Luận tạng Tây Tạng (Tengyur) — Tập 202

བུས་སུ་ནི། །གཡའ་ཞིང་ཚ་ལ་ན་བཅས་བརྟན། །མུངྒ་ཙམ་གྱི་ཁྲག་འབྲུམ་
དམར། །འབྲུམ་ཕྲན་མིག་ནད་ཅེས་བྱའོ། །ཞེས་བྱ་བ་ལ། མིག་མཆུའི་མཐའ་མའི་ཆ་འམ་དབུས་ཀྱི་གནས་སུ་འབྲུམ་ཕྲན་མུངྒ་ཞེས་བྱ་བ་མོན་སྲན་སྡེའུ་ཙམ་གཡའ་བ་ལ་སོགས་པ་དང་ལྡན་ལ་བརྟན་ཞིང་མི་འགྱུར་བ་མདོག་དམར་པོར་གནས་པ་དེ་ནི་འབྲུམ་ཕྲན་གྱི་མིག་
ནད་ཅེས་བྱའོ། །ནད་ཀྱིས་མིག་མཆུའི་ཕྱི་རོལ་སྐྲངས། །ནང་དུ་བུ་ག་ཕྲ་མོས་ཁྱབ། །འཛག་བཅས་ནང་ན་ཆུ་ཡོད་དེ། །པདྨའི་རྩ་འདྲ་པད་རྩ་ཡིན། །ཞེས་བྱ་བ་ལ། ནད་དམིགས་གསུམ་པོ་དག་གིས་མིག་མཆུའི་ཕྱི་རོལ་གྱི་ཆ་སྐྲངས་པར་གྱུར་ཅིང་ནང་ན་བུ་ག་ཕྲ་
མོས་ཀུན་དུ་ཁྱབ་པར་གྱུར་ལ་ཆུ་སེར་འཛག་པ་དང་བཅས་ཤིང་ནང་ན་ཆུ་ཡོད་པའི་མིག་མཆུའི་ནང་དེ་ནི་པདྨའི་རྩ་བའི་དབྱིངས་འདྲ་བར་འདུག་པ་དེའི་མིང་ནི་མིག་མཆུའི་ནད་པདྨ་ལྟ་བུ་ཞེས་བྱའོ། །ནད་གཞི་གསུམ་དང་ཁྲག་འཁྲུགས་པས། །མིག་མཆུའི་ནད་ནི་ལྡང་བ་དང་། །

རྒྱུ་མེད་པར་ནི་རྙེད་འགྱུར་གང་། །དེ་ནི་མིག་མཆུ་འཁྲུགས་ཞེས་བྱ། །ཞེས་བྱ་བ་ལ། ནད་གཞི་གསུམ་དང་ཁྲག་འཁྲུགས་པར་གྱུར་པས་གང་མིག་མཆུའི་ནད་ཡང་དང་ཡང་དུ་ལྡང་བར་གྱུར་ཅིང་རྒྱུ་མེད་པར་གློ་བུར་དུ་རྙིད་ཅིང་ཅུང་ཟད་སྐམས་ཏེ།
ཞུམ་པར་གྱུར་པའི་མིག་ནད་གང་ཡིན་པ་དེ་ནི་མིང་མིག་མཆུ་འཁྲུགས་པ་ཞེས་བྱ་བའི་མིང་དུ་བཏགས་པ་ཡིན་ནོ། །ནད་ཀྱིས་མིག་མཆུ་དྲི་མ་ཁྲག །སྐྲངས་རྣགས་ན་བཅས་མིག་མཆུ་སྔོ། །ཞེས་བྱ་བ་ལ། རླུང་ལ་སོགས་པའི་ནད་གསུམ་གྱིས་མིག་མཆུ་གང་དྲི་མ་དང་
བཅས་ཤིང་ཁྲག་ཡོད་ལ་སྐྲངས་པ་དང་། རྣགས་པ་དང་། ན་བ་དང་བཅས་པ་ནི། མིག་མཆུའི་ནད་སྔོན་པོ་ཞེས་བཤད་དོ། །གཡལ་ཞིང་སྐྲངས་ལ་དམར་བ་དང་། །མིག་མཆུ་འབྱར་བ་འབྱར་ཞེས་བྱ། །ཞེས་བྱ་བ་ལ། དྲི་མ་དང་ཁྲག་ལ་སོགས་པའི་ནད་ཀྱིས་
གཡའ་བ་ལ་སོགས་པ་དང་ལྡན་ཞིང་། མིག་མཆུ་གཉིས་ཕན་ཚུན་འབྱར་ཞིང་དབྱེ་བར་དཀའ་བ་དེ་ནི་མིག་མཆུའི་ནད་འབྱར་བ་ཞེས་བྱའོ། །མིག་མཆུའི་ནད་ནི་སྲ་ཞིང་རྩུབ། །འབྲུམ་ཕྲན་ཕྱེ་མ་འདྲ་ཞེས་བྱ། །ཞེས་བྱ་བ་ལ། མིག་མཆུའི་ནང་གི་ཆར་འབྲུམ་ཕྲན་སྲ་ཞིང་
རྩུབ་པར་བྱེ་མ་འདྲ་བ་ཡོད་པ་ནི་བྱེ་མ་འདྲ་བའི་མིག་མཆུའི་ནད་ཅེས་བྱའོ། །གནག་ཅིང་འདམ་འདྲ་འདམ་བུའོ། །ཞེས་བྱ་བ་ལ། མིག་མཆུ་གང་ཁ་དོག་ནག་ཅིང་འདམ་ལྟར་རྙོག་ཅན་དུ་གནས་པ་གང་ཡིན་པ་དེ་ནི་འདམ་བུ་ལྟ་བུ་ཞེས་བྱའོ། །མདོག་འདྲ་ཤ་ནི་མང་པོས་
རྒྱས། །ན་ཤས་ཆེ་བ་ཞེས་བྱའོ། །ཞེས་བྱ་བ་ལ། མིག་མཆུ་གང་ཤ་མདོག་འདྲ་བའི་ཤ་མང་པོས་ཆ་མཉམ་དུ་རྒྱས་ཤིང་ཁྱབ་པར་གྱུར་པ་ནི་མིང་ཤས་ཆེ་བ་ཞེས་བྱའོ། །བྱིས་པ་སོ་སྐྱེས་ཚེ་ན་འབྱུང་། །དེས་ནི་བྱིས་པའི་མིག་སྐྲང་ཞིང་། །མིག་དམར་ལྟ་བར་མི་ནུས་ལ། །མིག་
མཆུ་གཟེར་ཞིང་སྤྱི་བག་འཛག །རྣ་བ་སྣ་དང་མིག་ཉིད་བྱེད། །གང་ཡིན་དེ་ནི་སྒྲ་ངན་ཡིན། །ཞེས་བྱ་བ་ལ། སྒྲ་ངན་ཞེས་བྱ་བའི་མིག་མཆུའི་ནད་ནི་བྱིས་པ་སོ་སྐྱེ་བ་ཉིད་ཀྱི་ཚེ་ན་འབྱུང་ཞིང་དེ་རྒྱུར་གྱུར་པ་ཡིན་ཏེ། ནད་དེས་བྱིས་པའི་མིག་སྐྲངས་པ་ལ་སོགས་པའི་མཚན་ཉིད་

དང་ལྡན་ཞིང་རྣ་བ་དང་སྣ་དང་མིག་ལག་པས་ཉེད་པར་བྱེད་དེ། །དའི་མིང་ནི་སྒྲ་ངན་པ་ཞེས་བྱའོ། །རྫི་འགགས་རྫི་མ་འདུས་ཤིང་ཞུམ། །མིག་མཆུའང་དེ་འདྲར་གྱུར་པ་དང་། །རྩུབ་ཅིང་ནང་དུ་ཁ་བལྟར་ལ། །སྤུ་གཞན་ཡང་ནི་ཚེར་མ་ལྟར། །རྩེ་མོ་རྣོན་པོ་སྐྱེས་གྱུར་ཅིང་། །
དེས་བདར་མིག་ནི་སྐྲངས་པ་དང་། །ཚ་ཞིང་རླུང་ལ་སོགས་མི་བཟད། །བཏོན་ན་ཅུང་ཟད་བདེ་བར་བྱེད། །ཅེས་བྱ་བ་ལ། རྫི་མ་འགགས་པ་ཞེས་བྱ་བའི་མིག་མཆུའི་ནད་ནི་རྫི་མ་ནང་དུ་འདུས་ཤིང་མིག་རྙིད་ཅིང་ཞུམ་པ་དང་། །མིག་གི་མཆུ་ཡང་ནང་དུ་འདུས་ཤིང་རྙིད་པར་འགྱུར་
བ་དང་རྩུབ་ཅིང་ཁ་ནང་དུ་བལྟས་པ་དང་། རྫི་མའི་སྤུ་གཞན་དག་ཀྱང་ཚེར་མ་ལྟར་རྣོ་ཞིང་རྩུབ་པ་སྐྱེས་པས་དེས་མིག་བདར་ཞིང་རེག་པས་སྐྲད་པར་འགྱུར་བ་དང་། ཤ་ཆེར་ཚ་བ་དང་། མིག་དེས་རླུང་དང་ཚ་བ་ལ་སོགས་པ་མི་བཟོད་ཅིང་བསྟེན་མི་ནུས་པ་དང་། སྤུ་རྩུབ་ཅིང་རྣོ་བ་སྐྱེས་པ་དེ་
བཏོན་ཅིང་བསལ་ན་གཉིས་ཀ་ཅུང་ཟད་ཅིག་བདེ་ཞིང་ཞི་བར་གྱུར་ནས་སླ་ཡང་དེ་བཞིན་དུ་འགྱུར་བ་ཡིན་ཏེ། དེ་ནི་རྫི་མ་འགགས་པའི་མིག་ནད་ཅེས་བྱའོ། །མིག་ཕུགས་གྲྭ་མཚམས་ཕྱི་རོལ་དུ། །ཐོར་བུ་སྲ་ཞིང་མཐོ་བ་དང་། །དམར་ཞིང་མཆི་མ་རྣག་ཁྲག་འཛག །ཡང་ཡང་རྒྱས་
པ་སློན་པ་ཡིན། །ཞེས་བྱ་བ་ལ། མིག་ཕུགས་ཞེས་བྱ་བ་སྣ་གོང་གི་མིག་གི་གྲྭ་མཚམས་ཀྱི་ཕྱི་རོལ་གྱི་ཆར་ཐོར་བུ་སྲ་བ་ལ་སོགས་པའི་མཚན་ཉིད་དང་ལྡན་པ་ཡང་དང་ཡང་དུ་རྒྱས་པར་འགྱུར་བ་དེ་ནི་མིག་སློན་པ་ཞེས་བྱའོ། །ནད་གཞི་གསུམ་དང་ཁྲག་ལས་ནི། །མིག་མཆུའི་ནང་
ན་ཤའི་དུམ་བུ། །རྨེན་བུ་སྲ་ལ་ནད་མེད་པ། །ཕྱི་རོལ་མི་མཉམ་གཡོ་མཛེར་པ། །ཞེས་བྱ་བ་ལ། རླུང་ལ་སོགས་པའི་ནད་གཞི་གསུམ་ཁྲག་དང་བཅས་པ་ལས་མིག་མཆུའི་ནང་ན་ཤའི་དུམ་བུ་རྨེན་བུ་ཆགས་ཤིང་དེ་སྲ་བ་དང་ཟུག་གཟེར་གྱི་ནད་མེད་པ་དང་། །ཕྱི་རོལ་མི་མཉམ་
ཞིང་གཡོ་བར་གྱུར་པའི་མིག་མཆུའི་ནད་དེ་ནི་མིག་གི་མཛེར་པ་ཞེས་བྱའོ། །དེ་ལྟར་ཉི་ཤུ་རྩ་བཞི་པོ། །མིག་མཆུ་ལ་གནས་ནད་ཡིན་ནོ། །ཞེས་བྱ་བ་ལ། དེ་ལྟར་འཛུམས་པར་དཀའ་བ་ལ་སོགས་པ་གྲངས་ཉི་ཤུ་རྩ་བཞིས་བཤད་པ་དེ་དག་ནི་མིག་མཆུ་ལ་གནས་པའི་ནད་ཡིན་ནོ། །

།ཞེས་བཤད་དོ། །དེ་ལ་དང་པོར་སྨན་གྱིས་གསོ། །དེ་འོག་གཉིས་དང་འབྲུམ་བུ་སྤང་། །ཞེས་བྱ་བ་ལ། འདིར་དེ་དག་གི་ནང་ནས་དང་པོར་འཛུམས་པར་དཀའ་བ་ཞེས་བྱ་བའི་མིག་མཆུའི་ནད་ནི་སྨན་གྱི་སྦྱོར་བས་གསོ་བར་བྱའོ། །དེའི་འོག་མ་སྟེ་
བཙུམས་པ་དང་། རླུང་གིས་གནོད་པ་གཉིས་དང་མིག་འབྲུམ་ཞེས་བྱ་བའི་མིག་མཆུའི་ནད་ནི་གསོར་མི་རུང་བས་སྤང་བར་བྱའོ། །རྫི་མ་འགགས་པ་གསོར་རུང་ཙམ། །ལྷག་མ་མཚོན་གྱིས་གསོ་བར་བྱ། །ཞེས་བྱ་བ་ལ། མིག་མཆུའི་ནད་རྫི་མ་འགགས་པ་ཞེས་བྱ་བ་
ནི་རེ་ཞིག་མི་སྤང་བ་ཙམ་དུ་གསོར་རུང་བ་ཡིན་ལ་ལྷག་མ་ནི་མཚོན་གྱིས་གདབ་ཅིང་གཙགས་བུས་གསོར་རུང་པ་ཡིན་ནོ། །དེ་དག་ལས་ཀྱང་རྫི་མ་འབྱི། །གཙགས་པར་བྱ་ལ་མིག་མཛེར་གཅད། །ཆགས་དང་པད་རྩ་ཀུ་མུ་ད། །བརྩེགས་དང་འབྲུམ་ཕྲན་སློན་པ་འདྲ་ལ། །
ཞེས་བྱ་བ་ལ། མཚོན་གྱིས་གསོ་བར་བྱ་བ་དེ་དག་ལས་ཀྱང་རྫི་མ་འབྱི་བ་ཞེས་བྱ་བའི་ནད་ནི་འོག་ནས་བཤད་པའི་ཚུལ་གྱིས་གཙགས་ཤིང་གསོ་བར་བྱའོ། །དེ་དག་ལས་ཀྱང་མིག་མཛེར་ཞེས་བྱ་བ་ནི་གཅད་པར་བྱའོ། །ཆགས་པ་ནས་སློན་པའི་བར་ནི་མཚོན་གྱིས་འདྲལ་ཞིང་
དབུག་པར་བྱའོ། །མིག་མཆུའི་ཤ་སྔོ་བྱེ་མ་འདྲ། །དབྱར་དང་བསྐྱེད་བྱ་ཞེས་པ་བཞི། །འདམ་བཅས་ཤས་ཆེར་བྱས་པ་དང་། །སྒྲ་ངན་བཅས་པ་མཚོན་གྱིས་བཞར། །ཞེས་བྱ་བ་ལ། མིག་མཆུའི་ཤའི་ནད་ལ་སོགས་པ་བཅུ་གསུམ་ནི་མཚོན་གྱིས་ཕྱི་ཞིང་བཞར་ཏེ་གསོ་བར་
བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་བརྒྱད་པའི་རྣམ་པར་འགྲེལ་པའོ།། །།དེ་ནས་མིག་མཆུའི་ནད་གསོ་བ་བཤད་པར་བྱའོ། །
ཞེས་བྱ་བ་ལ། འཛུམས་པར་དཀའ་ལ་མར་རྙིང་ནི། །རྒུན་འབྲུའི་ལྡེ་གུ་ཆུར་བསྐོལ་བར། །ཁ་ར་བཏབ་དང་སྣ་སྨན་དང་། །དུད་པ་མིག་སྨན་སྣུམ་ཅན་གཏང་། །ཞེས་བྱ་བ་ལ། འཛུམ་པར་དཀའ་བ་ཞེས་བྱ་བའི་མིག་ནད་ལ་ནི་མར་རྙིང་པ་དང་རྒུན་འབྲུའི་ལྡེ་གུ་བསྐོལ་བའི་ཁུ་

བ་དང་བཅས་པར་བཙོས་པའི་སྨན་མར་ལ་ཁ་ར་བཏབ་པ་བཏང་བ་དང་། དེ་བཞིན་དུ་སྣ་ནས་གཏང་བའི་སྨན་དང་དུད་པས་བདུགས་པ་དང་། མིག་སྨན་སྣུམ་ཅན་གང་ཡིན་པ་གཏང་བར་བྱའོ། །ཀུ་མུ་ད་ལ་ཞལ་ཞལ་གདབ། །དེ་སྟེང་རྒྱམ་ཚ་གདབ་པར་བྱ། །ཤིང་མངར་དང་
ནི་སྐྱུ་རུ་ར། །པ་ཏོ་ལ་བསྐོལ་ཆུ་བླུགས་བྱ། །ཞེས་བྱ་བ་ལ། ཀུ་མུ་ད་ཞེས་བྱ་བའི་མིག་མཆུའི་ནད་ལ་ནི། གཙགས་བུས་ཞལ་ཞལ་བཏབ་ལ་དེའི་སྟེང་དུ་རྒྱམ་ཚྭའི་ཕྱེ་མ་བཏབ་སྟེ། ཤིང་མངར་ལ་སོགས་པ་བསྐོར་བའི་ཆུ་དྲོ་འཇམ་ཙམ་བླུགས་པར་བྱའོ། །རླུང་མེད་གནས་
ལ་གཡོག་མཁས་པས། །སྦྱང་བྱས་གན་རྐྱལ་ཉལ་བ་ལ། །མིག་མཆུ་བཟློག་སྟེ་དྲོ་འཇམ་ཆུར། །བསྲོས་པའི་གོས་ཀྱིས་དུགས་བྱས་ལ། །གོས་ཀྱིས་ལེགས་པར་དཀྲིས་ནས་ནི། །གཡོན་པའི་མཐེབ་འཛུབ་ཀྱིས་བཟུང་ཞིང་། །འགུལ་ཞིང་འགྱུར་བ་མེད་པར་ནི། །དེ་ནས་
མིག་མཆུ་ཀུན་དུ་ནི། །དཀྱིལ་འཁོར་ལྟ་བུའི་མཚོན་གྱིས་ནི། །འཕྲེད་དུ་གདབ་ཅིང་མཚན་མ་བྱས། །དེ་ཉིད་ཀྱིས་སམ་ལོ་རྩུབ་བམ། །ཤེ་པ་ལི་ཡི་ལོ་མ་འམ། །ཡང་ན་རྒྱ་མཚོའི་ཝུ་བས་བླུད། །ཅེས་བྱ་བ་ལ། ནད་པ་རླུང་མེད་པའི་གནས་སུ་བཞག་ལ། །ནད་གཡོག་
མཁས་ཤིང་བྱང་བས་སྔར་སྦྱང་བ་བྱས་པའི་ནད་པ་ལ་གན་རྐྱལ་དུ་ཉལ་བར་གྱུར་པ་ལ་ནི་མིག་མཆུའི་ཕྱི་རོལ་དུ་བཟློག་ལ། ཆུ་དྲོ་འཇམ་ཙམ་གྱིས་བསྲོས་པའི་གོས་ཀྱིས་དུགས་བྱས། གོས་འཇམ་པོས་དཀྲིས་ཏེ་ནང་དུ་བཅུག་ལ་ལག་པ་གཡོན་པའི་མཐེ་བོང་དང་མཛུབ་མོས་བཟུང་སྟེ།
དེ་ལྟར་བྱས་པས་མིག་འགུལ་ཞིང་འགྱུར་བ་མེད་པར་གྱུར་བ་དང་། དེའི་འོག་ཏུ་མིག་མཆུ་དེ་དཀྱིལ་འཁོར་ལྟ་བུའི་མཚོན་གྱི་གཙགས་བུས་འཕྲེད་དུ་གདབ་པར་བྱ་ཞིང་གཙགས་བུས་མཚན་མ་བྱས་ལ། དཀྱིལ་འཁོར་ལྟ་བུའི་གཙགས་བུ་དེ་ཉིད་ཀྱིས་འབྲུད་ཅིང་ཞལ་ཞལ་གདབ་པར་བྱའོ། །
ཡང་ན་ལོ་མ་རྩུབ་པོ་འམ་ཤིང་ཤེ་ལའི་ལོ་མ་ལ་སོགས་པ་ལོ་མ་རྩུབ་པས་རྨ་དེ་བྲུད་པར་བྱའོ། །ཡང་ན་རྒྱ་མཚོའི་ཝུ་བས་བྲུད་པར་བྱའོ། །དེ་ནས་ཁྲག་བྱུང་བ་དང་། རས་བལ་གྱི་ཡེ་འུས་ལེགས་པར་ཕྱི་བར་བྱའོ། །ཁྲག་ནི་རས་བལ་ཡེ་འུས་ཕྱི། །ཁྲག་བཅད་ལེགས་པར་བྲུད་ཤེས་

ནས། །རང་རང་སྨན་ནི་སྦྲང་རྩི་དང་། །བཅས་པ་དེ་ལ་བསྐུ་བར་བྱ། །ཞེས་བྱ་བ་ལ། ཁྲག་ཆོད་ཅིང་འགགས་པར་གྱུར་ནས་ལེགས་པར་བྲུད་པར་གྱུར་པར་ཤེས་ནས་རང་རང་གི་སྨན་སྦྲང་རྩི་དང་བཅས་པའི་ལྡེ་གུས་རྨ་དེ་ལ་བསྐུ་ཞིང་གདབ་པར་བྱའོ།
དེའི་འོག་ཆུ་དྲོན་གྱིས་བཀྲུས་ལ། །མར་གྱིས་བླུགས་པར་བྱ་བ་དང་། །རྣ་བའི་སྟེང་དང་འོག་གི་བར། །ནས་ཀྱི་ཟན་དང་སྦྲང་རྩི་དང་། །མར་དང་བཅས་པས་དཀྲི་བར་བྱ། །ཞེས་བྱ་བ་ལ། མིག་མཆུ་ལེགས་པར་བྲུད་པ་དེའི་རྗེས་ལ་ཆུ་དྲོ་འཇམ་ཙམ་གྱིས་མིག་མཆུ་དེ་བཀྲུས་
ལ་མར་བླུགས་ནས་རྣ་བའི་སྟེང་དང་འོག་གི་བར་དུ་ནས་ཀྱི་ཟན་མར་དང་སྦྲང་རྩིར་བཅས་པས་བསྣན་ལ་དཀྲི་ཞིང་བཅིང་བར་བྱའོ། །ཞག་ནི་གཉིས་པ་ལ་དཀྲོལ་ཏེ། །ཇི་ལྟ་བར་ནི་སྨན་བླུགས་ཤིང་། །བཞི་པར་སྣ་སྨན་ལ་སོགས་བྱ། །ཞག་ནི་ལྔ་པ་དག་ལ་དགྲོལ། །ཞེས་བྱ་བ་ལ།
དེ་ལྟར་གླན་ཞིང་བཅིང་བའི་མིག་མཆུ་དེ་ཞག་གཉིས་པ་ལ་བཀྲོལ་ཏེ་རང་གི་སྨན་གང་དག་ཡིན་པའི་སྨན་གྱི་ཁུ་བ་ཇི་བཞིན་དུ་བླུགས་ཤིང་སྔ་མ་བཞིན་དུ་བཅིང་བར་བྱས་ལ། ཞག་བཞི་པ་ལ་ནི་སྣ་སྨན་ལ་སོགས་པ་བྱས་ཏེ་དཀྲི་བར་བྱའོ། །ཞག་ལྔ་པ་ལ་ནི་སླར་དགྲོལ་བར་བྱའི་བཅིང་བར་མི་
བྱའོ། །མཉམ་ཞིང་སེན་མོ་ལྟར་དམར་ལ། །སྐྲང་གཡའ་དྲུད་སོགས་ནད་མེད་པ། །མིག་མཆུ་སྦྱར་ལེགས་ཡིན་ཞིས་བྱ། །དེ་ལས་བཟློག་པ་སླར་བཞར་བྱ། །ཞེས་བྱ་བ་ལ། བཞར་ཞིང་བྲུད་ལེགས་པའི་མིག་མཆུ་ནི་མཉམ་པོར་གནས་ཀྱི་མཐོན་དམན་དུ་མི་འགྱུར་བ་དང་།
སེན་མོའི་མདོག་ལྟར་དམར་བ་དང་། སྐྲངས་པ་ལ་སོགས་པའི་ནད་མེད་པ་ནི་བྲུད་ལེགས་པ་ཡིན་པར་ཤེས་པར་བྱའོ། །མཚན་ཉིད་དེ་ལས་གོ་བཟློག་པ་ནི་བཞར་མ་ལེགས་པ་ཡིན་པས་སླར་ཞིང་བཟླས་ཏེ་བཞར་ཞིང་བྲུད་པར་བྱའོ། །བཞར་དྲགས་པས་ནི་ན་བ་དང་། །རྫི་མ་འབྱི་ཞིང་མིག་
མཆུར་འགྱུར། །ཞེས་བྱ་བ་ལ། བཞར་དྲགས་པས་ནི་ན་བ་ལ་སོགས་པར་འགྱུར་རོ། །དེ་ལ་སྣུམ་དང་དུགས་ལ་སོགས། །རླུང་ལ་ཕན་པའི་སྦྱོར་བ་བསྔགས། །ཞེས་བྱ་བ་ལ། བཞར་དྲགས་པའི་མིག་མཆུ་དེ་ལ་སྣུམ་ཆོས་དང་དུགས་ལ་སོགས་པ་རླུང་སེལ་བའི་སྦྱོར་བ་བྱ་བར་

སློབ་དཔོན་གྱིས་བསྔགས་པ་ཡིན་ནོ། །མར་སར་གྱིས་ནི་བསྐུ་བྱ་ཞིང་། །སེང་ཕྲོམ་དཀར་པོ་མར་སར་གྱིས། །ལེགས་པར་བསྐུ་བར་བྱས་ནས་ནི། །ཨེ་རཎྜ་ཡི་རྩ་བ་ཡི། །ལྡེ་གུས་བྱུགས་ཏེ་ཕུར་མས་བཙོ། །ཚོས་པ་བཀྲུས་ཏེ་སྐམས་ནས་ནི། །བཏགས་པ་ཐུམ་པོར་
བྱས་ནས་ནི། །ར་འམ་བུད་མེད་འོ་མར་ནི། །མཉེས་ལ་མིག་ཏུ་བླུགས་པར་བྱ། །ཞེས་བྱ་བ་ལ། སེང་ཕྲོམ་ཞེས་བྱ་བ་རོ་ཏྲ་དཀར་པོ་མར་སར་གྱིས་བསྐུས་ལ། དེའི་འོག་ཏུ་ཨེ་རཎྜའི་རྩ་བའི་ལྡེ་གུས་བྱུགས་ལ། དེའི་རྗེས་ལ་སྨན་ཀྱི་ཕུར་མས་བཙོ་བའི་ཚུལ་གྱིས་བཙོས་
ལ་ཚོས་པར་གྱུར་པ་དང་། ཆུས་བཀྲུས་ཏེ་དེའི་འོག་ཏུ་སྐམས་པ་དེ་ཞིབ་ཏུ་བཏགས་ལ་རས་གཙང་མས་ཐུམ་བུར་གཏུམས་ནས་ར་འམ་བུད་མེད་ཀྱི་འོ་མའི་ནང་དུ་ཐུམ་བུ་སྔངས་ལ་མཉེས་པ་དེའི་ཐིགས་པ་མིག་ཏུ་བླུགས་པར་བྱའོ། །དེ་ཉིད་སཱ་ལུ་ཐུག་པོ་ཆེའི། །ལྡེ་གུས་བསྐུས་
ཏེ་དེ་ལྟར་བྱས། །ཞོ་དང་ཞོ་ག་ཆུས་སྤངས་པ། །མིག་ནི་བཞར་དྲགས་གྱུར་ལ་བླུགས། །ཞེས་བྱ་བ་ལ། ཡང་ན་སེང་ཕྲོམ་དཀར་པོ་དེ་ཉིད་འབྲས་སཱ་ལུ་ཐུག་པོ་ཆེའི་ལྡེ་གུས་བསྐུ་ལ། སྔ་མ་བཞིན་དུ་མར་སར་གྱིས་བསྐུ་ཞིང་ཕུར་མས་བཙོ་བ་ལ་སོགས་པའི་སྦྱོར་བ་སྔ་མ་
བཞིན་དུ་བྱས་ལ། ཞོ་དང་ཞོ་ག་ཆུའི་ནང་དུ་སྦངས་པ་དེ་མིག་བཞར་དྲགས་པ་ལ་སྨན་གྱི་ཐིགས་པ་བླུགས་པར་བྱའོ། །ཡང་ན་ཞོ་ག་ཆུ་ཉི་ཚེ། །བླུགས་ཤིང་སྐམ་སའི་ཤ་ཁུ་སྦྱིན། །ཞེས་བྱ་བ་ལ། ཡང་ན་མིག་བཞར་དྲགས་པ་ལས་ཞོ་ག་ཆུ་ཉི་ཚེ་བླུགས་ཤིང་སྐམ་སའི་ཤ་ཁུ་སྦྱིན་པར་
བྱའོ། །འབྲུམ་ཕྲན་སྲ་ཞིང་མཐོ་བ་ནི། །འབྲས་ཀྱི་རྩེ་མོས་བརྟོལ་བར་བྱ། །དེ་རྗེས་བཙིར་ཏེ་ཆོ་ག་ནི། །ལྷག་མ་སྔ་མ་བཞིན་དུ་བྱ། །ཞེས་བྱ་བ་ལ། འབྲུམ་བུ་ཕྲ་མོ་ཞེས་བྱ་བའི་མིག་མཆུའི་ནད་སྲ་ཞིང་མཐོ་བར་གནས་པ་ནི་འབྲས་ཀྱི་རྩེ་མོ་འདྲ་པའི་གཙགས་བུས་བརྟོལ་
ཞིང་ཕུག་པ་དེའི་རྗེས་ལ་ཆོ་ག་ལྷག་མ་བཀྲུ་བ་དང་། སྨན་བསྐུ་བ་ལ་སོགས་པ་སྔ་མ་བཞིན་དུ་བྱའོ། །ཞལ་ཞལ་གདབ་དང་འདྲལ་བ་ལ། །རིམ་འདིས་མིག་མཆུའི་ནད་ཀུན་སྦྱར། །ཞེས་བྱ་བ་ལ། མིག་མཆུའི་ནད་ལ་ཞལ་ཞལ་གདབ་ཅིང་བྲུད་པ་དང་། འདྲལ་ཞིང་དབུག་པའི་ལས་

ཀུན་ལ་ཡང་བཤད་མ་ཐག་པའི་རིམ་པ་འདི་ཉིད་སྦྱར་བར་བྱའོ། །ཁྲག་མཁྲིས་ལས་གྱུར་མངར་བ་ཡི། །སྡེ་ཚན་དང་བསྐོལ་མར་གྱིས་གསོ། །སྣུམ་གྱུར་ནས་ནི་གཏར་ག་གདབ། །དུར་བྱིད་བཀྲུ་སྨན་གཏང་བ་མཆོག །ཅེས་བྱ་བ་ལ། ཁྲག་དང་
མཁྲིས་པས་སྐྱེད་པའི་མིག་མཆུའི་ནད་ལ་ནི་མངར་བའི་སྡེ་ཚན་དང་བསྐོལ་བའི་མར་གྱིས་གསོས་ལ། སྣུམ་པར་གྱུར་པ་དང་གཏར་ག་གདབ་ཅིང་ཁྲག་དབྱུང་བ་དང་། དུར་བྱིད་ཀྱི་བཀྲུ་སྨན་གཏོར་བ་ཉིད་མཆོག་ཏུ་གྱུར་པ་ཡིན་ནོ། །བཞར་ཞིང་ཁྲག་ནི་ཕྱུང་བ་དང་། །ཤིང་མངར་
བསྐོལ་བའི་ཆུས་བཀྲུ་ཞིང་། །ཙནྡན་དཀར་པོ་འོ་མར་བསྐོལ། །མིག་མཆུ་ལ་ནི་བླུགས་ན་ཕན། །ཞེས་བྱ་བ་ལ། མིག་མཆུ་བཞར་ཞིང་བྲུད་པ་དང་ཁྲག་གཟགས་ནས་ཤིང་མངར་བསྐོལ་བའི་ཆུས་བཀྲུས་ན་ཕན་པ་དང་། ཙནྡན་དཀར་པོ་དང་འོ་མ་བསྐོལ་བ་བླུགས་ན་
ཕན་ནོ། །རྫི་མ་འབྱི་ལ་ཁབ་ཀྱིས་ནི། །བ་སྤུའི་བུ་ག་གཙགས་པ་འམ། །སྲིན་བུ་པད་པས་ཁྲག་དབྱུང་ངོ་། །ཞེས་བྱ་བ་ལ། རྫི་མ་འབྱི་བ་ལ་ནི་ཁབ་ཀྱིས་བ་སྤུའི་བུ་ག་གཙགས་པའམ། སྲིན་བུ་པད་པས་དེ་ལ་ཁྲག་དབྱུང་བར་བྱའོ། །ཡང་ན་འོ་མའམ་བུ་རམ་ཤིང་། །
ཁུ་བས་སློན་བྱ་མངར་བསིལ་སྨན། །བསྐོལ་བའི་མར་ནི་གཏང་བར་བྱ། །ཞེས་བྱ་བ་ལ། རྫི་མ་འབྱི་བའི་མིག་མཆུའི་ནད་དེ་ལ་འོ་མའམ་བུ་རམ་ཤིང་གི་ཁུ་བའི་སློན་སྨན་བྱ་བའམ། རྒུན་འབྲུ་ལ་སོགས་པའི་སྨན་མངར་བ་དང་བསིལ་བ་དང་བསྐོལ་བའི་མར་གྱིས་རྫི་མ་འབྱི་བ་ལ་སྣ་
ནས་བཏང་བའི་སྨན་གཏང་བར་བྱའོ། །ནག་ཚུར་དཀར་པོའི་ཕྱེ་མ་ནི། །བྱེའུ་རུག་པའི་ཁུ་བར་བསྲེས། །ཟངས་ཀྱི་སྣོད་དུ་བཅུག་པ་དེ། །རྫི་མ་འབྱི་བའི་མིག་སྨན་མཆོག །ཅེས་བྱ་བ་ལ། ནག་ཚུར་དཀར་པོ་ཕྱེ་མར་བྱས་པ་དང་། བྱེའུ་རུག་བའི་ཁུ་བ་བསྲེས་ལ་ཟངས་
མའི་སྣོད་ཀྱི་ནང་དུ་ཞག་བཅུའི་བར་དུ་སྤངས་པའི་མིག་སྨན་དེ་ནི་རྫི་མ་འབྱི་བའི་མིག་སྨན་གྱི་དམ་པར་གྱུར་པ་ཡིན་ནོ། །མིག་མཆུའི་ཤ་བྲུད་བཅའ་སྒ་དང་། །རྒྱམ་ཚའི་ཕྱེ་མ་གདབ་པར་བྱ། །ཆུ་དྲོན་གྱིས་བཀྲུ་སེང་ལྡེང་དང་། །ན་ལེ་ཤམ་དཀར་ཏུ་བ་རི། །ཆུ་བསྐོལ་བ་འམ་སེར་པོ་

གཉིས། །ཤིང་མངར་དང་ནི་འབྲས་བུ་གསུམ། །ཁུ་བ་སྦྲང་རྩིར་བཅས་པ་བླུགས། །ཞེས་བྱ་བ་ལ། མིག་མཆུའི་ཤ་ལ་འབྲུམ་ཕྲན་བྱུང་བ་ལ་ནི་དཀྱིལ་འཁོར་ལྟ་བུའི་གཙགས་བུས་ཞལ་ཞལ་གདབ་ཅིང་བྲུད་ལ་བཅའ་སྒ་དང་རྒྱམ་ཚ་གཉིས་ཀྱི་ཕྱེ་མ་གདབ་པར་བྱ་ཞིང་ཆུ་དྲོན་
གྱིས་བཀྲུས་ལ་སེང་ལྡེང་ལ་སོགས་པའི་ཆུར་བསྐོལ་བའི་སྨན་གྱི་ཁུ་བ་བླུགས་པར་བྱ་བ་འམ། ཡང་ན་སེར་པོ་གཉིས་དང་ཤིང་མངར་དང་འབྲས་བུ་གསུམ་བསྐོལ་བའི་ཁུ་བ་སྦྲང་རྩི་དང་བཅས་པ་བླུགས་པར་བྱའོ། །བད་ཀན་ལས་གྱུར་ཞལ་ཞལ་བྱས། །ནག་ཚུར་རྒྱམ་ཚ་
པི་པི་ལིང་། །ལྡོང་རོས་སྟེང་ཟིལ་ཞིབ་བཏགས་པ། །སྦྲང་རྩི་བཅས་བ་བསྐུ་བར་བྱ། །ཞེས་བྱ་བ་ལ། །བད་ཀན་གྱིས་བསྐྱེད་པའི་མིག་མཆུའི་ནད་ལ་ནི་གཙགས་བུས་ཞལ་ཞལ་བྱས་ཤིང་བྲུད་ལ་ནག་ཚུར་ལ་སོགས་པའི་སྨན་ཞིབ་ཏུ་བཏགས་ནས་སྦྲང་རྩི་དང་བཅས་པས་
བསྐུས་ན་ཕན་ནོ། །སྐྱུག་སྨན་མིག་སྨན་སྣ་སྨན་ནི། །བད་ཀན་སེལ་བ་ཐམས་ཅད་ཕན། །ཞེས་བྱ་བ་ལ། ཡང་ན་བད་ཀན་ལས་གྱུར་པའི་མིག་མཆུའི་ནད་ལ་སྐྱུག་སྨན་དང་མིག་སྨན་ལ་སོགས་པ་དང་། བད་ཀན་སེལ་ཞིང་འཇོམས་པར་བྱེད་པ་གང་ཡིན་པ་དེ་ཐམས་ཅད་ཕན་
ནོ། །ཆགས་པ་ལ་ཡང་འདི་དག་བྱ། །མ་ཞི་མེ་བཙའ་གདབ་པར་བྱ། །ཞེས་བྱ་བ་ལ། བད་ཀན་ལས་གྱུར་བའི་མིག་མཆུའི་ནད་གསོ་བ་འདི་ནི་ཆགས་པ་ཞེས་བྱ་བའི་མིག་ནད་ལ་ཡང་སྦྱར་བར་བྱ་ལ། དེས་ཞི་ཞིང་མེད་པར་གྱུར་ན་ཆགས་པ་ཞེས་བྱ་བའི་མིག་མཆུའི་ནད་དེ་ལ་མེ་
བཙའ་གདབ་པས་བསྲེགས་པར་བྱའོ། །སྒྲ་ངན་ལ་ནི་སེང་ལྡེང་དང་། །ནིམ་པའི་ལོ་མ་འབྲས་བུ་གསུམ། །མར་དང་སྦྱར་བ་འམ་པི་པི་ལིང་། །ཤིང་མངར་རྒྱམ་ཚ་བསྐོལ་བ་ནི། །མ་མར་བླུད་དེ་སློན་དུ་གཞུག །ཅེས་བྱ་བ་ལ། སྒྲ་ངན་ཞེས་བྱ་བའི་བྱིས་པའི་མིག་མཆུའི་ནད་ལ་
ནི་སེང་ལྡེང་ལ་སོགས་པའི་སྨན་བསྐོལ་བའི་ཁུ་བ་བླུད་ལ་མ་མ་སློན་དུ་གཞུག་ལ། དེའི་འོག་ཏུ་པི་པི་ལིང་ལ་སོགས་པ་བསྐོལ་བས་སློན་དུ་གཞུག་པར་བྱའོ། །རྒུན་འབྲུ་དང་ནི་ཨ་རུ་ར། །པི་པི་ལིང་བསྐོལ་བཀྲུ་སྨན་སྦྱིན། །ཞེས་བྱ་བ་ལ། དེའི་འོག་ཏུ་མ་མ་དེ་ལ་རྒུན་འབྲུ་ལ་སོགས་པ་

བསྐོལ་བའི་སྐྱུག་སྨན་སྦྱིན་པར་བྱའོ། །སེར་པོ་རྣམ་གཉིས་པི་པི་ལིང་། །གླ་སྒང་ལྡེ་གུས་ནུ་མ་བསྐུ། །ཞེས་བྱ་བ་ལ། ཡང་མ་མ་དེའི་ནུ་མ་སེར་པོ་གཉིས་ལ་སོགས་པའི་ལྡེ་གུས་བསྐུ་བར་བྱའོ། །ཡུངས་ཀར་མར་བཅས་དུད་པས་བདུགས། །སྦྱད་བ་
བྱས་ནས་པ་ཏོ་ལ། །གླ་སྒང་དང་ནི་རྒུན་འབྲུ་དང་། །སླེ་ཏྲེས་འབྲས་བུ་གསུམ་བསྐོལ་བླུད། །ཅེས་བྱ་བ་ལ། མ་མ་དེ་ལ་ཡུངས་ཀར་མར་དང་བཅས་པའི་དུད་པས་ནུ་མ་ལ་བདུག་པར་བྱ་བ་དང་། ཡང་མ་མ་དེ་བཀྲུ་སྨན་དང་སྐྱུག་སྨན་གྱི་སྦྱང་བ་བྱས་ནས་པ་ཏོ་ལ་ལ་སོགས་པ་
བསྐོལ་བའི་སྨན་གྱི་ཁུ་བ་བླུད་པར་བྱའོ། །བྱིས་པའི་མིག་མཆུ་བྲུད་པའམ། །སྲིན་བུ་པད་པས་ཁྲག་དབྱུང་བྱ། །ཨ་སྨན་ད་ཀ་སྐྱུ་རུ་ར། །འཛམ་བུའི་ལོ་མ་བསྐོལ་བ་བླུགས། །ཞེས་བྱ་བ་ལ། བྱིས་པའི་མིག་མཆུ་དེ་གཙགས་བུས་བྲུད་པའམ་སྲིན་བུ་པད་པས་ཁྲག་
ཕྱུང་ཞིང་བཏོན་ལ་ཨ་སྨན་ཏ་ཀ་ལ་སོགས་པའི་ལོ་མ་བསྐོལ་བའི་ཁུ་བ་བླུགས་པར་བྱའོ། །བྱིས་པ་འོ་མ་མར་བརྟེན་པས། །ཕལ་ཆེར་བད་ཀན་ནད་འབྱུང་པས། །དེ་བས་དང་པོར་སྐྱུག་སྨན་ཉིད། །ནད་ཀུན་ལ་ནི་བསྔགས་པ་ཡིན། །ཞེས་བྱ་བ་ལ། བྱིས་པ་ནི་འོ་མ་དང་མར་
ལ་བརྟེན་ཅིང་སྤྱོད་པའི་རྒྱུས་ན་ཕལ་ཆེར་ཏེ་མང་དུ་བད་ཀན་གྱི་ནད་འབྱུང་བར་འགྱུར་བས། དེའི་ཕྱིར་བྱིས་པའི་ནད་ཐམས་ཅད་ལ་དང་པོ་ཁོ་ནར་སྐྱུག་སྨན་བཏང་ན་ནད་ཀུན་ལ་བསྔགས་ཤིང་ཕན་པ་ཡིན་ནོ། །ལྕེ་མྱང་ཚ་དང་པི་པི་ལིང་། །ཨ་པ་མརྒའི་འབྲས་བུ་མར། །འོ་མ་ཤུ་
དག་སྦྲང་རྩིར་བཅས། །པོ་སོན་ཆ་ནི་ཤིང་མངར་བཅས། །འོ་མ་ཁ་ཟས་འོ་མ་དང་། །ཟས་ལ་བརྟེན་པའི་བྱིས་པ་ལ། །རིམ་བཞིན་བླུད་པས་ནད་ཀུན་ནི། །སྦྱར་བར་བྱ་ཕྱིར་སློན་སྨན་གཏང་། །མཆོག་དུ་སྒྲ་ངན་ནད་ལ་ཕན། །ཞེས་བྱ་བ་ལ། བྱིས་པའི་ནད་ཐམས་ཅད་ལ་ནི་
ལྕེ་མྱང་ཚ་ལ་སོགས་པའི་སྨན་དང་མར་འོ་མ་དང་། སྦྲང་རྩི་སྦྱར་བའི་སྐྱུག་སྨན་བཏང་བ་ནི། འོ་མ་ལ་བརྟེན་པ་བསྔགས་པ་ཡིན་ནོ། །ཁ་ཟས་དང་འོ་མ་གཉིས་ལ་བརྟེན་པ་ལ་ནི་ཤུ་དག་གི་ཕྱེ་མ་སྦྲང་རྩི་དང་བཅས་པའི་སྐྱུག་སྨན་ནད་ཐམས་ཅད་ལ་བསྔགས་པ་ཡིན་ནོ། །ཟས་འབའ་ཞིག་ལ་བརྟེན་པའི་

ཤིང་མངར་སྦྱར་བའི་སྐྱུག་སྨན་ནད་ཐམས་ཅད་ལ་ནི་བསྔགས་པ་ཡིན་ཏེ། །དེ་ལྟར་ན་འོ་མ་འཐུང་བ་དང་འོ་མ་དང་། ཁ་ཟས་གཉིས་ཀ་ལ་བརྟེན་པ་དང་། ཟས་འབའ་ཞིག་ལ་བརྟེན་པ་དག་ལ་རིམ་བཞིན་དུ་སྦྱར་བར་བྱ་སྟེ། དེ་ལས་ཀྱང་ཁྱད་པར་དུ་ནི་སྒྲ་ངན་
ཞེས་བྱ་བའི་མིག་མཆུའི་ནད་ལ་ཕན་པ་ཡིན་ནོ། །སབ་ཏ་ལ་ཡི་ཁུ་བ་མར། །བསྐོལ་བ་གཉིས་ཀ་སྦྱོང་བྱེད་སྦྱིན། །ཞེས་བྱ་བ་ལ། ཡང་ན་སབ་ཏ་ལ་བསྐོལ་བའི་ཁུ་བ་དང་མར་ལྷན་ཅིག་བསྐོལ་བའི་སྨན་མར་ནི་བད་ཀན་དང་སྒྲ་ངན་གཉི་ག་སྦྱོང་བར་བྱེད་པ་དེ་སྦྱིན་པར་
བྱའོ། །སེང་ཕྲོམ་ཤིང་མངར་སེར་པོ་གཉིས། །ནིམ་པའི་ལོ་མ་པུ་ཙེ་ཤེལ། །ཟངས་ཀྱི་ཕྱེ་མར་བཅས་རེང་བུ། །སྒྲ་ངན་གྱི་ནི་ནད་ལ་ཕན། །ཞེས་བྱ་བ་ལ། ཡང་ན་སེང་ཕྲོམ་ལ་སོགས་པའི་ཕྱེ་མ་དང་། ཟངས་ཀྱི་ཕྱེ་མ་དང་བཅས་པའི་རི་ལུ་ནི་སྒྲ་ངན་
གྱི་ནད་ལ་ཕན་ནོ། །ཡང་ན་ལྕགས་ཀྱི་ཕྱེ་མ་བསྲེགས། །འོ་མ་སྦྲང་རྩི་མར་བཅས་ཕན། །ཞེས་བྱ་བ་ལ། ཡང་ན་ལྕགས་ཀྱི་ཕྱེ་མ་བསྲེགས་པ་དང་། འོ་མ་སྦྲང་རྩི་བཅས་པའི་རི་ལུ་ཡང་སྒྲ་ངན་གྱི་ནད་ལ་ཕན་ནོ། །སུག་སྨེལ་སྒོག་སྐྱ་ཀ་ཏ་ཀ །ཕ་ནི་ད་ཛ་ཀ་ན་ལེ་ཤམ། །
དུང་བཅས་ཆུ་དང་བདར་བ་དང་། ཀད་པ་ལ་བཅས་རི་ལུའང་ཕན། །ཞེས་བྱ་བ་ལ། ཡང་ན་སུག་སྨེལ་ལ་སོགས་པའི་རི་ལུ་ཡང་མིག་མཆུའི་ཤའི་ནད་དང་སྒྲ་ངན་གྱི་ནད་ལ་ཕན་ནོ། །ཀ་ཏ་ཀ་པ་ལ་ནི་ཀི་ཚའོ། །ཕ་ནི་ད་ཛ་ཀ་ནི་མ་དུ་པ་ཀའོ། །རྫི་མ་འགགས་ནད་འཕེལ་བ་
ལ། །སྦྱང་བ་བྱས་པར་གྱུར་པ་ནི། །སྨིན་མའི་འོག་གི་ཆ་གཉིས་དང་། །རྫི་མའི་ཆ་གཅིག་བར་པར་ནི། །ནས་ཀྱི་ཚད་ཙམ་ནས་ཀྱི་དབྱིབས། །འཕྲེད་དུ་དཔྲལ་ལ་རས་རློན་པས། །དེ་ཡི་ཁྲག་ནི་བསལ་ནས་ནི། །ཁྲག་ནི་ཆུང་བར་གྱུར་པ་དང་། །བར་མཚམས་མུངྒ་
ཙམ་བཞག་ལ། །ཁ་བ་ནི་ཡོན་པོས་བཙེམ་པར་བྱ། །ཞེས་བྱ་བ་ལ། རྫི་མ་འགགས་པའི་ནད་བུ་འཕེལ་བར་གྱུར་པ་ལ་ནད་པ་སྦྱང་བ་བྱས་ཤིང་དག་བར་བྱས་པའི་སྨིན་མའི་འོག་ཆ་གཉིས་དང་། རྫི་མའི་ཆ་གཅིག་བོར་བའི་གནས་སུ་ནས་ཀྱི་ཚད་ཙམ་ལ་དབྱིབས་ནས་འདྲ་པར་

འཕྲེད་དུ་དབྲལ་ལ་རས་ཆུ་དོན་མོའི་ནད་དུ་སྦངས་པས་དེའི་ཁྲག་བསལ་ཞིང་ཕྱིས་ནས་ཁྲག་དེ་བྲི་ཞིང་ཆུང་བར་གྱུར་པ་དང་བར་མཚམས་སུ་སྲན་མུད་ག་ཞེས་བྱ་བ་མོན་སྲན་སྡེའུ་ཙམ་བཞག་ལ། ཁ་བ་ཡོན་པོས་ལེགས་པར་འདྲུབ་པར་བྱའོ། །དཔྲལ་བ་རས་ཀྱིས་བཅིངས་ནས་ནི།
དེ་བཞིན་སྐུད་པས་བཙེམ་པར་བྱ། །ཤིན་ཏུ་དམ་དང་ལྷོད་མིན་པར། །དེར་ནི་ལེགས་པར་བཙེམ་བར་བྱ། །ཞེས་བྱ་བ་ལ། དེའི་འོག་ཏུ་དཔྲལ་བ་རས་ཀྱི་ཚལ་པས་བཅིང་ལ། དེར་སྐུད་པས་ཤིན་ཏུ་དམ་པ་ཡང་མ་ཡིན་ཤིན་ཏུ་ལྷོད་པ་ཡང་མ་ཡིན་པར་བཙེམ་པར་བྱའོ། །དེ་ནས་
སྦྲང་རྩི་མར་གྱིས་བྱུག །འདི་ལ་བཅིང་བར་མི་བྱའོ། །ཞེས་བྱ་བ་ལ། དེའི་འོག་ཏུ་སྦྲང་རྩི་དང་མར་གྱིས་བྱུག་ཅིང་དེ་བསྐུས་ནས་རས་ཀྱིས་དཀྲིས་ལ་བཙེམ་པར་བྱའི་འདི་ལ་བཅིང་བར་ནི་མི་བྱའོ། །ན་ན་ནྱ་གྲོ་ངྷ་སོགས་པའི། །ཁུ་བ་འོ་མ་བཅས་པ་བླུགས། །ཞེས་བྱ་བ་ལ།
གལ་ཏེ་རྨ་དེ་ནད་དང་བཅས་པར་གྱུར་ན་ནྱ་གྲོ་ངྷ་ལ་སོགས་པའི་སྡེ་ཚན་གྱི་ཁུ་བ་འོ་མ་དང་བཅས་པ་བླུགས་པར་བྱའོ། །ཞག་ལྔ་པ་ལ་སྐུད་པ་ནི། །བསལ་ཏེ་ཡུག་སྣམ་ཕྱེ་མ་ནི། །རྨ་ལ་ལེགས་པར་གདབ་པར་བྱ། །སྣ་སྨན་མིག་སྨན་རྣོན་པོ་གཏང་། །ཞེས་བྱ་བ་ལ། ཞག་ལྔ་པ་ལ་མཚོན་
གྱིས་དབྲལ་ལ་དེ་འདྲུབས་པར་གྱུར་པ་དང་སྐུད་པ་བསལ་ཞིང་བཅད་དེ་བཙག་ཡུག་སྣམ་ཞིབ་ཏུ་བཏགས་པའི་ཕྱེ་མ་རྨ་ལ་གདབ་པར་བྱ་བ་དང་། དེ་ལ་སྣ་སྨན་དང་མིག་སྨན་རྣོན་པོ་གཏང་བར་བྱའོ། །ཞག་བཅུའི་མཐར་ཡང་མ་སོས་ན། །མིག་མཆུར་བརྟེན་གཉེར་བཟློག་སྟེ་བསྲེག། །
ཅེས་བྱ་བ་ལ། སྦྱོར་བ་དེས་ཞི་བར་མ་གྱུར་ན་མིག་མཆུར་བརྟེན་པའི་གཉེར་མ་བཟློག་སྟེ་ཐལ་སྨན་ནམ་ཐུར་མ་ཚ་བས་བསྲེག་པར་བྱའོ། །རྫི་མའི་ལྷག་མ་ཚེར་ཟུངས་ཀྱིས། །ཕྱུང་ལ་དེ་ཡི་གནས་དག་ནི། །མེའི་མདོག་འདྲའི་ཁབ་རྩེས་བསྲེག །ཅེས་བྱ་བ་ལ། རྫི་མའི་ལྷག་མ་
ཚེར་ཟུངས་ཀྱིས་ཕྱུང་ལ་རྫི་མ་དེའི་གནས་མེའི་མདོག་འདྲ་བའི་ཁབ་ཀྱི་རྩེ་མོས་བསྲེག་པར་བྱའོ། །ཕྱི་རོལ་རློན་པ་བསྲེགས་པ་དང་། །ཐོར་བུ་བཅད་པར་གྱུར་པ་ལ། །མེ་འམ་ཐལ་སྨན་རྣོན་པོས་བསྲེག །ཅེས་བྱ་བ་ལ། ཕྱི་རོལ་གྱི་རློན་ཞིང་གཤེར་བ་མེ་འམ་ཐལ་སྨན་ཀྱིས་བསྲེག་པར་

བྱ་བ་དང་། ཐོར་བུ་ཡང་རྩ་བ་ནས་དང་པོ་བཅད་ལ་མེ་འམ་ཐལ་སྨན་རྣོན་པོས་བསྲེག་པར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་དགུ་པའི་རྣམ་པར་
འགྲེལ་པའོ།། །།དེ་ནས་མིག་ཟུར་དང་མིག་གི་འབྲས་བུ་དཀར་ནག་གི་ནད་ཀྱི་དམིགས་བརྟག་པར་བྱ་བ་བཤད་པར་བྱའོ། །ཞེས་བྱ་བ་ལ། མིག་མཆུའི་ནད་ཀྱི་རྗེས་ལ་མིག་ཟུར་དང་མིག་གི་འབྲས་བུ་དཀར་ནག་གི་ནད་ཀྱི་དམིགས་བརྟག་པ་བསྟན་པ་ནི་གནས་ཀྱི་གོ་
རིམས་ཀྱིས་བཤད་པ་ཡིན་ཏེ། མིག་ཟུར་གཉིས་དང་མིག་གི་འབྲས་བུ་དཀར་པོ་དང་ནག་པོ་དག་གི་ནད་ཀྱི་དམིགས་ཤེས་ཤིང་བརྟག་པར་བྱ་བའི་ལེའུ་གང་ཡིན་པ་དེ་བཤད་པར་བྱའོ། །ཞེས་པའོ། །རླུང་འཁྲུགས་པས་ནི་ཆུ་རྒྱུ་བའི། །རྩར་སོང་ནས་ནི་ཆུ་འདྲ་བའི། །མཆི་མ་
མིག་མཆུའི་མིག་ཕུགས་ཀྱི། །མཚམས་ནས་མཆི་མ་འཛག་འགྱུར་ལ། །དེས་ནི་ནད་མེད་རྩ་དམར་ལ། །སྐྲང་འགྱུར་དེ་ནི་ཆུ་འཛག་ཡིན། །ཞེས་བྱ་བ་ལ། རླུང་གི་ནད་རང་རང་གི་སྐྱེ་བའི་རྒྱུས་འཁྲུགས་ཤིང་ལྡང་བར་གྱུར་བ་དང་། ཆུ་རྒྱུ་བའི་རྩར་སོང་ནས་མིག་ཕུགས་ཀྱི་
མཚམས་ཏེ། མིག་འབྲས་དཀར་པོའི་མཐའ་སྣ་གོང་གི་ཕུགས་ནས་འདྲ་བའི་མཆི་མ་འཛག་པར་འགྱུར་ལ། ནད་དེས་མིག་ན་བ་ལྷང་ལྷང་པོ་མེད་པར་རྩ་དམར་བ་དང་། སྐྲང་པར་འགྱུར་ཏེ་མིག་ནད་དེ་ནི་མཆི་མ་འཛག་པ་ཞེས་བྱའོ། །བད་ཀན་ལས་གྱུར་སྤྱི་བག་མང་། །དཀར་བ་
བད་ཀན་འཛག་པ་ཡིན། །ཞེས་བྱ་བ་ལ། བད་ཀན་འཛག་པའི་མིག་ཟུར་གྱི་ནད་ནི་བད་ཀན་ལས་གྱུར་ཅིང་མཆི་མ་སྤྱི་བག་ནལ་ནལ་པོར་མང་དུ་འཛག་པ་དང་། མིག་དཀར་བ་ནི་མིང་བད་ཀན་འཛག་པ་ཞེས་བྱའོ། །བད་ཀན་གྱིས་སྐྲང་རྩེ་མོ་རྣོ། །ལན་ཚྭའི་ཆུ་བུར་འདྲ་བ་འབྱུང་
རྩ་བ་ཆེ་ཞིང་གཡོ་ལ་སྣུམ། །མདོག་འདྲ་འཇམ་ཞིང་སྤྱི་བག་ཅན། །ཆེ་ཞིང་སྨིན་དཀའ་གཡའ་དང་བཅས། །གཟེར་མེད་བཅིངས་པ་ལྟ་བུ་ཡིན། །ཞེས་བྱ་བ་ལ། བད་ཀན་གྱིས་མིག་སྐྲང་བར་འགྱུར་ཞིང་སྐྲང་བདེའི་རྩེ་མོ་རྣོན་པོར་འདུག་ལ་སྐྲང་པ་དེ་ལན་ཚྭའི་ཆུ་བུར་འབྱུང་བ་འདྲ་

ཞིང་རྩ་བ་ཆེ་བ་ལ་སོགས་པའི་མཚན་ཉིད་དང་ལྡན་པ་ནི་བཅིངས་བ་ལྟ་བུའི་མིག་ནད་ཅེས་བྱའོ། །ཁྲག་ལས་མཆི་མ་ཁྲག་འཛག་དམར། །ཤས་ཆེར་དྲོ་བ་ཁྲག་འཛག་ཡིན། །ཞེས་བྱ་བ་ལ། ཁྲག་འཁྲུགས་པ་ལས་མཆི་མ་དམར་ཞིང་ཤས་ཆེར་དྲོ་བ་འཛག་པ་ནི་
མིག་ཟུར་གྱི་ནད་ཁྲག་གི་མཆི་མ་འཛག་པ་ཞེས་བྱའོ། །མིག་མཆུ་གྲྭ་མཚམས་དཀར་པོ་རུ། །འབྲུམ་ཕྲན་ཚ་ཞིང་གཟེར་དང་བཅས། དམར་ཞིང་མུངྒ་འདྲ་ལ་གས། །ཁྲག་འཛག་དེ་ནི་ཚིགས་ཅན་ཡིན། །ཞེས་བྱ་བ་ལ། མིག་མཆུའི་གྲྭ་མཚམས་དཀར་པོའི་ཆ་རུ་འབྲུམ་
ཕྲན་ཚ་བ་ལ་སོགས་པ་དང་ལྡན་པ་སྲན་མུངྒ་ཙམ་དང་འདྲ་བ་ཁ་གྱེས་ཤིང་གས་པ་ལས་ཁྲག་འཛག་པ་དེ་ནི་མིང་ཚིགས་ཅན་ཞེས་བྱའོ། །རྣག་འཛག་དྲི་མ་ཁྲག་དང་བཅས། །མིག་ཕུགས་ཀྱི་ནི་གྲྭ་མཚམས་ནས། །ཡང་དང་ཡང་དུ་རྣག་འཛག་ཅིང་། །ཤ་ལྤགས་འདྲུལ་བས་མཆི་
མར་བཅས། །ཞེས་བྱ་བ་ལ། རྣག་འཛག་པ་ཞེས་བྱ་བའི་མིག་ཟུར་གྱི་ནད་ནི་དྲི་མ་ཞེས་བྱ་བ་ནད་གཞི་གསུམ་པོ་ཁྲག་དང་བཅས་པའི་མིག་ཕུགས་ཀྱི་མིག་མཆུའི་མཚམས་ནས་ཡང་དང་ཡང་དུ་རྣག་འཛག་ཅིང་མཆི་མ་འབྱུང་བ་དང་བཅས་པ་དང་། ཤ་དང་པགས་པ་འདྲུལ་བའི་རྒྱུ་ལས་
འབྱུང་བའི་རྣག་འཛག་པའི་མིག་ནད་ཅེས་བྱའོ། །རྣག་སླ་འཛག་པ་རྨ་ཕྲ་ཞིང་། །སྐྲང་ཞིང་གཡོ་བ་ཆེ་བ་དང་། །མིག་ཕུགས་མཚམས་སྐྲང་རྣག་འཛག་ཅིང་། །ནད་བཅས་རྣག་གི་ཆུ་སེར་འཛག །ཅེས་བྱ་བ་ལ། རྣག་སླ་བ་ཆུ་སེར་འདྲ་བ་འཛག་པ་དང་། རྨའི་དབྱིབས་ཕྲ་ཞིང་
སྐྲངས་པ་དང་། གཡོ་ཞིང་འགུལ་བ་དང་། རྩོམ་པ་ཆེ་བ་ལ་མིག་ཕུགས་ཀྱི་གྲྭ་མཚམས་སྣ་གོང་གི་མཚམས་སུ་སྐྲངས་པ་དང་། རྣག་གི་ཚོགས་འཛག་ཅིང་འབབ་པ་དང་། ནད་དང་བཅས་པ་ཡིན་ཏེ། ནད་དེ་ནི་རྣག་གི་ཆུ་སེར་འཛག་པ་ཞེས་བྱའོ། །མིག་ཕུགས་ཀྱི་ནི་མཚམས་ནང་ན། །སྐྲང་
ཟུག་ཚ་བཅས་ཆུ་སེར་ནད། །ཅེས་བྱ་བ་ལ། མིག་ཕུགས་ཀྱི་མཚམས་ནི་ནད་ན་བ་དང་བཅས་པ་དང་། ཟུག་པ་དང་ཚ་བ་དང་བཅས་པ་ནི་ཆུ་སེར་གྱི་ནད་ཅེས་བྱའོ། །མིག་ཟུར་རམ་ནི་མིག་ཕུགས་སུ། །གཡོའ་ཞིང་རྫི་མའི་བུ་ག་ནས། །རྣག་འཛག་སྲིན་དང་རྨེན་བུ་འབྱུང་། །ན་བཅས་

སྲིན་གྱི་རྨེན་བུ་ཅན། །ཞེས་བྱ་བ་ལ། མིག་འགྲམ་གྱི་མིག་ཟུར་གྱི་ཕྱོགས་སམ་མིག་ཕུགས་སྣ་གོང་གི་ཕྱོགས་སུ་གཡའ་བ་ལ་སོགས་པ་དང་ལྡན་པའི་སྲིན་གྱི་རྨེན་བུ་འབྱུང་བར་འགྱུར་ཞིང་ན་བ་དང་བཅས་པ་ནི་སྲིན་བུའི་རྨེན་བུ་ཞེས་བྱའོ། །བཅིངས་པ་ལྟ་བུའི་སྲིན་རྨེན་བུ། །རྣག་གི་ཆུ་
སེར་ཚིགས་ཅན་དག །མཚོན་གྱིས་གསོ་བྱ་ལྷག་མ་ལྔ། །འཛག་པ་ཆུ་སེར་བཅས་པ་སྤང་། །ཞེས་བྱ་བ་ལ། །བཅིངས་པ་ལྟ་བུ་ཞེས་བྱ་བ་ལ་སོགས་པ་བཞི་ནི་མཚོན་གྱི་གཙགས་བུས་གསོ་བར་བྱ་ལ། མིག་མཆུ་འཛག་པ་ལ་སོགས་པ་བཞི་དང་ཆུ་སེར་ཅན་ཏེ་ལྔ་པོ་དེ་དག་སྤང་བར་
བྱའོ། །དེ་ཡང་འཛག་པ་བཞི་ནི་ཆུ་འཛག་པ་དང་། བད་ཀན་འཛག་པ་དང་། ཁྲག་འཛག་པ་དང་། རྣག་འཛག་པའོ། །མཁྲིས་པས་དཀར་པོའི་ཐིག་ལེ་ནི། །གནག་པ་འམ་སྔོ་བ་འམ་སེར་པོ་སྐྱེད། །གུར་ཀུམ་མེ་ལོང་དྲི་མས་གོས། །ལྟར་སྣང་ན་བ་ཚ་བ་མེད། །འཁྲུ་ཞིང་སྐོམ་དང་
རིམས་དང་བཅས། །ནད་ནི་ཉ་ཕྱིས་ཅན་ཞེས་བྱ། །ཞེས་བྱ་བ་ལ། མཁྲིས་པའི་ནད་ཀྱིས་མིག་འབྲས་དཀར་པོའི་སྟེང་དུ་ཐིག་ལེ་ནག་པོ་འམ་སྔོན་པོ་འམ་སེར་པོ་འམ། །ཡང་ན་དཀར་པོ་ཐམས་ཅད་མེ་ལོང་དྲི་མས་གོས་པ་ལྟར་སྣང་ཞིང་ཚ་བ་དང་། ལྷང་ལྷང་པོར་ན་བ་མེད་པ་དང་། འཁྲུ་བ་
ལ་སོགས་པ་དང་བཅས་པའི་ནད་དེ་ནི་མིང་ཉ་ཕྱིས་ཅན་ཞེས་བྱའོ། །བད་ཀན་ལས་དཀར་ཤ་ལྷག་དཀར། །རིང་ནས་འཕེལ་བ་མིག་མཛེར་དཀར། །ཞེས་བྱ་བ་ལ། བད་ཀན་གྱི་རྒྱུ་ལས་མིག་འབྲས་དཀར་པོའི་ཆར་ཤ་ལྷག་དཀར་ཞིང་ཡུན་རིང་ཞིག་ན་དལ་གྱིས་འཕེལ་བ་གང་ཡིན་པ་དེ་ནི་
མིག་མཛེར་དཀར་པོ་ཞེས་བྱའོ། །ནད་མེད་པ་ལ་སྐྲང་པ་དང་། །མདོག་དཀར་ལྷུན་ཆེ་འཇམ་པ་དང་། །ལྕི་སྣུམ་ཆུ་ཡི་ཐིགས་པ་འདྲ། །བད་ཀན་མདུད་པ་ཞེས་བྱར་བཤད། །ཅེས་བྱ་བ་ལ། ཡང་མིག་འབྲས་དཀར་པོ་ལ་ན་ཚབས་ཆུང་ཞིང་སྐྲང་པ་དང་། མདོག་དཀར་ཞིང་དཀར་པོར་
སྣང་བ་དང་། །ལྷུན་ཆེ་བ་དང་། འཇམ་ཞིང་མཉེན་བ་དང་། ལྕི་བ་ལ་སོགས་པའི་རྨེན་བུ་བྱུང་བ་གང་ཡིན་པ་དེ་ནི་བད་ཀན་གྱི་མདུད་པ་ཞེས་བྱའོ། །ཞེས་དྲང་སྲོང་རྣམས་ཀྱིས་བཤད་དོ། །ཐིག་ལེ་འབྲས་ཕྱེ་ལྟར་དཀར་བ། །མཐོ་བ་འབྲས་ཕྱེ་འདྲ་ཞེས་བཤད། །ཅེས་བྱ་བ་ལ། མིག་འབྲས་དཀར་

པོའི་སྟེང་དུ་ཐིག་ལེ་འབྲས་ཕྱེ་ལྟར་དཀར་ལ་དཔངས་མཐོ་ཞིང་པགས་པས་ཁྱབ་པ་གང་ཡིན་པ་དེ་ནི་འབྲས་ཕྱེ་འདྲ་བ་ཞེས་བྱའོ། །དཀར་པོའི་རི་མོ་དམར་པོས་ཁྱབ། །ཚ་ཞིང་ན་དང་བཅས་པ་ནི། །སྐྲང་ཞིང་མཆི་མས་གོས་པ་མེད། །ཁྲག་གྱུར་རྩ་ཡི་ཉེས་པར་བཤད་།
ཅེས་བྱ་བ་ལ། མིག་འབྲས་དཀར་པོའི་སྟེང་དུ་རི་མོ་དམར་པོ་ཤར་ཤར་པོར་ཁྱབ་ཅིང་ཚ་བ་དང་། ལྷང་ལྷང་པོར་ན་བ་དང་བཅས་པ་ལ། སྐྲང་པ་དང་། མཆི་མ་དང་ལྗན་ལྗིན་གྱིས་གོས་པ་མེད་པར་གྱུར་པ་དེ་ནི་ཁྲག་ལས་གྱུར་པའི་རྩའི་ནད་ཡིན་པས་ན་རྩའི་ཉེས་པ་ཞེས་བྱའོ། །རྩ་ཉེས་ཡལ་
བར་བོར་ན་ནི། །དམར་རིས་དེ་ཉིད་འཕེལ་བར་འགྱུར། །ཁྲག་བཅས་རྩ་ནི་བརྩེ་བར་བྱེད། །དེ་ཡིས་མིག་གིས་བལྟ་མི་ནུས། །ཞེས་བྱ་བ་ལ། རྩའི་ཉེས་པ་དེ་ཡལ་བར་བོར་ཞིང་གསོ་བ་མ་བྱས་ན་རྩ་རིས་དམར་པོ་ཤར་ཤར་པོར་གནས་པ་དེ་ལ་འཕེལ་ཞིང་རྒྱས་པར་གྱུར་པས་རྩ་ཁྲག་དང་
བཅས་པ་དང་། རྩ་བརྩེ་ཞིང་ཚ་བ་ཙག་ཙག་པོས་ཁྱབ་པར་འགྱུར་རོ། །རྩ་བརྩེ་བ་དེས་མིག་གིས་བལྟ་མི་ནུས་པར་འགྱུར་རོ། །རྩ་ཡི་དྲ་བས་གཡོགས་ཤིང་སྟུག །མཐོང་རྩ་ཡི་དྲ་བ་ཡིན། །ཞེས་བྱ་བ་ལ། རྩའི་དྲ་བ་ཞེས་བྱ་བའི་མིག་ནད་ནི་དཀར་པོ་རྩའི་རྩ་བའི་ནང་ན་ཁྲག་གིས་གང་ཞིང་
ཆེ་བ་སྟུག་ཅིང་མཐོ་བར་གནས་པ་ཡིན་ནོ། ཁྲག་གི་མིག་མཛེར་འཇམ་ཞིང་མཉམ། །པདྨ་འདྲ་བ་ཤ་ལྷག་ཡིན། །ཞེས་བྱ་བ་ལ། ཁྲག་གི་མིག་འཛེར་དང་མཉམ་པ་སྟེ་མིག་ཟུར་གྱི་ནད་དང་ཚུལ་འདྲ་བ་འཇམ་ཞིང་མཉམ་པ། མདོག་པདྨ་འདྲ་བ་གང་ཡིན་པ་དེ་ནི་ཤ་ལྷག་ཅན་ཞེས་བྱའོ།
ནད་མེད་རི་བོང་ཁྲག་ལྟར་དམར། །ཐིག་ལེ་ལིང་ཐོག་དམར་པོ་ཡིན། །ཞེས་བྱ་བ་ལ། མིག་འབྲས་དཀར་པོའི་སྟེང་དུ་ལིང་ཐོག་ནད་ཀྱི་ཤས་ཆུང་ཞིང་རི་བོང་གི་ཁྲག་ལྟར་དམར་བའི་ཐིག་ལེ་འབྱུང་བ་དེ་ནི་མིང་ལིང་ཐོག་དམར་པོ་ཞེས་བྱའོ། །འཇམ་ཞིང་ནད་མེད་མྱུར་དུ་འཕེལ། །དཀར་
པོར་ཁྱབ་བྱེད་དམར་ནག་ནི། །ཁྱབ་པའི་མཛེར་པ་ཞེས་བྱའོ། །ཞེས་བྱ་བ་ལ། འཇམ་ཞིང་སྲ་བ་མ་ཡིན་པ་ཟུག་གཟེར་གྱི་ཤས་ཆུང་བ་མྱུར་དུ་མཆེད་ཅིང་འཕེལ་བར་བྱེད་པ་དཀར་པོར་ཁྱབ་ཅིང་རྒྱས་པར་བྱེད་ལ། མདོག་དམར་ནག་ཏུ་གནས་པ་དེའི་མིང་ནི་ཁྱབ་པའི་མཛེར་པ་ཞེས་བྱའོ། །

དྲི་མ་ཁྲག་བཅས་རྩའི་མཛེར་པ། །རྩ་རྒྱུས་དང་འདྲ་རྩ་མཛེར་ཡིན། །ཞེས་བྱ་བ་ལ། ནད་གཞི་གསུམ་གྱི་དྲི་མ་ཁྲག་ཏུ་བཅས་པ་ལས་བྱུང་བའི་རྩའི་མཛེར་བ་རྩ་རྒྱུས་དང་འདྲ་བར་གནས་པ་གང་ཡིན་པ་དེ་ནི་རྩའི་མཛེར་བ་ཞེས་བྱའོ། །ཁྲག་སྐམ་གོང་བུ་ལྟར་གནག་ཅིང་། །ཤ་ནི་ཆེ་ཞིང་རྒྱས་པ་
གང་། །དེ་ནི་ཤ་ལྷག་མཛེར་པ་ཡིན། །ཞེས་བྱ་བ་ལ། ཤ་གང་ཁྲག་སྐམ་པོའི་གོང་བུ་ལྟར་ཀ་དོག་གནག་ཅིང་ཤས་ཆེ་བ་དང་། མཛེར་པ་རྒྱས་ཤིང་གཏོས་ཆེ་བ་གང་ཡིན་པ་དེ་ནི་ཤ་ལྷག་གི་མཛེར་པ་ཞེས་བྱ་བ་ཡིན་ནོ། །ཚ་ཞིང་རེག་ན་རྩུབ་པ་དང་། །རྩས་གཡོགས་མིག་འབྲས་ནག་
དང་ཉེ། །འབྲུམ་ཕྲན་ཡུངས་ཀར་ལྟ་བུས་རྩ། །ཞེས་བྱ་བ་ལ། མིག་འབྲས་ནག་པོ་དང་ཐག་ཉེ་བར་འབྲུམ་བུ་ཕྲོ་མོ་ཡུངས་ཀར་ལྟ་བུས་ཁྱབ་ཅིང་ཚ་བ་དང་། རེག་ན་རྩུབ་པ་དང་ལྡན་ལ་རྩས་གཡོགས་པ་གང་ཡིན་པ་དེ་ནི་མིང་རྩ་ཞེས་བའོ། །ཉ་ཕྱིས་རྩ་བརྩེ་རྩའི་ཉེས་པ། །འབྲས་ཕྱེ་མ་དུད་པའི་
ལིང་ཐོག་དམར། །དྲུག་པོ་སྨན་གྱིས་གསོ་བར་བྱ། །ལྷག་མ་བདུན་པོ་མཚོན་གྱིས་གསོ། །ཞེས་བྱ་བ་ལ། ཉ་ཕྱིས་ལ་སོགས་པའི་མིག་ནད་དྲུག་པོ་ནི་སྨན་གྱིས་གསོ་ཞིང་བཅོས་པར་བྱའོ། །མིག་ནད་ལྷག་མ་བདུན་ནི་མཚོན་གྱིས་དཔྱད་དུ་བྱ་ཞིང་གསོའོ། །དེ་ཡང་སར་བ་སྨན་གྱིས་གསོ། །
མཛེར་པར་བཤད་པ་ལྔ་པོ་གང་། །རྒྱུས་པ་དང་ནི་རྩས་གཡོགས་པ། །ནག་པོར་ཕྱིན་ཅིང་ལྤགས་གས་འདྲ། །མཐོན་པོ་གཅད་པར་བྱ་བ་ཡིན། །ཞེས་བྱ་བ་ལ། མཚོན་གྱིས་གསོ་བར་བྱ་བ་དེ་དག་ཀྱང་སར་པ་ཡིན་ཞིང་ནད་བྱུང་ནས་རིང་པོ་མ་ལོན་པ་ནི་སྨན་ཉིད་ཀྱིས་གསོ་བར་བྱའོ། །མཛེར་
བར་བཤད་པ་ལྔ་པོ་རྒྱུས་པ་དང་རྩས་གཡོགས་པ་མིག་འབྲས་ནག་པོར་ཕྱིན་པ་པགས་པ་གས་པ་ལྟ་བུར་སྣང་བ་མཐོན་པོ་གང་ཡིན་པ་དེ་ནི་མཚོན་གྱིས་གཅད་པར་བྱའོ། །དེ་ལ་མཛེར་པ་ལྔ་བོ་ནི། མཛེར་པ་དཀར་པོ་དང་། ཁྲག་གི་མཛེར་པ་དང་། ཤ་ལྷག་གི་མཛེར་པ་
དང་། ཁྱབ་པའི་མཛེར་པ་དང་། རྩ་རྒྱུས་ཀྱི་མཛེར་པ་སྟེ་ལྔའོ། །མཐོང་བྱེད་སྟེང་དུ་ཕྱིན་པ་སྤང་། །ཞེས་བྱ་བ་ལ། མཛེར་པ་དེ་མཐོང་བར་བྱེད་པ་ཞེས་བྱ་བའི་མིག་གི་རྒྱལ་མོའི་སྟེང་དུ་མཛེར་པ་དེ་དག་བྱུང་ན་ནི་སྤང་ཞིང་དོར་བར་བྱའོ། །དེ་ལྟར་ན་དེ་ཡན་ཆད་མིག་

འབྲས་དཀར་པོའི་ནད་བཅུ་གསུམ་དུ་བཤད་པ་ཡིན་ནོ། །ནག་པོ་འམ་མཐོང་བྱེད་ལ་མཁྲིས་པས། །པགས་པ་བརྟོལ་ཏེ་ལིང་ཏོག་ནི། །ཟུག་དམར་མཆི་མར་བཅས་པ་སྐྱེད། །དེ་ཡིས་མིག་འབྲས་དཀྱིལ་འཁོར་ནག །འཛམ་བུ་སྨིན་པ་འདྲར་སྣང་ཞིང་། །དམའ་
བ་རྨ་ཡི་ལིང་ཐོག་སྟེ། །དེ་ནི་གསོ་དཀའ། །ཞེས་བྱ་བ་ལ། ནག་པོ་ཞེས་བྱ་བ་མིག་འབྲས་ནག་པོའི་ཤའི་སྟེང་ངམ། མཐོང་བར་བྱེད་པའི་མིག་གི་རྒྱལ་མོའི་སྟེང་དུ་མཁྲིས་པས་འཁྲུགས་པར་གྱུར་ནས་པགས་པ་བརྟོལ་ཏེ་ལིང་ཏོག་ཟུག་ཅིང་ན་བ་དང་། དམར་བ་དང་། མཆི་མ་དང་
བཅས་པ་སྐྱེད་པར་བྱེད་ལ། ནད་དེས་མིག་གི་འབྲས་བུའི་དཀྱིལ་འཁོར་ནག་པོ་འཛམ་བུ་སྨིན་པ་དང་མདོག་འདྲ་བར་སྣང་བར་གྱུར་ལ། ལིང་ཐོག་དེ་ནི་ཅུང་ཟད་དམའ་བ་ཡིན་ཏེ། དེ་ལ་ནི་མིག་རྨའི་ལིང་ཐོག་ཅེས་བྱ་ལ་དེ་ནི་ཤིན་ཏུ་གསོ་དཀའ་བ་ཡིན་ནོ། །རིམ་གཉིས་དག །བརྟོལ་
བ་གསོ་པ་ཙམ་ཡིན་ནོ། །ཞེས་བྱ་བ་ལ། ལིང་ཐོག་དེ་རིམ་པ་གཉིས་བརྟོལ་པ་ཡིན་ན་ནི་དེ་རེ་ཞིག་གསོར་རུང་བ་ཙམ་ཡིན་ནོ། །དེར་ནི་ཟུག་པ་ལ་སོགས་མང་། །ནག་པོ་ཁབ་ཀྱིས་ཕུགས་སྙམ་བྱེད། །ཅེས་བྱ་བ་ལ། རིམ་པ་གཉིས་བརྟོལ་ནས་བྱུང་བའི་ལིང་ཐོག་ནི་ཟུག་པ་ལ་
སོགས་པའི་ནས་མང་བར་གྱུར་པ་དང་མིག་འབྲས་ནག་པོ་ཁབ་ཀྱིས་ཕུག་པ་སྙམ་དུ་སེམས་བར་གྱུར་རོ། །རིམ་པ་གསུམ་ནི་བརྟོལ་བ་དང་། །རྨ་ཡིས་ཁྱབ་པ་གསེར་མི་རུང་། །ཞེས་བྱ་བ་ལ། ལིང་ཏོག་དེ་མིག་ལྤགས་ཀྱི་རིམ་པ་གསུམ་པོ་བརྟོལ་ཏེ་བྱུང་བ་དང་། རྨས་ཁྱབ་ཅིང་ཁེབས་པ་
གང་ཡིན་པ་དེ་ནི་གསོར་མི་རུང་བར་འགྱུར་རོ། །བད་ཀན་ལས་གྱུར་དུང་ལྟར་དཀར། །ཤས་ཆེན་མི་ན་གསོ་སླ་དཀར། །ཞེས་བྱ་བ་ལ། བད་ཀན་ལས་གྱུར་པའི་ལིང་ཐོག་དུང་ལྟར་ཤས་ཆེར་དཀར་ཞིང་། ཧ་ཅང་ཤས་ཆེར་མི་ན་བ་གང་ཡིན་པ་དེ་གསོ་སླ་བ་ཡིན་པས་དེ་ནི་ལིང་ཐོག་དཀར་པོ་ཞེས་བྱའོ།
དམར་ཞིང་མཆི་མ་སྤྱི་བག་འཛག །འབྲུམ་ཕྲན་དམར་ཞིང་ཤིན་ཏུ་ན། །ར་ཡི་རིལ་མ་འདྲ་ཞིང་འབུར། །ཁྲག་སྐྱེས་ར་རིལ་འདྲ་བ་སྤང་། །ཞེས་བྱ་བ་ལ། ཁྲག་འཁྲུགས་པར་གྱུར་པ་ལས་མིག་གི་འབྲས་བུ་ནག་པོའི་སྟེང་དུ་འབྲུམ་བུ་ཕྲ་མོ་ཀུན་ལས་དམར་ཞིང་མཆི་མ་སྤྱི་བག་ནལ་ནལ་པོ་འཛག་

ལ་འབྲུམ་ཕྲན་དེ་ཟངས་ལྟར་དམར་བ་ཤིན་ཏུ་ན་ལ་དབྱིབས་རའི་རིལ་མ་འདྲ་བར་འཇོང་ཞིང་འབུར་ལ་ནག་པ་དེ་ནི་རའི་རིལ་མ་ལྟ་བུ་ཞེས་བྱ་སྟེ། དེ་གསོར་མི་རུང་བས་སྤང་བར་བྱའོ། །ནད་ཁྲག་བཅས་པས་རྩའི་ལིང་ཏོག །དེ་ཡིས་མིག་འབྲས་ནག་པོ་ཁེབས། །ཚ་ཞིང་ན་ལ་དམར་བ་ཡི། །རྩ་ཡིས་
ཀུན་དུ་རྒྱས་གྱུར་ལ། །རྒྱུ་མེད་མཆི་མ་གྲང་དྲོ་དང་། །སྐ་སླ་འཛག་པ་དེ་སྤང་བྱ། །ཞེས་བྱ་བ་ལ། རླུང་ལ་སོགས་པའི་ནད་ཁྲག་དང་བཅས་པས། རྩའི་ལིང་ཏོག་ཅེས་བྱ་བའི་ནད་དུ་འགྱུར་ཏེ་ནད་དེས་མིག་འབྲས་ནག་པོ་ཁེབས་པར་གྱུར་ཅིང་ཚ་བ་ལ་སོགས་པ་ཀུན་དུ་རྒྱས་པར་འགྱུར་ལ། རྒྱུ་མེད་
པར་མཆི་མ་གྲང་བ་དང་དྲོ་བ་དང་། སྐ་བ་དང་སླ་བ་འཛག་པའི་རྩའི་ལིང་ཐོག་དེ་ནི་གསོར་མི་རུང་བས་སྤང་བར་བྱའོ། །ནད་གཞི་ཁྲག་ལས་མཐོང་བཅས་གནག །འབྲས་བུ་དཀར་པོར་སྒྱུར་བྱེད་དེ། །སྤྲིན་དཀར་གྱིས་ནི་གཡོགས་འདྲ་ཞིང་། །ནིམ་པ་བ་ནི་བཀས་པ་འདྲ། །ཤིན་ཏུ་མི་བཟད་ན་ཞིང་
དམར། །ཚ་ཞིང་སྐྲངས་པས་གཟིར་བ་དག །སྨིན་པས་ཉེན་པའི་ལིང་ཏོག་དེ། །མི་བཟད་ན་བ་སྤང་པར་བྱ། །ཞེས་བྱ་བ་ལ། ནད་གཞི་གསུམ་པོ་དང་ཁྲག་འཁྲུགས་པ་ལས་མཐོང་བར་བྱེད་པའི་མིག་གི་རྒྱལ་མོ་དང་བཅས་པའི་མིག་འབྲས་ནག་པོ་དཀར་པོའི་གཟུགས་སུ་སྒྱུར་བར་བྱེད་ཅིང་སྤྲིན་
དཀར་པོས་གཡོགས་པ་ལྟ་བུ་ལ་ནིམ་པ་ཞེས་བྱ་བའི་རྩ་འབྲུའི་ཕྱེད་དུ་བཀས་པའི་དབྱིབས་དང་འདྲ་བར་གནས་པ་དང་། ཤིན་ཏུ་མི་བཟད་པར་ན་བ་ལ་སོགས་པ་གང་ཡིན་པ་དེ་སྨིན་པས་ཉེ་ན་པའི་རྒྱུས་ལིང་ཐོག་དེ་ཤས་ཆེར་མི་བཟད་པར་གྱུར་པ་ནི་གསོར་མི་རུང་བས་སྤང་བར་བྱའོ། །གང་གིས་
མཚན་མ་ཉམས་པ་འམ། །ནང་སྔོ་བ་འམ་དམར་བཅས་པ་འམ། །ཤིན་ཏུ་འབུར་བ་འམ་གཏིང་རིང་བ་འམ། །མཆི་མར་བཅས་ཞིང་རྩའི་རྨས་ཁྱབ། །རྙིང་པ་འམ་མཐོ་དམན་ཅན་དག་གམ། །དབུས་ཆད་ལིང་ཐོག་སྤང་བར་བྱ། །ཞེས་བྱ་བ་ལ། ལིང་ཐོག་གང་ཞིག་སྐྱེས་པར་གྱུར་པ་ནས་མཐོང་བར་བྱེད་
པའི་མཚན་མ་ཟར་མའི་མེ་ཏོག་ལྟ་བུར་ཉམས་པར་གྱུར་པའམ། ནང་སྔོ་བར་གྱུར་པ་འམ། ཡང་དམར་བ་དང་བཅས་པའི་ལིང་ཐོག་གམ། གང་ཤིན་ཏུ་འབུར་ཞིང་མཐོ་བ་འམ། གང་གཏིང་རིང་ཞིང་ཁོང་དུ་བྲོས་པ་འམ། གང་མཆི་མ་དང་བཅས་ཤིང་རྩའི་རྨས་ཁྱབ་པ་འམ། གང་རྙིང་ཞིང་ཡུན་རིང་

དུ་ལོན་པ་དང་། གང་མཐོན་དམན་མི་ཉམས་པར་གནས་པ་འམ། དབུས་སུ་ཆད་པའི་ལིང་ཐོག་གང་ཡིན་པ་དེ་ནི་གསོར་མི་རུང་བས་སྤང་བར་བྱའོ། །ནག་པོའི་ནད་ནི་གསོར་རུང་དང་། །མི་རུང་དབྱེ་བ་རྣམ་ལྔ་ཡིན། །ཞེས་བྱ་བ་ལ། མིག་འབྲས་ནག་པོའི་ནད་ནི་གསོར་རུང་བའི་དབྱེ་
བ་དང་དེ་བཞིན་དུ་གསོར་མི་རུང་བའི་དབྱེ་བས་རྣམ་པ་ལྔར་བཤད་པ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་བཅུ་པའི་རྣམ་པར་འགྲེལ་པའོ།། །།
དེ་ནས་མིག་ཟུར་དང་མིག་གི་འབྲས་བུ་དཀར་པོ་དང་ནག་པོའི་ནད་གསོ་བ་བཤད་པར་བྱའོ། །མིག་ནད་བཅིངས་པ་སྨན་པ་ཡིས། །དུགས་བྱས་རྩེ་མོ་འབྲས་འདྲས་དབུག །རྩེ་མོ་དཀྱིལ་འཁོར་འདྲ་བས་བཞར། །ཞེས་བྱ་བ་ལ། མིག་ཟུར་གྱི་ནད་བཅིངས་པ་ཞེས་བྱ་བ་ལ་ནི། སྨན་པས་དང་པོ་ཁོ་
ནར་དུགས་བྱས་ལ། །དེའི་འོག་ཏུ་རྩེ་མོ་འབྲས་འདྲ་བའི་གཙགས་བུས་ཕུག་ཅིང་བརྟོལ་ལ་དེ་ནས་རྩེ་མོ་དཀྱིལ་འཁོར་འདྲ་བའི་གཙགས་བུས་བཞར་བར་བྱའོ། །དེའི་འོག་རྒྱམ་ཚ་པི་པི་ལིང་། །སྦྲང་རྩི་སྦྱར་བས་བསྐུ་བར་བྱ། །དེ་ནས་སྔ་མ་བཞིན་དུ་བཅིང་། །པ་ཏོ་ལའི་ལོ་སྐྱུ་རུ་ར། །བསྐོལ་བའི་སྨན་ཁུ་
ཐིགས་པ་བླུགས། །ཞེས་བྱ་བ་ལ། དེ་ལྟར་བཞར་བའི་འོག་ཏུ་རྒྱམ་ཚ་ལ་སོགས་པའི་སྨན་སྦྱར་བས་བསྐུ་ཞིང་བྱུག་པར་བྱའོ། །དེའི་འོག་ཏུ་སྔར་མིག་མཆུའི་ནད་གསོ་བའི་སྐབས་སུ་བཤད་པ་བཞིན་དུ་བཅིང་བར་བྱ་ཞིང་དེ་ལྟར་བཅིངས་ནས་པ་ཏོ་ལའི་ལོ་མ་དང་། སྐྱུ་རུ་ར་བསྐོལ་བའི་སྨན་གྱི་ཐིགས་པ་
བླུགས་པར་བྱའོ། །ཚིགས་ཅན་ལྕགས་ཀྱུའི་ཆ་སྤྱད་ཀྱིས། །ཕྱི་མའི་མཚམས་ཀྱི་ཆ་གསུམ་གཟུང་། །འཕེལ་གཙགས་ཀྱིས་ནི་ཕྱེད་གཅད་བྱ། །གཞན་དུ་མཆི་མ་རྒྱུ་ལ་གནོད། །སྦྲང་རྩི་རྒྱམ་ཚས་བསྐུས་ནས་ནི། །མིག་མཛེར་ལྟ་བུར་གསོ་བར་བྱ། །ཞེས་བྱ་བ་ལ། ཚིགས་ཅན་ཞེས་བྱ་བའི་
མིག་གི་གྲྭ་མཚམས་ཀྱི་ནད་པ་ནི་ལྕགས་ཀྱུ་ལྟ་བུའི་ཆ་སྤྱད་ཀྱིས་ཕྱིའི་མཚམས་ཀྱི་ཆ་གསུམ་ནས་གཟུང་ཞིང་བླངས་ཏེ་དེ་ནས་འཕེལ་གཙགས་ཀྱིས་ཕྱེད་ཙམ་དུ་གཅད་པར་བྱའོ། །དེ་ལས་གཞན་དུ་བྱས་ན་མཆི་མ་རྒྱུ་བའི་རྩ་ལ་གནོད་པར་འགྱུར་རོ། །དེ་ལྟར་བཅད་ནས་ཀྱང་དེ་ལ་སྦྲང་རྩི་དང་རྒྱམ་ཚར་

སྦྱར་བས་བསྐུས་ཏེ་མིག་མཛེར་གསོ་པའི་ཚུལ་དུ་གསོ་བར་བྱའོ། །ཆུ་སེར་རྣག་འཛག་གཏར་ག་གདབ། །དེ་ནས་དེ་ནི་བཅིང་བར་བྱ། །མིག་རྣགས་ཆོ་གར་བཤད་པ་ཡི། །ལས་ཀུན་ཆོ་ག་བཞིན་དུ་བྱ། །ཞེས་བྱ་བ་ལ། རྣག་གི་ཆུ་སེར་འཛག་པ་ཞེས་བྱ་བའི་མིག་གི་གྲྭ་མཚམས་ཀྱི་ནད་ལ་ནི་དང་པོར་
གཏར་ག་གདབ་ལ་ཁྲག་གཟགས་ནས་དེའི་འོག་ཏུ་རྣག་གི་ཆུ་སེར་འཛག་པའི་ནད་དེ་བཅིང་པར་བྱ་བ་དང་། དེ་བཞིན་དུ་མིག་རྣགས་པའི་གསོ་བའི་ཆོ་གར་བཤད་པའི་ལས་ཀུན་ཆོ་ག་ཇི་ལྟ་པ་བཞིན་སྤྱད་པར་བྱའོ། །རྒྱམ་ཚ་སྒེའུ་གཤེར་ནག་ཚུར་དང་། །ལྕགས་དང་ཟངས་ནི་ཞིབ་བཏགས་པའི་
ཕྱེ་མའི་མིག་སྨན་གཏང་བ་འམ། །སྦྲང་རྩིར་སྦྱར་བའི་ཁུ་བ་བླུགས། །ཞེས་བྱ་བ་ལ། རྣག་གི་ཆུ་སེར་འཛག་པ་དེ་ལ་རྒྱམ་ཚ་ལ་སོགས་པ་ཞིབ་ཏུ་ལེགས་པར་བཏགས་པའི་ཕྱེ་མའི་མིག་སྨན་གཏང་བར་བྱ་བ་འམ། ཡང་ན་རྒྱམ་ཚ་ལ་སོགས་པའི་སྨན་སྦྲང་རྩི་དང་སྦྱར་བའི་ཁུ་བ་མིག་ཏུ་བླུགས་
ཤིང་གཏང་བར་བྱའོ། །སྲིན་གྱི་རྨེན་བུ་ལྕི་བ་ཡིས། །དུགས་བྱས་བརྟོལ་ཏེ་ཕྱི་བར་བྱ། །ནག་ཚུར་རྒྱམ་ཚ་འབྲས་བུ་གསུམ། །སྦྲང་རྩིར་སྦྱར་བས་བསྐུ་བར་བྱ། །ཞེས་བྱ་བ་ལ། སྲིན་གྱི་རྨེན་བུ་ནི་ལྕི་བ་འམ་རིལ་མ་ལ་སོགས་པས་དུགས་བྱས་ལ། གཙགས་བུས་བརྟོལ་ཏེ་དེའི་འོག་ཏུ་
གཙགས་བུ་ཉིད་ཀྱིས་ཕྱི་ཞིང་བཞར་ལ་དེ་ནས་ནག་ཚུར་ལ་སོགས་པའི་སྨན་བསྐུ་བར་བྱའོ། །ཉ་ཕྱིས་མཁྲིས་མཆི་འཛག་ལྟར་གསོ། །ཞེས་བྱ་བ་ལ། ཉ་ཕྱིས་ཞེས་བྱ་བ་གྲྭ་མཚམས་ཀྱི་མིག་ན་ན་ནི་མཁྲིས་པ་ལས་གྱུར་པའི་མཆི་མ་འཛག་པའི་མིག་ནད་ལྟར་གསོ་བར་བྱའོ། །བད་ཀན་མདུད་
པ་འབྲས་ཕྱེ་གཉིས། །གཏར་ག་མ་གཏོགས་བད་ཀན་གྱི། །མཆི་མ་འཛག་པ་བཞིན་དུ་གསོ། །ཞེས་བྱ་བ་ལ། བད་ཀན་གྱི་མདུད་པ་དང་འབྲས་ཕྱེ་ལྟ་བུའི་མིག་ཟུར་གྱི་ནད་གཉིས་ནི་གཏར་ག་གདབ་ཅིང་ཁྲག་དབྱུང་བའི་སྦྱོར་བ་མ་གཏོགས་པར་བད་ཀན་ལས་གྱུར་པའི་མཆི་མ་འཛག་པ་བཞིན་དུ་
གསོ་བར་བྱའོ། །ཚ་བ་གསུམ་དང་ཀད་ཕ་ལ། །བ་ལུང་ཁུ་བའི་མིག་སྨན་གཏང་། །ཞེས་བྱ་བ་ལ། བད་ཀན་གྱི་མདུད་པ་དང་འབྲས་ཀྱི་ཕྱེ་མའི་མིག་ནད་གཉིས་ལ་ནི། ཚ་བ་གསུམ་དང་ཀད་པ་ལ་དང་བ་ལུང་ཞེས་བྱ་བ་པི་ཛ་པུ་རའི་ཁུ་བ་དང་སྦྱར་བའི་མིག་སྨན་གཏང་བར་བྱའོ། །རྒྱམ་ཚ་ཛཱ་ཏི་ཁ་འབུས་པ་

ཐང་ཤིང་བཅའ་སྒ་བཏགས་པའི་ཕྱེ། །ཆང་གི་དངས་མ་རི་ལུར་བྱས། །མིག་སྨན་སྐྲང་དང་གཡའ་བ་སེལ། །ཞེས་བྱ་བ་ལ། རྒྱམ་ཚ་ལ་སོགས་པར་སྨན་བཏགས་པའི་ཕྱེ་མ་ཆང་གི་དངས་མ་དང་རི་ལུ་བྱས་པའི་མིག་སྨན་ནི་སྐྲང་པ་དང་། གཡའ་བ་སེལ་བར་བྱེད་དོ། །རྩ་ཉེས་རྩ་
བརྩེ་ལིང་ཐོག་དམར། །རྩ་དྲ་ཁྲག་འཛག་ལྟ་བུར་གསོ། །ཞེས་བྱ་བ་ལ། རྩའི་ཉེས་པ་དང་རྩ་བརྩེ་བ་དང་ལིང་ཐོག་དམར་པོ་དང་རྩའི་དྲ་བ་ནི། ཁྲག་འཛག་པའི་མིག་ནད་དང་འདྲ་བར་གསོ་བར་བྱའོ། །རྩ་ཡི་ཉེས་ལ་ཁྱད་པར་དུ། །མར་དང་སྦྲང་རྩིའི་མིག་སྨན་བསྐུ། །ཞེས་བྱ་བ་ལ། རྩའི་ཉེས་པ་ལ་ནི་
ཁྱད་པར་དུ་མར་དང་སྦྲང་རྩི་སྦྱར་བའི་མིག་སྨན་བསྐུ་བར་བྱའོ། །རྩ་བརྩེ་བ་ལ་སྦྲང་རྩི་དང་། །སྐྱེར་པའི་ཁཎྜ་ཞིབ་བཏགས་བསྐུ། །ཞེས་བྱ་བ་ལ། རྩ་བརྩེ་བ་ཞེས་བྱ་བ་ལ་ནི་ཁྱད་པར་དུ་སྦྲང་རྩི་དང་སྐྱེར་པའི་ཁཎྜ་ཞིབ་ཏུ་བཏགས་པའི་མིག་སྨན་གཏར་བར་བྱའོ། །ལིང་ཐོག་དམར་པོ་ཞོ་ག་ཆུ། །སྦྲང་རྩི་
ཁུ་རའི་ཐིགས་པ་བླུགས། །ཞེས་བྱ་བ་ལ། ལིང་ཐོག་དམར་པོ་ལ་ནི་ཁྱད་པར་དུ་ཞོ་ག་ཆུ་དང་། སྦྲང་རྩི་དང་ཁ་ར་སྦྱར་བའི་ཐིགས་པ་བླུགས་ན་ཕན་ནོ། །ཤེལ་དང་གུར་ཀུམ་ཤིང་མངར་དུང་། །སྦྲང་རྩི་སྦྱར་བའི་མིག་སྨན་གཏང་། །ཞེས་བྱ་བ་ལ། ཡང་ལིང་ཐོག་དམར་པོ་ལ་ནི་ཤེལ་ལ་སོགས་པའི་མིག་
སྨན་བཏང་ན་ཕན་ནོ། །ཡང་ན་སྦྲང་རྩི་དུང་སྦྱར་བ་འམ། ཁ་ར་རྒྱ་མཚོའི་ཝུ་བ་ཕན། །ཞེས་བྱ་བ་ལ། ཡང་ན་ལིང་ཐོག་དམར་པོ་ལ་སྦྲང་རྩི་དང་དུང་སྦྱར་བའི་མིག་སྨན་ཕན་པ་འམ། ཡང་ན་ཁ་ར་དཀར་པོ་དང་རྒྱ་མཚོའི་ཝུ་བ་སྦྱར་བའི་མིག་སྨན་ལིང་ཐོག་དམར་པོ་ལ་ཕན་ནོ། །མཛེར་པར་བཤད་པ་རྣམ་
ལྔ་ལས། །དུད་པ་ལྟ་བུའི་རྙོག་ཅན་དང་། །གང་ཡང་དམར་ཞིང་ཞོ་འདྲ་བ། །དེ་སྨན་ལིང་ཐོག་བཞིན་དུ་བྱ། །ཞེས་བྱ་བལ། ཁྱབ་པའི་མཛེར་པ་རྣམ་པ་ལྔར་བཤད་པ་གང་ཡིན་པ་དེ་དག་ལས་དུད་པ་ལྟ་བུའི་རྙོག་མའི་རྡུལ་ཙམ་དམར་ཞིང་ཞོ་འདྲ་བ་གང་ཡིན་པ་དེ་ལ་ནི་ལིང་
ཐོག་བཞིན་དུ་ལུས་དང་མགོ་བོའི་བཀྲུ་སྨན་བཏང་པ་དང་བཞར་བ་དང་། མིག་སྨན་བསྐུ་བ་ལ་སོགས་པ་བྱས་ན་ཕན་ནོ། །ཅིག་ཤོས་གན་རྐྱལ་བཞག་དུགས་བྱས། །ཁ་ལུང་དང་ནི་རྒྱམ་ཚ་དག །སྦྱར་བའི་མིག་སྨན་བསྐུས་ནས་ནི། །མིག་བཙུམས་ནས་ནི་མཉེ་བར་བྱ། །ཞེས་བྱ་བ་ལ། ཅིག་ཤོས་

ཏེ་སྔར་བཤད་པའི་མིག་མཛེར་གྱི་ནད་ལ་ནི། གན་རྐྱལ་དུ་བཞག་ཅིང་དུགས་བྱས་ལ་ཁ་ལུང་དང་རྒྱམ་ཚར་སྦྱར་བའི་མིག་སྨན་བསྐུས་ལ་མིག་བཙུམས་ཏེ་མཉེ་བར་བྱའོ། །དེ་ལྟར་མིག་ནི་འཁྲུགས་བཅས་པ། །ཤ་ལྷག་སྐྱེས་པ་བསྐྱོད་ནས་ནི། །མགོ་བོ་མི་འགྱུར་དམ་དུ་བཟུང་། །མིག་མཆུ་
མཆོག་ཏུ་མི་འགུལ་དང་། །མིག་ཟུར་དུ་ནི་ལྟ་བཞིན་དུ། །མིག་ཕུགས་མཚམས་ནས་འཛེར་པ་མཐོ། །གང་དུ་གཉེར་མ་འདུས་གྱུར་པ། །དེར་ནི་ལྕགས་ཀྱུས་དམ་བཟུང་བ་འམ། །ཧ་ཅང་མི་ཆེ་མུ་ཙི་ཏྲ་འམ། ཁབ་བམ་སྐུད་པས་བླངས་ནས་ནི། །ཀུན་ནས་དཀྱིལ་འཁོར་འདྲ་བས་དབྲལ། །
ཞེས་བྱ་བ་ལ། དེ་ལྟར་རྣམ་པ་འདིས་འཁྲུགས་ཤིང་ནད་དང་བཅས་པའི་མིག་འདིའི་ཤ་ལྷག་སྐྱེས་པ་བསྐྱོད་ཅིང་མཉེས་པས་གཡོ་བར་བྱས་ནས། ནད་གཡོག་གིས་མགོ་བོ་གཞན་དུ་མི་འགྱུར་བར་དམ་དུ་བཟུང་ལ་མིག་མཆུ་ཡང་མི་འགུལ་བ་ཉིད་དུ་བརྟན་པར་བྱས་ཞིང་བཟུང་ལ་ཁྱད་པར་དུ་
མིག་ཟུར་དེ་མིག་འགམ་ལོགས་སུ་ལྟ་བཞིན་དུ། མིག་ཕུགས་ཀྱི་མཚམས་ནས་མཛེར་པ་མཐོ་ཞིང་འཕགས་པར་འགྱུར་ལ། །དེ་ལྟར་བྱས་པ་ན་གང་དང་གང་དུ་གཉེར་མ་འདུས་པར་གྱུར་པ་དེ་དང་དེར་ལྕགས་ཀྱུས་དམ་དུ་བཟུང་ཞིང་བླངས་ལ། ཧ་ཅང་རྒྱ་ཆེ་བ་མ་ཡིན་པར་བྱས་ཏེ། མུ་ཙི་ཏྲ་
ཞེས་བྱ་བའི་ཆ་སྦྱད་དམ་ཁབ་བམ་སྐུད་པར་བླངས་ལ་དེའི་འོག་ཏུ་ཀུན་ནས་ཏེ་ཐམས་ཅད་ནས་དཀྱིལ་འཁོར་འདྲ་བའི་གཙགས་བུས་དབྲལ་བར་བྱའོ། །དེ་ནས་བཏོན་ཏེ་བྲལ་ནས་ཀྱང་། །མིག་ཕུགས་མཚམས་སུ་བསྙེན་ནས་ནི། །ཆ་བཞི་ལུས་པར་གཅད་བྱ་སྟེ། །མིག་ཕུགས་རྩ་དང་མཆི་མ་ནི། །
འཛག་པའི་རྩ་ལ་མི་གནོད་བསྲུང་། །ཞེས་བྱ་བ་ལ། དེ་ནས་མིག་མཛེར་དེ་དབྲལ་ཞིང་ཕུག་ནས་མིག་ཕུགས་ཀྱི་ཕྱོགས་སུ་བསྙེན་ཅིང་དྲངས་ནས་ཆ་བཞི་ལུས་པ་ཙམ་དུ་དེ་གཅད་པར་བྱའོ། །མིག་ཕུགས་ཀྱི་རྩ་དང་མཆི་མ་འཛག་པའི་རྩ་ལ་ནི་མི་གནོད་ཅིང་མཚོན་གྱིས་མི་ཕོག་པར་བསྲུང་སྟེ།
མཚོན་གྱིས་གཅད་པར་མི་བྱའོ། །མིག་ཕུགས་ཟུར་བཅད་མཆི་མ་འཛག །མིག་གི་རྩ་སྦུབས་རྨ་ཅན་འགྱུར། །ཞེས་བྱ་བ་ལ། གལ་ཏེ་མིག་ཕུགས་སྣ་གོང་གི་མིག་ཟུར་དེ་བཅད་ཅིང་གནོད་པར་གྱུར་ན་རྟག་ཏུ་མཆི་མ་འཛག་པ་དང་། མིག་གི་རྩ་སྦུབས་ལ་རྨ་འབྱུང་བར་འགྱུར་རོ། །མིག་འགྲམ་

འཛེར་པ་ཆེར་སྐྱེས་པ། །མིག་ཕུགས་ཟུར་དུ་བལྟས་ཏེ་བྱ། །ཞེས་བྱ་བ་ལ། མིག་འགྲམ་ནས་མིག་མཛེར་ཆེར་སྐྱེས་ཤིང་འཕགས་པར་གྱུར་པ་ལ་ནི་མིག་ཕུགས་ཀྱི་ཟུར་དུ་ནད་པ་བལྟར་བཅུག་ལ་དེ་ལ་བཞི་ཆ་ལུས་བར་སྦྱད་པར་བྱ་ཞིང་མིག་ཟུར་དང་རྩ་ལ་མི་གནོད་བར་བསྲུང་
པར་བྱའོ། །ལེགས་པར་བཅད་དེ་ཚ་བ་གསུམ། །རྒྱམ་ཚ་སྦྲང་རྩིར་བཅས་པ་བསྐུ། །ཞུན་མར་དྲོན་པོ་བླུགས་པ་དང་། །སྦྲང་རྩི་མར་སྦྱར་བསྐུས་ཏེ་བཅིངས། །ཞེས་བྱ་བ་ལ། མཛེར་པ་ལེགས་པར་བཅད་ཅིང་པགས་པ་ལ་གནོད་པར་མ་གྱུར་པར་བྱས་ནས་རྨ་དེ་ལ་ཚ་བ་གསུམ་ལ་སོགས་པ་
བསྐུ་བར་བྱ་ཞིང་། ཞུན་མར་དྲོ་འཇམ་ཙམ་བླུགས་པར་བྱ་བ་དང་། སྦྲང་རྩི་དང་མར་སྦྱར་བས་བསྐུས་ཏེ་སྔར་བཤད་པའི་ཚུལ་དུ་བཅིང་བར་བྱའོ། །དེ་ནས་ཞག་གསུམ་ལ་སོགས་ནས། །བཀྲོལ་ནས་ཀ་རཉྫའི་ས་བོན། །འོ་མ་བསྐོལ་བ་དེ་བཞིན་བླུགས། །ཞེས་བྱ་བ་ལ། དེ་ནས་རྨ་དེ་ཞག་
གསུམ་ལ་སོགས་པའི་ཉིན་པར་བཀྲོལ་ལ། ཀ་རཉྫའི་ས་བོན་དང་། འོ་མ་བསྐོལ་བ་དྲོ་འཇམ་ཙམ་གྱི་ཐིགས་པ་བླུགས་པར་བྱའོ། །སེར་པོ་རྣམ་གཉིས་པ་ཏོ་ལ། །ཤིང་མངར་དང་ནི་རྒྱ་སྐྱེགས་ཤིང་། །ཀ་རཉྫ་ཡི་མེ་ཏོག་ནི། །ཁ་འབུས་སྦྲང་རྩིར་བཅས་བསྐོལ་བླུགས། །ཞེས་བྱ་བ་ལ། གསུམ་པོ་
ལ་སོགས་པའི་ཉིན་ཞག་ལ་མིག་གི་ཆིངས་མ་བཀྲོལ་ཏེ། སེར་པོ་རྣམ་གཉིས་ལ་སོགས་པ་དང་། ཀ་རཉྫའི་མེ་ཏོག་ཁ་འབུས་པ་བསྐོལ་བའི་ཁུ་བ་སྦྲང་རྩི་དང་བཅས་པ་མིག་ཏུ་བླུགས་པར་བྱའོ། །ཞག་བདུན་ནས་ནི་དེ་དགྲོལ་བྱ། །ཞེས་བྱ་བ་ལ། ཞག་བདུན་པ་ལ་ནི་དེ་དགྲོལ་བར་བྱའི་བཅིང་བར་མི་བྱའོ། །
ལེགས་པར་བཅད་ན་ནད་མེད་འགྱུར། །ཞེས་བྱ་བ་ལ། མིག་གི་མཛེར་པ་དེ་ལེགས་པར་བཅད་པར་གྱུར་ན། མིག་དེ་ནད་མེད་པ་ཁོ་ནར་འགྱུར་རོ། །བཅད་དྲགས་མ་ཆོད་ལས་ནད་འགྱུར། །སྨན་ཁུ་བླུགས་དང་མིག་སྨན་སོགས། །ཕྱི་བ་དང་བརྟ་བས་གསོ། །ཞེས་བྱ་བ་ལ། བཅད་དྲགས་པ་དང་། མཆོད་ཅིང་བཅད་མ་ལེགས་
པ་ལས་ནད་དུ་གྱུར་བ་ལ་ནི་སྨན་གྱི་ཁུ་བ་ལ་སོགས་པས་གསོ་བར་བྱའོ། །ཁ་ར་ལྡོང་རོས་ཨེ་ལི་ཡ། །རྒྱམ་ཚ་བཅའ་སྒ་ཞོ་རེ་དང་། །སྐྱེར་པའི་ཁཎྜ་སྲང་ཕྱེད་དང་། །སྦྲང་རྩི་སྦྱར་བའི་མིག་སྨན་གྱིས། །བད་ཀན་ལས་གྱུར་རབ་རིབ་དང་། །ཆུ་སེར་གྱིས་གང་ལིང་ཏོག་དང་། །མིག་མཛེར་བཅས་པའི་ཤ་ལྷག་

སེལ། །ཞེས་བྱ་བ་ལ། ཁ་ར་དཀར་པོ་ལ་སོགས་པའི་སྨན་འདི་དག་སྣ་རེ་ཞིང་ཞོ་རེ་དང་། སྐྱེར་པའི་ཁཎྜ་སྲང་ཕྱེད་དང་། །སྦྲང་རྩི་སྦྱར་ཞིང་སྦྲུས་པའི་མིག་སྨན་གྱིས་ནི་བད་ཀན་ལས་གྱུར་པའི་རབ་རིབ་ལ་སོགས་པ་སེལ་བར་བྱེད་དོ། །ཨེ་ལི་ཡ་ནི། ཨེ་ལ་བ་ལུ་ཀ་དང་མ་ལུང་ཀ་དང་ཧ་རི་བ་ལུ་ཀ་ཞེས་
བྱ་བ་ཡིན་ནོ། །འབྲས་བུ་གསུམ་ནི་གང་རུང་བའི། །ཤུན་པ་ཆུར་བཏགས་ལྡེ་གུར་བྱས། །ཁམ་ཕོར་སྦྱར་བའི་ནད་དུ་བསྲེག །དེ་ནས་ཚིག་ནས་ཕྱེ་མར་བཏགས། །སྨན་ནི་ལྷག་མའི་ཁུ་བ་ཡིས། །སོ་སོར་ལེགས་པར་བསྒོས་ནས་ནི། །སྣག་ཚ་དེ་བསྐམས་སླར་ཡང་བཏགས། །རྒྱམ་ཚ་
ཉིས་འགྱུར་བཅས་པ་ཡི། །མིག་སྨན་གསུམ་པོ་དེ་དག་ནི། །ཕྱི་བའི་མཆོག་ཏུ་མུ་ཁྱུད་འཆད། །ཅེས་བྱ་བ་ལ། འབྲས་བུ་གསུམ་གང་ཡང་རུང་པའི་ཤུན་པ་སྟེ། ཨ་རུ་རའི་ཤུན་པ་འམ། །བ་རུ་རའི་ཤུན་པ་དང་། །སྐྱུར་རུ་རའི་ཤུན་པ་གང་ཡང་རུང་བ་ཆུར་བཏགས་ཏེ་ལྡེ་གུར་བྱས་ལ་ཁམ་
ཕོར་སྦྱར་པའི་ནང་དུ་དུ་བ་མ་ཤོར་བའི་བསྲེག་པར་བྱའོ། །དེ་ནས་ཚིག་པར་གྱུར་པ་དང་ཕྱེ་མར་བཏགས་ཏེ་དེ་ནས་སྨན་གྱི་ལྷག་མ་འབྲས་བུ་གསུམ་ལས་བཞག་པའི་གཉིས་པོའི་ཁུ་བ་དང་སོ་སོར་ལེགས་པར་བསྒོས་ཤིང་བསྲེགས་ནས་སྣག་ཚ་འདྲ་བ་དེ་ཡང་བསྐམས་པ་བཏགས་ཏེ་རྒྱམ་ཚ་ཉིས་
འགྱུར་དང་བཅས་བའི་མིག་སྨན་གསུམ་པ་དེ་དག་ནི་ཕྱི་ཞིང་བསལ་བའི་མིག་སྨན་གྱི་མཆོག་ཡིན་པར་དྲང་སྲོང་མུ་ཁྱུད་ཅེས་བྱ་བས་བཤད་དོ། །རྩ་ཡི་དྲས་གཡོགས་རྩ་གང་ཞིག །སྲ་བས་ཕྱི་བའི་སྨན་དག་གིས། །མ་ཞི་འབྲུམ་ཕྲན་དེ་ལ་ནི། །མིག་མཛེར་ཆོ་ག་བཞིན་དུ་གསོ། །
ཞེས་བྱ་བ་ལ། རྩའི་དྲ་བས་གཡོགས་པའི་རྩ་གང་ཞིག་སྲ་ཞིང་མཁྲང་བས་ཕྱི་ཞིང་བསལ་བའི་སྨན་བསྐུས་སུ་ཟིན་ཀྱང་ནད་དེ་ཞི་ཞིང་མེད་པར་མ་གྱུར་ན། འབྲུམ་ཕྲན་དེ་ལ་མིག་མཛེར་གྱི་གསོ་བ་ལྟར་བྱའོ། །ལིང་ཏོག་ནད་གཞིའི་དབང་ལས་ནི། སྣུམ་རྩུབ་འབྲས་སུ་གསུམ་སྦྱིན་ཞིང་། །
ཏིག་ཏ་ཆེན་པོའི་སྨན་མར་སྤྱིན། །གཏར་ག་བཀྲུ་སྨན་སྨན་ཁུ་ཡི། །ཐིགས་པ་བླུགས་པ་ལ་སོགས་བྱ། །ཞེས་བྱ་བ་ལ། ལིང་ཐོག་གསོར་རུང་བ་དག་ལ་ནི་ནད་གཞི་རང་རང་གི་གང་དག་ཡིན་པའི་དབང་དུ་བྱས་ནས་སྣུམ་པ་འམ་རྩུབ་པ་དག་འབྲས་བུ་གསུམ་སྦྱིན་པར་བྱ་ཞིང་ཏིག་ཏ་

ཆེན་པོའི་སྨན་མར་སྦྱིན་པ་དང་། དེ་བཞིན་དུ་གཏར་ག་གདབ་པ་དང་། བཀྲུ་སྨན་དུ་གཏང་བ་དང་། སྨན་ཁུའི་ཐིགས་པ་མིག་ཏུ་བླུགས་པ་དང་། ཁ་བསྐུ་བ་དང་། སྣ་ནས་གཏང་བ་དང་། བརྟ་བ་དང་། མིག་སྨན་གྱི་ཕུར་མ་བཙོ་བའི་སྦྱོར་བ་དག་བྱས་ན་ཕན་ནོ། །
སྣད་པའི་ལིང་ཐོག་དུར་བྱིད་ཆུ། །ལན་གསུམ་བསྐོལ་བའི་མར་བླུད་བྱ། །ཞེས་བྱ་བ་ལ། སྣད་ཅིང་རྨ་བྱུང་བ་ལས་ལིང་ཐོག་ཏུ་གྱུར་པ་ལ་ནི་དུར་བྱིད་བསྐོལ་བའི་ཁུ་བ་དང་ལན་གསུམ་གྱི་བར་དུ་བསྐོལ་བའི་སྨན་མར་བླུད་པར་བྱའོ། །དེ་འོག་གཏར་ག་འམ་པད་པ་ཡིས། །མིག་
ལས་ཁྲག་ནི་དབྱུང་བར་བྱ། །ཞེས་བྱ་བ་ལ། དེའི་འོག་ཏུ་སྣད་པའི་ལིང་ཐོག་དེ་ལ་གཏར་ག་གདབ་པ་དང་། སྲིན་བུ་པད་པས་འཇིབ་ཏུ་གཞུག་པས་ཁྲག་དབྱུང་བར་བྱའོ། །ཨུ་ཏྤལ་རྒུན་འབྲུམ་རམ་ཉེ་བ། །ཤིང་མངར་བི་ད་རི་བསྐོལ་བ། །ཁ་ར་ར་ཡི་འོ་མ་འམ། །ཆུ་བསྐོལ་
ཐིགས་པ་བླུགས་པར་བྱ། །ཞེས་བྱ་བ་ལ། ཡང་ན་སྣད་པའི་ལིང་ཐོག་ལ་རའི་འོ་མ་དང་། ཨུཏྤལ་ལ་སོགས་པ་སྨན་བསྐོལ་བ་བསྒྲངས་པའི་ནང་དུ་ཁར་བཏབ་པ་བླུགས་པ་འམ། ཡང་ན་ཨུཏྤལ་ལ་སོགས་པའི་སྨན་ཆུའི་ནང་དུ་བསྐོལ་བའི་ཐིགས་པ་བླུགས་པར་བྱའོ། །མིག་དམར་
མཆི་མ་ནད་ཞི་ནས། །དེ་རྗེས་ཕྱི་བའི་མིག་སྨན་ཕན། །ཞེས་བྱ་བ་ལ། མིག་དམར་བ་ལ་སོགས་པ་ཞི་བར་གྱུར་ནས་དེའི་འོག་ཏུ་ཕྱི་བའི་མིག་སྨན་བཏང་ན་ལིང་ཐོག་ལ་ཕན་ནོ། །ཛཱ་ཏི་ཁ་འབུས་རྒྱ་སྐྱེགས་དང་། །ཡུག་སྣམ་ཙནྡན་རི་ལུར་བྱས། །ཁྲག་དང་མཁྲིས་པ་དང་བྱེད་ཅིང་། །
སྣད་པ་ལས་གྱུར་ལིང་ཐོག་སེལ། །ཞེས་བྱ་བ་ལ། ཛཱ་ཏིའི་མེ་ཏོག་ཁ་འབུས་པ་ལ་སོགས་པའི་རི་ལུར་བྱས་པའི་མིག་སྨན་གྱིས་ནི། ཁྲག་དང་མཁྲིས་པ་དང་ཞིང་སྦྱོང་བར་བྱེད་པ་དང་། སྣད་པར་གྱུར་པའི་ལིང་ཐོག་སེལ་བར་བྱེད་དོ། །ཕག་དང་རྔ་མོ་གླང་པོ་ཆེ། །བ་ལང་ར་རྟ་བོང་
བུའི་སོ། །རྒྱ་མཚོའི་ཝུ་བ་མུ་ཏིག་དང་། །ནེ་ལ་ཤམ་ནི་བཞི་པར་སྦྱར། །སོ་ཡི་རི་ལུས་སྣད་བ་ཡི། །ལིང་ཐོག་གིས་ཁྱབ་སེལ་བར་བྱེད། །ཅེས་བྱ་བ་ལ། ཕག་ལ་སོགས་པའི་སོ་དང་རྒྱ་མཚོའི་ཝུ་བ་དང་། མུ་ཏིག་དང་ན་ལེ་ཤམ་བཞི་པོར་སྦྱར་བའི་མིག་

སྨན་སོའི་རི་ལུ་ཞེས་བྱ་བས་སྣད་པའི་ལིང་ཐོག་གིས་ཤིན་ཏུ་ཁྱབ་པ་དག་ཀྱང་སེལ་བར་བྱེད་དོ། །ཏ་མའི་ལོ་མ་བ་ལང་སོ། །རྒྱ་མཚོ་ཝུ་བ་བོང་བུའི་རུས། །ཟངས་མ་དུང་གཅིན་རི་ལུར་བྱས། །ལིང་ཏོག་ཐམས་ཅད་སེལ་བར་བྱེད། །ཅེས་བྱ་བ་ལ། ཏ་མ་ལའི་ལོ་མ་
ལ་སོགས་པ་གཅིན་དང་རི་ལུར་བྱས་པས་ནི་ལིང་ཐོག་ཐམས་ཅད་འཇིག་ཅིང་སེལ་བར་བྱེད་དོ། །རིན་ཆེན་སོ་དང་རྭ་དང་ནི། །ཁམས་དང་སུག་སྨེལ་ཚ་བ་གསུམ། །སྒོག་སྐྱ་ཀ་རཉྫའི་ས་བོན། །རྨ་ལ་ཕན་པའི་སྨན་རྣམས་ནི། །རྨ་བཅས་རྨ་མེད་གཏིང་ཟུག་དང་།
ལྤགས་གནས་ལིང་ཐོག་འཇོམས་སྨན་ཡིན། །ཞེས་བྱ་བ་ལ། མར་གད་ལ་སོགས་པ་རིན་པོ་ཆེ་རྣམས་དང་། །གླང་པོ་ཆེ་ལ་སོགས་པའི་སོ་དང་། གསེར་ལ་སོགས་པའི་ཁམས་ཏེ་འབྱུང་ཁུངས་ལས་བྱུང་བ་དང་། །སུག་སྨེལ་ལ་སོགས་པའི་སྨན་དང་།
རྨ་ལ་ཕན་པའི་སྨན་རྨའི་དབང་དུ་བྱས་ནས་འོག་ནས་བཤད་པ་དེ་ཐམས་ཅད་མིག་སྨན་དུ་བྱས་པའི་རྨ་དང་བཅས་བའི་ལིང་ཏོག་དང་། རྨ་མེད་པའི་ལིང་ཏོག་དང་གཏིང་དུ་ཟུག་པའི་ལིང་ཐོག་དང་། ཕགས་པ་ལ་གནས་པའི་ལིང་ཐོག་མཇོམས་ཤིང་སེལ་བར་བྱེད་པ་ཡིན་ནོ། །སྣ་
སྨན་སྣུམ་བླུད་ཤ་ཁུ་ནི། །བླུད་པས་དམའ་བ་བསྟོད་པར་བྱ། །ནད་མེད་ལིང་ཏོག་དམའ་བ་ནི། །ཕུར་མ་བཙོས་དང་བརྟ་བས་བསྟོད། །ཅེས་བྱ་བ་ལ། དམའ་ཞིང་གཏིང་ན་ཡོད་པའི་ལིང་ཏོག་ནི་སྣུམ་བླུད་པ་དང་སྣ་སྨན་བཏང་བ་དང་། ཤ་ཁུ་བླུད་པས་བསྟོད་པར་
བྱ་བ་ལ་ནད་མེད་པའི་ལིང་ཏོག་གིས་དམའ་བ་ནི་སྨན་གྱི་ཕུར་མ་བཙོས་པ་དང་། བརྟ་བའི་སྦྱོར་བས་བསྟོད་པར་བྱའོ། །ལིང་ཏོག་དཀར་པོ་སྐྱེར་པ་དང་། །ཤིང་མངར་ཐལ་ཏྲེས་སེང་ཕྲོམ་ཆུ། །བླུགས་པས་སེང་ཕྲོམ་གཏུམས་པ་ནི། །ཆུ་དྲོན་ལ་སྦངས་ཐིགས་པ་བླུགས། །
ཞེས་བྱ་བ་ལ། ལིང་ཐོག་དཀར་པོ་ལ་ནི་སྐྱེར་པ་ལ་སོགས་པ་བསྐོལ་བའི་ཆུའི་ཐིགས་པ་བླུགས་པར་བྱ་བ་འམ། ཡང་ན་སེང་ཕྲོམ་བཏགས་ཏེ་ཐུམ་པོར་གཏུམས་པ་ཆུ་དྲོད་པོ་ལ་སྦངས་པའི་ཐིགས་པ་བླུགས་པར་བྱའོ། །ཤིང་མངར་བྲི་ཧ་ཏིའི་རྩ་བ། །རྒྱམ་ཚ་དོང་གྲ་ཟངས་

མ་ནི། །སྐྱུ་རུ་རའི་འབྲས་ཆུ་དང་བཏགས། །ལྡེ་གུ་ཟངས་མའི་སྣོད་ལ་བསྐུ། །ནས་མར་སྐྱུ་རུ་རའི་འོ་མ། །དུད་པས་དེ་འོག་མང་དུ་བདུག །དེ་ལས་རི་ལུར་བྱ་བ་ནི། །དེ་ནི་ཆུ་དང་སྦྲང་རྩིར་བཏགས། །མཐོན་ཀ་ཆེན་པོ་ཞེས་བྱ་སྟེ། །ལིང་ཐོག་
དཀར་བོ་སེལ་མཆོག་ཡིན། །ཞེས་བྱ་བ་ལ། ཤིང་མངར་ལ་སོགས་པའི་སྨན་སྐྱུ་རུ་རའི་འབྲས་བུ་བསྐོལ་བའི་ཆུ་དང་བཏགས་པའི་ལྡེ་གུས་ཟངས་མའི་སྣོད་བསྐུས་ལ་ནས་དང་མར་ལ་སོགས་པའི་དུད་པས་ཟངས་མའི་སྣོད་དེ་བསྐུས་པའི་འོག་ཏུ་མང་དུ་བདུག་པར་བྱའོ། །དེ་
ནས་ཟངས་མའི་སྣོད་དེ་ཆུ་དང་སྦྲང་རྩི་དང་སྦྱར་ཞིང་བཏགས་ཏེ་རི་ལུར་བྱས་པའི་མིག་སྨན་དེའི་མིང་མཐོན་ཀ་ཆེན་པོ་ཞེས་བྱ་སྟེ། ལིང་ཐོག་དཀར་པོ་སེལ་ཞིང་འཇོམས་པར་བྱེད་པའི་མཆོག་ཡིན་ནོ། །ལིང་ཐོག་བརྟན་ཞིང་མཐུག་པ་ལ། །ཁྲག་ནི་ལན་མང་དབྱུང་བར་བྱ། །མགོ་
དང་ལུས་ཀྱི་བཀྲུ་སྨན་དང་། །ཕུར་མ་བཙོས་པ་འང་ལན་མང་གཏང་། །ཞེས་བྱ་བ་ལ། ལིང་ཐོག་བརྟན་པ་ལ་སོགས་པ་ལ་ནི་གཏར་ག་ལ་སོགས་པས་ཁྲག་མང་དུ་དབྱུང་བར་བྱ་ཞིང་། །མགོ་བོའི་བཀྲུ་སྨན་ལ་སོགས་པ་ལན་མང་དུ་གཏང་བར་བྱའོ། །པི་པི་
ལིང་དང་ན་ལེ་ཤམ། །རྒྱམ་ཚ་ཤྲི་ཤའི་འབྲས་བུ་འམ། །འབྲས་བུ་གསུམ་བསྐོལ་རྒྱམ་ཚར་བཅས། །བླུད་པས་གནས་ལས་བསྟོད་པར་བྱ། །ཞེས་བྱ་བ་ལ། ལིང་ཐོག་དཀར་པོ་དེ་གནས་ནས་བསྐྱོད་ཅིང་བསྟོད་པར་བྱ་བའི་ཕྱིར་པི་པི་ལིང་ནས་ཤྲི་ཤའི་འབྲས་བུའི་བར་
གྱིས་སམ། ཡང་ན་རྒྱམ་ཚ་དང་འབྲས་བུ་གསུམ་བསྐོལ་ཏེ་ཞག་གསུམ་གྱི་བར་དུ་བླུད་པས་བསྟོད་པར་བྱའོ། །དུང་དང་རྒྱ་ཤུག་ཀ་ཏ་ཀ །རྒུན་འབྲུ་ཤིང་མངར་སྦྲང་རྩི་དང་། །མུ་ར་སོ་ཡི་དྲི་མ་ནི། །ཤི་རི་ཤ་ཡི་མེ་ཏོག་བཅས། །ཚིགས་བཅད་ཕྱེད་ཀྱིས་བཤད་
པ་ཡི། །མིག་སྨན་སྦྱོར་བ་གཏང་བར་བྱ། །ཞེས་བྱ་བ་ལ། ཡང་ན་ལིང་ཐོག་དཀར་པོ་དེ་བསྐྱོད་ཅིང་བསྟོད་པར་བྱ་བའི་ཕྱིར། དུང་ལ་སོགས་པ་དང་མུར་ལ་སོགས་པའི་ཚིགས་བཅད་ཕྱེད་ཕྱེད་ཀྱིས་བཤད་པའི་མིག་སྨན་གྱི་སྦྱོར་བ་འདི་གཏང་བར་བྱའོ། །སྐྱུ་རུ་ཕ་ནིད་

ཛའི་ཁུ་བར། །ལང་ཀ་ལི་ཡི་ཐལ་བ་ནི། །ནུབ་གཅིག་སྦངས་ཏེ་སྐམས་པའི་ཕྱེ། །ལིང་ཏོག་བསྐྱོད་པའི་མིག་སྨན་ཡིན། །ཞེས་བྱ་བ་ལ། སྐྱུ་རུ་ར་དང་ཕ་ནིད་ཛ་ཀ་བསྐོལ་བའི་ཁུ་བར་ལང་ག་ལིའི་ཐལ་བ་ནུ་བ་གཅིག་སྦངས་པ་དེ་སྐམས་ལ་ཕྱེ་མར་བྱས་པའི་མིག་
སྨན་དེ་ནི་ལིང་ཐོག་བསྐྱེད་པ་སྟོད་པར་བྱེད་པ་ཡིན་ནོ། །མུངྒ་སྦུན་པ་མེད་བཏགས་པ། །དུང་དང་སྦྲང་རྩིར་བཅས་པ་འང་ཕན། །ཞེས་བྱ་བ་ལ། ཡང་ན་སྲན་མུངྒ་སྦུན་པ་མེད་པར་བཏགས་པ་དང་། དུང་དང་སྦྲང་རྩི་དང་སྦྱར་བའི་མིག་སྨན་ནི་ལིང་ཐོག་སེལ་བ་ཡིན་ནོ། །
སྦྲང་རྩི་མ་དུ་ཀའི་སྙིང་པོ་འམ། །བ་རུ་ར་རྐང་སྦྲང་རྩིར་བཅས། །ཞེས་བྱ་བ་ལ། མ་དུ་ཀའི་སྙིང་པོ་སྦྲང་རྩི་དང་སྦྱར་བ་འམ། བ་རུ་རའི་རྐང་གི་ཚི་གུ་སྦྲང་རྩི་དང་སྦྱར་བ་ཡང་ལིང་ཐོག་སེལ་ཏོ། །བ་གླང་རྟ་བོང་རྔ་མོའི་སོ། །དུང་དང་རྒྱ་མཚོའི་ཝུ་བ་དང་། །ཨ་རྫུ་
ནའི་ཆུས་རི་ལུ་བྱས། །བསྐྱོད་པའི་ལིང་ཐོག་འཇིག་པར་བྱེད། །ཅེས་བྱ་བ་ལ། བ་གླང་ལ་སོགས་པའི་སོ་དང་དུང་ལ་སོགས་པ་ཨ་རྫུ་ནའི་ཆུ་དང་། རི་ལུར་བྱས་པས་ཀྱང་བསྐྱོད་ཅིང་བསྟོད་པའི་ལིང་ཐོག་འཇིག་པར་བྱེད་དོ། །བསྟོད་པ་འམ་ཟུག་རྔུར་
བཅས་བ་ཡི། །ལིང་ཐོག་སྤུ་ལ་སོགས་བས་ཕྱི། །ཞེས་བྱ་བ་ལ། ལིང་ཏོག་བསྟོད་པ་འམ་ཟུག་རྔུ་དང་བཅས་པ་ནི་སྤུ་ལ་སོགས་པས་ཕྱི་བར་བྱའོ། །རྩ་ཡི་ལིང་ཐོག་མཐོང་གནོད་མེད། །སྣད་པའི་ལིང་ཐོག་སྟ་བུར་གསོ། །ཞེས་བྱ་བ་ལ། རྩའི་ལིང་ཐོག་
མཐོང་བར་བྱེད་པ་ལ། གནོད་པ་མེད་པའི་རྨའི་ལིང་ཐོག་ལྟར་གསོ་པར་བྱའོ། །ཤིང་མངར་སྟག་ཚེར་རམ་ཉེ་བ། །བྲི་ཧ་ཏི་དང་ཨ་ཀ་རུ། །སྐྱེར་བའི་མིག་སྨན་རའི་འོ་མ། །བཏགས་པའི་ལྡེ་གུ་ནས་དང་མར། །བཅས་པའི་དུད་པས་བདུག་པར་བྱ། །སྐྱུ་རུ་ར་ཡི་
ལོ་མ་དང་། །རི་ལུར་བྱས་པ་མིག་སྨན་མཆོག །ཅེས་བྱ་བ་ལ། ཤིང་མངར་དང་སྟག་ཚེར་པ་ཞེས་བྱ་བ་པྲ་པུཎྜ་རཱི་ཀ་ལ་སོགས་པ་རའི་འོ་མ་དང་བཏགས་ཏེ་ལྡེ་གུར་བྱས་པ་དང་། ནས་དང་མར་དང་བཅས་པའི་དུད་པས་བདུགས་པ་དང་། སྐྱུ་རུ་རའི་ལོ་མས་རིམ་གྱིས་དུད་

པས་བདུགས་པའི་རི་ལུར་བྱས་པ་ནི་རྩའི་ལིང་ཐོག་སེལ་བའི་སྨན་གྱི་མཆོག་དམ་པ་ཡིན་ནོ། །མེ་སོས་ར་ཡི་རིལ་མ་འདྲ། །མཛེར་པ་ལྟ་བུར་མཚོན་གྱིས་གསོ། །ཞེས་བྱ་བ་ལ། ནད་དེ་གལ་ཏེ་ཞི་ཞིང་སོས་པར་མ་གྱུར་ན། །རྩའི་ལིང་ཐོག་ལ་མིག་
མཛེར་གྱི་དཔྱད་ལྟར་བྱ་བ་དང་། དེ་བཞིན་དུ་རའི་རིལ་མ་ལྟ་བུ་ཞེས་བྱ་བའི་མིག་ནད་ལ་ཡང་མཛེར་པ་ལྟར་མཚོན་གྱིས་གཅད་པར་བྱའོ། །ར་རིལ་གསོར་ནི་མི་རུང་དང་། །ལིང་ཐོག་དེ་འདྲ་དེ་བཞིན་གཞན། །ནད་མ་ཞི་ན་སྣུམ་བླུད་ཅིང་། །གཏར་ག་གདབ་པ་ལ་སོགས་
བྱ། །སྨད་བྱས་དེ་ནི་བསལ་བྱ་ཞིང་། །དཀར་ཞིང་མཐོ་བ་གསོ་བར་བྱ། །ཞེས་བྱ་བ་ལ། རའི་རིལ་མ་ལྟ་བུའི་མིག་ནད་གསོར་མི་རུང་བ་དང་། དེ་བཞིན་དུ་ལིང་ཐོག་ཀྱང་དེ་དང་འདྲ་བར་གསོར་མི་རུང་བ་དང་། མིག་ནད་གཞན་དག་རྟག་ཏུ་ནད་མ་ཞི་བར་གྱུར་པ་
ལ་སྣུམ་བླུད་པ་ལ་སོགས་པས་གསོ་བར་བྱ་ཞིང་དེ་བཞིན་དུ་སྨད་པར་བྱ་ཞིང་མིག་ནད་འཇིགས་པ་དེ་ཐབས་དེ་དག་གིས་བསལ་བར་བྱ་ཞིང་དཀར་བ་དང་མཐོ་ཞིང་འབུར་བའི་ནད་བསལ་བར་བྱའོ། །རྒྱ་སྟར་གོ་བྱེ་ལུང་ཏང་དང་། །ཏ་ལ་སྨྱིག་མ་ཀ་རི་ར། །བསྲེགས་པའི་
ཐལ་ཆུ་བཙགས་པ་དང་། །རྔ་མོའི་རུས་པའི་ཕྱེ་མ་བསྲེ། །མིག་སྨན་ལིང་ཐོག་གསོ་དཀའ་དང་། །མདོག་མི་སྡུག་པ་འཇོམས་པར་བྱེད། །ཅེས་བྱ་བ་ལ། རྒྱ་སྟར་ལ་སོགས་པ་བསྲེགས་པའི་ཐལ་བ་ཆུ་ལ་སྦངས་ཏེ། བཙགས་པ་ཐལ་ཆུ་དེ་དང་རྔ་མོའི་རུས་པའི་
ཕྱེ་མ་བསྲེས་ལ། མིག་སྨན་དེས་ནི་ལིང་ཏོག་གསོ་དཀའ་བ་དང་། མདོག་མི་སྡུག་པ་རྣམས་འཇོམས་ཤིང་སེལ་བར་བྱེད་དོ། །གསོ་སླ་ལ་ཡང་འདི་ཉིད་ནི། །བསྟེན་པས་སེལ་བར་ནུས་པ་ཡིན། །ཞེས་བྱ་བ་ལ། ལིང་ཏོག་གསོ་ཞིང་བཅོས་པར་སླ་བ་ལ་ཡང་བཤད་མ་
ཐག་པའི་ཕྱེ་མའི་མིག་སྨན་འདི་ཉིད་བསྟེན་ཞིང་བསྐུས་ན་ནད་དེ་སེལ་བར་ནུས་པ་ཡིན་ནོ། །ར་ཡི་རིལ་མ་ངོས་གཉིས་ནས། །ཁབ་ཀྱིས་ཕུག་སྟེ་ཆུ་གཟགས་ནས། །མཐེ་བོས་མཉམ་དུ་བཙིར་ནས་ནི། །རྨ་ཡི་ནང་ནི་ཤ་ཕྱེ་དང་། །ཚིལ་ནི་རློན་པས་བཀང་ནས་ནི། །དཀྲི་ཞིང་དཀྲི་ཞིང་དགང་

པར་བྱ། །ཞེས་བྱ་བ་ལ། རའི་རིལ་མ་ལྟ་བུ་ཞེས་བྱ་བའི་མིག་ནད་ལ་ངོས་གཉིས་ནས་ཁབ་ཕྲ་མོས་ཕུག་ལ་ཆུ་གཟགས་ནས་མཐེ་བོས་ཆ་མཉམ་དུ་ལེགས་པར་བཙིར་བ་དེའི་རྗེས་ལ་རྨའི་ནང་ན་བ་ལང་གི་ཤའི་ཕྱེ་མས་ལེགས་པར་བཀང་ནས་དེ་བཞིན་དུ་དཀྲིས་ཤིང་ཕྱིས་ཡང་བཀྲོལ་ལ་
དེའི་རྗེས་ལ་བ་ལང་གི་ཤའི་ཕྱེ་མ་དང་ཚིལ་རློན་པས་རྨ་དགང་བར་བྱའོ། །གཞན་བདུན་ནས་ནི་རྨ་འབྱོར་ནས། །མིག་འབྲས་ནག་པོ་མཉམ་བརྟན་ལ། །མིག་སྨན་སྣུམ་ཅན་གཏང་བྱ་ཞིང་། །མར་དང་འོ་མའི་སྣ་སྨན་བླུགས། །ཞེས་བྱ་བ་ལ། ཞག་བདུན་ལོན་པ་དང་། རྨ་འབྱོར་ཅིང་འཚོ་བས་
པའི་རྗེས་ལ་མིག་འབྲས་ནག་པོ་མཉམ་ཞིང་བརྟན་པར་གྱུར་པ་དང་། མིག་སྨན་སྣུམ་ཅན་མར་དང་སྦྱར་བ་གཏང་བར་བྱ་ཞིང་མར་དང་འོ་མ་བསྐོལ་བའི་སྣ་སྨན་བླུགས་པར་བྱའོ། །དེ་ལྟར་ན་ཡང་རྒྱས་གྱུར་ན། །དབུག་དང་གཅད་སོགས་བྱ་བ་བྱས། །བཅད་དྲགས་པ་ཡིས་
མིག་ནང་དུ། །ཞུགས་པར་མི་འགྱུར་ཅི་རིགས་བྱ། །ཞེས་བྱ་བ་ལ། དེ་ལྟར་སྔར་བཤད་པའི་ཚུལ་གྱིས་གསོ་བ་བྱས་སུ་ཟིན་ཀྱང་སླར་གང་ཞིང་རྒྱས་པར་གྱུར་ན་རའི་རིལ་མ་ལྟ་བུའི་མིག་ནད་དེ་ལ་དབུག་པ་དང་བཅད་པ་ལ་སོགས་པའི་གསོ་བ་ཅི་རིགས་པར་བྱ་སྟེ།
རྣམ་པ་གང་གིས་བཅད་དྲགས་པའི་རྒྱུས་མིག་ནང་དུ་ཞུགས་པར་མི་འགྱུར་བར་ལེགས་པ་ཁོ་ནར་བྱའོ། །ལིང་ཐོག་ལ་ནི་རྟག་པར་རང་གི་སྨན། །བསྐོལ་བའི་མར་བླུད་སྣ་སྨན་བསྟེན་པ་དང་། །ཅི་ནས་མཐོང་བ་ཉམས་པར་མི་འགྱུར་བར། །མིག་སྨན་རྣོན་པོ་རྟག་ཏུ་བསྟེན་
པར་བྱ། །ཞེས་བྱ་བ་ལ། ལིང་ཐོག་གི་མིག་ནད་ལ་ནི་དུས་རྟག་པར་རང་གི་མིག་ནད་དང་རྗེས་སུ་མཐུན་པའི་སྨན་དང་བསྐོལ་བའི་མར་བླུད་པ་དང་སྣ་སྨན་ཚད་ཕྲན་བསྟེན་པར་བྱས་སྟེ། དེ་ལྟར་བྱས་པས་ཅི་ནས་ཀྱང་མིག་གི་མཐོང་བ་ཉམས་པར་མི་འགྱུར་བར་མིག་སྨན་རྣོན་པོ་རྟག་ཏུ་
བསྟེན་ཞིང་གོམས་པར་བྱས་ན་ནང་དུ་ཞུགས་ཤིང་སྟོབས་ཉམས་པར་མི་འགྱུར་རོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་བཅུ་གཅིག་བའི་རྣམ་པར་འགྲེལ་པའོ།། །།

དེ་ནས་མཐོང་བར་བྱེད་པའི་མིག་ནད་ཀྱི་ནད་དམིགས་ཤེས་པར་བྱ་བ་བཤད་པར་བྱའོ། །ཞེས་བྱ་བ་ལ། གོ་རིམས་སུ་བབ་པའི་མཐོང་བར་བྱེད་པའི་མིག་གི་རྒྱལ་མོར་ནད་ཞུགས་པའི་ཚུལ་དུ་ཤེས་པར་བྱ་པའི་ལེའུ་བཤད་ཅིང་བརྩམས་པ་ཡིན་ནོ། །ནད་
ནི་རྩ་ཡི་ནང་ཞུགས་པ། རིམ་པ་དང་པོར་གནས་ནས་ནི། གཟུགས་ནི་མི་གསལ་མཐོང་འགྱུར་ཞིང་། རྒྱུ་མེད་པར་ཡང་གསལ་བར་མཐོང་། །ཞེས་བྱ་བ་ལ། རླུང་ལ་སོགས་པའི་ནད་གང་ཡང་རུང་བ་རྩའི་ནང་དུ་ཞུགས་ཤིང་འགྲོ་བར་གྱུར་པའི་ནད་དེས་རིམ་པ་དང་པོ་སྟེ་ཕྱི་རིམ་
དུ་གནས་ཤིང་བརྟེན་པར་གྱུར་པ་ན། མིག་གིས་གཟུགས་མི་གསལ་བར་མཐོང་བར་འགྱུར་བ་དང་། ལན་འགའ་ཞིག་ནི་དེ་ལྟར་འགྱུར་བའི་རྒྱུ་མེད་པར་གསལ་བ་ཉིད་དུ་ཡང་མཐོང་བར་འགྱུར་བ་ཡིན་ནོ། །རིམ་པ་གཉིས་པར་ཕྱིན་པ་ན། །མེད་པ་དག་ཀྱང་མཐོང་འགྱུར་ཞིང་། །ཡོད་ཅིང་
ཉེ་བར་བསྒྲིབས་ན་མཐོང་། །རིང་ནས་ཕྲ་བ་མཐོང་བར་འགྱུར། །ཉེ་དང་རིང་བར་གནས་པའི་གཟུགས། །ཕྱིན་ཅི་ལོག་ཏུ་ཤེས་པར་འགྱུར། །ཞེས་བྱ་བ་ལ། ནད་དེ་མིག་གི་རིམ་པ་གཉིས་པར་ཕྱིན་པར་གྱུར་པ་ན་མེད་པར་གྱུར་པའི་གཟུགས་དག་ཀྱང་མཐོང་བར་འགྱུར་བ་
དང་། གཟུགས་ཅན་དུ་ཡོད་ཅིང་གན་ན་གནས་ཏེ་ཉེ་བ་དག་ལ་བསྒྲིབས་ཏེ་བལྟས་ན་མཐོང་བར་འགྱུར་བ་དང་། ཐག་རིང་པོ་ནས་མཐོང་བར་འགྱུར་བ་ཡིན་ཏེ། ཉེ་བ་དང་རིང་བར་གནས་པའི་གཟུགས་ལ་ཕྱིན་ཅི་ལོག་ཏུ་ཤེས་པ་སྐྱེ་སྟེ། རིང་པོ་ན་ཡོད་པའི་གཟུགས་ནི་ཉེ་ཞིང་
གན་ན་ཡོད་པ་ལྟ་བུར་སྣང་བར་འགྱུར་ལ། ཉེ་བ་ན་ཡོད་པའི་གཟུགས་ནི་རིང་པོ་ན་གནས་པར་ཤེས་པར་འགྱུར་རོ། །ནད་ཀྱིས་ཟླུམ་པོའི་དབྱིབས་འདྲ་བར། །ཟླུམ་པོ་ཉིད་དུ་མཐོང་བར་འགྱུར། ཞེས་བྱ་བ་ལ། རིམ་པ་གཉིས་པ་ན་གནས་པར་གྱུར་པ་ན་སྐྱེས་བུས་གཟུགས་
ནས་ཀུན་ནས་ཟླུམ་པའི་དབྱིབས་འདྲ་བར་ཟླུམ་པོ་ཁོ་ནར་མཐོང་བར་འགྱུར་རོ། །མཐོང་བྱེད་དབུས་གནས་གཅིག་གཉིས་མཐོང་། །མང་དུ་གནས་ན་དུ་མ་མཐོང་། །ཞེས་བྱ་བ་ལ། ནད་མཐོང་བར་བྱེད་པའི་མིག་གི་རྒྱལ་མོའི་དབུས་ན་གནས་ན་དངོས་པོ་གཅིག་ལ་གཉིས་སུ་

མཐོང་བར་འགྱུར་ལ། མཐོང་བར་བྱེད་པ་དེར་ནད་མང་དུ་གནས་ན་གཟུགས་དུ་མ་སྟེ། སྣ་ཚོགས་པར་མཐོང་བར་བྱེད་པར་འགྱུར་རོ། །མཐོང་བྱེད་ནང་དུ་ཞུགས་པ་ནི། །ཆེ་ཆུང་གོ་ནི་བཟློག་པ་མཐོང་། །ཞེས་བྱ་བ་ལ། ནད་མཐོང་བར་བྱེད་པའི་མིག་གི་རྒྱལ་
མོའི་ནང་དུ་ཞུགས་ན་གཟུགས་ཆེ་བ་ཡང་ཆུང་བར་མཐོང་ལ་ཆུང་ངུ་ནི་ཆེ་བར་མཐོང་བར་འགྱུར་རོ། །འོག་ཏུ་གནས་པས་ཉེ་མི་མཐོང་། །སྟེང་དུ་གནས་པས་རིང་མི་མཐོང་། །ཞེས་བྱ་བ་ལ། མཐོང་བར་བྱེད་པའི་འོག་ན་ནད་གནས་པར་གྱུར་ན་གཟུགས་ཉེ་བར་གནས་པ་མཐོང་བར་
མི་འགྱུར་ལ། མཐོང་བར་བྱེད་པའི་སྟེང་ན་ནད་གནས་ན་གཟུགས་རིང་པོ་ན་གནས་པ་མཐོང་བར་མི་འགྱུར་རོ། །ངོས་ལ་གནས་པས་གཡས་གཡོན་མིན། །ནད་འདི་རབ་རིབ་ཅེས་བྱར་བཤད། །ཅེས་བྱ་བ་ལ། ནང་མཐོང་པར་བྱེད་པའི་ངོས་གཉིས་ལ་གནས་པར་གྱུར་
ན་གཡས་གཡོན་གྱི་ལོགས་ན་གནས་པའི་གཟུགས་མཐོང་བར་མི་འགྱུར་ཏེ། ནད་འདི་དག་ནི་རབ་རིབ་ཀྱི་ནད་ཅེས་བྱ་བར་བཤད་དོ། །ནད་ནི་རིམ་པ་གསུམ་པར་བརྟེན། །སྔོན་པོ་ཉིད་དུ་འགྱུར་བ་ཡིན། །དེ་ཡིས་སྟེང་མཐོང་འོག་མི་མཐོང་། །གོས་སྲབ་ཀྱིས་གཡོགས་
ལྟར་མཐོང་ཞིང་། །ཁ་དོག་ཇི་བཞིན་འགྱུར་བ་དང་། །རིམ་གྱིས་མཐོང་བ་ཉམས་པར་འགྱུར། །ཞེས་བྱ་བ་ལ། རླུང་ལ་སོགས་པའི་ནད་མིག་སྤྲིན་གྱི་རིམ་པ་གསུམ་པ་ལ་བརྟེན་ཅིང་གནས་པར་གྱུར་ན་མིག་མཆིང་བུ་ལྟར་སྔོན་པོར་འགྱུར་བ་ཡིན་ལ།