Luận tạng Tây Tạng (Tengyur) — Tập 142

ུད་ཁོ་ན་ལ་ཡོད་པ་འབའ་ཞིག་ཡིན་གྱི་ལན་ཅིག་སྐྱེས་ནས་གནས་པ་མ་ཡིན་

པས་གློ་བུར་དང་བཅས་པ་ཞེས་བྱ་སྟེ། ལུང་འདིས་ནི་དུས་མ་ཡིན་པར་འཆི་བ་ཡོད་དོ་ཞེས་སྟོན་པར་བྱེད་པ་ཡིན་ནོ། །མདོ་ལས་ཀྱང་དུས་མ་ཡིན་པར་འཆི་བ་ཡོད་པར་འབྱུང་ངོ་ཞེས་བསྟན་པའི་ཕྱིར་མདོ་ལས་ལུས་ཐོབ་པ་ནི་བཞི་སྟེ་ཞེས་བྱ་བ་རྒྱས་པར་སྨོས་ཏེ། བདག་ཉིད་འཆི་བ་
ནི་བདག་ཉིད་ཀྱིས་འཆི་བའོ། །གཞན་གྱིས་གསོད་པ་ནི་ཕ་རོལ་པོས་གསོད་པའོ། །སངས་རྒྱས་རྣམས་ཀྱི་ཡང་ཡིན་པར་བརྗོད་པར་བྱ་བ་ཅི་ཞེ་ན། བདག་ཉིད་འགྲོངས་པ་དེ་བདག་ཉིད་འགྲོངས་པའི་ཕྱིར་རོ། །སངས་རྒྱས་བཅོམ་ལྡན་འདས་རྣམས་ནི་མི་བརྫི་བའི་ཆོས་ཅན་དང་སྐུ་
ཚེ་གཏོང་བ་ལ་མངའ་བརྙེས་པ་ཡང་ཡིན་ནོ། །ཕལ་ཆེར་ཞེས་བྱ་བ་སྨོས་པ་ནི་མུ་བཞི་པར་བསྟན་པ་དམྱལ་བ་དང་སྲིད་པ་བར་མ་པ་ལ་སོགས་པ་ཡོངས་སུ་སྤངས་པའི་ཕྱིར་རོ། །རྒྱལ་པོའི་དྲང་སྲོང་ནི་སྔོན་འཁོར་ལོས་སྒྱུར་བའི་རྒྱལ་པོ་བྱེད་བྱེད་པ་ལས་རབ་ཏུ་བྱུང་བའོ། །རྒྱལ་བའི་
ཕོ་ཉ་ནི་སངས་རྒྱས་བཅོམ་ལྡན་འདས་ཀྱིས་འགའ་ཞིག་ཕོ་ཉར་བཏང་བ་གང་ཡིན་པ་སྟེ། དཔེར་ན་བཅོམ་ལྡན་འདས་ཀྱིས་ནེ་ཙོ་གཅིག་ཅིག་ཨ་མྲ་སྐྱོང་མའི་ཐོག་ཏུ་བཏང་བ་ལིཙྪ་བཱི་རྣམས་ཀྱིས་ཕྲིན་ཟེར་བ་ཡིན་པར་མཐོང་ནས་མདའ་རུབ་ཀྱིས་བྲུབས་ཀྱང་གསད་པར་མ་
ནུས་པ་ལྟ་བུ་སྟེ། ཇི་སྲིད་དུ་ཕོ་ཉའི་བྱ་བ་དེ་མ་བྱས་པ་དེ་སྲིད་དུ་བདག་ཉིད་འཆི་བར་ཡང་མི་འགྱུར་ལ་གཞན་གྱིས་གསོད་པར་ཡང་མི་འགྱུར་རོ། །རྒྱལ་བས་བསྟན་པ་ནི་བཅོམ་ལྡན་འདས་ཀྱིས་འདིས་འདི་སྲིད་ཅིག་ཐུབ་པར་འགྱུར་རོ་ཞེས་བཀའ་སྩལ་པ་གང་ཡིན་པའོ། །ཆོས་
ལེན་ཞེས་བྱ་བ་ལ་སོགས་པ་ནི་སྔོན་གྱི་གཏམ་རྒྱུད་དག་ལས་ཁོང་དུ་ཆུད་པར་བྱའོ། །སོགས་པ་ཞེས་བྱ་བའི་སྒྲས་ནི་གཞན་དག་ཀྱང་རྟོགས་པར་བྱ་སྟེ། དེ་དག་ནི་བདག་ཉིད་ཀྱང་འཆི་བར་མི་འགྱུར་ལ་གཞན་གྱིས་ཀྱང་གསོད་པར་མི་འགྱུར་རོ། །སྲིད་པ་ཐ་མ་པའི་བྱང་ཆུབ་སེམས་
དཔའ་རྣམས་ནི་གང་དག་ཚེ་དེ་ཁོ་ན་ལ་དགྲ་བཅོམ་པ་ཉིད་འཐོབ་པ་ཡིན་ནོ། །བྱང་ཆུབ་སེམས་དཔའ་ཡུམ་དེའི་ལྷུམས་ན་གནས་པ་ནི་བྱང་ཆུབ་སེམས་དཔའ་ལྷུམས་ན་བཞུགས་པའོ། །འཁོར་ལོས་སྒྱུར་བའི་མ་འཁོར་ལོས་སྒྱུར་བ་མངལ་ན་གནས་པ་སྟེ། དེ་དག་ནི་བདག་ཉིད་

ཀྱང་མི་འཆི་ལ་གཞན་གྱིས་ཀྱང་གསོད་པར་མི་འགྱུར་རོ། །གལ་ཏེ་གཟུགས་དང་གཟུགས་མེད་པ་ན་སྤྱོད་པ་ཐམས་ཅད་བདག་ཉིད་ཀྱང་མི་འཆི་ལ་གཞན་གྱིས་ཀྱང་གསོད་པར་མི་འགྱུར་ན། འོ་ན་ཡང་ཅིའི་ཕྱིར་མདོ་ལས་གསུངས་ཞེས་བྱ་བ་རྒྱས་པར་སྨོས་ཏེ། དེ་ན་
ནི་གཉི་ག་མེད་དོ་ཞེས་བྱ་བ་ནི་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དེ་ནའོ། །རང་གི་ས་པའི་འཕགས་པའི་ལམ་ནི་མེད་དེ། ཇི་སྲིད་དུ་འདུ་ཤེས་ལ་སྙོམས་པར་འཇུག་པ་དེ་སྲིད་དུ་དེ་ཀུན་ཤེས་པ་འཐོབ་བོ་ཞེས་འབྱུང་བའི་ཕྱིར་རོ། །ས་གོང་མ་པའི་ཉེར་བསྡོགས་ཀྱང་མེད་དེ་གོང་
ནས་མེད་པའི་ཕྱིར་རོ། །གཞན་གྱི་ས་པའི་འཕགས་པའི་ལམ་ཞེས་བྱ་བ་ནི་ཅི་ཡང་མེད་པའི་སྐྱེ་མཆེད་ཀྱི་ས་པའི་འཕགས་པའི་ལམ་སྟེ། སྲིད་རྩེར་འཕགས་པ་ཅི་ཡང་མེད། །མངོན་སུམ་བྱས་པས་ཟག་པ་ཟད། །ཅེས་བྱ་བའི་ཕྱིར་རོ། །འོ་ན་ནི་མཐའ་སྨོས་པས་ཞེས་བྱ་བ་
ལ། འོ་ན་ཞེས་བྱ་བ་ནི་དོན་གཞན་བརྗོད་པར་འདོད་པའི་ཚིག་གི་ཕྲད་ཡིན་ནོ། །དེ་ལ་སོགས་པ་གོའོ་ཞེས་བྱ་བ་ནི་མཐའ་མ་འདུ་ཤེས་མེད་འདུ་ཤེས་མེད་མིན་དེ་ལ་སོགས་པ་སྟེ་བསམ་གཏན་བཞི་པ་དང་གཟུགས་མེད་པ་ལྷག་མ་གསུམ་མོ། །འདོད་པའི་ཁམས་ནི་དེ་ལ་སོགས་པ་
མ་ཡིན་ཏེ། མཉམ་པར་གཞག་པ་མ་ཡིན་པ་ཉིད་ཀྱིས་མི་འདྲ་བའི་ཕྱིར་རོ། །ཡང་ན་སྙོམས་པར་འཇུག་པའི་སྒོ་ནས་དེ་ལ་སོགས་པ་གཟུགས་དང་གཟུགས་མེད་པ་དག་ཁོ་ན་ཡིན་ཏེ་མཐར་གྱིས་གནས་པའི་སྙོམས་པར་འཇུག་པ་དགུ་ཞེས་འབྱུང་བའི་ཕྱིར་རོ། །དེ་རྟོགས་པ་ནི་དེ་
ལ་སོགས་པ་གོ་བའོ། །གཞན་ལ་ལར་ཡང་འདི་ལྟ་བུ་མཐོང་བ་ཡོད་དམ་ཞེ་ན། སྨྲས་པ། ཡོད་དེ། ལ་ལར་ནི་མཐའ་ཡང་དང་པོས་གོ་ཞེས་བྱ་བ་རྒྱས་པར་སྨོས་སོ། །འདི་ལྟ་སྟེ་ཚངས་རིས་ཀྱི་ལྷ་དག་ལྟ་བུ་ཞེས་བྱ་བ་ནི་ཚངས་རིས་ཀྱི་ལྷ་དག་དང་དེའི་མཐའ་བསྡུས་པས་
ཚངས་པའི་མདུན་ན་འདོན་དང་ཚངས་ཆེན་དག་ཀྱང་བདེ་བ་སྐྱེ་བ་དང་པོ་ཡིན་ནོ། །འདི་ལྟ་སྟེ་འོད་གསལ་བའི་ལྷ་རྣམས་ལྟ་བུ་ཞེས་བྱ་བ་ནི་འོད་གསལ་བ་དག་དང་དེ་ལ་སོགས་པ་བསྡུས་པས་འོད་ཆུང་དང་ཚད་མེད་འོད་རྣམས་ཀྱང་བདེ་བ་སྐྱེ་བ་གཉིས་པ་ཡིན་ནོ། །བདེ་བ་སྐྱེ་བ་

ནི་གསུམ་ཁོ་ནར་འདོད་དེ། བདེ་བ་སྐྱེ་བ་གསུམ་པོ་ནི། །བསམ་གཏན་གསུམ་ལ་ས་དགུ་ཡིན། །ཞེས་འབྱུང་བའི་ཕྱིར་རོ། །དཔེའི་ཆོས་ནི་འདི་ཡིན་ཞེས་བྱ་བ་ནི་གང་དེའི་རྣམ་པ་གཅིག་སྟོན་པར་བྱེད་ཀྱི་ཐམས་ཅད་མ་ཡིན་ཡང་ལྷག་མ་རྣམས་རྟོགས་པར་འགྱུར་བ་ནི་དཔེའི་
ཚུལ་ཡིན་ཏེ། དཔེར་ན་སྒྲ་ནི་མི་རྟག་པ་སྟེ། བྱས་པའི་ཕྱིར། འདི་ལྟ་སྟེ་བུམ་པ་ལྟ་བུའོ་ཞེས་བྱས་ནས་འདི་ལྟ་སྟེ་ཞེས་བྱ་བའི་སྒྲ་ནི་དཔེར་བརྗོད་པ་ཡིན་པའི་ཕྱིར་རས་ཡུག་ལ་སོགས་པ་ཡང་བསྡུས་པ་ལྟ་བུའོ། །འདི་ནི་ཉེ་བར་སྦྱར་དུ་མི་རུང་ངོ་ཞེས་བྱ་བ་ནི་དཔེར་མི་རུང་ངོ་ཞེས་བྱ་
བའི་ཐ་ཚིག་གོ། །མི་རྣམས་དང་ལྷ་ཁ་ཅིག་གོ་ཞེས་བྱ་བ་ལ། ལྷ་ཁ་ཅིག་ནི་འདོད་པ་ན་སྤྱོད་པ་དྲུག་དང་བསམ་གཏན་དང་པོར་སྐྱེས་པའི་ལྷ་དང་པོར་བྱུང་བ་མ་གཏོགས་པ་རྣམས་ཏེ་ལུས་ཐ་དད་པ་དང་འདུ་ཤེས་ཐ་དད་པའི་སེམས་ཅན་ནི་འདི་དག་ཁོ་ན་ཙམ་དུ་ཟད་ཀྱི་འདི་དག་ལ་
མ་གཏོགས་པ་མེད་པས་འདི་ལྟ་སྟེ་ཞེས་བྱ་བའི་སྒྲ་འདི་ནི་དཔེར་བརྗོད་པ་མ་ཡིན་ནོ། །དེ་ལྟ་བས་ན་འདི་ནི་ཉེ་བར་བསྟན་པའི་དོན་ཁོ་ནར་བལྟ་བར་བྱའོ། །ཉེ་བར་བསྟན་པ་ཉིད་ཡིན་དང་དེ་ཁོ་ན་དང་འདྲ་བར་མཐའ་སྨོས་པས་དེ་ལ་སོགས་པ་གོའོ་ཞེས་བྱ་བ་འདི་གནས་པ་ཡིན་
ནོ། །བཟློག་པ་ནི་འདུས་མ་བྱས་སོ་ཞེས་བྱ་བ་ནི་གང་ལ་འདི་དག་མེད་པ་དེ་ནི་འདུས་མ་བྱས་ཡིན་ནོ་ཞེས་བྱ་བ་ཡིན་ནོ། །འདུས་མ་བྱས་ཀྱི་མཚན་ཉིད་གནས་པ་ཡང་ཡོད་པ་མ་ཡིན་ནམ་ཞེ་ན། འདུས་མ་བྱས་ཀྱི་གནས་པ་རྫས་གཞན་གྱི་ངོ་བོ་ནི་མེད་དོ། །འདིར་ནི་འདུས་བྱས་ཀྱི་མཚན་ཉིད་རྫས་གཞན་
གྱི་ངོ་བོ་དག་ཡིན་པར་འདོད་པས་འདི་ནི་ཀླན་ཀར་མི་རུང་ངོ་། །མདོ་ལས་གསུམ་པོ་འདི་དག་ནི་ཞེས་བྱ་བ་རྒྱས་པར་འབྱུང་བ་ཇི་ལྟ་བུ་ཞེ་ན། མདོ་ལས་དགེ་སློང་དག་གསུམ་པོ་འདི་དག་ནི་འདུས་བྱས་ཀྱི་མཚན་ཉིད་ཡིན་ནོ། །གསུམ་གང་ཞེ་ན། དགེ་སློང་དག་འདུས་བྱས་ལ་སྐྱེ་བ་
ཡང་མངོན་ནོ། །འཇིག་པ་ཡང་མངོན་ནོ། །གནས་པ་གཞན་དུ་འགྱུར་བ་ཡང་མངོན་ནོ་ཞེས་གསུངས་པ་ཡིན་ནོ། །དེར་བཞི་པ་ཡང་བརྗོད་པར་བྱ་དགོས་ཞེས་ཟེར་བ་ནི་བྱེ་བྲག་ཏུ་སྨྲ་བ་རྣམས་ཡིན་ནོ། །འོ་ན་ནི་གནས་པ་གཞན་དུ་འགྱུར་བ་ཞེས་བྱ་བ་གང་ཡིན་པ་ཞེས་བྱ་བ་ལ། རྒོལ་བ་པོའི་

བསམ་པ་ནི་འདི་ལ་གནས་པ་ཞེས་བྱ་བའི་སྒྲ་གྲག་ན་ནི་ཇི་ལྟར་གནས་པ་མ་གསུངས་སོ་ཞེས་བྱ་བ་འདི་བརྗོད་སྙམ་པ་ཡིན་ནོ། །འདི་ནི་རྒ་བའི་རྣམ་གྲངས་ཡིན་ཞེས་བྱ་བ་ནི་གནས་པ་ལས་གཞན་དུ་འགྱུར་བ་ནི་གནས་པ་གཞན་དུ་འགྱུར་བའོ་ཞེས་རྒ་བ་འདི་བསྟན་པ་ཡིན་
ཏེ། དཔེར་སྐྱེ་བའི་རྣམ་གྲངས་འབྱུང་བ་ཞེས་བྱ་བ་དང་། མི་རྟག་པ་ཉིད་ཀྱིས་འཇིག་པ་ཞེས་བྱ་བ་དེ་བཞིན་དུ་གནས་པ་གཞན་དུ་འགྱུར་བ་ནི་རྒ་བའི་རྣམ་གྲངས་ཡིན་ནོ། །ཡང་ཅིའི་ཕྱིར་མཚན་ཉིད་བཞི་ཡོད་བཞིན་དུ་བཅོམ་ལྡན་འདས་ཀྱིས་གསུམ་ཁོ་ན་ཞིག་གསུངས་ཤེ་ན། དེའི་ཕྱིར་ཆོས་
གང་དག་ཅེས་བྱ་བ་རྒྱས་པར་སྨོས་སོ། །འདུལ་བ་རྣམས་སྐྱོ་བར་བྱ་བའི་ཕྱིར་སྐྱེ་བ་དང་རྒ་བ་དང་མི་རྟག་པ་ཉིད་དེ་དག་ཁོ་ན་ཆོས་རྣམས་ཀྱི་མཚན་ཉིད་དུ་གསུངས་ཏེ་མདོ་ལས་བསྟན་པ་ནི་དགོངས་པ་ཅན་ཡིན་ལ་ཆོས་མངོན་པ་ལས་བསྟན་པ་ནི་མཚན་ཉིད་པ་ཡིན་ནོ། །རྒ་བ་དང་མི་རྟག་པ་ཉིད་
ཀྱིས་ནི་ད་ལྟར་བྱུང་བ་ནས་འདས་པར་ཏེ་ཞེས་བྱ་བ་ནི་སྦེད་དོ་ཞེས་བྱ་བར་སྐབས་དང་སྦྱར་ཏེ། རྒ་བ་དང་མི་རྟག་པ་ཉིད་དག་གིས་ན་ད་ལྟར་བྱུང་བའི་དུས་ནས་འདས་པར་སྦེད་དོ། །ཅིའི་ཕྱིར་ཞེ་ན་ཉམ་ཆུང་ངུར་བྱས་ཏེ་འཇོམས་པར་བྱེད་པའི་ཕྱིར་ཏེ། དགའ་བས་ནི་ཉམ་ཆུང་ངུ་བྱེད་ལ་མི་རྟག་པ་
ཉིད་ཀྱིས་ནི་འཇོམས་པའི་ཕྱིར་རོ། །མི་རྟག་པ་ཉིད་ཁོ་ནས་ཆོས་ད་ལྟར་བྱུང་བའི་དུས་ནས་འདས་པའི་དུས་སུ་སྦེད་པར་བྱེད་ཀྱི་རྒ་བས་ནི་མ་ཡིན་ཏེ། རྒ་བས་ནི་ཆོས་ཉམ་ཆུང་ངུར་བྱེད་པ་འབའ་ཞིག་ཏུ་ཟད་པ་མ་ཡིན་ནམ། ཅིའི་ཕྱིར་འདི་སྐད་དུ་རྒ་བ་དང་མི་རྟག་པ་ཉིད་དག་གིས་ནི་ད་ལྟར་བྱུང་བ་
ནས་འདས་པར་སྦེད་པར་བྱེད་དོ་ཞེས་བཤད་ཅེ་ན། དེའི་ཕྱིར་སྨྲས་པ། ཉམ་ཆུང་ངུར་བྱེད་པ་ཡང་དེ་དུས་སུ་སྦེད་པར་བྱེད་པ་ཁོ་ནར་འགྱུར་ཏེ། ཉམ་ཆུང་ངུར་མ་བྱས་པ་ལ་དུས་སུ་འཕོ་བ་མེད་པས་དགའ་བ་ཡང་དེ་དུས་སུ་སྦེད་པར་རྣམ་པར་གཞག་གོ། །འདུས་མ་བྱས་ཀྱང་རང་གི་མཚན་
ཉིད་ལ་གནས་པ་ཡོད་པའི་ཕྱིར་ཞེས་བྱ་བ་ནི་རང་གི་མཚན་ཉིད་ལ་གནས་པའི་གནས་པ་ཡོད་དོ། །གནས་པ་ཡོད་པ་དེའི་ཕྱིར་གནས་པ་ནི་འདུས་བྱས་ཀྱི་མཚན་ཉིད་དུ་རྣམ་པར་མ་བཞག་སྟེ། གནས་པ་ནི་འདུས་མ་བྱས་ཀྱི་གནས་སྐབས་ཀྱི་ཁྱད་པར་གྱི་མཚན་ཉིད་ཀྱི་གནས་པ་དང་

འདྲ་བས་ཆོས་ཀྱི་རྗེ་བཅོམ་ལྡན་འདས་ཀྱི་དགོངས་པ་ནི་འདུས་མ་བྱས་དེ་འདུས་བྱས་ཉིད་དུ་ཐལ་བར་འགྱུར་བ་སྤང་བར་བཞེད་ནས་མཚན་ཉིད་དུ་མ་བཤད་དོ་སྙམ་པ་ཡིན་ནོ། །གཞན་དག་རྟོག་པར་བྱེད་པ་ནི་ཞེས་བྱ་བ་ནི་མདོ་ལས་ཀྱང་གནས་པ་བཤད་དོ་ཞེས་བྱ་བར་བརྗོད་པ་ཡིན་
ཏེ། མདོ་ལས། རྒ་བ་དང་གནས་པ་བསྡུས་ཏེ་གནས་པ་དང་གཞན་དུ་འགྱུར་བ་ནི་གནས་པ་གཞན་དུ་འགྱུར་བ་ཉིད་དོ་ཞེས་བསྡུས་ཏེ་བཤད་ཀྱི་བྱེ་བྲག་ཏུ་ནི་མ་ཡིན་ནོ། །ཅིའི་ཕྱིར་ཞེ་ན། གསུམ་པོ་འདི་དག་ནི་འདུས་བྱས་ཀྱི་མཚན་ཉིད་ཡིན་ནོ་ཞེས་འབྱུང་བ་འགལ་བར་ཐལ་བར་
འགྱུར་བའི་ཕྱིར་རོ། །འདི་དག་ནི་ནང་ན་འདི་ནི་ཆགས་པའི་གཞི་ཡིན་ཞེས་བྱ་བ་རྒྱས་པར་འབྱུང་བ་ལ། འདི་དག་ནི་ནང་ན་ཞེས་བྱ་བ་ནི་སྐྱེ་བ་ལ་སོགས་པའི་ནང་ནའོ། །འདི་ཞེས་བྱ་བ་ནི་གནས་པའོ། །ཆགས་པའི་གཞི་ནི་ཆགས་པའི་གནས་ཏེ་འདིས་ཆོས་གནས་པར་འགྱུར་
རོ་སྙམ་པ་ཡིན་ནོ། །དེའི་ཕྱིར་བཅོམ་ལྡན་འདས་ཀྱིས་གནས་པ་དེ་ལ་མ་ཆགས་པར་བྱ་བའི་དོན་དུ་གནས་པ་དཔལ་དང་འདྲ་བ་འདི་བཀྲ་མི་ཤིས་པ་རྣ་ནག་མ་དང་ལྷན་ཅིག་ཏུ་བསྟན་ཏེ། ཁ་ཅིག་ནི་འདི་སྐད་དུ་འདི་ལ་ཆགས་པར་མི་བྱ་སྟེ། འདི་ལྟར་འདི་ནི་བཀྲ་ཤིས་མ་དང་བཀྲ་མི་ཤིས་
མ་བཞིན་དུ་མི་རྟག་པ་ཉིད་དང་རྗེས་སུ་འབྲེལ་པ་ཡིན་ནོ་ཞེས་བྱ་བར་འཆད་དོ། །གཞན་དག་ནི་འདི་ལ་ཆགས་པར་མི་བྱ་སྟེ། འདི་ལྟར་འདི་བཀྲ་ཤིས་མ་དང་བཀྲ་མི་ཤིས་མ་བཞིན་དུ་རྒ་བ་དང་རྗེས་སུ་འབྲེལ་བ་ཡིན་ཏེ། གཞན་དུ་འགྱུར་བའི་མཚན་ཉིད་ཀྱི་རྒ་བ་དང་གཅིག་ཏུ་བྱ་བ་
ཡིན་གྱི་མི་རྟག་པ་ཉིད་དང་ནི་མ་ཡིན་ནོ་ཞེས་ཟེར་རོ། །དེའི་ཕྱིར་འདུས་བྱས་ཀྱི་མཚན་ཉིད་ནི་བཞི་ཁོ་ནའོ་ཞེས་བྱ་བ་ནི་ཕྱོགས་གཉི་གའི་མཇུག་སྡུད་པ་ཡིན་ནོ། །སྐྱེ་བ་ལ་སོགས་པ་གཞན་ཡང་ཡོད་པར་འགྱུར་རོ་ཞེས་བྱ་བ་ནི་སྐྱེ་བའི་མཐུས་འདུས་བྱས་ཀྱི་ཆོས་འགའ་ཞིག་སྐྱེ་བར་
འགྱུར་ན་སྐྱེ་བ་ཡང་འདུས་བྱས་ཡིན་པས། དེ་ལྟ་བས་ན་དེ་ལ་ཡང་སྐྱེ་བ་གཞན་ཡོད་པར་འགྱུར་ཏེ། བདག་ཉིད་ལ་བྱེད་པ་འགལ་བའི་ཕྱིར་དང་གྲུབ་པའི་མཐའ་ལས། ཐམས་ཅད་འདུས་བྱས་མཚན་ཉིད་དང་ཞེས་འབྱུང་བའི་ཕྱིར་རོ། །དེ་བཞིན་དུ་རྒ་བ་ལ་སོགས་པ་ལ་

ཡང་སྦྱར་བར་བྱའོ། །དེ་དག་ནི་སྐྱེ་བའི་སྐྱེ་ལ་སོགས་ཞེས་བྱ་བ་ནི་དེ་དག་སྐྱེ་བའི་སྐྱེ་ལ་སོགས་པ་ཡང་ཞེས་བྱ་བར་འདིར་ཡང་ཞེས་བྱ་བའི་སྒྲ་མི་མངོན་པར་བསྟན་པར་བལྟ་བར་བྱའོ། །རེ་རེ་ལ་ཡང་མཚན་ཉིད་བཞི་པ་ཞེས་བྱ་བ་རྒྱས་པར་འབྱུང་བ་ནི་མཚན་
ཉིད་རེ་རེ་ལ་མཚན་ཉིད་བཞི་པ་སྟེ། མཚན་ཉིད་བཞི་པོ་ཚན་གཅིག་ཏུ་བྱས་པའི་མཚན་ཉིད་བཞི་པར་འགྱུར་རོ། །མཐའ་ཐུག་པ་མེད་པའི་སྐྱོན་དུ་ཡང་ཞེས་བྱ་བ་ནི་མུ་ཐུག་པ་མེད་པའི་སྐྱོན་དུ་ཡང་སྟེ་སྐྱེ་བ་ལ་ཡང་མི་རྟག་པ་ཉིད་ཀྱི་བར་ཡོད་པ་དང་མི་རྟག་པ་ཉིད་ཀྱི་བར་ལ་
ཡང་ཡོད་པར་ཐལ་བར་འགྱུར་བའི་ཕྱིར་དང་མཐུན་པའི་མཚན་ཉིད་དེ་དག་ལ་ཡང་སྐྱེ་བ་གཞན་ལ་སོགས་པ་ཡོད་པར་ཐལ་བར་འགྱུར་བའི་ཕྱིར་རོ། །དེ་ཆོས་བརྒྱད་དང་གཅིག་ལ་འཇུག་ཅེས་བྱ་བ་ནི་སྐྱེ་བ་ལ་སོགས་པ་དང་སྐྱེ་བའི་སྐྱེ་བ་ལ་སོགས་པའི་ངོ་བོ་ཉིད་ཀྱི་ཆོས་དེ་དག་ནི་རིམ་
བཞིན་དུ་ཆོས་བརྒྱད་དང་གཅིག་ལ་འཇུག་སྟེ་སྐྱེ་བ་ལ་སོགས་པ་ནི་ཆོས་བརྒྱད་ལ་འཇུག་གོ། །སྐྱེ་བའི་སྐྱེ་བ་ལ་སོགས་པ་ནི་ཆོས་གཅིག་ལའོ། །བདག་ཉིད་རྟོགས་པར་དགུ་ཞེས་བྱ་བ་ནི་མཚན་ཉིད་དང་མཐུན་པའི་མཚན་ཉིད་དག་ལ་ལྟོས་ནས་དེ་སྐད་བཤད་ཀྱི། དེ་ལ་
ཅི་རིགས་པར་ཐོབ་པ་ལ་སོགས་པ་དང་འབྱུང་བ་དག་དང་འབྱུང་བ་ལས་གྱུར་པ་དག་མི་འབྱུང་བ་ནི་མ་ཡིན་ཏེ། འདོད་ན་དབང་པོ་མེད་པ་དང་། །སྒྲ་མེད་ཕྲ་རབ་རྡུལ་རྫས་བརྒྱད། །ཅེས་བྱ་བ་དང་། །ཐམས་ཅད་འདུས་བྱས་མཚན་ཉིད་དང་མཚན་ཉིད་ཐོབ་པའམ་ཞེས་བྱ་བ་ལ་
སོགས་པ་འབྱུང་བའི་ཕྱིར་རོ། །སྐྱེ་བས་ནི་བདག་ཉིད་མ་གཏོགས་པར་ཞེས་བྱ་བ་རྒྱས་པར་འབྱུང་བ་ནི་རང་གི་བདག་ཉིད་ལ་བྱེད་པ་འགལ་བས་དེའི་ཕྱིར་བདག་ཉིད་མ་གཏོགས་པར་ཆོས་བརྒྱད་སྐྱེད་པར་བྱེད་དོ། །བརྒྱད་གང་ཞེ་ན་གཟུགས་སམ་སེམས་ཀྱི་ཆོས་དེ་དང་གནས་པ་
དང་། རྒ་བ་དང་། མི་རྟག་པ་ཉིད་དང་སྐྱེ་བའི་སྐྱེ་བ་དང་། གནས་པའི་གནས་པ་དང་། རྒ་བའི་རྒ་བ་དང་། མི་རྟག་པ་ཉིད་ཀྱིས་མི་རྟག་པ་ཉིད་སྐྱེད་པར་བྱེད་དོ། །སྐྱེ་བའི་སྐྱེ་བས་ནི་དེ་ཁོ་ན་སྐྱེད་པར་བྱེད་དོ། །དེ་བཞིན་དུ་རྒ་བ་དང་མི་རྟག་པ་ཉིད་དག་ལ་ཡང་སྦྱར་བར་བྱའོ་ཞེས་

བྱ་བ་ནི་རྒ་བས་ནི་བདག་ཉིད་མ་གཏོགས་པ་ཆོས་བརྒྱད་སྐྱེད་པར་བྱེད་དོ། །རྒ་བའི་རྒ་བས་ནི་རྒ་བ་དེ་ཁོ་ན་སྐྱེད་པར་བྱེད་དོ། །མི་རྟག་པ་ཉིད་ཀྱིས་ནི་བདག་ཉིད་མ་གཏོགས་པ་ཆོས་བརྒྱད་སྐྱེད་པར་བྱེད་དོ། །མི་རྟག་པ་ཉིད་ཀྱིས་ནི་མི་རྟག་པ་ཉིད་དེ་ཁོ་ན་སྐྱེད་པར་བྱེད་
དོ། །འདི་ནི་ནམ་མཁའ་འདྲལ་བར་སྐྱེད་པ་ཡིན་ཏེ་ཞེས་བྱ་བ་ནི་རྣམ་པར་འདྲལ་བར་བྱེད་པའོ་སྙམ་དུ་བསམས་པ་ཡིན་ནོ། །ནམ་མཁའ་ནི་ཐོགས་པ་དང་བཅས་པའི་རྫས་མེད་པ་ཙམ་དུ་ཟད་ཀྱི། ནམ་མཁའ་ཞེས་བྱ་བ་ནི་ཅུང་ཟད་ཀྱང་མེད་དེ། དེ་ཇི་ལྟར་དྲལ་བར་མི་ནུས་
པའམ། ཇི་ལྟར་མི་རུང་བ་དེ་བཞིན་དུ་སྐྱེ་བ་ལ་སོགས་པ་ཡོད་པ་མ་ཡིན་པའི་ཆོས་འདི་དག་ཀྱང་རྣམ་པར་དབྱེ་བར་མི་ནུས་པའམ་མི་རུང་བ་ཡིན་ནོ། །དེའི་ཕྱིར་སྐྱེ་བ་ལ་སོགས་པ་འདི་དག་ནི་ཡོད་པ་མ་ཡིན་ནོ་ཞེས་བྱ་བ་རྒྱས་པར་སྨོས་ཏེ། འདི་དག་ནི་ཇི་ལྟར་རྣམ་པར་
འབྱེད་པ་ལྟར་ཏེ་སྐྱེ་བས་ནི་བདག་ཉིད་མ་གཏོགས་པ་ཆོས་བརྒྱད་སྐྱེད་པར་བྱེད་དོ་ཞེས་བྱ་བ་དེ་ལྟ་བུ་རྒྱས་པར་རྣམ་པར་འབྱེད་པར་བྱེད་པ་ལྟར་རྫས་སུ་ཡོད་ཅིང་རང་གི་མཚན་ཉིད་དུ་ཡོད་པ་མ་ཡིན་ནོ། །ཇི་ལྟར་གཟུགས་ལ་སོགས་པའི་ཆོས་རྣམས་ཞེས་བྱ་བ་འདིར། སོགས་
པ་ཞེས་བྱ་བའི་སྒྲས་ནི་སྒྲ་ལ་སོགས་པ་དང་ཚོར་བ་ལ་སོགས་པ་དང་མིག་ལ་སོགས་པ་བསྡུའོ། །དེ་ལ་རེ་ཞིག་གཟུགས་དང་སྒྲ་ལ་སོགས་པ་ནི་མིག་གི་རྣམ་པར་ཤེས་པ་ལ་སོགས་པའི་མཚན་ཉིད་ཀྱི་མངོན་སུམ་གྱི་ཚད་མས་དམིགས་སོ། །ཚོར་བ་ལ་སོགས་པ་ཡང་རང་
རིག་པར་བྱ་བ་ཡིན་པའི་ཕྱིར་མངོན་སུམ་གྱིས་དམིགས་སོ། །མིག་ལ་སོགས་པ་ནི་དེ་དག་ཡོད་དམ་མེད་ན་དེ་དག་ཡོད་དམ་མེད་པའི་ཕྱིར་མིག་གི་རྣམ་པར་ཤེས་པ་ལ་སོགས་པའི་རྟེན་གཟུགས་དང་བ་ནི་མིག་ལ་སོགས་པ་ཡིན་ནོ་ཞེས་བྱ་བར་མིག་གི་རྣམ་པར་ཤེས་པ་ལ་
སོགས་པའི་རྗེས་སུ་དཔག་པས་རྗེས་སུ་དཔོག་པར་བྱེད་དོ། །ལུང་ཡང་མིག་གིས་གཟུགས་རྣམས་མཐོང་ནས་ཞེས་བྱ་བ་རྒྱས་པར་འབྱུང་བ་དང་། དེ་བཞིན་དུ་རྣ་བས་སྒྲ་རྣམས་ཐོས་ནས་ཞེས་བྱ་བ་རྒྱས་པར་འབྱུང་སྟེ། དྲི་ལ་སོགས་པ་ལ་ཡང་དེ་བཞིན་དུ་སྦྱར་བར་བྱའོ། །

དེ་བཞིན་དུ་གཟུགས་གང་ཡིན་པ་ཅི་ཡང་རུང་སྟེ་འདས་པའམ། མ་འོངས་པའམ་ད་ལྟར་བྱུང་བའམ་ཞེས་བྱ་བ་རྒྱས་པར་འབྱུང་སྟེ། ཚོར་བ་ལ་སོགས་པ་ལ་ཡང་དེ་བཞིན་དུ་སྦྱར་བར་བྱའོ། །གཞན་གྱི་རྒྱུད་ལ་ཡོད་པའི་ཚོར་བ་ལ་སོགས་པ་གཟུགས་
ཅན་མ་ཡིན་པ་རྣམས་ཡོད་པ་ཉིད་དུ་རྗེས་སུ་དཔག་པ་ནི་བདག་ཉིད་ཀྱི་བཞིན་དུ་ལུས་ཀྱི་གཡོ་བ་མཐོང་ནས་དེ་དག་རྟོགས་པའི་ཕྱིར་རོ། །ལུང་ཡང་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་དང་དེ་དང་ལྷན་ཅིག་སྐྱེ་བ་འདུ་ཤེས་དང་ཚོར་བ་དང་སེམས་
པ་དག་སྐྱེའོ་ཞེས་བྱ་བ་རྒྱས་པར་འབྱུང་ངོ་། །སྐྱེ་བ་ལ་སོགས་པ་ནི་གཟུགས་ལ་སོགས་པ་བཞིན་དུ་མངོན་སུམ་དུ་ཡང་མི་འགྱུར་ལ་འདི་དག་ཡོད་པ་ཉིད་དུ་ནུས་པའི་རྗེས་སུ་དཔག་པ་ཡང་མེད་དོ། །རྫས་སུ་ཡོད་པ་ཉིད་ཀྱི་ལུང་ཡང་མེད་དོ། །འོ་ན་གང་མདོ་ལས་
གསུངས་སོ་ཞེས་བྱ་བ་རྒྱས་པར་འབྱུང་བ་ནི་འདུས་བྱས་སྐྱེ་བར་ཡང་སྣང་ངོ་ཞེས་བྱ་བ་རྒྱས་པར་འབྱུང་བའི་ལུང་འདི་ཡོད་པ་མ་ཡིན་ནམ་ཞེས་བྱ་བ་ཡིན་ནོ། །བཅོམ་ལྡན་འདས་ཀྱིས་ནི་དོན་ལ་རྟོན་པར་གསུངས་སོ་ཞེས་བྱ་བ་ནི་དགེ་སློང་དག་རྟོན་པ་ནི་བཞི་པོ་འདི་དག་ཡིན་ནོ། །
བཞི་གང་ཞེ་ན། ཆོས་ལ་རྟོན་གྱི་གང་ཟག་ལ་མི་རྟོན་པ་དང་། དོན་ལ་རྟོན་གྱི་ཚིག་འབྲུ་ལ་མ་ཡིན་པ་དང་། ངེས་པའི་དོན་གྱི་མདོ་ལ་རྟོན་གྱི་དྲང་བའི་དོན་ལ་མ་ཡིན་པ་དང་། ཡེ་ཤེས་ལ་རྟོན་གྱི་རྣམ་པར་ཤེས་པ་ལ་མ་ཡིན་པའོ་ཞེས་བྱ་བ་དང་། དེ་བཞིན་དུ་དོན་ལ་རྟོན་
པ་ཡིན་གྱི་ཚིག་འབྲུ་ལ་ནི་མ་ཡིན་ནོ་ཞེས་བྱ་བ་འབྱུང་བ་ཡིན་ནོ། །འདིའི་དོན་གང་ཞེ་ན་ཞེས་བྱ་བ་ནི་འདུས་བྱས་ཀྱི་མཚན་ཉིད་ཀྱི་མདོ་ཉེ་བར་བཀོད་པ་འདིའོ། །དོན་དེ་བསྟན་པའི་ཕྱིར་མ་རིག་པས་ལྡོངས་པའི་བྱིས་པ་རྣམས་ཞེས་བྱ་བ་རྒྱས་པར་སྨོས་ཏེ། འདུ་བྱེད་ཀྱི་རྒྱུན་
ལ་བདག་དང་བདག་གིར་མོས་པ་ནི་དགའ་བར་གྱུར་པའོ། །མངོན་པར་ཞེན་པ་ནི་ཆགས་པར་བྱེད་ཅེས་བྱ་བའི་ཐ་ཚིག་གོ། །འདུས་བྱས་ཉིད་དང་རྟེན་ཅིང་འབྲེལ་པར་འབྱུང་བ་ཉིད་ཅེས་བྱ་བ་ནི་རྣམ་གྲངས་ཡིན་ཏེ་རྐྱེན་རྣམས་འདུས་ཤིང་ཕྲད་ནས་བྱས་པ་ནི་འདུས་བྱས་

སོ། །རྐྱེན་དེ་དང་ཕྲད་ནས་འབྱུང་བ་ནི་རྟེན་ཅིང་འབྲེལ་པར་འབྱུང་བའོ། །སྐད་ཅིག་མ་ལ་ནི་མ་ཡིན་ནོ་ཞེས་བྱ་བ་ནི་འདི་ནི་རྒྱུན་ཁོ་ན་ལ་འདུས་བྱས་ཉིད་བརྗོད་པར་བཞེད་ནས་གསུངས་པ་ཡིན་གྱི་སྐད་ཅིག་མ་ལ་ནི་མ་ཡིན་ཏེ་སྐད་ཅིག་མ་ནི་རྟོགས་པར་དཀའ་བའི་ཕྱིར་
སྐད་ཅིག་མ་ལ་སྐྱེ་བ་དང་འཇིག་པ་དང་གནས་པ་གཞན་དུ་འགྱུར་བ་ཉིད་ཀྱི་ཆོས་དག་མི་མངོན་ནོ། །ཇི་སྟེ་ཁྱོད་དེ་དག་མི་མངོན་ཡང་མཚན་ཉིད་ཡིན་པར་འོས་སོ་སྙམ་དུ་སེམས་ན། དེའི་ཕྱིར། མི་མངོན་པ་དེ་དག་ནི་མཚན་ཉིད་ཡིན་པར་འོས་པ་མ་ཡིན་ཏེ་ཞེས་བྱ་བ་སྨོས་
སོ། །མངོན་པ་ཁོ་ན་མཚན་ཉིད་ཡིན་ཏེ། དཔེར་ན་ཆུའི་ཆུ་སྐྱར་ལྟ་བུའོ། །དེ་ཉིད་ཀྱི་ཕྱིར་མདོ་དེ་ལས་ཞེས་བྱ་བ་ནི་དེ་ཉིད་ཀྱི་ཕྱིར་མདོ་ལས་མངོན་ནོ་ཞེས་བྱ་བ་སྨོས་པ་མཛད་ཀྱི་དེ་ལྟ་མ་ཡིན་ན་འདུས་བྱས་སྐྱེ་བ་ཡང་འཇིག་པ་ཡང་གནས་པ་གཞན་དུ་འགྱུར་བ་ཉིད་ཀྱང་ཞེས་བྱ་བ་
ཁོ་ན་ཞིག་བཀའ་སྩལ་པར་འགྱུར་རོ། །འདུས་བྱས་ཀྱི་མཚན་ཉིད་དག་ཅེས་བྱ་བ་ནི་འདུས་བྱས་ཞེས་བྱ་བའི་མཚན་ཉིད་དག་ཡིན་ནོ་ཞེས་བྱ་བའི་དོན་དུ་ཡོངས་སུ་གཟུང་བའི་ཕྱིར་ཡང་འདུས་བྱས་ཞེས་བྱ་བ་སྨོས་སོ། །ཆུ་དང་ཆུ་སྐྱར་ལྟར་ཞེས་བྱ་བ་འདི་ནི་ཆོས་མི་མཐུན་པའི་
དཔེ་ཡིན་ཏེ་ཇི་ལྟར་ཆུ་སྐྱར་ཆུ་ཡོད་པ་ཉིད་ཀྱི་མཚན་ཉིད་ཡིན་གྱི། ཆུའི་ཆུ་ཉིད་ཀྱི་མཚན་ཉིད་ནི་མ་ཡིན་པ་དེ་ལྟར་ཤེས་ན་མི་རུང་ངོ་། །ཅི་ཞེ་ན། འདུས་བྱས་ཀྱི་དངོས་པོ་ཡོད་པ་ཉིད་དག་ཡིན་ནོ་ཞེས་བྱ་བར་རོ། །དགེ་བ་དང་མི་དགེ་བ་ཉིད་ཀྱི་བུ་མོའི་མཚན་བཞིན་ཞེས་བྱ་བ་ནི་ཇི་
ལྟར་བུ་མོའི་མཚན་བཟང་བ་དང་མི་བཟང་བ་དག་གོ་རིམས་བཞིན་དུ་དགེ་བ་དང་མི་དགེ་བ་ཉིད་ཀྱི་མཚན་ཉིད་དག་ཡིན་པ་ལྟ་བུར་ཏེ། གལ་ཏེ་འདི་དག་ཀྱང་དེ་དང་འདྲ་བར་འདུས་བྱས་ཀྱི་དངོས་པོ་ཡོད་པ་ཉིད་དམ། དགེ་བ་ཉིད་དང་མི་དགེ་བ་ཉིད་ཀྱི་མཚན་ཉིད་ཡིན་
པར་བཞེད་པར་གྱུར་ན་ནི་གསུམ་པོ་འདི་དག་ནི་འདུས་བྱས་ཀྱི་མཚན་ཉིད་ཡིན་ནོ་ཞེས་བཀའ་སྩལ་པར་འགྱུར་གྱི། འདུས་བྱས་ཀྱི་མཚན་ཉིད་ཡིན་ནོ་ཞེས་བྱ་བར་ནི་བཀའ་སྩལ་པར་མི་འགྱུར་བ་ཞིག་ན་ཡང་བཀའ་སྩལ་ཡང་སྩལ་ཏོ། །དེས་ན་འདུས་བྱས་ཉིད་མཚན་ཉིད་དག་

ཡིན་ནོ་ཞེས་བྱ་བར་ཤེས་སོ། །ཡང་ཇི་ལྟར་ན་སྐྱེ་བ་ལ་སོགས་པ་ཡོད་པ་མ་ཡིན་པ་རྒྱུན་དག་ལ་རྣམ་པར་བཞག་པའམ་མངོན་པ་ཡིན་ཞེ་ན། སྐྱེ་བ་ལ་སོགས་པ་མེད་ཅེས་ནི་མི་སྨྲའི། ཇི་ལྟར་རྫས་ཀྱི་ངོ་བོར་རྣམ་པར་ཕྱེ་བ་དེ་ལྟར་ནི་ཡོད་པ་མ་ཡིན་ནོ་ཞེས་
སྨྲའོ། །འོ་ན་ཁྱེད་ཀྱི་ལྟར་ནི་ཇི་ལྟར་ཡོད་པ་དེ་བཞིན་དུ་སྨྲོས་ཤིག་ཅེ་ན། དེའི་ཕྱིར་རྒྱུན་གྱི་དང་པོ་ནི་སྐྱེ་བ་ཡིན་ནོ་ཞེས་བྱ་བ་རྒྱས་པར་སྨོས་ཏེ། ལྡོག་པ་ནི་འཇིག་པ་ཡིན་ནོ་ཞེས་བྱ་བ་ནི་རྒྱུན་ཞིག་པ་ནི་འཇིག་པ་ཡིན་པའོ། །རྒྱུན་དེ་ཉིད་རྗེས་སུ་འཇུག་པ་ཞེས་བྱ་བ་སྐད་ཅིག་
མ་འདྲ་བ་རྗེས་སུ་འཇུག་པའི་ཕྱིར་རྒྱུན་རྗེས་སུ་འཇུག་པ་ནི་གནས་པ་ཞེས་བྱའོ། །དེའི་སྔ་ཕྱིའི་བྱེ་བྲག་ཅེས་བྱ་བ་ནི་སྔ་མ་ལས་སྐད་ཅིག་མ་ཕྱི་མ་བྱེ་བྲག་ཡོད་པའམ་སྐད་ཅིག་སྔ་མ་དང་ཕྱི་མ་དག་གི་བྱེ་བྲག་ནི་སྔ་ཕྱིའི་བྱེ་བྲག་གོ། །དེ་ལྟ་ཡིན་པས་ན་ཞེས་བྱ་བ་ནི་སྐྱེ་བ་ལ་སོགས་པ་
རྒྱུན་གྱི་ངོ་བོ་ཁོ་ན་ཡིན་པས་ན་ཚེ་དང་ལྡན་པ་མཛེས་དགའི་དྲན་པ་ཉེ་བར་གནས་པ་ལས་བརྩམས་ཏེ་གསུངས་པ་ཡིན་ཏེ། དེའི་ཚོར་བ་རྒྱུན་དང་ལྡན་པ་རིག་བཞིན་དུ་སྐྱེ་ཞིང་རིག་བཞིན་དུ་གནས་པ་དང་རིག་བཞིན་དུ་ཡོངས་སུ་ཟད་པ་དང་ཡོངས་སུ་གཏུགས་པར་འགྱུར་རོ། །རྟོགས་
པར་དཀའ་བའི་ཕྱིར་སྐད་ཅིག་མ་དང་ལྡན་པ་ནི་མ་ཡིན་ཏེ། སྐད་ཅིག་མ་ནི་རིག་ཀྱང་གནས་པ་མི་སྲིད་པའི་ཕྱིར་རོ། །དོན་འདི་ཉིད་ཚིགས་སུ་བཅད་པ་གཉིས་ཀྱིས་བསྡུ་བའི་ཕྱིར། རྒྱུན་གྱི་དང་པོ་སྐྱེ་བ་ཡིན། །ཞེས་བྱ་བ་ལ་སོགས་པ་ཐམས་ཅད་སྨོས་སོ། །གནས་པ་དེ་ཞེས་བྱ་བ་
ནི་རྒྱུན་དེ་ཉིད་གནས་པ་ཡིན་ནོ། །དེ་ཉིད་ཅེས་བྱ་བ་ནི་རྒྱུན་དེ་ཉིད་ཀྱིའོ། །དེ་ཆད་ཅེས་བྱ་བ་ནི་རྒྱུན་ཆད་པའོ། །སྐད་ཅིག་མའི་ཆོས་ལ་ནི་ཞེས་བྱ་བ་ནི་ཚིགས་སུ་བཅད་པ་ཡིན་ཏེ། གལ་ཏེ་སྐད་ཅིག་མའི་ཆོས་ནི་གནས་པ་ཞིག་མེད་ན་འཇིག་པར་འགྱུར་བས་གནས་པ་ཡོད་དོ་ཞེས་བྱ་བར་
སེམས་ན་ཆོས་དེ་ཡང་གནས་པ་ཡོད་བཞིན་དུ་ཡང་འཇིག་པར་འགྱུར་བ་ཁོ་ན་སྟེ། སྐད་ཅིག་མ་ཡིན་པའི་ཕྱིར་དང་། འཇིག་པ་ལ་རྒྱུ་མེད་པའི་ཕྱིར་འཇིག་པར་འགྱུར་བ་ཁོ་ནའོ། །དེ་ལྟ་བས་ན་དེར་རྟོག་པ་དོན་མེད་དེ། གནས་པར་རྟོག་པ་དགོས་པ་མེད་དོ་ཞེས་བྱ་བའི་ཐ་ཚིག་གོ། །སྐད་ཅིག་

གཉིས་པ་ལ་སོགས་པའི་གནས་པ་ལ་གནས་པར་རྟོག་པ་ནི་དོན་མེད་པ་མ་ཡིན་ནོ། །དེའི་ཕྱིར་གནས་པ་ནི་རྒྱུན་ཁོ་ན་ཡིན་ནོ་ཞེས་བྱ་བ་ནི་གང་གི་ཕྱིར་ཆོས་སྐད་ཅིག་མ་ལ་གནས་པར་རྟོག་པའི་དོན་མེད་པས་སོ། །དེ་ལྟར་བཤད་ན་འདི་ཡང་ཞེས་བྱ་བ་ནི་གནས་པ་ནི་རྒྱུན་ཁོ་ན་ཡིན་པར་
བཤད་ན་ཞེས་བྱ་བའི་ཐ་ཚིག་གོ། །སྐྱེས་པ་སྐད་ཅིག་མ་ལ་ནི་མི་འཇིག་པ་མེད་པའི་ཕྱིར་རོ་ཞེས་བྱ་བ་འདི་ལ་ཁ་ཅིག་འདི་སྙམ་དུ་གནས་པ་ཡོད་པའི་ཕྱིར་ཆོས་སྐྱེས་པ་སྐད་ཅིག་མ་གཅིག་ཅིག་མི་འཇིག་པ་ཡིན་ནོ། །གལ་ཏེ་གནས་པ་མེད་ན་ནི་སྐད་ཅིག་མ་གཅིག་པོ་དེ་ཡང་ཡོད་
པར་མི་འགྱུར་རོ་སྙམ་དུ་སེམས་ན་མ་ཡིན་ཏེ། དེ་ཡོད་པ་ཉིད་ནི་འདི་ཡོད་ན་འདི་འབྱུང་ཞེས་འབྱུང་བའི་ཕྱིར་རྒྱུ་དང་རྐྱེན་སྔོན་དུ་འགྲོ་བ་ཅན་ཡིན་པའི་ཕྱིར་རོ། །གལ་ཏེ་གནས་པས་ཉེ་བར་འཛིན་ཏོ་སྙམ་སྟེ། ཇི་སྟེ་རྒྱུ་དང་རྐྱེན་དག་ལས་སྐྱེ་བའི་ཆོས་གནས་པས་ཉེ་བར་འཛིན་ཏོ་ཞེས་
བྱ་བར་འདོད་ན། གལ་ཏེ་གནས་པས་ཉེ་བར་མ་བཟུང་ན་ཅི་ཞིག་ཏུ་འགྱུར། བདག་ཉིད་ཡོད་པར་མི་འགྱུར་རོ། །འོ་ན་ནི་གནས་པས་སྐྱེད་པར་བྱེད་པ་ཡིན་པར་འགྱུར་གྱི་གནས་པར་བྱེད་པ་ནི་མ་ཡིན་ནོ། །གལ་ཏེ་གནས་པས་རྒྱུན་ཡོད་པ་གནས་པར་བྱེད་དོ། །ཞེ་ན། རྒྱུ་དང་
རྐྱེན་དག་ལ་གནས་པ་ཞེས་བྱ་བར་ཐལ་བར་འགྱུར་ཏེ། རྒྱུ་དང་རྐྱེན་རྣམས་ནི་རྒྱུན་གྱི་རྒྱུ་ཡིན་པའི་ཕྱིར་རོ། །རིས་མཐུན་པའི་སེམས་ལ་རུང་བར་འགྱུར་རོ་ཞེས་བྱ་བ་ནི་རིས་མཐུན་པ་གཅིག་ལ་སེམས་དུ་མ་ཡང་རིས་མཐུན་པ་གཅིག་ལས་བྱུང་བའི་ཕྱིར་གཅིག་ཅེས་བྱའོ་སྙམ་དུ་
བསམས་པ་ཡིན་ཏེ། སེམས་དེ་ལ་སེམས་གཅིག་ལ་ཞེས་བྱ་བར་བརྗོད་དུ་རུང་གི །དེ་ལྟ་མ་ཡིན་ན་སེམས་ཀྱི་སྐད་ཅིག་མ་གཅིག་ལ་ཇི་ལྟར་སྐྱེ་བ་དང་འཆི་བ་དང་གནས་པ་གཞན་དུ་འགྱུར་བ་ཉིད་དུ་འགྱུར། ཕྱི་མ་ཕྱི་མའི་སྐད་ཅིག་མ་རྗེས་སུ་འབྲེལ་པ་ནི་གནས་པའོ་ཞེས་བྱ་
བ་ནི་མཚུངས་པའི་ཕྱིར་སྐད་ཅིག་མ་ཕྱི་མ་ནི་སྐད་ཅིག་མ་སྔ་མ་དང་འདྲ་བ་ཡིན་ཏེ། དེའི་ཕྱིར་སྐད་ཅིག་མ་སྔ་མ་དེ་ད་དུང་གནས་པ་དང་འདྲ་བས་ན་སྐད་ཅིག་མ་ཕྱི་མ་ལ་གནས་པ་ཞེས་བྱའོ། །འོ་ན་གང་གི་ཚེ་འདྲ་བར་ཡང་སྐྱེའོ་ཞེས་བྱ་བ་ནི་འོ་ན་གང་གི་ཚེ་འདྲ་བར་སྐྱེ་བ་དེའི་ཚེ་ནི་མི་

འདྲ་བ་ཉིད་མེད་དོ། །གནས་པ་གཞན་དུ་འགྱུར་བ་ཉིད་ནི་མི་འདྲ་བ་ཉིད་ཡིན་པར་བཤད་དེ། དེ་བས་ན་འདྲ་བར་སྐྱེ་བ་ལ་གནས་པ་གཞན་དུ་འགྱུར་བ་ཉིད་མེད་པས་མཚན་ཉིད་མ་ཁྱབ་པ་ཅན་དུ་འགྱུར་རོ་སྙམ་དུ་བསམས་པ་ཡིན་ནོ། །འཕངས་པ་དང་མ་འཕངས་
པ་དང་སྟོབས་ཆེན་པོ་དང་སྟོབས་ཆུང་ངུས་འཕངས་པ་ཞེས་བྱ་བ་རྒྱས་པར་འབྱུང་བ་ནི་དེ་ནི་འཕངས་པ་དང་མ་འཕངས་པ་ཡིན་པས་འཕངས་པ་དང་མ་འཕངས་པའོ། །སྟོབས་ཆེན་པོ་དང་སྟོབས་ཆུང་ངུ་དག་གིས་འཕངས་པ་ནི་སྟོབས་ཆེན་པོ་དང་སྟོབས་ཆུང་ངུས་འཕངས་པའོ། །
དེ་ནི་འཕངས་པ་དང་མ་འཕངས་པ་ཡང་ཡིན་ལ་སྟོབས་ཆེན་པོ་དང་སྟོབས་ཆུང་ངུས་འཕངས་པ་ཡང་ཡིན་པས་འཕངས་པ་དང་མ་འཕངས་པ་དང་སྟོབས་ཆེན་པོ་དང་སྟོབས་ཆུང་ངུས་འཕངས་པའོ། །དེ་ཅི་ཞེ་ན། རྡོ་རྗེ་ལ་སོགས་པ་སྟེ། སོགས་པ་སྨོས་པས་ནི་ལྕགས་དང་རྡོ་ལ་
སོགས་པ་བསྡུའོ། །གཞན་དག་ནི་འདི་ལྟར་ཚིག་རྣམ་པར་སྦྱོར་བར་བྱེད་དེ། འཕངས་པ་དང་མ་འཕངས་པ་ནི་འཕངས་པ་དང་མ་འཕངས་པ་དག་ཡིན་ནོ། །སྟོབས་ཆེན་པོ་དང་སྟོབས་ཆུང་ངུ་དག་གིས་འཕངས་པ་དག་ནི་སྟོབས་ཆེན་པོ་དང་སྟོབས་ཆུང་ངུས་འཕངས་པ་དག་སྟེ།
རྣམ་པ་འདི་གཉིས་ནི་འཕངས་པའི་བྱེ་བྲག་ཡིན་ནོ། །འདི་ལ་རྡོ་རྗེ་ལ་སོགས་པ་འཕངས་པ་དང་མ་འཕངས་པ་དང་སྟོབས་ཆེན་པོ་དང་སྟོབས་ཆུང་ངུས་འཕངས་པ་དག་ཡོད་པས་ན་རྡོ་རྗེ་ལ་སོགས་པ་འཕངས་པ་དང་མ་འཕངས་པ་དང་སྟོབས་ཆེན་པོ་དང་སྟོབས་ཆུང་ངུས་འཕངས་
པའོ། །ཚིག་རྣམ་པར་སྦྱར་བ་འདི་ལ་རྡོ་རྗེ་ལ་སོགས་པ་ཁྱད་པར་ཡིན་ལ་འཕངས་པ་དང་མ་འཕངས་པ་དང་སྟོབས་ཆེན་པོ་དང་སྟོབས་ཆུང་ངུས་འཕངས་པ་ནི་ཁྱད་པར་གྱི་གཞི་ཡིན་ནོ། །དེ་ལྟ་བུའི་རྡོ་རྗེ་ལ་སོགས་པ་དེ་ཅི་རིགས་པར་བུལ་བ་དང་མྱུར་བ་དང་ཆེས་བུལ་བ་དང་
ཆེས་མྱུར་བར་ལྟུང་བ་སྟེ་འཕངས་པ་ནི་བུལ་བར་ལྟུང་ངོ་། །མ་འཕངས་པ་ནི་ཆེས་བུལ་བར་ལྟུང་ངོ་། །སྟོབས་ཆུང་ངུས་འཕངས་པ་ནི་མྱུར་བར་ལྟུང་ངོ་། །སྟོབས་ཆེན་པོས་འཕངས་པ་ནི་ཆེས་མྱུར་བར་ལྟུང་ངོ་། །དེའི་དུས་ཏེ་དེའི་བྱེ་བྲག་གོ། །བུལ་བ་དང་མྱུར་བ་དང་

ཆེས་བུལ་བ་དང་མྱུར་བར་ལྟུང་བའི་དུས་ཀྱི་བྱེ་བྲག་ལས་དེའི་འབྱུང་བ་རྣམས་ཀྱི་སྟེ་རྡོ་རྗེ་ལ་སོགས་པའི་འབྱུང་བ་རྣམས་ཀྱི་ཡོངས་སུ་གྱུར་པའི་བྱེ་བྲག་སྟེ་འཕངས་པའི་ཡོངས་སུ་གྱུར་པ་ཡང་གང་གིས་ན་བུལ་བར་ལྟུང་བ་སྟེ། གཞན་དུ་ཡིན་ལ་དེ་བཞིན་དུ་སྟོབས་ཆེན་པོས་འཕངས་
པའི་ཡོངས་སུ་གྱུར་པ་ཡང་གང་གིས་ན་ཆེས་མྱུར་བར་ལྟུང་བའི་བར་དུ་གཞན་དུ་ཡིན་ནོ། །ཡོངས་སུ་གྱུར་པའི་བྱེ་བྲག་དེ་འགྲུབ་སྟེ་ཡོངས་སུ་གྱུར་པའི་བྱེ་བྲག་འགྲུབ་པ་དེའི་ཕྱིར་དེ་དག་ཁྱད་པར་མེད་པ་མ་ཡིན་ནོ་ཞེས་བྱ་བར་སྐབས་དང་སྦྱར་རོ། །འོ་ན་ནི་སྒྲ་དང་མེ་ལྕེའི་སྐད་
ཅིག་མ་ཐ་མ་ཞེས་བྱ་བར་རྒྱས་པར་འབྱུང་བ་ནི་སྒྲ་དང་མར་མེ་ལ་སོགས་པའི་རྒྱུན་འཇིག་པའི་དུས་ཀྱི་སྐད་ཅིག་མ་ཐ་མ་གང་ཡིན་པ་དང་དགྲ་བཅོམ་པ་ཕུང་པོ་ལྷག་མ་མེད་པའི་མྱ་ངན་ལས་འདའ་བའི་ཚེ་སྐྱེ་མཆེད་ལ་སྐད་ཅིག་མ་ཕྱི་མ་མེད་པའི་ཕྱིར་གནས་པ་མེད་དོ། །གནས་
པ་མེད་པའི་ཕྱིར་གནས་པ་གཞན་དུ་འགྱུར་བ་ཉིད་མེད་པས་དེའི་མི་འདྲ་བ་ཉིད་ནི་གནས་པ་གཞན་དུ་འགྱུར་བ་ཉིད་དོ་ཞེས་བཤད་པ་གང་ཡིན་པའི་མཚན་ཉིད་རྣམ་པར་བཞག་པ་མ་ཁྱབ་པ་ཅན་དུ་འགྱུར་རོ་ཞེ་ན། གང་ལ་གནས་པ་ཡོད་པ་དེ་ལ་ནི་གདོན་མི་ཟ་བར་གཞན་དུ་འགྱུར་
བ་ཉིད་ཀྱང་ཡོད་ལ་གང་ལ་གནས་པ་མེད་པ་དེ་ལ་ནི་གཞན་དུ་འགྱུར་བ་ཉིད་ཀྱང་མེད་དོ་ཞེས་བཤད་པ་ཡིན་ཏེ། མདོ་ལས་ནི་སྲིད་པའི་ཕྱིར་འདི་སྐད་དུ་གསུམ་པོ་འདི་དག་ནི་འདུས་བྱས་ཀྱི་མཚན་ཉིད་དོ་ཞེས་བཤད་པར་ཟད་དོ། །དེ་ལྟ་བས་ན་སྒྲ་དང་མེ་ལྕེའི་སྐད་ཅིག་མ་ཐ་མ་ལ་
སོགས་པ་ལ་ནི་མཚན་ཉིད་སྐྱེ་བ་དང་འཇིག་པ་གཉིས་ཁོ་ནར་ཡོད་པར་འདོད་ལ། དེ་ལས་གཞན་པ་དག་ལ་ནི་གནས་པ་གཞན་དུ་འགྱུར་བ་ཉིད་ཀྱང་ཡོད་དོ། །གཞན་དག་ན་རེ་ནི་སྒྲ་དང་མེ་ལྕེའི་སྐད་ཅིག་མ་ཐ་མ་ལ་སོགས་པ་ལ་ཡང་རང་གནས་པ་གང་ཡིན་པའི་གནས་པ་
ཡོད་ལ། དེའི་གཞན་དུ་འགྱུར་བ་ཉིད་ནི་སྐད་ཅིག་མ་སྔ་མ་ལ་ལྟོས་པ་ཡིན་པས་དེ་དག་ལ་ཡང་མཚན་ཉིད་གསུམ་རྣམ་པར་གཞག་གོ་ཞེས་ཟེར་རོ། །དེ་ནི་ཇི་ལྟར་མཚན་ཉིད་ཀྱི་གཞིའི་ཆོས་དེ་ཉིད་ཀྱི་མཚན་ཉིད་དུ་ཞེས་བྱ་བ་ནི་མཚན་ཉིད་ཀྱི་གཞི་དང་མཚན་ཉིད་དག་ནི་ཆུ་

དང་ཆུ་སྐྱར་བཞིན་དུ་གཞན་ཉིད་ཡིན་པར་མཐོང་ནས་རྒོལ་བར་བྱེད་པ་ཡིན་ནོ། །མདོ་སྡེ་པ་རྣམས་ཀྱིས་དེ་འཁྲུལ་པར་བསྟན་པའི་ཕྱིར། རེ་ཞིག་ཇི་ལྟར་ན་སྐྱེས་བུ་ཆེན་པོའི་མཚན་རྣམས་ཞེས་བྱ་བ་ལ་སོགས་པ་སྨོས་ཏེ། སྐྱེས་བུ་ཆེན་པོའི་མཚན་
རྣམས་ནི་སྐྱེས་བུ་ཆེན་པོས་བསྡུས་པའི་ཕྱིར་ཏེ་དེ་ལས་གཞན་པ་མ་ཡིན་ནོ། །སྐྱེས་བུ་ཆེན་པོ་ནི་སྐྱེས་བུ་ཆེན་པོའི་མཚན་ཙམ་མ་ཡིན་གྱི། ཆོས་ཙམ་ནི་མ་བྱུང་བ་ལས་འབྱུང་ལ་བྱུང་ནས་ཀྱང་མེད་པར་འགྱུར་བས་འདི་ནི་དཔེར་མི་རུང་ངོ་ཞེས་སྨྲ་ན་འདི་ལ་བདག་སྨྲ་བར་བྱའོ། །
འདི་ནི་མཚུངས་པ་ཉིད་དེ། ཇི་ལྟར་སྐྱེས་བུ་ཆེན་པོའི་མཚན་རྣམས་ལ་སྐྱེས་བུ་ཆེན་པོ་ཞེས་ཀྱང་བྱ་སྐྱེས་བུ་ཆེན་པོའི་མཚན་ཞེས་ཀྱང་བྱ་བ་དེ་བཞིན་དུ་འདུས་བྱས་ཀྱི་ཆོས་ལ་ཡང་འདུས་བྱས་ཞེས་ཀྱང་བྱ་ལ་འདུས་བྱས་ཀྱི་མཚན་ཉིད་ཅེས་ཀྱང་བྱ་སྟེ། ཆོས་དེ་ནི་སྐྱེ་བ་ལ་
སོགས་པའི་མཚན་ཉིད་གནས་སྐབས་ཀྱི་ཁྱད་པར་གྱིས་མཚོན་པར་བྱེད་དོ། །གང་གི་ཚེ་རྒྱུན་ལ་མཚན་ཉིད་རྣམ་པར་འཇོག་པར་བྱེད་པ་དེའི་ཚེ་ནི་སྤྱིས་སྤྱི་མཚོན་པར་བྱེད་དེ། དཔེར་ན་སྐྱེས་བུ་ཆེན་པོ་ཞེས་བྱ་བ་སྤྱི་སྐྱེས་བུ་ཆེན་པོའི་མཚན་སྤྱིས་མཚོན་པར་བྱེད་པ་བཞིན་ནོ། །
འདིས་ནི་ལྐོག་ཤལ་ལ་སོགས་པའི་མཚན་ཉིད་དག་ཀྱང་རྣམ་པར་བཤད་པ་ཡིན་ནོ། །སྲ་བ་ཉིད་ལ་སོགས་པ་དག་ཀྱང་ཞེས་བྱ་བ་རྒྱས་པར་འབྱུང་བ་ནི་དཔེ་འདི་ནི་འདིའི་གསུང་རབ་ལས་གྲགས་པ་ཡིན་པའི་ཕྱིར་གཉི་ག་ལ་གྲུབ་པ་ཡིན་ཏེ། སའི་ཁམས་ནི་སྲ་བའི་མཚན་ཉིད་ཅན་
ཡིན་ནོ་ཞེས་བྱ་མོད་ཀྱི་སྲ་བ་ཉིད་སའི་ཁམས་ལས་གཞན་པ་ནི་མ་ཡིན་ནོ། །དེ་བཞིན་དུ་ཐམས་ཅད་ལའང་སྦྱར་བར་བྱའོ། །སའི་ཁམས་དེ་སྲ་བས་མཚོན་པར་བྱེད་པ་ན་སྲ་བའི་མཚན་ཉིད་ཅེས་བྱ་བ་དེ་བཞིན་དུ་འདུས་བྱས་དེ་ཉིད་མ་བྱུང་བ་ལས་འབྱུང་བ་དང་བྱུང་ནས་ཀྱང་མེད་པས་
མཚོན་པར་བྱེད་པ་ན་མཚོན་པར་བྱེད་པས་མཚན་ཉིད་ཅེས་བྱ་བ་ཡིན་པའི་ཕྱིར་འདུས་བྱས་ཀྱི་མཚན་ཉིད་ཅེས་བྱ་མོད་ཀྱི་དེ་ལས་གཞན་པ་ནི་མ་ཡིན་ནོ། །ཇི་ལྟར་གྱེན་དུ་འགྲོ་བ་ལས་ཞེས་བྱ་བ་རྒྱས་པར་འབྱུང་བ་ནི་བྱེ་བྲག་ཏུ་སྨྲ་བ་སྐད་ཅིག་མར་སྨྲ་བའི་ལྟར་ན་དུ་བའི་གྱེན་དུ་འགྲོ་བ་

གཞན་ཡོད་པ་མ་ཡིན་ཏེ། དེ་ཉིད་གྱེན་དུ་ཡུལ་གཞན་དག་ཏུ་འབྱུང་བ་ན་གྱེན་དུ་འགྲོ་བ་ཞེས་བྱ་བའི་མིང་འཐོབ་བོ། །གྱེན་དུ་འགྲོ་བ་དེ་ནི་དེ་དང་ཐ་དད་པ་ལྟར་སྣང་ཡང་དུ་བའི་གྱེན་དུ་འགྲོ་བ་ཉིད་ནི་གཞན་ཡིན་པར་ཡང་མི་འདོད་དོ། །དེ་ནི་དུ་བའི་དེ་ལས་ཀྱང་མིག་གཞན་པ་
ལྟར་ཞེས་བྱ་བ་ནི་གྱེན་དུ་འགྲོ་བ་དེ་ནི་དུ་བ་ལས་གཞན་པ་ཡང་མ་ཡིན་པ་ལྟར་རོ། །འདིར་ཡང་ཚུལ་དེ་ཉིད་ཡིན་ནོ་ཞེས་བྱ་བ་ནི་དེ་བཞིན་དུ་སྐྱེ་བ་དང་འཇིག་པ་དང་གཞན་དུ་འགྱུར་བ་ཉིད་དེ་དང་ཐ་དད་པར་སྣང་མོད་ཀྱི་འདུས་བྱས་གཞན་ཡང་མ་ཡིན་ནོ། །འདུས་བྱས་གཟུགས་
ལ་སོགས་པ་ཇི་སྲིད་དུ་རང་གི་ངོ་བོ་གཟུང་ཡང་ཇི་སྲིད་དུ་སྔ་ན་མེད་པ་དང་ཕྱིས་མེད་པ་མི་ཤེས་པ་སྟེ་གཟུགས་ལ་སོགས་པ་དེ་དག་གི་སྐྱེ་བ་སྔ་ན་མེད་པ་མི་ཤེས་པའོ། །ཕྱིས་ཅི་ཞེ་ན། མེད་པར་ཏེ་ཇི་སྲིད་དུ་སྔ་ན་མེད་པ་དང་ཞིག་ནས་མེད་པ་མི་ཤེས་པའོ། །རྒྱུན་གྱི་བྱེ་བྲག་ཇི་
སྲིད་དུ་མི་ཤེས་པ་ཞེས་བྱ་བར་སྦྱར་རོ། །དེ་ལྟ་བས་ན་དེ་ཉིད་ཀྱིས་དེ་མཚོན་པ་ཡང་མ་ཡིན་ཞེས་བྱ་བ་ནི་འདུས་བྱས་དེ་ཉིད་ཀྱིས་འདུས་བྱས་ཉིད་མཚོན་པར་བྱེད་པ་ཡང་མ་ཡིན་ནོ། །འོ་ན་ཅི་ཞེ་ན། སྔ་ན་མེད་པ་ལ་སོགས་པས་འདུས་བྱས་ཉིད་མཚོན་པར་བྱེད་དོ། །གལ་
ཏེ་གཟུགས་ལ་སོགས་པའི་རང་གི་ངོ་བོ་བཟུང་བ་ན་འདུས་བྱས་སོ་ཞེས་བྱ་བར་འཛིན་པར་གྱུར་ན་ནི་སྔ་ན་མེད་པ་དང་ཕྱིས་མེད་པ་དང་རྒྱུན་གྱི་བྱེ་བྲག་མ་ཤེས་པ་ཁོ་ནར་དེ་ཤེས་པར་འགྱུར་བ་ཞིག་ནི་དེ་ལྟར་ཡང་མི་ཤེས་ཏེ། དེ་ལྟ་བས་ན་དེ་ཉིད་ཀྱིས་དེ་མཚོན་པ་ཡང་མ་ཡིན་ནོ། །
གཟུགས་ལ་སོགས་པ་དེ་དག་ལས་སྐྱེ་བ་ལ་སོགས་པ་རྫས་གཞན་ཉིད་དུ་ཡོད་པ་ཡང་མ་ཡིན་ཏེ། རྒྱུན་གྱི་དང་པོ་སྐྱེ་བ་ཡིན། །ཞེས་བྱ་བ་རྒྱས་པར་འབྱུང་བའི་ཕྱིར་རོ། །དེ་དག་ནི་ལྷན་ཅིག་འབྱུང་བའི་ཕྱིར་ཞེས་བྱ་བ་ནི་སྐྱེ་བ་ལ་སོགས་པ་དུས་མཉམ་དུ་སྐྱེ་བའི་ཕྱིར་རོ། །
བྱ་བའི་དུས་ཐ་དད་པའི་ཕྱིར་རོ་ཞེས་བྱ་བ་ནི་དེ་ལྟ་མ་ཡིན་ནོ། །ཅིའི་ཕྱིར་ཞེ་ན། བྱ་བའི་དུས་ཐ་དད་པའི་ཕྱིར་ཏེ་རྩལ་གྱི་དུས་ཐ་དད་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་བསྟན་པའི་ཕྱིར་སྐྱེ་བ་མ་འོངས་པ་ནི་བྱ་བ་བྱེད་དེ་ཞེས་བྱ་བ་ལ་སོགས་པ་སྨོས་སོ། །ཅི་མ་འོངས་པ་

རྫས་སུ་ཡོད་དམ་མེད་ཅེས་བྱ་བ་རེ་ཞིག་མ་འོངས་པ་ཉིད་མེད་དོ་ཞེས་བྱ་བར་སྒྲུབ་པར་འགྱུར་ན་སྐྱེ་བ་མ་འོངས་པ་བྱ་བ་བྱེད་དོ་ཞེས་བྱ་བ་ལྟ་ག་ལ་ཡོད་སྙམ་དུ་བསམས་པ་ཡིན་ནོ། །དེ་ཡོད་དུ་ཆུག་ན་ཡང་ཞེས་བྱ་བ་ནི་རྫས་སུ་ཡོད་དུ་ཆུག་ན་ཡང་སྐྱེ་བ་མ་འོངས་
པ་དེས་འོངས་པའི་གནས་སྐབས་ན་བྱ་བ་བྱེད་ན་གོ། །ཇི་ལྟར་མ་འོངས་པར་འགྲུབ་པར་འགྱུར་ཏེ་མ་འོངས་པ་ནི་བྱ་བ་མི་བྱེད་པ་ཡིན་ནོ་ཞེས་བྱ་བའི་གྲུབ་པའི་མཐའ་དེ་དང་འགལ་བར་འགྱུར་རོ། །དེ་ལྟ་བས་ན་དེ་ནི་བརྗོད་པར་མི་བྱའོ། །ཇི་ལྟར་ན་ད་ལྟར་འགྲུབ་པར་འགྱུར་ཞེས་བྱ་བ་
ནི་བྱ་བ་ཞིག་པ་ནི་འདས་པ་ཡིན་པར་འདོད་ལ་སྐྱེ་བ་ཡང་མ་འོངས་པ་ཉིད་ན་བྱ་བ་ཞིག་པས་ད་ལྟའི་གནས་སྐབས་ན་འདས་པ་ཁོ་ནར་འགྱུར་གྱི་ད་ལྟར་ཡིན་པར་ནི་མི་འགྱུར་རོ། །དེ་ལྟ་བས་ན་ད་ལྟའི་མཚན་ཉིད་ཀྱང་བརྗོད་པར་བྱ་དགོས་ཏེ་གལ་ཏེ་བྱ་བ་ཡོངས་སུ་མ་རྫོགས་པ་ནི་ད་ལྟ་ཡིན་
ནོ་ཞེ་ན། འདས་པ་ཡང་ད་ལྟ་ཡིན་པར་འགྱུར་ཏེ་འདས་པ་ལ་ཡང་འབྲས་བུ་འབྱིན་པའི་བྱ་བ་ཡོད་པར་འདོད་དེ། འདི་གང་གི་ཚེ་གནས་པས་གནས་པར་བྱེད་པ་ཞེས་བྱ་བ་རྒྱས་པར་འབྱུང་བ་ནི་གནས་པ་དང་རྒ་བ་དང་འཇིག་པའི་བྱ་བ་དག་ནི་ཕན་ཚུན་འགལ་བ་ཡིན་ཏེ། ཆོས་དེ་གནས་
པ་ཡང་ཡིན་ལ་འཇིག་པ་ཡང་ཡིན་ནོ་ཞེས་བྱ་བར་རྣམ་པར་གཞག་པར་རིགས་པ་ནི་མ་ཡིན་ནོ། །སྐད་ཅིག་མ་ཉིད་ལ་གནོད་པར་འགྱུར་རོ་ཞེས་བྱ་བ་ནི་དང་པོ་ནི་གནས་པས་གནས་པར་བྱེད་ལ། དེའི་འོག་ཏུ་ནི་རྒ་བས་རྒས་པར་བྱེད། དེའི་འོག་ཏུ་ནི་མི་རྟག་པ་ཉིད་ཀྱིས་འཇིག་པར་
བྱེད་པས་སྐད་ཅིག་མ་གསུམ་དུ་གནས་པའི་ཕྱིར་སྐད་ཅིག་མ་ཉིད་ལ་གནོད་པར་འགྱུར་རོ། །ཁོ་བོ་ཅག་གི་སྐད་ཅིག་མ་ནི་འདི་ཁོ་ན་ཡིན་ནོ་ཞེས་བྱ་བ་ནི་ནུས་པ་ཡོངས་སུ་རྫོགས་པའི་མཚན་ཉིད་ཡིན་གྱི་སྐྱེས་མ་ཐག་ཏུ་འཇིག་པའི་མཚན་ཉིད་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལྟ་
ན་ཡང་ཞེས་བྱ་བ་རྒྱས་པར་འབྱུང་བ་ནི་ལྷན་ཅིག་འབྱུང་བ་རྣམས་རིམ་གྱིས་བྱེད་པར་མི་རུང་ན་རེ་ཞིག་གནས་པས་གནས་པར་བྱེད་ཀྱི་དེའི་ཚེ་རྒ་བས་ཀྱང་རྒས་པར་མི་བྱེད་ལ་མི་རྟག་པ་ཉིད་ཀྱིས་ཀྱང་འཇིག་པར་མི་བྱེད་དོ་ཞེས་བྱ་བ་འདི་ག་ལས། ཕྱིས་ཅིའི་ཕྱིར་སྟོབས་དང་མི་ལྡན་པ་ཉིད་དུ་

འགྱུར་ཞེས་བྱ་བ་ནི་ཕྱིས་གང་གིས་ན་སྟོབས་དང་མི་ལྡན་པ་ཉིད་དུ་གྱུར་ན་གང་གི་ཕྱིར་ན་གནས་པ་འདི་ཆོས་དང་ལྷན་ཅིག་གང་ལ་གནས་པ་ཡོད་པའི་ཆོས་དེ་དང་ལྷན་ཅིག་མི་རྟག་པ་ཉིད་ཀྱིས་འཇོམས་པར་བྱེད། བྱ་བ་བྱས་པས་ཡང་མི་ནུས་ཏེ་སྐྱེ་བ་བཞིན་ནོ་ཞེས་བྱ་བ་ནི་ཇི་ལྟར་སྐྱེ་
བས་བྱ་བ་བྱས་ཟིན་ཏོ། །བསྐྱེད་པར་བྱ་བ་བསྐྱེད་ནས་ནུས་པ་ཟད་ན་ཡང་སྐྱེད་པར་མི་བྱེད་པ་དེ་བཞིན་དུ་གནས་པས་ཀྱང་གནས་པར་མི་བྱེད་དོ། །སྐྱེ་བས་བསྐྱེད་པར་བྱ་བ་ད་ལྟ་ཉིད་དུ་ཞེས་བྱ་བ་རྒྱས་པར་འབྱུང་བ་ནི་ཐུག་པ་མེད་པར་ཐལ་བར་འགྱུར་བའི་ཕྱིར་བསྐྱེད་པར་བྱ་བ་ད་ལྟ་
ཉིད་དུ་ཁྱེར་ཏེ་འོངས་པ་ནི་ཡང་བསྐྱེད་པར་མི་ནུས་ཀྱི། གནས་པས་ནི་གནས་པར་བྱ་བ་ཡེ་གནས་པར་བྱ་བར་ནུས་ཏེ་གནས་པ་ནི་འཇིག་པའི་བགེགས་བྱེད་པའི་མཚན་ཉིད་ཡིན་པའི་ཕྱིར་རོ། །རྒ་བ་དང་མི་རྟག་པ་ཉིད་དེ་དག་ཁོ་ན་ཡིན་ནོ་ཞེས་བྱ་བ་ནི་རྒ་བ་དང་མི་རྟག་པ་ཉིད་དེ་དག་
ཁོ་ན་བགེགས་བྱེད་པ་ཡིན་ནོ། །དེ་ན་གནས་པར་བྱ་བ་ཡེ་གནས་པར་བྱ་བར་མི་ནུས་ཏེ་རྒ་བས་ནི་གནས་པ་ཉམ་ཆུང་ངུར་བྱེད་ལ་མི་རྟག་པ་ཉིད་ཀྱིས་ནི་ཉམ་དམས་པ་འཇོམས་པར་བྱེད་དོ། །སློབ་དཔོན་གྱིས་སྨྲས་པ། གལ་ཏེ་རྒ་བ་དང་མི་རྟག་པ་ཉིད་དེ་དག་སྟོབས་དང་ལྡན་པ་ཞིག་ཡིན་
ན་ནི་སྔོན་པོ་ཁོ་ན་སྟེ། གནས་པར་བྱ་བ་བྱེད་པའི་ཚེ་དེ་དག་གིས་གནས་པ་དེ་བྱ་བ་བྱེད་དུ་མི་སྟེར་བ་ཡིན་པར་འགྱུར་རོ། །གནས་པའི་བྱ་བ་ལོག་ན་ཡང་ཞེས་བྱ་བ་རྒྱས་པར་འབྱུང་བ་ནི་གང་གི་ཚེ་གནས་པའི་བྱ་བ་ལོག་པ་དེའི་ཚེ་རྒ་བ་དང་མི་རྟག་པ་ཉིད་དེ་དག་ཀྱང་མི་གནས་ལ་ཆོས་དེ་
ཡང་མི་གནས་ཏེ་གནས་པའི་བྱ་བས་དེ་རྣམས་གནས་པར་བརྟགས་པ་ཡིན་ནོ། །དེ་ལྟ་བས་ན་དེ་རྣམས་ཀྱང་མེད་ན་རྒ་བ་དང་མི་རྟག་པ་ཉིད་མི་གནས་པ་དག་གིས་ཇི་ལྟར་རམ་ཆོས་མི་གནས་པ་གང་ལ་བྱ་བ་བྱེད་པར་ནུས་པར་འགྱུར། ཡང་ན་རྒ་བ་དང་མི་རྟག་པ་ཉིད་དེ་དག་གིས་ཅི་
ཞིག་བྱ་སྟེ་གནས་པའི་མཐུས་ཆོས་སྐྱེས་པ་ཙམ་དེ་མ་ཞིག་པར་འགྱུར་བ་ཡིན་ལ་དེ་གནས་པར་བྱ་བ་ཞིག་པ་དེས་ཡལ་བར་བཏང་སྟེ། གནས་པར་མི་བྱེད་ན་ནི་གདོན་མི་ཟ་བར་མི་གནས་པས་མི་གནས་པ་ཡིན་པ་འདི་ཉིད་འདིའི་འཇིག་པ་ཡིན་ན་རྒ་བ་དང་མི་རྟག་པ་ཉིད་དག་གིས་ཅི་

ཞིག་བྱ་སྙམ་དུ་བསམས་པ་ཡིན་ནོ། །དེ་ཉིད་ལས་དེའི་རྣམ་པ་གཞན་ཉིད་དུ་ནི་རུང་བ་མ་ཡིན་ནོ་ཞེས་བྱ་བ་ནི་གལ་ཏེ་དེ་ཉིད་ཡིན་ན་ནི་འདི་གཞན་མ་ཡིན་ནོ། །གཞན་ཡིན་ན་ནི་འོ་ན་དེ་ཉིད་མ་ཡིན་ནོ། །གང་དག་གཞན་ཉིད་ཡིན་པ་དེ་དག་ནི་གཞན་ཡིན་པར་མཐོང་སྟེ།
དཔེར་ན་ལྷ་སྦྱིན་དང་མཆོད་སྦྱིན་དག་ལྟ་བུའོ། །གང་ཡང་སྡེ་པ་གཞན་ན་རེ་ཞེས་བྱ་བ་ནི་འཕགས་པ་མང་པོས་བཀུར་བའི་སྡེ་པ་སྟེ། དེ་ནི་བུམ་པ་ལ་སོགས་པ་ནི་འཇིག་པ་ནི་ཐོབ་པ་ལ་སོགས་པས་བྱས་པ་ཡིན་པར་སེམས་སོ། །དེ་ལྟར་ན་གཟུགས་ནི་དུས་གཞན་གྱི་བར་དུ་གནས་
པ་ཡིན་ལ། སེམས་དང་སེམས་ལས་བྱུང་བ་རྣམས་ནི་སྐད་ཅིག་མ་ཉིད་ཡིན་ནོ།། །།བམ་པོ་བཅུ་དྲུག་པ། །དེའི་ཕྱིར་བཤད་པ། སེམས་དང་སེམས་ལས་བྱུང་བ་རྣམས་སྐད་ཅིག་མ་ཉིད་དུ་ཁས་བླངས་པས་དེ་དག་ནི་མི་རྟག་པ་ཉིད་སེམས་དང་སེམས་ལས་བྱུང་བའི་མི་རྟག་པ་
ཉིད་འཇིག་པའི་རྒྱུ་ལ་མི་ལྟོས་པའི་ཕྱིར་རང་གི་ངང་གིས་འཇིག་པའི་ཕྱིར་གནས་པ་དང་མི་རྟག་པ་ཉིད་དག་ཅིག་ཅར་བྱ་བ་བྱེད་པར་འགྱུར་རོ། །དེའི་ཕྱིར་སེམས་སམ་སེམས་ལས་བྱུང་བ་གཅིག་ལ་ཅིག་ཅར་དུ་གནས་པ་དང་འཇིག་པ་ཉིད་ཕན་ཚུན་འགལ་བ་ཉིད་དུ་ཡང་ཐལ་བར་འགྱུར་
རོ། །དེ་ལྟ་ན་མདོ་དེ་ལེགས་པར་དྲངས་པ་ཡིན་ནོ་ཞེས་བྱ་བ་ནི་དགེ་སློང་དག་གསུམ་པོ་འདི་དག་ནི་འདུས་བྱས་ཀྱི་མཚན་ཉིད་དོ་ཞེས་འབྱུང་བ་གང་ཡིན་པའོ། །ཚོགས་པ་ཡོད་ན་ནི་འབྱུང་ལ་མེད་ན་ནི་མི་འབྱུང་བའི་ཕྱིར་རོ་ཞེས་བྱ་བ་ནི་རྒྱུ་དང་རྐྱེན་རྣམས་ཚོགས་པ་ཡོད་ན་ནི་བསྐྱེད་པར་བྱ་བ་
འབྱུང་ལ་མེད་ན་ནི་མི་འབྱུང་བའི་ཕྱིར་རོ། །སྐྱེ་བ་ནི་མ་ཡིན་ནོ། །ཅི་ཞེ་ན། མཐུ་མ་ཡིན་པར་བལྟ་བར་བྱ་ཞེས་བྱ་བར་སྐབས་དང་སྦྱར་ཏེ། རྒྱུ་དང་རྐྱེན་ཚོགས་ཀྱང་བསྐྱེད་པར་བྱ་བ་དེ་རེས་འགའ་ཡོད་ལ་རེས་འགའ་མེད་པ་ནི་མ་ཡིན་ནོ། །འདི་ལ་བཙུན་པ་གོ་ཆ་མཐའ་ཡས་ན་རེ་
དཔེར་ན་མིག་སྣང་བ་ལ་སོགས་པ་མེད་པར་མིག་གི་རྣམ་པར་ཤེས་པ་སྐྱེད་པར་མི་བྱེད་མོད་ཀྱི། དེའི་ཕྱིར་དེ་སྐྱེ་བའི་རྒྱུ་མ་ཡིན་པ་ཡང་མ་ཡིན་པ་དེ་བཞིན་དུ་སྐྱེ་བ་ཡང་རྒྱུ་དང་རྐྱེན་དག་མེད་པར་ཆོས་སྐྱེད་པར་མི་བྱེད་མོད་ཀྱི་དེའི་ཕྱིར་དེ་སྐྱེ་བའི་རྒྱུ་མ་ཡིན་པ་ཡང་མ་ཡིན་ནོ་ཞེས་ཟེར་ཏེ། འདི་

ལ་སྨྲས་པ་འདི་ནི་མི་སྨྲའོ། །སྣང་བ་ལ་སོགས་པ་ཡོད་དུ་ཟིན་ཀྱང་ལོང་བ་དང་ལོང་བ་མ་ཡིན་པ་དག་གི་མིག་གི་རྣམ་པར་ཤེས་པ་སྐྱེ་བ་དང་མི་སྐྱེ་བ་སྣང་བའི་ཕྱིར་མིག་གི་ནུས་པ་ནི་མཐོང་གི་སྐྱེ་བ་ནི་དེ་ལྟ་མ་ཡིན་ནོ། །ཆོས་ཀྱི་རང་བཞིན་ཕྲ་མོ་དག་ཅེས་བྱ་བ་ནི་དཔེར་ན་སེམས་ལས་བྱུང་
བ་རེག་པ་ལ་སོགས་པ་ཡོངས་སུ་བཅད་པར་དཀའ་བའི་ཕྱིར་རང་བཞིན་ངོ་བོ་ཉིད་ཕྲ་བ་དག་ཡིན་པ་བཞིན་ནོ། །དེ་ལྟ་བུ་ནི་ཡོད་བདེན་ན་ཆོས་ཁ་ཅིག་ནི་མི་སྣང་ཡང་བྱེད་པའི་སྒོ་ནས་ངེས་པར་འཛིན་པར་འགྱུར་གྱི་སྐྱེ་བ་ནི་དེ་ལྟར་བྱེད་པའི་སྒོ་ནས་ངེས་པར་ཟིན་པར་མི་འགྱུར་རོ། །རེག་པ་
ནི་བཅོམ་ལྡན་འདས་ཉིད་ཀྱིས་ངེས་པར་བཟུང་སྟེ། གང་ཅུང་ཟད་ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་གང་ཡིན་པ་དེ་ཐམས་ཅད་ནི་རེག་པ་ལ་བརྟེན་ནས་ཞེས་བྱ་བ་རྒྱས་པར་གསུངས་པ་ཡིན་ནོ། །སྐྱེ་བ་ཞིག་མེད་ན་སྐྱེས་ཞེས་བྱ་བ་དང་ཞེས་བྱ་བ་ནི་
གཟུགས་ལ་གཟུགས་ཀྱི་བློ་ནི་རང་གི་མཚན་ཉིད་ལ་ལྟོས་པ་ཡིན་གྱི་སྐྱེ་བའོ་སྙམ་པའི་སྐྱེ་བའི་བློ་ནི་རང་གི་མཚན་ཉིད་ལ་ལྟོས་པ་མ་ཡིན་ཏེ། ཚོར་བ་ལ་སོགས་པ་ལ་ཡང་ཡོད་པའི་ཕྱིར་རོ། །དེ་ལྟ་བས་ན་སྐྱེ་བའི་བློ་ནི་སྐྱེ་བའི་རྫས་དོན་གཞན་དུ་གྱུར་པ་ཞིག་ལ་ལྟོས་པ་ཡིན་པར་ངེས་
པར་བཟུང་ངོ་། །གཟུགས་ཀྱི་སྐྱེ་བ་ཞེས་བྱ་བ་དྲུག་པའི་ཚིག་ཏུ་ཡང་མི་འགྱུར་ཞེས་བྱ་བ་ནི་དྲུག་པར་སྟོན་པ་ནི་གཞི་མི་མཐུན་པར་སྦྱར་བ་ཡིན་གྱི། གཞི་མཐུན་པར་སྦྱར་བ་ནི་མ་ཡིན་ནོ། །དེའི་ཕྱིར་དཔེར་ན་གཟུགས་ཀྱི་གཟུགས་ཞེས་མི་བྱ་བ་བཞིན་ནོ་ཞེས་བྱ་བ་སྨོས་སོ། །འདི་ནི་ཆོས་མི་མཐུན་
པའི་དཔེ་ཡིན་ཏེ། ཇི་ལྟར་གཟུགས་ནི་གཟུགས་ལས་གཞན་མ་ཡིན་པའི་ཕྱིར་གཟུགས་ཀྱི་གཟུགས་ཞེས་དྲུག་པ་སྟོན་པར་མི་འགྱུར་བ་དེ་བཞིན་དུ་གཟུགས་ཀྱི་སྐྱེ་བ་ཞེས་བྱ་བར་ཡང་མི་འགྱུར་བ་ཞིག་ནའོ། །དེ་ལྟ་བས་ན་དྲུག་པ་བསྟན་པ་འདི་ནི་སྐྱེ་བའི་རྒྱུ་མཚན་ཅན་ཡིན་པར་ཤེས་
སོ། །དེ་བཞིན་དུ་མི་རྟག་པ་ཉིད་ཀྱི་བར་དུ་ཅི་རིགས་པར་བརྗོད་པར་བྱའོ་ཞེས་བྱ་བ་ནི་གནས་པ་ཞིག་མེད་ན་གནས་པ་ཉིད་དང་གཟུགས་ཀྱི་གནས་པ་ཞེས་བྱ་བ་དྲུག་པའི་ཚིག་ཏུ་ཡང་མི་འགྱུར་ཏེ། དཔེར་ན་གཟུགས་ཀྱི་གཟུགས་ཞེས་བྱ་བ་བཞིན་ནོ། །རྒ་བ་ཞིག་མེད་ན་རྒས་པ་ཉིད་དང་གཟུགས་ཀྱི་

རྒ་བ་ཞེས་བྱ་བ་དྲུག་པའི་ཚིག་ཏུ་ཡང་མི་འགྱུར་ཏེ། དཔེར་ན་གཟུགས་ཀྱི་གཟུགས་ཞེས་བྱ་བ་བཞིན་ནོ། །དེ་བཞིན་དུ་མི་རྟག་པ་ཉིད་ཅིག་མེད་ན་འཇིག་པ་ཉིད་དང་གཟུགས་ཀྱི་འཇིག་པ་ཞེས་བྱ་བ་དྲུག་པའི་ཚིག་ཏུ་ཡང་མི་འགྱུར་ཏེ། དཔེར་ན་
གཟུགས་ཀྱི་གཟུགས་ཞེས་བྱ་བ་བཞིན་ནོ་ཞེས་བྱ་བ་ཡིན་ནོ། །འོ་ན་ནི་དེས་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་སྐྱེས་པ་ཞེས་བྱ་བ་དེ་ལྟ་བུ་ལ་སོགས་པའི་བློ་གྲུབ་པར་བྱ་བའི་ཕྱིར་སྐྱེ་བ་ལ་སོགས་པར་བརྟག་ན། བདག་མེད་པ་ཉིད་ཅིག་ཀྱང་འདོད་པར་བྱ་དགོས་ཏེ།
བདག་མེད་པའི་བློ་རྒྱུ་མེད་པ་ཡིན་པར་འོས་པ་ནི་མ་ཡིན་ནོ། །འོན་ཏེ་བདག་མེད་པ་ཉིད་ནི་བཏགས་པར་ཡོད་ལ། བདག་མེད་པའི་བློ་ཡང་དེའི་རྒྱུ་མཚན་ཅན་ཡིན་པར་འདོད་ན་ནི། སྐྱེ་བ་ལ་སོགས་པ་ཡང་བཏགས་པའི་ཡོད་པ་ཡིན་ལ་སྐྱེ་བ་ལ་སོགས་པའི་བློ་ཡང་དེའི་རྒྱུ་མཚན་
ཅན་ཡིན་པར་འདོད་པར་བྱ་དགོས་སོ། །འདི་ལ་སྒྲུབ་པ་ནི་སྐྱེ་བ་ལ་སོགས་པ་ནི་བཏགས་པའི་ཡོད་པ་མ་ཡིན་ན་སྟེ། རྗེས་སུ་ཡོད་པ་ལ་ལྟོས་ཏེ་གཟུང་བར་བྱ་བ་ཡིན་པའི་ཕྱིར་བདག་མེད་པ་ཉིད་བཞིན་ནོ་ཞེས་བྱ་བ་ཡིན་ནོ། །གཟུགས་གཅིག་དང་། གཟུགས་གཉིས་དང་།
ཆེན་པོ་དང་། ཆུང་ངུ་དང་། ཐ་དད་པ་དང་། ལྡན་པ་དང་། རྣམ་པར་ཕྱེ་བ་དང་། གཞན་དང་། གཞན་མ་ཡིན་པ་དང་། གཟུགས་ཡོད་པ་ཞེས་བྱ་བ་དང་། དེ་བཞིན་དུ་འདི་ནི་རྫས་སོ། །འདི་ནི་གཟུགས་སོ། །འདི་ནི་བུམ་པའོ་ཞེས་བྱ་བ་དེ་ལྟ་བུ་ལ་སོགས་པའི་བློ་འགྲུབ་
པར་བྱ་བའི་ཕྱིར་དང་། དྲུག་པར་བྱ་བའི་ཕྱིར་བྱེ་བྲག་པས་ཀུན་བརྟགས་པ་གྲངས་ལ་སོགས་པ་དང་། གཟུགས་ཀྱི་ལྡན་པ་ཡང་ཁས་བླངས་དགོས་སོ། །ཡོད་པ་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་རྫས་ཉིད་དང་གཟུགས་ཉིད་དང་བུམ་པ་ཉིད་ལ་སོགས་པ་
བསྡུའོ། །ལྡན་པ་སྨོས་པ་ནི་དཔེར་བརྗོད་པ་ཙམ་དུ་ཟད་དེ་གཟུགས་ཀྱི་ཐ་དད་པ་དང་གཞན་ཉིད་དང་གཞན་མ་ཡིན་པ་ཉིད་ཅེས་བྱ་བ་དེ་ལྟ་བུ་ལ་སོགས་པ་ལ་ཡང་སྦྱར་བར་བྱའོ། །གཟུགས་ཀྱི་རང་བཞིན་ཞེས་བྱ་བའི་དྲུག་པ་འདི་ཡང་ཇི་ལྟར་བརྟག་ཅེས་བྱ་བ་ནི་བྱེ་བྲག་ཏུ་སྨྲ་བ་

ཁྱེད་གཟུགས་ལས་གཟུགས་ཀྱི་རང་བཞིན་གཞན་ཡིན་པར་མི་འདོད་པས་སོ། །སྐྱེ་བ་ཞེས་བྱ་བ་ནི་མ་བྱུང་བ་ལས་བྱུང་བ་ཁོ་ན་ཤེས་པར་བྱ་བའི་དོན་དུ་སྐྱེ་བ་ཁོ་ན་གདགས་པ་མཛད་པ་ཡིན་གྱི་ཞིག་པ་ཞེས་བྱ་བ་ནི་མ་ཡིན་ནོ། །རྣམ་པ་མང་དུ་ཡོད་པ་ཞེས་བྱ་བ་ནི་བྱེ་བྲག་མང་དུ་ཡོད་པ་སྟེ།
གཟུགས་དང་ཚོར་བ་ལ་སོགས་པ་ཐ་དད་པའི་ཕྱིར་རོ། །དེ་བྱེ་བྲག་ཏུ་བྱ་བའི་ཕྱིར་ཏེ་གཟུགས་ཀྱི་སྐྱེ་བ་ཡིན་གྱི་ཚོར་བ་ལ་སོགས་པའི་སྐྱེ་བ་ནི་མ་ཡིན་ནོ་ཞེས་བྱེ་བྲག་ཏུ་བྱ་བའི་ཕྱིར་དྲུག་པར་མཛད་དོ། །གཞན་དུ་ནི་ཤེས་པར་མི་འགྱུར་བར་བྱ་བ་ནི་གཟུགས་ཞེས་བྱ་བ་ཁོ་ན་སྐྱེ་བའི་ཚོར་
བ་ཞེས་བྱ་བ་ལ་སོགས་པ་ནི་མ་ཡིན་པའོ། །དེས་ཙན་དན་གྱི་དྲི་ལ་སོགས་པ་དང་མཆི་གུའི་ལུས་ཞེས་བྱ་བ་བཞིན་ནོ་ཞེས་བྱ་བ་སྨོས་ཏེ། དོན་གཞན་མ་ཡིན་ཡང་དྲུག་པར་སྟོན་པར་བྱེད་དོ། །སངས་རྒྱས་པའི་གྲུབ་པའི་མཐའ་ནི་ཙན་དན་གྱི་དྲི་ལ་སོགས་པ་འདུས་པ་ཙམ་ཡིན་ནོ་
ཞེས་བྱ་བ་ཡིན་ནོ། །བྱེ་བྲག་པའི་གྲུབ་པའི་མཐའ་ལ་ལྟོས་ན་དཔེ་ཙན་དན་མ་གྲུབ་པས་དཔེ་གཞན་མཆི་གུའི་ལུས་ཞེས་བྱ་བ་ཉེ་བར་འགོད་དེ། མཆི་གུ་དང་ལུས་གཉིས་ནི་བྱེ་བྲག་པ་རྣམས་ཀྱི་གྲུབ་པའི་མཐས་ཀྱང་དོན་གཞན་མ་ཡིན་མོད་ཀྱི། དྲུག་པར་སྟོན་པར་ཡང་
འགྱུར་ཏེ་དེ་ལྟར་སྟོན་པ་དེ་ནི་དོན་གཞན་དུ་ཀུན་བརྟགས་པས་བྱས་པ་ཡིན་ནོ། །དེ་བཞིན་དུ་གནས་པ་ལ་སོགས་པ་ལ་ཡང་ཅི་རིགས་པར་རིག་པར་བྱའོ་ཞེས་བྱ་བ་ནི་དེ་ལྟ་བས་ན་གནས་པ་ཞེས་བྱ་བ་འདི་ནི་རྒྱུན་གྱིས་གནས་པ་ཤེས་པར་བྱ་བའི་དོན་དུ་བཏགས་པ་ཙམ་ཁོ་ན་མཛད་པ་ཡིན་
ནོ། །རྒྱུན་གྱིས་གནས་པའི་མཚན་ཉིད་ཀྱི་གནས་པ་དེ་ཡང་རྣམ་པ་མང་དུ་ཡོད་པས་དེ་བྱེ་བྲག་ཏུ་བྱ་བའི་ཕྱིར་གཟུགས་ཀྱི་གནས་པ་ཞེས་དྲུག་པར་མཛད་དེ། ཅི་ནས་ཀྱང་གཟུགས་ཞེས་བྱ་བ་ཁོ་ན་གནས་པར་ཤེས་པར་བྱའི་གཞན་དུ་ནི་ཤེས་པར་མི་འགྱུར་བར་བྱ་བ་ཡིན་ཏེ་ཞེས་བྱ་
བ་དང་། རྒས་པ་ཞེས་བྱ་བ་འདི་ནི་སྔ་ཕྱིའི་ཁྱད་པར་ཤེས་པར་བྱ་བའི་དོན་གདགས་པ་ཙམ་མཛད་པ་ཡིན་ནོ། །སྔ་ཕྱིའི་ཁྱད་པར་ཀྱི་མཚན་ཉིད་ཀྱི་རྒ་བ་དེ་ཡང་རྣམ་པ་མང་དུ་ཡོད་པས་དེ་བྱེ་བྲག་ཏུ་བྱ་བའི་ཕྱིར་གཟུགས་ཀྱི་རྒ་བ་ཞེས་དྲུག་པར་མཛད་དེ་ཅི་ནས་ཀྱང་གཟུགས་

ཞེས་བྱ་བ་ཁོ་ན་རྒ་བར་ཤེས་པར་བྱའི། གཞན་དུ་ནི་ཤེས་པར་མི་འགྱུར་བར་བྱ་བ་ཡིན་ཏེ་ཞེས་བྱ་བ་དང་། དེ་བཞིན་དུ་ཞིག་པ་ཞེས་བྱ་བ་འདི་ནི་རྒྱུན་ལྡོག་པ་ཤེས་པར་བྱ་བའི་དོན་དུ་བཏགས་པ་ཙམ་མཛད་པ་ཡིན་ནོ། །རྒྱུན་ལོག་པའི་མཚན་ཉིད་ཀྱི་
འཇིག་པ་དེ་ཡང་རྣམ་པ་མང་དུ་ཡོད་པས་དེ་བྱེ་བྲག་ཏུ་བྱ་བའི་ཕྱིར་གཟུགས་ཀྱི་འཇིག་པ་ཞེས་དྲུག་པར་མཛད་དེ་ཅི་ནས་ཀྱང་གཟུགས་ཞེས་བྱ་བ་ཁོ་ན་འཇིག་པར་ཤེས་པར་བྱའི། གཞན་དུ་ནི་ཤེས་པར་མི་འགྱུར་བར་བྱ་བ་ཡིན་ཏེ་ཞེས་བྱ་བ་ཡིན་ཏེ། ཐམས་ཅད་དུ་ཡང་དཔེར་
ནི་ཙན་དན་གྱི་དྲི་ལ་སོགས་པ་དང་། མཆི་གུའི་ལུས་ཞེས་བྱ་བ་བཞིན་ནོ་ཞེས་བྱ་བ་དཔེ་གཉིས་ཀྱང་བརྗོད་པར་བྱའོ། །ཡང་ཇི་ལྟར་ཆོས་ཉིད་ཀྱིས་ཞེས་བྱ་བ་ལ། ཆོས་ཉིད་ནི་ཆོས་ཀྱི་རང་བཞིན་ཏེ་ཆོས་ཀྱི་ངོ་བོ་ཉིད་དང་ཆོས་ཀྱི་ངང་ཚུལ་ཅན་ཞེས་བྱ་བའི་ཐ་ཚིག་གོ། །ཆོས་
ཉིད་ཆོས་ཀྱི་རང་བཞིན་ཡིན་ནོ་ཞེས་བྱ་བ་འདི་ག་ལས་ཤེ་ན། མིག་ནི་ཆོས་ཉིད་ཀྱིས་རྟག་པ་དང་བརྟན་པ་དང་ཐེར་ཟུག་དང་མི་འགྱུར་བའི་ཆོས་ཅན་དང་བདག་དང་བདག་གིས་སྟོང་ངོ་། །དེ་ཅིའི་ཕྱིར་ཞེ་ན། འདི་ནི་འདིའི་རང་བཞིན་ཡིན་ནོ་ཞེས་བྱ་བ་རྒྱས་པར་འབྱུང་ངོ་། །ཇི་ལྟར་
ཆོས་ཉིད་ཀྱི་ནམ་མཁའ་ལ་སོགས་པ་ཐམས་ཅད་སྐྱེ་བ་དང་ལྡན་པར་མི་འདོད་པ་དེ་ལྟར་ཐམས་ཅད་མི་སྐྱེའོ་ཞེས་བྱ་བ་ཁོ་ནར་འདོད་པར་བྱ་སྟེ། འདུས་བྱས་ཁོ་ན་སྐྱེ་བ་དང་ལྡན་པ་ཡིན་གྱི་འདུས་མ་བྱས་ནི་མ་ཡིན་ནོ་ཞེས་བྱ་བ་གང་ཡིན་པ་འདི་ལ་ནི་ཆོས་ཉིད་མ་གཏོགས་པ་གཏན་
ཚིགས་ཅུང་ཟད་ཀྱང་མེད་དོ། །དེ་ལྟར་ན་སྐྱེ་བ་མེད་ཀྱང་འདུས་བྱས་ཁོ་ན་སྐྱེ་བར་འགྱུར་གྱི་འདུས་མ་བྱས་ནི་མ་ཡིན་ནོ། །ཡང་ཇི་ལྟར་སྐྱེ་བ་དང་ལྡན་པར་མཚུངས་པ་ལས་ཞེས་བྱ་བ་གང་དག་ཅེ་ན། གཟུགས་དང་ཚོར་བ་ལ་སོགས་པའོ། །དེ་དག་ལས་གཞན་པའི་རྐྱེན་
རྣམས་ཞེས་བྱ་བ་ནི་ཚོར་བ་ལ་སོགས་པ་སྐྱེད་པའི་རྐྱེན་རྣམས་ནི་གཟུགས་སྐྱེ་བའི་རྐྱེན་དེ་དག་ལས་གཞན་པ་ཡིན་ཏེ་དེ་དག་ལས་གཞན་པའི་རྐྱེན་དེ་རྣམས་ཀྱིས་ནི་དེ་དག་ལས་གཞན་པ་བསྐྱེད་པར་ནུས་པ་མ་ཡིན་ནོ། །ཚོར་བ་ལ་སོགས་པ་དེ་དག་ལས་གཞན་པ་ནི། དེ་

དག་ལས་གཞན་པའོ། །དེ་ཅི་ཞེ་ན། གཟུགས་ཏེ་ཇི་ལྟར་དེ་དག་ལས་གཞན་པ་དེ་ཚོར་བ་ལ་སོགས་པའི་རྐྱེན་རྣམས་ཀྱིས་བསྐྱེད་པར་ནུས་པ་མ་ཡིན་པ་དེ་བཞིན་དུ་གཟུགས་དང་ཚོར་བ་ལ་སོགས་པའི་རྐྱེན་ཐམས་ཅད་ཀྱིས་ཀྱང་ནམ་མཁའ་ལ་སོགས་པ་འདུས་མ་བྱས་
བསྐྱེད་པར་མི་ནུས་པར་འགྱུར་རོ། །སྔ་མ་ནི་རང་གི་ངོ་བོ་ངེས་པའི་སྒོ་ནས་བཤད་པ་ཡིན་ནོ། །འདི་ནི་ནུས་པ་ངེས་པའི་སྒོ་ནས་བཤད་པ་ཡིན་ནོ། །སུན་འབྱིན་པར་བྱེད་པ་དག་ཡོད་ཅེས་ཏེ་ཞེས་བྱ་བ་རྒྱས་པར་འབྱུང་བ་ནི་དཔེར་ན་རི་དགས་དག་ཡོད་ཅེས་ཏེ་ནས་མི་རྨོ་བ་མ་
ཡིན་གྱི་རྨོ་བ་ཁོ་ནའོ་ཞེས་བྱ་བའི་ཐ་ཚིག་སྟེ། དགག་པ་གཉིས་ཀྱི་དོན་རྣམས་མ་གོ་བར་འགྱུར་བ་ལྟ་བུ་དང་། དཔེར་ན་སྦྲང་བུ་དག་ཡོད་ཅེས་ཏེ། ལ་དུ་མི་བཟའ་བ་མ་ཡིན་ནོ། །འོ་ན་ཅི་ཞེ་ན། བཟའ་བ་ཁོ་ན་ཡིན་པ་དེ་བཞིན་དུ་སུན་འབྱིན་པ་དག་ཡོད་ཅེས་ཏེ། ལུང་ཆོས་
མངོན་པའི་བསྟན་བཅོས་དག་དོར་དུ་ནི་མི་རུང་ངོ་། །དེ་ལྟ་བས་ན་སྐྱོན་རྣམས་ལ་ཡང་ལན་གདབ་པར་བྱ་སྟེ། ཕ་རོལ་པོས་རྣམ་པར་གཞག་པའི་སྐྱོན་རྣམས་ལ་ཡང་ལན་གདབ་པར་བྱ་ལ་གྲུབ་པའི་མཐའི་རྗེས་སུ་འབྲང་བར་ཡང་བྱ་སྟེ། ཡོངས་སུ་མི་དོར་བར་བྱའོ་སྙམ་དུ་
བསམས་པ་ཡིན་ནོ། །མིང་གི་ཚོགས་ལ་སོགས་པ་ནི། །མིང་དང་ངག་དང་ཡི་གེའི་ཚོགས། །ཞེས་བྱ་བ་ནི་མིང་གི་ཚོགས་ནི་མིང་གི་ཚོགས་སོ། །ངག་གི་ཚོགས་ནི་ཚིག་གི་ཚོགས་སོ། །ཡི་གེའི་ཚོགས་ནི་ཡི་གེའི་ཚོགས་སོ། །མིང་བྱེད་པ་ཞེས་བྱ་བ་འདི་ནི་འཇིག་རྟེན་
གྱི་སྐད་ཡིན་ནོ། །མིང་བྱེད་པ་དང་མིང་འདོགས་པ་ཞེས་བྱ་བ་ནི་རྣམ་གྲངས་ཡིན་ཏེ་འདི་ལྟར་འཇིག་རྟེན་ན་སྨྲ་བ་པོ་འདིའི་མིང་ལྷ་སྦྱིན་ཞེས་བྱ་བར་འདོགས་སོ་ཞེས་ཟེར་རོ། །མིང་གི་བྱེད་པ་ནི་མིང་བྱེད་པ་སྟེ་གང་གིས་ན་སེམས་ལས་བྱུང་བའི་ཆོས་འདུ་ཤེས་བྱེད་ཅིང་སྐྱེད་པའོ། །
ཡང་ན་མིང་ཉིད་བྱེད་པས་ན་མིང་བྱེད་པ་སྟེ་མིང་སྨོས་པ་ནི་གཞན་བྱེད་པ་བཟློག་པའི་ཕྱིར་རོ། །བྱེད་པ་སྨོས་པ་ནི་སེམས་ལས་བྱུང་བ་ལས་ཁྱད་པར་དུ་བྱ་བའི་ཕྱིར་ཏེ་གལ་ཏེ་མིང་ནི་མིང་སྟེ་ཞེས་བརྗོད་ན་ནི་སེམས་ལས་བྱུང་བ་ཡིན་པར་ཡང་སེམས་ལས་བྱུང་བར་འགྱུར་རོ། །མིང་བྱེད་པ་

ནི་མིང་སྟེ་གཟུགས་དང་སྒྲ་དང་ཞེས་བྱ་བ་ལ་སོགས་པ་ལྟ་བུའོ། །ངག་ནི་ཚིག་སྟེ་ཞེས་བྱ་བ་ནི་འདིས་གོ་བར་འགྱུར་ཞིང་རྟོགས་པར་གྱུར་པས་ན་ཚིག་གོ། །དེའི་ཕྱིར་ཇི་ཙམ་གྱིས་འདོན་པ་ཡོངས་སུ་རྫོགས་པ་སྟེ་ཞེས་བྱ་བར་སྨོས་སོ། །ཀྱེ་མ་འདུ་
བྱེད་རྣམས་མི་རྟག། །ཅེས་བྱ་བ་དེ་ལྟ་བུ་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི། སྐྱེ་ཞིང་འཇིག་པའི་ཆོས་ཅན་ཡིན། །སྐྱེས་ནས་འགག་པར་འགྱུར་བ་སྟེ། །དེ་དག་ཉེ་བར་ཞི་བ་བདེ། །ཞེས་བྱ་བ་དེ་ལྟ་བུ་ལ་སོགས་པ་བསྡུའོ། །ཚིགས་སུ་བཅད་པ་
འདིའི་དོན་ནི་འདི་སྐད་དུ། ཀྱེ་མ་འདུ་བྱེད་རྣམས་མི་རྟག །ཅེས་བྱ་བ་ནི་དམ་བཅའ་བ་ཡིན་ནོ། །སྐྱེ་ཞིང་འཇིག་པའི་ཆོས་ཅན་ཡིན། །ཞེས་བྱ་བ་ནི་གཏན་ཚིགས་ཡིན་ཏེ་གང་གི་ཕྱིར་སྐྱེ་བ་དང་འཇིག་པའི་ཆོས་དང་ལྡན་པ་དེའི་ཕྱིར་རྟག་པ་དག་གོ་ཞེས་བྱ་བར་ཡོངས་སུ་ཆོད་པར་འགྱུར་
རོ། །སྐྱེས་ནས་འགག་པར་འགྱུར་བ་སྟེ། །ཞེས་བྱ་བ་ནི་དཔེ་སྟེ། གང་དག་སྐྱེ་བ་དེ་དག་ནི་འགག་པར་འགྱུར་ཏེ། དཔེར་ན་བུམ་པ་ལ་སོགས་པ་ལྟ་བུའོ། །འདུས་བྱས་རྣམས་ཀྱང་དེ་དང་འདྲའོ་ཞེས་འཆད་དོ། །གཞན་དག་ན་རེ་འདི་ནི་དེ་དག། །སྐྱེ་ཞིང་འཇིག་པའི་ཆོས་ཅན་
ཡིན། །ཞེས་བྱ་བ་འདི་ཇི་ལྟར་ཤེས་ཤེ་ན། འདི་ལྟར་སྐྱེས་ནས་འགག་པར་འགྱུར་བ་མཐོང་བའི་ཕྱིར་རོ་ཞེས་གཏན་ཚིགས་མ་གྲུབ་པ་སྒྲུབ་པར་བྱེད་པ་ཡིན་ནོ་ཞེས་ཟེར་རོ། །གཞན་དག་ན་རེ། ཀྱེ་མ་འདུ་བྱེད་རྣམས་མི་རྟག། །སྐྱེ་ཞིང་འཇིག་པའི་ཆོས་ཅན་ཡིན། །ཞེས་བྱ་བ་
འདི་གཉིས་ནི་རྣམ་གྲངས་སུ་བརྗོད་པ་ཡིན་ནོ། །ཅིའི་ཕྱིར་ཞེ་ན། སྨྲས་པ། འདི་ལྟར། སྐྱེས་ནས་འགག་པར་འགྱུར་བ་སྟེ། །ཞེས་བྱ་བ་ནི་གཏན་ཚིགས་སྨོས་པ་ཡིན་ནོ་ཞེས་ཟེར་རོ། །དེ་དག་ཉེ་བར་ཞི་བ་བདེ། །ཞེས་བྱ་བ་ནི་གང་དག་མི་རྟག་པ་དེ་དག་ནི་སྡུག་བསྔལ་བ་ཡིན་
ཏེ། དེའི་ཕྱིར། དེ་དག་ཉེ་བར་ཞི་བ་བདེ། །ཞེས་གདུལ་བའི་སྐྱེ་བོ་སྦྱོར་བར་མཛད་པ་ཡིན་ནོ། །གང་གིས་ན་བྱ་བ་དང་ཡོན་ཏན་དང་དུས་ཀྱི་འབྲེལ་པའི་ཁྱད་པར་རྟོགས་པར་འགྱུར་བའོ་ཞེས་བྱ་བ་ནི་དཔེར་ན་འཆད་དོ་འདོན་ཏོ་འགྲོའོ་ཞེས་བྱ་བ་ལྟ་བུ་དང་། ནག་པོའི་དཀར་ཤམ་

པོའོ་དམར་པོའོ་ཞེས་བྱ་བ་ལྟ་བུ་དང་། འཚེད་དོ་འཚེད་པར་འགྱུར་རོ་བཙོས་སོ་ཞེས་བྱ་བ་ལྟ་བུར་བྱ་བ་དང་། ཡོན་ཏན་དང་། དུས་རྣམས་ཀྱི་འབྲེལ་པའི་ཁྱད་པར་རྟོགས་པར་འགྱུར་བ་དེ་ནི་ཚིག་ཡིན་ཏེ། འདི་ལྟར་ཚིག་སྤྱི་ལ་འདུག་པ་རྣམས། ཁྱད་པར་ལ་འཇོག་པ་གང་
ཡིན་པ་དེ་ནི་ངག་གི་དོན་ཡིན་ནོ་ཞེས་ཟེར་རོ། །དེ་ལྟར་ན་མིང་ནི་རང་གི་མཚན་ཉིད་རྗོད་པར་བྱེད་པ་ཡིན་ལ། ཚིག་ནི་བྱ་བ་ལ་སོགས་པའི་འབྲེལ་པའི་ཁྱད་པར་རྗོད་པར་བྱེད་པ་ཡིན་ནོ་ཞེས་བཤད་པ་ཡིན་ནོ། །ཡི་གེ་ནི་ཡི་གེ་སྟེ་ཞེས་བྱ་བ་ནི་ཡི་གེ་ཡིན་ནོ་ཞེས་བྱ་བའི་ཐ་ཚིག་གོ། །
ཡི་གེ་རྣམས་ཀྱང་ཡིག་འབྲུའི་ཡན་ལག་དག་གི་མིང་མ་ཡིན་ནམ་ཞེས་བྱ་བ་ནི་ཡིག་འབྲུ་ནི་མི་ལ་སོགས་པས་གླེགས་བུ་ལ་སོགས་པ་ལ་བྲིས་པ་ཡིན་ནོ། །དེ་དག་གི་མིང་ནི་ཡི་གེ་རྣམས་ཡིན་ཏེ། གཟུགས་ཀྱི་མིང་སྨོས་ན། གཟུགས་རྟོགས་པ་བཞིན་དུ་ཡི་གེ་སྨོས་ན་ཡི་གེ་
འབྲུ་རྟོགས་པར་འགྱུར་རོ། །དེའི་ཕྱིར་ཡི་གེ་རྣམས་ཀྱང་ཡིག་འབྲུའི་ཡན་ལག་དག་གི་མིང་ཡིན་པར་འགྱུར་བས་མཚན་ཉིད་འཆོལ་བ་ཡིན་ནོ། །དེས་ན་ཡི་གེ་ནི་ཡི་གེ་སྟེ་ཞེས་མིང་ལ་མ་གཏོགས་པ་གཞན་ཉིད་དུ་འདོད་པ་གང་ཡིན་པ་སྟེ་མི་འཐད་དོ། །ཡིག་འབྲུའི་ཡན་ལག་
རྣམས་གོ་བར་བྱ་བའི་ཕྱིར་ཞེས་བྱ་བ་རྒྱས་པར་འབྱུང་བ་ནི་འདི་ནི་ལོག་པར་སྨྲས་པ་ཡིན་ནོ་ཞེས་བྱ་བ་ཡིན་ཏེ། ཡི་གེ་སྨོས་ན་ཡིག་འབྲུ་རྟོགས་པར་འགྱུར་རོ་ཞེས་བྱ་བ་གང་ཡིན་པ་དེ་ནི་རྟོགས་པར་བྱ་བ་དང་རྟོགས་པར་བྱེད་པའི་དངོས་པོར་སྒྲོ་བཏགས་པ་ཡིན་པའི་ཕྱིར་ཡིན་གྱི་དེ་དག་གི་
མིང་ཡིན་པའི་ཕྱིར་མ་ཡིན་ནོ། །མང་པོའི་དོན་གང་ཡིན་པའོ་ཞེས་བྱ་བ་དེ་ནི་ཚོགས་ཞེས་བྱ་བའི་དོན་ཡིན་ཏེ་སྤྱི་ཡིན་ནོ་ཞེས་བྱ་བའི་ཐ་ཚིག་གོ། །དེ་དག་ཀྱང་ངག་གི་རང་བཞིན་ཡིན་པའི་ཕྱིར་ཞེས་བྱ་བ་ནི་མདོ་སྡེ་པའི་ཚིག་ཡིན་ནོ། །དེ་དག་ནི་ངག་གི་རང་བཞིན་མ་ཡིན་ཏེ་ཞེས་བྱ་བ་རྒྱས་
པར་འབྱུང་བ་ནི་བྱེ་བྲག་ཏུ་སྨྲ་བའི་ཚིག་གོ། །སྒྲ་ཙམ་གྱིས་ནི་དོན་དག་གོ་བར་མི་འགྱུར་རོ་ཞེས་བྱ་བ་ནི་ཡི་གེའི་བདག་ཉིད་མ་ཡིན་པའི་སྒྲས་ནི་དོན་དག་གོ་བར་མི་འགྱུར་རོ། །འོ་ན་ཅི་ཞེ་ན། ངག་གི་མིང་ལ་འཇུག་པ་ལ་མིང་དེས་ནི་ངག་བདག་གི་ངོ་བོ་བཞིན་དུ་བྱེད་པ་ན་དོན་རྗོད་པར་

བྱེད་དོ་རྟོགས་པར་བྱེད་དོ་ཞེས་བྱ་བའི་ཐ་ཚིག་གོ། །མདོ་སྡེ་པས་སྒྲ་ཙམ་ཁོ་ན་ངག་མ་ཡིན་གྱི་ཞེས་བྱ་བ་རྒྱས་པར་སྨོས་ཏེ། ཁོ་བོ་ཅག་ཀྱང་ངག་སྒྲ་ཙམ་ཡིན་ནོ་ཞེས་ནི་མི་བརྗོད་ཀྱི་ཡི་གེའི་བདག་ཉིད་ཀྱི་སྒྲ་ལ་ལ་དོན་དག་ལ་མཚམས་བཅད་ཅིང་ཚིག་གིས་གཟུང་
བ་གང་ཡིན་པ་དེ་ཁོ་ན་ངག་ཡིན་ནོ། །འདིས་ནི་བརྡ་ལ་ལྟོས་པའི་སྒྲས་ནི་དོན་གོ་བར་བྱེད་ཀྱི་སྒྲའོ་ཅོག་གིས་ནི་མ་ཡིན་ནོ་ཞེས་བྱ་བར་སྟོན་པར་བྱེད་པ་ཡིན་ནོ། །བརྡར་བཏགས་པའི་སྒྲས་དོན་གོ་བར་འགྱུར་བའི་ཕྱིར་དེ་ནི་དོན་གོ་བར་བྱེད་པའི་སྒྲ་ཙམ་ཁོ་ནས་འགྲུབ་པར་འགྱུར་བས་དེ་ནི་
དོན་དེ་རྗོད་པར་བྱེད་པ་ཡིན་ནོ། །འདིའི་དོན་ནི་མིང་མེད་པའི་སྒྲ་བརྗོད་པར་བྱ་བའི་དོན་ཅན་གྱིས་ཀྱང་འགྲུབ་བོ་ཞེས་བྱ་བ་འདི་ཡིན་ནོ། །གལ་ཏེ་སྐྱེད་པར་བྱེད་ན་ནི་ཞེས་བྱ་བ་རྒྱས་པར་འབྱུང་བ་ནི་ངག་ཡོད་ན་སེམས་དང་ལྡན་པ་མ་ཡིན་པ་དེ་སྐྱེད་པར་བྱེད་དོ་ཞེས་བྱ་བར་འདོད་ན། དེས་ན་
གལ་ཏེ་སྐྱེད་པར་བྱེད་ན་ནི་ཞེས་བྱ་བའི་རྟོགས་པ་འདི་སློང་བར་བྱེད་དེ། གལ་ཏེ་དེ་ལྟ་ཡིན་ན་ནི་ཁྱུ་མཆོག་ལ་སོགས་པ་ལ་ཡོད་པ་ཡང་རུང་སྒྲ་ཙམ་ཐམས་ཅད་ཀྱིས་མིང་བསྐྱེད་པར་འགྱུར་ཏེ་ངག་ནི་སྒྲའི་ངོ་བོ་ཉིད་ཡིན་པའི་ཕྱིར་རོ། །འོན་ཏེ་ཁྱོད་སྒྲ་ཁྱད་པར་ཅན་ཡི་གེའི་བདག་ཉིད་དུ་འདོད་
པ་གང་ཡིན་པ་དེ་ཁོ་ནས་མིང་སྐྱེད་པར་བྱེད་དོ་ཞེས་སྨྲ་ན། འོ་ན་ཏེ་སྒྲའི་ཁྱད་པར་དེ་ལྟ་བུ་ཞིག་མིང་སྐྱེད་པར་བྱེད་པ་ཡིན་པར་འདོད་ན་ནི་དེ་ཉིད་དོན་རྗོད་པར་བྱེད་པ་ཡིན་པར་འགྱུར་གྱི་སེམས་དང་མི་ལྡན་པ་དེ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །འོན་ཏེ་གསལ་བར་བྱེད་པ་ཡིན་ནོ་ཞེ་ན་ནི་
ཞེས་བྱ་བ་རྒྱས་པར་འབྱུང་བ་ནི་གལ་ཏེ་སྒྲ་སྐྱེ་བས་དོན་བརྗོད་པར་བྱ་བའི་ཕྱིར་སེམས་དང་ལྡན་པ་མ་ཡིན་པ་དེ་སྐྱེད་པར་བྱེད་ཅིང་དེས་དེ་གསལ་བར་བྱེད་དོ་ཞེས་བྱ་བར་འདོད་ན་འདིར་སྒྲ་ཙམ་ཐམས་ཅད་ཀྱིས་གསལ་བར་བྱེད་པར་འགྱུར་རོ་ཞེས་བྱ་བ་སྔ་མ་བཞིན་དུ་བརྗོད་པར་བྱའོ། །ཡང་སྒྲ་
རྣམས་ལ་ཚོགས་པ་མེད་ལ་ཞེས་བྱ་བ་ནི་ཡི་གེ་དུ་མའི་མིང་གང་ཡིན་པ་དེ་སྐྱེ་བར་རྟོག་པ་ནི་སྒྲ་དུ་མ་ལ་ལྟོས་པ་ཡིན་པས་དེའི་ཕྱིར་འདི་ལྟར་དཔྱོད་པར་བྱེད་དེ། །འདི་སྒྲ་རྣམས་ནི་བརྗོད་ནས་འཇིག་པ་ཡིན་ནོ། །དེ་ལྟ་བས་ན་འདི་དག་ལ་ཅིག་ཅར་གནས་པ་མེད་དོ། །རྫས་སུ་

ཡོད་པའི་ཆོས་གཅིག་ལ་ཇི་ལྟར་བུམ་པ་ལ་སོགས་པ་བཏགས་པའི་ཡོད་པ་ལ་བཏགས་པ་ལྟ་བུར་ཆ་ཤས་ཀྱིས་དུམ་བུར་སྐྱེ་བ་ཡང་རིགས་པ་མ་ཡིན་ན་སྐྱེད་པར་བྱེད་པ་ན་ཇི་ལྟར་གང་གིས་མིང་སྐྱེད་པར་བྱེད་དེ། ཚིག་གི་དོན་ནི་གང་གི་ཚེ་སྐྱེད་པར་བྱེད་པ་དེའི་ཚེ་ཇི་ལྟར་སྐྱེད་པར་
བྱེད་ཅེས་བྱ་བ་ཡིན་ནོ། །ད་ལྟའི་ངག་གིས་མིང་སྐྱེད་པར་བྱེད་ན་སྒྲའི་མཚན་ཉིད་ཀྱི་ངག་ཐམས་ཅད་ཅིག་ཅར་དུ་ད་ལྟར་ཡིན་པར་ནི་མེད་དེ། གཟུགས་ཞེས་བྱ་བ་ལ་གང་གི་ཚེ་ར་ཞེས་བྱ་བའི་སྒྲ་ད་ལྟ་ཡིན་པ་དེའི་ཚེ་ཨཱུ་ཞེས་བྱ་བ་དང་པ་ཞེས་བྱ་བ་དང་ཨ་ཞེས་བྱ་བ་དག་མ་
འོངས་པ་ཡིན་ནོ། །གང་གི་ཚེ་ཨཱུ་ཞེས་བྱ་བ་ད་ལྟར་ཡིན་པ་དེའི་ཚེ་ར་ཞེས་བྱ་བའི་སྒྲ་ནི་འདས་པ་ཡིན་ལ། པ་ཞེས་བྱ་བ་དང་ཨ་ཞེས་བྱ་བ་དག་ནི་མ་འོངས་པ་ཡིན་ནོ། །དེ་བཞིན་དུ་པ་ཞེས་བྱ་བ་དང་ར་ཞེས་བྱ་བ་དག་ཀྱང་གང་གི་ཚེ་རིམ་གྱིས་ད་ལྟར་ཡིན་པ་དེའི་ཚེ་དེ་ལས་གཞན་
པ་དག་འདས་པའམ། མ་འོངས་པ་ཡིན་ན་ཇི་ལྟར་ངག་དེས་མིང་སྐྱེད་པར་བྱེད། ཁྱོད་ད་ལྟར་གྱི་ར་ཞེས་བྱ་བས་ནི་གཟུགས་ཀྱི་མིང་དེའི་ཚེ་སྔ་མ་སྐྱེད་པར་བྱེད་དོ། །ད་ལྟར་གྱི་ཨཱུ་ཞེས་བྱ་བའི་སྒྲས་ཀྱང་ཆ་གཉིས་པ་སྐྱེད་པར་བྱེད་དོ། །དེ་བཞིན་དུ་ཨ་ཞེས་བྱ་བའི་སྒྲས་ཀྱང་དེའི་
ཆ་བཞི་པའི་བར་སྐྱེད་པར་བྱེད་དོ་ཞེས་སྨྲ་ན། ཆོས་གཅིག་ལ་ཆ་ཤས་ཀྱི་སྐྱེ་བ་མི་སྲིད་པའི་ཕྱིར་དེ་ནི་རིགས་པ་མ་ཡིན་ཏེ། དེ་ནི་བཤད་ཟིན་ཏོ། །རེ་ཞིག་ཇི་ལྟར་ན་འདས་པ་ལ་ལྟོས་པའི་རྣམ་པར་རིག་བྱེད་ཀྱི་སྐད་ཅིག་མ་ཐ་མས་རྣམ་པར་རིག་བྱེད་མ་ཡིན་པ་སྐྱེད་པར་བྱེད་ཅེས་བྱ་བ་ནི་
སོ་སོར་ཐར་པའི་སྡོམ་པ་ཡང་དག་པར་ལེན་པ་ན་ལུས་ཀྱི་རྣམ་པར་རིག་བྱེད་དང་ངག་གི་རྣམ་པར་རིག་བྱེད་དེ་དག་ཚོགས་པ་མེད་མོད་ཀྱི་འོན་ཀྱང་ལུས་དང་ངག་གི་རྣམ་པར་རིག་བྱེད་ཀྱི་སྐད་ཅིག་མ་འདས་པ་ལ་ལྟོས་པའི་རྣམ་པར་རིག་བྱེད་ཀྱི་སྐད་ཅིག་མ་ཐ་མས་སོ་སོར་ཐར་པས་
བསྡུས་པའི་རྣམ་པར་རིག་བྱེད་མ་ཡིན་པ་སྐྱེད་པར་བྱེད་དོ། །དེ་བཞིན་དུ་སྒྲའི་སྐད་ཅིག་མ་འདས་པ་ལ་ལྟོས་པའི་སྒྲའི་སྐད་ཅིག་མ་ཐམས་ཅད་ཀྱང་ལུས་དང་མིང་སྐྱེད་པར་བྱེད་དོ་ཞེའོ། །དེ་ལྟ་ན་འོ་ན་ནི་སྒྲ་ཐ་མ་ཁོ་ནས་ཞེས་བྱ་བ་རྒྱས་པར་སྨོས་ཏེ། སྒྲ་ཐ་མས་མི་སྐྱེད་པའི་ཕྱིར་

གང་གིས་དེ་གཅིག་ཁོ་ན་ཐོས་པ་སྟེ། གང་གིས་སྒྲ་ཐ་མ་གཅིག་ཁོ་ན་ཐོས་པ་དེས་ཀྱང་དོན་གོ་བར་འགྱུར་ཏེ་དེའི་མིང་སྐྱེས་པའི་ཕྱིར་དེས་ཀྱང་གཟུགས་ཀྱི་མིང་གིས་དོན་འཛིན་པར་འགྱུར་བ་ཞིག་ན་དེ་ལྟར་གོ་བ་ནི་མ་ཡིན་ནོ། །དེ་ལྟ་བས་ན་འདི་ནི་རིགས་པ་མ་ཡིན་
ནོ། །འོན་ཏེ་འདི་སྙམ་དུ་རྟོག་པར་བྱེད་ན་ཞེས་བྱ་བ་རྒྱས་པར་འབྱུང་བ་ནི་ངག་ཀྱང་ཡི་གེའི་སྐད་ཅིག་མར་སྣང་བ་ཡིན་ལ་ཡི་གེ་ཡང་དེར་སྣང་བ་ཡིན་པས། ངག་གིས་ནི་ཡི་གེ་སྐྱེད་པར་བྱེད་ལ་ཡི་གེས་ནི་མིང་སྐྱེད་པར་བྱེད་དོ་ཞེས་བྱ་བ་ཕྱོགས་གཞན་ཉེ་བར་འགོད་པར་བྱེད་པ་ཡིན་
ནོ། །འདི་ལ་ཡང་སྐྱོན་དེ་ཉིད་ཡོད་དེ་ཡི་གེ་རྣམས་ལ་ཚོགས་པ་མེད་པའི་ཕྱིར་རོ། །ཇི་ལྟ་ཞེ་ན། ཡང་ཡི་གེ་རྣམས་ནི་ཚོགས་པ་མེད་ལ་ཆོས་གཅིག་ལ་ཆ་ཤས་ཀྱིས་སྐྱེ་བ་ཡང་རིགས་པ་མ་ཡིན་ན་སྐྱེད་པར་བྱེད་པ་ན་ཇི་ལྟར་ཡི་གེས་མིང་སྐྱེད་པར་བྱེད། རེ་ཞིག་ཇི་ལྟར་ན་འདས་པ་
ལ་ལྟོས་པའི་རྣམ་པར་རིག་བྱེད་ཀྱི་སྐད་ཅིག་མ་ཐ་མས་རྣམ་པར་རིག་བྱེད་མ་ཡིན་པ་སྐྱེད་པར་བྱེད། དེ་ལྟ་ན་འོ་ན་ནི་ཡི་གེ་ཐ་མ་ཁོ་ནས་མིང་སྐྱེད་པར་བྱེད་པའི་ཕྱིར་གང་གིས་ཡི་གེ་སྐྱེད་པར་བྱེད་པའི་སྒྲ་ཐ་མ་དེ་གཅིག་ཁོ་ན་ཐོས་པའམ་གང་གིས་ཡི་གེ་དེ་གཅིག་ཁོ་ན་ཐོས་པ་དེས་ཀྱང་གོ་
བར་འགྱུར་རོ། །ངག་མིང་གསལ་བར་བྱེད་པ་ཡིན་ན་སྐྱོན་དེ་ཉིད་ཡོད་དོ་ཞེས་བྱ་བ་ནི་སྒྲ་རྣམས་ནི་ཚོགས་པ་མེད་ལ་ཆོས་གཅིག་ལ་ཆ་ཤས་ཀྱིས་གསལ་བར་ཡང་རིགས་པ་མ་ཡིན་ན་གསལ་བར་བྱེད་པ་ན་ཇི་ལྟར་ངག་གིས་མིང་གསལ་བར་བྱེད། རེ་ཞིག་ཇི་ལྟར་ན་འདས་པ་ལ་ལྟོས་པའི་
རྣམ་པར་རིག་བྱེད་ཀྱི་སྐད་ཅིག་མ་ཐ་མས་རྣམ་པར་རིག་བྱེད་མ་ཡིན་པ་སྐྱེད་པར་བྱེད། དེ་ལྟར་ན་འོ་ན་ནི་སྒྲ་ཐ་མ་ཁོ་ནས་མིང་གསལ་བར་བྱེད་པའི་ཕྱིར་གང་གིས་དེ་གཅིག་ཁོ་ན་ཐོས་པ་དེས་ཀྱང་དོན་གོ་བར་འགྱུར་རོ། །འོན་ཏེ་འདི་སྙམ་དུ་ངག་གིས་ན་ཡི་གེ་གསལ་བར་བྱེད་ལ་ཡི་གེས་ནི་
མིང་གསལ་བར་བྱེད་དོ་སྙམ་དུ་རྟོག་པར་བྱེད་ན་དེ་ལ་ཡང་སྐྱོན་དེ་ཉིད་ཡོད་དེ་ཡི་གེ་རྣམས་ཚོགས་པ་མེད་པའི་ཕྱིར་རོ། །འོ་ན་གང་གི་ལྟར་ན་མིང་ནི་སྒྲ་ཙམ་ཡིན་ཞིང་མིང་ཡི་གེ་དུ་མ་ཡང་ཡིན་ལ། ཡི་གེ་རྣམས་ཚོགས་པ་ཡང་མེད་པ་དེའི་ལྟར་ཇི་ལྟར་མིང་གི་དོན་རྗོད་པར་བྱེད་ཅེ་ན། དོན་ནི་

ཡི་གེ་ཐམས་ཅད་དྲན་པའི་རྗེས་ལ་གོ་བའི་ཕྱིར་རོ། །དེ་ཉིད་ཀྱི་ཕྱིར་མེད་ན་མེད་པའི་ཕྱིར་ཁ་ཅིག་གིས་ནི་ཡི་གེ་དང་པོ་ཐོས་པའི་ཚེ་ཉིད་ན་ཡི་གེ་ལྷག་མ་རྣམས་དྲན་པའི་སྟོབས་ཀྱིས་དོན་གོ་བར་འགྱུར་བ་ཁོ་ནའོ། །ངག་ནི་ཡི་གེ་སྐྱེད་པར་བྱེད་པ་ཡིན་པར་ཡང་མི་རུང་ལ་གསལ་བར་བྱེད་པ་
ཡིན་པར་ཡང་མི་རུང་ངོ་ཞེས་བྱ་བ་ནི་གོང་དུ་ནི་ཡི་གེ་སྒྲས་བསྐྱེད་པར་བྱ་བ་དང་། སྒྲས་གསལ་བར་བྱ་བ་ཡིན་པ་ལྟར་ཁས་བླངས་ནས་ཉེས་པར་བརྗོད་པ་ཡིན་ནོ། །ད་ནི་སྒྲ་ལ་མ་གཏོགས་པ་མི་དམིགས་པའི་ཕྱིར་དེ་ལ་བསྐྱེད་པར་བྱ་བ་དང་གསལ་བར་བྱ་བ་ཉིད་ཀྱང་མེད་དོ་ཞེས་དེ་ཉིད་དུ་
དྲུངས་ནས་འབྱིན་པར་བྱེད་པ་ཡིན་གྱི་སྒྲ་རྣམས་ནི་ཚོགས་པ་མེད་པའི་ཕྱིར་ཞེས་བྱ་བའི་སྐྱོན་བརྗོད་པར་བྱ་བ་ནི་མ་ཡིན་ཏེ། སྒྲ་དུ་མ་ལ་ལྟོས་ནས་ཡི་གེ་གོ་བ་ནི་མ་ཡིན་ནོ། །འོན་ཀྱང་ངག་ནི་ཡི་གེའི་ངོ་བོ་ཉིད་ཡིན་པའི་ཕྱིར་སྒྲ་ཙམ་ཐམས་ཅད་ཀྱིས་ཀྱང་ཡི་གེ་སྐྱེད་པར་འགྱུར་རོ། །འོན་ཏེ་
སྒྲའི་ཁྱད་པར་དེ་ལྟ་བུ་ཞིག་ཡི་གེ་སྐྱེད་པར་བྱེད་པ་འམ་གསལ་བར་བྱེད་པ་ཡིན་ནོ་ཞེ་ན། དེ་ཉིད་ཀྱིས་ཡི་གེའི་དོན་བྱེད་པར་འགྱུར་རོ། །འོན་ཏེ་མིང་དོན་དང་ལྷན་ཅིག་སྐྱེས་པ་ཡིན་ཏེ་སྐྱེ་བ་ལ་སོགས་པ་བཞིན་ནོ་ཞེས་བྱ་བར་འདོད་ན་ནི་ཞེས་བྱ་བ་རྒྱས་པར་འབྱུང་བ་ནི་མིང་དོན་དང་ལྷན་ཅིག་
སྐྱེ་བར་བརྟགས་ན་མིང་ནི་ངག་གིས་བསྐྱེད་པར་བྱ་བའམ། གསལ་བར་བྱ་བ་ཞེས་བྱ་བ་དེ་ལྟ་བུ་ལ་སོགས་པའི་ཉེས་པར་ཐལ་བར་མི་འགྱུར་རོ་སྙམ་དུ་བསམས་ནས་ཕྱོགས་གཞན་འདི་རྣམ་པར་རྟོག་པར་བྱེད་པ་ཡིན་ནོ། །ཇི་ལྟར་སྐྱེ་བ་ལ་སོགས་པ་མཚན་ཉིད་རྣམས་དོན་དང་ལྷན་ཅིག་སྐྱེ་བ་ཁོ་
ནར་འདོད་པས་དོན་འདས་པ་དང་མ་འོངས་པའི་ད་ལྟར་ངག་ཡིན་པར་མི་འགྱུར་བ་ལྟར་གལ་ཏེ་མིང་ཡང་དེ་དང་འདྲ་བར་འདོད་ན་ནི་དོན་འདས་པ་དང་མ་འོངས་པའི་མིང་ད་ལྟར་ཡིན་པར་མི་འགྱུར་ཏེ་དེས་ན་དོན་འདས་པ་དང་མ་འོངས་པ་ཐ་སྙད་གདགས་པར་མི་ནུས་སོ། །འདས་པ་དང་མ་འོངས་
པའི་མིང་གིས་དོན་བརྗོད་པར་ནི་འོས་པ་མ་ཡིན་ཏེ། དཔེར་ན་འདས་པ་དང་མ་འོངས་པའི་ངག་གིས་མིང་སྐྱེད་པའམ་གསལ་བར་བྱེད་པར་འོས་པ་མ་ཡིན་པ་བཞིན་ནོ། །མིང་མང་པོ་ཞིག་ཡོད་པ་ཉིད་ཡིན་ན་ལྷན་ཅིག་སྐྱེས་པའི་མིང་ཡོངས་སུ་ཆོད་པར་ཡང་མི་འགྱུར་རོ། །འདུས་

མ་བྱས་རྣམས་མི་སྐྱེ་བ་དང་ལྡན་པའི་ཕྱིར་མིང་ལྷན་ཅིག་སྐྱེ་བར་མི་འགྱུར་བས་འདི་ནི་མིང་འདོད་པ་ཉིད་དོ། །འདི་ནི་འདོད་པར་མི་བྱ་བ་ཁོ་ནའོ་སྙམ་དུ་བསམས་པ་ཡིན་ནོ། །ཚིགས་བཅད་མིང་ལ་བརྟེན་པ་སྟེ། །ཞེས་བྱ་བ་ནི་ཚིགས་སུ་བཅད་པ་ནི་ངག་ཡིན་ལ་དེ་ནི་
མིང་ལ་བརྟེན་པ་ཡིན་ཏེ་མིང་དག་བྱུང་ན་དེ་ཡོད་པའི་ཕྱིར་རོ། །དེ་ལྟ་བས་ན་མིང་རྣམས་དང་ཚིག་ཡོད་དོ་ཞེས་སྨྲ་བའི་སྐབས་ཡོད་པས། དེར་ཡང་དོན་རྣམས་ལ་མཚམས་བཅད་པའི་སྒྲ་ནི་མིང་ཡིན་ལ་ཞེས་བྱ་བ་རྒྱས་པར་སྨོས་ཏེ། དོན་ལ་མཚམས་བཅད་པའི་སྒྲའི་ངོ་བོ་ཉིད་ཀྱི་མིང་རྣམས་
བཀོད་པའི་ཁྱད་པར་ཡང་ཚིགས་སུ་བཅད་པ་ཡིན་ཏེ། བསྡེབས་པའི་ཁྱད་པར་ཅན་ཞེས་བྱ་བའི་ཐ་ཚིག་གོ། །ཕྲེང་བ་ལྟ་བུ་ཞེས་བྱ་བ་ནི་དཔེར་ན་གྲོག་མ་ལ་སོགས་པ་སྦྲེངས་པའི་ཁྱད་པར་གྱི་ཕྲེང་བ་དེ་ལས་རྫས་གཞན་འབྱུང་བ་མ་ཡིན་པ་དེ་དང་འདྲའོ། །ཕྲེང་བ་ནི་གྲོག་མ་ལ་སོགས་
པ་དུས་གཅིག་ན་ཡོད་པ་རྣམས་སྦྲེངས་པའི་ཁྱད་པར་ལ་བྱ་ལ་བཀོད་པའི་ཁྱད་པར་ནི་སྒྲ་རིམ་གྱིས་འབྱུང་བ་རྣམས་ཡིན་ཏེ། དེས་ན་མི་མཚུངས་སོ་ཞེས་སྨྲ་བའི་སྐབས་ལ་བརྟགས་ནས། དཔེ་གཉིས་པ་སེམས་ཀྱི་རིམ་པ་བཞིན་ནོ་ཞེས་བྱ་བ་ཉེ་བར་བཀོད་དེ་ཇི་ལྟར་སེམས་རིམ་གྱིས་འབྱུང་
བ་དག་ལས་རིམ་པ་གཞན་ཡོད་པ་མ་ཡིན་པ་དེ་དང་འདྲའོ། །རྟོག་པ་དོན་མེད་པ་ཡིན་ནོ་ཞེས་བྱ་བ་ནི་མིང་དང་ཚིག་དོན་གཞན་དུ་རྟོག་པ་དགོས་པ་མེད་དོ་ཞེས་བྱ་བའི་ཐ་ཚིག་གོ། །ཆོས་ཐམས་ཅད་རྟོག་གེའི་སྤྱོད་ཡུལ་མ་ཡིན་པས་ཞེས་བྱ་བ་ནི་ཁ་ཅིག་ཁོ་ན་རྟོག་གེའི་སྤྱོད་ཡུལ་ཡིན་གྱི་
ཐམས་ཅད་ནི་མ་ཡིན་ཏེ། གང་དག་དེ་བཞིན་གཤེགས་པའི་ཡེ་ཤེས་ཀྱི་སྤྱོད་ཡུལ་དུ་གཏོགས་པ་ཁོ་ན་ཡིན་པ་དེ་དག་རྟོག་གེའི་སྤྱོད་ཡུལ་མ་ཡིན་ནོ་སྙམ་དུ་བསམས་པ་ཡིན་ནོ། །སེམས་དང་མི་ལྡན་པའི་ཁྱད་པར་བརྗོད་པར་འདོད་ནས། ཡང་ཅི་མིང་གི་ཚོགས་པ་ལ་སོགས་པ་འདི་དག་
ལྡན་པའམ་ཞེས་བྱ་བ་རྒྱས་པར་སྨོས་ཏེ། ཅི་གང་དང་ལྡན་པ་ནི་ཁམས་གང་དང་ལྡན་པའོ། །སེམས་ཅན་དུ་སྟོན་པ་དང་། །སེམས་ཅན་དུ་སྟོན་པ་མ་ཡིན་པ་ཞེས་བྱ་བ་ནི་ཅི་ཞེས་བྱ་བ་ཡིན་ནོ། །འདོད་དང་གཟུགས་གཏོགས་སེམས་ཅན་སྟོན། །རྒྱུ་མཐུན་ལུང་བསྟན་མིན་ཞེས་བྱ་བ་ནི་འདོད་

པ་དང་གཟུགས་སུ་གཏོགས་པ་ཁོ་ནའོ། །སེམས་ཅན་དུ་སྟོན་པ་ཁོ་ནའོ། །རྒྱུ་མཐུན་པ་ཁོ་ནའོ་ཞེས་བྱ་བར་གཟུང་བ་ཡིན་ནོ། །དེ་དག་ནི་བརྗོད་པར་བྱ་བ་མ་ཡིན་ནོ་ཞེས་བྱ་བ་ནི་གཟུགས་མེད་པར་གཏོགས་པའི་མིང་གི་ཚོགས་ལ་སོགས་པ་དེ་དག་ནི་བརྗོད་པར་བྱ་བ་མ་ཡིན་པ་ཡིན་ཏེ། དེ་ན་
ཚིག་མེད་པའི་ཕྱིར་རོ། །བྱེ་བྲག་ཏུ་སྨྲ་བ་རྣམས་ན་རེ་གང་གི་ཚེ་དེ་དག་མི་བརྗོད་ན་དེ་དག་ཡོད་དོ་ཞེས་བྱ་བར་ཡང་ཇི་ལྟར་ཤེས། དེ་ལྟ་བས་ན་འདོད་པ་དང་གཟུགས་སུ་གཏོགས་པ་ཁོ་ན་ཡིན་གྱི་གཟུགས་མེད་པར་གཏོགས་པ་ནི་མ་ཡིན་ནོ་ཞེས་ཟེར་རོ། །སེམས་ཅན་དུ་སྟོན་པ་ཁོ་ན་ཡིན་ཏེ་
སེམས་ཅན་གྱི་རྩོལ་བ་ལས་བྱུང་བའི་ཡི་གེ་ལ་སོགས་པའི་ངོ་བོ་ཉིད་ཡིན་པའི་ཕྱིར་རོ། །གང་ཞིག་རྗོད་པར་བྱེད་པ་དེ་དེ་དག་དང་ལྡན་ཞེས་བྱ་བ་འདི་ཅི་ཞིག་ཏུ་ཐེ་ཚོམ་ཟ་བར་གྱུར་ཞེ་ན། འདིའི་མིང་ནི་འདིའོ་ཞེས་ཐ་སྙད་འདོགས་པའི་ཕྱིར་བརྗོད་པར་བྱ་བ་དང་ལྡན་པར་འགྱུར་རོ་སྙམ་མོ། །
དཔེར་ན་མིག་གི་དབང་པོ་དང་ནི་ལྟ་བར་བྱེད་པ་ཁོ་ན་དང་ལྡན་གྱི་བལྟ་བར་བྱ་བའི་སེམས་ཅན་དང་ནི་མ་ཡིན་པ་དེ་བཞིན་དུ་རྗོད་པར་བྱེད་པ་ཁོ་ན་དང་ལྡན་གྱི་བརྗོད་པར་བྱ་བ་དང་ནི་མ་ཡིན་ནོ། །སྐལ་བ་མཉམ་པའི་རྒྱུས་བསྐྱེད་པའི་ཕྱིར་རྒྱུ་མཐུན་པ་ལས་བྱུང་བ་ཁོ་ན་ཡིན་གྱི་འདོད་དགུ་
ན་འབྱུང་བའི་ཕྱིར་རྣམ་པར་སྨིན་པ་ལས་སྐྱེས་པ་ཡང་མ་ཡིན་ལ་གཟུགས་ཅན་མ་ཡིན་པ་རྣམས་ལ་བསགས་པ་མེད་པའི་ཕྱིར་རྒྱས་པ་ལས་བྱུང་བ་ཡང་མ་ཡིན་ནོ། །མ་བསྒྲིབས་ལ་ལུང་དུ་མ་བསྟན་པ་དག་ཡིན་གྱི་དགེ་བ་དང་མི་དགེ་བ་དག་ནི་མ་ཡིན་ནོ། །ཅིའི་ཕྱིར་ཞེ་ན།
དགེ་བའི་རྩ་བ་ཀུན་དུ་ཆད་པ་དང་འདོད་ཆགས་དང་བྲལ་བ་རྣམས་ཀྱང་དེ་དག་དང་མི་ལྡན་པར་ཐལ་བར་འགྱུར་ཏེ། དེ་ལྟ་མ་ཡིན་ནོ། །གང་གི་ཚེ་དགེ་བའི་རྩ་བ་ཀུན་དུ་ཆད་པ་ཞིག་དགེ་བའི་ཆོས་རྣམས་རྗོད་པར་བྱེད་པ་དེའི་ཚེ་འདི་དགེ་བའི་ཆོས་དང་ལྡན་པར་འགྱུར་ལ། དེ་བཞིན་དུ་
འདོད་ཆགས་དང་བྲལ་བ་མི་དགེ་བའི་ཆོས་རྗོད་པར་བྱེད་པ་ལ་ཡང་སྦྱར་བར་བྱའོ། །དེ་ལྟ་བས་ན་མ་བསྒྲིབས་ལ་ལུང་དུ་མ་བསྟན་པ་དག་ཁོ་ན་ཡིན་ཏེ་མ་བསྒྲིབས་ལ་ལུང་དུ་མ་བསྟན་པ་རྣམས་ནི་དགེ་བ་དང་མི་དགེ་བ་དག་དང་མི་འགལ་བའི་ཕྱིར་རོ། །དེ་བཞིན་སྐལ་བ་མཉམ་ཞེས་བྱ་བ་

ལ་དེ་བཞིན་ཞེས་