Luận tạng Tây Tạng (Tengyur) — Tập 202

་མར་ཏེ་བཏུང་བ་དང་། སྣ་ནས་བཏང་པ་དང་ལུས་ལ་བསྐུ་བའི་དོན་དུ་སྦྱར་བར་བྱ་བ་དང་། །དེ་བཞིན་དུ་སྨན་འདི་དག་གི་ཕྱེ་མའི་དུད་པས་བདུག་པ་ཡང་སྦྱར་བར་
བྱའོ། །ཆ་བ་གསུམ་ནི་པི་པི་ལིང་ལ་སོགས་པའོ། །གླ་རྩི་ནི་ནེ་པ་ལི་སྟེ་ལ་ལ་ནི་ནེ་པ་ལི་ཞེས་བྱ་བ་གླ་རྩི་མ་ཡིན་གྱི་སྐབས་འདིར་ལྡོང་རོས་ལ་བྱའོ། །ཞེས་ཟེར་རོ། །ཨརྐའི་རྩ་བ་ནི་ཤིང་ཨརྐའི་རྩ་བའོ། །ཨ་ཟ་ལོ་མི་ནི་མི་ཤ་བྱི་ལོ་ཅན་ཞེས་བྱ་བའི་སྨན་ནོ། །ལ་བ་ནི་གོ་རོ་མིའོ། །འབམ་པོ་ནི་
འབུ་ཏ་ཀེ་ཤིའོ། །ཀུ་ཀུ་ཏི་ནི་ལག་མནའོ། །གནྡྷ་པྲི་ཡང་ཀུ་ནི་ལ་ཏཱ་ཞེས་བྱ་བའོ། །སར་པ་གན་ད་ནི་གན་ད་ན་གུ་ལིའོ། །ཀ་ཀན་ད་ནི་ཀ་ནའོ། །སྨུ་ཧ་ནི་ཤྲཱི་ཁཎྜའི་ཤིང་ངོ་། །སླེ་ཏྲེས་ནི་གུ་རྩེའོ། །གདོན་འཇོམས་སྨན་ནི་གདོན་སེལ་བའི་སྨན་ལ་སོགས་པ་ཇི་སྙེད་པའོ། །བོང་བུ་ལ་སོགས་
པའི་པགས་པ་ལ་སོགས་པ་ཇི་སྙེད་པ་གཞུག་པར་བྱའོ། །འདི་ཡི་རི་ལུ་བྱས་ནས་ནི། །མིག་སྨན་སྣ་སྨན་བྱ་བ་དང་། །འདི་ཡི་ལྡེ་གུས་བྱུག་པ་དང་། །བསྐོལ་བའི་ཁུ་བ་བླུགས་པར་བྱ། །ཞེས་བྱ་བ་ལ། ཤིང་ཀུན་ལ་སོགས་པའི་སྨན་གྱི་སྡེ་ཚན་འདི་དག་རི་ལུར་བྱས་ནས། མིག་སྨན་དུ་
བྱ་བ་དང་། སྣ་ནས་གཏང་བ་དང་། ཡང་ཤིང་ཀུན་ལ་སོགས་པའི་སྨན་འདི་དག་གི་ལྡེ་གུས་ལུས་ལ་བྱུག་པ་དང་། ཡང་སྨན་དེ་དག་བསྐོལ་བའི་ཁུ་བས་ལུས་ལ་བླུགས་པར་བྱའོ། །སྦྱོར་བ་འདིས་ནི་སྨྱོ་བྱེད་དང་། །བརྗེད་བྱེད་བཅས་པའི་གདོན་ཞི་བྱེད། །ཅེས་བྱ་བ་ལ། ཤིང་ཀུན་ལ་
སོགས་པའི་སྦྱོར་བ་འདིས་ནི་སྨྱོ་བྱེད་དང་བརྗེད་བྱེད་ཀྱི་གདོན་གང་དག་ཡིན་པ་དེ་ཞི་ཞིང་མེད་པར་འགྱུར་རོ། །ཡུངས་ཀར་ཧ་ཏི་བི་པི་ལིང་། །པི་པི་ལིང་རྩ་ཚ་བ་གསུམ། །སྐྱུ་རུ་ར་དང་གོ་ད་དང་། །སྲེ་མོ་བྱི་ལ་ཛ་ཤ་ཡི། །མཁྲིས་པ་དང་བཏགས་སྣ་སྨན་དང་། །བསྐུ་བྱུག་བྱུགས་སོགས་བྱས་
གདོན་འཇོམས། །ཞེས་བྱ་བ་ལ། ཡུངས་ཀར་ལ་སོགས་པའི་སྨན་སྲོག་ཆགས་གོ་ད་ལ་སོགས་པའི་མཁྲིས་པ་དང་བཏགས་ཏེ། སྣ་སྨན་ལ་སོགས་པའི་སྦྱོར་བ་བྱས་ན་ཡང་སྨྱོ་བྱེད་ལ་སོགས་པའི་གདོན་འཇོམས་པར་བྱེད་དོ། །ཡུངས་ཀར་ཤིང་ཀུན་ཤུ་དག་དང་། །པྲི་ཡང་ཀུ་དང་

སེར་པོ་གཉིས། །གི་རི་ཀར་ནི་དཀར་ནག་གཉིས། །འབྲས་བུ་གསུམ་དང་ཤྭེ་ཏ་དང་། །ནིམ་པའི་ལོ་མ་ཀརཉྫ། །ཤྲི་ཤ་གཉིས་དང་ས་བོན་དང་། །ཐང་ཤིང་དང་ནི་ཚ་བ་གསུམ། །མར་དང་བ་གཅིན་དེའི་བཞི་འགྱུར། །བསྐོལ་བ་དོན་གྲུབ་ཅེས་བྱ་སྟེ། །བཏུང་དང་སྣར་བླུགས་པ་སྦྱར་ན། །
གདོན་ནི་ཐམས་ཅད་མྱུར་འཇོམས་བྱེད། །མཆོག་ཏུ་ལྷ་མིན་གདོན་སེལ་བྱེད། །བརྗེད་བྱེད་དུག་དང་བཀྲ་མི་ཤིས། །སྨྱོ་བྱེད་གཤེད་བྱེད་རིམས་རྣམས་འཇོམས། །ཞེས་བྱ་བ་ལ། ཡུངས་ཀར་དང་ཤུ་དག་ལ་སོགས་པའི་སྨན་ལྡེ་གུར་བྱས་པ་དང་། མར་དང་མར་གྱི་བཞི་འགྱུར་གྱི་བ་
གཅིན་དང་། བསྐོལ་བའི་སྨན་མར་ནི་མིང་དོན་གྲུབ་ཅེས་བྱ་སྟེ། དེ་བཏུང་བ་ལ་སོགས་པར་སྦྱར་ན་གདོན་ཐམས་ཅད་མྱུར་དུ་འཇོམས་པར་བྱེད་དེ། མཆོག་གམ་ཁྱད་པར་དུ་ལྷ་མ་ཡིན་གྱི་གདོན་རྣམས་འཇོམས་པར་བྱེད་ལ། དེ་བཞིན་དུ་བརྗེད་བྱེད་ནས་རིམས་ཀྱི་བར་ཡང་འཇོམས་པར་བྱེད་པ་
ཡིན་ནོ། །སྨན་ཏེ་ཉིད་ནི་ར་ཐུག་གི གཅིན་དང་སྦྱར་ཏེ་བླུད་པ་དང་། །སྣར་བླུགས་མིག་སྨན་བྱུག་པ་དང་། །ཁྲུས་དང་དྲིལ་བ་ལས་སྦྱར་བ། །སྔར་བཤད་ཡོན་ཏན་དང་འདྲ་ཞིང་། །རྒྱལ་པོའི་སྒོར་ཡང་དོན་གྲུབ་བྱེད། །ཅེས་བྱ་བ་ལ། ཡུངས་ཀར་ལ་སོགས་པའི་སྨན་འདི་དག་ཉིད་ར་ཐུག་
གི་གཅིན་དང་སྦྱར་ཏེ་ལྡེ་གུར་བྱས་ལ་བླུད་པ་ལ་སོགས་པར་སྦྱར་ན་གདོན་ཐམས་ཅད་འཇོམས་པ་ལ་སོགས་པ་སྔར་བཤད་པའི་ཡོན་ཏན་དང་ལྡན་ཞིང་དེ་བཞིན་དུ་རྒྱལ་པོའི་སྒོར་ཡང་དོན་གྲུབ་པར་བྱེད་པ་ཡིན་ནོ། །ཡུངས་ཀར་ཤུ་དག་ཚ་བ་གསུམ། །ཨ་ཤྭོ་གནྡྷ་སེར་པོ་གཉིས། །ཤིང་ཀུན་ཀུན་
དོང་རྩ་བ་དང་། །ཀ་རཉྫ་ཡི་ས་བོན་དང་། །ཤི་རི་ཤ་ཡི་མེ་ཏོག་དང་། །ཀ་པིད་ཐ་ཡི་འབྲས་བུ་དང་། །རྒྱམ་ཚ་རུ་རྟ་རྒྱ་སྤོས་དང་། །གི་རི་ཀར་ནི་དཀར་པོ་དང་། །སོ་ན་ཀ་ཡི་རྩ་བར་བཅས། །ར་གཅིན་དག་དང་ལེགས་བསྒོས་ཤིང་། །བ་གླང་མཁྲིས་པ་བུ་རམ་དང་། །རི་ལུར་བྱས་པའི་
སྦྱོར་བ་དེ། །མིག་བསྐུས་སྣར་བླུགས་བསྐུ་བྱས་ན། །སྨྱོ་བྱེད་རྨ་ནི་རེད་པ་དང་། །མཚན་མོ་མི་མཐོང་མུན་ཐིབས་བྱེད། །བགེགས་དང་ལུས་ཆུར་ནུབ་པར་བརྒྱལ། །དུག་བསྐུས་མདའ་ཡིས་ཕོག་པ་དང་། །གདུག་པའི་སྦྲུལ་གྱིས་ཟིན་པ་སེལ། །ཞེས་བྱ་བ་ལ། སེར་པོ་གཉིས་ནི་ཡུང་

བ་དང་། །སྐྱེར་པའོ། །ཀུན་དོང་རྩ་བ་ནི་སྒོག་པ་ཀུན་དོང་ཞེས་བྱ་བའི་རྩ་བའོ། །གཞན་དག་ནི་གོ་བར་ཟད་དེ། སྨན་དེ་དག་ཐམས་ཅད་ར་གཅིན་དང་ལེགས་པར་སྤངས་ཤིང་བསྲེལ་ལ་དེའི་འོག་ཏུ་བ་གླང་གི་མཁྲིས་པ་དང་བུ་རམ་དང་སྦྱར་ཏེ་རི་ལུར་བྱས་པའི་
སྦྱོར་བ་དེ་མིག་ཏུ་བསྐུ་བ་དང་། སྣར་བླུགས་པ་དང་། །ལུས་ལ་བསྐུས་ན་སྨྱོ་བྱེད་ལ་སོགས་པའི་ནད་སེལ་བར་བྱེད་དོ། །རས་བལ་ས་བོན་རྨ་བྱའི་སྒྲོ། །མེ་ཏོག་སྨན་མ་བྲི་ཧ་ཏི། །ཤིང་ཚ་སྤང་སྤོས་པོ་སོན་ཆ། །བྱི་ལའི་རྟུག་པ་ཕུབ་མ་དང་། །ཤུ་དག་མི་སྐྲ་སྦྲུལ་ལྤགས་དང་། །གླང་པོའི་
སོ་དང་གླང་གི་རྭ། །ཤིང་ཀུན་དང་ནི་ན་ལེ་ཤམ། །ཆ་མཉམ་བདུགས་པར་བྱས་པ་ཡིས། །སྐེམ་བྱེད་སྨྱོ་བྱེད་ཤ་ཟའི་རིགས། །སྲིན་པོ་ལྷ་ཡི་གདོན་འཇོམས་མཆོག །ཅེས་བྱ་བ་ལ། རས་བལ་གྱི་ས་བོན་ལ་སོགས་པའི་སྨན་འདི་རྣམས་ཆ་སྙོམས་ཏེ་སྦྱར་བའི་དུད་པས་བདུགས་ན་སྐེམ་བྱེད་ལ་སོགས་
པའི་གདོན་སེལ་བར་བྱེད་པའི་མཆོག་ཡིན་ནོ། །སྐེམ་བྱེད་ནི་གཞོན་ནུའི་གདོན་ཡིན་ནོ། །གནྡྷ་བྷ་དྲ་ཚ་བ་གསུམ། །གུར་གུམ་པི་པི་ལིང་རྩ་བ། །ཀཎྜ་ཀ་རི་སྐྱེར་པ་དང་། །ཐང་ཤིང་དང་ནི་ཡུངས་ཀར་གཉིས། །པ་ལ་དཀར་དང་དུག་མོ་ཡུངས། །ཙནྡན་དཀར་པོ་རྒྱམ་ཚ་དང་། །འབྲས་བུ་གསུམ་
དང་པུ་ཤེལ་ཙེ། །ཤུ་དག་སྤངས་མ་པུ་ཙེ་ཤེལ། །ཙནྡན་དམར་པོ་བ་ལ་དང་། །ཤིང་མངར་སུག་སྨིལ་ལྡོང་རོས་དང་། །ཤུག་པ་རྒྱ་སྤོས་ཤྲི་པ་ས། །མ་དུ་ཀ་ཡི་སྙིང་པོ་དང་། །བོང་ང་གཉིས་པོ་པྲི་ཡང་ཀུ། །དབྱི་མོ་རུ་རྟ་སྐྱེར་ཁཎྜ། །ཆ་སྙོམས་ཞིབ་བཏགས་ལྡེ་གུ་དང་། །མར་རྙིང་གཅིན་ཀུན་
ཆ་སྙོམས་བསྐོལ། །གདོན་ཁུས་འདེབས་ཞེས་བྱ་བར་བརྗོད། །དེ་བླུད་གདོན་འཇོམས་མཆོག་ཡིན་ནོ། །ཞེས་བྱ་བ་ལ། ཡུངས་ཀར་གཉིས་ནི་ཡུངས་ཀར་སེར་པོ་དང་དམར་པོའི་མདོག་གིས་ཕྱེ་བའོ། །བ་ལ་ཀ་ནི་ཨམ་པུའོ། །ཙནྡན་དམར་པོ་ནི་ལོཧི་ཏ་སྟེ། ལ་ལ་དག་ཙནྡན་དམར་པོ་མ་
ཡིན་གྱི་བཙོད་ལ་བྱའོ་ཞེས་ཀྱང་ཟེར་རོ། །ཤྲི་བེ་ཏ་ནི་ཤྲི་པ་སའོ། མ་དུ་ཀའི་སྙིང་པོ་ནི་མ་དུ་ཀའི་མེ་ཏོག་གམ། ཤིང་མ་དུ་ཀའི་དབུས་ཀྱི་ཆ་ན་ཡོད་པའོ། །པྲི་ཡང་ཀུ་ནི་གནྡྷ་པྲི་ཡང་ཀུའོ། །བོང་ང་གཉིས་ནི་བོང་ང་དཀར་བོ་དང་ནག་པོའོ། །གཞན་དག་ནི་གོ་བར་ཟད་དེ། །སྨན་དེ་དག་ཐམས་ཅད་

ཆ་སྙོམས་ཏེ། ཞིབ་ཏུ་བཏགས་པའི་ལྡེ་གུ་དང་མར་རྙིང་པ་དང་། གཅིན་བརྒྱད་པོ་ཀུན་ཆ་སྙོམས་ཏེ་མར་ཇི་ཙམ་ཡོད་པ་གཅིན་རེ་རེ་ཡང་དེ་ཙམ་དུ་བྱས་དང་བསྲེས་ཏེ་བསྐོལ་པའི་སྨན་མར་ནི་གདོན་ཁུས་འདེབས་ཞེས་སློབ་དཔོན་གྱིས་བཤད་དེ་བླུད་ཅིང་བསྐུ་བ་ལ་སོགས་པའི་སྦྱོར་བ་བྱས་ན་གདོན་
ཐམས་ཅད་འཇོམས་པའི་མཆོག་ཡིན་ནོ། །རྒྱ་སྤོས་ཤིང་མངར་ཀ་རཉྫ། །རྒྱ་སྐྱེགས་ད་ཏ་པ་ཏོ་ལ། །ཤུ་དག་ཤིང་ཀུན་པ་ཏ་ལ། །ཡུངས་ཀར་ཀཎྜ་ཀ་རི་དང་། །སེར་པོ་གཉིས་དང་པུ་ཙེ་ཤེལ། །རྒྱ་ཤུག་གནྡྷ་པྲི་ཡང་ཀུ། །ཚ་བ་གསུམ་དང་འབྲས་བུ་གསུམ། །ཐང་ཤིང་སླེ་ཏྲེས་བྱི་དང་
ག། །ཀོ་ཤ་ཏ་ཀི་ཀ་ཀན་དང་། །ཤི་ཀྲུ་ནིམ་པ་དུག་མོ་ཡུངས། །ཤིང་ཤའི་མེ་ཏོག་ས་བོན་དང་། །གླ་སྒང་རུ་རྟ་དན་ད་དང་། །གི་རི་ཀར་ཎི་ཙི་ཏྲ་ག །བིལ་བ་ཆ་མཉམ་ལྡེ་གུར་བྱས། །མར་རྙིང་ཅན་གྱི་སྡེ་ཚན་བཅས། །བསྐོལ་ཏེ་ཡུན་རིང་གཞག་པ་སྟེ། །ཁུས་འདེབས་ཆེན་པོ་ཞེས་བཤད་དེ། །
རིམ་པ་ཀུན་གྱིས་སྦྱར་ན་ནི། །གདོན་རྣམས་ཀུན་དང་སྨྱོ་བྱེད་དང་། །མཛེ་དང་རིམས་ནི་མྱུར་དུ་འཇོམས། །ཞེས་བྱ་བ་ལ། རྒྱ་སྤོས་ནི་ཏ་ཀ་རུའོ། །སེར་པོ་གཉིས་ནི་ཡུང་བ་དང་སྐྱེར་པའོ། །རྒྱ་ཤུག་ནི་རྒྱ་ཤུག་སྐྱུར་པོའོ། །ཀ་ཀན་ད་ནི་མ་ཧ་ཀའི་འབྲས་བུའོ། །ཤི་ཀྲུ་ནི་སོ་བན་ཛ་ནའོ། །གཞན་
དག་ནི་གོ་བར་ཟད་དེ་སྨན་དེ་དག་ཐམས་ཅད་ཆ་སྙོམས་ཏེ་ལྡེ་གུར་བྱས་པ་དང་། མར་རྙིང་པ་དང་གཅིན་གྱི་སྡེ་ཚན་ཆང་གི་སྡེ་ཚན་གྱི་ནང་ནས་བཤད་པའི་གཅིན་བརྒྱད་པོ་དང་བཅས་པར་བསྐོལ་ཏེ་དུས་ཡུན་རིང་པོར་གཞག་པའི་རྙིང་པ་དེ་ནི་ཁུས་འདེབས་ཆེན་པོའི་སྨན་མར་ཞེས་བྱ་སྟེ། དེ་རིམ་པ་ཀུན་གྱིས་
ཞེས་པ་བཏུང་བ་དང་། སྣར་བླུགས་པ་དང་། བསྐུ་བ་དང་སྦྱར་ན་གདོན་གྱི་ནད་ཐམས་ཅད་དང་སྨྱོ་བྱེད་དང་། །མཛེའི་ནད་རིམས་ལ་སོགས་པ་མྱུར་དུ་འཇོམས་པར་བྱེད་དོ། །གདོན་ནི་ཉི་མ་གང་གང་ལ། །འཛིན་པའི་ཉི་མ་དེ་དང་དེར། མཆོག་ཏུ་སྦྱིན་སྲེག་གཏོར་མ་སོགས། །སྨན་པས་རབ་
ཏུ་འབད་དེ་བྱ། །ཞེས་བྱ་བ་ལ། གདོན་གང་ཞིག་ཉིན་ཞག་གང་ལ་འཛིན་པར་བྱེད་པའི་ཉི་མ་ཞག་དེ་ལ་སྦྱིན་སྲེག་དང་གཏོར་མ་ལ་སོགས་པ་གདོན་བཟློག་པའི་ཐབས་སྨན་པས་འབད་དེ་སྦྱར་ཏེ་བྱའོ། །ཁྲུས་དང་གོས་དང་ཤ་དང་ཚིལ། །ཆང་དང་མར་དང་བུ་རམ་སོགས། །གང་ཞིག་གང་ལ་སྲེད་

གྱུར་པ། །དེའི་ཚེ་དེ་ནི་དེ་ལ་སྦྱིན། །ཞེས་བྱ་བ་ལ། གདོན་གང་ཞིག་ཁྲུས་ལ་སོགས་པ་གང་ཞིག་ལ་སྲེད་ཅིང་འདོད་པར་གྱུར་པ་དེའི་ཚེ་གདོན་དེ་ལ་ཁྲུས་ལ་སོགས་པ་དག་སྦྱིན་པར་བྱའོ། །རིན་ཆེན་དྲི་དང་ཕྲེང་བ་དང་། །ས་བོན་མར་དང་སྦྲང་རྩི་དང་། །ཟས་ཀུན་ཀུན་ལ་
སྦྱིན་བྱ་སྟེ། །འདི་ནི་སྤྱི་ཡི་ཆོ་གའོ། །ཞེས་བྱ་བ་ལ། གདོན་ཐམས་ཅད་ལ་རིན་ཆེན་ཏེ་རྡོ་རྗེ་དང་བཻཌཱུརྱ་དང་། མ་རྒད་དང་། གསེར་ལ་སོགས་པ་དང་། དྲི་ཞིམ་པ་སྦྱར་བའི་དྲི་དང་། སྣ་མའི་མེ་ཏོག་ལ་སོགས་པའི་མེ་ཏོག་དྲི་ཞིམ་པའི་ཕྲེང་བ་དང་ས་བོན་དེའི་སྲན་མུད་ག་དང་། མོན་སྲན་གྲེའུ་
ལ་སོགས་པ་དང་། མར་དང་སྦྲང་རྩི་དང་ལ་དུ་ལ་སོགས་པའི་ཟས་ཀུན་གདོན་ཐམས་ཅད་ལ་སྦྱིན་པར་བྱ་སྟེ། ཆོ་ག་འདི་ནི་སྤྱིའི་ཐུན་མོང་གི་ཆོ་ག་ཡིན་ནོ། །ཞེས་བྱ་བའི་དོན་ནོ། །ལྷ་དང་དྲང་སྲོང་བླ་མ་རྒན། །གྲུབ་ལ་ལྷ་ཡི་གནས་སུ་སྦྱིན། །དེར་ཡང་ལྷ་ཡི་གདོན་ལ་ནི། །བྱང་གི་ཕྱོགས་
སུ་གཏོར་མ་སྦྱིན། །ཞེས་བྱ་བ་ལ། ལྷ་ལ་སོགས་པའི་གདོན་ལྔ་པོ་དག་ལ་ནི་ལྷའི་གནས་ཏེ། ལྷ་གནས་པའི་ཁང་པར་གཏོར་མ་སྦྱིན་པར་བྱ་ལ། དེར་ཡང་ལྷའི་གདོན་ལ་ནི་བྱང་གི་ཕྱོགས་སུ་གཏོར་མ་སྦྱིན་པར་བྱའོ། །ལྷ་མིན་གདོན་ལ་ཅི་འདོད་པར། །མཚམས་ཀྱི་གནས་སུ་ནུབ་ཏུ་སྦྱིན། །ཞེས་
བྱ་བ་ལ། ལྷ་མ་ཡིན་གྱི་གདོན་ལ་ནི་ཅི་ལྟར་འདོད་པར་གྲོང་གི་མཚམས་ཞེས་བྱ་བར་གྲོང་ངམ་ཡུལ་གྱི་ཕྱི་རོལ་དུ་ནུབ་ཕྱོགས་སུ་སྦྱིན་པར་བྱའོ། །དྲི་ཟའི་གདོན་ནི་བ་གླང་ངམ། །གོས་དང་རྒྱན་བཅས་གཏོར་མ་སྦྱིན། །ཞེས་བྱ་བ་ལ། དྲི་ཟའི་གདོན་ལ་ནི་བ་གླང་རྒྱུ་བའི་ལམ་དུ་གོས་དང་རྒྱན་དང་
བཅས་པའི་གཏོར་མ་སྦྱིན་པར་བྱའོ། །མཚུན་ལྷ་ཀླུ་གདོན་འབབ་ཆུའི་འགྲམ། །ཀླུ་ལ་ཤར་ལྷོའི་མཚམས་སུ་སྦྱིན། །ཞེས་བྱ་བ་ལ། མཚུན་ལྷའི་གདོན་དང་། ཀླུའི་གདོན་ལ་ནི་འབབ་ཆུའི་འགྲམ་དུ་གཏོར་མ་སྦྱིན་པར་བྱ་ལ། དེ་ལས་ཀྱང་ཀླུའི་གདོན་ལ་ནི་ཤར་ལྷོའི་མཚམས་སུ་གནས་ཏེ་གཏོར་
མ་སྦྱིན་པར་བྱའོ། །གནོད་སྦྱིན་རང་གི་གནས་སམ་ནི། །ཆུ་གཉིས་འདུས་པའི་གནས་སུ་སྦྱིན། །ཞེས་བྱ་བ་ལ། གནོད་སྦྱིན་གྱི་གདོན་ལ་ནི། གདོན་སྦྱིན་གྱི་གནས་སུ་བྱས་པའམ། ཡང་ན་ཆུ་བོ་གཉིས་འདུས་པའི་གནས་སུ་གཏོར་མ་སྦྱིན་པར་བྱའོ། །སྲིན་པོ་ལམ་གྱི་བཞི་འདོའམ། །ཚང་ཚིང་

འཇིགས་སུ་རུང་བར་སྦྱིན། །སྲིན་པོའི་ལྷོའི་ཕྱོགས་སུ་སྦྱིན། །ཚངས་པའི་སྲིན་པོ་ཤར་དུ་སྦྱིན། །ཞེས་བྱ་བ་ལ། སྲིན་པོ་དང་ཚངས་པའི་སྲིན་པོའི་གདོན་གཉིས་ལ་ནི་ལམ་གྱི་བཞི་མདོ་འམ། ནགས་ཀྱི་ཚང་ཚིང་འཇིགས་སུ་རུང་བར་གཏོར་མ་སྦྱིན་པར་བྱ་ལ། དེ་ལས་ཀྱང་སྲིན་བོའི་གདོན་ལ་ནི་ལྷོ་ཕྱོགས་སུ་སྦྱིན་པར་བྱ་ལ་
ཚངས་པའི་སྲིན་པོའི་གདོན་ལ་ནི་ཤར་ཕྱོགས་སུ་གཏོར་མ་སྦྱིན་པར་བྱའོ། །ཤ་ཟ་ནི་ཁང་སྟོང་དུ། །ནུབ་ཕྱོགས་སུ་ནི་གནས་ཏེ་སྦྱིན། །ཞེས་བྱ་བ་ལ། ཤ་ཟའི་གདོན་ལ་ནི་ཁང་སྟོང་དུ་ནུབ་ཕྱོགས་སུ་གནས་ཏེ་གཏོར་མ་སྦྱིན་བར་བྱའོ། །ཕྲེང་བ་གཙང་ཞིང་དཀར་པོ་དང་། །དྲི་དང་འོ་ཐུག་འབྲས་ཆན་དང་། །ཞོ་དང་གདུགས་
ནི་དཀར་པོ་ཡི། །ལྷ་རྣམས་ཀྱི་ནི་གཏོར་མར་འདོད། །ཅེས་བྱ་བ་ལ། ལྷའི་གདོན་ལ་ནི་ཕྲེང་བ་གཙང་ཞིང་དཀར་བ་དང་། ཨ་ཀ་རུ་ལ་སོགས་པའི་དྲི་དང་། འོ་ཐུག་དང་འབྲས་ཆན་དང་ཞོ་དང་གདུགས་དཀར་པོའི་གཏོར་མ་བཤམས་ཤིང་འདོད་པ་ཡིན་ནོ། །ཤིང་ཀུན་ཡུངས་ཀར་ཤུ་དག་དང་། །ཚ་བ་གསུམ་ནི་སྲང་ཕྱེད་ཕྱེད།
མར་བྲེ་གང་དང་བ་ཡི་གཅིན། །བཞི་འགྱུར་དང་ནི་ལྷན་ཅིག་བསྐོལ། །དེར་བཏུང་སྣར་བླུགས་བསྐུས་པ་ཡིས། །ལྷའི་གདོན་ལས་ཐར་བར་བྱེད། །ཅེས་བྱ་བ་ལ། དེ་ལྟར་གཏོར་མ་བྱིན་ཡང་མ་ཞི་ན་སྨན་གྱི་སྦྱོར་བ་བྱ་བ་ནི་ཤིང་ཀུན་ལ་སོགས་པའི་སྨན་སྲང་ཕྱེད་ཕྱེད་དང་། །མར་བྲེ་གང་དང་། བའི་གཅིན་བྲེ་བཞི་དང་ལྷན་ཅིག་བསྐོལ་ལ་
མར་དེ་བཏུང་བ་ལ་སོགས་པར་སྦྱར་ན་ལྷའི་གདོན་ལས་ཐར་བར་འགྱུར་རོ། །ཤུ་དག་ཤིང་ཀུན་སྒོག་སྐྱ་རྣམས། །ར་གཅིན་སྦྱར་བ་སྣར་བླུགས་དང་། མིག་བསྐུས་ལྷ་ཡི་གདོན་ལས་ཐར། །ཞེས་བྱ་བ་ལ། གཞན་ཡང་ཤུ་དག་ལ་སོགས་པའི་སྨན་ར་གཅིན་དང་སྦྱར་ཏེ་སྣ་སྨན་ལ་སོགས་པ་བྱས་ན་ཡང་ལྷའི་གདོན་ལས་ཐར་
པར་འགྱུར་རོ། །ལྷ་མིན་གཏོར་མ་འབྲས་བུ་ནི། །མང་པོ་དག་དང་པུ་ཤེལ་ཙེ། །ཞེས་བྱ་བ་ལ། ལྷ་མ་ཡིན་གྱི་གདོན་ལ་ནི་གཏོར་མ་འབྲས་བུ་ཤིང་ཐོག་ལ་སོགས་པ་མང་བ་དང་། དེ་བཞིན་དུ་པུ་ཤེལ་ཙེ་དང་པདྨ་དང་། ཨུ་ཏྤལ་དང་བཅས་པའི་གཏོར་མ་སྦྱིན་པར་བྱའོ། །ཀླུ་ཡི་གདོན་ལ་ཛཱ་ཏི་དང་། །འབྲས་ཡོས་བུ་རམ་སྣུམ་ཁུར་
དང་། །འབྲས་ཆན་བུ་རམ་བཅས་པ་དང་། །ཟས་མཆོག་སྦྲང་རྩི་འོ་མ་དང་། །ས་ན་ག་ནཱ་ག་གེ་སར་དང་། །ཤུ་དག་པདྨ་པུ་ཤེལ་ཙེ། །ཨུ་ཏྤལ་པདྨ་དམར་པོ་ཡི། །འདབ་མར་བཅས་པའི་གཏོར་མ་བྱིན། །ཞེས་བྱ་བལ། ཀླུའི་གདོན་ལ་ནི། ཛཱ་ཏི་ཞེས་བྱ་བའི་སྣ་མའི་མེ་ཏོག་དང་། འབྲས་ཡོས་ལ་སོགས་པའི་གཏོར་མ་སྦྱིན་པར་བྱ་སྟེ་

སྣུམ་ཁུར་དང་འབྲས་ཆེན་གཉིས་ཀ་ཡང་བུ་རམ་དང་བཅས་པར་བྱ་བ་དང་། ཟས་མཆོག་ཅེས་བྱ་བ་འོ་ཐུག་དང་ས་ནག་ནི་སོར་ཤི་ཏ་ཞེས་བྱའོ། །སེང་ཕྲོམ་འོ་མ་དཀར་པོ་དང་། །རྒྱ་སྤོས་ནཱ་ག་གེ་སར་དང་། །ཡུངས་ཀར་ཆུ་གྲང་ལ་བཏགས་པས། །སྣར་བླུགས་མིག་ལ་བསྐུས་པའང་ཕན། །ཞེས་བྱ་བ་ལ། སེང་
ཕྲོམ་འོ་མ་དཀར་པོ་ཡོད་པ་དང་རྒྱ་སྤོས་ལ་སོགས་པ་དང་ཡུངས་ཀར་དཀར་པོའི་ཆུ་གྲང་ལ་བཏགས་ཏེ་སྣར་བླུགས་པ་དང་མིག་སྨན་དུ་བྱས་ན་ཡང་ཀླུའི་གདོན་ཀྱིས་ཟིན་པ་ལ་ཕན་ཞིང་ཐར་བར་འགྱུར་རོ། །གནོད་སྦྱིན་གདོན་ལ་འོ་མ་ཞོ། །མར་དང་འབྲས་ཆན་བསྲས་པ་དང་། །གུ་གུལ་པདྨ་
ཐང་ཤིང་དང་། །པུ་ཤེལ་ཙེ་དང་གོས་དང་གསེར། །དབྱིག་ནི་གཏོར་མ་སྦྱིན་པར་བྱ། །ཞེས་བྱ་བ་ལ། གནོད་སྦྱིན་གྱི་གདོན་ལ་ནི་འོ་མ་ལ་སོགས་པའི་གཏོང་མ་སྦྱིན་པར་བྱའོ། །གསེར་དང་དབྱིག་ནི་བཟོར་བྱས་པ་དང་མ་བྱས་པའི་དབྱེ་བས་ཐ་དད་བར་ཤེས་པར་བྱའོ། །རྒྱན་ལ་སོགས་
བ་བྱས་པ་ནི་དབྱིག་ཅེས་བྱའོ། །མར་དང་འོ་མ་བ་གཅིན་ནི། །ཆ་སྙོམས་བསྐོལ་བ་བཏུང་བ་དང་། །སྣར་བླུགས་ལུས་ལ་བསྐུས་ན་ཕན། །ཞེས་བྱ་བ་ལ། མར་ལ་སོགས་པ་གསུམ་པོ་ཆ་སྙོམས་ཏེ་བསྐོལ་ལ་བླུད་པ་ལ་སོགས་པ་བྱས་ན་ཡང་གནོད་སྦྱིན་གྱི་གདོན་གྱིས་ཟིན་པ་ལ་ཕན་ནོ།
ཨ་རུ་ར་དང་སེར་པོ་གཉིས། །སྒོག་སྐྱ་ཤུ་དག་ན་ལེ་ཤམ། །ནིམ་པའི་འོ་མར་གཅིན་བཏགས། །ལྡེ་གུས་སྣ་སྨན་མིག་སྨན་བྱ། །ཞེས་བྱ་བ་ལ། ཨ་རུ་ར་ལ་སོགས་པའི་སྨན་ར་གཅིན་དང་བཏགས་པའི་ལྡེ་གུ་བཙིར་བ་སྣ་སྨན་ལ་སོགས་པ་བྱས་ན་ཡང་གནོད་གྱིས་ཟིན་
པ་ལ་ཕན་ནོ། །ཚངས་པ་སྲིན་པོའི་གཏོར་མ་ནི། །ནས་བྲེ་བཞི་ནི་བཙོས་པ་ཡི། །ཆུ་བྲེ་བཅུ་དྲུག་ཏིལ་བཏགས་བསྲེས། །གདུགས་དང་གོས་དང་བྱུག་པ་སྦྱིན། །ཞེས་བྱ་བ་ལ། ཚངས་པ་སྲིན་པོའི་གདོན་ལ་ནི་ནས་བྲེ་བཞི་བཙོས་པའི་ཆན་གྱི་གཏོར་མ་དང་། དེ་བཞིན་དུ་ཆུ་བྲེ་བཅུ་
དྲུག་དང་ཏིལ་མར་བཏགས་པ་བསྲེས་པའི་དང་གདུགས་དང་གོས་ཀྱི་རྣམ་པའི་དང་། གུར་ཀུམ་ལ་སོགས་པའི་བྱུག་པ་སྦྱིན་པར་བྱའོ། །སེང་ལྡེང་སྲང་ནི་ཉི་ཤུ་དང་། །ཚ་བ་གསུམ་དང་འབྲས་བུ་གསུམ། །ཤིང་ཀུན་ཤུ་དག་ཤུ་ཏི་དང་། །ཡུངས་ཀར་ནིམ་པའི་ལོ་མར་བཅས། །

སྒོག་སྐྱ་སྲང་ནི་ཕྱེད་ཕྱེད་དང་། །ཞུན་མར་ཕུལ་ནི་བདུན་དག་དང་། །བ་གཅིན་སུམ་འགྱུར་བསྐོལ་བ་དེ། །བཏུང་དང་སྣར་བླུགས་བསྐུས་ན་ཕན། །ཞེས་བྱ་བ་ལ། སེང་ལྡེང་སྲང་ཉི་ཤུ་བསྐོལ་བའི་ཁུ་བའི་ནང་དུ་ཚ་བ་གསུམ་ལ་སོགས་པ་སྲང་ཕྱེད་ཕྱེད་ལྡེ་གུར་བྱས་པ་དང་། །ཞུན་
མར་ཕུལ་བདུན་དང་བ་གཅིན་མར་གྱི་སུམ་འགྱུར་ལྷན་ཅིག་བསྲེས་ཏེ་བསྐོལ་ལ་སྨན་མར་དེ་བཏུང་བ་ལ་སོགས་པར་བཏང་ཡང་ཚངས་པ་སྲིན་པོའི་གདོན་གྱིས་ཟིན་པ་ལ་ཕན་ནོ། །སྲིན་པོའི་གདོན་ལ་ཏིལ་ཕྱེ་དང་། །མེ་ཏོག་དཀར་པོ་འབྲས་ཆན་འདྲེས། །ཤ་བཙོས་རྗེན་པ་ནིམ་པ་བ། །
ཁྲག་དང་བཅས་པའི་གཏོར་མ་སྦྱིན། །ཞེས་བྱ་བ་ལ། སྲིན་པོའོ་གདོན་ལ་ནི་ཏིལ་གྱི་ཕྱེ་མ་དང་མེ་ཏོག་དཀར་པོ་དང་འབྲས་ཆན་འདྲེས་མ་སྟེ། འབྲས་ཆན་དང་མུ་དག་ལ་སོགས་པའི་ཆན་དང་། །ཤ་བཙོས་པ་དང་རྗེན་པ་དང་ནིམ་པ་ཞེས་བྱ་བ་རྩ་འབྲུའི་རྣམ་པ་དང་། ཁྲག་གི་གཏོར་མ་
སྦྱིན་པར་བྱའོ། །ནག་ཏ་མ་ལ་ཤི་རི་ཤ། །ཤུན་ལྤགས་མེ་ཏོག་འབྲས་བུ་དང་། །དེ་བཞིན་པ་ཏ་ལ་ནག་པོ། །པིལ་བའི་རྩ་བ་ཚ་བ་གསུམ། །ཤིང་ཀུན་ཡུངས་ཀར་དུག་མོ་ཉུང་། །སྒོག་སྐྱ་སྐྱུ་རུ་རའི་འབྲས་བུ། །ར་གཅིན་དང་ནི་སྦྱར་བའི་སྨན། །སྣར་བླུགས་མིག་ཏུ་བྱུགས་ན་ཕན། །
ཞེས་བྱ་བ་ལ། ནག་ཏ་མ་ལ་སོགས་པའི་སྨན་ར་གཅིན་དང་སྦྱར་བའི་སྣ་སྨན་དང་མིག་སྨན་བཏང་ན་སྲིན་པོའི་གདོན་གྱིས་བཏབ་པ་ལས་ཐར་པར་འགྱུར་རོ། །འདི་དག་ཉིད་དང་མར་གྱི་ནི། །བཞི་འགྱུར་བ་གཅིན་བསྐོལ་བ་ནི། །བཏུང་དང་སྣར་བླུགས་བསྐུས་པ་ཡིས། །སྲིན་པོའི་
གདོན་ནི་ཟློག་པར་བྱེད། །ཅེས་བྱ་བ་ལ། ནག་ཏ་མ་ལ་དང་ཤྲི་ཤའི་ཤུན་ལྤགས་དང་མེ་ཏོག་དང་འབྲས་བུ་ལ་སོགས་པའི་སྨན་འདི་དག་ཉིད་དང་མར་དང་མར་གྱི་བཞི་འགྱུར་གྱི་བ་གཅིན་དང་བསྐོལ་བའི་སྨན་མར་བཏུང་བ་ལ་སོགས་བའི་སྦྱོར་བ་བྱས་ན་ཡང་སྲིན་པོའི་གདོན་སེལ་
བར་བྱེད་དོ། །ཤ་ཟ་ལ་ནི་བུ་རམ་ཆང་། །ཏིལ་ཚིགས་ཏིལ་གྱི་ཕྱེ་མ་ཞོ། །ལ་ཕུག་ལན་ཚྭ་ཕྱེ་ཟན་མར། །འབྱུང་བོར་འབྲས་ཆེན་གཏོར་མ་སྦྱིན། །ཞེས་བྱ་བ་ལ། ཤ་ཟའི་གདོན་ལ་ནི་བུ་རམ་ཆང་ལ་སོགས་པའི་གཏོར་མ་སྦྱིན་པར་བྱའོ། །ཏིལ་གྱི་ཚིགས་མ་ནི་འབའ་ཆའོ། །

འགྱུར་པའི་འབྲས་ཆེན་ནི་འབྲས་ཆན་འདྲེས་མའོ། །ལ་ལ་ནི་འབྱུང་པོའི་འབྲས་ཆེན་ཞེས་མི་བྱའི། འབྱུང་པོའི་ཁ་ཟས་ཞེས་བྱ་སྟེ། དེ་ནི་ཁྲག་ཡིན་ནོ། །ཕྱེ་ཟན་ནི་ནས་ཀྱི་ཆན་ནོ། །སེར་པོ་རྣམ་གཉིས་ལན་ཚྭ་བཙོད། །ཤུ་ཏི་དོང་གྲ་པྲི་ཡང་ཀུ། །ཤིང་
ཀུན་སྒོག་སྐྱ་ཚ་བ་གསུ། །འབྲས་བུ་གསུམ་དང་བ་ཏ་ལི། །ཤུ་དག་གི་རི་ཀར་ནི་དཀར། །ཤི་རི་ཤ་ཡི་མེ་ཏོག་མར། །བ་གཅིན་བཞི་ཆ་བཅས་པར་བསྐོལ། །བཏུང་དང་བསྐུ་བ་བྱས་ན་ཕན། །ཞེས་བྱ་བ་ལ། སེར་པོ་རྣམ་གཉིས་ལ་སོགས་པའི་ལྡེ་གུ་དང་། མར་དང་
བ་གཅིན་གྱི་བཞི་ཆ་དང་བཅས་པར་བསྲེ། བ་གཅིན་མར་གྱི་བཞི་འགྱུར་དང་བསྐོལ་བའི་མར་བཏུང་བ་ལ་སོགས་པར་བྱས་ན་ཤ་ཟའི་གདོན་གྱིས་ཟིན་པ་ལ་ཡང་ཕན་ནོ། །ཡང་ན་དེ་ཉིད་ར་གཅིན་བཏགས། །མིག་བསྐུས་སྣར་ནི་བླུགས་ན་ཕན། །ཞེས་བྱ་བ་ལ། ཡང་ན་སེར་པོ་རྣམ་
གཉིས་ལ་སོགས་པའི་སྨན་དེ་ཉིད་དང་ར་གཅིན་དང་ལྷན་ཅིག་བཏགས་ཏེ་ལྡེ་གུར་བྱས་པ་མིག་ཏུ་བསྐུས་ཤིང་སྣར་བླུགས་ན་ཡང་ཤ་ཟའི་གདོན་གྱིས་ཟིན་པ་ལ་ཡང་ཕན་ནོ། །ལྷ་དང་དྲང་སྲོང་མཚུན་ལྷ་དང་། །དྲི་ཟའི་གདོན་ལ་སྣ་སྨན་སོགས། །རྣོན་པོ་གཏང་བར་མི་བྱ་ཞིང་། །འདི་ལ་
ཞུན་མར་བཏུང་ལ་སོགས། །སྨན་ནི་འཇམ་པོར་སྤྱད་པར་བྱ། །ཞེས་བྱ་བ་ལ། ལྷ་ལ་སོགས་པའི་གདོན་བཞི་པོ་ལ་ནི་སྣ་སྨན་ལ་སོགས་པ་རྣོ་ཞིང་དྲག་པ་གཏང་བར་མི་བྱའོ། ལྷ་ལ་སོགས་པའི་གདོན་འདི་ལ་ཞུན་མར་དང་བཏུང་བ་ལ་སོགས་པའི་སྨན་འཇམ་པོ་གང་ཡིན་པ་དེ་སྤྱད་ཅིང་
གཏང་བར་བྱའོ། །ཤ་ཟ་མ་གཏོགས་ཐམས་ཅད་ལ། །མི་མཐུན་སྦྱིན་པར་མི་བྱ་སྟེ། །མཐུ་སྟོབས་ཆེ་བ་དེ་ཁྲོས་ན། །ནད་པ་སྨན་པར་བཅས་གསོད་བྱེད། །ཅེས་བྱ་བ་ལ། ཤ་ཟའི་གདོན་མ་གཏོགས་པ་གདོན་ཐམས་ཅད་ལ་མི་མཐུན་ཞིང་དེ་ལ་གནོད་པར་འགྱུར་བ་ཅི་ཡང་སྦྱིན་ཞིང་སྤྱད་
པར་མི་བྱ་སྟེ། །ཅིའི་ཕྱིར་ཞེ་ན། དེ་རྣམས་ནི་མཐུ་སྟོབས་ཆེ་ཞིང་ནུས་པ་དང་ལྡན་པ་ཡིན་པས་ལྷ་ལ་སོགས་པའི་གདོན་དེ་དག་ལ་མི་མཐུན་པས་སྤྱད་ན་ཁྲོས་ཞིང་འཁྲུགས་ནས་ནད་པ་སྨན་པ་དང་བཅས་པ་གསོད་པར་བྱེད་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག །མགོན་

པོ་ཕྱག་ནི་བཅུ་གཉིས་པ། །ནད་ཀུན་གསོ་པར་མཛད་པ་ཡི། །སྔགས་བཟླས་ན་ནི་ནད་ཀུན་སེལ། །དེ་བཞིན་སྨྱོ་བྱེད་བརྗེད་བྱེད་དང་། །གཞན་ཡང་སེམས་འཁྲུལ་བྱེད་པ་འཇོམས། །ཞེས་བྱ་བ་ལ། འཕགས་པ་སྤྱམ་རས་གཟིགས་དབང་ཕྱུག་སེམས་ཅན་ཐམས་ཅད་ཀྱི་མགོན་དུ་གྱུར་
པ། ལྷའི་ཡང་ལྷ་ཕྱག་བཅུ་གཉིས་པ་ནད་ཐམས་ཅད་གསོ་བར་མཛད་པའི་སྔགས་ཇི་སྐད་བཤད་པ་དག་བཟླས་ན་ཡང་གདོན་ཐམས་ཅད་དང་བརྗེད་བྱེད་ལ་སོགས་པ་འཇོམས་པར་འགྱུར་རོ། །རིགས་སྔགས་རྒྱལ་མོ་རྨ་བྱ་ཆེ། །གཙང་བྱས་དེ་ལ་རྟག་ཏུ་བསྒྲགས། །ཞེས་བྱ་བ་ལ། ཡང་
ན་ནད་པ་དེ་ཁྲུས་དང་གཙང་སྦྲ་བྱས་ལ་རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་སྔགས་དུས་ཐམས་ཅད་དུ་དེའི་རྣ་བར་བསྒྲགས་ཤིང་བཟླས་ན་ཡང་གདོན་ཐམས་ཅད་ལས་ཐར་བར་འགྱུར་རོ། །འབྱུང་བོའི་བདག་པོ་ལྷ་ཆེན་དང་། །དེ་ཡི་འཁོར་གྱི་ཚོགས་མཆོད་ཅིང་། །དེ་ཡི་སྔགས་གྲུབ་
བཟླས་ན་ཡང་། །གདོན་ནི་ཐམས་ཅད་འཇོམས་པར་བྱེད། །ཅེས་བྱ་བ་ལ། འབྱུང་བོའི་གདོན་རྣམས་ཀྱི་ལེགས་ལྡན་ལྷ་ཆེན་པོ་མཆོད་པར་བྱ་བ་དང་། །དེ་བཞིན་དུ་དེའི་འཁོར་གྱི་ཚོགས་འཇོམས་བྱེད་རྣམས་མཆོད་པ་དང་། དེའི་སྔགས་གྲུབ་ཟིན་པ་བཟླས་པར་གྱུར་ན་ཡང་གདོན་
ཐམས་ཅད་འཇོམས་པར་བྱེད་དོ། །གང་ཡང་འོག་ནས་བཤད་པ་ཡི། །ལེའུ་གཉིས་ལས་སྨོས་པ་དང་། །གང་འདིར་བཤད་པ་དེ་དག་ཀུན། །ཕན་ཚུན་སྦྱོར་བ་བྱས་ན་ཕན། །ཞེས་བྱ་བ་ལ། གང་འདིའི་འོག་ནས་བཤད་པའི་ལེའུ་གཉིས་པོ་སྨྱོ་བྱེད་དང་བརྗེད་བྱེད་ཅེས་བྱ་བའི་ནད་གསོ་བ་
ལ་སྨོས་པ་དང་། །གང་ལེའུ་འདི་ལས་བཤད་པའ་དེ་དག་ཐམས་ཅད་ནི་ཕན་ཚུན་འདྲེས་མར་སྦྱར་ཞིང་སྦྱོར་བ་བྱས་ན་ཕན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་
ལེའུ་ལྔ་བའི་རྣམ་པར་འགྲེལ་པའོ། །དེ་ནས་སྨྱོ་བྱེད་གསོ་བ་བཤད་པར་བྱའོ། །ཞེས་བྱ་བ་ལ། གདོན་གྱི་གསོ་བ་ལས་སྨྱོ་བྱེད་དང་བརྗེད་བྱེད་ཀྱི་གསོ་བ་ལོགས་ཤིག་ཏུ་བྱས་པ་ནི་བརྗོད་པ་མང་བ་ཡིན་པའི་ཕྱིར་རོ། །སྨྱོ་བྱེད་ནད་གཞི་རེ་རེ་དང་། །འདུས་སོགས་དུག་ལས་

གྱུར་པ་དྲུག །ཅེས་བྱ་བ་ལ། སྨྱོ་བྱེད་ནི་རྣམས་པ་དྲུག་སྟེ། །རླུང་ལ་སོགས་པ་ནད་གཞི་རེ་རེ་ལས་གྱུར་པ་གསུམ་དང་འདུས་པ་ལས་གྱུར་པ་གཅིག་དང་། སོགས་པ་སྨོས་པས་སེམས་ཀྱི་གདུང་བ་ལས་གྱུར་པ་གཅིག་དང་། དུག་ལས་གྱུར་པ་སྟེ་དྲུག་གོ། །སྨྱོ་བྱེད་
ཅེས་བྱ་ལུས་དང་ནི། །སེམས་ཀྱི་ནད་ལམ་ལོག་པ་རུ། །ཞུགས་པས་སྨྱོས་པར་གྱུར་པ་ཡིན། །ཞེས་བྱ་བ་ལ། སྨྱོ་བྱེད་ཅེས་བྱ་བ་ནི་གང་ལུས་དང་སེམས་ཀྱི་ནད་ལམ་ལོག་པར་གྱུར་པས་ཡིད་མྱོས་ཤིང་མ་རྟགས་པ་ཉིད་དུ་མྱོས་པར་གྱུར་པ་དེ་ལ་མྱོས་ཤིང་བརྒྱལ་བ་ཞེས་བྱའོ། །བཟའ་བཏུང་གནོད་
པ་དག་དང་ནི། །སྙིང་དང་མ་གོམས་དྲི་མར་བཅས། །མ་སྙོམས་པ་ནི་བསྟེན་པ་དང་། །ཡིད་ཞུམ་སྙིང་སྟོབས་ཆུང་བ་དང་། །རིད་ཅིང་སྤྱོད་པ་མ་སྙོམས་དང་། །མཆོད་འོས་མཆོད་པར་མི་བྱེད་དང་། །སེམས་ལས་ཀྱིས་ནི་སེམས་ཉམས་དང་། །དུག་
དང་ཉེ་བའི་དུག་ལས་གྱུར། །ཞེས་བྱ་བ་ལ། བཟའ་བ་དང་བཏུང་བ་གནོད་པར་གྱུར་པ་དག་གིས་ལུས་དང་སེམས་ཀྱི་ནད་སྐྱེད་པ་དང་། །དེ་བཞིན་དུ་ཟས་སྐོམ་རྙིང་པ་ལོ་ལོན་པ་དང་། །སྔར་མ་གོམས་པ་དང་། །དྲི་མ་ཅན་དུ་གྱུར་པ་དང་། ཟས་སྐོམ་མ་སྙོམས་པ་བསྟེན་པ་དང་། །དེ་བཞིན་
དུ་ཡིད་ཞུམ་ཞིང་མི་དགའ་བ་དང་སྙིང་སྟོབས་ཆུང་ཞིང་ནད་ཀྱི་ཁྱད་པར་གྱིས་འཁྲུགས་པ་དང་། ལུས་རིད་ཅིང་ཉམ་ཆུང་བ་དང་། །སྤྱོད་པ་དྲག་དལ་མ་སྙོམས་པ་དང་། །མཆོད་པར་འོས་པ་ལྷ་དང་བླ་མ་ལ་སོགས་པ་མཆོད་པར་མི་བྱེད་པ་དང་། །སེམས་ལས་ཀྱིས་ཡིད་ལ་གནོད་པར་བྱེད་པ་
དང་། སེམས་ཉམས་ཤིང་མ་རུངས་པར་གྱུར་པ་དང་། །དེ་བཞིན་དུ་དུག་དང་ཉེ་བའི་དུག་སྦྱར་བའི་དུག་ལ་སོགས་པ་ལས་སྨྱོ་བྱེད་ཀྱི་ནད་དུ་གྱུར་པ་ཡིན་ནོ། །འདི་ཡིས་སྙིང་སྟོབས་ཞན་པ་ཡི། །སྙིང་གི་ནད་ལ་གནོད་བྱས་ཏེ། །བློ་ནི་དྲི་མ་ཅན་བྱས་ཏེ། །ཡིད་རྒྱུ་བ་ཡི་ལམ་བཀག་ནས། །སྨྱོ་བྱེད་
དག་ནི་སྐྱེད་པར་བྱེད། །དེ་ཡིས་བློ་དང་རྣམ་ཤེས་དང་། །དྲན་པ་འཁྲུལ་ཞིང་ལུས་ཀྱི་ནི། །བདེ་དང་སྡུག་བསྔལ་ལས་ཉམས་ཏེ། །ཤིང་རྟ་ཁ་ལོ་སྒྱུར་བ་ནི། །མེད་པ་ལྟ་བུར་རྩོམ་པ་ནི། །ཀུན་ཀྱང་བསམ་པ་མེད་པར་སྤྱོད། །ཅེས་བྱ་བ་ལ། སྔར་བཤད་པའི་བཟའ་བ་དང་

བཏུང་བ་གནོད་པ་ལ་སོགས་པའི་ནད་ཀྱིས་སྙིང་ལ་གནོད་པར་བྱས་ཏེ། བློ་དྲི་མའི་རྙོག་མ་ཅན་དུ་བྱས་ཏེ། ཡིད་རྒྱུ་བའི་རྩ་སྦུབས་ཀྱི་ལམ་བཀག་ནས་སྨྱོ་བྱེད་ཀྱི་ནད་སྐྱེད་པར་བྱེད་པ་ཡིན་ལ། སྨྱོ་བྱེད་དེས་བློ་ལ་སོགས་པ་འཁྲུག་ཅིང་འཁྲུགས་པ་དང་ལུས་ཀྱི་བདེ་བ་དང་། སྡུག་བསྔལ་ལས་
ཉམས་ཤིང་། ཚོར་བ་མེད་དེ་ཐམས་ཅད་དུ་བསམ་པ་མེད་པ་ཁོ་ནར་སྤྱོད་པ་ནི་དཔེར་ན་ཇི་ལྟར་ཤིང་རྟ་ཁ་ལོ་སྒྱུར་བའི་སྐྱེས་བུ་མེད་པ་དང་ཕྱོགས་མེད་པར་འཁྱམས་པ་ལྟ་བུར་འགྱུར་རོ། །དེ་ལ་རླུང་གྱུར་ལུས་སྦེགས་ཤིང་། །རྒྱུ་མེད་ངུ་ཞིང་ཚིག་རྩུབ་སྨྲ། །དགོད་དང་འཛུམ་དང་གར་བྱེད་དང་
གླུ་ལེན་རོལ་མོ་བྱེད་པ་དང་། །ལུས་སྐྱོད་ཕེག་ནི་རྡོབ་པ་དང་། །གླིང་བུ་པི་ཝང་ལ་སོགས་ཀྱི། །སྒྲ་ཡི་ལད་མོ་ཡང་ཡང་ཟློ། །རྒྱུན་དུ་ཁ་ནས་སྦུ་བ་འཛག །ཕན་ཚུན་རྒྱུག་ཅིང་མང་དུ་སྨྲ། །རྒྱན་མིན་པས་ནི་རྒྱན་དུ་བྱེད། །བཞོན་པ་མིན་པར་འགྲོ་བར་རྩོམ། །ཁ་ཟས་ལ་ནི་གདུ་
བར་བྱེད། །དེ་རྙེད་ན་ནི་མི་འོདད་བྱེད། །མིག་ཟླུམ་མིག་ནི་དམར་བ་དང་། །ཁ་ཟས་ཞུ་ནུས་ནད་ལྡང་འགྱུར། །ཞེས་བྱ་བ་ལ། དེ་ལ་རླུང་ལས་གྱུར་པའི་སྨྱོ་བྱེད་ནི་ལུས་སྦེགས་ཤིང་རིད་པ་དང་། རྒྱུ་མེད་པར་ངུ་བ་ནས་ཕེག་རྡོབ་པའི་བར་དུ་བྱེད་དེ། རྒྱུ་མེད་པ་ནི་གནས་སྐབས་མ་ཡིན་
པ་སྟེ། གང་དུ་ངུ་བ་ལ་སོགས་པའི་བྱ་བའི་རིགས་པ་དག་ལ་ནི་མི་བྱེད་ལ། མི་བྱེད་པར་རིགས་པ་དག་ལ་ནི་བྱེད་པའོ། །འཛུམ་པ་ནི་ཆུང་ཟད་དགོད་པའོ། །གླིང་བུ་ལ་སོགས་པའི་ལད་མོ་བྱེད་པ་ན་དེ་དང་རྗེས་སུ་མཐུན་པར་བྱེད་པའོ། །རྒྱན་མ་ཡིན་པ་ནི་རྩ་ཤིང་ལ་སོགས་པ་སྟེ།
དེས་རྒྱན་དུ་བྱེད་པའོ། །བཞོན་པ་མ་ཡིན་པ་ནི་ཤིང་ལས་བྱས་པའི་རྟ་ལ་སོགས་པས་འགྲོ་བར་རྩོམ་པའོ། །ཁ་ཟས་ལ་གདུ་བ་ནི་ཟས་སྐོམ་ལ་སོགས་པ་ལ་ཆགས་པའོ། །རྙེད་ན་མི་འདོད་པ་ནི་དེ་ལ་མངོན་པར་མི་དགའ་བའོ། །ཁ་ཟས་ཞུ་ནས་ནད་ལྡང་བ་ནི། ནད་དེ་སྟོབས་ཅན་དུ་
འགྱུར་བའོ། །གཞན་དག་ནི་གོ་བར་ཟད་དོ། །མཁྲིས་ལས་སྤྱོ་ཞིང་ཁྲོ་བ་དང་། །ཁུ་ཚུར་བོང་བས་རྡེག་ཅིང་རྒྱུག །གྲིབ་མ་ཆུ་ནི་གྲང་མོ་འདོད། །གཅིག་པུ་འདུག་ཅིང་ལུས་མདོག་སེར། །མེད་པར་མེ་ནི་འབར་བ་དང་། །སྐར་མ་མར་མེ་མཐོང་བའོ། །ཞེས་བྱ་བ་ལ།

མཁྲིས་པ་ལས་གྱུར་པའི་སྨྱོ་བྱེད་ནི་གཞན་དག་ལ་ཚིག་ངན་པས་སྦྱོ་བ་དང་། ཁྲོ་ཞིང་འཁྲུག་པ་དང་། ཁུ་ཚུར་ལ་སོགས་པས་རྡེག་ཅིང་འགྲོ་བ་དང་། བཙོག་པ་དང་། ས་ཕྱོགས་གང་ན་མེ་འབར་བ་ལ་སོགས་པ་མེད་བཞིན་དུ་མེའི་ཕུང་པོ་ལ་སོགས་པ་མཐོང་བ་
ཡིན་ནོ། །བད་ཀན་སློན་ཞིང་ཡི་ག་འཆུས། །ཁ་ཟས་རྩོལ་དང་སྨྲ་བ་ཉུང་། །བུད་མེད་འདོད་ཅིང་དབེན་ལ་དགའ། །ཁུ་ཆུ་སྣབས་ནི་འཛག་པ་དང་། །འཇིགས་རུང་གཙང་སྦྲ་ལ་མི་དགའ། །གཉིད་ཆེ་གདོང་ནི་སྐྲང་བ་དང་། །ནུབ་མོ་ཤས་ཆེར་སྨྱོ་བ་དང་། །ཟོས་མ་ཐག་ཏུ་
ལྡང་བ་ཡིན། །ཞེས་བྱ་བ་ལ། །བད་ཀན་ལས་གྱུར་པའི་སྨྱོ་བྱེད་ནི་སློན་བྲོ་བ་དང་། །ཡི་ག་འཆུས་པ་ལ་སོགས་པ་དང་། དབེན་བར་གཅིག་པུ་འདུག་པར་དགའ་པ་དང་། །འཇིགས་སུ་རུང་ཞིང་སྨད་པར་བྱ་བ་ལ་གནས་པ་དང་། གཙང་སྦྲ་ཆུང་བ་ལ་སོགས་པ་དང་། ཁ་ཟས་
ཟོས་མ་ཐག་ཏུ་སྨྱོ་བྱེད་ཀྱི་ནད་ཤས་ཆེར་ལྡང་བའི་བར་ཡིན་ནོ། །འདུས་པའི་རྒྱུ་དང་མཚན་མ་ནི། །ཀུན་ལྡན་དེ་ཡི་བདག་ཉིད་ཅན། །སྨྱོ་བྱེད་མི་བཟང་པར་ཤེས་བྱ། །དེ་ནི་སྨན་པས་ཡོངས་སུ་སྤང་། །ཞེས་བྱ་བ་ལ། འདུས་པ་ལས་གྱུར་བའི་སྨྱོ་བྱེད་ནི་ནད་གཞི་རྒྱུ་ཐམས་ཅད་དང་མཚན་
མ་ཐམས་ཅད་དང་ལྡན་པ་ཡིན་ཏེ། དེ་ལྟ་བུ་ནི་འདུས་པའི་ནད་དེའི་བདག་ཉིད་ཅན་ཡིན་ལ། །སྨྱོ་བྱེད་དེ་ནི་ཤིན་ཏུ་མི་བཟད་ཅིང་། འཇིགས་སུ་རུང་བ་ཡིན་པས། གསོར་མི་རུང་བའི་ཕྱིར་སྨན་པས་སྤང་བར་བྱའོ། །ནོར་དང་ཆུང་མ་སོགས་བྲལ་བས། །བརྣག་དཀའ་བ་ལས་སེམས་
གདུང་བས། །སྨྱོ་ཞིང་ཞུམ་ལ་ཡང་ཡང་བརྒྱལ། །ཀྱི་ཧུད་ཀྱི་ཧུད་སྨྲེ་སྔགས་འདོན། །གློ་བུར་དུ་ནི་ངུ་ཞིང་བརྒྱལ། །དེ་ཡི་ཡོན་ཏན་མང་དུ་སེམས། །མྱ་ངན་གྱིས་གདུངས་སེམས་ཁོང་ཆུད། །གཉིད་ཡར་རྣམ་པར་འཁྱམས་པ་ཡིན། །ཞེས་བྱ་བ་ལ། སེམས་ཀྱི་གདུང་བ་ན་སྨྱོ་བྱེད་
ནི་ནོར་དང་ཆུང་མ་ལ་སོགས་པ་ཡིད་དུ་འོང་བ་དང་བྲལ་བས། །བརྣག་དཀའ་བ་ལ་སེམས་ཀྱི་གདུང་བ་སྐྱེ་ལ། དེའི་དབང་གིས་མདོག་སྐྱ་བོ་འོད་འོད་པོར་གྱུར་བ་དང་། སེམས་ཞུམ་པ་ལ་སོགས་པར་འགྱུར་ཞིང་། ནོར་རམ་ཆུང་མ་དང་བྲལ་བ་དེའི་ཡོན་ཏན་ཡང་དང་ཡང་དུ་སེམས་

ཤིང་མྱ་ངན་གྱིས་གདུངས་པ་ལ་སོགས་པ་ཡིན་ནོ། །དུག་གིས་གདོང་ནི་སྔོ་བ་དང་། །གཞི་ཉམས་དབང་པོ་སྟོབས་ཆུང་བ། །ཤུགས་ཀྱི་བར་དུའང་འཁྲུལ་བར་བྱེད། །མིག་དམར་དེ་ནི་སྤང་བར་བྱ། །ཞེས་བྱ་བ་ལ། དུག་ལས་གྱུར་པའི་སྨྱོ་བྱེད་ནི་མིའི་གདོང་སྔོ་བ་དང་། །གཟི་
མདངས་ཉམས་པ་ལ་སོགས་པ་དང་། བཤང་གཅི་ལ་སོགས་པའི་ཤུགས་འབྱིན་ཞིང་བར་དུ་ཡང་འཁྲུལ་ཞིང་མྱོས་པར་འགྱུར་བ་དང་། མིག་དམར་པོར་འགྱུར་བ་ཡིན་ཏེ། དེ་ཡང་གསོར་མི་རུང་བས་སྤང་བར་བྱའོ། །དེ་ནས་རླུང་གྱུར་སྨྱོ་བྱེད་ལ། །དང་པོར་སྣུམ་གྱི་བཏུང་བ་
བླུད། །ཅེས་བྱ་བ་ལ། དེ་ནས་དེ་དག་གི་གསོ་བ་ནི་རླུང་ལས་གྱུར་བའི་སྨྱོ་བྱེད་ལ་ནི་དང་བོ་ཐོག་མ་ཁོ་ནར་སྨན་མར་བླུད་ནས་གསོ་བར་བྱའོ། །ལམ་འགགས་གྱུར་ལ་དང་པོར་ནི། །སྣུམ་བཅས་སྦྱར་བ་འཇམ་པོ་བྱ། །ཞེས་བྱ་བ་ལ། རྩ་སྦུབས་ཀྱི་ལམ་འགགས་པ་ལས་སྨྱོ་བྱེད་དུ་
གྱུར་བ་ལ་ནི་དང་བོ་ཁོ་ནར་སྣུམ་དང་བཅས་པའི་སྐྱུག་སྨན་དང་། བཀྲུ་སྨན་དང་འཇམ་པོའི་སྦྱོར་བས་གསོ་བར་བྱའོ། །བད་ཀན་མཁྲིས་གྱུར་དང་པོ་ནི། །སྣུམ་དང་དུགས་བྱས་སྐྱུག་སྨན་དང་། །བཀྲུ་སྨན་མས་གཏོང་བཅས་པ་དང་། །མགོ་བོའི་བཀྲུ་སྨན་དག་ཀྱང་བྱ། །ཞེས་བྱ་བ་
ལ། བད་ཀན་དང་མཁྲིས་བ་ལས་གྱུར་བའི་སྨྱོ་བྱེད་ལ་ནི་དང་པོ་ཁོ་ནར་སྣུམ་དང་དུགས་ཀྱི་ཆོ་ག་བྱས་ལ་སྐྱུག་སྨན་ལ་སོགས་པ་བཏང་བས་གསོ་བར་བྱའོ། །དེ་ལྟར་ལུས་ནི་དག་བྱས་ན། །ཡིད་ནི་དྲན་པ་རྙེད་པར་འགྱུར། །ཞེས་བྱ་བ་ལ། ཚུལ་དེ་ལྟར་བྱས་པས་སྨྱོ་བྱེད་ཀྱིས་བཏབ་
པའི་ནད་པ་དེའི་ལུས་སྦྱང་བ་བྱས་བའི་རྒྱུས་སེམས་གསལ་ཞིང་ཡིད་དྲན་པ་རྙེད་པར་འགྱུར་རོ། །དེ་ལྟ་ན་ཡང་རྗེས་འབྲངས་ན། །སྣ་སྨན་མིག་སྨན་རྣོན་པོ་གཏང་། །སེམས་དགའ་དབུགས་འབྱུང་སྐྲག་པ་དང་། འཇིག་དང་རྡེག་དང་སྡིགས་མོ་བྱེད། །ལུས་དྲི་ལ་བྱུག་དང་བསྐུ་བ་དང་།
དུད་བརྔུབ་སྨན་མར་བླུད་པ་དག། །སྦྱར་ཏེ་དེ་ནི་དག་གྱུར་ན། །ཡིད་ནི་ཐ་མལ་བ་ལ་སྦྱར། །ཞེས་བྱ་བ་ལ། ཚུལ་དེ་ལྟ་བུའི་གསོ་བ་བྱས་སུ་ཟིན་ཀྱང་ནད་དེ་རྗེས་སུ་འབྲང་ཞིང་འབྲེལ་པ་ཡིན་ན་སྣ་སྨན་རྣོན་པོ་ལ་སོགས་པ་བཏང་བ་དང་། སེམས་དགའ་བ་ལ་སོགས་པ་བྱས་ཏེ། དེས་ནི་

ཡིད་ཐ་མལ་པར་བདེ་བར་གནས་པར་འགྱུར་རོ། །ཤིང་ཀུན་དང་ནི་རྩབས་རུ་ཚ། །ཚ་བ་གསུམ་ནི་སྲང་གཉིས་གཉིས། །མར་བྲེ་བཞི་ནི་བ་གཅིན་བཅས། །བསྐོལ་བས་སྨྱོ་བྱེད་འབྱུང་བོ་དང་། །བརྗེད་བྱེད་གདོན་ནི་སེལ་མཆོག་ཡིན། །ཞེས་བྱ་བ་ལ། ཤིང་
ཀུན་ལ་སོགས་པའི་སྨན་སྲང་གཉིས་གཉིས་དང་། མར་བྲེ་བཞི་བ་གཅིན་དང་བཅས་པར་བསྐོལ་བ་བཏུང་བ་ལ་སོགས་པར་སྦྱར་ན་སྨྱོ་བྱེད་ལ་སོགས་པ་སེལ་བར་འགྱུར་རོ། །བྲ་མྷིའི་ཁུ་བ་བྲེ་དོ་དང་། །མར་བྲེ་གང་དང་ཚ་བ་གསུམ། །ཤ་མ་དུར་བྱིད་བིམ་པ་དང་། །ཤང་ཀ་པུཥྤ་དོང་ག་
དང་། །སབྷ་ལ་དང་བྱི་དང་ག །ཞོ་ནི་གཉིས་གཉིས་ལྡེ་གུར་བསྐོལ། བྲམྷིའི་རྩ་བ་ཞེས་བཤད་དེ། །མར་ནི་སྲང་རེས་བསྐྱེད་དེ་གཏང་། །ཆེ་ཚད་སྲང་བཞིའི་བར་ཟོས་ན། །སྨྱོ་བྱེད་བརྗེད་བྱེད་མཛེ་ཡི་ནད། །སེལ་ཞིང་མོ་གཤམ་བུ་སྐྱེད་བྱེད། །སྐད་སྙན་ཚིག་གསལ་དྲན་པ་དང་། །ཡིད་
གཞུངས་དཔལ་ནི་སྐྱེད་པར་བྱེད། །ཞེས་བྱ་བ་ལ། སྨན་བྲམྷི་བསྐོལ་བའི་ཁུ་བ་བྲེ་དོ་དང་མར་བྲེ་གང་དང་། ཚ་བ་གསུམ་ལ་སོགས་པའི་སྨན་སྣ་རེ་རེ་ཞོ་གཉིས་གཉིས་ཀྱི་ལྡེ་གུ་བསྐོལ་བ་ནི་བྲམྷའི་སྨན་མར་ཞེས་བྱ་བར་བཤད་དེ། མར་དེ་སྲང་གཅིག་ནས་སྲང་རེ་བསྐྱེད་དེ་སྲང་བཞི་བར་དུ་ཟོས་ན། མར་དེས་སྨྱོ་
བྱེད་ལ་སོགས་པའི་ནད་སེལ་ཞིང་དཔལ་སྐྱེད་པའི་བར་དུ་བྱེད་དོ། །འབྲས་བུ་གསུམ་དང་བི་ཤ་ལ། །པ་ཏྲ་ཨེ་ལ་ཐང་ཤིང་དང་། །ཨེ་ལ་བ་ལུ་ཀ་དང་ནི། །ཐལ་ཏྲེས་རྣམ་གཉིས་སེར་བོ་གཉིས། །སྠི་ར་རྣམ་གཉིས་པྲི་ཡང་ཀུ། །རྒྱ་སྤོས་རུ་རྟ་བྲི་ཧ་ཏི། །ནཱ་ག་གེ་སར་དོང་ག་བཙོད། །སེའུ་འབྲུ་
བལ་བུའི་ལོ་མ་དང་། །ཛཱ་ཏི་ཁ་འབུས་བྱི་དང་ག །དན་ད་ཤུག་པ་ཨུཏྤ་ལ། །ཙནྡན་དཀར་པོ་ཞོ་གཉིས་གཉིས། །ཞུན་མར་བྲེ་གང་བཅས་བསྐོལ་བ། །དགེ་བའི་སྨན་མར་ཞེས་བཤད་འདིས། །འབྱུང་པོའི་གདོན་སོགས་སྨྱོ་བྱེད་དང་། །བརྗེད་བྱེད་ལུད་པ་སྡིག་ཅན་འཇོམས། །སྐྱ་རྦབ་
གཡན་པ་སྐེམ་དང་དུག །རྨོངས་བག་གཅིན་སྙི་དབྱིག་དུག་རིམས། །ཁུ་བ་མེད་པའམ་བུ་མེད་པ་འམ། །དྲན་པ་གདོན་གྱིས་བརླམས་པ་དང་། །ཡིད་གཞུངས་མེད་ཅིང་ཚིག་འཁྲུལ་དང་། །དྲན་ཉམས་མེ་དྲོད་ཆུང་ལ་ཕན། །སྟོབས་སྐྱེད་བཀྲ་ཤིས་ཚེ་རིང་ཞིང་། །མདངས་སྐྱེད་སྐལ་ལྡན་

ལུས་རྒྱས་བྱེད། །བུ་སྐྱེད་བྱེད་པའི་མཆོག་ཡིན་ནོ། །ཞེས་བྱ་བ་ལ། པ་ཏྲ་ཨེ་ལ་ནི་ཧ་རེ་ཎུ་ཀའོ། །ཨེ་ལ་བ་ལུ་ཀ་ནི་མ་ལུང་ཀའོ། །ཐལ་ཏྲེས་རྣམ་གཉིས་ནི་ཤ་རི་བ་དཀར་པོ་དང་། ནག་པོ་གཉིས་སོ། །སེར་པོ་གཉིས་ནི་ཡུང་བ་དང་སྐྱེར་པའོ། །སྠིར་རྣམ་གཉིས་ནི་ས་ལ་པརྞི་དང་
ཀྲིཥྞ་པརྞིའོ། །པྲི་ཡང་ཀུ་ནི་གན་དྷ་པྲི་ཡང་ཀུའོ། །ཛཱ་ཏི་ནི་སྣ་མའི་མེ་ཏོག་སྟེ། དེ་ཁ་འབུས་པའོ། །ཨུཏྤ་ལ་ནི་ཨུཏྤ་ལ་སྔོན་པོའོ། །གཞན་ནི་གྲགས་པར་ཟད་དེ་སྨན་དེ་དག་ཞོ་གཉིས་གཉིས་ཀྱི་ཚད་དུ་བྱས་པའི་ལྡེ་གུ་དང་། །ཞུན་མར་བྲེ་གང་བསྐོལ་བའི་སྨན་མར་ནི་དགེ་བའི་སྨན་མར་ཞེས་དྲང་
སྲོང་དག་གིས་བཤད་དེ། སྨན་མར་འདིས་ནི་འབྱུང་བོའི་གདོན་ལ་སོགས་པ་འཇོམས་པ་ནས་བུ་སྐྱེད་པའི་མཆོག་ཡིན་པའི་བར་གྱི་ཡོན་ཏན་དང་ལྡན་པ་ཡིན་ནོ། །འདི་ལས་ཐལ་ཏྲེས་རྣམ་གཉིས་སོགས། །ཉི་ཤུ་རྩ་གཅིག་ཆུ་ནང་བསྐོལ། །དེ་ཡི་ཁུ་བ་མར་དང་བ། །ལན་ཅིག་སྐྱེས་འོ་
བཞི་འགྱུར་དང་། །མེ་ད་རྣམ་གཉིས་རམ་ཉེ་བ། །བུམ་གཙང་སྟོང་དང་ཁ་སྲལ་ཕྲེའུ། །བུ་རམ་ཤིང་དང་པརྞི་གཉིས། །བསྐོལ་བ་ཡི་ནི་སྨན་མར་ནི། །དགེ་བ་ཆེན་པོ་ཞེས་བྱ་སྟེ། བརྟས་བྱེད་འདུས་པའི་ནད་འཇོམས་ཤིང་། །སྔ་མ་བས་ཀྱང་ཡོན་ཏན་ལྷག །ཅེས་བྱ་བ་ལ།
བཤད་མ་ཐག་པའི་སྨན་འདི་དག་ལས་དང་པོའི་བདུན་མ་གཏོགས་པ་ཐལ་ཏྲེས་རྣམ་གཉིས་ལ་སོགས་པ་སྨན་སྣ་ཉི་ཤུ་རྩ་གཅིག་ཁུ་བ་བསྐོལ་བའི་ཆོ་གས་ཆུར་བསྐོལ་ཏེ། ཤ་རི་བ་རྣམས་གཉིས་ལ་སོགས་པ་སྨན་སྤྱིར་བྲེ་གང་ཆུ་བྲེ་བཅུ་དྲུག་གི་ནང་དུ་བསྐོལ་ལ་སྨན་གྱི་ཁུ་བ་བཞི་ཆ་ལུས་པ་མར་བྲེ་
གང་དང་བ་བེའུ་ལན་ཅིག་སྐྱེས་པའི་འོ་མ་བྲེ་བཞི་དང་། མེ་ད་རྣམ་གཉིས་ལ་སོགས་པ་སྤྱིར་སྲང་བརྒྱད་བསྐོལ་བའི་སྨན་མར་ནི་དགེ་བ་ཆེན་པོའི་སྨན་མར་ཞེས་བྱ་སྟེ། དེས་ལུས་བརྟས་པར་བྱེད་པ་དང་། འདུས་པའི་ནད་སེལ་བར་བྱེད་པ་དང་། དགེ་བའི་སྨན་མར་ཡོན་ཏན་ཆེར་ལྷག་པ་ཡིན་ནོ།
སྤང་སྤོས་པུ་ཏ་ཀེ་ཤི་དང་། །ཆུ་རྩ་ཤུ་དག་ཁ་སྲལ་ཕྲེའུ། །ཀྱི་ལྕེ་བ་དང་རམ་ཉེ་བ། །ཙ་རོང་ཛ་ཡ་པུ་ཙེ་ཤེལ། །སླེ་ཏྲེས་ཙ་ཏྲ་བ་ར་ཧ། །ཨ་ཏི་ཚ་ཏྲ་ས་ཏ་ལ། །མ་ཧཱ་པུ་རུ་ཥ་དན་ཌ། །ན་ཀུ་ལི་གཉིས་སྐྱུ་རུ་ར། །བྲི་ཤྩི་ཀ་ལ་ཀ་དམ་པ། །ས་ལ་པརྞི་བཅས་བསྐོལ་མར། །ཤ་ཟ་

ཆེན་པོའི་མར་ཞེས་བྱ། དེས་ནི་ཉིན་བཞི་པ་རིམས་དང་། །སྨྱོ་བྱེད་བརྗེད་བྱེད་གདོན་འཇོམས་ཤིང་། །བློ་དང་ཡིད་གཞུངས་དྲན་པ་སྐྱེད། །བྱིས་པ་རྣམས་ཀྱི་ལུས་འཕེལ་བྱེད། །བདུད་རྩི་དང་ནི་འདྲ་བ་ཡིན། །ཞེས་བྱ་བ་ལ། སྤང་སྤོས་ལ་སོགས་པའི་
སྨན་དང་། །མར་ཚུལ་བཞིན་དུ་བསྐོལ་བའི་སྨན་མར་ནི་མིང་ཤ་ཟ་ཆེན་པོའི་སྨན་མར་ཞེས་བྱ་སྟེ། དེས་ནི་ཉིན་བཞི་པའི་རིམས་ལ་སོགས་པ་སེལ་བའི་ཡོན་ཏན་དང་ལྡན་པ་ཡིན་ནོ། །བྲམྷི་ཨིན་དྲི་བྱི་དང་ག །ཤིང་ཀུན་སྤང་སྤོས་མུར་བ་དང་། །ར་སྣ་སྒོག་སྐྱ་བོང་ང་དཀར། །
ཤུ་དག་བྱའུ་རུག་བི་ཤ་ལ། །ནཱ་ག་དན་ཏི་བྱི་ཚེར་བ། །ཛོ་ཏི་སྨ་ཏི་ཚ་བ་གསུམ། །ཨ་རུ་ར་དང་ས་ནག་རྣམས། །གླང་པོའི་གཅིན་བཏགས་རི་ལུ་བྱས། །གྲིབ་བསྐམས་སྣར་བླུགས་མིག་བསྐུ་ཞིང་། །ལུས་བསྐུས་སྤོས་བདུགས་སྨྱོ་བྱེད་སེལ། །ཞེས་བྱ་བ་ལ། བྲམྷི་ནི་བྲམ་མན་ཡ་སྟི་ཀ་
ཞེས་བྱའོ། །ཨིན་དྲི་ནི་ཨིན་དྲ་བ་རུ་ནའོ། །ལ་ལ་ནི་སུག་སྨེལ་ལ་བྱའོ་ཞེས་ཟེར་རོ། །མོར་ནི་གནྡྷ་མོ་རའོ། །བི་ཤ་ལ་ནི་ལང་ག་ལིའོ། །ཛོ་ཏི་སྨ་ཏི་ནི་མར་མ་ཏ་ཞེས་བྱ་བ་ཕུག་རོན་གྱི་རྐང་བ་འདྲ་བ་མིང་གི་རྣམ་གྲངས་ཀུ་ནི་ཞེས་བྱའོ། །ནཱ་ག་དན་ད་ནི་ནཱ་ག་བྱི་ནའོ། །ས་ནག་ནི་སོ་ར་ཤི་ཞེས་
བྱ་བ་སྟེ། །སྨན་དེ་རྣམས་གླང་པོ་ཆེའི་གཅིན་དང་བཏགས་ཏེ་རི་ལུར་བྱས་ནས། གྲིབ་མ་ལ་བསྐམ་ལ་སྣར་བླུགས་པ་ལ་སོགས་པ་བྱས་ན་སྨྱོ་བྱེད་ཀྱི་གདོན་སེལ་བར་འགྱུར་རོ། །ཡུངས་ཀར་དང་ནི་སྦྱར་བ་ཡི། །སྣ་སྨན་རྣམ་པ་སྣ་ཚོགས་ཕན། །ཞེས་བྱ་བ་ལ། གཞན་ཡང་སྨྱོ་བྱེད་
ཀྱི་གདོན་ལ་ནི་ཡུངས་ཀར་གྱི་མར་དང་སྦྱར་བའི་སྣ་སྨན་རྣམ་པ་ཐ་དད་པ་དག་ཀྱང་ཕན་པ་ཡིན་ནོ། །ཡུངས་མར་གྱིས་ནི་ལུས་བསྐུ་དང་། ཡུངས་ཀར་ཕྱེ་མ་སྣར་བུད་བྱ། །ཞེས་བྱ་བ་ལ། ཡང་སྨྱོ་བྱེད་ཀྱི་ནད་འདི་ལ་ཡུངས་ཀར་གྱི་མར་གྱིས་ལུས་བསྐུ་བ་དང་། །ཡུངས་ཀར་གྱི་ཕྱེ་མ་སྣ་ནས་འབུད་
པ་དག་བྱས་ན་ཡང་ཕན་ནོ། །མདོ་གནས་བསྟན་པའི་ཆོ་ག་བཞིན། །དུད་རྣོན་ཤིང་ཀུན་བཅས་པ་ཕན། །ཞེས་བྱ་བ་ལ། །སྨྱོ་བྱེད་ཀྱི་ནད་ལ་མདོའི་གནས་ལས་བཤད་པའི་དུད་པ་རྣོན་པོ་ཤིང་ཀུན་དང་བཅས་པ་བདུགས་ན་ཡང་ཕན་ནོ། །ཝ་དང་རེག་འཇམ་འུག་པ་དང་། བྱི་བར་ཐུག་

ཛ་ཏུ་ཀའི། །གཅིན་དང་རྟུག་པ་སྤུ་དང་ནི། །པགས་པ་མཁྲིས་པ་སེན་མོ་དང་། །སྤོས་བདུགས་མིག་སྨན་ལུས་བསྐུས་དང་། །བྱུགས་དང་བླུགས་པ་སྦྱད་པར་བྱ། །ཞེས་བྱ་བ་ལ། ཝ་ལ་སོགས་པའི་གཅིན་ལ་སོགས་པ་དང་སྦྱར་བའི་སྤོས་ཀྱིས་བདུགས་པ་ལ་སོགས་པ་བྱས་ན་ཡང་སྨྱོ་
བྱེད་ཀྱི་ནད་ལ་ཕན་ནོ། །བད་ཀན་རླུང་གྱུར་ལ་ཕལ་ཆར། །ཁྱི་དང་བ་གླང་ཉ་ཤ་ནི། །རུལ་བའི་དུད་པས་བདུག་པར་བྱ། །ཞེས་བྱ་བ་ལ། བད་ཀན་དང་རླུང་ལས་གྱུར་པའི་སྨྱོ་བྱེད་ཕལ་ཆེར་ལ་ནི་ཁྱི་དང་བ་གླང་དང་ཉའི་ཤ་རུལ་ཞིང་དྲི་མ་ནམ་པའི་དུད་པས་ནད་པ་དེ་ལ་བདུགས་ན་ཕན་ནོ། །
མཁྲིས་གྱུར་ལ་ནི་ཏིག་ཏའི་མར། །འཚོ་བྱེད་སྣུམ་ནི་གཉིས་ཀྱི་མར། །བཟའ་དང་བཏུང་བ་བསིལ་བ་དང་། །མངར་བ་དང་ནི་ཡང་བ་བསྔགས། །ཞེས་བྱ་བ་ལ། མཁྲིས་པ་ལས་གྱུར་པའི་སྨྱོ་བྱེད་ལ་ནི་ཏིག་ཏའི་སྨན་མར་དང་། མར་དང་། ཏིལ་མར་གཉིས་ཀྱི་སྨན་མར་བླུད་ན་ཕན་
པ་དང་། དེ་བཞིན་དུ་བཟའ་བ་དང་བཏུང་བ་བསིལ་བ་དང་། མངར་བ་དང་ཡང་བའི་བག་བསྟེན་པ་བསྔགས་པ་ཡིན་ནོ། །ཇི་སྐད་བཤད་པའི་གཏར་ག་གདབ། །ཡང་ན་ཤ་ཚོན་གྱིས་འགྲངས་བྱ། །དེ་འོག་རླུང་མེད་གནས་བསྙལ་ནས། །སེམས་མྱོས་པ་ལས་ཐར་པར་འགྱུར།
ཞེས་བྱ་བ་ལ། །སྔར་མདོའི་གནས་སུ་སྨྱོ་བྱེད་ལ་ནི་སྙིང་ག་དང་། མིག་ཟུར་དང་། དཔྲལ་བར་གཏར་ག་གདབ་པར་བཤད་པའི་ཆོ་གས་གཏར་ག་གདབ་པར་བྱའོ། །ཡང་ན་ཤ་ཚོན་གྱིས་འགྲངས་པར་བྱས་ལ། །དེའི་འོག་ཁང་པ་རླུང་མེད་པའི་གནས་སུ་བསྙལ་ན། སེམས་མྱོས་ཤིང་
འཁྲུལ་བའི་ནད་ལས་ཐར་པར་འགྱུར་རོ། །ཁྲོན་པའི་ཆུ་ནི་ཉུང་བར་གཞུག །ལྟོགས་པ་ཉིད་དུ་བྱས་ཏེ་བསྐམ། །ཞེས་བྱ་བ་ལ། ཡང་ན་སྨྱོ་བྱེད་ཀྱིས་ཟིན་བའི་ནད་པ་དེ་ཁྲོན་པའམ། རྫིང་བུ་ཆུ་ཉུང་བར་བཅུག་ལ་ལྟོགས་པ་ཉིད་དུ་བྱས་ནས་ལུས་བསྐམས་ན་ཡང་ཕན་ནོ། །དེ་ལ་ཆོས་དང་
ནོར་ལྡན་པའི། །གཏམ་དང་མཛའ་བོས་དགའ་བར་བྱ། །ཞེས་བྱ་བ་ལ། ཡང་ན་སྨྱོ་བྱེད་དང་ལྡན་པའི་ནད་པ་དེ་ལ་དེའི་སྙིང་དུ་སྡུག་པའི་མཛའ་བོས་ཆོས་དང་ནོར་དང་ལྡན་པའི་གཏམ་སྙན་པས་དེའི་སེམས་དགའ་བར་བྱ་ཞིང་སྤྲོ་བསྲིང་བར་བྱའོ། །ཡང་ན་སྡུག་པ་དང་བྲལ་བ་འམ། །

རྨད་དུ་བྱུང་བ་བསྟན་པར་བྱ། །ཞེས་བྱ་བ་ལ། ཡང་ནད་པ་དེ་ལ་ཡིད་དུ་འོང་ཞིང་སྡུག་པ་དང་བྲལ་བའི་གཏམ་སེམས་དངངས་པར་འགྱུར་བའམ། ཡང་ན་ངོ་མཚར་སྐྱེ་ཞིང་རྨད་དུ་གྱུར་པའི་དངོས་པོ་བསྟན་པར་བྱའོ། །བཅིངས་ལ་ཡུངས་མར་གྱིས་བསྐུས་ཏེ།
ཉི་ཚན་ལ་ནི་གན་རྐྱལ་བཞག །ཁ་སྲལ་ཕྲེའུའམ་ལྕགས་ཚ་བའམ། །ཏིལ་མར་ཆུ་ཚན་གྱིས་རེག་བྱ། །ཞེས་བྱ་བ་ལ། ཡང་ན་སྨྱོ་བྱེད་ཅན་དེ་བཅིངས་ལ། ཡུངས་མར་གྱིས་ལུས་བསྐུས་ཏེ། ཉི་ཚན་ལ་ལུས་གམ་རྐྱལ་དུ་བཞག་སྟེ། ཁ་སྲལ་ཕྲེའུ་ལུས་ལ་རེག་པར་བྱས་པ་
འམ། ཡང་ན་ལྕགས་དང་ཏིལ་མར་དང་། ཆུ་ཚ་བས་ལུས་ལ་བསྲེག་པར་བྱའོ། །ཡང་ན་ལྕག་གིས་གཞུས་ནས་ནི། །བཅིངས་ཏེ་གཡང་སར་སྐྱུར་བར་བྱ། །ཞེས་བྱ་བ་ལ། ཡང་ནད་པ་དེ་ལྕག་གིས་གཞུས་ལ་བཅིངས་ཏེ་ཉམ་ང་བའི་གཡང་སར་སྐྱུར་བས་སྡང་བར་བྱའོ། །
ཡང་ན་རྡོ་དང་མཚོན་མེད་པའི། །མུན་ཁང་མི་ནི་མེད་པར་བཞག །ཅེས་བྱ་བ་ལ། ཡང་ན་རྡོ་དང་མཚོན་ཆ་མེད་པའི་ཁང་བ་མུན་ནག་དུ་གྱུར་པ་མི་མེད་པ་དག་ཏུ་གཞག་པར་བྱའོ། །མཆེ་བ་བཏོན་པའི་སྦྲུལ་དང་ནི། །གླང་དང་སེང་གེ་གླང་པོ་ཆེས། །དེ་ནི་སྐྲག་ཏུ་གཞུག་པའམ། །ཡང་
ན་རྒྱལ་པོའི་སྐྱེས་བུ་ཡིས། །དམ་དུ་བཅིངས་ཏེ་ཕྱིར་ཕྱུང་ན། །རྒྱལ་པོའི་བཀའ་ཡིས་བསྡིགས་པ་དང་། །འིད་གསད་བྱ་ཞེས་སྐྲག་ཏུ་གཞུག །ཅེས་བྱ་བ་ལ། ཡང་ན་སྨྱོ་བྱེད་ཅན་གྱི་ནད་པ་དེ་མཆེ་བ་བཏོན་ཞིང་མེད་པར་བྱས་པའི་སྦྲུལ་ལམ་གླང་ཁྱུ་མཆོག་གམ། སེང་གེ་ལ་སོགས་
པས་སྐྲག་ཏུ་གཞུག་པར་བྱ་བའམ། ཡང་ན་ནད་པ་དེ་རྒྱལ་པོའི་མངགས་གཞུག་གི་སྐྱེ་བོས་དམ་དུ་བཅིངས་ཏེ། རྒྱལ་པོའི་བཀས་བསྡིགས་པ་དང་གསད་པ་ལ་སོགས་པའི་ཚིག་གིས་སྐྲག་ཏུ་གཞུག་པར་བྱའོ། །ལུས་ཀྱི་སྡུག་བསྔལ་འཇིགས་པ་བས། །སྲོག་གི་འཇིགས་པ་རབ་
འཇིགས་པས། །དེ་ཕྱིར་ཀུན་ཏུ་འཁྲུལ་པའི་ཡིད། །ཉེ་བར་ཞི་བ་ཉིད་དུ་འགྱུར། །ཞེས་བྱ་བ་ལ། གང་གི་ཕྱིར་ལུས་ཀྱི་སྡུག་བསྔལ་བསྲེག་པ་དང་བརྡེག་པ་དང་། གཟིར་བ་ལ་སོགས་པ་ལས་སྲོག་གི་འཇིགས་པ་རབ་ཏུ་འཇིགས་ཤིང་སྐྲག་པར་བྱེད་པ་ཡིན་པས་རྒྱུ་དེའི་ཕྱིར་སྲོག་དང་

བྲལ་བའི་འཇིགས་པས་སྨྱོ་བྱེད་ཀྱིས་ཀུན་ཏུ་འཁྲུལ་པར་བྱེད་པའི་ཡིད་ཉེ་བར་ཞི་ཞིང་མེད་པར་འགྱུར་རོ། །གྲུབ་པའི་སྦྱོར་བ་འདི་དག་ནི། །ནད་དམིགས་དུས་སོགས་ལྟོས་ཏེ་བྱ། །ཞེས་བྱ་བ་ལ། དེ་ལྟར་སྔར་བཤད་པའི་གསོ་བའི་སྦྱོར་བ་གྲུབ་པར་གྱུར་པ་འདི་དག་ནི་ནད་དམིགས་དང་དུས་ལ་
སོགས་པ་ལ་ལྟོས་ནས་སྦྱད་པར་བྱའོ། །སྡུག་དང་ནོར་དང་བྲལ་བ་ལས། །གང་གི་ཡིད་ལ་གནོད་གྱུར་པ། །དེ་ལ་དེ་འདྲ་རྙེད་གྱུར་པ། །སྤྲོ་བསྲིངས་དབུགས་དབྱུང་པ་ཡིས་གསོ། །ཞེས་བྱ་བ་ལ། སྐྱེས་བུ་གང་སྡུག་ཅིང་ཡིད་དུ་འོང་བ་དང་། །ནོར་དང་བྲལ་བ་ལས་ཡིད་ལ་གནོད་
ཅིང་གདུང་བར་གྱུར་པའི་མི་དེ་ལ་ནི་དེ་དང་འདྲ་བའི་ནོར་དང་སྡུག་པ་དང་ཕྲད་ཅིང་རྙེད་པར་འགྱུར་བའི་ཚུལ་གྱིས་སྤྲོ་བ་སྲིང་ཞིང་དབུགས་དབྱུང་པའི་ཚུལ་གྱིས་དེའི་ཡིད་གསོ་བར་བྱའོ། །འདོད་དང་མྱ་ངན་འཇིགས་པ་དང་། །ཁྲོ་དང་འཇིགས་པ་ཆང་ལས་གྱུར། །གཉིས་གཉིས་དག་གིས་
གཅིག་ལ་གཅིག །དེ་དག་ཉིད་ཀྱིས་ཞི་བར་བྱ། །ཞེས་བྱ་བ་ལ། འདོད་ཆགས་ལ་སོགས་པ་ལས་བྱུང་བའི་སྨྱོ་བྱེད་ནི་འདོད་ཆགས་ལ་སོགས་བ་དེ་དག་ཉིད་ཀྱིས་གཅིག་ལ་གཅིག་གཉེན་པོར་བྱས་ཏེ་ཞི་བར་བྱའོ། །དེ་ཡང་འདོད་ཆགས་ལས་བྱུང་བའི་སྨྱོ་བྱེད་ནི་མྱ་ངན་གྱིས་ཞི་བར་བྱ་
ལ། མྱ་ངན་ལས་བྱུང་བ་ནི་འདོད་ཆགས་ཀྱིས་ཞི་བར་བྱའོ། །དེ་བཞིན་དུ་ཁྲོ་བ་ལས་བྱུང་བ་ནི་འཇིགས་པས་ཞི་བར་བྱའོ། འཇིགས་པས་ནི་ཁྲོ་བ་ཞི་བར་བྱ་སྟེ། དེ་ལྟར་གཅིག་ལ་གཅིག་གཉེན་པོར་གྱུར་པས་བསལ་བར་བྱའོ། །བཤད་པའི་མཚོན་མ་ལས་ལྷག་པ། །གདོན་དང་
རྗེས་འབྲེལ་ཡིན་ཞེས་བྱ། །གལ་ཏེ་སྨྱོ་བྱེད་གདོན་ལས་གྱུར། །གདོན་གསོར་བཤད་པའི་སྨན་སྦྱར་བྱ། །ཞེས་བྱ་བ་ལ། སྔར་བཤད་པའི་སྨྱོ་བྱེད་དྲུག་པོ་ལས་མཚམ་ཉིད་ལྷག་པར་གྱུར་པ་སྨན་པས་གང་དང་གང་མཐོང་བ་དེ་ནི་གདོན་དང་རྗེས་སུ་འབྲེལ་བ་ཡིན་པས་ན་དེ་ལྟར་གདོན་ལས་གྱུར་
པའི་སྨྱོ་བྱེད་ལ་ནི་གདོན་གསོ་བའི་སྐབས་སུ་བཤད་པའི་སྨན་གང་དག་ཡིན་པ་དག་གིས་བཏང་ཞིང་གསོ་བར་བྱའོ། །ཏིལ་བཏགས་ཕྱེ་མ་ནས་ཟན་དང་། །སྣུམ་ཞིང་མངར་བའི་ཁ་ཟས་དང་། །འབྲས་ནི་ཁྲག་དང་སྦྲུས་པ་དང་། །ཤ་ནི་བཙོས་པ་རྗེན་པ་དང་། །འབྲུ་ཆང་སྦྱར་ཆང་མནན་པའི་ཆང་

ཨ་ཏི་མུ་ཏིའི་མེ་ཏོག་དང་། །ཛཱ་ཏི་ས་ཧ་ར་ཛ་ཡི། །མེ་ཏོག་བཅས་པའི་གཏོར་མ་ནི། །ལམ་གྱི་བཞི་མདོ་བ་ལང་ལྷས། །ཆུ་བོ་འདུས་པ་དག་ཏུ་སྦྱིན། །ཞེས་བྱ་བ་ལ། དེ་བཞིན་དུ་གདོན་ལས་གྱུར་པའི་སྨྱོ་བྱེད་ལ་ཏིལ་བཏགས་པའི་ཕྱེ་མ་སྐྱོ་མ་དང་། དེ་
བཞིན་དུ་ནས་ཆན་ནམ་ཟན་དང་དེ་བཞིན་དུ་སྣུམ་ཞིང་མངར་བའི་ཤས་ཆེ་བའི་ཁ་ཟས་དང་འབྲས་ཁྲག་གི་གཏོར་མ་དང་། ཤ་བཙོས་པ་ལ་སོགས་པ་དང་། ས་ཧ་ར་ཛའི་མེ་ཏོག་གི་བར་དང་བཅས་པའི་གཏོར་མ་ལམ་གྱི་བཞི་མདོ་དང་། བ་ལང་གི་ལྷས་དང་། ཆུ་བོ་གཉིས་འདུས་པའི་ལམ་
དུ་སྦྱིན་པར་བྱའོ། །གང་ཞིག་ཤ་དང་ཆང་སྦངས་ཤིང་། །ཕན་ལ་བརྩོན་ཞིང་གཙང་སྦྲ་ཆེ། །སྙིང་སྟོབས་ཅན་ལ་ལྷན་ཅིག་སྐྱེས། །གློ་བུར་སྨྱོ་བྱེད་འབྱུང་མི་འགྱུར། །ཞེས་བྱ་བ་ལ། སྐྱེས་བུ་གང་ཤ་དང་ཆང་སྦངས་ཤིང་བོར་བ་དང་། ཕན་ཞིང་འཕྲོད་པའི་ཁ་ཟས་ཟོས་པ་དང་བརྩོན་
པ་ཆེ་ཞིང་དགེ་བའི་ལས་ལ་འབད་པ་དང་ལྡན་པ་དང་། གཙང་ཞིང་ལུས་དང་ངག་དང་ཡིད་ཀྱི་ལས་དྲི་མས་མ་གོས་པ་དང་། སྙིང་སྟོབས་དང་དང་ལྡན་ཞིང་རང་བཞིན་གྱིས་སྲན་ཐུབ་པའི་སྐྱེས་བུ་ལ་ནི་ལྷན་ཅིག་སྐྱེས་པ་དང་། གློ་བུར་པའི་སྨྱོ་བྱེད་རྣམས་འབྱུང་པར་མི་འགྱུར་རོ། །དབང་པོའི་
དོན་ནི་གསལ་བ་དང་། །དེ་བཞིན་བློ་དང་ཡིད་གསལ་བ། །ལུས་ཟུངས་ཐ་མལ་པར་གནས་པ། །སྨྱོ་བྱེད་དང་བྲལ་མཚན་མ་ཡིན། །ཞེས་བྱ་བ་ལ། གཟུགས་ལ་སོགས་པའི་དབང་པོའི་དོན་གསལ་བར་རྟོགས་ཤིང་མ་འཁྲུལ་བ་དང་། བློའོ་ཤེས་པ་དང་། ཡིད་ཀྱི་འཛིན་པ་
དངས་མ་ལ་སོགས་པའི་ལུས་ཟུངས་རྣམས་ཐ་མལ་པར་གནས་ཤིང་། མ་འཁྲུལ་པ་དག་ནི་སྨྱོ་བྱེད་ཀྱི་གདོན་ལས་ཐར་ཞིང་བྲལ་བར་གྱུར་པའི་མཚན་མ་ཡིན་ནོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་
ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་དྲུག་པའི་རྣམ་པར་འགྲེལ་པའོ།། །།དེ་ནས་བརྗེད་བྱེད་གསོ་བ་བཤད་པར་བྱའོ། །ཞེས་བྱ་བ་ལ། སྨྱོ་བྱེད་གསོ་བའི་འོག་ཏུ་བརྗེད་བྱེད་གསོ་བར་བཤད་པ་ནི། ཕལ་ཆེར་རྒྱུ་དང་མཚན་ཉིད་དང་གསོ་བ་མཐུན་པ་ཡིན་

པའི་ཕྱིར་སྨོས་པ་ཡིན་ནོ། །བརྗེད་བྱེད་དྲན་པ་ཉམས་པ་སྟེ། །དེ་ནི་སྙིང་སྟོབས་བློ་འཁྲུལ་དང་། །སེམས་ལས་མྱ་ངན་འཇིགས་སོགས་ཀྱིས། །གནོད་གྱུར་སེམས་ལས་བྱུང་བ་ཡིན། །ཞེས་བྱ་བ་ལ། བརྗེད་བྱེད་ཅེས་བྱ་བ་ནི་དྲན་པ་ཉམས་ཤིང་འདུ་ཤེས་དང་བྲལ་བ་ལ་
བྱ་སྟེ། འདི་ནི་བརྗེད་བྱེད་ཀྱི་ངེས་པའི་ཚིག་བསྟན་པའི་ཕྱིར། འདི་སྐད་སྨོས་པ་ཡིན་ནོ། །བརྗེད་བྱེད་དེ་ནི་སྙིང་སྟོབས་དང་བློ་ལ་སོགས་པ་འཁྲུལ་པ་ལས་བྱུང་བ་ཡིན་ཏེ། དེ་ལ་བློ་ནི་ཤེས་རབ་དང་ཤེས་པ་དང་། བློ་གྲོས་ཞེས་བྱ་བའི་མིང་གི་རྣམ་གྲངས་ཡིན་ཏེ་དེ་འཁྲུལ་པས་སེམས་ལས་
དང་མྱ་ངན་དང་འཇིགས་པ་ལ་སོགས་པས་གནོད་ཅིང་ཉན་པར་གྱུར་པའི་སེམས་ལས་བརྗེད་བྱེད་བྱུང་བ་ཡིན་ནོ། །ལུས་སེམས་གཏོགས་པའི་ནད་ཀྱིས་ནི། །སྨྱོ་བྱེད་བཞིན་དུ་འཁྲུགས་གྱུར་པས། །སྙིང་སྟོབས་ཉམས་ཤིང་སྙིང་དང་ནི། །འདུ་ཤེས་རྒྱུ་བའི་རྩ་སྦུབས་ཁྱབ། །མུན་པར་
ཞུགས་སྙམ་སེམས་ཤིང་རྨོངས། །འཇིག་སུ་རུང་བའི་བྱ་བ་བྱེད། །སོ་འཆའ་ཝུ་བ་སྐྱུག་པ་དང་། །ལག་པ་རྐང་པ་གཡོབ་པ་དང་། །གཟུགས་མེད་པ་ཡང་མཐོང་བ་དང་། །འཁྲུལ་ཞིང་ས་ལ་འགྱེལ་བ་དང་། །སྨིན་མ་མི་གཡོ་ནད་ཤུགས་དང་། །བྲལ་ནས་སད་པར་འགྱུར་བ་དང་། །
དེ་ནི་དུས་གཞན་དག་ཏུ་ཡང་། །དེ་བཞིན་དུ་ནི་སྤྱོད་པ་ཡིན། །ཞེས་བྱ་བ་ལ། ལུས་དང་སེམས་ཀྱི་ཆར་གཏོགས་པའི་ནད་ཀྱིས་སྨྱོ་བྱེད་ཀྱི་ཚུལ་དུ་འཁྲུགས་ཤིང་ལྡང་བར་གྱུར་པས་སྙིང་སྟོབས་བརྟན་པ་ཡོད་པ་གང་ཡིན་པ་དེ་ཉམས་ཤིང་མེད་པར་གྱུར་ནས་གནོད་པ་དེ་སྙིང་ལ་ཁྱབ་པར་
གྱུར་པ་དང་། འདུ་ཤེས་རྒྱུ་བའི་རྩ་སྦུབས་རྣམས་སུ་ཡང་ནད་ཀྱིས་ཁྱབ་བར་གྱུར་ལ་དེས་ན་སྐྱེས་བུ་མུན་པའི་ནང་དུ་ཞུགས་པ་སྙམ་དུ་སེམས་ཤིང་བློ་རྨོངས་པར་གྱུར་པ་དང་། ལས་སུ་བྱ་བ་འཇིགས་སུ་རུང་ཞིང་སྨད་པར་བྱ་བ་བྱེད་པ་དང་། །སོ་འཆའ་བ་ལ་སོགས་པ་དང་། གཟུགས་
མེད་ཅིང་འདྲ་བ་མ་ཡིན་པ་གང་ཡིན་པ་དེ་མཐོང་བ་དང་འཁྲུལ་ཞིང་འདུ་ཤེས་ཉམས་པས་ས་ལ་འགྱེལ་བ་དང་། སྨིན་མ་དང་མིག་ཡོན་པོར་སྣང་བ་དང་། ནད་ཀྱི་ཤུགས་དེ་དང་བྲལ་ཞིང་ཞི་ནས་སད་ཅིང་འདུ་ཤེས་རྙེད་པར་འགྱུར་བ་དང་། ཡང་མི་དེ་དུས་ཕྱིས་ནས་གནས་སྐབས་གཞན་དག་ཏུ་ཡང་

སྤྱོད་པར་འགྱུར་པ་དེ་བཞིན་དུ་བྱེད་པ་ཡིན་ནོ། །རླུང་ལ་སོགས་པ་དང་འདུས་པའི། །དབྱེ་བས་བརྗེད་བྱེད་རྣམ་པ་བཞི། །ཞེས་བྱ་བ་ལ། བརྗེད་བྱེད་ནི་རླུང་ལ་སོགས་པ་ནད་གཞི་རེ་རེ་ལས་གྱུར་པ་དང་། འདུས་པ་ལས་གྱུར་པའི་དབྱེ་བས་རྣམ་པ་བཞི་
ཡོད་པ་ཡིན་ནོ། །དེ་ནི་སྐྱེ་བར་གྱུར་བའི་ཚུལ། །སྙིང་འདར་ཁོང་སྟོང་མགོ་འཁོར་ལ། །མུན་པར་མཐོང་ཞིང་སེམས་ཁོང་ཆུད། །སྨིན་མ་མི་སྡུག་མི་འགྱུར་དང་། །སྒྲ་མི་ཐོས་ཤིང་རྔུལ་འབྱུང་ལ། །ཁ་ཆུ་སྣབས་ནི་འཛག་པ་དང་། །མི་འཇུ་ཡི་ག་འཆུས་ཤིང་བརྒྱལ། །
ལྟོ་སྦོས་ཉམས་སྟོབས་ཟད་པ་དང་། །གཉིད་མེད་སྐོམ་ཞིང་ཡན་ལག་ནི། །རྨི་ལམ་གླུ་ལེན་གར་བྱེད་དང་། །ཏིལ་མར་ཆང་ནི་འཐུང་བ་དང་། །དེ་གཉིས་གཅིན་དུ་འབྱུང་བ་རྨི། །ཞེས་བྱ་བ་ལ། བརྗེད་བྱེད་ཀྱི་ནད་དེ་འབྱུང་ཞིང་སྐྱེ་བར་འགྱུར་བ་ན། སྔར་འབྱུང་པའི་ཚུལ་ལམ་
མཚན་མ་ནི་སྙིང་འདར་ཞིང་གཡོ་བ་དང་། ཁོང་པ་སྟོང་ཞིང་ལྟོ་སྦོ་བ་དང་། འཁོར་ལོ་ལ་བསྐྱོན་པ་ལྟར་མགོ་འཁོར་བ་དང་། མུན་པར་མཐོང་ཞིང་མུན་འཐིབས་ཞེས་བྱེད་པ་དང་། སེམས་ཁོང་དུ་ཆུད་པ་ལ་སོགས་པ་ནས་ཏིལ་མར་དང་ཆང་འཐུང་བ་དང་། དེ་གཉིས་གཅིན་དུ་འབྱུང་
པའི་རྨི་ལམ་རྨི་བའི་བར་ཡིན་ནོ། །དེ་ལ་རླུང་གྱུར་བརླ་འགུལ་ཞིང་། །ཡང་དང་ཡང་དུ་འགྱེལ་བ་དང་། ཡང་དང་ཡང་དུ་དྲན་པ་སྟོང་། །འདུ་ཤེས་རྙེད་ནས་མི་གསལ་དུ། །མིག་འབུར་ཡང་ཡང་དབུགས་འབྱིན་ཅིང་། །ཝུ་བར་སྐྱུག་ཅིང་འདར་བ་དང་། །སོ་འཆའ་མགོ་ནི་
རྡེབས་པ་དང་། །རླུང་གིས་གྲེ་བ་རྒྱས་པར་བྱེད། །ཡན་ལག་ཀུན་དུ་རྡེབས་པ་དང་། །སོར་མོ་མི་སྙོམས་འགུགས་པ་དང་། །མིག་དང་པགས་པ་སེན་མོ་ནི། །གནག་ཅིང་རྩུབ་པོར་སྣང་བ་དང་། །གཟུགས་ནི་མི་བརྟན་རྩུབ་པ་དང་། །མི་སྡུག་བཞིན་རས་ངན་པ་ཡིན། །ཞེས་
བྱ་བ་ལ། དེ་ལ་རླུང་ལས་གྱུར་པའི་བརྗེད་བྱེད་ནི་ནད་པ་དེའི་བརླ་འགུལ་བ་ལ་སོགས་པ་དང་། མིག་གྱེན་དུ་འབུར་ཞིང་འབྱུང་བ་དང་། ཡང་དང་ཡང་དུ་དབུགས་འབྱིན་པར་བྱེད་པ་དང་། ཝུ་བ་སྐྱུག་པ་ལ་སོགས་པ་དང་། རླུང་གིས་གྲེ་བ་རྒྱས་པར་བྱེད་ཅིང་འགེངས་པ་དང་། ཡན་ལག་ཀུན་

དུ་བརྡེབ་ཅིང་བསྐྱོད་པ་དང་། སོར་མོ་མཐོན་དམན་མི་སྙོམས་པར་བྱས་ནས་འགུགས་པ་ལ་སོགས་པ་ཡིན་ནོ། །མཁྲིས་པ་ལས་གྱུར་བརྗེད་བྱེད་ནི། དྲན་པ་ཡང་ཡང་ཉམས་པ་དང་། །མིག་གདོང་པགས་པ་དབུ་བ་སེར། །སལ་རྡེབ་པར་བྱེད་པ་དང་། །འཇིགས་རུང་འབར་ཞིང་ཁྲོ་བ་
ཡི། །གཟུགས་མཐོང་སྐོམ་དད་ཆེ་བ་ཡིན། །ཞེས་བྱ་བ་ལ། མཁྲིས་པ་ལས་གྱུར་པའི་བརྗེད་བྱེད་ཀྱི་མཚན་མ་ནི་དྲན་པ་ཡང་དང་ཡང་དུ་ཉམས་ཤིང་ཡང་དང་ཡང་དུ་རྙེད་པའི་འགྱུར་བ་དང་། མིག་སེར་བ་ལ་སོགས་པ་ཡིན་ནོ། །བད་ཀན་ལས་གྱུར་རིང་ནས་འཛིན། །ཡུན་རིང་
ཉིད་ནས་སད་པར་བྱེད། །གཡོ་འགུལ་ཉུང་ཞིང་ཁ་ཆུ་མང་། །ཁ་མིག་སེན་མོ་པགས་པ་དཀར། །གཟུགས་རྣམས་དཀར་པོར་མཐོང་བ་ཡིན། །ཞེས་བྱ་བ་ལ། བད་ཀན་ལས་གྱུར་པའི་བརྗེད་བྱེད་ཀྱི་མཚན་མ་ནི། ཡུན་རིང་ཞིག་ནས་འཛིན་ཅིང་འཇུག་ལ། རིང་ཞིག་ནས་སད་
ཅིང་དྲན་པ་རྙེད་པར་འགྱུར་བ་ལ་སོགས་པ་ཡིན་ནོ། །མཚན་ཉིད་ཀུན་དང་ལྡན་པ་སྤངས། །ཞེས་བྱ་བ་ལ། འདུས་པ་ལས་གྱུར་པའི་བརྗེད་བྱེད་ནི་མཚན་ཉིད་ཀུན་དང་ལྡན་པ་ཡིན་ཏེ། དེ་ནི་གསོར་མི་རུང་བས་སྤང་བར་བྱའོ། །དེ་ནས་བློ་སེམས་དྲན་པ་དང་། །སྙིང་གའི་སྦུབས་ནི་སད་བྱེད་
པའི། །སློན་སྨན་ལ་སོགས་ལས་རྣམས་ནི། །རྣོན་པོ་ཡིས་ནི་སྦྱང་བར་བྱ། །ཞེས་བྱ་བ་ལ། བློ་དང་སེམས་དང་དྲན་པ་རྒྱུ་བའི་སྙིང་གའི་རྩ་སྦུབས་འགགས་པར་གྱུར་པ་ལ་ནི་དེ་སད་ཅིང་དག་པར་བྱེད་པའི་སློན་སྨན་དང་། སྐྱུག་སྨན་ལ་སོགས་པ་རྣོན་པོ་དག་གིས་དེ་དང་པོར་སྦྱང་ཞིང་དག་
པར་བྱའོ། །རླུང་གྱུར་འཇམ་རྩི་མང་དུ་བྱ། །མཁྲིས་གྱུར་ཕལ་ཆེར་བཀྲུ་སྨན་གཏང་། །ཞེས་བྱ་བ་ལ། རླུང་ལས་གྱུར་པའི་བརྗེད་བྱེད་ནི། གསོ་བ་རྣམས་ཀྱི་ནང་ནས་ཕལ་ཆེར་འཇམ་རྩི་མང་བས་གསོ་བར་བྱའོ། །མཁྲིས་པ་ལས་གྱུར་པའི་བརྗེད་བྱེད་ལ་ནི་ཕལ་ཆེར་བཀྲུ་
སྨན་བཏང་བས་གསོ་བར་བྱའོ། །བད་ཀན་ཕལ་ཆེར་སྐྱུག་སྨན་ནི། །བཏང་བས་བརྗེད་བྱེད་གསོ་བར་བྱ། །ཞེས་བྱ་བ་ལ། བད་ཀན་ལས་གྱུར་པའི་བརྗེད་བྱེད་ནི་ཕལ་ཆེར་སྐྱུག་སྨན་ལ་སོགས་པ་བཏང་བས་གསོ་བར་བྱའོ། །རྣམ་པ་ཀུན་ཏུ་ལེགས་དག་ཅིང་། །ལེགས་པར་སྤྲོ་ནི་

བསྲིང་བྱ་ཞིང་། །བརྗེད་བྱེད་ལས་ནི་ཐར་བྱའི་ཕྱིར། །ཞི་བར་བྱ་བའི་སྦྱོར་བ་ཉོན། །ཞེས་བྱ་བ་ལ། བརྗེད་བྱེད་ཀྱི་ནད་ཀྱིས་བཏབ་པ་དེ་རྣམ་པ་ཐམས་ཅད་དུ་སྟེང་དང་འོག་ནས་སྦྱང་བ་བྱས་ཤིང་ལེགས་པར་དག་པར་བྱས་པ་དང་། ལེགས་པར་སྤྲོ་བསྲིང་ཞིང་
དབུགས་དབྱུང་བར་བྱས་ནས། བརྗེད་བྱེད་ལས་ཐར་ཞིང་ཞི་པར་བྱ་བའི་སྦྱོར་བ་གང་དག་ཡིན་པ་མཉན་པར་གྱིས་ཤིག་པའོ། །བ་ལྕིའི་ཁུ་བ་འོ་མ་དང་། །ཞོ་དང་གཅིན་དང་མར་བསྐོལ་བ། །བརྗེད་བྱེད་རིམས་དང་སྨྱོ་བྱེད་དང་། །མིག་སེར་སེལ་བར་བྱེད་པ་བླུད། ཅེས་བྱ་བ་
ལ། བའི་ལྕི་བ་བཙགས་པའི་ཁུ་བ་དང་། འོ་མ་དང་ཞོ་དང་གཅིན་རེ་རེ་ཞིང་པའི་མར་དང་ཆ་མཉམ་པར་བྱས་པའི་རྣམ་ལྔའི་སྨན་མར་ནི་བརྗེད་བྱེད་ལ་སོགས་པ་སེལ་བར་བྱེད་པ་ཡིན་པས་དེ་བླུད་པར་བྱའོ། །རྩ་བ་བཅུ་པ་འབྲས་བུ་གསུམ། །དུག་མོ་ཡུངས་ཤུན་སེར་པོ་གཉིས། །
ཨ་པ་མརྒ་ལོ་མ་བདུན། །ནི་ལི་ནི་དང་པུ་ཚེ་ཤེལ། །དོང་ག་པུཥྐར་མཱུ་ལ་དང་། །ཕལ་གུའི་རྩ་བ་བྱི་ཚེར་སྲང་། །གཉིས་གཉིས་ཆུ་བྲེ་བཅུ་དྲུག་ནང་། །བསྐོལ་བ་ལས་ནི་བཞི་ཆ་ལུས། །ག་བྲའི་རྩ་བ་དུ་བ་རི། །པ་ཐ་དན་ད་དུར་བྱིད་དང་། །ཚ་བ་གསུམ་དང་རོ་ཧི་ཤཻ།
མུར་པ་རྩ་མཁྲིས་བུ་ཏི་ཀ །ཧ་ཏི་པི་པི་ལིང་དང་ནི། །མ་དུ་ཡན་ཏི་ཐལ་ཏྲེས་གཉིས། ལྕང་མ་དང་ནི་ཙི་ཏྲ་ཀ །ཞོ་ནི་གཉིས་གཉིས་མར་བྲེ་གང་། །དེ་བཞིན་ལྔ་མའི་གཤེར་རྫས་བསྐོལ། །འདི་ནི་བ་ཡི་རྣམ་ལྔ་ཆེ། །བརྗེད་བྱེད་རིམས་དང་དམུ་རྫིང་དང་། །མཚན་བར་
རྡོལ་བ་སེལ་མཆོག་ཡིན། །འོར་ནད་གཞུང་འབྲུམ་མིག་སེར་དང་། །སྐྱ་རྦབ་སྐྲན་དང་ལུད་པ་དང་། །གདོན་རྣམས་འཇོམས་པར་བྱེད་པ་ཡིན། །ཞེས་བྱ་བ་ལ། རྩ་བ་ལྔ་པ་རྣམ་གཉིས་དང་འབྲས་བུ་གསུམ་ལ་སོགས་པའི་སྨན་སྣ་རེ་རེ་ཞིང་སྲང་གཉིས་གཉིས་ཆུ་བྲེ་བཅུ་དྲུག་གི་
ནང་དུ་བསྐོལ་ལ་དེ་ལས་ཆུ་བྲེ་བཞི་ལུས་པ་དང་། དེའི་ནང་དུ་ག་བྲ་ལ་སོགས་པའི་རྩ་བ་ཞོ་གཉིས་གཉིས་ལྡེ་གུར་བྱས་པ་དང་། དེ་བཞིན་དུ་སྔ་མའི་གཤེར་རྫས་པའི་ལྕི་བའི་ཁུ་བ་ལ་སོགས་པ་བའི་རྣམ་ལྔ་ཆེན་པོའི་སྨན་མར་ཞེས་བྱ་སྟེ། །འདིས་ནི་བརྗེད་བྱེད་ལ་སོགས་པ་སེལ་བར་བྱེད་

པ་དང་། འོར་ནད་ལ་སོགས་པ་འཇོམས་པར་བྱེད་པ་ཡིན་ནོ། །རོ་ཧི་ཤ་ནི་བུ་སྲི་ནའོ། །རྩ་མཁྲིས་ནི་བུ་ནིམ་པ་སྟེ། ཀི་ར་ཏ་ཏིག་ཏའོ། །ཧ་ཏི་པི་པི་ལིང་ནི་ཤི་བ་སེའོ། །ཐལ་ཏྲེས་རྣམ་གཉིས་ནི་ཤ་རི་བ་དཀར་པོ་དང་ནག་པོའོ། བྲ་མྷི་ཤུ་དག་རུ་རྟ་དང་། །ཤང་ཀ་པུ་ཥྐ་མར་རྙིང་བཅས་
བསྐོལ་བའི་མར་ནི་ཡིད་གཞུངས་བྱེད། །སྨྱོ་བྱེད་བཀྲ་མི་ཤིས་པ་དང་། །བརྗེད་བྱེད་སྡིག་པ་འཇོམས་པར་བྱེད། །ཅེས་བྱ་བ་ལ། བྲ་མྷིའི་ཁུ་བ་མར་གྱི་བཞི་འགྱུར་དང་། ཤུ་དག་ལ་སོགས་པའི་སྨན་གྱི་ལྡེ་གུ་དང་མར་རྙིང་པ་བསྐོལ་བའི་སྨན་མར་ནི་ཡིད་གཞུངས་པར་བྱེད་ཅིང་
སྡུག་པ་དང་བཀྲ་མི་ཤིས་པའི་བར་འཇོམས་པར་བྱེད་པ་ཡིན་ནོ། །འཚོ་བྱེད་སྡེ་ཚན་སྲང་རེ་དང་། །ཏིལ་མར་ཞུན་མར་བྲེ་རེ་བསྲེས། །འོ་མ་བྲེ་ནི་བཅུ་དྲུག་བསྐོལ། །འཐུངས་ན་བརྗེད་བྱེད་ལས་ཐར་བྱེད། །ཅེས་བྱ་བ་ལ། འཚོ་བྱེད་ཀྱི་སྡེ་ཚན་སྨན་བཅུ་པོ་སྲང་རེ་རེ་དང་། །
ཏིལ་མར་བྲེ་གང་དང་། མར་བྲེ་གང་བསྲེས་ཏེ་འོ་མ་བྲེ་བཅུ་དྲུག་གི་ནང་དུ་བསྐོལ་ལ་མར་དང་ཏིལ་མར་འབའ་ཞིག་ལུས་པ་ལས་རན་པར་འཐུངས་ན་བརྗེད་བྱེད་ཀྱི་ནད་ལས་ཐར་བར་འགྱུར་རོ། །འོ་མ་བུ་རམ་ཤིང་ཁུ་བ། །བྲེ་བཞི་དང་ནི་ཏང་པལ་གྱི། །ཁུ་བ་བརྒྱད་འགྱུར་དག་
དང་ནི། །འཚོ་བྱེད་སྡེ་ཚན་ཞོ་གཉིས་གཉིས། །ཞུན་མར་བྲེ་གང་བཅས་བསྐོལ་བླུད། །དེས་ནི་རླུང་མཁྲིས་ལས་གྱུར་པའི། །བརྗེད་བྱེད་མྱུར་དུ་སེལ་བར་བྱེད། །ཅེས་བྱ་བ་ལ། འོ་མ་དང་བུ་རམ་ཤིང་གི་ཁུ་བ་བྲེ་བཞི་དང་། ཏང་པལ་གྱི་ཁུ་བ་དེའི་བརྒྱད་འགྱུར་
དང་། འཚོ་བྱེད་སྣ་བཅུ་ཞོ་གཉིས་གཉིས་དང་ཞུན་མར་བྲེ་གང་བསྐོལ་བའི་སྨན་མར་བྱིན་ན་རླུང་དང་མཁྲིས་པ་ལས་གྱུར་བའི་བརྗེད་བྱེད་མྱུར་དུ་སེལ་བར་འགྱུར་རོ། །དེ་བཞིན་འཇག་མ་བྱི་ད་རི། །ཀུ་ཤ་བུ་རམ་ཤིང་འོ་མ། །བསྐོལ་བ་འཐུངས་པ་འང་དེ་དང་འདྲ། །ཞེས་
བྱ་བ་ལ། །འཇག་མ་ལ་སོགས་པ་དང་འོ་མ་བསྐོལ་བ་ལ་སོགས་པ་འཐུངས་ན་ཡང་དེ་དང་འདྲ་བར་རླུང་དང་མཁྲིས་པ་ལས་གྱུར་བའི་བརྗེད་བྱེད་སེལ་བར་འགྱུར་རོ། །ཀུ་སྨན་ཏ་ཡི་ཁུ་བ་མར། །བཅོ་བརྒྱད་འགྱུར་དང་ཤིང་མངར་གྱི། །ལྡེ་གུར་བཅས་པ་བསྐོལ་བ་ནི། །བརྗེད་བྱེད་

སེལ་བར་བྱེད་པ་དང་། །བློ་དང་ཚིག་གསལ་སྐད་སྙན་བྱེད། །ཅེས་བྱ་བ་ལ། ཀུ་སྨན་ཏ་ཞེས་བྱ་བ་བུ་མར་ཤའི་ཁུ་བ་མར་གྱི་བཅོ་བརྒྱད་འགྱུར་དང་། ཤིང་མངར་གྱི་ལྡེ་གུ་དང་བཅས་པར་བསྐོལ་པའི་སྨན་མར་གྱིས་ནི་བརྗེད་བྱེད་སེལ་བ་ལ་སོགས་
པའི་ཡོན་ཏན་དང་ལྡན་པ་ཡིན་ནོ། །བ་ནི་སེར་སྐྱའི་མཁྲིས་པ་ཡི། །སྣ་སྨན་བཏང་ཡང་མཆོག་ཏུ་ཕན། །ཞེས་བྱ་བ་ལ། ཁ་དོག་སེར་སྐྱར་འདུག་པའི་མཁྲིས་པའི་སྣ་སྨན་བཏང་ན་ཡང་བརྗེད་བྱེད་ཀྱི་ནད་ལ་མཆོག་ཏུ་ཕན་པ་ཡིན་ནོ། །ཁྱི་དང་ཝ་དང་བྱི་ལ་དང་། །སེང་
གེ་སོགས་ཀྱི་མཁྲིས་པ་བསྔགས། །ཞེས་བྱ་བ་ལ། ཁྱི་ལ་སོགས་པའི་མཁྲིས་པའི་སྣ་སྨན་བཏང་ན་ཡང་བརྗེད་བྱེད་ཀྱི་ནད་ལ་ཕན་ནོ། །གོ་ད་སྲེ་མོ་གླང་པོ་ཆེ། བ་གླང་དྲེད་དང་པྲི་ཤ་ཏའི། །མཁྲིས་པ་ཏིལ་མར་བསྐོལ་བ་དག །ལུས་བསྐུ་སྣར་ནི་བླུགས་ན་འང་ཕན། །ཞེས་
བྱ་བ་ལ། གོ་ད་ལ་སོགས་པའི་མཁྲིས་པ་དང་ཏིལ་མར་བསྐོལ་ལ་དེ་ལུས་ལ་བསྐུས་པ་དང་། སྣར་བླུགས་ན་ཡང་ཕན་པ་ཡིན་ནོ། །འབྲས་བུ་གསུམ་དང་ཚ་བ་གསུམ། །ནས་ཚིག་འཁུས་ཐལ་ཀོ་ཉོན་ཚེ། །ཕ་ནི་ཛ་ཀ་སྲ་རྩི་ཕོག ཨ་པ་མརྒ་ཀ་རཉྫའི། ས་བོན་
ཏིལ་མར་ར་གཅིན་དང་། །བཅས་པ་བསྐོལ་བ་སྣར་བླུགས་པ་འམ། །ཕྱེ་མ་སྣ་ནས་བུས་ན་འང་ཕན། །ཞེས་བྱ་བ་ལ། འབྲས་བུ་གསུམ་ལ་སོགས་པའི་ལྡེ་གུ་དང་ཏིལ་མར་གྱི་བཞི་འགྱུར་གྱི་ར་གཅིན་ལ་སོགས་པ་དང་བསྐོལ་ལ། ཏིལ་མར་ཉི་ཚེ་ལུས་པ་སྣར་བླུགས་པ་འམ། །
འབྲས་བུ་གསུམ་ལ་སོགས་པའི་སྨན་གྱི་ཕྱེ་མ་སྣ་ནས་བུས་ན་ཡང་བརྗེད་བྱེད་ཀྱི་ནད་ལ་ཕན་ནོ། །སྲེ་མོ་འུག་པ་སྦྲེའུ་དང་། །བྱ་རྒོད་ཁྱི་རྟ་བྱ་རོག་སྦྲུལ། །མཆུ་དང་སྒྲོ་དང་རྟུག་པ་ཡི། །དུད་པས་འདི་ལ་བདུག་པར་བྱ། །ཞེས་བྱ་བ་ལ། སྲེ་མོ་ལ་སོགས་པའི་མཆུ་ལ་སོགས་
པ་གང་རྙེད་པའི་དུད་པས་ནད་པ་དེ་ལ་བདུགས་ན་ཡང་བརྗེད་བྱེད་ཀྱི་ནད་ལ་ཕན་པ་ཡིན་ནོ། །ཏིལ་མར་སྒོག་སྐྱ་བཅས་པ་འམ། །འོ་མ་ཉེའུ་ཤིང་བསྟེན་ཡང་ཕན། །ཞེས་བྱ་བ་ལ། ཡང་ན་བརྗེད་བྱེད་ཀྱི་ནད་ཀྱིས་བཏབ་པ་དེས་ཏིལ་མར་དང་སྒོག་སྐྱ་བཟའ་བ་འམ། འོ་མ་

དང་ཉེའུ་ཤིང་བསྟེན་ཅིང་གོམས་པར་བྱས་ན་ཡང་ཕན་ནོ། །བྲམྷི་འམ་རུ་རྟའི་ཁུ་བའམ། །ཤུ་དག་སྦྲང་རྩིར་ལྡན་པ་འང་ཕན། །ཞེས་བྱ་བ་ལ། ཡང་ན་བྲམྷིའི་ཁུ་བའམ། རུ་རྟའི་ཁུ་བ་ཤུ་དག་དང་སྦྲང་རྩིར་ལྡན་པ་དག་ཀྱང་བསྟེན་པར་བྱའོ། །ནད་གཞི་མཉམ་དུ་
འཁྲུགས་པ་ལས། །ལུས་དང་སེམས་ལ་བརྟེན་གྱུར་ནད། །སྐྱེས་པར་གྱུར་པ་གང་ཡིན་དེ། །བརྗེད་བྱེད་གནད་ནི་ཆེན་པོར་གནས། །དེ་བས་གསོ་དཀའ་འདི་ལ་ནི། །བཅུད་ཀྱིས་ལེན་གྱིས་གསོ་བར་བྱ། །ཞེས་བྱ་བ་ལ། རླུང་དང་མཁྲིས་པ་དང་། བད་ཀན་ཆ་
མཉམ་དུ་འཁྲུགས་ཤིང་ལྡང་བ་ལས་ལུས་དང་སེམས་ལ་བརྟེན་པའི་བརྗེད་བྱེད་ཀྱི་ནད་སྐྱེས་པར་གྱུར་པ་འདི་ནི་བརྗེད་བྱེད་དེ། ལུས་ཀྱི་གནད་ཆེན་པོ་ལ་གནས་ཤིང་། སྙིང་ལ་བརྟེན་པ་ཡིན་ཏེ། དེ་བས་ན་ཤིན་ཏུ་གསོ་བར་དཀའ་བའི་བརྗེད་བྱེད་ཀྱི་ནད་འདི་ལ་ནི་བཅུད་ཀྱིས་ལེན་
དེ་དང་འཕྲོད་པར་གསོ་བར་བྱའོ། །དེས་ཉེན་མེ་དང་ཆུ་ལ་སོགས། །ཡང་བ་ལས་རྟག་ཏུ་བསྲུང་། །ཞེས་བྱ་བ་ལ། བརྗེད་བྱེད་ཅེས་བྱ་བའི་ནད་དེས་ཉེན་ཞིང་གདུངས་པའི་མི་དེ་མི་དང་ཆུ་ལ་སོགས་པ་ཡང་ཞིང་འཆི་བའི་རྒྱུར་གྱུར་པ་ལ་རྟག་པར་དུས་ཐམས་ཅད་དུ་བསྲུང་
པར་བྱའོ། །ཐར་པ་ན་ནི་ཡིད་འཁྲུལ་པས། །ཁྱེད་ཀྱིས་འདི་ལྟར་བྱས་སོ་ཞེས། །མི་བརྗོད་ཡུལ་ནི་ཡིད་འོང་བས། །ཉམས་པའི་སེམས་ནི་བརྟ་བར་བྱ། །ཞེས་བྱ་བ་ལ། བརྗེད་བྱེད་ཅེས་བྱ་བས་ཡིད་འཁྲུལ་ཞིང་དྲན་པ་ཉམས་པས་ཚུལ་འདི་ལྟར་བྱས་སོ་ཞེས་དེ་ཐར་ཞིང་དྲན་པ་
རྙེད་པའི་སྐབས་སུ་སྐྱེས་བུ་གཞན་དག་གིས་བརྗོད་པར་མི་བྱ་ཞིང་ཡིད་ལ་གདུང་བ་བསྐྱེད་པར་མི་བྱའི། དེ་ལ་སྒྲ་ལ་སོགས་པའི་ཡུལ་ཡིད་དུ་འོང་ཞིང་དབང་པོ་ཚིམ་པར་བྱེད་པས། ཉམས་ཉེས་པའི་སེམས་དེ་བརྟ་བར་བྱ་ཞིང་སྟོབས་དང་ལྡན་པར་འགྱུར་རོ། །ཡན་ལག་བརྒྱད་
པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་བདུན་པའི་རྣམ་པར་འགྲེལ་པའོ།། །།འབྱུང་པོའི་གདོན་གསོ་བའི་རྒྱུད་རྫོགས་སོ།། །།དེ་ནས་

མིག་མཆུའི་ནད་དམིགས་ཤེས་པར་བྱ་བ་བཤད་པར་བྱའོ། །ཞེས་བྱ་བ་ལ། འབྱུང་པོའི་ནད་གསོ་བའི་རྒྱུད་བཤད་པའི་རྗེས་ལ་མིག་སྨན་གྱི་རྒྱུད་བརྩམས་པ་ནི་སྔར་མདོར་བསྟན་པ་ཇི་ལྟ་བ་བཞིན་དུ་རྒྱས་པར་བཤད་པ་ཡང་དེ་ལྟར་བྱ་དགོས་པའི་ཚུལ་གྱིས་
བརྩམས་པ་ཡིན་ཏེ། ཇི་ལྟར་བརྗེད་བྱེད་ཀྱི་ནད་གནད་ཆེན་པོ་ཞེས་བྱ་བ་སྙིང་ལ་གནས་ཏེ་སྐྱེ་བར་བྱེད་པ་དེ་བཞིན་དུ་གནད་ཆེན་པོ་མགོ་བོ་ཞེས་བྱ་བ་ལ་བརྟེན་ཅིང་གནས་ནས་ནམ་ཚོང་ཡན་ཆད་དུ་གཏོགས་པའི་ནད་སྐྱེ་བར་འགྱུར་བ་ཡིན་ལ་དེ་ལས་ཀྱང་མིག་ནི་ལས་སུ་བྱ་བ་ཐམས་ཅད་ལ་
འཇུག་པའི་རྒྱུར་གྱུར་པ་ཡིན་པས་གཙོ་བོ་ཡིན་པའི་ཕྱིར་དེའི་གསོ་བ་དང་པོར་བརྩམས་པ་ཡིན་ནོ། །དེ་ལ་མིག་མཆུ་ནི་མིག་སྦུབས་དང་མིག་འབྲས་འགེབས་པར་གྱུར་པའི་པགས་པ་ལ་བྱ་སྟེ། མིག་མཆུ་དེར་མིག་དབྱེ་དཀའ་བ་ལ་སོགས་པའི་ནད་འབྱུང་ལ་དེའི་དམིགས་ཤེས་
པར་བྱ་བ་ནི་ནད་གཞི་ནད་ཀྱི་སྔར་བྱུང་བའི་ཚུལ་ལ་སོགས་པ་ཇི་ལྟ་བུ་ཡིན་པ་དེ་བཤད་པར་བྱའོ། །ཞེས་བྱ་བ་ལ། ནད་ཀུན་ནད་གཞི་ལས་བཤད་པའི། །གནོད་བས་ནད་ནི་འཁྲུགས་པ་དང་། །མཆོག་ཏུ་མིག་ལ་གནོད་པ་དང་། །ཕལ་ཆེར་མཁྲིས་པ་སྐྱེད་པ་ཡིས། །རྩ་
ལས་གྱེན་དུ་རྒྱུས་ནས་ནི། །མིག་གི་ཡན་ལག་མིག་མཆུ་གྲྭ། །དཀར་ནག་མཐོང་བྱེད་རྒྱལ་མོའམ། །མིག་ཀུན་ལ་གནས་ནད་སྐྱེད་བྱེད། །ཅེས་བྱ་བ་ལ། ནད་ཐམས་ཅད་ཀྱི་ནད་གཞི་ལས་བཤད་པའི་ནད་ཀྱི་རྒྱུ་ཁ་བ་དང་ཚ་བ་དང་ཉུང་བ་དང་། ཁ་ཟས་ངན་ངོན་ལ་
སོགས་པ་ཟོས་པ་དང་། གནོད་ཅིང་མི་འཕྲོད་པར་གྱུར་པ་དག་གིས་རང་གི་ནད་གཞི་ཇི་ལྟ་བ་བཞིན་དུ་འཁྲུགས་པར་གྱུར་པ་དང་། མཆོག་གམ་ཁྱད་པར་དུ་ཁ་ཟས་དང་སྤྱོད་ལམ་དང་། སྨན་མིག་ལ་གནོད་པར་གྱུར་པ་དག་གིས་མིག་ནད་ལྡང་བར་བྱས་པ་དག་ཕལ་ཆེར་རམ།
མང་དུ་མཁྲིས་པ་སྐྱེད་པར་བྱེད་པ་དག་གིས་ནད་ལྡང་ལ་དེས་ན་རྩ་ལས་གྱེན་དུ་རྒྱུས་པར་གྱུར་ནས་མིག་གི་ཡན་ལག་ཏུ་གྱུར་པ་མིག་མཆུའམ་མིག་གི་གྲ་མཚམས་མིག་འབྲས་དཀར་པོ་འམ་མཐོང་པར་བྱེད་པའི་མིག་གི་རྒྱལ་མོའམ། མིག་ཐམས་ཅད་ལ་བརྟེན་ཅིང་གནས་ནས་རང་

རང་གི་མིག་གི་ནད་སྐྱེད་པར་བྱེད་དོ། །དེ་ལ་རླུང་ནི་མིག་མཆུ་ཡི། །རྩ་ལ་ཞུགས་པར་གྱུར་པ་དག །ཉལ་ནས་ལང་ཚེ་མིག་མཆུ་ནི། །ཧར་བག་ན་དང་བཅས་པར་བྱེད། །མིག་ནི་རྡུལ་གྱིས་གང་སྙམ་སེམས། །འཛུམ་པར་དཀའ་ཞིང་མཆི་མ་འཛག །མཉེས་ན་
བདེ་བ་སྙམ་དུ་བྱེད། །དེ་ནི་འཛུམས་དཀའ་ཡིན་ཞེས་བཤད། །ཅེས་བྱ་བ་ལ། དེ་ལ་མིག་མཆུའི་ནད་དེ་རྣམས་ཀྱི་ནང་ནས་རླུང་གི་ནད་དམིགས་མཆུ་ལ་གནས་པ་རྩར་ཞུགས་ཏེ། མི་ཉལ་ནས་ལྡང་བར་གྱུར་པ་ལ། ན་བ་དང་བཅས་པའི་མིག་མཆུ་བསྡུར་མི་འདོད་ཅིང་
རེངས་ཏེ། ཧར་བག་ཏུ་འདུག་པ་སྐྱེད་པར་འགྱུར་བ་དང་། མིག་རྡུལ་གྱི་ཚོགས་སམ་བྱེ་མས་གང་བ་སྙམ་དུ་སེམས་པ་དང་། དེ་བཞིན་དུ་དཀའ་ཞིང་སྡུག་བསྔལ་བས་འཛུམས་པར་བྱེད་ཅིང་། སྡུད་པར་བྱེད་པར་འགྱུར་བ་དང་། མཆི་མ་མང་དུ་འཛག་པ་དང་། ནད་དེ་མཉེས་ན་
བདེ་བ་སྙམ་དུ་སེམས་ཤིང་། ཞི་བར་བྱེད་དེ་ནད་ཀྱི་ཁྱད་པར་དེ་ལྟ་བུ་དེ་ནི་མིག་འཛུམས་པར་དཀར་བ་ཞེས་བྱ་བ་ཡིན་ནོ། །ཞེས་སློབ་དཔོན་གྱིས་བཤད་དོ། །རླུང་གིས་མིག་མཆུ་བསྐྱོད་ནས་ནི། །ཡང་དང་ཡང་དུ་འབྱེད་ཅིང་འཛུམས། །འདི་ནི་འཛུམས་པ་ཞེས་བཤད་དོ། །
ཞེས་བྱ་བ་ལ། རླུང་གིས་མིག་མཆུ་བསྐྱོད་ཅིང་འགུལ་ནས། །ཡང་དང་ཡང་དུ་འབྱེད་པ་དང་། འཛུམས་པར་བྱེད་པ་དེ་ཡང་ནད་མེད་པར་འགྱུར་བའི་མིག་མཆུའི་ནད་འདི་ནི་འཛུམས་པ་ཞེས་བྱའོ། །ཞེས་བཤད་དོ། །གྲྭ་མཚམས་ལྷོད་ཅིང་ཚོར་བ་མེད། །རྟག་ཏུ་
འཛུམས་ཤིང་མིག་ཉམས་པ། །གང་ཡིན་དེ་ནི་རླུང་གནོད་ཡིན། །ཞེས་བྱ་བ་ལ། མིག་མཆུ་གང་མིག་གི་གྲྭ་མཚམས་ལྷོད་པར་གྱུར་ཅིང་ཚོར་བ་མེད་པས་རྟག་ཏུ་འཛུམས་པར་བྱེད་ཀྱི། ནམ་ཡང་འཛུམས་པར་མི་བྱེད་ལ། ཉམས་པའི་ནད་དེ་ནི་རླུང་གིས་གནོད་པར་བྱས་
པ་ཞེས་བྱའོ། །ཞེས་བཤད་དོ། །མཁྲིས་པས་མིག་མཆུའི་མཐའ་མར་ནི། །འབྲུམ་བུ་ཀུ་མུ་ད་ཡི་ནི། །ས་བོན་འདྲ་སླར་གང་གྱུར་པ། །འབྲུམ་ཕྲན་ཀུ་མུ་ད་ཞེས་བྱ། །ཞེས་བྱ་བ་ལ། མཁྲིས་པས་མིག་མཆུའི་མཐའ་མ་ཐོག་ཐག་ཏུ་འབྲུམ་བུ་ཕྲ་མོ་ཀུ་མུ་དའི་ས་བོན་འདྲ་བ་

མང་པོས་གང་ཞིང་ཁྱབ་པར་གྱུར་ལ། བསལ་ཞིང་བརྟོལ་ཡང་སླར་གང་བར་འགྱུར་བའི་འབྲུམ་ཕྲན་གྱི་མིག་མཆུའི་ནད་དེ་ནི་ཀུ་མུ་ད་ཞེས་བྱའོ། །ཚ་ཞིང་འདྲུལ་ལ་ནད་དང་བཅས། །དམར་ཞིང་རེག་ན་མི་བཟོད་པ། །མཁྲིས་པས་མིག་མཆུར་
སྐྱེས་པ་དེ། །མཁྲིས་པས་སྐྱེས་པ་ཡིན་ཞེས་བཤད། །ཅེས་བྱ་བ་ལ། མཁྲིས་པས་མིག་གི་མཆུར་ཚ་བ་དང་། འདྲུལ་བ་དང་། ན་བ་དང་བཅས་པ་དང་། མིག་དམར་པོར་སྣང་བ་དང་། རེག་ན་མི་བཟོད་པ་སྐྱེས་པར་གྱུར་ན་ནད་དེ་ནི་མཁྲིས་པས་སྐྱེད་ཅིང་དཀྲུགས་པ་ཡིན་
ནོ་ཞེས་སློབ་དཔོན་གྱིས་བཤད་དོ། །མཁྲིས་པ་རྫི་མའི་ནད་གནས་ཤིང་། །གཡའ་ཞིང་ཚ་བར་བྱེད་པ་དང་། །དེ་རྗེས་རྫི་མ་འབྱི་བ་སྟེ། །རྫི་མ་འབྱི་བ་ཞེས་བཤད་དོ། །ཞེས་བྱ་བ་ལ། མཁྲིས་པ་རྫི་མའི་ནང་ན་གནས་ཤིང་བརྟེན་ནས་གཡའ་བ་དང་ཚ་བར་བྱེད་ལ། དེའི་
རྗེས་ལ་རྫི་མ་འབྱི་ཞིང་འདྲུལ་བར་བྱེད་པའི་ནད་དེ་ནི་རྫི་མ་འབྱི་བ་ཞེས་བྱ་བར་དྲང་སྲོང་རྣམས་ཀྱིས་བཤད་དོ། །བད་ཀན་ལས་འགྱུར་མིག་མཆུའི་ནད། འབྲུམ་ཕྲན་དཀར་པོ་ཡུངས་ཀར་འདྲ། །མཐུག་སྐྲངས་གཡའ་ན་མིག་རྡུལ་ཁེབས། །སྤྱི་བག་ཅན་འཛག་པོ་དག་ཀྱ། །ཞེས་
བྱ་བ་ལ། བད་ཀན་ལས་གྱུར་པའི་མིག་མཆུའི་ནད་འབྲུམ་ཕྲན་ཡུངས་ཀར་ལྟ་བུ་ལ་མཐུག་ཅིང་སྐྲངས་པ་ལ་སོགས་པ་དང་ལྡན་པ་དེ་ནི་མིང་པོ་དག་ཀྱ་ཞེས་བྱའོ། །ཧར་བག་འདྲུལ་བ་རྔུ་མས་ཁེབས། །བད་ཀན་གྱིས་བསླངས་མིག་མཆུའི་ནད། །ཅེས་བྱ་བ་ལ། ཧར་བག་
ཏུ་འདུག་པ་དང་། འདྲུལ་ཞིང་རྣགས་པ་དང་། མིག་རྔུ་མས་ཁེབས་ཤིང་གོས་པའི་མིག་མཆུའི་ནད་ནི་མིང་བད་ཀན་གྱིས་བསླངས་པ་ཞེས་བྱའོ། །བད་ཀན་ལས་གྱུར་རྨེན་བུ་དཀར། །ན་ཞིང་སྨིན་མ་མེད་གཡའ་སྲ། །རྒྱ་ཤུག་ཙམ་མམ་དེ་ལས་ནི། །ཅུང་ཟད་ཆུང་བ་
ཆགས་པ་ཡིན། །ཞེས་བྱ་བ་ལ། བད་ཀན་ལས་གྱུར་པའི་མིག་མཆུའི་ནད་རྨེན་བུ་དཀར་པོ་རེ་འབྱུང་ཞིང་རེ་རེ་ཞིང་ན་བ་དང་། སྨིན་མ་གཉིས་ཀ་མེད་པ་ཤེས་ཆེར་གཡའ་བ་རྡོ་ལྟར་སྲ་བ་རྒྱ་ཤུག་ཙམ་གྱི་ཚད་དམ། ཡང་ན་རྒྱ་ཤུག་གི་འབྲས་བུ་དེ་ལས་ཅུང་ཟད་ཙམ་ཆུང་བའི་མིག་

མཆུའི་ནང་དེ་ནི་འབྱར་ཞིང་ཆགས་ཏེ་གནས་པ་ཡིན་པས་མིང་ཆགས་པ་ཞེས་བྱའོ། །ཁྲག་ལས་འབྲུམ་ཕྲན་དམར་བ་དང་། །དེ་མཚུངས་འབྲུམ་ཕྲན་གྱིས་ཁྱབ་པ། །བརྩེགས་པ་ཞེས་བྱ། ཞེས་བྱ་བ་ལ། ཁྲག་འཁྲུགས་པ་ལས་འབྲུམ་ཕྲན་ཁ་དོག་དམར་བ་ཞིག་
འབྱུང་ལ། གཞན་ཡང་དེ་དང་མཚུངས་པའི་འབྲུམ་བུ་ཕྲ་མོས་ཁྱབ་པ་དེ་ནི་བརྩེགས་པ་ཞེས་བྱའོ། །དེས་བསྐྱེད་དམར། རེག་མི་བཟོད་པ་མིག་མཆུ་སློངས། །ཞེས་བྱ་བ་ལ། ཡང་ཁྲག་དེ་ཉིད་ཀྱིས་དེ་བཞིན་དུ་མིག་མཆུ་དམར་པོ་བསྐྱེད་པར་འགྱུར་ལ་དེ་ཡང་རི་མོ་
དམར་པོ་ཤར་ཤར་པོའི་རི་མོ་དང་ལྡན་ཞིང་རེག་པར་མི་བཟོད་པ་ནི་མིག་མཆུ་སློངས་པ་ཞེས་བྱའོ། །མིག་མཆུའི་ནང་དུ་ཤ་ལྷག་ནི། །སྲ་ཞིང་སྣུམ་ལ་ཚ་ཞིང་ན། །མདོག་དམར་དེ་ནི་ཁྲག་འཛག་ཅིང་། །བཅད་བཞིན་འཕེལ་བྱེད་མིག་འབྲུམ་ཡིན། །ཞེས་བྱ་བ་ལ། མིག་
མཆུའི་ནང་དུ་ཤ་ལྷག་ཁྲག་ལས་གྱུར་པ་སྲ་བ་དང་སྣུམ་པ་ལ་སོགས་པའི་མཚན་ཉིད་དང་ལྡན་པ་བཅད་བཞིན་དུ་འཕེལ་བར་བྱེད་པ་ནི་མིག་ནད་མིག་འབྲུམ་ཞེས་བྱའོ། །མིག་མཆུའི་མཐའ་འམ་ད