Luận tạng Tây Tạng (Tengyur) — Tập 111

ནག་པོ་དང་། དཔལ་མཆོག་དང་པོ་དང་། ལྷ་ཐམས་ཅད་འདུས་པ་དང་། ཐམས་
ཅད་གསང་བ་དང་། འདུལ་བ་དོན་ཡོད་པ་དང་། ཡེ་ཤེས་རྡོ་རྗེ་ཀུན་ལས་བཏུས་པ་དང་། རྣམ་པར་སྣང་མཛད་སྒྱུ་འཕྲུལ་དང་། ནམ་མཁའ་དང་མཉམ་པ་ཆུང་ངུ་དང་། གཉིས་སུ་མེད་པ་རྣམ་པར་རྒྱལ་བའི་རྒྱུད་དང་། རྡོ་རྗེ་གཙུག་ཏོར་རྒྱུད་ལ་སོགས་པ་རྒྱུད་སྡེ་སྟོང་ཕྲག་བཅུ་
གཉིས་ཏེ་རྒྱས་པར་བྱ་ན་གྲངས་མེད་དོ། །རྣལ་འབྱོར་བླ་ན་མེད་པའི་རྒྱུད་ནི་དཔལ་ནམ་མཁའ་དང་མཉམ་པ་འབུམ་པ་ཆེན་པོ་འཁོར་ལོ་སྡོམ་པ་དང་། རྡོ་རྗེ་མཁའ་འགྲོ་དང་། རྡོ་རྗེ་གདན་བཞི་པ་དང་། མ་ཧཱ་མཱ་ཡཱ་དང་། སངས་རྒྱས་མཉམ་སྦྱོར་དང་། སངས་རྒྱས་ཐོད་པ་དང་།
དགྱེས་པའི་རྡོ་རྗེ་འབུམ་ཕྲག་ལྔ་པ་ལ་སོགས་པ་རྒྱུད་སྡེ་སྟོང་ཕྲག་བཅུ་བཞི་བཞུགས་ཏེ་རྒྱས་པར་བྱས་ན་གྲངས་མེད་དོ། །དེ་ལྟར་རྒྱུད་སྡེ་རེ་རེ་ཞིང་ཡང་གྲངས་མེད་པས་ན་གསང་སྔགས་ཀྱི་ཐེག་པ་ནི་ཤིན་ཏུ་རྒྱས་ཤིང་མཐར་ཐུག་པ་མེད་པ་ཡིན་ནོ། །འདི་ལྟར་ཡི་དགས་ཁ་ནས་
མེ་འབར་བའི་གཟུངས་དང་། རྨ་བྱ་ཆེན་མོའི་གཟུངས་ལ་སོགས་པ་གཟུངས་མ་ལུས་པ་ཐམས་ཅད་ཀྱང་བྱ་བའི་རྒྱུད་ཡིན་ནོ་ཞེས་བླ་མ་དག་གསུང་ངོ་། །གསུངས་པའི་ཞེས་པ་ནི་ཇི་ལྟར་གསུངས་ཤེ་ན། འདི་སྐད་དུ། གལ་ཏེ་གསང་སྔགས་སྤྱོད་འདོད་པས། །དེ་ཚེ་སློབ་དཔོན་དབང་

བསྐུར་ཕྱིར། །ཞེས་གསུངས་ཏེ། འདི་ལྟར་གལ་ཏེ་བྱ་བའི་རྒྱུད་ལ་སོགས་པའི་གསང་སྔགས་ཀྱི་ཐེག་པ་ལ་སྤྱོད་པར་འདོད་པ་ཡིན་ན་ནི་སློབ་དཔོན་གྱི་དབང་བསྐུར་བ་ཞེས་བྱ་བ་བུམ་པའི་དབང་ཐོབ་པར་མ་བྱས་པར་སྨོན་པ་དང་འཇུག་པའི་སེམས་བསྐྱེད་པ་ཙམ་ལ་ལྟོས་
པར་མི་བྱ་སྟེ། གསང་སྔགས་རང་ཉིད་ལེན་པར་འགྱུར་བའི་ཕྱིར་རོ། །དེ་ཡང་རྒྱུད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་ཡང་། །འབྲས་བུ་མེད་པ་ཉིད་དུ་འགྱུར། །ཞེས་གསུངས་པ་དང་། ཡང་རྒྱུད་ལས།
དབང་བསྐུར་རྗེས་གནང་མེད་པར་ཡང་། །གསང་སྔགས་རང་ཉིད་ལེན་པར་བྱེད། །ཅེས་གསུངས་ཏེ། དཀྱིལ་འཁོར་དུ་འཇུག་པ་དང་། དབང་བསྐུར་བ་དང་། བླ་མ་དེ་ཉིད་ཀྱི་རྗེས་སུ་གནང་བ་མ་བྱས་པར་ཐེག་པ་ཆེན་པོའི་མདོ་སྡེའི་དོན་ཕ་རོལ་ཏུ་ཕྱིན་པའི་ལམ་གྱི་ཆོ་ག་ལ་བརྟེན་
ནས་གཟུངས་ཀྱི་ཆོ་ག་བྱེད་པ་དང་། གཞན་ཡང་རྗེ་བཙུན་སྒྲོལ་མ་ལ་སོགས་པའི་སྒྲུབ་ཐབས་དག་མཉན་ནས་བསྒོམ་པ་དང་། བཟླས་པ་དང་། སྦྱིན་སྲེག་དང་། གཏོར་མ་དང་། དཀྱིལ་འཁོར་ལ་སོགས་པ་བྱེད་པ་ནི་གསང་སྔགས་རང་ཉིད་ལོན་པ་ཡིན་ཏེ། དཀྱིལ་འཁོར་དུ་
འཇུག་པ་དང་། དབང་བསྐུར་བ་བྱས་ཏེ། སློབ་དཔོན་གྱིས་འདི་སྐད་དུ་ཁྱོད་ཀྱི་ལྷ་ནི་འདི་ཡིན་ནོ། །བཟླས་པ་འདི་བྱ་དགོས་སོ་ཞེས་རྗེས་སུ་གནང་བ་མ་ཐོབ་པའི་ཕྱིར་རོ། །དེ་བས་ན་རྒྱུད་ལས། གསང་སྔགས་རང་ཉིད་ལེན་པ་ནི། །འགྲོ་བ་དམྱལ་བ་འབའ་ཞིག་སྟེ། །སྔགས་ཀྱང་
འགྲུབ་པར་མི་འགྱུར་ཞིང་། །ལུས་ཉོན་མོངས་པ་ཁོ་ནར་ཟད། །ཅེས་གསུངས་སོ། །དེ་དག་ནི་གསུངས་པའི་ཚིག་གི་དོན་ཡིན་ཏེ། རྒྱུད་ཐམས་ཅད་དང་། སྔོན་གྱི་སློབ་དཔོན་ཐམས་ཅད་དང་། ད་ལྟ་ཉིད་ཀྱི་བླ་མ་མ་ལུས་པས་འདི་སྐད་དུ་གསུངས་ཞེས་པའོ། །ཡང་ན་འཇིག་རྟེན་པ་
དང་འཇིག་རྟེན་ལས་འདས་པའི་ལྷའི་པྲ་ཕབ་པ་དང་། རྨི་ལམ་དག་ཏུ་གང་ཟག་འདི་ནི་སྐྱེ་བ་སྔ་མ་ལ་གསང་སྔགས་སྤྱོད་སྤྱོད་པ་དག་ཡིན་ནོ་ཞེས་ཟེར་ན། དེས་བླ་མ་ཡོངས་སུ་མཉེས་པར་བྱས་ལ་བྱིན་གྱིས་བརླབ་པ་བྱས་ཏེ། འདི་ལྟར་སྒྲུབས་ཤིག་ཅེས་གནང་བ་བྱིན་ལ། སྒྲུབ་པའི་ཆོ་གའི་

ཐབས་སྦྱིན་པར་བྱའོ། །ཆོ་ག་དེ་ཡང་འདི་ཡིན་ཏེ། འཕགས་པ་དམ་ཚིག་གསུམ་བཀོད་པའི་ཆོ་ག་དང་། བཅོམ་ལྡན་འདས་ནོར་བུ་རྒྱས་པའི་གཞལ་མེད་ཁང་གི་ཆོ་ག་དང་། བཅོམ་ལྡན་འདས་སྨན་གྱི་བླ་བཻ་ཌཱུརྱའི་འོད་ཀྱི་རྒྱལ་པོའི་ཆོ་གས་སྡིག་པ་སྦྱོང་བ་དང་། ཚོགས་བསགས་
པ་བྱས་ལ་ལྟས་བཟང་པོ་བྱུང་བ་ན་གང་ཟག་དེས་གསང་སྔགས་ཀྱི་ཐེག་པ་ལ་འཇུག་པར་གནང་གི་འདི་ལྟར་སྐྱེ་བ་སྔ་མ་ལ་གསང་སྔགས་སྤྱད་པ་མ་ཡིན་པ་དང་། ཡང་ན་གསུམ་ལ་སྐྱབས་སུ་འགྲོ་བ་དང་། སྨོན་པ་བྱང་ཆུབ་ཀྱི་སེམས་བསྐྱེད་པ་དང་། འཇུག་པ་བྱང་ཆུབ་ཀྱི་སེམས་
བསྐྱེད་པ་བྱས་པ་ཙམ་ལ་ནི་གསང་སྔགས་བསྟན་པ་དང་། དེས་བསྒྲུབ་པ་དང་བལྟ་བ་དང་མཉན་པ་བྱ་བར་མ་གནང་སྟེ། འཇུག་པའི་ལམ་སོ་སོ་བ་ཡིན་པ་དང་། ཐེག་པ་དག་ནི་རྣམ་པར་ཐར་པ་བསྲེ་བར་མི་བྱ་བ་ཡིན་ཏེ། བཅོམ་ལྡན་འདས་ཀྱིས་གང་ཟག་གི་དབང་པོ་དང་ཁམས་དང་
བག་ལ་ཉལ་མཁྱེན་པས་ཐེག་པའི་ལམ་སོ་སོར་གསུངས་པ་ཡིན་ནོ། །དེ་བས་ན་རྩ་བ་ནས་སྨྲས་པ་དེ་ལྟ་བས་ན། གལ་ཏེ་གསང་སྔགས་སྤྱོད་འདོད་པས། །དེ་ཚེ་སློབ་དཔོན་དབང་བསྐུར་ཕྱིར། །ཞེས་སྨྲས་ཏེ། ཕ་རོལ་ཏུ་ཕྱིན་པའི་ལམ་དུ་འཇུག་ཅིང་སྤྱོད་འདོད་ན་ནི་སྔར་ཇི་ལྟར་བརྗོད་
པ་བཞིན་དུ་བསླབ་པ་རྣམ་པ་གསུམ་ལ་བསླབ་པར་བྱ་བ་ཡིན་ལ། གལ་ཏེ་གསང་སྔགས་སྤྱོད་ཅིང་རྗེ་བཙུན་སྒྲོལ་མ་ལ་སོགས་པ་སྒྲུབ་པར་འདོད་ན་ནི་སློབ་དཔོན་གྱི་དབང་ཞེས་པ་བུམ་པའི་དབང་བསྐུར་བ་ཞུ་བར་བྱའོ་ཞེས་པ་ནི་ཤློ་ཀའི་དོན་ཡིན་ནོ། །འོ་ན་དབང་བསྐུར་བའི་བླ་མ་དེ་ལ་
བླ་ཆོས་དང་ཡོ་བྱད་མེད་པར་བྱ་བའམ་ཞེ་ན་མ་ཡིན་ཏེ། བསྙེན་བཀུར་རིན་ཆེན་ལ་སོགས་ཞེས་སོ། །འོ་ན་ཡོ་བྱད་ཀྱིས་ཕོངས་ཤིང་དབུལ་པོ་དག་གིས་ཇི་ལྟར་བྱ་ཞེ་ན། བཀའ་སྒྲུབ་ལ་སོགས་ཞེས་པའོ། །འདིར་སྐྱེ་བོ་འབྱོར་པ་ཅན་དག་གིས་ནི་རྒྱལ་སྲིད་རིན་པོ་ཆེ་བདུན་ལ་
སོགས་པ་ཐ་ན་བདག་ཉིད་ཀྱི་ལུས་ཀྱང་དབུལ་བར་བྱ་སྟེ། ཇི་ལྟར་སློབ་དཔོན་སངས་རྒྱས་ཡེ་ཤེས་ཞབས་ལ་རྒྱལ་པོ་དེ་བ་པཱ་ལས་རྒྱལ་སྲིད་ཐམས་ཅད་ཕུལ་བའི་རྗེས་སུ་བཙུན་མོ་དང་རང་ཉིད་ཀྱང་ཕུལ་ནས་ཕྱིས་རྒྱལ་པོ་དང་བཙུན་མོ་གཉིས་གསེར་དེ་གཉིས་དང་མཉམ་པས་བསླུས་

པ་ལྟ་བུའོ། །དབུལ་པོ་དག་གིས་བཀའ་བསྒྲུབ་པ་དང་། ལུས་ཀྱི་བསྙེན་བཀུར་དང་། དཀྱིལ་འཁོར་དང་། མེ་ཏོག་ཡང་དང་ཡང་དུ་དབུལ་བ་ལ་སོགས་བྱའོ། །དེ་ལྟ་བུའི་ཚུལ་གྱིས་བླ་མ་དམ་པ་མཉེས་པར་བྱའོ། །དེ་ལྟར་བླ་མ་མཉེས་ཤིང་དགེས་པར་
གྱུར་པ་དང་། དབང་བསྐུར་བ་ཐོབ་པར་བྱས་ནས་ལུས་ལ་སོགས་པའི་སྡིག་པ་ཐམས་ཅད་ལས་གྲོལ་ནས། དེས་སྡིག་པ་དག་པའི་རྒྱུས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་སྒྲུབ་པའི་སྐལ་བ་ཅན་དུ་འགྱུར་རོ། །དེ་ལྟར་གསང་སྔགས་ཀྱི་ཐེག་པ་ལ་གནས་
ནས་འབད་པ་མེད་པར་མྱུར་དུ་མངོན་པར་རྫོགས་པར་སངས་རྒྱས་པར་བྱས་ཏེ། གཞན་གྱི་དོན་མཐར་ཕྱིན་པར་བྱ་བའི་ཐབས་བསྟན་ནས། ད་ནི་གསང་སྔགས་ཀྱི་ཐེག་པ་ལ་ལོག་པར་རྟོག་པ་དག་དགག་པའི་ཕྱིར། དང་པོ་སངས་རྒྱས་རྒྱུད་ཆེན་ལས། །ཞེས་པ་ལ་སོགས་པ་སྨྲས་ཏེ།
འདིར་གསང་སྔགས་ལ་ལོག་པར་རྟོག་པ་ནི་གཉིས་ཏེ་སྒྲོ་འདོགས་པར་བྱེད་པ་དང་སྐུར་པ་འདེབས་པར་བྱེད་པའོ། །སྔ་མ་ནི་ཚར་གཅད་པར་བྱའོ། །ཕྱི་མ་ནི་རྗེས་སུ་གཟུང་བར་བྱའོ། །འདི་ལྟར་འདི་ན་ཁ་ཅིག་གསང་སྔགས་ཀྱི་རྒྱུད་ཆེན་པོ་མཐའ་དག་གི་དགོངས་པ་ཡང་མི་ཤེས།
བླ་མ་དམ་པས་ཀྱང་མ་ཟིན་ཅིང་། སྡིག་པའི་བཤེས་གཉེན་ལ་བརྟེན་པས་གསང་སྔགས་ཀྱི་ཚུལ་ཇི་ལྟ་བར་མ་ཤེས་པ་དགོངས་པ་ཅན་གྱི་བཀའ་ལ་བརྟེན་ནས་འདི་སྐད་དུ་བདག་ཅག་ནི་གསང་སྔགས་པའོ། །བདག་ཅག་ནི་སྤྱོད་པ་ཐམས་ཅད་བག་ཡངས་སུ་བྱེད་ཅིང་ཕྱག་རྒྱ་ཆེན་པོའི་
དངོས་གྲུབ་ཀྱང་མྱུར་དུ་ཐོབ་པར་འགྱུར་རོ་ཞེས་སྒྲོགས་ཤིང་གནས་པ་དེ་དག་ནི་ངན་འགྲོར་འགྲོ་བར་འགྱུར་ཏེ། དེ་བཞིན་གཤེགས་པའི་བཀའ་ལ་སྐུར་པ་བཏབ་པ་དང་། ཚངས་པར་སྤྱོད་པ་དག་སྦགས་པས་སངས་རྒྱས་ཀྱི་བསྟན་པ་ནུབ་པར་བྱས་པ་དང་། མངོན་སྤྱོད་དྲག་པོ་བྱས་པ་དང་།
བུད་མེད་དག་བསྟེན་པས་ཕམ་པ་བྱུང་བའི་ཕྱིར་རོ། །དཔལ་ཡེ་ཤེས་གྲགས་པའི་ཞལ་ནས་འདི་སྐད་དུ་བདག་ཅག་རྣལ་འབྱོར་པ་ལ་བཅོམ་ལྡན་འདས་ཀྱིས་གནང་བ་ཡིན་ནོ་ཞེས་ཟེར་ཞིང་སྒྲ་གསང་ཆེར་སྒྲོགས་པ་དང་། གཞན་ཡང་སྤྱོད་པ་ཐམས་ཅད་ཀྱང་བག་ཡངས་སུ་བྱེད་པ་དེ་

དག་ནི་ངན་འགྲོར་འགྲོ་བར་འགྱུར་རོ་ཞེས་གསུངས་སོ། །བདག་གི་བླ་མ་དགེ་སློང་བསོད་སྙོམས་པ་ཡ་བ་དྭཱི་པའི་ཞལ་ནས་ཀྱང་། གལ་ཏེ་དབང་བསྐུར་བ་དེ་གཉིས་འཛིན་པར་བྱེད་ན། སློབ་དཔོན་དང་སློབ་མ་དང་བཅས་པ་ངན་འགྲོར་འགྲོ་བར་འགྱུར་རོ་ཞེས་གསུངས་སོ། །བཅོམ་ལྡན་
འདས་ཀྱིས་དགོངས་པ་ལུང་བསྟན་པའི་རྒྱུད་ཆེན་པོ་ལས། རྣལ་འབྱོར་མན་ངག་མེད་པ་དག །ལྕགས་ཀྱུ་མེད་པ་བཞིན་དུ་སྤྱོད། །བདག་ནི་རྣལ་འབྱོར་པ་ཞེས་ཟེར། །ཆོས་ནི་གཡོ་ཡིས་བྱེད་པར་འགྱུར། །སྔགས་དང་ཕྱག་རྒྱའི་སྦྱོར་བ་ཡིས། །འཚོ་བ་དག་ཀྱང་སྒྲུབ་པར་བྱེད། །ཉེས་པ་
ཅུང་ཟད་ཙམ་ལ་ཡང་། །མངོན་སྤྱོད་དྲག་པོ་བྱེད་པར་འགྱུར། །འདི་ལྟར་སྒྲུབ་པའི་ཐབས་ཙམ་ཞིག །ཤེས་ནས་རྒྱུད་ཆེན་འཆད་པར་བྱེད། །གང་དུ་རྙེད་པ་ཐོབ་འགྱུར་བར། །དམ་པའི་ཆོས་ནི་སྟོན་པར་བྱེད། །ཅེས་བྱ་བ་ལ་སོགས་པ་མང་དུ་གསུངས་སོ། །དེ་བཞིན་དུ་དཔལ་
པདྨ་རྡོ་རྗེས་ཀྱང་དེ་ལྟ་བུའི་ཉེས་དམིགས་མང་དུ་གསུངས་ནས། དེ་ལྟ་བུ་དང་དེ་དག་ཉིད། །ཀུན་ཀྱང་སྡིག་པའི་ལས་ཅན་ཏེ། །དམ་པ་མིན་པའི་ལམ་ཞུགས་ནས། །དམྱལ་བ་དག་ཏུ་འགྲོ་བར་འགྱུར། །ཞེས་གསུངས་སོ། །ཁུངས་མང་དུ་ཡོད་མོད་ཀྱི་ཡི་གེ་མངས་པར་འགྱུར་རོ། །
དེ་ལྟ་བུ་དག་ནི་སྙིང་རྗེའི་སེམས་ཀྱིས་ཚར་གཅད་པར་བྱའོ། །ཡང་འདི་ན་ལ་ལ་དག་འདི་སྐད་དུ་གསང་སྔགས་ཀྱི་ཚུལ་ཆེན་པོ་ཇི་ལྟ་བར་མི་ཤེས་པར་གསང་སྔགས་ཀྱི་ཐེག་པས་ཅི་ཞིག་བྱ། ཕ་རོལ་ཏུ་ཕྱིན་པ་དང་། ཉན་ཐོས་དང་རང་སངས་རྒྱས་ཀྱི་ཐེག་པ་གཙང་བ་དེ་ཉིད་ལ་འཇུག་
པར་བྱའོ། །འདི་ལྟར་བུད་མེད་བསྟེན་པས་ནི་མི་ཚངས་པར་སྤྱོད་པའི་ཕམ་པ་འོང་ལ། མངོན་སྤྱོད་དྲག་པོ་བྱས་པས་ནི་སྲོག་བཅད་པའི་ཕམ་པ་འོང་བས་དེ་ལ་འཇུག་པར་མི་བྱའོ་ཞེས་རྒྱུད་ཀྱི་དགོངས་པ་མི་ཤེས་པར་སྐུར་པ་འདེབས་པ་དེ་དག་ནི་ཟབ་ཅིང་རྒྱ་ཆེ་བ་དབང་པོ་རྣོན་པོའི་སྤྱོད་
ཡུལ་སངས་རྒྱས་ཀྱི་བསྟན་པའི་སྙིང་པོར་གྱུར་པ་སྐལ་པ་དང་། བག་ཆགས་དང་། ལས་འཕྲོར་ལྡན་པ་འགའི་སྤྱོད་ཡུལ་དུ་གྱུར་པ་ཡིན་པས་དེ་ལྟ་བུ་ལ་སྐུར་པ་འདེབས་པ་དེ་ནི་ངེས་པར་སེམས་ཅན་དམྱལ་བར་འགྲོ་བར་འགྱུར་བ་འདི་ལ་ཐེ་ཚོམ་མི་བྱ་སྟེ། དེ་བཞིན་གཤེགས་པའི་བཀའ་

ལ་སྐུར་པ་བཏབ་པ་དང་། ཆོས་ཟབ་མོ་སྤངས་པའི་ཕྱིར་རོ། །ཆོས་སྤངས་པའི་ལས་ཀྱི་རྣམ་པར་སྨིན་པ་ནི་འཕགས་པ་རྣམ་པར་འཐག་པའི་མདོ་ལས་འདི་སྐད་དུ་ཆོས་ལ་ལ་ནི་བཟང་ཞེས་པ་དང་། ཆོས་ལ་ལ་ངན་ནོ་ཞེས་ཟེར་ན་ཆོས་སྤངས་པའོ་ཞེས་པ་ལ་
སོགས་པ་ཆོས་དུ་མ་མཐོང་བའི་ཕྱིར་རོ། །བླ་མ་དགེ་སློང་བསོད་སྙོམས་པའི་ཞལ་ནས་ཀྱང་། དེའི་ཕྱིར་གསང་སྔགས་ཐེག་པ་ལ། །བདུད་ཀྱིས་སྨྲས་ཞེས་བརྙས་མི་བྱ། །ཐེག་པ་ཀུན་ལ་སྤངས་པ་ཡང་། །འདི་གནས་ཕྱག་རྒྱ་ཆེན་པོ་ཐོབ། །ཅེས་གསུངས་སོ། །དེ་ལྟ་བུའི་
གང་ཟག་ནི་སྙིང་རྗེའི་སེམས་ཀྱིས་རྗེས་སུ་གཟུང་བར་བྱའོ། །སྐུར་པ་འདེབས་པ་དེ་ཡང་གཉིས་ཏེ། ཆོས་ལ་སྐུར་པ་འདེབས་པ་དང་། གང་ཟག་ལ་སྐུར་པ་འདེབས་པའོ། །དེ་ལ་ཆོས་ལ་སྐུར་པ་འདེབས་པར་མི་བྱ་སྟེ། འཕགས་པ་འོད་སྲུངས་ཀྱིས་ཞུས་པ་ལས་འདི་སྐད་དུ།
ཆོས་ཟབ་མོ་གང་དག་བློས་མི་རྟོགས་པ་དེ་ལ་སངས་རྒྱས་ཀྱི་བྱང་ཆུབ་ནི་མཐའ་ཡས་ཤིང་སེམས་ཅན་མོས་པ་ཐ་དད་པ་རྣམས་ལ་དེ་བཞིན་གཤེགས་པ་རྣམས་ཀྱིས་ཆོས་བསྟན་པ་ལ་འཇུག་སྟེ། དེ་བཞིན་གཤེགས་པ་ཉིད་ཀྱིས་མཁྱེན་གྱི་བདག་གིས་ནི་མི་ཤེས་ཏེ། དེ་བཞིན་
གཤེགས་པས་མངོན་སུམ་མོ་ཞེས་བྱ་བ་ལ་སོགས་པ་གསུངས་ཏེ། མདོ་ཉིད་དུ་བལྟ་བར་བྱའོ། །གཞན་ཡང་མདོ་དང་རྒྱུད་ཐམས་ཅད་དུ་དོན་འདི་བདག་གིས་མཐོང་ངོ་། །གང་ཟག་ལ་ཡང་སྐུར་པ་གདབ་པར་མི་བྱ་སྟེ། འཕགས་པ་ལྷག་པའི་བསམ་པ་བསྐུལ་བ་དང་།
འཕགས་པ་ཆོས་ཐམས་ཅད་འབྱུང་བ་མེད་པར་བསྟན་པ་དག་ལས་ངའམ་ང་དང་འདྲ་བ་མ་གཏོགས་པར་གང་ཟག་གིས་གང་ཟག་གི་ཚོད་གཟུང་བར་མི་བྱ་སྟེ་ཉམས་པར་འགྱུར་རོ་ཞེས་གསུངས་སོ། །དེའི་ཉེས་པ་ནི་མདོ་ལས་གཞན་ཡང་མང་དུ་མཐོང་ངོ་། །དང་པོའི་སངས་རྒྱས་རྒྱུད་
ཆེན་ལས། །ཞེས་བྱ་བ་ལ་སོགས་པའི་ཚིག་རྐང་པ་བཅུ་གཉིས་ཀྱི་དོན་བདག་གིས་བདག་གི་བླ་མར་གྱུར་པ་དགེ་སློང་བསོད་སྙོམས་པ་དང་གསེར་གླིང་པའི་གདམས་ངག་ལ་བརྟེན་པ་ཡིན་ཏེ། བླ་མའི་ཞལ་ནས་དབང་བསྐུར་བ་ངེས་པར་བསྟན་པ་ཞེས་བྱ་བ་ལས་འདི་སྐད་དུ། དེ་ལ་དབང་

ནི་རྣམ་པ་གཉིས་ཏེ། ཁྱིམ་པའི་ཕྱོགས་ལ་བརྟེན་པ་དང་། ཚངས་པར་སྤྱོད་པའི་ཕྱོགས་ལ་བརྟེན་པའོ། །ཁྱིམ་པའི་ཕྱོགས་ལ་བརྟེན་པ་གང་ཞེ་ན། ཇི་སྙེད་རྒྱུད་ལས་གསུངས་པ་ཐམས་ཅད་དོ། །ཚངས་པར་སྤྱོད་པའི་ཕྱོགས་ལ་བརྟེན་པ་གང་ཞེ་ན། དེ་དག་ཉིད་ལས་གསང་བ་དང་།
ཤེས་རབ་ཡེ་ཤེས་སྤངས་པའོ། །དེ་ཅིའི་ཕྱིར་དེ་གཉིས་སྤངས་ཤེ་ན། འདི་ལྟར་སངས་རྒྱས་ཀྱི་ཆོས་ལ་བརྟེན་ནས་དགེ་བ་ཇི་སྙེད་ཅིག་འབྱུང་བ་དེ་དག་ཐམས་ཅད་ནི་བསྟན་པ་གནས་པ་ལས་འབྱུང་བ་ཡིན་ལ། བསྟན་པ་གནས་པ་ཡང་ཚངས་པར་སྤྱོད་པ་ཁོ་ལ་ལྟོས་ཤིང་། དབང་
བསྐུར་བ་གཉིས་ནི་ཚངས་པར་སྤྱོད་པའི་མི་མཐུན་པའི་གནས་སུ་མཐོང་བའི་ཕྱིར་རོ། །དེ་བས་ན་དབང་བསྐུར་བ་གཉིས་ནི་ཚངས་པར་སྤྱོད་པ་ཟད་པར་བྱེད་པ་ཡིན་ལ། ཚངས་པར་སྤྱོད་པ་ཟད་ན་སངས་རྒྱས་ཀྱི་བསྟན་པ་ནུབ་པར་འགྱུར་ཞིང་། དེ་ནུབ་པས་བསོད་ནམས་མངོན་པར་འདུ་
བྱ་བ་རྣམས་རྒྱུན་ཆད་པར་འགྱུར་ལ། གཞི་དེ་ལས་དགེ་བ་མ་ཡིན་པ་དཔག་ཏུ་མེད་པ་འབྱུང་བའི་ཕྱིར་དེ་གཉིས་ཚངས་པར་སྤྱོད་པ་རྣམས་ལ་སྤངས་སོ་ཞེས་གསུངས་སོ། །དེ་ལྟར་ཡིན་ན་ཚངས་པར་སྤྱོད་པ་དག་གིས་གསང་སྔགས་ལ་འཇུག་ཏུ་མི་རུང་ངོ་ཞེ་ན། རྒྱུད་ཀུན་ཉན་དང་
འཆད་པ་དང་། །སྦྱིན་སྲེག་མཆོད་སྦྱིན་སོགས་བྱེད་པ། །སློབ་དཔོན་དབང་བསྐུར་རྙེད་གྱུར་པ། །ཞེས་བྱ་བ་འདི་སྨོས་སོ། །གལ་ཏེ་ཚངས་པར་སྤྱོད་པའི་སྔགས་པས་རྒྱུད་ལ་སོགས་པ་ཉན་པ་དང་། གཞན་ལ་འཆད་པ་དང་། བལྟ་བ་དང་། སྦྱིན་སྲེག་དང་། གཏོར་མ་དང་།
བཟླས་བརྗོད་དག་བྱེད་པར་འདོད་ན་ནི་སློབ་དཔོན་དབང་བསྐུར་ཞེས་པ་བུམ་པའི་དབང་གིས་རུང་བ་རྒྱུད་ཐམས་ཅད་དང་། དཀྱིལ་འཁོར་གྱི་ཆོ་ག་ཐམས་ཅད་ནས་གསལ་བར་གསུངས་སོ། །འདིའི་དོན་བླ་མ་དགེ་སློང་བསོད་སྙོམས་པ་ཡ་བ་དྭཱི་པས་གསུངས་ཏེ། འདི་སྐད་དུ་དེ་ལྟ་
ཡིན་ན་ཚངས་པར་སྤྱོད་པ་རྣམས་ནི་ཐེག་པ་ཆེན་པོའི་ཡང་ཐེག་པ་ཆེན་པོའི་སྐལ་བ་ཅན་མ་ཡིན་པར་འགྱུར་རོ་ཞེ་ན། དེ་ནི་འདིར་ངེས་པར་འཁྲུལ་པར་སྤྱད་པར་བྱ་སྟེ། གང་གིས་བུམ་པ་དང་། སློབ་དཔོན་དང་རྗེས་སུ་གནང་བ་ཐོབ་པ་ཉིད་ཀྱི་རྒྱུད་ལ་སོགས་པ་བསྒྲུབ་པ་དང་། བཤད་

པ་དང་མཉན་པ་དང་བལྟ་བ་ལ་དབང་བསྐུར་བའི་ཕྱིར་སྐལ་བ་ཅན་ཡིན་ནོ། །དེ་ལྟ་ན་ཁྱིམ་པ་དག་ལ་ཡང་གསང་བ་དང་། ཤེས་རབ་ཀྱི་དབང་དགོས་པ་མེད་པར་འགྱུར་རོ་ཞེ་ན། དེ་མི་དགོས་པ་ཡང་ཡིན་ལ། དེ་ལས་བཟློག་པ་ཡང་ཡིན་ནོ་ཞེས་བྱ་བ་ལ་སོགས་
པ་རྒྱས་པར་གསུངས་སོ། །དེ་ཉིད་རིག་ལ་ཉེས་པ་མེད། །ཅེས་པ་འདིའི་དོན་ནི་བདག་ལ་བླ་མ་དག་གིས་ཉེ་བར་བསྟན་པ་གནང་བ་མང་དུ་ཡོད་དེ། བླ་མ་དམ་པ་ཁ་ཅིག་གི་ཞལ་ནས་སྙིང་རྗེས་སེམས་ཅན་གྱི་དོན་རིག་ཅིང་སེམས་སྙིང་རྗེའི་དབང་དུ་སོང་བའི་བྱང་ཆུབ་སེམས་
དཔས་ཅི་བྱས་ཀྱང་དེའི་རྒྱུད་ལ་ཉེས་པ་མེད་ཅིང་དེའི་རྗེས་ལ་ཡང་བསོད་ནམས་མང་དུ་འཕེལ་བར་འགྱུར་རོ་ཞེས་གསུངས་སོ། །དེ་ནི་བཟོད་པ་ཆུང་ངུ་ཐོབ་པ་ཡིན་ནོ། །དམ་པ་ལ་ལའི་ཞལ་ནས་ཆོས་ཐམས་ཅད་སྒྱུ་མར་ཤེས་ཤིང་དེའི་དེ་ཁོ་ན་ཉིད་རིག་པའི་རྣལ་འབྱོར་པ་
ལས་ཉེས་པར་འགྱུར་བ་གང་ཡང་མེད་དེ། འདི་སྐད་དུ། ཆུ་ཡི་ཟླ་བ་ལྟ་བུར་ནི། །རྣལ་འབྱོར་པ་ནི་གང་གིས་ཤེས། །དེ་ནི་སྡིག་དང་བསོད་ནམས་སོགས། །ནམ་ཡང་གོས་པར་མི་འགྱུར་རོ། །ནང་དང་ཕྱི་རོལ་གནས་འདི་ཀུན། །སེམས་ཡིན་སྒྱུ་མ་ལྟ་བུ་སྟེ། །དེ་ཡང་རྟག་
མིན་ཆད་པ་མིན། །གཉི་ག་དག་ཏུའང་མི་རྟོག་ཅིང་། །དངོས་འཛིན་དུག་གིས་མ་གོས་པས། །དེ་ལྟ་བུ་ནི་སུས་མཐོང་བ། །སྒྱུ་མར་རིག་ལ་ཉེས་པ་མེད། །ཅེས་གསུངས་ཏེ། ཆོས་ཀྱི་མཆོག་ཆུང་ངུ་ཐོབ་པ་ལ་ཉེས་པ་མེད་པའོ། །བླ་མ་དགེ་སློང་བསོད་སྙོམས་པའི་ཉེས་པར་མི་
འགྱུར་བ་ནི་བླ་མའི་ཞལ་སྔ་ནས་མཛད་པའི་གཞུང་དེ་ཉིད་དུ་བལྟ་བར་བྱའོ། །འདི་ནི་ལས་དང་པོ་པ་ད་ལྟ་ཉིད་ན་ཡང་ཉེས་པ་མེད་པའོ། །དམ་པ་གཞན་ནི་འདི་སྐད་དུ་འཕགས་པ་འོད་སྲུངས་ཀྱིས་ཞུས་པའི་མདོ་དང་། བུད་མེད་འགྱུར་བ་ལུང་བསྟན་པའི་མདོ་དང་། དཔལ་མཆོག་དང་
པོའི་རྒྱུད་དང་། འདུལ་བ་དོན་ཡོད་པའི་རྒྱུད་དང་། རྒྱུད་གཞན་དེ་མ་ཡིན་པ་དག་དང་། འཕགས་པ་ཀླུ་སྒྲུབ་དང་། སློབ་དཔོན་ཨཱརྱ་དེ་བ་ལ་སོགས་པའི་གཞུང་དེ་དག་གི་ཚུལ་གྱིས་ཉེས་པར་མི་འགྱུར་ཞིང་། དོན་དེ་ནི་དེ་ཁོ་ན་ཉིད་རིག་པ་ལ་ཉེས་པ་མེད་དེ་རྩེ་མོ་ཆུང་ངུ་ཐོབ་པ་ནའོ་

ཞེས་གསུང་ངོ་། །དམ་པ་གཞན་ནི་འདི་སྐད་དུ་ཆོས་ཐམས་ཅད་ཀྱི་སྐྱེ་བ་མེད་པ་དོན་དམ་པ་བྱང་ཆུབ་ཀྱི་སེམས་བསྐྱེད་ཅིང་། དེ་རྒྱུད་ལ་སྐྱེས་པ་ལ་ཡང་ཉེས་པ་མེད་དེ། ཆོས་རྣམས་ཀྱི་དེ་ཁོ་ན་ཉིད་རིག་པ་ལ་ཉེས་པ་མེད་དོ་ཞེས་གསུང་སྟེ། འདི་ནི་བདེན་པ་མཐོང་བ་དག་ལ་ཉེས་པ་
པར་མི་འགྱུར་རོ། །དེ་བས་ན་ལམ་ལ་གནས་པའི་རྣལ་འབྱོར་པ་དེས་ཉེས་པ་མེད་པ་དང་། ཉེས་པར་འགྱུར་བ་དག་ཤེས་པར་བྱའོ། །ཡིད་བཞིན་ནོར་བུ་ལྟ་བུའི་སྤྲུལ་པའི་སྐུ། །འདས་ཤིང་འཕགས་པ་ཀླུ་སྒྲུབ་ལ་སོགས་པའི། །མཁས་པ་ཆེན་པོ་རྣམས་ཀྱང་མེད་པ་ན། །
ཐུབ་པའི་དམ་ཆོས་ནུབ་ཏུ་ཉེ་བ་ཡི། །དིང་སང་དུས་ན་སྨྱོན་པ་ལྟ་བུ་ཡི། །ལོག་པར་རྟོགས་པའི་གང་ཟག་མང་པོ་བྱུང་། །བླ་མ་བརྒྱུད་པའི་གདམས་ངག་བྲལ་བ་ཡི། །མདོ་དང་བསྟན་བཅོས་གླེགས་བམ་མཐོང་བ་ཡིས། །གསུང་རབ་རྒྱ་མཚོ་ཟབ་མོའི་དོན་ལ་སྤྱོད། །དེ་དག་
ལོང་བ་ལྟ་བུར་གྱུར་པ་སྟེ། །ཐེག་ཆེན་ལམ་མཆོག་དེ་ཡིས་ཤེས་པ་མིན། །དེ་བས་ལོག་རྟོགས་རྗེས་སུ་འབྲང་མི་བྱ། །ལེགས་པའི་འབྱུང་གནས་ཐེག་པ་ཆེན་པོའི་ལམ། །བླ་མ་མིག་དང་འདྲ་བ་མེད་པ་ཡིས། །མ་མཐོང་མི་མཐོང་མཐོང་བར་མི་འགྱུར་རོ། །ཐེག་པ་ཆེན་པོ་རྒྱ་
མཚོ་ལྟར་ཟབ་ཅིང་། །ནམ་མཁའ་ལྟ་བུར་ཤིན་ཏུ་རྒྱ་ཆེ་བ། །བླ་མ་དང་བྲལ་རང་དགའ་སྨྲ་བ་ཡིས། །མདོ་དང་བསྟན་བཅོས་དག་གི་གླེགས་བམ་དེ། །མཐོང་བས་ཚིམ་སྟེ་བླ་མ་སྟེན་མི་བྱེད། །དེ་དག་གིས་ནི་ཐེག་པ་ཆེན་པོ་ཡི། །གཏམ་གྱི་རིམ་པ་ཙམ་ཡང་མི་ཤེས་ན། །ཟབ་དང་རྒྱ་
ཆེའི་དོན་ལྟ་ག་ལ་ཡོད། །ཐེག་ཆེན་བག་ཆགས་བཟང་པོ་ཡོད་པ་ཡི། །བླ་མ་དམ་པས་ཟིན་པའི་སྐྱེ་བོ་ནི། །མཁས་པ་སུ་ཞིག་དེ་ཡི་རྗེས་སུ་འབྲང་། །དིང་སང་བསྟན་པ་ནུབ་ཀར་གྱུར་པ་ཡི། །འཇིགས་པ་ཆེན་པོའི་དུས་འདི་བྱུང་བས་ན། །རྟོགས་ལྡན་མཁས་པ་དག་གིས་བག་ཡོད་
གྱིས། །བླ་མ་བཟང་པོ་བརྒྱུད་པའི་གང་ཟག་ནི། །ཡུལ་དང་ས་ཕྱོགས་གང་ན་ཡོད་པ་དྲི། །རྙེད་ནས་ཟླ་བའམ་ལོར་ཡང་བསྟེན་བྱས་ལ། །བསྙེན་བཀུར་ཚུལ་བཞིན་བྱས་ལ་མཉེས་པར་བྱ། །སྐྱེས་བུ་དེ་ཡི་ལུས་དང་ངག་དག་གི། །སྤྱོད་ཚུལ་ཤིན་ཏུ་ངན་པར་སྤྱོད་ན་ཡང་། །དེ་ལ་

མི་བལྟ་དམ་ཆོས་བླང་བར་བྱ། །དཔེར་ན་བུང་བས་མེ་ཏོག་འཛིན་པའི་ཚེ། །སྦྲང་རྩི་ཁྱེར་ནས་མེ་ཏོག་ལུས་པ་དང་། །མཁས་པ་དེས་ཀྱང་དེ་དང་འདྲ་བར་སྤྱད། །སྤྱོད་ཚུལ་མི་བལྟ་དེ་ཡི་གདམས་ངག་མཉན། །ཉེར་བསྟན་དེ་ལ་སེམས་ནི་གོམས་པས་ན། །ཚེ་འདི་
ཉིད་ལ་བྱང་ཆུབ་ཐོབ་བྱའི་ཕྱིར། །འཁོར་ལོ་སྡོམ་པ་ལ་སོགས་གསང་སྔགས་ཀྱི། །གདམས་ངག་བླ་མ་བརྒྱུད་པ་ཅན་ལ་ཞུ། །དབང་བསྐུར་གཉིས་པ་སྤངས་པ་ཡི། །གསང་སྔགས་གཞུང་ལུགས་མི་ཤེས་ན། །རྣམ་རྟོག་དུ་མས་བཅིངས་གྱུར་པས། །མྱུར་དུ་སངས་རྒྱས་འགྲུབ་མི་
འགྱུར། །ཡང་སྨྲས་པ། ཐུབ་པའི་བསྟན་པ་མདངས་ཉམས་གྱུར་པ་ཡི། །སྟོན་པའི་དམ་ཆོས་རྣམ་པར་འཇིག་པ་ནི། །དིང་སང་དུས་ན་བསྟན་པ་འཇིག་པ་ན། །སངས་རྒྱས་ཉིད་ཀྱི་སློབ་མ་མ་གཏོགས་པར། །ཕ་རོལ་པ་དང་ཐ་མལ་སྐྱེ་བོ་ཡིས། །ཐུབ་པའི་བསྟན་པ་སུས་ཀྱང་
འཇིག་མི་ནུས། །ཁྱད་པར་དུ་ནི་རབ་ཏུ་བྱུང་བས་འཇིག །ཁ་ཅིག་གསང་སྔགས་རྒྱུད་ཀྱི་རྗེས་འབྲངས་ནས། །ལོག་པར་སྤྱོད་ཅིང་གཞན་ལའང་ལོག་པར་སྟོན། །ཁ་ཅིག་ཤེས་རབ་ཕ་རོལ་ཕྱིན་པ་ཡི། །ཇི་བཞིན་ཡང་དག་དོན་ནི་མི་ཤེས་པར། །རྒྱུ་དང་འབྲས་བུ་ལ་སོགས་ཀུན་རྫོབ་པ། །
འགོག་ཅིང་རང་བཞིན་རྣམ་པར་དག་ཅེས་སྨྲ། །ཁ་ཅིག་སོ་སོར་ཐར་པ་འདུལ་བ་ཡི། །བསླབ་པ་ཇི་སྙེད་གསུངས་པ་བཏང་བྱས་ནས། །ཞིང་དང་ཁེ་སོགས་ཁྱིམ་པ་དང་འདྲེ་ཞིང་། །གཙུག་ལག་ཁང་ནའང་སྣ་ཚོགས་གཏམ་གྱིས་སྤྱོད། །འཕགས་པ་ལང་ཀར་གཤེགས་པ་
ལས། ང་ཡི་བསྟན་པ་སུན་འབྱིན་པ། །ངུར་སྨྲིག་གི་ནི་གོས་བགོས་ཤིང་། །འབྲས་བུ་ཡོད་དང་མེད་སྨྲ་བ། །མ་འོངས་པ་ན་འབྱུང་བར་འགྱུར། །ཞེས་གསུངས་སོ། །ཡང་དེ་ཉིད་ལས། རྩོད་པའི་དུས་ཀྱི་ཐ་མ་ལ། །འཇིག་རྟེན་དམ་ཆོས་མི་བསྒོམ་མོ། །ཞེས་གསུངས་སོ། །མཁས་
པ་ཆེན་པོ་ནོར་གྱི་རྩ་ལག་གི་ཞལ་ནས་ཀྱང་། སྟོན་པ་འཇིག་རྟེན་མིག་ནི་ཟུམ་གྱུར་ཅིང་། །དཔང་གྱུར་སྐྱེ་བོ་ཕལ་ཆེར་ཟད་པ་ན། །དེ་ཉིད་མ་མཐོང་རང་དགར་སྤྱོད་པ་ཡི། །ངན་རྟོག་རྣམས་ཀྱིས་བསྟན་པ་འདི་དཀྲུགས་སོ། །རང་བྱུང་རང་འབྱུང་བསྟན་པ་གཅེས་འཛིན་རྣམས། །མཆོག་ཏུ་

ཞིར་གཤེགས་འགྲོ་མགོན་མེད་པ་ན། །འདོམས་མེད་ཡོན་ཏན་འཇོམས་པར་བྱེད་པ་ཡི། །དྲི་མས་དགའ་མགུར་དིང་སང་འདི་ན་སྤྱོད། །དེ་ལྟར་ཐུབ་པའི་བསྟན་པ་ཉམས་དགའ་འདི། །ལྐོག་མར་སྲོག་འབྱིན་འདྲ་དང་དྲི་མ་རྣམས། །སྟོབས་དང་ལྡན་པའི་དུས་སུ་རིག་ནས་ནི། །ཐར་
པ་འདོད་པ་དག་གིས་བག་ཡོད་གྱིས། །ཞེས་གསུངས་སོ། །དམ་པའི་གདམས་ངག་རྒྱས་པར་བཀོད་པ་འདི། །སངས་རྒྱས་བསྟན་པ་ཇི་སྲིད་གནས་ཀྱི་བར། །སྙིང་རྗེ་བྱང་ཆུབ་སེམས་དང་ལྡན་པ་དེ། །བརྩོན་འགྲུས་ཀྱིས་ནི་ཉིན་མཚན་སྤྱོད་གྱུར་ཅིག །བྱང་ཆུབ་ལམ་གྱི་སྒྲོན་
མའི་དཀའ་འགྲེལ་ཞེས་བྱ་བ་བྷཾ་ག་ལའི་རྒྱལ་པོའི་རིགས་རྒྱུད་ཤཱཀྱའི་དགེ་སློང་མཁས་པ་ཆེན་པོ་བྱང་ཆུབ་སེམས་དཔའི་སྤྱོད་པ་མཛད་པ་དཱི་པཾ་ཀ་ར་ཤྲཱི་ཛྙཱ་ནས་མཛད་པ་རྫོགས་སོ།། །།དད་པའི་ས་གཞི་ཚུལ་ཁྲིམས་ས་བོན་བསྟེན། །བྱམས་པའི་མྱུ་གུ་ཏིང་འཛིན་ཆུས་
བརླན་པའི། །རྩ་བ་སྙིང་རྗེ་ཆུ་བ་བྱང་ཆུབ་སེམས། །ཡལ་ག་ཕར་ཕྱིན་ལོ་མ་བསྡུ་བའི་དངོས། །མེ་ཏོག་ནོར་བདུན་འབྲས་བུ་རྗེས་དྲན་དྲུག །དགེ་བཅུའི་དྲིས་ཁྱབ་སློབ་མའི་བྱ་ཚོགས་འདུ། །ཤིང་མཆོག་དེ་འདྲའི་བྱང་ཆུབ་སེམས་དཔའ་ནི། །བྷཾ་ག་ལར་འཁྲུངས་མར་མེ་མཛད་དཔལ་
ཞབས། །དིང་སང་དུས་ན་སངས་རྒྱས་གདུང་འཚོབ་པ། །སྐྱེ་བོ་དབུས་ན་ཉི་མ་བཞིན་དུ་ལྷམ། །སྙན་པར་རབ་གྲགས་ཆོས་ལུགས་བཟང་པོ་ཤེས། །སྡོམ་པས་རབ་བསྡམས་མཁས་དང་ནུས་པར་ལྡན། །རིགས་ཅན་རྣམས་ཀྱི་བླ་མར་འོས་པ་སྟེ། །དེ་ནི་སངས་རྒྱས་རྣམས་ཀྱི་སྲས་
གཅིག་པུ། །བསམ་དང་ལྷག་བསམ་གསེར་དང་ཟླ་ཚེས་འདྲ། །ཕ་རོལ་འགྲོ་བ་དག་གི་བསམ་པ་དང་། །སྤྱོད་ལམ་མཐུན་ཞིང་ཆོས་ཀྱི་བཤད་པའང་སྟོན། །ནམ་ཡང་གང་ཟག་ཕ་རོལ་མི་དད་པ། །དུག་དང་འདྲ་བར་སྤོང་བྱེད་བསམ་རྗེས་འཇུག །བྱ་བ་ངན་སྤངས་སྤྱོད་ལམ་ཉམས་པ་
མེད། །སྐད་ཅིག་སྐད་ཅིག་གཉེན་པོའི་སྟོབས་དང་ལྡན། །ཕྲིན་ལས་བཟང་པོས་ཡུལ་ཕྱོགས་དབུས་སུ་འཁྲུངས། །སྐྱེ་བ་བཟང་པོ་རྒྱལ་པོའི་རིགས་སུ་འཁྲུངས། །རིགས་བརྒྱུད་བཟང་པོ་ཐེག་ཆེན་རིགས་སུ་འཁྲུངས། །སྨོན་ལམ་བཟང་པོས་སངས་རྒྱས་སྲས་སུ་འཁྲུངས། །དེ་

འདྲའི་བླ་མ་བྱང་ཆུབ་སེམས་དཔའ་ནི། །མར་མེ་མཛད་དཔལ་ཡེ་ཤེས་སྙིང་རྗེ་ཅན། །སྐྱེས་མཆོག་དེ་ལ་འདུན་པའི་སློབ་མ་ནི། །ཤཱཀྱའི་དགེ་སློང་ཚུལ་ཁྲིམས་རྒྱལ་བ་དེས། །དད་ཅིང་གུས་པས་བསྙེན་བཀུར་ཚུལ་བཞིན་དུ། །བྱས་པ་ཉིད་ཀྱིས་ཐུགས་དམ་སྙིང་པོ་ནི། །
འཁོར་ལོ་སྡོམ་པ་རྣལ་འབྱོར་རྒྱུད་རྒྱལ་པོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལས། །སྙིང་པོའི་སྙིང་པོར་གྱུར་པ་འདི་ཡིན་ཏེ། །ཉིན་མཚན་ཀུན་དུ་ཡིད་ལ་འདི་བསྒོམ་ཞེས། །དེ་ཡིས་ཉེར་བསྟན་ཉམས་པ་མེད་པར་གནང་། །ནགས་ཚོ་བདག་ཉིད་གཅིག་པུ་མ་གཏོགས་པ། །བོད་ཀྱི་
སློབ་མ་གཞན་ལ་ཡོད་རེ་སྐན། །བླ་མ་དེ་ལ་དད་ཅིང་གུས་པ་ཡིས། །ལུས་ངག་ཡིད་ཀྱིས་རྟག་ཏུ་ཕྱག་འཚལ་ལོ།། །།རྒྱ་གར་གྱི་མཁས་པ་ཆེན་པོ་བླ་མ་བྱང་ཆུབ་སེམས་དཔའ་བྷཾ་ག་ལ་པ། དཔལ་མར་མེ་མཛད་ཡེ་ཤེས་ཞབས་དང་། ལོ་ཙཱ་བ་དགེ་སློང་ཚུལ་ཁྲིམས་རྒྱལ་
བས་བསྒྱུར་ཅིང་ཞུས།། ༄༅༅།།རྒྱ་གར་སྐད་དུ། སཾ་གྲ་ཧ་གརྦྷ་ནཱ་མ། བོད་སྐད་དུ། སྙིང་པོ་བསྡུས་པ་ཞེས་བྱ་བ། ཐུགས་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །ཁམས་གསུམ་སྡུག་བསྔལ་རྒྱ་མཚོ་ཆེའི། །དབའ་རླབས་ཤིན་ཏུ་འཁྲུགས་
པ་ནི། །དགེ་དང་མི་དགེ་ལ་སོགས་པའི། །ཟག་བཅས་ལས་ལས་ངེས་པར་འབྱུང་། །དེ་དག་ཆགས་སྡང་ལ་སོགས་པའི། །ཉོན་མོངས་རྒྱུ་ཡིས་བསྐྱེད་པ་སྟེ། །དེ་དག་འབྱུང་བའི་རྒྱུ་ཉིད་ཀྱང་། །ཡིད་དུ་འོང་དང་མི་འོང་སོགས། །གཉིས་སུ་འཛིན་པ་ཉིད་ལས་བྱུང་། །ཐམས་ཅད་འབྱུང་
བའི་རྒྱུ་ཉིད་ནི། །རྟག་དང་ཁྱབ་དང་གཅིག་པུ་སོགས། །དངོས་པོར་འཛིན་པའི་གདོན་ཡིན་ཏེ། །དེ་བས་སྐལ་ལྡན་སྐྱེས་བུ་ནི། །བདག་གཞན་གྲོལ་བ་དོན་གཉེར་བས། །རྟེན་ཅིང་འབྲེལ་འབྱུང་ལ་སོགས་པའི། །རིགས་པ་གང་ལ་གོམས་པ་ཡིས། །དངོས་པོར་འཛིན་པ་བཟློག་པར་བྱ། །
ཕྱི་ནང་ཆོས་རྣམས་ཐམས་ཅད་ཀུན། །མཚན་མ་ཐམས་ཅད་དང་བྲལ་བའི། །ནམ་མཁའ་ལྟ་བུར་ཤེས་བྱས་ལ། །དངོས་འཛིན་གདོན་གྱིས་བརླབས་པ་ཡི། །འགྲོ་ཀུན་ཡུལ་དུ་བྱས་ནས་ནི། །སྡུག་བསྔལ་རྒྱ་མཚོ་སྐེམས་བྱེད་པ། །སྙིང་རྗེ་ཆེན་པོ་སྔོན་འགྲོ་བས། །བདག་གཞན་དོན་ཀུན་

འབྱུང་བ་ཡི། །རིན་ཆེན་བྱང་ཆུབ་སེམས་བསྐྱེད་བྱ། །བྱང་ཆུབ་སྤྱོད་པ་རླབས་ཆེན་པོས། །ཕ་རོལ་ཕྱིན་དྲུག་ལ་སོགས་ལ། །མཉམ་གཞག་ལངས་པའི་སྦྱོར་བ་ཡིས། །ལམ་སྔ་རིམ་གྱིས་བགྲོད་བྱས་ཏེ། །སྒྲིབ་པ་རྣམ་པ་གཉིས་བསལ་ན། །ཚོགས་གཉིས་ཡོངས་སུ་རྫོགས་པ་
ལས། །འབྲས་བུ་སྐུ་གསུམ་བསྒྲུབ་པར་བྱ། །སྐུ་གསུམ་འབྱུང་བའི་མཚན་ཉིད་ཀྱང་། །སྟོང་ཉིད་ནམ་མཁའ་ལྟ་བུ་ལས། །བརྩལ་མེད་ཐུགས་རྗེའི་སྤྲིན་འབྱུང་ཞིང་། །སྐུ་གཉིས་བདུད་རྩིའི་ཆུ་རྒྱུན་གྱིས། །ཁམས་གསུམ་ཐ་མའི་རྒྱུད་བརླན་ཏེ། །བྱང་ཆུབ་སྙིང་པོའི་ས་བོན་ལས། །
དགེ་བའི་ལོ་ཐོག་སྨིན་པར་འགྱུར། །སངས་རྒྱས་ཀུན་གྱི་སྙིང་པོ་སྟེ། །འདི་ནི་སྙིང་པོ་བསྡུས་པ་ཡིན། །ཐ་མའི་དུས་སུ་གྱུར་པས་ན། །ཚེ་ཐུང་ནད་མང་ལོངས་སྤྱོད་དམན། །རྐྱེན་ངན་བར་ཆད་མང་བ་ཡིས། །ཡུན་རིངས་གནས་པའི་མཐུ་མེད་པས། །ཚིག་རྗེས་གཅད་པར་མི་ནུས་ཀྱི། །
བཤེས་གཉེན་དམ་པ་བསྟེན་བྱ་སྟེ། །ཤིན་ཏུ་བརྩོན་པའི་སེམས་ལྡན་པས། །གཡང་ས་རབ་ཏུ་དྲན་བྱས་ཏེ། །བདག་གཞན་གྲོལ་བར་བྱ་བའི་ཕྱིར། །སྙིང་པོ་མྱུར་དུ་བསྡུ་བ་ཡིན། །བརྩེ་བས་འདི་བྱས་བསོད་ནམས་ཀྱིས། །སྐལ་ངན་སེམས་ཅན་ཐམས་ཅད་ཀྱང་། །བྱང་ཆུབ་
སེམས་དང་ལྡན་གྱུར་ནས། །སྙིང་པོ་མྱུར་དུ་སྡུད་པར་ཤོག །སྙིང་པོ་བསྡུ་བ་ཞེས་བྱ་བ། སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།པཎྜི་ཏ་དེ་ཉིད་དང་། ལོ་ཙཱ་བ་དགེ་སློང་ཚུལ་ཁྲིམས་འབྱུང་གནས་དེབ་རྩེས་བསྒྱུར་ཅིང་ཞུས་ཏེ་གཏན་ལ་
ཕབ་པ།། ༄༅༅། །རྒྱ་གར་སྐད་དུ། ཧྲྀ་ད་ཡ་ནི་ཀྲིཔྟ་ནཱ་མ། བོད་སྐད་དུ། སྙིང་པོ་ངེས་པར་བསྡུ་བ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །མངོན་མཐོ་ངེས་པར་འབྱུང་སྟེར་བ། །དཀོན་མཆོག་གསུམ་ལ་གུས་བཏུད་ནས། །འཁོར་བའི་
འཇིགས་པ་སེལ་བ་ཡི། །སྙིང་པོ་བསྡུ་བ་བཤད་པར་བྱ། །འཁོར་བའི་མཚན་ཉིད་སྡུག་བསྔལ་དང་། །ལས་དང་ཉོན་མོངས་རྣམ་རྟོག་སྟེ། །དེ་དག་རྒྱུ་འབྲས་གོ་རིམས་ཅན། །འཁོར་བ་བསྡུས་ནས་བསྟན་པ་ཡིན། །ཐར་པའི་མཚན་ཉིད་བྱང་ཆུབ་སྟེ། །ཤེས་རབ་ཐབས་དང་སྤྱོད་པ་དང་། །

ལམ་ལྔ་དང་ནི་ཚོགས་གཉིས་ལས། །མྱ་ངན་འདས་པའི་སྐུ་གསུམ་འབྱུང་། །དེ་ཡང་རྒྱུ་འབྲས་གོ་རིམས་ཅན། །ཐར་པ་བསྡུས་ཏེ་བསྟན་པའོ། །ཁམས་གསུམ་སྡུག་བསྔལ་རྒྱ་མཚོ་ཆེ། །དབའ་རླབས་ཤིན་ཏུ་འཁྲུགས་པ་ནི། །དགེ་དང་མི་དགེ་ལ་སོགས་པའི། །
ཟག་བཅས་ལས་ལས་ངེས་པར་འབྱུང་། །དེ་དག་གཏི་མུག་ཆགས་སྡང་སོགས། །ཉོན་མོངས་རྒྱུ་ཡིས་བསྐྱེད་པ་སྟེ། །ཡིད་འོང་མི་འོང་ལ་སོགས་པ། །གཉིས་སུ་འཛིན་པ་ཉིད་ལས་བྱུང་། །ཐམས་ཅད་འབྱུང་བའི་རྒྱུ་ཉིད་ནི། །ང་དང་བདག་ཏུ་འཛིན་ལས་བྱུང་། །གཞན་ཡང་འབྱུང་
བའི་རྒྱུ་ཉིད་ནི། །རྟག་དང་གཅིག་པུ་ཁྱབ་ལ་སོགས། །དངོས་པོར་འཛིན་པའི་གདོན་ཡིན་ཏེ། །ཤེས་རབ་ལྡན་པས་སྤང་བར་བྱ། །དེ་བས་སྐལ་ལྡན་སྐྱེས་བུ་ནི། །བདག་གཞན་མ་ལུས་གྲོལ་བྱའི་ཕྱིར། །མི་སླུ་བ་ཡི་ལུང་དག་དང་། །རྟེན་ཅིང་འབྲེལ་འབྱུང་ལ་སོགས་པའི། །རིགས་
པ་གང་ལ་གོམས་པ་ཡིས། །དངོས་པོར་འཛིན་པའི་གདོན་ཆེན་པོ། །མ་ལུས་པར་ནི་བཟློག་པར་བྱ། །འདི་ལྟར་ཕྱི་ནང་ཆོས་རྣམས་ནི། །མཚན་མ་ཀུན་བྲལ་རང་བཞིན་ནི། །ནམ་མཁའ་ལྟ་བུར་ཤེས་བྱས་ལ། །རྟག་ཏུ་གོམས་པར་བསྒྲུབ་པར་བྱ། །འཁོར་བ་ཐོག་མ་མེད་པ་ནས། །དངོས་
འཛིན་གདོན་གྱིས་བརླབས་གྱུར་པའི། །འགྲོ་ཀུན་ཡུལ་དུ་བྱས་ནས་ནི། །ཐམས་ཅད་རྗེས་སུ་འཛིན་པ་ཡིས། །བྱམས་ཆེན་ཚད་མེད་སྔོན་འགྲོ་བས། །སྡུག་བསྔལ་རྒྱ་མཚོ་སྐེམས་བྱེད་པའི། །སྙིང་རྗེ་ཆེན་པོ་ཚད་མེད་པས། །བདག་ལ་གཞན་དོན་འགྲུབ་པ་ཡི། །བྱང་ཆུབ་སེམས་
ནི་རིན་པོ་ཆེ། །ཡང་དག་བརྟན་པ་བསྐྱེད་པར་བྱ། །བདག་གཞན་འབྱོར་པ་བཅུད་ལྡན་པས། །འཁོར་བའི་ཆོས་ལ་ཡིད་འབྱུང་བྱ། །འཇིགས་པ་ཀུན་ལས་སྐྱོབ་པ་ཡི། །སྐྱབས་གསུམ་པོ་དང་ལྡན་པ་དེས། །སོ་སོར་ཐར་ལ་ལེགས་གནས་བྱ། །ཚུལ་ཁྲིམས་བཟང་པོ་དང་
ལྡན་ཞིང་། །ཐེག་ཆེན་རིགས་ཡོད་སྐྱེས་བུ་དེས། །འགྲོ་བ་སྐྱབས་མེད་བསྐྱབ་པའི་ཕྱིར། །སྐྱབས་སུ་འགྲོ་བ་སྔོན་འགྲོ་བ། །སྨོན་པའི་སེམས་ནི་བསྐྱེད་པར་བྱ། །ལྷག་པའི་བསམ་པ་དང་ལྡན་པས། །འཇུག་པའི་སེམས་ནི་བསྐྱེད་བྱས་པས། །སྔར་གྱི་སྨོན་པའི་སེམས་དེ་ཉིད། །རྒྱ་

ཆེར་རབ་ཏུ་འཕེལ་བར་འགྱུར། །བྱང་ཆུབ་སེམས་དཔའི་སྤྱོད་པ་ནི། །རླབས་ཆེན་ཕ་རོལ་ཕྱིན་དྲུག་སོགས། །མཉམ་གཞག་ལངས་པའི་རྣལ་འབྱོར་གྱིས། །ཚོགས་ཀྱི་ལམ་འདི་བསྟན་པར་བསྒྲུབ། །ལམ་ལྔ་རིམ་གྱིས་བགྲོད་བྱས་ཏེ། །སྒྲིབ་པ་གཉིས་ནི་བསལ་བྱས་ནས། །
འདི་ལྟར་ཚོགས་གཉིས་རྫོགས་བྱས་ཏེ། །འབྲས་བུ་སྐུ་གསུམ་འགྲུབ་པར་བྱ། །སྐུ་གསུམ་སྒྲུབ་པའི་མཚན་ཉིད་ཀྱང་། །ཆོས་སྐུ་ནམ་མཁའ་ལྟ་བུ་ལས། །བརྩལ་མེད་ཐུགས་རྗེའི་སྤྲིན་བྱུང་བས། །སྐུ་གཉིས་བདུད་རྩིའི་ཆུ་རྒྱུན་གྱིས། །ཁམས་གསུམ་ཐ་བའི་རྒྱུད་བརླན་ཏེ། །
བྱང་ཆུབ་སྙིང་པོའི་ས་བོན་ལས། །དགེ་བའི་ལོ་ཏོག་སྨིན་པར་འགྱུར། །དུས་གསུམ་སངས་རྒྱས་ཀྱིས་གསུངས་པའི། །སྙིང་པོ་འདིར་ནི་བསྡུས་པ་ཡིན། །འཁོར་བའི་སྡུག་བསྔལ་སྤང་འདོད་ན། །དེ་ལ་བརྩོན་འགྲུས་འབད་པར་བྱ། །རྩོད་པའི་དུས་ཀྱི་ཐ་མ་ལ། །ཚེ་ཐུང་ནད་མང་ལོངས་
སྤྱོད་དམན། །རྐྱེན་ངན་བར་ཆད་མང་བ་ཡིས། །ཡུན་རིངས་གནས་པའི་མཐུ་མེད་པས། །ཚིག་རྗེས་གཅད་པར་མི་ནུས་ཀྱིས། །རིགས་ལ་གནས་པའི་གང་ཟག་དེས། །བཤེས་གཉེན་དམ་པ་བསྟེན་བྱས་ལ། །ཤིན་ཏུ་བརྩོན་པའི་སེམས་ཀྱིས་ནི། །འཁོར་བའི་སྡུག་བསྔལ་དྲན་བྱས་ལ། །
བདག་གཞན་གྲོལ་བར་བྱ་བའི་ཕྱིར། །སྙིང་པོ་མྱུར་དུ་བསྡུ་བར་བྱ། །བརྩེ་བས་འདི་བྱས་དགེ་བ་ཡིས། །སྐལ་ལྡན་སེམས་ཅན་མ་ལུས་ཀུན། །བྱང་ཆུབ་སེམས་ཀྱིས་རྒྱུད་བརླན་ཏེ། །སྙིང་པོ་མྱུར་དུ་སྡུད་པར་ཤོག །སྙིང་པོ་ངེས་པར་བསྡུ་བ་ཞེས་བྱ་བ། སློབ་དཔོན་མཁས་པ་ཆེན་པོ་དཔལ་
མར་མེ་མཛད་ཡེ་ཤེས་ཀྱི་ཞལ་སྔ་ནས་དབུས་ཀྱི་གཉེ་ཐང་གཙུག་ལག་ཁང་དུ་མཛད་པ་རྫོགས་སོ།། །།རྒྱ་གར་གྱི་མཁན་པོ་ཆེན་པོ་དེ་ཉིད་དང་། ཞུ་ཆེན་གྱི་ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།
༄༅༅། །རྒྱ་གར་སྐད་དུ། བོ་དྷི་སཏྭ་མ་ཎྱ་བ་ལི། བོད་སྐད་དུ། བྱང་ཆུབ་སེམས་དཔའི་ནོར་བུའི་ཕྲེང་བ། ཐུགས་རྗེ་ཆེན་པོ་ལ་ཕྱག་འཚལ་ལོ། །དད་པའི་ལྷ་ལ་ཕྱག་འཚལ་ལོ། །བླ་མ་རྣམས་ལ་ཕྱག་འཚལ་ལོ། །ཐེ་ཚོམ་ཐམས་ཅད་རྣམ་སྤངས་ཤིང་། །སྒྲུབ་ལ་ནན་ཏན་གཅེས་

སུ་བྱ། །གཉིད་རྨུགས་ལེ་ལོ་སྤང་བྱ་ཞིང་། །རྟག་ཏུ་བརྩོན་འགྲུས་འབད་པར་བྱ། །དྲན་དང་ཤེས་བཞིན་བག་ཡོད་པས། །དབང་པོའི་སྒོ་རྣམས་རྟག་ཏུ་བསྲུང་། །ཉིན་མཚན་དུས་གསུམ་ཡང་དང་ཡང་། །སེམས་ཀྱིས་རྒྱུད་ལ་བརྟག་པར་བྱ། །བདག་གི་ཉེས་པ་
བསྒྲག་བྱ་ཞིང་། །གཞན་གྱི་འཁྲུལ་པ་བཙལ་མི་བྱ། །གཞན་གྱི་ཡོན་ཏན་བསྒྲག་བྱ་ཞིང་། །བདག་གི་ཡོན་ཏན་སྦ་བར་བྱ། །རྙེད་དང་བཀུར་སྟི་སྤང་བྱ་ཞིང་། །ཁེངས་གྲགས་རྟག་ཏུ་སྤང་བར་བྱ། །བྱམས་དང་སྙིང་རྗེ་བསྒོམ་བྱ་ཞིང་། །བྱང་ཆུབ་སེམས་ནི་བརྟན་པར་བྱ། །མི་དགེ་བཅུ་པོ་
སྤང་བྱ་ཞིང་། །རྟག་ཏུ་དད་པ་བརྟན་པར་བྱ། །འདོད་པ་ཆུང་ཞིང་ཆོག་ཤེས་དང་། །བྱས་པ་དྲིན་དུ་གཟོ་བ་དང་། །ཁྲོ་དང་ང་རྒྱལ་གཞོམ་བྱ་ཞིང་། །དམན་པའི་སེམས་དང་ལྡན་པར་བྱ། །ལོག་པའི་འཚོ་བ་རྣམ་སྤང་ཞིང་། །ཆོས་ཀྱི་འཚོ་བས་འཚོ་བར་བྱ། །ཟང་ཟིང་ཐམས་ཅད་
རྣམ་སྤང་ཞིང་། །འཕགས་པའི་ནོར་གྱིས་བརྒྱན་པར་བྱ། །དད་པའི་ནོར་དང་ཚུལ་ཁྲིམས་ནོར། །ཁྲེལ་ཡོད་ངོ་ཚ་ཤེས་པའི་ནོར། །ཐོས་པའི་ནོར་དང་གཏོང་བའི་ནོར། །ཤེས་རབ་ཉིད་ཀྱི་ནོར་བདུན་པོ། །ནོར་གྱི་རྣམ་པ་འདི་དག་ནི། །མི་ཟད་པ་ཡི་གཏེར་བདུན་དེ། །མི་མ་ཡིན་ལ་
བརྗོད་མི་བྱ། །རྟག་ཏུ་འདུ་འཛི་སྤང་བྱ་ཞིང་། །དགོན་པ་ལ་ནི་གནས་པར་བྱ། །འཁྱལ་པའི་ཚིག་རྣམས་སྤང་བྱ་ཞིང་། །ངག་རྣམས་རྟག་ཏུ་བསྡམ་པར་བྱ། །བླ་མ་མཁན་པོ་མཐོང་བའི་ཚེ། །གུས་པས་རིམ་གྲོ་བསྐྱེད་པར་བྱ། །གང་ཟག་ཆོས་ཀྱི་མིག་ཅན་དང་། །ལས་དང་པོ་པའི་
སེམས་ཅན་ལ། །སྟོན་པའི་འདུ་ཤེས་བསྐྱེད་པར་བྱ། །སེམས་ཅན་ཐམས་ཅད་མཐོང་བའི་ཚེ། །ཕ་མ་བུ་ཚའི་འདུ་ཤེས་བསྐྱེད། །སྡིག་པའི་གྲོགས་པོ་སྤང་བྱ་ཞིང་། །དགེ་བའི་བཤེས་གཉེན་བསྟེན་པར་བྱ། །སྡང་དང་མི་བདེའི་ས་སྤང་ཞིང་། །གང་དུ་བདེ་བར་འགྲོ་བར་བྱ། །གང་
ལ་ཆགས་པ་སྤང་བྱ་ཞིང་། །ཆགས་པ་མེད་པར་གནས་པར་བྱ། །ཆགས་པས་བདེ་འགྲོ་མི་ཐོབ་ཅིང་། །ཐར་པའི་སྲོག་ཀྱང་གཅོད་པར་བྱེད། །གང་དུ་དགེ་བའི་ཆོས་མཐོང་བ། །དེར་ནི་རྟག་ཏུ་འབད་པར་བྱ། །ཐོག་མ་བརྩམས་པ་གང་ཡིན་པ། །དང་པོ་དེ་ཉིད་བསྒྲུབ་བྱ་སྟེ། །དེ་ལྟ་

ན་ནི་ཀུན་ལེགས་བྱས། །གཞན་དུ་གཉིས་ཀ་འགྲུབ་མི་འགྱུར། །རྟག་ཏུ་སྡིག་ལ་དགའ་བྲལ་བྱ། །གང་དུ་མཐོ་བའི་སེམས་འབྱུང་ཚེ། །དེ་ཚེ་ང་རྒྱལ་བཅག་བྱ་ཞིང་། །བླ་མའི་གདམས་ངག་དྲན་པར་བྱ། །ཞུམ་པའི་སེམས་ནི་བྱུང་བའི་ཚེ། །སེམས་ཀྱི་གཟེངས་ནི་བསྟོད་པར་བྱ། །རྟག་ཏུ་
སྟོང་ཉིད་བསྒོམ་པར་བྱ། །གང་དུ་ཆགས་སྡང་ཡུལ་བྱུང་ཚེ། །སྒྱུ་མ་སྤྲུལ་པ་བཞིན་དུ་བལྟ། །མི་སྙན་ཚིག་རྣམས་ཐོས་པའི་ཚེ། །བྲག་ཅ་བཞིན་དུ་བལྟ་བར་བྱ། །ལུས་ལ་གནོད་པ་བྱུང་བའི་ཚེ། །སྔོན་གྱི་ལས་སུ་བལྟ་བར་བྱ། །བས་མཐའ་དགོན་པར་རབ་གནས་ཤིང་། །རི་དགས་ཤི་
བའི་རོ་བཞིན་དུ། །བདག་གིས་བདག་ཉིད་སྦ་བྱ་ཞིང་། །ཆགས་པ་མེད་པར་གནས་པར་བྱ། །རྟག་ཏུ་ཡི་དམ་བརྟན་བྱ་ཞིང་། །ལེ་ལོ་རྙོག་པའི་སེམས་བྱུང་ཚེ། །དེ་ཚེ་བདག་ལ་བརྔན་བགྲང་ཞིང་། །བརྟུལ་ཞུགས་སྙིང་པོ་དྲན་པར་བྱ། །གལ་ཏེ་གཞན་དག་མཐོང་བའི་ཚེ། །ཞི་དེས་
གསོང་པོར་སྨྲ་བ་དང་། །ཁྲོ་གཉེར་ངོ་འཛུམ་སྤང་བྱ་ཞིང་། །རྟག་ཏུ་འཛུམ་ཞིང་གནས་པར་བྱ། །རྟག་ཏུ་གཞན་དག་མཐོང་བའི་ཚེ། །སེར་སྣ་མེད་ཅིང་སྦྱིན་ལ་དགའ། །རྟག་ཏུ་ཕྲག་དོག་སྤང་བར་བྱ། །གཞན་གྱི་སེམས་ནི་བསྲུང་བའི་ཕྱིར། །རྩོད་པ་ཐམས་ཅད་སྤང་བྱ་ཞིང་། །རྟག་ཏུ་བཟོད་
དང་ལྡན་པར་བྱ། །ངོ་དགའ་མེད་ཅིང་གསར་འགྲོགས་མེད། །རྟག་ཏུ་ཟུངས་ནི་ཐུབ་པར་བྱ། །གཞན་ལ་བརྙས་པ་སྤང་བྱ་ཞིང་། །གུས་པའི་ཚུལ་གྱིས་གནས་པར་བྱ། །གཞན་ལ་གདམས་ངག་བྱེད་པའི་ཚེ། །སྙིང་རྗེ་ཕན་སེམས་ལྡན་པར་བྱ། །ཆོས་ལ་སྐུར་པ་གདབ་མི་བྱ། །གང་མོས་འདི་
ལ་འདུན་པར་བྱ། །ཆོས་སྤྱོད་རྣམ་བཅུའི་སྒོ་ནས་ནི། །ཉིན་མཚན་མེད་པར་འབད་པར་བྱ། །མང་པོའི་ནང་དུ་ངག་ལ་བརྟག །གཅིག་པུ་འདུག་ན་སེམས་ལ་བརྟག །དུས་གསུམ་དགེ་རྩ་ཅི་བསགས་པ། །བླ་མེད་བྱང་ཆུབ་ཆེན་པོར་བསྔོ། །བསོད་ནམས་སེམས་ཅན་རྣམས་ལ་བདར། །རྟག་ཏུ་
ཡན་ལག་བདུན་པ་ཡི། །སྨོན་ལམ་ཆེན་པོ་གདབ་པར་བྱ། །དེ་ལྟར་བྱས་ན་བསོད་ནམས་དང་། །ཚོགས་ཆེན་གཉིས་ཀྱང་རྫོགས་འགྱུར་ཏེ། །སྒྲིབ་པ་གཉིས་ཀྱང་ཟད་པར་འགྱུར། །མི་ལུས་ཐོབ་པའི་དོན་ཡོད་པས། །བླ་མེད་བྱང་ཆུབ་ཐོབ་པར་འགྱུར།། །།རྒྱ་གར་གྱི་མཁན་པོ་དང་དཔལ་མར་

མེ་མཛད་ཡེ་ཤེས་ཀྱིས་མཛད་པ། བྱང་ཆུབ་སེམས་དཔའི་ནོར་བུའི་ཕྲེང་བ་རྫོགས་སོ།། ༄༅༅། །རྒྱ་གར་སྐད་དུ། བོ་དྷི་སཏྭ་ཀརྨཱ་དི་མརྒཱ་བ་ཏཱ་ར་དེ་ཤ་ན། བོད་སྐད་དུ། བྱང་ཆུབ་སེམས་དཔའ་ལས་དང་པོ་པའི་ལམ་ལ་འཇུག་པ་བསྟན་པ།
བླ་མ་དམ་པ་ལ་ཕྱག་འཚལ་ལོ། །ངན་འགྲོ་འཁོར་བ་འཇོམས་པ་དང་། །མངོན་མཐོ་ངེས་འབྱུང་རྩོལ་མཛད་པ། །ཕྱོགས་བཅུའི་དཀོན་མཆོག་ཐམས་ཅད་དང་། །བླ་མའི་ཞབས་ལ་ཕྱག་འཚལ་ལོ། །འདི་ན་གང་དག་རང་བཞིན་གྱིས་སྙིང་རྗེ་དང་ཤེས་རབ་ཆེ་བ་ཐེག་པ་ཆེན་པོའི་རིགས་
ཅན་དང་། ཡང་གང་དག་སྐྱེ་བ་སྔ་མ་དག་ཏུ་ཐེག་པ་ཆེན་པོ་ལ་གོམས་པར་བྱས་པའི་སྐྱེས་བུ། འཁོར་བ་ལ་ཡིད་ལེགས་པར་བྱུང་བ་འཆི་བ་རྗེས་སུ་དྲན་པ། ཕྱི་ནང་གི་དངོས་པོ་ཐམས་ཅད་ལ་ཞེན་པ་ཆུང་བ་དང་། དགེ་བའི་བཤེས་གཉེན་དམ་པ་ཅིག་ལ་ཐེག་པ་ཆེན་པོའི་ལམ་
ཕྱིན་ཅི་མ་ལོག་པ་ཅིག་ཐོས་པར་གྱུར་ན་ཅི་མ་རུང་། བདག་གིས་དམ་པ་ཅིག་བཙལ་བར་བྱའོ་སྙམ་དུ་སེམས་པ་དེས། དགེ་བའི་བཤེས་གཉེན་དུ་རུང་བའི་བླ་མ་བཙལ་ཏེ། གཞན་དུ་བསྟན་པ་བཞིན་དུ་གསུམ་ལ་སྐྱབས་སུ་འགྲོ་བ་ཁྱད་པར་ཅན་དང་། འགྲོ་བ་མཐའ་ཡས་པ་
ཡུལ་དུ་བྱས་ཏེ་བསམ་པ་བཟང་པོ་དང་ལྡན་པས་བླ་ན་མེད་པའི་བྱང་ཆུབ་ཆེན་པོར་སེམས་ཐུན་མོང་མ་ཡིན་པ་བསྐྱེད་པ་དང་། ལྷག་པའི་བསམ་པ་བཟང་པོ་དང་ལྡན་པས་གཡོ་སྒྱུ་དང་བྲལ་བའི་འཇུག་པ་བྱང་ཆུབ་ཀྱི་སེམས་ཆེན་པོས། བྱང་ཆུབ་སེམས་དཔའི་ཚུལ་ཁྲིམས་ཀྱི་བསླབ་པ་
གསུམ་ལེགས་པར་བླང་བར་བྱའོ། །དེ་ནས་ཁྱི་དང་གདོལ་པ་དང་། བྲན་གྱི་འདུ་ཤེས་དང་ལྡན་པ། གཡོ་སྒྱུ་དང་བྲལ་བའི་བྱང་ཆུབ་སེམས་དཔའ་དེ་ཚོགས་ཀྱི་ལམ་པ་ཡིན་པས་ཉིན་དང་མཚན་དུ་ལུས་དང་ངག་དང་ཡིད་ཀྱི་བྱ་བ་ཐམས་ཅད་དོན་མེད་པར་མི་འགྱུར་རོ། །འདི་ལྟར་སེམས་
དེས་ཟས་ཚོད་རིག་པར་བྱ་བ་དང་། དབང་པོའི་སྒོ་རྣམས་བསྡམ་པ་དང་། ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ་དང་། ཉིན་དང་མཚན་དུ་རྣལ་འབྱོར་ལ་བརྩོན་པར་བྱའོ། །དེ་ནས་དབུགས་ཕྱི་ནང་དུ་རྒྱུ་བ་ཡང་གཞན་གྱི་དོན་དུ་འགྱུར་བར་འདོད་པ་དེས་ཐོ་རངས་ཀྱི་ཐུན་

ལ་ལངས་ཏེ། བཤང་བ་དང་གཅི་བ་དོར་བ་ལ་སོགས་པའི་སྤྱོད་ལམ་ལེགས་པར་བྱས་ནས། ཡུལ་དབུས་དང་ཡུལ་མཐའ་འཁོབ་ཀྱི་བྱེ་བྲག་གིས་ཁྲུས་བྱས་ལ། འགྲོ་བ་མཐའ་དག་ལ་དམིགས་ཏེ་ཚད་མེད་པ་བཞིས་བྱང་ཆུབ་ཏུ་སེམས་བསྐྱེད་ལ། དཀོན་མཆོག་
གསུམ་གྱི་གཟུགས་བརྙན་གྱི་སྤྱན་སྔར་བྱུག་རིས་ལེགས་པར་བྱས་ཏེ་མེ་ཏོག་དྲི་ཞིམ་པོ་སིལ་མ་ལེགས་པར་གཏོར་ནས། དེ་དག་གི་སྤྱན་སྔར་པུས་མོ་གཉིས་ས་ལ་བཙུགས་ནས་ཐལ་མོ་སྦྱར་ཏེ། ཕྱོགས་བཅུའི་འཇིག་རྟེན་གྱི་ཁམས་ཀྱི་སངས་རྒྱས་ཐམས་ཅད་དང་ཆོས་
ཐམས་ཅད་དང་། ཐེག་པ་ཆེན་པོའི་དགེ་འདུན་གྱི་སྤྱན་སྔར་ལུས་ཀྱི་བཀོད་པ་གྲངས་མེད་ཅིང་བརྗོད་དུ་མེད་པར་སྤྲུལ་ཏེ། དེ་དག་རེ་རེའི་ཞབས་ལ་ལེགས་པར་ཕྱག་བྱའོ། །དེ་དག་ལ་ཟང་ཟིང་གི་མཆོད་པ་ཚད་མེད་པ་རྒྱ་ཆེ་བ་དཔག་ཏུ་མེད་པས་མཉེས་པར་བྱའོ། །དེ་ནས་ལུས་རེ་རེ་ལ་
མགོ་བརྗོད་དུ་མེད་པ་མགོ་རེ་རེ་ལ་ལྕེ་བརྗོད་དུ་མེད་པར་སྤྲུལ་ཏེ་བདག་དང་གཞན་གྱི་སྡིག་པ་མ་ལུས་པར་བཤགས་པར་བྱའོ། །བདག་དང་གཞན་གྱི་དགེ་བ་ལ་རྗེས་སུ་ཡི་རང་བར་བྱའོ། །སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པ་
རྣམས་ལ་ཆོས་ཀྱི་འཁོར་ལོ་བསྐོར་བར་བསྐུལ་མ་གདབ་པར་བྱའོ། །གང་དག་ཆོས་ཀྱི་འཁོར་ལོ་བསྐོར་ནས་ཚེའི་འདུ་བྱེད་གཏོང་བ་དག་ལ་འཁོར་བ་ཇི་སྲིད་པའི་བར་དུ་ཡོངས་སུ་མྱ་ངན་ལས་མི་འདའ་བར་གསོལ་བ་གདབ་པར་བྱའོ། །དགེ་བའི་རྩ་བ་དེ་དག་ཐམས་ཅད་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བར་བྱའོ། །ཇི་ལྟར་མདོ་ལས་འབྱུང་བ་བཞིན་དུ་ཡན་ལག་དེ་དག་རེ་རེ་ལ་ཚིག་ཤིན་ཏུ་རྒྱས་པར་བརྗོད་པར་བྱའོ། །དེ་ནས་མཆོད་པ་བདུན་པོའི་རྗེས་ལ་འགྲོ་བ་མཐའ་དག་ལ་དམིགས་ཏེ། གསུམ་ལ་སྐྱབས་སུ་འགྲོ་བའི་ཚིག་ལན་གསུམ་
གྱི་བར་དུ་བརྗོད་པར་བྱའོ། །དེ་ནས་བྱང་ཆུབ་ཏུ་སེམས་བསྐྱེད་པར་བྱ་སྟེ། ཇི་ལྟར་ཆོ་ག་ལས་འབྱུང་བ་བཞིན་དུ་བྱའོ། །ཐ་ན་ཡང་འདི་སྐད་དུ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པ་འདི་

དག་གིས། འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ་བརྗོད་པར་བྱའོ། །དེ་ནས་བདག་གི་ལུས་དབུལ་བ་དང་། དེ་ནས་སྐྱེས་བུ་ཆེན་པོའི་ཆོས་ལུགས་ཤིང་རྟ་ཆེན་པོའི་ལམ་ལ་གནས་པར་དམ་བཅའ་བར་བྱའོ། །དེ་ནས་རང་གི་མལ་དུ་སྐྱིལ་
མོ་ཀྲུང་གིས་འདུག་ལ། བླ་མ་རྗེ་བཙུན་དཔལ་བྱང་ཆུབ་བཟང་པོས་བཀོད་པའི་ཏིང་ངེ་འཛིན་གྱི་ལེའུ་ལས་གསུངས་པའི་ཡན་ལག་དགུ་པོ་ཤེས་པར་བྱས་ལ། ཞི་གནས་དང་ལྷག་མཐོང་གི་རྣལ་འབྱོར་བསྒོམ་པར་བྱ་སྟེ། དེ་ཡང་བྱིང་བ་དང་རྒོད་པ་ལ་སོགས་པའི་སྐྱོན་དུ་གྱུར་པ་
ཐམས་ཅད་བསལ་ཏེ་བསྒོམ་པར་བྱའོ། །དེ་ནས་མིག་ཕྱེ་ལ་དབུགས་ཕྱུང་སྟེ། ཕྱི་དང་ནང་གི་དངོས་པོ་མཐོང་བ་ན། ཨེ་མའོ་རེ་མཚར། ཨེ་མའོ་རེ་མཚར། ནམ་མཁའ་ལྟ་བུའི་སྐྱེ་བ་མེད་པ་ལས་རྟེན་ཅིང་འབྲེལ་པར་འབྱུང་བའི་སྟོབས་ཀྱིས་སྣ་ཚོགས་སུ་སྣང་ཞིང་གནས་པ་འདི།
ཨེ་མའོ་ངོ་མཚར་རོ་སྙམ་དུ་སྒྱུ་མའི་དཔེ་བརྒྱད་ཀྱི་ཚུལ་དུ་ཤེས་པར་བྱའོ། །དེ་ནས་སྙིང་རྗེ་ཆེན་པོའི་ཡིད་ཀྱིས་མི་སྣང་བའི་སེམས་ཅན་ཐམས་ཅད་ལ་ཆོས་བཤད་པའི་ཕྱིར་རྟོག་པ་ཅི་ཡོད་པས་ཐེག་པ་ཆེན་པོའི་མདོ་སྡེ་ཁ་ཏོན་དུ་གདོན་པར་བྱའོ། །དེ་ནས་ཟས་ཀྱི་བྱ་བའི་དུས་སུ་མི་གཙང་
བའི་རྫས་སུམ་ཅུ་རྩ་དྲུག་གིས་གང་བའི་ལུས་སྙིང་པོ་མེད་པ་མཐར་འཇིག་པ་འདིས་སངས་རྒྱས་ཀྱི་ཆོས་ཀྱི་སྐུའི་སྙིང་པོ་དེ་བཙལ་བར་བྱའོ་ཞེས་བསམས་ལ་རྒྱགས་པའི་ཕྱིར་མ་ཡིན་ལ། རོ་ལ་ཆགས་པས་ཀྱང་མ་ཡིན་ཏེ། གྲུ་ལྟ་བུའི་བློས་བཟའ་བར་བྱའོ། །ཟས་ཀྱི་ཚོད་རིག་པར་
ཡང་བྱ་སྟེ། གསོ་བ་རིག་པའི་རྒྱུད་ཡན་ལག་བརྒྱད་པ་ལས། ལྟོ་ཡི་སུམ་ཆ་ཟས་ཀྱིས་ཏེ། །ཆ་གཉིས་པ་ནི་སྐོམ་གྱིས་སོ། །རླུང་ལ་སོགས་པའི་གནས་སུ་ནི། །ཆ་གཅིག་སྟོང་པར་གཞག་པར་བྱ། །ཞེས་བཤད་དོ། །ཟས་དེ་ལ་ཆ་བཞིར་བགོ་བར་བྱ། ཆ་དང་པོ་དཀོན་མཆོག་
གསུམ་དང་བླ་མ་ལ་དབུལ་བར་བྱའོ། །ཆ་གཅིག་རང་ཉིད་ལོངས་སྤྱད་པར་བྱའོ། །ཆ་གཅིག་བྱིས་པ་དང་མགོན་མེད་པ་དག་ལ་སྦྱིན་པར་བྱའོ། །ཆ་གཅིག་ནི་ཁྱི་དང་བྱ་རོག་ལ་སོགས་པའི་བྱོལ་སོང་ལ་སྦྱིན་པར་བྱའོ། །གང་དག་གིས་སྤྱོད་པ་བསྡུས་པར་ནི་གཞན་དུ་ཡང་བརྗོད་

དོ། །ཚུལ་གཞན་ནི་སྤྱོད་པ་བསྡུས་པའི་སྒྲོན་མ་ལས་བཤད་པ་བཞིན་ནོ། །དེ་ནས་སྔ་དྲོའི་ཐུན་ལ་ཡང་ཐོ་རངས་ཀྱི་ཐུན་ལ་ཇི་སྐད་བརྗོད་པ་ལྟར་ཐམས་ཅད་བྱའོ། །གུང་གི་ཐུན་དང་། དགོངས་མོའི་ཐུན་དང་། སྲོད་ཀྱི་ཐུན་དང་། མཚན་མོའི་གུང་གི་ཐུན་ཐམས་ཅད་དུ་ཇི་ལྟར་བརྗོད་
པའི་ཆོ་ག་ཐམས་ཅད་རྫོགས་པར་བྱའོ། །དེ་ལྟར་རྣལ་འབྱོར་པ་དེ་ལ་ནི་གཉིད་ལོག་པ་དང་ཉལ་བའི་དུས་ལ་ངེས་པ་མེད་དོ་ཞེས་བླ་མ་དག་གསུང་ངོ་། །དེ་ལྟ་བུའི་རྣལ་འབྱོར་པ་ཚོགས་ཀྱི་ལམ་པ། ཐར་པའི་ཆ་དང་མཐུན་པའི་དགེ་བའི་རྩ་བ་བསྐྱེད་འདོད་པའི་ལས་དང་པོ་པ་ཉིན་དང་
མཚན་དུ་དོན་མེད་པར་མི་གནས་པ་དེ་ལྟ་བུ་ལ་ལྟུང་བའི་ཉེས་པ་ག་ལ་འབྱུང་། གལ་ཏེ་བག་ཆགས་ངན་པའི་སྟོབས་ཀྱིས་ལྟུང་བ་བྱུང་བར་གྱུར་ན། འདི་ལྟར་མྱུར་དུ་གསོ་བར་བྱེད་དེ། དེ་ཡང་འདི་ལྟར་ཐུན་དྲུག་པོ་དག་དུམ་བུ་བཅོ་བརྒྱད་དུ་བགོས་ནས་སྐད་ཅིག་མ་ལྔ་བཅུ་རྩ་བཞིར་
འགྱུར་རོ། །བྱང་ཆུབ་སེམས་དཔའ་ཡང་རབ་འབྲིང་དགུར་འགྱུར་རོ། །བླ་མའི་མན་ངག་གིས་གསོ་བའི་ཐབས་རྣམས་ཤེས་པར་བྱའོ། །དམ་པ་རྣམས་ཀྱིས་བཤད་པའི་ལམ་བཟང་པོ། །བྱང་ཆུབ་འོད་སོགས་སློབ་མས་བསྐུལ་བྱས་པ། །ཐེག་ཆེན་རིགས་ཅན་རྣམས་ཀྱིས་
བགྲོད་བྱས་ནས། །རྐང་གཉིས་དབང་པོའི་གནས་སུ་འགྲོ་བར་ཤོག །རྗེ་བཙུན་བླ་མ་བྱང་ཆུབ་སེམས་དཔའ་ལ། །དགེ་སློང་བྱང་ཆུབ་འོད་ཀྱིས་གསོལ་བ་བཏབ། །དགེ་སློང་ཚུལ་ཁྲིམས་རྒྱལ་བས་ཞུས་ནས་བསྒྱུར། །ཐེག་པ་ཆེན་པོ་པ་རྣམས་སྤྱོད་གྱུར་ཅིག །བྱང་ཆུབ་སེམས་དཔའ་
ལས་དང་པོ་པའི་ལམ་ལ་འཇུག་པ་བསྟན་པ། སློབ་དཔོན་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།པཎྜི་ཏ་དེ་ཉིད་དང་། ལོ་ཙཱ་བ་ཚུལ་ཁྲིམས་རྒྱལ་བས་བསྒྱུར།། ༄༅༅། །རྒྱ་གར་སྐད་དུ། ས་ར་ཎཾ་གཙྪཱ་མི་དེ་ཤ །བོད་སྐད་དུ།
སྐྱབས་སུ་འགྲོ་བ་བསྟན་པ། དཀོན་མཆོག་གསུམ་ལ་ཕྱག་འཚལ་ལོ། །ངན་སོང་གསུམ་དང་འགྲོ་བ་ལྔའི། །སྡུག་བསྔལ་མ་ལུས་སེལ་མཛད་ཅིང་། །མཐོ་རིས་མྱ་ངན་འདས་པ་ཡི། །བདེ་བ་སྩོལ་མཛད་དེ་ལ་འདུད། །འདིར་སྐྱབས་སུ་འགྲོ་བ་བཤད་པར་བྱ་སྟེ། སྡོམ་ལ། རྟེན་དང་

གནས་དང་བསམ་པ་དང་། །དུས་དང་རང་བཞིན་ཚད་དང་ནི། །ཚུལ་དང་བསླབ་པ་ངེས་པའི་ཚིག །ལས་དང་དཔེ་དང་དབྱེ་བ་དང་། །ཉེས་དམིགས་དགོས་པ་ཕན་ཡོན་ཏེ། །རྣམ་པ་བཅོ་ལྔ་དག་ཏུ་བརྗོད། །དེ་ལ་རྟེན་གྱི་གང་ཟག་ནི་གཉིས་ཏེ། ཐེག་པ་ཆེན་པོའི་
རིགས་ཅན་དང་། ཐེག་པ་ཆུང་ངུའི་རིགས་ཅན་ནོ། །གནས་ནི་རྣམ་པ་གཉིས་ཏེ། ཐེག་པ་ཆེ་ཆུང་གི་བྱེ་བྲག་གིས་སོ། །དེ་ལ་ཐེག་པ་ཆེན་པོའི་གཞུང་གིས་ནི་དཀོན་མཆོག་གསུམ་འདི་ལྟ་བུ་ཡིན་ཏེ་དེ་ཁོ་ན་ཉིད་ཀྱི་དཀོན་མཆོག་གསུམ་དང་། མངོན་པར་རྟོགས་པའི་དཀོན་མཆོག་
གསུམ་དང་། མདུན་དུ་བཞུགས་པའི་དཀོན་མཆོག་གསུམ་མོ། །དེ་ཡང་འདི་ལྟར་ཤེས་བྱ་ཕྱིན་ཅི་མ་ལོག་པར་མཁྱེན་པ། རྣམ་པར་མི་རྟོག་པ་གཉིས་སུ་མེད་པའི་ཡེ་ཤེས། ཆོས་ཀྱི་དབྱིངས་ལ་གནས་པ་དང་། ཆོས་ཀྱི་དབྱིངས་རྣམ་པར་དག་པ་ཤེས་རབ་ཀྱི་ཕ་རོལ་ཏུ་ཕྱིན་པ་དེ་
ཉིད་དང་། མཉམ་པར་གཞག་པའི་དུས་སུ་ཆོས་ཐམས་ཅད་ནམ་མཁའི་དཀྱིལ་ལྟ་བུར་ཤེས་པའི་བྱང་ཆུབ་སེམས་དཔའ་ས་ཆེན་པོ་ལ་གནས་པ་དང་། ཡང་འདི་ལྟར་གཟུགས་ཀྱི་སྐུ་རྣམ་པ་གཉིས་དང་བདེན་པ་བཞི་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་།
ས་དང་ཕ་རོལ་ཏུ་ཕྱིན་པ་ལ་སོགས་པའི་ཆོས་རྒྱུད་ལ་གནས་པ་དང་། སྦྱོར་བའི་ལམ་གྱི་བྱང་ཆུབ་སེམས་དཔའ་དང་། ཡང་འདི་ལྟར་རི་མོར་བྲིས་པ་དང་། འབུར་དུ་བཏོད་པ་དང་། ལུགས་མ་དང་། ལྡེར་སོ་ལ་སོགས་པ་དང་། གསུང་རབ་ཡན་ལག་དགུའི་བདག་ཉིད་
པོ་ཏི་དང་། གླེགས་བམ་ལ་སོགས་པ་དང་། ཚོགས་ཀྱི་ལམ་པའི་བྱང་ཆུབ་སེམས་དཔའོ། །ཐེག་པ་ཆུང་ངུའི་གཞུང་ནི། གང་ཞིག་གསུམ་ལ་སྐྱབས་འགྲོ་བ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་
འགྲོ། །ཞེས་བྱ་བ་ཡིན་ནོ། །དེ་ལ་བསམ་པ་ནི་ཐེག་པ་ཆེན་པོ་པའི་ནི་སེམས་ཅན་མ་ལུས་པའི་དོན་དུ་སེམས་པའོ། །གཅིག་ནི་བདག་འབའ་ཞིག་གི་དོན་དུ་སེམས་པའོ། །དེ་ལ་དུས་ནི་ཐེག་པ་ཆེན་པོ་པའི་ནི་བྱང་ཆུབ་ཀྱི་སྙིང་པོའི་བར་དུའོ། །གཅིག་ནི་ཇི་སྲིད་

འཚོའི་བར་དུ་དམ་འཆའ་བའོ། །དེ་ལ་རང་བཞིན་ནི་ངོ་ཚ་ཤེས་པ་དང་ཁྲེལ་ཡོད་པ་དང་ལྡན་པ་དང་། རྣམ་པར་རིག་བྱེད་མ་ཡིན་པ་སྐྱེས་པའོ། །དེ་ལ་ཚད་ནི་ཁས་བླངས་པ་དང་། སྐྱབས་བྱེད་པ་དང་། རྣམ་པར་རིག་བྱེད་སྐྱེད་པའོ། །དེ་ལ་ཚུལ་ནི་སྐྱབས་སུ་འགྲོ་བའི་ཆོ་ག་ཡིན་
ཏེ་དེ་ནི་བླ་མ་ལ་ཞུ་བར་བྱའོ། །དེ་ལ་བསླབ་པ་ནི་ཐུན་མོང་དང་ཐུན་མོང་མ་ཡིན་པ་སྟེ། བླ་མའི་ཞལ་སྔ་ནས་ཤེས་པར་འགྱུར་རོ། །དེ་ལ་ངེས་པའི་ཚིག་ནི་འབངས་ཡིན་པའམ། དེ་ལས་གཞན་པའི་ཇོ་བོ་མི་ཚོལ་བས་སྐྱབས་སུ་སོང་བའོ། །དེ་ལ་ལས་ནི་བྱང་ཆུབ་ཀྱི་སེམས་ཀྱི་ལྗོན་ཤིང་
སྐྱེ་བའི་རྩ་བར་གྱུར་པ་དང་། ཐར་པའི་གྲོང་ཁྱེར་ཆེན་པོའི་སྒོར་འཇུག་པ་དང་། བསྙེན་གནས་ལ་སོགས་པའི་སྡོམ་པ་ཐམས་ཅད་ཀྱི་རྟེན་བྱེད་པའོ། །དེ་ལ་དཔེ་ནི་རྒྱལ་པོའམ་བློན་པོའི་འབངས་དག་དེའི་བཀའ་ལས་མི་འདའ་ཞིང་ཅི་ནས་ཀྱང་དེ་མགུ་བར་བྱེད་པ་བཞིན་ནོ། །
དེ་ལ་དབྱེ་བ་ནི་ཐུན་མོང་བ་དང་། ཐུན་མོང་མ་ཡིན་པའི་བྱེ་བྲག་གོ། །དེ་ལ་ཉེས་དམིགས་ནི་གཉིས་ཏེ། སྐྱབས་ཉམས་པའམ་མི་ཤེས་པའོ། །སྤངས་པའམ་ཉམས་པ་ནི་འདི་སྐད་དུ། ཟླ་གྲགས་ཀྱི་ཞལ་སྔ་ནས། རྟེན་གྱི་དམ་པ་བླངས་ནས་ནི། །སླར་ཡང་དམན་ལ་
བརྟེན་གྱུར་ན། །ཉམས་བཅས་ཕྱོགས་ལ་གནས་པས་ན། །དེ་ནི་དམ་པའི་བཞད་གད་འགྱུར། །ཞེས་གསུངས་ཏེ་མཚོན་པ་ཙམ་མོ། །དེ་ལ་དགོས་པ་ནི་བཅོམ་ལྡན་འདས་ཀྱིས་ཇི་སྐད་དུ། འཇིགས་པས་སྐྲག་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང་། །ཀུན་
དགའ་དང་ནི་མཆོད་གནས་ཀྱི། །ལྗོན་ཤིང་རྣམས་ལ་སྐྱབས་སུ་འགྲོ། །སྐྱབས་དེ་གཙོ་བོ་མ་ཡིན་ཞིང་། །སྐྱབས་དེ་མཆོག་གྱུར་མ་ཡིན་ལ། །སྐྱབས་དེ་ལ་ནི་བརྟེན་ནས་སུ། །སྡུག་བསྔལ་ཀུན་ལས་མི་གྲོལ་ཞིང་། །གང་ཚེ་གང་ཞིག་སངས་རྒྱས་དང་། །ཆོས་དང་དགེ་འདུན་
སྐྱབས་སོང་ན། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འདས་པ་དང་། །འཕགས་ལམ་ཡན་ལག་བརྒྱད་བདེ་བ། །མྱ་ངན་འདས་པར་འགྲོ་འགྱུར་དང་། །འཕགས་པའི་བདེན་པ་བཞི་པོ་དག །ཤེས་རབ་ཀྱིས་ནི་ལྟ་བྱེད་པ། །སྐྱབས་དེ་གཙོ་

བོ་ཡིན་པ་སྟེ། །སྐྱབས་དེ་མཆོག་ཏུ་གྱུར་པ་ཡིན། །སྐྱབས་དེ་ལ་ནི་བརྟེན་ནས་ཀྱང་། །སྡུག་བསྔལ་ཀུན་ལས་གྲོལ་བར་འགྱུར། །ཞེས་གསུངས་སོ། །སྐྱབས་སུ་འགྲོ་བའི་དགོས་པ་ནི་དེ་ལྟ་བུའོ། །དེ་ལ་ཕན་ཡོན་ནི་གསུམ་སྟེ། རྒྱུའི་དུས་ཀྱི་ཕན་ཡོན་དང་།
ལམ་གྱི་དུས་ཀྱི་ཕན་ཡོན་དང་། འབྲས་བུའི་དུས་ཀྱི་ཕན་ཡོན་ནོ། །རྒྱུའི་དུས་ཀྱི་ལ་ཚེ་འདིའི་དང་། ཚེ་རབས་གཞན་གྱིའོ། །ཚེ་འདིའི་ཕན་ཡོན་ནི་འཇིགས་པ་ཆེན་པོ་བརྒྱད་ལས་ཐར་བར་བྱེད་པ་དང་། བར་ཆད་མེད་པ་དང་། བསྟན་པ་ལ་དགའ་བའི་ལྷ་དག་བསྟང་གྲོགས་བྱེད་
པ་དང་། འཆི་བའི་དུས་སུ་ཡིད་དགའ་བ་ལ་སོགས་པའོ། །ཚེ་རབས་གཞན་གྱི་ནི་འཁོར་བའི་སྡུག་བསྔལ་དང་། ངན་སོང་གི་སྡུག་བསྔལ་ལས་འདྲེན་པར་མཛད་པ་དང་། མྱ་ངན་ལས་འདས་པ་དང་། མཐོ་རིས་ཀྱི་བདེ་བ་སྩོལ་བའོ། །ལམ་གྱི་ཕན་ཡོན་བདེན་པ་བཞི་དང་།
འཕགས་པའི་ལམ་ཡན་ལག་བརྒྱད་པ་དང་། བྱང་ཆུབ་ཀྱི་ཡན་ལག་བདུན་ལ་སོགས་པ་ལ་སྦྱོར་བར་མཛད་པའོ། །འབྲས་བུའི་ཕན་ཡོན་མྱ་ངན་ལས་འདས་པ་གཉིས་དང་། སྐུ་གསུམ་ཐོབ་པར་བྱེད་པའོ། །འདི་དག་ནི་མདོར་བསྡུས་པ་ཡིན་ལ་རྒྱས་པར་གཞུང་དང་བླ་མ་
ལས་ཤེས་པར་བྱའོ། །སྐྱབས་སུ་འགྲོ་བ་བསྟན་པ་ཞེས་བྱ་བ། བླ་མ་བྱང་ཆུབ་སེམས་དཔའ་དཱི་པཾ་ཀ་ར་ཤྲཱི་ཛྙཱ་ནས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། མ་ཧཱ་ཡཱ་ན་པ་ཐཱ་སཱ་དྷ་ན་ཝརྞྞ་སཾ་གྲ་ཧ། བོད་སྐད་དུ། ཐེག་པ་ཆེན་པོའི་ལམ་
གྱི་སྒྲུབ་ཐབས་ཡི་གེར་བསྡུས་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བསམ་གྱིས་མི་ཁྱབ་ཆེ་བ་མངའ། །བླ་མེད་བྱང་ཆུབ་ཐོབ་འདོད་ན། །བྱང་ཆུབ་བསྒྲུབ་ལ་རག་ལས་པས། །སྒྲུབ་པ་ལྷུར་བླང་སྙིང་པོར་བྱ། །དལ་འབྱོར་
ཕུན་སུམ་ཚོགས་པའི་ལུས། །ཤིན་ཏུ་རྙེད་དཀའ་རྙེད་གྱུར་ཅིང་། །ཕྱིས་ཀྱང་ཤིན་ཏུ་རྙེད་དཀའ་བས། །སྒྲུབ་ལ་འབད་པས་དོན་ཡོད་བྱ། །སངས་རྒྱས་འབྱུང་དང་དགེ་སློང་དང་། །མི་ལུས་རྙེད་དཀའ་རྙེད་གྱུར་ཅིང་། །དགེ་བཤེས་ཕྲད་དཀའ་ཕྲད་གྱུར་ནས། །དོན་མེད་པར་

ནི་མ་བྱེད་གསུངས། །རླུང་གི་ནང་གི་མར་མེ་བཞིན། །ཚེ་འདི་གནས་པའི་གདེང་མེད་ཕྱིར། །མགོའམ་ལུས་ལ་མེ་འབར་བཞིན། །སྒྲུབ་ལ་མྱུར་དུ་བརྩོན་འགྲུས་བརྩམ། །འཇིག་རྟེན་འདས་དང་འཇིག་རྟེན་གྱི། །ཕུན་སུམ་ཚོགས་པ་ཐམས་ཅད་ཀྱང་། །སྒྲུབ་པའི་མཐུ་ལས་བྱུང་རིག་
མཛད། །སྒྲུབ་པ་གཙོར་མཛད་བློ་ལྡན་རྣམས། །འདི་དང་གཞན་དུ་བདེ་བ་ལ། །མཁས་པ་སུ་ཞིག་ཐེ་ཚོམ་ཟ། །དེ་ཉིད་ཕྱིར་ན་བློ་ལྡན་རྣམས། །སྒྲུབ་པ་སྙིང་པོར་བྱ་བར་རིག །འདོད་པའི་གཞི་ལ་ཆགས་པའི་རྒྱུས། །སྒྲུབ་པའི་སྤྱོད་ལམ་ཉམས་པའི་མི། །འཇིག་རྟེན་འདས་དང་
འཇིག་རྟེན་གྱི། །ཕུན་སུམ་ཚོགས་པ་ཐམས་ཅད་ལས། །ཤིན་ཏུ་རིང་བ་ཁོ་ནར་འགྱུར། །འཁོར་བའི་བཙོན་ར་ཉམ་ང་རུ། །ཉོན་མོངས་འཆིང་བ་སྣ་ཚོགས་ཀྱིས། །རབ་ཏུ་བསྡམས་པས་ཉམ་ཐག་ཅིང་། །འཁོར་བའི་སྡུག་བསྔལ་དཔག་མེད་ཀྱིས། །དེ་ཉིད་རྒྱུད་གདུང་མི་
བདེར་འགྱུར། །དེ་ཉིད་ཕྱིར་ཡང་བློ་ལྡན་དང་། །འདོད་པའི་གཞི་ལ་ཆགས་སྤངས་ཏེ། །ཆོས་སྒྲུབ་གཙོ་བོར་བྱ་བའི་རིགས། །འདོད་ལ་ཆགས་བྲལ་བྱ་བའི་ཕྱིར། །འདོད་པའི་ཉེས་པ་དཔག་མེད་པ། །གཞུང་ལས་འབྱུང་བ་རྟོགས་བྱས་ལ། །རྟག་ཏུ་ཚུལ་བཞིན་ཡིད་ལ་བྱ། །
མནོག་ཆུང་ཉེས་པ་ཆེ་བ་ནི། །བཏུང་བ་དུག་ཅན་ལྟ་བུར་བལྟ། །ཆོས་མིན་སྡུག་བསྔལ་རྒྱུར་གྱུར་པས། །རྩ་བའི་མེ་བཞིན་ཤེས་པར་བྱ། །འདོད་པ་ངོམས་པར་མི་བྱེད་ཅིང་། །སྐོམ་པའི་སྲེད་པ་འཕེལ་བྱེད་པ། །ལན་ཚྭའི་ཆུ་འཐུངས་ལྟ་བུ་ཞེས། །ཐུབ་པའི་དབང་པོའི་ལུང་ལས་འབྱུང་། །
འདོད་པ་གནོད་པ་མང་བ་ནི། །ཤིང་གི་རྩེ་མོའི་ཤིང་ཏོག་དང་། །ལམ་ཀའི་ཤིང་གི་ཤིང་ཏོག་འདྲ། །བྱིས་པ་རྣམས་ནི་ལན་མང་དུ། །འདོད་པའི་གཞི་ལ་ཆགས་པས་ཕུང་། །འདོད་པའི་སྐྱོན་དུ་མ་གྱུར་པ། །དེ་ནི་འགའ་ཡང་མེད་རིག་བྱ། །དེ་ཡི་ལས་ནི་སྡུག་བསྔལ་བསྐྱེད། །
ཐོག་མ་མེད་པའི་དུས་ནས་ཀྱང་། །འདོད་ལ་ཆགས་པས་རྟག་ཏུ་འཁོར། །འདོད་པའི་ཆུ་བོའི་ཤུགས་ཀྱིས་ནི། །འཁོར་བའི་འཁོར་ལོར་འཁོར་བྱེད་ཅིང་། །དེ་ཡིས་ཉེས་པ་གྲངས་མེད་སྐྱེད། །འཁོར་བའི་སྐྱོན་ནི་མཐའ་ཡས་ཀྱིས། །སྔོན་མཐའ་ད་ལྟར་ཕྱི་མཐའ་རུ། །གདུང་

བྱས་གདུང་བྱེད་གདུང་བྱེད་འགྱུར། །དེ་དོན་རྟག་ཏུ་བསྒོམ་བྱ་ཞིང་། །བཙོན་ར་ལྟ་བུའི་འཁོར་བ་ལ། །བཙོན་ལྟར་སྐྱོ་བ་གོམས་པར་བྱ། །ཇི་ལྟར་བཙོན་ནི་བཙོན་ར་ཡི། །སྡུག་བསྔལ་མང་མྱོང་དེ་དྲན་པས། །སྐྱོ་སེམས་རྟག་ཏུ་ངང་གིས་འབྱུང་། །ཇི་ལྟར་བཙོན་
ནི་བཙོན་ར་ལས། །འབྲོས་པའི་གླགས་ནི་བྱུང་བའི་ཚེ། །ཆེད་ཀ་གཞན་དང་མི་སྙོམས་པར། །དེ་ཡི་གནས་ནས་འབྲོས་པ་ལྟར། །འཁོར་བའི་རྒྱ་མཚོ་ཆེ་འདི་ལས། །རྒལ་བའི་གླགས་དག་བྱུང་གྱུར་ན། །ཆེད་དཀའ་གཞན་དང་མི་སྙོམས་པར། །སྲིད་པའི་ཁྱིམ་ནས་འབྱུང་བར་བྱ། །
བདག་གཞན་འཁོར་བའི་སྡུག་བསྔལ་དག །མཐར་དབྱུང་ཕྱིར་ཡང་བློ་ལྡན་དག །འདོད་པ་མེ་བཞིན་མྱུར་སྤངས་ཏེ། །ཆོས་སྒྲུབ་གཙོར་བྱ་མི་རིགས་སམ། །སྒྲུབ་པར་འདོད་པའི་གང་ཟག་གིས། །ས་ལྟར་ཆོས་ཉིད་གཞིར་གྱུར་པས། །དང་པོ་སྐྱབས་སུ་ལེགས་འགྲོ་ཞིང་། །དེ་ཡི་
བསླབ་པའི་ཆོས་ལ་བསླབ། །རྗེས་སུ་དྲན་དྲུག་རྟག་ཏུ་བསྒོམ། །སངས་རྒྱས་ཡོན་ཏན་མཐའ་ཡས་པ། །སྒྲུབ་པ་པོས་ནི་དྲན་བྱས་ལ། །དེ་ལ་དད་པ་བརྟན་པར་བྱ། །ཆོས་ཀུན་རྩ་བ་དད་པ་ཡིན། །རྩྭ་རྩེའི་ཟིལ་ཐིགས་ལྟ་བུར་ནི། །རིང་དུ་མི་གནས་ཚེ་འདིའི་ཕྱིར། །མཁས་པས་སྡིག་
པ་ཡོང་མི་སྤྱོད། །དེ་འབྲས་ངན་འགྲོའི་སྡུག་བསྔལ་འབྱུང་། །དགེ་བཅུ་ཚུལ་ཁྲིམས་དག་བྱ་ཞིང་། །སོ་སོར་ཐར་པའི་སྡོམ་དག་ཀྱང་། །ཅི་ནུས་རིམ་གྱིས་དག་པར་བསྲུང་། །དེ་ནི་འཕགས་ནོར་ཀུན་གྱི་རྒྱུ། །མང་ཐོས་ནོར་ཡིན་དེ་ལྡན་བྱ། །ཚུལ་ཁྲིམས་ནོར་ཉམས་གྱུར་པ་བཞིན། །
མང་ཐོས་ནོར་ལས་ཉམས་པའི་མི། །ཕྱི་ཕྱིར་འགྱོད་པར་གདོན་མི་ཟ། །རང་ལ་ང་རྒྱལ་གཞོམ་པ་དང་། །ཆོས་སྨྲ་བ་ལའང་གུས་པར་བྱ། །ཐེག་ཆེན་ཆོས་སྒོར་འཇུག་འདོད་པས། །མུན་སེལ་གདུང་བ་ཞི་བྱེད་པ། །ཉི་ཟླ་ལྟ་བུའི་བྱང་ཆུབ་སེམས། །བསྐལ་པར་འབད་པས་སྐྱེ་
ཡང་རུང་། །དང་པོར་དེ་བསྐྱེད་རབ་སྦྱངས་པས། །རི་རབ་ལྟ་བུར་བརྟན་པར་བྱ། །དེ་བསྐྱེད་སྦྱོང་བར་འདོད་པ་ཡིས། །བྱམས་སོགས་ཚངས་པའི་གནས་བཞི་པོ། །འབད་པས་རིང་དུ་བསྒོམ་བྱས་པས། །ཆགས་དང་ཕྲག་དོག་སྤང་བྱ་ཞིང་། །ཡང་དག་ཆོ་ག་བྱས་པས་སྐྱེ། །བག་

ཡོད་ཆོས་ལས་ཉམས་པའི་མི། །ཆོས་ཀུན་ལས་ནི་ཉམས་པར་འགྱུར། །ཆོས་དེ་རྣལ་འབྱོར་ཉིད་དུ་བྱ། །བུ་གཅིག་ཕ་མ་བུ་བསྲུང་དང་། །ཞར་བ་མིག་གཅིག་མིག་བསྲུང་དང་། །ལམ་ཞུགས་རྣམས་ཀྱི་དེད་དཔོན་དང་། །སྨན་ཤིང་ཆེན་པོའི་འབྲས་བུ་ལྟར། །བག་ཡོད་ཆོས་ཀྱིས་
སེམས་དེ་བསྲུང་། །སེམས་དེ་བྱང་ཆུབ་རྩ་བར་གསུངས། །བྱང་ཆུབ་སེམས་དཔའི་སྤྱོད་པ་ཡི། །དཀྱིལ་འཁོར་དག་ནི་ཐམས་ཅད་ཀྱང་། །བྱང་ཆུབ་སེམས་ཀྱི་མཐུ་ལས་བྱུང་། །སེམས་མཆོག་དེ་དང་མི་ལྡན་པས། །སྦྱིན་ལས་ཤེས་རབ་བར་དག་གི །སྤྱོད་པ་དྲུག་ལ་སློབ་བྱེད་ཀྱང་། །
རྟེན་དང་བྲལ་བ་ཉིད་ཀྱི་ཕྱིར། །ཕ་རོལ་ཕྱིན་པའི་མིང་ཡང་མེད། །ཉན་ཐོས་བསེ་རུ་དྲུག་པོ་བཞིན། །བསོད་ནམས་ཐམས་ཅད་སྡུད་པ་ཡི། །ཏིང་འཛིན་སེམས་དེ་མ་བསྐྱེད་ན། །བསམ་གཏན་བཞི་དང་གཟུགས་མེད་བཞི། །ཏིང་འཛིན་ལན་མང་ཐོབ་འགྱུར་ཀྱང་། །སྲིད་པའི་མཚོ་
ལས་རྒལ་མི་ནུས། །བྱང་ཆུབ་སེམས་ཀྱི་བཞོན་པ་ལ། །བརྟེན་ནས་འཆི་བ་རྗེས་དྲན་གྱི། །ལྕག་ནི་ཡང་དང་ཡང་བརྡབ་ཅིང་། །སྲིད་ལམ་འཇིགས་པ་ཆེ་བ་ཡི། །ལམ་འདི་མྱུར་དུ་འདའ་བྱས་ལ། །འཇིགས་མེད་སངས་རྒྱས་སར་ཕྱིན་བྱ། །སྐྱབས་འགྲོ་ལྷག་པའི་ཚུལ་ཁྲིམས་
དང་། །སྨོན་པའི་གཞི་ལ་གནས་པ་ཡིས། །སེམས་དཔའི་སྡོམ་པ་རབ་བཟུང་ཞིང་། །ཕ་རོལ་ཕྱིན་དྲུག་ལ་སོགས་པ། །སེམས་དཔའི་སྤྱོད་པ་ཐམས་ཅད་ལ། །ཅི་ནུས་རིམ་གྱིས་ཚུལ་བཞིན་སྤྱད། །འཇུག་པའི་སྤྱོད་པ་གཙོར་སྟོན་པའི། །མདོ་སྡེ་བལྟ་ཞིང་བསྟན་བཅོས་མཉན། །
ཆོས་ཀྱིས་མི་ངོམས་མཚོ་འདྲའི་མིས། །རིན་ཆེན་ནོར་བུའི་རྒྱ་མཚོ་བཞིན། །ཡོན་ཏན་ཀུན་འབྱུང་འབྱུང་གནས་གང་། །ཐེག་ཆེན་གཞུང་ལས་བསྔགས་པ་ཡི། །བཤེས་གཉེན་རིང་དུ་ཚུལ་བཞིན་བསྟེན། །རྒྱ་མཚོ་ཆེན་པོར་ཆུ་བོ་བཞིན། །དེ་ཡི་རྟེན་ལ་ཡོན་ཏན་འདུ། །སེམས་དཔའི་
སྤྱོད་ལ་དེ་མཁས་འགྱུར། །སེམས་དཔའ་སྤྱོད་པ་ཆེ་བ་ལ། །དད་པ་ཤིན་ཏུ་བརྟེན་པར་བྱ། །བག་ཡོད་དྲན་དང་ཤེས་བཞིན་དང་། །ཚུལ་བཞིན་ཡིད་ལ་བྱེད་པ་ཡིས། །ཀུན་ནས་ཉོན་མོངས་དམིགས་པ་ལ། །རང་སེམས་ཡན་པ་ཕྱིར་བཟློག་སྟེ། །སངས་རྒྱས་ཆོས་ཀྱི་དམིགས་པ་ལ། །

རྟག་ཏུ་གཞག་པ་ཉིད་དུ་བྱ། །དེ་ལྟར་སློབ་པའི་རྒྱལ་སྲས་གང་། །དེ་ཡི་སྤྱོད་ལས་ཉམས་མི་འགྱུར། །དགེ་བའི་བཤེས་ཀྱི་གདམས་པ་བཞིན། །རྩོམ་པ་དག་ནི་ཐམས་ཅད་ཀུན། །ཐེག་ཆེན་གཞུང་དང་བསྟུན་དེ་ཙམ། །གྲོས་ཀྱི་ཕུགས་ནི་ཆོས་ལ་གཏད། །ཆོས་
དང་འགལ་ན་གང་ཡང་སྤང་། །ཆོས་དང་མཐུན་པའི་སྤྱོད་པ་སྤྱད། །བློ་ལྡན་གང་ཞིག་རྩོམ་པ་ཀུན། །ཆོས་གཙོར་བྱེད་པ་དཔལ་ལྡན་པོ། །དེ་ལ་འདི་དང་གཞན་དུ་ཡང་། །བདེ་བར་འགྱུར་བར་ཐེ་ཚོམ་མེད། །ཐོས་པ་ཉུང་དང་འཁོར་སྤངས་ཤིང་། །བས་མཐའ་དགོན་པར་
གནས་པར་བྱ། །ཞི་བ་དང་ནི་དུལ་བ་ཡི། །སྦྱོར་བ་དེ་ལ་བརྩོན་འགྲུས་བརྩམ། །ཁྱིམ་ནི་གང་ལའང་མི་བལྟ་ཞིང་། །གཞན་སྐྱོན་མི་བརྟག་རང་སྐྱོན་བལྟ། །གཞན་གྱི་སྙིང་ལ་མི་འབབ་པའི། །ཚིག་ཀྱང་མཁས་པས་རིང་དུ་སྤང་། །འདི་དག་དང་ལྡན་རྒྱལ་སྲས་གང་། །ཕྱི་
མཐའ་དུས་སུ་མི་ཉམས་པར། །བདེ་བར་ཐར་ཞེས་ཐུབ་པས་གསུངས། །གཞན་བརྙས་ཁྱད་དུ་གསོད་ཅིང་སྨོད། །དེ་ཡིས་བདག་ཉིད་ཉམས་པར་འགྱུར། །ཀུན་ལ་སྟོན་པའི་འདུ་ཤེས་སྦྱང་། །ཆོས་སྒོར་ཞུགས་དང་རྒྱལ་སྲས་ལ། །ཁྱད་པར་དུ་ཡང་བློ་དེ་སྦྱང་། །རང་བྱུང་
འཆིང་བ་དམ་པོ་གང་། །རྙེད་པ་དང་ནི་བཀུར་སྟི་སྟེ། །དེ་ཡིས་གཞི་ལ་ཆགས་པ་སྤང་། །འཆིང་བ་དེ་ལས་གྲོལ་བ་གང་། །མེ་ཡི་ནང་གི་པདྨ་བཞིན། །མཁས་པའི་ངོ་མཚར་གནས་སུ་འགྱུར། །རབ་ཏུ་བྱུང་བའི་སྒྲུབ་པ་པོས། །སངས་རྒྱས་ཆོས་ཀུན་འབྱུང་བའི་རྒྱུ། །འཕགས་
པའི་རིགས་བཞི་ལ་གནས་པས། །འདོད་པ་ཆུང་ཞིང་ཆོག་ཤེས་བྱ། །སྦྱངས་པའི་ཡོན་ཏན་བཅུ་གཉིས་ལ། །དེ་ཡིས་བསླབ་པར་ཐུབ་པས་གསུངས། །ཡོ་བྱད་བསྙུངས་པ་ལ་གནས་ཤིང་། །ཡོངས་སུ་འཛིན་པ་ཐམས་ཅད་ལ། །རྒྱབ་ཀྱིས་ཕྱོགས་ཏེ་གནས་པར་བྱ། །རྒྱུས་མེད་
ཡུལ་དུ་གྲོང་རྒྱུ་ཞིང་། །བྱ་བཞིན་འཚོ་བ་འཕྲལ་བཙལ་བྱ། །རང་སེམས་སྦྱོང་བ་ལྷུར་ལེན་པ། །ངོ་མཚར་ཐུབ་པའི་མདོ་ལས་གསུངས། །གདུལ་དཀའ་སེམས་རྒྱུད་ཡིན་བཏང་ནས། །གྲགས་སོགས་འཇིག་རྟེན་ཆོས་ཀྱི་ཕྱིར། །ཉིན་མཚན་གྱི་ནི་དུས་ཀུན་དུ། །རྩོད་པ་སློབ་

ཕྱིར་རྩོད་པ་སྦྱོང་། །ཉན་བཤད་ལ་སོགས་ཆོས་ལ་འཇུག །ཚེ་ནི་དོན་མེད་མྱུར་དུ་འདའ། །མཆོག་གི་ལམ་ལས་དེ་ཉམས་འགྱུར། །འཆི་བདག་ཉེ་བར་གྱུར་པའི་ཚེ། །འགྱོད་པས་དེ་རྒྱུད་གདུང་བར་འགྱུར། །འཇིག་རྟེན་ཆོས་ལ་མཉམ་སེམས་བསླབ། །དེ་ཡིས་བྱིས་པ་སླུ་བར་
བྱེད། །འཇིག་རྟེན་གང་གི་བློ་ལ་ཡང་། །བདག་གི་མིང་ཡང་མི་གནས་ཤིང་། །བདག་གི་ལུས་ཀྱི་རུས་པའི་རྡུལ། །ཤིན་ཏུ་ཕྲ་བའང་འཇིག་རྟེན་ན། །གནས་པར་མི་འགྱུར་དེ་དུས་འབྱུང་། །དེ་ཚེ་རྙེད་དང་བཀུར་སྟི་དང་། །གྲགས་སོགས་མེད་འཇིགས་སྨོས་ཅི་དགོས། །དེ་ཚེ་བདག་ལ་
གང་དབེན་པ། །བློ་དང་ལྡན་པས་དཔྱད་པ་ཐོབ། །ལས་དང་པོ་ཡི་གང་ཟག་གིས། །ལུས་དབེན་པ་ལ་མ་བརྟེན་པར། །སེམས་དབེན་རྙེད་པར་དཀའ་བའི་ཕྱིར། །འདྲེ་སྤངས་ནང་དུ་གནས་པར་བྱ། །འདྲེས་པས་འདྲིས་ཤིང་ཆགས་པར་བྱེད། །དེ་ཡིས་འཁོར་བའི་འཁོར་ལོ་བསྐོར། །
དེ་ལྟར་འདྲེ་བ་སྤངས་པ་ལ། །རྟག་ཏུ་བག་དང་ལྡན་པར་བྱ། །གཉིད་ལ་དགའ་སྤངས་ཆོས་ཀུན་ཕྱིར། །དེར་གནས་དེ་ཡིས་བརྩོན་འགྲུས་བརྩམ། །དེ་ཡིས་ཆོས་ཀུན་རྫོགས་པར་བྱེད། །དྲན་པ་ཉེར་གཞག་བཞི་བསྒོམ་ཞིང་། །ཕྱིན་ཅི་ལོག་བཞི་རབ་ཏུ་སྤང་། །སྨྲ་ལ་དགའ་ཡང་དོན་
བསམ་བྱ། །བུ་རམ་ཤིང་ཤུན་སྙིང་པོ་ཅི་ཡང་མེད། །དགའ་བར་བྱ་བའི་རོ་ནི་ནང་ན་འདུག །ཤུན་པ་ཟོས་པས་མིས་ནི་བུ་རམ་རོ། །ཞིམ་པོ་རྙེད་པར་ནུས་པ་མ་ཡིན་ནོ། །ཤུན་པ་དེ་བཞིན་འདི་ལ་སྨྲ་བ་སྟེ། །རོ་ལྟ་བུ་ནི་འདི་ལ་དོན་སེམས་ཡིན། །དེ་ལྟ་བས་ན་མི་རིགས་སྨྲ་སྤངས་ཏེ། །
རྟག་ཏུ་བག་ཡོད་ཀྱིས་ལ་དོན་སོམས་ཤིག །ནམ་མཁའི་མཐའ་ཀླས་སེམས་ཅན་གྱི། །ཆེད་དུ་གོ་བགོས་རིག་མཛོད་ལ། །འགའ་ཡི་ཆེད་དུ་སྒྲུབ་པ་ཡི། །སྤྱོད་པ་དག་ལ་ཉམས་མི་བྱ། །འཁོར་དང་རྙེད་པ་བཀུར་སྟི་དང་། །གྲོགས་འདོད་པ་ཡི་བློས་བསྐྱེད་ནས། །སྨྲ་ལ་དགའ་བའི་
སེམས་བྱུང་ན། །སྒྲུབ་པའི་བར་ཆད་བྱེད་པའི་གདོན། །རང་གི་སེམས་དེ་ཡིན་རིག་མཛོད། །མཛའ་བཤེས་ལ་སོགས་གང་ལ་ཡང་། །གཅེས་དགོས་མཁོ་བ་ཆུང་བར་བྱ། །མཁོ་བའི་སྒོ་ནས་ཉམས་འགྱུར་ཞིང་། །ཆོས་ལའང་བར་ཆད་མང་དུ་འབྱུང་། །ལས་ལ་དགའ་བ་རབ་སྤངས་ཏེ། །

གདུལ་དཀའི་སེམས་གདུལ་དགེ་བ་སྤྱད། །སྤྲོས་ལ་དགའ་བ་རབ་སྤངས་ཏེ། །བཟོད་ལ་ངེས་པས་བདག་ཉིད་བརྒྱན། །བཟོད་པའི་ཆེ་བ་དཔག་ཏུ་མེད། །རྙེད་དང་བཀུར་སྟི་ལ་སོགས་པའི། །ཆོས་དྲུག་ཉེས་པ་མཐོང་བར་བྱ། །སེམས་དཔའི་སྤྱོད་པ་གྲངས་མེད་
ཀྱང་། །བསྡུ་ན་ཐབས་དང་ཤེས་རབ་གཉིས། །ཐབས་དང་ཤེས་རབ་ཕ་མ་ཡིས། །སངས་རྒྱས་སྲས་ནི་སྐྱེད་པར་བྱེད། །བདེར་གཤེགས་སྲས་ནི་དོན་གཉེར་བས། །ཐབས་དང་ཤེས་རབ་ཕ་མ་ཡིན། །སྒྲུབ་པ་འདི་གཉིས་འབྲེལ་པར་བྱ། །སྒྲུབ་པ་འདི་གཉིས་བྲལ་གྱུར་ན། །སངས་
རྒྱས་སྲས་སྐྱེད་མི་ནུས་ཏེ། །སྐྱེས་པ་དང་ནི་བུད་མེད་དག །གཅིག་ལ་གཅིག་ནི་ཟླ་མེད་བཞིན། །གང་ཕྱིར་ཡ་བྲལ་འཆིང་བ་གསུངས། །ཆོས་ཀུན་རྩ་བར་རབ་བསྟན་པའི། །འདུན་པ་རྟག་ཏུ་བསྒོམ་བྱ་ཞིང་། །ཟླ་བ་ཡར་གྱི་ངོ་བཞིན་དུ། །སྒྲུབ་བློ་རྟག་ཏུ་འཕེལ་བར་བྱ། །སྟོབས་
དང་ལྡན་པ་ཉིད་དུ་བྱ། །སྒྲུབ་པའི་བློ་ནི་འཕེལ་འགྱུར་ན། །རླན་ལྡན་རི་རྩེའི་རྩ་ཤིང་བཞིན། །སྒྲུབ་པ་འཕེལ་བར་གདོན་མི་ཟ། །སྒྲུབ་བློ་སྟོབས་དང་ལྡན་གྱུར་ན། །སྤྱོད་པའི་ཁུར་ལྕི་ཡུན་རིང་དུ། །ཁུར་ཡང་སྐྱོ་ཞིང་ངལ་མི་འགྱུར། །ཆོས་སྤྱོད་རྣམ་བཅུ་ལ་སོགས་པའི། །ཚོགས་བསག་
སྒོ་ནི་ཐམས་ཅད་ནས། །ཚོགས་གཉིས་བསག་པ་ལྷུར་བླང་བྱ། །སློབ་པའི་དུས་ན་ཆེ་བ་གང་། །དེ་ཡི་རྟེན་ལ་ཆོས་ཀུན་སྐྱེ། །སེམས་ཅན་དོན་ལ་མཐུ་ལྡན་འགྱུར། །སྐུ་དང་ཡེ་ཤེས་འབྲས་བུ་འབྱུང་། །ཐབས་དང་ཤེས་རབ་སྙིང་པོ་གང་། །ཞི་གནས་ལྷག་མཐོང་རྣལ་འབྱོར་བསྒོམ། །འཇིག་
རྟེན་འདས་དང་འཇིག་རྟེན་གྱི། །ཆོས་ཀུན་དེ་གཉིས་འབྲས་བུར་གསུངས། །མངོན་ཤེས་མཐུ་དང་ལྡན་བྱ་དང་། །ཟག་མེད་ལམ་ནི་བསྐྱེད་པའི་ཕྱིར། །དང་པོ་ཞི་གནས་བསྐྱེད་པར་བྱ། །ཞི་གནས་ཚོགས་ནི་ཉམས་པ་ཡིས། །རིང་དུ་འབད་ཀྱང་འགྲུབ་མི་འགྱུར། །ཏིང་འཛིན་ཚོགས་ལ་
ལེགས་པར་བསླབ། །ཏིང་འཛིན་གནོད་པ་ཀུན་སྤངས་ཏེ། །མཐུན་པའི་དམིགས་པ་གང་ཡིན་པ། །སྤོང་བའི་འདུ་བྱེད་བརྒྱད་ལྡན་པར། །དེ་དོན་གཉེར་བས་གཙུབ་ཤིང་ལྟར། །ཆགས་པའི་རླན་དང་བྲལ་བ་ཡིས། །རྟག་ཏུ་རྒྱུན་དང་ལྡན་པར་བསྒོམ། །ཉོན་མོངས་གཡུལ་ལས་རྒྱལ་

བྱའི་ཕྱིར། །ཞི་གནས་ལ་བརྟེན་ལྷག་མཐོང་བསྒོམ། །ལྷག་མཐོང་གྲུབ་པར་གྱུར་པ་ཡིས། །མཉམ་གཞག་ལངས་པའི་དུས་དག་ཏུ། །སྒྱུ་མའི་དཔེ་བརྒྱད་ལྟ་བུར་ནི། །ཆོས་ཀུན་ལྟ་བ་གོམས་བྱས་པས། །རྗེས་ཀྱིས་རྟོགས་པ་སྦྱང་བ་དང་། །ཐབས་ལ་སློབ་པ་གཙོ་བོར་བྱ། །
མཉམ་པར་གཞག་པའི་དུས་དག་ཏུ། །ཞི་གནས་ལྷག་མཐོང་ཆ་མཉམ་ཞིང་། །དེ་རྒྱུན་རྟག་ཏུ་གོམས་པར་བྱ། །དེ་ལྟར་ཚུལ་བཞིན་བསླབས་པའི་མཐུས། །དྲོད་སོགས་ངེས་འབྱེད་བཞི་ཐོབ་ནས། །ས་བཅུའི་ཡེ་ཤེས་རིམ་གྱིས་སྐྱེད། །དེ་ཡིས་མྱུར་དུ་དེ་འཚང་རྒྱ། །ནོར་བུ་
བཞིན་དུ་གཞན་གྱི་དོན། །ལྷུན་གྱིས་གྲུབ་པར་དེ་བྱེད་འགྱུར། །ཤིན་ཏུ་བསྡུས་ན་གོ་མི་འགྱུར། །ཤིན་ཏུ་སྤྲོས་ན་གཞུང་མངས་འགྱུར། །བློ་དང་ལྡན་པས་ལེགས་དཔྱད་ན། །གོ་བའི་ཚད་དུ་བདག་གིས་གདམས། །བདག་གི་བླ་མ་ཡོན་ཏན་མང་མངའ་རྒྱ་མཚོ་ཆེ་དང་མཚུངས། །འཇིག་
རྟེན་ཆོས་ལ་མི་གཟིགས་ཉིད་གཞན་དོན་ཕྱིར་སྒྲུབ་པ་སྙིང་པོར་འཛིན། །འཇིག་རྟེན་མ་རིག་གིས་ལོང་ཤེས་རབ་མིག་འབྱེད་མཐུ་མངའ་དུ་མ་ཡིས། །གདམས་པའི་དོན་དང་གཙུག་ལག་བསྟན་བཅོས་ལས་བཤད་བསླབ་དགོས་ཞེས། །གཞན་ལ་ཕན་པ་འབྱུང་སྲིད་བསམ་པས་
ཡི་གེར་གནས་པར་བྱས། །དད་དང་ཤེས་རབ་ནོར་ལྡན་སྒྲུབ་པ་སྙིང་པོར་བྱེད་འདོད་གང་། །ཐེག་པ་ལམ་གྱི་སྒྲུབ་ཐབས་ཡང་དག་ཡི་གེར་བསྡུས་འདི་ལ། །གལ་ཏེ་མོས་པ་ཡོད་སྲིད་འདི་བཞིན་བྱས་ཏེ་རང་གཞན་དོན་དུ་འགྱུར། །ཐེག་པ་ཆེན་པོའི་ལམ་གྱི་སྒྲུབ་ཐབས་ཡི་གེར་བསྡུས་
པ། སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་དེ་ཉིད་དང་། ལོ་ཙཱ་བ་དགེ་སློང་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ། མ་ཧཱ་ཡཱ་ན་པ་
ཐཱ་སཱ་དྷ་ན་སཾ་གྲ་ཧ། བོད་སྐད་དུ། ཐེག་པ་ཆེན་པོ་ལམ་གྱི་སྒྲུབ་ཐབས་ཤིན་ཏུ་བསྡུས་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདས་དང་ད་ལྟར་བདེ་གཤེགས་ཀུན། །སྐྱེད་པའི་ཡབ་དང་ཡུམ་གྱུར་པ། །སྒྲུབ་པའི་ཆོས་ལ་རབ་གུས་ཤིང་། །ངག་

ཡིད་དང་བས་ཕྱག་འཚལ་ལོ། །བསམ་གྱིས་མི་ཁྱབ་ཆེ་བ་མངའ། །བླ་མ་བྱང་ཆུབ་ཐོབ་འདོད་ན། །བྱང་ཆུབ་བསྒྲུབ་ལ་རག་ལས་པས། །སྒྲུབ་པ་ལྷུར་བླང་སྙིང་པོར་བྱ། །དེ་ཡིས་གསུམ་ལ་སྐྱབས་འགྲོ་ཞིང་། །མི་དགེ་ཀུན་ལས་ལྡོག་པ་ཡིས། །ལྷག་པའི་ཚུལ་
ཁྲིམས་དག་པར་བསྲུང་། །བྱང་ཆུབ་སེམས་ཀྱི་བཞོན་པ་ལ། །བརྟེན་ནས་འཆི་བ་རྗེས་དྲན་གྱི། །ལྕག་ནི་ཡང་དང་ཡང་བརྡབ་ཅིང་། །སྲིད་ལམ་འཇིགས་པ་ཆེ་ས་ཡི། །ལམ་འདི་མྱུར་དུ་འདས་བྱས་ལ། །འཇིགས་མེད་སངས་རྒྱས་སར་ཕྱིན་བྱ། །སྨོན་པའི་གཞི་ལ་གནས་པ་
ཡིས། །སེམས་དཔའི་སྡོམ་པ་རབ་བཟུང་ཞིང་། །ཕ་རོལ་ཕྱིན་དྲུག་ལ་སོགས་པ། །སེམས་དཔའི་སྤྱོད་པ་ཚུལ་བཞིན་སྤྱད། །དེ་བསྡུས་ཐབས་དང་ཤེས་རབ་ལ། །མི་གནས་མྱ་ངན་འདས་ཕྱིར་བསླབ། །དེ་ཡི་སྙིང་པོ་རྣམ་པ་གཉིས། །མེ་དོན་གཉེར་བས་གཙུབ་ཤིང་ལྟར། །
ཆགས་པའི་ལྡན་དང་བྲལ་བ་ཡིས། །རྟག་ཏུ་རྒྱུན་ལྡན་གུས་པར་བསྒོམ། །དེ་ཡིས་མྱུར་དུ་དེ་འཚང་རྒྱ། །ནོར་བུ་བཞིན་དུ་གཞན་གྱི་དོན། །ལྷུན་གྱིས་གྲུབ་པར་དེ་བྱེད་འགྱུར། །ཐེག་ཆེན་སྒྲུབ་ཐབས་བསྡུས་འདི་ལ། །སྐལ་ལྡན་རྣམས་ཀྱིས་ལེགས་པར་བསླབ། །སྙིང་ལ་
བདུད་རྩིའི་ཐིགས་པ་ཆགས། །བློ་མ་སྦྱངས་པས་བློས་རེག་དཀའ། །འདི་བསྡུས་དགེ་བས་འགྲོ་བ་ཀུན། །ཐེག་ཆེན་སྒྲུབ་པ་ལྷུར་ལེན་ཤོག །བདག་ཀྱང་སངས་རྒྱས་ས་ཐོབ་ནས། །འགྲོ་བའི་འདྲེན་པ་བྱེད་པར་ཤོག །ཐེག་པ་ཆེན་པོ་ལམ་གྱི་སྒྲུབ་ཐབས་ཤིན་ཏུ་བསྡུས་པ། སློབ་
དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་དེ་ཉིད་དང་། ལོ་ཙཱ་བ་དགེ་སློང་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄། །རང་གི་བྱ་བའི་རིམ་པ་བསྐུལ་བ་དང་བཅས་པ་ཡི་གེར་བྲིས་པ་བཞུགས། །
༄༅༅། །རང་གི་བྱ་བའི་རིམ་པ་བསྐུལ་བ་དང་བཅས་པ་ཡི་གེར་བྲིས་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འཁོར་བ་ཐོག་མ་མེད་པ་ནས། །ཉོན་མོངས་བག་ཆགས་ཚད་མེད་པས། །ཡུལ་ངན་རྐྱེན་དང་ཕྲད་པ་ལས། །ཉོན་མོངས་སྡུག་བསྔལ་

སྐྱེ་བའི་ཚེ། །རང་གི་དྲན་པའི་ཕྱིར་དུ་འདི། །བྱས་པས་དེ་ཚེ་དྲན་པར་ཤོག །ནང་གི་སེམས་ནི་དུལ་གྱུར་ན། །ཕྱི་ཡི་དགྲ་འདིས་གནོད་མི་ནུས། །རང་གི་ནང་སེམས་གཡོ་བ་ན། །ཕྱི་ཡི་དགྲ་འདིས་རྐྱེན་བྱས་ནས། །ནང་གི་དགྲ་འདིས་རང་རྒྱུད་བསྲེག །དེས་ན་ནང་གི་དགྲ་འདི་གཞོམ། །དུག་
ཅན་སྣོད་ཀྱིས་ཟས་བརླག་བཞིན། །ནང་གི་དྲི་མས་དགེ་ཚོགས་བརླག །གཉེན་པོ་ཆུ་ཡིས་ཁྲུས་བྱས་ནས། །དག་པས་བདེ་བ་ཆེན་པོ་འཐོབ། །གང་ན་གནས་ཚེ་གང་གི་ཚེ། །གང་གི་དྲི་མ་ལྡང་བ་དང་། །ནང་གི་དགྲ་འདི་འབྱུང་བའི་ཚེ། །ཐབས་ནི་སྣ་ཚོགས་གསུངས་པས་
སྤང་། །དགྲ་གཞོམ་དྲི་མ་བཀྲུ་བའི་ཕྱིར། །དེ་ཚེ་འབད་པ་ཆེན་པོ་བྱ། །གང་གིས་རང་གི་རྒྱུད་འདི་ལ། །ནང་དུ་བལྟས་ཏེ་རང་སེམས་བརྟག །དེ་ཚེ་ཡུལ་ལ་ཤེས་པ་སྐྱེ། །ཤེས་པ་སྐྱེ་བའི་ཡུལ་རྣམས་གསུམ། །ཉོན་མོངས་བར་མ་དགེ་བ་སྐྱེ། །རྒྱུ་རྐྱེན་ཡུལ་གྱི་བྱེ་བྲག་
གིས། །ཉོན་མོངས་སྐྱེ་བ་དག་ལ་གསུམ། །ཆེན་པོ་འབྲིང་དང་ཆུང་ངུའོ། །གཉེན་པོའི་རིམ་པའང་དེ་བཞིན་ཏེ། །ཆེན་པོ་སྐྱེ་བའི་ཡུལ་དེ་ལ། །བརྟེན་ཏེ་ཚོགས་ཆེན་འབད་པས་སྐྱེ། །འབྲིང་གི་ཡུལ་ལ་འབྲིང་ཡིན་ཏེ། །ཆུང་ངུ་ལ་ནི་ཆུང་ངུའོ། །ཆེན་པོ་ཀུན་ལ་སྐྱེས་ན་
མཆོག །བར་མ་ལུང་མ་བསྟན་པ་ཡང་། །དྲན་པས་ཟིན་པའི་སེམས་དེ་ཡིས། །ཀུན་སློང་རྗེས་ཀྱིས་དགེ་བར་བསྒྱུར། །ཐབས་སྒོ་སྣ་ཚོགས་པ་ཡིས་སོ། །དགེ་བ་ཆེ་འབྲིང་ཆུང་ངུ་དག །ངང་གིས་སྐྱེས་པའི་ཡུལ་དེ་ལ། །སྦྱོར་བ་དངོས་དང་རྗེས་དག་ལས། །ཁྱད་འཕགས་
བསོད་ནམས་ཀུན་བསྔོ་བྱ། །ཤེས་ན་གང་ལའང་ཚོགས་འཕེལ་འགྱུར།