Luận tạng Tây Tạng (Tengyur) — Tập 60

ོར་ཧཱུཾ་དང་བཅས་པས་དུག་གམ་སྦྱར་བའི་དུག་ཤིང་སྐམ་པོ་བཞིན་ཉེ་བར་འབར་བར་བསམས་ཏེ། དེ་ལྟ་བུས་ནི་
དུག་དང་སྦྱར་བའི་དུག་ཐམས་ཅད་ཉེ་བར་འབར་བར་འགྱུར་རོ། །མཐེའུ་ཆུང་གཉིས་པོ་དེ་ཉིད་ཀྱིས་བསྡུ་བའི་ཚུལ་དུ་བྱས་པས་ནི་དུག་དང་སྦྱར་བའི་དུག་ཐམས་ཅད་བཅིང་བར་འགྱུར་རོ། །དེ་བཞིན་དུ་མཐེའུ་ཆུང་གཉིས་ཀྱིས་བསྣུན་པའི་ཚུལ་དུ་བྱས་པ་ནི་དུག་དང་སྦྱར་བའི་དུག་

ཐམས་ཅད་དབང་པོའི་གདུ་བུས་བཅིང་བར་འགྱུར་རོ། །ལྕེ་ལ་ཧཱུཾ་ལས་རྡོ་རྗེ་དཀར་པོ་བསམས་ལ་དེ་ལ་ཡི་གེ་ཧཱུཾ་ཟླ་བའི་མདོག་ཅན་གྱི་འོད་ཟེར་འབར་བ་བསམས་ལ་བ་དན་གསུམ་པ་གཉིས་ཀྱི་སྙིམ་པས་དུག་དང་སྦྱར་བའི་དུག་ཐམས་ཅད་བསལ་བའི་ཚུལ་དུ་བྱ་ཞིང་དུག་ཀྱང་སྦྱར་བའི་
དུག་བཟའ་བར་བྱའོ། །ཡི་གེ་བཾ་ལས་སྦྱར་བའི་དུག་གི་སྟེང་དུ་ཆུའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་ལས་ཟླ་བའི་འོད་ཟེར་རྣམ་པར་འཕྲོ་བ་དང་། ཡི་གེ་ཧཱུཾ་གིས་དུག་དང་སྦྱར་བའི་དུག་བདུད་རྩིར་བྱས་པར་བསམས་ལ། བ་དན་གསུམ་པའི་ལག་པ་གཉིས་ཀྱིས་སྙིམ་
པ་བྱས་པ་བཏུང་བའི་ཚུལ་དུ་བྱས་ཏེ། དེ་ལྟ་བུས་ནི་བདུད་རྩིར་བྱས་པར་འགྱུར་རོ། །གདོན་ཐམས་ཅད་དབབ་པ་དང་། བཅིང་བ་དང་། དམ་ཚིག་འཛིན་དུ་གཞུག་པ་དང་། རབ་ཏུ་འདུལ་བ་དང་། བསྲུང་བ་ལ་ནི་ཞེས་བྱ་བ་གོ་བར་ཟད་དོ། །དེ་ཇི་ལྟར་འགྱུར་ཞེ་ན། རྡོ་རྗེ་གར་གྱི་
གདོན་ལས་ཐར་བས་སོ། །དེ་ལ་འདིའི་མཚན་ཉིད་འདི་ཡིན་ཏེ། རྡོ་རྗེ་བསྡམས་པའི་མཛུབ་མོ་གཉིས་པ་བཀུག་ལ་མཐེ་བོང་གཉིས་བསྒྲེངས་ནས་ཕྱེ་སྟེ། མཆེ་བར་བྱ་བ་ནི་རྡོ་རྗེ་གནོད་སྦྱིན་གྱི་ཕྱག་རྒྱ་སྟེ། དེས་ལག་མཐིལ་དལ་བུས་བརྡབ་པ་དང་། མཛུབ་མོའི་སོར་མོ་བཙིར་བ་དང་།
གུང་མོའི་རྡོ་རྗེ་བསྡམས་པ་དང་། བྱབ་ཅིང་ཕྱག་རྒྱ་མྱུར་དུ་དགྲོལ་བ་དང་། སོར་མོ་ལྷག་མ་རྡོ་རྗེ་གཙུག་ཏོར་དུ་བྱ་བའོ། །འདིས་ནི་འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། རྡོ་རྗེ་བསྡམས་པ་བཅིངས་ཏེ། མཛུབ་མོ་གཉིས་བཀུག་པ་ནང་དུ་
བཅུག་སྟེ། མཐེ་བོང་གཉིས་ཁ་ཕྱེ་ལ་ཕྱེ་བའི་ཚུལ་གྱིས་རང་གི་ཁར་བཞག་ནས་རྡོ་རྗེ་གནོད་སྦྱིན་དུ་བདག་ཉིད་བསམས་ན་ལག་མཐིལ་གཉིས་དལ་གྱིས་བརྡབ་ཅིང་གདོན་གྱིས་ཟིན་པའི་སྙིང་གར་ཡང་རླུང་དང་མེའི་དཀྱིལ་འཁོར་གྱི་དབུས་ན་གནས་པའི་རྡོ་རྗེ་གནོད་སྦྱིན་རང་བཞིན་
དུ་དྲག་པ་འོད་ཟེར་འབར་བ་ཀུན་དུ་འཁྲུགས་པ་ཡིད་ཀྱིས་བཅུག་ན་དེས་གནོད་སྦྱིན་གྱིས་བཟུང་བའི་ལུས་ལ་གནས་པའི་གདོན་ཤིང་སྐམ་པོ་ལྟར་འབར་ཞིང་སྲེག་པར་བསམ་པར་བྱས་ཏེ། དེ་ལྟ་བུས་ནི་འབར་བར་འགྱུར་རོ། །ཕྱག་རྒྱ་འདི་ཉིད་ཀྱིས་མཛུབ་མོ་འདི་ཉིད་ཀྱི་སེན་

མོ་ཕན་ཚུན་བཙིར་བའི་ཚུལ་དུ་བྱས་ཏེ། དེ་ལྟ་བུས་ནི་རྡོ་རྗེ་ལྕགས་སྒྲོག་གིས་གདོན་བཅིང་བར་འགྱུར་རོ། །ཕྱག་རྒྱ་འདི་ཉིད་གུང་མོ་གཉིས་རྩེ་མོ་སྦྱར་ལ་བསྟན་ན་ཐམས་ཅད་དུ་གདོན་དམ་ཚིག་འཛིན་པར་འགྱུར་རོ། །དེ་བཞིན་དུ་རྡོ་རྗེ་གནོད་སྦྱིན་གྱི་ཕྱག་རྒྱ་བྱས་ལ།
གདོན་ལུས་ལས་བསལ་བའི་བསམ་པས་གདོན་འབྱུང་བའི་ཚུལ་དུ་བྱས་ནས་མྱུར་དུ་བཀྲོལ་ན་དེ་ལྟ་བུས་ནི་གདོན་ཐམས་ཅད་འདུལ་བར་འགྱུར་ཏེ། གདོན་ལས་ཐར་ཏོ་ཞེས་བྱ་བའི་ཐ་ཚིག་གོ། །རྡོ་རྗེ་གནོད་སྦྱིན་གྱི་ཕྱག་རྒྱ་དེ་གཉིས་ཀྱིས་མཛུབ་མོ་དང་། མཐེ་བོང་གི་གདོང་སྦྱར་ལ་ཕྱག་རྒྱ་དེ་
བསྒྲུབ་པར་བྱ་བའི་སྤྱི་གཙུག་ཏུ་གཞག་པར་བྱས་ཏེ། དེ་ལྟ་བུས་ནི་བསྲུང་བར་འགྱུར་རོ། །གདོན་བསལ་ནས་བསྒྲུབ་པར་བྱ་བ་ཕྱག་རྒྱ་འདིས་བསྲུང་བར་བྱའོ་ཞེས་སྟོན་པ་ཡིན་ནོ། །ཐམས་ཅད་བཅིང་བ་དང་། ཐར་པ་དང་། དྲལ་བ་དང་། ལྟུང་བར་བྱ་བ་དང་། བསླང་བ་ལ་ནི་ཞེས་བྱ་བ་ནི་
གོ་བར་སླའོ། །དེ་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་ཁྲོ་བོ་ཆེན་པོས་སོ། །ཞེས་བྱ་བ་གསུངས་སོ། །འདིའི་མཚན་ཉིད་ནི་འདི་ཡིན་ཏེ། བ་དན་གསུམ་པ་གཉིས་བཀན་ཏེ། མཛུབ་མོ་ཁས་སྦུབ་པ་དང་། གུང་མོ་མདུད་པར་བཅིངས་ལ་གུང་མོ་དང་མཛུབ་མོ་གདོང་སྦྱར་བ་དེ་
དང་རྡོ་རྗེ་ཧཱུཾ་མཛད་ཀྱིས་ལས་བྱ་བ་ནི་མདུད་པ་བཙིར་བ་དང་། ཕྱག་རྒྱ་མོད་ལ་དགྲོལ་བ་དང་། བཙིར་ཏེ་སེ་གོལ་གཏོགས་པ་དང་། གུང་མོས་བརྡེབ་ཅིང་དོང་དུ་ལྟུང་བར་བྱ་བ་དང་། བསླང་བའི་ཚུལ་དུ་བྱ་བའོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ།
བ་དན་གསུམ་པ་གཉིས་བཀན་ཏེ་བཞག་ནས་དེ་ནས་དེ་ཁས་སྦུབ་ལ། གུང་མོ་གཉིས་མདུད་པ་བྱས་ལ། མཛུབ་མོ་གཉིས་དང་གུང་མོ་གཉིས་གདོང་སྤྲད་དེ་ཕྱག་རྒྱ་བཙིར་ཞིང་ཧཱུཾ་བཟླས་ནས་བདག་ཉིད་རྡོ་རྗེ་ཧཱུཾ་མཛད་དུ་བསམས་ཏེ། ཧཱུཾ་ཞེས་བཟླས་ན་ཐམས་ཅད་བཅིང་བར་འགྱུར་རོ། །ཧཱུཾ་དེ་
ཉིད་ཟློས་ཤིང་། ལྕགས་སྒྲོག་ལ་སོགས་པ་བཅིངས་པའི་སྟེང་དུ་འབར་བའི་རྡོ་རྗེ་དབབ་པར་ཡིད་ཀྱིས་བསམ་པར་བྱས་ཏེ། དེ་ལྟ་བུས་ནི་བཅིངས་པ་ཀུན་ལས་གྲོལ་བར་བྱེད་པར་འགྱུར་རོ། །དེ་ཉིད་ཟློས་ཤིང་ཕྱག་རྒྱ་བཙིར་ལ་འཁྲུལ་འཁོར་ལ་སོགས་པ་གཞིག་པའི་བསམ་པས་རྡོ་རྗེ་འབར་བ་

དེ་ལ་ཡིད་ཀྱིས་དབབ་པར་བྱས་ཏེ། དེ་རྣམ་པར་བཤིག་ན་དེ་ལྟ་བུས་ཐམས་ཅད་དྲལ་བར་འགྱུར་རོ། །དེ་ཕྱག་རྒྱ་དེ་ཉིད་བཅིངས་ཏེ། གུང་མོ་གཉིས་རྩེ་མོ་སྦྱར་ནས་རྩེ་མོ་དེས་ལྷ་ལ་སོགས་པ་ལྷུང་བར་བྱ་བའི་བསམ་པས་ཧཱུཾ་བཟླས་ལ་ནམ་མཁའ་ལ་བསྣུན་ན། དེ་ལྟ་བུས་ནི་ཐམས་ཅད་དོང་
དུ་ལྟུང་བར་འགྱུར་རོ། །ཡང་གུང་མོ་གཉིས་སྔ་མ་བཞིན་དུ་བཅིངས་ཏེ་འདིས་བླང་བའི་ཚུལ་དུ་བྱེད་ཅིང་ཡི་གེ་ཧཱུཾ་བཟླས་པར་བྱས་ཏེ། དེ་ལྟ་བུས་ནི་ལྟུང་བ་ཐམས་ཅད་ལས་བསླང་བར་འགྱུར་རོ། །མཁའ་འགྲོ་མ་ཐམས་ཅད་ཀྱི་ཕྱག་རྒྱ་གཞིག་པ་དང་། གདོན་ལས་ཐར་བར་བྱ་བ་དང་། འཆི་བ་སློང་
བ་དང་། ཚེ་མངོན་པར་འཕེལ་བ་དང་། ཤིན་ཏུ་བསྲུང་བ་ལ་ནི་ཞེས་བྱ་བ་ནི་གོ་བར་ཟད་དོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་ལན་གྱི་ཕྱག་རྒྱས་སོ་ཞེས་བྱ་བ་གསུངས་སོ། །བ་དན་གསུམ་པ་གཉིས་མཉམ་པོར་བྱས་ལ་མཛུབ་མོ་དང་མཐེ་ཆུང་རྡོ་རྗེར་བྱས་ཏེ། གུང་མོ་མདུད་
ལ་བཟློག་སྟེ། དབང་བསྐུར་བའི་གནས་དང་། ཁར་བཞག་ལ་ཧཱུཾ་གིས་གཞིག་པ་དང་། མུས་གདོན་ལས་ཐར་བར་བྱ་བ་དང་། ཨ་ཞེས་བྱ་བ་ལ་སོགས་པས་འཆི་བ་ལས་བསླང་བ་དང་། ཧཱུཾ་གི་གླུས་ཚེ་མངོན་པར་འཕེལ་བ་དང་། ཡི་གེ་ཧཱུཾ་གི་ཆོས་ཀྱི་ཚིག་གིས་ཤིན་ཏུ་བསྲུང་བ་ནི་
འདིའི་མཚན་ཉིད་ཡིན་ནོ། །འདིས་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་ཡི་གེ་ཧཱུཾ་ལས་ཇི་སྐད་དུ་བཤད་པའི་མཚན་ཉིད་ཅན་གྱིས་དཔལ་ཧེ་རུ་ཀར་བདག་ཉིད་བསྐྱེད་ལ་བ་དན་གསུམ་པ་གཉིས་བཅིངས་ཏེ། གུང་མོའི་སོར་མོ་གཉིས་མདུད་པའི་
ཚུལ་དུ་བཅིངས་ལ། མཛུབ་མོ་གཉིས་དང་། མཐེ་ཆུང་གཉིས་ཀྱི་རྩེ་མོ་གཉིས་བྱས་ལ་བཟློག་སྟེ། མཛུབ་མོ་གཉིས་ཀྱི་གདོང་མཛོད་སྤུའི་གནས་སུ་བཞག་ལ། ཡི་གེ་ཧཱུཾ་ཟློས་ཤིང་མཁའ་འགྲོ་མའམ། །ཕྲ་མེན་མས་ཟིན་པའི་ལུས་ལ་དཔལ་ཧེ་རུ་ཀ་འཁོར་དང་བཅས་པ་ཡིད་ཀྱིས་
བཅུག་ལ་དེས་མཁའ་འགྲོ་མའི་ཕྱག་རྒྱ་ཐམས་ཅད་ཟོས་པར་བསམ་པར་བྱས་ཏེ། དེ་ལྟ་བུས་ནི་མཁའ་འགྲོ་མའི་ཕྱག་རྒྱ་ཐམས་ཅད་གཞིག་པར་འགྱུར་རོ། །གལ་ཏེ་མཁའ་འགྲོ་མ་རྣམས་ཕྱག་རྒྱ་བཅིངས་པས་གནོད་པར་བྱེད་པར་འགྱུར་ན་དེའི་ཚེ་དེའི་ཕྱག་རྒྱའི་སྟེང་དུ་ཧཱུཾ་གིས་རྡོ་རྗེ་

འབར་བ་དབབ་པར་བྱས་ཏེ། དེ་ལྟ་བུས་ཀྱང་མཁའ་འགྲོ་མའི་ཕྱག་རྒྱ་ཐམས་ཅད་འཇིག་པར་འགྱུར་རོ། །ཕྱག་རྒྱ་འདི་ཉིད་བཅིངས་ལ་མཁའ་འགྲོ་མ་ལ་སོགས་པའི་གདོན་ལས་ཐར་བར་བྱ་བའི་བསམ་པས་མུ་ཞེས་བྱ་བ་ཟློས་ཤིང་བཅོམ་ལྡན་འདས་དཔལ་ཧེ་རུ་ཀ་ཡང་
བསྒྲུབ་པར་བྱ་བའི་ལུས་ལ་ཞུགས་ནས་གདོན་རྣམས་ངེས་པར་འབྱིན་པར་བསམ་པར་བྱས་ཏེ། དེ་ལྟ་བུས་ནི་གདོན་ལས་ཐར་བར་འགྱུར་རོ། །ཕྱག་རྒྱ་འདི་ཉིད་བཅིངས་ལ་མཁའ་འགྲོ་མའི་གདོན་གྱིས་བསད་པའི་ལུས་ལ། དཔལ་ཧེ་རུ་ཀ་འཁོར་དང་བཅས་པའི་ཡི་གེ་ཨ་ཟློས་ཤིང་ཡིད་ཀྱིས་
བཅུག་ལ་རྡོ་རྗེ་འབར་བའི་ལྕགས་ཀྱུས་མཁའ་འགྲོ་མའི་གདོན་ལས་སྙིང་བཀུག་ལ་བཅིངས་པའི་ལུས་ལ་བཅུག་ལ། དེའི་སྙིང་ལ་བཞག་སྟེ། དེས་བདེ་ཞིང་སླར་འཚོ་བར་འགྱུར་བར་བསམ་པར་བྱ་སྟེ། དེ་ལྟ་བུས་ནི་འཆི་བ་བསླང་བར་འགྱུར་རོ། །ཕྱག་རྒྱ་དེ་ཉིད་བཅིངས་ལ་ཧཱུཾ་གིས་
གླུ་ཟློས་ཤིང་བསྒྲུབ་པར་བྱ་བའི་སྙིང་གར་དཔལ་རྡོ་རྗེ་སེམས་དཔའ་ཟླ་བའི་མདོག་ཅན་གྱི་མགོ་ལ་བདུད་རྩིའི་ཆར་འབེབས་པར་བསམ་པར་བྱས་ཏེ། དེ་ལྟ་བུས་ནི་ཚེ་འདི་མངོན་པར་འཕེལ་བར་འགྱུར་རོ། །དེ་བཞིན་དུ་ཕྱག་རྒྱ་དེ་བཅིངས་ལ་ཆོས་ཀྱི་ཚིག་གིས་ཡི་གེ་ཧཾ་ཟློས་ཤིང་། བསྒྲུབ་པར་
བྱ་བའི་རྡོ་རྗེའི་གོ་ཆས་རྡོ་རྗེར་བྱ་བར་བསམ་པར་བྱས་ཏེ། དེ་ལྟ་བུས་ནི་ཤིན་ཏུ་བསྲུང་བར་འགྱུར་རོ། །སྒྲུབ་པ་ཐམས་ཅད་ཅེས་བྱ་བ་ལ་སོགས་པ་ནི་བཤད་ཟིན་ཏོ། །སྲིན་པོ་ལ་སོགས་པའི་གདོན་གྱིས་ཉེ་བ་ནི་སྡིག་པའོ། །རྨི་ལམ་ངན་པ་དང་། ལྟས་ངན་པ་དང་། བྱུར་ནི་གོ་བར་
ཟད་དོ། །བྱུར་ལ་སོགས་པ་འདི་དག་གཞིག་པ་ནི་ཞི་བའོ། །དེ་ཇི་ལྟར་འགྱུར་ཞེ་ན། རྡོ་རྗེ་གར་གྱི་ཞི་བས་སོ་ཞེས་གསུངས་ཏེ། པདྨ་ཆེན་པོ་བཅིངས་ལ་ཇི་སྲིད་འདོད་པར་བཟླས་པ་འམ་ཡང་ན་པདྨའི་ཁུ་ཚུར་གཡོན་པ་བསྟན་ཏེ། མར་དང་། ཏིལ་མར་དང་། ཏིལ་དང་།
འབྲས་དང་། འབྱུང་ཁུང་གི་ཕྱེ་མའི་སྦྱིན་སྲེག་བྱ་བ་ནི་འདིའི་མཚན་ཉིད་ཡིན་ནོ། །དེ་ལ་རྡོ་རྗེ་ཐལ་མོ་ཁོང་སྟོང་དུ་བྱས་པ་ལས་མཛུབ་མོ་དང་། གུང་མོ་དང་མཐེ་བོང་དང་། མཐེའུ་ཆུང་དང་མཐེབ་མོའི་འདབ་མ་བཞིར་བྱ་བ་ནི་པདྨ་ཆེན་པོའི་མཚན་ཉིད་ཡིན་ནོ། །པདྨའི་ཁུ་ཚུར་གྱི་

མཚན་ཉིད་ཀྱང་འཕགས་པ་སྤྱན་རས་གཟིགས་དབང་ཕྱུག་གི་དཀྱིལ་འཁོར་ལས་འོག་ནས་བཤད་པ་ལས་ཤེས་པར་བྱའོ། །འདི་སྐད་སྟོན་པ་ཡིན་ཏེ། དེ་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་བཅོམ་ལྡན་འདས་རྡོ་རྗེ་སེམས་དཔའི་རས་རིས་ལ་སོགས་པ་ཇི་ལྟ་བ་བཞིན་དུ་
སྤྱན་དྲངས་ལ། ཡང་དག་པར་མཆོད་དེ་ཕྱག་བྱས་ནས་དེའི་འོག་ཏུ་པདྨ་ཆེན་པོ་བཅིངས་ཏེ་འོད་ཟེར་འབར་བས་ཀུན་དུ་འཁྲུགས་པ། འཕྲོ་བ་རྣམ་པར་འབར་བའི་འོད་ཀྱི་རང་བཞིན་ནི་དཔལ་རྡོ་རྗེ་སེམས་དཔའི་ཡེ་ཤེས་ཀྱི་འོད་ཟེར་གྱི་སྤྱན་སྔར་འདུག་པ་ལ། ཨོཾ་ནི་ར་ཝ་ར་ཎ་སརྦ་དྷརྨ་ཏཱ་བཛྲ་དྷ་རི་ཎི་ཧཾ།
ཞེས་ཟློས་ཤིང་པདྨ་ཆེན་པོའི་ཕྱག་རྒྱས་སྒྲིབ་པ་ཐམས་ཅད་བླངས་ལ་བསྲེག་པར་བྱའོ། །དེ་ལྟ་བུས་ནི་སྒྲིབ་པ་ཐམས་ཅད་འཇིག་པར་འགྱུར་རོ། །ཨོཾ་རོ་ཛོ་བི་ག་ཏ་སརྦ་དྷརྨཱ་བཛྲ་དྷ་རི་ཎི་ཧཾ། ཞེས་བྱ་བས་སྡིག་པ་ཐམས་ཅད་བླངས་ལ་བསྲེག་པར་བྱའོ། །དེ་ལྟ་བུས་ནི་སྡིག་པ་ཐམས་ཅད་འཇིག་
པར་འགྱུར་རོ། །ཨོཾ་སྭཔྣོ་པ་མ་སརྦ་དྷརྨཱཿ པྲ་ཏི་བེ་ད་བཛྲ་དྷ་རི་ཎི་ཧཾ། ཞེས་བྱ་བས་རྨི་ལམ་ངན་པ་བླངས་ལ་བསྲེག་པར་བྱའོ། །དེ་ལྟ་བུས་ནི་རྨི་ལམ་ངན་པ་ཐམས་ཅད་འཇིག་པར་འགྱུར་རོ། །ཨོཾ་ནི་རྣི་མིཏྟ་སརྦ་དྷརྨཱ་ཛྙཱ་ན་བཛྲ་དྷ་རི་ཎི་ཧཾ། ཞེས་བྱ་བས་ལྟས་ངན་པ་ཐམས་ཅད་བླངས་ལ་
བསྲེག་པར་བྱའོ། །དེ་ལྟ་བུས་ནི་ལྟས་ངན་པ་ཐམས་ཅད་འཇིག་པར་འགྱུར་རོ། །ཨོཾ་སྭ་བྷཱ་ཝ་པྲ་བྷ་སྭ་ར་སརྦ་དྷརྨཱ་བཛྲ་དྷ་རི་ཎི་ཧཾ། ཞེས་བྱ་བས་བྱུར་ཐམས་ཅད་བླངས་ལ་བསྲེག་པར་བྱས་ན་དེ་ལྟ་བུས་ནི་བྱུར་ཐམས་ཅད་འཇིག་པར་འགྱུར་རོ། །ཡང་ན་པདྨ་ཅན་གྱི་ཁུ་ཚུར་གྱིས་ཕྱིའི་སྦྱིན་སྲེག་
བྱས་ཏེ། རྡོ་རྗེ་སེམས་དཔའི་རྣལ་འབྱོར་བྱས་ལ། ལས་ཐམས་ཅད་པའི་ཐབ་ཁུང་དུ་བཅོམ་ལྡན་འདས་ཇི་ལྟ་བ་བཞིན་དུ་སྤྱན་དྲངས་ནས། གཡོན་པའི་པདྨའི་ཁུ་ཚུར་དང་། གཡས་པ་པདྨའི་ཁུ་ཚུར་གྱིས་དགང་གཟར་དང་བླུགས་གཟར་བླངས་ཏེ། ཨོཾ་ནི་ར་ཝ་ར་ཎ་སརྦ་དྷརྨ་
ཏཱ་བཛྲ་དྷ་རི་ཎི་ཧཾ། ཞེས་མར་གྱི་སྦྱིན་སྲེག་བྱས་ཏེ། དེ་ལྟ་བུས་ནི་སྡིག་པ་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་དུ་བྱས་ནས། ཨོཾ་རོ་ཛོ་བི་ག་ཏ་སརྦ་དྷརྨཱ་བཛྲ་དྷ་རི་ཎི་ཧཾ་ཞེས་ཟློས་ཤིང་ཏིལ་མར་གྱི་སྦྱིན་སྲེག་བྱས་ན་དེ་ལྟ་བུས་ནི་སྡིག་པ་ཐམས་ཅད་འཇིག་པར་འགྱུར་རོ། །

དེ་བཞིན་དུ་ཐམས་ཅད་བྱས་ལ། ཨོཾ་སྭཔྣོ་པ་མ་སརྦ་དྷརྨཱཿཔྲ་ཏི་བེ་ད་བཛྲ་དྷ་རི་ཎི་ཧཾ། ཞེས་ཟློས་ཤིང་ཏིལ་གྱི་སྦྱིན་སྲེག་བྱས་ན་རྨི་ལམ་ངན་པ་རྣམས་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། ཨོཾ་ནི་རྣི་མིཏྟ་སརྦ་དྷརྨཱ་ཛྙཱ་ན་བཛྲ་དྷ་རི་ཎི་ཧཾ། ཞེས་བྱ་བས་
འབྲས་ཀྱི་སྦྱིན་སྲེག་བྱས་ན་དེ་ལྟ་བུས་ནི་ལྟས་ངན་པ་ཐམས་ཅད་འཇིག་པར་འགྱུར་རོ། དེ་བཞིན་དུ་ཐམས་ཅད་བྱས་ལ་ཨོཾ་སྭ་བྷཱ་བ་པྲ་བྷ་སྭ་ར་སརྦ་དྷརྨཱ་དྷ་རི་ཎི་ཧཾ། ཞེས་བྱ་བས་གསེར་ཁམས་ཀྱི་ཕྱེ་མའི་སྦྱིན་སྲེག་བྱས་ན་དེས་ནི་བྱུར་རྣམས་འཇོམས་པར་འགྱུར་རོ། །ཐམས་ཅད་དབབ་
པ་དང་། བསྒུལ་བ་དང་། གར་བྱེད་དུ་གཞུག་པ་དང་། ཐམས་ཅད་བདེན་པར་སྨྲར་གཞུག་པ་དང་། པྲ་སེ་ན་ཐམས་ཅད་བསྒྲུབ་པར་ཡང་ཤེས་པར་བྱའོ། །དེ་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་མའི་འབེབས་པའི་ཕྱག་རྒྱས་སོ་ཞེས་བྱ་བ་ནི་ཐམས་ཅད་དབབ་པ་དང་།
བསྐྱོད་པ་དང་། གར་བྱེད་དུ་གཞུག་པ་དང་། ཐམས་ཅད་བདེན་པར་སྨྲར་གཞུག་པ་དང་། པྲ་སེ་ན་ཐམས་ཅད་སྒྲུབ་པ་ལ་ནི་ཞེས་བྱ་བ་ནི་གོ་བར་ཟད་དོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་འབེབས་པའི་ཕྱག་རྒྱས་སོ་ཞེས་བྱ་བ་གསུངས་སོ། །དེ་ལ་འདིའི་
མཚན་ཉིད་ནི་འདི་ཡིན་ཏེ། བ་དན་གསུམ་པའི་རྡོ་རྗེ་གཉིས་བཅིངས་ལ་དགའ་བའི་ཚུལ་གྱིས་སེན་མོས་རོལ་མོ་བྱེད་པ་དང་། རྡོ་རྗེ་བཅིངས་པ་སྟེང་དང་འོག་ཏུ་བསྐྱོད་པ་དང་། རྡོ་རྗེ་བསྡམས་པའི་ཐ་མ་ལ་སོགས་པ་ནས་གྲོལ་བར་གར་བྱ་བ་དང་། རྡོ་རྗེ་བསྡམས་པའི་མཛུབ་མོ་གཉིས་ཁ་
ནས་དབྱུང་བ་ལྟ་བུ་དང་། བདེ་བ་ཆེན་པོ་དོན་ཡོད་པའི་དམ་ཚིག་གི་ལྕགས་ཀྱུས་དངོས་པོ་ཐམས་ཅད་ལ་རྒྱུ་བ་དང་མི་རྒྱུ་བ་རྣམས་གཟུགས་བརྙན་གྱི་ཚུལ་གྱིས་གསལ་བར་བསྟན་པ་དང་། སྒྲ་སྙན་གྱི་ཚུལ་གྱིས་སེམས་ཅན་དང་། བདག་ཉིད་ཀྱིས་ཐམས་ཅད་བདེ་བར་གསལ་བར་
ཐོབ་པའོ། །འདིས་ནི་འདི་སྐད་སྟོན་ཏེ། སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་བ་དན་གསུམ་པ་གཉིས་ཀྱི་རང་བཞིན་ཅན་གྱི་རྡོ་རྗེ་བསྡམས་པ་བཅིངས་ལ་དགའ་བའི་ཚུལ་གྱིས་མཐེ་བོང་དང་། མཛུབ་མོའི་སེན་མོས་རོལ་མོ་བྱེད་ཅིང་བཅོམ་ལྡན་འདས་དཔལ་རྡོ་རྗེ་

སེམས་དཔའ་རླུང་དང་མེའི་དཀྱིལ་འཁོར་ལ་ཞུགས་པ་འབར་བའི་འོད་ཟེར་ཀུན་དུ་འཁྲུགས་པས་བསྒྲུབ་པར་བྱ་བ་ཀུན་དུ་གང་བར་འགྱུར་བར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་འབབ་པར་འགྱུར་རོ། །བ་དན་གསུམ་པ་གཉིས་ཀྱི་རང་བཞིན་ཅན་གྱི་རྡོ་རྗེ་བསྡམས་
པ་བསྒྲུབ་པར་བྱ་བ་བསྐྱོད་པའི་བསམ་པས་སྟེང་དང་འོག་ཏུ་བསྐུལ་བར་བྱས་ཏེ། དེ་ལྟ་བུས་ནི་ཐམས་ཅད་བསྐུལ་བར་བྱས་ཏེ། དེ་བཞིན་དུ་ཐམས་ཅད་བྱས་ལ། ཡིད་ཀྱིས་བསྒྲུབ་པར་བྱ་བ་དང་། ལྷན་ཅིག་གཅིག་ཏུ་བྱས་ཏེ་བ་དན་གསུམ་པ་གཉིས་ཀྱི་རང་བཞིན་ཅན་རྡོ་རྗེ་
བསྡམས་པ་བཅིངས་ཏེ། ཐ་མ་ལ་སོགས་པ་ནས་གྲོལ་བའི་ཚུལ་གྱིས་གར་བྱས་ནས་དེ་ལྟ་བུས་ནི་ཐམས་ཅད་གར་བྱེད་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་ཡིད་ཀྱིས་བསྒྲུབ་པར་བྱ་བ་དང་། ལྷན་ཅིག་གཅིག་ཏུ་བྱས་ཏེ། བ་དན་གསུམ་པ་གཉིས་ཀྱིས་
རང་བཞིན་ཅན་གྱི་རྡོ་རྗེ་བསྡམས་པ་བཅིངས་ལ། མཛུབ་མོ་གཉིས་གཞིབས་ཏེ། རྩེ་མོར་བྱས་ནས་ཚིག་འབྱུང་བའི་ཚུལ་གྱིས་ཁའི་ཕྱོགས་ནས་གྱེན་དུ་བཏེག་ན་དབབ་པར་གྱུར་པའི་སེམས་ཅན་ཐམས་ཅད་སྨྲ་བར་འགྱུར་རོ། །གསང་བའི་ལྕགས་ཀྱུས་བཅིངས་ལ་
དངོས་པོ་ཐམས་ཅད་གཟུགས་བརྙན་གྱི་ཚུལ་དུ་བྱུང་བར་བསྒོམས་ནས་རྡོ་རྗེ་སེམས་དཔའ་ལ་སོགས་པ་དངོས་པོ་ཐམས་ཅད་ལ་བཀུག་ན་དེ་རང་ཉིད་ཀྱིས་མཐོང་ཞིང་གཞན་རྣམས་ལ་ཡང་སྟོན་པར་འགྱུར་བ་དང་། བྲག་ཅ་དང་འདྲ་བའི་སྦྱོར་བས་ནི་སྒྲ་ཐམས་ཅད་རང་གིས་ཐོས་པ་དང་།
གཞན་གྱིས་ཐོས་པར་བྱེད་པར་འགྱུར་རོ། །ཐམས་ཅད་རྒྱས་གདབ་པ་དང་། གསད་པ་དང་། ལྟུང་བར་བྱ་བ་དང་། བསླང་བ་དང་། སླར་གསོ་བ་དོན་ཡོད་པར་གྲུབ་པ་ལ་ནི་ཞེས་བྱ་བ་ནི་གོ་སླའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་མཁའ་འགྲོ་མ་
ཆེན་པོས་སོ་ཞེས་བྱ་བ་གསུངས་སོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་ཁྲོ་བོའི་ཁུ་ཚུར་གཉིས་བཅིངས་ལ་རྡོ་རྗེ་ལྟ་བས་ལས་བྱ་བ་ནི་འདི་ལྟ་སྟེ་མིག་མི་འཛུམས་པར་བལྟ་བ་དང་། མིག་འབྲས་གྱེན་དུ་བཟློག་པ་དང་། མྱུར་དུ་བཙུམས་ཏེ་བསྒྱེལ་བ་དང་།

འོག་ནས་བསླང་བར་བྱའོ། །འདིས་ནི་འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། ཡི་གེ་ཧཱུཾ་ལས་རྡོ་རྗེ་མེ་ལྟར་འབར་བར་བདག་ཉིད་བསམས་ཏེ། ཁྲོ་བོའི་ཁུ་ཚུར་གཉིས་བཅིངས་ནས་བསྒྲུབ་པར་བྱ་བ་ལ་མིག་མི་
འཛུམས་པར་བལྟ་ཞིང་བསྒྲུབ་པར་བྱ་བའི་སྙིང་གར་རྡོ་རྗེ་འབར་བ་བསམ་པར་བྱས་ཏེ། དེ་ལྟ་བུས་ནི་ཐམས་ཅད་རྒྱས་བཏབ་པར་འགྱུར་རོ། །མིག་གྱེན་དུ་བསྒུལ་ལ་ཡིད་ཀྱིས་བསྒྲུབ་པར་བྱ་བའི་ལུས་ལ་ཞུགས་ལ་བསྒྲུབ་པར་བྱ་བའི་སྲོག་བླངས་ནས་གྱེན་དུ་འཕུར་བར་བྱས་ཏེ། དེ་
ལྟ་བུས་ནི་ཐམས་ཅད་གསོད་པར་འགྱུར་རོ། །བསྒྲུབ་པར་བྱ་བ་ལྟུང་བར་བྱ་བའི་བསམ་པས་མིག་འཛུམས་ལ་མྱུར་དུ་ལྟུང་བར་བྱས་པས་ནི་ཐམས་ཅད་ལྟུང་བར་འགྱུར་རོ། །ཁྲོ་བོའི་ཁུ་ཚུར་གཉིས་པོ་དེ་ཉིད་ཀྱིས་བསླང་བའི་ཚུལ་དུ་བྱ་ཞིང་། ལྟ་བས་བསླང་བ་ནི་ཐམས་ཅད་
བསླང་བར་འགྱུར་རོ། །བལྟ་བ་དེ་ཉིད་དང་ཁྲོ་བོའི་ལྟ་བས་བྱས་ན་ཐམས་ཅད་སླར་སོས་པར་འགྱུར་རོ། །ཐམས་ཅད་རེངས་པར་བྱ་བ་དང་། རྨོངས་པར་བྱ་བ་དང་། གཉིད་ལོག་པར་བྱ་བ་དང་། གསད་པ་དང་། བཟའ་བར་བྱ་བ་ལ་ནི་ཞེས་བྱ་བ་ནི་གོ་སླའོ། །འདི་དག་
ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་གདུག་པའི་སྲིན་པོས་སོ་ཞེས་བྱ་བ་གསུངས་སོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་བཟློག་ནས་མཆེ་བར་བྱ་ཞིང་མཐེ་ཆུང་སོར་བྱས་པས་གཟུང་ཞིང་མཆེ་བ་
གཙིགས་པས་འཇིགས་སུ་རུང་བའི་ཁས་མི་འགུལ་བ་ཉིད་དང་། ཡན་ལག་ཐམས་ཅད་ལྷོད་པ་དང་གཉིད་ཡུར་ཞིང་གླལ་བ་དང་། རང་གི་སྙིང་འཇོམས་པ་དང་། མྱུར་དུ་ལྡང་བའོ། །འདིས་ནི་འདི་སྐད་སྟོན་པར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་
སྦྱོར་བ་བྱས་ལ་རྡོ་རྗེ་གནོད་སྦྱིན་དུ་བདག་ཉིད་བསམས་ལ་མཛུབ་མོ་གཉིས་ཀྱིས་ལྕགས་ཀྱུ་གཉིས་བྱས་ནས་ཁ་འགྲམ་གཉིས་སུ་མཆེ་བའི་ཚུལ་དུ་བཞག་ལ། མཐེའུ་ཆུང་གཉིས་འཇིགས་སུ་རུང་བའི་ཁས་བསྒྲུབ་པར་བྱ་བ་ལེན་པའི་བསམ་པས་སོས་འཛིན་པར་བྱས་ཏེ། དེ་

ལྟ་བུས་ནི་ཐམས་ཅད་རེངས་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་ཡིད་ཀྱིས་བསྒྲུབ་པར་བྱ་བ་དང་། གཅིག་ཏུ་གྱུར་པར་བྱས་ཏེ། ཕྱག་རྒྱ་འདི་ཉིད་བཅིངས་ལ་བསྒྲུབ་པར་བྱ་བ་རྨོངས་པར་བྱ་བའི་བསམ་པས་ཡན་ལག་ཐམས་ཅད་ལྷོད་པར་གྱུར་པར་བྱས་ན་དེ་ལྟ་བུས་ནི་
ཐམས་ཅད་རྨོངས་པར་འགྱུར་རོ། །དེ་ཉིད་བཅིངས་ལ་བསྒྲུབ་པར་བྱ་བ་དང་། གཅིག་ཏུ་གྱུར་པར་བསམས་ལ་མིག་བཙུམས་ཏེ་གླལ་བར་བྱས་ན་དེ་ལྟ་བུས་ནི་ཐམས་ཅད་གཉིད་ལོག་པར་བྱ་བར་འགྱུར་རོ། །བསྒྲུབ་པར་བྱ་བ་གཞིག་པའི་བསམ་པས་སྙིང་གར་ཕྱག་རྒྱ་གཞིག་
པར་བྱས་ཏེ། དེ་ལྟ་བུས་ནི་ཐམས་ཅད་གསོད་པར་འགྱུར་རོ། །བསྒྲུབ་པར་བྱ་བ་བཟའ་བའི་བསམ་པས་མྱུར་དུ་ལྡང་བའི་ཚུལ་བྱས་ན་དེ་ལྟ་བུས་ནི་ཐམས་ཅད་ཟ་བར་འགྱུར་རོ། །གཞན་གྱི་དཔུང་ཐམས་ཅད་སྐྲག་པར་བྱ་བ་དང་། གཞིག་པར་བྱ་བ་དང་། ལྟུང་བར་
བྱ་བ་དང་། གསད་པ་ལ་ནི་ཞེས་བྱ་བ་ནི་གོ་བར་ཟད་དོ། །འདི་རྣམས་ཇི་ལྟར་འགྱུར་ཞེ་ན། རྡོ་རྗེ་གར་གྱི་གཤེད་བྱེད་ཀྱིས་སོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་ཁུ་ཚུར་གཉིས་བཅིངས་ལ་ཁ་གདངས་པ་དང་། གདོང་འཇིགས་སུ་རུང་བ་
སྐྲ་གྱེན་དུ་བརྫེས་པ། མགོ་ཐུར་དུ་འདུད་ཅིང་འདེགས་པས་ལས་བྱའོ་ཞེས་བྱ་བས་རྡོ་རྗེ་ཁུ་ཚུར་འཕེན་པ་དང་། ཁུ་ཚུར་བཙིར་བ་དང་། ཡི་གེ་ཧཱུཾ་གིས་མགོ་བོས་སྡིགས་མཛུབ་བྱེད་པ་དང་། རང་ཉིད་ཁྲོ་ཞིང་མྱུར་དུ་བསྒྱེལ་བའོ། །འདི་སྐད་སྟོན་པ་ཡིན་ཏེ། དེ་བཞིན་
དུ་རྡོ་རྗེ་སེམས་དཔའི་སྦྱོར་བ་བྱས་ཏེ། རྡོ་རྗེ་གནོད་སྦྱིན་གྱི་སྤྲུལ་པ་བསམས་ཏེ། རྡོ་རྗེ་ཁུ་ཚུར་གཉིས་བཅིངས་ནས་རྣལ་འབྱོར་པ་ཁ་གདངས་ཤིང་སྐྲ་གྱེན་དུ་བརྫེས་པ། མགོ་བོ་འོག་ནས་བསྟོད་དེ་བྷྱོ་ཞེས་ཟློས་ཤིང་རྡོ་རྗེ་གནོད་སྦྱིན་གྱི་གཟུགས་ཚད་མེད་པས་
གཞན་གྱི་དཔུང་མཆོག་ཏུ་སྐྲག་པར་བྱས་པར་བསམ་པར་བྱས་ཏེ། དེ་ལྟ་བུས་ནི་གཞན་གྱི་དཔུང་ཐམས་ཅད་སྐྲག་པར་བྱས་པར་འགྱུར་རོ། །དེ་བཞིན་དུ་རྡོ་རྗེ་གནོད་སྦྱིན་དུ་བདག་ཉིད་བསམས་ལ་གཞན་གྱི་དཔུང་གཞིག་ཅིང་གཞོམ་པའི་བསམས་པས་དེའི་ཐད་ཀར་འཕང་

ཞིང་རྡོ་རྗེ་འབར་བའི་ཕྲ་རབ་གཞན་གྱི་དཔུང་གི་སྟེང་དུ་འབེབས་པར་བསམ་པར་བྱ་སྟེ། དེ་ལྟ་བུས་ནི་གཞན་གྱི་དཔུང་ཐམས་ཅད་བཅོམ་པར་བྱས་པར་འགྱུར་རོ། །སྔ་མ་བཞིན་དུ་རྡོ་རྗེ་གནོད་སྦྱིན་དུ་བདག་ཉིད་བསམས་ལ། རྡོ་རྗེ་ཁུ་ཚུར་གཉིས་བཅིང་ཞིང་། གཞན་
གྱི་དཔུང་ཁྲོ་བོའི་རྡོ་རྗེ་གཉིས་ཀྱི་བར་དུ་བཙིར་བར་གྱུར་པར་བསམས་ན། དེ་ལྟ་བུས་ནི་རང་དབང་དུ་བྱས་པར་འགྱུར་རོ། །སྔ་མ་བཞིན་དུ་བདག་ཉིད་བསམས་ལ་ཧཱུཾ་དང་མགོ་བོས་སྡིགས་མཛུབ་བྱས་ཤིང་གཞན་གྱི་དཔུང་གི་སྟེང་དུ་རྡོ་རྗེ་གནོད་སྦྱིན་གྱི་ལུས་ཆེན་པོ་ལྟུང་བར་བསམ་པར་
བྱས་ཏེ། དེ་ལྟ་བུས་ནི་གཞན་གྱི་ལུས་ཐམས་ཅད་ལྷུང་བར་འགྱུར་རོ། །དེ་བཞིན་དུ་རྡོ་རྗེ་གནོད་སྦྱིན་དུ་བདག་ཉིད་བསམས་ལ་རྡོ་རྗེ་ཁུ་ཚུར་གཉིས་བཅིངས་ཏེ། ཁྲོ་བོ་ཆེན་པོ་ཟིལ་གྱིས་གནོན་པར་གྱུར་པ་དང་། གཞན་གྱི་དཔུང་གསད་པའི་བསམ་པས་ཤིན་ཏུ་མྱུར་དུ་ལྷུང་བར་བྱ་
ཞིང་། བཅོམ་ལྡན་འདས་རྡོ་རྗེ་གནོད་སྦྱིན་ཡང་རྡོ་རྗེ་འོད་ཟེར་འབར་བ་ཀུན་དུ་འཁྲུགས་པས་གཞན་གྱི་དཔུང་གི་སྟེང་དུ་ཕབ་པས་གཞན་གྱི་དཔུང་ཐལ་བར་གྱུར་པར་བསམ་པར་བྱས་ཏེ། དེ་ལྟ་བུས་ནི་གཞན་གྱི་དཔུང་ཐམས་ཅད་གསོད་པར་འགྱུར་རོ། །ཁྲོ་བ་ཐམས་ཅད་བསལ་
བ་དང་། བཞིན་རས་དང་བར་བྱ་བ་དང་། རྩོད་པ་ལས་རྒྱལ་བ་དང་། འཇིགས་པ་ཐམས་ཅད་ལས་ཐར་བ་དང་། གཡུལ་འགྱེད་པ་ལས་རྒྱལ་བ་གྲུབ་པ་ལ་ནི་ཞེས་བྱ་བ་ནི་གོ་བར་ཟད་དོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་རྒྱལ་མཚན་མཆོག་གི་དཔུང་རྒྱན་གྱི་རྩེ་
མོ་ཞེས་བྱ་བ་གསུངས་སོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་གནོད་སྦྱིན་གྱི་སྲིན་ལག་དང་མཐེ་ཆུང་གཉིས་མཉམ་པོར་ཕྱེ་སྟེ། བ་དན་བྱ་བ་ནི་རྒྱལ་མཚན་མཆོག་གི་རྩེ་མོ་སྟེ། ལས་ནི་རབ་ཏུ་འདུད་པ་དང་། འཛུམ་པ་དང་། ལྕེ་སྟོན་པ་དང་། ཕྲག་པ་གཉིས་
བསྙེམས་པ་སྟོན་པ་དང་། རྒྱལ་མཚན་བསྒྲེང་བའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་གནོད་སྦྱིན་དུ་བདག་ཉིད་བསམས་ནས་རྡོ་རྗེ་བསྡམས་པ་བཅིངས་ཏེ། མཛུབ་མོ་གཉིས་བཀུག་ནས་བར་ཡོད་པར་གནས་པར་བྱས་ལ་མཐེ་བོང་གཉིས་

ཕྱེ་སྟེ། བསྒྲེངས་ལ་མཆེ་བ་བྱས་པ་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །འདི་ཉིད་ཀྱི་སྲིན་ལག་དང་མཐེ་ཆུང་གཉིས་ཕྱེ་སྟེ། བ་དན་ལྟ་བུར་བྱ་བ་འདི་ནི་རྒྱལ་མཚན་མཆོག་གི་དཔུང་རྒྱན་ཏེ། འདི་བཅིངས་ལ་བསྒྲུབ་པར་བྱ་བ་དང་། ལྷན་ཅིག་གཅིག་ཏུ་བྱས་ལ་བསྒྲུབ་པར་བྱ་བ་རབ་ཏུ་འདུད་
པའི་བསམ་པས་ཕྱག་བྱས་ནས་དེ་ལྟ་བུས་ཁྲོ་བ་ཐམས་ཅད་བསལ་བར་འགྱུར་རོ། །དེ་ཉིད་བཅིངས་ལ་བསྒྲུབ་པར་བྱ་བ་དང་། གཅིག་ཏུ་བྱས་ཏེ། འཛུམ་པ་བྱས་ནས་བཞིན་རས་དང་བར་འགྱུར་རོ། །འདི་ཉིད་བཅིངས་ལ་ལྕེ་བསྟོད་དེ་བསྐྱོད་པས་ནི་རྩོད་པ་ལས་རྒྱལ་བའོ། །དེ་ཉིད་
བཅིངས་ལ་ཕྲག་པ་གཉིས་བསྙེམས་པ་བསྟོད་པའི་ཚུལ་དུ་བྱས་ལ་དེ་ལྟ་བུས་ནི་འཇིགས་པ་ལས་ཐར་བར་འགྱུར་རོ། །དེ་ཉིད་བཅིངས་ལ་ལག་ངར་གཉིས་བརྐྱང་སྟེ་སྤྱི་བོར་བཞག་ལ་ཕྱག་རྒྱ་བཅིངས་པ་དེ་ལས་དཔུང་གི་ཚོགས་ཡན་ལག་བཞི་པོ་ཕྱུང་སྟེ། དེས་གཞན་གྱི་དཔུང་
བཅོམ་པར་བསམས་ན་དེ་ལྟ་བུས་ནི་གཡུལ་འགྱེད་པ་ལས་རྣམ་པར་རྒྱལ་བར་འགྱུར་རོ། །སྤྲིན་ཐམས་ཅད་ཡང་དག་པར་བཟུང་ཞིང་མི་གཡོ་བར་བྱ་བ་དང་། ཆར་ཆེན་པོ་དབབ་པ་དང་། རླུང་དང་། ཆར་དང་། གློག་དང་། སེར་བ་དང་། སྤྲིན་བཟློག་པ་དང་། ཚ་བ་དང་། གྲང་
བ་བསལ་བས་ནི་ཞེས་བྱ་བ་ནི་གོ་སླའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་དབང་པོས་རྡོ་རྗེས་སོ་ཞེས་བྱ་བ་གསུངས་སོ། །དེ་ལས་དཔལ་འདི་དག་གི་མཚན་ཉིད་ནི་འདི་ཡིན་ཏེ། སེམས་དཔའི་སྐྱིལ་མོ་ཀྲུང་དུ་འདུག་ལ་རྡོ་རྗེ་གསོར་ཞིང་ལས་བྱ་བ་ནི་ནམ་མཁར་
དབུགས་གཏོང་བ་དང་། ཐམས་ཅད་དུ་བསྐྱོད་ཅིང་གཡོ་བའི་ལྟ་བས་ཆར་དབབ་པའི་ཚུལ་དང་། ཁྲོ་བོ་རྡོ་རྗེ་མེ་ལྟར་འབར་བའི་བཟླས་པས་ཆར་གཅད་པ་དང་། གྲང་བས་ཡན་ལག་འདར་བའི་ཚུལ་དང་ཐམས་ཅད་དུ་འབར་བའི་རྣམ་པར་བསམ་པར་བྱའོ། །འདི་སྐད་སྟོན་
པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ཏེ། ལག་པ་གཡས་པས་དང་པོའི་རྡོ་རྗེ་གསོར་ལ་ནམ་མཁར་དབུགས་གཏོང་ཞིང་བཟླས་བརྗོད་བྱས་ནས་རང་གི་དབུགས་ཀྱི་རྡོ་རྗེ་རླུང་གི་དཀྱིལ་

འཁོར་གྱིས་ཀྱང་སྤྲིན་མི་འགུལ་བར་བྱས་པར་བསམ་པར་བྱས་ཏེ། དེ་ལྟ་བུས་ནི་སྤྲིན་ཐམས་ཅད་ཡང་དག་པར་གཟུང་བར་འགྱུར་རོ། །དེ་བཞིན་དུ་རྡོ་རྗེ་གསོར་ཏེ་ཐམས་ཅད་དུ་བསྐྱོད་ཅིང་འཛུམ་པའི་བསམ་པའི་ལྟ་བས་ཆར་དབབ་པའི་ཚུལ་དུ་བྱས་ཏེ། དེ་ལྟ་
བུས་ནི་ཆར་འབེབས་པར་འགྱུར་རོ། །དེ་བཞིན་དུ་རྡོ་རྗེ་གསོར་ཞིང་རྡོ་རྗེ་མེ་ལྟར་འབར་བར་བདག་ཉིད་བསམས་ལ་ཧཱུཾ་ཟློས་ཤིང་ཁྲོ་བོའི་ལྟ་བས་རླུང་དང་། ཆར་དང་། སེར་བ་དང་། གློག་དང་། སྤྲིན་བསལ་བས་ནི་དེ་དག་ཞི་བར་འགྱུར་རོ། །དེ་བཞིན་དུ་རྡོ་རྗེ་སེམས་དཔའི་སྦྱོར་བ་
བྱས་ལ་རྡོ་རྗེ་གསོར་ཞིང་། གྲང་བ་དང་རླུང་ཆེན་པོ་བསྒོམས་པས་ཡན་ལག་གྲང་བས་འདར་ཚུལ་དུ་བྱས་ན། དེ་ལྟ་བུས་ནི་ཚ་བ་ཐམས་ཅད་སེལ་བར་འགྱུར་རོ། །དེ་བཞིན་དུ་རྡོ་རྗེ་མེ་ལྟར་འབར་བར་བདག་ཉིད་བསམས་ལ་རྡོ་རྗེ་གསོར་ཞིང་ཐམས་ཅད་དུ་མེ་འབར་བ་བསྐྱེད་པའི་
ཚུལ་དུ་བྱས་ཏེ། དེ་ལྟ་བུས་ནི་གྲང་བ་བསལ་ཞིང་འཇིག་པར་འགྱུར་རོ། །གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་ཤིན་ཏུ་གྲུབ་པ་ནི་རྟག་པར་གྲུབ་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་གར་གྱི་འདོད་པའི་དབང་ཕྱུག་གིས་སོ་ཞེས་བྱ་བ་གསུངས་ཏེ། དེ་ནས་
འདིའི་མཚན་ཉིད་བཤད་པར་བྱ་སྟེ། རྡོ་རྗེ་བསྡམས་པའི་རྡོ་རྗེ་སྤྱན་དང་། རྡོ་རྗེ་བསམས་པའི་མཛུབ་མོ་གཡོན་པའི་རྩེ་མོ་བཀུག་ལ་ཡུ་བར་བྱས་པ་ལ་མཛུབ་མོ་གཡས་པས་རྡོ་རྗེ་པི་ཝང་བརྡུང་བ་དང་། རྡོ་རྗེ་བསྡམས་པའི་མཐིལ་གཉིས་མཉེ་བ་དང་། ཐལ་མོ་ཁོང་སྟོང་དུ་སྦྱར་བའི་དབུས་
སུ་ལྕེ་བཅུག་པ་ལ་རབ་ཏུ་དགའ་བའི་རྡོ་རྗེའོ། །འདིས་ནི་འདི་སྐད་སྟོན་པ་ཡིན་ཏེ། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། རྡོ་རྗེ་བསྡམས་པ་བཅིངས་ཏེ་གཡས་པའི་མཛུབ་མོས་གཡོན་པའི་གུང་མོའི་ཚིགས་གསུམ་པ་བཟུང་ལ། གཡོན་པའི་མཛུབ་མོས་གཡས་པའི་གུང་
མོའི་ཚིགས་གསུམ་པ་བཟུང་སྟེ། མཐེ་བོང་གཉིས་དང་མཛུབ་མོ་གཉིས་གདོང་སྤྲད་པར་བྱ་བ་འདི་ནི་རྡོ་རྗེ་སྤྱན་ཞེས་བྱ་བའི་ཕྱག་རྒྱ་ཡིན་ཏེ། འདི་བཅིངས་ལ་བྱང་ཆུབ་སེམས་དཔའ་རྡོ་རྗེའི་གཟུགས་སུ་བདག་ཉིད་བསམ་པར་བྱས་ཏེ། དེ་ལྟ་བུས་ནི་རྡོ་རྗེ་གཟུགས་ཀྱི་དངོས་གྲུབ་བརྟན་པ་

ཐོབ་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་རྡོ་རྗེ་བསྡམས་པའི་མཛུབ་མོ་གཡོན་པ་བཀུག་པའི་ཡུ་བ་མཛུབ་མོ་གཡས་པས་བརྡུང་བའི་ཕྱག་རྒྱ་འདི་བཅིངས་ལ། བྱང་ཆུབ་སེམས་དཔའ་རྡོ་རྗེ་སྒྲར་བདག་ཉིད་བསམ་པར་བྱས་ཏེ། དེ་ལྟ་བུས་ནི་རྡོ་རྗེ་སྒྲའི་དངོས་གྲུབ་
རྟག་པར་ཐོབ་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་སེམས་དཔའ་རྡོ་རྗེ་དྲིར་བདག་ཉིད་བསྒོམ་ཞིང་རྡོ་རྗེ་བསྡམས་པ་བཅིངས་ལ་ལག་མཐིལ་གཉིས་ཕན་ཚུན་མཉེ་བར་བྱས་ཏེ། དེ་ལྟ་བུས་ནི་རྡོ་རྗེ་དྲི་བྱང་ཆུབ་སེམས་དཔའི་དངོས་གྲུབ་ཐོབ་པར་འགྱུར་རོ། །དེ་
བཞིན་དུ་དཔལ་རྡོ་རྗེ་སེམས་དཔའ་སྦྱོར་བ་བྱས་ལ་བྱང་ཆུབ་སེམས་དཔའི་རྡོ་རྗེ་རོར་བདག་ཉིད་བསམས་ལ་རྡོ་རྗེ་བསྡམས་པ་བཅིངས་ལ། ཐལ་མོ་ཁོང་སྟོང་གི་དབུས་སུ་ལྕེ་ཆུད་པར་བྱས་ཏེ། །དེ་ལྟ་བུས་ནི་བྱང་ཆུབ་སེམས་དཔའ་རྡོ་རྗེ་རོ་ཤིན་ཏུ་གྲུབ་པར་འགྱུར་རོ། །སྔ་
མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། རྡོ་རྗེ་ཀཱི་ལི་ཀཱི་ལར་བདག་ཉིད་བསམས་ལ་ལྔ་པོ་བསྡུས་པ་བཅིངས་ལ། ཨ་ནུ་རཱ་ག་ཡཱ་མི་ཧཱུཾ་ཞེས་བཟླ་བར་བྱས་ཏེ། དེ་ལྟ་བུས་ནི་རྡོ་རྗེ་ཀཱི་ལི་ཀཱི་ལའི་རེག་ཤིན་ཏུ་གྲུབ་པར་འགྱུར་རོ། །རྒྱུ་བ་དང་མི་རྒྱུ་བ་ཐམས་ཅད་
རྗེས་སུ་ཆགས་པ་དང་། དགུག་པ་དང་། དབང་དུ་བྱས་ལ་རྩེ་བ་དང་། ལས་ཐམས་ཅད་ལ་སྦྱར་བ་ལ་ནི་ཞེས་བྱ་བ་ནི་བཤད་ཟིན་ཏོ། །འདི་དག་ཐམས་ཅད་ཅིར་འགྱུར་ཞེ་ན། རྡོ་རྗེ་གར་གྱིས་ཐམས་ཅད་གྲུབ་པས་སོ་ཞེས་བྱ་བ་གསུངས་སོ། །དེ་ནས་འདིའི་མཚན་ཉིད་
བཤད་པར་བྱ་སྟེ། བདེ་བ་ཆེན་པོ་རྡོ་རྗེ་མཆོད་པའི་ལས་དང་དང་པོའི་གླུའི་བཟླས་བརྗོད་ཅི་འདོད་པར་བྱ་བ་དང་། ཤིན་ཏུ་བསྡུས་པའི་འཛུམ་པས་དགོད་པ་དང་རབ་ཏུ་དགའ་བའི་རྡོ་རྗེ་ལྕགས་ཀྱུ་རང་གི་མ་མཆུའི་ནང་སོས་བཟུང་བ་དང་རང་གི་དབང་པོ་གཡོ་བ་དང་། རབ་ཏུ་
དགའ་བའི་རྡོ་རྗེའི་ཚིག་གིས་ཡིད་ལ་འདོད་པའི་ལུང་བསྒོ་བ་བཅོམ་ལྡན་འདས་རྡོ་རྗེ་སེམས་དཔའི་སྦྱོར་བ་བྱས་ཏེ། དེས་ཀྱང་འདའ་བར་མཛད་པར་མི་སྤྱོད་ན། རྒྱུ་བ་དང་མི་རྒྱུ་བ་གཞན་དག་གིས་ལྟ་སྨོས་ཅི་དགོས། འདིས་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་

སེམས་དཔའི་སྦྱོར་བ་བྱས་ལ་རྒྱུ་བ་དང་མི་རྒྱུ་བའི་དངོས་པོ་ཐམས་ཅད་ཀྱི་རང་བཞིན་རང་གི་ངོ་བོར་བསམས་ཏེ། གར་དང་ཧཱུཾ་གི་གླུའི་བཟླས་བརྗོད་བྱས་ཏེ། དེ་ལྟ་བུས་ནི་རྒྱུ་བ་དང་མི་རྒྱུ་བ་ཐམས་ཅད་རྗེས་སུ་ཆགས་པར་འགྱུར་རོ། །དེ་བཞིན་དུ་གར་དང་རྡོ་རྗེའི་
ལྕགས་ཀྱུས་ངེས་པར་བསྡུས་པའི་མཛུབ་མོ་དང་བོད་པའི་ཚུལ་གྱིས་ཡི་གེ་ཧཱུཾ་གི་གླུས་བཟླས་བརྗོད་བྱས་ཏེ། དེ་ལྟ་བུས་ནི་དངོས་པོ་ཐམས་ཅད་འགུགས་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་གར་བྱེད་ཅིང་བསྒྲུབ་པར་བྱ་བ་དང་། མཆུ་སྤྲད་པའི་བསམ་པས་མ་མཆུའི་
ནང་རོལ་སོས་བཟུང་བར་བྱས་ཏེ། དེ་ལྟ་བུས་ནི་ཐམས་ཅད་དབང་དུ་བྱས་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་རང་གི་དབང་པོ་གཡོ་བའི་ཚུལ་གྱིས་ཡི་གེ་ཧཱུཾ་གི་གླུ་ཟློས་ཤིང་བསྒྲུབ་པར་བྱ་བའི་གནོད་སྦྱིན་མོ་ལ་སོགས་པ་དང་ལྷན་ཅིག་ཡང་དག་སྦྱར་བར་བསྒོམ་པར་བྱས་ཏེ། དེ་
ལྟ་བུས་ནི་ཐམས་ཅད་དང་རྩེ་བར་འགྱུར་རོ། དེ་བཞིན་དུ་ཐམས་ཅད་བྱས་ལ། གར་བྱེད་ཅིང་རྡོ་རྗེ་སེམས་དཔའ་ལ་སོགས་པ་དངོས་པོ་ཐམས་ཅད་ལ་ཡིད་ལ་མངོན་པར་འདོད་པའི་ལུང་བསྒོ་བའི་བསམ་པས་ཧཱུཾ་གི་གླུའི་བཟླས་བརྗོད་བྱ་སྟེ། དེ་ལྟ་བུས་ནི་ཐམས་ཅད་
ལས་ལ་ངེས་པར་སྦྱར་བར་འགྱུར་རོ། །ལྷ་ཐམས་ཅད་དབབ་པ་དང་། ཀླུ་ཐམས་ཅད་དབང་དུ་བྱ་བ་དང་། གནོད་སྦྱིན་དང་། འབྱུང་པོ་དང་། མ་མོ་ཐམས་ཅད་ལས་ཐམས་ཅད་ལ་ངེས་པར་སྦྱར་བ་ལ་ནི། རྡོ་རྗེ་གར་གྱི་སྐུའི་མཆོག་གིས་སོ་ཞེས་བྱ་བ་ནི་དེ་ལ་རྡོ་རྗེ་གར་
གྱི་སྐུའི་མཆོག་འདི་ཡིན་ཏེ། རྡོ་རྗེ་ཐལ་མོའམ་མཐེ་བོང་གཉིས་སེམས་དཔའི་སྐྱིལ་མོ་ཀྲུང་དུ་བྱས་ལ་མཛུབ་མོ་གཉིས་བསྒྲེང་བ་ནི། བཅོམ་ལྡན་འདས་རྡོ་རྗེ་སེམས་དཔའ་སྐུའི་མཆོག་སྟེ་འདི་གཟུང་བར་སྐད་ཅིག་གིས་བཅོམ་ལྡན་འདས་དགོངས་ཤིང་བྱིན་གྱིས་བརླབ་
པར་མཛད་པའི་ཕྱིར་གཟུང་བ་དང་། མཆོད་པ་དང་། སྒྲུབ་པར་འགྱུར་ཞིང་དངོས་གྲུབ་ཐམས་ཅད་ལ་ཡང་སྒྲུབ་པའི་ཐབས་སུ་དགོངས་པ་ཡིན་ནོ། །སྤྱི་བོར་བཞག་ནས་སྟེང་ནས་ཡོངས་སུ་དབབ་པར་བྱ་བ་དང་། ས་ལ་བཞག་ནས་ཁྲོ་གཉེར་གྱིས་གདེག་པ་

དང་། གནོད་སྦྱིན་གྱི་གཟུགས་བརྙན་བྱས་ནས་དེའི་སྙིང་གར་བཞག་ན་མངག་གཞུག་པར་འགྱུར་རོ། །དབང་ཕྱུག་ཆེན་པོའི་གནས་སུ་ཁྲོས་པས་བཟླ་བ་དང་། མ་མོའི་གནས་སུ་བཅིངས་ཏེ་བྷྱོ་ཞེས་བྱ་བ་དང་སྦྱར་ནས་མ་མོ་ཐམས་ཅད་དབང་དུ་འགྱུར་རོ། །རྩེ་བ་ལ་སོགས་
པའི་བསྒོ་བ་ཐམས་ཅད་བྱེད་པར་འགྱུར་རོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་ཐལ་མོ་བཅིངས་ཏེ། མཐེ་བོང་གཡོན་པའི་སྟེང་དུ་མཐེ་བོ་གཡས་པ་སེམས་དཔའི་སྐྱིལ་མོ་ཀྲུང་གི་ཚུལ་དུ་བཞག་ལ། མཛུབ་མོ་གཉིས་གཞིབས་
ཏེ་སོར་མོ་སྦྱར་བ་འདི་ནི། དཔལ་རྡོ་རྗེ་སེམས་དཔའི་སྐུའི་མཆོག་ཅེས་བྱ་བ་ནི་ཕྱག་རྒྱ་འདི་ཡིན་ཏེ། འདི་བཅིངས་ལ་སྤྱི་བོར་བཞག་ནས་སྟེང་གི་ཕྱོགས་ནས་ལྷ་ཐམས་ཅད་དབབ་པའི་བསམ་པས་གཡས་ལོགས་ནས་ཐུར་དུ་འབབ་པར་བྱས་ཏེ། དེ་ལྟ་བུས་ནི་ལྷ་ཐམས་ཅད་
དབབ་པར་བྱས་པར་འགྱུར་རོ། །དེ་བཞིན་དུ་ཐམས་ཅད་བྱས་ནས་རྡོ་རྗེ་སྐུའི་མཆོག་བཅིངས་ཏེ་ས་ལ་བཞག་ན་ཀླུ་ཐམས་ཅད་དབང་དུ་བྱ་བའི་བསམ་པས་ཁྲོ་གཉེར་བསྡུས་ལ་བཏེག་ན་ཀླུ་ཐམས་ཅད་དབང་དུ་བྱེད་དོ། །དེ་བཞིན་དུ་ཐམས་ཅད་བྱས་ལ་གནོད་སྦྱིན་གྱི་གཟུགས་
བརྙན་བྲིས་ཏེ། རྡོ་རྗེ་སྐུའི་མཆོག་དེའི་སྙིང་གར་གཞག་པར་བྱས་ཏེ། དེ་ལྟ་བུས་ནི་མངག་གཞུག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། དབང་ཕྱུག་ཆེན་པོའི་གནས་སུ་ཁྲོས་པའི་སྐུའི་མཆོག་བཅིངས་ལ་བཟླས་བརྗོད་བྱས་ན་འབྱུང་པོ་ཐམས་ཅད་མངག་
གཞུག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། བདག་ཉིད་དཔལ་ཧེ་རུ་ཀའི་སྐུར་བསམས་ལ་རྡོ་རྗེ་སྐུའི་མཆོག་བཅིངས་ཏེ། བྷྱོ་ཞེས་བྱ་བ་བཟླས་ནས་མ་མོ་ཐམས་ཅད་གཡོག་མོར་འགྱུར་ཞིང་རྩེ་ཞིང་རོལ་པ་ལ་སོགས་པའི་བསྒོ་བའི་ལས་ཐམས་ཅད་བྱེད་
པར་འགྱུར་རོ། །རྣམ་ཐོས་སྲས་མནན་ནས་དཔལ་དྲང་བ་དང་། ལྷའི་བུ་མོ་ཐམས་ཅད་དབྲོག་པ་དང་། ལྷ་དང་ལྷ་མ་ཡིན་གྱི་བུད་མེད་ཐམས་ཅད་རྩེ་བ་དང་། འཇིག་རྟེན་གསུམ་པོ་མ་ལུས་པ་ལས་རྒྱལ་བ་དང་། འདོད་པའི་དབང་ཕྱུག་ཐམས་ཅད་དབྲོག་པ་ལ་ནི་

རྡོ་རྗེ་གར་གྱི་སྐྱེས་བུ་བྱེད་པ་ཆེན་པོས་སོ་ཞེས་བྱ་བ་ལ་དེ་ནས་དེའི་མཚན་ཉིད་བཤད་པ་བྱ་སྟེ། རྡོ་རྗེ་གསོར་བའི་ཕྱག་རྒྱ་ཁྲོ་བ་དང་བཅས་པའི་བཞིན་གྱི་འཛུམ་གྱིས་ལས་བྱའོ། །འདི་ལྟ་སྟེ་ལུས་ངན་པོ་རྐང་པ་གཡོན་པས་མནན་ཏེ། བསྒྲུབ་པ་དང་
གཞོན་ནུ་མའི་མདུན་དུ་སྒྲུབ་ཅིང་འབར་བའི་མིག་སྦྱོར་བ་བྱ་བ་དང་། འབག་བྲིས་ལ་བལྟ་ཞིང་བསྒྲུབ་པ་དང་། དབང་ཕྱུག་ཆེན་པོས་རྐང་པ་གཡོན་པས་མནན་ལ་ཧཱུཾ་མཛད་དུ་སྦྱོར་བ་དང་། ཨ་ནུ་རཱ་ག་ཡཱ་མི་ཧཱུཾ་ཧཱུཾ་ཞེས་བྱ་བས་འདོད་པའི་དབང་ཕྱུག་རྡོ་རྗེའི་མདས་བསད་ལ་
ཁ་སྦུབ་ཏུ་བཞག་སྟེ་རྡོ་རྗེ་གསོར་བར་བྱའོ། །འདིས་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་མེ་ལྟར་འབར་བར་བདག་ཉིད་བསམས་ཏེ། དེའི་ཕྱག་རྒྱ་ཆེན་པོ་དེས་རྡོ་རྗེ་འབར་བ་གསོར་ཞིང་ཁྲོ་བ་དང་བཅས་པས་འཛུམ་པའི་བཞིན་གྱིས་
ལུས་ངན་པོའི་གཟུགས་བརྙན་རྐང་པ་གཡོན་པས་མནན་ལ་བཟླས་བརྗོད་བྱའོ། །དེ་ལྟ་བུས་ནི་དཔལ་དྲང་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་གཞོན་ནུ་མའི་མདུན་དུ་ལྷའི་བུ་མོ་ཐམས་ཅད་འཕྲོག་པའི་བསམ་པས་རྡོ་རྗེ་འབར་བའི་ལྟ་བས་དགུག་ཅིང་བཟླས་ན་དེ་ལྟ་
བུས་ནི་ལྷའི་བུ་མོ་ཐམས་ཅད་འཕྲོག་པར་འགྱུར་རོ། །རྩིག་པ་ལ་སོགས་པ་ལ་བུད་མེད་ཀྱི་གཟུགས་བྲིས་ལ་གནོད་སྦྱིན་མ་ལ་སོགས་པ་ལྷ་དང་ལྷ་མ་ཡིན་མ་ཡིན་པའི་མངོན་པར་འདོད་པའི་བུད་མེད་དེར་བཅུག་ལ་ཡང་དག་པར་སྦྱོར་བ་བསྒོམ་ཞིང་དེ་ལ་བལྟ་བཞིན་དུ་བཟླས་ན་དེ་ལྟ་
བུས་ནི་བུད་མེད་ཐམས་ཅད་དང་རྩེ་བར་འགྱུར་རོ། །དེ་བཞིན་དུ་རྡོ་རྗེ་གསོར་ཞིང་དབང་ཕྱུག་ཆེན་པོའི་གཟུགས་བརྙན་རྐང་པ་གཡོན་པས་མནན་ལ། ཨ་ནུ་རཱ་ག་ཡཱ་མི་ཧཱུཾ་ཧཱུཾ་ཞེས་བྱ་བ་བཟླས་པ་བྱས་ན་དེ་ལྟ་བུས་ནི་འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བར་འགྱུར་རོ། །
རྡོ་རྗེ་མདའི་ཕྱག་རྒྱ་སྔར་བཤད་པའི་ཚུལ་གྱིས་འདོད་པའི་དབང་ཕྱུག་གི་གཟུགས་བརྙན་ལ་བསྣུན་ལ་དེ་ནས་དེ་ཁ་སྦུབ་ཏུ་བཞག་སྟེ། རྡོ་རྗེ་གསོར་ཞིང་བཟླས་པར་བྱས་ཏེ། དེ་ལྟ་བུས་ནི་དབང་ཕྱུག་ཆེན་པོ་ཐམས་ཅད་འཕྲོག་པར་འགྱུར་རོ། །མཆོད་པ་ཐམས་ཅད་གྲུབ་པ་དང་། །

ཞེས་བྱ་བ་ནི་འདོད་ཆགས་རྡོ་རྗེ་ལ་སོགས་པའི་མཆོད་པ་ཐམས་ཅད་དེ། དེ་རྣམས་ཀྱིས་བསྒྲུབ་པ་སྐྱེད་པའོ། །ཐམས་ཅད་རྡོ་རྗེར་བྱ་བ་དང་། །ཞེས་བྱ་བ་ནི་བདག་དང་གཞན་གྱིས་མི་ཕྱེད་པར་བྱའོ། །བདུད་ལ་སོགས་པ་གདུག་པ་ཐམས་ཅད་ནི་གཞན་ལ་གནོད་པར་བྱེད་པར་ཉེ་བར་
ཞུགས་པ་རྣམས་སོ། །དེ་རྣམས་རབ་ཏུ་གཞོམ་པ་ནི་ཤིན་ཏུ་འདུལ་བའོ། །ཕྱག་རྒྱ་ཐམས་ཅད་བཅིངས་པ་ནི་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་ངེས་པར་བཅིངས་པའོ། །དངོས་གྲུབ་ཀྱི་མཆོག་ལ་སོགས་པ་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་
ཀྱི་ལས་ཀྱི་རྒྱུན་ནི་དེའི་ལས་ཀྱི་རབ་འབྱམ་སྟེ། དེ་མྱུར་དུ་བསྒྲུབ་པར་བྱ་བ་ལ་ནི་རྫོགས་པར་བྱ་བའོ། །འདི་དག་ཐམས་ཅད་ཇི་ལྟར་གྲུབ་པར་འགྱུར་ཞེ་ན། རྡོ་རྗེ་གར་གྱི་དོན་ཡོད་པའི་ཐོགས་པ་མེད་པ་ལ་མྱུར་བའི་ལས་སྣ་ཚོགས་ཀྱི་དངོས་གྲུབ་དམ་པས་སོ་ཞེས་གསུངས་
སོ། །དེ་ནས་འདིའི་མཚན་ཉིད་ནི་བཤད་པར་བྱ་སྟེ། རྡོ་རྗེ་གསང་བའི་མཆོད་པ་རྣམས་ནི་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཅེས་བྱའོ། །རྡོ་རྗེ་ཁུ་ཚུར་གཉིས་ཀྱིས་གོ་ཆའི་རྣམ་པར་སྤྱད་ལ་སྤྱི་བོར་དབང་བསྐུར་བ་གཉིས་བཞག་ལ་ངོས་གཉིས་སུ་ཕྲེང་བ་གཉིས་ཀྱི་རྣམ་པར་
བྱས་ལ་དེ་བཞིན་དུ་དར་དཔྱངས་བཅིངས་པ་དང་། གཡོན་དུ་རྡོ་རྗེ་མདའ་འཕང་བ་དང་། རྡོ་རྗེ་སྙེམས་མ་དང་། ཕྱག་རྒྱ་ཆེན་པོའོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ། དང་པོའི་རྡོ་རྗེ་བཅིངས་ཏེ། རྡོ་རྗེ་མཚོན་ཆ་མ་ལ་
སོགས་པ་མཆོད་པ་བཅུ་གཉིས་བསྐྱེད་ལ་དེ་རྣམས་ཀྱིས་དཔལ་རྡོ་རྗེ་སེམས་དཔའ་ལ་སོགས་པ་ཡིད་ཀྱིས་མཆོད་པར་བྱས་ཏེ། དེ་ལྟ་བུས་ནི་ཐམས་ཅད་གྲུབ་པར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་ཁུ་ཚུར་བཅིངས་ཏེ། སྙིང་ག་དང་། ལྐོག་མ་
དང་། རྒྱབ་དང་། ཡང་སྙིང་ག་དང་། དེ་ནས་ནུ་མའི་བར་དང་། དེ་ནས་སྙིང་ག་དང་། ལྐོག་མ་དང་། ལྟག་པར་དེ་ནས་དབང་བསྐུར་བའི་གནས་སུ་མདུད་པའི་ཚུལ་གྱིས་གོ་ཆ་བགོ་བ་བྱས་ལ་སྤྱི་བོ་དང་དབང་བསྐུར་བའི་གནས་སུ་མདུད་པ་བྱ་བའི་ཚུལ་དང་། གཡས་དང་གཡོན་གྱི་

མགོ་བོའི་ལོགས་སུ་མདུད་པའི་ཚུལ་དུ་བྱས་ལ་དར་དཔྱངས་བཅིངས་པའི་ཚུལ་དུ་བྱས་ཏེ། འདིས་ནི་ཐམས་ཅད་རྡོ་རྗེར་བྱས་པར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་གྱི་གོ་ཆ་ཐམས་ཅད་བྱས་ལ་རྡོ་རྗེ་ཁུ་ཚུར་གཉིས་བཅིངས་
ཏེ། གཡོན་ལོགས་སུ་མདའ་འཕང་བའི་ཚུལ་དུ་བྱ་ཞིང་། རྡོ་རྗེ་མདས་ཀྱང་གདུག་པ་ཐམས་ཅད་འཇོམས་པར་བྱེད་པར་བསམ་པར་བྱས་ཏེ། དེ་ལྟ་བུས་ནི་བདུད་ལ་སོགས་པའི་གདུག་པ་ཐམས་ཅད་རབ་ཏུ་འཇོམས་པར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་
བྱས་ལ་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་རྡོ་རྗེ་བསྙེམས་པ་བཅིངས་ནས་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་མ་ལུས་པར་བཅིང་བར་བསམ་པར་བྱས་ཏེ། དེ་ལྟ་བུས་ནི་ཕྱག་རྒྱ་ཐམས་ཅད་ངེས་པར་འཆིང་བར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་
སྦྱོར་བ་བྱས་ལ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིང་བར་བྱའོ། །འདིས་ནི་དངོས་གྲུབ་དམ་པ་མ་ལུས་ཤིང་ལུས་པ་མེད་པ་ཡིད་ལ་མངོན་པར་འདོད་པ་གྲུབ་པར་འགྱུར་རོ། །གར་ལས་བྱུང་བའི་ཕྱག་རྒྱ་བརྒྱ་ཕྲག་གཉིས་པ་འདི་རྫོགས་པ་སྟེ། ལས་ཉིས་བརྒྱ་
སྒྲུབ་པར་བྱེད་པའི་ཕྱག་རྒྱ་ཡི་གེ་ཧཱུཾ་ཟློས་ཤིང་བཅིང་བར་བྱའོ། །ཨ་ནུ་རཱ་ག་ཡཱ་མི་ཧཱུཾ་ཞེས་ཟློས་ཤིང་ལས་ལ་ངེས་པར་སྦྱར་བར་བྱའོ། །དེ་ལྟར་ལས་ཉིས་བརྒྱ་བསྒྲུབ་པར་བྱ་བའི་ཕྱིར། ཕྱག་རྒྱ་ཉིས་བརྒྱའི་མཚན་ཉིད་གསུངས་ནས་ད་ནི་ཕྱག་རྒྱ་ཆེན་པོ་བཅིང་བ་དེ་རྣམས་ཀྱི་སྙིང་
པོ་དང་། བཟླས་པའི་སྙིང་པོ་གསུངས་པ་ནི་དེ་ནས་ཕྱག་རྒྱ་ཐམས་ཅད་བསྒྲུབ་པའི་ཆོ་ག་རྒྱས་པའི་རྒྱུད་དོ་ཞེས་བྱ་བ་ཡིན་ཏེ། དེ་ནས་ཞེས་བྱ་བའི་སྒྲ་ནི་གནས་སྐབས་སོ། །ཕྱག་རྒྱ་ཡང་ཡིན་ལ་ཐམས་ཅད་ཀྱང་ཡིན་པས་ན་ཕྱག་རྒྱ་ཐམས་ཅད་དེ། །ཇི་སྐད་དུ་བཤད་པའི་ལས་ཐམས་ཅད་
སྒྲུབ་པར་བྱེད་པ་རྣམས་སོ། །དེ་རྣམས་ཀྱི་སྒྲུབ་པ་ནི་རང་དབང་དུ་བྱ་བའོ། །དེའི་ཆོ་ག་ནི་ཡི་གེ་ཧཱུཾ་བཟླས་ནས་ལས་ཐམས་ཅད་སྒྲུབ་པར་བྱེད་པའི་ཕྱག་རྒྱ་རྣམས་ཀྱི་བཅིང་བའོ། །དེའི་རྒྱས་པ་ནི་དེའི་རྒྱུན་ནོ། །ཉིན་རེ་ཞེས་བྱ་བ་ནི་ཉིན་ཞག་རེ་རེ་ཞིང་ངོ་། །དང་པོར་ཞེས་བྱ་བ་ནི་ལས་རྣམས་

ཀྱི་ཐོག་མར་རོ། །ལན་ཅིག་ཅེས་བྱ་བ་ནི་ལན་ཅིག་གཅིག་གོ། །ཕྱག་རྒྱ་ཆེན་པོ་རབ་གྲུབ་བྱ། །ཞེས་བྱ་བ་ནི་རྗེས་སུ་མཉེས་པར་བྱེད་པ་ལ་སོགས་པ་གྲུབ་པར་བྱེད་པའི་ཇི་སྐད་དུ་བཤད་པའི་མཚན་ཉིད་ཅན་གྱི་ཕྱག་རྒྱ་ནི་ཕྱག་རྒྱ་ཆེན་པོ་དེ་བསྒྲུབ་པར་བྱའོ། །གང་གིས་དེ་བསྒྲུབ་པར་བྱ་ཞེ་ན། ལན་
ཅིག་བཟླས་པ་ཞེས་བྱ་བ་གསུངས་ཏེ། ལན་ཅིག་བཟླས་པ་དེས་སོ། །དེ་ནས་ཅི་ཞིག་ལན་ཅིག་བཟླས་ཤེ་ན། སྙིང་པོ་མཆོག་ཅེས་བྱ་བ་གསུངས་ཏེ་སྙིང་པོ་བཟང་པོ་ནི་སྙིང་པོ་མཆོག་སྟེ། ཡི་གེ་ཧཱུཾ་དང་། སྙིང་པོ་མཆོག་མངོན་པར་འདོད་པའི་དངོས་གྲུབ་སྩོལ་བར་བྱེད་པའི་ཕྱག་རྒྱ་དེ་
ལ་ལན་ཅིག་མངོན་པར་བསྔགས་ཤིང་ལན་ཅིག་བཟླས་པའི་སྙིང་པོ་མཆོག་གིས་ཕྱག་རྒྱ་ཆེན་པོ་རབ་ཏུ་བསྒྲུབ་པར་བྱའོ། །རྒྱུ་ཅི་ཞིག་གི་ཕྱིར་ཞེ་ན། གང་གི་ཕྱིར། ཕྱག་རྒྱ་ཐམས་ཅད་རབ་སྒྲུབ་བྱེད། །ཅེས་བྱ་བ་གསུངས་ཏེ། ཇི་སྐད་དུ་བཤད་པའི་ལས་སྒྲུབ་པར་བྱེད་པའི་ཕྱག་རྒྱ་དེ་
རྣམས་ནི་ཤིན་ཏུ་བསྒྲུབ་པ་ཡིན་པས་ན། ཕྱག་རྒྱ་ཐམས་ཅད་རབ་གྲུབ་བྱེད། །ཅེས་བྱ་བ་སྟེ། གང་གི་ཕྱིར་ཧཱུཾ་གི་གཟུགས་ཅན་འདི་ནི་སྙིང་པོ་ཡིན་ནོ། །དེ་བས་ན་ལས་ཐམས་ཅད་སྒྲུབ་པར་བྱེད་པའི་ཕྱག་རྒྱ་ལ་ཧཱུཾ་ཟློས་ཤིང་བཅིང་བར་བྱའོ། །དེ་ཡི་རྗེས་ལ་ཉེ་སྙིང་པོ། །ལས་
རྣམས་ཀུན་ལ་ངེས་སྦྱོར་བས། །ཞེས་བྱ་བ་ནི་དེ་ལྟར་ཡི་གེ་ཧཱུཾ་ལན་ཅིག་བཟླས་ལ། མངོན་པར་འདོད་པའི་དངོས་གྲུབ་སྒྲུབ་པར་བྱེད་པའི་ལས་ཀྱི་ཕྱག་རྒྱ་བཅིངས་ནས། དེའི་རྗེས་ལ་ཨ་ནུ་རཱ་ག་ཡཱ་མི་ཧཱུཾ་ཞེས་བྱ་བ་ཉེ་བའི་སྙིང་པོ་དང་བཅས་པའི་ཧཱུཾ་བཟླས་པར་བྱ་སྟེ། དེ་ལྟ་བུས་ནི་རྗེས་སུ་
མཉེས་པར་བྱ་བ་ལ་སོགས་པ་ལས་ཀྱི་དངོས་གྲུབ་ཐམས་ཅད་ལ་ངེས་པར་སྦྱོར་བར་བྱས་པར་འགྱུར་རོ། །དེ་ལྟར་བྱས་པས་ཇི་ལྟར་འགྱུར་ཞེ་ན། དོན་ཡོད་གྲུབ་པས་ལས་རྣམས་ནི། །ཀུན་ལ་ཤིན་ཏུ་གྲུབ་པར་འགྱུར། །ཞེས་བྱ་བ་གསུངས་ཏེ། དོན་ཡོད་པར་གྲུབ་པར་འགྱུར་བས་
ཕྱག་རྒྱའི་ལས་ཀུན་ལ་ཞེས་པ་རྗེས་སུ་མཉེས་པར་བྱ་བ་ལ་སོགས་པ་ཐམས་ཅད་ཤིན་ཏུ་ཞེས་བྱ་བ་ལྷག་པར་གྲུབ་པར་འགྱུར་རོ། །ཕྱག་རྒྱ་ཐམས་ཅད་བདག་བྱིན་བརླབ། །ཅེས་བྱ་བ་ལས་ཐམས་ཅད་འགྲུབ་པར་བྱེད་པའི་ཕྱག་རྒྱ་རྣམས་ནི་ཕྱག་རྒྱ་ཐམས་ཅད་དེ། དེ་རྣམས་ཀྱིས་

ལེགས་པར་བྱིན་གྱིས་རློབ་པ་ནི་ཕྱག་རྒྱ་ཐམས་ཅད་རབ་ཏུ་བྱིན་གྱིས་རློབ་པ་སྟེ། དཔལ་རྡོ་རྗེ་སེམས་དཔའི་སྐུ་དང་། གསུང་དང་། ཐུགས་རྡོ་རྗེའི་ནུས་པ་གདུལ་བྱ་རྣམས་ཀྱི་རྒྱུད་ལ་གྲུབ་པའོ། །དེའི་དོན་གྱིས་ཕྱག་རྒྱ་ནི་ཇི་སྐད་དུ་བཤད་པའི་མཚན་ཉིད་
ཅན་ཡིན་ནོ། །ཕྱག་རྒྱ་རྡོ་རྗེ་ཞེས་བྱ་བ་ནི་དཔལ་རྡོ་རྗེ་སེམས་དཔའི་ཕྱག་རྒྱ་འདིའོ། །ནི་ཞེས་བྱ་བའི་སྒྲ་ནི་ངེས་པར་གཟུང་བ་སྟེ། ཕྱག་རྒྱ་ཐམས་ཅད་མཆོག་ཏུ་བྱིན་གྱིས་རློབ་པའི་དོན་དེ་ཉིད་དུའོ། །དེ་ཅིའི་ཕྱིར་ཞེ་ན། གང་གི་ཕྱིར། དཀྱིལ་འཁོར་དག་ཀྱང་མ་མཐོང་བའམ། །མ་
བཤད་པ་ལའང་རབ་གྲུབ་འགྱུར། །ཞེས་བྱ་བ་གསུངས་ཏེ། དཀྱིལ་འཁོར་དུ་མ་ཞུགས་པ་ལ་མ་བཤད་པ་ཡང་ཇི་སྐད་དུ་བཤད་པའི་མཚན་ཉིད་དུ་གྲུབ་པར་འགྱུར་རོ་ཞེས་བྱའོ། །རྟོག་པ་འདིར་ནི་ཞེས་བྱ་བ་རྒྱུད་འདིར་རོ། །འཇིགས་པ་ཡོད་མིན་ཏེ་ཞེས་བྱ་བ་ནི་དམ་ཚིག་ལས་
ཉམས་པ་མེད་པའོ། །ཕྱག་རྒྱ་སྦྱིན་པ་ནི་རྗེས་སུ་མཉེས་པ་ལ་སོགས་པའི་ལས་སྒྲུབ་པར་ཕྱག་རྒྱའི་ཆེ་བ་ཉིད་བསྟན་པར་འདོད་པར་བྱ་བའི་ཕྱིར་གདུལ་བྱ་རྣམས་ལ་རབ་ཏུ་སྟོན་པར་བཤད་ཅིང་འཁོར་ལོ་མེད་པས་ཏེ། དཀྱིལ་འཁོར་དུ་མ་ཞུགས་པ་རྣམས་ལའོ། །ཅིའི་ཕྱིར་འཁོར་
ལོ་མེད་པ་རྣམས་ལ་ཕྱག་རྒྱ་བསྟན་ན་རྟོག་པ་འདི་ལ་འཇིགས་ཤིང་ཉམས་པ་མེད་ཅེ་ན། གང་གི་ཕྱིར་བདག་ལ་བྱིན་གྱིས་རློབ་པས། རང་སྲས་རྒྱུར་ནི་འགྱུར་བ་ཡིན། །ཞེས་བྱ་བ་གསུངས་ཏེ། གང་གི་ཕྱིར་དཀྱིལ་འཁོར་དུ་མ་ཞུགས་པ་དེ་རྣམས་ཀྱིས་ཀྱང་ཕྱག་རྒྱ་བཅིངས་ཏེ། བཟླས་
ན་འདི་སྐད་བཤད་པའི་བདག་ལ་བྱིན་གྱིས་བརླབས་པས། དེ་བཞིན་གཤེགས་པ་ཉིད་ཀྱི་སྲས་བྱང་ཆུབ་སེམས་དཔའ་རྣམས་ལ་དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་དངོས་གྲུབ་ཀྱི་བག་ཆགས་བསྐྱེད་པར་འགྱུར་རོ། །བསམ་པ་ཤེས་ནས་སྦྱིན་པར་བྱ། །ཞེས་བྱ་བ་ཕྱག་
རྒྱའི་ཡུལ་ལ་གདུལ་བྱ་རྣམས་ཀྱི་སེམས་དང་བ་ཉིད་དུ་ཤེས་ན་ཕྱག་རྒྱ་སྦྱིན་པར་བྱའོ། །ཇི་ལྟ་བུ་ཞེ་ན། སྡིག་པ་ཆེན་པོ་བྱེད་པའང་ཞེས་བྱ་བ་གསུངས་ཏེ། མཚམས་མེད་པའི་ལས་ནི་སྡིག་པ་ཆེན་པོ་སྟེ། གང་གིས་དེ་བྱས་པ་དེ་ནི་སྡིག་པ་ཆེན་པོ་བྱེད་པའོ། །སྡིག་པ་ཆེན་པོ་བྱེད་པ་དེ་རྣམས་

ལ་འང་ཞེས་བྱ་བའི་སྒྲས་ནི་གཞན་དག་ལ་ནི་ཤིན་ཏུ་འང་སྦྱིན་པར་བྱའོ། །ཇི་ལྟ་བུ་ཞེ་ན་ཞེས་སྟོན་ཏོ། །དེ་ལྟ་བུ་ལ་ནི་སྙིང་པོ་བྱིན་ཡང་དགོས་པ་ཅི་འང་མེད་དོ་ཞེས་གཞན་དག་རྟོགས་ན། དེའི་ཕྱིར་འདི་དག་བཅིངས་པ་ཙམ་གྱིས་དེ་དག་ཅེས་བྱ་བ་གསུངས་ཏེ། ཇི་སྐད་དུ་བཤད་པའི་ལས་
གྲུབ་པའི་ཕྱག་རྒྱ་འདི་དག་སྡིག་པ་ཆེན་པོ་བྱེད་པ་རྣམས་ཀྱིས་ཀྱང་བཅིངས་པ་ཙམ་གྱིས་སྡིག་པ་ཆེན་པོ་བྱེད་པའི་སེམས་ཅན་དེ་ནི་དེ་དག་རྣམ་པར་སྦྱོང་བར་བྱེད་ཅིང་གཙང་བ་དང་དག་པར་བྱེད་པ་ཡིན་ནོ། །གང་གི་ཕྱིར་སྡིག་པ་བྱེད་པས་ཀྱང་། འདིའི་བཅིངས་པ་ཙམ་གྱིས་དག་པར་བྱེད་པ་
དེས་བྱིན་ཞིང་སྩལ་ན། དངོས་གྲུབ་ཐམས་ཅད་འགྲུབ་པར་འགྱུར་བས་ན་དགོས་པ་ཡོད་པ་ཉིད་ཡིན་ནོ། །མཆོག་དང་པོ་ཞེས་བྱ་བ་ནི་བཤད་ཟིན་ཏོ། །རྟོག་པ་ཡང་ཡིན་ལ་ཆེན་པོ་ཡང་ཡིན་པས་ན་རྟོག་པ་ཆེན་པོའོ། །དེ་ཉིད་རྟོག་པ་ཐམས་ཅད་ལས་མཆོག་ཏུ་གྱུར་པས་མཛེས་ཤིང་འབར་
བས་ན་རྒྱལ་པོའོ། །དེའི་བདེ་བ་ཆེན་པོ་ནི་ཐར་པ་ཆེན་པོའོ། །དེ་ཉིད་ནི་མི་ཕྱེད་པས་ན་རྡོ་རྗེ་ལྟ་བུ་ཡིན་པས་ན་རྡོ་རྗེའོ། །མངོན་པར་འདོད་པའི་དངོས་གྲུབ་ཐམས་ཅད་བསྐྱེད་པ་ཉིད་ཀྱིས་འབྲས་བུ་དང་བཅས་པས་ན་དེ་ཉིད་དོན་ཡོད་པའོ། །དེའི་རྒྱུ་མཐུན་པ་ལས་བྱུང་བ་དཔལ་རྡོ་རྗེ་
སེམས་དཔའི་ལྷ་མོའི་དཀྱིལ་འཁོར་ལ་སོགས་པའི་དེ་ཁོ་ན་ཉིད་ནི་དམ་ཚིག་གོ། །དེའི་ཆོ་ག་རྒྱས་པ་ནི་སྒྲུབ་པ་དང་བསྒྲུབ་པར་བྱ་བའི་རྒྱུ་ནི་དེ་སྟོན་པར་བྱེད་པའི་སྒྲའི་ཚོགས་ནི་རྟོག་པ་ལས་བྱུང་བའི་ཕྱིར་རྟོག་པ་ཞེས་བྱའོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་
ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པའི་རྟོག་པ་ཐམས་ཅད་ཀྱི་རྒྱུད་ཕྱི་མའི་རྩ་བའི་རྒྱུད་ལས། དཔལ་རྡོ་རྗེ་སེམས་དཔའི་བདེ་བ་ཆེན་པོ་རྡོ་རྗེ་གསང་བའི་དཀྱིལ་འཁོར་ཆེན་པོའི་བཤད་པ་རྫོགས་སོ།། །།དེ་ལྟར་འདོད་ཆགས་ཀྱིས་འདོད་ཆགས་སྤང་བར་བྱ་བའི་
ཕྱིར་དཔལ་རྡོ་རྗེ་སེམས་དཔའི་དཀྱིལ་འཁོར་གསུངས་ནས། ད་ནི་རང་བཞིན་བཟང་བའི་སེམས་ཅན་རྣམས་རྗེས་སུ་གཟུང་བའི་ཕྱིར་དེ་བཞིན་གཤེགས་པའི་རྟོག་པ་གསུངས་པ་ནི། དེ་ནས་སྟོན་པ་རྡོ་རྗེ་འཛིན། །ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་

བའི་སྒྲ་ནི་དེ་མ་ཐག་པ་སྟེ། དང་པོའི་སྦྱོར་བའི་རྗེས་ཐོགས་ཉིད་ལའོ། །འདིར་དང་པོའི་སྦྱོར་བའི་ཏིང་ངེ་འཛིན་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པ་ཉིད་གཟུང་ངོ་། །སྟོན་པ་ཞེས་བྱ་བ་ནི་བྱང་ཆུབ་ཀྱི་སེམས་ལ་སོགས་པ་རྟོགས་པར་བྱ་བའི་ཕྱིར་
སེམས་ཅན་རྣམས་ཀྱི་དོན་མཛད་ཅིང་། སྟོན་པས་རང་གི་བཀའ་བསྒོ་བ་ལ་ངེས་པར་སྦྱོར་བར་མཛད་པས་ན་སྟོན་པའོ། །རྡོ་རྗེ་འཛིན་པ་ནི་རྡོ་རྗེ་སེམས་དཔའོ། །འབྱིན་པ་ནི་སངས་རྒྱས་ལ་སོགས་པའི་སྤྲུལ་པ་མཛད་པའོ། །བྱེད་པ་ཞེས་བྱ་བ་ནི་འདུལ་བའི་སྐྱེ་བོ་རྣམས་དཔལ་རྡོ་རྗེ་
སེམས་དཔའ་ལ་སོགས་པའི་ངོ་བོར་མཛད་པའོ། །བདེ་བ་ཆེ་ཞེས་བྱ་བ་ནི་བཤད་ཟིན་ཏོ། །བདེ་བ་ཆེན་པོ་རབ་བརྟན་ཕྱིར། །ཞེས་བྱ་བ་ནི། རབ་ཏུ་དགའ་བ་ལ་སོགས་པའི་ས་ཐོབ་པའི་སེམས་ཅན་རྣམས་ཀྱི་གཉིས་སུ་མེད་པའི་སེམས་དང་སེམས་ལས་བྱུང་བའི་བརྟན་
པའི་དོན་ཏོ། །སེམས་ཅན་ཐམས་ཅད་རྣམ་དག་ཕྱིར། །ཞེས་བྱ་བ་ནི་ཁམས་གསུམ་པར་གཏོགས་པའི་སེམས་ཅན་གྱི་ཁམས་ཐམས་ཅད་སངས་རྒྱས་ཉིད་དུ་རྟོགས་པ་ནི་སེམས་ཅན་ཐམས་ཅད་རྣམ་པར་དག་པ་སྟེ། སེམས་ཅན་ཐམས་ཅད་རྣམ་པར་དག་པའི་ཕྱིར་དེ་བཞིན་
གཤེགས་པའི་རིགས་འབྱུང་ངོ་ཞེས་བྱ་བར་སྦྱར་རོ། །ཅི་ཞིག་མཛད་ནས་དེ་བཞིན་གཤེགས་པའི་རིགས་སྤྲུལ་པར་མཛད་ཅེ་ན། ཀུན་གྱི་བདག་ཉིད་ལ་ཞུགས་ཏེ། །ཞེས་བྱ་བ་གསུངས་ཏེ། ཐམས་ཅད་ཀྱི་བདག་ཉིད་ནི་ཀུན་གྱི་བདག་ཉིད་དེ་བཅོམ་ལྡན་འདས་རྣམ་པར་
སྣང་མཛད་དོ། །དེ་ཡང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་རང་བཞིན་ཞེས་བྱ་བའི་ཐ་ཚིག་གོ། །ཀུན་གྱི་བདག་ཉིད་དེར་ཞུགས་པ་ནི་ཞུགས་པར་མཛད་པའོ། །རྡོ་རྗེ་ཞེས་བྱ་བའི་སྒྲ་ནི་ངེས་པར་བཟུང་བ་སྟེ། དེ་ཉིད་རབ་ཏུ་ཞུགས་པའོ། །ཀུན་གྱི་བདག་
ཉིད་ཀྱི་ཁྱད་པར་ཇི་ལྟ་བུ་ཞེ་ན། ཁམས་གསུམ་དང་མཉམ་ཟད་པ་མེད། །ཅེས་བྱ་བ་གསུངས་ཏེ། ནམ་མཁའི་ཁམས་ཐམས་ཅད་ན་རྟག་ཏུ་གནས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་ཁམས་ནི་ཐམས་ཅད་ཀུན་ནོ། །ཁམས་དེ་དག་

ཐམས་ཅད་མཉམ་ཞིང་མཚུངས་པས་ན་ཁམས་ཀུན་དང་མཉམ་མོ། །དེ་ཉིད་ཀྱིས་མི་ཟད་པ་ཡིན་པས་ན། ཁམས་ཀུན་དང་མཉམ་ཟད་པ་མེད། །ཅེས་བྱའོ། །ཁམས་ཀུན་དང་མཉམ་པ་ཡང་ཡིན་ལ་ཟད་པ་མེད་པ་ཡང་ཡིན་པས། ཁམས་ཀུན་དང་མཉམ་ཟད་པ་མེད། །
ཅེས་བྱ་སྟེ། ཁམས་ཀུན་དང་མཉམ་ཞིང་ཟད་པ་མེད་པའི་རྣམ་པར་སྣང་མཛད་དེ་ལ་ཞུགས་ནས། ཀུན་གྱི་བདག་ཉིད་དེ་མཉམ་ཞིང་མི་མཉམ་པ་མེད་པར་སྤྲོ་ཞིང་ཁྱབ་པར་མཛད་པ་ཡང་དག་པར་གྲུབ་པ་སྟེ། ལེགས་པར་གྲུབ་པའམ། །མ་ཉམས་པར་གྲུབ་པ་མི་འབྱུང་
བའོ། །དེ་ཡང་ལོངས་སྤྱོད་རྫོགས་པའི་སྐུའི་རང་བཞིན་རྣམ་པར་སྣང་མཛད་ཀྱི་སྐུ་ལ་ཁྱབ་ཅིང་བཅོམ་ལྡན་འདས་རྣམ་པར་སྣང་མཛད་དང་ལྷན་ཅིག་ཏུ་གྱུར་ཏོ་ཞེས་བྱ་བའི་ཐ་ཚིག་གོ། །དེ་བཞིན་གཤེགས་པའི་རིགས་ཕྱུང་ངོ་ཞེས་བྱ་བ་ནི་དེ་བཞིན་གཤེགས་པ་རྣམས་ཀྱི་རིགས་
གང་ཡིན་པ་དེ་བསྐྱེད་པར་འགྱུར་རོ། །ཞིང་ནི་ཐམས་ཅད་མཐའ་ཡས་པ། །ཞེས་བྱ་བ་ནི་སངས་རྒྱས་ཀྱི་ཞིང་ནམ་མཁའི་ཁམས་ཐམས་ཅད་དང་འདྲ་བར་མཐའ་ཡས་ཤིང་རྒྱ་ཆེ་བའོ། །དེ་ཉིད་ནི་འཇིག་རྟེན་ཐམས་ཅད་དོ། །ཁམས་བཅས་པ་ཞེས་བྱ་བ་ནི་སངས་རྒྱས་ཀྱི་
ཞིང་དེ་རྣམས་ཉིད་ནས་ས་འོག་དང་ས་བླ་དང་ལྷ་ཡུལ་གྱི་རང་བཞིན་ཅན། མཐའ་ཡས་པའི་འཇིག་རྟེན་གསུམ་པོ་གང་ཡིན་པ་ནི་འཇིག་རྟེན་ཐམས་ཅད་དེ་ནི་འདོད་པ་དང་གཟུགས་དང་གཟུགས་མེད་པའི་ཁམས་ཀྱི་མཐའ་ཡས་པ་དང་ལྷན་ཅིག་ཏུ་གནས་པས་ན། འཇིག་རྟེན་
ཐམས་ཅད་དང་ཁམས་ཐམས་ཅད་ཅེས་བྱའོ། །དེའི་ཚེ་སངས་རྒྱས་ཐམས་ཅད་ཀྱིས། །ཏིལ་གྱི་གོང་བུ་བཞིན་དུ་གང་། །ཞེས་བྱ་བ་ནི། ཞིང་ཁམས་ཐམས་ཅད་དང་ཇི་སྐད་དུ་བཤད་པའི་འཇིག་རྟེན་ཐམས་ཅད་ཁམས་དང་བཅས་པ་གང་ཡིན་པ་དེ་ཐམས་ཅད་ནི་དེ་བཞིན་
གཤེགས་པ་ཐམས་ཅད་ཀྱི་རིགས་བསྐྱེད་པར་བྱ་བས་ན། དཔེར་ན་ཏིལ་གྱི་གོང་བུ་ལ་ཏིལ་གྱི་ས་བོན་གྱིས་བར་མཚམས་མེད་པར་ཡོངས་སུ་གང་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་རྡུལ་ཕྲ་རབ་དང་མཉམ་པའི་ཞིང་ཐམས་ཅད་དང་། ཁམས་དང་བཅས་པའི་

འཇིག་རྟེན་ཐམས་ཅད་རྣམ་པར་སྣང་མཛད་ལ་སོགས་པའི་སངས་རྒྱས་ཐམས་ཅད་ཀྱིས་དུས་དེའི་ཚེ་མྱུར་ཞིང་རེངས་པར་ཡོངས་སུ་གང་བར་འགྱུར་རོ། །འཇིག་རྟེན་ཁམས་ནི་ཐམས་ཅད་ན། །སེམས་ཅན་ཀུན་མདུན་ཡང་དག་བཞུགས། །ཞེས་བྱ་བ་འདི་ན་
སངས་རྒྱས་ཀྱི་ཞིང་མཐའ་ཡས་པ་ཡོངས་སུ་གང་བ་མཛད་པ་ནི་སངས་རྒྱས་དང་བཅས་པ་དང་། སངས་རྒྱས་མེད་པའི་འཇིག་རྟེན་གྱི་ཁམས་ཐམས་ཅད་ན་འགྲོ་བ་དྲུག་ཏུ་གཏོགས་པའི་སེམས་ཅན་ཐམས་ཅད་ལ་རེ་རེའི་ཡང་མདུན་ན་བཞུགས་པར་སྣང་བས། སེམས་ཅན་ཀུན་
མདུན་ཡང་དག་བཞུགས། །ཞེས་བྱ་བའོ། །ཅི་ཞིག་གི་དོན་དུ་ཞེ་ན། སེམས་ཅན་ཐམས་ཅད་རྣམ་དག་ཕྱིར། །ཞེས་བྱ་བ་གསུངས་ཏེ། སེམས་ཅན་ཡང་ཡིན་ལ་ཐམས་ཅད་ཀྱང་ཡིན་པས་ན་སེམས་ཅན་ཐམས་ཅད་དོ། །དེ་རྣམ་པར་དག་པ་ནི་བླ་ན་མེད་པའི་བྱང་ཆུབ་མངོན་
སུམ་དུ་བྱས་པས་ཉོན་མོངས་པ་བག་ཆགས་དང་བཅས་པའི་དྲི་མ་དང་བྲལ་བ་སྟེ། དེའི་དོན་དུ་སེམས་ཅན་ཐམས་ཅད་ཀྱི་མདུན་ན་བཞུགས་སོ། །སེམས་ཅན་དེ་དག་ཐམས་ཅད་དེ་རྣམས་བཞུགས་པས་ཡང་དག་པར་འགྱུར་རམ་མི་འགྱུར་ཞེ་ན། རང་གི་ལས་ཀྱིས་དག་མ་
གྱུར། །ཞེས་བྱ་བ་གསུངས་ཏེ། དམ་པའི་ཆོས་སྤོང་བ་ལ་སོགས་པའི་རང་གི་ལས་ལ་འཇུག་པ་གང་ཡིན་པས་སེམས་ཅན་དེ་དག་ཐམས་ཅད་དག་པར་མི་འགྱུར་ཞིང་། སངས་རྒྱས་ཉིད་མངོན་སུམ་དུ་བྱས་པར་མ་གྱུར་ཏོ། །དེའི་ཚེ་ནི་དེའི་དུས་ནའོ། །དེ་རྣམས་ནི་འདུས་པར་མཛད་
དེ། སེམས་ཅན་ཐམས་ཅད་ཀྱི་མདུན་དུ་བཞུགས་པའི་སངས་རྒྱས་ཐམས་ཅད་དོ། །སེམས་ཅན་གྱི་ཁམས་གསོ་དཀའ་བ་ཉིད་ཡིན་ཞེ་ན། རང་བཞིན་གྱིས་ཞེས་བྱ་བ་སྨོས་ཏེ། རང་གི་ངོ་བོ་ཉིད་ནི་རང་བཞིན་ཏེ། དམ་པའི་ཆོས་སྤོང་བ་ལ་སོགས་པ་ལ་འཇུག་པའི་ལས་
ཀྱིས་སངས་རྒྱས་ཀྱི་བྱང་ཆུབ་ཀྱི་སྣོད་དུ་མ་གྱུར་པ་ཡིན་ནོ། །སེམས་ཅན་གྱི་ཁམས་རྣམས་རང་བཞིན་གྱིས་གསོ་དཀའ་བ་དེས་ན། རང་གི་ལས་ནི་སྦྱང་བའི་ཕྱིར། །བཏང་སྙོམས་ཆེན་པོ་མཛད་པ་ཡིན། །ཞེས་བྱ་བ་ཡིན་ཏེ། རང་གི་ཡང་ཡིན་ལ་ལས་ཀྱང་ཡིན་

པས་རང་གི་ལས་ཏེ། སེམས་ཅན་དེ་རྣམས་ཀྱི་དམ་པའི་ཆོས་སྤོང་བ་ལ་སོགས་པའི་ལས་རྣམས་སོ། །སྦྱང་བའི་ཕྱིར་ཞེས་བྱ་བ་ནི་སྐལ་བ་མེད་པའི་སེམས་ཅན་དེ་རྣམས་ཀྱི། སྡིག་པ་བསལ་བའི་དོན་སྦྱང་བའི་ཕྱིར་རོ། །དོན་དེའི་ཕྱིར་སངས་རྒྱས་དེ་དག་ཐམས་ཅད་བཏང་
སྙོམས་ཆེན་པོ་མཛད་པ་ཡིན་ཏེ། སྐལ་བ་དང་མི་ལྡན་པའི་སེམས་ཅན་དེ་རྣམས་སྦྱང་བའི་ཕྱིར་རེ་ཞིག་འབད་པ་མི་མཛད་ཀྱི། དུས་གཞན་གྱི་ཚེ་སྨིན་པར་བྱ་བའི་སྒོ་ནས་སེམས་ཅན་གྱི་ཁམས་སྦྱང་བར་བྱའོ་སྙམ་དུ་དགོངས་ནས་བཏང་སྙོམས་ཆེན་པོ་མཛད་པ་ཡིན་ནོ། །ཇི་སྐད་དུ་བཤད་
པའི་སེམས་ཅན་ཐམས་ཅད་ཡོངས་སུ་སྦྱང་བའི་ཕྱིར། གང་གི་ཚེ་མདུན་ན་བཞུགས་པར་གྱུར་པས་སེམས་ཅན་གྱི་ཁམས་རྣམས་སོ། །རྣམ་པར་སྦྱོང་བར་མཛད་པར་མི་སྤྱོད་པར་གྱུར་པ་དེའི་ཚེ། སེམས་ཅན་གྱི་ཁམས་སྐལ་བ་མེད་པ་ན་འབད་པ་ནི་འབྲས་བུ་མེད་པར་
མཁྱེན་ན། སངས་རྒྱས་དེ་ཐམས་ཅད་སེམས་ཅན་ཐམས་ཅད་སྦྱང་བའི་དོན་དུ་འབད་པ་བཏང་ནས་བཞུགས་པ་ཡིན་ནོ། །དེ་ནས་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་བཏང་སྙོམས་ཆེན་པོ་མཛད་པའི་རྗེས་ཐོགས་ཉིད་ལའོ། །བཅོམ་ལྡན་འདས་རྡོ་རྗེ་ཅན་ཞེས་བྱ་བ་
ནི་རྡོ་རྗེ་སེམས་དཔའོ། །སེམས་དཔའ་ཆེན་པོ་བདེ་བ་ཆེ། །ཞེས་བྱ་བ་ནི་བཤད་ཟིན་ཏོ། །སྐད་ཅིག་གིས་ཞེས་བྱ་བ་ནི། སྐད་ཅིག་མ་གཅིག་གིས་སོ། །ཡང་དག་བསྐུལ་ཞེས་བྱ་བ་ནི་སངས་རྒྱས་ཐམས་ཅད་ལ་སེམས་ཅན་ཐམས་ཅད་ཀྱི་དོན་མཛད་པའི་ཕྱིར་ཡང་དག་པར་
བསྐུལ་བར་གྱུར་པའོ། །རྡོ་རྗེ་ཅན་རང་བཞིན་ཇི་ལྟ་བུ་ཞིག་སྐད་ཅིག་གཅིག་གིས་སངས་རྒྱས་ཐམས་ཅད་ཡང་དག་པར་བསྐུལ་ཞེ་ན། བྱང་ཆུབ་ཆེན་པོར་ཐུགས་བརྟན་པས། །ཞེས་བྱ་བ་གསུངས་ཏེ། བྱང་ཆུབ་ཀྱང་ཡིན་ལ་ཆེན་པོ་ཡང་ཡིན་པས་བྱང་ཆུབ་ཆེན་པོ་སྟེ། བླ་ན་
མེད་པ་ཡང་དག་པར་རྫོགས་པའི་བྱང་ཆུབ་བོ། །དེའི་རང་བཞིན་ཡིན་པས་ན་བརྟན་ཞིང་མི་ཕྱེད་པའི་ཐུགས་འདི་ལ་ཡོད་པས་ན་བྱང་ཆུབ་ཆེན་པོར་ཐུགས་བརྟན་པ་སྟེ། དེ་ལྟ་བུའི་རྡོ་རྗེ་ཅན་གྱིས་སངས་རྒྱས་ཐམས་ཅད་སྐད་ཅིག་གིས་ཡང་དག་པར་བསྐུལ་བར་གྱུར་པའོ། །ཇི་

ལྟར་ཡང་དག་པ་བསྐུལ་ཞེ་ན། སེམས་ཅན་ཀུན་ལ་ཞེས་བྱ་བ་ལ་སོགས་པ་གསུངས་ཏེ། སེམས་ཅན་ཀྱང་ཡིན་ལ་ཀུན་ཀྱང་ཡིན་པས་སེམས་ཅན་ཀུན་ནོ། །དེ་རྣམས་ལ་ཕན་པ་ནི་མ་འོངས་པའི་དུས་ན་བདེ་བའི་ལས་སོ། །དེ་ཉིད་ནི་བསོད་ནམས་ཏེ།
གཙང་ཞིང་དག་པར་བྱེད་པས་ན་བསོད་ནམས་སོ། །དེ་ཅི་ཞིག་ཅེ་ན། བྱང་ཆུབ་སེམས་དཔའ་ཞེས་བྱ་བ་གསུངས་ཏེ། བྱང་ཆུབ་ཀྱི་མཚན་ཉིད་ཅན་གྱི་སེམས་ནི་བྱང་ཆུབ་སེམས་སོ། །བདག་ཉིད་ཅེས་བྱ་བ་ནི་བདག་ཉིད་ཡིན་པར་སྟོན་ཏོ། །ཅི་ཞིག་ཏུ་རུང་བ་ཞིག་གམ་འོན་ཏེ་མ་ཡིན་
ཞེ་ན། བརྟན་པ་ཞེས་བྱ་བ་གསུངས་ཏེ། དེ་བཞིན་ཉིད་ཀྱི་རྡོ་རྗེ་མི་ཤིགས་པ་ནི་བདག་ཉིད་སྟོན་ཏོ། །ཤིན་ཏུ་བཏང་སྙོམས་མ་མཛད་ཅིག །ཅེས་བྱ་བ་ནི་གང་གི་ཕྱིར་སེམས་ཅན་ཀུན་ལ་ཕན་པའི་བསོད་ནམས་བྱང་ཆུབ་ཀྱི་སེམས་བརྟན་ཞིང་མི་ཕྱེད་པ་དག་ཡིན་པ་དེས་ན་སེམས་ཅན་
ཐམས་ཅད་སྦྱང་བའི་ཕྱིར་སངས་རྒྱས་བཅོམ་ལྡན་འདས་བཏང་སྙོམས་མ་མཛད་ཅིག །དེ་ཅིའི་ཕྱིར་ཞེ་ན། ཁྱེད་རྣམས་ཀྱིས་བཏང་སྙོམས་མཛད་ན་སེམས་ཅན་རྣམས་ངན་འགྲོར་འགྲོ་བས་སེམས་ཅན་གྱི་ཁམས་བརྒྱུད་པར་འགྱུར་རོ། །དེ་ལྟར་དཔལ་རྡོ་རྗེ་སེམས་དཔའི་སངས་
རྒྱས་ཐམས་ཅད་སེམས་ཅན་གྱི་དོན་གྱི་ཕྱིར་ཡང་དག་པར་བསྐུལ་བར་གྱུར་པ་དང་། དེ་རྣམས་སེམས་ཅན་གྱི་དོན་གྱི་ཐབས་སྟོན་ཅིག་ཅེས་སངས་རྒྱས་རྣམས་ཀྱིས་དེ་སྐད་དུ་གསུངས་པ་ཡིན་ནོ། །དེ་ནས་ཞེས་བྱ་བ་ནི་དེ་མ་ཐག་སྟོན་པའི་ཚིག་གོ། །སངས་རྒྱས་ཀྱིས་ཞེས་བྱ་བ་ནི་
རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་ཀྱིས་སོ། །གང་གསུངས་ཤེ་ན། སྐུ་གསུང་ཐུགས་ཀྱི་རྡོ་རྗེ་ཅན། །ཞེས་བྱ་བ་གསུངས་ཏེ། སྐུ་དང་གསུང་དང་ཐུགས་ནི་སྐུ་གསུང་ཐུགས་སོ། །དེ་འདི་ལ་མངའ་བས་ན་སྐུ་གསུང་ཐུགས་རྡོ་རྗེ་ཅན་ཏེ། སྐུ་དང་
གསུང་དང་ཐུགས་རྡོ་རྗེ་དང་ལྡན་པའི་རྡོ་རྗེ་སེམས་དཔའོ། །ཇི་ལྟར་གསུངས་ཤིང་ཅི་ཞིག་གསུངས་ཤེ་ན། ཁྱེད་ནི་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་སེམས་ཞེས་བྱ་བ་ནི་བྱང་ཆུབ་གྱི་མཚན་ཉིད་ཅན་གྱི་སེམས་སོ། །བདག་ཅི་ཞིག་ཡིན་ཞེ་ན། ཐབས་ཞེས་བྱ་བ་གསུངས་ཏེ།

ཡིད་ལ་མངོན་པར་འདོད་ཅིང་བསམ་པའི་དོན་བདེ་བས་ཐོབ་པར་བྱེད་པས་ན་ཐབས་ཞེས་བྱའོ། །གང་གི་ཐབས་ཡིན་ཞེ་ན། སྙིང་རྗེའི་བདག་ཉིད་ཅན་གྱི་ཞེས་བྱ་བ་གསུངས་ཏེ། མི་དམིགས་པའི་ཐུགས་རྡོ་རྗེ་ཆེན་པོའི་རང་བཞིན་ཅན་སངས་རྒྱས་བཅོམ་ལྡན་འདས་རྣམས་ཀྱིའོ། །ཁྱེད་ཅེས་བྱ་
བ་ནི་ཁྱེད་ཉིད་ཡིན་ཏེ་གཞན་མ་ཡིན་པའོ། །འདིས་ནི་འདི་སྐད་སྟོན་ཏེ། གང་གི་ཕྱིར་ཁྱེད་ནི་དམིགས་སུ་མེད་པའི་ཐུགས་རྗེ་ཆེན་པོའི་རང་བཞིན་ཅན་གྱི་སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་རྣམ་པར་སྦྱང་བའི་ཐབས་ཡིན་ལ། དེ་བས་ན་སེམས་ཅན་རྣམ་པར་སྦྱོང་བའི་ཐབས་
ཁྱེད་ཀྱིས་སྨྲོས་ཤིག་ཅེས་དེ་བཞིན་གཤེགས་པ་རྣམས་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ལ་གསུངས་པ་ཡིན་ནོ། །འདི་ལྟར་སེམས་ཅན་གྱི་དོན་གྱི་ཕྱིར་སངས་རྒྱས་བཅོམ་ལྡན་འདས་ཐམས་ཅད་ཀྱིས་རྡོ་རྗེ་འཆང་ལ་གསོལ་བ་བཏབ་པ་དང་། དེ་མཛད་པ་བསྟན་པའི་ཕྱིར། དེ་
ནས་སྟོན་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །སྟོན་པ་རྡོ་རྗེ་འཛིན་ཞེས་བྱ་བ་ནི་བཤད་ཟིན་ཏོ། །དེ་ཚེ་ཀུན་ནས་བྱིན་གྱིས་བརླབས། །ཞེས་བྱ་བ་ནི། དེ་བཞིན་གཤེགས་པའི་དཀྱིལ་འཁོར་གྱི་ཁམས་གསུམ་པ་ཐམས་ཅད་ཀུན་ནས་
ཁྱབ་པར་བྱིན་གྱིས་བརླབས་པས་ན། ཀུན་ནས་བྱིན་གྱིས་བརླབས་པ་སྟེ་དེ་མཛད་པར་གྱུར་པས་ན། ཀུན་ནས་བྱིན་གྱིས་བརླབས་ཞེས་བྱ་བ་སྟེ། དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་དུས་སུ་དེ་ལྟར་མཛད་པའོ། །ཅི་ཞིག་ཀུན་ནས་བྱིན་གྱིས་
བརླབས་ཤེ་ན། བདེ་བ་ཆེན་པོ་ཞེས་བྱ་བ་ལ་སོགས་པ་སྨོས་ཏེ། བདེ་བ་ཆེན་པོ་རྡོ་རྗེ་ཞེས་བྱ་བ་ནི་གཉིས་སུ་མེད་པའི་ཡེ་ཤེས་སོ། །དེ་ལས་སྐྱེས་པས་ན་དེ་བཞིན་གཤེགས་པའི་དཀྱིལ་འཁོར་ནི་དཀྱིལ་འཁོར་ཆེན་པོ་ཞེས་བྱ་བའོ། །དེ་ཉིད་ཀྱིས་ན་དམ་པ་སྟེ་མཆོག་གོ། །དེའི་ཚད་ཇི་
ཙམ་ཞེ་ན། ཁམས་གསུམ་འཁོར་ལོའི་རྒྱ་ཁྱོན་གྱི། །ཞེས་བྱ་བ་གསུངས་ཏེ། འདོད་པ་དང་། གཟུགས་དང་གཟུགས་མེད་པའི་ཁམས་ནི་ཁམས་གསུམ་གྱི་འཁོར་ལོའོ། །དེས་ཁྱབ་པའི་ངང་ཚུལ་འདི་ལ་ཡོད་པས་ན། ཁམས་གསུམ་གྱི་ནི་རྒྱ་ཁྱོན་ཞེས་བྱའོ། །འཁོར་ལོ་ཡང་

ཡིན་པ་ཆེན་པོ་ཡང་ཡིན་ལས་ན་འཁོར་ལོ་ཆེན་པོ་སྟེ། རྣམ་པར་སྣང་མཛད་ཀྱི་དཀྱིལ་འཁོར་རོ། །ཁམས་གསུམ་འཁོར་ལོའི་རྒྱ་ཁྱོན་ཡང་ཡིན་ལ་འཁོར་ལོ་ཆེན་པོ་ཡང་ཡིན་པས་ན་ཁམས་གསུམ་པའི་རྒྱ་ཁྱོན་གྱི་འཁོར་ལོ་ཆེན་པོའོ། །གདོད་ནས་
བྱུང་ཞེས་བྱ་བ་ནི་ད་ལྟར་བྱུང་བའི་ཚུལ་གྱིས་རྟག་ཏུ་བཞུགས་པས་ན་གདོད་མ་ནས་བྱུང་བའོ། །དེ་ཡིས་ཁམས་གསུམ་ལ་གནས་པའི་སེམས་ཅན་རྣམས་རབ་ཏུ་བསྒྲུབ་ཅེས་བྱ་བ་ནི། ཁམས་གསུམ་གྱི་འཁོར་ལོའི་རྒྱ་ཁྱོན་ཅན་གྱི་རྣམ་པར་སྣང་མཛད་ཀྱི་དཀྱིལ་འཁོར་དེས། འདོད་
པ་དང་། གཟུགས་དང་། གཟུགས་མེད་པ་སྟེ། ཁམས་གསུམ་ན་གནས་པའི་སེམས་ཅན་ཐམས་ཅད་བསྐལ་པ་ཇི་ལྟ་བ་བཞིན་དུ་དེ་བཞིན་གཤེགས་པའི་རིགས་ལ་མངོན་པར་འདོད་ཅིང་བརྩོན་པར་རབ་ཏུ་བསྒྲུབས་ཏེ། དེ་བཞིན་གཤེགས་པའི་རིགས་རྟོགས་པར་བྱ་བའི་ཕྱིར་
བྱང་ཆུབ་ཀྱི་སེམས་བསྐྱེད་པ་ལ་སོགས་པ་ལ་རབ་ཏུ་གཞག་པའོ། །དེ་ཚེ་དག་པ་གྲུབ་པར་འགྱུར། །ཞེས་བྱ་བ་ནི་དེ་ནས་དུས་དེའི་ཚེ་སྟེ་བསྐལ་པ་བཟང་པོ་ལ་སོགས་པ་དང་པོའི་ཚེའོ། །སེམས་ཅན་སྐལ་བ་ཇི་ལྟ་བ་བཞིན་དུ་ཉོན་མོངས་པ་བག་ཆགས་དང་བཅས་པ་དང་བྲལ་བས་
དག་པ་ཡིན་ནོ། །ཁམས་གསུམ་གྱི་ཆོས་ཀྱི་རྒྱལ་སྲིད་ཀྱི་དབང་བསྐུར་བ་ཐོབ་པས་གྲུབ་པ་ཡིན་ནོ། །སངས་རྒྱས་ཀུན་སོགས་དངོས་གྲུབ་ལ། །ཞེས་བྱ་བ་ནི་སངས་རྒྱས་ཀྱང་ཡིན་ལ་ཀུན་ཀྱང་ཡིན་པས་ན་སངས་རྒྱས་ཀུན་ཏེ། རྣམ་པར་སྣང་མཛད་ལ་སོགས་པའོ། །དེ་རྣམས་ཀྱི་
དངོས་གྲུབ་ནི་སངས་རྒྱས་ཀུན་སོགས་དངོས་གྲུབ་སྟེ། །སངས་རྒྱས་བྱང་ཆུབ་ཐོབ་པའོ། །དེ་ལ་སོགས་པའི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་སེམས་དཔའི་བར་གྱི་རིགས་ཐམས་ཅད་ཀྱི་དངོས་གྲུབ་གང་ཡིན་པ་དེ་ནི་སངས་རྒྱས་ཀུན་སོགས་དངོས་གྲུབ་སྟེ། སངས་རྒྱས་
ཀུན་སོགས་པའི་དངོས་གྲུབ་ཀྱི་ཡུལ་དེ་ལའོ། །དེ་ནས་ཞེས་བྱ་བ་ལ་སོགས་པ་ལ། སྐུ་དང་གསུང་དང་ཐུགས་ཞེས་བྱ་བ་ལ་སོགས་པ་གང་གསུངས་པ་དེས་འདུས་པ་མཛད་པའི་སངས་རྒྱས་ཐམས་ཅད་ཀྱིས་གསོལ་བ་བཏབ་པ་ཡིན་ཏེ། འདུས་པ་མཛད་ནས་རྡོ་རྗེ་སེམས་

དཔའ་ལ་དེ་བཞིན་གཤེགས་པའི་རིགས་སྟོན་པར་མཛད་པའི་ཕྱིར་གསོལ་བ་བཏབ་པ་ཡིན་ནོ། །ཇི་ལྟ་བུ་ཞེ་ན། དེ་བཞིན་གཤེགས་པའི་རིགས་ཆེན་པོ། །སངས་རྒྱས་ཀུན་མཆོག་བཤད་དུ་གསོལ། །དེ་བཞིན་གཤེགས་པའི་དཀྱིལ་འཁོར་ནི་དེ་བཞིན་གཤེགས་པའི་
རིགས་ཏེ། དེ་ཡང་ནམ་མཁའ་ཐམས་ཅད་ཁྱབ་པས་ན་ཆེན་པོའོ། །སངས་རྒྱས་ཀུན་ནི་ཇི་སྐད་དུ་བཤད་པ་རྣམས་སོ། །དེ་རྣམས་ཀྱི་མཆོག་ཡིན་པས་ན་སངས་རྒྱས་ཀུན་མཆོག་སྟེ། བྱང་ཆུབ་ཆེན་པོའི་མཚན་ཉིད་ཀྱི་སེམས་ཀྱི་རང་བཞིན་གྱིས་སྐུའི་གསང་བའི་ཚུལ་གྱིས་དེ་
བཞིན་གཤེགས་པ་རྣམས་ལས་དམ་པར་གྱུར་པས་ན་མཆོག་སྟེ། གང་གི་ཕྱིར་དེ་རྣམས་སེམས་དེ་དང་རྗེས་སུ་འབྲེལ་པ་ཡིན་ནོ། །དེ་ནས་སངས་རྒྱས་ཐམས་ཅད་ཀྱི། །ཞེས་བྱ་བ་ནི་གསོལ་བ་བཏབ་པའི་རྗེས་ཐོགས་ཉིད་ལ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་
མཉམ་པའི་སངས་རྒྱས་རྣམ་པར་སྣང་མཛད་ལ་སོགས་པ་འདུས་ནས་བྱོན་པ་དེ་ཐམས་ཅད་ཀྱི་སྐུ་དང་གསུང་དང་ཐུགས་ལ་ཡང་དག་བཞུགས་པས་ན། སྐུ་གསུང་ཐུགས་ལ་ཡང་དག་བཞུགས། །ཞེས་བྱའོ། །སྐུ་གསུང་ཐུགས་ཀྱི་རྡོ་རྗེ་ལས། །ཡང་དག་སྤྲོས་ནས་འདི་
གསུངས་སོ། །ཞེས་བྱ་བ་ནི་དེ་ལྟར་བཤད་མ་ཐག་པའི་ཚུལ་གྱིས་རྡོ་རྗེ་སེམས་དཔའ་སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལ་ཞུགས་ཏེ། དེ་ནས་འདི་གསུངས་སོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན། ཡང་དག་པར་སྤྲོས་ནས་ཞེས་བྱ་བ་
གསུངས་པ་སྟེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལ་ཆུ་དང་འོ་མ་ལྟར་གཅིག་ཏུ་གྱུར་པའི་རྡོ་རྗེ་སེམས་དཔའི་མཉམ་པའི་སྤྲོ་བ་དེ་མཛད་པ་ནི་ཡང་དག་པར་མཉམ་པར་སྤྲོ་བའོ། །འདི་གསུངས་སོ་ཞེས་བྱ་བ་ཨོཾ་བྷུ་ཁཾ་ཞེས་བྱ་བ་བཀའ་སྩལ་
པའོ། །དེ་ནས་འདི་ནི་ཞེས་བྱ་བ་ལ་སོགས་པ་ནི་གོ་སླའོ། །བདུད་རྣམས་བཅོམ་པ་ལ་སོགས་པ་ཞེས་བྱ་བ་ནི་ཇི་ལྟར་འདི་ནི་བཅོམ་ལྡན་འདས་རྡོ་རྗེ་གདན་ལ་བཞུགས་ཏེ། བདུད་བཅོམ་པར་མཛད་པ་དེ་བཞིན་དུ། དེའི་ཚེ་འདུལ་བར་མཛད་པའི་སངས་རྒྱས་ཐམས་ཅད་

ཀྱིས་བདུད་བཅོམ་པར་མཛད་ཅིང་ཁམས་གསུམ་པ་དེར་བྱང་ཆུབ་ཀྱི་སྙིང་པོར་བྱིན་གྱིས་བརླབས་ཤིང་བརྟན་པར་མཛད་པ་ཡིན་ནོ། །སོགས་པའི་སྒྲས་ནི་དབང་བསྐུར་བ་དང་། ཆོས་ཀྱི་འཁོར་ལོ་བསྐོར་བ་དང་། ལོག་པར་སྤྱོད་པའི་སེམས་ཅན་འདུལ་བ་དང་། སངས་
རྒྱས་ཐམས་ཅད་གཅིག་ཏུ་བསྡུས་པ་རྣམས་འདུལ་བ་ལ་བྱའོ། །དེ་ལ་མི་བསྐྱོད་པའི་ཚུལ་གྱིས་ནི་བདུད་རབ་ཏུ་བཅོམ་པ་ཡིན་ནོ། །རིན་ཆེན་འབྱུང་ལྡན་གྱིས་ནི་དབང་བསྐུར་བ་ཐོབ་པ་ཡིན་ནོ། །འོད་དཔག་ཏུ་མེད་པའི་ཚུལ་གྱིས་ནི་ཆོས་ཀྱི་འཁོར་ལོ་བསྐོར་བ་ཡིན་ནོ། །དོན་
ཡོད་པར་གྲུབ་པའི་ཚུལ་གྱིས་ནི་ལོག་པར་སྤྱོད་པའི་སེམས་ཅན་རྣམས་འདུལ་བ་ཡིན་ནོ། །རྣམ་པར་སྣང་མཛད་ཀྱི་ཚུལ་གྱིས་ནི་སངས་རྒྱས་ཐམས་ཅད་བསྡུས་པ་ཡིན་ནོ། །དེ་ལྟར་ན། དེ་ནས་སྟོན་པ་རྡོ་རྗེ་འཛིན། །ཞེས་བྱ་བ་ནས་བརྩམས་ཏེ། བྱང་ཆུབ་སྙིང་པོར་བྱིན་གྱིས་
བརླབས། །ཞེས་བྱ་བའི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་ནས་བརྩམས་ཏེ་གསུངས་པ་ཡིན་པས་ཤེས་པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་དོན་བསྟན་པར་
བྱ་བའི་ཕྱིར། དེ་ནས་སྟོན་པ་རྡོ་རྗེ་འཛིན། །དཀྱིལ་འཁོར་མཆོག་ནི་བཀའ་སྩལ་པ། །ཞེས་བྱ་བ་ལ་སོགས་པ་སློབ་དཔོན་གྱི་ལས་ཀྱི་ཆོ་ག་དང་། སློབ་མ་འཇུག་པ་ལ་སོགས་པའི་ཆོ་ག་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པའི་ཚིག་སྟེ། ལས་ཀྱི་
རྒྱལ་པོ་མཆོག་གི་ཏིང་ངེ་འཛིན་གྱི་རྗེས་ཐོགས་ཉིད་ལའོ། །རྡོ་རྗེ་འཛིན་པ་ཞེས་བྱ་བ་ནི་གོ་བར་ཟད་དོ། །རྟོག་པ་ཀུན་གྱི་བདེ་བ་ཆེ། །ཞེས་བྱ་བ་རྟོག་པ་ཡང་ཡིན་ལ་ཀུན་ཀྱང་ཡིན་པས་ན་རྟོག་པ་ཀུན་ཏེ། རྣམ་པར་སྣང་མཛད་ལ་སོགས་པའི་ཕྱག་རྒྱའི་ཚུལ་ལོ། །དེ་རྣམས་ཀྱི་
བདེ་བ་ཆེན་པོའི་སངས་རྒྱས་ཀྱི་བྱང་ཆུབ་སྟེ། དེ་ཐོབ་པའི་རྒྱུར་གྱུར་པའི་ཕྱིར་དང་། དེའི་རྒྱུ་མཐུན་པ་ལས་བྱུང་བས། དཀྱིལ་འཁོར་འདི་ཡང་། རྟོག་པ་ཀུན་གྱི་བདེ་བ་ཆེ། །ཞེས་བྱའོ། །དེ་ནས་ཞེས་བྱ་བ་ནི་རྗེས་ཐོགས་ལའོ། །གང་གི་ཕྱིར་ཞེས་བྱ་བ་ནི་རྒྱུ་གང་གི་

ཕྱིར་རོ། །ཡང་དག་པར་རབ་ཏུ་ཕྱེ་སྟེ་བཤད་པས་ན་ཡང་དག་རབ་བཤད་པའོ། །དཀྱིལ་འཁོར་ཆེན་པོ་ནི་དེ་བཞིན་གཤེགས་པ་རྣམ་པར་སྣང་མཛད་ཀྱི་དཀྱིལ་འཁོར་ཏེ། སྐུའི་གསང་བ་གཙོར་གྱུར་པའི་དཀྱིལ་འཁོར་ཆེན་པོའི་དེ་ཉིད་ནི་དེ་བཞིན་གཤེགས་པའི་རིགས་ཀྱིས་འདུལ་བའི་
སེམས་ཅན་རྣམས་འདུལ་བས་ན་དཀྱིལ་འཁོར་གཞན་ལས་མཆོག་ཏུ་གྱུར་པས་ན་དམ་པ་ཡིན་ཞེས་བྱའོ། །འདིས་ནི་འདི་སྐད་སྟོན་པ་ཡིན་ཏེ། ཏིང་ངེ་འཛིན་གསུམ་བསྒོམ་པ་ནས་ཉེ་བར་བཟུང་སྟེ་རྣམ་པར་སྣང་མཛད་དཀྱིལ་འཁོར་ཆེན་པོ་འདི་ཇི་སྲིད་མངོན་སུམ་དུ་མཐོང་
བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དེའི་རྗེས་ཐོགས་ཉིད་ལ་དེ་བཞིན་གཤེགས་པ་མཐོང་བའི་སྐལ་བ་མེད་པའི་སེམས་ཅན་རྣམས་སྐལ་བ་དང་ལྡན་པར་བྱ་བའི་ཕྱིར་དཀྱིལ་འཁོར་ཡང་དག་པར་བྲི་བར་བྱའོ། །དབྱིབས་ཇི་ལྟ་བུར་བྲི་བར་བྱ་ཞེ་ན། དཀྱིལ་
འཁོར་ཆེན་པོ་ཞེས་བྱ་བ་ལ་སོགས་པ་གསུངས་ཏེ། དཔལ་རྡོ་རྗེ་སེམས་དཔའི་ཕྱི་མའི་དཀྱིལ་འཁོར་བཤད་མ་ཐག་པའི་དཀྱིལ་འཁོར་ཆེན་པོ་འདིར་ཕྱིའི་དཀྱིལ་འཁོར་ཡིན་ལ། དེའི་མཆོག་གང་ཡིན་པ་དེ་ནི་དཀྱིལ་འཁོར་ཆེན་པོའི་ཕྱིའི་མཆོག་ཅེས་བྱའོ། །དེར་ཅི་ཞིག་བྱ་
ཞེ་ན། རྡོ་རྗེ་འཁོར་ལོ་ཡང་དག་བྲི། །ཞེས་བྱ་བ་སྟེ། རྡོ་རྗེ་འཁོར་ལོ་ཟླུམ་པོ་ལ་རྡོ་རྗེ་ཕྲེང་བའི་ཚུལ་དང་ཀ་བ་བརྒྱད་ཀྱིས་ཉེ་བར་མཛེས་པར་བྱས་པའི་དཀྱིལ་འཁོར་ནི་རྡོ་རྗེ་འཁོར་ལོ་སྟེ་ཡང་དག་པར་བྲི་བར་བྱའོ། །འཁོར་ལོའི་ལྟེ་བ་ཞེས་བྱ་བ་ལ་སོགས་པ་ལ་དེ་ལྟར་དཀྱིལ་འཁོར་
ཆེན་པོ་དེ་བྲིས་ནས་དཀྱིལ་འཁོར་དབུས་མའི་དབུས་ཀྱི་ལྟེ་བར་སངས་རྒྱས་བཅོམ་ལྡན་འདས་རྣམ་པར་སྣང་མཛད་འཛུམ་པ་མི་སྣང་བ་སྟེ། ཚེམས་མངོན་པའི་འཛུམ་པ་གང་ཡིན་པ་དེ་ནི་འཛུམ་པ་སྣང་བ་ཡིན་ལ། འདིའི་འཛུམ་པ་མི་མངོན་པས་ན་མི་སྣང་བ་སྟེ། འཛུམ་པ་མི་སྣང་བའི་
སངས་རྒྱས་ཀྱི་མཆོག་བཅོམ་ལྡན་འདས་རྣམ་པར་སྣང་མཛད་དེ། སུ་ར་ཏེ་ས་མ་ཡ་སྟྭཾ་ཧོ་སིདྡྷི་མཾ། ཞེས་ཟློས་ཤིང་དབུས་སུ་དགོད་པར་བྱའོ། །དེ་ནས་རྣམ་པར་སྣང་མཛད་དེའི་མདུན་དུ་འདོད་ཆགས་རྡོ་རྗེ་མའི་གནས་སུ་བདུད་ལས་རྣམ་པར་རྒྱལ་བར་མཛད་པའི་སངས་རྒྱས་མི་བསྐྱོད་པ་

ཡང་དག་པར་བྲི་བར་བྱ་སྟེ། རྣལ་འབྱོར་པ་མི་བསྐྱོད་པའི་སྦྱོར་བས་བདུད་ལས་རྣམ་པར་རྒྱལ་བར་བྱེད་ཅིང་། བཛྲ་སཏྭ། ཞེས་ཟློས་བཞིན་དུ་སངས་རྒྱས་བཅོམ་ལྡན་འདས་མི་བསྐྱོད་པ་བྲི་བར་བྱའོ་ཞེས་བྱ་བའི་ཐ་ཚིག་གོ། །གཡས་སུ་བྱང་ཆུབ་སེམས་དཔའ། ནོར་
ཆེན་གྱིས་ནི་དབང་བསྐུར་བ། །ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་གཡས་ཀཱི་ལི་ཀཱི་ལའི་གནས་སུ་རྣལ་འབྱོར་པས་འཕགས་པ་ནམ་མཁའི་སྙིང་པོ་ལ་སོགས་པའི་ནོར་ཆེན་པོ་རིན་པོ་ཆེའི་རིགས་ཀྱི་རང་བཞིན་གྱིས་དབང་བསྐུར་ཞིང་དབང་བསྐུར་བ་དེ་བྱེད་བཞིན་དུ་བྲི་བར་
བྱའོ། །འདི་སྐད་སྟོན་ཏེ། རྣལ་འབྱོར་པ་རིན་ཆེན་འབྱུང་ལྡན་གྱི་ང་རྒྱལ་དང་ལྡན་པས་བཛྲ་རཏྣ་ཞེས་བཟླས་ལ་བདག་ཉིད་འཕགས་པ་ནམ་མཁའི་སྙིང་པོ་ལ་སོགས་པ་ནོར་བུའི་རིགས་ཀྱི་རང་བཞིན་གྱི་བྱང་ཆུབ་སེམས་དཔའི་རིན་པོ་ཆེའི་ཅོད་པན་ལ་སོགས་པས་དབང་བསྐུར་བར་བསམ་ཞིང་
བཅོམ་ལྡན་འདས་སངས་རྒྱས་རིན་ཆེན་འབྱུང་ལྡན་བཛྲ་རཏྣ་ཞེས་ཟློས་ཤིང་གཡས་ལོགས་སུ་བྲི་བར་བྱའོ། །རྒྱབ་ཏུ་བྱང་ཆུབ་སེམས་དཔའ་དང་མཉམ་དུ་ཆོས་ཀྱི་འཁོར་ལོ་བསྐོར་བ་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་རྒྱབ་ཏུ་རྡོ་རྗེ་དྲན་
མའི་གནས་སུ་རྡོ་རྗེ་ཆོས་ལ་སོགས་པ་བྱང