Luận tạng Tây Tạng (Tengyur) — Tập 202

།ནད་ཀུན་འཇོམས་པར་བྱེད་པ་ཡིན། །ཞེས་བྱ་བ་ལ། ཤིང་མངར་ལ་སོགས་པའི་འདེ་གུ་དང་སྐྱུ་རུ་རའི་ཁུ་བ་དང་ཏིལ་མར་སྦྱོར་བ་ཇི་ལྟ་བ་བཞིན་དུ་བསྐོལ་ཏེ། སྣ་སྨན་དང་
བསྐུ་བ་བྱས་ན་སྐྲ་དཀར་དང་ཀླད་པའི་ནད་ཐམས་ཅད་སེལ་བར་བྱེད་དོ། །ཉེའུ་ཤིང་ཛི་བནྟིའི་ཁུ་བ། །འོ་མ་མར་དང་ཏིལ་མར་དང་། །འཚོ་བྱེད་བསྐོལ་བའི་སྣ་སྨན་གྱིས། །ནམ་ཚོང་ཡན་ཆད་ནད་ཀུན་སེལ། །ཞེས་བྱ་བ་ལ། ཉེའུ་ཤིང་ཛི་བནྟི་བསྐོལ་བའི་ཁུ་བ་དང་། འོ་མ་དང་འཚོ་བྱེད་ཀྱི་
སྡེ་ཚན་དང་བཅས་པར་བསྐོལ་བའི་སྣ་སྨན་འདིས་ནི་ནམ་ཚོང་ཡན་ཆད་ཀྱི་ནད་ཐམས་ཅད་སེལ་བར་བྱེད་དོ། །རྨ་བྱའི་སྒྲོ་མཁྲིས་རྒྱུ་མ་དང་། །རྐང་པ་རྟུག་པ་ཆུ་བོར་བའི། །ཤ་དང་བ་ལ་རྩ་བ་བཅུ། །ར་སྣ་ཤིང་མངར་སྲང་གསུམ་གསུམ། །ཆུ་བསྐོལ་ཁུ་བ་མར་བྲེ་གང་། །འོ་མ་བྲེ་གང་
བཅས་བསྐོལ་བ། །མངར་བའི་སྨན་སྡེའི་ལྡེ་གུ་བཏབ། །དེ་བཏུང་མས་གཏོང་བསྐུ་བ་དང་། །སྣ་སྨན་རྟག་ཏུ་བསྟེན་པ་ཡིས། །ནམ་ཚོང་ཡན་ཆད་ནད་ཀུན་སེལ། །ཞེས་བྱ་བ་ལ། རྨ་བྱའི་ཤ་སྒྲོ་ལ་སོགས་པ་བོར་བ་དང་། རྩ་བ་བཅུ་ལ་སོགས་པའི་སྨན་ལ་ལྟོས་པའི་ཆུ་བཅུ་
དྲུག་འགྱུར་དུ་བྱས་པ་ཡིན་གྱི། ཤ་ལ་ལྟོས་པ་ནི་མ་ཡིན་ཏེ། འདིར་དཔེར་བརྗོད་པ་ན། ར་སྣ་ལ་སོགས་པའི་སྨན་མར་དང་འདྲའོ། །ཆུ་དེར་བསྐོལ་བ་བྲེ་བཞི་ལུས་པའི་ནང་དུ་མར་བྲེ་གང་དང་འོ་མ་བྲེ་གང་དང་བཅས་པར་བསྐོལ་ལ་མངར་བའི་སྨན་གྱི་སྡེ་ཚན་སྲང་བརྒྱད་ཀྱི་ལྡེ་གུ་བཏབ་སྟེ་
བསྐོལ་ལ། དེ་བཏུང་བ་ལ་སོགས་པའི་སྦྱོར་བས་བསྟེན་ན་ནམ་ཚོང་ཡན་ཆད་ཀྱི་ནད་ཐམས་ཅད་སེལ་བར་བྱེད་དོ། །སྨན་འདི་དག་གི་ལྡེ་གུ་དང་། །ཛི་བནྟི་དང་འབྲས་བུ་གསུམ། །མེ་ད་རྒུན་འབྲུམ་དབྱི་མོ་དང་། །པ་རུ་ཤ་ས་མང་ག །ག་བྲའི་རྩ་བ་ཏང་པ་ལ་དང་། །ཀཪྐཏ་སྲིང་ཁ་

སྲལ་ཕྲེའུ། །མ་ཧཱ་མེད་ཏ་ལ་དང་། །འབྲ་གོ་པདྨའི་རྩ་བ་དང་། །པདྨའི་སྡོང་བུ་བ་རྫུ་ན། །ཤིང་མངར་ཉེའུ་ཤིང་ཛི་བ་ཀ། །པི་ད་རི་དང་བུ་རམ་ཤིང་། །ཐལ་ཏྲེས་རྣམ་གཉིས་བྲི་ཧ་ཏི། །མུར་བ་གཟེམ་ཟངས་རྩི་བ། །སྲིང་ག་ཏ་དང་ཀ་ཤེ་རུ། །ར་སྣ་སྠིར་ལྕ་བ་དང་། །སུག་སྨེལ་ཟུར་
པ་མ་ནུ་དང་། །བ་སྤུ་བ་དང་ཅུ་གང་དང་། །རམ་ཉེ་བ་དང་བྱི་ཚེར་བ། །མ་དུ་ཀ་དང་སྟར་ག་དང་། །ཨ་བི་ཤུ་ཀ་མུཉྫ་ཀ། །ཞོ་ནི་གཉིས་གཉིས་ཕྱེར་བཏགས་དང་། །མར་བྲེ་གང་དང་འོ་མ་ནི། །བཞི་འགྱུར་དག་དང་བསྐོལ་བའི་མར། །འདི་ནི་རྨ་བྱ་ཆེན་པོ་སྟེ། །རྨ་བྱ་ལས་ནི་ཡོན་ཏན་ལྷག །
ལུས་ཟུངས་དབང་པོ་ཉམས་སྐད་འགགས། །ལུད་པ་དབུགས་མི་བདེ་ཉེན་འཇོམས། །ཟླ་མཚན་ཁུ་བའི་སྐྱོན་ལའང་ཕན། །མོ་གཤམ་ལ་ཡང་བུ་སྐྱེད་བྱེད། །ཅེས་བྱ་བ་ལ། སྨན་བཤད་མ་ཐག་པ་འདི་དག་གི་འདེ་གུ་དང་། །ཛི་བན་ཏི་ལ་སོགས་པ་ཞོ་གཉིས་གཉིས་ཀྱི་འདེ་གུ་དང་། མར་བྲེ་
གང་དང་། །འོ་མ་བཞི་འགྱུར་དང་བཅས་པ་བསྐོལ་བ་འདི་ནི་རྨ་བྱ་ཆེན་པོའི་མར་བས་ཡོན་ཏན་ཆེ་བ་ཡིན་ཏེ། ལུས་ཟུངས་ཉམས་པ་ལ་སོགས་པ་ནད་ཕྲ་མོ་ཡང་སེལ་ཅིང་མོ་གཤམ་ལྟ་བུ་ལ་ཡང་བུ་སྐྱེད་པར་བྱེད་པ་ཡིན་ནོ། །བྱི་བ་
ཁྱིམ་བྱ་ངང་བ་དང་། །རི་བོང་དང་ཡང་དེ་བཞིན་སྦྱར། །ཞེས་བྱ་བ་ལ། བྱི་བ་ལ་སོགས་པོ་རེ་རེ་ཞིང་ཡང་རྨ་བྱའི་སྨན་མར་གྱི་ཚུལ་དུ་སྦྱར་བར་བྱ་བའི་དོན་ནོ། །ནམ་ཚོང་ཡན་ཆད་གཏོགས་པའི་ནད། །ཉིས་བརྒྱ་སུམ་ཅུ་རྩ་གཅིག་ཡིན། །དེ་དག་ཕན་ཚུན་མ་འདྲེས་པར། །རྒྱ་ཆེར་
རབ་ཏུ་བཤད་པ་ཡིན། །ཞེས་བྱ་བ་ལ། ནམ་ཚོང་ཡན་ཆད་དུ་གཏོགས་པའི་ནད་སྤྱིར་གྲངས་ཉིས་བརྒྱ་སུམ་ཅུ་རྩ་གཅིག་ཡོད་པ་ཡིན་ལ། དེ་དག་ཀྱང་ཕན་ཚུན་མཚན་ཉིད་མ་འདྲེས་པར་རྒྱ་ཆེར་རབ་ཏུ་བསྟན་ཅིང་བཤད་པ་ཡིན་ནོ། །དྲང་སྲོང་རྣམས་ཀྱིས་སྐྱེས་བུའི་མགོ། །རྩ་བ་
འོག་ནི་ཡལ་གར་བཤད། །དེ་ཕྱིར་རྩ་བ་ལ་གནོད་པའི། །ནད་ནི་མྱུར་དུ་གསོ་བར་བྱ། །ཞེས་བྱ་བ་ལ། དྲང་སྲོང་རྣམས་ཀྱིས་སྐྱེས་བུའི་མགོ་བོ་ནི་རྩ་བ་ཡིན་ལ། མགོ་བོ་མན་ཆད་ཀྱི་འོག་ཏུ་མ་ལུས་པ་ཐམས་ཅད་ནི་ཡན་ལག་ཡིན་པར་བཤད་དེ། དེ་བས་ན། སྨན་པས་ལུས་ཀྱི་རྩ་

བར་གྱུར་པ་མགོ་བོ་ལ་གནོད་པར་གྱུར་བའི་ནད་རྣམས་ནི་ཤིན་ཏུ་རིངས་པ་ཁོ་ནར་གསོ་བར་བྱ་བ་ཡིན་ནོ། །གང་ལ་དབང་བོ་ཀུན་རྟེན་ཞིང་། །གང་ལ་སྲོག་ནི་གནས་བྱེད་པས། །དེས་ན་ཡན་ལག་དམ་པ་ཡི། །བསྲུང་བ་ལ་ནི་འབད་པར་བྱ། །ཞེས་བྱ་བ་ལ། མགོ་བོ་གང་
ལ་རྒྱུ་གང་གིས་མིག་ལ་སོགས་པའི་དབང་པོ་ཀུན་རྟེན་པར་བྱེད་པ་དང་། གང་ལ་སྲོག་གི་དབང་པོ་གནས་པར་བྱེད་པའི་རྒྱུ་དེས་ཡན་ལག་དམ་པར་གྱུར་པའི་མགོ་བོ་དེ་བསྲུང་ཞིང་གནོད་པ་མེད་པར་བྱ་བ་ལ་སྨན་པས་འབད་ཅིང་བརྩོན་པ་ཉིད་དུ་བྱའོ། །མགོ་བོའི་ནད་གསོ་བའི་རྒྱུད་རྫོགས་སོ།། །།
ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་བཞི་བའི་རྣམ་པར་འགྲེལ་བའོ།། །།དེ་ནས་རྨ་གསོ་བ་བཤད་པར་བྱའོ། །ཞེས་བྱ་བ་ལ། ཡན་
ལག་བརྒྱད་པའི་གསོ་བ་ལས་ཡན་ལག་བཞི་བཤད་ནས། ད་ནི་གོ་རིམས་ཀྱིས་ན་རབ་ཏུ་བྱེད་པ་ལྔ་བ་བརྩམས་པ་ཡིན་ཏེ། དེ་ལ་རྨ་རྣམས་ཀྱི་ནད་ཀྱི་ཉེས་པ་དགག་པའི་རྨ་གསོ་བ་སྟེ། དེའི་ལེའུ་བཤད་པར་བྱའོ་ཞེས་པའོ། །རྨ་ནི་ལྷན་ཅིག་སྐྱེས་གློ་བུར། །རེད་དང་མ་རེད་དབྱེད་གཉིས། །
ཞེས་བྱ་བ་ལ། རྨ་ནི་ལྷན་ཅིག་སྐྱིས་པ་དང་། གློ་བུར་བའི་དབྱེ་བ་དང་། རེད་ཅིང་གནོད་པ་དང་བཅས་པ་དང་། མ་རེད་ཅིང་སྐྱོན་མེད་པའི་དབྱེ་བས་རྣམ་པ་གཉིས་ཁོ་ན་ཡིན་ནོ། །ལུས་ཀྱི་ནད་གཞིས་སྐྱེད་ལྷན་ཅིག །ཕྱི་རོལ་རྒྱུས་བྱུང་གློ་བུར་བའོ། །ཞེས་བྱ་བ་ལ། དེ་ལ་ལྷན་ཅིག་སྐྱེས་པའི་རྨ་
ནི་ལུས་ལས་བྱུང་བའི་ནད་རླུང་ལ་སོགས་པས་སྐྱེད་པ་ཡིན་ནོ། །གློ་བུར་བའི་རྨ་ནི་མཚོན་ཆ་དང་མཚོན་ཆ་ཕྲ་མོ་དང་རྡོ་དང་དབྱིག་པ་དང་སེན་མོ་དང་སོ་དང་དུག་དང་བསེ་ཞོ་ལ་སོགས་པ་ཕྱི་རོལ་གྱི་རྒྱུ་ལས་བྱུང་བ་ཡིན་ནོ། །ནད་དང་འདྲེས་པ་རེད་པ་ཡན། །དེ་མེད་དག་པ་མ་རེད་ཡིན། །ཞེས་བྱ་བ་ལ། །
རླུང་ལ་སོགས་པའི་ནད་དང་འདྲིས་ཤིང་དེས་སྐྱེད་པའི་རྨ་ནི་རེད་པའམ་མ་དག་ཅེས་བྱ་ལ། ནད་དེ་དག་མེད་ཅིང་དག་པར་གྱུར་པ་ནི་མ་རེད་པ་ཞེས་བྱ་བའོ། །རྨ་རེད་ཁ་རྒྱས་ཞུམ་པ་དང་། །ཤིན་ཏུ་སྲ་བའམ་ཤིན་ཏུ་སྙི། །ཤིན་ཏུ་མཐོ་འམ་ཤིན་ཏུ་དམའ། །ཤིན་ཏུ་གྲང་ངམ་ཤིན་ཏུ་ཚ། །དམར་

ཞིང་སྐྱ་བམ་གནག་པ་ཉིད། །རྣག་ནི་དྲི་མནམ་ཡོངས་སུ་འཛག །ཤ་དང་རྩ་རྒྱུས་འདྲུལ་བ་དང་། །གཡོས་ཤིང་མཆེད་ལ་རབ་ཏུ་ན། །གཡོ་ཞིང་ཚ་ལ་སྐྲང་བ་དང་། །གཡའ་བ་ལ་སོགས་བླ་བརྣན་བཅས། །ཡུན་རིང་དུ་ནི་འཚོ་བ་དཀའ། །རྨ་རད་མཚད་མར་ཤེས་བར་བྱ། །ཞེས་བྱ་བ་ལ།
དེ་ལ་རྨ་རེད་ཅིང་མ་དག་པའི་མཚན་མ་ནི་རྨའི་ཁ་རྒྱས་ཤིང་བྱེ་བ་དང་། ཞུམ་ཞིང་འཁུམས་པ་དང་། ཤིན་ཏུ་སྲ་ཞིང་རྩུབ་པའང་ཤིན་ཏུ་སྙི་བ་ལ་སོགས་པ་དང་། ཁ་དོག་ཤིན་ཏུ་དམན་པ་ལ་སོགས་པའམ། གནག་པ་ལ་སོགས་པའམ། རྨ་མཆེད་ཅིང་རབ་ཏུ་ན་ལ་བླ་བརྣན་དང་བཅས་པ་དང་། །
ཡུན་རིང་དུ་གནས་ཤིང་འཚོ་བར་དཀའ་སྟེ། རྨ་ཤིན་ཏུ་མ་རུངས་པའི་མཚན་མ་ནི་དེ་དག་ཡིན་པར་ཤེས་པར་བྱའོ། །དེ་ནི་ཁྲག་བཅས་ནད་བཅོ་ལྔ། །ཞེས་བྱ་བ་ལ། དེ་ལ་རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་བྱུང་བ་དང་། ཁྲག་ལས་གྱུར་པ་དང་། རླུང་
དང་མཁྲིས་བ་ལས་གྱུར་པ་དང་། རླུང་དང་བད་ཀན་ལས་གྱུར་བ་དང་། རླུང་དང་མཁྲིས་པ་དང་བད་ཀན་ལས་གྱུར་བ་དང་། རླུང་དང་ཁྲག་ལས་གྱུར་པ་དང་། མཁྲིས་པ་དང་ཁྲག་ལས་གྱུར་པ་དང་། བད་ཀན་དང་ཁྲག་ལས་གྱུར་པ་དང་། རླུང་དང་མཁྲིས་པ་དང་ཁྲག་ལས་གྱུར་པ་
དང་། རླུང་དང་བད་ཀན་དང་ཁྲག་ལས་གྱུར་པ་དང་། བད་ཀན་དང་མཁྲིས་པ་དང་ཁྲག་ལས་གྱུར་པ་དང་། བད་ཀན་དང་མཁྲིས་པ་དང་ཁྲག་ལས་གྱུར་པ་དང་། རླུང་དང་མཁྲིས་པ་དང་བད་ཀན་དང་ཁྲག་ལས་གྱུར་པ་སྟེ། དེ་ལ་རྣམ་པ་བཅོ་ལྔ་ཡིན་ནོ། །དེ་ལ་རླུང་ལས་གྱུར་པའི་རྨ། །གནག་
ཅིང་སྨུག་དམར་ཐལ་མདོག་དང་། །ཐི་པའི་རུས་པ་ལྟ་བུར་སྣང་། །ཞོ་ག་ཆུའམ་འབྲས་བཀྲུས་ཆུ། །འདྲ་བའི་ཆུ་ལས་ཉུང་དུ་འཛག །ཤ་ཟད་ཤས་ཆེར་ན་ཞིང་ཟུག །རྩུབ་ཅིང་ཙེག་ཙེག་ཚ་བ་ཡིན། །ཞེས་བྱ་བ་ལ། དེ་ལ་རྨ་དེ་དག་གི་ནང་ནས་རླུང་ལས་གྱུར་པའི་རྨ་ནི་ཁ་དོག་གནག་ཅིང་
སྔོ་བ་དང་། སྨུག་པ་དང་དམར་བ་ལ་སོགས་པ་དང་། ཞོ་ག་ཆུ་ལྟར་སྣང་པའམ། འབྲས་བཀྲུས་པའི་ཆུ་དང་འདྲ་བར་སྣང་བའི་ཆུ་སེར་སླ་བ་ཉུང་ཤས་ཤིག་འཛག་པ་དང་། དེ་བཞིན་དུ་ཤ་ཟད་པ་དང་། ཤས་ཆེར་ཟུག་ཅིང་ན་བ་དང་། རེག་ན་རྩུབ་པ་དང་། སྟེང་ན་ཚ་བ་ཙེག་ཙེག་བྱེད་

ཅིང་གས་པ་ཡིན་ནོ། །མཁྲིས་གྱུར་མྱུར་རྣགས་སེལ་བ་དང་། །སྔོ་ཞིང་སེལ་སྐྱའམ་ཁམ་པར་འདུག །གཅིན་དང་ཐལ་ཆུ་རྒྱ་སྐྱེགས་ཁུ། །ཏིལ་མར་འདྲ་ཆུ་མང་དུ་འཛག །རྨ་ལ་ཐལ་སྨན་བཏབ་ལྟར་ན། །དམར་ཞིང་ཚ་ལ་རྣགས་པ་ཡིན། །ཞེས་བྱ་བ་ལ། མཁྲིས་
པ་ལས་གྱུར་པའི་རྨ་ནི་མྱུར་དུ་རྣགས་ཤིང་ན་པར་བྱེད་པ་དང་། ཁ་དོག་སེར་པོ་ལ་སོགས་པ་གང་ཡང་རུང་བར་སྣང་པ་དང་། ཆུ་སེར་གཅིན་ལ་སོགས་པ་དང་འདྲ་བ་མང་དུ་འཛག་པ་དང་། དེ་བཞིན་དུ་རྨའི་ནང་དུ་ཐལ་སྨན་གྱི་ཆུ་བཏབ་པ་ལྟར་ཚ་ཞིང་ན་བ་དང་། ཤས་ཆེས་དམར་ཞིང་ཚ་བ་ལ་སོགས་
པ་དང་ལྡན་པ་ཡིན་ནོ། །བད་ཀན་ལས་གྱུར་མདོག་སྐྱ་གཡའ། །ཆུ་ནི་སྐ་བ་མང་དུ་འཛག །རྨ་ཁ་སྦོམ་ཞིང་ན་བ་དང་། །རྩ་རྒྱུས་ཀྱིས་ཁྱབ་ནད་ཚབས་ཆུང་། །ཞེས་བྱ་བ་ལ། བད་ཀན་ལས་གྱུར་པའི་རྨ་ནི་མདོག་སྐྱ་བ་ལ་སོགས་པ་དང་ལྡན་པ་དང་། རྨ་ཁ་སྦོམ་ཞིང་མཐུག་པ་དང་། རྨ་སྲ་བ་
དང་། རྩ་རྒྱུས་པའི་ཚོགས་ཀྱི་དྲ་བས་ཁྱབ་བར་སྣང་བ་ཡིན་ནོ། ཁྲག་གྱུར་བྱི་རུའི་མདོག་ལྟར་དམར། །ཁྲག་དང་བཅས་པའི་རྣག་འཛག་ཅིང་། །རྟ་བྲེས་ཀྱི་ནི་དྲི་ལྟར་བྲོ། །མཁྲིས་པའི་མཚན་མ་དག་དང་ལྡན། །ཞེས་བྱ་བ་ལ། ཁྲག་ལས་གྱུར་པའི་རྨ་ནི་བྱི་རུ་ལྟར་དམར་བ་ལ་སོགས་པ་
དང་། རྟ་བྲེས་ཀྱི་གནས་ཀྱི་དྲི་བྲོ་ཞིང་དེ་དང་མཚུངས་པའི་དྲི་དང་ལྡན་པ་དང་། དེ་བཞིན་དུ་མཁྲིས་པའི་མཚན་པ་ཇི་སྐད་བཤད་པ་དག་དང་ཡང་ལྡན་པ་ཡིན་ནོ། །གཉིས་སམ་གསུམ་མམ་ཐམས་ཅད་ལས། །གྱུར་པའི་མཚན་མ་འདྲེན་མ་ཡིན། །ཞེས་བྱ་བ་ལ། ནད་གཞི་གཉིས་གཉིས་སམ་གསུམ་གསུམ་
མམ། ཁྲག་དང་བཅས་པ་ཐམས་ཅད་ལས་གྱུར་པའི་མཚན་མ་ནི་གང་དང་གང་གི་ཤས་འདྲེས་པ་དེ་དང་དེའི་མཚན་མ་འདྲེས་མར་སྣང་བ་ཡིན་ནོ། །ལྕེ་ཡི་མདོག་འདྲ་འཇོམ་ཞིང་མཉེན། །རྨ་ཁ་སྨུག་ཅིག་འབྲུམ་ཕྲན་ཅན། །མཉམ་པ་དབུས་མ་ཅུང་ཟད་མཐོ། །བླ་བརྣན་མེད་རྨ་དག་པ་ཡིན། །
ཞེས་བྱ་བ་ལ། རྨ་མ་རེག་ཅིང་སྐྱོན་མེད་པའི་མཚན་མ་ནི་ལྕེའི་མདོག་འདྲ་བར་སྣང་པ་དང་། རེག་ན་འཇམ་པ་དང་། མཉེན་ཞིང་གྱོང་བག་མེད་པ་དང་། རྨ་ཁ་ཅུང་ཟད་སྨུག་པ་དང་། ཕྱི་རོལ་ན་འབྲུམ་ཕྲན་ཡོད་པ་དང་། དབྱིབས་མཐོ་དམན་མེད་ཅིང་མཉམ་པ་དང་། རྨའི་དབུས་ཡིད་

ཙམ་མཐོ་བའམ། བླ་བརྣན་གྱི་བག་མེད་པའི་རྨ་ནི་དག་ཅིང་སྐྱོན་མེད་པ་ཡིན་ནོ། །བགས་པ་ཤ་དང་རྩ་རྒྱུས་དང་། །ཚིག་དང་རུས་པ་ནང་གྲོལ་གནད། །བརྒྱད་པོ་དེ་ནི་རྨ་གནས་བ། །ཕྱི་མ་བཞིན་དུ་གསོ་བར་དཀའ། །ཞེས་བྱ་བ་ལ། པགས་པ་ནས་གནས་ཀྱི་བར་བརྒྱད་པོ་ནི་རྨའི་
གནས་ཡིན་པ་ལས། དེ་དག་ཕྱི་མ་བཞིན་དུ་གསོ་དཀའ་བ་ཡིན་ཏེ། དེ་ལ་པགས་པའི་རྨ་བས་ནི་ཤ་ལ་བརྟེན་པའི་རྨ་གསོ་དཀའོ། །དེ་བས་ནི་རྩའི་འོ། །དེ་བས་ནི་རྒྱུས་པའི་འོ། །དེ་བས་ནི་ཚིགས་ནས་ཇི་སྲིད་གནད་ལ་གནས་པའི་བར་ཐམས་ཅད་བས་ཀྱང་གསོ་དཀའ་བ་ཡིན་ནོ། །གསོ་སླ་སྙིང་
སྟོབས་མེ་དྲོད་ཤ། །ན་ཚོད་ཉམས་སྟོབས་ལྡན་བའི་རྨ། །ཟླུམ་ཞིང་དཀྱུས་རིང་རིམ་གསུམ་པ། །ཟུར་བཞི་བ་ནི་གང་ཡིན་དང་། །དེ་བཞིན་དབྱི་རྐུབ་ཕོ་མཚན་མཆུ། །རྒྱབ་དང་ཁ་ནང་མཁུར་ཚོས་འབྱུང་། །ཞེས་བྱ་བ་ལ། རྨ་མི་སྙིང་སྟོབས་དང་ལྡན་པ་དང་། རུས་ཚིགས་ཤ་དང་བཅས་པ་
དང་། ནང་གི་མེ་དྲོད་འབར་བ་དང་། ན་ཚོད་དར་ལ་བབ་པ་དང་། ཉམས་སྟོབས་དང་ལྡན་པའི་རྨ་གང་ཡིན་པ་དེ་ནི་གསོ་པར་སླ་བ་ཡིན་ནོ། །དེ་བཞིན་དུ་རྨའི་དབྱིབས་ཟླུམ་པ་དང་། དཀྱུས་རིང་བ་དང་། རིམ་པ་གསུམ་ཡོད་པ་དང་། ཟུར་བཞིར་གནས་པ་གང་ཡིན་པ་དང་། དེ་བཞིན་དུ་
གསོ་སླ་བའི་རྨ་ནི་དཔྱི་དང་རྐུབ་ཚོས་དང་། ཕོ་མཚན་དང་། མཆུ་དང་། རྒྱབ་དང་། ཁའི་ནང་དང་མཁུར་ཚོས་སུ་བྱུང་བ་ནི་གསོ་སླ་བ་ཡིན་ནོ། གསོ་དཀའ་མིག་དང་སོ་དང་ནི། །སྣ་དང་མིག་ཟུར་ལྟེ་བ་དང་། །སྲུབ་མཚམས་ལྟོ་བ་རྣ་བ་དང་། །རྩིབ་ལོགས་མཆན་ཁུང་ནུ་མར་བྱུང་། །ཞེས་
བྱ་བ་ལ། རྨ་གསོ་དཀའ་བ་ནི། མིག་ལ་སོགས་པ་ལས་བྱུང་བ་ཡིན་ནོ། །ལྦུ་བ་རྣག་འཛག་རླུང་འབྱུང་ཞིང་། །ཟུག་རྔུར་བཅས་ཤིང་སྟོང་ནས་འཛག །མཚན་པར་རྔོལ་ཞིང་ཁ་ནང་བལྟས། །དེ་བཞིན་རྐེད་པའི་རུས་པར་གནས། །ཞེས་བྱ་བ་ལ། ཡང་རྨ་གང་ལྦུ་བ་འཛག་པ་
དང་། རྣག་འཛག་པ་དང་། རླུང་འབྱུང་བ་དང་། ནང་ན་ཟུག་རྔུ་དང་བཅས་པ་དང་། སྟོད་ཀྱི་ཆ་ནས་རྣག་འཛག་ཅིང་ལྗན་ལྗིན་འབྱུང་བར་བྱེད་པ་དེ་ཡང་གསོ་དཀའ་བ་ཡིན་ལ། དེ་བཞིན་དུ་མཚན་བར་རྡོལ་ལ་ཁ་ནང་དུ་བལྟས་བ་དང་། རྐེད་པའི་རུས་པར་གནས་པ་ནི་གསོ་

དཀའོ། །མཛེ་ཅན་དུག་གིས་ཕོག་པ་དང་། །ལུས་སྐེམ་གཅིན་ནད་སྦྲང་རྩི་འདྲ། །རྨ་སྟེང་རྨ་ནི་བྱུང་བ་གང་། །རྨ་དེ་གསོ་བར་དཀའ་བ་ཡིན། །ཞེས་བྱ་བ་ལ། མཛེའི་ནད་ཡོད་པའི་ཕྱིར་མཛེ་ཅན་ནོ། །དུག་གིས་ཕོག་པ་ནི་དུག་གིས་ཉེན་པའོ། །ལུས་སྐེམ་
པ་ནི་ཟད་བྱེད་ཀྱི་ནད་གཅོང་ཆེན་པོས་བཏབ་པའོ། །གཅིན་ནད་སྦྲང་རྩི་འདྲ་བས་བཏབ་པའི་གཅིན་སྙི་བའི་ནད་མདོག་སྦྲང་རྩི་འདྲ་བས་བཏབ་པ་སྟེ། དེ་དག་གི་རྨ་ནི་གསོ་བར་དཀའ་བ་ཡིན་ནོ། །དེ་བཞིན་དུ་རྨའི་སྟེང་དུ་རྨ་བྱུང་བ་གང་ཡིན་པ་དེ་ཡང་གསོ་བར་དཀའ་བ་ཡིན་ནོ། མེད་བལ་རིམས་དང་
ཚད་པར་འཁྲུ། །ལུད་པ་ལུ་དང་སྐོམ་དད་ཆེ། །གཉིད་མེད་པ་དང་དབུགས་མི་བདེ། །མེ་དྲོད་ཆུང་བར་གྱུར་པ་ཡིན། །རྨ་ནི་འཚོབ་པར་མི་གྱུར་རོ། །ཞེས་བྱ་བ་ལ། མེད་པ་ལ་ལ་སོགས་པ་གནས་མེ་དྲོད་ཆུང་ཞིང་སྨིན་མི་ཤེས་པའི་རྨ་ནི་འཚོ་བས་ཤིང་འདྲུབས་པར་མི་འགྱུར་རོ། །མགོ་བོའི་
ཐོད་པ་ཆག་གྱུར་ཞིང་། །ཀླད་རྒྱས་མཚན་མ་སྣང་དེ་བཞིན། །ཞེས་བྱ་བ་ལ། མགོ་བོའི་ཐོད་པའི་རུས་པ་ཆག་པར་གྱུར་ནས། ཀླད་རྒྱས་ཞེས་བྱ་བ་ཀླད་པའི་མཚན་མ་སྣང་བར་གྱུར་པའི་རྨ་ཡང་འཚོ་བར་མི་འགྱུར་རོ། །ཆུ་བ་རུལ་ཞིང་རྩ་ཆད་དང་། རྨ་ཕུགས་རིང་དང་སྲིན་བུས་ཟོས། །
རུས་པ་ཆག་དང་ཟུག་རྔུར་བཅས། །དུག་བཅས་བ་དང་མ་རྟོགས་དང་། །བཅིང་བ་ཉེས་དང་སྣུམ་ཆེས་དང་། །རྩུབ་པས་སྦུ་ཚོགས་བདར་བ་དང་། །བསྐྱོད་དང་ཁོང་པ་མ་དག་དང་། །འགྲངས་དྲགས་ཉམས་དམན་དྲགས་བ་དང་། །ཆང་འཐུངས་ཉིན་པར་གཉིད་ལོག་དང་། །ཉལ་པོ་ལ་བརྟེན་
མཚན་གཉིད་ཡར། །རྨ་ནི་ལོག་པར་གསོས་པ་དང་། །གསོས་ཀྱང་འགྲུབ་པར་མི་འགྱུར་རོ། །ཞེས་བྱ་བ་ལ། རྨ་གསོ་བར་བྱ་བ་ཡིན་ཡང་ཆུ་བ་རུལ་བ་གང་ཡིན་པ་དེ་ནི་གསོས་ཀྱང་གསོ་བ་འགྲུབ་ཅིང་བདེ་བར་མི་འགྱུར་རོ། །དེ་བཞིན་དུ་རྩ་རྣམས་ཆད་པར་འགྱུར་བ་དང་། །རྨའི་
ཕུགས་ཤིན་ཏུ་གཏིང་རིང་བར་འགྱུར་བ་དང་། དེ་བཞིན་དུ་སྲིན་བུས་ཟོས་པ་དང་། རུས་པ་དུམ་བུར་ཆད་པ་དང་། ནང་ན་ཟུག་རྔུར་བཅས་པ་དང་། དུག་དང་བཅས་པ་དང་། གང་ན་ཡོད་པ་ངོས་མ་ཟིན་ཅིང་མ་རྟོགས་པ་དང་། བཅིང་བ་ཉེས་པར་གྱུར་པ་དང་། སྣུམ་དྲགས་པ་དང་། །

རྩུབ་ཆེས་བས་སྦུ་ལ་སོགས་པ་བདར་ཞིང་རེག་པ་དང་། ལུས་བསྐྱོད་ཅིང་གཡེང་བ་དང་། ཁོང་པ་མ་དག་ཅིང་ནང་གི་ནང་མ་སྦྱངས་པ་དང་། ཧ་ཅང་འགྲངས་དྲགས་པ་དང་། ཉམས་དམན་པའི་སྨྱུར་བ་བྱས་བ་ཧ་ཅང་དྲགས་པ་དང་། ཆང་མང་དུ་འཐུངས་པ་དང་། ཉིན་པར་གཉིད་ལོག་
པ་དང་། ཉལ་པོའི་ལས་འཁྲིག་པ་ལ་བརྟེན་པ་དང་། དེ་བཞིན་དུ་མཚན་མོ་གཉིད་ཡར་བ་དང་། གསོ་བ་ལོག་པར་བྱས་པ་སྟེ། རྒྱུ་དེ་དག་གིས་ནི་རྨ་གསོར་རུང་བ་ཡིན་ཡང་གསོ་བའི་ལས་འགྲུབ་པར་མི་འགྱུར་རོ་ཞེས་རེ་རེ་ལ་སྦྱར་རོ། །གང་ཞིག་ནང་ནི་ཐི་བའི་མདོག །འདྲ་ཞིང་
རྣགས་པ་མེད་པ་དང་། །བརྟན་ཞིང་འབྲུམ་ཕྲན་རྙིད་བཅས་པ། །འཚོབ་པར་འགྱུར་བར་དེ་བཤད་དོ། །ཞེས་བྱ་བ་ལ། རྨ་གང་ཞིག་གི་ནང་ཐི་བའི་མདོག་འདྲ་བར་སྣང་བ་དང་། ནང་ན་རྣག་དང་ལྗན་ལྗིན་མེད་པ་དང་། བརྟེན་ཞིང་མི་འགྱུར་བ་དང་། འབྲུམ་ཕྲན་རྙིད་པ་ལྟ་བུ་དང་བཅས་
བའི་རྨ་དེ་ནི། བ་ཅིང་འདྲུབས་པར་པར་འགྱུར་པ་ཡིན་པར་ཤེས་བར་བྱའོ། །དེས་ན་འདིར་སྐྲངས་གནས་སྐབས་སུ། །གང་ལ་ཉེ་བ་དེ་ལས་སྦྱང་། །སྦྱངས་པས་སྐྲངས་པར་གྱུར་བ་དང་། །རྨ་ནི་མྱུར་དུ་འཚོབ་པར་འགྱུར། །ཞེས་བྱ་བ་ལ། ད་ནི་འདི་དག་གིས་གསོ་བ་སྟོན་ཏེ། དེས་ན་འདི་ལ་སྐྲངས་
པའི་གནས་སྐབས་སུ་ནི། རྨ་དེ་དང་གང་དང་ཉེ་བའི་སྟེང་ངམ་འོག་གནས་སྦྱང་བ་སྟེ། བཀྲུ་སྨན་དང་སྐྱུག་སྨན་ལ་སོགས་བས་སྦྱང་པར་བྱ་སྟེ། དེ་ལྟར་སྦྱངས་པར་གྱུར་ན་སྐྲངས་པ་དང་། རྨ་དེ་མྱུར་དུ་ཞི་ཞིང་འཚོབ་པར་འགྱུར་རོ། །སྐྲངས་པའི་སྐབས་སུ་རྒྱུན་དུ་ནི། །ཉེ་བར་སྦྱོད་པ་བསིལ་བས་གསོ། །དེ་
ཡིས་ནད་མེད་ཆུ་ལྟ་བུར། །མོད་ལ་ཞི་བར་འགྱུར་བ་ཡིན། །ཞེས་བྱ་བ་ལ། རྨ་དེ་སྐྲངས་བའི་སྐབས་སུ་ནི་རྟག་པར་རྒྱུན་དུ་བསིལ་བར་བྱ་བའི་གསོ་བའི་ཚོགས་ཉེ་བར་གསོ་བར་བྱ་སྟེ། གསོ་བའི་ཆོ་ག་བྱས་པ་དེས་ནད་ཀྱི་ཚ་བ་མེ་ལྟ་བུ་མེ་ལ་ཆུ་བླུགས་པ་ལྟར་མོད་ལ་ཞི་བར་འགྱུར་རོ། །རྨ་སྐྲང་
སྲ་བར་གྱུར་བ་དང་། །ནད་བཅས་མདོག་ནི་མི་སྡུག་དང་། །དུག་ཅན་ལ་ནི་ཁྱད་པར་དུ། །བདྨ་སོགས་ཤས་ཁྲག་དབྱུང་ངོ་། །ཞེས་བྱ་བ་ལ། རྨ་སྐྲང་བར་བྱེད་པ་སྲ་བར་གྱུར་པ་རྩུབ་ཅིང་ནད་དང་བཅས་པ་མདོག་མི་སྡུག་པར་འགྱུར་བ་དང་། རྨ་དུག་ཅན་ལ་ནི་ཁྱད་པར་དུ་སྲིན་བུ་པད་

པ་དང་རྔབས་རྭ་ལ་སོགས་པས་ཁྲག་དབྱུང་བར་བྱའོ། །ནད་ཁྲག་བྲལ་ནས་མོད་ལ་ནི། །སྐྲང་དང་མདོག་དམར་ནད་ཞིར་འགྱུར། །ཞེས་བྱ་བ་ལ། ནད་ཁྲག་བསལ་ཅིང་། དེ་དང་བྲལ་ནས་ནི་མོད་ལ་དེ་ཉིད་ཀྱི་ཆེ་སྐྲང་པ་ལ་སོགས་པ་ཞི་བར་འགྱུར་རོ། །ཁྲག་དབྱུང་ནས་
ནི་ཆུང་ཟད་ལུས། །རེག་ན་ནུས་པ་རབ་བསིལ་བ། །ཤིན་ཏུ་ཞིབ་པར་དེ་ཉིད་བཏགས། །བུ་རམ་ཤིང་ཁུ་འོ་མས་སྤྲུས། །ལན་བརྒྱར་བསྐུས་པའི་མར་དང་བཅས། །གཞན་མ་སྐམ་པར་ཡང་དང་ཡང་། །རྗེས་སུ་མཐུན་པར་བསྐུས་ན་ཕན། །བྱུག་དང་བླུགས་པ་དེ་བཞིན་བྱ། །ཞེས་བྱ་བ་
ལ། ཁྲག་ཕྱུང་བའི་རྗེས་ལ། དེའི་ནད་ཁྲག་ཅུང་ཟད་ལུས་པར་གྱུར་པ་ལ་རེག་ན་བསིལ་པ་ནུས་པ་བསིལ་བའི་སྨན་ཞིབ་ཏུ་དེའི་ཉིན་ཞག་ཉིད་ལ་བཏགས་ཤེང་སྦྱར་གྱི་ཞག་ལོན་པ་མ་ཡིན་པ་དང་། བུ་རམ་ཤིང་གི་ཁུ་བ་དང་འོ་མས་སྤྲུས་ཏེ་ལན་བརྒྱར་བསྐུས་པའི་མར་དང་བཅས་པར་བྱས་
ལ། སྨན་སྔར་བསྐུས་ཏེ་མ་སྐམ་པར་ཡང་དང་ཡང་དུ་རྗེས་སུ་མཐུན་པར་བསྐུ་བར་བྱ་ཞིང་། དེ་བཞིན་དུ་རིག་པ་དང་། ནུས་པ་བསིལ་སྨན་གྱི་འདག་གུས་བྱུག་ཅིང་དེའི་ཆུ་བླུགས་ན་ཡང་ཕན་ནོ། །ཨུ་དུམ་ཝཱ་ར་ནྱ་གྲོ་དང་། །བླག་ཤ་ལྕང་མ་ཨ་ཤྭ་ཏྠའི། །ཤུན་པ་མར་དང་བཅས་བསྐུས་ན། །
སྐྲངས་བསིལ་བའི་མཆོག་ཡིན་ནོ། །ཞེས་བྱ་བ་ལ། ཨུ་དུམ་ཝཱ་ར་ལ་སོགས་པའི་ཤུན་པ་བཏགས་པའི་མར་དང་བསྲེས་པས་བསྐུས་ནས་ཡང་སྐྲངས་པ་ཞི་བར་བྱེད་པའི་དམ་པ་ཡིན་ནོ། །རླུང་ཤས་ཆེ་ཞིང་མཁྲང་བ་དང་། །སྲ་ཞིང་ནད་ཚབས་ཆེ་བ་དང་། །ཁྲག་འཛག་པ་དང་རྨ་སྐྲང་བ། །འདི་
ལྟ་བུ་ཡི་རྨ་ལ་ནི། །རླན་ཅན་ཤ་བཏགས་ལ་དུགས་བྱ། །ཞེས་བྱ་བ་ལ། རླུང་གི་ཤས་ཆེ་བའི་རྨ་མཁྲང་ཞིང་མི་འགྱུར་བ་དང་། སྲ་བ་ལ་སོགས་པའི་རྨ་འདི་ལྟ་བུ་ལ་ནི་རླན་ཅན་གྱི་ཤ་བཏགས་ཤིང་བརྡུངས་བ་ལ་སོགས་པས་དུགས་བྱས་ན་ཕན་ནོ། །ཟར་མ་ཏིལ་ནི་བརྔོས་པ་དང་། །འོ་མས་
དབལ་ནི་བསད་པ་དག །དེ་བཏགས་བསྐུས་ན་ཚ་ན་སེལ། །ཞེས་བྱ་བ་ལ། ཟར་མ་དང་ཏིལ་ཆ་མཉམ་དུ་བརྔོས་པ་འོ་མས་དབལ་བསད་དེ། འོ་མ་དེ་ཉིད་དང་བཏགས་པའི་ལྡེ་གུས་བསྐུས་ན་ཚ་བ་དང་ན་བ་སེལ་བར་བྱེད་དོ། །རྨ་སྐྲངས་བརྟན་ཞིང་ནད་ཚབས་ཆུང་། །བད་ཀན་རླུང་འཇོམས་

སྣུམ་བསྐུ་ཞིང་། །དེ་ཡི་རྗེས་ལ་འོད་མ་ཡི། །སྦུ་གུས་རིམ་གྱིས་དུགས་བྱའོ། །ཞུ་བར་བྱ་ཕྱིར་ལག་མཐིལ་ལམ། །མཐེ་བོ་ཡིས་ནི་མཉེ་བར་བྱ། །ཞེས་བྱ་བ་ལ། རྨ་སྐྲངས་པ་བརྟན་ཞིང་ནད་ཀྱི་ཤུགས་དལ་བ་ལ་ནི་བད་ཀན་དང་རླུང་འཇོམས་པར་བྱེད་པའི་སྣུམ་གྱིས་བསྐུ་ཞིང་། །དེའི་འོག་
ཏུ་འོད་མའི་སྦུ་གུས་མཉེ་ཞིང་དུགས་བྱས་ལ། གཞན་ཡང་ཞུ་བར་བྱ་བའི་ཕྱིར་ལག་མཐིལ་ལམ་མཐེ་བོས་དལ་གྱིས་མཉེ་པར་བྱའོ། །ནས་དང་གྲོ་དང་མོན་སྲན་སྡེའུ། །བཙོས་ཏེ་བཏགས་པའི་ལྡེ་གུས་བསྐུ། །ཞེས་བྱ་བ་ལ། ཡང་ན་སྐྲངས་བ་སྲ་ཞིང་ནད་ཚབས་ཆུང་བ་ལ་ནས་ལ་སོགས་
པ་དང་པོར་བཙོ་བས་སམ་བརྔོ་བ་བྱས་ལ་དེ་བཏགས་པའི་ལྡེ་གུས་བསྐུ་བར་བྱའོ། །གལ་ཏེ་དེ་ཡིས་ནི་མ་ཞུམ་ན། །དེ་ནས་དེ་ནི་དཀྲི་བར་བྱ། །མ་སྨིན་པ་ནི་ཞི་འགྱུར་ལ། །སྨིན་ན་རྣགས་པ་ཉིད་དུ་འགྱུར། །ཞེས་བྱ་བ་ལ། དེ་ལྟར་བྱས་སུ་ཟིན་ཀྱང་སྐྲངས་བའི་སྨིན་ཅིང་ཞུམ་པར་མ་གྱུར་ན། དེའི་
འོག་ཏུ་སྐྲངས་བ་དེ་དཀྲི་བའི་དུགས་ཀྱིས་དཀྲི་བར་བྱའོ། །དེ་ལྟར་བྱས་བས་མ་སྨིན་ཅིང་མ་རྣགས་པའི་སྐྲངས་པ་ནི་ཞི་བར་འགྱུར་ལ། སྨིན་ཅིང་རྣགས་པ་ནི་ལེགས་པར་འགྱུར་རོ། །རྒྱ་ཤུག་ཏིལ་དང་ཟར་མ་དང་། །རྒྱམ་ཚ་ཕབས་དང་རུ་རྟའི་ཕྱེ། །ཞོ་སྐྱུར་ཟན་དྲོན་གྱིས་གླན་ཞིང་། །དུགས་
བྱས་ནས་ནི་དཀྲི་བར་བྱ། །ཞེས་བྱ་བ་ལ། རྒྱ་ཤུག་ལ་སོགས་པ་ལས་བྱས་པའི་ཟན་དྲོན་འཇམ་ཙམ་གླན་ཞིང་དཀྲི་བར་བྱའོ། །ལེགས་སྨིན་སྐྲངས་པ་ཕྱོགས་གཅིག་འདུས། །བཙིར་བས་ཉེ་བར་བཙིར་གྱུར་བ། །དྲལ་བར་འོས་ལ་དྲལ་བྱ་ཞིང་། །ཤིང་ཏུ་འཇམ་པར་གྱུར་བའང་དྲལ། །ཞེས་བྱ་བ་
ལ། སྐྲངས་བ་དེ་སྨིན་ཅིང་རྣགས་པར་གྱུར་པ་དང་། ཕྱོགས་གཅིག་ཏུ་འདུས་ཤིང་བསྒོངས་པར་འགྱུར་ལ། བཙིར་བའི་སྨན་གྱིས་ཉེ་བར་བཙིར་ཞིང་། བསྡུས་པར་གྱུར་ནས་དྲལ་བར་འོས་པ་ནི་དྲལ་བར་བྱས་ལ། །དེ་བཞིན་དུ་ཤིན་ཏུ་འཇམ་པོར་གྱུར་བ་ཡང་དྲལ་བར་བྱའོ། །གུ་གུལ་ཟར་མ་བ་
ལངས་སོ། །ཁྲོན་བུ་ཕུག་རོན་རྟག་པ་དང་། །ཐལ་སྨན་འཕྲོད་དང་ཐལ་སྨན་དེ། །སྨིན་པའི་སྨན་གྱིས་བརྟོལ་བར་བྱ། །ཞེས་བྱ་བ་ལ། གུ་གུལ་ལ་སོགས་པའི་སྨན་དང་། ཐལ་སྨན་གྱི་འཕྲོད་ཀྱི་སྨན་དང་ཐལ་སྨན་ཉིད་དོ། དེ་ལྟར་སྨིན་པའི་སྨན་དག་གིས་ཀྱང་སྨིན་པ་རྣག་དེ་བརྟོལ་བར་

བྱའོ། །ནང་ན་རྣག་འབྱུང་སྒོ་ཕྲ་ཞིང་། མཐོ་བར་གྱུར་དང་གནད་ལ་གནས། །སྣུམ་མེད་བཙིར་པའི་སྨན་གྱིས་ནི། །ཀུན་ནས་རབ་ཏུ་བཙིར་བར་བྱ། །ཞེས་བྱ་བ་ལ། ནང་ན་རྣག་ཡོད་པ་དང་། འབྱུང་བའི་སྒོ་ཕྲ་ཞིང་ཁ་ཆུང་བ་དང་། རྨའི་ཁ་མཐོ་བར་གྱུར་པ་དང་། །
གནད་ཀྱི་གནས་ན་གནས་པའི་རྨ་ལ་ནི་བཙིར་བའི་སྨན་གྱིས་ཐམས་ཅད་ནས་བཙིར་བར་བྱའོ། །བསྐུ་བ་སྐམས་ན་བཙིར་བ་ཡི། །ལས་ལ་བཏང་སྙོམས་ཉིད་དུ་བྱ། །ཞེས་བྱ་བ་ལ། ལྡེ་གུ་སྐམས་པར་གྱུར་ན་ནི་བཙིར་བའི་སྦྱོར་བ་དེ་བཏང་སྙོམས་ཉིད་དུ་བྱ་ཞིང་བཤོལ་བར་བྱའོ། །དེ་ཡི་རྨ་སྒོར་
མི་བསྐུ་སྟེ། །དེ་འདྲས་ནད་ནི་དབྱུང་མི་འགྱུར། །ཞེས་བྱ་བ་ལ། རྨ་འདིའི་རྨ་ཁའི་སྟེང་དུ་ནི་བསྐུ་བར་མི་བྱ་སྟེ། དེ་ལྟར་བྱས་ན་རྣག་ཅེས་བྱ་བའི་ནད་དེ་འབྱུང་བར་མི་འགྱུར་རོ། །སྲན་ན་ནས་དང་གྲོ་དང་ནི། །མ་ཤ་མུ་དག་བྲོ་བོ་དང་། །སྨན་ནི་སྦྱི་བག་ཅན་དག་གིས། །པགས་པའི་རྩ་བར་རབ་ཏུ་
བསྡམས། །ཞེས་བྱ་བ་ལ། སྲན་མ་ལ་སོགས་པ་དང་། སྨན་སྦྱི་བག་ཅན་དེ་གུ་གུལ་དང་ཐང་ཆུ་ལ་སོགས་པ་པགས་པའི་རྩ་བར་རྨ་རབ་ཏུ་བསྡམས་པར་བྱའོ། །གཅིན་སྙི་མཛེ་ཡི་རྨ་དང་ནི། །ཤས་ཆེར་རེད་པའི་རྨ་དག་ལ། །དོང་ག་བྱིའུ་རུག་པ་སོགས་ཀྱིས། །ལན་ནི་བདུན་བདུན་བཀྲུ་
སོགས་བྱ། །ཞེས་བྱ་བ་ལ། གཅིན་སྙི་བ་ལ་སོགས་པའི་རྨ་ལ་བྱིའུ་དུག་པ་ལ་སོགས་པའི་སྡེ་ཚན་གྱིས་འོག་ནས་བཤད་པའི་ཚུལ་ལན་བདུན་བདུན་བཀྲུ་པ་ལ་སོགས་པ་བྱའོ། །མ་དག་ནིམ་པ་པ་ཏོ་ལའི། །ལོ་མ་བསྐོལ་བས་བཀྲུ་བར་བྱ། །ཞེས་བྱ་བ་ལ། རྨ་མ་དག་པ་ནི་ནིམ་པ་དང་
པ་ཏོ་ལའི་ལོ་མ་བསྐོལ་བའི་ཆུས་བཀྲུ་བར་བྱའོ། །རྨ་དག་པ་ལ་ནྱ་གྲོ་དྷ། །ལ་སོགས་ཤུན་ལྤགས་བསྐོལ་བས་བཀྲུ། །ཞེས་བྱ་བ་ལ། རྨ་དག་པར་གྱུར་པ་ལ་ནི། ནྱ་གྲོ་དྷ་ལ་སོགས་པའི་ཤུན་ལྤགས་བསྐོལ་བའི་ཁུ་བས་བཀྲུ་བར་བྱའོ། །ཤིང་མངར་ཏིལ་དང་པ་ཏོ་ལ། །དུར་བྱིད་དན་ད་
སེར་པོ་གཉིས། །ནིམ་པའི་ལོ་མ་རྒྱམ་ཚར་བཅས། །ལྡེ་གུས་བསྐུས་ན་རྨ་སྦྱོར་བྱེད། །ཅེས་བྱ་བ་ལ། ཤིང་མངར་ལ་སོགས་པའི་ལྡེ་གུས་བསྐུས་ན་ཡང་རྨ་སྦྱོང་བར་བྱེད་པ་ཡིན་ནོ། །རྨ་ནི་ཁ་ཕྲ་གནད་མཚམས་གནས། །དན་ད་རྒྱམ་ཚ་ལངྐ་ལི། །དུར་བྱིད་སྦྲང་རྩིར་སྦྱར་བ་ཡིས། །

རེད་བུར་བྱས་བས་རྨ་སྦྱོང་བྱ། །ཞེས་བྱ་བ་ལ། རྨ་བུ་ག་ཕྲ་ཞིང་ཁ་ཆུང་བ་དང་། །གནད་དང་མཚམས་ན་འདུག་པ་ལ་ནི་དན་ད་ལ་སོགས་པའི་སྨན་རེད་བུར་བྱས་བས་སྦྱང་བར་བྱའོ། །རླུང་གིས་གནོད་ཅིང་ཁྲག་བཅས་ཤིང་། །མི་བཟད་ན་ལ་ནས་དང་གྲོ། །སྦྲ་ཚིལ་ཤྲི་བེཥྚ་ཀ་དང་། །ཐང་ཤིང་
མར་བཅས་དུད་པས་བདུག །ཅེས་བྱ་བ་ལ། རྨ་རླུང་གིས་ཤས་ཆེར་གནོད་པར་གྱུར་ཅིང་ཁྲག་དང་བཅས་པ་ལ་སོགས་པ་ལ་ནི་ནས་ལ་སོགས་པའི་དུད་པས་བདུག་པར་བྱའོ། །ཁྲག་མཁྲིས་དག་གི་ཤས་ཆེ་བའི། །ཤིན་ཏུ་བསིལ་བའི་སྨན་གྱིས་བསྐུ། །ཞེས་བྱ་བ་ལ། ཁྲག་ལ་སོགས་པའི་
ཤས་ཆེ་བའི་རྨ་ལ་ནི་ཤིན་ཏུ་བསིལ་བའི་སྨན་གྱིས་ཡང་ནས་ཡང་དུ་བསྐུ་པར་བྱའོ། །སྐམ་ཞིང་ཤ་ཉུང་གཏིང་རིང་རྨ། །ཤ་སྐྱེད་པ་ཡི་སྨན་བྱ་སྟེ། །ཤུག་པ་ནྱ་གྲོ་དྷ་སོགས་དང་། །བ་ལ་ཨ་ཤྭ་གན་དྷ་ཏིལ། །བསྐུས་ཏེ་ཤ་ནི་བསྐྱེད་པར་བྱ། །ཞེས་བྱ་བ་ལ། རྨ་སྐམ་ཞིང་ཤ་ཉུང་བ་དང་ཟབ་ཅིང་
གཏིང་རིང་བ་ལ་ཤུག་པ་ལ་སོགས་པའི་ལྡེ་གུ་བསྐུ་བས་ཤ་ཆེར་བསྐྱེད་པར་བྱའོ། །ཤ་ཟའི་ཤ་ནི་ཆོ་ག་བཞིན། །གཡོས་སུ་བྱས་ཏེ་སྦྱིན་པར་བྱ། །སེམས་དགའ་བ་དང་ཤ་ཟ་ཡི། །ཤ་ཟོས་ན་ནི་ཤ་འཕེལ་འགྱུར། །ཞེས་བྱ་བ་ལ། གཞན་ཡང་ཤ་ཟ་བའི་སྲོག་ཆགས་སེང་གེ་དང་སྟག་དང་བྱ་རྒོད་
ལ་སོགས་པའི་ཤ་ཆོ་ག་བཞིན་དུ་ལེགས་པར་གཡོས་སུ་བྱས་ཏེ། ཤ་སྐྱེད་པའི་ཕྱིར་སྦྱིན་པར་བྱ་སྟེ། གང་གི་ཕྱིར་ནད་པ་སེམས་དགའ་ཞིང་སྲེད་པ་དང་ལྡན་བས་ཤ་ཟ་བའི་སྲོག་ཆགས་ཀྱི་ཤ་ཟོས་ན་ནད་པའི་ཤ་འཕེལ་བར་འགྱུར་བ་ཡིན་ནོ། །ཤ་སྙི་འབུར་བར་གྱུར་བ་ལ། །ཛཱ་ཏིའི་མེ་ཏོག་ནག་ཚུར་
དང་། །ལྡོང་རོས་བ་བླ་གུ་གུལ་དང་། །ཙི་ཏྲ་ཀ་སོགས་ལྡེ་གུས་བསྐུ། །ཞེས་བྱ་བ་ལ། རྨའི་ཤ་སྙི་ཞིང་འབུར་བར་གྱུར་པ་ལ་ནི་ཛཱ་ཏིའི་མེ་ཏོག་ལ་སོགས་པ་དག་གིས་བསྐུ་ཞིང་ཤ་བསྐྱེད་པར་བྱའོ། །ཤ་འབུར་བར་ནི་སྲ་བ་དང་། །གཡའ་ཞིང་རིང་ནས་འཚོ་བ་དང་། །རྨ་ནི་ན་ཞིང་སྦྱང་དགའ་ལ། །ཐལ་
སྨན་ལས་ཀྱིས་སྦྱང་བར་བྱ། །ཞེས་བྱ་བ་ལ། རྨ་ཤ་འབུར་བ་ལ་སོགས་པ་ལ་ནི་ཐལ་སྨན་གྱི་ལས་ཀྱིས་གསོ་བར་བྱའོ། །རྡེའུ་འབྱུང་རྨ་ནི་གཅིན་འཛག་དང་། །གང་གཞན་ཁྲག་ནི་སྦྱར་བ་དག །ཇི་སྐད་བཤད་བའི་ཆོ་ག་ཡིས། །གསོ་བར་བྱེད་བཞིན་

མི་འགྲུབ་ན། །དེ་ནི་མེ་ཡི་ལས་ཀྱིས་གསོ། །ཞེས་བྱ་བ་ལ། རྨ་གང་རྡེའུ་འབྱུང་བའི་ལམ་ནས་གཅིན་འཛག་པ་དང་། རྨ་གང་རྟག་ཏུ་ཁྲག་འབྱུང་བ་དང་། རྨ་གང་ཞིག་བཅད་ནས་སྦྱོར་བ་དང་། རྨ་གང་ཇི་སྐད་བཤད་པའི་ཆོ་ག་བྱས་ཀྱང་འཚོབ་བར་མ་གྱུར་ཅིང་རྨ་དེ་གསོ་བའི་
ལས་གྲུབ་པར་མ་གྱུར་པ་དེ་ལ་ནི་མེས་བསྲེག་པའི་ལས་ཀྱིས་གསོ་བར་བྱའོ། །སྐྱོན་མེད་རྨ་ལ་རྨ་འབྱོར་བའི། །སྨན་དང་ཤ་སྐྱེད་གང་ཡིན་སྦྱར། །ཞེས་བྱ་བ་ལ། རྨ་སྐྱོན་མེད་ཅིང་དག་པར་འགྱུར་བ་ལ་ནི་རྨ་འབྱོར་པ་དང་། ཤ་སྐྱེད་པའི་སྦྱོར་བ་བཤད་པ་གང་དག་ཡིན་པ་དག་བྱའོ། །ཨ་ཤྭ་
གན་དྷ་སེང་ཕྲོམ་དང་། །ཤིང་མངར་བཙོད་དང་ཀད་པ་ལ། །ད་ཏ་ཀ་ཡི་མེ་ཏོག་གི། །ཕྱེ་མས་རྨ་འཚོབ་བྱེད་པའི་མཆོག །ཅེས་བྱ་པ་ལ། ཨ་ཤྭ་གན་དྷ་ལ་སོགས་པའི་ཕྱེ་མས་བཏབ་པ་ནི་རྨ་འཚོབ་པར་བྱེད་པའི་དམ་པ་ཡིན་ནོ། །རྣག་དང་ཤ་ནི་མེད་པ་དང་། །ཤ་ཡི་གནས་སུ་མ་འདྲུབས་
པར། །ཏིལ་དང་ཤིང་མངར་བཅས་པ་ཡི། །ལྡེ་གུས་རྨ་ནི་འཚོབ་པར་བྱ། །ཞེས་བྱ་བ་ལ། རྨ་རྣག་དང་ཤ་མེད་པ་དང་། ཤའི་གནས་མ་སོབས་ཤིང་མ་འདྲུབས་པ་ལ་ནི། ཏིལ་དང་ཤིང་མངར་སྦྱར་བའི་ལྡེ་གུས་བསྐུས་ན་འཚོབ་པར་འགྱུར་རོ། །སྣུམ་དྲོ་མངར་དང་ཁ་བ་དང་། །བསྐ་བས་
ཐམས་ཅད་སེལ་བར་བྱེད། །ཅེས་བྱ་བ་ལ། སྣུམ་པ་ཉིད་དང་དྲོ་བ་དང་། མངར་བ་ལ་སོགས་པའི་ལྡེ་གུས་ནི་ནད་ཐམས་ཅད་ལས་བྱུང་བའི་རྨ་ཡང་སེལ་བར་བྱེད་དོ། །ནིམ་པའི་ལོ་མ་སྦྲང་རྩིར་བཅས། །བསྐུས་བས་རྨ་སྦྱོར་མཆོག་ཡིན་ནོ། །ཞེས་བྱ་བ་ལ། ནིམ་པའི་ལོ་མ་ལ་སོགས་
པའི་འདག་གུས་བསྐུས་ན་ཡང་རྨ་འཚོབ་བའི་མཆོག་ཡིན་ནོ། །སྔ་མ་གཉིས་དང་ཞུན་མར་སྦྱར། །མྱུར་དུ་རྨ་འཚོབ་བྱེད་པ་ཡིན། །ཞེས་བྱ་བ་ལ། སྔ་མ་ནིམ་པའི་ལོ་མ་དང་སྦྲང་རྩི་གཉིས་དང་། ཞུན་མར་དང་སྦྱར་བས་ཀྱང་རྨ་མྱུར་དུ་འཚོབ་པར་བྱེད་པ་ཡིན་ནོ། །ཏིལ་འདྲར་ནས་ཀྱི་ལྡེ་
གུ་ནི། །དེ་དང་འདྲ་བར་ལ་ལ་འདོད། །ཅེས་བྱ་བ་ལ། སློབ་དཔོན་ལ་ལ་ནི་ཐང་ལ་འབར་གྱིས་ནས་ཀྱི་ལྡེ་གུ་འདྲ་བར་འདོད་དོ། །ཏིལ་གྱི་ལྡེ་གུ་ཇི་ལྟར་སྦྱར་བ་དེ་བཞིན་དུ་ནས་ཀྱི་ལྡེ་གུ་ཡང་སྦྱར་བར་བྱའོ། །ཁྲག་མཁྲིས་དུག་དག་དང་གློ་བུར་དང་། །གཏིང་རིང་ཚ་དང་བཅས་པའི་རྨ། །འོ་མ་

རྨ་འབྱོར་སྨན་དང་ནི། །བསྐོལ་བའི་མར་གྱིས་རྨ་འཚོབ་བྱ། །ཞེས་བྱ་བ་ལ། རྨ་གང་ཁྲག་དང་མཁྲིས་པ་དང་བཅས་པ་དང་། འོ་མ་དང་རྨ་འབྱོར་པའི་སྨན་དང་བསྐོལ་པའི་མར་གྱིས་བསྐུས་ན་རྨ་འཚོབ་པར་འགྱུར་རོ། །བད་ཀན་རླུང་གྱུར་རྨ་འབྱོར་སྨན། །ཏིལ་མར་བཅས་པས་རྨ་འཚོབ་འགྱུར། །
ཞེས་བྱ་བ་ལ། བད་ཀན་དང་རླུང་ལས་གྱུར་པའི་རྨ་ལ་ནི་རྨ་འབྱོར་པར་བཤད་པའི་སྨན་དང་ཏིལ་མར་དང་བཅས་བས་རྨ་འཚོབ་པར་འགྱུར་རོ། །ནག་ཚུར་སེང་ཕྲོམ་ཨ་རུ་ར། །ལི་ཁྲི་དངུལ་རྡོ་སྲ་རྩི་ཕོག །སྤངས་མ་པོ་སོན་ཆུའི་ཕྱེ་མ། །ཏིལ་མར་བཅས་པ་རྨ་འཚོབ་མཆོག །ཅེས་བྱ་བ་ལ།
ནག་ཚུར་ལ་སོགས་པའི་ཕྱེ་མ་ཏིལ་མར་དང་བཅས་བ་བསྐུས་ན་ཡང་རྨ་འཚོབ་པར་བྱེད་པའི་མཆོག་ཡིན་ནོ། །མཉམ་ཞིང་ཤ་ནི་བརྟན་པ་དང་། །པགས་པར་གནས་ལ་ཕྱེ་མ་ཕན། །ཞེས་བྱ་བ་ལ། རྨ་མཐོན་དམན་མེད་པར་མཉམ་དུ་གནས་ཤིང་ཤ་བརྟེན་པ་དང་། པགས་པ་ཙམ་ལ་
གནས་པ་ལ་རྨ་འཚོབ་པའི་སྨན་གྱི་ཕྱེ་མས་བསྐུས་ན་ཕན་ནོ། །ཨུ་དུམ་ཝྭ་ར་ཨ་ཤྭད་ཐ། །འཛམ་བུས་སེང་ཕྲོམ་ཀད་པ་ལ། །ཀ་ཀུ་སེང་ཕྲོམ་ཕྱེ་མ་བཏབ། །པགས་པ་མྱུར་དུ་བསྐྱེད་པར་བྱེད། །ཞེས་བྱ་བ་ལ། ཨུ་དུམ་ཝཱ་ར་ནས་ཀ་ཀུ་བ་དང་སེང་ཕྲོམ་ཀྱི་བར་གྱི་ཕྱེ་མས་བཏབ་ན་པགས་པ་མྱུར་
དུ་སྐྱེད་པར་བྱེད་དོ། །རྒྱ་སྐྱེགས་ལྡོང་རོས་བཙོད་དང་ནི། །བ་ལ་དང་ནི་སེར་པོ་གཉིས། །སྦྲང་རྩི་མར་སྦྱར་ལྡེ་གུ་ཡི། །བསྐུས་ན་པགས་པ་དག་བྱེད་མཆོག །ཅེས་བྱ་བ་ལ། རྒྱ་སྐྱེགས་ལ་སོགས་པའི་ལྡེ་གུས་བསྐུས་པ་ནི་པགས་པ་དག་པར་བྱེད་པའི་མཆོག་ཡིན་ནོ། །སྐྱེར་པ་ཨ་མྲའི་རུས་
པ་དང་། །ནཱ་ག་གེ་སར་པྲི་ཡང་ཀུ། །ཙནྡན་སེར་པོ་དངུལ་ཆུ་རྣམས། །ལྡེ་གུ་བ་ལ་ལྕི་ཁུ་དང་། །སྦྱར་བ་བསྐུས་པར་གྱུར་ན་ནི། །པགས་པ་མདོག་འདྲར་བྱེད་མཆོག་ཡིན། །ཞེས་བྱ་བ་ལ། སྐྱེར་བ་ལ་སོགས་པའི་ལྡེ་གུ་བ་ལང་གི་ལྕི་བའི་ཁུ་བ་དང་སྦྱར་ཏེ་བསྐུས་ན་ཡང་པགས་པའི་
མདོག་ཆ་འདྲ་བར་བྱེད་པའི་མཆོག་ཡིན་ནོ། །བ་སོ་དུད་པ་མ་ཤོར་བསྲེགས། །སྐྱེར་ཁཎྜ་དང་ཏིལ་མར་སྦྱར། །བསྐུས་ན་སྦུ་ནི་སྐྱེད་པར་བྱེད། །ཅེས་བྱ་བ་ལ། གླང་པོ་ཆེའི་སོ་དུ་བ་མ་ཤོར་བར་བསྲེགས་པ་དང་སྐྱར་བའི་ཁཎྜ་དང་། །ཏིལ་མར་སྦྱར་བའི་ལྡེ་གུས་བསྐུས་ན་རྨ་ལས་སྦུ་སྐྱེད་པར་བྱེད་

པའི་མཆོག་ཡིན་ནོ། །དེ་བཞིན་རྐང་བཞིའི་སེན་མོ་སྤུ། །རུས་པ་པགས་པ་རྭ་རྨིག་བསྲེགས། །སྣག་ཚ་ཏིལ་མར་དང་སྦྱར་བས། །བསྐུས་ན་སྤུ་ནི་སྐྱེད་པར་བྱེད། །ཅེས་བྱ་བ་ལ། སྲོག་ཆགས་རྐང་བཞི་བའི་སེན་མོ་ལ་སོགས་པ་བསྲེགས་ཏེ། ཏིལ་མར་སྦྱར་བ་བསྐུས་ན་
ཡང་རྨ་ལ་སྤུ་སྐྱེད་པར་བྱེད་དོ། །སྨིན་མ་ལ་ནི་ཆ་སྤྱད་ཀྱི། །ལས་བཤད་ཕན་དང་གནོད་པ་བསྟེན། །ཞེས་བྱ་བ་ལ། རྨ་ཡོད་པའི་སྨིན་མ་ནི་ཆ་སྤྱད་ཀྱི་ལེའུ་ལས་བཤད་པའི་རྨ་ལ་ཕན་པ་དང་གནོད་པའི་ཟས་དག་ཀྱང་བསྟེན་པར་བྱའོ། །རླུང་གྱུར་རྨ་ལ་རྩ་བ་ལྔ། །གཉིས་དང་རླུང་འཇོམས་
སྡེ་ཚན་ཕན། །ཞེས་བྱ་བ་ལ། རླུང་ལས་གྱུར་པའི་རྨ་ལ་ནི་རྩ་བ་བཅུ་པ་དང་བི་ད་རི་ལ་སོགས་པ་སྨན་གྱི་སྡེ་ཚན་ཕན་ནོ། །མཁྲིས་གྱུར་ཤུག་བ་ནྱ་གྲོ་དང་། །སྡེ་ཚན་གཉིས་དང་མཁྲིས་འཇོམས་གཏང་། །ཞེས་བྱ་བ་ལ། མཁྲིས་པ་ལས་གྱུར་བའི་རྨ་ལ་ནི་ཤུག་པ་ལ་སོགས་པའི་སྡེ་ཚན་དང་། །
ནྱ་གྲོ་དྷ་ལ་སོགས་པའི་སྡེ་ཚན་དང་། དེ་བཞིན་དུ་མཁྲིས་པ་སེལ་པའི་སྨན་རྣམས་ཕན་ནོ། །བད་ཀན་ལས་གྱུར་དོང་གའི་སྡེ། །བད་ཀན་འཇོམས་པར་བྱེད་པ་གཏང་། །ཞེས་བྱ་བ་ལ། བད་ཀན་ལས་གྱུར་པའི་རྨ་ལ་ནི་དོང་ག་ལ་སོགས་པའི་སྡེ་ཚན་དང་། བད་ཀན་འཇོམས་པར་བྱེད་པའི་སྨན་གཞན་
དག་ཀྱང་བྱའོ། །འདྲེན་མ་ལས་གྱུར་འདྲེན་མར་བྱས། །ཞེས་བྱ་བ་ལ། ལྡན་པ་དང་འདུས་པ་ལས་གྱུར་པའི་རྨ་ལ་ནི་སྨན་གྱི་སྡེ་ཚན་འདྲེན་མ་ཕན་ཏེ། བྱེའུ་རུག་པ་ལ་སོགས་པ་དང་གླ་སྒང་དང་ཨརྐ་ལ་སོགས་པའི་སྡེ་ཚན་འདྲེན་མ་ཕན་ནོ། །འདི་དག་གིས་བཀྲུ་བྱུག་པ་དང་། །སྨན་མར་ཏིལ་
མར་སྨན་ཁུ་དང་། །ཕྱེ་མ་རིལ་བུ་བདུན་པོ་ནི། །རྨ་ལ་ཅི་རིགས་སྦྱར་བར་བྱ། །ཞེས་བྱ་བ་ལ། བཤད་མ་ཐག་པའི་རླུང་དང་མཁྲིས་པ་དང་བད་ཀན་ལ་ཕན་པར་བཤད་པའི་སྡེ་ཚན་དག་གིས་བཀྲུ་བ་དང་བྱུག་པ་ལ་སོགས་པའི་སྦྱོར་བ་བདུན་པོ་དེ་དག་ཇི་ལྟར་རིགས་པ་བཞིན་དུ་སྦྱར་བར་བྱའོ། །ཛཱ་ཏི་ནིམ་
པ་བ་ཏོ་ལའི་ལོ་མ། །སྐྱེར་པ་ཡུང་བ་ཐལ་ཏྲེས་པུ་ཙེ་ཤེལ། །སྤྲ་ཚིལ་སྤངས་མ་ཤིང་མངར་ཨ་རུ་ར། །ཀར་ཉྫ་ཡི་ས་བོན་བཙོད་དང་བཅོས། །མར་བསྐོལ་འདིས་ནི་རྨ་ཁ་ཆུང་བ་དང་། །གནད་ལ་བརྟེན་ཅིང་རྣག་ནི་འཛག་པ་དང་། །རྨ་ཡི་ཕུགས་རིང་ནད་བཅས་ཕུགས་རིང་པའི། །རྨ་ནི་དག་ཅིང་

འཚོབ་པར་བྱེད་པ་ཡིན། །ཞེས་བྱ་བ་ལ། ཛཱ་ཏི་ལ་སོགས་པའི་སྨན་གྱི་ལྡེ་གུ་དང་བསྐོལ་བའི་སྨན་མར་གྱིས་ནི་རྨ་ཁ་ཆུང་བ་ལ་སོགས་པའི་རྨ་དེ་དག་ཅིང་འཚོབ་པར་བྱེད་པ་ཡིན་ནོ། །ཡང་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་
ངེས་པར་སྦྱར་བ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་ལྔ་བའི་རྣམ་པར་འགྲེལ་པའོ།། །།དེ་ནས་འཕྲལ་དུ་བྱུང་བའི་རྨའི་གསོ་བ་བཤད་པར་བྱའོ། །རྨ་གང་སྣད་པས་འཕྲལ་དུ་ནི། །བྱུང་གྱུར་བློ་བུར་རྨ་ཞེས་བྱ། །དེ་ནི་མཐའ་ཡས་ཀྱང་ཡན་ལག །གནས་པ་རྣམ་པ་བརྒྱད་དུ་
བཤད། །ཅེས་བྱ་བ་ལ། རྨ་གང་ཞིག་སྣད་པ་ལས་འཕྲལ་དུ་བྱུང་བར་གྱུར་པ་དེ་ནི་གློ་བུར་བའི་རྨ་ཞེས་བྱའོ། །དེ་ནི་མཐའ་ཡས་པ་ཡིན་དུ་ཟིན་ཀྱང་ཡན་ལག་ལ་གནས་པའི་དབང་པོ་དག་གིས་རྣམ་པ་བརྒྱད་དུ་བཤད་དོ། །ཤུས་དང་བཅས་དང་རྣམ་པར་བཅད། །རབ་ཏུ་འཕྱང་དང་ལྟུང་བ་
དང་། །ཕུག་དང་གཤགས་དང་གྲུགས་པའོ། །ཞེས་བྱ་བ་ལ། བརྒྱད་པོ་དེ་དག་ཀྱང་ཤུས་པ་ལ་སོགས་པའི་དབྱེ་བས་བརྒྱད་དུ་བཤད་དོ། །དེ་ལ་ཤུས་པ་ཆུ་སེར་རམ། །ཁྲག་ནི་ཉུང་ཟད་འབྱུང་འགྱུར་ཞིང་། །པགས་པ་ཚོས་པས་ཚ་འགྱུར་ཡིན། །ཞེས་བྱ་བ་ལ། དེ་ལ་དེ་དག་གི་ནད་ནས་
ཤུས་པ་ནི་བདར་ཅིང་པགས་པ་ཤུས་པའི་དབང་གིས་ཆུ་སེར་རམ་ཁྲག་ཉུང་ཤས་ཞིག་འབྱུང་བར་འགྱུར་བ་དང་། །པགས་པ་ཚོས་བས་ཚ་བར་འགྱུར་བ་ཡིན་ནོ། །དེ་ལ་ཚོས་གྱུར་བཅད་པ་ཡིན། །ཞེས་བྱ་བ་ལ། ཤུས་པ་དེ་ལས་ཀྱང་རྨ་ནང་དུ་ཞུགས་ཤིང་པགས་པ་ཤས་ཆེར་ཚོས་པར་གྱུར་པ་
ནི་བཅད་པ་ཞེས་བྱ་ལ། དེ་ལས་ཀྱང་ཟབ་པར་གྱུར་བ་ནི་རྣམ་པར་བཅད་པ་ཞེས་བྱའོ། །རབ་འཕྱང་རུས་པར་ལྷག་མ་ལུས། །ལྟུང་བ་ལུས་ལས་བོགས་པ་ཡིན། །ཞེས་བྱ་བ་ལ། རབ་ཏུ་འཕྱང་བ་ནི་རུས་པར་ལྷག་མ་ཙམ་ལུས་ཤིང་དེ་དང་འབྲེལ་པ་ལས་བྱ་ལ། ལྟུང་བ་ནི་གང་ཡང་ལུས་
ལས་ཉིང་ལག་ལ་སོགས་པའི་ཚོགས་བོགས་ཤིང་ས་ལ་ལྷགས་པ་ལ་ལྟུང་བ་ཞེས་བྱའོ། །ཟུག་རྔུ་ཕྲ་མོ་འབིགས་པས་ཕུག། །ཁོང་པ་མ་གཏོགས་བསྣུན་པ་ཡིན། །ཞེས་བྱ་བ་ལ། མཚོན་རྩེ་མོས་ཕུག་པ་གང་ཡིན་པ་དེ་ནི་ཕུག་པ་ཞེས་བྱ་སྟེ། དེ་ཡང་ཁོང་པ་མ་གཏོགས་པ་གནས་གཞན་དུ་

བསྣུན་པ་ལ་ཕན་ནོ། །སྔ་མ་ལས་གཞན་གཤགས་པ་ཡིན། །ཞེས་བྱ་བ་ལ། སྔར་བཤད་པ་ལས་གཞན་པ་སྟེ་མཚོན་ཁ་ཞེང་ཆེ་བས་བསྣུན་པ་དང་། ཁོང་པར་སོང་བ་ལ་ནི་གཤགས་པ་ཞེས་བྱའོ། །ཁྲག་དང་རྐང་ནི་འདྲེས་གྱུར་པར། །མཚོན་གྱིས་དྲག་ཏུ་བསྣུན་པ་ཡིས། །
རུས་བཅས་རྒྱ་ཆེར་སྣད་གྲུགས་པ། །ཞེས་བྱ་བ་ལ། གྲུགས་པ་ནི་མཚོན་གྱིས་ཕོག་པའི་རྒྱུ་གང་གིས་ཁྲག་དང་རྐང་འདྲེས་པར་གྱུར་ཅིང་། རུས་པ་དང་བཅས་པ་རྒྱ་ཆེར་སྣད་པར་གྱུར་པ་ནི་གྲུགས་པ་ཞེས་བྱའོ། །དེ་ནས་འཕྲལ་དུ་བྱུང་བའི་རྨ། །ཟུག་གཟེར་ཤིན་ཏུ་ཆེ་བ་ལ། །ཤིང་མངར་
མར་དང་བསྐོལ་བའམ། །བ་ལའི་ཏིལ་མར་དྲོ་འཇམ་བླུགས། །ཞེས་བྱ་བ་ལ། འཕྲལ་དུ་རྨ་བྱུང་བ་མི་བཟད་པར་ན་བ་ལ་ནི་ཤིང་མངར་བསྐོལ་བའི་མར་དྲོ་འཇམ་ཙམ་འཕྲལ་དུ་བླུགས་པར་བྱའམ། ཡང་ན་བ་ལ་ཏིལ་མར་དྲོ་འཇམ་ཙམ་གྱིས་བླུགས་པར་བྱའོ། །སྣད་པའི་ཚ་བ་ཞི་བྱའི་ཕྱིར། །
བསྐུ་བ་ལ་སོགས་སྣུམ་པ་དང་། །བསིལ་དང་མངར་བའི་སྨན་གྱིས་ནི། །དེ་ཡི་མོད་ལ་བླུགས་པར་བྱ། །ཞེས་བྱ་བ་ལ། སྣད་ཅིང་རྨ་འབྱུང་བ་ལས་གྱུར་པའི་ཚ་བ་ཞི་བར་བྱ་བའི་ཕྱིར་བསྐུ་བ་ལ་སོགས་པ་བསིལ་བ་དང་མངར་བའི་སྨན་དག་གིས་བྱའོ། །འཕྲལ་གྱི་རྨ་ནི་རྒྱ་ཆེ་ལ། །སྦྱར་བའི་ཕྱིར་ནི་སྦྲང་རྩི་དང་། །
མར་གྱིས་མཆོག་ཏུ་བསྐུ་བྱ་ཞིང་། །མཁྲིས་འཇོམས་བསིལ་བའི་གསོ་བ་བྱ། །ཞེས་བྱ་བ་ལ། འཕྲལ་དུ་བྱུང་བ་རྨ་རྒྱ་ཆེར་གྱུར་པ་སླར་སྦྱར་བའི་ཕྱིར་ནི་སྦྲང་རྩི་དང་མར་སྦྱར་བས་བསྐུས་ན་མཆོག་ཏུ་ཕན་ནོ། དེ་བཞིན་དུ་མཁྲིས་པ་སེལ་བའི་གསོ་བ་སེལ་བ་བ་དག་གི་བྱ་བ་ཡང་ཕན་
ནོ། །ནད་ཀྱི་རྩོམ་པ་ཆེ་བ་ལ། །སྟེང་དང་འོག་ནས་སྦྱང་པར་བྱ། །ཞེས་བྱ་བ་ལ། རྨ་ནད་ཀྱི་རྩོམ་པ་ཆེ་ཞིང་ཤས་ཆེར་ཞུགས་པ་ལ་ནི། སྟེང་དང་འོག་ནས་སྐྱུག་སྨན་དང་བཀྲུ་སྨན་གྱིས་སྦྱང་བ་བྱའོ། །སྨྱུང་བ་བྱ་ཞིང་འབྲས་ཆན་སྦྱིན། །རྒྱུན་དུ་གཏར་ག་གཏབ་པར་བྱ། །ཞེས་བྱ་བ་ལ།
ཡང་ན་ནད་ཚབས་ཆེར་གཡོ་བའི་རྨ་ལ་ནི་སྨྱུར་བ་བྱ་ཞིང་ཟས་བཅད་པ་དང་། །འབྲས་ཆན་ཉུང་ཞིང་སྦྱིན་པ་དང་། །རྒྱུན་དུ་གཏར་ག་གདབ་ཅིང་ཁྲག་དབྱུང་བ་ཕན་ནོ། །ཤུས་དང་གྲུགས་པ་འདི་ཉིད་དེ། ཆོ་ག་འདི་ནི་ལྷག་པར་སྦྱར། །དེ་གཉིས་ཁྲག་ནི་ཉུང་ཤས་འཛག། །སྨིན་པའང་མྱུར་

བ་ཉིད་དུ་འགྱུར། །ཞེས་བྱ་བ་ལ། ཤུས་པ་དང་གྲུགས་པ་དག་ལ་ནི་བཤད་མ་ཐག་པའི་ཆོ་ག་འདི་དག་ལྷག་པར་སྦྱར་བར་བྱ་སྟེ། །དེ་ཅིའི་ཕྱིར་ཞེ་ན། ཤུས་པ་དང་གྲུགས་པ་དེ་གཉིས་ནི་ཁྲག་ཉུང་ཤས་འཛག་བར་བྱེད་པས་ན་རྒྱུ་དེའི་ཕྱིར་དེ་གཉིས་ནི་མྱུར་དུ་སྨིན་པར་འགྱུར་པ་ཡིན་ནོ། །ཕལ་
ཆེར་རྨ་ནི་ཤས་ཆེས་རྨ་ནི་ཤས་ཆེར་འབྱུང་། །གཞན་ལས་ཁྲག་ནི་འབྱུང་གྱུར་ལ། །དེ་ཡིས་ཁྲག་ནི་ཟད་གྱུར་བས། །རླུང་འཁྲུགས་ནད་ནི་བསྐྱེད་པ་ལས། །རླུང་འཇོམས་སྨན་དང་བསྐོལ་བ་ཡི། །སྣུམ་བླུགས་པ་དང་སྨན་ཆུ་བླུགས། །དུགས་དང་བསྐུ་དང་དཀྲི་བ་དང་། །སྣུམ་གྱི་འཇམ་རྩི་རྣམས་
ཀྱང་བྱ། །ཞེས་བྱ་བ་ལ། ཕལ་ཆེར་རྨ་ཚབས་པོ་ཆེ་བྱུང་བ་ལ་བྱུང་རྨ་ལས་གཞན་པའི་ཕྱོགས་ནས་ཁྲག་འབྱུང་བར་གྱུར་ལ། རྒྱུ་དེས་ཁྲག་ཟད་པར་གྱུར་ཅིང་། དེས་རླུང་ཤིང་ཏུ་འཁྲུགས་ཏེ་ནད་མི་བཟད་པ་བསྐྱེད་པར་གྱུར་བ་ལ་ནི་རླུང་འཇོམས་པའི་སྨན་དང་བསྐོལ་བའི་སྣུམ་བླུགས་པ་ལ་སོགས་
པའི་སྦྱོར་བ་བྱའོ། །དེ་ལྟར་ཞག་བདུན་པར་བཤད་པའི། །འཕྲལ་གྱི་རྨ་བྱུང་ཆོ་ག་བཤད། །ཅེས་བྱ་བ་ལ། དེ་ལྟར་བཤད་མ་ཐག་པའི་ཚུལ་གྱིས་ཞག་བདུན་གྱི་བར་དུ་བྱ་བར་བཤད་པའི་འཕྲལ་དུ་བྱུང་བའི་རྨའི་ཆོ་ག་བཤད་པ་ཡིན་ནོ། །ཞག་བདུན་ནས་ནི་ཤུགས་ཟད་ནས། །
སྔར་བཤད་པ་ཡི་ཆོ་གས་སྤྱད། །ཅེས་བྱ་བ་ལ། རྨ་སར་པའི་ཤུགས་ཟད་པར་གྱུར་ཅིང་ཞག་བདུན་འདས་པའི་འོག་ཏུ་ནི་སྔར་བཤད་པའི་རྨ་གསོ་བའི་ཆོ་ག་ཇི་སྐད་སྨོས་པས་སྦྱད་པར་བྱའོ། །འདི་ནི་ཕལ་ཆར་སྤྱིའི་ཆོ་ག །རེ་རེའི་གསོ་བ་བཤད་བྱ་སྟེ། །ཞེས་བྱ་བ་ལ། ཤུས་པ་ལ་སོགས་
པའི་རྨ་གསར་པ་ལ། འདི་དག་ནི་སྤྱིའི་ཆོ་ག་ཙམ་དུ་བཤད་པ་ཡིན་ཞིང་ཐུན་མོང་གི་གསོ་བར་བསྟན་པ་ཡིན་ལ། དེ་རྣམས་ཀྱི་རེ་རེའི་གསོ་བ་ནི་ད་གཟོད་བཤད་པར་བྱའོ། །ཤུས་ལ་ན་བ་མྱུར་བསལ་ཕྱིར། །རྨ་ལ་ཕན་པའི་ཕྱེ་མས་གདབ། བཅད་པ་རྨ་སེལ་ལྡེ་གུས་བསྐུ། །ཞེས་བྱ་བ་ལ། ཤུས་
པའི་རྨ་ལ་ནི་ནད་དེ་མྱུར་དུ་བསལ་བའི་ཕྱིར། རྨ་ལ་ཕན་པའི་ཕྱེ་མ་གདབ་པར་བྱའོ། །བཅད་པའི་རྨ་ལ་ནི་རྨ་ལ་ཕན་པའི་སྨན་གྱི་ལྡེ་གུས་བསྐུ་བར་བྱའོ། །རྣམ་པར་བཅད་དང་རབ་འཕྱང་ལ། །ཆོ་ག་བཞིན་དུ་བཙེམ་པ་དང་། །བཅིང་བ་དང་ནི་བཙིར་བར་བྱ། །ཞེས་བྱ་བ་ལ། རྣམ་པར་

བཅད་པ་དང་རབ་ཏུ་འཕྱང་བའི་རྨ་ལ་ནི་སྔར་ཇི་སྐད་བཤད་པ་བཞིན་དུ་བཙེམ་པར་བྱ་བ་འམ། དེ་བཞིན་དུ་བཅིང་བ་དང་། བཙིར་བའི་སྦྱོར་བ་དག་བྱའོ། །མིག་བཅར་ན་ནི་གསོ་མི་རུང་། །ཞེས་བྱ་བ་ལ། མིག་གི་འབྲས་བུ་བཅར་ཞིང་ཉམས་པར་གྱུར་བ་དེ་གསོར་མི་རུང་
ངོ་། །མ་ཞར་ཕྱིར་ནི་འཕྱང་བ་ལ། །རང་གི་གནས་སུ་ལེགས་བཞག་ཅིང་། །རྩ་མ་འཚོལ་བར་བྱས་ནས་ནི། །པདྨའི་འདབ་མས་གཡོགས་ནས་ནི། །ལག་པས་དལ་གྱིས་མནན་པར་བྱ། །ཞེས་བྱ་བ་ལ། མིག་གང་ཞར་བར་མ་གྱུར་ལ་གནས་ལས་འཕགས་ཏེ་ཕྱིར་འཕྱང་བར་གྱུར་པ་དེ་ནི་རང་
གི་གནས་སུ་ལེགས་པར་མ་འཆུག་པར་བཞག་སྟེ་རྩ་བ་འཚོལ་བར་བྱས་ལ། སྨན་པས་སྣྲེལ་ཞིར་མ་གྱུར་པར་གཞག་ལ། དེའི་འོག་ཏུ་པདྨའི་འདབ་མས་གཡོགས་ལ། དེའི་སྟེང་ནས་སྨན་པའི་ལག་པས་དལ་གྱིས་མནན་པར་བྱའོ། །དེ་ནས་ཤིང་མངར་ཛི་བ་ཀ །ཟངས་རྩི་བ་
དང་ཨུཏྤ་ལ། །མར་དང་འོ་མ་བཅས་བསྐོལ་བའི། །སྨན་ཐིགས་བླུགས་དང་སྣ་སྨན་དང་། །བརྟ་བའི་ཆོ་ག་དག་ཀྱང་བྱ་། །མིག་ནད་ཐམས་ཅད་སེལ་མཆོག་ཡིན། །ཞེས་བྱ་བ་ལ། དེའི་འོག་ཏུ་མིག་དེ་ལ་ཤིང་མངར་ལ་སོགས་བའི་ལྡེ་གུ་དང་མར་དང་འོ་མར་བཅས་པ་བསྐོལ་
བའི་སྣ་སྨན་ལ་སོགས་པ་བྱ་སྟེ། གང་གི་ཕྱིར་དེ་ནི་མིག་སྣད་པ་ཐམས་ཅད་སེལ་བར་བྱེད་པའི་མཆོག་ཡིན་པའི་ཕྱིར་རོ། །མིག་ཕུགས་ཞུགས་ལ་མགུལ་པ་བསྡམ། །སློན་དང་ལུད་པ་སྦྲིད་པ་འབྱུང་། །ཡང་ན་དབུགས་འབྱུང་དབུགས་བརྔུབ་བསྡམ། །རྨ་བྱུང་མིག་གི་གསོ་བ་བྱ། །ཞེས་
བྱ་བ་ལ། མིག་ཕུགས་སུ་ཞུགས་ཤིང་གཏིང་དུ་བྲིས་པ་ལ་ནི་མགུལ་པ་བསྡམ་པར་བྱ་བ་དང་། སློན་ཞིང་སྐྱུགས་པ་དང་ལུད་པ་དང་སྦྲིད་པ་འབྱུང་བར་བྱ་བ་དང་། ཡང་ན་དབུགས་འབྱུང་བ་དང་། བརྔུབ་པ་དང་བསྡམ་པར་བྱ་བ་དང་། དེ་བཞིན་དུ་རྨ་བྱུང་བའི་མིག་གི་གསོ་བ་ཇི་སྐད་བཤད་པ་དག་
བྱའོ། །རྣ་བ་བོགས་པ་བཙེམས་ནས་ནི། །བུ་ག་ཏིལ་མར་དག་གིས་དགང་། །ཞེས་བྱ་བ་ལ། རྣ་བ་གནས་ལས་བོགས་པ་ལ་ནི་དེ་ལ་ལེགས་པར་བཙེམས་ལ་རྣ་བའི་བུ་ག་ཏིལ་མར་གྱིས་དགང་བར་བྱའོ། །ལྟག་པའི་སུམ་མདོ་ཆོད་གྱུར་ཏེ། །རླུང་ནི་འབྱུང་བར་གྱུར་པ་ལའང་། །མཉམ་

དུ་གཞག་སྟེ་བར་མཚམས་ནི། །མེད་པར་བཙེམས་ཏེ་བཅིང་པར་བྱ། །ཞེས་བྱ་བ་ལ། ལྟག་པའི་སུམ་མདོ་ཆོད་པར་གྱུར་ཏེ་རླུང་བྱུང་བར་གྱུར་ན་ཡང་ལྟག་པ་དེ་ལྟར་མཉམ་པོར་གཞག་སྟེ། ལེགས་པར་བཙེམས་ལ་དེའི་འོག་ཏུ་ཅི་རིགས་པའི་བཅིང་བས་བཅིང་བར་བྱའོ། །དེ་ལ་ར་ཡི་མར་
སར་གྱིས། །བླུགས་པ་དག་ནི་རབ་ཏུ་བསྔགས། །ཞེས་བྱ་བ་ལ། དེ་ལྟར་བཅིངས་པའི་ལྟག་པ་དེ་ལ་རའི་མར་སར་བླུགས་པ་དག་ཕན་ནོ། །གན་རྐྱལ་བཞག་སྟེ་ཁ་ཟས་སྦྱིན། །ལེགས་པར་སྦྱོད་ལམ་བསྡམས་ཏེ་ཉལ། །ཞེས་བྱ་བ་ལ། ལྟག་པ་ཆོད་དེ་བཅིངས་པ་དེ་ནི་ཁ་ཟས་ཀྱང་
གན་རྐྱལ་དུ་བཞག་སྟེ་ཟར་གཞུག་པ་དང་། དེ་བཞིན་དུ་ཉལ་བ་ན་ཡང་རྨ་ལ་ནི་གནོད་པར་ཉལ་དུ་གཞུག་པར་བྱའོ། །ཡན་ལག་ཐད་དཀར་གནས་པ་ཡི། །རྨ་བྱུང་ཡན་ལག་ལེགས་གཞག་སྟེ། །བཙེམས་ལ་དཀྲི་ཞིང་བཅིང་བྱ་ཞིང་། །གོས་ནི་མཐུག་པོས་བཅིང་བར་བྱ། །ཞེས་བྱ་བ་
ལ། ལག་ངར་དང་བྱིན་པ་དག་ཏུ་ཐད་ཀར་གནས་པའི་རྨ་བྱུང་བ་ལ་ནི་ཡན་ལག་ལེགས་པར་གཞག་སྟེ། དམ་དུ་བཙེམས་ལ། དེའི་འོག་ཏུ་ཆིངས་མས་དཀྲི་ཞིང་གོས་མཐུག་པོས་བཅིང་བར་བྱའོ། །པགས་པའི་འུར་མཐིལ་བཅིང་བས་ནི། །ཕྲག་པའི་རྨ་ལ་བཅིང་བྱ། །ཞེས་
བྱ་བ་ལ། ཕྲག་པ་རྨ་བྱུང་བ་ལ་ནི། པགས་པ་ལས་འུར་མཐིལ་ལྟ་བུས་བཅིང་བར་བྱའོ། །རླིག་པ་འཕྱང་ལ་རྐང་པར་ནི། །སྦུ་གུས་ཆུ་ནི་གཏོར་ནས་ཀྱང་། །རླིག་པ་བཅུག་སྟེ་རས་བལ་དང་། །བཅས་པའི་ཁབ་ཀྱི་བཙེམ་པར་བྱ། །འུར་མཐིལ་བཅིང་བ་བྱས་པ་ལ། །རྐེད་པ་
ནས་ནི་སྲད་བུས་གདགས། །ཞེས་བྱ་བ་ལ། རླིག་པ་འཕྱང་བར་གྱུར་པ་ལ་ནི་རྐང་པ་ཆུའི་ནང་དུ་བཅུག་ཅིང་མིག་ཆུས་གཏོར་ལ། རླིག་པ་སླར་བཅུག་སྟེ་རས་བལ་གྱི་སྐུད་པ་དང་བཅས་པའི་ཁབ་ཀྱིས་བཙེམ་པར་བྱའོ། །དེ་ལྟར་བཙེམས་ནས། མདོའི་གནས་ལས་སྨོས་པའི་འུར་མཐིལ་
འདྲ་བའི་བཅིང་བས་བཅིངས་ལ་རྐེད་པ་ནས་ཆིངས་མའི་སྲད་བུས་བརྟོད་པར་བྱའོ། །དེར་ནི་རྨ་ནི་འདྲུལ་གྱུར་བས། །སྣུམ་དང་དུགས་ཀྱིས་ལས་མི་བྱ། །ཞིས་བྱ་བ་ལ། རླིག་པ་འཕྱང་བའི་རྨ་དེ་ལ་ནི་སྣུམ་དང་དུགས་ཀྱི་ཆོ་ག་བྱར་མི་རུང་སྟེ། རྨ་འདྲུལ་བར་བྱེད་པའི་ཕྱིར་རོ། །པྲི་ཡང་ཀུ་དང་ཨ་

ག་རུ། །སུག་སྨེལ་ཛྭ་ཏི་བར་བ་ཏ། །དན་ད་ལྡོང་རོས་སྐྱེར་བ་དང་། །སླེ་ཏྲེས་དང་ནི་སྦངས་མ་དང་། །ཏིལ་མར་བསྐོལ་བས་རྨ་འཚོབ་བྱེད། །ཅེས་བྱ་བ་ལ། པྲི་ཡང་ཀུ་ལ་སོགས་པ་དང་བསྐོལ་བའི་ཏིལ་མར་གྱིས་ནི་རླིག་པ་འབྱུང་བའི་རྨ་འཚོབ་པར་བྱེད་པའི་ཕྱིར་
རོ། པྲི་ཡང་ཀུ་ནི་ཀ་ར་ནུ་པར་ཏེ། ལ་ལ་ནི་འདིར་པྲི་ཡང་ཀུ་མ་ཡིན་གྱི་ཐལ་ཏྲེས་ནག་པོ་ཀྲི་སྣ་ཤ་རི་བཞེས་བྱ་བ་ཡིན་ཞེས་ཟེར་རོ། །ཡན་ལག་མ་ལུས་ཆད་པ་ལ། །ཏིལ་མར་བསྐོལ་བས་བསྲེགས་ནས་ནི། །སྒྱེའུ་བཅིང་བས་བཅིང་བར་བྱ། །དེ་ནས་རྨ་ལྟར་གསོ་བར་བྱ། །ཞེས་བྱ་བ་
ལ། ལག་ངར་མ་བྱིན་པ་ལྷག་མ་མ་ལུས་པར་འུར་པོར་ཆད་པ་ལ་ནི་ཏིལ་མར་བསྐོལ་བའི་ནང་དུ་བསྲེགས་ལ་སྔར་བཤད་པའི་སྒྱེའུ་བཅིང་བའི་ནང་དུ་བཅིངས་ཏེ། དེའི་འོག་ཏུ་རྨ་གསོ་བའི་ཚོགས་གསོ་བར་བྱའོ། །ཕུག་པ་ཟུག་རྔུ་དབྱུང་བས་གསོ། །གྲུགས་དང་ཆག་གྲུགས་གསོ་
བར་བྱ། །ཞེས་བྱ་བ་ལ། ཕུག་པའི་རྨ་ནི་ཟུག་རྔུ་དབྱུང་བའི་གསོ་བ་ཇི་སྐད་སྔར་མདོའི་གནས་སུ་བཤད་པ་བཞིན་གསོ་བར་བྱའོ། །གྲུགས་པ་ནི་ཆག་གྲུགས་གསོ་བའི་ལེའུ་ལས་ཇི་སྐད་སྨོས་པ་ལྟར་གསོ་བར་བྱའོ། །མགོ་བོའི་ཟུག་རྔུ་དབྱུང་བ་ལ། །སྐྲ་ཡི་ཡེའུ་གཞུག་པར་བྱ། །གཞན་
དུ་གླང་རྒྱས་འཛག་པ་ཡིས། །རླུང་འཁྲུགས་དེ་ནི་གསོད་པར་འགྱུར། །ཞེས་བྱ་བ་ལ། མགོ་བོའི་ཟུག་རྔུ་དབྱུང་བ་ལ་ནི་སྐྲའི་ཡེའུ་གཞུག་པར་བྱའོ། །གཞན་དུ་དེ་ལྟར་མ་བྱས་ན། གླད་རྒྱས་ཞེས་བྱ་བ་འཛག་པར་འགྱུར་བ་ལས་རླུང་འཁྲུགས་ཏེ་ནད་པ་དེ་གསོད་པར་འགྱུར་རོ། །རྨ་
འཚོབ་ས་ནས་ནི་རིམ་གྱིས་ནི། །སྐྲ་ནི་དལ་གྱིས་དབྱུང་བར་བྱ། །ཞེས་བྱ་བ་ལ། རྨ་དེ་འཚོབས་ནས་ནི་སྐྲ་དེ་རེ་རེ་ནས་རིམ་གྱིས་དལ་གྱིས་དབྱུང་བར་བྱའོ། །གླད་རྒྱས་འཛག་ལ་སྲོག་ཆགས་ནི། །གཞན་གྱི་གླད་པ་སྦྱིན་པར་བྱ། །ཞེས་བྱ་བ་ལ། གླད་རྒྱས་འཛག་པར་གྱུར་ན་སྲོག་ཆགས་
གཞན་དག་གི་གླད་པ་དང་། མགོ་བོར་བཅས་པ་སྦྱིན་པར་བྱའོ། །གཞན་ལས་ཟུག་རྔུ་ཕྱུང་ནས་ནི། །རྨ་དེར་རིང་བུ་སྣུམ་ཅན་གཞག། །ཅེས་བྱ་བ་ལ། ཡན་ལག་གཞན་དག་ལས་ཟུག་རྔུ་ཕྱུང་ནས་ནི་རྨ་དེ་ལ་རེང་བུ་ཡེའུ་སྣུམ་ཅན་གཞུག་པར་བྱའོ། །ཕུགས་རིང་ཁ་ནི་ཆུང་བ་དང་། །རྨ་

གང་རྣག་དང་ཁྲག་འཛག་ལ། །འཁོར་ལོས་བཙིར་བའི་ཏིལ་མར་བླུགས། །དེ་ནི་སྦུ་གུ་ཆུང་ངུས་གཏང་། །ཞེས་བྱ་བ་ལ། རྨ་གང་ཕུགས་རིང་ཞིག་གཏིང་དུ་ཟབས་པ་དང་། རྨ་ཁ་ཆུང་ཞིང་ཕྲ་བ་དང་། རྣག་དང་ཁྲག་འཛག་པར་གྱུར་པ་ལ་འཁོར་ལོས་བཙིར་བའི་ཏིལ་མར་སར་བླུགས་ཤིང་
དེ་སྦུ་གུ་ཆུང་ངུ་ལས་ནང་དུ་གཏང་བར་བྱའོ། །ཁོང་པ་བརྟོལ་ཏེ་ཁྲག་གིས་གང་། །བརྒྱལ་ཞིང་སྙིང་ག་རྩིབ་ལོགས་ན། །རིམས་འདེབས་ལུས་ཚ་ལྟོ་སྦོས་སྐོམ། །ཟས་ལ་མངོན་པར་མི་དགའ་ཞིང་། །བཤད་པ་གཅིན་དང་འཕྱེན་འགགས་ལ། །མིག་དམར་རྔུལ་འབྱུང་དབུགས་མི་བདེ། །
ཁ་ནང་ཁྲག་གི་དྲི་བྲོ་ཞིང་། །ལུས་ཀྱང་དྲི་མི་ཞིམ་པར་འགྱུར། །ཞེས་བྱ་བ་ལ། ཁོང་པའི་ནང་གྲོལ་བརྟོལ་ཏེ། ཁྲག་གིས་གང་ན་ནི་ཁྲག་སྐྱུགས་པ་ལ་སོགས་པར་འགྱུར་རོ། མི་ཞིམ་པའི་བར་དུ་འགྱུར་རོ། །མ་ཞུའི་གནས་ན་གནས་པའི་ཁྲག །ཁྲག་ཏུ་ཡང་ནི་སྐྱུག་པར་བྱེད། །ཤིན་
ཏུ་ཤས་ཆེར་ལྟོ་སྦོ་ཞིང་། །གཟེར་ནད་ཀྱིས་ཀྱང་གནོད་པར་བྱེད། །ཅེས་བྱ་བ་ལ། ཁྲག་དེ་མ་ཞུ་བའི་གནས་ན་འདུག་ན་ནི་ཁྲག་སྐྱུགས་པ་ལ་སོགས་བར་འགྱུར་རོ། །ཞུ་བའི་གནས་ན་གནས་པའི་ཁྲག །གཟེར་བཅས་ལུས་ནི་ལྕི་བར་བྱེད། །ལྟོ་བ་མན་ཆད་གྲང་བ་དང་། །བུ་ག་
ལས་ནི་ཁྲག་འབྱུང་འགྱུར། །ཞེས་བྱ་བ་ལ། ཁྲག་དེ་ཞུ་བའི་གནས་ན་འདུག་ན་ནི་གཟེར་བ་དང་བཅས་ཞིང་ལུས་ལྕི་བ་ལ་སོགས་པོར་འགྱུར་རོ། །གནས་ནི་ཞིག་པར་མ་གྱུར་ཀྱང་། །ཁྲག་ནི་འཛག་པར་གྱུར་བ་ཡིས། །བུ་ག་ལས་ནི་འགེངས་བྱེད་དེ། །ལྒང་པའི་ངོས་ནས་འགེངས་
དང་འདྲ། །ཞེས་བྱ་བ་ལ། གནས་ཞེས་བྱ་བ་ཁོང་པའི་ནང་གྲོལ་ཞིག་པར་མ་གྱུར་ཀྱང་ཁྲག་འཛག་པར་གྱུར་པས་ངོས་ཀྱི་བུ་ག་ནས་ལྟོ་བའི་སྣོད་འགེངས་པར་བྱེད་དེ། དཔེར་ན་གཅིན་འཛག་པ་ཡང་ལྒང་པའི་ངོས་ཀྱི་བུ་ག་ག་ནས་ཞུགས་པས་ནང་དུ་འགེངས་པར་བྱེད་པ་དང་འདྲའོ། ཁྲག་
ནང་ཡོད་པ་དེ་ལ་ནི། །རྐང་ལག་ཁ་དང་དབུགས་གྲང་ཞིང་། །མིག་དམར་གདོང་ནི་སྐྱ་བ་དང་། །ལྟོ་སྦོས་བ་ནི་སྦང་བར་བྱ། །ཞེས་བྱ་བ་ལ། དེ་ལ་ནང་གྲོལ་རྡོལ་ཞིང་ནང་ན་ཁྲག་ཡོད་པ་དེ་ནི་རྐང་པ་དང་ལག་པ་དང་ཁ་དང་དབུགས་གྲང་བ་དང་། མིག་དམར་བ་ལ་སོགས་པ་ཡིན་ཏེ། དེ་ནི་

གསོར་མི་རུང་བས་སྤང་བར་བྱའོ། །མ་ཞུར་གནས་ལ་སྐྱུག་སྨན་གཏང་། །ཞེས་བྱ་བ་ལ། མ་ཞུ་བའི་གནས་ན་ཁྲག་ཡོད་པའི་མི་ལ་ནི་སྐྱུག་སྣན་གཏང་བར་བྱའོ། །ཞུ་བའི་གནས་ལ་གནས་པ་ལ། །བཀྲུ་སྨན་དང་ནི་ནི་རུ་ཧ། །སྣུམ་མེད་དྲོ་བས་སྦྱང་བར་བྱ། །ཞེས་
བྱ་བ་ལ། ཞུ་བའི་གནས་ལ་ཁྲག་གནས་པ་ལ་ནི་བཀྲུ་སྨན་དང་ནི་རུ་ཧ་སྣུམ་མེད་པ་དང་དྲོ་བ་བཏང་ལ་སྦྱང་བར་བྱའོ། །ནས་དང་རྒྱ་ཤུག་རྒྱ་སྲན་གྱི། །ཁུ་བ་སྣུམ་ནི་མེད་པ་དང་། །ནས་ཐུག་ཁ་ཟས་ཟ་བ་དང་། །ལྕེ་མྱང་ཚ་དང་ལྡན་པ་སྦྱིན། །ཞེས་བྱ་བ་ལ། དེ་ལྟར་སྦྱངས་བ་བྱས་ནས། ནས་ལ་
སོགས་པའི་ཁ་ཟས་སྣུམ་མེད་པ་དང་། ནས་ཐུག་ལ་སོགས་པ་ལྕེ་མྱང་ཚ་དང་ལྡན་པ་སྦྱིན་པར་བྱའོ། །ཁྲག་ནི་མང་དུ་འཛག་པ་དང་། །ཁོང་པ་སྣད་ལ་ཁྲག་བླུད་བྱ། །ཞེས་བྱ་བ་ལ། ཁྲག་མང་དུ་འཛག་ཅིང་འཁྲུགས་པ་ལ་ནི་གཞན་དག་གི་ཁྲག་བླུད་པར་བྱའོ། །རྒྱུ་མ་
འབྱར་དང་ཆད་པར་ཉན། །ཁང་པ་སྣད་པ་གཉིས་སུ་བཤད། །ཅེས་བྱ་བ་ལ། ཁོང་པ་སྣད་ཅིང་རྡོལ་བ་ནི་རྒྱུ་མ་འབྱར་བ་དང་། རྒྱུ་མ་ཆད་པའི་དབྱེ་བས་རྣམ་པ་གཉིས་སུ་བཤད་དོ། །དང་པོར་བརྒྱལ་སོགས་ཆུང་བ་ཡིན། །གཉིས་པ་ཤས་ཆེར་གནོད་པར་བྱེད། །ཅེས་བྱ་བ་ལ།
དང་པོ་རྒྱུ་མ་འབྱར་བ་ནི་བརྒྱལ་བ་ལ་སོགས་པའི་གནོད་པ་ཆུང་བ་ཡིན་ལ། གཉིས་པ་རྒྱུ་མ་ཆད་པ་ནི་ཤིན་ཏུ་གནོད་པ་སྐྱེད་པ་ཡིན་ནོ། །རྒྱུ་མ་འབྱར་བ་ཐེ་ཚོམ་བཅས། །རྒྱུ་མ་ཆད་པ་འཚོ་མི་འགྱུར། །ཞེས་བྱ་བ་ལ། རྒྱུ་མ་རྡོལ་ཅིང་འབྱར་བ་ནི་འཚོ་འམ་མི་འཚོ་ཐེ་ཚོམ་དང་བཅས་པ་
ཡིན་ལ། རྒྱུ་མ་ཆད་པ་ནི་ངེས་པར་འཆི་བ་ཡིན་ནོ། །གང་ནི་བཤད་དང་གཅི་དང་འཕྱེན། །རང་གི་ལམ་ནས་བྱུང་གྱུར་ལ། །བླ་བརྣན་མེད་པར་རྡོལ་གྱུར་ཀྱང་། །འཚོ་བར་འགྱུར་བར་ཐེ་ཚོམ་མེད། །ཅེས་བྱ་བ་ལ། གང་གི་ནང་གྲོལ་རྡོལ་ཡང་བཤད་པ་ལ་སོགས་པ་རང་གི་རྒྱུ་ལམ་ནས་
ལུགས་བཞིན་དུ་འབྱུང་བ་དང་། བླ་བརྣན་གྱི་ནད་མེད་པ་དག་ནི་རྡོལ་བ་ཡིན་དུ་ཟིན་ཀྱང་ངེས་པར་འཚོ་བར་འགྱུར་རོ། །མ་རྡོལ་རྒྱུ་མ་འབྱུང་བ་ནི། །གཞུག་པར་བྱ་ཞིང་གཞན་དུ་མིན། །ཞེས་བྱ་བ་ལ། རྒྱུ་མ་མ་རྡོལ་ཞིང་འཕྲལ་དུ་བྱུང་བ་ནི་སླར་བཅུག་ན་འཚོའི། དེ་ལས་གཞན་དུ་ཆད་པར་

གྱུར་པ་ནི་སླར་བཅུག་ཀྱང་མི་འཚོའོ། །གྲོག་མའི་མགོ་བོ་བཅད་ནས་ནི། །དེ་ཡང་གཞུག་ཅེས་ལ་ལ་སྨྲ། །ཞེས་བྱ་བ་ལ། སློབ་དཔོན་ལ་ལ་དག་ནི་རྒྱུ་མ་རྡོལ་བ་ཡིན་དུ་ཟིན་ཀྱང་གྲོག་མའི་མགོ་བོས་ཁ་བཀབ་ལ་སླར་གཞུག་པར་བྱའོ་ཞེས་ཟེར་རོ། །རྡུལ་དང་ཁྲག་དང་རྩ་ཡིས་གོས། །
འོ་མས་ལེགས་པར་བཀྲུས་ནས་ནི། །སེན་མོ་བྲེགས་ཏེ་མར་གྱིས་བསྐུས། །རིམ་གྱིས་ལེགས་པར་གཞུག་པར་བྱ། །ཞེས་བྱ་བ་ལ། རྒྱུ་མ་གསར་དུ་ཕྱིར་བྱུང་བ་དེ་རྡུལ་དང་ཁྲག་ལ་སོགས་པས་གོས་པ་འོ་མས་བཀྲུ་ལ། མར་གྱིས་བསྐུས་ཏེ་སེན་མོ་བྲེགས་པའི་ལག་པས་རིམ་གྱིས་དལ་
བུས་གཞུག་པར་བྱའོ། སྐམ་པོ་འོ་མས་སྦངས་ནས་ནི། །མར་སར་མང་པོ་བསྐུ་བར་བྱ། །ཞེས་བྱ་བ་ལ། རྒྱུ་མ་སྐམ་པོ་ནི་འོ་མས་སྦངས་ལ་བཀྲུས་ཏེ་མར་སར་པ་མང་པོས་བསྐུས་ལ་གཞུག་པར་བྱའོ། །སོར་མོས་མགུལ་པ་མ་ཉེ་བ་དང་། །ཆུ་ཡིས་ཀྱང་ནི་གཏོར་བར་བྱ། །དེ་ལྟར་རྒྱུ་མ་
ནང་ཞུགས་ནས། །དེ་ཡི་ཚེ་ན་བཙིར་བར་བྱ། །ཞེས་བྱ་བ་ལ། རྒྱུ་མ་བྱུང་བར་གྱུར་བ་ལ་སེར་མོས་མགུལ་བ་མ་ཉེས་པ་དང་། ཆུས་གཏོར་ནས་སྦངས་པར་བྱས་ཏེ། དེ་ལྟར་རྒྱུ་མ་དེ་ནང་དུ་གཞུག་པར་བྱས་ལ་དེ་ནས་དུས་གཞན་དུ་རྒྱུ་མ་དེ་བཙིར་བར་བྱའོ། །རྨ་ཁ་ཆུང་དང་སྦོམ་པ་ཡིས། །
རྒྱུ་མ་ཁོང་བར་མ་ཚུད་ན། །དེ་ཡི་ཚད་ཅམལྟོ་བ་ནི། །དབྲལ་ཏེ་ནང་དུ་གཞུག་པར་བྱ། །ཞེས་བྱ་བ་ལ། རྨ་ཁ་ཤིན་ཏུ་ཆུང་བའམ། རྒྱུ་མ་སྦོམ་པའི་རྒྱུས་ནང་དུ་མ་ཚུད་ན། རྒྱུ་མའི་ཚད་ཙམ་ལྟོ་བ་དབྲལ་ཏེ་རྒྱུ་མ་ནང་དུ་གཞུག་པར་བྱའོ། གནས་སུ་ལེགས་པར་འདུག་གྱུར་ནས། །དེ་རྗེས་
རྒྱུ་མའི་རྨ་བཙེམ་བྱ། །ཞེས་བྱ་བ་ལ། རྒྱུ་མ་གནས་སུ་མ་འཕྱུགས་པར་ཚུད་ན་ནི་དེའི་འོག་ཏུ་རྨ་ལེགས་པར་བཙེམ་པར་བྱའོ། །གནས་སུ་ལེགས་པར་མ་བཞག་ན། །དེ་ནི་འཁྲུགས་པས་འཆི་བར་འགྱུར། །ཞེས་བྱ་བ་ལ། རྒྱུ་མ་དེ་གནས་ལས་འཕྱུགས་ན་ནི་སྐྱིས་བུ་དེ་འཆི་བར་
འགྱུར་རོ། །དེ་རྗེས་རས་ཀྱིས་དཀྲིས་ནས་ནི། །མར་གྱིས་བསྐུ་ཞིང་བླུགས་པར་བྱ། །ཞེས་བྱ་བ་ལ། དེའི་འོག་ཏུ་རྨ་དེ་རས་ཀྱིས་དཀྲིས་ལ། མར་བསྐུས་ཞིང་བླུགས་པར་བྱའོ། །དེ་ནས་དན་ད་ཏིལ་མར་དང་། །སྦྱར་བའི་འོ་མ་དྲོ་འཇམ་བླུད། །དེས་ནི་བཤད་པ་སྙི་པ་དང་། །རླུང་ནི་བདེ་བར་

འབྱུང་བར་འགྱུར། །ཞེས་བྱ་བ་ལ། དེའི་འོག་ཏུ་བཤད་པ་འཇམ་པར་བྱ་ཞིང་རླུང་བདེ་བར་འབྱུར་བར་བྱ་བའི་ཕྱིར་དན་ད་ཏིལ་མར་དང་སྦྱར་བའི་འོ་མ་དྲོ་ལ་འཇམ་ཙམ་བླུད་པར་བྱའོ། །ཇི་སྐད་བཤད་པའི་སྤྱོད་པ་བསྲུང་། །ལོ་གཅིག་བར་དུ་འབད་པར་བྱ། །ཞེས་བྱ་བ་ལ། དེ་
ལྟར་བྱས་ནས་ཆ་སྦྱད་ཀྱི་ལམ་ནས་བཤད་པའི་སྤྱོད་པ་ལོ་གཅིག་གི་བར་དུ་བསྲུང་བར་བྱའོ། །ལྟོ་ལས་ཚིལ་ནི་བྱུང་གྱུར་ན། །ཐལ་བ་འམ་ནི་ས་དག་གམ། །རོ་བསྐ་བ་ཡི་རྩ་བ་དག །ཞིབ་ཏུ་བཏགས་པས་བཏབ་ནས་ནི། །དེ་ནས་སྲད་བུ་དམ་དུ་བཅིང་། །སྨན་པ་མཁས་བས་གཅད་པར་བྱ། །
མཚོན་རྣོན་མེ་ལ་བསྲེགས་པ་ཡིས། །ལན་ཅིག་ཁོ་ནར་གཅད་པར་བྱ། །ཞེས་བྱ་བ་ལ། ཚིལ་གྱི་དུམ་བུ་ལྟོ་ལས་བྱུང་བར་གྱུར་ན། ཐལ་བ་འམ་ས་འམ་རོ་བསྐ་བའི་རྩ་བ་ཞིབ་ཏུ་བཏགས་པས་བཏབ་ལ། དེའི་འོག་ཏུ་སྲད་བུ་དམ་པོ་ཁོ་ནར་བཅིངས་ཏེ། སྨན་པ་མཁས་པས་གཅད་པར་བྱ་ལ། །
དེ་ཡང་མཚོན་རྣོན་པོ་མེས་བསྲེགས་པས་ལན་ཅིག་ཁོ་ནར་གཅད་པར་བྱའོ། །གཞན་དུ་བྱས་ནས་གཅོད་པའི་ཚེ། །ན་ཞིང་སྦོ་འམ་འཆི་བར་འགྱུར། །ཞེས་བྱ་བ་ལ། རྣམ་པ་གཞན་དུ་བྱས་ནས་གཅོད་པའི་ཚེ་ན་ཞིང་སྦོ་བ་ལ་སོགས་པ་འབྱུང་བར་འགྱུར་བ་འམ། ཡང་ན་འཆི་བར་འགྱུར་
རོ། །སྦྲང་རྩིར་བཅས་པས་རྨ་བཅིངས་ལ། །ཁ་ཟས་ཞུ་ནས་འོ་མ་མར། །དན་ཏི་རྒྱ་སྐྱེགས་གཟེ་མ་དང་། །ཤིང་མངར་ཁ་ར་བསྐོལ་བ་བླུད། །ཤིང་མངར་བཅས་པ་སྔར་གྱི་ནི། །ཆོ་གས་ན་དང་ཚ་བ་སེལ། །ཞེས་བྱ་བ་ལ། རྨ་དེ་སྦྲང་རྩི་དང་བཅས་པའི་ཆིངས་མས་བཅིངས་
ལ། ཁ་ཟས་ཞུ་བར་གྱུར་ནས། དན་ཏི་ལ་སོགས་པ་དང་། ཤིང་མངར་དང་མར་བསྐོལ་བ་འམ། ཤིང་མངར་དང་འོ་མ་བསྐོལ་བ་བླུད་པར་བྱ་སྟེ། དེ་གཉིས་ཀྱང་ན་བ་དང་ཚ་བ་སེལ་བར་བྱེད་དོ། །དེའི་འོག་ཏུ་ནི་སྔ་མའི་ཆོ་ག་བཤད་པར་བྱའོ། །ཚིལ་གྱི་རྨེན་བུར་བཤད་པ་ཡི། །
ཏིལ་མར་བསྐུས་ན་འང་ཕན་པ་ཡིན། །ཞེས་བྱ་བ་ལ། དེ་ལ་ཚིལ་བྱུང་བའི་རྨ་ལ་ནི། ཚིལ་གྱི་རྨེན་བུའི་ནད་གསོ་བའི་སྐབས་སུ་བཤད་པའི་ཏིལ་མར་བསྐུས་ན་ཡང་ཕན་པ་ཡིན་ནོ། །བལ་བུའི་ལོ་མ་ཤུག་པ་དང་། །སྤང་སྤོས་ཧ་རེ་ཎུ་ཀ་དང་། །ཨ་ཀ་རུ་དང་ཙནྡན་དང་། །པདྨའི་

ས་བོན་སེར་པོ་གཉིས། །ཨུ་ཤི་ར་དང་ཤིང་མངར་བཅས། །བསྐོལ་བ་འཕྲལ་གྱི་རྨ་ལ་ནི། །འཚོ་བར་བྱེད་པའི་དམ་པར་བཤད། །ཅེས་བྱ་བ་ལ། བལ་བུའི་འོ་མ་ལ་སོགས་པ་དང་། ཏིལ་མར་བསྐོལ་བ་ཡང་འཕྲལ་དུ་རྨ་བྱུང་བ་འཚོ་བར་བྱེད་པ་ཡིན་ནོ། །མཚོན་གྱིས་མསྣུན་པས་མི་
མངོན་པ། །གཡང་ས་མཐོན་པོ་ནས་ལྷུང་བ། །རླུང་མཁྲིས་འཇོམས་སྨན་འགྲངས་པ་དང་། །མཉེ་དང་བསྐུ་དང་སྦྱང་བ་བྱ། །ཞེས་བྱ་བ་ལ། སྐྱེས་བུ་མཚོན་གྱིས་མསྣུན་པའི་རྨ་མི་མངོན་པར་གྱུར་པ་དང་། དེ་བཞིན་དུ་གཡང་ས་མཐོན་པོ་ནས་ལྷུང་བར་གྱུར་པ་ལ་ནི་རླུང་དང་མཁྲིས་པ་
འཇོམས་པའི་སྦྱོར་བ་དང་། འགྲངས་པ་ལ་སོགས་པ་སྦྱང་བ་བྱའོ། །ལུས་ཚིགས་བྱེ་དང་མཉེས་པ་དང་། །གནད་དུ་བསྣུན་པས་ཉེན་པ་ལ། །སྣོད་ཆེན་ཏིལ་མར་གྱིས་བཀང་བར། །གཞུག་ཅིང་ཤ་ཁུ་སྦྱིན་པར་བྱ། །ཞེས་བྱ་བ་ལ། མི་གང་ལུས་ཀྱི་ཚིགས་བྱེ་བར་གྱུར་བའམ། །
མཉེས་ཞིང་དཀྲུགས་པ་འམ། གནད་དུ་བསྣུན་པས་ཉེན་པ་ལ་ནི་གཞོང་པ་ལ་སོགས་པའི་སྣོད་ཆེན་པོ་ཏིལ་མར་གྱིས་བཀང་བའི་ནང་དུ་ལུས་སྤྱིང་ཞིང་ཤ་ཁུ་སྦྱིན་པར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་
བར་སྦྱར་བ་ལས། ཕྱི་མའི་གནས་ཀྱི་ལེའུ་ཉི་ཤུ་རྩ་དྲུག་པའི་རྣམ་པར་འགྲེལ་པའོ།། །།དེ་ནས་ཆག་གྲུགས་གསོ་བའི་ལེའུ་བཤད་པར་བྱའོ། །ལྷུང་དང་སྣད་སོགས་ཀྱིས་རུས་ཚིགས། །ཚིགས་དང་ཚིགས་མིན་ཆག་གྱུར་གཉིས། །ཞེས་བྱ་བ་ལ། རུས་པ་ཆག་པའི་
དབྱེ་བ་རྣམ་པ་གཉིས་ཏེ། ཡང་ན་ལྷུང་བ་ལ་སོགས་པའི་རྒྱུ་ལས་ཚིགས་བྱུང་ཞིང་ཆག་པ་དང་། ཚིགས་མ་ཡིན་པར་ཆགས་པའོ། །ཚིགས་བྱུང་གྱུར་ན་བརྐྱང་དང་བསྐུམ། །ནུས་པ་མེད་པ་ཉིད་དུ་འགྱུར། །ཞེས་བྱ་བ་ལ། གང་གི་ཚེ་ཚིགས་བྱུང་བར་གྱུར་པ་དེའི་ཚེ་ནི་ཚིགས་དེའི་
ཕྱོགས་སུ་བརྐྱང་པ་དང་བསྐུམ་པ་མི་ནུས་པར་འགྱུར་རོ། །གཞན་དག་ཤིན་ཏུ་སྐྲངས་པ་དང་། །གནས་སྐབས་ཀུན་ཏུ་རབ་ཏུ་ན། །བསྐྱོད་པ་ཆུང་ངུ་འང་མི་ནུས་ཤིང་། །བཙིར་ན་སྒྲ་དང་བཅས་པ་ཡིན། །ཞེས་བྱ་བ་ལ། ཚིགས་སུ་ཆག་པ་མ་ཡིན་པ་དག་ནི་ཤས་ཆེར་སྐྲངས་པ་

གནས་སྐབས་ཐམས་ཅད་དུ་ཡང་མི་བཟད་པར་ན་བ་དང་། བསྒུལ་བསྐྱོད་ཀྱི་རྩོལ་བ་ཆུང་དུ་ཡང་མི་ནུས་པ་དང་། བཙིར་ན་འཁོར་ཞིང་སྒྲ་དང་བཅས་པ་ཡིན་ནོ། །དེ་ལྟར་ཆག་གྲུགས་མདོར་བསྡུས་པའི། །མཚན་ཉིད་ཡིན་ཏེ། ཞེས་བྱ་བ་ལ།
དེ་ལྟར་བཤད་མ་ཐག་པའི་ཚུལ་གྱིས་ན་ཆགས་གྲུགས་ཀྱི་མཚན་ཉིད་མདོར་བསྡུས་ནས་བཤད་པ་ཡིན་ནོ། །དེའི་དབྱེ་བ། ཆག་པའི་དབྱེ་བས་དུ་མར་འགྱུར། །ཞེས་བྱ་བ་ལ། དེའི་མཚན་ཉིད་ཀྱི་དབྱེ་བ་ནི་ཆག་པའི་ཚུལ་རྣམ་པ་དུ་མར་གྱུར་བ་ཡིན་ནོ། །དེ་དག་ཀུན་གྱི་གསོ་བ་ནི། །
ཇི་ལྟར་འཚམ་པ་བཞིན་དི་ནི། །དེ་བཞིན་དེ་ནི་ཉེ་བར་བསྟན། །ཞེས་བྱ་བ་ལ། ཆག་གྲུགས་དེ་ཐམས་ཅད་ཀྱི་གསོ་བ་གང་ལ་ཇི་ལྟར་འཚམ་པ་བཞིན་དུ་བསྟན་པ་ཡིན་ནོ། །མང་དུ་ཕྲ་མོར་ཆག་པ་དང་། །རེག་ན་སྒྲ་ནི་འཁྲོལ་བ་དང་། །གང་དུ་རུས་པ་ཆག་པ་ཡི། །བར་དུ་རུས་པ་ཕྲ་མོ་
ཞུགས། །ཡང་ན་སྣད་པས་ཆག་པ་ལས། །ཅུང་ཟད་ལུས་བར་གྱུར་པ་དང་། །གང་ཡང་བཏེག་པའི་ཚེ་ན་ནི། །རྨ་ལྟར་རྐང་དུ་ནུབ་པ་དང་། །ནུས་ཞན་སྦེག་པར་གྱུར་པ་དང་། །རླུང་ཅན་ཉུང་ཟད་སྦང་བར་བྱ། ཞེས་བྱ་བ་ལ། གང་ཡང་རུས་པ་ཕྲ་མོར་མང་དུ་ཆག་ཅིང་གྲུགས་
པར་གྱུར་བ་དང་། རེག་ན་སྒྲ་འབྱུང་བ་དང་། གང་དུ་རུས་པ་གས་ཤིང་ཆག་པའི་ནང་ངམ། བར་དུ་རུས་པ་ཕྲ་མོ་ཞུགས་པར་གྱུར་པ་དང་། ཡང་གང་ཞིག་སྣད་ནས་ཆག་པ་ལས་མ་ཆག་པར་ཅུང་ཟད་ལུས་པར་གྱུར་པ་དང་། ཡང་ན་གང་ཞིག་གྱེན་དུ་བཏེག་ཅིང་དྲགས་པའི་ཚ་རྨ་
ལྟར་རྐང་གི་ནང་དུ་རུས་པ་ནུབ་པར་གྱུར་བ་སྟེ། ལྔ་པོ་དེ་དག་ནི་གསོ་བར་དཀའ་བ་ཡིན་ནོ། །དེ་བཞིན་དུ་ནུས་པ་ཞན་པ་དང་། སྦེག་པར་གྱུར་བ་དང་། རླུང་ནད་ཀྱི་ཤས་ཆེ་བ་དང་། ཟས་ཉུང་ཤས་ཤིག་ཟ་བ་དག་གི་རུས་པ་ཆག་གྲུགས་སུ་གྱུར་པ་གང་ཡིན་པ་དེ་ཡང་གསོ་བར་དཀའ་
བ་ཡིན་ནོ། །དབྱི་ཡི་རུས་མིག་ཆག་པ་དང་། །གང་ཡང་ཚིགས་བྱེ་ལྟུང་བ་དང་། །རོ་སྨད་ཞིབ་ཏུ་གྲུགས་པའམ། །ཆག་པར་གྱུར་པ་གང་ཡིན་དང་། །ཐོད་པའི་མཚམས་ནི་མ་འབྱོར་པ་འམ། །དེ་བཞིན་དཔྲལ་བ་ཕྱེ་མར་གྱུར། །གང་ཡང་མུར་འགྲམ་ཆག་པ་དང་། །

ལྟག་པ་ནུ་མའི་བར་ཆག་སྤང་། །ཞེས་བྱ་བ་ལ། དཔྱིའི་རུས་མིག་ཆག་པར་གྱུར་པ་དང་། གང་ཚིགས་ལས་བྱེ་ཞིང་འཕོས་ཏེ་ལྷུང་བར་གྱུར་པ་དང་། །རོ་སྨད་ཤིན་ཏུ་ཕྱེ་མར་བཏགས་པ་ལྟར་གྲུགས་པའམ་མ་ཆག་པ་གང་ཡིན་དེ་སྡང་བར་བྱའོ། །དེ་བཞིན་དུ་ཐོད་པའི་མཚམས་
འབྱོར་བའམ་གྱུར་བའམ། དེ་བཞིན་དུ་དེ་ཕྱེ་མར་གྱུར་པ་གང་པ་གང་ཡིན་པ་འམ་སྤང་བར་བྱའོ། །ཡང་མུར་འགྲམ་ཆག་པར་གྱུར་པ་དང་། མགོ་བོའི་ལྟག་པ་དང་ནུ་མའི་བར་དུ་ཆག་ཅིང་གྲུགས་པ་གང་ཡིན་པ་དེ་ཡང་གསོ་མི་རུང་བས་སྤང་བར་བྱའོ། །རུས་པ་ལེགས་པར་ཆག་གྱུར་ཀྱང་། །
བཞག་ཉེས་བཅིང་ནི་ཉེས་པ་དང་། །གང་ཞིག་བསྐྱོད་པས་གནོད་གྱུར་པ། །དེ་ཡང་སྤང་བར་བྱ་བ་ཡིན། །གདོད་ནས་རུས་པའི་ཚིགས་དག་ནི། །ཉེས་པར་སྐྱེས་གྱུར་དེ་ཡང་སྤང་། །ཞེས་བྱ་བ་ལ། རུས་པ་ཆག་པ་གསོ་བླ་བ་ཡིན་ཡང་བཞག་ཉེས་པ་ལ་སོགས་པའི་རྒྱུས་གནོད་པར་གྱུར་
ཅིང་མ་རུངས་པར་གྱུར་པའི་ཆག་གྲུགས་དེ་ཡང་སྤང་བར་བྱའོ། །གཞན་ཡང་རུས་པ་གང་དང་པོ་ཉིད་ནས་སྐྱེ་མ་ལེགས་ཤིང་ཉེས་པར་སྐྱེས་པ་འམ། ཡང་ན་ཚིགས་གང་གདོད་མ་ནས་ཉེས་པར་སྐྱེས་པ་དེ་ཡང་སྤང་བར་བྱའོ། རུས་པ་གཞོན་ནུ་གུག་པ་དང་། །སྦུབས་ཅན་ཆག་པར་གྱུར་པ་
དང་། །ཐོད་པ་གྱེས་པར་གྱུར་པ་དང་། །གཞན་ཡང་མང་དུ་གས་པ་རྣམས། །ཞེས་བྱ་བ་ལ། རུས་པ་གཞོན་ཞིང་སྙི་བ་གུག་ཅིང་ཡོན་པོར་གྱུར་པ་དང་། ཡང་སྦུབས་ཅན་ཁོང་སྟོང་གི་རུས་པ་ཆག་པར་གྱུར་པ་དང་། གང་ཡང་ཐོད་པ་ལྟ་བུས་རུས་པ་ཀོར་ཀོར་པོར་འདུག་པ་གྱེས་ཤིང་
དུམ་བུར་གྱུར་པ་དང་། གཞན་ཡང་རུས་པ་གཞན་དག་ཀྱང་མང་དུ་གས་ཤིང་ཞིགས་པར་གྱུར་པ་གསོ་བར་བྱའོ། །དེ་ནས་དམའ་བ་བསྟོད་པར་བྱ། །མཐོན་པོ་མནན་པར་བྱ་བ་ཡིན། །ནང་དུ་ནུབ་པ་དྲང་བར་བྱ། །འོག་ཏུ་སོང་བ་སྟེང་དུ་དྲང་། །ཞེས་བྱ་བ་ལ། དེ་ནས་རུས་པ་དམའ་
བར་གྱུར་པ་ལ་བསྟོད་ཅིང་འདེགས་པར་བྱའོ། །འོན་ཏེ་སྔ་མའི་སོ་ལས་མཐོན་པོར་གྱུར་པ་ནི་མནན་ཅིང་བཙིར་བར་བྱའོ། །ནང་དུ་ནུབ་པ་ནི་ཕྱིར་དྲང་བར་བྱའོ། །འོག་ཏུ་སོང་བའི་རུས་པ་ནི་སྟེང་དུ་དྲང་བར་བྱའོ། །འདེགས་དང་མནན་དང་སྨད་པ་དང་། །པགས་པ་བསྡུས་ཏེ་བཅིང་བ་

དང་། །དེ་ལྟར་བཞག་པའི་ཐབས་ཀྱིས་ནི། །ལུས་སུ་གཏོགས་པའི་ཚིགས་ཐམས་ཅད། །གཡོ་བ་འམ་མི་གཡོ་གང་ཡང་རུང་། །ལེགས་པར་བཞག་སྟེ་མི་འགྱུར་བྱ། །རས་མ་མར་ནི་མང་བས་དཀྲི། །ཨུ་དུམ་ཝཱ་ར་ཀ་དམྤ། །ཨ་རྫུ་ན་དང་ཨ་ཤཱཏྠ།
ས་རྫ་དང་ནི་པ་ལ་ཤ། །འོད་མ་ལས་བྱུང་ཤུན་ཞེང་ཆེ། །འཇམ་པ་ལེགས་པར་འཇར་བ་དང་། །རྟེན་དང་བཅས་ཤིང་མི་འགྱུར་བའི། །ཤུན་པ་འམ་དུམ་བུ་དག་དང་ནི། །འཇག་མས་ལེགས་པར་དཀྲི་བྱ་ཞིང་། །རས་ཀྱིས་སྟེད་དུ་གླན་པར་བྱ། །ཞེས་བྱ་བ་ལ། འདེགས་པ་ལ་སོགས་
པ་རུས་པ་མཉམ་དུ་འཇོག་པའི་ཐབས་ཀྱིས་ལུས་སུ་གཏོགས་པའི་ཚིགས་གཡོ་བའམ་མི་གཡོ་བའི་ཚིགས་དང་། ཆག་གྲུགས་ཐམས་ཅད་ལེགས་པར་བཞག་སྟེ་མི་འགྱུར་བར་བྱས་ལ། དེའི་འོག་ཏུ་རས་མར་མང་པོ་དང་བཅས་པས་དཀྲིས་ལ། དེའི་འོག་ཏུ་ཨུ་དུམ་ཝཱ་ར་ལ་སོགས་པའམ།
འོད་མ་ལས་བྱུང་བའི་ཤིང་ཤུན་ཞེང་ཆེ་ཞིང་འཇམ་པ་ལེགས་པར་འཇམ་བརྟེན་དང་བཅས་པ་མི་འགྱུར་པ་དག་གིས་གླན་པ་དང་། འཇག་མ་རས་མས་དཀྲིས་པའི་སྟེང་དུ་དཀྲི་བར་བྱའོ། །བཅིང་བ་ལྷོད་པར་གྱུར་པ་ཡིས། །མཚམས་སྦྱོར་བརྟན་པོར་མི་འགྱུར་རོ། །དམ་པོས་ཤིན་ཏུ་ན་ཞིང་ཚ། །
རྣག་དང་སྐྲང་པ་འབྱུང་བར་འགྱུར། །ཞེས་བྱ་བ་ལ། གང་གི་ཕྱིར་བཅིང་བ་དེ་ལྷོད་པར་གྱུར་ན་ནི་རུས་པའི་མཚམས་འབྱོར་བ་བརྟན་པོར་མི་འགྱུར་ཏེ། ཤིག་ཤིག་པོར་འགྱུར་རོ། །གལ་ཏེ་བཅིང་བ་དང་དམ་དྲགས་ན་ནི་ན་བ་དང་ཚ་བ་ལ་སོགས་པ་འབྱུར་བར་འགྱུར་རོ། །སོ་གའི་དུས་སུ་ཞག་
གསུམ་གསུམ། །དགུན་གྱི་དུས་སུ་བདུན་ནས་དགྲོལ། །ཐུན་མོང་དུས་སུ་ཞག་ལྔ་ནས། །ཡང་ན་ཆག་པའི་དབང་ལས་དགྲོལ། །ཞེས་བྱ་བ་ལ། ཆག་གྲུགས་བཅིངས་པ་ནི་སོ་ག་ཚ་བའི་དུས་སུ་ཞག་གསུམ་གསུམ་ནས་དགྲོལ་ཞིང་བཅོས་པར་བྱའོ། །དགུན་སྟོད་དང་དགུན་སྨད་གྲང་
བའི་དུས་སུ་ནི་ཞག་བདུན་བདུན་ནས་དགྲོལ་ཞིང་བཅོས་པར་བྱའོ། །ཐུན་མོང་གི་དུས་ཏེ་དྲོ་གྲང་གི་དུས་རན་པ་སྟོན་དང་དཔྱིད་ཀྱི་དུས་སུ་ཞག་ལྔ་ལྔ་ནས་བཅོས་པར་བྱའོ། །ཡང་ན་ཆག་གྲུགས་སམ་ནད་ཚབས་ཆེ་ཆུང་གི་དབང་དུ་བྱས་ནས་ཆིངས་མ་བཀྲོལ་ཞིང་བཅོས་པར་བྱའོ། །དེ་ནས་ནྱ་

གྲོ་ངྷ་སོགས་པའི། །ཁུ་བ་བསིལ་པའི་ཆུ་བླུགས་བྱ། །ཞེས་བྱ་བ་ལ། དེའི་འོག་ཏུ་ཚིགས་ཆག་པར་གྱུར་དེ་ནྱ་གྲོ་དྷ་ལ་སོགས་པའི་ཁུ་བ་བསིལ་བའི་སྨན་ཆུ་བླུགས་པར་བྱའོ། །དེ་ནི་ནད་བཅས་རྩ་བ་ལྔ། །འོ་མ་བསྐོལ་བ་བླུགས་པར་བྱ། །ཞེས་བྱ་བ་ལ། ཆག་གྲུགས་བཅིངས་
པས་དེ་ནད་དང་བཅས་པར་གྱུར་ན་ནི་རྩ་བ་ལྔ་པ་དང་འོ་མ་བསྐོལ་བ་བླུགས་པར་བྱའོ། །མཁས་པས་ཏིལ་མར་འཁོར་ལོས་བཙིར། །རླུང་འཇོམས་སྨན་དང་བཅས་པ་ནི། །དྲོ་འཇམ་ཙམ་ནི་བསྐུ་བར་བྱ། །དུས་དང་ཡུལ་གྱི་དབྱེ་བས་བྱ། །ཞེས་བྱ་བ་ལ། འཁོར་ལོས་བཙིར་བའི་
ཏིལ་མར་དང་། །རླུང་འཇོམས་པའི་སྨན་དང་བཅས་པ་བསྐོལ་བའི་ཏིལ་མར་དྲོ་འཇམ་ཙམ་དག་ཀྱང་དུས་ལ་སོགས་པའི་དབྱེ་བ་ལས་དཔགས་ཏེ་སྨན་པ་མཁས་པས་གཏང་བར་བྱའོ། །ཁུ་བ་ཤིན་ཏུ་གྲང་མོ་ནི། །རྒྱུན་དུ་བླུགས་ཤིང་ལྡེ་གུས་བསྐུ། །ཞེས་བྱ་བ་ལ། གཞན་ཡང་ལྡེ་གུས་
བསྐུ་བ་དང་། སྨན་ཆུ་བླུགས་པ་དག་ཀྱང་རྒྱུན་དུ་བྱའོ། །བ་གསར་འོ་མ་མར་དང་བཅས། །མངར་བའི་སྨན་དང་བསྐོལ་བ་དག །རྒྱ་སྐྱེགས་ཁུ་བར་བཅས་པ་ནི། །ཆག་གྲུགས་ཅན་ལ་ནང་རེ་བླུད། །ཅེས་བྱ་བ་ལ། བ་གསར་བ་ནི་ལན་ཅིག་བེའུ་བཅས་པའི་བ་སྟེ། དེའི་འོ་མ་དང་།
མར་དང་། །མངར་བའི་སྨན་དང་བསྐོལ་བ་རྒྱ་སྐྱེགས་ཀྱི་ཁུ་བ་དང་བཅས་པ་གྲང་མོ་དག་ཆག་གྲུགས་ཅན་གྱི་ནད་པ་ལ་ནང་རེ་བླུད་པར་བྱའོ། །ཆག་གྲུགས་རྨ་དང་བཅས་པ་ནི། །རྨ་ལ་ཤིང་མངར་མར་ཤས་ཆེ། །ལྡེ་གུས་བསྐུ་བ་འམ་ཡང་ན་ནི། །ལྷག་མ་ཆག་གྲུགས་ལྟ་བུར་གསོ། །ཞེས་
བྱ་བ་ལ། ཆག་གྲུགས་རྨ་བྱུང་བ་དང་བཅས་པ་ལ་ནི། རྨ་སྨན་གྱི་ཁུ་བ་ཤིང་མངར་དང་མར་གྱི་ཤས་ཆེ་བའི་ལྡེ་གུས་བསྐུ་བར་བྱའོ། །གསོ་བ་གཞན་དག་ནི་ཆག་གྲུགས་གསོ་བ་དང་མཐུན་པར་བྱའོ། །རྨ་ཡི་ཤ་ནི་འཕྱང་བ་ལ། །སྦྲང་རྩི་མར་གྱིས་བསྐུས་ནས་ནི། །སྨན་པས་རྨ་ནི་
ཁ་སྦྱར་ནས། །བཅིང་བ་དག་ཀྱང་ལེགས་པར་བྱ། །ཞེས་བྱ་བ་ལ། རྨའི་ཤ་ཆད་དེ་འཕྱང་བ་ལ་ནི་སྦྲང་རྩི་དང་མར་སར་སྦྱར་བས་བསྐུས་ལ། དེའི་འོག་ཏུ་སྨན་པས་ཁ་ལེགས་པར་སྦྱར་ནས་བཅིང་བ་ལྟར་འཆམ་པ་དག་གིས་ཀྱང་ལེགས་པར་བཅིང་བར་བྱའོ། །དེ་ནི་མཉམ་ཞིང་

ལེགས་བཞག་ནས། །པྲི་ཡང་ཀུ་དང་ཀད་པ་ལ། །སང་ཕྲོམ་བཅོད་དང་ད་ཏ་ཀིའི། །ཕྱེ་མས་ལེགས་པར་གདབ་བྱའམ། །ཞེས་བྱ་བ་ལ། རྨ་དེ་མཉམ་ཞིང་ལེགས་པར་གནས་པར་གྱུར་པར་ཤེས་ནས་གན་དྷ་པྲི་ཡང་ཀུ་ལ་སོགས་པའི་ཕྱེ་མ་ལེགས་པར་
གདབ་པར་བྱའོ། །སེང་ཕྲོམ་ད་ཏ་ཀིའི་ཕྱེ་མ། །བཏབ་ན་མྱུར་དུ་འཚོ་བར་འགྱུར། །ཞེས་བྱ་བ་ལ། ཡང་ན་ད་ཏ་ཀི་དང་སེང་ཕྲོམ་གཉིས་ཀྱི་ཕྱེ་མ་རྨ་ལ་གདབ་པར་བྱ་སྟེ། སྦྱར་བ་དེ་དག་གིས་ནི་རྨ་མྱུར་དུ་འཚོ་བར་འགྱུར་རོ། །དེ་ལྟར་ཆགས་གྲུགས་གསོ་བ་ཡིན། །ཞེས་བྱ་བ་ལ། དེ་
ལྟར་བཤད་མ་ཐག་པའི་རྣམ་པས་ཆག་གྲུགས་གསོ་ཞིང་བཅོས་པར་བྱའོ། །ལུས་ཟུངས་བརྟན་ལ་དགུན་གྱི་ཚེ། ཤ་ཆེན་ནད་གཞི་ཆུང་བའི་རྨ། །གསོ་སླ་གཞན་ནི་གསོ་བར་དཀའ། །ཞེས་བྱ་བ་ལ། སྐྱེས་བུ་ལུས་ཟུངས་བརྟན་པ་ལ་སོགས་པའི་རྒྱུས་ནི་རྨ་གསོ་བར་སླ་བ་ཡིན་
ལ། དེ་ལས་གོ་བཟློག་པ་སྟེ། ལུས་ཟུངས་མི་བརྟན་ཞིང་སྦེག་པ་དང་། སོ་ག་ལ་སོགས་པའི་ཚེ་དང་། ཤ་ཆུང་བ་དང་། ནད་གཞི་ཤས་ཆེ་བའི་རྨ་ནི་གསོ་བར་དཀའ་བ་ཡིན་ནོ། །ན་ཚོད་དང་པོ་བར་མ་མཐའ། །ཟླ་གཅིག་གཉིས་དང་གསུམ་རིམ་གྱིས། །ཆོ་ག་ཇི་སྐད་
བཤད་བསྟེན་ན། །རྨ་འབྱོར་བརྟན་པར་གྱུར་བ་ཡིན། །ཞེས་བྱ་བ་ལ། ན་ཚོད་དང་པོ་དང་བར་མ་དང་ཐ་མ་སྟེ་བྱིས་པ་དང་ལང་ཚོ་ལ་བབ་པ་དང་། རྒན་པོར་གྱུར་པ་ནི་གོ་རིམས་བཞིན་དུ་ཟླ་བ་གཅིག་དང་ཟླ་བ་གཉིས་དང་། ཟླ་བ་གསུམ་གྱིས་རྨ་འབྱོར་པ་བརྟན་པར་འགྱུར་ཏེ། དེས་
ན་བྱིས་པ་དག་ནི་ཟླ་བ་གཅིག་གིས་སོ། །དར་ལ་བབ་པ་དག་གིས་ནི་ཟླ་བ་གཉིས་སོ། །རྒན་པོ་དག་ནི་ཟླ་བ་གསུམ་གྱིས་རྨ་འབྱོར་པ་བརྟན་པར་འགྱུར་ཏེ། དེ་ཡང་ཇི་སྐད་བཤད་པའི་རྨ་གསོ་བའི་ཆོ་གའི་འབྱོར་བ་བསྟེན་ན། དེ་ལྟར་འགྱུར་གྱི་གཞན་དུ་ནི་མ་ཡིན་ནོ། །རྐེད་པ་རྗེ་ངར་བརླ་
ཆག་ན། །སྤང་ལེབ་ལ་ནི་ཉལ་ན་ཕན། །དེ་བཞིན་བསྡོམ་ཕྱིར་ཕུར་བུ་ལྔ། །བྱས་ནས་ཉ་བར་བརྟོད་བྱ་སྟེ། །རྗེ་ངར་ངོས་གཉིས་ལ་གཉིས་གཉིས། །རྐང་མཐིལ་དྲང་པོར་གཅིག་གཞག་བརྟོལ། །ཅེས་བྱ་བ་ལ། རྐེད་པ་ལ་སོགས་པ་ཆག་པ་ལ་སྦང་ལེབ་ངོས་འཇམ་པའི་སྟེང་དུ་ཉལ་

ན་ཕན་ལ། དེ་བཞིན་དུ་ལུས་མ་འཆོལ་བར་བསྡམ་པའི་ཕྱིར་ཕུར་བ་ལྔ་ལ་བརྟོད་པར་བྱ་སྟེ། དེ་ཡང་རྗེ་ངར་གྱི་ངོས་གཉིས་ལ་ཕུར་བ་གཉིས་དང་། རྐང་མཐིལ་གྱི་དྲང་པོར་ཕུར་པ་གཅིག་བཙུགས་ཏེ་བརྟོད་པར་བྱའོ། །སྟ་ཟུར་རམ་ནི་སྒལ་ཚིགས་སམ། །གདོང་དང་དེ་བཞིན་ཕྲག་པ་རུས། །
ཚིགས་བྱུང་ཆག་གྲུགས་བྱུང་གྱུར་ན། །ཆོ་ག་འདི་བཞིན་སྦྱད་པར་བྱ། །ཞེས་བྱ་བ་ལ། སྟ་ཟུར་ལ་སོགས་པའི་ཚིགས་བྱུང་ཞིང་ཆག་གྲུགས་སུ་གྱུར་པ་ལ་ཡང་བཤད་མ་ཐག་པའི་ཆོ་ག་འདི་བཞིན་དུ་སྦྱར་བར་བྱ་སྟེ། དེ་རྣམས་ལ་ཡང་སྤང་ལེབ་ལ་ཉལ་བ་ལ་སོགས་པ་བྱའོ། །ཚིགས་
ནི་བྱུང་ནས་ཡུན་རིང་ལ། །སྣུམ་བསྐུ་དུགས་ཀྱིས་མཉེན་བྱས་ཏེ། །འདི་བཤད་ཐབས་དང་རང་གི་བློས། །རང་གི་གནས་སུ་ལེགས་པར་གཞུག །ཅེས་བྱ་བ་ལ། ཚིགས་བྱུང་ནས་ཡུན་རིང་པོ་ལོན་པ་ལ་ནི་སྣུམ་དང་དུགས་ལ་སོགས་པའི་སྣུམ་གྱིས་ཞེན་ཅིང་མཉེན་པར་བྱས་ནས། བརྟན་
པར་གྱུར་ནས་འདེགས་པ་དང་མནན་པ་ལ་སོགས་པའི་ཆོ་ག་ཇི་སྐད་བཤད་པའི་ཐབས་དང་། རང་གི་བློས་ཀྱང་ཅི་རིགས་པར་རྗེས་སུ་དཔགས་ཏེ་རང་གི་གནས་སུ་ལེགས་པར་གཞུགས་པར་བྱའོ། །ཚིགས་མིན་ཆག་སྟེ་འདྲུབས་པ་དང་། །བཅིང་ཉེས་པ་ཡིས་གསོས་པ་ལ། །བརྡུངས་ཏེ་
ཆག་གྲུགས་བསྲང་བར་བྱ། །དེ་ནས་ཆག་གྲུགས་བཞིན་དུ་གསོ། །ཞེས་བྱ་བ་ལ། ཚིགས་མ་ཡིན་པའི་ལུས་ཀྱི་ཕྱོགས་སུ་ཆག་སྟེ་རྨ་འདྲུབས་པར་གྱུར་པ་དང་། དེ་བཞིན་དུ