Kinh tạng Tây Tạng (Kangyur Đại Học) — 037_ཕལ་ཆེན།_ག

དཔའ་ཆེན་པོ་མི་རྟོག་རྣམ་པར་མི་
རྟོག་པའི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ས་གཞི་རབ་ཏུ་སྒྲོག་པའི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡན་ལག་ཐམས་ཅད་ཀྱི་དབྱངས་ཀྱི་ཟིལ་གྱིས་གནོན་པ་དང་། བྱང་ཆུབ་སེམས་
དཔའ་སེམས་དཔའ་ཆེན་པོ་ཀུན་ནས་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ནས་དྲི་མ་མེད་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་གྱི་སྙིང་པོ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་རྣམ་པར་སྣང་བའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བའི་སྙིང་
པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཙང་མའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་པད་མོའི་སྙིང་པོ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་པད་མོའི་དཔལ་གྱི་སྙིང་པོ་དང་། དེ་དག་ལ་སྩོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་ཀུན་ཏུ་བཟང་པོའི་སྤྱོད་

པ་དང་སྨོན་ལམ་དུ་ལྡན་པ། སྨོན་ལམ་དང་ལྷག་པའི་བསམ་པ་ཕུན་སུམ་ཚོགས་པ་དང་། སངས་རྒྱས་བྱུང་བ་ཐམས་ཅད་ཀྱི་དྲུང་དུ་འགྲོ་ཞིང་གསོལ་བ་གདབ་པ་ལ་མཁས་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་ཡང་དག་པར་འཛིན་
པ། སངས་རྒྱས་ཐམས་ཅད་ཀྱི་རིགས་རྒྱུན་མྱི་གཅོད་པ། སངས་རྒྱས་འབྱུང་བ་གཅིག་ནས་གཅིག་ཏུ་ལུང་བསྟན་པ་དང་། མངོན་པར་འཚང་རྒྱ་བ་དང་མྱིང་དང་ཞིང་དང་འཁོར་ལོའི་ཚུལ་ཡོངས་སུ་སྦྱོང་བ། སངས་རྒྱས་མྱི་བཞུགས་པའི་འཇིག་
རྟེན་གྱི་ཁམས་སུ་སངས་རྒྱས་སྐྱེ་བ་ཡོངས་སུ་སྟོན་པ། ཀུན་ནས་ཉོན་མོངས་པའི་སེམས་ཅན་གྱི་ཁམས་ཐམས་ཅད་ཡོངས་སུ་དག་པར་བྱེད་པ། བྱང་ཆུབ་སེམས་དཔའི་ལས་ཀྱི་སྒྲིབ་པ་ཐམས་ཅད་རབ་ཏུ་སེལ་བ། ཆོས་ཀྱི་དབྱིངས་བསྒྲིབས་པ་མྱེད་
པ་ལ་ཤིན་ཏུ་ཞུགས་པ་ཤ་སྟག་དང་ཐབས་གཅིག་ཏུ་བཞུགས་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དེའི་ཚེ། སངས་རྒྱས་ཕལ་པོ་ཆེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལྟར་
བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་ཏིང་ངེ་འཛིན་ཆེན་པོ་སངས་རྒྱས་ཕལ་པོ་ཆེ་ཞེས་བྱ་བ་དེ་ལ་མཉམ་པར་བཞག་མ་ཐག་ཏུ་དེའི་ཚེ། ཕྱོགས་བཅུའི་འཇིག་རྟེན་གྱི་ཁམས་འབྱམ་ཀླས་པ་ཆོས་ཀྱི་དབྱིངས་ཀྱིས་ཀླས་པ། ནམ་
མཁའི་མཐས་གཏུགས་པ་མ་ལུས་པ་ཐམས་ཅད་རྣམ་པ་དྲུག་ཏུ་གཡོས་ཏེ་གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ་རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ་རབ་ཏུ་ལྡེག་གོ །ཀུན་ཏུ་ལྡེག་གོ །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་ཆེམ་
ཆེམ་མོ། །འུར་འུར་རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག་རབ་ཏུ་ཤིག་ཤིག །ཀུན་ཏུ་ཤིག་ཤིག་གོ །དེ་ལྟར་འཇིག་རྟེན་གྱི་ཁམས་འབྱམ་ཀླས་པ་མ་ལུས་པ་ཐམས་ཅད་རབ་ཏུ་བསྐྱོད་དེ། དབྱངས་ཀྱིས་མངོན་པར་གོ་བར་

བྱས་ནས་ཏིང་ངེ་འཛིན་དེ་ལས་ལངས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་ཤེས་རབ་ཀྱིས་བྱང་ཆུབ་སེམས་དཔའི་ཚོགས་ཆེན་པོ་འདུས་པར་ཤེས་ནས། བྱང་ཆུབ་སེམས་དཔའ་
སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་ལེགས་པར་བསྟན་པ་མཛོད་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྒྱུ་མཐུན་པ་ནི་གང་། ངོ་མཚར་གྱི་འདུ་ཤེས་ནི་གང་། སྤྱོད་པ་ནི་གང་། དགེ་བའི་བཤེས་གཉེན་ནི་གང་
བརྩོན་འགྲུས་རྩོམ་པ་ནི་གང་། དབུགས་ཕྱིན་པ་ཐོབ་པ་ནི་གང་། སེམས་ཅན་ཡོངས་སུ་སྨིན་པར་བྱ་བ་ནི་གང་། ཚུལ་ཁྲིམས་ནི་གང་། ལུང་བསྟན་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའ་ལ་འཇུག་པ་ནི་གང་། དེ་བཞིན་
གཤེགས་པ་ལ་འཇུག་པ་ནི་གང་། སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་ནི་གང་། འཇིག་རྟེན་གྱི་ཁམས་ལ་འཇུག་པ་ནི་གང་། བསྐལ་པ་ལ་འཇུག་པ་ནི་གང་དུས་གསུམ་བསྟན་པ་ནི་གང་། དུས་གསུམ་ལ་འཇུག་པ་ནི་གང་།
མྱི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་ནི་གང་། ཀུན་ཏུ་དབྱེ་བའི་ཡེ་ཤེས་ནི་གང་། གཟུངས་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔས་སངས་རྒྱས་བསྟན་པའི་རྗེས་སུ་རྟོགས་པར་བྱ་བ་ནི་གང་། ཀུན་
ཏུ་བཟང་པོའི་སེམས་བསྐྱེད་པ་ནི་གང་། ཀུན་ཏུ་བཟང་པོའི་སྤྱོད་པའི་ཆོས་ནི་གང་། སྙིང་རྗེ་ཆེན་པོ་རབ་ཏུ་ཐོབ་པ་ནི་གང་། རྐྱེན་གང་གིས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་ཀྱི་སེམས་ཀྱི་རྐྱེན་ནི་གང་། དགེ་བའི་བཤེས་གཉེན་
ལ་གུས་པའི་སེམས་ནི་གང་། ཡོངས་སུ་དག་པ་ནི་གང་། ཕ་རོལ་ཏུ་ཕྱིན་པ་ནི་གང་། ཤེས་པ་ཁོང་དུ་ཆུད་པར་བྱ་བ་ནི་གང་རབ་ཏུ་རྟོགས་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཤུགས་ནི་གང་།

མཉམ་པ་ཉིད་ནི་གང་། སངས་རྒྱས་ཀྱི་ཆོས་ཀྱི་ཚུལ་གྱི་ལམ་ནི་གང་། ཆོས་བསྟན་པ་ནི་གང་། ཡོངས་སུ་གཟུང་བ་ནི་གང་། སྤོབས་པ་ནི་གང་། དབང་ནི་གང་། མྱི་གནས་པ་ནི་གང་། སེམས་མཉམ་པ་ཉིད་ནི་གང་། ཡེ་ཤེས་མངོན་པར་
བསྒྲུབ་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སྤྲུལ་པ་ནི་གང་། བྱིན་གྱི་རླབས་ནི་གང་། དབུགས་ཕྱིན་པ་ཆེན་པོ་རབ་ཏུ་ཐོབ་པ་ནི་གང་། སངས་རྒྱས་ཀྱི་ཆོས་ཟབ་མོ་ལ་འཇུག་པ་ནི་གང་། གནས་སུ་བྱ་བ་ནི་གང་། སེམས་བསྐྱེད་
པ་བརྟན་པ་ནི་གང་། ནེམ་ནུར་ཐམས་ཅད་གཅོད་པའི་སེམས་བསྐྱེད་པ་ནི་གང་། བསམ་གྱིས་མི་ཁྱབ་པ་ནི་གང་། དགོངས་ཏེ་བཤད་པ་ལ་མཁས་པ་ནི་གང་། ཡེ་ཤེས་རྣམ་པར་དབྱེ་བ་ལ་མཁས་པ་ནི་གང་། ཀྱེ་རྒྱལ་བའི་སྲས་བྱང་ཆུབ་
སེམས་དཔའ་རྣམས་ཀྱི་སྙོམས་པར་འཇུག་པ་ནི་གང་། རིལ་པོ་ནི་གང་། རྣམ་པར་ཐར་པ་ནི་གང་། མངོན་པར་ཤེས་པ་ནི་གང་། རིག་པ་ནི་གང་། རྣམ་པར་གྲོལ་བ་ནི་གང་། སྐྱེད་མོས་ཚལ་ནི་གང་། གཞལ་མེད་ཁང་ནི་གང་། དགའ་བ་ནི་གང་།
རྒྱན་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་མྱི་སྒུལ་བ་ནི་གང་། ལྷག་པའི་བསམ་པ་ཡོངས་སུ་མི་གཏོང་བ་ལ་གནས་པ་ནི་གང་། ཡེ་ཤེས་ཀྱི་རྣམ་པར་བལྟ་བ་ནི་གང་། ཆོས་ཤིན་ཏུ་བསྟན་པ་ནི་གང་། ཡོངས་
སུ་དག་པ་ནི་གང་། ཕྱག་རྒྱ་ནི་གང་། ཡེ་ཤེས་སྣང་བ་ནི་གང་། བྱང་ཆུབ་སེམས་དཔའི་གནས་མཚུངས་པ་མེད་པ་ནི་གང་། སངས་རྒྱས་ཀྱི་བྱང་ཆུབ་ཏུ་ཞུམ་པ་མེད་པའི་སེམས་བསྐྱེད་པ་ནི་གང་། ལྷག་པའི་བསམ་པ་རི་བོ་ལྟ་བུ་ནི་གང་། ཀྱེ་རྒྱལ་བའི་སྲས་
བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་ལྟ་བུ་ནི་གང་། བྱང་ཆུབ་སེམས་དཔའི་རྣམ་པར་སྤྱོད་པ་རིན་པོ་ཆེ་ལྟ་བུ་ནི་གང་། ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་ནི་གང་།

རྩོམ་པ་ཆེན་པོ་ནི་གང་། བརྩམས་པ་ཆེན་པོ་མཐར་ཕྱིན་པར་བྱ་བ་ནི་གང་། དད་པ་མྱི་ཕྱེད་པ་ནི་གང་། ལུང་བསྟན་པ་ནི་གང་། དགེ་བའི་རྩ་བ་ཡོངས་སུ་བསྔོ་བ་ནི་གང་། ཡེ་ཤེས་ཁོང་དུ་ཆུད་པ་ནི་གང་། སེམས་
བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་གཏེར་ནི་གང་། སྡོམ་པ་ནི་གང་། དབང་ནི་གང་། རྣམ་པར་འཕྲུལ་པ་ནི་གང་། སེམས་ཅན་ལ་རྣམ་པར་འཕྲུལ་པ་ནི་གང་། ཞིང་ལ་
རྣམ་པར་འཕྲུལ་པ་ནི་གང་། ཆོས་ལ་རྣམ་པར་འཕྲུལ་པ་ནི་གང་། ལུས་ལ་རྣམ་པར་འཕྲུལ་པ་ནི་གང་། སྨོན་ལམ་ལ་རྣམ་པར་འཕྲུལ་པ་ནི་གང་། སྤྱོད་ཡུལ་ལ་རྣམ་པར་འཕྲུལ་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་
ཡེ་ཤེས་ལ་རྣམ་པར་འཕྲུལ་པ་ནི་གང་། མངོན་པར་ཤེས་པ་ལ་རྣམ་པར་འཕྲུལ་བ་ནི་གང་། རྫུ་འཕྲུལ་ལ་རྣམ་པར་འཕྲུལ་པ་ནི་གང་། སྟོབས་ལ་རྣམ་པར་འཕྲུལ་པ་ནི་གང་། རྣམ་པར་རྩེ་བ་ནི་གང་། ཁྱུ་མཆོག་གི་མཐུ་ཕྱུང་བ་ནི་གང་། སྟོབས་ནི་
གང་། མི་འཇིགས་པ་ནི་གང་། བྱང་ཆུབ་སེམས་དཔའི་མ་འདྲེས་པའི་ཆོས་ནི་གང་། ལས་ནི་གང་ལུས་ནི་གང་། བྱང་ཆུབ་སེམས་དཔའ་རྣམས་ཀྱི་ལུས་ཀྱི་ལས་ནི་གང་། རང་བཞིན་ནི་གང་། ངག་ནི་གང་། ངག་ཡོངས་སུ་དག་པ་ནི་གང་། ཡོངས་སུ་འཛིན་
པ་ནི་གང་། གང་གིས་ཤིན་ཏུ་བཟུང་ཞིང་བྱང་ཆུབ་སེམས་དཔའི་ངག་འབྱུང་བར་འགྱུར། བྱང་ཆུབ་སེམས་དཔའི་ངག་གིས་ནི་ངག་གི་ལས་གང་ཞིག་འགྲུབ་པར་འགྱུར། སེམས་ནི་གང་སེམས་བསྐྱེད་པ་ནི་གང་སེམས་ཀྱིས་རྒྱས་པར་དགང་པ་ནི་གང་། ཀྱེ་
རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་དབང་པོ་ནི་གང་། བསམ་པ་ནི་གང་། ལྷག་པའི་བསམ་པ་ནི་གང་། སྦྱོར་བ་ནི་གང་། མོས་པ་ནི་གང་། འཇིག་རྟེན་གྱི་ཁམས་སུ་མོས་པ་ལ་འཇུག་པ་ནི་གང་། སེམས་ཅན་གྱི་ཁམས་སུ་མོས་པ་ལ་འཇུག་

པ་ནི་གང་། བག་ཆགས་ནི་གང་། ཉེ་བར་ལེན་པ་ནི་གང་། ནན་ཏན་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་འགྲུབ་པ་ནི་གང་། སངས་རྒྱས་ཀྱི་ཆོས་ལས་འགོལ་བའི་ལམ་ནི་གང་། སྐྱོན་མེད་པ་ནི་གང་། བྱང་ཆུབ་སེམས་དཔའི་ཆོས་
ངེས་པ་འཐོབ་པ་ནི་གང་། སངས་རྒྱས་ཀྱི་ཆོས་ལ་འབྱུང་བའི་ལམ་ནི་གང་། སྐྱེས་བུ་དམ་པའི་མྱིང་ཐོབ་པ་ནི་གང་། ལམ་ནི་གང་། ལམ་ཚད་མེད་པ་ནི་གང་། ལམ་གྱི་ཚོགས་ནི་གང་། ལམ་བསྒོམ་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་
རྣམས་ཀྱི་ལམ་གྱི་རྒྱན་ནི་གང་། རྐང་པ་ནི་གང་། ལག་པ་ནི་གང་། ལྟོ་ནི་གང་། སྙིང་པོ་ནི་གང་། སྙིང་ནི་གང་། གོ་ཆ་ནི་གང་། མཚོན་ཆ་ནི་གང་། མགོ་ནི་གང་། མྱིག་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་རྣ་
བ་ནི་གང་། སྣ་ནི་གང་། ལྕེ་ནི་གང་། ལུས་ནི་གང་། ཡིད་རྣམ་པར་རྒྱུ་བ་ནི་གང་། འགྲོ་བ་ནི་གང་། གནས་པ་ནི་གང་། སྟན་ལ་འདུག་པ་ནི་གང་། མལ་ནི་གང་། རྣམ་པར་སྤྱོད་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སྤྱོད་
ཡུལ་ནི་གང་། ལྟ་བ་ནི་གང་། རྣམ་པར་ལྟ་བ་ནི་གང་། རྣམ་པར་བསྒྱིངས་པ་ནི་གང་། སེང་གེའི་ང་རོ་ནི་གང་། སྦྱིན་པ་ཡོངས་སུ་དག་པ་ནི་གང་། ཚུལ་ཁྲིམས་ཡོངས་སུ་དག་པ་ནི་གང་། བཟོད་པ་ཡོངས་སུ་དག་པ་ནི་གང་། བརྩོན་འགྲུས་
ཡོངས་སུ་དག་པ་ནི་གང་། བསམ་གཏན་ཡོངས་སུ་དག་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་ཤེས་རབ་ཡོངས་སུ་དག་པ་ནི་གང་། བྱམས་པ་ཡོངས་སུ་དག་པ་ནི་གང་། སྙིང་རྗེ་ཡོངས་སུ་དག་པ་ནི་གང་། དགའ་
བ་ཡོངས་སུ་དག་པ་ནི་གང་། བཏང་སྙོམས་ཡོངས་སུ་དག་པ་ནི་གང་། དོན་ནི་གང་། ཆོས་ནི་གང་། བསོད་ནམས་ཀྱི་ཚོགས་ནི་གང་། ཡེ་ཤེས་ཀྱི་ཚོགས་ནི་གང་། རིག་པ་སྐྱེ་བ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་ཆོས་

ཡོངས་སུ་ཚོལ་བ་ནི་གང་། ཆོས་རབ་ཏུ་བརྗོད་པ་ནི་གང་ཆོས་ཀྱི་ནན་ཏན་ནི་གང་། བདུད་ནི་གང་། བདུད་ཀྱི་ལས་ནི་གང་། བདུད་ཀྱི་ལས་བཟློག་པ་ནི་གང་། སངས་རྒྱས་མཐོང་བར་བྱ་བ་ནི་གང་། སངས་རྒྱས་
ཀྱི་ཕྲིན་ལས་ནི་གང་། ང་རྒྱལ་གྱི་ལས་ནི་གང་། ཡེ་ཤེས་ཀྱི་ལས་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་བདུད་ཀྱི་བྱིན་གྱི་རླབས་ནི་གང་། སངས་རྒྱས་ཀྱི་བྱིན་གྱི་རླབས་ནི་གང་། ཆོས་ཀྱི་བྱིན་གྱི་རླབས་ནི་གང་། དགའ་ལྡན་ན་གནས་པའི་ལས་ནི་གང་། དགའ་
ལྡན་གྱི་གནས་ནས་འཆི་འཕོ་སྟོན་པ་ནི་གང་། མངལ་ན་གནས་པར་སྟོན་པ་ནི་གང་། ཤིན་ཏུ་ཕྲ་བའི་རྒྱུད་སྟོན་པ་ནི་གང་། ཚེར་སྐྱེ་བ་ནི་གང་། གད་མོ་ཆེར་དགོད་པ་ནི་གང་། གོམ་པས་རྣམ་པར་གནོན་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་
རྣམས་ཀྱི་གཞོན་ནུའི་ས་ཀུན་ཏུ་སྟོན་པ་ནི་གང་། བཙུན་མོའི་འཁོར་ཉེ་བར་སྟོན་པ་ནི་གང་། མངོན་པར་འབྱུང་བ་ནི་གང་། དཀའ་བ་སྤྱོད་པའི་སྦྱོར་བ་ནི་གང་། སྙིང་པོ་བྱང་ཆུབ་ཏུ་འགྲོ་བ་ནི་གང་། སྙིང་པོ་བྱང་ཆུབ་ལ་འདུག་པ་ནི་གང་། སྙིང་པོ་བྱང་ཆུབ་
ལ་འདུག་པ་རྣམས་ཀྱི་ངོ་མཚར་རྨད་དུ་བྱུང་བའི་ཆོས་ནི་གང་། བདུད་འདུལ་བ་སྟོན་པ་ནི་གང་། དེ་བཞིན་གཤེགས་པའི་སྟོབས་མངོན་པར་རྫོགས་པར་བྱང་ཆུབ་པ་ནི་གང་། ཆོས་ཀྱི་འཁོར་ལོ་རབ་ཏུ་བསྐོར་བ་ནི་གང་། ཆོས་ཀྱི་འཁོར་ལོ་རབ་ཏུ་བསྐོར་བའི་
ཆོས་དཀར་པོའི་རྣམ་པ་ནི་གང་། ཀྱེ་རྒྱལ་བའི་སྲས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡོངས་སུ་མྱ་ངན་ལས་འདའ་བ་ཆེན་པོ་བསྟན་པ་ནི་གང་། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་
དཔའ་ཆེན་པོ་ཀུན་ཏུ་བཟང་པོས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་ཤེས་རབ་ལ་དམྱིགས་ནས། བྱང་ཆུབ་སེམས་དཔའི་ཚོགས་དེ་དག་ཐམས་ཅད་ལ་སྨྲས་པ། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་

ཆེན་པོ་རྣམས་ཀྱི་རྒྱུ་འཐུན་པ་སྟེ། བཅུ་གང་ཞེ་ན་འདི་ལྟར་ཆུད་མི་ཟ་བའི་ཕྱིར། བྱང་ཆུབ་ཀྱི་སེམས་ཀྱི་རྒྱུ་འཐུན་པ་དང་། རྒྱུད་ཀྱི་ཚུལ་གཅིག་ཏུ་བྱ་བའི་ཕྱིར་དགེ་བའི་བཤེས་གཉེན་གྱི་རྒྱུ་འཐུན་པ་དང་། ཤིན་ཏུ་བསྩགས་པའི་ཕྱིར་དགེ་བའི་རྩ་བའི་
རྒྱུ་འཐུན་པ་དང་། ནན་ཏན་དུ་བྱ་བའི་ཕྱིར་ཕ་རོལ་ཏུ་ཕྱིན་པའི་རྒྱུ་འཐུན་པ་དང་། འབྱུང་བའི་ཕྱིར་ཆོས་ཐམས་ཅད་ཀྱི་རྒྱུ་འཐུན་པ་དང་། བྱང་ཆུབ་བརྟན་པའི་ཕྱིར་སྨོན་ལམ་གྱི་རྒྱུ་འཐུན་པ་དང་། རྒྱ་ཆེན་པོ་ཡང་དག་པར་བསྩགས་པའི་ཕྱིར་སྤྱོད་པའི་
རྒྱུ་འཐུན་པ་དང་། ཚུལ་གཅིག་ཏུ་བྱ་བའི་ཕྱིར་བྱང་ཆུབ་སེམས་དཔའ་ཐམས་ཅད་དང་རྒྱུ་འཐུན་པ་དང་། སེམས་རབ་ཏུ་དང་བའི་ཕྱིར་སངས་རྒྱས་མཆོད་པ་རྒྱུ་འཐུན་པ་དང་། ཕ་ལྟ་བུར་བརྗོད་པའི་ཕྱིར་དེ་བཞིན་གཤེགས་པ་ཐམས་ཅད་དང་རྒྱུ་འཐུན་པའོ། །
ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྒྱུ་འཐུན་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་
བྱང་ཆུབ་སེམས་དཔའ་རྣམས་ཀྱི་ངོ་མཚར་ཀྱི་འདུ་ཤེས་ཏེ། བཅུ་གང་ཞེ་ན། འདི་ལྟར་དགེ་བའི་རྩ་བ་ཐམས་ཅད་ལ་མི་དགེ་བར་འདུ་ཤེས་པ་དང་། དགེ་བ་ཐམས་ཅད་ལ་བྱང་ཆུབ་ཀྱི་ས་བོན་དུ་འདུ་ཤེས་པ་དང་། སེམས་ཅན་ཐམས་ཅད་ལ་བྱང་
ཆུབ་ཀྱི་སྣོད་དུ་འདུ་ཤེས་པ་དང་། སྨོན་ལམ་ཐམས་ཅད་ལ་སྨོན་ལམ་མེད་པར་འདུ་ཤེས་པ་དང་། ཆོས་ཐམས་ཅད་ལ་འབྱུང་བར་འདུ་ཤེས་པ་དང་། སྤྱོད་པ་ཐམས་ཅད་ལ་སྤྱོད་པ་མེད་པར་འདུ་ཤེས་པ་དང་། ཆོས་ཐམས་ཅད་ལ་སངས་རྒྱས་ཀྱི་ཆོས་
སུ་འདུ་ཤེས་པ་དང་། ཚིག་ཏུ་སྤྱོད་པ་ཐམས་ཅད་ལ་དག་གི་ལམ་མྱེད་པར་འདུ་ཤེས་པ་དང་། སངས་རྒྱས་ཐམས་ཅད་ལ་ཕར་འདུ་ཤེས་པ་དང་། དེ་བཞིན་གཤེགས་པ་ཐམས་ཅད་ལ་གཉིས་སུ་མེད་པར་འདུ་ཤེས་པའོ། །ཀྱེ་རྒྱལ་བའི་སྲས་

བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ངོ་མཚར་གྱི་འདུ་ཤེས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་འདུ་ཤེས་རྣམ་པར་བཟློག་པ་ལ་མཁས་པ་བླ་ན་མེད་པ་ཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་
བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་སྟེ། བཅུ་གང་ཞེ་ན། འདི་ལྟར་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་དོན་དུ་སྤྱོད་པ་དང་། ཆོས་ཐམས་ཅད་ཡོངས་སུ་བཙལ་བའི་དོན་དུ་སྤྱོད་པ་དང་། བསླབ་པ་ཐམས་ཅད་ནན་ཏན་ཏུ་བྱ་བའི་
དོན་དུ་སྤྱོད་པ་དང་། དགེ་བའི་རྩ་བ་ཐམས་ཅད་བསྩགས་པའི་དོན་དུ་སྤྱོད་པ་དང་། ཏིང་ངེ་འཛིན་རྩེ་གཅིག་ཏུ་བྱ་བའི་དོན་དུ་སྤྱོད་པ་དང་། ཡེ་ཤེས་རབ་ཏུ་ཤེས་པར་བྱ་བའི་དོན་དུ་སྤྱོད་པ་དང་། བསྒོམ་པ་ཡོངས་སུ་བསྒོམ་པའི་དོན་དུ་སྤྱོད་པ་དང་། ཞིང་
བརྒྱན་པའི་དོན་དུ་སྤྱོད་པ་དང་། དགེ་བའི་གཤེས་གཉེན་བཀུར་བའི་དོན་དུ་སྤྱོད་པ་དང་། དེ་བཞིན་གཤེགས་པ་མཆོད་ཅིང་རིམ་གྲོར་བྱ་བའི་དོན་དུ་སྤྱོད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་སྟེ། དེ་
དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་སྤྱོད་པ་བླ་ན་མེད་པ་ཡོངས་སུ་རྫོགས་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་བཤེས་གཉེན་
ཏེ། བཅུ་གང་ཞེ་ན། འདི་ལྟར་བྱང་ཆུབ་ཀྱི་སེམས་ལ་རབ་ཏུ་གཞོག་པའི་བཤེས་གཉེན་དང་། དགེ་བའི་རྩ་བ་ལ་སྦྱོར་བའི་བཤེས་གཉེན་དང་། ཕ་རོལ་ཏུ་ཕྱིན་པ་ལ་འཇུག་པར་བྱེད་པའི་བཤེས་གཉེན་དང་། ཆོས་ཐམས་ཅད་སྟོན་པའི་བཤེས་
གཉེན་དང་། སེམས་ཅན་ཐམས་ཅད་ཡོངས་སུ་སྨྱིན་པར་བྱ་བ་ལ་གཞོག་པའི་བཤེས་གཉེན་དང་། སྤོབས་པ་ལ་རྣམ་པར་གདོན་མྱི་ཟ་བར་བྱེད་པའི་བཤེས་གཉེན་དང་། འགྲོ་བ་ཐམས་ཅད་གནས་གྱེན་དུ་བསྐྱོད་པའི་བཤེས་གཉེན་དང་། བསྐལ་

པ་ཐམས་ཅད་དུ་གནས་ཤིང་མི་སྐྱོ་བར་བྱེད་པའི་བཤེས་གཉེན་དང་། ཀུན་ཏུ་བཟང་པོའི་སྤྱོད་པ་ལ་རབ་ཏུ་གཞོག་པའི་བཤེས་གཉེན་དང་། སངས་རྒྱས་ཐམས་ཅད་ཀྱི་ཡེ་ཤེས་ལ་འཇུག་ཅིང་འབབ་པར་བྱེད་པའི་བཤེས་གཉེན་ཏེ། ཀྱེ་རྒྱལ་བའི་
སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་བཤེས་གཉེན་ནོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་བརྩམས་པ་སྟེ། བཅུ་གང་ཞེ་ན། འདི་ལྟར་སེམས་ཅན་གྱི་ཁམས་ཐམས་ཅད་
ཡོངས་སུ་སྨིན་པར་བྱའོ་སྙམ་སྟེ། བརྩོན་འགྲུས་རྩོམ་པ་དང་། ཆོས་ཐམས་ཅད་གཟུང་བར་བྱའོ་སྙམ་སྟེ་བརྩོན་འགྲུས་རྩོམ་པ་དང་། འཇིག་རྟེན་གྱི་ཁམས་ཐམས་ཅད་ཡོངས་སུ་སྦྱང་བར་བྱའོ་སྙམ་སྟེ། བརྩོན་འགྲུས་རྩོམ་པ་དང་།
བྱང་ཆུབ་སེམས་དཔའི་བསླབ་པ་ཐམས་ཅད་ཤེས་པར་བྱའོ་སྙམ་སྟེ། བརྩོན་འགྲུས་རྩོམ་པ་དང་། སེམས་ཅན་ཐམས་ཅད་ཀྱི་ཉེས་བྱས་ཟད་པར་བྱའོ་སྙམ་སྟེ་བརྩོན་འགྲུས་རྩོམ་པ་དང་། སེམས་ཅན་དམྱལ་བ་དང་། བྱོལ་སོང་གི་སྐྱེ་
གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་རྒྱུན་གཅད་དོ་སྙམ་སྟེ། བརྩོན་འགྲུས་རྩོམ་པ་དང་། བདུད་ཐམས་ཅད་ལས་རྒྱལ་བར་བྱའོ་སྙམ་སྟེ། བརྩོན་འགྲུས་རྩོམ་པ་དང་། སེམས་ཅན་ཐམས་ཅད་ལ་འཁྲུག་པ་མེད་པར་བྱའོ་
སྙམ་སྟེ། བརྩོན་འགྲུས་རྩོམ་པ་དང་། སངས་རྒྱས་ཐམས་ཅད་ལ་མཆོད་པ་བྱའོ་སྙམ་སྟེ། བརྩོན་འགྲུས་རྩོམ་པ་དང་། དེ་བཞིན་གཤེགས་པ་ཐམས་ཅད་མཉེས་པར་བྱའོ་སྙམ་སྟེ། བརྩོན་འགྲུས་རྩོམ་པའོ། །ཀྱེ་རྒྱལ་བའི་སྲས་
བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་རྩོམ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བླ་ན་མེད་པ་ཡང་དག་པར་རྫོགས་པ་འཐོབ་པར་འགྱུར་བ་དག་གོ །ཀྱེ་

རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་ཕྱིན་པ་ཐོབ་པ་སྟེ། བཅུ་གང་ཞེ་ན་འདི་ལྟར་བདག་ནི་བྱང་ཆུབ་ཀྱི་སེམས་ལ་གནས་པ་ཡིན་གྱིས་ད་དུང་གཞན་ཡང་བྱང་ཆུབ་ཀྱི་སེམས་ལ་དགོད་
དོ་ཞེས་ཏེ་དབུགས་ཕྱིན་པ་རབ་ཏུ་འཐོབ་བོ། །བདག་ནི་འཇིག་རྟེན་གྱི་རྩོད་པ་ཐམས་ཅད་ཀྱིས་རྩོད་པ་མྱེད་པ་ལ་གཞོལ་བ་ཡིན་གྱིས་ད་དུང་གཞན་ཡང་རྩོད་པ་མེད་པར་དགའ་བ་ལ་དགོད་པར་བྱའོ། །ཞེས་དབུགས་ཕྱིན་པ་འཐོབ་བོ། །བདག་ནི་བྱིས་
པའི་ཆོས་ལས་འཕགས་ཀྱི་ད་དུང་ཕ་རོལ་ཀྱང་བྱིས་པའི་ཆོས་ལས་གྱེན་དུ་བསྐྱོད་དེ་སངས་རྒྱས་ཀྱི་ཆོས་ལ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །བདག་ནི་དགེ་བའི་རྩ་བ་བཙལ་བ་ལ་བརྩོན་པ་ཡིན་གྱིས། ད་དུང་གཞན་ཡང་དགེ་བའི་རྩ་བ་ཚོལ་བར་
བརྩོན་པ་ལ་རབ་ཏུ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །བདག་ནི་ཕ་རོལ་ཏུ་ཕྱིན་པའི་ལམ་དུ་ཞུགས་པ་ཡིན་གྱིས། །ད་དུང་གཞན་ཡང་ཕ་རོལ་ཏུ་ཕྱིན་པའི་ལམ་དུ་འཇུག་པ་ལ་དགོད་པར་བྱའོ། །ཞེས་དབུགས་ཕྱིན་པ་འཐོབ་བོ། །བདག་ནི་སངས་རྒྱས་
ཀྱི་རིགས་སུ་སྐྱེས་པ་ཡིན་གྱིས། ད་དུང་གཞན་ཡང་སངས་རྒྱས་ཀྱི་རིགས་སུ་སྐྱེ་བ་ལ་རབ་ཏུ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །བདག་ནི་དངོས་པོ་མེད་པའི་ཆོས་ཀྱི་ཚུལ་ལ་ཞུགས་པ་ཡིན་གྱིས། ད་དུང་གཞན་ཡང་དངོས་པོ་མེད་པའི་ཆོས་
ཀྱི་ཚུལ་ལ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །བདག་ནི་སངས་རྒྱས་ཀྱི་ཆོས་ཐམས་ཅད་མི་སྤོང་བ་ལ་བརྩོན་པ་ཡིན་གྱིས། ད་དུང་གཞན་ཡང་སངས་རྒྱས་ཀྱི་ཆོས་ཐམས་ཅད་མྱི་སྤོང་བར་བརྩོན་པ་ལ་དགོད་པར་བྱའོ་ཞེས་དབུགས་ཕྱིན་པ་འཐོབ་
བོ་བདག་གིས་ནི་ཐམས་ཅད་མཁྱེན་པའི་བྱང་ཆུབ་ཏུ་སྨོན་ལམ་ཡོངས་སུ་རྫོགས་པར་འགྱུར་གྱིས། །ད་དུང་གཞན་ཡང་ཐམས་ཅད་མཁྱེན་པའི་བྱང་ཆུབ་ཏུ་སྨོན་ལམ་ཡོངས་སུ་རྫོགས་པར་བྱེད་པ་ལ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །བདག་ནི་དེ་

བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་མཛོད་མི་ཟད་པར་ཞུགས་པ་ཡིན་གྱིས། །ད་དུང་གཞན་ཡང་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་མཛོད་མྱི་ཟད་པར་འཇུག་པ་ལ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །ཀྱེ་རྒྱལ་བའི་སྲས་
བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་ཕྱིན་པ་ཐོབ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་དབུགས་ཕྱིན་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་
བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་ཡོངས་སུ་སྨིན་པར་བྱ་བ་དག་སྟེ། བཅུ་གང་ཞེ་ན་འདི་ལྟར་བྱང་ཆུབ་སེམས་དཔའ་རྣམས་ནི་སྦྱིན་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །གཟུགས་ཀྱིས་ཀྱང་སེམས་ཅན་གྱི་ཁམས་
ཡོངས་སུ་སྨྱིན་པར་བྱེད་དོ། །ཆོས་སྟོན་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །སྐལ་བ་མཉམ་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །གནས་མེད་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་
བྱེད་དོ། །བྱང་ཆུབ་སེམས་དཔའི་སྤྱོད་པ་བརྗོད་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །འཇིག་རྟེན་གྱི་ཁམས་ཀུན་ཏུ་འབར་བ་ཡང་དག་པར་བསྟན་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །སངས་རྒྱས་
ཀྱི་ཆོས་ཀྱི་ཆེ་བ་ཉིད་བརྗོད་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །རྫུ་འཕྲུལ་སྣ་ཚོགས་ཀྱི་རྣམ་པར་འཕྲུལ་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །ཐབས་མཁས་པའི་སྦྱོར་བ་དང་། ཚུལ་གྱིས་
འཇིག་རྟེན་དུ་སྤྱད་པ་སྣ་ཚོགས་ཀྱིས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན། ཡོངས་སུ་སྨྱིན་པར་བྱ་བ་སྟེ། དེ་དག་གིས་བྱང་ཆུབ་སེམས་དཔའ་

རྣམས་ཀྱི་སེམས་ཅན་གྱི་ཁམས་ཡོངས་སུ་སྨིན་པར་བྱེད་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཏེ། བཅུ་གང་ཞེ་ན་འདི་ལྟར་བྱང་ཆུབ་ཀྱི་སེམས་མྱི་ཉམས་པའི་ཚུལ་
ཁྲིམས་དང་། ཉན་ཐོས་དང་རང་སངས་རྒྱས་ཀྱིས་ཡོངས་སུ་སྤོང་བའི་ཚུལ་ཁྲིམས་དང་། སེམས་ཅན་ཐམས་ཅད་ལ་ཕན་པར་དཀའ་བས་རྣམ་པར་ལྟ་བའི་ཚུལ་ཁྲིམས་དང་། སངས་རྒྱས་ཀྱི་ཆོས་ཐམས་ཅད་ལ་རབ་ཏུ་དགོད་པའི་ཚུལ་ཁྲིམས་དང་། བྱང་
ཆུབ་སེམས་དཔའི་བསླབ་པ་ཐམས་ཅད་ལ་ནན་ཏན་བྱ་བའི་ཚུལ་ཁྲིམས་དང་། ཆོས་ཐམས་ཅད་མྱི་དམྱིགས་པའི་ཚུལ་ཁྲིམས་དང་། དགེ་བའི་རྩ་བ་ཐམས་ཅད་བྱང་ཆུབ་ཏུ་ཡོངས་སུ་བསྔོ་བའི་ཚུལ་ཁྲིམས་དང་། སངས་རྒྱས་ཀྱི་སྐུ་ཐམས་ཅད་ལས་ཕྱིར་
ཕྱོགས་སུ་མི་ལྟ་བའི་ཚུལ་ཁྲིམས་དང་། ཆོས་ཐམས་ཅད་ངེས་པར་རྟོགས་པ་ལ་མངོན་པར་ཞེན་པ་མེད་པའི་ཚུལ་ཁྲིམས་དང་། དབང་པོ་སྡོམ་པའི་ཚུལ་ཁྲིམས་སོ། །ཀྱེ་རྒྱལ་བའི་སྲས་བཅུ་བོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཏེ།
དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཚུལ་ཁྲིམས་རྒྱ་ཆེན་པོའི་ཕ་རོལ་ཏུ་ཕྱིན་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་སྟེ། ལུང་བསྟན་
པ་དེ་དག་གིས་ལུང་བསྟན་པའི་བྱང་ཆུབ་སེམས་དཔའ་རྣམས་ནི་བདག་ཅག་ལུང་བསྟན་ཏོ། །ཞེས་བྱ་བར་ཤེས་སོ། །བཅུ་གང་ཞེ་ན། འདི་ལྟར་སྙིང་ཐག་པ་ནས་བྱང་ཆུབ་ཀྱི་སེམས་ཕུན་སུམ་ཚོགས་པ་ནི་བྱང་ཆུབ་སེམས་དཔའ་རྣམས་ཀྱི་རང་གི་རྒྱུད་ལས་ལུང་
བསྟན་པའོ། །བྱང་ཆུབ་སེམས་དཔའི་སྤྱོད་པ་ལ་མི་སྐྱོ་བ་ནི་བྱང་ཆུབ་སེམས་དཔའི་ལུང་བསྟན་པའོ། །བསྐལ་པ་ཐམས་ཅད་དུ་ཞེ་ནོན་པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །སངས་རྒྱས་ཀྱི་ཆོས་ཐམས་ཅད་ལ་ནན་ཏན་དུ་བྱེད་པ་ནི་བྱང་ཆུབ་སེམས་

དཔའ་རྣམས་ཀྱི་ལུང་བསྟན་པའོ། །དེ་བཞིན་གཤེགས་པ་ཐམས་ཅད་ཀྱི་བཀའ་ལ་གཅིག་ཏུ་ཆད་པར་མོས་ཤིང་ཡིད་ཆེས་ལ་མངོན་པར་དད་པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །དགེ་བའི་རྩ་བ་ཐམས་ཅད་ཡང་དག་པར་སོགས་ཤིང་སྒྲུབ་
པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །སེམས་ཅན་ཐམས་ཅད་སངས་རྒྱས་ཀྱི་བྱང་ཆུབ་ལ་རབ་ཏུ་དགོད་པར་བརྩོན་པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །དགེ་བའི་བཤེས་གཉེན་ཐམས་ཅད་དང་རྒྱུད་ཀྱི་ཚུལ་གཅིག་ཏུ་བྱེད་པ་
ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །དགེ་བའི་བཤེས་གཉེན་ཐམས་ཅད་ལ་སྟོན་པར་འདུ་ཤེས་པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །སྔོན་གྱི་བྱང་ཆུབ་ཀྱི་སྨོན་ལམ་རྗེས་སུ་བསྲུང་བ་ནི་བྱང་ཆུབ་སེམས་དཔའ་རྣམས་
ཀྱི་ལུང་བསྟན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་སྟེ། ལུང་བསྟན་པ། དེ་དག་གིས་ལུང་བསྟན་པའི་བྱང་ཆུབ་སེམས་དཔའ་རྣམས་ནི་བདག་ཅག་ལུང་བསྟན་ཏོ་ཞེས་བྱ་བར་ཤེས་སོ། །ཀྱེ་རྒྱལ་བའི་
སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའ་ལ་འཇུག་པ་སྟེ། བཅུ་གང་ཞེ་ན་འདི་ལྟར་སྔོན་གྱི་སྨོན་ལམ་ལ་འཇུག་པ་དང་། སྤྱོད་པ་ལ་འཇུག་པ་དང་། ཡང་དག་པར་བསྒྲུབ་པ་ལ་འཇུག་པ་དང་། ཕ་རོལ་ཏུ་ཕྱིན་པ་ལ་འཇུག་པ་
དང་། བསྒྲུབ་པ་ལ་འཇུག་པ་དང་། སྨོན་ལམ་རྣམ་པ་ཐ་དད་པ་ལ་འཇུག་པ་དང་། མོས་པ་ཐ་དད་པ་ལ་འཇུག་པ་དང་། ཞིང་གི་རྒྱན་ལ་འཇུག་པ་དང་། རྫུ་འཕྲུལ་གྱིས་རྣམ་པར་འཕྲུལ་པ་ལ་འཇུག་པ་དང་། སྐྱེ་བ་བསྟན་པ་ལ་འཇུག་པའོ། །ཀྱེ་རྒྱལ་བའི་
སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའ་ལ་འཇུག་པ་སྟེ། འཇུག་པ་དེ་དག་གིས་ནི་འདས་པ་དང་མ་འོངས་པ་དང་། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་ལ་འཇུག་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་

དཔའ་རྣམས་ཀྱིས་དེ་བཞིན་གཤེགས་པ་ལ་འཇུག་པ་སྟེ། བཅུ་གང་ཞེ་ན་འདི་ལྟར་མུ་མེད་པའི་མངོན་པར་རྫོགས་པར་བྱང་ཆུབ་པ་ལ་འཇུག་པ་དང་། མུ་མེད་པའི་ཆོས་ཀྱི་འཁོར་ལོ་བསྐོར་བ་ལ་འཇུག་པ་དང་། མུ་མེད་པའི་ཆོས་ཀྱི་
ཚུལ་ལ་འཇུག་པ་དང་། མུ་མེད་པའི་དབྱངས་ཀྱི་དཀྱིལ་འཁོར་ལ་འཇུག་པ་དང་། མུ་མེད་པའི་སེམས་ཅན་འདུལ་བ་ལ་འཇུག་པ་དང་། མུ་མེད་པའི་རྫུ་འཕྲུལ་གྱིས་རྣམ་པར་འཕྲུལ་པ་ལ་འཇུག་པ་དང་། མུ་མེད་པའི་སྐུ་སྣ་ཚོགས་ལ་འཇུག་པ་དང་། མུ་མེད་
པའི་ཏིང་ངེ་འཛིན་ལ་འཇུག་པ་དང་། མུ་མེད་པའི་སྟོབས་དང་མི་འཇིགས་པ་ལ་འཇུག་པ་དང་། མུ་མེད་པའི་མྱ་ངན་ལས་འདས་པ་ཡོངས་སུ་བསྟན་པའོ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དེ་བཞིན་གཤེགས་པ་ལ་འཇུག་
པ་སྟེ། འཇུག་པ་དེ་དག་གིས་ནི་འདས་པ་དང་། མ་བྱོན་པ་དང་ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ལ་འཇུག་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་གྱི་བསམ་པ་དང་། སྤྱོད་པ་ལ་འཇུག་པ་སྟེ། སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་
དེ་དག་གིས་ནི། བྱང་ཆུབ་སེམས་དཔའ་རྣམས་སེམས་ཅན་ཐམས་ཅད་ཀྱི་བསམ་པ་དང་། སྤྱོད་པ་ལ་རབ་ཏུ་འཇུག་གོ །བཅུ་གང་ཞེ་ན་འདི་ལྟར་སེམས་ཅན་ཐམས་ཅད་ཀྱི་སྔོན་གྱི་མཐའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་ཕྱི་མའི་མཐའི་སྤྱོད་
པ་ལ་འཇུག་པ་དང་། སེམས་ཅན་ཐམས་ཅད་ཀྱི་ད་ལྟར་བྱུང་བའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་དགེ་བའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་མི་དགེ་བའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་
སེམས་ཀྱི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་དབང་པོའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་མོས་པ་སྣ་ཚོགས་ཀྱི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་ཉོན་མོངས་པའི་བག་ཆགས་དང་བག་ལ་ཉལ་བའི་སྤྱོད་

པ་ལ་འཇུག་པ་དང་། སེམས་ཅན་ཐམས་ཅད་ཀྱི་དུས་དང་དུས་མ་ཡིན་པར་ཡོངས་སུ་སྨྱིན་པར་བྱ་བ་དང་། རྣམ་པར་འདུལ་བའི་སྤྱོད་པ་ལ་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་གྱི་བསམ་པ་དང་སྤྱོད་པ་
ལ་འཇུག་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་སེམས་ཅན་གྱི་བསམ་པ་དང་སྤྱོད་པ་ལ་འཇུག་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་འཇིག་རྟེན་གྱི་ཁམས་ལ་འཇུག་པ་སྟེ། བཅུ་གང་
ཞེ་ན་འདི་ལྟར་འཇིག་རྟེན་གྱི་ཁམས་རྣམས་ལ་ཀུན་ནས་ཉོན་མོངས་པར་འཇུག་པ་དང་། འཇིག་རྟེན་གྱི་ཁམས་རྣམས་ལ་རྣམ་པར་དག་པར་འཇུག་པ་དང་། འཇིག་རྟེན་གྱི་ཁམས་རྣམས་ལ་ཆུང་ངུར་འཇུག་པ་དང་། འཇིག་རྟེན་གྱི་ཁམས་རྣམས་ལ་ཆེན་
པོར་འཇུག་པ་དང་འཇིག་རྟེན་གྱི་ཁམས་རྣམས་ལ་རྡུལ་ཤིན་ཏུ་ཕྲ་མོར་ཆུད་པར་འཇུག་པ་དང་། འཇིག་རྟེན་གྱི་ཁམས་རྣམས་ལ་རབ་ཏུ་ཕྲ་བར་འཇུག་པ་དང་། འཇིག་རྟེན་གྱི་ཁམས་རྣམས་ལ་ཡངས་པར་འཇུག་པ་དང་། འཇིག་རྟེན་གྱི་ཁམས་རྣམས་ལ་
འབྱུང་བར་འཇུག་པ་དང་། འཇིག་རྟེན་གྱི་ཁམས་རྣམས་ལ་སངས་རྒྱས་དང་བཅས་པར་འཇུག་པ་དང་། འཇིག་རྟེན་གྱི་ཁམས་རྣམས་ལ་སངས་རྒྱས་མེད་པར་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་
འཇིག་རྟེན་གྱི་ཁམས་ལ་འཇུག་པ་སྟེ། དེ་དག་གིས་ནི་བྱང་ཆུབ་སེམས་དཔའ་རྣམས་འཇིག་རྟེན་གྱི་ཁམས་ཐམས་ཅད་ལ་འཇུག་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བསྐལ་པ་ལ་འཇུག་པ་
སྟེ། དེ་དག་གིས་བྱང་ཆུབ་སེམས་དཔའ་རྣམས་བསྐལ་པ་ཐམས་ཅད་ལ་རབ་ཏུ་འཇུག་གོ །བཅུ་གང་ཞེ་ན་འདི་ལྟར་འདས་པའི་བསྐལ་པ་ལ་འཇུག་པ་དང་། མ་འོངས་པའི་བསྐལ་པ་ལ་འཇུག་པ་དང་། ད་ལྟར་བྱུང་བའི་བསྐལ་པ་ལ་འཇུག་

པ་དང་། གྲངས་ཡོད་པའི་བསྐལ་པ་ལ་འཇུག་པ་དང་། གྲངས་མེད་པའི་བསྐལ་པ་ལ་འཇུག་པ་དང་། གྲངས་ཡོད་པ་དང་གྲངས་མེད་པའི་བསྐལ་པ་ལ་འཇུག་པ་དང་། གྲངས་མེད་པ་གྲངས་ཡོད་པའི་བསྐལ་པ་ལ་འཇུག་པ་དང་།
བསྐལ་པ་ཐམས་ཅད་ལ་བསྐལ་པ་གཅིག་ཏུ་འཇུག་པ་དང་། བསྐལ་པ་མ་ཡིན་པ་ལ་བསྐལ་པར་འཇུག་པ་དང་། བསྐལ་པ་ཐམས་ཅད་ལ་སྐད་ཅིག་གཅིག་གིས་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བསྐལ་པ་ལ་འཇུག་
པ་རྣམས་ཏེ། དེ་དག་གིས་བྱང་ཆུབ་སེམས་དཔའ་རྣམས་བསྐལ་པ་ལ་འཇུག་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དུས་གསུམ་བསྟན་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་དུས་གསུམ་
ཤིན་ཏུ་སྟོན་ཏོ། །བཅུ་གང་ཞེ་ན་འདི་ལྟར་འདས་པའི་དུས་ལ་འདས་པར་བསྟན་པ་དང་། འདས་པའི་དུས་ལ་མ་འོངས་པར་བསྟན་པ་དང་། འདས་པའི་དུས་ལ་ད་ལྟར་བྱུང་བར་བསྟན་པ་དང་། མ་འོངས་པའི་དུས་ལ་འདས་པར་བསྟན་པ་དང་། མ་འོངས་
པའི་དུས་ལས་ད་ལྟར་བྱུང་བར་བསྟན་པ་དང་། མ་འོངས་པའི་དུས་ལ་མི་ཟད་པར་བསྟན་པ་དང་། ད་ལྟར་བྱུང་བའི་དུས་ལ་འདས་པར་བསྟན་པ་དང་། ད་ལྟར་བྱུང་བའི་དུས་ལ་མ་འོངས་པར་བསྟན་པ་དང་། ད་ལྟར་བྱུང་བའི་དུས་ལ་མཉམ་པ་ཉིད་དུ་བསྟན་པ་དང་།
ད་ལྟར་བྱུང་བའི་དུས་ལ་དུས་གསུམ་སྐད་ཅིག་ཏུ་བསྟན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དུས་གསུམ་བསྟན་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་དུས་གསུམ་སྟོན་པར་འགྱུར་བ་དག་གོ །ཀྱེ་རྒྱལ་བའི་
སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དུས་གསུམ་ལ་འཇུག་པ་སྟེ། བཅུ་གང་ཞེ་ན་འདི་ལྟར་བརྡ་ལ་འཇུག་པ་དང་། ཚིག་གི་ལམ་ལ་འཇུག་པ་དང་། མངོན་པར་བརྗོད་པ་ལ་འཇུག་པ་དང་། གདགས་པ་ལ་འཇུག་པ་དང་། འདུ་ཤེས་

ལ་འཇུག་པ་དང་། ལེགས་པར་བསྔགས་པ་ལ་འཇུག་པ་དང་། སྤྱོད་པ་ལ་འཇུག་པ་དང་། མི་ཟད་པ་ལ་འཇུག་པ་དང་། ཞི་བ་ལ་འཇུག་པ་དང་། དབེན་པ་ལ་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དུས་གསུམ་ལ་
འཇུག་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་དུས་གསུམ་ལ་འཇུག་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མི་སྐྱོ་ཞིང་སྒྱིད་ལུག་པ་མེད་པའི་སེམས་བསྐྱེད་པ་སྟེ། བཅུ་གང་ཞེ་ན། འདི་
ལྟར་སངས་རྒྱས་ཐམས་ཅད་མཆོད་ཅིང་རིམ་གྲོར་བྱ་བས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། དགེ་བའི་བཤེས་གཉེན་ཐམས་ཅད་བསྙེན་བཀུར་བས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། ཆོས་ཐམས་ཅད་
བཙལ་བ་ལ་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། ཆོས་ཐམས་ཅད་མཉན་པ་ལ་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། ཆོས་ཐམས་ཅད་བསྟན་པ་ལ་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་
བསྐྱེད་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། སེམས་ཅན་ཐམས་ཅད་སངས་རྒྱས་ཀྱི་བྱང་ཆུབ་ལ་རབ་ཏུ་དགོད་པར་བྱ་བས་མི་སྐྱོ་ཞིང་ཡོངས་སུ་སྒྱིད་ལུག་པ་
མེད་པའི་སེམས་བསྐྱེད་པ་དང་། བསྐལ་པ་བརྗོད་དུ་མྱེད་པའི་ཡང་བརྗོད་དུ་མེད་པར་འཇིག་རྟེན་གྱི་ཁམས་རེ་རེར་བྱང་ཆུབ་སེམས་དཔའི་སྤྱད་པ་སྤྱོད་པས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། འཇིག་རྟེན་གྱི་ཁམས་མ་ལུས་པ་ཐམས་
ཅད་དུ་རྗེས་སུ་སྤྱོད་པས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། སངས་རྒྱས་ཀྱི་ཆོས་ཐམས་ཅད་རྟོགས་པར་བྱ་བ་དང་། ཡང་དག་པར་བལྟ་བ་ལ་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པའོ། །ཀྱེ་རྒྱལ་བའི་

སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མི་སྐྱོ་ཞིང་སྒྱིད་ལུག་པ་མེད་པའི་སེམས་བསྐྱེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་ཡོངས་སུ་སྐྱོ་བ་མེད་པ་བླ་ན་
མེད་པ་ཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་དབྱེ་བའི་ཡེ་ཤེས་ཏེ། བཅུ་གང་ཞེ་ན་འདི་ལྟར་སེམས་ཅན་ཀུན་ཏུ་དབྱེ་བའི་ཡེ་ཤེས་དང་། དབང་པོ་ཀུན་ཏུ་དབྱེ་བའི་ཡེ་ཤེས་དང་། ལས་དང་རྣམ་
པར་སྨིན་པ་ཀུན་ཏུ་དབྱེ་བའི་ཡེ་ཤེས་དང་། སྐྱེ་བ་ཀུན་ཏུ་དབྱེ་བའི་ཡེ་ཤེས་དང་། འཇིག་རྟེན་གྱི་ཁམས་ཀུན་ཏུ་དབྱེ་བའི་ཡེ་ཤེས་དང་། ཆོས་ཀྱི་དབྱིངས་ཀུན་ཏུ་དབྱེ་བའི་ཡེ་ཤེས་དང་། སངས་རྒྱས་ཀུན་ཏུ་དབྱེ་བའི་ཡེ་ཤེས་དང་། ཆོས་ཀུན་ཏུ་དབྱེ་བའི་ཡེ་ཤེས་
དང་། དུས་གསུམ་ཀུན་ཏུ་དབྱེ་བའི་ཡེ་ཤེས་དང་། ཚིག་གི་རྒྱུད་ཐམས་ཅད་ལ་ངག་གི་ལམ་ཀུན་ཏུ་དབྱེ་བའི་ཡེ་ཤེས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་དབྱེ་བའི་ཡེ་ཤེས་ཏེ། དེ་དག་ལ་གནས་ཤིང་བྱང་ཆུབ་
སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་ཀུན་ཏུ་དབྱེ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གཟུངས་ཏེ། བཅུ་གང་ཞེ་ན་འདི་ལྟར་ཆོས་ཐམས་ཅད་མི་བརྗེད་པར་འཛིན་
པའི་ཕྱིར་ཐོས་པའི་གཟུངས་དང་། ཆོས་ཐམས་ཅད་ཇི་ལྟ་བ་བཞིན་ཏུ་རབ་ཏུ་འབྱེད་པའི་ཆོས་ཁོང་དུ་ཆུད་པའི་གཟུངས་དང་། ཆོས་ཀྱི་རང་བཞིན་རྗེས་སུ་རྟོགས་པའི་ཕྱིར་ཆོས་ཐམས་ཅད་ངེས་པར་རྟོགས་པའི་གཟུངས་དང་། སངས་རྒྱས་ཀྱི་ཆོས་བསམ་
གྱིས་མི་ཁྱབ་པ་ཐོབ་པའི་ཕྱིར་ཆོས་སྣང་བ་རབ་ཏུ་ཐོབ་པའི་གཟུངས་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལས་ཆོས་མངོན་དུ་ཐོས་པ་ཡོངས་སུ་མི་ཟད་པའི་ཕྱིར་ཏིང་ངེ་འཛིན་གྱི་གཟུངས་དང་། སྒྲ་སྐད་དང་ཐ་སྙད་བསམ་གྱིས་

མི་ཁྱབ་པ་ལ་འཇུག་པའི་ཕྱིར་དབྱངས་ཀྱི་དཀྱིལ་འཁོར་ལ་འཇུག་པའི་གཟུངས་དང་། འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཤིན་ཏུ་སྟོན་པའི་ཕྱིར་དུས་གསུམ་གྱི་གཟུངས་དང་། སངས་རྒྱས་ཀྱི་ཆོས་
མཐའ་དང་དབུས་མེད་པ་རྣམ་པ་ཐ་དད་པ་ཐམས་ཅད་ཤིན་ཏུ་སྟོན་པའི་ཕྱིར་རྣམ་པ་སྣ་ཚོགས་སུ་སྤོབས་པའི་གཟུངས་དང་། སངས་རྒྱས་བྱུང་བ་བརྗོད་དུ་མེད་པ་ཐམས་ཅད་དུ་རྣ་བའི་དབང་པོས་ཁྱབ་པར་བྱེད་པའི་ཕྱིར་ཐོགས་པ་མེད་པའི་རྣ་བ་མངོན་པར་བསྒྲུབ་པའི་གཟུངས་དང་།
དེ་བཞིན་གཤེགས་པའི་སྟོབས་བཅུ་དང་། མི་བསྙེངས་པ་ལ་རབ་ཏུ་དགོད་པའི་ཕྱིར་སངས་རྒྱས་ཀྱི་ཆོས་ཐམས་ཅད་ཀྱི་གཟུངས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གཟུངས་ཏེ། དེ་དག་ཐོབ་པར་བྱ་བའི་ཕྱིར་བྱང་ཆུབ་སེམས་དཔའ་
རྣམས་ཀྱི་བརྩོན་པར་བྱ་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་བསྟན་པ་རྗེས་སུ་རྟོགས་པར་བྱ་བ་སྟེ། བཅུ་གང་ཞེ་ན་འདི་ལྟར་མངོན་པར་བྱང་ཆུབ་པའི་སངས་རྒྱས་དང་། སྨོན་ལམ་གྱི་སངས་རྒྱས་དང་།
ལས་རྣམ་པར་སྨྱིན་པའི་སངས་རྒྱས་དང་། བྱིན་གྱིས་བརླབས་པའི་སངས་རྒྱས་དང་། སྤྲུལ་པའི་སངས་རྒྱས་དང་། ཆོས་ཀྱི་དབྱིངས་ཀྱི་སངས་རྒྱས་དང་། སེམས་ཀྱི་སངས་རྒྱས་དང་། ཏིང་ངེ་འཛིན་གྱི་སངས་རྒྱས་དང་། རང་བཞིན་གྱི་སངས་རྒྱས་དང་། བསམ་པ་ཇི་ལྟ་བའི་
སངས་རྒྱས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་བསྟན་པ་རྗེས་སུ་རྟོགས་པར་བྱ་བ་རྣམས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་བཟང་པོའི་སེམས་བསྐྱེད་
པ་སྟེ། བཅུ་གང་ཞེ་ན་འདི་ལྟར་སེམས་བསྐྱེད་པ་དེ་ནི་འགྲོ་བ་ཐམས་ཅད་ཡོངས་སུ་སྐྱོབ་པའི་ཕྱིར་བྱམས་པ་ཆེན་པོ་དང་ལྡན་པའོ། །སེམས་བསྐྱེད་པ་དེ་ནི་འགྲོ་བ་ཐམས་ཅད་ཀྱི་སྡུག་བསྔལ་གྱི་ཕུང་པོ་རང་གི་ལུས་ཀྱིས་ལེན་པའི་ཕྱིར་སྙིང་རྗེ་ཆེན་པོ་དང་ལྡན་

པའོ། །སེམས་བསྐྱེད་པ་དེ་ནི་ཅི་བདོག་པ་ཡོངས་སུ་གཏོང་བའི་ཕྱིར་བཏང་བ་ཐམས་ཅད་ཡོངས་སུ་གཏང་བ་སྔོན་དུ་འགྲོ་བའོ། །སེམས་བསྐྱེད་པ་དེ་ནི་སངས་རྒྱས་ཀྱི་ཆོས་ཐམས་ཅད་ལ་མངོན་པར་མོས་པས་ཐམས་ཅད་མཁྱེན་པའི་
ཡེ་ཤེས་ཡིད་ལ་བྱེད་པ་སྔོན་དུ་འགྲོ་བའོ། །སེམས་བསྐྱེད་པ་དེ་ནི་བྱང་ཆུབ་སེམས་དཔའི་བསླབ་པ་ཐམས་ཅད་ལ་ནན་ཏན་དུ་བྱེད་པས་ཡོན་ཏན་གྱིས་བརྒྱན་པའོ། །སེམས་བསྐྱེད་པ་དེ་ནི་སྐྱེ་བའི་སྐྱེ་མཆེད་ཐམས་ཅད་དུ་ཉམས་པར་མི་འགྱུར་བས་རྡོ་རྗེ་ལྟ་བུའོ།
སེམས་བསྐྱེད་པ་དེ་ནི་ཆོས་དཀར་པོ་ཐམས་ཅད་ལ་ཡང་དག་པར་གཞོལ་བས་རྒྱ་མཚོ་ལྟ་བུའོ། །སེམས་བསྐྱེད་པ་དེ་ནི་གཞན་གྱིས་ངན་དུ་བརྗོད་པ་དང་ངན་དུ་སྨྲ་བ་དག་བཟོད་པའི་ཕྱིར་རི་བོ་ཆེན་པོའི་དབང་པོ་དམ་པ་ལྟ་བུའོ། །སེམས་བསྐྱེད་པ་དེ་ནི་
སེམས་ཅན་ཐམས་ཅད་ལ་དབུགས་ཕྱིན་པ་ཆེན་པོས་སྡུད་པའི་ཕྱིར་བདེ་བར་བྱེད་པའོ། །སེམས་བསྐྱེད་པ་དེ་ནི་ཆོས་ཐམས་ཅད་རབ་ཏུ་དབྱེ་བ་ལ་མཁས་པས་མི་དམྱིགས་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པས་རྟོགས་པར་ཁོང་དུ་ཆུད་པར་བྱ་བའོ། །ཀྱེ་
རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་བཟང་པོའི་སེམས་བསྐྱེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་མྱུར་དུ་ཀུན་ཏུ་བཟང་པོའི་ཡེ་ཤེས་ཁོང་དུ་ཆུད་པ་ལ་མཁས་པས་འཐོབ་པར་འགྱུར་བ་དག་གོ །
ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་བཟང་པོའི་སྤྱོད་པའི་ཆོས་ཏེ། བཅུ་གང་ཞེ་ན་འདི་ལྟར་མ་འོངས་པའི་བསྐལ་པ་ཐམས་ཅད་དུ་གནས་པའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །མ་བྱོན་པའི་དེ་
བཞིན་གཤེགས་པ་ཐམས་ཅད་མཆོད་ཅིང་རིམ་གྲོར་བྱ་བའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །སེམས་ཅན་ཐམས་ཅད་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་དགོད་པ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །དགེ་བའི་

རྩ་བ་ཐམས་ཅད་ཡང་དག་པར་བསྩགས་པའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །ཕ་རོལ་ཏུ་ཕྱིན་པ་ཐམས་ཅད་ལ་འཇུག་པའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་ཡོངས་སུ་རྫོགས་
པར་བྱ་བའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །འཇིག་རྟེན་གྱི་ཁམས་ཐམས་ཅད་བརྒྱན་པའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །སངས་རྒྱས་ཀྱི་ཞིང་ཐམས་ཅད་དུ་སྐྱེ་བ་གཟུང་བའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ།
ཆོས་ཐམས་ཅད་ཡོངས་སུ་བཙལ་ཞིང་རབ་ཏུ་དབྱེ་བ་ལ་མཁས་པར་བྱ་བའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །སངས་རྒྱས་ཀྱི་ཞིང་ཐམས་ཅད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བའི་སྨོན་ལམ་ནི་ཀུན་ཏུ་
བཟང་པོའི་སྤྱོད་པའི་ཆོས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་བཟང་པོའི་སྤྱོད་པའི་ཆོས་ཏེ། དེ་དག་གིས་སྨོན་ཅིང་མངོན་པར་བརྩོན་པར་བྱས་ན། བྱང་ཆུབ་སེམས་དཔའ་རྣམས་མྱུར་ཏུ་ཀུན་ཏུ་བཟང་པོའི་སྨོན་
ལམ་དང་། སྤྱོད་པ་ཡོངས་སུ་རྫོགས་པ་འཐོབ་པར་འགྱུར་བ་དག་གོ། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་བཞི་པ། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་
རྗེ་ཆེན་པོ་རབ་ཏུ་འཐོབ་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་རྟག་ཏུ་རྒྱུན་མི་འཆད་པར་སེམས་ཅན་གྱི་ཁམས་ལ་རྣམ་པར་ལྟའོ། །བཅུ་གང་ཞེ་ན་འདི་ལྟར་སེམས་ཅན་གྱི་ཁམས་མགོན་མེད་པ་རྣམས་ལ་རྣམ་པར་ལྟ་བའི་སྙིང་རྗེ་
ཆེན་པོ་རབ་ཏུ་ཐོབ་པ་དང་། སེམས་ཅན་གྱི་ཁམས་ཐེག་པ་མེད་པ་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། དགེ་བའི་རྩ་བས་དབུལ་བའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། ཡུན་རིང་

པོ་ནས་གཉིད་ཀྱིས་བརྒྱལ་བའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། དགེ་བ་མེད་པའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། འདོད་ཆགས་ཀྱི་
བཅིང་བས་གླགས་པའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། སྲིད་པའི་གང་ཆེན་མཚོར་རབ་ཏུ་གཞོལ་བར་གྱུར་བའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། ཡུན་རིང་པོ་ནས་ན་བའི་སེམས་ཅན་
གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། དགེ་བའི་ཆོས་ལ་མོས་པ་མེད་པའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། སངས་རྒྱས་ཀྱི་ཆོས་ལས་ཤིན་ཏུ་འཁྱམས་པར་གྱུར་པའི་སེམས་ཅན་གྱི་ཁམས་ལ་
རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོ་རབ་ཏུ་ཐོབ་པ་སྟེ་དེ་དག་གིས་བྱང་ཆུབ་སེམས་དཔའ་རྣམས་རྟག་ཏུ་རྒྱུན་མི་འཆད་པར་སེམས་ཅན་གྱི་ཁམས་ལ་རྣམ་པར་བལྟ་བ་དག་
གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་རྐྱེན་གང་གིས་བྱང་ཆུབ་ཏུ་སེམས་བསྐྱེད་པར་འགྱུར་བའི་བྱང་ཆུབ་ཀྱི་སེམས་ཀྱི་རྐྱེན་རྣམས་ཏེ། བཅུ་གང་ཞེ་ན་འདི་ལྟར་སེམས་ཅན་གྱི་ཁམས་ཡོངས་སུ་སྨྱིན་པར་བྱ་བ་དང་། རྣམ་པར་
གདུལ་བར་བྱ་བའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་རྣམ་པར་བཟློག་པའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སེམས་ཅན་ཐམས་ཅད་ལ་བདེ་བའི་ཡོ་བྱད་ཀྱིས་སྡུད་པའི་རྐྱེན་ནི་བྱང་ཆུབ་ཀྱི་སེམས་
ཀྱི་རྐྱེན་ཏོ། །སེམས་ཅན་ཐམས་ཅད་ཀྱི་མི་ཤེས་པ་བསྩལ་བའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སེམས་ཅན་ཐམས་ཅད་ལ་སངས་རྒྱས་ཀྱི་ཡེ་ཤེས་ཉེ་བར་བསྒྲུབ་པའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སངས་རྒྱས་ཐམས་ཅད་མཆོད་ཅིང་རིམ་

གྲོར་བྱ་བའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །དེ་བཞིན་གཤེགས་པ་ཐམས་ཅད་མཉེས་པར་བྱ་བའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སངས་རྒྱས་ཐམས་ཅད་ནི་སྐུ་གཟུགས་དང་མཚན་དང་དཔེ་བྱད་བཟང་པོ་ཡོངས་སུ་བསྟན་པའི་རྐྱེན་ནི་བྱང་ཆུབ་
ཀྱི་སེམས་ཀྱི་རྐྱེན་ཏོ། །སངས་རྒྱས་ཐམས་ཅད་ཀྱི་ཡེ་ཤེས་ལ་འཇུག་ཅིང་ཁོང་དུ་ཆུད་པར་བྱེད་པའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སངས་རྒྱས་ཀྱི་སྟོབས་དང་མི་བསྙེངས་པ་ཐམས་ཅད་ཡོངས་སུ་བསྟན་པའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །
ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་སེམས་ཀྱི་རྐྱེན་ཏེ། རྐྱེན་དེ་དག་གིས་བྱང་ཆུབ་ཀྱི་སེམས་ཡང་དག་པར་སྐྱེ་བར་འགྱུར་བ་དག་གོ །ཀྱེ་རྒྱལ་བའི་སྲས་བྱང་ཆུབ་སེམས་དཔའ་གང་གིས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེས་ཀྱང་ཐམས་ཅད་མཁྱེན་པའི་ཡེ་ཤེས་མངོན་པར་འཚང་རྒྱ་བར་བྱ་བའི་ཕྱིར་དགེ་བའི་བཤེས་གཉེན་རྣམས་ལ་རིམ་གྲོ་དང་བཀུར་སྟི་དང་བསྙེན་བཀུར་བྱའོ། །དེ་དགེ་བའི་བཤེས་གཉེན་རྣམས་ལ་རིམ་
གྲོ་དང་། བཀུར་སྟི་དང་། བསྙེན་བཀུར་བྱེད་པའི་ཚེ། དགེ་བའི་བཤེས་གཉེན་རྣམས་ལ་སེམས་བསྐྱེད་པ་བཅུ་པོ་འདི་དག་བསྐྱེད་པར་བྱ་སྟེ། བཅུ་གང་ཞེ་ན་འདི་ལྟར་རིམ་གྲོ་བྱ་བའི་སེམས་དང་། དགའ་བར་བྱ་བའི་སེམས་དང་ཇི་སྐད་བསྒོ་བ་བཞིན་དུ་ནན་ཏན་
ཏུ་བྱ་བའི་སེམས་དང་ཡིད་མི་འབྱུང་བའི་སེམས་དང་། ཇི་སྙམ་ཡང་མི་བྱེད་པའི་སེམས་དང་། གཅིག་ཏུ་ངེས་པའི་སེམས་དང་། དགེ་བའི་རྩ་བ་ཐམས་ཅད་ལ་རྒྱུད་ཀྱི་ཚུལ་གཅིག་ཏུ་གྱུར་པའི་སེམས་དང་། སྨོན་ལམ་གཅིག་པའི་སེམས་དང་། སྟོན་
པའི་སེམས་དང་། སྤྱོད་པ་མཚུངས་པར་ཡོངས་སུ་རྫོགས་པར་བྱ་བའི་སེམས་ཏེ། ཀྱེ་རྒྱལ་བའི་སྲས་བཅུ་པོ་དེ་དག་ནི་དགེ་བའི་བཤེས་གཉེན་རྣམས་ལ་སེམས་བསྐྱེད་པ་རྣམས་སོ། །དེ་སེམས་བསྐྱེད་པ་བཅུ་པོ་འདི་དག་བསྐྱེད་པའི་ཚེ་ཡོངས་སུ་དག་

པ་བཅུ་རབ་ཏུ་འཐོབ་པར་འགྱུར་ཏེ། བཅུ་གང་ཞེ་ན་འདི་ལྟར་ཆུད་མི་ཟ་བའི་ཕྱིར་ལྷག་པའི་བསམ་པ་ཡོངས་སུ་དག་པ་དང་། སེམས་ཅན་ཇི་ལྟ་བུར་འདུལ་བ་བཞིན་དུ་བསྟན་པའི་ཕྱིར་གཟུགས་ཡོངས་སུ་དག་པ་དང་། སྒྲ་
སྐད་དང་ཐ་སྙད་བསམ་གྱིས་མི་ཁྱབ་པ་ལ་འཇུག་པར་བྱ་བའི་ཕྱིར་དབྱངས་ཀྱི་དཀྱིལ་འཁོར་ཡོངས་སུ་དག་པ་དང་། སངས་རྒྱས་ཀྱི་ཆོས་བསམ་གྱིས་མི་ཁྱབ་པ་བསྟན་པ་ལ་མཁས་པར་བྱ་བའི་ཕྱིར་སྤོབས་པ་ཡོངས་སུ་དག་པ་དང་། མི་ཤེས་པ་ཐམས་
ཅད་དང་བྲལ་བར་བྱ་བའི་ཕྱིར་ཡེ་ཤེས་ཡོངས་སུ་དག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་དབང་རབ་ཏུ་ཐོབ་པར་བྱ་བའི་ཕྱིར་སྐྱེ་བ་ཡོངས་སུ་དག་པ་དང་། སྔོན་སྐལ་བ་མཉམ་པར་སྤྱད་པའི་སེམས་ཅན་རྣམས་ཀྱི་དགེ་བའི་རྩ་བ་ཡོངས་
སུ་སྨིན་པར་བྱ་བའི་ཕྱིར་འཁོར་ཡོངས་སུ་དག་པ་དང་། སྒྲིབ་པའི་ལས་ཐམས་ཅད་སྤངས་པས་རྣམ་པར་བཟློག་པའི་ཕྱིར་རྣམ་པར་སྨིན་པ་ཡོངས་སུ་དག་པ་དང་། བྱང་ཆུབ་སེམས་དཔའ་ཐམས་ཅད་དང་ཚུལ་གཅིག་ཏུ་བྱ་བའི་ཕྱིར་སྨོན་ལམ་ཡོངས་
སུ་དག་པ་དང་། ཀུན་ཏུ་བཟང་པོའི་ཐེག་པས་འབྱུང་བའི་ཕྱིར་སྤྱོད་པ་ཡོངས་སུ་དག་པ་སྟེ། ཡོངས་སུ་དག་པ་བཅུ་པོ་འདི་དག་འཐོབ་པར་འགྱུར་རོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཕ་རོལ་ཏུ་ཕྱིན་པ་སྟེ།
བཅུ་གང་ཞེ་ན་འདི་ལྟར་བདོག་པ་ཐམས་ཅད་ཡོངས་སུ་བཏང་བའི་ཕྱིར་སྦྱིན་པའི་ཕ་རོལ་ཏུ་ཕྱིན་པ་དང་། སངས་རྒྱས་ཀྱི་ཚུལ་ཁྲིམས་ཡོངས་སུ་སྦྱང་བའི་ཕྱིར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་སྟོབས་ཀྱིས་བསམ་པ་མི་འཁྲུགས་
པས་སངས་རྒྱས་ཀྱི་སྟོབས་ལ་སྦྱར་བའི་ཕྱིར་བཟོད་པའི་ཕ་རོལ་ཏུ་ཕྱིན་པ་དང་། མོས་པ་ཐམས་ཅད་ལས་ཕྱིར་མི་ལྡོག་པར་བྱ་བའི་ཕྱིར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། དྲན་པ་རྩེ་གཅིག་ཏུ་བྱ་བའི་ཕྱིར་བསམ་གཏན་གྱི་ཕ་རོལ་ཏུ་ཕྱིན་པ་དང་།

ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་པར་བྱ་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་དང་། སངས་རྒྱས་ཀྱི་སྟོབས་ལ་འཇུག་པའི་ཕྱིར་ཡེ་ཤེས་ཀྱི་ཕ་རོལ་ཏུ་ཕྱིན་པ་དང་། ཀུན་ཏུ་བཟང་པོའི་སྨོན་ལམ་ཡོངས་སུ་རྫོགས་
པར་བྱ་བའི་ཕྱིར་སྨོན་ལམ་གྱི་ཕ་རོལ་ཏུ་ཕྱིན་པ་དང་། རྫུ་འཕྲུལ་དང་རྣམ་པར་འཕྲུལ་བ་ཡོངས་སུ་བསྟན་པའི་ཕྱིར་རྫུ་འཕྲུལ་གྱི་རོལ་ཏུ་ཕྱིན་པ་དང་། ཆོས་ཐམས་ཅད་ལ་ཡང་དག་པར་གཞོལ་བར་བྱ་བའི་ཕྱིར་ཆོས་ཀྱི་ཕ་རོལ་ཏུ་ཕྱིན་
པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཕ་རོལ་ཏུ་ཕྱིན་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་ཕ་རོལ་ཏུ་ཕྱིན་པ་བླ་ན་མེད་པ་འཐོབ་པར་འགྱུར་
བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཤེས་པ་ཁོང་དུ་ཆུད་པར་བྱ་བ་སྟེ། བཅུ་གང་ཞེ་ན་འདི་ལྟར་འཇིག་རྟེན་གྱི་ཁམས་ཐམས་ཅད་ལ་རྣམ་པ་ཐ་དད་པ་ཤེས་པ་ཁོང་དུ་ཆུད་པར་བྱ་བ་དང་། སེམས་
ཅན་གྱི་ཁམས་ཐམས་ཅད་ཀྱི་རིགས་བསམ་གྱིས་མི་ཁྱབ་པ་ལ་འཇུག་པའི་ཤེས་པ་ཁོང་དུ་ཆུད་པར་བྱ་བ་དང་། ཆོས་ཐམས་ཅད་ལ་གཅིག་པ་དང་ཐ་དད་པར་ཡང་དག་པར་གཞོལ་བར་བྱ་བའི་ཤེས་པ་ཁོང་དུ་ཆུད་པར་བྱ་བ་དང་། ཆོས་ཀྱི་དབྱིངས་
འབྱམ་ཀླས་པ་ཐམས་ཅད་ཤིན་ཏུ་བསྟན་པའི་ཤེས་པ་ཁོང་དུ་ཆུད་པར་བྱ་བ་དང་། ནམ་མཁའི་དབྱིངས་མ་ལུས་པ་ཐམས་ཅད་ཀྱིས་ཀླས་པའི་ཤེས་པ་ཁོང་དུ་ཆུད་པར་བྱ་བ་དང་། འཇིག་རྟེན་གྱི་ཁམས་ཐམས་ཅད་ལ་མ་འོངས་པའི་དུས་ཀྱི་འཇུག།
པའི་ཤེས་པ་ཁོང་དུ་ཆུད་པར་བྱ་བ་དང་། འཇིག་རྟེན་གྱི་ཁམས་ཐམས་ཅད་ལ་འདས་པའི་དུས་ཀྱི་འཇུག་པའི་ཤེས་པ་ཁོང་དུ་ཆུད་པར་བྱ་བ་དང་། འཇིག་རྟེན་གྱི་ཁམས་ཐམས་ཅད་ལ་ད་ལྟར་བྱུང་བའི་དུས་ཀྱི་འཇུག་པའི་ཤེས་པ་ཁོང་དུ་

ཆུད་པར་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་སྤྱོད་པ་དང་། སྨོན་ལམ་རྣམ་པ་ཐ་དད་པ་ཐམས་ཅད་ཡོངས་སུ་རྫོགས་པར་བྱ་བས་གཅིག་ཏུ་རྟོགས་པར་འགྱུར་བའི་ཤེས་པ་ཁོང་དུ་ཆུད་པར་བྱ་བ་དང་། འདས་པ་
དག་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་སྤྱོད་པ་གཅིག་གིས་བྱུང་བའི་ཤེས་པ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཤེས་པ་ཁོང་དུ་ཆུད་པར་བྱ་བ་སྟེ། དེ་དག་ལ་གནས་ཤིང་བྱང་ཆུབ་
སེམས་དཔའ་རྣམས་ཆོས་སྣང་བ་ཐམས་ཅད་ལ་དབང་བསྒྱུར་བ་ཐོབ་པ་དང་། བསམ་པ་ཇི་ལྟ་བ་བཞིན་དུ་སྨོན་ལམ་ཡོངས་སུ་རྫོགས་པ་ཐོབ་པ་དང་། སངས་རྒྱས་ཀྱི་ཆོས་ཐམས་ཅད་མཚན་ཉིད་གཅིག་ཏུ་མོས་པས་སངས་རྒྱས་ཀྱི་ཆོས་ཐམས་ཅད་མངོན་
པར་རྫོགས་པར་འཚང་རྒྱ་བར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རབ་ཏུ་རྟོགས་པ་སྟེ། བཅུ་གང་ཞེན་འདི་ལྟར་ཆོས་ཐམས་ཅད་ལ་ཚུལ་གཅིག་ཏུ་རྟོགས་པ་དང་། ཆོས་ཐམས་ཅད་ལ་ཚུལ་ཐ་དད་པར་
རྟོགས་པ་དང་། ཆོས་ཐམས་ཅད་ལ་མཚན་ཉིད་གཅིག་ཏུ་རྟོགས་པ་དང་། སེམས་ཅན་གྱི་སེམས་དང་། བསམ་པ་ཐམས་ཅད་ལ་ཆགས་པ་མེད་པའི་ཡེ་ཤེས་སུ་རྟོགས་པ་དང་། སེམས་ཅན་ཐམས་ཅད་ཀྱི་དབང་པོ་མཉམ་པ་ཉིད་དུ་རྟོགས་པ་དང་། སེམས་
ཅན་ཐམས་ཅད་ཀྱི་ཉོན་མོངས་པ་དང་། བག་ཆགས་ཀྱི་སྤྱོད་པ་རྟོགས་པ་དང་། སེམས་ཅན་ཐམས་ཅད་ཀྱི་བསམ་པ་དང་། བག་ལ་ཉལ་བའི་སྤྱོད་པ་རྟོགས་པ་དང་། སེམས་ཅན་ཐམས་ཅད་ཀྱི་དགེ་བ་དང་། མི་དགེ་བའི་སྤྱོད་པ་ཐམས་ཅད་རྟོགས་པ་དང་།
བྱང་ཆུབ་སེམས་དཔའི་སྤྱོད་པ་དང་། སྨོན་ལམ་དང་རྣམ་པར་རྩེ་བ་དང་། འཕྲུལ་པ་དང་། བྱིན་གྱི་རླབས་ཐམས་ཅད་རྟོགས་པ་དང་། དེ་བཞིན་གཤེགས་པའི་སྟོབས་བཅུ་མ་ལུས་པར་མངོན་པར་སངས་རྒྱས་པའི་བྱིན་གྱི་རླབས་རྟོགས་པའོ། །

ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྟོགས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་ཐམས་ཅད་ཀྱི་ཚུལ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་
འདི་དག་ནི་བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཤུགས་ཏེ། བཅུ་གང་ཞེ་ན་འདི་ལྟར་ཆོས་ཐམས་ཅད་ཀྱི་རང་བཞིན་ལ་འཇུག་པའི་སྟོབས་ཀྱི་ཤུགས་དང་། ཆོས་ཐམས་ཅད་སྤྲུལ་པ་ལྟ་བུའི་སྟོབས་ཀྱི་ཤུགས་དང་། ཆོས་ཐམས་ཅད་སྒྱུ་མ་ལྟ་བུའི་
སྟོབས་ཀྱི་ཤུགས་དང་། ཆོས་ཐམས་ཅད་ལ་སངས་རྒྱས་ཀྱི་ཆོས་སུ་འཇུག་པའི་སྟོབས་ཀྱི་ཤུགས་དང་། ཆོས་ཐམས་ཅད་ལ་མངོན་པར་ཆགས་པ་མེད་པའི་སྟོབས་ཀྱི་ཤུགས་དང་། སངས་རྒྱས་ཀྱི་ཆོས་ཐམས་ཅད་ལ་ཤིན་ཏུ་མོས་པའི་སྟོབས་
ཀྱི་ཤུགས་དང་། དགེ་བའི་བཤེས་གཉེན་ཐམས་ཅད་ལ་ཤིན་ཏུ་གུས་པའི་བསམ་པ་མི་གཏོང་བའི་སྟོབས་ཀྱི་ཤུགས་དང་། དགེ་བའི་རྩ་བ་ཐམས་ཅད་ཀྱིས་ཡེ་ཤེས་ཀྱི་རྒྱལ་པོ་ཆེན་པོ་མཉེས་པར་བྱེད་པའི་སྟོབས་ཀྱི་ཤུགས་དང་། སངས་རྒྱས་ཀྱི་
ཆོས་ཐམས་ཅད་ལ་ཟབ་པར་ཡིད་ཆེས་པས་མི་སྤངས་པའི་སྟོབས་ཀྱི་ཤུགས་དང་། ཐམས་ཅད་མཁྱེན་པ་ཉིད་ཀྱི་སེམས་ལས་མྱི་ལྡོག་པར་མཁས་པའི་སྟོབས་ཀྱི་ཤུགས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་
ཀྱི་སྟོབས་ཀྱི་ཤུགས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སྟོབས་བཅུ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མཉམ་པ་ཉིད་དེ།
བཅུ་གང་ཞེ་ན་འདི་ལྟར་སེམས་ཅན་ཐམས་ཅད་ལ་མཉམ་པ་ཉིད་དང་། ཆོས་ཐམས་ཅད་ལ་མཉམ་པ་ཉིད་དང་། སངས་རྒྱས་ཀྱི་ཞིང་ཐམས་ཅད་ལ་མཉམ་པ་ཉིད་དང་། ལྷག་པའི་བསམ་པ་ཐམས་ཅད་ལ་མཉམ་པ་ཉིད་དང་། དགེ་བའི་རྩ་བ་

ཐམས་ཅད་ལ་མཉམ་པ་ཉིད་དང་། བྱང་ཆུབ་སེམས་དཔའ་ཐམས་ཅད་ལ་མཉམ་པ་ཉིད་དང་། སྨོན་ལམ་ཐམས་ཅད་ལ་མཉམ་པ་ཉིད་དང་། ཕ་རོལ་ཏུ་ཕྱིན་པ་ཐམས་ཅད་ལ་མཉམ་པ་ཉིད་དང་། སྤྱོད་པ་ཐམས་ཅད་ལ་མཉམ་
པ་ཉིད་དང་། སངས་རྒྱས་ཐམས་ཅད་ལ་མཉམ་པ་ཉིད་དོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མཉམ་པ་ཉིད་དེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་མཉམ་པ་ཉིད་བླ་ན་མེད་
པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ཀྱི་ཚུལ་གྱི་ལམ་རྣམས་ཏེ། བཅུ་གང་ཞེ་ན་འདི་ལྟར་ཆོས་ཐམས་ཅད་ནི་མིང་ཙམ་མོ། །ཆོས་ཐམས་ཅད་ནི་སྒྱུ་མ་ལྟ་བུའོ། །
ཆོས་ཐམས་ཅད་ནི་མིག་ཡོར་ལྟ་བུའོ། །ཆོས་ཐམས་ཅད་ནི་རྟེན་པ་ཙམ་མོ། །ཆོས་ཐམས་ཅད་ནི་ལས་དང་བྲལ་བའོ། །ཆོས་ཐམས་ཅད་ནི་མི་ཟད་པའི་སྦྱོར་བའོ། །ཆོས་ཐམས་ཅད་ནི་ཡང་དག་པའི་མཐའ་འོ། །ཆོས་ཐམས་ཅད་ནི་མཚན་མ་མེད་
པའོ། །ཆོས་ཐམས་ཅད་ནི་དོན་དམ་པའོ། །ཆོས་ཐམས་ཅད་ནི་ཆོས་ཀྱི་དབྱིངས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ཀྱི་ཚུལ་གྱི་ལམ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་
རྣམས་ཐམས་ཅད་མཁྱེན་པའི་ཡེ་ཤེས་ཀྱི་ཚུལ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་བསྟན་པ་སྟེ། བཅུ་གང་ཞེ་ན་འདི་ལྟར་ཟབ་མོའི་ཆོས་བསྟན་པ་དང་།
ཡངས་པའི་ཆོས་བསྟན་པ་དང་། སྣ་ཚོགས་ཀྱི་ཆོས་བསྟན་པ་དང་། ཐམས་ཅད་མཁྱེན་པ་ཉིད་བརྗོད་པ་མང་པོའི་ཆོས་བསྟན་པ་དང་། ཕ་རོལ་ཏུ་ཕྱིན་པ་དང་ལྡན་པའི་ཆོས་བསྟན་པ་དང་། དེ་བཞིན་གཤེགས་པའི་སྟོབས་མངོན་པར་

བསྒྲུབ་པའི་ཆོས་བསྟན་པ་དང་། དུས་གསུམ་དང་ལྡན་པའི་ཆོས་བསྟན་པ་དང་། ཕྱིར་མི་ལྡོག་པའི་བྱང་ཆུབ་སེམས་དཔས་བྱ་བའི་ཆོས་བསྟན་པ་དང་། སངས་རྒྱས་ཀྱི་ཡོན་ཏན་དང་། ལེགས་པ་རབ་ཏུ་བརྗོད་པའི་ཆོས་བསྟན་པ་དང་།
བྱང་ཆུབ་སེམས་དཔའི་བསླབ་པ་ཐམས་ཅད་དང་། སངས་རྒྱས་ཐམས་ཅད་ཀྱི་མཉམ་པ་ཉིད་དང་། དེ་བཞིན་གཤེགས་པ་ཐམས་ཅད་ལ་དམིགས་པ་དང་ལྡན་པའི་ཆོས་བསྟན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་
རྣམས་ཀྱི་ཆོས་བསྟན་པ་སྟེ་དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པ་རྣམས་ཀྱི་ཆོས་བསྟན་པ་ཆེན་པོ་བླ་ན་མེད་པ་སྟོན་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་
རྣམས་ཀྱི་ཡོངས་སུ་གཟུང་བ་སྟེ། བཅུ་གང་ཞེ་ན་འདི་ལྟར་དགེ་བའི་རྩ་བ་དང་། བསོད་ནམས་ཀྱི་ཚོགས་རྣམས་ཡོངས་སུ་གཟུང་བ་དང་། དེ་བཞིན་གཤེགས་པ་ཐམས་ཅད་ཀྱིས་གསུངས་པའི་ཆོས་བསྟན་པ་རྣམས་ཡོངས་སུ་གཟུང་བ་
དང་། དཔེ་དང་མཐུན་པར་བསྟན་པ་ཐམས་ཅད་ཡོངས་སུ་གཟུང་བ་དང་། ཆོས་ཀྱི་ཚུལ་དང་། སྒོ་ཐམས་ཅད་ཡོངས་སུ་གཟུང་བ་དང་། གཟུངས་ཐམས་ཅད་མངོན་པར་བསྒྲུབ་པའི་སྒོ་རྣམས་ཡོངས་སུ་གཟུང་བ་དང་། ཐེ་ཙོམ་ཐམས་ཅད་
ཡོངས་སུ་གཅོད་པ་རྣམས་ཡོངས་སུ་གཟུང་བ་དང་། བྱང་ཆུབ་སེམས་དཔའི་བསྒྲུབ་པ་ཐམས་ཅད་ཡོངས་སུ་གཟུང་བ་དང་། དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ཀྱི་ཏིང་ངེ་འཛིན་ཤིན་ཏུ་བསྟན་པའི་སྒོ་རྣམས་ཡོངས་སུ་གཟུང་བ་
དང་། ཆོས་སྣང་བའི་སྒོ་ཐམས་ཅད་ཡོངས་སུ་གཟུང་བ་དང་། སངས་རྒྱས་ཐམས་ཅད་ཀྱི་རྣམ་པར་སྤྲུལ་པ་དང་། རྣམ་པར་རོལ་པ་དང་། བྱིན་གྱི་རླབས་རྣམས་ཡོངས་སུ་གཟུང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་

སེམས་དཔའ་རྣམས་ཀྱི་ཡོངས་སུ་གཟུང་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་ཡོངས་སུ་གཟུང་བའོ། །བླ་ན་མེད་པ་འཐོབ་པར་འགྱུར་བ་དག་
གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤོབས་པ་སྟེ། བཅུ་གང་ཞེ་ན་འདི་ལྟར་ཆོས་ཐམས་ཅད་ལ་རྣམ་པར་མ་བརྟགས་པའི་སྤོབས་པ་དང་། ཆོས་ཐམས་ཅད་ལ་མངོན་པར་འདུ་བྱེད་པ་མེད་པའི་སྤོབས་པ་དང་། ཆོས་
ཐམས་ཅད་ལ་མི་གནས་པའི་སྤོབས་པ་དང་། ཆོས་ཐམས་ཅད་ལ་སྟོང་པ་ཉིད་དུ་སྣང་བའི་སྤོབས་པ་དང་། ཆོས་ཐམས་ཅད་ལ་མུན་པ་མེད་པའི་སྤོབས་པ་དང་། ཆོས་ཐམས་ཅད་ལ་སངས་རྒྱས་ཀྱི་བྱིན་གྱི་རླབས་ཀྱི་སྤོབས་པ་དང་། ཆོས་ཐམས་
ཅད་ལ་གཞན་གྱི་དྲིང་མི་འཇོག་པའི་སྤོབས་པ་དང་། ཆོས་ཐམས་ཅད་ལ་ཚིག་གི་བྱེ་བྲག་མཁས་པའི་སྤོབས་པ་དང་། ཆོས་ཐམས་ཅད་ལ་དེ་ཁོ་ན་ཉིད་བསྟན་པའི་སྤོབས་པ་དང་། སེམས་ཅན་གྱི་སེམས་དང་། སྤྱོད་པ་ཐམས་ཅད་ལ་བསམ་པ་ཇི་ལྟ་བ་
བཞིན་དུ་ཚིམ་པར་བྱེད་པའི་སྤོབས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤོབས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཐམས་ཅད་ཀྱི་སྤོབས་པ་ལ་མཁས་པ་བླ་ན་མེད་པ་འཐོབ་
པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དབང་སྟེ། བཅུ་གང་ཞེ་ན་འདི་ལྟར་སེམས་ཅན་ཐམས་ཅད་ཡོངས་སུ་སྨིན་པར་བྱེད་ཅིང་འདུལ་བའི་ཡེ་ཤེས་ཀྱི་དབང་དང་། ཆོས་ཐམས་ཅད་སྣང་བ་རབ་
ཏུ་འཐོབ་པའི་དབང་དང་དགེ་བའི་རྩ་བ་ཐམས་ཅད་ལ་སྤྱོད་པའི་དབང་དང་ཡེ་ཤེས་ཆེན་པོའི་དབང་དང་མི་གནས་པའི་ཚུལ་ཁྲིམས་ཀྱི་དབང་དང་། དགེ་བའི་རྩ་བ་ཐམས་ཅད་བྱང་ཆུབ་ཏུ་ཡོངས་སུ་བསྔོ་བའི་དབང་དང་། བརྩོན་འགྲུས་བརྩམས་པ་ཐམས་

ཅད་ལས་ཕྱིར་མི་ལྡོག་པའི་ཡེ་ཤེས་ཀྱི་དབང་དང་། བདུད་ཐམས་ཅད་ཤིན་ཏུ་ཕམ་པར་བྱ་བའི་ཡེ་ཤེས་ཀྱི་དབང་དང་། གང་དུ་དགའ་བར་འགྲོ་བར་བྱང་ཆུབ་ཀྱི་སེམས་བསྐྱེད་པའི་ཡེ་ཤེས་ཀྱི་དབང་དང་། སངས་རྒྱས་ཐམས་ཅད་ཀྱི་བྱང་ཆུབ་ནམ་འདོད་པ་
ན་མངོན་པར་རྫོགས་པར་འཚང་རྒྱ་བའི་ཡེ་ཤེས་ཀྱི་དབང་ངོ་། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབང་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་དབང་བླ་ན་མེད་པ་འཐོབ་
བར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མི་གནས་པ་སྟེ། བཅུ་གང་ཞེ་ན་འདི་ལྟར་འཇིག་རྟེན་གྱི་ཁམས་ཐམས་ཅད་ལ་མི་གནས་པ་དང་། སེམས་ཅན་ཐམས་ཅད་ལ་མི་གནས་པ་དང་།
ཆོས་ཐམས་ཅད་ལ་མི་གནས་པ་དང་། བྱ་བ་ཐམས་ཅད་ལ་མི་གནས་པ་དང་། དགེ་བའི་རྩ་བ་ཐམས་ཅད་ལ་མི་གནས་པ་དང་། སྐྱེ་བའི་སྐྱེ་མཆེད་ཐམས་ཅད་ལ་མི་གནས་པ་དང་། སྨོན་ལམ་ཐམས་ཅད་ལ་མི་གནས་པ་དང་། སྤྱོད་པ་ཐམས་
ཅད་ལ་མི་གནས་པ་དང་། བྱང་ཆུབ་སེམས་དཔའ་ཐམས་ཅད་ལ་མི་གནས་པ་དང་། སངས་རྒྱས་ཐམས་ཅད་ལ་མི་གནས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མི་གནས་པ་སྟེ། དེ་དག་ལ་གནས་ཤིང་བྱང་
ཆུབ་སེམས་དཔའ་རྣམས་སེམས་ཡངས་པར་བསྒྱུར་བ་ཡོངས་སུ་ཤེས་པའི་ཡེ་ཤེས་ཡོངས་སུ་དག་ཅིང་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་མཉམ་པ་ཉིད་དེ།
བཅུ་གང་ཞེ་ན་འདི་ལྟར་བསོད་ནམས་ཐམས་ཅད་བསྩགས་པ་ལ་སེམས་མཉམ་པ་ཉིད་དང་། སྨོན་ལམ་རྣམ་པ་ཐ་དད་པས་འབྱུང་བ་ཐམས་ཅད་ལ་སེམས་མཉམ་པ་ཉིད་དང་། སེམས་ཅན་གྱི་རིགས་ཐམས་ཅད་ལ་སེམས་མཉམ་པ་ཉིད་དང་། སེམས་

ཅན་གྱི་ལས་རྣམ་པར་སྨིན་པ་ལ་འཇུག་པ་ཐམས་ཅད་ལ་སེམས་མཉམ་པ་ཉིད་དང་། ཆོས་ལ་འཇུག་པ་ཐམས་ཅད་ལ་སེམས་མཉམ་པ་ཉིད་དང་། ཞིང་ཀུན་ནས་ཉོན་མོངས་པ་དང་། རྣམ་པར་དག་པ་ཐམས་ཅད་ལ་སེམས་
མཉམ་པ་ཉིད་དང་། སེམས་ཅན་གྱི་མོས་པ་ལ་འཇུག་པ་ཐམས་ཅད་ལ་སེམས་མཉམ་པ་ཉིད་དང་། སྤྱོད་པའི་རྣམ་པར་རྟོག་པ་ཐམས་ཅད་ལ་སེམས་མཉམ་པ་ཉིད་དང་། སངས་རྒྱས་ཀྱི་སྟོབས་དང་མི་བསྙེངས་པ་ལ་འཇུག་པ་ཐམས་ཅད་ལ་སེམས་མཉམ་
པ་ཉིད་དང་། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལ་འཇུག་པ་ཁོང་དུ་ཆུད་པར་བྱ་བ་ལ་སེམས་མཉམ་པ་ཉིད་དོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་མཉམ་པ་ཉིད་དེ། དེ་དག་ལ་གནས་ཤིང་བྱང་ཆུབ་
སེམས་དཔའ་རྣམས་དེ་བཞིན་གཤེགས་པའི་དགོངས་པ་མཉམ་པ་ཉིད་རྒྱ་ཆེ་ཞིང་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་མངོན་པར་བསྒྲུབ་པ་སྟེ། བཅུ་གང་ཞེ་ན་འདི་ལྟར་
སེམས་ཅན་གྱི་ཁམས་ཐམས་ཅད་ཀྱི་མོས་པ་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། སངས་རྒྱས་ཀྱི་ཞིང་སྣ་ཚོགས་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། ཕྱོགས་ཀྱི་དྲ་བ་རྣམ་པར་དབྱེ་
བ་ཐམས་ཅད་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། འཇིག་རྟེན་གྱི་ཁམས་སྤྱིའུ་ཚུགས་སུ་རྒྱུ་བ་དང་སྣྲེལ་ཞིར་རྒྱུ་བ་ཐམས་ཅད་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། ཆོས་ཐམས་ཅད་
གཅིག་པ་དང་། ཐ་དད་པའི་འབྱམ་ཀླས་པར་རྣམ་པར་དགོང་པ་ལ་མཁས་པ་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། ལུས་ཀྱི་རྒྱུད་ཐམས་ཅད་ཁོང་དུ་ཆུད་པར་བྱ་བ་ལ་འཇུག་པར་ཞུགས་པའི་ཡེ་ཤེས་མངོན་པར་བསྒྲུབ་པ་དང་།

འདུ་ཤེས་ཀྱིས་ཕྱིན་ཅི་ལོག་ཏུ་གྱུར་པའི་འཇིག་རྟེན་གྱི་རྣམ་པའི་འདུ་ཤེས་དང་། རློམ་སེམས་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། ཆོས་ཀྱི་རྒྱུད་ཐམས་ཅད་ལ་འབྱུང་བ་གཅིག་གི་མཐར་ཐུག་པར་འཇུག་པ་ཁོང་དུ་ཆུད་པར་
བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། ཆོས་ཀྱི་དབྱིངས་ཐམས་ཅད་ཀྱི་དེ་བཞིན་གཤེགས་པའི་རྣམ་པར་འཕྲུལ་པ་དང་། བྱིན་གྱི་རླབས་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། འགྲོ་བ་ཐམས་ཅད་
ཀྱི་དུས་གསུམ་དུ་འདུས་པའི་སངས་རྒྱས་ཀྱི་རིགས་ཐམས་ཅད་རྒྱུན་མི་གཅོད་པ་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་མངོན་པར་བསྒྲུབ་པ་
སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་གང་ལ་ཡང་མགོ་རྨོངས་པར་མི་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྲུལ་པ་སྟེ། བཅུ་གང་ཞེ་ན་འདི་ལྟར་སེམས་ཅན་སྤྲུལ་
པ་དང་། ལུས་སྤྲུལ་པ་དང་། ཞིང་སྤྲུལ་པ་དང་། མཆོད་པ་སྤྲུལ་པ་དང་། དབྱངས་སྤྲུལ་པ་དང་། སྤྱོད་པ་དང་སྨོན་ལམ་སྤྲུལ་པ་དང་། སེམས་ཅན་ཡོངས་སུ་སྨིན་པར་བྱ་བ་དང་གདུལ་བ་སྤྲུལ་པ་དང་། མངོན་པར་རྫོགས་པར་བྱང་ཆུབ་པ་
སྤྲུལ་པ་དང་། ཆོས་བསྟན་པ་སྤྲུལ་པ་དང་། བྱིན་གྱི་རླབས་སྤྲུལ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤྲུལ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་ཐམས་ཅད་སྤྲུལ་པ་
ཡོངས་སུ་རྫོགས་པ་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱིན་གྱི་རླབས་ཏེ། བཅུ་གང་ཞེ་ན་འདི་ལྟར་སངས་རྒྱས་ཀྱི་བྱིན་གྱི་རླབས་དང་། ཆོས་ཀྱི་བྱིན་གྱི་

རླབས་དང་། སེམས་ཅན་གྱི་བྱིན་གྱི་རླབས་དང་། ལས་ཀྱི་བྱིན་གྱི་རླབས་དང་། སྤྱོད་པའི་བྱིན་གྱི་རླབས་དང་། སྨོན་ལམ་གྱི་བྱིན་གྱི་རླབས་དང་། སྤྱོད་ཡུལ་གྱི་བྱིན་གྱི་རླབས་དང་། དུས་ཀྱི་
བྱིན་གྱི་རླབས་དང་། དགེ་བའི་བྱིན་གྱི་རླབས་དང་། ཡེ་ཤེས་ཀྱི་བྱིན་གྱི་རླབས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱིན་གྱི་རླབས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་
ཆོས་ཐམས་ཅད་ལ་དབང་བསྒྱུར་བའི་བྱིན་གྱི་རླབས་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཤིན་ཏུ་དབུགས་ཕྱིན་པ་རབ་ཏུ་རྙེད་པ་བཅུ་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་འདི་ལ་
བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། མ་འོངས་པའི་དུས་ན་དེ་བཞིན་གཤེགས་པ་གང་ཇི་སྙེད་ཅིག་འབྱུང་བར་འགྱུར་བ་དེ་དག་ཐམས་ཅད་མཉེས་པར་བྱའོ། །ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཡང་སངས་རྒྱས་ཀྱི་ཚུལ་དང་འདྲ་བའི་རིམ་གྲོ་བླ་ན་མེད་པ་བྱའོ། །མཆོད་པ་དང་བསྙེན་བཀུར་བླ་ན་མེད་པ་བྱའོ། །ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །བདག་གིས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཆོད་ནས་ཀྱང་གདམས་ངག་གང་གིས་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སར་བྱུང་བར་གྱུར་པ་དང་། འབྱུང་བ་དང་འབྱུང་བར་འགྱུར་བ་དེ་ལྟ་བུའི་གདམས་ངག་དང་མན་
དག་བསྟན་པ་མཛད་ཀྱིས་གདམས་ངག་དང་མན་ངག་དེའང་བདག་གིས་བསམ་པ་ཐག་པས་རིམ་གྲོ་བྱས་ཏེ། མཉན་ལ་ཡང་དག་པར་ནན་ཏན་ཏུ་བྱའོ། །ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་

སེམས་དཔའ་འདི་སྙམ་དུ་སེམས་ཏེ། བདག་བསྐལ་པ་བརྗོད་དུ་མེད་པར་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་རྣམས་དང་མི་འབྲལ་བར་འགྱུར་རོ། །ཞེས་དབུགས་ཕྱིན་པ་ཆེན་
པོ་རབ་ཏུ་འཐོབ་བོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། སྔོན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་ཞུགས་པའི་ཚེ། འདི་ལྟ་སྟེ། འཚོ་བ་མེད་པའི་འཇིགས་པའམ། གྲགས་
པ་མེད་པའི་འཇིགས་པའམ། འཆི་བའི་འཇིགས་པའམ། ངན་སོང་གི་འཇིགས་པའམ། འཁོར་དུ་བག་ཚ་བའི་འཇིགས་པའང་རུང་སྟེ། ཇི་སྙེད་ཀྱི་འཇིགས་པར་གྱུར་པ་དེ་དག་ཐམས་ཅད་ནི་རྣམ་པར་བཟློག་པར་གྱུར། རིང་དུ་བྱས་པར་གྱུར་རྣམ་པར་
བཅིལ་བར་གྱུར་ཏེ། བྱང་ཆུབ་ཀྱི་སེམས་བསྐྱེད་མ་ཐག་ཏུ་ཅིས་ཀྱང་མི་འཇིགས་པར་གྱུར་ཏོ། །མི་སྡངས་པར་གྱུར་ཏོ། །སྐྱི་གཡའ་བ་མེད་པར་གྱུར་ཏོ། །ཅིས་ཀྱང་འཇིགས་པར་མི་འགྱུར་རོ། །སྡངས་བར་མི་འགྱུར་རོ། །སྐྱི་གཡའ་བར་མི་འགྱུར་
རོ། །དེ་བས་ན་བརྟན་ཞིང་རྣམ་པར་གནོན་ལ་ཟིལ་གྱིས་མི་ནོན་པས་བདུད་དང་མུ་སྟེགས་ཅན་དང་། ཕས་ཀྱི་རྒོལ་བ་ཐམས་ཅད་ཀྱིས་མི་ཐུབ་པར་གྱུར་ཏོ། །ཞེས་དབུགས་ཕྱིན་པ་ཆེན་པོ་རབ་ཏུ་ཐོབ་བོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་
སེམས་དཔའ་འདི་སྙམ་དུ་སེམས་བསྐྱེད་དེ། བདག་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཅན་གྱི་ཁམས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱའོ། །རབ་ཏུ་དགོད་པར་བྱའོ། །དེ་
དག་བྱང་ཆུབ་ཐོབ་པར་གྱུར་ནས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་དད་པ་ཆེན་པོ་དང་ལྡན་པའི་སེམས་བསྐྱེད་པས་ཚེའི་ཚད་ཀྱི་མཐར་ཐུག་གི་བར་དུ་སངས་རྒྱས་ལ་འོས་པའི་རིམ་གྲོས་མཆོད་པ་དང་།

བཀུར་སྟི་བྱའོ། །དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་ནས་ཀྱང་སྐུ་གཟུགས་ལ་མཆོད་པའི་ལས་ཀྱི་ཕྱིར་མཆོད་རྟེན་ཚད་མེད་པ་མང་པོ་བྱའོ། །དེ་དག་གི་བསྟན་པ་ཡང་ཡོངས་སུ་བསྲུང་བ