Kinh tạng Tây Tạng (Kangyur Đại Học) — 007_འདུལ་བ།_ཇ

་ལ་བདུད་འབྱུང་པོ་དུང་ཕྱུར་ཕྲག་གསུམ་དང་། བྱེ་བ་ཕྲག་དྲུག་གི་འཁོར་དང་ལྡན་པ་བྱམས་པའི་སྟོབས་ཀྱིས་མངོན་པར་བཏུལ་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཇི་ལྟར་མངོན་པར་རྫོགས་པར་སངས་རྒྱས་པའི་བར་དག་མངོན་པར་འབྱུང་བའི་མདོ་ལས་རྒྱ་
ཆེར་ཇི་སྐད་གསུངས་པ་བཞིན་ཐམས་ཅད་རྒྱས་པར་བསྟན་ཏོ། །དེ་ནས་གར་མཁན་དེས་གར་ཐབས་སྦྱར་ནས་ཡང་བསམས་པ། བདག་གིས་འདིས་སྐྱེ་བོ་ཕལ་པོ་ཆེའི་ཚོགས་དད་པ་དང་ལྡན་པ་རྣམས་ནི་དད་པ་སྤེལ་བར་ནུས་ན་གང་གིས་མ་དད་པ་དག་ཀྱང་དད་པ་སྐྱེ་བར་འགྱུར་བའི་ཐབས་ཅི་ཡོད་སྙམ་
ནས། དེ་དགེ་སློང་དྲུག་སྡེ་དག་ལ་སྙིང་ན་བས་གླན་ཀ་ཚོལ་ཞིང་དེ་དག་གི་ཕྱི་བཞིན་ཕྱི་བཞིན་རྗེས་སུ་འབྲང་ཞིང་སོང་བ་དང་། ཇི་ཙམ་ན་ཚེ་དང་ལྡན་པ་འདུན་པ་ཟས་ཟོས་ཟིན་ཞིང་སྤངས་པས་བཅའ་བ་དང་། བཟའ་བ་བསོད་པ་ཞིག་རྙེད་ཅིང་དེ་ཟ་བར་འདོད་ནས་དེས་ལག་པ་གཉིས་བསྙལ་ཏེ་བཅའ་

བ་དང་། བཟའ་བ་བསོད་པ་དེ་བྱིན་ལེན་བྱས་ནས་ཚེ་དང་ལྡན་པ་འཆར་ཀ་ཟན་ཟ་བ་ན་འདུན་པས་དེའི་མདུན་དུ་ཙོག་པུར་འདུག་སྟེ་སྨྲས་པ། བཙུན་པ་འཆར་ཀ་དགོངས་སུ་གསོལ། བདག་དགེ་སློང་འདུན་པ་ཞེས་བགྱི་བ་འཚལ་མ་འཚལ་ལགས་ཤིང་སྤངས་ཏེ་ཡོངས་སུ་རྫོགས་ཤིང་མཐར་ཐུག་
པར་བགྱིས་པ་ལས་བཅའ་བ་དང་། བཟའ་བ་རྙེད་ཅིང་འཚལ་བར་འཚལ་ན་ལྷག་པོར་བགྱི་སྟེ་བདག་ལ་སྩལ་དུ་གསོལ། འཆར་ཀས་དེ་ལས་ཁམ་གཉིས་སམ་གསུམ་ཟོས་ནས་ཁྱོད་ཀྱིར་གྱུར་གྱིས་བཞུད་ཅིག་ཅེས་སྨྲས་པ་གར་མཁན་དེས་མཐོང་ནས་དེས་བསམས་པ། བདག་གིས་འདིས་མ་
དད་པ་དག་ཀྱང་དད་པར་འགྱུར་བར་ནུས་སོ་སྙམ་ནས་དེ་ནས་ཕྱིར་སོང་ངོ་།། །།འདུལ་བ་རྣམ་པར་འབྱེད་པ། བམ་པོ་ལྔ་བཅུ་རྩ་དགུ་པ། དེ་ནས་གར་མཁན་དེས་རྒྱལ་པོའི་ཁབ་ཏུ་ཀླུའི་རྒྱལ་པོ་རི་བོ་དང་། ཡིད་འོང་གཉིས་ཀྱི་དུས་སྟོན་བརྩམས་པ་དེའི་ཉིན་མོ་བླ་རེ་བྲེས་ཏེ་རྫ་རྔ་ཆེན་པོ་
བརྡུངས་པ་དང་། སྐྱེ་བོ་ཕལ་པོ་ཆེའི་ཚོགས་དེར་ལྷགས་ཏེ་འདུག་ཅིང་མཐུན་པར་གྱུར་པའི་ཚེ་དེས་གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པས་གཟིགས་པ་ལྔ་པོ་རིགས་དང་། རུས་དང་། ཡུལ་དང་། དུས་དང་། བུད་མེད་ལ་གཟིགས་པ་དག་གིས་
འཇིག་རྟེན་ལ་གཟིགས་ནས་འདོད་པ་ན་སྤྱོད་པའི་ལྷ་དྲུག་པོ་དག་ལན་གསུམ་ཡོངས་སུ་སྦྱང་བ་བྱེད་དུ་བཅུག་སྟེ། གླང་པོ་ཆེར་སྣང་བ་བསྒྱུར་ནས་ཤེས་བཞིན་དུ་ཡུམ་གྱི་ལྷུམས་སུ་ཞུགས་པ་དེའི་ཚེ་ན་ས་ཆེན་པོ་ཤིན་ཏུ་གཡོས་པར་གྱུར་ཅིང་འཇིག་རྟེན་གྱི་འཇིག་རྟེན་གྱི་བར་གང་ན་ཉི་མ་དང་ཟླ་བ་འདི་ལྟར་
རྫུ་འཕྲུལ་ཆེ་བ། འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་ནག་མུན་པར་བྱེད་པས་གནག་པར་གྱུར་པ་གང་དག་ཡིན་པ་དེ་དག་ཀྱང་དེའི་ཚེ་ན་སྣང་བ་རྒྱ་ཆེན་པོས་ཁྱབ་པར་གྱུར་ནས། སེམས་ཅན་གང་དག་དེར་སྐྱེས་པ་དག་གིས་རང་གི་ལག་པ་བརྐྱང་བ་ཡང་མི་མཐོང་
བ་དེ་དག་གིས་ཀྱང་འོད་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ཞེས་ཤེས་པར་གྱུར་པ་ནས། གང་གི་ཚེ་བཅོམ་ལྡན་འདས་ཀྱིས་མཚན་མོའི་གུང་ཐུན་ལ་བདུད་འབྱུང་པོ་དུང་

ཕྱུར་ཕྲག་གསུམ་དང་། བྱེ་བ་ཕྲག་དྲུག་གི་འཁོར་དང་ལྡན་པ་བྱམས་པའི་སྟོབས་ཀྱིས་མངོན་པར་བཏུལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཇི་ལྟར་མངོན་པར་རྫོགས་པར་སངས་རྒྱས་པའི་བར་དག་མངོན་པར་འགྱུར་བའི་མདོ་ལས་རྒྱ་ཆེར་ཇི་སྐད་གསུངས་པ་དང་འདྲ་བར་དེ་
ལྟར་བཅོས་པ་ཐམས་ཅད་གར་ཐབས་སུ་རྒྱ་ཆེར་སྦྱར་ཏེ་གར་བྱེད་པ་དང་། སྐྱེ་བོ་ཕལ་པོ་ཆེའི་ཚོགས་དད་པ་དང་ལྡན་པ་དག་དད་པ་མངོན་པར་འཕེལ་བར་གྱུར་ནས་ཨེ་མའོ་གར་བྱས་སོ། །ཨེ་མའོ་གར་བྱས་སོ་ཞེས་ཟེར་ཞིང་གར་མཁན་དེས་ཀྱང་རྙེད་པ་མང་པོ་གྲུབ་པར་གྱུར་ཏོ། །དེ་ནས་གར་མཁན་དེས་
ཡང་བསམས་པ། བདག་གིས་སྐྱེ་བོ་ཕལ་པོ་ཆེའི་ཚོགས་དད་པ་དང་ལྡན་པ་དག་ནི་དད་པ་མངོན་པར་འཕེལ་བར་བྱས་ཟིན་གྱིས། ད་ནི་མ་དད་པ་དག་ཀྱང་དད་པར་འགྱུར་བར་བྱའོ་སྙམ་ནས་དེའི་འོག་ཏུ་གར་མཁན་གཅིག་གིས་འཆར་ཀའི་ཆ་ལུགས་སུ་བྱས་ཤིང་གར་མཁན་ཅིག་ཤོས་ཀྱིས་འདུན་
པའི་ཆ་ལུགས་སུ་བྱས་ཏེ་དེས་ཁམ་ཕོར་ཐལ་བས་བཀང་ནས། སྟེང་དུ་བུ་རམ་གྱི་དུམ་བུ་གཉིས་སམ་གསུམ་བཞག་སྟེ་འཆར་ཀའི་ཆ་ལུགས་ཅན་ཟན་ཟ་བའི་མདུན་དུ་ཙོག་པུར་འདུག་སྟེ་སྨྲས་པ། བཙུན་པ་འཆར་ཀ་དགོངས་སུ་གསོལ། བདག་དགེ་སློང་འདུན་པ་ཞེས་བགྱི་བ་འཚལ་མ་
འཚལ་ཞིང་སྤངས་ཏེ་ཡོངས་སུ་རྫོགས་ཤིང་མཐར་ཐུག་པར་བགྱི་བ་ལས་བཅའ་བ་དང་། བཟའ་བ་རྙེད་ཅིང་འཚལ་བར་འཚལ་ན་ལྷག་པོར་བགྱིས་ཏེ་བདག་ལ་སྩལ་དུ་གསོལ། འཆར་ཀའི་ཆ་ལུགས་ཅན་དེས་དེ་ནས་བུ་རམ་གྱི་དུམ་བུ་གཉིས་སམ་གསུམ་པོ་དག་བླངས་ཏེ་ཟོས་ནས་ཁམ་ཕོར་
གྱི་ཐལ་བ་འདུན་པའི་ཆ་ལུགས་ཅན་གྱིས་མགོའི་སྟེང་དུ་གཏོར་ཏེ་ཁྱོད་ཀྱིར་གྱུར་གྱིས་བཞུད་ཅིག་ཅེས་སྨྲས་པ་དང་། སྐྱེ་བོ་ཕལ་པོ་ཆེའི་ཚོགས་ཐམས་ཅད་ཀྱིས་ཧ་ཧ་ཞེས་གད་མོའི་སྒྲ་ཆེན་པོ་ཕྱུང་སྟེ། མ་དད་པ་དག་ཀྱང་དད་པ་མངོན་པར་འཕེལ་བར་གྱུར་ནས་ཨེ་མའོ་སྨྱོན་ཐབས་བྱས་སོ། །
ཨེ་མའོ་སྨྱོན་ཐབས་བྱས་སོ་ཞེས་ཟེར་ཞིང་གར་མཁན་དེས་ཀྱང་རྙེད་པ་མང་པོ་གྲུབ་པར་གྱུར་ཏོ། །དེ་ན་སྐྱེ་བོ་ཕལ་པོ་ཆེའི་ཚོགས་དད་པ་དང་ལྡན་པ་དག་ནི། ཤེས་ལྡན་དག་ལྟོས་ཤིག །གར་མཁན་འདིས་གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་

པས་གཟིགས་པ་ལྔ་པོ་རིགས་དང་། རུས་དང་། ཡུལ་དང་། དུས་དང་། བུད་མེད་ལ་གཟིགས་པ་དག་གིས་འཇིག་རྟེན་ལ་གཟིགས་ནས་འདོད་པ་ན་སྤྱོད་པའི་ལྷ་དྲུག་པོ་དག་ལན་གསུམ་ཡོངས་སུ་སྦྱང་བ་བྱེད་དུ་བཅུག་སྟེ། གླང་པོ་ཆེར་སྣང་བ་བསྒྱུར་ནས་ཤེས་བཞིན་དུ་ཡུམ་གྱི་ལྷུམས་
སུ་ཞུགས་པ་དེའི་ཚེ་ན་ས་ཆེན་པོ་ཤིན་ཏུ་གཡོས་པར་གྱུར་ཅིང་འཇིག་རྟེན་གྱི་འཇིག་རྟེན་གྱི་བར་གང་ན་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་ནག་མུན་པར་བྱེད་པས་གནག་པར་གྱུར་པ་གང་དག་ཡིན་པ་དེ་དག་ཀྱང་དེའི་ཚེ་ན་སྣང་བ་རྒྱ་ཆེན་
པོས་ཁྱབ་པར་གྱུར་ནས་སེམས་ཅན་གང་དག་དེར་སྐྱེས་པ་དག་གིས་རང་གི་ལག་པ་བརྐྱང་བ་ཡང་མི་མཐོང་བ་དེ་དག་གིས་ཀྱང་འོད་དེས་སེམས་ཅན་གཅིག་གིས་གཅིག་མཐོང་ནས། ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་
ཞེས་ཤེས་པར་གྱུར་པ་ནས། གང་གི་ཚེ་བཅོམ་ལྡན་འདས་ཀྱིས་མཚན་མོའི་གུང་ཐུན་ལ་བདུད་འབྱུང་པོ་དུང་ཕྱུར་ཕྲག་གསུམ་དང་། བྱེ་བ་ཕྲག་དྲུག་གི་འཁོར་དང་ལྡན་པ་བྱམས་པའི་སྟོབས་ཀྱིས་མངོན་པར་བཏུལ་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཇི་ལྟར་མངོན་པར་
རྫོགས་པར་སངས་རྒྱས་པའི་བར་དག་མངོན་པར་འབྱུང་བའི་མདོ་ལས་རྒྱ་ཆེར་ཇི་སྐད་གསུངས་པ་དང་འདྲ་བར་དེ་ལྟར་བཅོས་པ་ཐམས་ཅད་གར་ཐབས་སུ་རྒྱ་ཆེར་སྦྱར་ཏེ་གར་བྱས་སོ་ཞེས་ཟེར་ཞིང་དད་པ་མངོན་པར་འཕེལ་བར་གྱུར་ཏོ། །སྐྱེ་བོ་ཕལ་པོ་ཆེའི་ཚོགས་མ་དད་པ་དག་ཀྱང་ཤེས་ལྡན་དག་ལྟོས་
ཤིག །གར་མཁན་འདིས་དགེ་སྦྱོང་ཧྲལ་པོ་དྲུག་སྡེ་དག་མི་བྱེད་དགུ་བྱེད་པ་དེ་ལྟར་བཅོས་པ་ཐམས་ཅད་སྨྱོན་ཐབས་སུ་རྒྱ་ཆེར་སྦྱར་ཏེ་བཞད་གད་བྱེད་དོ་ཞེས་དད་པ་མངོན་པར་འཕེལ་བར་གྱུར་ཏོ། །ཇི་ཙམ་ན་མཐར་གྱིས་དྲུག་སྡེ་དག་གིས་གར་མཁན་དེས་བདག་ཅག་ལྟར་བཅོས་ཞེས་གྲག་གོ་ཞེས་
ཐོས་ནས་དེ་དག་གིས་སྨྲས་པ། བདག་ཅག་གིས་གར་མཁན་དེ་མི་དགའ་བར་བྱས། སྲིང་མོ་དག་གི་གན་དུ་གྲོས་བྱེད་དུ་འདོང་ངོ་ཞེས་དེ་དག་དགེ་སློང་མ་བཅུ་གཉིས་སྡེ་དག་གི་གན་དུ་དོང་ནས་སྨྲས་པ། སྲིང་མོ་དག་བདག་ཅག་གིས་བཅོམ་ལྡན་འདས་བྱང་ཆུབ་སེམས་དཔའི་སྤྱོད་པ་ལ་འཇུག་པ་

ན་སྒྲ་མི་སྙན་ཞེས་བྱ་བའི་གར་ཐབས་བྱས་པ་གང་ཡིན་པ་དེ་ལས་ཅུང་ཟད་ཅི་དྲན་པ་བགྲོའོ་ཞེས་དེ་རྣམས་དེ་དག་དང་ལྷན་ཅིག་སྐྱེད་མོས་ཚལ་དུ་དོང་སྟེ་བགྲོ་བར་བརྩམས་པ་དང་། ཇི་ཙམ་ན་ཅུང་ཟད་ཀྱང་མ་བརྗེད་ནས་དེ་དག་གིས་རྒྱལ་པོའི་ཕོ་བྲང་ནས་རྒྱན་དང་ཆ་ལུགས་བླངས་ཏེ་གར་
མཁན་དེ་དང་ཧ་ཅང་ཐག་མི་རིང་བར་བླ་རེ་བྲེས་ནས། ཉེ་དགའ་མགོ་རས་ཀྱིས་དཀྲིས་ཏེ་རྫ་རྔ་ཆེན་པོ་བརྡུངས་པ་དང་། གར་ལ་ལྟ་བ་དང་དེའི་ནང་ནས་སྐྱེ་བོ་ཕལ་པོ་ཆེའི་ཚོགས་ཕྱིར་བྱུང་སྟེ་དེར་ལྷགས་སོ། །གར་མཁན་དེ་ཡང་དེར་སོང་བ་དང་། ཇི་ཙམ་ན་ལྷའི་གར་ཐབས་ལྟ་བུ་མཐོང་ནས་
དེས་བསམས་པ། འདི་དག་ལྷ་དག་གར་བྱེད་པ་ཡིན་ནམ། འོན་ཏེ་ཀླུ་དག་གམ། འོན་ཏེ་གནོད་སྦྱིན་དག་གམ། དྲི་ཟ་དག་གམ། མི་འམ་ཅི་དག་གམ། ལྟོ་འཕྱེ་ཆེན་པོ་དག་གར་བྱེད་པ་ཡིན་སྙམ་དུ་རིག་ནས་ཡ་མཚན་སྐྱེས་པར་གྱུར་ཏོ། །དྲུག་སྡེ་དག་གིས་ཀྱང་གར་བྱས་ནས་ཆ་བྱད་
བརྟུལ་ཏེ་དོང་བ་དང་། གར་མཁན་དེས་བསམས་པ། འདི་དག་སུ་ཞིག་ཡིན་སྙམ་ནས་དེ་དག་གི་ཕྱི་བཞིན་འབྲང་ཞིང་སོང་བ་དང་། ཇི་ཙམ་ན་དེ་དག་འོད་མའི་ཚལ་དུ་ཞུགས་ནས་གར་མཁན་དེས་སྒོར་བསྡད་པ་དང་། ཇི་ཙམ་ན་འཆར་ཀ་རྣ་བ་བབ་པ་བླས་བསྐུས་བཞིན་དུ་སྒོར་བྱུང་ནས་གར་
མཁན་དེས་དེ་ལ་སྨྲས་པ། འཕགས་པ་གར་དེ་ཁྱོད་ཀྱིས་བགྱིས་སམ། འཆར་ཀས་སྨྲས་པ། ཁོ་བོ་ཅག་གིས་ཁྱོད་དེ་ལྟར་མི་དགའ་བར་བྱའོ། །བཀྲེན་པ་ཁྱོད་ཁོ་བོ་ཅག་ཁོ་ནའི་སྒྱུ་རྩལ་གྱིས་ཉེ་བར་འཚོ་ལ། ཁོ་བོ་ཅག་ཉིད་ལྟར་འཆོས་པས་ཁྱོད་གང་དང་གང་དུ་གར་བྱེད་པ་དེ་དང་
དེར་ཁོ་བོ་ཅག་དོང་ལ་ཁྱོད་ལ་ཐོ་བཙམ་པར་བྱ་སྟེ། ཁོ་བོ་ཅག་གིས་རྫ་རྔ་ཆེན་པོ་དང་ཆ་སྤྱད་གཞན་ཡང་ཅི་ཡང་བཀུར་མི་དགོས་པར་འོང་ངོ་། །གར་མཁན་དེས་སྨྲས་པ། འཕགས་པ་དེ་ནི་བདག་ཅག་གིས་འཚོ་བ་ལགས་ཀྱིས་བཟོད་པ་མཛོད་ཅིག །འཆར་ཀས་སྨྲས་པ། གལ་ཏེ་ཁྱོད་ཀྱི་
རྙེད་པ་ཅི་རྙེད་པ་དེ་དག་ཐམས་ཅད་ཁོ་བོ་ཅག་ལ་བྱིན་ན་བཟོད་པར་བྱའོ། །དེས་བསམས་པ། འདི་དག་ཡང་དང་ཡང་དུ་ཐོ་འཚམ་པར་འགྱུར་གྱིས་སྦྱིན་ནོ་སྙམ་ནས། དེས་རྙེད་པ་ཐམས་ཅད་དེ་དག་ལ་བྱིན་ནས་སེམས་ཁོང་དུ་ཆུད་ཅིང་འདུག་གོ། །ཇི་ཙམ་ན་དེའི་ཆུང་པོ་གྲོགས་འོངས་ནས་དེས་

དེ་ལ་དྲིས་པ། གྲོགས་པོ་ཁྱོད་ཅིའི་ཕྱིར་སེམས་ཁོང་དུ་ཆུད་ཅིང་འདུག །དེས་སྨྲས་པ། ཁོ་བོ་ཆད་པས་བཅད་དོ། །སུས། ཤཱཀྱའི་བུའི་དགེ་སྦྱོང་དག་གིས་སོ། །ཅིའི་ཕྱིར། དེས་སྐབས་དེ་རྒྱས་པར་བརྗོད་པ་དང་། དེ་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་
ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་གར་མཁན་དག་ལ་ཡང་ཆད་པས་གཅོད་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་མི་མཛེས་པ་དེ་ལྟ་བུ་བྱེད་ཅེས་སྨོད་པར་བྱེད། ཕྱར་ཀ་གཏོང་བར་
བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཉེས་དམིགས་གང་ཅུང་ཟད་བྱུང་བ་དེ་ནི་དགེ་སློང་དག་ཁྱིམ་པའི་གོས་གྱོན་པ་ལས་གྱུར་པས་དེའི་ཕྱིར་དགེ་སློང་གིས་ཁྱིམ་པའི་གོས་བགོ་བར་མི་
བྱའོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་
སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཀྱིས་མི་མཛེས་པ་དེ་ལྟ་བུ་དེ་བྱས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ།
རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་
གཟིགས་པས་འདུལ་བ་ལ་ངའི་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གོས་སར་པ་ཞིག་རྙེད་ན་ཁ་བསྒྱུར་བ་གསུམ་པོ་སྔོན་པོའམ། དམར་

པོའམ། ངུར་སྨྲིག་ལས་གང་ཡང་རུང་བར་ཁ་བསྒྱུར་བར་བྱའོ། །གལ་ཏེ་དགེ་སློང་གིས་གོས་སར་པ་ཁ་བསྒྱུར་བ་གསུམ་པོ་སྔོན་པོའམ། དམར་པོའམ། ངུར་སྨྲིག་ལས་གང་ཡང་རུང་བར་ཁ་མ་བསྒྱུར་བར་སྤྱོད་ན་ལྟུང་བྱེད་དོ། །དེ་ལ་དགེ་སློང་གིས་ཞེས་བྱ་བ་ནི་དྲུག་སྡེས་སོ། །
གོས་ཞེས་བྱ་བ་ནི་བདུན་པོ་བལ་གོས་དང་། ཤ་ནའི་གོས་དང་། ཟར་མའི་གོས་དང་། དུ་གུ་ལའི་གོས་དང་། ཀོ་ཏམ་པའི་གོས་དང་། རས་བལ་གྱི་གོས་དང་། ཉི་འོག་གི་གོས་ལས་གང་ཡང་རུང་བའོ། །སར་པ་ཞིག་ཅེས་བྱ་བ་ནི་སར་པ་གཉིས་ཏེ། གསར་པས་སར་པ་དང་།
རྙེད་པས་གསར་པ་སྟེ། དོན་འདིར་ནི་གསར་པས་སར་པ་ཡིན་པར་དགོངས་སོ། །རྙེད་ན་ཞེས་བྱ་བ་ནི་གཞན་ལས་སོ། །ཁ་བསྒྱུར་བ་གསུམ་པོ་སྔོན་པོའམ། དམར་པོའམ། ངུར་སྨྲིག་ལས་གང་ཡང་རུང་བ་ཞེས་བྱ་བ་ལ། སྔོན་པོ་ཞེས་བྱ་བ་ནི་རམས་སོ། །དམར་པོ་ཞེས་བྱ་བ་ནི་
བཙག་གོ། །ངུར་སྨྲིག་ཅེས་བྱ་བ་ནི་ཤིང་ཤུན་ནོ། །ཁ་བསྒྱུར་བར་བྱའོ་ཞེས་བྱ་བ་ནི་ཁ་དོག་ངན་པར་བྱ་བའོ། །གལ་ཏེ་དགེ་སློང་གིས་གོས་སར་པ་ཁ་བསྒྱུར་བ་གསུམ་པོ་སྔོན་པོའམ། དམར་པོའམ། ངུར་སྨྲིག་ལས་གང་ཡང་རུང་བར་ཁ་མ་བསྒྱུར་བར་སྤྱོད་ན་ཞེས་བྱ་བ་ནི་གྱོན་ནའོ། །ལྟུང་
བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་
པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་གོས་སར་པ་ཞིག་རྙེད་ན་ཐ་ན་ལྷུང་བཟེད་ཀྱི་ཁ་གཡོགས་ཀྱང་རུང་སྟེ། ཁ་བསྒྱུར་བ་གསུམ་པོ་སྔོན་པོའམ། དམར་པོའམ། ངུར་སྨྲིག་ལས་གང་ཡང་རུང་བར་ཁ་
བསྒྱུར་བར་བྱའོ། །གལ་ཏེ་དགེ་སློང་གིས་གོས་སར་པ་ཁ་བསྒྱུར་བ་གསུམ་པོ་སྔོན་པོའམ། དམར་པོའམ། ངུར་སྨྲིག་ལས་གང་ཡང་རུང་བར་ཁ་མ་བསྒྱུར་བར་སྤྱོད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་

ཉེན་པ་ལ་ལྟུང་བ་མེད་དོ། །ཁ་མ་བསྒྱུར་བའི་གོས་གྱོན་པའི་ལྟུང་བྱེད་དེ་ལྔ་བཅུ་རྩ་བརྒྱད་པ་རྫོགས་སོ།། །།བར་སྡོམ་ལ། བྱ་རྒོད་ཕུང་པོ་འཕོང་དང་ནི། །རོལ་མོ་ལིཙྪ་ཆེན་པོ་དང་། །སིལ་སྙན་རི་དགས་འཛིན་མ་ཡི། །སྡེ་ཚན་ཡང་དག་བསྡུས་པ་ཡིན། །སངས་
རྒྱས་བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་བཞུགས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་། ཆོས་གོས་བསྣམས་ཏེ། བྱ་རྒོད་ཀྱི་ཕུང་པོའི་རི་ལས་བབས་ནས་སླད་བཞིན་འབྲང་བའི་དགེ་སྦྱོང་ཚེ་དང་ལྡན་པ་ཀུན་དགའ་བོ་དང་།
རྒྱལ་པོའི་ཁབ་ཏུ་བསོད་སྙོམས་ལ་གཤེགས་པ་དང་། བཅོམ་ལྡན་འདས་ཀྱིས་བསྐལ་པ་དང་པོའི་མི་རྣམས་ཀྱིས་གཏེར་སྦས་པ་ལྷས་ཆར་ཕབ་པས་ཕྱོགས་དེར་ཆུའི་འོད་པ་བབ་ཅིང་དེ་ཡང་ལམ་ལམ་ལམ་འབར་ཞིང་འདུག་པ་གཟིགས་སོ། །གཟིགས་ནས་ཀྱང་ཚེ་དང་ལྡན་པ་ཀུན་དགའ་
བོ་ལ་བཀའ་སྩལ་པ། ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ། །བཅོམ་ལྡན་འདས་སྦྲུལ་དུག་དྲག་པོ་ལགས་སོ། །ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱ་བ་ཡིན་ནོ། །བདེ་བར་གཤེགས་པ་སྦྲུལ་དུག་དྲག་པོ་ལགས་སོ། །དེ་ན་ཧ་ཅང་ཐག་མི་རིང་བ་ན་མི་འབྲས་
བུ་དང་རྩ་བ་ཐུ་བ་ཞིག་འདུག་པ་དེས་དེ་ཐོས་ནས་དེས་བསམས་པ། བདག་གིས་སྦྲུལ་དུག་མྱུར་དུ་ཁྱབ་པར་བྱེད་པ་ནི་མཐོང་ན་སྦྲུལ་དུག་དྲག་པོ་ནི་མ་མཐོང་བས། ཤཱཀྱའི་བུའི་དགེ་སྦྱོང་རྣམས་ཀྱི་སྦྲུལ་དུག་དྲག་པོ་ཅི་འདྲ། བདག་ཀྱང་ཕྱོགས་འདིར་ཉིན་མཚན་དུ་རྒྱུ་བས་བདག་སྦྲུལ་དུག་
དྲག་པོས་ཟིན་པར་གྱུར་ན་མི་རུང་གིས་ཇི་ལྟར་འགྲོའོ་སྙམ་ནས་དེ་དེར་སོང་བ་དང་། ཇི་ཙམ་ན་གཏེར་ཞིག་ལམ་ལམ་ལམ་འབར་ཞིང་འདུག་པ་མཐོང་ནས་དེས་བསམས་པ། ཤཱཀྱའི་བུའི་དགེ་སྦྱོང་རྣམས་ཀྱི་སྦྲུལ་དུག་དྲག་པོ་ནི་མཛེས་པ་ཡིན་ནོ། །ཤཱཀྱའི་བུའི་དགེ་སྦྱོང་རྣམས་ཀྱི་སྦྲུལ་
དུག་དྲག་པོ་ནི་ཤིན་ཏུ་བཟང་བ་ཡིན་ཏེ། འདི་ལྟར་སྦྲུལ་དུག་དྲག་པོ་འདི་ལྟ་བུས་ནི་ཕ་དང་མ་སྡུག་པ་ཡང་ཟིན་ཀྱང་སླའོ། །བུ་དང་། ཆུང་མ་དང་། བྲན་མོ་དང་། ལས་མི་དང་། ཞོ་ཤས་འཚོ་བ་དང་། མཛའ་བཤེས་དང་། བློན་པོ་དང་། ཉེ་དུ་དང་། སྣག་གི་གཉེན་མཚམས་

སྡུག་པ་ཡང་ཟིན་ཀྱང་བླའོ་སྙམ་ནས་མི་དེས་གཏེར་དེ་ལོ་མའི་ཆུན་པོ་དག་གིས་གཡོགས་ཏེ། ཁད་ཀྱིས་ཁད་ཀྱིས་རིམ་གྱིས་རང་གི་ཁྱིམ་དུ་བསྐྱས་སོ། །གང་གི་ཚེ་ལུས་འཕགས་མའི་བུ་མ་ག་དྷཱར་བྱུང་བའི་རྒྱལ་པོ་མ་སྐྱེས་དགྲ་སྡིག་པའི་གྲོགས་པོ་ལྷ་སྦྱིན་གྱིས་ཉེ་བར་བསྐོར་
བས་ཕ་ཆོས་དང་ལྡན་པ་ཆོས་ཀྱི་རྒྱལ་པོ་གཟུགས་ཅན་སྙིང་པོ་སྲོག་དང་ཕྲལ་ཏེ། རང་ཉིད་ཅོད་པན་བཅིངས་ནས་རྒྱལ་སྲིད་ཀྱི་དབང་ཕྱུག་གི་བདག་པོར་བཞག་པ་དེའི་ཚེ་ན་དེས་ཞོ་ཤས་འཚོ་བ་རྣམས་ལ་བསྒོ་བ། ཤེས་ལྡན་དག་སོང་ལ་གང་ལ་འདུ་བ་ནི་ཅི་ཡོད། འགོད་པ་ནི་ཅི་ཡོད། གང་
ནི་ཅི་ཞིག་གིས་འཚོ་བར་བྱེད་པ་དག་ལྟོས་ཤིག །དེ་ནས་ཞོ་ཤས་འཚོ་བའི་མི་དེ་དག་གིས་ལྷ་བཀའ་བཞིན་འཚལ་ཞེས་ལུས་འཕགས་མའི་བུ་མ་ག་དྷཱར་བྱུང་བའི་རྒྱལ་པོ་མ་སྐྱེས་དགྲ་ལས་མཉན་ནས། རྒྱལ་པོའི་ཞོ་ཤས་འཚོ་བའི་མི་དེ་དག་གིས་ཕྱོགས་སུ་བྱུལ་བ་ན་མི་དེ་ཁྱིམ་གྱི་འབྱོར་པ་
དག་བྱེད་པ་མཐོང་ནས། དེ་དག་གིས་དེ་ལ་སྨྲས་པ། ཀྱེ་ནང་རྗེ་ཁྱོད་དབུལ་པོ་རྩ་བ་དང་འབྲས་བུ་ཐུ་བ་རྩ་བ་དང་འབྲས་བུ་དག་བཙོངས་ཤིང་འཚོ་བ་དག་སྦྱོར་བར་བྱེད་པ་ཡིན་ན། ཁྱོད་ཀྱི་ཁྱིམ་གྱི་འབྱོར་པ་འདི་ག་ལས་འོངས། ཁྱོད་ཀྱིས་གཏེར་མ་རྙེད་དམ། དེས་སྨྲས་པ། བདག་
གིས་གཏེར་མ་རྙེད་དེ། བདག་ཉིད་ལ་འབྱོར་པ་འདི་ལྟ་བུ་དག་ཡོད་མོད་ཀྱིས་སྔན་ཆད་ནི་རྒྱལ་པོ་ཆོས་དང་མི་ལྡན་པ་བྱུང་བ་དེའི་ཕྱིར་བདག་གིས་མ་ཕྱུང་ངོ་། །ད་ནི་རྒྱལ་པོ་ཆོས་དང་ལྡན་པ་བྱུང་བས། དེའི་ཕྱིར་བདག་གིས་ཁྱིམ་གྱི་འབྱོར་པ་བྱེད་དེ་རྒྱལ་པོ་གཟུགས་ཅན་སྙིང་པོ་ལ་ཕོ་བྲང་
འཁོར་དང་ལྗོངས་ཀྱི་མི་དག་རྗེས་སུ་དགའ་བར་ཟད་ཀྱི་དེ་ཆོས་དང་ལྡན་པ་མ་ཡིན་ནོ། །རྒྱལ་པོ་མ་སྐྱེས་དགྲ་ལ་ནི་ཕོ་བྲང་འཁོར་དང་ལྗོངས་ཀྱི་མི་དག་རྗེས་སུ་མི་དགའ་ཡང་དེ་ཆོས་དང་ལྡན་པའི་རྒྱལ་པོ་ཡིན་ནོ། །དེ་དག་གིས་སྨྲས་པ། ཀྱེ་ནང་རྗེ་རྒྱལ་པོ་གཟུགས་ཅན་སྙིང་པོ་ཆོས་དང་
ལྡན་པ་མ་ཡིན་ན་གང་ཆོས་དང་ལྡན་པ་དེ་ཆོས་དང་ལྡན་པ་མ་ཡིན་པར་གྱུར་ལ། ཕ་གསོད་པ་གང་ཡིན་པ་དེ་ཆོས་དང་ལྡན་པར་གྱུར་ཏམ། ཁྱོད་ཀྱིས་ཁོ་བོ་ཅག་སུ་ཡིན་ཤེས་སམ། དེས་སྨྲས་པ། ཤེས་ཏེ་རྒྱལ་པོའི་ཞོ་ཤས་འཚོ་བ་དག་ཡིན་པས་ཁྱེད་ཀྱི་མིག་གིས་རྒྱལ་པོ་མཐོང་ངོ་། །

དེ་དག་གིས་སྨྲས་པ། ཀྱེ་ནང་རྗེ་ཁོ་བོ་ཅག་བརྫུན་གྱིས་མ་བསླུ་ཤིག །ཁྱོད་ཀྱིས་གཏེར་རྙེད་ཀྱི་ཕྱེད་ནི་ཁྱེད་ཁྱེར་ལ་ཕྱེད་ནི་ཁོ་བོ་ཅག་ལ་བྱིན་ཅིག །དེས་སྨྲས་པ། ཁོ་བོས་གཏེར་མ་རྙེད་དེ། འདི་ནི་ཁོ་བོ་ཉིད་ཀྱི་ཡིན་མོད་ཀྱི་འོན་ཀྱང་སུམ་ཆ་སྦྱིན་གྱི་ཁ་རོག་པར་དེངས་ཤིག །དེ་
དག་གིས་དེ་སྤྱོས་ཏེ་ལག་པ་གཉིས་ཕྱིང་ཀ་ལོག་ཏུ་བཅིངས་ནས་གཉའ་ཟུངས་རྒྱུད་མོས་རྒྱལ་པོའི་དྲུང་དུ་ཁྲིད་དེ་སྨྲས་པ། ལྷ་མི་འདིས་གཏེར་རྙེད་དོ། །རྒྱལ་པོས་སྨྲས་པ། ཀྭའི་ནང་རྗེ་ང་སུ་ཡིན་ཤེས་སམ། ལྷ་འཚལ་ཏེ་འཇིག་རྟེན་སྐྱོང་བ་བཞི་ནི་འཇིག་རྟེན་སྐྱོང་བར་བགྱིད་པ་ལགས།
ཁྱོད་ནི་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་འཇིག་རྟེན་སྐྱོང་བ་ལྔ་པ་ལགས་ཏེ་སྐྱེ་དགུ་སྐྱོང་བར་མཛད་པ་ལགས་སོ། །ཀྭའི་ནང་རྗེ་ཁྱོད་ཀྱིས་གཏེར་རྙེད་ཀྱི་ང་ལ་བརྫུན་གྱིས་མ་བསླུ་བར་བདེན་པ་སྨྲོས་ལ་ཕྱེད་ནི་ཁྱོད་ཁྱེར་ཅིག །ཕྱེད་ནི་ང་ལ་བྱིན་ཅིག །ལྷ་བདག་གིས་གཏེར་མ་རྙེད་དོ། །
ཀྭའི་ནང་རྗེ་ཁྱོད་ཀྱིས་གཏེར་རྙེད་ཀྱིས་སུམ་ཆ་ང་ལ་བྱིན་ཅིག །ལྷ་བདག་གིས་གཏེར་མ་རྙེད་དོ། །རྒྱལ་པོ་ཁྲོས་ཏེ་བློན་པོ་རྣམས་ལ་སྨྲས་པ། ཤེས་ལྡན་དག་གང་གི་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་བཀའ་ལན་གསུམ་གྱི་བར་དུ་བཅག་པ་དེ་ལ་ཆད་པ་ཅི་ཡོད། དེ་དག་གིས་སྨྲས་
པ། ལྷ་དགུམ་པ་ལ་ཐུག་པའི་ཆད་པ་མཆིས་སོ། །རྒྱལ་པོས་སྨྲས་པ། ཤེས་ལྡན་དག་ངས་མི་འདི་ཡོངས་སུ་བཏང་གིས། འདིའི་ཉེ་དུ་རྣམས་ཀྱང་ཕྱག་སྦལ་དུ་ཆུག་ལ། འདིའི་ནོར་ཐམས་ཅད་ཀྱང་རྒྱལ་པོའི་ཕོ་བྲང་དུ་ཕུལ་ཅིག །དེ་ནས་བློན་པོ་རྣམས་ཀྱིས་ལྷ་བཀའ་
བཞིན་འཚལ་ཞེས་ལུས་འཕགས་མའི་བུ་མ་ག་དྷཱར་བྱུང་བའི་རྒྱལ་པོ་མ་སྐྱེས་དགྲ་ལས་མཉན་ནས་མི་དེའི་ཉེ་དུ་རྣམས་ཀྱང་བཙོན་རར་བཅུག །དེའི་ནོར་ཐམས་ཅད་ཀྱང་རྒྱལ་པོའི་ཕོ་བྲང་དུ་ཕུལ། མི་དེ་ཉིད་ཀྱང་མི་གོས་སྔོན་པོ་གྱོན་པ། ལག་ན་རལ་གྲི་ཐོགས་པ་དག་གིས་ཀར་བཱི་རའི་མེ་
ཏོག་དམར་པོ་དག་གིས་མགྲིན་པ་བཅིངས་ཏེ་གསད་སར་ཁྲིད་པ་དང་། མི་དེ་བྱུང་རྒྱལ་དུ་སྨྲས་པ། ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ། །བཅོམ་ལྡན་འདས་སྦྲུལ་དུག་དྲག་པོ་ལགས་སོ། །ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ། །བདེ་བར་

གཤེགས་པ་སྦྲུལ་དུག་དྲག་པོ་ལགས་སོ། །རྒྱལ་པོ་དེའི་ཆོས་ཉིད་ནི་གསད་པར་བྱ་བའི་མི་གང་གཞན་དྲིས་པ་ལ་ལན་གཞན་འདེབས་པར་བྱེད་དེ། ཇི་སྲིད་དུ་རྒྱལ་པོ་ལ་མ་ཞུས་ཀྱི་བར་དུ་རེ་ཞིག་གསོད་པར་མི་བྱེད་པས་བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་མི་དེ་
གཞན་དྲིས་ན་ལན་གཞན་འདེབས་པར་བགྱིད་དོ། །རྒྱལ་པོས་སྨྲས་པ། ཁྲིད་དེ་ཤོག་ཤིག །བློན་པོ་རྣམས་ཀྱིས་ཁྲིད་དེ་སོང་ནས། རྒྱལ་པོས་དྲིས་པ། ཀྭའི་ནང་རྗེ་ཁྱོད་ཅི་ཟེར། དེས་སྨྲས་པ། ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ། །བཅོམ་ལྡན་འདས་
སྦྲུལ་དུག་དྲག་པོ་ལགས་སོ། །ཀུན་དགའ་བོ་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ། །བདེ་བར་གཤེགས་པ་སྦྲུལ་དུག་དྲག་པོ་ལགས་སོ། །རྒྱལ་པོས་སྨྲས་པ། ཀྭའི་ནང་རྗེ་སྨྲས་པ་དེའི་དོན་ཅི། ལྷ་ཇེ་མི་འཇིགས་པ་སྩལ་དུ་གསོལ། བྱིན་ནོ། །དེས་སྐབས་དེ་རྒྱས་པར་
བརྗོད་ནས་འདི་སྐད་ཅེས་ཀྱང་སྨྲས་སོ། །གལ་ཏེ་སྦྲུལ་དུག་མྱུར་དུ་ཁྱབ་པར་བགྱིད་པས་བདག་ཟིན་པར་གྱུར་ན་བདག་གཅིག་པུ་དུས་ལ་བབ་པར་འགྱུར་བ་ཞིག་ན། སྦྲུལ་དུག་དྲག་པོས་བདག་ཟིན་པས་དེའི་སླད་དུ་བདག་དང་། ཉེ་དུ་དང་། ནོར་ཐམས་ཅད་ཀྱང་ཚུལ་མ་ལགས་པས་སྡུག་
བསྔལ་བར་གྱུར་ཏོ། །དེའི་ཚེ་ན་ལུས་འཕགས་མའི་བུ་མ་ག་དྷཱར་བྱུང་བའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ལ་དད་པ་ཐོབ་ནས་རིང་པོ་མ་ལོན་པས་དེས་སྨྲས་པ། ཀྭའི་ནང་རྗེ་ཁྱོད་བཅོམ་ལྡན་འདས་ལ་མངོན་པར་དད་དམ། ལྷ་མངོན་པར་དད་དོ། །དེ་ནས་ལུས་འཕགས་མའི་
བུ་མ་ག་དྷཱར་བྱུང་བའི་རྒྱལ་པོ་མ་སྐྱེས་དགྲ་མཆི་མས་བརྣངས་པར་གྱུར་ནས། དེས་སྨྲས་པ། ཀྭའི་ནང་རྗེ་དེ་ཁྱོད་ཀྱིས་ཡིན་གྱི་སོང་ཤིག །དེ་ནས་རྒྱལ་པོས་ཞོ་ཤས་འཚོ་བ་རྣམས་ལ་བསྒོ་བ། མི་འདིའི་ཉེ་དུ་རྣམས་ཀྱང་ཐོང་ལ་འདིའི་ནོར་ཐམས་ཅད་ཀྱང་ཕྱིར་བྱིན་ཅིག །ཞོ་ཤས་འཚོ་
བ་རྣམས་ཀྱིས་དེའི་ཉེ་དུ་རྣམས་ཀྱང་བཏང་། དེའི་ནོར་ཐམས་ཅད་ཀྱང་ཕྱིར་བྱིན་ནོ། །དེ་ནས་མི་དེ་འདི་སྙམ་དུ་སེམས་ཏེ། བདག་གི་ཁྱིམ་ན་དཔལ་དང་སྐལ་བ་བཟང་པོ་ཕུན་སུམ་ཚོགས་པ་གང་ཅུང་ཟད་ཅི་ཡོད་པ་དེ་ཐམས་ཅད་བཅོམ་ལྡན་འདས་ལ་བརྟེན་པ་ཡིན་པས་བདག་གིས་སངས་རྒྱས་

ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་སྤྱན་དྲངས་ཏེ་གདུགས་ཚོད་གསོལ་ལོ་སྙམ་ནས། དེ་ནས་མི་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་
བཅོམ་ལྡན་འདས་མི་དེ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་
དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་མི་དེ་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་
སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་ཅིག་ཏུ་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་མི་དེ་ལ་ཅང་མི་གསུང་བས་གནང་ངོ་། །དེ་ནས་མི་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་
ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་མི་དེས་དེ་ཉིད་ཀྱི་མཚན་མོ་བཅའ་བ་དང་། བཟའ་བ་གཙང་ཞིང་བསོད་པ་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ།
བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན་བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་
ཡོངས་སུ་བསྐོར་ཞིང་། དགེ་སློང་གི་དགེ་འདུན་གྱིས་མདུན་དུ་བདར་ཏེ་མི་དེའི་བཀད་ས་ག་ལ་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་མི་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་

པར་རིག་ནས་བཅའ་བ་དང་། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་། བཟའ་བ་གཙང་ཞིང་བསོད་པས་རང་གི་ལག་ནས་བསྟབས་ཤིང་ཚིམ་པར་བྱས་ནས་བཅོམ་ལྡན་
འདས་གདུགས་ཚོད་གསོལ་ཞིང་ཕྱག་བཅབས་ཏེ་ལྷུང་བཟེད་བཞག་པར་རིག་ནས། སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་བཅོམ་ལྡན་འདས་ཀྱིས་མི་དེའི་བསམ་པ་དང་། བག་ལ་ཉལ་དང་། ཁམས་དང་། རང་
བཞིན་ཐུགས་སུ་ཆུད་པས། འདི་ལྟར་མི་དེ་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་མཛད་དོ། །དེས་བདེན་པ་མཐོང་ནས་གསོལ་
བ། བཙུན་པ་བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་འདི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་
དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་
རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། ཡི་དགས་དང་། དུད་འགྲོ་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་
ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་ཐོབ་སྟེ་བཙུན་པ་བདག་ནི་མངོན་པར་ཞུགས་པ་ལགས། བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆིས། བདག་

དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་གློ་བ་ཐག་པ་ནས་དད་པས་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་མི་དེ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད།
ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །འདི་ནི་རེ་ཞིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་
ཚལ་ཀ་ལན་ད་ཀའི་གནས་ན་བཞུགས་སོ། །ཚེ་དང་ལྡན་པ་འཆར་ཀས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང་། ཇི་ཙམ་ན་དེས་བསོད་སྙོམས་བརྒྱུས་ནས་འཕོང་གི་དཔོང་ས་མཐོང་ནས་དེ་དེར་ཞུགས་པ་དང་།
འཕོང་གི་སློབ་དཔོན་ནི་མེད། ཁྱེའུ་དག་འཁོད་ནས་དེས་དྲིས་པ། ཁྱེའུ་དག་ཅི་བྱེད། དེ་དག་གིས་སྨྲས་པ། འཕགས་པ་འཕོང་སློབ་བོ། །འཆར་ཀས་སྨྲས་པ། བུ་དག་ལེགས་ཏེ་ཁྱེད་ཅག་གིས་སྒྱུ་རྩལ་མཆོག་ལས་རྒལ་ཏོ། །བུ་དག་བལྟས་གཡོན་འཕོངས་དང་། གཡས་
འཕོངས་དང་། གོམ་སྟབས་དང་། འཛིན་སྟབས་དང་། ཞགས་པ་གདབ་པ་དང་། མདའ་བོ་ཆེ་འཕང་བ་དང་། གཅད་པ་དང་། དྲལ་བ་དང་། དབུག་པ་དང་། རྡོ་རྗེ་རྩེ་གཅིག་པ་དང་། མཚོན་རྩེ་གཅིག་འཕང་བ་གྱིས་ཤིག །དེ་དག་གིས་གཡོན་འཕོངས་དང་།
གཡས་འཕོངས་དང་། གོམ་སྟབས་དང་། འཛིན་སྟབས་དང་། ཞགས་པ་གདབ་པ་དང་། མདའ་བོ་ཆེ་འཕང་བ་དང་། གཅད་པ་དང་། དྲལ་བ་དང་། དབུག་པ་དང་། རྡོ་རྗེ་རྩེ་གཅིག་པ་དང་། མཚོན་རྩེ་གཅིག་འཕང་བར་བརྩམས་པ་དང་། འཆར་ཀ་ལག་པ་གཉིས་
འདྲིལ་བར་བྱེད། བཞིན་སྒྱུར་བར་བྱེད་ནས་དེ་དག་གིས་སྨྲས་པ། འཕགས་པ་ཅིའི་སླད་དུ་ཕྱག་གཉིས་འདྲིལ་བར་མཛད། ཞལ་སྒྱུར་བར་མཛད། འཆར་ཀས་སྨྲས་པ། ད་དུང་ཁྱེད་ཅག་གི་སློབ་དཔོན་གྱིས་ཀྱང་མི་ཤེས་ན། ཁྱེད་ཅག་གིས་ལྟ་ཤེས་པར་འགྱུར་རེ་སྐན། དེ་

དག་གིས་སྨྲས་པ། འཕགས་པ་འདི་ལ་ཅུང་ཟད་མཁྱེན་པ་མངའ་འམ། འཆར་ཀས་སྨྲས་པ། ཁྱེའུ་དག་སའི་སྟེང་ན་གང་ཁོ་བོས་མི་ཤེས་པའི་ལས་ཀྱི་གནས་དང་། བཟོའི་གནས་དེ་གང་ཡིན། དེ་དག་གིས་སྨྲས་པ། འཕགས་པ་གཡར་སྔ་བྲིམ་གྱིས་གཡོན་
འཕོངས་དང་། གཡས་འཕོངས་དང་། གོམ་སྟབས་དང་། འཛིན་སྟབས་དང་། ཞགས་པ་གདབ་པ་དང་། མདའ་བོ་ཆེ་འཕང་བ་དང་། གཅད་པ་དང་། དྲལ་བ་དང་། དབུག་པ་དང་། རྡོ་རྗེ་རྩེ་གཅིག་པ་དང་། མཚོན་རྩེ་གཅིག་པ་འཕང་བ་མཛད་དུ་གསོལ། འཆར་
ཀས་གཡོན་འཕོངས་དང་། གཡས་འཕོངས་དང་། གོམ་སྟབས་དང་། འཛིན་སྟབས་དང་། ཞགས་པ་གདབ་པ་དང་། མདའ་བོ་ཆེ་འཕང་བ་སུས་ཀྱང་བྱེད་མི་ནུས་པ་བྱས་ཤིང་རྐེད་ཆིངས་ཀྱིས་བཅིངས་ཏེ་ཕུབ་ཟླུམ་ཐོགས་ནས་གཅད་པ་དང་། དྲལ་བ་དང་། དབུག་པ་ཡང་བྱས་
པ་དང་། དེ་དག་ཡ་མཚན་སྐྱེས་ནས་སྨྲས་པ་དང་། འཕགས་པ་ལེགས་སོ་ལེགས་སོ། །འཆར་ཀས་སྨྲས་པ། ཁྱེའུ་དག་བཟོའི་གནས་དེ་ལྟར་བསླབ་པར་བྱ་བའམ། ཡང་ན་སློབ་དཔོན་གཞན་བཙལ་བར་བྱའི་འབྲས་བུ་མེད་པའི་སྦུན་པ་འཕྱར་ཞིང་འཁོད་དེ་ཅི་རུང་ཞེས་སྨྲས་ཏེ་
སོང་ངོ་། །ཇི་ཙམ་ན་དེ་དག་གི་སློབ་དཔོན་འོངས་ནས་དེས་སྨྲས་པ། ཁྱེའུ་དག་འཁོད་དེ་ཅི་རུང་། གཡོན་འཕོངས་དང་། གཡས་འཕོངས་དང་། གོམ་སྟབས་དང་། འཛིན་སྟབས་དང་། ཞགས་པ་གདབ་པ་དང་། མདའ་བོ་ཆེ་འཕང་བ་དང་། གཅད་པ་དང་། དྲལ་བ་དང་།
དབུག་པ་དང་། རྡོ་རྗེ་རྩེ་གཅིག་དང་། མཚོན་རྩེ་གཅིག་འཕང་བ་གྱིས་ཤིག །དེ་དག་ལག་པ་གཉིས་འདྲིལ་བར་བྱེད། བཞིན་སྒྱུར་བར་བྱེད་ཅིང་སྨྲས་པ། སློབ་དཔོན་ཡང་ད་དུང་ཅི་ཡང་མི་མཁྱེན་ན་བདག་ཅག་གིས་ལྟ་འཚལ་བར་འགྱུར་རེ་སྐན། སློབ་དཔོན་གྱིས་སྨྲས་པ།
ཁྱེའུ་དག་སྔོན་མ་བྱུང་བའི་རྣམ་པར་འགྱུར་བ་འདི་ལྟ་བུ་བྱུང་ན་འགའ་ཞིག་འདིར་འོངས་པར་མ་གྱུར་ཏམ། དེ་དག་གིས་སྨྲས་པ། མཆིས་སོ། །སུ། འཕགས་པ་འཆར་ཀ་སྟེ། དེས་གཡོན་འཕོངས་དང་། གཡས་འཕོངས་དང་། གོམ་སྟབས་དང་། འཛིན་སྟབས་དང་། ཞགས་

པ་གདབ་པ་དང་། མདའ་བོ་ཆེ་འཕང་བ་དང་། གཅད་པ་དང་། དྲལ་བ་དང་། དབུག་པ་དང་། རྡོ་རྗེ་རྩེ་གཅིག་དང་། མཚོན་རྩེ་གཅིག་འཕང་བ་སུས་ཀྱང་བགྱི་བར་རྔོ་མི་ཐོག་པ་དེ་ལྟ་བུ་བགྱིས་སོ། །དེས་དེ་དག་ལ་སྨྲས་པ། བྱང་ཆུབ་སེམས་དཔའ་འཕོང་གི་དཔོང་ས་གང་དུ་འཕོང་བསླབ་
པ་དེའི་དྲུང་དུ་དེས་ཀྱང་བསླབས་སོ། །གལ་ཏེ་དེ་རབ་ཏུ་བྱུང་བར་མ་གྱུར་ན་འཛམ་བུའི་གླིང་མཐའ་དག་ཏུ་འཕོང་གི་སློབ་དཔོན་གྱི་མཆོག་ཏུ་འགྱུར་རོ། །འོན་ཀྱང་ཁོ་བོས་ཅི་ཤེས་པ་དེ་ཇེ་ཁོ་བོ་ལས་སློབས་ལ། ལྷག་མ་གཞན་ལས་སློབས་ཤིག །སློབ་དཔོན་དེས་བསམས་པ། དེ་ཡང་དང་
ཡང་དུ་བདག་ལ་ཐོ་འཚམ་པར་འགྱུར་གྱིས་དེ་བལྟར་འགྲོའོ་སྙམ་ནས། དེ་འཆར་ཀའི་གན་དུ་སོང་སྟེ་སྨྲས་པ། འཕགས་པ་འཆར་ཀ་བདག་ཅག་གི་འཕོང་གི་དཔོང་སར་བྱོན་པར་གྱུར་ཏམ། འཆར་ཀས་སྨྲས་པ། སོན་ཏོ། །འཕགས་པས་ཁྱེའུ་དག་ཅུང་ཟད་ཚར་བཀུམ་མམ། འཆར་
ཀས་སྨྲས་པ། ཚར་བཅད་དོ། །དེས་སྨྲས་པ། འཕགས་པ་དེ་ནི་བདག་གི་འཚོ་བ་ལགས་ཀྱིས་ཁྱེའུ་དག་ཚར་མ་དགུམ་ཤིག །བཀྲེན་པ་ཁྱོད་ཁོ་བོ་ཅག་གི་སྒྱུ་རྩལ་གྱིས་འཚོ་ལ། ཁོ་བོ་ཅག་ལ་བཅའ་བའི་རིན་ཅུང་ཟད་ཀྱང་མི་སྦྱིན་ནམ། དེས་སྨྲས་པ། འཕགས་པ་བདག་ནི་
དབུལ་པོ་ལགས་སོ། །འཆར་ཀས་སྨྲས་པ། བཀྲེན་པ་གལ་ཏེ་མི་སྦྱིན་ན་ཡང་དང་ཡང་དུ་ཁོ་བོ་སོང་ལ་ཚར་གཅད་པར་བྱའོ། །དེས་བསམས་པ། འདི་ལ་བཅའ་བའི་རིན་མ་བྱིན་ན་ཡང་དང་ཡང་དུ་སོང་སྟེ་ཁྱེའུ་དག་ཚར་གཅོད་པར་འགྱུར་རོ་སྙམ་ནས། དེ་འཕོང་གི་ཡོ་བྱད་ཐམས་ཅད་
བཙོངས་ཏེ་དེ་ལ་བཅའ་བའི་རིན་བྱིན་ནས་སེམས་ཁོང་དུ་ཆུད་ཅིང་འདུག་གོ། །ཇི་ཙམ་ན་དེའི་ཆུང་པོ་གྲོགས་འོངས་ནས་དེས་དྲིས་པ། གྲོགས་པོ་ཅིའི་ཕྱིར་སེམས་ཁོང་དུ་ཆུད་ཅིང་འདུག །དེས་སྨྲས་པ། ཁོ་བོ་ཆད་པས་བཅད་དོ། །སུས། ཤཱཀྱའི་བུའི་དགེ་སྦྱོང་དག་གིས་སོ། །ཅིའི་ཕྱིར། དེས་
སྐབས་དེ་རྒྱས་པར་བརྗོད་པ་དང་། དེས་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་འཕོང་གི་སློབ་དཔོན་དག་ཀྱང་ཆད་པས་གཅོད་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །འདི་ཡང་རེ་ཞིག་བྱུང་བ་ཡིན་ཏེ། སངས་

རྒྱས་བཅོམ་ལྡན་འདས་རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །ཚེ་དང་ལྡན་པ་འཆར་ཀས་སྔ་དྲོ་ཤམ་ཐབས་བགོས། ལྷུང་བཟེད་
དང་ཆོས་གོས་ཐོགས་ཏེ། རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང་། ཇི་ཙམ་ན་དེས་བསོད་སྙོམས་བརྒྱུས་ནས་རོལ་མོའི་དཔོང་ས་མཐོང་ནས་དེ་དེར་ཞུགས་པ་དང་། རོལ་མོའི་སློབ་དཔོན་ནི་མེད། ཁྱེའུ་དག་འཁོད་ནས་དེས་དྲིས་པ། ཁྱེའུ་དག་ཅི་བྱེད། དེ་དག་གིས་སྨྲས་པ།
འཕགས་པ་རོལ་མོ་སློབ་བོ། །འཆར་ཀས་སྨྲས་པ། བུ་དག་ལེགས་ཏེ་ཁྱེད་ཅག་གིས་སྒྱུ་རྩལ་མཆོག་ལས་རྒལ་ཏོ། །བུ་དག་བལྟས་དྲུག་ལྡན་དང་། དྲང་སྲོང་པ་དང་། ས་འཛིན་པ་དང་། བློ་གསལ་དང་། འཁོར་ཉན་དང་། བར་མ་པ་དང་། ཀེ་ཤི་ཀ་གྱིས་ཤིག །དེ་དག་གིས་
དྲུག་ལྡན་དང་། དྲང་སྲོང་པ་དང་། ས་འཛིན་པ་དང་། བློ་གསལ་དང་། འཁོར་ཉན་དང་། བར་མ་པ་དང་། ཀེ་ཤི་ཀ་བྱ་བར་བརྩམས་པ་དང་། འཆར་ཀ་ལག་པ་གཉིས་འདྲིལ་བར་བྱེད། བཞིན་བསྒྱུར་བར་བྱས་ནས། དེ་དག་གིས་སྨྲས་པ། འཕགས་པ་ཅིའི་སླད་དུ་ཕྱག་གཉིས་འདྲིལ་བར་
མཛད། ཞལ་སྒྱུར་བར་མཛད། འཆར་ཀས་སྨྲས་པ། ད་དུང་ཁྱེད་ཅག་གི་སློབ་དཔོན་གྱིས་ཀྱང་མ་ཤེས་ན་ཁྱེད་ཅག་གིས་ལྟ་ཤེས་པར་འགྱུར་རེ་སྐན། དེ་དག་གིས་སྨྲས་པ། འཕགས་པ་འདི་ལ་ཅུང་ཟད་མཁྱེན་པ་མངའ་འམ། འཆར་ཀས་སྨྲས་པ། ཁྱེའུ་དག་སའི་སྟེང་ན་གང་ཁོ་བོས་མི་
ཤེས་པའི་བཟོའི་གནས་དང་། ལས་ཀྱི་གནས་དེ་གང་ཡིན། དེ་དག་གིས་སྨྲས་པ། འཕགས་པ་གཡར་སྔ་བྲིམ་གྱིས་དྲུག་ལྡན་དང་། དྲང་སྲོང་པ་དང་། ས་འཛིན་པ་དང་། བློ་གསལ་དང་། འཁོར་ཉན་དང་། བར་མ་པ་དང་། ཀེ་ཤི་ཀ་མཛོད་ཅིག །འཆར་ཀས་དྲུག་ལྡན་དང་།
དྲང་སྲོང་པ་དང་། ས་འཛིན་པ་དང་། བློ་གསལ་དང་། འཁོར་ཉན་དང་། བར་མ་པ་དང་། ཀེ་ཤི་ཀ་སུས་ཀྱང་བྱ་བར་མི་ནུས་པ་བྱས་པ་དང་། དེ་དག་ཡ་མཚན་སྐྱེས་ནས་སྨྲས་པ། འཕགས་པ་ལེགས་སོ་ལེགས་སོ། །འཆར་ཀས་སྨྲས་པ། ཁྱེའུ་དག་བཟོའི་གནས་དེ་ལྟར་བསླབ་པར་

བྱ་བའམ། ཡང་ན་སློབ་དཔོན་གཞན་བཙལ་བར་བྱའི་འབྲས་བུ་མེད་པའི་སྦུན་པ་འཕྱར་ཞིང་འཁོད་དེ་ཅི་རུང་ཞེས་སྨྲས་ཏེ་སོང་ངོ་། །ཇི་ཙམ་ན་དེ་དག་གི་སློབ་དཔོན་འོངས་ནས་དེས་སྨྲས་པ། ཁྱེའུ་དག་འཁོད་དེ་ཅི་རུང་དྲུག་ལྡན་དང་། དྲང་སྲོང་པ་དང་། ས་འཛིན་པ་དང་། བློ་གསལ་དང་། འཁོར་ཉན་
དང་། བར་མ་པ་དང་། ཀེ་ཤི་ཀ་གྱིས་ཤིག །དེ་དག་ལག་པ་གཉིས་འདྲིལ་བར་བྱེད། བཞིན་སྒྱུར་བར་བྱེད་ཅིང་སྨྲས་པ། སློབ་དཔོན་ཡང་ད་དུང་ཅི་ཡང་མི་མཁྱེན་ན་བདག་ཅག་གིས་ལྟ་འཚལ་བར་འགྱུར་ཏེ་སྐན། སློབ་དཔོན་གྱིས་སྨྲས་པ། ཁྱེའུ་དག་སྔོན་མ་བྱུང་བའི་རྣམ་པར་འགྱུར་བ་འདི་ལྟ་བུ་
བྱུང་ན་འགའ་ཞིག་འདིར་འོངས་པར་མ་གྱུར་ཏམ། དེ་དག་གིས་སྨྲས་པ། མཆིས་སོ། །སུ། འཕགས་པ་འཆར་ཀ་སྟེ། དེས་གླུ་དང་གར་སུས་ཀྱང་བརྗོད་པར་རྔོ་མི་ཐོག་པ་དེ་ལྟ་བུ་བགྱིས་སོ། །དེས་དེ་དག་ལ་སྨྲས་པ། བྱང་ཆུབ་སེམས་དཔའ་རོལ་མོའི་དཔོང་ས་གང་དུ་རོལ་མོ་བསླབས་པ་དེའི་དྲུང་དུ་དེས་
ཀྱང་བསླབས་ཏེ། གལ་ཏེ་དེ་རབ་ཏུ་བྱུང་བར་མ་གྱུར་ན་འཛམ་བུའི་གླིང་མཐའ་དག་ཏུ་རོལ་མོ་མཁན་གྱི་སློབ་དཔོན་གྱི་མཆོག་ཏུ་འགྱུར་རོ། །འོན་ཀྱང་ཁོ་བོས་ཅི་ཤེས་པ་དེ་ཇེ་ཁོ་བོ་ལས་སློབས་ལ་ལྷག་མ་གཞན་ལས་སློབས་ཤིག །སློབ་དཔོན་དེས་བསམས་པ། དེ་ཡང་དང་ཡང་དུ་བདག་ལ་ཐོ་འཚམ་པར་
འགྱུར་གྱིས་དེ་ལྟར་འགྲོའོ་སྙམ་ནས་དེ་འཆར་ཀའི་གན་དུ་སོང་སྟེ་སྨྲས་པ། འཕགས་པ་འཆར་ཀ་བདག་ཅག་གི་རོལ་མོའི་དཔོང་སར་བྱོན་པར་གྱུར་ཏམ། འཆར་ཀས་སྨྲས་པ། སོན་ཏོ། །འཕགས་པས་ཁྱེའུ་དག་ཅུང་ཟད་ཚར་བཀུམ་མམ། འཆར་ཀས་སྨྲས་པ། ཚར་བཅད་དོ། །དེས་སྨྲས་པ། འཕགས་
པ་དེ་ནི་བདག་གི་འཚོ་བ་ལགས་ཀྱིས་ཁྱེའུ་དག་ཚར་མ་དགུམ་ཤིག །བཀྲེན་པ་ཁྱོད་ཁོ་བོ་ཅག་གིས་སྒྱུ་རྩལ་གྱིས་འཚོ་ལ། ཁོ་བོ་ཅག་ལ་བཅའ་བའི་རིན་ཅུང་ཟད་ཀྱང་མི་སྦྱིན་ནམ། དེས་སྨྲས་པ། འཕགས་པ་བདག་ནི་དབུལ་པོ་ལགས་སོ། །འཆར་ཀས་སྨྲས་པ། བཀྲེན་པ་གལ་ཏེ་མི་
སྦྱིན་ན་ཡང་དང་ཡང་དུ་ཁོ་བོ་སོང་ལ་ཚར་གཅད་པར་བྱའོ། །དེས་བསམས་པ། འདི་ལ་བཅའ་བའི་རིན་མ་བྱིན་ན་ཡང་དང་ཡང་དུ་སོང་སྟེ་ཁྱེའུ་དག་ཚར་གཅོད་པར་འགྱུར་རོ་སྙམ་ནས། དེས་རོལ་མོའི་ཡོ་བྱད་ཐམས་ཅད་བཙོངས་ཏེ་དེ་ལ་བཅའ་བའི་རིན་བྱིན་ནས་སེམས་ཁོང་དུ་ཆུད་ཅིང་འདུག་

གོ། །ཇི་ཙམ་ན་དེའི་ཆུང་པོ་གྲོགས་འོངས་ནས་དེས་དྲིས་པ། གྲོགས་པོ་ཅིའི་ཕྱིར་སེམས་ཁོང་དུ་ཆུད་ཅིང་འདུག །དེས་སྨྲས་པ། ཁོ་བོ་ཆད་པས་བཅད་དོ། །སུས། ཤཱཀྱའི་བུའི་དགེ་སྦྱོང་དག་གིས་སོ། །ཅིའི་ཕྱིར། དེས་སྐབས་དེ་རྒྱས་པར་བརྗོད་པ་དང་། དེ་ཤཱཀྱའི་བུའི་
དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་རོལ་མོ་མཁན་གྱི་སློབ་དཔོན་དག་ཀྱང་ཆད་པས་གཅོད་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །འདི་ཡང་རེ་ཞིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཞིག་འདུལ་བ་ལ་
ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཏུ་ཅི་དགྱེས་པར་བཞུགས་ནས་ཡངས་པ་ཅན་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་ཏེ་མཐར་གྱིས་རྒྱུ་ཞིང་གཤེགས་པ་ན་ཡངས་པ་ཅན་དུ་བྱོན་ནས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་
པ་བརྩེགས་པའི་ཁང་བཟངས་ན་བཞུགས་སོ། །ཉེ་དགའ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་ཡངས་པ་ཅན་དུ་བསོད་སྙོམས་ལ་ཞུགས་པ་དང་། ལིཙྪ་བཱིའི་ཁྱེའུ་རབ་ཏུ་མང་པོ་དག་ཀྱང་ཡངས་པ་ཅན་ནས་བྱུང་སྟེ། ཡངས་པ་ཅན་གྱི་ཕྱི་རོལ་དུ་རྒྱན་ཐམས་ཅད་ཕྱོགས་གཅིག་ཏུ་
བཞག་སྟེ་རྩེ་བར་བརྩམས་སོ། །ཉེ་དགའས་དེ་མཐོང་ནས་དེས་དེ་གནོད་སྦྱིན་གྱི་ནོར་ཡིན་ནོ་ཞེས་རྒྱན་དེ་དག་ཐམས་ཅད་ཁྱེར་ཏེ་སོང་བ་དང་། ཡངས་པ་ཅན་གྱི་ལིཙྪ་བཱིའི་ཁྱེའུ་དེ་དག་གིས་ཉེ་དགའ་ལ་ལས་ནི་ལག་པ་ནས་བཟུང་། ལ་ལས་ནི་རྐང་པ་ནས་བཟུང་། ལ་ལས་ནི་ཆོས་གོས་ནས་བཟུང་སྟེ་
འཕགས་པ་ཅིའི་ཕྱིར་ཁོ་བོ་ཅག་གི་རྒྱན་འཕྲོག་པར་བྱེད་ཅེས་ཟེར་རོ། །ལིཙྪ་བཱི་ཆེན་པོས་ཡངས་པ་ཅན་གྱི་ལིཙྪ་བཱིའི་ཁྱེའུ་དག་གིས་ཉེ་དགའ་བཟུང་སྟེ་ཐོ་འཚམ་པ་མཐོང་ནས། དེས་སྨྲས་པ། ཁྱེའུ་དག་ཅིའི་ཕྱིར་འཕགས་པ་ཉེ་དགའ་ལ་ཐོ་འཚམ་པར་བྱེད། དེ་དག་གིས་སྨྲས་པ། འདིས་བདག་ཅག་
གི་རྒྱན་དག་ཕྲོགས་སོ། །དེས་སྨྲས་པ། འཕགས་པ་ཉེ་དགའ་ཅིའི་སླད་དུ་ཁྱེའུ་དག་གི་རྒྱན་འཕྲོག་པར་མཛད། ཉེ་དགའས་སྨྲས་པ། ཁོ་བོ་གནོད་སྦྱིན་གྱི་ནོར་འདི་རྙེད་དོ། །དེས་སྨྲས་པ། འདི་འདྲ་བ་གནོད་སྦྱིན་གྱི་ནོར་ལགས་རེ་སྐན། གཞོན་ནུ་དག་གི་རྒྱན་ལགས་ཀྱིས་མ་འཕྲོག་པར་

འོར་ཅིག །ཉེ་དགའས་དེ་བོར་ཏེ་རྡུལ་གྱིས་གོས་པའི་ཆོས་གོས་དག་གིས་གཙུག་ལག་ཁང་དུ་སོང་བ་དང་། དགེ་སློང་རྣམས་ཀྱིས་དེ་ལ་སྨྲས་པ། བཙུན་པ་ཉེ་དགའ་ཅིའི་ཕྱིར་རྡུལ་གྱི་ཚོགས་ཀྱིས་གོས། ཉེ་དགའས་སྨྲས་པ། ལིཙྪ་བཱི་ཆེན་པོ་ནད་མེད་པར་གྱུར་ཅིག །ཁོ་བོས་གནོད་སྦྱིན་གྱི་
ནོར་ཐོབ་པ་དེས་འདོར་དུ་བཅུག་གོ། །འདི་ཡང་རེ་ཞིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་
ན་བཞུགས་སོ། །དྲུག་སྡེ་དག་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་ཡངས་པ་ཅན་དུ་བསོད་སྙོམས་ལ་ཞུགས་སོ། །ལམ་གྱི་བར་ན་ཡངས་པ་ཅན་གྱི་ལིཙྪ་བཱི་རྣམས་ཀྱི་སྐྱེད་མོས་ཚལ་དག་ཡོད་ནས་དེ་དག་གིས་སྨྲས་པ། དགའ་བོ་ཉེ་དགའ་བཅོམ་ལྡན་འདས་ཀྱིས་
ཡངས་པ་ཅན་གྱི་ལིཙྪ་བཱི་དག་གི་དཔེ་སུམ་བཅུ་རྩ་གསུམ་པའི་ལྷ་རྣམས་ལས་བླངས་ཀྱིས་དེ་དག་གི་སྐྱེད་མོས་ཚལ་དག་ཅི་འདྲ་བ་བལྟས་འདོང་ངོ་ཞེས་དེ་དག་དེར་ཞུགས་པ་དང་། ཇི་ཙམ་ན་དེ་ན་ཡོ་བྱད་རྣམ་པ་སྣ་ཚོགས་འདི་ལྟ་སྟེ། ཁྲུས་ཀྱི་ཚལ་དག་དང་། སོ་ཕག་དག་དང་།
བསྐུ་བ་དག་དང་། ཕྲུག་སྤྱད་དག་དང་། ས་གར་དག་དང་། སྐྱུ་རུ་ར་དག་དང་། མགོ་བཀྲུ་བ་དག་དང་། པི་བང་དང་། འོད་མ་དང་། མ་ཧ་ཏི་དང་། བལ་ལ་རི་དང་། སུ་གྷོ་ཤ་ཀ་དག་བཞག་པ་དག་མཐོང་ནས་དེ་དག་གིས་སྨྲས་པ། དགའ་བོ་ཉེ་དགའ་ཇེ་དང་པོར་ཁྲུས་བྱའམ།
འོན་ཏེ་གླུ་བླང་ཞིང་བྲོ་བརྡུང་བར་བྱ། དེ་དག་གིས་སྨྲས་པ། བདག་ཅག་གིས་ཡུན་རིང་པོ་ནས་གླུ་བླངས་ཤིང་བྲོ་བརྡུངས་ཀྱིས་ཇེ་གླུ་བླང་ཞིང་བྲོ་བརྡུང་བར་བྱའོ་ཞེས་དེ་དག་གིས་གླུ་བླང་ཞིང་བྲོ་བརྡུང་བར་བརྩམས་སོ། །རྒྱལ་པོ་ཟས་གཙང་གི་སྐྱེད་མོས་ཚལ་དུ་སྤྱད་པའི་རོལ་མོའི་སྒྲ་གང་
ཡིན་པ་དེ་ནི་ལུས་འཕགས་མའི་བུ་མ་ག་དྷཱར་བྱུང་བའི་རྒྱལ་པོ་མ་སྐྱེས་དགྲའི་གཡུལ་ངོར་སྤྱད་པའི་རོལ་མོའི་སྒྲ་ཡིན་པས་དེ་དག་གིས་རོལ་མོའི་སྒྲ་དབྱུང་བར་བརྩམས་པ་དང་། ཡངས་པ་ཅན་གྱི་ལིཙྪ་བཱི་དག་གིས་ཐོས་སོ། །ཐོས་ནས་དེ་དག་དངངས་ཏེ་སྨྲས་པ། ཤེས་ལྡན་དག་ཕ་གསོད་

པས་མ་སྦྲན་པར་དམག་དྲངས་ཏེ་འོངས་སོ་ཞེས་དེ་དག་གོ་བགོས་ཏེ་ཕྱིར་འབྱུང་བར་བརྩམས་སོ། །དྲུག་སྡེ་དག་ཀྱང་སྐྱེད་མོས་ཚལ་དེ་ནས་ཕྱིར་བྱུང་བ་དང་། དེ་དག་གིས་ཡངས་པ་ཅན་གྱི་ལིཙྪ་བཱི་དག་གོ་བགོས་ཏེ་ཕྱིར་བྱུང་བ་མཐོང་ནས་དྲུག་སྡེ་དག་གིས་དེ་དག་ལ་དྲིས་པ། ཤེས་
ལྡན་དག་གར་འདོང་། དེ་དག་གིས་སྨྲས་པ། འདིར་ཕ་གསོད་པ་འོངས་པས་དེ་དང་གཡུལ་དགྱེ་བའི་ཕྱིར་སུར་འདོང་ངོ་། །དེ་ག་ལ་འདུག །དེ་དག་གིས་སྨྲས་པ། འདིར་ལུས་འཕགས་མའི་བུ་མ་ག་དྷཱར་བྱུང་བའི་རྒྱལ་པོ་མ་སྐྱེས་དགྲའི་གཡུལ་ངོར་སྤྱད་པའི་རོལ་མོའི་སྒྲ་བྱུང་ངོ་། །
ཤེས་ལྡན་དག་དེ་ནི་ཁོ་བོ་ཅག་གིས་བཞད་གད་བྱས་པ་ཡིན་ན་ཁྱེད་ཅག་དེ་ལྟར་བྲེད་ངས་སམ། དེ་དག་གིས་སྨྲས་པ། འཕགས་པ་དག་ཁྱེད་ཀྱི་རོལ་མོའི་སྒྲའི་ཡོ་བྱད་དེ་དག་སྒྲ་ཕྱུང་ངམ། དྲུག་སྡེ་དག་གིས་སྨྲས་པ། ཁོ་བོ་ཅག་གིས་སྒྲ་ཕྱུང་ངོ་། །དེ་དག་གིས་སྨྲས་པ། འཕགས་པ་
དག་ཡངས་པ་ཅན་གྱི་ལིཙྪ་བཱི་དག་སྔངས་པས་ཁྱེད་ལ་གནོད་པ་བྱེད་ན་མི་རུང་གིས་སླར་ལོག་ཤིག །དེ་དག་ཕྱིར་ལོག་པ་དང་། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་ཁྱེད་ཅག་ཇི་སྟེ་ཕྱིར་ལོག །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཁོ་བོ་ཅག་དེའུ་
གསད་དོ། །སུས། ཡངས་པ་ཅན་གྱི་ལིཙྪ་བཱི་དག་གིས་སོ། །ཅིའི་ཕྱིར། དེ་དག་གིས་སྐབས་དེ་རྒྱས་པར་བརྗོད་པ་དང་། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་མི་མཛེས་པ་དེ་ལྟ་བུ་དེ་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་
ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་
སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སློང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་

བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་
པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་རིན་པོ་ཆེའམ། རིན་པོ་ཆེར་སྨོས་པ་རང་གི་ལག་གིས་ལེན་ཏམ། ལེན་
དུ་འཇུད་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ། །དེ་ནས་བཅོམ་ལྡན་འདས་ཡངས་པ་ཅན་དུ་ཅི་དགྱེས་པར་བཞུགས་ནས་མཉན་ཡོད་ག་ལ་དེ་ལོགས་སུ་ལྗོངས་རྒྱུ་ཞིང་གཤེགས་ནས་མཐར་གྱིས་རྒྱུ་ཞིང་གཤེགས་
པ་ན་མཉན་ཡོད་དུ་བྱོན་ནས་མཉན་ཡོད་ན་ཤར་གྱི་ཀུན་དགའ་ར་བ་ན་རི་དགས་འཛིན་གྱི་མའི་ཁང་བཟངས་ན་བཞུགས་སོ། །རི་དགས་འཛིན་གྱི་མ་ས་གས་བཅོམ་ལྡན་འདས་ཀོ་ས་ལ་དག་ཏུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས་མཉན་ཡོད་ན་བདག་གི་ཁང་བཟངས་ན་བཞུགས་
ཞེས་ཐོས་སོ། །ཐོས་ནས་ཀྱང་རྒྱན་ཐམས་ཅད་ཀྱིས་བརྒྱན་ཏེ་མཉན་ཡོད་ནས་བྱུང་ནས་བཅོམ་ལྡན་འདས་ག་ལ་བ་དེར་སོང་ངོ་། །དེ་ངོ་ཚ་དང་ལྡན་པ་ཡིན་པས་དེས་རྒྱན་བཀྲོལ་ཏེ། ཐུམ་པོར་བཅིངས་ནས་བུ་མོའི་ལག་ཏུ་བྱིན་ཏེ། བཅོམ་ལྡན་འདས་ཀྱི་སྤྱན་སྔར་སོང་ནས། བཅོམ་ལྡན་
འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །དེ་ན་ཧ་ཅང་ཐག་མི་རིང་བ་ན་སྣ་མའི་ཡལ་ག་མེ་ཏོག་རྒྱས་པ་ཞིག་འདུག་ནས་བུ་མོ་དེས་དེ་མཐོང་ནས་བསམས་པ། འདི་ལས་མེ་ཏོག་དག་བཏོགས་ཏེ་བཅོམ་ལྡན་འདས་ལ་མེ་ཏོག་སིལ་མ་དག་གིས་
གཏོར་གྱིས་འཐོག་ཏུ་འགྲོའོ་སྙམ་ནས་དེས་རྒྱན་དེ་མཐའ་གཅིག་ཏུ་བཞག་སྟེ། སྣ་མའི་ཡལ་ག་དེ་ལས་མེ་ཏོག་དག་བཏོགས་ནས། བཅོམ་ལྡན་འདས་ལ་མེ་ཏོག་སིལ་མ་དག་གིས་གཏོར་ཏེ་མཐའ་གཅིག་ཏུ་འདུག་གོ། །བཅོམ་ལྡན་འདས་ཀྱིས་དེ་ལ་ཡུན་རིང་དུ་ཆོས་བསྟན་ནས་དེས་

བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་སོང་བ་དང་། རྒྱན་གྱི་ཐུམ་པོ་དེ་དེ་ཉིད་དུ་བརྗེད་དེ་ལུས་སོ། །ཚེ་དང་ལྡན་པ་ཀུན་དགའ་བོས་དེས་རྒྱན་དེ་བོར་ཏེ་སོང་བ་མཐོང་ནས་དེས་བསམས་པ། འདི་ལྟར་བཅོམ་ལྡན་འདས་ཀྱིས་མ་གནང་མོད་ཀྱིས་འདི་ཉིད་རྐྱེན་དུ་
མཛད་དེ་གནང་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས། དེ་ནས་ཚེ་དང་ལྡན་པ་ཀུན་དགའ་བོས་རྒྱན་དེ་སྦེད་དུ་བཅུག་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་
གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་རི་དགས་འཛིན་གྱི་མ་ས་གས་རྒྱན་བསྐྱུད་དེ་དེ་མཆིས་ནས་བདག་ལ་བློ་སྐྱེས་པ། འདི་ལྟར་བཅོམ་ལྡན་འདས་ཀྱིས་མ་གནང་མོད་ཀྱི་
འདི་ཉིད་རྐྱེན་དུ་མཛད་དེ་གནང་བར་འགྱུར་བ་གང་ལགས་པ་དེ་ལྟ་བུའི་གནས་མཆིས་པར་འགྱུར་རོ་སྙམ་ནས་བདག་གིས་རྒྱན་དེ་སྦེད་དུ་སྩལ་ཏོ། །ཀུན་དགའ་བོ་འདི་ལྟར་ངས་གནང་བར་འགྱུར་བ་གང་ཡིན་པ་དེ་ཁྱོད་ཀྱིས་ཤེས་པ་ལེགས་སོ། །ལེགས་སོ། །ཀུན་དགའ་བོ་དེ་ལྟ་
བས་ན་ཀུན་དགའི་ར་བར་གཏོགས་པ་ན་འདུག་པའམ། གནས་ཁང་དུ་གཏོགས་པ་ན་འདུག་པ་མ་གཏོགས་སོ། །བུད་མེད་ཀྱི་ཡུལ་ནི་རྒྱན་ལ་ཉེ་བར་སྤྱོད་པ་ཡིན་པས་ས་གས་ཕྱི་དེ་ཉིན་པར་རྒྱན་དེ་དྲན་ནས། དེས་བུ་མོ་དེ་ལ་སྨྲས་པ། བུ་མོ་རྒྱན་ག་རེ། བུ་མོས་སྨྲས་པ།
ཇོ་མོ་དེ་ཉིད་དུ་བསྐྱུད་དོ། །དེས་སྨྲས་པ། སོང་ལ་ལོང་ཤིག །དེའི་བུ་དག་གིས་དེ་ཐོས་ནས། དེ་དག་གིས་སྨྲས་པ། ཡུམ་མཛོད་ཁང་དུ་བཞག་པར་མཁྱེན་ནམ། ཅི་ག་ལས་བླངས་ཏེ་མཆི་བར་འགྱུར། ས་གས་བུ་རྣམས་ལ་སྨྲས་པ། བུ་དག་ཁོ་མོ་ནི་ནོར་ཆུད་
མི་ཟ་བ་ཡིན་ནོ། །དེ་ནས་བུ་མོ་དེ་ཚེ་དང་ལྡན་པ་ཀུན་དགའ་བོའི་གན་དུ་སོང་བ་དང་། ཚེ་དང་ལྡན་པ་ཀུན་དགའ་བོས་སྨྲས་པ། བུ་མོ་ཅི་ལ་འོངས། བུ་མོས་སྨྲས་པ། འཕགས་པ་ཇོ་མོའི་རྒྱན་བསྐྱུད་དོ། །ཚེ་དང་ལྡན་པ་ཀུན་དགའ་བོས་སྨྲས་པ། འདི་ན་འདུག་གིས་

ཁྱེར་ཏེ་སོང་ཤིག །བུ་མོ་དེས་དེ་ཁྱེར་ཏེ་སོང་ནས་ས་ག་ལ་སྨྲས་པ། ཇོ་མོ་རྒྱན་དེ་འཚལ་ཏེ་མཆིས་པ་འདི་ལགས་སོ། །ས་གས་བུ་རྣམས་ལ་སྨྲས་པ། བུ་དག་རྒྱན་དེ་ཁྱེར་ཏེ་འོངས་པ་འདི་ཡིན་ཏེ། ཁོ་མོས་ཁོ་མོ་ནི་ནོར་ཆུད་མི་ཟ་བ་ཡིན་ནོ་ཞེས་མ་སྨྲས་སམ། བུ་
དེ་དག་གིས་བུ་མོ་དེ་ལ་དྲིས་པ། བུ་མོ་འཕགས་པ་གང་གིས་སྦེད་དུ་བཅུག་པར་གྱུར། བུ་མོས་སྨྲས་པ། འཕགས་པ་ཀུན་དགའ་བོས་སོ། །དེ་དག་གིས་སྨྲས་པ། འཕགས་པ་ཀུན་དགའ་བོས་གཟིགས་པས་དེས་ན་ཐོབ་པར་ཟད་ཀྱི། གལ་ཏེ་དྲུག་སྡེ་དག་
གིས་མཐོང་བར་གྱུར་དུ་ཟིན་ན། དེ་དག་གིས་བཅའ་བའི་རིན་དུ་བྱིན་གྱིས་བརླབས་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །དེ་དག་གིས་ད་བདག་ཅག་གིས་མ་འདི་ནོར་ཆུད་ཟ་བ་ཡིན་ནམ་མ་ཡིན་པ་བརྟགས་ན་ཤེས་པར་འགྱུར་རོ་སྙམ་ནས། དེ་
དག་གིས་མའི་སོར་གདུབ་རྒྱ་བླངས་ཏེ། ཁྲོན་པའི་ནང་དུ་བཅུག་པ་དང་། ས་གས་བུ་མོ་མངག་གཞུག་མ་ལ་སྨྲས་པ། བུ་མོ་ཆུ་ཆུས་ཤིག་དང་ཁྲུས་བྱའོ། །བུ་མོ་དེས་ཆུ་བཅུ་བར་བརྩམས་པ་དང་། དེའི་བུམ་པའི་ནང་དུ་སོར་གདུབ་རྒྱ་དེ་ཆུད་ནས། ས་ག་ཁྲུས་
བྱེད་པ་ན་སོར་གདུབ་རྒྱ་དེ་པང་པར་ལྷུང་ནས། ས་གས་བུ་རྣམས་ལ་བསྟན་ཏེ་སྨྲས་པ། བུ་དག་ཁོ་མོས་ཁོ་མོ་ནི་ནོར་ཆུད་མི་ཟ་བ་ཡིན་ནོ་ཞེས་མ་སྨྲས་སམ། ཡང་དེ་དག་གིས་སོར་གདུབ་རྒྱ་དེ་ཆུ་ཀླུང་གནས་ཅན་གྱི་ནང་དུ་འཕངས་པ་དང་། དེ་ཉ་བོ་ཆེས་མིད་ནས་ཉ་བོ་
ཆེ་དེ་ཉ་པ་དག་གིས་རྒྱ་མོས་བཅུས་ཏེ་ཕྱུང་ངོ་། །ས་གའི་བུ་མོ་མངག་གཞུག་མ་ཉ་ཤའི་ཕྱིར་ཚོང་དུས་སུ་སོང་ནས། དེས་ཉ་པ་ལས་ཉ་བོ་ཆེ་དེ་ཉོས་ཏེ་བཤས་པ་དང་། ཇི་ཙམ་ན་དེའི་ལྟོ་ནས་སོར་གདུབ་རྒྱ་དེ་བྱུང་བ་མཐོང་ནས། དེས་ས་ག་ལ་སྨྲས་པ། ཇོ་མོ་སོར་གདུབ་
རྒྱ་དེ་འདི་ལགས་སོ། །ས་གས་བུ་རྣམས་ལ་དེ་བསྟན་ཏེ་སྨྲས་པ། བུ་དག་ཁོ་མོས་ཁོ་མོ་ནི་ནོར་ཆུད་མི་ཟ་བ་ཡིན་ནོ་ཞེས་མ་སྨྲས་སམ། བུ་དེ་དག་གིས་སྨྲས་པ། ཡུམ་ནོར་ཆུད་མི་ཟ་བ་ལགས་སམ་མ་ལགས་པ་ད་དུང་ཡང་བརྟག་པར་བགྱིའོ་ཞེས་དེ་དག་གིས་དེའི་

དི་ན་ར་དག་གིས་སྲེ་མོ་ལྟ་བུའི་རྐྱལ་བུ་བཀང་སྟེ་ལམ་པོ་ཆེའི་བཞི་མདོར་བོར་བ་དང་། སྐྱེ་བོ་ཕལ་པོ་ཆེ་དེ་ནས་འགྲོ་བས་མཐོང་ནས་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་ནོ་ཞེས་ཡོངས་སུ་སྤངས་ཏེ་འགྲོ་ཞིང་འགའ་ཡང་ལེན་པར་མི་བྱེད་ནས། དེ་དག་གིས་སྨྲས་
པ། འདི་ན་སྲེ་མོ་ལྟ་བུའི་རྐྱལ་བུ་དི་ན་ར་དག་གིས་གང་བ་འདུག་ན་མི་ལེན་ཏམ། དེ་དག་གིས་སྨྲས་པ། འདི་ནི་སྦྲུལ་དུག་མྱུར་དུ་ཁྱབ་པར་བྱེད་པ་ཡིན་གྱི་སྲེ་མོ་ལྟ་བུའི་རྐྱལ་བུ་དི་ན་ར་དག་གིས་གང་བ་མ་ཡིན་གྱིས་མི་ལེན་ཏོ། །དེ་ནས་བུ་དེ་དག་ལྷགས་ཏེ་མ་ལ་སྨྲས་པ།
ཡུམ་ཁྱོད་ནི་ནོར་ཆུད་མི་ཟ་བ་ལགས་མད་དོ། །ཐམས་ཅད་དུ་ཡང་རི་དགས་འཛིན་གྱི་མ་ས་ག་ནི་ནོར་ཆུད་མི་ཟ་བ་ཡིན། བདེན་ནོ་ཞེས་སྒྲ་གྲགས་པར་གྱུར་ཏོ། །དགེ་སློང་གིས་ཀུན་དགའི་ར་བར་གཏོགས་པར་སྲེ་མོ་ལྟ་བུའི་རྐྱལ་བུ་དི་ན་ར་དག་གིས་གང་བ་ཞིག་ལྷུང་བ་མཐོང་ནས་
ཕྱོགས་དེར་མི་ཞིག་འོངས་པ་དང་། དགེ་སློང་དེས་མི་དེ་ལ་སྨྲས་པ། ཀྱེ་ནང་རྗེ་སྲེ་མོ་ལྟ་བུའི་རྐྱལ་བུ་འདི་ཁྱོད་ཀྱི་མ་ཡིན་ནམ། འཕགས་པ་ལགས་སོ། །ཁྱེར་ཏེ་སོང་ཤིག །དེས་དེ་ཁྱེར་ཏེ་མྱུར་བ་མྱུར་བར་སོང་བ་དང་། མི་གཞན་ཞིག་མགོ་རྡུལ་གྱིས་གང་སྟེ་ངུ་ཞིང་
འོངས་ནས་དེས་སྨྲས་པ། འཕགས་པ་ཁྱོད་ཀྱིས་སྲེ་མོ་ལྟ་བུའི་རྐྱལ་བུ་ཞིག་གཟིགས་སམ། དགེ་སློང་དེས་སྨྲས་པ། མི་ཞིག་གིས་ཁྱེར་ཏེ་སོང་ངོ་། །དེས་སྲེ་མོ་ལྟ་བུའི་རྐྱལ་བུ་དེ་མ་རྙེད་པ་ན་སྨྱོས་ཤིང་སེམས་འཁྲུགས་པས་དེ་དང་དེར་ཚོལ་བ་ན་ཚུལ་མ་ཡིན་པས་སྡུག་
བསྔལ་བར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་གྱ་ཚོམ་དུ་སྨྲ་བར་མི་བྱ་བར་དེ་ལ་སྲེ་མོ་ལྟ་བུའི་རྐྱལ་བུ་ཅི་འདྲ་བ་ཞིག །སྲང་དུ་པ་ཞིག་ཅེས་དྲི་བར་བྱའོ། །གལ་ཏེ་རྟགས་ལ་བབ་
པར་སྨྲ་ན་སྦྱིན་པར་བྱའོ། །གལ་ཏེ་རྟགས་ལ་མ་བབ་པར་སྨྲ་ན་སྦྱིན་པར་མི་བྱའོ། །དེ་དག་གིས་དེར་བོར་ཏེ་དོང་བ་ན་དེ་གཞན་དག་གིས་བརྐུས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་བོར་ཏེ་འདོང་བར་མི་བྱ་བར་འགྲོ་བའི་ལམ་ལོགས་སུ་སའམ། ལོ་མའི་

ཚོགས་དག་གིས་གཡོག་པར་བྱའོ། །དེ་དག་གིས་དེ་ཡལ་བ་ཁོ་ནར་བོར་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ཡལ་བར་དོར་བར་མི་བྱ་བར་ཞག་བདུན་ནམ་བརྒྱད་དུ་དེར་སོང་སྟེ་བསྡད་པར་བྱའོ། །གལ་ཏེ་བདག་པོ་འོངས་ཤིང་རྟགས་ལ་བབ་པ་སྨྲ་ན་སྦྱིན་པར་བྱའོ། །
གལ་ཏེ་མ་འོངས་ན་དེའི་འོག་ཏུ་དགེ་འདུན་གྱི་མཛོད་དུ་བཅུག་སྟེ་གཞག་པར་བྱའོ། །གལ་ཏེ་བདག་པོ་ཟླ་བ་དྲུག་འདས་ནས་འོངས་ཤིང་། རྟགས་ལ་བབ་པར་སྨྲ་ན་སྦྱིན་པར་བྱའོ། །གལ་ཏེ་མ་འོངས་ན་དེའི་འོག་ཏུ་དངོས་པོ་བརྟན་པོར་བཙོངས་ཏེ་གཞག་པར་བྱའོ། །གལ་ཏེ་
དེའི་ཚེ་བདག་པོ་འོངས་པར་གྱུར་ན་དེ་ལ་དེ་དངོས་པོ་འདིར་བཙོངས་ཀྱིས། རྗེས་སུ་ཡི་རང་བར་གྱིས་ཤིག་ཅེས་བརྗོད་པར་བྱའོ། །གལ་ཏེ་རྗེས་སུ་ཡི་རང་ན་དེ་ལྟ་ན་ལེགས། གལ་ཏེ་རྗེས་སུ་ཡི་རང་བར་མི་བྱེད་ན་སྦྱིན་པར་བྱའོ། །གལ་ཏེ་སྐྱེད་སློང་ན་ཁོ་བོ་ཅག་གིས་ཡོངས་
སུ་བསྐྱངས་པ་གང་ཡིན་པ་དེ་ཉིད་དྲིན་ཆེ་བར་མི་སེམས་སམ། ཁྱེར་ཏེ་སོང་ཤིག་ཅེས་བརྗོད་པར་བྱའོ། །དེ་ལྟ་བས་ན་ཀུན་དགའི་ར་བར་གཏོགས་པ་ན་འདུག་པའམ། གནས་ཁང་དུ་གཏོགས་པ་ན་འདུག་པ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་།
བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་
དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་རིན་པོ་ཆེའམ། རིན་པོ་ཆེར་སྨོས་པ་རང་གི་ལག་གིས་ལེན་ཏམ། ལན་དུ་འཇུད་ན་
ཀུན་དགའི་ར་བར་གཏོགས་པ་ན་འདུག་པའམ། གནས་ཁང་དུ་གཏོགས་པ་ན་འདུག་པ་མ་གཏོགས་ཏེ་ལྟུང་བྱེད་དོ། །དགེ་སློང་གིས་ཀུན་དགའི་ར་བར་གཏོགས་པའམ། གནས་ཁང་དུ་གཏོགས་པ་ན་རིན་པོ་ཆེའམ། རིན་པོ་ཆེར་སྨོས་པ་འདུག་པ་ལ་འདི་སུའི་

ཡིན་པ་དེ་ལེན་པར་འགྱུར་གྲང་སྙམ་པ་དེ་ལྟ་བུའི་སེམས་ཀྱིས་བླང་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་ཞེས་བྱ་བ་ནི་དྲུག་སྡེའམ། གཞན་ཡང་དེ་ལྟ་བུ་གང་ཡིན་པའོ། །རིན་པོ་ཆེའམ་ཞེས་བྱ་བ་ལ། རིན་པོ་ཆེ་ཞེས་བྱ་བ་ནི་ནོར་བུ་
དང་། མུ་ཏིག་དང་། བཻ་ཌཱུརྱ་དང་། མན་ཤེལ་དཀར་པོ་དང་། བྱི་རུ་དང་། གསེར་དང་། དངུལ་དང་། རྡོའི་སྙིང་པོ་དང་། སྤུག་དང་། དམར་པོ་དང་། གཡས་སུ་འཁྱིལ་པའོ། །རིན་པོ་ཆེར་སྨོས་པ་ཞེས་བྱ་བ་ལ། རིན་པོ་ཆེར་སྨོས་པ་ཞེས་བྱ་བ་ནི་
གཡུལ་ངོར་སྤྱད་པའི་མཚོན་ཆ་ཐམས་ཅད་དང་། རོལ་མོར་སྤྱད་པའི་ཡོ་བྱད་ཐམས་ཅད་དོ། །རང་གི་ལག་གིས་ཞེས་བྱ་བ་ནི་ལག་པས་ལག་པར་རོ། །ལེན་ཏམ་ཞེས་བྱ་བ་ནི་བདག་ཉིད་ཀྱིས་སོ། །ལེན་དུ་འཇུད་ན་ཞེས་བྱ་བ་ནི་གཞན་ནོ། །ཀུན་དགའི་ར་བར་གཏོགས་པ་ན་
འདུག་པ་ཞེས་བྱ་བ་ནི་ཀུན་དགའི་ར་བའི་ཕྱི་རོལ་ནའོ། །གནས་ཁང་དུ་གཏོགས་པ་ན་འདུག་པ་ཞེས་བྱ་བ་ནི་ཀུན་དགའི་ར་བའི་ནང་ནའོ། །མ་གཏོགས་ཏེ་ཞེས་བྱ་བ་ནི་ཀུན་དགའི་ར་བར་གཏོགས་པ་ན་འདུག་པའམ། གནས་ཁང་དུ་གཏོགས་པ་ན་འདུག་པ་བཞག་སྟེའོ། །
ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་
ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དགེ་སློང་གིས་ཞེས་བྱ་བ་ནི་ཆོས་འདི་པས་སོ། །ཀུན་དགའི་ར་བར་གཏོགས་པ་དང་། གནས་ཁང་དུ་གཏོགས་པ་ན་རིན་པོ་ཆེའམ། རིན་པོ་ཆེར་སྨོས་པ་འདུག་པ་ལ་འདི་སུའི་ཡིན་པ་
དེ་ལེན་པར་འགྱུར་གྲང་སྙམ་པ་དེ་ལྟ་བུའི་སེམས་ཀྱིས་བླང་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ལ། དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་མཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན།། །།བར་སྡོམ་ལ། ནོར་བུ་མགུལ་

རྒྱན་པི་བང་དང་། །དུང་དང་གཞུ་དང་མདའ་དང་ནི། །སྐུ་གཟུགས་སྐུ་གདུང་བཅས་པ་དང་། །སྔོན་གྱི་ཚུལ་ནི་ཐ་མ་ཡིན། །དགེ་སློང་གིས་ནོར་བུ་ལེན་ན་བདར་བ་ལེན་ན་ལྟུང་བྱེད་དུ་འགྱུར་ལ། མ་བདར་བ་ལེན་ན་ཉེས་བྱས་སུ་འགྱུར་རོ། །ནོར་བུ་ཇི་ལྟ་བ་བཞིན་དུ་མུ་ཏིག་དང་།
བཻ་ཌཱུརྱ་དང་། མན་ཤེལ་དཀར་པོ་དང་། བྱི་རུ་དང་། དངུལ་དང་། གསེར་དང་། རྡོའི་སྙིང་པོ་དང་། སྤུག་དང་། དམར་པོ་དང་། གཡས་སུ་འཁྱིལ་པ་དག་ཀྱང་དེ་བཞིན་ནོ། །ཐ་ན་ནོར་བུ་མཆིང་བུ་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་གིས་མགུལ་རྒྱན་
ལེན་ན་ལྟུང་བྱེད་དུ་འགྱུར་རོ། །མགུལ་རྒྱན་ཇི་ལྟ་བ་བཞིན་དུ་གདུ་བུ་རྒྱན་ཅན་དང་། དཔུང་རྒྱན་དང་། དོ་ཤལ་དང་། སེ་མོ་དོ་ཡང་དེ་བཞིན་ནོ། །ཐ་ན་སོག་མའི་ཕྲེང་བ་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་གིས་པི་བང་ལེན་ན་རྒྱུད་དང་བཅས་པ་ལེན་ན་ལྟུང་བྱེད་
དུ་འགྱུར་ལ། རྒྱུད་མེད་པ་ལེན་ན་ཉེས་བྱས་སུ་འགྱུར་རོ། །པི་བང་ཇི་ལྟ་བ་དེ་བཞིན་དུ་འོད་མ་དང་། བལ་ལ་རི་དང་། མ་ཧ་ཏི་དང་། སུ་གྷོ་ཤ་ཀ་ཡང་དེ་བཞིན་ནོ། །ཐ་ན་མཆུ་སྦྲང་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་གིས་དུང་ལེན་ན་སྒྲ་འབྱིན་པ་ལེན་ན་ལྟུང་
བྱེད་དུ་འགྱུར་ལ། སྒྲ་མི་འབྱིན་པ་ལེན་ན་ཉེས་བྱས་སུ་འགྱུར་རོ། །དུང་ཇི་ལྟ་བ་བཞིན་དུ་རྔ་བོ་ཆེ་དང་། རྔ་པ་ཊ་ཧ་དང་། རྫ་རྔ་ཡང་དེ་བཞིན་ནོ། །ཐ་ན་རྫ་རྔ་ཁ་གཅིག་པ་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་གིས་གཞུ་ལེན་ན་རྒྱུད་དང་བཅས་པ་ལེན་ན་ལྟུང་བྱེད་དུ་འགྱུར་
ལ། རྒྱུད་མེད་པ་ལེན་ན་ཉེས་བྱས་སུ་འགྱུར་རོ། །གཞུ་ཇི་ལྟ་བ་བཞིན་དུ་རལ་གྲི་དང་། རལ་གྲི་ཀྱོག་པོ་དང་། རལ་གྲི་སོ་གཉིས་པ་དང་། མདུང་དང་། འཕང་མདུང་དང་། ལྕགས་ཀྱོ་ཡང་དེ་བཞིན་ནོ། །ཐ་ན་གཞུའུ་ལེན་ན་ཡང་ཉེས་བྱས་སུ་འགྱུར་རོ། །དགེ་སློང་
གིས་མདའ་ལེན་ན་མདེའུ་དང་བཅས་པ་ལེན་ན་ལྟུང་བྱེད་དུ་འགྱུར་ལ། མདེའུ་མེད་པ་ལེན་ན་ཉེས་བྱས་སུ་འགྱུར་རོ། །མདའ་ཇི་ལྟ་བ་བཞིན་དུ་ལྕགས་མདའ་དང་། མདའ་ཕྱེད་ལྕགས་ལས་བྱས་པ་ཡང་དེ་བཞིན་ནོ། །ཐ་ན་མདའ་ལྟར་བཅོས་པ་ལེན་ན་ཡང་ཉེས་བྱས་སུ་འགྱུར་

རོ། །དགེ་སློང་གིས་སྐུ་གཟུགས་ལེན་ན་སྐུ་གདུང་དང་བཅས་པ་ལེན་ན་ལྟུང་བྱེད་དུ་འགྱུར་ལ། སྐུ་གདུང་མེད་པ་ལེན་ན་ཉེས་བྱས་སུ་འགྱུར་རོ། །སྟོན་པའི་འདུ་ཤེས་ཉེ་བར་བཞག་སྟེ་ལེན་ན་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་
འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རི་དགས་འཛིན་གྱི་མ་ས་གས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ནོར་ཆབ་མི་
འཚལ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རི་དགས་འཛིན་གྱི་མ་ས་ག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འགྱུར་བ་དག་བྱས་ཤིང་བསགས་པས། རི་དགས་
འཛིན་གྱི་མ་ས་ག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་
ཁམས་ལ་མི་འགྱུར་གྱིས། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་
རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན། སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་ངོ་། །གང་གི་ཚེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་སངས་རྒྱས་ཀྱི་མཛད་

པ་མཐའ་དག་མཛད་ནས། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དེའི་ཚེ་ན། རྒྱལ་པོ་ཀྲྀ་ཀཱི་ཞེས་བྱ་བ་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་།
འཐབ་པ་དང་། འཁྲུགས་ལོང་དང་། ནང་འཁྲུགས་རབ་ཏུ་ཞི་བ། ཆོམ་རྐུན་དང་། མུ་གེ་དང་། ནད་དང་བྲལ་བ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་འཇུད་པ། ཆོས་དང་ལྡན་པ། ཆོས་ཀྱི་རྒྱལ་པོ་
ཆོས་ཀྱི་རྒྱལ་སྲིད་བྱེད་དུ་འཇུག་པས་རིན་པོ་ཆེ་སྣ་བཞི་ལས་བྱས་པའི་མཆོད་རྟེན་རྒྱར་དཔག་ཚད་གཅིག་པ། འཕང་དུ་དཔག་ཚད་ཕྱེད་པ་བྱེད་དུ་བཅུག་གོ། །དེ་ན་བུད་མེད་རྒན་མོ་སྐྱབས་སུ་འགྲོ་བ་དང་། བསླབ་པའི་གཞི་བླངས་པ་གཅིག་ཅིག །བཅོམ་ལྡན་འདས་ཡང་དག་
པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་བསྙེན་བཀུར་བྱེད་ཅིང་འདུག་གོ། །དེ་ནས་རྒྱལ་པོ་ཀྲྀ་ཀཱི་དཔྱིད་ཀྱི་དུས་ཀྱི་ཚེ་ཤིང་ལྗོན་པ་མེ་ཏོག་ཁ་བྱེ་ཞིང་འབྲས་བུ་རྒྱས་པ། ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་དང་།
ཤང་ཤང་ཏེའུ་སྒྲ་འབྱིན་པའི་ཚལ་གསེབ་དག་ཏུ། བཙུན་མོའི་འཁོར་དང་ལྷན་ཅིག་སྐྱེད་མོས་ཚལ་གྱི་སར་བྱུང་ནས། རྒྱལ་པོ་དེ་མྱུར་བ་མྱུར་བར་ཡང་བཱ་རཱ་ཎ་སཱིར་ཞུགས་སོ། །བཙུན་མོའི་འཁོར་གྱིས་སྣ་མའི་ཡལ་ག་དག་ལ་མུ་ཏིག་གི་ཆུན་པོ་དཔྱངས་ཏེ་ཁྲུས་བྱ་བར་བརྩམས་
པ་དང་། དེས་རྒྱལ་པོ་མྱུར་བ་མྱུར་བར་བཱ་རཱ་ཎ་སཱིར་ཞུགས་པ་ཐོས་ནས། དེ་ཡང་བརྟད་པ་དང་བཅས་པས་མུ་ཏིག་གི་ཆུན་པོ་བརྗེད་དེ་བོར་ནས་བཱ་རཱ་ཎ་སཱིར་ཞུགས་སོ། །བུད་མེད་རྒན་མོ་དེས་མུ་ཏིག་གི་ཆུན་པོ་དེ་མཐོང་ནས། དེས་མུ་ཏིག་གི་ཆུན་པོ་དེ་སྨྱུག་མ་ལ་བཏགས་ཏེ་
བཞག་གོ། །བུད་མེད་ཀྱི་ཡུལ་ནི་རྒྱན་ལ་ཉེ་བར་སྤྱོད་པ་ཡིན་པས། དེས་ཕྱི་དེ་ཉིན་པར་རྒྱན་དེ་དྲན་ནས། དེས་རྒྱལ་པོ་ལ་གསོལ་པ་དང་། རྒྱལ་པོས་ཞོ་ཤས་འཚོ་བ་དག་དེར་བཏང་ནས། དེ་དག་གིས་མུ་ཏིག་གི་ཆུན་པོ་སྨྱུག་མ་ལ་བཏགས་པ་དེ་མཐོང་བ་དང་། དེ་

དག་གིས་བུད་མེད་རྒན་མོ་དེ་ལ་དྲིས་པ། མུ་ཏིག་གི་ཆུན་པོ་འདི་སུས་སྨྱུག་མ་ལ་བཏགས་ཏེ་བཞག །རྒན་མོས་སྨྲས་པ། ཁོ་མོས་སོ། །དེ་དག་གིས་མུ་ཏིག་གི་ཆུན་པོ་དེ་རྒྱལ་པོ་ལ་ཕུལ་བ་དང་། རྒྱལ་པོས་ཞོ་ཤས་འཚོ་བ་དག་ལ་སྨྲས་པ། ཁྱོད་ཅག་
གིས་དེ་ག་ལས་རྙེད། དེ་དག་གིས་སྨྲས་པ། བུད་མེད་རྒན་མོ་ཞིག་གིས་སྨྱུག་མ་ལ་བཏགས་ཏེ་བཞག་པ་དེ་ནས་བདག་གིས་རྙེད་དོ། །རྒྱལ་པོས་སྨྲས་པ། བུད་མེད་རྒན་མོ་དེ་བོས་ཤིག །དེ་དག་གིས་དེ་བོས་ཏེ་སྨྲས་པ། ལྷ་བུད་མེད་རྒན་མོ་དེ་འདི་ལགས་སོ། །
རྒྱལ་པོས་སྨྲས་པ། ཁྱོད་ཀྱིས་མུ་ཏིག་གི་ཆུན་པོ་འདི་སྨྱུག་མ་ལ་བཏགས་ཏེ་བཞག་པ་བདེན་ནམ། རྒན་མོས་སྨྲས་པ། ལྷ་མད་དོ། །རྒྱལ་པོས་སྨྲས་པ། ཁྱོད་དེ་ལ་འདོད་པ་མ་སྐྱེས་སམ། རྒན་མོས་སྨྲས་པ། ལྷ་བདག་གིས་བཅོམ་ལྡན་འདས་ཡང་དག་པར་
རྫོགས་པའི་སངས་རྒྱས་འོད་སྲུང་གི་སྤྱན་སྔ་ནས་སྐྱབས་སུ་མཆི་བ་དང་། བསླབ་པའི་གཞི་དག་བླངས་པས་བདག་གཞན་གྱི་རྫས་ལ་འདོད་པའི་ཆོས་སྐྱེད་པར་ག་ལ་འགྱུར། རྒྱལ་པོ་དགའ་ནས་དེས་དེ་ལ་མུ་ཏིག་གི་ཆུན་པོ་དེ་ཉིད་བྱ་དགར་བྱིན་ཏེ། ཁྱོད་ཀྱིར་གྱུར་གྱི་སོང་ཤིག་
ཅེས་སྨྲས་སོ། །རྒན་མོ་དེས་མུ་ཏིག་གི་ཆུན་པོ་དེ་ཁྱེར་ཏེ་བཙོངས་ནས། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་མཆོད་པ་དང་། བསྙེན་བཀུར་བྱས་ཏེ་ཞབས་གཉིས་ལ་གཏུགས་ནས་སྨོན་ལམ་འདི་སྐད་ཅེས། བདག་དགེ་
བའི་རྩ་བ་འདིས་ནོར་ཆུད་མི་ཟ་བར་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་བུད་མེད་རྒན་མོ་གང་ཡིན་པ་དེ་ནི་རི་དགས་འཛིན་གྱི་མ་ས་ག་འདི་ཉིད་ཡིན་ཏེ། འདིས་དེའི་ཚེ་སྨོན་ལམ་དེ་ལྟར་བཏབ་པའི་ལས་དེའི་རྣམ་པར་སྨིན་པས་ནོར་ཆུད་མི་ཟ་བར་གྱུར་ཏོ། །
དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག་པ་ཡིན། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་

དག་དེ་ལྟ་བས་ན་ལས་གཅིག་ཏུ་གནག་པ་དང་། འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་རྣམས་ལ་བཙལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ལོངས་པའི་གཞིར་གཏོགས་པའི་ལྟུང་བྱེད་དེ་ལྔ་བཅུ་རྩ་དགུ་པ་རྫོགས་སྷོ།། །།
འདུལ་བ་རྣམ་པར་འབྱེད་པ། བམ་པོ་དྲུག་བཅུ་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ། ཀ་ལན་ད་ཀའི་གནས་ན་བཞུགས་སོ། །རྒྱལ་པོའི་ཁབ་ན་ཆུ་དྲོན་གསུམ་ཡོད་པ་གཅིག་ཏུ་ནི་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་
ཅན་སྙིང་པོ་ཁྲུས་བྱེད། གཉིས་པར་ནི་བཙུན་མོའི་འཁོར་ཁྲུས་བྱེད། གསུམ་པར་ནི་གྲོང་རྡལ་གྱི་མི་དང་ཡུལ་གྱི་མི་དག་ཁྲུས་བྱེད་དོ། །མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བསམས་པ། བདག་གིས་བཅོམ་ལྡན་འདས་ཉན་ཐོས་ཀྱི་
དགེ་འདུན་དང་བཅས་པ་ལ་རྣམ་པ་དུ་མའི་སྒོ་ནས་ཡོ་བྱད་ཐམས་ཅད་ཀྱིས་བསྟབས་ན་ཁྲུས་ཀྱིས་མ་བསྟབས་ཀྱིས། བདག་གིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་ཁྲུས་ཀྱིས་བསྟབས་པར་བྱའོ་སྙམ་དུ་རིག་ནས། བཅོམ་ལྡན་འདས་ག་ལ་བ་དེར་
སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས། བཅོམ་ལྡན་འདས་ལ་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་
པ་རྒྱལ་པོའི་ཁབ་འདི་ན་ཆབ་དྲོན་གསུམ་མཆིས་པ་གཅིག་ཏུ་ནི་བདག་ཁྲུས་བགྱིད། གཉིས་པར་ནི་མཆིས་འབྲང་གི་འཁོར་ཁྲུས་བགྱིད། གསུམ་པར་ནི་གྲོང་རྡལ་གྱི་མི་དང་ཡུལ་མི་དག་ཁྲུས་བགྱིད་ན། བཙུན་པ་གང་དུ་བདག་ཁྲུས་བགྱིད་པ་དེར་འཕགས་པ་དག་
ཀྱང་ཁྲུས་མཛད་ཅིང་། གང་གི་ཚེ་འཕགས་པ་དག་ཁྲུས་མཛད་པ་དེའི་ཚེ་ན་བདག་སྡོད་པར་བགྱིད་ལ། གང་གི་ཚེ་བདག་ཁྲུས་བགྱིད་པ་དེའི་ཚེ་ཡང་འཕགས་པ་བདག་གིས་གཞེས་པར་མཛད་དུ་གསོལ། གང་དུ་མཆིས་འབྲང་གི་འཁོར་ཁྲུས་བགྱིད་པ་དེར་ཡང་འཕགས་མ་

དག་ཁྲུས་མཛད་ཅིང་། གང་གི་ཚེ་འཕགས་མ་དག་ཁྲུས་མཛད་པ་དེའི་ཚེ་ཡང་མཆིས་འབྲང་གི་འཁོར་སྡོད་པར་བགྱིད་ལ། གང་གི་ཚེ་མཆིས་འབྲང་གི་འཁོར་ཁྲུས་བགྱིད་པ་དེའི་ཚེ་ཡང་འཕགས་མ་དག་གིས་གཞེས་པར་མཛད་དུ་གསོལ། བཅོམ་ལྡན་
འདས་ཀྱིས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཅང་མི་གསུང་བས་གནང་ངོ་། །དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་
གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དྲུག་སྡེ་དག་ལ་བློ་སྐྱེས་པ། དགའ་བོ་ཉེ་དགའ་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་དད་པ་དང་ལྡན་པ་ནི་ཡིན་ན་དད་པ་ཇི་ལྟ་བུ་དང་ལྡན་པ་བལྟས་ཁྲུས་བྱེད་དུ་འདོང་ངོ་ཞེས་
དེ་དག་དེར་ཁྲུས་བྱེད