Luận tạng Tây Tạng (Tengyur) — Tập 202

ུན་སྨན་དང་མཉམ་བྱས་ལ། །བརྒྱད་ཆའི་ནང་དུ་བསྐོལ་བར་བྱ། །ཞེས་བྱ་བ་ལ། བསྲེས་པའི་བྲག་ཞུན་གྱི་འཕྲོད་ཀྱི་སྨན་དང་བྲག་ཞུན་ཆ་མཉམ་པར་བྱས་ལ་ཆུ་དེའི་
བརྒྱད་འགྱུར་གྱི་ནང་དུ་བསྐོལ་བར་བྱའོ། །དེ་ལ་གལ་ཏེ་བྲག་ཞུན་སྲང་གཅིག་དང་སྦྱར་ན་དེའི་འཕྲོད་ཀྱི་སྨན་ཡང་སྲང་གཅིག་ལ་སྦྱར་ལ་དེ་ཆུ་བརྒྱད་འགྱུར་དང་བསྐོལ་བར་བྱའོ། །ཁུ་བ་བརྒྱད་ཆ་ལུས་བཙགས་པ། །དྲོ་འཇམ་ནང་དུ་བྲག་ཞུན་གཞུག །ཅེས་བྱ་བ་ལ། ཁུ་བ་
བསྐོལ་བ་དེ་བརྒྱད་ཆ་ལུས་པ་དང་བཙགས་པ་དྲོ་འཇམ་ཙམ་གྱི་ནང་དུ་བྲག་ཞུན་གཞུག་པར་བྱའོ། །དེ་དང་འདྲེས་གྱུར་བསྐམས་ནས་ནི། །སྨན་ཆུའི་ནང་དུ་སླར་ཡང་གཞུག །ཅེས་བྱ་བ་ལ། བྲག་ཞུན་འདྲེས་པར་གྱུར་ཏེ་དེ་བསྐམས་ནས་སླར་ཡང་གཞུག་པར་བྱའོ། །དེ་ལྟར་རང་རང་
སྨན་འཕྲོད་ནི། །བསྐོལ་བའི་ཁུ་བར་ལན་བདུན་སྤངས། །ཞེས་བྱ་བ་ལ། ཚུལ་དེ་ལྟར་རང་གི་སྨན་འཕྲོད་པའི་ཁུ་བ་དང་ལན་བདུན་གྱི་བར་དུ་སྦངས་ཤིང་བསྲེ་བར་བྱའོ། །དེ་ནས་ཏིག་ཏའི་སྨན་མར་གྱིས། །སྣུམ་ཆོས་བྱས་ནས་སྦྱར་བྱས་ཏེ། །འབྲས་བུ་གསུམ་གྱི་ཁུ་བ་དང་། །

ཤིང་མངར་པ་ཏོ་ལའི་ཁུ་བ། །བྲག་ཞུན་དག་ནི་རེ་རེ་ཡང་། །ཞག་གསུམ་བར་དུ་བླུད་པར་བྱ། །ཞེས་བྱ་བ་ལ། དེ་ནས་དེ་ལྟར་སྣུམ་ཆོས་བྱས་པའི་མི་དེ་ལ་ཏིག་ཏའི་སྨན་མར་ཞག་གསུམ་གྱི་བར་དུ་སྦྱིན་པར་བྱའོ། །དེ་བཞིན་དུ་བྲག་ཞུན་དང་། འབྲས་བུ་གསུམ་གྱི་ཁུ་བ་
དང་། ཤིང་མངར་གྱི་ཁུ་བ་དང་། པ་ཏོ་ལའི་ཁུ་བ་ཞག་གསུམ་གྱི་བར་དུ་བླུད་པར་བྱའོ། །དེ་ནས་དེ་ལ་སྦྱོར་བ་ནི། །དུས་དང་སྦྱར་ཏེ་བླུད་བར་བྱ། །ཞེས་བྱ་བ་ལ། དེ་ནས་མི་དེ་ལ་འཚམས་ཤིང་འོས་པའི་སྦྱོར་བ་དུས་དང་སྦྱར་ཏེ་སྨན་པས་བླུད་པར་བྱའོ། །དེ་ལྟར་བྲག་ཞུན་མི་རྣམས་
ལ། ཤིན་ཏུ་ཕན་པར་བྱེད་པ་ཡིན། །ཡོན་ཏན་མ་ལུས་སྐྱེད་བྱེད་ཅིང་། །འཕྲལ་དུ་གནོད་པར་མི་བྱེ་འདོ། །ཞེས་བྱ་བ་ལ། ཚུལ་དེ་ལྟར་བྲག་ཞུན་བསྟེན་ཞིང་གོམས་པར་བྱེད་པ་དག་ནི་ཤིན་ཏུ་ཕན་པར་བྱེད་པ་ཡིན་ལ། དེ་བཞིན་དུ་བཅུད་ཀྱིས་ལེན་གྱི་ཡོན་ཏན་མ་ལུས་པ་ཡང་སྐྱེད་
པར་བྱེད་ལ། འཕྲལ་དུ་དེའི་མོད་ལ་གནོད་པ་ཡང་སྐྱེད་པར་མི་བྱེད་པ་ཡིན་ནོ། །ཞག་བདུན་ཕྲག་གཅིག་ཕྲག་གསུམ་དང་། །ཕྲག་བདུན་ཞོ་གཉིས་སྲང་ཕྱེད་གཅིག །དམན་དང་བར་མ་ཆེན་པོ་ཡི། །བྲག་ཞུན་གོ་རིམས་བཞིན་དུ་སྦྱར། །ཞེས་བྱ་བ་ལ། །བྲག་ཞུན་ཞག་བདུན་
ཕྲག་གཅིག་དང་། ཚད་ཞོ་གཉིས་ནི་དམན་པའི་ཚད་ཡིན་ནོ། །ཞག་བདུན་ཕྲག་བདུན་དང་སྲང་གཅིག་ནི་ཕྱེད་ཚད་ཡིན་ནོ། །ལུས་ནི་ཤིན་ཏུ་སྦྱངས་བྱས་ལ། །བྲག་ཞུན་སྦྱངས་ལ་གཏང་བར་བྱ། །ཟངས་དང་ལྕགས་དང་དངུལ་དང་གསེར། །ཀུན་དང་ཡང་ན་རེ་རེར་སྦྱར། །འོ་མ་དང་
ནི་ལྷན་ཅིག་གཏང་། །བཅུད་ལེན་འབྲས་བུ་མྱུར་དུ་འགྲུབ། །ཅེས་བྱ་བ་ལ། བྲག་ཞུན་ནི་ལུས་ཤིན་ཏུ་སྦྱངས་པར་གྱུར་པ་ལ་བྲག་ཞུན་ལེགས་པར་སྦྱངས་ཤིང་བཏུལ་བ་གཏང་བར་བྱ་ལ། དེ་བཞིན་དུ་ཟངས་ལ་སོགས་པར་སྣ་རེའམ། ཀུན་དང་ཡང་སྦྱར་བར་བྱ་ཞིང་འོ་མ་དང་ལྷན་ཅིག་
བཏང་ན་བཅུད་ཀྱིས་ལེན་གྱི་འབྲས་བུ་གང་དག་ཡིན་འགྲུབ་པར་འགྱུར་རོ། །རྒྱ་སྲན་མོན་སྣེའུ་དམེ་རུ་དང་། །ཕུག་རོན་ཤ་ནི་རྟག་ཏུ་སྤང་། །ཞེས་བྱ་བ་ལ། བྲག་ཞུན་གྱི་སྦྱོར་བ་བསྟེན་བའི་དུས་སུ་རྒྱ་སྲན་ལ་སོགས་པ་རྟག་ཏུ་སྤང་བར་བྱའོ། །གང་ཞིག་བྲག་ཞུན་གྱིས་ནི་མངོན་སུམ་དུ་

མ་བསལ་ནད་ནི་ས་སྟེང་ཡོད་མ་ཡིན། །དུས་སུ་ཆོ་ག་བཞིན་དུ་བསྟེན་གྱུར་ན། །ནད་མེ་ཉམས་སྟོབས་རྒྱ་ཆེན་སྐྱེད་པར་བྱེད། །ཅེས་བྱ་བ་ལ། །མི་ཡུལ་ས་སྟེང་འདི་ན་བྲག་ཞུན་གྱི་སྨན་གྱིས་མངོན་དུ་མ་བཅོམ་པའི་ནད་ནི་ཡོད་པ་མ་ཡིན་ལ། དེ་བཞིན་
དུ་དེའི་ཆོ་ག་བཞིན་དུ་བསྟེན་ན་ནད་མེད་པ་ལ་སོགས་པའི་ཡོན་ཏན་སྐྱེད་པར་བྱེད་དོ། །ཁང་པར་གནས་པའི་ཁོམ་ལྡན་ཅན། །ཕུན་སུམ་ཚོགས་དང་ལྡན་ལ་ཕན། །དེ་ལས་གཞན་དུ་དེ་རྣམས་ལ། །ཉི་མ་རླུང་གི་ཚེ་ན་བསྟེན། །ཞེས་བྱ་བ་ལ། ཁང་པར་གནས་པ་ལ་སོགས་
པ་ཁོམ་ལྡན་ཡོད་ཅིང་འཁོར་དང་ཡོ་བྱད་ཕུན་སུམ་ཚོགས་པ་དང་ལྡན་པ་ལ་ནི་ཕན་པར་གྱུར་པ་ཡིན་ལ། དེ་ལས་གཞན་པ་སྟེ། ཁང་པར་གནས་པ་ལ་སོགས་པའི་ཁོམ་ལྡན་མེད་པ་ལ་ནི་ཉི་མ་དང་རླུང་ལ་གནས་པའི་ཚུལ་གྱིས་བསྟེན་ན་ཕན་པར་འགྱུར་རོ། །རླུང་དང་ཉི་ཚན་བཅས་
སྦྱོར་བ། །བདེ་བའི་ལོངས་སྦྱོད་མེད་ན་ཡང་། །གང་ཞིག་ལུས་ལ་མི་གནོད་པ། །མཆོག་ཏུ་དེ་ནི་བཤད་པར་བྱ། །ཞེས་བྱ་བ་ལ། ད་ནི་རླུང་དང་ཉི་ཚན་དང་བཅས་པར་ཡང་བསྟེན་དུ་རུང་བའི་སྦྱོར་བ་བདེ་བའི་ལོངས་སྤྱོད་ལས་ཉམས་སུ་ཟིན་ཀྱང་ལུས་ལ་གནོད་པར་མི་འགྱུར་བའི་
སྦྱོར་བའི་མཆོག་དེ་བཤད་པར་བྱའོ། །ཆུ་གྲང་འོ་མ་སྦྲང་རྩི་དང་། །མར་ནི་རེ་རེ་གཉིས་གཉིས་དང་། །གསུམ་མམ་ཡང་ན་ཐམས་ཅད་དང་། །ཟས་སྔར་འཐུངས་ན་རྒས་སྲ་བྱེད། །ཅེས་བྱ་བ་ལ། ཆུ་གྲང་ལ་སོགས་པ་རེ་རེ་འམ། གཉིས་གཉིས་སམ། གསུམ་མམ།
བཞི་ཆར་ཀུན་ཟས་ཀྱི་སྔར་འཐུངས་ན་ཡང་རྒས་སྲ་བར་བྱེད་དོ། །བུ་རམ་སྦྲང་རྩི་བཅའ་སྒ་དང་། །པི་པི་ལིང་ངམ་རྒྱམ་ཚ་དང་། །ཨ་རུ་ར་ནི་གཉིས་གཉིས་དག །རྟག་ཟོས་བདེ་ཞིང་ལོ་བརྒྱུར་འཚོ། །ཞེས་བྱ་བ་ལ། བུ་རམ་ལ་སོགས་པ་གང་ཡང་རུང་བ་དང་། ཨ་རུ་ར་གཉིས་
གཉིས་རྟག་ཏུ་ཟོས་ན་ཡང་མི་དེ་ལོ་བརྒྱའི་བར་དུ་འཚོ་བར་འགྱུར་རོ། །ཨ་རུ་ར་ནི་མར་ནང་བསྲོས། །བཟའ་ཞིང་མར་དེ་འཐུངས་ན་ནི། །རྒས་སྲ་ལུས་ནི་ཡུན་རིང་གནས། །སྟོབས་ནི་འཕེལ་བར་བྱེད་འགྱུར་ཏེ། །ཇི་ལྟར་དམ་པ་བྱས་གཟོ་བ། །ལན་ཅིག་ཕན་གདགས་ཇི་ལྟ་

བཞིན། །ཞེས་བྱ་བ་ལ། ཨ་རུ་ར་མར་གྱི་ནང་དུ་བསྲོས་ཏེ་བཟའ་བ་དང་བསྲོས་པའི་མར་དེ་འཐུངས་པར་གྱུར་ན་ལུས་རྒས་སྲ་བ་ལ་སོགས་པར་འགྱུར་རོ། །ཇི་ལྟར་བྱས་པ་གཟོ་བའི་མི་ལ་ཕན་བཏགས་ན་དེའི་མི་བརྗེད་པར་སེམས་ལ་འཇོག་པ་དང་འདྲའོ། །སྐྱུ་རུ་རའི་ཁུ་སྦྲང་རྩི་དང་། །
ཁ་ར་མར་དང་ལྡེ་གུར་བྱས། །བསྟེན་ཞིང་འཕྲོད་ང་ཟ་བའི་མི། །རྒ་བའི་གནོད་པ་འཇིག་འགྱུར་ཏེ། །ཉེས་བསྲུང་བསྟེན་བཅོས་རྒྱ་ཆེན་མཚུངས། །ཞེས་བྱ་བ་ལ། །སྐྱུ་རུ་རའི་ཁུ་བ་དང་སྦྲང་རྩི་དང་མར་དང་ཁ་ར་ལྡེ་གུར་བྱས་པ་ཟས་ཤིང་ཁ་ཟས་འཕྲོད་པ་ལ་བསྟེན་པའི་མི་རྒས་
པའི་གནོད་པ་གང་ཡིན་པར་དེ་འཇིག་པར་འགྱུར་ཏེ། ཇི་ལྟར་བསྟན་བཅོས་རྒྱ་ཆེན་པོ་ལེགས་པར་བཟུང་ནས་བརྗེད་དུ་མི་རུང་བར་འགྱུར་བ་དང་མཚུངས་སོ། །སྐྱུ་རུ་ར་དང་བྱི་དང་ག །ཨ་ས་ན་ཡི་སྙིང་པོ་ཕྱེ། །ལྕགས་ཕྱེ་ཏིལ་མར་སྦྲང་རྩི་ཡི། །མར་བཅས་ལྡེ་གུ་བསྟེན་ན་ནི། །
ན་ཚོད་མཛེས་པ་མ་ཉམས་འགྱུར། །ཞེས་བྱ་བ་ལ། སྐྱུ་རུ་ར་ལ་སོགས་པ་ཇི་སྐད་སྨོས་པ་བཞིན་བསྟེན་ཡང་ན་ཚོད་མཛེས་པ་ལ་སོགས་པར་འགྱུར་རོ། །ལྕགས་ཕྱེ་བྱི་དང་ག་ཡི་བྱེ་མ་དང་། །མར་དང་སྦྲང་རྩིར་བཅས་པ་ལོ་གཅིག་ཙམ། །ཨ་ས་ན་ཡི་ཟ་མ་ཏོག་ནང་གཞུག་
བསྟེན་ན་སྟོབས་ལྡན་ཚེ་རིང་སྐྲ་གནག་འགྱུར། །ཞེས་བྱ་བ་ལ། །ལྕགས་ནག་པོའི་ཕྱི་མ་ལ་སོགས་པ་ཇི་སྐད་སྨོས་པ་བཞིན་དུ་བསྟེན་ན་ཡང་ཚེ་རིང་ཞིང་སྐྲ་གནག་པར་འགྱུར་རོ། །བྱི་དང་ག་དང་གོ་བྱེ་བཅའ་སྒ་རྣམས། །མར་དང་སྦྲང་རྩིར་བཅས་པ་གང་གིས་ཟོས། །རྒས་པའི་ཆུ་བོ་
ནད་ཀྱི་རྦ་རླབས་ཅན། །ན་ཚོད་ལྡན་པའི་སྐྱེས་བུ་དེ་རྒལ་འགྱུར། །ཞེས་བྱ་བ་ལ། མི་གང་བྱི་དང་ག་ལ་སོགས་པའི་ལྡེ་གུ་ཟོས་བ་དེ་ནི་ན་ཚོད་དར་ལ་བབ་པ་དང་ལྡན་པར་འགྱུར་ཞིང་། རྒས་པའི་ཆུ་བོའི་རྦ་རླབས་ལས་ངེས་པར་རྒལ་བར་འགྱུར་རོ། །སེང་ལྡེང་ཨ་ས་ན་ཡི་ཁུ་བ་དང་། །
འབྲས་བུ་གསུམ་དང་སྦྲང་རྩི་མར་སྦྱར་བ། །ཆོ་ག་བཞིན་དུ་བསྟེན་པའི་མི་རྣམས་ནི། །ཚེ་རིང་འགྱུར་བ་འདི་ལས་ངོ་མཚར་མེད། །ཅེས་བྱ་བ་ལ། སེང་ལྡེང་ལ་སོགས་པའི་ལྡེ་གུ་བསྟེན་ན་ཡང་ངེས་པར་ཚེ་རིང་བར་འགྱུར་བ་ཡིན་ནོ། །ཛི་བ་ཀ་ཡི་ཁུ་བ་སོར་མོར་ཆགས། །ཁ་ར་

སྦྲང་རྩི་མར་དང་འབྲས་བུ་གསུམ། །སྐྱེས་བུ་དམ་པས་བསྟེན་པར་གྱུར་ན་ནི། །རྒས་དང་ནད་ནི་ངེས་པར་བཟློག་པར་འགྱུར། །ཞེས་བྱ་བ་ལ། ཛི་བ་ཀ་ཞེས་བྱ་བ་ཨ་ས་ནའི་ཁུ་བ་ལ་སོགས་པའི་ལྡེ་གུ་བསྟེན་ན་ཡང་རྒས་པ་ལ་སོགས་པའི་འཚེ་བ་མེད་
པར་འགྱུར་རོ། །བ་སྦྲུ་བ་ནི་སར་པ་སྲད་ཕྱེད་དང་། །འོ་མར་བཏགས་པ་ཟླ་ཕྱེད་ཟླ་བ་གཉིས། །ཟླ་དྲུག་ལོ་གཅིག་བར་དུ་འཐུངས་ན་ནི། །རྒས་ཤིང་རྙིང་པའང་སླར་ནི་གཞོན་པར་འགྱུར། །ཞེས་བྱ་བ་ལ་བ་སྦྲུ་བ་ཞེས་བྱ་བ་པུ་རྞ་བ་སྲང་ཕྱེད་བཏགས་པ་ཟླ་བ་ཕྱད་དམ་གཉིས་སམ་དྲུག་གམ་ལོ་གཅིག་གི་བར་དུ་འོ་མ་དང་
སྦྱར་ཏེ་འཐུངས་ན་རྒས་ཤིང་འཁོགས་དེ་སླར་གཞོན་པ་ཉིད་དུ་འགྱུར་རོ། །མུར་བ་ཨང་ཤུ་མ་ཏི་པྲི་ཧ་ཏི། །བ་ལ་པུ་ཤེལ་ཙེ་དང་པ་ཏ་དང་། །ཨ་ས་ན་དང་ཐལ་ཏྲེས་ཨ་ཀ་རུ། །པྲི་ཡང་ཀུ་དང་ཙནྡན་རེ་རེ་ཡི། །ཆོ་ག་འང་བ་སྤྲུ་བ་དང་མཚུངས་པ་ཡིན། །ཞེས་བྱ་བ་ལ། མུར་བ་ལ་
སོགས་པ་སྨན་སྣ་རེ་རེ་ཞིང་ཡང་བ་སྦྲུ་བའི་ཆོ་ག་བཞིན་བསྟེན་ན་ཡོན་ཏན་དེ་དང་མཚུངས་པ་ཡིན་ནོ། །ཉེའུ་ཤིང་ལྡེ་གུ་ཁུ་བར་བསྐོལ་བ་དང་། །ཞུན་མར་ཁ་རར་བཅས་པ་ཟ་བྱེད་པ། །དེ་ནི་འཚོ་བའི་ལམ་དུ་ཞུགས་གྱུར་ཚེ། །ནད་ཀྱི་རྐུན་པོས་ཆོམས་པར་མི་འགྱུར་རོ། །ཞེས་བྱ་བ་ལ།
ཉེའུ་ཤིང་གི་ལྡེ་གུ་དང་ཁུ་བ་བསྐོལ་བའི་སྨན་མར་གྱི་ནང་དུ་ཁུ་ར་བཏབ་སྟེ་ཟོས་ན་མི་འཚོ་བའི་ལམ་དུ་ཞུགས་པར་གྱུར་པའི་ཚེ་སྲོག་འཕྲོག་པར་བྱེད་པའི་ནད་ཀྱི་རྐུན་པོས་ཆོམས་པར་མི་འགྱུར་རོ། །ཨ་ཤྭ་གནྡྷ་འོ་མར་བཅས་པ་ནི། །མར་རམ་ཏིལ་མར་ཆུ་དྲོན་སྦྱར་བ་དང་། །ཟླ་ཕྱེད་
བསྟེན་ན་ཉམ་ཆུང་ལུས་རྒྱས་ཤིང་། །ཇི་ལྟར་ལོ་ཏོག་གཞོན་ལ་ཆར་བབ་མཚུངས། །ཞེས་བྱ་བ་ལ། ཨ་ཤྭ་གནྡྷ་འོ་མ་འམ། །མར་རམ། །ཏིལ་མར་རམ། ཆུ་དྲོན་དང་སྦྱར་ཏེ་འཐུངས་ན་ནི་ལུས་ཤིན་ཏུ་ཉམ་ཆུང་བ་ཡང་རྒྱས་ཤིང་འཕེལ་བར་འགྱུར་རོ། །ཇི་ལྟར་ལོ་ཏོག་
ཤིན་ཏུ་གཞོན་པ་ལ་ཆར་བབ་པ་དང་མཚུངས་སོ། །ཉིད་རེ་ཏིལ་ནག་སྲང་ནི་རེ་རེ་དག །ཟོས་པའི་རྗེས་ལ་ཆུ་གྲང་འཐུངས་གྱུར་ན། །ལུས་ནི་ཤས་ཆེར་རྒྱས་པ་ཉིད་འགྱུར་ཞིང་། །འཆི་བའི་བར་དུ་སོན་ནི་བརྟན་པར་འགྱུར། །ཞེས་བྱ་བ་ལ། ཏིལ་ནག་པོ་ཉིན་རེ་སྲང་རེ་ཟོས་ལ་

དེའི་འོག་ཏུ་ཆུ་གྲང་འཐུངས་པར་གྱུར་ན་མིའི་ལུས་ཤས་ཆེར་རྒྱས་པར་འགྱུར་ཞིང་རྟག་ཏུ་སོག་བརྟན་པར་འགྱུར་རོ། །གཟེ་མ་སླེ་ཏྲེས་སྐྱུ་རུ་རའི་ཕྱེ་མ། །མར་དང་སྦྲང་རྩི་ཆ་མཉམ་ལྡེ་གུ་ཟོས། །རོ་ཙ་ལུས་བརྟན་ནད་ཀྱི་སྡུག་བསྔལ་ཞི། །ལོ་བརྒྱར་འཚོ་ཞིང་སྐྲ་ནི་ནག་པོར་འགྱུར། །ཞེས་
བྱ་བ་ལ། །གཟེ་མ་ལ་སོགས་པའི་ལྡེ་གུ་ཟོས་ན་ཡང་རོ་ཙ་བ་ལ་སོགས་པའི་ཡོན་ཏན་སྐྱེད་དོ། །ཏིལ་ནག་ཨ་རུ་ར་དང་སྐྱུ་རུ་ར། །བ་རུ་ར་དང་བཅས་པ་བརྡུངས་ནས་བསྟེན། །མི་དེ་རྨ་བྱ་ལྟ་བུར་མེད་ངས་ལྡན་ཞིང་། །ཡིད་དུ་འོང་བའི་བདེ་བ་འཐོབ་པར་འགྱུར། །བྲག་ཞུན་མར་དང་སྦྲང་རྩི་
བྱི་དང་ག །ཨ་རུ་ར་དང་ལྕགས་ཕྱེད་ངུལ་ཆུ་དང་། །ཏ་བྱ་བ་སྟེན་ན་ལུས་ཟུངས་རྫོགས་འགྱུར་ཏེ། །ཡར་ངོ་ཟླ་ཕྱེད་རྫོགས་པའི་ཟླ་བ་འདྲ། །ཞེས་བྱ་བ་ལ། །སྐྱེས་བུ་གང་ཏིལ་དང་ལྷན་ཅིག་ཏུ་སྐྱུ་རུ་ར་ལ་སོགས་པ་བརྡུངས་པ་བཅས་ཏེ་ཟོས་ན་ཡང་མི་དེ་ཇི་སྐད་སྨོས་པའི་མདངས་དང་ལྡན་པར་འགྱུར་
ལ། །དེ་བཞིན་དུ་བྲག་ཞུན་ལ་སོགས་པ་ཟོས་ན་ཡང་ལུས་ཟུངས་ཟླ་བ་ཡར་གྱི་ངོ་ལྟར་རྒྱས་པར་འགྱུར་རོ། །གང་ཞིག་བྱིང་ག་ར་ཛའི་ཁུ་བ་ཟླ་བ་གཅིག །ཉིན་རེ་རྒྱུན་དུ་བསྟེན་པར་བྱེད་པ་དང་། །འོ་མ་འཐུངས་སྟེ་སྟོབས་དང་བརྩོན་འགྲུས་ལྡན། །ལོ་བརྒྱར་འཚོ་བ་དག་ཀྱང་ཐོབ་པར་འགྱུར། །
ཞེས་བྱ་བ་ལ། །སྐྱེས་བུ་གང་བྲིང་གར་ཛ་བསྐོལ་བའི་ཁུ་བ་ཉིན་རེ་ཞིང་ཟླ་བ་གཅིག་གི་བར་དུ་འཐུང་བར་བྱེད་པ་ད་འོ་མ་འཐུངས་པ་དེ་ནི་སྟོབས་ལ་སོགས་པ་འཐོབ་པར་འགྱུར་རོ། །ཤུ་དག་ཀྱང་ནི་ཟླ་བ་གཅིག་བསྟེན་ཞིང་། །འོ་མ་འམ་མར་རམ་ཏིལ་མར་བཅས་པ་བསྟེན། །གདོན་
གྱིས་མི་ཚུགས་པ་ཡི་ལུས་འགྱུར་ཞིང་། །ཡིད་གཞུངས་ཚིག་ནི་ཤིན་ཏུ་གསལ་བར་འགྱུར། །ཞེས་བྱ་བ་ལ། །མི་གང་ཟླ་བ་གཅིག་གི་བར་དུ་ཤུ་དག་འོ་མ་འམ་མར་དང་ཏིལ་མར་དང་བཅས་པར་བསྟེན་ན་གདོན་གྱིས་མི་ཚུགས་པ་ལ་སོགས་པའི་ཡོན་ཏན་འཐོབ་པར་འགྱུར་རོ། །མན་
དུ་ཀ་པ་རྞི་ནི་མར་དང་བརྔོས། །ཟླ་གཅིག་བར་དུ་ཟས་མ་ཟོས་བར་བསྟེན། །གཟུགས་ནི་རྒྱ་ཆེར་འཚེ་ཞིང་སྤོབས་པ་ཆེ། །གཞོན་ཞིང་མདངས་ལྡན་ཡོན་ཏན་ལྡན་པར་འགྱུར། །ཞེས་བྱ་བ་ལ། །མན་དུ་ཀ་པརྞི་ཞེས་བྱ་བ་སྨན་མར་དང་བརྔོས་བ་ཟླ་བ་གཅིག་གི་བར་དུ་ཟོས་ན་ཡང་ཡུན་རིང་

དུ་འཚོ་ཞིང་སྤོབས་པ་ཆེ་བ་ལ་སོགས་པར་འགྱུར་རོ། །འབྲས་བུ་གསུམ་དང་ཙང་གི་རི་དང་ནི། །ལྕགས་ཕྱེ་སྲང་ནི་ལྔ་བཅུ་ལས་བྱ་ཤིང་། །ཀོ་ཤ་ད་ཀི་ལི་ཁུ་བའི་ནང་དུ་བཏགས། །རི་ལུ་སུམ་བརྒྱ་བྱས་ནས་རི་ལུ་དེ། །གྲིབ་མར་བསྐམས་ཏེ་རིམ་
གྱིས་མ་ལུས་པར། །བཀྲུ་སྨན་བྱ་ཞིང་ཐུག་སླའི་རིམ་པ་དང་། །ཐུག་སྐ་གང་པོ་ཤ་ཁུ་འབྲས་ཆེན་དང་། །མར་ལ་བསྟེན་ཞིང་ཟླ་གཅིག་ལུས་བསྡམས་ལ། །ཟླ་གཅིག་འདས་ནས་རང་དགའ་ཉིད་དུ་སྤྱད། །འབད་པས་དུས་ཀུན་དུ་ནི་མ་ཞུ་སྤང་། །ལོ་གཅིག་བར་དུ་སྤྱོར་བ་འདི་
བསྟེན་ན། །གང་ཞིག་གསོད་ཀའི་ནད་ཀྱིས་ཉེན་པ་ཡང་། །ཤིན་ཏུ་སྟོབས་ཆེ་སྐྱེས་བུའི་བྱ་བ་རྫོགས། །ལུས་རྒྱས་འཇམ་ཞིང་མིག་དང་རྣ་བ་གསལ། །གཞོན་པ་ཉིད་དང་ལོ་ནི་ལྔ་བརྒྱར་འཚོ། །ཞེས་བྱ་བ་ལ། །འབྲས་བུ་གསུམ་དང་། །ཙང་གི་རི་དང་། །ལྕགས་ཀྱི་ཕྱེ་མ་ཚད་སྲང་
ལྔ་བཅུ་ཀོ་ཤ་ཏ་ཀའི་ཁུ་བའི་ནང་དུ་བཏགས་པ་ལས་རིལ་བུར་སྦྱར་ཏེ་གྲིབ་མར་བསྐམས་ནས་དེ་མ་ལུས་པར་ཟོས་ལ། །བཀྲུ་སྨན་དང་བྲུག་པའི་རིམ་པ་ལྔ་ལ་སོགས་པའི་ཚུལ་གྱིས་ཟླ་བ་གཅིག་འདས་པར་བྱས་ནས་དེའི་འོག་ཏུ་སྤྱོད་པ་བསྡམས་པ་མེད་པས་གནས་པར་བྱ་སྟེ། །འདིར་ནི་
རྣམ་པ་ཐམས་ཅད་དུ་མ་ཞུ་བའི་བག་སྤང་པར་བྱའོ། །ཚུལ་དེ་ལྟར་སྦྱོར་བ་འདིས་ལོ་གཅིག་གི་བར་ད་བསྟེན་ན་གསོ་དཀའ་བའི་ནང་ཀྱང་སེལ་བ་ལ་སོགས་པའི་ཡོན་ཏན་དང་ལྡན་པར་འགྱུར་རོ། །སེང་ལྡེང་ཤིར་ཤ་བ་དང་ཨ་ས་ན། །རྨ་བྱ་ཨ་རུ་ར་དང་སྐྱུ་རུ་ར། །གོ་བྱེ་བྱི་དང་ག་བཏགས་ཆུ་
འགྱུར་ནི། །བཅོ་བརྒྱད་ནང་བསྐོལ་ལྕགས་ཀྱི་དུམ་བུ་བཅུག །ལྕགས་ཀྱི་སྣོད་དུ་ཞག་གསུམ་ཉི་མ་ཡི། །འོད་ཀྱིས་བསྲོས་ལ་དེ་རྗེས་མེ་ལ་ནི། །ལྕགས་ཀྱི་ཕྱེ་མ་ཞིབ་པར་བྱས་ཏེ་བསྐོལ། །དེ་བཙགས་ཁུ་བ་ཆ་གཅིག་འོ་མ་ནི། །ཆ་གཅིག་དེ་བཞིན་གསོ་མའི་ཁུ་བ་གཅིག་
ཉེའུ་ཤིང་བསྐོལ་བའི་ཁུ་བ་ཆ་གསུམ་དང་། །འདིར་ནི་མར་སར་ཆ་ནི་བཞི་དང་སྦྱར། །འདི་དག་གཅིག་ཏུ་ལྕགས་ནག་སྣོད་དུ་བསྐོལ། །ཁ་ར་རྔུལ་མེད་དེ་བཞིན་སྦྲང་རྩི་དང་། །དེ་བཞིན་མར་དང་བསྲེས་པར་གྱུར་པ་དང་། །དེ་བཞིན་མར་དང་བསྲེས་པར་གྱུར་པ་དང་། །འཕྲོད་པའི་ཟས་དང་སྐོམ་དང་སྤྱོད་ལམ་བཅས། །སྲང་རེ་

རྟག་ཏུ་བསྟེན་པར་གྱུར་ན་ནི། །དཔལ་དང་ལྡན་ཞིང་ཉིས་པ་བསལ་བ་དང་། །ནགས་ཀྱི་མ་ཧེ་ལྟ་བུའི་སྟོབས་ལྡན་ཞིང་། །རྟ་ལྟར་མགྱོགས་ལ་ལུས་ནི་བརྟན་པ་དང་། །སྐྲ་ནི་བུང་བའི་མདོག་ལྟར་གནག་པ་དང་། །ཁ་ནི་དྲི་ཞིམ་བུད་མེད་མང་བསྟེན་ནུས། །ཚིག་གསལ་ཡིད་
གཞུངས་ཕུན་སུམ་ཚོགས་པ་དང་། །ཟླ་གཅིག་བསྟེན་ན་མེ་དྲོད་ཆེ་བ་ཡིན། །དེ་ནི་མི་ཡི་སེང་གེ་འམ་མེའམ་ནི། །བཙོ་མ་གསེར་གྱི་མདོག་འདྲའི་ལུས་འཛིན་གྱུར། །མི་ཡི་སེང་གེའི་སྦྱོར་བ་འདི། །ཟོས་ན་ནད་ཀྱིས་མི་ཉེན་ཏེ། །འཁོར་ལོ་འབར་བའི་ལག་པ་ཡིས། །ལྷ་མིན་
ཚོགས་ནི་འཇིགས་དང་འདྲ། །ཞེས་བྱ་བ་ལ། །སེང་ལྡེང་ལ་སོགས་པ་ཆ་མཉམ་པར་བྱས་ཏེ་བཏགས་ལ། །སྨན་གྱི་བཅོ་བརྒྱད་འགྱུར་ནང་དུ་བསྐོལ་ལ་ལྕགས་ཀྱི་དུམ་བུ་བཅུག་སྟེ། ལྕགས་ཀྱི་སྣོད་ཀྱི་ནང་དུ་བཞག་ལ་ཉི་མ་གསུམ་དུ་ཉི་མའི་འོད་ཀྱིས་བསྲོས་ལ། །དེའི་
རྗེས་ལ་མེ་ཆུང་ངུ་ལ་དེ་བཞི་ཆ་ལུས་ཀྱི་བར་དུ་བསྐོལ་ལ། །དེ་བཙགས་ནས་ཆ་གཅིག་ཏུ་བྱས་པ་དང་། །འོ་མའི་ཆ་ཡང་དེ་དང་མཉམ་པ་དང་། །དེ་བཞིན་དུ་གསོ་མའི་ཁུ་བའི་ཆ་དང་མཉམ་པ་དང་། །དེ་བཞིན་དུ་ཉིའུ་ཤིང་གི་ཁུ་བ་ཆ་གསུམ་དང་། །མར་སར་བཞི་ཆ་སྟེ་དེ་ཐམས་ཅད་གཅིག་
དུ་བསྡུས་ལ་ལྕགས་ཀྱི་སྣོད་ཆེན་པོའི་ནང་དུ་སྨན་མར་དེ་བསྐོལ་བར་བྱའོ། །དེར་ཡང་ཁ་ར་དཀར་པོ་ནག་ནོག་མེད་པ་དང་། །སྦྲང་རྩི་ལ་སོགས་པ་བཅུག་ལ་དེ་ལས་སྲང་རེ་བསྟེན་ན་དཔལ་དང་ལྡན་པ་ལ་སོགས་པའི་ཡོན་ཏན་དང་ལྡན་ཞིང་ཡིད་གཞུངས་པ་ཕུན་སུམ་ཚོགས་པའི་བར་དུ་
འགྱུར་རོ། །སྦྱོར་བདེ་ཟླ་བ་གཅིག་གི་བར་དུ་བསྟེན་ན་མེ་དྲོད་ཆེ་བ་ལ་སོགས་པའི་ཡོན་ཏན་ཐོབ་པར་འགྱུར་ཏེ། །འདི་ནི་མིའི་སེང་གེ་ཞེས་བྱ་བ་ཁྱག་འཇུག་གིས་བཤད་པའི་སྦྱོར་བ་ཡིན་ཏེ། །འདི་ཟོས་ན་ནད་ཀྱི་ཚོགས་ཀྱིས་ཉེན་པར་མི་འགྱུར་ཏེ། །ཇི་ལྟར་ཁྱབ་འཇུག་འཁོར་ལོ་འབར་
བ་ལག་ན་ཐོགས་པས་ལྷ་མ་ཡིན་གྱི་ཚོགས་འཇིགས་ཤིང་འབྱེར་བར་བྱེད་པ་དང་འདྲའོ། །བྲིང་གར་ཛ་མྱུ་གུའི་ཆོག་འདིས། །བརྔོས་ཤིང་མར་བཅས་ཟོས་ལ་བསྔམས་དང་བཅས། ལྟོ་སྦྱངས་པ་ལ་ཨ་ས་ནའི་ཁུ་བ། །འོམ་འཐུང་ཞིང་ཟས་ཀྱི་བྱ་བ་བྱེད། །ཟླ་གཅིག་བར་དུ་

བསྟེན་པར་གྱུར་ན་ནི། །བདེ་ཞིང་ལོ་ནི་ཉིས་བརྒྱའི་བར་དུ་འཚོ། །ལན་ཅིག་སྨྲས་པའི་ཚིག་ཀྱང་ཟིན་གྱུར་ཞིང་། །དྲན་དང་དབང་པོ་ཉམས་པ་མེད་པར་འགྱུར། །ཞེས་བྱ་བ་ལ། །བྲིང་གར་ཛའི་མྱུ་གུ་མར་དང་བརྔོས་པ་ལ་སོགས་བའི་སྦྱོར་བས་ཟླ་བ་
གཅིག་གི་བར་དུ་བསྟེན་ན་བདེ་ཞིང་ལོ་ཉིས་བརྒྱའི་བར་དུ་འཚོ་བ་ལ་སོགས་པ་འཐོབ་པར་འགྱུར་རོ། །གང་ཞིག་སྦྱོར་བ་འདི་ཡིས་ནི། །ཏིལ་མར་བསྟེན་པར་བྱེད་པ་དག །དེ་ཡིས་ཡོན་ཏན་དེ་ཐོབ་ཅིང་། །ལུས་ནི་ནག་པོ་ཉིད་དུ་འགྱུར། །ཞེས་བྱ་བ་ལ། །སྔར་བཤད་པའི་སྦྱོར་
བ་འདི་ཉིད་ཀྱིས་མར་ཇི་ལྟར་བསྐོལ་བ་དེ་བཞིན་དུ་ཏིལ་མར་བསྐོལ་ལ་བསྟེན་པར་བྱེ་པ་དེ་ཡང་ཡོན་ཏན་སྔར་ཇི་སྐད་སྨོས་པ་ཉིད་ཐོབ་པར་འགྱུར་རོ། །འོན་ཀྱང་ཁྱད་པར་ནི་ཏིལ་མར་གྱི་སྦྱོར་བས་ལུས་ནག་པོ་ཉིད་དུ་འགྱུར་རོ། །བཅུད་ཀྱིས་ལེན་ནི་དུས་དང་རྗེས་མཐུན་ཞིང་། །བསྟེན་
ཅུས་འབྲས་བུར་བཅས་པ་བཤད་པ་ཡིན། །གཞན་དག་ཕན་ཡོན་བཅས་པ་ཡོད་མོད་ཀྱི། །རྙེད་པར་དཀའ་བས་བདག་གིས་མ་བཤད་དོ། །ཞེས་བྱ་བ་ལ། །བཅུད་ཀྱིས་ལེན་ད་ལྟར་གྱི་དུས་དང་རྗེས་སུ་མཐུན་ཞིང་། །བསྟེན་ཅིང་སྤྱད་བར་ནུས་པ་འབྲས་བུ་དང་བཅས་པ་གང་དག་ཡིན་པ་
དེ་བདག་གིས་བཤད་པ་ཡིན་གྱི། །བཅུད་ཀྱིས་ལེན་གྱི་སྦྱོར་བ་གཞན་དག་ཕན་ཡོན་དང་བཅས་པ་མང་པོ་དྲང་སྲོང་རྣམས་ཀྱིས་བཤད་པ་ཡོད་མོད་ཀྱི། །དེ་ནི་རྙེད་པ་དང་བསྒྲུབ་པར་དཀའ་བ་ཡིན་པས་བདག་གིས་འདིར་མ་བཤད་དོ། །བཅུད་ཀྱིས་ལེན་གྱི་ཆོ་ག་ལས། །ཉམས་པས་
གལ་ཏེ་ནད་སྐྱེ་ན། །བཅུད་ཀྱིས་ལེན་དེ་སྤྲངས་ནས་ནི། །དེ་ཡི་སྨན་ནི་ཇི་བཞིན་བྱ། །ཞེས་བྱ་བ་ལ། །བཅུད་ཀྱིས་ལེན་གྱི་ཆོ་ག་བསྟན་པ་ལས་ལེགས་པར་མ་སྤྱད་པ་ཉམས་པར་གྱུར་ཏེ། །གལ་ཏེ་ནད་སྐྱེས་ན་བཅུད་ཀྱིས་ལེན་གྱི་ཆོ་ག་དེ་སྤངས་ཤིང་དོར་ལ་ནད་ནི་དེའི་སྨན་ཇི་ལྟ་བུ་
བཞིན་དུ་བྱའོ། །བདེན་པར་སྨྲ་ཞིང་ཁྲོ་བ་མེད། །དབང་པོ་བསྡམས་ཤིང་བདག་ཉིད་ཐུལ། །ཞི་ཞིང་དམ་པའི་སྤྱོད་ལ་དགའ། །རྟག་ཏུ་བཅུད་ལེན་ཡིན་ཞེས་བྱ། །ཞེས་བྱ་བ་ལ། །མི་རྟག་པར་བདེན་པར་སྨྲ་བ་དང་། དེ་བཞིན་དུ་ཁྲོ་བ་མེད་བ་དང་། །དབང་པོ་བསྡམས་

ཤིང་ཡུལ་ལ་མིག་ཡེང་བར་བདག་ཉིད་ཐུལ་བ་དང་། །སྤྱོད་ལམ་ཞི་བ་དང་། །དམ་པའི་སྤྱོད་ལམ་ལ་དགའ་བ་རྣམས་ནི་རྟག་ཏུ་བཅུད་གྱིས་ལེན་ཡིན་པར་ཤེས་བར་བྱའོ། །ཡོན་ཏན་འདི་དག་ལྡན་གྱུར་པས། །གང་ཞིག་བཅུད་ལེན་བསྟེན་གྱུར་པ། །དེ་ནི་དགའ་ཞིང་ཚེ་རིང་ལ། །འཇིག་
རྟེན་འདི་དང་གཞན་དུ་བདེ། །ཞེས་བྱ་བ་ལ། །བདེན་པར་སྨྲ་བ་ལ་སོགས་པའི་ཡོན་ཏན་འདི་དག་དང་ལྡན་པས། །མི་གང་ཞིག་བཅུད་ཀྱིས་ལེན་བསྟེན་ཞིང་སྤྱོད་པར་བྱེད་པ་དེ་དག་ནི་བདེ་ཞིང་དགའ་བ་དང་ཚེ་རིང་བ་དང་། །འཇིག་རྟེན་འདི་དང་འཇིག་རྟེན་གཞན་དག་ཏུ་བདེ་བ་
ཕུན་སུམ་ཚོགས་པ་དང་ལྡན་པར་འགྱུར་རོ། །སྤྱོད་པ་བསྟན་བཅོས་རྗེས་འཇུག་ཅིང་། །གམ་ན་གནས་པའི་སེམས་དང་མཐུན། །དོན་ལ་བློ་ནི་མི་འཁྲུགས་ལ། །བཅུད་ཀྱིས་ལེན་ནི་རྫོགས་པ་ཡིན། །ཞེས་བྱ་བ་ལ། །མི་གང་གི་སྤྱོད་པ་བསྟེན་བཅོས་ལས་ཇི་སྐད་
སྟོན་པའི་རྗེས་སུ་འཇུག་པར་བྱེད་པ་དང་། །གང་ན་ཉེ་འཁོར་དུ་གནས་པའི་གྲོགས་ཀྱི་སེམས་དང་རྗེས་སུ་མཐུན་པར་འཇུག་པ་དང་། དེ་བཞིན་དུ་གཟུགས་དང་སྒྲ་ལ་སོགས་པའི་དོན་ལ་བློ་མ་འཁྲུགས་པར་གྱུར་པ་གང་ཡིན་པ་དེ་ནི་བཅུད་ཀྱིས་ལེན་ཡོངས་སུ་རྫོགས་པ་ཡིན་
པར་ཤེས་པར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། །ཕྱི་མའི་གནས་ཀྱི་ལེའུ་སུམ་ཅུ་རྩ་དགུ་པའི་རྣམ་པར་འགྲེལ་པའོ། །དེ་ནས་རོ་ཙ་བར་བྱ་བའི་ལེའུ་བཤད་
པར་བྱའོ། །སྐྱེས་བུས་རྟག་ཏུ་ཡུལ་བསྟེན་པས། །རོ་ཙ་བར་ནི་འདོད་བྱ་སྟེ། །དགའ་དང་བརྟ་དང་བུ་རྒྱུད་ནི། །ཡོན་ཏན་ལྡན་པས་དེ་ལ་གནས། །ཞེས་བྱ་བ་ལ། །སྐྱེས་བུ་རྟག་ཏུ་ཡུལ་བསྟེན་པར་བྱེད་པས་རོ་ཙ་བར་བྱ་བའི་སྨན་འདོད་པར་བྱ་ཞིང་དེ་བསྟན་པར་བྱ་སྟེ། །གང་གི་ཕྱིར་རོ་
ཙ་བར་བྱ་བའི་ཆོ་ག་དེ་ལ་ནི་དགའ་བ་དང་ལུས་རྒྱས་ཤིང་བརྟ་བ་དང་། །ཡོན་ཏན་དང་ལྡན་པའི་བུ་རྒྱུད་འཕེལ་བར་བྱ་བ་དག་དེ་ལ་གནས་པ་ཡིན་ནོ། །བུ་ཚའི་རྒྱུད་ནི་སྐྱེད་བྱེད་ཅིང་། །འཕྲལ་དུ་ཡང་དག་དགའ་བྱེད་གང་། །གང་གིས་རྟ་ལྟར་རབ་སྟོབས་ལྡན། །བུད་མེད་ལ་ནི་ཐོགས་

མེད་འགྲོ། །བུད་མེད་ལ་རབ་ཆགས་འགྱུར་བ། །གང་དང་གང་གིས་འཕེལ་འགྱུར་བ། །དེ་ནི་རོ་ཙ་བྱེད་པ་སྟེ། །ལུས་ཀྱི་སྟོབས་ཀྱང་སྐྱེད་པའི་མཆོག །ཅེས་བྱ་བ་ལ། །བཅུད་ཀྱིས་ལེན་གང་བུ་ཚའི་རྒྱུད་ནི་སྐྱེད་ཅིང་མི་རབས་གནས་པར་བྱེད་པ་དང་།
གང་འཕྲལ་དུ་ཡང་དགའ་ཞིང་བདེ་བར་བྱེད་པ་དང་། །དངོས་པོ་གང་ཞིག་བསྟེན་པས་བུད་མེད་ལ་འཇུག་པར་བྱེད་པའི་ནུས་པ་དང་ལྡན་ཏེ། །ཇི་ལྟར་རྟ་འདོད་པ་སྤྱོད་པ་ལ་ནུས་པ་དང་ལྡན་པ་ལྟ་བུར་འགྱུར་ཞིང་། །གང་ཞིག་ལ་གནས་ན་བུད་མེད་ལ་རབ་ཏུ་ཆགས་པར་འགྱུར་བ་དེ་འཕེལ་
ཞིང་རྒྱས་པར་འགྱུར་བ་གང་ཡིན་པ་དེ་ལ་ནི་རོ་ཙ་བར་བྱེད་པ་ཞེས་བྱ་སྟེ། །དེ་ནི་ལུས་ཀྱི་སྟོབས་དང་བཟི་བརྗིད་སྐྱེད་བར་བྱེད་པའི་མཆོག་ཡིན་ནོ། །ཆོས་དང་གྲངས་དང་ཚེ་རིང་དང་། །འཇིག་རྟེན་གཉིས་ཀའི་བཅུད་ལེན་འགྱུར། །གཅིག་ཏུ་སྐྱོན་ནི་མེད་པ་ཡི། །ཚངས་པར་
སྤྱོད་ལ་བདག་ཡི་རང་། །ཞེས་བྱ་བ་ལ། །གང་ཞིག་ཚངས་པར་སྤྱོད་པ་གཅིག་ཏུ་སྐྱོན་མེད་པ་ལ་གནས་པ་ནི་ཆོས་དང་གྲགས་པར་འགྱུར་བ་དང་། །ཚེ་རིང་བར་བྱེད་པ་དང་། །འཇིག་རྟེན་འདི་དང་ཕྱི་མར་བཅུད་ཀྱིས་ལེན་དུ་གྱུར་པའི་ཚངས་པར་སྤྱོད་པ་ལ་གནས་པ་ལ་བདག་ཤིན་ཏུ་
ཡི་རང་ངོ་། །སྙིང་སྟོབས་ཆུང་བ་ཉོན་མོངས་པས། །གནོད་པར་གྱུར་པའི་ནད་བུ་ཅན། །ལུས་མི་ཟད་པ་བསྲུང་བའི་ཕྱིར། །རོ་ཙའི་ཆོ་ག་བརྗོད་པ་ཡིན། །ཞེས་བྱ་བ་ལ། །སེམས་ཅན་སྙིང་སྟོབས་ཆུང་བ་དང་། །ཉོན་མོངས་པ་ཤས་ཆེ་བར་གྱུར་པ་དང་། །ནད་བུ་ཅན་གྱི་
འདོད་པ་སྤྱད་པས་ལུས་ཟད་པར་འགྱུར་བ་བསྲུང་བའི་ཕྱིར་རོ་ཙ་བའི་ཆོ་ག་བཤད་པ་ཡིན་ནོ། །ནད་མེད་ལང་ཚོ་ལྡན་པ་དང་། །རོ་ཙ་བ་ནི་བསྟེན་བྱེད་པ། །དུས་ཚིགས་ཀུན་ལ་ཉིན་རེ་ཞིང་། །ཉལ་པོར་བྱ་བ་དགག་པ་མེད། །ཅེས་བྱ་བ་ལ། །སྐྱེས་བུ་ནད་མེད་པ་དང་ལང་ཚོ་དང་ལྡན་
པ་དག་རོ་ཙ་བའི་ཆོ་ག་ལ་བསྟེན་པར་བྱེད་པ་ལ་ནི། །དུས་ཚིགས་དྲུག་པོ་ཀུན་ལ་ཡང་ཉིན་རེ་ཞིང་ཉལ་པོ་བྱ་ཞིང་འཁྲིག་པ་སྤྱོད་པ་ལ་དགག་པ་མེད་དོ། །དེ་ནས་སྣུམ་འགྱུར་སྦྱང་བྱས་པ། །ནི་རུ་ཧ་དང་འཇམ་རྩིར་བཅས། །མར་དང་ཏིལ་མར་སྦྲང་རྩི་དང་། །ཤ་ཁུ་འོ་མ་ཁ་རར་

བཅས། །འོ་མ་ཤ་དང་ཤ་ཁུ་བཟའ། །སྐྱོར་བ་ཤེས་པས་དང་པོར་གཏང་། །དེ་ནས་རོ་ཙ་བྱེད་སྦྱོར་བ། །ཁུ་བ་བུ་ཚ་འཕེལ་བྱེད་བྱ། །ཞེས་བྱ་བ་ལ། །དེ་ནས་དའི་འོག་ཏུ་མི་སྣུམ་གྱི་ཆོ་ག་བྱས་ཤིང་སྐྱུག་སྨན་ལ་སོགས་པའི་སྦྱང་བ་བྱས་པ་དང་། །ནི་རུ་ཧ་ལ་སོགས་པ་
སྦྱོར་བ་ཤེས་པའི་སྨན་པས་དང་པོ་གཏང་བར་བྱའོ། །དེའི་འོག་ཏུ་རོ་ཙ་བའི་སྦྱོར་བ་ཇི་སྐད་བཤད་པ་དང་བུ་ཚ་འཕེལ་བར་བྱེད་པའི་སྦྱོར་བ་དག་བྱའོ། །མེ་ཏོག་དྲི་མནམ་གྲིབ་མ་མེད། །འབྲས་བུ་མེད་པར་གྱུར་པའི་ཤིང་། །ཡལ་ག་གཅིག་པའི་ཤིང་གཅིག་བཞིན། །
བུད་མེད་མེད་མི་དེ་དང་འདྲ། །ཞེས་བྱ་བ་ལ། །ཇི་ལྟར་ཤིང་མེ་ཏོག་དྲི་མནམ་བ་ཡོད་ཅིང་གྲིབ་མ་དང་འབྲས་བུ་མེད་པའི་ཤིང་གཅིག་པུ་ཡོད་ཅིང་ཡལ་ག་གཅིག་ཡོད་ཀྱི་མང་པོ་མེད་པ་ཇི་ལྟ་བ་བཞིན་དུ་བུད་མེད་མེད་པའི་མི་ཡང་དེ་དང་འདྲ་བར་ཤེས་པར་བྱའོ། །གོམ་འགྲོས་འཁྱོར་ཞིང་
ཚིག་མི་གསལ། །རྡུལ་གྱིས་ཡོགས་པ་ལྟར་སྣང་ཞིང་། །བཞིན་རས་སྣབས་ཀྱིས་གོས་པ་ཡང་། སྙིང་ནི་དགའ་བར་བྱེད་པ་ཡིན། །རེག་པ་དང་ནི་མཐོང་སོགས་ལ། །བུ་མཉམ་བདེ་བ་ཡོད་མིན་ན། །གང་ཞིག་ཆོས་དང་གྲགས་པར་ལྡན། །ང་རྒྱལ་རིགས་འཕེལ་སྨོས་ཅི་
དགོས། །ཞེས་བྱ་བ་ལ། །བུ་གང་ཤིན་ཏུ་ངན་ཅིང་གོམ་འགྲོས་འཁྱོར་བ་དང་། ཚིག་མི་གསལ་བ་ལ་སོགས་པའི་རང་བཞིན་ཅན་དག་ཀྱང་སྙིང་དགའ་བར་བྱེད་པ་ཡིན་ཞིང་དེ་དང་རེག་པ་དང་མཐོང་བ་ལ་སོགས་པ་དེ་དང་མཉམ་པའི་བདེ་བ་ཡོད་པ་མ་ཡིན་ན། །བུ་གང་ཞིག་
ཆོས་དང་གྲགས་པ་ལ་སོགས་པ་འཕེལ་བར་བྱེད་པ་དེ་ལྟ་སྨོས་ཀྱང་ཅི་དགོས་ཏེ། །དེ་ལ་མཉམ་པའི་དཔེ་གང་ཞིག་གཞལ་བར་བྱ་སྟེ་དཔེ་མེད་པ་ཡིན་ནོ། །ལུས་སྦྱང་བྱས་ཏེ་ཅི་ནུས་པར། །རོ་ཙའི་སྦྱོར་བ་བརྩམ་པར་བྱ། །ཞེས་བྱ་བ་ལ། །མིའི་ལུས་སྐྱུག་སྨན་ལ་སོགས་པས་སྦྱང་བ་བྱས་
ནས། །དེའི་འོག་ཏུ་ནུས་པ་དང་ལྕོགས་པ་ཅི་ཡོད་པས་རོ་ཙ་བའི་སྦྱོར་བ་བརྩམ་པར་བྱའོ། །འདམ་བུ་གུང་ཤིང་འཇག་མ་སོགས། །པུ་ཤེལ་ཙེ་དང་བི་ད་རི། །ཀཎྜཀ་རིའི་རྩ་བ་དང་། །བ་ལ་འཚོ་བྱེད་ཟངས་རྩི་བ། །རམ་ཉེ་བ་གཉིས་མེད་གཉིས། །ཉེའུ་ཤིང་པ་རྞ་རྣམ་གཉིས་དང་། །

ཨ་ཤྭ་གནྡྷ་ཁ་སྲལ་ཕྲེའུ། །ཨ་ཏི་བ་ལ་བ་སྤྲུ་བ། །བི་ད་རི་ཏི་པ་ཡ་སྱེ། །ར་སྣ་གཟེ་མ་ཛི་བན་ཏི། །ཤིང་མངར་ས་ལ་པརྞི་རྣམས། །རེ་རེའང་སྲང་ནི་གསུམ་གསུམ་ཆ། །མོན་སྲན་གྲེའུ་བྲེ་བཞི་དང་། །ཆུ་བྲེ་སུམ་ཅུ་གཉིས་ནང་བསྐོལ། །ཁུ་བ་བྲེ་
བཞི་ལུས་པ་རུ། །མར་བྲེ་བཞི་དང་བི་ད་རི། །སྐྱུ་རུ་ར་དང་བུ་རམ་ཤིང་། །བྲེ་ནི་བཞི་བཞི་གཞུག་པར་བྱེ། །འོ་མ་མར་གྱི་བཞི་འགྱུར་དང་། །པིར་ཁ་སྲལ་ར་མཉེ་གཉིས། །ཤིང་མངར་ཕལ་གུ་པི་པི་ལིང་། །རྒུན་འབྲུམ་འབྲ་གོ་བི་ད་རི། །མ་དུ་ཀ་དང་ཉེའུ་ཤིང་པ། །འདི་
དག་བཏགས་ཏེ་བཅུག་ནས་ནི། །དེ་བསྐོལ་བཙགས་པའི་ནང་དུ་ནི། །ཁ་ར་དཀར་པོ་སྨིག་རྐང་ནི། །སྨན་ནི་བྲེ་རེ་གཞུག་པ་དང་། །པི་པི་ལིང་ནི་སྲང་བཞི་དང་། །ན་ལེ་ཤམ་ནི་སྲང་གཅིག་དང་། །ཤིང་ཚ་སུག་སྨེལ་གེ་སར་རྣམས། །རེ་རེ་སྲང་ནི་ཕྱེད་ཕྱེད་ཕྱེ། །སྦྲང་
རྩི་སྲང་ནི་བཅུ་དྲུག་སྦྱར། །དེ་ལས་ཉིན་རེ་སྲང་རེ་བཟའ། །འོ་མ་དང་ནི་ཤ་ཁུ་འཐུང་། །དེས་ནི་རྟ་ལྟར་སྤྱོད་འགྱུར་ཞིང་། །མཆིལ་པ་ལྟ་བུར་འདོད་པ་སྤྱོད། །ཅེས་བྱ་བ་ལ། འདམ་བུ་ནས་ཀཎྜཀ་རིའི་བར་གྱི་རྩ་བ་དང་། །དེ་བཞིན་དུ་བལ་ལ་སོགས་པའི་སྨན་སྣ་རེ་ཞིང་སྲང་གསུམ་
གསུམ་བྱས་ལ། །མོན་སྲན་གྲེའུ་ལ་སོགས་པའི་ནང་དུ་བསྐོལ་ཏེ། །དེའི་ཁུ་བ་བཞི་ཆ་ལུས་པར་མ་རལ་སོགས་པའི་ཁུ་བ་བཞི་པོ་བྲེ་བཞི་བཞི་བཅུག་ལ་འོ་མ་བྲེ་བཅུ་དྲུག་བཅུག་སྟེ། །བི་ར་ནས་ཉིའུ་ཤིང་གི་བར་དུ་བསྐོལ་བའི་ཆོ་ག་བཞིན་དུ་ལྡེ་གུར་བྱས་པ་བཅུག་ནས་མར་དེ་བསྐོལ་
ལ་བཙགས་པའི་ནང་དུ་ཁ་ར་དང་ཅུ་གང་བྲེ་རེ་བཅུག་ལ། །དེ་བཞིན་དུ་པི་པི་ལིང་ལ་སོགས་པ་ཡང་ཇི་སྐད་སྨོས་པ་བཞིན་དུ་བཅུག་སྟེ་སྦྱར་ལ། །དེ་ནས་ཉིན་རེ་སྲང་རེ་ཟེས་ཤིང་འོ་མ་དང་ཤ་ཁུ་འཐུངས་ན་རོ་ཙ་བའི་སྦྱོར་བ་དེས་རྒོད་མའི་ནང་གི་རྟ་ལྟ་བུའམ། །བྱེའུ་མཆིལ་པ་དང་
འདྲ་བར་འདོད་པ་སྤྱོད་ནུས་སོ། །བི་ད་རི་དང་པི་པི་ལིང་། །ཤ་ལི་འབྲས་རྩ་པི་ཡ་ལིང་། །ཁ་སྲལ་ཕྱེ་མ་ཕུལ་རེ་དང་། །དེ་བཞིན་སྦྲང་རྩི་སྲང་བརྒྱད་དང་། །ཁ་རའི་ཕྱེ་མ་སྲང་ལྔ་བཅུ། །མར་སར་སྲང་ནི་བཅུ་དྲུག་སྦྱར། །དེ་ལས་ཞོ་ནི་གཉིས་གཉིས་བཟའ། །བུད་མེད་

བརྒྱ་ལ་སྤྱོད་པར་ནུས། །ཞེས་བྱ་བ་ལ། །བི་ད་རི་ལ་སོགས་པའི་ཕྱེ་མ་ཕུལ་རེ་དང་། །སྦྲང་རྩི་ལ་སོགས་པ་ཇི་སྐད་སྨོས་པ་བཞིན་དུ་སྦྱར་བའི་རོ་ཙ་བའི་སྦྱོར་བ་འདི་བསྟེན་ན་བུད་མེད་བརྒྱ་ལ་ཡང་འདོད་པ་སྤྱོད་ནུས་པར་འགྱུར་རོ། །ཁ་སྲལ་ཕྲེའུ་ཞོ་འམ་ནི། །མ་ཤ་འོ་མར་བསྐོལ་ཏེ་བསྒྲངས། །མར་དང་སྦྲང་རྩིར་བཅས་པ་
དག །ཟོས་ལ་བ་སར་འོ་མ་བཏུང་། །མཚན་མོ་ཐོག་ཐག་གཉིད་མ་ལོག །དུབ་པ་མེད་པར་ཉལ་པོ་སྤྱོད། །ཅེས་བྱ་བ་ལ། །ཁ་སྲལ་ཕྲེའུ་ལ་སོགས་པ་འོ་མར་བསྐོལ་བའམ། །མ་ཤ་འོ་མ་དང་བསྐོལ་བ་བསྒྲངས་པའི་ནད་དུ་མར་ལ་སྦྲ་རྩི་བཏབ་སྟེ་སྐྱེས་བུས་ཟོས་ལ། །དེའི་འོག་ཏུ་བ་སར་པ་བེའུ་ལན་
ཅིག་བཙས་པའི་འོ་མ་འཐུངས་ན་མཚན་རངས་བུ་མེད་ལ་ཉལ་པོ་སྤྱོད་ཀྱང་ངལ་བ་མེད་པར་འགྱུར་རོ། །ར་ཐུག་རླིག་པ་འོ་མར་བཙོས། །ཏིལ་དང་ལན་མང་བསྲེས་པ་དང་། །ཁ་རར་བཅས་ཟོས་གང་ཡིན་དེ། །བུད་མེད་བརྒྱ་ལ་འང་གསར་སྙམ་སེམས། །ཞེས་བྱ་བ་ལ། །ར་ཐུག་གི་རླིག་པ་འོ་མའི་ནང་དུ་བཙོས་ལ་
ཏིལ་དང་ཡང་དང་ཡང་དུ་ལན་མང་པོར་བསྲེས་ལ་ཁ་ར་དང་བཅས་པ་ཟོས་ན་བུད་མེད་བརྒྱ་ལ་སྤྱོད་པ་ན་ཡང་སྔོན་ཆད་མ་སྤྱད་པའི་སར་པ་སྙམ་དུ་སེམས་པར་འགྱུར་རོ། །བི་ད་རི་ཡི་ཕྱེ་མ་ནི། །རང་གི་ཁུ་བར་ལན་མང་སྤངས། །ཞུན་མར་སྦྲང་རྩིར་བཅས་བལྡགས་ན། །དུད་མེད་བཅུ་ལ་སྤྱོད་བར་ནུས། །ཞེས་བྱ་བ་ལ། །
བི་ད་རེའི་ཕྱེ་མ་བི་ད་རི་རང་ཉིད་བསྐོལ་པའི་ཁུ་བའི་ནང་དུ་སྤངས་བ་ཞུན་མར་དང་སྦྲང་རྩི་དང་ལྡེ་གུར་བྱས་ཏེ་ཟོས་ན་ཡང་ཉིན་རེ་ཞིང་བུད་མེད་བཅུ་ལ་སྤྱོད་པར་ནུས་སོ། །པི་ལིང་སྐྱུ་རུ་ར་ཡི་ཕྱེ། །རང་གི་ཁུ་བར་ལེགས་སྤངས་ལ། །ཤ་ཁ་ར་མར་སྦྲང་རྩིར་སྦྱར། །ཟོས་རྗེས་འོ་མ་འཐུངས་པ་གང་། །མི་དེ་བརྒྱད་ཅུ་ལོན་ན་ཡང་། །
ལང་ཚོར་གནས་ཤིང་འདོད་སྦྱོད་ནུས། །ཞེས་བྱ་བ་ལ། །པི་པི་ལིང་དང་སྐྱུ་རུ་རའི་ཕྱེ་མ་ཇི་སྐད་སྨོས་པ་བཞིན་དུ་བསྟེན་ན་ཡང་མི་དེ་ལོ་བརྒྱད་ཅུ་ལོན་ཡང་ད་རལ་བབ་པ་བཞིན་དུ་བུད་མེད་ལ་འདོད་པ་སྤྱོད་ནུས་པར་འགྱུར་རོ། །ཤེང་མངར་ཕྱེ་མ་ཞོ་གཉིས་དང་། །མར་དང་སྦྲང་རྩི་དེ་མཉམ་པ་ཟོས་རྗེས་འོ་མ་འཐུངས་གྱུར་ན། །
མི་དེ་རྟག་ཏུ་འདོད་སྤྱོད་ནུས། །ཞེས་བྱ་བ་ལ། །སྐྱེས་བུ་གང་ཤིང་མངར་བཏགས་པའི་ཕྱེ་མ་ཞོ་གཉིས་མར་དང་སྦྲང་རྩི་དེ་དང་མཉམ་པར་སྦྱར་བ་ཟོས་ལ་དེའི་འོག་ཏུ་འོ་མ་འཐུངས་ན་ཡང་རྟག་ཏུ་ཆགས་པ་སྤྱོད་ནུས་པར་འགྱུར་རོ། །ཀར་ཀ་ཏ་ལི་སྲིང་གི་ཕྱེ། །འོ་མར་སྦྱར་ཏེ་འཐུངས་པ་དང་། །ཁ་ར་འོ་མ་མར་བཅས་པའི་

ཟས་ཟོས་བུད་མེད་ལ་ཕོད་འགྱུར། །ཞེས་བྱ་བ་ལ། །ཡང་མི་གང་ཀར་ཀ་ཏ་སྲིང་གི་ཕྱེ་མ་ཇི་སྐད་སྨོས་པ་ལྟར་བསྟེན་ན་ཡང་བུད་མེད་ལ་འདོད་པ་སྤྱོད་པ་ཁྱུ་མཆོག་ལྟར་ནུས་པར་འགྱུར་རོ། །པ་ཡས་སྱ་དང་འོ་མ་བསྐོལ། །མར་དང་སྦྲང་རྩི་བཅས་ཟ་ཞིང་། །བ་ནི་
ཡར་མའི་འོ་མ་འཐུངས། །དེ་ཡི་ས་བོན་ཟད་མི་ཤེས། །ཞེས་བྱ་བ་ལ། །ཡང་མི་གང་པ་ཡ་སྱ་དང་འོ་མ་བསྐོལ་བ་མར་དང་སྦྲང་རྩི་དང་ཟ་ཞིང་། །དེ་བཞིན་དུ་བ་ཡར་མ་སྟེ་བེའུ་སྐྱེས་ནས་ལོ་གཅིག་ལོན་པའི་འོ་མ་འཐུངས་ན་དེ་བུད་མེད་སྤྱོད་ཀྱང་ས་བོན་ཟད་མི་ཤེས་པར་འགྱུར་རོ། །
ཁ་སྲལ་ཕྲེའུ་བུ་རམ་གྱི། །ས་བོན་ཕྱེ་མ་ཁ་རར་བཅས། །འོ་མ་བཞོས་མ་ཐག་འཐུངས་ན། །ལུང་བོང་ལྟ་བུར་སྤྱོད་པར་ནུས། །ཞེས་བྱ་བ་ལ། །ཁ་སྲལ་ཕྲེའུ་དང་བཅས་པ་བུ་རམ་ཤིང་ཕྲ་མོ་ས་བོན་གྱི་ཕྱེ་མ་ཁ་ར་དང་བཅས་པར་ཟོས་ལ། །འོ་མ་བཞོས་མ་ཐག་འཐུངས་ན་བུད་མེད་
རྣམས་ལ་ལུང་བོང་ལྟར་འདོད་ཆགས་སྤྱོད་ནུས་པར་འགྱུར་རོ། །ཨུཙྪ་ཊ་ཡི་ཕྱེ་མ་དང་། །ཉེའུ་ཤིང་སྦྱར་བ་འང་དེ་བཞིན་ནོ། །ཞེས་བྱ་བ་ལ། །ཨུཙྪ་ཊའི་ཕྱེ་མ་ཁ་ར་དང་བཅས་པ་ཟོས་ལ་འོ་མ་བཞོས་མ་ཐག་འཐུངས་པ་འམ་ཉེའུ་ཤིང་གི་སྦྱོར་བ་གོང་མ་ལྟར་བྱས་ན་ཡང་ལུང་བོང་ལྟར་
སྤྱོད་པར་འགྱུར་རོ། །ཞོ་སྤྲིས་ཟླ་བ་ལྟར་དཀར་བ། །ཚགས་ཀྱིས་བཙགས་པ་ཟོས་ནས་ནི། །ཁ་ར་དྲུག་ཅུའི་འབྲས་ཆན་ཟོས། །རྒན་པོའང་གཞོན་ནུ་བཞིན་དུ་སྤྱོད། །ཅེས་བྱ་བ་ལ། །ཞོའི་སྦྲིས་མ་ཟླ་བ་ལྟར་རབ་ཏུ་དཀར་བ་ཚགས་ཀྱིས་བཙགས་པ་དང་། །འབྲས་དྲུག་
ཅུ་པའི་ཆན་དང་ཁ་རར་བཅས་པ་ཟོས་ན་ཡང་རྒན་པོ་ཞིག་ཡིན་ཡང་དར་ལ་བབ་པ་བཞིན་དུ་འདོད་པ་སྤྱོད་པར་ནུས་སོ། །གཟེ་མ་མ་ཤ་ཨ་རུ་ར། །ཁ་སྲལ་ས་བོན་ཉིའུ་ཤིང་པ། །འོ་མ་བཅས་འཐུངས་རྒན་པ་ཡང་། །བུད་མེད་བརྒྱ་ལ་སྤྱོད་པར་ནུས། །ཞེས་བྱ་བ་ལ། །གང་
ཞིག་གཟེ་མ་ལ་སོགས་པ་འོ་མ་དང་བསྐོལ་བ་འཐུངས་ན་མི་དེ་རྒས་པ་ཡིན་ཡང་བུད་མེད་བརྒྱ་ལ་སྤྱོད་པར་འགྱུར་རོ། །གང་ཡང་སྣུམ་ཞིང་མངར་བ་དང་། །སྟོབས་འཕེལ་ཉམས་ནི་རྟས་བྱེད་དང་། །ཡིད་ནི་དགའ་བར་བྱེད་པ་གང་། །དེ་དག་ཐམས་ཅད་རོ་ཙར་བཤད། །

དེ་བས་རྫས་ནི་འདི་ལྟ་བུས། །བརྟས་བྱས་བུད་མེད་ལ་འཇུག་བྱ། །རང་གི་ཤུགས་ཀྱིས་སྤྱོད་པ་དང་། །བུད་མེད་ཡོན་ཏན་གྱིས་དགའ་སྤྱད། །ཅེས་བྱ་བ་ལ། །གང་ཡང་རོ་མངར་བ་དང་སྣུམ་པ་དང་། །ཉམས་འཕེལ་ཞིང་རྒྱས་བར་བྱེད་པ་དང་། །ཡིད་དགའ་བར་བྱེད་དེ། །དེ་
ཐམས་ཅད་ཀྱང་རོ་ཙ་ཞིང་ཁུ་བ་ལ་འཕེལ་བར་བྱེད་པར་བཤད་དོ། །དེ་བས་ན་མངར་བ་ལ་སོགས་པའི་རྫས་འདི་ལྟ་བུས་མི་བརྟས་པར་བྱས་ནས་བུད་མེད་ལ་འཇུག་པ་དང་། །དེ་བཞིན་དུ་རང་གི་དགའ་བའི་ཤུགས་བ་དོ་བས་བསྐྱོད་པ་དང་། །བུད་མེད་ཀྱི་ཡོན་ཏན་གྱིས་དགའ་བར་བྱེད་པའི་
སེམས་དང་། །བུད་མེད་ལ་འཇུག་ཅིང་དགའ་བར་འདོད་པ་སྤྱོད་པར་བྱའོ། །ཆོས་ཀྱི་དཔག་བསམ་ཤིང་མྱུ་གུ། །དབང་པོའི་བདེ་བ་ཀུན་བསྟེན་བྱ། །ཡུལ་ནི་ཡིད་དུ་འོང་བ་ལྔ། །འདོད་པའི་ལྷ་ཡི་མདའ་ཡིན་ནོ། །ཞེས་བྱ་བ་ལ། །འདོད་པའི་ཆོས་ཀྱི་ལྷའི་དཔག་བསམ་གྱི་མྱུ་གུ་
ལྟ་བུ་ཡིན་ཞིང་འདོད་པའི་ལྷའི་སྡེར་གྱུར་པ་གཟུགས་ལ་སོགས་པའི་ཡུལ་ལྔ་པོ་གང་དག་ཡིན་པ་དབང་པོའི་བདེ་བ་སྐྱེད་པར་བྱེད་པ་དེ་བསྟེན་པར་བྱའོ། །ཡིད་འོང་ཡུལ་ནི་རེ་རེས་ཀྱང་། །ཚིམ་ཞིང་དགའ་བྱེད་མཆོག་ཡིན་ནོ། །བུད་མེད་ལུས་ལ་འདུས་ནས་གང་། །གནས་པ་དེ་ནི་སྨོས་
ཅི་དགོས། །ཞེས་བྱ་བ་ལ། །ཡིད་དུ་འོང་བའི་ཡུལ་སྒྲ་ལ་སོགས་པ་ཡུལ་རེ་རེས་ཀྱང་ཚིམ་པ་དང་དགའ་བར་བྱེད་པའི་མཆོག་ཡིན་ན་ཡུལ་ཐམས་ཅད་འདུས་པར་གྱུར་བའི་བུད་མེད་ལྟ་སྨོས་ཀྱང་ཅི་དགོས། །གང་གི་མིང་ཐོས་ན་ཡང་སྙིང་དགའ་ཞིང་། །མཐོང་ན་ངོམས་པར་འགྱུར་བ་
མེད་པ་དང་། །དབང་པོ་ཀུན་འདྲེན་ལྕགས་ཀྱུར་འགྱུར་བ་ཡིན། །བུད་མེད་ཁྱོ་ཡི་རྗེས་འཇུག་འཕྱོན་མ་མིན། །སྒྱུ་རྩལ་འཇོ་སྒེག་ན་ཚོད་ལུས་ཀྱིས་བརྒྱན། །དགའ་བའི་ཕྱིར་ནི་ངོ་ཚ་དབེན་པར་སྦྱོད། །ཚིག་སྙན་སྨྲ་ཞིང་མཚུངས་པར་མངོན་དགའ་བཅས། །བུད་མེད་དེ་ནི་རོ་ཙའི་དོན་མཆོག་བྱེད། །
ཅེས་བྱ་བ་ལ། །བུད་མེད་གང་གི་མིང་ཙམ་ཐོས་ན་ཡང་སྙིང་དགའ་ཞིང་རོ་ཙ་བར་བྱེད་པ་དང་། །བུད་མེད་གང་མཐོང་ན་ཡིད་ངོམས་པར་འགྱུར་བ་མེད་པ་དང་། །གང་དབང་པོ་ཐམས་ཅད་འགུགས་ཤིང་འདྲེན་པའི་ལྕགས་ཀྱུར་གྱུར་པ་དང་། །བུད་མེད་ཁྱོའི་རྗེས་སུ་འཇུག་ཅིང་གཞན་ལ་མི་འཕོ་

བའི་ཁྱིམ་ཐབ་ཀྱི་བརྟུལ་ཞུགས་ཅན་དུ་གྱུར་པ་དང་། །དེ་བཞིན་དུ་སྒྱུ་རྩལ་དང་ལུས་ཀྱི་འཇོ་སྒེག་དང་། །ན་ཚོད་གཞོན་པས་བརྒྱན་པར་གྱུར་པ་དང་། །དེ་བཞིན་དུ་ཕྱི་རོལ་མང་པོ་འདུས་པའི་ནང་དུ་ངོ་ཚ་དང་བཅས་པ་དང་། །དབེན་པར་གཅིག་པུ་གནས་པ་དང་། །
སྤྱོད་བའི་བག་ཡངས་ལ་མཁས་པ་དང་། །ཚིག་འཇམ་ཞིང་སྙན་པར་སྨྲ་བ་དང་། །འདོད་པ་ལ་མཚུངས་པར་དགའ་བར་གྱུར་པའི་བུད་མེད་དེ་ནི་རོ་ཙ་བའི་དོན་གྱི་མཆོག་གྲུབ་པར་བྱེད་པ་ཡིན་ནོ། །འདོད་པའི་བསྟན་བཅོས་ལས་བཤད་སྐྱོན་མེད་པའི། །ཡུལ་དང་དུས་དང་ཉམས་
སྟོབས་རྗེས་མཐུན་ཞིང་། །སྨན་དཔྱད་བསྟན་བཅོས་སྦྱོར་དང་མི་འགལ་བ། །འདོད་པའི་སྤྱོད་པ་མ་ལུས་སྤྱད་པར་བྱ། །ཞེས་བྱ་བ་ལ། །འདོད་པའི་བསྟན་བཅོས་བྷ་ཙ་ཡ་ན་ལ་སོགས་པ་ལས་བཤད་པའི་ཉེས་པའི་སྐྱོན་མེད་པ་དང་། །ཡུལ་དང་དུས་དང་ཉམས་སྟོབས་ཀྱི་རྗེས་སུ་
མཐུན་པར་སྤྱོད་པ་དང་། །སྨན་དཔྱད་དེ་བསྟན་བཅོས་ལས་བཤད་པའི་སྦྱོར་བ་དང་མི་འགལ་བའི་འདོད་པ་སྤྱོད་པ་དེ་ལྟ་བུ་དག་གིས་འདོད་པ་སྤྱོད་པར་བྱའོ། །བསྐུ་བྱུག་ལུས་དྲིལ་སྨན་ཆུ་བླུགས་དང་དྲིལ། །མེ་ཏོག་ཕྲེང་བ་སྣ་ཚོགས་རྒྱན་དང་ལྡན། །གླུ་དང་སྙན་ངག་ལ་སོགས་གཏམ་
ལ་མཁས། །རང་བཞིན་ཚོད་མཚུངས་ཤིང་དབང་གྱུར་གྲོགས། །ཞེས་བྱ་བ་ལ། །གྲོགས་པོ་འཛའ་བཤེས་ཀྱང་བསྐུ་བྱུག་ལ་སོགས་པ་དང་ལྡན་ཞིང་གླུ་ལ་སོགས་པ་ལ་མཁས་པ། །རང་བཞིན་དང་ན་ཚོད་མཉམ་པ་དང་རང་གི་དབང་དུ་གྱུར་པ་ཡང་ཡིད་དང་མཐུན་ཞིང་མགུ་བར་
བྱེད་པ་ཡིན་པས་རོ་ཙ་བར་བྱེད་པ་ཡིན་ནོ་ཞེས་བྱ་བ་ནས་བཤད་པ་དང་སྦྱར་རོ། །རང་གི་ཁང་པའི་ཉེ་འཁོར་ཁྲུས་རྫིང་བུ། །པདྨའི་གེ་སར་སྦྲང་རྩིས་མྱོས་པ་ཡི། །སྦྲང་མ་བྱ་དང་བཅས་པར་གྱུར་པ་ནི། །སྔོ་ཞིང་གཞི་མཉམ་རི་ཡི་འདབ་ན་ནི། །ནགས་ཚལ་ཁྱིམ་དང་ཉེ་བར་འགྱུར་བ་དང་། །
ཞེས་བྱ་བ་ལ། །རང་གི་ཁང་པའི་ཉེ་འཁོར་ན་ཁྲུས་ཀྱི་རྫིང་བུ་ཡིད་དུ་འོང་བ་པདྨའི་གེ་སར་གྱི་རྡུལ་ལས་བྱུང་བའི་སྦྲང་རྩིས་མྱོས་པར་གྱུར་པའི་སྦྲང་མའི་ཚོགས་དང་བཅས་པ་ཡང་ཡིད་དུ་འོང་བ་ཡིན་པས་ན་རོ་ཙ་བར་བྱེད་པ་ཡིན་ལ། །དེ་བཞིན་དུ་བྱ་སྣ་ཚོགས་དང་བཅས་པའི་ནགས་ཚལ་

གཞི་མཉམ་ཞིང་ཡིད་དུ་འོང་བ་ཡང་ཁྱིམ་གྱི་འདབ་ཉེ་བར་འདུག་པ་དེ་ཡང་ཉམས་དགའ་བར་བྱེད་པ་ཡིན་པས་ན་རོ་ཙ་བར་བྱེད་པ་ཡིན་ནོ། །མཐོང་ན་དགའ་བའི་ཤིང་ནི་སྣ་ཚོགས་སྐྱེས། །མཉན་ན་བདེ་བའི་ཁུ་བྱུག་སྒྲ་སྙན་སྒྲོགས། །ལུས་བདེ་བུད་མེད་རྒྱན་ལྡན་དུས་དབང་འགྱུར། །
སེམས་བདེ་མ་ལུས་འཁོར་གྱིས་བསྐོར་བ་དང་། །ཞེས་བྱ་བ་ལ། །སྐྱེད་མོས་ཚལ་མཐོང་ན་ཉམས་དགའ་ཞིང་བདེ་བ་སྐྱེད་པ་སྣ་ཚོགས་པ་མཐོང་བས་དགའ་བ་སྐྱེད་པ་དེ་ཡང་རོ་ཙ་བར་བྱེད་པ་ཡིན་ལ། །དེ་བཞིན་དུ་མཉན་ན་བདེ་བའི་སྒྲ་ཁུ་བྱུག་ལ་སོགས་པ་དག་གི་སྒྲ་ཡིད་དུ་འོང་བ་ཐོས་པ་ཡང་
རོ་ཙ་བར་བྱེད་པ་ཡིན་ནོ། །བུད་མེད་རྒྱན་གྱིས་བརྒྱན་ཞིང་དུས་ཀྱི་བདེ་བའི་དབང་དུ་གྱུར་པ་སྐྱེད་པར་བྱེད་པ་ཡང་རོ་ཙ་བ་བསྐྱེད་པ་ཡིན་ལ། །དེ་བཞིན་དུ་སེམས་བདེ་བར་བྱེད་པའི་འཁོར་གྱི་ཚོགས་ཀྱིས་བསྐོར་ཏེ། །གནས་པ་ཡང་རོ་ཙ་བར་བྱེད་པའི་རྒྱུ་ཡིན་ནོ། །སོ་རྩི་དང་ནི་ཆང་དང་
ཆུང་མ་ནི། །ཡིད་འོང་མཚན་མོ་ཟླ་ཟེར་བཅས་པར་འདུག །ཡིད་ནི་དགའ་བར་བྱེད་པ་གང་དང་གང་། །དེ་དང་དེ་ནེ་རོ་ཙར་བྱེད་པ་ཡིན། །ཞེས་བྱ་བ་ལ། །སོ་རྩི་ཏམྦུ་ལ་ཞེས་བྱ་བ་བསྟེན་ཞིང་བཟའ་བ་དང་ཆང་དངས་མ་འཐུང་བ་དང་། །ཆུང་མ་ཡིད་དུ་འོང་བ་དང་འགྲོགས་ཤིང་
མཚན་མོ་ཟླ་ཟེར་དང་བཅས་པ་ལ་འདུག་པ་ཡང་རོ་ཙ་བར་བྱེད་པའི་རྒྱུ་ཡིན་ཏེ། །མདོར་ན་ཡིད་དགའ་བར་བྱེད་པ་གང་དང་གང་ཡིན་པ་དེ་དག་ཐམས་ཅད་རོ་ཙ་བར་བྱེད་པ་ཡིན་ནོ། །ཆུང་མའི་ཁ་ནི་ཨུ་ཏྤ་ལ་ལྟར་དྲི་ཞིམ། །པི་ལྦང་སྙན་པའི་སྒྲ་ནི་ཉན་བྱེད་དང་། །མལ་སྟན་ཡིད་འོང་
མེ་ཏོག་གཅལ་བཀྲམ་པ། །ལྕུག་མ་མེ་ཏོག་མྱུ་གུས་བརྒྱན་པ་འདྲ། །ཞེས་བྱ་བ་ལ། །ཆུང་མའི་ཁ་ཨུཏྤ་ལ་ལྟར་ཤིན་ཏུ་དྲི་ཞིམ་པར་བྱེད་པ་དང་། །པི་ཝང་སྙན་པའི་སྒྲ་ཉན་པར་བྱེད་པ་དང་། དེ་བཞིན་དུ་མལ་སྟན་ཡིད་དུ་འོང་ཞིང་མེ་ཏོག་དྲ་ཞིམ་པའི་གཅལ་བཀྲམ་
པ་ལྕུག་མ་རྩེ་མོ་མེ་ཏོག་དང་མྱུ་གུས་བརྒྱན་པ་ལྟར་ཡིད་དུ་འོང་བ་ཡང་འདོད་པའི་དོན་ཡོངས་སུ་རྫོགས་པར་བྱེད་པ་ཡིན་ནོ། །ཡུལ་དང་དུས་ལ་གནོད་པ་གང་ཡང་མེད། །ཡུལ་གྱི་ཡིད་ལ་གནོད་པ་ཆུང་དུའང་མེད། །རོ་ཙའི་སྦྱོར་བ་ཉེ་བར་ལྡན་གྱུར་པ། །འདོད་པའི་འདོད་

པ་ཡོངས་སུ་རྫོགས་པར་བྱེད། །ཅེས་བྱ་བ་ལ། །གང་ན་གནས་པའི་ཡུལ་ན་གནོད་པའི་འཚེ་བ་གང་ཡང་མེད་པ་དང་། །དེ་བཞིན་དུ་ལུས་ལ་གནོད་པའི་འཚེ་བ་གང་ཡང་མེད་པ་དང་། །དེ་བཞིན་དུ་གཟུགས་ལ་སོགས་པའི་ཡུལ་གྱི་ཡིད་ལ་གནོད་པ་ཆུང་
ཟད་ཙམ་ཡང་མེད་པར་གྱུར་བ་དང་། །དེ་བཞིན་དུ་རོ་ཙ་བའི་སྦྱོར་བ་ཇི་སྐད་ལ་སྨོས་པ་དང་ཉེ་བར་ལྡན་པ་སྟེ། །དེ་དག་ཐམས་ཅད་དེ་ནི་འདོད་པའི་འདོད་པ་ཡོངས་སུ་རྫོགས་པར་བྱེད་པ་ཡིན་ནོ། །གླ་སྒང་པར་བ་ཏ་ནི་རིམས་ལ་ཕན། །སྐོམ་དང་ཆེ་ལ་བོར་པ་བསྲེགས་པ་ནི། །ཆུ་ཡི་ནང་དུ་
གསུར་བའི་དངས་མ་ཕན། །སློན་ལ་འབྲས་ཡོས་ཆུ་སོའི་ནད་བྲག་ཞུན། །གཅིན་སྙི་སྐྱུ་རུ་ར་དང་སེར་པོ་གཉིས། །སྐྱ་རྦབ་ནད་ལ་ལྕགས་ཀྱི་ཕྱེ་མ་མཆོག །རླུང་དང་བད་ཀན་ལ་ནི་ཨ་རུ་ར། །མཆེར་པའི་ནད་ལ་པི་པི་ལིང་མཆོག་ཡིན། །གློ་རྡོལ་བ་ལ་རྒྱ་སྐྱེགས་ཁུ་བ་བསྔགས། །
དུག་གི་ནད་ལ་ཤེར་ཤ་རབ་བསྔགས་ཏེ། །ཚིལ་དང་རླུང་ནད་ལ་ནི་གུ་གུལ་ཕན། །ཁྲག་དང་མཁྲིས་པར་བ་ཤ་ཀ་རབ་བསྔགས། །འཁྲུ་བའི་ནད་ལ་དུག་མོ་ཉུང་ཕན་ཞིང་། །གཞང་འབྲུམ་གོ་བྱེད་བྱིག་དུག་ལ་གསེར་ཕན། །ཚོ་ཆེས་ར་ལ་སྐྱེར་ཁ་ཎྜ་བསྔགས་ཤིང་། །སྲིན་བུའི་
ནང་ནི་བྱི་དང་ཡིས་འཇོམས། །གཅོང་ཆེན་ལ་ཆང་ར་ཤ་འམ་འོ་མ་ཕན། །མིག་གི་ནད་ལ་འབྲས་བུ་གསུམ་རབ་ཕན། །དྲེག་ནས་ལ་ནི་སླེ་ཏྲེས་རབ་བསྔགས་ཤིང་། །ཕོ་བའི་ནད་ལ་དར་བ་གསར་པ་མཆོག །མཛེ་ལ་སེར་ལྡེང་སྙིང་པོ་བསྟེན་པས་མཆོག །ནད་ཀུན་ལ་ནི་དྲག་
ཞུན་རག་ཏུ་བསྔགས། །སྨྱོ་བྱེད་ནད་ལ་མར་ནི་རྙིང་པ་ཕན། །བརྗེད་བྱེད་ནད་ལ་བྲི་མྷི་ཕན་པ་ཡིན། །མྱ་ངན་ལ་ནི་ཆང་ནི་བླུད་པ་ཕན། །གཉིད་མེད་པ་ཡི་ནད་ནི་འོ་མས་སེལ། །ཆམ་པ་ཞོ་ནི་སྦྱར་མ་ཐག་གིས་སེལ། །རེད་བའི་ནད་ལ་ཤ་ནི་སྤྱི་བར་བྱ། །རླུང་གི་ནད་ལ་སྒོག་སྐྱ་རབ་ཏུ་བསྔགས་
ཡན་ལག་རེངས་པའི་ནད་ནི་དུགས་ཀྱིས་སེལ། །ཕྲག་པ་ཕྲག་གོང་ལག་ངར་ན་བ་ལ། །ཐང་ཆུ་ཁ་པོ་ར་ཡི་སྣ་སྨན་གཏང་། །ཀླད་པའི་ནད་ལ་མར་སར་ཧྭགས་ཀྱིས་སེལ། །དམུ་རྗིད་རྔ་མོའི་གཅིན་དང་འོ་མས་སེལ། །མགོ་བོའི་ནད་ཀུན་ལ་ནི་སྣ་སྨན་བསྔགས། །ཁོང་འབྲས་གསར་དུ་བྱུང་།།

ལ་གཏར་ག་གདབ། །ཁ་ཡི་ནད་རྣམས་ལ་ནི་མཁུར་བཀང་ཕན། །མིག་ནད་སྣ་སྨན་མིག་སྨན་བརྟ་བས་སེལ། །རྒས་པ་ལ་ནི་འོ་མ་ཞུན་མར་ཕན། །བརྒྱལ་ལ་ཆུ་གྲང་བླུགས་དང་གྲིབ་མ་ཕན། །དྲོད་ཆུང་ངལ་དང་སྒེའུ་གཤེར་ཆ་རན་ཕན། །དུབ་ལ་ཆང་འཐུངས་ལུས་ནི་ཁྲུས་བྱས་ཕན། །སྡུག་བསྔལ་
བཟོད་དང་བརྟན་ལ་རྩོལ་བ་ཕན། །གཅིན་སྲི་བ་ལ་གཟེ་མ་ཕན་པ་ཡིན། །ལུད་པ་ལུ་ལ་ཀཎྜ་ཀ་རི་ཕན། །རྩིབ་ལོགས་གཟེར་ལ་པུཥྐར་མཱུ་ལ་ཕན། །རྒས་སྲ་བ་ལ་སྐྱུ་རུ་ར་ཕན་ཞིང་། །རྨ་ལ་འབྲས་བུ་གསུམ་དང་གུ་གུལ་ཕན། །དེ་ལྟར་ནད་རྣམས་ཀྱི་ནི་སྨན་གྱི་མཆོག །བཤད་པས་ནད་
རྣམས་ཞི་བར་ནུས་པ་ཡིན། །དེ་ནི་ཡུལ་དང་དུས་ཀྱི་སྟོབས་ལས་ནི། །ཅི་རིགས་པར་ནི་བརྟགས་ཏེ་སྦྱར་བར་བྱ། །ཞེས་བྱ་བ་ལ། །རིམས་ཀྱི་ནད་ལ་ནི་གླ་སྒང་དང་པར་པ་ཏ་མཆོག་ཡིན་ནོ། །སྐོམ་དང་ཆེ་བ་ལ་ནི་སོ་ཕག་བསྲེགས་པ་ཆུའི་ནང་དུ་གསུར་ཏེ་བགྲུངས་པའི་ཆུ་བླུད་ན་མཆོག་ཡིན་ནོ། །སློན་པའི་ནད་
ལ་ནི་འབྲས་ཡོས་མཆོག་ཡིན་ནོ། །ཆུ་སོའི་ནད་ལ་ནི་བག་ཞུན་གཏང་བ་མཆོག་ཡིན་ནོ། །གཅིན་སྙི་བའི་ནད་ལ་ནི་སྐྱུ་རུ་ར་དང་ཡུང་བ་དང་སྐྱེར་པ་མཆོག་ཡིན་ནོ། །སྐྱ་རྦབ་ཀྱི་ནད་ལ་ནི་ལྕགས་ཀྱི་ཕྱེ་མ་མཆོག་ཡིན་ནོ། །རླུང་དང་བད་ཀན་ལྡན་པའི་ནད་ལ་ནི་ཨུ་རུ་ར་མཆོག་ཡིན་ནོ། །མཆེར་
པའི་ནད་ལ་ནི་ཕི་པི་ལིང་མཆོག་ཏུ་ཕན་ནོ། །གློ་རྡོལ་བའི་ནད་ལ་ནི་རྒྱ་སྐྱེགས་ཀྱི་ཁུ་བ་བླུད་པ་མཆོག་ཡིན་ནོ། །དུག་གི་ནད་ལ་ནི་ཤྲི་ཤ་ཞེས་བྱ་བ་ཤུ་ཀ་ཏ་རུ་མཆོག་ཡིན་ནོ། །ཚིལ་དང་རླུང་ལས་གྱུར་པའི་ནད་ལ་ནི་གུ་གུལ་མཆོག་ཡིན་ནོ། །ཁྲག་དང་མཁྲིས་པའི་ནད་ལ་ནི་བ་ཤ་ཀ་མཆོག་ཡིན་
ནོ། །ཚད་པ་རྙིང་པ་ལ་སོགས་པ་འཁྲུ་བའི་ནད་ལ་ནི་དུག་མོ་ཉུང་མཆོག་ཡིན་ནོ། །གཞང་འབྲུམ་ལ་ནི་གོ་བྱེ་ཞེས་བྱ་བ་བསེ་ཤིང་གི་འབྲས་བུ་མཆོག་ཡིན་ནོ། །དབྱིག་དུག་ལ་གསེར་བ་དར་བ་མཆོག་ཡིན་ནོ། །ཚོ་ཆེས་པ་ལ་སྐྱེར་པའི་ཁཎྜ་བསྔགས་པ་ཡིན་ནོ། །སྲིན་བུ་ལས་གྱུར་པའི་ནད་ལ་ནི་བྱི་དང་ག་
མཆོག་ཡིན་ནོ། །གཅོང་ཆེན་པོའི་ནད་ལ་ནི་ཆང་དང་ར་ཤ་འམ་འོ་མ་བྱིན་པ་མཆོག་ཡིན་ནོ། །མིག་གི་ནད་ཐམས་ཅད་ལ་ནི་འབྲས་བུ་གསུམ་མཆོག་ཡིན་ནོ། །དྲེག་ནད་ལ་ནི་སླེ་ཏྲེས་ཀྱི་ཁུ་བ་མཆོག་ཡིན་ནོ། །ཕོ་བའི་ནད་ལ་ནི་དར་བ་གསར་བ་མཆོག་ཡིན་ནོ། །མཛེའི་ནད་ཐམས་ཅད་ལ་ནི་སེང་ལྡེང་གི་སྙིང་

པོ་བསྟེན་པ་མཆོག་ཡིན་ནོ། །ནད་ཐམས་ཅད་ལ་ནི་བྲག་ཞུན་བསྟེན་པ་མཆོག་ཡིན་ནོ། །སྨྱོ་བྱེད་ཀྱི་ནད་ལ་ནི་མར་རྙིང་པ་ལོ་མང་པོ་ལོན་པ་མཆོག་ཡིན་ནོ། །བརྗེད་བྱེད་ཀྱི་ནད་ལ་ནི་བྲ་མྷི་ཞེས་བྱ་བ་མཆོག་ཡིན་ནོ། །མྱ་ངན་ལ་ནི་ཆང་བླུད་པ་མཆོག་ཡིན་ནོ། །གཉིད་མེད་པ་སེལ་བའི་མཆོག་
ནི་འོ་མ་ཡིན་ནོ། །ཆམ་པ་ལ་ནི་ཞོ་སྦྱར་བ་ཞེས་བྱ་བ་ཞོ་དཀྲུགས་པའི་ནང་དུ་དྲི་བཟང་བཞི་དང་པི་པི་ལིང་དང་ཁར་བཏབ་པ་མཆོག་ཡིན་ནོ། །སྐྱེས་བུ་རིད་ཅིང་ཉམ་ཆུང་བ་ལ་ནི་ཤ་སྦྱིན་པ་མཆོག་ཡིན་ནོ། །རླུང་གི་ནད་ལ་ནི་སྒོག་སྐྱ་མཆོག་ཡིན་ནོ། །ཡན་ལག་རེངས་བའི་ནད་སེལ་བའི་མཆོག་ནི་དུགས་ཡིན་ནོ། །
ཕྲག་པ་དང་ལག་ངར་དང་བཅས་པ་ན་བ་ལ་ནི། །ཐང་ཆུ་ཁ་པོར་ཞེས་བྱ་བ་ཛི་ཛིན་ནའི་སྨན་གཏང་བ་མཆོག་ཡིན་ནོ། །རླུང་གིས་ཀླད་པའི་གཞོགས་ཕྱེད་ན་བ་ལ་ནི་མར་སར་ཧྭགས་སྦྱར་བ་མཆོག་ཡིན་ནོ། །དམུ་རྫིང་གི་ནད་ལ་ནི་རྔ་མོའི་གཅིན་དང་འོ་མ་མཆོག་ཡིན་ནོ། །ནམ་ཚོང་ཡན་ཆད་ཀྱི་མགོ་བའི་ནད་ཀུན་
ལ་ནི་སྣ་སྨན་གཏང་བ་མཆོག་ཡིན་ནོ། །ཁོང་འབྲས་དང་པོ་བྱུང་བ་ལ་ནི་གཏར་ག་གདབ་ཅིང་ཁྲག་དབྱུང་བ་མཆོག་ཡིན་ནོ། །ཁའི་ནད་ཐམས་ཅད་ལ་ནི་སྨན་ཁུས་མཁུར་བ་བཀང་ཞིང་དབོ་བ་མཆོག་ཡིན་ནོ། །མིག་ནད་ལ་ནི་སྣ་སྨན་དང་མིག་སྨན་དང་མིག་བརྟབ་བྱ་བ་མཆོག་ཡིན་ནོ། །རྒས་པ་ལ་ནི་འོ་མ་དང་
ཞུན་མར་བསྟེན་པ་མཆོག་ཡིན་ནོ། །བརྒྱལ་བ་སེལ་བའི་མཆོག་ནི་ཆུ་གྲང་དང་གྲིབ་མ་ཡིན་ནོ། །ཁོང་བའི་མེ་དྲོད་ཆུང་བ་སེལ་བའི་མཆོག་ནི་ངལ་བ་དང་སྒེའུ་གཤེར་དང་། །ཚ་རན་པ་བསྟན་པ་མཆོག་ཡིན་ནོ། །ལུས་དུབ་པ་ལ་ནི་ཆིང་འཐུངས་པ་དང་། །ལུས་ཁྲུས་བྱས་པ་ཕན་ནོ། །སྡུག་བསྔལ་བཟོད་ཅིང་
དཀའ་བ་བསྟེན་ནུས་པ་དང་། །ལུས་བརྟན་པར་གྱུར་པ་ལ་ནི་རྩོལ་བ་དང་དྲག་ཤུལ་བྱས་པ་ཕན་པའི་མཆོག་ཡིན་ནོ། །གཅིན་སྲི་བ་སེལ་བའི་མཆོག་ནི་གཟེ་མ་ཡིན་ནོ། །ལུད་པ་ལུ་བ་ལ་ནི་ཀཎྜ་ཀ་རི་མཆོག་ཡིན་ནོ། །རྩིབ་ལོགས་སུ་གཟེར་བ་ལ་ནི་པུཥྐར་མཱུ་ལ་ཞེས་བྱ་བ་མ་ནུ་མཆོག་ཡིན་ནོ། །རྒས་
སྲ་བར་བྱ་བ་ལ་ནི་སྐྱུ་རུ་ར་མཆོག་ཡིན་ནོ། །རྨ་སེལ་བའི་མཆོག་ནི་འབྲས་བུ་གསུམ་དང་གུ་གུལ་ཡིན་ཏེ། །དེ་ལྟར་བཤད་མ་ཐག་པའི་ཚུལ་གྱིས་ནད་རྣམས་སེལ་བའི་སྨན་གྱི་མཆོག་བཤད་ཅིང་བསྟན་པ་དེ་དག་གིས་ནི་ནད་ཞི་ཞིང་སེལ་བར་ནུས་པ་ཡིན་ལ། །དེ་ལ་ཡུལ་དང་དུས་ཀྱི་སྟོབས་ལས་སྨན་གྱི་སྦྱོར་

བ་ཅི་རིགས་པར་སྦྱར་བར་བྱའོ། །དེ་ལྟར་རྒྱུན་ཤེས་བུ་ལས་གཞུང་གི་མདོ། །ལེགས་པར་བཤད་པ་དེས་ནི་མ་ངོམས་པས། །མེ་བཞིན་འཇུག་སོགས་བློ་མཐུན་དད་པས་འདུད། །ཐེ་ཚོམ་འདི་ནི་མེ་བཞིན་འཇུག་གིས་དྲིས། །ཞེས་བྱ་བ་ལ། །རྣམ་པ་དེ་ལྟ་བུའི་ཚུལ་གྱིས་དྲང་སྲོང་རྒྱུན་ཤེས་ཀྱི་བུ་
ལས་གཞུང་གི་དོན་གྱི་མདོ་ཐོས་པ་དང་ལེགས་པར་བཤད་ཅིང་ཚད་མས་བརྟགས་པའི་རང་གི་དོན་བརྟན་པ་རྟོགས་སླ་ཞིང་དོན་ཆེ་བ་དེས་མེ་བཞིན་འཇུག་ལ་སོགས་པའི་སློབ་མ་རྣམས་ངོམས་ཤིང་ཚིམ་པར་མ་གྱུར་པས། །དེ་དག་བློ་མཐུན་པར་དད་པས་མགོ་བོས་བཏུད་ནས་དྲང་སྲོང་ལུག་ཅེས་བྱ་བ་ལ་སོགས་
བསློབ་མ་རྣམས་ཀྱི་ནང་ན་བསྔགས་ལ། །མེ་བཞིན་འཇུག་ཅེས་བྱ་བས་བློ་ལ་ངེས་རྙེད་པའི་ཐེ་ཚོམ་འདི་རྒྱུན་ཤེས་ཀྱི་བུ་ལ་དྲིས་པར་གྱུར་ཏོ། །སྐལ་ལྡན་ཁ་ཅིག་བདག་ཉིད་མཁས། །སྨན་དང་ནད་གཡོག་ཕུན་སུམ་ཚོགས། །སྨན་པ་རྒན་པོའི་ལུང་གིས་ནི། །རྗེས་སུ་འཇུག་ཀྱང་ནད་བཅས་ཤིང་། །
ནད་ཀྱི་སྲོག་ནི་ཟད་པ་སྣང་། །གཞན་དག་དེ་ལས་གོ་བཟློག་སྣང་། །དེ་ཕྱིར་ཕན་དང་གནོད་པ་ཡི། །འབྲས་བུ་ངེས་པ་མ་མཆིས་ན། །འདིར་ནི་བསྟན་བཅོས་ཀྱིས་ཅི་བསྟན། །ཞེས་བྱ་བ་ལ། །འདི་དག་ནི་དྲི་བའི་ཚིག་སྟེ། །ཀྱེ་སྐལ་ལྡན་རྒྱུན་ཤེས་ཀྱི་བུ་ཁ་ཅིག་བདག་ཉིད་མཁས་ཤིང་རིག་པ་ཡིན་ཞིང་
སྨན་དང་ཡོ་བྱད་ཕུན་སུམ་ཚོགས་པ་དང་། །ནད་གཡོག་ཕུན་སུམ་ཚོགས་པའི་བདག་པོ་དང་ཡང་ལྡན་ལ། །སྨན་པ་རྒན་ཞིང་མཁས་པའི་གདམས་ངག་གིས་རྗེས་སུ་འཇུག་པར་བྱེད་དུ་ཟིན་ཀྱང་ནད་ཀྱི་སྲོག་ཟད་པར་བྱེད་པ་དག་སྣང་ལ། །ནད་པ་གཞན་ཁ་ཅིག་ནི་དེ་ལས་གོ་བཟློག་པ་སྟེ། །བདག་ཉིད་
མི་མཁས་པ་དང་། །སྨན་པ་ཡོ་བྱད་མེད་པ་དང་། །ནད་གཡོག་མེད་པ་དང་། །སྨན་པ་མི་མཁས་པ་དག་གིས་བཅོས་སུ་ཟིན་ཀྱང་སྲོག་ཟད་པར་མ་གྱུར་པར་སྣང་ངོ་། །དེའི་ཕྱིར་ཕན་པར་འགྱུར་བ་དང་། །གནོད་པར་འགྱུར་བའི་འབྲས་བུ་ལ་ནི་ངེས་པ་ཡོད་པ་མ་ཡིན་ཏེ། །ཕན་པའི་སྦྱོར་བ་བྱས་ཀྱང་འབྲས་
བུ་དེ་ཉིད་དུ་ཟད་པས་དེ་བས་ན་སྲོག་བསྲུང་བའི་གསོ་བའི་མཚན་ཉིད་འདི་ནི་གཅིག་ཏུ་ཆད་པ་མེད་ཅིང་ངེས་པ་མེད་པ་ཡིན་ནོ། །དེ་ལྟར་བྱ་བ་ལ་ངེས་པ་མེད་པའི་ཕྱིར་གསོ་བའི་བསྟན་བཅོས་ཀྱིས་འདིར་དོན་གྱི་དངོས་པོ་ཅི་ཞིག་བསྟན་ཅིང་དགོས་པ་ཅི་ཞིག་བྱ་སྟེ། །ཡུལ་དེ་ལ་ནི་འབྲས་བུ་ངེས་པ་

མེད་པའི་ཕྱིར་བསྟན་བ་ཅི་ཡང་མེད་དེ། །དེས་ན་སྨན་བསྟེན་པ་དང་། །མ་བསྟེན་པ་དག་ཚུལ་མཉམ་པའི་ཕྱིར་བསྟན་བཅོས་འདི་ནི་བརྩམ་བར་མི་བྱ་བའི་རིགས་སོ། །དེ་ལྟར་མེ་བཞིན་འཇུག་སོགས་སློབ་མའི་ཚོགས། །རྟོག་པ་སྐྱེས་ལ་རྒྱུན་ཤེས་བུ་ཡིས་ནི། །དེ་ཉིད་མ་ལུས་
རྣམ་པར་བཤད་གྱུར་པ། །གསོ་བྱས་མ་བྱས་མཉམ་པོར་བྱ་མི་རིགས། །ཞེས་བྱ་བ་ལ། ཚུལ་དེ་ལྟར་མེ་བཞིན་འཇུག་ལ་སོགས་པའི་སློབ་མའི་ཚོགས་ཐེ་ཚོམ་སྐྱེས་ཤིང་རྟོག་པར་གྱུར་པ་དེ་ལས་དྲང་སྲོང་ཆེན་པོ་རྒྱུན་ཤེས་ཀྱི་བུས་དོན་གྱི་དེ་ཁོ་ན་ཉིད་ཕྱིན་ཅི་མ་ལོག་པ་མ་ལུས་པ་ཐམས་ཅད་རྣམ་པར་བཤད་
པར་གྱུར་པ་ནི། །ཀྱེ་མེ་བཞིན་འཇུག་གསོ་བ་ཡན་ལག་བཞི་པའི་ཡོན་ཏན་ཕུན་སུམ་ཚོགས་པ་ཡོན་ཏན་བཅུ་དྲུག་གིས་ཉེ་བར་བརྒྱན་པར་གྱུར་བ་དང་། །གསོ་བ་མ་བྱས་པ་སྟེ། །ཡན་ལག་བཞི་དང་ཡན་ལག་བཅུ་དྲུག་གི་ཚོགས་པ་དང་མི་ལྡན་པར་གྱུར་པ་དེ་མཉམ་ཞིང་ཆ་མཚུངས་པར་བརྟགས་པ་ནི་
རིགས་ཤིང་འོས་པ་མ་ཡིན་ནོ། །ཅིའི་ཕྱིར་ཞེ་ན། ཡན་ལག་བཅུ་དྲུག་ལྡན་པ་ཡི། །གསོ་བྱེད་བདེ་འགྱུར་ཡོད་མོད་ཀྱི། །ནད་ཀྱི་འདམ་དུ་བྱིང་བ་ལ། །ལག་ནས་འདྲེན་ཐབས་སྨན་ཡིན་ནོ། །ཞེས་བྱ་བ་ལ། གང་གི་ཕྱིར་ནད་པ་གང་ཡང་ཡན་ལག་བཅུ་དྲུག་དང་ལྡན་པའི་འབྱོར་པ་ཚད་དུ་ཟིན་ཀྱང་ནད་མེད་ཅིང་
བདེ་བར་འགྱུར་བ་ཡོད་མོད་ཀྱི། །འོན་ཀྱང་ནད་ཀྱི་འདམ་དུ་བྱིང་བ་ལ་ནི་ལག་ནས་འདྲེན་ཞིང་བསླང་བའི་ཐབས་སྨན་ཁོ་ན་ཡིན་པར་ཤེས་པར་བྱའོ་ཞེས་བྱ་བའི་དོན་ཏོ། །དེ་ཡང་ཙ་ར་ཀ་ལས་ནད་པ་གང་སྨན་མེད་པར་ནད་ལས་ཐར་ཞིང་ལྡང་བ་ཡོད་ཀྱང་། །དེ་ནི་སྨན་གྱི་ཡན་ལག་ཕུན་སུམ་ཚོགས་པས་གསོས་པ་ལ་ར་
ནད་མེད་པ་ཡིན་ཏེ། །དཔེར་ན་སྐྱེས་བུ་ལྟུང་ཞིང་འགྱེལ་བར་གྱུར་པ་ལ་ལ་ཞིག་ལྡང་བར་ནུས་པ་ཅུང་ཟད་ཡོད་དུ་ཟིན་པ་ལ་ཡང་། །སྐྱེས་བུ་གཞན་ཞིག་གིས་ལག་ནས་དྲངས་ན་དེ་ཤིན་དུ་མྱུར་བར་ཉམ་ང་བ་མེད་པས་ལྡང་བར་འགྱུར་རོ། །ནད་པ་གསོ་བའི་སྨན་གྱི་སྦྱོར་བ་ཡོངས་སུ་རྫོགས་པ་ཡང་དེ་དང་འདྲའོ་
ཞེས་བྱ་བ་བཤད་པ་ལྟ་བུའོ། །འཚོ་དང་འཆི་བར་འགྱུར་བ་ལ། །ཀུན་ལ་སྨན་ཡོད་མ་ཡིན་ཞིང་། །ཐབས་ལ་ལྟོས་པ་མ་ཡིན་ལ། །གཞན་དུ་ཐབས་ལ་ལྟོས་པའི་ནད། །ཐབས་ཀྱིས་བསྒྲུབས་ན་འགྲུབ་འགྱུར་བས། །རྒྱུ་མེད་པར་ནི་གཏན་ཚིགས་མིན། །ཞེས་བྱ་བ་ལ། ནད་པ་འཆི་བར་

འགྱུར་བ་ཐམས་ཅད་ནི་སྨན་གྱིས་འཚོ་བར་འགྱུར་བ་མ་ཡིན་ཏེ། །གང་གི་ཕྱིར་ནད་ཐམས་ཅད་གསོ་བའི་ཐབས་ལ་རག་ལས་ཤིང་ལྟོས་པ་མ་ཡིན་གྱི། །གཞན་ཐབས་ལ་ལྟོས་དགོས་པའི་ནད་ནི་གསོ་བའི་ཐབས་མེད་པར་འགྱུར་བ་མ་ཡིན་ནོ། །དེ་བས་ན་ཁྱེད་ཀྱིས་བཤད་པའི་རྒྱུ་མེད་པར་བཤད་པ་དེ་ནི་
གཏན་ཚིགས་སུ་རུང་བ་མ་ཡིན་ནོ། །འདི་ཡང་ཙ་ར་ཀ་ལས་ནད་པ་གང་སྨན་མེད་པ་འགའ་ཞིག་གིས་འཆི་བར་འགྱུར་བ་དེ་ནི་སྨན་གྱི་སྦྱོར་བ་ཕུན་སུམ་ཚོགས་པ་རྫོགས་པས་སོས་པར་འགྱུར་བ་ཡིན་ཏེ། །གང་གི་ཕྱིར་ནད་ཐམས་ཅད་ཀྱང་གསོ་བའི་ཐབས་ལ་ལྟོས་དགོས་པ་དག་ཀྱང་གསོ་བ་མེད་པར་
འགྱུར་བ་མ་ཡིན་ནོ་ཞེས་བཤད་པ་ཡིན་ནོ། །གང་ཡང་ཁྱེད་ཀྱིས་ཕུན་ཚོགས་ནི། །ཀུན་དང་ལྡན་པས་གསོས་ན་ཡང་། །འཆི་འགྱུར་ཞེས་སྨྲ་དེ་མ་ཡིན། །ཐབས་ནི་ཐབས་མིན་འགྱུར་ཡོད་མིན། །ཞེས་བྱ་བ་ལ། གང་ཡང་ཁྱོད་ཀྱི་ཡན་ལག་བཅུ་དྲུག་གི་ཕུན་སུམ་ཚོགས་པ་ཐམས་ཅད་དང་ལྡན་པས་
གསོས་སུ་ཟིན་ཀྱང་འཆི་བར་འགྱུར་བ་དག་སྣང་ངོ་ཞེས་སྨྲ་བ་མ་ཡིན་ཏེ། །དེ་ནི་མི་རིགས་སོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། སྨན་གྱིས་གསོར་མི་རུང་བའི་ནད་པ་ཡང་སྨན་དེ་དག་གསོ་བའི་ཐབས་སུ་འགྱུར་བ་མ་ཡིན་ནོ། །སྨན་པ་ཤིན་ཏུ་མཁས་པ་དག་ཀྱང་ནད་པ་ལ་ཡོངས་སུ་རྟོག་ཅིང་གསོ་བའི་སྦྱོར་བ་འཇུག་
ཏུ་ཟིན་ཡང་གསོར་མི་རུང་བ་ལ་འཚོ་བ་ཡོད་པ་མ་ཡིན་ནོ། །གལ་ཏེ་དེ་ལྟའི་ཐབས་ལྡན་ཞིང་། །བློ་ལྡན་གསོ་བ་བྱས་གྱུར་ཀྱང་། །སྔོན་ལས་ཉེས་པ་མ་གྲུབ་པ། །ཡན་ལག་བཅུ་དྲུག་ལྡན་མེད་ཡིན། །ཞེས་བྱ་བ་ལ། གལ་ཏེ་ནད་པ་གསོ་བའི་ཐམས་ཡན་ལག་བཅུ་དྲུག་ཕུན་སུམ་
ཚོགས་པ་དང་ལྡན་ཞིང་ནད་པ་བློ་དང་ལྡན་པ་ལ་གསོ་པའི་དཔྱད་བྱས་སུ་ཟིན་ཀྱང་། །གསོ་བ་མ་གྲུབ་བར་གྱུར་བ་འདི་ནི་སྔོན་གྱི་ལས་ཀྱི་ཉེས་པས་ཚེ་ཟད་བ་ལ་སོགས་བའི་དབང་གིས་མ་གྲུབ་པ་ཡོད་ན་ཡང་ཡན་ལག་བཅུ་དྲུག་དང་ལྡན་བའི་གསོ་བ་ནི་མེད་པ་མ་ཡིན་ནོ། །མེ་དང་ཆུ་སོགས་དུགས་དང་ནི། །རེངས་སོགས་
མི་འགྲུབ་སུ་ཞིག་ཟེར། །ཞེས་བྱ་བ་ལ། མེ་དང་ཆུ་ལ་སོགས་པས་དུགས་དང་རེངས་པ་ལ་སོགས་པའི་ལས་མི་བྱེད་དོ། །ཞེས་སུ་ཞིག་ཟེར་ཏེ། དུགས་ཀྱི་ལས་ནི་མེས་བྱེད་པ་ཡིན་ལ། །རེངས་པ་ནི་ཆུས་བྱེད་པ་ཡིན་ཏེ། །སོགས་པའི་སྒྲས་ནི་རླུང་གིས་ནི་དྲན་པ་རྙེད་པའི་ལུས་བྱེད་པ་ཡིན་པར་ནི་ཀུན་

ལ་གྲགས་པ་དེ་ལྟར་སུ་ཞིག་མི་འདོད། །བརྟ་དང་ཉམས་སྨད་འོ་མ་དང་། །འབྲས་ངན་མི་བྱེད་སུ་ཞིག་འདོད། །ཅེས་བྱ་བ་ལ། །སྐྱེས་བུ་སུ་ཞིག་འོ་མས་ལུས་བརྟ་བ་དང་། །འབྲས་ངན་པ་བེ་དུ་ཞེས་བྱ་བས་ཉམས་སྨད་པར་མི་འགྱུར་བར་སུ་ཞིག་མི་འདོད་དེ། །དེ་ཡང་
ཀུན་ལ་གྲགས་པ་ཡིན་ནོ། །མ་ཤ་ཁ་སྲལ་ལ་སོགས་ལ། །རོ་ཙ་མི་ནུས་སུ་ཞིག་ཟེར། །ཞེས་བྱ་བ་ལ། གཞན་ཡང་མོན་སྲན་སྡེའུ་མ་ཤ་དང་། །ཁ་སྲལ་ཕྲེའུ་ཨད་མ་ཀུ་བ་ཏ་ཞེས་བྱ་བ་ལ་སོགས་པས་རོ་ཙ་པར་མི་འགྱུར་རོ་ཞེས་སུ་ཞིག་ཟེར་ཏེ་ཀུན་ལ་ཡང་འདི་གྲགས་པ་ཡིན་ནོ་ཞེས་བྱ་པའི་བར་དུའོ། །
བཤང་གཅི་སྐྱེད་དང་མང་བར་ནི། །ནད་ལ་ཐེ་ཚོམ་སུ་ཞིག་ཟ། །ཞེས་བྱ་བ་ལ། བཤང་བ་སྐྱེད་པར་བྱེད་པ་དང་གཅི་བ་མང་བར་གྱུར་བ་ནི་ནད་ཡིན་པར་སུ་ཞིག་ཐེ་ཚོམ་ཟ་སྟེ། །ཐེ་ཚོམ་མེད་པ་ཡིན་ནོ། །སྔགས་དང་རྒྱུད་ནི་མེད་པ་རུ། །གང་གིས་དུག་ནི་འཇུག་པར་འགྱུར། །ཞེས་བྱ་བ་ལ། །ཡང་སྲོག་
ཆགས་སུ་ཞིག་ལ་དུག་སྔགས་ཀྱིས་མ་བཏབ་ཅིང་། །གསོ་བའི་རྒྱུད་ཀྱི་ཆོ་ག་ལས་བཤད་པའི་དུག་བསལ་བའི་ཐབས་ཟས་དང་སྐོམ་སྨན་སྣ་ཚོགས་པ་མེད་པར་དུག་དེ་སུས་འཇུ་བར་འགྱུར་ཏེ། །གང་གིས་ཀྱང་འཇུ་བར་མི་འགྱུར་རོ། །ཞེས་བྱ་བའི་དོན་ཏོ། གག་པ་ལ་སོགས་གསོ་བ་ནི། །མེད་པར་གང་
ཞིག་བདེ་བར་འགྱུར། །ཞེས་བྱ་བ་ལ། །སྐྱེས་བུ་གང་ཞིག་གག་པ་དང་གཉེའུ་རེང་དང་མུར་འགྲམ་གྱི་ནད་ལ་གསོ་བའི་སྦྱོར་བ་མ་བྱས་པར། །གང་ཞིག་བདེ་བར་འགྱུར་ཏེ་སུ་ཡང་མི་འགྱུར་རོ་ཞེས་བྱ་བའི་དོན་ཏོ། །འོན་ཀྱང་དུས་མིན་འཆི་ལ་སོགས། །གྲུབ་མཐའ་ཀུན་དུ་ངེས་པར་གྲགས། །འབད་བ་ཆེན་པོ་
དག་གིས་ནི། །ཇི་ལྟར་གཞན་གྱིས་བཟློག་པར་ནུས། །ཞེས་བྱ་བ་ལ། འོན་ཀྱང་དུས་མ་ཡིན་པར་འཆི་བ་ལ་སོགས་པའི་བསྟན་བཅོས་ཀྱི་གྲུབ་པའི་མཐའ་ཐམས་ཅད་ལ་གྲགས་པ་ཡིན་པས་ན་དེ་སྦྱིན་པ་དང་། །སྦྱིན་སྲེག་དང་། དཀའ་ཐུབ་དང་སྡོམ་པ་ལ་སོགས་པ་འབད་པ་ཆེན་པོ་ཡིན་ཡང་གསོ་བའི་བསྟན་
བཅོས་ལྟར་མ་བྱས་ན་ཇི་ལྟར་བཟློག་པར་འགྱུར་ཏེ་གང་གིས་ཀྱང་བཟློག་པར་མི་ནུས་སོ། །ཙནྡན་ལ་སོགས་ཚ་སོགས་པ། །ལུང་ལས་གྲགས་པ་བཞིན་དུ་སེལ། །ཞེས་བྱ་བ་ལ། ཙནྡན་དང་ཨ་རུ་ར་ལ་སོགས་པའི་སྨན་ཚ་བ་དང་གྲང་བ་ལ་སོགས་པ་སེལ་བ་ཡིན་པར་ནི་བསྟན་བཅོས་ཀྱི་ལུང་ལས་

གྲགས་པ་ཡིན་ན་དེ་ཡང་དེ་བཞིན་དུ་འགྱུར་བ་ཡིན་ནོ། །རིམས་ལ་སྨྱུང་དང་བརྟ་བ་དག །བསྟན་བཅོས་ཉིད་ལས་གྲགས་པ་ཡིན། །ཞེས་བྱ་བ་ལ། །རིམས་ལ་དང་པོར་སྨྱུང་བ་དང་། །ཕྱིས་བརྟ་བ་བྱས་པས་ཕན་པ་ནི་གསོ་བའི་བསྟན་བཅོས་ལས་འཇིག་རྟེན་དུ་གྲགས་པ་ཡིན་ནོ། །ཡན་ལག་
བཞི་པའི་ཡོན་ཏན་འབྱོར། །ལེགས་བར་བརྟགས་ནས་སྦྱར་བྱ་ཞིང་། །གཞན་དུ་ནད་ཀྱི་ཚོགས་འཇོམས་པ། །གསོ་བ་ཐེ་ཚོམ་བཅས་མི་བྱ། །ཞེས་བྱ་བ་ལ། །མེ་བཞིན་འཇུག་ནད་སེལ་བའི་གསོ་བ་ནི་ཡན་ལག་བཞི་པོ་སྨན་པ་དང་ནད་པ་དང་། །ནད་གཡོག་དང་། །ནད་བའི་ཡོན་ཏན་བཞི་པོ་ལས་
ཡོན་ཏན་བཞི་བཞིར་འཕྲོས་པ་མཁས་ཤིང་ཞེས་བྱ་བ་ལ་སོགས་པ་བསྟན་པ་དེ་དག་འབྱོར་ཞིང་ཕུན་སུམ་ཚོགས་པ་དང་། །དེ་བཞིན་དུ་གནོད་པ་དང་། །གནོད་བ་ལ་སོགས་པ་བཅུ་གཉིས་ལེགས་པར་བརྟགས་ནས་ཉེ་བར་སྦྱར་བར་བྱ་ཞིང་གཞན་དུ་ན་ནད་ཀྱི་ཚོགས་འཇོམས་པར་བྱེད་པ་མིན་པར་གསོ་
བ་ཞེས་བྱ་བ་དེ་ལ་ཐེ་ཚོམ་དང་བཅས་པར་མི་བྱའོ། །འདི་ནི་དུས་མིན་འཆི་ཞགས་པ། །བརྟན་པོ་བཅོམ་པར་བྱེད་པ་ཡིན། །ནད་ཀྱིས་སྐྲག་ཅིང་འཇིགས་པ་ལ། །སྔགས་མེད་པ་ཡི་སྲུང་སྐུད་ཡིན། །ཞེས་བྱ་བ་ལ། །བསྟན་བཅོས་འདི་ནི་དུས་མ་ཡིན་པར་འཆི་བའི་
ཞགས་པ་བརྟན་པོ་འཇོམས་པར་བྱེད་པ་ཡིན་ཏེ། །ཇི་ལྟར་ཞགས་པ་འདི་མཚོན་རྣོན་པོས་གཅོད་པར་བྱེད་མི་ནུས་ཏེ། །གསོ་བའི་ཐབས་ཀྱིས་གཅོད་པ་ཡིན་ནོ། །དེ་བཞིན་དུ་ནད་ཀྱིས་སྐྲག་ཅིང་འཇིགས་པའི་སྐྱེས་བུ་ལ་བསྟན་བཅོས་འདི་སྔགས་མེད་ཅིང་སྔགས་ཀྱིས་མ་བཏབ་པའི་སྲུང་སྐུད་ཀྱང་ཡིན་ནོ། །
འདི་ནི་འགྲོ་བའི་སྡུག་བསྔལ་རྣམས། །སེལ་བྱེད་བདུད་རྩི་མངོན་སུམ་ཡིན། །སྣོད་ངན་གནས་ན་འཕྲལ་དུ་ནི། །ཧ་ལ་ཧ་ལར་འགྱུར་པ་ཡིན། །ཞེས་བྱ་བ་ལ། །སྨན་དཔྱད་ཀྱི་གསོ་བའི་རྒྱུད་འདི་ནི་འགྲོ་བའི་སྡུག་བསྔལ་རྣམས་སེལ་བར་བྱེད་ཅིང་རྒས་པ་དང་། །ན་བ་དང་། །འཆི་བའི་སྡུག་བསྔལ་
འཇོམས་པར་བྱེད་པ་ཡིན་པས་རྩི་དང་འདྲ་བ་ཡིན་ཏེ། །གང་གི་ཕྱིར་བདུད་རྩི་དོན་དུ་གཉེར་བའི་ཕྱིར་ལྷ་དང་ལྷ་མ་ཡིན་གྱིས་སྡུག་བསྔལ་གྱི་འབད་པ་ཆེན་པོ་བྱས་ནས། །འཐོབ་པར་གྱུར་པ་ཡིན་ཏེ། །འདི་ལ་ནི་སྡུག་བསྔལ་འགའ་ཡང་ཡོད་པ་མ་ཡིན་ནོ། །དེ་ལྟར་ན་ཡང་སྣོད་ངན་པ་བསྟན་བཅོས་ལ་

ཐོས་པ་མེད་པའི་སྨན་པའི་རྒྱུད་ལ་གནས་པར་གྱུར་ན། །འཕྲལ་དུ་དེའི་མོད་ལ་ཧ་ལ་ཧ་ལ་ཞེས་བྱ་བའི་དུག་ཆེན་པོར་འགྱུར་བ་ཡིན་ནོ། །བསྟན་བཅོས་ངེས་པ་མི་ཤེས་ཤིང་། །ཚིག་ཙམ་ལ་ནི་རྗེས་གཞོལ་བའི། །གཤིན་རྗེའི་ཞགས་པ་ཐོགས་པ་བཞིན། །སྨན་པ་ངན་པ་རིང་
དུ་སྤང་། །ཞེས་བྱ་བ་ལ། །སྨན་པ་གང་གསོ་བའི་བསྟན་བཅོས་ཀྱི་ངེས་པའི་དེ་ཁོ་ན་ཉིད་ལེགས་པར་མི་ཤེས་ཤིང་ཁོང་དུ་ཆུད་པར་མ་གྱུར་ལ། །ཚིག་ཙམ་གྱི་རྗེས་སུ་འབྲང་ཞིང་གཞོལ་བར་བྱེད་བའི་སྨན་པ་ངན་ཅིང་སྨད་པར་བྱ་བ་དེ་ནི་རིང་དུ་སྤང་བར་བྱ་སྟེ། །ཇི་ལྟར་གཤིན་རྗེའི་ཞགས་པ་དང་ཀྱང་རིང་དུ་སྤང་
བར་བྱ་བ་ཡིན་པ་དང་འདྲའོ། །སྨན་པ་གཞུང་ལ་ལེགས་མཁས་ཤིང་། །ལུང་ལ་མཁས་པའི་བཟང་པོ་དང་། །ལས་ལ་གོམས་ཞིང་དགེ་བ་ནི། །བཟང་པོ་འདོད་པ་དམ་པ་ཡིན། །ཞེས་བྱ་བ་ལ། །སྨན་པ་སྨན་དཔྱད་ཀྱི་ལུང་གི་གཞུང་ལུགས་ལ་ཤིན་ཏུ་མཁས་ཤིང་བྱང་བ་དང་། །དེ་བཞིན་དུ་ལས་ལ་གོམས་
ཤིང་རང་བཞིན་དགེ་བའི་བྱ་བ་ལ་སོགས་པ་དག་དང་། །དེ་བཞིན་དུ་བཟང་པོར་འདོད་ཅིང་བདེ་བ་དང་དགེ་བ་ལ་དགའ་བ་དག་ནི་དམ་པར་འགྱུར་བ་ཡིན་ནོ། །དེ་ལྟར་རྒྱུད་ཀྱི་ཡོན་ཏན་ལྡན། །རྒྱུད་ཀྱི་སྐྱོན་ནི་སྤང་གྱུར་པ། །གསོ་བའི་བསྟན་བཅོས་མ་ལུས་པ། །ཁྱབ་སྟེ་ཡོངས་སུ་གནས་པ་ཡིན། །དྲང་སྲོང་ཆེན་པོའི་གཞུང་
རྗེས་འཇུག། །རྒྱ་ཆེའི་དྲི་མ་མེད་པའི་གནས། །རྒྱ་མཚོ་ཆེན་པོ་ལྟར་ཟབ་ཅིང་། །བསྡུམ་དོན་ཉེ་བར་མཚོན་བྱེད་ཡིན། །ཞེས་བྱ་བ་ལ། །དེ་ལྟར་ཞེས་བྱ་བའི་དོན་ནི་གང་གི་ཕྱིར་ཞེས་བྱ་བའི་དོན་ཏེ། །གང་གི་ཕྱིར་བསྟན་བཅོས་འདི་ནི་དོན་ཆེན་པོ་དང་ལྡན་པ་ཡིན་ནོ་ཞེས་བྱ་བའི་དོན་ཏོ། །ཡང་ན་དེ་ལྟར་ཞེས་བྱ་
བའི་སྒྲ་ནི་རྫོགས་པའི་དོན་ཏེ། །རྒྱུད་ནི་ཚུལ་འདི་ལྟར་རྫོགས་བར་བྱས་ལ། །དེ་ལྟར་རྫོགས་པར་བྱས་པའི་རྒྱུད་ཀྱི་ཡོན་ཏན་ཐམས་ཅད་ནི་ལྡན་ལ། །རྒྱུད་ཀྱི་སྐྱོན་ཐམས་ཅད་ནི་སྤངས་བ་ཡིན་ནོ། །དེ་ཡང་འདིས་ལུས་འཛིན་ཅིང་སྡུད་བའི་དོན་གྱིས་ན་རྒྱུད་དེ། །རྒྱུད་དེའི་ཡོན་ཏན་ནི་དྲང་སྲོང་ཙ་ར་ཀས་བཤད་
དེ། །དེ་འདིར་བརྗོད་བར་བྱའོ། །གྲགས་པ་ཆེན་པོ་དང་ལྡན་པའི་སྐྱེས་བུ་དམ་པས་ཀུན་དུ་བརྟེན་པ། །དོན་ཤིན་ཏུ་མང་བ་ཉམས་དང་ལྡན་པའི་སྐྱེ་བོ་རྣམས་ཀྱིས་བསྔགས་པ། །སློབ་མ་དམ་པ་གསུམ་གྱི་བློ་ལ་ཕན་པ། །ཚིག་ཟློས་པའི་ཉེས་པ་དང་བྲལ་བ། །ལུང་དུ་གྱུར་པ། །མདོ་དང་བཤད་པ་དང་། །བསྡུ་བའི་རིམ་པ་ལེགས་

པར་བཤད་པ། །གཞི་བཟང་བ། །ཚིག་ཟུར་ཆག་པ་མེད་པ། །མི་གོ་བར་བྱ་བའི་སྒྲ་མེད་པ། །མིང་ཡོངས་སུ་རྫོགས་པ། །བརྒྱུད་པའི་རིམ་པས་རྟོགས་པའི་དོན་དང་ལྡན་པ། །དོན་གྱི་དེ་ཁོ་ན་ཉིད་ངེས་པ། །གཙོ་བོར་གྱུར་པ། །དོན་མཐུན་པ་དང་ལྡན་པ། །དོན་ཚོལ་ཞིང་འདྲེས་པ་མེད་པ། །རབ་དུ་བྱེད་བ་མ་འདྲེས་
པ། །མྱུར་དུ་འཇུག་ཅིང་རྟོགས་པར་བྱེད་པ། །མཚན་ཉིད་དང་ལྡན་ཞིང་དཔེ་དང་བཅས་པ་སྟེ། །བསྟན་བཅོས་འདི་ནི་དེ་ལྟ་བུ་ཡིན་པར་བྱའོ། །དེ་ཡང་ཇི་ལྟར་ཉི་མའི་དཀྱིལ་འཁོར་དྲི་མ་མེད་པས་མུན་པའི་ཚོགས་ཐམས་ཅད་གསལ་ཏེ། །དངོས་པོ་ཐམས་ཅད་སྣང་བ་དང་འདྲ་བར་བྱས་པ་ཡིན་ནོ། །
དེ་ལ་རྒྱུད་ཀྱི་སྐྱོན་ནི་ཐེ་ཚོམ་དང་བཅས་པ་དང་། །དོན་མེད་པ་དང་།།ཚིག་ཟློས་པ་དང་། །གོ་རིམས་འཆོལ་བ་དང་། །ཆོ་ག་དང་མི་ལྡན་པ་དང་། །ཤིན་ཏུ་མངས་བ་དང་། །འགལ་བ་ལ་སོགས་པའོ། །རྒྱུད་དེ་ཡང་གསོ་བའི་བསྟན་བཅོས་མ་ལུས་པ་ལ་ཀུན་ནས་ཁྱབ་སྟེ་གནས་པ་ཡངས་པ་རྒྱ་ཆེ་བ། །དྲི་མ་
མེད་ཅིང་སྐྱོན་མེད་པ་སྟེ། །གང་འདི་དྲང་སྲོང་ཆེན་པོ་རྒྱུན་ཤེས་ཀྱི་བུ་ལ་སོགས་པའི་གཞུང་རྒྱ་ཆེ་ཞིང་དྲི་མ་མེད་པའི་རྗེས་སུ་འགྲོ་བའི་རྒྱུད་དེ་ནི་རྒྱ་མཚོ་ཆེན་པོ་ལྟར་ཟབ་ཅིང་འཇུག་པར་བྱེད་ཅིང་། །རྒྱུད་དེ་ནི་ཚངས་པས་བཤད་པའི་བསྡུས་པ་ཞེས་བྱ་བའི་གཞུང་ཆེན་པོ་འདི་དེའི་དོན་ཡང་མཚོན་པར་བྱེད་པ་
ཡིན་ཏེ། །རྒྱུད་འདིས་བསྡུས་པའི་དོན་དེ་ཡང་མཚོན་ཞིང་སྟོན་པར་བྱེད་པ་ཡིན་ནོ། །སྨན་དཔྱད་ཡན་ལག་བརྒྱད་པའི་རྒྱ་མཚོ་བསྲུབས་པ་ལས། །ཡན་ལག་བརྒྱད་བསྡུས་བདུད་རྩིའི་ཚོགས་ཐོབ་གང་། །དེ་ལས་དོན་ཆེན་རྩོལ་བ་ཞེན་པ་རྣམས། །དགའ་བར་བྱ་ཕྱིར་རྒྱུད་འདི་ལོགས་ཤིག་
བྱས། །ཞེས་བྱ་བ་ལ། །སྨན་དཔྱད་གང་ལ་ཡན་ལག་བརྒྱད་ཡོད་པ་དེ་ནི་སྨན་དཔྱད་ཡན་ལག་བརྒྱད་པ་སྟེ། །དེ་ཉིད་དུ་ནི་རྒྱ་མཚོ་ལྟ་བུ་སྟེ་བདུད་རྩི་འབྱུང་བ་ཆོས་དང་མཐུན་པ་དང་། །དོན་ཟབ་པར་མཐུན་པའི་ཕྱིར་རྒྱ་མཚོ་ཞེས་བྱ་སྟེ། །དེ་བསྲུབས་ཤིང་རྣམ་པར་གློངས་བའི་ཚུལ་གྱིས་འབད་པར་
བྱ་བའི་རྒྱུ་དེ་ལས་ཡན་ལག་བརྒྱད་པ་བསྡུས་པའི་བདུད་རྩིའི་ཕུང་པོ་ཆེན་པོ་ཐོབ་པར་འགྱུར་བ་ཡིན་ལ། །ཡན་ལག་བརྒྱད་པ་བསྡུས་པའི་བདུད་རྩིའི་ཚོགས་ཐོབ་པ་དེ་ལས་དོན་ཆེ་ཞིང་བགོས་པ་ཆེན་པོ་དང་ལྡན་པ་འདི་སྨན་པ་རྩོལ་བ་ཞན་ཞིང་འབད་པ་ཆུང་ངུ་དང་ལྡན་པ་རྣམས་ཀྱི་དགའ་བ་

བསྐྱེད་པར་བྱ་བའི་ཕྱིར་ཡན་ལག་བརྒྱད་པའི་སྙིང་པོ་ཞེས་བྱ་བའི་རྒྱུད་འདི་ལོགས་ཤིན་ཏུ་གུད་དུ་བྱས་པ་ཡིན་ནོ། །འདི་ནི་ལུང་ཆེན་ལས་གྲགས་ཤིང་། །འབྲས་བུ་མངོན་དུ་སྟོན་བྱེད་པས། །སྔགས་དང་འདྲ་བར་ལེགས་སྦྱར་གྱི། །ལོག་དཔྱོད་ནམ་ཡང་མི་བྱའོ། །ཞེས་བྱ་བ་
ལ། །རྒྱུད་འདི་ནི་སྨན་དཔྱད་ཀྱི་ལུང་ཆེན་པོ་ལས་གྲགས་ཤིང་། །ལུང་གི་ཚད་མ་དང་ལྡན་པ་དང་། །འབྲས་བུ་འཕྲལ་དུ་མངོན་སུམ་དུ་སྟོན་པར་བྱེད་བའི་ཕྱིར་སྔགས་དང་འདྲ་བར་ཡང་དག་པར་སྦྱར་བར་བྱ་སྟེ། །ཇི་ལྟར་སྔགས་ཀྱི་འབྲས་བུ་ནི་རྒྱུ་གང་གིས་གནོད་པ་སེལ་བར་དཔྱད་པར་མི་བྱ་བའི་ཡིད་ཆེས་
པ་ཉིད་ཀྱིས་བསྒྲུབ་པར་བྱ་བ་ཡིན་པ་དང་འདྲ་བར། །འདིའི་སྦྱོར་བ་ལ་ཡང་ཡིད་ཆེས་པ་ཉིད་ཀྱིས་བསྒྲུབ་ཀྱི། །ལོག་པར་རྟོག་པའི་དཔྱོད་པ་དག་ནི་ཡང་མི་བྱའོ། །འདི་བཀླགས་རྟོགས་དང་ཉམས་བླངས་པས། །ཚེ་རིང་བ་དང་ནད་མེད་དང་། །ཆོས་དང་ནོར་དང་བདེ་དང་གྲགས། །ངེས་པར་འཐོབ་
པར་འགྱུར་བ་ཡིན། །ཞེས་བྱ་བ་ལ། །ཡན་ལག་བརྒྱད་པའི་སྙིང་པོ་ཞེས་བྱ་བའི་སྨན་དཔྱད་ཀྱི་རྒྱུད་འདི་བཀླགས་པ་དང་། །རྟོགས་ཤིང་ཁོང་དུ་ཆུད་པ་དང་། །སྦྱོར་བ་ཇི་སྐད་སྨོས་པ་དང་ཉམས་སུ་བླངས་པ་ལས་ཚེ་རིང་བ་དང་། །ནད་མེད་པ་དང་། །ཆོས་དང་ནོར་དང་བདེ་བར་འགྱུར་བ་དང་། །གྲགས་པར་འགྱུར་བ་
ངེས་བར་གདོན་མི་ཟ་བར་འཐོབ་པར་འགྱུར་རོ། །འདི་ནི་བལྟས་ན་བསྡུས་དོན་རྟོགས་ནུས་པས། །རང་གི་གོམས་ལས་སྨན་པས་བསྐྱོད་མི་ནུས། །རྒྱ་ཆེན་རྒྱུད་གཞན་དག་ལས་གོམས་གྱུར་པས། །མི་བསྐྱོད་གྱུར་གང་དེ་ནི་ངོ་མཚར་མེད། །ཅེས་བྱ་བ་ལ། །ཡན་ལག་བརྒྱད་པའི་སྙིང་པོ་ཞེས་བྱ་བའི་
གཞུང་འདི་བཀླགས་ཤིང་བལྟས་ན་བསྡུས་པ་བཞེས་བྱ་བའི་སྨན་དཔྱད་ཀྱི་བསྟན་བཅོས་ཀྱི་དོན་རྟོགས་ཤིང་ཤེས་བར་ནུས་པ་དང་། །དེ་བཞིན་དུ་རང་གི་གོམས་པའི་ལས་དེ་ཡང་དང་ཡང་དུ་བསྟན་ཞིང་ཉམས་སུ་བླངས་པར་གྱུར་པའི་ལས་ལ་སྨན་པ་འདི་ལ་མ་བརྟེན་པ་གཞན་དག་གིས་བསྐྱོད་བར་མི་ནུས་ཤིང་། །
ཐེ་ཚོམ་གྱིས་སུན་འབྱིན་ཞིང་རྒོལ་བས་ཚེར་བཅད་བར་མི་ནུས་སོ་ཞེས་བྱ་བའི་དོན་ཡིན་ལ། །གལ་ཏེ་སྨན་དཔྱད་ཀྱི་རྒྱུད་རྒྱ་ཆེན་པོ་གཞན་དག་ལས་དཀའ་བ་ཆེན་པོས་བསླབས་ཏེ་བྱ་བར་གྱུར་ནས། །ལས་ལ་གླགས་མི་ཐོད་ཅིང་མི་བསྐྱོད་པར་གྱུར་པ་ཡོད་མོད་ཀྱི། །དེ་ལྟ་བུ་གང་ཡིན་དེ་ནི་

འབད་པ་ཆེན་པོ་ལས་བྱུང་བ་ཡིན་པའི་འབྲས་བུ་ཡིན་པས་ངོ་མཚར་མི་ཆེའི། །འདི་ནི་ཚེགས་ཆུང་དུས་གོམས་པ་ཆེན་པོ་ཐོབ་པ་ཡིན་པས་ངོ་མཚར་ཆེའོ། །གལ་ཏེ་ཙ་ར་ཀས་ནི་བསླབས་གྱུར་དེས་ནི་ལེགས་ཐོས་སོགས། །ལས་བཤད་ནད་ཀྱི་མིང་ཙམ་ཡང་ནི་ཤེས་བར་འགྱུར་མ་ཡིན། །ཙ་ར་ཀ་
ལ་མ་བསླབས་གསོ་བ་དག་ནི་མ་གོམས་པའི། །ཉོན་མོངས་དེས་ནི་ནད་པ་རྣམས་ཀྱི་གསོ་བ་ཇི་ལྟར་བྱ། །ཞེས་བྱ་བ་ལ། །གལ་ཏེ་སྨན་པ་ཙ་ར་ཀ་འབའ་ཞིག་བསླབས་ཤིང་བྱང་བར་བྱས་པར་གྱུར་པ་དེས་ནི་དྲང་སྲོང་ལེགས་ཐོས་ཀྱིས་བྱས་པ་ལ་སོགས་པའི་གཞུང་ལས་བཤད་པའི་ནད་ཀྱི་ཚོགས་ནད་
ཕྲན་ཚེགས་དང་། །མགོ་བའི་ནད་དང་། །མིག་གི་འབྲས་བུ་དཀར་ནག་དང་། །རབ་རིབ་ཀྱི་ནད་དང་། །རབ་རིབ་ཀྱི་ནད་དང་། །རྣ་བ་དང་། །སྣའི་ནད་རྣམས་ཀྱི་མིང་གི་ཐ་སྙད་ཙམ་ཡང་ཤེས་པར་འགྱུར་བ་མ་ཡིན་ཞིང་། །དེ་ཡང་ཕྱི་རོལ་དུ་གྱུར་པ་མ་ཡིན་ནོ། །ཡང་ཞེས་བྱ་བའི་སྒྲས་ནི་དེའི་ནད་གཞི་དང་མཚན་ཉིད་དང་གསོ་བ་དག་མི་
ཤེས་པ་དག་སྨོས་ཀྱང་ཅི་དགོས་སོ་ཞེས་སྟོན་པ་ཡིན་ནོ། །གལ་ཏེ་ཞེས་བྱ་བ་ལ་ནི་ཕྱོགས་གཉིས་པ་སྟོན་པའི་ཕྱིར་སྨོས་པ་ཡིན་ཏེ། །གལ་ཏེ་ཙ་ར་ཀ་ཞེས་བྱ་བས་གཞུང་ལ་མ་བསླབས་ཤིང་ཤེས་པར་མ་གྱུར་གྱི། །ལེགས་ཐོས་ཀྱིས་བཤད་པ་ལ་སོགས་པའི་གཞུང་འབའ་ཞིག་ཙམ་བསླབས་
པར་གྱུར་ན་ནི། །ནད་གཞི་དང་ལུས་ཟུངས་ལ་སོགས་པ་གནོད་པར་བྱ་བ་དང་། །ཡུལ་དང་། །དུས་དང་། །ལུས་དང་། །ཁ་ཟས་དང་། །སྙིང་སྟོབས་དང་། །རང་བཞིན་ལ་སོགས་པ་དང་འབྲེལ་པའི་གསོ་བའི་བྱ་བ་ལ་མ་གོམས་ཤིང་མི་ཤེས་པ་ཡིན་པས། །དེའི་ཕྱིར་ཉོན་མོངས་པའི་ཤེས་པ་དང་མི་
ལྡན་པའི་སྨན་པ་ངན་པ་དེས་ནད་ཀྱིས་གཟེར་བའི་ནད་རྣམས་ལ་གསོ་བ་ཇི་ལྟར་བྱ་སྟེ། །དེ་ལྟབུས་ཀྱང་ནད་བསལ་བའི་བྱ་བ་ཅི་ཡང་བྱ་བར་མི་ནུས་ཏེ། །གསོ་བའི་བྱ་བ་ལ་མ་བསླབས་པའི་ཕྱིར་རོ། །ཡན་ལག་བརྒྱད་པའི་སྙིང་པོའི་སྙིང་པོ་འདིར་ནི་དེ་གཉིས་ཀའི་དོན་སྟོན་པ་ཡིན་པས་འདི་ལ་
བསླབས་པས་ནི་ངེས་པར་ནད་གསོ་བར་ནུས་པ་ཡིན་ནོ། །མངོན་པར་ཞེན་པའི་དབང་གིས་ལེགས་པར་བཤད་པར་གྱུར་པའང་། །ཤིན་ཏུ་རྨོངས་པས་མངོན་པར་སྤྱད་པར་མི་བྱེད་གང་ཡིན་དེ། །དེ་ནི་དང་པོར་སྨན་དཔྱད་བསྟན་བཅོས་སྐྱོན་མེད་བཀླགས་གྱུར་ཞིང་། །སྐྱེས་བུའི་ཚེ་ཡིས་ཇི་སྲིད་ཐུབ་ཀྱི་

བར་དུ་བསླབ་པར་བྱེད། །ཅེས་བྱ་བ་ལ། །རང་གི་བློའི་སྟོབས་ལ་སོགས་པའི་ཚུལ་གྱིས་བསྒྲུབ་པར་མི་ནུས་པའི་དངོས་པོ་རང་གི་ཡུལ་མ་ཡིན་པ་དག་ལ་ཕྱོགས་འཛིན་པར་བྱེད་པ་ནི་མངོན་པར་ཞེན་པ་ཞེས་བྱ་སྟེ། །དེའི་དབང་ནི་ནུས་པ་སྟེ། །མངོན་པར་ཞན་པ་དེ་ལྟ་བུའི་
དབང་དེ་ལས་ལེགས་པར་བཤད་ཅིང་བསྟན་པའི་སྨན་དཔྱད་ཀྱི་རྒྱུད་ལས་ཤིན་ཏུ་རྨོངས་ཤིང་ཡོན་ཏན་དང་། །སྐྱོན་གྱི་བྱེ་བྲག་མི་ཤེས་པས་མངོན་པར་མི་བརྩོན་ཞིང་ཀློག་པ་དང་རྟོགས་པར་བྱ་བའི་ཕྱིར་བརྩོན་པར་མི་བྱེད་པ་དེ་དག་ནི་ངེས་པར་རྨོངས་པར་གྱུར་པས་དང་པོ་སྨོན་དཔྱད་གྱི་བསྟན་བཅོས་
ཚངས་པས་བཤད་ལ། །ཤློ་ཀ་འབུམ་ཡོད་པའི་གཞུང་ལ་སྐྱོ་བ་མེད་པར་བསླབ་ཅིང་སྐྱེས་བུའི་ཚེ་ཇི་སྲིད་ཐུབ་པའི་ཚད་ལོ་བརྒྱའི་བར་དུ་བཀླགས་ཤིང་སློབ་པས་མངོན་པར་ཞེན་པ་མི་འདོར་བ་དེ་ཡང་རྨོངས་པ་ཞེས་བྱའོ། །རླུང་དང་མཁྲིས་པ་བད་ཀན་ཞི་བྱའི་ཕྱིར། །ཏིལ་མར་མར་སར་སྦྲང་
རྩི་རིམ་བཞིན་བསྟེན། །དེ་ལྟར་ཚངས་པའམ་ཚངས་པའི་བུ་ཡིས་བཤད། །ཚིག་གི་དབྱེ་བས་བཤད་ཀྱང་ཁྱད་འཕགས་མེད། །སྟོན་པ་པོ་ཡི་དབང་གིས་ནི། །སྨན་གྱི་ནུས་པ་ཁྱད་འཕགས་ཡིན། །དེ་བས་ཕྲག་དོག་སྤངས་ནས་ནི། །བར་མ་ཉིད་ལ་བསྟེན་བར་བྱ། །ཞེས་བྱ་བ་ལ། །
གལ་ཏེ་གཞན་དག་འདི་སྐད་ཅེས་སྨྲ་བ་པོའི་ཁྱད་པར་ལས་རྫས་ཀྱི་ནུས་པ་ཡང་ཕུལ་དུ་བྱུང་བར་འགྱུར་རོ། །ཞེས་རྒོལ་ན། །དེ་ནི་དེ་ལྟར་མ་ཡིན་ཏེ། །གང་གི་ཕྱིར་རླུང་གི་ནད་ལ་ནི་ཏིལ་མར་ཕན་ལ། །མཁྲིས་པའི་ནད་ལ་ནི་མར་སར་ཕན་ཞིང་། །བད་ཀན་གྱི་ནད་ལ་ནི་སྦྲང་རྩི་ཕན་ལ། །དེ་ལྟར་
རིམ་བཞིན་ཕན་པར་འགྱུར་རོ་ཞེས་བྱ་བ་དེ་ལྟར་ཚངས་པས་བཤད་པའམ། །ཚངས་བའི་བུ་སམ་ཀུ་མཱ་རས་བཤད་པའམ། །འམ་ཞེས་པའི་སྒྲས་ནི་ཁོ་བོ་ཅག་ལ་སོགས་པས་བཤད་དུ་ཟིན་ཀྱང་། །དེ་ནི་དེ་དག་ཉིང་ལ་གཅིག་ནས་གཅིག་ཏུ་ལུང་བརྒྱུད་པ་ཡིན་གྱི། །སྔགས་མེད་པར་ཚིག་གི་
སྒྲས་བསྟན་བའི་ཁྱད་པར་ནུས་པའི་ཁྱད་པར་དུ་གྱུར་པ་ཡང་མ་ཡིན་ཏེ། །སྨྲ་བ་པོའི་ཁྱད་པར་ལས་སྨན་གྱི་ཁྱད་པར་དུ་འཕགས་པ་མ་ཡིན་པས། །དེའི་ཕྱིར་གནས་པ་མ་ཡིན་པ་ལ་ཕྲག་དོག་བྱེད་པ་དེ་སྤངས་ཤིང་བོར་ནས་ཕྱོགས་སུ་མ་ལྷུང་པའི་ལམ་བར་མ་ཉིད་ལ་བློས་བསྟེན་ཞིང་གནས་བར་བྱ་ཞིང་

རང་ཉིད་དུས་དང་བློ་དང་འཚམ་པའི་བསྟན་བཅོས་གང་ཡིན་པ་ཡང་ཤེས་པར་བྱ་ཞིང་། །འདི་ནི་དགོས་པ་མེད་པ་ཡིན་ནོ་ཞེས་བརྟགས་ཤིང་ཤེས་པར་བྱའི། །གནས་མ་ཡིན་པ་ལ་མངོན་པར་ཞེན་པར་མི་བྱའོ། །དྲང་སྲོང་གིས་བ