Luận tạng Tây Tạng (Tengyur) — Tập 184

ཞིན་དུ་ཤི་བའི་རྗེས་ཐོགས་སུ། སྲིད་པ་བར་མ་འདི་རིམ་གྱིས་སམ། ཡང་ན་མོད་ཁོ་ན་ལ་ཕ་མའི་ཁུ་བ་ལ་སོགས་པས་སྐྱེས་པའི་ལུས་ཀྱི་རང་བཞིན་དུ་ཡང་སྐྱེ་བར་འགྱུར་ཞིང་། དེ་ཉིད་ཡིན་ནོ་ཞེས་བྱ་བའི་གདགས་པ་ལ་ལྟོས་པར་ཡང་འགྱུར་བ་ཡིན་ནོ། །གང་
གི་ཕྱིར་དེ་ལྟར་རྣམ་པར་ཤེས་པའི་རང་བཞིན་གྱིས་ནུས་པ་གཞན་མེད་པ་དེའི་ཕྱིར་རོ། །གང་ལ་བྱ་བ་དང་བཅས་པར་འགྱུར་བ་ཞེས་བྱ་བ་ནི་དམིགས་པར་བྱེད་པ་ཉིད་ཡིན་པར་འགྱུར་བའོ། །ལུས་ཀྱི་རྟེན་ཅན་རྣམ་པར་ཤེས་པའི་ནུས་པ་ཞེས་བྱ་བ་ལ། གཟུགས་ལ་སོགས་པ་ཡུལ་དུ་འདོད་པའི་རྣམ་པར་
སྣང་བ་དེས་རང་བཞིན་གཞན་ནི་ཡོད་པ་མ་ཡིན་ནོ། །འོན་ཀྱང་དེ་ལྟ་བུར་གྱུར་པ་ཞེས་བྱ་བ་དང་། ལུས་དང་གཞན་གྱི་རང་བཞིན་དུ་ཡོངས་སུ་གྱུར་པ་ནི་རང་རིག་པ་ཉིད་ཀྱིས་ཤེས་པ་ཡིན་ཏེ། གཞན་གྱིས་རིག་པ་ཉིད་ནི་ཡང་ནས་ཡང་དུ་བཀག་པའི་ཕྱིར་རོ། །འོ་ན་ཅི་ལྟར་ཀ་བ་ལ་སོགས་པ་མི་གཡོ་ཞེས་སྦྲེལ་ཏོ། །དེའི་
བདག་ཉིད་ཀྱིས་འཕོ་བ་ཞེས་བྱ་བ་ནི་ཀ་བའི་རྣམ་པར་ཡོངས་སུ་འགྱུར་རོ། །དེ་ཡང་ཞེས་བྱ་བ་ནི་ཀ་བ་ལ་སོགས་པ་ལ་ཡང་ངོ་། །དེ་ནི་མ་ཡིན་ཏེ་ཞེས་བྱ་བ་ནི་གྲུབ་པའི་མཐའོ། །རྣམ་པར་ཤེས་པའི་བདག་ཉིད་དུ་སྐྱེས་པ་ཙམ་གང་ཡིན་པ་དེ་ཙམ་འབའ་ཞིག་གིས་ནི་གཡོ་བ་མ་ཡིན་ནོ། །འོ་ན་ཅི་ལྟར་གཡོ་བར་འགྱུར་
སྙམ་ན། རེག་པའི་རྣམ་པར་ཤེས་པ་ཞེས་གསུངས་སོ། །དགོངས་པ་ནི་འདི་ཡིན་ཏེ། རྣམ་པར་ཤེས་པའི་བདག་ཉིད་ཡིན་པ་ཙམ་གྱིས་ནི་གཡོ་བ་མ་ཡིན་གྱི། འོན་ཀྱང་གང་གིས་ལུས་ཉིད་གཡོ་བར་འགྱུར་གྱི། ཀ་བ་ལ་སོགས་པ་ནི་མ་ཡིན་པ། འབད་རྩོལ་གྱི་རང་བཞིན། རེག་པའི་རྣམ་པར་ཤེས་པ་ཉིད་ལ་དེ་འདྲ་བའི་
ནུས་པ་ཡོད་པ་ཡིན་ནོ། །དངོས་པོ་རྣམས་ཀྱི་རང་གི་རྒྱུ་ལས་ངེས་པའི་རང་བཞིན་ལ་ནི་བརྒལ་ཞིང་བརྟག་པ་ཡང་འོས་པ་མ་ཡིན་ནོ། །གང་གི་ཚེ་ཞེས་བྱ་བ་ནི་འཆད་པའོ། །ལུས་ལ་སོགས་པ་ཞེས་བྱ་བ་ནི་ལུས་ལ་སོགས་པ་ཁོ་ན་སྟེ། ཀ་བ་ལ་སོགས་པ་ནི་མ་ཡིན་ཏེ། རེག་པའི་རྣམ་པར་ཤེས་པ་ནི་ནུས་པ་

དེ་འདྲ་བ་ཅན་ཡིན་པའི་ཕྱིར་རོ། །གཞན་དུ་མ་ཡིན་ནོ་ཞེས་བྱ་བ་ནི་རེག་པའི་རྣམ་པར་ཤེས་པ་མེད་པར་རོ། །འདི་ཡང་ཀུན་དུ་ཐ་སྙད་པའི་ཕྱོགས་ལ་བརྟེན་ནས་ལན་བཏབ་པ་ཡིན་ཏེ། དངོས་པོ་ལ་ནི་གཡོ་བ་དང་མི་གཡོ་བ་དག་མེད་པའི་ཕྱིར་ཏེ། དེ་དག་ནི་གཅིག་ཏུ་སྒྲོ་བཏགས་པས་
བྱས་པ་ཡིན་པའི་ཕྱིར་རོ། །འདི་ལྟར་དཔེར་ན་བག་ཆགས་ཀྱི་མཐུ་ལས་ཡུལ་གཞན་དང་གཞན་ཏུ་སྐྱེས་པ་གཞན་དང་གཞན་ཉིད་ཡིན་ན་ཡང་དེ་ཉིད་དུ་སྒྲོ་བཏགས་ནས་གཡོ་བ་བརྗོད་པ་དེ་བཞིན་དུ་གནས་དེར་སྐྱེས་པའི་སྐད་ཅིག་ལ་ཡང་། དེ་ཉིད་དུ་སྒྲོ་བཏགས་ནས་མི་གཡོ་བར་བརྗོད་པ་ཡིན་ནོ། །དེས་ན་
བག་ཆགས་ཀྱི་མཐུ་ལས་དེ་ལྟར་སྐྱེད་པ་དག་ལ། གཡོ་བ་དང་མི་གཡོ་བ་ནི་ཐ་སྙད་པ་ཉིད་དང་། འབད་རྩོལ་གྱི་ནུས་པ་ཡོད་པ་དང་མེད་པ་དག་གིས་བསྒྲུབ་པར་བྱ་བ་ཡང་ཡིན་ནོ། །རྣམ་པ་རྣམས་གཅིག་ཉིད་ཡིན་ན་ནི། གཡོ་བ་དང་མི་གཡོ་བ་དག་སྲིད་པ་ཐག་རིང་བ་ཉིད་དོ་ཞེས་ཕྱིས་སྟོན་པར་འགྱུར་རོ། །
གང་གི་ཕྱིར་རིག་པ་ནི་རང་གི་རང་བཞིན་ལ་འཇུག་པ་ཡིན་པའི་ཕྱིར། བདག་ཉིད་རྡུལ་ཕྲ་རབ་ལས་སྐྱེས་པར་མི་རྟོགས་ལ། དེ་ལྟར་རིག་པར་བྱེད་པ་གཞན་ཡང་མེད་པའི་གཏན་ཚིགས་དེའི་ཕྱིར་རོ། །གཟུགས་ལ་སོགས་པའི་རང་བཞིན་ཉིད་དོ་ཞེས་བྱ་བ་ནི་ཕྱི་རོལ་གྱི་གཟུགས་ལ་སོགས་པའི་རང་བཞིན་ཉིད་དེ།
དེར་འདུ་བའི་ཕྱིར་རོ། །དེ་ལྟ་ན་ཡང་སྔར་བཤད་པའི་ཐལ་བར་འགྱུར་བ་ཉིད་ཡིན་ནོ་ཞེས་མཇུག་སྡུད་པའི་སྒོ་ནས་སྟོན་པ་ནི། དེས་ན་རྡུལ་ཕྲ་རབ་རྣམས་ཞེས་བྱ་བའོ། །གཞན་གྱིས་ཁྱེད་ལ་ཡང་ཞེས་དྲིས་ཏེ། སངས་རྒྱས་པ་ལ་ཡང་ངོ་། །ལན་དུ་དེའི་རྣམ་པ་ཅན་གྱི་ཞེས་གསུངས་ཏེ། རགས་པའི་རྣམ་པ་པོ་མ་ཡོར་གཅིག་
ཏུ་འགྱུར་བའོ། །གཞན་ཞེས་བྱ་བ་ནི་ཕྱི་རོལ་ལས་གཞན་པའོ། །དོགས་པ་པ་ནི་འདི་ཡིན་ཏེ། ཕྱི་རོལ་ནི་རྡུལ་ཕྲ་རབ་ཀྱི་རང་བཞིན་ཡིན་པས། དེ་སྣང་ན་རྡུལ་ཕྲ་རབ་སྣང་བར་ཐལ་བར་འགྱུར་གྱི། གང་གི་ཚེ་རང་གི་རྣམ་པ་མྱོང་བ་ཉིད་ལྷག་པར་ཞེན་པ་ལས་ཕྱི་རོལ་རིག་པ་ཡིན་པ་དང་། དེ་བཞིན་འདི་བདག་ཉིད་ཅི་ལྟ་བ་དེ་
བཞིན་དུ་རིག་པ་ཡིན་པ་དེའི་ཚེ། ཕྱི་རོལ་གྱི་རྗེས་སུ་མཐུན་པ་ལ་བློས་རེག་པ་མ་ཡིན་ནོ་ཞེས་བྱ་བའོ། །འོ་ན་ཅི་ལྟར་འདྲ་བ་ལས་དམིགས་པར་རྣམ་པར་གཞག་ཅེ་ན། རྡུལ་ཕྲ་རབ་ཀྱི་རང་བཞིན་ལ་ནི་རྣམ་པ་ཐམས་ཅད་དུ་སོ་སོའི་སྐྱེ་བོས་རྗེས་སུ་མི་འཇུག་པའི་ཕྱིར་ན། ཁ་དོག་དང་དབྱིབས་ཉིད་ཀྱིས་བྱས་པ་འདྲ་བ་ཡིན་

ཏེ། དེ་ཙམ་ཐོབ་པ་ཉིད་ཀྱིས་འཇིག་རྟེན་གྱི་དོན་གྲུབ་པའི་ཕྱིར་རོ། །དབྱིབས་ཀྱང་ཡུལ་ཅི་འདྲ་བ་མངོན་པར་ཁྱབ་པར་སྐྱེས་པ་དེ་འདྲ་བ་ཐོབ་པ་ཉིད་ལས་རྣམ་པར་གཞག་པར་བྱ་བ་ཡིན་ནོ། །གཞན་གྱིས་ཁོ་བོ་ཅག་གི་ཡང་ཞེས་སྨྲས་སོ། །དེས་ན་རྡུལ་ཕྲ་རབ་སོ་སོར་རིག་པར་ཐལ་བ་མ་ཡིན་ནོ། །སྙམ་དུ་བསམས་པའོ། །
དེའི་རང་བཞིན་ནི་ཤེས་པའི་རང་བཞིན་དུའོ། །རྡུལ་ཕྲ་རབ་རྣམས་ཤེས་པའི་རང་བཞིན་མ་ཡིན་པ་དེ་བརྩམས་པ་ཡན་ལག་ཅན་གྱི་རྫས་རྣམ་པར་ཤེས་པའི་རང་བཞིན་དུ་ག་ལ་འགྱུར་ཞེས་སྔར་བརྗོད་ཟིན་ཏོ། །ཐམས་ཅད་དུ་སྔ་མ་རྗེས་སུ་བརྗོད་པ་ནི་ཁྱད་པར་གྱི་དོན་ཡིན་པར་རིག་པར་བྱའོ། །དེ་ལྟར་ཡང་
རྡུལ་ཕྲ་རབ་དག་ནི་ཐ་དད་པར་འགྱུར་བ་ཉིད་དོ་ཞེས་དོགས་པ་བསུ་ནས། འོ་ན་ནི་ཞེས་ལན་བརྗོད་པ་ཡིན་ནོ། །དེ་ཉིད་སྟོན་པ་ནི་འདི་ལྟར་ཞེས་བྱ་བའོ། །རྡུལ་ཕྲ་རབ་རྣམས་སེམས་པའི་རང་བཞིན་དུ་རྣམ་པར་གནས་པ་ནི་ཡན་ལག་ཅན་གྱི་ལུས་ཀྱི་ངོ་བོ་ཉིད་དུ་ཞེས་བྱ་བ་ལ་སེམས་པ་
ཙམ་དང་། དཀར་ཤམ་ལ་སོགས་པའི་རང་བཞིན་དུ་གནས་པ་ཡིན་ནོ། །དེ་ལྟ་མ་ཡིན་ན་ཡན་ལག་ཅན་དེས་བརྩམས་པ་ཞེས་བྱ་བ་ཉིད་མི་འགྱུར་རོ། །གང་གི་ཕྱིར་ཡན་ལག་ཅན་གྱི་ལུས་ཀྱང་རྡུལ་ཕྲ་རབ་རྣམས་ཀྱི་ངོ་བོ་ཉིད་སེམས་པ་ཅན་ལ་སོགས་པ་ཉིད་དུ་ཞེས་
བྱ་བ་དེས་རྣམ་པར་གནས་ཏེ། སྐྱེ་བ་ཡིན་པ་དེའི་ཕྱིར། རྡུལ་ཕྲ་རབ་རྣམས་སེམས་པ་ཅན་ལ་སོགས་པའི་རང་བཞིན་དུ་ངེས་པ་ཡིན་ནོ། །དེས་ན་རྡུལ་ཕྲ་རབ་སོ་སོར་དམིགས་པར་ཐལ་ལོ། གཟུང་བར་བྱ་བའི་རང་བཞིན་གྱི་རྡུལ་ཕྲ་རབ་མཐའ་དག་སེམས་པ་ཅན་དུ་
འགྱུར་རོ་ཞེས་བྱ་བའི་དོན་ཏོ། །ཉེས་པ་འདི་སྤངས་པའི་དོན་དུ་གཞན་གྱིས་རྡུལ་ཕྲ་རབ་དག་ནི་ཐ་དད་པར་གྱུར་པ་ཉིད་དོ་ཞེས་བརྗོད་པ་ཡིན་པར་སྟོན་པ་ནི། འོན་ཏེ་ཞེས་བྱ་བའོ། །གོ་རིམས་འདིར་རྩོད་པ་འདིའི་ལན་དུ་འགྱུར་རོ་ཞེས་བྱ་བའི་དོན་ཏོ། །འདི་ལ་ལན་དུ་དེ་ལྟ་ཡིན་ན་ཞེས་
བྱ་བའོ། །ལུས་ཀྱི་རང་བཞིན་ཉིད་དུ་མི་འགྱུར་རོ་ཞེས་སེམས་པ་ཅན་ཡན་ལག་ཅན་གྱི་རང་བཞིན་མ་ཡིན་པ་སྟེ། ལུས་ཀྱི་སེམས་པ་ཅན་གྱི་ཡན་ལག་ཅན་གྱི་རང་བཞིན་ཡིན་པའི་ཕྱིར་རོ། །གལ་ཏེ་དེ་ལྟ་ན་ཡང་དེ་དག་མེད་པར་དམ་ཅི་ལྟར་འཆའ་ཞེ་ན། རིག་པར་བྱ་བ་ཉིད་མ་ཡིན་པས་ཞེས་གསུངས་ཏེ།

རྡུལ་ཕྲ་རབ་སོ་སོར་རིག་པར་ཐལ་བས་དེ་ལྟར་ཁས་མི་ལེན་པའི་ཕྱིར་རོ། །གང་གི་ཕྱིར་དེ་ལྟར་གཟུང་བ་དང་འཛིན་པའི་རང་བཞིན་ཡོད་པ་མ་ཡིན་པའི་ཕྱིར་ཏེ། དེའི་ཕྱིར་རྡུལ་ཕྲ་རབ་གཞན་དག་ནི་མེད་པ་ཉིད་དུ་འགྱུར་རོ། །གཟུང་བ་དང་འཛིན་པ་ལ་མ་གཏོགས་པའི་ཕུང་པོ་
གཞན་མི་སྲིད་པའི་ཕྱིར་རོ། །དེའི་ཕྱིར་ཡན་ལག་ཅན་འབའ་ཞིག་གོ་ཞེས་ཁས་བླངས་པར་འགྱུར་རོ། །དེ་ཡང་མ་ཡིན་ཏེ་ཞེས་བྱ་བ་ནི་སུན་འབྱིན་པའོ། །དེ་ནི་རྡུལ་ཕྲ་རབ་ཡོད་པ་ལ་ཡང་མཚུངས་པ་ཡིན་ནོ། །ཅི་ལྟར་ཐམས་ཅད་གཡོ་བར་འགྱུར་སྙམ་ན། གཡོ་བ་དང་མི་གཡོ་བའི་མཚན་ཉིད་འགལ་བ་ཅན་ནི་
གཅིག་པ་མི་རུང་བའི་ཕྱིར་རོ། །གལ་ཏེ་གཡོ་བ་ཉིད་ལས་ཡིན་གྱི་མི་གཡོ་བ་ནི་རང་གི་རང་བཞིན་དུ་གནས་པ་ཙམ་ཡིན་གྱི་ལས་ནི་མ་ཡིན་ན། དེའི་ཕྱིར་ཅི་ལྟར་ལས་ནི་གཅིག་ལ་ཞེས་བརྗོད་ཅེ་ན། བདེན་ཏེ་ལས་ཀྱི་སྒྲས་ནི། ཆོས་ཙམ་ཉེ་བར་མཚོན་པར་བྱ་བ་ཡིན་ནོ། །དེས་ན་འགལ་བའི་ཆོས་དག་གཅིག་ལ་མི་རུང་ངོ་ཞེས་བྱ་
བའི་དོན་ཏོ། །གཞན་དུ་ཞེས་བྱ་བ་ནི་གལ་ཏེ་གཅིག་ཏུ་མངོན་པར་འདོད་པ་ལ་ཡང་འགལ་བ་ཅན་གྱི་ཆོས་གཉིས་ཡོད་ན། དེའི་ཚེ་སོ་སོར་གྲུབ་པར་ཐལ་ཏེ། རྟག་པ་དང་མི་རྟག་པ་ཉིད་ལ་སོགས་པ་བཞིན་ནོ། །གཅིག་པ་ཉིད་ནི་མངོན་པར་རློབ་པ་ཙམ་ཡིན་ནོ་ཞེས་བྱ་བའི་དོན་ཏོ། །རྫས་ཀྱི་མཚན་ཉིད་ནི་བྱ་བ་ཅན། ཡོན་
ཏན་ཅན། འདུ་བ་ཅན་གྱི་རྒྱུ་ཞེས་བྱ་བ་ཙམ་ཡིན་པ་ལ། བར་དུ་ལྡན་པ་ལ་སོགས་པའི་རྒྱུ་ཡིན་ནོ་ཞེས་བརྗོད་པ་ནི་ཇི་ལྟར་འདུ་བ་ཅན་གྱི་རྒྱུ་ཡིན་ཞེས་ཤེས་པར་འདོད་པ་ལ་ལྟོས་ནས་བརྗོད་པ་ཡིན་ནོ། །ལྡན་པ་ལས་དེའི་རྒྱུར་གྱུར་པ་ན་འདུ་བ་ཅན་གྱི་རྒྱུར་གྱུར་པ་ཡིན་ནོ་ཞེས་བྱ་བའི་དོན་ཏོ། །དེ་ལ་སོགས་པའི་
སྒྲས་ནི་ཡོན་ཏན་གྱི་ཚོགས་བཟུང་ནས་ལས་ལྔ་ཡང་འཛིན་ཏོ། །ཡང་ན་སྤྱི་དང་། ནམ་མཁའ་ཆེན་པོ་ཉིད་ལ་སོགས་པའི་འདུ་བ་ཅན་རྟག་པའི་ཚོགས་རྣམ་པར་གཅོད་པས་ལྡན་པ་ལ་སོགས་པའི་རྒྱུ་ཞེས་བརྗོད་པ་ཡིན་ནོ། །དེ་ལ་འདི་ནི་བསྒྲིབས་པ་དང་། མ་བསྒྲིབས་པའི་ཉེས་པ་བརྗོད་པའི་དོན་
དུ་བྲིས་པ་ཡིན་ལ། བྱ་བ་དང་ཡོན་ཏན་ནི་གཡོ་བ་དང་། མི་གཡོ་བ་དང་། ཚོན་གྱིས་བསྒྱུར་བ་དང་། མ་བསྒྱུར་བའི་ཉེས་པ་བརྗོད་པའི་དོན་དུ་ཡིན་ཞིང་འདུ་བ་ཅན་གྱི་རྒྱུ་ནི་ཐམས་ཅད་ཀྱི་ཐུན་མོང་བ་ཡིན་ནོ། །དེ་ལ་རེ་ཞིག་བྱ་བ་ལ་སྦྱོར་བ་དེ་ལ་གལ་ཏེ་ཞེས་བྱ་བའོ། །དེའི་ཞེས་བྱ་བ་ནི་བྱ་བའིའོ། །དོན་འདི་ཡིན་ཏེ་རྫས་

ལ་ཉེ་བ་ཙམ་ནི་སྤྱི་མ་ཡིན་ལ། འདི་ལ་བྱ་བ་དེས་ཟིན་པའི་ཡུལ་ལས་རང་བཞིན་གཞན་ཡང་ཡོད་པ་མ་ཡིན་ནོ། །དེས་ན་གནས་དེ་བཞིན་དུ་ཐམས་ཅད་གཡོ་བར་ཐལ་ལོ། །རྣམ་པ་ཅི་ཞིག་ལྟར་གཞན་གྱི་ལན་དོགས་པར་བྱེད་པ་ནི། །ཡན་ལག་ཅན་ནི་ཞེས་བྱ་བའོ། །དེ་དང་རྗེས་སུ་མཐུན་པའི་ལན་བརྗོད་པ་ནི་
ལྷས་བྱིན་དང་ཞེས་བྱ་བའོ། །གཅིག་ཏུ་ལྷག་པར་ཞེན་པ་མེད་པའི་ཕྱིར་རོ་ཞེས་ནི་བརྗོད་པར་མི་བྱ་སྟེ། ལྷག་པར་ཞེན་པ་ཙམ་ལ་ནི་དངོས་པོ་ལ་ངེས་པ་ཡིན་པར་མི་འཐད་པའི་ཕྱིར་རོ། །འདིར་ལྷག་པར་ཞེན་པ་ཙམ་ནི་མ་ཡིན་གྱི། དེ་ལྟར་རྣམ་པར་འཇོག་པར་བྱེད་པ་ནི་མངོན་སུམ་ཉིད་ཡིན་ནོ་སྙམ་པའི་བསམ་པས་འོན་
ཏེ་ཞེས་བྱ་བའོ། །ལྷ་སྦྱིན་ལ་སོགས་པ་ལ་ནི་མངོན་སུམ་གྱི་རྗེས་ལས་བྱུང་བས་གཅིག་ཉིད་དོ་ཞེས་བྱ་བ་རྣམ་པར་རྟོག་པ་མ་ཡིན་གྱི། ལག་པ་ལ་སོགས་པ་གཡོ་བའི་དུས་ན་ནི་ལུས་གཅིག་ཡིན་ནོ་སྙམ་དུ་མངོན་སུམ་གྱི་དེ་མ་ཐག་ཁོ་ན་ངེས་པར་བྱེད་དོ་ཞེས་བྱ་བའི་དོན་ཏོ། །སུན་འབྱིན་པ་ནི་གཅིག་ཅེས་བྱ་
བ་འདི་ཅི་ཡིན་ཞེས་བྱ་བའོ། །གཅིག་ཉིད་དུ་རྣམ་པར་འཇོག་པར་བྱེད་པ་དེ་གང་ཡིན་པ་ཞེས་བྱ་བའི་དོན་ཏོ། །དངོས་པོ་རྣམས་ལག་པ་གྱེན་དུ་བསྒྲེངས་ནས་བདག་ཉིད་གཅིག་གམ་དུ་མ་ཡིན་ནོ་ཞེས་ནི་མི་སྨྲའོ། །དེ་ཉིད་ཀྱི་ཕྱིར་གལ་ཏེ་ཞེས་རྣམ་པར་འཇིག་བྱེད་ཀྱི་དོགས་པ་བསུ་བ་ཡིན་ནོ། །སྣང་བ་ཐ་མི་དད་པ་གཅིག་
ཉིད་རྣམ་པར་འཇོག་པར་བྱེད་པ་ཡིན་ན་ཞེས་བྱ་བ་ནི་ལྷག་མའོ། །དེ་ནི་མེད་དོ་ཞེས་བྱ་བ་ནི་འགོག་པའོ། །སྣང་བ་ཐ་དད་པ་ནི་མེད་དེ། གཡོ་བ་དང་མི་གཡོ་བ་སྣང་བ་དག་ནི་ཐ་དད་པ་ཁོ་ན་ཡིན་པའི་ཕྱིར་རོ། །འོན་ཏེ་ཞེས་བྱ་བ་ནི་གཞན་གྱིའོ། །གང་ལ་ཆུ་འཛིན་པ་ལ་སོགས་པའི་འབྲས་བུ་གཅིག་ཡོད་པ་དེའི་ངོ་བོ་ནི་འབྲས་
བུ་གཅིག་པ་ཉིད་དོ། །གཅིག་ཏུ་རྣམ་པར་འཇོག་པར་བྱེད་པ་དེ་ཡིན་ན། དེ་ཡང་མ་ངེས་པ་ཉིད་ཡིན་ནོ་ཞེས་སྟོན་པ་ནི། གལ་ཏེ་ཞེས་བྱ་བའོ། །ས་བོན་དང་ཆུ་དང་ས་ལ་སོགས་པ་ལྟ་བ་དུ་མས་ཀྱང་ནི་འབྲས་བུ་གཅིག་བྱེད་པ་མཐོང་བའི་ཕྱིར་དང་། སྐོར་ཆོམས་ཀྱི་ཕྱིར་ཡང་གསལ་བའི་ཕྱིར་རོ། །ལྷག་མ་ནི་གསལ་བའི་
ཕྱིར་རྣམ་པར་མ་ཕྱེའོ། །གཉིས་པ་སུན་འབྱིན་པ་ནི་ཡན་ལག་ཅན་བསྒྲིབས་པ་ན་ཞེས་བྱ་བའོ། །ལྡན་པ་ཁྱད་པར་མེད་པའི་ཕྱིར་རོ་ཞེས་པ་ནི། གང་གི་ཚེ་གོས་ལ་སོགས་པས་ཡན་ལག་ཅན་གྱི་ཆ་བསྒྲིབས་པ་དེའི་ཚེ། ཡན་ལག་ཐམས་ཅད་ལ་ལྡན་པ་འདུས་པར་འགྱུར་བ་ཡིན་ཏེ།

སྔ་མ་བཞིན་དུ་འདུ་བ་ཅན་མ་ཡིན་པའི་ཆ་མེད་པའི་ཕྱིར་ན། ཐམས་ཅད་བསྒྲིབས་པ་བཟློག་ཏུ་མེད་པའི་ཕྱིར་རོ། །འོན་ཏེ་ཡན་ལག་བསྒྲིབས་ཀྱི་ཡན་ལག་ཅན་ནི་མ་ཡིན་ན་སྙམ་དུ་དོགས་ན། ཡན་ལག་བསྒྲིབས་པ་ཡིན་ན་ཞེས་སྨོས་སོ། །ཐམས་
ཅད་ཅེས་བྱ་བ་ནི་ཡན་ལག་ཅན་གྱི་གཟུགས་མ་གོད་པར་རོ། །འོན་ཏེ་ཡན་ལག་གི་སྒོ་ནས་ཡན་ལག་ཅན་གྱི་རང་བཞིན་ཅུང་ཟད་བསྒྲིབས་པ་དེས་ན་ཐམས་ཅད་མཐོང་བ་མ་ཡིན་ནོ་སྙམ་ན། ཡན་ལག་གི་སྒོ་ནས་ཞེས་སྨོས་སོ། །བསྒྲིབས་པའི་ཡན་ལག་འདུས་པའི་ཡན་ལག་ཅན་
ཡང་བསྒྲིབས་པ་ན་ཡན་ལག་ཅན་གྱི་རང་བཞིན་ཅུང་ཟད་ཀྱང་མི་མཐོང་བའམ། དེའི་སྒོ་ནས་བསྒྲིབས་པ་ལས་འདས་ཏེ། མཐོང་ན་ནི་རི་ལ་མཐོང་བར་འགྱུར་རོ་ཞེས་འབྲེལ་ཏོ། །དེ་ལྟར་འདིས་ནི་འགལ་བའི་ཆོས་དང་མཐུན་པའི་ཕྱིར་ཡན་ལག་ཅན་གཅིག་ནི་གང་དུ་ཡང་གྲུབ་པ་མ་ཡིན་ནོ་ཞེས་བརྗོད་པ་
ཡིན་ནོ། །འདི་ཉིད་ཉེ་བར་སྡུད་པ་ནི། །དེ་ཕྱིར་ཚོགས་པ་གཅིག་ཡོད་མིན། །ཞེས་བྱ་བའོ། །ཚོགས་པ་ནི་ཡན་ལག་ཅན་ནོ། །དུ་མ་ཉིད་ནའང་སྔ་མ་བཞིན། །ཞེས་བྱ་བ་ཉིད་བཤད་པ་བྱེད་པའི་འདོད་པས་སུན་འབྱིན་པའི་ངག་ཡིན་ནོ། །རྡུལ་ཕྲ་རབ་ཀྱི་ཚོགས་ཙམ་ཡིན་ན་སྔ་མ་བཞིན་དུ་རྡུལ་ཕྲ་རབ་སོ་སོར་རིག་
པར་ཐལ་བར་འགྱུར་རོ། །ཐལ་བ་འདི་ལ་གཞན་གྱི་དོགས་པ་བསུ་བ་ནི་ཁྱད་པར་མེད་ཕྱིར་ཞེས་བྱ་བའོ། །རྟོགས་མིན་ཞེས་བྱ་བ་ནི་རྡུལ་ཕྲ་རབ་སོ་སོར་དམིགས་པ་མ་ཡིན་པའོ། །ལན་ནི་ཁྱད་པར་མེད་པར་མ་གྲུབ་ཅེས་བྱ་བའོ། །ཅིའི་ཕྱིར་ཞེ་ན། ཁྱད་པར་ཅན་རྣམས་ནི་ཞེས་བྱ་བའོ། །གང་གི་
ཕྱིར་རྡུལ་ཕྲ་རབ་ཁྱད་པར་ཅན་རྣམས་དབང་ཡུལ་ཏེ། དམིགས་པར་བྱ་བ་ཡིན་པ་དེའི་ཁྱད་པར་མ་གྲུབ་པོ། །རྡུལ་ཕྲ་རབ་ཀྱི་རང་བཞིན་ལས་འདས་པ་མ་ཡིན་ཡང་དམིགས་པར་བྱ་བ་མ་ཡིན་པའི་རྡུལ་ཕྲ་རབ་དག་ལས། དམིགས་པར་བྱ་བའི་རྡུལ་ཕྲ་རབ་རྣམས་ཁྱད་པར་མེད་པར་རིགས་པ་ནི་མ་
ཡིན་ནོ། །རྡུལ་ཕྲ་རབ་ཀྱི་ཚོགས་ལས་མ་གཏོགས་པའི་ཕྱི་རོལ་གཞན་ཡང་དམིགས་པ་མ་ཡིན་ནོ། །འདིས་ནི་ཁྱད་པར་མེད་ཕྱིར་དང་། །ཞེས་བྱ་བའི་གཏན་ཚིགས་མ་གྲུབ་པར་བརྗོད་པ་ཡིན་ནོ། །ཕྲ་རབ་ཕྱིར་ཞེས་བྱ་བ་འདི་ཡང་བརྗོད་པ་ནི་དེ་ཕྱིར་ཕྲ་རབ་མིན་ཞེས་བྱ་བའོ། །དེའི་ཕྱིར་ཞེས་བྱ་བ་ནི་

དབང་པོའི་ཡུལ་ཡིན་པའི་ཕྱིར་རོ། །རྡུལ་ཕྲ་རབ་ནི་གང་ཞིག་དབང་པོའི་སྤྱོད་ཡུལ་མ་ཡིན་པ་དེ་ཉིད་ལ་བརྗོད་པ་ཡིན་ནོ། །གང་གི་ཚེ་འདི་དབང་པོའི་ཡུལ་ཡིན། དེའི་ཚེ་རྡུལ་ཕྲ་རབ་ཉིད་དུ་ཡོད་ཀྱང་མེད་པ་དང་ཁྱད་པར་མེད་པའི་ཕྱིར། དེ་ནི་རྡུལ་ཕྲ་རབ་མ་ཡིན་པ་ཁོ་ནའོ་སྙམ་དུ་དགོངས་པའོ། །དེས་ན་
རྡུལ་ཕྲ་རབ་སོ་སོར་དམིགས་པར་ཐལ་བ་བཟློག་པར་དཀའོ། །གསལ་བའི་ཕྱིར་ན་མཇུག་བསྡུ་བ་ནི་རྣམ་པར་བཀྲོལ་ཏོ། །ལྷག་མ་རྣམ་པར་འགྲེལ་པ་ནི་གལ་ཏེ་ལུས་ཞེས་བྱ་བའོ། །དེའི་ཚེ་ཞེས་ཁོང་ནས་ཕྱུང་ལ། དུ་མ་ཡིན་ན་ཡང་སྡེབ་བོ། །གལ་ཏེ་རིག་པའི་གནས་སྐབས་ཉིད་དམིགས་པ་མ་ཡིན་
ནམ། རིག་པའི་གནས་སྐབས་ན་དམིགས་པར་བྱ་བ་ཡིན་པའི་ཕྱིར་རོ། །ཞེས་ཐ་དད་པར་ཅི་ལྟར་སྟོན་ཞེ་ན། ཤེས་པ་སྐྱེ་བའི་གནས་སྐབས་ན་དམིགས་པ་ཡིན་གྱི། གཞན་གྱི་ཚེ་ན་མ་ཡིན་ནོ་ཞེས་བྱ་བར་དགོངས་པའི་ཕྱིར་ན་ཉེས་པ་མེད་དོ། །དེས་ན་ཤེས་པ་བསྐྱེད་པའི་ནུས་པས་སྔར་གྱི་གནས་སྐབས་ལས་ཁྱད་
པར་ཡོད་པའི་ཕྱིར་དམིགས་པར་བྱ་བ་ཉིད་དུ་རིགས་སོ། །དེ་ཉིད་བརྗོད་པ་ནི་དེས་ན་མི་དམིགས་པ་ལས་ཁྱད་པར་མེད་པ་མ་ཡིན་ནོ་ཞེས་བྱ་བའོ། །མི་དམིགས་པ་ལ་ལྟོས་ནས་ཞེས་བྱ་བ་ལས་ཀྱི་ལྔ་པར་བྱས་ནས། སྒྲུབ་པར་བྱེད་པ་ལ་བྱེད་པས་ཞེས་བསྡུ་བར་བྱའོ། །ཕྲ་རབ་ཕྱིར་ཞེས་བྱ་བ་དེ་ལ་བརྗོད་པ་ནི་དེ་
ཉིད་ཀྱི་ཕྱིར་ཞེས་བྱ་བ་སྟེ། དམིགས་པར་བྱ་བ་ཉིད་ཀྱི་ཕྱིར་རོ། །རང་ཉིད་རིག་པའི་གནས་སྐབས་ན། །ཞེས་བྱ་བ་ནི་རྡུལ་ཕྲ་རབ་རྣམས་ཀྱི་བདག་ཉིད་ཀྱི་རང་བཞིན་གང་ཡིན་པ་དེ་རིག་པའི་གནས་སྐབས་ནའོ། །རྡུལ་ཕྲ་རབ་ཉིད་ཀྱང་ཞེས་བྱ་བ་ནི་ལྷན་ཅིག་སྐྱེས་པ་ཉིད་དོ། །གེགས་བྱེད་པ་མ་ཡིན་ནོ་ཞེས་
བྱ་བ་ནི་དམིགས་པའོ། །ཡོད་ཀྱང་ཞེས་བྱ་བ་ནི་རྡུལ་ཕྲ་རབ་ཉིད་དོ། །རྡུལ་ཕྲན་མ་ཡིན་པ་ནི་མངོན་སུམ་གྱིས་རྟོགས་པའི་ཕྱིར་རོ། །གལ་ཏེ་ལུས་རྡུལ་ཕྲ་རབ་ཀྱི་ཚོགས་ཙམ་དུ་གནས་པའི་ཕྱིར། དེ་རྟོགས་ཀྱང་རྡུལ་ཕྲ་རབ་སོ་སོར་དམིགས་པར་ཐལ་ན། དེའི་ཚེ་ཐལ་བ་འདི་ནི་ཁྱེད་ཅག་ལ་ཡང་འགྱུར་རོ་ཞེས་
སྨྲས་པ་ན། ཁྱེད་ཅག་གི་ཡང་ཞེས་བྱ་བའོ། །ཁྱེད་ཀྱི་ལྟར་ན་ཡང་ཡུལ་ཐམས་ཅད་ནི་རྡུལ་ཕྲ་རབ་ཀྱི་ཚོགས་ཙམ་ཡིན་ཏེ། དེས་ན་རྡུལ་ཕྲ་རབ་སོ་སོར་དམིགས་པར་ཐལ་བར་ཅི་ལྟར་བཟློག་པར་བྱ་སྟེ། རང་གི་རང་བཞིན་དུ་སྣང་བར་འགྱུར་རོ་སྙམ་དུ་བསམས་པའོ། །རང་རིག་པའི་ཞེས་བྱ་བ་ནི་ལན་འདེབས་པའོ། །

རྡུལ་ཕྲ་རབ་སོ་སོའི་རང་བཞིན་དམིགས་པར་བྱེད་པ་ཉིད་ཀྱིས་ཡུལ་དམིགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །འོ་ན་ཅི་ལྟར་སྙམ་ན། འོན་ཀྱང་ཞེས་སྨྲས་སོ། །དེའི་རྣམ་པ་ཅན་ཉིད་ནི་ཁ་དོག་དང་། དེ་ཙམ་གྱིས་ཡུལ་ཁྱབ་པའི་རྗེས་སུ་འཇུག་པས་སོ། །ཅི་ལྟར་རྡུལ་
ཕྲ་རབ་ཀྱི་ཞེས་བྱ་བ་ནི་ཁ་དོག་དང་དབྱིབས་ཀྱི་རྣམ་པ་ཡང་རྡུལ་ཕྲ་རབ་དེ་འདྲ་བ་དག་གིས་བསྐྱེད་པ་ཡིན་པའི་ཕྱིར། དེ་ལས་རྡུལ་ཕྲ་རབ་ཀྱི་རྣམ་པའི་རྗེས་སུ་བྱེད་པ་ཉིད་བཟློག་དཀའོ་ཞེས་བྱ་བའི་ཐ་ཚིག་གོ། །འདི་ནི་འོག་ཏུ་ཞེས་བྱ་བ་ནི་ཅི་ལྟར་སྐྲ་དང་། སྦྲང་མ་ཤ་ལ་སོགས་པ་ཡུལ་བར་དང་
བཅས་པར་གནས་པ་ཡིན་ཡང་ཞེས་བྱ་བ་ལ་སོགས་པའི་སྐབས་སུའོ། །དེ་ལ་རྡུལ་ཕྲ་རབ་ཅི་སྙེད་སྐྱེད་བྱེད་ཡིན་པ་དེ་སྙེད་ཀྱིས་རྡུལ་ཕྲ་རབ་ཀྱི་ཤེས་པ་སྐྱེ་བ་ནི་མ་ཡིན་ནོ་ཞེས་སྟོན་པར་འགྱུར་རོ། །གལ་ཏེ་ཞེས་བྱ་བ་ནི་གཞན་གྱི་ལན་དུ་འདིས་ནི་ཞེས་བྱ་བའོ། །རྡུལ་ཕྲ་རབ་ཁྱད་པར་ཅན་དུ་བསྒྲུབས་
པས་སོ། །རྣམ་འགྲེལ་ལྷག་མ་བཞིས་ནི་སུན་འབྱིན་པ་གཞན་བརྗོད་པ་ཡིན་ནོ། །རྡུལ་ཕྲ་རབ་རྣམས་འབྱར་བ་མེད་པའི་ཕྱིར་ཞེས་བྱ་བ་ནི་འཆད་པའོ། །དེ་མེད་པ་ཞེས་བྱ་བ་ནི་ཡན་ལག་ཅན་མེད་པས་སོ། །གང་དུ་ཞེ་ན། རྡུལ་ཕྲ་རབ་རྣམས་ལའོ། །དེར་མི་འགྱུར་བ་ཞེས་བྱ་བ་ནི་བྱེད་པ་པོའི་ཆོས་ཀྱི་སྒྲིབ་པར་
རོ། །གང་གིས་རྡུལ་ཕྲ་རབ་རྣམས་སྒྲིབ་བྱེད་དུ་མི་འགྱུར་བ་ཞེས་བྱ་བའི་དོན་ཏོ། །དེ་བཞིན་དུ་རྡུགས་པར་བྱེད་པའི་བྱ་བ་ཐགས་པ་ཡང་། ཡན་ལག་ཅན་འབྲེལ་བ་འགར་ཡང་དམིགས་པ་མེད་དོ་ཞེས་བྱ་བ་ལ་སོགས་པར་སྦྱར་རོ། །སོགས་པའི་སྒྲས་ནི་ཆུ་འཛིན་པ་ལ་སོགས་པའོ། །རྡུལ་ཕྲ་རབ་ཀྱི་ཚོགས་
གསེང་དང་བཅས་པ་ཡིན་པས་ན། སྣམ་བུ་ལ་སོགས་པ་ཅི་ལྟར་རིགས་པར་རླུང་ལ་སོགས་པའི་སྐྱབས་སུ་ཅི་ལྟར་འགྱུར། འཆད་པ་ནི་ཕན་ཚུན་ཞེས་བྱ་བ་ལ་སོགས་པའོ། །ཕན་ཚུན་ནང་དུ་འཇུག་པ་ནི་གསེབ་ཏུ་འགྲོ་བ་གང་ཡིན་པ་སྟེ། དེ་ལ་གེགས་མེད་པ་གང་ཡིན་པ་དག་གོ། །དེ་ལ་ལྟོས་ནས་
འདི་དང་། འདི་ལ་ལྟོས་ནས་ཀྱང་དེ་ནང་དུ་འདུ་བ་སྲིད་པ་ཞེས་བྱ་བའི་དོན་ཏོ། །རྡུལ་ཕྲ་རབ་རྣམས་ནི་རེག་གོ་ཞེས་བྱ་བ་ལུགས་ཡིན་པའི་ཕྱིར་རོ། །ལན་ནི་འདིར་བཤད་པ་ཞེས་བྱ་བ་ཡིན་ནོ། །གལ་ཏེ་རེག་པ་རྣམས་འཛིན་པ་ལ་སོགས་པ་བྱེད་མི་ནུས་ན་ཡན་ལག་ཅན་ཉིད་ཅི་ལྟར་སྐྱེད་ཅེས་བྱ་བའི་

དོན་ཏོ། །རེག་གོ་ཞེས་བྱ་བའི་དོགས་པ་བསུ་ནས་རེག་པ་ཡང་ཞེས་སྨོས་སོ། །ཅིའི་ཕྱིར་ཞེ་ན། དེ་མེད་པའི་ཕྱིར་ཏེ། ཕྱོགས་གཅིག་མེད་པའི་ཕྱིར་རོ། །ལྡན་པ་ཞེས་བྱ་བ་ནི་གཞན་གྱིའོ། །བར་དང་བཅས་པ་རྣམས་ལྡན་པ་སྐྱེད་པས་ཡན་ལག་ཅན་སྐྱེད་དོ་ཞེས་འབྲེལ་ཏོ། །ལན་དུ་དེ་ཉིད་ཅེས་བྱ་
བའོ། །རེག་ན་ཞེས་བྱ་བ་ཡང་བཀོད་པ་ནི་ཉེས་པ་གཞན་བརྗོད་པར་འདོད་པས་སོ། །དེ་ཉིད་བརྗོད་པ་ནི་ལྡན་པ་གཞན་ན་མ་ཞེས་བྱ་བའོ། །བར་མཚམས་མེད་པ་ཉིད་ལས་སྐྱབས་ལ་སོགས་པར་འགྲུབ་པའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་ཞེས་བྱ་བ་ནི་བསྐྱེད་བྱ་ལ་དོན་མེད་པར་སུན་འབྱིན་པས་
འཇིགས་པས་ན་བར་དང་བཅས་པ་ཉིད་ཁས་ལེན་པའོ། །ལན་དུ་དེ་ལྟར་ཡིན་ན་ཞེས་བྱ་སྟེ། དེས་ན་བར་གྱི་ཤ་ལྷག་དང་འདྲ་བ་ལྡན་པ་ལ་སོགས་པ་བརྟགས་པས་ཅི་ཞིག་བྱ་ཞེས་བྱ་བར་དགོངས་པའོ། །གལ་ཏེ་ཡན་ལག་ཅན་མེད་ཅིང་རྡུལ་ཕྲ་རབ་རྣམས་ཀྱང་རེག་པ་མ་ཡིན་ན། དེའི་ཚེ་རྡུལ་གྱི་ཕུང་པོ་བཞིན་
དུ་བརྡེགས་ན། སོ་སོར་ཅི་སྟེ་མི་དགྱེས་ཤིང་བར་དུ་བཅས་པས་སྒྲིབ་པ་ལ་སོགས་པ་སྐྱེད་པ་དང་། གསེང་དང་བཅས་པར་ཆུ་ལ་སོགས་པ་འཛིན་པར་ཡང་ཅི་ལྟར་འགྱུར་སྙམ་ན། གང་ལ་ཞེས་བྱ་བ་སྨོས་ཏེ་ཚོགས་པ་གང་ལའོ། །སོ་སོར་དགྱེས་པར་འགྱུར་བ་ནི་སིལ་བུར་འཐོར་བའོ། །དེ་ཞེས་བྱ་བ་
ནི་ཁྱོད་ཀྱིས་བརྩད་པའོ། །རྡུལ་རྣམས་མཆོག་ཏུ་ཚོགས་པ་ཡིན་ཞེས་བྱ་བ་ནི་མཐོང་བ་དང་། མ་མཐོང་བ་དང་། མ་མཐོང་བའི་ཚོགས་པའི་དབང་གིས་མཆོག་ཏུ་ཞེས་བྱ་བ་ཁྱད་པར་ཅན་མཐོང་བ་ཡིན་ནོ། །ཡང་ན་པ་རའི་སྒྲ་ནི་འབའ་ཞིག་གི་དོན་ཡིན་པར་རྡུལ་རྣམས་ཚོགས་པ་འབའ་ཞིག་ཡིན་ཞེས་བྱ་བ་ཡིན་
ཏེ། ཡན་ལག་ཅན་གྱི་རྫས་ནི་མ་ཡིན་ནོ་ཞེས་བྱ་བའི་དོན་ཏོ། །གཉིས་པ་ལ་བརྗོད་པ་ནི་དཔེར་ན་སྒྲ་དང་ཞེས་བྱ་བའོ། །འབྲས་བུ་གཞན་ཡང་ཞེས་བྱ་བ་ནི་སྒྲིབ་པ་ལ་སོགས་པའོ། །དེར་ཞེས་བྱ་བ་ནི་གཞན་གྱིའོ། །སྒྲ་ལ་སོགས་པ་བར་དང་བཅས་པ་ཉིད་ལ་རྣམ་པ་གཅིག་ཏུ་རྟོགས་པ་འདིར་འགྱུར་རོ་ཞེས་བྱ་
བར་ནི་ཡུལ་དེར་ཕྱིན་པ་ལས་གནོད་བྱེད་སྐྱེས་པས་འཇོག་པ་ཡིན་གྱི་སྐབས་ལ་ནི་དེ་ལྟར་གནོད་བྱེད་ཡོད་པ་མ་ཡིན་ནོ་སྙམ་དུ་བསམས་པའོ། །ལན་དུ་འདི་ལ་ཡང་ཞེས་བྱ་བའོ། །གལ་ཏེ་ཞེས་མ་ངེས་པའི་དོན་གྱིས་གནོད་པའམ། སྒྲུབ་པ་ཞེས་བྱ་བ་འདི་སྔ་ན་མེད་པ་ཡིན་ནོ་ཞེ་ན། བདེན་ཏེ་འདིས་ནི་སྲིད་པར་

བསྟན་པ་མ་ཡིན་ཏེ། ཅི་ལྟར་སྒྲ་ལ་སོགས་པ་ལ་གནོད་བྱེད་སྐྱེ་བ་དེ་བཞིན་དུ་འདིར་ཡང་གནོད་བྱེད་དོ་ཞེས་བྱ་བ་ཡིན་ནོ། །གསུམ་པ་ལ་ལན་བཏབ་ན། དཔེར་ན་ཞེས་བྱ་བའོ། །སྣོད་ནི་ཆུ་སྣོད་དོ། །སྟེང་བཀག་ན་ཞེས་བྱ་བ་ནི་ཤིན་དུ་བསྡམས་ནའོ། །འདིར་ནི་རིལ་ཚགས་ལ་
སོགས་པ་ཉེ་བར་མཚོན་པའོ། །དངུལ་ཆུ་ཞེས་བྱ་བ་ལ་སོགས་པ་འཆད་པ་ནི་ཡང་ན་ཞེས་བྱ་བའོ། །དེ་ལ་རྩ་བའི་དོན་ནི་དངུལ་ཆུ་དང་གསེར་ལ་སོགས་པའམ། རྡོ་ཚན་ལ་སོགས་པ་འདྲེས་པ་ཕན་ཚུན་རིགས་མི་མཐུན་པའི་རྡུལ་ཕྲ་རབ་ཆོལ་བུར་གྱུར་པ། འབྲས་བུ་ཡན་ལག་ཅན་གྱི་རྫས་མ་བརྩམས་པ་
རྣམས་ཇི་ལྟར་སྣང་ཞེས་བྱ་བ་ཡིན་ནོ། །སྣང་བ་སྨོས་པ་ནི་སྒྲིབ་པ་ལ་སོགས་པ་ཉེ་བར་མཚོན་པའོ། །བཤད་པར་ཡང་ཐོགས་པ་ལ་སོགས་པ་ཞེས་སོགས་པའི་སྒྲས་མཐོང་བ་ཡང་གཟུང་བ་ཡིན་ནོ། །འོན་ཏེ་མ་མཐོང་བའི་དབང་གིས་དངུལ་ཆུ་དང་གསེར་ལ་སོགས་པ་ལ་ཡན་ལག་ཅན་མེད་ཀྱང་མཐོང་བ་དང་།
སྒྲིབ་པ་ལ་སོགས་པའི་འབྲས་བུར་འགྱུར་བ་ཡིན་ནོ་སྙམ་ན། འོ་ན་ནི་གོས་ལ་སོགས་པའི་ཡང་འཐད་པ་སྟེ། བྱ་རོག་དག་གིས་ཟོས་པ་ནི་མེད་དོ། །དངོས་པོ་རྣམས་ཀྱིས་ནུས་པ་ནི་སོ་སོའི་སྐྱེ་བོས་དཔག་པར་ངེས་པ་ཡང་མ་ཡིན་ནོ་ཞེས་སྟོན་པ་ནི་ཁྱད་པར་ཅན་གྱི་ཞེས་བྱ་བ་ལ་སོགས་པའོ། །གཞན་ཞེས་བྱ་བ་ནི་
འབྲས་བུ་ཡན་ལག་ཅན་ལས་སོ། །དེ་ཉིད་ཀྱི་ཕྱིར་རྒྱུ་ཁྱད་པར་ཅན་ཁྱད་པར་དུ་བྱེད་པ་ནི། ཁྱད་པར་ཅན་གྱི་འདུས་པའི་མཚན་ཉིད་ཀྱིས་ཞེས་བྱ་བའོ། །ལྕགས་ལ་སོགས་པ་ནི་ཁྱད་པར་ཅན་གྱི་སྨན་ལ་སོགས་པ་ཚོགས་པའི་མཚན་ཉིད་ཀྱི་རྒྱུ་ཁྱད་པར་ཅན་ལས་སིལ་བུར་འགྱེས་པར་དམིགས་སོ། །དེ་ཉིད་ཀྱི་
ཕྱིར་གྲགས་པ་ལ་ཞེས་བྱ་བ་ནི་སྒྲ་སྦྱར་རོ། སྨན་གྱི་ཚོགས་པ་དང་། མན་ངག་མེད་པས་ནི་སིལ་བུར་གྱེས་པ་དེ་དག་གི་འབྲས་བུ་ཉིད་དུ་དཔག་པར་ནུས་པ་མ་ཡིན་ནོ། །དེ་བཞིན་སྒྲིབ་པ་ལ་སོགས་པ་ཡང་རྡུལ་ཕྲ་རབ་ཀྱི་འབྲས་བུར་འགྱུར་རོ་ཞེས་བྱ་བར་དགོངས་པའོ། །འདི་འདྲ་བ་གྲགས་པ་ཡོད་མོད། དད་པར་
གོ་ཅི་ལྟར་བྱེད་སྙམ་ན། རྒྱུ་དང་འབྲས་བུ་ཉིད་ཞེས་གསུངས་ཏེ། ས་བོན་ལས་མྱུ་གུ་སྐྱེ་བ་ཡང་མ་མཐོང་བས་དཔག་པར་མི་ནུས་པའི་ཕྱིར་རོ། །དཔའ་སོགས་སོ་སོར་ནུས་མེད་ཀྱི། །འབྲས་བུ་རྟོགས་པ་དག་པ་ནི། །ཤེས་པ་དག་ནི་ཅི་ལྟར་ཡིན། །ཞེས་བྱ་བ་དེ་ལ་འཆད་པ་ནི་དེ་བཞིན་དུ་གཟུགས་ལ་སོགས་

པ་ཞེས་བྱ་བའོ། །ལྡན་པ་ལས་ཡིན་ནོ་ཞེས་བྱ་བ་ནི་རྩ་བ་དོགས་པ་གསལ་བར་བྱེད་པའོ། །དབང་པོ་ལ་སོགས་པའི་ལྡན་པ་ཉིད་ཤེས་པ་སྐྱེད་པར་བྱེད་པ་ཡིན་ཞེས་བྱ་བའི་དོན་ཏོ། །དེ་ལ་འདིར་ཐལ་བ་མཚུངས་ཞེས་བྱ་བའི་ལན་འཆད་པ་ནི། ལྡན་པ་ཡང་ཞེས་བྱ་བ་ནིའོ། །དེའི་ཕྱིར་ཅི་ལྟར་དབང་པོ་ལ་སོགས་
པ་སོ་སོར་ནུས་པ་མེད་པ་རྣམས་ལྡན་པ་སྐྱེད་པར་བྱེད་པ་བཞིན་དུ་ཤེས་པ་ཉིད་ཅི་སྟེ་སྐྱེད་པར་མི་བྱེད་དེ་བཞིན་དུ་རྡུལ་ཕྲ་རབ་རྣམས་ཀྱང་ཡིན་ནོ། །ཡང་ན་ཅི་ལྟར་མིག་ལ་སོགས་པ་སོ་སོར་མི་ནུས་པ་དང་ལྡན་པ་ཉིད་སྐྱེད་པར་བྱེད་པ་དེ་བཞིན་དུ། རྡུལ་ཕྲ་རབ་རྣམས་ཤེས་པ་ཅི་སྟེ་སྐྱེད་པར་མི་བྱེད་ཅེས་བྱ་བའི་དོན་
ཏོ། །ཡན་ལག་ཅན་མེད་པའི་ཕྱིར་དངུལ་ཆུ་དང་གསེར་ལ་སོགས་པ་ཅི་ལྟར་སྣང་བ་ཞེས་བརྗོད་པ་གང་ཡིན་པ་དེ་ཡང་། གལ་ཏེ་གསེར་དང་དངུལ་ཆུའི་ལྡན་པ་སྣང་བ་ཡིན་ཞེ་ན་ཞེས་བྱ་བ་རྩ་བའི་དོགས་པ་འགོག་པ་ནི། ལྡན་པའི་སྣང་བ་ཡང་མ་ཡིན་ཏེ་ཞེས་བྱ་བའོ། །རྟེན་མཐོང་བ་མེད་པར་གང་ལ་རྟོགས་ཞེས་བྱ་བ་ལན་འདིའི་
བཤད་པ་ནི་རྟོགས་པར་སླའོ། །དངུལ་ཆུ་དང་གསེར་ལ་སོགས་པར་ལྡན་པའི་རྟེན་ནི་རྡུལ་ཕྲ་རབ་རྣམས་ཡིན་ལ། དེ་དག་ཀྱང་མི་མཐོང་བའི་ཕྱིར་དེ་ལ་འདུ་བའི་ལྡན་པ་ཅི་ལྟར་རྟོགས་ཏེ། ཤ་ཟ་བ་ལ་སོགས་པའི་ལྡན་པ་བཞིན་ནོ། །ཁས་བླངས་ནས་ཀྱང་སུན་འབྱིན་པ་བརྗོད་པ་ནི་གལ་ཏེ་རྟེན་མཐོང་བ་མེད་པར་
ཡང་རྟོགས་ན་ནི་ཞེས་བྱ་བའི་དོན་ནི་འདི་ཡིན་ཏེ། གལ་ཏེ་རྟེན་དང་ཡང་ལྡན་པ་ཡོད་པའི་ཕྱིར། དེ་ལ་གནས་པའི་ལྡན་པ་རྣམས་ཀྱང་རྟོགས་པར་འགྱུར་ཏེ། འབྱོར་པ་དང་འདུས་པ་དང་མཚུངས་པའི་ཕྱིར་རོ། །དེས་ན་ཞེས་བྱ་བ་མཐོང་བས་ནའོ། །དེར་ནི་ཞེས་བྱ་བ་གཞན་གྱི་སྟེ། ཐག་རིང་བ་ན་གནས་པའི་རྫས་ཕྲ་མོ་
རྣམས་ལ་ངོ་མཐོང་བ་མེད་པ། རྡོ་ཚན་ལ་སོགས་པའི་མཚན་ཉིད་ཀྱི་ལྡན་པ་ཞེས་བྱ་བའི་མིང་ཅན་གྱི་ངོན་རྟོགས་ན་ནི་དེའི་ཚེ་དེ་དབང་པོ་དང་ཕྲད་པར་ཁས་བླངས་དགོས་ཏེ། དབང་པོ་དང་དོན་ཕྲད་པ་ལས་མངོན་སུམ་སྐྱེའོ་ཞེས་བྱ་བ་ལ་གཞུང་ལུགས་ཡིན་པའི་ཕྱིར་རོ། །དེ་ཡང་རྣ་བ་ལས་གཞན་པའི་དབང་པོའི་
ལྡན་པ་ལས་གཞན་མ་ཡིན་ཏེ། དེས་ན་རྡོ་ཚན་ལ་སོགས་པའི་མཚན་ཉིད་ཀྱིས་ལྡན་པ་ནི་ཡོན་ཏན་གྱི་མཚན་ཉིད་ཉམས་པར་འགྱུར་ཏེ། དབང་པོ་དང་ལྡན་པའི་རྒྱུ་ཡིན་པའི་ཕྱིར་རོ་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་གྱིའོ། །མིག་གི་འོད་ཟེར་དག་ནི་རྡུལ་ཕྲ་རབ་རྣམས་དང་ཕྲད་པ་ཡིན་ལ། ལྡན་པ་ནི་དེ་

དག་ལ་འདུས་པ་ཡིན་ནོ། །དེ་ལྟ་ན་ནི་འོ་ན་ཞེས་བྱ་བ་ནི་སུན་འབྱིན་པའོ། །རྡུལ་ཕྲ་རབ་ལ་དབང་པོའི་འོད་ཟེར་དང་ཕྲད་པའི་མཚན་ཉིད་ཀྱི་དབང་པོའི་ལྡན་པ་ཡོད་པས་སོ། །ལྡན་པ་ཐམས་ཅད་ཀྱང་ཞེས་བྱ་བ་ནི་མིག་གི་འོད་ཟེར་རྣམས་ནི་ཐག་རིང་པོ་ན་གནས་པའི་རྫས་ཕྲ་མོ་རྣམས་ལྡན་
པ་མེད་པ་ནི་ཐག་རིང་པོ་ཉིད་ཀྱི་ཕྱིར་རོ། །རགས་པ་རྣམས་ཀྱང་ཞེས་བྱ་བ་ནི་སུན་འབྱིན་པའོ། །དབང་པོས་ཡུལ་དེ་སྲིད་འགྲོ་མི་ནུས་ན་ནི་ཡུལ་དེ་ན་གནས་པའི་རྫས་རགས་པ་ཡང་ཅི་ལྟར་འཛིན་ཅེས་བྱ་བའི་དོན་ཏོ། །དེ་ལྟར་འབྱོར་པ་དང་། འདུས་པ་གཞུང་མ་བཙུགས་པ་དང་རྡོ་ཚན་ལ་སོགས་པའི་མཚན་ཉིད།
རྡུལ་ཕྲ་རབ་ཀྱི་ལྡན་པ་དང་། དབང་པོ་རྣམས་ཀྱི་ལྡན་པ་ཉིད་ཕྲད་པ་ཡིན་པར་བཤད་པ་སུན་འབྱིན་པ་སེལ་བའི་སྒོ་ནས་མདུན་དུ་བྱེད་པ་ནི། འོན་ཏེ་ལྡན་པ་ལས་སྐྱེས་པའི་ལྡན་པ་ཡང་ཞེས་སྨྲས་ཏེ། རྒྱུ་མཚན་གྱི་རྒྱུ་ཙམ་དུ་མི་འགྱུར་རོ་སྙམ་དུ་བསམས་པའོ། །མ་ཡིན་ཏེ་ཞེས་བྱ་བ་ནི་འགོག་པའོ། །
དེ་ལ་ཞེས་བྱ་བ་ནི་གཞན་གྱི་ལུགས་ལའོ། །གང་གི་ཕྱིར་འདུ་བ་ནི་འདི་ལའོ་སྙམ་པའི་བློའི་རྒྱུ་ཡིན་པ་དེའི་ཕྱིར། འདུ་བ་ཡང་ཡོད་པ་ཡིན་ནོ། །གལ་ཏེ་འདི་ལའོ་སྙམ་པའི་བློའི་རྒྱུ་འདུ་བ་ཡིན་མོད། དེ་ལྟ་ན་ཡང་སྐབས་སུ་བབ་པ་ལ་ཅིར་འགྱུར་སྙམ་ན། ལྡན་པ་ཡང་ཞེས་གསུངས་སོ། །རྡོ་ཚན་ལ་སོགས་པའི་
མཚན་ཉིད་རྡུལ་ཕྲ་རབ་རྣམས་ཀྱི་ལྡན་པ་རྟོགས་ན། འདི་ནི་དམིགས་པའི་འོད་ཟེར་དང་ལྡན་པ་ཡིན་ནོ་སྙམ་དུ་རྟོགས་པར་འགྱུར་བ་ཡིན་ནོ་ཞེས་བྱ་བའི་དོན་ཏོ། །འོན་ཏེ་དེར་ལྡན་པ་མཐོང་བ་ཡང་དབང་པོ་མ་མཐོང་བའི་ཕྱིར། དབང་པོ་དང་རྡུལ་གྱི་ལྡན་པ་མི་འགལ་བའི་ཕྱིར་གང་ལ་ལྟོས་ནས་རྡུལ་ཕྲ་རབ་ཀྱི་ལྡན་པ་
གཞི་ཉིད་དུ་སྟོན་ཅེ་ན་དེ་ལྟ་མ་ཡིན་ཏེ། འཐད་པས་ངེས་པ་ལ་ཡང་མ་བརྟེན་པའི་བློ་མི་འགལ་བའི་ཕྱིར་རོ། །དེ་བས་ན་ལྡན་པ་འདུ་བ་ཅན་གྱི་རྒྱུར་ཐར་བར་འགྱུར་བའི་ཕྱིར་རོ། །ཡོན་ཏན་གྱི་མཚན་ཉིད་ཉམས་པ་སོན་འདུག་གོ་སྙམ་དུ་དོགས་པའོ། །སུན་འབྱིན་པ་གཞན་བརྗོད་པའི་དོན་དུ་ཡང་ལྡན་པར་མྱུར་
བར་འདུས་པ་ཡང་གླེང་སློང་བ་ནི་གཞན་ཡང་ཞེས་བྱ་བའོ། །འབྲས་བུའི་རྫས་ཡན་ལག་ཅན་གྱི་ལྡན་པ་ལྟོས་པར་བྱ་བ་མ་ཡིན་པར་འགྱུར་རོ། །དེ་མེད་ཀྱང་འཛིན་པར་ཁས་བླངས་པའི་ཕྱིར་སྙམ་དུ་དགོངས་པའོ། །འོན་ཏེ་ཞེས་བྱ་བ་ནི་གཞན་གྱིའོ། །ལན་དུ་རྡུལ་ཕྲ་རབ་ཀྱི་ཞེས་བྱ་བའོ། །བུམ་པ་ལ་སོགས་

པས་ཞེས་བྱ་བ་ནི་རྡུལ་ཕྲ་རབ་ཙམ་འདུས་པ་ཙམ་གྱི་རང་བཞིན་ནོ། །འདི་ལྟར་རྡུལ་ཕྲ་རབ་མི་མཐོང་བ་ཡིན་ན་ནི་མཐོང་བའི་དོན་གཞན་བརྟག་པར་བྱ་བ་ཡིན་གྱི། རྡུལ་ཕྲ་རབ་རྣམས་ལ་རྟོགས་པའི་རྒྱུ་དབང་པོའི་ལྡན་པ་ཡོད་ན་དོན་གཞན་གྱིས་ཅི་བྱ། བརྗོད་མ་ཐག་པར་ནི་ཡན་ལག་ཅན་ལ་དབང་པོའི་ལྡན་པ་
ལ་ལྟོས་ནས་ཅི་བྱ་ཞེས་བརྗོད་པ་ཡིན་ནོ། །ཉེས་པ་དེ་ཉིད་ཡིན་ནོ་ཞེས་བྱ་བ་འབྲས་བུའི་རྫས་ཀྱི་ལྡན་པ་དོན་མེད་དོ་ཞེས་བརྗོད་པ་གང་ཡིན་པའོ། །འོན་ཏེ་ཞེས་བྱ་བ་ནི་གཞན་གྱིའོ། །གཞན་དུ་མ་ཡིན་ནོ་ཞེས་བྱ་བ་ནི་ཡན་ལག་ཅན་ཡོད་པ་ཉིད་དུ་མ་ཡིན་པའོ། །ལན་དུ་འདི་ནི་ཞེས་བྱ་བའོ། རྡུལ་ཕྲ་རབ་རྣམས་ལ་
དབང་པོའི་ལྡན་པ་མེད་ན་ཡན་ལག་ཅན་རྟོགས་པ་ཡིན་ནོ་ཞེས་ཅི་སྟེ་མི་བརྗོད་ཡན་ལག་ཅན་གྱི་ལྡན་པ་ཡོད་ན་ནི་གདོན་མི་ཟ་བར་རྡུལ་ཕྲ་རབ་ཀྱི་ལྡན་པ་ཡོད་དགོས་སོ་ཞེས་སྟོན་པ་ནི། ཡན་ལག་ཅན་ལྡན་ན་ཞེས་བྱ་བའོ། །ཡུལ་མཚུངས་པ་ཉིད་ཀྱང་ཡན་ལག་ཅན་རྡུལ་ཕྲ་རབ་ཀྱི་ཡུལ་ན་ཡོད་པ་ཡིན་པའི་ཕྱིར་རོ། །དེས་ན་གདོན་མི་ཟ་བར་ཁས་བླང་བར་བྱ་བ་
རྡུལ་ཕྲ་རབ་ཀྱི་ལྡན་པ་ཡོད་མོད། ཡན་ལག་ཅན་གྱི་ལྡན་པའམ། ཡན་ལག་ཅན་གྱིས་ཅི་བྱ། སྔར་ནི་ལྡན་པ་དང་མི་ལྡན་པའི་རྒྱུར་ཐལ་བའི་སྒོ་ནས་གཙུག་ལག་ལ་ལྟོས་པ་ཉེས་པ་བརྗོད་པ་ཡིན་ནོ། །དེ་ལས་གཞན་པའི་གཙུག་ལག་གི་ཉེས་པ་ཡང་བརྗོད་པ་ནི་ཡང་ན་ཞེས་བྱ་བའོ། །ཡན་ལག་ཅན་ལ་ཡང་
རྟོགས་པའི་དབང་པོ་ཁོ་ནས། དབང་པོའི་ལྡན་པ་བརྟགས་པ་ཡིན་ལ། དེ་ནི་རྡོ་ཚན་ལ་སོགས་པའི་མཚན་ཉིད་ཀྱི་ལྡན་པ་ལ་ཡོད་པའི་ཕྱིར། ཅི་ལྟར་དབང་པོའི་ལྡན་པ་མེད། དེས་ན་རྫས་གཉིས་ཁོ་ན་ལ་ལྡན་པ་ཡོད་དོ་ཞེས་བྱ་བའི་རྣམ་པར་གཞག་པར་མི་འགྱུར་རོ་ཞེས་བྱ་བའི་དོན་ཏོ། །རྟེན་མཐོང་མེད་པར་ག་
ལ་རྟོགས། །ཞེས་བྱ་བ་བཤད་ནས། རོ་གཟུགས་ལ་སོགས་པ་ལྡན་པ་འགལ་ཞེས་བྱ་བ་བཤད་པའི་ཕྱིར། གཞན་ཡང་ཞེས་སྨོས་སོ། །མཐོང་བའི་ཕྱིར་ཞེས་བྱ་བ་ནི་སྐབས་ཀྱི་ལྡན་པའོ། །བཏུང་བ་ལ་སོགས་པའམ། རྡོ་ཚན་ལ་སོགས་པའི་མཚན་ཉིད་ལྡན་པ་མཐོང་བ་ལ། གཟུགས་ལ་སོགས་པ་ལྡན་
པར་མི་འགྱུར་རོ། །ཅིའི་ཕྱིར་ཞེ་ན། ཡོན་ཏན་ལ་ཞེས་སྨོས་སོ། །ཡོན་ཏན་ནི་རྫས་ཁོ་ནའི་ཡིན་གྱི། ཡོན་ཏན་ལ་ནི་ཡོན་ཏན་ཡོད་པ་མ་ཡིན་ནོ། །འོན་ཏེ་གཟུགས་ལ་སོགས་པ་དེ་དག་ནི་ཡན་ལག་གི་ཡིན་གྱི། བཏུང་བ་ལ་སོགས་པའི་ནི་མ་ཡིན་ནོ་སྙམ་ན་དེ་ལ་ཞེས་སྨོས་ཏེ། བཏུང་བའོ། །ཡན་ལག་

རྣམས་ཀྱི་ཞེས་བྱ་བ་ནི་བུ་རམ་ལ་སོགས་པ་རྣམས་ཀྱིའོ། །མངོན་སུམ་ལ་དེ་ལས་བཟློག་པར་སྣང་བའི་ཕྱིར་རོ་སྙམ་དུ་ཞེ་ལ་བཞག་པའོ། །ཉེ་བར་བརྟགས་པ་ལས་ཞེས་བྱ་བ་ནི་གཞན་གྱིའོ། །སུན་འབྱིན་པ་ནི་བློ་ཐ་དད་པར་ཐལ་ལོ་ཞེས་བྱ་བའོ། །དོན་འདི་ཡིན་ཏེ་བཏུང་བའི་གནས་སྐབས་ན་
ཡོད་པའི་གཟུགས་ལ་སོགས་པ་ཉིད་ཉེ་བར་འདོགས་པ་ཡིན་ནོ་ཞེས་བྱ་བར་ནི་མི་རིགས་ཏེ། དེ་ནི་དངོས་སུ་ཉམས་སུ་མྱོང་བའི་ཕྱིར་རོ། །འཇིག་རྟེན་བཏུང་བ་ལ་བུ་རམ་ལ་སོགས་པ་རྫས་དུ་མའི་རང་བཞིན་དུ་ཐ་སྙད་འདོགས་པ་ཡང་མ་ཡིན་གྱི། འོན་ཀྱང་དེའི་གནས་སྐབས་ན་ཡོད་པ་ཉིད་དུའོ། །དེ་ལྟ་བུའི་ཐ་སྙད་ཡོད་
དུ་ཆུག་པ་དེ་ལྟ་ན་ཡང་། བཏུང་བ་ལ་བློ་ཐ་དད་པ་ཡོད་པར་ཐལ་བར་འགྱུར་རོ། །བཏུང་བའི་གནས་སྐབས་ན་ཡོད་པའི་གཟུགས་ལ་སོགས་པ་སྣང་བའི་བློར་མི་འགྱུར་གྱི། འོན་ཀྱང་བུ་རམ་ལ་སོགས་པ་ཡན་ལག་རྣམས་ཀྱི་གཟུགས་ལ་སོགས་པ་རྟོགས་པ་ཉིད་དུ་འགྱུར་ཏེ། དོན་གཅིག་ལ་འདུ་བས་ཉེ་བར་བཏགས་
པ་ཡིན་པའི་ཕྱིར་རོ། །ཞོ་ལ་སོགས་པ་ཞེས་བྱ་བ་ནི་འཆད་པའོ། །གང་ལ་བཏུང་བ་ཞེས་བྱ་བའི་ལྡན་པ་འདུ་བ་དེ་ཉིད་ལ། གཟུགས་ལ་སོགས་པ་ཡིན་པའི་ཕྱིར། །དོན་གཅིག་ལ་འདུ་བ་ཡིན་གྱི་བཏུང་བའི་གནས་སྐབས་ན་ཡོད་པའི་རོ་དང་གཟུགས་གཞན་དམིགས་པར་མི་འགྱུར་རོ་ཞེས་བྱ་བ་ལྷག་མའོ། །གལ་
ཏེ་ཉེ་བར་གཏུགས་པའི་མཐུ་ཁོ་ནས་གཟུགས་ལ་སོགས་པ་འགའ་ཞིག་ཏུ་འགྱུར་བ་ཡིན་ཏེ། དེ་ལྟ་མ་ཡིན་ན་གང་དུ་ཉེ་བར་འདོགས་པ་ཞེས་བརྒྱ་ལ་མི་མཁས་པ་དག་རྩོད་པ་སྨྲ་བར་འགྱུར་བས་དེ་ལ་བཤད་པ་ནི་ལྡན་པ་ཅན་གྱི་གཟུགས་གང་ཡིན་པ་ཞེས་བྱ་བའོ། །ཉེ་བར་བཏགས་ཕྱིར་ཞེས་བྱ་བ་འདིར་བཅད་དོ། །གལ་
ཏེ་འདིར་ཉེ་བར་བཏགས་པའི་མཐུ་ཡིན་ན། དེའི་ཚེ་ཉེ་བར་བཏགས་བཞིན་པའི་གཟུགས་ལ་སོགས་པ་ཉིད་འདིར་མཐོང་བར་འགྱུར་གྱི། གཟུགས་ལ་སོགས་པ་གཞན་ནི་མཐོང་བར་ག་ལ་འགྱུར། གང་དུ་ཉེ་བར་གདགས་ཞེས་བརྗོད་པ་དེ་ལ་ལྡན་པ་ཉིད་ཉེ་བར་བཏགས་པའི་གཞིར་འགྱུར་མོད། དེ་ཉིད་བསྟན་པ་ནི་ལྡན་པའི་
ཡང་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་གྱིའོ། གང་གིས་ཉེས་པ་འདིར་འགྱུར་བ་འདི་རྣམ་པ་ཐམས་ཅད་དུ་གཟུགས་གཞན་ཁོ་ན་སྣང་བ་ནི་མ་ཡིན་གྱི། འོན་ཀྱང་གཟུགས་དང་རོ་དེ་དག་ཉིད་ཡིན་ཏེ། བུ་རམ་ལ་སོགས་པ་ཡན་ལག་ལ་འདུས་པ་གང་ཡིན་པའོ། །དེ་ལྟར་མ་ཡིན་ཏེ་ཞེས་བྱ་བ་ནི་བཏུང་བའི་གནས་

སྐབས་ན། སྔ་ན་མེད་པའི་རང་བཞིན་ཅན་དུའོ། །གཅིག་ཏུ་ཞེས་བྱ་བ་ནི་དེ་དག་གཞན་ཉིད་དུའོ། །གཅིག་གིས་སྨྲས་པ་ཞེས་བྱ་བ་ལ་སོགས་པ་ལྟར་གཅིག་གི་སྒྲ་ནི་གཞན་གྱི་དོན་བརྗོད་པའོ། །ཡང་ན་གལ་ཏེ་བུ་རམ་ལ་སོགས་པའི་ཡན་ལག་རྣམས་འདྲེས་པ་ཡིན་ཡང་ནོར་བུ་མདོག་སྣ་ཚོགས་པ་འདྲེས་པ་ལྟར་ཐ་དད་པར་
རྟོགས་པར་བྱ་བ་མ་ཡིན་ནམ། དེ་ཇི་ལྟར་ན་བཏུང་བའི་གནས་སྐབས་ན་གཟུགས་དང་རོ་གཞན་དམིགས་ཤེ་ན། དེ་དག་ཤིན་དུ་འདྲེས་པ་ནི་ཞེས་སྨོས་སོ། །ནོར་བུའི་ཕུང་པོ་ཅི་ལྟར་འདྲེས་པ་དེ་འདྲ་བར་ནི་བཏུང་བའི་གནས་སྐབས་ན་བུ་རམ་ལ་སོགས་པའི་ཡན་ལག་འདྲེས་པ་མ་ཡིན་གྱི། འོན་ཀྱང་དེ་དང་མི་འདྲ་བ་ཤིན་དུ་
འདྲེས་པ་ཡིན་ནོ། །གང་གི་ཕྱིར་ཤིན་དུ་འདྲེས་པའི་བུ་རམ་ལ་སོགས་པའི་ཡན་ལག་གཅིག་ཏུ་རྟོགས་པའི་རྒྱུ་ཡིན་པ་དེའི་ཕྱིར། ལྡན་པ་ཅན་གྱི་གཟུགས་དང་རོ་ཉིད་གཟུགས་དང་རོ་གཞན་མངོན་པ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ནི་ཞེས་བྱ་བ་ནི་གྲུབ་པའི་མཐའོ། །གལ་ཏེ་དེ་དག་ཉིད་ཡིན་ན་ཅི་ལྟར་གཞན་དུ་རྟོགས་
ཞེས་བྱ་བའི་སུན་འབྱིན་པ་ཡལ་བར་དོར་ནས་གཞན་བརྗོད་པ། ཅི་ལྟར་གཟུགས་དང་རོ་དེ་དག་ཉིད་གཞན་དུ་མངོན་པ་དེ་བཞིན་དུ་རྡུལ་ཕྲ་རབ་ཉིད་རགས་པའི་རང་བཞིན་དུ་མངོན་པའམ། དེ་ལྟ་བུའི་ཐ་སྙད་དང་ལྡན་པར་འགྱུར་མོད། ཡན་ལག་ཅན་གྱིས་ཅི་བྱ། རྣམ་པ་གཞན་དུ་སྣང་བར་ཐལ་ལོ་ཞེ་ན། ཐ་སྙད་ལ་འཆོལ་
བར་བྱ་སྟེ། ཅི་སྐད་དུ། དེ་ཡི་གཟུགས་དང་བྲལ་ན་ཡང་། །རྣམ་པ་གཞན་དུ་སྣང་བར་འགྱུར། །ཞེས་འཆད་པར་འགྱུར་བ་བཞིན་ནོ། །དེ་ཁོ་ནར་ནི་གཞན་སྣང་བ་མ་ཡིན་ལ་མེད་པ་སྣང་བ་མ་ཡིན་ཏེ། རྡུལ་ཕྲ་རབ་ཀྱི་ཚོགས་ཀྱིས་བྱས་པ་བློའི་རྣམ་པའི་དངོས་པོ་དང་འདྲ་བ་ཁོ་ན་རིག་པའི་ཕྱིར་རོ་ཞེས་བརྗོད་ཟིན་ཏོ། །
སྐབས་སུ་བབ་པ་རྡུལ་ཕྲ་རབ་བསགས་པ་ཙམ་གྱི་རང་བཞིན་བུ་རམ་ལ་སོགས་པའི་རང་བཞིན་རྣམས་ཕན་ཚུན་ཕན་འདོགས་པས་དེ་དག་ཉིད་ཁྱད་པར་ཅན་དུ་སྐྱེས་པ་ཡིན་ཏེ། དེ་ལྟ་དེ་ལྟ་བུའི་རྟོགས་པ་སྐྱེད་པར་བྱེད་པ་གང་ཡིན་པའོ། །དེས་ན་ཉེས་པ་འགའ་ཡང་མེད་དོ། །འདིས་ནི་གལ་ཏེ་ཉེ་བར་བཏགས་པ་ལས་
འདོད་ན་བློ་ཐ་དད་པར་མི་འགྱུར་རོ་ཞེས་བྱ་བ་བཤད་པ་ཡིན་ནོ། །ཅི་ལྟར་ཕྲེང་རིང་ཞེས་བྱར་འགྱུར། །ཞེས་བྱ་བ་བཤད་པའི་ཕྱིར་རོ། །གཞན་ཡང་ཞེས་བྱ་བའོ། །ཁྱད་པར་ཅན་གྱི་རྟོགས་པ་ཡིན་ནོ་ཅོག་གང་ཡིན་པ་གལ་ཏེ་དོན་ཐ་དད་པའི་རྒྱུ་མཚན་ཅན་ཡིན་ནོ། །དེའི་ཚེ་ཕྲེང་རིང་ངོ་སྙམ་དུ་དོགས་པར་མི་འགྱུར་རོ་ཞེས་

བྱ་བའི་དོན་ཏོ། །ཅིའི་ཕྱིར་ཞེ་ན། ཕྲེང་ཞེས་བྱ་བ་ནི་ཞེས་བྱ་བའོ། །གལ་ཏེ་ལྡན་པ་ལ་སོགས་པ་ཉིད་ཕྲེང་བ་ཡིན་ནམ། དེས་ན་དེ་སྐད་ཅི་སྟེ་བརྗོད་སྙམ་ན། འདི་ལྟར་ཞེས་སྨོས་སོ། །ལྡན་པ་མེད་ཕྱིར་ཞེས་བྱ་བ་ནི་ཕན་ཚུན་མ་འབྲེལ་བར་གནས་པའི་ཕྱིར་ལྡན་པ་མེད་དོ། །འདི་ལྟར་ཉེ་བར་
མཚོན་པ་ཡིན་པའི་ཕྱིར། ཡོན་ཏན་གྱི་ཚིག་གི་དོན་མཐའ་དག་བཀག་པ་ཡིན་ནོ། །དེའི་ནང་ན་ལྡན་པ་སྲིད་པའི་ཕྱིར་འགོག་པ་ཡིན་ནོ། །དེ་ཉིད་ཕྱིར་ཞེས་བྱ་བ་ནི་ལྡན་པ་མེད་པ་ཉིད་ཀྱི་ཕྱིར་ཕྲེང་ནི་རྫས་མ་ཡིན་ནོ། །རྫས་ནི་ལྡན་པས་རྩོམ་པའི་ཕྱིར་རོ། །དེ་ནི་རིགས་ལ་སོགས་པ་ཡང་མ་ཡིན་ཏེ། གང་གི་ཕྱིར་
རིགས་ལ་སོགས་པ་ལ་ནི་རིང་པོ་ཉིད་ཡོད་པ་མ་ཡིན་པའི་ཕྱིར་རོ། །སོགས་པའི་སྒྲས་ནི་བྱ་བ་དང་སྤྱི་དང་ཁྱད་པར་རྣམས་འཕངས་པ་ཡིན་ཏེ། དེ་དག་ཀྱང་རིང་པོའི་ཚད་དང་ལྡན་པ་མ་ཡིན་ནོ། །རྫས་ལ་ལྟོས་པའི་ཕྱིར་རོ། །དེས་ན་རིང་པོ་ལ་སོགས་པའི་ཁྱད་པར་མི་འཐད་པའི་ཕྱིར་ན་རིགས་པ་མ་ཡིན་ནོ། །རིང་པོ་ལ་སོགས་
པའི་ཁྱད་པར་དང་བྲལ་བ་ཡང་རིགས་ལ་སོགས་པའི་ཁོངས་སུ་འདུ་བ་པ་མ་ཡིན་ནོ་ཞེས་བརྗོད་པ་ནི་དེ་ནི་རིགས་སོགས་ཞེས་བྱ་བའོ། །དེ་དག་ཀྱང་རིང་པོའི་ཚད་དང་ལྡན་པ་མ་ཡིན་ནོ། །ཤིང་གི་བློ་བཞིན་དུ་གཅིག་ལ་ཡང་དེ་ལྟ་བུའི་བློ་སྐྱེ་བར་ཐལ་བའི་ཕྱིར་རོ་སྙམ་དུ་དགོངས་པའོ། །གལ་ཏེ་གྲངས་གཅིག་རིང་པོ་ཡིན་ནོ་སྙམ་
ན། དེ་ལྟ་ན་ཡང་རིང་པོ་ལ་སོགས་པར་མི་འཐད་དོ་ཞེས། རིགས་སོགས་ལ་ནི་རིང་ཉིད་མེད། །ཅེས་བྱ་བ་འདིས་བརྗོད་པ་ཡིན་ནོ། །བཀོད་པའི་ཁྱད་པར་གྱིས་ཞེས་བྱ་བ་ལ་སོགས་པ་ནི་སྐབས་ལ་སྦྱོར་བར་བྱེད་པའོ། །ཡིན་ཞེས་རིགས་ཞེས་བྱ་བའི་ཞེས་ཀྱི་སྒྲ་ཉེ་བར་སྡུད་པའོ། །དོན་ཅན་ནི་དང་པོར་ལྟ་བར་བྱའོ། །དེས་ན་
དོན་འདིར་འགྱུར་ཏེ། གང་གི་ཕྱིར་ཕྲེང་ཞེས་བྱ་བ་འགའ་ཡང་ཡོད་པ་མ་ཡིན་པ་དེའི་ཕྱིར། ཅི་ལྟར་མངོན་པར་འདོད་པའི་གནས་སྐབས་ཁྱད་པར་གྱིས་རྣམ་པར་གནས་པ་རྣམས་ལ། རིང་པོ་ལ་སོགས་པའི་བློར་འགྱུར་བ་དེ་བཞིན་དུ་མངོན་པར་འདོད་པའི་ཁྱད་པར་དུ་གནས་པ་དེ་ཉིད་ཀྱིས་ན། ཡན་ལག་ཅན་གྱི་ཡུལ་ཅན་
གྱི་བློ་དེ་ནི་རྡུལ་ཕྲ་རབ་རྣམས་ལ་ཡིན་པར་རིགས་སོ། །དཔེར་ན་ཞེས་བྱ་བ་འཆད་པར་བྱེད་པའོ། །ཐ་མའི་ཡན་ལག་ཅན་གྱི་རང་བཞིན་གྱི་མེ་ཏོག་རིགས་མི་མཐུན་པའི་རང་བཞིན་གྱི་ཕྲེང་བ་ནི་རྫས་ཀྱི་ངོ་བོ་མ་ཡིན་པའི་ཕྱིར། གནས་པའི་ཁྱད་པར་ཙམ་གྱིས་མེ་ཏོག་རྣམས་ཀྱི་ཕྲེང་བ་རིང་པོ་ཞེས་བྱ་བའི་ཐ་སྙད་དུ་འགྱུར་བ་ཡིན་

ནོ། །རང་བཞིན་དུ་ཞེས་བྱ་བ་དེ་ཁོ་ན་ལྟར་ཏེ། ཕྲེང་བ་ལ་སོགས་པའི་རིང་པོ་ཉིད་ལྟ་བུ་ཁོ་ནར་རོ་ཞེས་བྱ་བའི་དོན་ཏོ། །རྩོད་པའི་གནས་སུ་གྱུར་པ་ཞེས་བྱ་བ་ནི་ཡན་ལག་ཅན་གྱི་མཚན་ཉིད་དུ་འདོད་པའི་ཡུལ་གྱི་དོན་དངོས་པོ་མ་ཡིན་ནོ། །དེ་ལྟར་རང་གི་ངོ་བོ་དང་ཞེས་བྱ་བ་ལ་སོགས་པ་བཤད་པའི་ཕྱིར། འཇུག་པར་
བྱེད་པ་ནི་གང་ལས་ཞེས་བྱ་བའོ། །སྨྲས་པ་ནི་ཞེས་བྱ་བ་ལ་ཅི་ཞིག་སྨྲ་སྙམ་ན། ལྡན་པ་ལ་སོགས་པའི་ཞེས་བྱ་བའོ། །རིགས་པ་མཚུངས་པས་ན་སྐབས་ཀྱི་ལྡན་པ་སུན་དབྱུང་བ་ཉེ་བར་མཚོན་པར་བྱེད་པར་སྨྲས་པ་ནི། གཟུགས་ལ་སོགས་པ་ཞེས་སྨོས་སོ། །འབའ་ཞིག་ཏུ་ཟད་དོ་ཞེས་བྱ་བ་ནི་རྫས་གཞན་བཀག་
པའི་ཕྱིར་རོ། །འབྱོར་པ་ཡིན་ནོ་ཞེས་བྱ་བ་ནི་གཞན་གྱིའོ། །དེ་བཞིན་དུ་ཞེས་བྱ་བ་ནི་དམིགས་པའི་སྤྱོད་ཡུལ་དུའོ། །འདི་གཉིས་འབྱོར་པ་ཡིན་ནོ་སྙམ་པའི་བློས་ནི་ལྡན་པ་ཁྱད་པར་ཉིད་དུ་འཕེན་པར་བྱེད་དོ་ཞེས་བྱ་བའི་དོན་ཏོ། །སུན་འབྱིན་པ་ནི་འབྱོར་པ་ཞེས་བྱ་བ་ནི་ཞེས་བྱ་བའོ། །ལྡན་པ་ཅན་ཉིད་ཀྱི་ཞེས་བྱ་བ་ནི་
དོན་གཉིས་ལས་ཐ་དད་པར་གྱུར་པ་ལྡན་པའི་རྟོགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །འོ་ན་སྒྲ་ལ་ཡུལ་ཐ་དད་པ་ཡོད་པ་ཡིན་ནོ་སྙམ་ན། འབྱོར་པའི་སྒྲ་ལ་ཞེས་སྨོས་སོ། །ཡང་གི་སྒྲས་ནི་ལྡན་པ་ཅན་གྱི་སྒྲ་སྡུད་པའོ། །གཞན་ནི་ཡོད་པ་མ་ཡིན་ནོ་ཞེས་བྱ་བ་ནི་ལྡན་པའི་ཁྱད་པར་རོ། །འོ་ན་ལྷག་པར་ཞེན་པ་ལ་ལྟོས་
ནས་ཀྱང་། སྒྲ་དང་རྟོགས་པ་དག་གི་ཡུལ་གང་ཡིན་སྙམ་ན། དེར་ནི་ཞེས་སྨོས་སོ། །ལྡན་པ་ཅན་དེ་ལས་གཞན་འབྱོར་བའི་བླའི་ཡུལ་དུ་གྱུར་པའི་ལྡན་པ་ནི་ཡོད་པ་མ་ཡིན་ནོ། །དེ་ཉིད་ཀྱི་ཕྱིར་འབྱོར་པའི་སྒྲས་བརྗོད་པར་བྱ་བ་མེད་དོ། །ལྡན་པ་གཞན་ཡོད་པ་མ་ཡིན་ནོ་ཞེས་བྱ་བ་འདི་ག་ལས་ཤེ་ན། ཅི་ལྟར་ཞེས་གསུངས་
སོ། །བར་མ་ཆོད་པའི་དོན་གཉིས་ལས་ཐ་དད་པར་གནས་པ་ནི་མེད་དོ་ཞེས་བྱ་བའི་དོན་ཏོ། །འོ་ན་ཅི་ལྟར་ལྡན་པ་ལ་སོགས་པའི་ཐ་སྙད་ཐ་དད་པར་འགྱུར་སྙམ་ན། རྗེས་འགྲོ་ཞེས་གསུངས་སོ། །ལྡན་པར་མ་གྱུར་པ་དག་ལ་གནས་སྐབས་དེ་མ་དམིགས་པའི་ཕྱིར་ན། གནས་སྐབས་དེ་ལྡོག་པར་བརྗོད་པ་ཡིན་
ནོ། །དེ་དག་ནི་དམིགས་པའི་ཕྱིར་རྗེས་སུ་འགྲོ་བའོ། །གལ་ཏེ་ལྡན་པ་ལ་སོགས་པ་སྒྲུབ་པར་བྱེད་པའི་མངོན་སུམ་ཉིད་ཡོད་པ་མ་ཡིན་ནམ། དེ་ལ་ལོག་པར་རྟོག་པ་ཅི་འདྲ་བ་ཞིག་ཡོད་ཅེ་ན། མངོན་སུམ་གྱིས་ནི་ཞེས་གསུངས་སོ། །དེ་ལྟ་བུར་གྱུར་པ་ནི་བྲལ་བར་གྱུར་པའོ། །འདི་འདྲ་བར་ཞེས་བྱ་བ་ནི་བར་མ་ཆོད་པར་རོ། །

གང་གི་ཕྱིར་ལྡན་པ་སྣང་བ་མེད་པའི་གཏན་ཚིགས་དེས་ན། དེ་ཉིད་ཅེས་བྱ་བ་བར་མ་ཆོད་པའི་མཚན་ཉིད་གང་ཡིན་པའོ། །ལོགས་ཤིག་ལ་ཞེས་བྱ་བ་རྣམ་པར་དབྱེ་བའི་དངོས་པོ་གཉིས་ལས་ཁྱད་པར་གཞན་སྤངས་པས་འཇོག་པ་ཡིན་ནོ། །དེ་བཞིན་དུ་ཁྱད་པར་གཞན་ལ་ཡང་ཅི་རིགས་པར་བརྗོད་པར་བྱའོ། །
གང་གི་ཕྱིར་དེ་ལྟར་ཡན་ལག་ཅན་དང་ཡོན་ཏན་ལ་སོགས་པ་མངོན་སུམ་ལ་ཐ་དད་པར་སྣང་བ་མེད་པ་དེ་ཉིད་ཀྱི་ཕྱིར། སྒྲ་ཤེས་ཏེ་སྒྲ་དང་། རྣམ་པར་རྟོག་པའི་བློ་གང་ཡིན་པ་དེ་གཉིས་ནི་བརྟགས་པའི་དོན་ཅན་ཡིན་ཏེ། དངོས་པོ་རང་གི་མཚན་ཉིད་ཀྱི་ཡུལ་ཅན་ནི་མ་ཡིན་ནོ་ཞེས་ཁྱབ་པ་ཡིན་ནོ། །གང་གིས་བརྟགས་པའི་ཡུལ་ཅན་
ཡིན་ཞེ་ན། བརྡའི་དུས་ན་ཡོད་པ་དངོས་པོ་ཐ་དད་པའི་རྗེས་སུ་འབྲང་བའི་རྣམ་པར་རྟོག་པས་བརྟགས་ཏེ། བརྟག་པར་བྱ་བའི་དོན་འདི་གཉིས་ལ་ཡོད་པའི་ཕྱིར་ཏེ། དེ་བརྟགས་པའི་དོན་ཅན་ཡིན་ནོ། །དཔེར་ན་ཡོན་ཏན་ལ་སོགས་པ་རྣམ་པར་རྟོག་པ་ཙམ་ལ་སྣང་བ་རྣམས་ལའམ། ཡང་ན་ཞིག་པ་དང་མ་སྐྱེས་པ་དག་ལ་སྟེ།
ར་མ་དང་སྟོབས་ཅན་དང་། དུང་ལ་སོགས་པའི་རྣམ་པར་རྟོག་པ་དང་སྒྲ་བཞིན་ནོ། །རང་ཉིད་མཚན་ཉིད་མེད་པར་ནི་གཉི་ག་ལ་མ་གྲུབ་པའི་ཕྱིར། རྣམ་པར་རྟོག་པ་ཙམ་གྱིས་ཡུལ་ཡིན་པ་ལ་རྩོད་པ་མེད་དོ། །བཤད་པ་ནི་ཡོན་ཏན་ལ་སོགས་པ་དང་། ཞིག་པ་དང་། མ་སྐྱེས་པ་ལ་སོགས་པ་ལ་གཅིག་ཉིད་ཀྱི་ཐ་སྙད་དུ་བྱེད་པ་
དཔེར་བརྗོད་པར་འགྱུར་རོ། །གལ་ཏེ་སྒྲ་དང་རྣམ་པར་རྟོག་པ་དག་དེ་ཁོ་ནར་དངོས་པོའི་ཡུལ་ཅན་མ་ཡིན་ནམ། དེས་ན་དེ་ཐ་དད་པ་ལ་སོགས་པ་ལས་དངོས་པོ་ཐ་དད་པར་ཅི་ལྟར་མི་འགྱུར་ཞེ་ན། སྒྲའི་ཤེས་པ་ཞེས་གསུངས་སོ། །མི་མཐུན་པ་ནི་གཞན་ཉིད་དོ། །འོ་ན་ཅི་ལྟར་ཡིན་ཞེ་ན། འོན་ཀྱང་ཞེས་གསུངས་སོ། །རྣམ་པར་རྟོག་
པ་མི་མཐུན་པས་དངོས་པོ་མི་མཐུན་པ་མ་ཡིན་ནོ་ཞེས་བྱ་བ་འདི་ག་ལས་ཤེ་ན། རྣམ་པར་རྟོག་པ་ཅན་གྱི་བློ་ནི་ཞེས་གསུངས་སོ། །བསླད་པར་འགྱུར་བ་ནི་རྣམ་པའི་ཁྱད་པར་ཡོངས་སུ་འཛིན་པར་སྐྱེས་པ་ན་དེ་འདྲ་བ་ཉིད་ཀྱིས་ཕྱི་རོལ་དུ་མངོན་པར་ཞེན་པར་འགྱུར་བ་ཡིན་ནོ། །དེ་ལས་ཞེས་བྱ་བ་རྣམ་པར་རྟོག་པ་ཅན་གྱི་བློ་དེ་ལས་སོ། །
འོན་ཏེ་ཡང་ལྡན་པ་ལ་སོགས་པའི་བློ་དག་ནི་དེ་ལྟ་མ་ཡིན་པ་དེས་ན། དེ་ལས་དོན་གྱི་དེ་ཉིད་ཇི་ལྟར་གནས་པར་མི་འགྱུར་སྙམ་ན། དེ་ལ་ཞེས་སྨོས་སོ། །ལྡན་པ་ལ་སོགས་པའི་བློ་ཡང་བརྟགས་པའི་ཐ་དད་པའི་རྗེས་སུ་འཇུག་པས་ན། བག་ཆགས་ཀྱི་སྟོབས་ལས་སྐྱེས་པ་ཉིད་ཡིན་ནོ་སྙམ་དུ་དགོངས་པའོ། །དེས་ནི་ལྡན་པ་ལ་

སོགས་པ་བརྟགས་པ་ཉིད་ཐ་དད་པ་སྟེ། ཐ་དད་པའི་ཐ་སྙད་དུ་བྱ་བ་ཡིན་ནོ། །དོན་གྱི་དེ་ཁོ་ན་ཉིད་ནི་ལྡན་པ་ལ་སོགས་པར་ཐ་དད་པ་མ་ཡིན་ནོ། །གལ་ཏེ་བརྟགས་པའི་དོན་ཐ་དད་པ་ཡང་དོན་ཐ་དད་པ་ཉིད་མ་ཡིན་ནམ་དེས་ན་རྣམ་པར་རྟོག་པ་བག་ཆགས་ཀྱི་སྟོབས་ལས་སྐྱེས་པ་ཡིན་ནོ་ཞེས་ཅི་སྟེ་བརྗོད་སྙམ་ན། རྣམ་པར་
བརྟགས་པའི་དོན་ཐ་དད་པ་ནི་ཞེས་གསུངས་སོ། །ཐུག་པ་མེད་མོད་སྐྱོན་ཅི་ཡོད་སྙམ་པ་ལ། དེ་ལྟར་ཁས་ལེན་ན་ནི་ཞེས་གསུངས་སོ། །ཕན་ཚུན་རྩོད་པར་ཡང་མི་འགྱུར་རོ་ཞེས་བྱ་བ་ནི་ཐམས་ཅད་ཀྱི་དོན་མཐའ་དག་གྲུབ་པའི་ཕྱིར་རོ། །བག་ཆགས་ལས་བརྟགས་པའི་ཞེས་བྱ་བ་ནི་བག་ཆགས་ལས་སྐྱེས་པའི་རྣམ་
པར་རྟོག་པས་བརྟགས་པ་ཞེས་བྱ་བའི་དོན་ཏོ། རྣམ་པར་རྟོག་པ་དེ་ཅི་འདྲ་བ་ཞིག་ཡིན་ཞེས་བྱ་བ་ལ་ནི་ཡིད་ལ་བཞག་པའོ། །གང་གིས་རྣམ་པར་བརྟགས་པའི་དོན་ལ་སྒྲ་དང་བློ་རྗེས་སུ་འགྲོ་བ་དང་། ལྡོག་པ་དག་གིས་འཇུག་པ་དེ་ཉིད་དོ། །རྗེས་སུ་འགྲོ་བ་ཅན་གྱི་སྐྱེས་བུ་དང་དབྱིག་པ་ལ་སོགས་པ་ནི་རྒྱུད་ལ་ལྟོས་
ཏེ་ནང་གི་དབྱེ་བ་ཞེས་བྱ་བ་བྲལ་བ་ལས། ཐ་དད་པ་གང་ཡིན་པ་རེས་འགའ་བར་བརྟགས་པ་ཐ་དད་པ་ལྟ་བུར་དེ་ཐ་དད་པ་ཉིད་ནི་མ་ཡིན་པར་སྣང་བའོ། །དངོས་པོ་དེ་ཁོ་ན་མེད་པའི་ཕྱིར་ན་ཐ་དད་པ་སྣང་བ་ཙམ་ཡིན་ནོ། །འོན་ཏེ་ཡོན་ཏན་ལ་སོགས་པ་ལ་གྲངས་ཡོད་པ་ཉིད་དེ། དེས་ན་གཅིག་གོ་ཞེས་རྟོག་པ་ཡིན་ནོ་སྙམ་
ན། དེ་ལ་གྲངས་ནི་མེད་དོ་ཞེས་གསུངས་སོ། །དེ་ལ་ཞེས་བྱ་བ་ནི་ཡོན་ཏན་ལ་སོགས་པ་རྣམས་ལའོ། །རྟེན་གྱི་གྲངས་ཉེ་བར་བཏགས་པ་ལས་གཅིག་ཅེས་ཐ་སྙད་དུ་བྱེད་པ་ཡིན་ནོ་སྙམ་ན། རྟེན་གྱི་ཞེས་གསུངས་སོ། །ཡོན་ཏན་གྱི་རྟེན་ནི་རྫས་ཡིན་ནོ། །ཅིའི་ཕྱིར་སྙམ་ན་རྟེན་ཐ་དད་བྱ་ཞེས་གསུངས་སོ། །སྤྱི་ལ་སོགས་པ་
ཞེས་སོགས་པའི་སྒྲས་ནི་ཡན་ལག་ཅན་ནོ། །རྫས་དུ་མ་ཅན་གྱི་གྲངས་དང་ལྡན་པ་ལ་སོགས་པ་ཉིད་ནི་གཅིག་ཉིད་དུ་ཐ་སྙད་བྱེད་དོ། །དེས་ན་རྟེན་གྱི་གྲངས་ཉེ་བར་བཏགས་པ་ལས་དེ་ལྟར་ཐ་སྙད་བྱེད་པ་ནི་མ་ཡིན་ནོ་སྙམ་དུ་དགོངས་པའོ། །འོ་ན་རྟེན་གྱི་གྲངས་ཉེ་བར་བཏགས་པ་མེད་པའི་ཕྱིར་འདི་ལ་གཅིག་ཉིད་ལ་སོགས་པའི་ཐ་སྙད་དུ་
ཇི་ལྟར་འགྱུར་ཞེས་བརྗོད་པ་ནི་ཞེས་པ་དང་ཞེས་བྱ་བ་ལ་སོགས་པའོ། །འདིར་དོགས་པ་བསུ་ནས་ལན་འདེབས་པ་ནི། གལ་ཏེ་ཞེས་བྱ་བ་ལ་སོགས་པའོ། །གལ་ཏེ་ཞིག་པ་དང་མ་སྐྱེས་པ་ལ་སོགས་པ་འདིར་གཅིག་ཉིད་ལ་སོགས་པའི་ཐ་སྙད་ཀྱི་རྒྱུན་ནི་གཅིག་ཉིད་དུ་བརྟགས་པ་ཡིན་པར་འདོད་ན། དེའི་ཚེ་གང་གི་རྒྱུ་མཚན་དུ་དེ་

འདོད་པ་སྟེ། སྒྲ་དང་ཤེས་པ་གང་དག་གི་རྒྱུ་མཚན་དུ་སྟེ་སྐྱེད་བྱེད་དུ་འདིར་འདོད་པའི་ཉེ་བར་བརྟགས་པ་དེ་ཉིད་དངོས་པོ་ཐམས་ཅད་ལ། སྒྲ་དང་ཤེས་པ་དེ་དག་གི་རྒྱུར་ཅི་སྟེ་མི་འདོད། དེ་འདོད་ན་ཅུང་ཟད་ཆད་པ་ནི་མེད་དོ་སྙམ་དུ་དགོངས་པའོ། །དེ་ཉིད་གསལ་བར་བྱེད་པ་ནི་ཐོག་མ་མེད་པའི་
ཞེས་བྱ་བ་ལ་སོགས་པའོ། །ཐོག་མ་མེད་པའི་རྟོག་པས་གཅིག་ཉིད་ལ་སོགས་པར་ལྷག་པར་སྒྲོ་བཏགས་པ་སྟེ་ཉེ་བར་བཏགས་པ་གང་ཡིན་པ་དེ་ཉིད་རྒྱུ་མཚན་ཡིན་གྱི་གཞན་དུ་མཐོང་བ་ནི་གཞན་དུ་ལྷག་པར་སྒྲོ་བཏགས་པའི་རྒྱུ་མཚན་མ་ཡིན་ནོ། །སྒྲ་དང་ཤེས་པ་དག་གི་ཞེས་བྱ་བ་ནི་སྐབས་ལས་སོ། །གཅིག་ཉིད་ལ་སོགས་
པ་དངོས་བརྟགས་པའི་སྐབས་ནི་ཡོད་པ་མ་ཡིན་ནོ། །གལ་ཏེ་ཀུན་ལ་ཉེ་བར་བཏགས་མིན་ཞེས་བྱ་བ་ནི་གཙོ་བོ་ལ་ལྟོས་པའི་ཕྱིར་རོ་སྙམ་དུ་དགོངས་པའོ། །ལན་དུ་ཐ་དད་ཁྱད་པར་ཞེས་བྱ་བའོ། །ཐ་དད་པའི་ཁྱད་པར་ཅན་མ་ཡིན་ཡང་འཁྲུལ་པ་མེད་པའི་རྟོག་པའི་ཡུལ་ཉིད་ཀྱི་གཙོ་བོ་ཡིན་པའི་ཕྱིར་རོ་ཞེས་བྱ་བར་དགོངས་པ་
ཡིན་ནོ། །རྩོད་པ་ནི་ཁྱད་པར་ཐ་དད་པ་མེད་པ་ལ་ཨུཏྤལ་དང་སྔོན་པོ་ལ་སོགས་པའི་སྒྲ་ཐ་དད་དོན་མེད་དོ་ཞེ་ན། གྲུབ་པའི་མཐའི་ནི་དོན་གཞན་ཞེས་བྱ་བ་ལ་སོགས་པའོ། །གལ་ཏེ་དེར་ཡང་ཞེས་བྱ་བ་ནི་གཞན་གྱི་སྟེ། ཡོན་ཏན་ལ་སོགས་པར་ཡང་ངོ་། །ལན་དུ་ཡོན་ཏན་རྫས་ནི་ཞེས་བྱ་བའོ། །གཞན་གྱི་ཕྱོགས་བསལ་ནས་
རང་གི་འདོད་པ་ཉེ་བར་སྡུད་པ་ནི་དོན་གཞན་མ་ཡིན་པ་ཉིད་ཀྱི་དོན་ཏེ། ཡུལ་གང་ལ་ཡང་ཡོད་པའི་སྒྲ་དང་ཤེས་པ་དེ་དག་ལ་དེ་སྐད་ཅེས་བརྗོད་དོ། །དེ་དག་གི་ངོ་བོ་ནི་དེ་ཉིད་དོ། །ལྡོག་པའི་དབྱེ་བ་ལས་ཐ་དད་པ་ནི་སྒྲ་དང་རྟོགས་པའོ། །གལ་ཏེ་ཞེས་བྱ་བ་ནི་འཆད་པའི་གཙོ་བོ་ཅི་ལ་བརྗོད་སྙམ་ན། གཙོ་བོ་ཡང་ཞེས་གསུངས་སོ། །
འདི་ལས་བཟློག་པ་ནི་ཕལ་པ་ཡིན་ནོ་ཞེས་བརྗོད་པ་ནི་ཁྱད་པར་ཞེས་བྱ་བའོ། །དེའི་ཕྱིར་ཐམས་ཅད་ལ་ཉེ་བར་བཏགས་པ་ནི་མི་འཐད་དོ། །སངས་རྒྱས་ལ་ནི་གཙོ་བོ་མེད་པའི་ཕྱིར་ཉེ་བར་བཏགས་པ་མི་འཐད་དོ་ཞེས་བརྗོད་པ་ནི་ཁྱད་པར་ལ་ནི་ཞེས་བྱ་བའི་ཐ་དད་པའི་ཁྱད་པར་ཅན་ཁོ་ནར་གཙོ་བོ་ཡིན་གྱི། ཁྱད་པར་ཐ་དད་པ་ཅན་མ་
ཡིན་པ་ནི་མ་ཡིན་ནོ་ཞེས་བྱ་བ་ཉིད་གང་ལས་ཡིན་ཏེ་མ་ཡིན་པ་ཉིད་དོ། །ཁྱད་པར་ཐ་དད་པ་ཅན་མ་ཡིན་ཡང་གཙོ་བོ་ཉིད་དོ། །དེ་ཉིད་བརྗོད་པ་ནི་ཁྱད་པར་ཐ་དད་པ་མེད་ཀྱང་ཞེས་བྱ་བའོ། །ཐ་དད་པ་ཁྱད་པར་གཙོ་བོ་ཞེས་བྱ་བ་ཉིད་ཀྱང་། གང་ལས་ཞེས་ཁོང་ནས་དབྱུང་བར་བྱ་བ་ཀྱང་གི་དོན་སྨྲས་པ་ནི་གཞན་ཡང་ཞེས་

བྱ་བའོ། དེའི་ཚེ་ཞེས་ཁོང་ནས་ཕྱུང་བ་ལ་རྣམ་པ་འདི་ལྟ་བུ་མཐའ་དག་ཅེས་སྦྱར་བར་བྱའོ། །ཁྱད་པར་ཐ་དད་པ་དང་ལྡན་པར་མ་དམིགས་པ་རྣམ་པ་འདི་ལྟ་བུ་མཐའ་དག་གོ། །དབྱུག་པ་ཅན་ལ་སོགས་པ་ཁོ་ན་གཙོ་བོར་འགྱུར་རོ་ཞེས་བྱ་བའི་དོན་ཏོ། །ཁྱད་པར་ཅན་ཡང་ཞེས་བྱ་བ་ནི་གཅིག་ཉིད་ལ་སོགས་པའི་
ཁྱད་པར་འབའ་ཞིག་ཏུ་ནི་མ་ཟད་པའི་སྐྱ་བསེང་གི་བུ་ལས་བྱུང་བར་འགྱུར་རོ་ཞེས་བྱ་བ་ལ་སོགས་པ་ནི་ཁྱད་པར་ཅན་སྐྱ་བསེང་གི་བུ་ཡང་ཉེ་བར་བཏགས་པ་ཡིན་ནོ། །གཡུལ་ངོར་བརྟན་པ་ལ་སོགས་པའི་རང་གི་མཚན་ཉིད་མེད་པའི་ཕྱིར་རོ། །ཐ་དད་པ་མེད་པ་ལ་ཐ་དད་དོན་མེད་ན་ཞེས་བྱ་བ་བཤད་པའི་ཕྱིར། གལ་
ཏེ་ཞེས་སྨོས་སོ། །ཅིའི་ཕྱིར་ཞེ་ན། དེ་ནི་འཇུག་པའི་རྒྱུ་མཚན་ཐ་དད་པ་ཞེས་སྨོས་སོ། །དེ་ཞེས་བྱ་བ་ནི་གཞི་མཐུན་པའོ། །དེ་ལ་ཨུཏྤལ་སྔོན་པོ་ལ་སོགས་པའི་སྒྲ་རྣམས་རྣམ་གྲངས་པ་ཡིན་པ་སྤངས་པའི་ཕྱིར་རེ་ཞིག་གཞན་གྱིས་ཀུན་བརྟགས་པའི་གཞི་མཐུན་པ་སེལ་བར་བྱེད་པ་ནི། དེ་ལ་རྗོད་པར་མི་བྱེད་
པ་ཡིན་ཏེ་ཞེས་བྱ་བའོ། །ཐ་དད་པར་གྱུར་པར་བྱེད་པས་ན་ཐ་དད་དེ། གཞི་མཐུན་པ་གང་ལ་འཇུག་པའི་རྒྱུ་མཚན་ཁྱད་པར་ཐ་དད་པ་ཡོད་པ་ནིའོ། །སྒྲ་དག་གམ་དོན་དག་གི་གཞི་མཐུན་པ་དེར་འགྱུར་ཏེ་མ་ཡིན་པ་ཉིད་དོ། །གང་གི་ཚེ་ཞེ་ན། དེའི་ཞེས་བྱ་བ་གཞན་ལ་རག་ལས་པ་མེད་པའི་ཁྱད་དང་ཁྱད་པར་
ཙམ་སྒྲ་ལ་སྣང་བ་ན་སྟེའོ། །དེ་བས་ནའོ། །སྒྲ་གཉིས་ཀྱི་གཞི་མཐུན་པ་ནི་དོན་གཅིག་ལ་འཇུག་པ་ཡིན་ལ། དོན་གཉིས་ཀྱི་གཞི་མཐུན་པ་ནི་དོན་གཅིག་ལ་གནས་པ་ཡིན་ནོ། །སོ་སོར་ངེས་པའི་དོན་བརྗོད་པའི་ཕྱིར་རོ་ཞེས་བྱ་བ་ནི་སྔོན་པོའི་སྒྲས་ཡོན་ཏན་སྔོན་པོ་ཉིད་བརྗོད་ལ། ཨུཏྤ་ལའི་སྒྲས་ནི་ཨུཏྤ་ལའི་
རིགས་ཉིད་བརྗོད་པ་ཡིན་ནོ། །དེས་ན་དོན་གཅིག་ལ་འཇུག་པར་ཅི་ལྟར་འགྱུར། ཡོན་ཏན་ནམ་རིགས་མཚོན་ཟིན་པ་དེའི་གཞི་རྫས་མཚན་པ་ཡིན་ཏེ། དེ་མེད་ན་མི་འབྱུང་བའི་ཕྱིར་རོ། །དེས་སྒྲ་གཉིས་གཞི་མཐུན་པར་འཇུག་པ་ཡིན་ནོ་སྙམ་དུ་བསམས་པའོ། །སུན་འབྱིན་པ་ནི་གཅིག་ཉིད་དང་ཞེས་བྱ་བའོ། །
སྔོན་པོའི་སྒྲས་ཡོན་ཏན་སྔོན་པོ་ཉིད་དང་ལྡན་པའི་རྫས་བརྗོད་པ་ན། ཨུཏྤ་ལའི་རིགས་དང་ལྡན་པ་ཉིད་བརྗོད་པར་འགྱུར་རོ། །མེད་དོ་ཞེས་བྱ་བ་ནི་གཞི་མཐུན་པ་སྟེ། སྦྱོར་བ་མེད་པའི་ཕྱིར་རོ། །དོན་དག་གམ་ཞེས་བྱ་བའི་ཕྱོགས་ལ། སུན་དབྱུང་བ་བརྗོད་པ་ནི་དོན་རྣམས་ཞེས་བྱ་བའོ། །སོ་སོར་ངེས་པའི་

དོན་བརྗོད་བཞིན་པའི་སྒྲ་དག་གི་དོན་དག་ནི་རང་དབང་ཁོ་ནར་སྣང་བ་ཡིན་ནོ། །མཚོན་ཟིན་པས་མཚོན་པ་ལ་དམིགས་ན་ཡང་ཉེས་པ་དེ་ཉིད་ཡིན་ནོ། །གལ་ཏེ་དེ་དག་གཉིས་དང་རང་དབང་དུ་སྣང་བ་མ་གྲུབ་སྟེ། དེ་དག་ནི་འགའ་ཞིག་དང་འབྲེལ་པར་རྟོགས་པ་ཡིན་པས་ན་དོན་
གཅིག་པོ་དེ་ཉིད་དང་གཞི་ཡིན་ནོ་སྙམ་ན། འབྲེལ་པ་ཡོད་པ་ཡིན་ན་ཡང་ཞེས་སྨོས་ཏེ། མངོན་སུམ་གྱིས་མ་དམིགས་པའི་ཕྱིར། འབྲེལ་པ་ནི་མེད་པ་ཁོ་ནའོ། །དེ་ལྟ་མོད་ཀྱི་འབྲེལ་པ་ཡོད་པ་ཡིན་ན་ཡང་ཇི་ལྟར་འབྲེལ་པ་ཅན་ཡིན་ཏེ། མ་ཡིན་པ་ཁོ་ནའོ། །འབྲེལ་པ་གཞན་རྟོག་ན་ནི་ཐུག་པ་མེད་
པར་ཐལ་བའི་ཕྱིར་རོ་སྙམ་དུ་དགོངས་པའོ། །འོན་ཏེ་རྗེས་སུ་དཔག་པ་ལས་རང་གི་ངོ་བོ་ཁོ་ནས་འབྲེལ་པ། འབྲེལ་པ་ཅན་དུ་གྲུབ་པོ་སྙམ་ན། ཇི་ལྟར་འཇལ་བ་ཡིན་ཞེས་གསུངས་སོ། །དེ་དང་འབྲེལ་པའི་རྟགས་མ་གྲུབ་པའི་འབྲེལ་པ་རང་གི་ངོ་བོས་འབྲེལ་པ་ཅན་ཡིན་པར་གང་ལས་འཇལ་བ་ཡིན། དེས་
ན་འབྲེལ་པ་མ་གྲུབ་པའི་ཕྱིར་ན་དེ་དག་ནི་འགའ་ཞིག་གིས་འབྲེལ་པ་ཅན་དུ་རྟོགས་པ་མ་ཡིན་ནོ་ཞེས་བྱ་བར་དགོངས་པའོ། །སོ་སོར་ངེས་པ་ནི་དོན་བརྗོད་པའི་ཕྱིར་སྒྲ་དག་ནི་གཞི་མཐུན་པ་མ་ཡིན་ནོ་ཞེས་བརྗོད་པ་གང་ཡིན་པ་དེ་ལ་གཞན་གྱི་ལན་གྱི་དོགས་པ་བསུ་བ་ནི། གལ་ཏེ་ཞེས་བྱ་བའོ། །དོན་ནི་འདི་ཡིན་ཏེ།
འབྲེལ་པ་རྟོགས་པས་ཅི་བྱ་སྟེ། འདུ་བའི་འབྲེལ་པའི་སྟོབས་ཀྱིས་སྔོན་པོ་ལ་སོགས་པ་ཡོན་ཏན་གྱི་མཚན་ཉིད་ཀྱི་དོན་ནི་སྔོན་པོ་ལ་སོགས་པའི་སྒྲ་ལས་རྫས་དང་ཐ་མི་དད་པར་རྟོགས་པའོ། །དེས་ན་རྫས་གཅིག་གི། གཞན་གྱི་དབང་དུ་རྟོགས་པའི་དོན་དག་དང་། དེའི་སྒྲ་དག་གཞི་མཐུན་པ་ཡིན་ནོ་སྙམ་
དུ་སེམས་ན། ལན་དུ་གཅིག་ཉིད་ཀྱིས་ཏེ། སྔོན་པོའི་སྒྲས་གང་ལ་ཡོན་ཏན་སྔོན་པོ་འདུ་བ་དེ་རྟོགས་ཕྱིར། དེ་ལ་འདུ་བ་ཨུཏྤ་ལའི་རིགས་ཉིད་ཀྱང་རྟོགས་པ་ཉིད་དོ། །དེས་ན་ཨུཏྤ་ལའི་སྒྲ་ནི་དོན་མེད་པར་འགྱུར་ཏེ། རྟོགས་ཟིན་པའམ་རྟོགས་པར་བྱེད་པའི་ཕྱིར་རོ། །དེས་ན་སྦྱོར་བ་མེད་པའི་ཕྱིར་
གཞི་མཐུན་པར་ག་ལ་འགྱུར། ཨུཏྤ་ལའི་སྒྲ་སྦྱར་བ་ནི་རྟོགས་ཟིན་པ་རྟོགས་པར་བྱ་བའི་དོན་ཉིད་དུ་ཡིན་ནོ་སྙམ་ན། གལ་ཏེ་གཞན་གྱིས་ཞེས་རྗེས་སུ་བརྗོད་པ་གསུངས་སོ། །དོན་དེ་ཉིད་ཅེས་བྱ་བ་ནི། དེ་ཙམ་ཞིག་སྔོན་པོའི་སྒྲས་བསྟན་པའི་དོན་གྱི་ཚོགས་སོ། །ཡོན་ཏན་སྔོན་པོའི་མཚན་ཉིད་ཀྱི་

དོན་ནི་སྔོན་པོའི་དོན་ཏོ། །དེ་ལ་སོགས་པའི་དེ་དང་འབྲེལ་པ་ཙམ་མོ། །སྔོན་པོའི་སྒྲ་ལས་རྫས་ཀྱི་རང་བཞིན། ཨུཏྤ་ལའི་རིགས་དང་འབྲེལ་བར་ནི་མི་རྟོགས་སོ་སྙམ་ན། ལན་དུ་སྔོན་པོའི་རྫས་འདུ་བ་ཅན་གྱི་རྟོགས་པ་ན། དེ་དང་འབྲེལ་པའི་ཨུཏྤལ་ཉིད་མ་རྟོགས་པ་གཞན་ནི་ཡོད་པ་མ་ཡིན་ཏེ། དེ་ནི་དེ་ལ་
འདུ་བའི་ཕྱིར་རོ། །དཔེ་བཤད་པ་ནི་ཇི་ལྟར་ཞེས་བྱ་བའོ། །དེའི་དོན་ནི་འདི་ཡིན་ཏེ། གང་གིས་གང་དང་འདུ་བ་ཅན་བཟུང་བ་དེ་ནི། དེར་འདུས་པ་ཡང་བཟུང་སྟེ། དཔེར་ན་གོང་བུ་འཛིན་པའི་མངོན་སུམ་གྱིས་རྣ་བ་ལ་སོགས་པ་བཞིན་ནོ། །སྔོན་པོའི་སྒྲ་ལས་སྐྱེས་པའི་ཤེས་པས་ཀྱང་། ཨུཏྤལ་ཉིད་ཀྱི་
རིགས་དང་འདུ་བ་ཅན་གྱི་ཨུཏྤ་ལའི་རྫས་བཟུང་བ་ཡིན་ནོ་ཞེས་བྱ་བ་ནི་རང་བཞིན་གྱིས་ཐལ་བའོ། །དེས་ན་སྒྲ་གཞན་དོན་མེད་པར་འགྱུར་བའི་ཕྱིར་སྔར་བཤད་པའི་ཉེས་པ་ཉིད་དོ། །སྒྲ་ནི་ཞེས་བྱ་བ་ནི་གཞན་གྱིའོ། །གལ་ཏེ་ཡང་སྔོན་པོའི་སྒྲས་འབྲེལ་ཏོ། །འཕངས་པ་དེ་ལྟ་ན་ཡང་ཨུཏྤལ་ཉིད་འདུ་བའི་
ཨུཏྤལའི་དོན་བརྗོད་པ་ནི་མ་ཡིན་ཏེ། དེས་ན་སྒྲ་གཞན་སྦྱོར་བ་ཡིན་ནོ་སྙམ་དུ་བསམས་པའོ། །སུན་འབྱིན་པ་ནི། ཁྱད་པར་ཅན་དང་ཞེས་བྱ་བ་ནི། སྔོན་པོ་ལ་སོགས་པ་ཡོན་ཏན་གྱི་བདག་ཉིད་ཀྱི་དོན་ནི་ཁྱད་པར་ཅན་གྱི་རྫས་ལ་འདུ་བ་ཡིན་ཏེ། དེས་ན་རྫས་དང་བྲལ་བའི་དོན་དེ་ནི་གང་ན་ཡང་མེད་དོ། །དེ་བས་
ན་སྔོན་པོ་སྒྲ་ལས་འདུས་པའི་སྔོན་པོ་རྟོགས་པ་ན་འདུ་བ་ཅན་ཡང་རྟོགས་པར་འགྱུར་ཏེ། །འདུ་བ་ཅན་ལ་སོགས་པར་ནི། །འདུ་བ་རྟོགས་པ་མ་ཡིན་ནོ། །འདུ་བ་ཅན་རྟོགས་པ་ན་དེ་ལ་འདུས་པའི་ཨུཏྤ་ལ་ཡང་རྟོགས་པར་འགྱུར་བའི་ཕྱིར། ཨུཏྤ་ལ་བརྗོད་པ་ནི་དོན་མེད་དོ། །སྒྲ་སྦྱར་བ་ནི་དོན་རྟོགས་པར་བྱ་བའི་
ཕྱིར་ཡིན་ན། གལ་ཏེ་དོན་ཇི་ལྟར་རུང་བར་རྟོགས་ན་སྒྲ་སྦྱར་བས་ཅི་བྱ། དེས་ན་གཞི་མཐུན་པར་མི་འགྱུར་རོ་སྙམ་དུ་དགོངས་པའོ། །ཤིན་དུ་གསལ་བ་མཐོན་ཏིང་ལ་སོགས་པ་ལ་མདོག་སྡུག་གུ་ཙམ་ཉིད་དབྱིབས་འདིས་གནས་པ་ཡིན་ནོ། །དེས་ན་ཁྱད་པར་ཅན་གྱི་དོན་མེད་པར་ཡང་ཁྱད་པར་རྟོགས་པ་ཡིན་ནོ་
ཞེས། རྨོངས་པའི་དོགས་པ་ཟློག་པར་བྱེད་པ་ནི། མཐོན་ཏིང་ཞེས་བྱ་བ་ལ་སོགས་པའོ། །འདི་ཡང་སྔོན་པོའི་ཁྱད་པར་ཅན་གྱི་དོན་གཞན་ཉིད་དོ་ཞེས་པའི་དོན་ཏོ། །འདིས་ནི་ཇི་སྐད་བཤད་པའི་སྦྱོར་བ་ལ་མ་གྲུབ་པ་ཉིད་མ་ཡིན་ནོ། །གལ་ཏེ་ཡང་འགའ་ཞིག་ཏུ་དེ་ལྟ་ཡིན་པ་དེ་ལྟ་ན་ཡང་ངེས་པ་གང་ལས་

ཡིན་ཞེས་བྱ་བའི་མ་ངེས་པ་སྤངས་པ་བརྗོད་པ་ནི་དེ་ལྟར་མངོན་སུམ་གྱིས་ཞེས་བྱ་བའོ། །མངོན་སུམ་ལ་ཡང་འདུ་བ་ཅན་རྟོགས་པ་ཉིད་འདུས་པར་རྟོགས་པ་ཡིན་ཏེ་རྒྱུ་མཚན་གཞན་མེད་པའི་ཕྱིར་རོ། །འདུ་བ་ཅན་འཛིན་ཀྱང་། འདུས་པ་འཛིན་པར་མི་འགྱུར་བ་གང་ཡིན་པ། སྒྲ་འཇུག་
གཞན་དུ་ཇི་ལྟར་ཡིན། །གཞན་ཡང་དངོས་པོ་ལ་མངོན་པར་ཞེན་པར་སྨྲ་བ་འདི་ལ། སྔོན་པོ་ཨུཏྤ་ལ་ལ་ངེས་སམ་མ་ངེས་ཞེས་དྲི་བར་བྱའོ། །གཉི་ག་ལྟར་ཡང་ཨུཏྤལ་གྱི་སྒྲ་མ་སྦྱར་བའི་ཕྱིར་ན། གང་དུ་གཞི་མཐུན་པར་འགྱུར་ཞེས་སྟོན་པ་ནི། གལ་ཏེ་ཞེས་བྱ་བ། སྔོ་ཉིད་ཅེས་བྱ་བའི། སྔོ་ཉིད་ཅེས་བྱ་
བས་ནི་ཆོས་བསྟན་པའི་སྒོ་ནས་ཆོས་ཅན་འཛིན་པའོ། །གལ་ཏེ་ཨུཏྤལ་ལ་ངེས་པའི་སྔོན་པོ་བརྗོད་བྱ་ཡིན་ན་དེའི་ཚེ་སྔོན་པོའི་སྒྲས། དེ་ལྟ་བུའི་སྔོན་པོ་རྟོགས་པ་ན། ཨུཏྤ་ལ་ཡང་རྟོགས་པའི་ཕྱིར་ན། ཨུཏྤ་ལའི་སྒྲ་དོན་མེད་དོ། །འོན་ཏེ་བྱ་རོག་དང་ཁུ་བྱུག་ལ་སོགས་པ་ཨུཏྤ་ལ་མ་ཡིན་པ་ལ་ཡོན་ཏན་སྔོན་པོ་
ཡོད་པ་ཡིན་ན། དེའི་ཚེ་སྔོན་པོའི་སྒྲས་ཐུན་མོང་གི་སྔོན་པོའི་རང་བཞིན་རྟོགས་པར་འགྱུར་ལ། དེ་ལྟ་ན་ཡང་བུམ་པ་དང་། སྣམ་བུ་ལྟར་གཞི་མཐུན་པ་མེད་པའི་ཕྱིར། ཁྱད་པར་ཅན་གྱི་དོན་རྟོགས་པ་ལ་ཉེ་བར་མི་མཁོ་བའི་ཕྱིར་ཨུཏྤ་ལའི་སྒྲ་དོན་མེད་དོ། །འོན་ཏེ་སྔོན་པོ་ཉིད་གཞན་ཁོ་ན་ལ་ཡོད་པ་ཡིན་ནོ། དེ་
ལྟ་ཡིན་ན་ཡང་སྔོན་པོའི་སྒྲས་དོན་གྱི་ཚོགས་པ་གང་བརྗོད་པ་དེ། ཨུཏྤ་ལའི་སྒྲས་མ་བརྗོད་པའི་ཕྱིར། ཇི་ལྟར་དོན་གཅིག་ལ་འཇུག་པས་བྱས་པའི་གཞི་མཐུན་པར་འགྱུར། དེ་བཞིན་དུ་ཨུཏྤ་ལའི་སྒྲས་དོན་གྱི་ཚོགས་གང་བརྗོད་པ་ཞེས་བྱ་བར་ཡང་སྦྱར་རོ། །འོན་ཏེ། སྔོན་པོའི་སྒྲས་ཁྱབ་པ་ཨུཏྤ་ལའི་
སྒྲས་རྣམ་པར་གཅོད་ལ། ཨུཏྤ་ལའི་སྒྲས་ཁྱབ་པ་ཨུཏྤ་ལའི་དཀར་པོ་ལ་སོགས་པ་ཡང་སྔོན་པོའི་སྒྲས་གཅོད་པར་བྱེད་པ་ཡིན་ནོ། །དེས་ན་ཨུཏྤ་ལ་སྔོན་པོ་གཅིག་ལ་ཆོས་གཉི་ག་ཡོད་པའི་ཕྱིར་ན་གཞི་མཐུན་པར་འགྱུར་རོ་སྙམ་ན། དེ་ཡང་མི་འཐད་དེ། གང་གི་ཕྱིར་ཁྱབ་པ་ཞེས་བྱ་བས་ནི་གསལ་བའི་དོན་
བརྗོད་པ་ཡིན་ནོ། །དེས་ན་ཇི་སྙེད་ཅིག་གིས་གསལ་བའི་དོན་དེ་མཐའ་དག་ཅི་ལྟར་གཞན་གྱིས་རྣམ་པར་བཅད་པར་ནུས། མངོན་སུམ་གྱིས་གསལ་བའི་དོན་ནི་གཞན་གྱིས་རྣམ་པར་བཅད་པར་མི་ནུས་སོ། །འོ་ན་གཉིས་པ་སྦྱར་བ་ཅི་དགོས་ཤེ་ན། དངོས་པོ་བརྗོད་པར་བྱ་བའི་ཕྱོགས་ལ་འདི་ཉིད་བཅད་པར་བྱ་བ་

ཡིན་ནོ། །དེ་ཉིད་ཀྱི་ཕྱིར་མཇུག་སྡུད་པ་ནི། དེའི་ཕྱིར་ཞེས་བྱ་བ་ལ་སོགས་པའོ། །ཆ་མེད་པར་མངོན་སུམ་ལ་སྣང་བའི་ཨུཏྤལ་སྔོན་པོ་ལ་སྔོན་པོ་ཉིད་དང་ཨུཏྤལ་ཉིད་ཐ་དད་པ་ཡིན་ལ། ཨུཏྤལ་ནི་ཨུཏྤལ་གཞན་དང་ཐ་མི་དད་པ་ཡིན་ཏེ། གཅིག་ཏུ་རྟོགས་པའི་ཕྱིར་རོ། །གཞི་མཐུན་པ་ཡང་དེ་ལ་ལྟོས་ནས་
ཡིན་ཏེ། དེས་ན་དོན་དེ་འདྲ་བ་མེད་ཀྱང་བློ་ཉིད་དེ་ལྟ་དེ་ལྟར་འཇུག་པའི་ཕྱིར། རྣམ་གྲངས་པ་ཉིད་ལ་སོགས་པ་མ་ཡིན་ནོ། །སླུ་བ་ཡང་མ་ཡིན་ཏེ། དེ་མ་ཡིན་པ་ལས་ལྡོག་པའི་རྩ་བ་ཡིན་པའི་ཕྱིར་རོ། །འདི་ཡང་རྣམ་འགྲེལ་མཛད་པ་ཉིད་ཀྱིས་བཤད་པ་ཡིན་ནོ་ཞེས་སྟོན་པ་ནི་འདི་ལྟར་ཞེས་བྱ་བའོ། །
བཤད་ཟིན་ཏོ་ཞེས་བྱ་བ་ནི་གྲངས་སོགས་དང་ལྡན་པའི་སྒྲ་ནི་རྣམ་གྲངས་མིན་ཞེས་བྱ་བའི་མཐར་ཐུག་པས་སོ། །ལྷག་མ་ཆད་པ་ནི་དེར་ཡང་ཞེས་བྱ་བའོ། །ཡོན་ཏན་གཅིག་གོ་ཞེས་བྱ་བ་ལ་སོགས་པ་ཡོན་ཏན་ལ་ཡང་གྲངས་ཀྱི་མཚན་ཉིད་ཀྱི་ཡོན་ཏན་གཞན་ཡོད་དོ་སྙམ་དུ་དོགས་ན། དེ་ལྟར་ཡིན་ན་ཞེས་
པའོ། །ཇི་ལྟར་འདི་གཉིས་ཁྱད་པར་མེད་པར་འགྱུར་ཞེ་ན། འདི་ལྟར་ཞེས་གསུངས་སོ། །གལ་ཏེ་དེ་ལྟ་ཡིན་མོད། སྐབས་ལ་ཅི་འོངས་སྙམ་ན། འཕྲོད་པ་འདུ་བ་ཅན་གྱི་རྒྱུ་ཉིད་ནི་ཞེས་གསུངས་སོ། །ལྡན་པ་ལ་སོགས་པའི་ཡོན་ཏན་གྱི་འདུ་བ་ཅན་གྱི་རྒྱུ་ཉིད་ནི་ལྡན་པ་ལ་སོགས་པའི་ཡོན་ཏན་
དང་ལྡན་ན་སྟེ་འབྲེལ་འགྱུར་རོ། །བཏུང་བ་ལ་སོགས་པ་ལ་ཡང་གཟུགས་ལ་སོགས་པའི་ཡོན་ཏན་དང་ལྡན་པ་ཡང་ངོ་སྙམ་དུ་དགོངས་པའོ། །དེ་ལྟ་ན་ཡང་ཇི་ལྟར་ཁྱད་པར་མེད་པར་འགྱུར་ཏེ། བྱ་བ་དང་ལྡན་པ་ཉིད་མ་ཡིན་པའི་ཕྱིར་རོ་སྙམ་ན། ལྕི་བ་ཉིད་ཅེས་གསུངས་སོ། །འོ་ན་ཇི་ལྟར་ཁྱད་པར་རྣམས་ཐ་དད་
མེད་པའི་ཕྱིར། བློ་ཐ་དད་པར་འགྱུར། དེའི་ཐ་དད་པ་བག་ཆགས་ཀྱི་སྟོབས་ལས་བྱུང་བ་ཡིན་ན་ཡང་། ཇི་ལྟར་སླུ་བར་མི་འགྱུར་བའི་དོགས་པ་སྤོང་བར་རྣམ་འགྲེལ་གྱི་ལྷག་མ་ཉེ་བར་སྡུད་པའི་སྒོ་ནས་འཆད་པ་ནི་དེའི་ཕྱིར་ཞེས་བྱ་བའོ། །དེ་མ་ཡིན་པའི་ལས་ལྡོག་པའི་རྩ་བ་ཅན་ཡིན་པའི་ཕྱིར་ན། སླུ་བ་མ་
ཡིན་ནོ་སྙམ་དུ་བསམས་པའོ། །ལས་མ་ཡིན་པ་ཉིད་དམ་རྫས་མ་ཡིན་པ་ཉིད་ཀྱང་སྤྱི་ནི་མ་ཡིན་ཏེ། སྤྱི་ལ་ཡང་ཡོད་པའི་ཕྱིར་རོ། །དེ་བཞིན་དུ་ཅི་རིགས་པར་དཔག་པར་བྱའོ། །ལས་མ་ཡིན་པ་དང་རྫས་མ་ཡིན་པའི་སྒྲ་དེར་ནིའོ། །དེ་དང་ལྡན་པ་ལས་གྲངས་ལ་སོགས་པ་ཐ་དད་པ་བཞིན་དུ་ཞེས་

འབྲེལ་ཏོ། །དེ་ཡང་ཆོས་གཞན་ཁྱད་པར་བྱེད་པ་ཡིན་ཞེས་བྱ་བ་ནི་ཆོས་གཞན་དཀར་པོ་ཉིད་མ་ཡིན་པ་ཟློག་པར་བྱེད་པ་ཡིན་གྱི། ཐ་དད་པར་བསྟན་པ་ཙམ་གྱིས། དངོས་པོ་ཐ་དད་པར་འགྲུབ་པ་ནི་མ་ཡིན་ནོ་ཞེས་བྱ་བའི་དོན་ཏོ། །འདི་ཉིད་བཟློག་པ་ནི་དེ་ཙམ་ཞེས་བྱའོ། །དེ་ཙམ་
ཤེས་པར་འདོད་པ་ཞེས་བྱ་བ་ནི་ལྡོག་པ་ཙམ་ཤེས་པར་འདོད་པ་ལའོ། །འགྲེང་བ་ལ་སོགས་པའི་ཆོས་གཞན་ཀུན་གང་ཡིན་པ་དེ་དག་གང་གིས་འཕངས་པ་མེད་པར་རོ། །སྟོན་པར་བྱེད་པའི་སྒྲ་གཞན་གྱི་གོ་སྐབས་འབྱེད་པ་ནི་འཕངས་པ་ཡིན་ནོ། །གང་གི་ཚེ་སོར་མོ་ལྡན་པར་གྱུར་ཏོ་ཞེས་ཆོས་ཅན་དང་གཞི་མཐུན་
པར་ཆོས་བརྗོད་པའི་སྒྲ་སྦྱར་བ་དེའི་ཚེ་འགྲེང་བ་ལ་སོགས་པའི་ཁྱད་པར་གྱི་སྐབས་ཡོད་པ་ཡིན་ལ། སོར་མོའི་ལྡན་པ་ཞེས་བྱ་བར་ནི་ཆོས་ཅན་དང་གཞི་མཐུན་པའི་ཁྱད་པར་གཞན་གྱི་སྒྲའི་གོ་སྐབས་ཡོད་པ་མ་ཡིན་ནོ། །རྟོགས་པར་བྱ་བས་ཤེས་པར་འདོད་པ་ཡང་དེ་ཙམ་ཉིད་ཡིན་ནོ། །དེ་བཞིན་དུ་དཀར་
པོ་ལ་སོགས་པའི་སྒྲ་ལ་ཡང་ངོ་། །གལ་ཏེ་གཉི་གས་ཀྱང་དོན་གཅིག་ཁོ་ན་བརྗོད་པའི་ཕྱིར། རྣམ་པར་དབྱེ་བ་འདིར་ཇི་ལྟར་འགྱུར་སྙམ་ན། དོན་གཅིག་བརྗོད་ཀྱང་ཞེས་བྱ་བ་གསུངས་སོ། །དེ་ལྟར་ཞེས་བྱ་བ་ནི་ཆོས་དང་ཆོས་ཅན་བརྗོད་པ་ཉིད་དུ་རྣམ་པར་གཞག་པར་བྱས་པ་གང་ཡིན་པ་སྟེ། དེ་ལ་དེ་སྐད་
ཅེས་བརྗོད་དོ། །དེའི་ཕྱོགས་གཅིག་ཅེས་བྱ་བ་ནི་བ་ལང་འགའ་ཞིག་ཁོ་ན་དཀར་པོ་ཡིན་པའི་ཕྱིར་རོ། །འཛིན་པ་གཞན་དང་ལྡན་པའི་ཡོད་པའི་ཞེས་བྱ་བ་ཡི་ནི་སྣམ་བུ་ལ་སོགས་པ་ལའོ། །ཐ་དད་པ་ནི་ཞེས་བྱ་བ་ནི་བ་ལང་ཉིད་ནི་རྗེས་སུ་འགྲོ་བ་ལ་དཀར་པོ་ཉིད་ནི་ལྡོག་པ་སྟེ། རྗེས་སུ་མི་འགྲོ་བའོ། །འཛིན་པ་
གཞན་དང་ལྡན་པ་ལ་ལྟོས་ནས་ནི་དཀར་པོ་ཉིད་རྗེས་སུ་འགྲོ་ལ། བ་ལང་ནི་ལྡོག་པ་ཡིན་ནོ། །དེས་ན་བ་ལང་དཀར་པོ་དག་ནི་ཐ་དད་པའི་ཐ་སྙད་ཙམ་དུ་ཟད་དོ། །དཀར་པོ་ཉིད་འབའ་ཞིག་ཅེས་བྱ་བ་ནི་གང་གི་ཚེ་ཐག་རིང་རབ་ཙམ་ནས་བསྒྲུབས་པའི་ཆ་གཞན་དང་བྲལ་བས་བློའི་ཚད་ཙམ་དམིགས་པ་དེའི་ཚེའོ། །
སྔོན་མཐོང་བ་ལས་ཞེས་བྱ་བ་ནི་འདྲི་བའི་ལན་འདེབས་པར་བྱེད་པའི་སྔར་འབའ་ཞིག་ངེས་པའི་ཕྱིར་རོ། །ཞེས་བྱ་བ་ནི་འདྲི་བར་བྱེད་པའོ། །འདིས་ནི་ཐ་དད་པར་སྟོན་པའི་གཞུང་བཙུགས་པ་ཡིན་ནོ། །འོ་ན་ཐ་མི་དད་པར་ཇི་ལྟར་སྟོན་སྙམ་ན། གང་གི་ཚེ་ཞེས་བྱ་བས་གཞུང་འཛུགས་པར་བྱེད་དོ། །འདིར་ཡང་

ངེས་པར་མ་ཤེས་པའི་ཁྱད་པར་ཉིད་དོ། །འོན་ཀྱང་དཀར་པོ་འདི་ཅི་ཡིན་ཆོས་ཅན་དང་གཞི་མཐུན་པས་འདྲི་བ་ན། དེ་ཁོ་ན་ལྟར་ལན་འདེབས་པ་ཡིན་ནོ། །དེ་ཁོ་ནའི་དོན་ནི་འདི་ཡིན་ཏེ་ཞེས་བྱ་བ་ནི་དེ་ཁོ་ནར་གྱུར་པའི་དོན་ནི་དེ་ཁོ་ནའི་དོན་ཏོ། །འདི་ཡིན་ཏེ་ཞེས་བྱ་བ་ནི་འཆད་པར་འགྱུར་བའི་ཚིགས་སུ་བཅད་
པས་བསྟན་པར་བྱ་བ་སྟེ། ཐ་དད་པ་ཡི་གནོད་མ་ཡིན། །ཞེས་བྱ་བའི་ཐར་པའི་སྟོན་པར་བྱེད་པའོ། །འགའ་ཞིག་ལས་ཞེས་བྱ་བ་མིག་མི་གསལ་བ་དང་། ཐག་ཅུང་ཟད་རིང་བ་ལ་སོགས་པའི་མཚན་ཉིད་ལས་ཐ་དད་པར་འདྲི་བ་ཡིན་ནོ། །དེའི་ཕྱིར་ན་དེ་ཁོ་ན་ལྟར་ཐ་དད་པ་ཉིད་དུ་མཁས་པ་ལེན་འདེབས་
པས་སོ། །རྣམ་པ་གང་གིས་ལན་འདེབས་སྙམ་ན། ཡོན་ཏན་དཀར་པོ་འདི་རྟའི་ཡིན་ནོ་ཞེས་ལན་འདེབས་སོ། །དེ་ལྟ་བུའི་རྣམ་པར་ལན་འདེབས་སོ་ཞེས་བྱ་བའི་དོན་ཏོ། །འདིར་ནི་དེ་ལྟ་བུ་ཉིད་དུ་ངེས་ཞེས་བྱ་བ་ནི་འགྲོ་བ་འདིར་དོན་གཞན་གནས་པ་ནི་མེད་པའོ། །རྟོག་པ་དང་ལྡན་པ་ནི་འདྲི་བའོ། །
དེ་ཞེས་བྱ་བ་ནི་དྲིས་པའོ། །ཚུལ་ལུགས་གཞན་གྱི་ཞེས་བྱ་བ་ནི་འདུ་བའི་སྟོབས་ཀྱིས་ཡོན་ཏན་གྱི་སྒོ་ནས། ཡོན་ཏན་ཅན་ལ་སྒྲ་འཇུག་པ། །ཞེས་བྱ་བ་ལ་སོགས་པའོ། །ཚད་མའི་འཇུག་པ་ལ་ལྟོས་ནས། །ཞེས་བརྗོད་པ་གང་ཡིན་པ་དེ་གསལ་བར་བྱེད་པ་ནི། མངོན་སུམ་ཉིད་དམ་ཞེས་བྱ་བའོ། །
དེས་ན་ཐ་དད་སྲིད་པ་ཡིན་ཏེ། མི་སྲིད་པར་འདོད་དོ། །འོ་ན་ཐ་དད་པའི་ཐ་སྙད་དུ་ཇི་ལྟར་འགྱུར་སྙམ་ན། གང་གི་ཚེ་ཞེས་གསུངས་སོ། །སྲིད་པའི་ཕྱིར་ཞེས་བྱ་བ་ནི་ཀུན་བརྟགས་པ་ལས་སོ། །དེ་ལྟ་ཉིད་ཅེས་བྱ་བ་ནི་ཐ་དད་པ་ཉིད་དུའོ། །འོ་ན་འཇིག་རྟེན་འདི་འདྲ་བའི་ཐ་དད་པ་ཅི་སྟེ་འདོར་ཞེ་ན། འགྲོ་བའི་
རྟོགས་པ་ཞེས་གསུངས་སོ། །འདི་ལྟ་བུ་ཞེས་བྱ་བ་ནི་དོན་དམ་པའི་ཐ་དད་པ་མེད་པའོ། །དངོས་པོ་སེམས་དང་ནི་དོན་དམ་པའི་ཐ་དད་པའི་སེམས་པས་སོ། །ཆ་དེ་ཙམ་གྱིས་དོན་གྲུབ་པར་ཁས་བླངས་པས་བསླད་པར་མི་སེམས་སོ་ཞེས་བྱ་བར་དགོངས་པའོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །གལ་ཏེ་ཞེས་
བྱ་བ་ནི་གཞན་གྱིའོ། །བུམ་པའི་ཞེས་བྱ་བ་འདི་ནི་གཟུགས་ལ་སོགས་པ་ཉིད་བརྗོད་པ་ཡིན་ནོ། །དེ་ཉིད་ཀྱི་གཟུགས་ལ་སོགས་པ་རྣམས་ཀྱི་ཞེས་སྨོས་སོ། །གཟུགས་ལ་སོགས་པ་རྣམས་ཀྱི་ཞེས་བྱ་བ་ནི་ཉེ་བར་མཚོན་པ་སྟེ་གཟུགས་ཀྱི་གཟུགས་སོ། །རོའི་རོ་ཞེས་བྱ་བ་ལ་སོགས་པ་ལ་ཡང་བལྟ་བར་བྱའོ། །

བུམ་པའི་བུམ་པ་ཞེས་བྱ་བ་ལ་ནི་ཚོགས་པ་ལ་ལྟོས་ནས་ཏེ་གཟུགས་ལ་སོགས་པ་རྣམས་ཀྱི། གཟུགས་ལ་སོགས་པ་ཞེས་བྱ་བའི་ཐ་ཚིག་གོ། །ཞེས་ཀྱི་སྒྲ་ནི་རྣམ་པ་དེ་ལྟར་གྱི་དོན་ཏོ། །གཟུགས་ལ་སོགས་པ་དེ་རྣམས་ཀྱིས་མཚུངས་པའི་འབྲས་བུ་ནི་ཆུ་འཛིན་པ་ལ་སོགས་པ་ཡིན་ལ། དེའི་རྒྱུ་
མ་ཡིན་པ་ནི་སྣམ་བུ་ལ་སོགས་པ་གང་ཡིན་པ་དེ། དེ་རྣམ་པར་བཅད་པའི་དོན་དུ་བུམ་པའི་སྒྲ་འཇུག་གོ། །གང་གི་ཕྱིར་གཟུགས་ལ་སོགས་པའི་ནུས་པའི་ཁྱད་པར་མ་སྤངས་པར་འཇུག་པ་དེས་ན། ཕྱོགས་གཅིག་ལ་འཇུག་པ་གཟུགས་ལ་སོགས་པའི་སྒྲ་དང་འདི་གཞི་མཐུན་པར་ཇི་ལྟར་འགྱུར། འདི་ཙམ་ཉིད་
ཀྱིས་ནི་རིགས་དང་ཚོགས་པའི་སྒྲ་གཉིས་ཀྱི་ཁྱད་པར་ཡང་ལེགས་པར་གནས་པ་ཡིན་ནོ་ཞེས་བཤད་པ་ནི་དེས་ན་འདི་ནི་ཞེས་བྱ་བའོ། །ཐུན་མོང་གི་བུམ་པ་བརྗོད་པ་དེ་ཉིད་ཀྱིས་རིགས་ཀྱི་སྒྲ་ལ་ཚོགས་པའི་སྒྲ་ཐ་དད་པ་ཡིན་ནོ། །རིགས་ཀྱི་སྒྲ་ཡང་སོ་སོར་ནུས་པའི་བརྗོད་པའི་ཕྱིར་ཚོགས་པའི་སྒྲ་ལས་ཐ་དད་པ་ཡིན་
ནོ། །གལ་ཏེ་ཡན་ལག་ཅན་མེད་པའི་ཕྱིར་བུམ་པའི་གཟུགས་ལ་སོགས་པ་ཞེས་བྱ་བ་འདིས་ཅི་སྟོན་ཞེ་ན། བུམ་པའི་ནི་ཞེས་གསུངས་སོ། །དེ་ནུས་ཁྱད་པར་གྱི་གཟུགས་ལ་སོགས་པའི་ནུས་པའི་ཁྱད་པར་རོ། །ཅི་འདྲ་བ་ཞིག་ཅེ་ན། ཆུ་ལ་སོགས་པ་འཛིན་པ་དེ་ཉིད་སྤྱི་སྟེ་ཐུན་མོང་བར་གྱུར་པ་
ཡན་ལག་ཁྱད་པར་དུ་བྱས་པ་གང་དག་ཡིན་པ་དེ་དག་ལ་དེ་སྐད་ཅེས་བྱའོ། །ཐུན་མོང་གི་ནུས་པའི་ཁྱད་པར་ཅན་སོ་སོར་རང་གི་ནུས་པ་དང་ལྡན་པ་ཉིད་སྟོན་པ་ཡིན་ནོ་ཞེས་བྱ་བའི་དོན་ཏོ། །འོ་ན་ནུས་པའི་ཁྱད་པར་མེད་པའི་ཕྱིར་བ་ལང་ཉི་ཤུ། བ་ལང་རྣམས་ཀྱི་ཉི་ཤུ་ཞེས་ཐ་སྙད་ཐ་དད་པར་ཇི་ལྟར་འགྱུར་
སྙམ་ན། ཕྱོགས་འདིས་ཞེས་གསུངས་སོ། །དེ་དག་ལ་ཞེས་བྱ་བ་ནི་བུམ་པ་ལ་སོགས་པ་དག་ལའོ། །སོ་སོར་ངེས་པའི་ནུས་པ་མ་འཕངས་པ་དེས་ནའོ། །དེས་ན་འདི་རིགས་དང་ནི་ཞེས་བྱ་བ་འཆད་པ་ནི། དེ་ཉིད་ཀྱི་ཕྱིར་ཞེས་བྱ་བའི་ཚོགས་པའི་སྒྲ་འདི་ནི་ཞེས་བྱ་བ་ནི་དཔེར་ན་ནགས་ཞེས་བྱ་བར་འབྲེལ་
ཏོ། །དུ་བ་ལ་སོགས་པའི་གནས་ནི་གཟུགས་ལ་སོགས་པ་ཡིན་ཏེ་དེས་ན་རྫས་གཅིག་ལ་མ་ལྟོས་པར་བུམ་པ་ཞེས་ཚོགས་པའི་སྒྲས་ཡིན་ནོ། །རིགས་ཀྱི་སྒྲ་ནི་ཞེས་བྱ་བ་ནི་བུམ་པའི་རྫས་སོ་སོར་ཆུ་འཛིན་པ་ལ་སོགས་པའི་འབྲས་བུ་གཅིག་པ་ཉིད་ལ་སྟེ། དཔེར་ན་ཤིང་ཞེས་བྱ་བ་བཞིན་ནོ། །དུ་བ་ལ་

སོགས་པ་སོ་སོར་གྲིབ་མ་ལ་སོགས་པའི་འབྲས་བུ་གཅིག་སྒྲུབ་པ་ལ་འཇུག་པ་ལྟ་བུའོ། །དཔེར་ན་ཤིང་གི་སྒྲ་རིགས་ཀྱི་སྒྲ་ཡིན་པ་དེ་བཞིན་དུ་བུམ་པའི་སྒྲ་ཡང་ཡིན་ནོ་ཞེས་བྱ་བའི་དོན་ཏོ། །གཟུགས་ལ་སོགས་པ་ཞེས་བྱ་བ་ནི་གཟུགས་སམ་སྒྲ་ཞེས་བྱ་བ་ལ་སོགས་པ་ཐ་དད་པར་བསྟན་པ་ཁྱད་པར་གང་ལ་ལྟོས་
པ་ཡིན་ཞེས་བྱ་བའི་དོན་ཏོ། །འབྲས་བུ་གཅིག་ལ་ལྟོས་ནས་ནི་བུའི་ཤེས་པ་དང་འབྲེལ་བར་སྟོན་པ་ཡིན་ལ། སོ་སོ་རང་གི་འབྲས་བུ་ལ་ལྟོས་ནས་ནི་གཟུགས་ལ་སོགས་པར་བསྙད་པ་ཡིན་ནོ་ཞེས་བྱ་བའི་དོན་ཏོ། །དེའི་འདུ་བྱེད་པའི་རྗེས་སུ་འཇུག་པ་ཞེས་བྱ་བ་ནི་བསྟན་བཅོས་གཞན་གྱི་འདུ་བྱེད་ཀྱི་རྗེས་
སུ་འཇུག་པའོ། །འཇིག་རྟེན་ན་དང་པོར་བརྡ་སྤྲོད་པར་བྱེད་པ་སློབ་པའི་ཕྱིར་དེ་འདྲ་བའི་གཞལ་བྱ་ཉིད་བྱ་བར་བྱེད་དོ། །དེའི་འོག་ཏུ་མུ་སྟེགས་པའི་བསྟན་བཅོས་སམ། གཞན་ལས་དམན་པ་ཉིད་ཀྱིས་ན། དོན་དེ་མོད་ལ་འཛིན་ཏེ། དོན་ཕྲ་མོ་བསྟན་བཅོས་ཁྱད་པར་ཅན་ལས་འཛིན་པར་མི་ནུས་སོ། །ཕལ་
ཆེར་ཞེས་བྱ་ནི། དཔོག་པ་དང་སེལ་བའི་ནུས་པ་རྣམ་པ་ཐམས་ཅད་དུ་ནི་མི་འགོག་པའོ། །དེ་ཉིད་ཀྱི་ཕྱིར་གང་ཞིག་ཡང་དག་པར་རྟོགས་པ་དང་ལྡན་པ་ཞེས་གསུངས་སོ། །འགའ་ཞིག་ཅེས་བྱ་བ་ཉིད་གསལ་བར་བྱེད་པ་ནི་འབྲས་བུའི་ཁྱད་པར་ནུས་པ་ཞེས་བྱ་བའོ། །འདིར་འབྲས་བུའི་ཁྱད་པར་ཅི་ལ་བརྗོད་སྙམ་ན།
འབྲས་བུའི་ཁྱད་པར་ཡང་ཞེ