Kinh tạng Tây Tạng (Kangyur Đại Học) — 037_ཕལ་ཆེན།_ག

རྣམས་ཀྱི་སངས་རྒྱས་ཀྱི་ཐབས་མཁས་པ་དགུ་པའོ། །
སངས་རྒྱས་བཅོམ་ལྡན་འདས་རྣམས་ནི་ཆོས་ཐམས་ཅད་ཀྱི་གཟུགས་མ་སྐྱེས་པ་རབ་ཏུ་མཁྱེན་པ་སྟེ་ཚོར་བའི་སྤྲོས་པ་མེད་པ་དང་། འདུ་ཤེས་ཀྱི་གྲངས་མེད་པ་དང་། འདུ་བྱེད་ཀུན་ཏུ་རྒྱུ་བ་མེད་པ་དང་། རྣམ་པར་ཤེས་པ་ཉེ་བར་ལེན་པ་མེད་པ་དང་། རང་བཞིན་
གྱིས་ཞི་བ་རབ་ཏུ་མཁྱེན་ཏེ། ཆོས་ཐམས་ཅད་སྐྱེ་མཆེད་ཀྱི་རྒྱུད་མེད་པ་དང་། ཁམས་རྣམས་མི་དམིགས་པ་དང་། ཆོས་ཐམས་ཅད་མི་འཇིག་པ་དང་། ཆོས་ཐམས་ཅད་བསྐྱོད་དུ་མེད་ཅིང་། རང་བཞིན་གྱིས་ནམ་མཁའ་ལྟ་བུ་དང་། ཆོས་
ཐམས་ཅད་དབེན་པ་དང་། ལས་མེད་པ་དང་། རྣམ་པར་སྨིན་པ་མེད་པ་དང་། སྤྱོད་པས་འབྱུང་བ་མེད་པ་དང་། མ་གྲུབ་པ་དང་། མ་བྱུང་བ་དང་། གྲངས་ཀྱིས་མི་བརྗོད་པ་དང་། ཡོད་པ་མ་ཡིན་པ་དང་། མེད་པ་མ་ཡིན་པ་དང་། མ་སྐྱེས་པ་
དང་། མ་འགགས་པ་དང་། ཀུན་ནས་ཉོན་མོངས་པ་མེད་པ་དང་། རྣམ་པར་བྱང་བ་མེད་པ་དང་། སྐྱོན་མེད་པ་དང་། གནས་པ་མེད་པ་དང་། ཡོངས་སུ་གནས་པ་མེད་པ་དང་། ཡོངས་སུ་སྨིན་པར་བྱས་པ་མེད་པ་དང་། རྣམ་པར་བཏུལ་བ་མེད་པ་དང་།
སེམས་ཅན་མེད་པ་དང་། སེམས་ཅན་མེད་པ་མ་ཡིན་པ་དང་། སྲོག་མེད་པ་དང་། སྲོག་མེད་པ་མ་ཡིན་པ་དང་། རྐྱེན་མེད་པ་དང་། རྐྱེན་མེད་པ་མ་ཡིན་པ་དང་། རྟེན་པ་མེད་པ་དང་། རྟེན་པ་མེད་པ་མ་ཡིན་པར་ཆོས་ཐམས་ཅད་ཐུགས་སུ་ཆུད་ཀྱང་ཆོས་ཀྱི་དབྱིངས་
ཐམས་ཅད་ཤིན་ཏུ་བསྟན་པ་ལ་ཕ་རོལ་ཏུ་ཕྱིན་པའི་དམ་པ་བརྙེས་པ་དག་སྟེ། ངེས་པ་དང་མ་ངེས་པ་དང་། ལོག་པར་ངེས་པའི་ཕུང་པོ་གསུམ་རྣམ་པར་དགོད་པ་རྣམས་ལ་སྟོབས་བཅུས་ཐུགས་སུ་ཆུད་པའི་ཡེ་ཤེས་མི་འཇིགས་པ་བཞིས་རྣམ་པར་དག་པའི་སངས་

རྒྱས་ཀྱི་ཡུལ་ཆེན་པོ་དང་ལྡན་པས་སེང་གེའི་སྒྲ་སྒྲོག་པ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཐབས་མཁས་པ་བཅུ་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཐབས་མཁས་པའོ།། །།
སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་གསུམ་པ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་རྒྱ་ཆེན་པོ་ཚད་མེད་པ་བསམ་གྱིས་མི་
ཁྱབ་པ་རྣམས་ཏེ། དེ་དག་ནི་སངས་རྒྱས་ཀྱི་བྱིན་གྱི་རླབས་མ་གཏོགས་པར་ལྷ་དང་བཅས་པའི་འཇིག་རྟེན་དང་། འདས་པ་དང་། མ་འོངས་པ་དང་། ད་ལྟར་བྱུང་བའི་ཉན་ཐོས་དང་། རང་སངས་རྒྱས་ཐམས་ཅད་ཀྱིས་འཇུག་པར་མི་ནུས་པའོ། །བཅུ་
གང་ཞེ་ན། ཕྱོགས་བཅུའི་ནམ་མཁའི་དབྱིངས་ཀྱི་མཐས་གཏུགས་པའི་ཆོས་ཀྱི་དབྱིངས་ཐམས་ཅད་ཀྱི་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་དགའ་ལྡན་དུ་སྐྱེ་བ་བསྟན་པ་དང་། བྱང་ཆུབ་སེམས་དཔའི་སྤྱོད་པ་མུ་མེད་པ་དག་ལ་སངས་རྒྱས་ཀྱི་ཕྲིན་ལས་
མཛད་དོ། །ཁ་དོག་ཚད་མེད་པ་གཟི་བརྗིད་ཚད་མེད་པ་སྣང་བ་ཚད་མེད་པ། དབྱངས་ཚད་མེད་པ་དབྱངས་ཀྱི་ཡན་ལག་རྣམ་པར་དག་པ་ཚད་མེད་པ་གསུང་བརྗོད་པས་རྣམ་པར་དམྱིགས་པ་ཚད་མེད་པ། ཏིང་ངེ་འཛིན་ཚད་མེད་པ་ལ་སྤྱོད་པ། ཤེས་རབ་དང་ཡེ་
ཤེས་ཀྱི་ཡུལ་ཚད་མེད་པ་མངའ་བ་རྣམས་ལྷ་དང་བཅས་པའི་འཇིག་རྟེན་ལ་ཕན་འདོགས་པ་མཛད་དེ། བདུད་དང་བཅས་པ་ཚངས་པ་དང་བཅས་པ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པ། ལྷ་དང་མི་དང་། ལྷ་མ་ཡིན་དུ་བཅས་པའི་འཇིག་
རྟེན་ལ་ཕན་འདོགས་པ་མཛད་དོ། །བྱམས་པ་ཆེན་པོའི་སྤྱོད་ཡུལ་ཐོགས་པ་མེད་པ་དང་། ཐབས་ཐུགས་རྗེ་ཆེན་པོའི་སྒོའི་མཐར་ཐུག་པས་སེམས་ཅན་ལ་ཕན་འདོགས་པ་མཛད་དོ། །བསོད་ནམས་ཀྱི་སྟོབས་དང་། མངའ་ཕུན་སུམ་ཚོགས་པ་དང་།

དབང་པོ་རྣམ་པར་སྦྱང་བ་དང་། ཅང་ཤེས་ཀྱི་སེམས་ཡོངས་སུ་དག་པས་ཀྱང་སེམས་ཅན་རྣམས་ལ་ཕན་འདོགས་པ་མཛད་དོ། །ཐེག་པ་སྣ་ཚོགས་རྣམ་པར་དག་པས་ཀྱང་སེམས་ཅན་རྣམས་ལ་ཕན་འདོགས་པ་མཛད་དོ། །
ཐེག་པ་ཆེན་པོ་ཡོངས་སུ་རྫོགས་པར་བྱ་བས་ཀྱང་སེམས་ཅན་རྣམས་ལ་ཕན་འདོགས་པ་མཛད་དོ། །འགྲོ་བ་ཐམས་ཅད་གདོན་པས་ཀྱང་སེམས་ཅན་རྣམས་ལ་ཕན་འདོགས་པ་མཛད་དེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་
དང་པོའོ། །དགའ་ལྡན་གྱི་ཕོ་བྲང་ནས་འཕོས་པ་མེད་ཀྱང་ཡུམ་གྱི་སྐུར་གཤེགས་ཤིང་། བྱང་ཆུབ་སེམས་དཔའི་སྐུ་ཐ་མ་སྐྱེ་བར་སྟོན་པ། སྒྱུ་མ་ལྟ་བུའི་ཡོངས་སུ་སྤྱོད་པ། སྤྲུལ་པ་ལྟ་བུའི་ཏིང་ངེ་འཛིན་གྱི་མཐར་ཐུག་པ། མིག་ཡོར་ལྟ་བུར་རྣམ་
པར་དམིགས་པ། ནམ་མཁའི་ཡུལ་ཚད་མེད་པར་ཁྱབ་པ། བཞེད་པ་བཞིན་དུ་སྐྱེ་བ་ཡང་ཆགས་པ་མི་མངའ་བ་སྨིག་རྒྱུ་ལྟ་བུར་བསྟན་པ། ཉོན་མོངས་པ་མེད་པའི་ཆོས་ལ་ཡང་དག་པར་གཞོལ་བ། གནས་མེད་པའི་ཡེ་ཤེས་ལ་གནས་པ། རང་
བཞིན་གྱིས་འདོད་ཆགས་དང་བྲལ་བས་རྣམ་པར་དག་པ། རྒྱན་ཤིན་ཏུ་རྒྱ་ཆེ་བའི་མཛོད་ཀྱིས་སངས་རྒྱས་ཀྱི་ཕྲིན་ལས་མཛད་དོ། །ཁང་བ་བརྩེགས་པ་རིན་པོ་ཆེ་ལས་བྱས་པའི་ཕོ་བྲང་ཆེན་པོ་རིན་པོ་ཆེའི་རྒྱན་མང་པོ་དང་ལྡན་པ་ན་བཞུགས་པས་ཀྱང་སངས་རྒྱས་
ཀྱི་ཕྲིན་ལས་མཛད་དོ། །རྫུ་འཕྲུལ་གྱིས་ཀྱང་སངས་རྒྱས་ཀྱི་ཕྲིན་ལས་མཛད་དོ། །ཡིད་ལ་བྱ་བའི་བྱིན་གྱི་རླབས་ཆེན་པོས་ཀྱང་སངས་རྒྱས་ཀྱི་ཕྲིན་ལས་མཛད་དོ། །རྣམ་པར་འཕྲུལ་པའི་མཛོད་ཆེན་པོ་ཡང་དག་པར་བསྟན་པས་ཀྱང་སངས་རྒྱས་ཀྱི་ཕྲིན་
ལས་མཛད་དོ། །ཡེ་ཤེས་ཀྱི་ཉི་མའི་དཀྱིལ་འཁོར་ཆེན་པོས་ཀྱང་སངས་རྒྱས་ཀྱི་ཕྲིན་ལས་མཛད་དོ། །ཡུམ་སྐུ་བསྐྱེད་པའི་སྐུ་ན་བཞུགས་པས་ཀྱང་སངས་རྒྱས་ཀྱི་ཕྲིན་ལས་མཛད་དོ། །སངས་རྒྱས་ཀྱི་ཡུལ་གྱི་སྤྱོད་ཡུལ་ཆེན་པོ་བརྙེས་པས་ཀྱང་སངས་

རྒྱས་ཀྱི་ཕྲིན་ལས་མཛད་དོ། །སངས་རྒྱས་ཀྱི་བྱིན་གྱིས་འཇིག་རྟེན་བྱིན་དུ་བརླབས་པ་མཐའ་ཡས་པས་ཀྱང་སངས་རྒྱས་ཀྱི་ཕྲིན་ལས་མཛད་དོ། །ཏིང་ངེ་འཛིན་ཆེན་པོ་གྲངས་མེད་པ་ལ་རྣམ་པར་སྤྱོད་ཅིང་། སྙོམས་པར་འཇུག་པས་ཀྱང་སངས་རྒྱས་ཀྱི་ཕྲིན་
ལས་མཛད་དོ། །ཏིང་ངེ་འཛིན་ལས་བཞེངས་པ་དེ་དང་དེ་དག་གིས་ཀྱང་སངས་རྒྱས་ཀྱི་ཕྲིན་ལས་མཛད་དོ། །སྤྱོད་པའི་ཐོག་མ་ལ་ཡོངས་སུ་མྱ་ངན་ལས་འདས་པ་ཆེན་པོའི་མཐར་ཐུག་པའི་བར་དུ་ཐོག་མ་དང་དབུས་དང་ཐ་མའི་ཚུལ་གྱིས་ཀྱང་སངས་རྒྱས་ཀྱི་
འཕྲིན་ལས་མཛད་དོ། །ས་འདི་ལ་གཉིས་སུ་མེད་པས་ཐམས་ཅད་མཐར་ཕྱིན་པར་བྱས་ནས་ཐ་མར་འཇིག་རྟེན་གྱི་གྲངས་ཀྱི་སྐྱེ་བ་ཡོངས་སུ་སྟོན་ཏེ། སྐྱེ་བས་ཀྱང་འཇིག་རྟེན་ཐམས་ཅད་དུ་སངས་རྒྱས་ཀྱི་ཕྲིན་ལས་མཛད་དོ། །གཞོན་ནུར་གྱུར་
བས་ཀྱང་འཇིག་རྟེན་ཐམས་ཅད་དུ་སངས་རྒྱས་ཀྱི་ཕྲིན་ལས་མཛད་དོ། །བྱང་ཆུབ་སེམས་དཔར་གྱུར་པས་ཀྱང་འཇིག་རྟེན་ཐམས་ཅད་དུ་སངས་རྒྱས་ཀྱི་ཕྲིན་ལས་མཛད་དོ། །མངོན་པར་འབྱུང་བས་ཀྱང་འཇིག་རྟེན་ཐམས་ཅད་དུ་སངས་རྒྱས་ཀྱི་ཕྲིན་
ལས་མཛད་དོ། །མངོན་པར་འཚང་རྒྱ་བས་ཀྱང་འཇིག་རྟེན་ཐམས་ཅད་དུ་སངས་རྒྱས་ཀྱི་ཕྲིན་ལས་མཛད་དོ། །ཆོས་ཀྱི་འཁོར་ལོ་བསྐོར་བས་ཀྱང་འཇིག་རྟེན་ཐམས་ཅད་དུ་སངས་རྒྱས་ཀྱི་ཕྲིན་ལས་མཛད་དོ། །ཐབས་མཁས་པ་སྣ་ཚོགས་ཀྱིས་ཀྱང་འཇིག་
རྟེན་སྣ་ཚོགས་འཇིག་རྟེན་ཚད་མེད་པ། འཇིག་རྟེན་ཀུན་ཏུ་མཐའ་ཡས་པ་ཕྱོགས་ཀྱི་དྲ་བའི་རྒྱུད་དང་། རིགས་ཐམས་ཅད་ཀྱི་འཇིག་རྟེན་མ་ལུས་པ་ཐམས་ཅད་དུ་སངས་རྒྱས་ཀྱི་ཕྲིན་ལས་མཛད་དོ། །ཞིང་གི་རྒྱུད་མ་ལུས་པའི་འཇིག་རྟེན་དུ་སངས་རྒྱས་
ཀྱི་ཕྲིན་ལས་མཛད་དོ། །ལས་ཀྱི་རྣམ་པར་སྨིན་པ་མ་ལུས་པའི་འཇིག་རྟེན་དུ་སངས་རྒྱས་ཀྱི་ཕྲིན་ལས་མཛད་དོ། །སེམས་ཅན་གྱི་རྒྱུད་མ་ལུས་པའི་འཇིག་རྟེན་དུ་སངས་རྒྱས་ཀྱི་ཕྲིན་ལས་མཛད་དོ། །སྐྱེ་བ་དང་ཤི་འཕོ་བའི་རྒྱུད་མ་ལུས་པའི་འཇིག་རྟེན་

དུ་སངས་རྒྱས་ཀྱི་ཕྲིན་ལས་མཛད་དོ། །སྤྲུལ་པ་ཆེན་པོའི་རྒྱུད་དང་། སངས་རྒྱས་ཀྱི་རིགས་དང་། ཆོས་དྲན་པའི་སྒོའི་འཁོར་ལོས་ཀྱང་སངས་རྒྱས་ཀྱི་ཕྲིན་ལས་མཛད་དེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་
རྒྱས་ཀྱི་ཕྲིན་ལས་གཉིས་པའོ། །དགེ་བར་སྤྱོད་པའི་ལས་རྣམ་པར་དག་ཅིང་གདུང་རབས་ཐམས་ཅད་དུ་ཡེ་ཤེས་ཀྱི་ཚུལ་རྣམ་པར་དག་པས། སྐུ་ཚེའི་རྒྱུད་ཀྱི་ཚུལ་དང་ལྡན་པ་སེམས་ཅན་ཐམས་ཅད་གདུལ་བ་ཐུགས་སུ་ཆུད་པ། དགེ་བའི་རྩ་བ་ཐམས་
ཅད་ཡོངས་སུ་རྫོགས་པར་མཛད་དོ། །བཙུན་མོའི་འཁོར་གྱི་ནང་དུ་བཞུགས་པ་སྟོན་ཀྱང་སངས་རྒྱས་ཐམས་ཅད་ཀྱི་འདོད་ཆགས་དང་བྲལ་བའི་ཚུལ་གྱིས་གནས་ལ་བཞུགས་པ་རྣམས་སྒྲ་དང་། ཚིག་ཐམས་ཅད་དང་བྲལ་བར་བརྟགས་པས། དངོས་པོ་
ཐམས་ཅད་དངོས་པོ་མེད་པ་ལས་བྱུང་བར་ཁོང་དུ་ཆུད་པར་བྱ་བ་དང་། དངོས་པོ་ཐམས་ཅད་ཤེས་པ་ལ་གཟུད་པར་བྱ་བ་དང་། ཚུལ་ཁྲིམས་ཐམས་ཅད་མཁྱེན་པ་ཉིད་ཀྱི་མཐར་ཐུག་པར་ཡོངས་སུ་རྫོགས་པར་བྱ་བ་དང་། སྙིང་རྗེ་ཆེན་པོས་འགྲོ་བ་
མུ་མེད་པ་ལ་རྣམ་པར་བལྟ་བར་བྱ་བ་དང་། བྱམས་པ་ཆེན་པོས་སེམས་ཅན་མེད་པའི་ཡུལ་ལ་རབ་ཏུ་རྟོགས་པར་བྱ་བ་དང་། དགའ་བ་ཆེན་པོས་འཇིག་རྟེན་བརྗོད་དུ་མེད་པ་ཁོང་དུ་ཆུད་པར་བྱ་བ་དང་། བཏང་སྙོམས་ཆེན་པོས་སེམས་ལ་
དབང་བསྒྱུར་བ་ལ་གནས་པར་བྱ་བ་དང་། ཐམས་ཅད་མཁྱེན་པའི་ཡོན་ཏན་གྱིས་རང་ཡོངས་སུ་རྒྱས་པར་བྱེད་པར་བྱ་བ་དང་། ཆོས་ཀྱི་དབྱིངས་ཀྱི་ལུས་མ་ལུས་པར་མངོན་པར་བསྒྲུབ་པར་བྱ་བ་དང་། ཐམས་ཅད་དུ་གནས་མེད་པའི་ལུས་ཡོངས་སུ་
རྫོགས་པར་བྱེད་པར་བྱ་བ་དང་། འཁོར་ཐམས་ཅད་རྣམ་པར་དག་པར་ནན་ཏན་ཏུ་བྱེད་པར་བྱ་བ་དང་། ཆོས་བསྟན་པ་རྣམ་པར་བརྗོད་པར་རབ་ཏུ་བརྗོད་པར་བྱ་བ་དང་། འཇིག་རྟེན་གྱི་དངོས་པོ་ལ་སྨོད་པར་བྱ་བ་དང་། འགྲོ་བ་ཐམས་ཅད་ཀྱི་ཉེས་པ་ལ་

རྟོག་པར་བྱ་བ་མཛད་ཅིང་སྤྱོད་པ་དང་། དགེ་བའི་རྩ་བས་རྣམ་པར་སྨིན་པ་ཡང་དག་པར་བསྟན་པ་དང་། ཇི་ལྟར་བཀོད་པའི་ཚུལ་དུ་སེམས་ཅན་གདུལ་བ་དང་། ཡོངས་སུ་མ་སྨིན་པའི་སེམས་ཅན་ཡོངས་སུ་སྨིན་པར་བྱ་བ་དང་། ཡོངས་སུ་སྨིན་པ་རྣམས་
ཚུལ་བཞིན་དུ་གདུལ་བ་དང་། གྲངས་མེད་པའི་ཐབས་མཁས་པ་མངོན་པར་བསྒྲུབ་པ་དང་། སངས་རྒྱས་ཀྱི་ཕྲིན་ལས་ཕྱིར་མི་ལྡོག་པ་ཡོངས་སུ་བསྟན་པ་དང་། སྒོ་སྣ་ཚོགས་ནས་ཆོས་ཀྱི་སྤྱོད་པ་རབ་ཏུ་བརྗོད་པ་དང་། སེམས་ཅན་རྣམས་ཀྱི་བསམ་
པ་སྣ་ཚོགས་པར་རྣམ་པར་སྦྱང་བ་དང་། ཐུགས་རྗེ་ཆེན་པོ་ལས་བྱུང་བའི་ཆོས་ཀྱི་སྤྲིན་གྱིས་མངོན་པར་སྤང་བ་དང་། ཐམས་ཅད་ལ་སྐྱོབ་པའི་བྱམས་པ་ཆེན་པོ་བསྐྱེད་པའི་ཆོ་འཕྲུལ་གསུམ་གྱིས་ཡོངས་སུ་བརླན་པ་དང་། སངས་རྒྱས་ཐམས་ཅད་མངོན་པ་དང་།
རྣམ་པར་དམིགས་པར་བཙུན་མོའི་འཁོར་གྱི་ནང་དུ་བསྟན་པ་ཡན་ཆད་དུ་འཇིག་རྟེན་མཐའ་དང་དབུས་མེད་པར་སངས་རྒྱས་ཀྱི་ཕྲིན་ལས་ཡོངས་སུ་བསྟན་པ་མཛད་ཅིང་། ཡེ་ཤེས་ཀྱི་མཐུ་ཆེན་པོ་ཐོགས་པ་མེད་པ་དང་། སངས་རྒྱས་ཀྱི་མངོན་པར་མཁྱེན་པ་བསྒྲིབས་པ་མེད་
པར་བསྒྲུབ་པ་དང་། ཆོས་རྣམ་པ་གསུམ་གྱི་ཐབས་མཁས་པ་དང་ལྡན་པའི་ཕྲིན་ལས་ཀྱི་མཐའ་དང་། སྐུའི་ཕྲིན་ལས་ཀྱི་མཐའ་ཤིན་ཏུ་རྣམ་པར་དག་པ་དང་། གསུང་གི་ཕྲིན་ལས་ཡེ་ཤེས་ཉམས་པ་མེད་པས་རྣམ་པར་དག་པ་དང་། ཐུགས་ཀྱི་ཕྲིན་ལས་
ཀྱི་མཐའ་ཟབ་ཅིང་ཆགས་པ་མེད་པའི་མཐར་ཐུག་པའི་ཐབས་ལ་མཁས་པས་སེམས་ཅན་རྣམས་ཀྱི་དོན་མཛད་དེ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་གསུམ་པའོ། །རྣམ་པར་རྒྱལ་བ་ཆེན་པོ་མངའ་བ་རྣམས་ནི་བཙུན་མོའི་
འཁོར་རྒྱན་རྣམ་པར་ཕྱེ་བ་ཚད་མེད་པ་དང་ལྡན་པ་ཡིད་དུ་འོང་བ་སྤངས་ཏེ། མངོན་པར་འབྱུང་བའི་སྤྱོད་པ་ཡོངས་སུ་བསྟན་པས་སེམས་ཅན་རྣམས་འཇིག་རྟེན་གྱི་གནས་ལས་བསྐྱོད་པ་དང་། འཇིག་རྟེན་གྱི་མངོན་པར་ཞེན་པ་རྣམ་པར་བཟློག་པ་དང་། འཇིག་རྟེན་དུ་གཏོགས་པ་

ཐམས་ཅད་མི་རྟག་པར་ཤེས་པར་བྱ་བ་དང་། འཇིག་རྟེན་གྱི་ཚུལ་ལ་མངོན་པར་ཞེན་པ་རྣམ་པར་བཟློག་པ་དང་། འཇིག་རྟེན་གྱི་དགའ་བ་ལ་སྲེད་པ་ཡོངས་སུ་གཅད་པ་དང་། འཇིག་རྟེན་གྱི་ཉོན་མོངས་པ་བྱང་ཞིང་ནུབ་པ་ལ་ཡང་དག་པར་སྤྱོད་པར་བྱ་བ་དང་། སེམས་ཅན་
གྱི་དོན་རྗེས་སུ་དྲན་པར་བྱ་བའི་ཕྱིར། །མངོན་པར་འབྱུང་བའི་དོན་ལ་རབ་ཏུ་གཞོལ་བ་དང་། །ཁྱིམ་པའི་ཚུལ་ཡོངས་སུ་སྤང་བ་བསྟན་པ་དང་། ཉོན་མོངས་པ་མེད་པའི་ཆོས་ཀྱི་སྦྱོར་བ་ལ་ཡང་དག་པར་གནས་པར་བྱ་བ་དང་། སྔོན་གྱི་སྨོན་ལམ་
ཡོངས་སུ་རྫོགས་པར་བྱ་བ་དང་། ཡོན་ཏན་གྱི་དཀྱིལ་འཁོར་ཚད་མེད་པ་ཡོངས་སུ་སྣང་བར་བྱ་བ་དང་། ཡེ་ཤེས་ཀྱི་དཀྱིལ་འཁོར་ཆེན་པོ་བརྙེས་པས་སེམས་ཅན་རྣམས་ཀྱི་མི་ཤེས་པའི་སྒྲིབ་པ་རབ་ཏུ་བསྩལ་བ་དང་། བདག་ཉིད་བསོད་ནམས་ཀྱི་ཞིང་
བླ་ན་མེད་པར་གྱུར་པར་འགྲོ་བ་ཐམས་ཅད་ལ་བསྟན་པ་དང་། དགེ་བའི་རྩ་བ་ཐམས་ཅད་སངས་རྒྱས་ལ་བསྐྱེད་པའི་དགེ་བའི་རྩ་བའི་ནང་དུ་འདུས་པར་འགྲོ་བ་ཐམས་ཅད་ལ་ཡང་དག་པར་བརྗོད་པ་དང་། བདག་ཉིད་ཀྱིས་ཡེ་ཤེས་ཀྱི་དོན་གཟིགས་པར་བསྟན་
པ་དང་། སེམས་ཅན་རྣམས་རྣམ་པར་དག་པའི་སྒོར་བརྗོད་པ་དང་། སེམས་ཅན་རྣམས་ཁ་ན་མ་ཐོ་བ་མེད་པའི་སྒོར་བསྒྲུབ་པ་དང་། འཇིག་རྟེན་ཐམས་ཅད་དུ་འབྱུང་བའི་སྒོ་རབ་ཏུ་བསྟན་པ་དང་། ཐམས་ཅད་མཁྱེན་པ་ཉིད་ཀྱི་རྒྱལ་མཚན་ཡང་དག་
པར་བསྒྲེང་བར་མཛད་ཅིང་མངོན་པར་འབྱུང་བ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་བཞི་པའོ། །དོན་གཅིག་མ་ཡིན་པ་མཁྱེན་པ་དང་ལྡན་པ། ཐམས་ཅད་མཁྱེན་པའི་ཡེ་ཤེས་ཀྱི་མཐར་ཐུག་པ་རྣམས་ནི་ཆོས་ཐམས་ཅད་
མངོན་པར་འཚང་རྒྱ་བར་བྱའོ་ཞེས་བྱང་ཆུབ་ཀྱི་ཤིང་དྲུང་དུ་བྱོན་ཏེ། བྱང་ཆུབ་ཏུ་མངོན་པར་འཚང་རྒྱ་བས་ཀྱང་བདུད་ཀྱི་དཔུང་ཐམས་ཅད་རབ་ཏུ་གཞོམ་པ་དང་། སྐུའི་བྱིན་གྱི་རླབས་ཀྱི་མཛོད་ཀྱིས་ཆོས་ཀྱི་དབྱིངས་ཀྱི་མ་ལུས་པ་ཐམས་ཅད་དུ་རྒྱས་པར་

དགང་བའི་ཕྱིར་བྱིན་གྱི་རླབས་ཟད་མི་ཤེས་པའི་མཐར་ཐུག་པས་མཐའ་རྣམ་པར་སྤངས་པ་སྤྱོད་པ་ཚད་མེད་པ་རབ་ཏུ་བརྙེས་པ་ཐམས་ཅད་མཁྱེན་པའི་ཡུལ་གྱིས་རྣམ་པར་རོལ་པའི་ཡེ་ཤེས་ཀྱི་དོན་དང་ལྡན་པ། ཐམས་ཅད་མཁྱེན་པའི་ཡོན་ཏན་ཡང་དག་པར་
བསྒྲུབ་པ་ཡོངས་སུ་རྫོགས་པ་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་གདན་རྣམ་པར་བཀྲམ་པས་ཡོངས་སུ་རྒྱས་པ། སངས་རྒྱས་ཀྱི་ཞིང་མ་ལུས་པ་ཐམས་ཅད་དུ་བྱང་ཆུབ་སེམས་དཔས་རྣམ་པར་དམིགས་པ། བྱང་ཆུབ་སེམས་དཔའི་སྤྱོད་
པ་དམ་པ་ཐོབ་པ་རྣམས་ཀྱི་ཞལ་དུ་བལྟ་བ། བྱང་ཆུབ་སེམས་དཔའ་ཐམས་ཅད་ཀྱི་རྣམ་པ་དང་། སྨོན་ལམ་ཁྱད་པར་ཅན་དང་ལྡན་པའི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཀྱིས་ཡང་དག་པར་བསམ་པའི་ཆོས་ཀྱི་འཁོར་ལོ་ཟབ་མོ་
རབ་ཏུ་བསྐོར་བ། སངས་རྒྱས་ཀྱི་ཡུལ་ཚད་མེད་པ་བརྩམས་པས། བྱང་ཆུབ་སེམས་དཔའ་བརྗོད་དུ་མེད་པའི་འབྱུང་གནས་སུ་གྱུར་པ། བྱང་ཆུབ་སེམས་དཔའི་སྤྱོད་པ་སྣ་ཚོགས་སྤྱོད་པ་ལ་ཡང་དག་པར་གཞོལ་བ། བྱང་ཆུབ་སེམས་དཔའི་འཁོར་
གྱི་དཀྱིལ་འཁོར་རྣམ་པར་དག་པ་མངའ་བ། འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་བྱིན་གྱིས་བྱིན་དུ་རློབ་པའི་ཡུལ་མངའ་བ། དགེ་བའི་རྩ་བ་བསྐྱེད་པའི་སེམས་ཅན་གྱིས་རྣམ་པར་དམིགས་པ། དགེ་བའི་རྩ་བ་ཐམས་ཅད་ཐ་མི་དད་པ་
དང་ལྡན་པ་འབྱུང་བའི་ས། །བྱང་ཆུབ་སེམས་དཔའི་སྤྱོད་པ་མཐའ་ཡས་པའི་མཐུའི་གནས་ལ་ཡོན་ཏན་གྱི་ཁྱད་པར་ཐམས་ཅད་རབ་ཏུ་བརྙེས་ནས་བཞུགས་པ། འཇིག་རྟེན་གྱི་རྣམ་པ་ཐམས་ཅད་མ་ལུས་པའི་མཐར་ཐུག་པ། སེམས་ཅན་གྱི་རྣམ་
པ་ཐམས་ཅད་དང་། ཞིང་གི་རྣམ་པ་ཐམས་ཅད་དང་། ཆོས་ཀྱི་རྣམ་པ་ཐམས་ཅད་དང་། བྱང་ཆུབ་སེམས་དཔའི་རྣམ་པ་ཐམས་ཅད་དང་། ཡོངས་སུ་སྨིན་པར་བྱ་བའི་རྣམ་པ་ཐམས་ཅད་དང་། དུས་ཀྱི་རྣམ་པ་ཐམས་ཅད་དང་། གདུལ་བའི་རྣམ་

པ་ཐམས་ཅད་དང་། སངས་རྒྱས་ཀྱི་རྣམ་པར་འཕྲུལ་བའི་རྣམ་པ་ཐམས་ཅད་མ་ལུས་པའི་མཐར་ཐུག་པ་རྣམས་འགྲོ་བ་མ་ལུས་པ་ཐམས་ཅད་དུ་མོས་པ་ཇི་ལྟ་བ་བཞིན་དུ་རྣམ་པར་འཚང་རྒྱ་བས་སངས་རྒྱས་ཀྱི་ཕྲིན་ལས་མཛད་དེ། །འདི་
ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་ལྔ་པའོ། །སངས་རྒྱས་བཅོམ་ལྡན་འདས་རྣམས་ཆོས་ཀྱི་འཁོར་ལོ་བསྐོར་བར་མཛད་པ་ཕྱིར་མི་ལྡོག་པའི་ཚུལ་གྱིས་ཕྱིར་མི་ལྡོག་པའི་འཁོར་ལོ་དང་། འཇིག་རྟེན་ཐམས་ཅད་ཀྱི་ཁོང་དུ་ཆུད་
པར་འགྱུར་བའི་ཚུལ་གྱིས་ཚད་མེད་པའི་འཁོར་ལོ་དང་། མི་འཇིགས་པའི་སེང་གེའི་ང་རོ་ཆེན་པོའི་ཚུལ་གྱིས་ཐམས་ཅད་མ་ལུས་པར་མངོན་པར་སངས་རྒྱས་པའི་འཁོར་ལོ་དང་། ཆོས་ཀྱི་མཛོད་མུན་པ་མེད་པའི་སྒོས་སྣང་བར་བྱེད་པའི་ཚུལ་གྱིས་ཆོས་ཐམས་ཅད་
མཁྱེན་པའི་མཛོད་ཀྱི་འཁོར་ལོ་དང་། ཡེ་ཤེས་ནམ་མཁའི་དབྱིངས་ལྟར་ཚད་མེད་པའི་ཚུལ་གྱིས་ཆགས་པ་མེད་པའི་འཁོར་ལོ་དང་། ཆོས་ཐམས་ཅད་ཀྱི་དངོས་པོ་མེད་པའི་རང་བཞིན་རབ་ཏུ་རྟོགས་པར་བྱ་བའི་ཚུལ་གྱིས་བསྒྲིབས་པ་མེད་པའི་འཁོར་ལོ་དང་། སེམས་
ཅན་ཐམས་ཅད་ཀྱི་ཆོས་ཀྱི་མིག་རྣམ་པར་སྦྱོང་བའི་ཚུལ་གྱིས་འཇིག་རྟེན་ཐམས་ཅད་ཀྱི་སྒྲོན་མའི་འཁོར་ལོ་དང་། འཇིག་རྟེན་ཐམས་ཅད་དུ་རྒྱས་པར་འགེངས་པའི་ཚུལ་གྱིས་ཐམས་ཅད་མཁྱེན་པའི་ཆོས་བརྗོད་པའི་འཁོར་ལོ་དང་། སངས་རྒྱས་ཀྱི་ཆོས་ཐམས་
ཅད་དང་མི་འགལ་བའི་ཚུལ་གྱིས་སངས་རྒྱས་ཐམས་ཅད་འདབ་འདྲེས་པར་གྱུར་པའི་འཁོར་ལོ་དང་། དེ་དག་ལ་སྩོགས་པ་རྣམ་པ་བྱེ་བ་ཁྲག་ཁྲིག་བརྒྱ་སྟོང་དུ་ཆོས་ཀྱི་འཁོར་ལོ་བསྐོར་བས་སེམས་ཅན་ཐམས་ཅད་ཀྱི་སེམས་དང་སྤྱོད་པའི་རྣམ་པ་ལ། །ཆོས་ཀྱི་
འཁོར་ལོ་སྐོར་ཏེ། དེ་ལྟར་ཆོས་ཀྱི་འཁོར་ལོ་བསྐོར་བས་ཀྱང་། སངས་རྒྱས་བཅོམ་ལྡན་འདས་རྣམས་སངས་རྒྱས་ཀྱི་ཕྲིན་ལས་བསམ་གྱིས་མི་ཁྱབ་པ་མཛད་དེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་དྲུག་པའོ། །

སངས་རྒྱས་བཅོམ་ལྡན་འདས་རྣམས་ནི་གྲོང་དང་གྲོང་ཁྱེར་དང་གྲོང་རྡལ་དང་། རྒྱལ་པོའི་གནས་སུ་གཤེགས་པས་ཀྱང་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དེ། མིའི་རྒྱལ་པོའི་གནས་དང་། ལྷའི་རྒྱལ་པོའི་གནས་དང་། ཀླུའི་
རྒྱལ་པོའི་གནས་དང་། གནོད་སྦྱིན་གྱི་རྒྱལ་པོའི་གནས་དང་། དྲི་ཟའི་རྒྱལ་པོའི་གནས་དང་། ལྷ་མ་ཡིན་གྱི་རྒྱལ་པོའི་གནས་དང་། ནམ་མཁའ་ལྡིང་གི་རྒྱལ་པོའི་གནས་དང་། མིའམ་ཅིའི་རྒྱལ་པོའི་གནས་དང་། ལྟོ་འཕྱེ་ཆེན་པོའི་རྒྱལ་པོའི་
གནས་དང་། སྲིན་པོའི་རྒྱལ་པོའི་གནས་དང་། ཤ་ཟའི་རྒྱལ་པོའི་གནས་དག་ཏུ་གཤེགས་པས་ཀྱང་སངས་རྒྱས་བཅོམ་ལྡན་འདས་རྣམས་ནི་སངས་རྒྱས་ཀྱི་ཕྲིན་ལས་མཛད་དེ། འདི་ལྟ་སྟེ། གྲོང་ཁྱེར་གྱི་སྒོར་བྱོན་ནས་གཡོ་བ་དང་། འོད་ཟེར་སྣང་
བ་དང་། ལོང་བ་རྣམས་མིག་འཐོབ་པ་དང་། འོན་པ་རྣམས་སྒྲ་ཐོས་པར་འགྱུར་བ་དང་། སྨྱོན་པ་རྣམས་དྲན་པ་འཐོབ་པར་འགྱུར་བ་དང་། གོས་མེད་པ་རྣམས་གོས་འཐོབ་པར་འགྱུར་བ་དང་། སྡུག་བསྔལ་བ་རྣམས་བདེ་བ་འཐོབ་པ་དང་།
རོལ་མོའི་ཆ་བྱད་མ་དཀྲོལ་མ་བརྡུངས་པར་སྒྲ་ཡིད་དུ་འོང་བ་རང་འབྱིན་པ་དང་། རྒྱན་སྣོད་ན་འདུག་པ་དང་། གནས་ནས་མ་ཕོག་པ་དང་། མ་བསྐྱོད་མ་དཀྲོལ་བར་བསྐྱོད་ཅིང་དཀྲོལ་བའི་སྒྲ་འབྱུང་བ་དང་། བྱ་སྣ་ཚོགས་མང་པོའི་སྒྲ་སྐད་ཡིད་
དུ་འོང་བ་འབྱུང་བ་དང་། བལྟ་ན་གཏང་མི་བྲ་ཞིང་མི་མཐུན་པ་མེད་པའི་སྐུ་མཐོང་བས་ཀྱང་། སངས་རྒྱས་བཅོམ་ལྡན་འདས་རྣམས་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དོ། །མཚན་དང་དཔེ་བྱད་བཟང་པོ་བསྟན་པས་ཀྱང་སངས་
རྒྱས་བཅོམ་ལྡན་འདས་རྣམས་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དེ། ཡོངས་སུ་གཟིགས་པ་དང་། རྣམ་པར་གཟིགས་པ་དང་། བརྐྱང་བ་དང་། བསྐུམ་པས་ཀྱང་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དོ། །

གཤེགས་པ་དང་སླར་བཞུད་པ་དང་། བཞེངས་པ་དང་། འཆག་པ་དང་། བཞུགས་པ་དང་། གཟིམས་པས་ཀྱང་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དོ། །ཆོས་བསྟན་པ་དང་། མི་གསུང་བར་
བཞུགས་པས་ཀྱང་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དོ། །རྫུ་འཕྲུལ་གྱི་ཆོ་འཕྲུལ་དང་། ཡོངས་སུ་བསྟན་པའི་ཆོ་འཕྲུལ་དང་། རྗེས་སུ་བསྟན་པའི་ཆོ་འཕྲུལ་གྱིས་ཀྱང་སངས་རྒྱས་བཅོམ་ལྡན་འདས་རྣམས་འཇིག་རྟེན་གྱི་
ཁམས་ཀྱི་ཡུལ་སེམས་ཅན་བསམ་པ་སྣ་ཚོགས་རྒྱ་མཚོ་དང་ལྡན་པ་འཇིག་རྟེན་གྱི་སྤྱོད་པ་ཐམས་ཅད་རྒྱུ་ཞིང་འབྱུང་བ་དང་ལྡན་པ་དགེ་བའི་རྩ་བ་ཆེན་པོས་ཤིན་ཏུ་བརྟན་པ། སངས་རྒྱས་རྗེས་སུ་དྲན་པ་དང་ལྡན་པ། སྔོན་འགྲོགས་འགྲོགས་པའི་བྱང་
ཆུབ་སེམས་དཔའ་དང་གནས་པའི་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དོ། །ཡང་དག་པར་རྫོགས་པའི་སངས་རྒྱས་རྣམས་ནི་སྐུ་གཟུགས་བལྟ་ན་མི་ངོམས་པའོ་ཞེས་བྱ་བར་གཞོལ་བ་དང་། སངས་རྒྱས་རྣམས་སྐྱེ་བར་དཀོན་ནོ་
ཞེས་བྱ་བར་ཡིད་ཆེས་པར་བྱེད་པ་དང་། དེ་བཞིན་གཤེགས་པ་མཐོང་ཞིང་། དེ་བཞིན་གཤེགས་པའི་གསུང་ཐོས་པ་ནི་བསོད་ནམས་ཀྱི་ཆོས་དཀར་པོའི་འབྱུང་གནས་སུ་གྱུར་པའོ། །ཞེས་སངས་རྒྱས་ཀྱི་སྤྱོད་པ་ཡིད་ལ་བྱེད་པ་དང་། འཇིག་
རྟེན་ཐམས་ཅད་རྣམ་པར་དག་པ་ནི། དེ་བཞིན་གཤེགས་པ་སྐྱེ་བ་ཡིན་ནོ་ཞེས་བྱ་བར་ཁོང་དུ་ཆུད་པར་བྱེད་པ་དང་། །སངས་རྒྱས་ཀྱི་ཡོན་ཏན་བསྔགས་པ་ནི་མཐའ་ཡས་པའོ་ཞེས་བྱ་བར་ཡང་དག་པར་ལྟ་བ་དང་། མ་བྱོན་པའི་སངས་རྒྱས་འབྱུང་
བའི་དེ་བཞིན་གཤེགས་པའི་རིགས་ཡང་དག་པར་བསྒྲུབ་པ་དང་། དགེ་བའི་རྩ་བ་དང་མོས་པའི་ཚུལ་ཐམས་ཅད་ཀྱིས་སངས་རྒྱས་བཅོམ་ལྡན་འདས་རྣམས་མཉེས་པར་བྱེད་པ་དང་། དེ་བཞིན་གཤེགས་པ་རྣམས་ནི་ཡོན་ཏན་མཐའ་ཡས་པའོ། །

ཞེས་ཁོང་དུ་ཆུད་པར་བྱེད་པ་དང་། དེ་བཞིན་གཤེགས་པ་ནི་སེམས་ཅན་ཐམས་ཅད་ལ་མངོན་དུ་གྱུར་པར་རྟོགས་པ་དང་། དེ་བཞིན་གཤེགས་པ་ནི་སེམས་ཅན་གྱི་རིས་བསམ་གྱིས་མི་ཁྱབ་པའི་གནས་སུ་གྱུར་པར་སེམས་པ་དང་། དེ་བཞིན་གཤེགས་
པ་ནི་ཞིང་ཐམས་ཅད་ན་སྣང་བར་ཁོང་དུ་ཆུད་པ་དང་། དེ་ལྟ་བུའི་དགེ་བའི་རྩ་བ་ཐམས་ཅད་འབྱུང་བས་འཇིག་རྟེན་ཐམས་ཅད་ན་སངས་རྒྱས་བཅོམ་ལྡན་འདས་རྣམས་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དོ། །དད་པར་བྱས་པ་དང་། ཕྱག་འཚལ་
བ་དང་། ཐལ་མོ་སྦྱར་བར་བྱས་པ་དང་། རྗེས་སུ་བསྟོད་པ་དང་། སྤྱན་དྲངས་པ་དང་། མཆོད་པ་དང་། མངོན་དུ་མཐོང་བ་དང་། འཛུམ་པ་བྱས་པ་དང་། སངས་རྒྱས་ལ་དགའ་བའི་སེམས་ཀྱིས་མོས་པར་བྱས་པའི་དགེ་བའི་རྩ་བའི་སྒོ་ནས་ཀྱང་།
སངས་རྒྱས་བཅོམ་ལྡན་འདས་རྣམས་ནི་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དོ། །སངས་རྒྱས་རྗེས་སུ་དྲན་པར་གྱུར་པས་ཀྱང་། སངས་རྒྱས་བཅོམ་ལྡན་འདས་རྣམས་ནི་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དོ། །
སངས་རྒྱས་མཐོང་བར་འདོད་པར་བྱས་པས་ཀྱང་སངས་རྒྱས་བཅོམ་ལྡན་འདས་རྣམས་ནི་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དོ། །དེ་བཞིན་གཤེགས་པའི་སྐུ་ཁ་དོག་དང་དབྱིབས་ཀྱི་རྣམ་པ་ཚད་མེད་པ་བསྟན་པས་ཀྱང་། སངས་
རྒྱས་བཅོམ་ལྡན་འདས་རྣམས་ནི་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དོ། །དེ་བཞིན་གཤེགས་པའི་གསུང་ཐོས་པར་བྱ་བས་ཀྱང་སངས་རྒྱས་བཅོམ་ལྡན་འདས་རྣམས་ནི་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དེ།
དེ་དག་ལ་སྩོགས་པ་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་མཛད་པ་རྣམ་པ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་དག །འཇིག་རྟེན་གྱི་ཁམས་མ་ལུས་པ་ཐམས་ཅད་དུ་སེམས་ཅན་ཐམས་ཅད་ཀྱི་བསམ་པ་དང་། མཐུ་དང་

འདུལ་བ་ཇི་ལྟ་བའི་ཚུལ་ལས་མི་འདའ་བར་འབྱུང་ངོ་། །དེ་ལྟར་སངས་རྒྱས་ཀྱི་ཕྲིན་ལས་འཇིག་རྟེན་ཐམས་ཅད་ཀྱི་སེམས་ཅན་ཀུན་གྱི་སེམས་དང་སྤྱོད་པ་དང་བསམ་པ་ལ་གནས་པ། དགེ་བ་རྒྱ་ཆེ་བ་ཚད་མེད་པ་དག་ཕྱིར་མི་
ལྡོག་པའི་ཡུལ་དང་། སྙིང་རྗེ་ཆེན་པོས་རབ་ཏུ་བསྐུལ་བ་དང་། སྔོན་གྱི་སྨོན་ལམ་གྱིས་ཡོངས་སུ་སྐྱོ་བ་མེད་པ་དང་། སངས་རྒྱས་ཀྱི་ཕྲིན་ལས་མཁྱེན་པའི་སྟོབས་དང་། ཤུགས་ཀྱིས་འཇིག་རྟེན་ཐམས་ཅད་དུ་འབྱུང་སྟེ། འདི་ནི་སངས་རྒྱས་
བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་བདུན་པའོ། །སངས་རྒྱས་བཅོམ་ལྡན་འདས་རྣམས་ནི་དགོན་པ་ལ་བཞུགས་སམ། ཞི་བར་བཞུགས་སམ། དབེན་པར་བཞུགས་སམ། སངས་རྒྱས་ཀྱི་རྣམ་པར་སྤྱོད་པ་ལ་བཞུགས་
སམ། ཏིང་ངེ་འཛིན་ཆེན་པོའི་གནས་ལ་བཞུགས་སམ། གཅིག་པུ་དགྱེས་པར་བཞུགས་སམ། སྐུ་མྱི་སྣང་བར་བཞུགས་སམ། ཡེ་ཤེས་ཟབ་མོའི་གནས་ལ་བཞུགས་སམ། སངས་རྒྱས་ཀྱི་ཡུལ་གྱི་སྟོབས་ཚད་མེད་པ་ལ་བཞུགས་
སམ། སྐུའི་ཡོངས་སུ་སྤྱོད་པ་མི་མཐོང་བར་བཞུགས་ཀྱང་རུང་སྟེ། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་གཞན་གྱིས་མི་ཚུགས་པའི་ཡེ་ཤེས་དང་། སྨོན་ལམ་གྱི་ཚུལ་གྱིས་མོས་པ་བཞིན་དུ་འདུལ་བའི་སེམས་ཅན་
རྣམས་ལ་རྒྱུན་མི་འཆད་པར་འབྱུང་སྟེ། སངས་རྒྱས་ལྷ་ཡོངས་སུ་ཚོལ་བས་ཀྱང་། སངས་རྒྱས་ཀྱི་ཕྲིན་ལས་རྒྱུན་མི་འཆད་དོ། །སངས་རྒྱས་ཀླུ་ཡོངས་སུ་ཚོལ་བས་ཀྱང་སངས་རྒྱས་ཀྱི་ཕྲིན་ལས་རྒྱུན་མི་འཆད་དོ། །སངས་རྒྱས་གནོད་སྦྱིན་
ཡོངས་སུ་ཚོལ་བ་དང་། སངས་རྒྱས་མིའམ་ཅི་ཡོངས་སུ་ཚོལ་བ་དང་། སངས་རྒྱས་ལྟོ་འཕྱེ་ཆེན་པོ་ཡོངས་སུ་ཚོལ་བ་དང་། སངས་རྒྱས་སྲིན་པ་ཡོངས་སུ་ཚོལ་བ་དང་། སངས་རྒྱས་མི་དང་མི་མ་ཡིན་པ་ཡོངས་སུ་ཚོལ་བ་དང་། སངས་རྒྱས་

ཉན་ཐོས་དང་། སངས་རྒྱས་རང་སངས་རྒྱས་དང་། སངས་རྒྱས་བྱང་ཆུབ་སེམས་དཔའ་ཡོངས་སུ་ཚོལ་བས་ཀྱང་སངས་རྒྱས་ཀྱི་ཕྲིན་ལས་རྒྱུན་མི་འཆད་དོ། །ཆོས་སྟོན་པས་ཀྱང་སངས་རྒྱས་ཀྱི་ཕྲིན་ལས་རྒྱུན་མི་འཆད་དོ། །སངས་རྒྱས་གཅིག་
བརྗོད་པས་ཀྱང་སངས་རྒྱས་ཀྱི་ཕྲིན་ལས་རྒྱུན་མི་འཆད་དོ། །སངས་རྒྱས་ཐམས་ཅད་བརྗོད་པས་ཀྱང་སངས་རྒྱས་ཀྱི་ཕྲིན་ལས་རྒྱུན་མི་འཆད་དོ། །བྱང་ཆུབ་སེམས་དཔའི་སྤྱོད་པའི་ཁྱད་པར་དང་། སྨོན་ལམ་ཐམས་ཅད་གཅིག་ཏུ་བརྗོད་པས་ཀྱང་
སངས་རྒྱས་ཀྱི་ཕྲིན་ལས་རྒྱུན་མི་འཆད་དོ། །བྱང་ཆུབ་སེམས་དཔའི་སྤྱོད་པ་གཅིག་རྣམ་པར་ཕྱེ་སྟེ། སྤྱོད་པ་ཐ་དད་པ་བརྗོད་པས་ཀྱང་སངས་རྒྱས་ཀྱི་ཕྲིན་ལས་རྒྱུན་མི་འཆད་དོ། །འཇིག་རྟེན་གྱི་ཡུལ་སངས་རྒྱས་ཀྱི་ཡུལ་དུ་བརྗོད་པས་ཀྱང་སངས་
རྒྱས་ཀྱི་ཕྲིན་ལས་རྒྱུན་མི་འཆད་དོ། །སངས་རྒྱས་ཀྱི་ཡུལ་འཇིག་རྟེན་གྱི་ཡུལ་དུ་བརྗོད་པས་ཀྱང་སངས་རྒྱས་ཀྱི་ཕྲིན་ལས་རྒྱུན་མི་འཆད་དོ། །ཡུལ་མ་ཡིན་པ་སངས་རྒྱས་ཀྱི་ཡུལ་དུ་བརྗོད་པས་ཀྱང་སངས་རྒྱས་ཀྱི་ཕྲིན་ལས་རྒྱུན་མི་འཆད་དོ། །ཉིན་
མཚན་དང་ཟླ་བ་ཡར་ཁམ་མར་ཁམ་དང་། ཟླ་བ་དང་། ལོ་འགྲངས་པར་བཞུགས་པ་དང་། ཡོངས་སུ་བཞུགས་པ་ནས། དེ་བཞིན་དུ་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་བཞུགས་པ་དང་། ཡོངས་སུ་བཞུགས་པས་ཀྱང་སངས་
རྒྱས་བཅོམ་ལྡན་འདས་རྣམས་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་མཛད་དེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་བརྒྱད་པའོ། །སངས་རྒྱས་བཅོམ་ལྡན་འདས་རྣམས་ནི་དགེ་བའི་རྩ་བ་རྣམས་ལ་འབྱུང་གནས་ལྟ་བུ།
སེམས་ཅན་ཐམས་ཅད་ཀྱི་བསམ་པ་ཀུན་ལ་རྣམ་པར་སྤྱོད་པ་ལྟ་བུ། །སངས་རྒྱས་རྣམས་ལ་དད་པ་ལྟ་བུ། སེམས་ཁོང་དུ་ཆུད་པར་བྱ་བ་ལ་ཤིན་ཏུ་མོས་པ་ལྟ་བུ། དབང་པོ་རྣམས་ལ་བསྒྲུབ་པ་ལྟ་བུ། སེམས་ཅན་སྐྱེ་དགུ་ཐམས་ཅད་ལ་འདུལ་བ་

ལྟ་བུ། འགྲོ་བ་ཐམས་ཅད་ལ་མོས་པ་ལྟ་བུ། བྱང་ཆུབ་སེམས་དཔའ་ཐམས་ཅད་ལ་འབྱུང་བ་ལྟ་བུ། བྱང་ཆུབ་ཏུ་ཞུགས་པ་རྣམས་ལ་བསྐུལ་བ་ལྟ་བུ། གཞན་གྱི་དྲིང་མི་འཇོག་པ་རྣམས་ལ་ཡེ་ཤེས་ཀྱི་སྣང་བ་ལྟ་བུ་དག་སྟེ་
སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་མི་རྟག་པར་སྟོན་པ་དང་། སངས་རྒྱས་ཀྱི་ཕྲིན་ལས་རྒྱུན་མི་འཆད་པར་བརྗོད་པ་དང་། ཕྲིན་ལས་མཛད་པའི་མཐར་ཐུག་པར་བསྟན་པ་དང་། ཆོས་ཀྱི་རྒྱུད་ཉམས་པ་མེད་པའི་དངོས་པོར་བརྗོད་པ་དང་།
སྲིད་པའི་ཚུལ་རྩ་བ་ནས་ཆད་པར་བརྗོད་པ་དང་། སེམས་ཅན་ཐམས་ཅད་སྐྱོ་བར་བྱ་བར་བསྟན་པ་དང་། སངས་རྒྱས་ཀྱི་རྗེས་སུ་འགྲོ་བའི་སེམས་སུ་མཐུན་པར་བྱ་བ་དང་། སྐུ་ཚེའི་མཐའ་ལྟ་བུར་སེམས་ཅན་རྣམས་ཀྱིས་ཤེས་པར་བྱ་བ་དང་། སེམས་ཅན་
རྣམས་ཀྱིས་འཇིག་རྟེན་ཐམས་ཅད་དུ་དགའ་བར་བྱ་བ་མེད་པར་བསྟན་པ་དང་། སེམས་ཅན་རྣམས་ལ་མ་བྱོན་པའི་སངས་རྒྱས་གཅིག་ནས། གཅིག་ཏུ་བརྒྱུད་པ་མཉེས་པར་གྱིས་ཤིག་པར་བསྟན་པ་དང་། སངས་རྒྱས་བཅོམ་ལྡན་འདས་རྣམས་ཆོས་ཀྱི་འཁོར་
ལོ་བསྐོར་བ་བསྟན་དུ་མི་རུང་བར་ཁོང་དུ་ཆུད་པར་བྱ་བ་དང་། འཇིག་རྟེན་རྣམས་ཀྱི་རྩོལ་བ་བསྐྱེད་པ་དང་སངས་རྒྱས་ལ་དམིགས་པར་བརྩོན་པའི་སེམས་ལ་དགོད་པ་དང་། ཡུན་དུ་དྲན་པ་རྣམ་པར་དག་པས་དེ་བཞིན་གཤེགས་པ་མཐོང་བའི་རྣམ་པར་རྟོག་པ་བསྐྱེད་
པ་དང་། སྐྱེ་བའི་དབང་པོ་ཕྱིར་བཟློག་ཅིང་ཡོངས་སུ་དག་པར་མཛད་པ་དང་། སངས་རྒྱས་ལ་མོས་པ་བསྐྱེད་པ་དང་། སྐྱོ་བར་གྱུར་པའི་སེམས་ཅན་རྣམས་ལ་བྱིན་གྱིས་བརླབ་པར་བྱ་བ་དང་། སངས་རྒྱས་ལ་དམིགས་པའི་རྐྱེན་འཇིག་རྟེན་གྱི་ཁམས་མ་
ལུས་པ་ཐམས་ཅད་དུ་ཕྱིན་པར་དགོངས་པ་མཛད་པ་དང་། སྐུ་ཐམས་ཅད་བཤིག་སྟེ། དེ་བཞིན་གཤེགས་པའི་སྐུ་གདུང་གིས་སེམས་ཅན་རྣམས་ཡོངས་སུ་གཟུང་བ་མཛད་པ་དང་། འཇིག་རྟེན་རྣམ་པར་འཁྲུགས་པ་དང་། དྲེགས་ཤིང་མྱོས་པའི་

སེམས་ཅན་རྣམས་སྡོམ་པ་ལ་དགོད་པ་མཛད་ཅིང་། ཡོངས་སུ་མྱ་ངན་ལས་འདའ་བ་སྟོན་པས་ཀྱང་། །སངས་རྒྱས་ཀྱི་ཕྲིན་ལས་རྒྱུན་མི་འཆད་དེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་དགུ་པའོ། །དེ་བཞིན་གཤེགས་
པ་རྣམས་མྱ་ངན་ལས་འདའ་བའི་ཚེ། འཇིག་རྟེན་ཐམས་ཅད་ན་སེམས་ཅན་རྣམས་སྨྲེ་སྔགས་འདོན་ཅིང་ངུ་བ་དང་། མྱ་ངན་བྱེད་པ་དང་། མཆི་མ་འབྱིན་པ་དང་། ཡང་དག་པར་རྫོགས་པའི་སངས་རྒྱས་ཞེའམ། ཐུགས་རྗེ་ཆེན་པོ་ཞེའམ། དེད་
དཔོན་ཆེན་པོ་ཞེའམ། ཕན་པར་བཞེད་པ་ཐུགས་བརྩེ་བ་ཅན་ཞེའམ། ལྷ་དང་བཅས་པའི་འཇིག་རྟེན་གྱི་སེམས་ཅན་ཐམས་ཅད་ཀྱི་སྐྱབས་སུ་གྱུར་པ། མགོན་དུ་གྱུར་པ། རྟེན་དུ་གྱུར་པ། བླ་ན་མེད་པ། བསོད་ནམས་ཀྱི་ཞིང་ནུབ་པར་གྱུར་
ཏོ་ཞེའམ། སངས་རྒྱས་བཅོམ་ལྡན་འདས་རྣམས་ནི་འབྱུང་བར་དཀའ་འོ། །ཞེས་རྣམ་པ་དེ་ལྟ་བུར་སྨྲེ་སྔགས་འདོན་ཅིང་། མྱ་ངན་བྱེད་པ་དང་། སངས་རྒྱས་མཐོང་བ་རྗེས་སུ་དྲན་པའི་སེམས་ཅན་རྣམས་ཀྱི་བསམ་པ་དང་། ཡིད་ལ་བྱ་བ་དེ་
དང་དེ་དག་གི་སྒོར་སངས་རྒྱས་ཀྱི་ཕྲིན་ལས་ཚད་མེད་པ་རྒྱུན་མི་འཆད་དོ། །སངས་རྒྱས་བཅོམ་ལྡན་འདས་རྣམས་ཡོངས་སུ་མྱ་ངན་ལས་འདའ་བའི་ཚེ། འདི་ལྟ་སྟེ། སེམས་ཅན་རྣམས་ཀྱི་སེམས་དང་པར་བྱ་བའི་དབང་དང་། སེམས་ཅན་རྣམས་
དད་པས་མཆོད་པར་བྱ་བའི་དབང་དང་། སེམས་ཅན་རྣམས་ལྷག་པའི་བསམ་པ་རྣམ་པར་སྤྱོད་པར་བྱ་བའི་དབང་དང་། སེམས་ཅན་རྣམས་ཡོངས་སུ་སྨིན་པར་བྱ་བའི་དབང་དང་། སེམས་ཅན་རྣམས་ཡོངས་སུ་སྦྱང་བར་བྱ་བའི་དབང་དང་། སེམས་ཅན་རྣམས་གདུལ་བའི་དབང་དང་།
སེམས་ཅན་རྣམས་ཀྱི་བསོད་ནམས་ཀྱི་ཚོགས་ཡོངས་སུ་རྫོགས་པར་བྱ་བའི་དབང་དང་། སེམས་ཅན་རྣམས་དེ་བཞིན་གཤེགས་པ་ལ་མཆོད་པས་དམིགས་པར་བྱ་བའི་དབང་དང་། དེ་བཞིན་གཤེགས་པའི་མཆོད་རྟེན་རྣམ་པ་སྣ་ཚོགས་སུ་བརྒྱན་པས། ཕྱོགས་དང་

ཡུལ་སྣ་ཚོགས་སུ་སེམས་ཅན་རྣམས་ཀྱི་དགེ་བའི་རྩེ་བ་བསྩགས་པར་བྱ་བའི་དབང་གིས་སེམས་ཅན་རྣམས་ཀྱི་བསམ་པ་དང་མོས་པ་ཇི་ལྟ་བ་བཞིན་དུ་སྐུ་གདུང་དང་། རིང་བསྲེལ་བྱིན་གྱིས་རློབ་སྟེ། ལྷ་དང་ཀླུ་དང་། གནོད་སྦྱིན་
དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མིའི་གནས་ཐམས་ཅད་དུ་འདུལ་བ་དང་། མོས་པའི་ཚུལ་ཇི་ལྟ་བ་བཞིན་དུ། སྐུ་གདུང་དང་རིང་བསྲེལ་བྱིན་གྱིས་རློབ་པོ། །རང་གི་སྐུ་རྣམ་པར་
ཕྱེ་སྟེ། སྐུ་གདུང་དང་རིང་བསྲེལ་ཚད་མེད་པ་གྲངས་མེད་པ་དཔག་ཏུ་མེད་པ་བསམ་གྱིས་མི་ཁྱབ་པ་བརྗོད་དུ་མེད་པའི་ཡང་བརྗོད་དུ་མེད་པ་བྱིན་གྱིས་རློབ་བོ། །དེ་བཞིན་གཤེགས་པའི་མཆོད་རྟེན་གྱིས་སངས་རྒྱས་ཀྱི་སྐུ་གདུང་འཇིག་རྟེན་ཐམས་ཅད་དུ་རྣམ་
པར་ཕྱེ་བ་དེའི་ཡུལ་དང་། ཕྱོགས་ཀྱི་ཀླུའི་གནས་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོའི་གནས་དང་། མིའི་གནས་དང་། སྲིན་པོའི་གནས་དག་ཏུ་སྐུ་གདུང་དང་། རིང་བསྲེལ་
མཆོད་པ་བྱེད་པར་འགྱུར་བས། སྐུ་གདུང་གི་རིང་བསྲེལ་དང་དབུ་དང་། ཕྱག་སེན་གྱི་མཆོད་རྟེན་དང་། སངས་རྒྱས་བཞུགས་པའི་མཆོད་རྟེན་ལ་འགྲོ་བ་ཐམས་ཅད་ངེས་པར་སངས་རྒྱས་དྲན་པར་འགྱུར་ཏེ། ཆོས་ལ་རབ་ཏུ་རྟེན་པར་འགྱུར་རོ། །དགེ་
འདུན་ལ་དད་པ་རབ་ཏུ་འཐོབ་པར་འགྱུར་རོ། །ཡུལ་དང་ཕྱོགས་ཀྱི་གནས་དེ་དང་དེ་དག་ཏུ་ཡང་རྒྱུན་མི་འཆད་པར་སངས་རྒྱས་མཆོད་པ་ལ་བརྩོན་པའི་བསམ་པས་སྦྱིན་པ་ཡོངས་སུ་གཏོང་བར་འགྱུར་རོ། །བསོད་ནམས་བྱེད་པར་འགྱུར་རོ། །མཐོ་
རིས་དེ་དང་དེ་ཡོངས་སུ་དག་པ་རབ་ཏུ་འཐོབ་པར་འགྱུར་རོ། །རིགས་དང་རྒྱུད་ཀྱི་བདག་ཉིད་ཆེ་བ་རབ་ཏུ་འཐོབ་པར་འགྱུར་རོ། །ལོངས་སྤྱོད་ཆེན་པོ་དང་། འཁོར་རྣམ་པར་དག་པ་རབ་ཏུ་འཐོབ་པར་འགྱུར་རོ། །ལྷ་དང་མིའི་ཕུན་སུམ་ཚོགས་པ་ཉམས་

སུ་མྱོང་བར་འགྱུར་རོ། །ལོག་པར་ལྟུང་བ་མེད་པའི་ལམ་ཡོངས་སུ་རྫོགས་པར་འགྱུར་རོ། །སངས་རྒྱས་བྱུང་བ་དོན་ཡོད་པ་རབ་ཏུ་བསྒྲུབ་པར་འགྱུར་རོ། །ཆོས་དཀར་པོ་ལ་གནས་པ་ཡོངས་སུ་རྫོགས་པར་བྱེད་པར་འགྱུར་རོ། །ཁམས་གསུམ་
པ་ལས་འབྱུང་བའི་ལམ་ཡོངས་སུ་སྦྱོང་བར་འགྱུར་རོ། །ཐེག་པ་གང་ལ་དད་པའི་སྨོན་ལམ་གྱིས་ངེས་པར་འབྱུང་བར་འགྱུར་རོ། །དེ་བཞིན་གཤེགས་པ་དེ་དང་དེ་དག་ལ་དྲིན་དུ་གཟོ་བ་རབ་ཏུ་འཐོབ་པར་འགྱུར་རོ། །སངས་རྒྱས་བཅོམ་ལྡན་འདས་
རྣམས་ལ་རྟེན་པ་དང་། སྐྱབས་བཙལ་བ་དང་། མགོན་བཙལ་བ་དང་། དཔུང་གཉེན་བཙལ་བའི་སེམས་བསྐྱེད་པར་འགྱུར་ཏེ། དེ་ལྟར་སངས་རྒྱས་བཅོམ་ལྡན་འདས་རྣམས་ནི་ཡོངས་སུ་མྱ་ངན་ལས་འདས་ཀྱང་ཡོན་བསམ་གྱིས་མི་ཁྱབ་
པར་སྦྱོང་བ། བསོད་ནམས་ཟད་མི་ཤེས་པའི་ཡོན་གྱི་གནས་དག་སྟེ། སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་དུ་བྱུང་ན་དེ་ལྟར་སེམས་ཅན་རྣམས་ཀྱི་དགེ་བའི་རྩ་བ་རྣམ་པ་མང་པོ་རབ་ཏུ་བསྩགས་པས་བསོད་ནམས་ཀྱི་ཚོགས་
རབ་ཏུ་རྫོགས་པར་འགྱུར་ཏེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་རྒྱ་ཆེན་པོ་ཚད་མེད་པ་བསམ་གྱིས་མི་ཁྱབ་པ་
རྣམས་སོ། །དེ་དག་ནི་སངས་རྒྱས་ཀྱི་བྱིན་རླབས་མ་གཏོགས་པར་ལྷ་དང་བཅས་པའི་འཇིག་རྟེན་གྱིས་ཚད་གཟུང་བར་མི་ནུས་པའོ། །འདས་པ་དང་མ་འོངས་པ་དང་། ད་ལྟར་བྱུང་བའི་ཉན་ཐོས་དང་། རང་སངས་རྒྱས་ཐམས་ཅད་ཀྱིས་འཇུག་
པར་མི་ནུས་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་གཉིས་སུ་མེད་པར་སྤྱོད་ཅིང་། དངོས་པོ་རྣམ་པ་གཉིས་སུ་མེད་པའི་ཆོས་ཀྱི་དབང་ཕྱུག་གི་ཆོས་རྣམས་ཏེ། བཅུ་གང་ཞེ་ན། འདི་ལྟ་སྟེ། སངས་

རྒྱས་བཅོམ་ལྡན་འདས་རྣམས་ནི་ལུང་བསྟན་པ་ཐམས་ཅད་སྟོན་པ་ལ་གཉིས་སུ་མེད་པར་སྤྱོད་དོ། །སངས་རྒྱས་བཅོམ་ལྡན་འདས་རྣམས་ནི་སེམས་ཅན་སངས་རྒྱས་རྗེས་སུ་དྲན་པ་ལ་བརྩོན་པ་རྣམས་ཀྱི་སེམས་དང་བསམ་པ་
བརྗོད་དུ་མེད་པ་འབྱམ་ཀླས་པ་རྣམས་ལ་གཉིས་སུ་མེད་པར་སྤྱོད་དོ། །སངས་རྒྱས་ཀྱི་ཆོས་ཐམས་ཅད་ཀྱི་དོན་མ་ལུས་པར་མངོན་པར་སངས་རྒྱས་པས་གཉིས་སུ་མེད་པའི་སྐུ་དམྱིགས་པར་མཛད་དོ། །འདས་པ་དང་། མ་བྱོན་པ་དང་། ད་ལྟར་བྱུང་བའི་དེ་
བཞིན་གཤེགས་པ་ཐམས་ཅད་ལ་རང་བཞིན་གཉིས་སུ་མེད་པར་ཐུགས་སུ་ཆུད་པ་མངའ་བའོ། །འབྱུང་བ་དང་བྱང་བའི་མཐའ་གཉིས་སུ་མེད་པ་དང་། སྔོན་གྱི་མཐའ་དང་། ཕྱི་མའི་མཐའ་དང་། ད་ལྟར་བྱུང་བ་གཉིས་སུ་མེད་པར་ཐུགས་སུ་ཆུད་པ་མངའ་བའོ། །
སངས་རྒྱས་ཀྱི་ཞིང་ཐམས་ཅད་གཉིས་སུ་མེད་པས་དུས་གསུམ་གྱི་སངས་རྒྱས་ཀྱི་ཞིང་ཐམས་ཅད་གཅིག་པར་རབ་ཏུ་མཁྱེན་ཅིང་སྟོན་པ་ཐུགས་སུ་ཆུད་པ་མངའ་བའོ། །སངས་རྒྱས་གཅིག་དང་། སངས་རྒྱས་ཐམས་ཅད་ཀྱི་གསུང་གཉིས་སུ་མེད་པར་ཐུགས་
སུ་ཆུད་པ་མངའ་བའོ། །དེ་བཞིན་གཤེགས་པ་ཐམས་ཅད་ཀྱིས་ཐུགས་སུ་ཆུད་པ་དང་། འདུལ་བ་མཛད་པའི་རྣམ་པར་དམིགས་པ་གཉིས་སུ་མེད་པར་ཐུགས་སུ་ཆུད་པ་མངའ་བའོ། །འཇིག་རྟེན་གྱི་ཆོས་ཐམས་ཅད་དང་། སངས་རྒྱས་ཀྱི་ཆོས་
གཉིས་སུ་མེད་པར་ཐུགས་སུ་ཆུད་པ་མངའ་བའོ། །འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱི་དགེ་བའི་རྩ་བ་ཐམས་ཅད་དགེ་བའི་རྩ་བ་གཅིག་སྟེ། གཉིས་སུ་མེད་པར་ཐུགས་སུ་ཆུད་པ་མངའ་བའོ། །ཀྱེ་རྒྱལ་
བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་གཉིས་སུ་མེད་པར་སྤྱོད་ཅིང་། དངོས་པོ་གཉིས་སུ་མེད་པའི་ཆོས་ཀྱི་དབང་ཕྱུག་གི་ཆོས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་དེ་བཞིན་

གཤེགས་པ་བཞུགས་པ་ཆོས་ཐམས་ཅད་ལ་རབ་ཏུ་ཞུགས་པ་རྣམས་སོ། །བཅུ་གང་ཞེ་ན། སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་དབྱིངས་གནས་པའི་ཡེ་ཤེས་ཐུགས་སུ་ཆུད་པ་ལ་བཞུགས་པའོ། །སངས་རྒྱས་བཅོམ་ལྡན་འདས་རྣམས་
ནི་ཐུགས་རྗེ་ཆེན་པོ་མི་ཉམས་པ་ལ་བཞུགས་པའོ། །སངས་རྒྱས་བཅོམ་ལྡན་འདས་རྣམས་ནི་སྨོན་ལམ་ཇི་ལྟ་བ་བཞིན་དུ་འབྱུང་བ་ལ་བཞུགས་པའོ། །སངས་རྒྱས་བཅོམ་ལྡན་འདས་རྣམས་ནི་འདུལ་བའི་སེམས་ཅན་ཡོངས་སུ་མི་གཏོང་བ་ལ་བཞུགས་
པའོ། །སངས་རྒྱས་བཅོམ་ལྡན་འདས་རྣམས་ནི་དངོས་པོ་མེད་པ་ལ་གནས་པའི་ཆོས་ཉིད་ལ་བཞུགས་པའོ། །སངས་རྒྱས་བཅོམ་ལྡན་འདས་རྣམས་ནི་དེ་བཞིན་གཤེགས་པའི་སྐུ་སྐལ་བ་མཉམ་པ་ཐ་མི་དད་ཅིང་དོན་ཡོད་པ་ལ་བཞུགས་པའོ། །
སངས་རྒྱས་བཅོམ་ལྡན་འདས་རྣམས་ནི་རྟག་ཏུ་མཉམ་པར་གཞག་པའི་ཐུགས་ལ་བཞུགས་པའོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཐམས་ཅད་ཉམས་པ་མེད་པར་གཞོལ་བ་ལ་བཞུགས་པའོ། །སངས་རྒྱས་བཅོམ་ལྡན་འདས་
རྣམས་ནི་ཆགས་པ་མེད་པའི་དགོངས་པས་རྣམ་པར་སྤྱོད་པ་ལ་བཞུགས་པའོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཐམས་ཅད་ཀྱི་མཉམ་པ་ཉིད་ལ་འཇུག་པས་གྲུབ་པ་མེད་པའི་ཡང་དག་པའི་མཐའི་མཚན་ཉིད་ལ་བཞུགས་པ་སྟེ། ཀྱེ་རྒྱལ་བའི་
སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་དེ་བཞིན་གཤེགས་པ་བཞུགས་པ་ཆོས་ཐམས་ཅད་ལ་ཞུགས་པ་རྣམས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཐམས་ཅད་མ་ལུས་པར་མངོན་
པར་མཁྱེན་པ་རྣམས་ཏེ། བཅུ་གང་ཞེ་ན་འདི་ལྟ་སྟེ། ཆོས་ཀྱི་དབྱིངས་མ་ལུས་པ་ཐམས་ཅད་ཀྱི་འདས་པ་བགྲངས་པ་མཐའ་དག་ཐམས་ཅད་མངོན་པར་མཁྱེན་པ་དང་། མ་འོངས་པ་བགྲངས་པ་མཐའ་དག་ཐམས་ཅད་མངོན་པར་མཁྱེན་པ་དང་།

ད་ལྟར་བྱུང་བ་བགྲངས་པ་མཐའ་དག་ཐམས་ཅད་མངོན་པར་མཁྱེན་པ་དང་། ཚིག་གི་ལམ་མཐའ་དག་ཐམས་ཅད་མངོན་པར་མཁྱེན་པ་དང་། འཇིག་རྟེན་གྱི་རྒྱུད་མཐའ་དག་ཐམས་ཅད་མངོན་པར་མཁྱེན་པ་དང་། སེམས་ཅན་གྱི་
བསམ་པ་དང་ཤེས་པ་མཐའ་དག་ཐམས་ཅད་མངོན་པར་མཁྱེན་པ་དང་། བྱང་ཆུབ་སེམས་དཔའ་དགེ་བའི་རྩ་བ་ཆུང་ངུ་དང་འབྲིང་དང་ཆེན་པོ་དང་། རྣམ་པ་སྣ་ཚོགས་སུ་རྣམ་པར་གནས་པའི་མཚན་ཉིད་ཀྱི་དགེ་བའི་རྩ་བ་རྣམས་ལ་བསམ་པ་ཚད་མེད་པ་ཡོངས་སུ་
མི་གཏོང་བས་སངས་རྒྱས་ཀྱི་ཡེ་ཤེས་འབར་བར་བྱ་བ་དང་། ཡོངས་སུ་རྫོགས་པར་བྱ་བ་མཐའ་དག་ཐམས་ཅད་མངོན་པར་མཁྱེན་པ་དང་། ཆོས་ཐམས་ཅད་འཚང་རྒྱ་བའི་མཁྱེན་པ་མཐའ་དག་ཐམས་ཅད་མངོན་པར་མཁྱེན་པ་དང་། འཇིག་རྟེན་གྱི་རྒྱུད་ཐམས་
ཅད་རྣམ་པར་དབྱེ་བའི་ཡེ་ཤེས་གཟིགས་པ་མཐའ་དག་ཐམས་ཅད་མངོན་པར་མཁྱེན་པ་དང་། ཆོས་ཀྱི་དབྱིངས་ཀྱི་གཞི་མྱིག་འཕྲུལ་གྱི་རྣམ་པ་ལྟ་བུར་དབྱེ་བ་ཐམས་ཅད་མངོན་པར་མཁྱེན་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་
ལྡན་འདས་ཀྱི་ཆོས་ཐམས་ཅད་མ་ལུས་པར་མངོན་པར་མཁྱེན་པའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཞི་པ། ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སྟོབས་ཆེན་པོ། སྟོབས་དམ་པ་སྟོབས་ཚད་
མྱེད་པ་སྟོབས་བདག་ཉིད་ཆེ་བ། སྟོབས་ཐུག་པ་མེད་པ། སྟོབས་མི་མཉམ་པ་སྟོབས་སྙིང་པོ་དང་ལྡན་པ། སྟོབས་མི་ཤིགས་པ། སྟོབས་འཇིག་རྟེན་ཐམས་ཅད་ཀྱིས་བསམ་གྱིས་མི་ཁྱབ་པ། སྟོབས་སེམས་ཅན་ཐམས་ཅད་ཀྱིས་མི་འཕྲོགས་པ། སངས་རྒྱས་ཀྱི་རྒྱལ་
མཚན་སྟོབས་པོ་ཆེ། དཔའ་བོ་ཆེན་པོའི་སྟོབས་རྣམས་ཏེ། བཅུ་གང་ཞེ་ན། འདི་ལྟ་སྟེ། སངས་རྒྱས་ཀྱི་སྐུ་ནི་ཕ་རོལ་གྱི་གནོད་པ་ཐམས་ཅད་ཀྱིས་མི་ཤིགས་མི་ཆོད་པའོ། །འཇིག་རྟེན་གྱི་ཡུལ་ཐམས་ཅད་ཀྱིས་སྐུ་ཚེའི་དབང་པོ་ཉམས་པར་

མི་ནུས་པའོ། །འཇིག་རྟེན་གྱི་ཁམས་ཐམས་ཅད་ཀྱི་བསྐལ་པའི་མྱེའི་གདུང་བས་འཚིག་པར་མྱི་ནུས་པའོ། །འཇིག་རྟེན་གྱི་ཁམས་ཐམས་ཅད་འཇིག་པར་གཏོགས་པའི་ཆུའི་ཕུང་པོར་འགྲོངས་པར་མྱི་འགྱུར་བའོ། །བདུད་ཐམས་ཅད་དང་། བདུད་
ཀྱི་སྡེ་ཐམས་ཅད་དང་། ལྷ་ཐམས་ཅད་ཀྱི་དཔུང་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མྱི་མ་ཡིན་པ་ཐམས་ཅད་ཀྱི་དཔུང་དང་། ཤ་ཟ་དང་། སྲིན་པོ་ཐམས་ཅད་
ཀྱི་དཔུང་དང་། སེམས་ཅན་མ་ལུས་པ་ཐམས་ཅད་ཀྱི་དཔུང་གིས་བརྒལ་བར་དཀའ་བའོ། །རྡོ་རྗེ་རི་རབ་ཀྱི་རི་ཙམ་གྱི་ཆར་པ་དང་། ཁོར་ཡུག་གི་རི་ཆེན་པོ་ཙམ་འམ། སྟོང་གསུམ་གྱི་སྟོང་ཆེན་པོ་ཙམ་གྱི་རྡོ་རྗེའི་ཆར་བབ་ཀྱང་། བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བ་སྤུ་གཅིག་ཀྱང་འགུལ་བར་མྱི་འགྱུར། གཡོ་བར་མྱི་འགྱུར་ཏེ། བག་ཚ་བའི་ཤས་མི་མངའ་འོ། །བཞུགས་སམ་བཞེངས་སམ་བཞུད་དམ། གཟིམས་
ཀྱང་རུང་སྟེ། སྤྱོད་ལམ་འགྱུར་བ་མེད་དོ། །དེ་བཞིན་གཤེགས་པ་གང་ན་བཞུགས་པའི་ཡུལ་དེ་དང་དེའི་འཁོར་དག་ཏུ་ཡང་དེ་བཞིན་གཤེགས་པ་དགྱེས་ན་ཀུན་ཏུ་འབབ་པར་མྱི་འགྱུར་རོ། །སངས་རྒྱས་ཀྱི་ཞམ་རིང་རྣམས་ལ་ཡང་གནོད་པར་མྱི་འགྱུར་
རོ། །སངས་རྒྱས་ཀྱི་བྱིན་གྱིས་བརླབས་པའི་སེམས་ཅན་རྣམས་ལ་ཡང་གནོད་པར་མི་འགྱུར་ཞིང་། མི་གཡོ་ན་དེ་བཞིན་གཤེགས་པའི་སྐུ་ལྟ་ལ་སྨོས་ཀྱང་ཅི་དགོས་ཏེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མཐུ་བོ་ཆེ་ཆེན་པོའི་སྟོབས་སངས་རྒྱས་ཀྱི་
སྤྱོད་པའི་རྒྱལ་མཚན་གྱི་ཆོས་དང་པོའོ། །གཞན་ཡང་སངས་རྒྱས་བཅོམ་ལྡན་འདས་རྣམས་དགྱེས་ན། ཆོས་ཀྱི་དབྱིངས་ཐམས་ཅད་ཀྱིས་ཀླས་པའི་འཇིག་རྟེན་གྱི་ཁམས་ཐམས་ཅད་རི་རབ་ཀྱི་རི་དང་བཅས་པ། ཁོར་ཡུག་དང་ཁོར་ཡུག་ཆེན་པོའི་རི་དང་

བཅས་པ། རྒྱ་མཚོ་དང་། རི་དང་ནགས་ཚལ་ཐིབས་པོ་དང་། སེམས་ཅན་གནས་པའི་གནས་ཐ་དད་པ་ཀུན་དང་བཅས་པ་དེ་ལྟ་བུའི་འཇིག་རྟེན་གྱི་ཁམས་ཐམས་ཅད་དེ་བཞིན་གཤེགས་པའི་བ་སྤུའི་བུ་ག་གཅིག་ཏུ་བཙུད་དེ།
ཕྱི་མའི་མཐའི་བསྐལ་པའི་མུར་ཐུག་པར་བཞག་ཀྱང་། དེ་བཞིན་གཤེགས་པའི་བྱིན་གྱི་རླབས་མ་གཏོགས་པར་སེམས་ཅན་རྣམས་ཀྱིས་ཤེས་པར་མྱི་ནུས་སོ། །དེ་བཞིན་གཤེགས་པ་དེ་དག་ནི་དེ་སྙེད་ཀྱི་འཇིག་རྟེན་གྱི་ཁམས་སྐུའི་བ་སྤུའི་ཁུང་བུ་གཅིག་
གིས་བཟུང་སྟེ། ཕྱི་མའི་མཐའི་བསྐལ་པའི་མུར་ཐུག་པར་བསྣམས་ཤིང་། གཤེགས་སམ། བཞུགས་སམ། བཞེངས་སམ། གཟིམས་ཀྱང་རུང་སྟེ། དེ་བཞིན་གཤེགས་པའི་ཐུགས་སྐད་ཅིག་ཙམ་ཡང་སྐྱོ་བ་མི་མངའོ།། ཆད་ཅིང་དུབ་པར་
མི་འགྱུར་རོ། །མཐུ་དང་སྟོབས་ལ་ཡོངས་སུ་ཉམས་པར་འགྱུར་བ་མི་མངའ་འོ། །སྤྱོད་ལམ་རྣམ་པར་འགྱུར་བ་མི་མངའ་འོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ནམ་མཁའ་ནི་ཆོས་ཀྱི་དབྱིངས་མ་ལུས་པའི་འཇིག་རྟེན་གྱི་ཁམས་ཐམས་ཅད་འཛིན་ཀྱང་
སྐྱོ་བ་མེད་དོ། །དུབ་པ་མེད་དོ། །གནོད་པ་མེད་དོ། །མེད་པར་མི་འགྱུར་རོ། །མི་གཡོ་མི་འབྱུང་མི་འཇིག་གོ །དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་བ་སྤུའི་ཁུང་བུ་གཅིག་ཏུ་འཇིག་རྟེན་ཀྱི་ཁམས་མ་ལུས་པ་ཐམས་ཅད་བསྣམས་ཀྱང་
དེའི་རྒྱུས་ཐུགས་སྐད་ཅིག་ཙམ་དུ་ཡང་མི་བདེ་བའི་སྐུ་ཉམས་མི་འབྱུང་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མཐུ་བོ་ཆེ་ཆེན་པོའི་སྟོབས། སངས་རྒྱས་ཀྱི་སྤྱོད་པའི་རྒྱལ་མཚན་གྱི་ཆོས་གཉིས་པའོ། །གཞན་ཡང་སངས་རྒྱས་བཅོམ་ལྡན་འདས་
རྣམས་གཤེགས་སྟབས་གཅིག་ཏུ་བཞུད་པས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་ཡོངས་སུ་འདའ་ཞིང་། དགོངས་པ་བསྐྱེད་པ་གཅིག་གིས་བསྐལ་པ་ཐ་དད་པའི་རིམ་པས་སངས་རྒྱས་ཀྱི་ཞིང་བརྗོད་

དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་འབྱུང་བར་མཛད་དོ། །དེ་ལྟ་བུར་གཤེགས་པས་བསྐལ་པ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་དུ་གཤེགས་ཤིང་། འཇིག་རྟེན་གྱི་ཁམས་ཐམས་ཅད་ཀྱི་སེམས་ཀྱི་རྒྱུད་ཇི་སྙེད་པའི་བསྐལ་པར་
བཞུད་དེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི། འཇིག་རྟེན་གྱི་ཁམས་ཙམ་དུ་ཁོར་ཀུན་ཏུ་རྒྱ་ཆེ་ཞིང་ཡངས་པའི་ཁོར་ཡུག་ཆེན་པོའི་རྡོ་རྗེའི་རི་དང་། སངས་རྒྱས་ཀྱི་ཞིང་གི་རྣམ་པ་བརྗོད་དུ་མེད་པའི་ཡང་བརྗོད་དུ་མེད་པ་ལ་བསྒྲེས་པ་
སྙེད་ཀྱི་རྡུལ་ཤིན་ཏུ་ཕྲ་བ་སྙེད་ཀྱང་། དེ་ལ་བསྒྲེས་པ་དེ་སྙེད་བ་སྤུའི་ཁུང་བུ་གཅིག་ཏུ་བཙུད་དེ། བ་སྤུའི་ཁུང་བུ་གཅིག་ཏུ་ཇི་ལྟ་བ་བཞིན་དུ། སྐུའི་བ་སྤུའི་ཁུང་བུ་ཐམས་ཅད་དུ་བཙུད་དེ། བ་སྤུའི་ཁུང་བུ་ཡང་སེམས་ཅན་ཐམས་ཅད་དེ་སྙེད་དུ་གྱུར་ལ།
དེ་དག་ཐམས་ཅད་བསྣམས་ཏེ། དེ་སྙེད་ཀྱི་བ་སྤུའི་ཁུང་བུར་ཚུལ་དེ་བཞིན་དུ་བཤམས་ཏེ། ཐུགས་བསྐྱེད་པ་དེ་ལྟ་བུས། དེ་བཞིན་གཤེགས་པ་འཇིག་རྟེན་གྱི་ཁམས་ཐམས་ཅད་དུ་རྒྱུ་ཞིང་གཤེགས་སམ། ཕྱོགས་ཀྱི་དྲ་བ་ཐམས་ཅད་དུ་རྒྱུ་ཞིང་གཤེགས་
སམ། ནམ་མཁའི་དབྱིངས་ཐམས་ཅད་དུ་རྒྱུ་ཞིང་གཤེགས་སམ། འཇིག་རྟེན་གྱི་ཁམས་ཀྱི་རྒྱུད་འགྲངས་པ་སྔོན་གྱི་མཐར་གཏོགས་པ་ནས་བཟུང་སྟེ། ཕྱི་མའི་མཐའི་བསྐལ་པའི་མུར་ཐུག་པར། དེ་བཞིན་གཤེགས་པས་བསྐལ་པ་ཐམས་ཅད་ཟད་པར་
གྱུར་ཀྱང་དེ་བཞིན་གཤེགས་པ་བཞུད་པ་ལ་བརྩོན་པ་ནི་ཉམས་པར་མི་འགྱུར་རོ། །སྐུ་ཉམས་ཆུང་བར་མི་འགྱུར་རོ། །དགོངས་པ་རྣམ་པར་འཁྲུག་པར་མི་འགྱུར་རོ། །ཏིང་ངེ་འཛིན་ཉམས་པར་མི་འགྱུར་རོ། །དེ་བཞིན་གཤེགས་པའི་སྐུ་ཡོངས་སུ་ཉམས་པར་
མི་འགྱུར་ཏེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མཐུ་བོ་ཆེ་ཆེན་པོའི་སྟོབས་སངས་རྒྱས་ཀྱི་སྤྱོད་པའི་རྒྱལ་མཚན་གྱི་ཆོས་གསུམ་པའོ། །གཞན་ཡང་སངས་རྒྱས་བཅོམ་ལྡན་འདས་རྣམས་ནི་བསོད་སྙོམས་གཅིག་བཞེས་ནས་བསྐལ་པ་བརྗོད་དུ་མེད་པར་སྐྱིལ་

མོ་ཀྲུང་གཅིག་བཅས་པས། ཉིན་མཚན་གྱི་རྒྱུད་དུ་སྔོན་གྱི་མཐའ་དང་། ཕྱི་མའི་མཐའི་མུར་གཏོགས་པའི་བསྐལ་པ་འདས་པར་བཞུགས་ཀྱང་། སྐུ་མི་གཡོ་ཞིང་བདེ་བའི་དམ་པ་ལ་སྤྱོད་པ་དང་། སངས་རྒྱས་ཀྱི་རྣམ་པར་སྤྱོད་པ་བསམ་གྱིས་
མི་ཁྱབ་པར་རྣམ་པར་སྤྱོད་ཀྱང་། སེམས་ཅན་འགའ་ཙམ་ལ་ཡང་སངས་རྒྱས་ཀྱི་ཕྲིན་ལས་རྒྱུན་འཆད་པར་མི་འགྱུར་རོ། །དེ་བཞིན་གཤེགས་པའི་སྐུ་དེ་ལ་འཇིག་རྟེན་གྱི་ཁམས་ཐམས་ཅད་ཡོངས་སུ་བཀོད་དེ། འཇིག་རྟེན་གྱི་ཁམས་དེ་དག་གི་སེམས་ཅན་གཅིག་
གི་ལུས་ཀྱང་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཙམ་དུ་ཆེ་བ་དེ་ལྟ་བུར་གྱུར་ལ། སེམས་ཅན་གཅིག་གི་ལུས་ཀྱི་ཚད་ཇི་ཙམ་པ་དེ་ཙམ་གྱི་ལུས་སུ་སེམས་ཅན་ཐམས་ཅད་ཀྱང་གྱུར་ལ། སེམས་ཅན་དེ་དག་རེ་རེའི་
གཟུགས་ཀྱང་འཇིག་རྟེན་གྱི་ཁམས་ཐམས་ཅད་ཀྱི་ལྕིད་ཇི་ཙམ་ཡོད་པ་དེ་ཙམ་དུ་གྱུར་ཏེ། སེམས་ཅན་གཅིག་ཇི་ལྟར་ལྕི་བ་བཞིན་དུ་སེམས་ཅན་ཐམས་ཅད་རེ་རེའི་ལྕིད་ཀྱང་དེ་ཙམ་དུ་གྱུར་ཏེ། སེམས་ཅན་དེ་དག་ཐམས་ཅད་དེ་བཞིན་གཤེགས་པའི་ཕྱག་སོར་གྱི་
རྩེ་མོ་གཅིག་ལ། །ཕྱི་མའི་མཐའི་བསྐལ་པའི་མུར་ཐུག་པར་བསྣམས་ཏེ། ཕྱག་སོར་གྱི་རྩེ་མོ་གཅིག་གིས་ཇི་ལྟར་བསྣམས་པ་དེ་བཞིན་དུ་ཕྱག་སོར་ཐམས་ཅད་ཀྱི་རྩེ་མོ་ལའང་། དེ་ཙམ་རེ་རེ་བསྣམས་ཀྱང་། དེའི་ཕྱིར་དེ་བཞིན་གཤེགས་པ་ལ་སྐུ་མཉེལ་
བ་འམ། དགོངས་པ་དུབ་པར་མི་འགྱུར་ཏེ། ཐུགས་བསྐྱེད་པའི་ཆ་ཤས་ཤིན་ཏུ་ཕྲ་བ་གཅིག་ཙམ་དུ་ཡང་སྡུག་བསྔལ་མི་བདེ་བ་སྐྱེ་བར་མི་འགྱུར་རོ། །དེ་བཞིན་དུ་འཇིག་རྟེན་གྱི་ཁམས་ལ་འཇུག་པ་དང་། ནམ་མཁའི་དབྱིངས་ལ་འཇུག་པ་དང་། ཕྱོགས་
ཀྱི་དྲ་བའི་རྣམ་པ་ལ་འཇུག་པ་རེ་རེ་དང་དེ་ལྟ་བུ་ལ་འཇུག་པ་ནམ་མཁའི་ཁམས་མ་ལུས་པའི་དབྱིངས་ཀྱིས་ཀླས་པ། ཆོས་ཀྱི་དབྱིངས་ཀྱི་མཐས་གཏུགས་པ་སྐྲའི་རྩེ་མོའི་ཆ་ཤས་ཀྱིས་གཞལ་བའི་འཇིག་རྟེན་གྱི་ཁམས་ལ་འཇུག་པ་ཐམས་ཅད་རེ་རེ་ཞིང་ཡང་། སྐྲའི་རྩེ་མོའི་

ཆ་ཤས་ཀྱིས་གཞལ་ཏེ། ནམ་མཁའི་དབྱིངས་ཀྱིས་ཀུན་ཏུ་ཁྱབ་པ་ཐམས་ཅད་མ་ལུས་པའི་སྐྲའི་རྩེ་མོའི་ཆ་ཤས་ཀྱི་ཚད་ཀྱིས་ནམ་མཁའི་དབྱིངས་ལ་འཇུག་པ་ཐམས་ཅད་དུ་ཞུགས་ཏེ། དེ་བཞིན་གཤེགས་པའི་སྤྱོད་ལམ་འདིའི་ཚུལ་དང་། སྐྱིལ་མོ་ཀྲུང་
གཅིག་ཏུ་བཞུགས་པའི་སྤྱོད་པས། སྔོན་གྱི་མཐའ་དང་། ཕྱི་མའི་མཐའི་མུར་ཐུག་པའི་བསྐལ་པ་ཟད་པར་མཛད་དེ། བསྐལ་པ་འདའ་བར་མཛད་ཅིང་། བསྐལ་པ་ལ་རབ་ཏུ་འཇུག་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མཐུ་བོ་ཆེ་
ཆེན་པོའི་སྟོབས་སངས་རྒྱས་ཀྱི་སྤྱོད་པའི་རྒྱལ་མཚན་གྱི་ཆོས་བཞི་པའོ། །གཞན་ཡང་སངས་རྒྱས་བཅོམ་ལྡན་འདས་རྣམས་ནི་སྐུ་གཅིག་ལ། །དབུ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱིན་གྱིས་བརླབས་ཏེ།
དབུ་རེ་རེ་ལ་ཡང་ལྗགས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱིན་གྱིས་བརླབས་ནས། དེ་དག་རེ་རེས་ཀྱང་དབྱངས་ཀྱི་ཡན་ལག་དང་སྒྲ་སྐད་ཀྱི་གསུང་། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་
རྡུལ་ཤིན་ཏུ་ཕྲ་བ་སྙེད་རེ་རེ་བརྗོད་དེ། ཆོས་ཀྱི་དབྱིངས་མ་ལུས་པའི་སེམས་ཅན་གྱི་ཁམས་ཐམས་ཅད་གོ་བར་མཛད་ཅིང་དབྱངས་ཀྱི་ཡན་ལག་དང་སྒྲ་སྐད་ཀྱི་གསུང་རེ་རེས་ཀྱང་མདོ་སྡེ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་
ཕྲ་བ་སྙེད་བཤད་ལ་མདོ་སྡེ་རེ་རེ་ལའང་ཆོས་བསྟན་པ། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རབ་ཏུ་གཞོལ་བར་མཛད་དེ། ཆོས་བསྟན་པ་གཅིག་ལས་ཀྱང་ཆོས་ཀྱི་ཚིག་དང་ཡི་གེ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་
མེད་པའི་རྡུལ་ཤིན་ཏུ་ཕྲ་བ་སྙེད་བརྗོད་པར་གྱུར་ལ། །ཆོས་བསྟན་པ་གཅིག་ལས་ཇི་ལྟ་བ་དེ་བཞིན་དུ་ཆོས་བསྟན་པ་ཐམས་ཅད་ལས་ཀྱང་དེ་སྙེད་ཀྱི་ཆོས་ཀྱི་ཚིག་དང་ཡི་གེ་བརྗོད་དེ། དེ་ལྟར་བརྗོད་པས་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་

དུ་མེད་པའི་རྡུལ་ཤིན་ཏུ་ཕྲ་བ་སྙེད་དུ་རབ་ཏུ་བསྟན་ལ། བསྐལ་བ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཟད་པར་གྱུར་ཀྱང་། ད་དུང་གཞན་ཡང་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་
ཤིན་ཏུ་ཕྲ་བ་སྙེད་དུ་བརྒྱུད་ཅིང་རབ་ཏུ་སྟོན་པའི་ཚུལ་གྱིས་རྣམ་གྲངས་འདིས་བསྐལ་པ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་དུ་རབ་ཏུ་བསྟན་ལ། །རྣམ་གྲངས་འདི་འདྲ་བས་བསྐལ་པ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཟད་ལ་སེམས་
ཅན་ཐམས་ཅད་ཀྱི་སེམས་ཀྱི་སྤྱོད་པ་སྙེད་ཀྱི་བསྐལ་པ་འདས་པར་གྱུར་ཏེ། ཕྱི་མའི་མཐའི་མུར་ཐུག་པའི་བསྐལ་པ་ཟད་ཅིང་འདས་པར་བྱས་ཀྱང་། དེ་བཞིན་གཤེགས་པའི་སྤྲུལ་པ་ཆོས་ཐམས་ཅད་སྣང་བའི་འཁོར་ལོ་བསྐོར་བ་དང་། ཆོས་ཐམས་
ཅད་རབ་ཏུ་ཤེས་པར་བསྟན་ཅིང་ལུང་བསྟན་པ་དང་། ཐེ་ཙོམ་ཐམས་ཅད་རབ་ཏུ་གཅོད་པའི་ཆོས་ཀྱི་འཁོར་ལོ་བསྐོར་བ་དང་། ཆོས་ཐམས་ཅད་སྣང་བར་བྱེད་པའི། ཆོས་ཀྱི་འཁོར་ལོ་བསྐོར་བ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་བརྗོད་པའི་རྒྱུན་
དང་ལྡན་པའི་ཆོས་ཀྱི་འཁོར་ལོ་བསྐོར་བ་དང་། ཡེ་ཤེས་ཀྱི་ཉི་མའི་དཀྱིལ་འཁོར་ཆེན་པོའི་རྒྱན་དང་ལྡན་པའི་ཆོས་ཀྱི་འཁོར་ལོ་བསྐོར་བ་དང་། འགྲོ་བ་ཐམས་ཅད་མ་ལུས་པར་ཡེ་ཤེས་ཀྱི་སྒྲོན་མ་ཆེན་པོས་བརྒྱན་པའི་ཆོས་ཀྱི་འཁོར་ལོ་བསྐོར་བ་དང་། སོ་
སོ་ཡང་དག་པར་རིག་པ་དང་། མི་འཇིགས་པ་ཆེན་པོས་བརྒྱན་པའི་ཆོས་ཀྱི་འཁོར་ལོ་བསྐོར་བ་རྒྱུན་མི་འཆད་དེ། སངས་རྒྱས་ཀྱི་སྐུ་གཅིག་གི་བྱིན་གྱི་རླབས་ཀྱིས་ཇི་ལྟ་བ་དེ་བཞིན་དུ་ཆོས་ཀྱི་འཁོར་ལོའི་སྤྲིན་ཆེན་པོ་དཔེ་ཐམས་ཅད་ལ། །དཔེ་མེད་
པར་རབ་ཏུ་འབྱུང་བར་འགྱུར་རོ། །དེ་བཞིན་དུ་ཆོས་ཀྱི་དབྱིངས་མ་ལུས་པ་ཐམས་ཅད་ཀྱི་ནམ་མཁའི་དབྱིངས་ཀྱི་མཐས་གཏུགས་པ་སྐྲའི་རྩེ་མོའི་ཆ་ཤས་ཀྱིས་གཞལ་བ་མ་ལུས་པ་ཐམས་ཅད་ཆགས་པ་མེད་པར་རྣམ་པར་དབྱེ་བས། སངས་རྒྱས་ཀྱི་ཞིང་

བརྗོད་དུ་མེད་པའི་ཡང་བརྗོད་དུ་མེད་པ་སྙེད་ཀྱི་སངས་རྒྱས་ཀྱི་སྤྲུལ་པ་དེ་སྙེད་དེ་སྙེད་དུ་དགོངས་པའི་སྐད་ཅིག་རེ་རེ་ལ་ཕྱི་མའི་མཐའི་མུར་ཐུག་པའི་བསྐལ་པར་སྤྲུལ་པ་མཛད་ཅིང་། དེ་བཞིན་གཤེགས་པའི་སྤྲུལ་པའི་སྐུ་ཐམས་ཅད་ལས་དེ་བཞིན་གཤེགས་པའི་སྐུ་རེ་རེ་ལ་འང་
དེ་སྙེད་དེ་སྙེད་ཀྱི་དབུ་མངའ་བར་འགྱུར་ལ་གཞུང་དེ་བཞིན་དུ་དབུ་རེ་རེ་ལ་ཡང་དེ་སྙེད་དེ་སྙེད་ཀྱི་ལྗགས་མངའ་བར་གྱུར་ཏེ། ལྗགས་རེ་རེ་ལས་ཀྱང་དེ་སྙེད་དེ་སྙེད་ཀྱི་དབྱངས་ཀྱི་ཡན་ལག་དང་། སྒྲ་སྐད་ཀྱི་གསུང་ཆོས་ཀྱི་དབྱིངས་མ་ལུས་པའི་སེམས་ཅན་གྱི་ཁམས་ཐམས་
ཅད་གོ་བར་མཛད་པར་བྱུང་ལ། དབྱངས་ཀྱི་ཡན་ལག་དང་། སྒྲ་སྐད་ཀྱི་གསུང་དེ་དག་རེ་རེས་ཀྱང་དེ་སྙེད་དེ་སྙེད་ཀྱི་མདོ་སྡེ་བཤད་པར་གྱུར་ལ་མདོ་སྡེ་དེ་དག་རེ་རེ་ལ་ཡང་དེ་སྙེད་དེ་སྙེད་ཀྱི། །ཆོས་བསྟན་པ་ལ་རབ་ཏུ་གཞོལ་བར་མཛད་དེ། ཆོས་བསྟན་པ་དེ་
དག་དེ་རེ་རེ་ལས་ཀྱང་། །དེ་སྙེད་དེ་སྙེད་ཀྱི་ཆོས་ཀྱི་ཚིག་དང་ཡི་གེ་བརྗོད་པར་གྱུར་ལ། ཆོས་ཀྱི་ཚིག་དང་ཡི་གེ་དེ་དག་རེ་རེས་ཀྱང་ཆོས་ཀྱི་དབྱིངས་མ་ལུས་པ་ཐམས་ཅད་དབྱངས་ཀྱིས་རྒྱས་པར་བཀང་སྟེ། སེམས་ཅན་གྱི་ཁམས་མ་ལུས་པ་ཐམས་ཅད་
གོ་བར་མཛད་ཀྱང་དེ་བཞིན་གཤེགས་པའི་དབྱངས་ལ་དུབ་པ་མི་མངའ་སྟེ། ཉམས་པར་མི་འགྱུར་ལ་ཐོགས་པ་མི་མངའ་ཞིང་དམའ་བར་མི་འགྱུར་ཏེ། དེ་ལྟ་བུའི་ཆོས་ཀྱི་འཁོར་ལོ་བསྐོར་ཡང་བསྐལ་པ་ཕྱི་མའི་མཐའི་མུག་ཐུག་པའི་བར་དུ་རྒྱུན་འཆད་
པར་མི་འགྱུར་ཏེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མཐུ་བོ་ཆེ་ཆེན་པོའི་སྟོབས་སངས་རྒྱས་ཀྱི་སྤྱོད་པའི་རྒྱལ་མཚན་གྱི་ཆོས་ལྔ་པའོ། །གཞན་ཡང་སངས་རྒྱས་བཅོམ་ལྡན་འདས་རྣམས་ནི་ཐུགས་དཔལ་གྱི་བེའུས་བརྒྱན་པ། རྡོ་རྗེ་ཆེན་པོ་ལྟར་
ཤིན་ཏུ་བརྟན་པར་གྲུབ་པ་མངའ་བདག་སྟེ། དེ་དག་བྱང་ཆུབ་ཀྱི་ཤིང་དྲུང་དུ་བྱོན་ན་བདུད་སྡིག་ཏོ་ཅན་གྱིས་སེམས་ཅན་ཐམས་ཅད་སྙེད་ཀྱི་བདུད་ཀྱི་སྡེ། གཟུགས་སྣ་ཚོགས་ཅན་ཤིན་ཏུ་མི་སྡུག་པ། འཇིགས་འཇིགས་ལྟར་འདུག་པ། རབ་ཏུ་སྡང་བའི་

གཟུགས་ཅན་འཇིག་རྟེན་ཐམས་ཅད་ཤིན་ཏུ་འཇིགས་པའི་གཟུགས་ཅན་རབ་ཏུ་སྐྱི་གཡའ་བ་བསྐྱེད་པའི་གཟུགས་ཅན། བདུད་ཤིན་ཏུ་མི་སྡུག་པའི་གཟུགས་འཆང་བ་རབ་བཙོག་པོར་འཇིགས་པ། འཇིགས་པ་ཆེན་པོ་སྐྱེད་པ། འགྲོ་
བ་ཐམས་ཅད་གསོད་པ། འཇིག་རྟེན་ཐམས་ཅད་ཕུང་བར་བྱེད་པ་དེ་ལྟ་བུ་ཤ་སྟག་གིས། བྱང་ཆུབ་ཀྱི་ཤིང་དྲུང་དང་། ཆོས་ཀྱི་དབྱིངས་ཐམས་ཅད་དང་། ནམ་མཁའི་དབྱིངས་ཀྱི་མཐར་ཐུག་པར་གང་བར་གཟིགས་ཀྱང་བྱང་ཆུབ་ཀྱི་ཤིང་དྲུང་ན་བཞུགས་པའི་
དེ་བཞིན་གཤེགས་པ་རྣམས་ལ་བསྙེངས་པ་མི་མངའ་འོ། །བག་ཚ་བ་མི་མངའ་འོ། །བ་སྤུ་གཅིག་ཀྱང་གཡོ་བ་མེད་དོ། །དགོངས་པའི་ཆ་ཤས་ཤིན་ཏུ་ཕྲ་བ་འགའ་ཙམ་གྱིས་ཀྱང་དེ་ལྟར་རྣམ་པ་ཐ་དད་པའི་གཟུགས་ལ་མཚན་མ་རྣམ་པ་ཐ་དད་པ་འཛིན་པ་མི་མངའ་
སྟེ། ཤིན་ཏུ་བརྟན་ནོ། །གཡོ་བ་མེད་དོ། །མི་སྒུལ་ཏོ། །འགྱུར་བ་མྱེད་དོ། །རྣམ་པར་རྟོག་པ་མེད་དོ། །ཤིན་ཏུ་ཞིའོ། །བསྙེངས་པ་དང་བག་ཚ་བ་ཐམས་ཅད་དང་ཤིན་ཏུ་བྲལ་ལོ། །སྡུག་པ་དང་ཁོང་ཁྲོ་བ་ཤིན་ཏུ་སྤངས་སོ། །སངས་རྒྱས་
ཀྱི་སྤྱོད་པ་རྒྱུན་མི་འཆད་དེ། བྱམས་པ་ཆེན་པོའི་སྟོབས་དང་ལྡན་པའོ། །ཐུགས་རྗེ་ཆེན་པོའི་གནས་ཀྱི་དབང་པོའི་ཤིན་ཏུ་དབེན་པའོ། །བག་ཚ་བ་མི་མངའ་བའི་དགོངས་པ་དང་ལྡན་པའོ། །དགོངས་པ་ཤིན་ཏུ་བརྟན་ཞིང་ཉམས་པ་མི་མངའ་བའོ། །
ཚུར་ཟིལ་གྱིས་མི་ནོན་ལ་ཕར་ཟིལ་གྱིས་གནོན་པའི་དགོངས་པ་དང་ལྡན་པ་སྟེ། བདུད་ཐམས་ཅད་དང་། བདུད་ཀྱི་རིས་སུ་གཏོགས་པའི་ལྷ་ཐམས་ཅད་དང་། བདུད་ཀྱི་སྡེ་ཐམས་ཅད་ཤིན་ཏུ་ཟིལ་གྱིས་གནོན་ཏོ། །ཤིན་ཏུ་སྤ་འགོང་ངོ་། །དེ་ལྟར་ཟིལ་
གྱིས་མནན་ཏེ། སྤ་གོང་བ་དང་། དེ་བཞིན་གཤེགས་པ་ལ་སྐྱབས་ཚོལ་ལོ། །དེ་དག་ལའང་བཅོམ་ལྡན་འདས་དེ་དག་ཆོ་འཕྲུལ་ཆེན་པོ་གསུམ་གྱིས། དེ་བཞིན་གཤེགས་པའི་འདུལ་བ་མཛད་པ་ཉེ་བར་བསྒྲུབས་ཏེ། བླ་ན་མེད་པ་ཡང་དག་པར་རྫོགས་

པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མཐུ་བོ་ཆེ་ཆེན་པོའི་སྟོབས་སངས་རྒྱས་ཀྱི་སྤྱོད་པའི་རྒྱལ་མཚན་གྱི་ཆོས་དྲུག་པའོ། །གཞན་ཡང་སངས་རྒྱས་བཅོམ་ལྡན་འདས་རྣམས་ཀྱི་གསུང་ཐོགས་
པ་མེད་པ་ནི་འཇིག་རྟེན་གྱི་ཁམས་མ་ལུས་པ་དེ་དང་། དེ་དག་ཐམས་ཅད་དུ་སེམས་ཅན་རྣམས་འདུལ་བའི་དོན་གྱི་རྣམ་པར་དམིགས་པར་ཀུན་ཏུ་ཁྱབ་པ་འབྱུང་སྟེ། དེ་བཞིན་གཤེགས་པའི་གསུང་དེ་ནི་རི་རྣམས་ལ་ཐོགས་པ་མྱེད་དོ། །རི་རབ་ལ་ཐོགས་པ་
མེད་དོ། །རིན་པོ་ཆེའི་རི་ལ་ཐོགས་པ་མྱེད་དོ། །ཁོར་ཡུག་དང་ཁོར་ཡུག་ཆེན་པོ་ལ་ཐོགས་པ་མེད་དོ། །ལྷའི་ཁྱིམ་ལ་ཐོགས་པ་མེད་དོ། །ཀླུའི་ཁྱིམ་ལ་ཐོགས་པ་མེད་དོ། །གནོད་སྦྱིན་གྱི་ཁྱིམ་ལ་ཐོགས་པ་མེད་དོ། །དྲི་ཟའི་ཁྱིམ་ལ་
ཐོགས་པ་མེད་དོ། །ལྷ་མ་ཡིན་གྱི་ཁྱིམ་ལ་ཐོགས་པ་མེད་དོ། །ནམ་མཁའ་ལྡིང་གི་ཁྱིམ་ལ་ཐོགས་པ་མེད་དོ། །མིའམ་ཅིའི་ཁྱིམ་ལ་ཐོགས་པ་མེད་དོ། །ལྟོ་འཕྱེ་ཆེན་པོའི་ཁྱིམ་ལ་ཐོགས་པ་མེད་དོ། །མི་དང་མི་མ་ཡིན་པའི་ཁྱིམ་ལ་
ཐོགས་པ་མེད་དོ། །གལ་ཏེ་བརྒྱ་ལ་འཇིག་རྟེན་གྱི་ཁམས་ཐམས་ཅད་ན་ཡོད་པའི་སྒྲ་ཆེན་པོ་འཇིག་རྟེན་རྣམ་པ་ཐ་དད་པའི་སྒྲས། འཇིག་རྟེན་གྱི་ཁམས་ཐམས་ཅད་གང་སྟེ། ཅ་ཅོ་འདྲེས་པར་གྱུར་ཀྱང་། དེ་ལ་དེ་བཞིན་གཤེགས་པས་གསུངས་པའི་གསུང་ནི་
འདུལ་བའི་སེམས་ཅན་རྣམས་ཀྱི་རྣ་བའི་རྣམ་པར་དམིགས་པ་ལ་བསྒྲིབས་པ་མེད་པ་ཡིན་ཏེ། དེ་བཞིན་གཤེགས་པའི་གསུང་འབའ་ཤིག་དེ་དག་གི་རྣ་བའི་རྣམ་པར་དམིགས་པ་ལ། ལྷང་ངེ་ལྷམ་མེ་ལྷན་ནེ་སྟེ་གོ་བར་མཛད་པའི་ཚིག་དང་། ཡི་གེ་རྣམས་ཀྱང་རླག་
པར་མི་འགྱུར་ཏེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མཐུ་བོ་ཆེ་ཆེན་པོའི་སྟོབས་སངས་རྒྱས་ཀྱི་སྤྱོད་པའི་རྒྱལ་མཚན་གྱི་ཆོས་བདུན་པའོ། །གཞན་ཡང་སངས་རྒྱས་བཅོམ་ལྡན་འདས་རྣམས་ཀྱི་ཐུགས་ནི་ཆགས་པ་མི་མངའ་བ་སྟེ། བསྐལ་

པ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་ཡང་བརྗོད་དུ་མེད་པར་ཡོངས་སུ་སྦྱངས་བའོ། །འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་དང་། རྒྱན་གཅིག་ཏུ་གྱུར་པའོ། །རྙོག་པ་མེད་ཅིང་རྣམ་པར་དང་
སྟེ་ཤིན་ཏུ་གསལ་བའོ། །བདག་གི་ཞེས་བྱ་བ་མི་མངའ་བའོ། །ཆོས་ཐམས་ཅད་ལ་མི་གནས་པའོ། །ནང་ན་གནས་པ་མ་ཡིན་པའོ། །ཕྱི་རོལ་ན་གནས་པ་མ་ཡིན་པའོ། །མ་སྐྱེས་པའོ། །དམིགས་པ་ཐམས་ཅད་ཀྱིས་དབེན་པའོ། །ཞི་
ཞེས་གནས་མེད་པའོ། །རྩོམ་པ་མེད་པའོ། །འདུ་ཤེས་སྣ་ཚོགས་ཐམས་ཅད་ལ་མི་གནས་པའོ། །དངོས་པོའི་རྣམ་པར་རྟོག་པ་ཐམས་ཅད་འགགས་པའོ། །རང་བཞིན་གྱི་འོད་དང་ཞིང་གསལ་བའོ། །ཡོངས་སུ་དག་པའོ། །དམིགས་པ་དང་
ཡིད་ལ་བྱ་བ་ཐམས་ཅད་དང་མ་འདྲེས་པའོ། །ཆོས་ཐམས་ཅད་ཉོན་མོངས་པ་མེད་པའི་ཡུལ་དང་ལྡན་པའོ། །ཡང་དག་པའི་མཐའ་འདོད་ཆགས་དང་བྲལ་བས་དག་པའོ། །ཆོས་ཀྱི་དབྱིངས་ཤིན་ཏུ་བསྟན་པའི་མཐར་ཐུག་པའོ། །ཆོས་ཀྱི་དབྱིངས་
ཀུན་ནས་མི་ཟད་པ་དང་ལྡན་པའོ། །འདུ་ཤེས་ཀྱི་རྣམ་པ་ཐམས་ཅད་ཀྱི་ཚད་དང་ཚད་མེད་པ་དང་བྲལ་བའོ། །འདུས་བྱས་དང་འདུས་མ་བྱས་ཀྱི་བརྗོད་པ་ཐམས་ཅད་འགགས་པའོ། །ཚིག་གི་ལམ་གྱིས་བརྗོད་དུ་མེད་པའི་མཐར་ཐུག་པའི་ཡུལ་ལོ། །
མི་ཟད་པ་དང་ཆགས་པ་མེད་པའི་དབྱིངས་ཀྱི་མཐར་ཐུག་པའོ། །ཡེ་ཤེས་སྔོན་དུ་འགྲོ་བའོ། །སྟོབས་བཅུའི་རྒྱན་དུ་གྱུར་པའོ། །ཆོས་ཐམས་ཅད་ཀྱིས་རྣམ་པར་དག་པའོ། །ཐབས་མཁས་པས་བྱུང་བའོ། །ཆོས་སྣ་ཚོགས་དང་ཆོས་དུ་མ་དང་། ཆོས་
ཐམས་ཅད་ཤིན་ཏུ་བསྟན་པ་དང་མི་འགལ་བའོ། །དུས་གསུམ་དུ་ཐ་དད་པ་མེད་པའོ། །ཆོས་ཀྱི་དབྱིངས་ཐམས་ཅད་དུ་ཆོས་གཞི་མེད་པ་ཐམས་ཅད་ཀྱི་མངའ་བའི་ཕ་རོལ་ཏུ་ཕྱིན་པ་བརྙེས་པའོ། །ཆོས་ཐམས་ཅད་ལ་མངའ་བའི་འབྱུང་གནས་དང་། མཛོད་

དུ་གྱུར་པའོ། །ཆོས་ཀྱི་ཚུལ་ཐམས་ཅད་དགོངས་པ་ཁྱད་པར་དུ་རྨོངས་པ་མེད་པའོ། །ཞིང་གི་རྒྱུད་དུ་གཏོགས་པ་ཐམས་ཅད་དང་ཕྱོགས་ཀྱི་དྲ་བ་དང་། རྒྱུད་འབྱམ་ཀླས་པ་མ་ལུས་པ་ཐམས་ཅད་ལ་མི་གནས་པ་བརྟན་ཞིང་མི་གཡོ་ལ་ཉམས་པ་མེད་པའི་
ཡེ་ཤེས་ཀྱིས་རབ་ཏུ་གཟིགས་པ། ཆོས་མ་ལུས་པ་ཐམས་ཅད་ཀྱི་མཐར་ཐུག་པ་ཟག་པ་ཐམས་ཅད་ཡོངས་སུ་ཟད་པ་དགོངས་པ་རྣམ་པར་གྲོལ་ཞིང་ཟག་པ་མི་མངའ་བ་དང་། ཤེས་རབ་རྣམ་པར་གྲོལ་བས་ཤིན་ཏུ་རྣམ་པར་གྲོལ་བ་ཡང་དག་པའི་མཐའ་མི་ཟད་
པས་ཀླས་པ། ཆགས་པ་མེད་པར་རྣམ་པར་སྤྱོད་པ་རྟག་ཏུ་མཉམ་པར་བཞག་པ་དུས་གསུམ་ཐམས་ཅད་དུ་བསྒྲིབས་པ་མེད་པར་འབྱུང་བ། སེམས་ཅན་ཐམས་ཅད་ཀྱི་དུས་གསུམ་གྱི་སེམས་དང་སྤྱོད་པ་ཐམས་ཅད་མ་ལུས་པར་ཐུགས་སྐད་ཅིག་གིས་རབ་ཏུ་
མཁྱེན་པ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མཐུ་བོ་ཆེ་ཆེན་པོའི་སྟོབས་སངས་རྒྱས་ཀྱི་སྤྱོད་པའི་རྒྱལ་མཚན་གྱི་ཆོས་བརྒྱད་པའོ། །གཞན་ཡང་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་སྐུ་ནི་སྐུ་མི་མངའ་བ་སྟེ། རང་བཞིན་
གཅིག་ཏུ་གྱུར་པ་སངས་རྒྱས་ཐམས་ཅད་ཀྱི་ཡུལ་ཚད་མེད་པའི་སྐུའོ། །མཐའ་དང་དབུས་མེད་པར་ཡོངས་སུ་གྲུབ་པའི་སྐུའོ། །འཇིག་རྟེན་ཐམས་ཅད་ཀྱིས་ཟད་པར་མི་ནུས་པའི་སྐུའོ། །ཁམས་གསུམ་པས་གོས་པ་མེད་པའི་སྐུའོ། །བརྟེན་པའི་
སྐུས་རྣམ་པར་དམིགས་པའོ། །ལྷག་པའི་བསམ་པ་དང་རྗེས་སུ་དྲན་པའི་བྱིན་གྱི་རླབས་ཀྱིས་སྐུའི་རང་བཞིན་ཡང་དག་པར་སྟོན་པའོ། །བདེན་པ་མེད་པ་དང་། བརྫུན་པ་མེད་པའི་སྐུ་མཉམ་པ་ཉིད་ཀྱིས་ཡོངས་སུ་དག་པའོ། །ཆོས་ཀྱི་སྐུ་བཞུད་པ་
དང་བྱོན་པ་མེད་པའི་སྐུའོ། །འདུས་མ་བྱས་པས་འཇིག་པ་མེད་པའི་སྐུའོ། །མཚན་ཉིད་མེད་པས་མཚན་ཉིད་གཅིག་པའི་ཆོས་ཀྱི་སྐུའི་རང་བཞིན་ནོ། །ཡུལ་ན་མི་གནས་པ་དང་ཕྱོགས་ན་མི་གནས་པའི་སྐུའོ། །མ་ལུས་པ་ཐམས་ཅད་ཀྱི་ལུས་

ཀྱི་སྐུའོ། །སངས་རྒྱས་ཀྱི་ཁྱུ་མཆོག་གིས་མཐུ་ཕྱུང་བ་དང་། རྣམ་པར་འཕྲུལ་པ་མཐའ་ཡས་པའི་སྐུའི་རང་བཞིན་ནོ། །ལུས་ཐམས་ཅད་དུ་ཡོངས་སུ་གཞོལ་བའི་སྐུ་སྣ་ཚོགས་སུ་རྣམ་པར་དམིགས་པ་མཛད་ཀྱང་ཆོས་ཀྱི་སྐུའི་
ཚུལ་གྱི་རྗེས་སུ་འབྲང་བའོ། །ཡེ་ཤེས་ཀུན་ཏུ་སྣང་བའི་སྙིང་པོ་ཅན་ནོ། །སྐུ་ཡོངས་ཀྱི་མཛོད་དུ་གྱུར་པའོ། །ཆོས་ཀྱི་དབྱིངས་རྣམ་པ་ཐ་དད་པ་མེད་པ་ཤིན་ཏུ་བསྟན་པའི་སྐུའོ། །ཁམས་མ་ལུས་པ་ཐམས་ཅད་རྒྱས་པར་འགེངས་པས། ཀུན་ཏུ་ཁྱབ་
པའི་སྐུའི་རང་བཞིན་ནོ། །མི་གཡོ་མི་དགོངས་པའི་སྐུ་རྣམ་པར་དག་པའོ། །ཡོད་པའང་མ་ཡིན་མེད་པའང་མ་ཡིན་པའི་ཚུལ་དང་ཚུལ་མ་ཡིན་པར་རབ་ཏུ་བརྗོད་པའི་སྐུའོ། །སེམས་ཅན་གྱི་མོས་པ་རྣམ་པ་སྣ་ཚོགས་འདུལ་བར་གྱུར་བའི་སྐུའོ། །
འགགས་པའང་མ་ཡིན་མ་འགགས་པའང་མ་ཡིན་པས་འདུལ་བ་སྟོན་པའི་སྐུའོ། །ཡོན་ཏན་རིན་པོ་ཆེ་ཐམས་ཅད་ཡང་དག་པར་འབྱུང་བས་ཤིན་ཏུ་འཕགས་པའི་སྐུའོ། །ཆོས་ཐམས་ཅད་སངས་རྒྱས་ཀྱི་ཆོས་ཀྱི་
དེ་བཞིན་ཉིད་དུ་ཡང་དག་པར་བསྒྲུབས་པའི་སྐུའོ། །རང་བཞིན་གྱིས་རབ་ཏུ་ཞི་ཞིང་བསྒྲིབས་པ་མེད་པའི་མཐར་ཐུག་པའི་སྐུའོ། །ཐོགས་པ་མི་མངའ་བས་ཆོས་ཐམས་ཅད་ཐུགས་སུ་ཆུད་པའི་སྐུའོ། །ཐམས་ཅད་ཀྱི་རྗེས་སུ་སོང་བའི་ཆོས་ཀྱི་དབྱིངས་ཀྱིས་
རྣམ་པར་དག་ཅིང་འཇིག་རྟེན་ཐམས་ཅད་དུ་ཤིན་ཏུ་རྣམ་པར་ཕྱེ་བའི་སྐུའོ། །ཕྱིར་མི་ལྡོག་ཅིང་བསྒྲིབས་པ་མི་མངའ་ལ། སངས་རྒྱས་ཀྱི་རྣམ་པར་ཐར་པས་ཡེ་ཤེས་ཐམས་ཅད་རྗེས་སུ་འབྲང་ཞིང་། ཡང་དག་པར་གཞོལ་བས་ཐུགས་སུ་
ཆུད་པའི་སྐུ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མཐུ་བོ་ཆེ་ཆེན་པོའི་སྟོབས་སངས་རྒྱས་ཀྱི་སྤྱོད་པའི་རྒྱལ་མཚན་གྱི་ཆོས་དགུ་པའོ། །གཞན་ཡང་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་མཉམ་པ་མེད་པ་དང་། མཉམ་པ་ནི་

དེ་བཞིན་གཤེགས་པ་ཐམས་ཅད་ཀྱིས་ཐུགས་སུ་ཆུད་པ་སྟེ། བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱིས་བྱུང་བའོ། །མངོན་པར་འགྲུབ་པའི་སྤྱོད་པ་ཁྱད་པར་དུ་འཕགས་པའི་སྨོན་ལམ་དང་། བྱང་ཆུབ་སེམས་དཔའི་སྤྱོད་པས་རྣམ་པར་དག་པའོ། །བྱང་
ཆུབ་སེམས་དཔའི་སྤྱོད་པ་ཐམས་ཅད་ཀྱིས་ཡོངས་སུ་རྫོགས་པར་བྱས་པའོ། །ཐ་དད་པ་མེད་པའོ། །སངས་རྒྱས་ཐམས་ཅད་ཀྱི་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱིས་བྱུང་བའོ། །བྱང་ཆུབ་སེམས་དཔའི་སྤྱོད་པ་རྒྱ་མཚོའི་སྤྱོད་པའི་ཚུལ་ཐམས་ཅད་ཐུགས་
སུ་ཆུད་པའོ། སྨོན་ལམ་དང་སྤྱོད་པ་ཆེན་པོས་ཡོངས་སུ་མི་དོག་པའོ། །སྤྱོད་པ་ཐམས་ཅད་མི་མཉམ་པ་མེད་པས་ཡོངས་སུ་རྫོགས་པར་བྱས་པའོ། །སྤྱོད་པའི་སྟོབས་ལ་ཐུབ་པར་དཀའ་བའི་སྤྱོད་པ་ཐམས་ཅད་ཀྱིས་མངོན་པར་བྱུང་བའོ། །
སྤྱོད་པ་ཐམས་ཅད་ཀྱིས་རྣམ་པར་དག་པའོ། །བྱང་ཆུབ་སེམས་དཔའི་སྤྱོད་པ་ལེགས་པར་སྤྱད་པས་རྒྱུད་དམའ་བ་མེད་པའོ། །སངས་རྒྱས་ཐམས་ཅད་ཀྱིས་ཚད་མེད་པར་སྤྱོད་པའོ། །ཏིང་ངེ་འཛིན་ཐམས་ཅད་ཀྱིས་སྤྱོད་ཡུལ་མཐའ་ཡས་
པའོ། །ལམ་ཐམས་ཅད་ཀྱིས་རབ་ཏུ་བརྗོད་པ་མ་ཡིན་པའོ། །ལམ་གྱི་ཡུལ་མེད་པའོ། །ལམ་ཐམས་ཅད་ལ་རབ་ཏུ་ཞུགས་པའོ། །ཡེ་ཤེས་དམ་པའི་སྟོབས་ཀྱི་ཚུལ་མཁྱེན་པའོ། །བག་ཚ་བ་མི་མངའ་བས་ཆོས་ཀྱི་ཆར་འབེབས་པའི་འཁོར་ལོ་
དང་ལྡན་པའོ། །དགེ་བ་དྲིས་པ་དང་མ་དྲིས་པ་ལ་རྗེས་སུ་འཐུན་པའི་ཆོས་ཀྱི་ཚུལ་སྟོན་པ་མཁྱེན་པའོ། །མཉམ་པ་མེད་པ་དང་མཉམ་པས་ཤིན་ཏུ་དག་པའོ། །སྐུ་དང་ཐུགས་དང་གསུང་གི་ཡང་དག་པར་སྤྱོད་པ་རྣམས་ལ་ཕྲིན་ལས་གསུམ་ཡོངས་
སུ་དག་པ་དང་། སངས་རྒྱས་ཀྱི་བསྒོམ་པས་བརྙེས་པའོ། །སངས་རྒྱས་ཀྱི་རྣམ་པར་སྤྱོད་པས་བརྙེས་པའོ། །དེ་བཞིན་གཤེགས་པའི་རིགས་ཐམས་ཅད་བསྐྱེད་པའི་དོན་དུ་སངས་རྒྱས་ཀྱི་ཡེ་ཤེས་ཀྱི་མཛད་པ་ཐམས་ཅད་རབ་ཏུ་འབྱུང་བའོ། །

ཐམས་ཅད་མཁྱེན་པའི་གནས་ཀྱི་བསྟན་པ་ཚད་མེད་པའི་གནས་རྩ་བ་མེད་པ་དང་ལྡན་པའོ། །མངོན་པར་ཤེས་པའི་ཡེ་ཤེས་ཐམས་ཅད་ཀྱི་མཐར་ཐུག་པར་མི་འགྱུར་བའོ། །འཇིག་རྟེན་གྱི་སེམས་ཀྱི་སྤྱོད་པའི་ཤེས་པ་ཐམས་
ཅད་ཀྱིས་བསམ་གྱིས་མི་ཁྱབ་པའོ། །ཆོས་ཐམས་ཅད་མ་ལུས་པར་མཁྱེན་ཅིང་གཟིགས་པས་སེམས་ཅན་ཐམས་ཅད་ཡོངས་སུ་སྐྱོབ་པའོ། །དུས་གསུམ་ཡངས་པ་ཐམས་ཅད་ཀྱི་ཚུལ་ཤིན་ཏུ་ཕྲ་བ་མཐའ་དང་དབུས་མེད་པ་མ་ལུས་པར་མཁྱེན་པའོ། །
འཇིག་རྟེན་ལས་འདས་པའི་དོན་མཁྱེན་པའི་ཕྱིར་ཕྲ་བའི་ཡེ་ཤེས་ཐུགས་སུ་ཆུད་པས་འཇིག་རྟེན་གྱི་ཁམས་མ་ལུས་པ་ཐམས་ཅད་རྣམ་པར་དག་པ་ཕྱིར་མི་ལྡོག་པའི་ཡེ་ཤེས་ཀྱིས་སངས་རྒྱས་ཀྱི་ཕྲིན་ལས་བརྗོད་དུ་མེད་པ་འཇིག་རྟེན་ཐམས་ཅད་དུ་སྦྱོར་བའོ། །
སངས་རྒྱས་ཀྱི་སྐུ་འགྲངས་པ་ཐམས་ཅད་ཐུགས་སུ་ཆུད་པའི་ཡེ་ཤེས་ཀྱིས་ཡི་གེ་མེད་པའི་ཆོས་ཐུགས་སུ་ཆུད་པའོ། །ཡི་གེ་སྣ་ཚོགས་རྣམ་པར་ཕྱེ་བ་དང་། ཡི་གེ་ཐམས་ཅད་སྨོས་ཤིང་བརྗོད་པ་མཁྱེན་པས། བརྗོད་དུ་མེད་པ་ཐུགས་སུ་ཆུད་པའོ། །
ཀུན་ཏུ་བཟང་པོའི་ཡེ་ཤེས་ཀྱི་དགེ་བའི་རྩ་བའི་ཆོས་སྤྱད་པ་ཐམས་ཅད་རྣམ་པར་དག་པའོ། །དམ་བཅས་པའི་ཚུལ་བཞིན་དུ་སེམས་ཅན་ཐམས་ཅད་ཀྱི་ལུས་དང་སྐྱེ་མཆེད་ཇི་ལྟར་དགོངས་པའི་སྐད་ཅིག་དང་ལྡན་པའི་ཤེས་རབ་ཀྱིས་ཆོས་ཐམས་ཅད་ཁོང་དུ་ཆུད་
པར་སྟོན་པ་མཁྱེན་པའོ། །ཆོས་ཐམས་ཅད་ཀྱི་དོན་དུ་ཆོས་ཡོངས་སུ་བཏང་ཞིང་རིམ་གྲོར་བྱས་པས་ཐུགས་སུ་ཆུད་པའོ། །འཇིག་རྟེན་གྱི་ཁམས་ཐམས་ཅད་མ་ལུས་པར་ཡུལ་དུ་གྱུར་པའོ། །ཆོས་ཀྱི་དབྱིངས་མ་ལུས་པ་ཐམས་ཅད་ཡུལ་དུ་གྱུར་
པའོ། །དུས་གསུམ་ཐམས་ཅད་ལ་དགོངས་པ་སྐད་ཅིག་གིས་ཆགས་པ་མེད་པར་མཁྱེན་ཅིང་ཐུགས་སུ་ཆུད་པའི་ཡུལ་དང་ལྡན་པའོ། །དེ་བཞིན་གཤེགས་པ་ཐམས་ཅད་ཀྱི་སངས་རྒྱས་འབྱུང་བ་མ་ལུས་པར་ཡུལ་དུ་གྱུར་པའོ། །འཇིགས་པ་མེད་པར་

འདུལ་བ་ཐམས་ཅད་ཡུལ་དུ་གྱུར་པའོ། །ཐམས་ཅད་ཀྱི་རྗེས་སུ་སོང་ཞིང་རྣམ་པར་དག་པའི་ཡུལ་ཐམས་ཅད་མངོན་པར་སངས་རྒྱས་པའོ། །ས་མཚམས་མེད་ཅིང་ཐུག་པ་མེད་པའི་མངོན་པར་ཤེས་པ་རྣམ་པར་སངས་རྒྱས་པའོ། །སེམས་ཅན་ཐམས་
ཅད་ཀྱི་སེམས་དང་ཡིད་དང་རྣམ་པར་ཤེས་པའི་རྣམ་པ་དུས་གསུམ་དུ་བརྗོད་པ་མ་ལུས་པ་ཐམས་ཅད་དགོངས་པའི་སྐད་ཅིག་གིས་མཁྱེན་ཅིང་ཐུགས་སུ་ཆུད་པའོ། །སེམས་ཅན་གྱི་རྣམ་པ་ཐམས་ཅད་ལས་མཚམས་མ་བཅད་པའོ། །འཇིག་རྟེན་གྱི་
ཁམས་ཀྱི་རྣམ་པ་ཐམས་ཅད་ལ་མུ་མེད་པའོ། །དུས་གསུམ་གྱི་རྣམ་པ་ཐམས་ཅད་ལ་མཐའ་ཡས་པའོ། །སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བའི་རྣམ་པ་ཐམས་ཅད་ལ་ཚད་མེད་པའོ། །ཤེས་བྱའི་རྣམ་པ་ཐམས་ཅད་ལ་ལྷག་མ་མ་ལུས་པ་སྟེ།
དེ་དག་ཐམས་ཅད་ལྷག་པར་མེད་པར་མངོན་པར་སངས་རྒྱས་པས་སངས་རྒྱས་ཀྱི་ཡེ་ཤེས་སངས་རྒྱས་ཀྱི་རྫུ་འཕྲུལ་དང་རྣམ་པར་འཕྲུལ་པས་བྱུང་བ་ཐམས་ཅད་ཐུགས་སུ་ཆུད་པ་དང་། མཁྱེན་པ་ཐམས་ཅད་རྒྱུན་འཆད་པ་མེད་དེ། དེ་ལ་སངས་རྒྱས་བཅོམ་
ལྡན་འདས་རྣམས་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བའི་སྐུས། །མཐའ་དང་དབུས་མེད་པར་སྤྱོད་པ་ཡིན། །ཆགས་པ་མེད་པའི་དགོངས་པས་སྤྱོད་པས་མཐའ་དང་དབུས་མེད་པ་སྤྱོད་པ་ཡིན། ཐུགས་རྗེ་ཆེན་པོའི་སྦྱོར་བས་དུས་ཐམས་ཅད་དུ་
རྟག་ཏུ་རྒྱུན་མི་འཆད་པར་ཆོས་བསྟན་པ་ལ་སྤྱོད་པས་མཐའ་དང་དབུས་མེད་པར་སྤྱོད་པ་ཡིན་ཏེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་མཐུ་བོ་ཆེ་ཆེན་པོའི་སྟོབས་སངས་རྒྱས་ཀྱི་སྤྱོད་པའི་རྒྱལ་མཚན་གྱི་ཆོས་བཅུ་པའོ། །ཀྱེ་རྒྱལ་བའི་སྲས་བཅུ་
པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་མཐུ་བོ་ཆེ་ཆེན་པོའི་སྟོབས་སངས་རྒྱས་ཀྱི་སྤྱོད་པའི་རྒྱལ་མཚན་གྱི་ཆོས་རྣམས་ཏེ། འདས་པ་དང་མ་འོངས་པ་དང་། ད་ལྟར་བྱུང་བའི་སེམས་ཅན་ཐམས་ཅད་དང་། ཉན་ཐོས་དང་། རང་སངས་རྒྱས་

ཐམས་ཅད་ཀྱིས་བསམ་གྱིས་མི་ཁྱབ་ཅིང་དཔག་ཏུ་མི་ནུས་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་ཐོགས་པ་མི་མངའ་བ་རྣམས་ཏེ། སངས་རྒྱས་བཅོམ་ལྡན་འདས་