Luận tạng Tây Tạng (Tengyur) — Tập 151

་ཀའི་ཚང་སྒོ་ང་དང་བཅས་ན་འཕེལ་ཞིང་སྐྱེ་བར་མི་འགྱུར་བའི་ཕྱིར་སྐུད་པས་དཀྲི་བར་བྱའོ། །དེ་ནས་མལ་ཆ་དང་། སྟན་རྣམས་བསྒོ་སྟེ་ཉུང་ན་དངོས་པོ་རེ་རེའོ། །མང་ན་མང་དུའོ། །
ལྕི་ཞིང་ལས་ཡོངས་སུ་དཀའ་བ་རྣམས་ནི་གནས་པ་རྣམས་ལ་སྦྱིན་པར་བྱའོ། །རྒན་པ་རྣམས་ལ་ནི་ཁྲིའུ་དང་། སྟན་བཟང་པོ་རྣམས་སོ། །ཡང་རྒན་རིམས་ཇི་ལྟ་བ་བཞིན་དུ་སྦྱིན་པར་བྱའོ། །བཟང་པོ་རྣམས་ནི་དགེ་སློང་ལ་བྲིམས་ནས། ལྷག་མ་དགེ་སློང་མ་རྣམས་ལ་བྲིམ་པར་བྱའོ། །
དེ་ནས་གང་རུང་བ་ཙམ་མམ། གདིང་བ་དྲི་མ་ཅན་གྱིས་གནས་མལ་ལ་སྤྱོད་པར་བྱེད་ན་དེ་ལ་དགེ་འདུན་གྱིས་ཉེ་བར་བརྟག་པར་དགོངས་སོ་ཞེས་བརྗོད་པར་བྱའོ། ཟླ་བ་ཕྱེད་ཕྱེད་ཅིང་མལ་ཆ་དང་། སྟན་རྣམས་བརྟག་པར་བྱའོ། །རྒན་པོ་དང་གནས་པ་རྣམས་ཀྱིས་ཡོངས་སུ་ལོངས་
སྤྱད་པ་དེ་གང་ངན་པར་སྤྱོད་པར་མཐོང་ནས། དགེ་འདུན་དང་། སློབ་དཔོན་དང་། མཁན་པོ་ལ་བརྗོད་དེ། སླར་དཔྲོག་པར་བྱའོ། །འདི་ནི་གནས་མལ་སྡུད་པར་བྱེད་པས་ཀུན་དུ་སྤྱད་པ་རྣམས་སོ། །གཙུག་ལག་ཁང་སྐྱོང་གིས་དགོངས་ཀར་ཚོགས་པའི་དུས་སུ་དགེ་སློང་གི་དགེ་

འདུན་རྣམས་ལ་སྦྱིན་བདག་འདི་ཞེས་བྱ་བ་དང་། ཞལ་ཏ་བ་འདི་ཞེས་བྱ་བ་དང་། སྤྱོད་ཡུལ་གྱི་གྲོང་འདི་དག་གིས་སང་དབྱར་ཉེ་བར་གནས་པར་བྱའོ་ཞེས་བརྗོད་པར་བྱའོ། །དེ་ནས་ཚེས་བཅུ་དྲུག་ལ་སོ་སོ་ནས་གནས་ཁང་དང་སྤྱོད་ཡུལ་རྣམས་བལྟས་ཏེ། གནས་འདི་ན་བདག་ལ་སྡུག་
བསྔལ་མི་སྐྱེད་པ་དང་། སྐྱེས་ན་མེད་པར་བྱེད་པའམ། ན་ན་ནད་གཡོག་བྱེད་པ་ལྟ་ཡོད་དམ། སྤྱོད་ཡུལ་འདི་ན་བསོད་སྙོམས་དང་། སྨན་སྦྱོར་བའི་སྦྱིན་པ་པོ་ལྟ་ཡོད་དམ་ཞེས་བརྟགས་ཏེ་གཡོགས་པར་ནང་དུ་ཞུགས་ལ། དགེ་སློང་གི་མདུན་དུ་ཕྱག་བྱས་ཏེ། འདི་སྐད་ཅེས་བརྗོད་
པར་བྱའོ། །ཚེ་དང་ལྡན་པ་དགོངས་སུ་གསོལ། །དེང་ནི་དགེ་འདུན་གྱི་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཚེས་གཅིག་ལགས་ལ། བདག་དགེ་སློང་མིང་འདི་ཞེས་བགྱི་བའི་ཡང་དབྱར་ཟླ་འབྲིང་པོའི་ཚེས་གཅིག་ལགས་ཏེ། བདག་དགེ་སློང་མིང་འདི་ཞེས་བགྱི་བས་མཚམས་ཀྱི་
ནང་དང་བཅས་པའི་གནས་འདི་ལྟ་སྟེ། གནས་རལ་བ་དང་། འདྲུམ་པ་བཅོས་པའི་སླད་དུ་སྦྱིན་བདག་ཆེ་གེ་མོ་ཞེས་བགྱི་བ་དང་། ཞལ་ཏ་བྱེད་པ་ཆེ་གེ་མོ་ཞེས་བགྱི་བ་དང་། སྤྱོད་ཡུལ་གྱི་གྲོང་ཆེ་གེ་མོ་ཞེས་བགྱི་བ་དང་། བྲོ་གཡོག་ཆེ་གེ་མོ་ཞེས་བགྱི་བས་དབྱར་སྔ་མ་ཟླ་བ་གསུམ་གནས་པར་ཁས་
བླང་ངོ་། །བདག་དབྱར་འདི་ན་མཆིས་ཤིང་། བདག་གི་དབྱར་གྱི་གནས་ནི་འདི་ལགས་སོ་ཞེས་དེ་བཞིན་དུ་ལན་གཉིས་ལན་གསུམ་དུའོ། །གང་ཡང་དེ་བཞིན་དུ་གཉིས་པར་སྒྲུབ་པས་ཀྱང་བྱའོ། །རྣམ་པ་གཉིས་སུ་ནི་མ་ཡིན་ནོ། །འདོད་ན་སྔ་མའམ། ཕྱི་མར་ངེས་པར་དབྱར་ཉེ་བར་གནས་པར་
བྱའོ། །ཕྱི་མར་དབྱར་ཉེ་བར་གནས་ན། སྟོན་ཟླ་ཐ་ཆུངས་ཀྱི་བར་དུ་གནས་པར་བྱའོ། །ཤིང་ལ་སོགས་པས་གནས་གཞིའི་མཚམས་ཀྱི་མདོར་མནན་ཏེ། དབྱར་གནས་པར་ཁས་བླངས་ན་བཞི་ཆར་དུ་ཡང་དབྱར་གནས་པར་ཁས་བླངས་པ་ཞེས་བྱ་བ་ཡིན་ནོ། །དབྱར་གནས་
པར་ཁས་བླངས་པས་མཚམས་ཀྱི་ཕྱི་རོལ་དུ་གནས་པར་མི་བྱའོ། །དགེ་སློང་ནས་དགེ་བསྙེན་གྱི་བར་དུ་སྟེ། ཉེ་དུའི་དོན་ནམ། མུ་སྟེགས་ཅན་ནམ་ལྟ་བ་ངན་པ་དང་དབྲལ་བའམ། བདག་ཉིད་མ་ཐོབ་པ་ཐོབ་པར་བྱ་བའི་ཕྱིར་རམ། མདོ་སྡེ་ལ་སོགས་པ་ལ་ཐེ་ཚོམ་སྤང་བའི་ཕྱིར་

ཡང་རུང་སྟེ། ཞག་བདུན་དུ་བྱིན་གྱིས་བརླབས་ལ་འགྲོ་བར་བྱའོ། །ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་དབྱར་སྔ་མ་ཟླ་བ་གསུམ་གནས་པར་ཁས་བླངས་པ་ལས་བདག་མིང་
འདི་ཞེས་བགྱི་བ་བགྱི་བ་ཞིག་གི་སླད་དུ་དགུང་བདུན་ཚུན་ཆད་མཚམས་ཀྱི་སླད་རོལ་དུ་མཆི་བ་དང་། བར་ཆད་མ་བྱུང་ན་དེ་ཚུན་ཆད་ཀྱིས་སླར་མཆི་བར་བྱིན་གྱིས་བརླབ་པོ། །བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ། །དེ་བཞིན་དུ་ལན་གཉིས་ལན་
གསུམ་དུའོ། །ཉེ་བར་གནས་པ་པ་ལ་བདག་ཉེ་བར་གནས་སམ་མ་གནས་ཞེས་ཡིད་གཉིས་ཟ་བ་མཚམས་ཀྱི་ཕྱི་རོལ་དུ་གནས་ཀྱང་དབྱར་རལ་པ་མ་ཡིན་ནོ། །དབྱར་གྱི་ནང་དུ་སྤངས་པ་དང་། ཡང་ཟླ་བ་གསུམ་དུ་ལྷན་ཅིག་འདུག་པར་བྱའོ། །དགག་དབྱེ་བྱས་ནས་ནི་མ་ཡིན་ནོ། །
ནམ་མཁའ་ལ་འདུག་སྟེ་སྐྱ་རེངས་ཤར་ན་དབྱར་རལ་བའོ། །དབྱར་གྱི་ནང་དུ་གྲུ་བསྐྱོད་པར་ཤེས་བཞིན་དུ་དེར་དབྱར་གནས་ན་དབྱར་རལ་པའོ། །མི་ཤེས་ན་མ་ཡིན་ནོ། །སྡེ་ལྔ་ཆར་གྱིས་ཞག་བདུན་དུ་བྱིན་གྱིས་བརླབ་པར་བྱའོ། །དེ་དག་གིས་ཀྱང་ཉེ་བར་གནས་པར་བྱའོ། །དགེ་འདུན་
གྱིས་གནང་བ་མེད་ཀྱང་གཅིག་གི་མདུན་དུ་བྱིན་གྱིས་བརླབ་པར་བྱའོ། །ཅི་ལྟར་འདུན་པ་དེ་བཞིན་དུ་གཅིག་ནས་དྲུག་གི་བར་དུའོ། །དགེ་འདུན་གྱི་དོན་གྱི་ཕྱིར་ནི་བརྒྱད་ནས་ཞག་བཞི་བཅུའི་བར་དུ་སྟེ། དགེ་འདུན་ལ་གསོལ་ལ། གཅིག་གི་མདུན་དུ་དེ་བྱིན་གྱིས་བརླབ་པར་བྱའོ། །དེ་ལས་འདས་
པ་ནི་མ་ཡིན་ནོ། །མཚམས་ཀྱི་ནང་དུ་ཡུན་རིང་དུ་གནས་པར་བྱའོ། །མཚམས་ཀྱི་ཕྱི་རོལ་དུ་ནི་ཡུན་ཐུང་ངུ་གནས་པར་བྱའོ། །དེར་སྔར་སྤྲོ་བར་བྱོས་ལ་ཕྱིས་གསོལ་བ་བྱས་ནས་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་མཚམས་
ཀྱི་ནང་དང་བཅས་པའི་གནས་འདིར་དབྱར་སྔ་མའམ་ཕྱི་མ་ཡང་རུང་། ཟླ་བ་གསུམ་གནས་པར་ཁས་བླངས་ཏེ། འདི་དབྱར་འདི་ན་མཆིས་ཤིང་འདིའི་དབྱར་གྱི་གནས་ནི་འདི་ལགས་པ་ལས། དགེ་སློང་མིང་འདི་ཞེས་བགྱི་བ། ཞག་བཞི་བཅུ་བྱིན་གྱིས་བརླབས་ནས་དགེ་འདུན་གྱི་ཆེད་ལ་

མཚམས་ཀྱི་སླད་རོལ་དུ་མཆི་བ་དང་། དེ་ཚུན་ཆད་ཀྱིས་སླར་མཆི་བར་སྤྲོ་ན་གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། འདི་དབྱར་འདི་ན་མཆིས་ཤིང་འདིའི་དབྱར་གྱི་གནས་ནི་འདི་ལགས་པས་དགེ་སློང་མིང་འདི་ཞེས་བགྱི་བ་ཞག་
བཞི་བཅུ་བྱིན་གྱིས་བརླབས་ནས་དགེ་འདུན་གྱི་ཆེད་དུ་མཚམས་ཀྱི་སླད་རོལ་དུ་མཆི་བ་དང་། འདི་ཚུན་ཆད་ཀྱིས་སླར་མཆི་བར་སྤྲོ་སྟེ། དགེ་སློང་མིང་འདི་ཞེས་བགྱི་བ་ལ་ཞག་བཞི་བཅུའི་གནང་བ་སྩོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དབྱར་གནས་པར་
ཁས་བླངས་ཏེ་ཞེས་བྱ་བའི་བར་དུ་སྔ་མ་བཞིན་ཏེ། དེའི་སླད་དུ་འདི་དབྱར་འདི་ན་མཆིས་ཤིང་འདིའི་དབྱར་གྱི་གནས་ནི་འདི་ལགས་པ་ལས་དགེ་སློང་མིང་འདི་ཞེས་བགྱི་བ་ཞག་བཞི་བཅུ་བྱིན་གྱིས་བརླབས་ནས་དགེ་འདུན་གྱི་ཆེད་ལ་མཚམས་ཀྱི་སླད་རོལ་དུ་མཆི་བ་དང་། དེ་ཚུན་ཆད་ཀྱིས་
སླར་མཆི་བར་དགེ་སློང་མིང་འདི་ཞེས་བགྱི་བ་ལ་ཞག་བཞི་བཅུའི་གནང་བ་གསོལ་ན། དགེ་སློང་མིང་འདི་ཞེས་བགྱི་བ་ལ་ཞག་བཞི་བཅུའི་གནང་བ་སྩལ་བར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་
ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་ལ་ཞག་བཞི་བཅུའི་གནང་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ནས་བསྐོས་པ་དེས་དགེ་སློང་གཅིག་གི་མདུན་དུ་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ།
བདག་མིང་འདི་ཞེས་བགྱི་བ་མཚམས་ཀྱི་ནང་དང་བཅས་པའི་གནས་འདིར་དབྱར་སྔ་མའམ། ཕྱི་མ་ཟླ་བ་གསུམ་གནས་པར་ཁས་བླངས་པ་ལས། བདག་དགེ་སློང་མིང་འདི་ཞེས་བགྱི་བ་དགེ་འདུན་གྱིས་ཞག་བཞི་བཅུ་གནང་བ་སྩལ་ལགས་ཏེ། བདག་མིང་འདི་ཞེས་བགྱི་བའི་དགེ་འདུན་
གྱི་བགྱི་བ་ཞིག་གི་སླད་དུ་དགུང་བཞི་བཅུ་མཚམས་ཀྱི་སླད་རོལ་དུ་མཆི་བ་དང་། དེ་ཚུན་ཆད་ཀྱིས་སླར་མཆི་བར་བྱིན་གྱིས་བརླབ་པོ། བདག་དབྱར་འདི་ན་མཆིས་ཤིང་། བདག་གི་དབྱར་གྱི་གནས་ནི་འདི་ལགས་སོ། །དེ་བཞིན་དུ་ལན་གཉིས་ལན་གསུམ་དུའོ། །ཐ་མ་ཞག་བརྒྱད་ཀྱི་བར་

ཡང་དེ་བཞིན་དུ་བརྗོད་པར་བྱའོ། །སྟོན་ཟླ་ཐ་ཆུངས་ལ་ཡང་ཞག་གཅིག་ལ་སོགས་པ་ལ་ཡང་བྱིན་གྱིས་བརླབ་པར་བྱའོ། །སྲོག་དང་ཚངས་པར་སྤྱོད་པའི་བར་ཆད་དུ་འགྱུར་ན། དབྱར་རལ་བ་ལ་ལྟུང་བ་མེད་དོ། །འདི་ལྟ་སྟེ། བསོད་སྙོམས་བྱིན་པ་དང་། སྨན་
དང་། ནད་གཡོག་མེད་པ་དང་། བུད་མེད་དང་། སྐྱེས་པ་དང་། མ་ནིང་དང་། ཉེ་དུ་ཡང་རུང་། མི་རིགས་པ་ལས་མགྲོན་དུ་གཉེར་བ་དང་། གཏེར་གྱི་སྒོ་མཐོང་བ་དང་། བུད་མེད་ཀྱི་ཡུལ་ཆགས་པར་བྱེད་པས། ཚུལ་བཞིན་མ་ཡིན་པའི་མཚན་མར་འཛིན་པའོ། །དགེ་སློང་
ངམ། སྦྱིན་བདག་ལ་ཡང་རུང་བར་ཆད་བརྒྱད་པོ་དག་ཏུ་གྱུར་པ་སྟེ། འདི་ལྟ་སྟེ། ཆོམ་རྐུན་གྱིས་འཇིག་པ་དང་། རྒྱལ་པོས་འཇིག་པ་དང་། མིས་འཇིག་པ་དང་། རྒྱལ་པོ་དང་། ཆོམ་རྐུན་མ་གཏོགས་པའི་མི་ལས་གང་བྱུང་བའོ། །མི་མ་ཡིན་པས་འཇིག་པ་དང་། ཀླུས་
འཇིགས་པ་དང་། གཅན་གཟན་གྱིས་འཇིགས་པ་དང་། ཀླུ་དང་མི་མ་ཡིན་པ་དག་མ་གཏོགས་པའི་འཚེ་བར་བྱེད་པ་རྣམས་སོ། །མེས་འཇིགས་པ་དང་། ཆུས་འཇིགས་པ་དང་། གནས་དེ་ནི་དགེ་འདུན་འདུ་བ་བྱེ་བར་འགྱུར་བ་ལ་ལྟུང་བ་མེད་དོ། །ཆོས་ཀྱི་ཕྱོགས་ནས་ཆོས་མ་ཡིན་པ་
ཕྱོགས་སུ་སྐྱ་རེངས་ཤར་བར་བྱེད་ན་དབྱར་རལ་བའོ། །གཙུག་ལག་ཁང་གཞན་ཞིག་ན་དགེ་སློང་མཛའ་བོ་ཞིག་དགེ་འདུན་ལ་དབྱེན་བྱེད་དུ་འདོད་པ་དེ་བཟློག་པའི་ཕྱིར་སོང་བ་དང་ཞག་བདུན་འདས་ཀྱང་ལྟུང་བ་མེད་དོ། །དེར་མི་འགྲོ་ན་ཡང་འགལ་ཚབས་ཅན་དུ་འགྱུར་རོ། །
གཙུག་ལག་ཁང་གང་དུ་དབྱར་གནས་པ་དེར་ཕྱག་དར་དང་། ཆག་ཆག་ལ་སོགས་པར་བྱའོ། །དབྱར་གནས་པར་ཁས་བླངས་པས་རྣམ་པ་གསུམ་སྟེ། མཁར་ལེན་དང་། གོས་བགོ་བ་དང་། སྲ་བརྐྱང་གི་གོས་སོ། །དགེ་འདུན་གྱིས་གནས་བརྟན་ལ་དགེ་སློང་རྣམས་
མཁར་ལེན་བྱེད་དུ་གཞུག་པར་བྱའོ། །གནས་འདིར་དབྱར་གནས་པར་བྱའོ་ཞེས་དམ་བཅས་པ་ལས། དེར་དབྱར་ཉེ་བར་མ་གནས་ན་ཉེས་བྱས་སོ། །ཞར་ལ་འོངས་པ་རྣམས་བརྗོད་ནས་དཀྱུས་ཉིད་བརྗོད་པར་བྱའོ། དབྱར་གྱི་གོས་རས་ཆེན་ཞེས་བྱ་བ་ནི། དབྱར་གནས་པར་འཁྲུས་

ཀྱི་ཕྱིར་ནི་གོས་རས་ཆེན་ནོ། །ཡུལ་གང་ན་ཁྲོན་པའི་ཆུ་ལས་ཁྲུས་བྱེད་པ་དེ་ན་དབྱར་ཁྲུས་བྱེད་པའི་ཕྱིར་ནི་གནང་བའོ། །བཙལ་བར་བྱའོ་ཞེས་བྱ་བ་ལ། གང་ནས་བཙལ་བར་བྱ་ཞེ་ན། ཉེ་དུའམ། ཉེ་དུ་མ་ཡིན་པར་བསྟབས་པའམ། བདག་གི་རིན་གྱིས་ཉོས་པ་དང་། ལུས་
སམ་ངག་གིས་བསྒྱུར་ཅིང་ཚོལ་བའོ། །དེ་ཚུན་ཆད་རྙེད་ན་རུང་བར་བྱས་ལ་བཅང་བར་བྱའོ། །དབྱར་ཟླ་འབྲིང་པོ་ལ་བྱིན་གྱིས་བརླབ་པར་བྱའོ། །དབྱར་ཟད་ནས་འོག་ཏུ་ཟླ་བ་ཕྱེད་ཀྱི་བར་དུ་བཅང་བར་བྱའོ་ཞེས་བྱ་བ་ནི་དགག་དབྱེ་བྱས་ནས་ཟླ་བ་ཕྱེད་ཀྱི་བར་དུའོ། །དགག་དབྱེ་བྱ་བ་ཅི་
ལྟ་ཞེ་ན། ཉི་མ་བདུན་ནམ་བརྒྱད་ན་དགག་དབྱེ་བྱེད་པ་ན་སྤྱོད་ཡུལ་གྱི་གྲོང་རྣམས་སུ་བརྗོད་པར་བྱའོ། །འཁོར་མེད་ན་གཞོན་ནུ་དང་། རྒན་པ་རྣམས་ཀྱིས་མཆོད་པའི་ཆོ་ག་ལེགས་པར་བྱའོ། །མདོ་སྡེ་ལ་སོགས་པ་འཛིན་པས་མཚན་ཐོག་ཐག་ཆོས་མཉན་པ་སྦྱིན་པར་བྱའོ། །དུས་ཤེས་པར་བྱས་
ནས་དགག་དབྱེ་བྱེད་པ་བསྐོ་བར་བྱའོ། །དེ་ཡང་སྔར་སྤྲོ་བར་བྱའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་
མཛོད་ཅིག་དང་། དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགག་དབྱེ་བགྱིད་པར་བསྐོས་ཏེ། དགེ་སློང་དགག་དབྱེ་བགྱིད་པ་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་འགྱུར་རོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་
བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་སྤྲོ་སྟེ། དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགག་དབྱེ་བགྱིད་པར་བསྐོ་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་
བ་དགག་དབྱེ་བགྱིད་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག་གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགག་དབྱེ་བགྱིད་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་

འཛིན་ཏོ། །དེས་རྩྭ་ཀུ་ཤ་རྣམས་ཁྱེར་ཏེ་བྲིམ་པར་བྱའོ། །དགེ་འདུན་གྱི་གནས་བརྟན་གྱིས་གསོལ་བ་འབའ་ཞིག་གི་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་སྟེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་
ན། དགེ་འདུན་གྱིས་གནང་བར་མཛོད་ཅིག་དང་། དེང་དགེ་འདུན་དགག་དབྱེ་མཛད་དོ། །འདི་ནི་གསོལ་བའོ། །དགག་དབྱེ་བྱེད་པ་གནས་བརྟན་གྱི་མདུན་དུ་འདུག་ལ་དེས་ཀྱང་རྩྭ་ཀུ་ཤ་ཅུང་ཟད་ལག་པས་གཟུང་བར་བྱའོ། །ཁ་ཤར་ཕྱོགས་དང་བྱང་ཕྱོགས་སུ་བསྟན་ཏེ། བཏིང་ལ་
རྐང་པས་མནན་ཏེ་འདི་སྐད་དུ་སྨྲ་བར་བྱའོ། །དགེ་འདུན་བཙུན་པ་རྣམས་གསན་དུ་གསོལ། །དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་ཡང་། དགག་དབྱེ་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་མཐོང་བ་དང་།
ཐོས་པ་དང་། དོགས་པའི་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་བགྱིད་ཀྱིས། དགེ་འདུན་བཙུན་པ་རྣམས་ཀྱིས་བདག་ལ་གདམས་སུ་གསོལ། དགེ་འདུན་བཙུན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། དགེ་འདུན་བཙུན་པ་རྣམས་ཀྱིས་བདག་
ལ་རྗེས་སུ་གཟུང་དུ་གསོལ། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་ཐུགས་བརྩེ་བར་མཛད་དུ་གསོལ། ལྟུང་བ་ཤེས་ཤིང་མཐོང་ན། ཆོས་བཞིན་འདུལ་བ་བཞིན་དུ་སླར་བགྱིའོ། །དེ་བཞིན་དུ་ལན་གཉིས་ལན་གསུམ་དུའོ། །དེ་བཞིན་
དུ་གསར་བུའི་བར་དུ་ཀུན་གྱིས་བྱའོ། །དགག་དབྱེ་བྱེད་པ་གཅིག་ཡོད་ན། དེས་དགེ་འདུན་གྱི་མདུན་དུའོ། །གལ་ཏེ་གཉིས་གསུམ་ན། གཅིག་ལ་གཅིག་དགག་དབྱེ་བྱའོ། །དེའི་འོག་ཏུ་དགེ་སློང་མ་རྣམས་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་རྣམས་ཀྱི་
དགག་དབྱེ་བྱའོ། །དེ་ནས་དགག་དབྱེ་བྱེད་པ་རྒན་རིམས་ཀྱི་མདུན་དུ་འགྲེང་སྟེ། དགེ་འདུན་བཙུན་པ་རྣམས་ཀྱི་དགག་དབྱེ་མཛད་པ་ལགས་སོ་ཞེས་བརྗོད་པར་བྱའོ། །ཐམས་ཅད་ཀྱིས་ཀྱང་དགག་དབྱེ་མཛད་དོ། །ལེགས་པར་དགག་དབྱེ་མཛད་དོ་ཞེས་བརྗོད་པར་བྱའོ། །རྣམ་པ་གཞན་དུ་

ན་འགལ་ཚབས་ཅན་དུ་འགྱུར་རོ། །དེ་ནས་དགག་དབྱེ་བྱེད་པས་ཁབ་བམ་གྲིའུ་ཐོགས་ལ་འདི་སྐད་དུ་བརྗོད་པར་བྱའོ། །བཙུན་པ་རྣམས་རྙེད་པའི་དངོས་པོ་འདི་ལྟ་བུས་ཀྱང་དབྱར་གནས་པའི་དགེ་སློང་གི་དགེ་འདུན་རྣམས་དགག་དབྱེ་བྱ་ཞིང་། འདིར་གང་ཅི་རྙེད་པ་དགེ་འདུན་ཚོགས་ནས་
བགོ་བར་བྱའོ། །ཐམས་ཅད་ཀྱིས་རྙེད་དོ་ཞེས་བརྗོད་པར་བྱའོ། །རྣམ་པ་གཞན་དུ་ན་དགག་དབྱེ་བྱེད་པ་དང་། དེ་དག་ཀྱང་འགལ་ཆབས་ཅན་དུ་འགྱུར་རོ། གཅིག་པུ་ཞིག་འདུག་ན་ཆོས་མཉན་པ་ཅི་ནུས་སུ་སྦྱིན་པར་བྱའོ། །གསོ་སྦྱོང་བཞིན་དུ་བྱིན་གྱིས་བརླབ་པར་བྱ་སྟེ། གསོ་སྦྱོང་
གི་སྐབས་སུ་དགག་དབྱེའི་སྒྲས་བརྗོད་པར་བྱའོ། །དེ་བཞིན་དུ་གཉིས་དག་གམ། གསུམ་པོ་རྣམས་ཀྱིས་ཀྱང་ངོ་། །གང་ན་གཞི་འཁོད་པ་དེ་དག་གིས་དགག་དབྱེ་ནི་བྱའོ། །དགག་དབྱེ་བྱེད་པར་བསྐོ་བར་ནི་མི་བྱའོ། །གང་ན་ལྔ་འཁོད་པ་དེར་ནི་དགག་དབྱེ་བྱེད་པ་བསྐོ་བར་བྱའོ། །
འདུན་པ་བླང་བར་མི་བྱའོ། །དགག་དབྱེ་བྱ་བ་རྣམ་པ་བཞི་སྟེ། ཚིག་གཅིག་པ་དང་། ཚིག་གཉིས་པ་དང་། ཚིག་གསུམ་པ་དང་། མང་པོའི་དགག་དབྱེ་བྱའོ། །དེ་ལ་ཚིག་གཅིག་པ་ནི་གལ་ཏེ་གཞང་འབྲུམ་གྱི་ནད་ཡོད་པའམ། བླ་གབ་མེད་པ་ན་མལ་ཆ་དང་སྟན་རྣམས་
བཞག་པ་ལས་ཆར་བབ་བམ། ཆར་བབ་ཏུ་དོགས་པའམ། རྒྱལ་པོའམ། ཁྱིམ་པས་རྙེད་པ་ཞིག་ཁྱེར་ཏེ་འོངས་སམ། ཆོས་མཉན་པ་སྒྲོགས་སམ། ཆོས་མཉན་པ་སྒྲོགས་པའི་གཏམ་གཏན་ལ་འབེབས་སམ་རྩོད་པ་ཞི་བར་བྱེད་དམ། མཚན་མོ་ཉུང་ངུ་ཙམ་ལུས་སམ། རྒྱལ་པོ་
ལ་སོགས་པ་འཇིགས་པ་བརྒྱད་པོ་དང་ལྡན་པའོ། །དེ་ལ་ཚིག་གཉིས་པ་ནི་ཚིག་གང་གསུམ་པོའི་སྐབས་མེད་པའོ། །ཚིག་གསུམ་པོ་ནི་མཉམ་པའི་གནས་སྐབས་སོ། །དེ་ལ་ཚོགས་ཀྱི་དགག་དབྱེ་བྱ་བ་ནི་འཇིགས་པ་ཆེན་པོ་བྱུང་ན་རྣམ་པར་བལྟས་ལ། ཕན་ཚུན་བརྗོད་པར་བྱ་སྟེ།
ཚེ་དང་ལྡན་པ་དག་དེང་དགེ་འདུན་གྱི་དགག་དབྱེ་བཅོ་ལྔ་པ་སྟེ། འདི་དང་འདི་ལྟ་བུའི་འཇིག་པ་བྱུང་སྟེ། གང་གི་ཚེ་དགེ་འདུན་ཚོགས་པ་རྙེད་པ་དག་དེའི་ཚེ་དགེ་འདུན་དང་ལྷན་ཅིག་དགག་དབྱེ་བགྱིའོ། །ལྟུང་བ་ཁས་ལེན་ཏེ་གལ་ཏེ་ཕམ་པར་འགྱུར་བར་ཁས་ལེན་ན་ཕྱུང་ལ་དགག་དབྱེ་བྱའོ། །གལ་ཏེ་

དེ་ལས་གཞན་པ་ནི་ལྟ་བ་མཐུན་པའི་མདུན་དུ་བཤགས་པར་བྱའོ། །ལྟ་བ་མཐུན་པ་ཇི་སྲིད་ལྟ་བུ་ཞེ་ན། གང་ལྟུང་བ་བྱུང་བ་དེ་དང་དེའི་དངོས་པོ་ལ་ལྟ་བ་མཚུངས་པར་གྱུར་པའོ། །ཁས་བླངས་པས་ཁས་མ་བླངས་པ་མང་པོའི་ཚོགས་སུ་ཁ་བསྐང་བ་དང་། གོ་བཟློག་པ་དང་།
དགག་དབྱེ་བྱེད་པ་མཚན་གྱུར་ན་དགག་དབྱེ་མ་བྱས་པའོ། །ཐེ་ཚོམ་ཟོས་པ་ནི་གང་ཅི་ལྟ་བུར་འདུ་ཤེས་པ་དེ་དག་གིས་དེ་ལྟར་དགག་དབྱེ་བྱའོ། །གང་ལྟུང་བའི་ཕྱིར་རྩོད་པ་ནི་ལྟུང་བ་ཅི་ལྟ་བུ་གང་བརྗོད་པ་དེ་དག་གིས་དེ་ལྟར་དགག་དབྱེ་བྱའོ། །གླེང་བར་བྱེད་པ་གང་ལུས་མི་སྡོམ་པ་དང་། ངག་
མི་སྡོམ་པར་ཚར་གཅོད་ལ་གཉི་ག་སྡོམ་པ་བསྐོ་བར་བྱའོ། །དེ་བཞིན་དུ་མདོ་སྡེ་ལ་སོགས་པ་འཛིན་པ་ལ་ཡང་ངོ་། །དེ་ལ་གསལ་བ་དང་། དེ་ལ་མཁས་པའོ། །གཞི་དང་མདོ་སྡེ་ལ་སོགས་པ་ལ་མཁས་སུ་ཟིན་ཀྱང་གང་ཆོས་མ་ཡིན་པའི་ཆོས་སུ་སྒྲོག་པ་དང་། དེ་ལ་བདག་གིས་དྲི་བར་
བྱའོ། །ལྟུང་བའི་རིས་ནི་གང་ཡིན། སྤྱོད་ལམ་ནི་གང་ཡིན། མཚན་མོའམ། དེ་བཞིན་དུ་ཉིན་མོའམ། མིང་གིས་ཕྱེ་ན་གང་ཉེས་པའི་ཡན་ལག་ཐམས་ཅད་དུ་རྣམ་པར་འཁྲུགས་པའམ། གནས་དང་གནས་མ་ཡིན་པའམ། འགྲོ་བའམ། མི་འགྲོ་བའམ། ཕོ་ཉའམ། དགག་
དབྱེ་འཇོག་ཅིང་དེར་མི་འགྲོ་ན་ཡང་གླེང་བར་བྱེད་པ་མ་ཡིན་ཏེ། དེ་ལ་གླེང་བ་མི་འཆགས་སོ། །གལ་ཏེ་འགྱུར་བ་མེད་ན་གླེང་བར་བྱེད་པ་ཡིན་ན། དེས་ཁས་ལེན་དུ་བཅུག་ལ་ཆོས་བཞིན་བྱེད་དུ་གཞུག་པར་བྱའོ། །འཐབ་ཀྲོལ་ཅན་རྣམས་ལྷགས་ཤིང་མི་འགྲོ་ན་མགུ་བར་བྱས་ལ་དགག་དབྱེ་བྱའོ། །
ཡང་ན་དཀྱིལ་འཁོར་བ་གཉིས་སམ། གསུམ་དུ་འདོང་བར་བྱའོ། །དགག་དབྱེའི་ལས་མ་ཟིན་པར་དགག་དབྱེ་བཞག་ན་ཆོས་དང་མཐུན་པར་དགག་དབྱེ་བཞག་པའོ། །ཟིན་ན་ཆོས་དང་མཐུན་པ་མ་ཡིན་པའོ། །ནད་པ་བདག་ཉིད་དམ་ཕོ་ཉ་དགག་དབྱེ་གཞག་པར་མི་བྱའོ། །ནད་པ་ལ་ཡང་མི་བྱའོ། །ལྷག་
མ་གཞན་ནི་གསོ་སྦྱོང་བཞིན་ཏེ་དགག་དབྱེ་ནི་འདི་ལྟ་བུའོ། །ཞར་ལ་འོངས་པ་རྣམས་རྫོགས་ཏེ། དཀྱུས་མ་བརྗོད་པར་བྱའོ། །སྔོན་རོལ་དུ་ཞེས་བྱ་བ་ནི་བདག་དབྱར་ཟླ་འབྲིང་པོ་ལས་སྔ་མའི་དུས་ལའོ། །དེ་ཉིད་བསྟན་པ་ནི། སོ་ག་རྣམས་ཀྱི་ཟླ་བ་གཅིག་ལུས་པ་ཞེས་བྱ་བ་དེའི་སྔོན་རོལ་དུ་

ཞེས་བྱ་བར་མངོན་པར་བསམས་པའོ། །འདས་པར་ཞེས་བྱ་བ་ནི། འཆང་ན་ཞེས་བྱ་བ་འདི་དང་འབྲེལ་ཏོ། །གང་ལས་འདས་ཤེ་ན། སྨྲས་པ། དབྱར་འདས་ནས་ཟླ་བ་ཕྱེད་ལུས་པའོ། །དེ་བས་ན་འདི་ལྟར་དེ་སྔར་བཙལ་ན་ལྟུང་བ་གཅིག་གོ། །དེ་ཉིད་མ་བཏང་ན་སྟེ། འདས་པར་བཅངས་ན་
ལྟུང་བྱེད་གཉིས་དང་། སྤང་བའི་དངོས་པོ་གཅིག་གོ། །དེ་ལ་ལྟུང་བ་ཇི་ལྟར་འགྱུར་ཞེ་ན། སྔ་མ་དང་ཕྱི་མ་སྟེ། གང་དབྱར་སྔ་མ་ལ་ཁས་ལེན་པར་འདོད་ན། དེ་དག་རང་གི་དུས་སུ་བྱས་ནས་ཚོལ་བ་ལ་ལྟུང་བ་མེད་དོ། །གང་ཕྱི་མ་ལ་ཁས་ལེན་པར་འདོད་པ་དེ་དག་ལ་བལྟས་ཏེ།
བཙལ་ནས་འཆང་ན་སྔ་མ་ལ་ཉེས་བྱས་སུ་འགྱུར་ཏེ། སྤང་བར་ནི་མི་འགྱུར་རོ། །སྔོན་རོལ་དུ་འཆང་བ་ལ་ལྟུང་བ་མེད་དོ། །སྟོན་ཟླ་ཐ་ཆུངས་ཉའི་ཟླ་བ་ཕྱེད་ལ་གཉིས་པའི་བར་དུ་འཆང་བ་ལའོ། །ཕྱི་མ་ལ་ནི་ལྟུང་བ་མེད་དོ། །དུས་མ་ཡིན་པ་ལ་ནི་དུས་མ་ཡིན་པར་འདུ་ཤེས་སམ་ཡིད་གཉིས་ཟ་ན་སྤང་
བའོ། །དུས་ལས་དུས་མ་ཡིན་པར་འདུ་ཤེས་སམ་ཡིད་གཉིས་ཟ་ན་ཉེས་བྱས་སོ། །དུས་མ་ཡིན་ནམ་དུས་ལ་བབ་ཀྱང་རུང་དུས་སུ་འདུ་ཤེས་ན་ལྟུང་བ་མེད་དོ། །མི་རུང་བ་དང་། ཐགས་སུ་མ་བཏགས་པ་དང་། བུག་རྡོལ་དུ་གྱུར་པ་དང་། རྙང་རྙིང་དུ་གྱུར་པ་ཡང་རུང་། ཚོལ་བ་དང་འཆང་ན་
ཉེས་བྱས་སོ། །ཁས་ལེན་པར་འདོད་ན་ཞེས་བྱ་བའི་ཚིག་ནི་གལ་ཏེ་དབྱར་ཟླ་འབྲིང་པོ་ལ་ཆོས་གོས་བཙལ་བ་ལས། དབྱར་ཟླ་འབྲིང་པོ་གཉིས་སུ་གྱུར་ན་སྔ་མའི་འདིར་ལྟུང་བ་མེད་དོ། །བརྒྱད་པའོ།། །།འདུལ་བ་བསྡུས་པ་བམ་པོ་བདུན་པ། མཉན་ཡོད་ན་སྟེ། ཉེ་དགས་དགེ་འདུན་ལ་
དབུལ་བ་ལས་རས་ཡུག་བདག་ཉིད་ལ་བསྔོས་པས་ན། ལོག་པར་བསྔོས་པ་ཡོངས་སུ་ལེན་པའི་གཞིའི་དབང་དུ་མཛད་དེ་འགལ་ཚབས་ཅན་དུ་འགྱུར་བ་དང་། མ་དད་པ་ལ་སོགས་པས་ཉོན་མོངས་པ་དག་གི་ཕྱིར་སྤང་བ་དགུ་པའོ། །ཤེས་བཞིན་དུ་ཞེས་བྱ་བ་ནི་རང་གིས་རིག་གམ་ཕ་རོལ་པོས་བརྗོད་
པའོ། །དགེ་འདུན་ལ་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནོ། །དགེ་འདུན་གྱི་ལག་ཏུ་མ་ཐོབ་ཀྱང་བསྔོས་པའི་དབང་གིས་ནི་དགེ་འདུན་གྱི་ཞེས་གསུངས་སོ། །དགེ་འདུན་དེ་ཡང་རྣམ་པ་ལྔ་སྟེ། ངོ་ཚ་མེད་པའི་དགེ་འདུན་ཏེ། གང་ཐམས་ཅད་ཀྱང་ཚུལ་ཁྲིམས་འཆལ་པ་

ཅན་དང་། ལུག་ལྟར་ལྐུགས་པའི་དགེ་འདུན་ཏེ། གང་མདོ་སྡེ་དང་འདུལ་བ་དང་། མ་མོ་མི་འཛིན་པ་དང་། ཚོགས་ཀྱི་དགེ་འདུན་ཏེ། གང་ལ་ལས་རྣམས་བྱེད་པ་དང་། ཀུན་རྫོབ་ཀྱི་དགེ་འདུན་ཏེ། གང་ན་སོ་སོའི་སྐྱེ་བོ་དགེ་བ་ཅན་ཐམས་ཅད་དང་། དོན་དམ་པའི་དགེ་
འདུན་ཏེ། གང་ན་སློབ་པ་དང་། མི་སློབ་པ་རྣམས་སོ། །རྙེད་པ་ཞེས་བྱ་བ་ནི་རྙེད་པ་ལ་རྣམ་པ་གཉིས་ཏེ། གོས་ཀྱི་རྙེད་པ་དང་། ཟས་ཀྱི་རྙེད་པའོ། །དོན་འདི་ལ་ནི་གོས་ཀྱི་རྙེད་པ་ལ་བྱ་བར་དགོངས་སོ། །ཁ་ཅིག་ནི་གོས་དང་། ཟས་དང་། མལ་ཆ་དང་། སྟན་དང་། ནད་ཀྱི་རྐྱེན་སྨན་
དང་། གོས་ཀྱི་རིན་ལ་སོགས་པ་རྙེད་པ་དང་། གཞན་ཅི་རྙེད་ཀྱང་རུང་སྟེ། རྙེད་པ་ཞེས་བྱའོ་ཞེའོ། །བསྔོས་པ་ཞེས་བྱ་བ་ནི་གྲུབ་པ་སྟེ། དགེ་འདུན་ལ་འབུལ་ལོ་ཞེས་བྱ་བ་དང་ངེས་པར་ཞེས་བྱ་བའི་བར་དུའོ། །གཞན་དག་ནི་དགེ་འདུན་ལ་འབུལ་ལོ་ཞེས་ལུས་རྣམ་པར་འགྱུར་བའམ། ངག་
གིས་ཕྱེའམ། དེ་ལ་མངོན་དུ་བྱེད་པ་ཞེའོ། །ཕུལ་བ་ནི་ཡང་མི་བསྐུར་བར་དགེ་འདུན་ཉིད་ལ་དབུལ་བར་བྱའོ། །གང་ཟག་བདག་ཉིད་ལ་ཞེས་བྱ་བ་ནི་བདག་ཉིད་ལ་བརྟེན་ནས་སོ། །དེ་ལ་ལྟུང་བ་ཅི་ལྟར་འགྱུར་ཞེ་ན། གང་ཟག་གཞན་གཅིག་གམ། གཉིས་དག་ལའམ། མང་པོ་
རྣམས་ལའམ། དགེ་འདུན་ལ་བསྔོས་ཀྱང་རུང་། བདག་གིར་བསྔོས་ཀྱང་སྦྱོར་བ་ནི་ཉེས་བྱས་སོ། །རྙེད་ན་སྤང་བའོ། །ཁ་ཅིག་ན་རེ་གང་ཟག་གཞན་གཅིག་ལ་བསྔོས་པ་ལས་བདག་ཉིད་ལ་བསྒྱུར་ན་ཉེས་བྱས་སོ་ཞེའོ། །གང་ཟག་གཅིག་ལ་འདིར་བསྔོས་པ་ལས། གང་ཟག་གཞན་གཅིག་
གམ། གཉིས་དག་ལའམ། མང་པོ་རྣམས་ལའམ། དགེ་འདུན་ལ་བསྔོས་ཀྱང་རུང་། སྦྱོར་བ་དང་། རྙེད་པ་ཡང་ཉེས་བྱས་སོ། །དེ་བཞིན་དུ་གཉིས་སམ། མང་པོའམ། དགེ་འདུན་ལ་བསྔོས་པ་དག་མ་གཏོགས་པ་གཞན་ལ་བསྔོས་པ་དག་བསྒྱུར་ན། སྦྱོར་བ་དང་། རྙེད་པ་ན་ཡང་ཉེས་
བྱས་སོ། །དགེ་སློང་གི་དགེ་འདུན་གཅིག་ལ་བསྔོས་པ་ལས་དགེ་སློང་གི་དགེ་འདུན་གཞན་ནམ། དགེ་སློང་མའི་དགེ་འདུན་ལ་བསྔོས་པ་བསྒྱུར་རམ། དེ་བཞིན་དུ་དགེ་སློང་མའི་དགེ་འདུན་ལ་བསྔོས་པ་ལས། དགེ་སློང་གི་དགེ་འདུན་ལའམ། གཉིས་གའི་དགེ་འདུན་ལ་བསྔོས་པ་དང་། གཅིག་

ལའམ། དགེ་འདུན་བྱེ་བ་ལས་ཕྱོགས་གཅིག་ལ་བསྔོས་པ་ཕྱོགས་གཅིག་ལ་བསྒྱུར་བ་ཡང་རུང་སྟེ། ཐམས་ཅད་ལ་ཡང་ཉེས་བྱས་སོ། །གནས་ཁང་དང་། ཁང་བཟངས་དང་། ཀ་བའི་བར་དང་། སྒོ་ཁང་དང་། ཁྱམས་གཞན་ལ་བསྔོས་པ་ལས་གཞན་དེ་དག་ཉིད་དུའམ། གཞན་དུ་བསྔོས་པ་
ལས་བསྒྱུར་ན་ཉེས་བྱས་སོ། །དེ་བཞིན་དུ་སྐུ་གཟུགས་ཀྱི་ལས་སྐུ་གཟུགས་གཞན་ཏེ་གཡར་པོའི་ཆོས་ལ་ལྟུང་བ་མེད་དོ། །དེ་བཞིན་དུ་མཆོད་རྟེན་ལ་ཡང་ངོ་། །དེ་བཞིན་དུ་མཆོད་རྟེན་གྱི་ཐེམ་སྐས་རིམ་པ་དང་པོ་དང་། གཉིས་པ་ལ་སོགས་པའམ། མེ་ཏོག་ཁང་ངམ། བ་གམ་བཞི་པ་
འམ། བུམ་པའམ། པུ་ཤུ་འམ། གདུགས་དང་པོ་འམ། ཐམས་ཅད་ཀྱི་སྟེང་གི་བར་དང་། ཆར་ཁབ་ཀྱང་རུང་སྟེ། ཕན་ཚན་དུ་བརྗོད་པར་བྱའོ། །མུ་ཏོ་པ་འམ། དུད་འགྲོའི་སྐྱེ་གནས་སུ་གཏོགས་པ་གཞན་ལ་བསྔོས་པ་ལས། གཞན་ལ་བསྔོས་པ་བསྒྱུར་ན་ཉེས་བྱས་
སོ། །བཙལ་ཏེ་མ་རྙེད་པ་ལ་ལྟུང་བ་མེད་དོ། །དེ་བཞིན་དུ་མི་དང་དུད་འགྲོའི་སྐྱེ་གནས་སུ་གཏོགས་པ་རྣམས་ཀྱང་ཕན་ཚུན་དུ་བརྗོད་པར་བྱའོ། །བསྔོས་པ་ལས་བསྔོས་པར་འདུ་ཤེས་སམ་ཡིད་གཉིས་ཟ་ན་སྤང་བའོ། །མ་བསྔོས་པ་ལ་བསྔོས་པར་འདུ་ཤེས་ན་ཉེས་བྱས་སོ། །ཁ་
གཅིག་ན་ན་རེ་ལྟུང་བར་འགྱུར་གྱི། སྤང་བར་ནི་མ་ཡིན་ཏེ། དེ་བཞིན་དུ་ཡིད་གཉིས་ཟ་བ་ཡང་ངོ་ཞེའོ། །མ་བསྔོས་སམ། བསྔོས་ཀྱང་རུང་མ་བསྔོས་ཀྱང་འདུ་ཤེས་ན་ལྟུང་བ་མེད་དོ། །དགེ་འདུན་ལ་བསྔོས་པ་བདག་ཉིད་ལ་བསྔོས་པར་བསྒྱུར་ན། ཆོས་གོས་གང་ལ་དེས་ལྷན་པ་ཙམ་དུ་
བཏབ་ཀྱང་ཆོས་གོས་དེ་མཐའ་དག་གཏང་བར་བྱའོ། །ཁ་ཅིག་ན་རེ་ངོ་ཚ་མེད་པའི་དགེ་འདུན་ལ་བསྔོས་པ་བདག་ཉིད་ལ་སྦྱིན་གནས་སུ་བསམས་ཤིང་སྙིང་རྗེའི་ཕྱིར་བསྔོས་པ་བསྒྱུར་ན་ལྟུང་བ་མེད་ཅེའོ། །དེ་ཡང་དགེ་འདུན་ལ་བསྔོས་པར་བསམས་པ་ལ་བྱའོ། །ཁྱིམ་ན་མ་དང་ཕའི་གོས་དང་།
ཡོ་བྱད་བདག་ཉིད་ལ་བསྔོས་པ་བསྒྱུར་ན་ཉེས་བྱས་སོ། །དགེ་འདུན་གྱི་རྙེད་པ་ལ་གཅིག་གམ། མང་པོ་ཡང་རུང་། མཚམས་ཀྱི་ཕྱི་རོལ་ཏུ་སོང་སྟེ། བདག་གིར་བྱས་ན་ཉེས་བྱས་སོ། །རྙེད་པའི་ཀུན་དུ་སྤྱད་པ་ནི་རྙེད་པ་ཞིག་འོངས་དང་། དགེ་འདུན་ལ་བསྒོ་སྟེ། གཎྜཱི་བརྡུངས་

ནས། ཚུལ་ཤིང་བྲིམས་ལ་དེ་ནས་བགོ་བར་བྱའོ། །བདག་གིར་མ་ཁྱེར་བ་དེ་ཡང་། ཁྱེར་ཅིག་ཅེས་དེའི་བགོ་སྐལ་བསྐྱལ་བར་བྱའོ། །སྐལ་བའང་བསྐྱལ་བའི་འོག་ཏུ་གཞན་འོངས་ན་དེ་ལ་རྙེད་པ་མི་སྦྱིན་ནོ། །དབྱར་གནས་པས་རྙེད་པ་གཞན་ལ་བཅོལ་ཏེ་
འགྲོ་བར་བྱའོ། །མ་བཅོལ་ན་བླང་བར་མི་བྱའོ། །བཅོལ་བ་མ་བླངས་ན་རིན་ཐང་བཞིན་དུ་བྱས་ནས་སྦྱིན་པར་བྱའོ། །རྙེད་པ་ཆུང་ངུ་ལ་ཡང་གཎྜཱི་བརྡུངས་ལ་བགོ་བར་བྱའོ། །དེ་ལ་ཡང་བཅོལ་བས་མ་བླངས་པ་ན་ལྔ་ཡན་ཆད་བླང་བར་བྱའོ། །རྙེད་པ་ནི་རྣམ་པ་བརྒྱད་དེ། མཚམས་
ཀྱིས་ཐོབ་པ་ལ་སོགས་པའོ། །དེ་ལ་མཚམས་ཀྱིས་ཐོབ་པ་གང་ཞེ་ན། གཙུག་ལག་ཁང་གཉིས་གསོ་སྦྱོང་གཅིག་པ་ལས་སོ་སོར་གསོ་སྦྱོང་བྱས་ཏེ། ཉེ་བར་ཞུགས་ན་གཙུག་ལག་ཁང་གང་དུ་རྙེད་པ་འོངས་པ་དེ་ཉིད་དུའོ། །ཁྲིམས་ཀྱིས་ཐོབ་པའི་རྙེད་པ་གང་ཞེ་ན། གང་ཁྲིམས་
སུ་བྱས་ནས་ཉེ་བར་ཞུགས་ཏེ་ཁྱིམ་འདི་དག་ནི་ཁྱེད་ཀྱིའོ། །འདི་དག་ནི་ངེད་ཀྱིའོ་ཞེས་བྱ་བ་དང་། དེ་བཞིན་དུ་ལམ་པོ་ཆེ་དང་། ཚོང་དུས་དང་། བཞི་མདོ་དང་། སུམ་མདོ་ཡོད་པ་དེ་ལ་དེ་གལ་ཏེ་ཁས་བླངས་པ་རྣམས་ཀྱི་ཁས་བླངས་པ་རྣམས་དང་། ཁས་མ་བླངས་པ་རྣམས་ཟན་བྱིན་
ཏེ་གང་དུ་དེ་ལ་རྙེད་པ་དང་། ཆུ་སྦྲེངས་ཏེ་སྦྱིན་པ་རྣམས་ནི་རྙེད་པ་དེ་ཁས་བླངས་པ་རྣམས་ཁོ་ནའོ། །ཇི་སྟེ་ཁས་མ་བླངས་པ་རྣམས་ཀྱི་གནས་སུ་རྙེད་པ་ཁས་མ་བླངས་པ་རྣམས་ཁོ་ནའོ། །ལམ་པོ་ཆེ་ལ་སོགས་པ་རྣམས་ལ་ནི་གཉི་ག་ཟན་བྱིན་ཏེ། གང་དུ་དེ་ལ་རྙེད་པ་དང་། ཆུ་སྦྲེངས་ཏེ་
བྱིན་པ་རྣམས་ནི་གཉི་གའི་རྙེད་པའོ། །རྟེན་གྱིས་ཐོབ་པའི་རྙེད་པ་གང་ཞེ་ན། གང་ལ་བརྟེན་ཏེ། དབྱར་ཉེ་བར་གནས་པ་དེས་བྱིན་པ་གང་ཡིན་པ་དེ་ཁོ་ན་ཡིན་ནོ། །དགེ་འདུན་གྱིས་མ་བརྟགས་པའི་རྙེད་པ་གང་ཞེ་ན། རྙེད་པ་གང་ཞིག་ངེས་ལ་དམིགས་ཀྱིས་མ་ཕྱེ་བ་རྣམས་ཀྱང་ངོ་། །
དགེ་སློང་གིས་བརྟགས་པའི་རྙེད་པ་གང་ཞེ་ན། རྙེད་པ་གང་ཞིག་ངེས་ལ་དམིགས་ཀྱིས་ཕྱེ་ནས་གནས་ཁང་ལ་སོགས་པ་རྣམས་ལ་དེ་ན་གནས་པ་གང་ཡིན་པའོ། །དེ་ཁོ་ནའོ། །དབྱར་གྱི་རྙེད་པ་གང་ཞེ་ན། གང་ཞིག་དབྱར་གནས་པའི་དགེ་འདུན་ལ་སྦྱིན་པ་པོ་རྣམས་ཀྱིས་བསྔོས་

པའོ། །མངོན་སུམ་གྱིས་རྙེད་པ་གང་ཞེ་ན། རྙེད་པ་གང་ཞིག་མ་ངེས་པ་རྣམས་ལ་དམིགས་ཀྱིས་མ་ཕྱེ་བའོ། །སོ་སོར་བསྟན་པའི་རྙེད་པ་གང་ཞེ་ན། གང་ཡང་མཆོད་རྟེན་ཆེན་པོ་བཞི་པོ་རྣམ་པ་ལ་བསྔོས་པ་ཡིན་ཏེ། གང་ལ་དངོས་པོ་དེ་ཉིད་ལ་དབུལ་བར་བྱའོ། །ཇི་སྟེ་སོ་སོར་སྐྱེལ་
མི་ནུས་ན་དེ་དག་གི་ནང་ནས་གང་ཡང་རུང་བ་གཅིག་ལ་དབུལ་བར་བྱའོ། །དེ་ལས་མཆོད་རྟེན་གཞན་དག་གི་རྙེད་པ་ནི་གང་དུ་སོན་པ་དེ་དག་ཉིད་དུ་དབུལ་བར་བྱའོ། །གལ་ཏེ་དབྱར་གྱི་ནང་དུ་དགེ་འདུན་རྣམས་བྱེ་ན། ཆོས་ཀྱི་ཕྱོགས་པའི་དགེ་འདུན་རྣམས་ལ་རྙེད་པ་སྦྱིན་གྱི། ཆོས་མ་
ཡིན་པའི་ཕྱོགས་པ་རྣམས་ལ་ནི་མ་ཡིན་ནོ། །གང་དབྱར་གྱི་ནང་དུ་ཡུན་རིང་དུ་གནས་པ་ལས་བསླབ་པ་ཕུལ་ཡང་རྙེད་ན་སྦྱིན་གྱི་གཞན་ལ་མ་ཡིན་ནོ། །དེ་བཞིན་དུ་དུས་ལས་འདས་ན་ཡང་ངོ་། །ཟས་ཀྱི་རྙེད་པ་ཞིག་གྲུབ་ན། ཆུང་ངུ་ན་ཤིང་བུ་ལ་སའི་ལོ་མ་ཙམ་དུ་ཡང་སྙོམས་
པར་བྱས་ལ་བགོ་བར་བྱའོ། །དེ་བཞིན་དུ་གོས་ཤིག་རྙེད་ན་ཡང་ཐ་ན་མར་མེའི་སྙིང་པོ་ཙམ་དུའང་བྱའོ། །གང་རིན་ཐང་ཆེན་པོའི་གོས་ཤིག་རྙེད་ན་མི་དྲ་བར་ཀཱཪྵཱ་པ་ཎར་བསྒྱུར་ཏེ། དེ་ཉིད་ལ་ཡིད་བརྟེན་ཏེ་བཅང་བར་བྱའོ། །གཉི་གའི་དགེ་འདུན་གྱིས་གོས་ཤིག་རྙེད་ན། དགེ་སློང་དང་དགེ་
སློང་མའི་གོས་ཀྱི་རྙེད་པ་དེ་མཉམ་པར་བྱའོ། །དགེ་ཚུལ་དང་དགེ་ཚུལ་མ་ལ་ནི་སུམ་ཆའོ། །དགེ་སློབ་མ་ལ་ནི་སུམ་གཉིས་སོ། །དགེ་ཚུལ་བསྙེན་པར་རྫོགས་པར་འདོད་པ་ཞིག་ན་ཡང་ངོ་། །ཟས་ཀྱི་རྙེད་པ་ནི་ཐམས་ཅད་ལ་མཉམ་པར་བྱའོ། །གང་ལ་དགེ་སློང་མང་ལ་དགེ་སློང་མ་ཉུང་ན་དེ་ནི་མགོ་
གྲངས་བཞིན་དུ་བགོ་བར་བྱའོ། །སླར་བཟློག་པ་ལ་ནི་ཕྱེད་ཕྱེད་དུ་བྱའོ། །སངས་རྒྱས་ཀྱི་དུས་སྟོན་ཆེན་པོ་ལ་སོགས་པའི་ཚེ། རྙེད་པ་ནི་སྡེ་ལྔ་ཆར་ལ་བགོ་བར་བྱའོ། །དགེ་སློང་གཅིག་པུ་ཞིག་ཉེ་བར་གནས་ན་ཡང་དགེ་འདུན་གྱི་དབྱར་གྱི་རྙེད་པ་བདག་གིར་བྱས་ཏེ་འགྱོད་པར་མི་བྱའོ། །རྙེད་པ་
མངོན་སུམ་དུ་རྙེད་པར་འགྱུར་ན། དགེ་འདུན་ལ་གོས་འདི་བྱུང་བས་བགོ་བར་བྱ་བ་མངོན་སུམ་དུ་གྱུར་པའི་དགེ་འདུན་གྱིས་བགོ་བར་བྱ་བ་འདི་དག་གཅིག་པུས་ཐོབ་སྟེ། བདག་གིར་བྱའོ་ཞེས་ཚིག་ཏུ་ཡང་བརྗོད་དེ། བྱིན་གྱིས་བརླབ་པ་ཡིན་ནོ། །གཞན་དག་ལྷགས་ན་ཡང་སྐལ་བ་སྦྱིན་

པར་བྱའོ། །རྣམ་པ་གཞན་དུ་ན་ཉེས་བྱས་སོ། །མཚམས་ཀྱི་ཕྱི་རོལ་དུ་ཁྱེར་ཏེ་འགོད་ན་ཉེས་བྱས་སོ། །རྐུ་སེམས་དང་ལྡན་ན་འགལ་ཚབས་ཅན་དུ་འགྱུར་རོ། །དབྱར་གནས་པའི་རྙེད་པ་དབྱར་འདས་པ་དང་། མ་འོངས་པ་དང་། རལ་བས་བླང་བར་མི་བྱའོ། །གོས་བགོས་
པའི་དུས་ལས་འདས་ཀྱང་དབྱར་གནས་པས་རྙེད་པ་བླང་བར་བྱའོ། །གལ་ཏེ་གོས་ཀྱི་རྙེད་པ་འགོད་པའི་ཚེ་མངོན་སུམ་དུ་གྱུར་ན། དབྱར་མ་གནས་ཀྱང་བླང་བར་བྱའོ། །གཉི་གའི་དགེ་འདུན་བཤོས་གསོལ་ཏེ། རྙེད་པ་ཞིག་ཕུལ་ན། སྦྱིན་བདག་ལ་དྲིས་ཏེ་བགོ་བར་བྱའོ། །དགེ་སློང་གི་ཕྱིར་
བཞག་ལ། གཉི་གའི་དགེ་འདུན་གྱི་ཟས་ཟོས་ཏེ། རྒན་པའི་མཐར་བཞག་ན་ཕྱེད་ཕྱེད་དུ་བགོ་བར་བྱའོ། །དགེ་འདུན་གྱི་གནས་བརྟན་གྱིས་ཐ་ན་ལན་ཚྭ་འདྲིམ་པ་ལ་ཡང་སྙོམས་པར་བྲིམས་ཤིག་ཅེས་བརྗོད་བར་བྱའོ། །གང་དགེ་འདུན་གྱི་བྱ་བའི་ཕྱིར་དབྱར་གྱི་ནང་དུ་སོང་ངམ། གང་གི་དོན་
གྱི་ཕྱིར་སོང་ཡང་རུང་དེ་ལ་དབྱར་གྱི་རྙེད་པ་སྦྱིན་པར་བྱའོ། །གང་ལ་དབྱར་སྔ་མའམ། ཕྱི་མར་ཉེ་བར་གནས་པར་ཤེས་ན་གང་ཡུན་རིང་དུ་གནས་པ་དེ་ལ་སྦྱིན་པར་བྱའོ། །གཞན་ལ་ནི་མ་ཡིན་ནོ། །ཀཽ་ཤཱམྦཱིའི་ཕྱོགས་གཉིས་སུ་འདུས་ཏེ་འཁོད་ན་གང་གི་གནས་བརྟན་ཡིན་པ་དེ་དག་རྙེད་པ་དབང་
ངོ་། །གལ་ཏེ་གཅིག་གི་གནས་བརྟན་དང་གཉིས་པའི་གནས་བརྟན་གཉི་ག་ལ་ཡང་ཕུལ་ན་གཉི་གས་ཐོབ་བོ། །འཁྲུག་པའི་ཕྱིར་ཚིག་གིས་དྲིས་ལ་བགོ་བར་བྱའོ། །སྦྱིན་བདག་གིས་གལ་ཏེ་ཀུན་དགའ་ར་བའི་རྒྱན་དུ་བྱེད་ན་དེ་ནི་ཤིང་ལྗོན་པའི་རྒྱན་རྣམས་ཏེ། དེ་ནི་ཐུམ་པོར་བཅིངས་ལ་
བཞག་སྟེ་མཆོད་པའི་ཚེ་བརྒྱན་པར་བྱའོ། །གང་རྩིག་པ་ལ་ན་དེས་ནི་རི་མོར་བྲི་བར་བྱའོ། །གང་མེ་གང་ལ་ན་དེས་ནི་བསྲོ་གང་གིར་བྱའོ། །གང་ཆུ་གང་ལ་ནི་དེས་ནི་ལྟུང་བར་བྱའོ། །གང་བཀད་ས་ལ་ན་དེས་ནི་སྣུམ་བག་གི་ཉེད་པར་རོ། །གང་འཁོར་གྱི་ཁྱམས་དང་། དཔོང་སའི་ར་བ་
དང་། འཆག་ས་དང་། ཁང་བཟངས་དང་། སྒོ་གང་ལ་ན་དེ་ནི་དགེ་སློང་རྣམས་ཀྱིས་བགོ་བར་བྱའོ། །གང་གཙུག་ལག་ཁང་གི་རྫིང་བུ་ལ་སོགས་བཞི་པའི་དགེ་སློང་གི་དགེ་འདུན་ལའོ། །མི་བགོ་བ་རྣམ་པ་ལྔ་སྟེ། ཕྱོགས་བཞི་པའི་དགེ་འདུན་ཐམས་ཅད་ཀྱི་དང་། མཆོད་རྟེན་གྱི་དང་།

ནད་པའི་རུང་བའི་ཁང་པའིའམ། རྩ་བ་ལས་བྱུང་བ་ཐམས་ཅད་དང་། ཁའི་སྒོར་འདུ་བའོ། །རྩ་བ་དང་འབྲས་བུ་དང་། བུ་རམ་ཤིང་གི་སྡོང་བུ་ལ་སོགས་པ་ཁའི་སྒོར་འདུ་བ་ནི་བགོ་སྟེ། ཇི་སྐད་དུ་ཤིང་ཏོག་ཨ་མྲ་དགེ་འདུན་ལ་བྲིམ་པར་བྱའོ། །དེ་བསྲུང་བ་ཡང་བསྐོ་བར་བྱའོ་ཞེས་
གསུངས་པ་ཡིན་ནོ། །ཅང་མི་སྨྲ་བས་རུང་བར་བྱས་ཏེ། སྲོག་ཆགས་བརྟགས་ལ་བསྙེན་པར་མ་རྫོགས་པ་མེད་ན་བྱིན་ལེན་བྱས་ཏེ་དགེ་སློང་རྣམས་ཉིད་ཀྱིས་བྲི་མ་པར་བྱའོ། །ཅ་ཅོ་དང་ག་ཞ་བྱས་ནས་སོ། །ཉན་ཐོས་ཀྱི་མཆོད་རྟེན་རྣམས་ལ་སྟེ། ཉན་ཐོས་ཀྱི་མཆོད་རྟེན་གྱི་རྙེད་པ་ནི་ལས་སར་
པའི་རིན་ཙམ་གཞག་ལ་འདུས་པའི་དགེ་འདུན་གྱིས་བགོ་བར་བྱའོ། །དེ་བཞིན་གཤེགས་པའི་མཆོད་རྟེན་ནི་རྣམ་པ་ཐམས་ཅད་དུ་ཡོངས་སུ་རྫོགས་པར་བྱའོ། །རང་སངས་རྒྱས་ཀྱི་ཆར་ཁབ་མེད་པར་བྱའོ། །དགྲ་བཅོམ་པའི་ནི་གདུགས་བཞི་པ་རྣམས་ཀྱིས་བྱའོ་ཞེས་བྱ་བའོ། །ཕྱིར་མི་
འོང་བ་རྣམས་ཀྱི་གསུམ་བའོ། །ལན་ཅིག་ཕྱིར་འོང་བ་དག་གི་ནི་གཉིས་པའོ། །རྒྱུན་དུ་ཞུགས་པ་ཡི་ནི་གཅིག་གོ། །སོ་སོའི་སྐྱེ་བོ་དགེ་བ་ཅན་རྣམས་ཀྱི་ནི་བྱི་བོར་བྱའོ། །གཙུག་ལག་ཁང་བྱ་བའི་ཕྱིར་ཕུལ་བ་རྣམས་ཀྱི་ཀཱཪྵཱ་པ་ཎི་རྣམས་ལ་སྦྱིན་བདག་གིས་རྗེས་སུ་གནང་བ་མཁར་ལེན་
གྱི་ཆ་སྤྱད་དང་། མཁར་ལེན་བྱེད་པའི་ཟན་དང་། རྐང་པ་བསྐུ་བ་དང་། མར་མེ་ལ་སོགས་པ་ཀུན་དུ་སྦྱར་བར་བྱའོ། །གང་ཟག་གཅིག་ལ་བྱིན་པ་ལས་གང་ཟག་གཞན་ལའམ། གཉིས་སམ། གསུམ་མམ། ཚོགས་ལའམ། དགེ་འདུན་ལ་ཕུལ་ན་ཆོས་བཞིན་བྱིན་པ་མ་ཡིན་ལ།
ལེན་པ་དང་སྤྱོད་པ་ཡང་རུང་བ་མ་ཡིན་ནོ། །དེ་བཞིན་དུ་ཅི་སྲིད་དུ་དགེ་འདུན་ལ་ཕུལ་བ་དགེ་འདུན་གཞན་ལ་ཕུལ་ལམ། དགེ་སློང་གི་དགེ་འདུན་ནམ། དགེ་སློང་མའི་དགེ་འདུན་ལ་ཕུལ་བ་དགེ་འདུན་གཞན་ལ་ཕུལ་ན་སྔར་ཕུལ་བར་ཟད་ཀྱི་ཕྱི་མ་ལ་ནི་བྱིན་པ་མ་ཡིན་ནོ། །སྦྱིན་བདག་ནི་རང་གི་
གཙུག་ལག་ཁང་འཆོས་པ་ལ་དབང་གི་སྦྱིན་པ་ལ་མ་ཡིན་ནོ། །ལྕགས་ཀྱི་སྤྱད་རྣམས་ལས་ལྷུང་བཟེད་དང་། ལྷུང་བཟེད་ཆུང་ངུ་དང་། ཁར་ཕོར་དང་། ལྡེ་མིག་ཀྱོག་པོ་དང་། གྲིའུ་དང་། ཁབ་དང་། སེན་མོ་གཅོད་པ་དང་། པོག་ཕོར་དང་། ཞུགས་ལིངས་དང་སྟ་རེ་དང་། བུམ་ཚགས་

གཅེའུ་ཅན་དང་། བཏུང་ཕོར་རྣམས་ནི་བགོའོ། །དེ་ལས་གཞན་པ་ནི་མི་བགོའོ། །སའི་སྣོད་ལས་ལྷུང་བཟེད་དང་། ལྷུང་བཟེད་ཆུང་ངུ་དང་། ཆུ་ཚོད་ཀྱི་སྣོད་དང་། རིལ་བ་སྤྱི་བླུགས་དང་། བྱ་མ་བུམ་དང་། ཆུ་སྣོད་རྣམས་ནི་བགོའོ། །དེ་ལས་གཞན་པ་ནི་མི་
བགོའོ། །ཚོན་བསྐོལ་བ་ནི་མི་བགོའོ། །དེ་ལས་གཞན་པ་ནི་བགོའོ། །རིན་པོ་ཆེ་ལ་སོགས་པ་ལས་བྱུང་བའི་ཁྲི་ནི་བཙོངས་ལ་བགོའོ། །ཤིང་གི་རང་བཞིན་ལ་སོགས་པ་ནི་ཕྱོགས་བཞི་པའི་ཕྱིར་བཞག་གོ། །ཀུན་དགའ་ར་བའི་གཞི་དང་། གཙུག་ལག་ཁང་གི་གཞི་དང་། དེའི་མལ་
ཆ་དང་། སྟན་རྣམས་མི་བགོའོ། །གཏར་མི་གཞག །མི་བཙོང་ངོ་། །ཡོངས་སུ་ལོངས་སྤྱོད་པ་ལྔ་སྟེ། བདག་པོ་ཡོངས་སུ་ལོངས་སྤྱོད་པ་ནི་མི་སློབ་པ་རྣམས་ཀྱིའོ། །བྱིན་པ་ཡོངས་སུ་ལོངས་སྤྱོད་པ་ནི་སློབ་པ་རྣམས་ཀྱིའོ། །རྗེས་སུ་གནང་བ་ཡོངས་སུ་ལོངས་སྤྱོད་པ་ནི་བསླབ་པ་འདོད་
པ་རྣམས་ཀྱིའོ། །སྐྱིན་པོ་ཡོངས་སུ་ལོངས་སྤྱོད་པ་ནི་ལེ་ལོ་ཅན་རྣམས་ཀྱིའོ། །རྐུན་པོ་ཡོངས་སུ་ལོངས་སྤྱོད་པ་ནི་ཚུལ་ཁྲིམས་འཆལ་པ་རྣམས་ཀྱིའོ། །ཁ་ཅིག་ཀྱང་རྗེས་སུ་གནང་བ་མེད་དོ། །ཀུན་དུ་སྤྱད་པ་ཇི་སྐད་བསྟན་པ་བཞིན་ཐམས་ཅད་མ་བྱས་ན་འགལ་ཚབས་ཅན་དུ་འགྱུར་རོ། །
དགུ་པའོ།། །།རྒྱལ་པོའི་ཁབ་ན་སྟེ། པི་ལིན་ད་བད་སས་གནས་པར་བྱེད་པ་རྣམས་དེ་ནས་ཉེ་བར་བླངས་པ་དང་། དེ་ལས་སོ་སོར་བླངས་པ་དང་། ཟས་ཀྱི་ཕྱེ་མ་དང་འདྲེ་བ་དང་། ཕན་ཚུན་འདྲེས་པ་དང་། རང་གི་རྒྱུད་ཀྱིས་མྱངས་པ་གང་རྣམ་པར་དབྱེར་ཡང་མི་མངོན་པའི་སྨན་དེ་ལྟ་
བུ་དུས་དང་དུས་མ་ཡིན་པར་ཡང་ཟ་བས་ན་སྨན་གྱི་གཞིའི་དབང་དུ་མཛད་དེ་འགལ་ཚབས་ཅན་དུ་འགྱུར་བའི་ཉོན་མོངས་པ་ལ་སོགས་པ་གསུམ་པོ་རྣམས་ཡོངས་སུ་སྤང་བའི་ཕྱིར་བཅུ་པ་བཅས་སོ། །གང་དག་དེ་དག་ལས་ཞེས་བྱ་བ་ནི་ཡུལ་དེ་དང་དེར་གསུངས་པའོ། །བཅོམ་ལྡན་
འདས་ཞེས་བྱ་བ་ནི་དེ་བཞིན་གཤེགས་པའི་མཚན་ཡོན་ཏན་ལས་བརྗོད་པའོ། །ན་བ་རྣམས་ལ་ཞེས་བྱ་བ་ནི་ནད་ཀྱིས་བཏབ་པ་རྣམས་སོ། །ནད་པའི་ཀུན་དུ་སྤྱོད་པ་ནི་མཁན་པོ་དང་སློབ་དཔོན་གྱིས་དང་། སློབ་མ་དང་། ཉེ་གནས་ཀྱིས་དང་། སློབ་དཔོན་དང་མཁན་པོ་དག་གཅིག་པ་

དང་། གཏམ་འདྲེས་པ་དག་གིས་ནད་པ་ལ་ནད་པའི་རིམ་གྲོ་བྱའོ། །མགོན་མེད་པ་ལ་དགེ་འདུན་དང་བསྐོས་པས་བྱའོ། །མཚམས་ཀྱི་ནང་དུ་འཁོད་པ་ཐམས་ཅད་ཀྱིས་དུས་གསུམ་དུ་ནད་པ་བལྟ་བར་བྱའོ། །ནད་གཡོག་གིས་ནི་དེ་དག་གི་ཕྱིར་སྟན་རྣམས་བཤམ་པར་བྱའོ། །དེ་དག་ཀྱང་
ཡུན་རིང་དུ་གནས་པར་མི་བྱའོ། །གལ་ཏེ་སྨན་གྱི་རིན་མེད་ན་སྦྱིན་པ་པོ་ལས་བཙལ་ཞིང་སྦྱིན་པར་བྱའོ། །ཡང་ན་དགེ་འདུན་གྱིས་སྦྱིན་པར་བྱའོ། །ཡང་ན་མཆོད་རྟེན་གྱི་བ་དན་ལ་སོགས་པ་བཙོངས་ལ་སྨན་དུ་སྦྱར་བར་བྱའོ། །ནད་སོས་ནས་སླར་དབུལ་བར་བྱའོ། །གལ་ཏེ་མི་འབྱོར་ན་
ཕའི་ནོར་བུ་ལ་འོས་པས་ན་ཉེས་པ་ཡོད་པ་མ་ཡིན་ནོ། །རང་བཞིན་གྱི་ཁ་ན་མ་ཐོ་བ་མ་གཏོགས་པ་ཐམས་ཅད་ཀྱིས་རིམ་གྲོ་བྱའོ། །ཤིར་ཉེ་བ་ལ་མངོན་དུ་ཕྱོགས་ན་ནད་གཡོག་གིས་ཐབས་ཀྱིས་ཅི་ལྟར་མི་འཁྲུགས་པའོ་ཞེས་བྱ་སྟེ། གང་ཟག་གི་མལ་དང་། སྟན་གྱི་སྟེང་དུ་གཞག་པར་
བྱའོ། །ལྷུང་བཟེད་ལ་སོགས་པ་སློང་ན་མྱུར་དུ་ཉེ་བར་བསྟེན་པར་བྱའོ། །མཆོད་པར་བྱེད་པ་ན་ཐ་ན་དགེ་འདུན་གྱི་ལས་ཀྱང་བྱའོ། །ནད་གཡོག་གིས་སྦྱིན་པར་བྱ་བ་བསྐུལ་བར་བྱའོ། །ཆོས་གོས་གསུམ་ཙམ་དུ་ཟད་ན་དགེ་འདུན་ལ་དབུལ་བར་བསྐུལ་བར་མི་བྱའོ། །ཕུལ་ན་ཡང་མ་
ཤིའི་བར་དུ་མི་བགོའོ། །ནད་པ་དང་ནད་གཡོག་གཅིག་ལ་གཅིག་གིས་མཉན་པར་བྱའོ། །ཇི་སྐད་བསྟན་པ་བཞིན་མ་བྱས་ན་ཐམས་ཅད་དུ་ཡང་ཉེས་བྱས་སོ། །ཕན་པ་ཞེས་བྱ་བ་ནི་རྗེས་སུ་མཐུན་པའོ། །སོ་སོར་བསྟེན་པ་ཞེས་བྱ་བ་ནི་ཁའི་ཐ་སྙད་དོ། །གང་ཡང་ཐ་སྙད་དུ་བྱ་བར་མི་
འོས་པ་དེ་འདས་ཀྱང་ལྟུང་བ་མེད་དོ། །སྨན་ཞེས་བྱ་བ་ནི་སྨན་ལ་རྣམ་པ་བཞི་སྟེ། དུས་སུ་རུང་བ་དང་། ཐུན་ཚོད་དུ་རུང་བ་དང་། ཞག་བདུན་པ་དང་། ཇི་སྲིད་འཚོའི་བར་དུ་བཅང་བ་སྟེ། སྨན་གྱི་བྱེ་བྲག་བྱེད་དུ་མི་བྱེད་ཀྱང་རུང་ཐ་སྙད་ཀྱི་ཚིག་ཏུ་ནི་འདི་དག་ནད་པ་ཉིད་ལ་རུང་གི་གཞན་
ནི་མ་ཡིན་ནོ། །སྨན་བཞི་པོ་ཡང་ནད་པར་འདུ་ཤེས་ཉེ་བར་གཞག་ལ་ཡོངས་སུ་ལོངས་སྤྱད་པར་བྱའོ། །དེ་ལ་དུས་སུ་རུང་བ་ནི་སྐྱོ་མ་དང་། འབྲས་ཆན་དང་། ཟན་དྲོན་དང་། ཤ་དང་ཁུར་བའོ། །ཐུན་ཚོད་དུ་རུང་བ་ནི་བཏུང་བ་བརྒྱད་དེ། ཤིང་ཏོག་ཙོ་ཙ་དང་། ཆུ་ཤིང་གི་

འབྲས་བུ་དང་། གོ་ལ་དང་། ཨ་ཤྭད་ཐ་དང་། ཨུ་དུམ་བཱ་ར་དང་། རྩུབ་འགྱུར་དང་། རྒུན་འབྲུ་དང་། འབྲ་གོ་ལ་སོགས་པ་ལས་བྱས་པའི་བཏུང་བའོ། །ཤིང་ཏོག་པི་ཛ་པཱུ་ར་ཀ་ལ་སོགས་པའི་བཏུང་བའང་རྗེས་སུ་གནང་ངོ་། །འདི་ཇི་སྐད་དུ་གསུངས་པ་གལ་
ཏེ་གང་ཤིན་ཏུ་དང་བ་དེ་པི་ཛ་པཱུ་ར་ཀ་ལ་སོགས་པ་དང་བསྲེ་བར་བྱའོ། །དེ་བཞིན་དུ་རྒུན་འབྲུའི་ཁུ་བ་དང་། དྲོ་འཛའ་དང་། བུ་རམ་གྱི་བཏུང་བ་དང་དེ་བཞིན་དུ་བུ་རམ་ཤིང་གི་ཁུ་བའི་བཏུང་བ་ཡང་ངོ་། །ཞག་བདུན་པ་ནི། ཇི་ལྟར་མདོ་ལས་བྱུང་བ་བཞིན་ནོ། །ཇི་སྲིད་འཚོའི་བར་
དུ་ཡང་བཅང་བ་ནི་རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། འབྲས་བུའི་སྨན་ནོ། །དེ་ལ་རྩ་བའི་སྨན་ནི་ཤུ་དག་དང་། ཡུང་བ་དང་། སྒེའུ་གཤེར་དང་། བོང་ང་ལ་སོགས་པ་སྟེ། གང་རྩ་བའི་སྨན་དུ་ནི་འགྱུར་གྱི་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་ནོ། །དེ་བཞིན་དུ་
གཞན་དག་ལའང་བརྗོད་པར་བྱའོ། །སྡོང་བུའི་སྨན་ནི་ཙན་དན་དང་། དབྱི་མོ་དང་། ཤུག་པ་དང་། ཐང་ཤིང་དང་། སླེ་ཏྲེས་དང་། སྐྱེར་པ་ལ་སོགས་པའོ། །ལོ་མའི་སྨན་ནི་ཤིང་པ་ཏོ་ལའི་ལོ་མ་དང་། བ་ཤ་ཀའི་ལོ་མ་དང་། ནིམ་པའི་དང་། ཀོ་ཤ་ཏ་ཀའི་དང་། འདབ་མ་
བདུན་པོའི་ལོ་མ་ལ་སོགས་པའོ། །མེ་ཏོག་གི་སྨན་ནི་ད་ཏ་ཀི་དང་། ན་ག་པུཥྤ་དང་། པདྨའི་གེ་སར་ལ་སོགས་པའོ། །འབྲས་བུའི་སྨན་ནི་སྐྱུ་རུ་ར་དང་། ཨ་རུ་ར་དང་། ན་ལེ་ཤམ་དང་། པི་པི་ལིང་ལ་སོགས་པའོ། །འདི་ལྟར་ཐང་ཆུ་ལྔ་སྟེ། ཤིང་ཀུན་དང་། སརྫ་ར་ས་དང་། རྒྱ་སྐྱེགས་
དང་། སྤྲ་ཚིལ་དང་། དེ་དག་ལས་གཞན་པའི་ཡང་ཤིང་ལས་ཐང་ཆུ་འབྱུང་བ་རྣམས་སོ། །འགྱུར་བྱེད་ནི་ཏིལ་གྱི་འགྱུར་བྱེད་དང་། ནས་ཀྱི་འགྱུར་བྱེད་དང་། ནས་ཀྱི་འགྱུར་བྱེད་ཀྱི་གྲ་མ་དང་། སརྫི་ཀའི་འགྱུར་བྱེད་དང་། ཤིང་བ་ཤ་ཀ་དང་རྣམས་ཀྱི་ཡང་ངོ་། །ལན་ཚྭ་ལྔ་སྟེ། སིན་
དྷ་དང་། རྩ་ལ་རུ་ཚ་དང་། ཁ་རུ་ཚ་དང་། བ་ཚ་དང་། རྒྱ་མཚོའི་ཚའོ། བསྐ་བ་ལྔ་སྟེ། ཤིང་ཨ་མྲ་དང་། ནིམ་པ་དང་། འཛམ་བུ་དང་། ཤི་རི་ཤའི་དང་། ཀོ་ཤམ་པའི་བསྐ་བའོ། །འདིར་ནི་རིགས་ཙམ་ཉེ་བར་མཚོན་པའི་དོན་དུ་བསྟན་པ་ཡིན་གྱི་ངེས་པར་གཟུང་བའི་དོན་དུ་ནི་མ་ཡིན་ནོ། །དེ་ལ་

དུས་སུ་རུང་བ་རྣམ་པར་ངེས་པ་ནི་དུས་མ་ཡིན་པ་སྤང་བའི་ཕྱིར་དུས་སུ་རུང་བ་ཉིད་དུ་རྗེས་སུ་གནང་བས་ན་དུས་སུ་རུང་བའོ། །ནད་ཚབས་ཆེ་ན་ནི་གལ་ཏེ་དེ་མེད་ན་ནད་དབྱུང་དུ་མི་བཏུབ་ན་དུས་མ་ཡིན་པར་རུང་བ་སྟེ། ཡང་རྗེས་སུ་གནང་ངོ་། །ཐུན་ཚོད་དུ་རུང་བ་ལ་སོགས་པ་ལ་ཡང་དེ་དང་
འདྲེས་ན་དུས་སུ་རུང་བ་ཉིད་ཅེས་བྱའོ། །བྱ་རོག་དང་། བྱ་གར་དང་། སྦལ་པ་དང་། སྲིན་བུ་པདྨ་དང་། བྱ་རྒོད་དང་། ཆུ་སྐྱར་དང་། བྱ་འོལ་བ་དང་། འུག་པ་རྣམས་ཀྱི་སྟེ། གང་གི་པགས་པ་མི་རུང་བ་དེའི་ཤ་དང་། རུས་པ་དང་། རྒྱུས་པ་ཡང་མི་རུང་ངོ་། །དེ་བཞིན་
དུ་གླང་པོ་ཆེ་དང་། རྟ་དང་། ཝ་དང་། སྤྲེའུ་དང་། ཀླུ་དང་། བྱ་གང་མི་ཤ་ཟ་བ་རྣམས་ཀྱི་ཡང་ངོ་། །སྟག་གི་གོང་ཀྱི་ཤ་མི་ཟའོ། །མིའི་ཤ་ནི་སྦོམ་པོའོ། །དགེ་འདུན་གྱི་གནས་བརྟན་གྱིས་ཤ་འདྲིམ་པའི་ཚེ་འདི་ཅིའི་ཤ་ཡིན་ཞེས་དྲི་བར་བྱའོ། །དེས་མ་དྲིས་ན་འོག་མ་གཉིས་པ་ལ་
སོགས་པས་ཀྱང་སྟེ། མ་དྲིས་ན་ལྟུང་བའོ། །བདག་གི་ཆེད་དུ་བྱས་པ་མཐོང་ངམ། ཡིད་ཆེས་པ་དང་ལས་ཐོས་སམ། དེའི་བྱེད་པ་ལས་ཡོངས་སུ་རྣམ་པར་བརྟགས་ནས་ཀྱང་ཤེས་པ་ཉིད་ཀྱི་ཆེད་དུ་བྱས་པ་མི་བཟའོ། །སྨན་པས་ལུང་ཕོག་ན་ནད་པ་ལ་ཤ་རྗེན་ཡང་རུང་
རྗེས་སུ་གནང་སྟེ། རས་ཀྱིས་མིག་དག་བཀབ་ལ་ཟས་སྦྱིན་ནོ། །ཟས་གྱ་ནོམ་པ་རྣམས་མདུན་དུ་གཞག་པ་ཉིད་ཀྱིས་རས་དགྲོལ་ལོ། །དེ་ལ་ཤ་འཚོང་བའི་གནས་ཆེན་པོ་ལྔ་རྣམས་ལས་དད་པ་ཅན་ཉིད་ཀྱིས་བླངས་ནས་ཁྱེར་བར་བྱའོ། །མིའི་འོ་མ་བཏུང་བར་མི་བྱ་སྟེ། མིག་ལ་སྐུད་པ་ལ་ནི་
ལྟུང་བ་མེད་དོ། །བརྟད་པའི་བསོད་སྙོམས་ལྔ་ཟ་བར་རྗེས་སུ་གནང་སྟེ། ནད་པ་དང་ནད་གཡོག་དང་གློ་བུར་དུ་འོངས་པ་དང་། ལམ་དུ་ཞུགས་པ་དང་། དགེ་སྐོས་སོ། །ནང་དུ་བཙོས་པ་དང་། ནང་དུ་ཞག་ལོན་པ་དང་། དེ་གཉི་གའང་བཟའ་བར་མི་བྱའོ། །ནང་དུ་ཞག་ལོན་པ་ནི་ཀུན་
དགའ་ར་བའི་ནང་དུ་ས་མ་བརྐོས་པ་རུང་བ་མ་ཡིན་པར་གང་ཞག་ལོན་པའོ། །ཐམས་ཅད་དུ་དགེ་སློང་གིས་བཙོས་པ་བཟའ་བར་མི་བྱ་སྟེ། མུ་གེ་བྱུང་བ་མ་གཏོགས་སོ། །འབྲས་སུམ་ཆ་ཚོས་པ་དང་། ལྡམ་ལྡུམ་དང་མེ་ཏོག་དང་འབྲས་བུ་དང་ཤ་དང་ཉ་ཁ་དོག་ཡོངས་སུ་གྱུར་པ་དང་། འོ་མ་ལ་

སོགས་པ་ལན་གསུམ་ཁོལ་བ་དེ་དག་རང་གིས་བཙོས་ཏེ་ཟོས་ཀྱང་ལྟུང་བ་མེད་དོ། །ཟ་བའི་ཚེ་ཐོག་མར་མུ་ཏོ་བ་རྣམས་ལ་མི་སྦྱིན་ནོ། །གཞན་གྱི་དེ་ཟ་བ་ལས་སྦྱིན་བདག་གཞན་ཞིག་གིས་བཅའ་བ་ལ་སོགས་པ་བསྐུར་བ་ན་སྦྱིན་བདག་ལ་སྔར་ཀུན་དུ་བལྟས་ཏེ་བླང་ངོ་། །དཀོན་
མཆོག་གསུམ་གྱི་མཚན་ནས་བོས་ཏེ་བྱིན་ན་གང་རྐང་གཉིས་རྣམས་ཀྱི་མཆོག་དེ་ལ་སོགས་པ་ལའམ་ཞེས་དྲིས་ཏེ་གལ་ཏེ་དེ་ལ་ཞེས་ཟེར་ན་མི་བླང་ངོ་། །ཇི་སྟེ་ཁྱོད་ཉིད་བདག་ཅག་གི་སངས་རྒྱས་སོ་ཞེས་ཟེར་ན་བླང་བར་བྱའོ། །ནད་པའི་ཕྱིར་ནི་ནས་ཐུག་ཐམས་ཅད་ཀྱང་རྗེས་སུ་གནང་ངོ་། །
ཁ་ཟས་འཕོ་བའི་སར་རྡོག་པས་བརྫི་བར་མི་བྱའོ། །ཆུ་མེད་ན་བ་བཞོན་མང་པོའི་སར་ནི་ཞོ་ག་ཆུ་དང་དར་བའི་དངས་མ་རྣམས་ཀྱིས་རྐང་པ་བཀྲུས་ཀྱང་ལྟུང་བ་མེད་དོ། །མུ་གེ་བྱུང་བའི་ཚེ་ཁྱེའུ་སུས་རྗེས་སུ་གནང་ངོ་། །དེ་ལྟར་བསོད་སྙོམས་རྙེད་དེ་བླངས་ལ་ཁྱིམ་གཞན་དུ་ཟོས་ཏེ་སྤང་བར་བྱས་ཀྱང་
ཕྱིས་འདོད་ན་སྔར་བླངས་པ་བྱས་པ་བཟའ་བར་བྱའོ། །དེ་བཞིན་དུ་རང་གིས་མནོས་ཏེ་ཟོས་པའི་ལྷག་མ་དང་། སྤྱི་བུངས་སུ་འོངས་པའི་ལྷག་མ་ཁྱིམ་པ་དག་གིས་ཁྱེར་ཏེ་འོངས་ནས་བྱིན་ན་སྔར་བཏང་བ་ཡིན་ནོ་ཞེས་བྱ་སྟེ། ལོངས་སྤྱད་པར་བྱའོ། །ཤིང་ཏོག་ཨ་མྲ་བཟའ་བར་མི་བྱ་སྟེ། ཚི་
གུ་ཆགས་སམ་ཤ་ཞུགས་པ་ཟོས་ན་ལྟུང་བ་མེད་དོ། །ཐུན་ཚོད་དུ་རུང་བའི་རྣམ་པར་ངེས་པ་ནི་བཞི་ཆར་ཡང་རང་གི་དུས་ཀྱི་དབང་གིས་བཟའ་བར་བྱའོ། །ཕྱི་དྲོ་བྱིན་ལེན་བྱས་ནས་མཚན་མོའི་ཐུན་དང་པོའི་བར་དུ་རུང་བས་ན་ཐུན་ཚོད་དུ་རུང་བ་ཞེས་མཆོག་ཏུའོ། །ཞག་བདུན་པའམ། ཇི་སྲིད་
འཚོའི་བར་དུ་བཅང་བ་ཡང་ཐུན་ཚོད་དུ་རུང་བ་དང་། འདྲེས་ན་ཐུན་ཚོད་དུ་རུང་བ་ཉིད་དོ། །དེ་བཞིན་དུ་ཚྭ་དང་། དགུན་ཆང་གི་ཚྭ་དང་། སྐྱུར་བོའི་ཁུ་བ་དང་། རྩབ་མོ་དང་། ཞོ་ག་ཆུ་དང་། དར་བའི་དངས་མ་དང་འདི་རྣམས་ཆུས་བཏབ་སྟེ་རས་ཚགས་ཀྱིས་བཙགས་པ་འདམ་བུའི་ཉག་
མའི་ཁ་དོག་ལྟ་བུ་ནི་དུས་ཡིན་ཡང་རུང་། དུས་མ་ཡིན་ཡང་རུང་། ན་ཡང་རུང་མི་ན་ཡང་རུང་། དེ་ལྟ་བུ་ནི་བཏུང་བར་བྱའོ། །དེ་ལ་ཚྭ་ནི་རྫས་བཏགས་པ་དང་ཆུ་དང་ཡང་སྦྱར་བའོ། །སྐྱུར་པོའི་ཁུ་བ་ཞེས་བྱ་བ་ནི་རྒྱ་ཤུག་དང་ཆུ་དང་ཡང་སྦྱར་བའོ། །གཞན་དག་ནི་སྐྱུར་པོའི་ཁུ་བ་ཞེས་

བྱ་བ་ནི་རྩ་བའི་སྨན་ལ་སོགས་པ་ལས་གྱུར་པའོ་ཞེའོ། །རྩབ་མོ་ཞེས་བྱ་བ་ནི་འབྲུ་རྣམས་བརྔོས་པ་དང་། ཆུ་དང་ཡང་སྦྱར་བའོ། །རྣམ་པ་གཞན་དུ་ན་འབྲས་ཐུག་པོ་ཆེའི་བཙོས་པའི་ཁུ་ལེ་དང་། འབྲས་ཐུག་པོ་ཆེའི་བཀྲུས་པའི་ཁུ་ལེའམ་ཆུ་དྲོན་པོའི་ནང་དུ་འབྲས་ཆན་ཚིག་པ་རྣམས་བླུགས་ཏེ་
ནམ་སྐྱུར་བར་གྱུར་པ་དེ་ནི་བཏུང་བའོ། །ཞོ་ག་ཆུས་ཞེས་བྱ་བ་ནི་ཞོ་ལས་འཁུས་པའི་ཁུ་བའོ། །ཇི་ལྟར་བུ་རམ་གྱི་བཏུང་བ་བརྗོད་པ་དེ་བཞིན་དུ་ཤ་ཁ་ར་ལ་སོགས་པ་ལ་ཡང་སྦྱར་ཏེ། རྒྱ་ཤུག་ལ་སོགས་པའི་འབྲས་བུའི་ཁུ་བ་དང་འདྲེས་པར་བྱའོ། །བུ་རམ་འབའ་ཞིག་གི་ཁུ་བ་ནི་ནམ་མྱོས་
པར་མི་འགྱུར་བ་དང་། ཟས་སུ་མ་གྱུར་པ་དང་། སྐྱུར་བར་མ་གྱུར་པ་དང་། བསྐ་བར་མ་གྱུར་པ་དང་། དང་བ་དང་རང་བཞིན་མི་གཏོང་བའི་བར་དུ་ཞག་བདུན་དུ་བྱིན་གྱིས་བརླབས་ཏེ་ཚུན་ཆད་དུ་བཏུང་ངོ་། །བཏུང་བ་བརྒྱད་པོ་དག་ནི་འབྲས་བུ་དུས་སུ་བླངས་ནས་མཉེས་ཏེ་བཙགས་ལ་དུས་ཉིད་དུ་
བྱིན་ལེན་བྱས་ཏེ་དུས་ཉིད་དུ་ལོངས་སྤྱད་པར་བྱའོ། །ཁྱིམ་པས་བྱས་ཟིན་པ་ཞིག་ལ་གང་དུས་སམ་དུས་མ་ཡིན་ཡང་རུང་བྱིན་ལེན་བྱས་ལ་བྱིན་གྱིས་བརླབས་ནས་ཕྱིས་ལོངས་སྤྱད་པར་བརྗོད་པར་བྱ་སྟེ། མཚན་མོའི་ཐུན་དང་པོའི་ཐུན་ཚོད་ལས་མ་འདས་པ་ཚུན་ཆད་དུའོ། །དུས་མ་ཡིན་ཡང་
བཏུང་བར་རུང་བ་ཡོད་དེ་གང་ཆུས་བཏབ་ཅིང་རས་ཀྱི་ཚགས་ཀྱིས་བཙགས་པའོ། །དུས་སུ་རུང་བ་ཡང་ཡོད་དེ་སླར་བཟློག་པའོ། །ཞག་བདུན་པའི་རྣམ་པར་ངེས་པ་ནི་ལྷན་ཅིག་བླངས་ཏེ་བྱིན་གྱིས་བརླབས་ནས་ཞག་བདུན་དུ་བཟོད་པ་དེ་ནི་ཞག་བདུན་པའོ། །ཇི་སྲིད་འཚོའི་བར་དུ་
བཅང་བ་ཡང་འདྲེས་ན་ཞག་བདུན་པར་འགྱུར་རོ། །དུས་མ་ཡིན་པའི་བཟའ་བ་བུ་རམ་དང་མར་ལ་སོགས་པ་བསྙེན་པར་མ་རྫོགས་པ་མེད་ན་ཞག་བདུན་དུ་བྱིན་གྱིས་བརླབས་ལ་ལམ་དུ་འགྲོ་ན་དགེ་སློང་ཉིད་ཀྱིས་ཁྱེར་བར་བྱའོ། །ཞག་བདུན་དུ་བྱིན་གྱིས་བརླབས་པ་ལ་ལྔ་པོ་རྣམས་ཀྱིས་
ལོངས་སྤྱད་པར་བྱ་སྟེ། ལམ་ལས་འོངས་པ་དང་། ཟན་ཆད་པ་དང་། ན་བ་དང་། དགེ་སྐོས་ཀྱིས་དང་། ལག་གི་བླས་སོ། །བུ་རམ་གྱི་གཟུངས་སུ་བྱ་བའི་ཕྱིར་བག་ཕྱེ་དང་། འབྲས་ཀྱི་ཚིགས་མ་ལ་སོགས་པ་དུས་སུ་རུང་བ་བླུགས་ཀྱང་གཞི་ཡོངས་སུ་དག་པའི་ཕྱིར་དུས་

མ་ཡིན་པར་ཡང་ལོངས་སྤྱད་པར་བྱའོ། །དེ་བཞིན་དུ་ལམ་དུ་གང་འབྲས་ཐུག་པོ་ཆེའི་ནང་དུ་བཅུག་ན་དེ་ཡང་སྤྲུག་པར་བྱའོ། །གང་ཕྱེའི་ནང་དུ་བཅུག་པ་དེ་ནི་བཀྲུའོ། །གལ་ཏེ་ཞུ་བ་ཞིག་ན་འོད་མའི་ཚལ་པས་བཞར་ལ་ཆུས་བཀྲུའོ། །གལ་ཏེ་ཁ་ཟས་དང་དབྱེར་མི་ནུས་
ན་དག་པར་བྱས་ཏེ། ཆུ་དང་ལྷན་ཅིག་མཉེས་ལ་རས་ཀྱིས་བཙགས་ཏེ་བཏུང་བར་བྱའོ། །དེ་ཟས་ཀྱི་བྱ་བ་བྱེད་མི་ནུས་སོ་ཞེས་བྱའོ། །བུ་རམ་ལ་སོགས་པ་ནི་ནའམ་མི་ན་ཡང་རུང་། དུས་སམ་དུས་མ་ཡིན་པར་ཡང་རུང་བཟའ་བར་བྱ་སྟེ། དེ་བཞིན་དུ་ཐུན་ཚོད་དུ་རུང་བ་དང་། ཇི་སྲིད་
འཚོའི་བར་དུ་བཅང་བར་ཡང་ངོ་། །ཞག་ལྔ་པོ་དུས་མ་ཡིན་པར་བཙོས་ཤིང་བཙགས་ནས་བྱིན་ལེན་བྱས་ཏེ་བྱིན་གྱིས་བརླབས་པ་གང་ཟག་གིས་ཡོངས་སུ་ལོངས་སྤྱད་པར་མི་བྱའོ། །ཉ་དང་ཆུ་སྲིན་དང་། ཆུ་སྲིན་བྱིས་པ་གསོད་དང་། དོམ་དང་། ཕག་རྣམས་ཀྱི་དུས་སུ་བཙོས་ཤིང་
བརྩགས་ནས་བྱིན་ལེན་བྱས་ཏེ་བྱིན་གྱིས་བརླབས་པ་འབྲུ་མར་ཡོངས་སུ་ལོངས་སྤྱོད་པ་བཞིན་དུ་ཡོངས་སུ་ལོངས་སྤྱད་པར་བྱའོ། །སླར་བཟློག་པ་ནི་མ་ཡིན་ནོ། །ནད་ལས་སོས་ནས་ཡང་གཞན་གྱི་ཕྱིར་བཅང་བར་བྱའོ། །སློང་བ་ཡོད་ན་ཡང་སློང་མོར་སྦྱིན་ནོ། །ཡང་ནད་པའི་རུང་
བའི་ཁང་པར་གཞག་ལ། གང་ལ་ཅི་དགོས་པ་དེ་བསྐུར་གྲང་ཞེས་སོ། །རྣམ་པ་གཞན་དུ་ན་འགལ་ཚབས་ཅན་དུ་འགྱུར་རོ། །མི་རུང་བའི་སྨན་དང་། ལྷན་ཅིག་བཙོས་པའི་འབྲུ་མར་ཐ་སྙད་དུ་མི་བྱའོ། །ཡན་ལག་གི་རྨ་སྐུད་པ་དང་། སྣའི་ལས་བྱེད་པ་ལ་ལྟུང་བ་མེད་དོ། །འབྲུ་
མར་ཤིང་དང་། འོ་མ་དང་། ཏིལ་དང་། ཤ་དུས་མ་ཡིན་པར་བྱིན་ལེན་བྱ་སྟེ། བཙིར་ཏེ་བཙགས་ནས་བྱིན་གྱིས་བརླབས་པ་ལ་སོགས་ལོངས་སྤྱད་པར་མི་བྱའོ། །སྦྲང་རྩི་ཆུས་བཏབ་ན་དུས་མ་ཡིན་པར་ཡང་རུང་བཟའ་བར་བྱ་སྟེ། འདིར་ཤེས་པར་བྱེད་པ་ནི་སྤྲེའུ་ཅང་ཤེས་ཀྱི་དཔེ་
ལས་སོ། །གླང་པོ་ཆེ་དང་། རྟ་ཅང་ཤེས་དང་། སེང་གེ་དང་། སྟག་དང་། གཟིག་རྣམས་ཀྱི་ཞག་གིས་རྐང་པ་བྱུགས་ན་ཉེས་བྱས་སོ། །ཇི་སྲིད་འཚོའི་བར་དུ་བཅང་བའི་རྣམ་པར་ངེས་པ་ནི་ཤུ་བའི་ནད་ཀྱིས་བཏབ་པ་ལ་བསྐ་བ་རྣམ་པ་ལྔ་ཉི་གྲིབ་ལ་བསྐམས་ཏེ་ཕྱེ་མའི་མིག་སྨན་

བྱས་ཏེ་ལག་པས་དྲིལ་ནས་ཡང་བསྐབས་བཏབ་སྟེ་གཞག་པར་བྱའོ་ཞེས་བྱ་བར་རྗེས་སུ་གནང་ངོ་། །ནད་སོས་ནས་ཡང་བཞག་བཞིན་ཏེ། དོར་བར་མི་བྱའོ། །མི་རུང་བའི་ཞག་ལས་བཙོས་པའི་ལན་ཚྭ་མི་བཟའོ། །སྨན་པས་ལུང་ཕོག་པས་མིག་སྨན་ལྔ་བསྟེན་པར་བྱ་སྟེ། མེ་ཏོག་གི་མིག་སྨན་
དང་། ཁུ་བའི་མིག་སྨན་དང་། ཕྱེ་མའི་མིག་སྨན་དང་། རི་ལུའི་མིག་སྨན་དང་། རྒྱ་ཤུག་གི་མིག་སྨན་ནོ། །ནད་སོས་ན་ཡང་གཞན་གྱི་ཕྱིར་མེ་ཏོག་གི་མིག་སྨན་ནི་སྣོད་ཀྱི་ནང་དུ་གཞག་གོ། །ཁུ་བའི་མིག་སྨན་ནི་ཟ་མ་ཏོག་ཆུང་ངུའི་ནང་དུའོ། །ཕྱེ་མའི་མིག་སྨན་ནི་སྦུ་གུའི་ནང་དུའོ། །
རི་ལུའི་མིག་སྨན་དང་། སེའུ་བི་རའི་མིག་སྨན་ནི་སྒྱེའུའམ་ཐུམ་པོར་བཅིང་ངོ་། །རྣམ་པ་གཞན་དུ་ན་འགལ་ཚབས་ཅན་དུ་འགྱུར་རོ། །རྒྱན་དུ་བྱས་པའི་མིག་སྨན་གྱིས་མིག་སྨན་མི་བྱ་མོད་ཀྱི་འོན་ཀྱང་སྨན་གྱི་མིག་སྨན་གྱིས་སོ། །མིག་སྨན་བསྐུ་བའི་ཐུར་མ་ནི་གཉིས་ཏེ། ལྕགས་དང་། ཟངས་ཀྱི་རང་
བཞིན་ནོ། །སྨན་རྣམས་ཉི་གྲིབ་ལ་སྐམས་སུ་བཅུག་པ་ལས་ཆར་འབབ་བམ་འབབ་དུ་དོགས་ཀྱང་རུང་། བསྙེན་པར་མ་རྫོགས་པ་མེད་ན་བདག་ཉིད་ཀྱིས་ནང་དུ་བཅུག་ལ་ལག་ཉར་བླངས་པའི་ལྟུང་བ་མེད་དོ། །འདྲེས་ན་ཡང་བཏུས་ལ་བཟའོ། །གང་ན་བའི་དུས་སུ་རྗེས་སུ་གནང་
བ་བདེ་བར་གནས་པའི་གནས་སྐབས་སུ་མི་བྱའོ། །དུས་སུ་རུང་བ་དང་ལྷན་ཅིག་འདྲེས་པའི་ཅི་སྲིད་འཚོའི་བར་དུ་བཅང་བ་བྱིན་གྱིས་བརླབས་པ་རྙེད་ན་མི་བཟའོ། །དེ་བཞིན་དུ་ཐམས་ཅད་ཀྱང་ཕན་ཚུན་འདྲེས་ལ། དེ་ཉིན་མོ་བྱིན་ལེན་བྱས་ལ་སྨན་རྣམ་པ་བཞི་པོ་རང་གི་རིགས་དང་མཐུན་པའམ།
རང་གི་རིགས་དང་མཐུན་པ་མ་ཡིན་པ་དང་འདྲེས་ཀྱང་བཟའ་བར་བྱའོ། །དེའི་ཉིན་མོ་བྱིན་ལེན་བྱས་ལ། ཕན་ཚུན་འདྲེས་ན་དུས་སུ་བཟའ་བར་བྱའོ་ཞེས་མ་མོ་ལས་འབྱུང་ངོ་། །སྨན་བཞི་པོ་གསོག་འཇོག་དང་། ལག་ཉར་བླངས་པ་དང་། ནང་དུ་ཞག་ལོན་པ་བྱིན་གྱིས་བརླབ་པར་མི་བྱའོ། །
སྨན་པས་ལུང་ཕོག་ན་རྣམ་པར་གྱུར་པ་བཟའ་བར་བྱའོ། །དད་པ་ཅན་གྱིས་དེ་བྱིན་ལེན་བྱས་པ་ཡང་ངོ་། །དེ་ཡང་རྣམ་པ་བཞི་སྟེ། བེའུ་འབྲངས་ནས་རིང་པོ་མ་ལོན་པའི་ལྕི་བ་དང་། དེ་ཉིད་ཀྱི་གཅིན་དང་། ཤིང་ཀན་ཚ་ན་དང་། ཀ་པི་ཏ་ལ་དང་། ཨ་ཤྭད་ཐ་དང་། ཨུ་དུམ་བཱ་ར་དང་།

ནྱ་གྲོ་དྷའི་ཤིང་དེ་རྣམས་ཀྱི་ཐལ་བ་དང་། སའི་སྟེང་ནས་སོར་བཞིའི་འོག་ནས་བླངས་པའི་སའོ། །སྒོག་སྐྱ་དང་། བཙོང་དང་། ཀེའུ་བཟའ་བར་མི་བྱའོ། །ན་བ་ལ་ནི་ལྟུང་བ་མེད་དོ། །དེ་ལ་ཀུན་དུ་སྤྱད་པ་ནི་དགེ་འདུན་གྱི་གཙུག་ལག་ཁང་དང་། མལ་ཆ་དང་།
སྟན་དང་། སྣམ་ཕྱིས་དང་། ཆབ་ཀུང་སར་འདུག་པར་མི་བྱའོ། །དགེ་འདུན་གྱི་ནང་དུ་ཡང་འཇུག་པར་མི་བྱའོ། །མཆོད་རྟེན་ལ་ཡང་ཕྱག་མི་བྱའོ། །ཁྱིམ་པ་ལྷགས་པ་རྣམས་ལ་ཡང་ཆོས་མི་བཤད་དོ། །ཁྱིམ་པའི་ཁྱིམ་དུ་ཡང་འགྲོ་བར་མི་བྱའོ། །དེ་ལ་ཡོངས་སུ་ལོངས་སྤྱད་ན་ཞག་
བདུན་གྱི་བར་དུ་ཆོ་ག་བཞིན་དུ་འདུག་ལ། དྲི་མེད་པར་བྱས་ཏེ། དེའི་ཕྱོགས་ཀྱང་སྐྱང་ནུལ་གྱིས་བྱུགས་ལ། ཁྲུས་བྱས་ནས་ཆོས་གོས་རྣམས་བཀྲུ་བར་བྱའོ། །བཙོང་གི་བྱ་བ་ནི་ཞག་གསུམ་གྱི་བར་དུ་འདུག་པར་བྱའོ། །ཀེའུ་ནི་ཉིན་ཞག་གཅིག་ཏུའོ། །ནད་པས་སེ་དྷ་བ་ནི་རྭའི་
ནང་དུ་བཅུག་ལ། རྭ་གཉིས་པས་ཁ་བཅད་དེ་གཞག་པར་བྱའོ། །དངོས་པོ་གཅིག་གིས་སྨན་རྣམ་པ་བཞིར་འགྱུར་བ་མཆིས་སམ་ཡོད་དེ། འདི་ལྟ་སྟེ་བུ་རམ་ཤིང་ནི་དུས་སུ་རུང་བའོ། །ཁུ་བ་ནི་ཐུན་ཚོད་དུ་རུང་བའོ། །བུ་རམ་ལ་སོགས་པ་ནི་ཞག་བདུན་པའོ། །བསྲེགས་པ་ནི་ཇི་སྲིད་
འཚོའི་བར་དུ་བཅང་བའོ། །དེ་བཞིན་དུ་གཞན་དག་ཀྱང་རྗེས་སུ་དཔག་པར་བྱའོ། །སྨན་རྣམ་པ་བཞི་པོ་བྱིན་ལེན་མ་བྱས་པར་བྱིན་གྱིས་བརླབས་པའམ། བྱིན་ལེན་བྱས་ལ་བྱིན་གྱིས་མ་བརླབས་པ་ཡང་རུང་སྟེ། བཟར་མི་རུང་ངོ་། །བྱིན་ལེན་བྱས་ལ་བྱིན་གྱིས་བརླབས་པ་ནི་ན་བ་ལ་ཡང་
རུང་མི་ན་བ་ལ་ཡང་རུང་ངོ་། །ནད་པ་ལ་རྣམ་པ་གཉིས་ཏེ་ལྷན་ཅིག་སྐྱེས་པ་དང་། གློ་བུར་དུ་འོངས་པའོ། །དེ་ལྟ་བས་ན་ན་བར་འདུ་ཤེས་ཉེ་བར་བཞག་སྟེ་ཐམས་ཅད་ཀྱང་བཟའ་བར་བྱའོ། །མི་རུང་བའི་སར་སྐྱེས་པའི་ཤིང་གི་འབྲས་བུ་ལ་སོགས་པ་ཐམས་ཅད་དུ་བཟའ་བར་མི་བྱའོ། །
རུང་བའི་སར་སྐྱེས་ཀྱང་། གལ་ཏེ་མི་རུང་བའི་སར་ལྷུང་བ་ནི་ཞག་ལོན་པ་ཡིན་ན་བཟའ་བར་མི་བྱའོ། །རུང་བའི་སར་ལྷུང་བ་ནི་ཞག་ལོན་ཀྱང་བྱིན་ན་བཟའ་བར་བྱའོ། །ཐམས་ཅད་ཀྱང་ཆོ་ག་བཞིན་དུ་མ་བྱས་ན་ཅི་ལྟར་རིགས་པར་སྦྱར་ཏེ། ཉེས་བྱས་ཀྱི་ལྟུང་བར་རིག་པར་བྱའོ། །ཡོ་བྱད་ཀྱི་

དངོས་པོའི་དབང་གི་དེའི་ཡོངས་སུ་བསྲུང་བ་རྣམས་ཀྱང་རྗེས་སུ་གནང་ངོ་། །འདི་ལྟ་སྟེ། མཚན་ཁུག་དང་སྨན་གྱི་ནལ་ཟེ་དང་། སྨན་གྱི་ཕོར་བུ་དང་། དུད་པ་བཏང་བའི་སྦུ་གུ་ལྕགས་ལས་བྱས་པ་སྲིད་སོར་བཅུ་གཉིས་ཀྱི་ཚད་དང་། སྣར་བླུགས་པ་མཆུ་གཉིས་པ་དང་། ཕུལ་བའི་བཏུང་ཕོར་དང་།
ཟ་མ་ཏོག་དང་། རྐང་རྟེན་དང་། རྐང་བརྙན་དང་། འདི་དག་རིན་པོ་ཆེའི་རང་བཞིན་ལས་བྱས་པ་སྤང་ཞིང་བཅང་བར་མི་བྱའོ། །ལྕགས་ཀྱི་གར་བུ་ལྕགས་ཐག་བཏགས་པ་བཅང་བར་བྱའོ། །དེས་ཐོག་མར་རུང་བའི་ཆུ་བསྲོས་ལ་དེའི་འོག་ཏུ་སྤྱད་པའི་ཆུ་བསྲོའོ། །ནད་པ་ལ་ལྕགས་ཀྱི་གཞོང་
རིང་རྗེས་སུ་གནང་ངོ་། །སྨན་བཙོ་བའི་ལྕགས་ཀྱི་གཞོང་པ་དང་། ལྕགས་སྒྱེད་དང་། འཇོར་དང་། སྟ་རེ་དང་། སྟེའུ་དང་། མཆིག་མཆིག་གུ་དང་བཅས་པ་རྗེས་སུ་གནང་ངོ་། །རྐང་པ་ལ་སོགས་པ་བཀྲུ་བའི་དོན་དུ་ཏིལ་མར་བླང་པའི་སྣོད་དང་། ཏིལ་མར་གྱི་སྣོད་དེ་ཡང་རྣམ་པ་
གསུམ་སྟེ། ཆེན་པོ་ནི་ཕུལ་གང་ཤོང་བའོ། །ཆུང་ངུ་ནི་ཕུལ་ཕྱེད་ཤོང་བའོ། །འབྲིང་ནི་དེ་གཉིས་ཀྱི་བར་རོ། །དེ་ཉིད་ཀྱི་རིགས་ཀྱི་ཆ་སྤྱད་བཅང་བར་མི་བྱའོ། །སྔོན་སྨན་པ་བྱས་པས་ཚོན་ལ་སོགས་པའི་སྣོད་འཆང་བ་དང་། སྔོན་ཡི་གེ་བྱེད་པར་རམ་ཕྱིས་འཆང་བ་དང་། བཟོ་མཁན་
ཁབ་འཆང་བ་ནི་མ་གཏོགས་པ་སྟེ། རང་གི་བཟོ་ཉེ་བར་བསྟན་པར་མི་བྱའོ། །ཆར་པ་དང་ཉི་མ་ཚ་བ་བསྐྱབ་པའི་ཕྱིར་གདུགས་རྗེས་སུ་གནང་སྟེ། དེ་ཡང་སྨྱིག་མ་དང་། རྩྭ་དང་། ལོ་མ་དང་གོས་ཀྱི་རང་བཞིན་ལས་བྱའོ། །དཀར་པོ་མ་ཡིན། ཁྲའོ་ཉེ་བར་བཀྲ་བ་མ་ཡིན། རྨ་བྱའི་
སྒྲོ་རྩ་སྤུ་མེད་པ་བཅང་བར་མི་བྱའོ། །ཡུ་བ་ཡང་གསེར་དང་། དངུལ་དང་། བཻ་ཌཱུརྱ་དང་། ཤེལ་གྱི་རང་བཞིན་ལས་བྱས་པ་ཡང་མི་བྱ་བས་རྩིས་མི་བྱུག །ཤིན་ཏུ་རིང་པོ་ཡང་ངོ་། །གདུགས་ཀྱི་ཚད་དུའོ། །གདུགས་སར་པ་ཐོགས་བཞིན་གྲོང་དུ་འཇུག་པར་མི་བྱའོ། །གལ་ཏེ་
དེའི་དབུས་སུ་ལམ་བྱུང་ན་ཡང་ལོགས་བསྙལ་ཏེ་འགྲོ་བར་བྱའོ། །བསོད་སྙོམས་པས་ཀྱང་གོས་བསྲུང་བའི་ཕྱིར་ཡུ་བ་རུང་བར་བྱས་པའི་གདུགས་ཐོགས་ཏེ། བསོད་སྙོམས་ལ་འཇུག་པར་བྱའོ། །ཁྱིམ་དང་པོར་ནི་དེ་བཞག་ལ་སླར་འགྲོ་བའི་ཚེ་ཁྱེར་བར་བྱའོ། །གྲང་བ་དང་།

ཚ་བ་དང་། ཚེར་མ་དང་། ས་རྡུལ་ཅན་སྤང་བ་དང་། སེར་ག་སྤང་བ་དང་རྐང་པ་འཇམ་པོ་ལ་གནོད་པ་སྤང་བར་བྱ་བའི་ཕྱིར་མཆིལ་ལྷམ་རིམ་པ་དྲུག་པའི་བར་དུའོ། །དེ་ལས་འདའ་བར་མི་བྱའོ། །ལྷམ་སྒྲོ་གུ་ཅན་ཡང་བཅང་བར་བྱའོ། །གྲང་བས་གནོད་པ་སྤང་བའི་
ཕྱིར་ཞྭ་དང་སྟོད་ཁོར་ནང་ཚངས་ཅན་དང་། གདིང་བ་དང་། སྟན་ཏེ་དེ་རྣམས་ཀྱང་ངོ་། །གྲང་བས་གནོད་པ་སྤང་བའི་ཕྱིར་བགོ་བར་བྱའོ། །སྟེང་གཡོགས་སྟན་ཁྲ་བོ་ཡིན་ལ་དེའི་སྟེང་ཁྲ་བོ་མ་ཡིན་ན་བཅང་བར་བྱའོ། །ཚ་བ་སྤང་བའི་ཕྱིར་བསིལ་ཡབ་རྣམ་པ་གཉིས་རྗེས་སུ་གནང་སྟེ། ཏ་ལའི་
ལོ་མ་དང་། གོས་ལས་བྱས་པའོ། །དེའི་ཡུ་བ་གསེར་དང་། དངུལ་དང་། བཻ་ཌཱུརྱ་དང་། ཤེལ་དང་། ཁྲ་བོ་ཉེ་བར་བཀྲ་བ་དང་། བསེ་རྩིས་བྱུག་པ་མི་བྱའོ། །དེ་བཞིན་དུ་སྦྲང་ཡབ་ཀྱང་ངོ་། །དེ་ཡང་བལ་དང་། ལྡུམ་བུ་ཤ་ན་ཀ་དང་། རས་བལ་ལམ། རས་མའམ། འདབ་
མ་ནི་ཆང་བུ་ལས་བྱའི། རྟའི་རྔ་མ་ལ་སོགས་པའི་རང་བཞིན་ལས་བྱས་པ་ནི་མ་ཡིན་ནོ། །ཡུ་བ་དང་། བསིལ་ཡབ་ལ་སོགས་པ་དགེ་འདུན་གྱི་ཕྱིར་བླང་བར་བྱའོ། །བདག་གི་ཕྱིར་ནི་མ་ཡིན་ནོ། །རིལ་བ་བསྐུར་དཀའ་བ་སྤང་བའི་ཕྱིར་དྲ་བ་དང་ཁར་བ་ཡང་བཅང་བར་བྱའོ། །བཞོན་པས་
འགྲོ་བར་རྗེས་སུ་གནང་སྟེ། ཤིང་རྟ་དང་། ཤིང་རྟ་ཆུང་ངུ་དང་། ཁྱོགས་སྤྱིལ་དང་། ཟུང་ཁྱོགས་དང་། གླང་པོ་ཆེ་དང་། རྟ་དང་། རྔ་མོ་དང་། བ་ལང་དང་། ཐ་ན་བོང་བུ་ལ་ཡང་རུང་སྟེ། གླང་པོ་ཆེ་མོ་ནས་བོང་མོའི་བར་དུ་ཡང་མོ་ལ་རེག་པའི་ཉེས་པར་མི་འགྱུར་རོ། །དེ་ཡང་གང་ལ་རྗེས་སུ་
གནང་ཞེ་ན་ན་བའམ། ནར་དོགས་པའམ། ན་བའི་མཚན་མ་བྱུང་བའམ། དེ་སྟོབས་ཆུང་བའམ། བཀྲུ་སྨན་གསར་བུ་རྩོམ་པའམ། བཀྲུ་སྨན་བཏང་ན་རིང་པོ་མ་ལོན་པའམ། །ཤིན་ཏུ་གཞོན་ཤ་ཅན་གྱི་རིགས་སམ། གང་ལམ་གྱིས་ངལ་བ་ལྟ་བུ་འམ། རིང་པོར་འགྲོ་བ་
འམ། ཅི་ལྟར་བྱང་ཕྱོགས་ནས་ཤར་ཕྱོགས་སུ་འགྲོ་བའམ། ཤར་ཕྱོགས་ནས་ཏ་ལའི་ཡུལ་དུ་འམ། འདྲོན་པའི་དབང་གིས་ཀྱང་ལམ་དུ་འགྲོ་བའམ། ཤིན་ཏུ་རིང་བར་འགྲོ་བའམ། དགེ་བའི་ཕྱོགས་མངོན་པར་འཕེལ་བར་བྱེད་པ་དེ་ལས་མི་ཉམས་པའི་ཕྱིར་དགེ་བའི་ཕྱོགས་

བྱེད་བཞིན་འགྲོ་སྙམ་པའམ། སྦྱིན་བདག་གལ་གྱིས་འཆུ་ན་དེའི་སེམས་བསྲུང་བར་བྱ་བའི་ཕྱིར་རོ། །དེ་ཅིའི་ཕྱིར་ཞེ་ན་ལེགས་པར་གསུངས་པའི་ཆོས་འདུལ་བ་ལ་ཚིག་དོར་གྱི་ཐ་སྙད་བྱ་བའི་ཕྱིར་བསླབ་པར་བཅས་པ་ནི་མ་ཡིན་ནོ། །མདོ་སྡེ་ལས་ཀྱང་འདི་གཉིས་ཀྱིས་ཁྱོགས་
ལ་འགྲོ་བར་བྱ་སྟེ། རྒས་ཤིང་འཁོགས་པས་སྟོབས་ཆུང་བའམ། ན་བས་སྦྱོར་མི་བཟོད་པ་ཞེས་གསུངས་སོ། །ནད་པ་ལ་སྤོས་ཀྱང་རྗེས་སུ་གནང་སྟེ། དེས་སྤོས་ཀྱིས་བྱུགས་བཞིན་དུ་དགེ་འདུན་གྱི་ནང་དུ་འགྲོ་བར་མི་བྱའོ། །ཁྱིམ་པ་རྣམས་ལ་ཆོས་བཤད་པར་མི་བྱའོ། །ཁྱིམ་
གཞན་དུ་འགྲོ་བ་སྤང་བར་བྱའོ། །ནད་སོས་ནས་ཁྲུས་བྱས་ལ་ཆོས་གོས་རྣམས་ལ་ཡང་སྤོས་མེད་པར་བྱའོ། །མི་ན་བར་སྤོས་ཀྱིས་བྱུགས་ན་ཉེས་བྱས་སོ། །གལ་ཏེ་དད་པ་ཅན་རྣམས་ཀྱིས་བྱིན་ན་ལོང་ལ་མགོ་དང་། རྐང་པའི་མཐའ་ལོགས་སུ་ལག་མཐིལ་གྱིས་བྱུག་པར་བྱའོ། །
དེ་མིག་ལ་ཕན་པའི་ཕྱིར་དུས་དུས་སུ་བསྣམ་པར་བྱའོ། །མེ་ཏོག་ཀྱང་དེ་བཞིན་ནོ། །ཟན་ཟོས་ནས་དད་པ་ཅན་དག་གིས་རྐང་པ་ལ་སྤོས་ཉུག་པ་སྤང་བར་མི་བྱའོ། །དེ་དག་ལྐོག་ཏུ་དོར་བར་བྱའོ། །སེང་གེའི་ཁྲིའི་རྐང་རྟེན་ལ་སྤོས་ཀྱིས་བྱུགས་སམ། སྤོས་ཀྱིས་ཡན་ལག་བྱིན་བྱས་པ་དང་།
རྡོ་ལེབ་བམ་ལོ་མ་གཞག་པ་ལ་རྐང་པ་གཞག་པར་བྱའོ། །གི་ཝང་གིས་ཐིག་ལེ་བྱས་ན་ཉེས་བྱས་སོ། །རྨའི་མཐའ་འཁོར་དུ་བྱུགས་པ་ལ་ལྟུང་བ་མེད་དོ། །སྨན་དེ་ལྟ་བུ་རྣམ་པ་དུ་མ་སྟེ། སྐབས་འདིར་ནི་ཞག་བདུན་པ་ལ་བྱ་སྟེ། ཞུན་མར་ལ་སོགས་པ་བསྟན་པའི་ཕྱིར་རོ། །
བཀའ་སྩལ་པ་ཞེས་བྱ་བ་ནི་རྒྱས་པར་བསྟན་པའོ། །འདི་ལྟ་སྟེ་ཞེས་བྱ་བ་ནི་ཉེ་བར་བསྟན་པའི་དོན་གྱི་ཚིག་གི་ཕྲད་དོ། །ཞུན་མར་ཞེས་བྱ་བ་ནི་བ་ལ་སོགས་པ་སྟེ། གང་དག་གི་ཤ་རུང་བའོ། །འབྲུ་མར་ཞེས་བྱ་བ་ནི་ཡུངས་ཀར་དང་ཏིལ་དང་། ཤིང་མ་དུ་ཀའི་འབྲས་བུ་ལ་སོགས་
པའི་འོ། །དེ་བཞིན་དུ་ཚིལ་བུ་ཡང་འབྲུ་མར་དང་འདྲ་སྟེ། ཚིལ་བུ་ལས་བཙོས་ཤིང་གང་ཟང་ཟིང་མེད་པའོ། །སྦྲང་རྩི་ཞེས་བྱ་བ་ནི་སྦྲང་མའི་འོ། །བུ་རམ་གྱི་དབུ་བ་ཞེས་བྱ་བ་ནི་བུ་རམ་སྟེ། ཁ་ཅིག་ན་རེ་བུ་རམ་ཤིང་གི་ཁུ་བ་དཀར་པོ་ལ་ཡང་བྱའོ་ཞེའོ། །ཞུན་མར་བཟུང་

བས་ནི་མར་སར་ཤིན་ཏུ་བཀྲུས་པ་དེ་ཡང་བཟུང་བའོ། །བུ་རམ་གྱི་དབུ་བ་བཟུང་བས་ནི་ལི་ཁ་ར་ལ་སོགས་པའི་ཁུ་བ་སྤང་སྟེ་བུ་རམ་ཤིང་ལས་བྱུང་བའི་རྣམ་པ་ཐམས་ཅད་ལ་ཡང་བྱའོ། །ཞུན་མར་ལ་སོགས་པ་བཟུང་བས་ནི་བཟའ་བ་དང་བཏུང་བ་ཉེ་བར་སྤྱད་པར་
བྱའོ། །མཁྲིས་པ་དང་། རླུང་དང་། བད་ཀན་གསུམ་ཞི་བར་བྱ་བའི་ཕྱིར་ཏེ། སྦྲང་རྩི་རྙིང་པ་དང་། བུ་རམ་རྙིང་པས་ནི་བད་ཀན་ཞི་བར་འགྱུར་རོ། །ཞུན་མར་དང་། ལི་ཁ་རས་ནི་མཁྲིས་པ་ཞི་བར་འགྱུར་རོ། །འབྲུ་མར་གྱིས་ནི་རླུང་ཞི་བར་བྱེད་དོ། །བུ་རམ་གྱི་དབུ་བས་
ནི་གསུམ་ཀ་ཞི་བར་འགྱུར་རོ། །དེ་དག་ལས་ཞེས་བྱ་བ་ནི་ཞོ་ལ་སོགས་པའི་དངོས་པོ་དེ་དག་མ་ཡིན་ནོ། །ཞག་བདུན་པ་ཞེས་བྱ་བ་ནི་མང་བ་ངེས་པར་གཅད་པའོ། །དེ་ཚུན་ཆད་དུ་འཆང་བ་ལ་ལྟུང་བ་མེད་དོ། །རང་གིས་བྱིན་གྱིས་བརླབས་ཏེ་ཞེས་བྱ་བ་ནི་ལག་པ་དག་བཀྲུས་ཏེ།
བྱིན་ལེན་བྱས་ནས་དགེ་སློང་གི་མདུན་དུ་འདུག་ནས་ལག་པ་གཡོན་པའི་སྟེང་དུ་གཞག་ལ་ལག་པ་གཡས་པས་བཀབ་སྟེ། འདི་སྐད་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། །བདག་མིང་འདི་ཞེས་བགྱི་བའི་སྨན་ཞག་བདུན་པ་འདི་དག་བདག་དང་ཚངས་པ་མཚུངས་
པར་སྤྱོད་པ་རྣམས་ཀྱིར་བགྱི་བར་ཞག་བདུན་པར་བྱིན་གྱིས་བརླབ་པོ། །དེ་བཞིན་དུ་ལན་གཉིས་ལན་གསུམ་དུའོ། །ཇི་སྲིད་འཚོའི་བར་དུ་བཅང་བ་དང་། དེ་བཞིན་དུ་ཐུན་ཚོད་དུ་རུང་བ་ཡང་བྱིན་གྱིས་བརླབ་པར་བྱའོ། །གསོག་འཇོག་གི་ཡོངས་སུ་ལོངས་སྤྱོད་པས་ལོངས་སྤྱད་
པར་བྱའོ་ཞེས་བྱ་བ་ནི་རང་གིས་བླངས་ལ་བཟའ་བར་བྱ་སྟེ། ཕྱིས་བྱིན་ལེན་བྱ་བ་ནི་མི་དགོས་སོ། །ཇི་སྲིད་འཚོའི་བར་དུ་སྤྱད་པ་ནི་ཇི་སྲིད་འཚོའི་བར་དུའོ། །དུས་སུ་རུང་བ་ཡང་དུས་སུ་རུང་བའོ། །ཐུན་ཚོད་དུ་རུང་བ་ཡང་ཐུན་ཚོད་དུ་རུང་བ་སྟེ། གསོག་འཇོག་གི་ཡོངས་སུ་ལོངས་སྤྱོད་པས་
ཡོངས་སུ་ལོངས་སྤྱད་པར་བྱའོ་ཞེས་བསྟན་པ་ཡིན་ནོ། །མདོར་ན་སྨན་རྣམ་པ་གཉིས་ཏེ། དུས་སུ་རུང་བ་དང་། དུས་མ་ཡིན་པར་རུང་བའོ། །གང་དུས་མ་ཡིན་པར་བཀག་པ་མེད་པ་དེ་ནི་དུས་མ་ཡིན་པར་བྱིན་ལེན་བྱས་ལ་དུས་དང་དུས་མ་ཡིན་པར་ཡང་རུང་བས་ཡོངས་སུ་ལོངས་སྤྱད་པར་བྱའོ། །

ལོངས་སྤྱད་པར་བྱའོ་ཞེས་བྱ་བ་ནི་བཟའ་ཞིང་མིད་པའོ། །རྐང་པ་ལ་བསྐུ་བ་ལ་སོགས་པའི་རྒྱུ་མཚན་ལ་ནི་གཞན་གྱིས་ཀྱང་རྙེད་པ་འཆང་དུ་མི་རུང་ངོ་ཞེས་བྱ་བར་བསྟན་ཏོ། །དེ་ལས་འདས་ན་ཞེས་བྱ་བ་ནི་ཞག་བརྒྱད་པ་ལ་སོགས་པར་བསྟན་པའོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་གིས་
སྨན་གཅིག་གམ་མང་དུ་ཡང་རུང་སྟེ། ཚེས་གཅིག་གམ། གཞན་དུ་རྙེད་ཀྱང་རུང་། ཞག་བདུན་ཚུན་ཆད་དུ་བྱིན་གྱིས་བརླབས་ལ་བཟའ་བར་བྱའོ། །ཡང་ན་གཞན་དུ་གཏང་བར་བྱའོ། །རྐང་པ་ལ་སོགས་པའི་བསྐུ་མཉེའི་རྒྱུ་མཚན་ལ་ཡང་དག་པར་བརྟགས་ནས་སོ། །གཞན་ལ་སྦྱིན་པར་
བྱའོ། །རྣམ་པ་གཞན་དུ་ན་གང་ཅུང་ཟད་ཅིག་ལུས་ཀྱང་ཞག་བརྒྱད་ལོན་ན་སྤང་བའོ། །གཅིག་གམ་མང་དུ་ཡང་རུང་ཚེས་གཅིག་ལ་བྱིན་གྱིས་བརླབས་པ་ལས། གཅིག་གམ་མང་ཞིག་ཚེས་གཉིས་ལ་རྙེད་པ་དེས་གཞན་ནི་བཟའ་བར་བྱའོ། །གཞན་ནི་གཏང་བར་བྱའོ། །ཡང་ན་སྦྱིན་པར་
བྱའོ། །རྣམ་པ་གཞན་དུ་ན་སྔ་མའི་དབང་གིས་ཉི་མ་བརྒྱད་པ་སྟེ་སྤང་བའོ། །དེ་བཞིན་དུ་ཞག་དྲུག་གམ་བདུན་གྱི་བར་དུ་ཡང་ངོ་། །གལ་ཏེ་ཕྱིས་བྱིན་གྱིས་བརླབས་པ་ལྷན་ཅིག་འདྲེས་ན་སྔ་མའི་ཉི་མ་ནས་བཟུང་སྟེ། ཞག་བདུན་དུ་ཡོངས་སུ་ལོངས་སྤྱད་པར་བྱའོ། །ཞག་བདུན་གྱི་
བར་དུ་ཡོངས་སུ་ལོངས་སྤྱད་པར་བྱའོ་ཞེས་མ་བསམས་པར་ཡོངས་སུ་ལོངས་སྤྱད་ན་ཉི་མ་རེ་རེ་ལ་ཁམ་རེ་རེ་ཡང་ཉེས་བྱས་སོ། །ཉི་མ་སྔ་མ་ལ་བྱིན་ལེན་བྱས་ལ་ཕྱི་དེ་ཉིན་པར་བྱིན་གྱིས་རློབ་པར་བྱེད་ན་ལྟུང་བ་མ་ཡིན་ཏེ། ཉི་མ་སྔ་མ་ནས་ཞག་བདུན་དུ་བགྲང་ངོ་། །ཞག་གྲངས་ཉུང་ངུ་བྱིན་གྱིས་
རློབ་པ་ནི་ལྟུང་བ་མེད་དོ། །ཚད་ལས་མི་འདའ་བར་བྱ་བའི་ཕྱིར་མཚམས་སུ་ངེས་པར་བྱ་བ་ནི་བདུན་དུའོ། །ཞག་བདུན་ལོན་པ་ལ་ལོན་པར་འདུ་ཤེས་སམ་ཡིད་གཉིས་ཟ་ན་ཡང་སྤང་བའོ། །མ་ལོན་པ་ལ་ལོན་པར་འདུ་ཤེས་སམ་ཡིད་གཉིས་ཟ་ན་ཡང་ཉེས་བྱས་སོ། །མ་ལོན་པ་ལ་མ་ལོན་
པར་འདུ་ཤེས་སམ་ལོན་པ་ལ་ལོན་པར་འདུ་ཤེས་ན་ལྟུང་བ་མེད་དོ། །སྒེག་པའི་སེམས་ཀྱིས་སམ། རོ་མྱང་བའི་སེམས་ཀྱིས་སམ། རྒྱས་པའམ། ཁ་དོག་གི་བྱེ་བྲག་གམ་གཡོ་དང་ཚུལ་འཆོས་པར་བསམས་ཏེ། ཟ་ན་ཐམས་ཅད་ལ་ཡང་ཉེས་བྱས་སོ། །ཞག་བདུན་བྱིན་གྱིས་

བརླབས་ཤིང་ཟ་ན་ཚངས་པ་མཚུངས་པར་སྤྱོད་པ་ལ་ཉི་མ་བརྗོད་པར་བྱ་སྟེ། དེང་བདག་གིས་ཉི་མ་གཅིག་ཟོས་ཏེ། དེ་བཞིན་དུ་ལྷག་མ་ཡང་བཟའོ་ཞེས་བྱ་བས་སོ། །ཞག་བདུན་ཚང་གི་བར་དུ་ཡང་དེ་བཞིན་དུ་བརྗོད་པར་བྱའོ། །ཅི་ལྷག་པ་དེ་ཀུན་དགའ་ར་བ་པའམ། དགེ་
ཚུལ་ལ་སྦྱིན་པར་བྱའོ། །ཞག་བདུན་པ་གང་དེ་ནས་ཉེ་བར་བླངས་པ་དང་། དེ་ལས་སོ་སོ་བླངས་པ་ཞེས་བྱ་བ་ནི་ལག་ཉར་བླངས་པ་དང་། བྱིན་ལེན་བྱས་པ་ཞེས་བྱ་བའི་ཐ་ཚིག་གོ། །ཟས་ཀྱི་ཕྱེ་མ་དང་འདྲེས་པ་ཞེས་བྱ་བ་ནི་དུས་སུ་རུང་བ་དང་འདྲེས་པ་ཞེས་བྱ་བའི་ཐ་ཚིག་གོ། །ཕན་ཚུན་
འདྲེས་པ་ཞེས་བྱ་བ་ནི་ཉི་མ་གཞན་དུ་བྱིན་གྱིས་བརླབས་པ་དང་། དུས་ཕྱི་མའི་དབང་དུ་བཅངས་པ་ནི་འདྲེས་པ་ཞེས་བྱ་བའི་ཐ་ཚིག་གོ། །རང་གི་རྒྱུད་ཀྱིས་མྱགས་པ་ཞེས་བྱ་བ་ནི་གང་མཚམས་མེད་པ་སྟེ། ཞག་ལོན་པར་མ་བྱས་ཤིང་རྙེད་པའོ། །དེ་ཐམས་ཅད་ཀྱི་ཀུན་དགའ་ར་བ་པ་
དང་། དགེ་ཚུལ་ལ་ཡང་སྤང་བར་བྱའོ། །ལྷུང་བཟེད་ཀྱི་སྡེ་ཚན་རྫོགས་སོ།། །།སྤང་བ་ཐམས་ཅད་ལས་བརྩམས་ཏེ། རྣམ་པར་ངེས་པར་བྱ་བ་ནི། དགེ་སློང་གིས་སྤང་བའི་དངོས་པོ་མ་སྤངས་ལ། ཞག་ལོན་པར་མ་བྱས་སམ། ལྟུང་བ་མ་བཤགས་སམ། སྤངས་ཀྱང་
ཞག་ལོན་པར་མ་བྱས་སམ། ལྟུང་བ་མ་བཤགས་སམ་སྤང་བ་ཐམས་ཅད་ལས་ཞག་ལོན་པར་བྱས་ཀྱང་ལྟུང་བ་མ་བཤགས་པར་དེ་དང་རིགས་མཐུན་པའམ། རིགས་མི་མཐུན་པའང་རུང་། གཞན་ཞིག་རྙེད་པ་འདི་ལྟ་སྟེ། ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་
སྐ་རགས་ལ་སོགས་པ་དགེ་སྦྱོང་གི་འཚོ་བའི་ཡོ་བྱད་ཅིག་རྙེད་ན། དེ་དག་ཀྱང་སྔ་མའི་རྒྱུད་ཀྱིས་སྤང་བའོ། །སྤངས་པར་གྱུར་པ་ལ་ཞག་ལོན་པར་བྱས་ནས། ལྟུང་བ་བཤགས་པ་ལ་ལྟུང་བ་མེད་དོ། །ཞག་ལོན་པར་ཞེས་བྱ་བ་ནི། གང་གི་ཉིན་མོ་སྤངས་པ་དེའི་ཉི་མ་གཉིས་པའི་ཞག་
གིས་བར་དུ་བཅད་དེ། ཉི་མ་གསུམ་པ་ལ་ལྟུང་བ་བཤགས་ནས་བླང་ངོ་། །སྤང་བ་ཐམས་ཅད་ཀྱང་གང་ཟག་ལ་སྤང་གི། དགེ་འདུན་མ་ཡིན་ནོ། །སྤངས་པའི་དངོས་པོ་དགེ་འདུན་གྱིས་བགོ་བར་མི་བྱའོ། །ལྷུང་བཟེད་གཉིས་པ་སྤང་བ་ནི་མ་གཏོགས་ཏེ། དེ་ནི་དགེ་འདུན་ལ་སྤང་ངོ་ཞེས་གསུངས་

སོ། །ཆོས་གོས་དང་གདིང་བ་ནི་བསྙེན་པར་རྫོགས་པ་ལ་སྤང་ངོ་། །དབྱིག་ལ་སོགས་པ་ནི་བསྙེན་པར་རྫོགས་པའམ། མ་རྫོགས་པའམ། རབ་ཏུ་བྱུང་བའམ་མ་བྱུང་བ་ལ་ཡང་རུང་ངོ་། །ཞག་བདུན་པ་ནི་བསྙེན་པར་མ་རྫོགས་པ་ལ་སྤང་ངོ་། །ཁྲོས་ནས་ཆོས་གོས་ཕྲོགས་པ་ནི་གང་ཁོ་ན་
ཕྲོགས་པ་ཉིད་ལ་སྤང་བར་བྱ་སྟེ། སྦྱིན་པར་བྱ་བའི་ཕྱིར་ཡིན་གྱི། རུང་བར་བྱ་བའི་ཕྱིར་ནི་མ་ཡིན་ནོ། །གང་ཟག་གསལ་ཞིང་ཡིད་གཅུགས་པ་ལ་སྤང་བར་བྱ་བའི་མི་གསལ་བ་དང་། །ཡིད་མི་གཅུགས་པ་ལ་མ་ཡིན་ནོ། །མི་གསལ་བ་ལ་སྤངས་པ་ལས་གལ་ཏེ་མི་གསལ་བ་སྟེ་
སླར་མི་སྟེར་ན་མཐུས་ཀྱང་དབྲོག་པར་བྱའོ། །སྤང་བར་གྱུར་པ་རུང་བར་བྱ་བའི་ཕྱིར་སྤང་གི། གཏན་དུ་སྦྱིན་པའི་ཕྱིར་མ་ཡིན་ནོ། །དེ་བཞིན་དུ་རེ་བ་དང་བཅས་པའི་སེམས་ཀྱིས་ཀྱང་སྤང་བ་ནི་སྤངས་པ་མ་ཡིན་ནོ། །སྤངས་པ་སུམ་ཅུ་རྫོགས་སོ།། །།འདུལ་བ་བསྡུས་པ་
བམ་པོ་བརྒྱད་པ། རྒྱལ་པོའི་ཁབ་ན་སྟེ། སྒྲ་གཅན་འཛིན་ལ་དྲིས་ན་ཐོ་འཚམས་པའི་ཕྱིར་དེ་བཞིན་གཤེགས་པ་གཞན་ན་བཞུགས་ན་གཞན་དུ་བསྟན་པ་དང་། མཉན་ཡོད་ན་དགེ་སློང་ལག་རྒྱུད་ཀྱིས་ལྷོ་ལམ་ནས་འོངས་པའི་རྒོལ་བ་དང་། དུས་བྱས་པ་ལས་བརྫུན་གྱིས་བསླུས་པས་ན་ལྟུང་བའི་
གཞིའི་དབང་དུ་མཛད་དེ། བཅབ་པའི་ཉོན་མོངས་པའི་ཕྱིར། བརྫུན་དུ་སྨྲས་པའི་ཚོགས་ཀྱི་ལྟུང་བྱེད་དང་པོར་བཅས་སོ། །ཤེས་བཞིན་དུ་ཞེས་བྱ་བ་ནི་འདུ་ཤེས་སྦས་ཞེས་བྱ་བའི་ཐ་ཚིག་གོ། །བརྫུན་དུ་སྨྲ་ན་ཞེས་བྱ་བ་ནི་དོན་གཞན་དུ་འདུག་པ་ལས་ཤེས་པའི་སྐྱེས་བུ་ལ་སླུ་བའི་
ཕྱིར་གཞན་དུ་སྨྲ་བ་ནི་བརྫུན་དུ་སྨྲ་བའོ། །དེ་ཡང་རྣམ་པ་དགུ་ནས་རྣམ་པ་གཉིས་ཀྱི་བར་དུ་སྟེ་དེ་ལ་རྣམ་པ་དགུ་ནི་ལྟུང་བ་སྡེ་ལྔ་དང་། ཉམས་པ་བཞིའོ། །རྣམ་པ་བརྒྱད་ནི་ལྟུང་བ་སྡེ་ལྔ་དང་། གཞི་མེད་པ་གསུམ་མོ། །རྣམ་པ་བདུན་ནི་ཉམས་པ་བཞི་དང་། གཞི་མེད་པ་གསུམ་མོ། །
རྣམ་པ་དྲུག་ནི་སྦྱོར་བ་དང་། དངོས་གཞི་དང་མཇུག་སྟེ། བརྫུན་དུ་