Kinh tạng Tây Tạng (Kangyur Đại Học) — 012_འདུལ་བ།_ན

ེལ་བར་བགྱིད་ན་
ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབང་བ་ལས་ཕྲིན་བླངས་ནས་མི་དབང་བ་ལ་སྐྱེལ་ཅིང་དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབང་བ་ལས་ཕྲིན་བླངས་ནས་མི་དབང་བ་ལ་སྐྱེལ་ཅིང་། མི་དབང་བ་ལ་ཕྱིར་སྐྱེལ་བར་

བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་མི་དབང་བ་ལས་ཕྲིན་བླངས་ནས་མི་དབང་བ་ལ་སྐྱེལ་ཅིང་། མི་དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་བྱས་སུ་འགྱུར་རོ། །མི་དབང་བ་ལས་ཕྲིན་བླངས་ནས་
མི་དབང་བ་ལ་སྐྱེལ་ཅིང་། དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབང་བ་ལས་ཕྲིན་བླངས་ནས་དབང་བ་ལ་སྐྱེལ་ཅིང་། མི་དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབང་
བ་ལས་ཕྲིན་བླངས་ནས་དབང་བ་ལ་སྐྱེལ་ཅིང་། དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་ཁྱིམ་བདག་ཅིག་ལ་འདི་སྐད་ཅེས་བུད་མེད་ཉོས་ཤིག་ཅེས་བགྱིས་ན་ཅིར་འགྱུར་ལགས། ཉེས་པ་སྦོམ་
པོར་འགྱུར་རོ། །བཙུན་པ་རེ་ཞིག་དགེ་སློང་གིས་ཁྱིམ་བདག་ཅིག་ལ་འདི་སྐད་ཅེས་བུད་མེད་ཆེ་གེ་མོ་ཞེས་བྱ་བ་ཉོས་ཤིག་ཅེས་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་བསྙེན་པར་མ་རྫོགས་པར་སྨྱན་བགྱི་བར་སྦྱོར་བ་བགྱིས་ལ་
བསྙེན་པར་མ་རྫོགས་པར་སྐྱེལ་ཅིང་། བསྙེན་པར་མ་རྫོགས་པར་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་བྱས་སོ། །བསྙེན་པར་མ་རྫོགས་པར་སྨྱན་བགྱིད་པར་སྦྱོར་བ་བགྱིས་ལ་བསྙེན་པར་མ་རྫོགས་པར་སྐྱེལ་ཅིང་། བསྙེན་པར་རྫོགས་ཀར་ཕྱིར་
སྐྱེལ་བར་བགྱིད་ན་ཅིར་འགྱུར་ལགས། ཉེས་བྱས་སོ། །བསྙེན་པར་མ་རྫོགས་པར་སྨྱན་བགྱིད་པར་སྦྱོར་བ་བགྱིས་ལ་བསྙེན་པར་མ་རྫོགས་པར་སྐྱེལ་ཅིང་། བསྙེན་པར་རྫོགས་ཏེ་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཀར་སྨྱན་
བགྱིད་པར་སྦྱོར་བ་བགྱིས་ལ་བསྙེན་པར་རྫོགས་ཀར་སྐྱེལ་ཅིང་། བསྙེན་པར་རྫོགས་ནས་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་བྱས་སུ་འགྱུར་རོ། །བསྙེན་པར་རྫོགས་ཀར་སྨྱན་བགྱི་བར་སྦྱོར་བ་བགྱིས་ལ་བསྙེན་པར་རྫོགས་ཀར་སྐྱེལ་ཅིང་། བསྙེན་པར་རྫོགས་ནས་

ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ནས་སྨྱན་བགྱི་བར་སྦྱོར་བ་བགྱིས་ལ། བསྙེན་པར་རྫོགས་ནས་སྐྱེལ་ཅིང་། བསྙེན་པར་རྫོགས་ནས་ཕྱིར་སྐྱེལ་བར་བགྱིད་ན་ཅིར་འགྱུར་ལགས། དགེ་འདུན་ལྷག་
མར་འགྱུར་རོ། །བསྙེན་པར་རྫོགས་ཏེ་སྨྱན་བགྱིས་ལ་བསྙེན་པར་རྫོགས་ཏེ་སྐྱེལ་ཅིང་བསྙེན་པར་མ་རྫོགས་པར་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་བྱས་སུ་འགྱུར་རོ། །བཙུན་པ་གང་ཟག་དེ་ཉིད་སྤོ་བ་ཡང་ལགས། དེ་ཉིད་སྤོ་བ་བགྱིས་པ་ཡང་ལགས། དེ་ཉིད་མགུ་བར་
བགྱི་བར་སྤྱོད་པ་ཡང་ལགས། དེ་ཉིད་མགུ་བར་བགྱིད་པ་སྤྱད་པ་ཡང་ལགས་པ་ལྟ་མཆིས་ལགས་སམ། ཡོད་དེ་འདི་ལྟར་མགུ་བར་བྱ་བ་སྤྱད་པའི་གང་ཟག་ལ་དགེ་འདུན་ལྷག་མའི་ལྟུང་བ་མ་བཅབས་པ་བྱུང་བ་དེ་དགེ་འདུན་གྱི་དྲུང་དུ་སོང་ནས་མགུ་བར་བྱ་བ་གསོལ་བ་ལས། དགེ་འདུན་
གྱིས་དེ་ལ་མགུ་བར་བྱ་བ་བྱིན་ནས། དེས་མགུ་བར་བྱ་བ་ཕལ་ཆེར་སྤྱད་པ་ལས་དགེ་འདུན་ལྷག་མའི་ལྟུང་བ་གཉིས་པོ་གཅིག་ནི་ཞག་གཅིག་བཅབས། གཉིས་པ་ནི་ཞག་གཉིས་བཅབས་པ་བྱུང་ནས་དེ་དགེ་འདུན་གྱི་དྲུང་དུ་སོང་སྟེ་སྤོ་བ་གསོལ་བ་ལས་དགེ་འདུན་གྱིས་དེ་ལ་སྤོ་བ་
བྱིན་ན་དེ་ལྟུང་བ་གཅིག་ནི་བྱས་པ་ཡིན་ནོ། །གཉིས་པས་ནི་སྤོ་བ་ཡིན་ནོ། །གསུམ་པས་ནི་མགུ་བར་བྱ་བ་སྤྱོད་པ་ཡིན་ནོ། །བཞི་པས་ནི་མགུ་བར་བྱ་བ་སྤྱད་པ་ཡིན་ནོ། །བཙུན་པ་རེ་ཞིག་མོ་ཡང་མི་ལགས། ཕོ་ཡང་མི་ལགས་ལ། དགེ་སློང་གིས་དེ་གཉིས་ཀྱི་སྨྱན་བགྱིས་
ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །མོ་ནི་མི་མ་ལགས། ཕོ་ནི་མི་མ་ལགས་ལ། དེ་གཉིས་ཀྱི་སྨྱན་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མོ་ནི་མི་མ་ལགས། ཕོ་ནི་མི་ལགས་ལ། དེ་གཉིས་ཀྱི་སྨྱན་བགྱིས་ན་ཅིར་
འགྱུར་ལགས། ཉེས་པ་སྦོམ་པོར་འགྱུར་རོ། །མོ་ཡང་མི་མ་ལགས། ཕོ་ཡང་མི་མ་ལགས་ལ། དེ་གཉིས་ཀྱི་སྨྱན་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་མི་དག་ལ་མིར་འདུ་ཤེས་པས་སྨྱན་བགྱིས་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ། །མི་དག་ལ་མི་མ་ལགས་པར་འདུ་ཤེས་པས་སྨྱན་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་དག་ལ་མིར་འདུ་ཤེས་པས་སྨྱན་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་དག་
ལ། མི་མ་ལགས་པར་འདུ་ཤེས་པས་སྨྱན་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་བརྒྱུད་དེ་སྨྱན་བགྱིས་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ།། །།སྡོམ་ལ། གཞོན་ནུ་མ་དང་བུ་མེད་མངལ། །ཟ་མ་
མ་ནིང་མ་ནིང་མོ། །དགེ་འདུན་ཐམས་ཅད་བརྟུལ་ཞུགས་གནས། །མཚན་གཉིས་དང་ནི་འདྲི་བའོ། །བཙུན་པ་རེ་ཞིག་དགེ་སློང་གིས་གཞོན་ནུ་མ་ལ་སྨྱན་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་བུ་མ་མཆིས་པའི་ཁྱིམ་བདག་རྣམས་ཀྱི་སྨྱན་
བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་མངལ་ན་གནས་པ་རྣམས་ཀྱི་སྨྱན་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་ཟ་མའི་སྨྱན་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མ་ནིང་མོ་
རྣམས་ཀྱི་སྨྱན་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་དགེ་འདུན་ཐམས་ཅད་འདུས་པའི་དྲུང་དུ་ཁྱིམ་བདག་གཅིག་ཕྱིན་ནས་འདི་སྐད་ཅེས་འཕགས་པ་དག་བདག་གི་ཚིག་གིས་ཁྱིམ་བདག་ཆེ་གེ་མོ་ཞིག་ལ་འདི་སྐད་ཅེས་བདག་གི་བུ་ལ། བུ་མོའམ།
སྲིང་མོའམ། ཚ་མོའམ། ཡང་ཚ་མོ་སྩོལ་ཅིག་ཅེས་གསུང་སྤྱོད་དམ་ཞེས་བགྱིས་པ་ལས། གལ་ཏེ་དགེ་འདུན་ཀུན་གྱིས་ཕྲིན་བླངས་ནས་སྐྱེལ་ཅིང་ཕྱིར་སྐྱེལ་བར་བགྱིད་ན་དགེ་འདུན་ཐམས་ཅད་ལ་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །འོན་ཏེ་དགེ་འདུན་
ཐམས་ཅད་ཀྱི་ཕྲིན་གྱིས་དགེ་སློང་གཅིག་གིས་སྐྱེལ་ཅིང་ཕྱིར་སྐྱེལ་བར་བགྱིད་ན་དགེ་འདུན་ཐམས་ཅད་ལ་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །འོན་ཏེ་དགེ་སློང་གཅིག་གིས་རང་གི་ཚིག་གིས་སྐྱེལ་ཅིང་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་པ་སྦོམ་

པོར་འགྱུར་རོ། །དགེ་སློང་མ་དང་། བརྟུལ་ཞུགས་ལ་གནས་པར་ཚངས་པར་སྤྱོད་པ་གཞན་དག་གི་སྨྱན་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་ཕྲིན་ལེན་པ་ལས་བླངས་མ་ཐག་ཏུ་དེའི་མཚན་གྱུར་ཏེ། དགེ་སློང་མར་རེད་ནས་
སྐྱེལ་ཅིང་ཕྱིར་སྐྱེལ་བར་བགྱིད་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ་རེ་ཞིག་དགེ་སློང་མ་ཞིག་ཕྲིན་ལེན་པ་ལས་བླངས་མ་ཐག་ཏུ་དེའི་མཚན་གྱུར་ཏེ། དགེ་སློང་དུ་རེད་ནས་སྐྱེལ་ཅིང་ཕྱིར་སྐྱེལ་བར་བགྱིད་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་
པ་རེ་ཞིག་དགེ་སློང་ཕྲིན་ལེན་པ་ལས་བུད་མེད་དེ་ལ་ནི་ཕོ་མཚན་སྐྱེས། སྐྱེས་པ་ལ་ནི་བུད་མེད་ཀྱི་མོ་མཚན་དོད་པར་གྱུར་ནས་མཚན་འཕོས་བཞིན་དུ་སྐྱེལ་ཅིང་ཕྱིར་སྐྱེལ་བར་བགྱིད་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ་སྐྱེས་པས་བུད་མེད་དང་ལྷན་ཅིག་བརྡ་བགྱིས་པར་གྱུར་ལ།
སྐྱེས་པ་དེས་དགེ་སློང་ཞིག་ལ་འདི་སྐད་ཅེས་འཕགས་པས་བུད་མེད་ལྟ་གཟིགས་སམ་ཞེས་བགྱིས་པ་དང་། དགེ་སློང་དེས་འདི་སྐད་ཅེས་དེ་ར་བའི་དྲུང་དུ་འདུག་གོ་ཞེས་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་སྨྱན་བགྱིས་ཀྱང་དགེ་
འདུན་ལྷག་མར་མི་འགྱུར་བ་ལྟ་མཆིས་ལགས་སམ། ཡོད་དེ་སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློང་མ་སུན་ཕྱུང་བ་ལ་ནི་ཉེས་བྱས་སོ། །ཇི་ལྟར་དགེ་སློང་སྨྱན་བྱས་པ་ལ་དགེ་འདུན་ལྷག་མར་གྱུར་
པ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་དགེ་འདུན་ལྷག་མར་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི་ཉེས་བྱས་སོ།། །།སྡོམ་ལ། གཞི་གསུམ་དང་ནི་ཚད་མ་དང་། །བདག་དང་གཞན་དང་མ་གཡོགས་པ། །
བབས་དང་བདུན་ཚན་ཉིད་དང་ནི། །མཚན་ནི་ཐ་མར་གྱུར་པ་ཡིན། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་དགེ་སློང་གིས་བསླངས་པ་བདག་པོ་མེད་པ། བདག་གི་ཕྱིར་ཁང་པ་ཞིག་རྩིག་ཏུ་བཅུག་ན། དགེ་སློང་

དེས་ཁང་པ་ཚད་བཞིན་དུ་རྩིགས་ཤིག །དེ་ལ་ཁང་པའི་ཚད་ནི་འདི་ཡིན་ཏེ། ནང་གི་སྲིད་དུ་བདེ་བར་གཤེགས་པའི་མཐོ་བཅུ་གཉིས་ཞེང་དུ་མཐོ་བདུན་ནོ། །གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ། །ཁྲིད་པའི་དགེ་སློང་དག་གིས་ཀྱང་གཞི་རུང་བ་དང་། རྩོད་པ་མེད་པ་དང་།
བརྩམ་དུ་རུང་བར་བལྟ་བར་བྱའོ། །གལ་ཏེ་དགེ་སློང་གིས་གཞི་མི་རུང་བའམ། རྩོད་པ་དང་བཅས་པའམ། བརྩམ་དུ་མི་རུང་བར་བདག་གིས་བསླངས་པ་བདག་པོ་མེད་པ་བདག་གི་ཕྱིར་ཁང་པ་རྩིག་ཏུ་འཇུག་གམ། གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ། དགེ་སློང་ཁྲིད་པ་
དག་ལ་ཡང་གཞི་མི་སྟོན་ཏམ། ཚད་ལས་འདས་ན་དགེ་འདུན་ལྷག་མར་འགྱུར་རོ། །ཞེས་གསུངས་པ་གང་ལགས་པ། བཙུན་པ་རེ་ཞིག་དགེ་སློང་གིས་གཞི་མ་སྣད་པར་ཁང་པ་རྩིག་ཏུ་སྩོལ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །གཞི་བསླངས་ནས་ཁང་པ་རྩིག་ཏུ་སྩོལ་ན་ཅིར་
འགྱུར་ལགས། ཉེས་བྱས་སོ། །ཁང་པ་གནང་བ་སྩོལ་ནས་ཁང་པ་མ་བརྩིགས་ན་ཅིར་འགྱུར་ལགས། ཉེས་བྱས་སོ། །བདག་གིས་བརྩམས་ཏེ་འཕྲོ་བོར་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །གཞན་གྱིས་འཕྲོ་བོར་བ་ལགས་པར་བགྱིད་ན་ཅིར་འགྱུར་ལགས།
ཉེས་པ་སྦོམ་པོར་འགྱུར་རོ། །མ་གཡོགས་པ་རྩིག་ཏུ་སྩལ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསམས་ནས་བབས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་བདག་ཉིད་སྲོག་དང་ཕྲལ་བའམ། ཁྱིམ་པ་ཉིད་དུ་གཡར་གྱིས་འཆི་བ་དང་།
དགེ་སྦྱོང་གི་ཆེད་ཉིད་དང་། ཟ་མ་ཉིད་དང་། མ་ནིང་ཉིད་དང་། དགེ་སློང་མ་སུན་ཕྱུང་བ་ཉིད་དང་། མ་གསོད་པ་ཉིད་དང་། ཕ་གསོད་པ་ཉིད་དང་། དགྲ་བཅོམ་པ་གསོད་པ་ཉིད་དང་། དགེ་འདུན་གྱི་དབྱེན་བྱེད་པ་ཉིད་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་
འབྱིན་པ་དང་། མུ་སྟེགས་ཅན་ཉིད་དང་། མུ་སྟེགས་ཅན་དུ་ཞུགས་པ་ཉིད་དང་། རྐུ་ཐབས་སུ་གནས་པ་ཉིད་དང་། གནས་པར་མི་བྱ་བ་ཉིད་དང་། དང་པོ་མི་མཐུན་པ་ཅན་ཉིད་དང་། ཐ་དད་དུ་གནས་པ་ཉིད་དང་། ཁས་ལེན་པ་ཉིད་དང་། བསླབ་པ་སྩལ་བ་ཉིད་དུ་གཡར་

གྱིས་འཆེ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་མ་རྫོགས་པར་སྦྱོར་བ་བགྱིས་ལ་བསྙེན་པར་མ་རྫོགས་པར་ལགས་པར་བགྱིད་ན་ཅིར་འགྱུར་ལགས། ཉེས་བྱས་སོ།། །།འདུལ་བ་གཞུང་བླ་མ། བམ་པོ་གསུམ་པ། བསྙེན་པར་
མ་རྫོགས་པར་སྦྱོར་བ་བགྱིས་ལ། བསྙེན་པར་རྫོགས་ཀར་ལགས་པར་བགྱིད་ན་ཅིར་འགྱུར་ལགས། ཉེས་བྱས་སོ། །བསྙེན་པར་མ་རྫོགས་པར་སྦྱོར་བ་བགྱིས་ལ། བསྙེན་པར་རྫོགས་ནས་ལགས་པར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་
ཀར་སྦྱོར་བ་བགྱིས་ལ། བསྙེན་པར་རྫོགས་ཀར་ལགས་པར་བགྱིད་ན་ཅིར་འགྱུར་ལགས། ཉེས་བྱས་སོ། །བསྙེན་པར་རྫོགས་ཀར་སྦྱོར་བ་བགྱིས་ལ། བསྙེན་པར་རྫོགས་ནས་ལགས་པར་བགྱིས་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ནས་སྦྱོར་བ་
བགྱིས་ལ། བསྙེན་པར་རྫོགས་ནས་ལགས་པར་བགྱིད་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བསྙེན་པར་རྫོགས་ནས་སྦྱོར་བ་བགྱིས་ལ། བསྙེན་པར་མ་རྫོགས་པར་ལགས་པར་བགྱིད་ན་ཅིར་འགྱུར་ལགས། ཉེས་བྱས་སོ། །བཙུན་པ་རེ་ཞིག་དགེ་སློང་ཁང་པ་
ཞིག་རྩིག་པར་རྩོམ་པ་ལས་དེའི་མཚན་གྱུར་ཏེ། དགེ་སློང་མར་རེད་ནས་ལགས་པར་བགྱིད་ན་ཅིར་འགྱུར་ལགས། ཉེས་བྱས་སོ། །བཙུན་པ་རེ་ཞིག་དགེ་སློང་མ་ཞིག་ཁང་པ་རྩིག་པར་རྩོམ་པ་ལས་དེའི་མཚན་གྱུར་ཏེ། དགེ་སློང་དུ་རེད་ནས་ལགས་པར་བགྱིད་ན་ཅིར་འགྱུར་ལགས།
ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་ཁང་པ་བརྩིགས་ཀྱང་དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ། ཡོད་དེ་སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློང་མ་སུན་ཕྱུང་
བ་ལ་ནི་ཉེས་བྱས་སུ་འགྱུར་རོ། །བསླབ་པ་སྩལ་བས་རྩིག་ཏུ་སྩལ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །དགེ་སློང་མ་ཞིག་གིས་རྩིག་ཏུ་སྩལ་ན་ཅིར་འགྱུར་ལགས། ཉེས་བྱས་སོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི་ཉེས་བྱས་

སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་དགེ་སློང་གིས་བདག་པོ་ཡོད་པ། དགེ་འདུན་གྱི་ཆེད་དུ་གཙུག་ལག་ཁང་ཆེན་པོ་ཞིག་རྩིག་ཏུ་འཇུག་ན་གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ། །ཁྲིད་
པའི་དགེ་སློང་དག་གིས་ཀྱང་གཞི་རུང་བ་དང་། རྩོད་པ་མེད་པ་དང་། བརྩམ་དུ་རུང་བར་བལྟ་བར་བྱའོ། །གལ་ཏེ་དགེ་སློང་གིས་གཞི་མི་རུང་བའམ། རྩོད་པ་དང་བཅས་པའམ། བརྩམ་དུ་མི་རུང་བར་བདག་པོ་ཡོད་པ་དགེ་འདུན་གྱི་ཕྱིར་གཙུག་ལག་ཁང་ཆེན་པོ་རྩིག་ཏུ་འཇུག་
གམ། གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ། དགེ་སློང་ཁྲིད་པ་དག་ལ་ཡང་གཞི་མི་སྟོན་ན་དགེ་འདུན་ལྷག་མའོ་ཞེས་གསུངས་པ་གང་ལགས་པ་ཞེས་བྱ་བ་སྟེ། ཚད་ལས་འདས་པ་དང་། བསླངས་པ་ཉིད་མ་གཏོགས་པ་གཞུང་ལྷག་མ་ནི་ཁང་པའི་དགེ་འདུན་ལྷག་མ་ལ་བཤད་པ་
ཇི་ལྟ་བར་གཙུག་ལག་ཁང་ཆེན་པོ་ལ་ཡང་དེ་བཞིན་དུ་བརྗོད་པར་བྱའོ།། །།སྡོམ་ལ། ཕོ་ཉ་ཡི་གེ་ལག་བརྡ་དང་། །གཞན་ལ་སྙད་འདོགས་བརྒྱུད་པ་དང་། །སྨྱོན་པ་དང་ནི་སེམས་འཁྲུགས་དང་། །ཚོར་བ་འོན་པ་གླེན་པ་དང་། །གཉིད་ལོག་ར་རོ་རབ་ཏུ་མྱོས། །སྙོམས་ཞུགས་འགྲོ་
དང་ཕྱི་རོལ་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་ཁྲོས་ཤིང་ཞེ་སྡང་བས་མ་མགུ་སྟེ། ཅི་ནས་ཀྱང་འདི་ཚངས་པར་སྤྱོད་པ་དང་བྲལ་ལོ་སྙམ་ནས་དགེ་སློང་དག་ལྟུང་བ་མེད་པ་ལ་གཞི་མེད་པར་ཕམ་
པར་འགྱུར་བའི་ཆོས་ཀྱིས་སྐུར་པ་བཏབ་པ་ལས་དེ་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་རྩོད་པ་དེ་ཡང་གཞི་མེད་པ་ཡིན་ལ། དགེ་སློང་དེ་ཡང་ཞེ་སྡང་གིས་སྨྲས་སོ་ཞེ་ན། དགེ་འདུན་ལྷག་མའོ་ཞེས་གསུངས་པ་གང་ལགས་པ། བཙུན་པ་རེ་ཞིག་དགེ་སློང་གིས་དགེ་སློང་ལ་གཞི་མ་
མཆིས་པར་ཕོ་ཉ་ལས་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་ཡི་གེ་དང་། ལག་བརྡ་དང་། གཞན་ལ་སྙད་འདོགས་པ་དང་། བརྒྱུད་པས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་

པ་རེ་ཞིག་དགེ་སློང་གིས་དགེ་སློང་སྨྱོན་པ་ཞིག་ལ་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་སེམས་འཁྲུགས་པ་དང་། ཚོར་བས་ཉམ་ཐག་པ་དང་། འོན་པ་དང་། གླེན་པ་དང་། གཉིད་ཀྱིས་ལོག་པ་དང་། ཕྱག་ལས་ཁོམ་པ་
དང་། རབ་ཏུ་མྱོས་པ་དང་། སྙོམས་པར་ཞུགས་པ་དང་། འགྲོ་བ་གཞན་དུ་གནས་པའི་དགེ་སློང་ལ་གཞི་མ་མཆིས་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་འདི་ལས་ཕྱི་རོལ་པ་གཞན་མུ་
སྟེགས་ཅན་དང་། དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་ཏུ་རྒྱུ་རྣམས་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་བྱས་སོ།། །།སྡོམ་ལ། སྐད་དང་ལུས་དང་དབེན་སྔགས་དང་། །གཞན་གྱིས་གཞན་ཕྱིར་སྐུར་པ་བཏབ། །
ཁྱིམ་པ་དག་ལ་སོགས་པ་དང་། །མཚན་རྣམས་དང་ནི་བཞི་ཚན་ནོ། །བཙུན་པ་རེ་ཞིག་དབུས་ཀྱི་དགེ་སློང་གིས་མཐའ་འཁོབ་པའི་སྐད་དུ་དབུས་ཀྱི་དགེ་སློང་ཞིག་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་པ་ལ། ཡུལ་དབུས་པའི་དགེ་སློང་གིས་ཀྱང་མཐའ་འཁོབ་པའི་
སྐད་དེ་མ་འཚལ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མཐའ་འཁོབ་པས་དབུས་པའི་སྐད་དུ་མཐའ་འཁོབ་པའི་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ལ། མཐའ་འཁོབ་པའི་དགེ་སློང་གིས་ཀྱང་དབུས་པའི་སྐད་དེ་མ་འཚལ་ན་ཅིར་འགྱུར་
ལགས། ཉེས་པ་སྦོམ་པོར་འགྱུར་རོ། །མཐའ་འཁོབ་པས་མཐའ་འཁོབ་པའི་སྐད་དུ་དབུས་པའི་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ལ། ཡུལ་དབུས་པའི་དགེ་སློང་གིས་ཀྱང་མཐའ་འཁོབ་པའི་སྐད་དེ་མ་འཚལ་ན་ཅིར་འགྱུར་ལགས། ཉེས་པ་སྦོམ་
པོར་འགྱུར་རོ། །དབུས་པས་དབུས་པའི་སྐད་དུ་མཐའ་འཁོབ་པའི་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ལ། མཐའ་འཁོབ་པའི་དགེ་སློང་གིས་ཀྱང་དབུས་པའི་སྐད་དེ་མ་འཚལ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་

ཞིག་དགེ་སློང་གིས་ལུས་ཀྱི་རྣམ་པར་རིག་བྱེད་ཀྱིས་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་དབེན་པ་ལ་དབེན་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་
སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབེན་པ་ལ་མི་དབེན་པར་འདུ་ཤེས་པས་གཞི་མ་མཆིས་པ་ལ་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབེན་པ་ལ་དབེན་པར་འདུ་ཤེས་པས་གཞི་མ་མཆིས་པར་ཕམ་
པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབེན་པ་ལ་མི་དབེན་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ་རེ་ཞིག་དགེ་སློང་གིས་སྨན་ནམ་
གསང་སྔགས་ཀྱིས་བདག་ཉིད་མི་གདའ་བར་བགྱི་སྟེ། དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་གཞན་ལས་དགེ་སློང་ཞིག་ལ་གཞི་མ་མཆིས་པར་ཕམ་པར་གྱུར་པའི་ཆོས་
ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་དགེ་སློང་གཞན་རྣམས་ཀྱི་སླད་དུ། གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་
ཁྱིམ་པ་ལ་གཞི་མ་མཆིས་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་བྱས་སོ། །ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། མ་གསོད་པ་དང་། ཕ་གསོད་པ་དང་། དགྲ་བཅོམ་པ་གསོད་པ་དང་། མུ་སྟེགས་ཅན་དང་། མུ་སྟེགས་
ཅན་དུ་ཞུགས་པ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། སྔར་ལྟུང་བ་བྱུང་བ་ལ་གཞི་མ་མཆིས་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་དགེ་སློང་ཐ་

མ་ལ་གཞི་མ་མཆིས་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །དགེ་འདུན་གྱི་དབྱེན་བགྱིད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་དང་། གནས་པར་མི་བྱ་བ་དང་། ཐ་དད་དུ་གནས་
པ་དང་། ཁས་བླངས་པ་དང་། བསླབ་པ་སྩལ་བའི་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ་རེ་ཞིག་དགེ་སློང་ཞིག་གིས་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་འདེབས་པ་ལས་
དེའི་མཚན་གྱུར་ཏེ། དགེ་སློང་མར་རེད་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ་རེ་ཞིག་དགེ་སློང་མ་ཞིག་གིས་དགེ་སློང་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་འདེབས་པ་ལས་དེའི་མཚན་གྱུར་ཏེ། དགེ་སློང་དུ་རེད་ན་ཅིར་འགྱུར་ལགས། དགེ་
འདུན་ལྷག་མར་འགྱུར་རོ། །བཙུན་པ་རེ་ཞིག་དགེ་སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བསྙེན་པར་རྫོགས་པ་ལ་བསྙེན་པར་མ་
རྫོགས་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་
པ་སྦོམ་པོར་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་མ་རྫོགས་པར་འདུ་ཤེས་པས་གཞིས་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་མིའི་དགེ་སློང་ལ་མིར་འདུ་ཤེས་པས་གཞི་མ་
མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །མི་ལ་མི་མ་ལགས་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་

པས་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མི་མ་ལགས་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ།། །།སྡོམ་ལ། དང་
པོ་མཐའ་དང་མཚམས་མེད་པ། །ལྷག་མ་དང་ནི་གཅིག་ལ་གཅིག །བྲིས་པ་དང་ནི་བག་ཙམ་ཉིད། །རྒྱ་ཆེར་བྱ་བ་ཉིད་ཡིན་ནོ། །བཙུན་པ་རེ་ཞིག་དགེ་སློང་བདག་ཉིད་ངས་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ཏོ་ཞེས་ཁས་ལེན་པ་དེ་ལ། དགེ་སློང་ཞིག་གིས་གཞི་
མ་མཆིས་པར་རྐུ་བའམ། གསོད་པ་དང་། བླ་མར་གྱུར་པའི་ཆོས་སྨྲས་པས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ་རེ་ཞིག་དགེ་སློང་བདག་ཉིད་ངས་ཡོ་བྱད་ཆེན་པོ་བརྐུས་སོ་ཞེས་ཁས་ལེན་པ་དེ་ལ་དགེ་སློང་ཞིག་གིས་གཞི་མ་མཆིས་པར་གསོད་
པའམ། བླ་མར་གྱུར་པའི་ཆོས་སྨྲ་བའམ། མི་ཚངས་པར་སྤྱོད་པས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ་རེ་ཞིག་དགེ་སློང་བདག་ཉིད་ངས་མི་སྲོག་དང་ཕྲལ་ལོ་ཞེས་ཁས་ལེན་པ་དེ་ལ། དགེ་སློང་ཞིག་གིས་གཞི་མ་མཆིས་པར་བླ་མར་གྱུར་པའི་
ཆོས་སྨྲ་བའམ། མི་ཚངས་པར་སྤྱོད་པའམ། རྐུ་བས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ་རེ་ཞིག་དགེ་སློང་བདག་ཉིད་ངས་མིའི་ཆོས་བླ་མར་གྱུར་པ་སྨྲས་སོ་ཞེས་ཁས་ལེན་པ་དེ་ལ་དགེ་སློང་ཞིག་གིས་གཞི་མ་མཆིས་པར་མི་ཚངས་པར་
སྤྱོད་པའམ། རྐུ་བའམ། སྲོག་གཅོད་པས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་
འགྱུར་རོ་ཞེས་གསུངས་པ་གང་ལགས་པ། བཙུན་པ་རེ་ཞིག་དགེ་སློང་གིས་དགེ་སློང་ལ་གཞི་མ་མཆིས་པར་མཚམས་མེད་པས་སྐུར་པ་བཏབ་ན་ཅིར་འགྱུར་ལགས། གལ་ཏེ་མ་དང་། ཕ་དང་། དགྲ་བཅོམ་པ་གསོད་པས་སྐུར་པ་བཏབ་ན། དགེ་འདུན་ལྷག་མར་འགྱུར་རོ། །

འོན་ཏེ་གཞི་མེད་པར་དགེ་འདུན་གྱི་དབྱེན་བྱེད་པ་དང་། ངན་སེམས་ཀྱིས་ཁྲག་འབྱིན་པས་སྐུར་པ་བཏབ་ན་ཉེས་བྱས་སོ། །དེ་ཅིའི་ཕྱིར་ཞེ་ན། ཉེ་བ་འཁོར་གང་གིས་ཕ་དང་། མ་དང་། དགྲ་བཅོམ་པ་གསོད་པས་སྐུར་པ་བཏབ་པ་དེས་ནི་ཕམ་པའི་ཆོས་ཀྱིས་
སྐུར་པ་བཏབ་པ་ཡིན་ནོ། །གང་གིས་དགེ་འདུན་གྱི་དབྱེན་བྱེད་པ་དང་། ངན་སེམས་ཀྱིས་ཁྲག་འབྱིན་པས་སྐུར་པ་བཏབ་པ་དེས་ནི་ཉེས་པ་སྦོམ་པོར་སྐུར་པ་བཏབ་པ་ཡིན་ཏེ། ཉེས་པ་སྦོམ་པོས་ནི་དགེ་སློང་མ་ཡིན་པར་མི་འགྱུར་གྱི། དེ་ནི་བཤགས་པར་འོས་པ་ཡིན་ནོ། །བཙུན་
པ་རེ་ཞིག་དགེ་སློང་གིས་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། དགེ་འདུན་ལྷག་མར་འགྱུར་ན། གལ་ཏེ་གཞི་མ་མཆིས་པར་དགེ་འདུན་ལྷག་མའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ལྟུང་བྱེད་དུ་འགྱུར་རོ། །གཞི་མ་མཆིས་པར་
སོ་སོར་བཤགས་པར་བགྱི་བ་དང་། ཉེས་བྱས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་བྱས་སོ། །དེ་བཞིན་དུ་གཞི་མ་མཆིས་པར་ཉེས་པ་སྦོམ་པོས་སྐུར་པ་བཏབ་ན་ཅིར་འགྱུར་ལགས། ཉེས་བྱས་སོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་དགེ་སློང་
ལ་གཞི་མེད་པར་ཕམ་པའི་ཆོས་ཀྱིས་སྐུར་པ་བཏབ་ན་དགེ་འདུན་ལྷག་མར་འགྱུར་རོ་ཞེས་གསུངས་པ་གང་ལགས་པ། བཙུན་པ་རེ་ཞིག་དགེ་སློང་གིས་དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས།
ཉེས་པ་སྦོམ་པོར་འགྱུར་རོ། །དགེ་སློབ་མས་དགེ་སློང་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་ལ་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་
འགྱུར་རོ། །དགེ་སློབ་མས་དགེ་སློང་མ་དང་། དགེ་ཚུལ་དང་། དགེ་ཚུལ་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དགེ་སློང་མས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་

ཚུལ་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་བྱས་སོ། །དགེ་ཚུལ་གྱིས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་
ལགས། ཉེས་བྱས་སོ། །དགེ་ཚུལ་མས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། ཉེས་བྱས་སོ། །བཙུན་པ་རེ་ཞིག་དགེ་སློང་གིས་བདག་ཉིད་ཀྱིས་བྲིས་
ནས་འདི་སྐད་ཅེས་ཡི་གེ་འདི་ལས་ནི་འདི་སྐད་དུ་ཁྱོད་ལ་མི་ཚངས་པར་སྤྱོད་པའི་ཕམ་པ་བྱུང་ངོ་ཞེས་ཟེར་རོ་ཞེས་མཆི་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ཀྱང་དགེ་འདུན་
ལྷག་མར་མི་འགྱུར་བ་ལྟ་མཆིས་ལགས་སམ། ཡོད་དེ་སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློང་མ་སུན་ཕྱུང་བ་ལ་ནི་ཉེས་བྱས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།
བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་ཁྲོས་ཤིང་ཞེ་སྡང་བར་གྱུར་ནས། ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས། དགེ་སློང་དག་ལ་ལྟུང་བ་མེད་པ་ལ་གཞན་གྱི་ཆ་དང་མཐུན་པ་མ་ཡིན་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་
པ་ལས། དེ་དུས་གཞན་ཞིག་ན་དྲིས་ཀྱང་རུང་། མ་དྲིས་ཀྱང་རུང་། རྩོད་པ་དེ་ཡང་གཞན་གྱི་ཆ་དང་མཐུན་པ་མ་ཡིན་ལ། རྩོད་པ་དེ་ཡང་གཞན་གྱི་ཆ་དང་མཐུན་པ་མ་ཡིན་པས། བག་ཙམ་ལས་བསམས་པ་ཙམ་གྱིས་ཆོས་འགའ་ཞིག་བླངས་པར་གྱུར་ལ། དགེ་སློང་ཡང་ཞེ་སྡང་
ལ་གནས་པས་ཞེ་སྡང་གིས་སྨྲས་སོ་ཞེ་ན། དགེ་འདུན་ལྷག་མའོ་ཞེས་གསུངས་པ་གང་ལགས་པ་ཞེས་བྱ་བ་སྟེ། གཞུང་ལྷག་མ་ནི་གཞི་མེད་པ་ཇི་ལྟ་བ་དེ་བཞིན་དུ་བག་ཙམ་ལ་རྒྱ་ཆེར་བརྗོད་པར་བྱའོ།། །།སྡོམ་ལ། བཤེས་པ་དང་ནི་གསོལ་བ་དང་། །གླེན་པ་

དང་ནི་དྲན་པ་གཉིས། །བཞི་པ་འདུག་དང་མ་བསྐོས་དང་། །འདུན་པས་གཅིག་དང་ནམ་མཁའ་ལ། །འདུག་པ་རྒྱས་པ་ཉིད་དུ་བྱ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་། དགེ་
འདུན་མཐུན་པ་དེ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་གྱུར་པའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་ན། དགེ་སློང་དེ་ལ་དགེ་སློང་རྣམས་ཀྱིས་འདི་སྐད་ཅེས་ཚེ་དང་ལྡན་པ་ཁྱོད་དགེ་སློང་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག །དབྱེན་བྱེད་པར་འགྱུར་བའི་རྩོད་པ་ཡང་དག་
པར་བླངས་ནས་རབ་ཏུ་བཟུང་སྟེ་མ་འདུག་ཤིག །ཚེ་དང་ལྡན་པ་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་ཏུ་དགའ། མི་རྩོད་མཆོག་གཅིག །འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ་སྟོན་པའི་བསྟན་པ་གསལ་བར་བྱེད་པ་བདེ་བ་དང་རེག་
པར་གནས་པར་འགྱུར་གྱིས་ཚེ་དང་ལྡན་པ་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་ཐོང་ཤིག་ཅེས་བསྒོ་བར་བྱའོ། །དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏང་བར་བྱ་བའི་ཕྱིར་ལན་གཉིས་ལན་གསུམ་
དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། །ཡང་དག་པར་བསྟན་པ་ན། གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་འདུན་ལྷག་མའོ་ཞེས་གསུངས་པ་གང་ལགས་པ། བཙུན་པ་རེ་ཞིག་དགེ་
སློང་གིས་བཤེས་པའི་ཚིག་གིས་མ་བསྒོ་བར་གསོལ་བ་དང་། བཞིའི་ལས་ཀྱིས་བསྒོ་བར་བགྱིད་ན། བསྒོ་བ་ཞེས་བགྱིའམ་འོན་ཏེ་མ་བསྒོ་བ་ཞེས་བགྱི་ལགས། བཀའ་སྩལ་པ། མ་བསྒོ་བ་ཞེས་བྱའོ། །བསྒོ་བ་འཆགས་ལགས་སམ། ཉེ་བ་འཁོར་མི་འཆགས་ཏེ། དགེ་འདུན་ལ་
ཡང་དེས་འགལ་ཚབས་ཅན་དུ་འགྱུར་རོ། །བཙུན་པ་བཤེས་པའི་ཚིག་གིས་བསྒོ་ནས་གསོལ་བ་དང་། བཞིའི་ལས་ཀྱིས་བསྒོ་ན་བསྒོ་བ་ཞེས་བགྱིའམ། འོན་ཏེ་མ་བསྒོ་བ་ཞེས་བགྱི་ལགས། བཀའ་སྩལ་པ། བསྒོ་བ་ཞེས་བྱའོ། །བསྒོ་བ་འཆགས་ལགས་སམ། །ཉེ་བ་འཁོར་

འཆགས་ཏེ། དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །བཙུན་པ་བསྐྲད་པའི་ལས་མ་བགྱིས་པར་བཤེས་པའི་བསྒོ་བར་བགྱིད་ན་བསྒོ་བ་ཞེས་བགྱིའམ། འོན་ཏེ་མ་བསྒོ་བ་ཞེས་བགྱི་ལགས། བཀའ་སྩལ་པ། བསྒོ་བ་ཞེས་མི་བྱའོ། །བསྒོ་བ་འཆགས་ལགས་སམ། ཉེ་བ་
འཁོར་མི་འཆགས་ཏེ། དགེ་འདུན་ལ་ཡང་འགལ་ཚབས་ཅན་དུ་འགྱུར་རོ། །བཙུན་པ་བསྐྲད་པའི་ལས་བགྱིས་ཏེ། བཤེས་པའི་ཚིག་གིས་བསྒོ་བར་བགྱིད་ན་བསྒོ་བ་ཞེས་བགྱིའམ། འོན་ཏེ་མ་བསྒོ་བ་ཞེས་བགྱི་ལགས། བཀའ་སྩལ་པ། བསྒོ་བ་ཞེས་བྱའོ། །བསྒོ་བ་འཆགས་ལགས་
སམ། ཉེ་བ་འཁོར་འཆགས་ཏེ། དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །བཙུན་པ་བསྐྲད་པའི་ལས་མ་བགྱིས་པར་དགེ་འདུན་ལ་འདུན་པས་འགྲོའོ་ཞེས་མཆི་ཞིང་ཞེ་སྡང་གིས་འགྲོ་བ་དང་། གཏི་མུག་གིས་འགྲོ་བ་དང་། འཇིགས་པས་འགྲོ་བའོ་ཞེས་མཆི་ན་ཅིར་འགྱུར་ལགས། ཉེས་
བྱས་སོ། །བསྒོ་བར་བགྱི་འམ། འོན་ཏེ་བསྒོ་བར་མི་བགྱི་ལགས། བཀའ་སྩལ་པ། བསྒོ་བར་མི་བྱའོ། །བསྒོ་བ་འཆགས་ལགས་སམ། ཉེ་བ་འཁོར་མི་འཆགས་ཏེ། དགེ་འདུན་ལ་ཡང་འགལ་ཚབས་ཅན་དུ་འགྱུར་རོ། །བསྐྲད་པའི་ལས་བགྱིས་ནས། དགེ་འདུན་ལ་འདུན་པས་འགྲོ་བའོ་ཞེས་
མཚོ་ཞིང་ཞེ་སྡང་གིས་འགྲོ་བ་དང་། གཏི་མུག་གིས་འགྲོ་བ་དང་། འཇིགས་པས་འགྲོ་བའོ་ཞེས་མཆི་ན་ཅིར་འགྱུར་ལགས། ཉེས་བྱས་སོ། །བསྒོ་བར་བགྱིའམ། འོན་ཏེ་བསྒོ་བར་མི་བགྱིད་ལགས། བཀའ་སྩལ་པ། བསྒོ་བར་བྱའོ། །བསྒོ་བ་འཆགས་ལགས་སམ། ཉེ་བ་
འཁོར་འཆགས་ཏེ། དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །བཙུན་པ་རེ་ཞིག་མ་གླེངས་དྲན་པར་མ་བགྱིས་པར་བདག་ཉིད་བཀའ་བློ་མི་བདེ་བ་ལ་གནས་པར་བགྱིད་ན་ཅིར་འགྱུར་ལགས། ཉེས་བྱས་སོ། །བསྒོ་བར་བགྱིའམ། འོན་ཏེ་བསྒོ་བར་མི་བགྱི་ལགས།
བཀའ་སྩལ་པ། བསྒོ་བར་མི་བྱའོ། །བསྒོ་བ་འཆགས་ལགས་སམ། ཉེ་བ་འཁོར་མི་འཆགས་སོ། །བཙུན་པ་རེ་ཞིག་གླེངས་ཤིང་དྲན་པར་བགྱིས་པ་ལས་བདག་ཉིད་བཀའ་བློ་མི་བདེ་བ་ལ་གནས་པར་བགྱིད་ན་ཅིར་འགྱུར་ལགས། ཉེས་བྱས་སོ། །བསྒོ་བར་བགྱིའམ། འོན་ཏེ་

བསྒོ་བར་མི་བགྱི་ལགས། བཀའ་སྩལ་པ། བསྒོ་བར་བྱའོ། །བསྒོ་བ་འཆགས་ལགས་སམ། ཉེ་བ་འཁོར་འཆགས་སོ། །མཚམས་ཀྱི་ནང་ན་མཆིས་པ་དག་གིས་མཚམས་ཀྱི་སླད་རོལ་ན་མཆིས་པ་ལ་བསྒོ་ན་བསྒོ་བ་ཞེས་བགྱི་ལགས་སམ། ཉེ་བ་འཁོར་མ་
ཡིན་ནོ། །མཚམས་ཀྱི་སླད་རོལ་ན་མཆིས་པ་དག་གིས་མཚམས་ཀྱི་ནང་ན་མཆིས་པ་དག་ལ་བསྒོ་ན་བསྒོ་བ་ཞེས་བགྱི་ལགས་སམ། ཉེ་བ་འཁོར་མ་ཡིན་ནོ། །བཙུན་པ་རེ་ཞིག་དགེ་སློང་ལས་བགྱིད་པ་མཚམས་ཀྱི་ནང་ན་མཆིས་པས་མཚམས་ཀྱི་སླད་རོལ་ན་མཆིས་པ་དག་ལ་བསྒོ་ན་བསྒོ་
བ་ཞེས་བགྱི་ལགས་སམ། ཉེ་བ་འཁོར་མ་ཡིན་ནོ། །བཙུན་པ་རེ་ཞིག་དགེ་སློང་ལས་བགྱིད་པ་མཚམས་ཀྱི་སླད་རོལ་ན་མཆིས་པས་མཚམས་ཀྱི་ནང་ན་མཆིས་པ་དག་ལ་བསྒོ་ན་བསྒོ་བ་ཞེས་བགྱི་ལགས་སམ། ཉེ་བ་འཁོར་མ་ཡིན་ནོ། །བཙུན་པ་རེ་ཞིག་དགེ་སློང་ལས་བགྱིད་པས་མཚམས་
མནན་ཅིང་། མཚམས་ནོན་པར་བགྱིས་ཏེ། མཚམས་སུ་མཆིས་ནས་བསྒོ་ན་བསྒོ་ཞེས་བགྱིའམ། མ་བསྒོ་ཞེས་བགྱི་ལགས། ཉེ་བ་འཁོར་བསྒོ་བ་ཞེས་བྱའོ། །བསྒོ་བ་འཆགས་ལགས་སམ། ཉེ་བ་འཁོར་འཆགས་སོ། །བཙུན་པ་དགེ་སློང་ལས་བགྱིད་པར་མ་བསྐོས་པ་
ཞིག་གིས་མཚམས་ཀྱི་ནང་ན་མཆིས་པའི་གང་ཟག་བཞི་བསྐྲད་ན། བསྐྲད་པ་ཞེས་བགྱི་ལགས་སམ། ཉེ་བ་འཁོར་མ་ཡིན་ནོ། །བཙུན་པ་རེ་ཞིག་དགེ་སློང་ལས་བགྱིད་པར་བསྐོས་པས་མཚམས་ཀྱི་ནང་ན་མཆིས་པའི་གང་ཟག་བཞི་ཞིག་བསྐྲད་ན། བསྐྲད་པ་ཞེས་བགྱི་ལགས་སམ།
གལ་ཏེ་དེས་རེ་རེ་དང་། གཉིས་གཉིས་དང་། གསུམ་གསུམ་ནས་བསྐྲད་ཀྱི་བཞིར་མ་ཡིན་ན་བསྐྲད་པ་ཞེས་བྱའོ། །བཙུན་པ་དགེ་སློང་ལས་བགྱིད་པས་མཚམས་ཀྱི་ནང་ཕྱོགས་བཞི་ན་མཚུངས་པར་གནས་པའི་དགེ་སློང་བཞི་ཞིག་ལ་བསྒོ་ན་བསྒོ་བར་ཡང་ཆུད་ལ་ལྟུང་བ་གང་དུ་
ཡང་མི་འགྱུར་ཞིང་། དེས་དགེ་འདུན་མི་མཐུན་པར་ཡང་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་གལ་ཏེ་ཕན་ཚུན་འདུན་པ་བྱིན་པས་རེ་རེ་དང་། གཉིས་གཉིས་དང་། གསུམ་གསུམ་ལ་བསྒོའི་བཞི་བཞི་ལ་མ་ཡིན་ན་ཡོད་དོ། །དེ་ཅིའི་ཕྱིར་ཞེ་ན། ཚོགས་ཀྱིས་ཚོགས་ཀྱི་ལས་

དག་བྱར་མི་རུང་བས་སོ། །ལས་བགྱིད་པ་ཕྱོགས་གཅིག་ན་མཆིས་པས་གནས་བཞིའི་ལས་ཐམས་ཅད་བགྱིར་རུང་ལགས་སམ། ཉེ་བ་འཁོར་འདི་ལྟར་དགེ་སློང་ལས་བྱེད་པས་གནས་བཞི་ཅར་གྱི་མཚམས་ཀྱི་མདོ། ཁྲིའམ་ཁྲིའུའམ། རེ་ལྡེའམ། རེ་ལྗོང་རིངས་ཀྱིས་མནན་ཏེ་
འདུག་པར་གྱུར་ལ། གནས་དེ་དག་ན་ཡང་ལས་འདི་ལྟ་བུ་འདི་ལྟ་སྟེ། བཞིའི་ཚོགས་ཀྱིས་བྱ་བའི་ལས་དང་། ལྔའི་ཚོགས་ཀྱིས་བྱ་བའི་ལས་དང་། བཅུའི་ཚོགས་ཀྱིས་བྱ་བའི་ལས་དང་། ཉི་ཤུའི་ཚོགས་ཀྱིས་བྱ་བའི་ལས་ཉེ་བར་གནས་པར་གྱུར་ན་རུང་ངོ་། །དེ་ཅིའི་ཕྱིར་
ཞེ་ན། དེ་དག་ཁ་ཅིག་ནི་ལས་བྱེད་པ་ཡིན་ལ། ཁ་ཅིག་གི་ནི་ཚོགས་སྐྱོང་བ་ཡིན་ནོ། །ས་ལ་མཆིས་པས་ནམ་མཁའ་ལ་མཆིས་པ་རྣམས་ལ་བསྒོ་ན་བསྒོ་བ་ཞེས་བགྱི་ལགས་སམ། ཉེ་བ་འཁོར་མ་ཡིན་ནོ། །བཙུན་པ་རེ་ཞིག་ལས་བགྱིད་པ་ནམ་མཁའ་ལ་མཆིས་ལ། ས་ལ་མཆིས་
པ་རྣམས་ལ་བསྒོ་ན་བསྒོ་བ་ཞེས་བགྱི་ལགས་སམ། ཉེ་བ་འཁོར་མ་ཡིན་ནོ། །ཇི་ལྟར་དགེ་སློང་ལ་དགེ་འདུན་ལྷག་མར་འགྱུར་བ་ཇི་ལྟ་བ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་དགེ་འདུན་ལྷག་མར་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་རྣམས་
ལ་ནི་ཉེས་བྱས་སོ། །སྔར་ལྟུང་བ་བྱུང་བ་ལ་སོགས་པ་ལ་ཡང་ཉེས་བྱས་ཁོ་ན་སྟེ། སྔ་མ་བཞིན་ནོ། །དེ་ལྟར་ན་གཞུང་འདི་ནི་དགེ་འདུན་ལྷག་མ་གསུམ་ལ་ཡང་ཅི་རིགས་པར་བརྗོད་པར་བྱ་བ་ཡིན་ནོ། ཉེ་བ་འཁོར་གྱིས་ཞུས་པ་ཁ་ཆེ་བ་ལས། དགེ་འདུན་ལྷག་མ་རྫོགས་སོ།། །།
སྡོམ་ལ། མཐའ་དང་ལམ་དང་རྒྱལ་རིགས་དང་། །ཕུང་པོ་དེ་བཞིན་ལྷག་མ་དང་། །ཁ་དང་ཤ་ཀ་ར་དང་ཧྭགས། །བུ་རམ་མར་སར་མ་ངེས་གཉིས། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་བུད་
མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་། དབེན་པ་སྐྱབས་ཡོད་པ་ན། འདོད་པ་བྱར་རུང་བར་སྟན་ལ་འདུག་པར་བྱེད་ཅིང་། དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གསུམ་པོ་ཕམ་པར་འགྱུར་བའམ། དགེ་འདུན་ལྷག་མའམ། ལྟུང་བྱེད་

ལས་གང་ཡང་རུང་བས་སྨྲས་པར་གྱུར་ལ། དགེ་སློང་གིས་འདུག་པས་ཁས་བླངས་ན་ཆོས་གསུམ་པོ་ཕམ་པར་འགྱུར་བའམ། དགེ་འདུན་ལྷག་མའམ། ལྟུང་བྱེད་ལས་ཆོས་གང་ཡང་རུང་བས་བྱེད་དུ་གཞུག་ཅིང་། དགེ་སློང་དེ་ལ་དགེ་བསྙེན་མ་ཡིད་ཆེས་པའི་ཚིག་དང་
ལྡན་པས་ཆོས་གང་དང་གང་གིས་སྨྲས་པར་གྱུར་པའི་ཆོས་དེ་དང་དེས་དགེ་སློང་དེ་བྱེད་དུ་བཅུག་སྟེ། དེ་ནི་མ་ངེས་པའི་ཆོས་སོ། །ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་། དབེན་པ་སྐྱབས་ཡོད་པ་ན། འདོད་པ་བྱར་མི་རུང་བར་སྟན་ལ་འདུག་པར་བྱེད་ཅིང་། དེ་
ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གཉིས་པོ་དགེ་འདུན་ལྷག་མའམ། ལྟུང་བྱེད་ལས་ཆོས་གང་ཡང་རུང་བས་སྨྲས་པར་གྱུར་ལ། དགེ་སློང་གིས་འདུག་པར་ཁས་བླངས་ན། ཆོས་གཉིས་པོ་དགེ་འདུན་ལྷག་མའམ། ལྟུང་བྱེད་ལས་ཆོས་གང་ཡང་རུང་བར་
བྱེད་དུ་གཞུག་ཅིང་དགེ་སློང་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གང་དང་གང་གིས་སྨྲས་པར་གྱུར་པའི་ཆོས་དེ་དང་དེས་དགེ་སློང་དེ་བྱེད་དུ་བཅུག་སྟེ། དེ་ཡང་མ་ངེས་པའི་ཆོས་སོ་ཞེས་གསུངས་པ་གང་ལགས་པ། བཙུན་པ་རེ་ཞིག་དགེ་བསྙེན་མ་ཡིད་ཆེས་པའི་ཚིག་དང་
ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས། འདི་སྐད་ཅེས་བཙུན་པ་དག་བདག་གིས་དགེ་སློང་མཐའ་དང་པོ་འབྱིན་པར་བགྱིད་པ་མཐོང་ངོ་ཞེས་མཆི་ན། དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་ཚོལ་
དུ་སྩལ་ཏམ། མི་གཞུག་སྟེ། རེ་ཞིག་དེ་ལ་དེ་ན་ཆེ་ཞེ་ཟླ་འགའ་ཡོད་དམ་ཞེས་དྲི་བར་བྱའོ། །གལ་ཏེ་འདི་སྐད་ཅེས་ཡོད་དོ་ཞེས་ཟེར་ན་གཉིས་ཀ་ལ་དྲི་བར་བྱ་སྟེ། གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བྱེད་དུ་གཞུག་ཅིང་། དེ་དེའི་ངོ་བོ་ཉིད་དུ་ཚོལ་དུ་གཞུག་
གོ། །འོན་ཏེ་དེ་འདི་སྐད་ཅེས་འདི་མཐའ་དང་པོ་ནི་མ་བྱུང་གི་འོན་ཀྱང་བདག་གིས་མཐའ་གཉིས་པ་དང་། གསུམ་པ་དང་། བཞི་པ་བྱུང་བ་མཐོང་ངོ་ཞེས་ཟེར་ན་དགེ་སློང་ལ་རྨེད་དུ་གཞུག་གོ། །དང་པོ་ཇི་ལྟར་མཐའ་གཉིས་པ་དང་། གསུམ་པ་དང་། བཞི་པ་རྣམས་ལ་ཡང་

དེ་བཞིན་དུ་བརྗོད་པར་བྱའོ། །བཙུན་པ་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་ཅེས་བཙུན་པ་དག་བདག་གིས་དགེ་སློང་ཞིག་གིས་ཁའི་ལམ་དུ་ཉམས་པར་བགྱིས་པ་མཐོང་ངོ་ཞེས་མཆི་ན། དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་
གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་ཚོལ་དུ་སྩལ་ཏམ། མི་གཞུག་སྟེ། རེ་ཞིག་དེ་ལ་ཆེ་ཞེ་ཟླ་འགའ་ཡོད་དམ་ཞེས་དྲི་བར་བྱའོ། །གལ་ཏེ་འདི་སྐད་ཅེས་ཡོད་དོ་ཞེས་ཟེར་ན་གཉི་ག་ལ་དྲི་བར་བྱ་སྟེ། གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་
ཚིག་གིས་བྱེད་དུ་བཅུག་ཅིང་། དེ་དེའི་ངོ་བོ་ཉིད་ཚོལ་དུ་གཞུག་གོ། །འོན་ཏེ་དེ་འདི་སྐད་ཅེས་འདིས་ཁའི་ལམ་དུ་ནི་ཉམས་པར་མ་བྱས་ཏེ། འོན་ཀྱང་བཤང་བའི་ལམ་དང་། གཅི་བའི་ལམ་དུ་ཉམས་པར་བྱས་སོ་ཞེས་ཟེར་ན་དགེ་སློང་ལ་རྨེད་དུ་གཞུག་གོ། །ཁའི་ལམ་དུ་ཇི་ལྟ་བར་བཤང་
བའི་ལམ་དང་། གཅི་བའི་ལམ་དུ་དེ་བཞིན་དུ་བརྗོད་པར་བྱའོ། །བཙུན་པ་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་ཅེས། བཙུན་པ་དག་དགེ་སློང་ཞིག་རྒྱལ་རིགས་མ་ཞིག་དང་ལྷན་ཅིག་ཏུ་ཉམས་པར་བགྱིད་པ་བདག་གིས་
མཐོང་ངོ་ཞེས་མཆི་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་དུ་ཚོལ་དུ་སྩལ་ཏམ། མི་གཞུག་སྟེ། རེ་ཞིག་དེ་ལ་དེ་ན་ཆེ་ཞེ་ཟླ་འགའ་ཡོད་དམ་ཞེས་དྲི་བར་བྱའོ། །གལ་ཏེ་དེ་འདི་སྐད་ཅེས་ཡོད་དོ་ཞེས་ཟེར་ན།
གཉི་ག་ལ་དྲི་བར་བྱ་སྟེ། །གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བྱེད་དུ་གཞུག་ཅིང་། དེ་དེའི་ངོ་བོ་ཉིད་དུ་ཚོལ་དུ་གཞུག་གོ། །འོན་ཏེ་དེ་འདི་སྐད་ཅེས་འདིས་རྒྱལ་རིགས་དང་ལྷན་ཅིག་ཏུ་ཉམས་པར་ནི་མ་བྱས་ན། འོན་ཀྱང་བྲམ་ཟེ་མོ་དང་ལྷན་ཅིག་ཏུ་
ཉམས་པར་གྱུར་ཏོ་ཞེས་ཟེར་ན་དགེ་སློང་ལ་རྨེད་དུ་གཞུག་གོ། །རྒྱལ་རིགས་མོ་དང་ཇི་ལྟ་བར་བྲམ་ཟེ་མོའི་རིགས་དང་། རྗེའུ་རིགས་མོ་དང་། དམངས་རིགས་མོ་དང་། དཀར་མོ་དང་། སྔོན་མོ་དང་། སྔོ་བསངས་མོ་དང་། རིང་མོ་དང་། ཐུང་ངུ་མ་དང་། སྡུག་གུ་མ་དང་།

སྐྱེམ་མོ་དང་། ཚོན་མོ་དང་། ལུས་རན་པ་དང་། འགྲོ་བ་དང་། འདུག་པ་དང་། འགྲེང་བ་དང་། འགྱེལ་བ་དང་། ཡང་རྒྱས་པར་བརྗོད་པར་བྱའོ། །བཙུན་པ་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས། འདི་སྐད་
ཅེས་བཙུན་པ་དག་བདག་གིས་དགེ་སློང་ཞིག་མཐའ་དང་པོའི་ཕུང་པོ་འབྱིན་པར་བགྱིད་པ་མཐོང་ངོ་ཞེས་མཆི་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་ཚོལ་དུ་སྩལ་ཏམ། མི་གཞུག་སྟེ། རེ་ཞིག་དེ་ལ་ཆེ་ཞེ་ཟླ་
འགའ་ཡོད་དམ་ཞེས་དྲི་བར་བྱའོ། །གལ་ཏེ་འདི་སྐད་ཅེས་ཡོད་དོ་ཞེས་ཟེར་ན། གཉི་ག་ལ་དྲི་བར་བྱ་སྟེ། གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་ཏུ་བྱེད་དུ་གཞུག་ཅིང་། དེ་དེའི་ངོ་བོ་ཉིད་ཚོལ་དུ་གཞུག་གོ། །འོན་ཏེ་དེ་འདི་སྐད་ཅེས་འདི་མཐའ་དང་པོའི་
ཕུང་པོ་ནི་མ་བྱུང་གི་འོན་ཀྱང་ལྟུང་བའི་ཕུང་པོ་གཉིས་པ་དང་། གསུམ་པ་དང་། བཞི་པ་དང་། ལྔ་པ་བྱུང་ངོ་ཞེས་བྱ་བ་རྒྱས་པར་བརྗོད་དོ། །བཙུན་པ་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས། འདི་སྐད་ཅེས་བཙུན་པ་དག་བདག་
གིས་དགེ་སློང་ཞིག་དགེ་འདུན་ལྷག་མ་དང་པོ་འབྱིན་པར་བགྱིད་པ་མཐོང་ངོ་ཞེས་མཆི་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་ཚོལ་དུ་སྩལ་ཏམ། མི་གཞུག་སྟེ། རེ་ཞིག་དེ་ལ་དེ་ན་ཆེ་ཞེ་ཟླ་འགའ་ཡོད་དམ་ཞེས་དྲི་བར་བྱའོ། །གལ་
ཏེ་འདི་སྐད་ཅེས་ཡོད་དོ་ཞེས་ཟེར་ན། གཉི་ག་ལ་དྲི་བར་བྱ་སྟེ། གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བྱེད་དུ་གཞུག་ཅིང་། དེ་དེའི་ངོ་བོ་ཉིད་ཚོལ་དུ་གཞུག་གོ། །འོན་ཏེ་དེ་འདི་སྐད་ཅེས་དགེ་འདུན་ལྷག་མ་དང་པོ་ནི་མ་བྱུང་གི་འོན་ཀྱང་དགེ་འདུན་ལྷག་མ་
གཉིས་པ་དང་། གསུམ་པ་དང་། བཞི་པ་ནས། བཅུ་གསུམ་པའི་བར་བྱུང་ངོ་ཞེས་ཟེར་ན། དགེ་སློང་ལ་རྨེད་དུ་གཞུག་གོ། །དང་པོ་ལ་ཇི་ལྟ་བར་དགེ་འདུན་ལྷག་མ་གཉིས་པ་དང་། གསུམ་པ་ནས་བཅུ་གསུམ་པའི་བར་ལ་ཡང་དེ་བཞིན་དུ་བརྗོད་པར་བྱའོ། །བཙུན་པ་དགེ་བསྙེན་མ་ཡིད་

ཆེས་པའི་ཚིག་དང་ལྡན་པས་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་ཅེས་བཙུན་པ་དག་བདག་གིས་དགེ་སློང་ཞིག་གིས་ཁར་ཉམས་པར་བགྱིད་པ་མཐོང་ངོ་ཞེས་མཆི་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་
ཚོལ་དུ་སྩལ་ཏམ། མི་གཞུག་སྟེ། རེ་ཞིག་དེ་ལ་དེ་ན་ཆེ་ཞེ་ཟླ་འགའ་ཡོད་དམ་ཞེས་དྲི་བར་བྱའོ། །གལ་ཏེ་འདི་སྐད་ཅེས་ཡོད་དོ་ཞེས་ཟེར་ན། གཉི་ག་ལ་དྲི་བར་བྱ་སྟེ། གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བྱེད་དུ་གཞུག་ཅིང་། དེ་དེའི་རང་བཞིན་ཚོལ་དུ་
གཞུག་གོ། །འོན་ཏེ་འདི་སྐད་ཅེས་ཁར་ནི་ཉམས་པར་མ་བྱས་ཀྱི་འོན་ཀྱང་འདིས་སོའི་ཕྱི་རོལ་མཆུའི་ནང་དུ་ཁུ་བ་ཕྱུང་ངོ་ཞེས་ཟེར་ན་དགེ་སློང་ལ་རྨེད་དུ་གཞུག་གོ། །བཙུན་པ་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་ཅེས་བཙུན་པ་དག་བདག་གིས་དགེ་
སློང་ཞིག་གིས་གཅི་བའི་ལམ་དུ་ཉམས་པར་བགྱི་བ་མཐོང་ངོ་ཞེས་མཆི་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་ཚོལ་དུ་སྩལ་ཏམ། མི་གཞུག་སྟེ། རེ་ཞིག་དེ་ལ་དེ་ན་ཆེ་ཞེ་ཟླ་འགའ་ཡོད་དམ་ཞེས་དྲི་
བར་བྱའོ། །གལ་ཏེ་འདི་སྐད་ཅེས་ཡོད་དོ་ཞེས་ཟེར་ན་གཉི་ག་ལ་དྲི་བར་བྱ་སྟེ། གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི། ཚིག་གིས་བྱེད་དུ་གཞུག་ཅིང་། དེ་དེའི་ངོ་བོ་ཉིད་ཚོལ་དུ་གཞུག་གོ། །འོན་ཏེ་དེ་འདི་སྐད་ཅེས་གཅི་བའི་ལམ་དུ་ནི་ཉམས་པར་མ་བྱས་
ཀྱི་འོན་ཀྱང་འདིས་བརླ་ཕྲག་ཏུ་ཁུ་བ་ཕྱུང་ངོ་ཞེས་ཟེར་ན་དེ་དགེ་སློང་ལ་རྨེད་དུ་གཞུག་གོ། །བཙུན་པ་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་ཅེས་བཙུན་པ་དག་བདག་གིས་དགེ་སློང་ཞིག་གིས་བཤང་བའི་ལམ་དུ་ཉམས་པར་བགྱིས་པ་
མཐོང་ངོ་ཞེས་མཆི་ན། དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་ཚོལ་དུ་སྩལ་ཏམ། མི་གཞུག་སྟེ། རེ་ཞིག་དེ་ལ་དེ་ན་ཆེ་ཞེ་ཟླ་འགའ་ཡོད་དམ་ཞེས་དྲི་བར་བྱའོ། །གལ་ཏེ་འདི་སྐད་ཅེས་ཡོད་དོ་ཞེས་ཟེར་ན་

གཉི་ག་ལ་དྲི་བར་བྱ་སྟེ། གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བྱེད་དུ་གཞུག་ཅིང་། དེ་དེའི་ངོ་བོ་ཉིད་ཚོལ་དུ་གཞུག་གོ། །འོན་ཏེ་འདི་སྐད་ཅེས་བཤང་བའི་ལམ་དུ་ནི་ཉམས་པར་མ་བྱས་ཀྱི་འོན་ཀྱང་འདིས་རྐུབ་ཙོས་ཀྱི་ཕྲག་ཏུ་ཁུ་བ་ཕྱུང་ངོ་
ཞེས་ཟེར་ན། དགེ་སློང་ལ་རྨེད་དུ་གཞུག་གོ། །བཙུན་པ་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས། འདི་སྐད་ཅེས་བཙུན་པ་དག་བདག་གིས་དགེ་སློང་ཞིག་དུས་མ་ཡིན་པར་སྐྱོ་མ་འཐུང་བ་མཐོང་ངོ་ཞེས་མཆི་ན་དགེ་བསྙེན་མ་ཡིད་ཆེས་པའི་ཚིག་
དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་ཚོལ་དུ་སྩལ་ཏམ། མི་གཞུག་སྟེ། རེ་ཞིག་དེ་ལ་དེ་ན་ཆེ་ཞེ་ཟླ་འགའ་ཡོད་དམ་ཞེས་དྲི་བར་བྱའོ། །གལ་ཏེ་འདི་སྐད་ཅེས་ཡོད་དོ་ཞེས་ཟེར་ན་གཉི་ག་ལ་དྲི་བར་བྱའོ། །གལ་ཏེ་མཐུན་ན་དགེ་བསྙེན་
མ་ཡིད་ཆེས་པའི་ཚིག་དང་ལྡན་པའི་ཚིག་གིས་བྱེད་དུ་གཞུག་ཅིང་། དེ་དེའི་ངོ་བོ་ཉིད་ཚོལ་དུ་གཞུག་གོ། །འོན་ཏེ་དེ་འདི་སྐད་ཅེས་དུས་མ་ཡིན་པར་སྐྱོ་མ་ནི་མ་འཐུངས་ཀྱི་འོན་ཀྱང་འདིས་ཤ་ཁ་རའི་ཆུ་འཐུངས་སོ་ཞེས་ཟེར་ན། དགེ་སློང་ལ་རྨེད་དུ་གཞུག་གོ། །བཙུན་པ་དགེ་
བསྙེན་མ་ཡིད་ཆེས་པའི་ཚིག་དང་ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས། འདི་སྐད་ཅེས་བཙུན་པ་དག་བདག་གིས་དགེ་སློང་ཞིག་བུ་རམ་ཆང་འཐུང་བ་མཐོང་ངོ་ཞེས་མཆི་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །
དེ་དེའི་ངོ་བོ་ཉིད་ཚོལ་དུ་སྩལ་ཏམ། མི་གཞུག་སྟེ། རེ་ཞིག་དེ་ལ་དེ་ན་ཆེ་ཞེ་ཟླ་འགའ་ཡོད་དམ་ཞེས་དྲི་བར་བྱའོ། །གལ་ཏེ་འདི་སྐད་ཅེས་དུས་ཡོད་དོ་ཞེས་ཟེར་ན་གཉི་ག་ལ་དྲི་བར་བྱ་སྟེ། གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བྱེད་དུ་གཞུག་ཅིང་། དེ་དེའི་ངོ་བོ་
ཉིད་ཚོལ་དུ་གཞུག་གོ། །འོན་ཏེ་འདི་སྐད་ཅེས་དུས་མ་ཡིན་པར་བུ་རམ་གྱི་ཆང་མ་འཐུངས་མོད་ཀྱི། འོན་ཀྱང་འདིས་ཧྭགས་ཀྱི་ཆུ་འཐུངས་སོ་ཞེས་ཟེར་ན་དགེ་སློང་ལ་རྨེད་དུ་གཞུག་གོ།། །།འདུལ་བ་གཞུང་བླ་མ། བམ་པོ་བཞི་པ། བཙུན་པ་དགེ་བསྙེན་མ་ཡིད་ཆེས་པའི་

ཚིག་དང་ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས། འདི་སྐད་ཅེས་བཙུན་པ་དག་བདག་གིས་དགེ་སློང་ཞིག་དུས་མ་ཡིན་པར་ཤ་ཟ་བ་མཐོང་ངོ་ཞེས་མཆི་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་ཚོལ་དུ་སྩལ་
ཏམ། མི་གཞུག་སྟེ། རེ་ཞིག་དེ་ལ་དེ་ན་ཆེ་ཞེ་ཟླ་འགའ་ཡོད་དམ་ཞེས་དྲི་བར་བྱའོ། །གལ་ཏེ་འདི་སྐད་ཅེས་ཡོད་དོ་ཞེས་ཟེར་ན་གཉི་ག་ལ་དྲི་བར་བྱ་སྟེ། གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བྱེད་དུ་གཞུག་ཅིང་། དེ་དེའི་ངོ་བོ་ཉིད་ཚོལ་དུ་གཞུག་གོ། །འོན་ཏེ་
དེ་འདི་སྐད་ཅེས་དུས་མ་ཡིན་པར་ཤ་ནི་མ་ཟོས་ཀྱི། འོན་ཀྱང་འདིས་བུ་རམ་ཞིག་ཟོས་སོ་ཞེས་ཟེར་ན། དགེ་སློང་ལ་རྨེད་དུ་གཞུག་གོ། །བཙུན་པ་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས། འདི་སྐད་ཅེས་བཙུན་པ་དག་བདག་གིས་དགེ་སློང་
ཞིག་དུས་མ་ལགས་པར་ཁ་ཟས་ཟ་བ་མཐོང་ངོ་ཞེས་མཆི་ན། དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བགྱིད་དུ་སྩལ་ཏམ། བྱེད་དུ་མི་གཞུག་གོ། །དེ་དེའི་ངོ་བོ་ཉིད་ཚོལ་དུ་སྩལ་ཏམ། མི་གཞུག་སྟེ། རེ་ཞིག་དེ་ལ་དེ་ན་ཆེ་ཞེ་ཟླ་འགའ་ཡོད་དམ་ཞེས་དྲི་བར་བྱའོ། །གལ་
ཏེ་འདི་སྐད་ཅེས་ཡོད་དོ་ཞེས་ཟེར་ན་གཉི་ག་ལ་དྲི་བར་བྱ་སྟེ། གལ་ཏེ་མཐུན་ན་དགེ་བསྙེན་མ་ཡིད་ཆེས་པའི་ཚིག་དང་ལྡན་པའི་ཚིག་གིས་བྱེད་དུ་གཞུག་ཅིང་། དེ་དེའི་ངོ་བོ་ཉིད་ཚོལ་དུ་གཞུག་གོ། །འོན་ཏེ་འདི་སྐད་ཅེས་དུས་མ་ཡིན་པའི་ཟས་ནི་མ་ཟོས་ཀྱི། འོན་ཀྱང་འདིས་མར་
ཟོས་སོ་ཞེས་ཟེར་ན། དགེ་སློང་ལ་རྨེད་དུ་གཞུག་གོ། །དེ་ལྟ་བུའི་དངོས་པོ་མ་ངེས་པ་དགེ་བསྙེན་མ་ཡིད་ཆེས་པའི་ཚིག་དང་ལྡན་པ་བདེན་པ་མཐོང་བ་སྨྲ་བ་གང་དག་ཡིན་པ་དེ་དག་ལ་དགེ་སློང་རྨེད་དུ་གཞུག་གོ། །ཉེ་བ་འཁོར་གྱིས་ཞུས་པ་ཁ་ཆེ་བ་ལས་མ་ངེས་པ་དང་ལྡན་པ་
རྫོགས་སོ།། །།སྡོམ་ལ། དེ་ཉིད་སྟོར་དང་ཚིག་པ་དང་། །སེམས་འཁྲུགས་བྱིན་གྱིས་མ་བརླབས་དང་། །རུང་བ་དང་ནི་དུས་ལས་འདས། །མཚན་དང་གཞི་དང་བཏིང་བའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་

བཅོམ་ལྡན་འདས་ཀྱིས་དགེ་སློང་ཆོས་གོས་ཟིན་པས་ཆོས་གོས་སྲ་བརྐྱང་ཕྱུང་ནས་ཞག་བཅུའི་བར་དུ་གོས་ལྷག་པ་རུང་བར་མ་བྱས་པ་བཅང་བར་བྱའོ། །དེ་ལས་འདས་པར་བཅངས་ན་སྤང་བའི་ལྟུང་བྱེད་དོ་ཞེས་གསུངས་པ་གང་ལགས་པ། བཙུན་པ་ཆོས་གོས་དེ་ཉིད་དགུང་
བཅུ་འདས་པ་ཡང་ལགས་ལ་དེ་ཉིད་དགུང་གཅིག་བྲལ་བ་ཡང་ལགས་པ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གིས་ཞག་བཅུ་འདས་པའི་ཆོས་གོས་བྱིན་གྱིས་བརླབས་ནས། ཆོས་གོས་མེད་པར་མཚམས་ཀྱི་ཕྱི་རོལ་དུ་སྐྱ་རེངས་འཆར་བར་བྱེད་ན། ཆོས་གོས་
འདི་ནི་ཞག་བཅུ་འདས་པ་ཡང་ཡིན་ལ། ཞག་གཅིག་བྲལ་བ་ཡང་ཡིན་ནོ། །བཙུན་པ་རེ་ཞིག་དགེ་སློང་གི་སྤང་བའི་ཆོས་གོས་ཉམས་པར་གྱུར་ན། ལྟུང་བ་བཤགས་པར་བགྱིའམ། ཉེ་བ་འཁོར་འབའ་ཞིག་པའི་བཤགས་པར་བྱའོ། །གལ་ཏེ་ལྟུང་བ་བཤགས་ལགས་
ནས་སླར་རྙེད་ན་སྤང་བར་བགྱིའམ། ཉེ་བ་འཁོར་མ་ཡིན་ནོ། །བཙུན་པ་རེ་ཞིག་དགེ་སློང་གི་སྤང་བའི་ཆོས་གོས་མེས་ཚིག་གམ་ཟོས་པར་གྱུར་ན་དུམ་བུའམ། དེ་དག་སྤང་བར་བགྱི་ལགས་སམ། ཉེ་བ་འཁོར་མ་ཡིན་ནོ། །འབའ་ཞིག་པའི་ལྟུང་བ་བཤགས་པར་བྱའོ། །འོན་
ཏེ་ཀུན་ནས་ཁྲུ་གང་བ་ཞིག་ཡིན་ན་སྤང་བར་བྱའོ། །བཙུན་པ་རེ་ཞིག་དགེ་སློང་གིས་ཆོས་གོས་རྙེད་ནས་དགུང་ལྔ་ལོན་པ་དང་། སེམས་འཁྲུགས་པར་གྱུར་ན་གང་ནས་བཟུང་སྟེ། དེའི་དགུང་བཅུ་བགྲང་བར་བགྱི་ལགས། གང་ནས་བཟུང་སྟེ་རང་གི་སེམས་ཕྱིར་རྙེད་པ་ནས་སོ། །
བཙུན་པ་དགེ་སློང་གིས་ཆོས་གོས་བརྒྱད་དམ་དགུ་ཞིག་བྱིན་གྱིས་མ་བརླབས། རུང་བར་མ་བགྱིས་པར་ནམ་འཚོའི་བར་དུ་བཅངས་ན་ནོངས་པར་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ་འདི་ལྟར་དགེ་སློང་གིས་ཉི་མ་རེ་རེ་ཞིང་ཆོས་གོས་ལས་ཕྱུང་སྟེ། གཞན་བྱིན་གྱིས་རློབ་ནའོ། །
བཙུན་པ་བཅོམ་ལྡན་འདས་ཀྱིས་ཞག་བཅུ་ལས་འདས་པའི་ཆོས་གོས་སྤང་བའོ་ཞེས་གསུངས་པ་གང་ལགས་པ། བཙུན་པ་དགེ་སློང་གིས་ཆོས་གོས་ལྷག་པ་དགུང་བཅུ་ལས་འདས་པར་བཅངས་ཀྱང་སྤང་བའི་ལྟུང་བྱེད་དུ་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་

ལྟར་གོས་ཀྱི་སྤུན་རུང་བར་གྱུར་ལ། རྒྱུ་མི་རུང་བར་གྱུར་པ་དང་། རྒྱུ་རུང་བར་གྱུར་ལ། སྤུན་མི་རུང་བར་གྱུར་པ་དང་། གཉི་ག་མི་རུང་བར་གྱུར་ཏེ། མི་རུང་བ་ནི་རྔ་བལ་དང་། བ་ལང་གི་སྤུ་དང་། ར་བལ་དང་། རི་དགས་ཀྱི་བལ་དང་། འདྲེས་པ་དང་། ཐགས་སུ་མ་བཏགས་པ་
སྟེ། དེ་ལྟ་བུའི་ཆོས་གོས་ཅན་ནི་ཞག་བཅུ་ལས་ལྷག་པར་བཅངས་ན་ཉེས་བྱས་སུ་འགྱུར་རོ། །བཙུན་པ་བཅོམ་ལྡན་འདས་ཀྱིས་དགེ་སློང་རྣམས་ཀྱིས་ཞག་བཅུའི་བར་དུ་ཆོས་གོས་ལྷག་པ་བཅང་བར་བྱའོ་ཞེས་གསུངས་པ་གང་ལགས་པ། བཙུན་པ་དགེ་སློང་གིས་ནམ་འཚོའི་བར་དུ་ཆོས་
གོས་ལྷག་མར་བཅངས་ཀྱང་ནོངས་པར་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཞག་བཅུ་ཚུན་ཆད་དུ་དུས་ལས་འདས་པར་གྱུར་ནའོ། །བཙུན་པ་ཆོས་གོས་དེ་ཉིད་བཅངས་ན་ལྟུང་བར་ཡང་མི་འགྱུར་ལ། ཆོས་གོས་དེ་ཉིད་བཅངས་ན་ལྟུང་བར་ཡང་འགྱུར་བ་ལྟ་མཆིས་
ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་དེ་ཆོས་གོས་རིན་ཆེན་པོ་འཆང་ན་ལྟུང་བ་མེད་ལ། མཚན་གྱུར་ཏེ་དགེ་སློང་མར་རེད་དེ་འཆང་ན་ལྟུང་བར་འགྱུར་རོ། །བཙུན་པ་རེ་ཞིག་དགེ་སློང་གིས་ཆོས་གོས་རྙེད་ནས་དགུང་བཅུ་ལགས་པ་དང་། དེའི་མཚན་གྱུར་ཏེ་དགེ་སློང་མར་རེད་
ནས་དགུང་བཅུ་འདས་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །བཙུན་པ་རེ་ཞིག་དགེ་སློང་མས་ཆོས་གོས་ཤིག་རྙེད་ནས་དགུང་བཅུ་ལགས་པ་དང་། མཚན་གྱུར་ཏེ་དགེ་སློང་དུ་རེད་ནས་དགུང་བཅུ་འདས་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །བཙུན་
པ་རེ་ཞིག་དགེ་སློང་གིས་དགུང་བཅུ་ལ་དགུང་བཅུར་འདུ་ཤེས་ཏེ་སྐྱ་རེངས་འཆར་བར་བགྱིད་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །དགུང་བཅུ་ལ་དགུང་བཅུ་མ་ལགས་པར་འདུ་ཤེས་ན་ཅིར་འགྱུར་ལགས། ལྟུང་བ་མེད་དོ། །དགུང་བཅུ་མ་ལགས་པ་ལ་དགུང་
བཅུར་འདུ་ཤེས་ན་ཅིར་འགྱུར་ལགས། ཉེས་བྱས་སུ་འགྱུར་རོ། །དགུང་བཅུ་མ་ལགས་པ་ལ་དགུང་བཅུ་མ་ལགས་པར་འདུ་ཤེས་ན་ཅིར་འགྱུར་ལགས། ལྟུང་བ་མེད་དོ། །བཙུན་པ་རེ་ཞིག་དགེ་སློང་གིས་སྲ་བརྐྱང་བཏིང་བའི་གནས་སུ་ཆོས་གོས་ཤིག་རྙེད་ལ། ཆོས་གོས་དེ་

ཡང་སྤང་བར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་དགེ་སློང་གི་ཆོས་གོས་སྤང་བ་ཡིན་ལ། དགེ་སློང་དེས་ཀྱང་ཆོས་གོས་དེ་མ་སྤངས། བྲལ་བར་མ་བྱས། ཉེས་པ་མ་བཤགས་པར་གྱུར་པའི་སྐབས་སུ་དགེ་འདུན་གྱིས་སྲ་བརྐྱང་བཏིང་བར་
གྱུར་ལ། སྲ་བརྐྱང་བཏིང་ནས་དགེ་སློང་དེས་ཆོས་གོས་གཞན་ཞིག་རྙེད་ནའོ། །བཙུན་པ་རེ་ཞིག་བསླབ་པ་སྩལ་བས་དགུང་བཅུ་ལས་ལྷག་པར་ཆོས་གོས་ལྷག་པ་བཅངས་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །བཙུན་པ་རེ་ཞིག་དགེ་སློང་མས་དགུང་བཅུ་
ལས་ལྷག་པར་ཆོས་གོས་ལྷག་པ་བཅངས་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མས་དགུང་བཅུ་ལས་འདས་པར་ཆོས་གོས་ལྷག་པ་བཅངས་ན་ཅིར་འགྱུར་ལགས། ལྟུང་བ་མེད་དོ། །སྔར་ལྟུང་བ་བྱུང་བ་ལ་སོགས་པ་ནི་ཉེས་
བྱས་ཏེ། སྔ་མ་བཞིན་ནོ།། །།སྡོམ་ལ། དགེ་འདུན་གྱི་དང་ས་དང་མཚམས། །མནན་པ་དང་ནི་མ་གནང་དང་། །མཚམས་མ་བཅད་དང་མ་གཡོགས་དང་། །བཞི་ཚན་དང་ནི་དེ་བཞིན་མཚན། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་
བཅོམ་ལྡན་འདས་ཀྱིས་དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན་གལ་ཏེ་ནུབ་གཅིག་ཀྱང་ཆོས་གོས་གསུམ་ལས་ཆོས་གོས་གང་ཡང་རུང་བ་དང་། མཚམས་ཀྱི་ཕྱི་རོལ་དུ་འབྲལ་བར་བྱེད་ན། དགེ་འདུན་གྱིས་གནང་བ་མ་གཏོགས་ཏེ་སྤང་བའི་ལྟུང་བྱེད་དོ་ཞེས་གསུངས་པ་གང་
ལགས་པ། བཙུན་པ་དགེ་འདུན་གྱི་ཆོས་གོས་བྱིན་གྱིས་བརླབ་པར་གནང་ལགས་སམ། ཉེ་བ་འཁོར་མི་གནང་ངོ་། །བཙུན་པ་དེ་ལྟ་བུའི་རྐྱེན་ཞིག་མཆིས་ན་གནང་ལགས་སམ། ཉེ་བ་འཁོར་གནང་ངོ་། །བཙུན་པ་རེ་ཞིག་དགེ་སློང་གིས་དགེ་འདུན་གྱི་ཆོས་གོས་བྱིན་གྱིས་བརླབས་
ཏེ། ཆོས་གོས་མ་མཆིས་པར་མཚམས་ཀྱི་སླད་རོལ་དུ་བྲལ་བར་བགྱིད་ན། ཆོས་གོས་དང་བྲལ་བ་ཞེས་བགྱིའམ། ཆོས་གོས་དང་མ་བྲལ་བ་ཞེས་བགྱི་ལགས། བཀའ་སྩལ་བ། ཆོས་གོས་དང་བྲལ་བ་ཞེས་བྱའོ། །ཆོས་གོས་དེ་སྤང་བར་བགྱི་ལགས་སམ། ཉེ་བ་འཁོར་མ་

ཡིན་ནོ། །འབའ་ཞིག་པའི་ལྟུང་བྱེད་བཤགས་པར་བྱའོ། བཙུན་པ་དགེ་སློང་གིས་ཆོས་གོས་ས་ལ་བཞག་སྟེ། ནམ་མཁའ་ལ་སྐྱ་རེངས་འཆར་བར་བགྱིད་དམ། ཆོས་གོས་ནམ་མཁའ་ལ་བཞག་སྟེ། ས་ལ་སྐྱ་རེངས་འཆར་བར་བགྱིད་ན་ཆོས་གོས་དང་བྲལ་བ་ཞེས་བགྱིའམ། ཆོས་
གོས་དང་མ་བྲལ་བ་ཞེས་བགྱི་ལགས། བཀའ་སྩལ་པ། ཆོས་གོས་དང་བྲལ་བ་ཞེས་བྱའོ། །བཙུན་པ་རེ་ཞིག་དགེ་སློང་གིས་ཆོས་གོས་མཚམས་ཀྱི་ནང་དུ་བཞག་སྟེ། མཚམས་ཀྱི་སླད་རོལ་དུ་སྐྱ་རེངས་འཆར་བར་བགྱིད་དམ། ཆོས་གོས་མཚམས་ཀྱི་སླད་རོལ་དུ་བཞག་སྟེ།
མཚམས་ཀྱི་ནང་དུ་སྐྱ་རེངས་འཆར་བར་བགྱིད་ན་ཆོས་གོས་དང་བྲལ་བ་ཞེས་བགྱི་འམ། ཆོས་གོས་དང་མ་བྲལ་བ་ཞེས་བགྱི་ལགས། བཀའ་སྩལ་པ། ཆོས་གོས་དང་བྲལ་བ་ཞེས་བྱའོ། །བཙུན་པ་རེ་ཞིག་དགེ་སློང་གིས་མཚམས་མནན་ཏམ། མཚམས་བཟུང་ངམ། མཚམས་
སུ་འགྲེང་ངམ་མཆིས་ཏེ། མཚམས་ཀྱི་བར་དུ་ཆོས་གོས་བཞག་ནས་སྐྱ་རེངས་འཆར་བར་བགྱི་ན་ཆོས་གོས་དང་བྲལ་བ་ཞེས་བགྱིའམ། ཆོས་གོས་དང་མ་བྲལ་བ་ཞེས་བགྱི་ལགས། བཀའ་སྩལ་བ། ཆོས་གོས་དང་མ་བྲལ་བ་ཞེས་བྱའོ། །བཙུན་པ་དགེ་སློང་ཡང་མཚམས་ཀྱི་ནང་
ན་མཆིས་ལ། ཆོས་གོས་ཀྱང་མཚམས་ཀྱི་ནང་ན་མཆིས་པ་ལས། ཆོས་གོས་དེ་དང་བྲལ་བར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། མཚམས་བཅད་པར་བྱས་པ་ཆོས་གོས་དང་མི་འབྲལ་བའི་སྡོམ་པ་མ་བྱིན་ནའོ། །བཙུན་པ་རེ་ཞིག་མཚམས་མ་བཅད་པའི་
གནས་སུ་གང་ཚུན་ཆད་དགེ་སློང་ཆོས་གོས་དང་བྲལ་བ་ཞེས་བགྱི། ཉེ་བ་འཁོར་ཇི་ཙམ་གཙུག་ལག་ཁང་གི་ཉེན་ཀོར་ཆབ་ཀུང་སའམ། སྒོ་ཁྱམས་སམ། ཁང་ཕྲན་ནམ། ཀུན་དགའ་ར་བའམ། དགེ་སློང་གིས་ཀུན་ཏུ་སྤྱད་པའམ། ར་བའམ། འགྲེང་རིབ་བམ། འོབས་ཡོད་པའོ། །
བཙུན་པ་དགེ་སློང་ཡང་གནས་གཅིག་ལ་སྟེང་གཡོགས་ཀྱང་གཅིག་པ་ཞིག་ན་མཆིས་ལ། དེ་ཉིད་ན་ཆོས་གོས་ཀྱང་མཆིས་ན་ཆོས་གོས་དེ་དང་བྲལ་བར་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། འདི་ལྟར་གནས་ཏེ་མུ་སྟེགས་ཅན་སྣ་ཚོགས་དང་། དགེ་སྦྱོང་དང་། བྲམ་ཟེ་དང་།

སྤྱོད་པ་པ་དང་། ཀུན་ཏུ་རྒྱུ་རྣམས་སམ། སྤུན་ནོར་བགོས་པ་རྣམས་ཀྱི་ཡིན་ནའོ། །བཙུན་པ་རེ་ཞིག་དགེ་སློང་གིས་མཚམས་ཀྱི་སླད་རོལ་ལ། མཚམས་ཀྱི་སླད་རོལ་དུ་འདུ་ཤེས་པ་ལས་སྐྱ་རེངས་འཆར་བར་བགྱིད་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་
རོ། །མཚམས་ཀྱི་ནང་ལ་མཚམས་ཀྱི་སླད་རོལ་དུ་འདུ་ཤེས་ན་ཅིར་འགྱུར་ལགས། ཉེས་བྱས་སོ། །མཚམས་ཀྱི་སླད་རོལ་ན་མཚམས་ཀྱི་ནང་དུ་འདུ་ཤེས་ན་ཅིར་འགྱུར་ལགས། ལྟུང་བ་མེད་དོ། །མཚམས་ཀྱི་ནང་ལ་མཚམས་ཀྱི་ནང་དུ་འདུ་ཤེས་ན་ཅིར་འགྱུར་ལགས། ལྟུང་བ་མེད་དོ། །
བཙུན་པ་རེ་ཞིག་དགེ་སློང་གིས་མཚམས་ཀྱི་ནང་དུ་ཆོས་གོས་བཞག་སྟེ། མཚམས་ཀྱི་སླད་རོལ་དུ་སྐྱ་རེངས་འཆར་བར་བགྱིད་པ་ལས་མཚན་གྱུར་ཏེ་དགེ་སློང་མར་རེད་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །བཙུན་པ་རེ་ཞིག་དགེ་སློང་མ་ཞིག་གིས་མཚམས་ཀྱི་སླད་རོལ་དུ་སྐྱ་
རེངས་འཆར་བར་བགྱིད་པ་ལས་མཚན་གྱུར་ཏེ། དགེ་སློང་དུ་རེད་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །བཙུན་པ་དགེ་སློང་གིས་གང་གི་མདུན་དུ་ཆོས་གོས་བྱིན་གྱིས་བརླབ་པར་བགྱི། ཉེ་བ་འཁོར་དགེ་སློང་གིས་ནི་དགེ་སློང་གི་མདུན་དུ་ཆོས་གོས་བྱིན་གྱིས་བརླབ་
པར་བྱའོ། །བཙུན་པ་དགེ་སློང་མས་གང་གི་མདུན་དུ་ཆོས་གོས་བྱིན་གྱིས་བརླབ་པར་བགྱི། ཉེ་བ་འཁོར་དགེ་སློང་མས་ནི་དགེ་སློང་མའི་མདུན་དུ་ཆོས་གོས་བྱིན་གྱིས་བརླབ་པར་བྱ་སྟེ། དབྱུང་བ་དང་རུང་བར་བྱ་བ་ཡང་དེ་བཞིན་དུ་བྱའོ། །བཙུན་པ་རེ་ཞིག་བསླབ་པ་སྩལ་པ་ཆོས་གོས་མ་
མཆིས་པར་མཚམས་ཀྱི་སླད་རོལ་དུ་སྐྱ་རེངས་འཆར་བར་བགྱིད་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་ཏེ། དེ་བཞིན་དུ་དགེ་སློང་མ་ལ་ནི་ཆོས་གོས་ལྔས་སྤང་བའི་ལྟུང་བྱེད་དུ་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་རྣམས་ལ་ནི་ཉེས་པ་མེད་དོ། །
སྔར་ལྟུང་བ་བྱུང་བ་ལ་སོགས་པ་ལ་ནི་ཉེས་བྱས་ཏེ་སྔ་མ་བཞིན་ནོ།། །།སྡོམ་ལ། སེམས་འཁྲུགས་པ་དང་དུས་ལས་འདས། །དེ་བཞིན་རུང་བ་ཉིད་དང་ནི། །མི་རུང་བ་དང་གདིང་བ་དང་། །ཚད་དང་བཞི་ཚན་དག་དང་མཚན། །སངས་རྒྱས་བཅོམ་ལྡན་འདས་ལ་ཚེ་

དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་དགེ་སློང་ཆོས་གོས་ཟིན་པས། ཆོས་གོས་སྲ་བརྐྱང་ཕྱུང་ནས་དུས་མ་ཡིན་པའི་གོས་རྙེད་ལ། འདོད་ན་དགེ་སློང་དེས་ཆོས་གོས་དེ་བླང་བར་བྱའོ། །བླངས་ནས་གལ་ཏེ་ལངས་ན་མྱུར་བ་ཁོ་ནར་ཆོས་གོས་སུ་བྱས་ཏེ་བཅང་
བར་བྱའོ། །གལ་ཏེ་མི་ལངས་ལ་ཁ་མ་ལངས་པ་ཁ་སྐོང་བའི་ཆོས་གོས་ལ་རེ་བ་ཡོད་ན་ཡང་དགེ་སློང་དེས་ཆོས་གོས་དེ་ཟླ་བ་གཅིག་གི་བར་དུ་གཞག་པར་བྱའོ། །དེ་ལས་འདས་པར་འཇོག་ན་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པ་གང་ལགས་པ། བཙུན་པ་རེ་ཞིག་དགེ་སློང་གོས་
ཤིག་རྙེད་མ་ཐག་ཏུ་སེམས་འཁྲུགས་པར་གྱུར་ན། གང་ནས་བཟུང་སྟེ་དེའི་ཟླ་བ་བགྲང་བར་བགྱི། གང་ནས་བཟུང་སྟེ་རང་གི་སེམས་ཕྱིར་རྙེད་པ་ནས་སོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་ཟླ་བ་གཅིག་གི་བར་དུ་ཆོས་གོས་གཞག་པར་བྱའོ་ཞེས་གསུངས་པ་གང་ལགས་པ།
བཙུན་པ་དགེ་སློང་གིས་ནམ་འཚོའི་བར་དུ་ཆོས་གོས་བཞག་ཀྱང་ལྟུང་བར་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཟླ་བ་གཅིག་ཚུན་ཆད་དུ་དུས་བྱས་ནའོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་ཆོས་གོས་ཟླ་བ་གཅིག་གི་བར་དུ་གཞག་པར་བྱའོ་ཞེས་གསུངས་པ་
གང་ལགས་པ། ཆོས་གོས་དེ་ཇི་ལྟ་བུ་ཞིག་ལགས། བདུན་པོ་དག་ལས་བརྟགས་པ་གང་ཡང་རུང་བ་ངས་རྗེས་སུ་གནང་ཞིང་མ་བཀག་པ་གང་ཡིན་པའོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་ཆོས་གོས་ཟླ་བ་གཅིག་གི་བར་དུ་གཞག་པར་བྱའོ་ཞེས་གསུངས་པ་གང་ལགས་པ།
བཙུན་པ་དགེ་སློང་དགུང་ཟླ་གཅིག་ལས་ལྷག་པར་བཞག་ཀྱང་སྤང་བའི་ལྟུང་བྱེད་དུ་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། དེ་འདི་ལྟར་ཆོས་གོས་ཀྱི་སྤུན་རུང་བར་གྱུར་ལ། རྒྱུ་མི་རུང་བར་གྱུར་པ་དང་། སྤུན་མི་རུང་བར་གྱུར་ལ། རྒྱུ་རུང་བར་གྱུར་པ་དང་། གཉི་ག་
མི་རུང་བར་གྱུར་པ་སྟེ། མི་རུང་བ་ནི་རྔ་བལ་དང་། བ་ལང་གི་སྤུ་དང་། རི་དགས་ཀྱི་བལ་དང་། ར་བལ་དང་འདྲེས་པ་དང་། ཐགས་སུ་མ་བཏགས་པ་སྟེ། དེ་ལྟ་བུའི་ཆོས་གོས་ནི་ཟླ་བ་གཅིག་ལས་ལྷག་པར་བཞག་ཀྱང་ཉེས་བྱས་སུ་འགྱུར་རོ། །བཙུན་པ་བཅོམ་ལྡན་

འདས་ཀྱིས་དགེ་སློང་གིས་ཆོས་གོས་དེ་ཟླ་བ་གཅིག་གི་བར་དུ་གཞག་པར་བྱའོ་ཞེས་གསུངས་པ་གང་ལགས་པ། བཙུན་པ་དགེ་སློང་གིས་དགུང་ཟླ་དྲུག་ཏུ་ཆོས་གོས་བཞག་ཀྱང་ལྟུང་བར་མི་འགྱུར་བ་ལྟ་མཆིས་ལགས་སམ། ཉེ་བ་འཁོར་ཡོད་དེ། ཆོས་གོས་དེ་
རྙེད་ནས་ཞག་སུམ་བཅུ་ལོན་པ་དང་། དགེ་འདུན་གྱིས་སྲ་བརྐྱང་བཏིང་བར་གྱུར་ནའོ། །བཙུན་པ་བཅོམ་ལྡན་འདས་ཀྱིས་ཆོས་གོས་གསུམ་དུ་མ་ཚང་ན་ཟླ་བ་གཅིག་གི་བར་དུ་གཞག་གོ་ཞེས་གསུངས་པ་གང་ལགས་པ། བཙུན་པ་དགེ་སློང་ཆོས་གོས་གསུམ་པར་གྱུར་པ་དེས་ཆོས་
གོས་མི་ལངས་པ་ཞིག་རྙེད་ན་དེས་ཀྱང་དགུང་ཟླ་གཅིག་གི་བར་དུ་གཞག་པར་བགྱི་ལགས་སམ། ཉེ་བ་འཁོར་མ་ཡིན་ནོ། །དེ་ཅིའི་ཕྱིར་ཞེ་ན། ཉེ་བ་འཁོར་ཆོས་གོས་གསུམ་ཚང་ན་ཆོས་གོས་གཞན་རྙེད་པ་གང་ཡིན་པ་ནི་ལངས་ཀྱང་རུང་། མི་ལངས་ཀྱང་རུང་སྟེ་ཐམས་ཅད་ནི་ཞག་བཅུ་པ་
ཡིན་ནོ། །ཆོས་གོས་གསུམ་དུ་མ་ཚང་བ་ལས་གལ་ཏེ་ཆོས་གོས་སུ་ལངས་པ་ཞིག་རྙེད་ན་དེ་ཡང་ཞག་བཅུ་པ་ཡིན་ནོ། །འོན་ཏེ་མ་ལངས་པ་ཞིག་རྙེད་ན་ཟླ་བ་གཅིག་གི་བར་དུ་གཞག་པར་བྱའོ། །དེ་ལས་འདས་པར་བཞག་ན་སྤང་བའི་ལྟུང་བྱེད་དུ་འགྱུར་རོ། །བཙུན་པ་རེ་ཞིག་དགེ་སློང་གིས་
དགུང་ཟླ་གཅིག་ལ་དགུང་ཟླ་གཅིག་ཏུ་འདུ་ཤེས་པས་སྐྱ་རེངས་འཆར་བར་བགྱིད་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །དགུང་ཟླ་གཅིག་ལ་དགུང་ཟླ་གཅིག་མ་ལགས་པར་འདུ་ཤེས་ན་ཅིར་འགྱུར་ལགས། ལྟུང་བ་མེད་དོ། །དགུང་ཟླ་གཅིག་མ་ལགས་པ་ལ་དགུང་
ཟླ་གཅིག་ཏུ་འདུ་ཤེས་ན་ཅིར་འགྱུར་ལགས། ཉེས་བྱས་སོ། །དགུང་ཟླ་གཅིག་མ་ལགས་པ་ལ་དགུང་ཟླ་གཅིག་མ་ལགས་པར་འདུ་ཤེས་ན་ཅིར་འགྱུར་ལགས། ལྟུང་བ་མེད་དོ། །བཙུན་པ་རེ་ཞིག་དགེ་སློང་གིས་ཆོས་གོས་རྙེད་ནས་དགུང་ཟླ་གཅིག་ལགས་པ་ལས་མཚན་གྱུར་ཏེ།
དགེ་སློང་མར་རེད་ནས་དགུང་ཟླ་གཅིག་ལས་འདའ་བར་བགྱིད་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །བཙུན་པ་རེ་ཞིག་དགེ་སློང་མས་ཆོས་གོས་རྙེད་ནས་དགུང་ཟླ་གཅིག་ལགས་པ་ལས་མཚན་གྱུར་ཏེ། དགེ་སློང་དུ་རེད་ནས་ཟླ་བ་གཅིག་ལས་འདའ་བར་བགྱིད་ན་ཅིར་

འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །བཙུན་པ་རེ་ཞིག་བསླབ་པ་སྩལ་བས་ཆོས་གོས་དགུང་ཟླ་གཅིག་པས་རིང་དུ་བཞག་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །བཙུན་པ་རེ་ཞིག་དགེ་སློང་མས་ཆོས་གོས་དགུང་ཟླ་གཅིག་པས་རིང་དུ་
བཞག་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མས་ཆོས་གོས་དགུང་ཟླ་གཅིག་གི་བར་དུ་བཞག་ན་ཅིར་འགྱུར་ལགས། ལྟུང་བ་མེད་དོ། །སྔར་ལྟུང་བ་བྱུང་བ་ལ་སོགས་པ་ལ་ནི་ཉེས་བྱས་ཏེ་སྔ་མ་བཞིན་
ནོ།། །།སྡོམ་ལ། ཕོ་ཉ་ཡི་གེ་ལག་བརྡ་དང་། །གཞན་ལ་སྙད་འདོགས་བརྒྱུད་པ་དང་། །སྨྱོན་མ་དང་ནི་སེམས་འཁྲུགས་དང་། །ཚོར་བ་འོན་མ་གླེན་མ་དང་། །ཁྱིམ་པ་མོ་ལ་སོགས་པ་སྟེ། །བསླབ་པ་བྱིན་པ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་
དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལ་ཆོས་གོས་རྙིང་པ་འཁྲུར་འཇུག་གམ། འཚེད་དུ་འཇུག་གམ། འཆག་ཏུ་འཇུག་ན་སྤང་བའི་ལྟུང་བྱེད་དོ་ཞེས་གསུངས་པ་གང་ལགས་པ། བཙུན་པ་རེ་ཞིག་དགེ་
སློང་གིས་དགེ་སློང་མ་ཉེ་དུ་མ་ལགས་པ་ལ་ཕོ་ཉ་ལས་གོས་རྙིང་པ་འཁྲུར་སྩོལ་ན་ཅིར་འགྱུར་ལགས། ཉེས་བྱས་སོ། །དེ་བཞིན་དུ་ཡི་གེ་དང་། ལག་བརྡ་དང་། གཞན་ལ་སྙད་འདོགས་པ་དང་། བརྒྱུད་དེ་དགེ་སློང་མ་ཉེ་དུ་མ་ལགས་པ་ལ་ཆོས་གོས་རྙིང་པ་འཁྲུར་སྩོལ་ན་ཅིར་འགྱུར་ལགས།
ཉེས་བྱས་སོ། །བཙུན་པ་རེ་ཞིག་དགེ་སློང་གིས་དགེ་སློང་མ་ཉེ་དུ་མ་ལགས་པ་སྨྱོན་མ་ལ་ཆོས་གོས་རྙིང་པ་འཁྲུར་སྩོལ་ན་ཅིར་འགྱུར་ལགས། ཉེས་བྱས་སོ། །དེ་བཞིན་དུ་དགེ་སློང་མ་ཉེ་དུ་མ་ལགས་པ། སེམས་འཁྲུགས་པ་དང་། ཚོར་བས་ཉམ་ཐག་པ་དང་། འོན་མ་དང་།
གླེན་མ་ལ་ཆོས་གོས་རྙིང་པ་འཁྲུར་སྩོལ་ན་ཅིར་འགྱུར་ལགས། ཉེས་བྱས་སོ། །བཙུན་པ་རེ་ཞིག་དགེ་སློང་གིས་ཁྱིམ་པ་མོ་ཉེ་དུ་མ་ལགས་པ་ལ་ཆོས་གོས་རྙིང་པ་འཁྲུར་སྩོལ་ན་ཅིར་འགྱུར་ལགས། ཉེས་བྱས་སོ། །དེ་བཞིན་དུ་དགེ་སློང་མ་ཐ་དད་དུ་གནས་པ་དང་། དགེ་སློང་མ་ཁས་

ལེན་པ་དང་། མ་ནིང་མོ་དང་། དགེ་སློང་མ་སུན་ཕྱུང་བ་དང་། མ་འགུམས་པ་དང་། ཕ་འགུམས་པ་དང་། དགྲ་བཅོམ་པ་འགུམས་པ་དང་། མུ་སྟེགས་ཅན་དང་། མུ་སྟེགས་ཅན་དུ་ཞུགས་པ་དང་། རྐུ་ཐབས་སུ་གནས་པ་དང་། ཐ་དད་དུ་གནས་པ་དང་། དང་པོ་
མི་མཐུན་པ་ཅན་དང་། །སྔར་ལྟུང་བ་བྱུང་བ་ཉེ་དུ་མ་ལགས་པ་ལ་ཆོས་གོས་རྙིང་པ་འཁྲུར་སྩོལ་ན་ཅིར་འགྱུར་ལགས། ཉེས་བྱས་སོ། །བཙུན་པ་རེ་ཞིག་དགེ་སློང་གིས་དགེ་སློང་མ་ཉེ་དུ་མ་ལགས་པ་དགེ་འདུན་གྱི་དབྱེན་བགྱིད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་
འབྱིན་པ་དང་། བསླབ་པ་སྩལ་བའི་དགེ་སློང་མ་ཉེ་དུ་མ་ལགས་པ་ལ་ཆོས་གོས་རྙིང་པ་འཁྲུར་སྩོལ་ན་ཅིར་འགྱུར་ལགས། སྤང་བའི་ལྟུང་བྱེད་དུ་འགྱུར་རོ།། །།སྡོམ་ལ། བསྒྲུབ་པར་བྱ་དང་བཀྲུས་པ་དང་། །དགེ་འདུན་གྱི་དང་མཚན་གཉིས་དང་། །མི་རུང་བ་དང་སྤངས་པ་
དང་། །གཞན་གྱི་དང་ནི་གྱོན་པ་དང་། །བཞི་ཚན་དག་ཏུ་བྱས་པ་དང་། །དགེ་སློང་མ་ནི་ཐ་མ་ཡིན། །བཙུན་པ་རེ་ཞིག་དགེ་སློང་གིས་དགེ་སློང་མ་ཉེ་དུ་མ་ལགས་པ་ལ་ཆོས་གོས་རྙིང་པ་བསྒྲུབ་པར་བགྱི་བ་ཞིག་འཁྲུར་སྩལ་ན་ཅིར་འགྱུར་ལགས། ཉེས་བྱས་སོ། །དགེ་སློང་མ་ཉེ་
དུ་མ་ལགས་པ་ལ་ཆོས་གོས་རྙིང་པ་བཀྲུས་པ་ཞིག་འཁྲུར་སྩལ་ན་ཅིར་འགྱུར་ལགས། ཉེས་བྱས་སོ། །བཙུན་པ་རེ་ཞིག་དགེ་སློང་གིས་དགེ་སློང་མ་ཉེ་དུ་མ་ལགས་པ་ལ་དགེ་འདུན་གྱི་ཆོས་གོས་རྙིང་པ་འཁྲུར་སྩོལ་ན་ཅིར་འགྱུར་ལགས། གལ་ཏེ་གང་ཟག་གིས་ཡོངས་སུ་སྤྱད་པས་
ཡོངས་སུ་སྤྱད་དེ། དྲི་མ་ཅན་དུ་གྱུར་པ་ཞིག་ན་ཉེས་བྱས་སུ་འགྱུར་རོ། །འོན་ཏེ་གནས་མལ་གྱི་དངོས་པོ་ཞིག་འཁྲུར་བཅུག་ན་ནི་ལྟུང་བ་མེད་དོ། །བཙུན་པ་རེ་ཞིག་དགེ་སློང་གིས་དགེ་སློང་མ་ཉེ་དུ་མ་ལགས་པ་ལ་ཆོས་གོས་རྙིང་པ་འཁྲུར་སྩལ་བ་ལས་མཚན་གྱུར་ཏེ་དགེ་སློང་མར་རེད་ན་ཅིར་
འགྱུར་ལགས། ཉེས་བྱས་སོ། །བཙུན་པ་རེ་ཞིག་དགེ་སློང་མས་ཉེ་དུ་མ་ལགས་པའི་དགེ་སློང་ལ་ཆོས་གོས་རྙིང་པ་འཁྲུར་སྩལ་བ་ལས་མཚན་གྱུར་ཏེ་དགེ་སློང་དུ་རེད་ན་ཅིར་འགྱུ