Luận tạng Tây Tạng (Tengyur) — Tập 202

ླུད། །ཅེས་བྱ་བ་ལ། འབྲས་བུ་གསུམ་གྱི་ཁུ་བ་སྦྲང་རྩིར་སྦྱར་བའམ། སླེ་ཏྲེས་བསྐོལ་བའི་ཁུ་བ་སྦྲང་རྩིར་སྦྱར་བའམ། སྐྱེར་བའི་ཁུ་བ་སྦྲང་རྩིར་སྦྱར་བའམ། ནིམ་པའི་ཁུ་བ་སྦྲང་རྩིར་
སྦྱར་བ་སྟེ། དེ་དག་གང་ཡང་རུང་བས་མིག་སེར་གྱི་ནད་ཀྱིས་ཉེན་པ་ལ་ནང་རེ་ཞིང་བླུད་ན་ཕན་ཏེ་སེལ་བར་བྱེད་དོ། །སྐྱེར་བ་ཡུག་སྣུམ་སྐྱུ་རུ་ར། །མིག་སེར་སེལ་བའི་མིག་སྨན་ཡིན། །ཞེས་བྱ་བ་ལ། སྐྱེར་པ་དང་བཙག་ཡུག་སྣམ་དང་སྐྱུ་རུ་ར་སྦྱར་བའི་མིག་སྨན་བསྐུས་ན་ཡང་
མིག་སེར་གྱི་ནད་སེལ་བར་བྱེད་དོ། །མིག་སེར་ཅན་གང་དྲི་མ་ནི། །ཏིལ་བཏགས་ལྟ་བུར་བྱུང་གྱུར་ན། །བད་ཀན་ལམ་འགགས་དེ་ལ་ནི། །བད་ཀན་མཁྲིས་པ་སེལ་བས་སོ། །ཞེས་བྱ་བ་ལ། མིག་སེར་ཅན་གྱི་མི་གང་ཞིག་བཤང་བ་ཞེས་བྱ་བའི་དྲི་མ་ཏིལ་བཏགས་པའི་

མདོག་འདྲ་བ་བྱུང་བར་གྱུར་ཅིང་བད་ཀན་གྱིས་མཁྲིས་པ་རྒྱུ་བའི་ལམ་འགགས་པ་ཡིན་ནོ། དེ་ལ་ནི་བད་ཀན་དང་མཁྲིས་པ་སེལ་བའི་ཁ་ཟས་དང་སྤྱོད་ལམ་དང་སྨན་གྱིས་གསོ་བར་བྱའོ། །རྩུབ་གྲང་ལྕི་དང་མངར་བ་དང་། །དྲག་ཤུལ་རླུང་ནི་བཀག་པ་ཡིས། །རླུང་དང་བད་
ཀན་གཅིག་གྱུར་པ། །མཁྲིས་པ་ཕྱིར་འབྱིན་དེ་ཡི་ཚེ། །མིག་དང་པགས་པ་སེར་བ་དང་། །ཕྱི་ས་སྐྱ་བར་གྱུར་པ་དང་། །བཤང་འགགས་རྒྱུ་མ་འཁྲུགས་པ་དང་། །སྙིང་ག་ལྕི་བ་ཉིད་གྱུར་ལ། །མཁྲིས་པ་ཡན་ལག་ལ་བརྟེན་ན། །རིད་ཅིང་དྲོད་ཆུང་རྩིབ་ལོག་གཟེར།
སྐྱིགས་བུ་ལུད་པ་ཡི་ག་འཆུས། །རིམས་འདེབས་རིམ་གྱིས་འབྱུང་བར་གྱུར། །ཞེས་བྱ་བ་ལ། གང་གི་ཚེ་རྩུབ་པ་ལ་སོགས་པའི་རྒྱུས་རླུང་དང་བད་ཀན་འདྲེས་ཤིང་གཅིག་ཏུ་གྱུར་པ་དེའི་ཚེ་མཁྲིས་པ་ཁོང་པ་ནས་ཕྱིར་འབྱིན་པར་བྱེད་ལ་དེའི་ཚེ་མིག་དང་པགས་པ་སེར་པོར་འགྱུར་
ཞིང་ཕྱི་ས་ཤིན་ཏུ་སྐྱ་རྦབ་ཤིང་དཀར་བར་འགྱུར་བ་དང་། བཤང་བ་འགགས་ཤིང་རྒྱུ་མ་ཀྲུག་ཀྲུག་ཟེར་ཞིང་ལྦོ་བ་དང་བཅས་ཏེ། སྙིང་ག་ཤིན་ཏུ་ལྕི་ཞིང་ན་བར་གྱུར་ན་མཁྲིས་པའི་རིམས་ཀྱིས་ཡན་ལག་བྱེར་ཞིང་བརྟེན་པར་གྱུར་པ་དང་། འབྲི་བར་གྱུར་པ་ན། རིད་ཅིང་དྲོད་ཆུང་བ་ལ་
སོགས་པའི་བླ་བརྣན་གྱི་ནད་རྣམས་འབྱུང་བར་འགྱུར་རོ། །དེ་ལ་རྨ་བྱའམ་ཁྱིམ་བྱ་དང་། །སྲེག་པའི་ཤ་ཁུའམ་ལ་ཕུག་ནི། །སྐམ་པོའི་ཁུ་བའམ་རྒྱ་སྲན་ཁུ། །རྩུབ་ཁ་སྐྱུར་བར་སྦྱར་བ་སྦྱིན། །ཞེས་བྱ་བ་ལ། ཡན་ལག་ལ་བརྟེན་པའི་མིག་སེར་གྱི་ནད་དེ་ལ་རྨ་བྱ་ལ་སོགས་པའི་ཤ་
ཁུ་དང་། ལ་ཕུག་སྐམ་པོའི་ཁུ་བ་ལ་སོགས་པའི་ཁུ་བ་དེ་དག་རྩུབ་པ་དང་ཁ་བ་དང་སྐྱུར་བ་དང་སྦྱར་བ་སྦྱིན་པར་བྱའོ། །རབ་ཚ་སྐྱུར་དང་རྣོ་བ་དང་། །ལན་ཚྭ་ཤིན་ཏུ་དྲོ་བ་བསྔགས། །ཞེས་བྱ་བ་ལ། ཡང་ནད་དེ་ལ་ཟས་སྐོམ་དང་སྨན་ལ་སོགས་པ་རབ་ཏུ་ཚ་བ་དང་སྐྱུར་བ་ལ་སོགས་པ་ཕན་ནོ། །ཁ་
ལུང་ཁུ་བ་ཚ་བ་གསུམ། །སྦྱར་བའི་ལྡེ་གུའང་སྦྱིན་པར་བྱ། །ཞེས་བྱ་བ་ལ། མིག་སེར་གྱི་ནད་དང་ལྡན་པས་ཁ་ལུང་ལ་སོགས་པའི་ལྡེ་གུ་ཟོས་ན་ཡང་ཕན་ནོ། །དེས་ནི་མཁྲིས་པ་རང་གནས་སུ། །འཇུག་ཅིང་བཤང་མདོག་ཐ་མལ་འགྱུར། །རྒྱུ་མ་འཁྲུག་སོགས་བླ་བརྣན་བཅས། །རླུང་

ཡང་རབ་ཏུ་ཞི་བར་འགྱུར། །ཞེས་བྱ་བ་ལ། བཤད་མ་ཐག་པ་ལྟར་བྱས་ལ། དེས་ནང་གི་རླུང་དང་བད་ཀན་བསལ་བས་ཡན་ལག་བྱེར་བའི་འཁྲིས་པ་རང་གི་གནས་གང་ཡིན་པ་དེར་འཇུག་ཅིང་འོང་བར་འགྱུར་ལ། དེས་ན་བཤང་བ་ཡང་སྔ་མ་ལས་མདོག་འགྱུར་ཏེ།
ཏིལ་བཏགས་པ་ལྟ་བུ་ལས་སེར་པོར་འགྱུར་རོ། །དེ་བཞིན་དུ་རླུང་བླ་བརྣན་དང་བཅས་པ་ཡང་ཞི་བར་འགྱུར་རོ། །འདི་ཡིས་བླ་བརྣན་ཞི་ནས་ནི། །མིག་སེར་གསོ་བའི་ཆོ་ག་བྱ། །ཞེས་བྱ་བ་ལ། སྐྱེས་བུ་དེའི་བླ་བརྣན་ཞི་བར་གྱུར་ནས། །མིག་སེར་ལ་ཕན་པའི་གསོ་བ་བྱའོ། །མིག་
སེར་ཁོང་དུ་ཞེན་པ་ན། །བྲག་ཞུན་བ་གཅིན་དང་སྦྱར་བ། །གསེར་གྱི་དྲི་མའམ་ཏ་བྱ་ནི །བ་གཅིན་སྦྱར་བ་ཟླ་གཅིག་བླུད། །ཅེས་བྱ་བ་ལ། །མིག་སེར་ཁང་པའི་ནང་དུ་ཞེན་པ་ལ་ནི་བྲག་ཞུན་དང་བ་གཅིན་དང་སྦྱར་བ་ཟླ་བ་གཅིག་གི་བར་དུ་བླུད་པའམ། གསེར་བཞུས་པའི་དྲི་
མ་དང་། བ་གཅིན་ནམ། ཏ་བྱ་དང་བ་གཅིན་སྦྱར་བ་ཟླ་བ་གཅིག་གི་བར་དུ་བླུད་པར་བྱའོ། །ཧ་ལི་ས་ཀ་སླེ་ཏྲེས་ཁུ། །འོ་མ་མ་ཧེའི་མར་བསྐོལ་བའི། །སྐྱུ་རུ་ར་ཡི་ཁུ་བ་དང་། །དུར་བྱིད་སྦྱར་བའི་བཀྲུ་སྨན་བླུད། །འཁྲུས་ནས་ཁ་ཟས་མངར་བག་ནི། །རླུང་འཇོམས་མཁྲིས་པ་
འཇོམས་པར་སྦྱིན། །ཞེས་བྱ་བ་ལ་སོགས་པའི། ཧ་ལི་ས་ཀ་ཞེས་བྱ་བ་འདིའི་ནད་ཡོད་པ་ལ་ནི། སླེ་ཏྲེས་ཀྱི་ཁུ་བ་དང་། །འོ་མ་མར་གྱི་ཉིས་འགྱུར་དང་མ་ཧེའི་མར་བསྐོལ་བས་ལུས་སྣུམ་པར་བྱས་ལ། སྐྱུ་རུ་རའི་ཁུ་བ་དང་། དུར་བྱིད་སྦྱར་བའི་བཀྲུ་སྨན་བླུད་ནས་འཁྲུས་པར་གྱུར་
བ་དང་། མཁྲིས་པ་ལ་ཕན་པའི་ཁ་ཟས་མངར་བག་སྦྱིན་པར་བྱའི་གཞན་སྦྱིན་པར་མི་བྱའོ། །སྔར་བཤད་རྒུན་འབྲུའི་ལྡེ་གུ་དང་། །མངར་བའི་སྨན་མར་ཞུན་མར་སྦྱིན། །འོ་མ་མས་གཏོང་སྨན་དང་ནི། །འཇམ་རྩིར་བྱས་པ་བསྟེན་པར་བྱ། །ཞེས་བྱ་བ་ལ། སྔར་ལེའུ་འདི་ཉིད་
ལས་བཤད་པའི་རྒུན་འབྲུའི་ལྡེ་གུ་དང་། མངར་བའི་སྨན་དང་སྦྱར་བའི་མར་དང་། འོ་མའི་མས་གཏོང་བ་འོག་ནས་བཤད་པ་དང་། སྣུམ་གྱི་འཇམ་རྩི་དང་བཅས་པ་སྦྱིན་པར་བྱའོ། །མེ་དྲོད་བསྐྱེད་པར་བྱ་བའི་ཕྱིར། །རྒུན་ཆང་ཆང་རྙིང་སྦྱིན་པར་བྱ། །ཞེས་བྱ་བ་ལ། དེ་བཞིན་དུ་

རྒུན་ཆང་དང་ཆང་རྙིང་དག་ཀྱང་ཁོང་པའི་མེ་དྲོད་བསྐྱེད་བ་བླུད་པར་བྱའོ། །ལུད་པའི་སྐབས་བཤད་ཨ་རུ་རའི། །ཤིང་མངར་བ་ལ་པི་པི་ལིང་། །འོ་མ་སྦྱར་བ་ནད་དམིགས་དང་། །མེ་དྲོད་ཇི་བཞིན་སྦྱིན་པར་བྱ། །ཞེས་བྱ་བ་ལ། ཧ་ལི་ས་ཀའི་ནད་དེ་ལ་ལུད་པ་གསོ་བའི་སྐབས་སུ་
བཤད་པའི་ཨ་རུ་རའི་ལྡེ་གུ་རྀ་ཥིས་བཤད་པ་སྦྱིན་པར་བྱའོ། ཡང་ན་པི་པི་ལིང་ལ་སོགས་པ་ནད་ཀྱི་ཇི་ལྟ་བ་དང་། མེ་དྲོད་ཀྱི་སྟོབས་ཇི་ལྟ་བ་བཞིན་དུ་སྦྱིན་པར་བྱའོ། །མཁས་པས་འོར་ནད་སྐབས་བཤད་པའི། །གསོ་བ་སྐྱ་རྦབ་ལ་ཡང་སྦྱར། །ཞེས་བྱ་བ་ལ། སྨན་པ་
མཁས་པས་འོར་ནད་ཀྱི་གསོ་བར་བཤད་པ་དག་ཀྱང་ནད་དམིགས་ཇི་ལྟ་བ་བཞིན་དུ་སྐྱ་རྦབ་ཀྱི་ནད་ལ་སྦྱར་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས་གསོ་བའི་གནས་ཀྱི་ལེའུ་བཅུ་དྲུག་
པའི་རྣམ་པར་འགྲེལ་པའོ།། །།དེ་ནས་འོར་ནད་གསོ་བ་བཤད་པར་བྱའོ། །ཞེས་བྱ་བ་ལ། གོ་རིམས་ཀྱིས་ན་འོར་ནད་གསོ་བ་བཤད་པའི་ཕྱིར་ལེའུ་འདི་བརྩམས་པ་ཡིན་ནོ། །འོར་ནད་ཡན་ལག་ཀུན་ཞུགས་ཤིང་། །ནད་སྐྱེས་མ་སྨིན་ལ་དང་པོར། །སྨྱུང་བྱས་ཁ་ཟས་ཡང་
བ་བཟའ། །བོང་ང་ཐང་ཤིང་བྱི་དང་ག །དུག་མོ་ཡུངས་དང་ན་ལེ་ཤམ། །བསྐོལ་བའི་ཆུ་དྲོན་བླུད་པར་བྱ། །ཞེས་བྱ་བ་ལ། འོར་ནད་ཀྱི་རྣམ་པ་ལུས་ཀྱི་ཡན་ལག་ཐམས་ཅད་ལ་ཞུགས་ཤིང་ནད་གཞི་སོ་སོ་དང་། གཉིས་དང་ཀུན་འདུས་པ་ལས་སྐྱེས་བ་མ་ཡིན་པ་ལ་དང་པོ་ཁོ་ནར་སྨྱུང་བ་
བྱས་པས་དེའི་རྗེས་ཐུག་པ་ལ་སོགས་པའི་ཁ་ཟས་མང་པོ་སྦྱིན་པར་བྱའོ། །དེའི་འོག་ཏུ་བོང་ང་ལ་སོགས་པ་དང་བསྐོལ་བའི་ཆུ་འཇམ་བླུད་པར་བྱའོ། །ཡང་ན་ཨ་རུ་ར་བཅས་དང་། །ཐང་ཤིང་བ་སྤྲུ་བསྐོལ་བའམ། །ལྕགས་ཕྱེ་དགུ་པར་བཅས་པ་བླུད། །ཅེས་བྱ་བ་ལ། ཡང་ན་ཨ་རུ་ར་རྣམ་པར་
རྒྱལ་བ་ལ་སོགས་པའི་ཁུ་བ་སྨྱུང་བར་བྱས་ཤིང་། ཁ་ཟས་ཡང་བཟོས་པའི་འོག་ཏུ་བླུད་པར་བྱའོ། །ཡང་ན་ལྕགས་ཕྱེ་དགུ་པ་སྐྱ་རྦབ་ཀྱི་ནད་གསོ་བའི་སྐབས་སུ་བཤད་པ་དང་། ཆུ་དྲོན་དུ་སྦྱར་ཏེ་བླུད་པར་བྱའོ། །འོར་ནད་ཤས་ཆེར་ཨ་རུ་ར། །བ་གཅིན་བཅས་པ་སྦྱང་ཕྱིར་བླུད། །ཅེས་བྱ་བ་ལ། འོར་

ནད་ཤས་ཆེར་བདོ་བ་ལ་ནི་ཨ་རུ་ར་དང་བ་གཅིན་སྦྱར་བ་བླུད་ཅིང་སྦྱངས་ནས་དག་པར་བྱའོ། །འབྲས་བུ་གསུམ་བསྐོལ་པུ་ཙེ་ཤེལ། །ཞེས་བྱ་བ་ལ། ཡང་ན་འབྲས་བུ་གསུམ་བསྐོལ་བའི་ནང་དུ་པུ་ཙེ་ཤེལ་ནས་ཚ་བ་གསུམ་གྱི་སྨན་ཡན་
བཏབ་པ་བླུད་པར་བྱའོ། །ཡང་ན་དེ་བཞིན་གུ་གུལ་ལམ། །བྲག་ཞུན་དང་ནི་སྦྱར་བ་བླུད། །ཅེས་བྱ་བ་ལ། ཡང་ན་འབྲས་བུ་གསུམ་བསྐོལ་བའི་ཁུ་བ་གུ་གུལ་ལ་བྲག་ཞུན་གང་ཡང་རུང་བ་དང་སྦྱར་ཏེ་བླུད་པར་བྱའོ། །མེ་དྲོད་ཆུང་ཞིང་མ་སྨིན་ལ། །ལྕི་ཞིང་རྟུག་འགགས་ཡང་ན་འཁྲུ། །
ཚ་བ་གསུམ་དང་རྩལ་རུ་ཚ། །སྦྲང་རྩི་དར་བར་སྦྱར་བའམ། ཨ་རུ་ར་དང་བུ་རམ་བཅས། །བུ་རམ་བཅའ་སྒར་བཅས་པ་དང་། །ཟོས་རྗེས་དར་བ་བླུད་པར་བྱ། །ཞེས་བྱ་བ་ལ། འོར་ནད་ཅན་གྱི་ནད་པ་མེ་དྲོད་ཆུང་བ་ལ་སོགས་པ་དང་ལྡན་པ་ལ་ཚ་བ་གསུམ་དང་ལྡན་པའི་དར་བ་བླུད་པའམ། ཡང་
ན་ཨ་རུ་ར་དང་བུ་རམ་ཟོས་པའི་རྗེས་ལ་དར་བ་བླུད་པར་བྱ་བའམ། ཡང་ན་བུ་རམ་དང་སྒར་སྦྱར་བཟོས་ནས། །དེའི་རྗེས་ལ་དར་བ་བླུད་པར་བྱའོ། །སྒེའུ་གཤེར་བུ་རམ་ཆ་སྙོམས་པ། །སྲང་ཕྱེད་ཚད་ཀྱིས་བསྐྱོད་ནས་ནི། །ཆེ་ཚད་སྲང་ལྔའི་བར་དུ་ནི། །ཟླ་གཅིག་ཟ་ཞིང་ཡུ་ཤ་དང་། །འོ་མ་
ཤ་ཁུ་བཅས་ཟོས་ན། །འོར་ནད་དམུ་རྫིང་སྐྲན་གཞང་འབྲུམ། །གཅིན་ནད་དབུགས་མི་བདེ་ཆམ་པ། །སྒྱིད་སྙོམ་མ་ཞུ་མིག་སེར་དང་། །ལུས་སྐེམ་གདོན་གྱི་ནད་རྣམས་དང་། །ལུད་པ་བད་ཀན་སྦྱོར་འདིས་སེལ། །ཞེས་བྱ་བ་ལ། ཡང་ན་སྒེའུ་གཤེར་བུ་རམ་དང་ཆ་མཉམ་པ་སྲང་ཕྱེད་
ཕྱེད་ཀྱིས་བསྐྱེད་ནས་ཆེ་ཚད་སྲང་ལྔར་ཕྱིན་གྱི་བར་དུ་ཟླ་བ་གཅིག་གི་བར་དུ་བཟའ་ཞིང་བསྟེན་པར་བྱའོ། །དེ་ནི་འདི་སྐད་སྟོན་ཏེ། སྒེའུ་གཤེར་དང་བུ་རམ་ཆ་མཉམ་སྟེ་བསྲེས་པ་ཉི་མ་དང་པོ་ལ་སྲང་ཕྱེད་བཟའ། ཉི་མ་གཉིས་པ་ལ་སྲང་གཅིག་བཟའ། གསུམ་པ་ལ་སྲང་ཕྱེད་དང་གཉིས། བཞི་
པ་ལ་སྲང་གཉིས། ལྔ་པ་ལ་སྲང་ཕྱེད་དང་གསུམ། དྲུག་པ་ལ་སྲང་གསུམ། བདུན་པ་ལ་སྲང་ཕྱེད་དང་བཞི། བརྒྱད་པ་ལ་སྲང་བཞི། དགུ་པ་ལ་སྲང་ཕྱེད་དང་ལྔ། ཞག་བཅུ་པ་ལ་སྲང་ལྔ། ཞག་བཅུ་གཅིག་པ་ནས་ཟླ་བ་གཅིག་གི་བར་གྱི་ཞག་ཉི་ཤུ་ལ་སྒེའུ་གཤེར་དང་བུ་རམ་ཡོད་ན་

སྲང་ལྔ་ལྔ་བཟའ་བར་བྱའོ། །སྨན་དེ་ཞུ་བར་གྱུར་ནས་བད་ཀན་གྱི་ཤས་ཆེ་བའི་འོར་ནད་ལ་ནི་ཡུ་ཤ་སྲན་ཁུ་བླུད་པར་བྱའོ། །མཁྲིས་པ་ཤས་ཆེ་བ་ལ་ནི་འོ་མ་བླུད་པར་བྱའོ། །རླུང་ཤས་ཆེ་བ་ལ་ནི་ཤ་ཁུ་དང་བཅས་པར་ཟས་སྦྱིན་པར་བྱའོ། །འདིས་ནི་འོར་ནད་ལ་སོགས་པ་ནས་བད་ཀན་གྱི་མཐའི་ནད་
སེལ་བར་བྱེད་དོ། །གདོན་གྱི་ནད་ནི་སྨྱོ་བྱེད་དང་། བརྗེད་བྱེད་ལ་སོགས་པའོ། །སྒེའུ་གཤེར་དོང་གྲའི་ལྡེ་གུའི་ཁུ་བ་དང་། །འོ་མ་དག་དང་མར་ནི་བསྐོལ་བླུད་ན། །འོར་ནད་སྦྲིད་པ་དམུ་རྫིང་མེ་དྲོད་ཉམས། །ནད་ཀྱིས་ཟིལ་མནན་ན་ཡང་ནད་མེད་འགྱུར། །ཞེས་བྱ་བ་ལ། སྒེའུ་གཤེར་དེ་
ཉིད་དོང་གྲ་ཡིན་པས་ན། སྒེའུ་གཤེར་དོང་གྲའོ། །ཡང་ན་གསར་ཞིང་རང་གི་ཁུ་བ་དང་བཅས་པ་བཟང་ཞིང་ཁྱད་པར་དུ་གྱུར་བའི་སྒེའུ་གཤེར་ཉིད་ལ་སྒེའུ་གཤེར་དོང་གྲ་ཞེས་བྱ་སྟེ། དེའི་ལྡེ་གུའི་ཁུ་བ་དང་འོ་མ་གཉིས་དང་མར་བསྐོལ་ཏེ་བླུད་ན་འོར་ནད་ལ་སོགས་པས་ཉམ་ཐག་ཅིང་ཟིལ་གྱིས་
མནན་ན་ཡང་ནད་མེད་པར་བྱེད་པར་འགྱུར་རོ། མ་ཞུ་མེད་ཅིང་ཕྱི་ས་འགགས། །འོར་ནད་ཀྱིས་གཟེར་ཚ་བ་གསུམ། །དུར་བྱིད་དན་ད་ཀྲུ་ཏྲུག་ཏྲེས། །བསྐོལ་བའི་འོ་མ་བླུད་པར་བྱ། །ཞེས་བྱ་བ་ལ། མ་ཞུ་བ་མེད་ཅིང་མ་ཞུ་བའི་ནད་དེ་བྱང་བར་གྱུར་ནས་ཀྱང་ཕྱི་ས་འགགས་པ་དང་ལྡན་པའི་
འོར་ནད་ཀྱིས་གཟིར་བར་གྱུར་པ་ལ་ཚ་བ་གསུམ་ལ་སོགས་པ་དང་བསྐོལ་བའི་འོ་མ་བླུད་པར་བྱའོ། །མ་ཧེའི་གཅིན་ནམ་བ་གཅིན་ནམ། །འོ་མ་བཏུང་ཞིང་དེ་དང་བཟའ། །ཞེས་བྱ་བ་ལ། ཡང་ན་འོ་མ་དང་བཅས་པར་ཟས་བཟའ་ཞིང་། མ་ཧེ་འམ། བའི་གཅིན་ཞེས་བྱ་བ་གང་ཡང་རུང་བ་
འོ་མ་དང་བཅས་པ་བླུད་པར་བྱའོ། །ཞག་བདུན་ཡང་ན་ཟླ་གཅིག་བར། །རྔ་མོའི་འོ་མ་བླུད་པས་གསོ། །ཞེས་བྱ་བ་ལ། ཡང་ན་ཞག་བདུན་ནམ། ཟླ་བ་གཅིག་གི་བར་དུ་ཟས་གཞན་མི་སྦྱིན་པར་རྔ་མོའི་འོ་མ་བླུད་པས་གསོ་བར་བྱའོ། །ཏི་མུ་ས་དང་ནས་ཚིག་ཐལ། །ལ་ལ་ཕུད་དང་ཚ་བ་
ལྔ། །ན་ལེ་ཤམ་དང་སེའུ་འབྲུ་དང་། །བ་ཏ་འུ་སུ་སྟར་བུ་དང་། །བིལ་བ་གཞོན་ནུ་ཞོ་གཉིས་གཉིས། །ཆུ་བྲེ་བཞི་བསྐོལ་མར་བྲེ་གང་། །བསྐོལ་བ་བླུད་ན་འོར་ནད་དང་། །གཞང་འབྲུམ་སྐྲན་དང་ཟ་གུ་འཇོམས། །ཞེས་བྱ་བ་ལ། ཡང་འོར་ནད་ལ་ཏི་མུ་ས་ཞེས་བྱ་བ། ཡང་བ་ན་ཀ་ལ་སོགས་པའི་

སྨན་སྣ་རེ་ཞིང་ཞོ་གཉིས་གཉིས་ཆུ་བྲེ་བཞིའི་ནང་དུ་བསྐོལ། དེའི་ཁུ་བ་བཞི་ཆ་ལུས་པ་དང་། སྨན་གྱི་ཁུ་བ་བཙགས་པ་བྲེ་གང་། མར་བྲེ་གང་བསྐོལ་བ་བླུད་ན་འོར་ནད་ལ་སོགས་པ་འཇོམས་པར་བྱེད་དོ། །ཞོ་དང་ཙི་ཏྲ་ཀར་བསྲེས་ལས། །བྱུང་བའི་མར་ནི་དར་བར་
བཅས། །ཙི་ཏྲ་ཀ་བཏབ་བསྐོལ་བ་ནི། །ཡོན་ཏན་གོང་མ་མཚུངས་པ་ཡིན། །ཞེས་བྱ་བ་ལ། ཙི་ཏྲ་ཀ་དང་བསྲེས་པའི་ཞོ་བསྲུབས་པ་ལས་མར་སར་གང་ཞིག་བྱུང་བར་གྱུར་པ་དེ་དར་བ་ཉིད་དང་བཅས་ལ་ཙི་ཏྲ་ཀའི་ལྡེ་གུ་བཏབ་སྟེ་བསྐོལ་བའི་སྨན་མར་བླུད་ན་ཡང་ཡོན་ཏན་སྔ་མ་དང་འདྲ་སྟེ།
འོར་ནད་གཞང་འབྲུམ་ལ་སོགས་པ་འཇོམས་པར་བྱེད་དོ། །ཐང་ལ་འབར་དང་ཏིག་ཏ་ཆེ། །དགེ་བའམ་ཨ་རུ་རའི་སྨན་མར། །དུས་ཤེས་པ་ཡིས་སྦྱིན་པར་བྱ། །ཞེས་བྱ་བ་ལ། དུས་ཤེས་པའི་སྨན་པ་མཁས་པས་ནད་དམིགས་ཀྱི་ཤས་གང་ཆེ་བ་ལས་དཔགས་ཏེ། ཐང་ལ་འབར་གྱིས་
བཤད་པའི་སྨན་མར་གཅིན་ནད་ཟ་གུའི་སྐབས་སུ་བཤད་པ་དང་། ཏིག་ཏ་ཆེན་པོའི་སྨན་མར་མཛེ་ནད་ཀྱི་སྐབས་སུ་བཤད་པ་དང་། དགེ་བ་ཆེན་པོའི་སྨན་མར་སྨྱོ་བྱེད་གསོ་བའི་སྐབས་སུ་བཤད་པ་དང་། ཨ་རུ་རའི་སྨན་མར་དམུ་རྫིང་གསོ་བའི་སྐབས་སུ་བཤད་པ་དེ་དག་ལས་ཅི་རིགས་པར་སྦྱིན་
པར་བྱའོ། །རྩ་བ་བཅུ་པའི་ཁུ་བ་ནི། །བྲེ་བཞིར་ཨ་རུ་ར་བརྒྱ་བསྐོལ། །དེར་ནི་བུ་རམ་སྲང་བརྒྱ་གཞུག །ཚ་བ་གསུམ་དང་དྲི་སྣ་གསུམ། །ནས་ཚིག་འཁུས་ཐལ་ཅུང་ཟད་བཏབ། །བསྒྲངས་ནས་སྦྲང་རྩི་བྲེ་ཕྱེད་གཞུག །དེ་བྱིན་ན་ནི་འོར་ནད་དང་། །རིམས་སྐྲན་གཅིན་ནད་ལུས་
སྐེམས་པ། །མ་ཞུ་མཁྲིས་པ་རླུང་དང་ནི། །སྒེགས་སྐྱུར་ཁ་དོག་མི་སྡུག་དང་། །གཅིན་ནད་རླུང་གི་ཁུ་ཆུའི་ནད། །དབུགས་མི་བདེ་དང་ཡི་ག་འཆུས། །མཆེར་པའི་ནད་དང་སྦྱར་བའི་དུག །དམུ་རྫིང་གི་ནི་ནད་རྣམས་སེལ། །ཞེས་བྱ་བ་ལ། རྩ་བ་བཅུ་པ་བསྐོལ་བའི་ཁུ་བ་བྲེ་བཞིའི་
ནང་དུ་ཨ་རུ་ར་རྡོག་མ་བརྒྱ་བསྐོལ་ལ་དེར་བུ་རམ་སྲང་བརྒྱ་གཞུག་པར་བྱ་སྟེ། དེ་ཚུལ་བཞིན་དུ་བསྐོལ། གཟར་བུར་ཆགས་པའི་ཚད་ཀྱི་ལྡེ་གུར་གྱུར་པ་དང་། དེའི་ནང་དུ་ཚ་བ་གསུམ་པི་པི་ལིང་དང་། ན་ལེ་ཤམ་དང་། བཅའ་སྒ་ཞེས་བྱ་བ་དང་། དྲི་སྣ་གསུམ་པོ་སུག་སྨེལ་དང་།

ཤིང་ཚྭ་དང་། གནྡྷ་བྷ་དྲ་ཞེས་བྱ་བ་དང་། ནས་ཚིག་འཁུས་པའི་ཐལ་བ་ལས་ཅུང་ཟད་ཅིག་ཅི་རིགས་པར་བཏབ་སྟེ་བཏགས་པའི་ཕྱེ་མ་དང་བསྲེས་ལ་བསྒྲངས་པ་དང་། སྦྲང་རྩི་བྲེ་ཕྱེད་དེ་སྲང་བཅུ་དྲུག་གཞག་གོ། །ཚ་བ་གསུམ་དང་། དྲི་སྣ་གསུམ་དང་། ཡ་བཀྵ་རའི་ཚད་འདིར་སློབ་
དཔོན་གྱིས་མ་བཤད་མོད་ཀྱི། དེ་གཞུང་གཞན་ལས་ཤེས་པར་བྱ་སྟེ། དེ་ཡང་རྒྱུད་གཞན་ལས། ཚ་བ་གསུམ་ལས་སྲང་བཞི་དང་། །དྲི་སྣ་གསུམ་ལས་སྲང་གཉིས་དང་། །ཡ་བཀྵ་ལ་སོགས་ཞོ་གཉིས། །བསྒྲངས་པའི་སྦྲང་རྩི་བྲེ་ཕྱེད་གཞུག །ཅེས་བཤད་པ་ཡིན་ནོ། །སྨན་དེ་
བྱིན་ནས་འོར་ནད་ནས་དམུ་རྫིང་གི་ནད་ཀྱི་བར་དུ་སེལ་བར་བྱེད་དོ། །ནས་དང་སཱ་ལུ་འབྲས་རྙིང་ཟས། །རྩ་བ་བཅུ་ཡི་ཆུ་དང་བསྐོལ། །ལན་ཚྭ་ཉུང་སྣུམ་ཤས་ཆུང་བ། །བྱིན་ན་འོར་ནད་སེལ་བར་བྱེད། །རྒྱ་སྲན་མུ་དྒའི་ཁུ་བ་ནི། །ཐལ་སྨན་ཚ་བ་གསུམ་ལྡན་དང་། །དེ་བཞིན་
སྐམ་སའི་ཤ་རུས་སྦལ། །སྐྱིན་གོར་བྱི་དུར་ཤ་ཁུ་སྦྱིན། །ཞེས་བྱ་བ་ལ། འོར་ནད་ལ་ནི་ནས་དང་སཱ་ལུ་ལ་སོགས་པའི་འབྲས་རྙིང་པ་རྩ་བ་བཅུའི་ཆུ་དང་བསྐོལ་བའི་ལན་ཚྭ་དང་སྣུམ་ཅུང་ཟད་ཅིག་བྱིན་ན་ཕན་ནོ། །རྒྱ་སྲན་མུདྒའི་ཁུ་བ་དང་ནས་ཚིག་འཁུས་པའི་ཐལ་བ་དང་། ཚ་བ་གསུམ་
དང་ལྡན་པ་དང་། དེ་བཞིན་དུ་སྐམ་སའི་སྲོག་ཆགས་རུས་སྦལ་ལ་སོགས་པའི་ཤ་ཁུ་ལ་ཐལ་སྨན་དང་ཚ་བ་གསུམ་དང་བྱིན་ན་ཡང་ཕན་ནོ། །བཏུང་བར་དར་བ་སར་པ་དང་། །ཆང་ནི་སྨན་དང་བཅས་པ་བླུད། །ཅེས་བྱ་བ་ལ། འོར་ནད་ཅན་ལ་བཏུང་བ་ནི་དར་བ་སར་པ་བསྲུབས་མ་ཐག་
གམ། ཆང་སྨན་དང་ལྡན་པ་མནན་པའི་ཆང་ཨ་ས་དང་། ཆང་སྙིང་དང་། རྒུན་ཆང་ལ་སོགས་པ་བླུད་ན་ཕན་ནོ། །ཟི་ར་ཟུར་པ་ཛི་བན་ཏི། །མ་ནུ་ཙི་ཏྲ་ཀ་ར་བཱི། །ཡ་བཀྵ་ར་བིལ་བའི་རྐང་། །ད་ཏྲིག་ཞོ་རེའི་ཚད་དུ་བྱས། །མར་དང་ཏིལ་མར་ནང་དུ་བརྔོས། །བྱིན་ན་འོར་ནད་སྐྲན་
གཞང་འབྲུམ། །ཚད་འཁྲུ་དང་ནི་སྙིང་གི་ནད། །མེ་དྲོད་ཆུང་དང་གཅིན་ནད་སེལ། །ཚ་བ་ལྔ་དང་སྦྱར་བ་ཡི། །ཐུག་པའང་ཡོན་ཏན་དེ་དང་འདྲ། །ཞེས་བྱ་བ་ལ། ཟི་ར་ལ་སོགས་པའི་སྨན་མར་དང་། ཏིལ་མར་གྱི་ནང་དུ་བརྔོས་ནས་ཐུག་པར་བྱས་ཏེ་བླུད་ན་ཡང་འོར་ནད་ལ་སོགས་པ་ལ་

མཆོག་ཏུ་ཕན་ལ། དེ་བཞིན་དུ་ཚ་བ་ལྔ་དང་སྦྱར་བའི་ཐུག་པ་ཡང་འོར་ནད་ལ་སོགས་པ་ལ་མཆོག་ཏུ་ཕན་པ་ཡིན་ནོ། །རྡོ་དྲེག་རུ་རྟོ་ནེ་ཡ། །ཧ་རེ་ཎུ་ཀ་ཨ་རུ་ར། །ཤི་བེ་ཏ་ཀ་ཤུ་པ་དང་། །ཆུ་སྲིན་སྡེར་མོ་པྲི་ཡང་ཀུ། །སྤྲི་ཀ་ཐང་ཤིང་སྤང་སྤོས་དང་། །པི་པི་ལིང་
དང་དབྱི་མོ་དང་། །ཀུན་ཏན་ཏ་ན་བྱ་མ་ཀ །བ་ལ་ཀ་དང་དྲི་སྣ་བཞི། །བལ་བུའི་ལོ་མ་གླ་སྒང་དང་། །གནྡྷ་པ་ལ་ཤ་ལ་ནི། བསྐུས་པའི་ཏིལ་མར་དག་དང་ནི། །ཁྲུས་ཀྱི་ཆུ་དང་ལྡེ་གུ་བྱ། །ཞེས་བྱ་བ་ལ། རྡོ་དྲེག་ལ་སོགས་པའི་སྨན་ལྡེ་གུར་བྱས་པ་དང་། ཏིལ་མར་དུ་བཅས་
པས་བསྐུ་བར་བྱ་བ་དང་། ཡང་སྨན་དེ་དག་ཞིབ་ཏུ་བཏགས་པའི་ལྡེ་གུས་བསྐུ་བ་དང་། ཡང་སྨན་དེ་དག་ཉིད་དང་བསྐོལ་བའི་ཆུས་ལུས་ཁྲུས་བྱའོ། །རྡོ་དྲེག་ནི་ཤིལ་པུས་པའོ། །སྟོ་ན་ཡ་ནི་ཏ་ལ་བིད་ཀའོ། །ཤི་པེ་ཏ་ཀ་ནི་ཐང་ཤིང་ཕྲ་མོ་འཐིང་ཆུའོ། །པྲི་ཀ་ནི་དེ་བི་ལ་ཏའོ། །ཀུན་
ཏན་ཏ་ནི་པ་རི་བི་ལའོ། །ནིམ་པ་ཨརྒ་བ་སྤྲུ་དང་། །ནག་ཏ་མ་ལིའི་ཆུས་ཁྲུས་བྱ། །ཞེས་བྱ་བ་ལ། །ཡང་ན་ནིམ་པ་དང་། ཨརྒ་དང་། །བ་སྤྲུ་བ་དང་ནག་ཏ་མ་ལ་བསྐོལ་བའི་ཆུས་ཁྲུས་བྱའོ། །ཡན་ལག་ཕྱོགས་གཅིག་སྐྲངས་པ་ལ། །ཀ་ར་བཱི་ར་བ་སྤྲུ་བ། །ཀིང་ཤུ་ཀ་དང་བི་ཤ་
ལ། འབྲས་བུ་གསུམ་དང་སེང་ཕྲོམ་དང་། །ན་ལི་ཀ་དང་ཐང་ཤིང་དང་། སྤང་སྤོས་ཀོ་ཤ་ཏ་ཀི་དང་། །བོང་ང་ཏ་ལའི་ལོ་མ་དང་། །ཛ་ཡན་ཏི་དང་འོལ་མ་སེ། །ཀ་ཀ་ཏ་ནི་ས་ལི་ཤིང་། །པྲི་ཤ་ཀ་རྞི་དབྱི་མོ་དང་། །རིད་ཏི་བྲི་ཏི་གླང་པོའི་སྣ། །ལྡེ་གུ་དྲོ་འཇོམ་བསྐུས་པ་ཕན།
ཞེས་བྱ་བ་ལ། ཡན་ལག་གི་ཕྱོགས་གཅིག་སྐྲངས་པའི་ནད་ལ་ནི། ཀ་ར་བཱི་ར་ལ་སོགས་པའི་སྨན་གྱི་ལྡེ་གུ་དྲོ་འཇམ་ཙམ་གྱིས་བསྐུས་པ་ཕན་ནོ། །བ་སྤུ་བ་ནི་དུ་རྒའོ། །ཀིང་ཤུ་ཀ་ནི་པ་ལ་ཤའོ། །ན་ལི་ཀ་ནི་པ་དྲུ་མ་ལ་ཏའོ། །ཀོ་ཤ་ཏ་ཀ་ནི་ཀྲི་ཏ་ཙི་ཏྲའོ། །བོང་ང་ནི་ཨ་ཏི་བི་
ཥའོ། །ཏ་ལིའི་ལོ་མ་ནི་མོ་ས་ལིའོ། །ཛ་ཡན་ཏི་ནི་ཨག་ནི་མན་ཏའོ། །འོལ་མ་སེ་ནི་གུན་ཛའོ། །པྲི་ཤ་ཀརྣི་ནི་མུ་ཤ་ཀར་ནིའོ། །རིད་ཏི་ནི་དུད་སྟིའོ། །བྲི་ཏི་ཏྲ་བ་ནི་ཤིར་ཤའོ། །ཧ་སྟི་ཀ་ར་ཎ་ནི་གླང་པོ་ཆེའི་རྣ་བ་སྟེ་བ་ར་དདའོ། །དེ་ནས་འོར་ནད་རླུང་གྱུར་ལ། །ཟླ་ཕྱེད་བར་དུ་དུར་བྱིད་

དམ། །ཡང་ན་ཨེ་རཎྜའི་མར་བླུད། །ཅེས་བྱ་བ་ལ། དེ་ནས་རླུང་ལས་གྱུར་པའི་འོར་ནད་ལ་དུར་བྱིད་དང་བསྐོལ་བའི་མར་རམ། ཨེ་རཎྜ་ལས་བྱུང་བའི་མར་ཟླ་བ་ཕྱེད་ཀྱི་བར་དུ་བླུད་པར་བྱའོ། །རླུང་གིས་རྟུག་འགགས་ལ་དེ་ཉིད། །ཟས་ཀྱི་སྔོན་དུ་འོ་མ་འམ། །ཤ་ཁུ་བླུད་ཅིང་
རླུང་འཇོམ་པའི་། །སྨན་གྱི་དུགས་དང་བསྐུ་བར་བྱ། །ཞེས་བྱ་བ་ལ། འོར་ནད་ལ་རླུང་གིས་རྟུག་པ་འགགས་པ་དང་ལྡན་པ་ལ་ནི་ཨེ་རཎྜའི་ཏིལ་མར་དེ་ཉིད་ཟས་མ་ཟོས་པའི་སྔོན་དུ་འོ་མ་འམ། ཤ་ཁུ་དང་སྦྱང་ཏེ་བླུད་པར་བྱའོ། །ཡང་ན་རླུང་ལས་གྱུར་པའི་འོར་ནད་ལ་རླུང་འཇོམ་པའི་སྨན་གང་
དག་ཡིན་པ་དུགས་དང་བསྐུ་བའི་རྣམ་པ་དག་བྱའོ། །ཕྱོགས་གཅིག་སྐྲངས་ལ་ཁ་ལུང་དང་། ཨག་ནི་མན་ཐ་སྡང་སྤོས་དང་། །བཅའ་སྒ་ཐང་ཤིང་ལྡེ་གུས་བསྐུ། །ཞེས་བྱ་བ་ལ། ལུས་ཀྱི་ཕྱོགས་གཅིག་སྐྲངས་པར་གྱུར་པ་ལ་ནི། ཁ་ལུང་ལ་སོགས་པའི་སྨན་གྱི་ལྡེ་གུས་བསྐུ་
བར་བྱའོ། །མཁྲིས་གྱུར་ཏིག་ཏའི་སྨན་མར་རམ། ནྱ་གྲོ་དྷ་སོགས་བསྐོལ་བ་བླུད། །ཅེས་བྱ་བ་ལ། མཁྲིས་པ་ལས་གྱུར་པའི་ནད་ལ་ཏིག་ཏའི་སྨན་མར་རམ། ནྱ་གྲོ་དྷ་ལ་སོགས་པ་དང་བསྐོལ་བའི་མར་བླུད་པར་བྱའོ། །སྐོམ་དད་ཆེ་དང་རྨོངས་བག་ཚ། །འོ་མ་བསྐུ་བྱུག་བསིལ་བ་
བྱ། །ཞེས་བྱ་བ་ལ། མཁྲིས་པའི་འོར་ནད་སྐོམ་དད་ཆེ་བ་དང་། རྨོངས་བག་དང་ཁོང་ཚ་བ་གྱུར་པ་ལ་ནི་འོ་མ་བླུད་པ་དང་། དེ་བཞིན་དུ་བསྐུ་བ་དང་བྱུག་པ་དང་རེག་པ་དང་ནུས་པའི་སྨན་གྱིས་བྱས་པ་ཕན་ནོ། །པ་ཏོ་ལ་རྩ་ཀྱི་ལྕེ་བ། །ཤིང་མངར་ཐང་ཤིང་པུ་ཙེ་ཤེལ། །སྐྱེར་པ་
ཙཎྜན་ཨ་རུ་ར། །ད་ན་ལྕང་མ་བི་ཤ་ལ། །པི་པི་ལིང་དང་མར་བསྐོལ་བླུད། །ཁོང་ཚ་མགོ་འཁོར་སྐོམ་དད་ཆེ། །འདུས་པའི་ནད་དང་མེ་དབལ་སྐྲང་། །ལུས་ཚ་རིམ་དང་བཅས་པ་སེལ། །ཞེས་བྱ་བ་ལ། པ་ཏོ་ལ་ལ་སོགས་པ་བསྐོལ་བའི་ཁུ་བ་མར་དང་བཅས་པ་བླུད་ན་ཁོང་ཚ་
བ་ལ་སོགས་པའི་ནད་སེལ་བར་འགྱུར་རོ། །བད་ཀན་ལས་གྱུར་དོང་ག་སོགས། །ཏིལ་མར་དང་ནི་བསྐོལ་བ་བླུད། །ཅེས་བྱ་བ་ལ། བད་ཀན་ལས་གྱུར་པའི་འོར་ནད་ལ་ནི་དོང་ག་ལ་སོགས་པའི་སྡེ་ཚན་དང་བསྐོལ་བའི་ཏིལ་མར་བླུད་པར་བྱའོ། །རྒྱུན་སྲང་འགགས་ཤིང་མེ་དྲོད་ཉམས། །

རྨོངས་བག་ཡི་ག་འཆུས་པ་ལ། །ཐལ་སྨན་ཆང་སྙིང་མནན་ཆང་དང་། །བ་གཅིན་དར་བར་བཅས་པ་བླུད། །ཅེས་བྱ་བ་ལ། བད་ཀན་ལས་གྱུར་པའི་སྐྲན་ནད་རྒྱུན་སྲང་འགགས་པ་ལ་སོགས་པ་ལ་ནི་ཐལ་སྨན་ལ་སོགས་པ་བླུད་ཅིང་བསྟེན་པར་བྱའོ། །པི་པི་ལིང་
དང་འབའ་ཆ་རྙིང་། །ཤི་ཀྲུའི་ཤུན་པ་ཟངས་མ་དང་། །བ་གཅིན་ལྡེ་གུ་དྲོ་འཇམ་སྦྱར། །བསྐུ་དང་དྲིལ་བའི་ལས་ལ་སྦྱར། །ཞེས་བྱ་བ་ལ། པི་པི་ལིང་ལ་སོགས་པ་བ་གཅིན་དང་ལྡེ་གུར་བྱས་པ་དྲོ་འཇམ་ཙམ་གྱིས་ལུས་ལ་བསྐུ་བ་དང་དྲིལ་ཕྱིས་བྱ་བ་ལ་སྦྱར་བར་བྱའོ། །རུ་རྟ་ཨག་ནི་མན་
ཐ་དང་། །རྒྱ་སྲན་དོང་ག་ཙི་ཏྲ་ཀ །བ་གཅིན་ཆུ་བསྐོལ་བས་ཁྲུས་བྱ། །ཙ་རོང་ཨ་ཀ་རུ་ཡིས་བྱུག །ཅེས་བྱ་བ་ལ། རུ་རྟ་ལ་སོགས་པའི་སྨན་བ་གཅིན་དང་ཆུའི་ནང་དུ་བསྐོལ་ལ་དེས་ཁྲུས་བྱས་ལ། ཙ་རོང་དང་ཨ་ཀ་རུའི་ལྡེ་གུར་བྱས་པས་ནི་བྱུག་པར་བྱའོ། །ནཱ་ག་བ་ལ་ས་ར་ལ། །
ཨ་ཟ་སྲིང་གི་ཨ་མ་བ་ཏ། །ཨ་ཟ་གནྡྷ་ཞེས་བྱ་དང་། །ཨ་ཤྭ་གནྡྷའི་ལྡེ་གུ་ནི། །ཡན་ལག་ཕྱོགས་གཅིག་སྐྲངས་ལ་ཕན། །ཞེས་བྱ་བ་ལ། ཡང་ཡན་ལག་གི་ཕྱོགས་གཅིག་སྐྲངས་པའི་འོར་ནད་ལ་ནི་ནཱ་ག་ལ་སོགས་པའི་ལྡེ་གུས་བསྐུས་ན་ཕན་ནོ། །ས་ར་ལ་ནི་ཙི་ཏྲའོ། །ཨམ་བ་ཏ་
ནི་ཨེའི་ཤ་ཤི་ཀའོ། །ཨ་ཟ་གནྡྷ་ནི་བད་གབྡྷའོ། །ནད་གཞི་ཇི་བཞིན་ཡན་ལག་ནི། །ཉེ་བའི་ཕྱོགས་ནས་གཏར་ག་བྱ། །ཞེས་བྱ་བ་ལ། ཡན་ལག་གི་ཕྱོགས་གཅིག་ལ་བརྟེན་པའི་སྐྲན་ནད་ལ་ནད་གཞི་སོ་སོ་ཇི་ལྟ་བ་དང་། ཡན་ལག་གི་ཕྱོགས་གང་དང་ཉེ་བའི་ཕྱོགས་ནས་གཏར་
ག་བྱ་བ་ལ། སློན་སྨན་དང་བཀྲུ་སྨན་གྱིས་སྦྱང་པར་བྱའོ། །འདྲིས་པའི་ནད་ལ་ནད་གཞི་ནི། །ཤས་ཆེའི་དབང་དུ་གསོ་བ་བྱ། །ཞེས་བྱ་བ་ལ། འདྲིས་པའི་ནད་དང་ལྡན་པ་དང་། འདུས་པ་ཞེས་བྱ་བ་ལ་ནི། ནད་གཞི་གང་ཤས་ཆེ་བའི་དབང་དུ་བྱས་ནས་ཇི་སྐད་སྨོས་པའི་གསོ་བ་ཉིད་ཅི་རིགས་
པར་སྦྱར་བར་བྱའོ། །གོ་སྙོད་པ་ཐ་གླ་སྒང་དང་། །ཀཎྡ་ཀ་རི་ཚ་བ་ལྔ། །སྐྱེར་བ་ཆུ་དྲོན་སྦྱར་བླུད་པ། །རྩ་མཁྲིས་བཅའ་སྒ་ཆུ་དྲོན་བླུད། །ནད་གཞི་གསུམ་གྱི་འོར་ནད་ནི། །ཡུན་རིངས་ལོན་ཞིང་ཚབས་ཆེན་སེལ། །ཞེས་བྱ་བ་ལ། གོ་སྙོད་ལ་སོགས་པའི་ལྡེ་གུ་ཆུ་དྲོན་དང་སྦྱར་ཏེ་

བླུད་ན། ནད་གཞི་གསུམ་འདུས་པ་ལས་གྱུར་པའི་འོར་ནད་ཡུན་རིང་པོ་ལོན་ཅིང་ཚབས་ཤིན་ཏུ་ཆེ་བ་དག་ཀྱང་སེལ་བར་བྱེད་དོ། །དེ་བཞིན་དུ་རྩ་མཁྲིས་ཞེས་བྱ་བ་བུ་ནིམ་པ་དང་བཅའ་སྒ་བསྐོལ་བའི་ཆུ་དྲོན་བླུད་ན་ཡང་ཡོན་ཏན་དེ་དང་འདྲའོ། །སླེ་ཏྲེས་དང་ནི་ཨ་རུ་ར། ཐང་ཤིང་གུ་གུལ་བ་
སྤྲུ་བ། །བ་གཅིན་སྦྱར་བླུད་དམུ་རྫིང་དང་། མཛེ་དང་སྐྱ་རྦབ་སྲིན་བུའི་ནད། །གཅིན་ནད་ཟ་ཁུ་བད་ཀན་དང་། །རླུང་ནི་སྟོད་དུ་འཇོམས་པ་སེལ། །ཞེས་བྱ་བ་ལ། སླེ་ཏྲེས་ལ་སོགས་པའི་སྨན་བ་གཅིན་དང་སྦྱར་ཏེ་བླུད་ན་དམུ་རྫིང་ལ་སོགས་པའི་ནད་སེལ་བར་བྱེད་དོ། །དེ་ལྟར་
རང་རང་ནད་ཀྱི་དབང་བྱས་བཤད། །སྣད་བ་ལས་བྱུང་བ་ལ་ཁྲག་དབྱུང་ཞིང་། བསིལ་སྨན་མར་ཁུས་བྱུགས་ཤིང་བྱུགས་ཤིང་བླུགས་པར་བྱ། དུག་སྐྱེས་སྐྲངས་ལ་དུག་སེལ་སྦྱོར་བ་བྱ། །ཞེས་བྱ་བ་ལ། ཚུལ་དེ་ལྟར་རང་རང་གི་ནད་གཞིའི་དབང་དུ་བྱས་ནས་འོར་ནད་ཀྱི་གསོ་བ་བཤད་པ་ཡིན་ལ།
མཚོན་ལ་སོགས་པས་སྣང་པ་ལས་བྱུང་བ་ལ་གཏར་ག་བྱ་བ་དང་། བསིལ་བའི་སྨན་དང་མར་ལ་སོགས་པས་བསྐུ་བ་ལ་སོགས་པ་བྱས་ལ་དུག་གིས་ཕོག་པ་ལས་གྱུར་པའི་སྐྲངས་ནད་ལ་ནི་དུག་སེལ་བའི་སྦྱོར་བ་གང་དག་ཡིན་པ་བྱས་ན་ཕན་ནོ། །གྲོང་དང་རླན་ཅན་ཆུར་གནས་ཤ་རིད་རློན།
ཚོད་སྐམ་ཏིལ་གྱི་ཟས་དང་བུ་རམ་ཅན། །ཕྱེ་བཏགས་ཟས་དང་ཞོ་དང་ལན་ཚ་དང་། །ཁ་ཟས་རུལ་བག་ཆང་སྐྱུར་ཡོས་ཤ་སྐམ། །འདྲིས་པའི་ཟས་དང་ལྕི་དང་མ་གོམས་ཟ། །ཚ་བ་བསྐྱེད་དང་ཉིན་པར་གཉིད་ལོག་དང་། །མཚན་མོ་གཉིད་མ་ལོག་དང་ཉལ་པོ་རྣམས། །འོར་ནད་ཅན་
གྱིས་དེ་དག་ཐམས་ཅད་སྤང་། །ཞེས་བྱ་བ་ལ། སྐྲང་ནད་དང་ལྡན་པ་ཐམས་ཅད་ཀྱིས་ཀྱང་གྲོད་གི་ཕྱོགས་ཀྱི་ཤ་ལ་སོགས་པ་དང་། ཚོད་མ་སྐོམ་པོ་ལ་སོགས་པ་སྤང་པར་བྱའོ། །ཆུར་གནས་ནི་ཆུ་ན་སྤྱོད་པའི་སྲོག་ཆགས་ཀྱི་ཤའོ། །ཆུར་གནས་པ་ཞེས་སྨོས་པ་རླན་ཅན་གྱི་
ཤའི་སྒྲས་ཀྱང་སྤང་བ་ཉིད་ཡིན་མོད་ཀྱི། འདིར་གཙོ་བོར་བྱ་བའི་ཕྱིར་ལོགས་ཤིག་ཏུ་སྨོས་པ་ཡིན་ནོ། །ཡང་ན་རླན་ཅན་ཉིད་ཆུར་གནས་པ་ཡིན་པར་སྦྱར་རོ། །ཤ་རིད་ནི་སྲོག་ཆགས་སྦེག་པའི་ཤའོ། །ཤ་རློན་ནི་མ་བཙོས་པའོ། །ཚོད་མ་སྐམ་པོ་ནི་པ་ཏོ་ལ་ལ་སོགས་པ་ཚོད་

མའི་སྡེ་ཚན་ལས་བཤད་པའོ། །ཏིལ་གྱི་ཁ་ཟས་ནི་ཏིལ་ལས་བྱས་པའི་ལ་དུ་ལ་སོགས་པའོ། །བུ་རམ་ནི་བུ་རམ་ལས་བྱས་པའི་ཟས་སམ་བཏུང་བའོ། །ཕྱེ་ཟན་ནི་འབྲས་ལ་སོགས་པ་བཏགས་པ་ལས་ཟན་དུ་བྱས་སོ། །དེ་བཞིན་དུ་ཞོ་འབའ་ཞིག་ཀྱང་
སྐྲང་བར་བྱེད་པ་ཡིན་པས་སྤང་བར་བྱའོ། །དེ་བཞིན་དུ་ལན་ཚྭ་དང་ཁ་ཟས་རུལ་ཅིང་སྤྱི་བག་ཏུ་གྱུར་པ་སྤང་བར་བྱའོ། །ཆང་འབའ་ཞིག་ཀྱང་སྤང་བར་བྱའོ། །དེ་བཞིན་དུ་སྐྱུར་བའི་རྣམ་པར་རང་སྐྱུར་ལ་སོགས་པ་གང་ཡང་རུང་བ་དང་། ནས་བརྔོས་པའི་ཡོས་དང་ཤ་སྐམ་
དང་འདྲིས་པའི་ཟས་དེ་ཕན་དང་མི་ཕན་ཞེས་བྱ་བ་དང་། དེ་བཞིན་དུ་གཞན་ཡང་ལྕི་བ་ལ་སོགས་པའི་མཚན་ཉིད་དང་ལྡན་པའི་ཁ་ཟས་ཀྱང་སྤང་བར་བྱ་བ་དང་། དེ་བཞིན་དུ་ཉིན་པར་གཉིད་ལོག་ཅིང་ཉལ་ལ་མཚན་མོ་གཉིད་མ་ལོག་པ་དང་། བུད་མེད་ལ་འཁྲིག་པ་སྤྱོད་ཅིང་ཉལ་པོ་
བྱེད་པ་གང་དག་ཡིན་པ་དེ་དག་ཐམས་ཅད་འོར་ནད་ཅན་གྱིས་སྤང་པར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། གསོ་བའི་གནས་ལས་ལེའུ་བཅུ་བདུན་པའི་རྣམས་པར་འགྲེལ་
པའོ།། །།དེ་ནས་མེད་བལ་གསོ་བ་བཤད་པར་བྱའོ། །ཞེས་བྱ་བ་ལ། གོ་རིམས་ཀྱིས་ན་འདི་ཉིད་ཀྱི་གསོ་བ་བཤད་དགོས་པས་འདི་བརྩམས་པ་ཡིན་ནོ། །མེད་བལ་ནད་ལ་ཐོག་མ་ཉིད། །སྨྱུང་བ་དང་ནི་རྩུབ་ཆོས་དང་། །ཁྲག་དབྱུང་སྐྱུག་སྨན་བཀྲུ་སྨན་ཕན། །སྣུམ་
ཆོས་སྦྱད་པར་མི་བྱའོ། །ཞེས་བྱ་བ་ལ། །མེ་དབལ་གྱི་ནད་ལ་ནི་ནད་ཀྱི་སྔོན་བྱུང་བའི་ཚུལ་སྐྱེས་པའི་ཐོག་མ་ཉིད་ལ་སྨྱུང་བ་བྱ་ཞིང་ཉམས་སྨད་པ་དང་རྩུབ་པར་འགྱུར་བའི་ཆོ་ག་བྱ་བ་དང་། གཏར་ག་བཏབ་ཅིང་ཁྲག་དབྱུང་བ་དང་། བཀྲུ་སྨན་དང་སྐྱུག་སྨན་བླུད་པས་སྦྱང་བ་བྱས་ན་ཕན་གྱི་མེད་དཔལ་
གྱི་ནད་གང་ལ་ཡང་ཐོག་མ་ཁོ་ནར་སྣུམ་ཆོས་བྱ་བ་ནི་ཕན་པ་མ་ཡིན་ནོ། །པོ་སོན་ཆ་དང་དུག་མོ་ཡུངས། །ཤིང་མངར་བཅས་བ་པ་ཏོ་ལ། །ནིམ་པའི་ལོ་མ་པི་པི་ལིང་། །སྐྱུག་སྨན་བཏང་ན་མེ་དབལ་འཇོམས། །ཞེས་བྱ་བ་ལ། དེ་ལ་པོ་སོན་ཆ་ལ་སོགས་པའམ། ཡང་ན་པོ་སོན་

ཆ་དང་པ་ཏོ་ལ་ལས་སྐྱུག་སྨན་བཏང་ན་ཡང་མེད་དབལ་གྱི་ནད་འཇོམས་པར་བྱེད་དོ། །ཀྱི་ལྕེ་བ་ཡི་ཁུ་བའམ། །རྒུན་འབྲུའི་འབྲས་བུ་གསུམ་ཡང་རུང་། །དུར་བྱིད་ཕྱེ་མ་བཏབ་པ་འམ། །འོ་མ་མར་སྦྱར་བཀྲུ་སྨན་ནི། །ཁོང་ན་ཞེན་པའི་ནད་ལ་ནི། །ཁྱད་པར་དུ་ནི་སྦྱང་བ་བཏང་། །ཞེས་
བྱ་བ་ལ། ཀྱི་ལྕེ་བསྐོལ་བའི་ཁུ་བ་འམ། རྒུན་འབྲུའི་ཁུ་བ་འམ། འབྲས་བུ་གསུམ་བསྐོལ་བའི་ཁུ་བ་འམ། གང་ཡང་རུང་བའི་ནང་དུ་དུར་བྱིད་ཀྱི་ཕྱེ་མ་བཏབ་པའི་བཀྲུ་སྨན་བཏང་བའམ། ཡང་ན་དུར་བྱིད་དང་། འོ་མ་དང་མར་དུ་སྦྱར་བའི་བཀྲུ་སྨན་གཏང་བར་བྱའོ། །དེ་
ལས་ཀྱང་ཁྱད་པར་དུ་ནི་ཁོང་པའི་ནང་དུ་ཞེན་པའི་ནད་ལ་སྐྱུག་སྨན་དང་བཀྲུ་སྨན་གྱིས་སྦྱང་བར་བྱའོ། །སྦྱང་མིན་ནད་ཚ་བས་ཆུང་བ་ལ། །ཞི་སྨན་ཙནྡན་ཨུཏྤལ་གཏང་། །ཞེས་བྱ་བ་ལ། མེ་དབལ་གྱི་ནད་དང་ལྡན་པ་ལས་སྦྲུམ་མ་ལ་སོགས་པ་སྦྱང་བར་མི་རུང་ལ་ནད་ཚབས་ཆུང་བ་ཡིན་
ན་ཞི་བར་བྱ་བའི་སྨན་ཙནྡན་དང་ཨུཏྤལ་ལ་སོགས་པ་གཏང་བར་བྱའོ། གླ་སྒང་ནིམ་པ་པ་ཏོ་ལ། །པ་ཏོ་ལ་སོགས་ཉིད་དག་གམ། །ཞེས་བྱ་བ་ལ། ཡང་ན་སྦྱར་བ་བྱར་མི་རུང་ཞིང་ནད་ཚབས་ཆུང་བ་ལ་ཞི་བར་བྱ་བའི་སྨན་གླ་སྒང་ལ་སོགས་པ་བླུད་པར་བྱའོ། པ་ཏོ་ལ་ལ་སོགས་པ་
ནི་པ་ཏོ་ལ་དང་པུ་ཙེ་ཤེལ། །ཞེས་བྱ་བ་བསྟན་པ་ཡིན་ནོ། །ཐལ་ཏྲེས་གླ་སྒང་སྐྱུ་རུ་ར། །པུ་ཙེ་ཤེལ་གྱི་ཆུ་བསྐོལ་བླུད། །ཅེས་བྱ་བ་ལ། ཡང་ན་དེ་ལ་ཞི་བར་བྱ་བའི་སྨན་ཐལ་ཏྲེས་ལ་སོགས་པ་བླུད་པར་བྱའོ། མེ་དབལ་སྐོམ་དད་ཅན་ལ་ནི། །བྱི་ཚེར་བ་དང་པ་ར་པ་ཏ། །སླེ་
ཏྲེས་བཅའ་སྒ་བསྐོལ་བ་ནི། །ཁུ་བ་བསྒྲངས་པ་བླུད་པར་བྱ། །ཞེས་བྱ་བ་ལ། མེ་དབལ་གྱི་ནད་སྐོམ་དད་ཅན་གྱིས་བཏབ་པ་ལ་ནི་བྱི་ཚེར་བ་ལ་སོགས་པ་བསྐོལ་བའི་ཁུ་བ་འམ། བསྐོལ་ཏེ་བསྒྲངས་པ་བླུད་པར་བྱ། སྐྱེར་པ་སྲན་ཆུང་པུ་ཙེ་ཤེལ། །པ་ཏོ་ལ་དང་འབྲས་བུ་གསུམ། །
ནིམ་པ་ཤིང་མངར་ཀྱི་ལྕེ་བ། །བསྐོལ་བ་མར་དང་བཅས་པ་བླུད། །ཅེས་བྱ་བ་ལ། ཡང་མེ་དབལ་སྐོམ་དད་ཅན་ལ་སྐྱེར་པ་ལ་སོགས་པའི་སྨན་གྱི་ཁུ་བ་ཉིད་བླུད་པའི་སྦྱོར་བར་བསྐོལ་ལ་དེའི་ནང་དུ་མར་བཅུག་སྟེ་བླུད་ན་ཡང་ཕན་ནོ། །ཡན་ལག་ནད་ཞུགས་ནད་ཁྲག་ཉིད། །ཐོག་

མ་ཉིད་དུ་ཁྲག་དབྱུང་བྱ། །ཞེས་བྱ་བ་ལ། ལག་དར་དད་བྱིན་པ་ལ་སོགས་པ་ཡན་ལག་རྣམས་ལ་ནད་ཁྲག་ཡོད་པ་ལས་གྱུར་པའི་མེ་དབལ་ནི་ཐོག་མ་ཉིད་དུ་ཁྲག་དེ་ཕྱུང་བས་བསལ་བར་བྱ་སྟེ། ནད་གཞི་ཇི་ལྟ་བ་ལས་རྔབས་རུ་དང་། ཀུ་བ་དང་།
སིན་བུ་པད་པས་ཁྲག་དབྱུང་བའམ། གཏར་ག་བཏབ་སྟེ་ཁྲག་དབྱུང་བར་བྱའོ། །པགས་པ་ཤ་དང་རྒྱུས་པ་འདྲུལ། །ཁྲག་རུལ་པ་ལས་བྱུང་བ་ཡིན། །ཞེས་བྱ་བ་ལ། གང་གི་ཕྱིར་ཁྲག་རུལ་པ་ལས་པགས་པ་ལ་སོགས་པ་འདྲུལ་ཞིང་རྣགས་པར་འགྱུར་བས་དེའི་
ཕྱིར་ཁྲག་དབྱུང་བར་བྱའོ། །སྨིན་ཞིང་བད་ཀན་ཟད་པ་དང་། །རླུང་དང་མཁྲིས་པ་ཤས་ཆེ་ལ། །ཏིག་ཏ་ཏིག་ཏ་ཆེན་པོའི་མར། །ཀྱི་ལྕེ་བ་བསྐོལ་མར་ཕན་ནོ། །ཞེ་བྱ་བ་ལ། སྨིན་ཅིང་བད་ཀན་ཟད་པར་གྱུར་ནས། རླུང་དང་མཁྲིས་པ་ཤས་ཆེ་ཞིང་རྒྱས་པར་གྱུར་
པ་ལ་ནི་ཏིག་ཏ་དང་ཏིག་ཏ་ཆེན་པོའི་སྨན་མར་མཁྲིས་པ་ལས་གྱུར་པའི་མཛེ་ནད་ཀྱི་སྐབས་སུ་བཤད་པ་དང་། ཀྱི་ལྕེ་བའི་སྨན་མར་ཁོང་འབྲས་ཀྱི་སྐབས་སུ་བཤད་པ་ཕན་ནོ། །ཁྲག་ཕྱུང་ཁོང་པ་དག་གྱུར་ནས། །ནད་ནི་ཤ་ལྤགས་ལ་གནས་ལ། །ཕྱི་རོལ་ནས་ནི་བྱུགས་
སོགས་ཀྱིས། །འཕྲལ་དུ་མེ་དབལ་ཞི་བར་འགྱུར། །ཞེས་བྱ་བ་ལ། ཁྲག་ཕྱུང་ཞིང་བསལ་བར་འགྱུར་བ་དང་། སྦྱང་བ་བྱས་པས་ཁོང་པ་དག་པར་གྱུར་ནས་ནང་གི་སྐྱོན་མེད་པར་རླུང་ལ་སོགས་པའི་ནད་གང་ཡང་མེད་པར་ཤ་དང་པགས་པ་ལ་གནས་པར་གྱུར་པ་ལ། ཕྱི་
རོལ་ནས་སྨན་གྱི་བྱུགས་པ་ལ་སོགས་པ་བྱས་ན་འཕྲལ་དུ་དེའི་མོད་ལ་མེ་དབལ་ཞི་བར་འགྱུར་རོ། །རླུང་གྱུར་ཤུ་ཏི་གླ་སྒང་དང་། །འོ་མ་འུ་སུ་བ་ར་ཧི། །ཨར་ཏ་ཀ་ལ་པི་པི་ལིང་། །ཐང་ཤིང་ཤི་ཀྲུ་རུ་རྟ་ཡི། །ལྡེ་གུས་བྱུགས་པ་བྱས་ན་ཕན། །ཞེས་བྱ་བ་ལ། རླུང་ལས་
གྱུར་པའི་མེ་དབལ་ནི་ཤུ་ཏི་ཞེས་བྱ་བའི་ཤ་ཏ་པུས་པ་ལ་སོགས་པའི་སྨན་བཏགས་པའི་ལྡེ་གུས་བསྐུས་ན་ཕན་ནོ། །བ་ར་ཧ་ནི་བི་ན་མ་ལི་ཀའོ། །ཨར་ཏ་ཀ་ལ་ནི་རུ་ཛ་ག་རའོ། །འུ་སུ་ནི་འུ་སུའི་འབྲས་བུའོ། །ཤི་ཀྲུ་ནི་སོ་བན་ཛ་ནའོ། །མཁྲིས་པར་ནྱ་གྲོ་དྷ་སོགས་ཏེ། །དེ་

བཞིན་པདྨ་ཨུཏ་པ་ལ་སོགས། །ཞེས་བྱ་བ་ལ། མཁྲིས་པ་ལས་གྱུར་བའི་མེ་དབལ་ལ་ནི་ནྱ་གྲོ་དྷ་ལ་སོགས་པའི་སྡེ་ཚན་གྱིས་བསྐུ་བའམ། ཡང་ན་པདྨ་དང་ཨུཏྤལ་ལ་སོགས་པ་བསྡུས་པ་ལས་བཤད་པས་བསྐུས་ན་ཕན་ནོ། །དེ་ལས་མཁྲིས་པ་ལ་ནི་པདྨ་དང་ཨུཏྤལ་དང་ཉ་
ལྕིབས་དང་། འདམ་དང་པདྨའི་རྩ་བ་དང་། སྲིང་ག་ཏ་ག་དང་། ཀ་ཤི་དུ་ཀ་དང་། ཤ་ཁ་ར་དང་། བ་ལ་ཀ་དང་། ཙནྡན་དཀར་པོ་དང་། མུ་ཏིག་དང་། ནོར་བུ་དང་། བཙག་ཡུག་སྣུམ་དང་། པ་ཡ་སྱ་དང་། པྲ་དུ་ན་ཌ་རཱི་ཀ་དང་། ཤིང་མངར་དང་། ཤུག་པ་དང་
མར་སར་དང་། འོ་མའི་ལྡེ་གུ་བསྐུས་ན་ཕན་ནོ། །ཞེས་བཤད་དོ། །ནྱ་གྲོ་དྷའི་རྩ་གཞོན་ནུ་དང་། །ཆུ་ཤིང་ནང་གི་ལོ་མར་བཅས། །པདྨའི་རྩ་བའི་ལྡེ་གུ་དང་། །ལན་བརྒྱར་བཀྲུས་པའི་མར་གྱིས་བྱུག །ཅེས་བྱ་བ་ལ། ནྱ་གྲོ་དྷའི་རྩ་བ་གཞོན་ནུ་སར་པ་དང་ཆུ་ཤིང་གི་ནང་
གི་ལོ་མ་དང་བཅས་ཤིང་བསྲེས་པ་དང་། པདྨའི་རྩ་བའི་ལྡེ་གུར་སྦྱར་བ་ལན་བརྒྱ་ཕྲག་མང་དུ་བཀྲུས་ཤིང་བཙིར་བའི་མར་དང་སྦྱར་བས་བྱུག་པར་བྱའོ། །པདྨ་ཅན་གྱི་འདམ་བསིལ་བའམ། །མུ་ཏིག་བཏགས་པར་གྱུར་པ་ལ། །དུང་ངམ་བྱི་རུ་ཉ་ཕྱིས་སམ། །ཡུག་སྣམ་མར་དང་བཅས་
པས་བྱུག །ཅེས་བྱ་བ་ལ། གང་ན་པདྨ་སྐྱེས་པའི་འོག་གི་འདམ་བསིལ་བས་བྱུག་པའམ། མུ་ཏིག་ཞིབ་ཏུ་བཏགས་པ་ཉིད་ཀྱིས་བྱུག་པའམ། དུང་ལ་སོགས་པ་གང་ཡང་རུང་བ་བཏགས་ནས་མར་དང་བཅས་པས་བྱུགས་ན་ཡང་ཕན་ནོ། །བད་ཀན་ལས་གྱུར་འབྲས་བུ་གསུམ།
ཤུག་བ་བཙོད་དང་པུ་ཤེལ་ཙེ། །ཀ་ར་བཱི་ར་འདམ་བུའི་རྩ། །ཨ་ནན་ད་ཡི་ལྡེ་གུས་བསྐུས། །ཞེས་བྱ་བ་ལ། བད་ཀན་ལས་གྱུར་པའི་མེ་དབལ་ལ་ནི་འབྲས་བུ་གསུམ་ལ་སོགས་པའི་ལྡེ་གུས་བསྐུས་ན་ཕན་ནོ། །ད་བ་ལོ་མ་བདུད་པ་དང་། །སེང་ལྡེང་ཐང་ཤིང་བཀྲུ་སྨན་དང་། །གླ་
སྒང་དོང་གར་བཅས་པའམ། །བ་ར་ན་སོགས་ལྡེ་གུས་བསྐུ། །ཞེས་བྱ་བ་ལ། ད་བ་ལ་སོགས་པའི་ལྡེ་གུ་ར་སྦྱར་བའམ། བ་ར་ན་ལ་སོགས་པའི་སྡེ་ཚན་གྱི་ལྡེ་གུ་བསྐུས་ན་ཡང་བད་ཀན་ལས་གྱུར་བའི་མེ་དབལ་སེལ་ཏོ། །དོང་ག་ཡི་ནི་ལོ་མ་དང་། །སླེ་སྨན་ཏ་ཀའི་ཤུན་ལྤགས་

དང་། །ཨིནྡྲ་བ་རུ་ནའི་ལོ་མ། །ཤྲཱི་ཥ་འོལ་མ་སེའི་མེ་ཏོག །ཅེས་བྱ་བ་ལ། དོང་གའི་ལོ་མ་དང་། སླེ་སྨན་ཏ་ཀ་ལས་སྐྱེས་པའི་ཤུན་ལྤགས་དང་། ཨེནྡྲ་བ་རུ་ནའི་ལོ་མ་དང་། ཤྲཱི་ཥ་དང་། འོལ་མ་སེའི་མེ་ཏོག་ལྡེ་གུ་ར་བྱས་པ་བསྐུས་ན་ཡང་ཕན་ནོ། །
ཆུ་བླུགས་མར་བསྐུ་སྨན་མར་དང་། །ལྡེ་གུ་ཕྱེ་མ་ཇི་བཞིན་དུ། །སྨན་ནི་འདི་དག་ཉིད་ཀྱིས་བྱ། །ཞེས་བྱ་བ་ལ། བཀྲུ་བའི་དོན་དུ་བཤད་པའི་སྨན་ཤུ་ཏི་ལ་སོགས་པ་འདི་དག་ཉིད་ཀྱིས་ཆུ་བླུགས་པ་དང་། རྨའི་ཕྱི་རོལ་ནས་བསྐུ་བའི་མར་དང་ལྡེ་གུ་དང་ཕྱེ་མའི་སྦྱོར་བ་ཡང་ཇི་ལྟ་བ་
བཞིན་དུ་བྱས་ཏེ་གཏང་བར་བྱའོ། །རླུང་རྒྱས་མར་ནི་ཤས་ཆེར་བྱ། །ཞེས་བྱ་བ་ལ། ཡང་ལྡེ་གུའི་སྨན་ལ་སོགས་པ་འདི་དག་རླུང་ཤས་ཆེ་བའི་མེ་དབལ་ལ་ནི་མར་ཤས་ཆེ་བས་བྱའོ། །བད་ཀན་གནས་ཞེན་མ་སྨིན་ལ། །དྲོ་དང་རྩུབ་ཤས་ཆེ་བ་སྦྱར། །དེ་བཞིན་མཁྲིས་པའི་གནས་
ཞུགས་ལ། །ཁྲག་མཁྲིས་ལ་ནི་མར་ལྡན་བྱ། །ཞེས་བྱ་བ་ལ། བད་ཀན་གྱི་གནས་ལ་གནས་ཤིང་རྟེན་པའི་མེ་དབལ་མ་སྨིན་པར་གྱུར་པ་ལ་ནི་དྲོ་བ་དང་རྩུབ་པའི་ལྡེ་གུས་བསྐུ་བ་ཕན་ལ། དེ་བཞིན་དུ་མཁྲིས་པའི་གནས་སུ་ཞུགས་པའི་མེ་དབལ་དང་ཁྲག་དང་། མཁྲིས་པ་
ལས་གྱུར་པའི་མེ་དབལ་ལ་ནི་མར་སར་དང་ལྡན་པའི་སྨན་དེ་དག་གི་ལྡེ་གུས་བསྐུ་བར་བྱའོ། །ཤིན་ཏུ་བསིལ་ཞིང་སྲབ་པ་དང་། །གོས་སྲབ་ནང་དུ་བཞག་པ་ནི། །ནུས་པ་ཆུང་ལས་ཡང་དང་ཡང་། །གཞན་དང་གཞན་ནི་སྦྱར་བར་བྱ། །ཞེས་བྱ་བ་ལ། ཤིན་ཏུ་བསིལ་ཞིང་
གྲང་ལ་སྲབ་ཅིང་ཆུང་བ་དང་། གོས་སྲབ་མོའི་ནང་དུ་གཏུམས་ཤིང་བཞག་པའི་ལྡེ་གུ་ནི་སྐད་ཅིག་མ་རེ་རེ་ཞིང་ཡང་དང་ཡང་དུ་གཞན་དང་གཞན་སྤོས་ལ་སྦྱར་བར་བྱ་སྟེ། གང་གི་ཕྱིར་ལྡེ་གུ་དེ་དེ་ལྟར་བསྐུས་པ་ནི་ནུས་པ་ཆུང་བ་ཡིན་པའི་ཕྱིར་རོ། །འདྲེས་པའི་ནད་ལ་ལས་འདི་ནི། །
འདྲེན་མར་བྱ་བ་ལ་བསྔགས་བ་ཡིན། །ཞེས་བྱ་བ་ལ། ནད་གཞི་གཉིས་འདྲེས་པའི་ལྡན་པ་ལས་གྱུར་བའི་མེ་དབལ་ལ་ནི། གོང་དུ་བཤད་པའི་གསོ་བའི་ལས་དེ་འདྲེན་མ་བྱས་ན་བསྔགས་ཤིང་ཕན་ནོ། །མེ་ལྟར་ཚ་ལ་ལན་བརྒྱར་ནི། །བཀྲུས་པའི་མར་སར་འབའ་ཞིག་

ཕན། །ཞེས་བྱ་བ་ལ། མེ་ལྟ་བུར་ཚ་བའི་མེ་དབལ་ནི། མར་སར་ཆུ་གྲང་མོའི་ནང་དུ་ལན་མང་དུ་མཉེས་པ་འབའ་ཞིག་གིས་བསྐུས་ན་ཕན་ནོ། །མར་གྱི་ཉིང་ཁུ་བླུགས་པ་འམ། །ཤིང་མངར་བསྐོལ་བའི་ཆུ་གྲང་ངམ། །ཨུཏྤལ་པདྨ་ཁ་རའི་ཆུ། །འོ་མ་བུ་རམ་ཤིང་ཁུ་
བླུགས། །ཞེས་བྱ་བ་ལ། ཡང་མེ་ལྟར་ཚ་བའི་མེ་དབལ་ལ་མར་གྱི་ཉིང་ཁུ་དངས་མ་བླུགས་པ་འམ། ཡང་ན་ཆུ་གྲང་བསྐོལ་པའི་ཆུ་བསྒྲངས་ཏེ་བླུགས་པའམ། ཡང་ན་ཨུཏྤལའམ། ཁ་རའམ། འོ་མ་འམ། བུ་རམ་ཤིང་ཁུའི་ཁུ་བ་གྲང་མོ་བླུགས་པར་བྱའོ། །བཏུང་བ་
བསྐུ་དང་བླུགས་པ་དང་། །ཏིག་ཏ་ཆེན་པོའི་སྨན་མར་ཕན། །ཞེས་བྱ་བ་ལ། མེ་ལྟ་བུའི་མེ་དབལ་ལ་ཏིག་ཏ་ཆེན་པོའི་སྨན་མར་མཛེ་ནད་ཀྱི་སྐབས་ནས་བཤད་པ་བླུད་པ་ལ་སོགས་པ་སྦྱར་ན་མཆོག་ཏུ་ཕན་ནོ། །རྨེན་བུ་ཁྲག་མཁྲིས་སེལ་བ་ཡི། །གསོ་བ་ཅི་རིགས་ལེགས་བྱས་
ལ། །རླུང་དང་བད་ཀན་འཇོམས་བྱེད་ལ། །གླན་དང་དཀྲི་བ་ལ་སོགས་ཕན། །ཞེས་བྱ་བ་ལ། རྨེན་བུའི་མེ་དབལ་ལ་ནི་སྔར་བཤད་པའི་མཁྲིས་པ་དང་འདྲེས་པ་ལས་བྱུང་བ་ནས། བཀྲུ་སྨན་གྱི་བར་ཁྲག་དང་མཁྲིས་པ་སེལ་བའི་གསོ་བ་ལེགས་པར་བྱས་ལ། དེའི་རྗེས་ལ་རླུང་
དང་བད་ཀན་ལ་ཕན་པའི་གསོ་བ་གླན་པའི་དུགས་དང་། དཀྲི་བའི་དུགས་ལ་སོགས་པ་བྱས་ན་ཕན་ནོ། །རྨེན་བུའི་མེ་དབལ་གཟེར་བཅས་ལ། །ཏིལ་མར་རྩ་བ་བཅུ་དང་བསྐོལ། །བ་གཅིན་དྲོན་མོ་ཆུ་དྲོན་བླུགས། །ཞེས་བྱ་བ་ལ། རྨེན་བུའི་མེ་དབལ་གཟེར་དང་བཅས་པ་འབྱུང་བ་
ལ་ནི་རྩ་བ་བཅུ་དང་བསྐོལ་བའི་ཏིལ་མར་བླུགས་པའམ། དེ་བཞིན་དུ་བ་གཅིན་དྲོན་མོའམ་ཆུ་དྲོན་མོ་བླུགས་པར་བྱའོ། །ཡང་ན་ཤི་ཀྲུའི་ལྡེ་གུའམ། །ན་ཏ་མ་ལའི་ཤུན་པའམ། །ལ་ཕུག་སྐམ་པོ་བ་རུ་རའི། །ལྡེ་གུ་དྲོ་འཇམ་བསྐུ་བའམ། །ཞེས་བྱ་བ་ལ། ཡང་ན་ཤི་ཀྲུའི་ཤུན་
པ་ལྡེ་གུར་བཏགས་པ་དྲོ་འཇམ་ཙམ་གྱིས་བསྐུ་བའམ། ཡང་ན་ན་ཏ་མ་ལ་ཞེས་བྱ་བ་ཀ་རཉྫའི་ཤུན་ལྤགས་བཏགས་པའི་ལྡེ་གུ་ཆུ་དྲོ་འཇམ་ཙམ་མམ། ལ་ཕུག་སྐམ་པོ་བཏགས་པའི་ལྡེ་གུ་དྲོ་འཇམ་ཙམ་བསྐུ་བ་འམ། བ་རུ་རའི་ལྡེ་གུ་དྲོ་འཇམ་ཙམ་བསྐུས་ན་ཡང་རྨེན་བུའི་མེ་དབལ་

གཟེར་དང་བཅས་པ་ལ་ཕན་ནོ། །དན་ད་ཤིང་ཚ་ཙི་ཏྲ་ཀ །ཨརྐ་སྣུ་ཧའི་འོ་མ་དང་། །བུ་རམ་གོ་བྱེའི་རུས་ནག་ཚུར། །ལྡེ་གུས་རྡོ་ཡང་འབིགས་བྱེད་ན། །བད་ཀན་ལས་གྱུར་རྨེན་བུའི་ནད། །ཕྱི་རོལ་གནས་པ་སྨོས་ཅི་དགོས། །ཞེས་བྱ་བ་ལ། དན་
པ་དང་། ཙི་ཏྲ་ཀའི་རྩ་བའི་ཤུན་སྤགས། ཨརྐ་དང་། ཤིང་སྣུ་ཧའི་འོ་མ་དང་། བུ་རམ་དང་། གོ་བྱེའི་ནང་གི་རུས་པ་དང་། ནག་ཚུར་གྱི་ལྡེ་གུར་བྱས་པས་བསྐུས་ན་རྡོ་ཡང་འབིགས་པར་བྱེད་ན་བད་ཀན་ལས་གྱུར་པའི་རྨན་བུ་ལུས་ཀྱི་ཕྱི་རོལ་ན་གནས་པ་ལྟ་སྨོས་ཀྱང་ཅི་དགོས་ཏེ་
ངེས་པར་འབིགས་པར་བྱེད་དོ། །ཡུན་རིང་གནས་པའི་རྨེན་བུ་ལ། །ལ་ཕུག་རྒྱ་སྲན་ཀུ་ལད་ཐའི། །ཁུ་བ་ཐལ་སྨན་སེའུ་འབྲུར་བཅས། །གྲོ་ཡི་ཟན་དང་ནས་ཀྱི་ཟན། །རྒུན་ཆང་སྦྲང་རྩི་བུ་རམ་དང་། །ཁ་ར་ཆང་གི་དངས་མར་བཅས། །ཁ་ལུང་ཁུ་བར་བཅས་པ་དང་། །འབྲས་
བུ་གསུམ་གྱི་སྦྱོར་ལྡེ་གུ། །པི་པི་ལིང་དང་སྦྲང་རྩིར་བཅས། །ཐང་ཤིང་དང་ནི་སླེ་ཏྲེས་དང་། །བྲག་ཞུན་གྱི་ནི་སྦྱོར་བ་དང་། །གླ་སྒང་གོ་བྱེའི་སྦྱོར་བའམ། །སྦྲང་རྩི་ཡི་ནི་སྦྱོར་བ་དང་། །མགོ་བཀྲུ་སྨན་དུད་རྔུབ་པ་དང་། །སྔར་བཤད་སྐྲན་ནི་གཞིག་པ་དང་། །ལྕགས་གསེར་
ལན་ཚྭ་བསྲེགས་པ་དང་། །རྡོ་བས་བཙིར་བར་བྱ་བ་ཡིན། །སྨན་འདི་ཡིས་ནི་འཇིགས་པར་བྱེད། །ཅེས་བྱ་བ་ལ། རྨེན་བུའི་ནད་ཡུན་རིང་དུ་གནས་ཤིང་རྒྱུན་དུ་ཆགས་པར་གྱུར་པ་ལ་འོག་ནས་བཤད་པའི་སྨན་འདི་དག་གིས་བཤིག་པར་བྱའོ། །ལ་ཕུག་གི་ཁུ་བ་ཐལ་སྨན་རྣམ་གཉིས་
གང་ཡང་རུང་བ་དང་བཅས་པ་སེའུ་འབྲུ་དང་བཅས་པ་དང་། དེ་བཞིན་དུ་རྒྱ་སྲན་ཀུ་ལད་ཐའི་ཡུ་ཤའི་ཁུ་བ་དང་ཐལ་སྨན་བཅས་པ་དང་། དེ་བཞིན་དུ་གྲོའི་ཟན་དང་ནས་ཀྱི་ཟན་རྟག་ཏུ་སྦྱིན་པ་དང་། རྒུན་ཆང་ལ་སོགས་པ་བླུད་པ་དང་། དེ་བཞིན་དུ་འབྲས་བུ་གསུམ་མམ། པི་པི་ལིང་
གི་སྦྱོར་བ་ལྡེ་གུའམ། ཕྱི་མར་བྱས་པའམ། དེ་བཞིན་དུ་ཐང་ཤིང་ལ་སོགས་པའི་སྦྱོར་བ་སྟེ། ཅི་རིགས་པར་སྦྱོར་བ་དེ་དང་དེས་བྱ་བ་དང་། ནམ་ཚོང་ཡན་ཆད་ཀྱི་ནད་དུ་གཏོགས་པའི་རྨེན་བུ་ལ། མགོ་བོའི་བཀྲུ་སྨན་དང་། དུད་པ་རྔུབ་པའི་རྣོན་པོ་དང་། ལྔར་བཤད་པའི་སྐྲན་

གཞིག་པའི་སྦྱོར་བ་གང་ཡིན་པ་དང་། ལྕགས་ལ་སོགས་པ་བསྲེགས་པས་བཙིར་ཞིང་མནན་པས་ཡུན་རིང་དུ་གནས་པའི་རྨེན་བུ་འཇིགས་པར་བྱེད་དོ། །ཞེས་ཐམས་ཅད་ལ་སྦྱར་པར་བྱའོ། །སྦྱོར་བ་སྣ་ཚོགས་དེ་དག་ནི། །བྱས་ཀྱང་ཞི་བར་མ་གྱུར་ཅིང་། །ཤིན་ཏུ་སྲ་བར་གནས་
གྱུར་ལ། །ནད་སྟོབས་ཆེ་བར་གྱུར་ན་ནི། །དེ་འོག་འདི་ལ་ཐལ་སྨན་ནམ། །ལྡེ་གུའམ་གསེར་གྱིས་བསྲེགས་པ་ཕན། །ཞེས་བྱ་བ་ལ། སྦྱོར་བ་གོང་དུ་སྨོས་པ་སྣ་ཚོགས་པ་དེ་དག་གིས་གསོ་བ་བྱས་ཀྱང་དེ་ཞི་བར་མ་གྱུར་ཅིང་། རྡོ་ལྟར་ཤིན་ཏུ་སྲ་བར་གནས་པར་གྱུར་ལ་ནད་
ཀྱི་སྟོབས་ཤིན་ཏུ་ཆེ་ཞིང་ཞིག་པར་མ་གྱུར་ན་སྨན་གྱི་སྦྱོར་བར་དེ་དག་གི་འོག་ཏུ་རྨེན་བུའི་ནད་འདི་ལ་ཐལ་སྨན་གྱིས་བསྲེག་པའམ། ལྡེ་གུ་མེས་བསྲེགས་པས་བསྲེགས་པའམ། གསེར་མེར་བསྲེགས་པས་བསྲེགས་ན་ཕན་ནོ། །སྨིན་པར་བྱེད་པས་རྣགས་བྱས་ལ། །དབྲལ་ནས་དེ་
ནས་དབྱུང་བར་བྱ། །ཞེས་བྱ་བ་ལ། ཡང་རྨེན་བུ་དེ་སྨིན་པར་བྱེད་པའི་སྨན་གྱིས་སྨིན་ཅིང་བསྲུབས་ལ། དེའི་འོག་ཏུ་གཙགས་སྤྱད་ཀྱིས་བསལ་ཏེ། །རྨེན་བུ་གང་ཡོད་པ་དབྱུང་བར་བྱའོ། །འདི་ལ་ཁྲག་འདི་རྣགས་འདོད་པ། །ཡང་དང་ཡང་དུ་གདོན་པར་བྱ། །ཞེས་བྱ་བ་
ལ། རྨེན་བུའི་མེ་དབལ་ཞེས་བྱ་བ་ལ། ཁྲག་རྣགས་པར་འདོད་ཅིང་གནས་པ་ལས་གཡོས་ཤིང་ཕྱེད་ཙམ་སྨིན་པར་གྱུར་པ་ལ་ཡང་དང་ཡང་དུ་ཁྲག་གདོན་ཅིང་དབྱུང་བར་བྱའོ། །ཁྲག་བསལ་འོག་ཏུ་སླར་ཡང་ནི། །རླུང་དང་བད་ཀན་སེལ་སྨན་གཏང་། །ཞེས་བྱ་བ་ལ། ཁྲག་
བསལ་ཞིང་བཏོན་ནས་དེ་ཡི་འོག་ཏུ་རླུང་དང་བད་ཀན་སེལ་བའི་སྨན་གང་དག་ཡིན་པ་གཏང་བར་བྱའོ། །ཚ་ཞིང་སྨིན་པས་རྣགས་གྱུར་ལ། །ཕྱི་ནང་རྨ་ལྟར་གསོ་བར་བྱ། །ཞེས་བྱ་བ་ལ། རྨེན་བུའི་མེ་དབལ་དེ་དང་སྨིན་པས་རྣགས་པར་གྱུར་པ་ལ་ནི་ཕྱི་དང་ནང་གི་རྨའི་གསོ་བ་ལྟར་
གསོ་བར་བྱའོ། སྐྱེར་པ་སྲིན་སྨན་ཀམ་བི་ཁྱཻ། །བསྐོལ་བའི་ཏིལ་མར་རྨ་ལ་ཕན། །ཞེས་བྱ་བ་ལ། སྐྱེར་པ་ལ་སོགས་པའི་སྨན་དང་ཏིལ་མར་བསྐོལ་བ་རྨ་ལ་ཕན་ནོ། །བད་ཀན་མཁྲིས་པ་ཤས་ཆེ་ལ། །དཱུར་བའི་ཁུ་བ་མར་བསྐོལ་ཕན། །ཞེས་བྱ་བ་ལ། བད་ཀན་དང་མཁྲིས་པ་ཤས་

ཆེར་གྱུར་པའི་མེ་དབལ་ལ་ནི་དཱུར་བ་བསྐོལ་བའི་ཁུ་བ་དང་མར་བསྐོལ་བ་ཕན་ནོ། །གསོ་བའི་ལས་ཀུན་ཕྱོགས་དང་སྟེང་། །ཁྲག་དབྱུང་པ་ནི་ཕྱོགས་གཅིག་ཡིན། །མེ་དབལ་དེ་ནི་ཁྲག་མཁྲིས་དང་། །མ་འདྲེས་པ་ལས་བྱུང་མི་འགྱུར། །འདི་ཡི་རྟེན་ནི་ཁྲག་
ཉིད་ཡིན། །དེ་བས་ཁྲག་ནི་མང་དུ་དབྲི། །ཞེས་བྱ་བ། མེ་དབལ་གྱི་ནད་ལ་སྐྱུག་སྨན་དང་། བཀྲུ་སྨན་བཏང་བ་ལ་སོགས་པའི་གསོ་བའི་ལས་ཀུན་ནད་སེལ་བའི་ལས་བྱེད་པའི་ཕྱོགས་གཅིག་ཏུ་བཞག་པ་དང་། ཁྲག་དབྱུང་བ་གཅིག་ཏུ་གསོ་བའི་ཕྱོགས་གཅིག་སྟེ་ཕྱེད་ཡིན་ནོ། །
དེ་ཡང་གང་གི་ཕྱིར་མེ་དབལ་དེ་ནི་ཁྲག་དང་མཁྲིས་པ་དང་མ་འདྲིས་ཤིང་དེ་ལ་མེ་བརྟེན་པ་ལས་འབྱུང་བར་མི་འགྱུར་ཏེ། དེ་བས་ན་རྒྱུ་དེའི་ཕྱིར་མེ་དབལ་འདིའི་རྟེན་ནམ། གནས་ནི་ཁྲག་ཉིད་ཡིན་ཏེ། དེ་བས་ན་ཁྲག་མང་དུ་དབྲི་ཞིང་དབྱུང་བ་ཁོ་ན་འདིའི་དཔྱད་ཀྱི་མཆོག་ཡིན་ནོ། །
ནད་གཞི་མང་པོ་མེ་དབལ་ལ། །བཀྲུ་སྨན་མ་གྱུར་མར་མི་སྦྱིན། །དེ་ཡིས་ནད་ནི་སྲ་གྱུར་པས། པགས་པ་ཁྲག་དང་ཤ་འཚོང་བྱེད། །ཅེས་བྱ་བ་ལ། གང་ནད་གཞི་མང་པོ་ལས་གྱུར་པའི་མེ་དབལ་དེ་ལ་ནི་བཀྲུ་སྨན་དུ་མ་གྱུར་ཅིང་གང་ཞིག་བླུད་ན་འཁྲུ་བའི་བྱ་བ་མི་བྱེད་པའི་མར་
དེ་སྦྱིན་པར་མི་བྱའོ། །དེ་ཅིའི་ཕྱིར་ཞེ་ན། འཁྲུ་བར་མི་བྱེད་པའི་མར་དེས་སླར་ཞིང་སྲ་ལ་རེངས་ཤིང་འཐས་པར་འགྱུར་བས་པགས་པ་དང་ཁྲག་དང་ཤ་འཚོད་ཅིང་སྲེག་པར་བྱེད་པའི་སྐྱོན་ཡོད་དོ། །ཡན་ལག་བརྒྱད་པའི་སྙིང་པོའོ་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་
དཔོན་ཟླ་བ་ལ་དགའ་བས་ངེས་པར་སྦྱར་བ་ལས་གསོ་བའི་གནས་ལེའུ་བཅོ་བརྒྱད་པའི་རྣམ་པར་འགྲེལ་པའོ།། །།དེ་ནས་མཛེ་ནད་གསོ་བ་བཤད་པར་བྱའོ། །ཞེས་བྱ་བ་ལ། །གོ་རིམས་ཀྱིས་ན་མཛེ་ནད་ཀྱི་གསོ་བ་བརྩམས་པ་ཡིན་ནོ། །མཛེ་ཅན་ཀུན་ལ་ཐོག་མ་ཉིད། །
སྣུམ་བླུད་པས་ནི་གསོ་བར་བྱ། །ཞེས་བྱ་བ་ལ། མཛེའི་ནད་ཀྱིས་བཏབ་པ་ཐམས་ཅད་ལ་ནི་དང་པོ་ཁོ་ནར་སྨན་མར་བླུད་ཅིང་སྣུམ་སྦྱིན་པས་གསོ་ཞིང་བཅོས་པར་བྱའོ། །དེ་ལ་རླུང་ཤས་ཆེ་བ་ལ། །རྩ་བ་བཅུ་པ་སླེ་ཏྲེས་དང་། །ཤ་རང་ཀ་ཏ་ཨེ་རཎྜ། །མེ་ཤ་སྲིང་གི་མར་རམ་ནི། །

ཏིལ་མར་བསྐོལ་ཏེ་བླུད་པ་ཕན། །ཞེས་བྱ་བ་ལ། དེ་ལ་མཛེ་ནད་དེ་རྣམས་ཀྱི་ནང་ན་རླུང་ལས་གྱུར་པ་དེའི་ཤས་ཆེ་བའི་མཛེ་ནད་ལ་ནི་རྩ་བ་བཅུ་པ་ལ་སོགས་པའི་མར་རམ། ཏིལ་མར་བསྐོལ་ཏེ་བླུད་ན་ཕན་ནོ། །ནིམ་པ་པ་ཏོ་པུ་ཙེ་ཤེལ། །སྐྱེར་པ་པ་ཏ་བྱི་ཚེར་བ། །པར་པ་ཏ་དང་
ཀྱི་ལྕེ་བ། །སྲང་རེ་ཆུ་བྲེ་བརྒྱད་ཀྱི་ནི། །ནང་བསྐོལ་བརྒྱད་ཆ་ལུས་པ་རུ། །གླ་སྒང་རྩ་མཁྲིས་ཀྱི་ལྕེ་བ། །དུག་མོ་ཡུངས་དང་པི་པི་ལིང་། །ཙནྡན་ཞོ་ནི་གཉིས་གཉིས་དང་། །ཞུན་མར་སྲང་ནི་བཅུ་གཉིས་བསྐོལ། །ཏིག་ཏའི་སྨན་མར་དེ་འཐུངས་ན། །མཁྲིས་པའི་
མཛེ་དང་མེ་དབལ་དང་། །འབྲུམ་ཕྲན་ལུས་ཚ་སྐོམ་དད་ཆེ། །མགོ་འཁོར་གཡན་པ་སྐྱ་རྦབ་འབྲས། །རྨ་འགྲམས་འབྲས་ཀྱི་ཕྲེང་བ་དང་། །ཐོར་བུ་ཁོང་འབྲས་སྐྲན་དང་ནི། །ཟད་བྱེད་སྨྱོ་བྱེད་མྱོས་པ་དང་། །སྙིང་ནད་རབ་རིབ་ངོ་ཁབས་དང་། །ཤ་བཀྲ་མིག་སེར་ཕོ་བའི་
ནད། །མཚན་པར་རྡོལ་དང་བརྗེད་བྱེད་དང་། །དམུ་རྫིང་ཟླ་མཚན་མི་ཆོད་དང་། །སྦྱར་དུག་གཞང་འབྲུམ་ཁྲག་མཁྲིས་སེལ། །གཞན་ཡང་མཁྲིས་པ་ལས་གྱུར་ནད། །ཤིན་ཏུ་གསོ་དཀའི་རྣམས་ལའང་ཕན། །ཞེས་བྱ་བ་ལ། ནིམ་པ་ལ་སོགས་པའི་སྨན་སྣ་རེ་སྲང་རེ་ཆུ་བྲེ་བརྒྱད་
ཀྱི་ནང་དུ་བསྐོལ་ལ་བསྐོལ་བ་དེ་བརྒྱད་ཆ་ལུས་པ་དང་ཞུན་མར་སྲང་བཅུ་གཉིས་དང་གླ་སྒང་ལ་སོགས་པའི་སྨན་སྣ་རེ་ཞོ་གཉིས་གཉིས་ལྡེ་གུར་བྱས་པ་དང་བསྐོལ་བའི་སྨན་མར་ཏེ་ཏིག་ཏའི་སྨན་མར་ཞེས་བྱ་སྟེ། དེ་བླུད་ན་མཁྲིས་པ་ལས་གྱུར་པའི་མཛེ་དང་མེ་དབལ་ལ་སོགས་པ་སེལ་བར་
བྱེད་དོ། །དེ་བཞིན་དུ་འདིར་མ་སྨོས་པའི་མཁྲིས་པ་དག་ལས་གྱུར་པའི་ནད་གཞན་དག་སེལ་བར་བྱེད་ཅིང་དེ་ལ་ཕན་པ་ཡིན་ནོ། །ལོ་མ་བདུན་པ་པར་པ་ཏ། །དོང་ག་ཤུ་དག་པུ་ཙེ་ཤེལ། །ཤུག་པ་པ་ཏ་འབྲས་བུ་གསུམ། །སེར་བོ་གཉིས་དང་ཐལ་ཏྲེས་གཉིས། །ནིམ་པ་ཙནྡན་
པི་པི་ལིང་། །ཤིང་མངར་སླེ་ཏྲེས་བེ་ཤ་ལ། །དུག་མོ་ཡུངས་དང་པུ་ཙེ་ཤེལ། །རྩ་མཁྲིས་མུར་བ་བ་ཤ་ཀ །ཉེའུ་ཤིང་བུ་ག་པ་ཏོ་ལ། །གླ་སྒང་བྱི་ཚེར་ཀྱི་ལྕེ་བ། །སྐྱུ་རུའི་ཁུ་བ་ཉིས་འགྱུར་དང་། །དེ་རྣམས་མར་གྱི་བརྒྱད་འགྱུར་ཆུར། །བསྐོལ་བའི་ཏིག་ཏ་ཆེན་པོ་སྟེ། །ཡོན་ཏན་

ཡང་ནི་སྔར་བས་ལྷག །ཅེས་བྱ་བ་ལ། ལོ་མ་བདུན་པ་ལ་སོགས་པའི་སྨན་ལྡེ་གུར་བྱས་པ་དང་། སྐྱུ་རུ་རའི་ཁུ་བ་ཉིས་འགྱུར་དང་། མར་གྱི་བརྒྱུད་འགྱུར་གྱི་ཆུའི་ནང་དུ་བསྐོལ་བའི་སྨན་མར་ནི་ཏིག་ཏ་ཆེན་པོའི་སྨན་མར་ཞེས་བྱ་སྟེ། དེའི་ཡོན་ཏན་ཡང་སྔར་སྨོས་
པའི་ཏིག་ཏའི་སྨན་མར་བས་ཡོན་ཏན་ཆེ་བ་ཡིན་ནོ། །ལོ་མ་བདུན་པ་ནི་སབ་ཏ་ལའོ། །པར་པ་ཏ་ནི་ལྡུམ་བུ་སྐྲ་བཟངས་སོ། །སེར་པོ་རྣམས་གཉིས་ནི་ཡུང་བ་དང་སྐྱེར་པའོ། །ཐལ་ཏྲེས་གཉིས་ནི་ཤ་རི་པ་དཀར་ནག་གཉིས་སོ། །པི་པི་ལིང་གཉིས་ནི་པི་པི་ལིང་དང་། ཧ་ཏི་པི་པི་ལིང་
ངོ་། །བད་ཀན་ལས་གྱུར་ནིམ་པ་དང་། །ལོ་མ་བདུན་པ་ཙི་ཏྲ་ཀ །རུ་རྟ་དོང་གྲ་ཚ་བ་གསུམ། །པི་ལ་ཡ་ཡི་མར་བླུད་ཕན། །ཞེས་བྱ་བལ། བད་ཀན་ལས་གྱུར་པའི་མཛེ་ནད་ལ་ནི་ནིམ་པ་ལ་སོགས་པའི་སྨན་ལྡེ་གུར་བྱས་པ་དང་། མར་ཚུལ་བཞིན་དུ་བསྐོལ་བ་བླུད་ན་ཕན་ནོ།
ཀུན་ལ་གོ་བྱེའི་མར་རམ་ནི། །ཡུངས་དཀར་དུ་བ་རའི་མར་བླུད། །ཅེས་བྱ་བ་ལ། མཛེ་ནད་ཐམས་ཅད་ལ་གོ་བྱེ་ཞེས་པ་བསེ་ཤིང་གི་འབྲས་བུ་བཙིར་བའི་མར་རམ། ཡུངས་ཀར་གྱི་མར་རམ། དུ་བར་བཙིར་བའི་མར་བླུད་ན་ཕན་ནོ། །བྱི་དང་ག་དང་ཨ་ཀ་རུ། །གོ་བྱེའི་ལྡེ་གུ་མར་
བསྐོལ་བླུད། །ཅེས་བྱ་བ་ལ། ཡང་ན་མཛེ་ནད་ཐམས་ཅད་ལ་སྲིན་སྨན་བྱི་དང་ག་དང་། ཨ་ཀ་རུ་དང་། གོ་བྱེ་བཏགས་པའི་ལྡེ་གུ་དང་བསྐོལ་བའི་སྨན་མར་བླུད་དོ། །དོང་གའི་རྩ་བ་དག་དང་མར། །ལན་བརྒྱའི་བར་བསྐོལ་མར་ཡང་བླུད། །སེང་ལྡེང་བསྐོལ་བའི་ཆུ་བསྟེན་ན། །མཛེ་
ནད་མྱུར་དུ་སེལ་བར་བྱའོ། །ཅེས་བྱ་བ་ལ། དོང་གའི་རྩ་བ་ལྡེ་གུར་བྱས་པ་དང་། མར་གཉིས་ལན་དུ་མའི་བར་དུ་བསྐོལ་བ་བླུད་ལ། སེང་ལྡེང་བསྐོལ་བའི་ཆུ་འཐུངས་ན་མཛེ་ནད་ཐམས་ཅད་མྱུར་དུ་སེལ་བར་བྱེད་དོ། །འདི་དག་ཉིད་ཀྱིས་ཅི་རིགས་པར། །སྣུམ་ཆོས་བསྐུ་བ་བྱས་པའང་
ཕན། །ཞེས་བྱ་བ་ལ། བཤད་མ་ཐག་པའི་སྣུམ་དེ་དག་གིས་ནད་གཞི་ཇི་ལྟ་བ་ལས། ཅི་རིགས་པས་སྣུམ་གྱི་ཆོ་ག་བྱས་པ་དང་། བསྐུ་བ་བྱས་ན་ཡང་ཕན་ནོ། །སྣུམ་གྱིས་ཞེན་ལ་མེད་དབལ་གྱི། །སྐབས་སུ་བཤད་པའི་སྦྱར་སྨན་གཏང་། །ཞེས་བྱ་བ་ལ། མཛེ་ནད་ཀྱིས་ཐེབས་པ་

དེ་ལུས་སྣུམ་གྱིས་ཁེབས་པར་བྱས་ནས། མེ་དབལ་གསོ་བའི་སྐབས་སུ་བཤད་པའི་བཀྲུ་སྨན་དང་སྐྱུག་སྨན་བཏང་བས་སྦྱར་བར་བྱའོ། །དཔྲལ་བ་ལག་པ་རྐང་པ་ལས། །འདི་ལ་གཏར་ག་གདབ་པར་བྱ། །ཞེས་བྱ་བ་ལ། ཡང་ནད་པ་དེ་ལ་ཉམས་སྟོབས་ཀྱི་ཚུལ་ནས་དཔགས་ཏེ་
དཔྲལ་བ་ལ་སོགས་པར་གཏར་ག་གདབ་ཅིང་ཁྲག་དབྱུང་བར་བྱའོ། །མཛེ་ནད་ཚབས་ཆུང་ཞལ་ཞལ་གདབ། །རྭ་སོགས་ཀྱིས་ཀྱང་ཁྲག་དབྱུང་བྱ། །ཞེས་བྱ་བ་ལ། མཛེ་ནད་ཅུང་ཟད་ཀྱིས་བཏབ་པ་ལ་ནི་གཙགས་བུས་ཞལ་ཞལ་གདབ་ཅིང་ཁྲག་དབྱུང་བར་བྱའོ། །ནད་
དམིགས་ཀྱི་ཚུལ་ལས་དཔགས་ཏེ། གཏར་ག་གདབ་པའི་ལེའུ་ལས་འབྱུང་བའི་ཚུལ་དུ་རྔབས་རུ་དང་བསྐུ་བ་ལ་སོགས་པས་ཁྲག་ཕྱུང་ན་ཕན་ནོ། །མཛེ་ནད་འཇོམས་པའི་སྣུམ་གྱིས་ནི། །འདི་ལ་བར་བར་བརྟ་བར་བྱ། །ཁྲག་བྱུང་བཀྲུ་སྨན་གྱིས་སྦྱང་ཞིང་། །ལྟོ་སྟོང་གྱུར་པའི་
མཛེ་ཅན་ལ། །ཅི་ནས་རླུང་གིས་འདི་ཡི་ནི། །ལུས་ནི་འཇིགས་པ་དེ་ལྟར་བྱ། །ཞེས་བྱ་བ་ལ། ཡང་མཛེ་ཅན་དེ་ལ་མཛེ་ནད་འཇོམས་ཤིང་སེལ་བར་བྱེད་པའི་སྣུམ་གོ་བྱེ་དང་། ཡུངས་ཀར་གྱི་མར་ལ་སོགས་པས་བར་དུ་ཉམས་བརྟ་ཞིང་ཚིམ་པར་བྱས་ན། དེ་སྔར་བྱུང་བ་དང་། བཀྲུ་
སྨན་གྱིས་སྦྱང་བར་གྱུར་པས་རླུང་བརྟ་བར་བྱེད་པའི་རྒྱུས་ལུས་ལ་གནོད་ཅིང་འཇིག་པར་བྱེད་པར་མི་འགྱུར་རོ། །ནིམ་པ་སླེ་ཏྲེས་བ་ཤ་ཀ །འབྲས་བུ་གསུམ་དང་པ་ཏོ་ལ། །ཀཎྜ་ཀ་རི་ཀ་རཉྗ། །ལྡེ་གུ་ཆུ་དང་མར་བསྐོལ་བ། །སྨན་མར་རྡོ་རྗེ་ཅན་ཞེས་བྱ། །དེས་ནི་མེ་དབལ་མིག་སེར་
རིམས། །ཁྲག་ནད་ལུད་པ་མཛེ་ནད་འཇོམས། །ཞེས་བྱ་བ་ལ། ནིམ་པ་ལ་སོགས་པའི་སྨན་ལྡེ་གུར་བྱས་པ་བསྐོལ་བའི་ཆུ་དང་མར་དུ་བསྐོལ་བའི་སྨན་མར་དེ་ནི་སློབ་དཔོན་གྱིས་རྡོ་རྗེ་ཅན་ཞེས་བྱའོ་ཞེས་བཤད་དེ། དེ་བླུད་པས་ན་མེ་དབལ་ལ་སོགས་པའི་ནད་སེལ་བར་བྱེད་དོ། །འབྲས་བུ་
གསུམ་དང་ཚ་བ་གསུམ། །དུར་བྱིད་ཀཎྜ་ཀ་རི་གཉིས། །དན་ད་དོང་ག་པུ་ཙེ་ཤེལ། །ཤུ་དག་བོང་ང་ཙི་ཏྲ་ཀ །པ་ཐར་བཅས་པ་ཞོ་གཉིས་གཉིས། སྣུ་ཧའི་འོ་མ་སྲང་གཅིག་དང་། །བྲེ་གང་མར་བསྐོལ་ལྟོ་སྲ་བའི། །སྣུམ་བཅོས་བཀྲུ་སྨན་དག་ཏུ་སྦྱར། །མཛེ་དང་ཤ་

བཀྲ་མཆེར་པ་དང་། །རྒྱུ་རླུགས་རྡེའུ་འགགས་སྐྲན་འཇོམས་བྱེད། །འདི་ནི་རྡོ་རྗེ་ཆེན་པོར་བཤད། །ཅེས་བྱ་བ་ལ། འབྲས་བུ་གསུམ་ལ་སོགས་པའི་སྨན་སྣ་རེ་རེ་ཞིང་ཞོ་གཉིས་གཉིས་ཀྱི་ཚད་དུ་བྱས་ལ། སྣུ་ཧ་ཞེས་བྱ་བ་སུ་དྷ་ཀྵི་རའི་འོ་མ་སར་པ་སྲང་གཅིག་
དང་བཏགས་ཏེ་ལྡེ་གུར་བྱས་ཏེ། ལྡེ་གུ་དེ་དང་མར་བྲེ་གང་བསྐོལ་བའི་སྨན་མར་དེ་ནི་ལྟོ་སྲ་བ་དག་ལ་སྣུམ་ཆོས་བྱ་ཞིང་བཏང་བ་དང་བཀྲུ་སྨན་གཉི་ག་ཅི་རིགས་པར་སྦྱར་ཞིང་གཏང་བར་བྱ་སྟེ། དེས་མཛེ་ནད་ལ་སོགས་པའི་ནད་ཤིན་ཏུ་གསོ་དཀའ་བ་དག་ཀྱང་སེལ་བར་བྱེད་དོ། །སྨན་མར་དེ་ནི་
རྡོ་རྗེ་ཆེན་པོ་ཞེས་བྱའོ། །ཀཎྜ་ཀ་རི་གཉིས་ནི་ཀཎྜ་ཀ་རི་དང་བྲི་ཧ་ཏིའོ། །དན་ད་བྲེ་བཞི་ཆུ་བྲེ་ནི། །བཅུ་དྲུག་བསྐོལ་བ་དེ་མར་བསྐོལ། །ཀོ་ཤ་ཀ་ཏི་སྲང་གཅིག་བཏང་། །དེ་བླུད་སྟེང་འོག་སྦྱོང་བྱེད་ཡིན། །ཞེས་བྱ་བ་ལ། དན་ད་བྲེ་བཞི་བྲེ་བཅུ་དྲུག་གི་ནང་དུ་བསྐོལ་བ་དེའི་བརྒྱད་ཆ་
ལུས་པར་མར་བྲེ་གང་བསྐོལ་བ་མར་དང་ཀོ་ཤ་ཏ་ཀི་སྲང་གཅིག་ལྡེ་གུར་བྱས་ཏེ་བསྲེས་ལ་དེ་ལས་ཅི་རིགས་པར་བླུད་ན་སྟེང་དང་འོག་ཏུ་སྦྱོང་ཞིང་སློན་པ་དང་ཁྲུས་བྱས་པས་དག་པར་བྱེད་པ་ཡིན་ནོ། །ཨ་པར་ཏ་ཀི་སྲང་བརྒྱད་ཆུ། །བྲེ་བཅུ་དྲུག་བསྐོལ་བརྒྱད་ཆ་ལུས། །ཁུ་བ་དེར་ནི་དེའི་རྩ་བ།
མར་ནི་བྲེ་གང་བསྐོལ་བར་བྱ། །བླུད་བ་དེ་ནི་ཞག་གཅིག་གིས། །བར་དུ་ཆོད་དེ་ལེགས་ཞུ་ནས། །ཁྲེ་རྒོད་རང་སྐྱུར་མར་བསྐོལ་བླུད། །མཛེ་ནད་ཤ་བཀྲ་འབྲས་ཀྱི་ཕྲེང་། །སེལ་ཞིང་བུ་མང་དྲན་འཛིན་འགྱུར། །ཞེས་བྱ་བ་ལ། ཨ་པར་ཏ་ཀི་ནི་རཀྟ་པུཥྤེ་དང་། ཙར་མ་རང་ག་
དང་། རོ་ཧི་ཞེས་བྱ་བ་མེ་ཏོག་དམར་པོ་ཅན་སག་ཏི་ཚོད་པ་ཞིག་ཡོད་པ་ལ་བྱའོ། །ལ་ལ་ནི་སབ་ཏ་ལ་ལ་ཨར་པ་ཏ་ཀི་ཞེས་བྱ་བའོ་ཞེས་ཟེར་རོ། །དེ་སྲང་བརྒྱད་ཆུ་བྲེ་བཅུ་དྲུག་གི་ནང་དུ་བསྐོལ་བ་དེ་ལས་ཆུ་བྲེ་དོ་ལུས་པ་དང་ཁུ་བ་དེའི་ནང་དུ་ཨར་ག་ཏ་ཀི་དེའི་རྩ་བ་ལྡེ་གུར་བྱས་པ་དང་།
མར་བྲེ་གང་བསྐོལ་ལ་མར་དེ་ཞག་གཅིག་གིས་བར་དུ་ཆོད་པའི་ཚུལ་གྱིས་བླུད་ལ་དེ་ལེགས་པར་ཞུ་བར་གྱུར་པ་དང་། ཁྲེ་རྒོད་དམ་ཅི་ཚེའི་ཆན་དང་རང་སྐྱུར་ཀན་ཛི་ཞེས་བྱ་བ་བསྐོལ་བ་བླུད་ན་མཛེ་ནད་ལ་སོགས་པ་སེལ་ཞིང་འཇོམས་པར་བྱེད་པ་དང་དེ་བཞིན་དུ་བུ་ཚ་མང་དུ་འཕེལ་བ་དང་དྲན་པ་

འཛིན་ཅིང་མི་བརྗེད་པར་འགྱུར་རོ། །ནི་ལི་ཏ་ཀའི་ཚིལ་སྦྲང་རྩི། །ཛཱ་ཏིའི་ཁུ་བ་མར་བཅས་པའམ། །སེང་ལྡེང་ཨ་ས་ནའི་ཆུར་བཅས། །དབང་བོ་བསྡམས་བརྟན་མཛེ་ནད་འཇོམས། །ཞེས་བྱ་བ་ལ། དབང་པོ་བསྡམས་ཤིང་ཡུལ་ཐུབ་པ་དང་ནི་ལི་ཀའི་ཚིལ་སྦྲང་རྩི་དང་མེ་
ཏོག་ཛཱ་ཏིའི་ཁུ་བ་དང་བཅས་པ་ཟོས་ན་མཛེ་ནད་འཇོམས་པར་འགྱུར་རོ། །ཡང་ན་ནི་ལི་ཏ་ཀའི་ཚིལ་མར་དང་ཆ་སྙོམས་པ་ཟོས་ན་ཡང་མཛེ་ནད་འཇོམས་པར་འགྱུར་རོ། །ཡང་ན་ནི་ལི་ཏ་ཀའི་ཚིལ་དང་སེང་ལྡེ་ང་དང་ཨ་ས་ན་བསྐོལ་བའི་ཆུ་དང་བཅས་པ་བླུད་ན་ཡང་མཛེ་ནད་འཇོམས་པར་
འགྱུར་རོ། །སཱ་ལུ་ནས་དང་གྲོ་དང་ནི། ཅི་ཚེ་ཁྲེ་དང་མུདྒ་དང་། །སྲན་ཆུང་དང་ནི་ཏུ་ཀ་རའི། །ཚོད་མ་ཁ་བོ་སྐམ་སའི་ཤ། །འབྲས་བུ་གསུམ་དང་པ་ཏོ་ལ། །སེང་ལྡེང་ནིམ་པ་གོ་བྱེ་སྦྱར། །ཆང་ནི་སྨན་དང་སྦྱར་བ་དང་། །དར་བ་སར་པ་ར་དང་བཅས། །བཟའ་དང་བཏུང་
བ་མཛེ་ལ་ཕན། །སྐྱུར་ཚ་ལན་ཚྭ་ཅན་རྣམས་གནོད། །ཅེས་བྱ་བ་ལ། སཱ་ལུ་ནི་སཱ་ལུ་རྩ་སྣར་ལ་སོགས་པ་སྟེ། དེ་དང་ནས་དང་སྐམ་སའི་ཤའི་བར་གྱི་ཁ་ཟས་འབྲས་བུ་ལ་སོགས་པ་དང་སྦྱར་བ་བཟའ་བར་བྱ་བ་དང་། །དེ་བཞིན་དུ་བཏུང་བར་ནི་ཆབ་ཀྱི་ནང་དུ་སྨན་བཅུག་པ་ལ་སོགས་
པ་བླུད་ན་ཕན་ནོ། །སྐྱུར་བ་དང་ཚ་བ་དང་ལན་ཚྭའི་བག་དང་ལྡན་པའི་བཟའ་བ་དང་། བཏུང་བ་ནི་དེ་གནོད་པ་ཡིན་པར་ཤེས་པར་བྱའོ། །ཞོ་དང་འོ་མ་རླན་ཅན་ཤ། །བུ་རམ་མ་ཤ་ཏིལ་མར་སྤང་། །ཞེས་བྱ་བ་ལ། ཞོ་ལ་སོགས་པ་ནི་མཛེ་ཅན་གྱིས་ཤིན་ཏུ་སྤང་བར་བྱའོ། །པ་ཏོ་ལའི་
རྩ་འབྲས་བུ་གསུམ། །པི་ཤ་ལ་ནི་རེ་རེ་ནི། །ཆ་གསུམ་གྱིས་དབྲི་ཞོ་ཕྱེད་གསུམ། །ཀྱི་ལྕེ་བ་དང་པུ་ཙེ་ཤེལ། །ཞོ་ཕྱེད་དོང་གྲ་བཞི་ཆར་བཅས། །དེ་ལྟར་སྲང་གཅིག་བརྡུངས་པ་དག །བསྐོལ་བའི་ཆུ་ནི་འཐུངས་གྱུར་ན། །ནད་ཀྱི་ཚོགས་ནི་སྦྱོང་བར་བྱེད། །སྨན་དེ་ཞུ་ནས་
སྐམ་ས་ཡི། །རི་དགས་བྱ་ཡི་ཤ་ཁུ་དག །འབྲས་རྙིང་ཆན་དང་སྦྱར་བ་བཟའ། །སྦྱོར་འདི་ཞག་དྲུག་བསྟེན་ན་ནི། །མཛེ་ནད་ཀུན་དང་སྐྲངས་པའི་ནད། །ཕོ་བའི་ནད་དང་གཅིན་སྲི་དང་། །གཟུགས་འཁུམས་གསོ་དཀའི་ནད་རྣམས་དང་། །སྙིང་ནད་ཆུ་སོར་གཟིར་རིམས་

སེལ། །ཞེས་བྱ་བ་ལ། པ་ཏོ་ལའི་རྩ་བ་ལ་སོགས་པའི་སྨན་སྣ་རེ་ཞིང་སུམ་ཆ་སུམ་ཆ་དབྲི་བའི་ཞོ་ཕྱེད་སུམ་ཆ། དེས་ན་སྨན་ལྔ་པོ་དག་སྣ་རེ་ཞིང་ཆ་གསུམ་པས་ཕྲི་བའི་ཞོ་ཕྱེད་དང་གཉིས་ཏེ། དེ་ལ་ད་ན་དྲུག་ལ་ཞོ་ཕྱེད་ཡོད་པས་དེ་ལ་པ་ཏོ་ལ་ཞོ་ཕྱེད་དང་
གཉིས། དེ་ལས་ཞོ་ཕྱེད་ཀྱི་སུམ་ཆ་ད་ན་གཉིས་ཀྱིས་དབྲི། དེས་ན་པ་ཏོ་ལ་ད་ན་བཅོ་བརྒྱད་ལས་བཅུ་དྲུག་ཏུ་བྱ། དེ་བཞིན་དུ་ཨ་རུ་ར་དང་། སྐྱུ་རུ་ར་དང་། བ་རུ་ར་དང་བི་ཤ་ལ་ཡང་ད་ན་ཞོ་གཉིས་བྲི་སྟེ། ད་ན་བཅུ་དྲུག་བཅུ་དྲུག་བྱ། དེ་ལྟར་བཅུ་དྲུག་ཕྲག་ལྔ་པ་ད་ན་
བརྒྱད་ཅུ་ཡོད་ལ། ཀྱི་ལྕེ་བ་དང་པུ་ཙེ་ཤེལ་གཉིས་ཆ་གཅིག་གིས་བསྐྱེད་པ་དང་དོང་གྲ་བཞི་ཆ་དང་བཅས་པ་དེ་ལྟར་སྦྱར་ན་ཀྱི་ལྕེ་བ་ཞོ་ཕྱེད་དེ། ད་ན་དྲུག་པུ་ཙེ་ཤེལ་ཡང་ཞོ་ཕྱེད་དེ། ད་ན་དྲུག་དང་གྲ་བཞི་ཆ་སྟེ། ད་ན་བཞི་སྟེ་སྤྱིར་ད་ན་དགུ་བཅུ་རྩ་དྲུག་ལ་སྤྱིར་སྲང་དྲུག་ཡོད་དོ། སྨན་
གཅིག་པ་དེ་བརྡུངས་ལ་ཕྱེ་མར་བྱས་ཏེ་བསྐོལ་བའི་ཆུ་འཐུངས་ན་ནད་ཀྱི་ཚོགས་སྦྱོང་ཞིང་དག་པར་བྱེད་ལ་སྨན་དེ་ཞུ་ནས་སྐམས་རི་དགས་དང་བྱའི་ཤ་ཁུ་དང་འབྲས་རྙིང་པའི་ཆན་ཟོས་ཤིང་སྤྱོད་ལ་སྤྱོད་ལ་སྦྱོར་བ་འདི་ཞག་དྲུག་གི་བར་བསྟེན་ཞིང་ལོངས་སྤྱད་པར་གྱུར་ན་མཛེ་ནད་ལ་སོགས་པ་སེལ་བར་འགྱུར་རོ།
དེ་བཞིན་དུ་རྟག་པའི་རིམས་ལ་སོགས་པའི་རིམས་ཐམས་ཅད་ཀྱང་སེལ་བར་འགྱུར་རོ། །བྱི་དང་ག་ཡི་སྙིང་པོ་དང་། །ཨ་རུ་ར་དང་སྐྱུ་རུ་ར། །སྲང་རེ་དན་ད་སྲང་གསུམ་དང་། །བུ་རམ་སྲང་ནི་བཅུ་གཉིས་དག །རི་ལུར་བྱས་འདི་བྱིན་གྱུར་ན། །མཛེ་དང་ཤ་བཀྲ་དབུགས་མི་བདེ།
ལུད་པ་དམུ་རྫིང་གཞང་འབྲུམ་དང་། །གཅིན་ནད་མཆེར་པའི་རྨེན་བུའི་ནད། །ཐོར་བུ་སྲིན་ནད་སྐྲན་རྣམས་འཇོམས། །གྲུབ་པའི་སྦྱོར་འདི་གནོད་སྦྱིན་ནི། །ནོར་བུ་བཟང་པོས་དགེ་སློང་ཞིག །སྲོག་འདོར་ཉིད་ལ་བཤད་ཅེས་གྲགས། །ཞེས་བྱ་བ་ལ། བྱི་དང་གའི་སྙིང་པོ་ལ་
སོགས་སྤྱིར་སྲང་རེ་རེ་སྲང་གསུམ། །དན་ད་གཅིག་པུ་སྲང་གསུམ། བུ་རམ་སྲང་བཅུ་གཉིས་ཏེ། དེ་དག་སྤྱིར་རི་ལུ་བྱས་པ་དབང་པོ་ཐུལ་ཞིང་བསྡམས་པའི་ནད་ལ་བྱིན་ན། མཛེ་ནད་ལ་སོགས་པ་སེལ་བར་བྱེད་དོ། །སྦྱོར་བ་འདི་ནི་རབ་ཏུ་གྲུབ་པར་གྲགས་པ་ཡིན་ནོ། །གནོད་སྦྱིན་

ནོར་བུ་བཟང་པོས་དགེ་སློང་ཞིག་སྲོག་འདོར་དུ་ཉེ་བའི་ཚེ་སྦྱོར་བ་འདི་བཤད་ཅིང་བསྟན་ཏོ་ཞེས་གྲགས་ཏེ། གྲགས་ཞེས་བྱ་བ་ནི་དེ་སྐད་ཟེར་རོ། །ཞེས་ལུང་ལས་འབྱུང་བ་སྟོན་པ་ཡིན་ནོ། །ཐོར་བུ་ནི་ཚོགས་དག་ཏུ་རྩ་བ་ཆེར་འཆོས་པའི་འབྲས་ནད་ལ་བྱའོ། །ཏིག་ཏ་ནིམ་པ་འབྲས་བུ་
གསུམ། །ཤུག་པ་བོང་ང་པི་པི་ལིང་། །མུར་བ་དང་ནི་པ་ཏོ་ལ། །སེར་པོ་རྣམ་གཉིས་པུ་ཙེ་ཤེལ། །ཤུ་དག་ཨིནྡྲ་བ་རུ་ནི། །དུག་མོ་ཡུངས་བཅས་ཆ་སྙོམས་པ། །དན་ད་དུར་བྱིད་བྲ་མ་ཤ་མི། །ཕྱི་མ་བཞིན་དུ་ཉིས་འགྱུར་བྱས། །ཕྱེ་མ་སྦྲང་རྩི་མར་བཅས་ཟོས། །མཛེ་
དང་ཟ་གུ་ཚོར་བ་ཆུང་། །སེལ་བའི་སྨན་གྱི་མཆོག་ཡིན་ནོ། །ཞེས་བྱ་བ་ལ། ཏིག་ཏ་ལ་སོགས་པའི་སྨན་ཆ་མཉམ་པོར་བྱས་ལ། དན་ད་དང་དུར་བྱིད་དང་བྲ་མ་ཤ་མི་ཞེས་བྱ་བ་ཕྱི་མ་བཞིན་ཉིས་འགྱུར་དུ་བྱས་ཏེ། དེས་ན་གལ་ཏེ་ཏིག་ཏ་ཞོ་གཅིག་བྱེད་ན་དན་ད་ཞོ་གཉིས་དུར་བྱིད་ཞོ་
བཞི་བྲམ་ཤ་མི་ཞོ་བརྒྱད་དང་སྦྱར་རོ། །སྨན་དེ་དག་ཕྱེ་མར་ཞིབ་ཏུ་བཏགས་པ་སྦྲང་རྩི་དང་སྦྱར་བ་རྟག་ཏུ་ཟོས་ན་མཛེ་ནད་ལ་ཕན་ནོ། །འབྲས་བུ་གསུམ་དང་པི་པི་ལིང་། །བྱི་དང་ག་དང་སྦྲང་རྩི་ནི། །ཏིལ་མར་མར་སྦྱར་ལྡེ་གུའམ། །ཞེས་བྱ་བ་ལ། འབྲས་བུ་གསུམ་ལ་
སོགས་པའི་ལྡེ་གུ་སྦྱར་བ་ཟོས་ན་ཡང་མཛེ་ནད་ལ་ཕན་ནོ། །ཀ་ཀ་ཨུ་དུམྦཱ་ར་དང་། །ནིམ་པ་གླ་སྒང་བྱི་དང་ག །ཚ་བ་གསུམ་གྱི་ལྡེ་གུ་ནི། །དུག་མོ་ཡུངས་ཀྱི་ཁུ་བར་བཅས། །བླུད་ན་ལྤགས་ནད་ཐམས་ཅད་འཇོམས། །ཞེས་བྱ་བ་ལ། །ཀ་ཀ་ཨུ་དུམྦཱ་ར་ལ་སོགས་པའི་ལྡེ་
གུ་དུག་མོ་ཡུངས་བསྐོལ་བའི་ཁུ་བ་དང་སྦྱར་ཏེ། བླུད་ན་མཛེ་ནད་དུ་གཏོགས་པའི་བགས་པའི་སྐྱོན་ཐམས་ཅད་སེལ་བར་བྱེད་དོ། །ཀ་ཀ་ཨུ་དུམྦཱ་ར་ནི་ཕལ་གུ་སྟེ། ཕྲེད་དུ་ཞེས་བྱའོ། །དུག་མོ་ཡུངས་དང་ཙི་ཏྲ་ཀ །ནིམ་པ་ཐང་ཤིང་སེང་ལྡེང་དང་། །ལོ་མ་བདུན་པ་ཨ་ས་ན། །
ཁུ་བ་སྐོལ་མར་དང་ཨ་རུ་ར། །སྦྲང་རྩི་ལྡན་ཟོས་མཛེ་ནད་འཇོམས། །ཞེས་བྱ་བ་ལ། དུག་མོ་ཡུངས་ལ་སོགས་པའི་སྨན་བསྐོལ་བའི་ཁུ་བའི་ནང་དུ་ཨ་རུ་ར་དང་སྦྲང་རྩི་དང་མར་བཏབ་སྟེ་ཟོས་ན་མཛེ་ནད་ཐམས་ཅད་སེལ་བར་འགྱུར་རོ། །སེང་ལྡེང་ནིམ་པ་སླེ་ཏྲེས་དང་། །པ་ཏོ་ལ་

དང་བྱི་ཚེར་བསྐོལ། །སེང་ལྡེང་ལ་སོགས་ལྔ་པ་སྟེ། །ཁྱབ་འཇུག་གིས་ནི་ལྷ་མིན་བཞིན། །མཛེ་ནད་འཕྲལ་དུ་འཇོམས་པར་བྱེད། །ཅེས་བྱ་ལ། སེང་ལྡེང་ནས་བྱི་ཚེར་བར་སྨན་ལྔ་པོ་བསྐོལ་བའི་ཁུ་བ་ནི་སེང་ལྡེང་ལྔ་པ་ཞེས་བྱ་སྟེ། དེས་ནི་མཛེ་
ནད་ཀྱི་རྣམ་པ་འཕྲལ་དུ་འཇོམས་ཤིང་སེལ་བར་བྱེད་དོ། །དཔེར་ན་ལྷ་ཆེན་པོ་ཁྱབ་འཇུག་གིས་ལྷ་མ་ཡིན་རྨེག་མེད་པར་བྱེད་པ་དང་འདྲའོ། །སྐྱེར་པ་ནིམ་པ་སེང་ལྡེང་གི །ཤུན་ལྤགས་བསྐོལ་བས་མཛེ་ནད་སེལ། །ཞེས་བྱ་བ་ལ། སྐྱེར་པ་ལ་སོགས་པ་བསྐོལ་བའི་ཁུ་བ་བླུད་
པས་ཀྱང་མཛེ་ནད་སེལ་བར་བྱེད་དོ། །སྐྱེར་པ་ནིམ་པ་འབྲས་བུ་གསུམ། །པ་ཏོ་ལའི་རྩ་པུ་ཙེ་ཤེལ། །ཤུ་དག་བཅོད་ནི་བསྐོལ་བ་ཡིས། །དམ་ཆོས་ལ་བརྟེན་འཁོར་བ་ལྟར། །ཁྲག་མཁྲིས་ལས་གྱུར་མཛེ་ནད་གཅོད། །སྨན་འདི་ཉིད་དང་བ་ཡི་མར། །བསྐོལ་བས་རླུང་གྱུར་མཛེ་
ནད་རྣམས། །མཆོག་ཏུ་སེལ་བར་བྱེད་པ་ཡིན། །ཞེས་བྱ་བ་ལ། སྐྱེར་བ་ལ་སོགས་པ་སྨན་བསྐོལ་བའི་ཁུ་བ་བླུད་ན་ཡང་ཁྲག་དང་མཁྲི་པ་ལས་གྱུར་པའི་མཛེ་ནད་སེལ་བར་བྱེད་དོ། །དཔེར་ན་དམ་པའི་ཆོས་ལ་ལེགས་པར་བརྟེན་ཅིང་བསྒོམས་པས་འཁོར་བའི་འཆིང་བ་གཅོད་པ་དང་འདྲའོ། །
ཡང་སྐྱེར་པ་ལ་སོགས་པའི་སྨན་འདི་དག་ཉིད་དང་བའི་མར་བསྐོལ་བའི་སྨན་མར་བླུད་ན་རླུང་ལས་གྱུར་པའི་མཛེ་ནད་སེལ་བར་གྱུར་རོ། །སེང་ལྡིང་ནིམ་པ་སྐྱེར་པ་དང་། །སླེ་ཏྲེས་ཐང་ཤིང་སྣ་རེར་བསྐོལ། །ཞེས་བྱ་བ་ལ། དེ་བཞིན་དུ་སེང་ལྡེང་ལ་སོགས་པའི་སྨན་སྣ་རེ་རེ་བསྐོལ་བའི་ཁུ་
བའམ་སྨན་དེ་དག་མར་དུ་བསྐོལ་བ་བླུད་ན་ཡང་མཛེ་ནད་ལ་ཕན་ནོ། །པ་ཐ་སྐྱེར་པ་ཙི་ཏྲ་ཀ །དན་ད་དུག་ཡུངས་པུ་ཙེ་ཤེལ། །བ་གཅིན་ཡང་ན་ཆུ་དྲོན་བཅས། །ཟླ་བ་གཅིག་བླུད་མཛེ་ནད་དང་། །གཞང་འབྲུམ་ཟ་ཁུ་སྐྲན་ནད་དང་། །སྐྱ་རྦབ་མ་ཞུ་སྲིན་ནད་འཇོམས། །ཞེས་བྱ་བ་ལ།
པ་ཏོ་ལ་ལ་སོགས་པའི་སྨན་གྱི་ལྡེ་གུ་བ་གཅིན་དང་སྦྱར་བའམ། ཆུ་དྲོན་དང་སྦྱར་སྟེ་ཟླ་བ་གཅིག་གི་བར་དུ་བླུད་ན་མཛེའི་ནད་ལ་སོགས་པ་འཇོམས་པར་བྱེད་དོ། །རྒྱ་སྐྱེགས་དན་དའི་འབྲས་བུ་གསུམ། །མུར་བ་པ་ཏ་ཙི་ཏྲ་ཀ །ཨ་པ་མར་ག་བྱི་དང་ཀ །ལོ་མ་བདུན་པ་ཚ་བ་གསུམ། །བཙོད་

དང་སྐྱེར་པ་བ་ཤ་ཀ །ནིམ་པ་ཐང་ཤིང་རྩ་བ་ལྔ། །གཉིས་པོ་ཕྱེ་མ་བ་གཅིན་སྦྱར། །ཟླ་བ་གཅིག་འཐུངས་ཕན་ཟས་བཟའ། །མཛེ་ཡི་ནད་ཀུན་འཇོམས་པར་བྱེད། །ཅེས་བྱ་བ་ལ། རྒྱ་སྐྱེགས་ལ་སོགས་པ་ནས་རྩ་བ་ཆེན་པོ་ལྔ་དང་། ཆུང་ངུ་ལྔ། གཉིས་པོའི་བར་ཕྱེ་མར་བྱས་པ་དང་
བ་གཅིན་དུ་སྦྱར་ཏེ་ཟླ་བ་གཅིག་གི་བར་དུ་བླུད་ཅིང་ཕན་ཞིང་འཕྲོད་པའི་ཟས་ཟོས་ནས་མཛེའི་ནད་ཐམས་ཅད་སེལ་བར་བྱེད་དོ། །སྐྱེར་པ་པི་པི་ལིང་དོང་གྲ། །བྱི་དང་ག་དང་དོ་བ་རི། །ཙི་ཏྲ་ཀ་དང་ཏ་བྱ་རྣམས། །གོ་རིམས་བཞིན་དུ་ཆ་རེས་བསྐྱེད། །བ་གཅིན་སྦྱར་བའམ་རི་ལུ་ནི། །བྱིན་
ན་མི་བཟད་མཛེ་ཡང་འཇོམས། །ཞེས་བྱ་བ་ལ། སྐྱེར་པ་ལ་སོགས་པ་གོ་རིམས་བཞིན་དུ་ཆ་རེས་བསྐྱེད་པའི་ཕྱེ་མ་བ་གཅིན་དང་སྦྱར་ཏེ་བླུད་པའམ། ཡང་ན་བསྐོལ་ཏེ་རི་ལུར་བྱས་པ་བྱིན་ན་མཛེ་ནད་གསོ་དཀའ་བའམ་མི་བཟད་པ་ཡང་འཇོམས་ཤིང་སེལ་བར་བྱེད་དོ། །ཚ་བ་གསུམ་དང་
འབྲས་བུ་གསུམ། །ཏིལ་དང་གོ་བྱེའི་ཕྱེ་མ་ནི། །མར་དང་སྦྲང་རྩི་ཁ་རར་སྦྱར། །རི་ལུར་བྱས་པ་ཆ་བདུན་པས། །མཛེ་ཡི་ནད་རྣམས་འཇོམས་བྱེད་ཅིང་། །བཅུད་ཀྱིས་ལན་དང་རོ་ཙར་འགྱུར། །ཞེས་བྱ་བ་ལ། ཚ་བ་གསུམ་ཆ་གཅིག །འབྲས་བུ་གསུམ་ཆ་གཉིས་པ།
ཏིལ་གསུམ་པ། གོ་བྱེ་བཞི་པ། མར་ལྔ་པ། སྦྲང་རྩི་དྲུག་པ། ཁ་ར་བདུན་པ་སྟེ། དེ་ལྟ་བུའི་ཆ་བདུན་མཉམ་པོར་བྱས་པའི་སྨན་འདིས་ནི་མཛེའི་ནད་ཐམས་ཅད་འཇོམས་པར་བྱེད་ཅིང་བཅུད་ཀྱིས་ལེན་དུ་འགྱུར་ཞིང་རོ་ཙ་བ་དང་སྟོབས་སྐྱེད་པར་འགྱུར་བ་ཡིན་ནོ། སོ་མ་ར་ཛ་ཙི་
ཏྲ་ཀ །སྐྱེར་པ་དུ་བ་རའི་རུས་པ། །གོ་བྱེ་སྲིན་སྨན་འབྲས་བུ་གསུམ། །བསྟེན་ན་མཛེ་ནད་མ་ལུས་འཇོམས། །ཞེས་བྱ་བ་ལ། སོ་མ་ར་ཛ་ལ་སོགས་པའི་སྨན་བུ་རམ་དང་རི་ལུར་བྱས་པ་བསྟེན་ཞིང་ཟོས་ན་མཛེ་ནད་མ་ལུས་པར་འཇོམས་ཤིང་སེལ་བར་བྱེད་དོ། །སོ་མ་ར་ཛ་བྱི་དང་
ག །གོ་བྱེ་ཙི་ཏྲ་བ་ར་ཧི། །ཨ་རུ་ར་དང་ལང་ག་ལི། །ཏིལ་ནག་པོ་དང་པི་པི་ལིང་། །བུ་རམ་དང་ནི་རི་ལུར་བྱས། །མཛེ་ཡི་ནད་རྣམས་འཇོམས་པར་བྱེད། །ཅེས་བྱ་བ་ལ། སོ་མ་ར་ཛ་ལ་སོགས་པའི་ཕྱེ་མ་གཅིག་ཏུ་བསྡུས་ཏེ་བུ་རམ་དང་རི་ལུར་བྱས་པ་གང་ཡིན་པ་དག་གིས་

ཀྱང་མཛེའི་ནད་རྣམས་འཇོམས་པར་བྱེད་དོ། །འདིས་སོ་མ་ར་ཛ་ལ་སོགས་པའི་ཕྱེ་མ་ཇི་སྙེད་ཡོད་པའི་བུ་རམ་ཉིས་འགྱུར་དང་རི་ལུར་བྱས་ཏེ། དེ་ཡང་། ཚད་ནི་རྣམ་པར་མ་བཤད་པར། །ཕྱེ་མ་བུ་རམ་ཉིས་འགྱུར་གཞུག །ཅེས་སྨོས་པ་ཡིན་ནོ། །
ལང་ག་ལི་ནི་བི་ཤ་ལའོ། །སོ་མ་ར་ཛ་པི་པི་ལིང་། །དེ་ཡི་རྩ་བ་བྱི་དང་ག །སྙིང་པོ་ལྕགས་རྐྱག་སྐྱུ་རུ་ར། །ཏིལ་མར་ལྡེ་གུས་མཛེ་ནད་འཇོམས། །ཞེས་བྱ་བ་ལ། སོ་མ་ར་ཛ་ལ་སོགས་པ་དང་ཏིལ་མར་དང་བུ་རམ་རི་ལུ་བྱས་པ་བྱིན་ན་ཡང་ཕན་ནོ། །ཨ་རུ་ར་དང་
གོ་བྱེ་ཏིལ། །བུ་རམ་རི་ལུས་མཛེ་ནད་འཇོམས། །ཞེས་བྱ་བ་ལ། ཡང་ན་ཨ་རུ་ར་ལ་སོགས་པའི་རི་ལུ་བྱིན་ན་ཡང་མཛེ་ནད་ལ་ཕན་ནོ། །སོ་མ་ར་ཛ་བྱི་དང་ག །བུ་རམ་རི་ལུར་བྱས་པའང་ཕན། །ཞེས་བྱ་བ་ལ། སོ་མ་ར་ཛ་དང་བུ་རམ་རི་ལུར་བྱས་ན་ཡང་ཕན་ནོ། །སེང་ལྡེང་
བྲག་ཞུན་བྱི་དང་ག །སྦྲང་རྩི་མར་དང་ལྡན་ཟ་ཞིང་། །ཕན་དང་རན་པར་ཟོས་ན་ནི། །འབྲུམ་ཕྲན་ཤ་བཀྲ་ཤུ་བ་འཇོམས། །ཞེས་བྱ་བ་ལ། སེང་ལྡེང་གི་ཕྱེ་མ་དང་བྲག་ཞུན་དང་བྱི་དང་ག་མར་དང་སྦྲང་རྩི་དང་སྦྱར་བ་ཟ་ཞིང་མཛེ་ལ་ཕན་པའི་ཁ་ཟས་འབྲུམ་ཕྲན་ལ་སོགས་པ་འཇོམས་པར་
བྱེད་པ་ཟོས་ན་ཡང་མཛེ་ནད་ལ་ཕན་ནོ། །ཁ་ར་ལྕགས་ཕྱེ་བྱི་དང་ག །ཙི་ཏྲ་ཀ་དང་སྐྱུ་རུ་ར། །པི་པི་ལིང་གི་ལྡེ་གུ་ཡིས། །མཛེ་ནད་ཤིན་ཏུ་གསོ་དཀའ་འཇོམས། །ཞེས་བྱ་བ་ལ། ཁ་ར་ལ་སོགས་པའི་སྨན་གྱི་ལྡེ་གུ་བྱིན་ན་ཡང་ཤིན་ཏུ་གསོ་དཀའ་ཞིང་ལྕི་བའི་མཚན་ཉིད་འཇོམས་སོ། །
གླ་སྒང་ཚ་གསུམ་འབྲས་བུ་གསུམ། །རྩ་བ་ལྔ་ཉིད་ཐང་ཤིང་བཙོད། །ནིམ་པ་ཤིང་ཚ་ལོ་མ་བདུན། །ཤིང་ཚ་ཙི་ཏྲ་ཀ་དང་ནི། །མུར་བ་པི་ཤ་ལའི་ཕྱེ་མ། །ནས་ཕྱེ་དགུ་ཆ་སྦྲང་རྩི་ནི། །ཆ་གཅིག་སྦྱར་བ་འདི་རྟག་ཏུ། །འཐུངས་ན་མཛེ་ནད་འཇོམས་བྱེད་ཅིང་། །འོར་ནད་སྐྱ་རྦབ་
ཤ་བཀྲར་བཅས། །ཕོ་ནད་གཞང་འབྲུམ་རྒྱུ་རླུགས་དང་། །མཚན་བར་རྡོལ་དང་འབྲུམ་ཕྲན་དང་། །གཡན་པ་ཤུ་བ་ནད་རྣམས་འཇོམས། །ཞེས་བྱ་བ་ལ། གླ་སྒང་ལ་སོགས་པའི་སྨན་ཕྱེ་མར་བཏགས་པ་ནས་ཕྱེ་དགུ་ཆ་དང་། སྦྲང་རྩི་ཆ་གཅིག་ཏུ་སྦྱར་ཏེ་སྐྱོ་མར་བྱས་པ་འཐུངས་ན་

མཛེ་ནད་འཇོམས་པར་བྱེད་པ་ཡིན་ནོ། །ཏུ་པ་ར་ཡི་རུས་པའམ། །གོ་བྱེ་སོ་མ་ར་ཛ་དང་། །ཙི་ཏྲ་ཀ་དང་བྲག་ཞུན་རྣམས། །བཅུད་ལེན་ཆོ་ག་ལྟར་བསྟེན་ཕན། །ཞེས་བྱ་བ་ལ། ཏུ་པ་རའི་ནང་གི་རུས་པ་བཅུད་ལེན་གྱི་ཆོ་ག་ལས་བཤད་པའི་ཚུལ་ལྟར་བསྟེན་ན་ཡང་ཕན་ནོ། །དེ་
བཞིན་དུ་གོ་བྱེ་དང་། སོ་མ་ར་ཛ་དང་། ཙི་ཏྲ་ཀ་དང་། བྲག་ཞུན་རྣམས་རེ་རེ་ཞིང་བཅུད་ཀྱི་ལེན་གྱི་ཆོ་ག་ལྟར་བསྟེན་ན་ཡང་མཛེའི་ནད་ལ་ཕན་ནོ། །དེ་ལྟར་ནད་བསལ་ནང་གི་ནི། །ནད་སྦྱངས་ནས་ནི་ཕྱི་རོལ་གྱི། པགས་པར་གནས་ལ་སྨན་བྱུགས་ཕན། །ནད་ཀྱི་དྲི་མ་མ་
དག་ལ། །སྨན་རྣོན་བྱུགས་ན་མཛེ་ནད་ནི། །བསླངས་པས་སླར་ནི་འཕེལ་བར་འགྱུར། །ཞེས་བྱ་བ་ལ། ཚུལ་དེ་ལྟར་མཛེའི་ནད་ནང་དུ་སྦྱངས་ཤིང་བསལ་ནས་པགས་པར་གནས་པའི་ནད་ལ་ནི་སྨན་གྱི་ཕྱི་རོལ་ནས་བསྐུ་བ་ལ་སོགས་པ་ཕན་ཏེ། གང་གི་ཕྱིར་དྲི་མ་ཅན་གྱི་ལུས་མ་
དག་བར་གྱུར་པ་ལས་སྨན་རྣོན་པོས་བྱུགས་ཤིང་བསྐུས་ན་ནད་དེ་བསླངས་པས་སླར་ཞིག་འཕེལ་བར་འགྱུར་བས་ན་དང་པོར་ནང་གི་སྦྱངས་ནས་གཟོད་བསྐུ་བར་བྱའོ། །གཏིང་ཟུག་སྲ་ཞིང་ཀོར་ཀོར་པོའི། །མཛེ་ལ་དུགས་བྱ་སྙི་བ་དང་། །འབུར་བར་གྱུར་ནས་མཚོན་གྱིས་ནི། །ཞལ་ཞལ་
གདབ་ཅིང་བྱུག་པར་བྱ། །ཞེས་བྱ་བ་ལ། མཛེའི་ནད་གཏིང་ཟུག་ཅིང་ཞེན་པ་དང་། སྲ་ཞིང་མཁྲང་བ་དང་། ཟླུམ་བོ་ཀོར་ཀོར་བོའམ་ཏིལ་ཏིལ་དུ་ཆགས་པ་ལ་ནི་སྨན་རྣོ་བ་ལ་སོགས་པས་དུགས་བྱ་ཞིང་དཀྲིས་ལ་འབུར་ཞིང་མཐོ་བར་གྱུར་པ་དང་མཚོན་གྱིས་དྲིལ་ཞིང་ཞལ་ཞལ་བྱས་ལ་སྨན་
གྱིས་བྱུག་ཅིང་བསྐུ་བར་བྱའོ། །གང་ཞིག་པགས་པ་ཀུན་ཉམས་ཤིང་། །མཚོན་གྱིས་གདབ་ཏུ་མི་རུང་བ། །དེ་ལ་ཁྲག་ནི་ཕྱུང་ནས་སུ། །ཐལ་སྨན་རྣོན་པོས་བསྐུ་བར་བྱ། །ཞེས་བྱ་བ་ལ། མཛེ་ནད་གང་པགས་པ་ཀུན་ཉམས་ཤིང་ཞིག་སྟེ། མཚོན་གྱིས་གདབ་ཏུ་མི་རུང་བ་དེ་ལ་
ནི་ནད་ཀྱི་ཁྲག་ཕྱུང་ཞིང་བསལ་ལ་ཐལ་སྨན་རྣོན་པོས་བསྐུ་བར་བྱའོ། མཛེ་ནད་རབ་སྲ་རྩུབ་པ་དང་། །ཚོར་བ་མེད་བརྟན་ཡུན་རིང་ལོན། །སྔགས་བཅས་དུག་ཁུ་བླུད་པ་དང་། །དུག་གི་སྨན་ནི་རྗེས་སུ་བསྐུ། །ཞེས་བྱ་བ་ལ། མཛེའི་ནད་སྲ་ཞིང་རྩུབ་པར་གྱུར་པ་དང་། ཚོར་བ་མེད་

ཅིང་བེམ་བེམ་པོར་གནས་པ་དང་། བརྟན་ཞིང་འགྱུར་བ་མེད་པ་དང་། ཡུན་རིང་ཞིང་ལོ་མང་ཞིག་ལོན་པ་ལ་དུག་གིས་བྱུག་ཅིང་བླུད་པར་བྱ་བ་དེ་ཡང་སྔགས་ཀྱིས་བཏབ་པས་བྱུག་ཅིང་བསྐུ་བར་བྱ་བ་ལ། དེའི་འོག་ཏུ་དུག་གི་སྨན་རྗེས་སུ་སྦྱར་ཞིང་བླུད་པར་བྱའོ། །
མཛེ་ནད་རེངས་ཤིང་ཚོར་བ་མེད། །རྔུལ་མི་འབྱུང་ཞིང་གཡའ་བ་ལ། །ལྕི་སྐམ་རྒྱ་མཚོའི་དབུ་བའམ། །མཚོན་གྱིས་བདར་ལ་ལྡེ་གུས་བྱུག །ཅེས་བྱ་བ་ལ། མཛེ་ནད་གང་ལུས་རེངས་ཤིང་འགྱུར་མི་ཤེས་པ་དང་། ཤིན་ཏུ་ཚོར་བ་མེད་ཅིང་བེམ་བེམ་པོར་འདུག་པ་
དང་། འབྱུང་མི་ཤེས་པ་དང་། གཡའ་བ་དང་ལྡན་པའི་མཛེ་ནད་ལ་ནི་ལྕི་བ་སྐམ་པོའམ། རྒྱ་མཚོ་དབུ་བའམ་མཚོན་གྱི་བདར་ཞིང་དྲུད་ལ་དེའི་འོག་ཏུ་ལྡེ་གུས་བསྐུ་བར་བྱ