Luận tạng Tây Tạng (Tengyur) — Tập 163

ད་པ་ཕྱིར་གཏང་བའི་སྔགས་ཀྱང་དེ་བཞིན་དུ་ཅི་རིགས་པར་སྦྱོར་རོ། །གང་ཟག་ལ་ཕྱིར་གཏང་བའི་སྔགས་ཀྱི་གཞུང་ནི་ཞུ་བ་ལས། བཙུན་པ་བཅོམ་ལྡན་འདས་ཀྱིས་གལ་ཏེ་ཡོངས་སུ་གནས་པ་བྱེད་པའི་དགྲ་བོ་འོངས་ན་དེས་སྤོ་བའི་སྤྱོད་པ་བག་ཡངས་སུ་བྱའོ་ཞེས་
བཀའ་སྩལ་ན། དེས་དེ་ཇི་ལྟར་བག་ཡངས་སུ་བགྱི། ཉེ་བ་འཁོར་དགེ་སློང་དེས་ཆོས་གོས་ཕྲག་པ་གཅིག་ཏུ་བྱས་ཏེ། མཆིལ་ལྷམ་དག་ཕུད་ནས་དགེ་སློང་གི་དགེ་འདུན་དུ་ཙོག་པུར་འདུག་སྟེ་འདི་སྐད་ཅེས་བརྗོད་པར་བྱའོ། །བདག་དགེ་སློང་ཡོངས་སུ་གནས་པ་བགྱིས་པའི་དགྲ་བོ་དགེ་
སློང་མཆིས་ཏེ། བདག་མིང་འདི་ཞེས་བགྱི་བ་སྤོ་བའི་སྤྱོད་པ་བག་ཡོངས་སུ་བགྱིད་ཅིང་སླར་ཡང་ལེན་བར་བགྱིའོ། །ཡང་བླངས་ཏེ་སྤྱོད་པར་བགྱིད་ན་ཚེ་དང་ལྡན་པ་དག་གིས་བདག་ངོ་ཚ་མ་མཆིས་པར་མི་གཟུང་དུ་གསོལ། །དེ་བཞིན་དུ་ལན་གཉིས་ལན་གསུམ་དུ་བཟླས། ཐབས་ཡིན་

ནོ་ལེགས་སོ་ཞེས་གསུངས་པ་ཡིན་ནོ། །དགྲ་བོ་སོང་ནས་ཕྱིར་ཡང་དེ་བཞིན་དུ་བླང་བར་བྱ་སྟེ། དེ་ནི་སྤོ་བ་དང་མགུ་བར་བྱ་བ་སྤྱོད་པ་གཉི་གའི་སྤྱོད་པ་ཡིན་ནོ། །འཇིགས་པ་དང་བྲལ་ན་དེ་ཉིད་དུ་ཕྱིར་བླང་བར་བྱའོ་ཞེས་བྱ་བ་ནི། གང་ཟག་འཐབ་ཀྲོལ་ཅན་དེ་སོང་
ཞིང་འཇིགས་པ་དང་བྲལ་ན་གཙུག་ལག་ཁང་དེ་ཉིད་དུ་སྤོ་བ་དང་མགུ་བར་བྱ་བ་སྤྱད་པ་དེ་དགེ་འདུན་ཚོགས་པའམ་གང་ཟག་གི་མདུན་དུ་སྔགས་ཀྱི་ཡང་ཕྱིར་བླང་བར་བྱ་བའོ། །དེའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་མིང་འདི་ཞེས་བགྱི་བ་སྤོ་བ་
བགྱིད་པས། དགེ་སློང་འཐབ་ཀྲོལ་བགྱིད་པ་མཚང་འདྲུ་བར་བགྱིད་པ་འཐབ་མོ་བགྱིད་པ། འགྱེད་པར་བགྱིད་པ། རྩོད་པར་བགྱིད་པ་དག་མཆི་ཞེས་ཐོས་ཏེ། དེ་དག་གིས་བདག་ལ་གཞི་འདིས་གླེང་བར་འགྱུར་དྲན་པར་བགྱིད་པར་འགྱུར་བས། བདག་གིས་དེ་སྐད་ཐོས་ནས་དགེ་སློང་
རྣམས་ཀྱི་མདུན་དུ་སྤོ་བ་སླར་བཏང་བ་ཕྱིར་རྒོལ་བ་མི་མཛའ་བ་དེ་དག་སླར་མཆིས་ལགས་པས་བདག་སྤོ་བ་ཡང་སླར་ལེན་ཏོ། །སྤོ་བ་ཞག་མ་འཁོར་བ་རྣམས་བགྱིའོ། །དགེ་འདུན་བཙུན་པ་རྣམས་ཀྱིས་བདག་ཡོངས་སུ་གནས་པར་བགྱིད་པར་གཟུང་དུ་གསོལ། །ལན་གསུམ་དུ་བཟླས་ཞེས་
གསུངས་པ་ཡིན་ནོ། །གཞི་ནས་སྤོ་བ་ལ་སོགས་པ་དང་མགུ་བར་བྱ་བ་ལ་སོགས་པ་སྤྱོད་པ་ཕྱིར་བླང་བའི་སྔགས་ཀྱང་དེ་བཞིན་དུ་ཅི་རིགས་པར་སྦྱར་རོ། །ས་གཞན་ན་གནས་པའི་སྤྱོད་པའི་གཞིའོ་ཞེས་བྱ་བ་དེ་འདུལ་བའི་གཞིར་གཏོགས་པ་བཤད་ཟིན་ཏོ། །ད་ནི་ས་གཞན་དུ་
གནས་པའི་སྤྱོད་པའི་གཞི་ཞུ་བའི་སྐབས་བསྡུ་བའི་ཕྱིར། སྤོ་བ་དང་མགུ་བར་བྱ་བ་སྤྱོད་པ་རང་བཞིན་དུ་གནས་པ་དང་ལྷན་ཅིག་ཏུ་གཡོགས་མ་གཅིག་པར་ཉལ་ན་ཉིན་མཚན་དེ་བཅད་དོ་ཞེས་བྱ་བ་སྨྲས་ཏེ། ཡོངས་སུ་གནས་པ་དང་མགུ་བར་བྱ་བ་སྤྱོད་པ་རང་བཞིན་དུ་གནས་པ་དང་ལྷན་ཅིག་ཏུ་
གཡོགས་མ་གཅིག་པའི་གནས་སུ་ཉལ་ན་ཇི་སྲིད་ཉལ་བའི་ཉིན་མཚན་དེ་སྤོ་བར་བྱ་བ་དང་། མགུ་བ་སྤྱོད་པར་བྱ་བའི་ཞག་ཏུ་བགྲང་བར་མི་བྱ་ཞིང་གཅད་པར་བྱ་བའོ། །འདིར་གཞུང་ནི་སྤོ་བ་བྱེད་པས་རང་བཞིན་དུ་གནས་པ་དང་ལྷན་ཅིག་ཏུ་གཡོགས་མ་གཅིག་པར་ཉལ་ན་དེའི་ཉིན་མཚན་

དེ་སྤོ་བ་དང་མགུ་བར་བྱ་བ་སྤྱོད་པར་མི་བགྲང་བར་ཉིན་མཚན་དེ་བཅད་དེ་བགྲང་བར་བྱའོ། །མགུ་བར་བྱ་བ་སྤྱོད་པ་ལ་ཡང་དེ་བཞིན་ནོ་ཞེས་གསུངས་པ་ཡིན་ནོ། །མཚམས་ཀྱི་ཕྱི་རོལ་དུ་ཡང་ངོ་ཞེས་བྱ་བ་ཡང་། ཉལ་ན་ཉིན་མཚན་དེ་བཅད་དོ་ཞེས་བྱ་བའི་རྗེས་སྙགས་པའི་ཕྱིར་ཡང་ངོ་
ཞེས་བྱ་བའི་སྒྲ་སྨོས་སོ། །མ་བརྗོད་ན་ཡང་ངོ་ཞེས་བྱ་བ་ཡང་། ཡོངས་སུ་གནས་པར་དང་མགུ་བར་བྱ་བ་སྤྱོད་པའི་ཞག་འདས་པ་དང་། འབྱུང་བར་འགྱུར་བ་མ་བརྗོད་ན་ཡང་ཉིན་མཚན་དེ་གཅད་པར་བྱ་བའོ། །ཐོས་པར་བྱ་བ་དག་མཚམས་དེ་ན་ཉེ་བར་མི་འཁོད་ན་དེ་མི་འབྱུང་ངོ་ཞེས་བྱ་བ་ནི།
མཚམས་གང་དུ་དེ་སྤྱད་པར་བྱ་བའི་མཚམས་དེ་ན་གང་ལ་བརྗོད་ཅིང་ཐོས་པར་བྱ་བའི་དགེ་སློང་དག་ཉེ་བར་མི་གནས་ན་མ་བརྗོད་པ་དེ་མི་འབྱུང་བའོ། །ཉི་མ་དེ་ཉིད་ལ་ཕྱིར་འོང་ན་མཚམས་གཞན་དུ་འགྲོ་བ་ལ་ཉེས་པ་མེད་དོ་ཞེས་བྱ་བ་ནི། གལ་ཏེ་ཉི་མ་དེ་ཉིད་ལ་ཕྱིར་འོང་ན་མཚམས་གཞན་དུ་འགྲོ་བ་ལ་
ཉེས་པ་མེད་པའོ། །སྤོ་བ་བྱེད་པས་སྤོ་བ་བྱེད་པ་དང་ལྷན་ཅིག་གཡོགས་མ་གཅིག་པར་ཉལ་བར་མི་བྱའོ་ཞེས་བྱ་བ་ནི། སྤོ་བ་དང་མགུ་བར་བྱ་བ་སྤྱོད་པས་དེ་སྤྱོད་པ་གཞན་དང་ལྷན་ཅིག་ཏུ་གཡོགས་མ་གཅིག་པའི་གནས་སུ་ཞག་ལོན་པར་ཉལ་བར་མི་བྱ་བ་སྟེ། ཉིན་མཚན་བཅད་པར་ནི་
མི་འགྱུར་མོད་ཀྱི། འོན་ཀྱང་ཉིན་མཚན་གྱི་མཐར་ཉེས་བྱས་ཡོངས་སུ་རྫོགས་པར་འགྱུར་ལ། དེའི་མདུན་རོལ་དུ་ནི་སྦྱོར་བ་ལས་བྱུང་བའི་ཉེས་བྱས་སུ་འགྱུར་རོ། །རང་བཞིན་དུ་གནས་པ་དང་ལྷན་ཅིག་ཉལ་བ་ལ་ཡང་ཁ་ན་མ་ཐོ་བ་དེ་གཉིས་སུ་འགྱུར་བའི་སྟེང་དུ་དེའི་ཉིན་མཚན་བཅད་
པ་ཡང་འགྱུར་རོ། །དེ་དང་མུ་སྟེགས་ཅན་སྤོ་བ་ལ་གནས་པ་དང་དེར་ལྷན་ཅིག་པ་ལ་ནི་ཉེས་པ་མེད་དོ་ཞེས་བྱ་བ་ནི། སྤོ་བ་དང་མགུ་བར་བྱ་བ་སྤྱོད་པ་དེ་དང་མུ་སྟེགས་ཅན་ཟླ་བ་བཞིའི་བར་དུ་མཁན་པོས་སྦྱར་བའི་གོས་ཀྱིས་སྤོ་བ་ལ་གནས་པ་དང་ལྷན་ཅིག་གཡོགས་མ་གཅིག་པའི་གནས་དེར་
ཉལ་བ་ལ་ཉེས་པ་མེད་པའོ། །ཅིའི་ཕྱིར་སྤོ་བའི་གཞི་ལ་ས་གཞན་ན་གནས་པའི་སྤྱོད་པའི་གཞི་ཞེས་མིང་གཞན་དུ་བྱས་ཤེ་ན། ས་གཞན་ན་གནས་པ་ཐམས་ཅད་ཀྱི་ཡུལ་བསྟན་པར་བྱ་བའི་ཕྱིར་སྤོ་བའི་ཕྱིར་གཞི་འདིའི་མིང་ས་གཞན་ན་གནས་པའི་སྤྱོད་པའི་གཞི་ཞེས་མིང་གཞན་དུ་བྱས་སོ། །མགུ་

བར་བྱ་བ་སྤྱོད་པ་དང་བསླབ་པ་བྱིན་པ་ལ་སོགས་པ་ས་གཞན་ན་གནས་པ་གང་ཇི་སྙེད་པ་དེ་དག་ཐམས་ཅད་གཞི་འདིས་སྤྱོད་པར་བསྟན་གྱི། སྤོ་བ་བྱེད་པས་འབའ་ཞིག་ཏུ་མ་ཟད་པས་དེའི་ཕྱིར་དོན་དེ་བསྟན་པའི་ཕྱིར། ས་གཞན་ན་གནས་པའི་སྤྱོད་པའི་གཞི་ཞེས་
མིང་གཞན་དུ་བྱས་སོ། །ས་གཞན་ན་གནས་པའི་སྤྱོད་པའི་གཞི་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་བཤད་ཟིན་ཏོ། །ས་གཞན་ན་གནས་པའི་སྤྱོད་པའི་གཞི་རྫོགས་སོ་ཞེས་བྱ་བ་སྤོ་བའི་གཞི་བཤད་ཟིན་ཏོ།། །།ད་ནི་ཡོངས་སུ་སྤྱད་པའི་གཞི་བསྡུ་བར་བྱ་བ་
སྟེ། འདིར་གཞི་དང་བཅས་པས་གླེང་བ་ལ་སོགས་པ་ནི་འཆགས་ལ་གཞི་མེད་པས་གླེང་བ་ལ་སོགས་པ་ནི་མི་འཆགས་སོ་ཞེས་འོག་ནས་འབྱུང་བས་གཞི་དང་བཅས་པ་ནི་གང་ཡིན། གཞི་མེད་པ་ནི་གང་ཡིན་ཞེ་ན་དེའི་ཕྱིར། མ་གྲགས་པ་ནི་གཞི་ཉིད་མ་ཡིན་ནོ་ཞེས་བྱ་བ་སྨྲས་ཏེ།
མ་གྲགས་པ་ཞེས་བྱ་བ་མིའི་ཆོས་ལས་བླ་མར་གྱུར་པ་ཐ་སྙད་དུ་བྱ་བ་མ་ཡིན་པའི་མཐོང་བ་དང་ཐོས་པ་དང་དོགས་པ་ནི་གཞི་ཉིད་མ་ཡིན་ཏེ། གཞི་དེས་གླེང་བ་ལ་སོགས་པ་མི་བྱའོ་ཞེས་བྱ་བའི་ཐ་ཚིག་གོ། །མ་གྲགས་པ་དེས་ཅིའི་ཕྱིར་གླེང་བར་མི་བྱ་ཞེ་ན། ཁ་ཅིག་མིའི་ཆོས་ལས་བླ་མ་
དང་ལྡན་པས་ཞེས་གླེངས་པ་ན་དེའི་ཆོས་ལ་སྐུར་པ་འདེབས་པར་འགྱུར་བ་དང་། ཁ་ཅིག་དེ་དང་མི་ལྡན་བཞིན་དུ་བདག་ཉིད་དེ་དང་ལྡན་པར་སྒྲོ་འདོགས་ཤིང་། གཞན་ལ་སྐུར་པ་འདེབས་པའི་ཉེས་པ་སྤང་བའི་ཕྱིར་རོ། །འདིར་གཞུང་ནི་དགེ་སློང་དག་ལྷའི་མིག་ནི་ཐ་སྙད་དུ་བྱ་བ་མ་ཡིན་ཏེ། དེ་
བས་ན་དགེ་སློང་གིས་ལྷའི་མིག་གིས་མཐོང་བས་གླེང་བར་མི་བྱའོ་ཞེས་བྱ་བ་ནས། དེ་བཞིན་དུ་ལྷའི་རྣ་བས་གླེང་བར་མི་བྱའོ་ཞེས་བྱ་བ་ལ་སོགས་པའི་བར་དུ་གསུངས་པ་ཡིན་ནོ། །དགག་དབྱེ་བརྗོད་པ་རྫོགས་ན་དགག་དབྱེ་གཞག་པ་མི་འཆགས་སོ་ཞེས་བྱ་བ་ནི། གང་ཟག་གང་གིས་དབྱར་
གནས་པའི་དགེ་འདུན་ལ། ཚེ་དང་ལྡན་པ་དགོངས་སུ་གསོལ། །དེང་ནི་དགེ་འདུན་གྱི་དགག་དབྱེ་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བའི་དགག་དབྱེ་ཡང་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་བདག་ལ་མཐོང་བ་དང་ཐོས་པ་དང་དོགས་

པའི་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་བགྱིད་ཀྱི་ཚེ་དང་ལྡན་པ་རྣམས་ཀྱིས་བདག་ལ་གདམས་སུ་གསོལ། ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་གཟུང་དུ་གསོལ། ཐུགས་
བརྩེ་བ་ཅན་ཚེ་དང་ལྡན་པ་རྣམས་ཀྱིས་ཐུགས་བརྩེ་བའི་སླད་དུ་ཉེ་བར་བཟུང་སྟེ་བདག་ལ་ཐུགས་བརྩེ་བར་མཛད་དུ་གསོལ། ལྟུང་བ་ཤེས་ཤིང་མཐོང་ན་ཆོས་བཞིན་དུ་སླར་བགྱིའོ། །ལན་གསུམ་དུ་བཟླས། ཐབས་ཡིན་ནོ། །ལེགས་སོ་ཞེས་བྱ་བའི་སྔགས་ཀྱིས་དགག་དབྱེ་བརྗོད་པ་
རྫོགས་པར་བྱས་ནས། དེ་ལ་ཁྱོད་ཕྱིས་བདག་ལ་མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དགག་དབྱེ་མ་བྱེད་ཅིག་ཅེས་དགག་དབྱེ་འཇོག་པར་མི་འཆགས་པའོ། །དགག་དབྱེ་བརྗོད་པ་མ་རྫོགས་པ་དགག་དབྱེ་འཇོག་པར་བྱེད་ན་ནི་འཆགས་སོ། །དགག་དབྱེའི་
སྔགས་ལན་གཅིག་བརྗོད་པ་ལ་ནི་དེའི་མཐར་ཕྱིན་པ་ཉིད་རྫོགས་པ་ཡིན་ནོ། །ལན་གཉིས་བརྗོད་པ་ལ་ནི་གཉིས་པའི་མཐར་ཕྱིན་པ་ཉིད་རྫོགས་པ་ཡིན་ནོ། །ལན་གསུམ་བརྗོད་པ་ལ་ཡང་གསུམ་པའི་མཐར་ཕྱིན་པ་ཉིད་རྫོགས་པ་ཡིན་ནོ། །བྱེད་པ་པོ་ནད་པ་དང་ལྡན་པ་ཉིད་ལ་ཡང་
དེ་བཞིན་ནོ་ཞེས་བྱ་བ་ནི། དགག་དབྱེ་འཇོག་པ་གང་གི་བྱེད་པ་པོ་ནད་པ་ཡིན་པ་དེ་ནི་བྱེད་པ་པོ་ནད་པ་དང་ལྡན་པ་སྟེ་དེའི་དངོས་པོ་ནི་དེ་ཉིད་དོ། །དེས་དགག་དབྱེ་འཇོག་ཏུ་འཇུད་པ་ཡང་སྔ་མ་བཞིན་དུ་མི་འཆགས་པ་ཉིད་ཡིན་ནོ། །འདི་སྐད་བསྟན་ཏེ། ནད་པས་དགེ་སློང་གཞན་གྱི་དགག་
དབྱེ་འཇོག་ཏུ་འཇུད་ཅིང་ཁྱོད་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་མ་བྱེད་ཅིག་ཅེས་ཟེར་ན་དེ་མི་འཆགས་སོ། །ཅི་དེས་མངོན་སུམ་དུ་འཇོག་པ་མི་འཆགས་པར་མ་ཟད་དམ་ཞེ་ན། དེའི་ཕྱིར་མངགས་པས་ཀྱང་ངོ་ཞེས་བྱ་བ་སྨྲས་ཏེ། ནད་པས་དེ་མངགས་པས་
དགག་དབྱེ་འཇོག་ཏུ་འཇུད་པ་ཡང་མི་འཆགས་སོ། །ཀྱང་ངོ་ཞེས་བྱ་བའི་སྒྲས་ནི། རང་གིས་འཇོག་ཏུ་འཇུད་ན་ཡང་མི་འཆགས་སོ་ཞེས་བྱ་བའི་ཐ་ཚིག་གོ། །ནད་པ་ཉིད་ལ་ཡང་ངོ་ཞེས་བྱ་བ་ནི། གལ་ཏེ་གཞན་གྱིས་ནད་པའི་དགག་དབྱེ་འཇོག་པར་བྱེད་ན་དེས་ཀྱང་ནད་པའི་དགག་

དབྱེ་གཞག་པ་མི་འཆགས་པའོ། །འདིར་དགག་དབྱེ་ཞེས་སྨོས་པ་ནི་གསོ་སྦྱོང་དང་གདམས་ངག་གཞག་པའི་དཔེ་ཡིན་ནོ། །དེ་མནོད་པར་མི་བྱའོ་ཞེས་བྱ་བ་ནི། དགག་དབྱེ་གཞག་པ་མི་འཆགས་པར་བསྟན་པ་གང་ཡིན་པ་དེ་དགེ་འདུན་གྱིས་ཀྱང་མནོད་པར་མི་
བྱ་བའོ། །ནད་པས་རང་ངམ་མངགས་པས་གཞན་གྱི་དགག་དབྱེ་འཇོག་ཏུ་འཇུད་པ་དང་གཞན་གྱིས་རང་ངམ་མངགས་པས་ནད་པའི་དགག་དབྱེ་འཇོག་ཏུ་འཇུད་པ་དེ་དག་དགེ་འདུན་གྱིས་ཇི་ལྟར་གནོད་པར་མི་བྱ་ཞེ་ན། དེའི་ཕྱིར། ཚེ་དང་ལྡན་པ་ནད་པ་ནི་སྦྱོར་མི་བཟོད་པ་ཡིན་གྱི་ཁྱོད་སྡོད་
ཅིག་ཅེའམ་ཚེ་དང་ལྡན་པ་ཕོ་ཉ་ནད་པ་དེ་ལ་ནི་བརྒལ་ཞིང་བརྟགས་པ་མ་ཡིན་ནོ་ཞེས་ལན་གདབ་པར་བྱའོ་ཞེས་བྱ་བ་སྨོས་ཏེ། གལ་ཏེ་ནད་པ་རང་གིས་གཞན་གྱི་དགག་དབྱེ་འཇོག་ཏུ་འཇུད་ན་དེའི་ཚེ་དགེ་འདུན་གྱིས་ནད་པ་དེ་ལ་ཚེ་དང་ལྡན་པ་ནད་པ་ནི་སྦྱོར་མི་བཟོད་པ་ཡིན་གྱི་ཁྱོད་སྡོད་ཅིག་
ཅེས་ལན་གདབ་པར་བྱའོ། །གལ་ཏེ་ནད་པས་མངགས་པས་གཞན་གྱི་དགག་དབྱེ་འཇོག་ཏུ་འཇུད་ན། དེའི་ཚེ་དགེ་འདུན་གྱིས་མངགས་པ་དེ་ལ་ཚེ་དང་ལྡན་པ་ཕོ་ཉ་ནད་པ་དེ་ལ་ནི་བརྒལ་ཞིང་བརྟག་པར་བྱ་བ་མ་ཡིན་ནོ་ཞེས་ལན་གདབ་པར་བྱའོ། །གལ་ཏེ་གཞན་གྱིས་རང་གི་ནད་པའི་
དགག་དབྱེ་འཇོག་ཏུ་འཇུད་ན་དེའི་ཚེ་དགེ་འདུན་གྱིས་གཞན་དེ་ལ་ཚེ་དང་ལྡན་པ་ནད་པ་ལ་ནི་སྦྱོར་མི་བཟོད་པ་ཡིན་གྱིས་ཁྱོད་སྡོད་ཅིག་ཅེས་ལན་གདབ་པར་བྱའོ། །གལ་ཏེ་གཞན་གྱིས་མངགས་པས་ནད་པའི་དགག་དབྱེ་འཇོག་ཏུ་འཇུད་ན་དེའི་ཚེ་དགེ་འདུན་གྱིས་མངགས་པ་དེ་ལ་ཚེ་དང་ལྡན་པ་ཕོ་
ཉ་ནད་པ་དེ་ལ་ནི་བརྒལ་ཞིང་བརྟག་པར་བྱ་བ་མ་ཡིན་ནོ་ཞེས་ལན་གདབ་པར་བྱའོ། །བྱས་པ་དང་བྱེད་པའི་རང་གི་ངོ་བོ་མ་རྟོགས་པ་ཉིད་ན་ཡང་གླེང་བ་མི་འཆགས་སོ་ཞེས་བྱ་བ་ལ་བྱས་པའི་རང་གི་ངོ་བོ་མ་རྟོགས་པ་ཉིད་ཅེས་བྱ་བ་ནི། འཕགས་པ་ཆེ་གེ་མོས་ཉེས་པ་བྱས་ཞེས་ནི་ཐོས་ཀྱི་ཉེས་པ་འདི་
དང་འདི་ལྟ་བུ་བྱས་ཞེས་ནི་མ་ཐོས་སོ་ཞེས་ཟེར་བའོ། །བྱེད་པའི་རང་གི་ངོ་བོ་མ་རྟོགས་པ་ཉིད་ཅེས་བྱ་བ་ནི། འཕགས་པས་ཉེས་པ་འདི་དང་འདི་ལྟ་བུ་བྱས་ཞེས་ནི་ཐོས་ཀྱི། ཆེ་གེ་མོ་ཞིག་གིས་ཞེས་ནི་མ་ཐོས་སོ་ཞེས་ཟེར་བ་སྟེ། དེ་ལྟར་བྱས་པ་དང་བྱེད་པའི་རང་གི་ངོ་བོ་མ་རྟོགས་པ་

ཉིད་ཡིན་ན་ཡང་གླེང་བ་མི་འཆགས་སོ། །ལྷག་མས་ཀྱང་དུས་མ་ཡིན་པར་འཇུག་པར་མི་བྱའོ་ཞེས་བྱ་བ་ལ། ལྷག་མས་ཀྱང་ཞེས་བྱ་བ་ནི། བྱེད་པ་པོ་ནད་པ་ལ་སོགས་པས་གླེང་བ་དེ་ལས་གཞན་པས་ཀྱང་དུས་མ་ཡིན་པར་གླེང་བ་ལ་འཇུག་པར་མི་བྱའི་དུས་སུ་འཇུག་པར་བྱ་བའོ། །
དྲན་པ་དང་ཤེས་བཞིན་ཉེ་བར་མི་གཞག་པར་མི་བྱའོ་ཞེས་བྱ་བ་ནི། དྲན་པ་དང་ཤེས་བཞིན་མངོན་དུ་མ་བྱས་པར་ཡང་གླེང་བ་ལ་འཇུག་པར་མི་བྱ་བའོ། །མཐའ་མ་ཡིན་པར་མི་བྱའོ་ཞེས་བྱ་ནི། གནས་གང་དུ་གླེང་བར་བྱ་བའི་གང་ཟག་དེའི་བསྲུང་བར་བྱ་བ་མཁན་པོའམ་སློབ་དཔོན་
ནམ་དགེ་འདུན་ནམ་ཞེ་འགྲས་པ་ལ་སོགས་པ་སྤང་བར་བྱ་བ་དག་གི་མདུན་དུ་གླེངས་ན་དེས་བདག་ལ་བརྙས་པར་འགྱུར་རོ་སྙམ་པའི་བློ་སྐྱེ་བར་འགྱུར་བའི་གནས་དེ་ལས་གཞན་པའི་མཐའ་དབེན་པ་དེར་གླེང་བར་བྱ་བ་ལ་གླེང་བར་བྱའི། དེས་བསྲུང་བར་བྱ་བ་དག་གི་དབུས་སུ་གླེང་བར་མི་བྱ་བའོ། །
ལྕགས་ཀྱི་གསལ་ཤིང་ཅན་ཉིད་ནི་དམ་པ་རྣམས་ཀྱིས་སྨད་པར་བྱ་བ་ཉིད་ཡིན་པའི་ཕྱིར་ཏེ། གང་ལྕགས་ལས་བྱས་པའི་གསལ་ཤིང་གིས་འཛུགས་པར་བྱེད་པ་དེ་ནི་ལྕགས་ཀྱི་གསལ་ཤིང་ཅན་ཏེ། མང་པོ་དག་གི་མདུན་དུ་གནད་དུ་ཕོག་པར་བྱེད་པ་གང་ཡིན་པའོ། །དེའི་དངོས་པོ་
ནི་དེ་ཉིད་དེའི་གནད་དུ་ཕོག་པར་བྱེད་པ་དེ་ཉིད་དོ། །དེ་ནི་དམ་པ་རྣམས་ཀྱིས་སྨད་པར་བྱ་བ་ཉིད་ཡིན་པས་དེའི་ཕྱིར་མཐའ་མ་ཡིན་པར་གླེང་བ་ལ་འཇུག་པར་མི་བྱའོ། །སྐབས་འབྱེད་དུ་མ་བཅུག་པར་མི་བྱའོ་ཞེས་བྱ་བ་ནི། གང་དུ་གང་ཟག་གང་ལ་སྐབས་འབྱེད་དུ་མ་བཅུག་པར་གླེང་བ་ལ་
འཇུག་པར་མི་བྱ་བ་སྟེ། དེ་ནི་རབ་ཏུ་འཁྲུག་པ་སྤང་བའི་ཕྱིར་རོ། །དགག་དབྱེ་ནི་དེ་ཉིད་ཡིན་ནོ་ཞེས་བྱ་བ་ནི། གང་གིས་དགག་དབྱེའི་ཚེ་དགེ་འདུན་ལ་དགག་དབྱེ་བྱས་པ་དེ་ནི་སྐབས་ཕྱེ་བ་ཉིད་ཡིན་པས་དེའི་ཕྱིར་དགག་དབྱེ་བྱེད་ན་གླེང་བ་ལ་འཇུག་པ་ལ་ནི་ཉེས་པ་མེད་དོ། །མི་དྲན་ན་
དྲན་པར་བྱ་བའོ་ཞེས་བྱ་བ་ནི། གླེངས་པ་ནི་མི་དྲན་ན། དྲན་པར་བྱའོ། །དྲན་པར་བྱ་བ་ནི་གླེང་བའི་འཁོར་ཡིན་པས་དེའི་ཕྱིར་ཇི་ལྟར་གླེང་བ་ལ་དུས་མ་ཡིན་པར་འཇུག་པར་མི་བྱ་བ་དང་དྲན་པ་དང་ཤེས་བཞིན་ཉེ་བར་མ་བཞག་པར་མི་བྱ་བ་དང་། མཐའ་མ་ཡིན་པར་མི་བྱ་བ་དང་། སྐབས་

འབྱེད་དུ་མ་བཅུག་པར་དེ་མི་བྱ་བའོ་ཞེས་ཇི་སྐད་སྨོས་པ་དེ་དག་དྲན་པར་བྱ་བའི་སྐབས་འདིར་ཡང་གྲུབ་པ་ཡིན་ནོ། །དེ་མི་བྱེད་ན་དེ་ལ་བརྗོད་པ་དང་བཅས་པ་ཉིད་བྱའོ་ཞེས་བྱ་བ་ནི། སྐབས་འབྱེད་པ་དེ་མི་བྱེད་ན་གླེང་བར་བྱ་བ་དེ་ལ་བརྗོད་པ་དང་བཅས་པ་ཉིད་བྱའོ། །
ཇི་ལྟར་བརྗོད་པ་དང་བཅས་པ་ཉིད་བྱ་ཞེ་ན་དེའི་ཕྱིར། ཚེ་དང་ལྡན་པ་ཁྱོད་ལ་བརྗོད་པ་དང་བཅས་པ་ཉིད་བྱས་ཁྱོད་ཀྱིས་གནས་འདི་ནས་མ་ཞུས་པར་འགྲོ་བར་མི་བྱའོ། །ཁོ་བོ་ལ་ཚེ་དང་ལྡན་པ་ལ་བརྗོད་པའི་ཕྱིར་བསྡོགས་པ་ཡོད་དོ་ཞེས་བྱ་བ་སྨྲས་ཏེ། བརྗོད་པར་བྱ་བ་ཉིད་དུ་ངེས་
པ་ནི་བསྡོགས་པ་ཞེས་བྱའོ། །དེས་འདུལ་བར་མི་འགྱུར་ན་མི་གདམས་པ་ཉིད་དུའོ་ཞེས་བྱ་བ་སྨྲས་ཏེ། དེ་ལྟར་བརྗོད་པ་དང་བཅས་པ་ཉིད་བྱས་ཀྱང་གལ་ཏེ་འདུལ་བར་མི་འགྱུར་ན་དེའི་ཚེ་གླེང་བར་བྱ་བ་དེ་ལ་མི་གདམས་པ་ཉིད་དུ་བྱ་བའོ། །དེ་ལ་གཏམ་འདྲེ་བ་ལ་སོགས་པ་ཡང་བཟློག་
པར་བྱའོ་ཞེས་བྱ་བ་ནི། མི་གདམས་པ་ཉིད་དུ་བྱས་པ་དེ་ལ་གདམས་ཤིང་རྗེས་སུ་བསྟན་པར་བྱ་བ་ཉིད་ཀྱིས་ཕན་གདགས་པ་བཟློག་པར་བྱ་བ་འབའ་ཞིག་ཏུ་མ་ཟད་ཀྱི་གཏམ་འདྲེ་བ་དང་ཕེབས་པར་སྨྲ་བར་དང་སོ་སོར་ཀུན་དགའ་བར་བྱ་བའི་ཐ་སྙད་ཀྱི་ཚིག་སྦྱིན་པ་ཡང་མི་བྱའོ། །དེ་ལྟར་
ན་ཡང་གསོ་སྦྱོང་གཞག་གོ་ཞེས་བྱ་བ་ནི། དེ་ལྟར་སྨྲ་བར་མི་བྱ་བ་ཉིད་དུ་རྣམ་པར་གཞག་ཅིང་མི་གདམས་པར་བྱས་ཀྱང་འདུལ་བར་མི་འགྱུར་ཞིང་སྐབས་མི་འབྱེད་ན་དེའི་ཚེ་གསོལ་བ་དང་བཞིའི་ལས་ཀྱིས་དེའི་གསོ་སྦྱོང་གཞག་པར་བྱ་བའོ། །དེའི་སྔགས་ནི། དགེ་འདུན་བཙུན་
པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་གླེངས་ཤིང་དྲན་པར་བགྱིད་ཀྱང་སྐབས་འབྱེད་དུ་མི་བཏུབ་སྟེ། འདི་དགེ་སློང་རྣམས་ཀྱིས་སྨྲ་བར་མི་བགྱིད་པ་ཉིད་དུ་རྣམ་པར་བཞག་ཅིང་མི་གདམས་པར་བགྱིས་ཀྱང་སྐབས་མི་འབྱེད་ན། གལ་ཏེ་དགེ་འདུན་
གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱི་དགེ་སློང་མིང་འདི་ཞེས་བགྱི་བའི་གསོ་སྦྱོང་གཞག་པར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་གླེངས་

ཤིང་དྲན་པར་བགྱིས་ཀྱང་སྐབས་འབྱེད་དུ་མི་བཏུབ་སྟེ། འདི་དགེ་སློང་རྣམས་ཀྱིས་སྨྲ་བར་མི་བགྱི་བ་ཉིད་དུ་རྣམ་པར་གཞག་ཅིང་མི་གདམས་པར་བགྱིས་ཀྱང་སྐབས་མི་འབྱེད་དེ་དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བའི་གསོ་སྦྱོང་གཞག་པར་བགྱིད་ན། ཚེ་དང་
ལྡན་པ་གང་དག་དགེ་སློང་མིང་འདི་ཞེས་བགྱི་བའི་གསོ་སྦྱོང་གཞག་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱི་དགེ་སློང་མིང་འདི་ཞེས་བགྱི་བའི་གསོ་
སྦྱོང་གཞག་ལགས་ཏེ། འདི་ལྟར་ཅང་མི་གསུང་པས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །དེས་ཀྱང་ན་དགག་དབྱེ་བྱའོ་ཞེས་བྱ་བ་ནི། དེ་ལྟར་གསོ་སྦྱོང་གཞག་པ་དེས་ཀྱང་འདུལ་བར་མི་འགྱུར་ཞིང་སྐབས་མི་འབྱེད་ན་དེའི་ཚེ་གསོལ་བ་དང་། བཞིའི་ལས་ཀྱིས་དེའི་དགག་
དབྱེ་གཞག་པར་བྱའོ། །དེའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་གླེངས་ཤིང་དྲན་པར་བགྱིས་ཀྱང་སྐབས་འབྱེད་དུ་མི་བཏུབ་སྟེ། འདི་དགེ་སློང་རྣམས་ཀྱིས་སྨྲ་བར་མི་བགྱི་བ་ཉིད་དུ་རྣམ་པར་གཞག་ཅིང་མི་གདམས་པར་
བགྱིས་ཀྱང་སྐབས་མི་འབྱེད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱི་དགེ་སློང་མིང་འདི་ཞེས་བགྱི་བའི་དགག་དབྱེ་གཞག་པར་བགྱིའོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་
གསོལ། །དགེ་སློང་མིང་འདི་ཞེས་བགྱིད་པ་འདི་གླེངས་ཤིང་དྲན་པར་བགྱིས་ཀྱང་སྐབས་འབྱེད་དུ་མི་བཏུབ་སྟེ། འདི་དགེ་སློང་རྣམས་ཀྱིས་སྨྲ་བར་མི་བགྱི་བ་ཉིད་དུ་རྣམ་པར་གཞག་ཅིང་མི་གདམས་པར་བགྱིས་ཀྱང་སྐབས་མི་འབྱེད་དེ་དེའི་སླད་དུ་དགེ་འདུན་གྱིས་དགེ་སློང་མིང་འདི་
ཞེས་བགྱིས་པའི་དགག་དབྱེ་གཞག་པར་བགྱི་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བའི་དགག་དབྱེ་གཞག་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །ལན་གསུམ་དུ་བཟླས། དགེ་འདུན་གྱིས་བཟོད་ཅིང་

གནང་ནས། དགེ་འདུན་གྱིས་དགེ་སློང་མིང་འདི་ཞེས་བགྱི་བའི་དགག་དབྱེ་གཞག་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །གསོ་སྦྱོང་དང་དགག་དབྱེ་གཞག་པ་ཞེས་བྱ་བ་ནི། གང་ཟག་འདི་འདུག་པ་
དང་ལྷན་ཅིག་དགེ་སློང་རྣམས་ཀྱིས་གསོ་སྦྱོང་དང་དགག་དབྱེ་མི་བྱའོ་ཞེས་བྱ་བར་རིག་པར་བྱའོ། །འཇོག་པར་བྱེད་པ་དག་གིས་གཞག་པ་དེ་དང་ལྷན་ཅིག་ཏུ་བྱ་བ་ཡང་འདིར་བཟོད་པ་ཡིན་ནོ་ཞེས་བྱ་བ་ནི། འཇོག་པར་བྱེད་པའི་དགེ་སློང་གང་དག་གིས་གསོ་སྦྱོང་དང་དགག་དབྱེ་གཞག་
པ་གང་ཡིན་པ་དེ་གང་ཟག་དེ་དང་ལྷན་ཅིག་བྱ་བ་གང་ཡིན་པ་དེ་ཡང་སྐབས་འདིར་དེ་ལ་བཟོད་པ་བྱ་བ་ཡིན་གྱི། ཚིག་འབའ་ཞིག་གིས་བཟོད་པར་བྱ་ཞིང་བག་ཡོངས་སུ་བྱ་བར་མ་ཟད་དོ་ཞེས་བྱ་བའི་ཐ་ཚིག་གོ། །འདིར་གཞུང་ནི། དྲུག་སྡེ་དག་གིས་དྲན་ཐོར་ཅན་གྱི་བསམ་པས་དགེ་
སློང་གི་གསོ་སྦྱོང་གཞག་པ་དང་། དགེ་སློང་རང་བཞིན་དུ་གནས་པ་ཐམས་ཅད་ཀྱིས་ཀྱང་ཁྱོད་ཀྱི་གསོ་སྦྱོང་དྲུག་སྡེ་དག་གིས་གཞག་གོ་ཞེས་གསོ་སྦྱོང་ལས་ཟློག་པར་བྱེད་ནས། ཡང་དྲུག་སྡེ་དག་གིས་གསོ་སྦྱོང་བྱའོ་ཞེས་བྱ་བ་སྨྲས་པ་ནས། བཅོམ་ལྡན་འདས་ཀྱིས་བཀའ་
སྩལ་པ། གལ་ཏེ་དགེ་སློང་གང་དག་གིས་གསོ་སྦྱོང་གཞག་པ་དེ་དག་ཉིད་ཀྱིས་གསོ་སྦྱོང་བྱས་ན་བཟོད་པ་བྱས་པར་བརྗོད་པར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །སྐབས་ཕྱེ་བ་ཉིད་ན་གལ་ཏེ་མཉན་པ་ཉིད་མ་ཡིན་ན་ཕུར་པ་དང་བཅས་པ་བྱའོ་ཞེས་བྱ་བ་ནི། གླེང་བར་
བྱ་བ་དེས་སྐབས་ཕྱེ་བ་ཉིད་ན་གལ་ཏེ་དེ་མཉན་པ་ཉིད་དུ་མི་འགྱུར་ན། དེའི་ཚེ་དེ་ལ་ཕུར་པ་དང་བཅས་པ་ཉིད་དུ་བྱ་བ་སྟེ་ཕུར་པ་དང་བཅས་པའི་སྐབས་འདི་ནི་མ་མོ་ལས་འབྱུང་ངོ་། །ཇི་ལྟར་ཕུར་པ་དང་བཅས་པར་བྱ་ཞེ་ན། དེའི་ཕྱིར་གནས་འདི་འམ་གཞན་དུའམ་གཞི་
འདིའམ་གང་རུང་བ་ལ་འདོད་པ་སྨྲ་བར་བྱའོ་ཞེས་བྱ་བ་དང་། ལྟུང་བ་བཀལ་ཞིང་ཉེས་པ་བསྟན་ཏེ་བཏང་བས་སོ་ཞེས་བྱ་བ་སྨྲས་ཏེ། གང་ཡང་རུང་བ་ལ་ཞེས་བྱ་བ་ནི། གནས་སམ་གཞི་ལའོ། །ཉེས་པ་བསྟན་ཏེ་ཞེས་བྱ་བ་ནི། ལྟུང་བ་བཀལ་ཞིང་ཞེས་བྱ་བའི་རྣམ་

གྲངས་གཞན་བསྟན་ཏོ། །རྟ་དམུ་རྒོད་ཕུར་པ་དང་བཅས་པ་དང་འདྲ་བར་དེ་ཡང་དྲི་མ་དང་བཅས་པར་བཏང་བ་ཡིན་པས་དེའི་ཕྱིར་ཕུར་པ་དང་བཅས་པ་ཞེས་བྱའོ། །ཚུལ་ཁྲིམས་དང་ལྟ་བ་དང་ཆོ་ག་དང་འཚོ་བ་ཉམས་པས་གླེང་བ་ལ་སོགས་པ་དེ་དག་ཐམས་ཅད་བྱེད་པ་ནི་གཞི་དང་བཅས་
པ་འཆགས་སོ་ཞེས་བྱ་བ་ནི། མཐོང་བ་དང་ཐོས་པ་དང་དོགས་པ་དག་གིས་གཞི་དང་བཅས་པ་ཚུལ་ཁྲིམས་དང་ལྟ་བ་དང་ཆོ་ག་དང་འཚོ་བ་ཉམས་པས་གླེང་བ་ལ་སོགས་པ་དེ་དག་ཐམས་ཅད་བྱེད་ན་འཆགས་པའོ། །སྩོགས་པ་ཞེས་བྱ་བའི་སྒྲས་ནི། དྲན་པར་བྱ་བ་དང་སྐབས་འབྱེད་
དུ་གཞུག་པ་དང་། བརྗོད་པ་དང་བཅས་པ་ཉིད་དང་། མི་གདམས་པ་ཉིད་དང་། གསོ་སྦྱོང་གཞག་པ་དང་། དགག་དབྱེ་གཞག་པ་དང་། ཕུར་པ་དང་བཅས་པ་བྱ་བ་དག་བསྡུ་སྟེ། དེ་དག་བྱ་བ་ཡང་གཞི་ཡོད་ན་འཆགས་ཀྱི། གཞི་མེད་པར་ཚུལ་ཁྲིམས་ལ་སོགས་པ་ཉམས་
པས་གླེང་བ་ལ་སོགས་པ་བྱེད་ན་ནི་མི་འཆགས་སོ། །གཞི་ལེགས་པ་མ་ཡིན་པས་མི་བྱའོ་ཞེས་བྱ་བ་ནི། གླེང་བ་ལ་སོགས་པ་དེ་དག་ལེགས་པར་མ་མཐོང་བ་དང་ལེགས་པར་མ་ཐོས་པ་དང་། ལེགས་པར་མི་དོགས་པས་མི་བྱ་བ་དེ་མི་གསལ་བར་མཐོང་བ་ནི་ལེགས་པར་མ་མཐོང་བའོ། །
མི་གསལ་བར་ཐོས་པ་ནི་ལེགས་པར་མ་ཐོས་པའོ། །སྙིང་ཐ་དད་ཅིང་དད་པ་ཞན་པའི་ཡོངས་སུ་རྟོགས་པ་ནི་ལེགས་པར་མི་དོགས་པའོ། །འདི་ལ་དངོས་པོ་ལས་བདེན་པ་ཉིད་ཀྱི་རྒྱུ་མ་ཡིན་ནོ་ཞེས་བྱ་བ་ནི། གཞི་འདི་ལ་དངོས་པོ་ལས་བདེན་པ་ཉིད་ཀྱི་རྒྱུ་མ་ཡིན་གྱི། འདུ་ཤེས་ལས་
བདེན་པ་ཉིད་ཀྱི་རྒྱུ་ཉིད་དུ་རྣམ་པར་གཞག་པ་སྟེ། དངོས་པོ་བདེན་པ་ཉིད་ཡིན་ཡང་གལ་ཏེ་མཐོང་བ་ལ་སོགས་པའི་འདུ་ཤེས་མེད་པས་གླེང་བར་བྱེད་ན་གཞི་མེད་པ་ཁོ་ནས་གླེང་བ་ལ་སོགས་པར་འགྱུར་ལ། དངོས་པོ་མི་བདེན་པ་ཉིད་ཡིན་ཡང་གལ་ཏེ་མཐོང་བ་ལ་སོགས་པའི་འདུ་ཤེས་
ཀྱིས་གླེང་བར་བྱེད་ན་གཞི་དང་བཅས་པ་ཁོ་ནས་གླེང་བ་ལ་སོགས་པར་འགྱུར་རོ་ཞེས་བསྟན་པ་ཡིན་ནོ། །ཐོས་པ་ནི་རྣམ་པ་གསུམ་སྟེ་བྱ་བའི་མཚན་མ་དང་གཞན་ཕེབས་པར་སྨྲ་བ་དང་རང་གིས་རྗེས་སུ་ཐོས་པའོ་ཞེས་བྱ་བ་ལ། བྱ་བའི་མཚན་མ་ཞེས་བྱ་བ་ནི། བྱ་བ་དེ་སྒྲ་གང་དག་

གིས་འཇུག་པའི་སྒྲ་དེ་དག་དེར་བྱ་བ་དེ་དང་ལྷན་ཅིག་འབྱུང་བའི་རང་བཞིན་ཅན་གང་ཡིན་པ་དེ་ནི་བྱ་བའི་མཚན་མའི་སྒྲ་སྟེ་མི་ཚངས་པར་སྤྱོད་པ་དང་འཛིན་པ་ལ་སོགས་པའི་བྱ་བ་གང་བྱེད་པ་དེ་ལ་སྒྲ་ཤུབ་ཤུབ་པོ་དང་། ཁུ་ཚུར་གྱིས་བརྡེགས་པ་དང་ལག་པས་བརྡེགས་
པ་ལ་སོགས་པའི་སྒྲ་གྲགས་པ་གང་ཡིན་པ་དེ་ནི་བྱ་བའི་མཚན་མའི་སྒྲ་ཐོས་པ་ཡིན་ནོ། །གཞན་ཕེབས་པར་སྨྲ་བ་ཞེས་བྱ་བ་ནི། གཞན་དག་མི་ཚངས་པར་སྤྱོད་པ་དང་འཛིན་པ་ལ་སོགས་པ་གང་བྱེད་པ་དེ་གཞན་ཕེབས་པར་སྨྲ་བ་ལས་ཐོས་པ་གང་ཡིན་པའོ། །རང་གི་རྗེས་སུ་ཐོས་
པ་ཞེས་བྱ་བ་ནི། ཆེ་གེ་མོ་ཞིག་གིས་འདི་ལྟ་བུ་བྱས་སོ་ཞེས་གཞན་དག་ནི་ལོགས་ཤིག་ན་གཏམ་ཟེར་བ་རང་གིས་ལོགས་ཤིག་ནས་རྗེས་སུ་ཐོས་པ་གང་ཡིན་པའོ། །འདིར་གཞུང་ནི། འདི་ལ་དགེ་སློང་དག་གིས་རྣམ་པ་གང་དག་དང་། རྟགས་གང་དག་དང་། །མཚན་མ་
གང་དག་གིས་ཕམ་པར་འགྱུར་བ་མཐའི་ལྟུང་བ་འབྱིན་པའི་རྣམ་པ་དེ་དག་དང་། རྟགས་དེ་དག་དང་། མཚན་མ་དེ་དག་གིས་ཕམ་པར་འགྱུར་བ་མཐའི་ལྟུང་བ་འབྱིན་པ་དེ་ཐོས་པ་དང་གཏམ་དེ་ཡང་དེ་ལས་བྱུང་ཞིང་དེའི་རང་བཞིན་གྱིས་ཉེ་བར་གནས་པ་ཡིན་པ་དང་། དེ་
བཞིན་དུ་དེས་དགེ་སློང་དེ་ཕམ་པར་འགྱུར་བ་མཐའི་ལྟུང་བ་བྱུང་ངོ་ཞེས། ཡིད་ཆེས་པའི་ཚིག་ལས་ཐོས་པར་གྱུར་ན་གཞི་དེས་གནས་དེའམ་གཞན་དུ་དེའི་གསོ་སྦྱོང་འཇོག་པར་བྱེད་ན། ཆོས་བཞིན་དུ་གསོ་སྦྱོང་འཇོག་པར་བྱེད་པ་ཡིན་ནོ་ཞེས་གསུངས་པ་ཡིན་ཏེ། དེར་ཇི་སྐད་
གསུངས་པ་དེ་དག་གོ་རིམས་བཞིན་དུ་འདིར་བསྡུས་པ་ཡིན་ནོ། །ཡིད་མ་ཆེས་པ་ནི་གཞི་མ་ཡིན་ནོ་ཞེས་བྱ་བ་ནི། ཐོས་ཀྱང་ཡིད་མ་ཆེས་པ་གང་ཡིན་པ་དེ་ནི་གཞི་མ་ཡིན་པར་རིག་པར་བྱའོ། །འདིར་གཞུང་ནི། དེས་ཡིད་ཆེས་པའི་ཚིག་ལས་ཐོས་པ་མ་ཡིན་ན་ཞེས་གསུངས་པ་ཡིན་
ནོ། །ཡོངས་སུ་སྦྱང་བའི་གཞིའོ་ཞེས་བྱ་བ་དེ་འདུལ་བ་གཞིའི་སྐབས་སུ་གཏོགས་པ་བཤད་ཟིན་ཏོ།། །།ད་ནི་ཡོངས་སུ་སྦྱང་བའི་གཞི་ཞུ་བའི་སྐབས་བསྡུ་བའི་ཕྱིར་ཤེས་པ་དུ་མ་ཉིད་ཡིན་ན་གླེང་བ་ལ་སོགས་པ་ལ་འདོད་པས་སོ་ཞེས་བྱ་བ་སྨྲས་ཏེ། གལ་ཏེ་གླེང་བར་བྱ་བ་དེའི་ལྟུང་པ་

ཤེས་པའི་དགེ་སློང་དུ་མ་ཉིད་ཡིན་ན་དེ་ལ་གླེང་བ་དང་དྲན་པར་བྱ་བ་དང་། སྐབས་འབྱེད་དུ་གཞུག་པ་ལ་སོགས་པ་དེ་དག་རྒན་རིམས་ཀྱིས་འཇུག་པར་བྱ་བར་མ་ངེས་ཀྱི་གང་གླེང་བར་འདོད་པས་ཅི་དགར་འཇུག་པར་བྱ་བའོ། །འདིར་གཞུང་ནི་བརྫུན་དུ་སྨྲ་བའི་ལྟུང་བྱེད་ཀྱི་ཞུ་བ་ལས་བཙུན་
པ་དགེ་སློང་དགེ་འདུན་གྱི་དབུས་སུ་བསླབ་པ་ལས་འདའ་བར་བགྱིད་ན་སུས་གླེང་བར་བགྱི། གང་འདོད་པས་སོ་ཞེས་གསུངས་པ་ཡིན་ནོ། །དགག་དབྱེ་མ་ཡིན་པར་དེ་གཞག་པར་མི་བྱའོ་ཞེས་བྱ་བ་ནི། དགག་དབྱེའི་ལས་ཀྱི་དུས་མ་ཡིན་པ་གཞན་དུ་དགག་དབྱེ་དེ་གཞག་པར་
མི་བྱ་བའོ། །གསོ་སྦྱོང་མ་ཡིན་པར་དེ་མི་བྱའོ་ཞེས་བྱ་བ་ནི། གསོ་སྦྱོང་གི་ལས་ཀྱི་དུས་མ་ཡིན་པ་གཞན་དུ་གསོ་སྦྱོང་དེ་གཞག་པར་མི་བྱ་བའོ། །འཇོག་པར་བྱེད་པ་བུད་མེད་ཀྱིས་གཞན་སྐྱེས་པའི་གཞག་པ་ཉིད་བྱེད་དམ་བྱས་པ་ཉིད་ན་གཞག་པ་ཉིད་མ་ཡིན་ནོ་ཞེས་བྱ་བ་ནི། གསོ་
སྦྱོང་དང་དགག་དབྱེ་འཇོག་པར་བྱེད་པས་དེ་དག་འཇོག་པར་བྱེད་པ་ཉིད་ནའམ། གཞག་པར་བྱས་པ་ཉིད་ཀྱི་འོག་ཏུ་གལ་ཏེ་མཚན་གྱུར་ཏམ་དང་པོ་ཉིད་ནས་བུད་མེད་དུ་གྱུར་པ་ཉིད་ཀྱིས་འཇོག་པར་བྱེད་པ་བུད་མེད་ཡིན་པར་གྱུར་ལ། གཞག་པར་བྱ་བ་གཞན་སྐྱེས་པ་ཡིན་པར་གྱུར་ན།
དེ་ནི་འཇོག་པར་བྱེད་པ་བུད་མེད་ཉིད་ཀྱིས་གཞན་སྐྱེས་པའི་གསོ་སྦྱོང་དང་དགག་དབྱེ་གཞག་པ་ཉིད་བྱེད་དམ་བྱས་པ་ཉིད་ནི་གཞག་པ་ཉིད་མ་ཡིན་ཏེ། བུད་མེད་རྣམས་ནི་སྐྱེས་པའི་ཡུལ་ལ་དབང་མེད་པའི་ཕྱིར་གཞག་པ་མི་འབྱུང་བ་ཁོ་ན་ཡིན་ནོ། །སྐྱེས་པས་བུད་མེད་ཀྱི་འཇོག་པ་ནི་
འབྱུང་བ་ཁོ་ན་ཡིན་ནོ། །འོ་ན་གང་གི་ཚེ་འཇོག་པར་བྱེད་པ་བུད་མེད་ཀྱིས་འཇོག་ཏུ་བཅུག་ནས་སྐྱེས་པ་ཉིད་དུ་གྱུར་ན་ཇི་ལྟར་བརྗོད་པར་བྱ་ཞེ་ན། འཇོག་པར་བྱེད་པ་བུད་མེད་ཉིད་ལ་གཞག་པ་དང་པོ་ནས་མི་འབྱུང་བས་ཕྱིས་སྐྱེས་པ་ཉིད་དུ་གྱུར་ཀྱང་རྗེས་སུ་འཇུག་པ་མེད་དོ། །དེ་ལྟ་བས་ན་བུད་
མེད་ཀྱིས་འཇོག་ཏུ་བཅུག་ནས་སྐྱེས་པ་ཉིད་དུ་གྱུར་ཀྱང་གཞག་པ་ཉིད་མེད་དོ། །འདིར་གཞུང་ནི། དགག་དབྱེའི་གཞིའི་ཞུ་བ་ལས་བཙུན་པ་རེ་ཞིག་དགེ་སློང་གིས་དགེ་སློང་གི་དགག་དབྱེ་འཇོག་པར་བགྱིད་ཅིང་། གང་གི་འཇོག་བར་བགྱིད་པ་དེའི་མཚན་གྱུར་ཏེ་དགེ་སློང་མར་གྱུར་ན་གཞག་

པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་བྱའོ། །འཇོག་པར་བགྱིད་པ་གང་ལགས་པ་དེ་མཚན་གྱུར་ཏེ་དེ་དགེ་སློང་མར་གྱུར་ན་གཞག་པར་བརྗོད་པར་བགྱིའམ་ཉེ་བར་འཁོར་གཞག་པར་བརྗོད་པར་མི་བྱའོ། །བཙུན་པ་རེ་ཞིག་དགེ་སློང་མས་དགེ་
སློང་མའི་དགག་དབྱེ་འཇོག་པར་བགྱིད་ཅིང་གང་གིས་འཇོག་པར་བགྱིད་པ་དེ་མཚན་གྱུར་ཏེ་དགེ་སློང་དུ་གྱུར་ན་གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ། །འཇོག་པར་བགྱིད་པ་གང་ལགས་པ་དེ་མཚན་གྱུར་ཏེ་དགེ་སློང་དུ་གྱུར་ན་གཞག་པར་བརྗོད་པར་
བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ། །དེ་བཞིན་དུ་དགེ་སློང་དང་དགེ་སློང་མས་དགག་དབྱེ་བྱེད་པ་ཡང་བརྗོད་པར་བྱའོ་ཞེས་གསུངས་པ་ཡིན་ནོ། །དེ་བཞིན་དུ་ཉམས་པས་ཀྱང་མ་ཡིན་ནོ་ཞེས་བྱ་བ་ནི། སྨྱོན་པ་ལ་སོགས་པས་གཞག་པ་ཉིད་ཀྱང་གཞག་པ་ཉིད་མ་ཡིན་
པའོ། །ཚུལ་ཁྲིམས་མེད་པ་དང་གཅིག་པ་ཉིད་མ་ཡིན་པས་ཀྱང་མ་ཡིན་ནོ་ཞེས་བྱ་བ་ནི། ཉམས་པའམ་དང་པོ་ནས་སྡོམ་པ་མ་ཐོབ་པས་ཚུལ་ཁྲིམས་མེད་པ་ཉིད་དོ། །ཆོས་དང་ཆོས་མ་ཡིན་པའི་ཕྱོགས་སུ་གྱུར་པ་ཕན་ཚུན་བློ་གཅིག་པ་ཉིད་མ་ཡིན་པ་དེ་གཉིས་ཀྱིས་གཞག་པ་ཉིད་ཀྱང་
གཞག་པ་ཉིད་མ་ཡིན་ནོ། །གཅིག་པ་ཉིད་མ་ཡིན་པའི་གཞུང་ནི་དགག་དབྱེའི་གཞིའི་ཞུ་བ་ལས་བཙུན་པ་རེ་ཞིག་ཁས་བླངས་པ་དག་གིས་ཁས་མ་བླངས་པ་དག་གི་དགག་དབྱེ་འཇོག་པར་བགྱིད་ན་གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ། །
བཙུན་པ་རེ་ཞིག་ཁས་མ་བླངས་པ་དག་གིས་ཁས་བླངས་པ་དག་གི་དགག་དབྱེ་འཇོག་པར་བགྱིད་ན། གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ་ཞེས་གསུངས་པ་ཡིན་ནོ། །དེ་གཉིས་ཀྱི་ཡང་མ་ཡིན་ནོ་ཞེས་བྱ་བ་ནི། རང་བཞིན་ཉམས་པ་
ཞེས་བྱ་བ་དེ་དང་། ཚུལ་ཁྲིམས་མེད་པ་དང་གཅིག་པ་ཉིད་མ་ཡིན་པ་ཞེས་སྨོས་པའི་ཚོམས་དེ་གཉིས་ཀྱིས་གསོ་སྦྱོང་དང་དགག་དབྱེ་གཞན་གྱིས་གཞག་པ་ཉིད་ཀྱང་གཞག་པ་ཉིད་མ་ཡིན་པའོ། །ཅིའི་ཕྱིར་གསོ་སྦྱོང་གཞག་པའི་གཞི་འདིའི་མིང་ཡོངས་སུ་སྦྱང་བའི་གཞི་ཞེས་གཞན་དུ་བྱས་ཤེ་ན་

གཞི་འདིས་དགག་དབྱེ་གཞག་པ་དང་གདམས་ངག་གཞག་པ་དང་། བརྗོད་པ་དང་བཅས་པ་དང་། ཕུར་པ་དང་བཅས་པ་ལ་སོགས་པས་ཡོངས་སུ་སྦྱང་བར་བྱ་བ་ཐམས་ཅད་བསྡུས་པ་ཡིན་གྱི། གསོ་སྦྱོང་གཞག་པ་འབའ་ཞིག་ཏུ་མ་ཟད་ཀྱི། དེ་དག་ཐམས་ཅད་བསྟན་པའི་ཕྱིར། གསོ་སྦྱོང་གཞག་
པའི་གཞི་འདིའི་མིང་ཡོངས་སུ་སྦྱང་བའི་གཞི་ཞེས་མིང་གཞན་དུ་བྱས་སོ། །ཡོངས་སུ་སྦྱང་བའི་གཞི་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་བཤད་ཟིན་ཏོ་ཡོངས་སུ་སྦྱང་བའི་གཞི་རྫོགས་སོ་ཞེས་བྱ་བ་གསོ་སྦྱོང་གཞག་པའི་གཞི་བཤད་ཟིན་ཏོ།། །།ད་ནི་ལས་བྱེད་པའི་གཞི་སྨྲ་
བར་འདོད་ནས་དགེ་འདུན་ཐ་དད་པ་ཉིད་དུ་ནུས་པ་ལ་མི་འདོད་པར་གླེང་བ་དང་གླེང་བར་བྱེད་པ་ན་ལོག་པར་མི་བྱའོ་ཞེས་བྱ་བ་སྨྲས་ཏེ། གང་ཟག་གང་གིས་དགེ་འདུན་ཐ་དད་པ་ཉིད་དུ་དབྱེ་བར་ནུས་པ་དེ་ལ་དེ་མི་འདོད་བཞིན་དུ་ཕར་གླེང་བར་མི་བྱ་ལ། དེས་ཚུར་གླེངས་པ་ན་ཡང་ལོག་ཐབས་མི་བྱ་
བ་སྟེ། དེ་ནི་དེས་དགེ་འདུན་འབྱེད་པར་འགྱུར་བ་སྤང་བའི་ཕྱིར་རོ། །འདའ་བར་བྱ་བ་གང་ན་མི་མཐུན་པ་ཡོད་པ་དེ་དང་ལྷན་ཅིག་ཏུ་འཁོད་པར་མི་བྱའོ་ཞེས་བྱ་བ་ནི། གནས་གང་དུ་འདའ་བར་བྱེད་ཅིང་ངལ་བསོ་བར་བྱེད་པའི་གནས་དེ་ནི་འདའ་བར་བྱ་བ་ཞེས་བྱ་སྟེ། དབེན་པ་ཞེས་བྱ་
བའི་ཐ་ཚིག་གོ། །འདའ་བར་བྱ་བའི་གནས་གང་ན་མི་མཐུན་པ་ཞེས་བྱ་བར་དགྲ་བོ་ཡོད་པ་དེར་དེ་དང་ལྷན་ཅིག་ཏུ་འཁོད་པ་ཞེས་བྱ་བ་འདུག་པ་དང་། འགྲེང་བར་མི་བྱ་བ་སྟེ་འཐབ་ཀྲོལ་གྱི་སྐབས་བཅད་པའི་ཕྱིར་འདི་བཅའ་བ་མཛད་དོ། །གཞན་དུ་ནི་གོ་གཉིས་སམ་གསུམ་གྱི་བར་དུ་
བཅད་དེའོ་ཞེས་བྱ་བ་ནི། འདའ་བར་བྱ་བའི་གནས་དབེན་པ་སྔར་བསྟན་པ་དེ་ལས་གཞན་པའི་གནས་གང་ན་གང་ཟག་མི་མཐུན་པ་ཡོད་པ་དེ་དང་ལྷན་ཅིག་ཏུ་མི་འཁོད་དུ་མི་རུང་ན་གོ་གཉིས་སམ་གསུམ་གྱི་བར་དུ་བཅད་དེ་འཁོད་པར་བྱའོ། །འདི་ནི་ལུས་ཀྱིས་ཕ་རོལ་གནོད་པ་དང་
རེག་པ་སྤང་བའི་ཕྱིར་རོ། །དེས་ཅིག་ཤོས་དང་ཡང་དེ་བཞིན་ནོ་ཞེས་བྱ་བ་ནི། མི་མཐུན་པའི་ཡུལ་གང་ལ་འདའ་བར་བྱ་བ་གང་ན་མི་མཐུན་པ་ཡོད་པ་དེ་དང་ལྷན་ཅིག་ཏུ་འཁོད་པར་མི་བྱ་བ་དང་། གཞན་དུ་ནི་གོ་གཉིས་སམ་གསུམ་གྱིས་བཅད་དེ་འཁོད་པར་བྱའོ་ཞེས་བསྟན་པ་

གང་ཡིན་པ་དེ་མི་མཐུན་པར་དེས་ཀྱང་མི་མཐུན་པའི་ཡུལ་ཅིག་ཤོས་དང་དེ་བཞིན་དུ་བྱ་བའོ། །དེ་གཉིས་ཀྱི་གཙུག་ལག་ཁང་བར་དུ་ཆོད་པ་སྦྱིན་པར་བྱ་བ་ཉིད་དང་མནོད་པར་བྱ་བ་ཉིད་དོ་ཞེས་བྱ་བ་ནི། གང་ཟག་མི་མཐུན་པ་དེ་གཉིས་ཀྱི་གཙུག་ལག་ཁང་ཞེས་བྱ་བ་
གནས་པའི་གཞི་གཡོགས་པའམ་མ་གཡོགས་པ་གང་ཡང་རུང་བ། བར་དུ་གཞན་གྱི་གནས་ཁང་གིས་ཆོད་པ་གནས་ཁང་བསྒོ་བས་ཀྱང་སྦྱིན་པར་བྱ་བ་ཉིད་ཡིན་ལ། རང་གིས་ཀྱང་མནོད་པར་བྱ་བ་ཉིད་ཡིན་ནོ། །བསྐོ་བས་དེ་ལས་གཞན་དུ་བསྐོས་ན་ཡང་ཉེས་བྱས་སུ་འགྱུར་ལ། ནོད་
པས་དེ་མནོས་ན་ཡང་ཉེས་བྱས་སུ་འགྱུར་རོ། །དགེ་འདུན་ཐམས་ཅད་ཀྱིས་གྲོགས་བྱས་སམ་ལས་སུ་སྩལ་ཏེ། དེར་གནས་ཁང་སྦྱིན་པར་བྱེད་ན་ཡང་ཐམས་ཅད་ལ་ཉེས་བྱས་སུ་འགྱུར་རོ། །འདི་ནི་མི་མཐུན་པ་དེ་གཉིས་མི་འཕྲད་པར་བྱ་བའི་ཕྱིར་རོ། །ཆོས་དང་འདུལ་བ་ལ་གལ་ཏེ་དེ་དང་ལྡན་
པར་ཤེས་ནས་ཆོས་མ་ཡིན་པ་ལ་མངོན་པར་ཞེན་པ་ལ་དགེ་འདུན་མཐུན་པ་མེད་དོ་ཞེས་བྱ་བ་ནི། དངོས་པོ་དང་འབྲེལ་བའི་རྣམ་པའི་འདུལ་བ་ལ་གལ་ཏེ་དེ་དང་ལྡན་པ་ཉིད་དུ་ཤེས་ན་ཞེས་བྱ་བ་ཆོས་དང་འདུལ་བ་ལ་གལ་ཏེ་མི་མཐུན་པ་དེ་དང་ལྡན་པར་ཤེས་ནས་ཆོས་མ་ཡིན་པ་ལ་མངོན་
པར་ཞེན་པ་ལ་ཞེས་བྱ་བ་དེ་ལྟར་ཆོས་དང་འདུལ་བའི་རྣམ་པ་ལ་མི་མཐུན་པ་ཉིད་དང་ལྡན་པར་ཤེས་ནས་དེའི་འོག་ཏུ་ཆོས་མ་ཡིན་པ་ལ་མངོན་པར་ཞེན་པ་ལ་དེ་ལ་དགེ་འདུན་མཐུན་པ་མེད་དོ། །གང་གི་ཕྱིར་ཆོས་དང་འདུལ་བའི་ཕྱིར་དགེ་འདུན་མཐུན་པ་ཡིན་གྱི་དོན་གཞན་གྱི་ཕྱིར་མ་ཡིན་
པ་དེའི་ཕྱིར་མི་མཐུན་པ་ལ་ནི་དགེ་འདུན་མཐུན་པ་འབྱེ་བར་མི་འགྱུར་རོ། །དེའི་ཕྱིར་དེ་ལས་གཞན་པ་དག་དང་ཚོགས་ཏེ་ལས་བྱས་ན་ཡང་མི་འཆགས་པ་ལ་ཕན་ཚུན་མི་མཐུན་པ་ཉིད་དུ་ཡང་མི་འགྱུར་རོ་ཞེས་བྱ་བ་ནི། གང་གི་ཕྱིར་ཇི་སྐད་བསྟན་པ་དེ་ལ་དགེ་འདུན་མཐུན་པ་མེད་པ་དེའི་ཕྱིར་
ཆོས་མ་ཡིན་པ་ལ་མངོན་པར་ཞེན་པ་དེ་དག་དང་། དེ་ལས་གཞན་པའི་ཆོས་ཀྱི་ཕྱོགས་དང་མཐུན་པ་དག་ཚོགས་ཏེ་ལས་བརྒྱ་རྩ་གཅིག་པོ་དག་བྱས་ན་ཡང་མི་འཆགས་ལ། མ་ཚོགས་པར་སོ་སོར་བྱེད་ན་ཡང་ཕན་ཚུན་མི་མཐུན་པ་ཉིད་དུ་མི་འགྱུར་ཏེ། ཕྱོགས་སོ་སོའི་ལས་

འཆགས་པར་འགྱུར་བའོ། །དེ་དག་དེའི་མི་མཐུན་པའི་ཕྱོགས་དང་འཐབ་པར་འགྱུར་བ་ཉིད་ནི་ཆོས་འདི་པ་དག་པའི་ཕྱག་མི་བྱ་བ་ཉིད་ཡིན་ནོ་ཞེས་བྱ་བ་ནི། ཆོས་མ་ཡིན་པ་ལ་མངོན་པར་ཞེན་པ་དེ་དག་དེའི་མི་མཐུན་པའི་ཕྱོགས་ཆོས་དང་མཐུན་པའི་ཕྱོགས་སུ་གཏོགས་པ་དང་།
ལྷན་ཅིག་འཐབ་པར་འགྱུར་བ་ཉིད་ན་དེ་དག་ལ་ཆོས་འདི་ལ་དགེ་སློང་དང་དགེ་སློང་མ་དང་དགེ་ཚུལ་དང་། དགེ་ཚུལ་མ་དང་། དགེ་སློབ་མ་དང་། དགེ་བསྙེན་དང་དགེ་བསྙེན་མ་དག་གིས་ཕྱག་མི་བྱ་བ་ཉིད་ཡིན་པའོ། །མངོན་དུ་ལྡང་བ་དང་སྟན་ལ་བོད་པ་དང་གཏམ་འདྲེ་བ་དང་།
ཕེབས་པར་སྨྲ་བ་དང་། ཀུན་དགའ་བར་འགྱུར་བ་དང་། རྣམ་པར་བལྟ་བ་དང་། ཅུང་ཟད་བལྟ་བ་དག་ཀྱང་མི་བྱའོ་ཞེས་བྱ་བ་ནི། ཇི་སྐད་སྨོས་པ་དེ་དག་ཐམས་ཅད་ཀྱང་ཆོས་མ་ཡིན་པ་ལ་མངོན་པར་ཞེན་པ་སྤང་བའི་ཕྱིར་རོ། །གཏམ་འདྲེ་བ་ཞེས་བྱ་བ་ནི། ཚིག་གི་ལན་ལ་སོགས་པ་ཀུན་
དུ་སྨྲ་བ་སྦྱིན་པའོ། །ཕེབས་པར་སྨྲ་བ་ཞེས་བྱ་བ་ནི། ཡིད་གཅུགས་པའི་གཏམ་བྱ་བའོ། །ཀུན་དགའ་བར་འགྱུར་བ་ཞེས་བྱ་བ་ནི། གཏམ་དྲི་བ་ལ་སོགས་པའི་ཐ་སྙད་བྱ་བའོ། །རྣམ་པར་བལྟ་བ་ཞེས་བྱ་བ་ནི། མིག་གིས་རྒྱུན་དང་ལྡན་པར་བལྟ་བའོ། །ཅུང་ཟད་བལྟ་བ་ཞེས་བྱ་བ་ནི།
རྒྱུན་དང་ལྡན་པ་མ་ཡིན་པར་བལྟ་བའོ། །ལོག་པའི་ཐ་སྙད་ཀྱིས་གནས་མལ་ངན་པ་རྗེས་སུ་སྦྱིན་ནོ་ཞེས་བྱ་བ་ནི། ཆོས་མ་ཡིན་པ་ལ་མངོན་པར་ཞེན་པ་དེ་དག་ཉེ་བར་འོངས་ནའོ། །ཁ་ཅིག་ལས་ནི་ཚིག་གིས་ཐོས་པ་དང་བཅས་པར་གཞན་ལའོ་ཞེས་བྱ་བ་ནི། གཞུང་ཁ་ཅིག་
ལས་ནི་ཆོས་མ་ཡིན་པ་ལ་མངོན་པར་ཞེན་པ་དེ་དག་འོངས་ན་ཚིག་གིས་ཅི་ནས་ཀྱང་དེ་དག་གིས་ཐོས་པ་དང་བཅས་པར་གང་ཟག་གཞན་ལ་བརྟེན་ཏེ་དེ་དག་འདི་ཙམ་འཐོབ་བོ་ཞེས་བྱ་བའི་ཚིག་གིས་གནས་མལ་ངན་པ་རྗེས་སུ་སྦྱིན་པར་བྱའོ་ཞེས་འབྱུང་ངོ་། །གཙུག་ལག་ཁང་མཇུག་
ཏུའོ་ཞེས་བྱ་བ་ནི། སྦྱིན་ནོ་ཞེས་བྱ་བར་སྦྱར་ཏེ་མཇུག་ཏུ་ཞེས་བྱ་བར་ནི་ཐ་མར་རོ། །ཁོ་བོ་ཅག་རྒན་ནོ་ཞེས་ཟེར་ན་ཁྱེད་ཀྱང་བདག་ཅག་ཤཱཀྱའི་སྲས་ཀྱི་དགེ་སློང་དག་ཡིན་ནོ་སྙམ་དུ་བདག་ཉིད་ཁས་འཆེའམ་ཁྱེད་ཅག་གང་དག་གི་སྤྱོད་ཚུལ་འདི་ལྟ་བུ་དང་གཏམ་འདི་ལྟ་བུ་འདི་ལ་ཡང་མི་

འཐོབ་པ་ཡིན་ན། ཁྱོད་ཀྱི་སྟོན་པ་ཐུགས་རྗེ་དང་ལྡན་པས་དེས་ན་འདི་རྗེས་སུ་གནང་ངོ་ཞེས་གཞན་ལ་ལན་གདབ་པར་བྱའོ་ཞེས་བྱ་བ་ནི། ཆོས་མ་ཡིན་པ་ལ་མངོན་པར་ཞེན་པ་དེ་དག་གནས་མལ་ངན་པ་དག་ཐ་མར་བྱིན་པ་ན། གལ་ཏེ་འདི་སྐད་ཅེས་ཁོ་བོ་ཅག་
རྒན་རབས་ཡིན་ན་ཅིའི་ཕྱིར་གནས་མལ་འདི་ལྟ་བུ་ངན་པ་མཇུག་ཏུ་སྦྱིན་ཞེས་ཟེར་ན་དེ་དག་ལ་དངོས་སུ་ལན་མི་གདབ་པར་གང་ཟག་གཞན་ལ་བརྟེན་ཏེ་ལན་འདི་སྐད་གདབ་པར་བྱའོ་ཞེས་བྱ་བར་སྦྱར་རོ། །ཁྱེད་ཅག་ཀྱང་བདག་ཅག་ཤཱཀྱའི་སྲས་ཀྱི་དགེ་སྦྱོང་དག་ཡིན་ནོ་སྙམ་དུ་བདག་
ཉིད་ཁས་འཆེ་འམ་ཞེས་བྱ་བ་ནི། ཁྱེད་ཅག་དེ་མ་ཡིན་ནོ་ཞེས་བྱ་བའི་ཟུར་ཡིན་ནོ། །སྤྱོད་ཚུལ་འདི་ལྟ་བུ་ཞེས་བྱ་བ་ནི། ཁྱེད་ཅག་གིས་སྤྱད་པའི་སྤྱོད་པ་ལ་སོགས་པ་དང་གསོ་སྦྱོང་དང་དགག་དབྱེ་ཉམས་པ་གང་ཡིན་པ་དེ་དག་བརྗོད་པར་བྱའོ། །གཏམ་འདི་ལྟ་བུ་ལ་ཞེས་བྱ་བ་ནི།
སྤྱོད་ཚུལ་དེ་ལ་ཉེས་དམིགས་གང་བྱུང་བ་སྟེ་སྟོན་པར་གུད་དུ་གཤེགས་པ་ལ་སོགས་པ་གང་ཡིན་པ་དེ་དག་བརྗོད་པར་བྱའོ། །འདི་ཡང་མི་ཐོབ་པ་ཡིན་ནོ་ཞེས་བྱ་བ་ནི། གནས་མལ་ངན་པ་མཇུག་ཏུ་བྱིན་པ་འདི་ཡང་ཁྱེད་ལ་མི་འོས་པ་ཡིན་ནོ་ཞེས་བྱ་བའི་ཐ་ཚིག་གོ། །ཁྱེད་ཀྱི་སྟོན་པ་ཐུགས་
རྗེ་དང་ལྡན་པ་ཞེས་བྱ་བ་ནི། དེ་དག་ཀྱང་ད་དུང་དེ་བཞིན་གཤེགས་པའི་ཉན་ཐོས་ཡིན་པས་སྟོན་པའི་ཆེ་བ་ཉིད་བརྗོད་པར་བྱའོ། །དེས་ན་ཞེས་བྱ་བ་ནི། སྟོན་པ་ཐུགས་རྗེ་དང་ལྡན་པའི་རྒྱུ་དེས་ནའོ། །འདི་རྗེས་སུ་གནང་ངོ་ཞེས་བྱ་བ་ནི། གནས་མལ་ངན་པ་མཇུག་ཏུ་སྦྱིན་པ་ཞེས་བྱ་བ་འདི་
རྗེས་སུ་གནང་ངོ་ཞེས་སོ། །གཞན་ལ་ལན་གདབ་པར་བྱའོ་ཞེས་བྱ་བ་ནི། དེ་དག་ལ་དངོས་སུ་ལན་མི་གདབ་པར་གང་ཟག་གཞན་ལ་བརྟེན་ཏེ་ལན་དེ་སྐད་ལན་གདབ་པར་བྱ་བའོ། །དགེ་སློང་མས་སྟན་ལས་ལྡང་བ་ལ་དབྲི་བར་མི་བྱའོ་ཞེས་བྱ་བ་ནི། དགེ་སློང་འཐབ་ཀྲོལ་བྱེད་པ་དེ་དག་ལ་
དགེ་སློང་མས་ནི་སྟན་ལས་ལྡང་བ་གཞན་གྱི་ལུགས་ལས་དབྲི་བར་མི་བྱ་བའོ། །འདི་སྐད་བསྟན་ཏེ། དགེ་སློང་མས་ནི་འཐབ་ཀྲོལ་བྱེད་པ་དག་མཐོང་ན་དེ་ལྟར་ཡང་སྟན་ལས་ལྡང་བར་བྱའོ། །དགེ་བསྙེན་གྱིས་བསོད་སྙོམས་དབུལ་བར་བྱའོ་ཞེས་བྱ་བ་ནི་འཐབ་ཀྲོལ་ཅན་དེ་དག་ལའོ། །

བཟོད་པ་བྱས་པ་དེ་དག་ལ་མཐུན་པ་ཐོབ་པ་མེད་པར་མཐུན་པར་མི་འབྱུང་ངོ་ཞེས་བྱ་བ་ནི། ཆོས་མ་ཡིན་པ་ལ་མངོན་པར་ཞེན་པ་དེ་དག་གིས་དགེ་འདུན་ལ་བཟོད་པ་གསོལ་ཏེ། དགེ་འདུན་གྱིས་གསོལ་བ་དང་བཞིའི་ལས་ཀྱིས་བཟོད་པ་བྱས་སུ་ཟིན་ཀྱང་དེ་དག་རང་གིས་དགེ་འདུན་ལ་བཟོད་པ་
གསོལ་ཏེ། དགེ་འདུན་གྱིས་གསོལ་བ་དང་བཞིའི་ལས་ཀྱིས་མཐུན་པ་སྦྱིན་པ་ཐོབ་པ་མེད་པར་དགེ་འདུན་དང་མཐུན་པ་མི་འབྱུང་བའོ། །དེ་དག་གིས་དགེ་འདུན་ལ་བཟོད་པ་གསོལ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །བདག་དགེ་སློང་ཀཽ་ཤཱམྦཱི་བའི་དགེ་
སློང་ནང་པར་སྔ་ཞིག་ཏུ་མདོ་སྡེ་དང་འདུལ་བ་དང་མ་མོའི་ལུང་རྣམ་པར་རྟོག་རྟོག་ན་འདི་སྙམ་བགྱིད་དེ་གང་ལས་བདག་ཅག་ལ་འཐབས་དང་མཚང་འདྲུ་བ་དང་། རྩོད་པ་དང་འགྱེད་པ་འབྱུང་བའི་གཞི་ནི་འདི་ལྟ་སྟེ། ལྟུང་བ་བྱུང་ངམ་མ་བྱུང་བ་དང་གནས་ནས་ཕྱུང་ངམ་མ་ཕྱུང་བ་ལགས་ན། བདག་
ཅག་ལ་ལྟུང་བ་བྱུང་གི་ལྟུང་བ་མ་བྱུང་བ་མ་ལགས་གནས་ནས་ཕྱུང་བ་ལགས་ཀྱི། གནས་ནས་མ་ཕྱུང་བ་མ་ལགས་ཏེ། གང་གནས་ནས་ཕྱུང་བ་ནི་ཆོས་དང་མཐུན་པའི་ལས་མ་འཁྲུགས་གཞག་པར་མི་འོས་པས་བགྱིས་སོ་སྙམ་བགྱིད་ནས་བདག་གྲོང་ཁྱེར་ཡངས་པ་ཅན་གྱི་དགེ་སློང་དང་
སྡུམས་བགྱི་ཞིང་མཐུན་པར་བགྱིའོ་སྙམ་དུ་སྟེ། བདག་ཀཽ་ཤཱམྦཱི་པའི་དགེ་སློང་སྐྲ་འགྲེང་བར་གྱུར་སྐྲ་འཕྱར་བར་གྱུར་ཅིང་དགེ་འདུན་ལ་སྤུ་སྙོལ་བར་བགྱིད། འབྱུང་བར་སྐྱོད་མཚུངས་པ་ཉེ་བར་སྟོན་ལ་མཚམས་ཀྱི་ནང་དུ་མཆིས་ཏེ་བཟོད་པ་གསོལ་ཞིང་བཞི་གང་ལས་གནས་ནས་དབྱུང་
བའི་ཕྲིན་ལས་མཛད་པའི་གཞི་དེ་ལས་སླར་ལྡོག་པར་བགྱིད་ན་ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་གནས་ནས་དབྱུང་བའི་ཕྲིན་ལས་མཛད་ལགས་པ་ལ་བཟོད་པ་མཛད་དུ་གསོལ། ལན་གསུམ་དུ་བཟླས་ཞེས་གསུངས་པ་ཡིན་ནོ། །དགེ་འདུན་
གྱིས་གསོལ་པ་དང་བཞིའི་ལས་ཀྱིས་བཟོད་པ་བྱ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །ཀཽ་ཤཱམྦཱི་པའི་དགེ་སློང་གནས་ནས་དབྱུང་བའི་ཕྲིན་ལས་མཛད་ལགས་པ་འདི་སྐྲ་འགྲེང་བར་གྱུར། སྐྲ་འཕྱར་བར་གྱུར་ཅིང་། དགེ་འདུན་ལས་སྤུ་སྙོལ་བར་བགྱིད་ན།

འབྱུང་བ་སྐྱོད། མཚུངས་པར་ཉེ་བར་སྟོན་ལ་མཚམས་ཀྱི་ནང་དུ་མཆིས་ཏེ། བཟོད་པ་གསོལ་ཞིང་གཞི་གང་ལས་གནས་ནས་དབྱུང་བའི་ཕྲིན་ལས་མཛད་པའི་གཞི་དེ་ལས་སླར་ལྡོག་པར་བགྱིད་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་
གྱིས་གནང་བར་མཛོད་ཅིག་དང་། དགེ་འདུན་གྱིས་ཀཽ་ཤཱམྦཱི་པའི་དགེ་སློང་གནས་ནས་དབྱུང་བའི་ཕྲིན་ལས་མཛད་ལགས་པ་ལ་བཟོད་པ་མཛད་དོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །མཐུན་པ་གསོལ་བ་དང་མཐུན་པ་སྦྱིན་པའི་སྔགས་ནི་འོག་ནས་འབྱུང་
ངོ་། །གསོ་སྦྱོང་མེད་པར་རང་བཞིན་དུ་གནས་པ་ཉིད་མི་འཐོབ་པོ་ཞེས་བྱ་བ་ནི། མཐུན་པ་གསོལ་ཏེ་མཐུན་པ་ཐོབ་ཏུ་ཟིན་ཀྱང་ཇི་སྲིད་དུ་དགེ་འདུན་ལས་མཐུན་པའི་གསོ་སྦྱོང་གསོལ་ཞིང་མཐུན་པའི་གསོ་སྦྱོང་མ་ཐོབ་ཀྱི་བར་དུ་རང་བཞིན་དུ་གནས་པ་ཉིད་མི་འཐོབ་སྟེ། ཆོས་དང་ཟང་ཟིང་
གི་ལོངས་སྤྱོད་གཉིས་ཀྱི་འོས་ཉིད་མ་ཡིན་ནོ་ཞེས་བྱ་བའི་ཐ་ཚིག་གོ། །མཐུན་པའི་གསོ་སྦྱོང་ཞེས་བྱ་བ་ནི། དོན་དང་མཐུན་པར་བརྗོད་པ་ཡིན་ཏེ། མཐུན་པར་སྒྲུབ་པའི་ཕྱིར་གསོ་སྦྱོང་བྱ་བ་ཞེས་བྱ་བའི་ཐ་ཚིག་གོ། །དེ་བྱིན་ནས་བྱའོ་ཞེས་བྱ་བ་ནི། མཐུན་པའི་གསོ་སྦྱོང་དེ་དེ་བཞིན་
དུ་མི་བྱ་བར་བྱིན་ནས་གཟོད་བྱ་བའོ། །དེ་ནི་ལས་ཀྱིས་སོ་ཞེས་བྱ་བ་ནི། མཐུན་པའི་གསོ་སྦྱོང་སྦྱིན་པ་དེ་ནི་དེ་དག་གིས་གསོལ་ནས་དགེ་འདུན་གྱིས་གསོལ་བ་དང་བཞིའི་ལས་ཀྱིས་སྦྱིན་པའོ། །དེ་དག་གིས་གསོལ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །
བདག་ཀཽ་ཤཱམྦཱི་པའི་དགེ་སློང་ལ་དགེ་འདུན་གྱིས་གནས་ནས་དབྱུང་བའི་ཕྲིན་ལས་མཛད་ལགས་པས་བདག་དགེ་འདུན་གྱི་གན་དུ་མཆིས་ཏེ། བཟོད་པ་གསོལ་ན་དགེ་འདུན་གྱིས་བདག་ལ་བཟོད་པའི་ཕྲིན་ལས་མཛད་ལགས་ཏེ། བདག་བཟོད་པའི་ཕྲིན་ལས་མཛད་ལགས་པ་འཁོར་དང་
བཅས་པ་དགེ་འདུན་གྱི་གན་དུ་མཆིས་ནས་མཐུན་པ་གསོལ་ན། དགེ་འདུན་གྱིས་བདག་འཁོར་དང་བཅས་པ་ལ་མཐུན་པ་སྩལ་ལགས་པས་བདག་ཀཽ་ཤཱམྦཱི་པའི་དགེ་སློང་འཁོར་དང་བཅས་པ་མཐུན་པ་སྩལ་བ་མཐུན་པའི་གསོ་སྦྱོང་དུ་གསོལ་ན་ཐུགས་བརྩེ་བ་ཅན་དགེ་འདུན་བཙུན་པ་རྣམས་

ཀྱིས་ཐུགས་བརྩེ་བའི་སླད་དུ་བདག་ཀཽ་ཤཱམྦཱི་པའི་དགེ་སློང་འཁོར་དང་བཅས་པ་མཐུན་པ་སྩལ་བ་ལས་མཐུན་པའི་གསོ་སྦྱོང་སྩལ་དུ་གསོལ། །ལན་གསུམ་དུ་བཟླས་ཞེས་གསུངས་པ་ཡིན་ནོ། །དགེ་འདུན་གྱིས་གསོལ་བ་དང་བཞིའི་ལས་ཀྱིས་མཐུན་པའི་གསོ་སྦྱོང་སྦྱིན་པའི་སྔགས་ནི།
དགེ་འདུན་བཙུན་པ་རྣམས་གསན་དུ་གསོལ། །ཀཽ་ཤཱམྦཱི་པའི་དགེ་སློང་འདི་ལ་དགེ་འདུན་གྱིས་གནས་ནས་དབྱུང་བའི་ཕྲིན་ལས་མཛད་ལགས་པས་འདི་དགེ་འདུན་གྱི་གན་དུ་མཆིས་ཏེ། བཟོད་པ་གསོལ་ན་དགེ་འདུན་གྱིས་འདི་ལ་བཟོད་པའི་ཕྲིན་ལས་མཛད་ལགས་ཏེ། བཟོད་པའི་ཕྲིན་
ལས་མཛད་ལགས་པ་འཁོར་དང་བཅས་པ་འདི་དགེ་འདུན་གྱི་གན་དུ་མཆིས་ནས་མཐུན་པ་གསོལ་ཏེ། དགེ་འདུན་གྱིས་ཀཽ་ཤཱམྦཱི་པའི་དགེ་སློང་འཁོར་དང་བཅས་པ་འདི་ལ་མཐུན་པ་སྩལ་ལགས་པས། ཀཽ་ཤཱམྦཱི་པའི་དགེ་སློང་འཁོར་དང་བཅས་པ་མཐུན་པ་སྩལ་བ་འདི་མཐུན་པའི་གསོ་
སྦྱོང་གསོལ་ན་གལ་ཏེ། དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་ཀཽ་ཤཱམྦཱི་པའི་དགེ་སློང་འཁོར་དང་བཅས་པ་མཐུན་པ་སྩལ་བ་ལ་མཐུན་པའི་གསོ་སྦྱོང་གསོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་
ཡིན་ནོ། །སྔ་མ་ཡང་ངོ་ཞེས་བྱ་བ་ནི། མཐུན་པ་སྦྱིན་པ་ཞེས་སྔར་བསྟན་པ་དེ་ཡང་དེ་དག་གིས་གསོལ་ནས་དགེ་འདུན་གྱིས་གསོལ་བ་དང་བཞིའི་ལས་ཀྱིས་སྦྱིན་པའོ། །དེ་དག་གིས་གསོལ་བའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །བདག་ཀཽ་ཤཱམྦཱི་པའི་དགེ་
སློང་ལ་དགེ་འདུན་གྱིས་གནས་ནས་དབྱུང་བའི་ཕྲིན་ལས་མཛད་ལགས་པས་བདག་དགེ་འདུན་གྱི་གན་དུ་མཆིས་ཏེ་བཟོད་པ་གསོལ་ན། དགེ་འདུན་གྱིས་བདག་ལ་བཟོད་པ་མཛད་ལགས་ཏེ། བདག་ཀཽ་ཤཱམྦཱི་པའི་དགེ་སློང་བཟོད་པའི་ཕྲིན་ལས་མཛད་ལགས་པ་འཁོར་དང་བཅས་པ་
མཐུན་པ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ཀཽ་ཤཱམྦཱི་པའི་དགེ་སློང་བཟོད་པའི་ཕྲིན་ལས་མཛད་ལགས་པ་འཁོར་དང་བཅས་པ་ལ་མཐུན་པ་སྩལ་དུ་གསོལ། །ལན་གསུམ་བཟླས་ཞེས་གསུངས་པ་ཡིན་ནོ། །དགེ་འདུན་གྱིས་

གསོལ་བ་དང་བཞིའི་ལས་ཀྱིས་མཐུན་པ་སྦྱིན་པའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། །ཀཽ་ཤཱམྦཱི་པའི་དགེ་སློང་འདི་ལ་དགེ་འདུན་གྱིས་གནས་ནས་དབྱུང་བའི་ཕྲིན་ལས་མཛད་ལགས་པས་འདི་དགེ་འདུན་གྱི་གན་དུ་མཆིས་ཏེ། བཟོད་པ་
གསོལ་ནས་དགེ་འདུན་གྱིས་འདི་ལ་བཟོད་པ་མཛད་ལགས་ཏེ། ཀཽ་ཤཱམྦཱི་པའི་དགེ་སློང་བཟོད་པའི་ཕྲིན་ལས་མཛད་ལགས་པ་འཁོར་དང་བཅས་པ་འདི་མཐུན་པ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་
ཀཽ་ཤཱམྦཱི་པའི་དགེ་སློང་བཟོད་པའི་ཕྲིན་ལས་མཛད་ལགས་པ་འཁོར་དང་བཅས་པ་འདི་ལ་མཐུན་པ་སྩོལ་ཏོ། །འདི་ནི་གསོལ་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ།། །།བམ་པོ་དྲུག་ཅུ་དྲུག་པ། མཐུན་པ་དང་བཀྲ་ཤིས་དང་གནོད་པར་བྱུང་བའི་དོན་དུ་གསོ་
སྦྱོང་བྱར་རུང་ངོ་ཞེས་བྱ་བ་ལ། མཐུན་པའི་དོན་དུ་གསོ་སྦྱོང་བྱར་རུང་བ་ནི། བྱེ་བ་རྣམས་ཀྱི་མཐུན་པ་སྒྲུབ་པའི་ཕྱིར་མཐུན་པའི་གསོ་སྦྱོང་བྱར་རུང་བའི་སྐབས་འདིར་ཇི་སྐད་བསྟན་པ་ཉིད་ཡིན་ནོ། །བཀྲ་ཤིས་ཀྱི་དོན་དུ་གསོ་སྦྱོང་བྱར་རུང་བ་ནི། ཆོས་དང་འདུལ་བའི་སྐབས་སུ་ཆོས་མ་
ཡིན་པ་དང་འདུལ་བ་མ་ཡིན་པའི་དོན་སྒྲོ་འདོགས་པ་བཀྲ་མི་ཤིས་པ་དང་། དགེ་འདུན་བདེ་བའི་སྐབས་སུ་དགེ་འདུན་ལ་མི་བདེ་བ་ཡམས་ཀྱི་ནད་དང་། སེར་བ་དང་བྱེ་བ་དང་ཆོམ་རྐུན་དང་དམག་དང་རླུང་ལ་སོགས་པ་ཕྱི་རོལ་གྱི་བཀྲ་མི་ཤིས་པ་འབྱུང་བ་དག་མཐོང་ན་བཀྲ་ཤིས་པར་
སྒྲུབ་པའི་ཕྱིར་གསོ་སྦྱོང་བྱར་རུང་བའོ། །གནོད་པ་བྱུང་བའི་དོན་དུ་གསོ་སྦྱོང་བྱར་རུང་བ་ནི། རིམས་ཉིན་བཞི་པ་ལ་སོགས་པའི་གནོད་པ་བྱུང་བ་ན། དེ་དག་ཉེ་བར་ཞི་བར་བྱ་བའི་དོན་དུ་གསོ་སྦྱོང་བྱར་རུང་བའོ། །གྲོང་ཁྱེར་ཡངས་པ་ཅན་དུ་ཡང་དག་པར་སྡུད་པར་བྱེད་པ་ན། གསོ་སྦྱོང་བྱས་
པ་གང་ཡིན་པ་དེ་ནི་མི་རུང་བའི་གཞི་བཅུ་བྱུང་བ་དེ་དག་ཉེ་བར་ཞི་བར་བྱ་བའི་ཕྱིར་ཏེ། དེ་ཡང་ཆོས་དང་འདུལ་བའི་སྐབས་སུ་ཆོས་མ་ཡིན་པ་དང་། འདུལ་བ་མ་ཡིན་པའི་དོན་སྒྲོ་འདོགས་པ་བཀྲ་མི་ཤིས་པ་མཐོང་ནས། བཀྲ་ཤིས་པར་སྒྲུབ་པའི་ཕྱིར་བཀྲ་ཤིས་ཀྱི་གསོ་སྦྱོང་བྱ་བ་ཡིན་ནོ། །མི་

རུང་བའི་གཞི་བཅུ་གང་ཞེ་ན། སྡོམ་ལ། །ཧུ་ལུ་ཧུ་ལུ་ཡི་རང་དང་། །ཀུན་སྤྱད་གནོད་དང་ལན་ཚྭ་དང་། །ལམ་དང་སོར་གཉིས་དཀྲུགས་དང་གདིང་། །གསེར་གྱི་རུང་བ་བྱས་པ་ནི། །འདི་ལ་རུང་མིན་གཞི་བཅུ་ཡིན། །དེ་ལ་ཧུ་ལུ་ཧུ་ལུའི་རུང་བ་ཞེས་བྱ་བ་ནི། ཡངས་པ་ཅན་པ་དག་
ཆོས་མ་ཡིན་པ་དང་མི་མཐུན་པས་ལས་དག་བྱེད་ཅིང་། འཇུག་ཏུ་ཐལ་མོ་བརྡབས་ཏེ། ཧུ་ལུ་ཧུ་ལུ་ཞེས་བྱ་བའི་སྒྲ་ཕྱུང་ནས་ལས་འདི་གྲུབ་བོ་ཞེས་ཟེར་བ་གང་ཡིན་པའོ། །ཡི་རང་བའི་རུང་བ་ཞེས་བྱ་བ་ནི། ཡངས་པ་ཅན་པ་དག་ཆོས་མ་ཡིན་པ་དང་མི་མཐུན་པས་ལས་དག་བྱས་ནས།
དགེ་སློང་ལྷག་མ་རྣམས་རྗེས་སུ་ཡི་རང་བ་བྱེད་དུ་བཅུག་པ་གང་ཡིན་པའོ། །ཀུན་དུ་སྤྱད་པའི་རུང་བ་ཞེས་བྱ་བ་ནི། དེ་དག་གིས་གྲགས་པའི་དབང་གིས་ས་བརྐོས་པ་དང་། རྐོར་བཅུག་པ་གང་ཡིན་པའོ། །གནོད་པའི་རུང་བ་ཞེས་བྱ་བ་ནི། དེ་དག་ན་བར་གྱུར་ནས་ཆང་འཐུངས་པ་གང་ཡིན་
པའོ། །ལན་ཚྭའི་རུང་བ་ཞེས་བྱ་བ་ནི། དེ་དག་གིས་འཚོ་བའི་བར་དུ་བཅང་བར་བྱིན་གྱིས་བརླབས་པའི་ལན་ཚ་དུས་སུ་རུང་བ་དང་། ལྷན་ཅིག་ཏུ་མི་ན་བར་ཡང་ཟོས་པ་གང་ཡིན་པའོ། །ལམ་གྱི་རུང་བ་ཞེས་བྱ་བ་ནི་དེ་དག་གིས་རྒྱང་གྲགས་ཕྱེད་དུ་ཡང་སོང་སྟེ། འདུས་ཤིང་ཟ་བ་བྱས་པ་
གང་ཡིན་པའོ། །སོར་གཉིས་ཀྱི་རུང་བ་ཞེས་བྱ་བ་ནི། དེ་དག་གི་སྤངས་པ་ན་ལྷག་པོར་བྱེད་དུ་མ་བཅུག་པར་སོར་མོ་གཉིས་ཀྱིས་རེག་པར་བྱས་ཏེ་བཟོད་པ་གང་ཡིན་པའོ། །དཀྲུགས་པའི་རུང་བ་ཞེས་བྱ་བ་ནི། དེ་དག་གིས་ཞོ་དང་འོ་མ་དག་དཀྲུགས་ཏེ་དུས་མ་ཡིན་པར་ཡང་འཐུངས་
པ་གང་ཡིན་པའོ། །གདིང་བའི་རུང་བ་ཞེས་བྱ་བ་ནི། དེ་དག་གིས་གདིང་བ་སར་པ་ལ་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་མ་གླན་པར་སྤྱད་པ་གང་ཡིན་པའོ། །གསེར་གྱི་རུང་བ་ཞེས་བྱ་བ་ནི། དེ་དག་གིས་ལྷུང་བཟེད་ཁྲིའུ་གོར་བུ་ཅན་གྱི་སྟེང་དུ་བཞག་སྟེ། དགེ་
ཚུལ་གྱི་མགོའམ་ཕྲག་པར་བཀལ་ཏེ། བསྔགས་པ་བརྗོད་ཅིང་བྲམ་ཟེ་དང་ཁྱིམ་བདག་དག་ལས་དབྱིག་དང་གསེར་ལ་སོགས་པ་བསླངས་ཏེ་སྤྱད་པ་གང་ཡིན་པ་སྟེ། དེ་ནི་དེ་དག་གིས་རང་གི་ངོ་བོ་ཡིན་པར་བལྟ་བར་བྱའོ། །མཐུན་པའི་གསོ་སྦྱོང་ལ་སོགས་པ་དེ་དག་གང་གི་ཚེ་བྱ་ཞེ་ན།

དེའི་ཕྱིར་འདི་ལ་དུས་དེ་ཁོ་ནའི་རྒྱུ་ཉིད་དུའོ་ཞེས་བྱ་བ་སྨྲས་ཏེ། གསོ་སྦྱོང་བྱ་བ་འདི་ལ་དེ་དག་ཚེས་བཅུ་བཞིའམ་བཅོ་ལྔའི་དུས་དེ་ཁོ་ནའི་རྒྱུ་ཉིད་དུ་བྱ་བར་མ་ངེས་ཀྱི་མཐུན་པ་ལ་སོགས་པ་དེ་དག་གི་དུས་དེ་ཁོ་ནའི་རྒྱུ་ཉིད་དུ་བྱ་བ་ཡིན་ནོ། །འདིར་གཞུང་ནི་ཉེ་
བ་འཁོར་གསོ་སྦྱོང་ནི་ལྔ་པོ་འདི་དག་ཡིན་ཏེ། བཅུ་བཞི་པ་དང་བཅོ་ལྔ་པ་དང་། བཀྲ་ཤིས་ཀྱི་གསོ་སྦྱོང་དང་། གནོད་པ་བྱུང་བའི་གསོ་སྦྱོང་དང་། མཐུན་པའི་གསོ་སྦྱོང་ངོ་། །དགེ་སློང་གིས་གསོ་སྦྱོང་མ་ཡིན་པར་གསོ་སྦྱོང་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ། །
བཀྲ་ཤིས་ཀྱི་གསོ་སྦྱོང་དང་། གནོད་པ་བྱུང་བའི་གསོ་སྦྱོང་དང་། མཐུན་པའི་གསོ་སྦྱོང་ནི་མ་གཏོགས་སོ་ཞེས་བྱ་བ་གསུངས་པ་ཡིན་ནོ། །ལས་བྱེད་པའི་གཞིའོ་ཞེས་བྱ་བ་དེ་འདུལ་བའི་གཞིའི་སྐབས་སུ་གཏོགས་པ་བཤད་ཟིན་ཏོ།། །།ད་ནི་ལས་བྱེ་བའི་གཞི་ཞུ་བ་དང་། བྲམ་
ཟེའི་བུ་མོའི་སྐབས་བསྡུ་བའི་ཕྱིར། ཆོས་མ་ཡིན་པ་སྨྲ་བ་དག་གིས་དབྱེ་བའི་སེམས་ཀྱིས་མཚམས་ཀྱི་ནང་དུ་ལས་ཐ་དད་པར་བྱས་ན་དེ་དབྱེ་བ་ཡིན་ནོ་ཞེས་བྱ་བ་སྨྲས་ཏེ། ཆོས་མ་ཡིན་པ་སྨྲ་བ་དག་གིས་ཆོས་སྨྲ་བ་འདི་དག་བདག་ཅག་གི་ནང་དུ་ཞུགས་པས་ཅི་བྱས། དེ་དག་བདག་
ཅག་ལས་ཐ་དད་པར་གྱུར་ཅིག་སྙམ་དུ་དབྱེ་བའི་མཚམས་ཀྱི་ནང་དུ་ཆོས་སྨྲ་བ་དག་ལས། ལས་ཐ་དད་པར་བྱས་ན་ལས་དེ་བྱེ་བ་ཡིན་ནོ་ཞེས་བྱ་བའི་ཐ་ཚིག་གོ། །ཆོས་སྨྲ་བ་དག་གིས་མཚམས་ཀྱི་ནང་དུ་ཆོས་མ་ཡིན་པ་སྨྲ་བ་དག་ལས་ཐ་དད་པར་བྱས་པ་དེ་ནི། ལས་དེ་བྱེ་བར་མི་འགྱུར་
ཏེ། དེ་དག་གིས་ལས་དེ་ཆོས་ལས་རྣམ་པར་མ་གཡོས་པ་ཁོ་ནར་བྱེ་བའི་ཕྱིར་རོ། །འདིར་གཞུང་ནི་སུ་དག་གིས་ཀཽ་ཤཱམྦཱི་པའི་དགེ་འདུན་ཕྱེ་བར་གྱུར། ཆོས་མ་ཡིན་པ་སྨྲ་བ་དག་གིས་མཚམས་ཀྱི་ནང་དུ་གནས་གཅིག་ཏུ་གསོ་སྦྱོང་མ་འདྲེས་པར་བྱས་པས་སོ་ཞེས་གསུངས་པ་ཡིན་ནོ། །
འདི་ལ་སོ་སོའི་རང་གི་ལས་ནི་འཆགས་སོ་ཞེས་བྱ་བ་ནི། ལས་བྱེ་བའི་བདག་ཉིད་ཀྱི་དགེ་འདུན་གྱི་བྱེ་བ་འདི་ལ་ཕྱོགས་སོ་སོའི་ལས་ཐ་དད་པར་བྱས་པ་ནི་ཐ་དད་པར་འཆགས་སོ། །རང་གི་ཕྱོགས་དང་མཐུན་པ་མ་ཡིན་པ་ལ་ནི་མི་འཆགས་སོ་ཞེས་བྱ་བ་ནི། རང་གི་ཕྱོགས་དང་མཐུན་

པ་མ་ཡིན་པའི་གང་ཟག་ལ་བསྡིགས་པ་དང་སྨད་པ་དང་བསྐྲད་པ་དང་། ཕྱིར་འགྱེད་པ་དང་གནས་ནས་དབྱུང་བའི་ལས་བྱེད་པ་ནི་མི་འཆགས་སོ། །འདིར་གཞུང་ནི་དགེ་འདུན་བྱེ་བར་གནས་པ་ན། ཕན་ཚུན་གྱི་ཕྱོགས་གནས་ནས་འབྱིན་པར་བགྱིད་ན། གནས་ནས་བྱུང་བར་བརྗོད་
པར་བགྱི་འམ་བཀའ་སྩལ་པ། གནས་ནས་མ་ཕྱུང་བར་བརྗོད་པར་བྱའོ་ཞེས་གསུངས་པ་ཡིན་ནོ། །དགེ་འདུན་གྱི་ནི་ཆོས་སྨྲ་བས་བྱས་པ་ཉིད་ནི་བྱས་པ་ཉིད་ཡིན་ནོ་ཞེས་བྱ་བ་ནི། དགེ་འདུན་གྱི་མཚམས་བཅད་པ་ལ་སོགས་པའི་ལས་གང་ཡིན་པ་དེ་ནི་ཆོས་སྨྲ་བ་དག་གིས་བྱས་པ་ཉིད་
ན་བྱས་པ་ཉིད་ཡིན་གྱི་ཆོས་མ་ཡིན་པ་སྨྲ་བ་དག་གིས་བྱས་པ་ཉིད་ན་ནི་བྱས་པ་ཉིད་མ་ཡིན་ནོ། །འདིར་གཞུང་ནི་དགེ་འདུན་བྱེ་བ་ན་གཅིག་གམ་ཅིག་ཤོས་ཀྱི་མཚམས་འགྲོལ་བར་བགྱིད་ན། མཚམས་བཀྲོལ་བར་བརྗོད་པར་བགྱིའམ། གལ་ཏེ་ཆོས་སྨྲ་བས་འགྲོལ་བར་བྱེད་ན་བཀྲོལ་བར་
བར་བརྗོད་པར་བྱའོ་ཞེས་གསུངས་པ་ཡིན་ནོ། །འདི་ལ་གལ་ཏེ་གཟུ་བོ་དག་ཡོད་ན་དགེ་སློང་མ་རྣམས་ལ་བསྟན་པར་བྱ་བ་ཉིད་ཡིན་ནོ་ཞེས་བྱ་བ་ནི། དགེ་འདུན་བྱེ་བ་འདི་ལ་གལ་ཏེ་དགེ་སློང་གཟུ་བོ་དག་ཡོད་ན་དེ་དག་གིས་དགེ་སློང་མ་རྣམས་ལ་བསྟན་པར་བྱ་བ་ཉིད་ཡིན་ནོ། །གལ་ཏེ་དེ་དག་
མེད་ན་ཆོས་སྨྲ་བ་དག་ཉིད་ཀྱིས་སོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་ཀཽ་ཤཱམྦཱི་པའི་དགེ་སློང་ཕྱོགས་གཉིས་སུ་འདུས་ཤིང་མཆིས་པར་གྱུར་ན། དེ་གཉིས་གང་གིས་དགེ་སློང་མ་རྣམས་ལ་བསྟན་པར་བགྱི། ཉེ་བ་འཁོར་གཟུ་བོ་དག་གིས་མཚམས་ཀྱི་ཕྱི་རོལ་དུ་
སོང་སྟེ་བསྟན་པར་བྱ་བའོ་ཞེས་གསུངས་པ་དང་། བྲམ་ཟེའི་བུ་མོས་ཞུས་པ་ལས་ཀྱང་གལ་ཏེ་གཟུ་བོ་དག་མེད་ན། ཆོས་སྨྲ་བ་དག་ཁོ་ནས་སོ་ཞེས་གསུངས་པ་ཡིན་ནོ། །དེ་དག་གི་ནི་ཆོས་ཀྱི་ཕྱོགས་དང་མཐུན་པ་དག་གིས་མི་མཐུན་པ་ཉིད་དོ་ཞེས་བྱ་བ་ནི། གཟུ་བོ་དེ་དག་གི་
ལས་ནི་ཆོས་ཀྱི་ཕྱོགས་དང་མཐུན་པ་དག་གིས་མི་མཐུན་པ་ཉིད་དུ་འགྱུར་བ་སྟེ། དེ་དག་ནི་དགེ་འདུན་གྱི་ཁོངས་སུ་གཏོགས་པའི་ཕྱིར་དང་། དགེ་འདུན་ལས་ཐ་མི་དད་པའི་ཕྱིར་རོ། །ཆོས་མ་ཡིན་པའི་ཕྱོགས་དང་མཐུན་པ་དག་གིས་ནི་མི་མཐུན་པ་ཉིད་དུ་མི་འགྱུར་བ་དེ་དག་ནི་

དགེ་འདུན་གྱི་ཁོངས་སུ་མ་གཏོགས་པའི་ཕྱིར་དང་དགེ་འདུན་ལས་ཐ་དད་པའི་ཕྱིར་རོ། །དེ་བས་ན་གཟུ་བོའི་དགེ་སློང་དག་གིས་ལས་ལ་ཆོས་སྨྲ་བ་དག་དང་མི་མཐུན་པ་ཉིད་སྤང་བར་བྱ་ཞིང་དེ་དག་དང་ལྷན་ཅིག་ལས་བྱས་ན་ཡང་འཆགས་སོ། །ཆོས་མ་ཡིན་པར་སྨྲ་
བ་དག་དང་མི་མཐུན་པ་ཉིད་དུ་སྤང་བར་བྱ་མི་དགོས་ཏེ། དེ་དག་དང་ལྷན་ཅིག་ལས་བྱས་ན་ཡང་མི་འཆགས་སོ། །རྗེས་སུ་ཞུགས་ན་དེ་ཉིད་ཉམས་སོ་ཞེས་བྱ་བ་ནི། གཟུ་བོ་རྣམས་ཆོས་སྨྲ་བའམ། ཆོས་མ་ཡིན་པ་སྨྲ་བ་གང་ཡང་རུང་བའི་ཕྱོགས་ཀྱི་རྗེས་སུ་ཞུགས་ན། གཟུ་བོ་ཉིད་
ཉམས་ཏེ་གཟུ་བོར་མི་རུང་ངོ་ཞེས་བྱ་བའི་ཐ་ཚིག་གོ། །གཟུ་བོ་ཞེས་བྱ་བ་ནི། སྐམ་ལ་གནས་པ་སྟེ། དབུས་ན་གནས་པ་དང་ཞལ་ཅེ་བ་ཉིད་ཡིན་པས་འདི་ལྟར་དེ་དག་ནི་འཐབ་ཀྲོལ་གྱི་ལྗན་ལྗིན་གྱི་འདམ་རྫབ་སྤངས་པའི་སྐམ་སའི་དབུས་ན་གནས་པ་ཡིན་པས་གཟུ་བོ་དང་དབུས་ན་
གནས་པ་དང་ཞལ་ཅེ་བ་ཡིན་པར་རིག་པར་བྱའོ། །ཕྱོགས་དེ་གཉིས་ལས་ཕྱོགས་གང་ཡང་རུང་བ་ཅིག་ཤོས་སུ་ཡང་མ་ལྷུང་ལ་ཅིག་ཤོས་སུ་ཡང་མ་ལྷུང་བ་ཉིད་ཀྱིས་སྐམ་ལ་གནས་པ་ནི་གཟུ་བོ་ཞེས་བྱའོ། །དེ་ལྟར་ཡང་འདིར་གཞུང་ནི་ཞུ་བ་ལས། ཡངས་པ་ཅན་གྱི་དགེ་སློང་
དག་གི་ས་གཞི་བཅུ་ཕྱུང་བ་ན། དགེ་སློང་གནས་བརྟན་གང་དག་ཕྱོགས་ཅིག་ཤོས་སུ་ཡང་མ་གཏོགས་ལ་ཕྱོགས་གཉིས་པར་ཡང་མ་གཏོགས་པ་དེ་དག་ཅི་ལགས་པར་བརྗོད་པར་བགྱི། སྐམ་ས་ལ་གནས་པ་གཟུ་བོ་ཡིན་པར་བརྗོད་པར་བྱའོ་ཞེས་གསུངས་པ་ཡིན་ནོ། །དེ་མི་བྱའོ་ཞེས་བྱ་
བ་ནི། གཟུ་བོ་ཉིད་ཉམས་པ་དེ་མི་བྱའོ། །འདིར་གཞུང་ནི། དགེ་འདུན་བྱེ་བར་རྣམ་པར་གནས་པ་ན། གཟུ་བོ་རྣམས་ཀྱིས་ཇི་ལྟར་བསྒྲུབ་པར་བགྱི། ཕྱོགས་ཅིག་ཤོས་སུ་རང་འགྲོ་བར་ཡང་མི་བྱ། མངག་པ་གཏང་བར་ཡང་མི་བྱ་ཞིང་། ཕྱོགས་གཉིས་པར་ཡང་རང་འགྲོ་བར་
ཡང་མི་བྱ། མངག་པ་གཏང་བར་ཡང་མི་བྱ་བར་ལུས་ཀྱིས་ཀྱང་བསྡམ་པར་བྱ། ངག་གིས་ཀྱང་བསྡམ་པར་བྱ་ཞིང་མཚམས་ཀྱི་ཕྱི་རོལ་དུ་སོང་སྟེ་གསོ་སྦྱོང་བྱའོ་ཞེས་གསུངས་པ་ཡིན་ནོ། །དགེ་སློང་མའི་དགེ་འདུན་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ལ་གདམས་པར་བྱ་

བ་ཉིད་ཡིན་ནོ་ཞེས་བྱ་བ་ནི། དགེ་སློང་མའི་དགེ་འདུན་ལས་དང་འཁོར་ལོ་མ་བྱེ་བ་དགེ་སློང་གི་དགེ་འདུན་ལས་དང་འཁོར་ལོ་བྱེ་བའི་ཕྱོགས་དང་གཞན་གྱི་ཕྱོགས་ཀྱི་འགབ་ལ་བརྟེན་ཅིང་རྣམ་པར་གནས་པ་དག་ལ་ནི་དགེ་སློང་གི་དགེ་འདུན་གྱི་ཕྱོགས་བཟུང་བ་མེད་པར་ཅི་ནས་ཀྱང་དེ་དག་
བྱེ་བར་མི་འགྱུར་བར་བྱ་བའི་ཕྱིར་གདམས་ཤིང་རྗེས་སུ་བསྟན་པར་བྱ་བ་ཉིད་ཡིན་ནོ། །འདིར་གཞུང་ནི་དགེ་སློང་མའི་དགེ་འདུན་ཕྱོགས་དང་ཕྱོགས་ལ་རྣམ་པར་གནས་པ་ལ་དགུང་ཟླ་ཕྱེད་ཕྱེད་ཅིང་གདམས་ངག་དང་རྗེས་སུ་བསྟན་པ་སྩལ་བར་བགྱིའམ། བཀའ་སྩལ་པ། དགེ་སློང་མའི་
དགེ་འདུན་བྱེ་བར་མི་འགྱུར་བར་བྱ་བའི་ཕྱིར་སྦྱིན་པར་བྱའོ་ཞེས་གསུངས་པ་ཡིན་ནོ། །བྱེ་བ་ལ་ནི་དེ་ལྟ་མ་ཡིན་ནོ་ཞེས་བྱ་བ་ནི། དགེ་སློང་མའི་དགེ་འདུན་ལས་དང་འཁོར་ལོ་བྱེ་བ་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ལ་ནི་སྔ་མ་ལྟར་གདམས་པར་མི་བྱ་བ་ཉིད་ཡིན་པའོ། །
གསོལ་བ་ན་མཐུན་པ་ཉིད་ལ་ངེས་པར་སྦྱར་བར་བྱ་བ་ཉིད་ཡིན་ནོ་ཞེས་བྱ་བ་ནི། དགེ་སློང་མ་བྱེ་བ་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་དེ་དག་གདམས་ངག་གསོལ་བ་ན། སྲིང་མོ་དག་ཇེ་མཐུན་པར་གྱིས་ཤིག་ཅེས་མཐུན་པ་ཉིད་ལ་ངེས་པར་སྦྱར་བར་བྱའོ། །དབྱར་གྱི་རྙེད་
པ་ནི་ཆོས་སྨྲ་བ་དབང་བ་ཉིད་དོ་ཞེས་བྱ་བ་ནི། དགེ་འདུན་བྱེ་བ་ན་དབྱར་གནས་པའི་རྒྱུ་ལས་བྱུང་བའི་རྙེད་པ་ནི་ཆོས་སྨྲ་བ་དག་དབང་བ་ཉིད་ཡིན་གྱི། ཆོས་མ་ཡིན་པ་སྨྲ་བ་དག་མི་དབང་བའོ། །གཉི་ག་འདུས་པ་ལ་བྱེ་བྲག་ཏུ་མ་བྱས་པར་བགོ་བཤའ་བྱ་བ་དགེ་འདུན་ལ་ཕུལ་བ་
ཡང་ངོ་ཞེས་བྱ་བ་ནི། ཆོས་དང་ཆོས་མ་ཡིན་པ་སྨྲ་བའི་ཕྱོགས་གཉི་ག་འདུས་པ་ལ་བྱེ་བྲག་ཏུ་མ་བྱས་པར་དགེ་འདུན་ཙམ་ལས་ཕུལ་བའི་བགོ་བཤའ་བྱ་བ་ཆོས་གོས་ལ་སོགས་པ་དགེ་འདུན་ལ་ཕུལ་བ་ཡང་ཆོས་སྨྲ་བ་རྣམས་དབང་བའོ། །འདི་སྐད་བསྟན་ཏེ། དབྱར་གནས་པ་
པའི་རྒྱུ་ལ་བརྟེན་ཏེ། དགེ་འདུན་ཙམ་ལ་འབུལ་བར་བྱེད་པའི་རྙེད་པ་གང་ཡིན་པ་དེ་ཡང་ཆོས་སྨྲ་བ་དག་ཁོ་ན་དབང་བ་ཡིན་གྱི། ཆོས་མ་ཡིན་པ་སྨྲ་བ་དག་ནི་མི་དབང་ངོ་། །ཅི་ཐམས་ཅད་ལ་དེ་ལྟར་རྣམ་པར་གཞག་གམ་ཞེ་ན་དེའི་ཕྱིར། དེ་ལ་གལ་ཏེ་དགེ་འདུན་གྱི་ཚད་ཉིད་ཡིན་ན་

དེ་དག་གོ་ཞེས་བྱ་བ་སྨྲས་ཏེ། རྙེད་པ་དབང་བ་དེ་ལ་གལ་ཏེ་ཆོས་སྨྲ་བ་དག་བཞི་ཡན་ཆད་ཡིན་ན་རྙེད་པ་དེ་དེ་དག་དབང་བར་རྣམ་པར་གཞག་གོ། །དེ་དག་ཉུང་བ་ཉིད་ཡིན་ན་ཇི་ལྟར་བསྒྲུབ་པར་བྱ་ཞེ་ན་དེའི་ཕྱིར། གལ་ཏེ་ཉུང་བ་ཉིད་ཡིན་ལ་ཅིག་ཤོས་ནི་དེ་ཉིད་
ཡིན་ན་གང་གིས་ཕང་བར་ཕུལ་བའོ་ཞེས་བྱ་བ་སྨྲས་ཏེ། གལ་ཏེ་དེ་ན་ཆོས་སྨྲ་བ་དག་ནི་དགེ་འདུན་གྱི་ཚད་པས་ཉུང་བ་ཉིད་ཡིན་ལ། ཆོས་མ་ཡིན་པ་སྨྲ་བ་ཅིག་ཤོས་ནི་དགེ་འདུན་གྱི་ཚད་དེ་ཉིད་ཡིན་ན། ཕྱོགས་དེ་གཉིས་ཀྱི་གང་ཟག་གིས་ཕང་བར་རྙེད་པ་དེ་ཕུལ་བའི་ཕྱོགས་དེ་རྙེད་པ་
དེ་དབང་ངོ་། །ཕང་བ་ཞེས་སྨོས་པ་ནི་ལག་པ་དང་རྐང་པའི་དྲུང་དག་གི་དཔེ་ཡིན་ནོ། །གལ་ཏེ་གཉི་གའི་ན་གཉི་གའོ་ཞེས་བྱ་བ་ནི། གལ་ཏེ་ཕྱོགས་གཉི་གའི་དགེ་སློང་གི་ཕང་བ་ལ་སོགས་པར་ཕུལ་ན་ཕྱོགས་གཉི་ག་དབང་བའོ། །དེ་ལ་ཕྱོགས་གཉི་གས་ཇི་ལྟར་བགོ་བར་བྱ་ཞེ་ན་དེའི་ཕྱིར།
དེ་ལ་གང་ཟག་ལས་ཆ་ཉིད་ཡིན་གྱི་དགེ་འདུན་ལས་མ་ཡིན་ནོ་ཞེས་བྱ་བ་སྨྲས་ཏེ། ཕྱོགས་གཉི་ག་དབང་བའི་རྙེད་པ་དེ་ལ་ཕྱོགས་གཉི་གའི་གང་ཟག་ཇི་སྙེད་ཡོད་པ་དེ་སྙེད་ཀྱི་ཆ་ཉིད་དུ་བགོ་བར་བྱའི། ཆོས་དང་ཆོས་མ་ཡིན་པ་སྨྲ་བའི་དགེ་འདུན་གྱི་ཕྱོགས་གཉིས་ལས་ཕྱེད་ཕྱེད་དུ་བགོ་བ་
ནི་མ་ཡིན་ནོ། །ལས་བྱེ་བའི་གཞི་ཞུ་བ་དང་། བྲམ་ཟེའི་བུ་མོའི་སྐབས་སོ་ཞེས་བྱ་བ་དེ་དེ་གཉིས་ཀྱི་སྐབས་ནས་འབྱུང་བ་བཤད་ཟིན་ཏོ། །ལས་བྱེ་བའི་གཞི་རྫོགས་སོ་ཞེས་བྱ་བ་དེ་བཤད་ཟིན་ཏོ།། །།ད་ནི་འཁོར་ལོ་བྱེ་བའི་གཞི་སྨྲ་བར་འདོད་ནས། དེ་བསྡུ་བའི་ཕྱིར་དགེ་འདུན་
གྱི་དབྱེན་ནི་ཆོས་ལས་ཐ་དད་པའི་དངོས་པོར་གསོལ་བས་སམ་དོན་དེས་ཚུལ་ཤིང་ལེན་དུ་འཇུག་པས་སོ་ཞེས་བྱ་བ་སྨྲས་ཏེ། དགེ་འདུན་གྱི་དབྱེན་ནི་རྒྱུ་གཉིས་ཀྱིས་འགྱུར་ཏེ། ཆོས་ལས་ཐ་དད་པའི་དངོས་པོར་གསོལ་བས་དབྱེན་བྱེད་པ་དང་དོན་དེས་ཚུལ་ཤིང་ལེན་དུ་འཇུག་པས་
དབྱེན་བྱེད་པའོ། །དེ་ལ་ཆོས་ལས་ཐ་དད་པའི་དངོས་པོར་གསོལ་བས་དབྱེན་བྱེད་པ་ཞེས་བྱ་བ་ལ་འདིར་ཞེས་བྱ་བ་ནི། ཐར་པའི་ལམ་ཡང་དག་པ་ཉིད་དུ་གྱུར་པ་སྟེ། དེ་ལས་ཐ་དད་པའི་དངོས་པོར་བྱ་བའི་ཕྱིར་འགྱེད་པར་བྱེད་པའི་གང་ཟག་གིས་ཆོས་མ་ཡིན་པའི་ཕྱོགས་དང་མཐུན་པའི་

དགེ་འདུན་ལ་གསོལ་བས། དགེ་འདུན་འབྱེད་པར་བྱེད་པའོ། །དེའི་སྔགས་ནི་ཚེ་དང་ལྡན་པ་དག་དགེ་སྦྱོང་གཽ་ཏ་མ་ནི་ཤ་ཟ་སྟེ། བདག་ཅག་གིས་ཤ་བཟའ་བར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་སྲོག་ཆགས་གསོད་པར་འགྱུར་བའི་ཕྱིར་རོ། །དགེ་སྦྱོང་གཽ་ཏ་མ་ནི་འོ་མ་
འཐུངས་ཏེ། བདག་ཅག་གིས་བཏུང་བར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་བེའུ་ལ་གནོད་པའི་ཕྱིར་རོ། །དགེ་སྦྱོང་གཽ་ཏ་མ་ནི་ལན་ཚྭ་ཟ་སྟེ། བདག་ཅག་གིས་བཟའ་བར་མི་བྱའོ། །དེ་ཅིའི་ཕྱིར་ཞེ་ན། ཁུ་བ་ལས་གྱུར་པའི་ཕྱིར་རོ། །དགེ་སྦྱོང་གཽ་ཏ་མ་ནི་གོས་
དྲས་པ་གྱོན་ཏེ་བདག་ཅག་གིས་བགོ་བར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་དད་པས་སྦྱིན་པར་བྱ་བ་ཆུད་ཟོས་པར་འགྱུར་བའི་ཕྱིར་རོ། །དགེ་སྦྱོང་གཽ་ཏ་མ་ནི་དགོན་པ་ན་གནས་པར་བྱེད་དོ། །བདག་ཅག་ནི་གྲོང་དུ་གནས་པར་བྱའོ། །དེ་ཅིའི་ཕྱིར་ཞེ་ན། གཞི་དེ་
ལས་དད་པས་སྦྱིན་པར་བྱ་བ་ཡོངས་སུ་མ་སྤྱད་པར་འགྱུར་བའི་ཕྱིར་རོ། །ཚེ་དང་ལྡན་པ་དག་ཁྱེད་ཅག་ལས་གང་བརྟུལ་ཞུགས་ཀྱི་གནས་ལྔ་པོ་འདི་དག་གིས་དག་པ་དང་གྲོལ་བ་དང་ངེས་པར་འབྱུང་བར་འདོད་པ་དང་། བཟོད་པ་དང་། ལེགས་པར་འཛིན་པ་དེས་དགེ་སྦྱོང་
གཽ་ཏ་མ་ལས་རིང་དུ་གྱིས་ཤིག །སོ་སོར་གྱིས་ཤིག །ཐ་དད་དུ་གྱིས་ཤིག །རྒྱང་སྲིངས་ཤིག ཐག་སྲིངས་ཤིག །ལོགས་ཤིག་ན་འདུག་ཤིག་ཅེས་ཟེར་བ་ཡིན་ནོ། །དོན་དེས་ཚུལ་ཤིང་ལེན་དུ་འཇུག་པས་དབྱེན་བྱེད་པ་ཞེས་བྱ་བ་ལ་འདིར་དོན་དེས་ཞེས་བྱ་བ་ནི།
ཆོས་ལས་ཐ་དད་པའི་དངོས་པོར་ཞེས་སྔར་སྨོས་པའི་དོན་དེ་ཉིད་ཀྱིས་ཏེ། དེ་ལས་ཐ་དད་པའི་དངོས་པོར་བྱ་བའི་ཕྱིར་འབྱེད་པར་བྱེད་པའི་གང་ཟག་གིས་ཆོས་མ་ཡིན་པའི་ཕྱོགས་དང་མཐུན་པའི་དགེ་འདུན་ལ་ཚུལ་ཤིང་ལེན་དུ་འཇུག་པས་དགེ་འདུན་འབྱེད་པར་བྱེད་པའོ། །དེའི་སྔགས་
ནི་ཚེ་དང་ལྡན་པ་དག །དགེ་སྦྱོང་གཽ་ཏ་མ་ནི་ཤ་ཟ་སྟེ། བདག་ཅག་གིས་ཤ་བཟའ་བར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་སྲོག་གཅོད་པར་འགྱུར་བའི་ཕྱིར་རོ། །དགེ་སྦྱོང་གཽ་ཏ་མ་ནི་འོ་མ་འཐུངས་ཏེ། བདག་ཅག་གིས་བཏུང་བར་མི་བྱའོ། །དེ་ཅིའི་ཕྱིར་ཞེ་ན།

གཞི་དེ་ལས་བེའུ་ལ་གནོད་པའི་ཕྱིར་རོ། །དགེ་སྦྱོང་གཽ་ཏ་མ་ནི་ལན་ཚྭ་ཟ་སྟེ། བདག་ཅག་གིས་བཟའ་བར་མི་བྱའོ། །དེ་ཅིའི་ཕྱིར་ཞེ་ན། ཁུ་བ་ལས་གྱུར་པའི་ཕྱིར་རོ། །དགེ་སྦྱོང་གཽ་ཏ་མ་ནི་གོས་དྲས་པ་གྱོན་ཏེ། བདག་ཅག་གིས་བགོ་བར་མི་བྱའོ། །དེ་
ཅིའི་ཕྱིར་ཞེ་ན། གཞི་དེ་ལས་དད་པས་སྦྱིན་པར་བྱ་བ་ཆུད་ཟོས་པར་འགྱུར་བའི་ཕྱིར་རོ། །དགེ་སྦྱོང་གོ་ཏ་མ་ནི་དགོན་པ་ན་གནས་པར་བྱེད་དེ། བདག་ཅག་གིས་གྲོང་དུ་གནས་པར་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་དད་པས་སྦྱིན་པར་བྱ་བ་ཡོངས་སུ་མ་སྤྱད་པར་འགྱུར་
བའི་ཕྱིར་རོ། །ཚེ་དང་ལྡན་པ་དག་ཁྱེད་ཅག་ལས་གང་བརྟུལ་ཞུགས་ཀྱི་གནས་ལྔ་པོ་འདི་དག་གིས་དག་པ་དང་གྲོལ་བ་དང་། ངེས་པར་འགྱུར་བར་འདོད་པ་དང་། བཟོད་པ་དང་ལེགས་པར་འཛིན་པ་དེས་ཚུལ་ཤིང་ལོངས་ཤིག་ཅེས་ཟེར་བ་ཡིན་ནོ། །དབྱེ་བར་བྱ་བ་དགེ་འདུན་གྱི་
ཚད་ཉིད་མ་ཡིན་པ་དང་མཚམས་ཀྱི་ནང་ན་གཞན་དགེ་འདུན་གྱི་ཚད་དག་ཀྱང་མེད་པ་ཉིད་ཡིན་ན་དེ་མི་འཆགས་སོ་ཞེས་བྱ་བ་ནི། གལ་ཏེ་ཕྱོགས་གཉི་ག་ལ་སོ་སོ་ན་དགེ་འདུན་གྱི་ཚད་དུ་མེད་པ་ཉིད་ཡིན་ན་འབྱེད་པར་བྱེད་པ་དེས་དགེ་འདུན་དབྱེ་བ་དེ་མི་འཆགས་སོ། །འདིར་དགེ་
འདུན་གྱི་ཚད་ནི་བཞི་ཡན་ཆད་དོ། །འབྱེད་པར་བྱེད་པ་ཉིད་ཀྱིས་ཆོས་མ་ཡིན་པའི་ཕྱོགས་ཀྱི་དགེ་འདུན་གྱི་ཁ་བསྐང་དུ་ཡང་མི་རུང་ངོ་། །ཅི་འབྱེད་པ་ཐམས་ཅད་ལ་མཚམས་མེད་པར་འགྱུར་རམ་ཞེ་ན། དེའི་ཕྱིར། ཆོས་དང་ཆོས་མ་ཡིན་པ་གཉི་ག་དེ་བཞིན་ཉིད་དུ་ཤེས་ན་མཚམས་
མེད་པའོ་ཞེས་བྱ་བ་སྨྲས་ཏེ། ཆོས་ཀྱང་ཆོས་ཉིད་དུ་ཤེས་ལ་ཆོས་མ་ཡིན་པ་ཡང་ཆོས་མ་ཡིན་པ་ཉིད་དུ་ཤེས་བཞིན་དུ་དགེ་འདུན་འབྱེད་པར་བྱེད་ན་དེ་ལ་མཚམས་མེད་པའི་ཁ་ན་མ་ཐོ་བར་འགྱུར་རོ། །ཆོས་ལ་ཆོས་མ་ཡིན་པར་འདུ་ཤེས་པ་དང་། ཆོས་མ་ཡིན་པ་ལ་ཆོས་སུ་འདུ་ཤེས་
པ་ལ་ནི་མཚམས་མེད་པར་མི་འགྱུར་ཏེ། དེ་ལ་བསམ་པས་ལོག་པར་བསྒྲུབ་པ་མེད་པའི་ཕྱིར་རོ། །དབྱེན་ལ་ཆོས་སུ་འདུ་ཤེས་པས་ཀྱང་ངོ་ཞེས་བྱ་བ་ཡང་། མཚམས་མེད་པ་ཉིད་དུ་འགྱུར་རོ་ཞེས་བྱ་བར་སྦྱར་ཏེ། ཕུང་པོའི་ལྷག་མ་མེད་པའི་ཆུད་ཟ་བ་དེ་ལས་བཟློག་ཅིང་དབྱེན་བྱེད་པ།

འགྲོ་བ་རྣམས་ཐར་པ་ལས་བཟློག་པ་གང་ཡིན་པ་དེ་ནི་འདོད་པའི་ཁམས་ཀྱི་དབང་ཕྱུག་ལ་ཕན་པ་ཆེན་པོ་བྱེད་པ་ཡིན་ནོ་ཞེས་བྱ་བ་ལ་སོགས་པའི་རྣམ་པས་དབྱེན་ལ་ཆོས་སུ་འདུ་ཤེས་པས་དགེ་འདུན་གྱི་དབྱེན་བྱེད་ན་དེས་ཀྱང་ཆོས་དང་ཆོས་མ་ཡིན་པ་དག་དེ་བཞིན་ཉིད་དུ་ཤེས་པ་ཡིན་
པས་མཚམས་མེད་པར་འགྱུར་རོ། །ཡིད་གཉིས་ནི་འདུ་ཤེས་དང་འདྲ་བས་དེའི་ཕྱིར་འདི་ལ་ཡིད་གཉིས་ཟ་ན་ཡང་དེ་མཚམས་མེད་པ་ཉིད་དུ་འགྱུར་བར་རིག་པར་བྱའོ། །འཁོར་ལོ་བྱེད་པའི་གཞིའོ་ཞེས་བྱ་བ་དེ་བཤད་ཟིན་ཏོ།། །།ད་ནི་རྩོད་པའི་གཞི་སྨྲ་བར་འདོད་ནས། རྩོད་པ་ནི་རྣམ་
པ་བཞི་སྟེ། འགྱེད་པའི་ཕྱིར་རྩོད་པ་དང་། མ་གདམས་པའི་ཕྱིར་རྩོད་པ་དང་། ལྟུང་བའི་ཕྱིར་རྩོད་པ་དང་། བྱེ་བའི་ཕྱིར་རྩོད་པ་སྟེ་དེ་ལ་འགྱེད་པའི་ཕྱིར་རྒྱུ་ལས་རྩོད་པ་ནི་འགྱེད་པའི་ཕྱིར་རྩོད་པའོ། །ལྷག་མ་རྣམས་ཀྱང་དེ་བཞིན་དུ་བརྗོད་པར་བྱའོ་ཞེས་གསུངས་པ་ལ་རྩོད་པ་བཞི་པོ་གང་དག་ཡིན་
པ་དེ་དག་གི་རང་གི་ངོ་བོ་ངེས་པར་གཟུང་བའི་ཕྱིར། འཁྲུག་ལོང་གི་རྒྱུ་བཞིའོ་ཞེས་བྱ་བ་སྨྲས་ཏེ། ཚིག་གི་ཕྱིར་སེམས་གཞོལ་བ་གང་ཡིན་པ་དེ་ནི་འདིར་འཁྲུག་ལོང་ཞེས་བྱའི་ཁྲོ་བ་ནི་མ་ཡིན་ནོ། །ཚིག་ཅེས་བྱ་བ་ནི། དགྲ་བོས་མི་མཐུན་པར་སྨྲས་པ་གང་ཡིན་པ་དགོངས་ཀྱི་
ཚིག་ཙམ་ནི་མ་ཡིན་ཏེ། དེའི་ཕྱིར་དེ་ལ་འཁྲུག་ལོང་ཉིད་དུ་ཉེ་བར་གདགས་སོ། །གལ་ཏེ་ཚིག་གི་ཕྱིར་སེམས་གཞོལ་བ་འཁྲུག་ལོང་ཡིན་ལ་དེ་ཉིད་རྩོད་པ་ཡིན་ན། འོ་ན་ཇི་ལྟར་གཙུག་ལག་ལས་དེ་ལ་བརྟེན་ཏེ་འཐབ་པ་དང་མཚང་འདྲུ་བ་དང་། རྩོད་པ་དང་། འགྱེད་པ་
གང་ཡིན་པ་དེ་འགྱེད་པའི་ཕྱིར་རྩོད་པ་ཞེས་བྱའོ་ཞེས་གསུངས་ཤེ་ན། འདི་ལྟར་འཐབ་པ་ལ་སོགས་པ་ནི་ཚིག་གི་ཕྱིར་གཞལ་བའི་འཁྲུག་ལོང་འདིའི་འཁོར་ཡིན་ཏེ་དེ་དང་འབྲེལ་པ་ལས་འབྱུང་བའི་ཕྱིར་རོ། །ཡང་དག་པར་ན་འཁྲུག་ལོང་ཉིད་རྩོད་པ་ཡིན་ཏེ། འདི་ལྟར་རྩོད་
པའི་གཞི་ཡིན་པས་གཞིར་གྱུར་པའི་དངོས་པོ་ནི་འགྱེད་པའི་ཕྱིར་རྩོད་པ་ཡིན་པར་རིག་པའི་ཕྱིར་རོ། །འཁྲུག་ལོང་གི་རྒྱུ་བཞི་པོ་དེ་དག་གང་ཞེ་ན་དེའི་ཕྱིར་དངོས་པོའི་དེ་བཞིན་ཉིད་ལ་ལོག་པར་བསྒྲུབ་པ་དང་སྤོང་བ་དང་ལྟུང་བ་དང་བཅས་པ་ཉིད་དང་། ལས་ལ་མཐུན་པ་མི་སྦྱིན་

པའོ་ཞེས་བྱ་བ་སྨྲས་ཏེ། དངོས་པོའི་དེ་བཞིན་ཉིད་ཅེས་བྱ་བ་ནི། དེའི་རང་བཞིན་ཉིད་དེ་རང་གི་ངོ་བོ་ཞེས་བྱ་བའི་ཐ་ཚིག་གོ། །དེ་ལ་ལོག་པར་བསྒྲུབ་པ་ཞེས་བྱ་བ་ནི། མ་ངེས་པ་ཉིད་དེ་ཆོས་ཡིན་ནོ་ཞེའམ། ཆོས་མ་ཡིན་ནོ་ཞེས་བྱ་བ་ལ་སོགས་པ་ལྟ་བུར་
གཉིས་སུ་འདྲེན་པའོ། །དེ་ལྟར་དངོས་པའི་དེ་བཞིན་ཉིད་ལ་ལོག་པར་བསྒྲུབ་པ་དེ་ནི་འཁྲུག་ལོང་གི་རྒྱུ་དང་པོ་ཡིན་ནོ། །ཇི་ལྟར་ན་དངོས་པོའི་དེ་བཞིན་ཉིད་ལ་ལོག་པར་བསྒྲུབ་པ་དེ་འབའ་ཞིག་འཁྲུག་ལོང་དང་པོའི་རྒྱུར་བཞག་སྟེ། དེ་ལྟར་དངོས་པོའི་རྣམ་པ་འདི་ལྟ་བུ་ལ་སྤྱོད་པ་ལས་
ཀྱང་འགྱེད་པ་འབྱུང་བའི་ཕྱིར་ཏེ། དེ་ཅིའི་ཕྱིར་ཁྱོད་ཀྱིས་འདི་བླངས་ཤེའམ་བྱིན་ཞེའམ་ལུས་སུ་བསྐོས་པ་འདི་མ་བྱས་ཞེས་འགྱེད་པ་གང་ཡིན་པ་དེ་ཡང་དངོས་པོའི་དེ་བཞིན་ཉིད་མ་ཡིན་པ་མ་ཡིན་ཏེ། འདི་ནི་བྱ་བའོ་ཞེའམ་བྱ་བ་མ་ཡིན་ནོ་ཞེས་ཞུགས་པའི་ཕྱིར་རོ་ཞེ་ན། འདི་ལྟར་
འདིར་དེ་ལྟ་བུ་དང་མཐུན་པ་དག་མ་བསྡུས་པར་ཤེས་པར་མི་བྱ་སྟེ། དེས་ན་དངོས་པོའི་རང་གི་ངོ་བོ་ཁོ་ན་ལ་འགྱེད་པ་འདི་འབྱུང་བས་དེའི་ཕྱིར། དངོས་པོའི་དེ་བཞིན་ཉིད་ལ་ལོག་པར་བསྒྲུབ་པ་ལས་འགྱེད་པའི་ཕྱིར་རྩོད་པ་འདི་འབྱུང་བར་ཤེས་པར་བྱའོ། །སྤོང་བ་ཞེས་བྱ་བ་
ནི། གདམས་ངག་ལ་སོགས་པ་འཇོག་པར་འགྱུར་བས་གཞན་སྤོང་བ་སྟེ། འདི་ནི་འཁྲུག་ལོང་གི་རྒྱུ་གཉིས་པ་ཡིན་ནོ། །རྒྱུ་དེ་ལས་མི་གདམས་པའི་ཕྱིར་རྩོད་པ་འབྱུང་བར་ཤེས་པར་བྱའོ། །ལྟུང་བ་དང་བཅས་པ་ཉིད་ཅེས་བྱ་བ་ནི། འཁྲུག་ལོང་གི་རྒྱུ་གསུམ་པ་ཡིན་ཏེ།
དེ་ལ་ལྟུང་བའི་ཕྱིར་རྩོད་པ་འབྱུང་ངོ་། །ལས་ལ་མཐུན་པ་མི་སྦྱིན་པ་ཞེས་བྱ་བ་ནི། གསོལ་བ་ལ་སོགས་པའི་ལས་ལ་མཐུན་པ་མི་སྦྱིན་པ་སྟེ་དེ་ནི་འཁྲུག་ལོང་གི་རྒྱུ་བཞི་པ་ཡིན་ཏེ། དེ་ལས་བྱ་བའི་ཕྱིར་རྩོད་པ་འབྱུང་ངོ་། །འཁྲུག་ལོང་གི་རྒྱུ་བཞི་པོ་དེ་དག་གིས་བསྐྱེད་པའི་
འཁྲུག་ལོང་བཞི་པོ་དེ་དག་ཇི་ལྟར་ཉེ་བར་ཞི་བར་འགྱུར་ཞེ་ན་དེའི་ཕྱིར། རྒྱུ་དང་པོ་ལས་བྱུང་བ་ནི་རྒྱུད་གཅིག་ཏུ་བྱ་བས་ཉེ་བར་ཞིའོ་ཞེས་བྱ་བ་སྨྲས་ཏེ། རྒྱུ་དང་པོ་ཞེས་བྱ་བ་དངོས་པོའི་དེ་བཞིན་ཉིད་ལ་ལོག་པར་བསྒྲུབ་པ་ཞེས་བྱ་བ་ལས་བྱུང་བའི་འཁྲུག་ལོང་འགྱེད་པའི་ཕྱིར་རྩོད་པ་ཞེས་

བྱ་བ་དེ་ནི་རྒྱུད་གཅིག་ཏུ