ་ན། སེམས་ཅན་ཐམས་ཅད་ཡོངས་སུ་མི་གཏོང་བ་དང་། བྱང་ཆུབ་སེམས་དཔའ་ཐམས་ཅད་ལ་སྟོན་པའི་སེམས་སུ་བྱ་བ་དང་། སངས་རྒྱས་ཀྱི་ཆོས་ཐམས་ཅད་མི་སྤང་བ་དང་། ཞིང་ཐམས་ཅད་ལ་མི་ཟད་པའི་ཡེ་ཤེས་ཀྱིས་འཇུག་པ་དང་། བྱང་
ཆུབ་སེམས་དཔའི་སྤྱོད་པ་ཐམས་ཅད་ལ་མོས་པ་དང་དད་པ་ཆེ་བ་དང་། ནམ་མཁའི་དབྱིངས་ཀྱིས་ཀླས་པའི་ཆོས་ཀྱི་དབྱིངས་མཉམ་པ་ཉིད་རྣམ་པར་བསྒོམ་པའི་བྱང་ཆུབ་ཀྱི་སེམས་མི་གཏང་བ་དང་། དེ་བཞིན་གཤེགས་པའི་སྟོབས་ལ་འཇུག་པས། སངས་རྒྱས་
ཀྱི་བྱང་ཆུབ་ལ་རྣམ་པར་དཔྱད་པ་དང་། སོ་སོ་ཡང་དག་པར་རིག་པ་ལ་བརྩོན་པར་བྱ་བ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བས་ཡོངས་སུ་མི་སྐྱོ་བ་དང་། འཇིག་རྟེན་གྱི་ཁམས་ཐམས་ཅད་དུ་གནས་པ་ལ་མངོན་པར་ཆགས་པ་མེད་པ་སྟེ། ཀྱེ་
རྒྱལ་བའི་སྲས་དག་བྱང་ཆུབ་སེམས་དཔས་ཆོས་བཅུ་པོ་དེ་དག་ལ་མངོན་པར་བརྩོན་པར་བྱའོ། །དེ་ཆོས་བཅུ་པོ་དེ་དག་ལ་གནས་པས་རྣམ་པར་དག་པར་བྱེད་པའི་ཆོས་བཅུ་རབ་ཏུ་འཐོབ་སྟེ། བཅུ་གང་ཞེ་ན་འདི་ལྟ་སྟེ། ཆོས་ཟབ་མོ་ལ་འཇུག་པ་རྣམ་པར་དག་པ་དང་། དགེ་
བའི་བཤེས་གཉེན་དང་། འགྲོགས་པ་རྣམ་པར་དག་པ་དང་། སངས་རྒྱས་ཀྱི་བསྟན་པ་ཡོངས་སུ་བཟུང་བ་རྣམ་པར་དག་པ་དང་། ནམ་མཁའི་དབྱིངས་རྣམ་པར་བསྒོམ་པ་རྣམ་པར་དག་པ་དང་། ཆོས་ཀྱི་དབྱིངས་ལ་འཇུག་པ་རྣམ་པར་དག་པ་དང་། མཐའ་
དང་དབུས་མེད་པའི་སེམས་རྣམ་པར་དཔྱད་པ་རྣམ་པར་དག་པ་དང་། བྱང་ཆུབ་སེམས་དཔའ་ཐམས་ཅད་ཀྱིས་གྲོགས་བྱ་བའི་དགེ་བའི་རྩ་བ་རྣམ་པར་དག་པ་དང་། བསྐལ་པ་ཐམས་ཅད་ལ་མངོན་པར་ཆགས་པ་མེད་པ་རྣམ་པར་དག་པ་དང་། དུས་གསུམ་

ཐམས་ཅད་རབ་ཏུ་བརྟག་པ་རྣམ་པར་དག་པ་དང་། སངས་རྒྱས་ཐམས་ཅད་ཀྱི་རིགས་སུ་ནན་ཏན་ཏུ་བྱ་བ་རྣམ་པར་དག་པ་སྟེ། རྣམ་པར་དག་པར་བྱེད་པའི་ཆོས་བཅུ་པོ་དེ་དག་རབ་ཏུ་འཛིན་ཏོ། །དེ་དེ་ལྟ་བུའི་ཆོས་བཅུ་པོ་དེ་དག་ལ་
གནས་པས་ཡེ་ཤེས་འབྱམ་ཀླས་པ་བཅུ་ལ་འཇུག་པར་འགྱུར་ཏེ། བཅུ་གང་ཞེ་ན། འདི་ལྟར་སེམས་ཅན་ཐམས་ཅད་ཀྱི་སེམས་དང་སྤྱོད་པ་ལ་འཇུག་པ་དང་། འགྲོ་བ་ཐམས་ཅད་ཀྱི་ལས་ཀྱི་རྣམ་པར་སྨིན་པ་རབ་ཏུ་ཕྱེ་བ་ལ་འཇུག་པ་དང་། སངས་རྒྱས་ཀྱི་
ཆོས་ཐམས་ཅད་ལ་ཡེ་ཤེས་སྣང་བས་འཇུག་པ་དང་། སངས་རྒྱས་ཀྱི་ཆོས་ཀྱི་ཚུལ་དང་ལྡེམ་པོ་དག་ལ་ཡེ་ཤེས་ཀྱིས་འཇུག་པ་དང་། གཟུངས་ཀྱི་སྒོ་ཐམས་ཅད་ལ་ཡེ་ཤེས་ཀྱིས་འཇུག་པ་དང་། ཡི་གེ་ཐམས་ཅད་ལ་སྤོབས་པའི་ཡེ་ཤེས་ཀྱིས་འཇུག་
པ་དང་། སེམས་ཅན་ཐམས་ཅད་ཀྱི་སྐད་དང་ཐ་སྙད་དང་། ཚིག་ལ་མཁས་པའི་ཡེ་ཤེས་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་དུ་ལུས་བསྟན་པའི་ཡེ་ཤེས་ལ་འཇུག་པ་དང་། འཁོར་གྱི་དཀྱིལ་འཁོར་ཐམས་ཅད་དུ་གཟུགས་བརྙན་འབྱུང་
བ་བསྟན་པའི་ཡེ་ཤེས་ལ་འཇུག་པ་དང་། སྐྱེ་མཆེད་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་ལ་འཇུག་པ་སྟེ། ཡེ་ཤེས་འབྱམ་ཀླས་པ་བཅུ་པོ་དེ་དག་རབ་ཏུ་འཛིན་ཏོ། །དེ་དེ་ལྟར་ཡེ་ཤེས་འབྱམ་ཀླས་པ་བཅུ་ལ་རབ་ཏུ་གནས་པས་ཡང་དག་པར་
གཟུད་པ་ལ་འཇུག་པ་བཅུ་འཐོབ་སྟེ། བཅུ་གང་ཞེ་ན། འདི་ལྟར་འཇིག་རྟེན་གྱི་ཁམས་ཐམས་ཅད་སྐྲའི་སྦུབས་སུ་གཟུང་པ་ལ་འཇུག་ཅིང་། སྐྲའི་སྦུབས་གཅིག་འཇིག་རྟེན་གྱི་ཁམས་བསམ་གྱིས་མི་ཁྱབ་པར་མངོན་པར་བསྒྲུབ་པ་ལ་འཇུག་པ་དང་། སེམས་
ཅན་ཐམས་ཅད་ཀྱི་ལུས་སེམས་ཅན་གཅིག་གི་ལུས་སུ་བསྡུ་ཞིང་སེམས་ཅན་གཅིག་གི་ལུས་བརྗོད་དུ་མེད་པའི་ལུས་སུ་མངོན་པར་བསྒྲུབ་པ་ལ་འཇུག་པ་དང་། བསྐལ་པ་བརྗོད་དུ་མྱེད་པ་སེམས་ཀྱི་སྐད་ཅིག་དུ་གཟུང་པ་ལ་འཇུག་ཅིང་སེམས་ཀྱི་སྐད་ཅིག་བརྗོད་

དུ་མེད་པའི་བསྐལ་པར་འཇུག་པ་བསྟན་པ་དང་། ཆོས་གཅིག་སངས་རྒྱས་ཀྱི་ཆོས་ཐམས་ཅད་དུ་ཡང་དག་པར་གཞོལ་བ་ལ་འཇུག་ཅིང་། སངས་རྒྱས་ཀྱི་ཆོས་ཐམས་ཅད་ཆོས་གཅིག་ཏུ་གཟུང་པ་ལ་འཇུག་པ་དང་། སྐྱེ་མཆེད་གཅིག་བརྗོད་དུ་མེད་པའི་སྐྱེ་
མཆེད་དུ་བྱས་ཏེ། བརྗོད་དུ་མེད་པའི་སྐྱེ་མཆེད་དུ་བྱ་བ་ལ་འཇུག་ཅིང་། སྐྱེ་མཆེད་བརྗོད་དུ་མེད་པ་སྐྱེ་མཆེད་གཅིག་ཏུ་བསྟན་པ་ལ་འཇུག་པ་དང་། དབང་པོ་གཅིག་བརྗོད་དུ་མེད་པའི་དབང་པོར་བྱ་བ་ལ་འཇུག་ཅིང་། དབང་པོ་བརྗོད་དུ་མེད་པ་དབང་
པོ་གཅིག་ཏུ་གཟུང་པ་ལ་འཇུག་པ་དང་། དབང་པོ་ཐམས་ཅད་དབང་པོ་མེད་པ་དང་། ཐ་མི་དད་པར་འཇུག་ཅིང་དབང་པོ་མེད་པ་དང་དབང་པོར་བྱ་བ་ལ་འཇུག་པ་དང་། འདུ་ཤེས་ཐམས་ཅད་འདུ་ཤེས་གཅིག་ཏུ་བྱིན་གྱིས་བརླབ་པ་ལ་འཇུག་ཅིང་། འདུ་ཤེས་གཅིག་འདུ་ཤེས་ཐམས་
ཅད་དུ་བྱིན་གྱིས་བརླབ་པ་ལ་འཇུག་པ་དང་། ཚིག་གཅིག་རྣམ་པར་བརྗོད་པ་ཚིག་བརྗོད་དུ་མེད་པ་རྣམ་པར་བརྗོད་པར་བྱ་བ་ལ་འཇུག་ཅིང་ཚིག་རྣམ་པར་བརྗོད་པ་ཐམས་ཅད་སྒྲ་གཅིག་གི་དབྱངས་སུ་བྱིན་གྱིས་བརླབ་པ་ལ་འཇུག་པ་དང་། དུས་གསུམ་
ཐམས་ཅད་བསམ་གཏན་གཅིག་ཏུ་བསྡུས་ཏེ། བསམ་གཏན་གཅིག་པོ་དུས་ཐམས་ཅད་དུ་ཀུན་ཏུ་སྤྲོ་བར་བསྟན་པ་ལ་འཇུག་པ་སྟེ། ཀྱེ་རྒྱལ་བའི་སྲས་དག་ཡང་དག་པར་གཟུང་པ་བཅུ་པོ་དེ་དག་སེམས་ཀྱི་བསམ་པ་བཅུ་ལ་གནས་ཏེ། རྣམ་པར་དཔྱད་
པར་བྱའོ། །བཅུ་གང་ཞེ་ན། འཇིག་རྟེན་གྱི་ཁམས་ཐམས་ཅད་ཀྱི་སྤྱོད་པ་ལ་མི་སྤྱོད་པའི་སེམས་ཀྱི་བསམ་པ་ལ་གནས་པ་དང་། འགྲོ་བ་ཐམས་ཅད་ཀྱི་འདུ་ཤེས་དང་། ཡིད་ལ་བྱེད་པ་ལ་མི་གནས་པའི་སེམས་ཀྱི་བསམ་པ་ལ་གནས་པ་དང་། ལྷག་
པའི་བསམ་པ་ནམ་མཁའི་དབྱིངས་ཀྱིས་ཀླས་པའི་སེམས་ཀྱི་བསམ་པ་ལ་གནས་པ་དང་། ཆོས་ཀྱི་དབྱིངས་མཐའ་དང་དབུས་མེད་པའི་སེམས་ཀྱི་བསམ་པ་ལ་གནས་པ་དང་། སངས་རྒྱས་ཐམས་ཅད་ཀྱི་དགོངས་པ་ལ་མཁས་པའི་སེམས་ཀྱི་བསམ་པ་ལ་

གནས་པ་དང་། ཆོས་ཟབ་མོ་ཐ་མི་དད་པ་ལ་མཁས་པའི་སེམས་ཀྱི་བསམ་པ་ལ་གནས་པ་དང་། དོགས་པ་ཐམས་ཅད་ལན་མེད་པར་བྱ་བའི་སེམས་ཀྱི་བསམ་པ་ལ་གནས་པ་དང་། དུས་ཐམས་ཅད་ཐ་མི་དད་ཅིང་
མཉམ་པའི་སེམས་ཀྱི་བསམ་པ་ལ་གནས་པ་དང་། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་མཉམ་པ་ཉིད་ཀྱི་སེམས་ཀྱི་བསམ་པ་ལ་གནས་པ་དང་། སངས་རྒྱས་ཐམས་ཅད་ཀྱི་སྟོབས་ཚད་མེད་པའི་སེམས་
ཀྱི་བསམ་པ་ལ་གནས་པ་སྟེ། ཀྱེ་རྒྱལ་བའི་སྲས་དག །སེམས་ཀྱི་བསམ་པ་བཅུ་པོ་དེ་དག་ལ་གནས་ཏེ། བྱང་ཆུབ་སེམས་དཔས་ཡང་དག་པར་གཟུད་པ་བཅུ་པོ་དེ་དག་རྣམ་པར་དཔྱད་པར་བྱའོ། །དེ་སེམས་ཀྱི་བསམ་པ་བཅུ་པོ་དེ་དག་
ལ་གནས་པས་སངས་རྒྱས་ཀྱི་ཆོས་ལ་མཁས་པའི་སྣང་བ་བཅུ་འཐོབ་བོ། །བཅུ་གང་ཞེ་ན་འདི་ལྟ་སྟེ། སངས་རྒྱས་ཀྱི་ཆོས་ཟབ་མོ་སྣང་བ་ལ་མཁས་པ་རབ་ཏུ་འཐོབ་བོ། །སངས་རྒྱས་ཀྱི་ཆོས་ཡངས་པ་མངོན་པར་བསྒྲུབ་པ་ལ་མཁས་པ་རབ་
ཏུ་འཐོབ་བོ། །སངས་རྒྱས་ཀྱི་ཆོས་སྣ་ཚོགས་ཤིན་ཏུ་བསྟན་པ་ལ་མཁས་པ་རབ་ཏུ་འཐོབ་བོ། །སངས་རྒྱས་ཀྱི་ཆོས་མཉམ་པ་ཉིད་ལ་འཇུག་པ་ལ་མཁས་པ་རབ་ཏུ་འཐོབ་བོ། །སངས་རྒྱས་ཀྱི་ཆོས་ཐ་དད་པའི་སྣང་བ་ལ་འཇུག་པར་
མཁས་པ་རབ་ཏུ་འཐོབ་བོ། །སངས་རྒྱས་ཀྱི་ཆོས་ཐ་མི་དད་པ་ལ་འཇུག་པར་མཁས་པ་རབ་ཏུ་འཐོབ་བོ། །སངས་རྒྱས་ཀྱི་ཆོས་ཀྱི་རྒྱན་ལ་འཇུག་པར་མཁས་པ་རབ་ཏུ་འཐོབ་བོ། །སངས་རྒྱས་ཀྱི་ཚུལ་གཅིག་པའི་མོས་པ་ལ་འཇུག་
པར་མཁས་པ་རབ་ཏུ་འཐོབ་བོ། །སངས་རྒྱས་ཀྱི་ཆོས་མཐའ་ཡས་པའི་ཚུལ་ལ་འཇུག་པར་མཁས་པ་རབ་ཏུ་འཐོབ་བོ། །སངས་རྒྱས་ཀྱི་ཆོས་ཐམས་ཅད་རང་གི་སེམས་ལ་རག་ལུས་པས་རང་གི་སྟོབས་དང་མཐུ་ཕྱིར་མི་ལྡོག་པ་ལ་མཁས་པ་རབ་ཏུ་འཐོབ་

སྟེ། ཀྱེ་རྒྱལ་བའི་སྲས་དག་སངས་རྒྱས་ཀྱི་ཆོས་ལ་མཁས་པའི་སྣང་བ་བཅུ་པོ་དེ་དག་རབ་ཏུ་འཐོབ་བོ། །ཀྱེ་རྒྱལ་བའི་སྲས་དག་དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་དེ་དག་ཐོས་ནས་རིམ་གྲོ་དང་། ཞེ་ས་ཆེན་པོའི་
བསམ་པས་གཟུང་བར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་ཆོས་འདི་ལ་གནས་པ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་དཀོན་པ་མ་ཡིན་ཏེ། ལས་གྲོན་ཆུང་ངུས་སངས་རྒྱས་ཀྱི་ཆོས་ཐམས་ཅད་ཡང་དག་པར་འགྲུབ་པའི་
བྱིན་གྱི་རླབས་རབ་ཏུ་འཐོབ་བོ། །འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་མཉམ་པ་ཉིད་དུ་ཡང་འཇུག་པར་འགྱུར་རོ། །དེ་ནས་དེའི་ཚེ་སངས་རྒྱས་ཀྱི་མཐུས་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མྱེད་པ་
བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རྣམས་དྲུག་ཏུ་རབ་ཏུ་གཡོས་སོ། །སངས་རྒྱས་ཀྱི་མཐུ་དང་ཆོས་ཉིད་རབ་ཏུ་ཐོབ་པས་ལྷ་རྫས་ལས་འདས་པའི་མེ་ཏོག་གི་སྤྲིན་གྱི་ཆར་མངོན་པར་བབ་བོ། །ལྷ་རྫས་ལས་འདས་པའི་སྤོས་ཀྱི་སྤྲིན་གྱི་ཆར་
མངོན་པར་བབ་བོ། །གཞུང་དེ་བཞིན་དུ་ཕྱེ་མ་དང་། ན་བཟའ་དང་། རྒྱལ་མཚན་དང་། བ་དན་དང་། གདུགས་དང་། ནོར་བུ་རིན་པོ་ཆེ་དང་། སྦྲུལ་གྱི་སྙིང་པོའི་ཙན་དན་དང་། རྒྱན་དང་། ལྷབ་ལྷུབ་ཐམས་ཅད་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ལས་འདས་པའི་
རོལ་མོ་དཀྲོལ་བའི་སྤྲིན་དང་། ལྷ་རྫས་ལས་འདས་པའི་རོལ་མོ་བརྡུང་བའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ལས་འདས་པའི་བྱང་ཆུབ་སེམས་དཔའི་མཆོད་པའི་སྤྲིན་གྱིས་ཆར་མངོན་པར་བབ་བོ། །ལྷ་རྫས་ལས་འདས་པའི་དེ་བཞིན་གཤེགས་པའི་ཡོན་
ཏན་གྱི་རྣམ་པ་བརྗོད་དུ་མེད་པའི་སྤྲིན་གྱི་ཆར་མངོན་པར་བབ་པོ། །ལྷ་རྫས་ལས་འདས་པའི་དེ་བཞིན་གཤེགས་པས་ལེགས་སོ་ཞེས་གསུངས་པའི་རྣམ་པ་བརྗོད་དུ་མེད་པའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ལས་འདས་ཤིང་ཆོས་ཀྱི་དབྱིངས་སུ་རྒྱས་པར་ཁྱབ་

བའི་དེ་བཞིན་གཤེགས་པའི་གསུང་གི་དབྱངས་མངོན་པར་བརྗོད་པའི་སྤྲིན་གྱི་ཆར་མངོན་པར་བབ་བོ། །འཇིག་རྟེན་གྱི་ཁམས་ཡོངས་སུ་དག་པ་རྣམ་པ་བརྗོད་དུ་མེད་པའི་སྤྲིན་གྱི་ཆར་མངོན་པར་བབ་བོ། །བྱང་ཆུབ་ཉེ་བར་བརྟེན་པའི་
རྣམ་པ་བརྗོད་དུ་མེད་པའི་སྤྲིན་གྱི་ཆར་མངོན་པར་བབ་པོ། །འོད་ཟེར་སྣང་བའི་རྣམ་པ་བརྗོད་དུ་མེད་པའི་སྤྲིན་གྱི་ཆར་མངོན་པར་བབ་བོ། །ཤིན་ཏུ་བསྟན་པའི་བྱིན་གྱི་རླབས་ཀྱི་ཆར་རྣམ་པར་བརྗོད་དུ་མེད་པའང་མངོན་པར་བབ་སྟེ། ཇི་ལྟར་འཇིག་རྟེན་གྱི་ཁམས་
འདིའི་གླིང་བཞི་པར་དེ་བཞིན་གཤེགས་པ་བྱང་ཆུབ་ཀྱི་ཤིང་དྲུང་དུ་དེ་བཞིན་གཤེགས་པ་མངོན་པར་འཚང་རྒྱ་བའི་སྙིང་པོ་བྱང་ཆུབ་ལ། བྱང་ཆུབ་སེམས་དཔའ་ཕོ་བྲང་ན་བཞུགས་པར་སྣང་བ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་མ་ལུས་པ་རྒྱས་པར་གང་
བར་བཞུགས་ཏེ། ཆོས་བསྟན་པ་འདི་ཡང་ཐམས་ཅད་དུ་བྱུང་ངོ་། །སངས་རྒྱས་ཀྱི་མཐུ་དང་ཕྱོགས་བཅུར་དེ་བཞིན་གཤེགས་པ་མངོན་པར་སངས་རྒྱས་པའི་ཆོས་ཉིད་རབ་ཏུ་ཐོབ་པས་སངས་རྒྱས་ཀྱི་ཞིང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་སངས་
རྒྱས་ཀྱི་ཞིང་འདས་པའི་ཕ་རོལ་ནས། བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱང་འོངས་པར་གྱུར་ཏེ། ཕྱོགས་བཅུ་བཀང་ནས་དེ་དག་འདི་སྐད་ཟེར་རོ། །ཀྱེ་རྒྱལ་བའི་སྲས། དེ་ལྟར་དེ་བཞིན་གཤེགས་པའི་སྨོན་ལམ་ལུང་བསྟན་
པའི་ཆོས་ཉིད་བརྗོད་པ་ལེགས་སོ་ལེགས་སོ། །ཀྱེ་རྒྱལ་བའི་སྲས། བདག་ཅག་ཀྱང་ཐམས་ཅད་ཀུན་ཏུ་བཟང་པོ་ཞེས་བྱ་བར་མིང་མཐུན་པ་ཤ་སྟག་སྟེ། འཇིག་རྟེན་གྱི་ཁམས་ཀུན་ཏུ་དཔལ་ཞེས་བྱ་བ་དག་ནས་དེ་བཞིན་གཤེགས་པའི་མཚན་ཀུན་ཏུ་དཔལ་གྱི་དབང་ཕྱུག་
ཅེས་བྱ་བ་ཤ་སྟག་གི་དྲུང་ནས་འདིར་ཕྱིན་ཏེ། ཐམས་ཅད་ནའང་ཆོས་བསྟན་པ་འདི་ཉིད་སངས་རྒྱས་ཀྱི་བྱིན་གྱིས་འཁོར་གྱི་རྣམ་པ་འདི་ལྟ་བུ་དམ་ཚིག་འདི་དག་དང་ཡི་གེ་འདི་དག་དང་། གོ་བར་བྱ་བ་འདི་དག་དང་། བརྗོད་པ་འདི་དག་གིས་ལྷག་ཆད་མེད་པར་བྱང་

བར་གྱུར་ཏེ། ཀྱེ་རྒྱལ་བའི་སྲས་བདག་ཅག་ཀྱང་དབང་དུ་གྱུར་པ་ཤ་སྟག་སངས་རྒྱས་ཀྱི་བྱིན་གྱི་རླབས་ཀྱིས་འཁོར་འདིར་ཕྱིན་ཏོ། །ཇི་ལྟར་བདག་ཅག་འཁོར་འདིར་ཕྱིན་པ་དེ་བཞིན་དུ་འཇིག་རྟེན་གྱི་ཁམས་མ་ལུས་པ་ཐམས་ཅད་ཀྱི་གླིང་བཞི་པ་ཀུན་གྱི་དེ་བཞིན་
གཤེགས་པ་མངོན་པར་འཚང་རྒྱ་བའི་གཞིར་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་ཕྱོགས་བཅུ་བཀང་སྟེ་ཕྱིན་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཕྱོགས་བཅུར་བལྟས་ཏེ། ཆོས་ཀྱི་དབྱིངས་ལ་རྣམ་པར་
བལྟས་ནས། བྱང་ཆུབ་སེམས་དཔའི་སྤྱོད་པ་རབ་ཏུ་བརྗོད་པ་དང་། དེ་བཞིན་གཤེགས་པ་མངོན་པར་འཚང་རྒྱ་བའི་དབྱིངས་ཡོངས་སུ་བརྗོད་པ་དང་། སྨོན་ལམ་ཆེན་པོའི་དབྱིངས་ཀུན་ཏུ་གྲགས་པར་བྱ་བ་དང་། འཇིག་རྟེན་གྱི་ཁམས་དང་། བསྐལ་པ་ཐམས་
ཅད་ཀྱི་གྲངས་ཡོངས་སུ་བརྗོད་པ་དང་། དུས་ཇི་ལྟ་བ་བཞིན་དུ་སངས་རྒྱས་འབྱུང་བ་བསྟན་པ་དང་། སེམས་ཅན་གྱི་ཁམས་དང་དབང་པོ་ཇི་ལྟར་ཡོངས་སུ་སྨིན་པའི་ཚུལ་བཞིན་དུ་སངས་རྒྱས་བྱུང་བ་མཉེས་པར་བྱ་བ་བརྗོད་པ་དང་། བྱིན་གྱིས་བརླབས་པའི་ཚུལ་བཞིན་
དུ་སངས་རྒྱས་འབྱུང་བ་དང་། དེ་བཞིན་གཤེགས་པའི་སྤྱོད་པ་དོན་ཡོད་པ་ཡོངས་སུ་བརྗོད་པར་བྱ་བ་དང་། དགེ་བའི་རྩ་བ་ཇི་ལྟར་བསྐྱེད་པ་བཞིན་དུ་གསལ་བར་བྱ་བ་ཡང་དག་པར་བསྟན་པ་དང་། བྱང་ཆུབ་སེམས་དཔའ་མང་པོའི་མཐུ་ཆེན་པོ་བསྟན་པ་དང་། སེམས་
ཅན་ཐམས་ཅད་ལ་རྫོགས་པའི་བྱང་ཆུབ་ཀྱི་སྒྲས་བསྐུལ་བ་བྱེད་ཅིང་དགེ་བའི་རྩ་བའི་སྟོབས་དང་ཤུགས་དང་། སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཐམས་ཅད་ཤིན་ཏུ་དང་སེམས་ཀྱིས། །བསྒྲིབས་པ་
མ་ལུས་ཐམས་ཅད་རྣམ་པར་བསྩལ་གྱིས་ལ། །ཡོན་ཏན་འབྱུང་གནས་འཇིག་རྟེན་གཙོ་བོ་ཡི། །སྨོན་ལམ་དམ་པ་བཤད་ཀྱིས་མཉན་པར་གྱིས། །མཁས་མཆོག་སྐྱེས་བུ་སེང་གེ་དག །སྤྱད་པ་ཅི་འདྲ་སྔོན་སྤྱད་སྤྱོད་པར་འགྱུར་བའི་རྣམས། །བྱང་ཆུབ་

སེམས་དཔའ་གཙོ་རྣམས་ཀྱི། །སྤྱོད་པ་ཐམས་ཅད་རིམ་གྱིས་བརྗོད་པར་བྱ། འདི་ལ་དཔེ་མེད་མཆོག་རྣམས་ཀྱི། །བསྐལ་པའི་གྲངས་དང་འཇིག་རྟེན་གྲངས་དང་ཆོས་བསྟན་དང་། །རྒྱལ་བ་རྣམས་ཀྱི་འབྱུང་བ་དག །ཡོངས་སུ་བརྗོད་ཀྱིས་དང་བའི་
ཡིད་ཀྱིས་ཉོན། །དེ་དག་སྔོན་ཆད་སྨོན་ལམ་གྱིས། །སེམས་ཅན་ཇི་ལྟར་སྡུག་བསྔལ་རྣམས་ལས་དགྲོལ་བྱ་ཞེས། །སེམས་ཅན་ཀུན་ལ་ཕན་པའི་ཕྱིར། །འཇིག་རྟེན་སྒྲོན་མ་སྐྱེ་བ་རྣམས་ཀྱང་མཐོང་། །སྤྱོད་པ་ཇི་ལྟར་ཤེས་གྱུར་ཏེ། །གསུང་པའི་མཆོག་
རྣམས་ཀུན་ལ་མཆོད་པ་བྱས་པས་ན། །སངས་རྒྱས་མཉམ་པ་ཉིད་རྙེད་དེ། །ཐམས་ཅད་མཁྱེན་ཉིད་རབ་ལ་མངོན་སངས་རྒྱས། །སྔོན་གྱི་མི་ཡི་སེང་གེ་རྣམས། །སངས་རྒྱས་ཕྱོགས་བཅུར་འོད་སྣང་རབ་ཏུ་འབར་མཛད་ཅིང་། །འོད་ཟེར་དྲ་བ་རབ་འགྱེད་
པས། །ཕྱོགས་བཅུའི་འཇིག་རྟེན་སྣང་མཛད་མཐོང་གྱུར་ནས། །བདག་ཅག་རྒྱལ་བའི་ཡོན་ཏན་གྱིས། །བརྒྱན་པའི་འཇིག་རྟེན་སྒྲོན་མའི་དམ་པར་འགྱུར་བས་ཏེ། །སྟོབས་བཅུ་མངའ་བ་ཀུན་མཁྱེན་པར། །མི་ཡི་སེང་གེ་བྱ་ཞེས་སྨོན་ལམ་འདེབས། །
ངེད་ཀྱིས་སེམས་ཅན་ཐམས་ཅད་ཀྱི། །འདོད་ཆགས་ཞེ་སྡང་གཏི་མུག་རབ་ཏུ་འབར་གྱུར་པའི། །སྡུག་བསྔལ་རྣམས་ལས་རབ་བཀྲོལ་ཏེ། །ངན་སོང་ཐམས་ཅད་ཡོངས་སུ་གཅད་བྱ་ཞེས། །འདི་འདྲའི་སྨོན་ལམ་རྫོགས་བྱས་ཏེ། །དེ་ནས་དཔའ་བ་
ཆེན་པོ་སྤྱོད་པ་རབ་ལ་སྤྱོད། །བློ་བརྟན་ཕྱིར་ལྡོག་མི་འགྱུར་བ། །སྟོབས་བཅུ་རྣམས་ཀྱི་ཆགས་མེད་རབ་ཏུ་འཐོབ། །སྐྱེས་བུ་སེང་གེ་གང་རྣམས་ཀྱི། །འདི་འདྲའི་སྨོན་ལམ་སྔར་བཏབ་ཕྱིར་ལྡོག་མི་འགྱུར་བ། །འཇིག་རྟེན་རྣམས་ན་སྤྱོད་མཛད་པ། །
དེ་དག་དོན་ཡོད་སྤྱོད་པ་བརྗོད་པར་བྱ། །བསྐལ་པ་བཟང་པོ་གཅིག་ལ་ཡང་། །སངས་རྒྱས་སྟོང་གྲངས་ཚང་བར་ཀུན་ཀྱང་འབྱུང་གྱུར་ཏེ། །ཀུན་ཏུ་གཟིགས་པ་གང་བརྗོད་པ། །དེ་དག་རིམ་གྱིས་བཤད་པ་འདི་འདྲའོ། །བསྐལ་པ་བཟང་པོ་གཅིག་བཞིན་

དུ། །བརྗོད་དུ་མེད་པའི་བསྐལ་པ་ཁྲག་ཁྲིག་དེ་བཞིན་ཏེ། །སངས་རྒྱས་མ་བྱོན་དེ་དག་གི །བཟང་པོའི་སྤྱོད་པ་བདག་གིས་བསྟན་པར་བྱ། །ཞིང་རྒྱུད་གཅིག་པ་ཇི་བཞིན་དུ། །བརྗོད་དུ་མེད་པའི་ཞིང་རྣམས་ཐམས་ཅད་ཀུན་བཟུང་སྟེ། །མ་བྱོན་
སྟོབས་བཅུའི་སྐྱོན་མེད་པའི། །སྤྱོད་པ་ཐམས་ཅད་དེ་བཞིན་བཤད་པར་བྱ། །རྒྱལ་བ་གོང་འོག་གང་འབྱུང་དང་། །ཅི་མཚན་དེ་ཡི་སྨོན་ལམ་རྣམ་པ་ཅི་འདྲ་དང་། །རྒྱལ་བ་གང་གིས་གང་གི་ལུང་། །བསྟན་མཛད་མཁས་པའི་སྐུ་ཚེ་ཇི་ཙམ་དང་། །
ཆོས་ཀྱི་རྣམ་པ་དགེ་བ་ནི། །གང་གིས་བསྒྲུབས་ཏེ་དམ་པ་བརྙེས་པར་གྱུར་པ་དང་། །འཇིག་རྟེན་ཇི་ལྟར་བཏུལ་བ་དང་། །རྒྱལ་བ་རྣམས་ཀྱི་དམ་ཆོས་ཅིར་གནས་དང་། །རྣམ་དག་ཞིང་ཡང་ཅི་འདྲ་དང་། །སེམས་ཅན་རྣམ་པར་དག་དང་ཆོས་ཀྱི་འཁོར་
ལོ་དང་། །བསྟན་པའི་དུས་དང་དུས་མིན་དང་། །དེ་ལས་གང་ཟག་རྣམ་པར་དག་འགྱུར་དང་། །སེམས་ཅན་རྣམས་ཀྱི་ལས་གང་དང་། །སྤྱོད་པ་གང་དང་རྣམ་གྲོལ་ཇི་འདྲར་འགྱུར་བ་དང་། །དབང་པོ་རྣོ་རྟུལ་བར་མ་དང་། །སྤྱོད་མཆོག་སེམས་ཅན་
འདུལ་བའང་བསྟན་པར་བྱ། །འདི་འདྲའི་ཤེས་པར་འཇུག་པ་ལ། །སྤྱོད་པའི་དམ་པ་རྣམས་ཀྱིས་རབ་ཏུ་ཞུགས་གྱུར་ཅིང་། །བཟང་པོའི་འབྱུང་གནས་སྤྱོད་པ་དང་། །འགྲོ་ཀུན་ཡེ་ཤེས་འཁོར་ལོ་སྤྱོད་ཞུགས་པ། །ལུས་ཀྱི་ལས་ལ་ཆགས་མེད་
ཅིང་། །ངག་ལ་ཆགས་མེད་སྒྲ་དབྱངས་ཐམས་ཅད་རྣམ་དག་ལ། །སེམས་སྤྱོད་ཆགས་པ་མེད་པ་ཡིས། །དུས་གསུམ་མ་ལུས་རྒྱས་པར་ཁྱབ་པར་བྱེད། །འདི་འདྲ་ཀུན་ཏུ་བཟང་པོ་ཡི། །སྤྱོད་པའི་མཆོག་ལ་ཕ་རོལ་ཕྱིན་པ་ཐོབ་གྱུར་པ། །
བརྗོད་དུ་མེད་པའི་དཀྱིལ་འཁོར་རྣམས། །ཆོས་དབྱིངས་ཀུན་ཏུ་རབ་ཏུ་བརྗོད་པར་བྱེད། །མ་འོངས་དུས་ཀྱི་བསྐལ་པ་དང་། །འབྱམ་ཀླས་ཞིང་རྣམས་བརྗོད་དུ་མེད་པ་ཐམས་ཅད་ཀྱང་། །སྐད་ཅིག་སེམས་ཀྱིས་རབ་ཏུ་ཤེས། །ཆོས་ཉིད་དེ་

ལ་རྣམ་པར་རྟོག་པ་མེད། །གང་རྣམས་སྤྱོད་པའི་ས་འདི་ལ། །སྤྱོད་པའི་དམ་པས་རྗེས་སུ་ཞུགས་པར་གྱུར་པ་རྣམས། །བྱང་ཆུབ་སེམས་དཔའ་མཆོག་རྣམས་ཀྱི། །ཡོན་ཏན་སྤྱོད་པ་ཕྱོགས་ཙམ་བཤད་པར་བྱ། །མཐའ་
དང་དབུས་མེད་ཡེ་ཤེས་ཅན། །སྟོབས་བཅུ་རྣམས་ཀྱི་སྤྱོད་ཡུལ་མཆོག་ལ་ཞུགས་གྱུར་པ། །ཐམས་ཅད་ཤེས་བྱེད་མཁས་པའི་རྣམས། །མི་ལྡོག་སྤྱོད་པས་རབ་ཏུ་ཞུགས་གྱུར་ཅིང་། །འོད་བྱེད་བློ་གྲོས་དམ་པ་དང་། །ཀུན་ཏུ་བཟང་པོའི་སྨོན་
ལམ་མཆོག་ལ་ཞུགས་གྱུར་པ། །དཔེ་ཟླ་མེད་པ་དེ་དག་གི། །ཡེ་ཤེས་ཚུལ་དང་སྤྱོད་པ་བརྗོད་པར་བྱ། །རྡུལ་ཕྲན་གཅིག་གི་ཆ་ཤས་ལ། །འཇིག་རྟེན་ཁམས་རྣམས་ཇི་སྙེད་དེ་དག་ཤེས་པ་དང་། །སྤྱོད་པ་རྒྱ་ཆེ་ཐོས་གྱུར་ན། །འཇིག་རྟེན་
དེ་དག་ཐམས་ཅད་མོས་པར་འགྱུར། །རྡུལ་ཕྲན་གཅིག་ལ་ཇི་ལྟ་བ། །དེ་བཞིན་རྡུལ་ཕྲན་ཐམས་ཅད་མ་ལུས་བཟུང་བྱས་ཏེ། །ཡེ་ཤེས་བཟང་པོ་དེ་དག་ནི། །འཇིག་རྟེན་ཁམས་ལ་འཇུག་པ་བསམ་མི་ཁྱབ། །དེ་དག་དུས་ཀྱི་རྣམ་པ་ལའང་། །
རྡུལ་ཕྲན་གཅིག་གི་ཁྱོན་གྱི་ཆ་ལ་ཡང་དག་འཇུག །རྡུལ་ཕྲན་གཅིག་ལ་དེ་བཞིན་དུ། །ཞིང་ཡངས་རྣམ་པ་ཐ་དད་ཀུན་ལ་འཇུག །རྡུལ་ཕྲན་ཐམས་ཅད་རེ་རེ་ལ། །ཞིང་རྣམས་བརྗོད་དུ་མེད་པ་མང་པོ་འཛུད་པ་བྱེད། །རྣམ་པ་ཐ་དད་དུ་མ་དང་།
གཅིག་དང་ཚད་མེད་དེ་བཞིན་རབ་ཏུ་ཤེས། །ཇི་སྙེད་ཅི་ཡང་མ་ལུས་པའི། །ཆོས་དབྱིངས་གཟུང་བ་ཐམས་ཅད་ཡང་དག་གཟུང་བྱེད་ཅིང་། །མཚན་ཉིད་ཐ་དད་སྣ་ཚོགས་ཏེ། །སེམས་ཅན་གྲངས་ཀྱི་བསྐལ་པ་རྒྱུད་མི་མཉམ། །འཇིག་རྟེན་ཕྲ་བར་
འཇུག་པ་ལ། །ཕྲ་ལ་ཤིན་ཏུ་གཞོལ་བས་ཕྲ་བར་འཇུག་བྱས་ཏེ། །བརྗོད་དུ་མེད་པར་བསྟན་པ་ཡི། །བསྐལ་པ་ཐམས་ཅད་མ་ལུས་འཛུད་པ་བྱེད། །དེ་དག་རིང་དང་ཐུང་བ་དང་། །དུས་ཀྱི་སྐད་ཅིག་སེམས་ལ་སྐལ་བ་མི་མཐུན་ཤེས། །

ཤེས་སྤྱོད་མི་མཉམ་མ་ཡིན་པའི། །ཤེས་པས་དེ་དག་ཐམས་ཅད་ཁོང་དུ་ཆུད། །ཡངས་དང་ཡངས་མིན་མཁས་པས་ན། །འཇིག་རྟེན་ཟབ་མོ་རྣམས་ལ་རབ་ཏུ་འཇུག་པར་བྱེད། །ལུས་ལ་ཞིང་རྣམས་དེ་ཤེས་ཏེ། །ཞིང་ལའང་དེ་བཞིན་གཅིག་མིན་ལུས་
འཛུད་དོ། །ཕྱོགས་རྣམས་བཅུ་པོ་ཐམས་ཅད་དུ། །ཕྱོགས་རྣམས་ཀུན་ལ་འཇུག་ཅིང་སྐད་ཅིག་དུ་མ་དང་། །འཇིག་རྟེན་ཁམས་རྣམས་འབྱམ་ཀླས་ལ། །ཚད་མེད་གཟི་བརྗིད་ལྡན་པ་རབ་ཏུ་འཇུག །གང་ཡང་ཞིང་རྣམས་མཐའ་ཡས་ཤིང་། །དབུས་
མེད་གཟུང་བ་བྱས་ཤིང་དུས་ཀྱི་དབྱིངས་སུ་འཛུད། །ཞིང་གི་རྒྱུད་ལ་མཁས་པའི་རྣམས། །ཤེས་དང་ལྡན་པས་ཡེ་ཤེས་རབ་ཏུ་འབྱུང་། །བཟང་པོའི་ཡོན་ཏན་ལྡན་པའི་རྣམས། །ཕྱོགས་དང་འཇིག་རྟེན་ཁམས་ཀྱི་རྒྱུད་དུ་གྱུར་པ་དག །ཇི་སྙེད་ཡོད་པ་
དེ་འཇུག་སྟེ། །བརྗོད་དུ་མེད་པ་དེ་དག་རབ་ཏུ་ཤེས། །ཞིང་དང་ཞིང་གི་ས་རྣམས་ཀྱི། །བརྗོད་དུ་མེད་པའི་ཞིང་རྣམས་ཀུན་ཀྱང་རབ་ཏུ་མཐོང་། །དེ་དག་ཚུལ་ཡང་རབ་ཏུ་ཤེས། །ལས་རྣམས་གང་གིས་སྦྱངས་པ་འང་ཁོང་དུ་ཆུད། །གང་ཡང་ཞིང་
རྣམས་དུ་མ་དག །ལས་རྣམས་ཁྲག་ཁྲིག་ཀུན་གྱིས་ཀུན་ནས་ཉོན་མོངས་པར། །འགྲོ་བས་ཀུན་ཏུ་བསྒྲུབས་བྱས་པ། །དེ་དག་ཐམས་ཅད་རྒྱུད་ཀྱང་ཅི་འདྲ་ཤེས། །བརྗོད་དུ་མེད་པ་ཡངས་པའི་རྣམས། །ཞིང་གཅིག་བསྟན་པས་དེ་དག་ཡོངས་སུ་
ཤེས་པར་འགྱུར། །དེ་འདྲའི་ཞིང་ལ་འཇུག་པ་དང་། །གང་ལ་གྲངས་མེད་དེ་དག་ཀུན་ལ་འཇུག །འཇིག་རྟེན་ཁམས་ནི་གཅིག་ལ་ཡང་། །འཇིག་རྟེན་ཁམས་རྣམས་ཐམས་ཅད་ཡང་དག་འཛུད་པ་བྱེད། །འཇིག་རྟེན་གཅིག་ཏུ་དགོངས་མི་འགྱུར། །འཇིག་
རྟེན་ཁམས་རྣམས་དེ་བཞིན་འདྲེས་མི་འགྱུར། །སྤྱིའུ་ཚུགས་རྣམས་དང་གོང་མའི་རྣམས། །བླ་དང་འོག་གི་ས་རྣམས་ཡོངས་སུ་གཟུང་བྱས་ཏེ། །འགྲོ་བའི་རྣམ་པར་མིང་ཐོགས་པ། །འཇིག་རྟེན་ཀུན་ལ་འཇུག་ཅིང་རབ་ཏུ་ཤེས། །སྣྲེལ་ཞིར་རྒྱུ་བའི་

རྒྱུད་རྣམས་དང་། །ཞིང་རྣམས་མཐའ་ཡས་མཐའ་དང་དབུས་ཡོད་མ་ཡིན་པ། །སྣ་ཚོགས་ཡངས་པ་རབ་ཏུ་ཤེས། །རྣམ་པ་གཅིག་ཤེས་རྣམ་པ་ཐ་དད་ཤེས། །ཞིང་གི་གྲངས་རྣམས་རབ་ཏུ་ཤེས། །ཡེ་ཤེས་ཆགས་མྱེད་
མཐའ་ལྡན་ཀུན་གྱི་གྲངས་རྣམས་ཀྱང་། །བཟང་པོའི་ཐེག་པ་སྤྱོད་པ་ཡིས། །རྒྱལ་སྲས་ཀུན་ཏུ་བཟང་རྣམས་རབ་ཏུ་ཤེས། །འཇིག་རྟེན་ཐམས་ཅད་སྤྲུལ་པ་དང་། །སེམས་ཅན་རྣམ་པར་སྤྲུལ་དང་དེ་བཞིན་ཞིང་སྤྲུལ་དང་། །ཆོས་རྣམས་སྤྲུལ་པའི་
ཚུལ་ཤེས་པ། །སངས་རྒྱས་སྤྲུལ་པའི་ཕ་རོལ་ཕྱིན་པ་རྣམས། །འཇིག་རྟེན་ཕྲ་ཞིང་ཟབ་པ་དང་། །ཡངས་ཤིང་སྣ་ཚོགས་ཡངས་པས་ཆོ་མ་ཆོ་དགུ་རྣམས། །སྣ་ཚོགས་ཐ་དད་རྣམ་བསྩགས་པ། །ལས་ཀྱི་རྣམ་སྨིན་གནས་པའི་འཇིག་རྟེན་རྣམས། །
རྫུ་འཕྲུལ་རྣམ་པར་འཕྲུལ་པ་ཡིས། །ཆོས་དབྱིངས་འཇུག་པར་བྱ་ལ་ཤིན་ཏུ་བསླབས་པ་ཡི། །རྒྱལ་སྲས་མཐའ་དང་དབུས་མེད་པ། །ཕྱོགས་བཅུ་ཐམས་ཅད་མ་ལུས་འགེངས་པར་བྱེད། །འཇིག་རྟེན་ཁམས་རྣམས་དེ་དག་གི །མིང་ནི་བསྐལ་པ་
སེམས་ཅན་སྙེད་ཀྱི་མཐར་ཐུག་ཅིང་། །ཟད་པར་བརྗོད་པར་མི་ནུས་ཏེ། །མིང་བཤད་གལ་ཏེ་སངས་རྒྱས་གསུང་ན་གསུང་། །འཇིག་རྟེན་མགོན་པོ་རྣམས་ཀྱི་ཡང་། །མཚན་རྣམས་མཚན་ཉིད་མི་འཐུན་རྣམ་པ་སྣ་ཚོགས་མཚན། །བསྐལ་པ་
བརྗོད་མེད་ཟབ་བྱས་ཀྱང་། །མཚན་རྣམས་གཅིག་ནས་གཅིག་བརྒྱུད་མཐར་ཐུག་མེད། །འོན་ཀྱང་དམའ་བའི་སེམས་མེད་པར། །མཁས་པ་རྣམས་ནི་དུས་གསུམ་བདེ་གཤེགས་སངས་རྒྱས་ཕྱིར། །ཆོས་ཀྱི་དབྱིངས་ལས་བྱུང་བ་སྟེ། །སངས་རྒྱས་
ཡེ་ཤེས་ས་ལ་འང་རབ་ཏུ་ཞུགས། །དྲན་པས་ཆགས་མེད་དག་པ་སྟེ། །ཆགས་མེད་ཡིད་དང་ལྡན་ཞིང་བློ་གྲོས་མཐའ་ཡས་པས། །ཡེ་ཤེས་བློ་གྲོས་མཆོག་ལྡན་པ། །ཆོས་དབྱིངས་བཤད་ལ་ཕ་རོལ་ཕྱིན་པ་ཐོབ། །གང་གིས་འཇིག་རྟེན་ཁམས་

ཀྱི་རྣམས། །ཡངས་དང་ཕྲ་བ་རྣམ་པ་སྣ་ཚོགས་ཤེས་གྱུར་ཅིང་། །དེར་ནི་འདས་པའི་དུས་རྣམས་ལ། །སེམས་གཅིག་བསྐྱེད་པས་རབ་ཏུ་འཇུག་པ་བྱེད། །མི་ཡི་སེང་གེ་དེ་དག་ཏུ། །སངས་རྒྱས་སྤྱོད་པ་སྣ་ཚོགས་རྣམ་པར་ཆགས་མེད་པར། །བྱང་
ཆུབ་མཆོག་ཏུ་སངས་རྒྱས་ཤིང་། །རྣམ་པར་འཕྲུལ་པ་ཐམས་ཅད་སྟོན་པ་མཛད། །དེ་བཞིན་མ་འོངས་དུས་རྣམས་ཀྱི། །རྗེས་སུ་གང་བྱོན་དེ་ཡི་བསྐལ་པ་ཅི་འདྲ་དང་། །དེ་ལ་མྱི་ཡི་སེང་གེ་གང་། །སྐྱེ་བར་འགྱུར་བ་དེ་དག་ཀུན་ཀྱང་ཤེས། །སྨོན་
ལམ་སྤྱོད་པ་ཅི་འདྲ་དང་། །སྤྱོད་ཡུལ་གང་རྣམས་བསྒོམ་པ་གང་གིས་གྲུབ་གྱུར་ཅིང་། །བསྒྲུབ་པའི་རྣམ་པ་ཅི་འདྲ་བས། །བསྐལ་པ་གང་ལ་བྱང་ཆུབ་འཚང་རྒྱ་དང་། །དེ་དག་འཁོར་ཀྱང་ཁོང་དུ་ཆུད། །སྐུ་ཚེའི་ཚད་དང་སེམས་ཅན་འདུ་བ་ཅི་འདྲ་དང་།
ཆོས་ཀྱི་སྒོ་མོ་གང་ཞིག་གིས། །འགྲོ་བར་ཆོས་ཀྱི་འཁོར་ལོ་བསྐོར་བ་ཤེས། །དེ་ལྟར་ཀུན་ཏུ་བཟང་པོ་ཡི། །ཡེ་ཤེས་མཆོག་གིས་བསྒྲུབས་པའི་སྤྱོད་པའི་ས་གནས་ཤིང་། །དེ་དག་ཐམས་ཅད་རབ་ཏུ་ཤེས། །དེ་ནི་འགྲོ་གཙོ་ཀུན་གྱི་འབྱུང་གནས་ཡིན། །
ད་ལྟར་བྱུང་བ་གཟུང་བྱས་ཤིང་། །འཇིག་རྟེན་ཁམས་རྣམས་ཐམས་ཅད་འདབ་ཆགས་མ་ལུས་པར། །འཇིག་རྟེན་ཁམས་ལ་རབ་ཏུ་འཇུག །དེ་བཞིན་ཆོས་ཀྱི་དབྱིངས་རྣམས་རབ་ཏུ་ཤེས། །དེ་ན་མི་ཡི་གཙོ་བོ་རྣམས། །དགྲ་ལས་རྒྱལ་ཞིང་
ཐམས་ཅད་གཟིགས་པ་ཇི་སྙེད་པ། །མི་ཐུབ་རྒོལ་བ་དཔའ་བོ་རྣམས། །ཆོས་ཀྱི་མངའ་ལ་ཕ་རོལ་ཕྱིན་བརྙེས་པ། །དེ་དག་འཁོར་ཀྱང་རབ་ཏུ་ཤེས། །སེམས་ཅན་འདུལ་དང་ཞིང་རྣམས་རྣམ་པར་དག་པ་དང་། །རྒྱལ་བའི་རྣམ་པར་འཕྲུལ་པ་རྣམས། །
སེམས་པས་བསྐལ་པ་ཡངས་པ་ཟད་པར་བྱེད། །སྐྱེས་བུའི་མཆོག་རྣམས་འདུལ་མཛད་ཅིང་། །འཇིག་རྟེན་མཆོག་ཏུ་ཕྱིན་པའི་བྱིན་རླབས་དམ་པ་ལ། །མི་ཟད་མཛོད་ཀྱི་ཤེས་ཡངས་པས། །ཡེ་ཤེས་ཚུལ་ལ་མཁས་པ་རབ་ཏུ་འཇུག །ཆགས་

མེད་མིག་གིས་བལྟ་བ་དང་། །ཆགས་མེད་རྣ་བ་མངོན་པར་བསྒྲུབ་པ་སྒྲུབ་བྱེད་ཅིང་། །ཆགས་པ་མེད་པའི་ལུས་ཡངས་དང་། །ཡངས་པའི་ལྕེས་ཀྱང་འཇིག་རྟེན་ཚིམ་པར་བྱེད། །དམ་པའི་སེམས་ལ་ཆགས་མྱེད་དེ། །བསམ་
པ་ཀུན་ཏུ་རྣམ་ཡངས་རྣམ་པར་དག་དང་ལྡན། །ཡེ་ཤེས་འབྱུང་གནས་བདག་ཉིད་ཆེ། །དུས་གསུམ་སེམས་རྣམས་མ་ལུས་དེས་ཁྱབ་བོ། །སྤྲུལ་པའི་ཕ་རོལ་ཕྱིན་ཐོབ་ཅིང་། །ཞིང་རྣམས་སྤྲུལ་པའི་བསླབ་པར་བྱ་ལ་བསླབས་པའི་རྣམས། །སེམས་ཅན་
སྤྲུལ་ལ་མཁས་པ་དག །སྤྲུལ་པ་སྤྲུལ་པས་འཇིག་རྟེན་འདུལ་བ་བྱེད། །འདུ་ཤེས་རྣམ་པ་དུ་མ་སྟེ། །དེས་ནི་འཇིག་རྟེན་སྣ་ཚོགས་མ་ལུས་རྣམ་པར་བྲིས། །དེ་དག་ཐམས་ཅད་རབ་ཏུ་ཤེས། །སངས་རྒྱས་ཡེ་ཤེས་ཚུལ་ལ་རབ་ཏུ་འཇུག །འཁོར་རྣམས་
བརྗོད་དུ་མེད་པ་དག །སངས་རྒྱས་སྐུ་རྣམས་རེ་རེ་དག་ལ་ཡོད་པའི་རྣམས། །ཀུན་ལ་འཇུག་ཅིང་མཐོང་བར་བྱེད། །སེམས་ཅན་རྣམ་པར་འདུལ་བའི་མཐའ་འང་མྱེད། །ཡེ་ཤེས་ཟབ་མོ་མཐོང་བས་ན། །ཡེ་ཤེས་ཉི་མ་ཤིན་ཏུ་གསལ་བར་ཤར་གྱུར་
བའི། །ཕྱིར་མི་ལྡོག་པའི་སྤྱོད་པ་ལ། །འཇིག་རྟེན་འབྱམ་ཀླས་ཀུན་ཏུ་འཇུག་པ་བྱེད། །ཇི་ལྟའི་ཚུལ་དུ་ཞུགས་གྱུར་ཅིང་། །འཇིག་རྟེན་འདི་དག་ཐམས་ཅད་རྣམ་པར་བཀོད་འདྲ་བར། །སེམས་ཅན་ཚུལ་བཞིན་རབ་ཏུ་འཕགས། །ཁམས་གསུམ་ཐམས་
ཅད་མྱིག་ཡོར་ཚུལ་འདྲར་ཤེས། །འོན་ཀྱང་རྟོག་དང་རྣམ་རྟོག་མེད། །འཇིག་རྟེན་མཐའ་དང་དབུས་མེད་ཀུན་ལ་རྟོག་མི་བྱེད། །རྟོག་དང་རྟོག་མེད་མཁས་པ་སྟེ། །རྟོག་པའི་ཤེས་པས་རྣམ་པར་རྟོག་པ་མེད། །བསྐལ་པ་བརྗོད་དུ་མེད་པ་རྣམས། །
སེམས་བསྐྱེད་གཅིག་ལ་ཡང་དག་འདུ་བར་འཛུད་བྱེད་ཅིང་། །འཇིག་རྟེན་མི་ཁོམ་འདི་མཐོང་ནས། །སྐད་ཅིག་སེམས་ཀྱིས་ཐམས་ཅད་ཤེས་པར་བྱེད། །བརྗོད་དུ་མེད་པའི་ཞིང་རྣམས་ཀྱང་། །སེམས་བསྐྱེད་གཅིག་གིས་ཐམས་ཅད་ཡོངས་སུ་འདའ་

བར་བྱེད། །བསྐལ་པ་བརྗོད་མེད་ཟད་བྱེད་ཀྱང་། །སྐྲ་རྩེའི་ཆ་ཤས་གཅིག་ལས་གཡོ་བ་མེད། །བསྐལ་པ་བརྗོད་དུ་མེད་པ་དག །ཉི་མ་གཅིག་དང་ཡུད་ཙམ་གཅིག་ཏུ་འཛུད་བྱེད་ཀྱང་། །རིང་དང་ཐུང་ལ་གཞོལ་བ་མེད། །སྐད་ཅིག་གཅིག་ལ་
འཇུག་པའི་ཕ་རོལ་ཕྱིན། །སེམས་ཀྱི་རྣམ་པ་འཇིག་རྟེན་ཀུན། །འཇིག་རྟེན་རྣམ་པ་སེམས་ཅན་ཀུན་གྱི་སེམས་ཡིན་ཏེ། །རྣམ་པ་གཉིས་ཀྱི་གྲངས་སུ་ཞུགས། །འོན་ཀྱང་དེ་དག་མི་གཉིས་རྟོག་པ་མེད། །སྒྱུ་མའི་རྣམ་པ་འཇིག་རྟེན་ཏེ། །སེམས་
ཅན་ཞིང་དང་སངས་རྒྱས་ཆོས་ཀྱང་དེ་བཞིན་ནོ། །འོན་ཀྱང་འཇིག་རྟེན་མགོན་པོ་རྣམས། །ཆོས་ཀྱི་དབྱིངས་རྣམས་ཀུན་ལ་གཅིག་ཏུ་སྙོམས། །ལུས་རྣམས་བརྗོད་དུ་མེད་པ་ཡིས། །ཕྱོགས་བཅུ་ཐམས་ཅད་རྒྱས་པར་བཀང་ཞིང་ཡོངས་སུ་སྟོན། །
འོན་ཀྱང་ལུས་ལ་གཞོལ་བ་མེད། །ཆོས་ཉིད་རྟེན་པ་གནས་མེད་རབ་ཏུ་ཤེས། །འོན་ཀྱང་མྱི་ཡི་སེང་གེ་རྣམས། གཉིས་ལ་གནས་པའི་ཤེས་པས་བྱུང་བ་མ་ཡིན་ཏེ། །མི་གཉིས་པ་ལ་འང་གནས་པ་མེད། །གཉིས་དང་གཉིས་མྱེད་ཆོས་རྣམས་རབ་
ཏུ་ཤེས། །ཇི་ལྟར་སྨྱིག་རྒྱུ་རབ་རིབ་དང་། །མྱིག་ཡོར་སྒྲ་བརྙན་དེ་བཞིན་རྨྱི་ལམ་འདྲ་བ་དང་། །རྨི་ལམ་རྣམ་པ་སྤྲུལ་པ་ལྟར། །འགྲོ་བ་ཐམས་ཅད་མ་ལུས་རབ་ཏུ་ཤེས། །དེ་ལྟར་སྤྱོད་ཡུལ་ཉམས་མེད་པས། །སངས་རྒྱས་ཀུན་གྱི་རིགས་ཀྱི་
རྗེས་སུ་འབྱུང་བ་ཡིན། །ཀུན་ཏུ་བཟང་པོའི་ཡེ་ཤེས་དང་། །ཆོས་ཀྱི་དབྱིངས་ལ་ཤིན་ཏུ་བདལ་བ་ཡིན། །སྙིང་རྗེ་ཆེན་པོ་མཐའ་ཡས་ཀྱང་། །སེམས་ཅན་མེད་དང་མཉམ་པར་ཞིང་རྣམས་ཐམས་ཅད་སྒོམ། །སྔོན་ནས་ཉོན་མོངས་ཉམས་མྱེད་པའི་
བསམ་པ་དག་པས་འཇིག་རྟེན་ཀུན་ཏུ་འགྲོ། །མི་ཟད་མཁའ་ལྟར་རྣམ་དག་པའི། །རྒྱ་ཆེ་ཤིན་ཏུ་ཡངས་པའི་ས་ལ་རབ་ཏུ་ཞུགས། །གསུང་བའི་སེང་གེ་ཐམས་ཅད་ཀྱི། །ཚུལ་གྱི་དཀྱིལ་འཁོར་ཐམས་ཅད་རྗེས་སུ་དྲན། །འཇིག་རྟེན་རབ་ཏུ་

སྤྲོས་པ་ལ། །སྨོན་ལམ་ཚད་མེད་ཡོངས་སུ་གདབ་པ་བྱས་པས་ན། །དེ་དག་སྤྱོད་པ་ཡོངས་སུ་དག །འཇིག་རྟེན་ཁམས་རྣམས་ཐམས་ཅད་རྒྱས་པར་ཁྱབ། །སངས་རྒྱས་རྣམས་དང་རྒྱལ་སྲས་དང་། །དེ་
བཞིན་སངས་རྒྱས་རྣམས་ཀྱི་ཆོས་རྣམས་ཐམས་ཅད་དང་། །འཇིག་རྟེན་རྣམས་དང་འཇིག་རྟེན་ཆོས། །ཆགས་མེད་ཐ་དད་མེད་པའི་ཚུལ་དུ་ཤེས། །ཆོས་ཀྱི་སྐུ་ཡི་སྙིང་པོ་ཅན། །དེ་ཡི་ལུས་ལ་འཇིག་རྟེན་ཐམས་ཅད་གཟུད་བྱས་ཤིང་། །འཇིག་
རྟེན་དེ་ཡི་ལུས་ཡིན་ཡང་། །འཇིག་རྟེན་ཀུན་གྱི་དེ་ལ་གོས་པ་མེད། །ཇི་ལྟར་དང་བའི་ཆུ་གསལ་ལ། །གཟུགས་བརྙན་ཡོངས་སུ་སྣང་ཡང་དེར་སོང་འཕོས་པ་མེད། །དེ་བཞིན་འཇིག་རྟེན་ཐམས་ཅད་ཀྱི། །རྗེས་སུ་ལུས་འགྲོ་དེར་སོང་འཕོས་པ་མེད། །
དེ་ལྟར་འཇིག་རྟེན་ཐམས་ཅད་ཀྱིས། །གོས་པ་མེད་ཅིང་འཇིག་རྟེན་ཡོངས་སུ་དག་པས་ན། །ལུས་ནི་མཁའ་དང་འདྲ་བ་སྟེ། །དེ་ཡི་ལུས་རྣམས་གང་ཡང་སྐྱེས་པ་མེད། །མི་ཟད་པ་ཡི་ལུས་ཤེས་པས། །དེ་ནི་ནམ་ཡང་སྐྱེས་ཤིང་འགགས་པ་མེད་པ་
སྟེ། །རྟག་དང་མི་རྟག་མ་ཡིན་པར། །འཇིག་རྟེན་ཀུན་ལ་འང་རྣམ་པར་དམྱིགས་པ་བྱེད། །ལྟ་བའི་རྣམ་པ་རབ་ཏུ་འགགས། །བརྟན་པ་དེ་དག་ཡང་དག་ལྟ་བ་སྟོན་པ་བྱེད། །བདག་གི་མྱེད་ཅིང་གནས་པ་མེད། །ལེན་པ་མེད་ཅིང་ཆོས་ཀྱི་དབྱིངས་
དང་མཉམ། །ཇི་ལྟར་སྒྱུ་མཁན་མཁས་པ་ཞིག །སྣ་ཚོགས་མཚན་ཉིད་རྣམ་པ་ཐ་དད་གཤེགས་འཕྲུལ་བྱེད། །འོན་ཀྱང་དེ་ལ་འགྲོ་བ་མེད། །གང་དུའང་འགྲོ་བ་དེ་བཞིན་མྱི་དམྱིགས་སོ། །སྒྱུ་མ་ཚད་མྱེད་མ་ཡིན་ཏེ། །སྒྱུ་མ་ཚད་ཀྱིས་དམྱིགས་
པར་བྱ་བའང་མ་ཡིན་ནོ། །ཚད་མེད་ཚད་དང་ལྡན་པར་ཡང་། །ཚོགས་ཀྱི་དབུས་སུ་སྟོན་པ་རབ་ཏུ་བྱེད། །དེ་བཞིན་རྟོགས་པའི་བློ་ལྡན་པ། །སངས་རྒྱས་ཀུན་གྱི་དགེ་བའི་རྩ་བ