Kinh tạng Tây Tạng (Kangyur Đại Học) — 037_ཕལ་ཆེན།_ག

་ཆུབ་ཏུ་སེམས་བསྐྱེད་དེ། སངས་རྒྱས་ཀྱི་ཆོས་དང་ཐམས་ཅད་མཁྱེན་པའི་ཆོས་དང་རང་བྱུང་གི་ཆོས་འདྲི་བ་ལེགས་སོ། །ལེགས་སོ། །
རིགས་ཀྱི་བུ་ཁོ་བོ་ནི་བྱང་ཆུབ་སེམས་དཔའི་རྣམ་པར་ཐར་པ་ཐོགས་པ་མེད་པའི་སྒོ་ཐོབ་པ་སྟེ། རིགས་ཀྱི་བུ་བྱང་ཆུབ་སེམས་དཔའི་རྣམ་པར་ཐར་བ་ཐོགས་པ་མེད་པའི་སྒོ་དེ་ཁོ་བོས་བླངས་ཏེ། ཡོངས་སུ་བཟུང་ནས་རྗེས་སུ་འབྲང་ཞིང་རྣམ་པར་དབྱེ་བ་དང་། རྣམ་པར་
དཔྱད་པ་དང་རྣམ་པར་བརྟག་པ་དང་སྣང་བར་བྱ་བ་དང་། རབ་ཏུ་སྣང་བར་བྱས་པས་ཐོགས་པ་མེད་པའི་མཐའ་ཞེས་བྱ་བའི་ཡེ་ཤེས་སྣང་བ་ཐོབ་བོ། །དེ་ཐོབ་པས་ཁོ་བོ་ནི་སེམས་ཅན་ཐམས་ཅད་ཀྱི་སེམས་དང་སྤྱོད་པ་ཁོང་དུ་ཆུད་པར་བྱ་བ་ལ་ཐོགས་པ་
མེད་དོ། །སེམས་ཅན་ཐམས་ཅད་ཀྱི་སྐྱེ་བ་དང་འཆི་འཕོ་ཡོངས་སུ་ཤེས་པར་བྱ་བ་ལ་ཐོགས་པ་མེད་དོ། །སྔོན་གྱི་གནས་རྗེས་སུ་དྲན་པར་བྱ་བའི་སྒོར་འཇུག་པ་ལ་ཐོགས་པ་མེད་དོ། །ཕྱི་མའི་མཐའི་བསྐལ་པར་འགྲོ་བ་ཐམས་ཅད་དང་འགྲོགས་པར་བྱ་བ་ལ་ཐོགས་

པ་མེད་དོ། །ད་ལྟར་བྱུང་བའི་དུས་ཀྱི་འགྲོ་བ་ཐམས་ཅད་རྣམ་པར་རིག་པར་བྱ་བ་ལ་ཐོགས་པ་མེད་དོ། །སེམས་ཅན་ཐམས་ཅད་ཀྱི་སྒྲ་སྐད་དང་། ཀུན་རྫོབ་ཡོངས་སུ་ཤེས་པར་བྱ་བ་ལ་ཐོགས་པ་མེད་དོ། །སེམས་ཅན་ཐམས་ཅད་ཀྱི་ཐེ་
ཙོམ་གཅད་པར་བྱ་བ་ལ་ཐོགས་པ་མེད་དོ། །སེམས་ཅན་ཐམས་ཅད་ཀྱི་དབང་པོ་ཐ་དད་པར་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་དུས་སུ་འགྲོ་བར་བྱ་བ་ལ་ཐོགས་པ་མེད་དོ། །
ཉིན་མཚན་དང་སྐད་ཅིག་དང་ཡུད་ཙམ་དང་ཐང་ཅིག་དང་། དུས་ཀྱི་མིང་དུ་བྱ་བ་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །དུས་གསུམ་རྒྱ་མཚོའི་རྒྱུད་དུ་འཇུག་པར་བྱ་བ་ལ་ཐོགས་པ་མེད་དོ། །ཕྱོགས་བཅུའི་སངས་རྒྱས་ཀྱི་ཞིང་རང་གི་ལུས་ཀྱིས་རྒྱས་པར་དགང་
བར་བྱ་བ་ལ་ཐོགས་པ་མེད་དོ། །དེ་ནི་དེ་ལྟར་དངོས་པོ་མེད་པ་ལ་གནས་ཤིང་མངོན་པར་འདུ་བྱ་བ་མེད་པའི་རྫུ་འཕྲུལ་ཐོབ་པའི་ཕྱིར་ཏེ། རིགས་ཀྱི་བུ་དངོས་པོ་མེད་པ་ལ་གནས་ཤིང་མངོན་པར་འདུ་བྱ་བ་མེད་པའི་རྫུ་འཕྲུལ་དེའི་བྱིན་གྱིས་ཁོ་བོ་ནམ་མཁའ་
དབྱིངས་འདི་ལས་ཕན་ཚུན་དུ་འགྲོ་ཞིང་འདུག་པ་དང་། སྙེས་པ་དང་སྤྱོད་ལམ་སྣ་ཚོགས་སུ་སྤྱོད་དོ། །མི་སྣང་བར་བྱེད་དོ། །སྣང་བར་འབྱུང་ངོ་། །དུ་བ་འཐུལ་བར་བྱེད་དོ། །མེ་ལྕེ་འབར་བར་བྱེད་དོ། །གཅིག་ཏུ་བྱས་ཤིང་མང་པོར་བསྒྱུར་རོ། །མང་པོར་
བྱས་ཤིང་གཅིག་ཏུ་བསྒྱུར་རོ། །སྣང་བ་དང་མི་སྣང་བའང་ཉམས་སུ་མྱོང་བར་བྱེད་དོ། །རྩིག་པ་ལའང་ཐག་ཐོགས་མེད་པ་དང་རབ་ལའང་ཐག་ཐོགས་མེད་པར་འགྲོ་སྟེ། དཔེར་ན་ནམ་མཁའ་ལ་བྱ་བཞིན་ནོ། །ནམ་མཁའ་ལའང་སྐྱིལ་མོ་ཀྲུང་གིས་འགྲོ་སྟེ།
དཔེར་ན་འདབ་ཆགས་བྱ་བཞིན་ནོ། །ས་ལ་ཡང་བྱིའུ་ཟུལ་དང་སྟེང་དུ་འབྱུང་བ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་བྱིང་བ་མེད་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །དུ་བ་འཐུལ་བ་དང་། མེ་ལྕེ་འབར་བར་བྱེད་དེ། དཔེར་

ན་མེའི་ཕུང་པོ་ཆེན་པོ་བཞིན་ནོ། །ས་ཡང་ཡོངས་སུ་གཡོ་བར་བྱེད་དོ། །ཉི་མ་དང་ཟླ་བ་འདི་གཉིས་དེ་ལྟར་རྫུ་འཕྲུལ་ཆེ་ཞིང་དེ་ལྟར་མཐུ་ཆེ་ལ། དེ་ལྟར་གཟི་བརྗིད་ཆེ་ཡང་ལག་པས་ཀུན་ནས་ཡོངས་སུ་ཉུག་གོ །ཚངས་པའི་འཇིག་རྟེན་གྱི་བར་དག་ཏུ་ཡང་
ལུས་ཀྱིས་དབང་བསྒྱུར་རོ། །འཇིག་རྟེན་སྤོས་ཀྱི་དུད་པ་ན་བུན་དུ་ཆགས་པའི་སྤྲིན་གྱིས་ཀུན་ནས་ཁེབས་པར་བྱས་ཤིང་རབ་ཏུ་འབར་བར་བྱེད་དོ། །རིན་པོ་ཆེ་ཐམས་ཅད་ཀྱི་འོད་ཟེར་གྱི་སྤྲིན་གྱི་དྲ་བས་འཇིག་རྟེན་ཀུན་ནས་ཁེབས་པར་བྱས་
ཤིང་། འགྲོ་བ་ཐམས་ཅད་དང་འདྲ་བའི་སྤྲུལ་པའི་སྤྲིན་རབ་ཏུ་འགྱེད་དོ། །ཁ་དོག་མཐའ་ཡས་པའི་འོད་ཀྱི་དྲ་བའི་སྤྲིན་རབ་ཏུ་བཀྱེ་ཞིང་ཕྱོགས་ཀུན་ཏུ་འང་འགྲོ་སྟེ། འདི་ལྟར་ཤར་ཕྱོགས་སུ་འགྲོའོ། །ལྷོ་ཕྱོགས་དང་ནུབ་ཕྱོགས་དང་བྱང་ཕྱོགས་དང་།
བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་བླའི་ཕྱོགས་སུ་ཡང་འགྲོའོ། །སེམས་ཀྱི་སྐད་ཅིག་རེ་རེ་ཞིང་ཡང་ཤར་ཕྱོགས་ལོགས་སུ་
འཇིག་རྟེན་གྱི་ཁམས་གཅིག་ཀྱང་འདའོ། །འཇིག་རྟེན་གྱི་ཁམས་གཉིས་དང་བཅུ་ཡང་འདའོ། །འཇིག་རྟེན་གྱི་ཁམས་བརྒྱ་དང་། འཇིག་རྟེན་གྱི་ཁམས་སྟོང་དང་། འཇིག་རྟེན་གྱི་ཁམས་བརྒྱ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་དང་།
འཇིག་རྟེན་གྱི་ཁམས་བྱེ་བ་ཕྲག་བརྒྱ་དང་འཇིག་རྟེན་གྱི་ཁམས་བྱེ་བ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་བརྒྱ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་ཕྲག་སྟོང་དང་། འཇིག་རྟེན་གྱི་ཁམས་ཚད་མེད་པ་དང་། འཇིག་རྟེན་
གྱི་ཁམས་དཔག་ཏུ་མེད་པ་དང་། འཇིག་རྟེན་གྱི་ཁམས་གྲངས་མེད་པ་དང་འཇིག་རྟེན་གྱི་ཁམས་བསམ་གྱིས་མི་ཁྱབ་པ་དང་། འཇིག་རྟེན་གྱི་ཁམས་མཚུངས་པ་མེད་པ་དང་། འཇིག་རྟེན་གྱི་ཁམས་གཞལ་དུ་མེད་པ་དང་། འཇིག་རྟེན་གྱི་ཁམས་

ཀུན་ཏུ་མཐའ་ཡས་པ་དང་། འཇིག་རྟེན་གྱི་ཁམས་མུ་མེད་པ་དང་འཇིག་རྟེན་གྱི་ཁམས་མཚམས་མེད་པ་དང་། འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་འདའ་བར་བྱེད་དེ། འཇིག་རྟེན་གྱི་ཁམས་
དེ་དག་ན་སངས་རྒྱས་བཅོམ་ལྡན་འདས་ཇི་སྙེད་ཅིག་བཞུགས་ཤིང་འཚོ་སྐྱོང་ལ་འཇིག་རྟེན་གྱི་ཁམས་རྒྱ་མཚོ་དེ་དང་དེ་དག་དང་། འཇིག་རྟེན་གྱི་ཁམས་འབྱམ་ཀླས་པ་དེ་དང་དེ་དག་དང་། འཇིག་རྟེན་གྱི་ཁམས་ཀྱི་ཕྱོགས་དེ་དང་དེ་དག་དང་། འཇིག་རྟེན་
གྱི་ཁམས་ཀྱི་རྒྱུད་དེ་དང་དེ་དག་དང་། འཇིག་རྟེན་གྱི་ཁམས་ཡོངས་སུ་འདུ་བ་དེ་དང་དེ་དག་དང་། འཇིག་རྟེན་གྱི་ཁམས་འབྱུང་བ་དེ་དང་དེ་དག་དང་། འཇིག་རྟེན་གྱི་ཁམས་སུ་བྱ་བ་དེ་དང་དེ་དག་དང་། འཇིག་རྟེན་གྱི་ཁམས་ཀྱི་སྒོ་དེ་དང་དེ་དག་དང་།
འཇིག་རྟེན་གྱི་ཁམས་ཀྱི་བསྐལ་པར་བྱ་བ་དེ་དང་དེ་དག་དང་། འཇིག་རྟེན་གྱི་ཁམས་སུ་འཇུག་པ་དེ་དང་དེ་དག་དང་། འཇིག་རྟེན་གྱི་ཁམས་ཀྱི་སྙིང་པོ་བྱང་ཆུབ་རྣམ་པར་བཀོད་པ་དེ་དང་དེ་དག་དང་། འཇིག་རྟེན་གྱི་ཁམས་ཀྱི་འཁོར་གྱི་དཀྱིལ་འཁོར་
དེ་དང་དེ་དག་ན། སངས་རྒྱས་བཅོམ་ལྡན་འདས་ཇི་སྙེད་ཅིག་ཆོས་སྟོན་པའི་དེ་བཞིན་གཤེགས་པ་དེ་དག་ལས་དེ་བཞིན་གཤེགས་པ་རེ་རེ་ཞིང་ཡང་སངས་རྒྱས་ཀྱི་ཞིང་མཐའ་ཡས་པའི་རྡུལ་ཤིན་ཏུ་ཕྲ་བ་སྙེད་ཀྱི་ལུས་སྣ་ཚོགས་དང་། ལུས་རེ་རེ་ཞིང་ཡང་
སངས་རྒྱས་ཀྱི་ཞིང་མཐའ་ཡས་པའི་རྡུལ་ཤིན་ཏུ་ཕྲ་བ་སྙེད་ཀྱི་མཆོད་པའི་སྤྲིན་གྱི་ཆར་འབེབས་ཤིང་སྤྱན་སྔར་འགྲོའོ། །དེ་དག་ཏུ་ཕྱིན་ནས་ཀྱང་མེ་ཏོག་ཐམས་ཅད་དང་སྤོས་ཐམས་ཅད་དང་། ཕྲེང་བ་ཐམས་ཅད་དང་ཕྱེ་མ་ཐམས་ཅད་དང་། བྱུག་པ་ཐམས་ཅད་
དང་ན་བཟའ་ཐམས་ཅད་དང་། རྒྱལ་མཚན་ཐམས་ཅད་དང་ལྷའི་བ་དན་ཐམས་ཅད་དང་བླ་རེ་ཐམས་ཅད་དང་། དྲ་བ་ཐམས་ཅད་དང་གཟུགས་ཐམས་ཅད་ཀྱི་མཆོད་པ་རྒྱུན་མ་ཆད་པར་བྱེད་དོ། །སངས་རྒྱས་བཅོམ་ལྡན་འདས་དེ་དག་གིས་གང་ཇི་སྙེད་དུ་

གསུངས་པ་དང་། བསྟན་པ་དང་། བརྗོད་པ་དང་། ཡང་དག་པར་བཤད་པ་དང་། ཡང་དག་པར་སྨོས་པ་དང་། ཡོངས་སུ་བརྗོད་པ་དང་། མན་ངག་དུ་གསུངས་པ་དང་། ཤིན་ཏུ་བསྟན་པ་དང་རབ་ཏུ་བརྗོད་པ་དེ་དག་ཐམས་ཅད་ཀྱང་ཤེས་ཤིང་འཛིན་ཏོ། །སངས་རྒྱས་བཅོམ་
ལྡན་འདས་དེ་དག་གི་སངས་རྒྱས་ཀྱི་ཞིང་ཡོངས་སུ་དག་པ་ཇི་སྙེད་པ་དེ་དག་ཐམས་ཅད་ཀྱང་རྗེས་སུ་དྲན་ནོ། །ཤར་ཕྱོགས་སུ་ཇི་ལྟ་བ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་
མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་སུ་ཡང་འཇིག་རྟེན་གྱི་ཁམས་གཅིག་ཀྱང་འདའོ། །འཇིག་རྟེན་གྱི་ཁམས་གཉིས་དང་བཅུ་ཡང་འདའོ། །འཇིག་རྟེན་གྱི་ཁམས་བརྒྱ་ནས་
འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱང་འདའོ། །འཇིག་རྟེན་གྱི་ཁམས་དེ་དག་ན་སངས་རྒྱས་བཅོམ་ལྡན་འདས་ཇི་སྙེད་ཅིག་བཞུགས་ཤིང་འཚོ་སྐྱོང་ལ། འཇིག་རྟེན་གྱི་ཁམས་རྒྱ་མཚོ་
དེ་དང་དེ་དག་དང་། འཇིག་རྟེན་གྱི་ཁམས་རྣམ་པར་དག་པ་དེ་དང་དེ་དག་ནས། འཇིག་རྟེན་གྱི་ཁམས་ཀྱི་འཁོར་གྱི་དཀྱིལ་འཁོར་དེ་དང་དེ་དག་ན་ཆོས་སྟོན་པ་དེ་དག་ཀུན་ཀྱང་མཐོང་ངོ་། །དེ་བཞིན་གཤེགས་པ་དེ་དག་ལའང་མེ་ཏོག་ཐམས་ཅད་ནས་གཟུགས་
ཐམས་ཅད་ཀྱི་བར་གྱི་མཆོད་པ་བྱེད་དོ། །སངས་རྒྱས་བཅོམ་ལྡན་འདས་དེ་དག་གིས་གང་ཇི་སྙེད་དུ་གསུངས་པ་ནས། རབ་ཏུ་བརྗོད་པའི་བར་དེ་དག་ཐམས་ཅད་ཀྱང་ཡོངས་སུ་ཤེས་ཤིང་འཛིན་ཏོ། །སངས་རྒྱས་བཅོམ་ལྡན་འདས་དེ་དག་གི་སངས་རྒྱས་ཀྱི་ཞིང་
ཡོངས་སུ་དག་པ་གང་ཇི་སྙེད་པ་དེ་དག་ཐམས་ཅད་ཀྱང་རྗེས་སུ་དྲན་ནོ། །སེམས་ཅན་གང་གིས་ཁོ་བོ་མཐོང་བར་གྱུར་བ་དང་། གང་དང་འགྲོགས་པར་གྱུར་པ་དེ་དག་ཀུན་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །སེམས་ཅན་

ཕྲ་མོ་འམ་རགས་པ་འམ་ངན་པའམ་བཟང་བའམ་བདེ་བའམ་མི་བདེ་བ་གང་ཇི་སྙེད་ཅིག་ཁོ་བོས་མཐོང་བར་གྱུར་པ་དེ་དག་ཀུན་ལ་ཡང་ཡོངས་སུ་སྨིན་པར་བྱ་བ་དང་། འདུལ་བའི་དུས་ལས་མི་འདའ་བར་བྱ་བའི་ཕྱིར། ཁོང་ཏ་དེ་
དག་གི་ལུས་ཀྱི་ཚད་དང་མཉམ་པར་ལུས་བྱིན་གྱིས་རློབ་བོ། །སེམས་ཅན་ཇི་སྙེད་ཅིག་ཁོ་བོའི་དྲུང་དུ་འོང་བ་དེ་དག་ཐམས་ཅད་ཀྱང་། བྱང་ཆུབ་སེམས་དཔའི་རྣམ་པར་ཐར་པ་ཀུན་ཏུ་འགྲོ་བ་འདི་དང་། བྱང་ཆུབ་སེམས་དཔའི་རྣམ་པར་ཐར་པ་
རྣམ་པར་གནོན་པ་དོན་ཡོད་པ་ལ་རབ་ཏུ་གཞོག་གོ །རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའི་རྣམ་པར་ཐར་པ་ཐོགས་པ་མེད་པའི་སྒོ་ཀུན་ཏུ་འགྲོ་བ་དེ་བཞིན་གཤེགས་པའི་མཆོད་པ་དང་། རིམ་གྲོ་རབ་ཏུ་སྦྱོར་བ་སེམས་ཅན་ཐམས་ཅད་
ཡོངས་སུ་སྨིན་པར་བྱ་བ་དང་། མཐུན་པ་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་སྙིང་རྗེ་ཆེན་པོའི་ངང་ཚུལ་ཅན། ཐེག་པ་ཆེན་པོའི་ངང་ཚུལ་ཅན། བྱང་ཆུབ་སེམས་དཔའི་ལམ་དང་མི་འབྲལ་བའི་ངང་ཚུལ་ཅན། ཐོགས་པ་མེད་པའི་
ངང་ཚུལ་ཅན། བྱང་ཆུབ་སེམས་དཔའི་བསམ་པའི་སྙིང་པོ་ཆུད་མི་གསོན་པའི་ངང་ཚུལ་ཅན། བྱང་ཆུབ་ཀྱི་སེམས་ཡོངས་སུ་མི་གཏོང་བའི་ངང་ཚུལ་ཅན། སངས་རྒྱས་ཀྱི་ཆོས་ལ་ལྷག་པར་དམིགས་པའི་ངང་ཚུལ་ཅན། ཐམས་ཅད་མཁྱེན་པ་ཉིད་
ཡིད་ལ་བྱ་བ་དང་མི་འབྲལ་བའི་ངང་ཚུལ་ཅན། ནམ་མཁའ་དང་མཉམ་པའི་ངང་ཚུལ་ཅན། འཇིག་རྟེན་ཐམས་ཅད་ལ་མི་གནས་པའི་ངང་ཚུལ་ཅན། ཆུད་མི་གསོན་པའི་ངང་ཚུལ་ཅན། མཉམས་པའི་ངང་ཚུལ་ཅན། མ་གོད་པའི་ངང་ཚུལ་ཅན།
གླགས་མེད་པའི་ངང་ཚུལ་ཅན། མ་འདྲེས་པའི་ངང་ཚུལ་ཅན། རྙོག་པ་མེད་པའི་ངང་ཚུལ་ཅན། འགྱོད་པ་མེད་པའི་ངང་ཚུལ་ཅན། རྣམ་པར་དག་པའི་ངང་ཚུལ་ཅན། བྱང་ཆུབ་སེམས་དཔའ་རྡུལ་དང་བྲལ་བ་དེ་དག་གི་སྤྱོད་པ་ཤེས་པའམ།

ཡོན་ཏན་བརྗོད་པ་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན། དྲ་བྱི་ལའི་གྲོང་རྡལ་རྡོ་རྗེའི་གྲོང་ཁྱེར་ཅན་བྱ་བ་ཡོད་དེ། དེ་ན་དྲ་བྱི་ལའི་སྤྲིན་ཅེས་བྱ་བ་འདུག་གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་
པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དགེ་སློང་རབ་ཏུ་བརྟན་པའི་རྐང་པ་གཉིས་ལ་སྤྱི་བོས་ཕྱག་འཚལ་ནས། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། ཡང་དང་
ཡང་བལྟས་ནས་དགེ་སློང་ཤིན་ཏུ་བརྟན་པའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཆོས་ཀྱི་དད་པའི་ཤུགས་དང་། བྱིན་གྱིས་ནོན་པ། སངས་རྒྱས་ཡིད་ལ་བྱ་བའི་འདུ་ཤེས་དང་ལྡན་པ། དཀོན་མཆོག་གསུམ་གྱི་གདུང་མི་གཅད་པ་
ལ་རབ་ཏུ་བརྩོན་པ། དུས་གསུམ་སྣང་བས་སེམས་སྣང་བར་གྱུར་པ་སྨོན་ལམ་ཆེན་པོ་ཡིད་ལ་བྱེད་པ་དང་ལྡན་པ་སེམས་ཅན་གྱི་ཁམས་ཐམས་ཅད་ཡོངས་སུ་བསྐྱབ་པའི་ཐབས་ལ་ཞུགས་པ། འདུས་བྱས་ཀྱི་དགེ་བ་ཐམས་ཅད་ལ་མི་གནས་པའི་
སེམས་དང་ལྡན་པ། ཆོས་ཐམས་ཅད་ཀྱི་རང་བཞིན་ངེས་པར་རྟོགས་པར་བྱ་བ་ལ་བརྩོན་པ། འཇིག་རྟེན་གྱི་ཁམས་ཐམས་ཅད་ཡོངས་སུ་སྦྱང་བའི་སྨོན་ལམ་ལས་མི་གཡོ་བ། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་ན་གནས་
པ་མེད་པར་གནས་པ་ཆོས་ཀྱི་སྣང་བ་དེ་རྗེས་སུ་དྲན་པར་བྱ་བ་དང་། དགེ་བའི་བཤེས་གཉེན་རྗེས་སུ་དྲན་པར་བྱ་བ་དང་། འདོད་ཆགས་དང་བྲལ་བའི་རིགས་ཡོངས་སུ་བརྗོད་པ་བྱེད་ཅིང་། མཐར་གྱིས་དྲ་བྱི་ལའི་གྲོང་རྡལ་རྡོ་རྗེའི་གྲོང་ཁྱེར་དུ་ཕྱིན་ནས།
དྲ་བྱི་ལའི་སྤྲིན་ཡོངས་སུ་ཚོལ་ཚོལ་བ་ལས། གྲོང་ཁྱེར་གྱི་ཁྱམས་ཤིག་ན་ཆོས་བསྟན་པའི་དོན་དུ་སེང་གེའི་ཁྲིལ་འདུག་ཅིང་། སྲོག་ཆགས་སྟོང་ཕྲག་བཅུ་ཙམ་ཞིག་ལ་ཆོས་ཀྱི་རྣམ་གྲངས་ཡི་གེའི་འཁོར་ལོའི་རྒྱུད་ཀྱི་རྒྱན་ཅེས་བྱ་བ་ཡོངས་སུ་

སྟོན་ཅིང་འདུག་པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དྲ་བྱི་ལའི་སྤྲིན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དྲ་བྱི་ལའི་སྤྲིན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་
མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་
བ་དང་། ཇི་ལྟར་ནན་ཏན་དུ་བགྱི་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་ཀྱི་སེམས་སྲིད་པའི་ལམ་རྒྱུད་ཐམས་ཅད་དུ་ཆབ་མི་འཚལ་བ་དང་། ཇི་ལྟར་ཡོངས་སུ་སྐྱོ་བ་མ་མཆིས་ཤིང་། བསམ་པ་བརྟན་པར་འགྱུར་བ་དང་། ཇི་ལྟར་ཐུབ་པ་མ་མཆིས་ཤིང་ལྷག་པའི་
བསམ་པ་ཡོངས་སུ་དག་པར་འགྱུར་བ་དང་། ཇི་ལྟར་ཡོངས་སུ་སྐྱོབ་མ་མཆིས་ཤིང་སྙིང་རྗེ་ཆེན་པོའི་སྟོབས་ཡང་དག་པར་སྐྱེ་བར་འགྱུར་བ་དང་ཇི་ལྟར་སྒོ་ཀུན་ནས་རྣམ་པར་དག་ཅིང་གཟུངས་ཀྱི་སྟོབས་གནོན་པར་འགྱུར་བ་དང་། ཇི་ལྟར་མ་རིག་པའི་རབ་རིབ་དང་སྒྲིབ་པ་རྣམ་པར་འཐོར་
ཞིང་། ཤེས་རབ་ཀྱི་འོད་ཆོས་ཐམས་ཅད་ལ་རབ་རིབ་མ་མཆིས་པའི་སྣང་བ་སྐྱེ་བར་འགྱུར་བ་དང་། ཇི་ལྟར་དོན་དང་ཆོས་དང་ངེས་པའི་ཚིག་དང་སྤོབས་པ་ལ་མཁས་པའི་དབྱངས་ཀྱི་དཀྱིལ་འཁོར་ཡོངས་སུ་རྫོགས་ཤིང་། སོ་སོ་ཡང་དག་པར་རིག་པའི་སྟོབས་
གནོན་པར་འགྱུར་བ་དང་། ཇི་ལྟར་སངས་རྒྱས་ཐམས་ཅད་ཀྱི་འཁོར་ལོ་ཐ་མི་དད་པ་ཡང་དག་པར་འཛིན་ཅིང་དྲན་པའི་སྟོབས་ཡོངས་སུ་གནོན་པར་འགྱུར་བ་དང་། ཇི་ལྟར་ཆོས་ཐམས་ཅད་ཀྱི་ཕྱོགས་རིགས་པའི་སྣང་བ་རྗེས་སུ་རྟོག་ཅིང་། རིག་པའི་སྟོབས་
རྣམ་པར་དག་པར་འགྱུར་བ་དང་། ཇི་ལྟར་བྱང་ཆུབ་སེམས་དཔའི་ཏིང་ངེ་འཛིན་གྱི་སྟོབས་ཆོས་ཐམས་ཅད་ཀྱི་དོན་རྣམ་པར་གདོན་མི་ཟ་བར་རབ་ཏུ་དབྱེ་བ་ལ་བརྩོན་པས་འགྲུབ་པར་འགྱུར་བ་མ་འཚལ་ཏོ། །དེ་ནས་དྲ་བྱི་ལའི་སྤྲིན་གྱིས་བྱང་ཆུབ་སེམས་དཔའ་

ལ་རིམ་གྲོ་བྱ་བའི་ཕྱིར་སེང་གེའི་ཁྲི་དེ་ལས་ལངས་ཏེ་བབས་ནས་ཚོང་དཔོན་གྱི་བུ་ནོར་བཟངས་ལ་ལུས་ཐམས་ཅད་ཀྱིས་ཕྱག་བྱས་ནས། ཚོང་དཔོན་གྱི་བུ་ནོར་བཟངས་ལ་གསེར་གྱི་མེ་ཏོག་གི་ཕུང་པོས་མངོན་པར་གཏོར་ཏོ། །ནོར་བུ་རིན་པོ་ཆེ་རིན་ཐང་མེད་པ་མང་པོ་
དང་། ཙན་དན་གྱི་ཕྱེ་མ་དམ་པས་ཀྱང་མངོན་པར་གཏོར་ཏོ། །གོས་ཚོན་སྣ་ཚོགས་རྣམ་པ་ཐ་དད་པས་ཁ་དོག་བསྒྱུར་བ་བརྒྱ་སྟོང་ཕྲག་དུ་མས་ཀྱང་མངོན་པར་བཀབ་བོ། །སྤོས་ཀྱི་མེ་ཏོག་ཁ་དོག་རྣམ་པ་ཐ་དད་ཅིང་ཡིད་དུ་འོང་ལ་བལྟ་ན་སྡུག་པ་མང་པོས་ཀྱང་མངོན་
པར་གཏོར་ནས་མཆོད་པའི་རྣམ་པ་སྣ་ཚོགས་གཞན་དག་གིས་ཀྱང་། མཆོད་པ་དང་རིམ་གྲོ་དང་། བཀུར་སྟི་དང་བསྟི་སྟང་ཆེར་བྱས་ཏེ། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་དེ་ལྟར་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་སེམས་བསྐྱེད་པ་ལེགས་སོ་ལེགས་སོ། །རིགས་ཀྱི་བུ་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ནི། སངས་རྒྱས་ཐམས་ཅད་ཀྱི་གདུང་མི་གཅད་པའི་ཕྱིར་ཞུགས་པ་ཡིན་ནོ། །འདོད་
ཆགས་དང་བྲལ་བའི་རིགས་ཡང་དག་པ་ཅི་ལྟ་བ་བཞིན་དུ་རྣམ་པར་རིག་པར་བྱ་བ་ལ་བརྩོན་པ་ཡིན། ཞིང་གི་རྒྱུད་ཐམས་ཅད་ཡོངས་སུ་དག་པར་བྱ་བ་ལ་ཞུགས་པ་ཡིན། སེམས་ཅན་གྱི་རིགས་ཐམས་ཅད་ཡོངས་སུ་སྨིན་པར་བྱ་བ་དང་། འདུལ་བ་ལ་སྟ་
གོན་དུ་གནས་པ་ཡིན། ཆོས་ཀྱི་རིགས་ཐམས་ཅད་ཡང་དག་པ་ཇི་ལྟ་བ་བཞིན་དུ་བརྟག་པ་ལ་བརྩོན་པ་ཡིན། ལས་ཀྱི་རིགས་ཐམས་ཅད་དང་མི་འགལ་བར་གནས་པ་ཡིན། བྱང་ཆུབ་སེམས་དཔའི་སྤྱོད་པའི་རིགས་ཐམས་ཅད་ཡོངས་སུ་
རྫོགས་པར་བྱ་བ་ལ་རབ་ཏུ་བརྩོན་པ་ཡིན། སྨོན་ལམ་གྱི་རིགས་ཐམས་ཅད་རྒྱུན་མི་འཆད་པའི་ཕྱིར་ཡང་དག་པར་ཞུགས་པ་ཡིན། དུས་གསུམ་གྱི་རྒྱུད་ཐམས་ཅད་ཡེ་ཤེས་ཀྱི་ཁོང་དུ་ཆུད་པར་བྱ་བ་ལ་ཞུགས་པ་ཡིན། མོས་པའི་རིགས་ཤིན་ཏུ་བརྟན་པར་བྱ་བའི་ཕྱིར་བརྩོན་པ་

ཡིན་ཏེ། དེ་ནི་དེ་བཞིན་གཤེགས་པ་མང་པོ་ཐམས་ཅད་ཀྱི་བྱིན་གྱིས་བརླབས་པ་ཡིན། སངས་རྒྱས་ཐམས་ཅད་ཀྱིས་ཡང་དག་པར་དགོངས་པ་ཡིན། བྱང་ཆུབ་སེམས་དཔའ་ཐམས་ཅད་དང་མཉམ་པ་ཉིད་དུ་གྱུར་པ་ཡིན། འཕགས་པ་
ཐམས་ཅད་ཀྱི་རྗེས་སུ་དགྱེས་པར་བྱ་བ་ཡིན། ཚངས་པའི་དབང་པོ་ཐམས་ཅད་ཀྱིས་མངོན་པར་དགའ་བར་བྱས་པ་ཡིན། ལྷའི་དབང་པོ་ཐམས་ཅད་ཀྱིས་ཡང་དག་པར་མཆོད་པ་ཡིན། གནོད་སྦྱིན་གྱི་དབང་པོ་ཐམས་ཅད་ཀྱིས་ཡོངས་སུ་བསྲུང་བ་ཡིན།
སྲིན་པོའི་དབང་པོ་ཐམས་ཅད་ཀྱིས་རིམ་གྲོར་བྱས་པ་ཡིན། ཀླུའི་དབང་པོ་ཐམས་ཅད་ཀྱིས་བསུ་བ་ཡིན། མིའམ་ཅིའི་དབང་པོ་ཐམས་ཅད་ཀྱིས་མངོན་པར་བསྟོད་པ་ཡིན། འཇིག་རྟེན་གྱི་དབང་པོ་ཐམས་ཅད་ཀྱིས་ཡང་དག་པར་བསྔགས་པ་ཡིན། དེས་
ནི་སེམས་ཅན་གྱི་ཁམས་ཐམས་ཅད་ཀྱང་ངན་སོང་གི་ལམ་རྒྱུད་གསུམ་པོ་ཡོངས་སུ་གཅད་པ་དང་མི་ཁོམ་པ་དང་། ངན་འགྲོ་ལམ་ཐམས་ཅད་བཟློག་པ་དང་། དབུལ་བའི་ལམ་ཐམས་ཅད་ལས་ཡང་དག་པར་བཟླ་བ་དང་། ལྷ་དང་མིའི་ཕུན་སུམ་
ཚོགས་པ་ཐོབ་པར་བྱ་བ་དང་། དགེ་བའི་བཤེས་གཉེན་མཐོང་བ་དང་མི་འབྲལ་བ་དང་། སངས་རྒྱས་ཀྱི་ཆོས་རྒྱ་ཆེན་པོ་མཉམ་པ་དང་། འབྲལ་བར་མི་འགྱུར་བ་དང་། བྱང་ཆུབ་ཀྱི་སེམས་ཀྱི་ཡན་ལག་ཡོངས་སུ་དག་པར་བྱ་བ་དང་། བྱང་ཆུབ་ཀྱི་
སེམས་འབྱུང་བའི་རྒྱུད་ཡོངས་སུ་བསྒྲུབ་པ་དང་། བྱང་ཆུབ་སེམས་དཔའི་ལམ་སྣང་བ་ཐོབ་པར་བྱ་བ་དང་། བྱང་ཆུབ་སེམས་དཔའི་ཡེ་ཤེས་ཁོང་བུ་ཆུད་པར་བྱ་བ་དང་། བྱང་ཆུབ་སེམས་དཔའི་ས་ལ་གནས་པར་བྱ་བས་དབུགས་ཕྱིན་པར་བྱས་པ་
ཡིན། རིགས་ཀྱི་བུ་དེ་ལ་བདག་འདི་སྙམ་དུ་སེམས་ཏེ། བྱང་ཆུབ་སེམས་དཔའ་རྣམས་ནི་དཀའ་བ་བྱེད་པ་སྟེ། འབྱུང་བར་དཀའ་ཞིང་མཐོང་བར་དཀའ་བའོ། །བྱང་ཆུབ་སེམས་དཔའ་རྣམས་ནི་སེམས་ཅན་རྣམས་ལ་བག་དྲོ་བར་བྱེད་པས་

ཕ་དང་མ་ལྟ་བུའོ། །བྱང་ཆུབ་སེམས་དཔའ་རྣམས་ནི་ལྷ་དང་བཅས་པའི་འཇིག་རྟེན་གྱི་རྒྱན་ཏུ་གྱུར་པའོ། །བྱང་ཆུབ་སེམས་དཔའ་རྣམས་ནི་སྡུག་བསྔལ་གྱིས་མནར་བ་རྣམས་ལ་སྐྱབས་སུ་གྱུར་པའོ། །བྱང་ཆུབ་སེམས་དཔའ་རྣམས་ནི་འགྲོ་བ་
ཐམས་ཅད་ཡོངས་སུ་བསྲུང་བའི་ཕྱིར་གནས་སུ་གྱུར་པའོ། །བྱང་ཆུབ་སེམས་དཔའ་རྣམས་ནི་འཇིགས་པ་སྣ་ཚོགས་ཀྱིས་གཙེས་པ་རྣམས་ལ་དཔུང་གཉེན་དུ་གྱུར་པའོ། །བྱང་ཆུབ་སེམས་དཔའ་རྣམས་ནི་འགྲོ་བ་ཐམས་ཅད་ངན་སོང་གསུམ་དུ་ལྟུང་བ་ལས་
ཡོངས་སུ་རྟོན་པའི་ཕྱིར་རླུང་གི་དཀྱིལ་འཁོར་ལྟ་བུའོ། །བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ཀྱི་དགེ་བའི་རྩ་བ་རྣམ་པར་འཕེལ་བར་བྱེད་པས་ས་ལྟ་བུའོ། །བྱང་ཆུབ་སེམས་དཔའ་རྣམས་ནི་བསོད་ནམས་རིན་པོ་ཆེའི་མཛོད་མི་ཟད་པའི་གཏོས་
དང་ལྡན་པས་རྒྱ་མཚོ་ལྟ་བུའོ། །བྱང་ཆུབ་སེམས་དཔའ་རྣམས་ནི་ཡེ་ཤེས་ཀྱི་འོད་ཀྱིས་སྣང་བར་བྱེད་པའི་ཕྱིར་ཉི་མ་ལྟ་བུའོ། །བྱང་ཆུབ་སེམས་དཔའ་རྣམས་ནི་དགེ་བའི་རྩ་བས་ཤིན་ཏུ་མཐོ་བས་རི་རབ་ལྟ་བུའོ། །བྱང་ཆུབ་སེམས་དཔའ་རྣམས་ནི་སྙིང་པོ་བྱང་
ཆུབ་ཏུ་ཡེ་ཤེས་ཀྱི་ཟླ་བ་འཆར་བར་འགྱུར་བའི་ཕྱིར་ཟླ་བ་ལྟ་བུའོ། །བྱང་ཆུབ་སེམས་དཔའ་རྣམས་ནི་བདུད་ཀྱི་སྡེ་ཐམས་ཅད་རབ་ཏུ་འཇོམས་པས་དཔའ་བོར་གྱུར་པའོ། །བྱང་ཆུབ་སེམས་དཔའ་རྣམས་ནི་རང་བྱུང་གི་ཆོས་ཀྱི་གྲོང་ཁྱེར་དུ་ཕྱིན་པར་བྱེད་པས་རྟུལ་
ཕོད་པ་ལྟ་བུའོ། །བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ཀྱི་བག་ལ་བྱམས་པའི་རླན་ཡོངས་སུ་སྐེམ་པས་མེ་ལྟ་བུའོ། །བྱང་ཆུབ་སེམས་དཔའ་རྣམས་ནི་ཆོས་ཀྱི་སྤྲིན་རྒྱ་ཆེན་པོའི་ཆར་མངོན་པར་འབེབས་པས་སྤྲིན་ལྟ་བུའོ། །བྱང་ཆུབ་སེམས་
དཔའ་རྣམས་ནི་སེམས་ཅན་གྱི་དབང་པོ་དད་པ་ལ་སྩོགས་པའི་མྱུ་གུ་རྣམ་པར་འཕེལ་བར་བྱེད་པས་ཆར་པ་ལྟ་བུའོ། །བྱང་ཆུབ་སེམས་དཔའ་རྣམས་ནི་ཆོས་རྒྱ་མཚོའི་འགྲམ་ཡོངས་སུ་སྟོན་པས་མཉན་པ་ལྟ་བུའོ། །བྱང་ཆུབ་སེམས་དཔའ་རྣམས་ནི་

སེམས་ཅན་ཐམས་ཅད་འཁོར་བའི་རྒྱ་མཚོ་ལས་ཡང་དག་པར་སྒྲོལ་བའི་ཕྱིར་ཟམ་པ་ལྟ་བུའོ། །བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ཀྱིས་མངོན་པར་བགྲོད་པར་བྱ་བའི་ཕྱིར་མུ་སྟེགས་ལྟ་བུའོ། །དེ་ལྟར་དྲ་བྱི་ལའི་སྤྲིན་
གྱིས་ཚོང་དཔོན་གྱི་བུ་ནོར་བཟངས་ཀྱི་མདུན་དུ་འདུག་སྟེ། ཚིག་གི་རྒྱུད་དེ་དག་གིས་བྱང་ཆུབ་སེམས་དཔའ་རྣམས་ལ་ཡོངས་སུ་བསྔགས་པ་བྱས་ནས། ཚོང་དཔོན་གྱི་བུ་ནོར་བཟངས་ལ་ལེགས་སོ་ཞེས་བསྔགས་སོ། །དེ་ལྟར་དེ་བྱང་ཆུབ་སེམས་དཔའ་
ཡང་དག་པར་དགའ་བར་བྱ་བའི་ཕྱིར་ཚིག་བརྗོད་པའི་ཚེ། ཁའི་སྒོ་ནས་འོད་འཕྲོ་བའི་ཕུང་པོ་རྣམ་པ་འདི་ལྟ་བུ་བྱུང་སྟེ། འོད་འཕྲོ་བའི་ཕུང་པོ་དེས་སྟོང་གསུམ་གྱི་འཇིག་རྟེན་གྱི་ཁམས་རྒྱས་པར་གང་བར་གྱུར་ནས། ལྷ་དང་ལྷ་རྫུ་འཕྲུལ་ཆེན་པོའམ།
ཀླུ་དང་ཀླུ་རྫུ་འཕྲུལ་ཆེན་པོ་འམ། གནོད་སྦྱིན་དང་གནོད་སྦྱིན་རྫུ་འཕྲུལ་ཆེན་པོའམ། དྲི་ཟ་དང་དྲི་ཟ་རྫུ་འཕྲུལ་ཆེན་པོའམ། ལྷ་མ་ཡིན་དང་ལྷ་མ་ཡིན་རྫུ་འཕྲུལ་ཆེན་པོའམ། ནམ་མཁའ་ལྡིང་དང་ནམ་མཁའ་ལྡིང་རྫུ་འཕྲུལ་ཆེན་པོའམ། མིའམ་ཅི་དང་
མིའམ་ཅི་རྫུ་འཕྲུལ་ཆེན་པོའམ། ལྟོ་འཕྱེ་ཆེན་པོ་དང་ལྟོ་འཕྱེ་ཆེན་པོ་རྫུ་འཕྲུལ་ཆེན་པོའམ། མི་དང་མི་རྫུ་འཕྲུལ་ཆེན་པོའམ། མི་མ་ཡིན་པ་དང་མི་མ་ཡིན་པ་རྫུ་འཕྲུལ་ཆེན་པོའམ། ཚངས་པ་དང་ཚངས་པ་རྫུ་འཕྲུལ་ཆེན་པོའམ། སེམས་ཅན་
གང་སུས་མཐོང་ཡང་རུང་སྟེ། སྣང་བ་དེས་ཡོངས་སུ་སྣང་བར་བྱས་པ་དེ་དག་དྲ་བྱི་ལ་སྤྲིན་གྱི་དྲུང་དུ་འོངས་སོ། །དེ་ནས་དེ་ལྟར་དྲ་བྱི་ལ་སྤྲིན་གྱིས་བསམ་པ་བྱིན་གྱིས་བརླབས་ཤིང་ཐལ་མོ་སྦྱར་ཏེ། གནས་པ་ལུས་དང་སེམས་སིམ་པར་གྱུར་པ། དགའ་བ་རྒྱ་
ཆེན་པོ་སྐྱེས་པ། སྲི་ཞུ་ཆེན་པོ་ལ་གནས་པ། ང་རྒྱལ་གྱི་རྒྱལ་མཚན་བཅོམ་པ། གཡོ་རྒྱུ་དང་བྲལ་བ། དབང་པོ་རྣམ་པར་དང་བར་གྱུར་པ་དེ་དག་ལ་དྲ་བྱི་ལའི་སྤྲིན་གྱིས་ཆོས་ཀྱི་རྣམ་གྲངས་ཡི་གེའི་འཁོར་ལོའི་རྒྱུད་ཀྱི་རྒྱན་ཅེས་བྱ་བ་དེ་ཉིད་རྒྱ་ཆེར་ཡང་དག་པར་

བསྟན་ཏེ། ཁོང་དུ་ཆུད་པ་དང་རྟོགས་པ་དང་ཤེས་པ་དང་རིག་པར་བྱས་སོ། །དེ་ཐོས་ནས་ཀྱང་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་དེའི་ཕྱིར་ཆོས་ཀྱི་སྟན་ལ་འདུག་ནས། ཚོང་དཔོན་
གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་བོ་ནི་དབྱངས་དང་ལྡན་པའི་གཟུངས་ཐོབ་པ་སྟེ། དེའི་མཐུས་ཁོ་བོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལྷ་རྣམས་ཀྱི་ལྷའི་སྐད་ཀྱང་ཤེས་སོ། །དེ་བཞིན་དུ་ཀླུ་དང་གནོད་སྦྱིན་དང་།
དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། ཚངས་པ་རྣམས་ཀྱི་ཚངས་པའི་སྐད་ཀྱང་ཤེས་སོ། །ལྷ་རྣམས་ཀྱི་ལྷའི་སྐད་སྣ་ཚོགས་ཀྱང་ཤེས་སོ། །དེ་བཞིན་དུ་ཀླུ་དང་གནོད་
སྦྱིན་དང་དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། ཚངས་པ་རྣམས་ཀྱི་ཚངས་པའི་སྐད་སྣ་ཚོགས་ཀྱང་ཤེས་སོ། །ལྷ་རྣམས་ཀྱི་ལྷའི་སྐད་གཅིག་པ་ཡང་ཤེས་སོ། །
དེ་བཞིན་དུ་ཀླུ་དང་གནོད་སྦྱིན་དང་དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། ཚངས་པ་རྣམས་ཀྱི་ཚངས་པའི་སྐད་གཅིག་པ་ཡང་ཤེས་སོ། །ལྷ་རྣམས་ཀྱི་ལྷའི་སྐད་ཐ་
དད་པ་ཡང་ཤེས་སོ། །དེ་བཞིན་དུ་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་མིའམ་ཅི་དང་། ལྟོ་འཕྱེ་ཆེན་པོ་དང་མི་དང་མི་མ་ཡིན་པ་དང་། ཚངས་པ་རྣམས་ཀྱི་ཚངས་པའི་སྐད་ཐ་དད་པ་ཡང་ཤེས་སོ། །བྱོལ་སོང་གི་
སྐྱེ་གནས་སུ་སྐྱེས་པའི་སེམས་ཅན་རྣམས་ཀྱི་བརྡ་དང་སྐད་དང་མིང་ཐ་དད་པའང་ཤེས་སོ། །སེམས་ཅན་དམྱལ་བ་པའི་སེམས་ཅན་རྣམས་ཀྱི་སྐད་དང་། མིང་རྣམས་ཀྱང་ཤེས་སོ། །གཤིན་རྗེའི་འཇིག་རྟེན་པའི་སེམས་ཅན་རྣམས་ཀྱི་སྐད་དང་མིང་

རྣམས་ཀྱང་ཤེས་སོ། །འཕགས་པའི་སྐད་དང་མིང་རྣམས་ཀྱང་ཤེས་སོ། །འཕགས་པ་མ་ཡིན་པའི་སྐད་དང་མིང་རྣམས་ཤེས་སོ། །བྱང་ཆུབ་སེམས་དཔའ་རྣམས་ཀྱི་ཚིག་དང་བརྡ་དང་། ངེས་པའི་ངག་སེམས་ཅན་
གྱི་བསམ་པ་བཞིན་དུ་འབྱུང་བ་ཡང་ཤེས་སོ། །སེམས་ཀྱི་སྐད་ཅིག་རེ་རེ་ལ་ཡང་དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཀྱི་དབྱངས་ཀྱི་ཡན་ལག་དང་གསུང་རྒྱ་མཚོ་སེམས་ཅན་ཐམས་ཅད་ཀྱི་མིང་དང་གཏམ་གྱི་སྒྲ་དང་། ཚིག་ཏུ་
ལྡན་པ་ཡང་རྟོགས་ཤིང་ཁོང་དུ་ཆུད་དོ། །ཇི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སེམས་ཅན་རྣམས་ཀྱི་བརྡ་དང་ངེས་པའི་ཚིག་དང་སྐད་དང་མིང་རྒྱ་མཚོ་ལ་འཇུག་ཅིང་ཤེས་པ་དེ་བཞིན་དུ་ཤར་ཕྱོགས་ཀྱི་འཇིག་རྟེན་གྱི་ཁམས་བྱེ་བ་
ཁྲག་ཁྲིག་བརྒྱ་སྟོང་ཚད་མེད་པ། གྲངས་མེད་པ། བསམ་གྱིས་མི་ཁྱབ་པ། མཚུངས་པ་མེད་པ། ཀུན་ཏུ་མཐའ་ཡས་པ་མུ་མེད་པ། ས་མཚམས་མེད་པ་གཞལ་དུ་མེད་པ། བརྗོད་དུ་མེད་པའི་ཡང་བརྗོད་དུ་མེད་པ་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་
དང་བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་
ཚད་མེད་པ་ནས་བརྗོད་དུ་མེད་པའི་ཡང་བརྗོད་དུ་མེད་པའི་བར་གྱི་སེམས་ཅན་རྣམས་ཀྱི་བརྡ་དང་། ངེས་པའི་ཚིག་དང་སྐད་དང་མིང་རྒྱ་མཚོ་ཐམས་ཅད་ལ་འཇུག་ཅིང་ཤེས་ཏེ། འདི་ལྟར་ལྷ་རྣམས་ཀྱི་ལྷའི་སྐད་ཀྱང་ཤེས་སོ། །ཚངས་པ་རྣམས་
ཀྱི་ཚངས་པའི་སྐད་ཀྱི་བར་དུའང་ཤེས་སོ། །རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའ་རྣམས་ཀྱི་གཟུངས་སྣང་བ་དབྱངས་དང་ལྡན་པ་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་འགྲོ་བ་སྣ་ཚོགས་ཀྱི་བརྡའི་རྣམ་པ་རྒྱ་མཚོ་

ལ་ཞུགས་པ་དེ་དག་དང་། འགྲོ་བ་སྣ་ཚོགས་ཀྱི་སྐད་དང་། མིང་རྒྱ་མཚོ་ལ་ཞུགས་པ་དེ་དག་དང་། འགྲོ་བ་སྣ་ཚོགས་ཀྱི་མིང་ཤིན་ཏུ་བསྟན་པ་མིང་རྒྱ་མཚོ་ལ་ཞུགས་པ་དེ་དག་དང་འགྲོ་བ་སྣ་ཚོགས་ཀྱི་བརྗོད་པ་རབ་ཏུ་བཀོད་པ་དང་། རྣམ་པར་སྤྱོད་པ་རྒྱ་
མཚོ་ལ་ཞུགས་པ་དེ་དག་དང་། ཚིག་ཐམས་ཅད་ཀྱི་མཚམས་སྦྱར་བ་རྒྱ་མཚོ་ལ་ཞུགས་པ་དེ་དག་དང་། ཚིག་ལྷུར་བླངས་ཏེ་བསྟན་པ་རྒྱ་མཚོ་ལ་ཞུགས་པ་དེ་དག་དང་། དུས་གསུམ་གྱི་དམིགས་པ་ཐམས་ཅད་དམིགས་པ་གཅིག་ཏུ་རྣམ་
པར་སྤྱོད་པ་རྒྱ་མཚོ་གང་ཆེན་མཚོ་ལ་ཞུགས་པ་དེ་དག་དང་། ཚིག་གིས་བརྩེགས་ཏེ་བསྟན་པ་རྒྱ་མཚོ་ལ་ཞུགས་པ་དེ་དག་དང་། ཚིག་གཉིས་ནས་བརྩེགས་ཏེ་བསྟན་པ་རྒྱ་མཚོ་ལ་ཞུགས་པ་དེ་དག་དང་། ཚིག་རབ་ཏུ་ཕྱེ་སྟེ་བསྟན་པ་རྒྱ་མཚོ་ལ་ཞུགས་
པ་དེ་དག་དང་། ཆོས་ཐམས་ཅད་རབ་ཏུ་དབྱེ་བས་འདུལ་བའི་ཚུལ་བསྟན་པ་རྒྱ་མཚོ་ལ་ཞུགས་པ་དེ་དག་དང་། འགྲོ་བ་ཐམས་ཅད་ཀྱི་སྐད་རྒྱ་མཚོ་ལ་ཞུགས་པ་དེ་དག་དང་། དབྱངས་ཀྱི་དཀྱིལ་འཁོར་རྣམ་པར་དག་པའི་རྒྱན་ཐམས་ཅད་ལ་ཞུགས་པ་དེ་དག་
དང་། ཡི་གེའི་འཁོར་ལོའི་མཐར་ཕྱིན་པར་བྱ་བས་རབ་ཏུ་དབྱེ་བ་ལས་བྱུང་བ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་ཡུལ་ནགས་ཚལ་ན་གནས་པ་ཞེས་བྱ་བ་ཡོད་དེ། དེ་ན་ཚོང་
དཔོན་བཏང་བརྗོད་ཅེས་བྱ་བ་འདུག་གི་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བརྩོན་པར་བྱ་བ་དང་། ཇི་ལྟར་འབྱུང་བར་བྱ་བ་དང་། ཇི་ལྟར་སེམས་ངེས་པར་བཞག་པར་བྱ་བ་དྲིས་ཤིག །དེ་ནས་ཚོང་དཔོན་
གྱི་བུ་ནོར་བཟངས་ཀྱིས། དྲ་བྱི་ལ་སྤྲིན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཆོས་ཀྱི་རིམ་གྲོ་བྱས་ནས། དད་པའི་མཚན་ཉིད་རྩ་བ་ཚུགས་པ་ལ་རབ་ཏུ་བརྟག་པ་དང་། དགེ་བའི་བཤེས་གཉེན་ལས་འོངས་པའི་ཐམས་ཅད་མཁྱེན་པ་

ཉིད་ལ་ཡང་དག་པར་ལྟ་ཞིང་གདོང་མཆི་མས་གང་བར་ངུས་ཏེ། དྲ་བྱི་ལ་སྤྲིན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ་ཕྱག་འཚལ་ཞིང་དྲ་བྱི་ལ་སྤྲིན་གྱི་དྲུང་ནས་སོང་ངོ་།། །།
སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་དགུ་པ། དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའི་གཟུངས་སྣང་བ་དབྱངས་དང་ལྡན་པའི་རྒྱན་དེ་ཉིད་ལ་རྗེས་སུ་བསམ་པ་དང་། བྱང་ཆུབ་སེམས་
དཔའི་སྐད་ཀྱི་ཚུལ་རྒྱ་མཚོ་དེ་ཉིད་ལ་འཇུག་པར་བྱ་བ་དང་། བྱང་ཆུབ་སེམས་དཔའི་ཚུལ་ཕྲ་མོ་ལ་འཇུག་པ་དེ་ཉིད་རྗེས་སུ་དྲན་པར་བྱ་བ་དང་། བྱང་ཆུབ་སེམས་དཔའི་སེམས་རྣམ་པར་བྱང་བས། རྣམ་པར་དག་པ་དེ་ཉིད་ཀྱི་རྗེས་སུ་འབྲང་བར་བྱ་བ་དང་།
བྱང་ཆུབ་སེམས་དཔའི་དགེ་བའི་རྩ་བའི་བག་ཆགས་བསྡུ་ཞིང་བསྒྲུབ་པ་མངོན་པར་བསྒྲུབ་པ་དང་། བྱང་ཆུབ་སེམས་དཔའི་ཡོངས་སུ་སྨིན་པར་བྱ་བའི་སྒོ་དེ་ཉིད་རྣམ་པར་སྦྱང་བ་དང་། བྱང་ཆུབ་སེམས་དཔའ་རྣམས་ཀྱི་སེམས་ཅན་བསྡུ་བའི་ཡེ་ཤེས་དེ་
ཉིད་ཤིན་ཏུ་བྱང་བར་བྱ་བ་དང་། བྱང་ཆུབ་སེམས་དཔའི་བསམ་པའི་སྟོབས་རྣམ་པར་དག་པ་བྱ་བ་དེ་ཉིད་བརྟན་པར་བྱ་བ་དང་། བྱང་ཆུབ་སེམས་དཔའི་ལྷག་པའི་བསམ་པའི་སྟོབས་དེ་ཉིད་ཉེ་བར་བརྟན་པར་བྱ་བ་དང་། བྱང་ཆུབ་སེམས་དཔའི་མོས་པའི་རྒྱུད་དེ་ཉིད་
ཡོངས་སུ་སྦྱང་བ་དང་། བྱང་ཆུབ་སེམས་དཔའི་སེམས་དེ་ཉིད་གདོན་མི་ཟ་བར་དགེ་བར་བསམ་པ་དང་བྱང་ཆུབ་སེམས་དཔའི་ཡི་དམ་ཆེན་པོ་དེ་ཉིད་མཐར་ཕྱིན་པར་བྱེད་ཅིང་། ཚོང་དཔོན་གྱི་བུ་ནོར་བཟངས་ཡི་དམ་ལ་བརྟན་ཞིང་སྨོན་ལམ་གྱི་སེམས་ཀྱིས་
ཡོངས་སུ་སྐྱོ་བ་མེད་པའི་རྒྱུད་ཀྱི་རྒྱན་དང་ལྡན་པ། ཕྱིར་མི་ལྡོག་པས་རྣམ་པར་གནོན་པའི་བརྩོན་འགྲུས་ཅན། ཡིད་ཀྱིས་བརྟུལ་བ་ལས་མི་ཟློགས་པ། དད་པ་མི་འཕྲོགས་པའི་སྟོབས་དང་ལྡན་པ། རྡོ་རྗེ་མཐུ་བོ་ཆེ་མི་ཕྱེད་པའི་སེམས་དང་ལྡན་པ་དགེ་

བའི་བཤེས་གཉེན་ཐམས་ཅད་ཀྱི་གདམས་ངག་འཐུན་པར་ལེན་པ། ཤེས་རབ་ཁ་མ་བབ་པའི་ཡུལ་དང་ལྡན་པ། སྒོ་ཀུན་ནས་རྣམ་པར་དག་པ་ལ་མངོན་དུ་གྱུར་པ། ཡེ་ཤེས་རྣམ་པར་དག་པའི་སྤྱོད་ཡུལ་ཐོགས་པ་མེད་པ་ཀུན་ཏུ་ལྟ་བའི་ཡེ་ཤེས་ཀྱི་ཚུལ་སྣང་བ་དང་ལྡན་པ།
སའི་གཟུངས་ཀུན་ནས་སྣང་བ་རབ་ཏུ་ཐོབ་པ། ཆོས་ཀྱི་དབྱིངས་ཀྱི་གཞིའི་བྱེ་བྲག་ལ་མངོན་སུམ་དུ་གྱུར་པའི་སེམས་དང་ལྡན་པ། གཞི་ཀུན་ལ་རྟེན་པའི་རྒྱན་རྣམ་པར་དག་པའི་རང་བཞིན་རྣམ་པར་དམིགས་པ་གནས་པ་མེད་པ་དང་། བདག་གི་མེད་པ་དང་གཉིས་
སུ་མེད་པའི་སྤྱོད་ཡུལ་ལ་རབ་ཏུ་བརྩོན་པ། འདུ་ཤེས་ཐམས་ཅད་ལས་འདའ་བར་བྱེད་པའི་ཡེ་ཤེས་ཀྱི་སྒོ་རྣམ་པར་དག་པ། ཆོས་ཀྱི་ཕྱོགས་དང་གཞི་ཐ་དད་པའི་ཕྱོགས་ལ་སོ་སོར་རྟོག་པ་མེད་པ་འཇིག་རྟེན་གྱི་གཞི་དང་ཕྱོགས་ཀྱི་བྱེ་བྲག་ལས་ཕྱིར་མི་ལྡོག་པ། ཆོས་
ཀྱི་གཞི་དང་ཕྱོགས་ཀྱི་བྱེ་བྲག་ལས་ཕྱིར་མི་ལྡོག་པ་སངས་རྒྱས་ཀྱི་ཕྱོགས་དང་གཞི་ཐ་དད་པ་མཐོང་བ་དང་། རྣམ་པར་རིག་པར་བྱ་བ་ལ་གཞོལ་བ། དུས་ཀྱི་ཕྱོགས་དང་གཞིའི་བྱེ་བྲག་ཁོང་དུ་ཆུད་པའི་ཡེ་ཤེས་ཅན། ཆོས་ཀྱི་འཁོར་ལོ་ཡིད་དུ་འོང་བས་ཡང་དག་པར་བསྒྲུབས་
པའི་བློ་དང་། ཡེ་ཤེས་ཀུན་ནས་སྣང་བའི་ཏིང་ངེ་འཛིན་གྱི་རྣམ་པར་སྣང་བས་སེམས་གསལ་བར་བྱས་པ། ཡིད་ཀྱི་ཡུལ་ལུས་ཀུན་དང་ལྡན་པའི་ས་ལ་ཞུགས་པ་དེ་བཞིན་གཤེགས་པའི་ཡེ་ཤེས་སྣང་བས་རྒྱུད་ཤིན་ཏུ་སྣང་བར་བྱས་པ། ཐམས་ཅད་མཁྱེན་པ་
ཉིད་དུ་དད་པའི་དཔའ་རླབས་ཀྱི་ཤུགས་ཀྱིས་རབ་ཏུ་རློབ་པ། སངས་རྒྱས་ཀྱི་ཆོས་ལ་མོས་པའི་ཤུགས་དང་འབྲལ་བ་མེད་པ་དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་དུ་བརླབས་པ། སངས་རྒྱས་ཐམས་ཅད་རང་གི་སེམས་ཀྱི་རྒྱུད་ཁོང་དུ་ཆུད་པའི་འོད་ཀྱིས་
སྣང་བར་གྱུར་པ། འཇིག་རྟེན་གྱི་ཁམས་ཀྱི་དྲ་བ་ཐམས་ཅད་རང་གི་ལུས་ཀྱིས་རྒྱས་པར་དགང་བའི་སྨོན་ལམ་དང་ཆོས་ཀྱི་དབྱིངས་ཐམས་ཅད་རང་གི་ལུས་སུ་ཡང་དག་པར་བསྡུ་བ་དང་། མངོན་པར་བསྒྲུབ་པ་ལ་བརྩོན་པ། དེ་མཐར་གྱིས་སོང་སོང་སྟེ། ལོ་

བཅུ་གཉིས་ཀྱིས་ཡུལ་ནགས་ཚལ་ན་གནས་པར་ཕྱིན་ནས། དེས་ཚོང་དཔོན་བཏང་བརྗོད་དེ་བཙལ་བཙལ་ཏེ་མཐོང་ངོ་། །མཐོང་ནས་ཀྱང་ལུས་ཐམས་ཅད་ཀྱིས་ཕབ་སྟེ། ཕྱག་འཚལ་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་
སྨྲས་སོ། །འཕགས་པ་བདག་དེ་རིང་དགེ་བའི་བཤེས་གཉེན་དང་མཇལ་བར་གྱུར་པ་ནི་བདག་གིས་འཐོབ་པར་བགྱི་བ་ལེགས་པར་ཐོབ་བོ། །དེ་ཅིའི་སླད་དུ་ཞེ་ན། དགེ་བའི་བཤེས་གཉེན་རྣམས་ནི་མཐོང་བར་དཀའ་བའོ། །འབྱུང་བར་དཀའ་བའོ། །མཇལ་བར་དཀའ་
བའོ། །བགྲོད་པར་དཀའ་བའོ། །བསྙེན་བཀུར་བགྱི་བར་དཀའ་བའོ། །མཉེས་པར་བགྱི་བར་དཀའ་བའོ། །འགྲོགས་པར་དཀའ་བའོ། །རིམ་གྲོ་བགྱི་བར་དཀའ་བའོ། །དགེ་བའི་བཤེས་གཉེན་རྣམས་ནི་རྗེས་སུ་འབྲང་བར་དཀའ་བ་ལགས་ན། དེ་ལྟ་བུའི་དགེ་
བའི་བཤེས་གཉེན་དང་འགྲོགས་པ་དེ་རིང་བདག་གིས་ཐོབ་པར་གྱུར་ཏོ། །འཕགས་པ་བདག་གིས་འདི་ལྟ་སྟེ། སངས་རྒྱས་ཐམས་ཅད་བསྙེན་བཀུར་བ་དང་། སངས་རྒྱས་ཐམས་ཅད་ལ་རིམ་གྲོ་བགྱི་བ་དང་། སངས་རྒྱས་ཐམས་ཅད་ཀྱི་ཞལ་བལྟ་བ་དང་།
སངས་རྒྱས་ཐམས་ཅད་རྣམ་པར་དམིགས་པར་བགྱི་བ་དང་། སངས་རྒྱས་ཐམས་ཅད་དང་མཉམ་པ་ཉིད་ཐོབ་པར་བགྱི་བ་དང་། སངས་རྒྱས་ཐམས་ཅད་ཀྱི་སྨོན་ལམ་ཁོང་དུ་ཆུད་པར་བགྱི་བ་དང་། སངས་རྒྱས་ཐམས་ཅད་ཀྱི་སྨོན་ལམ་ཡོངས་སུ་རྫོགས་པར་བགྱི་བ་དང་།
སངས་རྒྱས་ཐམས་ཅད་ཀྱི་ཡང་དག་པར་བསྒྲུབ་པའི་ཡེ་ཤེས་སྣང་བར་བགྱི་བ་དང་། སངས་རྒྱས་ཐམས་ཅད་རང་གི་ལུས་སུ་མངོན་པར་བསྒྲུབ་པ་དང་། སངས་རྒྱས་ཐམས་ཅད་ཀྱིས་ཡང་དག་པར་བསྒྲུབས་པ་རང་གི་སྤྱོད་པ་མངོན་པར་བསྒྲུབ་པར་བགྱི་བ་དང་། སངས་
རྒྱས་ཐམས་ཅད་ཀྱི་རྣམ་པར་འཕྲུལ་པ་མངོན་སུམ་དུ་རྟོགས་པར་བགྱི་བ་དང་། སངས་རྒྱས་ཐམས་ཅད་ཀྱི་སྟོབས་དང་མི་བསྙེངས་པ་ཡོངས་སུ་དག་པར་བགྱི་བ་དང་། སངས་རྒྱས་ཐམས་ཅད་ཀྱི་ཆོས་བསྟན་པ་མཉན་པས་མི་ངོམས་པར་བགྱི་བ་དང་། སངས་

རྒྱས་ཐམས་ཅད་ཀྱི་ཆོས་བསྟན་པ་མཉན་ཅིང་བླང་བར་བགྱི་བ་དང་། སངས་རྒྱས་ཐམས་ཅད་ཀྱི་ཆོས་བསྟན་པ་ཡང་དག་པར་གཟུང་བར་བགྱི་བ་དང་། སངས་རྒྱས་ཐམས་ཅད་ཀྱི་ཆོས་བསྟན་པ་རྣམ་པར་དབྱེ་བར་བགྱི་བ་དང་། སངས་རྒྱས་ཐམས་ཅད་ཀྱི་ཆོས་
བསྟན་པ་ཡོངས་སུ་གཟུང་བ་དང་། བྱང་ཆུབ་སེམས་དཔའ་ཐམས་ཅད་དང་། ཚུལ་གཅིག་ཏུ་འགྱུར་བར་བགྱི་བ་དང་། བྱང་ཆུབ་སེམས་དཔའ་ཐམས་ཅད་དང་སྐལ་བ་མཉམ་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་ཡོངས་
སུ་དག་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་མངོན་པར་བསྒྲུབ་པ་རྣམ་པར་དག་པར་བགྱི་བ་དང་བྱང་ཆུབ་སེམས་དཔའ་ཐམས་
ཅད་ཀྱི་སངས་རྒྱས་ཀྱི་བྱིན་གྱི་རླབས་ཀྱི་མཛོད་རབ་ཏུ་ཐོབ་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་ཆོས་ཀྱི་གཏེར་དང་མཛོད་མི་ཟད་པའི་ཡེ་ཤེས་སྣང་བ་ཐོབ་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་ཏིང་
ངེ་འཛིན་གྱི་གཏེར་དང་མཛོད་ཁོང་དུ་ཆུད་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་མཛོད་ཚད་མེད་པ་མངོན་པར་བསྒྲུབ་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྙིང་རྗེ་ཆེན་པོའི་གཏེར་དང་མཛོད་སེམས་ཅན་འདུལ་བའི་མཐར་
ཕྱིན་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་འཕྲུལ་བའི་གཏེར་དང་མཛོད་རྣམ་པར་དམིགས་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་དབང་གི་གཏེར་དང་། མཛོད་རང་གི་སེམས་ཀྱིས་དབང་དུ་བགྱི་བ་དང་། བྱང་
ཆུབ་སེམས་དཔའ་ཐམས་ཅད་ཀྱི་རྣམ་པར་དག་པའི་གཏེར་དང་། མཛོད་རྣམ་པ་ཐམས་ཅད་དུ་བརྒྱན་པར་བགྱི་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། འཕགས་པ་དེ་ལྟ་བུའི་སེམས་ཀྱིས་བདག་འདིར་མཆིས་སོ། །

བསམ་པ་དེ་ལྟ་བུ་དང་ཡིད་ལ་སྨོན་པ་དེ་ལྟ་བུ་དང་། མངོན་པར་དགའ་བ་དེ་ལྟ་བུ་དང་། སེམས་པ་དེ་ལྟ་བུ་དང་། གདོན་མི་འཚལ་བར་བསྒྲུབ་པར་བསམ་པ་དེ་ལྟ་བུ་དང་། །སྤྱོད་ཡུལ་མངོན་དུ་བགྱི་བ་དེ་ལྟ་བུ་དང་། ཚུལ་
ཁོང་དུ་ཆུད་པར་བགྱི་བ་ལ་མོས་པ་དེ་ལྟ་བུ་དང་། རྣམ་པར་དག་པ་ལ་གཞོལ་བ་དེ་ལྟ་བུ་དང་། རྣམ་པར་དཔྱོད་པའི་བསམ་པ་དེ་ལྟ་བུ་དང་། རབ་ཏུ་གཞོལ་བའི་སེམས་དེ་ལྟ་བུ་དང་། དགེ་བའི་སྦྱོར་བ་དེ་ལྟ་བུ་དང་། མངོན་དུ་འགྱུར་བའི་དབང་པོ་དེ་ལྟ་བུས་བདག་
འདིར་མཆིས་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་། རྗེས་སུ་སྟོན་པ་མཛད་ཅིང་ཚུལ་ནི་ཉེ་བར་སྟོན་པ་མཛད། རྟོགས་པར་བགྱི་བ་ནི་སྣང་བར་མཛད། ལམ་ནི་བསྟན་པར་མཛད། མུ་སྟེགས་ལ་ནི་འཇོག་པར་མཛད།
ཆོས་ཀྱི་སྒོ་ནི་རྣམ་པར་འབྱེད་པ་མཛད། ཐེ་ཙོམ་ནི་ཡོངས་སུ་གཅོད་པར་མཛད། ནེམ་ནུར་ནི་སེལ་བར་མཛད། ཡིད་གཉིས་ཀྱི་ཟུག་རྔུ་ནི་འབྱིན་པར་མཛད། དོགས་པའི་དྲི་མ་ནི་སྦྱོང་བར་མཛད། སེམས་ཀྱི་ཐིབས་པོ་ནི་སྣང་བར་མཛད། སེམས་ཀྱི་དྲི་མ་ནི་
ཡོངས་སུ་སེལ་བར་མཛད། སེམས་ཀྱི་རྒྱུད་ནི་རབ་ཏུ་དང་བར་མཛད། སེམས་ཀྱི་གཡོ་སྒྱུ་ནི་ཡོངས་སུ་སེལ་བར་མཛད། སེམས་ཀྱི་གདུང་བ་ནི་ཡོངས་སུ་སིམ་པར་མཛད། འཁོར་བ་ལས་ནི་སེམས་རྣམ་པར་བཟློག་པར་མཛད། མི་དགེ་བའི་ལས་ནི་ཕྱིར་བཟློག་
པར་མཛད། སེམས་ཅན་དམྱལ་བ་ལས་ནི་ལྡོག་པར་མཛད། གནས་དང་ནི་དབྲལ་བར་མཛད། མངོན་པར་ཞེན་པ་ལས་ནི་གྱེན་དུ་བསྐྱོད་པ་མཛད། ཆགས་པ་ཐམས་ཅད་ལས་ནི་ཡོངས་སུ་འགྲེལ་བ་མཛད། ཐམས་ཅད་མཁྱེན་པ་ཉིད་དུ་ནི་བསྒྲུབ་པ་མཛད། ཆོས་ཀྱི་གྲོང་ཁྱེར་དུ་འཇུག་པར་བགྱི་བའི་
གླད་དུ་ནི་མངོན་དུ་གྱུར་པར་མཛད། སྙིང་རྗེ་ཆེན་པོ་ལ་ནི་རབ་ཏུ་བསྒྲུབ་པ་མཛད། བྱམས་པ་ཆེན་པོ་ལ་ནི་རབ་ཏུ་གཞོག་པ་མཛད། བྱང་ཆུབ་སེམས་དཔའི་སྤྱོད་པ་ལ་ནི་རབ་ཏུ་སྦྱོར་བ་མཛད། ཏིང་ངེ་འཛིན་གྱི་སྒོ་བསྒོམ་པ་ལ་ནི་འཛུད་པ་མཛད། རྟོགས་པར་འགྱུར་བའི་སྒོ་ལ་ནི་

གནས་པར་མཛད། རང་བཞིན་ངེས་པར་རྟོགས་པ་ལ་ནི་གཞག་པར་མཛད། སྟོབས་དང་ལྡན་པས་ནི་ཁྱབ་པར་མཛད། འགྲོ་བ་ཐམས་ཅད་མཉམ་པ་ཉིད་དུ་ནི་སེམས་རྣམ་པར་དབྱེ་བ་མཛད་དོ། །ཞེས་ཐོས་ན། འཕགས་པའི་ཇི་ལྟར་བྱང་ཆུབ་སེམས་དཔས་བྱང་
ཆུབ་སེམས་དཔའི་སྤྱོད་པ་ལ་བརྩོན་པར་བགྱི། ཇི་ལྟར་སྦྱར་བར་བགྱི། ཇི་ལྟར་བརྩོན་པར་བགྱིས་ན། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་རྣམ་པར་དག་པར་འགྱུར་བ་བདག་ལ་བསྟན་དུ་གསོལ། དེ་ནས་ཚོང་དཔོན་བཏང་བརྗོད་ཀྱིས་དེའི་ཚེ་བྱང་ཆུབ་སེམས་དཔའི་
ཏིང་ངེ་འཛིན་གྱི་སྒོ་སངས་རྒྱས་ཀྱི་ཞིང་ཐམས་ཅད་ཡང་དག་པར་འདུ་བ་ཞེས་བྱ་བ་གཟུངས་ཀྱི་སྒོ་ཀློང་མཐའ་ཡས་པ་སྔོན་དུ་འགྲོ་བ་ལ། སྔོན་གྱི་དགེ་བའི་རྩ་བའི་ཤུགས་དང་། དེ་བཞིན་གཤེགས་པའི་བྱིན་གྱི་རླབས་དང་། འཇམ་དཔལ་གཞོན་ནུར་
གྱུར་པས་ཡང་དག་པར་བསམས་ཤིང་ཡེ་ཤེས་སྣང་བ་ཉེ་བར་བསྒྲུབས་པས་སྙོམས་པར་ཞུགས་སོ། །ཚོང་དཔོན་བཏང་བརྗོད་དེ་ལྟར་སྙོམས་པར་ཞུགས་མ་ཐག་ཏུ་གཟུགས་ཀྱི་ལུས་ཡོངས་སུ་དག་པ་རྣམ་པ་འདི་ལྟ་བུར་གནས་པར་གྱུར་ཏེ། ལུས་ཡོངས་སུ་དག་
པ་དེའི་མཐུས་ཕྱོགས་བཅུའི་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་སངས་རྒྱས་ཀྱི་ཞིང་ཡོངས་སུ་དག་པ་དང་བཅས། འཁོར་གྱི་དཀྱིལ་འཁོར་དང་བཅས། འོད་རྣམ་པར་དག་པ་དང་བཅས། སྔོན་སྤྱོད་པ་ལ་
ཞུགས་པ་དང་བཅས། སངས་རྒྱས་ཀྱི་རྣམ་པར་འཕྲུལ་པ་དང་བཅས། སྨོན་ལམ་གྱི་ཚོགས་དང་བཅས། སྤྱོད་པ་དང་འབྱུང་བའི་རྒྱན་རྣམ་པར་དག་པ་དང་བཅས། མངོན་པར་རྫོགས་པར་འཚང་རྒྱ་བ་ཡོངས་སུ་སྟོན་པ་དང་བཅས། ཆོས་ཀྱི་འཁོར་
ལོ་ཤིན་ཏུ་སྟོན་པ་དང་བཅས། སེམས་ཅན་ཡོངས་སུ་སྨིན་པར་མཛད་པ་དང་བཅས། ཆོས་ཀྱི་མུའི་མཐར་ཐུག་པ་དང་བཅས་པར་ཀུན་ཀྱང་ལུས་ཀྱི་ཁོངས་སུ་ཆུད་ཅིང་འདུས་པར་སྣང་སྟེ། དེ་དག་ཀྱང་ཕན་ཚུན་མ་འདྲེས་པ་དང་། ཕན་ཚུན་མཆོད་

པ་དང་། ཕན་ཚུན་ཤིན་ཏུ་རྣམ་པར་ཕྱེ་བ་དང་། ཕན་ཚུན་ཤིན་ཏུ་རྣམ་པར་གནས་པ་དང་། ཚུལ་སྣ་ཚོགས་སུ་ཞུགས་པ་དང་ཡང་དག་པ་ཇི་ལྟ་བ་བཞིན་དུ་རྣམ་པར་དམིགས་པ་དང་། སངས་རྒྱས་ཀྱི་ཞིང་རྒྱན་སྣ་ཚོགས་ཅན་མངའ་
བ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་སྣ་ཚོགས་ཀྱི་རྒྱན་དང་ལྡན་པ་དང་། སངས་རྒྱས་ཀྱི་རྣམ་པར་འཕྲུལ་པ་སྣ་ཚོགས་ཡོངས་སུ་སྟོན་པར་སྣང་ངོ་། །ཐེག་པ་སྣ་ཚོགས་རྣམ་པར་དགོད་པ་མཛད་པ་དང་། སྨོན་ལམ་གྱི་སྒོ་སྣ་ཚོགས་ཡོངས་སུ་
བརྗོད་པ་དང་། འཇིག་རྟེན་གྱི་ཁམས་ལ་ལ་ན་ནི་དགའ་ལྡན་གྱི་ཕོ་བྲང་དུ་སྐྱེས་ཤིང་སངས་རྒྱས་ཀྱི་འཕྲིན་ལས་ཐམས་ཅད་མཛད་པར་སྣང་ངོ་། །ལ་ལ་ན་ནི་དགའ་ལྡན་གྱི་ཕོ་བྲང་ནས་འཕོ་བ་དང་། ལ་ལ་ན་ནི་ཡུམ་གྱི་སྐུ་ན་བཞུགས་ཤིང་རྣམ་པར་འཕྲུལ་པ་སྣ་ཚོགས་
ཡོངས་སུ་སྟོན་པ་དང་། ལ་ལ་ན་ནི་སྐྱེ་བ་དང་། ལ་ལ་ན་ནི་བྱིས་པའི་རྩེད་མོ་སྟོན་པ་མཛད་པ་དང་། ལ་ལ་ན་ནི་བཙུན་མོའི་འཁོར་གྱི་ནང་ན་བཞུགས་པ་དང་། ལ་ལ་ན་ནི་མངོན་པར་འབྱུང་བ་དང་། ལ་ལ་ན་ནི་སྙིང་པོ་བྱང་ཆུབ་ཏུ་གཤེགས་ཏེ། རྣམ་པར་འཕྲུལ་པའི་རྒྱན་
ཆེན་པོས་བདུད་ཀྱི་སྡེ་ཕམ་པར་མཛད་པ་དང་། ལ་ལ་ན་ནི་ལྷ་དང་ཀླུ་དང་། གནོད་སྦྱིན་དང་། དྲི་ཟས་ཡོངས་སུ་བསྐོར་ཅིང་ཚངས་པའི་དབང་པོས་ཆོས་ཀྱི་འཁོར་ལོ་བསྐོར་བར་གསོལ་བ་གདབ་པ་དང་། ལ་ལ་ན་ནི་ཆོས་ཀྱི་འཁོར་ལོ་བསྐོར་བ་མཛད་པ་དང་། ལ་ལ་ན་
ནི་སེམས་ཅན་ཐམས་ཅད་ཀྱི་གནས་ན་བཞུགས་པ་དང་། ལ་ལ་ན་ནི་ཡོངས་སུ་མྱ་ངན་ལས་འདའ་བར་སྣང་ངོ་། །འཇིག་རྟེན་གྱི་ཁམས་ལ་ལ་ན་ནི་དེ་བཞིན་གཤེགས་པ་མྱ་ངན་ལས་འདས་པ་རྣམས་ཀྱིས་རིང་བསྲེལ་རྣམ་པར་དགོད་པར་སྣང་ངོ་། །སངས་རྒྱས་
ཀྱི་ཞིང་ལ་ལ་ན་ནི་ལྷ་དང་མི་རྣམས་དེ་བཞིན་གཤེགས་པའི་མཆོད་རྟེན་ལ་རྒྱན་གྱིས་ཀླུབས་པ་བྱེད་པར་སྣང་སྟེ། སངས་རྒྱས་བཅོམ་ལྡན་འདས་དེ་དག་གིས་སེམས་ཅན་གྱི་རིས་རྣམ་པ་ཐ་དད་པ་དང་། སེམས་ཅན་གྱི་འཇིག་རྟེན་གྱི་རྣམ་པ་ཐ་དད་པ་དང་། སེམས་

ཅན་གྱི་ལམ་རྣམ་པ་ཐ་དད་པ་དང་། སེམས་ཅན་གྱི་སྐྱེས་གནས་རྣམ་པ་ཐ་དད་པ་དང་། སེམས་ཅན་གྱི་ཚོགས་རྣམ་པ་ཐ་དད་པ་དང་། སེམས་ཅན་གྱི་དགེ་བའི་རྩ་བའི་རྒྱུད་རྣམ་པ་ཐ་དད་པ་དང་། སེམས་ཅན་གྱི་ལམ་གྱི་རྒྱུད་རྣམ་པ་ཐ་དད་པ་དང་། སེམས་ཅན་གྱི་བསམ་པའི་རྒྱུད་རྣམ་པ་ཐ་དད་པ་དང་།
སེམས་ཅན་གྱི་མོས་པའི་རྒྱུད་རྣམ་པ་ཐ་དད་པ་དང་། སེམས་ཅན་གྱི་དབང་པོའི་རྒྱུད་རྣམ་པ་ཐ་དད་པ་དང་། དུས་ཀྱི་རྒྱུད་རྣམ་པ་ཐ་དད་པ་དང་། སེམས་ཅན་གྱི་ལས་ཀྱི་བྱེ་བྲག་རྣམ་པ་ཐ་དད་པ་དང་། སེམས་ཅན་གྱི་ལས་མི་མཐུན་པ་རྣམ་པར་ཐ་དད་པ་དང་།
སེམས་ཅན་གྱི་འཇིག་རྟེན་རྣམ་པར་དབྱེ་བ་རྣམ་པ་ཐ་དད་པ་དང་། སེམས་ཅན་གྱི་ཚུལ་ལམ་དང་སྤྱོད་པ་རྣམ་པ་ཐ་དད་པ་ལ་རྣམ་པར་སྤྱོད་པ་དང་། སེམས་ཅན་རྒྱ་མཚོ་བསམ་པ་དང་སྦྱོར་བའི་རྣམ་པ་ཐ་དད་པ་དང་དབང་པོ་མི་མཐུན་པ་སྣ་ཚོགས་རྣམ་པར་དག་པ་དང་།
ཉོན་མོངས་པ་དང་། བག་ཆགས་སྣ་ཚོགས་བག་ལ་ཉལ་བར་གྱུར་པའི་སེམས་ཅན་འབྱམ་ཀླས་པ་རྣམས་ལ་སངས་རྒྱས་ཀྱི་རྣམ་པར་འཕྲུལ་པ་རྣམ་པ་སྣ་ཚོགས་ཡོངས་སུ་བསྟན་པ་དང་། ཡུལ་སྣ་ཚོགས་ཀྱི་ངེས་པའི་ཚིག་དང་། དབྱངས་ཀྱི་ཡན་ལག་དང་གསུང་
རྣམ་པ་སྣ་ཚོགས་སུ་བསྒྲུབས་པ་དང་། མདོ་སྡེ་སྣ་ཚོགས་ཀྱི་ཚུལ་རབ་ཏུ་བརྗོད་པ་དང་། གཟུངས་ཀྱི་སྒོ་རྣམ་པ་ཐ་དད་པའི་རྒྱུད་དང་སོ་སོ་ཡང་དག་པར་རིག་པའི་ཚུལ་གྱི་གཞུང་སྣ་ཚོགས་དང་། འཕགས་པའི་བདེན་པའི་མིང་རྒྱ་མཚོའི་རྒྱུད་རྣམ་པ་སྣ་ཚོགས་
དང་། སངས་རྒྱས་ཀྱི་ཁྱུ་མཆོག་དང་སེང་གེའི་ང་རོ་རབ་ཏུ་བསྒྲགས་པ་དང་། སེམས་ཅན་གྱི་དགེ་བའི་རྩ་བ་སྣ་ཚོགས་བསྟན་པའི་ཆོ་འཕྲུལ་ཡོངས་སུ་བསྟན་པ་དང་། དྲན་པའི་སྒོ་སྣ་ཚོགས་ཅན་ཤིན་ཏུ་བསྟན་པའི་རྣམ་པར་འཕྲུལ་པ་དང་། བྱང་ཆུབ་སེམས་
དཔའ་ལུང་བསྟན་པའི་སེང་གེའི་ང་རོ་སྣ་ཚོགས་དང་། དེ་བཞིན་གཤེགས་པའི་ཆོས་ཀྱི་འཁོར་ལོའི་མཐུ་ཕྱུང་བ་རྣམ་པ་སྣ་ཚོགས་ཀྱི་འཁོར་གྱི་དཀྱིལ་འཁོར་མཐའ་དང་དབུས་མེད་པ་མཐའ་ཡས་པར་རྣམ་པར་ཐ་དད་པ་ཕན་ཚུན་མཆོད་པ་དང་། རྣམ་པར་དག་པའི་འཁོར་

གྱི་དཀྱིལ་འཁོར་སྣ་ཚོགས་ཡངས་པ་དང་། འཁོར་གྱི་དཀྱིལ་འཁོར་ཤིན་ཏུ་ཕྲ་བར་འདུས་པ་དང་། དཔག་ཚད་གཅིག་གི་ཚད་ཙམ་དང་། དཔག་ཚད་བཅུའི་ཚད་ཙམ་དང་། དཔག་ཚད་བརྒྱའི་ཚད་ཙམ་ནས། འཁོར་གྱི་དཀྱིལ་འཁོར་
འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཚད་ཙམ་དུ་སངས་རྒྱས་བཅོམ་ལྡན་འདས་དེ་དག་གིས། དེ་བཞིན་གཤེགས་པའི་གསུང་དབྱངས་ཀྱི་ཡན་ལག་དང་། སྒྲ་སྐད་ཐམས་ཅད་
ཀྱི་རྗེས་སུ་འགྲོ་བས་ཆོས་ཇི་སྙེད་དུ་བསྟན་པ་དེ་དག་ཐམས་ཅད་ཀྱང་། ཚོང་དཔོན་གྱི་བུ་ནོར་བཟངས་ཀྱིས་ཐོས་སོ་བླངས་སོ། །ཡང་དག་པར་བཟུང་ངོ་བསམས་སོ། །སངས་རྒྱས་ཀྱི་རྣམ་པར་འཕྲུལ་པ་དེ་དག་ཀྱང་མཐོང་ངོ་། །བྱང་ཆུབ་
སེམས་དཔའི་ཏིང་ངེ་འཛིན་གྱི་ཁྱུ་མཆོག་གི་མཐུ་ཕྱུང་བ་དེ་དག་ཀྱང་མཐོང་ངོ་། །དེ་ནས་ཚོང་དཔོན་བཏང་བརྗོད་དྲན་ཞིང་ཤེས་བཞིན་དུ་ཏིང་ངེ་འཛིན་དེ་ལས་ལངས་ནས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་བོ་ནི་དེ་
བཞིན་གཤེགས་པའི་རྣམ་པར་ཐར་པ་ཐོགས་པ་མེད་པའི་རྒྱན་ཅེས་བྱ་བ་ཡོངས་སུ་བླངས་ཤིང་འཛིན་པ་སྟེ། རིགས་ཀྱི་བུ་དེ་ལྟར་ཁོ་བོ་དེ་བཞིན་གཤེགས་པའི་རྣམ་པར་ཐར་པ་ཐོགས་པ་མེད་པའི་རྒྱན་དེ་ལ་རྟོག་ཅིང་དཔྱོད་པའི་ཚེ། ཤར་ཕྱོགས་ཀྱི་འཇིག་
རྟེན་གྱི་ཁམས་འཛམ་བུ་ཆུ་ཀླུང་གི་མདོག་དང་ལྡན་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐར་མའི་དབང་ཕྱུག་རྒྱལ་པོ་ཞེས་བྱ་བ་བྱང་ཆུབ་སེམས་དཔའ་རྣམ་པར་སྣང་བའི་སྙིང་པོ་ལ་སོགས་པ། བྱང་ཆུབ་སེམས་
དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། །ལྷོ་ཕྱོགས་ཀྱི་འཇིག་རྟེན་གྱི་ཁམས་སྟོབས་ཐམས་ཅད་ཀྱི་ཤུགས་དང་ལྡན་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་ཀུན་

ཏུ་རྣམ་པར་ཡངས་པ་ཞེས་བྱ་བ་བྱང་ཆུབ་སེམས་དཔའ་བསམ་པའི་རྒྱལ་པོ་ལ་སྩོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། །ནུབ་ཕྱོགས་ཀྱི་འཇིག་རྟེན་གྱི་ཁམས་སྤོས་
ཐམས་ཅད་ཀྱི་འོད་དང་ལྡན་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་མར་མེའི་རྒྱལ་པོ་ཞེས་བྱ་བ། བྱང་ཆུབ་སེམས་དཔའ་ཆགས་པ་མེད་པའི་སེམས་ལ་སྩོགས་པ་བྱང་ཆུབ་སེམས་དཔའི་འཁོར་གྱི་དཀྱིལ་
འཁོར་ཐམས་ཅད་དང་། ཐབས་གཅིག་ཏུ་བཞུགས་པ་ཡང་མིག་ལམ་དུ་སྣང་ངོ་། །བྱང་ཕྱོགས་ཀྱི་འཇིག་རྟེན་གྱི་ཁམས་ངུར་སྨྲིག་གི་རྒྱལ་མཚན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་རབ་ཏུ་འདུལ་བ་ཞེས་བྱ་བ་
བྱང་ཆུབ་སེམས་དཔའ་རྡོ་རྗེའི་གོམ་པས་རྣམ་པར་གནོན་པ་ལ་སོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པ་ཡང་མིག་ལམ་དུ་སྣང་ངོ་། །བྱང་ཤར་གྱི་ཕྱོགས་མཚམས་ཀྱི་འཇིག་རྟེན་གྱི་
ཁམས་རིན་པོ་ཆེ་ཐམས་ཅད་རབ་ཏུ་འབར་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་དམིགས་པའི་སྤྱན་རྣམ་པར་དམིགས་པ་ཞེས་བྱ་བ་བྱང་ཆུབ་སེམས་དཔའ་དམིགས་པ་མེད་པར་ཤིན་ཏུ་སྤྲུལ་བ་ལ་སྩོགས་
པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པ་ཡང་མིག་ལམ་དུ་སྣང་ངོ་། །ཤར་ལྷོའི་ཕྱོགས་མཚམས་ཀྱི་འཇིག་རྟེན་གྱི་ཁམས་སྤོས་ཀྱི་འོད་ཟེར་རབ་ཏུ་སྣང་བ་ན། དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་ཀྱི་མར་མེ་ཞེས་བྱ་བ་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་གཞི་ཐ་དད་པའི་དཔལ་གྱི་རྒྱལ་པོ་ལ་སྩོགས་པ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་

གཅིག་ཏུ་བཞུགས་པའང་མིག་ལམ་དུ་སྣང་ངོ་། །ལྷོ་ནུབ་ཀྱི་ཕྱོགས་མཚམས་ཀྱི་འཇིག་རྟེན་གྱི་ཁམས་ཉི་མའི་འོད་གཟེར་ལྟར་སྣང་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒོ་ཀུན་ནས་ཡེ་ཤེས་
རྣམ་པར་སྣང་བའི་དབྱངས་ཞེས་བྱ་བ་བྱང་ཆུབ་སེམས་དཔའི་མེ་ཏོག་གི་འོད་ཀུན་ནས་འཕྲོ་བར་གཙུག་ཕུད་རབ་ཏུ་འཕྱང་བ་ལ་སོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་།
ནུབ་བྱང་གི་ཕྱོགས་མཚམས་ཀྱི་འཇིག་རྟེན་གྱི་ཁམས་སྤོས་ཀྱི་རྒྱན་ཡིད་དུ་འོང་བའི་དགེ་བའི་སྙིང་པོ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་རྒྱ་མཚོ་ཚད་མེད་པའི་འོད་ཅེས་བྱ་བ། བྱང་ཆུབ་སེམས་
དཔའ་ལུས་ཀྱི་འོད་ཟེར་ཐོགས་པ་མེད་པའི་གཟི་བརྗིད་རྒྱལ་པོ་བློ་གྲོས་ལ་སྩོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། །འོག་གི་ཕྱོགས་ཀྱི་འཇིག་རྟེན་གྱི་ཁམས་རིན་པོ་ཆེའི་
སེང་གེ་སྣང་ཞིང་འབར་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་ཆོས་ཀྱི་དབྱིངས་སུ་སྣང་བ་ཞེས་བྱ་བ་བྱང་ཆུབ་སེམས་དཔའ་ཆོས་ཀྱི་དབྱིངས་འོད་འཕྲོ་ཞིང་རྣམ་པར་སྣང་བར་བྱུང་བའི་བློ་གྲོས་ལ་སོགས་པ་བྱང་ཆུབ་
སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། །སྟེང་གི་ཕྱོགས་ཀྱི་འཇིག་རྟེན་གྱི་ཁམས་མཚན་གྱི་འོད་རྣམ་པར་སྣང་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཡོན་ཏན་གྲགས་པ་ཐོགས་པ་མེད་པའི་རྣམ་པར་ཐར་པའི་འོད་ཀྱི་རྒྱལ་པོ་ཞེས་བྱ་བ་བྱང་ཆུབ་སེམས་དཔའ་སྟོབས་དང་། བརྩོན་འགྲུས་ཐོགས་པ་མེད་པའི་བློ་གྲོས་ལ་སོགས་པ། །བྱང་ཆུབ་སེམས་དཔའི་འཁོར་གྱི་དཀྱིལ་འཁོར་

ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། །རིགས་ཀྱི་བུ་དེ་ལྟར་དེ་བཞིན་གཤེགས་པ་འདི་དག་ལ་སོགས་པ། ཕྱོགས་བཅུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། སངས་རྒྱས་ཀྱི་ཞིང་བཅུའི་
རྡུལ་ཤིན་ཏུ་ཕྲ་བ་སྙེད་མཐོང་ཡང་དེ་བཞིན་གཤེགས་པ་དེ་དག་ཀྱང་འདིར་མི་བྱོན། ཁོ་བོ་ཡང་དེར་འགྲོ་བ་མེད་དེ་ནམ་འདོད་པ་དེ་ན་བདེ་བ་ཡོད་པའི་འཇིག་རྟེན་གྱི་ཁམས་ན། དེ་བཞིན་གཤེགས་པ་འོད་སྣང་མཐའ་ཡས་པ་བཞུགས་པ་འང་མཐོང་ངོ་། །ཙན་དན་
ཡོད་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་འོད་སྣང་རྡོ་རྗེ་བཞུགས་པའང་མཐོང་ངོ་། །སྤོས་དྲི་ཡོད་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་འོད་སྣང་རིན་ཆེན་བཞུགས་པ་ཡང་མཐོང་ངོ་། །པད་མོ་ཡོད་པའི་འཇིག་རྟེན་གྱི་ཁམས་ན།
དེ་བཞིན་གཤེགས་པ་འོད་སྣང་རིན་ཆེན་པད་མོ་བཞུགས་པའང་མཐོང་ངོ་། །གསེར་ཡོད་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་འོད་སྣང་ཞི་བ་བཞུགས་པའང་མཐོང་ངོ་། །མངོན་པར་དགའ་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་མི་སྒུལ་
བ་བཞུགས་པའང་མཐོང་ངོ་། །ཤིན་ཏུ་བརྟན་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་སེང་གེ་བཞུགས་པའང་མཐོང་ངོ་། །མེ་ལོང་གི་དཀྱིལ་འཁོར་ལྟར་སྣང་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་བློ་གྲོས་ཟླ་བ་བཞུགས་པ་ཡང་མཐོང་
ངོ་། །རིན་ཆེན་དཔལ་གྱི་དད་པས་བརྒྱན་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་རྣམ་པར་སྣང་མཛད་བཞུགས་པ་ཡང་མཐོང་ངོ་། །རིགས་ཀྱི་བུ་དེ་ལྟར་ཁོ་བོས་ནི་ཕྱོགས་གང་དང་གང་ན་འཇིག་རྟེན་གྱི་ཁམས་གང་དང་གང་གིས་དེ་བཞིན་གཤེགས་པ་གང་
དང་གང་མཐོང་བར་འདོད་པའི་དེ་བཞིན་གཤེགས་པ་དེ་དང་དེ་དག་ཀྱང་མཐོང་ངོ་། །དུས་གང་དང་གང་དུ་དམིགས་པ་གང་དང་གང་ལ་སྔོན་གྱི་སྤྱོད་པ་གང་དང་གང་གིས་དེ་བཞིན་གཤེགས་པ་མཐོང་བར་འདོད་པ་དང་། རྣམ་པར་འཕྲུལ་པ་གང་དང་གང་གི་དོན་དང་།

སེམས་ཅན་འདུལ་བ་གང་དང་གང་གི་དོན་དུ་དེ་བཞིན་གཤེགས་པ་གང་དང་གང་མཐོང་བར་འདོད་པའི་དེ་བཞིན་གཤེགས་པ་དེ་དང་དེ་དག་ཀྱང་མཐོང་སྟེ། དེ་བཞིན་གཤེགས་པ་དེ་དག་ཀྱང་འདིར་གཤེགས་པ་མ་ཡིན། བདག་ཀྱང་དེར་ཕྱིན་
པ་མ་ཡིན་ནོ། །རིགས་ཀྱི་བུ་དེ་ལྟར་ཁོ་བོས་དེ་བཞིན་གཤེགས་པ་རྣམས་ག་ལས་ཀྱང་བྱོན་པ་མེད་པར་ཤེས་ལ། རང་གི་ལུས་ཀྱང་གར་ཡང་འགྲོ་བ་མེད་པར་ཤེས་པ་དང་། དེ་བཞིན་གཤེགས་པ་རྣམས་རྣམ་པར་དམྱིགས་པ་ཡང་རྨི་ལམ་ལྟ་
བུར་ཤེས་ལ། རང་གི་སེམས་རྣམ་པར་དམིགས་པ་ཡང་རྨི་ལམ་དང་འདྲ་བར་རྒྱུ་བར་ཤེས་པ་དང་། དེ་བཞིན་གཤེགས་པ་རྣམས་རྣམ་པར་དམྱིགས་པ་ཡང་གཟུགས་བརྙན་ལྟ་བུར་ཤེས་ལ་རང་གི་སེམས་རྣམ་པར་དམྱིགས་པ་ཡང་ཆུའི་སྣོད་གསལ་
བ་ལྟ་བུར་ཤེས་པ་དང་། དེ་བཞིན་གཤེགས་པ་རྣམས་རྣམ་པར་དམིགས་པ་ཡང་སྒྱུ་མས་བྱས་པའི་གཟུགས་བརྙན་ལྟ་བུར་ཤེས་ལ་རང་གི་སེམས་རྣམ་པར་དམྱིགས་པ་ཡང་སྒྱུ་མ་ལྟ་བུར་ཤེས་པ་དང་། དེ་བཞིན་གཤེགས་པའི་གསུང་ཡང་སྒྲ་བརྙན་
རིའི་བྲག་ཆ་ལྟ་བུར་བརྗོད་པར་ཤེས་ལ་རང་གི་སེམས་རྣམ་པར་དམྱིགས་པ་ཡང་སྒྲ་བརྙན་ལྟ་བུར་ཤེས་པས་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ཐམས་ཅད་ནི་རང་གི་སེམས་ཀྱི་བྱིན་གྱི་རླབས་ལས་འབྱུང་ངོ་། །ཞེས་བྱ་བར་རྗེས་སུ་རྟོགས་
ཤིང་ཁོང་དུ་ཆུད་དོ། །སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་ཀྱང་རང་གི་སེམས་ཀྱི་བྱིན་གྱི་རླབས་སོ། །བྱང་ཆུབ་སེམས་དཔའི་སྤྱོད་པ་ཡང་རང་གི་སེམས་ཀྱི་བྱིན་གྱི་རླབས་སོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་
བ་དང་། གདུལ་བ་ཡང་རང་གི་སེམས་ཀྱི་བྱིན་གྱི་རླབས་སོ། །བྱང་ཆུབ་སེམས་དཔའི་སྨོན་ལམ་མངོན་པར་བསྒྲུབ་པ་ཡང་རང་གི་སེམས་ཀྱི་བྱིན་གྱི་རླབས་སོ། །ཐམས་ཅད་མཁྱེན་པ་ཉིད་ཀྱི་གྲོང་ཁྱེར་དུ་ཕྱིན་པར་བྱ་བ་ཡང་རང་གི་སེམས་ཀྱི་

བྱིན་གྱི་རླབས་སོ། །རྣམ་པར་ཐར་པ་བསམ་གྱིས་མི་ཁྱབ་པས་རྣམ་པར་རྩེ་བ་ཡང་རང་གི་སེམས་ཀྱི་བྱིན་གྱི་རླབས་སོ། །སངས་རྒྱས་ཀྱི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་ཡང་རང་གི་སེམས་ཀྱི་བྱིན་གྱི་རླབས་སོ། །ཆོས་ཀྱི་
དབྱིངས་ཀུན་ནས་འདུས་པར་ཁྱུ་མཆོག་གི་མཐུ་དབྱུང་ཞིང་རྣམ་པར་འཕྲུལ་པ་ཡང་རང་གི་སེམས་ཀྱི་བྱིན་གྱི་རླབས་སོ། །བསྐལ་པ་ཐམས་ཅད་ཤིན་ཏུ་ཕྲ་བར་བསྡུ་བའི་ཡེ་ཤེས་ཀྱང་རང་གི་སེམས་ཀྱི་བྱིན་གྱི་རླབས་སོ། །ཞེས་བྱ་བར་ཁོང་དུ་ཆུད་
ཅིང་རྗེས་སུ་རྟོགས་སོ། །རིགས་ཀྱི་བུ་དེ་ལ་ཁོ་བོ་འདི་སྙམ་དུ་སེམས་ཏེ། དགེ་བའི་རྩ་བ་ཐམས་ཅད་ཀྱིས་ནི་རང་གི་སེམས་ཉིད་ཉེ་བར་བརྟན་པར་བྱའོ། །ཆོས་ཀྱི་སྤྲིན་གྱིས་ནི་རང་གི་སེམས་ཉིད་ཡོངས་སུ་བརླན་པར་བྱའོ། །སྒྲིབ་པའི་ཆོས་རྣམས་
ལས་ནི་རང་གི་སེམས་ཉིད་ཡོངས་སུ་སྦྱང་བར་བྱའོ། །བརྩོན་འགྲུས་ཀྱིས་ནི་རང་གི་སེམས་ཉིད་བརྟན་པར་བྱའོ། །བཟོད་པས་ནི་རང་གི་སེམས་ཉིད་མཉམ་པར་བྱའོ། །ཡེ་ཤེས་ཁོང་དུ་ཆུད་པར་བྱ་བ་ལ་ནི་རང་གི་སེམས་ཉིད་གཞོལ་
བར་བྱའོ། །ཤེས་རབ་ཀྱིས་ནི་རང་གི་སེམས་ཉིད་ཡོངས་སུ་སྦྱང་བར་བྱའོ། །དབང་རྣམས་ལ་ནི་རང་གི་སེམས་ཉིད་མངོན་པར་བསྒྲུབ་པར་བྱའོ། །སངས་རྒྱས་དང་མཉམ་པ་ཉིད་ལ་ནི་རང་གི་སེམས་ཉིད་རྒྱས་པར་བྱའོ། །དེ་བཞིན་
གཤེགས་པའི་སྟོབས་བཅུས་ནི་རང་གི་སེམས་ཉིད་སྣང་བར་བྱའོ་སྙམ་མོ། །རིགས་ཀྱི་བུ་ཁོ་བོ་ནི་དེ་བཞིན་གཤེགས་པའི་རྣམ་པར་ཐར་པ་ཐོགས་པ་མེད་པའི་རྒྱན་འདི་ཤེས་ཏེ། བླངས་ཤིང་ཡོངས་སུ་འཛིན་པར་ཟད་ན། ཁོ་བོས་བྱང་ཆུབ་སེམས་
དཔའ་ཆགས་པ་མེད་པའི་སེམས་དང་ལྡན་པ་ཆགས་པ་མེད་པ་རྣམ་པར་སྤྱོད་པའི་སྤྱོད་ཡུལ་དང་ལྡན་པ། ད་ལྟར་བྱུང་བའི་སངས་རྒྱས་ཐམས་ཅད་མངོན་སུམ་དུ་བཞུགས་པའི་ཏིང་ངེ་འཛིན་རབ་ཏུ་ཐོབ་པ། མྱ་ངན་ལས་འདའ་བ་མྱེད་པའི་མཐའ་ལ་གནས་པའི་རྫོགས་པའི་

བྱང་ཆུབ་ཀྱི་སྒོའི་ཏིང་ངེ་འཛིན་རབ་ཏུ་ཐོབ་པ། དུས་གསུམ་མཉམ་པ་ཉིད་དུ་གྱུར་པ། གཞི་ཀུན་ནས་ཕྱེད་པའི་ཏིང་ངེ་འཛིན་གྱི་སྤྱོད་ཡུལ་གྱི་ཚུལ་ཤེས་པ། སངས་རྒྱས་ཀྱི་ཞིང་ཐམས་ཅད་དུ་ལུས་རྣམ་པར་བཀྲམ་པ། སངས་རྒྱས་
ཀྱི་ཡུལ་ཐ་མྱི་དད་པ་ལ་རྣམ་པར་སྤྱོད་པ། ཕྱོགས་ཐམས་ཅད་དུ་མངོན་པར་ཕྱོགས་པའི་སྤྱོད་ཡུལ་དང་ལྡན་པ། ཕྱིན་ཕྱོགས་མེད་པའི་ཡེ་ཤེས་ཀྱི་དཀྱིལ་འཁོར་གྱིས་རྣམ་པར་ལྟ་བ་དེ་དག་གི་ལུས་ལ་འཇིག་རྟེན་གྱི་ཁམས་ཐམས་ཅད་འཇིག་ཅིང་འདུ་
བར་སྣང་ཡང་དེ་དག་ལ་བདག་དང་འཇིག་རྟེན་གྱི་ཁམས་སུ་གཉིས་ཀྱི་འདུ་ཤེས་མེད་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་འཛམ་བུའི་གླིང་གི་མགོ་འགེབས་པས་རྒྱས་
པར་འགེངས་པ་ཞེས་བྱ་བ་ཡོད་དེ། དེ་ན་དགེ་སློང་རྒྱ་མཚོའི་རྒྱལ་མཚན་ཅེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །
དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཚོང་དཔོན་བཏང་བརྗོད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཚོང་དཔོན་བཏང་བརྗོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། ཚོང་དཔོན་བཏང་བརྗོད་
ཀྱི་ཡོན་ཏན་གྲངས་མེད་པ་ལ་སྙན་པར་བརྗོད་དེ། བརྟག་པ་དང་། མོས་པར་བྱ་བ་དང་། མི་བཏང་བར་བྱ་བ་སེམས་ཤིང་དུ་སྟེ་སྨྲེ་སྔགས་བཏོན་ནས། དགེ་བའི་བཤེས་གཉེན་སྡུག་པར་སེམས་ཤིང་དགེ་བའི་བཤེས་གཉེན་གྱི་རྗེས་སུ་འབྲང་བ་དང་། དགེ་
བའི་བཤེས་གཉེན་ལ་བསྙེན་བཀུར་བར་མོས་པ་དང་། དགེ་བའི་བཤེས་གཉེན་གྱིས་བསྒོ་བ་དང་། མྱི་འགལ་བར་བྱེད་པ་དང་ཐམས་ཅད་མཁྱེན་པ་ཉིད་དགེ་བའི་བཤེས་གཉེན་ལ་རག་ལུས་པར་རྗེས་སུ་བལྟ་བ་དང་། དགེ་བའི་བཤེས་གཉེན་ལ་རྗེས་སུ་

བསམ་པ་དང་། དགེ་བའི་བཤེས་གཉེན་ལ་གཡོ་སྒྱུ་མེད་པར་སྤྱོད་པ་དང་། དགེ་བའི་བཤེས་གཉེན་གྱི་སེམས་ཀྱི་དབང་དུ་འགྲོ་བར་བྱ་བ་དང་ལྡན་པས་དགེ་བའི་བཤེས་གཉེན་རྣམས་གནོད་པ་ཐམས་ཅད་ཡོངས་སུ་སྤོང་བར་བྱེད་པས་མ་ཙམ་དུ་སེམས།
དགེ་བའི་རྩ་བ་ཡོངས་སུ་བསྐྱེད་པས་ཕ་ཙམ་དུ་སེམས་ཤིང་ཚོང་དཔོན་བཏང་བརྗོད་ཀྱི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཚོང་དཔོན་བཏང་བརྗོད་ཀྱིས་བསྟན་པ་དེ་ལ་རྗེས་སུ་སེམས་ཤིང་། ཚོང་དཔོན་བཏང་བརྗོད་ཀྱི་གདམས་ངག་
ལ་ནན་ཏན་བྱ་བ་དང་། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་རྗེས་སུ་འབྲང་བར་བྱ་བ་དང་། བྱང་ཆུབ་སེམས་དཔའི་ཡེ་ཤེས་སྣང་བ་བསམ་གྱིས་མི་ཁྱབ་པ་རྗེས་སུ་དྲན་པར་བྱ་བ་དང་། ཆོས་ཀྱི་དབྱིངས་ལ་འཇུག་
ཅིང་འབབ་པ་བསམ་གྱིས་མི་ཁྱབ་པ་ཁོང་དུ་ཆུད་པར་བྱ་བ་དང་། བྱང་ཆུབ་སེམས་དཔའ་རྣམས་ཀྱི་ཡོངས་སུ་འདུ་བར་བྱ་བའི་ཚུལ་བསམ་གྱིས་མི་ཁྱབ་པ་ལ་འཇུག་པར་བྱ་བ་དང་། དེ་བཞིན་གཤེགས་པའི་རྣམ་པར་འཕྲུལ་པ་བསམ་གྱིས་མི་ཁྱབ་
པའི་རྗེས་སུ་བལྟ་བར་བྱ་བ་དང་། སངས་རྒྱས་ཀྱི་ཞིང་ཡོངས་སུ་བསྡུ་བ་བསམ་གྱིས་མི་ཁྱབ་པ་ལ་མོས་པར་བྱ་བ་དང་། སངས་རྒྱས་ཀྱི་བྱིན་གྱི་རླབས་ཀྱི་རྒྱན་རྗེས་སུ་སྦྱང་བ་དང་། བྱང་ཆུབ་སེམས་དཔའི་ཏིང་ངེ་འཛིན་དང་། རྣམ་པར་ཐར་
པའི་རྣམ་པར་དགོད་པ་དང་། ཁྱུ་མཆོག་གི་མཐུ་ཕྱུང་བ་བསམ་གྱིས་མྱི་ཁྱབ་པ་ལ་ཡོངས་སུ་བརྟག་པ་དང་། འཇིག་རྟེན་གྱི་ཁམས་ཐ་དད་པ་ལ་སྒྲིབ་པ་མེད་པ་བསམ་གྱིས་མི་ཁྱབ་པ་ལ་འཇུག་པ་དང་། བྱང་ཆུབ་སེམས་དཔའི་ལས་ལ་བསམ་པ་
ཤིན་ཏུ་བརྟན་པ་དེ་ལ་ནན་དུ་བྱ་བ་དང་། བྱང་ཆུབ་སེམས་དཔའི་ལས་དང་། སྨོན་ལམ་གྱི་རྒྱུད་བསམ་གྱིས་མི་ཁྱབ་པ་དེའི་རྗེས་སུ་སྤྱོད་ཅིང་མཐར་གྱིས་འཛམ་བུ་གླིང་གི་མགོ་འགེབས་པས་རྒྱས་པར་འགེངས་པ་ཞེས་བྱ་བ་གང་ན་བ་དེར་ཕྱིན་ནས།

དགེ་སློང་རྒྱ་མཚོའི་རྒྱལ་མཚན་ཚོལ་ཚོལ་བ་ལས། འཆག་པའི་གནས་ཤིག་གི་འཆག་པའི་མཐར་འདུག་སྟེ། ཏིང་ངེ་འཛིན་ལ་མཉམ་པར་བཞག་ནས་དབུགས་ཕྱི་ནང་དུ་རྒྱུ་བ་མེད་ཅིང་མྱི་གཡོ་ལ་བྱེད་པ་མེད་ཅིང་ལུས་དྲང་པོར་བསྲང་
སྟེ། དྲན་པ་མངོན་དུ་བྱས་ནས་ཏིང་ངེ་འཛིན་གྱི་རྣམ་པར་འཕྲུལ་པ་བསམ་གྱིས་མྱི་ཁྱབ་པར་རྣམ་པར་འཕྲུལ་ཞིང་གཡས་གཡོན་དང་། སྟེང་ལོགས་སུ་ལུས་མཐའ་ཡས་ལ་ཚད་མེད་ཅིང་བསམ་གྱིས་མི་ཁྱབ་པ་སྤྱི་གཙུག་བལྟར་མི་མཐོང་བ། ཁ་དོག་
དུ་མའི་ལུས་དང་ལྡན་པ་སེམས་ཀྱི་སྐད་ཅིག་རེ་རེ་ལ་ཁ་དོག་རྣམ་པ་ཐ་དད་པ་ཚད་མེད་པ་ཡོངས་སུ་སྟོན་པ་དེ། དེ་དེ་ལྟར་མཉམ་པར་བཞག་ཅིང་ཟབ་ལ་ཞི་སྟེ། གཡོ་བ་མེད་ཅིང་དམིགས་པ་མེད་ལ་དགའ་བས་ལུས་མཐོ་བར་གྱུར་པ་དེའི་བ་སྤུའི་སྒོ་ཐམས་ཅད་ནས་
བྱང་ཆུབ་སེམས་དཔའི་རྣམ་པར་ཐར་པས་རྣམ་པར་འཕྲུལ་པ་བསམ་གྱིས་མི་ཁྱབ་པ་རབ་ཏུ་འགྱེད་པར་བྱེད་ཅིང་འདུག་པ་མཐོང་ངོ་། །རྣམ་པར་ཐར་པས་རྣམ་པར་འཕྲུལ་པ་དེའི་མཐུས་སེམས་ཀྱི་སྐད་ཅིག་རེ་རེ་ལ་སེམས་ཅན་ཐམས་ཅད་ཡོངས་སུ་སྨིན་
པར་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་མཆོད་པ་སྦྱར་བ་དང་། སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བ་དང་། སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་རྣམ་པར་བཟློག་པ་དང་། ངན་སོང་གི་ལམ་ཐམས་
ཅད་ཡོངས་སུ་གཅད་པ་དང་། སེམས་ཅན་ཐམས་ཅད་ཀྱི་བདེ་བའི་ལམ་གྱི་སྒོ་དབྱེ་བ་དང་། སེམས་ཅན་ཐམས་ཅད་ཀྱི་ཉོན་མོངས་པའི་གདུང་བ་རབ་ཏུ་ཞི་བར་བྱ་བ་དང་། སེམས་ཅན་ཐམས་ཅད་ཀྱི་མི་ཤེས་པའི་སྒྲིབ་པ་རྣམ་པར་གཏོར་བ་དང་།
སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ལ་དགོད་པའི་ཕྱིར་རྣམ་པར་འཕྲུལ་པའི་བྱེ་བྲག་རྣམ་པ་སྣ་ཚོགས་མཐའ་ཡས་པས་ཆོས་ཀྱི་དབྱིངས་ཐམས་ཅད་རྒྱས་པར་འགེངས་ཤིང་དེའི་རྐང་པའི་མཐིལ་གཉིས་ནས། ཚོང་དཔོན་གྱི་ཚོགས་བཀུར་

སྟི་དང་། རིམ་གྲོ་སྣ་ཚོགས་བྱེད་པ་འཇིག་རྟེན་གྱི་ཁམས་ཐམས་ཅད་དུ་གཏོགས་པའི་ཚོང་དཔོན་དང་འདྲ་བའི་གཟུགས་དང་ལྡན་པ་ལྷག་པའི་ཡུལ་ལ་སྤྱོད་པ། རྒྱན་སྣ་ཚོགས་ཀྱིས་ལུས་ཤིན་ཏུ་ཀླུབས་པ། ཐོར་ཚུགས་དང་གཙུག་གི་རིན་པོ་ཆེ་དང་།
ཅོད་པན་སྣ་ཚོགས་ཐོགས་པ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱིས་པ་བྱེ་བ་འཕྱེས་པའི་འཁོར་དང་ལྡན་པ་བྱུང་བ་མཐོང་ངོ་། །བྲམ་ཟེ་དང་ཁྱིམ་བདག་མང་པོའི་བཟའ་བཏུང་རྣམ་པ་མང་པོ་དང་། རོའི་ཡན་ལག་སྣ་ཚོགས་སུ་སྦྱར་བ་
ཐམས་ཅད་དང་། རྒྱན་ཐམས་ཅད་དང་། གོས་ཐམས་ཅད་དང་། མེ་ཏོག་ཐམས་ཅད་དང་། ཕྲེང་བ་ཐམས་ཅད་དང་། སྤོས་ཐམས་ཅད་དང་། བྱུག་པ་ཐམས་ཅད་དང་། འདོད་པའི་ཡོད་བྱད་ཐམས་ཅད་དང་། རིན་པོ་ཆེ་ཐམས་ཅད་དང་། གནས་ཐམས་
ཅད་དང་། སྣོད་རྣམ་པ་སྣ་ཚོགས་ཐམས་ཅད་དང་། ཡོ་བྱད་རྣམ་པ་སྣ་ཚོགས་ཐམས་ཅད་ཀྱིས་སེམས་ཅན་དབུལ་པོ་རྣམས་ཡོངས་སུ་སྡུད་ཅིང་། འགྲོ་བ་སྡུག་བསྔལ་བ་རྣམས་དབུགས་དབྱུང་བ་དང་། སེམས་ཅན་གྱི་སེམས་ཚིམ་པར་བྱ་བ་དང་།
སེམས་ཅན་གྱི་བསམ་པ་རྣམ་པར་དག་པར་བྱ་བ་དང་། སེམས་ཅན་རྣམས་བྱང་ཆུབ་ཏུ་ཡོངས་སུ་སྨིན་པར་བྱེད་ཅིང་ཕྱོགས་བཅུ་བཀང་སྟེ། འདོང་བ་མཐོང་ངོ་། །པུས་མོའི་ལྷ་ང་གཉིས་ན་རྒྱལ་རིགས་མཁས་པའི་གཟུགས་དང་། བྲམ་ཟེ་མཁས་
པའི་གཟུགས་དང་། འཇིག་རྟེན་ན་མཁས་པའི་གཟུགས་དང་། བཟོ་སྣ་ཚོགས་ལ་མཁས་པའི་གཟུགས་དང་། མིའི་འགྲོ་བའི་རྒྱུད་ན་མཁས་པའི་གཟུགས་དང་། འཇིག་རྟེན་པ་དང་། འཇིག་རྟེན་ལས་འདས་པའི་ལས་ཀྱི་ཚུལ་དང་། རྒྱུས་ལ་གསལ་
ཞིང་མཁས་པའི་གཟུགས་དང་། འཇིག་རྟེན་གྱི་སློབ་དཔོན་དུ་བྱ་བར་མཁས་པའི་གཟུགས་ཆ་བྱད་རྣམ་པ་དུ་མ་དང་ལྡན་པ། དབྱིབས་དང་རྒྱན་རྣམ་པ་དུ་མ་དང་ལྡན་པ། ཡིད་དུ་འོང་བའི་ཚིག་མང་པོ་བརྗོད་པས། ཡིད་མི་བདེ་བའི་སེམས་ཅན་རབ་ཏུ་

དགའ་བར་བྱེད་ཅིང་ཆོས་ཀྱི་ནོར་གྱིས་དབུལ་བའི་སེམས་ཅན་རྣམས་ལ་ཕན་གདགས་པ་དང་། སྡུག་བསྔལ་བའི་སེམས་ཅན་རྣམས་བདེ་བར་བྱ་བ་དང་། ལོག་པར་ལྟུང་བའི་སེམས་ཅན་རྣམས་མངོན་པར་གདོན་པ་དང་།
ཐེག་པའི་གྲུ་ལ་ཉམ་ཉེས་སུ་གྱུར་པའི་སེམས་ཅན་རྣམས་དབུགས་དབྱུང་བ་དང་། འཇིགས་པའི་སེམས་ཅན་རྣམས་ཡོངས་སུ་བསྐྱབ་པ་དང་། དགེ་བའི་རྩ་བའི་སྒྲ་ཀུན་ཏུ་གྲགས་པར་བྱ་བ་དང་། སྡིག་པ་ལས་བཟློག་པའི་སྒྲ་ཡོངས་སུ་བསྒྲག་པ་དང་།
དགེ་བའི་ཆོས་ཡང་དག་པར་བླང་བ་ལ་སེམས་ཅན་གཟུང་བ་དང་། དོན་སྤྱོད་པ་ལ་སེམས་ཅན་དགོད་པ་དང་། དགའ་བའི་ཤུགས་ཡོངས་སུ་བསྐྱེད་པ་དང་། སྙན་པར་སྨྲ་བའི་བསྡུ་བའི་དངོས་པོ་ཡོངས་སུ་བརྗོད་པ་དང་། འཇིག་རྟེན་ལ་དོན་
མཐུན་པར་བསྒྲུབ་པ་སྟོན་པར་བྱེད་ཅིང་ཕྱོགས་བཅུ་རྒྱས་པར་བཀང་སྟེ་འདོང་བ་མཐོང་ངོ་། །ལྟེ་བའི་དཀྱིལ་འཁོར་ནས་དྲང་སྲོང་མང་པོ་འགྲོ་བ་ཐམས་ཅད་ཀྱི་ལུས་ཀྱི་དབྱིབས་སུ་འཁོད་པ། པགས་པ་དང་ཤུན་པའི་གོས་གྱོན་པ་རིལ་བ་ཐོགས་པ།
གཟུགས་དང་ཆ་བྱད་དང་དབྱིབས་སྣ་ཚོགས་ཅན་སྤྱོད་ལམ་རབ་ཏུ་ཞི་བ་དག་བྱུང་བས། སྟེང་གི་བར་སྣང་ལས་སངས་རྒྱས་ཀྱི་ཡོན་ཏན་བརྗོད་པ་བྱེད་ཅིང་། ཆོས་ཀྱི་སྒྲ་ཡོངས་སུ་བསྒྲག་པ་དང་། སངས་རྒྱས་ཀྱི་སྒྲ་བརྗོད་པ་དང་། བྱང་ཆུབ་
སེམས་དཔའི་དགེ་འདུན་ཡོངས་སུ་བསྟན་པ་དང་། ཚངས་པའི་སྤྱོད་པ་ཡོངས་སུ་བརྗོད་པ་དང་། དབང་པོ་དབེན་པ་ལ་སེམས་ཅན་དགོང་པ་དང་། རང་བཞིན་མེད་པའི་དོན་རབ་ཏུ་བརྟག་པ་དང་། ཡེ་ཤེས་ཀྱི་དོན་ལ་འཇིག་རྟེན་རབ་ཏུ་དགོད་པ་དང་།
འཇིག་རྟེན་གྱི་གཙུག་ལག་གི་རྣམ་པ་ཡོངས་སུ་བརྗོད་པ་དང་། ཐམས་ཅད་མཁྱེན་པའི་ཡེ་ཤེས་ཀྱིས་འབྱུང་བའི་ལམ་གྱི་ཚུལ་རབ་ཏུ་བསྟན་པ་དང་། མཐར་གྱིས་བྱ་བའི་ལས་ལ་སེམས་ཅན་རབ་ཏུ་དགོད་པ་བྱེད་ཅིང་། ཕྱོགས་བཅུ་བཀང་སྟེ་འདོང་བ་

མཐོང་ངོ་། །རྩིབ་ལོགས་གཉིས་ནས། ཀླུའི་བུ་མོ་འཇིག་རྟེན་རྒྱུ་བ་ཐམས་ཅད་ཀྱི་གྲངས་དང་མཉམ་པ། ལུས་ཀྱི་དབྱིབས་བསམ་གྱིས་མི་ཁྱབ་པ་དུ་མ་དང་ལྡན་པ་བྱུང་སྟེ་ཀླུའི་རྣམ་པར་འཕྲུལ་པ་བསམ་གྱིས་མི་ཁྱབ་པ་ཡོངས་སུ་བསྟན་པ་དང་། སྤོས་
ཀྱི་སྤྲིན་གྱི་རྒྱན་བསམ་གྱིས་མི་ཁྱབ་པ་ནམ་མཁའི་དབྱིངས་ལ་བྱིན་གྱིས་བརླབ་པ་དང་། མེ་ཏོག་གི་སྤྲིན་གྱི་རྒྱན་བསམ་གྱིས་མི་ཁྱབ་པས་ནམ་མཁའི་དབྱིངས་ཐམས་ཅད་བརྒྱན་པ་དང་། ཕྲེང་བའི་སྤྲིན་བསམ་གྱིས་མི་ཁྱབ་པའི་རྒྱན་གྱིས་ནམ་
མཁའི་དབྱིངས་ཐམས་ཅད་རྣམ་པར་ཀླུབས་པ་དང་། རིན་པོ་ཆེའི་གདུགས་ཀྱི་སྤྲིན་བསམ་གྱིས་མི་ཁྱབ་པའི་རྒྱན་གྱིས། །ཆོས་ཀྱི་དབྱིངས་ཐམས་ཅད་ཡོངས་སུ་ཁེབས་པར་བྱ་བ་དང་། རིན་པོ་ཆེའི་རྒྱལ་མཚན་གྱི་སྤྲིན་བསམ་གྱིས་མི་ཁྱབ་པའི་
རྒྱན་དང་། རིན་པོ་ཆེའི་ལྷའི་བ་དན་གྱི་སྤྲིན་བསམ་གྱིས་མི་ཁྱབ་པའི་རྒྱན་དང་། རིན་པོ་ཆེའི་ཕྱང་འཕྲུལ་སྣ་ཚོགས་ཀྱི་སྤྲིན་དང་། ཆར་བསམ་གྱིས་མི་ཁྱབ་པའི་རྒྱན་དང་། ནོར་བུ་རིན་པོ་ཆེ་དམ་པའི་སྤྲིན་གྱི་ཆར་འབབ་པ་བསམ་གྱིས་མི་ཁྱབ་
པའི་རྒྱན་དང་། རིན་པོ་ཆེའི་སེ་མོ་དོ་སྣ་ཚོགས་དང་། མེ་ཏོག་གི་སྤྲིན་གྱི་ཆར་བསམ་གྱིས་མི་ཁྱབ་པའི་བརྒྱན་དང་། རིན་པོ་ཆེའི་ཁྲི་ལ་སྐྱིལ་མོ་ཀྲུང་དུ་འཁོད་པའི་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཀྱི་སྤྲིན་གྱི་ཆར་བསམ་གྱིས་མི་ཁྱབ་པ་
འབེབས་པའི་རྒྱན་དང་། ལྷ་རྫས་ཀྱི་རིན་པོ་ཆེའི་རྒྱན་སྣ་ཚོགས་དང་ལྡན་པའི་ལྷའི་བུ་མོ་མང་པོ་ཆོས་ཀྱི་གླུ་སྙན་པའི་སྒྲ་དབྱངས་ཀྱི་སྤྲིན་གྱི་ཆར་འབེབས་པ་བསམ་གྱིས་མི་ཁྱབ་པ་དང་། རིན་པོ་ཆེའི་པད་མོ་ཟེ་བ་མཐོ་བ་མུ་ཏིག་གི་དྲ་བས་བརྒྱན་པ། རིན་པོ་ཆེའི་
རྒྱལ་པོ་ཐམས་ཅད་ཀྱི་འབྲུའི་སྤྲིན་གྱི་ཆར་རྣམ་པར་འཐོར་བ་བསམ་གྱིས་མི་ཁྱབ་པའི་རྒྱན་དང་། རིན་པོ་ཆེའི་ཅོད་པན་གྱི་སྤྲིན་ནོར་བུ་རིན་པོ་ཆེ་ཐམས་ཅད་ཀྱིས་རབ་ཏུ་བརྒྱན་པ་དང་། འོད་ཟེར་གྱི་སྤྲིན་མཐའ་ཡས་པའི་ཆར་འབེབས་པ་བསམ་གྱིས་མི་ཁྱབ་པའི་རྒྱན་དང་།

ལྷའི་ལུས་ཀྱི་སྤྲིན་གྱི་མེ་ཏོག་དང་། ཕྲེང་བ་དང་། གདུགས་དང་། རྒྱལ་མཚན་དང་། ལྷའི་བ་དན་བསམ་གྱིས་མི་ཁྱབ་པའི་རྒྱན་དང་། ལྷའི་བུ་མོ་མང་པོའི་ལུས་ཀྱི་སྤྲིན་ཐལ་མོ་སྦྱར་ཏེ། གསེར་གྱི་མེ་ཏོག་སྙིམ་པས་འདོར་བ། དེ་བཞིན་གཤེགས་པ་
ལ་ཡོན་ཏན་དང་། ལེགས་པ་ཐམས་ཅད་དུ་བསྟོད་པའི་སྤྲིན་གྱི་འབྲུག་སྒྲ་འབྱིན་ཅིང་ཆར་འབེབས་པ། བསམ་གྱིས་མི་ཁྱབ་པའི་རྒྱན་ནམ་མཁའི་དབྱིངས་ལ་བྱིན་གྱིས་རློབ་ཅིང་། སྤོས་ཀྱི་ཕུང་པོའི་སྤྲིན་རིན་པོ་ཆེ་ཐམས་ཅད་ཀྱི་ཁ་དོག་ཏུ་འདུག་པ་དང་། བདུག་
སྤོས་ཀྱི་ན་བུན་དང་སྤྲིན་ཤིན་ཏུ་རྒྱ་ཆེ་བས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་མངོན་པར་ཁེབས་པར་བྱ་བ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རབ་ཏུ་བརྒྱན་པ་དང་། སེམས་ཅན་ཐམས་ཅད་རབ་ཏུ་དགའ་བར་བྱ་བ་དང་།
སངས་རྒྱས་ཐམས་ཅད་མཆོད་པས་སྐད་ཅིག་སྐད་ཅིག་ཏུ་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །མཐོང་ཀའི་དཔལ་གྱི་བེའུ་ནས་ལྷ་མ་ཡིན་གྱི་དབང་པོ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་
ཏུ་ཕྲ་བ་སྙེད་བྱུང་སྟེ། ལྷ་མ་ཡིན་གྱི་སྒྱུས་རྣམ་པར་འཕྲུལ་པ་བསམ་གྱིས་མི་ཁྱབ་པ་རབ་ཏུ་སྟོན་ཅིང་ཆུ་འཛིན་ཆེན་པོ་ཡོངས་སུ་བསྐྱམ་པ་དང་། འཇིག་རྟེན་གྱི་ཁམས་བརྒྱ་སྟོང་རབ་ཏུ་བསྐྱོད་པ་དང་། རིའི་རྒྱལ་པོ་ཆེན་པོ་ཐམས་ཅད་འཐབ་པར་བྱ་བ་དང་།
ལྷའི་གནས་ཐམས་ཅད་ཡོངས་སུ་བསྐྱོད་པ་དང་། བདུད་ཀྱི་དཀྱིལ་འཁོར་ཐམས་ཅད་ཟིལ་གྱིས་གནན་པ་དང་། བདུད་ཀྱི་སྡེ་ཐམས་ཅད་རབ་ཏུ་གདུལ་བ་དང་། ང་རྒྱལ་དང་རློམ་པ་དང་དྲེགས་པ་ཐམས་ཅད་རབ་ཏུ་གཞོམ་པ་དང་། གནོད་པར་སེམས་
པའི་སེམས་བཟློག་ཅིང་དགའ་བར་བྱ་བ་དང་། འཐོ་འཚམ་པའི་སེམས་ཕྱིར་བཟློག་པར་བྱ་བ་དང་། སེམས་ཅན་རྣམས་ཀྱིས་མི་དགེ་བའི་ཆོས་རབ་ཏུ་ཞི་བར་བྱ་བ་དང་། ཉོན་མོངས་པའི་རི་རྣམ་པར་གཏོར་བ་དང་། ཉོན་མོངས་པའི་ཐབ་མོ་ཤིན་ཏུ་ཞི་བར་བྱ་བ་

དང་། ལྷ་མ་ཡིན་གྱི་སྒྱུས་རྣམ་པར་འཕྲུལ་པ་དང་། རྣ