Kinh tạng Tây Tạng (Kangyur Đại Học) — 009_འདུལ་བ།_ཏ

ིས་བསྒོ་བ་བཞིན་དུ་གྱིས་ཤིག་ཅེས་སྨྲས་པ་དང་ཞེས་བྱ་བ་ནས་

ལེགས་སོ་ཞེས་བྱ་བའི་བར་དུའོ། །དེ་ཕ་མ་ལ་གུས་པ་ཡིན་པས་དེས་འདི་སྙམ་དུ་འདི་ལྟར་བདག་གིས་དེ་དག་གི་ཚིག་བཟློག་པར་མི་ནུས་ཏེ། འདི་ལྟར་ཕ་མས་བསྒོ་བ་བཞིན་དུ་བྱ་དགོས་པས་ཕ་མས་བསྒོ་བ་བཞིན་དུ་འགྲོ་བར་བྱའོ་སྙམ་དུ་བསམས་
ནས་དེ་ཁས་བླངས་སོ། །དེ་ནས་ཕ་མས་ཀྱང་བུ་དེ་འགྲོ་བའི་བསམ་པ་རྟོགས་ནས་བདག་ཉིད་ཀྱི་གྲོང་ན་གནས་པའི་འབངས་དང་། ཞོ་ཤས་འཚོ་བ་རྣམས་ལ་གྱད་བུ་ནོར་རི་དགས་ཤོར་དུ་འགྲོ་ཡིས་ཁྱེད་ཅག་ཀྱང་སོང་ཤིག་ཅེས་བསྒོའོ། །དེ་དག་ཀྱང་བསྒོ་བ་བཞིན་
དུ་འོངས་ནས་ཉི་མ་གཉིས་པ་ལ་གྱད་བུ་ནོར་གྱད་ཀྱི་སྣ་ལ་གཏོགས་པའི་བུ་ལྔ་བརྒྱས་བསྐོར་ཏེ་ཞོ་ཤས་འཚོ་བའི་མི་དང་། བྲན་གཡོག་མང་པོས་ཡོངས་སུ་བསྐོར་ནས་རི་དགས་ཤོར་དུ་སོང་ངོ་། །དེ་ནས་དེ་ལ་གྲོགས་པོ་རྣམས་ཀྱིས་སྨྲས་པ། གྲོགས་པོ་ཁྱོད་ཅི་རི་དགས་
སྐོང་དུ་འགྲོ་འམ། འོན་ཏེ་འཕན་ཀར་སྡོད་ཅེས་བྱས་པ་དང་། དེས་འདི་སྙམ་དུ་གལ་ཏེ་འདི་དག་འཕན་ཀར་བཞག་སྟེ། བདག་གིས་རི་དགས་བཏབ་པར་གྱུར་ན་དེ་དག་འཕོང་སྐྱེན་པས་རི་དགས་ཕལ་མོ་ཆེ་བསད་པར་འགྱུར་བར་བདག་གིས་འཕན་ཀར་བསྡད་ན་
རུང་ངོ་སྙམ་དུ་བསམས་ནས། དེས་དེ་དག་ལིངས་ལ་སོང་ཤིག་ཅེས་བསྒོ་བ་དང་། དེ་དག་ཀྱང་ཡིད་རབ་ཏུ་དགའ་བར་གྱུར་ནས་གྲོགས་པོ་བདག་ཅག་ཀྱང་དེ་ཁོ་ན་ལྟར་དད་དོ། །དེ་དག་གིས་འདི་སྙམ་དུ་འདི་ནི་གནས་བཞི་དང་། འཕང་བ་ལྔ་རྣམས་ལ་བྱང་
བ་ཡིན་པས་ཕལ་མོ་ཆེ་ཞིག་བསད་པར་འགྱུར་རོ། །སྙམ་དུ་བསམས་སོ། །དེ་ཡང་མདའ་སྟོང་གིས་བཀང་བའི་དོང་པ་ཐོགས་ནས་འཕན་ཀར་འདུག་གོ། །དེ་དག་གིས་ཀྱང་རི་དགས་ཕལ་མོ་ཆེ་ཀུན་ནས་བསྐོངས་པ་དང་། རི་དགས་དེ་དག་འཇིགས་སྐྲག་བཞིན་
དུ་གཞོན་ནུའི་དྲུང་དུ་ལྷགས་པ་དང་། གཞོན་ནུ་སྙིང་རྗེ་ཅན་གྱིས་བརྟབས་པར་གྱུར་པ་དེ་དག་མཐོང་ནས་ཡིད་མི་བདེ་བར་གྱུར་ནས་སྙིང་རྗེས་མངོན་པར་གདུངས་པར་གྱུར་ཏེ། དེའི་ཚེ་ཚིགས་སུ་བཅད་པ་སྨྲས་པ། སེམས་ཅན་ཀུན་ལ་བྱིན་པ་དང་། །སེམས་ཅན་གཅིག་

ལ་སྙིང་བརྩེ་གང་། །སེམས་ཅན་ཀུན་ལ་བྱིན་པ་བས། །སྙིང་བརྩེ་གཅིག་ཏུ་ཁྱད་པར་འཕགས། །དེ་དག་རླུང་ལྟར་འགྲོ་ཞིང་གཞན་གྱིས་སྡུག་བསྔལ་བར་བྱས་པ་དེ་དག་བྱེར་བར་གྱུར་ཀྱང་མདའ་མ་འཕངས་སོ། །འདི་ལྟར་སེམས་ཅན་ཐམས་ཅད་ནི་
ཤེས་པ་གཅིག་པོ་ཀུན་རྫོབ་ཤེས་པ་དང་ལྡན་པ་ཡིན་པས་དེ་དག་གིས་འདི་སྙམ་དུ་བདག་ཉིད་ཆེན་པོ་འདི་ནི་སྙིང་རྗེ་ཅན་ཡིན་ནོ་སྙམ་དུ་བསམས་ཏེ། དེ་དག་དེ་ལ་ལེགས་པར་ཐུགས་ཀྱང་འཇིགས་པ་མེད་པར་བྱེར་རོ། །དེ་ནས་གྱད་བུ་ནོར་འདི་སྙམ་དུ་གལ་ཏེ་
བདག་གིས་མདའ་མ་འཕངས་པ་གྲོགས་པོ་འགའ་ཞིག་གིས་ཐོས་ན་ཡིད་མི་དགའ་བར་འགྱུར་རོ། །སྙམ་དུ་བསམས་ཤིང་། དེ་ཡང་འདི་སྙམ་དུ་མ་ལ་དེ་དག་བདག་ལ་གཤེ་བར་འགྱུར་བ་ཡོངས་སུ་སྤང་བའི་ཕྱིར་དང་། བདག་སྦྱོར་བ་ལ་གོམས་པར་ཤེས་པར་བྱ་བའི་ཕྱིར་
མདའ་འཕང་ངོ་སྙམ་དུ་བསམས་ནས། དེས་དེ་ལྟར་བསམས་ཏེ། འདི་ལྟར་སེམས་ཅན་འགའ་ལ་ཡང་གནོད་པ་སྐྱེད་པར་མི་འགྱུར་བར་མདའ་འཕངས་སོ། །དེས་ཀྱང་བསླབས་པས་མདའ་རྣམས་རྭ་ཕྲག་དང་རྐང་ལག་གི་བར་དང་སྤུ་གསེབ་དང་རྣ་བར་དག་ཏུ་འཕངས་
ཏེ་བཏང་ངོ་། །དེས་དེ་ལྟར་མདའ་སྟོང་པོ་དེ་དག་སེམས་ཅན་གཅིག་ལ་གནོད་པར་མི་འགྱུར་བར་དེ་ལྟར་འཕངས་སོ། །དེ་ནས་རི་དགས་དེ་དག་ཤིན་ཏུ་ཐལ་ནས་དོང་བ་དང་། དེའི་གྲོགས་པོ་རྣམས་འོངས་ནས་འཕན་ཀར་འདུག་སྟེ། ཕན་ཚུན་དུ་འདི་སྙམ་དུ་དེང་བདག་
ཅག་གིས་རི་དགས་ཕལ་མོ་ཆེ་ཀུན་ནས་བསྐོངས་ལ་གྱད་བུ་ནོར་འདི་ཡང་གནས་བཞི་དང་། འཕང་བ་རྣམ་པ་ལྔ་ལ་བྱང་བ་ཡིན་པས་དེ་རིང་རི་དགས་མང་པོ་ཞིག་བསད་པར་གྱུར་ན། ཁུར་ཁལ་དག་ཁྱེར་ཏེ་མ་འོངས་པ་ནི་གཅིག་ཏུ་ཉེས་པ་བྱས་སོ། །སྙམ་དུ་བསམས་
སོ། །ཇི་ཙམ་དྲུང་དུ་ཕྱིན་ན་དེ་དག་གིས་རི་དགས་གཅིག་ཀྱང་མ་བསད་པར་མཐོང་ངོ་། །མཐོང་ནས་ཀྱང་གྱད་བུ་ནོར་དེ་ལ་འདི་སྐད་ཅེས་སྨྲས་སོ། །གྲོགས་པོ་རི་དགས་དེ་དག་གར་སོང་། དེས་འདི་སྐད་ཅེས་སྨྲས་སོ། །བྲོས་ཏེ་སོང་ངོ་། །དེ་དག་གིས་སྨྲས་པ། ཅི་ཁྱོད་

ཀྱིས་མདའ་མ་འཕངས་སམ། དེས་སྨྲས་པ། འཕངས་ཏེ་དོང་པ་སྟོང་པར་འདུག་པ་ལ་ལྟོས། དེ་དག་གིས་འདི་སྙམ་དུ་འདི་ལྟར་གྱད་བུ་ནོར་འཕང་བ་དེ་ལྟ་བུ་དག་ལ་དེ་ལྟར་བྱང་བར་གྱུར་ཏོ་ཞེས་བྱ་བ་དེའི་གྲགས་པ་བརྫུན་པ་ལྟ། རྣམ་པ་གཅིག་
ཀྱང་མི་ཤེས་ན་བཞི་ཆར་ཤེས་པ་ལྟ་སྨོས་ཀྱང་ཅི་དགོས་སྙམ་དུ་བསམས་ཏེ། ཞེས་བྱ་བ་ནས་དེའི་གྲོགས་པོ་རྣམས་སྨོད་པར་བྱེད་དོ་ཞེས་བྱ་བའི་བར་དང་། རང་གི་ཁྱིམ་དུ་འོངས་ནས་སྟེང་གི་ཁང་བཟངས་ཀྱི་ཐོག་ན་ལག་པ་འགྲམ་པ་ལ་གཏད་ནས་སེམས་ཁོང་
དུ་ཆུད་དོ་ཞེས་བྱ་བའི་བར་ནས། ཕ་མ་འོངས་ནས་འདི་སྐད་ཅེས་སྨྲས་སོ། །ཞེས་བྱ་བའི་བར་དང་། བུ་ཅིའི་ཕྱིར་ཁྱོད་ཀྱིས་རི་དགས་མ་བསད་དེས་སྨྲས་པ། ཡབ་ཡུམ་ཁྱེད་ཅག་ལ་བདག་སྡུག་ལགས་སམ། བུ་ཤིན་ཏུ་སྡུག་གོ། །གལ་ཏེ་འགའ་ཞིག་གིས་
བདག་སྲོག་དང་ཕྲལ་ན་ཁྱེད་ཅག་ཇི་ལྟ་བུར་འགྱུར། དེ་དག་གིས་སྨྲས་པ། ཤིན་ཏུ་སྡུག་བསྔལ་བ་དང་། ཡིད་མི་བདེ་བར་འགྱུར་མོད། དེ་སྨྲས་པ། ཁྱེད་ཅག་ལ་ཡང་སྲོག་མི་ཕངས་ལགས་སམ། དེ་དག་གིས་སྨྲས་པ་ཤིན་ཏུ་ཕངས་སོ། །འོ་ན་ཁྱེད་ཅག་ཅིའི་སླད་དུ་
བདག་གཞན་གྱི་སྲོག་གཅོད་པ་ལ་སྦྱོར་བར་མཛད་གཞན་ཡང་ཡབ་ཡུམ་ཁྱེད་ཅག་གིས་འདི་ལྟར། འབྱུང་པོ་རྣམས་ལ་ཕན་འདོད་སྙིང་བརྩེ་བས། །སྲོག་གཅོད་པ་དང་གསོད་དང་འཆིང་བ་སྤོངས། །ཇི་ལྟར་རང་གི་སྲོག་ཕངས་སྲུང་བ་ལྟར། །དེ་བཞིན་གཞན་རྣམས་
ཀྱི་ཡང་སྲོག་བསྲུང་ངོ་། །ཞེས་བགྱི་བ་ཅི་མ་གསན་ཏམ་ཞེས་བྱ་བའི་བར་དུའོ། །དེ་ནས་དེ་དག་གི་བུ་དེའི་ངེས་པ་ཁོང་དུ་ཆུད་ནས་འདི་སྐད་ཅེས་སྨྲས་སོ། །བུ་དེ་ལྟ་ན་ཕྱིར་ཡང་སྟེང་གི་ཁང་བཟངས་ཀྱི་ཐོག་ཏུ་བཙུན་མོའི་འཁོར་རྣམས་དང་ལྷན་ཅིག་རྩེད་མོ་གྱིས་ཤིག །
དེ་ནས་གྱད་བུ་ནོར་གྱི་སྟེང་གི་ཁང་བཟངས་ཀྱི་ཐོག་ནས་འདི་སྐད་ཅེས་རྐང་གཉིས་པ་དང་། རྐང་མེད་པ་དང་། སྨན་དང་། རིག་སྔགས་དང་། གསང་སྔགས་འཆང་བ་གང་གིས་བདག་འཁོར་བའི་དགོན་པ་ལས་ཡོངས་སུ་ཐར་བར་བྱེད་པ་སུ་ཡོད་ཅེས་སྨྲས་སོ། །དེའི་ཚེ་

ཡུལ་སྡིག་བྱུང་ན་སྟོན་པ་དྲུག་པོ་ཐམས་ཅད་མཁྱེན་པ་མ་ཡིན་པར་ཐམས་ཅད་མཁྱེན་པར་མངོན་པའི་ང་རྒྱལ་བྱེད་པ་རྣམས་གནས་ཏེ་ཞེས་བྱ་བ་ནས། འོད་སྲུང་གི་གན་དུ་སོང་སྟེ་འདི་སྐད་ཅེས་སྨྲས་སོ། །ཁྱོད་ཀྱི་ཆོས་ཀྱི་ཚུལ་ནི་གང་ཡིན་སློབ་མ་ལ་གདམས་པ་ནི་གང་ཡིན། ཁྱོད་ཀྱི་ཚངས་
པར་སྤྱོད་པ་ལ་གནས་པའི་འབྲས་བུ་ནི་གང་ཡིན་ཕན་ཡོན་ནི་གང་ཡིན། དེས་སྨྲས་པ། གཞོན་ནུ་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། སྦྱིན་པ་མེད་དོ། །མཆོད་སྦྱིན་མེད་དོ། །སྦྱིན་སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ། །ལེགས་པར་སྤྱད་
པ་དང་ཉེས་པར་སྤྱད་པ་རྣམས་ཀྱི་ལས་ཀྱི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །མ་མེད་དོ། །ཕ་མེད་དོ། །སེམས་ཅན་རྫུས་ཏེ་སྐྱེ་བ་མེད་དོ། །འཇིག་རྟེན་འདི་ན་ཡང་དག་པར་སོང་བ་དང་། ཡང་དག་
པར་ཞུགས་པའི་དགྲ་བཅོམ་པ་གང་དག་རང་གི་མངོན་པར་ཤེས་པས་འཇིག་རྟེན་འདི་དང་འཇིག་རྟེན་ཕ་རོལ་མངོན་སུམ་དུ་བྱས་ཤིང་བསྒྲུབས་ནས་ཁོང་དུ་ཆུད་པར་བྱས་ཏེ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བརྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་
ཤེས་སོ་ཞེས་གོ་བར་བྱེད་པ་དག་མེད་དོ་ཞེས་བྱ་བ་ནས། སྟོན་པ་འདི་ཡང་ལམ་གོལ་བར་ཞུགས་པ། ལམ་ངན་པ་སྒྲུབ་པར་བྱེད་པ་ཡིན་ཏེ། མཁས་པ་རྣམས་ཀྱིས་ལམ་འཇིགས་པ་དང་བཅས་པ་ཇི་ལྟ་བ་བཞིན་སྤང་བར་བྱ་བ་ཡིན་ནོ་ཞེས་བྱ་བའི་བར་དང་ཚིགས་སུ་
བཅད་པ་སྨྲས་པ། ལྟ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་ནི་དེ་འདྲ་བ། །དེ་ཡི་ཆོས་མིན་ཅི་འདྲ་ཞིག །ཅེས་བྱ་བ་ནས། དེ་བཞིན་དུ་སྟོན་པ་དྲུག་པོ་རྣམས་སྣོད་སྟོང་པ་བཞིན་དུ་བརྡབས་ཏེ་སོང་ངོ་ཞེས་བྱ་བའི་བར་དུའོ། །
སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་ནི་ཉིན་ལན་གསུམ་མཚན་ལན་གསུམ། ཉིན་མཚན་ལན་དྲུག་ཏུ་སངས་རྒྱས་ཀྱི་སྤྱན་གྱིས་འཇིག་རྟེན་རྣམས་ལ་གང་ནི་ཉམས་པར་གྱུར། གང་ནི་སྡུག་བསྔལ་བར་གྱུར། གང་ནི་ཉམ་ང་བར་གྱུར། གང་ནི་མི་

བདེ་བར་གྱུར། གང་ནི་སྡུག་བསྔལ་དང་། ཉམ་ང་བ་དང་། མི་བདེ་བར་གྱུར། གང་གི་དགེ་བའི་རྩ་བ་མ་བསྐྱེད་པ་རྣམས་ནི་དགེ་བའི་རྩ་བ་བསྐྱེད་པར་བྱ། གང་གི་སྐྱེད་པ་རྣམས་ནི་འཕེལ་བར་བྱ། གང་གི་དགེ་བའི་རྩ་བ་ཡོངས་སུ་མ་སྨིན་པ་
རྣམས་ནི་ཡོངས་སུ་སྨིན་པར་བྱ། གང་གི་དགེ་བའི་རྩ་བ་ཡོངས་སུ་སྨིན་པ་རྣམས་ཤེས་རབ་ཀྱི་མཚོན་གྱིས་དྲལ་བར་བྱ། གང་ནི་སངས་རྒྱས་ཀྱིས་འདུལ། གང་ནི་ཉན་ཐོས་ཀྱིས་འདུལ། གང་ནི་སངས་རྒྱས་དང་ཉན་ཐོས་ཀྱིས་འདུལ། གང་ནི་ཞེ་སྡང་ལ་སྤྱོད།
གང་ནི་འདོད་ཆགས་ལ་སྤྱོད། གང་ནི་གཏི་མུག་ལ་སྤྱོད། གང་ནི་འདོད་ཆགས་དང་། ཞེ་སྡང་དང་། གཏི་མུག་ལ་སྤྱོད། གང་ནི་ཉེས་དམིགས་གང་གིས་གནོད་པར་གྱུར། འཕགས་པའི་ནོར་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་གི་བདག་པོ་ལ་
རབ་ཏུ་གཞག་པར་བྱ། ཉེས་པར་སྤྱོད་པའི་འདམ་དུ་བྱིང་བ་གང་གི་ལག་ནས་དྲང་བར་བྱ། གང་ནི་ངན་སོང་ལས་བསླང་སྟེ། མཐོ་རིས་དང་ཐར་པའི་འབྲས་བུ་ལ་རབ་ཏུ་གཞག་པར་བྱ་ཞེས་གཟིགས་པ་འཇུག་གོ། །ཡང་སྨྲས་པ། རྒྱ་མཚོ་ཆུ་སྲིན་རྣམས་ཀྱི་གནས། །
དུས་ལས་འདའ་བར་འགྱུར་སྲིད་ཀྱི། །གདུལ་བྱ་ལ་བྱམས་སངས་རྒྱས་ནི། །དུས་ལས་འདའ་བར་མི་འགྱུར་རོ། །དེ་ནས་བཅོམ་ལྡན་འདས་ཀྱི་ཡེ་ཤེས་སྒྲིབ་པ་མི་མངའ་བའི་སྤྱན་སངས་རྒྱས་ཀྱི་སྤྱན་གྱིས་ཀུན་དུ་གཟིགས་ནས་དགོངས་པ། གྱད་བུ་ནོར་དེ་སྔོན་གྱི་སངས་
རྒྱས་རྣམས་ལ་དགེ་བའི་རྩ་བ་སྐྱེད་པ། སྨོན་ལམ་བཏབ་པར་གྱུར་པ། འབྲས་སྨིན་པ་མཚོན་གྱིས་བརྟོལ་འདོད་པ་ལྟ་བུར་ཐུགས་སུ་ཆུད་ནས་བཅོམ་ལྡན་འདས་ཀྱིས་འདི་སྙམ་དུ་གང་གིས་འདུལ་བར་འགྱུར། ཅི་ཉན་ཐོས་ཀྱིས་འདུལ་ལམ། འོན་ཏེ་སངས་རྒྱས་ཀྱིས་འདུལ།
ཅི་སྤྱོད་ལམ་གྱིས་འདུལ་ལམ། འོན་ཏེ་ཆོས་བཤད་པས་འདུལ་སྙམ་དུ་དགོངས་སོ། །བཅོམ་ལྡན་འདས་ཀྱིས་སྤྱོད་ལམ་གྱིས་འདུལ་ན་གང་གི་སྤྱོད་ལམ་གྱིས་འདུལ་སྙམ་དུ་དགོངས་ན། ཞེས་བྱ་བ་དེ་ནས་ཚེ་དང་ལྡན་པ་རྟ་ཐུལ་ཡུལ་སྡིག་བྱུང་དུ་ཕྱིན་ནས་ཡུལ་སྡིག་བྱུང་ན་སྲིན་བུ་

པད་མའི་ནགས་ཁྲོད་ན་འདུག་གོ། །དེ་ནས་ཚེ་དང་ལྡན་པ་རྟ་ཐུལ་སྔ་དྲོ་ཤམ་ཐབས་བགོས་ཞེས་བྱ་བ་ནས། གྱད་བུ་ནོར་སྟེང་གི་ཁང་བཟངས་ཀྱི་ཐོག་ན་འདུག་པས་ཚེ་དང་ལྡན་པ་རྟ་ཐུལ་འགྲོ་བ་དང་། ལྡོག་པ་དང་། བསྐུམ་པ་དང་། བརྐྱང་བ་དང་། སྣམ་སྦྱར་དང་།
ཆོས་གོས་དང་། ལྷུང་བཟེད་ཐོགས་པ་མཛེས་པ་དེ་མཐོང་ངོ་། །གྱད་བུ་ནོར་གྱིས་ཚེ་དང་ལྡན་པ་རྟ་ཐུལ་མཐོང་བ་དེའི་ཚེ་ཚིགས་སུ་བཅད་པ་སྨྲས་པ། རྟགས་ཅན་ཆོས་ཀྱིས་འཚོ་བྱེད་པ། །འདི་ན་ཕལ་ཆེར་བདག་གིས་མཐོང་། །ཞི་ཞིང་ཞི་བར་གནས་གྱུར་པ། །
འདི་འདྲ་བདག་གིས་མ་མཐོང་ངོ་། །ཞེས་བྱ་བའི་བར་དུའོ། །མི་ཞིག་བཏང་ནས་ཞེས་བྱ་བ་ནས་སྤྱོད་ལམ་མཐོང་སྟེ་སླར་ལོག་ནས་གཞོན་ནུ་ལ་སྨྲས་སོ་ཞེས་བྱ་བའི་བར་དུའོ། །དེ་ནས་ཚེ་དང་ལྡན་པ་གྱད་བུ་ནོར་དགེ་བའི་རྩ་བས་བསྐུལ་ཏེ་ལྟ་འདོད་དེ་ཞེས་བྱ་བ་ནས། ཡང་
དག་པར་དགའ་བར་འགྱུར་བའི་བར་དུ་བྱས་ནས་འདུག་སྟེ་དེ་ལ་སྨྲས་པ། ཅི་ཁྱོད་སྟོན་པ་ཡིན་ནམ། འོན་ཏེ་ཉན་ཐོས་ཡིན། ཚེ་དང་ལྡན་པ་རྟ་ཐུལ་གྱིས་ཞེས་བྱ་བ་ནས་ཚིགས་སུ་བཅད་པ་སྨྲས་པ། རི་དབང་གངས་ཅན་དང་ནི་ཡུངས་ཀར་ཉིད་ཀྱི་ཁྱད་པར་གང་ཡིན་དང་། །
རྒྱ་མཚོ་དང་ནི་ཕྱུགས་རྗེས་ཆུ་ཆུང་ཉིད་ཀྱི་ཁྱད་པར་གང་ཡིན་དང་། །ཉི་མ་འོད་ཟེར་དྲ་བ་ཆེ་དང་སྲིན་བུ་མེ་ཁྱེར་ཁྱད་གང་ཡིན། །དེ་དག་རྫོགས་པའི་སངས་རྒྱས་ཡོན་ཏན་གཏེར་དང་ཉན་ཐོས་ཁྱད་པར་རོ། །ཞེས་བྱ་བའི་བར་དུའོ། །ཕ་མ་གཉིས་ཀྱི་གན་དུ་འོངས་ནས་གསོལ་
བ་འདེབས་པར་བྱེད་དེ་ཞེས་བྱ་བ་ནས། མ་གནང་ངོ་ཞེས་བྱ་བའི་བར་དང་། ཉིན་ཞག་གཅིག་ཟན་བཅད་པའི་བར་དང་། ཕ་མ་འོངས་ནས་འདི་སྐད་ཅེས་སྨྲས་སོ། །ཁྱོད་ཀྱིས་ནི་སྡུག་བསྔལ་མི་ཤེས་ཏེ་ཚངས་པར་སྤྱོད་པར་སྤྱད་དཀའོ། །གཅིག་པུ་ཉིད་ལ་མངོན་པར་
དགའ་བར་བྱ་དཀའོ། །གནས་མལ་དགོན་པ་དང་། ནགས་འདབ་དང་། བས་མཐའ་དག་ཏུ་གནས་དཀའོ། །ཁྱོད་ཀྱིས་ཇི་སྲིད་འཚོའི་བར་དུ་གཅན་གཟན་གདུག་པ་དག་དང་ལྷན་ཅིག་གནས་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མི་རྣམས་ཀྱི་དགའ་བ་

དང་། རྩེད་མོ་དག་ལས་མངོན་པར་དབེན་པར་བྱ་དགོས་སོ། །བུ་ཁྱོད་ཚུར་ཤོག་འདུག་ལ་སྦྱིན་པ་དག་བྱིན་ཅིག །འདོད་པ་ལ་ཡང་ཡོངས་སུ་སྤྱོད་ཅིག་ཅེས་བྱ་བའི་བར་དུའོ། །རྗེས་སུ་གནང་ནས་ཞེས་བྱ་བ་ནས། ལུས་ཀྱི་སྟོབས་དང་། མཐུ་ཡང་དག་པར་
བསྐྱེད་ནས་ཞེས་བྱ་བའི་བར་དང་། ཕས་གྱད་བུ་ནོར་རབ་ཏུ་འབྱུང་བར་འདོད་ཀྱིས་གང་དག་རབ་ཏུ་འབྱུང་བར་འདོད་པ་དེ་དག་ཀྱང་དེང་ཤིག་ཅེས་དྲིལ་བསྒྲགས་པ་བྱས་པའི་བར་དུའོ། །དེ་ནས་དེའི་ནེའུ་ལྡངས་གང་ཡིན་པ་དེ་དག་འདི་སྙམ་དུ་གྱད་བུ་ནོར་འདི་ནི་བདེ་བ་འདོད་
པ་ཤིན་ཏུ་གཞོན་པ་ཡིན་ཡང་། ཁྱིམ་གྱི་བདེ་བ་སྤངས་ནས་ངེས་པར་བྱུང་སྟེ་རབ་ཏུ་འབྱུང་བར་བྱེད་ན། བདག་ཅག་གིས་ཇི་ལྟར་བྱ་སྙམ་དུ་བསམ་པ་ལས། དེ་ལས་གཅིག་གིས་འདི་སྐད་ཅེས་ལེགས་སུ་ཟད་དེ་བདག་ཅག་ཀྱང་རབ་ཏུ་འབྱུང་བར་བྱའོ་ཞེས་སྨྲས་སོ། །དེ་
ནས་གྱད་བུ་ནོར་གཞོན་ནུ་ལྔ་བརྒྱ་དང་ལྷན་ཅིག་ཏུ་ཚེ་དང་ལྡན་པ་རྟ་ཐུལ་གང་ན་བ་དེར་སོང་སྟེ་ཕྱིན་ནས་རྟ་ཐུལ་གྱི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་གྱད་བུ་ནོར་གྱིས་ཚེ་དང་ལྡན་པ་རྟ་ཐུལ་ལ་འདི་སྐད་ཅེས་སྨྲས་
སོ། །བཙུན་པས་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གིས་དངོས་པོ་ཐོབ་པར་མཛད་དུ་གསོལ། བདག་ཁྱོད་ཀྱི་ཐད་དུ་ཚངས་པར་སྤྱད་པར་སྤྱོད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་གྱད་བུ་
ནོར་རིམ་གྱིས་རབ་ཏུ་ཕྱུང་སྟེ་བསྙེན་པར་རྫོགས་པར་བྱས་སོ། །དེས་ཀྱང་སྡེ་སྣོད་གསུམ་པོ་དག་ཁ་ཏོན་དུ་བཏོན་ཅིང་བསྒོམས་པས་དགྲ་བཅོམ་པར་གྱུར་ཏེ། ཁམས་གསུམ་གྱི་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་
ལག་མཐིལ་དུ་མཚུངས་པའི་སེམས་དང་ལྡན་པ། སྟེའུ་དང་ཙན་དན་དུ་མཉམ་པ། མ་རིག་པའི་སྒོ་ངའི་སྦུབས་དྲལ་བ། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་། བཀུར་སྟི་

ལ་རྒྱབ་ཀྱིས་ཕྱོགས་པ། དབང་པོ་དང་། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །སངས་རྒྱས་བཅོམ་ལྡན་འདས་ཀྱིས་ལུགས་ཀྱིས་འདི་ལྟར་འདུས་པ་ཆེན་པོ་གཉིས་ཡོད་དེ་དབྱར་ཟླ་འབྲིང་
པོ་ལ་དབྱར་ཉེ་བར་སྒྲུབ་པའི་ཚེ་དང་། སྟོན་ཟླ་འབྲིང་པོའི་ཉ་ལའོ། །གང་དག་དབྱར་ཟླ་འབྲིང་པོ་ལ་དབྱར་ཉེ་བར་སྒྲུབ་པའི་ཚེ་གདམས་ངག་དང་རྗེས་སུ་བསྟན་པ་མནོས་པ་དེ་དག་གྲོང་དང་། གྲོང་རྡལ་དང་། ཡུལ་འཁོར་དང་རྒྱལ་པོའི་ཕོ་བྲང་དག་ཏུ་དབྱར་འདས་པར་བྱས་པ་
དེ་དག་སྟོན་ཟླ་འབྲིང་པོ་ཉ་ལ་འོངས་ནས་ཇི་ལྟར་ཁོང་དུ་ཆུད་པ་དག་ནི་རྗོད་པར་བྱེད། གོང་མར་གྱུར་པ་དག་ནི་འདྲི་བར་བྱེད་དོ། །སངས་རྒྱས་བཅོམ་ལྡན་འདས་རྣམས་ཀྱིས་ཇི་ལྟ་བ་དེ་བཞིན་དུ་ཉན་ཐོས་ཆེན་པོ་རྣམས་ཀྱི་ཡང་དེ་ལྟ་བུ་ཡིན་པས་ཚེ་དང་ལྡན་པ་རྟ་ཐུལ་གྱིས་ལྷན་
ཅིག་གནས་པ་དང་། ཉེ་གནས་གང་དག་གྲོང་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་དུ་དབྱར་གནས་པར་བྱས་པ་དེ་དང་། དེ་དག་སྟོན་ཟླ་འབྲིང་པོ་ཉ་ལ་ཚེ་དང་ལྡན་པ་རྟ་ཐུལ་གང་ན་བ་དེར་ལྷགས་པ་དང་། ཚེ་དང་ལྡན་པ་གྱད་བུ་ནོར་
གྱིས་མཐོང་ངོ་། །ཚངས་པར་སྤྱོད་པ་དེ་དག་མཐོང་ནས་ཀྱང་བསུ་སྟེ། གསོང་པོར་སྨྲ་བས་ཡང་དག་པར་དགའ་བར་བྱས་ཏེ། ཆོས་གོས་དང་། འཁར་གསིལ་དང་། རིལ་བ་སྤྱི་བླུགས་དང་། གཏུར་བུ་དང་། ཞྭ་དང་། མཆིལ་ལྷམ་དང་། གདིང་བ་དག་བླངས་
སོ། །དེ་དག་ཀྱང་མཁན་པོའི་དྲུང་དུ་སོང་ནས་བསྙེན་བཀུར་བྱས་ཏེ་ཇི་ལྟར་ཁོང་དུ་ཆུད་པ་ནི་རྗོད་པར་བྱེད། གོང་མར་གྱུར་པ་ནི་འདྲི་བར་བྱེད་ཅིང་རྒྱལ་པོའི་ཁབ་གང་ན་བ་དེར་བཅོམ་ལྡན་འདས་ལ་བལྟ་བ་དང་། བཅོམ་ལྡན་འདས་ལ་བསྙེན་བཀུར་བྱ་བའི་ཕྱིར་འགྲོ་བར་
བྱེད་པ་དག་གྱད་བུ་ནོར་གྱིས་མཐོང་ངོ་། །མཐོང་ནས་ཀྱང་སློབ་དཔོན་གཅིག་པ་དང་། མཁན་པོ་གཅིག་པ་དེ་དག་གི་དྲུང་དུ་སོང་ནས་འདི་སྐད་ཅེས་སྨྲས་སོ། །ཁྱེད་ཅག་གང་དུ་དོང་། དེ་དག་གིས་སྨྲས་པ། བདག་ཅག་གིས་མཁན་པོ་ནི་མཐོང་ཟིན་པས་ད་ནི་སངས་

རྒྱས་བཅོམ་ལྡན་འདས་ལྟར་འགྲོའོ། །དེ་ནས་ཚེ་དང་ལྡན་པ་གྱད་བུ་ནོར་གྱིས་འདི་སྙམ་དུ་བདག་གིས་མཁན་པོ་དང་། དགེ་བའི་བཤེས་གཉེན་ལ་བརྟེན་པས་བཅོམ་ལྡན་འདས་ཀྱི་ཆོས་ཀྱི་སྐུ་ནི་མཐོང་ན། གཟུགས་ཀྱི་སྐུ་མ་མཐོང་བས་བདག་
བཅོམ་ལྡན་འདས་གང་ན་བ་དེར་འགྲོའོ་སྙམ་དུ་བསམས་སོ། །དེ་ལྟར་བསམས་ནས་ཀྱང་གྱད་བུ་ནོར་གྱིས་མཁན་པོ་ལ་འདི་སྐད་ཅེས་སྨྲས་སོ། །མཁན་པོ་བདག་གིས་མཁན་པོ་དང་། དགེ་བའི་བཤེས་གཉེན་ལ་བརྟེན་ནས་བཅོམ་ལྡན་འདས་ཀྱི་ཆོས་ཀྱི་སྐུ་ནི་
མཐོང་ན། གཟུགས་ཀྱི་སྐུ་མ་མཐོང་བས་ད་ནི་གཟུགས་ཀྱི་སྐུ་བལྟ་བར་འཚལ་ལོ། །དེ་སྐད་ཅེས་སྨྲས་པ་དང་། རྟ་ཐུལ་གྱིས་གྱད་བུ་ནོར་ལ་འདི་སྐད་ཅེས་སྨྲས་སོ། །བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་
དཔེར་ན་ཨུ་དུམ་བཱ་རའི་མེ་ཏོག་ལྟར་ཤིན་ཏུ་མཐོང་བར་དཀའ་བ་ཡིན་པས། བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བལྟ་བར་གྱིས་ཤིག །དེ་ནས་ཚེ་དང་ལྡན་པ་གྱད་བུ་ནོར་མཁན་པོས་རྗེས་སུ་གནང་བས་ནེའུ་ལྡངས་མཁན་
པོ་གཅིག་པ་རྣམས་དང་ལྷན་ཅིག་ཏུ་བཅོམ་ལྡན་འདས་གང་ན་བ་དེར་དོང་ངོ་། །དེའི་ཚེ་ན་བཅོམ་ལྡན་འདས་འཁོར་བརྒྱ་ཕྲག་དུ་མ་ལ་ཆོས་སྟོན་ཏེ། བཅོམ་ལྡན་འདས་ཀྱིས་གྱད་བུ་ནོར་རྒྱང་རིང་པོ་ཁོ་ན་ནས་འོངས་པ་གཟིགས་སོ། །གཟིགས་ནས་ཀྱང་གྱད་བུ་
ནོར་ལ་བཀའ་སྩལ་པ། གྱད་བུ་ནོར་ཚུར་ཤོག །འོངས་པ་ལེགས་སོ། །ཁྱོད་དུས་སུ་ཕྱིན་ཏོ་ཞེས་བཀའ་སྩལ་ཏོ། །དེའི་ཚེ་ན་གནས་མལ་མི་མཐུན་པར་འབོགས་པར་བྱེད་དོ། །མདོ་སྡེ་འཛིན་པ་རྣམས་དང་འདུལ་བ་འཛིན་པ་རྣམས་སུ་ལྷན་ཅིག་མདོ་སྡེ་
འཛིན་པ་རྣམས་དང་། མ་མོ་འཛིན་པ་རྣམས་སུ་ལྷན་ཅིག །འདུལ་བ་འཛིན་པ་རྣམས་དང་། མདོ་སྡེ་འཛིན་པ་རྣམས་སུ་ལྷན་ཅིག །འདུལ་བ་འཛིན་པ་རྣམས་དང་། མ་མོ་འཛིན་པ་རྣམས་སུ་ལྷན་ཅིག་ཅེས་བྱ་བ་ནས་དེ་བཞིན་དུ་མུ་གསུམ་པ་ཡང་སྦྱར་

བར་བྱའོ། །དེ་ནས་བཅོམ་ལྡན་འདས་ཀྱིས་འདི་སྙམ་དུ་གྱད་བུ་ནོར་འདི་ནི་སྔོན་གྱི་སངས་རྒྱས་རྣམས་ལ་ཀྱེ་མའོ་བདག་བཅོམ་ལྡན་འདས་ཀྱི་གནས་མལ་འགེད་པ་དང་། ཁ་ཟས་ལ་བསྐོ་བའི་མཆོག་ཏུ་གྱུར་ཅིག་ཅེས་སྨོན་ལམ་བཏབ་པས་ཞེས་བྱ་བའི་བར་ནས། བཅོམ་
ལྡན་འདས་ཀྱིས་བཀའ་སྩལ་པ། གནས་མལ་འབོགས་པ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན། འདུན་པས་འགྲོ་བ་དང་། ཞེ་སྡང་གིས་འགྲོ་བ་དང་། གཏི་མུག་གིས་འགྲོ་བ་དང་།
འཇིགས་པས་འགྲོ་བ་དང་། གནས་མལ་ཕོག་པ་དང་། མ་ཕོག་པ་མི་ཤེས་པའོ། །དཀར་པོའི་ཕྱོགས་ནི་དེ་ལས་བཟློག་པར་བྱའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གྱད་དུ་ནོར་གནས་མལ་འབོགས་པར་བསྐོ་བར་
བྱའོ་ཞེས་བྱ་བ་ནས། གནས་མལ་བཤམ་པར་བྱས་ནས་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། གྱད་བུ་ནོར་འདི་དགེ་འདུན་གྱི་གནས་མལ་འབོགས་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་
མཛོད་ཅིག་དང་། གྱད་བུ་ནོར་དགེ་འདུན་གྱི་གནས་མལ་འབོགས་པར་བསྐོ་བར་བགྱིའོ་ཞེས་བྱ་བའི་བར་དུ་སྟེ་འདི་ནི་གསོལ་བའོ། །དེའི་འོག་ཏུ་ལས་ཇི་ལྟ་བ་བཞིན་བྱའོ་གང་གི་ཚེ་གྱད་བུ་ནོར་འདི་དགེ་འདུན་གྱི་གནས་མལ་འབོགས་པར་བསྐོས་པ་དེའི་ཚེ། གནས་མལ་
གཞན་དུ་བསྐོ་བར་བརྩམས་ཏེ། དེས་མདོ་སྡེ་འཛིན་པ་རྣམས་དང་། མདོ་སྡེ་འཛིན་པ་རྣམས་སུ་ལྷན་ཅིག །འདུལ་བ་འཛིན་པ་རྣམས་དང་། འདུལ་བ་འཛིན་པ་རྣམས་སུ་ལྷན་ཅིག །མ་མོ་འཛིན་པ་རྣམས་དང་མ་མོ་འཛིན་པ་རྣམས་སུ་ལྷན་ཅིག །གློ་བུར་པ་རྣམས་
དང་གློ་བུར་པ་རྣམས་སུ་ལྷན་ཅིག །རྣལ་འབྱོར་སྤྱོད་པ་རྣམས་དང་རྣལ་འབྱོར་སྤྱོད་པ་རྣམས་སུ་ལྷན་ཅིག །གང་དག་རྒྱུན་དུ་ཞུགས་པའི་འབྲས་བུ་ཐོབ་པ་དེ་དག་ནི་ལན་གཅིག་ཕྱིར་འོང་བ་རྣམས་དང་ལྷན་ཅིག་ཏུ་བསྐོས། གང་དག་ལན་གཅིག་ཕྱིར་འོང་བའི་

འབྲས་བུ་ཐོབ་པ་དེ་དག་ནི་ཕྱིར་མི་འོང་བ་རྣམས་དང་ལྷན་ཅིག །ཕྱིར་མི་འོང་བ་རྣམས་ནི་དགྲ་བཅོམ་པ་རྣམས་དང་ལྷན་ཅིག་སྟེ། དེ་ལྟར་དགེ་སློང་དེ་རྣམས་ལྷག་པར་ཕན་ཚུན་དུ་འབེལ་བའི་གཏམ་རྣམ་པར་གཏན་ལ་དབབ་པ་དང་། དགེ་བའི་ཕྱོགས་
འཕེལ་བར་འགྱུར་བ་དེ་ལྟར་གནས་མལ་མཐུན་པར་གཞན་དང་གཞན་དུ་བསྐོས་སོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་རྫུ་འཕྲུལ་གྱིས་གནས་མལ་འབོགས་པར་བྱེད་དོ། །གང་དག་མཚན་མོ་སྔར་འོང་བ་དེ་དག་ལ་ནི་སོར་མོ་གཅིག་ལས་འོད་སྦར་ཏེ་གནས་མལ་
འབོགས་པར་བྱེད་དོ། །གང་དག་མཚན་མོ་ཆེས་ཕྱིས་འོང་བ་དེ་དག་ལ་ནི་སོར་མོ་གཉིས་ལས་འོད་སྦར་ཏེ་འབོགས་པར་བྱེད་དོ། །དེ་བཞིན་དུ་གསུམ་པ་དང་། བཞི་པ་དང་། ལྔ་པ་ལས་འོད་སྦར་ཏེ་ཞེས་བྱ་བའི་བར་དུའོ། །དེ་ནས་དགེ་སློང་དེ་དག་འདི་སྙམ་དུ་
འདི་ནི་ཆོས་དང་ལྡན་པས་ལས་བྱས་པ་ཡིན་ཏེ་ཞེས་བྱ་བ་ནས། ཁོང་དུ་མ་ཆུད་པ་ནི་ཁོང་དུ་ཆུད་པར་གྱུར། ཁོང་དུ་ཆུད་པ་ནི་ལྷག་པར་ཁྱད་པར་དུ་ཁོང་དུ་ཆུད་པར་གྱུར་ཏོ། །དེ་ལྟར་བྱས་པ་ནས་འདི་ལྟར་ཚེ་དང་ལྡན་པ་གྱད་བུ་ནོར་གྱིས་རྫུ་འཕྲུལ་གྱི་ཆོ་འཕྲུལ་བསྟན་ཏེ་
གནས་མལ་འབོགས་པར་བྱེད་ཅེས་ཕྱོགས་བཞི་དག་ཏུ་དེའི་སྒྲ་གྲགས་པར་གྱུར་ཏོ། །དེའི་ཚེ་གང་དག་ངོ་མཚར་དུ་གྱུར་པ་དེ་དག་གིས་ནི་མངོན་སུམ་དུ་བྱ་བའི་ཕྱིར་ཉིན་པར་འོངས་ནས་འོད་མའི་ཚལ་གྱི་ཉེན་ཀོར་དུ་འདུག་སྟེ་ཉི་མ་ནུབ་པ་དང་མཚན་མོ་འོང་བར་བྱེད་དོ། །དེ་
རྣམས་ལ་ཡང་ཚེ་དང་ལྡན་པ་དེས་དེ་བཞིན་དུ་རྫུ་འཕྲུལ་གྱི་ཆོ་འཕྲུལ་བསྟན་ནས་གནས་མལ་འབོགས་པར་བྱེད་དོ། །རེ་ཞིག་ན་རྒྱལ་པོའི་ཁབ་དེ་ན་སྦྱིན་པ་པོ་དང་། སྦྱིན་བདག་དེ་དག་དགེ་འདུན་ལ་ཟས་རྣམ་པ་གསུམ་དུ་ཤོམ་པར་བྱེད་དེ། ཁ་ཅིག་ནི་བསོད་པ་སྦྱིན་
པར་བྱེད་པའོ། །ཁ་ཅིག་ནི་འབྲིང་དག་སྦྱིན་པར་བྱེད་པའོ། །ཁ་ཅིག་ནི་ངན་པ་དག་སྦྱིན་པར་བྱེད་པའོ། །ཁྱིམ་གང་ན་བསོད་པ་དག་སྦྱོར་བ་དེ་དག་ནི་དྲུག་སྡེ་རྣམས་ཀྱི་སྔོན་ངོ་ཤེས་པ་ཡིན་པས་དེར་ནི་རང་འབའ་ཞིག་འགྲོ་བར་བྱེད་དོ། །གང་ན་འབྲིང་སྦྱིན་པར་བྱེད་པ་

དེར་ནི་གྲོགས་པོ་དང་། ཉེ་གནས་དག་གོ། །གང་ན་ངན་པ་དག་སྦྱིན་པ་དེར་ནི་དགེ་སློང་ཕལ་རྣམས་འགྲོ་བར་བཤམས་སོ། །དེའི་ཚེ་ཁྱིམ་བདག་དགེ་བཟང་ཞེས་བྱ་བ་བསོད་པ་སྦྱིན་པར་བྱེད་པའི་མཆོག་ཅེས་བྱ་བའི་བར་ནས། དྲུག་སྡེ་རྣམས་རེ་མོས་འགྲོ་བར་
བྱེད་དེ། ཉི་མ་དང་པོ་ལ་ནི་དགའ་བོ་དང་། ཉེ་དགའ་ཟན་ཟ་བར་བྱེད་དོ། །ཉི་མ་གཉིས་པ་ལ་ནི་འདུན་པ་དང་། འཆར་ཀའོ། །ཉི་མ་གསུམ་པ་ལ་ནི་འགྲོ་མགྱོགས་དང་། ནབ་སོའོ། །ཁྱིམ་བདག་དེས་དེ་རྣམས་ལ་དྲིས་པ། འཕགས་པ་དག་འོད་མའི་ཚལ་ན་དགེ་
སློང་གཞན་མི་བཞུགས་སམ་ཅི་ན། འགའ་ཙམ་ཡང་འདིར་བཤོས་གསོལ་བར་མི་མཛད་པར་ཡང་དང་ཡང་དུ་ཁྱེད་ཅག་ཁོ་ན་རེ་མོས་བྱོན། དེ་དག་གིས་སྨྲས་པ། ཁྱིམ་བདག་ཁྱོད་ཀྱིས་མི་ཤེས་སོ། །འོད་མའི་ཚལ་དེ་ན་དགེ་སློང་དག་ཡོད་ཀྱང་ཉིན་གཅིག་བཞིན་དུ་
བཟའ་བ་དང་། བཅའ་བ་ལ་སོགས་པ་རྣམ་པ་སྣ་ཚོགས་སྤྱོད་པར་བྱེད་པ་དེ་དང་དེ་དག་ཁྱོད་འདྲ་བའི་ཁ་ཟས་ཕུལ་བ་དེ་ཇི་ལྟར་ཟ་བར་བྱེད། ངེད་ཅག་ནི་ཁྱོད་ཁོ་ན་ལ་ཕན་གདགས་པའི་ཕྱིར་འོང་བར་ཟད་དོ། །དེ་ནས་ཁྱིམ་བདག་གིས་སྨྲས་པ། འཕགས་པ་གལ་ཏེ་འཕགས་
པ་ཁྱེད་ཅག་གིས་བདག་ལ་ཕན་གདགས་པར་མི་མཛད་ན་གཞན་སུ་ཞིག་བགྱིད་པར་འགྱུར་ཞེས་སྨྲས་སོ། །དེ་ནས་དུས་གཞན་ཞིག་ན་ལྷོ་ལམ་ནས་དགེ་སློང་ཞིག་བཅོམ་ལྡན་འདས་ཡང་དག་པར་བལྟ་བའི་ཕྱིར་ལྗོངས་རྒྱུ་ཞིང་རིམ་གྱིས་འོད་མའི་ཚལ་དུ་འོངས་སོ། །དེ་
སྔ་དྲོ་ཆོས་གོས་བགོས་ལྷུང་བཟེད་ཐོགས་ཏེ་སྔ་དྲོ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་ནས། དེ་སྲང་ན་རྒྱུ་བ་ཁྱིམ་བདག་དགེ་བཟང་གིས་མཐོང་ནས་སྔོན་མ་བྱུང་བ་ཞིག་གོ་སྙམ་དུ་བསམས་ཏེ་དེས་དེ་ལ་སྨྲས་པ། བཙུན་པ་ག་ལས་བྱོན། དེས་སྨྲས་པ། ལྷོ་
ལམ་ནས་སོ། །ཅིའི་ཕྱིར་བཅོམ་ལྡན་འདས་བལྟ་བའི་ཕྱིར་རོ། །བསྟི་གནས་གང་དུ་བྱས་དེས་སྨྲས་པ། འོད་མའི་ཚལ་དུའོ། །ཅིའི་ཕྱིར་བསོད་སྙོམས་ལ་རྒྱུ། དེས་སྨྲས་པ། ཅི་ཟན་གཅོད་ཕོད་དམ། བཙུན་པ་ཅི་འོད་མའི་ཚལ་ན་ད་ལྟར་དགེ་འདུན་ལ་

སྦྱིན་བདག་རྣམས་བཟའ་བ་དང་། བཅའ་བ་དང་། བལྡག་པའི་རྣམ་པ་བསོད་པ་བསོད་པ་དག་འབུལ་བར་མི་བགྱིད་ལགས་སམ། ཁྱིམ་བདག་གལ་ཏེ་དེ་ལྟར་གྱུར་དུ་ཟིན་ན། ཁོ་བོ་ཁྱོད་ཀྱི་ཡུལ་དུ་བསོད་སྙོམས་ལ་འོང་རེ་སྐན། ཁྱིམ་བདག་
གིས་དགེ་སློང་གི་ཚིག་ཐོས་ནས་དྲུག་སྡེ་རྣམས་ལ་དོགས་པ་སྐྱེས་ཏེ། དེ་དག་ནི་བདག་ལ་གཞན་དུ་སྨྲ་ལ། དགེ་སློང་འདི་ཡང་གཞན་དུ་སྨྲའོ་སྙམ་མོ། །དེས་དགེ་སློང་དེ་ལ་ཐུགས་ཁྲལ་སྐྱུངས་ཤིག་དང་། དེང་ཁྱོད་ཀྱི་གདུགས་ཚོད་བདག་སྦྱོར་ན་བདག་རྗེས་སུ་གཟུང་
དུ་གསོལ་ཞེས་བྱ་བའི་བར་ནས་དེས་དགེ་སློང་དེ་ཁྲིད་དེ་སོང་ངོ་།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བརྒྱད་པ། དྲུག་སྡེས་བསྐོས་པའི་དགེ་སློང་གཉིས་ཀྱང་འོངས་པ་དང་། ཁྱིམ་བདག་དེས་དེ་དག་བདེ་བར་འདུག་ཏུ་བཅུག་སྟེ། བཟའ་བ་
དང་། བཅའ་བ་གཙང་ཞིང་བསོད་པ་རབ་ཏུ་མང་པོ་དག་ལེགས་པར་བྲིམས་ཤིང་བསྟབས་ཏེ་ཟན་ཟོས་ཟིན་པ་དང་། ཁྱིམ་བདག་གིས་དྲུག་སྡེ་གཉིས་ལ་འཕགས་པ་དག་གིས་ནི་བདག་ལ་གདུགས་གཅིག་བཞིན་དུ་ཆོས་བཤད་པས་དེ་རིང་ནི་བདག་སྔོན་ཆད་མ་བྱོན་པའི་དགེ་
སློང་འདི་ལས་ཆོས་མཉན་ཏོ་ཞེས་སྨྲས་པ་དང་། དེ་གཉིས་ཀྱིས་ཡོན་བསྔོ་བ་བྱས་ནས་དོང་ངོ་། །དེ་ནས་ཁྱིམ་བདག་དགེ་བཟང་དགེ་སློང་དེའི་མདུན་དུ་འདུག་ནས་དགེ་སློང་དེ་ལ་སྨྲས་པ། འཕགས་པ་ཁྱོད་ལ་བདག་གིས་དེ་རིང་ནི་བཤོས་གསོལ་བ་འདི་ཅི་བསོད་པ་
དག་ལགས་སམ། འོན་ཏེ་ངན་པ་དག་ལགས། དེས་སྨྲས་པ། སྦྱིན་བདག་བདག་ལྷོ་ལམ་ནས་འོང་བར་བརྩམས་པ་གང་ཡིན་པ་ཚུན་ཆད་ནས་དའི་བར་དུ་བདག་གིས་འདི་ལྟ་བུའི་བསོད་པ་དག་ཟ་མ་མྱོང་ངོ་། །དེས་ཡང་སྨྲས་པ། འཕགས་པ་བདག་ལ་དགེ་
སློང་འདི་དག་ཁ་ཟས་འདི་ངན་ནོ་ཞེས་རྟག་ཏུ་སྨྲ་ན་དེ་ཇི་ལྟ་བུ་ཞིག་ལགས། དེས་སྨྲས་པ། དེ་དག་གིས་གདོན་མི་ཟ་བར་ཁྱིམ་འདིར་གཞན་འགའ་ཡང་མི་འོང་བར་བྱ་བའི་ཕྱིར་བྱས་སོ། །བཙུན་པ་ཅིའི་སླད་དུ་དགེ་སློང་གཞན་ཁྱིམ་འདིར་མི་བྱོན། ཁྱིམ་བདག་འདིར་

གཞན་དག་འོང་དུ་གླང་པོ་ཆེས་བརྫིས་ན་ཇི་ལྟར་བྱ། དེས་འདི་སྙམ་དུ་དེ་ཁོ་ན་ལྟར་ཡིན་ནོ་སྙམ་དུ་བསམས་ནས། དེས་དེ་ལ་འདི་སྐད་ཅེས་སྨྲས་སོ། །བཙུན་པ་དོན་མཇལ་ལགས་ཀྱིས་ད་ཆོས་ཀྱི་བཀའ་མཆིད་གསུངས་ཤིག་ཅེས་བྱ་བ་ནས། དགེ་སློང་དེས་ཆོས་ཀྱི་
གཏམ་གྱིས་ཡང་དག་པར་བསྟན་ནས་སོང་ངོ་ཞེས་བྱ་བའི་བར་དུའོ། །དེ་ནས་ཁྱིམ་བདག་དགེ་བཟང་གིས་སྐབས་དེ་དགེ་སློང་རྣམས་ལ་བརྗོད་ནས་འདི་སྐད་ཅེས་སྨྲས་སོ། །བདག་གིས་དགེ་འདུན་གྱི་གདུགས་ཚོད་ནར་མར་བཤམ་པ་དེ་ལ་གལ་ཏེ་དགེ་འདུན་གྱིས་བསྐོས་པའི་
དགེ་སློང་མཆིས་པས་ལོངས་སྤྱོད་པར་བགྱིད་པ་ལྟ་ན་གཡར་དམ་དེ་མི་བཤིག་པར་བགྱིའོ། །དེ་ལྟ་མ་ལགས་ན་བདག་གི་སྦྱིན་པར་བྱ་བའི་ཆོས་ཇི་ལྟར་བཤམས་པ་རྣམས་བཞག་སྟེ། བདག་གིས་གང་ཟག་སྒོ་སྒོར་སྩལ་བར་མི་བགྱིའོ། །དེ་ནས་དགེ་སློང་དེ་དག་གིས་
འདི་སྙམ་དུ་རྣམ་པ་འདི་ལྟ་བུའི་ཉེས་པ་གང་ཡིན་པ་དེ་ནི་ཞེས་བྱ་བ་ནས། བཅོམ་ལྡན་འདས་ལ་གསོལ་ཏོ་ཞེས་བྱ་བའི་བར་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གྱད་བུ་ནོར་ཟས་ལ་བསྐོ་བ་བསྐོ་བར་བྱའོ། །
གང་གི་ཚེ་དགེ་འདུན་རྣམས་ཀྱིས་གསོལ་བ་དང་གཉིས་ཀྱི་ལས་ཀྱིས་ཚེ་དང་ལྡན་པ་གྱད་བུ་ནོར་ཟས་ལས་བསྐོ་བར་བསྐོས་པ་དེའི་ཚེ་ཚེ་དང་ལྡན་པ་གྱད་བུ་ནོར་གྱིས་སྦྱིན་བདག་གིས་ཁྱིམ་དེ་དག་ཐམས་ཅད་ལས་གང་དག་ནི་བསོད་པ་སྦྱིན་པར་བྱེད། གང་དག་ནི་འབྲིང་སྦྱིན་
པར་བྱེད། གང་དག་ནི་ངན་པ་དག་སྦྱིན་པར་བྱེད་ཅེས་བརྟགས་སོ། །དེས་བརྟགས་ནས་ཀྱང་བསོད་པ་དག་སྦྱིན་པར་དགེ་སློང་གནས་བརྟན་གནས་བརྟན་དག་བསྐོས་སོ། །འབྲིང་དག་སྦྱིན་པར་དགེ་སློང་བར་མ་དག་བསྐོས་སོ། །ཐ་མ་དག་སྦྱིན་པར་དགེ་སློང་
གཞོན་རབས་དག་བསྐོས་སོ། །ཉི་མ་གཉིས་པ་ལ་ནི་ངན་པ་དག་སྦྱིན་པར་གནས་བརྟན་གནས་བརྟན་རྣམས་སོ། །འབྲིང་དག་སྦྱིན་པར་གཞོན་རབས་རྣམས་སོ། །བསོད་པ་དག་སྦྱིན་པར་བར་མ་རྣམས་སོ། །ཉི་མ་གསུམ་པ་ལ་ནི་བར་མ་དག་སྦྱིན་པར་གནས་

བརྟན་རྣམས་སོ། །ངན་པ་དག་སྦྱིན་པར་བར་མ་རྣམས་སོ། །བསོད་པ་དག་སྦྱིན་པར་གཞོན་རབས་རྣམས་ཏེ། དེ་ལྟར་ཚུལ་དེ་ལྟ་བུས་དགེ་སློང་རྣམས་ཟས་ལ་སྐོ་བར་བྱེད་དོ། །ཡང་དགེ་སློང་གློ་བུར་བ་གང་ཡིན་པ་དེ་དག་ཉི་མ་དང་པོ་ལ་ནི་བསོད་
པ་སྦྱིན་པ་དག་ཏུའོ། །ཉི་མ་གཉིས་པ་ལ་ནི་འབྲིང་སྦྱིན་པ་དག་ཏུའོ། །ཉི་མ་གསུམ་པ་ལ་ནི་ངན་པ་སྦྱིན་པ་དག་ཏུ་སྐོ་བར་བྱེད་ཅིང་། ཉི་མ་བཞི་པ་ལ་ནི་ལམ་སྲང་གི་སྤྱོད་ཡུལ་ལ་མཁས་པར་བྱེད་དོ། །དེས་རིམ་པར་བཀླགས་པ་དེ་བཞིན་དུ་དགེ་འདུན་རྣམས་ཟས་ལ་
བཀོད་པ་ན་རྒན་རིམས་ཇི་ལྟ་བ་བཞིན་དང་རིམ་པར་བཀླགས་པ་ཇི་ལྟ་བ་བཞིན་དུ་ཐོད་རྒལ་མེད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་རྣམས་གནས་མལ་འབོགས་པ་རྣམས་
དང་། ཟས་ལ་བསྐོས་པ་རྣམས་ཀྱི་ནང་ན་གྱད་བུ་ནོར་འདི་མཆོག་ཡིན་ནོ། །དེའི་ཚེ་དགེ་སློང་མཛའ་བོ་དང་། ས་ལས་སྐྱེས་གཉིས་ལྗོངས་རྒྱུ་ཞིང་འགྲོ་བ་ན་རིམ་གྱིས་རྒྱལ་པོའི་ཁབ་ཏུ་ཕྱིན་པ་དང་། ཚེ་དང་ལྡན་པ་གྱད་བུ་ནོར་གྱིས་དེ་གཉིས་ཀྱི་གནས་མལ་དང་
གནས་ཁང་ཡང་བསྐོས་སོ། །དེ་ནས་ནམ་ནངས་པ་དང་མཛའ་བོ་དང་། ས་ལས་སྐྱེས་ཀྱིས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཟས་ལས་བསྐོ་བ་སུ་ཡོད། དགེ་སློང་ཞིག་གིས་དེ་གཉིས་ལ་སྨྲས་པ། གྱད་བུ་ནོར་ཡིན་ནོ། །དེ་གཉིས་ཀྱིས་ཚེ་དང་
ལྡན་པ་གྱད་བུ་ནོར་ལ་འདི་སྐད་ཅེས་སྨྲས་སོ། །གྱད་བུ་ནོར་བདག་ཅག་གི་ཟས་སྐོས་ཤིག །དེ་ནས་ཚེ་དང་ལྡན་པ་གྱད་བུ་ནོར་གྱིས་དེ་གཉིས་ཉི་མ་དང་པོ་ལ་ཟས་བསོད་པ་སྦྱིན་པ་དག་ཏུ་བསྐོས་སོ། །དེ་ནས་མཛའ་བོ་དང་། ས་ལས་སྐྱེས་སྔ་དྲོ་ཆོས་
གོས་བགོས། ལྷུང་བཟེད་ཐོགས་ནས་སྦྱིན་བདག་གི་ཁྱིམ་གང་ན་བར་དོང་ངོ་། །ཁྱིམ་བདག་དེ་ཡང་བུ་གཅིག་པ་སྡུག་པ། ཡིད་དུ་འོང་བ་ཤི་བས་དེ་བུ་ཤི་བའི་མྱ་ངན་གྱིས་གདུངས་པའི་ཕྱིར་དགེ་སློང་གི་ཟས་བཤམ་པ་མ་བྱས་སོ། །དེ་གཉིས་ཀྱིས་ཀྱང་

མ་བརྟགས་པར་འོངས་པ་ཁྱིམ་བདག་གིས་མཐོང་ངོ་། །མཐོང་ནས་ཀྱང་ཁྱིམ་གྱི་མི་རྣམས་ལ་སྨྲས་པ། དགེ་སློང་དག་གི་ཕྱིར་ཟས་བཤམས་པ་ཅུང་ཟད་ཡོད་དམ། དེ་དག་གིས་སྨྲས་པ། མ་མཆིས་སོ། །དེས་འདི་སྙམ་དུ་རེ་ཞིག་བུ་ཤི་བ་འདི་ཡང་ཕུང་
བྱས་པ་གཅིག་ཡིན་ན། གཉིས་པ་གོ་ཅིའི་ཕྱིར་བྱ་སྙམ་དུ་བསམས་སོ། །དེ་ལྟར་བསམས་ནས་ཀྱང་དེས་ཁ་ཟས་ངན་པ་ཞིག་ཕུལ་ལོ། །དེ་གཉིས་ཀྱིས་ཀྱང་ཟོས་སོ། །ཟོས་ནས་ཀྱང་དེ་གཉིས་ཀྱིས་འདི་སྙམ་དུ་བདག་ཅག་གིས་ཐོས་པ་ཡང་གཞན་ལ། མྱོང་བ་ཡང་
གཞན་དུ་གྱུར་ཏེ་ཟས་ངན་པ་དག་ཟོས་པར་གྱུར་མོད་ཀྱི། འོན་ཀྱང་སང་ནི་ཟས་བསོད་པ་དག་བཟའ་བར་བྱའོ་སྙམ་དུ་བསམས་སོ། །དེ་གཉིས་ཉི་མ་གཉིས་པ་ལ་སྦྱིན་བདག་འབྲིང་དག་སྦྱིན་པར་བསྐོས་ཏེ་དེར་དོང་བ་ལས་ཞེས་བྱ་བ་ནས། དེར་ཡང་ཉེས་པ་དེ་བཞིན་དུ་གྱུར་
ཏོ་ཞེས་བྱ་བའི་བར་དུའོ། །ཉི་མ་གསུམ་པ་ལ་སྦྱིན་བདག་ངན་པ་དག་སྦྱིན་པ་དེར་བསྐོས་སོ། །དགྲ་བཅོམ་པ་རྣམས་ནི་མ་དགོངས་པར་ཡེ་ཤེས་གཟིགས་པ་མི་འཇུག་པ་ཡིན་ལ། དེ་གཉིས་ཀྱིས་ཀྱང་ཁ་ཟས་ངན་པ་དག་ཟོས་པས་དེ་དག་ལུས་ཤིན་ཏུ་རྗུད་པར་གྱུར་ཏོ། །
དེ་ནས་དགེ་སློང་མཛའ་བོ་དང་། ས་ལས་སྐྱེས་གཉིས་ཀྱིས་འདི་སྙམ་དུ་ཀྱེ་མའོ་སྡུག་བསྔལ་ལོ། །ཀྱེ་མའོ་མི་བཟད་དེ། ཚེ་དང་ལྡན་པ་གྱད་བུ་ནོར་གྱིས་བསམས་བཞིན་དུ་བདག་ཅག་གཉིས་ལན་གསུམ་གྱི་བར་དུ་ཁ་ཟས་ངན་པ་ཟར་བཅུག་པས་ཐོ་བཙམས་ཏེ་ལུས་ཤིན་ཏུ་
རྗུད་པར་གྱུར་གྱིས། བརྐུ་ཐབས་འགའ་ཞིག་བྱའོ་སྙམ་དུ་བསམས་སོ། །དེའི་ཚེ་དགེ་སློང་མཛའ་བོ་དང་། ས་ལས་སྐྱེས་གཉིས་ཀྱི་སྲིང་མོ་དགེ་སློང་མ་མཛའ་མོ་ཞེས་བྱ་བ་རྒྱལ་པོའི་ཁབ་ན་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བ་ན་འདུག་གོ། །དེ་
ནས་དགེ་སློང་མ་མཛའ་མོས་དགེ་སློང་མཛའ་བོ་དང་། ས་ལས་སྐྱེས་གཉིས་ག་ལ་བ་དེར་སོང་སྟེ་ཕྱིན་ནས། དགེ་སློང་མཛའ་བོ་དང་། ས་ལས་སྐྱེས་གཉིས་ཀྱི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དགེ་སློང་མ་མཛའ་མོ་ཕྱོགས་གཅིག་ཏུ་འདུག་

པ་ན་དགེ་སློང་མཛའ་བོ་དང་། ས་ལས་སྐྱེས་གཉིས་གཏམ་འདྲེ་བར་མི་བྱེད། ཕེབས་པར་སྨྲ་བར་མི་བྱེད། ལྟ་བར་མི་བྱེད། རྣམ་པར་ལྟ་བར་མི་བྱེད་དོ། །དེ་ནས་དགེ་སློང་མ་མཛའ་མོས་དགེ་སློང་མཛའ་བོ་དང་། ས་ལས་སྐྱེས་གཉིས་ལ་འདི་
སྐད་ཅེས་སྨྲས་སོ། །འཕགས་པ་དག་ཅིའི་སླད་དུ་བདག་ལ་གཏམ་འདྲེ་བར་མི་མཛད། ཕེབས་པར་སྨྲ་བར་མི་མཛད། ལྟ་བར་མི་མཛད། རྣམ་པར་ལྟ་བར་མི་མཛད་སྲིང་མོ་ཁོ་བོ་ཅག་གཉིས་ཚེ་དང་ལྡན་པ་གྱད་བུ་ནོར་གྱིས་ལན་གསུམ་གྱི་བར་དུ་ཁ་ཟས་ངན་པས་ཐོ་
བཙམས་ཏེ། ལུས་ཤིན་ཏུ་རྗུད་པར་གྱུར་ན། དེ་ཁྱོད་ཀྱིས་ཡལ་བར་དོར་རམ། འཕགས་པ་དག་འོ་ན་དེ་ལ་བདག་གིས་ཅི་ཞིག་བགྱི་སྲིང་མོ་ཁྱོད་ཚུར་ཤོག །བཅོམ་ལྡན་འདས་ག་ལ་བ་དེར་སོང་ནས་བཅོམ་ལྡན་འདས་ལ་འདི་སྐད་ཅེས་བཙུན་པ་འདི་ལྟར་འཕགས་
པ་གྱད་བུ་ནོར་བདག་དང་ལྷན་ཅིག་མི་ཚངས་པར་སྤྱད་དེ། ཕས་ཕམ་པ་བྱུང་བ་དེ་ནི་མི་མཛེས་ཤིང་ཚུལ་དང་མཐུན་པ་མ་ལགས་སོ་ཞེས་སྨྲོས་ཤིག་དང་། ཁོ་བོ་ཅག་གཉིས་ཀྱིས་ཀྱང་བཅོམ་ལྡན་འདས་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་
ཅག་གཉིས་ཀྱི་སྲིང་མོས་ཇི་སྐད་གསོལ་པ་དེ་ཁོ་ན་བཞིན་དུ་བདག་ཅག་གཉིས་ཀྱིས་ཀྱང་འཚལ་ཏོ་ཞེས་སྨྲ་བར་བྱའོ། །དེ་སྐད་ཅེས་སྨྲས་པ་དང་། དགེ་སློང་མ་མཛའ་མོས་དེ་གཉིས་ལ་འདི་སྐད་ཅེས་སྨྲས་སོ། །འཕགས་པ་དག་བདག་གིས་དགེ་སློང་དག་པ་ལྟུང་བ་མ་
མཆིས་པ་ལ་གཞི་མ་མཆིས་པར་ཕས་ཕམ་པར་འགྱུར་བའི་ཆོས་ཀྱིས་ཇི་ལྟར་སྐུར་པ་གདབ། སྲིང་མོ་ཁྱོད་ཅི་སྲིད་དུ་དེ་སྐད་མི་ཟེར་བ་དེ་སྲིད་ཀྱི་བར་དུ་ཁོ་བོ་ཅག་གཉིས་ཁྱོད་ལ་གཏམ་འདྲེ་བར་མི་བྱེད། ཕེབས་པར་སྨྲ་བར་མི་བྱེད། ལྟ་བར་མི་བྱེད། རྣམ་པར་ལྟ་བར་མི་
བྱེད་དོ། །དེ་ནས་དགེ་སློང་མ་མཛའ་མོ་ཡུད་ཙམ་ཞིག་ཅང་མི་སྨྲ་བར་འདུག་ནས། དགེ་སློང་མཛའ་བོ་དང་། ས་ལས་སྐྱེས་གཉིས་ལ་འདི་སྐད་ཅེས་སྨྲས་སོ། །འཕགས་པ་དེ་ལྟ་ན་བདག་གིས་བགྱི་བ་གང་ལགས་པ་དེ་བགྱིའོ། །སྲིང་མོ་ཁྱོད་དེའི་ཕྱིར་ཇི་སྲིད་དུ་ཁོ་བོ་

ཅག་གཉིས་བཅོམ་ལྡན་འདས་གང་ན་བ་དེར་མ་སོན་པ་དེ་སྲིད་དུ་སྡོད་ལ། དེའི་འོག་ཏུ་ཁྱོད་ཤོག་ཤིག །དེ་ནས་དགེ་སློང་མཛའ་བོ་དང་། ས་ལས་སྐྱེས་གཉིས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་
འཚལ་ཏེ་ཕྱོགས་གཅིག་ཏུ་འདུག་གོ། །དེ་ནས་དགེ་སློང་མ་མཛའ་མོས་དགེ་སློང་མཛའ་བོ་དང་། ས་ལས་སྐྱེས་གཉིས་དོང་ནས་རིང་པོ་མ་ལོན་པར་རིག་པ་དང་། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་
ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་དགེ་སློང་མ་མཛའ་མོས་འདི་སྐད་ཅེས་གསོལ་ཏོ། །བཙུན་པ་འདི་ལྟར་འཕགས་པ་གྱད་བུ་ནོར་བདག་དང་ལྷན་ཅིག་མི་ཚངས་པར་སྤྱད་དེ་ཕས་ཕམ་པ་བྱུང་བ་དེ་ནི་མི་མཛེས་ཤིང་ཚུལ་དང་
མཐུན་པ་མ་ལགས་སོ། །དགེ་སློང་མཛའ་བོ་དང་། ས་ལས་སྐྱེས་གཉིས་ཀྱིས་ཀྱང་འདི་སྐད་ཅེས་གསོལ་ཏོ། །བཙུན་པ་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱི་སྲིང་མོས་ཇི་སྐད་གསོལ་པ་དེ་ཁོ་ན་བཞིན་དུ་བདག་ཅག་གཉིས་
ཀྱིས་ཀྱང་འཚལ་ཏོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་གྱད་བུ་ནོར་ལ་བཀའ་སྩལ་པ། གྱད་བུ་ནོར་ཁྱོད་ཀྱིས་དེ་ཐོས་སམ། བཅོམ་ལྡན་འདས་བདག་གིས་ཐོས་ལགས་སོ། །
གྱད་བུ་ནོར་ཁྱོད་ཀྱི་དེ་ཇི་ལྟ་བུ་ཡིན། བདག་ཇི་ལྟ་བུ་ལགས་པ་དེ་བཅོམ་ལྡན་འདས་ཀྱིས་མཁྱེན་ཏོ། །བདག་གི་ཇི་ལྟ་བུ་ལགས་པ་དེ་བདེ་བར་གཤེགས་པས་མཁྱེན་ཏོ། །བཅོམ་ལྡན་འདས་ཀྱིས་བཀའ་སྩལ་པ། གྱད་བུ་ནོར་ཁྱོད་ཀྱི་དྲན་ན་དྲན་ནོ་ཞེས་སྨྲོས་ཤིག །
ཁྱོད་མི་དྲན་ན་མི་དྲན་ནོ་ཞེས་སྨྲོས་ཤིག །བཅོམ་ལྡན་འདས་མི་དྲན་ལགས་སོ། །བདེ་བར་གཤེགས་པ་མི་དྲན་ལགས་སོ། །དེའི་ཚེ་ཚེ་དང་ལྡན་པ་སྒྲ་ཅན་ཟིན་བཅོམ་ལྡན་འདས་ཀྱི་སྣམ་ལོགས་ན་རྔ་མའི་བསིལ་ཡབ་ཐོགས་ཏེ་བཅོམ་ལྡན་འདས་ལ་གཡོབ་

ཅིང་འདུག་གོ། །དེ་ནས་ཚེ་དང་ལྡན་པ་སྒྲ་ཅན་ཟིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འདི་ལྟར་དགེ་སློང་མ་མཛའ་མོ་བཅོམ་ལྡན་འདས་ག་ལ་བ་དེར་མཆིས་ཏེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་བཙུན་པ་འདི་
ལྟར་འཕགས་པ་གྱད་བུ་ནོར་བདག་དང་ལྷན་ཅིག་མི་ཚངས་པར་སྤྱད་དེ་ཕས་ཕམ་པ་བྱུང་བ་དེ་ནི་མི་མཛེས་ཤིང་ཚུལ་དང་མཐུན་པ་མ་ལགས་སོ་ཞེས་མཆི་ལ། དགེ་སློང་མཛའ་བོ་དང་། ས་ལས་སྐྱེས་གཉིས་ཀྱང་འདི་སྐད་ཅེས་བཅོམ་ལྡན་འདས་དེ་དེ་བཞིན་ནོ། །བདེ་བར་
གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱི་སྲིང་མོས་ཇི་སྐད་གསོལ་པ་དེ་ཁོ་ན་བཞིན་བདག་ཅག་གཉིས་ཀྱིས་ཀྱང་འཚལ་ཏོ་ཞེས་མཆི་ན། ཚེ་དང་ལྡན་པ་གྱད་བུ་ནོར་ལ་སྨྲ་ཅི་འཚལ། སྒྲ་ཅན་ཟིན་དེའི་ཕྱིར་ན་དེ་ཁྱོད་ཉིད་ལ་དྲིས། ཁྱོད་ཀྱིས་ཇི་ལྟར་
བཟོད་པ་དེ་ཁོ་ན་བཞིན་དུ་ལན་ཐོབ་ཤིག །གལ་ཏེ་དགེ་སློང་མ་མཛའ་མོ་ང་གང་ན་བ་དེར་འོངས་ཏེ་ཕྱིན་ནས་འདི་སྐད་ཅེས་བཙུན་པ་འདི་ལྟར་འཕགས་པ་སྒྲ་ཅན་ཟིན་བདག་དང་ལྷན་ཅིག་མི་ཚངས་པར་སྤྱད་དེ་ཕས་ཕམ་པ་བྱུང་བ་དེ་ནི་མི་མཛེས་ཤིང་ཚུལ་དང་མཐུན་པ་
མ་ལགས་སོ་ཞེས་ཟེར་ལ། དགེ་སློང་མཛའ་བོ་དང་། ས་ལས་སྐྱེས་གཉིས་ཀྱིས་ཀྱང་འདི་སྐད་ཅེས་བཅོམ་ལྡན་འདས་དེ་དེ་བཞིན་ནོ། །བདེ་བར་གཤེགས་པ་དེ་དེ་བཞིན་ཏེ། བདག་ཅག་གཉིས་ཀྱིས་ཀྱང་སྲིང་མོས་ཇི་སྐད་གསོལ་པ་དེ་ཁོ་ན་བཞིན་དུ་འཚལ་ཏོ་
ཞེས་ཟེར་ན། དེ་ལ་སྒྲ་ཅན་ཟིན་ཁྱོད་ཀྱིས་ཇི་སྐད་ལན་གདབ་པར་བྱ། བཙུན་པ་བདག་གིས་འདི་སྐད་ཅེས་དྲན་ན་ཡང་དྲན་ནོ་ཞེས་གསོལ་ལོ། །མི་དྲན་ན་ཡང་མི་དྲན་ནོ་ཞེས་གསོལ་ལོ། །རེ་ཞིག་སྐྱེས་བུ་བླུན་པོ་ཁྱོད་ཀྱིས་ཀྱང་དོན་དེ་སྨྲ་བར་གྱུར་ན། དགེ་སློང་
གྱད་བུ་ནོར་དག་པ་ལྟུང་བ་མེད་པས་ཅིའི་ཕྱིར་སྨྲ་བར་མི་བྱ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་གྱད་བུ་ནོར་ནི་དྲན་པ་དང་ལྡན་པར་ཟུང་ཤིག །དགེ་སློང་མ་མཛའ་མོ་ནི་རང་གིས་ཁས་བླངས་པས་

བསྙིལ་བར་གྱིས་ཤིག །དགེ་སློང་མཛའ་བོ་དང་། ས་ལས་སྐྱེས་གཉིས་ལ་ནི་ཅི་ཞིག་མཐོང་། ཇི་ལྟར་མཐོང་། གང་དུ་མཐོང་། གང་ན་མཐོང་། ཁྱེད་གཉིས་ཅིའི་ཕྱིར་དེར་སོན་ཅེས་ལེགས་པར་རབ་ཏུ་སྨྲ་ཞིང་བརྟག་པ་གྱིས་ཤིག་ཅེས་བཀའ་
སྩལ་ནས། བཅོམ་ལྡན་འདས་གདན་ལས་བཞེངས་ཏེ་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་གཤེགས་སོ། །དེ་ནས་དགེ་སློང་རབ་ཏུ་མང་པོ་དག་གིས་བཅོམ་ལྡན་འདས་ནང་དུ་ཡང་དག་འཇོག་ལ་ཞུགས་ནས་རིང་པོ་མ་ལོན་པར་རིག་ནས། ཚེ་དང་
ལྡན་པ་གྱད་བུ་ནོར་ནི་དྲན་པ་དང་ལྡན་པར་བཟུང་། དགེ་སློང་མ་མཛའ་མོ་ནི་རང་གིས་ཁས་བླངས་པས་བསྙིལ་དགེ་སློང་མཛའ་བོ་དང་། ས་ལས་སྐྱེས་གཉིས་ལ་ནི་ཅི་ཞིག་མཐོང་། ཇི་ལྟར་མཐོང་། གང་དུ་མཐོང་། གང་ན་མཐོང་། ཁྱེད་གཉིས་ཅིའི་
ཕྱིར་དེར་སོན་ཅེས་ལེགས་པར་རབ་ཏུ་སྨྲས་ཤིང་བརྟགས་སོ། །ལེགས་པར་རབ་ཏུ་སྨྲས་ཤིང་བརྟགས་པ་ན་དེ་གཉིས་ཀྱིས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཚེ་དང་ལྡན་པ་གྱད་བུ་ནོར་ལ་མི་ཚངས་པར་སྤྱོད་པའི་ཕས་ཕམ་པ་མ་བྱུང་མོད་ཀྱི། འོན་ཀྱང་
བདག་ཅག་ཚེ་དང་ལྡན་པ་གྱད་བུ་ནོར་གྱིས་ལན་གསུམ་གྱི་བར་དུ་ཁ་ཟས་ངན་པ་ཟར་བཅུག་པས་ཐོ་བཙམས་ཏེ། ལུས་ཤིན་ཏུ་རྗུད་པར་གྱུར་ཏེ་ཞེས་བྱ་བའི་བར་དང་། དེ་གཉིས་ཀྱིས་འདི་སྙམ་དུ་ཀྱེ་མའོ་སྡུག་བསྔལ་ལོ། །ཀྱེ་མའོ་མི་བཟད་དོ། །ཚེ་དང་ལྡན་པ་
གྱད་བུ་ནོར་གྱིས་བསམས་བཞིན་དུ་ཞེས་བྱ་བ་ནས་ལན་གསུམ་གྱི་བར་དུ་ཁ་ཟས་ངན་པ་ཟར་བཅུག་པས་ལུས་ཤིན་ཏུ་རྗུད་པར་གྱུར་པས་བརྐུ་ཐབས་འགའ་ཞིག་བྱའོ་ཞེས་བསམས་ཏེ། བདག་ཅག་གིས་ཚེ་དང་ལྡན་པ་གྱད་བུ་ནོར་ལ་འདུན་པས་སྨྲས་པ། ཞེ་སྡང་དང་།
གཏི་མུག་དང་། འཇིགས་པས་སྨྲས་པར་ཟད་ཀྱི། ཚེ་དང་ལྡན་པ་གྱད་བུ་ནོར་ལ་མི་ཚངས་པར་སྤྱད་པའི་ཕས་ཕམ་པར་མ་བྱུང་སྟེ། འདི་ལྟར་ཚེ་དང་ལྡན་པ་གྱད་བུ་ནོར་དག་པ་ལྟུང་བ་མེད་པ་ཡིན་ནོ་ཞེས་བྱ་བའི་བར་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་

རྣམས་ལ་བཀའ་སྩལ་པ། དགེ་སློང་དག་མི་གཏི་མུག་ཅན་དེ་དག་གཉིས་ཀྱིས་འདི་ལྟར་ཟང་ཟིང་ཅུང་ཟད་ཙམ་གྱི་རྒྱུས་ཤེས་བཞིན་དུ་བརྫུན་གྱི་ཚིག་སྨྲས་པར་གྱུར་ཏོ། །དེ་ཡང་བཅོམ་ལྡན་འདས་ཀྱིས་བྱུང་བ་དེ་ཉིད་ལས་ཚིགས་སུ་བཅད་པ་
གཉིས་བཀའ་སྩལ་པ། ལུས་ཅན་བརྫུན་དུ་སྨྲ་བ་ཡི། །ཆོས་གཅིག་ལས་ནི་འདས་གྱུར་ཅིང་། །འཇིག་རྟེན་ཕ་རོལ་བཤིག་པ་ཡིས། །འདི་ན་སྡིག་པ་མི་བྱ་མེད། །ལྕགས་སྒོང་མེ་ལྕེ་འདྲ་བ་དག །ཟོས་པར་གྱུར་པ་ཆེས་བླ་ཡི། །ཚུལ་འཆལ་
ཡང་དག་སྡོམ་མེད་པས། །ཡུལ་འཁོར་བསོད་སྙོམས་ཟ་བ་མིན། །དེ་ནས་ནམ་མཁའི་དཀྱིལ་ན་གནས་པའི་ལྷ་རྣམས་ཀྱིས་ཀྱེ་མའོ། །ཨ་ལ་ལ་རྙེད་པ་དང་བཀུར་སྟི་འདི་ནི་མི་བཟད་པའོ། །མཆོག་ཏུ་མི་བཟད་པའོ་ཞེས་བྱ་བ་ནས། ཟང་ཟིང་ཅུང་ཟད་
ཙམ་གྱི་རྒྱུས་དགེ་སློང་ལ་སྐུར་པ་འདེབས་པར་བྱེད་པ་ནི་ངན་པའོ་ངན་པའོ་ཞེས་སྨྲས་སོ། །དེ་ནས་དགེ་སློང་ཞིག་གིས་དེའི་ཚེ་ཚིགས་སུ་བཅད་པ་སྨྲས་པ། ཉེས་མེད་སྲིད་གསུམ་འགྲོ་བ་ཡི། །ནོར་ལའང་སྐུར་པ་བཏབ་པའི་ཕྱིར། །འཇིག་རྟེན་དག་ན་བློ་ལྡན་
གང་། །འཁོར་བ་ལ་ནི་དགའ་བར་བྱེད། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གང་ཟག་གསུམ་པོ་འདི་དག་ནི་འདི་དག་མ་སྤངས་ན་ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་དག་ཡིན་ནོ། །
གསུམ་གང་ཞེ་ན། དགེ་སློང་དག་འདི་ལ་གཅིག་ནི་འདོད་པ་རྣམས་ལ་སྟེན་ཅིང་སྡིག་པ་མི་དགེ་བ་དག་བྱེད་པ་སྟེ། དགེ་སློང་དག་དེ་མ་སྤངས་ན་གང་ཟག་འདི་ནི་ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་དང་པོ་ཡིན་ནོ། །གཞན་ཡང་དགེ་སློང་
དག་འདི་ལ་གང་ཟག་གཅིག་ནི་འདོད་པ་རྣམས་ནི་གཙང་བའོ། །འདོད་པ་རྣམས་ནི་བསོད་པའོ། །འདོད་པ་རྣམས་ནི་ལོངས་སྤྱད་པར་བྱ་བའོ། །འདོད་པ་རྣམས་ལ་ཉེས་པ་མེད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་བ་སྟེ། དགེ་སློང་དག་དེ་མ་སྤངས་ན་གང་ཟག་འདི་ནི་

ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་གཉིས་པ་ཡིན་ནོ། །གཞན་ཡང་དགེ་སློང་དག་འདི་ལ་གང་ཟག་གཅིག་ནི་བདག་ཉིད་མི་ཚངས་པར་སྤྱོད་པ་བྱེད་ལ། གཞན་དག་ལ་ཡང་གཞི་མེད་པར་མི་ཚངས་པར་སྤྱོད་པའི་ཆོས་ཀྱིས་སྐུར་པ་འདེབས་པར་བྱེད་
པ་སྟེ། དགེ་སློང་དག་དེ་མ་སྤངས་ན་གང་ཟག་འདི་ནི་ངན་སོང་དུ་འགྲོ་བ། སེམས་ཅན་དམྱལ་བར་འགྲོ་བ་གསུམ་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་
འདི་སྐད་བཀའ་སྩལ་ཏོ། །སྐྱེས་བུ་སྐྱེས་པའི་ཁ་ནས་ནི། །ངག་གིས་ཚིག་ངན་རྗོད་བྱེད་པའི། །སྟ་རེ་འབྱུང་ཞིང་དེ་ཡིས་ནི། །བདག་ཉིད་གཅོད་པར་བྱེད་པར་འགྱུར། །གང་ཞིག་སྨད་བྱ་སྟོད་བྱེད་ཅིང་། །བསྟོད་བྱ་རྣམས་ལ་སྨོད་བྱེད་པ། །དེ་ཡི་ཁ་
ནས་ཕུང་ཁྲོལ་སྐྱེད། །ཕུང་ཁྲོལ་ཅན་གྱིས་བདེ་མི་མྱོང་། །གང་འདིར་ཆོ་ལོས་རང་ནོར་ཟད་བྱེད་པ། །དེ་ནི་ཕུང་ཁྲོལ་ཅུང་ཟད་ཙམ་དུ་ཟད། །གང་ཞིག་བདེ་བར་གཤེགས་ལ་ཡིད་རབ་འཁྲུག །དེ་འདིར་ཕུང་ཁྲོལ་ཤིན་ཏུ་ཆེན་པོ་ཡིན། །གང་ཡིད་འཕགས་
པས་སྨད་པའི་སྡིག་གནས་ན། །བྱེ་བ་བརྒྱ་ཕྲག་སྟོང་ཕྲག་དུང་ཕྱུར་ཕྲག །སུམ་བཅུ་དྲུག་དང་ལྔ་པོ་ཇི་སྙེད་པར། །སེམས་དམྱལ་ཆུ་བུར་ཆུ་བུར་རྡོལ་བར་འགྲོ། །གང་གི་ཚེ་དགེ་འདུན་གྱིས་དགེ་སློང་མ་མཛའ་མོ་ནི་རང་གིས་ཁས་བླངས་པས་བསྙིལ།
མཛའ་བོ་དང་ས་ལས་སྐྱེས་ལ་ནི་ལེགས་པར་རབ་ཏུ་དྲིས་པ་དེའི་ཚེ། དགེ་སློང་མ་རང་བཞིན་དུ་གནས་པ་རྣམས་ཚེ་དང་ལྡན་པ་གྱད་བུ་ནོར་གྱི་བསྔགས་པ་ནི་སྨྲ་བར་བྱེད། དགེ་སློང་མ་མཛའ་མོ་ལ་ནི་བསྔགས་པ་མ་ཡིན་པ་རྗོད་པར་བྱེད་དོ། །དེ་ནས་དགེ་སློང་
མ་མཛའ་མོའི་ཕུ་ནུ་མོ་དགེ་སློང་མ་མཛའ་ཅན་མ་ཞེས་བྱ་བ་དགེ་སློང་མ་མཛའ་མོའི་བསྔགས་པ་མ་ཡིན་པ་བརྗོད་པ་དེའི་ཚེ་དགེ་སློང་མ་རྣམས་ལ་ཁྲོས་འཁྲུགས་རྔམ་པས་དགེ་སློང་མ་རྣམས་ལ་ཡང་གཞི་མེད་པར་ཕས་ཕམ་པར་འགྱུར་བའི་ཆོས་ཀྱིས་སྐུར་པ་འདེབས་ཤིང་

དགེ་སློང་མ་རྣམས་སྤ་འགོང་བར་བྱེད་དོ། །སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང་། དགེ་སློང་རྣམས་ཀྱིས་ཀྱང་། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་།
དངོས་པོ་འདི་དང་། སྐབས་འདི་ལ་ཞེས་བྱ་བ་ནས་བསླབ་པ་བཅས་པའི་བར་དུ་རྒྱས་པར་བརྗོད་པར་བྱའོ། །ཡང་དགེ་སློང་མ་གང་ཞིག་ཁྲོས་ཤིང་ཞེ་སྡང་མ་སྤངས་པས་ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་དགེ་སློང་མ་དག་པ་ལྟུང་བ་མེད་པ་ལ་
གཞི་མེད་པར་ཕས་ཕམ་པར་འགྱུར་བའི་ཆོས་ཀྱིས་སྐུར་པ་ལས་དེ་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་རྩོད་པ་དེ་ཡང་གཞི་མེད་པ་ཡིན་ལ། དགེ་སློང་མ་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན་ཡང་ཆོས་འདི་དང་པོ་ཉིད་ཀྱི་ལྟུང་བར་འགྱུར་ལ། ངེས་
པར་འབྱུང་བ་དང་བཅས་པ་དགེ་འདུན་ལྷག་མའོ། །ཡང་དགེ་སློང་མ་གང་ཞེས་བྱ་བ་ནི་མཛའ་མོའོ། །ཁྲོས་ཤིང་ཞེས་བྱ་བ་ནི་འཁྲུགས་པ་དང་། རྔམ་པ་དང་། ངན་པ་དང་། ཡི་མ་རངས་པའོ། །ཞེ་སྡང་མ་སྤངས་པས་ཞེས་བྱ་བ་ནི་འཁྲུགས་པ་མ་
བསལ་བར་རོ། །ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་ཞེས་བྱ་བ་ནི་ཅི་ནས་ཀྱང་འདི་དགེ་སྦྱོང་གི་ཚུལ་དང་དབྲལ་ལོ་སྙམ་ནས་སོ། །དགེ་སློང་མ་དག་པ་ལྟུང་བ་མེད་པ་ལ་ཞེས་བྱ་བ་ནི་གཞི་དེའི་ལྟུང་བ་མེད་པའོ། །གཞི་མེད་པར་ཞེས་བྱ་བ་ནི་གཞི་གསུམ་
པོ་མཐོང་བའི་གཞི་དང་། ཐོས་པའི་གཞི་དང་། དོགས་པའི་གཞི་མེད་པར་རོ། །ཕས་ཕམ་པར་གྱུར་པ་ཞེས་བྱ་བ་ནི་བརྒྱད་པོ་གང་ཡང་རུང་བས་སོ། །ཆོས་ཀྱིས་ཞེས་བྱ་བ་ནི་ཆོས་མ་ཡིན་པ་ལ་ཆོས་ཀྱི་སྒྲར་གསུངས་པ་ཡིན་ནོ། །སྐུར་པ་ལས་ཞེས་བྱ་
བ་ནི་སྐུར་པ་བཏབ་པ་ལས་སོ། །དེ་དུས་གཞན་ཞིག་ན་ཞེས་བྱ་བ་ནི་དུས་གཞན་ནའོ། །དྲིས་ཀྱང་རུང་ཞེས་བྱ་བ་ནི་གཞན་དག་གིས་སོ། །མ་དྲིས་ཀྱང་རུང་ཞེས་བྱ་བ་ནི་དེ་རང་ཉིད་འགྱོད་པ་དང་། ཅུང་ཟད་འགྱོད་པ་དང་། རྣམ་པར་འགྱོད་པ་དང་། ཡིད་ལ་གཅགས་པ་

སྐྱེས་ནས་སོ། །རྩོད་པ་དེ་ཡང་ཞེས་བྱ་བ་ནི་རྩོད་པ་བཞི་པོ་འགྱོད་པའི་ཕྱིར་རྩོད་པ་དང་། མི་གདམས་པའི་ཕྱིར་རྩོད་པ་དང་། ལྟུང་བའི་ཕྱིར་རྩོད་པ་དང་། བྱ་བའི་ཕྱིར་རྩོད་པའོ། །གཞི་མེད་པ་ཡིན་ལ་ཞེས་བྱ་བ་ནི་གཞི་གསུམ་པོ་དག་མེད་པ་ཡིན་པ་ལའོ། །དགེ་
སློང་མ་ཞེ་སྡང་ལ་གནས་པས་ཞེས་བྱ་བ་ནི་དགེ་སྦྱོང་གི་ཚུལ་དང་དབྲལ་བར་འདོད་པས་སོ། །ཞེ་སྡང་གིས་སྨྲས་སོ་ཞེས་བྱ་བ་ནི་ལྷག་པར་ཡང་དགེ་སྦྱོང་གི་ཚུལ་དང་དབྲལ་བར་འདོད་པས་སོ། །ཆོས་འདི་ཞེས་བྱ་བ་འདི་ནི་ཆོས་མ་ཡིན་པ་ལ་ཆོས་ཀྱི་སྒྲར་བསྟན་པའོ། །དང་
པོ་ཉིད་ཀྱིས་ལྟུང་བར་འགྱུར་ལ་ཞེས་བྱ་བ་ནི་མོད་ལ་ལྟུང་བར་འགྱུར་བའོ། །ངེས་པར་འབྱུང་བ་དང་བཅས་པ་ཞེས་བྱ་བ་ནི་རྟོན་པ་དང་བཅས་པའོ། །དགེ་འདུན་ལྷག་མ་ཞེས་བྱ་བ་ནི་ལྟུང་བ་དེ་གཉི་གའི་དགེ་འདུན་ལ་རག་ལས་པ་དང་། གཉི་གའི་དགེ་འདུན་དང་འབྲེལ་བ་དང་།
གཉི་གའི་དགེ་འདུན་ལ་རྟོན་པ་ཡིན་ཏེ། ལྟུང་བ་དེ་གཉི་གའི་དགེ་འདུན་ལས་ལྡང་བར་འགྱུར་གྱི་གང་ཟག་ལས་ནི་མ་ཡིན་པའོ། །ཡང་ན་ཕས་ཕམ་པར་གྱུར་པ་བརྒྱད་པོ་ནི་ལྷག་མ་མེད་པ་ཡིན་ལ། ལྟུང་བ་འདི་ནི་ལྷག་མ་དང་བཅས་པ་ཡིན་པ་དེའི་ཕྱིར་ལྷག་མ་
དང་བཅས་པ་ཞེས་བྱའོ། །དེ་ལ་ཇི་ལྟར་ལྟུང་བར་འགྱུར་ཞེ་ན། གང་ཟག་དག་པ་ལ་སྐུར་པ་འདེབས་པ་ལ་གཞི་བཅུས་ནི་ལྟུང་བར་འགྱུར་ལ། གཞི་ལྔས་ནི་ལྟུང་བར་མི་འགྱུར་རོ། །ཇི་ལྟར་གཞི་བཅུས་ལྟུང་བར་འགྱུར་ཞེ་ན། དེས་མ་མཐོང་བ་དང་། མ་
ཐོས་པ་དང་། མི་དོགས་པར་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་ངོ་། །བདག་གིས་ཐོས་སོ། །བདག་དོགས་སོ་ཞེས་ཟེར་ན་བརྗོད་དོ་ཅོག་དགེ་འདུན་
ལྷག་མར་འགྱུར་རོ། །དེ་ཐོས་ལ་དེ་ཡང་བརྗེད་པ་དང་། དེ་དོགས་ལ་དེ་ཡང་བརྗེད་བཞིན་དུ་དེས་འདུ་ཤེས་བསྒྱུར་ཅིང་བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་ལྟ་བ་བསྒྱུར་ཏེ། འདི་སྐད་ཅེས་བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་

དེ་ཡང་མ་བརྗེད་དོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །ཐོས་པ་ལ་ཡིད་ཆེས་ནས་བདག་གིས་མཐོང་ངོ་ཞེས་ཟེར་བ་དང་། ཐོས་པ་ལ་ཡིད་མ་ཆེས་པར་བདག་གིས་མཐོང་ངོ་ཞེས་ཟེར་བ་དང་། ཐོས་པ་ལ་དོགས་པ་ན་བདག་གིས་མཐོང་
ངོ་ཞེས་ཟེར་བ་དང་། ཐོས་པ་ལ་མི་དོགས་པ་ན་བདག་གིས་མཐོང་ངོ་ཞེས་ཟེར་བ་དང་། དོགས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་བ་ན་བརྗོད་དོ་ཅོག་དགེ་འདུན་ལྷག་མར་འགྱུར་ཏེ། དེ་ལྟར་གཞི་བཅུས་ལྟུང་བར་འགྱུར་རོ། །ཇི་ལྟར་གཞི་ལྔས་ལྟུང་བར་
མི་འགྱུར་ཞེ་ན། དེས་མ་མཐོང་བ་དང་། མ་ཐོས་པ་དང་། མི་དོགས་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་མ་བསྒྱུར་བར་འདི་སྐད་ཅེས་བདག་གིས་མཐོང་ངོ་། །ཐོས་སོ། །དོགས་སོ། །ཞེས་
ཟེར་ན་ལྟུང་བར་མི་འགྱུར་རོ། །དེས་ཐོས་ལ་དེ་ཡང་བརྗེད་པ་དང་། དེ་དོགས་ལ་དེ་ཡང་བརྗེད་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་མ་བསྒྱུར་བར་འདི་སྐད་ཅེས་བདག་གིས་ཐོས་ཏེ་དེ་ཡང་མ་བརྗེད་དོ། །
བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་ལྟུང་བར་མི་འགྱུར་རོ། །དེ་ལྟར་གཞི་ལྔས་ལྟུང་བར་མི་འགྱུར་རོ། །ཇི་ལྟར་གང་ཟག་དག་པ་ལ་སྐུར་པ་འདེབས་པ་ལ་གཞི་བཅུས་ལྟུང་བར་འགྱུར་ལ། གཞི་ལྔས་ལྟུང་བར་མི་འགྱུར་བ་དེ་བཞིན་དུ་གང་ཟག་དག་པ་མ་དག་པ་
ལྟར་བཅོས་པ་ལ་སྐུར་པ་འདེབས་པ་ལ་ཡང་གཞི་བཅུས་ལྟུང་བར་འགྱུར་ལ། གཞི་ལྔས་ལྟུང་བར་མི་འགྱུར་རོ། །གང་ཟག་མ་དག་པ་ལ་སྐུར་པ་འདེབས་པ་ལ་ནི་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་རོ། །ཇི་ལྟར་གཞི་བཅུ་
གཅིག་གིས་ལྟུང་བར་འགྱུར་ཞེ་ན། དེས་མ་མཐོང་བ་དང་། མ་ཐོས་པ་དང་། མི་དོགས་པ་ལ་དེས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་ངོ་། །བདག་གིས་

ཐོས་སོ། །བདག་དོགས་སོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །དེས་མཐོང་བ་དེ་ལ་ཡང་བརྗེད་པ་དང་། དེས་ཐོས་ལ་དེ་ཡང་བརྗེད་པ་དང་། དེས་དོགས་ལ་དེ་ཡང་བརྗེད་པ་ལ་དེས་འདུ་ཤེས་བསྒྱུར་ཅིང་བཟོད་པ་དང་། འདོད་པ་དང་། བློ་གྲོས་དང་།
རྟོག་པ་དང་། ལྟ་བ་བསྒྱུར་ཏེ་འདི་སྐད་ཅེས་བདག་གིས་མཐོང་སྟེ་དེ་ཡང་མ་བརྗེད་དོ། །བདག་གིས་ཐོས་ཏེ་དེ་ཡང་མ་བརྗེད་དོ། །བདག་དོགས་ཏེ་དེ་ཡང་མ་བརྗེད་དོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་རོ། །ཐོས་པ་ལ་ཡིད་ཆེས་ནས་བདག་གིས་མཐོང་
ངོ་ཞེས་ཟེར་བ་དང་། ཐོས་པ་ལ་ཡིད་མ་ཆེས་པར་བདག་གིས་མཐོང་ངོ་ཞེས་ཟེར་བ་དང་། ཐོས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་བ་དང་། ཐོས་པ་ལ་མི་དོགས་པ་ན་བདག་གིས་མཐོང་ངོ་ཞེས་ཟེར་བ་དང་། དོགས་པ་ལ་དོགས་པ་ན་བདག་གིས་
མཐོང་ངོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མར་འགྱུར་ཏེ། དེ་ལྟར་གཞི་བཅུ་གཅིག་གིས་ལྟུང་བར་འགྱུར་རོ། །ཇི་ལྟར་གཞི་དྲུག་གིས་ལྟུང་བ་མེད་པར་འགྱུར་ཞེ་ན། དེས་མ་མཐོང་བ་དང་། མ་ཐོས་པ་དང་། མི་དོགས་པ་ལ་དེས་འདུ་ཤེས་མ་བསྒྱུར་ཅིང་བཟོད་
པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་མ་བསྒྱུར་བར་འདི་སྐད་ཅེས་བདག་གིས་མཐོང་ངོ་། །ཐོས་སོ། །དོགས་སོ་ཞེས་ཟེར་ན་ལྟུང་བར་མི་འགྱུར་རོ། །དེས་མཐོང་ལ་དེ་ཡང་མ་བརྗེད་པ་དང་། དེས་ཐོས་ལ་དེ་ཡང་མ་བརྗེད་པ་དང་།
དེ་དོགས་ལ་དེ་ཡང་མ་བརྗེད་པ་ལ་དེས་འདུ་ཤེས་མ་བསྒྱུར་ཅིང་བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་མ་བསྒྱུར་བར་འདི་སྐད་ཅེས་བདག་གིས་མཐོང་སྟེ་དེ་ཡང་མ་བརྗེད་དོ། །བདག་གིས་ཐོས་ཏེ་དེ་ཡང་མ་བརྗེད་དོ། །བདག་
དོགས་ཏེ་དེ་ཡང་མ་བརྗེད་དོ་ཞེས་ཟེར་ན་ལྟུང་བར་མི་འགྱུར་ཏེ། དེ་ལྟར་གཞི་དྲུག་གིས་ལྟུང་བར་མི་འགྱུར་རོ། །ཇི་ལྟར་གང་ཟག་མ་དག་པ་ལ་སྐུར་པ་འདེབས་པ་ལ་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་བ་དེ་བཞིན་དུ་

གང་ཟག་མ་དག་པ་དག་པ་ལྟར་བཅོས་པ་ལ་སྐུར་པ་འདེབས་པ་ལ་ཡང་གཞི་བཅུ་གཅིག་གིས་ལྟུང་བར་འགྱུར་ལ། གཞི་དྲུག་གིས་ལྟུང་བར་མི་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་
ལྡན་འདས་ལ་ཞུས་པ། ལས་ཅི་ཞིག་བགྱི་ན་ཞེས་བྱ་བའི་བར་ནས་སྔོན་གྱི་རབས་རྣམས་རྒྱ་ཆེར་བརྗོད་པར་བྱའོ། །ལས་ཅི་ཞིག་བགྱིས་ནས་གནས་མལ་འབོགས་པ་དང་། ཟས་ལ་སྐོ་བ་གང་ལགས་པར་གྱུར་ཅིང་དགྲ་བཅོམ་པ་ཉིད་ཐོབ་ཀྱང་སྐུར་པ་བཏབ་པར་
གྱུར་ཅེས་ཇི་ལྟར་དགེ་སློང་གི་རྣམ་པར་འབྱེད་པ་བཞིན་དུ་རྒྱ་ཆེར་བརྗོད་པར་བྱའོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་གཉིས་པ་རྫོགས་སྷོ།། །།སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་
ལན་ད་ཀ་གནས་པ་ན་བཞུགས་སོ། །གང་གི་ཚེ་ཨུཏྤ་ལའི་མདོག་དགེ་བའི་བཤེས་གཉེན་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བརྟེན་ནས་སྨད་པའི་ལས་རྣམས་སྤངས་ནས་དགྲ་བཅོམ་པ་ཉིད་ཐོབ་པར་གྱུར་པ་དེའི་ཚེ་དེ་ཉིན་གཅིག་བཞིན་དུ་དུས་གསུམ་དུ་
བཅོམ་ལྡན་འདས་ལ་བལྟ་བའི་ཕྱིར་འགྲོའོ། །དགེ་སློང་ཡིད་ཆེས་པ་རྣམས་ནི་དེ་ཚེ་དང་ལྡན་པ་གྱད་བུ་ནོར་ལ་བདག་ཉིད་ཆེན་པོ་འདི་ནི་རང་གི་ཏིང་ངེ་འཛིན་དང་། རྣམ་པར་ཐར་པ་དང་། སྙོམས་པར་འཇུག་པ་དག་སྤངས་ཏེ་དགེ་སློང་རྣམས་ལ་ཆོས་དང་ལྡན་པའི་
ཞལ་ཏའི་ལས་ལ་བརྩོན་པར་བྱེད་པ་ལ་ལྟོས་ཞེས་ལྷག་པར་ཡང་དད་པ་སྐྱེས་པར་འགྱུར་རོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་དང་ཧ་ཅང་ཡང་མི་རིང་བ་ན་རྫིང་བུ་རྡོ་རྩིགས་ཅན་ཞེས་བྱ་བའི་འགྲམ་ན་ཉིན་མོ་གནས་པར་བྱེད་དོ། །དེ་
ནས་དགེ་སློང་མ་ཨུཏྤ་ལའི་མདོག་ཚེ་དང་ལྡན་པ་གྱད་བུ་ནོར་ག་ལ་བ་དེར་སོང་སྟེ། ཕྱིན་ནས་ཚེ་དང་ལྡན་པ་གྱད་བུ་ནོར་གྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་གྱི་ཆོས་གོས་སྣམ་སྦྱར་ཚོན་དམར་

པོར་གསར་དུ་བཙོས་ཤིང་དགེ་སློང་མ་ཨུཏྤ་ལའི་མདོག་ཀྱང་སྐྲ་བྲེགས་ནས་རིང་པོ་མ་ལོན་པར་གྱུར་ཏོ། །དེ་ནས་ཆོས་གོས་སྣམ་སྦྱར་རླུང་གིས་ཁྱེར་ནས་དེའི་མགོ་ལ་འཁྲིས་སོ། །དེའི་ཚེ་ན་རི་དགས་ཞིག་ཀྱང་རི་དགས་མོ་དང་རུང་བའི་ཆོས་མ་ཡིན་པ་བྱེད་དོ། །དེ་ན་
མཛའ་བོ་དང་ས་ལས་སྐྱེས་ཀྱང་རྫིང་བུ་རྡོ་རྩིགས་ཅན་ན་ཕྱག་དར་ཁྲོད་པ་འཁྲུ་བར་བྱེད་དོ། །མཛའ་བོ་དང་། ས་ལས་སྐྱེས་ཀྱིས་དགེ་སློང་མ་ཨུཏྤ་ལའི་མདོག་ཚེ་དང་ལྡན་པ་གྱད་བུ་ནོར་གྱི་རྐང་པ་གཉིས་ལ་ཕྱག་འཚལ་བ་ན། ཆོས་གོས་ཀྱི་མཐའ་མ་རླུང་གིས་ཁྱེར་བས་
མགོ་ལ་འཁྲིས་པ་དང་། རི་དགས་ཞིག་ཀྱང་རི་དགས་མོ་དང་རུང་བའི་ཆོས་མ་ཡིན་པ་བྱེད་པ་ཡང་མཐོང་ངོ་། །མཐོང་ནས་ཀྱང་མཛའ་བོས་ས་ལས་སྐྱེས་ལ་སྨྲས་པ། ས་ལས་སྐྱེས་ཨུཏྤ་ལའི་མདོག་དང་གྱད་བུ་ནོར་ལ་ལྟོས། དེའི་ཚེ་ནི་བདག་ཅག་གིས་ཆ་མེད་པ་ལས་བརྒལ་
གྱི། ད་ནི་བདག་ཅག་གིས་ཆ་རྙེད་དོ་ཞེས་སྨྲས་ནས། དེ་གཉིས་ཀྱིས་ཆ་དེས་ཚེ་དང་ལྡན་པ་གྱད་བུ་ནོར་ལ་བརྒལ་ཏོ། །དགེ་སློང་རྣམས་ཀྱིས་ཀྱང་འདི་སྐད་ཅེས་སྨྲས་སོ། །ཁྱེད་ཅག་གཅིག་ཏུ་ལྷ་དང་མི་རྣམས་ཡོངས་སུ་བཏང་ནས་གཅིག་ཁོ་ནར་སེམས་ཅན་དམྱལ་བར་
གནས་པར་བྱེད་དམ་ཅི། དེ་གཉིས་ཀྱིས་སྨྲས་པ། བདག་ཅག་གིས་ནི་མ་ཉེས་ན་བདག་ཅག་གི་མིག་གིས་ཉེས་གྲང་ཞེས་བྱ་བ་ནས་བཅོམ་ལྡན་འདས་ཀྱིས་དེ་གཉིས་ལ་ཅི་ཞིག་མཐོང་ངོ་། །ཇི་ལྟར་མཐོང་། གང་དུ་མཐོང་། གང་ན་མཐོང་། ཁྱེད་གཉིས་ཅིའི་ཕྱིར་དེར་
སོན་ཅེས་ལེགས་པར་རབ་ཏུ་སྨྲས་ཤིང་བརྟག་པར་གྱིས་ཤིག་ཅེས་བཀའ་སྩལ་ཏོ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་རྣམས་ཀྱིས་ཀྱང་དེ་གཉིས་ལ་ལེགས་པར་རབ་ཏུ་སྨྲས་སོ། །དེ་གཉིས་ལ་ལེགས་པར་རབ་ཏུ་སྨྲས་ཤིང་བརྟགས་པ་ན་དེ་གཉིས་ཀྱིས་འདི་སྐད་
ཅེས། བདག་ཅག་གིས་རི་དགས་ཤིག་དང་། རི་དགས་མོ་ཞིག་ཀྱང་མཐོང་། བདག་ཅག་གིས་གྱད་བུ་ནོར་དང་། ཨུཏྤ་ལའི་མདོག་ཀྱང་མཐོང་ནས་ཆ་འདིས་བརྒལ་ཏོ་ཞེས་སྨྲས་སོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས་གང་གི་ཚེ་

བཅོམ་ལྡན་འདས་ཀྱིས་དགེ་སློང་རྣམས་ལ་བསླབ་པའི་གཞི་བཅའ་བར་མཛད་པ་དེའི་ཚེ་དགེ་སློང་མ་རྣམས་ཀྱིས་ཆ་དེས་ཨུཏྤ་ལའི་མདོག་ལ་བརྒལ་ཏོ། །སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་
འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅས་པའི་བར་དུའོ། །ཡང་དགེ་སློང་མ་གང་ཁྲོས་ཤིང་ཞེ་སྡང་མ་སྤངས་པས་ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས་དགེ་སློང་མ་དག་པ་ལྟུང་བ་མེད་པ་ལ་
རྩོད་པ་གཞན་གྱི་ཆ་མ་ཡིན་པའི་ཆ་ཅུང་ཟད་ཙམ་གྱི་ཆོས་འགའ་ཞིག་བླངས་ནས་དགེ་སློང་མ་ཕས་ཕམ་པ་མ་བྱུང་བ་ལ་ཕས་ཕམ་པའི་ཆོས་ཀྱིས་སྐུར་པ་ལས་དེ་ཡང་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་རྩོད་པ་དེ་ཉིད་ཀྱང་གཞན་གྱི་ཆ་མ་ཡིན་ཞིང་། རྩོད་པ་དེ་
ཡང་གཞན་གྱི་ཆ་མ་ཡིན་པའི་ཆ་ཅུང་ཟད་ཙམ་གྱི་ཆོས་འགའ་ཞིག་བླངས་པར་གྱུར་ལ་དགེ་སློང་མ་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན། ཡང་ཆོས་འདི་དང་པོ་ཉིད་ཀྱིས་ལྟུང་བར་འགྱུར་ལ། ངེས་པར་འབྱུང་བ་དང་བཅས་པ་སྟེ་དགེ་འདུན་ལྷག་མར་འགྱུར་རོ། །
ཡང་དགེ་སློང་མ་གང་ཞེས་བྱ་བ་ནི་མཛའ་མོའོ། །ཁྲོས་ཤིང་ཞེས་བྱ་བའི་བར་ནི་སྔ་མ་བཞིན་ནོ། །རྩོད་པ་ཞེས་བྱ་བ་ནི་རྩོད་པ་བཞི་པོ་རྣམས་ཏེ་སྔ་མ་བཞིན་ནོ། །གཞན་གྱི་ཆ་མ་ཡིན་པ་ཞེས་བྱ་བ་ལ། གཞན་ཞེས་བྱ་བ་ནི་མྱ་ངན་ལས་འདས་པའོ། །དེའི་ཆ་མ་ཡིན་
པ་ནི་ཕས་ཕམ་པར་འགྱུར་བའི་ཆོས་བརྒྱད་པོ་དག་གོ། །ཆ་ཅུང་ཟད་ཙམ་ཞེས་བྱ་བ་ནི་རི་དགས་དང་། རི་དགས་མོ་དག་ལྟ་བུའོ། །ཆོས་ཞེས་བྱ་བ་ནི་ཆོས་མ་ཡིན་པ་ལ་ཆོས་ཀྱི་སྒྲར་གསུངས་པའོ། །བླངས་ནས་ཞེས་བྱ་བ་ནི་བཟུང་ནས་སོ། །དགེ་སློང་མ་ཕས་ཕམ་པ་
མ་བྱུང་བ་ལ་ཞེས་བྱ་བ་ནི་ཨུཏྤ་ལའི་མདོག་གོ། །ཕས་ཕམ་པའི་ཆོས་ཞེས་བྱ་བ་ནི་ཕས་ཕམ་པ་བརྒྱད་པོ་གང་ཡང་རུང་བས་སོ། །སྐུར་པ་ལས་ཞེས་བྱ་བ་ནི་སྐུར་པ་བཏབ་པ་ལས་སོ་ཞེས་བྱ་བ་ནས་གཞི་མེད་པའི་བསླབ་པའི་གཞི་ཇི་ལྟ་བ་བཞིན་དུ་ཐམས་ཅད་སྔ་མ་བཞིན་དུ་

བརྗོད་པར་བྱའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་
པ་དང་། ལྟ་བ་བསྒྱུར་ཏེ་འདི་སྐད་ཅེས་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་
བ་ཐོབ་པར་གྱུར་ནས། དེས་འདུ་ཤེས་བསྒྱུར་ཅེས་བྱ་བའི་བར་ནས་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་
མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཕས་ཕམ་པར་
འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་
སློང་མས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་
འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་

ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་ཕས་ཕམ་པར་འགྱུར་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་
པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་
དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས།
བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས། དེས་འདུ་
ཤེས་བསྒྱུར་ཅིང་བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་དགེ་འདུན་ལྷག་མའི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་
བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་
དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ཕས་ཕམ་པའི་ལྟ་བ་ཐོབ་པར་

གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་
མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་
དེ་དེ་ལ་ལྟུང་བྱེད་ཀྱི་ལྟ་བ་ཉིད་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ལྟུང་བྱེད་ཀྱི་ལྟུང་བ་
འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་
དགེ་སློང་མ་ལྟུང་བྱེད་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་
སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་
ལྷག་མར་འགྱུར་རོ། །དགེ་སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ཕས་ཕམ་པའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་

པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས་བདག་
གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་
ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བ་ཉིད་ཀྱི་
ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་སོ་སོར་བཤགས་པར་བྱ་བའི་ལྟུང་བ་འབྱིན་པ་མཐོང་ཞིང་དེ་
དེ་ལ་ཉེས་བྱས་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཉེས་བྱས་ཀྱི་ལྟུང་བ་འབྱིན་པ་མཐོང་
ཞིང་དེ་དེ་ལ་ལྟུང་བ་མེད་པའི་ལྟ་བ་ཐོབ་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཉེས་བྱས་ཀྱི་ལྟུང་བ་འབྱིན་
པ་མཐོང་ཞིང་དེ་དེ་ལ་ཕས་ཕམ་པར་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་ཉེས་བྱས་ཀྱི་

ལྟུང་བ་འབྱིན་པ་མཐོང་ཞིང་དེ་དེ་ལ་དགེ་འདུན་ལྷག་མའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་
ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ལྟུང་བྱེད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་མ་
ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་འགྱུར་རོ། །དགེ་
སློང་མས་དགེ་སློང་མ་ཉེས་བྱས་ཀྱི་ལྟུང་བ་འབྱིན་པ་མཐོང་ཞིང་དེ་དེ་ལ་ཉེས་བྱས་ཀྱི་ལྟུང་བ་ཉིད་ཀྱི་ལྟ་བ་ཐོབ་པར་གྱུར་ནས་དེས་འདུ་ཤེས་བསྒྱུར་ཅིང་ཞེས་བྱ་བ་ནས། བདག་གིས་དགེ་སློང་མ་ཕས་ཕམ་པར་འགྱུར་བའི་ལྟུང་བ་འབྱིན་པ་མཐོང་ངོ་ཞེས་ཟེར་ན་དགེ་འདུན་ལྷག་མར་
འགྱུར་རོ། །དགེ་སློང་མའི་རྣམ་པར་འབྱེད་པ་ལས་དགེ་འདུན་ལྷག་མ་གསུམ་པ་རྫོགས་སྷོ།། །།སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བ