Luận tạng Tây Tạng (Tengyur) — Tập 184

ས་བྱ་བའོ། །ཡང་ན་གཟུགས་ལ་སོགས་པ་ཉིད་འགའ་ཞིག་དབྱིབས་ཀྱི་ཁྱད་པར་གྱིས་རྣམ་པར་གནས་པ་ནི་བུམ་པ་ཡིན་ལ་ཞེས་འབྲེལ་ཏོ། །ཅི་ལྟར་ཞེ་ན་དབྱིབས་ཀྱི་ཁྱད་པར་གང་ལས་ཞེས་བྱ་བའོ། །དཔེར་ན་གཟུགས་ལ་སོགས་པ་བུམ་པ་ཡིན་ནོ་ཞེས་བྱ་བ་ལྟར་དེ་བཞིན་དུ་གཟུགས་
བུམ་པ་ཡིན་ནོ་ཞེས་བྱ་བར་ཡང་འགྱུར་རོ་སྙམ་དུ་དགོངས་ན། གཟུགས་བུམ་པར་ཞེས་བྱ་བར་ནི་ཞེས་སྨོས་སོ། །ཕན་ཚུན་ཁྱད་པར་མེད་པ་བརྗོད་པར་འདོད་པའི་མ་རྟོགས་པས་ཤིང་དང་སྨྲས་སོ། །དེ་བཞིན་དུ་ཨུཏྤ་ལ་སྔོན་པོ་ལ་སོགས་པ་ལ་ཡང་མི་འགྱུར་ཏེ། གཉི་ག་འཁྲུལ་བའི་ཕྱིར་རོ། །བྱས་པ་དང་མི་
རྟག་པ་ལ་སོགས་པ་ཁོ་ན་ལ་འགྱུར་ཏེ། ཕན་ཚུན་འཁྲུལ་པ་མེད་པའི་ཕྱིར་རོ་ཞེས་བྱ་བ་ནི་རྩོད་པ་པོའི་བསམ་པའོ། །གྲུབ་པའི་མཐའ་ནི་འདི་ནི་ཕན་ཚུན་ཁྱབ་པའི་དོན་མ་ཡིན་གྱི། འོན་ཀྱང་གཅིག་གིས་གཅིག་འཕེན་པ་ཡིན་ནོ། །དེ་ནི་ཤིང་ཞེས་བརྗོད་པ་ན་ཤ་པ་དང་སྔོན་པོ་ཞེས་བརྗོད་པ་ན་ཨུཏྤལ་ལ་ཡོད་པ་

ཡིན་ཏེ། དེས་ན་གཞི་མཐུན་པ་ཉམས་པ་མེད་དོ། །འདིར་ནི་བུམ་པའི་སྒྲས་གཟུགས་ཙམ་འཕེན་པ་མ་ཡིན་ལ། གཟུགས་ཀྱི་སྒྲས་ཀྱང་བུམ་པའི་ཚོགས་འཕེན་པ་མ་ཡིན་ཏེ། དེས་ན་འདི་གཉིས་ནི་གཞི་མཐུན་པ་མ་ཡིན་ནོ་ཞེས་བྱ་བའི་དོན་ཏོ། །འདི་གང་ལས་ཤེ་ན་བུམ་པའི་
སྒྲས་ཞེས་གསུངས་ཏེ། སྒྲས་ནི་ཞེས་བྱ་བའི་དོན་ཏོ། །ནུས་པའི་ཁྱད་པར་ནི་གཟུགས་ཀྱི་ཤེས་པ་སྐྱེད་པར་རུང་བའོ། །ཡང་ཇི་ལྟར་ན་ཕྱོགས་གཅིག་པའི་ཡིན་ཡང་ཤ་པ་ལ་ཤིང་གི་ཐ་སྙད་དུ་འགྱུར་གྱི་ཕྱོགས་གཅིག་ཏུ་འགྱུར་བ་གཟུགས་ལ་སོགས་པ་ལ་ནི་བུམ་པའི་སྒྲ་མི་འཇུག་སྙམ་ན། གནའི་ཐ་སྙད་ཅེས་པས་
ཞེས་གསུངས་སོ། །གཞན་གྱི་ལུགས་ལ་ལྟོས་ནས་བརྗོད་པ་ནི་ནུས་པ་ངེས་པའི་ཕྱིར་རོ་ཞེས་བྱ་བ་ཡིན་ནོ། །བུམ་པའི་སྒྲ་ནི་གཟུགས་ཙམ་ལ་མི་འཇུག་འོན་ཀྱང་ངོ་བོ་ཉིད་ཀྱི་ཚོགས་པ་ཁོ་ན་ལ་འཇུག་པ་ཡིན་ནོ། །ཁྱད་པར་གྱི་ནུས་པ་དང་ལྡན་པ་ནི་ཤིང་ཤ་པའི་ནུས་པ་དང་ལྡན་པའོ། །ཇི་ལྟར་འདིར་ཁྱད་པར་
ཅན་གྱི་ནུས་པ་དང་ལྡན་པ་འཕེན་ཅེ་ན། འདིར་ཡང་ཞེས་གསུངས་ཏེ། ཤིང་གི་སྒྲ་ལོག་གོ། །ཕྱོགས་འདིས་གཞན་ཡང་བརྗོད་པར་བྱ་ཞེས་བྱ་བ་ལ་འཇུག་པར་བྱེད་པ་ནི་གལ་ཏེ་ཞེས་བྱ་བའོ། །ཅིའི་ཕྱིར་ཞེ་ན། ཉི་ཤུ་བྱ་བ་ཞེས་སྨོས་སོ། །ཇི་ལྟར་བུམ་པའི་སྒྲས་ནུས་པ་གཞན་བརྗོད་པ་དེ་བཞིན་ཉི་ཤུའི་
སྒྲས་ནི་མ་ཡིན་ནོ་ཞེས་བྱ་བའི་དོན་ཏོ། །འདི་ག་ལས་ཤེ་ན། འོན་ཀྱང་ཞེས་སྨྲས་སོ། །འདིར་ནི་ཞེས་བྱ་བ་ནི་བ་ལང་ཉི་ཤུར་རོ། །ལན་ནི་དེར་ནི་ཞེས་བྱ་བའོ། །མང་པོ་ཉིད་ཀྱིས་ཞེས་བྱ་བ་ནི་མང་པོ་ཉིད་ཀྱིས་ཉེ་བར་མཚོན་པའི་བ་ལང་ལ་སོགས་པ་དག་གོ། །གལ་ཏེ་འདུས་པའི་ཁྱད་པར་བརྗོད་པ་ཉི་ཤུའི་སྒྲ་ཉིད་
ཀྱིས་བཞོ་བ་དང་དགལ་བ་ལ་སོགས་པའི་བྱ་བ་དང་ལྡན་པའི་བ་ལང་རྣམས་རྟོགས་པ་ཉིད་མ་ཡིན་ནམ། དེས་ན་བ་ལང་གི་སྒྲ་སྦྱར་བར་ཅི་བྱ་སྙམ་ན། དེས་ནི་བཞོ་བ་དང་ཞེས་གསུངས་སོ། །གལ་ཏེ་བཞོ་བ་དང་དགལ་བའི་ནུས་པས་ཀྱང་འདུས་པའི་ཁྱད་པར་རྟོགས་པར་བྱེད་ན་དེའི་ཚེ་ཡང་འདུས་པའི་སྒྲ་སྦྱར་
བས་ཅི་བྱ་སྙམ་པའི་དོགས་པ་སེལ་བ་ནི་དེས་ཀྱང་ཞེས་བྱ་བའོ། །དེས་ན་འདི་གཉིས་ཀྱང་ཁྱད་པར་དང་ཁྱད་པར་ཅན་གྱི་དངོས་པོར་མི་འགལ་ལོ་སྙམ་དུ་དགོངས་པའོ། །དེ་བཞིན་དོན་ཐ་དད་པ་མེད་པ་ལ་ཡང་དེ་དང་དེ་ལས་ལྡོག་པ་ལ་བརྟེན་ནས་སྒྲའི་དོན་ཐ་དད་པར་རྣམ་པར་གཞག་པ་བྱས་པ་ཡིན་ནོ། །

བག་ཆགས་ཀྱི་ཁྱད་པར་ལ་ཡང་བརྟེན་ནས་མི་འགལ་ལོ་ཞེས་བྱ་བར་བསམས་ནས་བརྗོད་པ་ནི་ཡང་ན་ཞེས་བྱ་བའོ། །ཐོག་མ་མེད་པ་ཡང་ཡིན་ལ་ཐ་སྙད་ཀྱང་ཡིན་པ་སྟེ། དེས་བསྐྱེད་པའི་བག་ཆགས་གང་ཡིན་པ་དེས་འདུས་བྱས་པའི་བདག་ཉིད་གང་ཡང་ཡོད་པ་དེ་དག་གི་ཐོག་མ་མེད་པའི་སྐད་ཅིག་
འདི་ནི་རྟོག་པ་རྣམ་པར་རྟོག་པ་དང་སྒྲ་སྟེ་དེ་ལ་ཡོད་པའོ། །གང་གི་ཕྱིར་ཐ་སྙད་འདི་ཐོག་མ་མེད་པའི་བག་ཆགས་ཀྱི་རྣམ་པར་འགྱུར་བའི་དབང་གིས་ངེས་པ་ཡིན་པ་དེས་ན་གང་ལའང་ཞེས་བྱ་བ་སངས་རྒྱས་པ་ལ་མི་བརྩད་དེ་ཞེས་བྱ་བ་ནི། དོན་དམ་པའི་ཁྱད་པར་མེད་ན་ཁྱད་པར་དང་ཁྱད་པར་ཅན་ལ་སོགས་པའི་
དངོས་པོར་ཇི་ལྟར་འགྱུར་ཞེས་བྱ་བར་རོ། །འདིས་ནི་བརྒལ་ཞིང་བརྟག་པར་བྱ་བ་འགའ་ཡང་ཡོད་པ་མ་ཡིན་ནོ་ཞེས་བསྟན་པ་མ་ཡིན་ནོ། །རྒོལ་ཞིང་རྟོག་པ་ཡང་ཡོད་པ་མ་ཡིན་ནོ་ཞེས་བརྗོད་པ་ནི་གང་གིས་ཀྱང་ནི་བརྩད་མི་བྱ་ཞེས་བྱ་བ་སྟེ། རིགས་པ་ཅན་ལ་སོགས་པས་སོ། །གལ་ཏེ་དེ་ལྟར་སྒྲ་དོན་རྣམ་
པར་གཞག་པ་ལ་འཆད་པ་མེད་མོད། དེ་ལྟ་ན་ཡང་སྤྱི་ལ་སོགས་པ་ལྟོས་པར་བྱ་བ་ཡིན་ནོ་ཞེས་གཞན་དག་བརྒྱ་ལ་སྨྲ་བར་འགྱུར་བའི་ཕྱིར་གལ་ཏེ་ཞེས་གསུངས་སོ། །ཇི་སྐད་དུ་བརྗོད་པའི་བློའི་རྣམ་པར་འགྱུར་བ་ཙམ་གྱིས་བཀོད་པ་དོན་དམ་པ་མ་ཡིན་པ་ལ། སྤྱི་གཞི་མཐུན་པ་ལ་སོགས་པ་རྣམས་ལ།
གལ་ཏེ་ཇི་སྐད་བརྗོད་པའི་རིགས་པས་ཆད་པ་འགའ་ཡང་མེད་ན། དེ་དེའི་ཚེ་གང་གི་སྤྱི་ལ་སོགས་པ་དེ་ཡོད་པ་ལ་ལྟོས་པར་བྱ་བ་ཡིན་ནོ་ཞེས་རྩོད་པར་བྱེད་པ་རིགས་ལྡན་མིན་ལ་འདིར་ཅི་སྨོས་ཏེ། ཡན་ལག་ཅན་དང་ལྡན་པ་ལ་སོགས་པ་རིགས་ལྡན་མིན་ལ་སྟེ། ཚད་མ་ཅན་མ་ཡིན་པ་ལ་ཅི་ལྟོས་ཏེ་ལྟོས་པར་
བྱ་བ་ཅི་ཡོད་དེ་ལྟར་བརྗོད་བྱ་བསླད་པར་བསྟན་ནས། སྐབས་ཀྱིས་རྗོད་པར་བྱེད་པ་ཡང་ལོག་པ་དང་ལོག་པ་མ་ཡིན་པའི་རྣམ་པར་དབྱེ་བ་རྣམ་པའི་བསླད་པར་བསྟན་པའི་དོན་དུ་ཐ་མལ་ཞེས་སྨོས་སོ། །ཐ་མལ་པའི་བསྟན་བཅོས་ལ་སྒྲའི་འདུས་བྱས་པ་གང་ཡིན་པ་དེར་མ་འཆོལ་བ་མཐོང་བ་མེད་དོ། །
གང་ཞིག་ཅེ་ན་རྟགས་སོ། །དཔེར་ན་སྟོན་ཤར་དོ་ཞེས་བྱ་བ་འདི་ལ། ཤ་རད་དེ་དང་སན་གྱི་མཐའ་ཅན་དང་། པྲ་ནེད་དང་། ཤི་རོ་དང་། ན་བྷ་དང་། སྐྱེས་བུའོ་ཞེས་བྱ་བས་ཕོ་རྟགས་སུ་འགྱུར་བ་བཞིན་ནོ། །ཚིག་ཀྱང་མ་འཆོལ་བར་མཐོང་བ་མེད་དེ་དཔེར་ན་ཁྱེད་ཅག་རྣམས་ཀྱི་ནོར་ཞེས་བྱ་བ་ལ།

ཏུམྷ་ནང་ཞེས་བྱ་བ་དྲུག་པ་མང་པོའི་ཚིག་གི་མཐའ་ཅན་ཁྱེད་གཉིས་ཞེས་བྱ་བའི་དོན་ལ་སྦྱོར་བ་བཞིན་ནོ། །དེ་སྐད་དུ་ཡང་མདོ་ལས་གཉིས་ལ་མང་པོའི་ཚིག་གོ་ཞེས་འབྱུང་ངོ་། །གལ་ཏེ་དེ་ལྟར་རྟགས་ལ་སོགས་པ་ཐ་དད་པར་འགྱུར་མོད། དོན་ནི་གཅིག་ཁོ་ནས་ཡིན་ནོ་སྙམ་
ན། དེ་ལ་དོན་ཞེས་གསུངས་སོ། །དཔེར་ན་ཨས་པ་ཞེས་བྱ་བ། །ཐ་མལ་པར་ནི་བདག་ཉིད་རྗོད་པར་བྱེད་པ་ཡིན་ལ། ལེགས་པར་སྦྱར་བ་ནི་ཆུ་འཐུང་བ་རྗོད་པར་བྱེད་པ་བཞིན་ནོ། །རང་བཞིན་ཐ་དད་པ་ནི་གསལ་བར་གྲགས་པའི་ཕྱིར་མི་བརྗོད་དོ། །དེ་ལས་ཅིར་འགྱུར་སྙམ་ན། དེ་ལ་མི་རིགས་
ཡོད་པ་ཡིན། །ཞེས་སྨོས་སོ། །དེར་ནི་རྟགས་ལ་སོགས་པ་དེ་འདྲ་བ་ཁོ་ན་ཚད་མ་ཡིན་པའི་ཕྱིར་ལེགས་པར་སྦྱར་བ་ཁོ་ན་བཟང་པོ་ཡིན་པར་འགྱུར་རོ་སྙམ་དུ་དགོངས་པའོ། །ལེགས་པར་སྦྱར་བ་ལ་ཞེས་བྱ་བ་ནི་ལེགས་པར་སྦྱར་བའི་སྦྱོར་བ་ལའོ། །དེ་ཞེས་བྱ་བ་ནི་རྟགས་ལ་སོགས་པ་ཕྱིན་ཅི་ལོག་དང་
ལྡན་པ་མ་ཡིན་པའོ། །འགྱུར་བར་སྲིད་པ་ཡིན་ནོ་ཞེས་བྱ་བ་ནི་དགོས་པའི་དོན་ཏོ། །དེ་ཡང་མ་ཡིན་ནོ་ཞེས་བྱ་བ་བརྗོད་པ་ནི། མཚན་ཉིད་ཀྱིས་ནི་ལེགས་བསྒྲུབས་ལ། །ཞེས་བྱ་བའོ། །རང་གི་མཚན་ཉིད་ཇི་ལྟ་བ་ཡིས་བྱེ་བྲག་ཏུ་བསྒྲུབས་པའི་སྒྲ་ལས་ལེགས་པར་བྱས་བརྗོད་པ་ཡིན་ལ། དེ་ནི་ལེགས་པར་
སྦྱར་བ་དང་ཐ་མལ་པ་ལ་མཚུངས་པ་ཡིན་ནོ། །དེས་ཇི་ལྟར་གཅིག་ལེགས་པར་སྦྱར་བ་ཡིན་ལ་གཞན་མ་ཡིན་ཏེ། རང་རང་གི་མཚན་ཉིད་ཀྱིས་ལེགས་པར་བསྒྲུབས་པ་ནི་ཐམས་ཅད་ལ་ཡོད་པའི་ཕྱིར་རོ། །འོན་ཏེ་ལེགས་པར་སྦྱར་བའི་མཚན་ཉིད་སྟོན་པའི་སྐྱེས་བུ་ཚད་མ་ཡིན་གྱི་གཞན་ནི་མ་ཡིན་
ནོ་ཞེ་ན། འདི་ལ་རིགས་པ་འགའ་ཡང་མེད་དེ། འདི་ནི་འདོད་པའི་དོན་འདོན་པ་ཙམ་དུ་སྟོན་པ་ཡིན་ནོ། །དེའི་ཕྱིར་ཐ་མལ་པ་ལ་སོགས་པ་ཡང་། མཚན་ཉིད་ཀྱིས་བསྒྲུབས་པ་ཡིན་པའི་ཕྱིར་ན་ལེགས་པར་སྦྱར་བ་དང་ཅིག་ཤོས་ཀྱི་རྣམ་པར་དབྱེ་བ་མེད་པའི་ཕྱིར་ལེགས་པ་དང་མི་ལེགས་པར་རྣམ་
པར་གནས་པ་མེད་དོ། །འོན་ཏེ། ལེགས་སྦྱར་ཞེས་བྱ་ལྷ་ཡི་ངག །དྲང་སྲོང་ཆེན་པོ་རྣམས་ཀྱིས་བཤད། །ཞེས་བྱ་བས་ལྷའི་ཚིག་ནི་ལེགས་པར་སྦྱར་བ་ཡིན་ལ། དེ་ལས་གཞན་ནི་ལེགས་པར་སྦྱར་བ་མ་ཡིན་ནོ་སྙམ་དུ་དགོངས་ན། ལེགས་པར་སྦྱར་དང་ལེགས་སྦྱར་མིན། །ཞེས་སྨོས་སོ། །

འདི་ཁོ་ན་ལྷའི་ངག་ཡིན་ནོ་ཞེས་བྱ་བ་ལ་ཚད་མ་མེད་པའི་ཕྱིར་རོ། །དེས་ན་འདི་ལྟར་འགྱུར་རོ་ཞེས་བརྗོད་པ་ནི་འདིར་ནི་ཞེས་བྱ་བ་སྟེ། ལེགས་པར་སྦྱར་བ་དང་། ལེགས་པར་སྦྱར་བ་མ་ཡིན་པ་ཉིད་དོ། །དོན་ཡོད་མ་ཡིན་ཡང་ཞེས་བྱ་བའི་སྒྲ་རྣམས་ནི་དོན་རྟོགས་པ་ཙམ་ལ་ཉེ་བར་མཁོ་བ་ཡིན་ན་དེ་ནི་ལེགས་
པར་སྦྱར་བ་མ་ཡིན་པ་ལ་ཡང་ཉམས་པ་མེད་དོ། །འདི་ཞེས་བྱ་བ་ནི་སྒྲ་བྱེ་བྲག་ཏུ་བཤད་པའོ། །ཕྱིས་གཞན་ཉིད་བཅོས་ཞེས་བྱ་བ་ནི་བ་ལང་གི་ཚོགས་ཀྱི་ཚུལ་དུ་དེའི་ལམ་དུ་འཇུག་པ་དག་གོ། །དེས་འདིས་འདི་དག་ལ། །ཅི་ཞིག་བརྗོད་པ་མི་ཤེས་སོ། །ཞེས་བྱ་བ་ནི་ཤིན་དུ་ཚབས་ཆེན་པོར་ལེགས་
པ་དང་ལེགས་པ་མ་ཡིན་པར་འཛིན་པའི་རྨོངས་པ་བསལ་བའི་དོན་དུ་ཅི་ཞིག་བརྗོད་པར་བྱ་བ་ཡིན་ཏེ། འཛིན་པ་དམ་པ་ཉིད་ཀྱིས་རིགས་པ་བརྗོད་ཀྱང་མི་རྟོགས་པའི་ཕྱིར་རོ། །ཆོས་དང་ཆོས་མ་ཡིན་པའི་རྒྱུ་མཚན་ཉིད་ཀྱང་ལེགས་པར་སྦྱར་དང་ལེགས་པར་སྦྱར་བ་མ་ཡིན་པ་ཉིད་དུ་རིགས་པ་མ་ཡིན་ནོ་
ཞེས་བརྗོད་པ་ནི། མ་མཐོང་བའི་དོན་བརྗོད་ནི་ཞེས་བྱ་བའོ། །གལ་ཏེ་ལས་ནི་འདིས་ཆོས་སུ་འགྱུར་རོ་ཞེས་བྱ་བའི་བྲོ་བའི་ཚིག་ལ་ཡིད་ཆེས་པ་མེད་པ་མ་ཡིན་ནམ། ལེགས་པར་སྦྱར་བ་མ་བརྗོད་ན་ཕུང་བར་འགྱུར་རོ་ཞེས་བྱ་བ་ལ་སོགས་པའི་ཚིག་ལ་ནི་ཡིད་ཆེས་པ་ཡིན་པའི་ཕྱིར། ཁྱད་པར་ཆེ་ཞེ་ན།
དེ་ལ་ཞེས་སྨོས་ཏེ། བྲོ་བའི་ངག་བཞིན་ནོ། །དེས་ཞེས་བྱ་བ་ནི་ཉེ་བར་སྡུད་པའོ། །དེའི་ཕྱིར་བརྗོད་བྱ་དང་རྗོད་བྱེད་ཀྱི་དངོས་པོ་ལ་ཡང་རྟོག་པ་ཙམ་སྐྱབས་ཡིན་པའི་ཕྱིར་སྒྲ་ཙམ་ལས་མ་གཏོགས་པར་ནི་ཡན་ལག་ཅན་ལ་སོགས་པ་གྲུབ་པ་མེད་དོ་ཞེས་གནས་སོ། །དེ་ལྟར་ཡན་ལག་ཅན་
བསལ་བའི་ཕྱིར་ན་ལུས་འབྱུང་བའི་རྡུལ་ཕྲ་རབ་ཀྱི་ཚོགས་ཙམ་ཞིག་ཡིན་པར་ལུས་པ་ཡིན་ནོ། །དེས་ན་ཤེས་པ་དེའི་ཉེ་བར་ལེན་པ་ཅན་ཡིན་པར་སྨྲ་བ་རྣམ་པར་བརྟག་པའི་དོན་དུ་གལ་ཏེ་ཞེས་གསུངས་སོ། །སྐྱེས་པ་ཡིན་ན་ཞེས་བྱ་བ་ནི་ཤེས་པའོ། །རྩ་བ་ལ་སོགས་པ་རྒྱུ་ཡིན་པ་ལྟ་བུ་ཞིག་གོ་
ཞེས་འབྲེལ་ཏོ། །ཡན་ལག་གཅིག་དང་བྲལ་ནའང་མིན། །ཞེས་བྱ་བ་ནི་ལུས་སོ། །མིན་ཞེས་བྱ་བ་ནི་ཤེས་པ་སྐྱེད་པར་མི་འགྱུར་རོ། །རྡུལ་ཕྲ་རབ་འཕེལ་བ་དང་འགྲིབ་པ་ནི་རྟོགས་པར་མི་ནུས་པའི་ཕྱིར་ན་སེར་མོ་ལ་སོགས་པ་བརྗོད་པ་ཡན་ལག་གི་སྒྲས་ཐ་སྙད་དུ་བྱས་སོ། །རྣམ་པར་རྟོག་པ་

གཉིས་པ་སེལ་བ་ནི་རེ་རེ་ཞེས་བྱ་བའོ། །མང་པོར་འབྱུང་བར་འགྱུར་ཞེས་བྱ་བ་ནི་རྣམ་པར་ཤེས་པ་མང་པོ་འབྱུང་བར་འགྱུར་རོ་གལ་ཏེ་འབྱུང་བ་དང་རྔུབ་པ་དག་ངེས་པར་བྱེད་པ་ཡིན་པའི་ཕྱིར་ཅིག་ཅར་མང་པོ་འབྱུང་བར་མི་འགྱུར་རོ་སྙམ་དུ་དོགས་ན། དུ་མ་ཉིད་དུ་
ཞེས་གསུངས་སོ། །ལུས་བཞིན་དུ་འབྱུང་བ་དང་རྔུབ་པ་དག་ཀྱང་ཡུལ་ཐ་དད་པ་དང་འབྲེལ་པའི་ཕྱིར་དུ་མ་ཉིད་ཡིན་པར་ངེས་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །དེ་མེད་ཀྱང་ཞེས་བྱ་བ་ནི་གཅིག་མེད་ཀྱང་ངོ་། །འོན་ཏེ་ཞེས་བྱ་བ་ལ་སོགས་པས་ནི་རྣམ་པར་རྟོག་པ་གཉིས་པ་སློང་བའོ། །
རྣམ་འགྲེལ་གྱི་ལྷག་མ་ཕྱེད་པོ་འཆད་པ་ནི། དེ་སྐྱེས་པར་བྱེད་པ་ནི་ཞེས་བྱ་བའོ། །གལ་ཏེ་འདི་དག་སྐྱེད་བྱེད་ཡིན་མོད། དེ་ལྟ་ན་ཡང་ལུས་ཀྱི་ཆ་དུ་མ་ལྷན་ཅིག་བྱེད་པ་ཡིན་པའི་ཕྱིར་ཆ་གཅིག་མེད་ན་ཡང་རྣམ་པར་ཤེས་པ་སྐྱེ་བར་མི་འགྱུར་སྙམ་ན། ཆ་ཤས་གཅིག་འགའ་གང་ཡིན་པ། །
ཞེས་གསུངས་ཏེ། ཐམས་ཅད་ནི་མ་ཡིན་པའོ། །དེའི་ཞེས་བྱ་བ་ནི་ལུས་ཀྱིའོ། །ལྷན་ཅིག་བྱེད་པ་ཞེས་བྱ་བ་ནི་སྐབས་ཀྱིས་འབྱུང་རྔུབ་དག་གིའོ། །དེས་ན་རྣམ་པར་ཤེས་པ་མི་སྐྱེ་བ་ཡིན་ནོ་སྙམ་དུ་བསམས་པའོ། །འོ་ན་ནི་ལྷན་ཅིག་བྱེད་པ་ཐ་དད་པ་གཞན་དང་གཞན་ལས་རྣམ་པར་ཤེས་
པ་ཐ་དད་པར་འགྱུར་རོ་སྙམ་ན། ལྷན་ཅིག་བྱེད་པ་ཞེས་སྨོས་སོ། །འབྱུང་རྔུབ་དག་ཀྱང་ཞེས་བྱ་བ་ནི་ལུས་འབའ་ཞིག་ཏུ་མ་ཟད་པའོ། །དེ་ཉིད་དུ་ཞེས་བྱ་བ་ནི་ལུས་ལ་བརྗོད་པ་གང་ཡིན་པའོ། །འདི་དག་དུ་མ་ཉིད་ཀྱང་ཡུལ་དུ་མ་དང་འབྲེལ་པའི་ཕྱིར་རོ། །ཐལ་བ་དེ་གང་ཡིན་སྙམ་ན་ཡན་ལག་གཅིག་ཅེས་
གསུངས་སོ། །མི་འབྱུང་བའམ་ཞེས་བྱ་བ་ནི་རྣམ་པར་ཤེས་པ་སྐྱེ་བར་ཞེས་བྱ་བ་སྐབས་ཡིན་ནོ། །སྐྱེས་བུ་གང་ལ་དབུགས་ཇི་ཙམ་ཡོད་པ་དེ་ཙམ་ལས་དམན་པའི་གནས་སྐབས་ནའོ། །འདི་ནི་ཐལ་བ་གཅིག་གོ། །དུ་མ་འབྱུང་བར་འགྱུར་རོ་ཞེས་བྱ་བ་སོ་སོར་ནུས་པའི་ཕྱོགས་ལ་ཐལ་བ་གཉིས་པའོ། །
གལ་ཏེ་འབྱུང་བ་དང་རྔུབ་པ་དག་ལ་གཅིག་ཉིད་དུ་གྲུབ་པ་མ་ཡིན་ནམ། དེས་ན་ལུས་བཞིན་དུ་ཐལ་བར་ཇི་ལྟར་འགྱུར་སྙམ་ན། ལུས་བཞིན་དུ་ཞེས་སྨོས་སོ། །གང་གི་ཕྱིར་འགལ་བའི་ཆོས་གནས་པ་ཐམས་ཅད་ལ་མཚུངས་པའི་ཕྱིར་ན་ལུས་བཞིན་དུ་འདི་གཉིས་གཅིག་ཉིད་དུ་མ་གྲུབ་པ་དེའི་

ཕྱིར་ཐལ་བ་དེ་ཉིད་དུ་འགྱུར་རོ། །འོན་ཏེ་གཅིག་ཉིད་དུ་ཞེས་བྱ་བ་ནི་འབྱུང་བའམ་རྔུབ་པ་དེ་དུས་གཞན་དུ་ཡང་རང་བཞིན་གཅིག་ཉིད་ཡིན་ནམ། སྐད་ཅིག་མའི་རང་བཞིན་ཡིན། །དེ་ལ་ཕྱོགས་དང་པོ་ལ་བརྗོད་པ་ནི་གཅིག་ཉིད་ཡིན་ན་ཞེས་བྱ་བའོ། །མ་གསལ་འགྱུར་ཞེས་བྱ་བ་ནི་རིམ་མ་ཡིན་
པར་འགྱུར་རོ། །དེ་རྒྱུ་ནི་རྣམ་པར་ཤེས་པ་དུ་མའི་རྒྱུའོ། །དེས་ན་ཞེས་བྱ་བ་ནི་དུ་མ་གསལ་བར་འགྱུར་བས་ནའོ། །ཕྱེད་ཕྱི་མ་འཆད་པ་ནི་འོན་ཏེ་ཞེས་བྱ་བའོ། །ཅིའི་ཕྱིར་བརྒལ་ཞིང་བརྟག་པར་འོས་པ་མ་ཡིན་ཞེ་ན། མེ་ནི་ཞེས་གསུངས་སོ། །མ་ཡིན་ཏེ་ཞེས་བྱ་བ་ནི་སུན་འབྱིན་པའོ། །
ཁྱད་པར་མེད་ཕྱིར་ཞེས་བྱ་བ་འདིའི་བཤད་པ་ནི་ཁྱད་པར་མེད་པའི་ཕྱིར་རོ་ཞེས་བྱ་བ་འདི་ཡིན་ཏེ། འབྱུང་བ་ལ་སོགས་པའོ། །རེ་ཞིག་ཇི་ལྟར་མེ་ལ་ཐལ་བ་མེད་པ་དེ་ལྟར་བརྗོད་པ་ནི་མེ་ལས་ནི་ཞེས་པའོ། །དམིགས་པ་ནི་སྐྱེ་བའམ་ཚད་མས་ངེས་པའོ། །གལ་ཏེ་མེ་དེ་ཉིད་ལས་རིམ་པ་དང་ལྡན་པའི་དུ་བ་
མཐའ་དག་སྐྱེ་བར་འགྱུར་ན་ནི་དེ་ལས་ཡང་ཐལ་བར་འདིར་འགྱུར་བ་ཞིག་ན། དེ་ལྟ་ནི་མ་ཡིན་ཏེ། མེ་གཞན་དང་གཞན་ཉིད་ཡིན་པར་གསལ་བར་ངེས་པར་གཟུང་བའི་ཕྱིར་རོ། །སྐབས་ལ་ནི་ཐལ་བར་འགྱུར་བ་ཁོ་ནའོ་ཞེས་ཁྱད་པར་བརྗོད་པ་ནི་འདིར་ནི་ཞེས་བྱ་བའོ། །སད་པར་བྱེད་པའི་རྐྱེན་ནི་ཡུལ་ཉེ་
བའོ། །དེ་ཡང་འདོད་ཆགས་ལ་སོགས་པའི་སེམས་ཀྱི་རྒྱུ་མ་ཡིན་ཏེ་མ་ངེས་པའི་ཕྱིར་རོ་ཞེས་བརྗོད་པ་ནི་སད་པར་བྱེད་པའི་ཞེས་གསུངས་སོ། །གཅིག་གི་སྙིང་དུ་སྡུག་པ་གང་ཡིན་པ་དེ་ནི་གཞན་ལ་མ་ཡིན་ནོ། །གཅིག་ཉིད་ལ་ཡང་སྡུག་པ་ཉིད། །རེས་འགའ་མི་སྡུག་པར་འགྱུར་རོ། །ཞེས་བྱ་བ་ལ་
སོགས་པ་ནི་ངེས་པ་མེད་པའི་དོན་ཏོ། །དེས་ན་ཡུལ་ནི་འདོད་ཆགས་ལ་སོགས་པའི་རྒྱུ་མ་ཡིན་ནོ་ཞེས་བྱ་བར་བསམས་པའོ། །སད་པར་བྱེད་པ་འདོད་ཆགས་ལ་སོགས་པའི་རྒྱུ་མ་ཡིན་ནོ་ཞེས་བྱ་བ་འདི་ག་ལས་ཡིན་སྙམ་ན། སྔོན་གྱི་འདུ་བྱེད་ཅེས་བྱ་བ་གསུངས་ཏེ། སྟོབས་དང་ལྡན་པས་ནི་འདོད་ཆགས་
ལ་སོགས་པ་གྲགས་པར་འགྱུར་ལ་མི་ལྡན་པས་ནི་དམན་པར་འགྱུར་རོ། །དེས་ན་ཞེས་བྱ་བ་ནི་གང་གི་ཕྱིར་དབུགས་དབྱུང་བ་ལ་སོགས་པ་གཅིག་ཉིད་ལས་འདོད་ཆགས་ལ་སོགས་པའི་སེམས་འབྱུང་བའི་གཏན་ཚིགས་དེས་ནའོ། །སེམས་ཀྱི་རྒྱུ་མ་ཡིན་ན་ཞེས་བྱ་བ་ནི་སྔར་རོ། །དེ་བས་ན་སྔར་

དང་ཕྱིས་ཀྱང་རྒྱུ་མ་ཡིན་པའི་ཕྱིར་དབུགས་དབྱུང་བ་ལ་སོགས་པ་ནི་རྒྱུ་ཉིད་དུ་མི་འགྱུར་རོ། །དེ་སྟེ་རྒྱུ་ཡིན་ན་དེའི་ཚེ། དེའི་རང་བཞིན་ནམ་ཡང་ན་ཉམས་པ་མེད་པའི་ཕྱིར་འདོད་ཆགས་ལ་སོགས་པའི་སེམས་གཞན་དང་གཞན་འབྱུང་བའི་ཕྱིར་གཅིག་ཡིན་ཡང་གཅིག་
ཉིད་ཀྱིས་ཚེ་མང་པོ་གསལ་བར་འགྱུར་རོ་ཞེས་གྲུབ་པོ། །དེ་བས་ན་རིམ་གྱིས་ཀྱང་དུ་མའི་རྒྱུ་ཉིད་དུ་མི་འཐད་དོ། །དེས་ན་ཚུ་རོལ་མཛེས་པ་ལས་སྔོན་གྱི་འདུ་བྱེད་པ་ཉིད་རྒྱུ་ཡིན་པར་ཐལ་བར་འགྱུར་རོ། །སངས་རྒྱས་ལ་ལྟོས་ནས་ནི་འདི་ཐལ་བ་མ་ཡིན་ཏེ། མངོན་པར་འདོད་པ་ཉིད་ཡིན་པའི་ཕྱིར་རོ། །
བརྗོད་པ་ཡིན་ཏེ་ཞེས་བྱ་བ་ནི། གཅིག་ཉིད་ནའང་མང་གསལ་འགྱུར། །ཞེས་བྱ་བ་ལ་སོགས་པ་སུན་འབྱིན་པའོ། །གཅིག་ཉིད་དུ་འཐད་པ་ནིའོ། །དེ་ལས་ཞེས་བྱ་བ་ནི་འབྱུང་རྔུབ་ལས་སོ། །ཡང་ན་གལ་ཏེ་འབྱུང་རྔུབ་ལས་ངེས་པ་མ་ཡིན་ན་འོ་ན་གང་ལས་ངེས་པ་ཡིན་སྙམ་ན། དེ་ལས་
ངེས་པ་ཡིན་ཞེས་ཡང་བཟླ་བར་བྱའོ། །སྔ་མ་སྔ་མའི་འདུ་བྱེད་པ་ལས་སེམས་ཕྱི་མ་ཕྱི་མ་ངེས་པ་ཡིན་ནོ་ཞེས་བྱ་བའི་དོན་ཏོ། །འོན་ཏེ་སྔ་མ་དང་ཕྱི་མར་རང་བཞིན་གཅིག་པའི་བློ་ཉིད་ཀྱིས་དོན་དུ་མ་འཛིན་པ་ཡིན་ན། དེའི་ཚེ་གཅིག་གིས་དུ་མ་ཤེས་པར་མཁས་པར་གྱུར་པ་ན། དོན་དུ་མ་ཅིག་ཅར་ཉིད་
ཤེས་པར་འགྱུར་རོ། །ཅིའི་ཕྱིར་ཞེ་ན་འགལ་བ་མེད་ཕྱིར་རོ། །རྟག་པའི་རང་བཞིན་དོན་ཅིག་ཅར་འཛིན་པ་ལ་འགལ་བ་ཅི་ཡང་མེད་དོ་ཞེས་བྱ་བའི་དོན་ཏོ། །འོན་ཏེ་དོན་ཅིག་ཅར་འཛིན་པར་ནུས་པ་མ་ཡིན་ནོ་སྙམ་ན། རིམ་གྱིས་ཀྱང་མིན་ཞེས་སྨྲས་སོ། །དབུགས་འབྱུང་བ་ལ་སོགས་པ་ལས་བློ་
གཅིག་ཉིད་དུ་ངེས་པ་མ་ཡིན་པའོ། །དེས་ན་མང་པོ་གསལ་བར་ཐལ་བ་ཇི་ལྟར་སྤང་བར་བྱ་སྙམ་དུ་དགོངས་པའོ། །འོ་ན་ཞེས་བྱ་བ་ནི་གཞན་སངས་རྒྱས་པ་ལ་འདྲི་བའོ། །གལ་ཏེ་རིམ་གྱིས་དོན་མཛད་པའི་བློ་དུ་མར་གྱུར་པ་དེ་ནི་དེའི་ཚེ་དེ་དག་ཅིག་ཅར་འབྱུང་བར་བརྗོད་པ་མཛེས་པ་ཞིག་ན།
འོན་ཀྱང་དེ་ནི་གཅིག་ཁོ་ན་ཡིན་ནོ་ཞེས་དགོངས་པར་བྱེད་པ་ནི། འོན་ཏེ་ཞེས་བྱ་བའོ། །གང་གི་ཕྱིར་གཅིག་ཉིད་དོན་དུ་མར་རིམ་གྱིས་འཛིན་པའི་རང་བཞིན་ཡིན་པའི་གཏན་ཚིགས་དེས་ནའོ། །འདི་ལ་རེ་ཞིག་རང་ཉིད་ལན་འདེབས་པ་ནི་དེ་ཡང་ཞེས་བརྗོད་པའོ། །བདེ་བ་ལ་སོགས་པའི་

རྣམ་པ་ལས་མ་གཏོགས་པར་ཡིད་དམིགས་པ་མེད་པའི་ཕྱིར་དེ་དོན་དུ་མ་འཛིན་པ་ཉིད་དུ་ཇི་ལྟར་བརྗོད་ཅེས་བྱ་བའི་དོན་ཏོ། །འོན་ཏེ་གཟུགས་ལ་སོགས་པའི་རྣམ་པ་ནི་དོན་ཉིད་ཀྱི་ཡིན་གྱི་ཤེས་པའི་བདག་ཉིད་ནི་མ་ཡིན་ནོ། །དེ་ལ་སྣང་བ་ཡང་གཟུགས་བརྙན་ཡིན་ཏེ། རྣམ་པ་མེད་
པ་བློ་ཙམ་གྱི་རང་བཞིན་ནི་རྣམ་པ་ཐམས་ཅད་ཀྱི་རྗེས་སུ་འཇུག་པ་ཡིན་པའི་ཕྱིར་རོ་སྙམ་དུ་བསམས་ནས། གཞན་གྱིས་གལ་ཏེ་ཡིད་ནི་ཞེས་སྨོས་སོ། །གལ་ཏེ་རྣམ་པར་ཤེས་པ་བྱ་བ་མེད་པ་ཉིད་ལ་བརྟེན་ནས། ཞེས་བྱ་བ་ནི་རྣམ་པ་དེའི་བདག་ཉིད་དུ་གྱུར་པ་དང་མ་འབྲེལ་པའི་རྣམ་
པར་ཤེས་པ་ལ་བརྟེན་ནས་སོ། །དོན་གྱི་གཟུགས་བརྙན་ཙམ་སྐྱེ་བ་ཡིན་ན། དེའི་ཚེ་དོན་རྣམས་ལ་ཤེས་པ་དང་ཉེ་བའི་རིམ་པ་ཁྱད་པར་མེད་པའི་ཕྱིར་ཉེ་བའི་དོན་ཐམས་ཅད་ཅིག་ཅར་འཛིན་པར་ཐལ་བར་འགྱུར་རོ། །ཆགས་པ་ལ་སོགས་པའི་གནས་སྐབས་སུ་ནི་འགའ་ཞིག་ཁོ་ན་ལ་ཤེས་
པར་ཡང་མཐོང་བ་ཡིན་ནོ། །འོན་ཏེ་ཞེས་བྱ་བ་ནི་གཞན་གྱིའོ། །གོམས་པའི་ཁྱད་པར་གྱི་རིམ་པས་གང་ལ་ཆགས་པ་དེ་ལ་གཟུགས་བརྙན་སྐྱེ་བའི་ཕྱིར་ཤེས་པ་ཡིན་གྱི། གཞན་ལ་ནི་མ་ཡིན་ཏེ། དེས་ན་ཅིག་ཅར་དོན་འཛིན་པར་ཐལ་བ་མ་ཡིན་ནོ་སྙམ་ན། ལན་དུ་འོ་ན་དེ་ཉིད་ཅེས་གསུངས་
ཏེ། བསྒོམས་པ་ཉིད་དོ། །དོན་གྱི་རྣམ་པའི་ཞེས་བྱ་བ་གཟུགས་བརྙན་གྱིའོ། །དབུགས་འབྱུང་བ་ལ་སོགས་པ་ཞེས་བྱ་བ་ནི་དེ་དག་ནི་ཡོད་ཀྱང་འགའ་ཞིག་ལ་ཆགས་པ་ན་བྱ་བ་བྱེད་པའི་ཕྱིར་རོ། །དེ་ལ་ནི་ཁོ་བོ་ཅག་ཀྱང་ཤེས་པ་དང་རྣམ་པ་དག་ཐ་མི་དད་པར་སྒྲུབ་པར་བྱེད་པ་དེ་འདྲ་བ་ལ་
འཆོལ་བ་མེད་དོ། །གང་གི་དབང་གིས་ཡུལ་རྟོགས་པར་རྣམ་པར་གཞག་པ། གོམས་པ་སྔ་མ་སྔ་མ་སྔོན་དུ་འགྲོ་བ་ཅན་གྱི་གཟུགས་བརྙན་དེ་གྲུབ་སྟེ། འབྱུང་དང་རྔུབ་པ་རྒྱུ་མ་ཡིན་ན། དེ་ཙམ་གྱིས་རྣམ་པར་ཤེས་པ་ཐོག་མ་མེད་པ་གྲུབ་པ་དང་ཤེས་པ་དང་ཤེས་བྱའི་ཐ་སྙད་ཡོངས་སུ་རྫོགས་
པས་འདིར་གཟུགས་བརྙན་དང་ཐ་མི་དད་པའི་ཤེས་པ་བཙལ་བས་ཅི་ཞིག་བྱ། གཟུགས་བརྙན་གྱི་སྒྲས་བརྗོད་པར་བྱ་བའི་དོན། སྔ་མ་སྔ་མའི་གོམས་པ་ལས་རྒྱུན་འཇུག་པ་དེ་ཉིད་ཁོ་བོ་ཅག་ཤེས་པ་བརྗོད་པ་ཡིན་ཏེ། དེ་ལས་གཞན་པའི་ཤེས་པ་ལ་ཚད་མ་མེད་པའི་ཕྱིར་རོ། །དེ་ལས་ཐ་དད་

པའི་ཤེས་པ་གྲུབ་པ་ནི་རིགས་པས་ཀྱང་གསལ་བའི་ཕྱིར་རོ། །དེ་བས་ན་གཟུགས་བརྙན་འདི་ནི་ལུས་ཀྱིས་བསྐྱེད་པ་ཡིན་ཡང་གོམས་པ་སྔ་མ་སྔ་མའི་བདག་པོ་ལ་ལྟོས་པ་ཁོ་ནའོ། །ལྟོས་པ་མེད་ན་ནི་ཤེས་པ་ཐ་དད་པར་ཁས་བླངས་ཀྱང་ཉེས་པ་དེ་གནས་
པ་ཁོ་ནའོ་ཞེས་སྟོན་པ་ནི་ཕྱེད་པོ་ཕྱི་མ་འཆད་པ་ནི། མེ་ལོང་བཞིན་དུ་ཞེས་བྱ་བའོ། །འོན་ཏེ་ཞེས་བྱ་བ་ནི་ཆགས་པའི་ཡུལ་ལས་གཞན་འཛིན་པའི་ནུས་པའོ། །དོན་གཞན་དེ་འཛིན་པར་མི་འགྱུར་རོ། །དེ་ཡན་ཆད་ཀྱིས་ནི་བརྟག་པའི་ཕྱོགས་ལ་དབུགས་འབྱུང་བ་ལ་སོགས་པའི་ཤེས་པའི་
རྒྱུ་ཡིན་པ་བསལ་ནས། སྐད་ཅིག་གི་ཕྱོགས་དགག་པའི་དོན་དུ་གཞན་གྱི་དོགས་པ་བསུ་བ་ནི། འོན་ཏེ་ཞེས་བྱ་བའོ། །དེ་ལ་ཡང་ཞེས་བྱ་བ་ནི་རྣམ་པ་མེད་པའི་ཤེས་པ་འགའ་ཞིག་ཏུ་མ་ཟད་དེ་དབུགས་འབྱུང་རྔུབ་ལ་ཡང་ངོ་། །སྐད་ཅིག་མང་པོ་ནི་ཡན་ལག་ཅན་སུན་ཕྱུང་བའི་ཕྱིར་རོ། །བརྒྱ་
ལ་དུས་གཅིག་ཏུ་ཉེ་བར་གནས་པ་ཉིད་དུ་འགྱུར་རོ་སྙམ་དུ་དོགས་ན། སྔ་མ་དང་ཕྱི་མར་ཡང་དེ་ལྟ་བུར་གྱུར་པ་ཉིད་དུ་སྟོན་པས་རིམ་པ་ཅན་དུ་སྟོན་པ་ནི། རང་རིགས་མིན་པའི་དུས་ཅན་གྱི། །ཞེས་བྱ་བའོ། །འདི་དག་རང་གི་རིགས་ཀྱི་དུས་ན་ངེས་པར་ཡོད་པ་དེ་བཞིན་དུ་སྔ་མ་དང་ཕྱི་མར་
ཡང་ཡིན་ཏེ། དེ་འདྲ་བའི་ཚོགས་པ་ཡོད་པའི་ཕྱིར་རོ། །དེ་འདྲ་བའི་སེམས་ཉིད་ཀྱི་ཞེས་བྱ་བ་ནི་སྐད་ཅིག་མང་པོ་དུས་གཅིག་པོ་དེར་མ་ངེས་པའིའོ། །དེ་དག་ཅེས་བྱ་བ་ནི་དབུགས་དབྱུང་བ་དག་གོ། །དང་པོ་ནི་སྐྱེ་བ་དང་པོའོ། །དེའི་སྔ་རོལ་ན་རང་གི་རིགས་ཀྱི་དབུགས་འབྱུང་བ་མེད་པའི་
ཕྱིར་རོ། །དེ་ཉིད་བརྗོད་པ་ནི་གང་གི་ཕྱིར་ཞེས་བྱ་བ་བསྣན་ཏེ། དེ་རྒྱུ་དེ་འདྲ་ཡོད་མ་ཡིན། །ཞེས་བྱ་བ་སྟེ། འཇིག་རྟེན་ཕ་རོལ་མི་འདོད་པའི་ཕྱིར་རོ། །ཡོད་ཀྱང་ཞེས་བྱ་བ་ནི་དེའི་རྒྱུ་དེ་འདྲ་བའོ། །དེ་ནི་མེད་བཞིན་དུ་ལ་སོགས་པ་ཁས་བླངས་པ་ཡིན་ནོ། །དབུགས་དབྱུང་བ་རྣམས་དུ་མ་
ཉིད་དུ་ངེས་སོ། །ཅིའི་ཕྱིར་སྙམ་ན་དབུགས་འབྱུང་ཐ་སྙད་ཡུལ་ཅན་ཕྱིར་ཏེ། ཡུལ་རྒྱ་ཆེར་ཁྱབ་པའི་ཕྱིར་རོ། །དེའི་ཕྱིར་ཞེས་བྱ་བ་ནི་དབུགས་འབྱུང་བ་རྣམས་གཅིག་ཡིན་པའི་ཕྱིར། རྣམ་པར་རྟོག་པ་རྣམས་ཅིག་ཅར་སྐྱེ་བར་འགྱུར་རོ། །འདི་ནི་ཚུ་རོལ་མཛེས་པ་ལ་ལ་འཇིག་རྟེན་ཕ་

རོལ་གྲུབ་པར་ཐལ་བ་ཡང་བར་དོར་ནས་བརྗོད་པ་ཡིན་ནོ། །རྣམ་པར་འགྲེལ་པ་ནི་དབུགས་སྐད་ཅིག་མ་ཞེས་བྱ་བ་སྟེ། འདིས་རང་གི་གཞུང་ལས་འདས་ཀྱང་གཞན་གྱི་བསྒྲུབ་བྱ་མི་འགྲུབ་པ་ཞེས་སྟོན་པ་ཡིན་ནོ། །རིམ་གྱིས་འབྱུང་བ་ནི་ཞེས་བྱ་བ་ནི་དབུགས་འབྱུང་བ་ཡང་རིམ་གྱིས་འབྱུང་བ་
ཡིན་ནོ་སྙམ་དུ་དགོངས་པའོ། །རྣམ་འགྲེལ་གཉིས་པ་རྣམ་པར་འགྲེལ་པ་ན་ལན་གསུང་བ་ནི། དབུགས་འབྱུང་བ་ལ་སོགས་པ་དེ་ཉིད་ཅེས་བྱ་བའོ། །ཇི་ལྟར་འཇིག་རྟེན་ཕ་རོལ་ཁས་མ་བླངས་ཀྱང་དབུགས་ཉིད་དབུགས་ཀྱི་རྒྱུ་ཡིན་པ་དེ་ལྟར་གཞན་དག་འདོད་པའི་དོགས་པ་བསུ་བ་ནི་ཕ་
མའི་དབུགས་ཉིད་ཅེས་བྱ་བའོ། །མ་ཡིན་ཏེ་ཞེས་བྱ་བ་ནི་སུན་འབྱིན་པའོ། །དེ་ལྟ་བུའི་བདག་ཉིད་དུ་གྱུར་པ་ཞེས་བྱ་བ་ནི་ཕ་མ་དག་གི་དབུགས་ཞན་པ་དང་དྲག་པ་ལ་སོགས་པའི་རང་བཞིན་ཅི་འདྲ་བའོ། །གཞན་ཡང་དེ་ལྟ་ན་ཕ་མ་ཉིད་ཀྱི་སེམས་འཕོས་པས་ཅི་སྟེ་མི་བརྗོད། དེ་ལ་ཡང་
སྔར་བརྗོད་ཟིན་ཏོ། །དེའི་ཕྱིར་དང་པོ་དབུགས་འབྱུང་བ་མི་རུང་ངོ་། །དབུགས་འབྱུང་ཐ་དད་ཡུལ་ཅན་ཕྱིར། །ཞེས་བྱ་བ་ལ་སོགས་པ་རྣམ་པར་འགྲེལ་པ་ནི་ཁས་བླངས་ནས་ཞེས་བྱ་བའོ། །དབུགས་དང་པོ་འབྱུང་བར་ཁས་བླངས་ནས་བརྗོད་པའོ། །ཅི་བརྗོད་པ་དེ་གང་ཞེ་ན། བཤད་པ་
དབུགས་རྣམས་ནི་དུ་མ་ཉིད་དེ་ཞེས་བྱ་བའོ། །ཅིའི་ཕྱིར་ཞེ་ན། ཡུལ་ཞེས་བྱ་བའོ། །འདི་ཉིད་གསལ་འདེབས་པ་ནི་ཡུལ་དུ་མ་ཞེས་བྱ་བའོ། །དེ་ལྟར་གྱུར་ན་ཉེས་པ་ཅི་ཡོད་སྙམ་ན། དབུགས་དུ་མ་ཞེས་བྱ་བའོ། །ཡིད་ཀྱི་རྣམ་པར་ཤེས་པ་དུ་མ་ཅིག་ཅར་སྐྱེ་བར་ཐལ་བར་འགྱུར་
རོ། །སྐད་ཅིག་མའི་ཕྱོགས་ལ་ལྟོས་ནས་ཀྱང་། ཀྱང་གི་སྒྲས་བསྡུས་པའི་གནོད་པར་བྱེད་པ་གཞན་བརྗོད་པ་ནི་རིགས་མཐུན་པའི་ཡིད་ནི་ཞེས་བྱ་བའོ། །དབུགས་ལ་སོགས་པ་སྐད་ཅིག་གཅིག་ལ་ཅི་འདྲ་བར་གྱུར་པ་དེ་འདྲ་བ་ནི་སྐད་ཅིག་གཞན་དུ་ཡང་ཡིན་ཏེ། དེས་ན་ཡིད་ཀྱི་རྣམ་
པར་ཤེས་པ་ཅི་འདྲ་བ་ཞིག་གཅིག་གི་ཚེ་སྐྱེས་པས་དེ་འདྲ་བ་ཉིད་གཞན་གྱི་ཚེ་ཡང་འགྱུར་གྱི་དེ་འདྲ་བ་མ་ཡིན་པར་མི་འགྱུར་ཏེ། རྒྱུ་རྣམས་མཚུངས་པའི་ཕྱིར་རོ། །འོན་ཏེ་སྐད་ཅིག་ཐ་དད་པ་ཉིད་ལས་རིགས་མི་མཐུན་པ་སྐྱེ་བར་འགྱུར་བ་ཡིན་ནོ་སྙམ་ན། སྐད་ཅིག་ཐ་དད་པ་ཉིད་ཀྱིས་

ཞེས་སྨོས་སོ། །འོ་ན་ཅིས་འགྱུར་སྙམ་ན། ཇི་ལྟར་རིགས་མཐུན་པའི་ཞེས་གསུངས་སོ། །དུ་མ་ཞེས་བྱ་བ་ནི་རིམ་གྱིས་འབྱུང་བའི་ཕྱིར་རོ། །གལ་ཏེ་ཞེས་བྱ་བ་ནི་གཞན་དག་ཡིད་ཀྱི་རྣམ་པར་ཤེས་པ་དུ་མ་ཅིག་ཅར་སྐྱེ་བར་ཐལ་བ་ཡོད་པའོ། །ཞིང་དང་ས་
བོན་དང་ཆུ་ལ་སོགས་པ་བཞིན་ནོ་སྙམ་དུ་ཡིད་ལ་གཞག་པའོ། །འོན་ཏེ་གཞན་དུ་ཡིན་ཞེས་བྱ་བ་ནི་ཇི་ལྟར་སྲིད་པས་སོ། །དེ་ལ་ཕྱོགས་དང་པོ་སེལ་བས་ནི། ཚོགས་པའི་རང་བཞིན་གྱིས་ཞེས་བྱ་བའོ། །ཚོགས་པ་མ་ཚང་བ་ནི་མ་ཚོགས་པའོ། །གཞན་དུ་ཡིན་ཞེས་བྱ་བའི་
ཕྱོགས་ལ་བརྟེན་ནས་བཤད་པ་ནི་འོན་ཏེ་ཇི་ལྟར་ཞེས་བྱ་བའོ། །འདི་ནི་ཇི་ལྟར་ཡོད་རྒྱུ་ཡིན། །ཞེས་བྱ་བའི་འགྲེལ་པའོ། །ཉེ་བར་གནས་པ་རྒྱུ་ཉིད་མ་ཡིན་ཏེ་ཞེས་བྱ་བ་ནི་འབྲས་བུ་དེ་འདྲ་བ་ཉིད་ཀྱི་ཞེས་བྱ་བ་བསམས་པའོ། །འོན་ཀྱང་ཉེ་བར་གནས་པ་མ་ཡིན་ནོ་ཞེས་བརྗོད་པར་
བྱའོ། །དེ་ལྟར་ནི་བརྗོད་པར་འཐད་པ་མ་ཡིན་ཏེ། ཆོད་པའི་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པའི་ཕྱིར་རོ། །ལྡོག་པའི་རྗེས་སུ་མི་བྱེད་ཀྱང་རྒྱུ་མ་ཡིན་པར་ཇི་ལྟར་འགྱུར་སྙམ་ན། རྒྱུ་དང་འབྲས་བུ་ཉིད་ནི་ཞེས་བྱ་བའོ། །དེས་ན་ཉེ་བར་གནས་པ་མ་ཡིན་པ་ནི་རྒྱུ་མ་ཡིན་ནོ་སྙམ་
དུ་དགོངས་པའོ། །དེ་བས་ན་མེའི་བུད་ཤིང་བཞིན་དུ་ཚང་བ་དང་མ་ཚང་བའི་རྒྱུ་དག་ནི་དེ་འདྲ་བ་ཉིད་ཀྱི་རྒྱུ་མ་ཡིན་ནོ་ཞེས་སྟོན་པ་ནི་དེའི་ཕྱིར་ཞེས་བྱ་བའོ། །དེ་ཡོད་ན་ཡོད་པ་ཉིད་ཅེས་བྱ་བའི་དགོས་པའི་དོན་ནི་འདི་ཡིན་ཏེ། རྒྱུ་དང་འབྲས་བུའི་དངོས་པོ་རྣམ་པར་གནས་པའི་རྒྱུ་མཚན་ནི་
དེ་ཡོད་ན་ཡོད་པ་ཉིད་ཡིན་ཏེ་འདིར་དེའི་ཁྱད་པར་སྐྱེད་པ་ལས་ལྟོས་པ་ལ་ཅི་བྱ་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་དེ་ཡོད་ན་ཡོད་པ་ཉིད་རྒྱུ་མཚན་ཞེས་བྱ་བ་རྗེས་སུ་འཇུག་པའོ། །ཅིའི་ཕྱིར་ཞེ་ན། དེ་ཡོད་ན་ཡོད་པ་ཉིད་ནི་ཞེས་བྱ་བའོ། །ཁྱབ་པར་ཞེས་བྱ་བ་ནི་ལྷག་མའོ། །
དེ་འགྱུར་ན་འགྱུར་བ་ཉིད་མེད་པར་དེ་ཡོད་ན་ཡོད་པ་ཉིད་མི་རྟོགས་སོ་ཞེས་བྱ་བའི་དོན་ཏོ། །འདི་ཉིད་སྟོན་པ་ནི་དེ་ཡོད་ན་ནི་ཞེས་བྱ་བའོ། །དེ་ལྟར་ཞེས་བྱ་བ་ནི་རྣམ་འགྱུར་རྒྱུ་མེད་པ་ཅན་ཡིན་ནའོ། །ཐམས་ཅད་རྒྱུ་མེད་པར་འགྱུར་ཞེས་བྱ་བ་ནི་དེ་ཡོད་ན་ཡོད་པ་ཉིད་ཀྱང་མེད་པར་འགྱུར་རོ་ཞེས་བྱ་

བའི་དོན་ཏོ། །འོན་ཏེ་ཞེས་བྱ་བ་ནི་གཞན་གྱིའོ། །དེ་ཙམ་ཉིད་ལས་ཞེས་བྱ་བ་ནི་ཁྱད་པར་དང་བྲལ་བའི་རྒྱུ་ཙམ་འབའ་ཞིག་ལས་སོ། །ལན་ནི་དང་པོ་ཉིད་ཅེས་བྱ་བའོ། །གང་གི་ཚེ་མེ་དང་བུད་ཤིང་སྟོབས་དང་ལྡན་པ་མ་ཡིན་པ་དེའི་ཚེ་ཡང་དུ་བ་དྲག་པོ་ཉིད་དུ་འགྱུར་རམ་ཅི་ཞེས་བྱ་
བའི་དོན་ཏོ། །དེའི་ཕྱིར་དེའི་ཁྱད་པར་གྱི་རྗེས་སུ་བྱེད་པ་ཁོ་ན་དེ་ཡོད་ན་ཡོད་པ་ཉིད་ཡིན་ནོ། །དེ་བས་ན་དེའི་རྗེས་སུ་བྱེད་པས་ཁྱབ་པའི་ཕྱིར། དེ་ཡོད་ན་ཡོད་པ་ཉིད་རྒྱུ་དང་འབྲས་བུའི་དངོས་པོ་རྣམ་པར་གནས་པའི་རྒྱུ་མཚན་དུ་ཇི་ལྟར་རྟོགས། འདིས་ནི་ཞེས་བྱ་བས་ནི་རྒྱུ་ཁྱད་
པར་མེད་པས་འབྲས་བུ་ཁྱད་པར་མེད་པར་བསྟན་པས་སོ། །ཡོངས་སུ་འགྱུར་བའི་ཁྱད་པར་ལ་ལྟོས་པའི་ཞེས་བྱ་བ་ནི་ཁྱད་པར་གཞན་དང་གཞན་དག་དང་ལྡན་པ་སྟེ། དེ་ལྟ་བུའི་ལུས་ལས་རྣམ་པར་ཤེས་པ་གཞན་དང་གཞན་སྐྱེ་བ་ཡིན་ལ་ཁྱད་པར་ཐམས་ཅད་མེད་ན་འཆི་བའི་གནས་
སྐབས་ན་མི་སྐྱེ་བ་ཡིན་ནོ་ཞེས་བྱ་བའི་དོན་ཏོ། །ལུས་ཁྱད་མེད་པའི་ཕྱིར་ན་ཡོངས་སུ་གྱུར་པ་འདིའི་ཡང་ཁྱད་པར་གང་ལས་འབྱུང་བ་ཡིན་ཏེ། རིམ་པ་དང་ལྡན་པའི་ལུས་རྣམས་ནི་འབྱུང་བ་ཆེན་པོ་བཞི་ཙམ་གྱི་རང་བཞིན་ཉིད་ཀྱིས་ཁྱད་པར་འགའ་ཡང་མེད་པའི་ཕྱིར་ཡོངས་སུ་འགྱུར་བ་
ཁྱད་པར་ཅན་དུ་མི་འགྱུར་ལ། དེ་མེད་པའི་ཕྱིར་རྣམ་པར་ཤེས་པ་ཁྱད་པར་མེད་པར་འགྱུར་རོ། །དེ་མེད་པར་ཡང་འབྱུང་ན་ནི་རྒྱུ་མེད་པ་ཅན་དུ་འགྱུར་རོ། །དེས་ན་སྔ་མ་སྔ་མའི་འདུ་བྱེད་པའི་དབང་གིས་སྐྱེས་པ་ལ་སྐྱོན་མེད་དོ་ཞེས་བྱ་བའི་དོན་ཏོ། །རང་བཞིན་ཁྱད་པར་མེད་ཀྱང་ཡོངས་སུ་
གྱུར་པ་ཁྱད་པར་ཡོད་པར་སྟོན་པ་ནི་གལ་ཏེ་འོ་མ་ཞེས་བྱ་བའོ། །སྣོད་གཉིས་ན་གནས་པའི་འོ་མ་ལ། གཅིག་ལ་ནི་ཞོ་སྐ་བ་དང་གཞན་ལ་ནི་སླ་བར་མཐོང་ངོ་། །སྐ་བ་དང་ཅིག་ཤོས་ཀྱི་ཁྱད་པར་གང་ལས་ཡིན་སྙམ་ན། དུས་ཀྱི་མཐར་ཐུག་པ་ཙམ་ལས་ཞེས་བྱ་བའོ། །གྲང་བ་དང་
དྲོ་བ་ལ་སོགས་པ་རྟེན་གཞན་གྱི་ལྷན་ཅིག་བྱེ་བ་ཙམ་ལས་ཞེས་བྱ་བའི་དོན་ཏོ། །དེ་བཞིན་དུ་ལུས་ཀྱང་ཡིན་ནོ་ཞེས་བྱ་བ་ནི་ཡོངས་སུ་གྱུར་པ་ཁྱད་པར་མེད་པ་ཅན་ཡིན་ཡང་འགྱུར་བ་ཡིན་ནོ། །ཞོ་ལ་སོགས་ཀྱི་རྣམ་འགྱུར་ནི། །ཞེས་བྱ་བ་ནི་འོ་མ་ལ་སོགས་པའི་རྣམ་པར་འགྱུར་བའོ། །མི་

མཚུངས་པ་གང་ཡིན་པ་དེ་ནི་འོ་མ་མཚུངས་པ་ལས་བྱུང་བ་ནི་མ་ཡིན་ནོ་ཞེས་བྱ་བའི་དོན་ཏོ། །ལུས་ཀྱི་རྣམ་འགྱུར་ནི། ཁྱད་པར་ཅན་དུ་གྱུར་པ་ཉིད་ཅེས་བྱ་བ་ནི་འབྱུང་བ་ཆེན་པོ་བཞིའི་རང་བཞིན་ཉིད་དུ་མཚུངས་པའི་ལུས་རྣམས་ལ། འགའ་ཞིག་ཏུ་ཡོངས་སུ་གྱུར་
པ་འགའ་ཞིག་སེམས་ཀྱི་ཁྱད་པར་གྱི་རྒྱུ་ཡིན་ནོ། །དས་ན་ལུས་ནི་མཚུངས་པ་དང་མི་མཚུངས་པ་དག་ལ་རྗེས་སུ་མཐུན་པ་གོམས་པའི་བག་ཆགས་གང་ཡིན་པ་དེ་ཉིད་རྣམ་པར་རྟོག་པ་དང་རྣམ་པར་མི་རྟོག་པ་ནི་ཤེས་པ་དག་ཐ་དད་པའམ་ཐ་མི་དད་པའི་རྒྱུ་ཡིན་ནོ། །ལུས་མཚུངས་པ་དང་མི་
མཚུངས་པ་དག་ཡོད་ཀྱང་། རྣམ་པར་རྟོག་པ་དང་རྣམ་པར་མི་རྟོག་པའི་ཤེས་པ་རྣམས་ལ་ཐ་དད་པ་དང་ཐ་མི་དད་པ་མེད་པའི་ཕྱིར་རོ། །ཞར་ལ་བྱུང་བ་རྫོགས་པར་བྱས་ནས་གཉུག་མ་ཉེ་བར་སྡུད་པ་ནི། དེའི་ཕྱིར་ཞེས་བྱ་བའོ། །ཚོགས་པ་རྒྱུ་ཉིད་ཡིན་ན་ཞེས་བྱ་བ་ནི་ཐམས་ཅད་རྒྱུ་
ཉིད་ཡིན་ནའོ། །དེ་ལྟ་མ་ཡིན་ན་ཞེས་བྱ་བ་ནི་སོ་སོར་སྐྱེད་པར་ནུས་པའི་ཕྱོགས་ལའོ། །དུ་མ་ཉིད་དོ་ཞེས་བྱ་བ་ནི་ཡིད་ཀྱི་ཤེས་པ་ཅིག་ཅར་སྐྱེ་བར་ཐལ་བར་འགྱུར་རོ་ཞེས་གང་བརྗོད་པའོ། །དེ་ལྟར་མི་མཐོང་བ་མ་ཡིན་ནོ་ཞེས་བྱ་བ་ནི་བཟློག་པའོ། །དེས་ན་དབུགས་འབྱུང་བ་ལ་
སོགས་པ་ནི་སེམས་ཀྱི་རྒྱུ་མ་ཡིན་ནོ་ཞེས་ཚད་མའི་འབྲས་བུ་འཕངས་པ་ཡིན་ནོ། །གང་གི་ཞེས་བྱ་བ་ནི་གཞན་གྱིའོ། །དེ་ལ་དུ་མ་ཅིའི་ཕྱིར་མི་སྐྱེ་ཞེས་བྱ་བ་དེ་ནི་རེ་ཞིག་མི་རིགས་ཏེ། རྣམ་པར་རྟོག་པ་མེད་པ་འབའ་ཞིག་པ་རྣམས་སམ། རྣམ་པར་རྟོག་པ་གཅིག་དང་ལྡན་པ་རྣམས་ནི་ལྷན་
ཅིག་སྐྱེད་པར་འདོད་པའི་ཕྱིར་རོ། །འོན་ཀྱང་ཇི་ལྟར་ལུས་ལས་ཡིན་པ་ལ་ཐལ་བར་འགྱུར་བ་ལྟར་ཡིད་ཀྱི་རྣམ་པར་ཤེས་པ་དུ་མ་ཉིད་སྐྱེ་བར་ཇི་སྟེ་མི་འགྱུར་ཞེས་བརྗོད་པར་འདོད་པ་ཡིན་ནོ། །དེ་ལ་བརྗོད་པ་ནི་རྣམ་ཤེས་ནུས་པ་ངེས་པའི་ཕྱིར་རོ་ཞེས་བྱ་བའོ། །དོན་གཞན་ལ་ཆགས་
པས་སམ། དོན་གཞན་ལ་འཛིན་པའི་ཕྱིར་ཞེས་ཕྱོགས་གཞན་དུ་བལྟ་བར་བྱའོ། །བཤད་པ་ལ་མཚུངས་པ་དེ་མ་ཐག་པའི་རྐྱེན་གྱི་རང་བཞིན་གྱི་རྣམ་པར་ཤེས་པ་གཅིག་ཅིག་གི་རྒྱུ་ཡིན་ནོ་ཞེས་བྱ་བ་ནི་དམ་བཅའ་བའོ། །འདི་ལ་གཏན་ཚིགས་ཅི་ཡོད་སྙམ་ན། ནུས་པ་ངེས་པ་

ནི་རྗེས་སུ་མཐུན་པའི་འདུ་བྱེད་ཀྱི་བག་ཆགས་ཏེ། གཏན་ཚིགས་ཡིན་ནོ་ཞེས་འབྲེལ་པར་བྱའོ། །གཉིས་པ་བརྗོད་པ་ནི་ཆགས་པའི་ཁྱད་པར་ཏེ་ཞེས་བྱ་བའོ། །གཏན་ཚིགས་སོ་ཞེས་འབྲེལ་ཏོ། །དང་པོ་རྣམ་པར་འགྲེལ་པ་ནི་བག་ཆགས་བརྟན་པའི་ཞེས་བྱ་བའོ། །མཚུངས་པ་
དེ་མ་ཐག་པའི་རྐྱེན་གྱི་ཞེས་བྱ་བ་ནི་ཇི་ལྟར་གྲགས་པའིའོ། །རྣམ་པར་ཤེས་པ་ཞེས་བྱ་བ་ནི་ཡིད་དོ། །འབའ་ཞིག་གམ་ཞེས་བྱ་བ་ནི་ཇི་སྐད་བརྗོད་པའི་དེ་མ་ཐག་པ་ལ་མ་ལྟོས་པར་རོ། །ཆགས་པའི་ཁྱད་པར་ཏེ་ཞེས་བྱ་བ་འཆད་པ་ནི། ཡང་མཚུངས་པ་དེ་མ་ཐག་པའི་ཞེས་བྱ་བའོ། །
རྗེས་སུ་མཐུན་པའི་ཆགས་པས་ཡུལ་གཅིག་ལ་ངེས་པའོ། །དེ་ལ་ཕྱོགས་དང་པོ་ནི་གསལ་བའི་ཕྱིར་དེ་མ་ཐག་པ་གཉིས་ལ་ཉམས་སུ་མྱོང་བ་གསལ་བར་བསྟན་པའི་དོན་དུ་འགའ་ཞིག་གམ་ཞེས་བྱ་བའི་དབང་དུ་བྱས་ནས་འདི་ལྟར་ཞེས་གསུངས་སོ། །ཆགས་པའི་ཕྱོགས་ལ་བརྟེན་ན་
བཤད་པ་ནི་རྣམ་པར་ཤེས་པ་འགའ་ཞིག་ནི་ཞེས་བྱ་བའོ། །ཉེ་བ་ཉིད་ནི་ཆགས་པ་ཉིད་དོ། །རྣམ་པར་རྟོག་པ་གཞན་ནི་སྐྱེ་བར་མཐོང་བ་མ་ཡིན་ནོ། །དེ་སྐྱེ་བས་བར་དུ་བཅད་པའི་ཕྱིར་རོ། །མཚུངས་པ་དེ་མ་ཐག་པའི་རྐྱེན་གྱི་རྣམ་པར་ཤེས་པའི་བག་ཆགས་ནི་རྣམ་པར་རྟོག་པ་
སྐྱེད་པར་ནུས་པ་གང་ཡིན་པ་སྟེ། རྣམ་པར་རྟོག་པ་སྐྱེ་བ་གང་དག་ལ། དེ་བར་དུ་བཅད་པ་ཞེས་བྱ་བ་ནུས་པ་མེད་པར་བྱས་པ་ཡོད་པ་དེ་དག་ནི་སྐྱེ་བར་མ་མཐོང་ངོ་ཞེས་འབྲེལ་ཏོ། །ཡང་བག་ཆགས་གང་གིས་བར་དུ་བཅད་སྙམ་ན། གཞན་གྱིས་ཞེས་སྨོས་ཏེ་རྣམ་པར་རྟོག་པ་ཞེས་
བྱ་བ་སྐབས་ཡིན་ནོ། །དོན་གང་ཞིག་གཞན་ལ་མི་འབྱུང་བའི་དོན་གྱིས་ཆགས་པའི་ཡུལ་ཡིན་པའི་ཡུལ་དེ་ཤེས་བྱ་ཉིད་ཀྱིས་གང་ལ་ཡོད་པའོ། །དེ་ལྟར་རྣམ་པར་ཤེས་པ་ལས་རྣམ་པར་ཤེས་པ་སྐྱེ་བར་ཁས་བླང་བ་ན་རྣམ་པར་རྟོག་པ་གཅིག་སྐྱེ་བའི་ཚོགས་པ་ཡོད་པ་ཡིན་གྱི།
ལུས་ཀྱིས་རྡུལ་ཕྲ་རབ་རྣམས་སྐྱེད་པ་ཡིན་ན་ནི་མ་ཡིན་ཏེ། ལྟོས་པར་བྱ་བ་གོམས་པ་ལ་སོགས་པ་ལ་ལོག་པ་མེད་པ་མེད་པའི་ཕྱིར་རོ་ཞེས་བརྗོད་པར་འགྱུར་རོ། །མ་ཆགས་པའི་དུས་ན་རྣམ་པར་རྟོག་པ་མེད་པ་བཞིན་དུ་ཉེ་བའི་དོན་རྣམས་ལ་དུས་གཅིག་ཏུ་རྣམ་པར་རྟོག་པ་དུ་མ་ཉིད་ཅི་སྟེ་

མི་སྐྱེ་ཞེ་ན། འདི་ལ་ཡང་ནུས་པ་ངེས་པའི་ཕྱིར་རོ་ཞེས་བྱ་བ་ལན་ཡིན་ནོ། །འབད་པ་དང་ལྡན་པ་ལ་ཡང་ཅིག་ཅར་རྣམ་པར་རྟོག་པ་གཉིས་མི་སྐྱེ་བའི་ཕྱིར་ན་མཚུངས་པ་དེ་མ་ཐག་པའི་རྐྱེན་རྣམ་པར་རྟོག་པ་གཅིག་སྐྱེད་པ་ལ་ནུས་པ་ངེས་པ་ཉིད་ཡིན་ནོ་ཞེས་
བྱ་བའི་དོན་ཏོ། །ལུས་ཀྱིས་རྡུལ་ཕྲ་རབ་གྲངས་མེད་པ་རྣམས་སོ་སོར་ནུས་པ་ཡིན་ན་ནི་རྣམ་པར་རྟོག་པ་དཔག་ཏུ་མེད་པ་སྐྱེ་བར་ཐལ་བ་ཉིད་དོ། །དེ་བས་ན་ཞེས་བྱ་བ་ནི་ཉེ་བར་སྡུད་པའོ། །གཅིག་གམ་ཞེས་བྱ་བ་ནི་རྣམ་པར་རྟོག་པ་དང་བཅས་པའོ། །དུ་མ་ཞེས་བྱ་བ་ནི་རྣམ་པར་
རྟོག་པ་མེད་པའོ། །ལུས་ཙམ་ལས་སྐྱེ་ན་ནི་དེ་ལྟ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་གཞན་གྱིའོ། །རྣམ་པར་ཤེས་པ་དེ་ཉིད་ལས་ཞེས་བྱ་བ་ནི་གཅིག་གམ་དུ་མ་སྐྱེས་པ་གང་ཡིན་པ་དེ་ཉིད་ལས་སོ། །ཁྱེད་ཀྱི་ཕྱོགས་བཞིན་དུ་ཕྱིས་བློ་གཅིག་གམ་དུ་མ་སྐྱེ་མོད།
དང་པོ་ནི་ལུས་ལས་སྐྱེ་བར་འགྱུར་རོ་ཞེས་བསམས་པའོ། །རེ་ཞིག་གཅིག་ལས་སྐྱེ་བ་ན་ངེས་པ་འདི་འཐད་ཀྱི་ལུས་དུ་མ་ལས་སྐྱེ་བ་ལ་གོ་ཇི་ལྟར་ཞེ་ན་དཔེར་ན་ཞེས་སྨོས་སོ། །དེ་བཞིན་དུ་འདིར་ཡང་རྒྱུ་འགའ་ཞིག་ལ་ལྟོས་པ་ཡིན་ནོ་ཞེས་བྱ་བའི་དོན་ཏོ། །ཆགས་པའི་ཁྱད་པར་དེ་
ཉིད་ལས་ཞེས་བྱ་བ་ནི་འདི་ཉིད་དུ་འབྲེལ་པར་བྱའོ། །གྲུབ་པའི་མཐར་ནི་དང་པོ་སྐྱེས་པའི་རྣམ་པ་ཤེས་པ་ལས་རྒྱུན་འཇུག་པ་ལ་རྣམ་པར་རྟོག་པ་འདིར་འགྱུར་མོད། ལུས་ལ་ནི་དེ་བཞིན་དུ་སྐྱེད་པར་བྱེད་པའི་ནུས་པ་ཡོད་པའི་ཕྱིར་རྒྱུན་གཞན་དང་གཞན་ཡང་སྐྱེ་བར་འགྱུར་རོ་སྙམ་དུ་བསམས་
པ་ཡིན་ནོ། །དེ་སྲིད་ཉིད་དུ་ཞེས་བྱ་བ་ནི་གཅིག་གི་ཚེ་ལུས་ལས་ཤེས་པའི་ཚོགས་ཚད་ཇི་ཙམ་སྐྱེས་པའི་ནུས་པ་ངེས་པར་བསྟན་པ་ཡང་མ་ཡིན་ནམ་སྙམ་པའི་དོགས་པ་བསུ་ནས་ཡང་གསལ་བར་བྱེད་པ་ནི་གལ་ཏེ་ཞེས་བྱ་བ་དེ་སྲིད་ཁོ་ན་སྐྱེ་བར་འགྱུར་རོ། །ཅིའི་ཕྱིར་ཞེ་ན། ལུས་ཀྱི་ནུས་
པ་ནུས་པ་ཞེས་སྨོས་སོ། །གལ་ཏེ་ཁྱེད་ཀྱི་ལུགས་བཞིན་གཞན་དང་གཞན་ཡང་སྐྱེ་བར་འགྱུར་རོ་སྙམ་དུ་བསམས་པ་ཡིན་ནོ། །དེ་སྲིད་དུ་ཞེས་བྱ་བ་ནི་གཅིག་གི་ཚེ་ལུས་ལས་ཤེས་པའི་ཚོགས་ཚད་ཇི་ཙམ་སྐྱེས་ཤེས་པའི་ནུས་པ་ངེས་པར་བསྟན་པ་ཡང་མ་ཡིན་ནམ་སྙམ་པའི་དོགས་པ་བསུ་

ནས། ཡང་གསལ་བར་བྱེད་པ་ནི་གལ་ཏེ་ཞེས་བྱ་བའོ། །འོན་ཏེ་ཞེས་བྱ་བ་ལ་སོགས་པ་ནི་གོ་བླའོ། །དོན་འདི་ཞེས་བྱ་བ་ནི་རེ་ཞིག་ལུས་ལས་ཤེས་པའི་ཚོགས་སྐྱེ་ལ། དེས་ཀྱང་དེའི་ནུས་པ་ཉམས་པའི་ཕྱིར་ཡང་ཤེས་པའི་ཚོགས་བྱེད་པ་མ་ཡིན་ནོ་ཞེས་བྱ་བའོ། །འོ་ན་གང་ཚད་མའི་
སྤྱོད་ཡུལ་ཡིན་སྙམ་པ་ལ། རྣམ་པར་ཤེས་པ་ཉིད་ལས་ཞེས་བྱ་བའོ། །གོམས་པའི་རང་བཞིན་ལས་སོ། །རྣམ་ཤེས་ནི་ཞེས་བྱ་བ་ནི་ཆགས་པའི་རང་བཞིན་ནོ། །གང་གིས་ཞེས་བྱ་བ་ནི་རྟོག་པ་དང་ལྡན་པ་ཡིན་པས་སོ། །འོན་ཏེ་ཞེས་བྱ་བ་ནི་གཞན་གྱིའོ། །ལུས་ལས་རྣམ་
ཤེས་ཞེས་བྱ་བ་ནི་ལན་ནོ། །རྒྱུ་མཚན་མེད་པར་དོགས་པ་ཡང་མ་ཡིན་ནོ་ཞེས་བྱ་བ་ལ། གལ་ཏེ་གཞན་གྱི་ལུགས་ལ་དེ་ལྟར་འགྱུར་མོད། སངས་རྒྱས་པའི་ལུགས་ལ་ནི་རྣམ་པར་རྟོག་པས་བྲིས་པ་ལས་སྒྲུབ་པར་བྱེད་པ་དང་གནོད་པར་བྱེད་པ་མེད་པ་ཉིད་ཀྱིས་དོགས་པའི་སྐབས་བྱེད་པ་
མ་ཡིན་ནམ་དེས་ན་ཇི་ལྟར་རྒྱུ་མཚན་མེད་པ་ཡིན་སྙམ་ན་དེ་ནི་མི་འཐད་དོ། །རྣམ་པ་གཉིས་ཀ་མ་གྲུབ་པའི་ཕྱིར་རོ། །གནོད་པར་བྱེད་པ་ཉིད་ཡིན་པའི་ཕྱིར་རོ་ཞེས་སྟོན་པ་ན། རྣམ་ཤེས་ཉིད་ལས་རྣམ་ཤེས་ནི་སྐྱེ་བར་ཞེས་བྱ་བའི་ཕྱེད་ཕྱི་མ་རྣམ་པར་འགྲེལ་པ་ནི། ཆགས་པ་ཕྱོགས་སུ་
ལྷུང་བར་བྱས། །ཞེས་བྱ་བའོ། །དེ་སྐྱེ་བ་ནི་ཕྱོགས་སུ་ལྷུང་བ་སྐྱེ་བའོ། །དེ་བས་ན་རྣམ་པར་ཤེས་པའི་ངེས་བྱེད་ཉིད་ནི་བརྒྱུད་ནས་གོམས་པ་ཉིད་ལས་སྐྱེས་པ་ཡིན་ནོ། །གལ་ཏེ་ཞེས་བྱ་བ་ནི་གཞན་གྱི་ཡིན་ནོ། །ཇི་ལྟར་མི་རིགས་སྙམ་ན་ཆགས་པའི་རང་བཞིན་མ་ཡིན་པའི་ཞེས་
གསུངས་སོ། །ཚུ་རོལ་མཛེས་པ་པའི་ལ་ཡང་དེ་ལྟར་འགྱུར་རོ་སྙམ་ན། གང་ལ་འཇིག་རྟེན་གཞན་མེད་པ་ཞེས་བྱ་བའོ། །དབང་པོའི་རྣམ་པར་ཤེས་པ་དུ་མ་ཡོད་ཀྱང་རྣམ་པར་ཤེས་པ་གཅིག་འབྱུང་བ་གང་ཡིན་པ་དེ་ནི་གོམས་པ་ཁོ་ན་ལས་ཡིན་ནོ་ཞེས་བསྒྲུབས་ཟིན་ཏོ། །དེས་ན་ཞེས་བྱ་
བ་ནི་རྣམ་པར་ཤེས་པ་གཞན་སྐྱེ་བ་མ་བཟློགས་པས་སོ། །དང་པོ་སྐྱེས་པའི་རྣམ་པར་ཤེས་པའི་རྒྱུན་མ་གཏོགས་པ་ནུས་པའི་ལུས་ལས་ཡང་དེ་ལྟར་སྐྱེས་པ་ན་ཚོགས་སུ་འགྱུར་རོ་ཞེས་བྱ་བའི་གནས་སྐབས་ཀྱི་མཐར་ཐུག་པའོ། །དེ་ནི་མཐོང་བ་མེད་པའི་ཅེས་བྱ་བ་ནི་བཟློག་པའོ། །

གཅིག་གི་ཚེ་རྣམ་པར་རྟོག་པའི་རྣམ་པར་ཤེས་པ་གཅིག་ཉིད་མཐོང་བའི་ཕྱིར་རོ། །འོན་ཏེ་ཞེས་བྱ་བ་ནི་གཞན་གྱིའོ། །ཕྱི་མར་གྱུར་པ་ཞེས་བྱ་བ་ནི་ནུར་ནུར་པོ་ལས་སོ། །དང་པོ་ནུར་ནུར་པོའི་གནས་སྐབས་ཉིད་སེམས་ཀྱི་སྐྱེད་བྱེད་ཡིན་ནོ། །ཁོ་ནའི་སྒྲ་ནི་
འབའ་ཞིག་ཅེས་བྱ་བ་འདི་ནི་འོག་ཏུ་བལྟ་བར་བྱའོ། །མེད་པ་འབའ་ཞིག་ཁོ་ནའོ། །ཇི་ལྟར་སྙམ་ན་ཕན་གདགས་པར་བྱ་བ་དང་ཞེས་བྱ་བ་གསུངས་སོ། །འགའ་ཞིག་ལས་སྐད་ཅིག་དང་པོ་སྐྱེད་པ་ཡིན་མོད། སེམས་ཀྱི་རྒྱུན་ནི་ལུས་ལ་བརྟེན་པ་མ་ཡིན་ནོ། །ཞེས་བྱ་བའི་དོན་ཏོ། །
འོན་ཏེ་ཞེས་བྱ་བ་ལ་ལུས་ལྷན་ཅིག་བྱེད་པ་ཅན་གྱི་རྣམ་པར་ཤེས་པས་ཞེས་བྱ་བ་ནི་བྱེད་པ་པོའོ། །རྣམ་པར་ཤེས་པ་ཞེས་བྱ་བ་ནི་ལས་སོ། །འདིར་ནི་མི་མཐོང་བར་རྟོག་པ་མེད་ཅེས་བྱ་བ་ནི་ལུས་ནི་ཉེ་བར་ལེན་པ་ཉིད་དུ་སྔར་མངོན་སུམ་གྱི་ངེས་པ་མེད་ལ་ཉེ་བར་ལེན་པ་ངེས་པ་སྔོན་དུ་འགྲོ་
བ་ཅན་གྱི་ལྷན་ཅིག་བྱེད་པ་ཉིད་དུ་ཡང་མ་ཡིན་ནོ། །རིགས་མཐུན་པ་ཉིད་ཀྱིས་ནི་ཤེས་པའི་ཉེ་བར་ལེན་པ་ནི་ཤེས་པ་ཉིད་ཡིན་པར་གསལ་བ་ཡིན་ནོ་ཞེས་བྱ་བའི་དོན་ཏོ། །བ་ལང་གི་ལྕི་བ་ལས་ཀྱང་ཨུཏྤ་ལ་སྐྱེ་ལ། ཨུཏྤ་ལ་ཉིད་ལས་ཀྱང་སྐྱེ་བ་ཡིན་ནོ་ཞེས་གང་བརྗོད་པ་དེ་ནི་མི་འཐད་
དོ་ཞེས་བརྗོད་པ་དེ་ནི་བ་ལང་གི་ལྕི་བ་དང་ཞེས་བྱ་བའོ། །དེ་ལྟ་ཡང་འོ་ན། སྐྱེ་བ་དང་པོའི་ཤེས་པ་དང་། བར་གྱི་གནས་སྐབས་ཀྱི་རྣམ་པར་ཤེས་པ་དག་ཤིན་དུ་ཁྱད་པར་ཆེ་བའི་ཕྱིར་ཇི་ལྟར་སྐྱེ་བ་དང་པོའི་རྣམ་པར་ཤེས་པ་རྣམ་པར་ཤེས་པ་གཞན་གྱི་སྒྲུབ་བྱེད་དུ་འགྱུར་སྙམ་དུ་དོགས་
པ་བསུ་ནས་གསལ་བ་ལ་སོགས་ཞེས་གསུངས་སོ། །ལ་ལར་ཞེས་བྱ་བ་ནི་བར་གྱི་གནས་སྐབས་ནའོ། །དང་པོར་ཞེས་བྱ་བ་ནི་སྐྱེ་བ་དང་པོར་རོ། །ལུས་ལས་ཞེས་བྱ་བ་ནི་ཉེ་བར་ལེན་པར་གྱུར་པ་ལས་སོ། །དེའི་རྒྱུ་ནི་ལུས་ཀྱི་རྒྱུ་སྟེ་མེར་མེར་པོ་ལ་སོགས་པའོ། །དེའི་འཇུག་པ་ནི་
རང་གི་འབྲས་བུའི་ལུས་སྐྱེད་པ་ལས་སྔོན་དུ་ཕྱོགས་པའོ། །དེ་ཐོབ་པའི་ཕྱིར་ཡན་ལག་ཏུ་འགྱུར་བ་ནི་ལྷན་ཅིག་བྱེད་པའི་རྐྱེན་ཉིད་དུ་འགྱུར་བའོ། །ལྡོག་པ་བརྗོད་ནས་རྗེས་སུ་འགྲོ་བ་བཤད་པ་ནི་གང་གི་ཚེ་ཞེས་བྱ་བའོ། །མིག་ལ་སོགས་པའི་དབང་པོ་ལྔ་ནི་སྐྱེ་མཆེད་ལྔ་ཡིན་ནོ། །ཚེ་

འདི་ཉིད་ནི་སྐྱེ་བ་འདི་ལ་ཡོད་པའོ། །སེམས་ཀྱི་རྒྱུན་གནས་པའི་རྒྱུ་ནི་ལྷན་ཅིག་བྱེད་པ་ཅན་ཡིན་ནོ་ཞེས་བལྟ་བར་བྱའོ། །བློ་དབེན་པ་ལ་སེམས་ཀྱི་རྒྱུན་གནས་རྒྱུ་ཞེས་བྱ་བ་ལ་སོགས་པ་སྡེབ་སྦྱོར་ཙམ་བྱས་པ་བཤད་པའི་དོན་དུ་འདི་ལྟར་ཞེས་གསུངས་སོ། །སེམས་ཀྱི་རྒྱུན་གནས་པའི་རྒྱུ་
ཞེས་བྱ་བ་ནི་རྣམ་འགྲེལ་བྲིས་པ་ཙམ་དུ་ཟད་དོ། །དེའི་རྒྱུ་འཇུག་ཐོབ་ཕྱིར་ཞེས་བྱ་བ་འཆད་པ་དེ་ནི་དེའི་རྒྱུ་འཇུག་སྟེ་ཞེས་བྱ་བ་ལ་སོགས་པའོ། །སེམས་ཀྱི་རྒྱུན་གནས་རྒྱུ་ཞེས་བྱ་བ་འཆད་པ་ནི་སྔར་གྱི་སེམས་ལས་ཀྱི་མིང་ཅན་ཞེས་བྱ་བའོ། །གང་གི་ཚེ་དེ་ལུས་གཞན་སྐྱེ་བ་ཡན་ལག་
ཉིད་དུ་འགྱུར་སྙམ་ན། དེའི་ཡན་ལག་ཉིད་ནི་ཞེས་བྱ་བའོ། །དེས་ན་ཞེས་བྱ་བ་ཁོང་ནས་ཕྱུང་ལ། གལ་ཏེ་དེའི་ཡན་ལག་ཏུ་མི་འགྱུར་ན་ཞེས་བྱ་བར་སྦྱར་རོ། །དེའི་ཚེ་འབའ་ཞིག་ཅེས་བྱ་བ་ནི་དཔེར་ན་གཟུགས་མེད་པའི་ཁམས་སུ་བཞིན་ནོ། །གང་ལ་ལས་ལྷན་ཅིག་བྱེད་པར་འགྱུར་བའི་
རྒྱུ་དེ་གང་ཡིན་སྙམ་ན། ལུས་གཞན་སྐྱེ་བ་ལས་ནི་ཚེ་འདིའི་སྐྱེ་མཆེད་ལྔ་ཡིན་ཏེ་ཞེས་སྨོས་སོ། །འདི་ནི་ལུས་ཀྱི་རྒྱུ་མེར་མེར་པོ་ལ་སོགས་པའི་མིང་ཅན་ཞེས་བརྗོད་ཟིན་ཏོ། །དེ་མ་ཐག་ཏུ་སྐྱེས་པའི་མིག་ལ་སོགས་པའི་སྐྱེ་མཆེད་ལྔ་ལ་སེམས་ཀྱིས་བྱིན་གྱིས་བརླབས་ན་འཆི་བའི་
མཐར་ཐུག་པའི་སྐྱེ་མཆེད་ལྔ་པོ་ལུས་ལ་སྲེད་པ་དང་བཅས་པའི་ལས་ཀྱི་ལྷན་ཅིག་བྱེད་པ་ལས། གནས་སྐབས་གཞན་དང་གཞན་གྱིས་རིམ་གྱིས་སྲིད་པ་བར་མ་དོའི་ལུས་ལ་སོགས་པ་ཡིན་ནོ། །དེ་ལྟར་ན་འོ་ན་གཟུགས་མེད་པའི་ཁམས་ནས་འཆི་འཕོས་ཕ་ལ་ཇི་ལྟར་ལུས་སྐྱེ་ཞེ་ན།
གཟུགས་མེད་པའི་ཁམས་ནས་ཞེས་གསུངས་སོ། །དེ་ཉིད་ཅེས་བྱ་བ་ནི་ཚེ་འདི་ཉིད་ཀྱི་སྐྱེ་མཆེད་ལྔའོ། །ཇི་ལྟར་ཞེ་ན་འདུ་བྱེད་པ་པོ་ཉིད་ཀྱིས་ཏེ། བག་ཆགས་འཛིན་པར་བྱེད་པ་ཉིད་ཀྱིས་སོ། །འབྱུང་བར་འགྱུར་བའི་སྲིད་པ་ལ་ལྟོས་ནས་སྔར་བྱུང་བ་ནི་འདི་ཉིད་ཀྱི་ཡིན་པར་བརྗོད་
དོ། །དོན་འདི་ཡིན་ཏེ། གལ་ཏེ་གཟུགས་མེད་པའི་ཁམས་ནས་སྲིད་པ་གཞན་དུ་འཕོ་བ་ལ། དེ་མ་ཐག་པའི་སྐྱེ་མཆེད་སྔ་མ་སྔ་མ་མེད་པ་དེ་ལྟ་ན་ཡང་། གཟུགས་མེད་པའི་ཁམས་སུ་འཇུག་པ་ན་ཡོད་པར་གྱུར་པ་གང་ཡིན་པ་དེ་ཉིད་སྲིད་པ་གཞན་གྱི་ལུས་ཀྱི་རྒྱུ་ཡིན་ན་སྟེ། དེས་

གཞག་པའི་བག་ཆགས་ཀྱིས་སྐྱེད་པའི་ཕྱིར་རོ་ཞེས་བྱ་བའོ། །གལ་ཏེ་ཞེས་བྱ་བ་ནི་གཞན་གྱིའོ། །དེའི་ཞེས་བྱ་བ་ནི་ལས་ཀྱིའོ། །ཡན་ལག་གི་དངོས་པོ་ནི་སྐྱེ་མཆེད་ལྔ་ལ་ཞེས་བྱ་བ་ནི་ལྷག་མའོ། །ཅིའི་ཕྱིར་ཞེ་ན། ཤི་བའི་འོག་ཏུ་ཞེས་བྱ་བ་ལ་སོགས་པའོ། །
འདིས་ནི་འབའ་ཞིག་གནས་པ་ག་ལ་ཡིན་ཞེས་བྱ་བ་དེ་ནི་དམིགས་པས་གནོད་པར་བསྟན་ཏོ། །གང་ཡང་འབའ་ཞིག་གནས་པར་འདོད་པ་ཉིད་དོ་ཞེས་བརྗོད་པ་དེ་ཡང་འདིས་གནོད་དོ་ཞེས་སྨྲས་པ་ནི། གཟུགས་མེད་པའི་ཁམས་སུ་ནི་ཞེས་བྱ་བའོ། །དེའི་ཡན་ལག་དངོས་པོ་དང་རྒྱུ་ཉིད་
འགོག་ལ་ཞེས་བྱ་བ་ནི་ལས་དེའི་ཡན་ལག་གི་དངོས་པོ་ནི་ལྷན་ཅིག་བྱེད་པ་ཉིད་དོ། །ནུར་ནུར་པོ་ལ་སོགས་པའི་མིང་ཅན་ལུས་ཀྱི་རྒྱུ་ནི་རྒྱུ་སྟེ། དེ་གཉིས་འགོག་པ་ལའོ། །རབ་ཏུ་བཤད་ཅེས་བྱ་བ་ནི་གལ་ཏེ་འགྲོ་བ་མ་མཐོང་ཕྱིར་ཞེ་ན་ཞེས་བྱ་བ་ལ་སོགས་པས་སོ། །སྐྱེ་མཆེད་
ལྔ་ཞེས་བྱ་བའི་དྲུག་པ་ནི་སྐྱེ་བ་གཞན་གྱི་ལུས་སྐྱེད་པའི་བྱ་བ་ལ་ལྟོས་པའོ། །ཡན་ལག་གི་དངོས་པོ་ནི་སེམས་ཀྱི་རྒྱུན་གནས་པའི་རྒྱུ་ཞེས་རྟོགས་པར་བྱའོ། །དེ་ལྟ་ན་ཡང་མ་དམིགས་པ་ཙམ་གྱིས་དེ་མེད་པར་ངེས་པ་མ་ཡིན་ནོ་ཞེས་འབྲེལ་ཏོ། །དེ་མེད་པར་བརྗོད་པའི་ངེས་པའི་རྣམ་
པར་བརྗོད་པ་ནི་སེམས་ཀྱི་རྒྱུན་ཞེས་བྱ་བའོ། །དེ་ལྟར་ཞེས་བྱ་བ་ནི་ཡན་ལག་གི་དངོས་པོར་རོ། །ཚིག་རྐང་ལྔ་པ་བཤད་པའི་ཕྱིར་འོན་ཏེ་ཡང་ཞེས་བྱ་བའོ། །འགལ་བས་ཁྱབ་པའི་དམིགས་པའོ་ཞེས་བྱ་བ་ནི་དང་པོ་ཉིད་ལ་ནི་དགག་པར་བྱ་བ་མཚམས་སྦྱོར་བ་དང་འགལ་བས་ཁྱབ་པའོ། །
གལ་ཏེ་ལྷག་མ་དང་ལྡན་པ་ཡིན་ཡང་འདི་ལས་མངོན་པར་འདོད་པ་འགྲུབ་པར་འགྱུར་རོ་སྙམ་ན། འདི་ཞེས་བྱ་བའོ། །ལྷག་མ་དང་ལྡན་པའི་རྗེས་སུ་དཔག་པ་ལས་དོན་ཇི་ལྟ་བ་བཞིན་རྟོགས་པ་ནི་མེད་དོ་ཞེས་བྱ་བ་འདི་ནི་སློབ་དཔོན་ཕྱོགས་ཀྱི་གླང་པོས་བཤད་པ་ཡིན་ནོ། །ཇི་ལྟར་
ལྷག་མ་དང་ལྡན་པ་ཡིན་སྙམ་ན། སྐྱེ་བ་གཞན་གྱི་དབང་པོ་དང་ཞེས་བྱ་བའོ། །མི་མཐུན་པའི་ཕྱོགས་ལས་ལྡོག་པར་གྲུབ་པ་ཞེས་བྱ་བ་ནི་མི་མཐུན་པའི་ཕྱོགས་དབང་པོ་གཞན་དང་མཚམས་སྦྱོར་བ་ལས་སྒྲུབ་པར་བྱེད་པ་དབང་པོ་ཉིད་ལྡོག་པར་ངེས་པ་མ་ཡིན་པའོ། །འོན་ཏེ་ཚེ་

འདི་པའི་ཞེས་བྱ་བ་ནི་སྔོན་གྱི་སྐྱེ་མཆེད་ལྔས་སྐྱེ་མཆེད་གཞན་གྱི་རང་བཞིན་གྱི་ལུས་བསྐྱེད་པར་ཟད་ཀྱི། སྐྱེ་བ་གཞན་གྱི་ནི་མ་ཡིན་ནོ་ཞེས་བྱ་བའི་དོན་ཏོ། །གཞན་དུ་ཡང་ཞེས་བྱ་བ་ནི་བསྒྲུབ་པའི་ཆོས་ཅན་འཆི་བའི་གནས་སྐབས་ལ་ཡང་ངོ་། །དེ་དང་མཚམས་སྦྱོར་བ་ཉིད་དུ་ཞེས་བྱ་བ་
ནི། ཚེ་འདི་པའི་ལུས་ལ་ཡོད་པའི་དབང་པོ་དང་མཚམས་སྦྱོར་བ་ཡིན་གྱི། སྐྱེ་བ་གཞན་གྱི་ལུས་དང་ནི་མཚམས་སྦྱོར་བ་ཡིན་པའོ། །དེ་ལ་ཡང་ཞེས་བྱ་བ་ནི་ལན་ཞེས་བྱ་བ་སྟེ། འདི་པའི་ལུས་ལ་ཡོད་པའི་དབང་པོ་དང་མཚམས་སྦྱོར་བ་ལ་ཡོད་དོ། །ཅིའི་ཕྱིར་ཞེ་ན། དེ་ཡང་ཞེས་
སྨོས་ཏེ། རྗེས་སུ་དཔག་པར་བྱ་བ་མཚམས་སྦྱོར་བའི་ལུས་སོ། །དེའི་ཚེ་ཞེས་བྱ་བ་མཚམས་སྦྱོར་བའི་དུས་ནའོ། །དཔེར་ན་ལྟོས་པའི་ཕྱིར་ཚུ་རོལ་དང་པོ་ལ་གཅིག་ཏུ་ངེས་པ་མ་ཡིན་པ་དེ་བཞིན་དུ་འདི་ལ་ཡང་ཡིན་པས་ཁྱད་པར་མེད་དོ། །དེར་ཡང་ཞེས་བྱ་བ་ནི་ཁྱད་པར་དང་བཅས་པའི་
གཏན་ཚིགས་ལའོ། །དམིགས་པ་ཙམ་མེད་པར་མི་མཐུན་པའི་ཕྱོགས་ལ་མེད་པར་རྟོགས་པ་མ་ཡིན་ནོ། །ཁུ་ཁྲག་གཞན་གཞན་ལས་བྱུང་བའི་དབང་པོ་ཡང་ཡིན་ལ་དབང་པོ་གཞན་དང་མཚམས་སྦྱོར་བ་ཡང་ཡིན་པའི་ཕྱིར་ཁྱད་པར་དང་བཅས་པའི་གཏན་ཚིགས་ཀྱང་མ་ངེས་པ་ཡིན་ནོ། །ཡུལ་གྱི་
ཁྱད་པར་བཞིན་ནམ་ཞེས་བྱ་བ་ནི་དཔེར་ན་དུ་བའི་ཡུལ་གྱི་ཁྱད་པར་མེ་རྗེས་སུ་དཔོག་པ་འཇིགས་པའི་སྐྱོབ་པ་མ་ཡིན་པ་དེ་བཞིན་དབང་པོའི་ཁྱད་པར་ཁུ་ཁྲག་གཞན་ལས་བྱུང་བ་ཡང་འཇིག་རྟེན་གཞན་གྱི་དབང་པོའི་རྗེས་སུ་དཔོག་པ་འཇིགས་པའི་སྐྱོབ་པའི་སྐྱོབ་པར་བྱེད་པ་མ་ཡིན་ནོ། །
དཔེར་ན་བྱས་པའི་ཁྱད་པར་ནུས་པ་དང་སྒྲའི་ཡིན་པ་ཉིད་རྗེས་སུ་དཔག་པར་སེལ་བར་བྱེད་པ་ལ་ནུས་པ་མེད་པ་དེ་བཞིན་དུ་འདི་ཡང་ཡིན་ནོ། །འོ་ན་གང་ལས་ཁྱད་པར་ལ་བརྟེན་པའི་ཉེས་པའི་གོ་སྐབས་སུ་མི་འགྱུར་བ་ཚེ་འདི་ཉིད་ཀྱི་སྐྱེ་མཆེད་ལྔ། ལུས་གཞན་སྐྱེ་བའི་རྒྱུ་ཡིན་ནོ་ཞེས་བྱ་བའི་སྤྱིས་
ཀྱང་ཇི་ལྟར་ཁྱབ་པར་འགྲུབ་པར་འགྱུར་སྙམ་དུ་དོགས་ན། འདི་ལྟར་ཞེས་གསུངས་སོ། །གལ་ཏེ་དབང་པོ་རྣམས་ལ་གཞན་དང་གཞན་སྐྱེ་བ་ཉིད་མེད་པ་མ་ཡིན་ནམ། དེ་ཇི་ལྟར་ན་སྔ་མ་རྣམས་རང་གི་རིགས་ལ་ནུས་པ་འགྲུབ་ཅེ་ན། འགྱུར་བ་མཐོང་ཕྱིར་ཞེས་བྱ་བའོ། །གསལ་

བ་ནི་ས་ཕྱོགས་ལ་སོགས་པ་རང་གི་མཚན་ཉིད་དོ། །དེ་ལྟ་མ་ཡིན་ན་ཞེས་བྱ་བ་ནི་གསལ་བའི་ཁྱད་པར་ལ་ལྟོས་ནའོ། །གལ་ཏེ་ཐ་སྙད་ཀྱང་ཁྱད་པར་གྱི་ཡུལ་ཅན་ཉིད་དུ་འགྱུར་རོ་སྙམ་ན། ཐ་སྙད་ནི་སྤྱིའི་ཞེས་གསུངས་སོ། །དེས་ན་ཞེས་བྱ་བ་ནི་སྤྱིའི་ཡུལ་
ཅན་ཡིན་པས་སོ། །དེ་ལྟ་ན་ཡང་ཞེས་བྱ་བ་ནི་གསལ་བའི་ཁྱད་པར་ལ་མི་ལྟོས་ནའོ། །དེ་ལྟ་བུར་ཞེས་བྱ་བ་ནི་གཡོ་བག་ལ་སོགས་པ་དང་ལྡན་པར་དབུས་ཀྱི་གནས་སྐབས་སུ་སྐྱེས་པར་གྲུབ་པ་ནའོ། །ཇི་ལྟར་མིག་ལ་སོགས་པ་ལས་དེ་དེ་ལྟར་སྐྱེས་པ་ཡིན་སྙམ་ན། གོམས་པའི་
ཁྱད་པར་ལས་ཞེས་སྨོས་སོ། །དེ་ལྟ་བུར་གྱུར་པ་ཞེས་བྱ་བ་ནི་གཡོ་བག་ལ་སོགས་པ་དང་ལྡན་པའོ། །གཞན་དུ་ནི་སྐྱེ་བ་དང་པོར་རོ། །དེ་ལྟ་བུར་གྱུར་པ་ནི་གཡོ་བག་ལ་སོགས་པ་དང་བཅས་པའི་དབང་པོའོ། །གལ་ཏེ་སྐྱེ་བ་དང་པོར་ཡང་ཚེ་འདིའི་དབང་པོ་ཉིད་རྒྱུ་མ་ཡིན་ནམ།
དེས་ན་འཇིག་རྟེན་སྔ་མ་མི་འགྲུབ་པོ་སྙམ་ན། སྐྱེ་བ་དང་པོར་ནི་ཞེས་བྱ་བའོ། །དེ་འདྲ་བར་གྱུར་པ་ནི་འདྲི་བའོ། །དེས་ན་ཞེས་བྱ་བ་ནི་འདི་པའི་དབང་པོ་མ་མཐོང་བའི་ཕྱིར་རོ། །གཞན་གྱི་ཁྱད་པར་ནི་ཞེས་བྱ་བ་ནི་ཁུ་ཁྲག་གཞན་ལས་སྐྱེས་པ་ལ་སོགས་པའོ། །འདིས་ནི་ཕྱེད་སྔ་
མ་བཤད་པ་ཡིན་ནོ། །ཕྱེད་ཕྱི་མ་བཤད་པའི་དོན་དུ་འོན་ཏེ་ཞེས་བྱ་བ་ལ་སོགས་པས་རྩོད་པའོ། །དེས་ན་ཞེས་བྱ་བ་ནི་གཅིག་པས་སོ། །འདིར་ཀྱང་ནི་སྒྲས་འཕངས་པའི་ལན་རེ་ཞིག་བརྗོད་པ་ནི་གལ་ཏེ་དེ་ལྟ་ཡིན་དུ་ཆུག་པ་ཞེས་བྱ་བའོ། །བར་གྱི་གནས་སྐབས་སུ་ནི་གཡོ་བ་ལ་སོགས་པ་
གོམས་པ་སྔོན་དུ་འགྲོ་བ་ཅན་དུ་མཐོང་བ་ཡིན་ནོ། །དེས་ན་སྐྱེ་བ་དང་པོའི་གཡོ་བ་ལ་སོགས་པ་ཡང་གོམས་པ་སྔོན་དུ་འགྲོ་བ་ཅན་དུ་རྗེས་སུ་དཔོག་པ་གྲུབ་པ་ཁོ་ནའོ། །དབང་པོ་དེ་གཅིག་ཡིན་ནམ་འོན་ཏེ་མ་ཡིན་ཞེས་བྱ་བ་ལ་སོགས་པ་གཞན་ནི་དོན་མེད་དོ། །འོན་ཏེ་གོམས་པ་ལས་སྐྱེས་
པའི་ཡོན་ཏན་ནི་ལུས་གཞན་ལ་མཐོང་བ་མེད་པ་མ་ཡིན་ནམ། དེས་ན་གང་གིས་འཇིག་རྟེན་ཕ་རོལ་འགྲུབ་པར་འགྱུར་བ་སྐྱེ་བ་དང་པོའི་གཡོ་བག་ལ་སོགས་པ་ལུས་གཞན་དང་འབྲེལ་པའི་གོམས་པ་སྔོན་དུ་འགྲོ་བ་ཅན་དུ་ཇི་ལྟར་འགྱུར་སྙམ་ན། གོམས་པ་ལས་སྐྱེས་པའི་ཞེས་

གསུངས་སོ། །དེ་བཞིན་སྐྱེ་བ་དང་པོའི་ལུས་ལ་ཡང་འགྱུར་རོ། །རྨི་ལམ་གྱི་ལུས་མི་བདེ་བ་མ་ཡིན་ནོ་ཞེས་ཀྱང་བསྒྲུབས་ཟིན་པ་ཉིད་དོ། །ཀྱང་གི་སྒྲས་བསྡུས་པའི་ལན་བརྗོད་ནས་རྣམ་འགྲེལ་ལ་འཇུག་པ་ནི་གཞན་ཡང་ཞེས་བྱ་བའོ། །གཉིད་དང་ནད་དང་ཉམས་པར་བྱས་པ་
ལ་སོགས་པས་འགྱུར་བ་གཞན་དང་གཞན་མཐོང་བ་ཡིན་ནོ། །གལ་ཏེ་དབང་པོ་རྣམས་ལ་འགྱུར་བ་གཞན་སྐྱེ་ཡང་སྐྱེ་བ་གཞན་དང་གཞན་ཡིན་པར་ཇི་ལྟར་འགྲུབ་ཅེ་ན། རང་གི་ངོ་བོར་གྱུར་པའི་ཞེས་གསུངས་སོ། །རང་གི་ངོ་བོ་མ་ཡིན་ན་ནི་དེའི་རྣམ་པར་འགྱུར་བ་ཉིད་དུ་མི་འགྲུབ་སྟེ་
དོན་གཞན་བཞིན་ནོ། །དེ་ན་དབང་པོའི་གནས་སྐབས་དེ་ཉིད་ཡིན་པར་འགྱུར་རོ། །དེས་ན་དེའི་རང་གི་ངོ་བོ་ཡིན་པས་ན་དེ་དང་འདྲ་བར་ཐ་དད་པ་ཁོ་ནའོ། །དཔེར་ན་ས་དང་ཆུ་དང་མེ་དང་རླུང་རྣམས་ཕན་ཚུན་ཐ་དད་པ་བཞིན་ནོ། །འདིར་ནི་ཞེས་བྱ་བ་ནི་མིག་ལ་སོགས་པ་ལའོ། །དེ་ནི་ཞེས་བྱ་བ་
ནི་ལན་ཏེ། རྒྱུད་གཅིག་ཏུ་གདགས་པའི་ཡུལ་དེ་ནིའོ། །ཅི་ལྟར་ཞེ་ན། སྐྱེ་བ་གཞན་ཡང་ཞེས་བྱ་བའོ། །འོ་ན་ཇི་ལྟར་དེ་གཅིག་ཉིད་དུ་མི་རྟོགས་སྙམ་ན། དྲན་པས་བར་ཆོད་པས་ན་ཞེས་གསུངས་སོ། །བར་ཆོད་པ་ནི་མེད་པའོ། །ཐག་རིང་པོ་ནི་གཏན་བསྐལ་པ་སྟེ། མེད་པ་ཞེས་
བྱ་བའི་དོན་ཏོ། །སྐྱེ་བ་གཞན་དེ་ཁོ་ནར་ཡོད་པ་ཡིན་ཡང་མེད་པ་བཞིན་དུ་རྟོགས་པ་དེས་ན་གཅིག་ཉིད་དུ་ལྷག་པར་ཞེན་པ་མ་ཡིན་ནོ། །སྔ་མ་བཞིན་དུ་ཞེས་བྱ་བ་ནི་ཇི་ལྟར་ལུས་ལས་དང་པོ་སེམས་སྐྱེ་བར་རྟོག་པ་ལ་ཐལ་བ་བཞིན་དུའོ། །ཕྱོགས་གཉིས་པ་ལ་བརྗོད་པ་ནི་དབང་པོ་
མེད་པ་ལས་ཞེས་བྱ་བའོ། །དེ་ལྟ་ཡིན་དང་ཞེས་བྱ་བ་ནི་དབང་པོ་དུ་མ་འབྱུང་ནའོ། །ཐལ་བ་དེ་ཉིད་ཡིན་ནོ་ཞེས་འབྲེལ་ཏོ། །ཅི་འདྲ་ཞིག་སྙམ་ན་དབང་རྣམས་ཞེས་བྱ་བ་ལ་སོགས་པའོ། །ཕྱེད་ཕྱི་མ་བཤད་པའི་དོན་དུ་ཕྱོགས་སྔ་མ་འགོད་པ་ནི་འོན་ཏེ། སེམས་ཞེས་བྱ་བ་ལ་སོགས་
པའོ། །ལན་ནི་གལ་ཏེ་འོ་ན་ཞེས་བྱ་བ་ལ་སོགས་པའོ། །གལ་ཏེ་དབང་པོ་རྣམས་ལུས་དང་སེམས་ལས་སྐྱེ་བ་ཡིན་པ་དེས་ན་ཤི་བའི་ལུས་ལ་དབང་པོ་མི་སྲིད་པ་ཡིན་ན་དེའི་ཚེ་ནའོ། །སྔོན་གྱི་དབང་པོ་རྒྱུ་ཉིད་དུ་རྟོག་པའི་ཞེན་པས་བདག་ཅག་ལ་མཁོ་བ་མེད་དེ། དབང་པོ་ལ་སོགས་པ་

སེམས་ལས་སྐྱེ་བ་ཁས་བླངས་པ་ཉིད་ལས་འཇིག་རྟེན་སྔ་མ་འགྲུབ་པའི་ཕྱིར་རོ། །དེས་ན་ཞེས་བྱ་བ་ལུས་ལ་སོགས་པ་ལས་སེམས་སྐྱེ་བས་ནའོ། །སྐབས་ཉེ་བར་སྡུད་པ་ནི་དེས་ན་རྒྱུ་མ་ཡིན་པའི་ལུས་མ་ཚང་བས་ཞེས་བྱ་བའོ། །དེའི་ཕྱིར། འདི་འདྲ་
སྒྲུབ་བྱེད་ལྷག་ལྡན་འདོད། །ཅེས་བྱ་བ་འཆད་པ་ནི་འཆི་བའི་སེམས་ཡིན་པའི་ཕྱིར་ཞེས་བྱ་བ་ཉིད་ཅེས་བྱ་བའོ། །ལྷག་མ་དང་ལྡན་པ་ཡིན་ཏེ་ཞེས་བྱ་བ་ནི་འཆི་བའི་སེམས་ཀྱང་ཡིན་ལ། མཚམས་སྦྱོར་བ་ཡང་ཡིན་པའི་ཕྱིར་མ་ངེས་པ་ཉིད་དོ། །ཅི་ལྟར་ཞེ་ན། མ་མཐོང་བ་ཙམ་
གྱིས་ཞེས་བྱ་བའོ། །ལུས་ཐ་དད་པ་ལ་གནས་པའི་ཕྱིར་ཞེས་བྱ་བའི་དོན་གང་ཅི་ཡིན། ཅི་ལུས་ལ་བརྟེན་པའི་ཡིན་ནམ། འོན་ཏེ་ལུས་ལ་དམིགས་པ་ཡིན། །དེ་ལ་རེ་ཞིག་ཕྱོགས་དང་པོ་ནི་རིགས་པ་མ་ཡིན་ཏེ། གང་གི་ཕྱིར་གནས་པའི་ཞེས་བྱ་བ་དེ་ལ་གནས་པའི་ཞེས་བྱ་བའི་
ཐ་སྙད་ཀྱི་དགག་པ་ནི་སྔར་བརྗོད་པ་ཡིན་ནོ། །གང་ལས་ཤེ་ན། རྟེན་བཀག་པ་ཡིས་སོ། །དེས་ན་ལུས་ཐ་དད་པ་ལ་གནས་པའི་ཕྱིར་ཞེས་བྱ་བའི་གཏན་ཚིགས་མ་གྲུབ་པའོ། །ཕྱོགས་གཉིས་པ་སུན་འབྱིན་པ་ནི་རྣམ་ཤེས་ཞེས་བྱ་བའོ། །རྣམ་པར་ཤེས་པ་ཕྱི་མ་སྐད་ཅིག་
ལུས་གཞན་དམིགས་པར་འགྱུར་རོ། །དེས་ན་ལུས་ཐ་དད་པ་ལ་གནས་པའི་ཕྱིར་ཞེས་བྱ་བའི་གཏན་ཚིགས་མ་ངེས་པ་ཉིད་དོ། །དེ་ནི་སྔར་སྤྱིར་བཀག་པ་ཡིན་ནོ་ཞེས་རྟོགས་པར་བྱའོ། །འོ་ན་སེམས་ཅི་ལ་གནས་སྙམ་ན། རྣམ་པར་ཤེས་པ་ནི་ཞེས་གསུངས་སོ། །འདི་ནི་རྟེན་གྱི་རྫས་
ཀྱི་ཡུལ་ལ་བསམས་ནས་བརྗོད་པ་ཡིན་ཏེ། དེ་ལྟ་མ་ཡིན་ན་ནི་འདི་ཡོད་པའི་ཡུལ་ནི་དུས་བཞིན་དུ་བརྟགས་པ་དགག་པར་མི་ནུས་སོ་དེ་ཉིད་ཀྱང་རྟེན་གྱི་རྣམ་པ་ཡིན་ནོ། །དེ་ལྟར་ཕྱེད་སྔ་མ་བཤད་པའི་སྒོ་ནས་མ་གྲུབ་པ་དེ་ཉིད་བརྗོད་ནས་ཕྱོགས་གཉིས་པ་སུན་འབྱིན་པ་ནི། དམིགས་པར་
བྱ་བའི་ལུས་ནི་ཞེས་བྱ་བའོ། །དམིགས་པར་བྱ་བ་ལ་གནས་པའི་ཐ་སྙད་ནི་མེད་དོ་ཞེས་བྱ་བའི་དོན་ཏོ། །རྣམ་པ་འདིའི་སྒོ་ནས་ཀྱང་རྟེན་ཉིད་དུ་མི་འགྲུབ་པ་ཞེས་བསྟན་པའི་དོན་དུ་རྟེན་གྱི་སྒྲར་བརྗོད་དོ། །གལ་ཏེ་གང་གི་རྟེན་དུ་མི་འགྱུར་བ་དམིགས་པར་བྱ་བ་ཉིད་ཇི་ལྟར་ཡིན་སྙམ་ན་ནང་གི་རིག་པའི་

ཞེས་གསུངས་སོ། །ཕྱེད་ཕྱི་མ་འཆད་པ་ནི་མ་ངེས་པ་ཉིད་དུ་བཤད་པ་ནི་དམིགས་པ་ནི་ཞེས་བྱ་བ་ནི་རང་གི་ལུས་དམིགས་པར་གྱུར་པ་བྱེད་པ་པོས་ནི་ནང་བདེ་བ་ལ་རག་པ་ན་གཞན་ལ་འཆོལ་བའི་རྣམ་པར་ཤེས་པ་སྐྱེད་པར་བྱེད་དོ་ཞེས་བྱ་བའི་དོན་ཏོ། །དེས་ཞེས་བྱ་བ་གཞན་གྱི་ལུས་ལ་
དམིགས་པ་པས་ལུས་ཐ་དད་པ་ལ་དམིགས་པའི་ཕྱིར་ཞེས་བྱ་བའི་གཏན་ཚིགས་དེ་དག་ལ་མ་ངེས་པ་ཡིན་ནོ། །ཁྱད་པར་ལུས་ཐ་དད་པ་ཉིད་ཀྱང་མ་གྲུབ་པོ་ཞེས་བརྗོད་པ་ནི་ལུས་གཞན་ཉིད་ཀྱང་ཞེས་བྱ་བའོ། །ཅིའི་ཕྱིར་ཞེ་ན། ལུས་གཅིག་ཉིད་དུ་བཏགས་པའི་ཕྱིར་རོ། །འོན་ཏེ་དོན་
དམ་པར་ཐ་དད་པ་ཡོད་པའི་ཕྱིར། ཁྱད་པར་མ་གྲུབ་པ་ཡིན་ནོ་སྙམ་ན། དོན་དམ་པར་ནི་ཞེས་བྱ་བའོ། །ཇི་ལྟར་ཞེ་ན། ཕྱིས་པ་ལ་སོགས་པའི་ཞེས་སྨོས་སོ། །དེ་ལྟར་སླར་གཏན་ཚིགས་མ་ངེས་པ་ཡིན་ནོ་སྙམ་དུ་དགོངས་པའོ། །གལ་ཏེ་ལུས་འདི་ལ་ཤེས་པ་འདི་ཡོད་དོ་
ཞེས་བྱ་བ་མི་སླུ་བ་དང་ལྡན་པའི་རྟོགས་པ་ནི་རེ་ཞིག་ཡོད་པ་མ་ཡིན་ནམ། དེས་ན་ཇི་ལྟར་རྟེན་ཅིང་འགོག །དེ་ཉིད་ཀྱི་ཕྱིར་ལུས་ནི་ཉེ་བར་ལེན་པ་ཉིད་དུ་མི་འགལ་ལོ་སྙམ་ན་དེ་ཕྱིར་ཞེས་གསུངས་སོ། །རྟེན་ཉིད་རྒྱ་ཆེར་བཀག་པའི་ཕྱིར་ན་ལུས་ལས་ཀྱི་རྒྱུན་ལ་ཕན་འདོགས་པ་ཡིན་ཏེ།
དེས་ན་ལུས་འདི་ལ་བློ་ཡོད་དོ་སྙམ་དུ་རྟོགས་པ་ཡིན་གྱི་ཡིད་ཀྱི་རྒྱུན་སྐྱེ་བ་ནི་སེམས་ཉིད་ལས་ཡིན་ནོ། །དཔེར་ན་འབྲུའི་རྒྱུན་ལ་ཕན་འདོགས་པའི་ཕྱིར་སྦྱང་ལ་སོགས་པའི་དོན་ཡིན་ལ། སྐྱེ་བ་ནི་འབྲུ་གཞན་ལས་ཡིན་པ་བཞིན་ནོ། །དེ་ལྟ་ན་ཡང་སྦྱང་ཚིག་ན་འབྲུ་ཚིག་པ་བཞིན་
དུ། ལུས་ཞིག་པ་ན་སེམས་ཀྱང་འཇིག་པར་འགྱུར་རོ་ཞེ་ན། སྦྱང་ཚིག་པ་ཙམ་གྱིས་ནི་འབྲུ་ཚིག་པ་མ་ཡིན་ཏེ། ཅི་ཞིག་ལྟར་འབྲུ་སྦྱང་ནས་སྤོས་ན་མི་འཚིག་ཀྱང་སྲིད་པའི་ཕྱིར་རོ། །བསྲེག་པར་བྱ་བ་རང་ཉིད་མེ་དང་འབྲེལ་ན་འཚིག་པ་ཡིན་ལ། ལུས་བཞིན་དུ་སེམས་ལ་ནི་
བཤད་པ་དང་བསྲེག་པ་ལ་སོགས་པ་ཡོད་པ་མ་ཡིན་ནོ། །ནོའི་སྒྲ་ནི་སྐབས་ཀྱི་དོན་རྫོགས་པ་ལའོ། །སྐབས་ཀྱི་དོན་གྲུབ་ན་མངོན་པར་འདོད་པའི་དོན་འགྲུབ་པ་ཞེས་མཇུག་བསྡུ་བའི་སྒོ་ནས་སྟོན་པ་ནི་དེས་ན་ཞེས་བྱ་བའོ། །གཞན་པའི་ཡོན་ཏན་ཞེས་བྱ་བ་ནི་བརྩེ་བ་དང་ཆགས་

པ་དང་བྲལ་བ་ལ་སོགས་པའོ། །དེ་ལྟར་འཇིག་རྟེན་ཕ་རོལ་གྲུབ་ན་གོམས་པ་ཉམས་པ་མེད་པའི་ཕྱིར་ན་ཐམས་ཅད་མཁྱེན་པ་ལ་སྙོམས་པའི་རྣམ་པ་གཞན་བརྗོད་པ་ནི་གལ་ཏེ་ཞེས་བྱ་བའོ། །ཁྱད་པར་ཅུང་ཟད་དང་ལྡན་པ་ཞེས་བྱ་བ་ནི་རབ་ཏུ་འགྲོ་བ་གང་ལ་
ཁྱད་པར་ཅུང་ཟད་ཙམ་ཡོད་པའོ། །གང་གི་ཕྱིར་རྣམ་པ་འགའ་ཞིག་ཙམ་དུ་རྣམ་པར་གནས་པའི་རབ་ཏུ་འགྱུར་བ་ནི་གང་གི་ཁྱད་པར་དང་ལྡན་པ་མཐོང་བ་ཡིན་ནོ། །སླར་ཡང་ནི། འབད་རྩོལ་ལ་ནི་ལྟོས་འགྱུར་རམ། །ཞེས་བྱ་བ་ནི་མཆོང་བ་བཞིན་ནོ། །རྟེན་མི་བརྟན་པ་ནི་ཆུའི་དྲོ་བ་
བཞིན་ནོ་འདིའི་རྟེན་ཆུ་ནི་མི་བརྟན་པས་ནའོ། །རྟེན་བརྟན་པའི་རང་བཞིན་ཁོ་ན་འཕེལ་རབ་ཀྱི་མཐར་ཐུག་པ་ཡིན་ནོ་ཞེས་བརྗོད་པར་འདོད་པ་ཡིན་པར་བསམས་ནས་བརྗོད་པ་ནི་རང་བཞིན་དེ་འདྲའང་ཞེས་བྱ་བའོ། །ཡང་འབད་རྩོལ་ལ་ལྟོས་པ་གང་ཡིན་པ་དེ་འདྲ་བ་ཞེས་བྱ་བར་སྦྱར་རོ། །
མཆོང་བ་ནི་ལུས་ཀྱི་རང་བཞིན་མ་ཡིན་ཏེ། སྐད་ཅིག་ཀྱང་གནས་པ་མི་འཐོབ་པའི་ཕྱིར་རོ། །དེ་ཞེས་བྱ་བ་ནི་གང་ཞིག་ཡང་འབད་རྩོལ་ལ་ལྟོས་པའི་རང་བཞིན་དུ་རྟེན་མི་བརྟན་པ་འཕེལ་བ་མ་ཡིན་པ་ཁོ་ནའོ་ཞེས་བྱ་བ་དེ་ཅིའི་ཕྱིར་ཞེ་ན། དེ་ལ་ཞེས་སྨོས་ཏེ། ཁྱད་པར་ཇི་ཙམ་ཞིག་བྱས་པའི་
ཁྱད་པར་དེ་ཙམ་ལ། ཕན་བཏགས་ནུས་ཅན་ཏེ། ནུས་པ་ཟད་པའི་སྒྲུབ་པར་བྱེད་པ་རྣམས་ལ། ཁྱད་པར་ཕྱི་མ་དག་ལ་ནུས་པ་མེད་པའི་ཕྱིར་ཡང་འབད་པ་ལ་ལྟོས་པའི་ཁྱད་པར་འཕེལ་བ་མ་ཡིན་ནོ། །རྟེན་ཐམས་ཅད་ཀྱི་ཚེ་གནས་པ་མེད་པའི་ཡང་ཕྱིར་རོ། །རྟེན་མི་བརྟན་པ་ཅན་གྱི་ཁྱད་
པར་འཕེལ་བ་མ་ཡིན་ནོ། །གལ་ཏེ་གང་དང་གང་ཁྱད་པར་ཡིན་པ་དེ་ཐམས་ཅད་ནི་འཕེལ་བ་གནས་པ་ཅན་ཡིན་ཏེ། དཔེར་ན་མཆོང་བ་ལ་སོགས་པ་བཞིན་ནོ། །སེམས་ཀྱི་ཡོན་ཏན་རྣམས་ཀྱང་དེ་ལྟ་བུ་ཡིན་ནོ། །དེས་ན་དེ་དག་འཕེལ་བ་གནས་པ་མེད་པ་ཇི་ལྟར་འགྱུར་སྙམ་ན། ཁྱད་
པར་ཡིན་ནོ་ཅོག་ནི་ཞེས་གསུངས་སོ། །གལ་ཏེ་མཆོང་བ་ལ་སོགས་པ་ནི་རང་བཞིན་ཡོད་པ་ཙམ་གྱིས་དེ་ལྟར་འགྱུར་བ་མ་ཡིན་ནམ། དེ་བཞིན་དུ་སེམས་ཀྱི་ཡོན་ཏན་རྣམས་ཀྱང་འགྱུར་རོ་སྙམ་ན། མཆོང་བ་དང་ཞེས་སྨོས་སོ། །དེ་ལྟར་ཞེས་བྱ་བ་ནི་བོགས་འབྱུང་བ་གནས་པ་ལ་

སྟོན་པར་རོ། །འོ་ན་ཇི་ལྟར་དེ་ལྟར་འགྱུར་སྙམ་ན། འོན་ཀྱང་ཞེས་གསུངས་སོ། །ཡང་རྩོལ་བ་ལ་ལྟོས་པ་ཉིད་གསལ་བར་བྱ་བའི་དོན་དུ་མཆོང་བ་ནི་ཞེས་གསུངས་སོ། །ཇི་ལྟར་ན་ཡང་རྩོལ་བ་ལ་ལྟོས་པ་ཅན་ཡིན་སྙམ་ན། གང་ལ་འཕེལ་བ་རྣམ་པར་གནས་པ་མེད་པར་
འགྱུར་ལ། མེ་དང་འབྲེལ་བ་མེད་ཀྱང་དེ་ཡོད་པ་ནི་མ་ཡིན་ནོ་ཞེས་སྨོས་སོ། །གང་ལས་ཞེས་བྱ་བ་ནི་མེ་དང་འབྲེལ་བ་ལོག་ཀྱང་གནས་པ་ལས་སོ། །འཕེལ་བ་རྣམ་པར་གནས་པ་ཉིད་ལ་གཉི་གས་ཁྱབ་པ་ཉེ་བར་སྡུད་པ་ནི་དེའི་ཕྱིར་འཕེལ་བ་མཐར་ཐུག་པ་མ་ཡིན་པ་ཉིད་ནི་ཞེས་བྱ་བའོ། །གཉི་ག་མེད་པའི་
ཕྱིར་ཡིད་ཀྱི་ཡོན་ཏན་རྣམས་ནི་ཁྱབ་པར་བྱེད་པ་སྟོན་པ་ནི། དེ་མེད་པའི་ཕྱིར་དང་ཞེས་བྱ་བའོ། །བཟློག་པ་སྲིད་པའི་ཕྱིར་རོ་ཞེས་བྱ་བ་ནི་རྟེན་བརྟན་པ་ཉིད་ལ་སོགས་པ་སྲིད་པའི་ཕྱིར་རོ། །འོ་ན་ཡང་རྩོལ་བ་ལ་ལྟོས་པ་རང་གི་ངང་གིས་འཇུག་པར་འགྱུར་རོ་སྙམ་ན། ཡང་རྩོལ་བ་ལ་ལྟོས་པ་གང་ཡིན་པ་ཞེས་བྱ་བའོ། །
རང་གི་ངང་གིས་འཇུག་པར་མི་འགྱུར་རོ་ཞེས་བྱ་བའི་དོན་ཏོ། །སྔར་བྲམ་ཟེ་ཡིན་པ་ལས་ཕྱིས་ཐོད་པ་ཅན་དུ་གྱུར་པ་དེ་ནི་ལོག་པ་མེད་པ་སྟེ། བཙོག་པ་མེད་པའོ། །བཤད་ཟིན་པའི་ཡོན་ཏན་དང་ལྡན་པས་རབ་ཀྱི་མཐར་ཐུག་པར་འགྲོ་བའི་ཕྱིར་ན་དཀར་ཡོལ་སར་པ་ལྟར་ཐོད་པ་ཡང་ཟ་བའི་ཕྱིར་རོ། །སྙིང་རྗེ་ལ་
སོགས་པ་ཡང་རྟེན་བརྟན་པ་དང་། རང་གི་ངོ་བོར་གྱུར་པ་ཡིན་ནོ་ཞེས་ཞེ་ལ་བཞག་པ་ཡིན་ནོ། །དེ་ཉིད་ཀྱི་ཕྱིར་མཆོང་བ་དང་ཆུ་བསྐོལ་བ་ལས་ཆོས་མི་མཐུན་པ་སྟོན་པ་ནི་གང་ཞིག་ཡང་རྩོལ་བ་ལ་ལྟོས་པ་དང་ཞེས་བྱ་བའོ། །རང་བཞིན་ཉིད་མིན་ཕྱིར་ཞེས་བྱ་བ་ནི་རང་གི་ངང་གིས་འཇུག་
པ་ཡང་མ་ཡིན་པའི་ཕྱིར་རོ། །ཁྱད་པར་འཕེལ་ཡང་མཐར་ཐུག་པར་འཕེལ་བ་མ་ཡིན་ནོ་ཞེས་བྱ་བ་ནི་ལྷག་མའོ། །འོ་ན་གང་ཞིག་ཤིན་དུ་འཕེལ་བ་དང་ལྡན་པར་འགྱུར་སྙམ་ན། གང་ཚེ་བྱས་གྱུར་པ་ཞེས་བྱ་བའོ། །ཡང་གང་གི་ཚེ་བྱས་ཟིན་པའི་ཁྱད་པར་ཡང་རྩོལ་བ་ལ་ལྟོས་ན་
དེའི་ཚེ་རྩོལ་བ་གཞན་དག་ཁྱད་པར་གཞན་བྱེད་པར་འགྱུར་རོ། །དེ་ལྟ་བུར་གྱུར་པའི་ཁྱད་པར་ནི་ཤིན་དུ་འཕེལ་བར་འགྱུར་རོ་ཞེས་བྱ་བའི་དོན་ཏོ། །ཇི་ལྟར་འདི་རང་བཞིན་ཉིད་མ་ཡིན་སྙམ་ན། རྒྱུ་ཉེ་བ་ལ་ལྟོས་པ་ནི་ཞེས་གསུངས་སོ། །དེ་སྐད་ཅེས་བྱ་བ་ནི་རང་གི་ངོ་བོ་

ཉིད་ཡིན་པའི་ཕྱིར་རོ། །དེས་ན་ཞེས་བྱ་བ་ནི་ངོ་བོ་ཉིད་མ་ཡིན་པས་ནའོ། །ཆོས་མི་མཐུན་པར་བརྗོད་པ་ནི་བརྩེ་བ་ལ་སོགས་པ་ཞེས་བྱ་བའོ། །གལ་ཏེ་ཤེས་རབ་ལ་སོགས་པ་ཡང་གོལ་བ་ཉིད་དུ་མཐོང་སྙམ་ན། འདི་ནི་བག་ཆགས་བརྟན་པ་མེད་པ་ལས་ཡིན་
ཏེ། ཤིན་དུ་བརྟན་པར་གོམས་པར་བྱས་པ་བརྗོད་པར་འདོད་པ་ཡིན་ནོ། །དེ་ཉིད་བསྟན་པའི་ཕྱིར་ཡང་ནས་ཡང་དུ་དེ་གོམས་པར་བྱས་པའི་ཁྱད་པར་ནི་ལྡོག་པ་ལ་བརྟེན་པ་མ་ཡིན་ནོ་ཞེས་བཤད་དོ། །དེ་ལྟ་ན་ཡང་འདི་དག་ཤིན་དུ་འཕེལ་བར་ཇི་ལྟར་འགྱུར་སྙམ་ན། དེ་བཞིན་དུ་ཞེས་
གསུངས་སོ། །འདིས་ནི་འདི་ལ་ཕན་བཏགས་ནུས་ཅན་ཞེས་བྱ་བ་དང་། བྱས་ཏེ་གལ་ཏེ་སླར་ཡང་ནི་ཞེས་བྱ་བ་ལ་སོགས་པའི་རྣམ་འགྲེལ་རྣམ་པར་བཀྲལ་བ་ཡིན་ནོ། །གཅིག་ནི་ཞེས་བྱ་བ་ནི་བརྩེ་བ་ལ་སོགས་པའོ། །གཞན་ནི་ཆུའི་དྲོ་བ་ལ་སོགས་པའོ། །མཆོང་བ་དང་ཆུ་
བསྐོལ་བ་ལ་སོགས་པ་དེ་ནི་ཡང་རྩོལ་བ་ལ་མི་ལྟོས་པས་རང་གི་ངང་གིས་འཇུག་པ་མ་ཡིན་ནོ། །བརྩེ་བ་ལ་སོགས་པ་དེ་ལས་བཟློག་པ་བཤད་པ་ནི། བརྩེ་བ་ལ་སོགས་པ་ནི་ཞེས་བྱ་བའོ། །མཆོང་བ་ལ་སོགས་པ་རང་གི་ངང་གིས་འཇུག་པ་མ་ཡིན་པ་དེའི་ཕྱིར་རོ། །དེ་དག་ལ་ཞེས་བྱ་བ་
ནི་སྐྱེས་བུ་རྣམས་ལའོ། །དེ་ནི་བརྩེ་བ་ལ་སོགས་པའི་ཡོན་ཏན་ནོ། །ངོ་བོ་ཉིད་སྐྱེས་ན་ནི་རང་གི་ངང་གིས་འཇུག་པའོ། །གལ་ཏེ་ཇི་ལྟར་ཡོངས་སུ་མཐོང་བའི་ཁྱད་པར་ཙམ་འགྱུར་མོད་ཇི་ལྟ་ཤིན་དུ་འཕེལ་བའི་མཐར་ཐུག་པར་འགྱུར་སྙམ་ན། གང་ཕྱིར་ཞེས་གསུངས་སོ། །དེའི་ཕྱིར་
ཞེས་ཁོང་ནས་ཕྱུང་ལ། བརྩེ་བ་ལ་སོགས་པ་ཞེས་བྱ་བ་ལ་སོགས་པ་དང་སྦྱར་རོ། །དེ་ལྟ་ཡིན་དང་ཤིན་དུ་འབོགས་པའི་མཐར་ཐུག་པར་ཡང་འགྱུར་གྱི། །ཇི་ལྟར་ཡོངས་སུ་མཐོང་བ་བཞིན་པའི་ཁྱད་པར་ཙམ་ནི་མ་ཡིན་ནོ། །ཇི་ལྟར་ཤེས་རབ་ལ་སོགས་པའི་བློ་རྣམས་ལ་ཡང་ནས་
ཡང་དུ་ལྷག་པར་འགྱུར་སྙམ་ན། བརྩེ་བ་ལ་སོགས་པ་ནི་ཞེས་བྱ་བ་སྨོས་སོ། །དེས་ན་དེ་དག་ནི་ཤིན་དུ་འཕེལ་བར་འགྱུར་རོ་ཞེས་བྱ་བར་དགོངས་པའོ། །ཇི་ལྟར་ལྟོས་པ་དང་བཅས་པ་མ་ཡིན་སྙམ་ན་འདི་ལྟར་ཞེས་བྱ་བ་གསུངས་སོ། །གལ་ཏེ་བརྩེ་བ་ལ་སོགས་པ་ནི་ལན་དུ་

ཕན་འདོགས་པས་འཇུག་པར་མཐོང་བ་མ་ཡིན་ནམ་དེས་ན་དེ་སྐད་ཇི་སྟེ་བརྗོད་ཅེ་ན། བརྩེ་སྩོགས་ལན་དུ་ཞེས་བྱ་བའོ། །བྱང་ཆུབ་སེམས་དཔའི་བརྩེ་བ་ལ་སོགས་པ་ནི་ལན་དུ་ཕན་འདོགས་པ་ལ་ལྟོས་པ་མ་ཡིན་གྱི་འོན་ཀྱང་ཤེས་རབ་ལ་སོགས་པ་རིགས་མཐུན་པའི་བློ་ལས་བྱུང་
བ་ཡིན་ནོ། །དེ་ཉིད་ཀྱི་ཕྱིར་དེ་དག་ནི་དམན་པ་མ་ཡིན་ནོ་ཞེས་གསུངས་པ་ནི་དེའི་ཞིང་དུ་ཞེས་བྱ་བའོ། །བརྩེ་བ་ལ་སོགས་པའི་བློ་དེས་ཞིང་དུ་བྱས་པའི་རྒྱུ་གང་ལ་ཡོད་པ་ཞེས་ཚིག་རྣམ་པར་སྦྱར་རོ། །དེས་ན་ཞེས་བྱ་བར་ནི་ཆུང་བར་འགྱུར་བ་མ་ཡིན་པས་ནའོ། །དེ་དག་ཅེས་བྱ་བ་ནི་
བརྩེ་བ་ལ་སོགས་པའོ། །རྒྱས་པར་མི་འགྱུར་བའི་མཚན་ཉིད་ཀྱིས་ཞན་པར་ལྟ་ག་ལ་འགྱུར། ཡང་ནས་ཡང་དུ་རྒྱས་པ་ཁོ་ནར་འགྱུར་རོ་ཞེས་བྱ་བའི་དོན་ཏོ། །དེ་ཡང་ཞེས་བྱ་བ་ནི་མཆོང་བ་ཡང་ངོ་། །དེའི་ཆོས་ནི་མངོན་པར་འཕེལ་བ་མཐར་ཐུག་པ་མེད་པའོ། །དེ་ལྟ་ན་ཡང་མ་
ཡིན་ཏེ། །དེས་བཟློག་པ་ཡིན་ཏེ། སྐབས་ཀྱི་ཤེས་རབ་ལ་སོགས་པ་ལ་འཕེལ་བ་མཐར་ཐུག་པ་མེད་པ་ཡང་མ་ཡིན་ནོ་ཞེས་བྱ་བར་སེམས་ནའོ། །སྟོབས་དང་རྩོལ་བ་དག་ལས་མཆོང་པ་ཡིན་ནོ་ཞེས་འབྲེལ་ཏོ། །མཆོང་བ་སྟོབས་ལ་སོགས་པའི་འབྲས་བུ་བསྒྲུབ་པའི་དོན་དུ་ལྡོག་
པ་བརྗོད་པ་ནི། ཤིན་དུ་ལེགས་མཆོང་གོམས་པར་བྱས་པ་ལ་ཡང་ཞེས་བྱ་བའོ། །དེས་ན་དེ་གཉིས་ནི་མཆོང་པའི་རྒྱུ་ཡིན་ནོ་ཞེས་བྱ་བ་དགོངས་པའོ། །འོ་ན་ནི་གང་གིས་མཆོང་པ་མཐའ་ཐུག་པ་མེད་པར་འགྱུར་བ། དེ་གཉིས་རྣམ་པར་གནས་པ་མེད་པའི་བདག་ཉིད་དུ་འགྱུར་རོ་
ཞེ་ན། སྟོབས་དང་ཞེས་བྱ་བ་གསུངས་སོ། །རྣམ་པར་གནས་པའི་བདག་ཉིད་ནི་ནུས་པ་གནས་པ་ཉིད་དོ། །གནས་པའི་བདག་ཉིད་དུ་ཞེས་བྱ་བ་ནི་སོ་སོར་ངེས་པ་ཉིད་དུའོ། །གཞན་དུ་ནི་མ་ཡིན་ནོ་ཞེས་བྱ་བ་ནི་མཐའ་ཐུག་པ་མ་ཡིན་པའོ། །གོམས་པ་ཉིད་ལས་ཡིན་གྱི་སྟོབས་
དང་རྩོལ་བ་ལས་ནི་མ་ཡིན་ནོ། །དེས་ན་འདི་གཉིས་ནི་དེའི་རྒྱུད་ཉིད་མ་ཡིན་ནོ་སྙམ་དུ་བསམས་པའོ། །དེ་ལྟ་མ་ཡིན་ན་ཞེས་བྱ་བ་ནི་གོམས་པའི་འབྲས་བུ་ཉིད་མ་ཡིན་ནའོ། །ཕྱིས་མ་གྲུབ་པར་ཐལ་ལོ་ཞེས་བྱ་བ་ནི་སྔར་ཡང་ཞེས་བྱ་བར་རྟོགས་པར་བྱའོ། །ཅིའི་ཕྱིར་ཞེ་ན། དེའི་རྒྱུ་

སྟོབས་ནི་སྔར་ཡང་ཡོད་པའི་ཕྱིར་རོ། །མཆོང་པའི་ཡུལ་ཅན་གྱི་སྟོབས་ཅན་གྱི་སྟོབས་དེ་ནིའོ། །དེ་ལྟ་ན་ཞེས་བྱ་བ་ནི་མཆོང་པའི་ཡུལ་ཅན་གྱི་གོམས་པས་བསྒྲུབས་པ་ཡིན་ནའོ། །དེ་ཉིད་དུ་ཞེས་བྱ་བ་ནི་མཐའ་ཐུག་པ་མེད་པ་མ་ཡིན་པ་ཞེས་བྱ་བ་ལ་
སོགས་པ་དེ་ལྟ་བུའི་རང་བཞིན་དུའོ། །སྐྱེས་བུ་དེ་ནིའོ། །དེའི་ཕྱིར་ཞེས་བྱ་བ་ནི་མི་མཐུན་པ་གསལ་བའི་ཕྱིར་རོ། །སྟོབས་དེས་ནའོ། །ཇི་སྟེ་ཞེས་བྱ་བ་ནི་བཅུད་ཀྱིས་ལེན་ཟོས་པ་ལས་སྟོབས་སྐྱེ་བ་ཡིན་གྱི་སྔར་ཡོད་པ་ནི་མ་ཡིན་ནོ་ཞེ་ན། ལན་དུ་དེ་ཡང་ཞེས་བྱ་བའོ། །གནས་
པ་ཉིད་དོ་ཞེས་བྱ་བ་ནི་མཐའ་ཐུག་པ་མེད་པ་མ་ཡིན་པའོ། །ཤེས་རབ་ལ་སོགས་པའི་ཚུལ་དུ་གོམས་པ་ཉིད་ལས་མཆོང་བ་ཡིན་ནོ་ཞེས་བྱ་བ་རྣམ་པ་གཞན་གྱིས་འགོག་པ་ནི་མིང་དང་ཞེས་བྱ་བའོ། །བྱ་ཁྱུང་མི་དང་སྤྲེའུ་མངལ་ནས་སྐྱེས་པ་དག་ལས་སྐྱེ་གནས་ཁྱད་པར་དུ་
གྱུར་པ་ཡིན་ལ། སྤྲེའུ་ནི་མི་ལས་རིགས་ཁྱད་པར་དུ་གྱུར་པ་ཡིན་ནོ། །རིགས་མཐུན་པ་ཉིད་ཀྱི་མི་རྣམས་ལ་ཁ་ཅིག་ཉིད་བཅུད་ཀྱིས་ལེན་ཟོས་པའི་སྟོབས་ཀྱིས་ཁྱད་པར་དུ་གྱུར་པ་ཡིན་ནོ། །བརྩེ་བ་ལ་སོགས་པ་ནི་མཆོང་བ་ལས་བཟློག་པར་བརྗོད་པ་ནི་བརྩེ་བ་ལ་སོགས་པ་
དག་ནི་ཞེས་བྱ་བའོ། །གཞན་ལ་མི་ལྟོས་པ་ཉིད་དོ་ཞེས་བྱ་བ་ནི་བརྩེ་བ་ལ་སོགས་པ་ནི་རིགས་ལ་སོགས་པ་གཞན་ལ་ལྟོས་པ་མ་ཡིན་ནོ། །གོམས་པ་ཙམ་ལ་ལྟོས་པ་ཡིན་ཏེ། དེ་མེད་ན་མེད་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་གཞན་གྱིའོ། །མ་ཡིན་
ཏེ་ཞེས་བྱ་བ་ནི་ལན་ནོ། །དེས་ན་སྟོབས་ནི་གོམས་པའི་འབྲས་བུ་མ་ཡིན་ཏེ། དེ་འཕེལ་བ་ན་དེ་མེད་པའི་ཕྱིར་རོ་ཞེས་བྱ་བར་བསམས་པའོ། །དེའི་བདག་ཉིད་ནི་སྙིང་རྗེ་ལ་སོགས་པའི་བདག་ཉིད་དུའོ། །སྙིང་རྗེའི་བདག་ཉིད་དུ་གྱུར་པ་ཡོད་པ་ཡང་མ་ཡིན་ནོ། །རང་ས་
བོན་ལས་བྱུང་བ་ནི་བརྩེ་བའི་ས་བོན་ལས་བྱུང་བའོ། །མི་མཐུན་པའི་ཕྱོགས་ཞེ་སྡང་ལ་སོགས་པས་གནོད་པ་མེད་པ་དེའི་ཚེ་སེམས་ཀྱི་རྒྱུན་ལ་དེ་བདག་ཉིད་དུ་འགྱུར་ཏེ། རང་གི་ངང་གིས་འཇུག་པར་འགྱུར་རོ། །འོ་ན་ཇི་ལྟར་དེའི་བདག་ཉིད་དུ་འགྱུར་སྙམ་ན། གལ་ཏེ་རྟེན་བརྟན་

པ་ཡང་ཡིན་པ་ཞེས་བྱ་བའོ། །དེ་ཉིད་བཤད་པ་ནི་དེ་ལ་ཞེས་བྱ་བའོ། །གདོན་མི་ཟ་བར་ཞེས་བྱ་བ་ནི་བརྩེ་བའི་བདག་ཉིད་གོམས་པ་སྔོན་དུ་འགྲོ་བ་ཅན་ནོ་ཞེས་ཁས་བླང་བར་བྱ་སྟེ། མཐོང་བའི་ཕྱིར་རོ། །མཐོང་བ་ཉིད་བཤད་པ་ནི་འདི་ལྟར་ཞེས་བྱ་བའོ། །རྩ་བ་ཡིན་ཞེས་བྱ་བ་
ནི་རྒྱུ་ཡིན་པའོ། །ནིའི་སྒྲ་ནི་ཁོ་ནའི་དོན་ཏོ། །དེ་ཉིད་ཀྱི་ཕྱིར་བཤད་པ་བརྩེ་བ་ལ་སོགས་པ་གོམས་པ་ཞེས་བྱ་བའོ། །ཅིའི་ཕྱིར་སྙམ་ན། སྐྱེ་བ་ནི་ཞེས་གསུངས་སོ། །བསྒྲུབ་པར་བྱ་བ་ཡིན་ནོ་ཞེས་བྱ་བར་གཅད་དོ། །སྐྱེ་བ་ལས་ནི་ཡོད་པ་ཉིད་དེ་དེའི་ཕྱིར་རོ། །གང་ཡོད་པས་
འགའ་ཡང་བླང་བར་བྱ་བ་ཉིད་མ་ཡིན་པར་སྣང་བར་འགྱུར་བ་ཞེས་བྱ་བ་ནི་ཁམས་གསུམ་པ་ལ་སྡང་བའི་རྣམ་པ་ཅན་གྱི་ཆོས་སོ། །དེ་བཞིན་དུ་ཞེས་བྱ་བ་ནི་ཡིད་ལོག་པ་བཞིན་ནོ། །ཆགས་བྲལ་ནི་མཉམ་པ་ཉིད་ཀྱི་རྣམ་པ་ཅན་དུ་འཆད་པར་འགྱུར་ལ། ཆགས་ཀྱི་རབ་ཀྱི་མཐར་
ཐུག་པ་ནི་ཟད་པ་ལས་ཁྲག་འཛག་པས་འཆི་བའི་མཐར་ཐུག་པར་འགྱུར་བའོ། །དེ་ལྟ་ན་ཞེས་བྱ་བ་ནི་ཡིད་ལོག་པ་ལ་སོགས་པ་བདག་ཉིད་དུ་གྱུར་པ་བཞིན་དུ་སྙིང་རྗེ་དང་ལྡན་པ་བརྩེ་བ་ཆེན་པོའི་བདག་ཉིད་དུ་གྱུར་པ་ཡིན་ནོ། །གལ་ཏེ་བརྩེ་བ་དང་ལྡན་པ་ནི་གཞན་གྱི་སྡུག་བསྔལ་གཞོམ་
པ་ཉིད་ལ་བརྩོན་མོད། རང་གི་སྡུག་བསྔལ་གཞོམ་པའི་ཐབས་བཙལ་བས་ཅི་བྱ་ཞེ་ན། རང་གི་སྡུག་བསྔལ་མ་གསལ་བར་ཞེས་གསུངས་སོ། །འདིས་ནི་དངོས་པོ་ཐམས་ཅད་མངོན་དུ་བྱས་པ་མེད་པར་བྱ་བ་འདིའི་ཉེ་བར་མཚོན་བྱེད་ཡིན་ནོ། །དེ་ཉིད་ཀྱི་ཕྱིར་དེས་ན་ཞེས་
གསུངས་ཏེ་མི་ནུས་པས་ནིའོ། །ཅིའི་ཕྱིར་ཐམས་ཅད་ཀྱི་ཚེ་དེ་སྟོན་པ་སྲིད་པ་མ་ཡིན་ཞེ་ན། རང་གི་དོན་འདོད་པ་ཞེས་སྨོས་སོ། །ཐར་པ་རྣམས་ནི་རང་གི་དོན་འདོད་པ་མེད་དོ་ཞེས་བྱ་བར་དགོངས་སོ། །དམྱལ་བ་ལ་སོགས་པར་སྐྱེས་པའི་དུས་ན་ཡང་མེད་པའི་ཕྱིར་རོ། །
འདིས་ནི་རང་གི་སྡུག་བསྔལ་ཟད་པ་ལ་མངོན་པར་སྦྱོར་བར་བརྗོད་དོ། །གལ་ཏེ་གང་གིས་འདི་ཡང་བརྗོད་པར་བྱ་བ་དངོས་པོ་ཐམས་ཅད་མངོན་དུ་བྱ་བ་ལ་མངོན་པར་སྦྱོར་བ་མེད་ན་ཆད་པ་ཅི་ཡོད་སྙམ་ན། འཇིག་རྟེན་གྱི་ཁམས་འོད་ཟེར་ཅན་གྱི་ཁམས་ཞེས་བྱ་བ་ལ་སོགས་པ་གསུངས་

ཏེ། དེས་ན་འདི་བརྗོད་པར་བྱ་བ་ཡིན་ནོ། །ཐམས་ཅད་ཅེས་བྱ་བ་ནི་རང་གི་སྡུག་བསྔལ་ཟད་པ་ལ་སོགས་པའོ། །མངོན་དུ་བྱེད་པ་ན་ཞེས་བྱ་བ་འཕགས་པའི་བདེན་པ་ལ་སོགས་པ་རྣམས་སོ། །རྟོག་པ་ནི་རང་གི་ངོ་བོ་དང་རང་གི་ཆོས་ཀྱི་སྒོ་ནས་ངེས་
པར་གཟུང་ནས་ངེས་པར་རྟོག་པའོ། །རྣམ་པར་དཔྱོད་པ་ཐར་པའི་འདོད་པ་ནི་ལུང་དང་རིགས་པས་སྡུག་བསྔལ་གྱི་རྟོག་པ་མཛད་དོ། །གཙོ་བོའི་དོན་ཉིད་ཀྱིས་ན་སྡུག་བསྔལ་གྱི་རྒྱུ་ཡོངས་སུ་སྨོས་ཏེ། ལུང་ལ་བརྟ