Kinh tạng Tây Tạng (Kangyur Đại Học) — 012_འདུལ་བ།_ན

པའི་གང་ཟག་དང་ཚིག་མཉམ་དུ་ཆོས་ཀློག་པ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ལྟུང་བའོ། །བཙུན་པ་དགེ་སློང་མས་བསྙེན་པར་མ་རྫོགས་པའི་གང་ཟག་དང་ཚིག་མཉམ་དུ་ཆོས་ཀློག་པ་ན་མཚན་འཕོས་ཏེ་
དགེ་སློང་དུ་གྱུར་ན་ཅིར་འགྱུར། ལྟུང་བའོ། །བཙུན་པ་དགེ་སློང་ངམ་དགེ་སློང་མས་བསྙེན་པར་མ་རྫོགས་པའི་གང་ཟག་དང་ཚིག་མཉམ་དུ་ཆོས་ཀློག་པ་དང་བསྙེན་པར་མ་རྫོགས་པ་དེ་ཡང་མཚན་འཕོས་ན་ཅིར་འགྱུར། ལྟུང་བའོ། །བཙུན་པ་དགེ་སློང་གིས་བསྙེན་པར་
མ་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ཏེ་ཚིག་མཉམ་དུ་ཆོས་བཀླགས་ན་ཅིར་འགྱུར། ལྟུང་བར་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་

ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་བཀླགས་ན་ཅིར་འགྱུར། ཉེས་པ་མེད་དོ། །བཙུན་པ་དགེ་སློང་གིས་མི་ལ་མིར་འདུ་ཤེས་ཏེ་བཀླགས་ན་ཅིར་འགྱུར། ལྟུང་བའོ། །
མི་ལ་མི་མ་ལགས་པར་འདུ་ཤེས་ཏེ་བཀླགས་ན་ཅིར་འགྱུར། ཉེས་བྱས་སོ། །མི་མ་ལགས་པ་ལ་མིར་འདུ་ཤེས་ན་ཅིར་འགྱུར། ཉེས་བྱས་སོ། །མི་མ་ལགས་པ་ལ་མི་མ་ལགས་པར་འདུ་ཤེས་ན་ཅིར་འགྱུར། ཉེས་བྱས་སོ། །བཙུན་པ་དགེ་
སློང་མ་དང་ཚིག་མཉམ་དུ་ཆོས་བཀླགས་ན་ཅིར་འགྱུར། ཉེས་བྱས་སོ། །དགེ་སློབ་མ་དང་། དགེ་ཚུལ་མ་དང་ཚིག་མཉམ་དུ་ཆོས་བཀླགས་ན་ཐམས་ཅད་ལྟུང་བར་འགྱུར་རོ། །བཙུན་པ་དགེ་སློང་མས་བསྙེན་པར་མ་རྫོགས་པའི་གང་ཟག་དང་ཚིག་མཉམ་
དུ་བཀླགས་ན་ཅིར་འགྱུར། ལྟུང་བའོ། །དགེ་སློང་མ་དང་དགེ་སློང་ཚིག་མཉམ་དུ་ཆོས་ཀློག་ན་ཉེས་བྱས་སུ་འགྱུར་རོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཀློག་ན་ལྟུང་བར་འགྱུར་རོ། །དགེ་སློབ་མ་དང་། དགེ་ཚུལ་མ་དང་།
དགེ་ཚུལ་ཕ་རྣམས་ལ་ཉེས་བྱས་སོ། །བཙུན་པ་བསླབ་པ་སྩལ་བས་བསྙེན་པར་མ་རྫོགས་པའི་གང་ཟག་དང་ཚིག་མཉམ་དུ་ཆོས་བཀླགས་ན་ཅིར་འགྱུར། ལྟུང་བར་འགྱུར་རོ།། །།འདུལ་བ་གཞུང་དམ་པ། བམ་པོ་དྲུག་པ། མདོར་ན། ཕྲིན་
པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པར་གྱུར་དང་སེམས་འཁྲུགས་དང་། །འོན་པ་གླེན་པ་གཉིད་ལོག་རྣམས། །ར་རོ་བ་དང་མྱོས་པ་དང་། །སྙོམས་ཞུགས་འགྲོ་བ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་
དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་དགེ་འདུན་གྱི་སྡོམ་པ་སྩལ་བ་མ་གཏོགས་པར་བསྙེན་པར་མ་རྫོགས་པའི་གང་ཟག་ལ་གནས་ངན་ལེན་གྱི་ནོངས་པ་སྨྲས་ན་ལྟུང་བར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་

བསྙེན་པར་མ་རྫོགས་པའི་གང་ཟག་ལ་ཕྲིན་པ་ལས་གནས་ངན་ལེན་གྱི་ནོངས་པ་སྨྲས་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་པ་ཐམས་ཅད་ཉེས་བྱས་སུ་འགྱུར་
རོ། །བཙུན་པ་དགེ་སློང་གིས་སྨྱོན་པ་ལ་གནས་ངན་ལེན་གྱི་ནོངས་པ་སྨྲས་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། དིག་པ་དང་། འོན་པ་དང་། གཉིད་ལོག་པ་དང་།
ར་རོ་བ་དང་། མྱོས་པ་སྙོམས་པར་ཞུགས་པ་དང་། འགྲོ་བ་གཞན་དུ་གནས་པ་རྣམས་ལ་གནས་ངན་ལེན་གྱི་ནོངས་པ་སྨྲས་ན་ཐམས་ཅད་ཉེས་བྱས་སུ་འགྱུར་རོ།། །།མདོར་ན། ཚིག་དང་ལུས་དང་དབེན་དེ་ལྟར། །བཞི་པ་མཚན་ཀྱང་དེ་བཞིན་ཏེ། །
བསྐོས་དང་བདུན་པ་བདག་ཉིད་དང་། །ཁྱིམ་པ་དག་དང་དགེ་སློང་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་འཕགས་པས་འཕགས་པའི་སྐད་དུ་མཐའ་འཁོབ་པ་ལ་གནས་ངན་ལེན་གྱི་ནོངས་པ་སྨྲས་
པ་དང་། མཐའ་འཁོབ་པ་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །འཕགས་པས་མཐའ་འཁོབ་པའི་སྐད་དུ་འཕགས་པ་ལ་སྨྲས་པ་དང་། འཕགས་པ་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་
སོ། །མཐའ་འཁོབ་པས་མཐའ་འཁོབ་པའི་སྐད་དུ་འཕགས་པ་ལ་སྨྲས་པ་དང་། འཕགས་པ་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་འཕགས་པའི་སྐད་དུ་མཐའ་འཁོབ་པ་ལ་སྨྲས་པ་དང་། མཐའ་
འཁོབ་པ་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ལུས་ཀྱི་དམིགས་པས་གནས་ངན་ལེན་གྱི་ནོངས་པ་སྨྲས་ན་ཅིར་འགྱུར། ཉེས་བྱས་སོ། །བཙུན་པ་དབེན་པ་ལ་མི་དབེན་པར་འདུ་ཤེས་ཏེ་གནས་ངན་ལེན་གྱི་ཉེས་

པ་སྨྲས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསྙེན་པར་མ་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ཏེ་གནས་ངན་ལེན་གྱི་ནོངས་པ་སྨྲས་ན་ཅིར་འགྱུར། ལྟུང་བའོ། །བསྙེན་པར་མ་རྫོགས་པ་ལ་བསྙེན་པར་
རྫོགས་པར་འདུ་ཤེས་ཏེ་སྨྲས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་སྨྲས་ན་ཉེས་པ་མེད་དོ། །བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ཏེ་སྨྲས་ན་ཅིར་འགྱུར། ཉེས་བྱས་
སོ། །བཙུན་པ་དགེ་སློང་གིས་མི་ལ་མིར་འདུ་ཤེས་ཏེ་སྨྲས་ན་ཅིར་འགྱུར། ལྟུང་བར་འགྱུར་རོ། །མི་ལ་མི་མ་ལགས་པར་འདུ་ཤེས་ཏེ་སྨྲས་ན་ཅིར་འགྱུར། ཉེས་བྱས་སོ། །མི་མ་ལགས་པ་ལ་མིར་འདུ་ཤེས་ཏེ་སྨྲས་ན་ཅིར་འགྱུར། ཉེས་བྱས་སོ། །
མི་མ་ལགས་པ་ལ་མི་མ་ལགས་པར་འདུ་ཤེས་ཏེ་སྨྲས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསྙེན་པར་མ་རྫོགས་པ་ལ་གནས་ངན་ལེན་གྱི་ཉེས་པ་སྨྲ་བ་ན་འཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ལྟུང་བར་འགྱུར་རོ། །བཙུན་
པ་དགེ་སློང་མས་བསྙེན་པར་མ་རྫོགས་པའི་གང་ཟག་ལ་གནས་ངན་ལེན་གྱི་ཉེས་པ་ཞིག་སྨྲ་བ་ན་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། ལྟུང་བར་འགྱུར་རོ། །བཙུན་པ་གང་བཅོམ་ལྡན་འདས་ཀྱིས་ཡང་དགེ་སློང་གིས་དགེ་འདུན་གྱིས་སྩལ་བ་མ་
གཏོགས་པར་བསྙེན་པར་མ་རྫོགས་པའི་གང་ཟག་ལ་གནས་ངན་ལེན་གྱི་ཉེས་པ་སྨྲས་ན་ལྟུང་བར་འགྱུར་རོ་ཞེས་གསུངས་ན། བཙུན་པ་དགེ་འདུན་གྱིས་མ་བསྐོས་པའི་དགེ་སློང་གིས་བསྙེན་པར་མ་རྫོགས་པའི་གང་ཟག་ལ་གནས་ངན་ལེན་གྱི་ཉེས་པ་སྨྲས་ཀྱང་ནོངས་པར་མི་
འགྱུར་བ་མཆིས་སམ། ཨུ་པཱ་ལི་ཡོད་དེ། གང་ཟག་འདི་བཞིའོ། །འདི་ལྟ་སྟེ། གང་ཟག་གང་ཉེས་པའི་མཐར་བྱ་བ་དང་། རིགས་ཀྱི་མཐར་བྱ་བའི་སྦྱིན་པའང་ཡོད། གང་ཟག་གང་ཉེས་པའི་མཐར་བྱ་བ་དང་རིགས་ཀྱི་མཐར་བྱ་བ་མེད་པའི་སྦྱིན་པ་ཡང་

ཡོད། གང་ཟག་གང་རིགས་ཀྱི་མཐར་བྱ་བ་དང་ཉེས་པའི་མཐར་བྱ་བ་མེད་པའི་སྦྱིན་པའང་ཡོད། གང་ཟག་གང་ཉེས་པའི་མཐར་བྱ་བ་ཡང་མེད་རིགས་ཀྱི་མཐར་བྱ་བ་ཡང་མེད་པའི་སྦྱིན་པ་ཡང་ཡོད་དོ། །ཉེས་པའི་མཐར་བྱ་བ་དང་། རིགས་ཀྱི་མཐར་བྱ་བའི་
སྦྱིན་པ་གང་ཞེ་ན། ཉེས་པ་ཆུང་ངུ་གང་གིས་རིགས་མང་དུ་སུན་ཕྱུང་བའོ། །ཉེས་པའི་མཐར་བྱ་བ་དང་རིགས་ཀྱི་མཐར་བྱ་བ་མེད་པའི་སྦྱིན་པ་གང་ཞེ་ན། གང་གིས་ཉེས་པ་ཆུང་ངུས་རིགས་མང་དུ་སུན་པའོ། །རིགས་ཀྱི་མཐར་བྱ་བ་དང་ཉེས་པའི་མཐར་བྱ་བ་མེད་
པའི་སྦྱིན་པ་གང་ཞེ་ན། གང་གིས་ཉེས་པ་ཆེན་པོས་རིགས་ཉུང་ངུས་སུན་པའོ། །ཉེས་པའི་མཐར་བྱ་བ་ཡང་མེད་རིགས་ཀྱི་མཐར་བྱ་བ་མེད་པའི་སྦྱིན་པ་གང་ཞེ་ན། གང་གིས་ཉེས་པ་ཆེན་པོས་རིགས་མང་དུ་སུན་པའོ། །གང་ཟག་གང་ལ་ཉེས་པའི་མཐར་བྱ་བ་དང་།
རིགས་ཀྱི་མཐར་བྱ་བ་སྦྱིན་པ་ནི་དེ་ལ་ཉེས་པ་ཇི་ཙམ་པ་དང་རིགས་ཇི་སྙེད་དུ་སོ་སོར་རིག་པ་དེ་དག་ལ་བསྒོ་བར་བྱའོ། །དེ་ལས་ལྷག་པར་བསྒོ་ན་ལྟུང་བར་འགྱུར་རོ། །གང་ཟག་གང་ལ་ཉེས་པའི་མཐར་བྱའི་རིགས་ཀྱི་མཐར་བྱ་བ་མེད་པ་སྦྱིན་པ་ནི་དེའི་ཉེས་པ་ཇི་ཙམ་པ་དང་།
རིགས་ཇི་སྙེད་ཀྱིས་སོ་སོར་རིག་པ་ཐམས་ཅད་ལ་བསྒོ་བར་བྱའོ། །དེ་ལས་ལྷག་པར་བསྒོ་ན་ལྟུང་བར་འགྱུར་རོ། །གང་ཟག་གང་ལ་རིགས་ཀྱི་མཐར་བྱ་བའི་ཉེས་པའི་མཐར་བྱ་བ་མེད་པ་སྦྱིན་པ་ནི་དེ་ལ་ཉེས་པ་ཐམས་ཅད་བསྒོ་བར་བྱ་བའི་རིགས་ཀྱིས་སོ་སོ་
ནས་རིག་པ་དེ་དག་ཐམས་ཅད་ལ་ནི་བསྒོ་བར་མི་བྱའོ། །དེ་ལས་ལྷག་པར་བསྒོ་ན་ལྟུང་བར་འགྱུར་རོ། །གང་ཟག་གང་ལ་ལྟུང་བའི་མཐར་ཡང་བྱ་བ་མེད་ལ་རིགས་ཀྱི་མཐར་ཡང་བྱ་བ་མེད་པ་སྦྱིན་པ་ནི་དེའི་ཉེས་པ་ཐམས་ཅད་དང་རིགས་ཇི་སྙེད་ཀྱིས་སོ་སོར་
རིག་པ་དེ་དག་ཐམས་ཅད་ལ་བསྒོ་བར་བྱ་སྟེ། བསྒོ་ཡང་ལྟུང་བ་མེད་དོ། །བཙུན་པ་བསྙེན་པར་མ་རྫོགས་པས་བསྙེན་པར་མ་རྫོགས་པའི་གང་ཟག་ལ་གནས་ངན་ལེན་གྱི་ནོངས་པ་སྨྲ་བར་བཤམས་ནས་བསྙེན་པར་མ་རྫོགས་པར་གྲུབ་ན་ཅིར་འགྱུར།

ཉེས་བྱས་སོ། །བསྙེན་པར་མ་རྫོགས་པར་བཤམས་ལ་བསྙེན་པར་རྫོགས་ཀར་གྲུབ་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ལ་བསྙེན་པར་རྫོགས་ཏེ་གྲུབ་ན་ཅིར་འགྱུར། ཉེས་བྱས་སོ། །
བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ཀར་གྲུབ་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ཏེ་གྲུབ་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པ་ན་བཤམས་ལ་
བསྙེན་པར་རྫོགས་པ་ན་གྲུབ་ན་ཅིར་འགྱུར། ལྟུང་བའོ། །བསྙེན་པར་རྫོགས་པ་ན་བཤམས་ལ་བསྙེན་པར་མ་རྫོགས་པ་ན་གྲུབ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བདག་ཉིད་ཀྱི་གནས་ངན་ལེན་གྱི་ནོངས་པ་བསྙེན་པར་མ་
རྫོགས་པ་ལ་སྨྲས་ན་ཅིར་འགྱུར། ཉེས་བྱས་སོ། །དགེ་སློང་གིས་དགེ་སློང་གི་གནས་ངན་ལེན་གྱི་ནོངས་པ་ཟ་མ་ལ་སྨྲས་ན་ཅིར་འགྱུར། ཉེས་བྱས་སོ། །དེ་བཞིན་དུ་མ་ནིང་དང་། མ་ནིང་མོ་རྣམས་དང་། མཚན་གཉིས་པ་ལ་སྨྲས་ན་ཐམས་
ཅད་ཉེས་བྱས་སོ། །དགེ་སློང་གིས་དགེ་སློང་གི་གནས་ངན་ལེན་གྱི་ནོངས་པ་དགེ་སློང་མ་སུན་ཕྱུང་བ་ལ་སྨྲས་ན་ཅིར་འགྱུར། ལྟུང་བའོ། །དེ་བཞིན་དུ་ཕ་དང་། མ་བསད་པ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་
སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་པ་དང་། མི་གནས་པ་དང་། སོ་སོར་གནས་པ་དང་། སྔར་འཁྲུགས་པ་དང་། སྔར་ཉེས་པ་བྱུང་བ་རྣམས་ལ་སྨྲས་ན་ཐམས་ཅད་ལྟུང་བར་འགྱུར་
རོ། །དགེ་སློང་གིས་དགེ་སློང་གི་གནས་ངན་ལེན་གྱི་ནོངས་པ་དགེ་འདུན་གྱི་དབྱེན་བྱས་པ་དང་། ཉེ་བར་ཕྱོགས་པ་དང་། བསླབ་པ་བྱིན་པ་རྣམས་ཀྱི་དགེ་སློང་དང་། དགེ་སློང་མ་རྣམས་ལ་སྨྲས་ན་ཐམས་ཅད་ཉེས་བྱས་སུ་འགྱུར་རོ། །དགེ་སློབ་

མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་སྨྲས་ན་ཐམས་ཅད་ལྟུང་བར་འགྱུར་རོ། །དགེ་སློང་མས་དགེ་སློང་མའི་གནས་ངན་ལེན་གྱི་ནོངས་པ་བསྙེན་པར་མ་རྫོགས་པ་ལ་སྨྲས་ན་ཅིར་འགྱུར། ལྟུང་བའོ། །དགེ་སློང་གིས་དགེ་སློང་མ་
ལ་སྨྲས་ན་ཅིར་འགྱུར། ཉེས་བྱས་སོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་སྨྲས་ན་ཐམས་ཅད་ལྟུང་བར་འགྱུར་རོ། །བཙུན་པ་བསླབ་པ་སྩལ་བས་གནས་ངན་ལེན་གྱི་ནོངས་པ་བསྙེན་པར་མ་རྫོགས་པ་ལ་སྨྲས་ན་
ཅིར་འགྱུར། ལྟུང་བའོ། །དེ་བཞིན་དུ་དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཡང་ཐམས་ཅད་ཉེས་བྱས་སུ་རྒྱས་པར་བརྗོད་པར་བྱའོ། །སངས་རྒྱས་སྟོན་པའོ་ཞེས་བྱ་བ་མ་གཏོགས་པ་མི་ལས་བླ་མར་གྱུར་པའི་ཆོས་ཡང་དག་
པར་སྨྲས་ན་ཕས་ཕམ་པ་བཤད་པ་ལས་རིམ་པར་དབྱེའོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པར་གྱུར་དང་སེམས་འཁྲུགས་དང་། །ན་བ་འོན་པ་གླེན་པ་དང་། །གཉིད་ལོག་ར་རོ་མྱོས་
པ་དང་། །སྙོམས་ཞུགས་འགྲོ་བ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་སྔར་ཡིད་མཐུན་པར་བགྱིས་པ་ལས་ཕྱིས་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་
པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་མཆི་ན་ལྟུང་བར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་ཕྲིན་པ་ལས་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་སྐད་མཛའ་བའི་གང་ཟག་ལ་བསྔོས་སོ་ཞེས་སྨྲས་ན་ཅིར་འགྱུར། ཉེས་
བྱས་སོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་པ་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་སྨྱོན་པ་ལ་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་

ཟག་ལ་བསྔོས་སོ་ཞེས་སྨྲས་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། དིག་པ་དང་། འོན་པ་དང་། གཉིད་ལོག་པ་དང་། མྱོས་པ་དང་། སྙོམས་པར་ཞུགས་
པ་དང་། འགྲོ་བ་གཞན་དུ་གནས་པ་རྣམས་ལ་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲས་ན་ཐམས་ཅད་ཉེས་བྱས་སུ་འགྱུར་རོ།། །།མདོར་ན། སྐད་དང་ལུས་དང་དབེན་པ་དང་། །མཚན་དང་
བཞི་པ་བདུན་པ་དང་། །ཁྱིམ་པ་མི་རུང་ཆུང་ངུ་དང་། །རྙེད་པ་ཐ་མ་དགེ་སློང་མའོ། །བཙུན་པ་དགེ་སློང་འཕགས་པས་འཕགས་པའི་སྐད་དུ་དགེ་སློང་ཞིག་ལ་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་
སྨྲས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །འཕགས་པས་མཐའ་འཁོབ་པའི་སྐད་དུ་དགེ་སློང་ཞིག་ལ་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲས་པ་
དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་མཐའ་འཁོབ་པའི་སྐད་དུ་དགེ་སློང་ཞིག་ལ་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲས་པ་
དང་། འཕགས་པ་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་འཕགས་པའི་སྐད་དུ་དགེ་སློང་ཞིག་ལ་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲས་པ་
དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ལུས་ཀྱི་དམིགས་པས་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་གོ་བར་བགྱིས་ན་ཅིར་

འགྱུར། ཉེས་བྱས་སོ། །བཙུན་པ་དགེ་སློང་གིས་དབེན་པ་ལ་མི་དབེན་པར་འདུ་ཤེས་ཏེ་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་ཞིག་
འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲ་བ་ན་དེའི་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ལྟུང་བའོ། །བཙུན་པ་དགེ་སློང་མས་འདི་སྐད་དུ་སྨྲ་བ་ན་དེའི་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར།
ལྟུང་བའོ། །བཙུན་པ་དགེ་སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ནས་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲས་ན་ཅིར་འགྱུར། ལྟུང་བའོ། །བསྙེན་པར་
རྫོགས་པ་ལ་བསྙེན་པར་མ་རྫོགས་པར་འདུ་ཤེས་ཏེ་དེ་བཞིན་དུ་སྨྲས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་དེ་བཞིན་དུ་སྨྲས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པ་ལ་
བསྙེན་པར་མ་རྫོགས་པར་འདུ་ཤེས་ཏེ་དེ་བཞིན་དུ་སྨྲས་ན་ཅིར་འགྱུར། ཉེས་བྱས་སོ། །བཙུན་པ་བསྙེན་པར་མ་རྫོགས་པས་ཡིད་མཐུན་པར་གྱུར་ལ་བསྙེན་པར་མ་རྫོགས་པས་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་
བསྔོས་སོ་ཞེས་སྨྲས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པས་ཡིད་མཐུན་པར་གྱུར་ལ། བསྙེན་པར་རྫོགས་ཀར་འདི་སྐད་སྨྲས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་ཡིད་མཐུན་པར་གྱུར་ལ་བསྙེན་པར་རྫོགས་
ནས་དེ་བཞིན་དུ་སྨྲས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་ཡིད་མཐུན་པར་གྱུར་ལ་བསྙེན་པར་རྫོགས་ཀར་དེ་བཞིན་དུ་སྨྲས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པར་ཡིད་མཐུན་པར་གྱུར་ལ་བསྙེན་པར་རྫོགས་ནས་དེ་བཞིན་

དུ་སྨྲས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པས་ཡིད་མཐུན་པར་གྱུར་ལ་བསྙེན་པར་རྫོགས་ནས་དེ་སྐད་སྨྲས་ན་ཅིར་འགྱུར། ལྟུང་བའོ། །བསྙེན་པར་རྫོགས་པས་ཡིད་མཐུན་པར་གྱུར་ལ་བསྙེན་པར་མ་རྫོགས་པས་འདི་
སྐད་སྨྲས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ཁྱིམ་པ་ལ་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲས་ན་ཅིར་འགྱུར། ཉེས་བྱས་སོ། །དེ་བཞིན་དུ་ཟ་མ་དང་། མ་ནིང་དང་། མཚན་
གཉིས་པ་དང་། ཕ་དང་མ་བསད་པ་དང་། དགྲ་བཅོམ་པ་བསད་པ་དང་། དགེ་སློང་མ་སུན་ཕྱུང་བ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་པ་དང་། མི་གནས་པ་དང་། སོ་
སོར་གནས་པ་དང་། སྔར་ཉེས་པ་བྱུང་བ་དང་། སྔར་འཁྲུགས་པ་རྣམས་ལ་འདི་སྐད་དུ་སྨྲས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ལ་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་
གང་ཟག་ལ་བསྔོས་སོ་ཞེས་སྨྲས་ན་ཅིར་འགྱུར། ལྟུང་བའོ། །བཙུན་པ་དགེ་སློང་གིས་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲས་ཀྱང་ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་ཡང་གོས་དེའི་
རྒྱུ་རུང་ལ་སྤུན་མི་རུང་བ་དང་། སྤུན་རུང་ལ་རྒྱུ་མི་རུང་བར་གྱུར་པ་དང་། གཉི་ག་མི་རུང་བ་སྟེ། མི་རུང་བ་ནི་རྔ་མོའི་བལ་དང་། བ་ལང་གི་བལ་དང་། རའི་བལ་དང་། རི་དགས་ཀྱི་བལ་དང་། འདྲེས་པ་དང་། ཐགས་སུ་མ་བཏགས་པ་དང་། གོས་ཀྱི་རྒྱུ་དེ་ལྟ་བུ་དག་གི་
ཕྱིར་འདི་སྐད་སྨྲས་ན་ཉེས་བྱས་སུ་འགྱུར་རོ། །བཙུན་པ་དགེ་འདུན་གྱི་གོས་ཁྲུ་གང་དུ་མ་འཚལ་བ་ཞིག་རྙེད་པར་གྱུར་ཏེ། དེ་ཡང་དགེ་སློང་གིས་མཐུན་པར་བགྱིས་པའི་འོག་ཏུ་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་

ཞེས་སྨྲས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་གོས་ཀྱི་རྙེད་པ་མ་གཏོགས་པར་དེ་ལས་གཞན་པའི་རྙེད་པ་རྣམས་ཀྱི་ཕྱིར་འདི་སྐད་སྨྲས་ན་ཅིར་འགྱུར། ཉེས་བྱས་སོ། །བཙུན་པ་དགེ་འདུན་གྱིས་དགེ་སློང་དེའི་མངོན་དུ་མ་བབ་པར་གོས་སྩལ་བར་གྱུར་
པ་ལས་དེའི་འོག་ཏུ་མཆིས་ནས་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲས་ན་ཅིར་འགྱུར། ཉེས་བྱས་སོ། །བཙུན་པ་བསླབ་པ་སྩལ་བས་འདི་སྐད་དུ་སྨྲས་ན་ཅིར་འགྱུར། ལྟུང་བའོ། །དགེ་སློང་མས་འདི་སྐད་དུ་
སྨྲས་ན་ཡང་ལྟུང་བར་འགྱུར་རོ། །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ཀྱིས་འདི་སྐད་དུ་ཚེ་དང་ལྡན་པ་དགེ་འདུན་གྱི་རྙེད་པ་འདི་ལྟར་མཛའ་བའི་གང་ཟག་ལ་བསྔོས་སོ་ཞེས་སྨྲས་ན་ཉེས་བྱས་སུ་འགྱུར་རོ།། །།མདོར་ན། ཕྲིན་པ་སྤྲིང་ཡིག་ལག་
བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པར་གྱུར་དང་སེམས་འཁྲུགས་དང་། །ན་བ་འོན་པ་གླེན་པ་དང་། །གཉིད་ལོག་ར་རོ་མྱོས་པ་དང་། །སྙོམས་ཞུགས་འགྲོ་བ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་
པ་བཅོམ་ལྡན་འདས་ཀྱིས་བསླབ་པ་སྩལ་བ་ལ་འཕྱ་ན་ལྟུང་བའོ་ཞེས་གསུངས་ན། བཙུན་པ་དགེ་སློང་གིས་ཕྲིན་པས་བསླབ་པ་ལ་དཔྱས་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་པ་ཐམས་
ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་སྨྱོན་པའི་དྲུང་དུ་བསླབ་པ་ལ་དཔྱས་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། འོན་པ་དང་། ལྐུགས་པ་དང་། གཉིད་ལོག་པ་དང་། ར་རོ་བ་དང་། མྱོས་
པ་དང་། སྙོམས་པར་ཞུགས་པ་དང་། འགྲོ་བ་གཞན་དུ་གནས་པ་རྣམས་ཀྱི་དྲུང་དུ་བསླབ་པ་ལ་དཔྱས་ན་ཐམས་ཅད་ཉེས་བྱས་སུ་འགྱུར་རོ།། །།མདོར་ན། སྐད་དང་ལུས་དང་དབེན་པ་དང་། །དེ་བཞིན་མཚན་དང་བཞི་པ་དང་། །ཁྱིམ་པ་ལ་སོགས་སྤྲུལ་པ་དང་། །བསླབ་པ་དང་

ཡང་དགེ་སློང་མའོ། །བཙུན་པ་དགེ་སློང་འཕགས་པས་འཕགས་པའི་སྐད་དུ་དགེ་སློང་གི་དྲུང་དུ་བསླབ་པ་ལ་དཔྱས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །འཕགས་པས་མཐའ་འཁོབ་པའི་སྐད་དུ་དགེ་
སློང་གི་དྲུང་དུ་བསླབ་པ་ལ་དཔྱས་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་མཐའ་འཁོབ་པའི་སྐད་དུ་དགེ་སློང་གི་དྲུང་དུ་བསླབ་པ་ལ་དཔྱས་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་
འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་འཕགས་པའི་སྐད་དུ་དགེ་སློང་གི་དྲུང་དུ་བསླབ་པ་ལ་དཔྱས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ལུས་ཀྱི་དམིགས་པས་བསླབ་པ་
ལ་དཔྱས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དབེན་པ་ལ་མི་དབེན་པར་འདུ་ཤེས་ཏེ་བསླབ་པ་ལ་དཔྱས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསླབ་པ་ལ་འཕྱ་བ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ལྟུང་བའོ། །
བཙུན་པ་དགེ་སློང་མས་བསླབ་པ་ལ་འཕྱ་བ་ན་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། ལྟུང་བའོ། །བཙུན་པ་དགེ་སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་དེའི་དྲུང་དུ་བསླབ་པ་ལ་དཔྱས་ན་ཅིར་འགྱུར། ལྟུང་བའོ། །བསྙེན་པར་རྫོགས་
པ་ལ་བསྙེན་པར་མ་རྫོགས་པར་འདུ་ཤེས་ཏེ་དེའི་དྲུང་དུ་བསླབ་པ་ལ་དཔྱས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་དེའི་དྲུང་དུ་བསླབ་པ་ལ་དཔྱས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པ་ལ་བསྙེན་
པར་མ་རྫོགས་པར་འདུ་ཤེས་ཏེ་དེའི་དྲུང་དུ་བསླབ་པ་ལ་དཔྱས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ཁྱིམ་པའི་དྲུང་དུ་བསླབ་པ་ལ་དཔྱས་ན་ཅིར་འགྱུར། ཉེས་བྱས་སོ། །ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་མ་དང་དགྲ་བཅོམ་པ་

བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། མི་གནས་པ་དང་། སོ་སོར་གནས་པ་དང་། སྔར་ཉེས་པ་བྱུང་བ་དང་། སྔར་འཁྲུགས་པ་རྣམས་ཀྱི་དྲུང་དུ་བསླབ་པ་
ལ་དཔྱས་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ཀྱི་དྲུང་དུ་བསླབ་པ་ལ་དཔྱས་ན་ཅིར་འགྱུར་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་
སྤྲུལ་པའི་དྲུང་དུ་བསླབ་པ་ལ་དཔྱས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ཀྱི་དྲུང་དུ་བསླབ་པ་ལ་དཔྱས་ན་ཅིར་འགྱུར། ཉེས་བྱས་སོ། །དགེ་སློང་མས་དགེ་སློང་མའི་
དྲུང་དུ་བསླབ་པ་ལ་དཔྱས་ན་ཅིར་འགྱུར། ལྟུང་བའོ། །དགེ་སློང་མས་དགེ་སློང་དང་། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ཀྱི་དྲུང་དུ་བསླབ་པ་ལ་དཔྱས་ན་ཅིར་འགྱུར། ཉེས་བྱས་སོ། །བཙུན་པ་བསླབ་པ་སྩལ་བས་བསླབ་པ་ལ་དཔྱས་ན་ཅིར་
འགྱུར། ལྟུང་བའོ། །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ལ་ཉེས་བྱས་སུ་འགྱུར་རོ།། །།མདོར་ན། རྫུ་འཕྲུལ་ལུས་དང་རྡོ་དྲེག་དང་། །རྩ་བ་མེ་ཏོག་ཉ་ལྕིབས་དང་། །གནས་ཚང་ཤ་མོ་རྙིང་པ་དང་། །མེ་ཏོག་འབྲས་བུ་ཤུན་པ་དང་། །
མཚན་དང་བཞི་པ་བདུན་པ་དང་། །ཐ་མར་གྱུར་པ་འབྲས་བུའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ས་བོན་གྱི་གྲོང་དང་། སྲོག་ཆགས་ཀྱི་གྲོང་བཤིག་གམ་འཇིག་ཏུ་སྩལ་ན་ལྟུང་བའོ་ཞེས་གསུངས་ན་
བཙུན་པ་དགེ་སློང་གིས་རྫུ་འཕྲུལ་གྱིས་ཤིང་བཀུམ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ལུས་ཀྱི་དམིགས་པས་ཤིང་བཀུམ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་རྡོའི་དྲེག་པ་བཀོགས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་

རྩ་བ་མ་ཟུག་པའི་ས་བོན་གྱི་དངོས་པོ་ཕྱུང་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་གཡའ་ཅན་དང་། རླམ་ཅན་བཀྲུས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་འདམ་རྫབ་ནས་ཉ་ལྕིབས་ཕྱུང་སྟེ་ཐང་ལ་བོར་ན་ཅིར་འགྱུར། ཉེས་བྱས་
སོ། །བཙུན་པ་དགེ་སློང་གིས་སྲོག་ཆགས་ཀྱི་གནས་བཤིག་ན་ཅིར་འགྱུར། ཉེས་བྱས་སོ། །བསྲེགས་སམ་མ་རུང་བར་བགྱིས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བྱའི་ཚང་དྲལ་ཏམ་ཕྱུང་ངམ་བཤིག་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་
འཛིམ་མམ་ཤ་མོ་བཏོགས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ཤིང་རྒན་གྱི་ཤུན་པ་བཤུས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་མེ་ཏོག་དང་། འབྲས་བུ་དང་། ལོ་མ་རྙིང་པ་བཏོགས་ན་ཅིར་འགྱུར། ཉེས་བྱས་སོ། །བཙུན་པ་དགེ་
སློང་གིས་ཤིང་འགུམ་པ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ལྟུང་བའོ། །བཙུན་པ་དགེ་སློང་མས་ཤིང་འགུམ་པ་ན་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། ལྟུང་བའོ། །བཙུན་པ་དགེ་སློང་གིས་ས་བོན་ལ་ས་བོན་དུ་འདུ་ཤེས་ཏེ་ཆུད་གསན་ན་ཅིར་
འགྱུར། ལྟུང་བའོ། །ས་བོན་ལ་ས་བོན་མ་ལགས་པར་འདུ་ཤེས་ཏེ་ཆུད་གསན་ན་ཅིར་འགྱུར། ཉེས་བྱས་སོ། །ས་བོན་མ་ཡིན་པ་ལ་ས་བོན་དུ་འདུ་ཤེས་ན་ཉེས་བྱས་སུ་འགྱུར་རོ། །ས་བོན་མ་ཡིན་པ་ལ་ས་བོན་མ་ཡིན་པར་འདུ་ཤེས་ཏེ་བཤིག་ན་ཉེས་པ་མེད་དོ། །བཙུན་པ་
བསྙེན་པར་མ་རྫོགས་པས་རན་དགུམ་པར་བཤམས་ལ་བསྙེན་པར་མ་རྫོགས་པར་བཀུམ་ན་ཅིར་འགྱུར། ཉེས་པ་མེད་དོ། །བསྙེན་པར་མ་རྫོགས་པས་བཤམས་ལ་བསྙེན་པར་རྫོགས་ཀར་བཀུམ་ན་ཅིར་འགྱུར། ཉེས་པ་མེད་དོ། །བསྙེན་པར་མ་རྫོགས་པར་བཤམས་ལ་
བསྙེན་པར་རྫོགས་ཏེ་བཀུམ་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ཀར་བཀུམ་ན་ཅིར་འགྱུར། ཉེས་པ་མེད་དོ། །བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ཏེ་བཀུམ་ན་ཅིར་འགྱུར། ཉེས་བྱས་སོ། །བསྙེན་པར་

རྫོགས་ཏེ་བཤམས་ལ་བསྙེན་པར་རྫོགས་ཏེ་བཀུམ་ན་ཅིར་འགྱུར། ལྟུང་བའོ། །བསྙེན་པར་རྫོགས་པ་ན་བཤམས་ལ་བསྙེན་པར་མ་རྫོགས་པ་ན་བཀུམ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་རུང་བར་མ་བགྱིས་པའི་འབྲས་བུ་འཚལ་ཀྱང་ནོངས་པར་མི་འགྱུར་བ་
མཆིས་སམ། ཨུ་པཱ་ལི་ཡོད་དེ། མངོན་པར་མ་སྨིན་པའི་ས་བོན་ནི་ས་བོན་གྱི་དངོས་པོ་མ་ཡིན་ནོ་སྙམ་དུ་བསམས་ནས་ཟོས་པའོ། །བཙུན་པ་དགེ་སློང་གིས་ས་བོན་གྱི་རིགས་ལྔ་ལ་མེས་རུང་བར་བགྱིས་ཏེ་འཚལ་ཀྱང་ལྟུང་བར་འགྱུར་བ་མཆིས་སམ། ཨུ་པཱ་ལི་ཡོད་དེ། ས་བོན་
གྱི་རིགས་ལྔ་ལ་རུང་བར་བྱས་ཀྱང་སའི་ནང་དུ་གཞག་གམ། སྣོད་ཀྱི་ནང་དུ་གཞག་གམ། གདང་ཤིང་ལ་བཀལ་ཀྱང་རུང་སྟེ་མྱུ་གུ་སྐྱེས་པར་གྱུར་པའོ། །དེ་ཆུད་གསན་ན་ཅིར་འགྱུར། ལྟུང་བྱེད་དུ་འགྱུར་རོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་
གཅིག་ནས་གཅིག །སྨྱོན་པ་སེམས་འཁྲུགས་ནད་པ་དང་། །འོན་པ་དང་ནི་འགྲོ་བ་དང་། །ཁྱིམ་པ་དག་ལ་སོགས་པ་རྣམས། །བསླབ་པ་བྱིན་དང་དགེ་སློང་མའོ། །བཙུན་པ་དགེ་སློང་གིས་ཕྲིན་གྱིས་ཤིང་བཀུམ་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་།
ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་པ་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་སྨྱོན་པ་ཞིག་ཤིང་འགུམས་སུ་སྩལ་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་།
ལྐུགས་པ་དང་། འོན་པ་དང་། འགྲོ་བ་གཞན་དུ་གནས་པ་རྣམས་ཤིང་གཅོད་དུ་བཅུག་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་མངོན་སུམ་དུ་ཁྱིམ་པ་ཤིང་འགུམས་སུ་སྩལ་ན་ཅིར་འགྱུར། ལྟུང་བའོ། །དེ་བཞིན་དུ་ཟ་མ་དང་། མ་ནིང་དང་། དགེ་སློང་མ་སུན་
ཕྱུང་བ་དང་། ཕ་དང་མ་བསད་པ་དང་། དགྲ་བཅོམ་པ་བསད་པ་དང་། དགེ་འདུན་གྱི་དབྱེན་བྱས་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་པ་དང་། མི་གནས་པ་དང་། སོ་སོར་གནས་པ་དང་།

སྔར་ཉེས་པ་བྱུང་བ་དང་། སྔར་འཁྲུགས་པ་དང་། ཉེ་བར་ཕྱོགས་པ་དང་། བསླབ་པ་བྱིན་པ་རྣམས་མངོན་སུམ་དུ་ཤིང་གཅོད་དུ་བཅུག་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་བསླབ་པ་སྩལ་བས་རན་སྔོན་པོ་བཀུམ་མམ་འགུམས་སུ་སྩལ་ན་ཅིར་འགྱུར།
ལྟུང་བའོ། །བཙུན་པ་དགེ་སློང་མས་རན་སྔོན་པོ་འགུམ་མམ་འགུམས་སུ་སྩལ་ན་ཅིར་འགྱུར། ལྟུང་བའོ། །བཙུན་པ་དགེ་སློང་མས་རན་སྔོན་པོ་བཀུམ་མམ་འགུམས་སུ་སྩལ་ན་ཅིར་འགྱུར། ཉེས་བྱས་སོ། །དགེ་ཚུལ་ཕ་དང་དགེ་ཚུལ་མ་རྣམས་ལ་ཉེས་པ་མེད་དོ།། །།
མདོར་ན། སྐད་དང་ལུས་དང་དབེན་པ་དང་། །མཚན་དང་བཞི་པ་བདུན་པ་དང་། །ཁྱིམ་པ་དག་ལ་སོགས་པ་རྣམས། །བསྐོས་པ་དག་དང་མ་བསྐོས་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ནོངས་པ་ངོར་བརྗོད་
ཅིང་དཔྱས་འདོགས་ན་ལྟུང་བར་འགྱུར་རོ་ཞེས་གསུངས་ན། དགེ་སློང་གིས་ནོངས་པ་ངོར་བརྗོད་ཅིང་དཔྱས་བཏགས་ཀྱང་ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་ཡང་དེ་ནི་མི་མ་ཡིན་པ་ལས་རབ་ཏུ་བྱུང་ཞིང་བསྙེན་པར་རྫོགས་པ་ལ་ནོངས་པ་ངོར་བརྗོད་ན་
ཉེས་བྱས་སུ་འགྱུར་རོ། །བཙུན་པ་དགེ་སློང་འཕགས་པས་འཕགས་པའི་སྐད་དུ་དགེ་སློང་ལ་ནོངས་པ་ངོར་བརྗོད་ཅིང་དཔྱས་བཏགས་པ་དང་དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །འཕགས་པས་མཐའ་འཁོབ་པའི་སྐད་དུ་དགེ་སློང་
ལ་ནོངས་པ་ངོར་བརྗོད་ཅིང་དཔྱས་བཏགས་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་མཐའ་འཁོབ་པའི་སྐད་དུ་དགེ་སློང་ལ་ནོངས་པ་ངོར་བརྗོད་ཅིང་དཔྱས་བཏགས་པ་དང་། དགེ་སློང་དེས་ཀྱང་མཐའ་
འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་འཕགས་པའི་སྐད་དུ་དགེ་སློང་ཞིག་ལ་ནོངས་པ་ངོར་བརྗོད་ཅིང་དཔྱས་བཏགས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ལུས་

ཀྱི་དམིགས་པས་ནོངས་པ་ངོར་བརྗོད་ཅིང་དཔྱས་བཏགས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དབེན་པ་ལ་མི་དབེན་པར་འདུ་ཤེས་ཏེ་ནོངས་པ་ངོར་བརྗོད་ཅིང་དཔྱས་བཏགས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་ཞིག་ནོངས་པ་ངོར་བརྗོད་
ཅིང་དཔྱས་འདོགས་པ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མ་ནོངས་པ་ངོར་བརྗོད་ཅིང་དཔྱས་འདོགས་པ་ན་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསྙེན་པར་རྫོགས་
པ་ལ་བསྙེན་པར་རྫོགས་པར་འདུ་ཤེས་ཏེ་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ལྟུང་བའོ། །བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ན་ཉེས་བྱས་སུ་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་ན་ཉེས་བྱས་
སུ་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ན་ཉེས་བྱས་སུ་འགྱུར་རོ། །བཙུན་པ་བསྙེན་པར་མ་རྫོགས་པ་ཞིག་དགེ་འདུན་གྱིས་ནོངས་པ་ངོར་བརྗོད་ཅིང་དཔྱས་འདོགས་པར་བགྲངས་པར་གྱུར་ལ་བསྙེན་པར་མ་རྫོགས་པར་ནོངས་པ་ངོར་
བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བགྲངས་ལ་བསྙེན་པར་རྫོགས་ཀར་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བགྲངས་ལ་བསྙེན་པར་རྫོགས་ཏེ་ནོངས་
པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བགྲངས་ལ་བསྙེན་པར་རྫོགས་ཀར་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བགྲངས་ལ་བསྙེན་པར་རྫོགས་ཏེ་ནོངས་པ་
ངོར་བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཏེ་བགྲངས་ལ་བསྙེན་པར་རྫོགས་ནས་ནོངས་པ་ངོར་བརྗོད་ཅིང་དཔྱས་འདོགས་ན་ལྟུང་བའོ། །བསྙེན་པར་རྫོགས་ནས་བགྲངས་ལ་བསྙེན་པར་མ་རྫོགས་པ་ན་ནོངས་པ་ངོར་བརྗོད་ཅིང་དཔྱས་

འདོགས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ཁྱིམ་པ་ལ་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ཟ་མ་དང་མ་ནིང་དང་དགེ་སློང་མ་སུན་ཕྱུང་བ་དང་། ཕ་དང་མ་དང་དགྲ་བཅོམ་
པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་པ་དང་། མི་གནས་པ་དང་། སོ་སོར་གནས་པ་དང་། སྔར་ཉེས་པ་བྱུང་བ་དང་། སྔར་འཁྲུགས་པ་རྣམས་ལ་ཉེས་པ་ངོར་
བརྗོད་ཅིང་དཔྱས་འདོགས་ན་ཅིར་འགྱུར་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་འདུན་གྱི་དབྱེན་བགྱིས་པ་དང་ཉེ་བར་ཕྱོགས་པ་དང་བསླབ་པ་སྩལ་བའི་དགེ་སློང་ལ་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར་ཐམས་ཅད་ལྟུང་བར་
འགྱུར་རོ། །བཙུན་པ་དགེ་སློང་གིས་བསྐོས་སམ་མ་བསྐོས་ཀྱང་རུང་སྟེ། དགེ་འདུན་གྱི་ཞལ་ཏ་བྱེད་པ་མ་གཏོགས་པར་དེ་ལས་གཞན་ལ་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་སོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་
བ་དང་གཅིག་ནས་གཅིག །སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་ཞུགས་འགྲོ་བ་ཐ་མའོ། །བཙུན་པ་དགེ་སློང་གིས་ཕྲིན་པ་ལས་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་སོ། །
དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་པ་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་སྨྱོན་པ་ལ་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་
དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། གཉིད་ལོག་པ་དང་། ར་རོ་བ་དང་། མྱོས་པ་དང་། སྙོམས་པར་ཞུགས་པ་དང་། འགྲོ་བ་གཞན་དུ་གནས་པ་རྣམས་ལ་ཉེས་པ་ངོར་བརྗོད་ན་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་

སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་དགེ་སློང་དང་། དགེ་ཚུལ་ཕ་དང་། དགེ་ཚུལ་མ་དང་། དགེ་སློབ་མ་ལ་ནོངས་པ་ངོར་བརྗོད་
ཅིང་དཔྱས་འདོགས་ན་ཅིར་འགྱུར། ཉེས་བྱས་སོ། །བཙུན་པ་བསླབ་པ་སྩལ་བས་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ལྟུང་བའོ། །དགེ་སློབ་མ་དང་དགེ་ཚུལ་མ་དང་དགེ་ཚུལ་ཕ་རྣམས་ལ་ནོངས་པ་ངོར་བརྗོད་ཅིང་དཔྱས་འདོགས་ན་ཅིར་འགྱུར། ཉེས་བྱས་
སོ།། །།མདོར་ན། ཉེས་པ་དག་ཀྱང་དེ་བཞིན་ཏེ། །ལུས་དང་ཚིག་དང་མི་སྨྲ་མཚན། །ཁྱིམ་པ་དག་ལ་སོགས་པ་རྣམས། །བཞི་པ་ཐ་མར་གྱུར་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་བསྒོ་བཞིན་
དུ་མི་བགྱིད་ན་ལྟུང་བར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་ནོངས་པ་མ་གཏོགས་པར་དེ་ལས་གཞན་པ་དག་བསྒོ་བ་བཞིན་དུ་མི་བགྱིད་ན་ཅིར་འགྱུར་ཉེས་བྱས་སོ། །བཙུན་པ་དགེ་སློང་གིས་ལུས་ཀྱི་དམིགས་པས་བསྒོ་བ་བཞིན་མ་བགྱིས་ན་ཅིར་འགྱུར།
ཉེས་བྱས་སོ། །བཙུན་པ་དགེ་སློང་འཕགས་པས་འཕགས་པའི་སྐད་དུ་བསྒོ་བ་བཞིན་མ་བགྱིས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །འཕགས་པས་མཐའ་འཁོབ་པའི་སྐད་དུ་བསྒོ་བ་བཞིན་མ་བགྱིས་པ་དང་། དགེ་
སློང་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་མཐའ་འཁོབ་པའི་སྐད་དུ་དགེ་སློང་གིས་བསྒོ་བ་བཞིན་མ་བགྱིས་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་
འཕགས་པའི་སྐད་དུ་དགེ་སློང་གིས་བསྒོ་བ་བཞིན་མ་བགྱིས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་སློང་ལ་མི་སྨྲ་བས་བསྒོ་བ་བཞིན་མ་བགྱིས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་

གིས་དགེ་སློང་གི་བསྒོ་བ་བཞིན་མ་བགྱིས་པ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་དགེ་སློང་མའི་བསྒོ་བ་བཞིན་མ་བགྱིས་པ་ན་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། ཉེས་བྱས་སོ། །བཙུན་པ་
དགེ་སློང་གིས་ཁྱིམ་པས་བསྒོ་བ་བཞིན་མ་བགྱིས་ན་ཅིར་འགྱུར། ཉེས་བྱས་སོ། །དེ་བཞིན་དུ་ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་མ་དང་དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྲག་ཕྱུང་བ་དང་། མུ་སྟེགས་
ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སོ་སོར་གནས་པ་དང་། མི་གནས་པ་དང་། སྔར་འཁྲུགས་པ་དང་། སྔོན་ཉེས་པ་བྱུང་བ་རྣམས་ཀྱི་བསྒོ་བ་བཞིན་མ་བགྱིས་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་འདུན་གྱི་དབྱེན་
བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ཀྱི་བསྒོ་བ་བཞིན་མ་བགྱིས་ན་ཅིར་འགྱུར་ཐམས་ཅད་ལྟུང་བར་འགྱུར་རོ། །བཙུན་པ་དགེ་སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་བསྒོ་བ་བཞིན་མ་བགྱིས་ན་ཅིར་འགྱུར།
ལྟུང་བའོ། །བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ཏེ་བསྒོ་བ་བཞིན་མ་བགྱིས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་བསྒོ་བ་བཞིན་མ་བགྱིས་ན་ཅིར་འགྱུར། ཉེས་བྱས་སོ། །
བསྙེན་པར་མ་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ཏེ་བསྒོ་བ་བཞིན་མ་བགྱིས་ན་ཅིར་འགྱུར། ཉེས་བྱས་སོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པར་གྱུར་དང་སེམས་འཁྲུགས་དང་། །ན་
བ་འོན་པ་གླེན་པའོ། །བཙུན་པ་དགེ་སློང་གིས་ཕྲིན་གྱིས་བསྒོ་བ་བཞིན་མ་བགྱིས་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་གཅིག་ནས་གཅིག་ཏུ་བརྒྱུད་དེ་བསྒོ་བ་བཞིན་མ་བགྱིས་ན་ཐམས་ཅད་ཉེས་བྱས་སུ་འགྱུར་

རོ། །བཙུན་པ་དགེ་སློང་གིས་དགེ་སློང་སྨྱོན་པས་བསྒོ་བ་བཞིན་མ་བགྱིས་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། འགྲོ་བ་གཞན་དུ་གནས་པ་རྣམས་ཀྱིས་བསྒོ་བ་
བཞིན་མ་བགྱིས་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ཀྱིས་བསྒོ་བ་བཞིན་མ་བགྱིས་ན་ཅིར་འགྱུར། ཉེས་བྱས་སོ། །བཙུན་པ་བསླབ་པ་སྩལ་བས་བསྒོ་བ་བཞིན་མ་བགྱིས་ན་ཅིར་འགྱུར།
ལྟུང་བའོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ཀྱིས་བསྒོ་བ་བཞིན་མ་བགྱིས་ན་ཅིར་འགྱུར། ཉེས་བྱས་སོ།། །།མདོར་ན། མི་རུང་བ་དང་གང་ཟག་དང་། །མ་ཆོག་ལྷག་དང་བདུན་པ་དང་། །མཚན་དང་བཞི་པ་དེ་བཞིན་དུ། །ལུས་དང་སྐད་དང་
དབེན་དེ་བཞིན། །ཁྱིམ་པ་དག་ལ་སོགས་པ་རྣམས། །བར་དུ་གཅོད་པ་ཐ་མ་ཡིན། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་དགེ་འདུན་གྱི་མལ་སྟན་བླ་གབ་མེད་པར་བཏིང་ངམ།
འདིང་ངམ། འདིང་དུ་སྩལ་བར་འཚལ་བཞིན་དུ་མ་བརྟུལ་ཏེ་རྟུལ་དུ་མ་སྩལ་ཏམ། དགེ་སློང་ལ་ཡང་མ་གཏད་པར་གཞན་དུ་མཆིས་ན་ལྟུང་བར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་དགེ་འདུན་གྱི་མལ་སྟན་བཏིང་བ་མ་གཏད་པར་གཞན་དུ་མཆིས་ཀྱང་ལྟུང་བར་
མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་མལ་སྟན་དེ་རྒྱུ་རུང་ལ་སྤུན་མི་རུང་བ་དང་། སྤུན་རུང་ལ་རྒྱུ་མི་རུང་བ་དང་། གཉི་ག་མི་རུང་བ་སྟེ། མི་རུང་བ་ནི་རྔ་མོའི་བལ་དང་། བ་ལང་གི་བལ་དང་། རའི་བལ་དང་། རི་དགས་ཀྱི་བལ་དང་འདྲེས་པ་དང་། ཐགས་
སུ་མ་བཏགས་པ་དེ་ལྟ་བུའི་མལ་སྟན་ཞིག་བཏིང་ངམ་འདིངས་སུ་བཙུག་པ་ལས་མ་གཏད་པར་སོང་ན་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་གང་ཟག་གི་མལ་སྟན་བཏིང་ངམ་གདིང་དུ་བཅུག་པ་ལས་མ་གཏད་པར་མཆིས་ན་ཅིར་འགྱུར། ཉེས་བྱས་སོ། །

བཙུན་པ་དགེ་སློང་གིས་དགེ་འདུན་གྱི་ཁྲི་དང་ཁྲིའུ་བཀྲམ་པ་ལས་མ་གཏད་པར་གཞན་དུ་མཆིས་ཀྱང་ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ་རྐང་པའི་ཚད་བདེ་བར་གཤེགས་པའི་སོར་བརྒྱད་ལས་ལྷག་གམ་མ་ཆོག་ན་ཉེས་བྱས་སུ་
འགྱུར་རོ། །བཙུན་པ་བསྙེན་པར་མ་རྫོགས་པས་མལ་སྟན་བཏིང་བ་ལ་བསྙེན་པར་མ་རྫོགས་པར་ཉེ་འཁོར་ལས་འདས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཏིང་ལ་བསྙེན་པར་རྫོགས་ཀར་ཉེ་འཁོར་ལས་འདས་ན་ཅིར་འགྱུར། ཉེས་
བྱས་སོ། །བསྙེན་པར་མ་རྫོགས་པར་བཏིང་ལ་བསྙེན་པར་རྫོགས་པ་ན་ཉེ་འཁོར་ལས་འདས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཏིང་ལ་བསྙེན་པར་རྫོགས་ཀར་ཉེ་འཁོར་ལས་འདས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་
ཀར་བཏིང་ལ་བསྙེན་པར་རྫོགས་ཏེ་ཉེ་འཁོར་ལས་འདས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པ་ན་བཏིང་ལ་བསྙེན་པར་རྫོགས་ཏེ་ཉེ་འཁོར་ལས་འདས་ན་ཅིར་འགྱུར། ལྟུང་བའོ། །བསྙེན་པར་རྫོགས་པ་ན་བཏིང་ལ་བསྙེན་པར་མ་རྫོགས་པར་
ཉེ་འཁོར་ལས་འདས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་འདུན་གྱི་མལ་སྟན་བཏིང་ནས་མ་བརྟུལ་ཅིང་དགེ་སློང་མཆིས་པ་ལའང་མ་གཏད་པར། གཞན་དུ་མཆི་བ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ལྟུང་བའོ། །
བཙུན་པ་དགེ་སློང་མས་དགེ་འདུན་གྱི་མལ་སྟན་བཏིང་བ་མ་བརྟུལ་ཅིང་དགེ་སློང་མ་མཆིས་པ་ལ་ཡང་མ་གཏད་པར། གཞན་དུ་མཆིས་པ་དང་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། ལྟུང་བའོ། །བཙུན་པ་དགེ་སློང་གིས་དགེ་འདུན་གྱི་མལ་སྟན་བཏིང་བ་ལས་
མ་བརྟུལ་ཅིང་དགེ་སློང་མཆིས་པ་ལ་ཡང་མ་གཏད་པར། མཚམས་ཀྱི་སླད་རོལ་ལ་མཚམས་ཀྱི་སླད་རོལ་དུ་འདུ་ཤེས་ཏེ་གཞན་དུ་མཆིས་ན་ཅིར་འགྱུར། ལྟུང་བའོ། །མཚམས་ཀྱི་ཕྱི་རོལ་ལ་མཚམས་ཀྱི་ནང་དུ་འདུ་ཤེས་ན་ཉེས་པ་མེད་དོ། །

མཚམས་ཀྱི་ནང་ལ་མཚམས་ཀྱི་ཕྱི་རོལ་དུ་འདུ་ཤེས་ན་ཉེས་བྱས་སོ། །མཚམས་ཀྱི་ནང་ལ་མཚམས་ཀྱི་ནང་དུ་འདུ་ཤེས་ན་ཉེས་པ་མེད་དོ། །བཙུན་པ་དགེ་སློང་འཕགས་པས་འཕགས་པའི་སྐད་ཀྱིས། དགེ་སློང་ལ་དགེ་འདུན་གྱི་མལ་སྟན་གཏད་དེ།
གཞན་དུ་མཆིས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །འཕགས་པས་མཐའ་འཁོབ་པའི་སྐད་དུ་དགེ་སློང་ལ་དགེ་འདུན་གྱི་མལ་སྟན་གཏད་དེ། གཞན་དུ་མཆིས་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་
མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་མཐའ་འཁོབ་པའི་སྐད་དུ་དགེ་སློང་ལ་གཏད་དེ། གཞན་དུ་མཆིས་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་འཕགས་པའི་སྐད་དུ་དགེ་སློང་ལ་
གཏད་དེ། གཞན་དུ་མཆིས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་འདུན་གྱི་མལ་སྟན་བཏིང་བ་ལུས་ཀྱི་དམིགས་པས་དགེ་སློང་མཆིས་པ་ལ་གཏད་དེ་གཞན་དུ་མཆིས་ན་ཅིར་འགྱུར། ཉེས་བྱས་སོ། །
བཙུན་པ་དགེ་སློང་གིས་དགེ་འདུན་གྱི་མལ་སྟན་བཏིང་བ་དབེན་པ་ལ་མི་དབེན་པར་འདུ་ཤེས་ནས་གཏད་དེ། གཞན་དུ་མཆིས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་འདུན་གྱི་མལ་སྟན་བཏིང་བ་དགེ་སློང་མཆིས་པ་ལ་ནི་མ་གཏད་ཀྱིས་ཁྱིམ་པ་ལ་གཏད་དེ།
གཞན་དུ་མཆིས་ན་ཅིར་འགྱུར། ཉེས་བྱས་སོ། །དེ་བཞིན་དུ་ཟ་མ་དང་། དགེ་སློང་མ་སུན་ཕྱུང་བ་དང་། ཕ་དང་མ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་
དུ་སོང་བ་དང་། རྐུན་གནས་པ་དང་། མི་གནས་པ་དང་། སོ་སོར་གནས་པ་དང་། སྔར་ཉེས་པ་བྱུང་བ་དང་། སྔར་འཁྲུགས་པ་རྣམས་ལ་གཏད་དེ། གཞན་དུ་མཆིས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་

འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་ལ་གཏད་དེ་གཞན་དུ་མཆིས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་འདུན་གྱི་མལ་སྟན་བཏིང་བ་ལ་བརྟུལ་ཅིང་དགེ་སློང་མཆིས་བཞིན་དུ་མ་གཏད་པར་ཉེ་འཁོར་འདས་ཀྱང་ནོངས་པར་མི་
འགྱུར་བ་མཆིས་སམ། ཨུ་པཱ་ལི་ཡོད་དེ། དེ་ནི་འདི་ལྟར་དགེ་སློང་དེས་ཀྱང་མལ་སྟན་དེ་ཡལ་བར་མ་བོར་བར་སོང་བ་དང་གཙུག་ལག་ཁང་དེར་བར་ཆད་བརྒྱད་ལས་གང་ཡང་རུང་བའི་བར་ཆད་གཅིག་བྱུང་བར་གྱུར་པའོ།། །།མདོར་ན། སྨྱོན་པ་སེམས་འཁྲུགས་ན་བ་དང་། །འོན་པ་གླེན་
པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་ཞུགས་འགྲོ་བ་ཐ་མའོ། །བཙུན་པ་དགེ་སློང་གིས་དགེ་འདུན་གྱི་མལ་སྟན་བཏིང་བ་མ་བརྟུལ་བར་དགེ་སློང་སྨྱོན་པ་ཞིག་ལ་གཏད་དེ་གཞན་དུ་མཆིས་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་
གཟིར་བ་དང་། །གླེན་པ་དང་། ལྐུགས་པ་དང་། འོན་པ་དང་། གཉིད་ལོག་པ་དང་། ར་རོ་བ་དང་། མྱོས་པ་དང་། འགྲོ་བ་གཞན་དུ་གནས་པ་རྣམས་ལ་གཏད་དེ་གཞན་དུ་མཆིས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་སློང་མ་ལ་གཏད་དེ་གཞན་དུ་མཆིས་ན་ཅིར་འགྱུར།
ཉེས་བྱས་སོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་ལ་གཏད་དེ་གཞན་དུ་མཆིས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་གཏད་དེ་གཞན་དུ་མཆིས་ན་ཅིར་འགྱུར། ཉེས་བྱས་སོ། །བཙུན་པ་བསླབ་
པ་སྩལ་བས་དགེ་འདུན་གྱི་མལ་སྟན་བཏིང་བ་དགེ་སློང་མཆིས་བཞིན་དུ་མ་གཏད་པར་གཞན་དུ་མཆིས་ན་ཅིར་འགྱུར། ལྟུང་བའོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཉེས་བྱས་སོ། །མལ་སྟན་ལ་ཇི་ལྟ་བ་དེ་བཞིན་དུ་གདིང་བ་ལ་ཡང་རྒྱས་པར་བརྗོད་པར་བྱའོ། །ཚད་
བདེ་བར་གཤེགས་པའི་སོར་བརྒྱད་ལས་ཆུང་ངམ་ལྷག་པ་ནི་མི་རུང་བས་ན་མ་གཏོགས་སོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་

ཞུགས་འགྲོ་བ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་དགེ་སློང་གང་གིས་འཚལ་བཞིན་དུ་དགེ་འདུན་གྱི་གཙུག་ལག་ཁང་ནས་དགེ་སློང་ཞིག་བསྐྲད་དམ་སྐྲོད་དུ་སྩལ་ན་ལྟུང་བར་འགྱུར་རོ་ཞེས་གསུངས་ན།
བཙུན་པ་དགེ་སློང་གིས་འཚལ་བཞིན་དུ་དགེ་འདུན་གྱི་གཙུག་ལག་ཁང་ནས་དགེ་སློང་ཞིག་ཕྲིན་གྱིས་བསྐྲད་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་པ་ཐམས་ཅད་ཉེས་བྱས་སུ་འགྱུར་རོ། །བཙུན་
པ་དགེ་སློང་གིས་དགེ་སློང་སྨྱོན་པ་ཞིག་བསྐྲད་དམ་སྐྲོད་དུ་སྩལ་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། གཉིད་ལོག་པ་དང་། ར་རོ་བ་དང་། མྱོས་པ་དང་། སྙོམས་པར་ཞུགས་
པ་དང་། འགྲོ་བ་གཞན་དུ་གནས་པ་རྣམས་བསྐྲད་དམ་སྐྲོད་དུ་སྩལ་ན་ཉེས་བྱས་སོ།། །།འདུལ་བ་གཞུང་དམ་པ། བམ་པོ་བདུན་པ། མདོར་ན། མཚན་དང་བཞི་པ་བདུན་པ་དང་། །དེ་བཞིན་ཁྱིམ་པ་ལ་སོགས་རྣམས། །དགེ་འདུན་ཐ་མར་གྱུར་པའོ། །བཙུན་པ་
དགེ་སློང་གིས་དགེ་འདུན་གྱི་གཙུག་ལག་ཁང་ནས་དགེ་སློང་ཞིག་བསྐྲད་དམ་སྐྲོད་དུ་སྩལ་བ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་དགེ་འདུན་གྱི་གཙུག་ལག་ཁང་ནས་དགེ་སློང་མ་བསྐྲད་དམ་སྐྲོད་དུ་སྩལ་བ་ན་མཚན་འཕོས་ཏེ་དགེ་
སློང་དུ་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་བསྐྲད་དམ་སྐྲོད་དུ་སྩལ་ན་ཅིར་འགྱུར། ལྟུང་བའོ། །བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ན་ཉེས་བྱས་སུ་འགྱུར་རོ། །བསྙེན་པར་མ་
རྫོགས་པ་ལ་བསྙེན་པར་རྫོགས་པར་འདུ་ཤེས་ན་ཉེས་བྱས་སུ་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ན་ཉེས་བྱས་སུ་འགྱུར་རོ། །བཙུན་པ་བསྙེན་པར་མ་རྫོགས་པ་ན་དགེ་སློང་ཞིག་བསྐྲད་པར་བཤམས་ནས་བསྙེན་པར་མ་རྫོགས་པ་ན་གྲུབ་ན་ཅིར་འགྱུར།

ཉེས་བྱས་སོ། །བསྙེན་པར་མ་རྫོགས་པར་བཤམས་ལ་བསྙེན་པར་རྫོགས་ཀར་བསྐྲད་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ལ་བསྙེན་པར་རྫོགས་ཏེ་བསྐྲད་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ལ་བསྙེན་པར་
རྫོགས་ཀར་བསྐྲད་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ཏེ་བསྐྲད་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ནས་བཤམས་ལ་བསྙེན་པར་རྫོགས་པ་ན་བསྐྲད་ན་ཅིར་འགྱུར། ལྟུང་བའོ། །བསྙེན་པར་རྫོགས་ནས་བཤམས་ལ་
བསྙེན་པར་མ་རྫོགས་པ་ན་བསྐྲད་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ཁྱིམ་པ་ཞིག་བསྐྲད་དམ་སྐྲོད་དུ་སྩལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་མ་དང་དགྲ་བཅོམ་པ་བསད་པ་དང་། དེ་
བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་པ་དང་། སྔར་ཉེས་པ་བྱུང་བ་དང་། སྔར་འཁྲུགས་པ་རྣམས་བསྐྲད་དམ་སྐྲོད་དུ་བཅུག་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་འདུན་གྱི་
དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་བསྐྲད་དམ་སྐྲོད་དུ་སྩལ་ན་ཅིར་འགྱུར། ཐམས་ཅད་ལྟུང་བར་འགྱུར་རོ། །བཙུན་པ་དགེ་སློང་ཞིག་མངོན་སུམ་དུ་ཁྱིམ་པ་ཞིག་སྐྲོད་དུ་སྩལ་ན་ཅིར་འགྱུར། ལྟུང་བའོ། །དེ་བཞིན་དུ་ཟ་མ་དང་། མ་ནིང་དང་། དགེ་སློང་མ་སུན་
ཕྱུང་བ་དང་། ཕ་དང་མ་བསད་པ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་པ་དང་། སོ་སོར་གནས་པ་དང་། མི་གནས་པ་དང་། སྔར་འཁྲུགས་པ་དང་། སྔར་ཉེས་
པ་བྱུང་བ་དང་། ཉེ་བར་ཕྱོགས་པ་དང་། བསླབ་པ་སྩལ་བ་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕས་སྐྲོད་དུ་སྩལ་ན་ཅིར་འགྱུར། ལྟུང་བའོ། །བཙུན་པ་དགེ་སློང་མ་ཞིག་གིས་དགེ་སློང་མ་བསྐྲད་དམ་སྐྲོད་དུ་སྩལ་ན་ཅིར་འགྱུར། ལྟུང་བའོ། །བཙུན་པ་

དགེ་སློང་མས་དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་བསྐྲད་དམ་སྐྲོད་དུ་སྩལ་ན་ཅིར་འགྱུར། ཉེས་བྱས་སོ། །བཙུན་པ་བསླབ་པ་སྩལ་བས་དགེ་སློང་མ་ཞིག་བསྐྲད་དམ་སྐྲོད་དུ་སྩལ་ན་ཅིར་འགྱུར། ལྟུང་བའོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་
རྣམས་ལ་ཉེས་བྱས་སོ།། །།མདོར་ན། སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་ཞུགས་འགྲོ་བ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ་བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་
གིས་སྔ་ན་མཆིས་པའི་དགེ་སློང་ལ་སླད་ཀྱིས་མཆིས་ཏེ་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་བགྱིད་ན་ལྟུང་བའོ་ཞེས་གསུངས་ན། བཙུན་པ་དགེ་སློང་གིས་དགེ་སློང་སྨྱོན་པ་ཞིག་ལ་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །དེ་བཞིན་དུ་
སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། གཉིད་ལོག་པ་དང་། ར་རོ་བ་དང་། མྱོས་པ་དང་། སྙོམས་པར་ཞུགས་པ་དང་། འགྲོ་བ་གཞན་དུ་གནས་པ་རྣམས་ལ་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་བགྱིད་ན་ཅིར་འགྱུར།
ཉེས་བྱས་སོ།། །།མདོར་ན། གང་ཟག་གི་དང་དགེ་འདུན་གྱི། །དེ་བཞིན་མཚན་དང་བཞི་པ་དང་། །ཁྱིམ་པ་དག་ལ་སོགས་པ་རྣམས། །མི་རུང་བ་ནི་ཐ་མར་གྱུར། བཙུན་པ་དགེ་སློང་གིས་གང་ཟག་གི་གཙུག་ལག་ཁང་ན་སྔ་ན་མཆིས་པའི་དགེ་སློང་རྣམས་ལ་ཤིན་ཏུ་གནོད་པར་བགྱིད་ཅིང་མཆིས་
སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་འདུན་གྱི་གཙུག་ལག་ཁང་མ་གཏོགས་པར་དེ་ལས་གཞན་པའི་གནས་ན་སྔ་ན་མཆིས་པའི་དགེ་སློང་རྣམས་ལ་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་
རྣམས་ལ་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་བགྱིད་པ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསྙེན་པར་མ་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ཏེ་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །བསྙེན་

པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་ན་ཉེས་བྱས་སོ། །བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ན་ཉེས་བྱས་སོ། །བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་
བགྱིད་ན་ཅིར་འགྱུར། ལྟུང་བའོ། །བཙུན་པ་དགེ་སློང་གིས་ཁྱིམ་པ་ལ་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །དེ་བཞིན་དུ་ཟ་མ་དང་། མ་ནིང་དང་། སྔར་ཉེས་པ་བྱུང་བ་རྣམས་ལ་ཤིན་ཏུ་གནོད་པ་བགྱིད་ཅིང་མཆིས་སམ་ཉལ་བར་བྱེད་ན་
ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ལ་ཤིན་ཏུ་གནོད་པ་བགྱིད་ཅིང་མཆིས་སམ་ཉལ་བར་བགྱིད་ན་ཅིར་འགྱུར། ཐམས་ཅད་ལྟུང་བར་འགྱུར་རོ། །བཙུན་པ་དགེ་སློང་གིས་དགེ་
འདུན་གྱི་གཙུག་ལག་ཁང་ན་སྔ་ན་མཆིས་པའི་དགེ་སློང་རྣམས་ལ་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་བགྱིད་ཀྱང་ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། མི་རུང་བའི་མལ་སྟན་ཡིན་ཏེ། གང་དགེ་སློང་རྣམས་ཀྱིས་སྤྱད་དུ་མི་རུང་བའོ། །བཙུན་པ་དགེ་སློང་གིས་
དགེ་སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་དགེ་སློང་དང་། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཤིན་ཏུ་གནོད་
པར་བགྱིད་ཅིང་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །བཙུན་པ་བསླབ་པ་སྩལ་བས་སྔ་ན་མཆིས་པའི་དགེ་སློང་རྣམས་ལ་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་བགྱིད་ན་ཅིར་འགྱུར། ལྟུང་བའོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་
ནི་ཉེས་བྱས་སོ།། །།མདོར་ན། གང་ཟག་གི་དང་དགེ་འདུན་གྱི། །དེ་བཞིན་མཚན་དང་བཞི་པ་དང་། །མི་རུང་བ་དང་དེ་བཞིན་བདུན། །ནམ་མཁའི་གཡོགས་པ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་

སློང་གི་དགེ་འདུན་གྱི་གཙུག་ལག་ཁང་གི་སྟེང་དུ་ཁང་བུ་བརྩེགས་པའི་ནང་དུ་ཁྲི་འམ་ཁྲིའུ་ཡང་རུང་རྐང་པ་གཟེར་བུ་མ་མཆིས་པར་འཚལ་བཞིན་དུ་མཆིས་སམ་ཉལ་བར་བགྱིད་ན་ལྟུང་བའོ་ཞེས་གསུང་ན། བཙུན་པ་དགེ་སློང་གིས་གང་ཟག་གི་གཙུག་ལག་ཁང་གི་སྟེང་དུ་ཁང་བུ་བརྩེགས་པའི་
ནང་དུ་ཁྲིའམ་ཁྲིའུ་ཡང་རུང་རྐང་པ་གཟེར་བུ་མ་མཆིས་པ་ལ་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་འདུན་གྱི་གཙུག་ལག་ཁང་མ་གཏོགས་པར་དེ་ལས་གཞན་པའི་གནས་ཀྱི་སྟེང་དུ་ཁང་བུ་བརྩེགས་པའི་ནང་དུ་གཟེར་བུ་མ་མཆིས་པའི་ཁྲིའམ་
ཁྲིའུའི་སྟེང་དུ་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་སྟེང་གི་ཡང་ཐོག་གི་ཁང་བུར་ཤིན་ཏུ་གནོད་པར་བགྱིད་ཅིང་མཆིས་སམ་ཉལ་བར་བགྱིད་པ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ལྟུང་བའོ། །བཙུན་པ་དགེ་སློང་གིས་སྟེང་
གི་ཡང་ཐོག་གི་ཁང་བུ་ལ་ཡང་ཐོག་ཏུ་འདུ་ཤེས་ཏེ་གཟེར་བུ་མ་མཆིས་པའི་ཁྲིའམ་ཁྲིའུའི་སྟེང་དུ་ལྗིད་ཀྱིས་ཕབ་སྟེ་མཆིས་སམ་ཉལ་བར་བགྱིད་ན་ཅིར་འགྱུར། ལྟུང་བའོ། །ཡང་ཐོག་ལ་ཡང་ཐོག་མ་ཡིན་པར་འདུ་ཤེས་ན་ཉེས་པ་མེད་དོ། །ཡང་ཐོག་མ་ཡིན་པ་ལ་ཡང་ཐོག་ཡིན་པར་འདུ་
ཤེས་ན་ཉེས་བྱས་སུ་འགྱུར་རོ། །ཡང་ཐོག་མ་ཡིན་པ་ལ་ཡང་ཐོག་མ་ཡིན་པར་འདུ་ཤེས་ན་ཉེས་པ་མེད་དོ། །བཙུན་པ་དགེ་སློང་གིས་སྟེང་གི་ཡང་ཐོག་གི་ཁང་བུར་ཁྲིའམ་ཁྲིའུ་རྐང་པ་གཟེར་བུ་མ་མཆིས་པའི་སྟེང་དུ་ལྗིད་ཀྱིས་ཕབ་སྟེ་མཆིས་སམ་ཉལ་བར་བགྱིད་ཀྱང་ལྟུང་བར་མི་འགྱུར་བ་མཆིས་
སམ། ཨུ་པཱ་ལི་ཡོད་དེ། མལ་སྟན་མི་རུང་བར་གྱུར་པ་གང་ལ་དགེ་སློང་རྣམས་ཀྱིས་སྤྱད་པར་མི་རུང་བའོ། །བཙུན་པ་བསྙེན་པར་མ་རྫོགས་པར་བཤམས་ལ་བསྙེན་པར་མ་རྫོགས་པར་མཆིས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ལ་བསྙེན་པར་རྫོགས་ཀར་
མཆིས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པ་ན་བཤམས་ལ་བསྙེན་པར་རྫོགས་པ་ན་ལྗིད་ཀྱིས་ཕབ་སྟེ་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ཀར་ཤིན་ཏུ་ལྗིད་ཀྱིས་ཕབ་སྟེ་མཆིས་སམ་ཉལ་བར་བགྱིད་

ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ཏེ་ལྗིད་ཀྱིས་ཕབ་སྟེ་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པ་ན་བཤམས་ལ་བསྙེན་པར་རྫོགས་ནས་ལྗིད་ཀྱིས་ཕབ་སྟེ་མཆིས་སམ་ཉལ་བར་བགྱིད་ན་
ཅིར་འགྱུར། ལྟུང་བའོ། །བསྙེན་པར་རྫོགས་པ་ན་བཤམས་ལ་བསྙེན་པར་མ་རྫོགས་པ་ན་ལྗིད་ཀྱིས་ཕབ་སྟེ་མཆིས་སམ་ཉལ་བར་བགྱིད་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ཁྲིའམ་ཁྲིའུ་རྐང་པ་གཟེར་བུ་མ་མཆིས་པ་ལ་ལྗིད་ཀྱིས་ཕབ་སྟེ་མཆིས་སམ་ཉལ་བར་བགྱིད་ཀྱང་
ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། དེ་ནི་འདི་ལྟར་གཙུག་ལག་ཁང་གི་སྟེང་སྤང་ལེབ་ཀྱིས་གཡོགས་པ་དང་། ས་གང་དུ་གྱུར་པ་ཡང་རུང་སྟེ་སྟེང་དུ་འདུག་གམ་ཉལ་བར་བྱེད་ན་ཉེས་པ་མེད་དོ། །བཙུན་པ་བསླབ་པ་སྩལ་བས་སྟེང་གི་ཡང་ཐོག་གི་ཁང་བུའི་ཁྲིའམ་ཁྲིའུ་རྐང་པ་
གཟེར་བུ་མ་མཆིས་པ་ལ་ལྗིད་ཀྱིས་ཕབ་སྟེ་མཆིས་སམ་ཉལ་བར་བགྱིད་ན་ཅིར་འགྱུར། ལྟུང་བའོ། །དགེ་སློང་མས་ལྗིད་ཀྱིས་ཕབ་སྟེ་མཆིས་སམ་ཉལ་བར་བགྱིད་ན་ཅིར་འགྱུར། ལྟུང་བའོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལྗིད་ཀྱིས་ཕབ་སྟེ་མཆིས་སམ།
ཉལ་བར་བགྱིད་ན་ཅིར་འགྱུར། ཉེས་བྱས་སོ། །སྲོག་ཆགས་དང་བཅས་པའི་ཆུས་རྩྭ་དང་ས་དང་བ་ལང་གི་ལྕི་བ་ལ་བཏབ་ན་ལྟུང་བའོ་ཞེས་གསུངས་པ་ཡང་བསྟན་པ་བཞིན་རྒྱས་པར་བརྗོད་པར་བྱའོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་
གཅིག །སྨྱོན་པ་སེམས་འཁྲུགས་ན་བ་དང་། །འོན་པ་དང་ནི་འགྲོ་བ་རྣམས། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་དགེ་སློང་གིས་གཙུག་ལག་ཁང་ཆེན་པོ་ཞིག་རྩིག་ན་འཇིམ་པ་དང་ཕ་གུར་སྤེལ་ཏེ་རིམ་པ་གཉིས་སམ་གསུམ་
གྱི་བར་དུ་རྩིགས་ཤིག་དེ་ལས་ལྷག་པར་བརྩིགས་ན་ལྟུང་བར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་ཕྲིན་གྱིས་རིམ་པ་གཉིས་སམ་གསུམ་ལས་ལྷག་པར་བརྩིགས་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་

བརྒྱུད་པ་ཐམས་ཅད་ཉེས་བྱས་སོ། །བཙུན་པ་དགེ་སློང་སྨྱོན་པས་རིམ་པ་གཉིས་སམ་གསུམ་ལས་ལྷག་པར་བརྩིགས་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། འགྲོ་བ་གཞན་དུ་
གནས་པ་རྣམས་རྩིག་ཏུ་སྩལ་ན་ཅིར་འགྱུར། ཐམས་ཅད་ཉེས་བྱས་སུ་འགྱུར་རོ།། །།མདོར་ན། ཆེན་པོ་གང་ཟག་རྡོ་བ་དང་། །གཞན་གྱིས་བརྩམས་པའང་དེ་བཞིན་ཏེ། །མཚན་དང་བཞི་པ་དེ་བཞིན་དུ། བསླབ་པ་བྱིན་དང་དགེ་སློང་མའོ། །བཙུན་པ་དགེ་སློང་གིས་གཙུག་ལག་ཁང་ཆེན་པོ་
མ་གཏོགས་པར་དེ་ལས་གཞན་པ་དགེ་འདུན་གྱི་དངོས་པོ་ཞིག་རྩིག་སྟེ་རིམ་པ་གཉིས་སམ་གསུམ་ལས་ལྷག་པར་བརྩིགས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་གང་ཟག་གི་གཙུག་ལག་ཁང་ཞིག་རྩིག་པ་ལྷག་པར་བརྩིགས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་
འདུན་གྱི་གཙུག་ལག་ཁང་རྩིག་པའི་ཚེ་ན་རིམ་པ་གཉིས་སམ་གསུམ་ལས་ལྷག་པར་བརྩིགས་ཀྱང་ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། དེ་ནི་འདི་ལྟར་གཙུག་ལག་ཁང་དེ་རྡོ་བ་འབའ་ཞིག་གིས་བརྩིགས་སམ་སྦྱིན་བདག་གིས་འདི་སྐད་དུ་སྦྱིན་པ་ཟིན་ན་ལྟའོ་ཞེས་སྨྲས་ན་ཉེས་པ་
མེད་དོ། །བཙུན་པ་དགེ་སློང་གིས་གཞན་གྱིས་རིམ་པ་གཉིས་སམ་གསུམ་བརྩིགས་སམ་གཞན་གྱིས་བརྩིགས་པ་ལས་ལགས་པར་བགྱིས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་འཇིམ་པ་དང་ཕ་གུ་སྤེལ་ཏེ་རིམ་པ་གཉིས་སམ་གསུམ་ལས་ལྷག་པར་བརྩིགས་ཏེ་གཞན་གྱིས་
ལགས་པར་མ་བགྱིས་ན་ཅིར་འགྱུར། ཉེས་བྱས་སོ། །སེམས་འཁྲུགས་པར་གྱུར་པའམ་དུས་བྱས་པ་ཡང་དེ་བཞིན་ནོ། །བཙུན་པ་དགེ་སློང་གིས་འཇིམ་པ་དང་ཕ་གུར་སྤེལ་ཏེ་རིམ་པ་གཉིས་སམ་གསུམ་ལས་ལྷག་པར་རྩིག་པ་ན་མཚན་འཕོས་ཏེ་དགེ་སློང་མར་གྱུར་ནས་ལགས་པར་བགྱིས་ན་ཅིར་
འགྱུར། ལྟུང་བའོ། །བཙུན་པ་དགེ་སློང་མས་འཇིམ་པ་དང་ཕ་གུར་སྤེལ་ཏེ་རིམ་པ་གཉིས་སམ་གསུམ་ལས་ལྷག་པར་རྩིག་པ་ན་མཚན་འཕོས་ཏེ་དགེ་སློང་ཕར་གྱུར་ནས་ལགས་པར་བགྱིས་ན་ཅིར་འགྱུར། ལྟུང་བའོ། །བཙུན་པ་དགེ་སློང་གིས་འཇིམ་པ་དང་ཕ་གུར་སྤེལ་ཏེ་རིམ་པ་གཉིས་སམ་གསུམ་ལས་

ལྷག་པ་ལ། ལྷག་པར་འདུ་ཤེས་ཏེ་བརྩིགས་ན་ཅིར་འགྱུར། ལྟུང་བའོ། །ལྷག་པ་ལ་མ་ལྷག་པར་འདུ་ཤེས་ན་ཉེས་པ་མེད་དོ། །མ་ལྷག་པ་ལ་ལྷག་པར་འདུ་ཤེས་ན། ཉེས་བྱས་སོ། །མ་ལྷག་པ་ལ་མ་ལྷག་པར་འདུ་ཤེས་ན་ཉེས་པ་མེད་དོ། །བཙུན་པ་བསླབ་པ་སྩལ་
བས་རིམ་པ་གཉིས་སམ་གསུམ་ལས་ལྷག་པར་བརྩིགས་ན་ཅིར་འགྱུར། ལྟུང་བའོ། །བཙུན་པ་དགེ་སློང་མས་རིམ་པ་གཉིས་སམ་གསུམ་ལས་ལྷག་པར་བརྩིགས་ན་ཅིར་འགྱུར། ལྟུང་བའོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཉེས་བྱས་སོ།། །།མདོར་ན། ཕྲིན་
པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་ཞུགས་འགྲོ་བ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་
ལྡན་འདས་ཀྱིས་ཡང་དགེ་སློང་གང་དགེ་འདུན་གྱིས་མ་བསྐོས་པར་དགེ་སློང་མ་ལ་སྟོན་ན་ལྟུང་བའོ་ཞེས་གསུངས་ན། བཙུན་པ་དགེ་སློང་དགེ་འདུན་གྱིས་མ་བསྐོས་པར་ཕྲིན་གྱིས་དགེ་སློང་མ་ལ་སྟོན་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་
གཅིག་ནས་གཅིག་ཏུ་བརྒྱུད་པ་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གི་དགེ་འདུན་གྱིས་མ་བསྐོས་པར་དགེ་སློང་མ་སྨྱོན་མ་ཞིག་ལ་བསྟན་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། འོན་པ་དང་། ལྐུགས་པ་
དང་། གཉིད་ལོག་པ་དང་། ར་རོ་བ་དང་། མྱོས་པ་དང་། སྙོམས་པར་ཞུགས་པ་དང་། འགྲོ་བ་གཞན་དུ་གནས་པ་རྣམས་ལ་བསྟན་ན་ཐམས་ཅད་ཉེས་བྱས་སུ་འགྱུར་རོ།། །།མདོར་ན། ཚིག་དང་ལུས་དང་དབེན་པ་དང་། །མཚན་དང་བཞི་པ་ལྔ་པ་དང་། །བཏང་བ་དང་ནི་ཉེ་བར་སོང་། །སློབ་
པ་གཞན་དང་ལན་གཉིས་བསྐོས། །བཙུན་པ་དགེ་སློང་འཕགས་པས་འཕགས་པའི་སྐད་དུ་དགེ་སློང་མ་ལ་བསྟན་པ་དང་། དགེ་སློང་མ་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །འཕགས་པས་མཐའ་འཁོབ་པའི་སྐད་དུ་དགེ་སློང་མ་ལ་བསྟན་པ་དང་། དགེ་སློང་

མ་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་འཕགས་པའི་སྐད་དུ་དགེ་སློང་མ་ལ་བསྟན་པ་དང་། དགེ་སློང་མ་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་མཐའ་འཁོབ་པའི་སྐད་དུ་
དགེ་སློང་མ་ལ་བསྟན་པ་དང་། དགེ་སློང་མ་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ལུས་ཀྱི་དམིགས་པས། དགེ་སློང་མ་ལ་བསྟན་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དབེན་པ་ལ་མི་དབེན་པར་འདུ་
ཤེས་ཏེ་བསྟན་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་སློང་མ་ལ་སྟོན་པ་ན་དེའི་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་སློང་མ་ལ་སྟོན་པ་ན་དགེ་སློང་མ་དེའི་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། ཉེས་
བྱས་སོ། །བཙུན་པ་དགེ་སློང་གིས་བསྙེན་པར་མ་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་ན་ཉེས་བྱས་སུ་འགྱུར་རོ། །བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ན་
ཉེས་བྱས་སུ་འགྱུར་རོ། །བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་བསྟན་ན་ཅིར་འགྱུར། ལྟུང་བའོ། །བཙུན་པ་དགེ་སློང་གིས་དགེ་སློང་མ་མ་ནིང་དང་། རྐུན་གནས་པ་དང་། སོ་སོར་གནས་པ་དང་། སྔར་ཉེས་པ་བྱུང་བ་དང་། སྔར་འཁྲུགས་པ་རྣམས་ལ་བསྟན་ན་ཅིར་
འགྱུར། ཐམས་ཅད་ཉེས་བྱས་སོ། །བཙུན་པ་དགེ་སློང་གིས་དགེ་འདུན་གྱི་དབྱེན་བགྱིད་མ་དང་། ཉེ་བར་ཕྱོགས་མ་དང་། བསླབ་པ་སྩལ་བ་རྣམས་ལ་བསྟན་ན་ཅིར་འགྱུར། ཐམས་ཅད་ལྟུང་བར་འགྱུར་རོ། །དགེ་སློབ་མ་དང་། དགེ་ཚུལ་མ་རྣམས་ལ་བསྟན་ན་ཐམས་ཅད་ཉེས་བྱས་སུ་འགྱུར་
རོ། །བཙུན་པ་དགེ་སློང་མ་ལ་སྟོན་པར་བགྱིད་པ་དེས་བར་དུ་བཏང་བར་གྱུར་ན་ལན་གཉིས་སུ་བསྐོ་འཚལ་ལམ། ཨུ་པཱ་ལི་མི་དགོས་ཏེ། སྔར་སྡོམ་པ་བྱིན་པ་ཉིད་ཀྱིས་སྟོན་ཅིག །བཙུན་པ་རྗེས་སུ་མ་ཕྱོགས་པའི་དགེ་སློང་གིས་རྗེས་སུ་ཕྱོགས་པའི་དགེ་སློང་མ་ལ་བསྟན་ན་ཅིར་འགྱུར།

ཉེས་བྱས་སོ། །བཙུན་པ་རྗེས་སུ་ཕྱོགས་པའི་དགེ་སློང་གིས་རྗེས་སུ་མ་ཕྱོགས་པའི་དགེ་སློང་མ་ལ་བསྟན་ན་ཅིར་འགྱུར། ཉེས་བྱས་སོ། །བཙུན་པ་བསླབ་པ་སྩལ་བ་ཞིག་སྔར་དགེ་སློང་མ་ལ་སྟོན་པར་བསྐོས་པ་ལས་དེ་ནི་ནོངས་པ་ཚངས་ན་ལན་གཉིས་བསྐོ་འཚལ་ལམ། ཨུ་
པཱ་ལི་མི་དགོས་ཏེ། སྔར་སྡོམ་པ་བྱིན་པ་ཉིད་ཀྱིས་སྟོན་ཅིག །བཙུན་པ་དགེ་སློང་མ་ལ་སྟོན་པའི་དགེ་སློང་གནས་གཞན་དུ་བསྐོས་པ་ལས་གནས་གཞན་དུ་མཆིས་ནས་སྟོན་ན་སྔར་སྡོམ་པ་དེ་ཉིད་ཀྱིས་དགེ་སློང་མ་ལ་བསྟན་པར་བགྱིའམ། བསྟན་པར་མི་བགྱི། ཨུ་པཱ་ལི་བསྟན་པར་བྱའོ། །
བཙུན་པ་དགེ་སློང་མ་ལ་སྟོན་པ་ན་སེམས་འཁྲུགས་པར་གྱུར་ནས་རང་གི་སེམས་སླར་རྙེད་ན་ལན་གཉིས་སུ་བསྐོ་འཚལ་ལམ། ཨུ་པཱ་ལི་མི་དགོས་སོ། །ཆོས་ལྔ་དང་ལྡན་པ་དགེ་སློང་མ་ལ་སྟོན་པར་བསྐོས་ན་བསྐོས་པ་ཞེས་བགྱིའམ། མ་བསྐོས་པ་ཞེས་བགྱི། ཨུ་པཱ་ལི་བསྐོས་པ་ཞེས་བྱ་
སྟེ་དགེ་འདུན་ཡང་འདས་པ་དང་བཅས་པར་མི་འགྱུར་རོ། །བཙུན་པ་དགེ་སློང་དགེ་འདུན་གྱིས་དགེ་སློང་མ་ལ་སྟོན་པར་བསྐོས་ཀྱང་ནོངས་པ་དང་བཅས་པར་འགྱུར་བ་མཆིས་སམ། ཨུ་པཱ་ལི་ཡོད་དེ། ཆོས་ལྔ་དང་མི་ལྡན་པར་གྱུར་པའོ། །བཙུན་པ་དགེ་སློང་དགེ་སློང་མ་ལ་སྟོན་པར་དགེ་འདུན་
གྱིས་མ་བསྐོས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། དགྲ་བཅོམ་པས་བསྟན་པའོ། །བཙུན་པ་བསླབ་པ་སྩལ་བ་ཞིག་དགེ་སློང་མ་ལ་སྟོན་པར་དགེ་འདུན་གྱིས་མ་བསྐོས་ན་ཅིར་འགྱུར། ལྟུང་བའོ། །བཙུན་པ་དགེ་ཚུལ་ཕ་ཞིག་དགེ་སློང་མ་ལ་སྟོན་ན་ཅིར་འགྱུར་ཉེས་བྱས་
སོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་ཞུགས་འགྲོ་བ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་
པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་དགེ་སློང་གིས་དགེ་འདུན་གྱི་གདུགས་བས་ཀྱི་བར་དུ་དགེ་སློང་མ་ལ་སྟོན་པར་བསྐོས་པ་དང་། དེ་ལས་འདས་པར་སྟོན་ན་ལྟུང་བར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་ཕྲིན་གྱིས་གདུགས་བས་པ་ལས་འདས་པར་

བསྟན་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་། ལག་བ