Luận tạng Tây Tạng (Tengyur) — Tập 142

་ཡིན་པར་འགྱུར་རོ་ཞེས་ཉེས་པ་སྨྲས་པ་གང་ཡིན་པ་དེར་མི་འགྱུར་རོ། །འོ་ན་གང་གི་ཚེ་
འབྲས་བུ་ཐོབ་པ་དེའི་ཚེ་སྡུག་བསྔལ་ལ་ཆོས་ཤེས་པའི་བཟོད་པ་དང་དེ་དང་ལྷན་ཅིག་འབྱུང་བ་རྣམས་རྣམ་པར་ཉམས་པར་འགྱུར་བས་འབྲས་བུ་ཐོབ་པ་ནི་འཕགས་པ་མ་ཡིན་པར་འགྱུར་ཞེས་བྱ་བའི་ཉེས་པ་ཡང་ཡོངས་སུ་སྤང་བའི་ཕྱིར་སྨྲས་པ། དེ་དག་བཏང་བས་བཟོད་པ་དང་དེ་དང་
ལྷན་ཅིག་འབྱུང་བ་དེ་དག་བཏང་བས་འཕགས་པ་མ་ཡིན་པ་ཉིད་དུ་ཐལ་བར་ཡང་མི་འགྱུར་ཏེ། དེ་དག་གི་མ་རྙེད་པ་གཏན་དུ་བཅོམ་པའི་ཕྱིར་མ་རྙེད་པ་དེ་ཤིན་ཏུ་རྣམ་པར་ཉམས་པའི་ཕྱིར་རོ། །འདི་ཇི་ལྟར་གཏན་དུ་བཅོམ་པ་ཡིན་ཞེ་ན། དེའི་རྒྱུད་ལ་ཡང་མི་སྐྱེ་བའི་ཕྱིར་རོ། །འོ་ན་ནི་དེ་
དག་ཀྱང་རིགས་གསུམ་པ་ཡིན་ནོ་ཞེས་བྱ་བ་ནི་ཉན་ཐོས་དང་རང་སངས་རྒྱས་དང་སངས་རྒྱས་ཀྱི་རིགས་ཡིན་ན། གང་དག་གི་མ་རྙེད་པ་ཡིན། །ཐམས་ཅད་ཀྱིའོ་ཞེས་བྱ་བ་ནི་ཉན་ཐོས་ལ་སོགས་པའི་རིགས་ཀྱི་ཡིན་ནོ། །འོ་ན་ནི་ཉེས་པ་དེ་ཉིད་དུ་འགྱུར་རོ་ཞེས་བྱ་བ་ནི་སངས་རྒྱས་ཀྱིས་ཀྱང་
རིགས་གསུམ་ཆར་མ་རྙེད་པས་འཕགས་པ་མ་ཡིན་པར་འགྱུར་རོ་ཞེས་བྱ་བའི་ཐ་ཚིག་གོ། །ལན་ཡང་དེ་ཉིད་ཡིན་ནོ་ཞེས་བྱ་བ་ནི་སྔ་མ་བཞིན་དུ་དེ་ནི་རྙེད་པ་མེད་པ་གང་ཡིན་པ་སྟེ་ཞེས་བྱ་བ་ནས་རྒྱས་པར་དཔེར་ན་ཆུ་འཐུང་བའོ་རླུང་ཟ་བའོ་ཞེས་བྱ་བའི་བར་ཡིན་ནོ། །འོ་ན་ནི་འབད་པ་དོན་མེད་པ་

ཡིན་ནོ་ཞེས་བྱ་བ་ནི་བཟོད་པའི་ལྷག་མ་འཕགས་པའི་ཆོས་གཞན་གྱི་མ་རྙེད་པ་ཡོད་པས་འཕགས་པ་མ་ཡིན་པར་འགྱུར་རོ་ཞེས་བྱ་བ་འདི་སྤང་བའི་ཕྱིར་བཟོད་པ་དང་དེ་དང་ལྷན་ཅིག་འབྱུང་བ་རྣམས་ཀྱི་མ་རྙེད་པ་རྣམས་ནི་སོ་སོའི་སྐྱེ་བོ་ཉིད་ཡིན་ནོ་ཞེས་བྱ་བའི་འབད་
པ་གང་ཡིན་པ་དེ་ནི་དོན་མེད་པར་འགྱུར་ཏེ། འདི་ནི་ཕྱོགས་སྔ་མའི་ཉེས་པ་སྤོང་བ་ཁོ་ན་ལ་འབད་པ་བྱེད་པར་ཟད་དོ། །འཕགས་པའི་ཆོས་རྣམས་མ་སྐྱེས་པའི་རྒྱུད་ཅེས་བྱ་བ་ནི་འདི་ལ་འཕགས་པའི་ཆོས་རྣམས་མ་སྐྱེས་པ་ཡོད་པས་ན་འཕགས་པའི་ཆོས་རྣམས་མ་སྐྱེས་པའི་རྒྱུད་ནི་སོ་སོའི་སྐྱེ་བོ་
ཉིད་ཡིན་ཏེ། འཕགས་པའི་ཆོས་རྣམས་མ་སྐྱེས་པའི་ཕུང་པོའི་རྒྱུད་ཅེས་བྱ་བའི་ཐ་ཚིག་གོ། །ཤུགས་ཀྱིས་ན་འཕགས་པའི་ཆོས་རྣམས་སྐྱེས་པའི་རྒྱུད་ནི་འཕགས་པ་ཉིད་ཡིན་ནོ་ཞེས་བཤད་པ་ཡིན་ནོ། །གནས་གྱུར་པའི་ཕྱིར་རོ། །ཡང་མ་ཐོབ་པ་འདི་ཇི་ལྟར་ཞེས་བྱ་བ་ནི་ཆོས་ཐམས་
ཅད་ཀྱི་མ་ཐོབ་པ་གླེང་བར་བྱེད་པ་ཡིན་གྱི་འཕགས་པའི་ཆོས་མ་ཐོབ་པ་འབའ་ཞིག་ནི་མ་ཡིན་ནོ། །རེ་ཞིག་འདི་ལྟ་སྟེ་ཞེས་བྱ་བ་འདི་ནི་དཔེར་བརྗོད་པ་ཡིན་ནོ། །དེ་ནི་རྙེད་པས་རྣམ་པར་ཉམས་པར་འགྱུར། །ཞེས་བྱ་བ་ནི་མ་རྙེད་པའི་མཚན་ཉིད་ཀྱི་སོ་སོའི་སྐྱེ་བོ་ཉིད་དེ་ནི་འཕགས་པའི་ལམ་
དེ་རྙེད་པས་རྣམ་པར་ཉམས་པར་འགྱུར་རོ། །སོ་སོའི་སྐྱེ་བོ་ཉིད་དེ་ཁམས་གང་ཞིག་ཡིན་ཞེ་ན། ཁ་ཅིག་ན་རེ་ཁམས་གསུམ་པ་ཡིན་ནོ་ཞེས་ཟེར་རོ། །མ་རྙེད་པ་ནི་སྐྱེ་བའི་རྟེན་གྱི་དབང་གིས་རྣམ་པར་གཞག་པ་མ་ཡིན་ནམ། སོ་སོའི་སྐྱེ་བོ་ཉིད་ཀྱང་མ་རྙེད་པའི་ངོ་བོ་ཉིད་ཡིན་པས།
ད་ལྟ་བས་ན་འདོད་པ་ན་སྤྱོད་པའི་སེམས་ཅན་ལ་ནི་འདོད་པ་ན་སྤྱོད་པ་ཁོ་ནའི་སོ་སོའི་སྐྱེ་བོ་ཉིད་ཡིན་གྱི་གཟུགས་དང་གཟུགས་མེད་པ་ན་སྤྱོད་པའི་ནི་མ་ཡིན་ཏེ། དེའི་ཕྱིར་ཁམས་གསུམ་པ་ཡིན་པ་རྣམ་པར་ཉམས་པར་འགྱུར་བས་འདི་ནི་རུང་བ་མ་ཡིན་པར་བལྟའོ། །འོན་ཏེ་དེ་མི་སྐྱེ་བའི་
ཆོས་ཅན་དུ་གྱུར་པའི་ཕྱིར་དེ་ཁམས་གསུམ་པ་རྣམ་པར་ཉམས་སོ་ཞེས་ཉེ་བར་བཏགས་ཏེ་རྟོགས་པ་ཡིན་ན་ནི། དེ་ནི་ཡིན་དུ་ཟད་དེ་འདི་ནི་མི་འགོག་གོ། །འདོད་པ་ན་སྤྱོད་པའི་སོ་སོའི་སྐྱེ་བོ་གཅིག་ཁོ་ནའི་ཐོབ་པ་ཡོད་ལ་དེ་ནི་འཇིག་རྟེན་པའི་ཆོས་ཀྱི་མཆོག་གི་གནས་སྐབས་ན་རྣམ་པར་

ཉམས་པར་འགྱུར་རོ་ཞེས་བྱ་བར་ཤེས་ཏེ། དེ་ཡང་འདོད་པའི་འདོད་ཆགས་དང་བྲལ་བ་རྣམ་པར་གྲོལ་བའི་ལམ་དགུ་པ་ལ་སྤོང་བར་འགྱུར་རོ། །འཕགས་པ་གཟུགས་དང་གཟུགས་མེད་པའི་ཁམས་དག་ཏུ་སྐྱེས་པའི་ས་སོ་སོ་ན་ཡོད་པའི་སོ་སོའི་སྐྱེ་བོ་རྣམས་ཀྱི་ཐོབ་པ་ནི་འཕགས་
པའི་ལམ་ཐོབ་པའི་མཐུ་ཁོ་ནས་སྐྱེ་བར་མི་འགྱུར་ལ། དེ་དག་ནི་སོ་སོར་རྣམ་པར་གྲོལ་བའི་ལམ་དགུ་པ་ལ་སྤོང་བར་འགྱུར་རོ་ཞེས་བྱ་བར་ཁོང་དུ་ཆུད་པར་བྱའོ། །ས་འཕོས་པ་ལས་ཞེས་བྱ་བ་ནི་གང་གི་ཚེ་འདོད་པའི་ཁམས་ལས་འདོད་ཆགས་དང་བྲལ་བར་བྱས་ཏེ་བསམ་གཏན་དང་པོར་
འཕོས་པ་དེའི་ཚེ་འདོད་པ་ན་སྤྱོད་པའི་སོ་སོའི་སྐྱེ་བོ་ཉིད་དེ་རྣམ་པར་ཉམས་པར་འགྱུར་ཏེ། བསམ་གཏན་དང་པོའི་ས་པའི་སོ་སོའི་སྐྱེ་བོ་ཉིད་སྐྱེ་བའི་ཕྱིར་འཕགས་པ་ནི་མ་ཡིན་ནོ། །དེ་བཞིན་དུ་གཟུགས་མེད་པའི་ཁམས་སུ་ས་འཕོས་པས་གཟུགས་ན་སྤྱོད་པའི་སོ་སོའི་སྐྱེ་བོ་ཉིད་
རྣམ་པར་ཉམས་པར་འགྱུར་རོ། །ས་གོང་མ་ནས་ས་འོག་མར་འཕོས་པས་ཀྱང་ས་གོང་མ་པའི་སོ་སོའི་སྐྱེ་བོ་རྣམ་པར་ཉམས་པར་འགྱུར་རོ་ཞེས་བྱ་བར་བརྗོད་པར་འགྱུར་རོ། །གཞན་དག་གི་ཡང་དེ་བཞིན་དུ་སྦྱར་བར་བྱའོ་ཞེས་བྱ་བ་ནི་ཇི་ལྟར་འཕགས་པའི་ལམ་གྱི་ཐོབ་པས་མ་ཐོབ་
པ་སོ་སོའི་སྐྱེ་བོ་ཉིད་རྣམ་པར་ཉམས་པར་འགྱུར་རོ་ཞེས་བྱ་བ་སྦྱར་བ་དེ་བཞིན་དུ་ཐོབ་པ་དང་བསམས་པ་ལས་བྱུང་བ་ལ་སོགས་པའི་ཆོས་རྣམས་ཀྱི་མ་ཐོབ་པ་རྣམ་པར་ཉམས་པར་འགྱུར་བ་ཡང་སྦྱར་བར་བྱ་བ་ཡིན་ནོ། །ཇི་ལྟ་ཞེ་ན། རེ་ཞིག་འདོད་པ་ན་སྤྱོད་པའི་ཐོས་པ་དང་བསམས་པ་
ལས་བྱུང་བ་ལ་སོགས་པའི་ཆོས་རྣམས་ཀྱི་མ་ཐོབ་པའི་རྙེད་པ་ནི་ཐོབ་པས་རྣམ་པར་ཉམས་པར་འགྱུར་ལ། སྐྱེ་བས་ཐོབ་པའི་དགེ་བ་རྣམས་དགེ་བའི་རྩ་བ་ཀུན་དུ་ཆད་པའི་མ་ཐོབ་པ་ཡང་ཐོབ་པས་རྣམ་པར་ཉམས་པར་འགྱུར་རོ། །ས་འཕོས་པ་ལས་ནི་གང་གི་ཚེ་འདི་འདོད་པའི་
ཁམས་ནས་ཤི་འཕོས་ཏེ་བསམ་གཏན་དང་པོར་སྐྱེ་བས་འཕོ་བ་དེའི་ཚེ་དེའི་ས་པ་འགྲོ་བས་བསྡུས་པའི་ཕུང་པོ་རྣམས་ཀྱི་མ་ཐོབ་པ་རྣམ་པར་ཉམས་པར་འགྱུར་ཏེ་འགྲོ་བ་དག་ནི་ཉོན་མོངས་པ་ཅན་མ་ཡིན་ཞིང་ལུང་དུ་མ་བསྟན་པ་ཁོ་ན་ཡིན་ནོ་ཞེས་འཆད་པར་འགྱུར་ལ། ལུང་

བསྟན་མན་འཐོབ་ལྷན་ཅིག་སྐྱེ། །ཞེས་ཀྱང་བཤད་ཟིན་ཏོ། །དེ་བཞིན་དུ་བསམ་གཏན་དང་པོའི་ས་པའི་སྦྱོར་བ་ལས་བྱུང་བ་རྣམས་ཀྱི་མ་ཐོབ་པ་ནི་ཐོབ་པས་རྣམ་པར་ཉམས་པར་འགྱུར་རོ། །ས་འཕོས་པ་ལས་ནི་ས་གོང་མ་པ་འགྲོ་བས་བསྡུས་པའི་ས་དེར་འཕོས་
པས་རྣམ་པར་ཉམས་པར་འགྱུར་རོ། །ཁ་ཅིག་གི་ས་འཕོ་བ་རྣམ་པར་བཤད་པ་དཔེར་བརྗོད་པ་འདི་ནི་བྱེ་བྲག་ཏུ་མ་ཕྱེད་པར་བལྟ་སྟེ། ས་གོང་མས་བསྡུས་པའི་ཕུང་པོ་རྣམས་ཀྱི་མ་ཐོབ་པ་ནི་ས་འཕོས་པས་རྣམ་པར་ཉམས་པར་འགྱུར་བ་འབའ་ཞིག་ཏུ་མ་ཟད་དོ། །འོ་ན་ཅི་ཞེ་ན། དེ་
ཐོབ་པས་ཀྱང་ཡིན་ནོ། །དཔེར་བརྗོད་པ་འདི་ནི་མ་འཆོལ་བར་བལྟ་སྟེ། འདི་ལྟ་སྟེ་བསམ་གཏན་གཉིས་པ་ལ་སོགས་པའི་སྦྱོར་བ་ལས་བྱུང་བའི་ཡོན་ཏན་རྣམས་ཀྱི་མ་ཐོབ་པ་ནི་དེ་དག་མ་ཐོབ་པ་འདོད་པ་ན་སྤྱོད་པའི་སེམས་ཅན་རྣམས་ལ་ཡོད་ལ། དེ་གལ་ཏེ་འདོད་པ་རྣམས་
ལས་འདོད་ཆགས་དང་བྲལ་བར་བྱས་ནས་བསམ་གཏན་དང་པོར་སྐྱེ་ན། དེ་དག་གི་མ་ཐོབ་པ་དེ་ནི་ས་འཕོས་པས་རྣམ་པར་ཉམས་པར་འགྱུར་རོ། །དེ་དག་གི་བསམ་གཏན་དང་པོའི་ས་པའི་ཐོབ་པ་ནི་སྐྱེ་བ་ཁོ་ན་སྟེ། དེ་བཞིན་དུ་གཞན་དག་གི་ཡང་སྦྱར་བར་བྱའོ། །དེ་ལྟ་ན་ཐོབ་པ་རྣམས་
ཐུག་པ་མེད་པར་ཐལ་བར་འགྱུར་བ་མ་ཡིན་ནམ་ཞེས་བྱ་བ་ནི་ཐོབ་པའི་ཡང་ཐོབ་པ་ཡོད་ལ་དེའི་ཡང་གཞན་དེའི་ཡང་གཞན་ཡོད་པས་ཐུག་པ་མེད་པ་ཡིན་ནོ། །ཕན་ཚུན་ལྡན་པའི་ཕྱིར་ཞེས་བྱ་བ་ནི་ཐོབ་པའི་ཐོབ་པ་དང་ལྡན་པས་ཐོབ་པ་དང་ལྡན་ལ། ཐོབ་པ་དང་ལྡན་པས་ནི་ཐོབ་པའི་ཐོབ་པ་དང་ལྡན་ནོ་
ཞེས་བྱ་བའི་ཐ་ཚིག་གོ། །ཐོབ་པ་སྐྱེས་པས་ཞེས་བྱ་བ་རྒྱས་པར་འབྱུང་བ་ནི། ཐོབ་པ་སྐྱེས་པས་ཆོས་སམ་སེམས་དེ་དང་ཡང་ལྡན་པར་འགྱུར་ལ། ཐོབ་པའི་ཐོབ་པ་དང་ཡང་ལྡན་པར་འགྱུར་རོ་ཞེས་བྱ་བར་སྦྱར་རོ། །ཐོབ་པའི་ཐོབ་པ་སྐྱེས་པས་ཐོབ་པ་ཁོ་ན་དང་ལྡན་པར་འགྱུར་རོ། །དེ་
ལྟར་ན་ཐོབ་པ་ནི་གཉི་ག་ལ་བྱ་བ་བྱེད་ལ་ཐོབ་པའི་ཐོབ་པ་ནི་གཅིག་ལ་ཡིན་ཏེ། དེའི་ཕྱིར་ཐུག་པ་མེད་པ་མ་ཡིན་ནོ། །དགེ་བ་ཡང་རུང་ཉོན་མོངས་པ་ཅན་ཡང་རུང་ཞེས་བྱ་བ་ནི་འདི་གཉིས་ཀྱི་ཐོབ་པ་སྔར་སྐྱེ་བ་དང་དུས་ཕྱིས་སྐྱེ་བ་ཡོད་པའི་ཕྱིར་སྨོས་པ་ཡིན་ཏེ། ལུང་དུ་མ་བསྟན་པའི་ཐོབ་

པ་ནི་ལྷན་ཅིག་སྐྱེ་བ་ཁོ་ན་ཡིན་ནོ། །སྐད་ཅིག་མ་གཉིས་པ་ལ་ཞེས་བྱ་བ་རྒྱས་པར་འབྱུང་བ་ནི་སྐད་ཅིག་མ་གཉིས་པ་ལ་ཆོས་དེ་དང་དེའི་ཐོབ་པ་དང་ཐོབ་པའི་ཐོབ་པ་དག་ཅེས་བྱ་བ་ཐོབ་པ་གསུམ་སྐྱེ་སྟེ། ཐོབ་པ་དག་དང་ལྡན་པས་དེ་དག་དང་ལྡན་པར་འགྱུར་རོ། །ཡང་ཐོབ་པ་གསུམ་
པོ་དེ་དག་དང་ལྡན་པར་བྱ་བའི་ཕྱིར་ཐོབ་པའི་ཐོབ་པ་གསུམ་སྐྱེ་སྟེ། ཐོབ་པ་དྲུག་ཏུ་འགྱུར་རོ། །སྐད་ཅིག་མ་དང་པོ་དང་གཉིས་པ་ལས་སྐྱེས་པའི་རྫས་རྣམས་ཀྱི་ཞེས་བྱ་བ་ནི་ཆོས་དང་བཅས་པ་དང་རྫས་དགུའི་ཐོབ་པ་དགུ་པོ་རྗེས་ཀྱི་ཐོབ་པ་དང་བཅས་པས་བཅོ་བརྒྱད་དུ་འགྱུར་རོ། །དེ་ལྟར་
ཐོབ་པ་རྣམས་གོང་ནས་གོང་དུ་སྤེལ་བའི་འགྲེས་ཀྱིས་ཞེས་བྱ་བ་རྒྱས་པར་འབྱུང་བ་ནི་ཐོབ་པ་རྣམས་ཀྱི་སྐད་ཅིག་མ་གོང་ནས་གོང་དུ་སྤེལ་བའམ། ཐོབ་པ་རྣམས་སྐད་ཅིག་མ་གོང་ནས་གོང་དུ་སྤེལ་བ་སྟེ་དེའི་འགྲེས་ནི་གོང་ནས་གོང་དུ་སྤེལ་བའི་འགྲེས་སོ། །གོང་ནས་གོང་དུ་སྤེལ་བའི་འགྲེས་
དེས་ཐོབ་པ་འདི་དག་བསྐྱེད་ནའོ། །ཕྱོགས་ཙམ་ཞིག་བསྟན་པར་བྱ་སྟེ། སྐད་ཅིག་མ་བཞི་པ་ལ་ནི་སྐད་ཅིག་མ་དང་པོ་ལ་སྐྱེས་པའི་ཆོས་དང་ཐོབ་པ་དང་རྗེས་ཀྱི་ཐོབ་པ་དག་དང་བཅས་པ་གསུམ་ཡང་ཡོད་ལ་སྐད་ཅིག་མ་གཉིས་པ་ལ་སྐྱེས་པའི་ཐོབ་པ་དང་རྗེས་ཀྱི་ཐོབ་པ་ཕྱིས་ཀྱི་ཐོབ་
པ་དང་ལྡན་པ་དྲུག་ཀྱང་ཡོད་དོ། །དེ་བཞིན་དུ་སྐད་ཅིག་མ་གསུམ་པ་ལ་སྐྱེས་པའི་ཐོབ་པ་དང་རྗེས་ཀྱི་ཐོབ་པ་ཕྱིས་ཀྱི་ཐོབ་པ་དང་ལྡན་པ་བཅོ་བརྒྱད་ཀྱང་ཡོད་པས་སྐད་ཅིག་མ་བཞི་པ་ལ་ནི་སྐད་ཅིག་མ་དང་པོ་དང་གཉིས་པ་དང་གསུམ་པ་ལ་སྐྱེས་པ་རྣམས་ཀྱི་ཐོབ་པ་ཉི་ཤུ་རྩ་བདུན་རྗེས་
ཀྱི་ཐོབ་པ་དེ་སྙེད་དང་བཅས་ན་ཐོབ་པ་ལྔ་བཅུ་རྩ་བཞི་སྐྱེ་བར་འགྱུར་རོ། །སྐད་ཅིག་མ་ལྔ་པ་ལ་ནི་སྐད་ཅིག་མ་དང་པོ་དང་གཉིས་པ་དང་གསུམ་པ་ལ་སྐྱེས་པ་རྣམས་ཀྱི་ཐོབ་པ་དང་རྗེས་ཀྱི་ཐོབ་པ་ལྔ་བཅུ་རྩ་བཞི་དང་སྐད་ཅིག་མ་བཞི་པ་ལ་སྐྱེས་པ་རྣམས་ཀྱི་ཐོབ་པ་དང་རྗེས་ཀྱི་ཐོབ་པ་ལྔ་
བཅུ་རྩ་བཞི་པ་ཕྲག་གཉིས་ཡོད་པས་ལྔ་བཅུ་རྩ་བཞི་པ་ཕྲག་གསུམ་སྟེ། ཐོབ་པ་བརྒྱ་དྲུག་ཅུ་རྩ་གཉིས་སྐྱེ་བར་འགྱུར་ཏེ། དེ་ལྟར་གོང་ནས་གོང་དུ་སྤེལ་བའི་བསྒྲེ་བས་བརྗོད་པར་བྱའོ། །འདས་པ་དང་མ་འོངས་པ་ཞེས་བྱ་བ་འདིར་ད་ལྟར་བྱུང་བ་མ་སྨོས་པ་ནི་གདོན་མི་ཟ་བ་མ་ཡིན་

པའི་ཕྱིར་རོ། །སྐྱེས་ནས་ཐོབ་པ་ཞེས་བྱ་བ་འདིར་སྦྱོར་བ་ལས་བྱུང་བ་མ་སྨོས་པ་ཡང་གདོན་མི་ཟ་བ་མ་ཡིན་པ་ཉིད་ཀྱི་ཕྱིར་རོ།། །།བམ་པོ་བཅུ་བཞི་པ། ཐོག་མ་དང་ཐ་མ་མེད་པའི་འཁོར་བར་གཏོགས་པ་ཞེས་བྱ་བ་ནི་སྲོག་ཆགས་གཅིག་ལ་ཡང་སྐད་
ཅིག་སྐད་ཅིག་ལ་ཡང་ཐོག་མ་མེད་པ་དང་ཐ་མ་མེད་པའི་འཁོར་བར་གཏོགས་པ་རྣམས་ཀྱིས་ཐོབ་པ་མཐའ་ཡས་ཤིང་ཚད་མེད་པ་དག་སྐྱེ་བར་འགྱུར་ན་མང་པོ་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་ཡིན་ནོ། །རྫས་མཐའ་ཡས་པ་ཉིད་ནི་ཐོབ་པའི་རྫས་མཐའ་ཡས་པ་ཞེས་བྱ་བའི་ཐ་
ཚིག་གོ། །ཀྱེ་མ་འདི་ནི་ཐོབ་པ་རྣམས་ཀྱི་དགའ་སྟོན་ཆེན་པོ་ཞིག་སྟེ་ཞེས་བྱ་བ་འདི་ནི་བསྟིང་བ་ཡིན་ནོ། །སྟེས་ཏེ་ཐོབ་པ་རྣམས་གཟུགས་ཅན་མ་ཡིན་པའི་ཕྱིར་རོ། །ཐོགས་པ་མེད་པས་འདི་ལྟར་གོ་སྐབས་རྙེད་དོ། །སྐལ་མཉམ་སེམས་ཅན་འདྲ་བའོ། །ཞེས་བྱ་བ་ནི་འདི་དག་ལ་
སྐལ་བ་བསྟེན་པ་མཚུངས་པ་ཡོད་པས་ན་སྐལ་བ་མཉམ་པའོ། །དེའི་ངོ་བོ་ནི་སྐལ་བ་མཉམ་པ་ཉིད་དོ། །ཡང་ན་སྐལ་བ་བསྟེན་པ་མཚུངས་པས་ན་སྐལ་བ་མཉམ་པའོ། །དེ་ཉིད་སྐལ་བ་མཉམ་པ་ཉིད་གང་དང་ལྡན་པས་སྐལ་བ་མཉམ་པར་འགྱུར་བ་དེ་ནི་རྫས་ཡིན་ནོ། །
སེམས་ཅན་རྣམས་ཀྱི་འདྲ་བ་ནི་སྤྱི་སྟེ་མཚུངས་པ་ཞེས་བྱ་བའི་ཐ་ཚིག་གོ། །སེམས་ཅན་སྨོས་པ་ནི་སེམས་ཅན་མ་ཡིན་པ་བསལ་བའི་ཕྱིར་ཏེ། སེམས་ཅན་རྣམས་དང་སེམས་ཅན་དུ་བགྲང་བའི་ཆོས་རྣམས་ཀྱི་འདྲ་བ་ནི་སྐལ་བ་མཉམ་པ་ཉིད་ཡིན་གྱི། སེམས་ཅན་དུ་བགྲང་བ་མ་
ཡིན་པ་སཱ་ལུ་དང་ནས་ལ་སོགས་པ་དག་གི་ནི་ཡིན་པར་མི་འདོད་དོ། །བསྟན་བཅོས་ལས་ནི་འདིའི་མིང་རིས་མཐུན་པ་ཞེས་འབྱུང་ངོ་ཞེས་བྱ་བ་ནི་བསྟན་བཅོས་ཡེ་ཤེས་ལ་འཇུག་པ་ལ་སོགས་པ་ལས་ནི་རིས་མཐུན་པ་ཞེས་བྱ་བའི་མིང་འདིས་སེམས་དང་ལྡན་པ་མ་ཡིན་པ་གང་ཡིན་པ་
བསྟན་ཏོ། །འདིར་ནི་ཚིགས་སུ་བཅད་པ་བསྡེབས་པ་དང་མཐུན་པར་སྐལ་བ་མཉམ་པ་ཉིད་ཅེས་བྱ་བའི་མིང་འདིས་བསྟན་ཏོ་སྙམ་དུ་བསམས་པ་ཡིན་ནོ། །དེ་ཡང་ཐ་དད་པ་མ་ཡིན་པ་དང་ཐ་དད་པ་སྟེ་ཞེས་བྱ་བ་ནི་སེམས་ཅན་ཐམས་ཅད་ལ་ཡོད་པ་གང་ཡིན་པ་དེ་ནི་སེམས་ཅན་རེ་རེ་

ཞིང་གཞན་དང་གཞན་ཡིན་ཡང་འདྲ་བའི་ཕྱིར་ཐ་དད་པ་མ་ཡིན་པ་ཞེས་བྱའོ། །དེ་ཇི་ལྟར་བྱེ་བྲག་པ་རྣམས་ཀྱི་ལྟ་བུ་གཅིག་པུ་དང་རྟག་པ་ནི་མ་ཡིན་ནོ། །ཐ་དད་པ་ནི་ཁ་ཅིག་ལ་ནི་ཡོད་ལ་ཁ་ཅིག་ལ་ནི་མེད་པ་གང་ཡིན་པའོ། །དེ་ཉིད་ཀྱི་ཕྱིར་ཐ་དད་པ་ལ་ནི་ཞེས་བྱ་བ་རྒྱས་པར་སྨོས་ཏེ།
ཁམས་ནི་འདོད་པ་ལ་སོགས་པ་གསུམ་མོ། །འགྲོ་བ་ནི་དམྱལ་བ་ལ་སོགས་པ་ལྔའོ། །སྐྱེ་གནས་ནི་སྒོ་ང་ལ་སོགས་པ་བཞིའོ། །རིགས་ནི་བྲམ་ཟེ་ལ་སོགས་པའོ། །སོགས་པ་ཞེས་བྱ་བའི་སྒྲས་ནི་དགེ་བསྙེན་མ་དང་དགེ་སློང་མ་དང་སློབ་པ་ཡང་མ་ཡིན་མི་སློབ་པ་ཡང་
མ་ཡིན་པ་ལ་སོགས་པ་བསྡུས་པས་སོ། །ཕུང་པོ་དང་སྐྱེ་མཆེད་དང་ཁམས་ཀྱི་སྒོ་ནས་སོ་ཞེས་བྱ་བ་ནི་ཕུང་པོའི་སྐལ་བ་མཉམ་པ་ཉིད་ནས་ཆོས་ཀྱི་ཁམས་ཀྱི་སྐལ་བ་མཉམ་པ་ཉིད་ཀྱི་བར་ཡིན་ནོ། །ཁྱད་པར་མེད་པར་ཞེས་བྱ་བ་ནི་སྤྱིའི་ངོ་བོ་ཡིན་ནོ། །འདོགས་པར་ཡང་ཞེས་བྱ་བ་ནི་
བརྗོད་པར་ཡང་ཞེས་བྱ་བའི་ཐ་ཚིག་གོ། །ཕུང་པོ་ལ་སོགས་བློ་དང་འདོགས་པ་དག་ལ་ཡང་དེ་བཞིན་དུ་སྦྱར་བར་བྱའོ་ཞེས་བྱ་བ་ནི་གལ་ཏེ་ཕུང་པོའི་སྐལ་བ་མཉམ་པ་ཉིད་ཀྱི་རྫས་ཁྱད་པར་མེད་པ་ཞིག་མེད་ན་ཕན་ཚུན་ཁྱད་པར་ཐ་དད་པའི་ཕུང་པོ་རྣམས་ལ་བྱེ་བྲག་མེད་པར་ཕུང་པོ་ཕུང་
པོ་ཞེས་བྱ་བའི་བློ་འཇུག་པ་དང་། འདོགས་པར་ཡང་མི་འགྱུར་ཞེས་བྱ་བ་ཡིན་ནོ། །ཁ་ཅིག་ནི་ཁམས་ལ་སོགས་པའི་བློ་དང་འདོགས་པ་དག་ལ་ཡང་དེ་བཞིན་དུ་སྦྱར་བར་བྱའོ་ཞེས་འདོན་པར་བྱེད་དེ། དེ་དག་གི་ལྟར་ན་འདི་སྐད་དུ་གལ་ཏེ་སྐལ་བ་མཉམ་པ་ཉིད་ཅེས་བྱ་བ་ནས་རྒྱས་
པར་ཕན་ཚུན་ཁྱད་པར་ཐ་དད་པའི་ཁམས་རྣམས་ལ་ཁྱད་པར་མེད་པར་འདོད་པ་ན་སྤྱོད་པ་འདོད་པ་ན་སྤྱོད་པ་ཞེས་བྱ་བའི་བློ་དང་འདོགས་པར་ཡང་མི་འགྱུར་རོ་ཞེས་བརྗོད་པར་བྱའོ། །འཆི་འཕོ་བར་ཡང་འགྱུར་ཞིང་སྐྱེ་བར་ཡང་འགྱུར་ལ་སེམས་ཅན་གྱི་སྐལ་བ་མཉམ་པ་ཉིད་འདོར་
བར་ཡང་མི་འགྱུར་འཐོབ་པར་ཡང་མི་འགྱུར་བ་ཡོད་དམ་ཞེས་བྱ་བ་ལ། སེམས་ཅན་གྱི་སྐལ་བ་མཉམ་པ་ཉིད་ཅེས་བྱ་བ་ནི་སེམས་ཅན་རྣམས་ཀྱི་སྐལ་བ་མཉམ་པ་ཉིད་ནི་སེམས་ཅན་གྱི་སྐལ་བ་མཉམ་པ་ཉིད་དེ་མི་ཉིད་ལ་སོགས་པའི་མཚན་ཉིད་ཡིན་ནོ། །སེམས་ཅན་སྨོས་པ་

ནི་ཆོས་ལས་ཁྱད་པར་དུ་བྱ་བའི་ཕྱིར་ཏེ། མུ་བཞི་པ་འདིར་ནི་སེམས་ཅན་གྱི་སྐལ་བ་མཉམ་པ་ཉིད་བརྗོད་པར་འདོད་པ་ཡིན་གྱི་ཆོས་ཀྱི་སྐལ་བ་མཉམ་པ་ཉིད་ནི་མ་ཡིན་ནོ། །འདིར་ནི་སེམས་ཅན་སེམས་ཅན་ཞེས་བྱ་བའི་རྣམ་པའི་སྐལ་བ་མཉམ་པ་ཉིད་ཀྱང་ཡིན་
པར་མི་འདོད་དེ། གལ་ཏེ་དེ་ཡིན་པར་འདོད་པར་གྱུར་ན་སེམས་ཅན་གྱི་སྐལ་བ་མཉམ་པ་ཉིད་དེ་ནི་འགྲོ་བ་འཕོས་ཀྱང་དེའི་སོ་ན་འདུག་པའི་ཕྱིར་མུ་གསུམ་པ་འགྲུབ་པར་མི་འགྱུར་རོ། །མུ་བཞི་ཞེས་བྱ་བ་ལ། དེ་ཉིད་དུ་སྐྱེ་བ་ནའོ་ཞེས་བྱ་བ་ནི། འདི་ལྟ་སྟེ། མིའི་འགྲོ་བ་ནས་ཤི་འཕོས་ཏེ།
མིའི་འགྲོ་བ་ཁོ་ནར་སྐྱེ་བ་ན་འཆི་བའི་ཕྱིར་འཆི་འཕོ་བར་ཡང་འགྱུར་ཞིང་དེ་ཉིད་དུ་ཉིང་མཚམས་སྦྱོར་བ་དང་ལྡན་པའི་ཕྱིར་སྐྱེ་བར་ཡང་འགྱུར་ལ་འདིས་མིའི་སྐལ་བ་མཉམ་པ་ཉིད་འདོར་བ་ཡང་མི་འགྱུར་ལ། འཐོབ་པར་ཡང་མི་འགྱུར་ཏེ། མིའི་སྐལ་བ་མཉམ་པ་ཉིད་དེ་དེའི་སོ་ན་འདུག་
པའི་ཕྱིར་རོ། །གཉིས་པ་ནི་ངེས་པ་ལ་འཇུག་པ་ན་སྟེ་ཞེས་བྱ་བ་ནི་དེས་ནི་སེམས་ཅན་གྱི་སྐལ་བ་མཉམ་པ་ཉིད་དེ་སོ་སོའི་སྐྱེ་བོའི་ངོ་བོ་ཉིད་འདོར་ཞིང་འཕགས་པའི་ངོ་བོ་ཉིད་གཞན་འཐོབ་བོ། །གསུམ་པ་ནི་འགྲོ་བ་འཕོ་བ་ལས་སོ་ཞེས་བྱ་བ་ནི་འདི་ལྟ་སྟེ། མིའི་འགྲོ་བ་ནས་ཤི་འཕོས་ཏེ་ལྷའི་
འགྲོ་བར་སྐྱེ་བ་ན་དེ་བཞིན་དུ་འཆི་བའི་ཕྱིར་འཆི་འཕོ་བར་ཡང་འགྱུར་ཞིང་། དེ་ཉིད་དུ་ཉིང་མཚམས་སྦྱོར་བ་དང་ལྡན་པའི་ཕྱིར་སྐྱེ་བར་ཡང་འགྱུར་ལ། སེམས་ཅན་གྱི་སྐལ་བ་མཉམ་པ་ཉིད་མིའི་སྐལ་བ་མཉམ་པ་ཉིད་ཀྱི་མཚན་ཉིད་འདོར་བར་ཡང་འགྱུར་ཞིང་ལྷའི་སྐལ་བ་མཉམ་པ་ཉིད་ཀྱི་
མཚན་ཉིད་གཞན་འཐོབ་པར་ཡང་འགྱུར་རོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ནི་གོང་དུ་བཤད་པའི་མུའི་ངོ་བོ་ཉིད་ཀྱི་རྣམ་པ་དག་མ་གཏོགས་པའོ་ཞེས་བྱ་བའི་ཐ་ཚིག་གོ། །འདི་ལྟ་སྟེ། སོ་སོའི་སྐྱེ་བོའམ་འཕགས་པ་གསོན་པོས་ཅུང་ཟད་ཀྱང་མི་ཐོབ་པ་ལྟ་བུའོ། །
གལ་ཏེ་སོ་སོའི་སྐྱེ་བོའི་སྐལ་བ་མཉམ་པ་ཉིད་ཅེས་བྱ་བའི་རྫས་ཞིག་ཡོད་ན་གོ་སོ་སོའི་སྐྱེ་བོ་ཉིད་ཀྱིས་ཅི་ཞིག་བྱ་སྟེ་ཞེས་བྱ་བ་ནི་མི་དགོས་སོ་ཞེས་བྱ་བའི་ཚིག་ལྷག་མ་ཡིན་ནོ། །སོ་སོའི་སྐྱེ་བོའི་སྐལ་བ་མཉམ་པ་ཉིད་ཁོ་ནས་སོ་སོའི་སྐྱེ་བོ་ཞེས་བྱ་བར་ཡོངས་སུ་ཆོད་པར་འགྱུར་རོ། །དཔེར་

ན་མིའི་སྐལ་བ་མཉམ་པ་ཉིད་ཁོ་ནས་མི་ཞེས་བྱ་བ་ལྟ་བུ་ཡིན་ནོ། །བྱེ་བྲག་ཏུ་སྨྲ་བ་དག་མ་རྙེད་པ་བཞིན་དུ་མིའི་སྐལ་བ་མཉམ་པ་ཉིད་ལས་མི་ཉིད་ཅེས་བྱ་བ་ངོ་བོ་ཉིད་གཞན་ཞིག་ཏུ་རྟོག་པར་ནི་མི་བྱེད་དོ། །དེ་ལ་སྒྲུབ་པ་ནི་སོ་སོའི་སྐྱེ་བོ་ཉིད་ནི། རང་གི་སྐལ་བ་མཉམ་པ་ཉིད་
ལས་གཞན་པ་མ་ཡིན་ཏེ། རང་གི་སྐལ་བ་མཉམ་པ་ཉིད་ཀྱི་རྐྱེན་གྱིས་བརྗོད་པར་བྱ་བ་ཡིན་པའི་ཕྱིར་མི་ཉིད་ལྟ་བུའོ། །འཇིག་རྟེན་གྱིས་ནི་སྐལ་བ་མཉམ་པ་ཉིད་གཟུགས་ཅན་མ་ཡིན་པའི་ཕྱིར་མི་མཐོང་བ་ཉིད་ལ་ཞེས་བྱ་བ་ནི་འཇིག་རྟེན་གྱི་མིག་གིས་ནི་སྐལ་བ་མཉམ་པ་
ཉིད་གཟུགས་ཅན་མ་ཡིན་པའི་ཕྱིར་ཏེ་གཟུགས་མེད་པའི་ཕྱིར་རམ། གཟུགས་ཀྱི་ངོ་བོ་ཉིད་མ་ཡིན་པའི་ཕྱིར་མི་མཐོང་ངོ་། །ཇི་ལྟར་མི་མཐོང་བ་དེ་བཞིན་དུ་མི་ཐོས་པ་ནས་རེག་པར་མི་འགྱུར་བའི་བར་དུ་དེ་དང་འདྲ་སྟེ། འདིས་ནི་མངོན་སུམ་གྱིས་མ་གྲུབ་པ་ཉིད་དུ་སྟོན་པར་བྱེད་དོ། །
འདི་ཤེས་རབ་ཀྱིས་ཀྱང་ཡོངས་སུ་མི་ཆོད་མོད་ཀྱི་ཞེས་བྱ་བ་འདིས་ནི་རྗེས་སུ་དཔག་པས་ཀྱང་མི་འགྲུབ་བོ་ཞེས་སྟོན་པར་བྱེད་དོ། །སེམས་ཅན་རྣམས་ཀྱི་རིགས་ཐ་མི་དད་པ་ཡང་ཁོང་དུ་ཆུད་དོ་ཞེས་བྱ་བ་ནི་དེ་མེད་པར་ཡང་ངོ་། །དེ་ལས་ཇི་ལྟ་བུ་ཞིག་བྱེད་ཅེས་བྱ་བ་ནི་རིགས་ཐ་མི་དད་པ་
རྟོགས་པ་ཡོད་ལ་དེ་ནི་སྐལ་བ་མཉམ་པ་ཉིད་རྫས་གཞན་དུ་བརྟགས་པས་བྱས་པ་མ་ཡིན་ཏེ་ཚད་མས་མི་དམིགས་པ་ཉིད་ཀྱིས་དེའི་ལས་མི་སྲིད་པའི་ཕྱིར་རོ། །ཁྱོད་སྤྱིའི་བློ་ནི་རྒྱུ་མཚན་མེད་པ་འབྱུང་བར་འོས་པ་མ་ཡིན་ཏེ་དེས་ན་སྤྱིའི་བློ་དེའི་རྒྱུ་མཚན་གང་ཡིན་པ་དེ་ནི་སྐལ་བ་མཉམ་
པ་ཉིད་ཅེས་བྱ་བའི་རྫས་ཡིན་ནོ་ཞེས་སྨྲ་བར་འགྱུར་ན། ཁོ་བོ་ཅག་ཀྱང་སྤྱིའི་བློ་དེ་རྒྱུ་མཚན་དང་བཅས་པ་ཡིན་པར་ནི་སྨྲ་སྟེ། བློ་དེ་ནི་འདྲ་བས་བྱས་པ་ཡིན་ལ་འདྲ་བ་དེ་ཡང་རྫས་གཞན་མ་ཡིན་ནོ་ཞེས་སྨྲའོ། །དེའི་ཕྱིར་གཞན་ཡང་སེམས་ཅན་མ་ཡིན་པ་སྐལ་བ་མཉམ་པ་ཉིད་ཀྱང་ཅིའི་ཕྱིར་མི་
འདོད་ཅེས་བྱ་བ་རྒྱས་པར་སྨོས་ཏེ། སེམས་ཅན་སེམས་ཅན་སྙམ་པའི་སྤྱིའི་བློ་ནི་སྐལ་བ་མཉམ་པ་ཉིད་རྫས་གཞན་གྱི་རྒྱུ་མཚན་ཅན་མ་ཡིན་ཏེ། སྤྱིའི་རྣམ་པ་ཅན་དུ་འབྱུང་བའི་ཕྱིར་སཱ་ལུ་དང་ནས་དང་མོན་སྲན་གྲེའུ་ལ་སོགས་པའི་སྤྱིའི་བློ་ལྟ་བུའོ། །འདི་དག་གི་སྤྱིའི་བློ་ནི་སཱ་ལུ་དང་ནས་

ལ་སོགས་པའི་རང་གི་རིགས་འདྲ་བས་བྱས་པ་ཡིན་ལ། དེ་དག་གི་རང་གི་རིགས་འདྲ་བ་ཡང་རང་ལས་དོན་གཞན་ནི་མ་ཡིན་ནོ། །སྐལ་བ་མཉམ་པ་ཕན་ཚུན་ཐ་དད་པ་དེ་དག་ཀྱང་ཞེས་བྱ་བ་རྒྱས་པར་འབྱུང་བ་ནི་སེམས་ཅན་གྱི་སྐལ་བ་མཉམ་པ་ཉིད་ཀྱང་
གཞན་ཡིན་ལ། ཁམས་ཀྱི་སྐལ་བ་མཉམ་པ་ཉིད་ཀྱང་གཞན་ཡིན། འགྲོ་བའི་སྐལ་བ་མཉམ་པ་ཉིད་ཀྱང་གཞན་ཡིན་ནོ་ཞེས་སྐལ་བ་མཉམ་པ་ཉིད་ཕན་ཚུན་ཐ་དད་པར་འདོད་དོ། །ཁྱེད་ནི་དེ་དག་ལ་འདི་ཡང་སྐལ་བ་མཉམ་པ་ཉིད་དོ། །འདི་ཡང་སྐལ་བ་མཉམ་པ་ཉིད་དོ་ཞེས་ཐ་མི་
དད་པར་སྐལ་བ་མཉམ་པ་ཉིད་དོ་ཞེས་བྱ་བར་འདོགས་པ་འདི་བྱེད་དེ། །གལ་ཏེ་དེ་ལ་ཡང་གང་གིས་ན་སྐལ་བ་མཉམ་པ་ཉིད་ཀྱི་སྤྱིའི་བློ་འབྱུང་བར་འགྱུར་བ་མཉམ་པ་གཞན་ཞིག་ཡོད་པར་ཁས་ལེན་ན་དེའི་ཕྱོགས་སྔ་མ་དང་འགལ་བའི་ཕྱིར་ཕྱོགས་སུ་མི་རུང་ངོ་། །དེ་ལྟ་ན་ནི་
བྱེ་བྲག་པ་རྣམས་ཀྱིས་གསལ་བར་བྱས་པ་ཡིན་ཏེ་ཞེས་བྱ་བ་ནི་འབར་བར་བྱས་ཤིང་གཞུང་བཙུགས་སོ་སྙམ་དུ་བསམས་པ་ཡིན་ཏེ། དེ་དག་ཀྱང་སྤྱིའི་དངོས་པོར་སྨྲ་བ་ཡིན་ལ་ཁྱེད་ཀྱང་ཡིན་པས་སོ། །གཅིག་ཡིན་ཡང་མེ་ཏོག་གི་ཕྲེང་བའི་སྐུད་པ་ལྟ་བུའམ། འབྱུང་པོའི་མགུལ་
དུ་སྲད་བུ་སྦྲེངས་པ་ལྟར་དུ་མ་ལ་འཇུག་པ་འདི་ནི་བྱེ་བྲག་པ་དེ་དག་གི་ཁྱད་པར་ཡིན་ནོ། །སྤྱིའི་རྫས་སུ་སྨྲ་བའི་ཕྱིར་གལ་ཏེ་གསལ་བར་བྱས་ཀྱང་རུང་། གཅིག་དང་དུ་མ་དང་རྟག་པ་ཉིད་དང་མི་རྟག་པ་ཉིད་ལ་སོགས་པ་ཁྱད་པར་དུ་སྨྲ་བའི་ཕྱིར་གསལ་བར་མ་བྱས་ཀྱང་རུང་སྟེ།
བྱེ་བྲག་པ་རྣམས་ཀྱིས་འཇིག་རྟེན་ཕ་རོལ་ཡོད་པ་ཉིད་དུ་བརྟགས་ཞེས་ཏེ་རྣམ་པར་མི་གཞག་པ་ནི་མ་ཡིན་ནོ། །བརྒྱ་ལ་ནི་མི་རྣམས་དང་སྐལ་བ་མཉམ་པ་འདི་ལྟ་བུ་ཉིད་དུ་འོང་ན་ཞེས་བྱ་བ་རྒྱས་པར་འབྱུང་བ་ནི་སྲོག་གཅོད་པ་ཀུན་དུ་བསྟེན་པ་དང་གོམས་པར་བྱས་པ་དང་ལེན་མང་དུ་བྱས་
པས་དམྱལ་བ་དག་ཏུ་སྐྱེ་བར་འགྱུར་རོ། །བརྒྱ་ལ་མི་རྣམས་དང་སྐལ་བ་མཉམ་པ་འདི་ལྟ་བུ་ཉིད་དུ་འོང་ན་ཡང་སྲོག་བཅད་པས་ཚེ་ཐུང་བར་འགྱུར་རོ་ཞེས་བྱ་བ་རྒྱས་པར་གསུངས་པ་ཡིན་ཏེ། རྣམ་པ་འདི་ལྟ་བུ་ནི་འདི་ལྟ་བུའོ། །དེའི་ངོ་བོ་ནི་འདི་ལྟ་བུ་ཉིད་དོ། །སློབ་དཔོན་འདུས་

བཟང་ན་རེ་ནི་ལུས་དང་དབང་པོ་དང་དབྱིབས་དང་སྤྱོད་པ་དང་ཟས་ལ་སོགས་པ་བསྟེན་པ་མཚུངས་པ་ཉིད་ཀྱི་རྒྱུ་དང་ཕན་ཚུན་མངོན་པར་དགའ་བའི་རྒྱུ་མཚན་ནི་སྐལ་བ་མཉམ་པ་ཉིད་ཡིན་ནོ་ཞེས་ཟེར་ཏེ། འདི་ནི་ཁོ་བོ་ཅག་ཀྱང་དེ་སྐད་དུ་སྨྲ་མོད་ཀྱི་སྐལ་བ་མཉམ་པ་ཉིད་དེ་རྫས་གཞན་ནི་མ་ཡིན་
ཏེ། འདུ་བྱེད་དེ་དག་ཁོ་ན་དེ་ལྟ་བུའི་རྒྱུའི་ངོ་བོར་འགྱུར་བར་ཟད་དོ་ཞེས་བྱ་བ་འདི་ཁོ་ནས་གསལ་བ་ཡིན་ནོ། །འདུ་ཤེས་མེད་པ་ལ་འདུ་ཤེས། །མེད་པར་སེམས་དང་སེམས་བྱུང་རྣམས། །འགོག་པའོ་ཞེས་བྱ་བ་རྒྱས་པར་འབྱུང་བ་ནི་འདི་འདུ་ཤེས་མེད་པ་རྣམས་ཀྱི་ཡིན་པས། འདུ་ཤེས་
མེད་པ་པའམ་འདུ་ཤེས་མེད་པ་དག་ན་ཡོད་པས་འདུ་ཤེས་མེད་པ་པའོ། །སེམས་དང་སེམས་ལས་བྱུང་བ་རྣམས་འདིས་འགོག་པར་འགྱུར་བའམ། སེམས་དང་སེམས་ལས་བྱུང་བ་རྣམས་འགོག་པས་ན་འགོག་པའོ། །གང་གིས་མ་འོངས་པའི་དུས་ན་འདུག་པའི་སེམས་དང་སེམས་
ལས་བྱུང་བ་རྣམས་དུས་གཞན་གྱི་བར་དུ་དུས་རེ་ཞིག་འགོག་ཅིང་སྐྱེར་མི་སྟེར་བ་ཞེས་བྱ་བའི་ཐ་ཚིག་སྟེ། དེ་ནི་འདུ་ཤེས་མེད་པ་པ་ཞེས་བྱ་བའི་རྫས་ཡིན་ནོ། །རླུང་གིས་ཆུ་འགོག་པ་བཞིན་ནོ། །ཞེས་བྱ་བ་ནི་འགག་བཞིན་ཞེས་བྱ་བའི་ཐ་ཚིག་གོ། །བསམ་གཏན་ཁྱད་པར་ཅན་
བཞིན་ནོ་ཞེས་བྱ་བ་ནི་ཇི་ལྟར་བསམ་གཏན་ཁྱད་པར་ཅན་གང་དག་གི་ཕྱོགས་གཅིག་ན་ཚངས་པ་ཆེན་པོ་ཁ་ཅིག་འཁོད་པའི་ལྷ་དེ་དག་ནི་ཚངས་པའི་མདུན་ན་འདོན་ཞེས་བྱ་བ་ཡིན་པ་དེ་བཞིན་དུ་འདུ་ཤེས་མེད་པའི་སེམས་ཅན་དག་ཀྱང་འབྲས་བུ་ཆེ་བ་ཞེས་བྱ་བའི་ཕྱོགས་གཅིག་
ན་འཁོད་ཀྱི་དེའི་ས་གཞན་ནི་མེད་དོ། །སྐྱེ་བའི་དུས་དང་འཆི་འཕོ་བའི་དུས་ན་འགྱུར་ཏེ་ཞེས་བྱ་བ་ནི་འདུ་ཤེས་ཅན་དུ་ཞེས་བྱ་བར་སྦྱར་ཏེ། ཉོན་མོངས་པ་ཅན་གྱི་ཡིད་ཀྱིས་ཉིང་མཚམས་སྦྱོར་བ་དང་ལྡན་པའི་ཕྱིར། འཆི་འཕོ་སྐྱེ་བ་བཏང་སྙོམས་ལ། །ཞེས་བྱ་བར་ངེས་པའི་ཕྱིར་རོ། །
སྔོན་གྱི་སྙོམས་པར་འཇུག་པའི་འདུ་བྱེད་ཡོངས་སུ་ཟད་པའི་ཕྱིར་ཞེས་བྱ་བ་ནི་སྔོན་གྱི་སྙོམས་པར་འཇུག་པའི་འདུ་བྱེད་ཀྱི་མཚན་ཉིད་རྣམ་པར་སྨིན་པའི་རྒྱུ་ཡོངས་སུ་ཟད་པའི་ཕྱིར་ཏེ། དེའི་འབྲས་བུ་ཡོངས་སུ་རྫོགས་སོ་ཞེས་བྱ་བའི་ཐ་ཚིག་གོ། །གཞན་དག་ན་རེ་སྔོན་གྱི་སྙོམས་

པར་འཇུག་པའི་འདུ་བྱེད་ཀྱི་འཕེན་པ་ཡོངས་སུ་ཟད་པའི་ཕྱིར་རོ་ཞེས་ཟེར་རོ། །སྔོན་མེད་པ་མ་བསགས་པའི་ཕྱིར་ཞེས་བྱ་བ་ནི་སེམས་མེད་པ་ལས་མ་བསགས་པའི་ཕྱིར་སྙམ་དུ་བསམས་པ་ཡིན་ནོ། །མདའ་འཕངས་པ་ཤུགས་ཟད་པ་དག་ས་ལ་ལྷུང་བ་བཞིན་
དུ་ཞེས་བྱ་བ་ནི་སྐྱེ་བར་འགྱུར་ཞེས་བྱ་བར་སྐབས་དང་སྦྱར་རོ། །ཚིག་གོང་མ་འདི་ནི་བསྐྱེད་པར་བྱ་བའི་དོན་ཡིན་ལ། དོན་གྱི་དབང་གིས་ན་འགྲོ་བའི་དོན་ཡིན་པར་འགྱུར་ཏེ་འགྲོ་བ་ཞེས་བྱ་བའི་ཐ་ཚིག་གོ། །གཞན་དག་ན་རེ་ས་ལ་འགྲོ་ཞེས་བྱ་བའི་ཚིག་ལྷག་མ་ཡིན་ནོ་ཞེས་ཟེར་རོ། །
སེམས་ཅན་འདུ་ཤེས་མེད་པ་རྣམས་ཀྱི་སྙོམས་པར་འཇུག་པའམ། སྙོམས་པར་འཇུག་པ་འདུ་ཤེས་མེད་པ་ཅན་ཡིན་པས་འདུ་ཤེས་མེད་པའི་སྙོམས་པར་འཇུག་པའོ། །དེ་བཞིན་ཞེས་བྱ་བའི་སྒྲས་ནི་དེ་ཙམ་ཞིག་མཐུན་པར་འདྲེན་ཏོ་ཞེས་བྱ་བ་ནི་རྣམ་སྨིན་ཞེས་བྱ་བ་དེ་ལྟ་བུ་ལ་སོགས་པའི་
དོན་གྱི་ཁྱད་པར་མི་འདོད་པའི་ཕྱིར་ཏེ་འདུ་ཤེས་མེད་པས་ནི་ལུང་དུ་མ་བསྟན་པ་ཁོ་ན་ཡིན་ལ། སྙོམས་པར་འཇུག་པ་འདི་ནི་དགེ་བ་ཁོ་ན་ཡིན་ནོ་ཞེས་འཆད་པར་འགྱུར་རོ། །རྣམ་པར་སྨིན་པ་ནི་ཕུང་པོ་ལྔ་ཞེས་བྱ་བ་ནི་འཆི་འཕོ་བ་དང་སྐྱེ་བའི་དུས་ན་སེམས་དང་སེམས་ལས་བྱུང་བ་རྣམས་
རྣམ་པར་སྨིན་པ་ཉིད་ཡིན་པའི་ཕྱིར་རོ། །གང་གི་ཕྱིར་དེ་ལྟར་དེ་ཐོབ་པ་ཡོངས་སུ་ཉམས་ཀྱང་ངེས་པ་ཁོ་ནར་ཡང་བསྐྱེད་ནས་འདུ་ཤེས་མེད་པའི་སེམས་ཅན་རྣམས་ཀྱི་ནང་དུ་སྐྱེ་བར་འགྱུར་བ་དེ་ཉིད་ཀྱི་ཕྱིར་དེ་ཐོབ་པ་ནི་ངེས་པ་ལ་མི་འཇུག་སྟེ། འཕགས་པ་ནི་ངེས་པ་ལ་ཞུགས་པ་ཁོ་ནས་ངན་
སོང་གི་འགྲོ་བ་དང་། འདུ་ཤེས་མེད་པ་དང་། ཚངས་པ་ཆེན་པོ་དང་། སྒྲ་མི་སྙན་དུ་སྐྱེ་བ་དང་། སྲིད་པ་བརྒྱད་པར་སྐྱེ་བ་ལ་སོགས་པའི་སོ་སོར་བརྟགས་པ་མ་ཡིན་པས་འགོག་པ་སོ་སོར་འཐོབ་པོ། །འདི་ལ་རྣམ་པར་ལྟུང་བའི་གནས་ལྟ་བུར་གཟིགས་པས་ཞེས་བྱ་བ་ནི་འདི་ངན་
སོང་གི་གནས་ལྟ་བུར་གཟིགས་པ་ཞེས་བྱ་བའི་ཐ་ཚིག་གོ། །གཞན་དག་ན་རེ་རེའི་གཡང་ས་ལ་སོགས་པ་རྣམ་པར་ལྟུང་བའི་གནས་ལྟ་བུར་རོ་ཞེས་ཟེར་རོ། །སོ་སོའི་སྐྱེ་བོ་ངེས་པར་འབྱུང་བའི་འདུ་ཤེས་ཅན་དག་ནི་དེ་ལ་སྙོམས་པར་འཇུག་སྟེ། ཐར་པར་འདུ་ཤེས་པ་དག་ཅེས་བྱ་

བའི་ཐ་ཚིག་གོ། །འཕགས་པ་དག་ནི་དེ་ལྟར་འདུ་ཤེས་ཕྱིན་ཅི་ལོག་པ་ཅན་མ་ཡིན་ནོ། །བསམ་གཏན་བཞིན་དུ་འཐོབ་བམ་ཞེས་བྱ་བ་ནི་རྣལ་འབྱོར་པ་དག་བསམ་གཏན་བཞི་པ་ཐོབ་ནས་ཐོག་མ་མེད་པ་ཅན་གྱི་འཁོར་བ་ནས་བསམ་གཏན་བཞི་པ་སྔོན་ཐོབ་པ་འདས་པ་དང་མ་འོངས་པ་
སོ་སོར་འཐོབ་པར་འགྱུར་ཏེ། དེ་ལྟ་བས་ན་ཅི་དེ་དང་འདྲ་བ་ཁོ་ནར་འདས་པ་དང་མ་འོངས་པ་དག་ཀྱང་འཐོབ་བམ་ཞེས་འདྲི་བར་བྱེད་དོ། །རེ་ཞིག་གཞན་དག་གིས་ཀྱང་མི་འཐོབ་པོ་ཞེས་བྱ་བ་ནི་རེ་ཞིག་སྙོམས་པར་འཇུག་པ་འདི་གང་དག་གིས་བདག་ཉིད་ཀྱི་ཡིན་པ་སོ་སོའི་སྐྱེ་བོ་དག་གིས་ཀྱང་འདས་པ་མི་
འཐོབ་ན། འདི་གང་དག་གི་བདག་ཉིད་ཀྱི་མ་ཡིན་པ་འཕགས་པ་དག་གིས་ལྟ་སྨོས་ཀྱང་ཅི་དགོས་ཞེས་བྱ་བ་ཡིན་ནོ། །འདི་ནི་འདྲིས་པ་ཡིན་ཡང་ཞེས་བྱ་བ་ནི་ཐོག་མ་མེད་པ་ཅན་གྱི་འཁོར་བ་ན་སྔོན་ཐོབ་པ་ཡིན་ཡང་ངོ་། །མངོན་པར་འདུ་བྱ་བ་ཆེན་པོས་བསྒྲུབ་པར་བྱ་བ་ཡིན་པའི་ཕྱིར་དང་།
སེམས་མེད་པ་པ་ཡིན་པའི་ཕྱིར་རོ་ཞེས་བྱ་བ་ནི་འབད་པ་ཆེན་པོས་བསྒྲུབ་པར་བྱ་བ་ཡིན་པའི་ཕྱིར་ཞེས་བྱ་བའི་ཐ་ཚིག་གོ། །དུས་གཅིག་འཐོབ་ཅེས་བྱ་བ་ནི་དུས་མཉམ་པ་འཐོབ་པར་འགྱུར་རོ་ཞེས་བྱ་བའི་ཐ་ཚིག་གོ། །སོ་སོར་ཐར་པའི་སྡོམ་པ་ཇི་ལྟ་བ་བཞིན་ཞེས་བྱ་བ་ནི་རྣམ་པ་བརྒྱད་ཅར་
ཡང་གང་གི་ཚེ་ཡང་དག་པར་ནོད་པ་དེའི་ཚེ་དེ་འཐོབ་ལ་དེའི་འཐོབ་པ་ཡང་སྐད་ཅིག་མ་དེ་ཉིད་ཀྱི་ཚེ་སྐྱེ་བ་ལྟ་བུའོ། །སྐད་ཅིག་མ་གཉིས་པ་ལ་སོགས་པར་ནི་ཇི་སྲིད་སྙོམས་པར་འཇུག་པ་དེ་མི་གཏོང་བ་དེ་སྲིད་དུ་སྙོམས་པར་འཇུག་པ་ཐོབ་པ་དེ་དང་ལྡན་པ་ཡིན་ནོ། །དེ་གཏོང་བ་ནི་ཡོངས་སུ་
ཉམས་པ་འམ་འཕོས་པའི་སྒོ་ནས་ཡིན་ནོ། །སེམས་མེད་པ་པ་ཡིན་པའི་ཕྱིར་མ་འོངས་པ་ནི་མི་འཐོབ་སྟེ་དགེ་བའི་སེམས་ནི་མ་འོངས་པ་ཐོབ་པར་འགྱུར་གྱི་སེམས་མེད་པ་འདི་ནི་མ་ཡིན་པས་དེ་དང་འདྲ་བར་མ་འོངས་པ་འཐོབ་པར་མི་འགྱུར་རོ། །འགོག་པ་ཞེས་པའང་དེ་བཞིན་ཉིད་ཅེས་བྱ་བ་
ནི་སྙོམས་པར་འཇུག་པ་ཞེས་བྱ་བ་དང་སྦྱར་རོ། །ཉིད་ཅེས་བྱ་བའི་སྒྲ་ནི་ངེས་པར་གཟུང་བ་ཡིན་ཏེ། ཇི་ལྟར་འདུ་ཤེས་མེད་པའི་སྙོམས་པར་འཇུག་པ་བསྟན་པ་དེ་བཞིན་ཞེས་བྱ་བའི་སྒྲས། སེམས་དང་སེམས་པ་ལས་བྱུང་རྣམས། །འགོག་པའོ་ཞེས་བྱ་བ་མཐུན་པར་བསྒྲེས་པ་དེ་

བཞིན་དུ་འགོག་པའི་སྙོམས་པར་འཇུག་པ་བསྟན་པ་འདི་ཡང་རྣམ་པ་དེ་ཉིད་མཐུན་པར་བསྒྲེའོ་ཞེས་བྱ་བ་ཡིན་ནོ། །ཞི་བར་གནས་པའི་འདུ་ཤེས་སྔོན་དུ་བཏང་བའི་ཡིད་ལ་བྱེད་པས་ཞེས་བྱ་བ་ལ། གནས་པ་ནི་རྩེད་མོས་གནས་པ་དང་འདྲ་བར་གནས་པ་སྟེ།
ཏིང་ངེ་འཛིན་གྱི་ཁྱད་པར་ཡིན་ནོ། །གནས་པ་ཞི་བ་ནི་ཞི་བར་གནས་པའོ། །ཞི་བར་གནས་པར་བྱ་བར་འདུ་ཤེས་པ་ནི་ཞི་བར་གནས་པར་འདུ་ཤེས་པའོ། །འདི་ལ་དེ་སྔོན་དུ་འགྲོ་བ་ཡོད་པས་ན་ཞི་བར་གནས་པའི་འདུ་ཤེས་སྔོན་དུ་འགྲོ་བའི་ཡིད་ལ་བྱེད་པ་སྟེ། ཡིད་ལ་སེམས་པ་ཞེས་
བྱ་བའི་ཐ་ཚིག་གོ། །འདུ་ཤེས་དང་ཚོར་བ་ཀུན་དུ་འབྱུང་བས་ཡོངས་སུ་སྐྱོ་བ་རྣམས་ནི་དེ་ལ་ཞི་བར་གནས་པའི་འདུ་ཤེས་སུ་འགྱུར་ཏེ། ཡིད་ལ་བྱེད་པ་དེ་ལྟ་བུས་འགོག་པའི་སྙོམས་པར་འཇུག་པ་འདི་ལ་སྙོམས་པར་འཇུག་གོ། །འདུ་ཤེས་མེད་པའི་སྙོམས་པར་འཇུག་པ་དེ་
ལ་ནི་འབྱུང་བའི་འདུ་ཤེས་སྔོན་དུ་བཏང་བས་ཏེ་ཐར་པའི་འདུ་ཤེས་སྔོན་དུ་བཏང་བས་ཞེས་བྱ་བའི་ཐ་ཚིག་གོ། །ལན་གྲངས་གཞན་ལ་མྱོང་བར་འགྱུར་བ་ཞེས་བྱ་བ་ལ། ལན་གྲངས་གཞན་ནི་ཚེ་རབས་གསུམ་པ་ལ་སོགས་པ་ཡིན་ཏེ། དེ་ལ་མྱོང་བར་འགྱུར་བ་ཡིན་ནོ། །ཇི་ལྟ་
ཞེ་ན། འཕགས་པ་གང་ཞིག་འདོད་པའི་ཁམས་སུ་འགོག་པའི་སྙོམས་པར་འཇུག་པ་བསྐྱེད་ནས་སྲིད་པའི་རྩེ་མོར་སྐྱེ་བར་འགྱུར་བ་དེའི་དེ་ནི་སྐྱེས་ནས་མྱོང་བར་འགྱུར་བ་ཡོངས་སུ་རྫོགས་པར་བྱེད་པ་ཡིན་ནོ། །གང་ཞིག་དེ་ལས་ཡོངས་སུ་ཉམས་ནས་གཟུགས་ཀྱི་ཁམས་སུ་སྐྱེས་ཏེ་
དུས་གཞན་ཞིག་ན་ཡང་སྲིད་པའི་རྩེ་མོ་ཐོབ་ནས་འགོག་པའི་སྙོམས་པར་འཇུག་པ་བསྐྱེད་དམ་མ་བསྐྱེད་ཀྱང་རུང་སྲིད་པའི་རྩེ་མོར་སྐྱེ་བར་འགྱུར་བ་དེ་ནི་ལན་གྲངས་གཞན་ལ་མྱོང་བར་འགྱུར་བ་ཡིན་ནོ། །གང་ཞིག་འདིར་ཡོངས་སུ་མྱ་ངན་ལས་འདའ་བར་འགྱུར་བ་དེའི་ནི་མ་ངེས་པ་
ཡིན་ནོ། །ཆད་པས་འཇིགས་པའི་ཕྱིར་ཞེས་བྱ་བ་ནི་བདག་གི་ངོ་བོ་ཐམས་ཅད་ཆད་པས་འཇིགས་པའི་ཕྱིར་ཏེ། ཡང་སྲིད་མེད་པས་གནོད་འགྱུར་ཏེ། །གཡང་སས་བྱིས་པ་རྣམས་བཞིན་ནོ། །ཅིའི་ཕྱིར་འདུ་ཤེས་མེད་པའི་སྙོམས་པར་འཇུག་པ་ལ་ཆད་པས་འཇིགས་པར་མི་འགྱུར་

ཞེ་ན། དེ་ལ་གཟུགས་ཡོད་པའི་ཕྱིར་ཏེ་གཟུགས་ལ་བདག་ཏུ་འདུ་ཤེས་པ་ལ་མངོན་པར་ཞེན་ནས་དེ་ལ་སྙོམས་པར་འཇུག་གོ། །འགོག་པའི་སྙོམས་པར་འཇུག་པ་ལ་ནི་གཟུགས་མེད་པའི་ས་པ་ཡིན་པའི་ཕྱིར་གཟུགས་ཀྱང་མེད་པས་བདག་གི་ངོ་བོ་ཐམས་ཅད་མེད་པར་མཐོང་ནས་དེ་ལ་
སྙོམས་པར་འཇུག་པར་སྤྲོ་བ་མེད་དོ། །གཟུགས་མེད་པ་དག་ན་རིས་མཐུན་པ་དང་སྲོག་གི་དབང་པོ་ལ་སོགས་པ་སེམས་དང་ལྡན་པ་མ་ཡིན་པ་དག་ཡོད་པ་མ་ཡིན་ནམ། ཅིའི་ཕྱིར་དེ་ལ་བདག་གི་འདུ་ཤེས་སུ་མངོན་པར་ཞེན་ནས་དེ་ལ་སྙོམས་པར་མི་འཇུག་ཅེ་ན། ལྡན་པ་མ་ཡིན་པ་རྣམས་
ནི་བལྟར་མི་སྣང་བའི་ཕྱིར་རོ། །འཕགས་པའི་ལམ་གྱི་སྟོབས་ཀྱིས་བསྐྱེད་པའི་ཡང་ཕྱིར་རོ་ཞེས་བྱ་བ་ཡང་དེ་འཕགས་པའི་ལམ་གྱིས་སྐྱེད་དོ་ཞེས་བྱ་བ་ཇི་ལྟར་ཤེས་ཤེ་ན། དེའི་ཕྱིར་མཐོང་བའི་ཆོས་ལ་མྱ་ངན་ལས་འདས་པ་ནི་དེ་ལ་མོས་པའི་ཕྱིར་རོ་ཞེས་བྱ་བ་སྨོས་ཏེ། མཐོང་བའི་
ཚེ་ལ་མྱ་ངན་ལས་འདས་པ་ནི་མཐོང་བའི་ཆོས་མྱ་ངན་ལས་འདས་པ་སྟེ། དེ་ནའོ། །དེ་ལ་མོས་པའི་ཕྱིར་རོ་ཞེས་བྱ་བ་ལ། དེ་ཡིན་ནོ་སྙམ་དུ་སྨོས་པ་ནི་དེ་ལ་མོས་པའོ། །ཡང་ན་དེས་མོས་པ་ནི་དེ་ལ་མོས་པའོ། །དེ་ལ་མོས་པས་ན་དེ་ལ་མོས་པའི་ཕྱིར་ཏེ། འཕགས་པ་རྣམས་ནི་མཐོང་
བའི་ཚེ་མྱ་ངན་ལས་འདས་པ་ནི་འདི་ཡིན་ནོ་ཞེས་དེ་ལ་མོས་སོ། །ཡང་ཁ་ཅིག་ནི་འདི་སྐད་དུ་མྱ་ངན་ལས་འདས་པ་མཐོང་བ་དེ་ལ་མོས་པའི་ཕྱིར་རོ་ཞེས་འདོན་ཅིང་འདི་སྐད་དུ་འདིས་མྱ་ངན་ལས་འདས་པ་མཐོང་བས་ན་མྱ་ངན་ལས་འདས་པ་མཐོང་བའོ། །འཕགས་པ་དེ་དེ་ལ་མོས་པ་ནི་དེ་
ལ་མོས་པའོ། །དེ་ལ་མོས་ན་དེ་ལ་མོས་པའི་ཕྱིར་རོ་ཞེས་འཆད་དེ། འདི་སྐད་དུ་འཕགས་པ་ཆོས་མཐོང་བ་དེ་ལ་མོས་ཀྱི་གཞན་ནི་མ་ཡིན་ནོ་ཞེས་བཤད་པ་ཡིན་ནོ། །སོ་སོའི་སྐྱེ་བོ་ཡང་འཇིག་རྟེན་པའི་ལམ་གྱིས་མྱ་ངན་ལས་འདས་པ་མཐོང་བ་མ་ཡིན་ནམ་ཞེ་ན། སོ་སོའི་སྐྱེ་བོས་ནི་མྱ་
ངན་ལས་འདས་པ་མཐོང་བ་མ་ཡིན་གྱི་མྱ་ངན་ལས་འདས་པ་ཐོབ་པ་ཡིན་ཏེ། སོ་སོའི་སྐྱེ་བོ་ནི་དེའི་གོང་མའི་ས་ལ་ཞི་བར་ལྟ་བས་འདོད་ཆགས་དང་བྲལ་བ་ཐོབ་ཀྱི་མྱ་ངན་ལས་འདས་པར་ནི་མ་ཡིན་པས་འདི་ནི་ཀླན་ཀར་མི་རུང་ངོ་། །འདི་ནི་སྦྱོར་བས་ཐོབ་པར་བྱ་བ་ཁོ་ན་ཡིན་ཞེས་བྱ་བ་ནི་

སྙོམས་པར་འཇུག་པ་འདི་ཡང་འདུ་ཤེས་མེད་པའི་སྙོམས་པར་འཇུག་པ་ཁོ་ན་བཞིན་དུ་མངོན་པར་འདུ་བྱ་བ་ཆེན་པོས་བསྒྲུབ་པར་བྱ་བ་ཡིན་པས་དེ་ཁོ་ན་བཞིན་དུ་དུས་གཅིག་འཐོབ་བོ། །ཇི་ལྟ་ཞེ་ན། འདས་པ་ཡང་མི་འཐོབ་ལ་ཞེས་བྱ་བ་སྨོས་ཏེ། གང་གི་ཚེ་
ཡོངས་སུ་ཉམས་ནས་ཡང་དེ་སྐྱེད་པར་བྱེད་པ་དེའི་ཚེ་ཡང་སྦྱོར་བས་སྔོན་མེད་པ་ཁོ་ན་ཞིག་འཐོབ་སྟེ། སོ་སོར་ཐར་པའི་སྡོམ་པ་བཞིན་ནོ་ཞེས་བྱ་བ་རྒྱས་པར་རྣམ་པར་བཤད་པར་བྱའོ། །དེ་ནི་སེམས་ཀྱི་སྟོབས་ཀྱིས་འཐོབ་པའི་ཕྱིར་རོ་ཞེས་བྱ་བ་ནི་སེམས་ཀྱི་སྟོབས་ཀྱིས་མ་འོངས་པ་
འཐོབ་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཐུབ་པའི་བྱང་ཆུབ་ཀྱིས་ཐོབ་བྱ། །ཞེས་བྱ་བ་འདི་ནི་སྦྱོར་བས་ཐོབ་པར་བྱ་བ་ཁོ་ན་ཡིན་ནོ་ཞེས་བྱ་བ་སྤྱིར་བསྟན་པའི་དམིགས་ཀྱིས་བསལ་བ་ཡིན་ཏེ། དེ་ནི་ཉན་ཐོས་དང་རང་སངས་རྒྱས་རྣམས་ཀྱི་ཚུལ་ཡིན་པའི་ཕྱིར་རོ། །ཟད་དང་མི་སྐྱེས་ཤེས་
བྱང་ཆུབ། །ཅེས་འཆད་པར་འགྱུར་བ་དེའི་ཕྱིར། ཟད་པ་མཁྱེན་པ་དང་དུས་མཉམ་དུ་ཞེས་བྱ་བ་རྒྱས་པར་སྨོས་ཏེ། སངས་རྒྱས་བཅོམ་ལྡན་འདས་རྣམས་ཀྱིས་ནི་ཟད་པ་མཁྱེན་པ་ན་ཟག་པ་དང་བཅས་པ་འདི་དག་ཀྱང་འཐོབ་བོ། སངས་རྒྱས་རྣམས་ཀྱི་ནི་སྦྱོར་བ་ལས་བྱུང་བ་ཅུང་ཟད་ཀྱང་
མེད་ཅེས་བྱ་བ་ནི་བསྟོད་པ་བྱེད་པས་ཇི་སྐད་དུ། དགེ་བའི་མཐར་ཕྱིན་ཁྱོད་ཀྱིས་ནི། །སྦྱོར་བ་ལས་བྱུང་ཅུང་ཟད་མེད། །ཁྱོད་ཀྱི་གང་དུ་བཞེད་ངེས་པ། །བཞེད་པ་ཙམ་ལ་རག་ལས་ལགས། །ཞེས་བཤད་པ་ལྟ་བུ་ཡིན་ནོ། །བཅོམ་ལྡན་འདས་གཉི་གའི་ཆ་ལས་རྣམ་པར་གྲོལ་བར་ཇི་
ལྟར་འགྲུབ་ཅེས་བྱ་བ་ལ། གཉི་གའི་ཆ་ནི་ཉོན་མོངས་པའི་སྒྲིབ་པ་དང་སྙོམས་པར་འཇུག་པའི་སྒྲིབ་པ་སྟེ། དེ་ལས་རྣམ་པར་གྲོལ་བའོ། །འགྲུབ་སྟེ་དེ་བསྐྱེད་ཟིན་པ་བཞིན་དུ་ཞེས་བྱ་བའི་གཉི་གའི་ཆ་ལས་རྣམ་པར་གྲོལ་བ་འགྲུབ་སྟེ། བཅོམ་ལྡན་འདས་ནི་སྔོན་མངོན་དུ་བྱས་པ་བཞིན་
དུ་དེ་ལ་མངའ་བརྙེས་པའི་ཕྱིར་དེ་མངོན་དུ་བྱ་བའི་མཐུ་དང་ལྡན་པའི་ཕྱིར་རོ། །འདི་ནི་དང་པོ་ཁོ་ནར་ཞེས་བྱ་བ་རྒྱས་པར་འབྱུང་བ་ནི་ནུབ་ཕྱོགས་པ་དག་ན་རེ་གང་བྱང་ཆུབ་སེམས་དཔའ་སྲིད་པ་ཐ་མ་པ་སྲིད་པའི་རྩེ་མོ་ཐོབ་པར་འགྱུར་ནས་བསམ་གཏན་བཞི་པ་ལ་བརྟེན་ཏེ་མཐོང་བའི་

ལམ་བསྐྱེད་ནས། དེ་ལས་ལངས་ཏེ་སྲིད་པའི་རྩེ་མོ་ལ་སྙོམས་པར་འཇུག་ཅིང་དེ་ནས་འགོག་པའི་སྙོམས་པར་འཇུག་པ་ལ་སྙོམས་པར་འཇུག་གོ། །དེ་ལས་ལངས་ནས་ཡང་བསམ་གཏན་བཞི་པ་ལ་བརྟེན་ཏེ་སྲིད་པའི་རྩེ་མོ་པའི་བསྒོམ་པས་སྤང་བར་བྱ་བའི་ཉོན་མོངས་པ་སྤངས་
པར་བྱས་ནས། ཟད་པ་མཁྱེན་པ་ཕྱིན་ཆད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཡིན་ནོ་ཞེས་བྱ་བ་འདི་ནི་ཆོས་ཉིད་ཡིན་ཏེ། དེ་ལྟ་བས་ན་དེས་སློབ་པའི་གནས་སྐབས་ན་སྐྱེད་པར་བྱེད་དོ་ཞེས་ཟེར་རོ། །ཁ་ཆེའི་ཡུལ་གྱི་ནུབ་ཕྱོགས་ན་འཁོད་པ་རྣམས་ནི་ནུབ་ཕྱོགས་པ་
དག་གོ། །ལུགས་ཀྱི་ཚིག་ཅེས་བྱ་བ་ནི་གནས་བརྟན་ཉེ་སྲུངས་ཀྱི་བསྟན་བཅོས་ཏེ། གང་ལས་དེ་བཞིན་གཤེགས་པ་ནི་འགོག་པའི་སྙོམས་པར་འཇུག་པ་བསྐྱེད་ནས་ཟད་པ་མཁྱེན་པ་བསྐྱེད་པར་མཛད་དོ་ཞེས་བརྗོད་པར་བྱའོ་ཞེས་བྱ་བའི་ཐ་ཚིག་འདི་འབྱུང་བ་ཡིན་ནོ། །བདེན་པ་
མངོན་པར་རྟོགས་ན་བཅུ་དྲུག་ཅེས་བྱ་བ་ནི་སྡུག་བསྔལ་ལ་ཆོས་ཤེས་པའི་བཟོད་པ་ནས་བཟུང་སྟེ། ལམ་ལ་རྗེས་སུ་ཤེས་པ་ཞེས་བྱ་བའི་བར་སེམས་ཀྱི་སྐད་ཅིག་མ་བཅུ་དྲུག་གོ། །སྲིད་པའི་རྩེ་མོ་ལ་འདོད་ཆགས་དང་བྲལ་བ་ན་བཅོ་བརྒྱད་ཅེས་བྱ་བ་ནི་སྲིད་པའི་རྩེ་མོ་པའི་བསྒོམ་
པས་སྤང་བར་བྱ་བའི་ཉོན་མོངས་པའི་རྣམ་པ་དགུ་སྤོང་བར་བྱེད་པ་བར་ཆད་མེད་པའི་ལམ་དགུ་དང་། རྣམ་པར་གྲོལ་བའི་ལམ་དགུ་སྟེ། དེ་ལྟར་ན་བཅོ་བརྒྱད་དོ། །བཅུ་དྲུག་དང་བཅོ་བརྒྱད་པོ་དེ་དག་ནི་སུམ་ཅུ་རྩ་བཞིར་འགྱུར་རོ། །ས་འོག་མ་པའི་ཉོན་མོངས་པ་རྣམས་ནི་ཡང་
སྤང་བར་བྱ་བ་མ་ཡིན་ནོ་ཞེས་བྱ་བ་ནི་འདོད་པ་ན་སྤྱོད་པ་ལ་སོགས་པའི་ཉོན་མོངས་པ་རྣམས་ནི་སོ་སོའི་སྐྱེ་བོའི་གནས་སྐབས་ཉིད་ན་འཇིག་རྟེན་པའི་ལམ་གྱིས་སྤངས་ཟིན་པའི་ཕྱིར་རོ། །གལ་ཏེ་ཉོན་མོངས་པ་སྤངས་ཟིན་པའི་གཉེན་པོ་བསྐྱེད་པར་མི་བྱའོ་ཞེས་བྱ་བ་འདི་ངེས་
པ་ཡིན་ནོ། །འོ་ན་ཅིའི་ཕྱིར་འདོད་པ་ན་སྤྱོད་པའི་ཉོན་མོངས་པ་རྣམས་སྤངས་ཟིན་པ་ལས་མངོན་པར་རྟོགས་པའི་དུས་ན་ཉེས་པ་དེ་དག་གི་གཉེན་པོ་ཆོས་ཤེས་པའི་ཕྱོགས་དང་མཐུན་པའི་ལམ་སྐྱེད་པར་བྱེད་ཅེ་ན། རྗེས་སུ་ཤེས་པའི་ཕྱོགས་དང་མཐུན་པའི་ལམ་ནི་དེ་མེད་ན་

མེད་པ་ཡིན་པའི་ཕྱིར་ཏེ། ཆོས་ཤེས་པའི་ཕྱོགས་དང་མཐུན་པ་སྐྱེ་བ་མེད་པར་ནི་རྗེས་སུ་ཤེས་པའི་ཕྱོགས་དང་མཐུན་པ་མངོན་དུ་འགྱུར་བ་མི་སྲིད་དོ། །ཤེས་པའི་རྗེས་སུ་ཤེས་པ་ཉིད་ནི་གང་དེའི་རྗེས་ལ་འབྱུང་བ་འདི་ཡིན་ནོ། །ནུབ་ཕྱོགས་པ་དག་དང་
ཅིར་འགྱུར་ཞེས་བྱ་བ་རྒྱས་པར་སྨྲས་ཏེ། གལ་ཏེ་བར་སྐབས་སུ་མི་འདྲ་བ་ཟག་པ་དང་བཅས་པའི་སེམས་མངོན་དུ་བྱས་ནའོ། །བྱེ་བྲག་ཏུ་སྨྲ་བ་རྣམས་ཀྱིས་བསམ་པ་ལྡང་བ་ཅན་དུ་འགྱུར་ཏེ་ཞེས་བྱ་བ་རྒྱས་པར་སྨོས་ཏེ། བྱང་ཆུབ་སེམས་དཔའ་དེ་བསམ་པ་ལྡང་བ་ཅན་
དུ་འགྱུར་རོ། །གཞན་དག་ན་རེ་དགེ་བའི་རྩ་བ་ལས་ལྡང་བར་འགྱུར་ཏེ། བསམ་པའི་དོན་ནི་དགེ་བའི་རྩ་བའི་དོན་ཡིན་ནོ་ཞེས་ཟེར་རོ། །འདི་སྐད་དུ་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ནི་གང་དག་མངོན་དུ་གྱུར་པས་ཇི་སྲིད་དུ་སྐད་ཅིག་ཁོ་ན་ལ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཐོབ་ཀྱི་བར་དེ་སྲིད་དུ་ལྡང་བར་མི་འགྱུར་བ་དེ་ལྟ་བུ་ཡིན་ནོ་ཞེས་བཤད་པ་ཡིན་ནོ། །ཉི་འོག་པ་དག་གིས་བསམ་པ་མི་ལྡང་བ་ཅན་ཡིན་པ་བདེན་མོད་ཀྱི་ཁྱེད་བརྗོད་པ་ལྟ་བུ་ནི་མ་ཡིན་ནོ་ཞེས་བྱ་བ་སྨོས་སོ། །སྔ་མ་ཁོ་ན་ཡིན་ནོ་བརྗོད་དོ་ཞེས་བྱ་བ་ནི་ཟད་པ་
མེད་པ་མཁྱེན་པ་དང་དུས་མཉམ་དུ་ཞེས་བྱ་བའི་ཕྱོགས་གང་ཡིན་པའོ། །གཉིས་ཀྱི་རྣམ་པའི་བྱེ་བྲག་མང་པོ་ཞིག་ཡོད་མོད་ཀྱི་ཞེས་བྱ་བ་ནི་གཅིག་ནི་བསམ་གཏན་ཐ་མ་ན་ཡོད་པ་ཡིན་ལ་ཅིག་ཤོས་ནི་སྲིད་པའི་རྩེ་མོ་ལས་སྐྱེས་པ་ཡིན་ནོ། །གཅིག་ལ་ནི་ངེས་པར་འབྱུང་བའི་
འདུ་ཤེས་ཀྱིས་སྙོམས་པར་འཇུག་ལ་ཅིག་ཤོས་ལ་ནི་གནས་པར་འདོད་པས་སོ་ཞེས་བྱ་བ་དེ་ལྟ་བུ་ལ་སོགས་པའི་རྣམ་པའི་བྱེ་བྲག་མང་པོ་ཞིག་ཡོད་པའོ། །འདི་གཉིས་ཀྱི་མཚུངས་པ་ནི། གཉི་ག་འདོད་དང་གཟུགས་བསྟེན་ཅན། །ཞེས་བྱ་བ་ཡིན་ནོ། །གཟུགས་ཀྱི་སྲིད་
པ་ཡིན་ལ་ཞེས་བྱ་བ་རྒྱས་པར་འབྱུང་བ་ནི་གང་ལ་ལ་གཟུགས་ཀྱི་སྲིད་པ་ཡིན་པའི་སྲིད་པ་འདི་ཐམས་ཅད་རྣམ་པར་འདྲིད་པ་ཅན་ལྔའི་སྲིད་པ་ཡང་ཡིན་ནམ་ཞེས་བྱ་བ་མུ་བཞི་པ་ཡིན་ནོ། །གཟུགས་ཀྱི་སྲིད་པ་ཡིན་ལ་སྲིད་པ་འདི་རྣམ་པར་འདྲིད་པ་ཅན་ལྔ་མ་ཡིན་པ་ཡང་ཡོད་དེ་

གཟུགས་ན་སྤྱོད་པའི་སེམས་ཅན་ལྷ་འདུ་ཤེས་ཅན་སེམས་མི་འདྲ་བ་ལ་གནས་པ་རྣམས་དང་འདུ་ཤེས་མེད་པའི་སྙོམས་པར་འཇུག་པ་དང་། འགོག་པའི་སྙོམས་པར་འཇུག་པ་ལ་སྙོམས་པར་ཞུགས་པ་རྣམས་དང་། ལྷ་འདུ་ཤེས་མེད་པས་ཐོབ་པ་རྣམས་ཀྱི་སྲིད་པ་གང་ཡིན་པ་
ལྟ་བུའོ། །རྣམ་པར་འདྲིད་པ་ཅན་ལྔའི་སྲིད་པ་ཡིན་ལ་འདི་གཟུགས་ཀྱི་སྲིད་པ་མ་ཡིན་པ་ཡང་ཡོད་དེ། འདོད་པ་ན་སྤྱོད་པའི་སེམས་ཅན་སེམས་འདྲ་བ་ལ་གནས་པ་རྣམས་ཀྱི་སྲིད་པ་གང་ཡིན་པ་ལྟ་བུའོ། །གཟུགས་ཀྱི་སྲིད་པ་ཡིན་ལ་སྲིད་པ་དེ་ཡང་རྣམ་པར་འདྲིད་པ་ཅན་
ལྔ་ཡིན་པ་ཡང་ཡོད་དོ། །གཟུགས་ན་སྤྱོད་པའི་ལྷ་འདུ་ཤེས་ཅན་སེམས་འདྲ་བ་ལ་གནས་པ་རྣམས་དང་། འདུ་ཤེས་མེད་པའི་ལྷ་རྣམས་ཀྱི་འདུ་ཤེས་མེད་པ་པ་མ་ཐོབ་པའི་སྲིད་པ་གང་ཡིན་པ་ལྟ་བུའོ། །གཟུགས་ཀྱི་སྲིད་པ་ཡང་མ་ཡིན་ལ་སྲིད་པ་འདི་རྣམ་པར་འདྲིད་
པ་ཅན་ལྔ་ཡང་མ་ཡིན་པ་ཡང་ཡོད་དེ། འདོད་པ་ན་སྤྱོད་པའི་སེམས་ཅན་སེམས་མི་འདྲ་བ་ལ་གནས་པ་རྣམས་ལ་འདུ་ཤེས་མེད་པའི་སྙོམས་པར་འཇུག་པ་དང་། འགོག་པའི་སྙོམས་པར་འཇུག་པ་ལ་སྙོམས་པར་ཞུགས་པ་རྣམས་ཀྱི་སྲིད་པ་གང་ཡིན་པ་དང་། གཟུགས་
མེད་པའི་སྲིད་པ་གང་ཡིན་པ་ལྟ་བུའོ། །འདིར་དཔེར་བརྗོད་པ་ནི་མུ་དང་པོ་ཡིན་ནོ། །གཟུགས་ཀྱི་སྲིད་པ་ནི་གཟུགས་ན་སྤྱོད་པའི་ཕུང་པོ་ཡིན་ནོ། །རྣམ་པར་འདྲིད་པ་ཅན་ལྔ་ནི་ཕུང་པོ་ལྔ་ཞེས་བྱ་བའི་ཐ་ཚིག་སྟེ། རྣམ་པར་འདྲིད་པ་ཞེས་བྱ་བའི་དེ་བཞིན་གཤེགས་པ་འོད་
སྲུངས་ཀྱི་རང་གི་ཕུང་པོའི་མིང་ཡིན་ནོ། །ཁྱད་པར་དུ་འདྲིད་པས་ན་རྣམ་པར་འདྲིད་པ་སྟེ། གཞན་དུ་འགྱུར་བས་རྣམ་པར་སླུ་བ་ཞེས་བྱ་བའི་ཐ་ཚིག་གོ། །དེ་འདི་ལ་ཡོད་པས་ན་རྣམ་པར་འདྲིད་པ་ཅན་ནོ། །རྣམ་པར་སླུ་བར་བྱེད་པ་ཞེས་བྱ་བའི་ཐ་ཚིག་སྟེ། གཟུགས་ནི་དབུ་
བ་རྡོས་པ་འདྲ། །ཚོར་བ་ཆུ་ཡི་ཆུ་བུར་བཞིན། །ཞེས་བྱ་བ་ལ་སོགས་པ་ལྟ་བུ་ཡིན་པས་རྣམ་པར་སླུ་བའི་ཕྱིར་རོ། །དེ་ལ་གལ་ཏེ་གཟུགས་ཀྱི་ཁམས་ན་འདུ་ཤེས་མེད་པའི་སྙོམས་པར་འཇུག་པ་ཡོད་པར་མི་བཞེད་ན། འདུ་ཤེས་མེད་པའི་སྙོམས་པར་འཇུག་པ་དང་འགོག་

པའི་སྙོམས་པར་འཇུག་པ་ལ་སོགས་པ་ལ་སྙོམས་པར་ཞུགས་པ་རྣམས་ཞེས་གསུངས་པར་མི་འགྱུར་རོ། །དེས་ན་འདུ་ཤེས་མེད་པའི་སྙོམས་པར་འཇུག་པ་གཟུགས་ན་སྤྱོད་པ་ཡིན་ནོ་ཞེས་བྱ་བར་ཤེས་སོ། །དེ་ལ་ཡང་ཁྱད་པར་ནི་འདི་ཡོད་དེ་ཞེས་བྱ་བ་ནི་
ཆོས་མཚུངས་པ་དེ་ལ་ཡང་ཁྱད་པར་ཡོད་པ་ཡིན་ནོ། །ཕྱིས་ནི་གཟུགས་ཀྱི་ཁམས་སུ་ཡང་། །ཞེས་བྱ་བ་ནི་འཕགས་པ་གང་དག་གིས་འགོག་པའི་སྙོམས་པར་འཇུག་པ་བསྐྱེད་དེ་དེ་ལས་ཡོངས་སུ་ཉམས་པ་ལས་བསམ་གཏན་ཐོབ་ནས་གཟུགས་ཀྱི་ཁམས་སུ་སྐྱེ་བ་སྔར་ཡོངས་
སུ་ཉམས་པ་དེ་དག་གིས་སྔོན་གོམས་པའི་དབང་གིས་གཟུགས་ཀྱི་ཁམས་སུ་འགོག་པའི་སྙོམས་པར་འཇུག་པ་བསྐྱེད་པར་འགྱུར་རོ། །འདུ་ཤེས་མེད་པའི་སྙོམས་པར་འཇུག་པ་ནི་སོ་སོའི་སྐྱེ་བོ་དག་གིས་དང་པོ་ནས་ཀྱང་གཟུགས་ཀྱི་ཁམས་སུ་སྐྱེ་བར་འགྱུར་བས་ཁྱད་པར་ནི་
འདི་ཡོད་དོ། །ཅི་འདི་ལས་ཀྱང་ཡོངས་སུ་ཉམས་པ་ཡོད་དམ་ཞེས་བྱ་བ་ནི་སྙོམས་པར་འཇུག་པ་འདི་ནི་མྱ་ངན་ལས་འདས་པ་དང་འདྲ་བ་ཡིན་ན་ཇི་ལྟར་ཡོངས་སུ་ཉམས་པར་འགྱུར་སྙམ་ནས་ཡིད་མི་ཆེས་ཏེ་འདྲི་བ་ཡིན་ནོ། །འཆར་བྱེད་ཀྱི་མདོ་ཞེས་བྱ་བ་ནི་མདོ་འདི་འཕགས་པ་ཤཱ་རིའི་
བུས་བཤད་པ་ཡིན་ཏེ། དེ་ལ་འཆར་བྱེད་རྒོལ་བར་བྱེད་པ་ཡིན་པས་འཆར་བྱེད་ཀྱི་མདོ་ཞེས་བྱའོ། །ཇི་ལྟ་ཞེ་ན། གླེང་གཞི་ནི་མཉན་ཡོད་ནའོ། །དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་འདི་ན་དགེ་སློང་ཚུལ་ཁྲིམས་ཕུན་སུམ་ཚོགས་པ་ཡང་
ཡིན། ཏིང་ངེ་འཛིན་ཕུན་སུམ་ཚོགས་པ་ཡང་ཡིན། ཤེས་རབ་ཕུན་སུམ་ཚོགས་པ་ཡང་ཡིན་པ་དེ་ནི་ཡང་དང་ཡང་དུ་འདུ་ཤེས་དང་ཚོར་བ་དང་འགོག་པ་ལ་སྙོམས་པར་འཇུག་པ་དང་ལྡན་པའི་གནས་དེ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་མཐོང་བའི་ཆོས་
ཁོ་ན་ལ་དང་པོ་ཉིད་དུ་ཀུན་ཤེས་པའི་ཆོས་ཐོབ་པར་ཡང་མི་བྱེད་ཅིང་འཆི་བའི་དུས་ཀྱི་ཚེ་ཡང་མ་ཡིན་ལ། ལུས་ཞིག་ནས་ཀྱང་ཁམ་གྱི་ཟས་ཟ་བའི་ལྷ་ལས་འདས་ཏེ་ཡིད་ལས་བྱུང་བའི་ལྷའི་ལུས་གང་ཡང་རུང་བ་ཞིག་ཏུ་སྐྱེ་བར་འགྱུར་རོ། །དེ་དེར་སྐྱེས་ནས་ཡང་དང་ཡང་དུ་འདུ་

ཤེས་དང་ཚོར་བ་འགོག་པ་ལ་སྙོམས་པར་འཇུག་པ་དང་ལྡང་བའི་གནས་དེ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནས་ཡང་དེའི་ཚེ་ཚེ་དང་ལྡན་པ་འཆར་བྱེད་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། །དེ་ནས་ཚེ་དང་ལྡན་པ་འཆར་བྱེད་ཀྱིས་
ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་གང་དགེ་སློང་ཡིད་ལས་བྱུང་བའི་ལྷའི་ལུས་གང་ཡང་རུང་བ་ཞིག་ཏུ་སྐྱེས་ནས་ཡང་དང་ཡང་དུ་འདུ་ཤེས་དང་ཚོར་བ་འགོག་པ་ལ་སྙོམས་པར་འཇུག་པ་དང་ལྡན་པའི་གནས་དེ་ཡོད་དོ་ཞེས་བྱ་བར་ཡང་དག་པ་
ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་བྱ་བ་འདི་ནི་གནས་མ་ཡིན་ཞིང་གོ་སྐབས་མེད་དོ། །ཚེ་དང་ལྡན་པ་འཆར་བྱེད་ཀྱིས་ཚེ་དང་ལྡན་པ་ཤཱ་རིའི་བུ་ལ་ལན་གཉིས་ལན་གསུམ་དུ་འདི་སྐད་དུ། ཚེ་དང་ལྡན་པ་འདི་ནི་གནས་མ་ཡིན་ཏེ་ཞེས་བྱ་བ་སྔ་མ་བཞིན་དུ་སྨྲས་པ་དང་། དེ་ནས་ཚེ་དང་ལྡན་པ་ཤཱ་རིའི་བུ་
འདི་སྙམ་དུ་སེམས་པར་གྱུར་ཏེ། བདག་གིས་བཤད་པ་ལ་དགེ་སློང་འདི་ལན་གསུམ་གྱི་བར་དུ་ཕྱིར་སྤོང་བར་བྱེད་ཕྱིར་ཁྲོ་བར་བྱེད་ལ་ཚངས་པ་མཚུངས་པར་སྤྱོད་པ་འགའ་ཡང་བདག་གིས་བཤད་པ་ལ་རྗེས་སུ་ཡི་རང་བར་མི་བྱེད་པས། མ་ལ་བདག་བཅོམ་ལྡན་འདས་ག་ལ་བ་དེར་འགྲོ་
གོར་མ་ཆག་སྙམ་མོ། །དེ་ནས་ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ག་ལ་བ་དེར་སོང་སྟེ། སོང་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་སྨྲས་
པ། ཚེ་དང་ལྡན་པ་དག་འདི་ལ་དགེ་སློང་ཚུལ་ཁྲིམས་དང་ལྡན་པ་ཡང་ཡིན་ཞེས་བྱ་བ་སྔ་མ་བཞིན་ནོ། །དེ་ནས་ཡང་དེའི་ཚེ་ཚེ་དང་ལྡན་པ་འཆར་བྱེད་ཅེས་བྱ་བ་སྔ་མ་བཞིན་ནོ། །ཚེ་དང་ལྡན་པ་འཆར་བྱེད་ཀྱིས་ཚེ་དང་ལྡན་པ་ཤཱ་རིའི་བུ་ལ་ལན་གཉིས་ལན་གསུམ་གྱི་བར་དུ་འདི་སྐད་
ཅེས་སྨྲས་སོ་ཞེས་བྱ་བ་སྔ་མ་བཞིན་ནོ། །དེ་ནས་ཚེ་དང་ལྡན་པ་ཤཱ་རིའི་བུ་འདི་སྙམ་དུ་སེམས་པར་གྱུར་ཏེ། སྟོན་པའི་སྤྱན་སྔ་ན་ཡང་དགེ་སློང་འདི་བདག་གིས་བཤད་པ་ལ་ལན་གསུམ་གྱི་བར་དུ་སྤོང་བར་བྱེད་ཕྱིར་ཁྲོ་བར་བྱེད་ལ། ཚངས་པ་མཚུངས་པར་སྤྱོད་པ་འགའ་ཡང་བདག་

གིས་བཤད་པ་ལ་རྗེས་སུ་ཡི་རང་བར་མི་བྱེད་པས། མ་ལ་བདག་ཅང་མི་སྨྲ་བར་འདུག་པར་བྱ་གོར་མ་ཆག་སྙམ་མོ། །དེ་ནས་ཚེ་དང་ལྡན་པ་ཤཱ་རིའི་བུ་ཅང་མི་སྨྲ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་བྱེད་ལ་བཀའ་སྩལ་པ། འཆར་
བྱེད་ཁྱོད་ཀྱིས་ཡིད་ལས་བྱུང་བའི་ལྷའི་ལུས་གང་ཡང་རུང་བ་གང་ཞིག་ཡིན་པར་ཤེས། གསོལ་བ། བཙུན་པ་གཟུགས་ཅན་མ་ལགས་པ་འདུ་ཤེས་ལས་བྱུང་བ་ཇི་སྙེད་པ་མ་ལགས་སམ། བཀའ་སྩལ་པ། སྐྱེས་བུ་རྨོངས་པ་རེ་ཞིག་དེ་ལྟ་ན་གོ། །ལོང་བ་མིག་མེད་པ་ཁྱོད་ཁོ་ན་
མིག་དང་ལྡན་པ་དགེ་སློང་ཤཱ་རིའི་བུ་དང་ལྷན་ཅིག་ཆོས་མངོན་པ་འམ་འདུལ་བའི་གཏམ་བྱ་བར་སེམས་སམ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་བྱེད་མངོན་སུམ་དུ་སྤྱོས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱང་དགེ་སློང་
གནས་བརྟན་ལ་རྣམ་པར་འཚེ་བ་ཡལ་བར་འཇོག་གམ། ཁྱོད་སྐྱེས་བུ་རྨོངས་པས་དགེ་སློང་གནས་བརྟན་གཙེས་ན་སྙིང་རྗེ་ཡང་མ་སྐྱེས་སམ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་བྱེད་དང་ཚེ་དང་ལྡན་པ་ཀུན་དགའ་བོ་མངོན་སུམ་དུ་སྤྱོས་ནས། དགེ་སློང་རྣམས་
ལ་བཀའ་སྩལ་པ། དགེ་སློང་དག་འདི་ལ་དགེ་སློང་ཚུལ་ཁྲིམས་ཕུན་སུམ་ཚོགས་པ་ཡང་ཡིན། ཏིང་ངེ་འཛིན་ཕུན་སུམ་ཚོགས་པ་ཡང་ཡིན་ཞེས་བྱ་བ་རྒྱས་པར་གནས་འདི་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་བྱ་བའི་བར་བཀའ་སྩལ་ནས། བཅོམ་
ལྡན་འདས་བཞེངས་ཏེ་ནང་དུ་ཡང་དག་འཇོག་པར་གཙུག་ལག་ཁང་དུ་གཤེགས་སོ་ཞེས་བྱ་བ་ཡིན་ནོ། །འདིར་ནི་ཚེ་དང་ལྡན་པ་འཆར་བྱེད་ནི་ཡིད་ལས་བྱུང་བའི་ལུས་གང་ཡང་རུང་བ་འདི་ནི་གཟུགས་མེད་པ་ན་སྤྱོད་པ་ཡིན་པར་བཤད་དོ་སྙམ་དུ་ཡིད་ལ་བྱས་ནས་བརྒལ་བ་བྱས་པ་
ཡིན་ཏེ། དེ་ན་ནི་གཟུགས་ནི་མེད་ཀྱི་ཡིད་ཁོ་ན་མཚུངས་པར་ལྡན་པ་དང་བཅས་པ་ཡོད་དོ། །དེ་ལྟ་བས་ན་དེའི་བསམ་པ་ནི་དེ་ན་ཡོད་པའི་ལུས་ནི་ཡིད་ལས་བྱུང་བ་ཡིན་ལ། དེ་ཡང་སྙོམས་པར་འཇུག་པ་འདི་ལ་སྙོམས་པར་མི་འཇུག་གོ་སྙམ་པ་ཡིན་ནོ། །འཕགས་པ་ཤཱ་རིའི་

བུས་ནི་ཡིད་ལས་བྱུང་བའི་ལྷའི་ལུས་གཟུགས་ན་སྤྱོད་པ་ཡིན་པར་བསམས་པ་ཡིན་ཏེ། ཁུ་ཆུ་དང་ཁྲག་ལས་མ་བརྟན་པར་འབྱུང་བའི་ཕྱིར་རོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་ཚེ་དང་ལྡན་པ་འཆར་བྱེད་འདི་ལ་འཆར་བྱེད་ཁྱོད་ཀྱིས་ཡིད་ལས་བྱུང་བའི་ལྷའི་ལུས་གང་
ཡང་རུང་བ་གང་ཞིག་ཡིན་པར་ཤེས་ཞེས་སྨྲས་སོ། །དེས་ཀྱང་བཙུན་པ་གཟུགས་ཅན་མ་ལགས་པ་འདུ་ཤེས་ལས་བྱུང་བ་ཇི་སྙེད་པ་མ་ལགས་སམ་ཞེས་དེ་ལྟ་བུར་ཁས་བླངས་པ་དང་། བཅོམ་ལྡན་འདས་ཀྱིས་ཡིད་ལས་བྱུང་བའི་ལྷའི་ལུས་གཟུགས་ན་སྤྱོད་པ་ཁོ་ན་ཡིན་པར་
དགོངས་ནས། འཕགས་པ་ཤཱ་རིའི་བུའི་གཞུང་ལུགས་གཞུང་གཟུགས་པའི་ཕྱིར་ཚེ་དང་ལྡན་པ་འཆར་བྱེད་ལ། སྐྱེས་བུ་རྨོངས་པ་རེ་ཞིག་དེ་ལྟ་ན་གོ། །ལོང་བ་མིག་མེད་པ་ཁྱོད་ཁོ་ན་མིག་དང་ལྡན་པ་དགེ་སློང་ཤཱ་རིའི་བུ་དང་ལྷན་ཅིག་ཆོས་མངོན་པའམ་འདུལ་བའི་གཏམ་བྱ་
བར་སེམས་སམ་ཞེས་སྤྱོས་སོ། །གནས་དེ་ཡོད་དོ་ཞེས་བྱ་བ་ནི་འགོག་པའི་སྙོམས་པར་འཇུག་པ་ལ་སྙོམས་པར་འཇུག་པ་དང་ལྡན་པ་གང་ཡིན་པའི་གནས་ཏེ། ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །དང་པོ་ཉིད་དུ་ཞེས་བྱ་བ་ནི་དང་པོ་ཁོ་ནར་ཞེས་བྱ་བའི་ཐ་ཚིག་གོ། །
ཀུན་ཤེས་པ་འཐོབ་པར་ཞེས་བྱ་བ་ནི་དགྲ་བཅོམ་པ་འཐོབ་པར་ཞེས་བྱ་བའི་དོན་ཏོ། །སྙོམས་པར་འཇུག་པ་འདི་ནི་སྲིད་པའི་རྩེ་མོ་པ་ཡིན་ཞེས་བྱ་བ་རྒྱས་པར་འབྱུང་བ་ནི་འགོག་པའི་སྙོམས་པར་འཇུག་པ་ནི་སྲིད་པའི་རྩེ་མོ་པ་ཡིན་ཏེ། གང་གིས་དེ་འཐོབ་པ་དེ་ནི་སྲིད་པའི་རྩེ་མོ་ཁོ་
ནར་སྐྱེ་བར་འགྱུར་གྱིས་གཟུགས་ཀྱི་ཁམས་སུ་ནི་མ་ཡིན་ནོ། །བཅོམ་ལྡན་འདས་ཀྱིས་ཀྱང་མདོ་ལས་དེ་གཟུགས་ཀྱི་ཁམས་སུ་སྐྱེས་ཏེ་ཡང་དང་ཡང་དུ་འདུ་ཤེས་དང་ཚོར་བ་འགོག་པ་ལ་སྙོམས་པར་འཇུག་པ་དང་ལྡང་བར་གསུངས་ཏེ། དེ་ལྟ་བས་ན་འདི་ལས་ཡོངས་སུ་
ཉམས་པ་ཡོད་དོ་ཞེས་བྱ་བར་ཤེས་སོ། །བྱེ་བྲག་ཏུ་སྨྲ་བ་རྣམས་ཀྱི་ལྟར་ན་ནི་འདི་རུང་ན། མདོ་སྡེ་པ་རྣམས་ལྟར་ན་གོ་ཇི་ལྟར་རུང་། འགོག་པ་འཐོབ་པ་ནི་འཕགས་པ་ཁོ་ན་ཡིན་ལ། མདོ་སྡེ་པ་རྣམས་ཀྱི་གྲུབ་པའི་མཐའ་ནི་འཕགས་པའི་ལམ་ལས་ཡོངས་སུ་ཉམས་པ་

མེད་དོ་ཞེས་བྱ་བ་ཡིན་ནོ། །འཕགས་པ་དེ་ཇི་ལྟར་འཕགས་པའི་ལམ་གོང་མ་ལས་ཡོངས་སུ་ཉམས་པར་འདོད་ཅེ་ན། དེ་དག་གི་ལྟར་ན་ཡང་མདོ་འདི་མི་འགལ་ལོ། །ཇི་ལྟ་ཞེ་ན། འགའ་ཞིག་སྲིད་པའི་རྩེ་མོ་ཐོབ་ནས་ངེས་པ་ལ་འཇུག་པ་གང་ཡིན་པ་དེ་ནི་
ཕྱིར་མི་འོང་བ་ཡིན་པ་ལས་འགོག་པའི་སྙོམས་པར་འཇུག་པ་སྐྱེད་པར་ཡང་བྱེད་ཅིང་། དེ་སྲིད་པའི་རྩེ་མོའི་འགོག་པའི་སྙོམས་པར་འཇུག་པ་ལས་ཡོངས་སུ་ཉམས་པར་ཡང་འགྱུར་གྱི། ལམ་ལས་ནི་མ་ཡིན་ཏེ། ས་གོང་མ་པའི་འཕགས་པའི་ལམ་ནམ་ཡང་མ་བསྐྱེད་
པའི་ཕྱིར་རོ། །དེ་ཡོངས་སུ་ཉམས་པར་གྱུར་ནས་བསམ་གཏན་བསྐྱེད་དེ་གཟུགས་ཀྱི་ཁམས་སུ་སྐྱེ་བར་འགྱུར་རོ། །དེ་ལྟ་བས་ན་འདི་ལས་ཡོངས་སུ་ཉམས་པ་ཡོད་ཀྱི་འཕགས་པའི་ལམ་ལས་ཡོངས་སུ་ཉམས་པ་ནི་མ་ཡིན་པས་རང་གིས་གྲུབ་པའི་མཐའ་དང་འགལ་བ་མེད་
དོ། །མཐར་གྱིས་གནས་པའི་སྙོམས་པར་འཇུག་པ་དགུ་ཞེས་བྱ་བ་ནི་བསམ་གཏན་བཞི་དང་གཟུགས་མེད་པ་བཞི་དང་འགོག་པའི་སྙོམས་པར་འཇུག་པའོ། །འདི་ནི་རྩོམ་པ་དང་པོ་ལ་ངེས་པ་ཡིན་ཏེ་ཞེས་བྱ་བ་ནི་དང་པོར་སྙོམས་པར་འཇུག་པ་སྐྱེད་པར་བྱེད་པ་ལ་ཞེས་བྱ་བའི་ཐ་
ཚིག་གོ། །མྱོང་བར་འགྱུར་བར་ངེས་པ་དང་གཉི་ག་ཡིན་པའི་ཕྱིར་རོ་ཞེས་བྱ་བ་ལ། མྱོང་བར་འགྱུར་བར་ངེས་པ་ནི་འདུ་ཤེས་མེད་པའི་སྙོམས་པར་འཇུག་པ་སྟེ། སྐྱེས་ནས་མྱོང་བར་འགྱུར་བའི་ཕྱིར་རོ། །གཉི་གར་མྱོང་བར་འགྱུར་བ་ནི་འགོག་པའི་སྙོམས་པར་འཇུག་པའོ། །
མྱོང་བར་འགྱུར་བར་ངེས་པ་དང་། མ་ངེས་པ་ཞེས་བྱ་བའི་ཐ་ཚིག་སྟེ། མྱོང་བར་འགྱུར་བར་ངེས་པ་ནི་ཕྱིར་མི་འོང་བའིའོ། །མྱོང་བར་འགྱུར་བར་མ་ངེས་པ་ནི་དགྲ་བཅོམ་པའི་སྟེ། འདི་ཉིད་དུ་ཡོངས་སུ་མྱ་ངན་ལས་འདའ་བའི་ཕྱིར་རོ། །དང་པོར་བསྐྱེད་པ་ལས་ཀྱང་
ཞེས་བྱ་བ་ནི་འདུ་ཤེས་མེད་པའི་སྙོམས་པར་འཇུག་པ་ནི་ལ་ལ་དང་པོར་མི་དག་གི་ནང་དུ་སྐྱེད་པར་བྱེད་ལ། ལ་ལ་ནི་གཟུགས་ཀྱི་ཁམས་སུའོ། །འགོག་པའི་སྙོམས་པར་འཇུག་པ་ནི་མི་དག་གི་ནང་ཁོ་ནར་སྐྱེད་པར་བྱེད་ལ་ཡོངས་སུ་ཉམས་ན་ནི་གཟུགས་ཀྱི་ཁམས་སུའོ། །

ཡང་ཅིའི་ཕྱིར་འདི་མི་དག་གི་ནང་ཁོ་ནར་སྐྱེད་པར་བྱེད་ལ། ཕྱིར་མི་འོང་བ་འདུ་ཤེས་དང་ཚོར་བའི་སྒོ་ནས་རྟོག་པ་དང་དཔྱོད་པ་ལ་སོགས་པ་སེམས་ལས་བྱུང་བ་རབ་ཏུ་རྒྱུ་བས་ཡོངས་སུ་སྐྱོབ་པ་དང་ཞི་བར་གནས་པས་བདེ་བར་གནས་པར་བྱའོ་སྙམ་ནས་འགོག་པའི་སྙོམས་པར་འཇུག་
པ་སྐྱེད་པར་བྱེད་དོ། །ཕྱིར་མི་འོང་བ་གཟུགས་ཀྱི་ཁམས་སུ་སྐྱེས་པ་ནི་གཟུགས་ཀྱི་ཁམས་ཞི་བ་ཡིན་པའི་ཕྱིར་དེ་ན་ཡོད་པའི་སེམས་དང་སེམས་ལས་བྱུང་བ་འབྱུང་བས་དེ་ལྟར་གནོད་པར་མི་བྱེད་པས་དང་པོར་དེར་སྐྱེད་པར་མི་བྱེད་དོ། །ཡོངས་སུ་ཉམས་ན་ནི་སྔོན་གོམས་པས་
དེ་སྐྱེད་པར་བྱེད་དོ། །གཟུགས་མེད་པའི་ཁམས་སུ་སྐྱེས་པ་འདུ་ཤེས་མེད་འདུ་ཤེས་མེད་མིན་དུ་ཉེ་བར་འགྲོ་བར་སྐྱེས་པ་ཡང་ཞི་བ་དེ་ཉིད་ཀྱི་ཕྱིར་སྐྱེད་པར་མི་བྱེད་དོ། །རྣམ་པ་གཅིག་ཏུ་ཕུང་པོའི་ལྷག་མ་མེད་པའི་མྱ་ངན་ལས་འདས་པར་ཐལ་བར་འགྱུར་བའི་ཕྱིར་ཏེ་དེ་ན་གཟུགས་ནི་
མེད་དོ། །གལ་ཏེ་སེམས་དང་སེམས་ལས་བྱུང་བ་ཡང་འགགས་པར་གྱུར་ན་སེམས་དང་ལྡན་པ་མ་ཡིན་པ་རྣམས་འབའ་ཞིག་གནས་པའི་མཐུ་མེད་པའི་ཕྱིར་འདི་ཡོངས་སུ་མྱ་ངན་ལས་འདའ་བ་ཁོ་ནར་འགྱུར་རོ། །མྱོང་བར་འགྱུར་བར་ངེས་པའི་ལས་འབྲས་བུ་ཡོངས་སུ་རྫོགས་
པ་བགེགས་ཀྱི་ངོ་བོར་གནས་པའི་ཕྱིར་ཡོངས་སུ་མྱ་ངན་ལས་འདའ་བ་ནི་མི་སྲིད་དོ། །འདུ་ཤེས་མེད་པའི་སྙོམས་པར་འཇུག་པ་ནི་ཐར་པའི་འདུ་ཤེས་ངེས་པར་འབྱུང་བའི་འདུ་ཤེས་སྔོན་དུ་འགྲོ་བའི་ཡིད་ལ་བྱེད་པས་སྙོམས་པར་འཇུག་པས་གཟུགས་ཀྱི་ཁམས་སུ་ཡང་དང་པོར་
སྙོམས་པར་འཇུག་གོ། །ཡང་ཅིའི་ཕྱིར་འདི་དག་ཅེས་བྱ་བ་རྒྱས་པར་འབྱུང་བ་ནི་སྙོམས་པར་འཇུག་པ་འདི་གཉི་ག་ཡང་སེམས་དང་སེམས་ལས་བྱུང་བ་ནི་ཐམས་ཅད་འགག་པའི་ངོ་བོ་ཉིད་ཡིན་པའི་ཕྱིར་སེམས་དང་སེམས་ལས་བྱུང་བ་འགོག་པ་ཞེས་བརྗོད་དགོས་སོ་སྙམ་
དུ་བསམས་པ་ཡིན་ནོ། །དེ་དག་དང་མི་མཐུན་པས་དེ་དག་ལ་སྙོམས་པར་འཇུག་པར་སྦྱོར་བའི་ཕྱིར་ཞེས་བྱ་བ་ནི་འདུ་ཤེས་དང་ཚོར་བ་དང་མི་མཐུན་པས་སྙོམས་པར་འཇུག་པ་དེ་དག་ལ་སྦྱོར་བའི་ཕྱིར་རོ། །འདུ་ཤེས་དང་མི་མཐུན་པས་ནི་འདུ་ཤེས་མེད་པའི་སྙོམས་པར་འཇུག་པ་ལ་

སྦྱོར་བ་ཡིན་ཏེ། འདུ་ཤེས་ནི་ཟུག་རྔུའོ། །འདུ་ཤེས་ནི་ནད་དོ། །འདུ་ཤེས་ནི་འབྲས་སོ། །འདི་ནི་ཞི་བའོ། །འདི་ནི་གྱ་ནོམ་པའོ་སྙམ་ནས་ཞེས་བྱ་བ་རྒྱས་པར་འབྱུང་བ་ཡིན་ནོ། །འདུ་ཤེས་དང་ཚོར་བ་དང་མི་མཐུན་པས་ནི་འགོག་པའི་སྙོམས་
པར་འཇུག་པ་ལ་སྦྱོར་རོ། །གཞན་གྱི་སེམས་ཤེས་པ་ཞེས་བྱ་བ་བཞིན་ནོ་ཞེས་བྱ་བ་ནི་དཔེར་ན་གཞན་གྱི་སེམས་ཤེས་པ་ཞེས་བྱ་བ་ནམ་ཡང་གཞན་གྱི་སེམས་ཤེས་པས་སེམས་ལས་བྱུང་བ་མི་ཤེས་པ་མ་ཡིན་མོད་ཀྱི་འོན་ཀྱང་དང་པོར་གཞན་གྱི་སེམས་ཤེས་པར་བྱའོ་སྙམ་
དུ་སྦྱོར་བའི་ཕྱིར་གཞན་གྱི་སེམས་ཤེས་པ་ཞེས་བྱ་བའི་སེམས་དང་སེམས་ལས་བྱུང་བ་ཤེས་པ་ཞེས་ནི་མི་བྱ་བ་དེ་བཞིན་དུ་འདིར་ཡང་སྙོམས་པར་འཇུག་པ་འདི་གཉིས་ལ་དེ་སྐད་ཅེས་བྱའོ། །དེ་ལ་བྱེ་བྲག་ཏུ་སྨྲ་བ་ལ་སོགས་པ་ནི་འགོག་པ་དང་འདུ་ཤེས་མེད་པའི་
སྙོམས་པར་འཇུག་པ་དང་འདུ་ཤེས་མེད་པ་པ་སེམས་མེད་པ་པ་ཁོ་ན་དག་ཡིན་ནོ་ཞེས་ཟེར་ལ། གནས་བརྟན་དབྱིག་བཤེས་ལ་སོགས་པ་ནི་ཡིད་ཀྱི་རྣམ་པར་ཤེས་པ་ཡོངས་སུ་མི་གསལ་བ་ཁོ་ནས་སེམས་དང་བཅས་པ་དག་ཡིན་ནོ་ཞེས་ཟེར། རྣལ་འབྱོར་སྤྱོད་པ་བ་དག་
ནི་ཀུན་གཞི་རྣམ་པར་ཤེས་པས་སེམས་དང་བཅས་པ་དག་ཡིན་ནོ་ཞེས་ཟེར་ཏེ་གྲུབ་པའི་མཐའ་ཐ་དད་པས་དེ་ལྟ་བས་ན། ད་ནི་ཇི་ལྟར་འགགས་ནས་ཡུན་རིང་དུ་ལོན་པའི་སེམས་ལས་ཞེས་བྱ་བ་རྒྱས་པར་འབྱུང་བ་འདི་ཉེ་བར་འགོད་པར་བྱེད་དེ། འགགས་ནས་ཡུན་རིང་དུ་ལོན་
པ་སྨོས་པ་ནི་འགགས་མ་ཐག་པ་བསལ་བའི་ཕྱིར་རོ། །བྱེ་བྲག་ཏུ་སྨྲ་བ་རྣམས་ན་རེ་དེ་ནི་འགགས་མ་ཐག་པ་ལ་སོགས་པ་ཡང་ཇི་ལྟ་བུ་ཞིག་ཡིན། གལ་ཏེ་འགགས་མ་ཐག་པ་ཡོད་དོ། །ཞེས་བྱ་བར་ཁས་བླངས་ན་ནི་འགགས་ནས་ཡུན་རིང་དུ་ལོན་པ་ཡང་ཅི་སྟེ་ཡོད་དོ་ཞེས་བྱ་བར་
ཁས་མི་བླང་ཞེས་ཟེར་རོ། །འགགས་མ་ཐག་པ་ཡོད་པ་ཉིད་དུ་ནི་མི་སྨྲའོ། །འོན་ཀྱང་སྲང་མདའི་མཐོན་དམན་བཞིན་དུ་ད་ལྟར་གྱི་སེམས་ནི་བདག་ཉིད་ཀྱི་སེམས་གཞན་གྱི་རྒྱུའི་དངོས་པོ་རྣམ་པར་བཞག་ནས་འགགས་ལ་གཞན་ནི་སྐྱེའོ། །དེ་ནི་འགགས་ལ་སེམས་གཞན་ནི་

སྐྱེ་བར་འགྱུར་བས་འགགས་མ་ཐག་པའི་སེམས་ལས་སེམས་གཞན་སྐྱེའོ་ཞེས་བྱ་སྟེ། ད་ལྟ་དང་ཉེ་བར་ཡང་ད་ལྟར་དང་འདྲ་བའི་ཕྱིར་རོ། །གཞན་དག་ན་རེ་ནི་ཞེས་བྱ་བ་ནི་མདོ་སྡེ་པ་རྣམས་ཏེ་རེ་ཞིག་གཟུགས་མེད་པར་སྐྱེས་པ་རྣམས་ཀྱིས་ཞེས་བྱ་བ་རྒྱས་པར་འབྱུང་བ་ལ། རེ་ཞིག་
ཅེས་བྱ་བའི་སྒྲ་ནི་རིམ་གྱིས་དོན་ཏེ། རེ་ཞིག་དཔེའི་དོན་འདི་ཁོ་ན་བརྗོད་པར་བྱ་སྟེ་ཞེས་བྱ་བའི་ཐ་ཚིག་གོ། །གཟུགས་ལ་ནི་མཚུངས་པ་དེ་མ་ཐག་པའི་རྐྱེན་ཡོད་པར་མི་འདོད་ན། དེ་ཇི་ལྟར་སྐྱེ་ཞེ་ན། དེ་ནི་སེམས་དེ་ཁོ་ན་ལས་སྐྱེའི་གཟུགས་ལས་ནི་མ་ཡིན་ནོ་ཞེས་སྨྲའོ། །འདི་
གཉིས་ནི་ཕན་ཚུན་ས་བོན་ཅན་ཡིན་ནོ་ཞེས་བྱ་བ་ནི་སེམས་ལ་ཡང་དབང་པོ་དང་བཅས་པའི་ལུས་ཀྱི་ས་བོན་ཡོད་ལ་དབང་པོ་དང་བཅས་པའི་ལུས་ལ་ཡང་སེམས་ཀྱི་ས་བོན་ཡོད་དོ་ཞེས་བྱ་བ་ཡིན་ནོ། །ཡོངས་སུ་དྲི་བ་ལས་ཞེས་བྱ་བ་ནི་ཡོངས་སུ་དྲི་བ་ཞེས་བྱ་བའི་བསྟན་བཅོས་གནས་བརྟན་
དབྱིག་བཤེས་ཀྱིས་བྱས་པ་ཡིན་ནོ། །དེས་དེ་ལས་བཤད་པ་ཡིན་ཏེ། དེའི་བསྟན་བཅོས་བཞི་ལྔ་པ་ལ་སོགས་པ་ཡང་ཡོད་པས་དེའི་ཕྱིར་ཁྱད་པར་དུ་བྱེད་པ་ཡིན་ནོ། །དེ་ལ་སྐྱོན་དུ་འགྱུར་ཞེས་བྱ་བ་སྐྱོན་གང་ཡིན་ཞེ་ན། ད་ནི་ཇི་ལྟར་འགགས་ནས་ཡུན་རིང་དུ་ལོན་པའི་སེམས་ལས་ཞེས་
བཤད་པ་གང་ཡིན་པའོ། །གསུམ་འདུས་པ་ཞེས་བྱ་བ་ནི་དབང་པོ་དང་ཡུལ་དང་རྣམ་པར་ཤེས་པ་རྣམས་སོ། །འདི་ལ་འདུ་ཤེས་དང་ཚོར་བ་དག་ཀྱང་འགག་པར་མི་འགྱུར་རོ་ཞེས་བྱ་བ་ནི་བཙུན་པ་དབྱིག་བཤེས་ཀྱི་གཞུང་ལུགས་འགོག་པའི་སྙོམས་པར་འཇུག་པ་
དེ་སེམས་དང་བཅས་པ་ཉིད་ཡིན་ཡང་འདི་ལ་འདུ་ཤེས་དང་ཚོར་བ་དག་འགོག་གོ་ཞེས་བྱ་བ་ཡིན་ཏེ། དེའི་ཕྱིར་དེ་ལྟར་ཐལ་བར་བྱེད་པ་ཡིན་ནོ། །མ་རིག་པའི་འདུས་ཏེ་རེག་པ་ལས་སྐྱེས་པ་ཞེས་བྱ་བ་ནི་མ་རིག་པ་དང་ལྷན་ཅིག་པའི་འདུས་ཏེ་རེག་པ་ནི་མ་རིག་པའི་འདུས་ཏེ་
རེག་པའོ། །དེ་ལས་སྐྱེས་པ་ནི་མ་རིག་པའི་འདུས་ཏེ་རེག་པ་ལས་སྐྱེས་པའོ། །ཚོར་བ་སྐྱེ་བ་ལ་ནི་མ་བྱས་ཞེས་བྱ་བ་ནི་རེག་པ་འདི་ལྟ་བུ་ནི་ཚོར་བའི་རྐྱེན་ཡིན་ནོ་ཞེས་བྱ་བར་རོ། །བཙུན་པ་དབྱངས་སྒྲོགས་དེ་ཉིད་ཀྱིས་མཇུག་བརྟུལ་བའི་ཕྱིར་དེ་ལྟ་བས་ན་སེམས་མེད་པ་པ་

ཡིན་ནོ་ཞེས་ཟེར་ཞེས་བྱ་བ་སྨོས་སོ། །ཇི་ལྟར་ན་སེམས་མེད་པ་སྙོམས་པར་འཇུག་པ་ཉིད་ཡིན་ཞེས་བྱ་བ་ནི་འདི་སྙམ་དུ་བསམ་གཏན་ལ་སོགས་པ་ནི་སྙམས་པར་འཇུག་པས་སེམས་དང་སེམས་ལས་བྱུང་བ་རྣམས་མཉམ་པར་བྱེད་རྩེ་གཅིག་པར་བྱེད་
པས་སྙོམས་པར་འཇུག་པ་ཉིད་ཡིན་པར་འོས་ཀྱི་སྙམ་དུ་བསམས་ནས་འདྲི་བར་བྱེད་པ་ཡིན་ནོ། །འབྱུང་བ་ཆེན་པོ་མཉམ་པ་ཉིད་དུ་བསྒྲུབ་པའི་ཕྱིར་ཞེས་བྱ་བ་ནི་འདིས་འབྱུང་བ་ཆེན་པོ་རྣམས་མཉམ་པར་བྱེད་པས་ན་སྙོམས་པར་འཇུག་པ་ཡིན་ནོ། །དེ་ལྟར་ན་འགོག་པའི་
སྙོམས་པར་འཇུག་པ་འདི་དང་བསམ་གཏན་ལ་སོགས་པ་ལ་སྙོམས་པར་འཇུག་པ་ཉིད་ཡོད་དོ། །འདི་ལ་འབྱུང་བ་ཆེན་པོ་རྣམས་ཀྱི་མཉམ་པ་ཉིད་གང་ཡིན་ཞེ་ན། སེམས་སྐྱེ་བ་དང་འགལ་བར་ཡང་དག་པར་གནས་པའོ།། །།བམ་པོ་བཅོ་ལྔ་པ། འཐོབ་
པར་འགྱུར་བས་ན་ཞེས་བྱ་བ་ནི་དེ་ལ་སྙོམས་པར་འཇུག་ཅིང་འཐོབ་པར་འགྱུར་བས་ན་སྙོམས་པར་འཇུག་པ་སྟེ་ལས་སུ་སྒྲུབ་པ་ཡིན་ནོ། །རྣལ་འབྱོར་པ་དག་བསམ་གཏན་ལ་སོགས་པ་ཡང་འཐོབ་པར་འགྱུར་ཏེ། དེ་ལྟ་བས་ན་བསམ་གཏན་ལ་སོགས་པ་ཡང་སྙོམས་པར་
འཇུག་པ་ཉིད་ཡིན་ནོ། །རྫས་སུ་ཞེས་བྱ་བ་ནི་རང་གི་མཚན་ཉིད་དུའོ། །སེམས་སྐྱེ་བ་ལ་བགེགས་བྱེད་པའི་ཕྱིར་ཞེས་བྱ་བ་ནི་འདི་ལྟར་སེམས་སྐྱེ་བའི་བགེགས་བྱེད་པ་ཡིན་ནོ། །མ་ཡིན་ཏེ་སྙོམས་པར་འཇུག་པའི་སེམས་ཁོ་ན་ཞེས་བྱ་བ་དེ་ནི་དེ་ལྟ་མ་ཡིན་ནོ། །ཅིའི་
ཕྱིར་ཞེ་ན། སྙོམས་པར་འཇུག་པའི་སེམས་ཁོ་ན་དེ་ལ་བགེགས་བྱེད་པའི་ཕྱིར་ཏེ་སེམས་སྐྱེ་བ་ལ་བགེགས་བྱེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཇི་ལྟ་ཞེ་ན། དེ་བསྟན་པའི་ཕྱིར་སྙོམས་པར་འཇུག་པའི་སེམས་ཁོ་ན་ཞེས་བྱ་བ་རྒྱས་པར་སྨོས་ཏེ། དེ་ཉིད་སྙོམས་
པར་འཇུག་པའི་སེམས་ཁོ་ན་ཡིན་གྱི་རྫས་གཞན་ནི་མེད་དོ། །དེ་དང་འགལ་བའི་རྟེན་བསྐྱེད་པའི་ཕྱིར་ཞེས་བྱ་བ་ནི་སེམས་དང་འགལ་བའི་རྟེན་ཏེ་རྒྱུད་བསྐྱེད་པའི་ཕྱིར་རོ། །སེམས་གང་གིས་ན་གཏན་དུ་མ་ཡིན་པ་དུས་གཞན་གྱི་བར་དུ་མི་འཇུག་པར་འགྱུར་བ་སྟེ། ཙམ་ཞེས་

བྱ་བའི་སྒྲ་ནི་རྫས་གཞན་བཟློག་པའི་ཕྱིར་རོ། །སེམས་གཞན་དང་འགལ་བ་སྟེ། མ་འོངས་པའི་སེམས་དང་འགལ་བ་སྐྱེའོ། །མི་འཇུག་པ་ཙམ་གང་ཡིན་པ་དེ་ལ་སྙོམས་པར་འཇུག་པ་ཞེས་གདགས་ཏེ་འདི་ནི་བཏགས་པའི་ཆོས་ཡིན་གྱི་རྫས་ཀྱི་ཆོས་ནི་མ་ཡིན་ནོ་ཞེས་བྱ་
བའི་ཐ་ཚིག་གོ། །གལ་ཏེ་རྫས་ཀྱི་ཆོས་མ་ཡིན་ན་འདི་ཇི་ལྟར་འདུས་བྱས་ཞེས་གདགས་ཤེ་ན། སྨྲས་པ། མི་འཇུག་པ་ཙམ་དེ་ཡང་སྔོན་མ་བྱུང་བ་དང་དུས་ཕྱིས་ལངས་པའི་རྣལ་འབྱོར་པ་ལ་མེད་པ་ཡིན་པས་འདུ་ཤེས་མེད་པའི་སྙོམས་པར་འཇུག་པ་འམ། འགོག་
པའི་སྙོམས་པར་འཇུག་པར་ཡང་རུང་སྙོམས་པར་འཇུག་པ་འདི་ནི་ཐ་སྙད་དུ་འདུས་བྱས་སུ་གདགས་ཀྱི་རྫས་སུ་ནི་མ་ཡིན་ནོ། །རྟེན་ཉིད་དེ་ལྟར་མཉམ་པར་སྒྲུབ་པ་ཞེས་བྱ་བ་ནི་དེ་ལྟ་བུར་རྣམ་པར་འཇོག་པ་སྟེ། གནས་སྐབས་ཀྱི་ཁྱད་པར་ཡིན་ཏེ། ཁོ་བོ་ཅག་ནི་སྙོམས་
པར་འཇུག་པས་བསྐྱེད་པ་འདི་ལ་སྙོམས་པར་འཇུག་པ་ཞེས་འདོགས་སོ་ཞེས་བྱ་བའི་ཐ་ཚིག་གོ། །གནས་སྐབས་དེ་ཡང་སྔ་མ་བཞིན་དུ་བྱུང་བར་མ་གྱུར་པ་དང་ཕྱིས་ལངས་པ་ལ་མེད་པས་འདུས་བྱས་ཉིད་དུ་འགལ་བ་མེད་དོ། །ཡང་ན་སྙོམས་པར་འཇུག་པ་ཞེས་
འབྱུང་སྟེ། སྙོམས་པར་འཇུག་པ་དེ་འདུས་བྱས་ཀྱི་གནས་སྐབས་ཀྱི་ཁྱད་པར་ཡིན་པའི་ཕྱིར་འདུས་བྱས་ཉིད་དུ་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ། །འདུ་ཤེས་མེད་པ་པ་ཡང་དེ་བཞིན་དུ་ཞེས་བྱ་བ་རྒྱས་པར་འབྱུང་བ་ནི། རྣལ་འབྱོར་པ་འདིས་འདུ་ཤེས་
མེད་པ་པ་དེར་སེམས་ཁོ་ན་སེམས་འཇུག་པ་པ་དང་འགལ་བ་པ་འཐོབ་པོ། །མི་འཇུག་པ་ཙམ་དེ་ཡང་སེམས་དང་སེམས་ལས་བྱུང་བ་རྣམས་ཞེས་བྱ་བ་ཚིག་ལྷག་མ་ཡིན་ཏེ། འདུ་ཤེས་མེད་པ་པ་ཞེས་བྱ་བར་གདགས་ཀྱི་རྫས་སུ་ནི་མེད་དོ་ཞེས་བྱ་བར་བསམས་པ་ཡིན་
ནོ། །དེ་ལྟ་བས་ན་དྲོད་དང་ཞེས་བྱ་བ་རྒྱས་པར་འབྱུང་བ་ནི་དྲོད་དང་རྣམ་པར་ཤེས་པ་འཇུག་པ་ནི་སྲོག་ལ་རག་ལས་པ་ཡིན་ནོ། །དེ་ལྟ་བས་ན་སྲོག་ནི་དྲོད་དང་རྣམ་པར་ཤེས་པའི་རྟེན་ཡིན་ནོ་ཞེས་བྱ་བ་སྟེ། གནས་པའི་རྒྱུ་ཡང་དེ་དག་ཁོ་ན་ཡིན་ནོ། །རྟག་ཏུ་ལྡོག་པ་མེད་

པར་ཐལ་བར་འགྱུར་རོ་ཞེས་བྱ་བ་ནི་འདི་དག་རྟག་ཏུ་རྒྱུན་ཆགས་པར་ཐལ་བར་འགྱུར་བའོ། །རིས་མཐུན་པ་གནས་པའི་དུས་ཀྱི་འཕེན་པ་ཡིན་ཞེས་བྱ་བ་ལ། རིས་མཐུན་པ་ནི་གཟུགས་ལ་སོགས་པ་ཕུང་པོ་ལྔའི་ངོ་བོ་ཉིད་ཀྱི་འདུ་བྱེད་དེ་ལྟ་བུ་དེ་དག་ཁོ་ན་
ཡིན་ནོ་ཞེས་བཤད་ཟིན་ཏོ། །དེ་དག་གནས་པ་ནི་རྒྱུན་ཏོ། །དེའི་དུས་ནི་དེས་ཇི་སྲིད་དུ་གནས་པར་འགྱུར་བའི་འདུ་བྱེད་ཀྱི་མཚན་ཉིད་དེ་སྙེད་པ་དེ་དག་ཁོ་ན་ཡིན་ནོ། །དེ་འཕངས་པ་ནི་ཚེ་རབས་སྔ་མའི་ལས་ཀྱིས་ཉིང་མཚམས་སྦྱོར་བའི་སྐད་ཅིག་མ་ལ་རྒྱུར་རྣམ་པར་གཞག་པ་ཡིན་
ནོ། །རྒྱུ་དེ་ཡང་གང་ཞེ་ན། ནུས་པའི་ཁྱད་པར་ཡིན་ཏེ། དེ་ནི་བརྒྱུད་པའི་ཕུང་པོའི་རྒྱུན་གྱི་མཚན་ཉིད་ཀྱི་གནས་པའི་རྒྱུར་འགྱུར་རོ། །དེ་ཉིད་ཀྱི་ཕྱིར་གནས་པའི་དུས་འཕངས་པ་ཞེས་བྱ་སྟེ། དུས་རེ་ཞིག་རྒྱུན་ཆགས་པ་ལ་ལྟོས་པའི་མཚན་ཉིད་ཡིན་པའི་ཕྱིར་རོ། །དེ་
གནས་པ་ཞེས་བྱ་བ་ལ། དེ་ཞེས་བྱ་བ་ནི་རིས་མཐུན་པའོ། །འབྲུ་རྣམས་ཀྱི་སྨིན་པའི་དུས་འཕེན་པ་ལྟ་བུ་ནི་ཇི་ལྟར་འབྲུ་རྣམས་ཀྱི་སྨིན་པའི་དུས་ཀྱི་འཕེན་པ་ནུས་པའི་ཁྱད་པར་གྱི་ངོ་བོ་ཉིད་སྐད་ཅིག་མ་བརྒྱུད་པས་ཇི་སྲིད་མ་སྨིན་གྱི་བར་དུ་འབྲུའི་རྒྱུན་གྱི་རྒྱུར་འགྱུར་བ་གང་ཡིན་པ་
ས་བོན་གྱི་མྱུ་གུ་ལ་འཇོག་པ་ལྟར་འདི་ཡང་དེ་དང་འདྲའོ། །མདའ་འཕངས་པ་དག་གི་གནས་པའི་དུས་ཀྱི་འཕེན་པ་བཞིན་ཞེས་བྱ་བ་ལ། མདའ་འཕངས་པའི་གནས་པ་ནི་ནམ་མཁའི་ཡུལ་གཞན་དུ་འབྱུང་བ་སྟེ། རྒྱུན་གྱིས་འཇུག་པའོ། །དེའི་དུས་ནི་མཚམས་ཏེ་གང་ཕན་ཆད་དུ་
མི་འབྱུང་བའོ། །དེའི་འཕེན་པ་ནི་རྒྱུ་རྣམ་པར་གཞག་པའོ། །རྒྱུ་དེ་ཡང་གང་ཞིག་ཡིན་ཞེ་ན། འབད་པ་ཁྱད་པར་ཅན་དུ་གྱུར་པ་ལས་གྲུབ་པའི་རླུང་གི་ཁམས་ཀྱིས་བསྐྱེད་པའི་ནུས་པའི་ཁྱད་པར་ཡིན་ཏེ། ཇི་ལྟར་མདའ་འཕངས་པ་དག་གི་གནས་པའི་དུས་ཀྱི་འཕེན་པ་རྫས་
གཞན་མེད་པ་ལྟར་ཚེའི་མཚན་ཉིད་ཀྱི་འཕེན་པ་འདི་ཡང་དེ་དང་འདྲ་བར་བལྟ་བར་བྱའོ། །གང་ཞིག་སེམས་པ་ཞེས་བྱ་བ་ནི་བྱེ་བྲག་པ་ཡིན་ནོ། །འདུ་བྱེད་ཅེས་བྱ་བ་ཡོན་ཏན་གྱི་ཁྱད་པར་ཞེས་བྱ་བ་ནི་ས་ལ་སོགས་པ་ཡོན་ཏན་ཁྱད་པར་ཅན་འདུ་བྱེད་ཅེས་བྱ་བ་ལས། ལས་སྐྱེས་

པ་དང་ལས་ཀྱི་རྒྱུ་ཅན་ཡིན་པ་མིང་གཉིས་པ་ཤུགས་ཞེས་བྱ་བ་མདའ་ལ་སྐྱེ་སྟེ་དེའི་དབང་གིས་ཡོན་ཏན་འདིའི་དབང་གིས་མ་ལྟུང་གི་བར་དུ་འགྲོ་བར་འགྱུར་རོ་ཞེས་བྱ་བ་ཡིན་ནོ། །དེའི་ཕྱིར་དེ་ལ་འདི་དཔེར་མི་རུང་སྟེ། ཇི་ལྟར་འདུ་བྱེད་ཅེས་བྱ་བ་རྫས་གཞན་ཡོད་པ་དེ་བཞིན་
དུ་ཚེ་ཡང་ཡོད་པར་འགྱུར་རོ་ཞེ་ན། དེའི་ཕྱིར་སློབ་དཔོན་གྱིས་དེའི་གཞུང་ལུགས་སུན་དབྱུང་བ་དེའི་ནི་ཞེས་བྱ་བ་རྒྱས་པར་སྨོས་ཏེ། དེའི་ཞེས་བྱ་བ་ནི་བྱེ་བྲག་པའིའོ། །དེ་ནི་གཅིག་པུ་ཡིན་པའི་ཕྱིར་ཞེས་བྱ་བ་ནི་འདུ་བྱེད་དེ་གཅིག་པུ་ཡིན་པའི་ཕྱིར་རོ། །གགས་བྱེད་པ་མེད་
པའི་ཕྱིར་ཞེས་བྱ་བ་ནི་ཤིང་ལ་རྟུགས་པ་ལ་སོགས་པའི་མཚན་ཉིད་ཀྱི་གགས་བྱེད་པ་མེད་པའི་ཕྱིར་རོ། །ཅི་ཞེ་ན། ཡུལ་གཞན་དག་ཏུ་མགྱོགས་པ་དང་ཆེས་དང་ཤིན་ཏུ་ཆེས་དང་མགྱོགས་པར་ཕྱིན་པའི་དུས་ཀྱི་བྱེ་བྲག་ཀྱང་མི་འཐད་དེ། མགྱོགས་པ་དང་ཆེས་མགྱོགས་པ་
དང་ཤིན་ཏུ་ཆེས་མགྱོགས་པའོ། །གང་དག་ཏུ་ཞེ་ན། ཡུལ་གཞན་དག་དང་བཅས་པར་ཏེ་ནམ་མཁའི་ཡུལ་ལ་སོགས་པར་རོ། །དེའི་དུས་དེའི་བྱེ་བྲག་དེ་མི་འཐད་དེ་གོང་དུ་བཤད་པའི་གཏན་ཚིགས་དེ་གཉིས་ཀྱིས་ནི་ཡུལ་གཞན་དག་དང་བཅས་པར་མགྱོགས་པ་དང་
ཆེས་མགྱོགས་པ་དང་ཤིན་ཏུ་ཆེས་མགྱོགས་པར་མི་འཐད་དོ། །འདུ་བྱེད་ལ་ཁྱད་པར་མེད་པའི་ཕྱིར་ལྟུང་བར་ཡང་མི་འཐད་དོ། །འདུ་བྱེད་ཡོད་ན་མདའ་ལྟུང་བར་ཡང་མི་འཐད་དེ། རྒྱུ་ཡོད་བཞིན་དུ་འབྲས་བུ་མི་འབྱུང་ངོ་ཞེས་བྱ་བ་འདི་ནི་མི་འདོད་དོ། །གལ་ཏེ་རླུང་གིས་དེ་ལ་
གགས་བྱས་སོ་ཞེ་ན་ཞེས་བྱ་བ་ནི་གལ་ཏེ་དེ་ལ་རླུང་གིས་གགས་བྱས་པའི་ཕྱིར་རླུང་གགས་བྱེད་པའི་ཁྱད་པར་ལས་མགྱོགས་པ་དང་ཆེས་དང་ཤིན་ཏུ་ཆེས་མགྱོགས་པར་ཕྱིན་པར་ཡང་འཐད་ལ་ལྟུང་བར་ཡང་འཐད་དེ། རེག་པ་དང་ལྡན་པའི་རྫས་ཕྲད་པ་ལས་ལས་མེད་དོ་ཞེས་འབྱུང་
བའི་ཕྱིར་རོ་ཞེས་བྱ་བར་འདོད་ན། འདིར་ཚུ་རོལ་དུ་ལྟུང་བར་ཐལ་བར་འགྱུར་རོ་ཞེས་བྱ་བ་སྨོས་ཏེ། མདའ་འཕངས་ན་རླུང་དང་ལྡན་པས་གཞུ་རྒྱུད་དང་བྲལ་མ་ཐག་ཁོ་ནར་དྲུང་ཉིད་དུ་ལྟུང་བར་འགྱུར་རོ། །འོན་ཏེ་རླུང་གིས་གགས་བྱས་ཀྱང་དྲུང་དུ་མི་ལྟུང་ན་ནི་གཞར་ཡང་མི་

ལྟུང་བར་འགྱུར་ཏེ་ཕྱིས་ཀྱང་ལྟུང་བར་མི་འགྱུར་རོ་ཞེས་བྱ་བའི་ཐ་ཚིག་གོ། །ཅིའི་ཕྱིར་ཞེ་ན། རླུང་ལ་ཁྱད་པར་མེད་པའི་ཕྱིར་ཏེ་ཉེ་བ་ལ་ཇི་ལྟ་བར་རིང་བ་ལ་ཡང་དེ་དང་འདྲའོ། །ཡ་ང་བ་ཡོངས་སུ་མ་སྤངས་པས་སོ་ཞེས་བྱ་བ་ནི་བག་མེད་པར་ཟ་བ་ལ་སོགས་པའི་ཡ་ང་བ་
མ་སྤངས་པས་སོ། །ཚེ་ཟད་ན་བསོད་ནམས་ཟད་པ་འཆི་བ་ལ་ནུས་པ་མེད་དེ་དེའི་ཕྱིར་མུ་གསུམ་པར་མི་འགྱུར་རོ། །དེ་ལྟ་བས་ན་གཉི་ག་ཟད་ན་གཉི་ག་ཟད་པ་ལས་འཆི་བ་ཞེས་བྱ་བ་ནི་གཉི་ག་ཟད་ན་ཞེས་བྱ་བའི་དོན་གང་ཡིན་པ་དེ་ནི་གཉི་ག་ཟད་པས་ཞེས་བྱ་བའི་དོན་འདི་ཡིན་པར་བཤད་
པར་རིག་པར་བྱའོ། །ཚེ་མ་ཟད་པར་ཡང་འཆི་བར་འགྱུར་རོ་ཞེས་བྱ་བ་ཇི་ལྟར་ཤེས་ཤེ་ན། འབྲུ་ལ་སོགས་པ་དང་ཆོས་མཐུན་པའི་ཕྱིར་ཏེ། འབྲུ་ལ་སོགས་པ་ནི་ས་བོན་གྱི་འཕེན་པ་ཡོངས་སུ་ཟད་ཕན་ཆད་ཞིང་དང་ཆུ་ལ་སོགས་པ་རྐྱེན་གཞན་ཡོད་ཀྱང་འབྲས་བུ་སྨིན་པའམ།
འབྲས་བུ་སྨིན་པའི་དུས་སུ་མ་ཕྱིན་པ་ཁོ་ནར་རྒྱུན་ལྡོག་པ་ཡང་མཐོང་སྟེ། ས་བོན་ཤིན་ཏུ་གྲུང་བ་མ་ཡིན་པའི་ཕྱིར་རོ། །ས་བོན་གྲུང་པོའི་འཕེན་པ་ཡོད་ཀྱང་ཆུ་ལ་སོགས་པ་གནས་པ་དང་འཕེལ་བ་ལ་སོགས་པའི་རྐྱེན་མེད་པའི་ཕྱིར་རྒྱུན་ལྡོག་པ་ཡང་མཐོང་ངོ་། །ས་བོན་གྱི་འཕེན་
པ་དང་གནས་པ་དང་འཕེལ་བའི་རྐྱེན་མེད་ན་ཡང་མཐོང་སྟེ། གང་གི་ཚེ་ས་བོན་གྱི་འཕེན་པ་ཡང་ཡོངས་སུ་རྫོགས་པ་ཡིན་ལ་ཆུ་ཡང་མེད་པ་ནའོ། །ས་བོན་གྲུང་པོའི་འཕེན་པ་ཡང་ཡོད་ལ་ཆུ་ལ་སོགས་པ་གནས་པ་དང་འཕེལ་བའི་རྐྱེན་ཡང་ཡོད་ཀྱང་འགྲོ་བ་ལ་སོགས་པའི་གནོད་
པས་འབྲུ་ལ་སོགས་པའི་རྒྱུན་ལྡོག་པ་ཡང་མཐོང་བ་ལྟ་བུའོ། །གང་ལ་ལུས་ལ་གནོད་པས་གནོད་པར་འགྱུར་བ་དེ་ནི་རྒྱུད་ལ་རག་ལུས་པའི་ཕྱིར་ཞེས་བྱ་བ་འདི་ནི་ཉི་འོག་པའི་གཞུང་ལུགས་ཡིན་ཏེ། ཚེ་དེ་ནི་ལུས་ཀྱི་རྒྱུད་ལ་རག་ལུས་པ་ཡིན་པས་རྒྱུད་ལ་རག་ལུས་པ་
ཞེས་བྱའོ། །ཁ་ཆེ་བའི་གཞུང་ལུགས་ལྟར་ན་ཡང་དོན་ནི་དེ་ཁོ་ནར་ཟད་དེ་གློ་བུར་དང་བཅས་པ་དང་གློ་བུར་མེད་པ་ཞེས་བྱ་བ་སྒྲ་ཙམ་ཞིག་ཐ་དད་པར་ཟད་དོ། །ཡང་ན་རྒྱུད་ལ་རག་ལུས་པ་དེ་ནི་རྒྱ