Luận tạng Tây Tạng (Tengyur) — Tập 184

ར་འདོད་པ་ཡིན་ནོ། །བཟློག་པ་ནི་བདེན་པའོ། །ཆོས་འཕོ་བ་ཉིད་ནི་ཆོས་ཅན་བདེན་པའི་ཕྱིར་ཞེས་བྱ་བར་བསམས་པའོ། །ཐུན་མོང་དུ་དམིགས་པ་ཞེས་བྱ་བ་ལ། ཡང་གང་ལ་བག་ཆགས་བརྟན་པ་ཡོད་པ་དེར་
བཟློག་པའི་ཕྱིར་འཕོ་བ་ཉིད་དོ་ཞེས་སྦྱར་རོ། །ཐུན་མོང་དུ་དམིགས་པ་ནི། གཞན་གྱིས་ས་དང་རི་ལ་སོགས་པ་ཅི་ལྟར་དམིགས་པ་དེ་ལྟར་དེ་རིང་སྐྱེས་པས་ཀྱང་དམིགས་པ་རྨི་ལམ་ནི་དེ་ལྟ་མ་ཡིན་ནོ་ཞེས་བྱ་བའི་དོན་ཏོ། །དེ་དག་སྡུད་པ་ནི་ང་འདི་ལྟར་ཞེས་བྱ་བའོ། །མི་བདེན་པའི་ཐ་སྙད་
སྐྱེ་བ་ནི་བདེན་མིན་སྐྱེ་བ་སྟེ་འདི་ལས་སྐྱེ་བའོ། །ཐུན་མོང་དུ་དམིགས་པ་ཞེས་བྱ་བ་འདི་ལ་ཐུན་མོང་མ་ཡིན་པར་དམིགས་པའི་བྱ་བ་ཡོད་པ་སྟེ་འབྲུ་མང་པོ་པའོ། །སྐབས་སུ་བབ་པ་སྐྱེ་བ་དང་པོའི་གནས་སྐབས་ཅན་ཡང་སད་པའི་ཤེས་པའི་རང་བཞིན་ཉིད་ཡིན་གྱི། བདེན་པ་ལ་
འདའ་བ་ནི་མ་ཡིན་ནོ་ཞེས་བྱ་བ་ནི། དེས་ན་འཕོ་བ་གྲུབ་པའི་ཞེས་བྱ་བའོ། །འོ་ན་རྨི་ལམ་གྱི་ཤེས་པ་ཇི་ལྟར་མི་བདེན་ཞེ་ན། བསྟན་པ་མེད་པ་ནི་ཞེས་བྱ་བའོ། །དེ་ཙམ་གྱིས་རྨི་ལམ་མི་བདེན་པར་ཐ་སྙད་བྱེད་ཀྱང་སྐབས་ཉམས་པ་མ་ཡིན་ཏེ་དེ་མེད་པའི་ཕྱིར་རོ། །རྨི་ལམ་ཡང་

མི་བདེན་པར་ངེས་པ་མ་ཡིན་ནོ་ཞེས་བརྗོད་པ་ནི། གང་དུ་ཞེས་བྱ་བ་སྟེ་རྨི་ལམ་དུའོ། །གཉི་ག་ལ་ཡང་ཐུན་མོང་དུ་དེ་ལྟར་སྣང་བ་དེ་ཉེ་བར་བསྟན་པའི་སྨན་ལ་སོགས་པ་ཟོས་པས་ནད་ཞི་བ་ལ་སོགས་པ་ཉམས་སུ་མྱོང་བའི་ཕྱིར་རོ། །འབྲས་བུའི་རྒྱུན་
ལ་ལྟོས་ནས་ཡུན་རིང་དུ་རྗེས་སུ་འབྲེལ་པ་ཡང་ཡིན་པའི་ཕྱིར་དེར་ཅི་ལྟར་མི་བདེན་པ་ཡིན། འོན་ཏེ་དེའི་ཚེ་བདེན་པ་ཉིད་དོ་ཞེས་བྱ་བ་གཉིས་ལ་རྨི་ལམ་དུ་མཐོང་བ་སྣང་བའི་དུས་ནའོ། །དེ་ལྟར་བག་ཆགས་བརྟན་པ་དང་བཅས་པའི་རྨི་ལམ་དུ་རིགས་མི་མཐུན་པའི་ལུས་
སུ་འཕོ་བ་ནི་བདེན་པས་ཁྱབ་པར་བསྟན་པ་ཡིན་ནོ། །དེས་ན་གང་འཕོ་བའི་སེམས་བག་ཆགས་བརྟན་པ་དང་བཅས་པ་དེ་ནི་བདེན་པ་ཡིན་ཏེ། དཔེར་ན་བྱིས་པ་ནས་གཞོན་ནུའི་ལུས་འཕོ་བ་བཞིན་ནོ། །འཇིག་རྟེན་གཞན་ནས་འཇིག་རྟེན་འདིའི་ལུས་འཕོ་བའི་སེམས་འདི་
ཡང་བག་ཆགས་བརྟན་པ་དང་བཅས་པ་ཡིན་ནོ་ཞེས་བྱ་བ་ནི་རང་བཞིན་ནོ། །འདིར་འཕོ་བ་ཉིད་ཡོད་ཀྱང་སྔ་མ་དྲན་པའི་ཕྱིར་གཞོན་ནུའི་ལུས་འཕོ་བ་ཉིད་བདེན་པ་ཡིན་ནོ་ཞེས་སུན་འབྱིན་པའོ། །དོགས་པ་བསུ་ནས་དེ་ལྟ་ཡིན་ན་ཞེས་གསུངས་སོ། །འཕོ་བ་ཞེས་བྱ་བ་འཕོ་བ་ཙམ་
བདེན་པས་ཁྱབ་པར་རབ་ཏུ་གྲུབ་པས་ནའོ། །ཁྱད་པར་ཡོངས་སུ་རྟོག་པའི་ཕྱིར་ཞེས་བྱ་བ་ནི་དྲན་པ་དང་ལྡན་པའི་ཕྱིར་ཞེས་བྱ་བར་རོ། །རྣམ་རྟོག་དང་མཚུངས་ཞེས་བྱ་བ་ནི་སྔ་མ་བཞིན་ཆོས་མཐུན་པ་ཡིན་ཡང་ཁྱད་པར་བརྗོད་པ་ནི་རྣམ་པར་རྟོག་པ་དང་མཚུངས་པའོ། །ཡང་ན་སྦྱོར་
བ་ནི་བཤད་མ་ཐག་པ་ཉིད་ཡིན་ལ། དཔེ་ནི་དཔེར་ན་བག་ཆགས་བརྟན་པ་དང་བཅས་པའི་རྨི་ལམ་གྱི་ལུས་སུ་འཕོ་བ་བཞིན་ནོ་ཞེས་གཞན་དུ་བྱའོ། །གལ་ཏེ་རྨི་ལམ་གྱི་གནས་སྐབས་སུ་བྱུང་བའི་ཕྱིར་ན། དེ་འདྲ་བའི་རྨི་ལམ་གྱི་ལུས་འཕོ་བ་བདེན་པར་འགྱུར་མོད། སྐྱེ་བ་
དང་པོར་ནི་མ་ཡིན་ཏེ། བཟློག་པའི་ཕྱིར་ཞེས་སུན་འབྱིན་པའི་དོགས་པ་བསུ་ནས། དེ་ལྟ་ཡིན་ན་རྨི་ལམ་གྱི་དོན་ཐམས་ཅད་མི་བདེན་པ་མ་ཡིན་ནོ་ཞེས་གསུངས་སོ། །ཁྱད་པར་ཡོངས་སུ་རྟོག་པའི་ཕྱིར་ཞེས་བྱ་བ་ནི། རྨི་ལམ་ལ་སོགས་པའི་ཁྱད་པར་ཡོངས་སུ་རྟོག་པའི་ཕྱིར་

རོ། །ལྷག་མ་ནི་སྔ་མ་བཞིན་བཤད་པར་བྱའོ། །འཕོ་བ་གྲུབ་པ་ལ་འཐད་པ་གཞན་བརྗོད་ན། ཡང་ན་ཞེས་བྱ་བའོ། །གོམས་ལས་ཁྱད་པར་གང་འགྱུར་ཏེ། །སྐྱེ་བ་དང་པོར་དེ་བཞིན་གནས། །ཞེས་བྱ་བ་འདི་བཤད་པས་རྟོགས་ཟིན་མོད་ཀྱི་དེ་ཉིད་འགྲེལ་པའི་ཚུལ་
དུ་གྱུར་པ་ཡིན་ནོ། །ཁྱད་པར་ཡང་བརྗོད་པ་ནི། འོན་ཏེ་འཕོ་བ་ལ་ཞེས་བྱ་བའོ། །ཅི་ལྟར་སྐྱོན་མེད་ཅེ་ན། རྗེས་དཔག་ཡུལ་ནི་ཞེས་བྱ་བའོ། །མངོན་སུམ་གྱིས་ཡུལ་གང་ཡིན་པ་དེ་ནི་རྗེས་སུ་དཔག་པའི་ཡུལ་མ་ཡིན་ཏེ། ཕན་ཚུན་ཡུལ་སྤངས་ནས་གནས་པའི་ཕྱིར་
རོ། །འདི་ཉིད་བརྗོད་པ་ནི། མངོན་སུམ་དང་ཞེས་བྱ་བའོ། །ཕན་ཚུན་སྤངས་པས་གནས་པ་དེ་ཉིད་དོ། །ལུས་སམ་གཞན་གོས་ལ་སོགས་པའི་ལ་ཡང་རུང་སྟེ། ཀུན་དུ་འཛིན་པ་ནི། གོམས་པ་ཉིད་དམིགས་སོ། །དེས་ན་སྔོན་གོམས་པ་བསྒྲུབ་པར་བྱ་བ་ལ་ལྟོས་ནས་
ཕྱོགས་ལ་ཡོང་པ་ནི་དགོས་པ་མེད་པའི་ཕྱིར་སྐྱེ་བ་དང་པོ་ཀུན་དུ་འཛིན་པ་མཐོང་བ་དེ་ཉིད་ལས། སྐྱེ་བ་དང་པོར་འཕོ་བ་ཅི་སྟེ་རྗེས་སུ་མི་དཔོག །བརྗོད་ཟིན་པའི་རྩོད་པ་ཉིད་གསལ་བར་བྱེད་པ་ནི། ཅི་སྐད་དུ་ཞེས་བྱ་བའོ། །སྐྱོན་དེ་ཡང་མེད་དེ་བྱ་བ་ཉིད་གསལ་བར་བྱེད་པ་ནི་དེ་ལ་
ལན་འདི་ཡིན་ཏེ་ཞེས་བྱ་བའོ། །ཚིག་ལེའུར་བྱས་པ་འགྲེལ་པ་ནི། གལ་ཏེ་ཞེས་བྱ་བའོ། །འབྲས་བུའི་ཞེས་བྱ་བ་ནི་ཀུན་དུ་འཛིན་པ་ལ་སོགས་པའོ། །དེས་ན་ཀུན་དུ་འཛིན་པ་འདིའི་སྔོན་གོམས་པར་བྱས་པ་གང་ཡིན་པ་དེ་ཉིད་འདིའི་སྔོན་གྱི་སེམས་ལས་བྱུང་བ་ཡིན་ནོ། །འཕོ་
བའི་དོན་འདི་ཁོ་ན་ཡིན་ཏེ་དབུས་ཀྱི་གནས་སྐབས་བཞིན་ནོ། །དེས་ན་འཕོ་བའི་སེམས་མངོན་སུམ་དུ་བྱས་པ་ཉིད་ནི་མཁོ་བ་མེད་དོ། །ཀུན་དུ་འཛིན་པའི་གོམས་པ་སྔོན་དུ་སོང་བ་ཅན་ནི་བདག་ཉིད་ལས་མཐོང་བ་ཉིད་དོ། །དེ་ལྟར་འཕོ་བ་སྤྱིར་རྗེས་སུ་དཔོག་པ་བསྒྲུབས་ནས། ཁྱད་པར་དུ་
བསྒྲུབ་པའི་ཕྱིར་འགྲོ་བ་གཞན་འཕོ་བའི་དཔེ་བཤད་པ་ནི། དཔེར་ན་ཞེས་བྱ་བ་ལ་སོགས་པའོ། །ཅི་ལྟར་མེད་པའི་ཁྱད་པར་ལས་འདི་ནི་འདྲ་བ་ཞིག་ནས་འོངས་སོ་ཞེས་རྟོགས་པ་དེ་བཞིན་དུ་བདེ་བ་དང་། གཙང་བའི་རྒྱུའི་ཉེ་བར་མཁོ་བ་ལ་དགའ་བས་ན། སྤྱོད་པའི་ཁྱད་པར་

ལས་འདི་ནི་འདི་འདྲ་བ་ཞིག་གི་འཇིག་རྟེན་ནས་སྐྱེས་སོ་ཞེས་ངེས་པ་ཡིན་ནོ། །གལ་ཏེ་ལྷ་ལ་སོགས་པའི་འགྲོ་བ་ནས་གཞན་དུ་འོངས་པ་མ་མཐོང་ཡང་ཁྱད་པར་འདིར་ཅི་ལྟར་འགྱུར་སྙམ་ན། གྲོང་གཞན་ནས་འོངས་པ་ལ་ཞེས་གསུངས་སོ། །འདིས་
དཔེ་དྲན་པར་བྱེད་པའོ། །འབྲས་བུའི་ཁྱད་པར་ནི་རྒྱུའི་ཁྱད་པར་མེད་པར་མི་འགྱུར་བའི་ཕྱིར་ན། ཤུགས་ཉིད་ལ་ཁྱད་པར་འགྲུབ་པོ། །དེ་ཉིད་སྟོན་པ་ནི། དུ་བ་ལས་ཞེས་བྱ་བའོ། །ཙན་དན་ལས་བྱུང་བ་ལ་སོགས་པའི་ཁྱད་པར་དང་ལྡན་པའོ། །དེ་ལྟར་ཡང་ཙན་དན་གྱི་བསུང་དང་
ལྡན་པའི་དུ་བ་ལས་ཙན་དན་གྱི་མེ་རྗེས་སུ་དཔོག་པ་ཁོ་ནའོ། །དོགས་པ་བསུ་བ་ནི་མེ་ཙམ་ལས་འཇུག་གོ་ཞེས་བྱ་བ་སྟེ་མངོན་སུམ་མོ། །ལན་འདིར་ཡང་ཞེས་བྱ་བའོ། །ཡུལ་ལ་སོགས་པ་ལས་འཕོ་བའི་སྤྱི་ལ་མངོན་སུམ་འཇུག་ལ། གཞན་གྱི་ངེས་པའི་མངོན་པར་འདོད་
པ་ལ་སོགས་པའི་ཁྱད་པར་ལ་དེ་ལྟར་རྗེས་སུ་དཔོག་པ་ཡིན་ནོ། །དེ་བཞིན་དུ་འཇིག་རྟེན་གཞན་ནས་འཕོ་བ་སྤྱིར་གྲུབ་པའི་ཕྱིར། མངོན་པར་འདོད་པ་ལ་སོགས་པའི་ཁྱད་པར་ཅན་གྱི་འཇིག་རྟེན་གཞན་གྲུབ་པ་ཞེས་བཤད་ཟིན་པ་ཁོ་ནའོ། །མེ་ལ་བརྟེན་པའི་སྐབས་གསལ་གྱིས་གསལ་བར་
བྱེད་པ་ཡིན་ནོ། །འོན་ཏེ་ཡང་ཞེས་བྱ་བ་ནི་གཞན་གྱིའོ། །འདི་ཉིད་སྡུད་པ་ནི་འདི་ལྟར་ཞེས་བྱ་བ་ལ་སོགས་པའོ། །ལུས་གཞན་གྱིས་འཕོ་བ་གང་གིས་ཡིན་པ་དེ་དོར་ཏེ་ལུས་དེ་ཉིད་ཀྱིས་འཕོ་བ་ཞེས་བྱ་བའི་དོན་ཏོ། །བདེ་བར་བསྒྲུབ་པ་འགྱུར་བ་ཡིན་ཞེས་བྱ་བ་ནི་བསྟིང་ཆད་དོ། །གཞན་
ཡང་བརྗོད་པས་སོ། །ཅི་ལྟར་རྨི་ལམ་ཞེས་བྱ་བའི་གང་གི་ཚེ་རྨི་ལམ་གྱི་དམིགས་པ་མེད་པ་ན་ཞེས་བྱ་བའི་དོན་ཏོ། །ཤི་བའི་ཕྱིར་སྐྱེ་བའི་སྔོན་རོལ་ཏུ་གལ་ཏེ་ཆད་ན། དེའི་ཚེ་འཇིག་རྟེན་ཕ་རོལ་སྨྲ་བ་རྣམས་ཀྱིས་ཅི་ཞིག་བྱས་ཞེས་སྦྱར་རོ། །ཇི་ལྟར་ཞེས་བྱེད་པ་ལ་སོགས་པས་
ནི་ཚིགས་སུ་བཅད་པ་དང་པོས་བཤད་དོ། །ཕྱིན་ཅི་ལོག་ཏུ་བསྒྲུབ་པར་འགྱུར་རོ་ཞེས་བྱ་བ་ནི། ལུས་དེ་མ་བཏང་བ་ན་སྐྱེ་བ་ཉིད་དུ་འགྲུབ་པ་ཞེས་བྱ་བའི་ཐ་ཚིག་གོ། །གཞན་ཡང་ཞེས་བྱ་བ་ནི་ཚིགས་སུ་བཅད་པ་གཉིས་པ་འཆད་པའོ། །འདིར་འདི་སྐད་བརྗོད་དེ་ཞེས་བྱ་བ་ནི་ལན་ནོ། །

གཞན་མཐོང་བ་ཉིད་ཅེས་བྱ་བ་ནི། ད་ལྟར་བའི་ལུས་ཀྱི་སྐད་ཅིག་མཐོང་བ་གང་ཡིན་པ་ཉིད་སྔོན་གྱི་ལུས་པོ་ཡོངས་སུ་དོར་བ་མེད་པ་ཡིན་ཏེ་མི་དམིགས་པ་ལས་མེད་པ་གཞན་མ་ཡིན་པའི་ཕྱིར་རོ། །དེ་ལྟར་ལུས་དེ་ཉིད་ཀྱིས་འགའ་ཡང་འཕོ་བ་མེད་པའི་ཕྱིར་རྩོད་པ་དང་པོ་བསལ་ཏོ། །མི་
བདེན་པ་དང་། འགྲེལ་པའི་རྩོད་པ་ལ་བརྗོད་པ་ནི། རྨི་ལམ་རིག་པ་ཐམས་ཅད་ནི་ཞེས་བྱ་བའི་རྨི་ལམ་གྱི་མི་བདེན་པ་ཇི་འདྲ་བ་ཡུལ་གྱི་རྗེས་སུ་འཇུག་པ་མེད་པ་ཙམ་གྱི་ཉེ་བར་བསྒྲུབས་པ་དེ་ཁས་བླངས་ཀྱང་རྨི་ལམ་གྱི་ཤེས་པ་དངོས་སུ་བདེན་པ་ཡིན་པའི་ཕྱིར་ན་བདེན་པས་བསྐྱེད་པར་བྱ་བ་
དང་བདེན་པའི་སྐྱེད་བྱེད་དུ་མི་འགལ་བ་ཡིན་ནོ། །དེ་ལྟར་འཇིག་རྟེན་ཕ་རོལ་ལ་ཡང་དེ་གཉིས་ཀ་མི་འགལ་ལོ། །དེས་ན་ཡོད་པར་སྨྲ་བ་རྣམས་ཀྱི་འདོད་པ་ཐོག་ཏུ་བབ་པོ་སྙམ་དུ་དགོངས་པ་ཡིན་ནོ། །ཇི་ལྟར་རྨི་ལམ་དམིགས་པ་མེད་པར་ཞེས་བྱ་བ་དེ་ལ་བཤད་པ། རྣམ་པར་
འཆད་པ་ཐམས་ཅད་ནི་ཞེས་བྱ་བའི་བདེན་པའི་སད་པ་དང་འབྲེལ་པ་ཡིན་ཞེས་བྱ་བ་ནི་བདེན་པས་ཉེ་བར་སད་པའི་འབྲེལ་པ་སྟེ། སད་པ་ཙམ་ནི་བདེན་པ་མ་ཡིན་ནོ་སྙམ་པའི་དོགས་པར་མི་འགྱུར་བར་བྱ་བའི་ཕྱིར་རོ། །འདི་ནི་གཞན་གྱི་འདོད་པས་བརྗོད་པར་ཟད་དེ་རྣམ་པར་ཆད་པ་ནི་
མ་གྲུབ་པོ་ཞེས་གསལ་བར་བྱའོ། །གལ་ཏེ་གྲོང་གཞན་ནས་འོངས་པ་ལ་སྔོན་གྱི་ལུས་དོར་བ་གལ་ཏེ་རིགས་པས་བསྒྲུབས་པ་དེ་ལྟ་ན་ཡང་སྐྱེ་བ་འདི་ལ་དེ་ལྟར་རྟོགས་པར་ནུས་པ་ནི་མ་ཡིན་ཏེ། ཡུལ་གཞན་ནས་འོངས་པ་ལྟར་སྔ་མ་དང་ཕྱི་མར་མངོན་པར་འདོད་པའི་ལུས་ནི་དམིགས་པ་
མ་ཡིན་ནོ། །དེས་ན་ད་ལྟར་གྱི་སེམས་དང་བཅས་པའི་ལུས་ནི་སྔ་ན་མེད་པ་ཉིད་སྐྱེས་པ་ཡིན་ནོ་སྙམ་ན་འདི་ནི་བཤད་ཟིན་ཏོ་ཞེས་གསུངས་སོ། །དོན་གྱིས་འཕངས་པས་ན་ལུས་བྱུང་བ་ནི་ལུས་སྔ་མ་བཏང་བ་ཁོ་ནས་ཡིན་ནོ་ཞེས་བྱ་བའི་དོན་ཏོ། །དེ་ཡོངས་སུ་བརྟགས་པ་ལ་གསལ་བ་ཁོ་
ནའོ། །དེས་ན་སྔོན་གྱི་ལུས་དོར་བ་ནི་མཐོང་བ་ཉིད་དོ་ཞེས་གསུངས་སོ། །སྔོན་གྱི་ལུས་གྲུབ་པའི་དོན་དུ་འཐད་པ་གཞན་ཡང་དྲན་པར་བྱ་བའི་ཕྱིར་གཞན་གྱི་དོགས་པ་བསུ་བ་ནི། སྔོན་གྱི་ལུས་མ་གྲུབ་པར་ཞེས་གསུངས་སོ། །མ་ཡིན་ཏེ་ཞེས་བྱ་བ་ནི་ལན་ཏོ། །ལུས་ཀྱི་ཡུལ་ཅན་ཉིད་

ཀྱིས་ན་ཁྱད་པར་ཅན་ནོ། །སྔོན་གྱི་ལུས་དེས་མོད་དོར་བ་གོ་ཅི་ལྟར་ཞེ་ན། ལུས་དེ་ཞེས་གསུངས་སོ། །འོ་ན་མ་དམིགས་པའི་ཕྱིར་སྔོན་མེད་པ་ཁོ་ནའོ་སྙམ་ན་ཁ་སད་པ་ཞེས་གསུངས་སོ། །རང་གི་དུས་དེའི་ཚེ་ཡང་ངོ་། །ཕྱེད་ཕྱི་མ་བཤད་ནས། མཇུག་བསྡུ་
བའི་སྒོ་ནས་ཕྱེད་སྔ་མ་འཆད་པ་ནི་དེས་ན་ཞེས་བྱ་བའོ། །མངོན་སུམ་དེ་ཉིད་རྨོངས་པ་ལ་མི་དམིགས་པར་བརྗོད་པ་ཡིན་ནོ། །ཇི་སྐད་དུ་ཞེས་བྱ་བ་ལ་སོགས་པས་བརྗོད་ཟིན་པའི་རྒོལ་བ་དང་ལན་བརྗོད་པ་ནི། ཁྱད་པར་བརྗོད་པའི་དོན་དུ་ཡིན་ནོ། །བདེན་པའི་རྗེས་སུ་འགྲོ་བ་ཅན་ཞེས་བྱ་བ་
ནི་བདེན་པའི་ཉེས་པའི་རྒྱུ་ཅན་ནོ། །དེ་ལྟར་གྱུར་པ་ཞེས་བྱ་བ་ནི་རྨི་ལམ་དང་འདྲ་བ་བདེན་པར་འདོད་པ་སྔ་མ་དང་ཕྱི་མའི་དབུས་སུ་བྱུང་བ་དེ་ནིའོ། །སྡོད་ན་ནི་གནས་སྐབས་ཀྱི་ཁྱད་པར་རོ། །འཆད་པར་འགྱུར་རོ་ཞེས་བྱ་བ་ནི། སྲིད་པ་བར་མ་དོའི་ལུས་ཤིན་ཏུ་དང་བའི་མི་དམིགས་པ་མ་
ཡིན་ཞེས་བྱ་བ་དེར་རོ། །འདི་ཡང་རྨི་ལམ་གྱི་ཤེས་པ་མི་བདེན་པར་ཁས་བླངས་ནས་བརྗོད་པ་ཡིན་ནོ། །ཁས་མ་བླངས་ཀྱང་ཉེས་པ་མེད་དོ་ཞེས་བརྗོད་པ་ནི་ཡང་ན་ཞེས་བྱ་བའོ། །འདི་ཉིད་དུ་ཅི་སྟེ་མི་འཆད་སྙམ་ན་འདིའི་སྐབས་ནི་དེ་ཡིན་ཞེས་གསུངས་ཏེ། རྨི་ལམ་དང་རྨི་ལམ་མ་ཡིན་
པ་ཁྱད་པར་མེད་པས་སྒྲུབ་ཀྱི་སྐབས་ནི་རྣམ་པར་ཤེས་པར་སྨྲ་བ་དེ་ཉིད་ཡིན་ནོ། །འཆད་པ་ནི་རྨི་ལམ་གྱི་ཞེས་བྱ་བའི་སྐབས་ཀྱིས་འགའ་ཞིག་ཉིད་བསྟན་པ་གང་ཡིན་པ་དེ་ནི། དེ་ཁོ་ན་ཉིད་ནི་ཟབ་པ་ཡིན་པས་ནི་རིམ་གྱིས་བཟོད་པར་བྱ་བའི་དོན་ཏོ། །ཁྱད་པར་མེད་པ་དེ་ཁོ་ནའོ། །དེའི་
ཕྱིར་ཞེས་བྱ་བ་ནི་འཕོ་བ་མེད་པའི་ཕྱིར་རོ། །ལུས་ཤེས་པའི་རང་བཞིན་ཡིན་ཡང་སྔ་མ་དང་ཕྱི་མའི་ལུས་གཉིས་ལ་ནི་ཐོགས་པ་དང་བཅས་པར་བརྗོད་དེ། བག་ཆགས་ཀྱིས་བྱས་པ་ན་དེའི་གནས་སུ་ཤེས་པ་གཞན་མི་སྐྱེ་བར་ངེས་པའི་ཕྱིར་རོ། །བར་མ་དོའི་སྲིད་པ་ལ་ནི་ཐོགས་པ་
མེད་པས་བརྗོད་དེ། དེའི་གཞན་ཤེས་པ་གཞན་སྐྱེ་བ་སྲིད་པའི་ཕྱིར་རོ། །སོགས་པའི་སྒྲས་ནི་རིང་དུ་རྗེས་སུ་འཇུག་པ་དང་། དེ་ལྟར་མ་ཡིན་པ་ལ་སོགས་པ་ཡང་བསྡུའོ། །རྒྱུན་ཉམས་པ་ནི་མ་མཐོང་བ་ཉིད་དོ་ཞེས་བྱ་བ་ནི་དེ་ལྟར་ཡང་རྣམ་པ་ཐམས་ཅད་དུ་ཤེས་པ་རྒྱུན་ཆད་པ་ནི་

མ་མཐོང་བ་ཁོ་ནའོ། །རྣམ་པར་ཤེས་པ་ཆད་པ་ནི་སད་པ་དང་འབྲེལ་པ་ཁོ་ནར་མཐོང་ངོ་ཞེས་བྱ་བའི་དོན་ཏོ། །འདིས་ནི་ཚིག་ལེའུར་བྱས་པ་གསུམ་པ་རྣམ་པར་བཀྲལ་ལོ། །སྔགས་ཀྱིས་བྱིན་གྱིས་བརླབས་པའི་སྡོང་བུ་ནི་སྒྲོན་མའི་རྒྱུ་མ་ཡིན་ལ། མར་ནག་གིས་བྱུགས་པའི་
ས་བོན་ཡང་མྱུ་གུའི་རྒྱུ་མ་ཡིན་པ་བཞིན་ཏེ། དེ་བཞིན་དུ་གཞན་ཡང་རྟོགས་པར་བྱའོ། །ཉེས་པས་ཞེས་བྱ་བ་ནི་རླུང་མཁྲིས་པ་ལ་སོགས་པས་སོ། །མཉམ་གྱུར་ཚེ་ཞེས་བྱ་བ་ནི་འཆིང་བའི་ཚོགས་པས་མཉམ་པོར་བྱས་པ་ནི་སྟོང་ཆ་སྙོམས་པར་གྱུར་པ་ན་ཞེས་བྱ་བའི་དོན་ཏོ། །
ཉེས་པ་རྣམས་མཉམ་པ་ནད་མེད་པ་ཡིན་ནོ་ཞེས་གང་ལས་རྟོགས་ཤེ་ན། དེ་དག་མཉམ་པ་ནད་མེད་པ། །ཞེས་གསུངས་སོ། །བཟློག་པ་ནི་མེད་པ་མ་ཡིན་པ་བརྗོད་པའི་ཕྱིར་རོ་ཞེས་བྱ་བ་ནི་སྨན་དཔྱད་ཀྱི་བསྟན་བཅོས་ལས་སོ། །འོན་ཏེ་ཞེས་བྱ་བ་ནི་གཞན་གྱི་ལན་དུ་རིམས་ལ་སོགས་
པ་ཞེས་བྱ་བའོ། །ཐམས་ཅད་ཀྱི་ཚེ་ནི་འཆི་བ་ཡང་མ་ཡིན་ཏེ། དེས་ནི་རིམས་ལ་སོགས་པ་རྣམ་པར་འགྱུར་བ་མེད་པ་ཁོ་ན་འཆི་བའི་རྒྱུ་ཡིན་ཞིང་། རིམས་ལ་སོགས་པས་རྣམ་པར་འགྱུར་བའི་མཚན་ཉིད་ཀྱིས་མི་མཐུན་པ་མེད་ཀྱང་ལོག་པས་ན་སེམས་སྐྱེས་པས་ན་ལ་ལ་གེགས་
ཡོད་པ་མ་ཡིན་ནོ་སྙམ་དུ་དགོངས་པའོ། །དེ་ལྟ་མ་ཡིན་ན་ཞེས་བྱ་བ་ནི་ལུས་མི་མཐུན་པ་མེད་ཀྱང་སེམས་མི་འབྱུང་ནའོ། །སེམས་རྒྱུ་ཡིན་པ་ལ་ཉེས་པ་འདིར་མི་འགྱུར་སྙམ་ན། སེམས་ཀྱི་རྒྱུ་ནི་ཞེས་གསུངས་སོ། །ལུས་རྒྱུ་ཡིན་ན་ནི་ཉེས་པ་དེ་ཉིད་དོ་ཞེས་བརྗོད་པ་ནི་ལུས་རྒྱུ་ཡིན་པར་
འགྱུར་ན་ནི་ཞེས་བྱ་བའོ། །མི་མཐུན་པ་དེ་ནི་ཚབས་ཆེ་སྟེ། དེས་ན་སེམས་ཕྱིར་སྐྱེ་བ་མ་ཡིན་ནོ་སྙམ་དུ་དོགས་ན། དེ་འདྲའི་ལུས་ཉིད་ནི་ཞེས་གསུངས་སོ། །མ་མཐོང་བའི་ཁྱད་པར་རྟོགས་པ་ནི་གལ་ཏེ་ཡོངས་སུ་གྲུབ་པའི་ཁྱད་པར་དེ་ལྟར་མི་རུང་ན་རྟོགས་པ་དེ་ཅི་ལྟར་ཞེས་བྱ་
བ་དེར་བསལ་ཟིན་ཏོ། །ཚིག་ལེའུར་བྱས་པ་གཉིས་པ་རྣམ་པར་འགྲེལ་པ་ནི་ལུས་རྒྱུ་ཡིན་ན་ནི་ཞེས་བྱ་བའོ། །དོན་གྱིས་འཕངས་པ་བརྗོད་པ་ནི། མི་མཐུན་པ་དེ་འདྲ་བ་ཉིད་ཅེས་བྱ་བའོ། །ཚིག་ལེའུར་བྱས་པ་དང་པོར་འཆད་པ་ནི། སེམས་རྒྱུ་ཡིན་ན་ནི་ཞེས་བྱ་བའོ། །མི་མཐུན་པ་

མེད་གསོན་པའི་རྒྱུ་མ་ཡིན་ནོ་ཞེས་བརྗོད་པ་ནི། འགའ་ཞིག་ཉེས་པ་ཡིན་ཞེས་བྱ་བའོ། །འབྲས་བུ་འཆི་བ་དང་གསོན་པ་རང་གི་རྒྱུ་ལ་ངེས་པའི་རྣམ་པར་གནས་པ་འདིར་མི་འགྱུར་རོ། །རྣམ་པར་མི་གནས་ཀྱང་འབྲས་བུར་འགྱུར་རོ་སྙམ་ན་འབྲས་བུ་ནི་ཞེས་གསུངས་
སོ། །དེས་ན་ཞེས་བྱ་བ་ནི། རྣམ་པར་ཕྱེ་བ་མེད་པས་སོ། །འདི་ཉིད་གསལ་བར་བྱེད་པ་ནི། །ལུས་ཀྱི་འབྲས་བུ་ཡིན་ན་ཞེས་བྱ་བའོ། །རྣམ་པར་འགྱུར་བ་དེ་བཟློག་པའི་ཕྱིར་རོ། །འཆི་བ་ནི་ཞེས་བྱ་བ་ནི་རྣམ་པར་འགྱུར་བ་ཞེས་རྟོགས་པར་བྱའོ། །བཟློག་ཏུ་ཡོད་པ་དང་མེད་པའི་རྣམ་པར་འགྱུར་
བ་གང་ལ་ཡོད་པ་དེ་དག་ལ་དེ་སྐད་ཅེས་བྱ་བའོ། །གསོད་པའི་སྦྱོར་བ་མེད་པའི་མཚན་ཉིད་འདི་ནི་ལན་ཡང་ཡིན་ནོ། །འགྱུར་བ་པ་དང་པོ་ནི་ཆུང་ཡང་ཞེས་འབྲེལ་ཏོ། །ལྡོག་པ་མིན་པ་ནི་ཕྱིར་མི་འབྱུང་བའོ། །སླར་ལྡོག་རུང་བ་ནི་མི་མཐུན་པ་ཐོབ་ནས་ཕྱིར་ལོག་པའོ། །བྱས་གང་ཞེས་བྱ་
བ་ནི་གང་གིས་སམ་གང་ལས་བྱས་པ་དེ། དེ་ལ་ཞེས་བྱ་བར་བལྟའོ། །དེར་ངེས་བྱ་བའི་ཕྱིར་རྣམ་པར་འགྱུར་བ་ཡོད་ན་ཞེས་བྱ་བའི་དོན་ཏོ། །སྔ་མའི་རང་བཞིན་དེ་ནི་སླར་ཡང་འབྱུང་བར་འགྱུར་ཏེ་གསེར་གྱི་སྲ་བ་ཉིད་བཞིན་ནོ། །གལ་ཏེ་དེ་ལྟ་ན་ཡང་སླར་འཚོ་བར་ཅི་ལྟར་ཐལ་ཏེ། དེ་སྲིད་པར་ནི་
འགྱུར་རོ་སྙམ་ན། གཞན་གྱི་ལུགས་ཀྱིས་སླར་འཚོ་བར་བསྒྲུབ་པའི་ཕྱིར་དེ་ལ་འགྲུབ་པར་རྣམ་པར་འགྱུར་བར་དེ་བཟློག་པ་ཉིད་སྟོན་པ་ནི་འདི་ལྟར་གཉིས་ཀྱིས་ཞེས་བྱ་བའོ། །ཚུ་རོལ་མཛེས་པ་སེམས་ཀྱི་རྒྱུ་ལུས་ཡིན་པར་བསྒྲུབ་པའི་དོན་དུ་སེམས་པ་སྐྱེས་པའི་ལུས་མངོན་སུམ་གྱིས་གྲུབ་པ་
ཉིད་ཉེ་བར་བརྟགས་པ་མ་ཡིན་པར་སེམས་པ་གྲུབ་པ་ཡིན་ཞིང་། སེམས་པ་མ་གྲུབ་པའི་ལུས་གྲུབ་པ་ཡང་སེམས་པ་མེད་པ་གྲུབ་པ་ཡིན་ནོ་ཞེས་སྨྲའོ། །དེས་ན་གལ་ཏེ་གཉིད་མཐུག་པོའི་གནས་སྐབས་ན་དེ་ཆད་པ་རང་གིས་མ་རྟོགས་སུ་ཆུད་པ་དེ་ལྟར་ན་ཡང་སེམས་པ་མ་སྐྱེས་པའི་ལུས་
ཀྱིས་ནི་གཞན་དག་མངོན་སུམ་གྱིས་ངེས་པར་བྱེད་པའམ། སད་པ་ལས་རང་ཉིད་ངེས་པ་ཡིན་ནོ། །དེས་ན་སེམས་པ་དང་བྲལ་བའི་རྣམ་པར་འགྱུར་བ་ནི། གཉིད་ལ་སོགས་པ་མེད་པར་སྡིག་པ་ཡིན་ནོ་ཞེས་བྱ་བ་འདི་ནི་གཞན་གྱི་ལུགས་ལ་ལྟོས་ནས་བརྗོད་པ་ཡིན་ནོ། །དེའི་གནས་སྐབས་ན་ནི་

བདག་ཉིད་ལ་སེམས་པ་མེད་པར་གྲུབ་པ་ནི་ཚད་མ་ནི་འགའ་ཡང་མེད་དོ། །ཡོད་ན་སེམས་པ་ཚད་མར་མི་འགྱུར་ཏེ། ཚད་མ་ནི་སེམས་པའི་ཁྱད་པར་ཉིད་ཡིན་པའི་ཕྱིར་རོ། །སེམས་ཆད་པ་བདག་ཉིད་ནི་སྒྲུབ་པར་བྱེད་པ་མ་ཡིན་ཏེ། དངོས་པོ་མེད་པ་ནི་འགའི་ཡང་རྟོགས་པར་བྱེད་པ་
མ་ཡིན་ནོ་ཞེས་བྱ་བའི་ཚུལ་གྱིས་སོ། །སད་པའི་གནས་སུ་ཡང་བདག་ལ་སྔར་ཤེས་པ་མ་བྱུང་ངོ་ཞེས་རྟོགས་པ་ཡིན་ཏེ། རྟོགས་པ་མེད་པ་ཡིན་ནམ་ཅི། འོན་ཏེ་ཡིད་ཀྱང་རྗེད་པར་གྱུར་ཅེས་རང་ཉིད་ཀྱིས་གསུངས་པའི་ཕྱིར་རོ། །ཚད་མ་ལས་ཕྱི་རོལ་ཏུ་གྱུར་པའི་ཐ་སྙད་ལས་དེ་གྲུབ་ན་ནི་
འཇིག་རྟེན་ཕ་རོལ་ཡང་འགྲུབ་པ་ཉིད་དུ་འགྱུར་རོ། །རང་བཞིན་གྱིས་ཀྱང་དེའི་ཚད་མ་རྟོགས་པ་མ་ཡིན་ཏེ། གཞན་གྱིས་རྒྱུད་ནི་སྣང་དུ་མི་རུང་བའི་ཕྱིར་རོ། །ཤེས་པའི་འབྲས་བུ་དབྱུང་བ་ལ་སོགས་པ་མེད་པ་ལས་ཀྱང་དེ་འགྲུབ་པ་མ་ཡིན་ཏེ། རྒྱུ་རྣམས་ནི་གནོད་མི་ཟ་བར་འབྲས་བུ་ལྡན་
པས་མ་ཡིན་པའི་ཕྱིར་རོ། །དེ་བཞིན་དུ་འཆི་བའི་གནས་སྐབས་སུ་ཡང་རང་ངམ་གཞན་གྱི་སེམས་རྣམ་པར་ཆད་པས་མི་རྟོགས་སོ། །འོ་ན་ཅི་ལྟར་གཉིད་ལོག་པ་ལྟར་ཤི་བ་བཅོམ་པ་ལས་སྲོག་གཅོད་པ་ལ་སོགས་པར་མི་བཞག་ཅེ་ན་མ་ཡིན་ཏེ། འཇིག་རྟེན་གྱི་ཐ་སྙད་ནི་ལུང་ཇི་ལྟ་བ་
བཞིན་ཡིན་པའི་ཕྱིར་དང་ལུང་ཡང་དེ་ཁོ་ན་ལྟར་ཡིན་ཏེ། ནད་ལ་སོགས་པས་བཅོམ་པས་གཡོ་བ་ལ་སོགས་པ་དང་བྲལ་བ་ལ་ཤིའོ་ཞེས་བརྗོད་པ་ཡིན་ནོ། །དེས་ན་འདི་ནི་འཇིག་རྟེན་རྒྱང་འཕན་པའི་ལུགས་ལ་ལྟོས་ནས་བརྗོད་པར་རྟོགས་པར་བྱའོ། །དེས་ན་གཉིད་ལ་སོགས་པ་བྱས་པ་
སེམས་པ་དང་བྲལ་བའི་མཚན་ཉིད་ཀྱི་རྣམ་པར་འགྱུར་བ་ལྡོག་པ་ལྟར་འཆི་བའི་མཚན་ཉིད་ཀྱི་རྣམ་པར་འགྱུར་བ་ཡང་ལྡོག་པར་འགྱུར་བའི་ཕྱིར་སླར་འཚོ་བར་ཐལ་ལོ། །འོན་ཏེ་ཉེས་པ་འདིས་བྲེད་པས་ཅི་ཞིག་ལྟར་རྣམ་པར་མ་ཆད་པར་ཁས་ལེན་ན། དེའི་ཚེ་ཡང་བརྗོད་པའི་ཐལ་བ་མི་ལྡོག་
གོ་ཞེས་སྟོན་པ་ནི། འོན་ཏེ་དེ་ལ་ཞེས་བྱ་བ་སྟེ་གཉིད་ཀྱི་གནས་དེར་རོ། །ལྡོག་པ་མེད་པ་ཉིད་དོ་ཞེས་བྱ་བ་ནི་ཤེས་པ་ཞེས་བྱ་བར་བལྟ་སྟེ། ནུས་པའི་རང་བཞིན་དུ་རྣམ་པར་གནས་པའི་ཕྱིར་རོ་སྙམ་དུ་བསམས་པའོ། །དེ་ཉིད་ཀྱི་ཕྱིར་འགྲེལ་པར་རིག་པ་མེད་ཀྱང་ནུས་པའི་རང་བཞིན་

དུ་ཡིན་ན་ཞེས་འཆད་པར་འགྱུར་རོ། །དེས་ན་གཉིད་ལོག་པ་ལ་ནི་སད་པའི་གནས་སྐབས་ཡོད་པར་འགྱུར་གྱི་ཤི་བ་ལ་ནི་མ་ཡིན་ནོ་ཞེས་བྱ་བ་ནི་ལྷག་པའི་དོན་ཏོ། །དེ་ལྟར་གཞན་གྱིས་བརྗོད་པ་དེ་ཉིད་ཀྱི་ལུགས་ལ་བརྟེན་ནས་སེལ་བ་ནི། དེ་ལ་སྨྲས་པ་ཞེས་བྱ་
བའོ། །ཅི་ལྟར་ཞེ་ན། རིག་པ་མེད་པའི་རང་བཞིན་ཅི། །ཞེས་གསུངས་སོ། །རིག་པའི་རང་བཞིན་མ་ཡིན་པ་དེ་ནི་རིག་པར་འདོད་པ་མ་ཡིན་ནོ། །དེས་ན་ནུས་པའི་རང་བཞིན་ཡང་རིག་པ་ལས་གཞན་ཡིན་པའི་ཕྱིར་ན་རིག་པའི་རང་བཞིན་ཡོད་པ་མ་ཡིན་པ་ལ་ཁྱོད་རིག་པར་འདོད་པར་མི་བྱའོ། །
དེས་ན་སེམས་པའི་ནུས་པ་ནི་ལུས་ཉིད་ཡིན་ཏེ་གཞན་མེད་པའི་ཕྱིར་རོ། །དེས་ན་སེམས་པ་མེད་པ་ཁོ་ནའོ་ཞེས་བྱ་བར་དགོངས་པའོ། །དེ་ལྟ་ཡིན་ན་ཅི་སྐྱོན་ཞེ་ན། དེ་ལྟའང་ཞེས་གསུངས་ཏེ། རིག་པ་མེད་པ་དེ་ལྟར་ན་ཡང་ངོ་། །གལ་ཏེ་གཉིད་ལོག་པའི་གནས་སྐབས་ན་དེ་ཡོད་
ནའོ། །དེའི་ཚེ་ཤི་བ་ལ་ཡང་ཡོད་པར་འགྱུར་བས་སླར་འཚོ་བར་འགྱུར་རོ། །གང་ལས་ཤེ་ན། ཤིང་དང་ཞེས་གསུངས་སོ། །འོན་ཏེ་དབུགས་རྔུབ་པ་ལ་སོགས་པའི་ཁྱད་པར་ཡོད་དོ་སྙམ་ན། དབུགས་རྔུབ་ཅེས་གསུངས་སོ། །དབུགས་རྔུབ་པ་ལ་སོགས་པ་གང་ཡིན་པ་དེ་ཐམས་ཅད་
ཀྱང་སྔར་དེ་མདུན་དུའོ། །སེམས་པའི་ནུས་པས་བྱས་པའི་ཁྱད་པར་ནི། རྣམ་ཤེས་ནུས་པ་དང་འབྲེལ་ཕྱིར། །ཞེས་བྱ་བ་དེ་འཆད་པའི་སྐབས་སུ་སེལ་བར་འགྱུར་རོ། །བཤད་པ་ནི་ཅི་རིགས་སུ་བསལ་བ་ཁོ་ནའོ། །དེས་ན་ཏེ་ཁྱད་པར་མེད་པ་ནའོ། །དེ་ནི་རིག་པ་མེད་ནའོ། །དེ་ཞེས་བྱ་བ་ནི་
རིག་པའོ། །འོ་ན་དེ་ལུས་ཉིད་ཡིན་པས་ཞེས་བྱ་བས་ན་གཞན་མེད་པའི་ཕྱིར་རོ་སྙམ་དུ་དོགས་པའོ། །སེམས་པ་དེར་མི་ལྡོག་པ་ཉིད་དོ། །འོན་ཏེ་ཞེས་བྱ་བ་ནི་གཞན་གྱིའོ། །ལན་ནི་སྐྱེད་པར་བྱེད་པ་མ་ཡིན་པ་དེ་ཞེས་བྱ་བའི་རིག་པ་དང་ཞེས་བྱ་བ་ནི་དོགས་པའོ། །གཉིད་ལོག་པ་ལ་ཞེས་
བྱ་བ་ནི་ལན་ནོ། །འོན་ཏེ་དེ་ལ་ཞེས་བྱ་བ་ནི་གཉིད་ལོག་པ་ལའོ། །དེ་ཡོངས་སུ་གྱུར་པ་ནི་རིག་པ་མེད་པ་ཡོངས་སུ་གྱུར་པའོ། །དེ་ལྟར་ལུས་ལྷན་ཅིག་བྱེད་པ་ཉིད་ཡིན་པ་སེལ་བ་བརྗོད་ནས་ཉེ་བར་ལེན་པའི་རྒྱུ་ཉིད་དགག་པར་ཡང་སྟོན་པ་ནི་དབུགས་རྔུབ་པ་ལ་སོགས་པ་ཐམས་ཅད་སྔར་ཞེས་

བྱ་བ་དེ་རྣམ་པར་འགྲེལ་པ་ནི་དབུགས་རྔུབ་པ་ལ་སོགས་པ་ནི་ཞེས་བྱ་བ་ལ་སོགས་པའོ། །དེའི་ཕྱིར་དེ་གང་ཡིན་ཡང་གཉིད་ལོག་པ་ལྟར་ཤི་བ་ལ་ཡང་རྟོག་པ་ཡོད་པའི་ཕྱིར་སླར་འཚོ་བར་ཐལ་ལོ་ཞེས་བྱ་བའི་གནས་སོ། །དེ་ལྟར་ལུས་རྒྱུ་ཉིད་དུ་ཁས་བླངས་ནས་སུན་འབྱིན་པ་དེ་བརྗོད་ནས་ལུས་
དེ་ནི་རྒྱུ་ཉིད་དུ་འཐད་པ་ཡང་མ་ཡིན་ནོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །འདིར་འདས་ནས་ཡུན་རིང་དུ་ལོན་པའི་ཤེས་པའི་འདུ་བྱེད་ཉིད་སྨྲ་བ་ཡིན་ཏེ། ཚད་མས་གྲུབ་པའི་ཕྱིར་རོ། །གཉིད་ལོག་པའི་གནས་སྐབས་སུ་བྱུང་བ་འདས་མ་ཐག་པ་ནི་མ་ཡིན་ཏེ། ཐེ་ཚོམ་ཟ་བའི་ཕྱིར་རོ། །ཐེ་
ཚོམ་ཟ་བ་ནི་རྒྱུའམ་རྒྱུ་མ་ཡིན་པར་གཞག་པར་མི་ནུས་ཏེ། དུ་བ་ལ་ཤ་ཟ་བ་བཞིན་ནོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་སེམས་པ་ཆད་པར་གྲུབ་པ་འབར་བ་ནི་འབྲས་བུ་དང་ལྡན་པ་མ་ཡིན་ཏེ། དེ་མེད་ཀྱང་འདས་ནས་ཡུན་རིང་དུ་ལོན་པ་ནི་རྒྱུ་ཉིད་དུ་རྣམ་པར་གཞག་པ་སླ་བའི་ཕྱིར་རོ། །འཇིག་རྟེན་
རྒྱང་འཕན་པའི་འདོད་པ་ལ་ལྟོས་ནས་ནི་ཤིན་ཏུ་ཡང་ལུས་ཀྱི་འདུ་བྱེད་ཀྱི་རྗེས་སུ་འཇུག་པ་མ་མཐོང་བའི་ཕྱིར་རོ་ཞེས་བྱ་བར་བསམས་པའོ། །ལུས་མཚུངས་པར་ཡོད་པ་ཡིན་ཡང་ཞེས་བྱ་བ་ནི་གཉིད་ལོག་པ་གཉིས་སོ། །འོན་ཏེ་ཞེས་བྱ་བ་ནི་དེས་སྔོན་གྱི་འདུ་བྱེད་ཀྱི་རྗེས་སུ་འཇུག་ཀྱང་ལུས་རྒྱུ་ཡིན་པ་མི་
འགལ་ལོ་ཞེས་བྱ་བའི་ཐ་ཚིག་གོ། །གྲུབ་པའི་མཐར་ནི་ལ་སོགས་པ་བཞིན་དུ་མེད་པ་དང་ཅིག་ཤོས་དག་ལྷན་ཅིག་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །གཉིད་མཐུག་པ་ལ་སོགས་པ་སེམས་དང་བྲལ་བའི་སྐྱེས་བུ་ལ་སད་པའི་གནས་སྐབས་ན་ཞེས་བྱ་བ་ནི་སད་པ་ལས་མངོན་དུ་ཕྱོགས་པའི་
གནས་སྐབས་ནའོ། །ལུས་བཞིན་དུ་སྔོན་གྱི་སེམས་ཀྱང་ནི་ཡོད་པ་མ་ཡིན་ནོ། །འོ་ན་ཇི་ལྟར་ཞེས་བྱ་བ་ནི་གལ་ཏེ་དུས་གཞན་ན་ཡོད་པར་ལྷན་ཅིག་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །གྲུབ་པའི་མཐའ་ནི་དོན་འདི་ཡིན་ཏེ། རྒྱ་སྐྱེགས་ཀྱི་ཁུ་བས་འདུས་བྱས་པའི་རས་བལ་གྱི་ས་བོན་དང་མེ་
ཏོག་དག་ལ་གཅིག་མེད་ན། རས་བལ་གྱི་དམར་པོ་བཞིན་དུ་མེད་པར་བསྐྱེད་བྱ་རྣམ་པ་ཐམས་ཅད་དུ་མི་འགྱུར་བ་དེའི་ཚེ། འདིའི་ལྷན་ཅིག་བྱེད་པའི་ས་བོན་བསྐྱེད་དོ་ཞེས་བྱ་བའི་རྣམ་པར་གཞག་པ་འདིར་འགྱུར་བ་ཞིག་ན། དེ་ལྟར་ན་འདིར་མ་ཡིན་ཏེ། རྟོག་པ་མེད་ཀྱང་སད་པ་ཙམ་ཡོད་

པའི་ཕྱིར་རོ། །ཁྱད་པར་ཅན་ལ་ལྷན་ཅིག་བྱེད་པ་ཡིན་པ་ནི་ལུས་ལ་ཡང་བཟློག་ཏུ་མེད་དོ། །དེ་ཙམ་གྱིས་ནི་སྐབས་དང་འགལ་བ་ཡང་མ་ཡིན་ནོ། །ཡང་མེད་པ་ལྷན་ཅིག་བྱེད་པ་མི་འདོད་པ་བསལ་བའི་ཕྱིར་གལ་ཏེ་སད་མ་ཐག་ཏུ་ཞེས་གསུངས་སོ། །སད་མ་ཐག་ནི་མཐོང་མ་
ཐག་གོ། །མཐོང་བ་དང་སྔོན་གྱི་རྣམ་པར་ཤེས་པ་ཡོད་པ་དང་ཅིག་ཤོས་དག་གོ། །ལན་ནི་དེ་ཡང་རིགས་པ་མ་ཡིན་ཏེ་ཞེས་བྱ་བའི་ཉེ་བར་གནས་པ་ལ་སད་པར་འགྱུར་རོ་ཞེས་བྱ་བའི་དོན་འདི་ལ་ངེས་པ་ཡོད་པ་མ་ཡིན་ནོ། །མཐོང་བའི་ལུས་ཡིན་པས་ན་ཉེ་བ་ཉིད་ཀྱིས་དོན་གང་ཞིག་མཐོང་བ་
དེ་ཉིད་ལ་སྔོན་མཐོང་བར་རྟོགས་པའི་མཚན་ཉིད་དུ་འགྱུར་བའི་ཕྱིར་རོ། །དེ་དང་མཐུན་པ་ཉིད་དུ་ཞེས་བྱ་བ་ནི་བདག་གིས་འདི་ལྟར་བྱའོ་ཞེས་སོ། །བག་ཆགས་སད་པ་ནི་བག་ཆགས་སད་པའི་རྣམ་པར་རྟོག་པ་ལས་བྱུང་བའོ། །སད་པ་ན་ཞེས་བྱ་བ་ནི་གཉིད་སད་པ་ནའོ། །རྟོག་པ་ནི་རྣམ་པར་རྟོག་
པའི་བདག་ཉིད་དོ། །གལ་ཏེ་མཐོང་བ་ལ་མི་ལྟོས་པར་རྣམ་པར་རྟོག་པར་འགྱུར་ན། ཅི་སྟེ་ཐམས་ཅད་ལ་ཐམས་ཅད་མི་འགྱུར་སྙམ་ན། བདག་གིས་ཞེས་གསུངས་ཏེ། ཅི་ལྟར་ཞེས་བྱ་བ་ནི་གནས་སྐབས་དག་ཏུའོ། །དེར་འགྱུར་གྱིས་ཐམས་ཅད་ནི་མ་ཡིན་ནོ། །དེ་ལྟ་བུར་གྱུར་པ་ཉིད་རྟོགས་
ཀྱི་གཞན་ནི་མ་ཡིན་ནོ། །གལ་ཏེ་ཅི་རྣམ་པར་རྟོག་པ་ཁོ་ན་སད་པ་ཡིན་གྱི་ཅི་གཞན་མ་ཡིན་ནམ་སྙམ་པ་ལ། སད་པ་ནི་ཞེས་གསུངས་སོ། །གཉི་ག་ཡང་སད་པ་ཡིན་ཏེ། རྣམ་པ་གཅིག་ཏུ་ངེས་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལ་གཉིད་ཀྱིས་བཟའ་བཏུང་ཞུ་བ་ན་གང་གི་ཚེ་དབང་པོ་སྐྱོན་
མེད་དང་བཅས་པའི་ལུས་ཀྱིས་སྐད་ཅིག་བྱེད་པ་ཅན་འདས་ནས་རིང་དུ་ལོན་པའི་ཤེས་པ་སྔ་མས་ཕྱིའམ་ནང་གི་དོན་ཅི་ལྟར་ཉེ་བར་གནས་པ་ལ་བདེ་བ་དང་། སྡུག་བསྔལ་ཉམས་སུ་མྱོང་བ་དང་པོར་སྐྱེད་པར་བྱེད་པ་དེའི་ཚེ་ནི་རྣམ་པར་རྟོག་པ་མེད་པའི་སད་པ་ཡིན་ནོ། །གང་གིས་གཉིད་ལོག་པ་བརྡེབས་
པ་ཚར་ནས་མི་བཟད་པས་འཇིགས་པ་ལ་སོགས་པ་གོམས་པ་ལས། ལུས་ཀྱི་གནས་སྐབས་ཀྱི་ཁྱད་པར་ལྷན་ཅིག་བྱེད་པ་ཅན་གྱི་ཤེས་པ་སྔ་མས་འདི་བྱའི་སྙམ་པའི་རྣམ་པར་རྟོག་པ་སྐྱེད་པ་དེའི་ཚེ་ནི་རྣམ་པར་རྟོག་པའི་ཤེས་པ་ཉིད་སད་པ་ཡིན་ལ། དེའི་འོག་ཏུ་ནི་རྣམ་པར་རྟོག་པ་དང་

བཅས་པའམ་རྟོག་པ་མེད་པར་ཡང་འགྱུར་བ་ཡིན་ནོ། །གང་གི་ཚེ་ཚོགས་པ་ཡིན་པས་གཉི་ག་གཅིག་པར་སྐྱེ་བ་དེའི་ཚེ་ན་གཉི་ག་ཡང་སད་པ་ཡིན་ནོ། །སད་པ་གོམས་པར་བྱས་པ་ཉིད་སྟོན་པ་ནི་གང་ཞིག་ཅེས་བྱ་བའོ། །བརྟན་སོགས་ཞེས་སོགས་པའི་སྒྲས་ནི་འདོད་པར་བྱ་བའི་བུད་མེད་
གཟུང་ངོ་། །འདུ་བྱེད་ནི་གོམས་པའོ། །བདེ་བ་ལ་སོགས་པ་རིག་པ་དང་རྟོགས་པའི་རང་བཞིན་སྐྱེ་བར་འགྱུར་ཞེས་འབྲེལ་ཏོ། །དེ་ལ་འདས་ནས་ཡུན་རིང་དུ་ཡིན་པའི་འཇིགས་པ་གོམས་པ་ལས་འབྲེལ་པ་ལ་སོགས་པའི་རང་བཞིན་དང་། བདེ་བ་སྐྱེ་བར་འགྱུར་རོ། །མ་བྲོས་ན་ནི་སྡུག་
བསྔལ་དུ་རིག་པར་འགྱུར་རོ། །ཁོན་པ་གོམས་པར་བྱས་པ་ལ་ནི་མཚོན་འཛིན་པ་ལ་སོགས་པའི་རྟོག་པའི་རང་བཞིན་དང་བདེ་བ་རིག་པ་ཉེ་བར་འགྱུར་རོ། །འཆད་པ་ནི་འཇིགས་པ་གོམས་པའི་ཁྱིམ་དུ་ཞེས་བྱ་བའོ། །འབྲོས་པ་དང་བདེ་བ་ལ་སོགས་པའི་རང་བཞིན་དུ་རིག་པའོ། །སོགས་པའི་
སྒྲས་ནི་རྣམ་པར་རྟོག་པ་ཡོངས་སུ་གཟུང་ངོ་། །དེ་དག་ཉིད་ཀྱིས་རང་བཞིན་གང་ལ་ཡོད་པའི་སད་པ་དེ་ལ་དེ་སྐད་ཅེས་བྱ་བའོ། །གཞན་ཞེས་བྱ་བ་ནི་འབྲོས་མི་ནུས་ནའོ། །གཞན་ལ་གནོད་པར་བྱེད་པའི་རྒྱུ་ཡང་དེ་ཡིན་ལ་མཚོན་ལ་སོགས་པ་འཛིན་པ་ཡང་དེ་ཡིན་པ་སྟེ། རང་བཞིན་དེ་ཉིད་
རྟོགས་པ་གང་ལ་ཡོད་པ་དེ་ལ་དེ་སྐད་ཅེས་བྱ་བའོ། །དེས་ན་འབྲུ་མང་པོ་ཁོ་ན་ཡོད་པ་ལས་འཛིན་པའི་བསྡུ་བའོ། །གང་གི་ཕྱིར་འདིར་རྣམ་པར་རིག་པ་ཙམ་ལས་འདས་པ་དང་ཅིག་ཤོས་དག་ལྷན་ཅིག་བྱེད་པ་ཉིད་དུ་མི་འཐད་པ་དེས་ན་ཞེས་བྱ་བ་ལ་སོགས་པའོ། །རྣམ་པར་ཤེས་པ་སྤྱིའི་ལྷན་
ཅིག་བྱེད་པའི་རྒྱུ་མ་ཡིན་ནོ། །འདིས་ནི་འདུ་བྱེད་པ་དང་ལྷན་ཅིག་ཡང་ནས་སྐྱེ་བའི་ཞེས་གང་བརྗོད་པ་སྤངས་པ་ཡིན་ནོ། །འོ་ན་རྣམ་པར་ཤེས་པའི་རྒྱུ་ཅི་ཡིན་སྙམ་ན་རྣམ་པར་ཤེས་པ་སྔ་མ་ཉིད་རྒྱུ་ཡིན་ནོ་ཞེས་གསུངས་ཏེ། ཉེ་བར་སིམ་པ་ཡིན་ནོ། །འོན་ཀྱང་རྣམ་པར་ཤེས་པ་སྔ་མ་དེ་ཇི་ལྟར་རང་
གི་རྒྱུས་དུས་ངེས་པར་བསྐྱེད་པ་དེ་བཞིན་དུ་བར་དུ་ཆད་པའི་དུས་དང་། འབྲེལ་པའི་འབྲས་བུ་སྐྱེད་པར་བྱེད་པ་མ་ཡིན་པ་དེས་སང་གི་དུས་ཀྱི་དེ་མ་ཐག་ཏུ་འབྲས་བུ་མི་སྐྱེད་པ་དང་། དུས་གཞན་དང་འབྲེལ་པའི་འབྲས་བུ་སྐྱེད་པར་བྱེད་པར་འགྱུར་བ་ཙམ་དུ་ཟད་པ་ཡིན་པའི་ཕྱིར་སྐྱོན་མེད་དོ། །

རྒྱ་སྐྱེགས་ཀྱི་ཁུ་བས་འདུས་བྱས་པའི་ས་བོན་ནི་འདས་པའི་ཡིན་ཡང་། གཞན་གྱི་ཚེ་འབྲས་བུ་ནི་ཡོད་པར་ཐལ་བའི་ཉེས་པ་མེད་དོ། །མ་ལྡོག་པ་ལ་ལྟོས་ནས་རྣམ་པ་དེ་ལྟ་བུའི་འབྲས་བུ་སྐྱེད་པར་བྱེད་པ་ཡིན་པའི་ཕྱིར་རོ། །འབྱུང་བར་འགྱུར་བའི་རྒྱུ་ཡང་སྔར་གྱི་
དུས་སུ་ཡོད་པ་ལ་ལྟོས་པ་ཁོ་ནས་སྣ་ཞོམ་པ་ལ་སོགས་པའི་འབྲས་བུ་སྐྱེད་པ་ཡིན་ནོ། །འདི་གཉིས་ནི་ལྷན་ཅིག་འབྱུང་བ་མ་ཡིན་ཡང་གཅིག་མེད་ན་འབྲས་བུ་མི་སྐྱེ་བའི་ཕྱིར་ན་དོན་བྱ་བ་གཅིག་བྱེད་པའི་མཚན་ཉིད་ཀྱི་ལྷན་ཅིག་བྱེད་པ་ཉིད་ཡིན་ཡང་མི་འགལ་ལོ། །གལ་ཏེ་དེ་ལྟར་
ལྷན་ཅིག་འབྱུང་བ་མེད་ཀྱང་ལྷན་ཅིག་བྱེད་པ་ཡིན་ན་འདུ་བྱེད་པ་ཡང་ལུས་ཀྱིས་ལྷན་ཅིག་བྱེད་པར་འགྱུར་བ་དེས་ན། འདུ་བྱེད་དེ་ཡི་ཚེ་མེད་ན། །ལྷན་ཅིག་བྱེད་འགྱུར་ཕྱིར་འཐད་དཀའ། །ཞེས་ཇི་ལྟར་བརྗོད་ཅེ་ན། བརྗོད་པ། གལ་ཏེ་གཅིག་མེད་པར་འབྲས་བུ་རྟོགས་པ་ཙམ་གྱིས་སྐྱེ་ན་ནི།
འདི་དེ་ལྟར་འགྱུར་བ་ཁོ་ནའོ། །ལུས་དེ་ལུས་མེད་ན་མི་སྐྱེ་བ་ཁོ་ནའོ་ཞེ་ན། འདི་གང་གིས་ངེས་པར་ཟིན་ཏེ། རང་ངམ་གཞན་གྱིས་ངེས་པར་མི་འཐད་པའི་ཕྱིར་རོ། །དེས་ན་གང་གི་ཕྱིར་འཇིག་རྟེན་རྒྱང་འཕན་པའི་མངོན་པར་འདོད་པའི་འགྲུབ་ཏུ་རེ་བ་འབྲས་བུ་དང་བཅས་པར་འགྱུར། འདི་
གཉིས་ཀྱི་ལྷན་ཅིག་ལ་འདི་ཡང་ཚད་མས་རྟོགས་པ་མ་ཡིན་ནོ་ཞེས་བྱ་བར་རྟོགས་པར་བྱའོ། །གལ་ཏེ་ལུས་ཉིད་ཉེ་བར་ལེན་པ་ཡིན་ན་དེའི་ཚེ་ཉེས་པ་ཅི་ཡོད་སྙམ་པའི་དོགས་པ་སྤང་བའི་ཕྱིར། སྔར་བཤད་པའི་རིགས་པ་ཉིད་གྲགས་པར་བྱེད་པ་ནི་དེ་ཡང་ཞེས་བྱ་བ་ཡིན་ཏེ་ཤེས་པ་སྤྱིའོ། །
ལྷག་མ་ཡང་བརྗོད་པ་ནི་དེ་བཞིན་དུ་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་གྱིའོ། །མི་མཐུན་པ་མེད་ན་ཞེས་བྱ་བ་ནི་ལན་ནོ། །འོན་ཏེ་མི་མཐུན་པ་ཚབས་ཆེན་པོ་སེམས་དང་བྲལ་བའི་མཚན་ཉིད་ནི་རང་གི་རྒྱུ་ལོག་ཀྱང་མི་རྟོག་པའི་ཕྱིར་ན། སྔར་གྱི་རང་བཞིན་ཡང་འབྱུང་བ་མ་ཡིན་ཏེ།
སེལ་བ་ལོག་ནས་རང་བཞིན་གྱི་གནས་འབྱུང་བ་ནི་ནམ་ཡང་མེད་དོ། །དེས་ན་མི་མཐུན་པ་མེད་ན་སླར་ལུས་རྣམ་པར་ཤེས་པའི་རྒྱུ་ཡིན་ནོ་ཅི་སྟེ་བརྗོད་ཅེས་དོགས་ན་ཕྱིར་མི་འབྱུང་བའི་རྣམ་པར་འགྱུར་བར་ཞེས་གསུངས་སོ། །གང་ཞིག་རང་གི་རྒྱུན་ཡོད་ན་སྐྱེས་པ་དང་། དེ་མེད་ན་ལྡོག་པར་

ཡང་འགྱུར་ཞིང་ཡང་ཡོད་ན་འབྱུང་བར་འགྱུར་བ་དེ་ནི་རེ་ཞིག་བྱུང་བ་དེ་ཞེས་བརྗོད་དེ་གསེར་གྱི་རྣམ་པར་འགྱུར་བ་ཞུ་བ་ཉིད་བཞིན་ནོ། །གང་ཞིག་དེ་ལྟར་མི་འགྱུར་བ་དེ་ནི་ཡང་མི་འབྱུང་བའི་རྣམ་པར་འགྱུར་བ་ཡིན་ཏེ། དཔེར་ན་བུད་ཤིང་གི་རྣམ་པས་འགྱུར་བ་ལྟ་བུའོ། །ཉེས་པ་རྣམས་སོ་དེ་རྩོམ་
པར་བྱེད་པ་ཉིད་ཡིན་པར་ཁས་ལེན་ན་ནི་ཆེན་པོ་འབའ་ཞིག་ཏུ་མ་ཟད་ཀྱི་ཆུང་ངུ་ཡང་བཟློག་ཏུ་མེད་པར་འགྱུར་རོ། །དེས་བྱས་པས་ཞེས་བྱ་བ་ནི་ལུས་དེ་བྱས་པའོ། །རྣམ་པར་ཤེས་པ་ཞན་པ་ཡང་འཇུག་པའི་མཚན་ཉིད་བཟློག་ཏུ་མེད་པར་འགྱུར་རོ་ཞེས་འབྲེལ་ཏོ། །རྣམ་པར་འགྱུར་བ་གཞན་
ཡང་བཟློག་ཏུ་མེད་པར་ཐལ་བ་ཉིད་དུ་སྟོན་པ་ནི་བརྒྱལ་བ་ལ་སོགས་པ་སྟེ་གཉིད་སྟུག་པོས་ལོག་པ་ལ་སོགས་པ་གང་དག་ཡིན་པ་དེ་དག་གིས་རྣམ་པར་ནི་རྣམ་པར་ཤེས་པ་མེད་པའི་མཚན་ཉིད་དེ་རང་བཞིན་དེ་ཉིད་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་དག་ནི་བཟློག་ཏུ་མེད་པ་ནི་མ་
ཡིན་ཏེ། དེས་ན་ཉེས་པ་རྣམ་བཟློག་ཏུ་རུང་བའི་རྣམ་པར་འགྱུར་བ་རྩོམ་པར་བྱེད་པ་ཁས་བླངས་པ་བྱ་བ་ཡིན་ནོ། །དེ་ལྟར་ཁས་བླངས་པ་ནི་ཡང་འདོད་པ་འགྲུབ་བོ་ཞེས་གསུངས་པ་ནི། ཕྱིར་ལྡོག་པར་རུང་བ་ཞེས་བྱ་བའོ། །གང་ཞེས་བྱ་བ་ནི་ལུས་གང་ལ་བྱས་པའོ། །དེ་ནི་ཞེས་བྱ་བ་ནི་
ལུས་ཀྱི་རང་བཞིན་ཏེ། གསེར་གྱི་སྲ་བ་ཉིད་བཞིན་ནོ། །གལ་ཏེ་ཞེས་བྱ་བ་ནི་གཞན་གྱིའོ། །རྣམ་པར་ཤེས་པ་འབའ་ཞིག་རྒྱུ་ཡིན་ནོ། །བསྒྲུབ་ཏུ་མེད་པ་ཉིད་མེད་པར་འགྱུར་རོ་སྙམ་དུ་བསམས་པའོ། །གསོ་བྱ་མིན་པ་ནི་བཟློག་ཏུ་མེད་པ་སྟེ། སྐབས་ཀྱི་རྣམ་པར་འགྱུར་བའི་ཅུང་ཟད་
ཅེས་བྱ་བ་ཐམས་ཅད་མ་ཡིན་པའོ། །ཚུ་རོལ་མཛེས་པ་པའི་ཕྱོགས་ཁས་ལེན་ན་ནི་ཉེས་པ་འབའ་ཞིག་མི་མཐུན་པའི་བྱེད་པ་ཡིན་པར་ཁས་བླངས་པས་ན། མི་མཐུན་པ་བསྒྲུབ་ཏུ་མེད་པར་འགྱུར་རོ། །བསྒྲུབ་པར་བྱ་བ་མ་ཡིན་པ་ཉིད་ནི་ཞེས་བྱ་བ་ནི་འཆད་པའོ། །བསྒྲུབ་པར་བྱར་མེད་
པ་ནི་བསྒྲུབ་པར་བྱ་བ་མ་ཡིན་པ་སྟེ་སྦྲུལ་དང་ཉེ་བ་གང་ཡིན་པ་དག་གོ། །དེ་དག་ཀྱང་ཡིན་ལ་སྦྲུལ་དང་ཉེ་བར་ཡང་མ་ཡིན་པ་སྟེ། དེ་དག་གིས་བྱས་པའི་རྣམ་པར་འགྱུར་བ་ནི་སེམས་ལྡོག་པའི་མཚན་ཉིད་འཇིག་རྟེན་གྲགས་པ་དེ་སེལ་བར་ནུས་པའོ། །རྙེད་པར་དཀའ་བའི་ཕྱིར་ཞེས་བྱ་བའི་

མེད་པའི་ཉེ་བར་མཚོན་པར་བྱེད་པ་ཡིན་པའི་ཕྱིར་ན་མེད་པའི་ཕྱིར་ཞེས་གསུངས་སོ། །གཞན་གྱི་ལུགས་ལ་ཡང་དེ་ལྟར་འགྱུར་རོ་ཞེས་གསུངས་པ་ནི་སེམས་པ་ཞེས་བྱ་བའོ། །འཇིག་རྟེན་རྒྱང་འཕན་པའི་ལུགས་ལ་ནི་བསྒྲུབ་པར་བྱ་བ་མ་ཡིན་པའི་མི་མཐུན་པ་འགའ་
ཡང་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །འོ་ན་ཞེས་བྱ་བ་ནི་གཞན་གྱི་སྟེ། ངེད་ཀྱི་ཕྱོགས་ལ་ཞེས་འཐད་དོ། །དེ་ནི་མེད་དོ་ཞེས་བྱ་བ་ནི་ལན་ནོ། །དོན་ནི་གལ་ཏེ་རྣམ་པར་འགྱུར་བ་བཟློག་པར་བྱ་བ་མ་ཡིན་ན་དེའི་ཚེ་འཆོས་བྱེད་རྙེད་པར་དཀའ་བ་ཉིད་སླར་འཚོ་བའི་རྒྱུ་མིན་པར་འགྱུར་
བ་ཉིད་དོ། །རྣམ་པར་འགྱུར་བ་ལོག་ན་ཡང་འཆོས་བྱེད་ཉིད་དོན་མེད་དོ་ཞེས་བྱ་བ་ཡིན་ནོ། །གཞན་ལ་ཡང་ཞེས་བྱ་བ་ནི་འཇིག་རྟེན་ཕ་རོལ་སྨྲ་བ་ལའོ། །གལ་ཏེ་ཚུ་རོལ་མཛེས་པ་ལ་ཡང་བསྒྲུབ་པར་བྱ་བ་མ་ཡིན་པ་ཡོད་ན་སྐྱོན་ཅི་ཡོད། དེ་ལྟར་མ་ཡིན་ན་ཁྱེད་ལ་ཡང་ཇི་ལྟར་འགྱུར་ཞེས་བྱ་བ་
ནི་རྒོལ་བའི་དོན་ཏོ། །དེ་ཅིའི་ཕྱིར་སྙམ་ན། འདི་ལྟར་ཞེས་གསུངས་སོ། །ཚུ་རོལ་མཛེས་པ་པ་ལ་ནི་སྔོན་གྱི་ལས་ཀྱི་བདག་པོ་ཉིད་མེད་དོ་སྙམ་དུ་དགོངས་པའོ། །འདིར་ནད་བསྒྲུབ་པར་བྱ་བ་མ་ཡིན་པ་ནི། ཉེ་བར་མཚོན་པ་མ་ཡིན་པ་སྟེ། དེ་བདག་པོར་གྱུར་པས་བྱས་པའི་རྣམ་
པར་འགྱུར་བ་ཐམས་ཅད་གཟུང་ངོ་། །དེ་ལྟར་རང་གི་ལུགས་ལེགས་པར་བསྟན་ནས་སླར་འཚོ་བ་ཐལ་བ་འདི་ནི་གཞན་ཁོ་ན་ལས་ཡིན་ནོ་ཞེས་མཇུག་སྡུད་པའི་སྒོ་ནས་སྟོན་པ་ནི་དེའི་ཕྱིར་ཞེས་བྱ་བའོ། །དེའི་ཕྱིར་རྣམ་པར་ཤེས་པ་ནི་ལུས་ཀྱིས་རྒྱུ་ཅན་མ་ཡིན་པའི་ཕྱིར་རྣམ་པར་ཤེས་པའི་རྒྱུ་ནི་
རྣམ་པར་ཤེས་པ་སྔ་མ་ཉིད་ཡིན་ནོ། །དེ་བས་ནི་ལུས་ལོག་པས་ནི་རྣམ་པར་ཤེས་པ་ལྡོག་པ་མ་ཡིན་ནོ། །ཡང་ན་ལུས་རྣམ་པར་ཤེས་པའི་རྒྱུ་ཅན་ཡིན་ཡང་དེ་ཙམ་གྱིས་ནི་དེ་ལོག་པས་ལྡོག་པ་མ་ཡིན་ཏེ། རྒྱུ་ཙམ་ལོག་པས་འབྲས་བུ་ཐམས་ཅད་མི་ལྡོག་པའི་ཕྱིར་རོ་ཞེས་བྱ་བ་འདི་
བསྟན་པའི་དོན་དུ་གཞན་ཡང་ཞེས་གསུངས་སོ། །འོ་ན་ལུས་ཉིད་ཉེ་བར་མཚོན་པའི་རྒྱུ་ཡིན་ནོ་སྙམ་ན། ལུས་ཀྱང་ཞེས་གསུངས་སོ། །ཅིའི་ཕྱིར་ཞེ་ན། གལ་ཏེ་ཡིན་ན་ཞེས་གསུངས་སོ། །ལུས་དེ་རྣམ་པར་མ་གྱུར་པའོ། །རྣམ་པར་མི་འགྱུར་བར་འགྱུར་རོ་ཞེས་བྱ་བ་ནི་སྐབས་

ཀྱིས་རྣམ་པར་ཤེས་པའོ། །གལ་ཏེ་དེ་ལྟ་ན་ལུས་ཉིད་རྣམ་པར་ཤེས་པའི་ཉེ་བར་ལེན་པའི་རྒྱུར་འགྱུར་རོ་སྙམ་ན། ལུས་ནི་རྒྱུ་ཉིད་ཡིན་ཡང་ཞེས་གསུངས་སོ། །ཅིའི་ཕྱིར་སྙམ་པ་ལ། དེ་མ་གྱུར་ཀྱང་ཞེས་གསུངས་ཏེ། དེས་ན་ལུས་ནི་ཉེ་བར་ལེན་པའི་རྒྱུ་མ་ཡིན་ནོ། །འོ་ན་རྣམ་པར་
ཤེས་པ་ཡང་ཅི་ལྟར་ཞེ་ན། དེ་འགྱུར་ན་ཡང་གདོན་མི་ཟ་བར་འགྱུར་བའི་ཕྱིར་རོ་ཞེས་སྨྲས་སོ། །དེ་འགྱུར་ན་ཡང་གདོན་མི་ཟ་བར་འགྱུར་བ་མ་ཡིན་པའི་ཕྱིར་རོ་ཞེས་འདོན་པ་དེ་ནི་ལུས་རྒྱུ་ཡིན་པ་འགོག་པའི་གཏན་ཚིགས་ཀྱི་དོན་ཡིན་ནོ། །གལ་ཏེ་ཞེས་བྱ་བ་ལ་སོགས་པ་ནི་གཞན་གྱིའོ། །
འདིས་ནི་ཧ་ཅང་ཁྱབ་ཆེས་པའི་ཉེས་པ་བརྗོད་དོ། །དེ་ལ་མཚན་ཉིད་གཞན་བསྒྲུབས་པས་རེ་ཞིག་དེ་དགག་པ་བརྗོད་པ་ནི་མ་ཡིན་ཏེ་ཞེས་བྱ་བའོ། །རྒྱུན་གྱིས་ཞེས་བྱ་བ་ནི་སཱ་ལུའི་རྒྱུན་གྱི་རྒྱུའོ། །གལ་ཏེ་ཆུ་ཉིད་རྒྱུན་གྱི་རྒྱུ་མ་ཡིན་ནམ། དེས་ན་ཧ་ཅང་ཁྱབ་པའི་ཉེས་པ་ཇི་ལྟར་སྤོང་སྙམ་ན།
རྒྱུན་གྱི་རྒྱུ་ཡང་ཞེས་གསུངས་སོ། །དེ་ལྟར་ན་ནི་འོ་ན་རྒྱུ་མ་ཡིན་པའི་ཆུ་ལ་ཅི་ལྟོས་སྙམ་པ་ལ་ཆུའི་ནི་ཞེས་བྱ་བ་གསུངས་སོ། །རྒྱུ་འབྱུང་བ་ཡང་དེ་ཉིད་ལས་འགྱུར་མོད་སྙམ་ན། ཆུ་ལས་ཞེས་གསུངས་སོ། །ཅིའི་ཕྱིར་སྙམ་པ་ལ་ཆུ་ནི་ཞེས་གསུངས་སོ། །དེ་ལྟར་རྗེས་སུ་འགྲོ་བ་མེད་
པར་བསྟན་པའི་སྒོ་ནས་ཉེ་བར་ལེན་པའི་མཚན་ཉིད་ཧ་ཅང་ཁྱབ་ཆེས་པའི་ཉེས་པ་སྤངས་པས་ལྡོག་པའི་སྒོ་ནས་སྟོན་པ་ནི་ཆུ་ལོག་ཀྱང་ཞེས་གསུངས་སོ། །མེ་ཡོད་ན་དུ་བའི་རྒྱུན་ཡོད་ཀྱང་དེ་ཉེ་བར་ལེན་པ་ནི་མ་ཡིན་ནོ་ཞེ་ན། མ་ཡིན་ཏེ་ཙན་དན་གྱི་རྒྱུན་གྱི་ཉེ་བར་ལེན་པ་ཡིན་པའི་ཕྱིར་
རོ། །ཙན་དན་གྱི་རྒྱུན་ཡང་ཙན་དན་ཡིན་གྱི་མེ་ནི་མ་ཡིན་ཏེ། མེ་ནི་དུ་བའི་གནས་སྐབས་ཀྱི་རྒྱུ་ཡིན་པའི་ཕྱིར་རོ། །མེ་ལས་ནི་ཙན་དན་གྱི་རྒྱུན་འབྱུང་བ་མ་ཡིན་ཏེ། མེ་ནི་སེང་ལྡེང་ལ་སོགས་པ་དང་ཐུན་མོང་པའི་ཕྱིར་རོ། །མེ་ལོག་པས་ནི་ཙན་དན་གྱི་རྒྱུ་ལྡོག་པ་མ་ཡིན་
ཏེ། མེ་མེད་ཀྱང་ཙན་དན་གྱི་རྒྱུན་མི་ལྡོག་པའི་ཕྱིར་རོ། །དེ་བཞིན་དུ་གཞན་དག་ཏུ་ཡང་ཅི་རིགས་སུ་བརྗོད་པར་བྱའོ། །དེས་ན་བཤད་མ་ཐག་པའི་ཉེས་པ་མེད་དོ། །འོ་ན་ཆུ་རྣམ་པ་ཐམས་ཅད་དུ་མཁོ་བ་མེད་པར་འགྱུར་ཞེ་ན། མྱུ་གུ་ལ་སོགས་པ་དེའི་ཞེས་གསུངས་སོ། །དེ་ནི་

དེ་ལོག་ན་ལྡོག་པ་ཡིན་ནོ་ཞེས་བྱ་བ་ནི་སྐམ་པ་ལ་སོགས་པའི་ཚུལ་གྱིས་སོ། །འོན་ཏེ་དེ་ལྟ་ན་སཱ་ལུའི་རང་བཞིན་ལ་ཆུ་ཉེ་བར་ལེན་པ་མ་ཡིན་མོད། དེའི་གནས་སྐབས་ནི་དེ་ལས་སྐྱེས་པ་དང་དེ་ལོག་ན་ཡང་ལྡོག་པའི་ཕྱིར་ཉེ་བར་ལེན་པར་འགྱུར་རོ་ཞེ་ན། དེས་ན་ཆུ་
ཞེས་གསུངས་སོ། །ཉེ་བར་ལེན་པའི་རྒྱུ་ཁོ་ན་སྟེ་བདག་ཅག་ལ་བཅད་པ་ཅིག་ཡོད་ཅེས་བྱ་བ་འདི་ལྷུར་བྱེད་པ་ཡིན་ནོ། །སཱ་ལུའི་རང་བཞིན་བརྒྱུད་པས་གནས་པ་ན་ལྷན་ཅིག་བྱེད་པ་དག་ལས་ཁྱད་པར་གཞན་དང་གཞན་པ་ན་རེ་ཞིག་ཡོད་པ་ཡིན་ནོ། །དེ་ལ་རྣམ་པ་ཇི་ལྟ་བ་དེ་ལྟར་རྣམ་པར་གཞག་
པ་བགྱིས་ཏེ། ཆད་པ་ཅི་ཡང་མེད་དེ་ཞེས་བྱ་བ་ཡིན་ནོ། །དེ་ལྟར་རྒྱུན་གྱི་རྒྱུ་ཉིད་ཉེ་བར་ལེན་པའི་རྒྱུ་ཡིན་ནོ་ཞེས་བྱ་བའི་མཚན་ཉིད་ལ་ཉེས་པ་མེད་པར་བསྟན་ནས། སློབ་དཔོན་གྱིས་གསུངས་པའི་མཚན་ཉིད་ལ་ཡང་བསྟན་པའི་ཕྱིར་ཆུ་ལ་སོགས་པ་ལས་ནི་ཞེས་གསུངས་སོ། །དེ་
ལ་རྣམ་པར་ཤེས་པའི་རྒྱུན་གྱི་རྒྱུ་ཡིན་པ་ཉིད་ཀྱི་ལུས་ཉེ་བར་ལེན་པའི་རྒྱུ་ཉིད་ཡིན་པ་ནི། ལུས་ལས་དང་པོ་སྐྱེ་ན་ཞེས་བྱ་བ་འདིའི་སྐབས་སུ་ཕྱིས་སེལ་བར་འགྱུར་རོ། །དེར་འགྱུར་བས་འགྱུར་བའི་སྒོ་ནས་ལུས་ཉེ་བར་ལེན་པ་ཉིད་ཡིན་པ་ཉེ་བར་སྡུད་པའི་སྒོ་ནས་སེལ་བ་ནི་དེའི་ཕྱིར་ཞེས་
བྱ་བ་སྟེ། གང་གི་ཕྱིར་དེ་ལྟར་མ་ཡིན་པ་དེའི་ཕྱིར་ཉེ་བར་ལེན་པའི་རྒྱུ་མ་ཡིན་ནོ། །ཅིའི་ཕྱིར་ཞེ་ན་སྨྲས་པ། ལུས་འགྱུར་བ་མེད་པར་ཡང་སྟེ་ཉམས་པ་དང་འཕེལ་བ་མེད་པར་ཡང་ངོ་། །རྣམ་པར་འགྱུར་བའི་ཕྱིར་ཏེ་ཉམས་པ་དང་འཕེལ་བའི་ཕྱིར་རོ། །དོན་འདི་ཉིད་རྣམ་འགྲེལ་གྱི་
གསལ་འདེབས་པ་ནི། དེ་ཉིད་བཤད་པ་ན་ཞེས་བྱ་བའོ། །ལུས་རྣམ་པ་དེ་འདྲ་བ་ཉིད་ཡིན་ནོ་ཞེས་སྟོན་པ་ནི་ལུས་མ་འགྱུར་ཡང་ཞེས་བྱ་བའོ། །དེའི་ཕྱིར་ཞེས་བྱ་བ་ནི་ཉེ་བར་ལེན་པ་མ་ཡིན་པའི་ཕྱིར་རོ། །བ་ལང་དང་བ་མེན་ཅི་ལྟར་ཡིན་ཞེ་ན། དེ་མ་འགྱུར་ཡང་འགྱུར་བའི་ཕྱིར་ཞེས་
གསུངས་སོ། །བ་ལང་དང་བ་མེན་དག་ཕན་ཚུན་གནས་སྐབས་ཀྱིས་ཁྱད་པར་བྱེད་པས་ནི་ཅི་ཡང་ཆད་པ་མེད་དོ་ཞེས་བརྗོད་པ་ནི། བ་མེན་བ་ལང་གི་ཞེས་བྱ་བའོ། །གཞན་གྱིས་གལ་ཏེ་ཞེས་སྨྲས་སོ། །སྐྱོན་ཡོན་དུ་འགྱུར་བ་མ་ཡིན་ནོ་ཞེས་པ་ནི་འདིའི་བར་གྱིས་ནི་ཉེས་གཅིག་གོ། །

ཉེ་བར་ལེན་པ་ཞེས་བྱ་བ་ལ་སོགས་པས་ནི་གཉིས་པའོ། །དང་པོ་ལ་ནི་ལན་ལུས་དང་སེམས་ཀྱང་དེ་བཞིན་ནོ་ཞེས་བྱ་བ་ཡིན་ཏེ། བ་ལང་དང་བ་མེན་ལྟར་འདི་གཉིས་ནི་ཉེ་བར་ལེན་པ་དང་། ཉེ་བར་ལེན་པ་ལས་བྱུང་བ་ཉིད་མ་ཡིན་ནོ་ཞེས་བྱ་བའི་དོན་ཏོ། །གཉིས་པའི་ལན་ནི་རྐང་པ་ལྷག་མ་
གསུམ་ཡིན་ནོ། །ལུས་དང་སེམས་ཀྱི་མཚན་ཉིད་སྐྱེ་བའི་འབྲས་བུ་ལྷན་ཅིག་གནས་པ་ཡིན་ནོ། །ཅིའི་ཕྱིར་ཞེ་ན། ལུས་དང་སེམས་འདྲིས་པ་དེ་གཉིས་ཀྱི་རྒྱུ་ནུར་ནུར་པོ་ལ་སོགས་པ་དང་། ལྷན་ཅིག་པའི་སེམས་དེ་ལྷན་ཅིག་བྱེད་པའི་ཕྱིར་ཏེ། ཕན་ཚུན་ལྷན་ཅིག་བྱེད་པའི་ཕྱིར་རོ། །དཔེ་
བརྗོད་པ་ནི་མེ་དང་ཟངས་མའི་ཞུ་ཉིད་བཞིན་ཞེས་པའོ། །དེས་ན་ཉེ་བར་ལེན་པའི་དང་ཉེ་བར་ལེན་པ་ལས་བྱུང་བ་ཉིད་མ་ཡིན་པ་ཡང་ལྷན་ཅིག་གནས་པར་འཐད་དོ་སྙམ་དུ་དགོངས་པའོ། །དེ་ལྟར་ཡང་སྔར་གྱི་རྩོད་པ་ལས་ཅི་ལྟར་འདས་སྙམ་པ་ལ། འདིར་ཞེས་བྱ་བའོ། །སྐབས་སྡུད་པ་ནི་
གནས་སྐབས་རྒྱུའི་དངོས་པོ་ནི་ཞེས་བྱ་བའོ། །དངོས་པོ་ནི་ལུས་སོ། །གལ་ཏེ་དེ་ལྟ་ཡིན་ན་འོ་ན་དེ་ལོག་ན་ཅི་ཞིག་ལྡོག་སྙམ་ན་གནས་སྐབས་བྱེད་པ་ཞེས་གསུངས་སོ། །ནིའི་སྒྲ་ནི་གསལ་ལོ་ཞེས་བྱ་བའི་དོན་ཡིན་ནོ། །དེ་ལྟ་ན་འོ་ན་ཉེ་བར་ལེན་པའི་རྒྱུ་གང་ཡིན་སྙམ་དུ་དགོངས་ན། རང་གི་བརྗོད་
པའི་ཉེ་བར་ལེན་པའི་མཚན་ཉིད་དྲན་པར་བྱེད་པས། དེ་ལོག་པ་ཉིད་ན་རྒྱུ་ལྡོག་པའོ་ཞེས་སྟོན་པ་ནི། རྒྱུན་གྱི་རྒྱུ་གང་ཡིན་པ་དེ་ཞེས་གསུངས་སོ། །འོན་ཏེ་གནས་སྐབས་ཀྱི་རྒྱུ་ལོག་པས་ཀྱང་རྒྱུ་ལྡོག་པར་འགྱུར་རོ། །དེས་ན་དེ་ཡང་ཉེ་བར་ལེན་པར་འགྱུར་རོ་སྙམ་པ་ལ། མེ་ལོག་པས་ནི་ཞེས་
གསུངས་སོ། །དེ་བཞིན་དུ་མེ་ལོག་ན་ཙན་དན་གྱི་དུ་བའི་གནས་སྐབས་ཉིད་ལོག་པར་འགྱུར་རོ་ཞེས་བྱ་བར་རྟོགས་པར་བྱའོ། །གནས་སྐབས་ཀྱི་རྒྱུ་ལོག་པས་ནི་རྒྱུན་ལྡོག་པ་མ་ཡིན་ནོ་ཞེས་བྱ་བའི་དོན་ཏོ། །ལན་གཉིས་པ་སྡུད་པ་ནི་སེམས་ནི་ལུས་དང་ལྷན་ཅིག་ཅེས་བྱ་བའོ། །ལུས་དང་
སེམས་འདྲེས་པ་དེ་གཉིས་ཀྱིས་འབྲས་བུ་མ་ཡིན་ན། འབའ་ཞིག་པའམ་ལུས་གཞན་དང་ལྷན་ཅིག་ཡང་རུང་སྟེ། རྒྱུན་དུ་འབྱུང་བའི་རང་བཞིན་གྱི་སེམས་ལུས་མེད་ཀྱང་གནས་པ་ཉིད་དེ། དཔེར་ན་མེ་དང་གསེར་གཉིས་ཀྱི་འབྲས་བུ་མ་ཡིན་པའི་གསེར་ནི་མེ་མེད་ཀྱང་གནས་པ་བཞིན་

ནོ། །བཤད་ཟིན་པའི་དོན་ཉིད་གསལ་བར་བྱེད་པའི་ཕྱིར་འདི་སྐད་བརྗོད་པ་ཡིན་ནོ་ཞེས་བྱ་བའོ། །ལུས་དང་སེམས་ཀྱི་མཚན་ཉིད་ཅན་འབྲས་བུ་གཉིས་ནིའོ། །རྒྱུ་དེ་གཉིས་འབྲས་བུ་མིན་ན་ནི་ཞེས་བྱ་བ་ལ་སོགས་པ་རྣམ་པར་འགྲེལ་པ་ནི། ལུས་ལོག་ན་ནི་ཞེས་བྱ་བའོ། །
འོན་ཏེ་ཞེས་བྱ་བ་ནི་གཞན་གྱིའོ། །དེ་ཞེས་བྱ་བ་ནི་ཁྱད་པར་རོ། །གང་གི་ཚེ་ཆུ་ལོག་ན་ལྡོག་པ་མ་ཡིན་ནོ་ཞེས་འདོན་པ་དེའི་ཚེ་ནི་དེ་ཞེས་བྱ་བ་རྒྱུན་ལ་བྱ་སྟེ་རྒྱུན་དེ་ནི་ཆུ་ལོག་ཀྱང་མི་ལྡོག་གོ་ཞེས་བྱ་བའི་དོན་ཏོ། །ཡང་ཅི་ལྟར་ཞེས་བྱ་བ་ནི་རྩོད་པ་གཉིས་པའི་སྐྱེ་བར་འགྱུར་རོ་ཞེས་བྱ་བ་ནི་རྣམ་པར་ཤེས་
པ་ནི་རྒྱུན་ནོ། །དེས་ན་རྣམ་པར་ཤེས་པའི་རྒྱུན་ནི་རྣམ་པར་ཤེས་པའི་རྒྱུན་གྱི་རྒྱུ་ཡིན་པའི་ཕྱིར་ལུས་ཉེ་བར་ལེན་པར་ཐལ་ལོ་ཞེས་བྱ་བ་ནི་གཞན་གྱི་བསམ་པའོ། །དེ་ལ་འདིར་ཞེས་བྱ་བ་ལ་སོགས་པ་དང་པོ་སྤངས་ནས། གཉིས་པ་སེལ་བར་བྱེད་པ་ནི་དང་པོར་རྣམ་པར་ཤེས་པ་ནི་ཞེས་བྱ་
བའི་སྔོན་གྱི་འདུ་བྱེད་པའི་རྗེས་སུ་འཇུག་པས་ཐམས་ཅད་ལ་གྲུབ་པའི་ཕྱིར་རོ་སྙམ་པའི་དགོངས་པའོ། །ཡང་ན་རང་ངམ་གཞན་གྱིས་མ་མཐོང་བ་དེས་ན་ཉེ་བར་ལེན་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་གནོད་པས་བྱས་པ་མེད་ཀྱང་རྒྱུན་ལྡོག་པར་འགྱུར་བ་མ་ཡིན་ནམ་ཞེ་ན། ཉེར་ལེན་
གནོད་པར་བྱེད་པ་ནི། །ཞེས་གསུངས་སོ། །འཆད་པར་ནི་འབྲུའི་རྒྱུན་གྱི་ཞེས་བྱ་བ་སྟེ། ཆོས་མི་མཐུན་པའི་དཔེ་བརྗོད་པའོ། །གང་ལ་གནོད་པ་མེད་པར་རྣམ་པར་ཤེས་པའི་ཉེ་བར་ལེན་པ་ཡིན་སྙམ་ན་རྣམ་པར་ཤེས་པའི་ཉེ་བར་ལེན་པ་ནི་ཞེས་སྨོས་སོ། །ཉིད་ཡིན་གྱི་ལུས་ནི་མ་ཡིན་ཏེ་
ཉེ་བར་ལེན་པའི་མཚན་ཉིད་གཉི་ག་མེད་པའི་ཕྱིར་རོ། །འོན་ཏེ་འདི་ལ་ཡང་གནོད་པ་སྲིད་དོ་སྙམ་ན་དེ་ལ་ནི་ཞེས་གསུངས་སོ། །འདི་ཙམ་གྱིས་ནི་ཚིག་ལེའུར་བྱས་པ་དང་པོ་བཤད་པ་ཡིན་ནོ། །གཉིས་ལ་སོགས་པས་ཞེས་བྱ་བ་ནི་བཤད་པ་འདིའི་དང་ལག་ལ་ཡིན་ནོ། །སོགས་པའི་སྒྲས་
ནི་བརྒྱལ་བ་ལ་སོགས་པའོ། །དུས་དེ་ཙམ་དུ་གནོད་པ་ཡིན་ནོ་ཞེས་བྱ་བ་འདི་ག་ལས་ཡིན། གང་གི་ཕྱིར་སྔ་མ་རྣམ་པ་ཐམས་ཅད་དུ་ཉམས་པ་ན་ཕྱིས་ལུས་ལས་སྔ་ན་མེད་པའི་སེམས་ཉིད་སྐྱེ་བའི་ཕྱིར་རོ་སྙམ་ན། སྔོན་གྱི་འདུ་བྱེད་ལ་ལྟོས་པ་ཅན་ཞེས་གསུངས་སོ། །འདི་ནི་ཚིག་ལེའུར་

བྱས་པའི་དོན་ཡང་བསྒྲུབ་པ་ཡིན་ནོ། །རྣམ་ཆད་མིན་ཏེ་རྣམ་པ་ཐམས་ཅད་དུ་མེད་པ་མ་ཡིན་ནོ། །ཅིའི་ཕྱིར་ཞེ་ན། རྣམ་ཤེས་རྣམ་ཚད་ཞེས་གསུངས་སོ། །གལ་ཏེ་དམིགས་པའི་ཕྱིར་ན་རྨི་ལམ་དུ་རྣམ་པར་ཤེས་པ་རྣམ་པར་ཆད་ཀྱང་འབྱུང་བ་ཡིན་ནོ། །གཞན་དུ་གོ་ཇི་ལྟར་སྙམ་ན། ཤི་དང་གཉིད་
ལོག་པ་དག་ལ། །ཞེས་གསུངས་སོ། །དེས་ན་གང་ཞིག་རྣམ་པར་ཆད་པ་དེ་ནི་སད་པ་དང་འབྲེལ་པ་ཡིན་ཏེ། དཔེར་ན་གཉིད་མཐུག་པའི་ཚད་མ་བཞིན་ནོ། །འཆི་བ་ཡང་རྣམ་པར་འཆད་པ་ཡིན་ནོ། །དེས་ན་འཇིག་རྟེན་ཕ་རོལ་མེད་པ་མ་ཡིན་ནོ་སྙམ་དུ་དགོངས་པའོ། །གཉིད་ལ་སོགས་པའི་དཔེ་ལ་
འཁྲུལ་པ་དོགས་པ་ནི་འོན་ཏེ་ཞེས་བྱ་བའོ། །ཁོ་ནར་ཞེས་བྱ་བ་ནི་ཕྱིས་མི་སྐྱེ་བའོ། །དེས་ན་རྣམ་པར་ཆད་པར་ནི་ཡང་འབྱུང་བས་མ་ཁྱབ་པོ་སྙམ་དུ་བསམ་པའོ། །དེ་ནི་མ་ཡིན་ཏེ་ཞེས་བྱ་བ་ནི་ལན་ནོ། །རེས་འགའ་རྣམ་པར་ཆད་པ་ཁོ་ནར་འགྱུར་རོ་ཞེས་བྱ་བའི་རྟོག་པ་འདི་འདྲ་བ་འདི་དེ་ག་ལས་ཡིན་འདི་
སྐད་བརྗོད་པར་འགྱུར་དེ་འགའ་ཞིག་གིས་དམིགས་པའི་དངོས་པོ་ནི་དེ་ཉིད་དུ་འགྱུར་གྱི་རྣམ་པར་ཆད་པ་ནི་རང་ངམ་གཞན་འགའ་ཞིག་གིས་རྟོགས་པར་ནུས་པ་མ་ཡིན་ནོ་ཞེས་བྱ་བའོ། །རེ་ཞིག་རང་གི་དབང་དུ་བྱས་ནས་བཤད་པ་ནི་རེ་ཞིག་ཅེས་བྱ་བའོ། །ཀུན་ཏེ་ཞེས་བྱ་བ་ནི་གཞན་གྱིས་སྨྲས་པའོ་མི་
དམིགས་པ་ཙམ་གྱིས་རྣམ་པར་འཆད་པར་དགག་པ་ག་ལས་ཡིན་ཏེ། གལ་ཏེ་རྣམ་པར་ཆད་པ་རྟག་ཏུ་རང་ཉིད་མི་དམིགས་པ་ཡིན་པ་དེ་ལྟ་ན་ཡང་མཐའ་གཅིག་ཏུ་བྱ་བར་མི་ནུས་པའི་ཕྱིར་ན་རེས་འགའ་གཏན་དུ་རྣམ་པར་ཆད་པར་ཡང་འགྱུར་རོ། །དེ་ལྟ་ཡིན་ཏེ་རྣམ་པར་ཆད་པ་མེད་པར་མ་
ངེས་པ་ཉིད་འཇིག་རྟེན་ཕ་རོལ་ཡོད་པའི་ཐ་སྙད་མེད་པར་གྲུབ་པ་སྙམ་དུ་འདོད་པ་ནི་སྡུག་བསྔལ་བས་བརྒལ་བར་བྱའི་ཕྱིར་བརྒལ་དཀའ་བའོ། །དེ་སུན་འབྱིན་པ་ནི་དེ་ཡང་མ་ཡིན་ཏེ་ཞེས་བྱ་བའོ། །དེ་ལྟ་ན་ཡང་སྔ་ན་མེད་པ་སྐྱེ་བ་འཐད་པར་དཀའ་བའི་ཕྱིར་རོ་སྙམ་དུ་དགོངས་པའོ། །དེས་ན་རྣམ་པར་
ཆད་པ་ཙམ་ཁས་བླངས་ཀྱང་སྲིད་པ་མི་འགལ་ལོ་ཞེས་བྱ་བའི་དོན་ཏོ། །སྔོན་དང་ཕྱི་མ་དག་གི་མཐའ་རྣམ་པར་ཆད་པ་དམིགས་པ་མ་ཡིན་ནོ་ཞེས་བྱ་བའི་རྗེས་སུ་འཇུག་པ་དེ་ནི་སྔོན་གྱི་འདུ་བྱེད་མེད་པར་མ་ཡིན་ལ་དེ་བཞིན་དུ་འདུ་བྱེད་སྔ་མ་སྔ་མ་ཡང་ངོ་། །དེས་ན་ཇི་ལྟར་སྔོན་བྱུང་བའི་མཐའ་རྣམ་པར་

མ་དམིགས་པ་དེ་བཞིན་དུ་ཕྱི་མར་གྱུར་པ་ཡང་ངོ་། །འདི་ལྟར་དཔེར་ན་འདུ་བྱེད་སྔ་མ་སྔ་མ་རང་དང་རྗེས་སུ་མཐུན་པའི་རྣམ་པར་ཤེས་པ་མཚམས་མ་སྦྱར་བ་གནས་ལ་མི་དབང་བ་དེ་བཞིན་དུ་ཕྱི་མ་ཕྱི་མ་ཡང་མཚམས་མི་སྦྱར་བ་ཅི་ལྟར་ནུས་ཏེ། ཚོགས་པ་མཚུངས་པ་ཅན་ཡིན་
པའི་ཕྱིར་རོ། །ཁྱད་པར་ཡོད་ན་ཡང་བརྗོད་དགོས་སོ། །ཉོན་མོངས་པ་དང་ལྡན་པ་ལ་སོགས་པ་ཐུན་མོང་ཉིད་ན་བཤད་པ་དེས་ན་སྔ་མ་དང་ཕྱི་མའི་མཐའ་གཉིས་ལ་རྣམ་པར་དབྱེ་བ་མེད་དོ། །རྣམ་པར་རྟོག་པ་གཉིས་པའི་འདུས་བྱས་ནས་བརྗོད་པ་ནི་གཞན་གྱིས་ནི་ཞེས་བྱ་བའོ། །དམིགས་པའི་
མཚན་ཉིད་དུ་གྱུར་པ་མེད་པའི་ཕྱིར་ཞེས་བྱ་བ་ནི་གཞན་གྱི་སེམས་གཞན་ལའོ། །རྣལ་འབྱོར་པ་རྣམས་ལ་ནི་གཞན་གྱི་ཤེས་པ་དམིགས་པའི་མཚན་ཉིད་དུ་གྱུར་པ་ཁོ་ནའོ། །འོན་ཀྱང་དེ་དགག་པ་འཇུག་པ་དེ་ཡང་རིང་བ་ཁོ་ནའོ། །དེས་ན་ཤེས་པ་རྣམ་པར་ཆད་པ་ནི་རང་ངམ་གཞན་གྱིས་དམིགས་
པ་མ་ཡིན་ནོ། །དེས་ན་རྣམ་པར་ཤེས་པ་རྣམ་པར་ཆད་པར་རྟོག་པ་མེད་དོ། །འོན་ཏེ་ཡང་འདོད་ཆགས་དང་བྲལ་བ་ནི་ཉོན་མོངས་པ་མ་ལུས་པ་བྲལ་བའི་ཕྱིར་ན་སེམས་ཀྱི་རྒྱུན་གནས་པ་ལ་ཉམས་པ་སྲིད་པའི་ཕྱིར་རྣམ་པར་ཆད་པར་འགྱུར་རོ་སྙམ་ན་འདོད་ཆགས་དང་བྲལ་བས་གསུངས་སོ། །
ཅིའི་ཕྱིར་ཞེ་ན། རང་གི་དོན་ལ་ཞེས་གསུངས་སོ། །ཉེས་པ་དང་བྲལ་བ་ཡང་གཞན་དོན་ལ་མི་དགའ་བ་ནི་བྲལ་བ་མ་ཡིན་ཞིང་གཞན་གྱི་དོན་ལ་མི་དགའ་ན་ཡང་ཉེས་པ་མེད་པ་ཉིད་ཀྱང་འབྲེལ་པར་འབྱུང་བ་མ་ཡིན་ནོ་ཞེས་བྱ་བའི་དོན་ཏོ། །དེས་ན། གང་དག་བརྩེ་བ་ཆེན་པོ་ཅན། །གཞན་
གྱི་ངོར་ནི་བཞུགས་པ་ཡིན། །ཞེས་བྱ་བའི་ཚུལ་གྱིས་འདོད་ཆགས་དང་བྲལ་བ་ཉིད་ལ་ཉམས་དམས་པ་སྲིད་པས་རྒྱུན་ཆད་པ་ནི་མ་ཡིན་ནོ་ཞེས་བྱ་བ་དགོངས་པའོ། །འདིས་ནི་ཐེག་པ་གཅིག་པའི་ཕྱོགས་བསྟན་པ་ཡིན་ནོ། །ཐེག་པ་གསུམ་གྱི་ཕྱོགས་ཀྱང་གསུངས་པ་ནི་ཡང་ན་ཞེས་
བྱ་བའོ། །སྐབས་ལ་བརྟེན་ནས་བརྗོད་པ་ནི། ཉེས་པ་མ་ཡིན་ནོ་ཞེས་བྱ་བའོ། །འདོད་ཆགས་དང་བྲལ་བའི་གནས་སྐབས་ན་ནི་འབྲས་བུ་སྐྱེད་མི་ནུས་པའི་སྐད་ཅིག་འཇོག་པས་རྒྱུན་ཆད་པ་ཡིན་དུ་ཆུག་མོད། དེས་ན་མཐའ་མེད་པ་ཉིད་ནི་ཀུན་ནས་ཉོན་མོངས་པའི་གནས་སྐབས་ལ་ལྟོས་ནས་

འདོད་པ་ཡིན་ནོ་ཞེས་བྱ་བའི་དོན་ཏོ། །སྐབས་ཉེ་བར་སྡུད་པ་ནི་དེའི་ཕྱིར་ཞེས་བྱ་བའོ། །འབྲུ་ལ་སོགས་པ་ལྟར་རྣམ་པར་ཤེས་པ་ཉེ་བར་ལེན་པ་ཉམས་པས་ལྡོག་པ་མ་ཡིན་ནོ། །གལ་ཏེ་ལུས་ཀྱང་ཉེ་བར་ལེན་པ་ཡིན་ལ། དེ་ལ་ནི་མེ་ལ་སོགས་པ་ཉམས་པ་ཡོད་པ་མ་ཡིན་ནམ་ཞེ་ན་ལུས་ཞེས་
གསུངས་སོ། །ལུས་ནི་ཉེ་བར་ལེན་པ་མ་ཡིན་ཏེ་མཚན་ཉིད་གཉི་ག་མེད་པའི་ཕྱིར་རོ། །འོ་ན་སེམས་གནོད་པར་བྱ་བ་ལྡོག་པར་འགྱུར་རོ་སྙམ་ན། སེམས་ཀྱང་ཞེས་གསུངས་སོ། །སེམས་ནི་ཉེ་བར་ལེན་པ་ཡིན་ཡང་གནོད་པ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ཡང་ཞེས་ཁོང་ནས་ཕྱུང་
ལ་རྟེན་ལོག་པར་སྦྱར་རོ། །རེ་ཞིག་རྟེན་གྱི་དངོས་པོ་ཁས་བླངས་ནས་རང་ཉིད་རྩོད་པ་འདི་སེལ་བ་ཡིན་ཡང་གནོད་པ་མ་ཡིན་ནོ་ཞེས་རྣམ་པར་ཤེས་པ་ནི་རི་མོ་བཞིན་དུ་རྟེན་སོ་སོར་ངེས་པ་མ་ཡིན་ནོ་ཞེས་འབྲེལ་ཏོ། །ཅི་ལྟར་ཞེ་ན་གང་གང་གི་ཕྱིར་དང་པོའི་སྐྱེ་བར་སྐྱེ་བ་གཞན་གྱི་ལུས་དང་ལྷན་ཅིག་སྤྱོད་པའི་
འདུ་བྱེད་པ་གང་ཡིན་པ་དེ་དང་རྗེས་སུ་འབྲེལ་པ་དང་། རྨི་ལམ་གྱི་དེ་མ་ཐག་ཏུ་སད་པའི་གནས་སྐབས་སུ་འཇིགས་པ་དང་མྱ་ངན་ལ་སོགས་པས་རྨི་ལམ་གྱི་འདུ་བྱེད་གང་ཡིན་པ་དེ་དང་རྗེས་སུ་འབྲེལ་པར་དམིགས་པ་ཡིན་ནོ་ཞེས་བྱ་བ་ལྷག་མའི་རྟེན་སོ་སོར་ངེས་པ་མ་ཡིན་མོད། དེ་ལྟ་ན་ཡང་དེ་ཞིག་
པས་ཅི་སྟེ་མི་འཇིག་ཅེ་ན། རྟེན་སོ་སོར་ངེས་པ་ཡིན་ནོ་ཞེས་གསུངས་སོ། །རང་གིས་སྤངས་ནས་ད་ནི་རྟེན་ཉིད་ཡོད་པ་མ་ཡིན་ནོ་ཞེས་སྟོན་པས་རྣམ་འགྲེལ་ལ་འགྲེལ་པ་ནི་གཞན་ཡང་ཞེས་བྱ་བའོ། །འོ་ན་ཇི་ལྟར་རི་མོ་ལ་སོགས་པ་འཇིག་སྙམ་པ་ལ། རི་མོ་ལ་སོགས་པ་ནི་ཞེས་གསུངས་སོ། །
དེས་ན་ཞེས་བྱ་བ་ནི་ཐ་དད་པ་མ་ཡིན་པས་སོ། །དེའི་རྒྱུ་ཉིད་ནི་འཇིག་པའི་རྒྱུ་ཉིད་དོ། །གནས་པའི་རྒྱུ་དེས་ནི་གཞག་པར་བྱ་བའི་དངོས་པོ་ཅི་ཞིག་བྱས་ཀྱང་ཅི་ལྟར་མེད་པ་ལ་རྒྱུ་ཉིད་ཀྱི་དོན་མ་ཡིན། མེད་པ་ལ་ནི་རྒྱུ་དང་འབྲེལ་པ་ཡང་འཐད་པ་མ་ཡིན་ཏེ། འབྲེལ་པ་ནི་གཉིས་ཀྱི་ཆོས་ཡིན་པའི་
ཕྱིར་རོ། །མེད་པ་ལ་ནི་རྒྱུས་ཅི་ཡང་བྱེད་པ་མ་ཡིན་ནོ། །དེ་ལྟ་ན་ཡང་བྱེད་པ་མེད་དོ་ཞེས་བྱ་བའི་དོན་ཅི་ཡིན་ཞིང་རྟེན་མ་ཡིན་པ་ཡང་ཇི་ལྟར་འགྱུར་ཞེ་ན་བདེན་ཏེ། དེ་ཁོ་ནར་ནི་མེད་པ་ལ་གཉི་གར་ཡང་མེད་དོ། །ཀུན་རྫོབ་ཏུ་ཡང་སྔར་མ་དམིགས་པ་ལས་འགའ་ཞིག་ཉེ་ན་ནི་ཉེ་བར་འགྱུར་བའི་

ཡོད་པ་ལ་མེད་པ་སྐྱེའོ། །ཇི་ལྟར་ཞེས་རྣམ་པར་འཇོག་པ་དེ་བཞིན་དུ་མེད་པ་ལ་རྒྱུ་ཡོད་དོ། །མེད་པ་རྒྱུ་ལ་ལྟོས་སོ་ཞེས་བརྗོད་པ་ཡིན་ནོ། །དེ་བཞིན་བརྟེན་པ་ནི་རྣམ་པར་གནས་པ་མ་ཡིན་ཏེ། དེའི་ཚེ་ནི་རྒྱུ་དང་འབྲས་བུའི་དངོས་པོ་ཉིད་དུ་འགྱུར་རོ། །ཡོད་པ་ཉིད་འགའ་
ཞིག་ལ་བརྟེན་པ་ཡིན་ནོ་ཞེས་ཐ་སྙད་ཀྱང་བྱེད་པ་ཡིན་ནོ། །དེས་ན་མེད་པ་ལ་ནི་རྟེན་པར་རིགས་སོ་ཞེས་བྱ་བ་ཡིན་ནོ། །འོ་ན་ཡོད་པ་ཉིད་ལ་འགྱུར་རོ་ཞེ་ན། ཡོད་པ་ལ་ཡང་ཞེས་གསུངས་སོ། །དེ་ཉིད་ཅེས་བྱ་བ་ནི་གནས་པར་བྱ་བའོ། །དེ་ལྟར་ན་དེ་ཉིད་བྱས་མོད་ཅེ་ན་སྐྱོན་ཅི་ཡོད་ཞེ་ན། ཡོད་པ་ནི་ཞེས་
གསུངས་སོ། །ཐ་མི་དད་པའི་ཕྱོགས་ལ་ཉེས་པ་བརྗོད་ནས་ཐ་དད་པའི་ཕྱོགས་སུན་དབྱུང་བའི་ཕྱིར་དོགས་པ་བསུ་བ་ནི་འོན་ཏེ་ཞེས་བྱ་བའོ། །ཅུང་ཟད་ཡོད་པས་ཞེས་བྱ་བ་ནི་གནས་པའི་རང་བཞིན་ནོ། །རྟེན་ལ་སོགས་པ་ཞེས་སོགས་པའི་སྒྲས་ནི་ཕན་འདོགས་པ་ལ་སོགས་པའོ། །གལ་ཏེ་གནས་པ་
གནས་པར་བྱ་བ་ལས་ཐ་མི་དད་པ་ཁོ་ན་མ་ཡིན་ནམ། དེས་ན་དེ་བྱས་ན་དངོས་པོ་མ་བྱས་པ་ཇི་ལྟར་འགྱུར་ཞེ་ན། གནས་པ་ནི་ཞེས་གསུངས་སོ། །རང་གི་དང་བའི་ཞེས་བྱ་བ་ནི་སྐབས་ཀྱིས་གནས་པར་བྱ་བ་ལས་སོ། །ཅིའི་ཕྱིར་ཞེ་ན། ལྟུང་བ་ཞེས་གསུངས་སོ། །ཐ་མི་དད་ན་གཞན་ཉིད་ལ་ཉེས་པ་
བརྗོད་པ་ནི་གལ་ཏེ་ཞེས་བྱ་བའོ། །གནས་པར་བྱ་བ་དེའོ། །རྣམ་འགྲེལ་གྱི་ལྷག་མ་ཕྱེད་པོ་རྣམ་པར་འགྲེལ་པས་ལན་འདེབས་པ་ནི་དེ་ནི་ཞེས་བྱ་བའི་དངོས་པོ་ཞེས་པ་ནི་གནས་གང་ཡིན་པའོ། །འདིར་ཐ་དད་པ་དང་ཐ་མི་དད་པའི་ཕྱོགས་དག་ལ་ནི་ཉེས་པ་བརྗོད་ཟིན་པ་ཁོ་ནའོ། །འོན་ཀྱང་ཉེས་པ་
ལྷག་པ་བརྗོད་པའི་དོན་དུ་ཅི་ཞེས་བྱ་བའོ། །གཞན་དུ་ཞེས་བྱ་བ་ནི་མ་སྐྱེས་པ་ནའོ། །དེ་ལ་དེ་མ་ཐག་ཕའི་རྣམ་པར་རྟོག་པའི་དབང་དུ་བྱས་ནས་གསུངས་པ་ནི་སྐྱེས་པའི་སྔོན་རོལ་དུ་ནི་དངོས་པོ་མ་ཡིན་ཏེ་ཞེས་བྱ་བ་ནི་གནས་པ་ཞེས་བྱ་བར་འབྲེལ་ཏོ། །ཅིའི་ཕྱིར་ཞེ་ན། སྐབས་ཀྱིས་གནས་པ་མེད་པ་ཉིད་ཀྱི་
ཕྱིར་རོ། །རྣམ་པར་རྟོག་པ་དང་པོ་སེལ་བར་བྱེད་པ་ནི་ཐ་དད་པ་ཞེས་བྱ་བའོ། །ཅིའི་ཕྱིར་ཞེ་ན། དེའི་བདག་ཉིད་དང་ཞེས་གསུངས་སོ། །འབྲེལ་པ་མེད་པ་མ་གྲུབ་པར་དོགས་པ་བསུ་བ་ནི། དེ་དང་འདྲེས་པ་ཞེས་བྱ་བའོ། །སུན་འབྱིན་པ་ནི་དེ་དང་ཞེས་བྱ་བའོ། །གནས་པར་བྱ་བ་དེར་རོ། །ཉེས་པ་གཞན་

ཡང་བརྗོད་པ་ནི། གཞན་ཡིན་ན་ཞེས་བྱ་བའི་དོགས་པ་བསུ་བ་ནི་འཕྲོད་པ་འདུ་པས་ནི་དངོས་པོའི་རང་བཞིན་སེལ་བ་མ་ཡིན་ནོ་སྙམ་དུ་དགོངས་པའོ། །གཞན་དུ་ཞེས་བྱ་བ་ནི་ཐ་མི་དད་པར་རོ། །དེའི་ཚེ་གནས་པར་བྱ་བ་ལས་གནས་པ་གཞན་མ་ཡིན་ནོ་ཞེས་བྱ་བ་ནི་སྐབས་ལས་སོ། །དེ་ལྟ་ན་ཡང་སྔར་
གྱི་སྐྱོན་ཉིད་དོ་སྙམ་དུ་དགོངས་པའོ། །གཞན་དུ་ཁྱད་པར་དོགས་པར་བྱེད་པ་ནི། སོ་སོ་བ་དང་ཞེས་བྱ་བའོ། །སོ་སོ་བར་གྲུབ་ན་ནི་ལྡན་པ་ཡིན་ལ། སོ་སོ་བ་མ་ཡིན་པར་གྲུབ་ན་ནི་འདུ་བ་ཡིན་ནོ། །སོ་སོ་བ་མ་ཡིན་པར་གྲུབ་ན་ནི་སོ་སོར་མི་རྟོག་པའམ་སོ་སོར་མ་སྐྱེས་པའོ། །དེ་ལ་རེ་ཞིག་ཕྱོགས་
གཉིས་པ་ཉིད་སེལ་བ་ནི་ཤིང་ལ་སོགས་པའི་ཞེས་གསུངས་སོ། །ཡལ་ག་སོ་སོར་སྐྱེས་པ་གཉིས་འདྲེས་པ་ནི་མ་ཡིན་གྱིས་འོན་ཀྱང་ལྷན་ཅིག་ཁོ་ནར་སྐྱེས་པ་ཡིན་ནོ། །འདི་ལའོ་ཞེས་བྱ་བ་ནི་གཞན་གྱི་སྟེ་ཡལ་ག་འདི་ལ་ཡང་འདི་ཞེས་མི་རྟོག་པའི་ཕྱིར་རོ་ཞེ་ན། འགོག་པ་ནི་མ་ཡིན་ཏེ་ཞེས་བྱ་
བའོ། །ཅིའི་ཕྱིར་ཞེ་ན། ལྡན་པ་ཉིད་ལ་གཉིས་མཐོང་བའི་ཕྱིར་རོ། །འདུ་བ་ལ་ནི་མ་ཡིན་ཏེ་བཟློག་པའི་ཕྱིར་རོ། །ཐལ་བའི་ཕྱིར་རོ་ཞེས་བྱ་བ་ནི་རབ་ཏུ་འབྲེལ་པ་སྟེ་དེའི་ཕྱིར་རོ། །འདི་ལའོ་སྙམ་པའི་བློའི་རྒྱུ་ནི་གཉིས་མཐོང་བ་ཡིན་ལ། དེ་ལ་ཡང་ལྡན་པའི་ཡུལ་ལ་ཡིན་ནོ། །དེས་ན་དེ་ཉིད་དུ་འདི་ལྟ་
བུའོ་སྙམ་པའི་བློ་འབྲེལ་བར་འགྱུར་རོ། །འདུ་བའི་ཡུལ་ལ་ནི་དེ་མེད་པའི་ཕྱིར་མེད་དོ། །དེས་ན་དེར་ནི་བ་ལང་འདི་ལ་རིགས་ཞེས་བྱ་བ་འདི་རང་གི་རྟོག་པ་ཙམ་ཡིན་ནོ། །ཅིའི་ཕྱིར་ཞེ་ན། མགོ་ལ་གཉིས་མཐོང་བ་ལས་འགྱུར་དེ་ཡི། །ཡུལ་ལས་འགར་ཡང་གཉིས་མཐོང་མེད་དེས་ན། །རང་གི་རྟོག་པ་
ཙམ་ཞིག་ཐབས་སུ་འགྱུར། །ཞེས་བྱ་བ་དགོངས་པའོ། །རྣམ་པར་རྟོག་པ་དང་པོ་སློང་བ་ནི་འོན་ཏེ་ཞེས་བྱ་བའོ། །འདུ་བ་ཅན་གྱི་ཡན་ལག་གང་ཡིན་པ་དག་སྟེ་གང་དུ་འདུ་བར་འགྱུར་བའི་འབྲས་བུའི་རྫས་སྐྱེས་པའོ། །འདི་ཡང་ཉེ་བར་མཚོན་པ་སྟེ། རྫས་གང་ལ་ཡོན་ཏན་ལ་སོགས་འདུས་པར་འགྱུར་
བ་འམ། གང་དུ་སྤྱི་ལ་སོགས་པ་འདུ་བར་འགྱུར་བའམ། ཡང་ན་གང་ལ་རྫས་ལ་སོགས་པ་ལ་ལྟོས་པའི་འདུས་པ་ཉིད་ཡོད་པ་སྟེ། དེ་དང་སོ་སོར་མ་རྟོགས་པ་ཉིད་ནི་དང་པོ་མ་ཡིན་པར་གྲུབ་པ་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ཡང་ཞེས་བྱ་བ་ནི་རང་གི་འདུ་བ་ཅན་རྣམས་འདུས་པ་ཉིད་ཡིན་

ཡང་འདིར་འདི་རང་གི་འདུ་བ་ཅན་གྱི་ཡན་ལག་འདུས་སོ་ཞེས་དེ་ལྟ་བུའི་རང་བཞིན་ཅན་ཐ་དད་པར་རྟོགས་པས་སོ། །དོན་འདི་ཡིན་ཏེ་གལ་ཏེ་གཉིས་རང་གི་ངོ་བོས་སྣང་ན། དེའི་ཚེ་སོ་སོར་མ་རྟོགས་པ་འདུ་བར་རྣམ་པར་འཇོག་འདོད་པའི་འདུ་བའི་གཏན་གང་ན་ཡོད། འོན་ཏེ་ཐ་དད་
པར་སྣང་བ་མེད་པ་ཉིད་ཡིན་ན། དེ་ལྟ་ན་འང་འདི་ལའོ་སྙམ་པའི་རྟོགས་པ་མེད་པའི་ཕྱིར་རོ། །དེ་ལྟར་ཕྱོགས་གཅིག་གིས་འབྱར་བ་ཁས་བླངས་ནས། ལྡན་པ་དང་འདུ་བ་དག་ཁྱད་པར་འགའ་ཡང་མེད་དོ་ཞེས་བསྟན་ནས་འབྱར་བར་ཡང་མི་འཐད་དོ་ཞེས་སྟོན་པ་ནི། ཡན་ལག་མེད་པའི་ཞེས་
གསུངས་སོ། །ཡན་ལག་མེད་པ་གནས་པའི་རང་བཞིན་ཅན་གཞན་གྱིས་ཁས་བླངས་པ་ནི་མ་དམིགས་པའི་ཕྱིར་ན་མེད་པ་ཁོ་ནའོ། །ཡང་ན་ཡོད་དུ་ཆུག་པ་དེ་ལྟ་ན་ཡང་དེ་ནི་ཡན་ལག་དང་འབྱར་བ་མ་ཡིན་ནོ། །ཡན་ལག་ཅན་ནི་ཡོད་པར་ཁས་མ་བླངས་པའི་ཕྱིར་ཡན་ལག་ཅན་དང་ཞེས་ནི་མ་གསུངས་
སོ། །ཅིའི་ཕྱིར་ཞེ་ན། ཡན་ལག་དང་ཞེས་གསུངས་སོ། །ཐ་དད་པར་རྟོགས་པར་ཐལ་བ་ནི་གནས་དང་གནས་པ་ཅན་ཏེ། བུམ་པ་དང་སྣམ་བུ་བཞིན་ནོ་ཞེས་སྐབས་ཀྱིས་སོ། །བརྒྱ་ལ་ཕ་རོལ་པོ་ཐ་དད་པར་རྟོགས་པར་ཁས་ལེན་དུ་འོང་ངོ་ཞེས་དོགས་པ་བསུ་ནས་རྗེས་སུ་ཞུགས་པ་དང་ཞེས་གསུངས་སོ། །
གནས་པ་ལ་སོགས་པའི་གནས་སྐབས་ནི་རྗེས་སུ་མ་ཞུགས་པ་ཡིན་ལ། རྫས་ནི་གནས་སྐབས་ཐམས་ཅད་དུ་རྗེས་སུ་ཞུགས་པ་ཡིན་ནོ། །རྣམ་པ་ཐམས་ཅད་དུ་རྟོག་པའི་དབྱེ་བ་མེད་ན་གང་ཞིག་གང་དུ་འདུ་བ་ཡིན། དེ་ལྟ་བུའི་ཐ་དད་པ་ནི་རྟོགས་ཀྱང་ཐ་དད་པར་གྲུབ་པ་མ་ཡིན་ཏེ། ཡུལ་དང་དུས་དག་གི་མངོན་སུམ་
གྱི་རྣམ་པ་ཐ་དད་པར་མེད་པའི་ཕྱིར་རོ་ཞེ་ན། དེ་འགོག་པ་ནི་འཐད་པ་མ་ཡིན་ནོ་ཞེས་བྱ་བའོ། །ཅིའི་ཕྱིར་ཞེ་ན། མངོན་སུམ་གྱིས་ནི་ཞེས་གསུངས་ཏེ། གནས་པ་ལས་གཞན་ནི་མི་དམིགས་པའི་ཕྱིར་རོ་ཞེས་བྱ་བའི་དོན་ཏོ། །གང་གི་ཕྱིར་དེ་ལྟར་གཞི་ལས་ཐ་དད་པ་ཐ་མི་དད་པ་གནས་པར་མི་འཐད། ལྟན་ཅིག་
བྱེད་པ་ཞེས་བྱ་བ་ལ་སོགས་པའོ། །དེ་ལྟ་ཡིན་ན་ཡང་ཞེས་བྱ་བ་ནི་ལྷག་མའོ། །གནས་སྐབས་བྱེད་པ་ལོག་ན་ནི་གནས་སྐབས་དེ་ཉིད་ལོག་པར་ཟད་དོ་ཞེས་བྱ་བར་དགོངས་པའོ། །འོན་ཏེ་ལུས་ནི་ཉེ་བར་ལེན་པའི་རྒྱུ་ཉིད་ཡིན་གྱི་ཁྱད་པར་གྱི་རྒྱུ་ནི་མ་ཡིན་ནོ་སྙམ་ན། ལུས་ནི་ཞེས་གསུངས་ཏེ། ཉེ་བར་ལེན་

པའི་མཚན་ཉིད་གང་ཡང་མེད་པའི་ཕྱིར་རོ། །དེས་ན་ལུས་དེ་ལོག་པ་ནི་རྣམ་པར་ཤེས་པ་ཙམ་ལྡོག་པ་མ་ཡིན་ནོ། །གལ་ཏེ་ཞེས་བྱ་བ་ལ་སོགས་པ་ནི་སུན་འབྱིན་པ་གཞན་ནོ། །རྣམ་པར་ཤེས་པ་ལ་སོགས་པ་གང་ལའོ། །འཇིག་པ་དེའི་གལ་ཏེ་གནས་པ་ནི་མི་གཡོ་བ་དང་མི་འཇིག་པ་ལ་བརྗོད་པ་མ་
ཡིན་ནམ། དེ་ལ་རྟེན་གྱིས་ནི་མི་གཡོ་བའི་རང་བཞིན་གྱིས་གནས་པ་ཉིད་བྱེད་ཀྱི་མི་འཇིག་པའི་རང་བཞིན་ནི་མི་བྱེད་པའི་ཕྱི་མ་འདི་ཅི་ལྟར་འགྱུར་ཞེ་ན། བརྗོད་པ་མི་གཡོ་བ་ཞེས་བྱ་བ་ནི་གནས་པ་དེ་ཉིད་ན་ཡོད་པ་མ་ཡིན་ནོ། །འཇིག་པ་ཡང་ཡོད་པ་དང་འགལ་བ་ཡིན་ཏེ། འཇིག་ན་གནས་དེ་ཡང་ཡོད་མི་
སྲིད་དོ། །དེས་ན་གནས་པ་ནི་འཇིག་པ་དང་འགལ་བས་ཁྱབ་པ་ཡིན་པའི་ཕྱིར་ཐལ་བར་འགྱུར་བ་རིགས་སོ། །དེ་ལའང་ཐལ་བར་མཚུངས་པ་ཡིན་ནོ་ཞེས་བྱ་བ་ནི་འཇིག་པ་དེ་ཡང་དངོས་པོ་ལས་ཐ་དད་པའམ་ཐ་མི་དད་པ་ཡིན། དེ་ལ་འཇིག་པས་ནི་དངོས་པོ་ཉིད་འཇིག་པ་ཡིན་ན་དེའི་ཚེ་འདི་རང་གི་རྒྱུ་ཅི་
ལྟར་སྐྱེད་པ་དེ་ཁོ་ན་འདྲ་བ་ཉིད་ཡིན་པའི་ཕྱིར་གནས་པའི་རྒྱུ་རྟེན་གྱིས་ཅི་ཞིག་བྱ། ཅིའི་ཕྱིར་འཇིག་པ་མེད་པར་ཐལ་སྙམ་ན། གནས་པར་ཞེས་གསུངས་སོ། །འོན་ཏེ་ཞེས་བྱ་བ་ལ་སོགས་པས་ནི་རྣམ་འགྲེལ་གྱི་ལྷག་མ་ལ་འཇུག་པའོ། །ཐ་མི་དད་པའི་ཕྱོགས་ལ་ཉེས་པ་བརྗོད་ནས་ཐ་དད་པའི་ཕྱོགས་ལ་བརྗོད་
པ་ནི། དངོས་པོ་ལས་འཇིག་པ་གཞན་ཡིན་ན་ཡང་འཇིག་པའི་རྒྱུ་དེས་དངོས་པོ་ལ་ཅི་ཞིག་བྱས་ནས་གང་གིས་དེའི་འཇིག་པར་བྱེད་པར་འགྱུར། འཇིག་པ་བྱས་པ་དེས་ན་འདི་འཇིག་པ་བྱས་པ་ཡིན་ནོ། །འཇིག་པ་བཞིན་ཞེས་གསུངས་སོ། །དེས་ན་ཞེས་བྱ་བས་འཇིག་པར་བྱེད་པས་ནའོ། །ཅུང་ཟད་ཀྱང་བྱེད་པ་མ་ཡིན་
པ་དེའི་ཕྱིར་རོ། །གཉི་ག་ལྟར་ཡང་འཇིག་པར་བྱེད་པ་ཅུང་ཟད་ཀྱང་མི་བྱེད་པ་ཉིད་མཇུག་སྡུད་པ་ནི་གནས་པའི་རྒྱུས་ཅི་ཞིག་བྱ་ཞེས་བྱ་བའོ། །འཇིག་པར་བྱེད་པར་ཐལ་བར་འགྱུར། །གལ་ཏེ་དེ་འཇིག་རྒྱུ་ལས་འདོད། །གནས་པའི་རྒྱུས་ཀྱང་ཅི་ཞིག་བྱ། །ཞེས་བྱ་བ་འདི་ལ་བཤད་པ་གཞན་གསུངས་ན་ཡང་ན་
ཞེས་བྱ་བའོ། །བཤད་པ་གཉི་ག་གཞན་གྱི་ལན་གྱི་དོགས་པ་བསུ་བ་ནི། གལ་ཏེ་ཞེས་འཇིག་རྒྱུ་ཞེས་སྨོས་སོ། །གནས་པར་བྱེད་པ་དེས་འཇིག་པར་བྱེད་པ་དང་ཕྲད་ཀྱི་བར་དུ་གནས་པར་བྱ་བ་རྣམ་པར་གནས་པར་བྱ་བ་ཡིན་ཏེ། དེ་ལྟ་མ་ཡིན་ན་ནི་འཇིག་བྱེད་འོང་བ་ལ་མི་ལྟོས་པ་ཉིད་དུ་འཇུག་པར་འགྱུར་རོ་སྙམ་

ན། ལན་དུ་འཇིག་པ་དངོས་ཆོས་ཉིད། །ཅེས་བྱ་བའི་དགོངས་པ་འདི་ཡིན་ཏེ། གལ་ཏེ་གནས་པར་བྱ་བ་གནས་པའི་དོན་དུ་གནས་པར་བྱེད་པ་མ་ཡིན་ན་དེའི་ཚེ་འཇིག་པའི་རྒྱུ་མེད་པར་རང་ཉིད་འཇིག་པར་འགྱུར་ལ། བཟློག་ན་ནི་འཇིག་པའི་རྒྱུ་ལས་འཇིག་པའི་ཕྱིར་གནས་པར་བྱེད་པ་འབྲས་བུ་དང་
བཅས་པར་འགྱུར་རོ། །དེ་ལྟ་ན་ཡང་འཇིག་པ་རྒྱུ་མེད་པར་ཐལ་བ་དེས་ན་འཇིག་པ་དངོས་པོའི་ཆོས་ཉིད་དོ། །ཡོད་པའི་དོན་ལ་འཇིག་པ་འདི་པ་གནོད་པ་ཡོད་པ་མ་ཡིན་པའི་ཕྱིར་ན། གནས་པའི་རྒྱུས་ནི་ཅི་ཞིག་བྱ། །ཞེས་བྱ་བ་འདི་གནས་སོ། །རེ་ཞིག་རྩོད་པའི་ཆ་རྣམ་པར་འགྲེལ་བ་ནི་གནས་པར་བྱེད་པ་མེད་ན་ཞེས་བྱ་བའོ། །
གང་གི་ཕྱིར་གནས་པར་བྱེད་པ་མེད་པར་འཇིག་པ་གང་ཡིན་པ་དེ་ནི་འཇིག་བྱེད་མེད་པར་རང་ཉིད་འགྱུར་རོ་ཞེས་བྱ་བའི་དོན་ཏེ། གལ་ཏེ་དེ་ལྟ་ཡིན་མོད་དེ་ལྟ་ན་ཡང་གནས་པར་བྱེད་པར་བྱེད་པ་ཇི་ལྟར་ཉེ་བར་སྦྱོར་བ་ཡིན་སྙམ་ན། གནས་པར་བྱེད་པ་ཡོད་ན། དངོས་པོ་འཇིག་གི་འཇིག་པའི་རྒྱུ་མེད་པར་ནི་མ་ཡིན་ནོ། །
གྲུབ་པའི་མཐའ་རྣམ་པར་གྲོལ་བའི་དོན་དུ་གསུངས་པ་ནི་དེ་ལྟ་ན་ཡང་ཞེས་བྱ་བ་སྟེ། གནས་པར་བྱེད་པ་མེད་ན་རང་ཉིད་འཇིག་པར་ཁས་བླངས་ནས་འོ་ན་འཇིག་པ་ཞེས་བྱ་བ་ལ་སོགས་པ་རྟོགས་པར་སླའོ། །འདི་ཞེས་བྱ་བ་ནི་འཇིག་པའོ། །འོན་ཏེ་ཞེས་བྱ་བ་ནི་གཞན་གྱིའོ། །ལན་དུ་འཇིག་པའི་གེགས་དེ་ཡང་ཞེས་བྱ་
བྱ་བའོ། །འཇིག་པའི་གེགས་དེ་ཡང་ཞེས་བྱ་བ་ནི་འཇིག་པ་ལ་གནོད་པར་བྱེད་པའོ། །འོན་ཏེ་ཞེས་བྱ་བ་ནི་གཞན་གྱིའོ། །གཞན་དུ་ཞེས་བྱ་བ་འཇིག་པ་མ་ཡིན་པར་རོ། །ལན་དུ་དེའི་ཞེས་བྱ་བ་ལ་སོགས་པའོ། །རྒྱུ་མེད་པ་ཅན་ཞེས་བྱ་བ་ནི་རྒྱུ་མི་ནུས་པ་དང་དོན་མེད་པའི་ཉེས་པས་ཟིན་པའི་ཕྱིར་རོ་སྙམ་དུ་དགོངས་པའོ། །སུན་
འབྱིན་པ་གཞན་ཡང་བརྗོད་པ་ནི། དེ་ཡང་ཞེས་བྱ་བ་སྟེ་འཇིག་པ་ཡང་ངོ་། །དེས་ན་འཇིག་པ་དངོས་ཆོས་ཉིད། །ཅེས་བྱ་བ་མ་གཏོགས་པར་ལྷག་མ་ལ་བཤད་པ་གཞན་གསུངས་པ་ན་ཡང་ན་ཞེས་བྱ་བའོ། །འཇིག་པར་བྱ་བ་དང་ཕྲད་ཀྱི་བར་དུ་མི་འཇིག་པར་གནས་པར་བྱེད་པ་ལས་གནས་པ་ཞེས་བྱ་བ་
གང་ཡིན། དེ་ལྟ་ཡིན་ན་མི་འཇིག་པར་སྐྱེས་པས་ཞེས་བྱ་བའི་དོན་ནི་འདི་ཡིན་ཏེ། བརྟགས་པ་ནི་སྐབས་ཀྱི་རྟེན་པ་ལ། ཕྱིན་ཅི་ལོག་ཏུ་རྟོག་པ་ཞེས་བྱ་བ་ནི། རྒྱུ་དང་འབྲས་བུའི་དངོས་པོ་ལ་རྟེན་དང་བརྟེན་པའི་དངོས་པོ་གཞན་མ་ཡིན་ནོ་ཞེས་བྱ་བར་རོ། །ཐོག་མ་མེད་པའི་བག་

ཆགས་ཀྱི་མཐུ་ལས་ཞེས་བྱ་བ་འདིས་བཟུང་བའི་དོན་ཉིད་གསལ་འདེབས་པ་ནི་དེ་ཉིད་ཀྱི་ཕྱིར་ཞེས་བྱ་བའོ། །དེ་ཉིད་གཞུང་འཛུགས་པ་འདི་ལྟར་ཞེས་བྱ་བའོ། །ཡིད་ཙམ་ལ་བརྟེན་པ་ནི་ཡིད་ཀྱིའོ། །གནས་པར་བྱེད་པ་ལ་འཇིག་པའི་རྒྱུ་དང་བྲལ་བའི་མཐར་ཐུག་པར་སུས་ཀྱང་བཟློག་པར་ནུས་པ་
མ་ཡིན་ནོ། །དེས་ན་སྐད་ཅིག་གཉིས་པ་ལ་སོགས་པའི་དུས་སུ་གནས་པར་བྱེད་པ་དོན་མེད་དོ་ཞེས་བྱ་བ་ཡིན་ནོ། །འོན་ཏེ་མི་འཇིག་པའི་ཕྱིར་མེད་པ་མ་ཡིན་མོད། ལྟུང་བ་ནི་ལྡོག་ཏུ་མེད་པའི་ཕྱིར་རྟེན་ལ་ལྟོས་སོ་ཞེ་ན་མ་ཡིན་ཏེ། ལྟུང་བ་ཡང་རང་གི་ངོ་བོ་ལས་འཕོ་བའི་རང་བཞིན་ཡིན་པའི་ཕྱིར་རོ། །འོན་ཏེ་
ཞེས་བྱ་བ་ནི་གཞན་གྱིའོ། །སྐད་ཅིག་གནས་པར་ཡང་གནས་པར་བྱེད་པ་ཡོད་པར་ཁས་བླངས་ཏེ། དེ་ལྟ་མ་ཡིན་ན་གནས་པར་བྱ་བར་མི་འགྱུར་རོ་སྙམ་དུ་དགོངས་པའོ། །ལན་ནི་དེ་ལྟ་ན་ཞེས་བྱ་བའོ། །དེ་ལྟ་ཡིན་ན་གནས་པར་བྱེད་པ་ལས་སོ་སོར་མི་འཇིག་པའི་དངོས་པོ་གཞན་དང་གཞན་སྐྱེ་བར་
འགྱུར་རོ། །དེ་ལྟ་ན་ཡང་གནས་པའི་རྒྱུས་ཅི་བྱ་སྙམ་དུ་དགོངས་པའོ། །གཞན་ཡང་ཇི་ལྟར་གནས་པར་བྱེད་པ་གནས་པ་དེ་བཞིན་དུ་གནས་པར་བྱ་བར་ཡང་འགྱུར་རོ་ཞེས་བརྗོད་པ་ནི་གནས་པའི་ཞེས་བྱ་བའོ། །ངག་འདིར་གནས་པ་པོ་གཞན་དང་གཞན་ཁས་ལེན་རྟེན་བཅས་ཐམས་ཅད་གནས་དང་གནས་
ལྡན་ཞེས་བྱ་བ་ལ་སོགས་པའི་རྣམ་འགྲེལ་ཉིད་འབྱུང་བར་འགྱུར་བའི་ཕྱིར་ལན་དོགས་པར་བྱེད་པ་ནི་རང་གི་རྒྱུས་བྱས་སོ་ཞེ་ན་ཞེས་བྱ་བའོ། །ལན་དུ་གནས་པར་བྱ་བའི་ཡང་ཞེས་བྱ་བའོ། །དེ་ལྟར་ཞེས་བྱས་པ་རྒྱུར་བྱས་པར་རོ། །རྟེན་འགོག་པ་ལ་མངོན་སུམ་དང་འགལ་བའི་
བརྗོད་པའི་དོགས་པ་བསུ་བ་ནི། ཅི་སྟེ་ཡང་ས་ཕྱོགས་ཞེས་བྱ་བའོ། །མཐོང་བ་ནི་མངོན་སུམ་གྱིས་ཡུལ་དུ་བྱས་པའོ། །རྣམ་པར་རྟོག་པ་རྒྱས་ཀྱང་ཞེས་བྱ་བ་ནི་ཅི་ཡོད་དམ། དེ་སྟེ་མེད་ཅེས་བྱ་བ་ལ་སོགས་པའི་རྣམ་པར་རྟོག་པའི་སྤྲོས་པའོ། །རྣམ་པར་རྟོག་པ་ལ་ནི་རྗེས་སུ་དཔག་པའི་དངོས་པོས་
བྱས་པ་ཉིད་བླང་བར་བྱ་བ་ཡིན་གྱི་མངོན་སུམ་གྱིས་གནོད་པའི་ཉེས་པ་ཡོད་པར་དོགས་ན་རང་ཉིད་ནི་ཅི་ཡང་མ་ཡིན་ནོ། །དེས་ན་དེ་བསྒྲུབ་པའམ་གནོད་ན་ནི་ངེས་པ་ཁོ་ནར་སྐབས་ཡོད་པར་མ་ཡིན་ནོ་ཞེས་བྱ་བར་གདོན་མི་ཟའོ། །དོན་དང་ཞེས་བྱ་བ་ནི། གསོག་ཏུ་གྱུར་ཏོ་ཞེས་བྱ་བ་འཐད་དོ། །

འདི་ལ་མཚུངས་ཞེས་བྱ་བ་ནི། ཡོད་མེད་དག་རྟེན་མེད་ཕྱིར་རོ། །ཞེས་བྱ་བ་ལ་སོགས་པའི་སུན་འབྱིན་པའོ། །གལ་ཏེ་རེ་ཞིག་རྟེན་དང་བརྟེན་པའི་ཐ་སྙད་འདི་ནི་ཡོད་པ་ཁོ་ན་ཡིན་ལ་དེ་ལ་ཡུལ་ངེས་པ་ཅན་ཡིན་པས་རྒྱུ་མཚན་མེད་པར་ཡང་མ་ཡིན་ནོ། །དེས་ན་འདི་ལ་རྒྱུ་
མཚན་ཅི་ཡིན་སྙམ་ན། དངོས་རྣམས་ཞེས་གསུངས་ཏེ། དངོས་པོ་རྣམས་སྐད་ཅིག་སོར་འཇོག་པ་ཡིན་པར་རིགས་པ་ལས་འོངས་པ་ཡིན་པ་ན། དངོས་པོའི་རྒྱུ་གང་ཡིན་པ་དེ་ལྟར་ཏེ་ཉེ་བར་ལེན་པའི་ཡུལ་ཡོངས་སུ་མ་སྤངས་པར་སྐྱེ་བ་དེའི་རྒྱུ་ཡིན་པའི་ཕྱིར་ན་རྟེན་ཡིན་ནོ་ཞེས་བརྗོད་དོ། །དེས་
ན་གནས་པར་བྱེད་པ་ནི་སྐྱེད་བྱེད་ཁོ་ན་ཡིན་ཏེ། གཞན་ལས་གྲུབ་ན་གནས་པ་ནི་མ་ཡིན་ནོ། །དེ་ལྟ་མ་ཡིན་ན་ནི་མི་འཐད་དོ། །བརྟེན་པ་ལ་ནི་གནས་པར་བྱེད་པ་ལས་ཅིར་ཡང་འགྱུར་བ་མ་ཡིན་ལ། མི་བརྟན་པ་ལ་ཡང་བསྐྱེད་པ་ལས་མ་གཏོགས་པའི་བྱ་བ་མེད་པ་ལ་མ་ཡིན་ཏེ། ཕན་འདོགས་པ་
མེད་པ་ཉིད་ཀྱི་ཕྱིར་རོ། །ཡང་ན་འགྲོ་བའི་གེགས་བྱེད་པའི་ཕྱིར་ནི་རྫས་ལྕི་བ་རྣམས་ལ་རྟེན་ཡོད་དུ་ཆུག་ཀྱང་། བློ་ལ་སོགས་པ་ལ་ནི་མ་ཡིན་ཏེ། བཟློག་པའི་ཕྱིར་རོ་ཞེས་བརྟེན་པ་ནི། འབོ་བ་ཡིས་ནི་གེགས་བྱེད་ཕྱིར། །ཞེས་བྱ་བའོ། །ཆུ་ལ་སོགས་པ་ནི་ཞེས་བྱ་བ་ནི་ཁད་ཀྱིས་འཆད་པར་བྱེད་པའོ། །མཐོང་བ་
མེད་དོ་ཞེས་བྱ་བ་ནི་མ་གྲུབ་པའོ། །མཐོང་བ་འགལ་བའི་ཕྱིར་རོ་ཞེས་བྱ་བ་འདི་ཕྱིན་ཅི་ལོག་ཏུ་བསྟན་པའི་དོན་དུ་ཇི་སྐད་བརྗོད་པ་ཡིན་ནོ། །གལ་ཏེ་ཞེས་བྱ་བ་ནི་གཞན་གྱིའོ། །མ་མཐོང་བ་ཉིད་ལ་ཞེས་བྱ་བ་ནི་ལན་ནོ། །དངོས་པོ་གཉིས་ཀྱི་རང་བཞིན་ལས་གཞན་ནི་རྟེན་དང་བརྟེན་པའི་དངོས་པོ་ཡང་དམིགས་པའི་
སྤྱོད་ཡུལ་དུ་གྱུར་པ་མེད་དོ། །དེ་ཉིད་སྟོན་པ་ནི་བྱ་བའི་རྟེན་གང་ཡིན་པ་དེ་ནི་བྱེད་པ་པོ་དང་ལས་དག་གིས་འཛིན་པ་ལས་ཡིན་ནོ། །བྱ་བ་ནི་བྱེད་པ་པོའམ་ལས་ལ་གནས་པ་ཡིན་ཏེ། ལས་ལ་སོགས་པ་བརྟེན་པ་དང་བྲལ་བར་མི་སྲིད་པའི་ཕྱིར་རོ། །དེས་ན་བྱེད་པ་པོ་དང་ལས་ཀྱིས་འཛིན་པ་ཉིད་ལས་བྱ་
བའི་རྟེན་ཡིན་ནོ་ཞེས་བྱ་བ་ནི་ལུགས་ཡིན་ཏེ་རྒོལ་བ་ཐམས་ཅད་ཀྱིས་འདོད་པ་ཡིན་ནོ། །ལུགས་འདི་ནི་རྣམ་པར་དཔྱད་ན་མེད་པ་ཉིད་དོ། །ཅིའི་ཕྱིར་ཞེ་ན། འཛིན་པའི་ཕྱིར་ཞེས་གསུངས་སོ། །གང་འཛིན་པ་དེ་མྱུར་བར་མ་དམིགས་པ་ཅིའི་ཕྱིར་ཞེ་ན། ལྟུང་བ་དང་མི་ལྟུང་བ་དག་ཅེས་གསུངས་སོ། །

རིགས་པ་འདི་དག་གིས་ཅི་ཞིག་བྱ་སྟེ་མངོན་སུམ་ཉིད་ཀྱིས་སྔ་མ་དང་ཕྱི་མའི་རང་བཞིན་གཅིག་ཏུ་བྱས་ནས་གཟུང་བས་ན། ལྟུང་བ་གང་ཡིན་པ་དེ་ཉིད་མ་ལྟུང་བའི་ཆོས་ཅན་ཡིན་ནོ་ཞེས་རྣམ་པར་འཇོག་པ་ཡིན་ནོ། །མངོན་སུམ་གྱིས་ཞེས་གསུངས་སོ། །གལ་ཏེ་ཐ་དད་པར་རྟོགས་པའི་གནས་སྐབས་
གཉིས་ཐ་དད་མོད་གནས་སྐབས་ཅན་གྱི་རྫས་ནི་གཅིག་ཡིན་ནོ་སྙམ་ན་ལྟུང་བ་དང་ཞེས་གསུངས་སོ། །དམིགས་པ་གང་ཡིན་པ་དེ་ནི་ཕན་ཚུན་རང་བཞིན་རྗེས་སུ་ཞུགས་པ་མེད་པ་ཁོ་ནའོ། །དེ་ལྟ་ན་ཡང་གནས་སྐབས་ཅན་མི་འཛིན་ཅེ་ན། དེ་ལྟ་ཡང་ཞེས་གསུངས་སོ། །གལ་ཏེ་ད་དུང་ཡོད་དོ་ཞེས་བྱ་བར་
རྟོགས་པ་ཡོད་པ་མ་ཡིན་ནམ་ཞེ་ན། ཡོད་པ་ནི་བདེན་མོད་ཀྱི་འོན་ཀྱང་རྣམ་པར་རྟོག་པ་ཙམ་ཡིན་ནོ། །འདིས་བརྟགས་པ་དུས་སུ་མ་ཁྱབ་པར་འཛིན་པའི་རང་བཞིན་ཅན་ནི་མངོན་སུམ་བྱེད་པ་ཡིན་པར་མི་བརྗོད་དོ། །དེ་མེད་ཕྱིར་ན་རྫས་སུ་འཛིན་པ་མེད་པའི་རྣམ་པར་རྟོག་པ་ཙམ་བླང་བར་བྱ་བ་མ་ཡིན་པ་ཁོ་ནའོ། །གལ་
ཏེ་དེ་ལྟ་ན་ཡང་དུས་གཞན་ཁྱབ་པ་དང་བྲལ་བའི་མངོན་སུམ་གྱིས་སྐད་ཅིག་གཅིག་ཉིད་ལ་གནས་སྐབས་འཛིན་པ་མ་ཡིན་མོད། རིམ་གྱིས་འཛིན་པར་འགྱུར་རོ་ཞེས་དོགས་པ་བསུ་བ་ནི་རིམ་གྱིས་ཞེས་བྱ་བའོ། །སུན་འབྱིན་པ་ནི་རིམ་གྱི་དོན་ཅི་ཡིན་ཞེས་བྱ་བའོ། །དེ་ཉིད་སྤྱོད་པ་ནི་དངོས་པོ་དང་ཞེས་བྱ་བའོ། །
ཡོད་པ་འབའ་ཞིག་བཟུང་ན་ནི་རིམ་གནས་པ་མ་ཡིན་ཞིང་། འོན་ཀྱང