Luận tạng Tây Tạng (Tengyur) — Tập 142

་པོ་རེ་རེར་དབྱེ་ན་ནི་ཇི་ལྟར་
གཟུགས་ལ་སོགས་པ་རྟེན་དང་མཚུངས་པར་ལྡན་པ་དང་ལྷན་ཅིག་བྱུང་བའི་ངོ་བོར་ཉེ་བར་འགྲོ་བའི་ཕྱིར་རྣམ་པར་ཤེས་པ་ཀུན་ནས་ཉོན་མོངས་པར་བྱེད་པ་ཡིན་པ་ལྟར་རྣམ་པར་ཤེས་པ་འབའ་ཞིག་ནི་ལོགས་ཤིག་ཏུ་དེ་ལྟ་མ་ཡིན་ཏེ་ཅི་ཞེ་ན། ཀུན་ནས་ཉོན་མོངས་པར་བྱེད་
པ་ཞེས་བྱ་བར་སྐབས་དང་སྦྱར་རོ། །ཅིའི་ཕྱིར་ཞེ་ན། ཅིག་ཅར་དུ་རྟེན་ལ་སོགས་པ་ཉིད་དུ་མི་རུང་བའི་ཕྱིར་རོ། །དེ་ལྟ་བས་ན་རྣམ་པར་ཤེས་པ་གནས་པ་བཞི་བཤད་པ་དག་ཏུ་རྣམ་ཤེས་འབའ་ཞིག་ལོགས་ཤིག་ཏུ་གནས་པར་མ་བཤད་དོ། །དེ་བཞིན་དུ་གདུལ་བའི་
སྐྱེ་བོ་ལ་ལྟོས་ནས་རྣམ་པར་ཤེས་པ་གནས་པ་མདོ་ཁ་ཅིག་ལས་ནི་གཞན་དུ་འབྱུང་བ་ལ། འདི་ལས་ཀྱང་གཞན་དུ་འབྱུང་བས་དེའི་ཕྱིར་གཞན་ཡང་བཅོམ་ལྡན་འདས་ཀྱིས་རྣམ་པར་ཤེས་པ་གནས་པ་བཞི་ནི་ཞིང་གི་ངོ་བོར་ཞེས་བྱ་བ་རྒྱས་པར་སྨོས་ཏེ། བཅོམ་
ལྡན་འདས་ཀྱིས་རྣམ་པར་ཤེས་པ་གནས་པ་བཞི་པོ་གཟུགས་དང་ཚོར་བ་དང་འདུ་ཤེས་དང་འདུ་བྱེད་ཀྱི་ངོ་བོ་ཉིད་དག་ནི་རྣམ་པར་ཤེས་པའི་ཞིང་གི་ངོ་བོར་བསྟན་ལ་ཉེ་བར་ལེན་པ་དང་བཅས་པའི་རྣམ་པར་ཤེས་པ་རང་གི་ས་པའི་སྲེད་པས་སྲེད་པ་དང་བཅས་པ་རྒྱུད་
ཐམས་ཅད་དུ་གཏོགས་པ་ཟད་པར་ནི་ས་བོན་གྱི་ངོ་བོ་ཁོ་ནར་བསྟན་གྱི་ས་བོན་ཉིད་ས་བོན་གྱི་ཞིང་གི་ངོ་བོར་རྣམ་པར་གཞག་པར་གྱུར་པ་མ་ཡིན་ཏེ། འཇིག་རྟེན་ན་ས་བོན་གྱི་ཞིང་གི་ངོ་བོར་རྣམ་པར་འཇོག་པར་བྱེད་པ་ནི་མེད་དོ། །ཆོས་གང་དག་ཅེས་བྱ་བ་རྒྱས་པར་

འབྱུང་བ་ནི་གཟུགས་ལ་སོགས་པའི་ཆོས་གང་དག་རྣམ་པར་ཤེས་པ་དང་ལྷན་ཅིག་འདུག་པ་དེ་དག་ཁོ་ན་ཞིང་གི་ངོ་བོར་ཤིན་ཏུ་ལེགས་པ་ཡིན་ཏེ། ཞིང་ནི་འཇིག་རྟེན་ན་ས་བོན་དང་ལྷན་ཅིག་འདུག་པ་ཡིན་པར་སྣང་ངོ་། །རྣམ་པར་ཤེས་པ་ནི་རྣམ་
པར་ཤེས་པ་དང་ལྷན་ཅིག་འདུག་པ་མ་ཡིན་ཏེ། ཅིག་ཅར་འབྱུང་བ་མེད་པའི་ཕྱིར་རོ། །འོ་ན་ནི་འདས་པ་དང་མ་འོངས་པའི་གཟུགས་ལ་སོགས་པ་རྣམ་པར་ཤེས་པ་གནས་པ་མ་ཡིན་པར་འགྱུར་རོ་ཞེ་ན། འདས་པ་དང་མ་འོངས་པ་དེ་དག་ཀྱང་བདག་ཉིད་ཇི་ལྟ་བ་བཞིན་
དུ་རྣམ་པར་ཤེས་པ་འདས་པ་དང་མ་འོངས་པ་རྣམས་ཀྱི་གནས་པ་ཡིན་ནོ། །དེ་ལྟ་བས་ན་རྣམ་པར་ཤེས་པ་གནས་པ་ནི་རང་གི་ས་པའི་ཟག་པ་དང་བཅས་པའི་གཟུགས་ལ་སོགས་པ་ཐམས་ཅད་ཡིན་པ་ཁོ་ནའོ་ཞེས་བྱ་བ་ཁོང་དུ་ཆུད་པར་བྱའོ། །མུ་དང་པོ་ནི་ཞེས་བྱ་བ་
རྒྱས་པར་འབྱུང་བ་ལ་བདུན་དག་ཏུ་རྣམ་པར་ཤེས་པ་གང་ཡིན་པའོ་ཞེས་བྱ་བ་ནི་རྣམ་པར་ཤེས་པ་གནས་པ་བདུན་ནི་ཕུང་པོ་ལྔའི་རང་བཞིན་ཡིན་པའི་ཕྱིར་དེར་རྣམ་པར་ཤེས་པ་བསྡུས་ཀྱི་བཞི་པོར་ནི་མ་ཡིན་ཏེ། དེར་རྣམ་པར་ཤེས་པ་མ་སྨོས་པའི་ཕྱིར་རོ། །རྣམ་པར་ཤེས་
པ་མ་གཏོགས་པའི་ཕུང་པོ་རྣམས་སོ་ཞེས་བྱ་བ་ནི་ངན་སོང་ལ་སོགས་པ་ན་ཡོད་པའི་རྣམ་པར་ཤེས་པ་ཡང་བཞིར་ཡང་མ་བསྡུས་ལ་བདུན་དུ་ཡང་མ་ཡིན་ཏེ། ངན་སོང་ལ་སོགས་པ་ན་རྣམ་པར་ཤེས་པ་འཇོམས་པར་བྱེད་པས་མ་སྨོས་པའི་ཕྱིར་རོ། །བདུན་དག་ཏུ་ཕུང་པོ་
བཞི་རྣམས་སོ་ཞེས་བྱ་བ་ནི་རྣམ་པར་ཤེས་པ་གནས་པ་བདུན་དག་ཏུ་རྣམ་པར་ཤེས་པ་མ་གཏོགས་པའི་ཕུང་པོ་བཞི་བཤད་པ་གང་དག་ཡིན་པ་དེ་དག་ནི་རྣམ་པར་ཤེས་པ་གནས་པ་བཞིར་ཡང་བསྡུས་པས་གཉི་གར་ཡང་བསྡུས་པ་ཡིན་ཏེ། མུ་གསུམ་པ་ཡིན་ནོ། །བཞི་
པར་རྣམ་པ་དེ་དག་མ་གཏོགས་པའོ་ཞེས་བྱ་བ་ནི་ངན་སོང་རྣམས་དང་། བསམ་གཏན་བཞི་པ་དང་སྲིད་པའི་རྩེ་མོ་ན་ཡོད་པའི་རྣམ་པར་ཤེས་པ་གང་ཡིན་པ་དང་། ཟག་པ་མེད་པའི་ཆོས་རྣམས་སོ། །འགྲོ་བ་ལ་སོགས་པའི་བྱེ་བྲག་གིས་ཐ་དད་པ་ཞེས་བྱ་བ་ལ་སོགས་

པ་ཞེས་བྱ་བའི་སྒྲས་ནི་སྣོད་དང་སྲིད་པ་བར་མ་དང་ས་ལ་སོགས་པ་བསྡུའོ། །མངལ་ནི་གང་གིས་མའི་ལྟོར་བུ་དཀྲིས་ཤིང་འདུག་པའོ། །དེ་ལས་སྐྱེས་པ་ནི་མངལ་ནས་སྐྱེ་བ་ཡིན་ནོ། །འབྱུང་བའི་དྲོད་གཤེར་ལས་སྐྱེ་བ་ཞེས་བྱ་བ་ནི་ས་ལ་སོགས་པ་འབྱུང་བ་རྣམས་ཀྱི་
དྲོད་གཤེར་ཏེ། བརླན་པའི་མཚན་ཉིད་ལས་སྐྱེས་པ་ནི་འབྱུང་བའི་དྲོད་གཤེར་ལས་སྐྱེས་པ་རྣམས་ཡིན་ནོ། །དབང་པོ་མ་ཚང་བ་མ་ཡིན་པ་ནི་མིག་གི་དབང་པོ་ལ་སོགས་པ་མ་ཚང་བ་མེད་པའི་ཕྱིར་རོ། །དམན་པ་མ་ཡིན་པ་ནི་ཞར་བ་དང་ཡོ་བ་ལ་སོགས་པ་མེད་པའི་
ཕྱིར་རོ། །ཡན་ལག་ཐམས་ཅད་དང་ལྡན་པ་ནི་ལག་པ་དང་རྐང་པ་ལ་སོགས་པ་དང་ངོ་། །ཉིང་ལག་ཐམས་ཅད་དང་ལྡན་པ་ནི་སོར་མོ་ལ་སོགས་པ་དང་ངོ་། །ཅིག་ཅར་དུ་སྐྱེ་བ་ནི་སྒོ་ང་ལས་སྐྱེ་བ་ལ་སོགས་པ་བཞིན་དུ་ནུར་ནུར་པོ་ལ་སོགས་པའི་རིམ་གྱིས་མ་ཡིན་པའོ། །
སྐྱེ་ཞིང་འབྱུང་བ་ལ་མཛེས་པར་བྱེད་པའི་ཕྱིར་ཏེ། ཁུ་ཆུ་དང་ཁྲག་ལ་སོགས་པ་རྒྱུར་མ་བྱས་པར་ཅིག་ཅར་དུ་སྐྱེས་པའི་ཕྱིར་རྫུས་ཏེ་སྐྱེ་བ་རྣམས་ཞེས་བྱའོ། །ཁྲུང་ཁྲུང་མོ་ལས་སྐྱེས་པ་ཞེས་བྱ་བ་རྒྱས་པར་འབྱུང་བ་ནི་ཚོང་པ་གྲུ་ཆག་པ་དག་ཅིག་རྒྱ་མཚོའི་ངོགས་
སུ་ཁྲུང་ཁྲུང་མོ་དང་འདུས་པ་ལས་དེ་ལས་བཙས་པ་གནས་བརྟན་བྲག་དང་ཉེ་བྲག་ཅེས་བྱ་བ་ཡིན་ནོ་ཞེས་གྲག་གོ། །རྒྱལ་པོ་ལྔ་ལེན་གྱི་ཞེས་བྱ་བ་ནི་དེའི་བཙུན་མོ་ཆེན་མོ་ལས་སྒོ་ང་ལྔ་བརྒྱ་བྱུང་བ་དང་། རྒྱལ་པོ་དེས་སྒྲམ་གྱི་ནང་དུ་བཅུག་སྟེ་ཆུ་བོ་གང་གཱ་ལ་བསྐུར་བ་
དང་། ལི་ཙྪ་བཱིའི་རྒྱལ་པོ་བཙུན་མོ་དང་བཅས་ཏེ་ཁྲུས་བྱེད་པས་སྒྲམ་ཆུས་ཁྱེར་བ་མཐོང་སྟེ། ཕྱེ་བ་དང་དེའི་ནང་ན་བུ་ལྔ་བརྒྱ་འདུག་པ་མཐོང་ནས་བླངས་སོ་ཞེས་བྱ་བ་ཡིན་ནོ། །ང་ལས་ནུ་ལ་སོགས་པ་ནི་དྲོད་གཤེར་ལས་སྐྱེས་པ་ཡིན་ནོ། །ཇི་ལྟ་ཞེ་ན་རྒྱལ་པོ་བསྙེན་
གནས་པའི་སྤྱི་བོ་ནས་འབུར་འབུར་པོ་ཞིག་སྐྱེས་པ་དེ་རིམ་གྱིས་སྐྱེས་ཤིང་རིམ་གྱིས་སྨིན་ཅིང་རིམ་གྱིས་རྡོལ་བ་ལས་བུ་ཅིག་སྐྱེས་པ་དེ་ང་ལས་ནུ་ཞེས་བྱ་བ་སྟེ་དྲོད་གཤེར་ལས་སྐྱེ་བ་ཡིན་ནོ། །རྒྱལ་པོ་ང་ལས་ནུའི་པུས་མོ་གཉིས་ཀྱི་སྟེང་ནས་ཀྱང་འབུར་འབུར་པོ་ཞིག་སྐྱེས་ཏེ།

དེ་གཉིས་རིམ་གྱིས་སྐྱེ་བ་ལ་སོགས་པ་ལས་བྱུང་བ་ནི་མཛེས་པ་དང་ཉེ་མཛེས་ཞེས་བྱ་བ་དེ་གཉིས་ཡིན་ནོ་ཞེས་གྲག་གོ། །རྒྱལ་པོ་ཚངས་པ་བྱིན་གྱི་བྲང་ནས་འབུར་འབུར་པོ་ཞིག་སྐྱེས་པ་དེ་སྔ་མ་བཞིན་དུ་རིམ་གྱིས་འཕེལ་བ་ལ་སོགས་པ་ལས་བུ་མོ་
བྱུང་བ་དེ་ནི་ཐི་བའི་ཕྲེང་ཅན་མ་ཞེས་བྱའོ་ཞེས་གྲག་གོ། །ཨ་མྲ་སྐྱོང་མ་ཡང་ཆུ་ཤིང་གི་སྡོང་པོ་ལས་སྐྱེས་སོ་ཞེས་གྲག་གོ། །བསྐལ་པ་དང་པོ་པ་རྣམས་ཞེས་བྱ་བ་ནི། སྔར་བྱུང་སེམས་ཅན་གཟུགས་ཅན་བཞིན། །ཞེས་འབྱུང་བའི་ཕྱིར་རོ། །འདབ་བཟངས་ནི་ནམ་
མཁའ་ལྡིང་ངོ་། །ཡི་དགས་རྣམས་མངལ་ནས་སྐྱེ་བ་ཉིད་ཡིན་པར་གྲུབ་པར་བྱ་བའི་ཕྱིར་ཚེ་དང་ལྡན་པ་ཞེས་བྱ་བ་རྒྱས་པར་སྨྲས་སོ་མངལ་ནས་སྐྱེ་བ་ཉིད་ཡིན་པར་གྲུབ་པར་བྱ་བ་ཡིན་པར་ཅི་མངོན་ཞེ་ན། མཚན་མོ་བུ་ལྔ་སྐྱེས་ནས་ཞེས་འབྱུང་བའི་ཕྱིར་རོ། །བདག་གིས་
མཚན་མོ་བུ་ལྔ་དང་། །དེ་བཞིན་ཉིན་མོ་གཞན་ལྔ་དག །བསྐྱེད་ནས་དེ་དག་ཟོས་མོད་ཀྱི། །འོན་ཀྱང་བདག་ནི་ཚིམ་པ་མེད། །ཅེས་འབྱུང་བའི་ཕྱིར་ཆེས་རྫུས་ཏེ་སྐྱེ་བ་ཉིད་ཡིན་པར་གྲུབ་པར་བྱ་བ་མ་ཡིན་ནམ་མངལ་ནས་སྐྱེས་པ་དག་ཟོས་པས་ནི་ཚིམ་པར་འགྱུར་རོ་
ཞེ་ན། མངལ་ནས་སྐྱེ་བ་ཉིད་ཡིན་པར་གྲུབ་པར་བྱ་བ་ཁོ་ན་ཡིན་གྱི། རྫུས་ཏེ་སྐྱེ་བ་ཡིན་པར་གྲུབ་པར་བྱ་བ་ནི་མ་ཡིན་ནོ། །མཚན་མོ་ཡང་ལྔ་ཅིག་ཅར་འབྱུང་ལ། ཉིན་མོ་ཡང་གཞན་ལྔ་འབྱུང་བ་ལ་འགལ་བ་དག་མེད་དེ་དུས་དེ་ཙམ་གྱིས་ལུས་ཡོངས་སུ་བརྟས་པར་འགྱུར་
རོ། །རིམ་གྱིས་མཚན་མོ་ཡང་ལྔ་ཉིན་མོ་ཡང་ལྔ་བསྐྱེད་པ་ལ་འགལ་བ་མེད་དེ། སེམས་ཅན་གྱི་རིགས་དེ་དེ་འདྲ་ཞིང་ལས་རྣམས་ཀྱི་རྣམ་པར་སྨིན་པ་ཡང་བསམ་གྱིས་མི་ཁྱབ་པས་སོ། །བཀྲེས་པ་ཤས་ཆེ་ཆེས་པའི་ཉེས་པས་ནི་ཚིམ་པ་མེད་དོ། །སྐྱེ་བ་ལ་དབང་
ཐོབ་པ་ཞེས་བྱ་བ་འདིས་ནི་མངལ་ནས་སྐྱེ་བའི་སྐྱེ་བར་ལས་ཀྱི་ནན་གྱིས་མནན་པ་མི་རུང་བར་སྟོན་པར་བྱེད་དོ། །གཞན་མུ་སྟེགས་ཁ་ཟེར་བ་ཞེས་བྱ་བ་ལ་གཞན་མུ་སྟེགས་དག་ནི་མ་སྐ་རི་ལ་སོགས་པ་སྟེ། གཅེར་བུའི་བསྟན་བཅོས་ལས་ཇི་སྐད་དུ་བཙུན་པ་སུ་ཞིག་རྫུ་

འཕྲུལ་སྟོན་པར་བགྱིད་ལགས། སྒྱུ་མ་མཁན་གཽ་ཏ་མ་ཡིན་ནོ་ཞེས་འབྱུང་བ་དང་། དེ་བཞིན་དུ་བཅོམ་ལྡན་འདས་ཁོ་ན་ལ་གཞན་དུ་བསྐལ་པ་བརྒྱ་འདས་ནས། སྒྱུ་མ་མཁན་འདི་ལྟ་བུ་འཇིག་རྟེན་དུ་བྱུང་ནས་སྒྱུ་མས་འཇིག་རྟེན་ཟའོ་ཞེས་ཟེར་བ་འབྱུང་སྟེ་ཉེ་བར་འཚོའོ་
ཞེས་བྱ་བའི་ཐ་ཚིག་གོ། །ཕྱིའི་ས་བོན་མེད་པའི་ཕྱིར་ཞེས་བྱ་བ་ནི་ཕྱིའི་ཁུ་ཆུ་དང་ཁྲག་གི་འདམ་རྫབ་ལ་སོགས་པ་མེད་པའི་ཕྱིར་ཞེས་བྱ་བའི་ཐ་ཚིག་གོ། །བྱིན་གྱིས་བརླབས་པས་བྱུང་བ་ཞེས་བྱ་བ་ནི་འདི་འདི་ལྟར་གྱུར་ཅིག་ཅེས་བྱིན་གྱིས་རློབ་པ་གང་ཡིན་པ་དེ་ནི་བྱིན་གྱིས་
བརླབ་པའོ། །འདི་ལ་དགོས་པ་དེ་ཡོད་པའམ་དེ་ལས་བྱུང་བའི་རྫུ་འཕྲུལ་ནི་བྱིན་གྱི་རླབས་ལས་བྱུང་བ་སྟེ། དེ་ཡིན་པར་འདོད་པའི་སངས་རྒྱས་པ་རྣམས་ལ་ནི་ལན་དེ་རིགས་པ་མ་ཡིན་ནོ། །གང་ཞིག་ཅེ་ན། རིང་བསྲེལ་སྐུ་གདུང་རྣམས་གཞག་པའི་ཕྱིར་ཞེས་བཤད་པ་གང་
ཡིན་པའོ། །དྲི་བ་ལས་དྲི་བ་གཞན་འབྱུང་སྟེ་ཞེས་བྱ་བ་ནི་འོ་ན་ཅིའི་ཕྱིར་སྲིད་པ་ཐ་མ་པའི་བྱང་ཆུབ་སེམས་དཔའ་ཞེས་བྱ་བ་དྲི་བ་རྒྱས་པར་སྨོས་ལ་དེ་ཡང་རིང་བསྲེལ་སྐུ་གདུང་རྣམས་གཞག་པའི་ཕྱིར་ཞེས་བྱ་བ་རྒྱས་པར་བཤད་པའི་དྲི་བ་དེ་ལས་དྲི་བ་གཞན་གལ་ཏེ་རྫུས་ཏེ་སྐྱེ་བ་
རྣམས་ཞེས་བྱ་བ་རྒྱས་པ་འདི་འབྱུང་ངོ་། །ལུས་ཞིག་པ་ནི་ཤི་བའི་ལུས་སོ། །རྫུས་ཏེ་སྐྱེ་བའི་ནམ་མཁའ་ལྡིང་གིས་རྫུས་ཏེ་སྐྱེ་བའི་ཀླུ་ཞེས་བྱ་བ་ཁྱད་པར་གཉིས་ཅིའི་ཕྱིར་སྨོས། ཅི་རྫུས་ཏེ་སྐྱེ་བ་མ་ཡིན་པའི་ནམ་མཁའ་ལྡིང་དང་། ཀླུ་དག་ཀྱང་ཡོད་དམ་ཞེ་ན་སྨྲས་པ་ཡོད་དེ།
ནམ་མཁའ་ལྡིང་དང་ཀླུ་རྣམས་ནི་སྒོ་ང་ལས་སྐྱེས་པ་ལ་སོགས་པའི་བྱེ་བྲག་གིས་རྣམ་པ་བཞིའོ། །དེ་དག་གི་ནང་ན་རྫུས་ཏེ་སྐྱེ་བ་རྣམས་ནི་རབ་ཡིན་ནོ། །དྲོད་གཤེར་ལས་སྐྱེ་བ་རྣམས་ནི་རབ་འོག་ཡིན་ནོ། །མངལ་ནས་སྐྱེ་བ་རྣམས་ནི་འབྲིང་ཡིན་ནོ། །སྒོ་ང་ལས་སྐྱེ་བ་རྣམས་ནི་
ཐ་མ་ཡིན་ནོ། །དེ་ལ་ནམ་མཁའ་ལྡིང་རྫུས་ཏེ་སྐྱེ་བས་ནི་རྫུས་ཏེ་སྐྱེ་བ་ལ་སོགས་པ་ཐམས་ཅད་བཟའ་བའི་ཕྱིར་འབྱིན་ཏོ། །དྲོད་གཤེར་ལས་སྐྱེ་བས་ནི་དྲོད་གཤེར་ལས་སྐྱེ་བ་ལ་སོགས་པ་གསུམ་མོ། །མངལ་ནས་སྐྱེ་བས་ནི་མངལ་ནས་སྐྱེ་བ་དང་སྒོ་ང་ལས་སྐྱེ་བ་དང་གཉིས་

སོ། །སྒོ་ང་ལས་སྐྱེ་བ་ནི་སྒོ་ང་ལས་སྐྱེ་བ་ཁོ་ནའོ་ཞེས་བརྗོད་དོ། །ཇི་སྲིད་མ་ཤི་བའི་བར་དུ་ཞེས་བྱ་བ་ནི་ཇི་སྲིད་གསོན་པ་དེ་སྲིད་དུ་དེའི་ཤ་ལ་སོགས་པ་མི་སྣང་བར་མི་འགྱུར་རོ་ཞེས་སྟོན་པ་ཡིན་ནོ། །ཤི་བ་དེས་ཚིམ་པར་འགྱུར་བ་ནི་མ་ཡིན་ནོ་ཞེས་བྱ་བ་ནི་ཤི་
ཟིན་པ་དེས་ཚིམ་པར་མི་འགྱུར་རོ་ཞེས་བྱ་བའི་ཐ་ཚིག་གོ། །ཤའི་གོང་བུ་མི་སྣང་བར་འགྱུར་བའི་ཕྱིར་ཤི་བ་ནམ་མཁའ་དང་འདྲ་བ་ཟོས་པ་དེས་དེ་ཚིམ་པར་མི་འགྱུར་རོ་ཞེས་བྱ་བར་ཁོང་དུ་ཆུད་པར་བྱའོ། །དེས་ནི་འགྲོ་བ་གཉིས་ཞེས་བྱ་བ་ནི་དམྱལ་བའི་འགྲོ་བ་དང་ལྷའི་
འགྲོ་བའོ། །གསུམ་གྱི་ཕྱོགས་ཞེས་བྱ་བ་ནི་དུད་འགྲོ་དང་། ཡི་དགས་དང་། མིའི་འགྲོ་བ་རྣམས་ཀྱིའོ། །འགྲོ་བ་བར་མ་ཡིན་པའི་ཕྱིར་རོ་ཞེས་བྱ་བ་ནི་འགྲོ་བ་གཉིས་ཀྱི་བར་མ་ཡིན་པའི་ཕྱིར་རོ། །འགྲོ་བ་གོ་ལུང་དུ་མ་བསྟན་པ་ཁོ་ན་ཡིན་པར་འདོད་པ་མ་ཡིན་ནམ། སྐྱེ་
བའི་སྲིད་པ་ནི་གཅིག་ཏུ་ཉོན་མོངས་པ་ཅན་ཡིན་ལ། འཆི་བའི་སྲིད་པ་ཡང་རེས་འགའ་དགེ་བའམ་ཉོན་མོངས་པ་ཅན་དུ་འགྱུར་ཏེ། འགྲོ་བ་མ་ཡིན་ན་ཇི་ལྟར་དེ་གཉིས་ལ་འགྲོ་བ་ཞེས་བྱ་བའི་སྒྲར་བཏགས་ནས་འགྲོ་བའི་བར་མ་ཡིན་ནོ་ཞེས་བྱ་ཞེ་ན། འདི་ནི་ཉེས་པ་
མེད་དེ། དེའི་ཚེ་འཆི་བ་དང་སྐྱེ་བ་དག་གི་སྲིད་པ་དག་ནི་མ་བསྒྲིབས་ལ་ལུང་དུ་མ་བསྟན་པ་རིས་མཐུན་པ་དང་སྲོག་གི་དབང་པོ་དང་སྐྱེ་བ་ལ་སོགས་པ་འགྲོ་བའི་ངོ་བོ་ཉིད་དག་ཀྱང་ཡོད་པའི་ཕྱིར་ལ་འདོད་པ་དང་གཟུགས་ཀྱི་ཁམས་ན་ནི་ལུས་ཀྱི་དབང་པོ་ཡང་གདོན་མི་ཟ་
བར་ཡོད་པའི་ཕྱིར་རོ། །འཆི་བའི་སྲིད་པ་ཡང་སྐྱེ་བའི་སྲིད་པ་བཞིན་དུ་ཉོན་མོངས་པ་ཅན་དུ་ངེས་པ་ཡང་མ་ཡིན་ལ། དགེ་བར་ངེས་པ་ཡང་མ་ཡིན་ཏེ། དེ་ལྟ་བས་ན་དེ་དག་ལ་འགྲོ་བ་ཞེས་བྱ་བའི་སྒྲར་བཏགས་ནས་འགྲོ་བའི་བར་མ་ཡིན་པའི་ཕྱིར་རོ་ཞེས་བཤད་དོ། །སྲིད་
པ་བར་མ་བྱུང་བ་མིན། །འོ་ན་ཅི་ཞེ་ན། འབྱུང་བ་ཞེས་བྱའོ། །མངོན་ཞིང་རྫོགས་པའོ་ཞེས་བྱ་བ་ནི་འཕེན་པར་བྱེད་པའི་ལས་ཀྱིས་ནི་རིས་མཐུན་པ་མངོན་ལ་རྫོགས་པར་བྱེད་པ་དག་གིས་ནི་རྫོགས་པ་ཡིན་ཏེ། སྐྱེ་བ་གཅིག་ནི་གཅིག་གིས་འཕེན། །རྫོགས་པར་བྱེད་

པ་དུ་མ་ཡིན། །ཞེས་འབྱུང་བས་སྐྱེ་བ་ཐམས་ཅད་ལ་ལས་གཉིས་བྱ་བ་བྱེད་པའི་ཕྱིར་རོ། །ཡུལ་གང་དུ་མིང་དང་གཟུགས་ལས་ཀྱིས་ཇི་ལྟར་འཕངས་པ་བཞིན་འབྱུང་ཞིང་མངོན་ལ་སྐྱེ་མཆེད་དྲུག་ཚང་ཞིང་རྫོགས་པ་དེ་ནི་བགྲོད་པར་བྱ་བའི་ཡུལ་ཡིན་ནོ། །འབྲུ་ཡི་རྒྱུན་
དང་ཆོས་མཐུན་ཕྱིར། །ཞེས་བྱ་བ་རྒྱས་པར་འབྱུང་བ་ལ་འབྲེལ་ཞིང་འཕེལ་བ་ནི་རྒྱུན་ཏོ། །འབྲུའི་རྒྱུན་ནི་འབྲུའི་རྒྱུན་ཏེ། དེ་དང་ཆོས་མཐུན་པའི་ཕྱིར་སྲིད་པ་ཆད་པ་ལས་བྱུང་བ་མ་ཡིན་ནོ། །སྐྱེ་བའི་སྲིད་པའི་གཟུགས་ནི་གང་དང་འབྲལ་བ་དང་གང་དུ་འབྱུང་བ་དེ་
དག་གི་བར་མའི་རྒྱུན་ལ་ཡོད་པའི་གཟུགས་སྔོན་དུ་འགྲོ་བ་ཅན་ཡིན་ཏེ། རང་གི་ཉེ་བར་ལེན་པ་གཟུགས་ཀྱི་རྒྱུན་གྱི་ངོ་བོའི་ངོ་བོ་ཉིད་ཅན་ཡིན་པའི་ཕྱིར། འབྲུའི་རྒྱུན་ཕྱིས་འབྱུང་བའི་གཟུགས་ལྟ་བུའོ། །རྒྱུན་གྱིས་འབྱུང་བའི་ཆོས་རྣམས་ནི་རྒྱུན་མི་འཆད་པར་ཡུལ་
གཞན་དུ་འབྱུང་བའི་སྒོ་ནས་ཡུལ་གཞན་དག་ཏུ་འབྱུང་བ་མཐོང་སྟེ། དཔེར་ན་འབྲུའི་རྒྱུན་ལྟ་བུའོ། །འབྲུའི་རྒྱུན་ཕྱིས་འབྱུང་བའི་གཟུགས་ནི་ཡུལ་གཞན་གང་དང་འབྲལ་བ་དང་ཡུལ་གཞན་གང་དུ་འབྱུང་བ་དེ་དག་གི་བར་མའི་རྒྱུན་ལ་ཡོད་པའི་གཟུགས་སྔོན་དུ་འགྲོ་
བ་ཅན་དུ་འབྱུང་སྟེ། འདི་ནི་ཁོ་བོ་ཅག་སྐད་ཅིག་མར་སྨྲ་བ་རྣམས་ཀྱི་གྲུབ་པའི་མཐའ་ཡིན་ནོ། །གང་གི་ཚེ་འབྲུ་གྲོང་ནས་གྲོང་གཞན་དུ་ཁྱེར་བ་ན་འབྲུ་དེ་གྲོང་སྔ་མར་འགགས་ནས་གྲོང་དེ་གཉིས་ཀྱི་བར་དུ་མི་འབྱུང་བར་དཔག་ཚད་དུ་མས་བཅད་པའི་གྲོང་གཞན་དུ་འབྱུང་བ་ནི་
མ་ཡིན་ནོ། །འོ་ན་ཅི་ཞེ་ན། ནམ་མཁའི་ཕྱོགས་སུ་སྐྱེ་བ་དང་འགག་པ་བར་མ་པའི་རིམ་གྱིས་གྲོང་གཞན་དུ་འབྱུང་ལ། དེ་ཡང་རང་གི་ཉེ་བར་ལེན་པ་གཟུགས་ཀྱི་རྒྱུན་གྱི་ངོ་བོའི་ངོ་བོ་ཉིད་ཅན་ཡིན་པ་ལྟར་སྐྱེ་བའི་སྲིད་པའི་ངོ་བོ་ཡང་དེ་དང་འདྲ་བར་འབྱུང་ངོ་། །འདི་
ལ་སློབ་དཔོན་ཡོན་ཏན་བློ་གྲོས་ནི་སློབ་མ་སློབ་དཔོན་དབྱིག་བཤེས་དང་བཅས་ཏེ། རང་གི་སྡེ་པ་ལ་བློ་ཞེན་ཅིང་གོམས་པས་རྣམ་པར་འཆད་པའི་ལས་བཏང་སྟེ་རྒོལ་བ་ལྷུར་ལེན་པ་འབའ་ཞིག་ལ་འཇུག་གོ། །བདག་ནི་འདི་ལ་བསྟན་བཅོས་ཀྱི་དོན་དཔྱད་པ་འབའ་ཞིག་ལ་

འབད་ཀྱི་ཆེད་མི་ཆེ་བའི་ཕྱིར་དང་། ཚིག་མངས་སུ་དོགས་པའི་ཕྱིར་དེ་སུན་འབྱིན་པ་ལ་ནི་མ་ཡིན་ནོ། །ཚུལ་ཅན་ནི་ངང་ཚུལ་ཅན་ནོ། །ཆད་ནས་འབྱུང་བ་ཡང་ཞེས་བྱ་བ་རྒྱས་པར་འབྱུང་བ་ལ་མེ་ལོང་ལ་སོགས་པ་དག་གི་ནང་དུ་གཟུགས་ལས་
གཟུགས་བརྙན་ལྟ་བུའོ་ཞེས་བྱ་བ་ནི་མེ་ལོང་ལ་སོགས་པའི་ནང་དུ་གཟུགས་གདོང་ལས་གཟུགས་བརྙན་གདོང་འདྲ་བའི་ངོ་བོ་ཆད་ནས་འབྱུང་བ་མཐོང་སྟེ། འདིས་ནི་མ་ངེས་པ་ཉིད་དུ་སྟོན་པར་བྱེད་དོ། །ཡང་ན་ཕྱིར་སྒྲུབ་པར་བྱེད་པ་ཡིན་ཏེ། སྐྱེ་བ་སྲིད་པའི་གཟུགས་ནི་གང་
དང་འབྲེལ་བ་དང་། གང་དུ་འབྱུང་བ་དེ་དག་གི་བར་མའི་རྒྱུན་ལ་ཡོད་པའི་གཟུགས་སྔོན་དུ་འགྲོ་བ་ཅན་མ་ཡིན་ཏེ། རང་གི་ཉེ་བར་ལེན་པ་གཟུགས་ཀྱི་རྒྱུན་གྱི་ངོ་བོའི་ངོ་བོ་ཉིད་ཅན་ཡིན་པའི་ཕྱིར་གཟུགས་བརྙན་གྱི་གཟུགས་ལྟ་བུའོ་ཞེས་བྱ་བ་ཡིན་ནོ། །གཟུགས་བརྙན་
ཞེས་བྱ་བ་ཁ་དོག་གི་ཁྱད་པར་གཞན་ཁོ་ན་ཞིག་འབྱུང་ངོ་ཞེས་བྱ་བ་དེ་ནི་མ་གྲུབ་པ་ཞེས་བྱ་བ་ལ། སློབ་དཔོན་གྱི་དགོངས་པ་ནི་མེ་ལོང་ལ་སོགས་པ་དེ་ལ་གཟུགས་ཀྱི་མཐུ་ཁོ་ནས་འཁྲུལ་པའི་ཤེས་པ་གཟུགས་བརྙན་གྱི་རྣམ་པ་ཅན་སྐྱེའི་དེ་ལ་གཟུགས་བརྙན་ཞེས་བྱ་བ་ནི་
ཆུང་ཟད་ཀྱང་མེད་དོ་སྙམ་པ་ཡིན་ཏེ། འདིས་ནི་དཔེའི་སྐྱོན་ཆོས་ཅན་མ་གྲུབ་པ་ཞེས་བྱ་བ་སྟོན་པར་བྱེད་དོ། །དེ་ལྟ་བས་ན་མ་ངེས་པ་ཉིད་ཀྱང་མེད་ལ་ཕྱིར་བསྒྲུབ་པ་དེ་ཡང་བཟང་པོ་མ་ཡིན་ནོ། །གྲུབ་ཏུ་ཟིན་ཀྱང་མི་འདྲ་བའི་ཕྱིར་དཔེ་མ་ཡིན་ནོ་ཞེས་བྱ་བ་ནི་གཟུགས་བརྙན་
རྫས་སུ་ཡོད་པ་ཉིད་དུ་གྲུབ་ཏུ་ཟིན་ཀྱང་དངོས་དང་མི་འདྲ་བའི་ཕྱིར་དཔེ་མ་ཡིན་ཏེ། དཔེར་བརྗོད་དུ་མི་རུང་ངོ་། །རེ་ཞིག་ཇི་ལྟར་ན་མ་གྲུབ་ཅེ་ན་ཞེས་བྱ་བ་ལ། རེ་ཞིག་ཅེས་བྱ་བའི་སྒྲ་ནི་རིམ་མོ། །རེ་ཞིག་མ་གྲུབ་པ་ཉིད་ཀྱི་རིགས་པ་བསྟན་པའི་ཕྱིར། གཅིག་ན་ལྷན་ཅིག་
གཉིས་མེད་ཕྱིར། །ཞེས་བྱ་བ་རྒྱས་པར་སྨོས་ཏེ། མེ་ལོང་གི་ཡུལ་དེ་ཉིད་ན་བློ་ན་འདུག་པས་ནི་མེ་ལོང་གི་གཟུགས་མཐོང་གི་གཟུགས་བརྙན་མ་ཡིན་ལ་དེ་ཉིད་ན་མདུན་ན་འདུག་པས་ནི་གཟུགས་བརྙན་མཐོང་གི་མེ་ལོང་གི་གཟུགས་མ་ཡིན་ཏེ། ཡུལ་གཅིག་ན་རྒྱུར་བྱས་

པའི་གཟུགས་གཉིས་ལྷན་ཅིག་འདུག་པ་མེད་དོ། །ཅིའི་ཕྱིར་ཞེ་ན་རྟེན་གྱི་འབྱུང་བ་ཐ་དད་པའི་ཕྱིར་རོ། །དེ་གཉིས་ཀྱིས་རྟེན་གྱི་འབྱུང་བ་རྣམས་ཐ་དད་པས་མེ་ལོང་གི་གཟུགས་བརྙན་གྱི་རྟེན་གྱི་འབྱུང་བ་རྣམས་ཀྱིས་ནོན་པའི་ཡུལ་དེར་གཟུགས་བརྙན་གྱི་གཟུགས་ཀྱི་རྟེན་གྱི་
འབྱུང་བ་རྣམས་ཀྱི་གོ་སྐབས་མེད་དེ། དེའི་ཕྱིར་རྒྱུར་བྱས་པའི་གཟུགས་གཉིས་འབྱུང་བ་མེད་དོ། །དེ་ལྟ་བས་ན་དེ་ལྟར་རྣམ་པར་ཤེས་པ་ཅིག་ཅར་མེད་པའི་ཕྱིར་དང་། རྒྱུར་བྱས་པའི་གཟུགས་གཉིས་ཀྱང་གཅིག་ཏུ་འབྱུང་བ་མེད་པའི་ཕྱིར་དེ་ནི་ཅུང་ཟད་ཀྱང་མེད་དོ་ཞེས་
བྱ་བར་སྟོན་ཏོ། །གལ་ཏེ་ཡུལ་གང་ན་མེ་ལོང་གི་གཟུགས་སྣང་བ་དེ་ཉིད་ན་གཟུགས་བརྙན་ཡང་སྣང་གི་གཞན་ན་ནི་མ་ཡིན་ན་ཉེས་པ་ཅི་ཡོད་ཅེ་ན་སྨྲས་པ། གཅིག་ན་གཟུགས་གཉིས་ལྷན་ཅིག་འབྱུང་བ་ནི་མེད་དོ་ཞེས་སྔ་མ་བཞིན་དུ་བརྗོད་པར་བྱའོ། །རྣམ་པ་གཅིག་ཏུ་
ན། གཅིག་ན་ལྷན་ཅིག་གཉིས་མེད་ཕྱིར། །ཞེས་བྱ་བའི་མདོའི་དོན་ནི་འདི་ཡིན་ཏེ། གཟུགས་གཅིག་ལ་ལྟ་བ་པོ་སྐྱེས་བུ་གཉིས་ཀྱིས་ལྷན་ཅིག་མཐོང་བ་མེད་པའི་ཕྱིར་གཟུགས་བརྙན་མ་གྲུབ་པའོ་ཞེས་བྱ་བར་ཚིག་ཁོང་ནས་དྲང་ངོ་། །ཇི་ལྟ་ཞེ་ན། སྨྲས་པ་ཕྱོགས་ཐ་
དད་པ་ན་གནས་པ་སྟེ། ཁ་ཅིག་བྱང་ཕྱོགས་ན་གནས་པ་རྣམས་དང་། ཁ་ཅིག་ལྷོ་ཕྱོགས་ན་གནས་པའི་མི་རྣམས་ཀྱིས་མཚེའུའི་ཆུའི་ཡུལ་གཅིག་ན་སྟེ། མཚེའུའི་ནང་གི་ཕྱོགས་གཅིག་ན་རང་གི་མདུན་རོལ་གྱི་ཡུལ་ན་གནས་པའི་གཟུགས་ལྷོ་ཕྱོགས་ཀྱི་ངོགས་ཀྱི་ཁ་ན་
འདུག་པའི་གཟུགས་རྣམས་ནི་བྱང་ཕྱོགས་ཀྱི་ངོགས་ན་འདུག་པའི་སྐྱེས་བུའི་རང་གི་མདུན་རོལ་ན་གནས་པ་ཡིན་ལ། བྱང་ཕྱོགས་ཀྱི་ངོགས་ཀྱི་ཁ་ན་འདུག་པའི་གཟུགས་རྣམས་ཀྱང་ལྷོ་ཕྱོགས་ན་འདུག་པའི་སྐྱེས་བུའི་རང་གི་མདུན་རོལ་ན་གནས་པ་ཡིན་ཏེ་དེ་རྣམས་ཀྱིའོ། །
ཅི་ཞེ་ན། གཟུགས་བརྙན་ཕན་ཚུན་དམིགས་ཏེ་ཚིག་གི་དོན་ནི་བྱང་ཕྱོགས་ན་འདུག་པ་རྣམས་ཀྱིས་ཀྱང་ལྷོ་ཕྱོགས་ཀྱི་ངོགས་ཀྱི་གཏིང་ན་གཟུགས་བརྙན་དམིགས་ལ་ལྷོ་ཕྱོགས་ན་འདུག་པ་རྣམས་ཀྱིས་ཀྱང་བྱང་ཕྱོགས་ཀྱི་ངོགས་ཀྱི་གཏིང་ན་གཟུགས་བརྙན་དམིགས་ཀྱི། གཉི་

གཅིག་ཅར་དམིགས་པ་ནི་མ་ཡིན་ནོ་ཞེས་བྱ་བ་ཡིན་ཏེ། རང་རོལ་གྱི་ངོགས་ཀྱི་གཏིང་གི་གཟུགས་བརྙན་ནི་ངོགས་དེ་ན་འདུག་པ་མཚེའུའི་ཆུ་རིལ་གྱིས་མཐོང་བ་རྣམས་ཀྱིས་ཀྱང་མི་དམིགས་སོ། །གལ་ཏེ་དེས་ན་ཅི་ཞེ་ན། དེའི་ཕྱིར་སྨྲས་པ། བུམ་
པའམ་རས་ཡུག་གི་གཟུགས་གཅིག་ལ་ལྟ་བ་པོ་སྐྱེས་བུ་གཉིས་ཀྱིས་ལྷན་ཅིག་མི་མཐོང་བ་ནི་མ་ཡིན་ཏེ། མཐོང་བ་ཁོ་ནའོ་ཞེས་བྱ་བའི་ཐ་ཚིག་གོ། །འདིར་ནི་ལྷན་ཅིག་མཐོང་བ་མ་ཡིན་ཏེ། དེའི་ཕྱིར་དེར་གཟུགས་གཞན་ཞིག་འབྱུང་བར་ནི་རིགས་པ་མ་ཡིན་
ནོ། །རྣམ་པ་གཅིག་ཏུ་ན་འདིའི་དོན་ནི་འདི་ཡིན་ཏེ། འཇིག་རྟེན་ན་གྲིབ་མ་དང་ཉི་མ་གཉིས་ཀྱང་ལྷན་ཅིག་འབྱུང་བ་མ་མཐོང་སྟེ། འདུན་ཁང་ངམ་གཞན་ན་ཡང་རུང་གང་ན་གྲིབ་མ་ཡོད་པ་དེ་ན་ཉི་མ་མེད་ལ། བླ་གབ་མེད་པ་གང་ན་ཉི་མ་ཡོད་པ་དེ་ན་གྲིབ་མ་
མེད་ན། གྲིབ་མ་ན་འདུག་པའི་མེ་ལོང་གི་ནང་ན་ཉི་མའི་གཟུགས་བརྙན་ཡང་དམིགས་སོ། །ཇི་ལྟ་ཞེ་ན། མཚེའུའི་ནང་དུ་ནི་ཉི་མའི་གཟུགས་བརྙན་ཡང་འབྱུང་ལ། མཚེའུ་དེའི་ངོགས་ན་ཡོད་པའི་འདུན་ཁང་གྲིབ་མ་ཅན་གྱི་ནང་དུ་མེ་ལོང་ཞིག་བཞག་ན་
མེ་ལོང་དེའི་ནང་དུ་ཉི་མའི་གཟུགས་བརྙན་མཚེའུ་ན་འདུག་པ་དེའི་གཟུགས་བརྙན་གཞན་ཞིག་ཀྱང་འབྱུང་བར་འགྱུར་རོ། །མཚེའུའི་ནང་གི་ཉི་མའི་གཟུགས་བརྙན་གང་ཡིན་པ་དེ་ཡང་ཉི་མས་ཀུན་ནས་བསླང་བ་ཡིན་པས་གདོན་མི་ཟ་བར་ཉི་མའི་ངོ་བོ་ཉིད་ཡིན་པར་
ཁས་བླང་བར་བྱ་དགོས་ལ། མེ་ལོང་གི་ནང་དུ་གཟུགས་བརྙན་གཞན་འབྱུང་བ་གང་ཡིན་པ་དེ་ཡང་ཉི་མའི་ངོ་བོ་ཉིད་ཀྱི་གཟུགས་བརྙན་གྱིས་ཀུན་ནས་བསླང་བ་ཡིན་པས་འདི་ཡང་གདོན་མི་ཟ་བར་ཉི་མའི་ངོ་བོ་ཉིད་ཡིན་པར་ཁས་བླང་བར་བྱ་དགོས་སོ། །དེ་ལྟ་ཡིན་དང་
གྲིབ་མ་དང་ཉི་མ་དག་ལྷན་ཅིག་ན་འདུག་པར་འགྱུར་བ་ཞིག་ན་འཇིག་རྟེན་ན་གཞན་ན་ནི་གྲིབ་མ་དང་ཉི་མ་དག་ལྷན་ཅིག་འདུག་པ་ཡང་མེད་པས་དེར་གཟུགས་བརྙན་དེ་འབྱུང་བར་རིགས་པ་ནི་མ་ཡིན་ནོ། །ཁྲོན་པའི་ཆུ་བཞིན་དུ་ཞེས་བྱ་བ་ནི་ཇི་ལྟར་ཁྲོན་པའི་ནང་ན་ཆུ་མ་

ཟད་པ་རིང་མོ་ཞིག་ན་འདུག་པར་སྣང་བ་དེ་བཞིན་དུ་ཟླ་བའི་གཟུགས་བརྙན་འདི་ཉིད་ཀྱི་ནང་ན་འདུག་པ་ཡང་དེ་དང་འདྲ་བར་སྣང་སྟེ། མེ་ལོང་ལ་ནི་དེ་ཙམ་གྱི་རྔམ་ཀྱང་མེད་དོ། །དེ་ཡང་འདིའི་ནང་དུ་འབྱུང་ན་ནི་གཟུགས་བརྙན་དེ་ཡང་མེ་ལོང་ཁོ་ནའི་ནང་དུ་འབྱུང་ན་ནི་ཕ་
ཟད་གཞན་ན་དམིགས་པར་ཡང་མི་འགྱུར་བ་ཞིག་ན་དམིགས་ཏེ་དེ་ལྟ་བས་ན་དེ་ནི་ཅུང་ཟད་ཀྱང་མེད་ཀྱི་གང་དེ་ལྟར་སྣང་བ་དེ་ནི་གཟུགས་དང་མེ་ལོང་ལ་སོགས་པའི་མཚན་ཉིད་ཚོགས་པ་དེའི་མཐུ་ཡིན་ནོ། །ཆོས་རྣམས་ཀྱི་མཐུའི་བྱེ་བྲག་ནི་བསམ་གྱིས་མི་ཁྱབ་སྟེ། དཔེར་
ན་ཁབ་ལོང་གིས་ལྕགས་ལེན་པར་སྣང་གི་ཤིང་ལ་སོགས་པ་མ་ཡིན་པ་དང་། ཟླ་བ་ཤར་ནས་ཆུ་ཤེལ་ལས་ཆུ་འབྱུང་བར་སྣང་གི །སོལ་བ་ལ་སོགས་པ་ལས་ནི་མ་ཡིན་པ་ལྟ་བུའོ་ཞེས་བྱ་བ་དེ་ལྟ་བུ་ལ་སོགས་པ་བརྗོད་པར་བྱའོ། །མེ་ལོང་གི་རྒྱུད་དང་འབྲེལ་པའི་
ཕྱིར་ཞེས་བྱ་བ་ནི་གཟུགས་བརྙན་ནི་གཟུགས་ཀྱི་རྒྱུན་དུ་གྱུར་པ་མ་ཡིན་ཏེ། མེ་ལོང་གི་རྒྱུད་དང་འབྲེལ་བའི་ཕྱིར་མེ་ལོང་གི་གཟུགས་ལྟ་བུའོ། །ལྷན་ཅིག་འབྱུང་བའི་ཕྱིར་ཞེས་བྱ་བ་ནི་གཟུགས་དང་དུས་གཞན་མཉམ་པའི་གཟུགས་ལྟ་བུར་རོ། །དེ་ལྟར་ན་སྐྱེ་བའི་
སྲིད་པ་འཆི་བའི་སྲིད་པའི་རྒྱུན་དུ་གྱུར་པ་ཇི་ལྟ་བར་གཟུགས་བརྙན་ནི་གཟུགས་ཀྱི་དེ་ལྟ་བུ་མ་ཡིན་པས་གཟུགས་བརྙན་གྱི་དཔེ་བསྒྲུབ་པ་དང་མི་ལྡན་པ་ཡིན་ནོ། །འབྲུའི་རྒྱུན་ཕྱིས་འབྱུང་བའི་ངོ་བོའི་དཔེ་ནི་རང་གི་རྒྱུན་སྔ་མའི་རྒྱུན་ཅན་དུ་གྱུར་པ་ཡིན་པས་དེ་ལྟ་བས་ན་དཔེ་
དང་མཐུན་པ་ཡིན་ནོ། །གཟུགས་བརྙན་ནི་གཉིས་ལས་འབྱུང་ཕྱིར་ཞེས་བྱ་བ་རྒྱས་པར་འབྱུང་བ་ནི་གཉིས་ཀྱིས་འབྱུང་བ་ནི་གཉིས་ལས་འབྱུང་བའོ། །དེའི་ཕྱིར་ཏེ་གཟུགས་དང་མེ་ལོང་ལས་ཞེས་བྱ་བའི་ཐ་ཚིག་གོ། །གཟུགས་བརྙན་ནི་གཙོ་བོའི་རྒྱུ་མེ་ལོང་ལ་
སོགས་པ་གང་ཡིན་པ་དེ་ལ་བརྟེན་ནས་འབྱུང་སྟེ། གཟུགས་བརྙན་གྱི་གཙོ་བོའི་རྒྱུ་ནི་མེ་ལོང་ལ་སོགས་པ་ཡིན་ཏེ། དེ་དག་གི་རྗེས་སུ་བྱེད་པའི་ཕྱིར་རོ། །འདི་ལྟ་སྟེ། གལ་ཏེ་རལ་གྲིའི་ཕྲེད་དུ་འདུག་ན་ནི་གཟུགས་བརྙན་ཡང་ཆུ་རིངས་སུ་འདུག་པར་སྣང་ལ་གལ་

ཏེ་བསྒྲེང་སྟེ་འདུག་ན་ནི་གཟུགས་བརྙན་ཡང་དེ་ཁོ་ན་ལྟར་སྣང་ན། སྐྱེ་བའི་སྲིད་པ་ཡང་དེ་ལྟར་འཆི་བའི་སྲིད་པ་དང་། མེ་ལོང་ལྟ་བུ་གཙོ་བོའི་རྒྱུ་གང་ཡང་རུང་བ་ཞིག་དང་གཉིས་ལས་འབྱུང་བ་ནི་མེད་དོ། །གལ་ཏེ་ཕྱིའི་ཁུ་ཆུ་དང་ཁྲག་ལ་སོགས་པ་
གཙོ་བོའི་རྒྱུ་ཡིན་ནོ་ཞེ་ན། སེམས་པ་མེད་པའི་ཕྱིར་དང་རྫུས་ཏེ་སྐྱེ་བ་རྣམས་ལ་ཡང་དེ་མེད་པའི་ཕྱིར་མ་ཡིན་ཏེ། དེའི་ཕྱིར་ཡང་དཔེ་འདི་ནི་མི་འདྲ་བ་ཡིན་ནོ། །འདིས་ཅི་ཞིག་བསྟན་པར་འགྱུར་ཞེ་ན། ཁྱད་པར་དུ་བྱས་པའི་གཏན་ཚིགས་ལ་དཔེ་འདི་མཐུན་པ་མ་ཡིན་ནོ་
ཞེས་བྱ་བ་ཡིན་ནོ། །ཇི་ལྟ་ཞེ་ན། སྐྱེ་བའི་སྲིད་པའི་གཟུགས་ནི་གང་དང་བྲལ་བ་དང་། གང་དུ་སྐྱེ་བ་དེ་དག་གི་བར་མའི་རྒྱུད་ལ་ཡོད་པའི་གཟུགས་སྔོན་དུ་འགྲོ་བ་ཅན་ཡིན་ཏེ། གཉིས་ལས་འབྱུང་བ་མ་ཡིན་པ་ནི་ཉེ་བར་ལན་པ་གཟུགས་ཀྱི་རྒྱུན་གྱི་ངོ་བོའི་ངོ་བོ་ཉིད་
ཅན་ཡིན་པའི་ཕྱིར་འབྲུའི་རྒྱུན་གྱིས་འབྱུང་བའི་ངོ་བོ་ལྟ་བུའོ་ཞེས་བྱ་བ་ཡིན་ནོ། །དེ་ལྟ་ཡིན་ན་བསྒྲུབ་པ་འདི་ལ་མ་ངེས་པ་ཉིད་ཀྱང་བརྗོད་པར་མི་ནུས་ལ། ཕྱིར་བསྒྲུབ་པར་བྱ་བ་ཡང་ནུས་པ་མ་ཡིན་ནོ་ཞེས་བཤད་པ་ཡིན་ནོ། །ལུང་གིས་ཀྱང་སྲིད་པ་བར་མ་ཡོད་པ་ཉིད་དུ་
བསྒྲུབ་པའི་ཕྱིར། མགུར་ནས་གསུངས་ཕྱིར་ཡོད་ཅེས་བྱ་བ་སྨོས་ཏེ། རང་གི་མིང་ནས་བརྗོད་པའི་ཕྱིར་ཞེས་བྱ་བའི་ཐ་ཚིག་གོ། །མདོ་འདི་དག་མི་འདོན་ཏོ་ཞེས་བྱ་བ་ནི་སྡེ་པ་གཞན་དག་གོ། །ཅིའི་ཕྱིར་མི་འདོན་ཅེ་ན། དེ་དག་གི་ལུང་དག་ལས་མི་འབྱུང་བའི་ཕྱིར་རོ། །
སྡེ་པ་གཞན་གྱི་ལུང་ལས་གྲགས་པ་ཅི་སྟེ་ཚད་མར་མི་འཛིན་ཞེ་ན། ཡང་དག་པར་བསྡུས་པའི་བཞི་པོ་ཉམས་པས་མདོ་སྒྲོ་བཏགས་པ་ཡིན་པར་དོགས་པ་ཡིན་པའི་ཕྱིར་རོ། །གནས་གསུམ་ཞེས་བྱ་བ་ནི་རྒྱུ་གསུམ་སྟེ། མ་རུང་བ་ནི་ནང་མེད་པའོ། །ཟླ་མཚན་དང་ལྡན་པ་
ནི་ཁྲག་དང་ལྡན་པ་སྟེ་འདི་གཉིས་ནི་གནས་དང་པོ་ཡིན་ནོ། །ཆགས་པར་གྱུར་ཅིང་ཕྲད་པ་ཞེས་བྱ་བ་ནི་འཁྲིག་པའི་ཆོས་བྱེད་པ་སྟེ། འདི་ནི་གནས་གཉིས་པ་ཡིན་ནོ། །དྲི་ཟ་ཡང་ཉེ་བར་གནས་པར་གྱུར་ན་ཞེས་བྱ་བ་ནི་གསུམ་པ་ཡིན་ནོ། །ཕུང་པོ་ཞིག་པ་ཉེ་བར་

གནས་པར་གྱུར་ན་ཞེས་བྱ་བ་ནི་འཆི་བའི་སྲིད་པའོ། །ཕྱིར་མི་འོང་བ་ནི་ལྔ་ཞེས་བྱ་བ་དང་། སྐྱེས་བུ་དམ་པའི་འགྲོ་བ་བདུན་ཞེས་བྱ་བ་ནི་གང་ཟག་བསྟན་པའི་མཛོད་ཀྱི་གནས་ནས་འཆད་པར་འགྱུར་རོ། །སྐྱེས་པ་ཞེས་བྱ་བ་ལ་སོགས་པ་ལ་ཡང་ཞེས་བྱ་བ་ནི་དེ་
དག་ཀྱང་སྐྱེས་པ་ཞེས་བྱ་བའི་ལྷ་ཞིག་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པར་ཐལ་བར་འགྱུར་བའོ། །སྐྱེས་བུ་དམ་པའི་འགྲོ་བ་བདུན་ཞེས་བྱ་བ་ནི་བར་མ་དོར་ཡོངས་སུ་མྱ་ངན་ལས་འདའ་བ་དེ་དག་ཉིད་རྣམ་པ་གསུམ་དུ་ཕྱེ་ན་བདུན་དུ་འགྱུར་རོ། །དེའི་ཕྱིར་དུས་དང་ཡུལ་གྱི་
ཁྱད་པར་གྱི་བྱེ་བྲག་གིས་བར་མ་དོར་ཡོངས་སུ་མྱ་ངན་ལས་འདས་པ་གསུམ་དུ་བཤད་ཅེས་བྱ་བ་སྨོས་ཏེ། ཅི་རིགས་པར་དུས་ཀྱི་ཁྱད་པར་གྱི་བྱེ་བྲག་དང་། ཡུལ་གྱི་ཁྱད་པར་གྱི་བྱེ་བྲག་གིས་སོ། །འདིར་མདོ་ཡང་གདོན་པར་བྱ་སྟེ། གླེང་གཞི་ནི་མཉན་ཡོད་
ནའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་ཁྱེད་ལ་སྐྱེས་བུ་དམ་པའི་འགྲོ་བ་བདུན་དང་ཉེ་བར་ལེན་པ་མེད་པར་ཡོངས་སུ་མྱ་ངན་ལས་འདའ་བ་ཡང་བསྟན་གྱི། ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་པར་
བྱའོ། །སྐྱེས་བུ་དམ་པའི་འགྲོ་བ་བདུན་གང་ཞེ་ན། འདི་ན་དགེ་སློང་འདི་ལྟར་ཞུགས་པ་ཡིན་ཏེ། བདག་འབྱུང་ཡང་ཅི་མ་རུང་སྙམ་པ་ཡང་མེད་ལ། བདག་གི་འབྱུང་ཡང་ཅི་མ་རུང་སྙམ་པ་ཡང་མེད་པ་དག་འབྱུང་བར་འགྱུར་རོ་སྙམ་པ་ཡང་མེད་བདག་གི་འབྱུང་བར་འགྱུར་རོ་
སྙམ་པ་ཡང་མེད་ཅིང་། ཡོད་པ་གང་ཡིན་པ་དང་ཡང་དག་པ་གང་ཡིན་པ་དེ་སྤང་བར་བྱའོ་སྙམ་པའི་བཏང་སྙོམས་འཐོབ་བོ། །དེ་སྲིད་པ་འདི་ལ་ཆགས་པ་མེད་ལ། དེ་ནས་ཤེས་རབ་ཀྱི་གོ་འཕང་ཞི་བ་མཆོག་ཀྱང་རྟོགས་ཤིང་འདིས་གོ་འཕང་དེ་ཡང་ལུས་ཀྱིས་མངོན་དུ་
བྱས་པར་འགྱུར་རོ། །དགེ་སློང་དེ་ལྟར་ཞུགས་པའི་འགྲོ་བ་ནི་གང་ཡིན། སྐྱེ་བ་ནི་གང་ཡིན། ཚེ་རབས་གཞན་ནི་གང་ཡིན་ཞེས་འདྲི་བར་བྱེད་པ་ཡོད་ན། དགེ་སློང་དག་དཔེར་ན་ཞོགས་མའི་མེ་ཆུང་ངུ་མངོན་པར་འགྲུབ་བཞིན་དུ་འཆི་བར་འགྱུར་བ་དེ་བཞིན་དུ་དེའི་ང་

རྒྱལ་གྱི་ལྷག་མ་དེ་ཙམ་ཞིག་མ་སྤངས་ཤིང་ཡོངས་སུ་མ་ཤེས་པ་ལས་དེའི་ང་རྒྱལ་གྱི་ལྷག་མ་དེ་སྤངས་ཤིང་ཡོངས་སུ་ཤེས་ནས་ཀུན་དུ་སྦྱོར་བ་ཐ་མའི་ཆ་དང་མཐུན་པ་ལྔ་སྤངས་པས་བར་མ་དོར་ཡོངས་སུ་མྱ་ངན་ལས་འདའ་བར་འགྱུར་ཏེ། འདི་ནི་སྐྱེས་བུ་
དམ་པའི་འགྲོ་བ་དང་པོ་ཡིན་པར་བཤད་དོ། །གཞན་ཡང་འདི་ལྟར་ཞུགས་པ་ཡིན་ཏེ། བདག་འབྱུང་ཡང་ཅི་མ་རུང་སྙམ་པ་ཡང་མེད་ཅེས་བྱ་བ་ནས་འདྲི་བར་བྱེད་པ་ཡོད་ན་ཞེས་བྱ་བའི་བར་སྔ་མ་བཞིན་ནོ། །དཔེར་ན་ལྕགས་ཀྱི་ཐུ་ལུམ་མམ་ཐོང་ལྕགས་མེ་ཀུན་དུ་འབར་
བའི་ནང་དུ་རབ་ཏུ་བསྲེགས་པ་ལྕགས་ཀྱི་ཐོ་བས་བརྡུངས་པ་རྣམས་ཀྱི་ལྕགས་ཀྱི་ཚ་ཚ་གནམ་དུ་ཡར་བཞིན་དུ་འཆི་བར་འགྱུར་བ་དེ་བཞིན་དུ་དེའི་ཞེས་བྱ་བ་ནས་ཀུན་དུ་སྦྱོར་བ་ཐ་མའི་ཆ་དང་མཐུན་པ་ལྔ་སྤངས་པས་བར་མ་དོར་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་བྱ་
བའི་བར་སྔ་མ་བཞིན་ཏེ། འདི་ནི་སྐྱེས་བུ་དམ་པའི་འགྲོ་བ་གཉིས་པ་ཡིན་ནོ། །གཞན་ཡང་དགེ་སློང་འདི་ལྟར་ཞུགས་པ་ཡིན་ཏེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ལྕགས་ཀྱི་ཚ་ཚ་གནམ་དུ་ཡར་ནས་ས་ལ་མ་ལྷུང་བ་ཉིད་དུ་འཆི་བར་འགྱུར་རོ། །དེ་བཞིན་དུ་
དེའི་ཞེས་བྱ་བ་ནས་བར་མ་དོར་ཡོངས་སུ་མྱ་ངན་ལས་འདས་པར་འགྱུར་རོ་ཞེས་བྱ་བའི་བར་སྔ་མ་བཞིན་ཏེ། འདི་ནི་སྐྱེས་བུ་དམ་པའི་འགྲོ་བ་གསུམ་པ་ཡིན་ནོ། །གཞན་ཡང་དགེ་སློང་འདི་ལྟར་ཞུགས་པ་ཡིན་ཏེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ལྕགས་ཀྱི་ཚ་ཚ་
གནམ་དུ་ཡར་ནས་ས་ལ་ལྷུང་མ་ཐག་ཏུ་འཆི་བར་འགྱུར་རོ། །དེ་བཞིན་དུ་དེའི་ཞེས་བྱ་བ་ནས་ཀུན་དུ་སྦྱོར་བ་ཐ་མའི་ཆ་དང་མཐུན་པ་ལྔ་སྤངས་པས་ཞེས་བྱ་བའི་བར་སྔ་མ་བཞིན་ནོ། །སྐྱེས་ནས་ཡོངས་སུ་མྱ་ངན་ལས་འདའ་བར་འགྱུར་ཏེ། འདི་ནི་སྐྱེས་བུ་དམ་པའི་འགྲོ་
བ་བཞི་པ་ཡིན་ནོ། །གཞན་ཡང་དགེ་སློང་འདི་ལྟར་ཞུགས་པ་ཡིན་ཏེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ལྕགས་ཀྱི་ཚ་ཚ་གནམ་དུ་ཡར་ནས་རྩྭ་དང་ཤིང་ཉུང་ངུའི་ནང་དུ་ལྟུང་ཞིང་དེས་དེར་དུ་བ་ཡང་འཐུལ་བར་བྱེད་མེ་ལྕེ་ཡང་སྐྱེད་པར་བྱེད་ལ། དེས་དེར་དུ་བ་ཡང་

འཐུལ་བར་བྱས་མེ་ལྕེ་ཡང་བསྐྱེད་ནས་རྩྭ་དང་ཤིང་ཉུང་ངུ་དེ་ཁོ་ན་མ་ལུས་པར་བསྲེགས་ཏེ་ཉེ་བར་ལེན་པ་མེད་པར་འཆི་བར་འགྱུར་རོ། །དེ་བཞིན་དུ་དེའི་ཞེས་བྱ་བ་ནས་ཀུན་དུ་སྦྱོར་བ་ཐ་མའི་ཆ་དང་མཐུན་པ་ལྔ་སྤངས་པས་ཞེས་བྱ་བའི་བར་སྔ་མ་བཞིན་ནོ། །མངོན་པར་འདུ་
བྱེད་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་ཏེ། འདི་ནི་སྐྱེས་བུ་དམ་པའི་འགྲོ་བ་ལྔ་པ་ཡིན་ནོ། །གཞན་ཡང་དགེ་སློང་འདི་ལྟར་ཞུགས་པ་ཡིན་ཏེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ལྕགས་ཀྱི་ཚ་ཚ་གནམ་དུ་ཡར་ནས་རྩྭ་དང་ཤིང་མང་ཞིང་ཕལ་ཆེ་བའི་
ནང་དུ་ལྷུང་ཞིང་། དེས་དེར་དུ་བ་ཡང་འཐུལ་བར་བྱེད་མེ་ལྕེ་ཡང་སྐྱེད་པར་བྱེད་ལ། དེས་དེར་དུ་བ་ཡང་འཐུལ་བར་བྱས། མེ་ལྕེ་ཡང་བསྐྱེད་ནས་རྩྭ་དང་ཤིང་མང་ཞིང་ཕལ་ཆེ་བ་དེ་ཁོ་ན་མ་ལུས་པར་བསྲེགས་ཏེ་ཉེ་བར་ལེན་པ་མེད་པར་འཆི་བར་འགྱུར་རོ། །དེ་བཞིན་དུ་
དེའི་ཞེས་བྱ་བ་ནས་ཀུན་དུ་སྦྱོར་བ་ཐ་མའི་ཆ་དང་མཐུན་པ་ལྔ་སྤངས་པས་ཞེས་བྱ་བའི་བར་སྔ་མ་བཞིན་ནོ། །མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བར་འགྱུར་ཏེ། འདི་ནི་སྐྱེས་བུ་དམ་པའི་འགྲོ་བ་དྲུག་པ་ཡིན་ནོ། །གཞན་ཡང་དགེ་སློང་འདི་
ལྟར་ཞུགས་པ་ཡིན་ཏེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ལྕགས་ཀྱི་ཚ་ཚ་གནམ་དུ་ཡར་ནས་རྩྭ་དང་ཤིང་མང་ཞིང་ཕལ་ཆེ་བའི་ནང་དུ་ལྷུང་ཞིང་དེས་དེར་དུ་བ་འཐུལ་བར་བྱེད་མེ་ལྕེ་ཡང་སྐྱེད་པར་བྱེད། དེས་དེར་དུ་བ་ཡང་འཐུལ་བར་བྱས། མེ་ལྕེ་ཡང་བསྐྱེད་ནས་
རྩྭ་དང་ཤིང་མང་ཞིང་ཕལ་ཆེ་བ་དེ་ཁོ་ན་ཡང་མ་ལུས་པར་བསྲེགས་ཏེ་གྲོང་ཡང་སྲེག་པར་བྱེད། གྲོང་གི་ཕྱོགས་ཀྱང་སྲེག་པར་བྱེད། གྲོང་ཁྱེར་ཡང་སྲེག་པར་བྱེད། གྲོང་ཁྱེར་གྱི་ཕྱོགས་ཀྱང་སྲེག་པར་བྱེད། ཡུལ་ཡང་སྲེག་པར་བྱེད། ཡུལ་ཕྱོགས་ཀྱང་སྲེག་པར་
བྱེད། ལྷབ་ལྷུབ་ཀྱང་སྲེག་པར་བྱེད། ནགས་ཚལ་ཡང་སྲེག་པར་བྱེད། ཚང་ཚིང་ཡང་སྲེད་པར་བྱེད་ལ། གྲོང་གི་བར་ཡང་བསྲེགས་ཤིང་ཚང་ཚིང་གི་བར་ཡང་མ་ལུས་པར་བསྲེགས་ཏེ། ལམ་ལ་ཐུག་གམ་ཆུ་ལ་ཐུག་གམ་ས་ཕྱོགས་སྔོན་རྩྭ་ཉུང་བ་ལ་ཐུག་

ནས་ཉེ་བར་ལེན་པ་མེད་པར་འཆི་བར་འགྱུར་རོ། །དེ་བཞིན་དུ་དེའི་ཞེས་བྱ་བ་ནས་ཀུན་དུ་སྦྱོར་བ་ཐ་མའི་ཆ་དང་མཐུན་པ་ལྔ་སྤངས་པས་ཞེས་བྱ་བའི་བར་སྔ་མ་བཞིན་ནོ། །གོང་དུ་འཕོ་བར་འགྱུར་ཏེ། འདི་ནི་སྐྱེས་བུ་དམ་པའི་འགྲོ་བ་བདུན་པ་ཡིན་
པར་བཤད་དོ། །ཉེ་བར་ལེན་པ་མེད་པར་ཡོངས་སུ་མྱ་ངན་ལས་འདའ་བ་གང་ཞེ་ན། འདི་ནི་དགེ་སློང་འདི་ལྟ་བུར་ཞུགས་པ་ཡིན་ཏེ་ཞེས་བྱ་བ་ནས་འདྲི་བར་བྱེད་པ་ཡོད་ན་ཞེས་བྱ་བའི་བར་སྔ་མ་བཞིན་ནོ། །དེ་ལྟར་ཞུགས་པའི་དགེ་སློང་ནི་ཤར་ཕྱོགས་སུ་འགྲོ་བར་ཡང་མི་
སྨྲ་ལ། ལྷོ་ཕྱོགས་སུ་ཡང་མ་ཡིན། ནུབ་ཕྱོགས་སུ་ཡང་མ་ཡིན། བྱང་ཕྱོགས་སུ་ཡང་མ་ཡིན། འོག་ཏུ་ཡང་མ་ཡིན། སྟེང་དུ་ཡང་མ་ཡིན། ཕྱོགས་མཚམས་སུ་ཡང་མ་ཡིན། གཞན་དུ་ཡང་མ་ཡིན་གྱི་མཐོང་བའི་ཆོས་ཁོ་ན་ལ་སྲེད་པ་མེད་པར་ཡོངས་སུ་མྱ་
ངན་ལས་འདས་པ་བསིལ་བར་འགྱུར་བ་ཚངས་པར་གྱུར་པ་ཡིན་ནོ་ཞེས་སྨྲའོ། །འདི་ནི་ཉེ་བར་ལེན་པ་མེད་པར་ཡོངས་སུ་མྱ་ངན་ལས་འདས་པ་ཡིན་ཏེ། དགེ་སློང་དག་ངས་ཁྱེད་ལ་སྐྱེས་བུ་དམ་པའི་འགྲོ་བ་བདུན་དང་། ཉེ་བར་ལེན་པ་མེད་པར་ཡོངས་སུ་མྱ་ངན་
ལས་འདའ་བ་ཡང་བསྟན་གྱི་ཞེས་སྨྲས་པ་གང་ཡིན་པ་དེ་ནི་བཤད་ཟིན་ཏོ། །གཞན་དག་ན་རེ་ཞེས་བྱ་བ་རྒྱས་པར་འབྱུང་བ་ནི་ཚེའི་ཚད་དེའི་བར་རོ། །ཚེའི་ཚད་ཀྱི་བར་དེ་ཡོངས་སུ་མ་ཟད་པ་ཞེས་བྱ་བའི་ཐ་ཚིག་གོ། །ལྷ་དང་ཉེ་བའི་བར་དུ་ཞེས་བྱ་བ་ནི་ལྷ་རྣམས་ཀྱི་
དྲུང་ནི་ལྷ་དང་ཉེ་བ་སྟེ་ལྷ་དང་ཉེ་བའི་འགྲོ་བའི་བར་དུ་ཉོན་མོངས་པ་རྣམས་སྤོང་བར་བྱེད་པ་གང་ཡིན་པ་དེ་ནི་བར་མ་དོར་ཡོངས་སུ་མྱ་ངན་ལས་འདའ་བ་ཡིན་ནོ། །དེ་ཡང་ཁམས་ཀྱི་གནས་སྐབས་པ་ཡོངས་སུ་མྱ་ངན་ལས་འདའ་བ་ནི་སྐྱེས་མ་ཐག་པ་ཉོན་མོངས་པའི་ས་
བོན་གྱི་གནས་སྐབས་པ་གང་ཡིན་པ་སྟེ་ཉོན་མོངས་པ་ཀུན་དུ་མི་སྤྱོད་པ་ཞེས་བྱ་བའི་ཐ་ཚིག་གོ། །འདུ་ཤེས་ཀྱི་གནས་སྐབས་པ་ནི་ཡུལ་གྱི་འདུ་ཤེས་ཀུན་དུ་སྤྱོད་པའི་གནས་སྐབས་ན་ཡོངས་སུ་མྱ་ངན་ལས་འདས་པ་གང་ཡིན་པ་སྟེ། འདི་ནི་ཁམས་ཀྱི་གནས་སྐབས་

པ་བས་ཆེས་འཕྱི་སྟེ་མྱ་ངན་ལས་འདའ་བའོ། །རྣམ་པར་རྟོག་པའི་གནས་སྐབས་པ་ནི་རྣམ་པར་རྟོག་པ་ཀུན་དུ་སྤྱོད་པའི་གནས་སྐབས་ན་ཡོངས་སུ་མྱ་ངན་ལས་འདའ་བ་གང་ཡིན་པ་སྟེ། འདི་ཡང་འདུ་ཤེས་ཀྱི་གནས་སྐབས་པ་བས་ཆེས་འཕྱི་སྟེ་ཡོངས་སུ་མྱ་
ངན་ལས་འདའ་བའོ། །ཇི་སྐད་བཤད་པའི་དཔེ་གསུམ་པོ་དེས་ན་བར་མ་དོར་ཡོངས་སུ་མྱ་ངན་ལས་འདའ་བ་རྣམ་པ་གསུམ་ཡིན་ནོ། །ཡང་ན་དང་པོ་ནི་རིས་མཐུན་པ་ཡོངས་སུ་བླངས་ནས་ཞེས་བྱ་བ་ནི་སྐྱེས་མ་ཐག་ཏུ་ཞེས་བྱ་བའི་ཐ་ཚིག་སྟེ། གང་གི་དཔེར་ཞོགས་
མའི་མེ་ཆུང་ངུ་ཞེས་བྱ་བ་འདི་བསྟན་པ་ཡིན་ནོ། །གཉིས་པ་ནི་ལྷ་རྣམས་ཀྱི་འབྱོར་པ་ཉམས་སུ་མྱོང་ནས་ཡོངས་སུ་མྱ་ངན་ལས་འདའ་བའོ་ཞེས་བྱ་བ་ནི་གང་གིས་དཔེར་ན་ལྕགས་ཀྱི་ཚ་ཚ་ཞེས་བྱ་བ་འདི་བསྟན་པ་ཡིན་ནོ། །གསུམ་པ་ནི་ཆོས་ཡང་དག་པར་འགྲོ་བའི་
ནང་དུ་ཞུགས་ཤིང་ཆོས་ཀྱི་འབེལ་བའི་གཏམ་ལ་ཞུགས་ནས་ཡོངས་སུ་མྱ་ངན་ལས་འདའ་བ་སྟེ། གང་གི་དཔེར་ན་ལྕགས་ཀྱི་ཚ་ཚ་གནམ་དུ་ཡར་ནས་ས་ལ་མ་ལྷུང་བ་ཉིད་དུ་འཆི་བར་འགྱུར་བ་ཞེས་བྱ་བ་འདི་བསྟན་པ་ཡིན་ནོ། །དེ་ལྟར་ན་སྡེ་པ་གཞན་དག་གིས་
སྲིད་པ་བར་མ་མེད་པར་ཡང་ཇི་ལྟར་ན་བར་མ་དོར་ཡོངས་སུ་མྱ་ངན་ལས་འདའ་བ་ཡོད་པ་དང་། ཇི་ལྟར་ན་དེ་དཔེ་གསུམ་གྱིས་རྣམ་པ་གསུམ་ཐ་དད་པ་དེ་ལྟར་བསྒྲུབས་པ་ཡིན་ནོ། །དེ་ལྟར་བསྒྲུབས་པ་དང་། འདི་སྐད་དུ་གལ་ཏེ་ཆོས་ཡང་དག་པར་འགྲོ་བའི་ནང་
དུ་ཞུགས་ནས་ཡོངས་སུ་མྱ་ངན་ལས་འདའ་བ་གང་ཡིན་པ་དེ་བར་མ་དོར་ཡོངས་སུ་མྱ་ངན་ལས་འདའ་བ་ཡིན་པར་འདོད་ན་སྐྱེས་ནས་ཡོངས་སུ་མྱ་ངན་ལས་འདའ་བ་ཅི་འདྲ་བ་ཞིག་ཡིན་པར་འགྱུར་ཞེས་རྒོལ་བར་འགྱུར་བས་དེའི་ཕྱིར། སྐྱེས་ནས་ཡོངས་སུ་མྱ་ངན་
ལས་འདའ་བ་ནི་ཡང་དག་པར་འགྲོ་བ་མཆོག་དང་ལྡན་པའི་ནང་དུ་ཞུགས་ནས་ཡོངས་སུ་མྱ་ངན་ལས་འདའ་བ་ཞེས་བྱ་བ་སྨོས་ཏེ། མཆོག་དང་ལྡན་པའི་ཕྱིར་སྐྱེས་པའི་དོན་ཡིན་ནོ་སྙམ་དུ་བསམས་པ་ཡིན་ནོ། །ཡང་དག་པར་འགྲོ་བའི་ནང་དུ་ཞུགས་ནས་ཞེས་བྱ་

བར་འདྲ་བའི་ཕྱིར་བྱེ་བྲག་འདི་རུང་བ་མ་ཡིན་ནོ་ཞེས་སྨྲ་བའི་ཀླན་ཀ་ཡོད་པར་བསམས་ནས་ཡང་ཚེ་ཕལ་ཆེར་བཅོམ་ནས་ཞེས་བྱ་བ་སྨོས་ཏེ། ཚེ་ཕལ་ཆེར་ཟད་པར་བྱས་ནས་ཡོངས་སུ་མྱ་ངན་ལས་འདའ་བའོ་ཞེས་བྱ་བའི་ཐ་ཚིག་གོ། །དེ་དག་
ཐམས་ཅད་ཀྱང་ཞེས་བྱ་བ་རྒྱས་པར་འབྱུང་བ་ནི་ཁམས་ཀྱི་གནས་སྐབས་པ་ལ་སོགས་པ་དེ་དག་ཐམས་ཅད་ཀྱང་ཞོགས་མ་ལ་སོགས་པའི་དཔེ་དག་དང་མི་འབྱོར་ཏོ། །ཅིའི་ཕྱིར་ཞེ་ན། ཡུལ་དུ་འགྲོ་བའི་བྱེ་བྲག་མེད་པའི་ཕྱིར་ཏེ། ཡུལ་དུ་འགྲོ་བའི་ཁྱད་པར་མེད་པའི་
ཕྱིར་རོ། །འདི་དག་ལ་ནི་ཡུལ་དེ་ཉིད་དུ་ཡོངས་སུ་མྱ་ངན་ལས་འདའ་བའི་ཕྱིར་ཡུལ་དུ་འགྲོ་བའི་བྱེ་བྲག་མེད་ལ་མདོ་ལས་གསུངས་པའི་དཔེ་གསུམ་པོ་ལ་ནི་ཡུལ་དུ་འགྲོ་བའི་བྱེ་བྲག་ཡོད་པས་དེ་དག་དང་མི་འབྱོར་ཏོ། །གཟུགས་མེད་པ་དག་ཏུ་ཡང་ཞེས་བྱ་བ་རྒྱས་
པར་འབྱུང་བ་ནི། གལ་ཏེ་དེ་ལྟར་སྐྱེས་ནས་ཡོངས་སུ་མྱ་ངན་ལས་འདའ་བ་དག་ཁོ་ན་བར་མ་དོར་ཡོངས་སུ་མྱ་ངན་ལས་འདའ་བ་ཉིད་ཡིན་པར་རྣམ་པར་གཞག་པར་གྱུར་ན། གཟུགས་མེད་པ་རྣམས་སུ་ཡང་དེ་དག་དེ་བཞིན་དུ་གསུངས་པར་འགྱུར་ཏེ། དེ་ན་ཚེའི་ཚད་ཀྱི་
བར་དུ་ཡོངས་སུ་མྱ་ངན་ལས་འདའ་བའི་ཕྱིར་རོ། །དེ་ལྟར་ཡང་མ་ཡིན་ཏེ། དེའི་ཕྱིར་མདོའི་དོན་ནི་ཚེའི་ཚད་ཀྱི་བར་དུའམ་ཞེས་བྱ་བ་དེ་ལྟ་བུ་ལ་སོགས་པ་མ་ཡིན་ནོ། །ཡང་གཟུགས་མེད་པ་དག་ཏུ་བར་མ་དོར་ཡོངས་སུ་མྱ་ངན་ལས་འདའ་བ་མ་གསུངས་པར་ཅི་མངོན་
ཞེ་ན་དེའི་ཕྱིར། བསམ་གཏན་དག་གིས་བཅུ་ཚན་བཞི། །ཞེས་བྱ་བ་རྒྱས་པར་སྨོས་ཏེ། བསམ་གཏན་བཞིས་མདོའི་དོན་རྣམས་བཅུ་ཚན་བཞི་སྟེ། བསམ་གཏན་དང་པོ་ལ་བཅུ་ཚན་གཅིག་ནས་བསམ་གཏན་བཞི་པ་ལ་བཅུ་ཚན་གཅིག་གི་བར་དུ་མཛད་ནས་སོ། །
གཟུགས་མེད་དག་གི་བདུན་ཚན་གསུམ། །ཞེས་བྱ་བ་ནི་ནམ་མཁའ་དང་རྣམ་ཤེས་དང་ཅི་ཡང་མེད་པའི་སྐྱེ་མཆེད་དག་གིས་ནི་དེ་གསུམ་ན་སྲིད་པ་བར་མ་མེད་པའི་ཕྱིར་དང་། སྐྱེ་བའི་གནས་མེད་པས་གཉིས་མེད་པའི་ཕྱིར་བདུན་ཚན་གསུམ་སྟེ་དེ་མཛད་ནས་སོ། །འདུ་

ཤེས་མེད་འདུ་ཤེས་མེད་མིན་གྱི་སྐྱེ་མཆེད་ན་ནི་གསུམ་པོ་དེ་དག་ཉིད་དང་། གོང་དུ་འཕོ་བ་མེད་པའི་ཕྱིར་དྲུག་ཚན་དུ་མཛད་ནས་ཚོམ་བུ་ཡང་དག་སྡེབས། སྤེལ་ཞེས་བྱ་བའི་ཐ་ཚིག་གོ། །ཇི་ལྟ་ཞེ་ན། འདི་ན་དགེ་སློང་རྣམ་པ་གང་དག་དང་། རྟགས་གང་དག་དང་། མཚན་
མ་གང་དག་གིས་འདོད་པ་དག་ལས་དབེན་པ་སྡིག་པ་མི་དགེ་བའི་ཆོས་རྣམས་ལས་དབེན་པ་རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་རྫོགས་པར་བྱས་ཏེ་གནས་པ་དེ་རྣམ་པ་དེ་དག་དང་རྟགས་
དེ་དག་དང་མཚན་མ་དེ་དག་ཡིད་ལ་མི་བྱེད་ཀྱི། འོན་ཀྱང་དེ་གང་ཞེ་ན་དམིགས་པའི་གཟུགས་ཀྱི་རྣམ་པའམ། ཚོར་བའི་རྣམ་པའམ། འདུ་ཤེས་ཀྱི་རྣམ་པའི་ཆོས་དེ་དག་ལ་ནད་དུ་ཡིད་ལ་བྱེད་ཅིང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་།
སྡུག་བསྔལ་བ་དང་། སྟོང་པ་དང་། བདག་མེད་པར་ཡིད་ལ་བྱེད་དོ། །དེས་ཆོས་དེ་དག་ལ་ནད་དུ་ཡིད་ལ་བྱས་ཤིང་བདག་མེད་པའི་བར་དུ་ཡིད་ལ་བྱས་ནས་ཆོས་དེ་དག་ལ་ཡིད་འབྱུང་བར་བྱེད། འཇིགས་པར་བྱེད། ཕྱིར་ཟློག་པར་བྱེད་དོ། །དེས་ཆོས་དེ་དག་ལ་ཡིད་
འབྱུང་བར་བྱས། འཇིགས་པར་བྱས། ཕྱིར་བཟློག་པར་བྱས་ནས་འདི་ལྟ་སྟེ། ཕུང་པོ་ཐམས་ཅད་ངེས་པར་སྤངས་པ་སྲེད་པ་ཟད་པ་འདོད་ཆགས་དང་བྲལ་བ་འགོག་པའི་མྱ་ངན་ལས་འདས་པ་འདི་ནི་ཞི་བའོ། །འདི་ནི་གྱ་ནོམ་པའོ་ཞེས་བདུད་རྩིའི་གོ་འཕང་ལ་
གཏོད་དོ་ཞེས་བྱ་བ་དང་། མདོ་དེ་ཉིད་བརྗོད་ནས་ཁྱད་པར་ནི་འདི་ཡིན་ཏེ། དེ་ལྟར་ཤེས་ཤིང་དེ་ལྟར་མཐོང་བ་དེ་འདོད་པའི་ཟག་པ་ལས་སེམས་རྣམ་པར་གྲོལ་ཞིང་སྲིད་པའི་ཟག་པ་དང་མ་རིག་པའི་ཟག་པ་ལས་སེམས་རྣམ་པར་གྲོལ་ལོ། །རྣམ་པར་གྲོལ་ན་བདག་ནི་
རྣམ་པར་གྲོལ་ལོ་ཞེས་བྱ་བར་ཡེ་ཤེས་མཐོང་བར་འགྱུར་ཏེ། བདག་གི་སྐྱེ་བ་ནི་ཟད། ཚངས་པར་སྤྱོད་པ་ནི་བསྟེན། བྱ་བ་ནི་བྱས་ཏེ། འདི་ལས་སྲིད་པ་གཞན་མི་ཤེས་སོ་སྙམ་མོ་ཞེས་བྱ་བ་དང་། མདོ་དེ་ཉིད་བརྗོད་ནས་རྣམ་པར་མི་འགྲོལ་གྱི། འོན་ཀྱང་ཆོས་ལ་

འདུན་པ་དེ་ཉིད་དང་། ཆོས་ལ་ཆགས་པ་དེ་ཉིད་དང་། ཆོས་ལ་དགའ་བ་དེ་ཉིད་དང་། ཆོས་ལ་མངོན་པར་དགའ་བ་དེ་ཉིད་ཀྱིས་བར་མ་དོར་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་བྱ་བ་དང་། བར་མ་དོར་ཡོངས་སུ་མྱ་ངན་ལས་འདའ་
བར་མི་འགྱུར་གྱི། འོན་ཀྱང་སྐྱེས་ནས་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་བྱ་བ་དང་། སྐྱེས་ནས་ཀྱང་ཡོངས་སུ་མྱ་ངན་ལས་འདའ་བར་མི་འགྱུར་གྱི། འོན་ཀྱང་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་བྱ་བ་དང་།
མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བར་མི་འགྱུར་གྱི། འོན་ཀྱང་མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་བྱ་བ་དང་། མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བར་མི་
འགྱུར་གྱི། འོན་ཀྱང་གོང་དུ་འཕོ་བར་འགྱུར་རོ་ཞེས་བྱ་བ་དང་། གོང་དུ་འཕོ་བར་མི་འགྱུར་གྱི། འོན་ཀྱང་ཆོས་ལ་འདུན་པ་དེ་ཉིད་དང་། ཆོས་ལ་ཆགས་པ་དེ་ཉིད་དང་། ཆོས་ལ་དགའ་བ་དེ་ཉིད་དང་། ཆོས་ལ་མངོན་པར་དགའ་བ་དེ་ཉིད་ཀྱིས་ཚངས་ཆེན་པའི་
ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་དང་། ཚངས་ཆེན་པའི་ལྷ་རྣམས་དང་སྐལ་བ་མཉམ་པར་སྐྱེ་བར་མི་འགྱུར་གྱི། འོན་ཀྱང་ཆོས་ལ་འདུན་པ་དེ་ཉིད་དང་། སྔ་མ་བཞིན་དུ་ཆོས་ལ་མངོན་པར་དགའ་བའི་བར་དེ་ཉིད་ཀྱིས་ཚངས་པའི་མདུན་
ན་འདོན་པའི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་དང་། ཚངས་ཆེན་པའི་མདུན་ན་འདོན་པའི་ལྷ་རྣམས་དང་སྐལ་བ་མཉམ་པར་སྐྱེ་བར་མི་འགྱུར་གྱི། འོན་ཀྱང་ཆོས་ལ་འདུན་པ་དེ་ཉིད་ཀྱིས་ཆོས་ལ་མངོན་པར་དགའ་བའི་བར་དེ་ཉིད་ཀྱིས་ཚངས་
རིས་པའི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་དང་། འདི་ན་དགེ་སློང་རྣམ་པ་གང་དག་དང་། རྟགས་གང་དག་དང་། མཚན་མ་གང་དག་གིས་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་

པ་མེད་པ་དང་དཔྱོད་པ་མེད་པ་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་རྫོགས་པར་བྱས་ཏེ་གནས་པ་དེ་རྣམ་པ་དེ་དག་དང་རྟགས་དེ་དག་དང་མཚན་མ་དེ་དག་ཡིད་ལ་མི་བྱེད་ཀྱི། འོན་ཀྱང་གང་དེ་ཉིད་ན་དམིགས་པ་ཞེས་བྱ་བ་ནས། འདོད་
ཆགས་དང་བྲལ་བ་འགོག་པའི་མྱ་ངན་ལས་འདས་པ་ཞེས་བྱ་བའི་བར་གྱི་གཞུང་ཐམས་ཅད་སྔ་མ་བཞིན་ནོ། །མདོ་དེ་ཉིད་བརྗོད་ནས་དེ་ལྟར་ཤེས་ཤིང་དེ་ལྟར་མཐོང་བ་དེ། འདོད་པའི་ཟག་པ་ལས་སེམས་རྣམ་པར་གྲོལ་ཞིང་སྲིད་པའི་ཟག་པ་དང་མ་རིག་པའི་ཟག་པ་
ལས་ཞེས་བྱ་བ་ནས་བྱ་བ་ནི་བྱས་ཏེ་འདི་ལས་སྲིད་པ་གཞན་མི་ཤེས་སོ་སྙམ་མོ་ཞེས་བྱ་བའི་བར་སྔ་མ་བཞིན་ནོ།། །།བམ་པོ་ཉི་ཤུ་བཞི་པ། མདོ་དེ་ཉིད་བརྗོད་ནས་རྣམ་པར་མི་གྲོལ་གྱི། འོན་ཀྱང་ཆོས་ལ་འདུན་པ་དེ་ཉིད་ནས་ཆོས་ལ་མངོན་པར་དགའ་བ་དེ་
ཉིད་ཀྱི་བར་གྱིས་འོད་གསལ་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་དང་། འོད་གསལ་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་མི་འགྱུར་གྱི། འོན་ཀྱང་ཆོས་ལ་འདུན་པ་དེ་ཉིད་ནས་ཆོས་ལ་མངོན་པར་དགའ་བ་དེ་ཉིད་ཀྱི་བར་གྱིས་ཚད་མེད་འོད་
ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་དང་། ཚད་མེད་འོད་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་མི་འགྱུར་གྱི། འོན་ཀྱང་སྔ་མ་བཞིན་དུ་ཆོས་ལ་འདུན་པ་དེ་ཉིད་ནས་ཆོས་ལ་མངོན་པར་དགའ་བ་དེ་ཉིད་ཀྱི་བར་གྱིས་འོད་ཆུང་གི་ལྷ་རྣམས་དང་སྐལ་བ་
མཉམ་པར་སྐྱེ་བར་འགྱུར་རོ་ཞེས་བྱ་བ་དང་། འདི་ན་དགེ་སློང་རྣམ་པ་གང་དག་དང་། རྟགས་གང་དག་དང་། མཚན་མ་གང་དག་གིས་དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་
མྱོང་ལ་འཕགས་པ་རྣམས་ཀྱིས་གང་དེ་དྲན་པ་ལ་གནས་པ་བདེ་བ་ལ་གནས་པའོ་ཞེས་བརྗོད་པ་སྟེ། དགའ་བ་མེད་པ་བསམ་གཏན་གསུམ་པ་རྫོགས་པར་བྱས་ཏེ་གནས་པ་དེ་རྣམ་པ་དེ་དག་དང་། རྟགས་དེ་དག་དང་། མཚན་མ་དེ་དག་ཡིད་ལ་མི་བྱེད་ཀྱི་ཞེས་བྱ་བ་

མདོ་ཐམས་ཅད་སྔ་མ་བཞིན་ནོ། །རིས་མཐུན་པ་འབའ་ཞིག་ལ་ཁྱད་པར་ཡོད་དེ། གོང་དུ་འཕོ་བར་མི་འགྱུར་གྱི། འོན་ཀྱང་སྔ་མ་བཞིན་དུ་ཆོས་ལ་འདུན་པ་དེ་ཉིད་ནས་ཆོས་ལ་མངོན་པར་དགའ་བ་དེ་ཉིད་ཀྱི་བར་གྱིས་དགེ་རྒྱས་ཀྱི་ལྷ་རྣམས་དང་
སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་དང་། དགེ་རྒྱས་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་མི་འགྱུར་གྱི། འོན་ཀྱང་སྔ་མ་བཞིན་དུ་དེ་ཉིད་ཀྱིས་ཚད་མེད་དགེ་བའི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་དང་། ཚད་མེད་དགེ་
བའི་ལྷ་རྣམས་དང་སྐལ་བ་མཉམ་པར་སྐྱེ་བར་མི་འགྱུར་གྱི། འོན་ཀྱང་སྔ་མ་བཞིན་དུ་དེ་ཉིད་ཀྱིས་དགེ་ཆུང་གི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་དང་། འདི་ན་དགེ་སློང་རྣམ་པ་གང་དག་དང་། རྟགས་གང་དག་དང་། མཚན་མ་གང་དག་
གིས་བདེ་བ་ཡང་སྤངས་ཏེ། སྔ་ནས་སྡུག་བསྔལ་སྤོངས་ཤིང་ཡིད་བདེ་བ་དང་ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་ཡོངས་སུ་རྫོགས་པར་བྱས་ཏེ། གནས་པ་དེ་རྣམ་
པ་དེ་དག་དང་། རྟགས་དེ་དག་དང་། མཚན་མ་དེ་དག་ཅེས་བྱ་བར་མདོ་ཐམས་ཅད་སྔ་མ་བཞིན་དུ་བརྗོད་པར་བྱའོ། །ལྷའི་རིས་སུ་སྐྱེ་བ་ནི་ཁྱད་པར་དུ་བྱ་སྟེ། ཆོས་ལ་མངོན་པར་དགའ་བའི་བར་དེ་ཉིད་ཀྱིས་འབྲས་བུ་ཆེ་བའི་ལྷ་རྣམས་དང་སྐལ་བ་མཉམ་པར་སྐྱེ་བར་
འགྱུར་རོ་ཞེས་བྱ་བ་དང་། སྐྱེ་བར་མི་འགྱུར་གྱི་ཞེས་བྱ་བ་སྔ་མ་བཞིན་ཏེ། བསོད་ནམས་སྐྱེས་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་དང་། སྐྱེ་བར་མི་འགྱུར་གྱི་ཞེས་བྱ་བ་སྔ་མ་བཞིན་ཏེ། སྤྲིན་མེད་ཀྱི་ལྷ་རྣམས་དང་སྐལ་བ་མཉམ་
པར་སྐྱེ་བར་འགྱུར་རོ་ཞེས་བྱ་བ་དང་། འདི་ན་དགེ་སློང་རྣམ་པ་གང་དག་དང་། རྟགས་གང་དག་དང་། མཚན་མ་གང་དག་གིས་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ཡང་དག་པར་འདས་ཏེ། ཐོགས་པའི་འདུ་ཤེས་རྣམས་ནུབ་པར་གྱུར་

ཅིང་སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་པ་དེ་རྣམ་པ་དེ་དག་དང་ཞེས་བྱ་བ་སྔ་མ་བཞིན་ནོ། །དེས་ན་གཟུགས་མེད་པའི་ཕྱིར་གཟུགས་ཀྱི་རྣམ་པ་ཞེས་
བྱ་བ་འབའ་ཞིག་ནི་གདོན་པར་མི་བྱའོ། །འགོག་པའི་མྱ་ངན་ལས་འདས་པ་ཞེས་བྱ་བའི་བར་མདོ་དེ་ཉིད་བརྗོད་ནས་ཁྱད་པར་ནི་འདི་ཡོད་དེ། དེ་ལྟར་ཤེས་ཤིང་ཞེས་བྱ་བ་ནས། འདི་ལས་སྲིད་པ་གཞན་མི་ཤེས་སོ་སྙམ་མོ་ཞེས་བྱ་བའི་བར་ཐམས་ཅད་སྔ་མ་
བཞིན་ནོ། །མདོ་དེ་ཉིད་བརྗོད་ནས། རྣམ་པར་མི་འགྲོལ་གྱི་འོན་ཀྱང་ཆོས་ལ་འདུན་པ་དེ་ཉིད་ནས་ཆོས་ལ་མངོན་པར་དགའ་བ་དེ་ཉིད་ཀྱི་བར་གྱིས་སྐྱེས་ནས་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་བྱ་བ་དང་། སྐྱེས་ནས་ཡོངས་སུ་མྱ་ངན་ལས་མི་
འདའ་བར་འགྱུར་གྱི་འོན་ཀྱང་དེ་ཉིད་ཀྱིས་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་བྱ་བ་ནས་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བར་མི་འགྱུར་གྱི་ཞེས་བྱ་བའི་བར་ཐམས་ཅད་བརྗོད་ནས། གོང་དུ་འཕོ་
བའི་བར་དུ་མི་འགྱུར་གྱི། འོན་ཀྱང་སྔ་མ་བཞིན་དུ་ཆོས་ལ་མངོན་པར་དགའ་བའི་བར་དེ་ཉིད་ཀྱིས་ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་དང་། འདི་ན་དགེ་སློང་རྣམ་པ་གང་དག་དང་།
རྟགས་གང་དག་དང་། མཚན་མ་གང་དག་གིས་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། རྣམ་པར་ཤེས་པ་མཐའ་ཡས་སོ་སྙམ་ནས་རྣམ་ཤེས་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་པ་དེ་རྣམ་པ་དེ་དག་དང་
ཞེས་བྱ་བ་མདོ་བདུན་པོ་ནམ་མཁའ་མཐའ་ཡས་སྐྱེ་མཆེད་བཞིན་དུ་བརྗོད་པར་བྱའོ། །ཁྱད་པར་ནི་རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་འབའ་ཞིག་ཡོད་དོ། །ཡང་འདི་ན་དགེ་སློང་རྣམ་པ་

གང་དག་དང་། རྟགས་གང་དག་དང་། མཚན་མ་གང་དག་གིས་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅི་ཡང་མེད་དོ་སྙམ་ནས་ཅི་ཡང་མེད་པའི་སྐྱེ་མཆེད་རྫོགས་པར་བྱས་ཏེ་གནས་པ་དེ་
རྣམ་པ་དེ་དག་དང་ཞེས་བྱ་བ་མདོ་བདུན་སྔ་མ་བཞིན་ནོ། །གང་འདི་ན་དགེ་སློང་རྣམ་པ་གང་དག་དང་ཞེས་བྱ་བ་ནས་མཚན་མ་གང་དག་གིས་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་
རྫོགས་པར་བྱས་ཏེ་གནས་སོ་ཞེས་བྱ་བའི་བར་གོང་དུ་འཕོ་བ་གཅིག་པུ་མ་གཏོགས་པ་མདོ་ཐམས་ཅད་སྔ་མ་བཞིན་དུ་བརྗོད་པར་བྱའོ། །དེ་ལྟར་ན་བསམ་གཏན་བཞིས་ནི་འཆི་བ་མེད་པའི་དབྱིངས་ལ་སེམས་གཏོད་པ་དང་། སེམས་རྣམ་པར་གྲོལ་བ་དང་། བར་མ་
དོ་དང་། སྐྱེས་ནས་དང་། མངོན་པར་འདུ་བྱེད་པ་མེད་པ་དང་། མངོན་པར་འདུ་བྱེད་པ་དང་བཅས་པ་དང་། ཡོངས་སུ་མྱ་ངན་ལས་འདའ་བ་དང་། གོང་དུ་འགྲོ་བ་དང་། སྐྱེ་གནས་སུ་སྐྱེ་བའི་ངོ་བོ་ཉིད་མདོའི་དོན་བཅུ་ཚན་བཞི་བཤད་པ་ཡིན་ནོ། །གཟུགས་
མེད་པ་དང་པོ་གསུམ་གྱིས་ནི་འཆི་བ་མེད་པའི་དབྱིངས་ལ་སེམས་གཏོད་པ་དང་། སེམས་རྣམ་པར་གྲོལ་བ་དང་། སྐྱེས་ནས་དང་། མངོན་པར་འདུ་བྱེད་པ་མེད་པ་དང་། མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བ་དང་། གོང་དུ་འགྲོ་བ་
དང་། སྐྱེ་གནས་སུ་སྐྱེ་བ་ཉིད་མདོའི་དོན་བདུན་ཚན་གསུམ་མོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱིས་ནི་གོང་དུ་འགྲོ་བ་མ་གཏོགས་པ་དྲུག་ཚན་བཤད་དོ། །དེའི་ཕྱིར་བར་མ་དོར་ཡོངས་སུ་མྱ་ངན་ལས་འདའ་བ་གང་ཡིན་པ་དེའི་ཚེ་ཚད་ཀྱི་བར་དུ་
ཡོངས་སུ་མྱ་ངན་ལས་འདའ་བ་ཡིན་ནོ་ཞེས་བརྗོད་པར་བྱ་རུང་བ་མ་ཡིན་ཏེ། སྒྲ་མི་སྙན་མ་གཏོགས་པར་འཆི། །ཞེས་འབྱུང་བའི་ཕྱིར་གཟུགས་མེད་པ་དག་ན་ཡང་བར་མ་དོར་འཆི་བ་སྲིད་དོ། །དེ་ལྟ་བས་ན་ལུང་ལས་ཀྱང་སྲིད་པ་བར་མ་གྲུབ་སྟེ། ཀྱང་ཞེས་བྱ་

བའི་སྒྲས་ནི་རིགས་པ་འབའ་ཞིག་ཏུ་མ་ཟད་ཀྱི་ཞེས་བྱ་བ་ཡིན་ནོ། །བདུད་སུན་འབྱིན་བྱེད་ཅེས་བྱ་བ་ནི་དེ་བཞིན་གཤེགས་པ་འོད་སྲུངས་ཀྱི་ཉན་ཐོས་མཁས་མགུ་ཞེས་བྱ་བ་ལ། དེའི་ཚེ་བདུད་སུན་འབྱིན་བྱེད་ཅེས་བྱ་བ་ཞིག་གི་སླད་དུ་ཁུ་ཚུར་གྱིས་བསྣུན་པ་ལས་དེས་
མ་རངས་པའི་སྐད་བྱུང་བ་དང་སྐད་ཅིག་དེ་ཉིད་ལ་རང་གི་ལུས་ཀྱིས་སེམས་ཅན་དམྱལ་བ་ཆེན་པོ་མནར་མེད་པར་ལྷུང་ངོ་ཞེས་བྱ་བ་ཡིན་ཏེ། རང་གི་ལུས་ཁོ་ནས་ཞེས་འབྱུང་བའི་ཕྱིར་སྲིད་པ་བར་མ་མེད་དོ་སྙམ་དུ་བསམས་པ་ཡིན་ནོ། །དེ་གསོན་པོ་ཁོ་ནར་དམྱལ་བའི་
མེ་དག་གིས་ཞེས་བྱ་བ་ལ་དགོངས་པ་ནི་བདུད་དེ་གསོན་པོ་ཁོ་ནར་དམྱལ་བ་ལས་བྱུང་བའི་མེ་དག་གིས་བསྐོར་ནས་རང་གི་ལུས་ཀྱི་གནས་སྐབས་ལ་སྡུག་བསྔལ་སྐྱེས་པའི་ཕྱིར་རང་གི་ལུས་ཁོ་ནས་ལྷུང་ངོ་ཞེས་བཤད་ཀྱི་ཤི་ནས་སྲིད་པ་བར་མའི་གནས་སྐབས་དང་
དམྱལ་བར་སྐྱེ་བའི་སྲིད་པའི་གནས་སུ་སོང་བར་མ་གྱུར་པ་ནི་མ་ཡིན་ནོ་སྙམ་པ་ཡིན་ནོ། །ལས་ཤིན་ཏུ་དྲག་པོ་ཡོངས་སུ་རྫོགས་པ་རྣམས་ཞེས་བྱ་བ་ནི་ཞིང་དང་བསམ་པའི་ཁྱད་པར་དང་ལྡན་པའི་ཕྱིར་ཤིན་ཏུ་དྲག་པོ་རྣམས་སོ། །བསགས་པའི་ཕྱིར་ཡོངས་སུ་
རྫོགས་པ་རྣམས་སོ། །དེ་མ་ཐག་ཏུ་དམྱལ་བ་དག་ཏུ་སྐྱེའོ་ཞེས་བྱ་བ་ནི་དེ་མ་ཐག་ཅེས་འབྱུང་བའི་ཕྱིར་སྲིད་པ་བར་མ་མེད་དོ་སྙམ་དུ་བསམས་པ་ཡིན་ནོ། །འགྲོ་བ་གཞན་དུ་མི་འགྲོ་བར་ཞེས་བྱ་བ་ལ་དགོངས་པ་ནི་བཀའ་འདི་སྐྱེ་བ་གཞན་དག་དགག་པ་ལྷུར་མཛད་
པ་ཡིན་གྱི། སྲིད་པ་བར་མ་དགག་པ་ལྷུར་མཛད་པ་ནི་མ་ཡིན་ནོ་སྙམ་པ་ཡིན་ནོ། །ལྔ་ཁོ་ན་ཞེས་བྱ་བ་ནི་གལ་ཏེ་སྒྲ་ཇི་བཞིན་དུ་བརྟགས་ན་ལྔ་ཞེས་འབྱུང་བས་མཚམས་མེད་པ་ལྔ་ཁོ་ན་བྱས་པར་འགྱུར་གྱི། གཅིག་གམ་གཉིས་ཀྱིས་ནི་དམྱལ་བར་འགྲོ་བར་མི་
འགྱུར་རོ་ཞེས་བྱ་བ་ནི་འདིར་ཡང་འགྱུར་ལ། གང་དག་བྱས་ཤིང་བརྩམས་ནས་སེམས་ཅན་དམྱལ་བ་དག་ཏུ་སྐྱེ་བར་འགྱུར་རོ་ཞེས་འབྱུང་བའི་ཕྱིར་བྱས་མ་ཐག་ཏུ་སྟེ་མཚམས་མེད་པ་བྱས་མ་ཐག་ཏུ་སེམས་ཅན་དམྱལ་བ་དག་ཏུ་སྐྱེ་བར་འགྱུར་གྱི་དུས་གཞན་གྱི་བར་དུ་

གསོན་པོར་འདུག་ནས་ཀྱང་མ་ཡིན་ནོ་ཞེས་བྱ་བར་ཡང་འགྱུར་རོ། །སྲིད་པ་བར་མར་སྐྱེ་བ་ཉིད་ཡིན་པར་གོ་སུ་ཞིག་མི་འདོད་ཅེས་བྱ་བ་ནི་གནས་སྐབས་ཐ་དད་པར་འབྱུང་བའི་ཕྱིར་ཏེ། སྐྱེ་བ་ནི་སྐྱེ་བ་ལ་མངོན་དུ་ཕྱོགས་པ་ཡིན་ནོ་སྙམ་དུ་
བསམས་པ་ཡིན་ནོ། །སྐྱེས་པ་ཡིན་ནོ་ཞེས་ནི་མི་སྨྲའོ་ཞེས་བྱ་བ་ནི་སྐྱེ་བར་འགྱུར་རོ་ཞེས་བྱ་བའི་ཚིག་འདི་སྐྱེས་པའི་དོན་ཡིན་ནོ་ཞེས་མི་སྨྲ་སྟེ། དེ་ལྟ་བས་ན་འདི་ནི་ཉེས་པ་མེད་དོ། །བྲམ་ཟེ་ན་ཚོད་ཁྱེར་ཟིན་རྒ་བ་དང་། །ཞེས་བྱ་བ་རྒྱས་པར་འབྱུང་བ་ནི་གང་གིས་ན་ཚོད་
འཆི་བདག་གི་དྲུང་དུ་ཁྱེར་བ་དེ་ནི་ན་ཚོད་ཁྱེར་ཟིན་པའོ། །བྲམ་ཟེ་ཞེས་བྱ་བ་ནི་བོད་པ་ཡིན་ཏེ། བྲམ་ཟེ་རྒན་པོ་འགའ་ཞིག་ལ་བོས་པའོ། །འདིར་ཁུངས་ནི། བར་ན་ཁྱོད་ཀྱི་གནས་ཀྱང་ཡོད་མིན་ཞིང་། །ཞེས་བྱ་བ་འདི་ཡིན་ཏེ། བར་ན་ཁྱོད་ཀྱི་གནས་མེད་ཅེས་
བྱ་བ་ནི་སྲིད་པ་བར་མ་མེད་པ་ཡིན་ནོ་སྙམ་དུ་བསམས་པ་ཡིན་ནོ། །ཁྱོད་ལ་ལམ་རྒྱགས་ཏེ་ལམ་གྱི་རྒྱགས་ཀྱང་ནི་ཡོད་མ་ཡིན་ཞེས་བྱ་བ་ནི་ཁྱོད་ལ་འཇིག་རྟེན་ཕ་རོལ་གྱི་དགེ་བའི་ཚོགས་མེད་དོ་སྙམ་དུ་དགོངས་པ་ཡིན་ནོ། །མི་དག་གི་ནང་ན་གནས་སུ་མེད་དོ་ཞེས་བྱ་བ་
ལ་དགོངས་པ་ནི་ཁྱོད་དེའུ་རེ་འཆི་སྟེ། ཇི་ལྟར་འདི་ན་ཁ་ཅིག་གནས་པ་ལྟར་མི་དག་གི་ནང་ན་གནས་སུ་མེད་དོ་སྙམ་པ་ཡིན་ནོ། །འགྲོ་བ་ལ་བགེགས་བྱེད་པ་མེད་པའི་ཕྱིར་ཞེས་བྱ་བ་ནི་འགྲོ་བ་དང་མི་འབྲལ་བའི་ཕྱིར་རོ། །ཁྱོད་ཀྱིས་ཇི་སྐད་དུ་སྲིད་པ་བར་མ་ཡོད་དོ་
ཞེས་བརྗོད་པ་འདི་ནི་དགོངས་པ་ཡིན་གྱི་ཁོ་བོས་ཇི་སྐད་དུ་སྲིད་པ་བར་མ་མེད་དོ་ཞེས་བརྗོད་པ་འདི་ནི་དགོངས་པ་མ་ཡིན་ནོ་ཞེས་བྱ་བ་འདི་གལ་ཏེ་གཏན་ཚིགས་གང་གིས་ན་འདིར་འགྱུར། བརྟག་པ་འདི་ནི་ཁྱོད་ལ་འང་མཚུངས་ཏེ་ཞེས་བྱ་བ་ནི་དྲི་བ་འདི་ནི་ཁྱོད་
ལ་ཡང་མཚུངས་སོ་ཞེས་བྱ་བའི་ཐ་ཚིག་གོ། །མདོ་མི་འགལ་བའི་ཕྱིར་ཞེས་བྱ་བ་ནི་བདུད་སུན་འབྱིན་བྱེད་ཀྱི་མདོ་ལ་སོགས་པ་མི་འགལ་བའི་ཕྱིར་མདོ་འདི་ནི་སྲིད་པ་བར་མ་མེད་པའི་ཁུངས་མ་ཡིན་ནོ། །ཁུངས་ཞེས་བྱ་བ་ནི་ཤེས་པར་བྱེད་པར་གཞན་དུ་ཤེས་

པར་མི་བྱེད་པ་ཡིན་ནོ་ཞེས་བྱ་བ་ནི་ཤེས་པར་བྱེད་པ་གང་ལ་གཞན་དུ་ཤེས་པར་བྱེད་པ་མེད་པ་དེ་ནི་ཤེས་པར་བྱེད་པ་གཞན་དུ་ཤེས་པར་མི་བྱེད་པ་ཡིན་ཏེ། འདི་སྐད་དུ་དོན་གང་ཞིག་བསྟན་པའི་ཕྱིར་ཁུངས་མདོ་འམ་ཚིགས་སུ་བཅད་པ་བརྗོད་པ་གང་ཡིན་པ་གལ་ཏེ་དོན་དེ་ཁོ་ན་སྟོན་གྱི་
དེ་དང་འགལ་བ་དོན་གཞན་མ་ཡིན་ན་དེ་ཤེས་པར་བྱེད་པ་གཞན་དུ་ཤེས་པར་མི་བྱེད་པའི་ཁུངས་ཡིན་ནོ་ཞེས་བཤད་པ་ཡིན་ནོ། །སྔོན་དུས་སྲིད་འབྱུང་ཤ་ཚུགས་ཅན། །ཞེས་བྱ་བ་ལ། འབྱུང་ཞེས་བྱ་བ་ནི་འབྱུང་བར་འགྱུར་བའོ། །འདི་ལ་སྔོན་གྱི་
དུས་ན་སྲིད་པའི་ཤ་ཚུགས་ལྟ་བུ་ཡོད་པས་ན། སྔོན་དུས་སྲིད་འབྱུང་ཤ་ཚུགས་ཅན་ནོ། །ཅིའི་ཕྱིར་ཞེ་ན། འཕེན་པ་གཅིག་པའི་ཕྱིར་ཏེ་འདི་ལྟར་འགྲོ་བ་འབྱུང་བར་འགྱུར་བ་དང་། དེར་ཕྱིན་པར་བྱེད་པ་སྲིད་པ་བར་མ་ནི་ལས་གཅིག་པོ་དེ་ཁོ་ནས་འཕེན་པར་བྱེད་
དོ། །ཁྱི་མོ་ལ་སོགས་པའི་ཞེས་བྱ་བ་ནི་ཁྱི་མོ་དང་། ཕག་མོ་ལ་སོགས་པའོ། །འགྲོ་བ་ལྔ་པའི་ཞེས་བྱ་བ་ནི་འགྲོ་བ་ལྔར་འགྲོ་བ་ཞེས་བྱ་བའི་ཐ་ཚིག་གོ། །གལ་ཏེ་མངལ་ན་འདུག་པ་ལས་ཤི་བར་གྱུར་ན། དེའི་དམྱལ་བའི་སྲིད་པ་བར་མས་མའི་མངལ་ཚིག་
པར་འགྱུར་ཞེས་བྱ་བ་ནི་དམྱལ་བ་པ་ནི་འབར་བ་ཡིན་ལ་སྲིད་པ་བར་མ་འང་དེ་དང་འདྲ་བས་སོ། །སྲིད་པ་སྔ་མ་ལའང་ཞེས་བྱ་བ་རྒྱས་པར་འབྱུང་བ་ནི་དམྱལ་བ་པ་དུས་སྔ་མའི་སྲིད་པའི་གནས་སྐབས་པ་རྣམས་ཀྱང་མེ་མ་མུར་ལ་སོགས་པ་ལྷག་པ་དག་ན་འཕྱན་པ་ན།
རྟག་ཏུ་འབར་བ་མ་ཡིན་ན་སྲིད་པ་བར་མ་རྣམས་ལྟ་སྨོས་ཀྱང་ཅི་དགོས། ཡང་ན་འབར་དུ་ཆུག་ན་ཡང་ཞེས་བྱ་བ་ནི་དམྱལ་བ་པའི་སྲིད་པ་བར་མའོ། །མངལ་ན་ཕན་ཚུན་མ་རེག་པའི་ཕྱིར་ཞེས་བྱ་བ་ནི་སྲིད་པ་བར་མ་པ་རྣམས་ནི་ལུས་ཤིན་ཏུ་དང་བས་ཕན་ཚུན་མི་རེག་
པའི་ཕྱིར་དང་། ལས་ལ་རག་ལུས་པའི་ཕྱིར་མི་ཚིག་སྟེ། མི་ཚིག་པ་ནི་དེ་དག་གི་ལས་ལ་རག་ལས་པའི་ཕྱིར་རོ། །དེ་ཉིད་ཀྱི་ཕྱིར་ཁྱི་མོ་ལ་སོགས་པའི་མངལ་མི་ཚིག་གོ། །གླིང་བཞི་པ་བྱེ་བ་ཕྲག་བརྒྱ་སྣང་བར་མཛད་དོ་ཞེས་བྱ་བ་ནི་གང་གི་ཕྱིར་བྱང་ཆུབ་

སེམས་དཔའི་སྲིད་པ་བར་མ་གཞོན་ནུ་ཐོར་བུ་ལྟ་བུ་མཚན་དང་དཔེ་བྱད་དང་བཅས་པ་ཡིན་པ་དེའི་ཕྱིར་སྲིད་པ་བར་མ་ན་བཞུགས་པ་ཡུམ་གྱི་ལྷུམས་སུ་འཇུག་པར་བཞེད་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རང་གི་སངས་
རྒྱས་ཀྱི་ཞིང་ཡིན་པའི་ཕྱིར་སྣང་བར་མཛད་དོ། །གླང་པོ་ཆེའི་ཕྲུ་གུ་དཀར་པོ་ཞེས་བྱ་བ་ནི་གལ་ཏེ་སྲིད་པ་བར་མ་དུས་སྔ་མའི་སྲིད་པ་འབྱུང་བར་འགྱུར་བའི་ཤ་ཚུགས་ཅན་ཡིན་ནོ། །ཅིའི་ཕྱིར་བྱང་ཆུབ་སེམས་དཔའི་ཡུམ་གྱིས་དེ་ལྟར་གླང་པོ་ཆེའི་ཕྲུ་གུའི་གཟུགས་
སུ་གཟིགས་ཤེ་ན། བྱང་ཆུབ་སེམས་དཔའ་ནི་དུད་འགྲོའི་སྐྱེ་གནས་བཟློག་ནས་ཡུན་རིང་པོ་ལོན་པའི་ཕྱིར་དེ་ནི་མཚན་མ་ཙམ་དུ་ཟད་དེ། བསྐལ་པ་བརྒྱ་ལུས་པ་གང་ཚུན་ཅད་མཚན་གྱི་རྣམ་པར་སྨིན་པ་ཅན་གྱི་ལས་དག་མཛད་པར་རྩོམ་པ་དེ་ཚུན་ཅད་དེའི་ངན་
འགྲོ་ཐམས་ཅད་ལོག་པ་ཡིན་ནོ། །དཔེར་ན་རྒྱལ་པོ་ཀྲྀ་ཀཱིས་རྨི་ལམ་བཅུ་མཐོང་བ་ལྟ་བུའོ་ཞེས་བྱ་བ་ནི་འབྱུང་བར་འགྱུར་བའི་དོན་གྱི་མཚན་མ་ཙམ་དུ་ཟད་པའོ། །རྨི་ལམ་བཅུ་ནི་འདུལ་བ་ལས་འབྱུང་སྟེ། གླང་པོ་ཆེ་སྐར་ཁུང་ནས་འབྱུང་བ་མཇུག་མ་ལ་
ཐོགས་པ་དང་། སྐོམ་པ་མེད་པ་ལ་ཁྲོན་པ་ཕྱི་བཞིན་བསྙེགས་པ་དང་། མུ་ཏིག་བྲེ་གང་། ཕྱེ་བྲེ་གང་དང་བརྗེ་བ་དང་། ཙན་དན་ཤིང་གི་རིན་ཐང་དུ་འཚང་པ་དང་། ཀུན་དགའི་ར་བ་མེ་ཏོག་དང་། འབྲས་བུ་ཕུན་སུམ་ཚོགས་པ་དག་མེ་ཏོག་དང་འབྲས་བུ་
ཐམས་ཅད་རྐུན་པོ་རྣམས་ཀྱིས་བརྐུས་པ་དང་། གླང་པོ་ཆེའི་ཕྲུ་གུ་དག་གིས་སྤོས་ཀྱི་གླང་པོ་ཆེ་སྐྲག་པ་དང་། སྤྲེའུ་མི་གཙང་བས་སྦགས་པ་གཞན་དག་ལ་བསྒོ་བར་བྱེད་པ་དང་། སྤྲེའུ་དབང་བསྐུར་བར་བྱེད་པ་དང་། རས་ཡུག་གཅིག་སྐྱེ་བོ་བཅོ་བརྒྱད་ཀྱིས་
དྲངས་པ་དང་། སྐྱེ་བོའི་ཚོགས་ཕལ་པོ་ཆེའི་ལྷན་ཅིག་འཐབ་པ་དང་། འཐབ་མོ་དང་རྩོད་པ་དང་། འགྱེད་པས་ཕན་ཚུན་གནོད་པར་གྱུར་པ་ཞེས་བྱ་བ་རྨི་ལམ་བཅུ་རྨིས་ནས། དེས་བཅོམ་ལྡན་འདས་དེ་བཞིན་གཤེགས་པ་འོད་སྲུངས་ལ་གསོལ་པ་དང་།

བཅོམ་ལྡན་འདས་ཀྱིས་ཀྱང་མ་འོངས་པའི་དུས། དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་ཞིག་འབྱུང་བར་འགྱུར་ཏེ། དེའི་ཉན་ཐོས་རྣམས་ཉེ་དུ་ཕལ་མོ་ཆེ་སྤངས་ནས་རབ་ཏུ་བྱུང་བ་གླང་པོ་ཆེ་སྐར་ཁུང་ནས་འབྱུང་བ་མཇུག་མ་ལ་ཐོགས་པ་ལྟ་བུར་གཙུག་ལག་
ཁང་དག་ལ་ཁྱིམ་གྱི་འདུ་ཤེས་སྐྱེད་ནས་ཆགས་པར་བྱེད་པར་འགྱུར་རོ། །ཁྲོན་པའི་རྨི་ལམ་གྱིས་ནི་དེའི་ཉན་ཐོས་དག་ཁོ་ན་བྲམ་ཟེ་དང་ཁྱིམ་པ་རྣམས་ལ་ཆེད་དུ་ཆོས་འཆད་དང་དེ་དག་ཉན་པར་འདོད་པ་ཉིད་ཡང་དག་པར་གནས་པར་མི་འགྱུར་རོ་ཞེས་བྱ་བ་དེ་སྟོན་ཏོ། །ཕྱེ་དང་མུ་ཏིག་
བྲེ་གང་གི་རྨི་ལམ་གྱིས་ནི་དེའི་ཉན་ཐོས་དག་ཁོ་ན་ཕྱེ་བསླང་བའི་ཕྱིར་ཡང་དབང་པོ་དང་སྟོབས་དང་བྱང་ཆུབ་ཀྱི་ཡན་ལག་ལ་སོགས་པ་ཆོས་རིན་པོ་ཆེ་རྣམས་སྟོན་པར་གྱུར་པ་ཡིན་ནོ། །ཙན་དན་གྱི་རྨི་ལམ་གྱིས་ནི་དེའི་ཉན་ཐོས་དག་ཁོ་ན་ལུས་དང་ཚུལ་ཁྲིམས་དང་ཤེས་
རབ་མ་བསྒོམས་པས་མུ་སྟེགས་ཀྱི་གཞུང་ལུགས་དག་བཟུང་ནས། སངས་རྒྱས་ཀྱི་བཀའ་དང་སྙོམས་པར་བྱེད་པར་འགྱུར་རོ་ཞེས་བྱ་བར་སྟོན་ཏོ། །ཀུན་དགའི་ར་བའི་རྨི་ལམ་གྱིས་ནི་དེའི་ཉན་ཐོས་དག་ཁོ་ན་དཔག་བཙལ་ནས་དགེ་འདུན་གྱི་མེ་ཏོག་གམ། འབྲས་བུ་
འབྱུང་བར་འགྱུར་བ་གང་ཡིན་པ་དེ་བཙོངས་ཤིང་བཙོངས་ནས་འཚོ་བར་བྱེད་ལ་དེས་ཀྱང་ཁྱིམ་པ་གསོ་བར་བྱེད་པར་འགྱུར་རོ་ཞེས་བྱ་བ་དེ་སྟོན་ཏོ། །གླང་པོ་ཆེའི་ཕྲུ་གུའི་རྨི་ལམ་གྱིས་ནི་དེའི་ཉན་ཐོས་དག་ཁོ་ན་ཚུལ་ཁྲིམས་འཆལ་ཅིང་སྡིག་པའི་ཆོས་ཅན་འབྱུང་བར་འགྱུར་
ལ། དེ་དག་གིས་དགེ་སློང་གནས་བརྟན་ཚུལ་ཁྲིམས་དང་ལྡན་པ་དགེ་བའི་ཆོས་ཅན་གང་དག་ཡིན་པ་དེ་དག་གནས་ནས་སྐྲོད་པར་འགྱུར་རོ་ཞེས་བྱ་བ་དེ་སྟོན་ཏོ། །སྤྲེའུ་མི་གཙང་བས་སྦགས་པའི་རྨི་ལམ་གྱིས་ནི་དེའི་ཚེ་ཉན་ཐོས་དག་ཁོ་ན་ཚུལ་ཁྲིམས་འཆལ་ཞིང་
སྡིག་པའི་ཆོས་ཅན་ཡིན་ལ་དགེ་སློང་དགེ་བ་གང་དག་ཡིན་པ་དེ་དག་ལ་ཡང་དག་པ་མ་ཡིན་པའི་ཉེས་པས་གླེང་བར་བྱེད་དོ་ཞེས་བྱ་བ་དེ་སྟོན་ཏོ། །སྤྲེའུ་དབང་བསྐུར་བའི་རྨི་ལམ་གྱིས་ནི་དེའི་ཉན་ཐོས་དག་ཁོ་ན་གཙུག་ལག་ཁང་དག་ཏུ་བདག་ཉིད་ཀྱི་ཡིན་པར་དབང་སྐུར་

བར་བྱེད་པར་འགྱུར་ཞིང་། འཇིག་རྟེན་ན་ཡང་མ་ནིང་ཡང་རྒྱལ་སྲིད་འཛིན་པར་འགྱུར་རོ་ཞེས་བྱ་བ་དེ་སྟོན་ཏོ། །རས་ཡུག་གི་རྨི་ལམ་གྱིས་ནི་དེའི་བསྟན་པ་ཁོ་ན་རྣམ་པ་བཅོ་བརྒྱད་དུ་གྱེས་པར་འགྱུར་ལ། རྣམ་པར་གྲོལ་བའི་རས་ཡུག་ནི་
ཉམས་པར་མི་འགྱུར་རོ་ཞེས་བྱ་བ་དེ་སྟོན་ཏོ། །ཐབ་མོའི་རྨི་ལམ་གྱིས་ནི་དེའི་ཉན་ཐོས་དག་ཁོ་ན་སྡེར་འཆས་ནས་ཕན་ཚུན་རྩོད་པར་འགྱུར་རོ་ཞེས་བྱ་བ་སྟེ་དེ་སྟོན་ཏོ་ཞེས་ལུང་བསྟན་ཏོ་ཞེས་གྲག་གོ། །བསྡུས་པའི་ཚིགས་སུ་བཅད་པ་ནི། གླང་ཆེན་ཁྲོན་པ་ཕྱེ་
དང་ཙན་དན་གླང་ཆེན་བེའུ། །དེ་བཞིན་ཀུན་དགའ་ར་བ་དང་ནི་སྤྲེའུ་དབང་བསྐུར། །མི་གཙང་སྤྲེའུ་དང་རས་ཡུག་ཐབ་མོ་ཞེས་བྱ་བ། །རྨི་ལམ་བཅུ་ནི་རྒྱལ་པོ་ཀྲྀ་ཀཱིས་མཐོང་བ་ཡིན། །ངོ་ཚ་ཤེས་པའི་ཤས་ཆེ་བའི་ཕྱིར་ཞེས་བྱ་བ་ནི་ངོ་ཚ་ཤེས་པ་ལྷག་པའི་ཕྱིར་
རོ། །སྐྱེ་བའི་སྲིད་པ་ནི་ཉིང་མཚམས་སྦྱོར་བའི་སྐད་ཅིག་མ་ཁོ་ན་ཡིན་ནོ། །དེ་ཕན་ཆད་ཉིང་མཚམས་སྦྱོར་བའི་སྐད་ཅིག་མ་ལས་གཞན་པའི་སྲིད་པ་ནི་དུས་སྔ་མའི་སྲིད་པ་ཡིན་ནོ། །གལ་ཏེ་སེམས་ཅན་གཟུགས་ཅན་དག་གི་ནང་དུ་སྐྱེས་ན་ཞེས་བྱ་བ་ནི་གཟུགས་མེད་
པའི་ཁམས་ན་སྲིད་པ་བར་མ་མེད་པའི་ཕྱིར་ཁྱད་པར་འདི་སྨོས་པ་ཡིན་ནོ། །རིགས་མཐུན་པ་དག་གིས་ཞེས་བྱ་བ་ནི་དམྱལ་བའི་སྲིད་པ་བར་མ་ནི་དམྱལ་བའི་སྲིད་པ་བར་མ་དག་ཁོ་ནས་མཐོང་ལ། དེ་བཞིན་དུ་ལྷའི་སྲིད་པ་བར་མའི་བར་དུ་ཡང་ལྷའི་སྲིད་པ་བར་
མ་དག་ཁོ་ནས་མཐོང་ངོ་ཞེས་བྱ་བ་ཡིན་ནོ། །ལྷའི་མིག་ཤིན་ཏུ་རྣམ་པར་དག་པས་ཞེས་བྱ་བ་ནི་ལྷའི་མིག་གི་སྐྱོན་བཅུ་གཅིག་དང་བྲལ་བའོ། །སྐྱོན་དེ་དག་ཀྱང་ཐེ་ཚོམ་དང་། ཡིད་ལ་མི་བྱེད་པ་དང་། ལུས་ཀྱི་གནས་ངན་ལེན་དང་། རྨུགས་པ་དང་། གཉིད་
དང་། རྒོད་པ་དང་། བརྩོན་འགྲུས་བརྩམས་དྲགས་པ་དང་། སེམས་ཡ་ཡ་པོ་དང་། བག་ཚ་བ་དང་། འདུ་ཤེས་སྣ་ཚོགས་དང་། སྨྲ་བ་མངས་པ་དང་། ཧ་ཅང་བསྒོམས་དྲགས་པ་ཉིད་དང་། མདོ་ལས་ཇི་སྐད་འབྱུང་བ་བཞིན་ནོ། །མངོན་པར་ཤེས་པ་

ལས་བྱུང་བ་ཞེས་བྱ་བ་ནི་མངོན་པར་ཤེས་པའི་ངོ་བོ་ཉིད་དེ་བསྒོམས་པ་ལས་བྱུང་བ་ཞེས་བྱ་བའི་ཐ་ཚིག་གོ། །ལྷ་ལ་སོགས་པའི་སྐྱེ་གནས་ཐོབ་པ་ཡང་ལྷའི་ཡིན་པར་ནི་འདོད་མོད་ཀྱི་ཤིན་ཏུ་རྣམ་པར་དག་པ་ནི་མ་ཡིན་ནོ། །ལྷའི་སྲིད་པ་བར་མ་པས་ནི་ཞེས་བྱ་བ་རྒྱས་པར་
འབྱུང་བ་ནི་གཞན་དག་ན་རེ་སྲིད་པ་བར་མ་ནི་རིས་མཐུན་པ་དག་ཁོ་ནས་མཐོང་བ་མ་ཡིན་ནོ། །འོ་ན་ཅི་ཞེ་ན། ལྷའི་སྲིད་པ་བར་མ་པས་ནི་ལྷའི་སྲིད་པ་བར་མ་དོ་ལ་སོགས་པ་ཐམས་ཅད་མཐོང་ངོ་། །མི་དང་། ཡི་དགས་དང་། དུད་འགྲོ་དང་། དམྱལ་བའི་སྲིད་པ་བར་
མ་རྣམས་མཐོང་ངོ་། །གོང་མ་གོང་མ་མ་གཏོགས་པའོ་ཞེས་ཟེར་རོ། །ཇི་ལྟ་ཞེ་ན། མིའི་སྲིད་པ་བར་མ་པས་ནི་གོང་མའི་ལྷའི་སྲིད་པ་བར་མ་མ་གཏོགས་པ་མི་དང་། ཡི་དགས་དང་། དུད་འགྲོ་དང་། དམྱལ་བའི་སྲིད་པ་བར་མ་པ་རྣམས་མཐོང་ངོ་། །ཡི་དགས་
ཀྱི་སྲིད་པ་བར་མ་པས་ནི་གོང་མ་ལྷ་དང་། མིའི་སྲིད་པ་བར་མ་པ་དག་མ་གཏོགས་པ་ཡི་དགས་དང་། དུད་འགྲོ་དང་། དམྱལ་བའི་སྲིད་པ་བར་མ་པ་རྣམས་མཐོང་ངོ་། །དེ་བཞིན་དུ་དམྱལ་བའི་སྲིད་པ་བར་མ་པས་ནི་གོང་མའི་ལྷའི་སྲིད་པ་བར་མ་ལ་སོགས་པ་མ་གཏོགས་
པ་དམྱལ་བའི་སྲིད་པ་བར་མ་ཁོ་ན་མཐོང་བའི་བར་དུ་ཡིན་ཏེ། འགྲོ་བ་རྣམས་ནི་ཕྱི་མ་ཕྱི་མ་དམན་པའི་ཕྱིར་རོ། །དེ་ཉིད་ཀྱི་ཕྱིར་དྲི་ཟ་ཞེས་བྱའོ་ཞེས་བྱ་བ་ནི་གང་གི་ཕྱིར་དྲི་ཟ་བ་དེའི་ཕྱིར་དྲི་ཟ་ཡིན་ཏེ། དྲི་ཟ་ཞིང་ཟས་སུ་ཟ་བས་ན་དྲི་ཟའོ་ཞེས་བྱ་བའི་ཐ་ཚིག་གོ། །དབང་
ཆུང་བར་གྲགས་པ་ནི་རྒྱ་ཆུང་བ་སྟེ། རིགས་དམན་པ་ཞེས་བྱ་བའི་ཐ་ཚིག་གོ། །དབང་བྱེད་པས་ན་དབང་ངོ་། །ཆུང་ངུ་ལ་དབང་བས་ན་དབང་ཆུང་བ་སྟེ། གང་ལ་དབང་ཆུང་བ་ཞེས་བྱ་བ་ཡོད་པ་དེ་ནི་དབང་ཆུང་བར་གྲགས་པའོ། །བཟློག་པ་ནི་དབང་ཆེ་བར་
གྲགས་པའོ། །རིས་མཐུན་པ་གཅིག་པའི་ཕྱིར་ཞེས་བྱ་བ་ནི་བཙུན་པ་ན་རེ་དུས་སྔ་མའི་སྲིད་པ་གང་ཡིན་པ་དང་དེའི་ཕྱིར་བྱེད་པ་སྲིད་པ་བར་མ་གང་ཡིན་པ་དེ་གཉིས་ནི་རིས་མཐུན་པ་གཅིག་ཁོ་ན་ཡིན་ནོ། །དེ་བས་ན་རིས་མཐུན་པ་གཅིག་པའི་ཕྱིར་ཚེའི་ལས་

གང་གིས་དུས་སྔ་མའི་སྲིད་པ་ཚེ་འཕེན་པར་བྱེད་པ་དེ་ཁོ་ནས་སྲིད་པ་བར་མའི་ཡང་འཕེན་པར་བྱེད་དོ། །དེ་ལྟ་མ་ཡིན་ཏེ་གལ་ཏེ་སྲིད་པ་བར་མའི་ཚེ་དེའི་འཕེན་པ་ལོགས་ཤིག་ན་ཡོད་པར་གྱུར་ན་དུས་སྔ་མའི་སྲིད་པ་བཞིན་དུ་སྲིད་པ་བར་མ་བ་
དེའི་ཚེ་ཟད་པས་འཆི་བའི་སྲིད་པར་ཡང་ཐལ་བར་འགྱུར་རོ་ཞེས་ཟེར་རོ། །དེ་དག་དྲི་དེ་ཚོར་ནས་དྲི་དང་རོ་ལ་མངོན་པར་ཆགས་པ་རྣམས་ཞེས་བྱ་བ་རྒྱས་པར་འབྱུང་བ་ནི་སྐྱེ་བོ་ཕྲ་མོ་དེ་དག་དྲི་དེ་ཚོར་ལ། དེ་དང་ལྷན་ཅིག་འབྱུང་བའི་རོ་ཡང་ཉམས་སུ་མྱོང་ཞིང་ཉེ་བར་སྤྱད་
དེ། དྲི་དང་རོ་ལ་མངོན་པར་ཆགས་པ་རྣམས་འཆི་བ་ན་སྲིན་བུ་དང་སྐལ་བ་མཉམ་པར་སྐྱེ་བར་བྱེད་པའི་ལས་སད་པར་བྱས་ནས་དྲི་དང་རོ་ལ་སྲེད་པ་དེས་རྣམ་པར་སྨིན་པ་ལ་མངོན་དུ་ཕྱོགས་པར་བྱས་ཏེ་སྲིད་པ་བར་མའི་རྒྱུན་གྱིས་སྲིན་བུའི་ནང་དག་ཏུ་སྐྱེ་བར་འགྱུར་རོ། །
དེའི་རྐྱེན་མང་པོ་ཁོ་ནའི་དུས་སུ་ཞེས་བྱ་བ་ནི་སྲིན་བུ་རྐྱེན་མང་པོའི་དུས་སུའོ། །དེར་འགྱུར་བ་ནི་སྲིན་བུར་འགྱུར་བའོ། །རྣམ་པར་སྨིན་པ་མངོན་པར་འགྲུབ་པར་བྱ་བ་ལ་འཇུག་པ་རྙེད་ཅེས་བྱ་བ་ནི་རྣམ་པར་སྨིན་པ་འབྱིན་པར་མངོན་དུ་ཕྱོགས་པར་འགྱུར་རོ་ཞེས་བྱ་བའི་
ཐ་ཚིག་གོ། །ཚོགས་ཤིང་དུས་དང་ལྡན་པ་ན། །ལུས་ཅན་རྣམས་ལ་འབྲས་བུར་སྨིན། །ཞེས་འབྱུང་བའི་ཕྱིར་རོ། །གཞན་དུ་ནི་མ་ཡིན་ཏེ་ཞེས་བྱ་བ་ནི་དེ་དག་དཀོན་པའི་དུས་སུ་མ་ཡིན་པའོ། །གཞན་དུ་ནི་མ་ཡིན་པ་ལྟ་བུའོ་ཞེས་བྱ་བ་ནི་ཚེ་ཐུང་བའི་ཚེ་མ་ཡིན་ཏེ།
འཁོར་ལོས་སྒྱུར་བ་འབྱུང་བ་ནི། །བརྒྱད་ཁྲི་མན་ཆད་མ་ཡིན་ནོ། །ཞེས་འབྱུང་བའི་ཕྱིར་རོ། །དེ་ཉིད་ཀྱི་ཕྱིར་ཞེས་བྱ་བ་ནི་གང་གི་ཕྱིར་འཁོར་ལོས་སྒྱུར་བར་འགྱུར་བའི་ལས་དག་ཡོད་དུ་ཟིན་ཀྱང་རྐྱེན་མང་པོ་ལ་ལྟོས་པའི་ཕྱིར་རྣམ་པར་སྨིན་པ་མངོན་པར་འགྲུབ་
པར་བྱ་བ་ལ་འཇུག་པ་མི་རྙེད་པའོ། །སྲིད་པ་ཚོལ་བ་ཡིན་པའི་ཕྱིར། །ཞེས་བྱ་བ་ནི་སྐྱེ་བ་འདོད་པ་ཡིན་པའི་ཕྱིར་རོ། །ལས་རྣམས་ཁོ་ནས་རྐྱེན་དག་ཚོགས་པ་འདྲེན་པར་བྱེད་པ་ཡིན་ནོ་ཞེས་བྱ་བ་ནི་ལས་ཀྱི་དབང་གིས་རྟ་ལ་སོགས་པ་དུས་དྲགས་པ་ལས་འདས་ཏེ་

དུས་གཞན་ནའང་འཁྲིག་པ་སྤྱོད་པར་འགྱུར་རོ། །འཕེན་པ་གཅིག་པའི་ཕྱིར་ཞེས་བྱ་བ་ནི་ལས་གང་གིས་བ་ལང་ལ་སོགས་པའི་རིས་མཐུན་པ་འཕེན་པར་བྱེད་པའི་ལས་དེ་ཉིད་ཀྱིས་དེ་དག་གི་སྲིད་པ་བར་མ་ཡང་འཕེན་པར་བྱེད་དེ། དེའི་ཕྱིར་དུས་གཞན་ན་བ་ལང་
རྣམས་ཀྱི་ནང་དུ་སྐྱེ་བར་འགྱུར་བ་གང་ཡིན་པ་དེ་ནི་བ་མེན་རྣམས་ཀྱི་ནང་དུ་སྐྱེའོ་ཞེས་བྱ་བ་རྒྱས་པར་བཤད་པ་གང་ཡིན་པ་དེ་ནི་བརྗོད་པར་བྱ་བ་ཡིན་ནོ། །སློབ་དཔོན་འདུས་བཟངས་ན་རེ་རིས་གཅིག་པའི་ཕྱིར་དང་། བ་ལང་གི་ཤ་ཚུགས་དང་དབྱིབས་ཀྱི་ཁྱད་པར་མ་
བཏང་བའི་ཕྱིར་རིས་ཐ་དད་པས་ནི་དེའི་ལས་ཀྱི་འཕེན་པར་བྱེད་པ་ཉིད་ཉམས་པར་མི་འགྱུར་རོ། །འགྲོ་བ་ངེས་པའི་ལས་རྣམས་ལ་ཡང་སྐྱེ་བའི་རྐྱེན་སྣ་ཚོགས་པ་མཐོང་སྟེ། རྐང་བཀྲ་ལ་སོགས་པ་ལྟ་བུའོ། །དེ་ལྟ་བས་ན་དེ་ནི་ཉེས་པ་མེད་དོ་ཞེས་ཟེར་རོ། །བློ་ནི་
ཕྱིན་ཅི་ལོག་གྱུར་པས། །ཞེས་བྱ་བ་ལ་ཇི་ལྟར་ཆགས་པ་དང་ལྡན་པའི་སེམས་ཀྱིས་བློ་ཕྱིན་ཅི་ལོག་ཏུ་གྱུར་པ་དེ་བསྟན་པའི་ཕྱིར་དེས་དེ་ན་ཕ་མ་ཞེས་བྱ་བ་རྒྱས་པར་སྨོས་ཏེ། ཕ་དང་མ་ཉལ་པོ་བྱེད་པ་དབང་པོ་གཉིས་སྤྲོད་པའི་མཚན་ཉིད་དེའོ། །སྐྱེས་བུ་སྲིད་པ་
བར་མ་ཕོ་ཞིག་ཡིན་ནའོ། །འདོད་ཆགས་ནི་ཕོའི་ཡིན་པས་ན་ཕོའི་སྟེ་ཆུང་མ་བཞིན་དུ་མ་ལ་སྐྱེའོ། །འདོད་ཆགས་ནི་མོའི་ཡིན་པས་ན། མོའི་དེ་ཁྱོ་བཞིན་དུ་ཕ་ལ་སྐྱེའོ། །བཟློག་པ་ལ་ནི་ཁོང་ཁྲོ་བ་སྟེ་ཞེས་བྱ་བ་ནི་ཕོ་ཞིག་ཡིན་ན་ཕོའི་ཁོང་ཁྲོ་བ་ཕྲག་དོག་གིས་
བསླང་བར་གྱུར་པ་འགྲན་ཟླའི་སྐྱེས་བུ་བཞིན་དུ་ཕ་ལ་སྐྱེའོ། །མོ་ཞིག་ཡིན་ན་མོའི་ཁོང་ཁྲོ་བ་ཆེན་ཆུང་བཞིན་དུ་མ་ལ་སྐྱེའོ། །དེ་དེ་ལྟར་ཕྱིན་ཅི་ལོག་ཏུ་གྱུར་པའི་སེམས་དེ་གཉིས་ཀྱིས་ཕྱིན་ཅི་ལོག་ཏུ་གྱུར་པས་ཡུལ་དབང་པོ་གཉིས་ཀྱི་གནས་དེར་ཕྱིན་པ་དང་
དགའ་བར་བྱེད་པས་འཁྲིག་པའི་ལས་འདོད་པས་གནས་དེར་དེ་ཉལ་པོའི་གནས་སྐབས་དེར་བདག་གིས་ལས་འདི་བྱའོ་ཞེས་བདག་ཉིད་མོས་སོ། །མི་གཙང་བ་དེར་ཞེས་བྱ་བ་ནི་ཁུ་ཆུ་དང་ཁྲག་གི་ནང་དུའོ། །མངལ་གྱི་གནས་དེར་ཕྱིན་ཞེས་བྱ་བ་ནི་ཕོ་བ་དང་ལོང་

ཀའི་ཁྲོད་ན་འདུག་པའི་གནས་སུ་ཕྱིན་པའོ། །གནས་སོ་ཞེས་བྱ་བ་ནི་འདུག་གོ་ཞེས་བྱ་བའི་ཐ་ཚིག་གོ། །རྒྱབ་རོལ་ཏུ་ཁ་བལྟས་ཏེ་ཙོག་ཙོག་པོར་ཞེས་བྱ་བ་ནི་བདག་ཉིད་འཁྲིག་པར་བྱེད་པ་མངོན་པའི་ང་རྒྱལ་དང་ལྡན་པའི་ཕྱིར་རོ། །སྐྱེ་
ཞིང་ཞེས་བྱ་བ་ནི་བརྟས་ཤིང་ངོ་། །འབྱུང་བ་གཞན་ཁོ་ན་ཞིག་ཅེས་བྱ་བ་ནི་ཁུ་ཆུ་དང་ཁྲག་ལས་མ་གཏོགས་པ་དག་གོ། །ས་བོན་དང་མྱུ་གུ་འགག་པ་དང་། སྐྱེ་བའི་ཚུལ་དུ་སྟེ། འཇིག་པ་དང་འགག་པ་དག་གི་སྲང་མདའི་མཐོན་དམན་བཞིན་དུ་དུས་མཉམ་པའི་ཕྱིར་
སྐད་ཅིག་མ་གཅིག་ཁོ་ན་ལ་ས་བོན་ནི་འགག་ལ་མྱུ་གུ་ནི་སྐྱེའོ། །ནུར་ནུར་པོ་ཞེས་བྱ་བ་གང་ཡིན་པ་དེ་ནི