Luận tạng Tây Tạng (Tengyur) — Tập 111

 །ཐོག་མེད་དུས་ནས་ཇི་སྲིད་དུ། །བདག་ནི་དུག་གསུམ་ཞེན་པས་འཁོར། །ཇི་སྲིད་སྐྱེ་ཤི་ཁ་བརྒྱུད་པས། །དེ་སྲིད་ལས་རྣམས་ཆུད་རེ་ཟོས། །ཇི་སྲིད་དགེ་སེམས་འཕེལ་འགྱུར་བ། །དེ་སྲིད་སངས་
རྒྱས་མངོན་སངས་རྒྱས། །བདག་ནི་གཏི་མུག་མུན་པས་བསྒྲིབས། །མུན་ནག་གློག་འགྱུ་སྣང་བ་ཙམ། །ཅི་ཞིག་ལྟར་སྟེས་དྲན་རྙེད་ཚེ། །དེ་ཚེ་འབད་པས་བསྒྲུབ་པར་བྱ། །འཆི་བར་ངེས་པ་ཆ་ཡོད་ཅིང་། །གནས་པའི་དབང་སྟེར་མེད་མོད་ཀྱི། །བདག་ནི་རེ་ཞིག་མི་འཆི་སྙམ། །

དྲན་པ་བཏང་སྟེ་བྱང་ཆུབ་བསྒྲུབ། །གཞན་དག་ལ་ཡང་སྒྲུབ་པར་གྱིས། །དཔེར་ན་བྱིས་པ་རིག་མེད་པས། །མེ་དང་གཡང་སོགས་འཇིགས་པ་མེད། །དེ་བཞིན་འགྲོ་བ་གཏི་མུག་རྣམས། །ངན་སོང་དག་ལའང་འཇིགས་པ་མེད། །དཔེར་ན་ཟས་མཆོག་རོ་དང་ལྡན། །
ནད་པ་དག་ལ་བྱིན་པའི་ཚེ། །ཟས་ལ་སྨོད་ཅིང་མི་འདོད་བཞིན། །ཐབས་ཀྱི་བྱེ་བྲག་འདི་དག་ཀྱང་། །རྨོངས་པ་ཉོན་མོངས་ལྡན་པ་ལ། །བསྟན་ཀྱང་དེ་འདྲ་ཉིད་དུའོ། །དཔེར་ན་བཟའ་ལ་དགའ་བའི་མི། །ཟོས་བརླག་བསགས་ཕན་ཆ་ཡོད་ཀྱང་། །འདོད་པས་མི་ཚུགས་ཟ་བ་བཞིན། །
སྔ་ཕྱི་རྒྱུ་འབྲས་ཆ་ཡོད་ཀྱང་། །ཉོན་མོངས་ཞེན་པ་སྟོབས་ཆ་ཡོད། །དགེ་མེད་སྡིག་པ་སྣ་ཚོགས་སྤྱོད། །དཔེར་ན་ཁ་བྱ་མཁན་དག་གིས། །ཁ་ལ་བྱ་དགོས་ཀུན་བསྒྲུབ་ཟེར། །གཞན་གྱི་དྲན་པ་བསྐྱེད་པའི་ཚེ། །དེ་བཞིན་དགེ་བ་བྱ་དགོས་ཟེར། །ཁ་ཅིག་ཁ་ལ་གླེང་བྱེད་ཅིང་། །ཞེ་ལ་དོན་
དུ་སྒྲུབ་མི་བྱེད། །ཁ་ཅིག་འབྲས་བུ་དོན་ཆེན་པོ། །བཏང་ནས་བྱ་བ་ཆུང་ངུ་སྒྲུབ། །དེ་ཡང་བྱིས་པའི་སྤྱོད་པ་ཅན། །ཁ་ཅིག་བསམ་པ་རླུང་བཞིན་གཡོ། །རུང་དང་མི་རུང་གཉིས་ཀ་བྱེད། །ཁ་ཅིག་ཁ་དོག་དཀར་པོ་བཞིན། །རྐྱེན་གང་ལྡན་པ་དེ་ལྟར་འགྱུར། །ཁ་ཅིག་རང་ཉིད་ངང་གིས་
དགེ །གྲོགས་ཀྱིས་རྦད་པས་ཉོན་མོངས་སྐྱེད། །ཁ་ཅིག་རྐྱེན་མེད་རྒྱུ་དང་ལྡན། །དམ་པའི་གྲོགས་ཀྱིས་ཟིན་པ་ན། །སྡིག་སྤོང་དགེ་བྱེད་དེ་ལ་བསྐུལ། །ཁ་ཅིག་དགེ་ལ་བསྐུལ་མི་དགོས། །རང་གི་བྱ་བའི་རིམ་པ་བསྐུལ་བ་དང་བཅས་པ་ཡི་གེར་བྲིས་པ། སློབ་དཔོན་མཁས་པ་ཆེན་
པོ་དཔལ་མར་མེ་མཛད་ཡེ་ཤེས་ཀྱི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཆེན་པོ་དེ་ཉིད་དང་། ཞུ་ཆེན་གྱི་ལོ་ཙཱ་བ་དགེ་སློང་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ། སཱུ་ཏྲཱ་རྠ་ས་མུཙྪ་ཡོ་པ་དེ་ཤ།
བོད་སྐད་དུ། མདོའི་སྡེའི་དོན་ཀུན་ལས་བཏུས་པའི་མན་ངག །དཀོན་མཆོག་གསུམ་ལ་ཕྱག་འཚལ་ལོ། །རྒྱ་མཚོ་ནམ་མཁའ་ལྟར་ཟབ་རྒྱ་ཆེ་བ། །མདོ་སྡེའི་སྡེ་སྣོད་མ་མོ་ཀུན་བལྟས་ཤིང་། །དཔལ་ལྡན་བླ་མའི་ཞལ་ནས་བྱུང་བ་ཡི། །རྙེད་པར་དཀའ་བའི་དོན་རྣམས་བྲི་བར་

བྱ། །འདིར་བྱང་ཆུབ་སེམས་དཔའ་རྣམས་ཀྱི་ནོར་ལྟ་བུའི་ཆོས་ནི་ལྔ་བཅུ་སྟེ། སྲོག་ལྟ་བུ་ལ་སོགས་པའོ། །དེ་རྣམས་ཅུང་ཟད་བཤད་པར་བྱ་སྟེ། ཇི་སྐད་དུ། སྲོག་ནི་ཚེ་ཡིན་དྲོད་དང་ནི། །རྣམ་ཤེས་རྟེན་ཉིད་ཡིན་པའོ། །ཞེས་སོ། །དེ་ལྟར་སེམས་ཅན་རྣམས་ལ་སྲོག་གཅེས་ཤིང་
སྲོག་ལ་བརྟེན་པ་དེ་བཞིན་དུ་བྱང་ཆུབ་སེམས་དཔའ་ལ་ཡང་སྲོག་ལྟ་བུའི་བྱང་ཆུབ་ཀྱི་སེམས་གཅེས་ཤིང་དེ་ལ་བརྟེན་པའོ། །ཕ་མ་ལྟ་བུའི་ཆོས་ནི་སྟོང་པ་ཉིད་དང་། སྙིང་རྗེ་ཡིན་ཏེ། དེས་མ་བསྐྱེད་པའི་བྱང་ཆུབ་སེམས་དཔའ་འབྱུང་བར་མི་འགྱུར་རོ། །བྱན་མོ་ལྟ་བུ་ནི་འཆི་བ་
དང་། བསླབ་པ་དང་། ལས་ཀྱིས་བསགས་པ་བགྲང་བ་རྣམས་ཏེ། ཉིན་མཚན་ལན་གསུམ་དུ་འགྲོགས་དགོས་པའོ། །ཁང་པ་ལྟ་བུ་ནི་དགེ་བ་བཅུ་པོ་ཡིན་ཏེ། འདི་ནི་ཁང་པ་ཉིད་དེ་ངན་འགྲོ་དག་གི་སྒོ་གཅོད་པའི་ཕྱིར། ནོར་ལྟ་བུ་ནི་འཕགས་པའི་ནོར་བདུན་དང་། འདོད་པ་
ཆུང་བ་དང་། ཆོག་ཤེས་པའོ། །གྲོགས་པོ་ལྟ་བུ་ནི་སྦྱོར་བ་ཁམས་གསུམ་ན་བྱེད་ཀྱང་བསམ་པ་མྱ་ངན་ལས་འདས་པ་དང་། སྦྱིན་པ་རྒྱ་ཆེན་པོ་གཏོང་ཡང་རྣམ་པར་སྨིན་པ་ལ་རེ་བ་མེད་པ་དང་། ཆོས་ཐམས་ཅད་སྐྱེ་བ་མེད་པར་ཤེས་ཀྱང་ལས་ཀྱི་རྣམ་པར་སྨིན་པ་མི་འདོར་བ་དང་།
ཆོས་ཐམས་ཅད་བདག་མེད་པར་ཤེས་ཀྱང་སེམས་ཅན་ལ་སྙིང་རྗེ་བསྐྱེད་པའོ། །རྩ་བ་ལྟ་བུ་ནི་དད་པ་དང་། ཐོས་པ་དང་། གཏོང་བ་དང་། བཟོད་པའོ། །ཞིང་ལྟ་བུ་ནི་ཚུལ་ཁྲིམས་སོ། །ཉེ་དུ་ལྟ་བུ་ནི་ཕ་རོལ་ཏུ་ཕྱིན་པ་བཅུའོ། །སློབ་དཔོན་ལྟ་བུ་ནི་རྗེས་སུ་དྲན་པ་དྲུག་གོ། །མཁན་
པོ་ལྟ་བུ་ནི་འཕགས་པ་འོད་སྲུངས་ཀྱིས་ཞུས་པའི་མདོའི་བྱང་ཆུབ་ཀྱི་སེམས་མི་བརྗེད་པར་འགྱུར་བའི་ཆོས་བཞིའོ། །ཚོང་དཔོན་ལྟ་བུ་ནི་བསླབ་པ་ཀུན་ལས་བཏུས་ཀྱི་གནོད་པ་བཅུ་བཞིའི་གཉེན་པོ་རྣམས་སོ། །སྲིང་མོ་ལྟ་བུ་ནི་ཚད་མེད་པ་བཞིའོ། །བྲན་ལྟ་བུ་ནི་བསྡུ་བའི་དངོས་པོ་བཞིའོ། །
འབངས་ལྟ་བུ་ནི་ཁྱི་དང་བྲན་དང་གདོལ་པ་ལྟ་བུར་ང་རྒྱལ་བཅག་པའོ། །མིག་ལྟ་བུ་ནི་བསམ་པ་དང་། ལྷག་པའི་བསམ་པ་རྣམ་པར་དག་པའོ། །མ་མ་ལྟ་བུ་ནི་དགེ་བའི་བཤེས་གཉེན་ཡིན་ནོ། །རྒྱལ་པོ་ལྟ་བུ་ནི་དཀོན་མཆོག་གསུམ་ཡིན་ནོ། །ཆུ་ལུད་ལྟ་བུ་ནི་འཁོར་གསུམ་ཡོངས་སུ་དག་

པ་ཡིན་ནོ། །ལམ་མཁན་ལྟ་བུ་ནི་དྲན་པ་དང་། ཤེས་བཞིན་དང་། ཚུལ་བཞིན་སེམས་པ་དང་། བག་ཡོད་པ་དང་། ཕྱིན་ཅི་ལོག་བཞིའི་གཉེན་པོ་བསྟེན་པའོ། །པགས་པ་ལྟ་བུ་ནི་སེམས་ཅན་མི་གཏོང་ཞིང་རྗེས་སུ་འཛིན་པའོ། །རྒྱན་ལྟ་བུ་ནི་དད་པ་དང་།
ཚུལ་ཁྲིམས་དང་། གཏོང་བ་དང་། ཐས་པ་དང་། ཤེས་རབ་པོ། །ནད་དང་ཟུག་རྔུ་ལྟ་བུ་ནི་ཕྱི་ནང་གི་དངོས་པོ་ལ་ཞེན་པའི་སེམས་སོ། །སྐྱེས་བུ་མནར་སེམས་ཅན་ལྟ་བུ་ནི་ཁྱིམ་པའི་བྱང་ཆུབ་སེམས་དཔའ་འདི་སྙམ་དུ་བདག་ནམ་ཞིག་ན་ཚངས་པར་སྤྱོད་པར་འགྱུར་ཞིག་གུ་ཞེས་པ་དང་།
རབ་ཏུ་བྱུང་བ་འདི་སྙམ་དུ་ནམ་ཞིག་ན་བདག་གིས་འགྲོ་བ་རྣམས་སྡུག་བསྔལ་ལས་ཐར་བར་ནུས་ཞེས་པའོ། །ལེ་ལོ་ཅན་ལྟ་བུ་ནི་ཁྱིམ་པས་ཞིང་ལ་སོགས་པ་མ་སྤངས་པའོ། །རབ་ཏུ་བྱུང་བས་ཚུལ་འཆོས་ལ་སོགས་པ་མ་སྤངས་པའོ། །ཚུལ་ཁྲིམས་ཀྱི་ཕུང་པོའི་མདོ་ལས།
དགེ་སློང་དག་རབ་ཏུ་བྱུང་བས་གླང་པོ་ཆེ་འཐབ་པ་ལ་བལྟས་ན་ཡང་ལོག་པའི་འཚོ་བ་ཡིན་ནོ་ཞེས་གསུངས་སོ། །གཤིས་བཟང་པོ་ལྟ་བུ་ནི་ཚུལ་བཞིན་སེམས་པ་དང་ལྡན་པའོ། །དིག་པ་ལྟ་བུ་ནི་གཞན་གྱི་ཉེས་པ་དང་འཁྲུལ་པ་མི་བརྗོད་པ་དང་། རང་གི་ཡོན་ཏན་མི་བརྗོད་པ་དང་།
གཞན་ལ་མི་སྨོད་པའོ། །ལོང་བ་ལྟ་བུ་ནི་གཞན་གྱི་འཁྲུལ་པ་ལ་མི་བལྟ་བའོ། །རྐུན་མ་ཟིན་པ་ལྟ་བུ་ནི་དམ་པའི་ཆོས་འཇིག་པ་ན་དམ་པའི་ཆོས་འཛིན་པའོ། །བྱིས་པ་ལྟ་བུ་ནི་བཀའ་བློ་བདེ་བ་དང་། ང་ལོ་ཡང་བ་དང་། འགྲོགས་ན་བདེ་བ་དང་། མགུ་སླ་བ་དང་། གསོ་སླ་བ་
དང་། དགང་སླ་བ་དང་། ཆོག་ཤེས་པའོ། །ཕོ་ཉ་ལྟ་བུ་ནི་བྱང་ཆུབ་སེམས་དཔའ་དོན་མང་བ་དང་། བྱ་བ་མང་བ་དང་སྙིང་ལས་ཆེ་བའོ། །བློན་པོ་ལྟ་བུ་ནི་དམ་བཅའ་བརྟན་པའོ། །མཛངས་པ་ལྟ་བུ་ནི་སེམས་ཅན་དང་ཞེ་འགྲས་པ་མེད་པ་དང་བཅོས་སུ་བཏུབ་པའོ། །སློབ་མ་ལྟ་བུ་ནི་ཉིན་
ལན་གསུམ་མཚན་ལན་གསུམ་དུ་བླ་མ་ལ་བསྙེན་བཀུར་བྱ་བ་དང་། བསོད་ནམས་ཀྱི་ཚོགས་བསག་པ་དང་། སྡོམ་པ་གསོ་བའོ། །བསུ་སྐྱེལ་བ་ལྟ་བུ་ནི་སེམས་ཅན་ཐམས་ཅད་སངས་རྒྱས་པར་བྱས་ནས་གདོད་བདག་ཉིད་འཚང་རྒྱ་བར་འདོད་པའོ། །ལོང་ཁྲིད་ལྟ་བུ་ནི་བདག་

སངས་རྒྱས་པར་བྱས་ནས་གདོད་གཞན་གྱི་དོན་བྱེད་པའོ། །བསྐལ་པ་དང་པོའི་མི་ལྟ་བུ་ནི་སྤྱོད་ལམ་དང་། ཚུལ་ཁྲིམས་དང་། འཚོ་བ་དང་། ཆོ་ག་དང་། ལྟ་བ་ཕུན་སུམ་ཚོགས་པའོ། །སྐྱེས་བུ་འདོད་པ་ཅན་ལྟ་བུ་ནི་སྤྱོད་ལམ་ཐམས་ཅད་གཞན་ལ་བསྔོ་བ་སྟེ། འཕགས་པ་དཀོན་མཆོག་སྤྲིན་
ལས་འབྱུང་བ་ལྟ་བུའོ། །མུན་པ་ལྟ་བུ་ནི་དབུ་མ་ཆེན་པོའི་དོན་ལ་རྟག་ཏུ་གནས་པའོ། །གཤེད་མ་ལྟ་བུ་ནི་ལོག་པར་ལྟ་བ་སྐྱེས་པ་དེ་སྤང་བར་བྱའོ། །ཆོམ་རྐུན་ལྟ་བུ་ནི་བག་མེད་པ་དང་། མ་གུས་པ་སྟེ་སྤང་བར་བྱའོ། །དགྲ་ལྟ་བུ་ནི་ངོ་ཚ་མེད་པ་དང་བག་མེད་པའོ། །གླེན་པ་ལྟ་
བུ་ནི་དྲན་པ་དང་ཤེས་བཞིན་མེད་པའོ། །ར་རོ་བ་ལྟ་བུ་ནི་ནག་པོར་གྱུར་པ་བཞིའོ། །བྱོལ་སོང་ལྟ་བུ་ནི་བསླབ་པའི་ཚུལ་རྣམས་མི་ཤེས་པའོ། །ཤན་པ་ལྟ་བུ་ནི་སྙིང་རྗེ་དང་བྲལ་བའི་སྤྱོད་ལམ་ཅན་ནོ། །བྱས་པ་ལ་དྲིན་དུ་མི་གཟོ་བ་ལྟ་བུ་ནི་སོ་སོར་ཐར་པའི་སྡོམ་པ་བཞག་པའོ། །
དྭ་ཕྲུག་ལྟ་བུ་ནི་ཐབས་མཁས་པ་དང་བྲལ་བའོ། །སྨོན་པ་ལྟ་བུ་ནི་བྱ་བ་དང་བྱ་བ་མ་ཡིན་པ་མི་ཤེས་པའོ། །བདུད་ཀྱིས་བརླམས་པ་ལྟ་བུ་ནི་བར་དུ་གཅོད་པའི་ཆོས་ལྔ་བཅུ་རྩ་ལྔ་དང་། སུམ་ཅུ་རྩ་གཉིས་མི་ཤེས་པའོ། །ལྔ་བཅུ་རྩ་ལྔ་པོ་ཡང་གང་ཞེ་ན། འཕགས་པ་བྱང་ཆུབ་
སེམས་དཔའི་སྡེ་སྣོད་ལས་བྱུང་བ་ལྟ་བུ་སྟེ་འདི་ལྟར་བར་དུ་གཅོད་པའི་ཆོས་ནི་གཅིག་སྟེ་བག་མེད་པའོ། །བར་དུ་གཅོད་པའི་ཆོས་ནི་གཉིས་ཏེ། ངོ་ཚ་མེད་པ་དང་། ཁྲེལ་མེད་པའོ། །གསུམ་སྟེ་འདོད་ཆགས་དང་། ཞེ་སྡང་དང་། གཏི་མུག་གོ། །བཞི་སྟེ། དམ་པ་མ་ཡིན་པའི་
འགྲོ་བ་བཞིའོ། །ལྔ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཆང་འཐུང་བའོ། །དྲུག་སྟེ། སངས་རྒྱས་དང་། ཆོས་དང་། དགེ་འདུན་དང་། ཚུལ་ཁྲིམས་དང་། སློབ་དཔོན་དང་། རྒན་པ་རྣམས་ལ་མ་
གུས་པའོ། །བདུན་ཏེ། ང་རྒྱལ་རྣམ་པ་བདུན་ནོ། །བརྒྱད་དེ་ལོག་པ་བརྒྱད་དོ། །དགུ་སྟེ། ཀུན་ནས་མནར་སེམས་ཀྱི་དངོས་པོ་རྣམ་པ་དགུའོ། །བཅུ་སྟེ། མི་དགེ་བ་བཅུའོ་ཞེས་འབྱུང་ངོ་། །བར་དུ་གཅོད་པའི་ཆོས་སུམ་ཅུ་རྩ་གཉིས་ཀྱང་། འཕགས་པ་ཐེག་པ་ཆེན་པོའི་མན་ངག་གི་མདོ་

ལས་འབྱུང་བ་ལྟ་བུ་སྟེ། ཇི་སྐད་དུ། བུ་མོ་ཐེག་པ་ཆེན་པོའི་བར་དུ་གཅོད་པའི་ཆོས་ནི་སུམ་ཅུ་རྩ་གཉིས་ཏེ། བར་དུ་གཅོད་པ་དེ་དག་གིས་ཐམས་ཅད་མཁྱེན་པར་མྱུར་དུ་ངེས་པར་མི་འབྱུང་ངོ་། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། ཉན་ཐོས་དང་རང་
སངས་རྒྱས་ཀྱི་ཐེག་པ་འདོད་པ་དང་། བརྒྱ་བྱིན་དང་ཚངས་པ་འདོད་པ་དང་། སྐྱེ་བ་ལ་གནས་ཏེ་ཚངས་པར་སྤྱོད་པ་དང་། དགེ་བའི་རྩ་བ་གཅིག་ལ་ཆགས་པ་དང་། ལོངས་སྤྱོད་བདོག་པ་རྣམས་ལ་སེར་སྣ་བྱེད་པ་དང་། སེམས་ཅན་རྣམས་ལ་མཉམ་པར་མི་སྦྱིན་པ་དང་། ཚུལ་
ཁྲིམས་ལ་ལྷོད་པ་དང་། གཞན་གྱི་སེམས་མི་བསྲུང་བ་དང་། གནོད་སེམས་དང་། ཁོང་ཁྲོ་བའི་བག་ལ་ཉལ་བྱེད་པ་དང་། དེས་སེམས་ཞུམ་པ་དང་། བརྗེད་ངས་པ་དང་། ཐོས་པ་དོན་དུ་མི་གཉེར་བ་དང་། དཔྱོད་པ་མེད་པ་དང་། འཕགས་པ་མ་ཡིན་པའི་སྤྱོད་པ་
དང་། ང་རྒྱལ་ལས་ཀྱང་ང་རྒྱལ་འཕེལ་བ་དང་། ལུས་དང་ངག་དང་སེམས་ཀྱི་ལས་ཡོངས་སུ་མ་དག་པ་དང་། དམ་པའི་ཆོས་ཡོངས་སུ་མི་བསྲུང་བ་དང་། སློབ་དཔོན་ཆོས་འཆབ་པ་དང་། བསྡུ་བའི་དངོས་པོ་རྣམས་འདོར་བ་དང་། ཡང་དག་པར་དགའ་བར་འགྱུར་བའི་
ཆོས་གཏོང་བ་དང་། སྡིག་པའི་གྲོགས་པོ་བསྟེན་པ་དང་། བྱང་ཆུབ་ཏུ་ཡོངས་སུ་མི་བསྔོ་བ་སྟེ་ཕུང་པོ་གསུམ་དང་མི་མཐུན་པ་དང་། དགེ་བའི་རྩ་བ་ཆུང་ངུས་རློམ་སེམས་སུ་བྱེད་པ་དང་། ཐབས་མེད་པར་ལྷུང་བའི་བློ་དང་། ཕྱིར་ཞིང་དཀོན་མཆོག་གི་བསྔགས་པ་མི་སྨྲ་བ་
དང་། བྱང་ཆུབ་སེམས་དཔའ་ལ་གནོད་པར་སེམས་པ་དང་། མ་ཐོས་པའི་ཆོས་སྤོང་བ་དང་། བདུད་ཀྱི་ལས་ཁོང་དུ་མི་ཆུད་པ་དང་། འཇིག་རྟེན་རྒྱང་པན་པའི་གསང་ཚིག་འཛིན་པ་དང་། སེམས་ཅན་ཡོངས་སུ་སྨིན་པར་མི་བྱེད་པ་དང་། འཁོར་བས་ཡོངས་སུ་མི་སྐྱོ་བ་སྟེ།
བུ་མོ་སུམ་ཅུ་རྩ་གཉིས་པོ་འདི་དག་ནི་ཐེག་པ་ཆེན་པོའི་བར་དུ་གཅོད་པའི་ཡང་དག་པའི་ཕུལ་ཡིན་ཏེ། བར་དུ་གཅོད་པ་དེ་དག་གིས་ཐམས་ཅད་མཁྱེན་པར་ངེས་པར་མི་འབྱུང་ངོ་། །དེ་ལྟ་མོད་ཀྱི་འོན་ཀྱང་བུ་མོ་ཐེག་པ་ཆེན་པོའི་ཡོན་ཏན་ཇི་ཙམ་པ་དེ་ཙམ་དུ་བར་དུ་གཅོད་པ་ཡང་དེ་

ཙམ་མོ་ཞེས་གསུངས་སོ། །གཞན་ཡང་བར་དུ་གཅོད་པའི་ཆོས་དཔག་ཏུ་མེད་པ་དག་མདོ་སྡེ་དུ་མར་མཐོང་མོད་ཀྱི། འདིར་གཞུང་མངས་པར་འགྱུར་བས་མ་བཀོད་དེ། ལམ་འདི་ལ་ཆེད་ཆེར་བྱེད་པའི་བྱང་ཆུབ་སེམས་དཔའ་ལས་དང་པོ་པས་མདོ་དེ་དང་དེར་བལྟ་བར་བྱ་ཞིང་ཉམས་སུ་བླང་པ་
ལ་བརྩོན་པར་བྱའོ། །གཏམ་དུ་བྱ་བ་གཞན་ཡང་མང་དུ་ཡོད་དེ། རྩུབ་ཅིང་དྲག་ལ་ཡུན་རིང་སྡུག་བསྔལ་བཟོད་དཀའ་བཟོད་པར་བྱེད་པ་ངོ་མཚར་ཆེ། །ཆུ་བོ་བཞིས་གཡེངས་ཡང་དང་ཡང་དུ་ཀེང་རུས་བཞོན་པ་ཞོན་པ་དེ་ཡང་ངོ་མཚར་ཆེ། །ཆུང་མ་ཁྱིམ་སྤངས་བརྟུལ་ཞུགས་བཟང་
བླངས་རྟག་ཏུ་ལུས་ངག་ཡིད་གཡེངས་འདི་ཡང་ངོ་མཚར་ཆེ། །དགེ་བའི་རྩ་བ་ཆུང་ངུ་ཙམ་ཡང་མེད་པར་དེ་ཉིད་དོན་གྱི་སངས་རྒྱས་ཡེ་ཤེས་རྩད་གཅོད་ཚོལ་བ་འདི་ཡང་ངོ་མཚར་ཆེ། །སོ་སོར་ཐར་པའི་བསླབ་པ་མེད་པར་ཐེག་ཆེན་བྱང་ཆུབ་མཆོག་གཉིས་རྩད་གཅོད་ཚོལ་བ་འདི་ཡང་
ངོ་མཚར་ཆེ། །དེ་ལ་སོགས་པ་ངོ་མཚར་ཆེ་བ་མང་དུ་ཡོད་མོད་ཀྱི། །འཛམ་གླིང་སྐྱེ་བོའི་རྟོག་དང་སྤྱོད་པ་སྨྲ་བར་ག་ལ་ནུས། །དེ་བས་ཐར་འདོད་མཁས་པ་ཁྱེད་ཅག་སྨྱོན་པ་དེ་དག་དང་། །ལྷན་ཅིག་འདྲེ་བར་མ་བྱེད་བག་ཡོད་གནས་པར་གྱིས། །འདི་ལྟར་དེ་དག་སྙིང་རྗེའི་ཡུལ་དུ་མ་བྱས་
མ་གཏོགས་པར། །ལམ་མཆོག་བཤད་ཀྱང་དེ་ལ་འཇུག་པར་མི་འགྱུར་བདག་གིས་ཇི་ལྟར་བྱ། །ཇི་སྲིད་མངོན་པར་ཤེས་པ་མ་ཐོབ་བར་དུ་གཞན་དག་སྨིན་པར་མི་ནུས་བསེ་རུར་གནས་པར་བྱ། །བླ་མ་བཟང་པོ་བཙལ་བྱ་རྟག་ཏུ་མདོ་སྡེ་དག་ལ་བལྟ་བར་བྱ། །མདོ་སྡེའི་དོན་ཀུན་ལས་བཏུས་པའི་
མན་ངག །སློབ་དཔོན་མཁས་པ་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཆེན་པོ་དེ་ཉིད་དང་། ཞུ་ཆེན་གྱི་ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། ད་ཤཱ་ཀུ་ཤ་
ལ་ཀརྨ་པ་ཐཱ། བོད་སྐད་དུ། མི་དགེ་བ་བཅུའི་ལས་ཀྱི་ལམ་བསྟན་པ། དཀོན་མཆོག་གསུམ་ལ་ཕྱག་འཚལ་ལོ། །གང་ཞིག་བདེ་འགྲོ་ཐོབ་པར་འདོད་པས་སྤང་བར་བྱ་བའི་མི་དགེ་བ་བཅུའི་ལས་ཀྱི་ལམ་རང་བཞིན་གྱིས་ཁ་ན་མ་ཐོ་བ་དང་བཅས་པ་འདི་ལྟ་སྟེ། ལུས་ཀྱི་ལས་ནི་རྣམ་གསུམ་

དང་། །ངག་གི་རྣམ་པ་བཞི་དག་དང་། །ཡིད་ཀྱི་རྣམ་པ་གསུམ་པོ་དང་། །འདི་བཅུ་མི་དགེ་བ་རུ་གསུངས། །འདི་རྣམས་རབ་ཏུ་ཕྱེ་ནས་བཤད་པར་བྱ་སྟེ། དེ་ལ་རེ་ཞིག་ལུས་ཀྱི་ནི་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་སྤྱོད་པའོ། །ངག་གི་ནི་བརྫུན་
དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་འཁྱལ་པའོ། །ཡིད་ཀྱི་ནི་བརྣབ་སེམས་དང་། གནོད་སེམས་དང་། ལོག་པར་ལྟ་བའོ། །དེ་ལ་སྲོག་གཅོད་པ་ནི་སྲོག་ཆགས་སུ་གྱུར་པ་དང་། སྲོག་ཆགས་སུ་འདུ་ཤེས་པར་གྱུར་པ་དང་། གསོད་པའི་སེམས་ཉེ་བར་གནས་
པར་གྱུར་པ་དང་། དེའི་ཐབས་ཀྱང་བྱེད་པ་དང་། སྲོག་འགགས་པར་གྱུར་པ་སྟེ། ཡན་ལག་ལྔ་པོ་དེ་དག་དང་ལྡན་ན་སྲོག་གཅོད་པ་ཡིན་ནོ། །དེ་ལ་མ་བྱིན་པར་ལེན་པ་གང་ཞེ་ན། གཞན་གྱིར་གྱུར་པ་དང་། ཕ་རོལ་གྱིས་ཡོངས་སུ་བཟུང་བར་ཡང་འདུ་ཤེས་པ་དང་། རྐུ་བའི་སེམས་ཀྱང་
ཉེ་བར་གནས་པར་གྱུར་པ་དང་། དེའི་ཐབས་ཀྱང་བྱེད་པ་དང་། གནས་ནས་བསྐྱོད་པ་སྟེ་ཡན་ལག་ལྔ་པོ་དེ་དག་དང་ལྡན་ན་མ་བྱིན་པར་ལེན་པར་འགྱུར་རོ། །འདོད་པས་ལོག་པར་གཡེམ་པ་ནི་རྣམ་པ་བཞི་སྟེ། ཡུལ་མ་ཡིན་པ་དང་། དུས་མ་ཡིན་པ་དང་། ཡན་ལག་མ་ཡིན་པ་དང་། འགྲོ་བར་བྱ་བ་མ་
ཡིན་པའོ། །དེ་ལ་ཡུལ་མ་ཡིན་པ་ཞེས་བྱ་བ་ནི་དམ་པའི་ཆོས་དང་། སྐུ་གཟུགས་ལ་སོགས་པ་དང་བྱང་ཆུབ་སེམས་དཔའི་གནས་དང་། སློབ་དཔོན་དང་། མཁན་པོ་དང་། སྦྱིན་གནས་དང་། ཕ་མ་ལ་སོགས་པ་དང་། བླ་མ་དང་ཉེ་བར་གྱུར་པའོ། །དུས་མ་ཡིན་པ་ཞེས་བྱ་བ་ནི་ཉིན་པར་དང་།
ཟླ་མཚན་དང་ལྡན་པ་དང་། སྦྲུམ་མ་དང་། བུ་ཆུང་འཚོ་བ་དང་། མི་འདོད་པ་དང་། སྡུག་བསྔལ་བ་དང་། ཡིད་མི་བདེ་བས་ཉེ་བར་གདུངས་པ་དང་། བསྙེན་གནས་ཡན་ལག་བརྒྱད་ལ་གནས་པའོ། །ཡན་ལག་མ་ཡིན་པ་ཞེས་བྱ་བ་ནི་ཁ་དང་བཤང་བའི་ལམ་དང་། ཁྱེའུ་དང་བུ་མོའི་མདུན་དང་
རྒྱབ་ཀྱི་བུག་པ་དང་རང་གི་ལག་པའོ། །འགྲོ་བར་བྱ་བ་མ་ཡིན་པ་ནི། གཞན་གྱི་བུད་མེད་ཐམས་ཅད་དང་། ཆོས་དང་། རྒྱལ་མཚན་དང་། རིགས་ཀྱིས་བསྲུངས་པ་དང་། རྒྱལ་པོས་བསྲུངས་པ་དང་། གཞན་གྱིས་བླངས་པའི་སྨད་འཚོང་མ་དང་། གཉེན་འབྲེལ་ཅན་དང་། བྱོལ་སོང་ངོ་། །དེ་ལྟར་རང་

གི་ཆུང་མ་ལ་བརྟེན་ནས་འདོད་པས་ལོག་པར་གཡེམ་པར་འགྱུར་རོ། །དེ་ལ་བརྫུན་དུ་སྨྲ་བ་ཞེས་བྱ་བ་ནི་དངོས་པོར་ཡང་མ་གྱུར་པ་དང་། དངོས་པོའི་གནས་སྐབས་ལས་ཉམས་པར་གྱུར་པ་དང་། ལོག་པར་འདུ་ཤེས་པར་གྱུར་པ་དང་། ལོག་པའི་ཐབས་ཀྱང་ཉེ་བར་གནས་པར་གྱུར་པ་
དང་། དེའི་ཐབས་ཀྱང་བྱེད་པ་དང་། བརྫུན་གྱི་ཚིག་ཀྱང་སྨྲས་པ་སྟེ། ཡན་ལག་ལྔ་པོ་འདི་དག་དང་ལྡན་ན་བརྫུན་དུ་སྨྲ་བར་འགྱུར་རོ། །ཕྲ་མ་ཞེས་བྱ་བ་ནི་ཉོན་མོངས་པའི་སེམས་ཀྱིས་གཞན་འབྱེད་པའི་ཚིག་གོ། །ཚིག་རྩུབ་པོ་ཞེས་བྱ་བ་ནི་ཕ་རོལ་གྱི་གནད་ལ་ཕོག་པའི་སྡང་ཚིག་གོ། །
ཚིག་འཁྱལ་པ་ཞེས་བྱ་བ་ནི་འདོད་པ་དང་ཉེ་བར་ལྡན་པས་སམ། ཆགས་པ་དང་ཉེ་བར་ལྡན་པས་སྨྲ་བར་བྱ་བ་མ་ཡིན་པ་སྨྲ་བའོ། །བརྣབ་སེམས་ཞེས་བྱ་བ་ནི་ཕ་རོལ་གྱི་རྫས་དང་། དབང་ཕྱུག་དང་ལོངས་སྤྱོད་རྣམས་ལ་ཆགས་པའི་སེམས་མི་བཟད་པའོ། །གནོད་སེམས་ཞེས་བྱ་
བ་ནི་སེམས་ཅན་ལ་རྣམ་པར་སྡང་བ་དང་། སེམས་ཅན་འདི་དག་གསད་དོ། །བཅིང་ངོ་། །བརྡེག་གོ། །གཏག་གོ་ཞེས་སེམས་པའོ། །ལོག་པར་ལྟ་བ་ཞེས་བྱ་བ་ནི་སྦྱིན་པ་མེད། སྦྱིན་སྲེག་མེད། འཇིག་རྟེན་འདི་མེད། འཇིག་རྟེན་ཕ་རོལ་མེད། དགེ་སྦྱོང་མེད། བྲམ་ཟེ་མེད། ལྷ་མེད།
སངས་རྒྱས་བཅོམ་ལྡན་འདས་མེད། དགྲ་བཅོམ་པ་མེད། རང་སངས་རྒྱས་མེད། ལེགས་པར་སྤྱད་པ་མེད། ཉེས་པར་སྤྱད་པ་མེད། ལེགས་པར་བྱས་པ་དང་ཉེས་པར་བྱས་པའི་ལས་རྣམས་ཀྱི་འབྲས་བུ་རྣམ་པར་སྨིན་པ་མེད་ཅེས་པའོ། །བཅོམ་ལྡན་འདས་ཀྱིས་བཀའ་སྩལ་པ།
འཕགས་པ་དམ་པའི་ཆོས་དྲན་པ་ཉེ་བར་གཞག་པ་ཞེས་བྱ་བ་དང་། ཐེག་པ་ཆེན་པོའི་མདོ་ལས་འབྱུང་བ། མི་དགེ་བ་བཅུའི་ལས་ཀྱི་ལམ་འདི་ནི་དམྱལ་བ་ཆེན་པོའི་རྒྱུ་ཡིན་ཏེ། མི་དགེ་བ་བཅུའི་ལས་ཀྱི་ལམ་བསྟེན་པས་སེམས་ཅན་དམྱལ་བར་ལྟུང་བར་འགྱུར་རོ། །མི་དགེ་བ་བཅུའི་
ལས་ཀྱི་ལམ་བསྟན་པ། སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་དེ་ཉིད་དང་། ཞུ་ཆེན་གྱི་ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཀརྨ་བི་བྷཾ་ག་ནཱ་མ། བོད་སྐད་དུ། ལས་རྣམ་པར་འབྱེད་པ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །དིང་སང་དུས་ཀྱི་སྐྱེ་བོ་འདི་དག་གིས། །མཐོ་རིས་བདེ་བ་དག་ཀྱང་ཐོབ་དཀའ་ན། །མྱ་ངན་འདས་ལ་རེ་བ་ཡོད་མིན་པས། །བདག་ཉིད་ཁོ་ན་དྲན་
ཕྱིར་བྲི་བར་བྱ། །ཡོད་མེད་རྟག་ཆད་དང་བྲལ་བ། །བདེ་བའི་ལོངས་སྤྱོད་ཕུན་སུམ་ཚོགས། །འགྲོ་རྣམས་ཡོངས་སུ་སྨིན་མཛད་པ། །དམ་པའི་སྐྱེས་མཆོག་དེ་ལ་འདུད། །བཅོམ་ལྡན་འདས་གང་འཇིག་རྟེན་དང་འཇིག་རྟེན་ལས་འདས་པའི་ཆེན་པོ་ལས་ཀྱང་ཕུལ་དུ་བྱུང་ཞིང་ཁྱད་པར་དུ་འཕགས་
པ་དེ་ལ་ཕྱག་འཚལ་ནས། ཇི་ལྟར་བྱ་ཞེ་ན། ལས་དགེ་བ་དང་མི་དགེ་བ་རྣམ་པར་དབྱེ་བར་བྱ་སྟེ། མངོན་པར་མཐོ་བ་མཐོ་རིས་ལྷ་དང་མི། །ཐོབ་པར་བྱེད་པ་སྡོམ་པའི་ཚུལ་ཁྲིམས་ཡིན། །དེ་ཉམས་གྱུར་པས་ངན་སོང་འགྲོ་བ་ནི། །དམྱལ་བ་ཡི་དགས་བྱོལ་སོང་འདི་དག་གོ། །ལྷ་དང་མིའི་གཏམ་
རྒྱས་པ་འདི་ནི་འཇིག་རྟེན་གཞག་པ་དང་། འཇིག་རྟེན་གདགས་པ་དང་། བྱེ་བྲག་ཏུ་བཤད་པ་ཆེན་པོའི་ནང་ནས་ཆེ་ལོང་དུ་བཏུས་པ་མཛོད་ཀྱི་གནས་གསུམ་པ་ལ་སོགས་པར་བལྟ་བར་བྱའོ། །འདི་ལྟར་ཚ་བའི་སེམས་ཅན་དམྱལ་བ་ནི་འཛམ་བུའི་གླིང་འདིའི་འོག་ན་དཔག་ཚད་ཁྲི་ཕྲག་
གཉིས་ན་སེམས་ཅན་དམྱལ་བ་ཆེན་པོ་གནས་སོ། །གཞན་བདུན་ནི་དེའི་སྟེང་ན་རིམ་པ་བཞིན་དུ་གནས་སོ། །དེ་དག་གི་ཚེའི་ཚད་ཀྱི་རིམ་པ་ནི་མི་རྣམས་ཀྱི་ལོའི་རིམ་པ་རྣམས་ལ། འདོད་པའི་ཁམས་ཀྱི་ལྷ་རྣམས་དང་། ཡང་སོས་ལ་སོགས་པ་དམྱལ་བ་རྣམས་ཀྱི་ཉིན་ཞག་དང་ཟླ་བ་དང་ལོའི་
རིམ་པ་རྣམས་བསྒྲེས་ནས་ཤེས་པར་བྱ་སྟེ། འདི་ལྟར་མི་རྣམས་ཀྱི་ཚེ་ལོ་ལྔ་བཅུ་ལ་སོགས་པ་ལས་བསྒྱུར་ནས་ཤེས་པར་བྱའོ་ཞེས་བཤད་པས་སོ། །གྲང་བའི་སེམས་ཅན་དམྱལ་བ་ཡང་ནི་ཏི་སེའི་འོག་ན་སྔ་མ་དེ་དག་གི་ཐད་ཀ་ན་གནས་པ་སྟེ། དེ་དག་གི་ཚེའི་ཚད་ཀྱང་ཡུལ་དབུས་ཀྱི་བྲེས་
བཅལ་བའི་ཏིལ་ཁལ་བརྒྱད་ཅུས་བྱུར་བུར་བཀང་བའི་ནང་ནས། སྐྱེས་བུ་ཞིག་གིས་ལོ་བརྒྱ་བརྒྱ་ན་ཏིལ་རེ་རེ་ཕྱུང་བས་ཟད་པར་གྱུར་པ་ན་སེམས་ཅན་དམྱལ་བ་ཆུ་བུར་ཅན་གྱི་ཚེ་ཟད་པ་ཡིན་ཏེ། འོག་མ་རྣམས་ཀྱི་ཚེ་ནི་ཉི་ཤུར་བསྒྱུར་རོ། །འདི་དག་གི་དོན་ཡང་ཅུང་ཟད་ཙམ་ཞིག་མདོ་ལས་བཤད་པ་

བྲི་བར་བྱའོ། །དེ་ལྟར་དེ་དག་དམྱལ་བ་ནི། །བཅུ་དྲུག་ཅེས་བྱ་རྒལ་བར་དཀའ། །དྲག་པོའི་ལས་ཀྱིས་ཀུན་དུ་གང་། །རེ་རེ་ལ་ཡང་ལྷག་བཅུ་དྲུག །རྩིག་པ་བཞི་དང་ངོས་བཞི་སྟེ། །རྣམ་ཕྱེ་རིས་སུ་ཆད་པ་ཡིན། །ལྕགས་ཀྱི་ར་བས་ཀུན་ནས་བསྐོར། །ལྕགས་དག་གིས་ནི་གང་བ་
ཡིན། །དཔག་ཚད་བརྒྱ་ཕྲག་དུ་མར་ནི། །མེ་ལྕེ་དག་གིས་ཁྱབ་པར་གནས། །ཞེས་བཅོམ་ལྡན་འདས་ཀྱིས་གསུངས་སོ། །མཛོད་ལས་ཀྱང་། དེ་དག་གི་ནི་ངོས་བཞི་ན། །མེ་མར་མུར་དང་རོ་མྱགས་དང་། །སྤུ་གྲི་ལམ་སོགས་ཆུ་བོ་ཡིན། །ཞེས་བཤད་དོ། །སྔོན་གྱི་མཁས་པ་ཆེན་པོ་
ཁ་ཅིག་ན་རེ་ཚ་བ་ལ་སོགས་པ་བདུན་པོ་དེ་དག་ནི་མནར་མེད་པའི་སེམས་ཅན་དམྱལ་བའི་གཡས་ངོས་དང་གཡོན་ངོས་ན་གནས་སོ་ཞེས་ཟེར་རོ། །ཉི་ཚེ་བ་དང་ཉེ་འཁོར་བའི་སེམས་ཅན་དམྱལ་བ་དག་ལ་ནི་གནས་ཀྱི་ངེས་པ་མེད་དེ། ཆུ་བོ་དང་རི་དང་མྱ་ངམ་ལ་སོགས་པའི་ཐང་དང་སྟེང་
ན་གནས་སོ། །གཏམ་རྒྱས་པར་ནི་དྲན་པ་ཉེ་བར་གཞག་པ་དང་། འཇིག་རྟེན་གཞག་པ་དང་། འཇིག་རྟེན་གདགས་པ་ལ་སོགས་པར་བལྟའོ། །ཡི་དགས་ཀྱི་རྩ་བའི་གནས་ནི་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་འོག་དཔག་ཚད་ལྔ་བརྒྱ་ན་ཡོད་དེ། དེ་ན་ཡི་དགས་ཀྱི་རྒྱལ་པོ་གཤིན་རྗེ་
གནས་སོ། །གཞན་ནི་དེ་ལས་འཕྲོས་པ་ཡིན་ནོ། །གཏམ་རྒྱས་པར་ནི་ཡི་དགས་ཀྱི་རྟོགས་པ་བརྗོད་པར་བལྟ་བར་བྱའོ། །བྱོལ་སོང་གི་རྩ་བའི་གནས་ནི་རྒྱ་མཚོ་ཆེན་པོ་ཡིན་ནོ། །ཐང་དང་། ཆུ་དང་། རི་དང་། དུར་ཁྲོད་ལ་སོགས་པ་ན་ནི་དེ་ལས་འཕྲོས་པ་ཡིན་ཏེ། རྒྱས་པར་ནི་དེ་དང་དེ་དག་ཏུ་
བལྟ་བར་བྱའོ། །གནས་གསུམ་པོ་ན་བདེ་བ་མེད། །སྡུག་བསྔལ་རྒྱུ་དང་བཅས་པའི་གཏམ། །མདོ་དང་བསྟན་བཅོས་དག་ན་གསལ། །བློ་དང་ལྡན་པས་བལྟ་བར་གྱིས། །དམྱལ་བ་དང་། ཡི་དགས་དང་། བྱོལ་སོང་གི་སྡུག་བསྔལ་རྒྱུ་དང་བཅས་པ་མདོ་དང་བསྟན་བཅོས་དག་ན་གསལ་ལོ། །མིའི་
སྡུག་བསྔལ་བརྒྱ་རྩ་བཅུ་དག་ནི་འཕགས་པ་ཐོགས་མེད་ཀྱིས་མཛད་པའི་ཡོ་ག་ཙཱརྱར་བལྟ་བར་བྱའོ། །ལྷ་དག་ལ་ནི་སྡུག་བསྔལ་གཞན་ནི་མེད་ཀྱི་འོན་ཀྱང་འཆི་ལྟས་ལྔ་དང་ཉེ་བའི་འཆི་ལྟས་ལྔ་འབྱུང་སྟེ། འདི་ལྟར་གོས་དྲི་མ་འཆགས་པ་དང་། མེ་ཏོག་གི་ཕྲེང་བ་རྙིངས་པ་དང་། མཆན་ཁུང་

ནས་རྔུལ་འབྱུང་བ་དང་། ལུས་ལ་དྲི་མ་འབྱུང་བ་དང་རང་གི་སྟན་ལ་མི་དགའ་བར་འགྱུར་རོ། །ཉེ་བའི་ལྟས་ལྔ་ནི་གོས་དང་རྒྱན་དག་ལས་ཡིད་དུ་མི་འོང་བའི་སྒྲ་འབྱུང་བ་དང་། ལུས་ཀྱི་འོད་ཆུང་བར་འགྱུར་བ་དང་། ཁྲུས་བྱས་པའི་ཆུའི་ཐིགས་པ་ལུས་ལ་འཆགས་
པར་འགྱུར་བ་དང་། གཡོ་བའི་བདག་ཉིད་ཅན་ཡང་བློ་ཡུལ་གཅིག་ལ་འཆགས་པར་འགྱུར་བ་དང་། མིག་འབྱེད་པ་དང་འཛུམས་པ་སྲིད་པར་འགྱུར་བ་དག་སྟེ། ཉེ་བ་ལྔ་ནི་མ་ངེས་པའོ། །སྡུག་བསྔལ་དེ་དག་ཅི་ལས་བྱུང་ཞེ་ན། ལས་ནི་ལྕི་དང་ཡང་བ་དག །ཡུལ་དང་བསམ་པའི་དབྱེ་བ་
ཡིས། །ཉན་ཐོས་ཐེག་པ་ཆེན་པོའི་ལུགས། །རྣམ་པ་གཉིས་སུ་ཤེས་པར་བྱ། །ལྕི་བ་ནི་གཉིས་ཏེ། ཡུལ་གྱིས་ལྕི་བ་དང་། བསམ་པས་ལྕི་བའོ། །ཡང་བ་ཡང་དེ་དང་འདྲའོ། །དེ་ཡང་ཉན་ཐོས་དང་ཐེག་པ་ཆེན་པོའི་ལུགས་ཀྱིས་ལྕི་བ་དང་ཡང་བ་སོ་སོར་ཐ་དད་པར་ཤེས་པར་བྱའོ། །དེ་ལ་
ཉན་ཐོས་ཀྱི་ཡུལ་གྱིས་ལྕི་བ་ནི་འདི་ལྟར་མཚམས་མེད་པ་ལྔ་ལས་ཕ་བསད་པ་མ་གཏོགས་པ་བཞིའོ། །དེ་ལས་ཀྱང་དགེ་འདུན་གྱི་འཁོར་ལོའི་དབྱེན་ལྕི་བའོ། །གཞན་ཡང་བྱམས་པའི་ཏིང་ངེ་འཛིན་ལ་སྙོམས་པར་ཞུགས་པ་དང་། རྡོ་རྗེ་ལྟ་བུའི་ཏིང་ངེ་འཛིན་དང་། སྲིད་པའི་རྩེ་མོའི་ཏིང་ངེ་
འཛིན་ལས་ལངས་པའི་རྣལ་འབྱོར་པ་དང་། མཁན་པོ་དང་། སློབ་དཔོན་དང་། དགེ་སློང་དང་། དགེ་སློང་མ་དང་། ཕ་དང་མ་དང་། སྲིད་པ་ཐ་མའི་བྱང་ཆུབ་སེམས་དཔའ་དང་། ནད་པ་དང་། ཆོས་སྨྲ་བ་དང་། ངེས་པའི་ས་ལ་གནས་པའི་བྱང་ཆུབ་སེམས་དཔའ་དང་། རྒྱུན་དུ་ཞུགས་པ་དང་། ལན་ཅིག་
ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་གསོད་པ་དང་། དེ་དག་ལ་རྡེག་པ་དང་། ལྕགས་སྒྲོག་ལ་སོགས་པས་སྡོམ་པ་དང་། དེ་དག་གི་ཡོ་བྱད་རྐུ་བ་དང་། མཆོད་རྟེན་གྱི་དང་། དགེ་འདུན་གྱི་དང་། ཆོས་ཀྱི་དང་། སངས་རྒྱས་ཀྱི་ཡོ་བྱད་རྐུ་བ་དང་། གང་ཟག་སྔ་མ་དེ་དག་དང་།
དཀོན་མཆོག་གསུམ་ལ་བརྫུན་སྨྲ་བ་དང་། ཚིག་རྩུབ་པོ་དང་། དེ་དག་ཕན་ཚུན་འབྱེད་པ་དང་། ཚིགས་སུ་བཅད་པ་མ་ཡིན་པ་སྨྲ་བ་ནི་ཡུལ་གྱིས་ལྕི་བའོ། །བསམ་པས་ལྕི་བ་ནི་ལོག་པར་ལྟ་བ་ཆེན་པོ་སྐྱེས་པ་དང་ཡིད་ཀྱིས་ཉེས་པ་ཆེན་པོའོ། །ཡུལ་གྱིས་ཡང་བ་ནི་བྱོལ་སོང་དང་། དུར་

ཁྲོད་ཀྱི་ཤ་ཟ་གསོད་པ་ལ་སོགས་པའོ། །བསམ་པས་ཡང་བ་ནི་དེ་ལས་གཞན་པ་རྣམས་སོ། །དེ་ལ་ཐེག་པ་ཆེན་པོའི་ཡུལ་གྱིས་ལྕི་བ་ནི་འདི་ལྟར་བླ་མ་རྣམས་དང་། སེམས་དང་པོ་བསྐྱེད་པ་ལ་སོགས་པའི་བྱང་ཆུབ་སེམས་དཔའ་དང་། ཕ་དང་མ་དང་དེ་ཁོ་ན་ཉིད་ཀྱི་རྣལ་འབྱོར་པ་དང་།
རང་གི་ལྷ་དང་། དཀོན་མཆོག་གསུམ་ལ་སོགས་པ་ལ་སྔ་མའི་ཚུལ་རྣམས་བཞིན་དུ་བྱེད་པའོ། །དོན་འདི་ཉིད་ལ་དགོངས་ནས། བཅོམ་ལྡན་འདས་ཀྱིས་རྡོ་རྗེ་གཙུག་ཏོར་ཞེས་བྱ་བ་རྣལ་འབྱོར་ཆེན་པོའི་རྒྱུད་ལས་འདི་སྐད་དུ། གསང་བ་པའི་བདག་པོ་ཉེས་པར་སྤྱོད་པ་དེ་དག་ནི་ལྕི་བར་
གྱུར་པ་དང་། ཐ་མལ་པར་གྱུར་པའོ། །དེ་ལ་ཕ་མར་གྱུར་པ་ལ་སོགས་པ་གསོད་པ་དང་། རྡེག་པ་ནི་ལུས་ཀྱི་ཉེས་པར་སྤྱོད་པ་ལྕི་བའོ། །སྲོག་གཅོད་པ་ལ་སོགས་པ་གཞན་གསུམ་ནི་ལུས་ཀྱི་ཉེས་པར་སྤྱོད་པ་ཐ་མལ་པའོ། །དམ་པའི་ཆོས་སྤོང་བ་དང་། ལྷ་རྣམས་ལ་ཚིག་རྩུབ་པོ་སྨྲ་
བ་དང་། ཕ་མ་དང་། བླ་མར་གྱུར་པ་ལ་སོགས་པ་ལ་ཚིག་ངན་པ་སྨྲ་བ་ནི་ངག་གི་ཉེས་པར་སྤྱོད་པ་ལྕི་བའོ། །སྐྱེས་བུ་འགའ་ཞིག་དད་པས་དགེ་བ་ཉམས་སུ་ལེན་ཅིང་རྩོམ་པའི་གཏམ་གྱི་སྐབས་སུ་འཇིག་རྟེན་ཕ་རོལ་མེད་དོ་ཞེས་བྱ་བའི་ཚིག་འཇིག་རྟེན་ལས་འདས་པའི་བརྫུན་དུ་སྨྲ་
བ་ནི་ངག་གི་ཉེས་པར་སྤྱོད་པ་ལྕི་བའོ། །དགེ་བའི་བར་ཆད་བྱེད་པའི་ཚིག་འཁྱལ་པ་སྨྲ་བ་དང་། ལྐོག་འཕྱས་བྱེད་པ་དང་། མི་དགེ་བའི་ལས་ཀྱི་གཏམ་རྣམས་ནི་ངག་གི་ཉེས་པར་སྤྱོད་པ་ཐ་མལ་པའོ། །ཡིད་ཀྱི་ཉེས་པར་སྤྱོད་པ་ནི་གསུམ་སྟེ། དེ་ཉིད་ལས་སེམས་ཀྱི་ཉེས་པ་དང་།
སེམས་ལས་བྱུང་བའི་ཉེས་པ་དང་། མ་རིག་པའི་ཉེས་པའོ། །དེ་དག་ཀྱང་དགེ་བ་བཅུའི་ལས་ཀྱི་ལམ་དེ་ཉིད་ལ་མ་ཆགས་པ་ཉིད་ནི་སེམས་ཀྱི་ཉེས་པར་སྤྱོད་པའོ། །དྲེགས་པ་དང་། ང་རྒྱལ་དང་། ཁྲོ་བ་དང་། སེམས་ཅན་རྣམ་པར་འཇིག་པ་དང་། འདོད་ཆགས་ཀྱི་སེམས་ཀྱིས་
གཞན་གྱི་བུད་མེད་ལ་ཆགས་པ་དང་། གཞན་གྱི་སྲོག་འཕྲོག་པ་དང་། བླ་མར་གྱུར་པ་ལ་སེམས་གྱ་གྱུ་ཞིང་རབ་ཏུ་སྡང་བ་ནི་སེམས་ལས་བྱུང་བའི་ཉེས་པའོ། །དགེ་བ་བཅུའི་ལས་ཀྱི་ལམ་རྣམས་དང་། ཕ་རོལ་ཏུ་ཕྱིན་པ་དྲུག་འདོར་ཞིང་བརྗེད་ངས་པ་དང་། སོམ་ཉིར་གྱུར་པ་དང་། ཡིད་

ཤིན་ཏུ་རྨོངས་པར་གྱུར་པ་ནི་མ་རིག་པའི་ཉེས་པ་སྤྱོད་པའོ་ཞེས་གསུངས་སོ། །དེ་ལ་བསམ་པས་ལྕི་བ་ནི། ཐེག་པ་ཆེན་པོ་པ་སེམས་སྙིང་རྗེའི་དབང་དུ་གྱུར་པ། སེམས་ཅན་ཐམས་ཅད་མི་གཏོང་བར་རྗེས་སུ་འཛིན་པས་ལྕི་བ་ནི། འདི་ལྟར་ཞེ་སྡང་ཁོ་ན་ཡིན་ཏེ། སློབ་
དཔོན་ཞི་བ་ལྷའི་ཞལ་ནས། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཡང་། །ཁོང་ཁྲོ་གཅིག་གིས་འཇོམས་པར་བྱེད། །ཅེས་གསུངས་སོ། །འདི་ཁོ་ན་ཉིད་ལྕི་བ་ཡིན་པའི་ཁུངས་མང་དུ་ཡོད་མོད་ཀྱི་རེ་ཞིག་གཞག་
གོ། །ཡང་བའི་ལས་ཀྱང་ཚུལ་འདི་ལས་ཤེས་པར་བྱའོ། །ཐེག་པ་གཉིས་པོ་འདི་དག་ཏུ། །ལྕི་དང་ཡང་བའི་ལས་རྣམས་བཤད། །འདོད་ཆགས་ཞེ་སྡང་གཏི་མུག་གིས། །རྣམ་པ་གསུམ་དུ་འགྱུར་བའོ། །དེ་ལ་སྲོག་གཅོད་པ་འདོད་ཆགས་ལས་སྐྱེས་པ་ནི་འདི་ལྟར་ལུས་ཀྱི་ཡན་ལག་གི་
ཕྱིར་རམ། ནོར་གྱི་ཕྱིར་རམ། རྩེད་མོའི་ཕྱིར་རམ། བདག་དང་མཛའ་བོ་ཡོངས་སུ་བསྐྱབ་པའི་ཕྱིར་སྲོག་གཅོད་པའོ། །ཞེ་སྡང་ལས་བྱུང་བ་ནི་རྩོད་པ་དང་ཁོན་གྱིས་བྱས་པའོ། །གཏི་མུག་ལས་བྱུང་བ་ནི་མཆོད་སྦྱིན་བྱེད་པ་དང་། རྒྱལ་པོའི་ཆོས་འདོན་པ་ཚད་མར་བྱས་ནས་ཆོས་ཀྱི་
བློས་གསོད་པ་དང་། མི་མི་བགྲུངས་པ་དག་ལ་ཆད་པས་བཅད་ན་རྒྱལ་པོའི་བསོད་ནམས་ཀྱི་སྣོད་དུ་འོང་ཞེས་ཟེར་ནས་གསོད་པ་ལྟ་བུ་དང་། སེན་དྷ་པ་དག་འདི་སྐད་དུ། ཕ་དང་མ་རྒས་སམ་ནད་ཚབས་པོ་ཆེས་ཐེབས་ན་གསད་དོ། །སྦྲུལ་དང་སྡིག་པ་དང་སྦྲང་བུ་ཏྲེ་མ་བུ་ཀ་ལ་སོགས་པ་ནི་མི་
རྣམས་ལ་གནོད་པ་བྱེད་པས་གསད་དོ། །རི་དགས་དང་། ཕྱུགས་དང་། བྱ་དང་། མ་ཧེ་ལ་སོགས་པ་ནི་ལོངས་སྤྱོད་པའི་ཕྱིར་གསད་དོ་ཞེས་ཟེར་བ་ལྟ་བུའོ། །མ་བྱིན་པར་ལེན་པ་ཆགས་པ་ལས་བྱུང་བ་ནི། གང་ཞིག་གང་དོན་དུ་གཉེར་བ་དེས་འཕྲོག་པའམ། གཞན་གྱི་རྙེད་པའམ།
བཀུར་སྟིའམ། གྲགས་པའི་ཕྱིར་རམ། བདག་དང་མཛའ་བོ་ཡོངས་སུ་བསྐྱབ་པའི་ཕྱིར་འཕྲོག་པའོ། །ཞེ་སྡང་ལས་སྐྱེས་པ་ནི་སྔར་བཞིན་ནོ། །གཏི་མུག་ལས་བྱུང་བ་ནི་རྒྱལ་པོའི་ཆོས་འདོན་པ་ཚད་མར་བྱས་ནས་མི་བགྲུངས་པ་དག་ཆད་པས་བཅད་ནས་འཕྲོག་པ་ལྟ་བུ་དང་། བྲམ་

ཟེ་དག་ན་རེ་འདི་ཐམས་ཅད་ཚངས་པས་བྲམ་ཟེ་རྣམས་ལ་བྱིན་པ་ཡིན་པ་ལས། ད་ལྟར་བྲམ་ཟེ་རྣམས་ཉམས་པས་རིགས་གཞན་སྤྱོད་དུ་ཟད་མོད། དེ་བས་བྲམ་ཟེ་འཕྲོག་པ་ན། རྐུ་བ་མ་ཡིན་གྱི་བྲམ་ཟེ་བདག་ཉིད་ཀྱི་ལེན་པར་བྱེད་པར་ཟད་པས་བདག་ཉིད་ཀྱི་ཟ་བ་དང་། བདག་ཉིད་ཀྱི་
འཐུངས་པ་དང་། བདག་ཉིད་ཀྱི་གྱོན་པ་དང་། བདག་ཉིད་ཀྱི་སྦྱིན་པ་ཡིན་ནོ་ཞེས་ཟེར་བ་ལྟ་བུའོ། །དེ་ལ་འདོད་པས་ལོག་པར་གཡེམ་པ་འདོད་ཆགས་ལས་བྱུང་བ་ནི་གཞན་གྱི་ཆུང་མ་ལ་ཆགས་པའམ། རྙེད་པའམ། བཀུར་སྟིའི་ཕྱིར་རམ། བདག་གམ་མཛའ་བོ་ཡོངས་སུ་བསྐྱབ་
པའི་ཕྱིར་མི་ཚངས་པར་སྤྱོད་པའོ། །ཞེ་སྡང་ལས་བྱུང་བ་ནི་སྔ་མ་བཞིན་ནོ། །གཏི་མུག་ལས་བྱུང་བ་ནི་པར་སིག་པ་དག་ན་རེ་མ་ལ་སོགས་པ་ལ་ཉལ་བ་དང་། བ་ལང་ཕྲེང་གི་མཆོད་སྦྱིན་ལ་ཆོ་ག་ཅན་གྱི་ཆུ་འཐུང་ངོ་། །རྩྭ་གཅོད་དོ། །མའི་གན་དུ་ཉལ་པོ་ལ་འགྲོ་བའོ། །སྲིང་མོའི་
གན་དུ་དང་། རུས་གཅིག་པའི་གན་དུ་འགྲོ་བར་བྱའོ་ཞེས་བྱ་བ་དང་། བ་ལང་ལ་སོགས་པ་ལ་ཡང་སྤྱད་པར་བྱའོ་ཞེས་ཟེར་བ་ལྟ་བུའོ། །དེ་ལྟ་བས་ན་འདི་ལྟ་བུ་བྱུང་བ་ན་ནི། རྒྱལ་པོ་བཞད་གད་ལྟ་བུ་བྱེད་པ་དང་། །བག་མ་ལེན་པའི་ཚེ་དང་གསོད་པ་དང་། །ནོར་ཀུན་འཕྲོག་ཚེ་བརྫུན་
སྨྲས་གནོད་མེད་དེ། །བརྫུན་ལྔ་ལྟུང་བར་བྱེད་པ་མིན་ཞེས་བཤད། །ཅེས་ཟེར་བ་དང་། གང་ཡང་ལོག་པར་ལྟ་བའི་བརྫུན་དུ་སྨྲ་བའོ། །མི་དགེ་བ་ལྷག་མ་དག་ཀྱང་སྔ་མ་བཞིན་ནོ། །ཡིད་ཀྱི་གསུམ་ནི་འདོད་ཆགས་ལ་སོགས་པ་གསུམ་གྱི་མཇུག་ཏུ་སྐྱེས་པའོ། །སྲོག་གཅོད་པ་ནི་
བསམས་བཞིན་དུ། །མ་ནོར་བར་ནི་གཞན་གསད་ནའོ། །མ་བྱིན་ལེན་པ་གཞན་གྱི་ནོར། །མཐུ་དང་འཇབ་བུས་བདག་གིར་བྱེད། །ལོག་གཡེམ་བགྲོད་མིན་པ་ལ་འགྲོ། །འདུ་ཤེས་གཞན་བསྒྱུར་བརྫུན་ཚིག་དོན། །ཉོན་མོངས་སེམས་ཀྱིས་ཕ་རོལ་འབྱེད། །ཚིག་རྩུབ་པོ་ནི་མི་སྙན་པའོ། །
ངག་འཁྱལ་གླུ་དང་ཟློས་གར་དང་། །བསྟན་བཅོས་ངན་དང་འདུ་འཛིའི་གཏམ། །བརྣབ་སེམས་གཞན་གྱི་ནོར་ལ་ཆགས། །གནོད་སེམས་སེམས་ཅན་ལ་སྡང་བའོ། །རྒྱུ་འབྲས་མེད་ཟེར་ལོག་ལྟའོ། །དེ་ལྟར་ཐེག་པ་ཆེན་པོའི་འདི་ལྟར་ཡིན་ཏེ། དེ་ཡང་རྣམ་པར་སྣང་མཛད་མངོན་པར་བྱང་ཆུབ་

པའི་རྒྱུད་ལས་བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་ཆེད་དུ་བསམས་ནས་སྲོག་གཅོད་པ་ལས་སླར་ལྡོག་པར་བྱའོ། །དབྱུང་བ་སྤང་ཞིང་ཁོན་དུ་འཛིན་པ་ཡང་སྤང་བར་བྱའོ། །དེས་བདག་ཉིད་ལ་ཇི་ལྟ་བ་དེ་བཞིན་དུ་གཞན་གྱི་སྲོག་ཀྱང་ཡོངས་
སུ་བསྲུང་བར་བྱའོ། །མ་བྱིན་པར་ལེན་པ་ལས་སླར་ལྡོག་པར་བྱ་སྟེ། དེས་གཞན་གྱིས་ཡོངས་སུ་བཟུང་བའི་ལོངས་སྤྱོད་ལ་ཆགས་པ་བསྐྱེད་པར་ཡང་མི་བྱ་ན། གཞན་གྱིས་ཡོངས་སུ་བཟུང་བའི་ལོངས་སྤྱོད་ལ་མ་བྱིན་པར་ལེན་པ་ལྟ་ཅི་སྨོས། འདོད་པས་ལོག་པར་གཡེམ་པ་ལས་ལྡོག་པར་
བྱ་སྟེ། དེས་གཞན་གྱིས་ཡོངས་སུ་བཟུང་བའི་ཆུང་མ་དང་། རིགས་དང་། མཚན་མ་དང་། ཆོས་ཀྱིས་བསྲུངས་པ་རྣམས་ལ་ཆགས་པ་བསྐྱེད་པར་ཡང་མི་བྱ་ན། ཡན་ལག་མ་ཡིན་པར་སྤྱོད་པ་དང་། དབང་པོ་གཉིས་སྤྲོད་པ་ལྟ་ཅི་སྨོས། བརྫུན་དུ་སྨྲ་བ་ལས་ལྡོག་པར་བྱ་སྟེ། དེས་ཆེད་དུ་བསམས་
ནས་གང་གིས་སངས་རྒྱས་ཀྱི་བྱང་ཆུབ་སླུ་བར་འགྱུར་བའི་བརྫུན་གྱི་ཚིག་སྲོག་གི་ཕྱིར་ཡང་སྨྲ་བར་མི་བྱའོ། །ཚིག་རྩུབ་པོ་ལས་ལྡོག་པར་བྱ་སྟེ་དེས་སེམས་ཅན་རྣམས་ལ་མཉེན་པ་དང་། འཇམ་པ་དང་། ཡིད་ལ་འབབ་པ་དེ་ལྟ་བུའི་ཚིག་སྨྲ་བར་བྱའོ། །དེ་ཅིའི་ཕྱིར་ཞེ་ན། གསང་པའི་བདག་པོ་བྱང་
ཆུབ་སེམས་དཔའ་སེམས་ཅན་ཐམས་ཅད་ཀྱི་དོན་བྱ་བའི་ཐོག་མར་འགྲོ་བ་ནི་ཚིག་སྙན་པ་ཡིན་པའི་ཕྱིར་རོ། །ཕྲ་མ་ལས་ལྡོག་པར་བྱ་སྟེ། དེ་ཅི་ནས་ཀྱང་དབྱེན་དུ་མི་འགྱུར་བའི་ཚིག་དེ་དང་། གནོད་པར་མི་འགྱུར་བའི་ཚིག་དེ་ལྟར་བསྒྲུབ་པར་བྱའི་བྱང་ཆུབ་སེམས་དཔའ་རྣམས་ནི་སེམས་ཅན་དབྱེ་བ་ལ་
ཞུགས་པ་མ་ཡིན་ནོ། །ཚིག་འཁྱལ་པ་ལས་ལྡོག་པར་བྱ་སྟེ། དེས་ཡུལ་དང་དུས་དང་དོན་དང་ལྡན་པའི་རྗེས་སུ་འཇུག་པས་སེམས་ཅན་ཐམས་ཅད་ལ་ཡིད་དུ་འོང་བ་དང་རན་པར་སྤྱོད་པའི་ཚིག་སྨྲ་བར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་ཚིག་བཟང་པོ་དང་ལྡན་པའི་ཕྱིར་རོ། །བརྣབ་
སེམས་ལས་ལྡོག་པར་བྱ་སྟེ། དེས་གཞན་གྱི་ལོངས་སྤྱོད་དང་གཞན་གྱི་ནོར་ལ་ཆགས་པའི་སེམས་ཀྱང་བསྐྱེད་པར་མི་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་སེམས་མ་ཆགས་པ་ཡིན་ནོ། །གལ་ཏེ་བྱང་ཆུབ་སེམས་དཔའ་བདག་སེམས་ཆགས་ན་ཐམས་ཅད་མཁྱེན་པ་ཉིད་ཀྱི་སྒོའི་ཕྱོགས་

གཅིག་ལས་ཉམས་པར་འགྱུར་རོ། །གསང་བ་པའི་བདག་པོ་བྱང་ཆུབ་སེམས་དཔའི་རབ་ཏུ་དགའ་བ་བསྐྱེད་པ་དེས་འདི་ལྟར་བསམ་པར་བྱ་སྟེ། གང་དག་གིས་བྱ་དགོས་པ་དེ་དང་དེས་རང་འབྱོར་པར་གྱུར་པ་དེ་ལེགས་སོ་སྙོམ་ནས་སེམས་ཅན་དེ་དག་གི་ལོངས་སྤྱོད་དེ་དག་ཆུད་མི་ཟ་བ་ལ་ཡང་དང་ཡང་དུ་དགའ་བ་
བསྐྱེད་པར་བྱའོ། །གསང་བའི་བདག་པོ་གཞན་ཡང་གནོད་སེམས་ལས་ལྡོག་པར་བྱ་སྟེ། དེས་ཐམས་ཅད་དུ་བཟོད་པ་དང་ལྡན་པ་དང་། བྱམས་པ་དང་། ཁོང་ཁྲོ་བ་མེད་ཅིང་སེམས་སྙོམས་པར་བྱའོ། །དེས་མཛའ་བོ་ལ་ཇི་ལྟ་བ་བཞིན་དུ་དགྲ་ལ་ཡང་དེ་བཞིན་དུ་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་
དཔའ་ནི་ཡིད་ཀྱི་གནས་ངན་ལེན་དང་ལྡན་པ་མ་ཡིན་གྱི་བྱང་ཆུབ་སེམས་དཔའ་ནི་རང་བཞིན་གྱིས་བསམ་པ་ཡོངས་སུ་དག་པ་ཡིན་ནོ། །གསང་བའི་བདག་པོ་དེ་ལྟ་བས་ན་བྱང་ཆུབ་སེམས་དཔའ་གནོད་སེམས་དང་བྲལ་བར་བྱའོ། །གསང་བའི་བདག་པོ་གཞན་ཡང་བྱང་ཆུབ་སེམས་དཔའ་ལོག་པར་ལྟ་བ་
ལས་ལྡོག་པར་བྱ་སྟེ། དེས་ཡང་དག་པའི་ལྟ་བ་དང་། འཇིག་རྟེན་ཕ་རོལ་ལ་འཇིགས་པར་ལྟ་བ་དང་། གཡོ་མེད་པ་དང་། གྱ་གྱུ་མེད་པ་དང་། དྲང་བ་དང་། སངས་རྒྱས་དང་ཆོས་དང་དགེ་འདུན་དག་ལ་བསམ་པ་ངེས་པར་བྱའོ། །དེ་ཅིའི་ཕྱིར་ཞེ་ན། གསང་བའི་བདག་པོ་ལོག་པར་ལྟ་བ་ནི་བྱང་ཆུབ་སེམས་དཔའི་
ཁ་ན་མ་ཐོ་བ་ཆེན་པོ་སྟེ། དགེ་བའི་རྩ་བ་ཐམས་ཅད་གཅོད་པར་འགྱུར་རོ། །འདི་ནི་མི་དགེ་བའི་རྩ་བ་ཐམས་ཅད་ཀྱི་ཕྱི་མོའོ། །གསང་བའི་བདག་པོ་དེ་ལྟ་བས་ན་ཐ་ན་བཞད་གད་ཙམ་དུ་ཡང་ལོག་པར་ལྟ་བ་སྐྱེད་པར་མི་བྱེད་པའོ་ཞེས་གསུངས་སོ། །ཡུལ་དང་བསམ་པ་ཉོན་མོངས་དང་། །དུས་དང་གྲངས་དང་
ཡན་ལག་སོགས། །ཆུང་དང་འབྲིང་དང་ཆེན་པོ་སྟེ། །རྣམ་པ་གསུམ་དུ་ཤེས་པར་བྱ། །ལས་ཀྱི་ལམ་བཅུ་པོ་དེ་དག་ཀྱང་ཡུལ་ལ་སོགས་པ་དེ་དག་གི་དབང་གིས་ཆུང་ངུ་དང་འབྲིང་པོ་དང་ཆེན་པོར་འགྱུར་རོ། །དེ་ལ་ཡུལ་གྱིས་འགྱུར་བ་ནི་སྔར་ཇི་སྐད་བརྗོད་པའི་ཚུལ་དེ་ལས་ཤེས་པར་བྱའོ། །དེ་ལ་བསམ་
པས་གསུམ་དུ་འགྱུར་བ་ནི། །མི་ཤེས་པས་བྱས་པ་ནི་ཆུང་ངུའོ། །བག་མེད་པས་བྱས་པ་ནི་འབྲིང་པོའོ། །མ་གུས་པས་བྱས་པ་ནི་ཆེན་པོའོ། །དེ་ལ་ཉོན་མོངས་པས་གསུམ་དུ་འགྱུར་བ་ནི་འདོད་ཆགས་ལ་སོགས་པའི་ཉོན་མོངས་པ་ཆུང་ངུ་དང་འབྲིང་དང་ཆེན་པོས་སྲོག་གཅོད་པ་ལ་སོགས་པའི་ལས་ཀྱང་དེ་བཞིན་

དུ་བྱེད་པའོ། །དེ་ལ་དུས་ཀྱིས་འགྱུར་བ་ནི་སྦྱོར་བ་དང་། དངོས་གཞི་དང་། མཇུག་རྣམས་ལས་གཅིག་དང་ལྡན་པ་ནི་ཆུང་བའོ། །གཉིས་དང་ལྡན་པ་ནི་འབྲིང་པོའོ། །དེ་དག་གསུམ་ག་རྫོགས་པ་ནི་ཆེན་པོའོ། །དེ་ལ་ལས་ཀྱི་ལམ་བཅུ་པོ་དེ་དག་གྲངས་ཀྱིས་འགྱུར་བ་ནི་ལན་གཅིག་བྱས་པ་འདི་ཆུང་
བའོ། །ལན་གཉིས་བྱས་པ་ནི་འབྲིང་པོའོ། །ལན་གསུམ་ཕན་ཆད་བྱས་པ་ནི་ཆེན་པོའོ། །དེ་ལ་ཡན་ལག་གི་འགྱུར་བ་ནི་སྲོག་གཅོད་པ་ལ་སོགས་པ་དེ་དག་གི་ཡན་ལག་ཕལ་ཆེར་མ་ཚང་བ་ནི་ཆུང་བའོ། །ཕལ་ཆེར་ཚང་བ་ནི་འབྲིང་པོའོ། །ཐམས་ཅད་རྫོགས་ཤིང་ཚང་བ་ནི་ཆེན་པོའོ། །སོགས་ཞེས་བྱ་བ་ནི་
སྲོག་གཅོད་པ་ལ་སོགས་པ་དེ་དག་ལས་གང་ཡང་རུང་བ་ལན་ཅིག་བྱས་པ་ཙམ་ནི་ཆུང་བའོ། །དེ་ལ་འགྱོད་པ་མེད་པ་ནི་འབྲིང་པོའོ། །དེ་ལ་གཉེན་པོ་བསྟེན་པ་ནི་ཆེན་པོའོ། །བསྡམ་པར་བྱ་བ་ནི་ཆུང་ངུའོ། །བཤགས་པར་བྱ་བ་ནི་འབྲིང་པོའོ། །ཕམ་པ་ནི་ཆེན་པོའོ། །རྩེད་མོ་དང་གཞན་གྱི་གཡམ་ལ་རྒྱུགས་ཀྱིས་བྱས་པ་
ནི་ཆུང་ངུའོ། །རང་ཉིད་ལ་ཉོན་མོངས་པ་དང་ཉེས་པ་མེད་ཀྱང་དཔྱ་ཞིང་གཞན་གྱི་སྡིག་པ་བྱེད་པའི་རྐྱེན་བྱེད་པ་ནི་འབྲིང་པོའོ། །རང་ཉིད་ལ་ཉེས་པ་ཡོད་ཅིང་གཞན་གྱིས་སྤྱད་པ་ནི་ཆེན་པོའོ། །གཞན་ཡང་སྡིག་པའི་གྲོགས་པོ་དང་མི་དགེ་བའི་བཤེས་གཉེན་གྱི་དབང་གིས་རང་དབང་མེད་པར་བྱས་པ་ནི་ཆུང་ངུའོ། །
གྲགས་པ་སྙན་པའི་ཕྱིར་བྱས་པ་ནི་འབྲིང་པོའོ། །རྣམ་པར་སྨིན་པ་ལ་མི་འཇིགས་པ་ནི་ཆེན་པོའོ། །གཞན་ཡང་ལས་ཀྱི་ལམ་བཅུ་པོ་འདི་དག་གི་དོན་རྒྱས་པ་ནི་འཕགས་པ་དྲན་པ་ཉེ་བར་གཞག་པ་ལ་སོགས་པའི་མདོ་སྡེ་དང་། སློབ་དཔོན་བྲམ་ཟེ་ཆོས་ལྡན་རབ་འབྱོར་དབྱངས་ཀྱིས་མཛད་པ་དང་། འཕགས་པ་
ཐོགས་མེད་ཀྱིས་མཛད་པའི་རྣམ་པར་གཏན་ལ་དབབ་པ་བསྡུ་བ་ལ་སོགས་པའི་ཡོ་ག་ཙཱརྱའི་ས་ཆེན་པོར་བལྟའོ། །གཞན་ཡང་། བསམས་བཞིན་པ་དང་རྫོགས་པ་དང་། །མི་འགྱོད་གཉེན་པོ་མེད་པ་དང་། །འཁོར་དང་རྣམ་པར་སྨིན་པ་ལས། །བསགས་པའི་ལས་ཞེས་བྱ་བ་ཡིན། །ཡང་འཁོར་བའི་
ལས་ནི་ལྕི་གང་དང་། །ཉེ་བ་གང་དང་གོམས་པ་གང་། །སྔོན་བྱས་དེ་དག་གང་ཡིན་ལས། །སྔ་མ་སྔ་མ་རྣམ་སྨིན་འགྱུར། །ཡང་། ཤིན་ཏུ་ཡིད་ལ་གཅགས་པ་དང་། །ལས་དེ་གསར་དུ་བྱས་པ་དང་། །ཡང་དང་ཡང་དུ་བྱས་པས་གོམས། །དེ་ལས་གང་རུང་སྔར་མྱོང་འགྱུར། །མཐོང་བའི་ཆོས་ལས་

མྱོང་འགྱུར་དང་། །སྐྱེས་ནས་མྱོང་བར་འགྱུར་བ་དང་། །ལན་གྲངས་གཞན་དུ་མྱོང་འགྱུར་དང་། །མྱོང་པར་འགྱུར་བར་མ་ངེས་པའོ། །ལས་ནི་དཀར་དང་གནག་པ་དང་། །འདྲེས་མའི་ལས་དང་རྣམ་པ་གསུམ། །མདོ་དང་བསྟན་བཅོས་དག་ན་གསལ། །དེ་བས་ན། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་ངེས་བསགས་
ནས། །སྨིན་ནས་ལུས་ཅན་རྣམས་ལ་ནི། །འབྲས་བུ་ཉིད་དུ་སྟོན་པར་བྱེད། །ཅེས་བྱ་སྟེ་དེ་ལྟ་བུ་ལ་ཡང་ངེས་པར་ཡིད་ཆེས་པར་བྱའོ། །འགྲོ་བ་རྒྱུད་ལྔའི་སེམས་ཅན་ཐམས་ཅད་དག །འཛམ་གླིང་འདིར་སྐྱེས་དགེ་བ་བཅུ་སྤྱད་དེ། །མཐར་གྱིས་བླ་མ་བཟང་པོ་བསྟེན་བྱས་ནས། །ཟག་པ་མེད་པའི་ཚུལ་ཁྲིམས་ཐོབ་གྱུར་ཅིག །ལས་
རྣམ་པར་འབྱེད་པ་ཞེས་བྱ་བ། སློབ་དཔོན་མཁས་པ་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དེ་ཉིད་དང་། ཞུ་ཆེན་གྱི་ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ། ཙཱརྱ་སཾ་གྲ་ཧ་པྲ་དཱི་པ། བོད་སྐད་དུ།
སྤྱོད་པ་བསྡུས་པའི་སྒྲོན་མ། འཇིག་རྟེན་དབང་ཕྱུག་ལ་ཕྱག་འཚལ་ལོ། །གང་གི་གསུང་གི་འོད་ཟེར་གྱིས། །བདག་སོགས་རྨོངས་པ་མ་ལུས་པའི། །སྙིང་གི་པདྨ་ཁ་འབྱེད་པའི། །དམ་པའི་སྐྱེས་མཆོག་དེ་ལ་འདུད། །གསང་སྔགས་ཕ་རོལ་ཕྱིན་པ་ལ། །བརྟེན་ནས་བྱང་ཆུབ་བསྒྲུབ་བོ་ཞེས། །བླ་མ་སངས་རྒྱས་གསུངས་
པས་ན། །དེ་དོན་བདག་གིས་བྲི་བར་བྱ། །གསང་སྔགས་འདི་རུ་བརྗོད་མི་བྱ། །ཕ་རོལ་ཕྱིན་ལུགས་སྤྱོད་པ་ཡི། །བྱང་ཆུབ་སེམས་དཔའི་སྤྱོད་པ་དག །མདོ་ཙམ་བདག་གིས་བཤད་པར་བྱ། །སེམས་བསྐྱེད་སྔོན་དུ་སོང་བ་ཡིས། །བྱང་ཆུབ་སེམས་དཔའི་སྡོམ་པ་བླང་། །མདོ་སྡེ་མ་ལུས་ཀུན་བལྟ་ཞིང་། །བསྟན་བཅོས་མཐའ་དག་
མཉན་པར་བྱ། །ལུས་དང་ངག་དང་ཡིད་གསུམ་གྱིས། །ཇི་སྐད་བཤད་པའི་སྡོམ་པ་རྣམས། །མ་ཉམས་གཙང་མར་བསྲུང་བྱས་ལ། །ཚུལ་ཁྲིམས་རྣམ་པར་དག་པར་བྱ། །ཟས་ཀྱི་ཚོད་ཀྱང་རིག་པར་བྱ། །དབང་པོ་རྣམས་ཀྱི་སྒོ་ཡང་བསྡམས། །ནམ་གྱི་ཆ་སྟོད་ཆ་སྨད་ལ། །མི་ཉལ་རྣལ་འབྱོར་བརྩོན་པར་བྱ། །
ཁ་ན་མ་ཐོ་ཕྲ་རབ་ལའང་། །ཤིན་ཏུ་འཇིགས་པ་བསྐྱེད་པར་བྱ། །མཚན་མོ་ཆ་གསུམ་བགོ་བྱ་སྟེ། །ཐ་མའི་ཆ་ལ་ལྡང་བར་བྱ། །གདོང་ལ་སོགས་པ་བཀྲུ་བའམ། །ཡང་ན་མ་བཀྲུས་པ་ཡང་རུང་། །བདེ་བའི་སྟན་ལ་འདུག་ནས་ནི། །ཆོས་རྣམས་ཆོས་ཉིད་དྲན་པར་བྱ། །མཚན་མས་གཡེངས་པས་མ་ནུས་ན། །ལངས་

ལ་དངོས་པོ་སྣང་བ་ཀུན། །སྒྱུ་མ་ལྟ་བུར་ཉེ་བར་བརྟག །བར་སྐབས་དེར་ཡང་དགེ་སྦྱོར་ཡང་། །ཡན་ལག་བདུན་པ་རྫོགས་པར་བྱ། །སྨོན་ལམ་ཤིན་ཏུ་རྒྱ་ཆེན་གདབ། །ཡང་ན་སྔར་གྱི་སྒོམ་ལ་བསྒོམ། །དེ་ནས་ཟས་ཀྱི་དུས་དག་ཏུ། །སྙིང་པོ་མེད་པའི་ལུས་འདི་ཡིས། །སྙིང་པོ་དམ་པ་བཙལ་བྱ་ཞེས། །ལུས་ལ་
གྲུ་ཡི་བློ་གཞག་ལ། །རྒྱགས་པ་སྐྱེད་ཕྱིར་མི་བཟའ་ཞིང་། །རོ་ལ་ཆགས་པས་མི་བཟའོ། །ཟས་ལ་ཆ་བཞིར་བགོ་བྱ་སྟེ། །དང་པོ་ལྷ་ལ་བཤོས་གཙང་དབུལ། །དེ་རྗེས་ཆོས་ཀྱི་སྲུང་མ་ལ། །གཏོར་མ་ཤིན་ཏུ་རྒྱ་ཆེན་བཏང་། །རང་གིས་ཟོས་ཤིང་འཐུངས་པ་ཡི། །ལྷག་མ་འབྱུང་པོ་ཀུན་ལ་སྦྱིན། །བར་སྐབས་དེར་ཡང་སྒྲུང་རྒྱུད་
དང་། །ངོ་མཚར་ཅན་གྱི་གཏམ་ཡང་བྱ། །དེ་ནས་ལངས་ལ་ཅུང་ཞིག་བཅག །ཡང་ན་རྟེན་ལ་བསྐོར་བ་བྱ། །བཟླས་བརྗོད་གླེགས་བམ་བཀླག་པའམ། །ཡང་ན་བདེ་གཤེགས་གཟུགས་བརྙན་བྱ། །ཇི་སྲིད་རྔུལ་ནི་མ་བྱུང་བར། །དེ་སྲིད་བསྐོར་བ་མ་ཡེངས་པར། །བྱས་ལ་སྨོན་ལམ་རྒྱ་ཆེན་གདབ། །མདོར་ན་མགོན་པོ་
བྱམས་པ་ཡིས། །བཤད་པའི་ཆོས་སྤྱོད་བཅུ་པོ་རྣམས། །ཡིད་ནི་རབ་ཏུ་མ་ཡེངས་ཤིང་། །སྒྱུ་མ་ལྟ་བུར་དྲན་པས་སྤྱད། །གལ་ཏེ་ཡོད་ན་དགེ་འདུན་མཆོད། །ཡང་ན་བྱིས་པའི་སྟོན་མོ་བྱ། །མགོན་མེད་དག་ལ་སྦྱིན་པ་ནི། །རྣལ་འབྱོར་བསོད་ནམས་ཚོགས་སུ་འགྱུར། །ཉིན་མོའི་བྱ་བ་རྫོགས་པ་དང་། །མཚན་མོའི་ཆ་ནི་དང་པོ་
རུ། །ཆོས་ཉིད་སྤྲོས་པ་དང་བྲལ་བ། །ཤེས་པའང་སྤྲོས་དང་བྲལ་བར་གཞག །མཚན་མོའི་གུང་ལ་བབ་པ་ན། །ལྡང་དང་སྣང་བའི་འདུ་ཤེས་ཀྱིས། །སེང་གེ་ཇི་ལྟར་ཉལ་བ་ལྟར། །དགེ་བའི་གཉིད་ནི་ལོག་པར་བྱ། །སྤྱིར་ན་མཉམ་གཞག་སེམས་བརྟན་ན། །ལུས་ངག་དགེ་བ་གཙོར་མི་བྱ། །ཡང་ན་མཉམ་གཞག་མི་གསལ་
ན། །འཇིག་རྟེན་མཐུན་འཇུག་བྱ་བའི་ཕྱིར། །ལུས་ངག་དགེ་བ་ཅི་ནུས་བྱ། །འཇིག་རྟེན་སེམས་དང་མ་མཐུན་ན། །འདི་ནི་བདག་གི་ཆོས་མིན་ཞེས། །བསམ་པ་བཟང་པོ་སྔོན་བཏང་ལ། །འཇིག་རྟེན་ཡུལ་ཆོས་དྲི་བར་བྱ། །ནེ་པ་ལ་ཡི་ཡུལ་དུ་ནི། །རང་གི་གྲོགས་པོས་བསྐུལ་ནས་བྱས། །གསང་སྔགས་ལུགས་ལ་མི་མོས་ན། །
འདི་ལྟར་མཛོད་ཅིག་སྠ་བི་ར། །སྤྱོད་པ་བསྡུས་པའི་སྒྲོན་མ་སློབ་དཔོན་མཁས་པ་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་དཱི་པཾ་ཀ་ར་ཤྲཱི་ཛྙཱ་ན་དེ་ཉིད་དང་། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་པའོ།། །།