Luận tạng Tây Tạng (Tengyur) — Tập 142

ར་ངེས་པར་འབྱེད་
པའི་ཆ་དང་མཐུན་པ་དང་འདྲ་བའི་སྤྱི་ཡིད་ལ་བྱེད་པ་གང་ཞིག་འཐོབ་པར་འགྱུར་བ་སྟེ། ཟག་པ་མེད་པའི་ལམ་སྐྱེ་བའི་ཚེ་ཐོབ་པར་འགྱུར་བ་ཞེས་བྱ་བའི་ཐ་ཚིག་གོ། །ཇི་ལྟར་ཞེ་ན། མྱ་ངན་ལས་འདས་པ་ནི་ཞི་བའོ་སྙམ་པ་ནི་མྱ་ངན་ལས་འདས་པ་ལས་ཐམས་ཅད་ལ་
དམིགས་པའི་ཕྱིར་སྤྱི་ཡིད་ལ་བྱེད་པ་ཡིན་ནོ། །དེ་མངོན་དུ་བྱེད་པར་འགྱུར་རོ་ཞེས་བྱ་བ་ནི་འཕགས་པའི་ལམ་གྱི་མཇུག་ཐོགས་སུ་འདུ་བྱེད་ཐམས་ཅད་ནི་མི་རྟག་པའོ་སྙམ་པའམ་ཆོས་ཐམས་ཅད་ནི་བདག་མེད་པའོ་སྙམ་པའམ་མྱ་ངན་ལས་འདས་པ་ནི་ཞི་བའོ་སྙམ་པ་མངོན་
དུ་བྱེད་པར་འགྱུར་རོ། །དེ་སྐད་དུ་ནི་མི་བརྗོད་དོ། །ཅིའི་ཕྱིར་ཞེ་ན། དེ་དང་འདྲ་བའི་སྤྱི་ཡིད་ལ་བྱེད་པ་འདི་དག་ནི་ངེས་པར་འབྱེད་པའི་ཆ་དང་མཐུན་པ་ལ་རག་ལས་ནས་འཐོབ་པའི་ཕྱིར་ཏེ། འདི་དག་ཟག་པ་མེད་པའི་ལམ་དུ་རག་ལུས་ཏེ་འཐོབ་པ་ནི་མ་ཡིན་ནོ་ཞེས་གྲག་
གོ། །མི་ལྕོགས་པ་མེད་པ་ལ་བརྟེན་ནས་ཞེས་བྱ་བ་རྒྱས་པར་འབྱུང་བ་ལ་དེའི་ས་པ་ཞེས་བྱ་བ་ནི་མི་ལྕོགས་པ་མེད་པའི་ས་པའོ། །དེའི་ས་པའམ་སྲིད་པའི་རྩེ་མོ་པ་ཡིན་ནོ་ཞེས་བྱ་བ་ནི་ཅི་ཡང་མེད་པའི་སྐྱེ་མཆེད་ཀྱི་ས་པའམ་སྲིད་པའི་རྩེ་མོ་པ་སྟེ། གལ་ཏེ་སྲིད་པའི་རྩེ་མོར་
སྐྱེས་པ་ཞིག་ཡིན་ནའོ། །ས་ལྷག་མ་རྣམས་སུ་ནི་ལྡང་བའི་སེམས་རང་གི་ས་པ་ཁོ་ན་ཡིན་གྱི་གཞན་གྱི་ས་པ་ནི་མ་ཡིན་ཏེ། གཞན་གྱི་ས་པ་ནི་སྦྱོར་བས་བསྒྲུབ་པར་བྱ་བ་ཡིན་པའི་ཕྱིར་ལ། རང་གི་ས་པ་ནི་མངོན་པར་འདུ་བྱ་བ་མེད་པར་འབྱུང་བས་སོ། །སྦྱོར་བ་ལ་རག་ལུས་
པའི་ཕྱིར་རོ་ཞེས་བྱ་བ་ཅི་ཞེ་ན། འཕགས་པའི་ལམ་མོ། །ལམ་གྱི་མཇུག་ཐོགས་སུ་ནི་འདོད་པ་ན་སྤྱོད་པའི་སྐྱེས་ནས་ཐོབ་པ་ཡང་མངོན་དུ་འགྱུར་རོ་ཞེས་བྱ་བར་སྐབས་དང་སྦྱར་རོ། །ཁམས་གསུམ་པ་ཡི་ཉོན་མོངས་ཅན། །ཞེས་བྱ་བ་རྒྱས་པར་འབྱུང་བ་ནི་གྲངས་བཞིན་

དུ་བསྟན་པ་ཡིན་ཏེ། འདོད་པ་ན་སྤྱོད་པའི་ཉོན་མོངས་པ་ཅན་ལ་ནི་སེམས་དྲུག་རྙེད་དེ་སོ་སོར་རྙེད་དོ་ཞེས་བྱ་བའི་ཐ་ཚིག་གོ། །གཟུགས་ན་སྤྱོད་པ་ལ་ཡང་དྲུག་གོ། །གཟུགས་མེད་པ་ན་སྤྱོད་པ་ལ་ནི་གཉིས་སོ། །དེའི་ཕྱིར་འདོད་པ་ན་སྤྱོད་པའི་ཉོན་མོངས་པ་ཅན་ཞེས་བྱ་བ་
རྒྱས་པར་སྨོས་ཏེ། སེམས་དྲུག་པོ་འདི་དག་དང་མི་ལྡན་པ་ཞེས་བྱ་བ་ནི་སེམས་དྲུག་པོ་འདི་དག་དང་མི་ལྡན་པའི་གང་ཟག་གོ། །ཇི་ལྟ་ཞེ་ན། འདི་ན་དགེ་བའི་རྩ་བའི་ཉིང་མཚམས་སྦྱོར་བ་ནི་ཡང་དག་པའི་ལྟ་བའམ་ཐེ་ཚོམ་གྱིས་ཡིན་ཏེ། དེ་གལ་ཏེ་ཐེ་ཚོམ་གྱིས་
ཉིང་མཚམས་སྦྱོར་བར་བྱེད་ན། དེ་ལ་ཐེ་ཚོམ་དང་མཚུངས་པར་ལྡན་པའི་ཉོན་མོངས་པ་ཅན་གྱི་སེམས་མངོན་དུ་གྱུར་པ་དང་། གང་གི་ཚེ་གཟུགས་ཀྱི་ཁམས་དང་གཟུགས་མེད་པའི་ཁམས་ནས་འདོད་པའི་ཁམས་སུ་སླར་ལྡོག་པ་དེའི་ཚེ་འདིའི་སྲིད་པ་བར་མ་ཉིང་
མཚམས་སྦྱོར་བའི་ཉོན་མོངས་པ་ཅན་གྱི་སེམས་ལ་གདོན་མི་ཟ་བར་དགེ་བ་དེ་རྙེད་པ་ཡིན་ནོ། །མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དག་ཅེས་བྱ་བ་རྒྱས་པར་འབྱུང་བ་ནི་སྐབས་ཡིན་པའི་ཕྱིར་དང་། གཟུགས་ན་སྤྱོད་པའི་བསྒྲིབས་ལ་ལུང་དུ་མ་བསྟན་པ་ཡང་ལོགས་
ཤིག་ནས་འབྱུང་བའི་ཕྱིར་འདོད་པ་ན་སྤྱོད་པའི་མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དག་ཁོ་ན་ཡིན་ཏེ། མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དེ་དག་དང་གཟུགས་ན་སྤྱོད་པའི་ཉོན་མོངས་པ་ཅན་ཏེ། ཅི་ཞེ་ན། རྙེད་ཅེས་བྱ་བར་སྐབས་དང་སྦྱར་རོ། །ཇི་ལྟར་
རྙེད་ཅེ་ན་ཁམས་སུ་སླར་ལྡོག་པ་དང་། ཡོངས་སུ་ཉམས་པ་ལས་ཞེས་བྱ་བ་སྨོས་ཏེ། གང་གི་ཚེ་གཟུགས་ཀྱི་ཁམས་སམ། གཟུགས་མེད་པའི་ཁམས་ནས་འདོད་པའི་ཁམས་སུ་སླར་ལྡོག་པ་དེའི་ཚེ་འདི་སྲིད་པ་བར་མར་ཉིང་མཚམས་སྦྱོར་བ་ཉོན་མོངས་པ་ཅན་གྱི་སེམས་
མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དག་ལས་གང་ཡང་རུང་བ་ཞིག་ཏུ་མངོན་དུ་གྱུར་པ་ན་གདོན་མི་ཟ་བར་སྔོན་རྣམ་པར་ཉམས་པའི་ཕྱིར་དེ་དག་དང་མི་ལྡན་པ་ལས་མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དེ་དག་རྙེད་པར་འགྱུར་རོ། །ཡོངས་སུ་ཉམས་པ་ལས་

གང་གི་ཚེ་འདོད་པའི་འདོད་ཆགས་དང་བྲལ་བ་ལས་ཡོངས་སུ་ཉམས་པ་དེའི་ཚེ་འདི་ལ་ཡོངས་སུ་ཉམས་པའི་སེམས་ཉོན་མོངས་པ་ཅན་མངོན་དུ་གྱུར་ན་དེ་དག་དང་མི་ལྡན་པ་ལས་ཉོན་མོངས་པ་ཅན་དེ་དག་རྙེད་པ་ཡིན་ནོ། །ཁམས་སུ་སླར་ལྡོག་པ་ལས་
གཟུགས་ན་སྤྱོད་པའི་ཉོན་མོངས་པ་ཅན་ནི་གང་གི་ཚེ་གཟུགས་མེད་པའི་ཁམས་ནས་འདོད་པའི་ཁམས་སུ་སླར་ལྡོག་པ་དེའི་ཚེ་འདིའི་སྲིད་པ་བར་མར་ཉིང་མཚམས་སྦྱོར་བའི་ཉོན་མོངས་པ་ཅན་གྱི་སེམས་ལ་གདོན་མི་ཟ་བར་དེ་དང་མི་ལྡན་པ་ལས་གཟུགས་ན་སྤྱོད་པའི་ཉོན་
མོངས་པ་ཅན་སྔོན་ཉམས་པ་རྙེད་པར་འགྱུར་རོ། །ཡོངས་སུ་ཉམས་པ་ལས་ནི་གང་གི་ཚེ་འདོད་པ་ན་སྤྱོད་པའི་སེམས་ཀྱིས་གཟུགས་ཀྱི་འདོད་ཆགས་དང་བྲལ་བ་ལས་ཡོངས་སུ་ཉམས་པ་དེའི་ཚེ་དེ་དང་མི་ལྡན་པ་ལས་གཟུགས་ན་སྤྱོད་པའི་ཉོན་མོངས་པ་ཅན་རྙེད་པར་འགྱུར་
རོ། །ཡོངས་སུ་ཉམས་པ་ལས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་ནི་གང་གི་ཚེ་འདོད་པ་ན་སྤྱོད་པའི་སེམས་ཀྱིས་གཟུགས་མེད་པའི་འདོད་ཆགས་དང་བྲལ་བ་ལས་ཡོངས་སུ་ཉམས་པ་དེའི་ཚེ་འདི་དེ་དང་མི་ལྡན་པ་ལས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་རྙེད་
པར་འགྱུར་རོ། །སློབ་པ་ཡང་ཡོངས་སུ་ཉམས་པ་ལས་ཞེས་བྱ་བ་སྐབས་དང་སྦྱར་ཏེ། གང་གི་ཚེ་འདོད་པ་ན་སྤྱོད་པའི་སེམས་ཀྱིས་དགྲ་བཅོམ་པ་ཉིད་ལས་ཡོངས་སུ་ཉམས་པ་དེའི་ཚེ་འདི་དེ་དང་མི་ལྡན་པ་ལས་སློབ་པའི་སེམས་རྙེད་པར་འགྱུར་རོ། །དེ་ལྟར་ན་རེ་ཞིག་འདོད་པ་
ན་སྤྱོད་པའི་ཉོན་མོངས་པ་ཅན་གྱི་སེམས་མངོན་དུ་གྱུར་ན་དེ་དག་དང་མི་ལྡན་པ་ལས་སེམས་དྲུག་རྙེད་པར་བཤད་པ་ཡིན་ནོ། །གཟུགས་ན་སྤྱོད་པའི་ཉོན་མོངས་པ་ཅན་གྱི་སེམས་མངོན་དུ་གྱུར་ན་ཡང་དེ་དག་དང་མི་ལྡན་པ་ལས་དྲུག་རྙེད་དོ། །གཟུགས་ན་སྤྱོད་པ་གསུམ་ཞེས་བྱ་བ་
རྒྱས་པར་འབྱུང་བ་ཞེས་བྱ་བ་ནི་གང་གི་ཚེ་གཟུགས་མེད་པའི་ཁམས་ནས་གཟུགས་ཀྱི་ཁམས་སུ་སླར་ལྡོག་པ་དེའི་ཚེ་འདི་གཟུགས་ན་སྤྱོད་པའི་སྲིད་པ་བར་མར་ཉིང་མཚམས་སྦྱོར་བའི་ཉོན་མོངས་པ་ཅན་གྱི་སེམས་ལ་གདོན་མི་ཟ་བར་གཟུགས་ན་སྤྱོད་པ་གསུམ་སྟེ། སྐྱེས་ནས་

ཐོབ་པའི་དགེ་བ་དང་ཉོན་མོངས་པ་ཅན་དང་ཐོབ་པ་སྔར་སྐྱེ་བ་ཡོད་པའི་ཕྱིར་མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་དང་། འདོད་པ་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་ཁོ་ན་དང་ཡོངས་སུ་ཉམས་པ་ལས་གཟུགས་ན་སྤྱོད་པའི་སེམས་
ཀྱིས་དགྲ་བཅོམ་པ་ཉིད་ལས་ཡོངས་སུ་ཉམས་པ་དེ་དང་མི་ལྡན་པ་ལས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་དང་སློབ་པ་རྙེད་དེ། དེ་ལྟར་ན་གཟུགས་ན་སྤྱོད་པའི་ཉོན་མོངས་པ་ཅན་ལ་ཡང་དྲུག་རྙེད་པར་བཤད་པ་ཡིན་ནོ།། །།བམ་པོ་ཉི་ཤུ་གཉིས་
པ། གཟུགས་མེད་པ་ན་སྤྱོད་པའི་ཉོན་མོངས་པ་ཅན་ལ་ནི་དེ་དག་དང་མི་ལྡན་པ་ལས་གཉིས་རྙེད་དེ། ཡོངས་སུ་ཉམས་པ་ལས་གཟུགས་མེད་པ་ན་སྤྱོད་པའི་སེམས་ཀྱིས་དགྲ་བཅོམ་པ་ཉིད་ལས་ཡོངས་སུ་ཉམས་པས་གང་གི་ཕྱོགས་གཅིག་མངོན་དུ་གྱུར་པའི་ཉོན་མོངས་
པ་ཅན་དེ་ཉིད་དང་སློབ་པའོ། །གཟུགས་ན་སྤྱོད་པའི་དགེ་བ་ལ་སེམས་གསུམ་ཞེས་བྱ་བ་ལ། དགེ་བ་ལ་ཞེས་བྱ་བ་ནི་སྤྱིར་བསྟན་པར་ཟད་དེ། གཟུགས་ན་སྤྱོད་པའི་དགེ་བ་འགའ་ལ་ཅི་རིགས་པར་གསུམ་རྙེད་པ་ཡིན་ནོ། །ཇི་ལྟར་ཞེ་ན། རེ་ཞིག་གཟུགས་ན་སྤྱོད་པའི་
དགེ་བའི་སེམས་དང་པོ་མངོན་དུ་གྱུར་ན་དེ་དང་མི་ལྡན་པ་ལས་གཟུགས་ན་སྤྱོད་པའི་དགེ་བ་དེ་ཉིད་རྙེད་ལ། དངོས་གཞིའི་བསམ་གཏན་གྱིས་བསྡུས་པའི་དགེ་བའི་སེམས་མངོན་དུ་གྱུར་ན་དེ་དག་དང་མི་ལྡན་པ་ལས་འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་
དུ་མ་བསྟན་པ་སྤྲུལ་པའི་སེམས་དག་རྙེད་དེ། དེ་ལྟར་ན་གཟུགས་ན་སྤྱོད་པའི་དགེ་བའི་སེམས་མངོན་དུ་གྱུར་ན་གསུམ་རྙེད་དོ་ཞེས་བཤད་དོ། །གསུམ་པོ་ཅིག་ཅར་དུ་རྙེད་དོ་ཞེས་བྱ་བ་སྲིད་པ་ནི་མ་ཡིན་ནོ། །སློབ་པ་ལ་བཞི་ཞེས་བྱ་བ་རྒྱས་པར་འབྱུང་བ་ནི་སློབ་པའི་
སེམས་སྡུག་བསྔལ་ལ་ཆོས་ཤེས་པའི་བཟོད་པའི་སེམས་མངོན་དུ་གྱུར་ན་དེ་དང་མི་ལྡན་པ་ལས་སློབ་པ་སྡུག་བསྔལ་ལ་ཆོས་ཤེས་པའི་བཟོད་པའི་ཚོགས་ཀྱི་ངོ་བོ་ཉིད་དེ་ཉིད་རྙེད་དོ། །འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་དག་དང་

གཟུགས་མེད་པ་ན་སྤྱོད་པའི་དགེ་བ་ཡང་རྙེད་དོ། །གང་གི་ཚེ་ཞེ་ན། འཕགས་པའི་ལམ་གྱིས་འདོད་པ་དང་གཟུགས་ཀྱི་ཁམས་ལས་འདོད་ཆགས་དང་བྲལ་བར་བྱེད་པ་ནའོ། །ཇི་ལྟ་ཞེ་ན། གང་གི་ཚེ་འདི་མི་ལྕོགས་པ་མེད་པའི་ས་པའི་
འཕགས་པའི་ལམ་གྱིས་འདོད་པ་ལས་འདོད་ཆགས་དང་བྲལ་བར་བྱེད་པ་དེའི་ཚེ་སློབ་པའི་སེམས་རྣམ་པར་གྲོལ་བའི་ལམ་དགུ་པས་བསྡུས་པ་མངོན་དུ་གྱུར་པ་ན་དེ་དག་དང་མི་ལྡན་པ་ལས་འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་
དག་རྙེད་ལ། གང་གི་ཚེ་ས་དྲུག་པའི་འཕགས་པའི་ལམ་རྣམས་ལས་གང་ཡང་རུང་བ་ཞིག་གིས་གཟུགས་ལས་འདོད་ཆགས་དང་བྲལ་བར་བྱེད་པ་དེའི་ཚེ་སློབ་པའི་སེམས་རྣམ་པ་དང་པོ་མངོན་དུ་གྱུར་པ་ན་དེ་དང་མི་ལྡན་པ་ལ་འདས་པ་དང་མ་འོངས་པ་འཐོབ་པའི་ཚུལ་
གྱིས་གཟུགས་མེད་པ་ན་སྤྱོད་པའི་དགེ་བའི་སེམས་རྙེད་དོ། །འཕགས་པའི་ལམ་ཞེས་སྨོས་པ་ནི་ཟག་པ་དང་བཅས་པའི་སེམས་བརྩལ་བའི་ཕྱིར་ཏེ། རྙེད་པ་འདི་ནི་སློབ་པའི་སེམས་མངོན་དུ་གྱུར་པ་ཡིན་པར་བཤད་དོ། །འདི་ལ་སློབ་དཔོན་ཡོན་ཏན་བློ་གྲོས་ན་རེ། སློབ་པ་ལ་
བཞི། སློབ་པ་དེ་ཉིད་དང་། འཕགས་པའི་ལམ་གྱིས་འདོད་པ་དང་གཟུགས་ཀྱི་ཁམས་ལས་འདོད་ཆགས་དང་བྲལ་བར་བྱེད་པ་ན་འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་དག་དང་གཟུགས་མེད་པའི་དགེ་བའོ་ཞེས་བྱ་བ་ཇི་ལྟ་བུ་ཞེ་ན། དེའི་ཕྱིར་
བཤད་པ། འཕགས་པའི་ལམ་གྱིས་འདོད་པ་དང་གཟུགས་ཀྱི་ཁམས་ལས་འདོད་ཆགས་དང་བྲལ་བར་བྱེད་པ་ན་སྟེ། གང་གི་ཚེ་འདི་མི་ལྕོགས་པ་མེད་པའི་ས་པའི་འཕགས་པའི་ལམ་གྱིས་འདོད་པའི་ཁམས་ལས་འདོད་ཆགས་དང་བྲལ་བར་བྱེད་པ་དེའི་ཚེ་རྣམ་པར་
གྲོལ་བའི་ལམ་དགུ་པ་གང་ཡིན་པ་དེ་ནི་དངོས་གཞིའི་བསམ་གཏན་གྱི་ས་པའི་ལམ་གྱི་སློབ་པ་འཐོབ་པས་སློབ་པ་རྙེད་ཅེས་བྱ་ལ། འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་དག་ཀྱང་དེ་ཁོ་ནའི་ཚེ་རྙེད་དོ། །ས་དྲུག་གི་འཕགས་

པའི་ལམ་གྱིས་གཟུགས་ཀྱི་ཁམས་ལས་འདོད་ཆགས་དང་བྲལ་བ་ན་རྣམ་པར་གྲོལ་བའི་ལམ་དགུ་པ་གང་ཡིན་པ་དེ་ནི་གཟུགས་མེད་པ་ན་སྤྱོད་པའི་དགེ་བ་རྙེད་པ་ཡིན་ནོ་ཞེས་ཟེར་ལ། དེའི་སློབ་མ་སློབ་དཔོན་དབྱིག་བཤེས་ཀྱང་དོན་དེ་ཁོ་ན་དག་དེ་དང་ཚིག་དང་ཡི་གེ་དག་ཁོ་
ན་འདྲི་བར་བྱེད་དོ། །བཤད་པ་འདི་ནི་རིགས་པ་མ་ཡིན་ཏེ། དེ་ལྟར་ཚིག་གཅིག་ཏུ་བཤད་ན་དོན་རུང་བ་མ་ཡིན་གྱི་ཚིག་ཐ་དད་པར་ནི་རུང་ངོ་། །སློབ་པ་དེ་ཉིད་ཅེས་བྱ་བ་ནི་ཚིག་གཅིག་ཡིན་ནོ། །འཕགས་པའི་ལམ་ཞེས་བྱ་བ་ནས་འདོད་པ་དང་གཟུགས་ན་སྤྱོད་པའི་མ་
བསྒྲིབས་ལ་ལུང་དུ་མ་བསྟན་པ་དག་ཅེས་བྱ་བའི་བར་ནི་ཚིག་གཞན་ཡིན་ནོ། །འཕགས་པའི་ལམ་གྱིས་འདོད་པ་དང་གཟུགས་ཀྱི་ཁམས་ལས་འདོད་ཆགས་དང་བྲལ་བར་བྱེད་པ་ན་ཞེས་བྱ་བའི་ཁྱད་པར་འདིས་ནི་གོང་དུ་སློབ་པ་དེ་ཉིད་ཅེས་བཤད་པ་དེ་ཁྱད་པར་དུ་བྱ་བ་མ་ཡིན་
ཏེ་ཚིག་ཐ་དད་པའི་ཕྱིར་རོ། །ལྡན་པ་མིན་ལས་རྙེད་ཅེས་བྱ་བ་བྱུང་བའི་ཕྱིར་སེམས་ཀྱིས་རྙེད་པ་འདི་ནི་དེ་དང་མི་ལྡན་པ་ལས་ཡིན་པར་བརྗོད་ན། དེ་ཇི་ལྟར་རྣམ་པར་གྲོལ་བའི་ལམ་དགུ་པ་ལ་སློབ་པའི་སེམས་དང་ལྡན་པའི་གང་ཟག་ལ་སློབ་པའི་སེམས་རྙེད་པར་རྣམ་པར་གཞག །
དངོས་གཞིའི་བསམ་གཏན་གྱི་སློབ་པ་སྔོན་མེད་པ་རྙེད་པར་འགྱུར་རོ་ཞེས་བཤད་པ་མ་ཡིན་ནམ་ཞེ་ན། ཧ་ཅང་ཐལ་བར་འགྱུར་བའི་ཕྱིར་མ་ཡིན་ཏེ། གཟུགས་ན་སྤྱོད་པའི་དགེ་བའི་སེམས་དངོས་གཞིའི་བསམ་གཏན་གྱི་ས་པ་སྔོན་མེད་པའང་རྙེད་པར་འགྱུར་བས་དེ་
ཡང་རྙེད་པར་ཐལ་བར་འགྱུར་རོ། །སློབ་དཔོན་དབྱིག་བཤེས་ན་རེ་སློབ་པའི་སེམས་ལ་གནས་པ་འདོད་པའི་ཁམས་ལས་འདོད་ཆགས་དང་བྲལ་བ་ན་གཟུགས་ན་སྤྱོད་པའི་དགེ་བ་ནི་ངེས་པ་ལ་འཇུག་པའི་དྲོ་བར་གྱུར་པའི་གནས་སྐབས་ཉིད་ན་ཐོབ་ཟིན་པའི་ཕྱིར་མི་བགྲང་
ངོ་ཞེས་ཟེར་རོ། །དེ་ནི་རིགས་པ་མ་ཡིན་ཏེ། སློབ་པའང་མི་བགྲང་བར་འགྱུར་བའི་ཕྱིར་རོ། །སློབ་པའང་མཐོང་བའི་ལམ་གྱི་གནས་སྐབས་དང་པོ་ན་ཐོབ་ཟིན་པས་ཁྱོད་ཀྱིས་དེ་ལྟར་རྣམ་པར་མི་གཞག་པར་བྱ་དགོས་པར་འགྱུར་རོ། །གང་གི་ཕྱིར་སློབ་དཔོན་ཉིད་

ཀྱིས་སྤེལ་མའི་ཚིགས་སུ་བཅད་པ་བཤད་པ་ཁོ་ན་ལས། ངེས་འཇུག་དགྲ་བཅོམ་ཉིད་ཀྱི་ཚེ། །སློབ་པ་དང་མི་སློབ་པའོ་ཞེས་བཤད་པ་དེའི་ཕྱིར་ཡང་ཉེས་པར་བཤད་པ་ཡིན་ནོ་ཞེས་བྱ་བར་ངེས་སོ། །ལྷག་མར་བཅས་པས་ལྷག་མ་སྟེ་
ཞེས་བྱ་བ་ནི་སེམས་གང་ལ་རྙེད་པ་མ་བཤད་པ་དེ་ལ་ནི་དེ་ཉིད་རྙེད་དོ་ཞེས་བྱ་བ་ཡིན་ནོ། །ཇི་ལྟ་བུར་ཞེ་ན་རེ་ཞིག་འདོད་པ་ན་སྤྱོད་པའི་དགེ་བའི་སེམས་ལ་སེམས་འདི་རྙེད་ཅིང་རྙེད་དོ་ཞེས་མ་བཤད་པས་དེ་ལ་ནི་དེ་ཁོ་ན་རྙེད་ཀྱི་གཞན་དག་ནི་མ་ཡིན་ཏེ། དཔེར་ན་ཡང་
དག་པའི་ལྟ་བས་དགེ་བའི་རྩ་བའི་ཉིང་མཚམས་སྦྱོར་བར་བྱེད་པའི་ཚེ་འདོད་པ་ན་སྤྱོད་པའི་དགེ་བའི་སེམས་མངོན་དུ་གྱུར་ན། དེ་དང་མི་ལྡན་པ་ལས་དགེ་བའི་སེམས་དེ་ཁོ་ན་རྙེད་ཀྱི་གཞན་ཉོན་མོངས་པ་ཅན་དག་ནི་མ་ཡིན་ཏེ། ཁམས་གསུམ་ཆར་ཡང་སྔར་ཐོབ་ཟིན་
པའི་ཕྱིར་རོ། །འདོད་པ་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་ཡང་མ་ཡིན་ཏེ། རྣམ་པར་སྨིན་པ་ལ་སོགས་པའི་ཐོབ་པ་ནི་ལྷན་ཅིག་སྐྱེ་བ་ཡིན་པའི་ཕྱིར་ལ། སྤྲུལ་པའི་སེམས་ནི་ཐོབ་པ་མེད་པའི་ཕྱིར་རོ། །གཟུགས་དང་གཟུགས་མེད་པ་ན་སྤྱོད་པའི་དགེ་བ་
ལ་སོགས་པ་དང་སློབ་པ་དང་མི་སློབ་པ་དག་ཀྱང་མ་ཡིན་ཏེ་ཐོབ་པ་མེད་པའི་ཕྱིར་རོ། །འདོད་པ་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པའི་སེམས་ལ་ཡང་དེ་རྙེད་པར་བཤད་དེ། དེ་ལ་ཡང་དེ་དང་མི་ལྡན་པ་ལས་དེ་ཁོ་ན་རྙེད་པ་ཡིན་ཏེ། ལུང་བསྟན་མིན་འཐོབ་ལྷན་ཅིག་
སྐྱེ། །ཞེས་བྱ་བ་ཡིན་པའི་ཕྱིར་རོ། །དགེ་བ་ལ་སོགས་པ་གཞན་དག་ནི་མ་ཡིན་ཏེ། སྔར་ཐོབ་ཟིན་པའི་ཕྱིར་དང་། དེ་བཞིན་ཉིད་དུ་ཁ་ཅིག་ཐོབ་པ་མེད་པའི་ཡང་ཕྱིར་རོ། །སྤྲུལ་པའི་སེམས་མངོན་དུ་གྱུར་ན་ནི། འགའ་ཡང་རྙེད་པ་མེད་པས་དེ་ནི་བརྗོད་པར་མི་བྱའོ། །ཉོན་མོངས་པ་
ཅན་ནམ་གཞན་ཡང་རུང་གང་ལ་འགའ་ཡང་ཐོབ་པ་མེད་པ་དེ་ནི་བརྗོད་པར་མི་བྱའོ། །ཁམས་གསུམ་པའི་ཉོན་མོངས་པ་ཅན་ཁོ་ན་ལ་དྲུག་ནས་གཉིས་ཀྱི་བར་རྙེད་ལ། གདོན་མི་ཟ་བ་ནི་མ་ཡིན་ནོ་ཞེས་བྱ་བར་ངེས་པར་གཟུང་ངོ་། །གཟུགས་ན་སྤྱོད་པའི་མ་བསྒྲིབས་ལ་

ལུང་དུ་མ་བསྟན་པ་མངོན་དུ་གྱུར་ན་ཡང་། དེ་ཁོ་ན་རྙེད་ཀྱི་གཞན་དག་ནི་མ་ཡིན་ཏེ། སྔ་མ་བཞིན་དུ་བརྗོད་པར་བྱའོ། །དེ་བཞིན་དུ་གཟུགས་མེད་པ་ན་སྤྱོད་པའི་དགེ་བའི་སེམས་རྣམ་པ་དང་པོས་བསྡུས་པ་ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་མངོན་དུ་
གྱུར་ན་ཡང་དེ་དང་མི་ལྡན་པ་ལས་དེ་ཁོ་ན་རྙེད་ཀྱི་གཞན་དག་ནི་མ་ཡིན་ཏེ། ཁ་ཅིག་ནི་སྔར་ཐོབ་ཟིན་པའི་ཕྱིར་ལ། ཁ་ཅིག་ནི་ཐོབ་པ་མེད་པའི་ཕྱིར་རོ། །དེ་བཞིན་དུ་མ་བསྒྲིབས་ལ་ལུང་དུ་མ་བསྟན་པ་དང་མི་སློབ་པ་ལ་ཡང་བརྗོད་པར་བྱའོ། །གཞན་དག་ནི་ཁྱད་པར་
མེད་པར་ཞེས་བྱ་བ་ནི་སྤེལ་མ་བྱེད་པ་དག་གོ། །ཁྱད་པར་མེད་པར་ཞེས་བྱ་བ་ནི་ཁམས་གསུམ་པའི་ཉོན་མོངས་པ་ཅན་ལ་སོགས་པ་སོ་སོར་མ་བྱས་པའི་ཕྱིར་རོ། །དགེ་བའི་སེམས་ལ་བདུན་ཡིན་ཏེ། །ཞེས་བྱ་བ་ནི་མཚན་ཉིད་བཤད་པ་གང་ཡིན་པ་དེ་མ་ཚང་བ་
ཡིན་ཏེ། དགེ་བ་ནི་ཁམས་གསུམ་པ་དང་ཟག་པ་མེད་པ་ཡིན་ལ་དེ་ལ། དགེ་བའི་སེམས་ལ་བདུན་ཡིན་ཏེ། །ཞེས་བརྗོད་པར་བྱའི་དྲུག་ཡིན་ཏེ་ཞེས་བྱ་བ་ནི་མ་ཡིན་ནོ། །ཇི་ལྟ་ཞེ་ན་དེ་བསྟན་པའི་ཕྱིར་འདོད་པ་ན་སྤྱོད་པའི་དགེ་བ་ཞེས་བྱ་བ་རྒྱས་པར་སྨོས་ཏེ། དགེ་
བའི་རྩ་བའི་ཉིང་མཚམས་སྦྱོར་བ་ལས་ཞེས་བྱ་བ་འདི་བཤད་ཟིན་ཏོ། །འདོད་ཆགས་དང་བྲལ་བ་ལས་འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་དག་ཅེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་ལམ་གྱིས་འདོད་པའི་
ཁམས་ལས་འདོད་ཆགས་དང་བྲལ་བ་ན་རྣམ་པར་གྲོལ་བའི་ལམ་དགུ་པ་ལ་དེ་དག་དང་མི་ལྡན་པ་ལས་འདོད་པ་དང་གཟུགས་ན་སྤྱོད་པའི་སྤྲུལ་པའི་སེམས་དག་རྙེད་པ་ཡིན་ནོ། །དེ་ན་ཡོད་པའི་ཏིང་ངེ་འཛིན་ཐོབ་པ་ལས་གཟུགས་དང་གཟུགས་མེད་པ་ན་སྤྱོད་པའི་དགེ་
བ་དག་གོ་ཞེས་བྱ་བ་ནི་གང་གི་ཚེ་དང་པོ་ཉིད་དུ་གཟུགས་ན་སྤྱོད་པ་མི་ལྕོགས་པ་མེད་པ་འཐོབ་པ་དེའི་ཚེ་གཟུགས་ན་སྤྱོད་པའི་དགེ་བ་རྙེད་ལ་གང་གི་ཚེ་དང་པོ་ཉིད་དུ་ནམ་མཁའ་མཐའ་ཡས་ཀྱི་ཉེར་བསྡོགས་ཐོབ་པ་དེའི་ཚེ་གཟུགས་མེད་པ་ན་སྤྱོད་པའི་དགེ་བ་རྙེད་དོ། །

ངེས་འཇུག་དགྲ་བཅོམ་ཉིད་ཀྱི་ཚེ། །སློབ་པ་དང་མི་སློབ་པའོ་ཞེས་བྱ་བ་ནི་གང་གི་ཚེ་ངེས་པ་ལ་འཇུག་པ་དེའི་ཚེ་ནི་སློབ་པ་སྡུག་བསྔལ་ལ་ཆོས་ཤེས་པའི་བཟོད་པའི་ཚོགས་རྙེད་ལ། གང་གི་ཚེ་དགྲ་བཅོམ་པ་ཉིད་འཐོབ་པ་དེའི་ཚེ་ནི་མི་སློབ་པ་
ཟད་པར་ཤེས་པའི་ཚོགས་རྙེད་དེ། དེ་ལྟར་ན་གནས་སྐབས་འདི་དག་ཏུ་ཇི་སྐད་བཤད་པའི་སེམས་བདུན་པོ་དག་དང་མི་ལྡན་པ་ལས་ལྡན་པ་རྙེད་པར་འགྱུར་རོ། །ལྷག་མ་ནི་རྣམ་པར་བཤད་པ་འདི་ཉིད་ཀྱིས་ཁོང་དུ་ཆུད་པར་བྱའོ་ཞེས་བྱ་བ་ནི་ལྷག་མ་ནི་བདག་གིས་བཤད་
པ་འདི་ཁོ་ན་ལས་རྟོགས་པར་བྱ་བ་ཡིན་ཏེ། ལྷག་མ་ཡང་། ཉོན་མོངས་ཅན་གྱི་སེམས་ལ་ནི། །མཁས་པ་རྣམས་ཀྱིས་དགུ་རྙེད་བརྗོད། །ཅེས་བྱ་བ་དང་། དེ་བཞིན་དུ་གཉིས་པ་ལུང་དུ་མ་བསྟན་ལ་དེ་ཉིད་དོ་ཞེས་བྱ་བ་འདི་ཡིན་ཏེ། ཁམས་གསུམ་པའི་ཉོན་
མོངས་པ་ཅན་ལ་ནི་དེ་དག་དང་མི་ལྡན་པ་ལས་དགུ་རྙེད་དེ། འདོད་པ་ན་སྤྱོད་པ་བཞི་དང་། གཟུགས་ན་སྤྱོད་པ་གསུམ་དང་གཟུགས་མེད་པ་ན་སྤྱོད་པ་བསྒྲིབས་པ་དང་སློབ་པ་ཞེས་བྱ་བ་དགུ་པོ་དག་ཅི་རིགས་པར་རྙེད་དོ། །ཅི་རིགས་པའི་དོན་ནི་འདི་ཡིན་ཏེ། འདོད་
པ་ན་སྤྱོད་པའི་ཉོན་མོངས་པ་ཅན་ལ་དགེ་བའི་སེམས་ཉིང་མཚམས་སྦྱོར་བ་དང་ཁམས་སུ་སླར་ལྡོག་པ་ནས་འདོད་པ་ན་སྤྱོད་པའི་དགེ་བ་རྙེད་དོ། །འདོད་པ་ན་སྤྱོད་པའི་ཉོན་མོངས་པ་ཅན་ཁོ་ན་ལ་ཁམས་སུ་སླར་ལྡོག་པ་དང་། ཡོངས་སུ་ཉམས་པ་ལས་མི་དགེ་བ་དང་།
བསྒྲིབས་ལ་ལུང་དུ་མ་བསྟན་པ་དག་རྙེད་དོ། །གཟུགས་ན་སྤྱོད་པའི་ཉོན་མོངས་པ་ཅན་ལ་ཁམས་སུ་སླར་ལྡོག་པ་ལས་གཟུགས་ན་སྤྱོད་པའི་དགེ་བ་དང་། འདོད་པ་དང་། གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་དག་
རྙེད་དོ། །འདོད་པ་ན་སྤྱོད་པའི་ཉོན་མོངས་པ་ཅན་ནམ་གཟུགས་ན་སྤྱོད་པའང་རུང་བ་ལ་ཁམས་སུ་སླར་ལྡོག་པའམ། ཡོངས་སུ་ཉམས་པ་ལས་གཟུགས་ན་སྤྱོད་པའི་ཉོན་མོངས་པ་ཅན་ཉིད་དོ། །འདོད་པ་ན་སྤྱོད་པའི་ཉོན་མོངས་པ་ཅན་ནམ། གཟུགས་ན་སྤྱོད་

པའམ། གཟུགས་མེད་པ་ན་སྤྱོད་པ་ཡང་རུང་བ་ལ་ཡོངས་སུ་ཉམས་པ་ལས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་དང་སློབ་པ་དག་རྙེད་དོ། །དེ་ལྟ་བུ་ནི་ཅི་རིགས་པའི་དོན་ཡིན་ནོ། །ལུང་མ་བསྟན་པ་དེ་ཉིད་དོ། །ཞེས་བྱ་བ་ནི་ལྷག་མ་གང་ཡིན་པ་ནི་སྔ་མ་
དང་འདྲ་བ་ཁོ་ན་སྟེ། ཁམས་གསུམ་པའི་ལུང་དུ་མ་བསྟན་པ་རྣམས་ལས་གང་ཡང་རུང་བ་ཞིག་མངོན་དུ་གྱུར་ན་དེ་དང་མི་ལྡན་པ་ལས་ལུང་དུ་མ་བསྟན་པའི་དེ་ཁོ་ན་རྙེད་དེ། གྲུབ་པའི་མཐའ་ལས། ལུང་བསྟན་མི་འཐོབ་ལྷན་ཅིག་སྐྱེས། །ཞེས་འབྱུང་བའི་ཕྱིར་རོ། །
བསྡུས་པའི་ཚིགས་སུ་བཅད་པ་ནི་ཞེས་བྱ་བ་ཐམས་ཅད་འབྱུང་བ་ལས་སྐྱེ་བའི་ཚེ་ནི་ཁམས་སུ་སླར་ལྡོག་པ་ལས་ཞེས་འབྱུང་བའི་ཕྱིར་རོ། །སྙོམས་པར་འཇུག་པ་ལས་ནི་དེ་ན་ཡོད་པ་ཞེས་བྱ་བ་ལ་སོགས་པ་འབྱུང་བའི་ཕྱིར་རོ། །འདོད་ཆགས་དང་བྲལ་བའི་ཚེ་ནི་འདོད་
པའི་འདོད་ཆགས་དང་བྲལ་བའི་ཚེ་ཞེས་འབྱུང་བའི་ཕྱིར་རོ། །ཡོངས་སུ་ཉམས་པའི་ཚེ་ནི་ཡོངས་སུ་ཉམས་པ་ལས་ཞེས་འབྱུང་བའི་ཕྱིར་རོ། །དགེ་བའི་ཉིང་མཚམས་སྦྱོར་བའི་ཚེ་ནི་ཐེ་ཚོམ་དང་ཡང་དག་པའི་ལྟ་བས་དགེ་བའི་རྩ་བའི་ཉིང་མཚམས་སྦྱོར་བ་ལས་
ཞེས་འབྱུང་བའི་ཕྱིར་རོ། །སེམས་རྙེད་ཅེས་བྱ་བ་ནི་སེམས་སོ་སོར་ཐོབ་པའོ། །དེ་ལྡན་པ་མིན་ལས་ཞེས་བྱ་བ་ནི་གང་ཟག་སྟེ། དེ་དག་དང་མི་ལྡན་པ་ལས་ཞེས་འབྱུང་བའི་ཕྱིར་རོ། །ཆོས་མངོན་པའི་མཛོད་ཀྱི་རྒྱ་ཆེར་འགྲེལ་པ་སློབ་དཔོན་རྒྱལ་པོའི་སྲས་
གྲགས་པའི་བཤེས་གཉེན་གྱིས་མཛད་པ་ལས་དབང་པོ་བསྟན་པ་ཞེས་བྱ་བ་སྟེ་མཛོད་ཀྱི་གནས་གཉིས་པའོ།། །།ད་ནི་ཞེས་བྱ་བ་འདི་ནི་མཛོད་ཀྱི་གནས་གཉིས་པ་དང་གསུམ་པའི་འབྲེལ་པ་རབ་ཏུ་བསྟན་པའི་ཕྱིར་སྨོས་པ་ཡིན་ནོ། །འདོད་པ་དང་གཟུགས་དང་
གཟུགས་མེད་པའི་ཁམས་ཀྱི་ངེས་པ་ཉིད་ཀྱིས་སེམས་ལ་སོགས་པ་བསྟན་པ་བྱས་པ་ཞེས་བྱ་བ་ལ་ངེས་པའི་དངོས་པོ་ནི་ངེས་པ་ཉིད་དོ། །ཡང་ན་ངེས་པ་ཉིད་ནི་ངེས་པ་ཁོ་ན་ཡིན་ནོ། །དེས་སེམས་ལ་སོགས་པ་བསྟན་པ་བྱས་པ་ནི། འདོད་ཡིད་དགེ་དང་མི་དགེ་

དང་། །བསྒྲིབས་པ་དང་ནི་མ་བསྒྲིབས་པ། །གཟུགས་དང་གཟུགས་མེད་པ་དག་ན། །མི་དགེ་ལས་གཞན་ཞེས་འབྱུང་བའི་ཕྱིར་རོ། །སོགས་པ་ཞེས་བྱ་བའི་སྒྲས་ནི་སེམས་ལས་འབྱུང་བ་ལ་སོགས་པ་བསྡུ་སྟེ། འདོད་པའི་དགེ་བའི་
སེམས་ལ་ནི། རྟོག་དང་དཔྱོད་དང་བཅས་པའི་ཕྱིར། །ཞེས་བྱ་བ་དང་། དེ་ལས་འགྱོད་ཡིད་མི་དགེ་རྣམས། །བསམ་གཏན་དང་པོ་དག་ན་མེད། །རྟོག་པའང་བསམ་གཏན་ཁྱད་པར་ན། །དེ་ཡི་གོང་ན་དཔྱོད་པ་ཡང་། །ཞེས་འབྱུང་བའི་ཕྱིར་རོ། །འདོད་པ་
ལ་སོགས་པའི་ངེས་པ་ཉིད་ཀྱིས་དབང་པོ་རྣམས་བསྟན་པ་བྱས་པ་ནི། དྲི་མེད་མ་གཏོགས་འདོད་པར་གཏོགས། །ཕོ་མོའི་དབང་དང་སྡུག་བསྔལ་དག། །མ་གཏོགས་གཟུགས་གཏོགས་གཟུགས་ཅན་དང་། །བདེ་བའང་མ་གཏོགས་གཟུགས་མེད་གཏོགས། །
ཞེས་འབྱུང་བའི་ཕྱིར་རོ། །འདོད་པ་དང་གཟུགས་དང་གཟུགས་མེད་པའི་ཁམས་དེ་དག་གི་མཚན་ཉིད་ནི་མི་བཤད་པས། དེའི་ཕྱིར་དེ་ལ་འདོད་པ་དང་གཟུགས་དང་གཟུགས་མེད་པའི་ཁམས་དེ་དག་གང་ཡིན་ཞེས་བྱ་བ་འདི་སྨོས་སོ། །དམྱལ་བ་ཡི་དགས་དུད་འགྲོ་
དང་། །ཞེས་བྱ་བ་རྒྱ་ཆེར་འབྱུང་བ་ལ། འགྲོ་བ་བཞི་ཞེས་བྱ་བ་ནི་དམྱལ་བ་དང་ཡི་དགས་དུད་འགྲོ་དང་མིའི་འགྲོ་བ་བཞི་སྟེ། རིལ་གྱིས་འདོད་པའི་ཁམས་སུ་གཏོགས་པ་ཡིན་ནོ། །ལྷའི་འགྲོ་བ་ནི་རིལ་གྱིས་མ་ཡིན་ནོ། །འོ་ན་ཅི་ཞེ་ན། ལྷའི་རིགས་དྲུག་ཡིན་ནོ་
ཞེས་སྟོན་པར་བྱེད་དོ། །དེ་ལ་སེམས་ཅན་རྣམས་འདིར་བསོད་ནམས་མ་ཡིན་པས་ཁྲིད་པར་བྱེད་པས་ན་དམྱལ་བ་རྣམས་སོ། །གཞན་དག་ན་རེ་དགའ་བར་མི་བྱེད་པས་ན་དམྱལ་བ་རྣམས་ཡིན་ནོ་ཞེས་ཟེར་རོ། །སློབ་དཔོན་འདུས་བཟངས་ན་རེ་མི་རྙེད་པའི་དོན་གྱིས་དམྱལ་
བའི་སྒྲ་ནི་སྐྱབས་མི་རྙེད་ཅིང་མེད་པས་ན་དམྱལ་བ་པ་རྣམས་ཡིན་ནོ་ཞེས་ཟེར་རོ། །འདི་ནས་ཤིན་ཏུ་ཕྱིར་མི་ལྡོག་པར་སོང་བས་ན་ཡི་དགས་རྣམས་སོ། །གཞན་དག་ན་རེ་སྐོམ་པ་དང་ལྡན་པའི་ཕྱིར་རོ། །དུད་དེ་འགྲོ་བའི་ཕྱིར་དུད་འགྲོའོ། །ཡིད་ཤས་ཆེ་བའི་ཕྱིར་མི་

རྣམས་སོ། །འཇིག་རྟེན་པ་རྣམས་ནི་ཡིད་ཀྱི་བུ་ཡིན་པའི་ཕྱིར་རོ་ཞེས་ཟེར་རོ། །འདི་དག་ལ་ཁྱིམ་ནམ་མཁའ་ཡོད་པས་ན་ལྷའོ། །འདོད་པའི་ཁམས་ནི་འདོད་པས་རབ་ཏུ་ཕྱེ་བའི་ཁམས་ཡིན་ནོ་ཞེས་འཆད་པར་འགྱུར་རོ། །རྒྱལ་པོ་ཆེན་པོ་འཇིག་རྟེན་སྐྱོང་
བ་བཞི་ནི། འཕགས་སྐྱེས་པོ་དང་། མིག་མི་བཟང་དང་། ཡུལ་འཁོར་སྲུང་དང་། རྣམ་ཐོས་ཀྱི་བུའོ། །དེ་དག་ན་ཡོད་པ་ནི་རྒྱལ་ཆེན་བཞི་པ་རྣམས་ཏེ། དེ་དག་གི་ནང་དུ་གཏོགས་པ་ཞེས་བྱ་བའི་ཐ་ཚིག་གོ། །དཔེར་ན་ལྷ་དག་ཏུ་སྐྱེ་བར་འགྱུར་བ་ཞེས་བྱ་བ་
ནི་ལྷའི་ནང་དུ་སྐྱེ་བར་འགྱུར་བ་ཞེས་བྱ་བའི་དོན་ལྟ་བུ་ཡིན་ནོ། །གཞན་དག་ན་རེ་རྒྱལ་པོ་ཆེན་པོ་བཞིའི་གནས་ན་ཡོད་པ་ནི་རྒྱལ་ཆེན་བཞི་པ་རྣམས་ཏེ། བར་གྱི་ཚིག་མི་མངོན་པར་བྱས་པའི་ཕྱིར་བ་ལང་གི་ཤིང་རྟ་ལྟ་བུའོ། །ལེགས་པར་བྱས་པ་ལྷན་ཅིག་
བྱས་པ་རྣམས་ཀྱིས་དེར་སྐྱེ་བས་ན་སུམ་ཅུ་རྩ་གསུམ་པ་རྣམས་སོ། །གཞན་དག་ན་རེ་འཇིག་རྟེན་པ་རྣམས་ན་རེ་གཙོ་བོ་ནོར་ལྷ་བརྒྱད་དང་། ཐ་སྐར་གྱི་བུ་གཞོན་ནུ་གཉིས་དང་། དྲག་པོ་བཅུ་གཅིག་དང་། ཉི་མ་བཅུ་གཉིས་ཞེས་བྱ་བ་དེ་ཙམ་དུ་ཟད་པས་
སུམ་ཅུ་རྩ་གསུམ་པ་རྣམས་སོ་ཞེས་ཟེར་ཏེ། དེ་དང་མཐུན་པར་གསུང་རབ་ལས་ཀྱང་མིང་དེ་བཞིན་དུ་ཐ་སྙད་བཏགས་སོ་ཞེས་ཟེར་རོ། །བསོད་ནམས་ཀྱིས་སོང་བས་ན་འཐབ་བྲལ་བའོ། །ཡང་ན་དེའི་སྡུག་བསྔལ་ཟད་པར་བྱེད་པས་འཐབ་བྲལ་བ་རྣམས་སོ། །དགའ་
ཞིང་ཡིད་དུ་འོང་བས་སོང་བའམ། འདི་དག་ལ་དགའ་བ་ཡོད་པས་ན་དགའ་ལྡན་པ་རྣམས་སོ། །འདི་དག་ལ་རང་རང་གིས་བྱས་པའི་ལོངས་སྤྱོད་རྣམས་སྤྲུལ་པ་ལ་དགའ་བ་ཡོད་པས་ན་འཕྲུལ་དགའ་བ་རྣམས་སོ། །འདི་དག་ལ་གཞན་གྱིས་སྤྲུལ་པའི་ལོངས་
སྤྱོད་དག་ལ་དབང་བསྒྱུར་བའི་ངང་ཚུལ་ཡོད་པས་གཞན་འཕྲུལ་དབང་བྱེད་པ་རྣམས་སོ། །གནས་རྣམས་ཞེས་བྱ་བ་ཚིག་ལྷག་མ་ཞེས་བྱ་བ་ནི་གནས་ཉི་ཤུ་གང་དག་ཡིན་པ་དེ་དག་ནི་འདོད་པའི་ཁམས་ཡིན་ནོ། །གལ་ཏེ་དཔེར་ན་རྟ་ཆུ་འཐུངས་པ་ལ་འཐུངས་

པའོ་ཞེས་བྱ་བ་དང་འདྲ་བར་གནས་ཉི་ཤུ་ལ་ཉི་ཤུའོ་ཞེས་བར་གྱི་ཚིག་མི་མངོན་པར་བྱས་ན་ནི་ཤིན་ཏུ་ཡང་རིགས་པ་ཡིན་ནོ། །ཡང་སོས་ནི་གང་དུ་སེམས་ཅན་ཤི་བ་རྣམས་རླུང་དག་གིས་འཚོ་བར་བྱེད་པའོ། །ཐིག་ནག་ནི་གང་དུ་ཐིག་ནག་པོ་
བཏབ་ནས་འཇོག་པར་བྱེད་པའོ། །བསྡུས་འཇོམས་ནི་གང་དུ་ཕྱོགས་གཉིས་ནས་ལུག་ལྟ་བུའི་རི་ལ་སོགས་པ་འོང་སྟེ་སེམས་ཅན་རྣམས་འཇོམས་པར་བྱེད་པའོ། །ངུ་འབོད་ནི་གང་དུ་སེམས་ཅན་བཏགས་པ་རྣམས་ཤིན་ཏུ་སྐྲག་པའི་ང་རོ་འབྱིན་པའོ། །གང་དུ་
ཁྱད་པར་དུ་ཡིན་པ་དེ་ནི་ངུ་འབོད་ཆེན་པོའོ། །ཚ་བ་ནི་གང་དུ་སེམས་ཅན་རྣམས་མེ་ལ་སོགས་པས་གདུང་བར་བྱེད་པའོ། །གང་དུ་ཁྱད་པར་དུ་གདུང་བར་བྱེད་པ་དེ་ནི་རབ་ཏུ་ཚ་བའོ། །མནར་མེད་པ་ནི་གང་དུ་སེམས་ཅན་མེ་འབར་བས་ཤིན་ཏུ་བསྐོར་བ་རྣམས་ལ་བདེ་བའི་
མནའ་བའི་སྐབས་མེད་པའོ། །འཛམ་བུའི་གླིང་ནི་ཤིང་འཛམ་བུས་མཚོན་པའི་གླིང་ངོ་། །ཤར་གྱི་ལུས་འཕགས་ནི་རི་རབ་ཀྱི་ཤར་ཕྱོགས་ན་ཡོད་པའོ། །ནུབ་ཀྱི་བ་ལང་སྤྱོད་ནི་ནུབ་ཕྱོགས་ན་ཡོད་པའོ། །བྱང་གི་སྒྲ་མི་སྙན་ནི་བྱང་ཕྱོགས་ན་ཡོད་པ་སྟེ། གླིང་འདི་
དག་གི་མིང་ནི་འཇིག་རྟེན་ན་དེ་ལྟར་གྲགས་པ་ཡིན་ནོ། །བཤད་མ་ཐག་པའི་ལྷའི་རིགས་དྲུག་དང་དེ་ལྟར་ན་གནས་ཉི་ཤུ་པོ་དེ་དག་ནི་འདོད་པའི་ཁམས་ཡིན་ནོ་ཞེས་བྱ་བ་ནི་དམྱལ་བ་ནི་དམྱལ་བ་བརྒྱད་དང་། གླིང་བཞི་དང་རྒྱལ་ཆེན་བཞིའི་རིས་པ་ལ་སོགས་པ་བཤད་མ་
ཐག་པ་དྲུག་དང་། མ་ཕྱེ་བ་ཡི་དགས་དང་དུད་འགྲོ་ཞེས་བྱ་བ་དང་གནས་ཉི་ཤུ་ནི་འདོད་པའི་ཁམས་ཡིན་ནོ། །རླུང་གི་དཀྱིལ་འཁོར་གྱི་བར་ཞེས་བྱ་བ་ནི་གང་ལ་ཆུའི་དཀྱིལ་འཁོར་འདུག་པའོ། །གཟུགས་ཀྱི་ཁམས་ཞེས་བྱ་བ་ནི་གཟུགས་ཀྱིས་རབ་ཏུ་ཕྱེ་
བའི་ཁམས་ནི་གཟུགས་ཀྱི་ཁམས་ཡིན་ནོ། །དེར་སོ་སོའི། བསམ་གཏན་ས་ནི་གསུམ་པ་ཡིན། །བཞི་པ་ས་ནི་བརྒྱད་པ་ཡིན། །ཞེས་བྱ་བ་དེ་ལ། གཟུགས་ཀྱི་ཁམས་ནི་བསམ་གཏན་ཐམས་ཅད་ཀྱང་ཆུང་ངུ་དང་འབྲིང་དང་ཆེན་པོའི་བྱེ་བྲག་གིས་སོ་སོར་ས་གསུམ་

པའི་བྱེ་བྲག་ཉིད་ཡིན་ཏེ། ཚངས་རིས་པ་རྣམས་དང་། ཚངས་པའི་མདུན་ན་འདོན་པ་རྣམས་དང་། ཚངས་ཆེན་པ་རྣམས་ནི་དང་པོ་ཡིན་ནོ། །འོད་ཆུང་པ་རྣམས་དང་། ཚད་མེད་འོད་རྣམས་དང་། འོད་གསལ་བ་རྣམས་ནི་གཉིས་པ་ཡིན་ནོ། །དགེ་ཆུང་རྣམས་དང་།
ཚད་མེད་དགེ་རྣམས་དང་། དགེ་རྒྱས་རྣམས་ནི་གསུམ་པ་ཡིན་ནོ། །སྤྲིན་མེད་རྣམས་དང་། བསོད་ནམས་སྐྱེས་རྣམས་དང་། འབྲས་བུ་ཆེ་བ་རྣམས་ནི་བཞི་པ་ཡིན་ནོ། །ཆེན་པོ་དེ་ཉིད་ཟག་པ་མེད་པའི་བསམ་གཏན་དང་སྤེལ་བའི་སྒོ་ནས་ཆུང་ངུ་དང་འབྲིང་དང་ཆེན་པོ་དང་།
ཤིན་ཏུ་ཆེན་པོ་དང་། ཆེས་ཤིན་ཏུ་ཆེན་པོ་ཐ་དད་པའི་བྱེ་བྲག་གི་གནས་གཞན་ལྔ་སྟེ། མི་ཆེ་བ་རྣམས་དང་། མི་གདུང་བ་རྣམས་དང་། གྱ་ནོམ་སྣང་བ་རྣམས་དང་། ཤིན་ཏུ་མཐོང་རྣམས་དང་། འོག་མིན་རྣམས་སོ། །དེའི་ཕྱིར་བསམ་གཏན་བཞི་པ་ནི་ས་བརྒྱད་པ་
ཞེས་བྱའོ། །དེ་ལ་དགེ་བའི་རྩ་བ་ཆེན་པོ་ལས་སྐྱེས་པའི་ཕྱིར་ཚངས་པའོ། །དེ་ཡང་གང་ཞེ་ན་ཚངས་པ་ཆེན་པོ་ཞེས་བྱ་བ་གང་ཡིན་པ་སྟེ། བསམ་གཏན་ཁྱད་པར་ཅན་ཐོབ་པས་ཐོག་མར་སྐྱེ་ཞིང་ཐ་མར་འཆི་འཕོ་བའི་ཕྱིར་དང་། སྔ་མ་དང་ཁྱད་པར་ཡོད་
པའི་ཕྱིར་ཆེན་པོ་ཡིན་ནོ། །འདི་དག་ལ་དེའི་རིས་ན་གནས་པ་ཡོད་པས་ཚངས་རིས་པ་རྣམས་སོ། །ཚངས་པའི་མདུན་ན་འདོན་པས་ན་ཚངས་པའི་མདུན་ན་འདོན་རྣམས་སོ། །འདི་དག་ལ་ཚེ་དང་ཁ་དོག་ལ་སོགས་པའི་ཁྱད་པར་གྱིས་ཚངས་པ་ཆེན་པོ་ཡོད་པས་
ན་ཚངས་པ་ཆེན་པོ་རྣམས་སོ། །འདི་དག་ལ་འོད་གསལ་གྱི་ས་ལ་ལྟོས་ནས་འོད་ཆུང་ངུ་ཡོད་པས་ན་འོད་ཆུང་རྣམས་སོ། །འདི་དག་ནི་འོད་ཚད་གཟུང་བར་མི་ནུས་པས་ན་ཚད་མེད་འོད་རྣམས་སོ། །གནས་གཞན་ཟད་པར་སྣང་བར་བྱེད་པའི་ཕྱིར་འོད་གསལ་རྣམས་
སོ། །ཡིད་ཀྱི་ས་པའི་བདེ་བ་ལ་ནི་དགེ་བ་ཞེས་བྱ་སྟེ། འདི་དག་ལ་གཞན་གྱི་ས་ལ་ལྟོས་ན་དེ་ཆུང་ངུ་ཡོད་པས་ན་དགེ་ཆུང་རྣམས་སོ། །འདི་དག་ལ་དགེ་བ་ཚད་མེད་པ་ཡོད་པས་ན་ཚད་མེད་དགེ་རྣམས་སོ། །འདི་དག་ལ་དགེ་བ་རྒྱས་པ་ཡོད་པས་ན་དགེ་རྒྱས་

རྣམས་ཏེ། གཞན་ན་དེ་ལས་ཤིན་ཏུ་མཆོག་ཏུ་གྱུར་པའི་བདེ་བ་མེད་དོ་སྙམ་དུ་བསམས་པ་ཡིན་ནོ། །འདི་དག་ལ་སྤྲིན་དང་འདྲ་བར་ས་དང་འབྲེལ་པ་མེད་པས་ན་སྤྲིན་མེད་རྣམས་ཏེ། གཞལ་མེད་ཁང་དེ་སེམས་ཅན་དང་། ལྷན་ཅིག་འབྱུང་
ཞིང་འཇིག་པའི་ཕྱིར་ཞེས་འབྱུང་བའི་ཕྱིར་རོ། །གཞན་དག་ན་རེ་འདི་དག་གི་གོང་ན་གཞན་མེད་པའི་སྤྲིན་མེད་རྣམས་ཏེ། གོང་ན་སྤྲིན་ལྟ་བུ་ས་དང་འབྲེལ་པ་མེད་པས་སོ་ཞེས་ཟེར་རོ། །མི་གཡོ་བའི་ལས་ལས་ཡང་དག་པར་འབྱུང་བའི་ཕྱིར་འདི་དག་ལ་བསོད་ནམས་
རྣམས་ལས་སྐྱེས་པ་ཡོད་པས་ན་བསོད་ནམས་སྐྱེས་རྣམས་སོ། །འདི་དག་ལ་འབྲས་བུ་གནས་གཞན་དང་འབྲེལ་པ་སོ་སོའི་སྐྱེ་བོ་པ་ཐམས་ཅད་པས་མཆོག་ཏུ་གྱུར་པ་ཆེན་པོ་ཡོད་པས་ན་འབྲས་བུ་ཆེ་རྣམས་སོ། །སོ་སོའི་སྐྱེ་བོ་རྣམས་དང་མ་འདྲེས་པའི་ཕྱིར་གནས་གཙང་མ་
སྟེ། དེ་འདི་དག་ལ་ཡོད་པས་གནས་གཙང་མ་རྣམས་སོ། །གནས་གཙང་མ་པ་གཞན་དག་པས་མཆོག་ཏུ་མ་གྱུར་པའི་ཕྱིར་རྒྱས་པ་མ་ཡིན་པས་ན་མི་ཆེ་བ་རྣམས་སོ། །ཡང་ན་བདག་ཉིད་ཀྱིས་བདག་གི་གནས་དུས་ཉ་ཉེ་ཞིག་ན་སྤོང་ཞིང་འདོར་བར་མི་བྱེད་པས་ན་མི་ཆེ་བ་རྣམས་
སོ། །ཏིང་ངེ་འཛིན་ཁྱད་པར་ཅན་ཐོབ་པའི་ཕྱིར་འདི་ནི་ཉོན་མོངས་པ་རྣམས་ཀྱིས་གདུང་བར་བྱེད་པ་མེད་པས་ན་མི་གདུང་བ་རྣམས་སོ། །ཡང་ན་བསམ་པ་དགེ་བའི་ཕྱིར་གཞན་དག་ལ་གདུང་བར་མི་བྱེད་པས་ན་མི་གདུང་བ་རྣམས་སོ། །མཐོང་བ་ཡོངས་སུ་དག་པའི་ཕྱིར་ཤིན་
ཏུ་མཐོང་བས་ན་གྱ་ནོམ་སྣང་རྣམས་སོ། །ལྟ་བ་བཟང་བའི་ཕྱིར་ཤིན་ཏུ་མཐོང་རྣམས་སོ། །དེ་ལས་མཆོག་ཏུ་གྱུར་པའི་ས་གཞན་མེད་པའི་ཕྱིར་འདི་དག་འོག་མ་མ་ཡིན་པས་འོག་མིན་རྣམས་ཏེ། གོང་མར་གྱུར་པ་ཡིན་པའི་ཕྱིར་རོ། །འདིས་ནི་གནས་པ་དག་བསྟན་ན། །
ཇི་ལྟར་དེ་ལྟར་ན་གནས་བཅུ་བདུན་པོ་འདི་དག་ཅེས་བྱ་ཞེ་ན། གནས་ནི་གནས་པའི་སྒྲར་བསྟན་པའི་ཕྱིར་ཉེས་པ་མེད་དོ། །དེ་ལྟར་ན་ཉི་འོག་པའི་ལུགས་ཀྱིས་གཟུགས་ཀྱི་ཁམས་ནི་གནས་བཅུ་བདུན་ཡིན་ནོ། །ཁ་ཆེ་བ་རྣམས་ན་རེ་བཅུ་དྲུག་ཡིན་ནོ་ཞེས་ཟེར་རོ་ཞེས་བྱ་བ་ཁ་ཆེ་

བ་རྣམས་ན་རེ་གཟུགས་ཀྱི་ཁམས་ནི་བཅུ་དྲུག་ཡིན་ནོ་ཞེས་ཟེར་རོ། །སྤགས་པ་བཞིན་དུ་ཞེས་བྱ་བ་ནི་བང་རིམ་བཞིན་དུ་ཞེས་བྱ་བའི་ཐ་ཚིག་གོ། །གཞན་དག་ན་རེ་འབྲོག་ཕྱོགས་ཀྱི་རྫོང་བཞིན་དུའོ་ཞེས་ཟེར་རོ། །ས་གཞན་ནི་མེད་དོ་ཞེས་བྱ་བ་ནི་ས་གཞན་དང་འབྲེལ་པ་
མེད་པས་སོ། །འདས་པ་དང་མ་འོངས་པ་དང་རྣམ་པར་རིག་བྱེད་མ་ཡིན་པ་དང་། ཆོས་གཟུགས་ཅན་མ་ཡིན་པ་རྣམས་ནི་ཡུལ་ན་མི་གནས་ཞེས་བྱ་བ་ནི་འདས་པ་དང་མ་འོངས་པ་ནི་གཟུགས་ཅན་དག་ཀྱང་ཡུལ་ན་མི་གནས་སོ། །རྣམ་པར་རིག་བྱེད་མ་ཡིན་པ་ནི་གཟུགས་
ཅན་ཡིན་ལ། ད་ལྟར་གྱི་དག་ཀྱང་ཡུལ་ན་མི་གནས་ལ། གཟུགས་ཅན་མ་ཡིན་པ་ཚོར་བ་ལ་སོགས་པ་ཡང་དེ་བཞིན་དུ་ད་ལྟར་གྱི་དག་ཡིན་ཡང་ཡུལ་ན་མི་གནས་ན། འདས་པ་དང་མ་འོངས་པ་རྣམས་ལྟ་སྨོས་ཀྱང་ཅི་དགོས་སོ། །སྐྱེ་བ་ལས་ནི་རྣམ་པ་བཞི། །ཞེས་བྱ་
བ་ནི་ཚེ་རབས་གཞན་དུ་ལས་ཀྱིས་གྲུབ་པའི་ཕུང་པོ་འབྱུང་བ་ནི་སྐྱེ་བ་ཡིན་ཏེ། དེས་ན་གཟུགས་མེད་པའི་ཁམས་རྣམ་པ་བཞི་ཡིན་ནོ། །འདི་ལྟ་སྟེ། ནམ་མཁའ་མཐའ་ཡས་སྐྱེ་མཆེད་དང་། །ཞེས་བྱ་བ་རྒྱས་པར་འབྱུང་བ་ནི་སྙོམས་པར་འཇུག་པར་སྦྱོར་བའི་དུས་ན་ནམ་མཁའ་
མཐའ་ཡས་སོ་སྙམ་དུ་རྣམ་པར་བྱེད་པའི་ཕྱིར་ནམ་མཁའ་མཐའ་ཡས་ཏེ། དེའི་ལམ་དེ་ཉིད་སྐྱེ་མཆེད་ཡིན་ནོ། །དེ་བཞིན་དུ་རྣམ་པར་ཤེས་པ་མཐའ་ཡས་སོ་སྙམ་པ་དང་ཅི་ཡང་མེད་དོ་སྙམ་དུ་དེ་དག་གི་རྣམ་པར་བྱེད་པའི་ཕྱིར། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་
མེད་པའི་སྐྱེ་མཆེད་ཅེས་བྱའོ། །འདུ་ཤེས་ནི་འབྲས་ལྟ་བུའོ། །འདུ་ཤེས་ནི་ཟུག་རྔུ་ལྟ་བུའོ། །འདུ་ཤེས་མེད་པ་ནི་ཀུན་དུ་རྨོངས་པ་སྙམ་ནས། འདུ་ཤེས་གཞན་པ་འབྱུང་བའི་ཕྱིར་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཅེས་བྱའོ། །དེ་དག་ལ་ཡུལ་གྱིས་བྱས་
པའི་བླ་འོག་ནི་མེད་དོ་ཞེས་བྱ་བ་ནི་ཡུལ་ན་མི་གནས་པའི་ཕྱིར་རོ། །ཇི་ལྟར་སེམས་ཅན་གཟུགས་ཅན་རྣམས་ཀྱི་ཞེས་བྱ་བ་ཐེ་ཚོམ་འདི་ཅི་ལས་གྱུར་ཅེ་ན་འདི་ལ་བདག་མེད་ན་འདོད་པ་དང་། གཟུགས་ཀྱི་ཁམས་དག་ན་ནི་སེམས་དང་སེམས་ལས་བྱུང་བ་རྣམས་གཟུགས་

ལ་བརྟེན་ནས་འཇུག་པར་བརྟག་གྲང་ན། གཟུགས་མེད་པའི་ཁམས་ན་ནི་གཟུགས་མེད་པས་དེ་ན་སེམས་དང་སེམས་ལས་བྱུང་བ་འཇུག་པར་མི་འགྱུར་རོ་སྙམ་མོ། །ཐེ་ཚོམ་དེ་བཟློག་པའི་ཕྱིར། དེར་ནི་རིས་དང་སྲོག་ལ་ཡང་། །སེམས་
ཀྱི་རྒྱུད་ནི་རྟེན་པ་ཡིན། །ཞེས་བྱ་བ་འདི་སྨོས་ཏེ། ཡང་ཞེས་བྱ་བའི་སྒྲས་ནི་སོ་སོའི་སྐྱེ་བོ་ཉིད་དང་མི་ལྡན་པ་དང་། ཐོབ་པ་དང་། སྐྱེ་བ་ལ་སོགས་པ་བསྡུའོ། །སྟོབས་ཆུང་བའི་ཕྱིར་རོ་ཞེས་བྱ་བ་ཅི་ཞིག་ཅེ་ན་སེམས་ཀྱི་རྒྱུན་ནོ། །སེམས་ཅན་གཟུགས་ཅན་རྣམས་
ཀྱི་སེམས་ཀྱི་རྒྱུན་ནི་གཟུགས་ཀྱི་འདུ་ཤེས་དང་མ་བྲལ་བའི་ཕྱིར་སྟོབས་ཆུང་བ་ཡིན་པས་གཟུགས་མེད་པར་མི་འཇུག་སྟེ། དེའི་ཕྱིར་གཟུགས་ལ་བརྟེན་ནས་འཇུག་གོ། །དེ་ནི་ཅིའི་ཕྱིར་སྟོབས་དང་ལྡན་པ་ཉིད་ཡིན་ཞེས་བྱ་བ་ནི་གཟུགས་མེད་པ་ན་སྤྱོད་པ་དེ་ཅིའི་ཕྱིར་
སྟོབས་དང་ལྡན་པ་ཉིད་ཡིན་ནོ། །དེའི་ཕྱིར་སྙོམས་པར་འཇུག་པའི་ཁྱད་པར་ལས་སྐྱེས་པའི་ཕྱིར་ཞེས་བྱ་བ་རྒྱས་པར་སྨོས་ཏེ། གཟུགས་དང་བྲལ་བའི་འདུ་ཤེས་ཅན་ཞེས་བྱ་བ་ནི་གཟུགས་ཀྱི་འདུ་ཤེས་དང་བྲལ་བ་ཅན་ཞེས་བྱ་བའི་ཐ་ཚིག་གོ། །དེའི་ཕྱིར་དེ་ལ་སྐྱེས་
པ་གཟུགས་མེད་པའི་སེམས་ཀྱི་རྒྱུན་ཀྱང་གཟུགས་ལ་མི་ལྟོས་པར་འཇུག་གོ། །འོ་ན་ནི་སྟོབས་དང་ལྡན་པའི་ཕྱིར་སྙོམས་པར་འཇུག་པའི་ཁྱད་པར་གྱིས་བསྐྱེད་པ་དེ་ཁོ་ནས་འཇུག་པར་འགྱུར་གྱི་རྟེན་གྱིས་ཅི་ཞིག་བྱ་སྙམ་དུ་བསམས་པ་ཡིན་ནོ། །ཇི་ལྟར་སེམས་ཅན་
གཟུགས་ཅན་རྣམས་ཀྱི་ཞེས་བྱ་བ་རྒྱས་པར་འབྱུང་བ་ལ་ཚིག་གི་དོན་ནི་སེམས་ཅན་གཟུགས་ཅན་རྣམས་ཀྱི་རིས་མཐུན་པ་དང་སྲོག་གི་དབང་པོ་དག་གཟུགས་ལ་བརྟེན་པ་དེ་ལྟར་གཟུགས་མེད་པ་རྣམས་ཀྱིས་ཅི་ལ་བརྟེན་ཞེས་བྱ་བ་ཡིན་ནོ། །དེ་གཉིས་ཕན་ཚུན་དུའོ་ཞེས་བྱ་
བ་ནི་རིས་མཐུན་པ་ཡང་སྲོག་གི་དབང་པོ་ལ་བརྟེན་ནས་འཇུག་ལ་སྲོག་གི་དབང་པོ་ཡང་རིས་མཐུན་པ་ལ་བརྟེན་ནས་ཞེས་བྱ་བ་ཡིན་ནོ། །དེ་གཉིས་ཁོ་ན་ཕན་ཚུན་དུ་ཅིའི་ཕྱིར་མི་རྟེན་ཞེས་བྱ་བ་ནི་རྟེན་གཟུགས་ཀྱིས་ཅི་ཞིག་བྱ་སྙམ་དུ་བསམས་པ་ཡིན་ནོ། །ད་ནི་དེ་ན་ཞེས་བྱ་བ་

ནི་གཟུགས་མེད་པའི་ཁམས་དེ་ན་ཅིའི་ཕྱིར་རིས་མཐུན་པ་དང་སྲོག་གི་དབང་པོ་དེ་དག་སྟོབས་དང་ལྡན་པ་དེ་ཉིད་ཡིན་ནོ། །དེ་ནི་སེམས་ཀྱི་རྒྱུད་ལ་ཡང་མཚུངས་ཏེ་ཞེས་བྱ་བ་ནི་སེམས་ཀྱི་རྒྱུད་འདི་ཡང་སྙོམས་པར་འཇུག་པའི་ཁྱད་པར་ལས་སྐྱེས་པས་སྟོབས་དང་ལྡན་པ་ཡིན་
པའི་ཕྱིར་གཉིས་ལ་བརྟེན་ནས་འཇུག་པར་མི་འགྱུར་གྱི་བརྟེན་པ་མེད་པ་ཁོ་ནར་འཇུག་པར་འགྱུར་རོ་ཞེས་བྱ་བ་ཡིན་ནོ། །སེམས་དང་སེམས་ལས་བྱུང་བ་དག་ལ་ཡང་ཅི་ཞེ་ན། མཚུངས་ཏེ་ཞེས་བྱ་བར་སྐབས་དང་སྦྱར་རོ། །ཅི་ཞིག་མཚུངས་ཤེ་ན་ཕན་ཚུན་བརྟེན་པ་ཉིད་
དེ། ཇི་ལྟར་རིས་མཐུན་པ་ཡང་སྲོག་གི་དབང་པོ་ལ་བརྟེན་ནས་འཇུག་ལ་སྲོག་གི་དབང་པོ་ཡང་རིས་མཐུན་པ་ལ་བརྟེན་ནས་འཇུག་པ་དེ་བཞིན་དུ་སེམས་ལས་བྱུང་བ་རྣམས་ཀྱང་སེམས་ལ་བརྟེན་ནས་འཇུག་པར་འགྱུར་ལ། སེམས་ཀྱང་སེམས་ལས་བྱུང་བ་རྣམས་
ལ་བརྟེན་ནས་འཇུག་པར་འགྱུར་ན། དེ་དག་ལས་གཞན་པའི་རྟེན་བརྟག་པ་ནི་དགོས་པ་མེད་དོ། །སེམས་ཀྱི་རྒྱུན་གང་གི་ཞེས་བྱ་བ་རྒྱས་པར་འབྱུང་བ་ནི་སེམས་ཀྱི་རྒྱུན་གྱི་འཕེན་པར་བྱེད་པའི་རྒྱུན་ནི་འཕེན་པའི་རྒྱུ་སྟེ། ལས་དང་ཉོན་མོངས་པའི་མཚན་ཉིད་
ཡིན་ནོ། །འདི་ལ་སྲེད་པ་དང་བྲལ་བ་ཡོད་པས་ན་སྲེད་པ་དང་བྲལ་བ་ཅན་ནོ། །སྲེད་པ་དང་མ་བྲལ་བ་ནི་སྲེད་པ་དང་མ་བྲལ་བའོ། །གང་ལ་ཞེ་ན། གཟུགས་ལ་སྟེ་སེམས་ཀྱི་རྒྱུན་དེ་ནི་གཟུགས་དང་ལྷན་ཅིག་འབྱུང་བའི་ཕྱིར་གཟུགས་ལ་བརྟེན་ནས་འཇུག་
གོ། །རྒྱུ་དེ་ལ་རྒྱབ་ཀྱིས་ཕྱོགས་པའི་ཕྱིར་རོ་ཞེས་བྱ་བ་ནི་འཕེན་པའི་རྒྱུ་གཟུགས་ལ་རྒྱབ་ཀྱིས་ཕྱོགས་པའི་ཕྱིར་རོ་ཞེས་བྱ་བའི་ཐ་ཚིག་གོ། །རྡོ་རྗེའི་སོར་གདུབ་ལྟ་བུ་ཞེས་བྱ་བ་ནི་རྡོ་རྗེ་དང་ལྡན་པའི་སོར་གདུབ་སྟེ། སོར་གདུབ་བམ་གདུ་བུ་ལ་རྡོ་རྗེའི་སོར་གདུབ་
ཅེས་བྱ་བ་ལྟ་བུ་དང་། ན་ལེ་ཤམ་གྱི་བཏུང་བ་བཞིན་ཏེ། ན་ལེ་ཤམ་དང་ལྡན་པའི་བཏུང་བ་ལ་བར་གྱི་ཚིག་མི་མངོན་པར་བྱས་པའི་ཕྱིར་ན་ལེ་ཤམ་གྱི་བཏུང་བ་ཞེས་བྱ་བ་དེ་བཞིན་དུ་འདོད་པ་དང་ལྡན་པའི་ཁམས་ནི་འདོད་པའི་ཁམས་སོ་ཞེས་བྱ་བ་ལ་སོགས་པ་ཡིན་

ནོ། །ཡང་ན་གཟུགས་སུ་རུང་བ་ཞེས་བྱ་བ་ནི་གནོད་པར་བྱ་བར་རུང་བ་ཞེས་བྱ་བའི་ཐ་ཚིག་སྟེ། དེ་ནི་གཟུགས་དང་ལྡན་པའི་ཕྱིར་ན་གནོད་པར་བྱ་བར་ནུས་སོ། །དེའི་ངོ་བོ་ནི་གཟུགས་མེད་པ་ཡིན་ནོ་ཞེས་བྱ་བ་ནི་གང་གི་ཚེ་མཇུག་ལ་ཁམས་ཞེས་བྱ་
བའི་ཚིག་འདི་ཡོད་པ་དེའི་ཚེ་གཟུགས་མེད་པའི་ཁམས་ཞེས་བྱ་བར་རུང་ངོ་། །གང་གི་ཚེ་མཇུག་ལ་ཚིག་མེད་པར་གཟུགས་མེད་པ་ཞེས་བྱ་བའི་སྒྲ་སྦྱོར་ཏེ། དཔེར་ན་གཟུགས་རྣམས་ལས་འདས་པ་ནི་གཟུགས་མེད་པ་དག་གོ་ཞེས་བྱ་བ་དེའི་ཚེ་ནི་གཟུགས་མེད་པ་
དག་ཉིད་གཟུགས་མེད་པ་རྣམས་སོ་ཞེས་བྱ་བར་གཟུང་བར་བྱའོ། །ཡང་ན་གཟུགས་མེད་པ་ལ་མཁས་པ་དག་ནི་གཟུགས་མེད་པ་རྣམས་སོ་ཞེས་བྱ་བར་བལྟའོ། །ཡང་ན་འདོད་པ་རྣམས་ཀྱི་ཁམས་ནི་ཞེས་བྱ་བ་ནི་ལྡན་པ་ཞེས་བྱ་བའི་སྒྲ་མི་མངོན་པར་བྱས་པ་མེད་པར་ཡང་དྲུག་པར་
ཚིག་བསྡུ་བ་ཁོ་ནས་སྒྲུབ་པར་བྱེད་པ་ཡིན་ནོ། །འདོད་པ་རྣམས་ཀྱི་ཁམས་དེ་གང་ཡིན་ཞེ་ན། གང་ཞིག་འདོད་པ་རྣམས་འཛིན་པའོ་ཞེས་བྱ་བ་སྨོས་སོ། །གཟུགས་དང་གཟུགས་མེད་པའི་ཁམས་དག་ཀྱང་དེ་དང་འདྲ་བར་རིག་པར་བྱའོ་ཞེས་བྱ་བ་ནི་གཟུགས་མེད་པ་རྣམས་
ཀྱི་ཁམས་ནི་གཟུགས་ཀྱི་ཁམས་ཏེ་གང་ཞིག་གཟུགས་རྣམས་འཛིན་པའོ། །གཟུགས་མེད་པའི་ཁམས་ནི་གཟུགས་མེད་པའི་ཁམས་ཏེ་གང་ཞིག་གཟུགས་མེད་པ་འཛིན་པའོ་ཞེས་བྱ་བ་ཡིན་ནོ། །ཁམ་གྱི་ཟས་དང་འཁྲིག་པ་དང་ལྡན་པའི་འདོད་ཆགས་ཞེས་
བྱ་བ་ནི་ཁམ་དུ་བྱེད་པས་ན་ཁམ་མོ། །དེ་ཉིད་ཟས་ཡིན་པས་ན་ཁམ་གྱི་ཟས་སོ། །ཕོ་མོ་ལས་བྱུང་བ་ནི་འཁྲིག་པ་སྟེ། གཉིས་ཀྱིས་གཉིས་སྤྲོད་པ་ལ་སོགས་པའོ། །ཁམ་གྱི་ཟས་དང་འཁྲིག་པ་དག་དང་ལྡན་ཞིང་འབྲེལ་པའམ་སྐྱེད་པ་ལ་ནི་ཁམ་གྱི་ཟས་དང་འཁྲིག་
པ་དང་ལྡན་པའི་འདོད་ཆགས་ཀྱི་འདོད་པ་ཡིན་ཏེ། འདིས་འདོད་པར་བྱེད་པས་ན་འདོད་པ་ཡིན་པའི་ཕྱིར་རོ། །ཇི་ལྟར་དེ་ལྟར་ཤེས་ཤེ་ན། གནས་བརྟན་ཤཱ་རིའི་བུས་བཤད་པའི་ཚིགས་སུ་བཅད་པས་དོན་དེ་བསྟན་པའི་ཕྱིར། འཇིག་རྟེན་དག་ན་སྣ་ཚོགས་གང་

དེ་འདོད་པ་མིན་ཞེས་བྱ་བ་རྒྱས་པར་སྨོས་སོ། །ཀུན་དུ་འཚོ་བྱེད་ཀྱིས་ཚིགས་སུ་བཅད་པ་གཞན་གྱིས་དགེ་སློང་འདོད་པའི་རྣམ་པར་རྟོག་པ་དག་ལ་རྣམ་པར་རྟོག་པར་བྱེད་པ་འདོད་པ་ལ་སྤྱོད་པ་ཉིད་ཡིན་ནོ་ཞེས་སྨྲས་པ་གང་ཡིན་པ་དེ་གནས་བརྟན་གྱི་ཁས་བླངས་ཏེ།
འདོད་པ་ལ་སྤྱོད་པ་ནི་རྣམ་པ་གསུམ་སྟེ། ལུས་དང་ངག་དང་ཡིད་ཀྱིས་སོ། །དེ་ལ་འདོད་ཆགས་དང་མ་བྲལ་བ་ཡིད་ཀྱིས་འདོད་པ་ལ་སྤྱོད་པ་ཉིད་ཡིན་ཡང་དགེ་སློང་མ་ཡིན་པར་མི་འགྱུར་གྱི་འདིའི་ཚུལ་ཁྲིམས་ཡོངས་སུ་མ་དག་པར་འགྱུར་བ་འབའ་ཞིག་ཏུ་ཟད་
དོ། །གང་ཞིག་ལུས་དང་ངག་གིས་དེ་བཞིན་གཤེགས་པའི་བསླབ་པའི་གཞི་བཀོད་པའི་མཚམས་ལས་འདས་ཏེ། འདོད་པ་དག་ལ་ཡོངས་སུ་སྤྱོད་པར་བྱེད་པ་དེ་ནི་དགེ་སློང་མ་ཡིན་པར་འགྱུར་ཏེ། དེ་བས་ན་དེས་ཉེས་པ་གཞན་གལ་ཏེ་འཇིག་རྟེན་སྣ་ཚོགས་
གང་དེ་འདོད་ཅེས་བྱ་བ་རྒྱས་པར་སྨོས་ཏེ། གལ་ཏེ་ཁྱེད་ཀྱི་ཕྱོགས་གཟུགས་ལ་སོགས་པ་ཡུལ་སྣ་ཚོགས་དག་འདོད་པ་ཡིན་ནོ་ཞེས་བྱ་བ་ཡིན་ན་ཁྱེད་ཀྱི་སྟོན་པ་ནི་འདོད་ཆགས་དང་བྲལ་བ་ཡིན་ནོ་ཞེས་བྱ་བར་ཁས་བླངས་མོད་ཀྱི་དེས་ན་ཁྱོད་ཀྱི་སྟོན་པ་ཡང་
ལུས་ཀྱི་ཡུལ་དེ་དག་ཉེ་བར་མ་སྤྱད་ཀྱང་གཟུགས་ཡིད་དུ་འོང་བ་རྣམས་མཐོང་བ་ཁོ་ནས་འདོད་པ་ལ་སྤྱོད་པ་ཅན་དུ་ཐལ་བར་འོང་ཞིང་འགྱུར་བ་ཞིག་ན་དེ་ལྟར་ཡང་མི་འདོད་དེ་དེ་ལྟ་བས་ན། སྐྱེས་བུའི་ཀུན་རྟོག་འདོད་ཆགས་འདོད་པ་ཡིན་ནོ་ཞེས་བྱ་བར་གྲུབ་པ་ཡིན་
ནོ། །ཆོས་གང་དག་ཅེས་བྱ་བ་ནི་གང་དག་ཡིན་པ་ཞེས་བྱ་བའི་ཐ་ཚིག་གོ། །སྨྲས་པ་མ་ཡིན་ནོ་ཞེས་བྱ་བ་ནི་འགོག་པར་བྱེད་པ་ཡིན་ནོ། །འདི་ལྟར་ཁམས་གཞན་གྱི་ཆོས་རྣམས་དང་། ཁམས་སུ་མ་གཏོགས་པ་དག་ཀྱང་ཁམས་གཞན་ན་ཀུན་དུ་སྤྱོད་
དེ་འདོད་པའི་ཁམས་ན་ནི་ཁམས་གསུམ་པ་དང་ཟག་པ་མེད་པའི་ཆོས་རྣམས་ཀུན་དུ་སྤྱོད་ལ། གཟུགས་ཀྱི་ཁམས་ན་ཡང་དེ་དང་འདྲ་སྟེ། དེ་ན་འདོད་པ་ན་སྤྱོད་པ་ནི་སྤྲུལ་པའི་སེམས་ཀུན་དུ་སྤྱོད་དོ། །གཟུགས་མེད་པའི་ཁམས་ན་ནི་གཟུགས་མེད་པ་ན་

སྤྱོད་པ་རྣམས་དང་ཟག་པ་མེད་པ་དག་སྟེ། དེ་ལྟ་བས་ན་མ་ཡིན་ནོ་ཞེས་འགོག་པར་བྱེད་པ་ཡིན་ནོ། །འོ་ན་ཅི་ཞེ་ན། གང་དག་ལ་འདོད་པ་དང་གཟུགས་དང་གཟུགས་མེད་པའི་འདོད་ཆགས་རྒྱས་པར་འགྱུར་བའོ་ཞེས་བྱ་བ་ནི་གང་དག་ལ་
འདོད་པའི་འདོད་ཆགས་དམིགས་པའམ་མཚུངས་པར་ལྡན་པའི་སྒོ་ནས་ཅི་རིགས་པར་རྒྱས་པར་འགྱུར་བ་དེ་དག་ནི་འདོད་པ་དང་ལྡན་པ་ཡིན་ལ། གང་དག་ལ་གཟུགས་དང་གཟུགས་མེད་པའི་འདོད་ཆགས་དག་རྒྱས་པར་འགྱུར་བ་དེ་དག་ནི་གོ་རིམས་བཞིན་
དུ་གཟུགས་དང་གཟུགས་མེད་པ་དང་ལྡན་པ་ཡིན་ནོ། །ད་ནི་འདི་རྟ་དང་བྲེས་ལྟ་བུ་དེ་ཡིན་ཏེ་ཞེས་བྱ་བ་ནི་རྟ་དང་རྟའི་བྲེས་ནི་རྟ་དང་བྲེས་སོ། །རྟ་དང་བྲེས་དང་འདྲ་བ་ནི་རྟ་དང་བྲེས་ལྟ་བུའོ། །ཡང་ན་འདི་རྟ་དང་བྲེས་ཀྱི་ཡིན་པས་ན་རྟ་དང་བྲེས་ཏེ་རྟ་དང་བྲེས་དང་འདྲ་བ་
ཡིན་ཏེ། འགའ་ཞིག་གིས་རྟའི་བྲེས་འདི་སུའི་ཡིན་ཞེས་དྲིས་ན་དེ་ལ་ཅིག་ཤོས་ཀྱིས་རྟ་འདི་སུའི་ཡིན་པ་དེའི་འོ་ཞེས་སྨྲས་ལ། ཡང་དེས་རྟ་འདི་སུའི་ཡིན་ཞེས་དྲིས་པ་དང་ཡང་ཅིག་ཤོས་དེས་རྟའི་བྲེས་འདི་སུའི་ཡིན་པ་དེའི་འོ་ཞེས་སྨྲས་ན། རྟ་དང་བྲེས་གཉི་
ག་ཡང་མི་ཤེས་ཏེ་ཇི་ལྟར་ཕན་ཚུན་མ་གྲུབ་པས་གཉི་ག་ཡང་ཡོངས་སུ་མི་ཆོད་པ་དེ་བཞིན་དུ་འདིར་ཡང་འདོད་ཆགས་དག་གིས་ཀྱང་ཁམས་རྣམས་སྒྲུབ་པ་མ་ཡིན་ལ་ཁམས་རྣམས་ཀྱིས་ཀྱང་འདོད་ཆགས་དག་མ་ཡིན་པས་འདི་གཉི་ག་ཡང་མི་འགྲུབ་བོ། །
འདོད་པའི་ཁམས་སུ་གནས་བསྟན་པ། །ཞེས་བྱ་བ་ནི། དམྱལ་བ་ཡི་དགས་དུད་འགྲོ་དང་། །མི་རྣམས་དང་ནི་ལྷ་དྲུག་དག །འདོད་པའི་ཁམས་ཡིན་དམྱལ་བ་དང་། །གླིང་དབྱེ་བ་ལས་དེ་ཉི་ཤུ། །ཞེས་བྱ་བ་ཡིན་ཏེ། འདོད་པའི་ཁམས་སུ་གནས་བསྟན་
པ་དེ་དག་ལ་འདོད་ཆགས་དང་མ་བྲལ་བའི་འདོད་ཆགས་གང་ཡིན་པ་དེ་ནི་འདོད་པའི་འདོད་ཆགས་ཡིན་ནོ། །དེ་བཞིན་དུ་གཟུགས་དང་གཟུགས་མེད་པའི་འདོད་ཆགས་ཞེས་བྱ་བ་ནི་གཟུགས་ཀྱི་ཁམས་སུ་གནས་བསྟན་པ་སྟེ། གོང་མའི་གནས་དག་བཅུ་

བདུན་ནི། །གཟུགས་ཀྱི་ཁམས་ཡིན་ཞེས་བྱ་བ་དེ་དག་ལ་འདོད་ཆགས་དང་མ་བྲལ་བའི་འདོད་ཆགས་གང་ཡིན་པ་དེ་ནི་གཟུགས་ཀྱི་འདོད་ཆགས་ཡིན་ལ། དེ་བཞིན་དུ་གཟུགས་མེད་པའི་ཁམས་སུ་སྐྱེ་བ་བསྟན་པ་སྟེ། གཟུགས་མེད་ཁམས་ན་གནས་མེད་དོ། །སྐྱེ་བ་
ལས་ནི་རྣམ་པ་བཞི། །ཞེས་བྱ་བ་དེ་དག་ལ་འདོད་ཆགས་དང་མ་བྲལ་བའི་འདོད་ཆགས་གང་ཡིན་པ་དེ་ནི་གཟུགས་མེད་པའི་འདོད་ཆགས་ཡིན་ནོ། །ཅི་རིགས་པར་ཞེས་བྱ་བ་ནི་གནས་བསྟན་པ་ལ་ལྟོས་པ་ཡིན་ནོ། །བསམ་གཏན་དང་གཟུགས་མེད་པ་དག་ལ་འདོད་
ཆགས་པ་ཞེས་བྱ་བ་ནི་སྙོམས་པར་འཇུག་པ་དང་སྐྱེ་བའི་བསམ་གཏན་དག་ལ་འདོད་ཆགས་པ་ནི་གཟུགས་ཀྱི་འདོད་ཆགས་ཡིན་ལ་གཟུགས་མེད་པའི་འདོད་ཆགས་ཀྱང་དེ་དང་འདྲའོ། །སྤྲུལ་པའི་སེམས་ལ་ཇི་ལྟར་འདོད་པའི་འདོད་ཆགས་པ་ཡིན་ཞེས་བྱ་བ་ནི་གང་
གིས་ན་དེ་འདོད་པ་ན་སྤྱོད་པ་ཉིད་ཡིན་པར་འགྱུར་བ་བསམ་གཏན་གྱི་འབྲས་བུ་འདོད་པ་ན་སྤྱོད་པའི་སྤྲུལ་པའི་སེམས་ལ་ཇི་ལྟར་འདོད་པ་ལས་འདོད་ཆགས་དང་བྲལ་བ་རྣམས་ཀྱི་འདོད་པའི་འདོད་ཆགས་ཡིན། གང་གི་ཚེ་འདི་འདོད་པ་ལས་འདོད་ཆགས་དང་མ་བྲལ་བ་དེའི་ཚེ་
ནི་སྤྲུལ་པའི་སེམས་ཀུན་དུ་མི་འབྱུང་ངོ་། །གང་གི་ཚེ་སྤྲུལ་པའི་སེམས་ཀུན་དུ་འབྱུང་བ་དེའི་ཚེ་ནི་དེ་ལས་འདོད་ཆགས་མི་སྐྱེ་ན། ཇི་ལྟར་འདི་འདོད་པའི་འདོད་ཆགས་མེད་པར་འདོད་པ་ན་སྤྱོད་པ་ཉིད་དུ་རྣམ་པར་གཞག་ཅེས་བྱ་བའི་ཐ་ཚིག་གོ། །ཐོས་པ་དང་ཡོངས་སུ་
ཉམས་ནས་དེ་ལ་ཆགས་པའི་ཕྱིར་རོ་ཞེས་བྱ་བ་ནི་གཞན་ལས་ཐོས་ནས་སྤྲུལ་པའི་སེམས་ལ་འདོད་ཆགས་སྐྱེ་ལ། བདག་ཉིད་ཀྱི་སྤྲུལ་པའི་སེམས་ལས་ཡོངས་སུ་ཉམས་ནས་ནི་དེ་ལ་ཆགས་པའི་ཕྱིར་ཏེ། བསམ་གཏན་པ་འདི་ལྟ་བུ་ཞིག་གིས་འདོད་པ་ན་སྤྱོད་པའི་
སྤྲུལ་པའི་སེམས་ཀྱིས་འདོད་པ་ན་སྤྱོད་པའི་སྤྲུལ་པ་སྤྲུལ་པར་བྱེད་དོ་ཞེས་ཐོས་ནས་ནི་དེ་ལ་དམིགས་པའི་འདོད་ཆགས་སྐྱེ་ལ་བདག་ཉིད་ཀྱི་རྗེས་སུ་དྲན་ནས་ཀྱང་དེ་ལ་འདོད་ཆགས་སྐྱེའོ། །ཡང་ན་སྤྲུལ་པའི་དབང་གིས་ཞེས་བྱ་བ་ནི་སྤྲུལ་པ་ཡིད་འཕྲོག་པ་མཐོང་ནས་

སྤྲུལ་པ་བྱེད་པའི་ཕྱིར་སེམས་སམ་སྤྲུལ་པ་པོའི་སེམས་ལ་གང་གི་སྤྲུལ་པ་འདི་འདྲ་བ་ཡིན་པའི་སྤྲུལ་པའི་སེམས་ནི་བཟང་ངོ་སྙམ་དུ་འདོད་ཆགས་པ་ཡིན་ནོ། །ཡང་ན་སྤྲུལ་པ་སྤྲུལ་པའི་ཕྱིར་ཞེས་བྱ་བ་ནི་འདོད་པ་ན་སྤྱོད་པའི་སྤྲུལ་པ་སྤྲུལ་
པར་བྱེད་པའི་སེམས་གང་ཡིན་པ་དེ་ནི་འདོད་པ་ན་སྤྱོད་པ་ཡིན་ཏེ། འདོད་པ་ན་སྤྱོད་པའི་ཆོས་ཀྱི་རྒྱུ་ཡིན་པའི་ཕྱིར་བུམ་པའི་རྒྱུའི་སེམས་ལྟ་བུའོ། །གང་འདོད་པ་ན་སྤྱོད་པ་མ་ཡིན་པ་དེ་ནི་འདོད་པ་ན་སྤྱོད་པའི་ཆོས་ཀྱི་རྒྱུ་མ་ཡིན་ཏེ། དཔེར་ན་གཟུགས་ན་སྤྱོད་པའི་
སེམས་ལྟ་བུའོ། །དེ་ལྟ་ཉིད་ཀྱི་ཕྱིར་གཟུགས་ན་སྤྱོད་པས་ནི་དེ་གཉིས་མི་སྤྲུལ་པའི་ཕྱིར་རོ་ཞེས་བྱ་བ་སྨོས་སོ། །ཡང་ཅིའི་ཕྱིར་གཟུགས་ན་སྤྱོད་པའི་སེམས་ཀྱིས་དྲི་དང་རོ་དེ་དག་མི་སྤྲུལ་ཞེ་ན་དྲི་དང་རོ་དེ་དག་ནི་ཁམ་གྱི་ཟས་ཀྱི་ངོ་བོ་ཉིད་ཡིན་པའི་ཕྱིར་ལ། གཟུགས་ཀྱི་
ཁམས་སུ་སྐྱེས་པ་རྣམས་ཀྱང་དེའི་འདོད་ཆགས་དང་བྲལ་བའི་ཕྱིར་རོ། །གཉའ་ཤིང་ཙམ་ཞེས་བྱ་བ་ནི་ཆར་གྱི་རྒྱུན་གཉའ་ཤིང་གི་ཚད་ཙམ་ནི་གཉའ་ཤིང་ཙམ་མོ། །མཚམས་སམ་བར་མེད་དོ་ཞེས་བྱ་བ་ནི་འདབ་ཆགས་པ་ཉིད་དུ་སྟོན་པར་བྱེད་དོ། །སྟེང་དང་འོག་ཅེས་ནི་
མ་གསུངས་སོ་ཞེས་བྱ་བ་ནི་དེའི་ཕྱིར་འཇིག་རྟེན་གྱི་ཁམས་རྣམས་ཐད་ཀ་ཁོ་ནར་གནས་སོ་ཞེས་སྟོན་པར་བྱེད་དོ། །ལྔ་པའི་ཕྱོགས་སོ་ཞེས་བྱ་བ་ནི་ལྷའི་འགྲོ་བ་སྟེ། འདོད་པ་ན་སྤྱོད་པའི་ལྷ་དྲུག་བཤད་པ་ཡིན་ནོ། །ལྷག་མ་རྣམས་ནི་གཟུགས་དང་གཟུགས་མེད་པ་ན་སྤྱོད་
པ་ཡིན་ནོ། །དེ་ལྟ་མ་ཡིན་ན་འགྲོ་བ་འཆོལ་བར་འགྱུར་རོ་ཞེས་བྱ་བ་ནི་འགྲོ་བ་འདྲེས་པའོ། །གལ་ཏེ་དགེ་བ་དང་ཉན་མོངས་པ་ཅན་ཡང་ཡིན་པར་གྱུར་ན། འགྲོ་བ་འཆོལ་བར་འགྱུར་ཏེ། མི་ཡང་དམྱལ་བར་འགྱུར་བའི་ལས་ནས་ལྷར་སྐྱེ་བར་འགྱུར་བའི་བར་གྱི་ལས་བྱེད་
པས་དེའི་ཕྱིར་མིའི་འགྲོ་བ་དམྱལ་བའི་འགྲོ་བ་ཡང་ཡིན་པར་འགྱུར་བ་ནས་ལྷའི་འགྲོ་བའི་བར་དུ་ཡང་ཡིན་པར་འགྱུར་ཏེ། ལས་དེ་རྣམས་འགྲོ་བ་དེར་གཏོགས་པའི་ཕྱིར་རོ། །འདོད་པའི་ཁམས་སུ་སྐྱེས་པས་གོང་མ་པའི་ཉོན་མོངས་པ་རྣམས་དང་ཡང་ལྡན་ལ་འདོད་པ་ན་

སྤྱོད་པའི་ཉོན་མོངས་པ་ཅན་འགྲོ་བ་ཐམས་ཅད་པ་དང་ཡང་ལྡན་པས་མི་དེ་ཉིད་དམྱལ་བ་ནས་ལྷའི་བར་དུ་ཡང་ཡིན་པར་འགྱུར་རོ། །སེམས་ཅན་ཞེས་བྱ་བ་ཁོ་ན་ཡིན་ཞེས་བྱ་བ་ནི་ལུས་རྣམས་ལས་དང་མཐུན་པར་དེར་འགྲོ་བའི་ཕྱིར་རོ། །དེ་ཉིད་ཀྱི་ཕྱིར། བསོད་
ནམས་སྡིག་འབྲས་ཉེར་འགྲོ་རྣམས། །ལས་བཞིན་དུ་ནི་འགྲོ་བར་འགྱུར། །ཞེས་གསུངས་སོ། །སྲིད་པ་བར་མའི་རང་བཞིན་དག་ནི་མ་ཡིན་ནོ་ཞེས་བྱ་བ་འདི་བསྒྲུབ་པའི་ཕྱིར་ཁུངས་བཏགས་པ་ལས་ཀྱང་གསུངས་སོ་ཞེས་བྱ་བར་རྒྱས་པར་ཁྱེར་ཏེ་འོང་བར་བྱེད་དོ། །
རྒྱུ་དང་བཅས་པ་དང་འགྲོ་བ་དང་བཅས་པ་ཞེས་བྱ་བ་ལ་རྒྱུ་ནི་ལས་ཀྱི་སྲིད་པའོ། །འགྲོ་བ་ནི་སྲིད་པ་བར་མ་པ་སྟེ། འདིས་འགྲོ་བར་འགྱུར་བའི་ཕྱིར་རོ། །འགྲོ་བ་ནི་བགྲོད་པར་བྱ་བ་ཡིན་པས་ན་འགྲོ་བའོ། །དེའི་རྒྱུ་ལས་དེ་དག་ལོགས་ཤིག་ཏུ་མཛད་པའི་ཕྱིར་རོ་
ཞེས་བྱ་བ་ནི་ལས་ཀྱི་སྲིད་པ་དགེ་བ་དང་མི་དགེ་བ་ནི་འགྲོ་བ་དེ་དག་ལས་ལོགས་ཤིག་ཏུ་མཛད་པའི་ཕྱིར་རོ། །ཁ་ཆེ་བའི་ཡུལ་ན་ཡོད་པ་ཁ་ཆེ་བ་རྣམས་མདོ་འདོན་ཏེ་ཞེས་བྱ་བ་དེ་ནི་མདོ་སིལ་བུ་ཡིན་ཏེ། དེ་དག་ཁོ་ན་འདོན་གྱི་གཞན་རྣམས་ནི་མ་ཡིན་ནོ་ཞེས་བྱ་བར་བསམས་
པ་ཡིན་ནོ། །དམྱལ་བ་པ་ཞེས་བྱ་བ་རྒྱས་པར་འབྱུང་བ་ནི་དམྱལ་བ་པ་དང་མཐུན་པ་དག་ནི་དམྱལ་བ་པའོ། །དེ་དག་གི་ཞེས་བྱ་བ་རྒྱས་པར་འབྱུང་བ་ལ། ལུས་དང་ངག་དང་ཡིད་ཀྱི་དཀྱིལ་འཁོར་ནི་རྒྱུས་ཀུན་ནས་བསླང་བའི་ལས་དག་ཡིན་ནོ། །སྐྱོན་དང་སྙིགས་མ་ནི་ཞེ་
སྡང་དང་འདོད་ཆགས་ཀྱིས་ཀུན་ནས་བསླང་བ་དག་ཡིན་ནོ། །དེའི་ཕྱིར་ཡང་འགྲོ་བ་དག་ནི་མ་བསྒྲིབས་ལ་ལུང་དུ་མ་བསྟན་པ་ཁོ་ན་ཡིན་ནོ་ཞེས་བྱ་བ་ནི་གང་གི་ཕྱིར་རྣམ་པར་སྨིན་པ་གྲུབ་ནས་དམྱལ་བ་ཞེས་བྱ་བའི་གྲངས་སུ་འགྲོའོ་ཞེས་བྱ་བ་ཡིན་ནོ། །འགྲོ་བ་དག་ལ་ཕྲ་
རྒྱས་ཐམས་ཅད་རྒྱས་པར་འགྱུར་རོ་ཞེས་འབྱུང་བའི་གཞུང་ལན་གདབ་པར་བྱ་དགོས་ཏེ། འགལ་བར་ཐལ་བར་འགྱུར་བའི་ཕྱིར་ལན་བརྗོད་པར་བྱ་དགོས་སོ་ཞེས་བྱ་བའི་ཐ་ཚིག་གོ། །གལ་ཏེ་འགྲོ་བ་ཆོས་རྣམ་པ་ལྔའི་ངོ་བོ་ཉིད་ཡིན་པར་གྱུར་ན་དེ་ལྟ་ན་ཕྲ་རྒྱས་ཐམས་

ཅད་རྒྱས་པར་འགྱུར་རོ། །ཅི་སྟེ་འགྲོ་བ་དག་མ་བསྒྲིབས་པ་ཁོ་ན་ཡིན་པར་གྱུར་ན་དེ་ལྟ་ན་ནི་བསྒོམ་པས་སྤང་བར་བྱ་བ་རྣམས་དང་། ཀུན་དུ་འགྲོ་བ་རྣམས་ཞེས་བརྗོད་པར་བྱ་དགོས་ཏེ་བསྒོམ་པས་སྤང་བར་བྱ་བ་ནི་འདུས་བྱས་ཀྱི་ཆོས་མ་བསྒྲིབས་ལ་
ལུང་དུ་མ་བསྟན་པ་དག་ཁོ་ན་ཡིན་ལ་དེ་དག་ལ་ཡང་ཕྲ་རྒྱས་བསྒོམ་པས་སྤང་བར་བྱ་བ་རྣམས་དང་། ཀུན་དུ་འགྲོ་བ་རྣམས་དམིགས་པའམ་མཚུངས་པར་ལྡན་པའི་སྒོ་ནས་རྒྱས་པར་འགྱུར་གྱི་གཞན་དག་ནི་མ་ཡིན་ནོ། །དེས་ན་འགྲོ་བ་དག་ནི་མ་བསྒྲིབས་ལ་ལུང་དུ་མ་
བསྟན་པ་ཡིན་ནོ་ཞེས་བྱ་བར་ཤེས་སོ། །འགྲོ་བ་རྣམས་སུ་ཉིང་མཚམས་སྦྱོར་བའི་སེམས་རྣམ་པ་ལྔ་ཡོད་དེ་ཞེས་བྱ་བ་ནི་འགྲོ་བ་རྣམས་སུ་ཉིང་མཚམས་སྦྱོར་བའི་སེམས་ནི་འཇུག་པ་དག་ཡིན་ཏེ། དེ་དག་སྡུག་བསྔལ་མཐོང་བས་སྤང་བར་བྱ་བ་ནས། བསྒོམ་པས་སྤང་བར་
བྱ་བའི་བར་རྣམ་པ་ལྔ་ཡིན་པའི་ཕྱིར་དེ་ལ་ཕྲ་རྒྱས་ཐམས་ཅད་རྒྱས་པར་འགྱུར་རོ་ཞེས་བྱ་བ་རིགས་པ་ཡིན་ནོ། །གྲོང་གི་ཉེན་ཀོར་ཡང་སྨོས་པ་བཞིན་ནོ་ཞེས་བྱ་བ་ནི་གྲོང་གི་གཡས་གཡོན་ཡང་སྨོས་པ་བཞིན་ནོ་ཞེས་བྱ་བའི་ཐ་ཚིག་གོ། །སྙིགས་མ་ལྔ་པོ་དག་ཏུ་ཞེས་བྱ་བ་
སྙིགས་མ་ལྔ་ནི་ཚེའི་སྙིགས་མ་དང་། དུས་ཀྱི་སྙིགས་མ་དང་། ཉོན་མོངས་པའི་སྙིགས་མ་དང་། ལྟ་བའི་སྙིགས་མ་དང་། སེམས་ཅན་གྱི་སྙིགས་མའོ། །དེ་དག་ཏུ་ཉོན་མོངས་པ་དང་ལྟ་བའི་སྙིགས་མ་དག་ཐ་དད་དུ་གསུངས་ཞེས་བྱ་བ་ནི་ཉོན་མོངས་པའི་སྙིགས་མ་དང་ལྟ་
བའི་སྙིགས་མ་སོ་སོར་གསུངས་ཞེས་བྱ་བའི་ཐ་ཚིག་སྟེ། འདི་གཉིས་སོ་སོར་གསུངས་པ་ནི་ཁྱིམ་ན་གནས་པ་དང་རབ་ཏུ་བྱུང་བའི་ཕྱོགས་ཀྱི་དབང་དུ་མཛད་པའི་ཕྱིར་རོ། །འགྲོ་བའི་རྒྱུ་ཤེས་པར་བྱ་བའི་ཕྱིར་ཞེས་བྱ་བ་ནི་འགྲོ་བ་རྣམས་ཀྱི་རྒྱུ་ནི་ལས་ཀྱི་སྲིད་པ་ཡིན་ནོ་ཞེས་བྱ་
བར་རོ། །འདི་ནི་སྲིད་པ་བར་མ་ལ་ཡང་ཐལ་བར་འགྱུར་རོ་ཞེས་བྱ་བ་ནི་དེ་ལྟ་ན་དེ་སྲིད་པ་བར་མ་ཡང་ཡིན་འགྲོ་བ་ཡང་ཡིན་ལ། འགྲོ་བར་འགྲོ་བ་ཤེས་པར་བྱ་བའི་ཕྱིར་འདི་ཐ་དད་དུ་བསྟན་པ་ཡང་ཡིན་ནོ་ཞེས་བྱ་བ་ཡིན་ནོ། །དེར་འགྲོ་བས་ན་ཞེས་བྱ་བ་ནི་ལས་སུ་བསྒྲུབ་

པ་ཡིན་པར་ཡོངས་སུ་གཟུང་ངོ་། །སྲིད་པ་བར་མ་ནི་དེ་ལྟ་བུ་ཡིན་པར་ཡང་མི་རུང་བས་འགྲོ་བ་མ་ཡིན་ནོ། །གཟུགས་མེད་པ་རྣམས་ཀྱང་ཞེས་བྱ་བ་རྒྱས་པར་འབྱུང་བ་ནི་གཟུགས་མེད་པ་དག་ཀྱང་འགྲོ་བ་མ་ཡིན་པར་འགྱུར་ཏེ། འཆི་འཕོ་བའི་ཡུལ་ཉིད་དུ་སྐྱེ་བའི་ཕྱིར་རོ། །གཟུགས་
མེད་པར་ཉེ་བར་འགྲོ་བ་དག་ནི་གཙུག་ལག་ཁང་ངམ་ཤིང་དྲུང་ངམ་བསམ་གཏན་བཞི་པའི་སའི་བར་གང་དུ་འཆི་འཕོ་བ་དེ་ཉིད་དུ་སྐྱེ་བས་སྲིད་པ་བར་མ་བཞིན་དུ་འགྲོ་བ་མ་ཡིན་པར་འགྱུར་རོ། །དེ་ལྟ་ན་འོ་ན་ནི་ཞེས་བྱ་བ་ནི་ཕྱོགས་སྔ་མ་ཡོངས་སུ་བོར་ནས་ཕྱོགས་གཞན་ལ་རྟེན་
པར་བྱེད་པ་ཡིན་ཏེ། འགྲོ་བ་དག་གི་བར་ན་ཡོད་པས་འགྲོ་བའི་བར་མ་དོ་ཞེས་མིང་དོན་དང་མཐུན་པར་བཏགས་པའི་ཕྱིར་སྲིད་པ་བར་མ་ནི་འགྲོ་བ་མ་ཡིན་ནོ། །བྱེ་བྲག་ཏུ་སྨྲ་བས་འོ་ན་གནས་བརྟན་ཤཱ་རིའི་བུས་ཞེས་བྱ་བ་རྒྱས་པར་སྨྲས་ཏེ། དེའི་བསམ་པ་ནི་རྣམ་པར་
སྨིན་པ་གྲུབ་ནས་ཞེས་རྣམ་པར་སྨིན་པའི་སྒྲ་སྨོས་པའི་ཕྱིར་འགྲོ་བ་ནི་རྣམ་པར་སྨིན་པའི་ངོ་བོ་ཉིད་ཡིན་ནོ་སྙམ་པ་ཡིན་ནོ། །ཅིག་ཤོས་ཀྱིས་སྨྲས་པ། རྣམ་པར་སྨིན་པ་གྲུབ་ནས་དམྱལ་བ་ཡིན་ནོ་ཞེས་འགྲོ་བ་རྣམ་པར་གཞག་གི་རྣམ་པར་སྨིན་པ་ཁོ་ནའོ་ཞེས་མ་བཤད་དོ་ཞེས་བྱ་བ་ནི་
འགྲོ་བ་རྣམ་པར་སྨིན་པའི་ངོ་བོ་ཉིད་ཁོ་ནའོ་ཞེས་མ་བཤད་དོ། །འོ་ན་ཅི་ཞེ་ན། འགྲོ་བ་ནི་རྣམ་པར་སྨིན་པ་དང་། རྣམ་པར་སྨིན་པ་མ་ཡིན་པའི་ངོ་བོ་ཉིད་ཡིན་ཏེ། དེ་ལྟ་བས་ན་འགྲོ་བ་དག་ནི་དགེ་བ་དང་། ཉོན་མོངས་པ་ཅན་ཡང་ཡིན་ནོ་སྙམ་དུ་བསམས་པ་ཡིན་ནོ། །ཡང་བྱེ་
བྲག་ཏུ་སྨྲ་བ་རྣམས་ཀྱིས་འོ་ན་ཚེ་དང་ལྡན་པ་དེ་ལ་ཞེས་བྱ་བ་རྒྱས་པར་སྨོས་ཏེ། ཆོས་དེ་དག་ལས་མ་གཏོགས་པ་ཞེས་བྱ་བ་ནི་རྣམ་པར་སྨིན་པ་དག་ལས་མ་གཏོགས་པ་ཞེས་བྱ་བའི་ཐ་ཚིག་གོ། །ཕུང་པོ་གཞན་འགོག་པར་བྱེད་པ་ནི་མ་ཡིན་ནོ་ཞེས་བྱ་བ་སྐབས་དང་སྦྱར་རོ། །
དེ་དག་ཀྱང་ཞེས་བྱ་བ་རྒྱས་པར་འབྱུང་བ་ནི་ལུང་དུ་མ་བསྟན་པ་ཉིད་ཀྱི་ཕྱོགས་ལ་ཡང་རྣམ་པ་གཉིས་སོ། །རྒྱས་པ་ལས་བྱུང་བའི་རང་བཞིན་དག་ཀྱང་ཡིན་ནོ་ཞེས་བྱ་བ་ལ་ཡང་ཞེས་བྱ་བའི་སྒྲས་ནི་རྣམ་པར་སྨིན་པའི་རང་བཞིན་ཡང་ཡིན་པ་སྟེ། ཇི་སྐད་དུ། སྲོག་ནི་རྣམ་

སྨིན་བཅུ་གཉིས་གཉིས། །ཞེས་བཤད་པ་ལྟ་བུའོ། །རྒྱུ་མཐུན་པ་དག་ཡིན་པར་ནི་མི་གཟུང་ངོ་། །སློབ་དཔོན་འདུས་བཟངས་ནི་རྣམ་པར་སྨིན་པའི་རང་བཞིན་དག་ཁོ་ན་ཡིན་ནོ་ཞེས་བྱ་བ་ཕྱོགས་སྔ་མ་ཉིད་འདོད་དོ། །འདོད་པ་ན་སྤྱོད་པ་དྲུག་དང་། བསམ་གཏན་
དང་པོ་པ་རྣམས་སོ། །དེ་དག་ཀྱང་གང་ཞེ་ན། ཉི་འོག་པའི་ལུགས་ཀྱིས་ནི་ཚངས་རིས་རྣམས་དང་། ཚངས་པའི་མདུན་ན་འདོན་པ་རྣམས་དང་། ཚངས་ཆེན་དང་པོར་བྱུང་བ་མ་གཏོགས་པ་རྣམས་ཡིན་ནོ། །ཡང་ཁ་ཆེའི་ལུགས་ཀྱིས་ནི་ཚངས་རིས་རྣམས་དང་། ཚངས་
པའི་མདུན་ན་འདོན་དང་པོར་བྱུང་བ་མ་གཏོགས་པ་རྣམས་ཡིན་ཏེ། དེ་དག་གི་ལུགས་ལྟར་ན་ཚངས་པ་ཆེན་པོ་རྣམས་ཚངས་པའི་མདུན་ན་འདོན་པ་དག་ཁོ་ནའི་ནང་ན་གནས་ཀྱི་གནས་གཞན་ནི་མེད་དོ། །ཁ་དོག་དང་རྟགས་དང་དབྱིབས་དུ་མའི་ཕྱིར་རོ་ཞེས་བྱ་བ་ལ་ཁ་དོག་ནི་སྔོན་པོ་
ཉིད་ལ་སོགས་པའོ། །རྟགས་ནི་གོས་དང་། རྒྱན་ལ་སོགས་པའོ། །དབྱིབས་ནི་སྲིད་ལ་སོགས་པའོ། །ཆུ་ནི་འཕང་ངོ་། །ཞེང་ནི་ཞེང་གི་ཚད་དོ། །དབྱིབས་ཀྱི་མཚན་ཉིད་ཀྱི་ལུས་ནི་དབྱིབས་ཀྱི་ལུས་སོ། །དེ་ལྟར་ཁྱད་པར་དུ་བྱས་ན་ཚོར་བ་ལ་སོགས་པའི་ལུས་བརྩལ་བ་
ཡིན་ཏེ། དེ་ནི་དབྱིབས་ཀྱི་མཚན་ཉིད་མ་ཡིན་ནོ། །ལུས་ནི་ཁོག་པ་ཡིན་ནོ། །ཚིག་ཏུ་བརྗོད་པ་ནི་ཚིག་ཏུ་འདོན་པའོ། །ད་ནི་བསམ་གཏན་གཉིས་པའི་ཞེས་བྱ་བ་རྒྱས་པར་འབྱུང་བ་ནི་གཉིས་ནི་དེ་དག་གི་བསམ་གཏན་དང་པོས་སླར་ལྡོག་པས་བཏང་ན་ཇི་ལྟར་དེའི་ས་པ་སྟེ།
བསམ་གཏན་གཉིས་པའི་ས་པའི་སྔོན་གྱི་གནས་རྗེས་སུ་དྲན། རེ་ཞིག་བསམ་གཏན་དང་པོའི་ས་པའི་སེམས་ཀྱིས་ནི་མ་ཡིན་ཏེ། དེའི་ཡུལ་མ་ཡིན་པའི་ཕྱིར་རོ། །བསམ་གཏན་གཉིས་པའི་ས་པས་ཀྱང་མ་ཡིན་ཏེ། དེ་ནི་མ་ཐོབ་པའི་ཕྱིར་རོ། །གལ་ཏེ་ཕྱིས་ཐོབ་པོ་ཞེ་ན།
དེའི་ཕྱིར། འོན་ཏེ་ཐོབ་ན་ནི་ཞེས་བྱ་བ་རྒྱས་པར་སྨོས་ཏེ། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལྟ་བ་ཚངས་པ་ཆེན་པོ་ལ་དམིགས་པ་ནི་བསམ་གཏན་དང་པོའི་ས་པ་ཁོ་ན་ཡིན་པར་རུང་བ་དེ་ཡང་བསམ་གཏན་གཉིས་པ་ཐོབ་སྟེ་སྤངས་པས་ཀུན་དུ་འབྱུང་ངོ་། །གལ་ཏེ་བསམ་

གཏན་གཉིས་པའི་ས་པས་ཡིན་ནོ་ཞེ་ན། འོག་མ་ལ་དམིགས་པ་ཉིད་དུ་མི་རུང་བའི་ཕྱིར་མ་ཡིན་ཏེ། ཉོན་མོངས་པ་ནི་འགའ་ཡང་ས་འོག་མ་པ་ལ་དམིགས་པར་མི་འདོད་དོ། །སྲིད་པ་བར་མ་ལ་གནས་པ་དག་གིས་མཐོང་ངོ་ཞེས་བྱ་བ་ནི་སྲིད་པ་བར་མ་ལ་གནས་པ་དེ་དག་གིས་
ཚངས་པ་ཆེན་པོ་དེ་མཐོང་ནས་འདི་སྐད་དུ་བདག་ཅག་གིས་སེམས་ཅན་འདི་ཚེ་རིང་བ་དང་དུས་རིང་པོར་གནས་པ་མཐོང་ལ་ཞེས་སྨྲའོ། །ཕྱོགས་འདི་ཡང་རུང་བ་མ་ཡིན་ཏེ། འདི་ལྟར་སྲིད་པ་བར་མ་དེ་ན་ཡང་ཁུ་ཆུ་དང་ཁྲག་ལ་མི་ལྟོས་པས་སྐྱེ་བ་ལ་བགེགས་བྱེད་པ་མེད་པའི་ཕྱིར་
དུས་རིང་པོར་གནས་པ་སྲིད་པ་མེད་ན་ཇི་ལྟར་དེ་དག་གི་བློ་ལ་བདག་ཅག་གིས་སེམས་ཅན་འདི་ཚེ་རིང་ཞིང་དུས་རིང་པོར་གནས་པར་མཐོང་ངོ་སྙམ་དུ་ཤེས་པར་འགྱུར་ཏེ། དུས་རིང་པོར་གནས་པ་ཤེས་པར་མི་འགྱུར་རོ་ཞེས་བྱ་བའི་ཐ་ཚིག་གོ། །དེ་ལྟ་བས་ན། དེ་ན་གནས་པ་ཁོ་
ནས་ཞེས་བྱ་བ་རྒྱས་པར་འབྱུང་བ་ནི་བསམ་གཏན་དང་པོའི་ས་པ་ལ་གནས་པ་དེ་དག་ཁོ་ན་ཚངས་པ་ཆེན་པོ་དེའི་སྔོན་གྱི་ཚུལ་རྗེས་སུ་དྲན་ཞིང་སྟེ། སྐྱེ་བའི་གནས་སྐབས་ཁོ་ན་ན་དེ་དག་གིས་ཚངས་པ་ཆེན་པོ་སྔར་བྱུང་བ་དེ་དུས་རིང་པོར་གནས་པ་མཐོང་ངོ་། །མཐོང་ནས་ཀྱང་ཕྱིས་དུས་
ཕྱིས་དེ་དག་མཐོང་ངོ་སྙམ་དུ་ཤེས་པ་ཡིན་ཏེ་བློ་ལ་ཞེས་བྱ་བ་ཚིག་ལྷག་མ་ཡིན་ནོ། །དེ་ལྟ་ཡིན་ན་སེམས་ཅན་འདི་ཡང་སེམས་ལ་འདི་སྙམ་དུ་ཀྱེ་མ་སེམས་ཅན་གཞན་དག་ཀྱང་འདིར་བདག་དང་སྐལ་བ་མཉམ་པར་སྐྱེ་བར་གྱུར་ཅིག་སྙམ་དུ་སྨོན་ལ་བདག་ཅག་ཀྱང་འདིར་སྐྱེས་པས་
ཞེས་བྱ་བའི་འདི་ལན་མ་བཏབ་པར་འགྱུར་རོ་ཞེ་ན། ས་མཚུངས་པའི་ཕྱིར་སྐྱེས་ནས་ཐོབ་པས་ཚངས་པ་ཆེན་པོ་དེའི་སེམས་ལ་སྨོན་པ་དེ་ཤེས་ཏེ་དྲན་པར་གྱུར་པས་དེ་ནི་ཉེས་པ་མེད་དོ། །ཡང་ན་དེ་ལས་ཐོབ་པའི་ཕྱིར་རོ། །འདི་དགེ་རྒྱས་པ་དག་ལ་ཡང་ཐལ་བར་འགྱུར་
བ་མ་ཡིན་ནམ་ཞེ་ན་ཞེས་བྱ་བ་ནི་ལུས་གཅིག་ཅིང་འདུ་ཤེས་ཐ་དད་པ་ཞེས་བྱ་བའོ། །ཇི་ལྟ་ཞེ་ན། འདི་སྐད་དུ་དེ་དག་གི་དངོས་གཞིའི་ས་ལ་བདེ་བའི་དབང་པོས་ཡོངས་སུ་སྐྱོ་ནས་ཉེར་བསྡོགས་ལས་བཏང་སྙོམས་ཀྱི་དབང་པོ་མངོན་དུ་བྱེད་ལ་ཞེས་བཤད་པ་རྒྱས་པར་

བརྗོད་པར་བྱ་དགོས་པར་འགྱུར་བ་ཞིག་ན། དེ་དག་ནི་འོག་ནས་ལུས་གཅིག་ཅིང་འདུ་ཤེས་གཅིག་པའོ་ཞེས་འཆད་པར་འགྱུར་རོ། །བདེ་བ་དེས་ཞེས་བྱ་བ་ནི་བསམ་གཏན་གསུམ་པའི་ས་པས་སོ། །སེམས་གཡོ་བར་བྱེད་པ་ཡིན་པས་ཞེས་བྱ་བ་ནི་
སེམས་རྒོད་པར་བྱེད་པ་ཡིན་པས་སོ། །འོང་བ་དང་མེད་པར་འདུ་ཤེས་པའི་ཕྱིར་ཞེས་བྱ་བ་ནི་སྐྱེས་ནས་རིང་པོ་མ་ལོན་པ་རྣམས་ནི་འོང་བར་འདུ་ཤེས་པའི་ཕྱིར་ལ་སྐྱེས་ནས་རིང་དུ་ལོན་པ་རྣམས་ནི་མེད་པར་འདུ་ཤེས་པའི་ཕྱིར་རོ། །སྐྲག་པ་དང་མི་སྐྲག་པར་འདུ་ཤེས་པའི་
ཕྱིར་ཞེས་བྱ་བ་ནི་གོ་རིམས་བཞིན་དུ་སྐྱེས་ནས་རིང་པོ་མ་ལོན་པ་དང་རིང་དུ་ལོན་པ་སྟེ་དེས་ན་འདུ་ཤེས་ཐ་དད་པ་དག་ཡིན་གྱི། བྱེ་བྲག་ཏུ་སྨྲ་བ་རྣམས་ཀྱིས་ཇི་སྐད་བཤད་པ་ལྟ་བུ་བདེ་བ་དང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པར་འདུ་ཤེས་པའི་ཕྱིར་ནི་མ་ཡིན་ནོ། །
བསམ་གཏན་དང་པོ་ན་ནི་ཉོན་མོངས་པ་ཅན་གྱི་འདུ་ཤེས་སུ་ཞེས་བྱ་བ་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་མཚུངས་པར་ལྡན་པ་སྟེ། རྒྱུ་མ་ཡིན་པ་ལ་རྒྱུར་མངོན་པར་ཞེན་པའི་ཕྱིར་རོ། །གཉིས་པ་ན་ནི་དགེ་བའི་འདུ་ཤེས་སུ་ཞེས་བྱ་བ་ནི་ཉེར་བསྡོགས་དང་
དངོས་གཞིས་བསྡུས་པའི་ཕྱིར་རོ། །གསུམ་པ་ན་ནི་རྣམ་པར་སྨིན་པ་ལས་སྐྱེས་པའི་འདུ་ཤེས་སུ་ཞེས་བྱ་བ་ནི་རྣམ་པར་སྨིན་པ་ལས་སྐྱེས་པའི་བདེ་བ་དང་མཚུངས་པར་ལྡན་པའི་ཕྱིར་རོ། །གཟུགས་མེད་པ་གསུམ་ན་ནི་མདོ་ལས་ཇི་སྐད་འབྱུང་བ་སྟེ་ཞེས་བྱ་བ་ནི་སེམས་ཅན་
གཟུགས་ཅན་མ་ཡིན་པ་གང་དག་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་དག་ལས་ཡང་དག་པར་འདས་ཏེ་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་པ་ཡང་ཡོད་དེ་འདི་ལྟ་སྟེ་ནམ་མཁའ་མཐའ་ཡས་སྐྱེ་མཆེད་དུ་
ཉེ་བར་འགྲོ་བའི་ལྷ་དག་གོ། །འདི་ནི་རྣམ་པར་ཤེས་པ་གནས་པ་ལྔ་པའོ། །སེམས་ཅན་གཟུགས་ཅན་མ་ཡིན་པ་གང་དག་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། རྣམ་པར་ཤེས་པ་མཐའ་ཡས་སོ་སྙམ་ནས་རྣམ་ཤེས་

མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་པ་ཡང་ཡོད་དེ། འདི་ལྟ་སྟེ། རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་དག་གོ། །འདི་ནི་རྣམ་པར་ཤེས་པ་གནས་པ་དྲུག་པ་ཡིན་ནོ། །སེམས་ཅན་གཟུགས་ཅན་མ་ཡིན་པ་གང་དག་རྣམ་པ་ཐམས་ཅད་དུ་རྣམ་ཤེས་
མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅི་ཡང་མེད་དོ་སྙམ་ནས་ཅི་ཡང་མེད་པའི་སྐྱེ་མཆེད་རྫོགས་པར་བྱས་ཏེ་གནས་པ་དག་ཀྱང་ཡོད་དེ། འདི་ལྟ་སྟེ། ཅི་ཡང་མེད་པའི་སྐྱེ་མཆེད་དུ་ཉེ་བར་འགྲོ་བའི་ལྷ་དག་གོ། །འདི་ནི་རྣམ་པར་ཤེས་པ་གནས་པ་བདུན་པ་ཡིན་ནོ་ཞེས་
འབྱུང་བ་ཡིན་ནོ། །ཅི་རིགས་པར་དེ་དག་དང་ལྡན་པའི་ཕུང་པོ་ལྔ་དང་བཞི་ཡིན་ནོ་ཞེས་བྱ་བ་ནི་ནམ་མཁའ་མཐའ་ཡས་སྐྱེ་མཆེད་ལ་སོགས་པ་དང་ལྡན་པ་ནི་ཕུང་པོ་བཞི་ཡིན་ནོ། །གཞན་དག་དང་ལྡན་པ་ནི་ཕུང་པོ་ལྔ་ཡིན་ནོ། །ལྷག་མ་དེ་འཇོམས་བྱེད་ལྡན་ཞེས་བྱ་བ་ནི་འདིས་ཡོངས་སུ་
འཇོམས་པར་བྱེད་པས་ན་འཇོམས་བྱེད་དོ། །རྣམ་པར་ཤེས་པ་དེ་ཡོངས་སུ་འཇོམས་པ་ནི་དེའི་འཇོམས་བྱེད་དོ། །དེ་འདི་ལ་ཡོད་པས་ན་དེའི་འཇོམས་བྱེད་ལྡན་ནོ།། །།བམ་པོ་ཉི་ཤུ་གསུམ་པ། ལྷག་མ་ནི་ངན་འགྲོ་ལ་སོགས་པའོ། །ངན་སོང་དག་ན་ནི་གཉི་ག་མེད་དོ་
ཞེས་བྱ་བ་ནི་འདི་ན་གནས་པ་རྣམས་ཀྱང་འགྲོ་བར་འདོད་པ་ཉིད་མེད་ལ། དེ་ན་གནས་པ་རྣམས་ཀྱང་སྐྱོད་པར་མི་འདོད་པ་ཉིད་མེད་པའོ། །རྒྱུ་བ་མི་གསལ་བའི་ཕྱིར་ཞེས་བྱ་བ་ནི་འདི་ན་སེམས་དང་སེམས་ལས་བྱུང་བ་རྣམས་ཀྱི་རྒྱུ་བ་ཉམ་ཆུང་བའི་ཕྱིར་རྣམ་པར་ཤེས་པ་སྟོབས་དང་ལྡན་པ་
གནས་སོ་ཞེས་བྱ་བར་བརྗོད་པར་རིགས་པ་མ་ཡིན་ནོ། །སྲིད་རྩེ་དང་། འདུ་ཤེས་མེད་པའི་སེམས་ཅན་རྣམས། །སེམས་ཅན་གྱི་ནི་གནས་དགུར་བཤད། །ཅེས་བྱ་བ་ནི་མདོ་ལས་སེམས་ཅན་གྱི་གནས་དགུ་བཤད་པ་སྟེ། དགུ་གང་ཞེ་ན། སེམས་ཅན་གཟུགས་ཅན་ལ་ལུས་ཐ་
དད་ཅིང་འདུ་ཤེས་ཐ་དད་པ་དག་ཀྱང་ཡོད་དེ། འདི་ལྟ་སྟེ་མི་རྣམས་དང་ལྷ་ཁ་ཅིག་ལྟ་བུའོ། །འདི་ནི་སེམས་ཅན་གྱི་གནས་དང་པོ་ཡིན་ནོ། །གཉིས་པ་དང་གསུམ་པ་དང་བཞི་པ་དག་ཀྱང་རྣམ་པར་ཤེས་པ་གནས་པ་དག་ཏུ་ཇི་སྐད་བཤད་པ་དེ་བཞིན་དུ་བརྗོད་པར་བྱའོ། །ཁྱད་

པར་ནི་འདི་ཡོད་དེ་སེམས་ཅན་གཟུགས་ཅན་དག་ལ་འདུ་ཤེས་མེད་ཅིང་སོ་སོར་འདུ་ཤེས་མེད་པ་ནི་འདི་ལྟ་སྟེ། སེམས་ཅན་འདུ་ཤེས་མེད་པའི་ལྷ་རྣམས་ཏེ། འདི་སེམས་ཅན་གྱི་གནས་པ་ལྔ་པ་ཡིན་ནོ། །སེམས་ཅན་གྱི་གནས་གཟུགས་མེད་པ་
རྣམས་ལས་ཀྱང་རྣམ་པར་ཤེས་པ་གནས་པ་གསུམ་བརྗོད་པར་བྱའོ། །གཟུགས་མེད་པ་བཞི་པ་ནི་སེམས་ཅན་གཟུགས་ཅན་མ་ཡིན་པ་དག་ལ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་
བྱས་ཏེ་གནས་པ་ཡོད་དོ། །འདི་ལྟ་སྟེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ལྟ་བུའོ། །འདི་ནི་སེམས་ཅན་གྱི་གནས་དགུ་པ་ཡིན་ནོ། །བསམ་གཏན་བཞི་པར་ཉེ་བར་འགྲོ་བ་འདུ་ཤེས་མེད་པའི་སེམས་ཅན་དག་ལས་གཞན་པ་གང་
དག་ཡིན་པ་དེ་དག་ཅི་སེམས་ཅན་གྱི་གནས་ཡིན་ནམ། འོན་ཏེ་མ་ཡིན་ཞེ་ན། སློབ་དཔོན་འདུས་བཟངས་ན་རེ་མ་ཡིན་ནོ་ཞེས་ཟེར་རོ། །ཅིའི་ཕྱིར་སློབ་དཔོན་གྱིས་འདི་སྐད་དུ་གཞན་གང་དག་ཅེ་ན། ངན་སོང་རྣམས་ཏེ་ཞེས་བཤད་ཅེ་ན་འདི་ནི་སྒོ་ཙམ་ཞིག་བཤད་པར་ཟད་དེ། བསམ་གཏན་
བཞི་པར་ཉེ་བར་འགྲོ་བ་འདུ་ཤེས་མེད་པའི་སེམས་ཅན་གྱིས་མ་བསྡུས་པ་རྣམས་ཀྱང་བརྗོད་པར་བྱ་བ་ཡིན་ནོ། །འདིར་ཡང་གཏན་ཚིགས་ནི་རྣམ་པར་ཤེས་པ་གནས་པ་དག་ལ་བཤད་པ་གང་ཡིན་པ་དེ་བརྗོད་པར་བྱ་སྟེ། འདི་ན་གནས་པ་རྣམས་ནི་ངན་སོང་དུ་འགྲོ་བ་དོན་དུ་གཉེར་བ་
མེད་ལ། དེ་ན་གནས་པ་རྣམས་ཀྱང་གནས་པར་འགྲོ་བ་མེད་པ་ཉིད་པས་དེ་དག་ནི་སེམས་ཅན་གྱི་གནས་མ་ཡིན་ནོ། །འབྲས་བུ་ཆེ་བ་འདུ་ཤེས་མེད་པའི་སེམས་ཅན་གྱིས་མ་བསྡུས་པ་དག་ཏུ་ཡང་འདི་ན་གནས་པ་རྣམས་འགྲོ་བ་དོན་དུ་གཉེར་བ་ཡོད་མོད་ཀྱི། དེ་ན་གནས་པ་སོ་
སོའི་སྐྱེ་བོ་རྣམས་ནི་འདུ་ཤེས་མེད་པ་ལ་འཇུག་པར་འདོད་དོ། །འཕགས་པ་ནི་སྤྲིན་མེད་དང་། བསོད་ནམས་སྐྱེས་དག་ན་གནས་པ་རྣམས་ཀྱང་གནས་གཙང་མ་དང་གཟུགས་མེད་པར་འཇུག་འདོད་དོ། །གནས་གཙང་མ་རྣམས་ཀྱང་ཡོངས་སུ་མྱ་ངན་ལས་འདའ་བར་འདོད་པ་

ཉིད་པས་དེ་དག་ནི་དེ་ན་གནས་པའི་བློ་མེད་དེ། དེ་དེའི་ཕྱིར་དེ་དག་ནི་སེམས་ཅན་གྱི་གནས་མ་ཡིན་ནོ་ཞེས་ཟེར་རོ། །ཡང་གཞན་དག་ན་རེ་གཞན་གང་ཞེ་ན་ངན་སོང་རྣམས་ཏེ་ཞེས་ངན་སོང་རྣམས་ཁོ་ན་སྨོས་པའི་ཕྱིར་སློབ་དཔོན་ནི་སྤྲིན་མེད་ལ་སོགས་པ་སེམས་ཅན་གྱི་གནས་ཡིན་པར་
བཞེད་དོ་ཞེས་ཟེར་རོ། །དེ་དག་གིས་ནི་རིགས་པ་བཙལ་དགོས་སོ། །བཙོན་ར་བཞིན་ནོ་ཞེས་བྱ་བ་ནི་ཇི་ལྟར་མི་འདོད་བཞིན་དུ་གནས་པའི་ཕྱིར་བཙོན་ར་དག་སེམས་ཅན་གྱི་གནས་མ་ཡིན་པ་ལྟར་ངན་སོང་རྣམས་ཀྱང་དེ་དང་འདྲའོ། །རྣམ་པར་ཤེས་པ་གནས་པ་ཞེས་བྱ་བ་ནི་འདི་
ལ་རྣམ་པར་ཤེས་པ་གནས་པས་རྣམ་པར་ཤེས་པ་གནས་པའོ། །ཉེ་བར་འགྲོ་བས་ན་ཉེ་བར་འགྲོ་བ་སྟེ། རྣམ་པར་ཤེས་པ་འདི་དང་ཉེ་བར་སྤྱོད་པ་ཞེས་བྱ་བའི་ཐ་ཚིག་གོ། །དེ་ནི་གཟུགས་ཀྱང་ཡིན་ལ་དེ་ནི་ཉེ་བར་འགྲོ་བ་ཡང་ཡིན་པས་གཟུགས་སུ་ཉེ་བར་འགྲོ་བ་སྟེ་དེ་བཞིན་
དུ་དེ་དག་ནི་འདུ་བྱེད་ཀྱི་བར་དུ་ཡང་སྲིད་པས་འདུ་བྱེད་དུ་ཉེ་བར་འགྲོ་བ་ཞེས་བྱའོ། །སྐལ་ལྡན་ཁྱད་པར་ཅན་ན་རེ་རྣམ་པར་ཤེས་པ་གནས་པ་གཟུགས་སུ་ཉེ་བར་འགྲོ་བ་ནས། འདུ་བྱེད་དུ་ཉེ་བར་འགྲོ་བ་ཞེས་བྱ་བའི་བར་ནི་མདོ་སྡེ་པ་རྣམས་ཀྱི་ལུགས་སུ་བཤད་པ་ཡིན་ཏེ། དེ་ལ་
རྣམ་པར་ཤེས་པ་གནས་པ་ནི་རྣམ་པར་ཤེས་པའི་རྒྱུན་མ་ཆད་པ་ཡིན་ནོ། །རྣམ་པར་ཤེས་པ་གནས་པ་འདི་ལ་གཟུགས་སུ་ཉེ་བར་འགྲོ་བ་ཡོད་པས་འདི་ནི་གཟུགས་སུ་ཉེ་བར་འགྲོ་བ་ཅན་ཡིན་ནོ། །ཉེ་བར་འགྲོ་བ་ཞེས་བྱ་བ་ནི་དེ་བདག་ཉིད་ཀྱི་ཡིན་པར་ཁས་ལེན་པའོ། །དེ་བཞིན་དུ་
རྣམ་པར་ཤེས་པ་གནས་པ་འདི་ལ་འདུ་བྱེད་དུ་ཉེ་བར་འགྲོ་བ་ཡོད་པས་འདི་ནི་འདུ་བྱེད་དུ་ཉེ་བར་འགྲོ་བ་ཅན་ཡིན་ནོ། །ཡང་ན་གནས་པ་ནི་སྲེད་པ་ཡིན་ཏེ། འདིས་ཡང་སྲིད་པའི་རྒྱུན་མི་འཆད་པའི་སྒོ་ནས་རྣམ་པར་ཤེས་པ་གནས་པར་བྱེད་པའི་ཕྱིར་རོ། །རྣམ་པར་ཤེས་པའི་གནས་
པ་ནི་རྣམ་པར་ཤེས་པ་གནས་པ་སྟེ། དེ་དེ་ལ་མངོན་པར་ཞེན་པའི་སྒོ་ནས་གཟུགས་སུ་ཉེ་བར་འགྲོ་བས་ན་གཟུགས་སུ་ཉེ་བར་འགྲོ་བ་སྟེ། འདུ་བྱེད་དུ་ཉེ་བར་འགྲོ་བའི་བར་དུ་ཡང་དེ་དང་འདྲའོ་ཞེས་ཟེར་རོ། །བྱེ་བྲག་ཏུ་སྨྲ་བ་རྣམས་ཀྱི་ལུགས་ལྟར་བྱེད་པ་པོའི་དོན་དུ་སྦྱར་བར་ནི་མི་

ནུས་པས་དེ་ནི་སུན་འབྱིན་པར་བྱེད་དོ། །འདིར་བཤད་པ་རྣམ་པ་འདི་གཉི་ག་ཡང་རྣམ་པར་ཤེས་པ་གནས་པ་གཟུགས་ལ་སོགས་པ་ལས་གཞན་པར་བཤད་དེ་དེ་ནི། ཟག་པ་དང་བཅས་པའི་ཕུང་པོ་བཞི་ཞེས་བྱ་བ་དང་། བསྡུ་ན་མུ་བཞི་ཡིན་ནོ་ཞེས་བྱ་བ་འདི་
ཐམས་ཅད་བཙལ་བར་འགྱུར་བས་ཉེས་པ་གཞན་ཡོད་དེ་དེ་ལྟ་བས་ན་བཤད་པ་སྔ་མ་ཉིད་བཟང་ངོ་ཞེས་སྨྲའོ། །བྱེ་བྲག་ཏུ་སྨྲ་བའི་བཤད་པ་འདི་ནི་བརྗོད་པར་བྱ་སྟེ། དེ་དག་གིས་ནི་འདི་སྐད་དུ་གཟུགས་ལ་ཉེ་བར་འགྲོ་བས་རྣམ་པར་ཤེས་པ་གནས་པ་གཟུགས་སུ་
ཉེ་བར་འགྲོ་བ་ཞེས་བྱ་བ་ལ་སོགས་པར་ནི་མ་བཤད་དོ། །གཞན་དག་ན་རེ་རྣམ་པར་ཤེས་པ་གནས་པ་གཟུགས་སུ་ཉེ་བར་འགྲོ་བ་ཞེས་བྱ་བ་ནི་གཟུགས་ཀྱི་ངོ་བོ་ཉིད་དོ་ཞེས་བྱ་བའི་ཐ་ཚིག་གོ་ཞེས་ཟེར་ཏེ། །ཇི་ལྟར་གཞན་ལས་སྲ་བ་མཁྲང་བར་གྱུར་པ་ཞེས་འབྱུང་བ་ལ་
གྱུར་པའི་དོན་ནི་ངོ་བོ་ཉིད་ཀྱི་དོན་ཏོ་ཞེས་བྱ་བ་ལྟ་བུའོ་སྙམ་དུ་བསམས་པ་ཡིན་ནོ། །གནས་པ་པོ་ཡོངས་སུ་སྤངས་ནས་ཞེས་བྱ་བ་ནི་གནས་པ་པོ་མ་གཏོགས་པར་ཏེ། འཇིག་རྟེན་ན་གནས་པ་པོ་ལྷས་བྱིན་ལ་སོགས་པ་ཡང་གཞན་ལ་གནས་པ་ཁྱིམ་ལ་སོགས་པའི་གནས་
ཀྱང་གཞན་ནོ་ཞེས་བྱ་བའི་ཐ་ཚིག་གོ། །གྲུ་དང་མཉེན་པའི་ཚུལ་དུ་ཞེས་བྱ་བ་ནི་ཇི་ལྟར་མཉེན་པས་གྲུ་འདྲེན་པར་བྱེད་པ་དེ་དང་འདྲ་བར་རོ། །རྣམ་པར་ཤེས་པ་འགྲོ་བར་བྱེད་པ་ནི་འཇུག་པར་བྱེད་པ་ཞེས་བྱ་བའི་ཐ་ཚིག་གོ། །རྣམ་པར་ཤེས་པ་ཉིད་རྣམ་པར་ཤེས་པ་ལ་
གནས་ནས་འགྲོ་བར་བྱེད་པ་ནི་མ་ཡིན་ནོ་ཞེས་བྱ་བ་ནི་རྒྱུད་གཅིག་ལ་རྣམ་པར་ཤེས་པ་གཉིས་ཕྲད་པ་མེད་པའོ། །རྒྱུད་གཞན་གྱི་རྣམ་པར་ཤེས་པ་ཅིག་ཅར་འབྱུང་མོད་ཀྱི། དེ་ནི་ཅིག་ཤོས་དང་ཉེ་བར་འདུག་པ་མ་ཡིན་པས་དེ་དེའི་གནས་པ་མ་ཡིན་ནོ། །དགའ་བ་ནི་
ཡིད་བདེ་བའོ། །རྣམ་པར་ཤེས་པ་གནས་པ་བདུན་ཕུང་པོ་ལྔའི་རང་བཞིན་དག་ཡིན་ནོ་ཞེས་བྱ་བ་དེ་ཡང་ཇི་ལྟ་བུ་ཞེས་བྱ་བ་ནི་རྣམ་པར་ཤེས་པ་གནས་པ་བདུན་ཕུང་པོ་ལྔའི་རང་བཞིན་ཉིད་ཡིན་པར་བཞེད་ན། དེ་ཇི་ལྟར་རྣམ་པར་ཤེས་པ་ལ་རྣམ་པར་ཤེས་པ་གནས་པ་ཞེས་

བྱ་བར་མི་འདོད་ཅེས་བྱ་བ་ཡིན་ནོ། །དེ་ལྟ་ན་འོ་ན་ནི་ཞེས་བྱ་བ་རྒྱས་པར་འབྱུང་བ་ནི་གཟུགས་ལ་སོགས་པའི་ཕུང་པོ་རྣམས་བྱེ་བྲག་མེད་པར་གཅིག་ཏུ་བཟླུམ་པའི་ངོ་བོར་ནི་སྐྱེ་བའི་སྐྱེ་མཆེད་ཀྱིས་བསྡུས་པའི་ཕུང་པོ་མི་ལ་སོགས་པའི་རིས་མཐུན་པས་བསྡུས་པ་དག་ལ་མངོན་
པར་དགའ་བ་དང་བཅས་ཤིང་མངོན་དུ་དགའ་བ་དང་བཅས་པའི་རྣམ་པར་ཤེས་པ་འཇུག་ན་རྣམ་པར་ཤེས་པ་ལ་རྣམ་པར་ཤེས་པ་གནས་པ་བདུན་བཤད་པར་རྣམ་པར་ཤེས་པ་གནས་པ་ཞེས་བྱའོ་ཞེས་བྱ་བར་བཞེད་དོ། །སོ་སོར་དབྱེ་ན་སྟེ་ཕུང