Luận tạng Tây Tạng (Tengyur) — Tập 60

ཡོན་ལོགས་སུ་ནི་རྡོ་རྗེ་བསྙེམས་མ་ཧཱུཾ་ཏུ་དྷྱ་བཛྲ་ཎི་ཧཱུཾ་ཞེས་བྱ་བས་སོ། །དེ་བཞིན་དུ་རྡོ་རྗེ་སྦྲང་རྩི་མ་ལ་སོགས་པ་ནས་གར་མའི་བར་གྱི་མཆོད་པའི་ལྷ་མོ་རྣམས་རང་རང་གི་སྙིང་པོས་དགོད་པར་བྱས་ལ་
རྡོ་རྗེ་ལྕགས་ཀྱུ་མ་ལ་སོགས་པ་ཡང་ལྷ་མོར་གྲགས་པ་དགོད་པར་བྱའོ། །དེ་ནས་ཛཿབཛྲ་ཨཾ་ཀུ་ཤ །ཧཱུཾ་བཛྲ་པཱ་ཤ །བཾ་བཛྲ་སྥོ་ཊ། ཨ་བཛྲ་གཎྚེ་ཞེས་བྱ་བར་དགོངས་པར་རྟོགས་པར་བྱའོ་ཞེས་བྱ་བ་ནི་བར་སྣང་གི་ཕྱོགས་ལས་ཕབ་སྟེ། བྲིས་པ་དང་བླུགས་པ་ལ་སོགས་པའི་ནང་
དུ་བཅུག་ལ་ཡེ་ཤེས་སེམས་དཔའ་དང་། རང་བཞིན་གཅིག་ཏུ་གྱུར་པས་ལྷ་ཐམས་ཅད་བཞུགས་པར་མཛད་པར་བྱའོ་ཞེས་བྱ་བའི་ཐ་ཚིག་གོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་དཀྱིལ་འཁོར་བྲིས་པའི་རྗེས་ཐོགས་ཉིད་ལ། བུམ་པ་གང་བ་ལ་སོགས་པའི་མཆོད་པ་ཐམས་ཅད་ཀྱིས་ཡང་
དག་པར་མཆོད་ལ། དར་དང་དྲིལ་བུ་ལ་སོགས་པ་དང་བཅས་པར་དཀྱིལ་འཁོར་གྱི་གྲྭ་བཞིའི་གནས་སུ་གཞག་པར་བྱའོ། །ལྷག་མ་ནི་གོ་བར་ཟད་དོ། །དེ་ནས་རང་གི་དམ་ཚིག་ཅེས་བྱ་བ་ལ་སོགས་པ་ལ། དེ་ལྟར་དཀྱིལ་འཁོར་བྲིས་ནས་སྒོ་ཕྱེ་ལ་བསྡུ་བ་བྱས་ནས་མཚན་བརྒྱ་རྩ་བརྒྱད་པས་

ཡང་དག་པར་བསྟོད་ལ། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ་གཡས་པའི་རྡོ་རྗེ་ལྕགས་ཀྱུས་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་དཀྱིལ་འཁོར་དུ་ཇི་ལྟ་བ་བཞིན་དུ་བཅུག་ལ་མཆོད་ཡོན་ཕུལ་ནས། དེའི་རྗེས་ཐོགས་
ཉིད་ལ། བཅོམ་ལྡན་འདས་རྡོ་རྗེ་སེམས་དཔའ་ལ་སོགས་པས་རང་གི་དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །ཛཿཧཱུཾ་བཾ་ཧོཿཞེས་བྱ་བ་བརྗོད་ལ། དགུག་ཅིང་ཞེས་བྱ་བ་ལ་སོགས་པ་ལ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་ཇི་སྐད་དུ་བཤད་པའི་ལྕགས་ཀྱུས་དགུག་
པ་དང་། དཀྱིལ་འཁོར་དུ་གཞུག་པ་དང་། རང་གི་གནས་རྣམས་སུ་དམ་ཚིག་གི་ལྕགས་སྒྲོག་གིས་བཅིངས་ནས། དེའི་འོག་ཏུ་རྡོ་རྗེ་སེམས་དཔའ་ལ་སོགས་པ་དབང་དུ་འགྱུར་བས་དེ་ཁོ་ན་བཞིན་དུ་དབང་དུ་བྱའོ་ཞེས་བྱ་བ་ཡིན་ནོ། །ཕྱག་རྒྱ་ཆེན་པོར་མཉམ་གཞག་སྟེ། །ཞེས་བྱ་བ་
ནི། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་པའོ། །དེ་བཞིན་གཡས་མཛུབ་ལྕགས་ཀྱུར་བྱ། །ཞེས་བྱ་བ་ནི། གཡས་པའི་མཛུབ་མོ་ལྕགས་ཀྱུར་བྱས་ལ་དེ་བཞིན་ཞེས་བྱ་བ་རྣམ་པ་འདིས་ཕྱག་རྒྱ་ཆེན་པོའི་དངོས་གྲུབ་ཏུ་འགྱུར་རོ་ཞེས་བྱ་བའི་ཐ་ཚིག་གོ། །འདི་
དག་ནི་དགུག་པའོ། །ལྷན་ཅིག་མཆོག་ཏུ་འགུགས་པར་བྱེད། །ཅེས་བྱ་བ་ནི། དེ་བཞིན་དུ་ཕྱག་རྒྱ་ཆེན་པོའི་ལྕགས་ཀྱུ་བཅིངས་པའི་རྗེས་ཐོགས་ཉིད་འོག་ནས་བཤད་པའི། ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་གྲུབ་པའི་སྙིང་པོ་ལན་ཅིག་བརྗོད་པར་བྱའོ། །དེ་ནས་བཅོམ་ལྡན་འདས་
རྡོ་རྗེ་ཅན་རྡོ་རྗེ་སེམས་དཔའ་རང་ཉིད་དཀྱིལ་འཁོར་དུ་བྱོན་པར་གྱུར་པ་ནི་བྲིས་པའི་དཀྱིལ་འཁོར་དུ་བྱོན་ནས། གནས་ཇི་ལྟ་བ་བཞིན་དུ་ཞུགས་པར་འགྱུར་རོ་ཞེས་སྟོན་པ་ཡིན་ནོ། །ཡང་ན་བཅོམ་ལྡན་འདས་རང་ཉིད་གཟིགས་པར་འགྱུར་རོ་ཞེས་བྱ་བ་ནི་ཡང་ན་རྣལ་འབྱོར་པ་རང་ཉིད་རྡོ་རྗེ་སེམས་
དཔར་གྱུར་པ་བཅོམ་ལྡན་འདས་རྡོ་རྗེ་སེམས་དཔའ་རང་ཉིད་ཀྱིས་མཐོང་བར་འགྱུར་རོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་བཅོམ་ལྡན་འདས་དཀྱིལ་འཁོར་དུ་བཅུག་ནས། དམ་ཚིག་གི་ཕྱག་རྒྱ་རྣམས་ཀྱིས་ཇི་ལྟ་བ་བཞིན་དུ་ཡང་དག་པར་བསྒྲུབས་ལ། ཆོས་དང་ལས་དང་ཕྱག་

རྒྱ་ཆེན་པོ་རྣམས་ཀྱིས་རྒྱས་བཏབ་ལ་ཆོ་ག་ཐམས་ཅད་རྗེས་སུ་སྤྱད་ནས། དེའི་རྗེས་ལ་འཇུག་པའི་ཆོ་གས་བདག་ཉིད་འཇུག་པར་བྱའོ། །དེ་ལྟར་ཆོ་ག་ཐམས་ཅད་བྱས་པས་རང་ཉིད་ཞུགས་པའི་བསམ་གཏན་གྱི་སློབ་དཔོན་ནམ། དཀྱིལ་འཁོར་གཞན་དུ་དཀྱིལ་འཁོར་གྱི་སློབ་
དཔོན་དུ་འགྱུར་རོ་ཞེས་བྱ་བར་དགོངས་སོ། །ཡང་ཞེས་བྱ་བའི་སྒྲས་ནི་གཞན་དག་ནི་མི་གཞུག་གོ་ཞེས་སྟོན་ཏོ། །རྡོ་རྗེ་འཛིན་ཀུན་སློབ་དཔོན་ནི། །ཞེས་བྱ་བ་ལ་རྡོ་རྗེ་འཛིན་པ་ཡང་ཡིན་ལ་ཀུན་ཀྱང་ཡིན་པས་ན་རྡོ་རྗེ་འཛིན་པ་ཀུན་ཏེ། རིགས་ཐམས་ཅད་ཀྱི་རང་བཞིན་གྱི་སངས་རྒྱས་དང་
བྱང་ཆུབ་སེམས་དཔའ་རྣམས་སོ། །དེ་རྣམས་ཀྱི་དཀྱིལ་འཁོར་གྱི་སློབ་དཔོན་ནི་རྡོ་རྗེ་འཛིན་ཀུན་སློབ་དཔོན་ནོ། །ཕྱག་རྒྱ་ཐམས་ཅད་ཀྱིས་ཞེས་བྱ་བ་ནི། ཕྱག་རྒྱ་ཡང་ཡིན་ལ་ཀུན་ཀྱང་ཡིན་པས་ན་ཕྱག་རྒྱ་ཀུན་ཏེ། རིགས་ཐམས་ཅད་ཀྱི་མཚན་མའི་ཕྱག་རྒྱ་སྟེ་དེ་རྣམས་ཀྱིས་གྲུབ་པའོ། །
དམ་ཚིག་ཀུན་མཁྱེན་པ་ཞེས་བྱ་བ་ལ་དམ་ཚིག་ཀྱང་ཡིན་ལ་ཀུན་ཀྱང་ཡིན་པས་ན་དམ་ཚིག་ཀུན་ཏེ་རིགས་ཐམས་ཅད་ཀྱི་དམ་ཚིག་གི་དཀྱིལ་འཁོར་རོ། །དེ་མཁྱེན་པས་ན་དམ་ཚིག་ཐམས་ཅད་མཁྱེན་པའོ། །ལས་ཐམས་ཅད་ནུས་པ་ཞེས་བྱ་བ་ལ་རིགས་ཐམས་ཅད་ཀྱི་ལས་ཀྱི་དཀྱིལ་
འཁོར་ནི་ལས་ཐམས་ཅད་དེ། དེ་རྣམས་བྱེད་པར་ནུས་པ་ལས་ཐམས་ཅད་ནུས་པ་སྟེ། བཅོམ་ལྡན་འདས་ཀྱིས་ལས་ཐམས་ཅད་ནུས་པར་བྱིན་གྱིས་རློབ་པར་མཛད་དོ་ཞེས་རེ་རེ་ཞིང་སྦྱར་བར་བྱའོ། །ཆོ་ག་ཇི་ཙམ་གྱིས་ཞུགས་ནས་བཅོམ་ལྡན་འདས་རྡོ་རྗེ་སེམས་དཔའ་དེ་ལྟར་བྱིན་གྱིས་རློབ་
པར་མཛད་ཅེ་ན་འདི་ཡིས་ཞེས་བྱ་བ་གསུངས་ཏེ་རྗེས་ཐོགས་ལ་འཆད་པར་འགྱུར་བའི་འཇུག་པའི་ཆོ་ག་འདིས་ཞེས་བྱ་བའི་དོན་ཏོ། །ད་ནི་ཆོ་ག་དེ་བསྟན་པའི་ཕྱིར་རང་ཉིད་ཅེས་བྱ་བ་གསུངས་ཏེ། རྡོ་རྗེ་སློབ་དཔོན་བདག་ཉིད་རྡོ་རྗེ་སེམས་དཔར་བྱིན་གྱིས་བརླབས་པའི་སློབ་དཔོན་
ནི་རྡོ་རྗེ་སློབ་དཔོན་ནོ། །ཇི་སྙེད་པའི་དྲིས་བྱུགས་ཤིང་བསྒོས་ལ་ཞེས་བྱ་བ་ལ། ཇི་ཙམ་སྙེད་པར་གྱུར་པའི་དྲིས་ལུས་ལ་ཉེ་བར་བྱུགས་ཤིང་བསྐུས་པ་ཡིན་པས་དེ་སྐད་ཅེས་བྱའོ། །རྒྱན་དང་བཅས་པ་ཞེས་བྱ་བ་ནི་རྡོ་རྗེ་སེམས་དཔའ་དང་རྗེས་སུ་མཐུན་པའི་རྒྱན་རྣམས་ཀྱིས་བརྒྱན་

པར་བྱས་པའོ། །ལུས་ཤིན་ཏུ་བརྒྱན་པ་ཞེས་བྱ་བ་ནི་རྒྱན་དང་བཅས་པའི་མེ་ཏོག་གི་ཕྲེང་བ་རྣམས་ཀྱིས་སྤུད་པའོ། །གོས་དམར་པོས་ཞེས་བྱ་བ་ལ་སོགས་པ་ལ་གོས་དམར་པོ་གཅིག་གིས་སྨད་གཡོགས་བྱས་ལ་གཉིས་པས་སྟོད་གཡོགས་བྱས་ནས། རང་
ཉིད་རྡོ་རྗེ་དང་བཅས་པའི་རྡོ་རྗེ་བསྙེམས་པས་རང་ཉིད་འཇུག་པར་བྱའོ་ཞེས་བྱ་བ་ནི་རྡོ་རྗེ་དང་ལྷན་ཅིག་པས་ན་རྡོ་རྗེ་དང་བཅས་པའོ། །རྡོ་རྗེ་བསྙེམས་མ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ། རྡོ་རྗེ་བསྙེམས་མའི་རྣལ་འབྱོར་དང་ལྡན་པའི། །བསྒྲུབ་པར་བྱ་བའི་བུ་མོའོ། །རྡོ་རྗེ་དང་
བཅས་པ་ཡང་ཡིན་ལ་རྡོ་རྗེ་བསྙེམས་མ་ཡང་ཡིན་པས་ན་རྡོ་རྗེ་དང་བཅས་པའི་རྡོ་རྗེ་བསྙེམས་མ་དེ་དང་ལྷན་ཅིག་བདག་ཉིད་འཇུག་པར་བྱའོ། །འདི་སྐད་སྟོན་ཏེ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ་བསྒྲུབ་པར་བྱ་བ་རྡོ་རྗེ་བསྙེམས་མའི་རྣལ་འབྱོར་དང་ལྡན་པའི་སྔོན་དུ་སྤྱད་
པ་བྱས་ལ་རྗེས་སུ་གནང་བ་ཐོབ་པ་དང་། རྡོ་རྗེ་སེམས་དཔའི་ཕྱག་རྒྱ་ཆེན་པོའི་སྦྱོར་བ་དང་ལྡན་པས། བུ་མོ་རྡོ་རྗེ་དང་དྲིལ་བུ་འཛིན་པ་ལག་པ་གཡས་པས་གཟུང་བའི་ཚུལ་གྱིས་བླངས་ལ་རྡོ་རྗེ་སློབ་དཔོན་དཀྱིལ་འཁོར་དུ་འཇུག་པར་བྱའོ། །བཅོམ་ལྡན་འདས་ལ་མངོན་པར་བསྟོད་
ཅིང་ཞེས་བྱ་བ་ནི་དྲུག་ལྡན་ལ་སོགས་པའི་གླུས་རྡོ་རྗེའི་གླུ་ལེན་ཅིང་འཇུག་པར་བྱའོ། །འདོད་ཆགས་ཞེས་བྱ་བ་ལ་སོགས་པ་ལ། འདོད་ཆགས་དམ་ཚིག་ཡིན་པར་བཤད། །ཅེས་གསུངས་པས་འདོད་ཆགས་ནི་རྡོ་རྗེ་སེམས་དཔའོ། །སོགས་པའི་སྒྲས་ནི་རྡོ་རྗེ་ཡིད་ལས་བྱུང་བ་
ནས་བརྩམས་ཏེ། རྡོ་རྗེ་འབེབས་པའི་བར་དུ་གཟུང་ངོ་། །འདོད་ཆགས་ལ་སོགས་པ་གང་ཡིན་པ་དེ་ནི་འདོད་ཆགས་ལ་སོགས་པ་སྟེ་དེ་ཉིད་ནི་བདེ་བ་ཡང་ཡིན་ལས་ཐམས་ཅད་ཀྱང་ཡིན་པས་ན་བདེ་བ་ཐམས་ཅད་དོ། །དེས་གང་གི་ཡིད་མཛེས་པར་གྱུར་པ་དེ་ནི་འདོད་ཆགས་ལ་སོགས་
པས་བདེ་བ་ཡིད་དེ། དེ་བཞིན་གཤེགས་པ་རྣམས་སོ། །ཁྱེད་ནི་དེ་རྣམས་བསྡུས་པ་སྟེ་ཡང་དག་པར་བསྡུས་པས་ན་བསྡུས་པ་ཡིན་ཏེ། དེ་རྣམས་ཀྱིས་ཉེ་བར་བླངས་ཤིང་རྟོགས་པ་ཞེས་བྱ་བའི་ཐ་ཚིག་གོ། །ནི་ཞེས་བྱ་བ་ནི་གང་གི་ཕྱིར་ཞེས་བྱ་བའི་དོན་ཏེ། གང་གི་ཕྱིར་ཁྱེད་ནི་

དེ་རྣམས་ཀྱིས་སྐྱེས་བུའི་དོན་གྲུབ་པར་བྱ་བའི་ཕྱིར་ཉེ་བར་བླངས་པ་ཡིན་པ་དེའི་ཕྱིར། ཁྱེད་བདག་ལ་བདེ་བ་སྩོལ་བར་མཛོད་ཅིག་ཅེས་བྱ་བ་ནི། ཇི་ལྟར་ཁྱེད་སངས་རྒྱས་རྣམས་ཀྱིས་བསྡུས་པར་གྱུར་པའི་ཚུལ་གྱིས་སྐྱེས་བུའི་དོན་གྲུབ་པར་སྩོལ་བ་དེ་བཞིན་དུ་བདག་ལའང་བསྡུས་
པའི་ཚུལ་གྱིས་སྐྱེས་བུའི་དོན་གྲུབ་པའི་དངོས་གྲུབ་སྩོལ་བར་མཛོད་ཅིག་ཅེས་སློབ་དཔོན་ལ་གསོལ་བ་འདེབས་པའོ། །རྡོ་རྗེ་སེམས་དཔའ་དགོངས་པར་མཛོད་ཅིག་ཅེས་བྱ་བ་ནི་བདེ་བ་སྩོལ་བ་ཉིད་དགོངས་ཤིང་མངོན་སུམ་དུ་མཛོད་ཅིག་པའོ། །བདག་ལ་བརྟན་པར་མཛོད་ཅིག་ཅེས་
བྱ་བ་ནི། བདག་ལ་བདེ་བ་སྩོལ་བ་མི་ཕྱེད་པར་མཛོད་ཅིག་ཅེས་པའོ། །མྱུར་དུ་ཞེས་བྱ་བ་ནི་རིངས་པར་རོ། །བདག་ལ་དགྱེས་པར་མཛོད་ཅིག་ཅེས་བྱ་བའི་མངོན་སུམ་དུ་ཕྱོགས་ཤིང་གྲུབ་པར་མཛོད་ཅིག་པའོ། །ཡོངས་སུ་མཉེས་པར་མཛད་པ་དང་ཞེས་བྱ་བ་ལ་ཙའི་སྒྲ་ནི་བསྡུ་
བའོ། །བདེ་བ་རྣམས་ཀྱི་མཆོག་ཡིན་པས་ན་བདེ་མཆོག་གོ། །མཆོག་ཉིད་ཡིན་པས་ན་བདེ་མཆོག་གོ། །ཕྱག་འཚལ་ལོ་ཞེས་བྱ་བ་ནི་རབ་ཏུ་འདུད་པའི་ཚིག་གིས་རང་གི་དབང་བསྐུར་བ་བདག་ལ་སྩོལ་ཅིག་ཅེས་སྟོན་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་དེ་
ནས་འཇུག་པའི་རྗེས་ཐོགས་ལ་བཅོམ་ལྡན་འདས་རང་རང་གི་ངོ་བོས་བཅོམ་ལྡན་འདས་མངོན་དུ་བྱས་ལ་དྲན་པར་བྱའོ། །ཐོག་མ་དང་ཐ་མ་མེད་པའི་སེམས་དཔའ་ནི་ཆོས་ཀྱི་དབྱིངས་ཀྱི་རང་བཞིན་གྱི་སེམས་དཔའོ། །རྡོ་རྗེ་སེམས་དཔའ་ཞེས་བྱ་བ་ནི་གཟུང་བ་དང་འཛིན་པའི་རྟོག་
པ་དང་བྲལ་བའི་ཕྱིར་མི་ཕྱེད་པའི་སེམས་དཔའ་ནི་རྡོ་རྗེ་སེམས་དཔའོ། །བདེ་བ་ཆེན་པོ་ཞེས་བྱ་བ་ནི་ཐར་པའོ། །ཀུན་དུ་བཟང་པོ་ཁྱོད་ཅེས་བྱ་བ་ནི་ཁྱེད་ལས་ཀུན་དུ་བཟང་པོར་འགྱུར་རོ་ཞེས་བྱ་བའི་དོན་ཏོ། །ཁྱེད་ནི་ཀུན་དུ་བཟང་པོ་སྟེ། །ཞེས་བྱ་བ་ནི་ཀུན་དུ་བཟང་པོ་ཡིན་
ཞེས་བྱ་བ་སྟེ། བཅོམ་ལྡན་འདས་རྡོ་རྗེ་སེམས་དཔའ་དང་ལྷ་མོ་རྡོ་རྗེ་བསྙེམས་མའི་ཕྱག་རྒྱ་ཆེན་པོའོ། །དེའི་བདག་པོ་ཡིན་པས་ན་རྡོ་རྗེ་བསྙེམས་མའི་བདག་པོའོ། །དེ་ཡང་བྱང་ཆུབ་ཀྱི་སེམས་ཆེན་པོའི་དབང་གིས་རྡོ་རྗེ་བསྙེམས་མ་རྒྱུན་མི་འཆད་པར་འབྱུང་བས་དེའི་

ཕྱིར་བྱང་ཆུབ་ཀྱི་སེམས་ཀྱི་རང་བཞིན་ནི་རྡོ་རྗེ་སེམས་དཔའ་ཡིན་པས་རྡོ་རྗེ་བསྙེམས་མའི་བདག་པོའོ། །དེ་ཡང་སེམས་ནི་བཅོམ་ལྡན་འདས་དེ་འདོད་ཆགས་ཆེན་པོ་ནི་དེའི་ལྷ་མོའི་ཞེས་བཤད་པ་ཡིན་ནོ། །ཁམས་གསུམ་གྱི་དབང་ཕྱུག་ཡིན་པ་དང་རིགས་ཐམས་ཅད་
ཀྱི་གཙོ་བོ་ཡིན་པས་ན་ཁྱབ་བདག་གོ། །སེམས་ཞེས་བྱ་བ་ནི་དགེ་བའི་ཁམས་རྣམས་ཀྱིས་བསགས་པས་ན་སེམས་སོ། །དེ་ཡང་ཇི་ལྟར་ན་བཅོམ་ལྡན་འདས་སེམས་ཅན་ཐམས་ཅད་ཡིན་ཞེ་ན། བསམ་མི་ཁྱབ་ཅིང་རྒྱ་ཆེར་ཟབ། །མི་འགྱུར་བདེ་བ་ཀུན་གྲུབ་པ། །ཀུན་དུ་ཁྱབ་
ཅིང་དྲི་མ་མེད། །བྱང་ཆུབ་སེམས་ནི་ཆེ་ཞིང་བརྟན། །ཞེས་གསུངས་པས། སེམས་དཔའ་ཞེས་བྱ་བ་ནི་སེམས་དེ་ཉིད་དེ། དེ་བཞིན་ཉིད་ཀྱི་རྡོ་རྗེ་དང་གཅིག་ཏུ་གྱུར་པར་བསྒོམས་པའི་མཐུས། རྣམ་པར་རྟོག་པ་ཐམས་ཅད་ཀྱིས་བསྐྱོད་པར་མི་ནུས་པས་ན་སེམས་དཔའ་སྟེ།
སེམས་ཅན་ཀུན་གྱི་སེམས་གང་ཡིན། །བརྟན་པའི་ཕྱིར་ན་སེམས་དཔར་བཤད། །ཅེས་གསུངས་པའི་ཕྱིར་རོ། །ཏིང་ངེ་འཛིན་ཞེས་བྱ་བ་ནི་མི་གཡོ་བའི་སེམས་རྩེ་གཅིག་པོ་དེ་ཉིད་དང་ལྡན་པས་ཏིང་ངེ་འཛིན་ལས་མཉམ་པར་འཇོག་པའི་ཕྱིར་ཏིང་ངེ་འཛིན་ཞེས་བཤད་དོ། །རྡོ་རྗེ་ཞེས་
བྱ་བ་ནི་ཏིང་ངེ་འཛིན་གྱི་རང་བཞིན་ཅན་གྱི་སེམས་ཏེ་དེ་ཉིད་ཟླ་བའི་དཀྱིལ་འཁོར་ལ་སོགས་པའི་རིམ་གྱིས་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་རྩེ་ལྔ་པའི་གཟུགས་སུ་གྱུར་པ་ནི་རྡོ་རྗེ་ཞེས་བཤད་དེ། ངེས་པའི་ཕྱིར་ན་རྡོ་རྗེར་གྱུར། །ཞེས་བཤད་པའི་ཕྱིར་རོ། །དེ་བཞིན་རྡོ་རྗེ་འཛིན་ཞེས་
བྱ་བ་ནི་རྡོ་རྗེར་གྱུར་པའི་རྡོ་རྗེ་སེམས་དཔའི་ཐུགས་དེ་ཉིད་བསྒོམས་པའི་སྟོབས་ཀྱིས་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ངོ་བོ་རྡོ་རྗེ་དང་དྲིལ་བུ་འཛིན་པར་གང་གི་ཚེ་གྱུར་པ་དེའི་ཚེ་རྡོ་རྗེ་འཆང་བ་ཆེན་པོ་ཡིན་ཏེ། སེམས་དཔར་བྱིན་རླབས་སྦྱོར་བ་ཡིན། །སླར་ཡང་རྡོ་རྗེ་སེམས་དཔར་གྱུར། །ཞེས་གསུངས་
པའི་ཕྱིར་རོ། །ཀུན་མཆོག་ཅེས་བྱ་བ་ལ་ཀུན་གྱི་མཆོག་ནི་ཆོས་ཀྱི་དབྱིངས་ཏེ་དེ་ལས་བྱུང་བའོ། །ཀུན་མཆོག་དམ་ཚིག་ཅེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་རང་བཞིན་གྱི་དམ་ཚིག་སྟེ་ཕྱག་རྒྱ་འདི་དམ་ཚིག་ཅེས་བསྒྲགས་སོ་ཞེས་གསུངས་པའི་ཕྱིར་རོ། །དངོས་

གྲུབ་ཅེས་བྱ་བ་ནི་རང་བཞིན་གྱིས་ཕྱག་རྒྱ་ཆེན་པོ་ལ་སོགས་པའི་ངོ་བོར་གྲུབ་ཅིང་བྱུང་བའོ། །རྡོ་རྗེ་སེམས་དཔའ་དེང་གྲུབ་མཛོད། །ཅེས་བྱ་བ་ནི་རྡོ་རྗེ་སེམས་དཔའ་ཡང་ཡིན་ལ་དེ་ཡང་ཡིན་པས་ན་རྡོ་རྗེ་སེམས་དཔའ་དེང་སྟེ་བདག་དེ་གྲུབ་པར་གྱུར་ཅིག་ཅེས་སློབ་དཔོན་ལ་གསོལ་བ་འདེབས་
པའོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་དཀྱིལ་འཁོར་དུ་ཞུགས་ནས་སློབ་དཔོན་གྱིས་དྲན་ན་བཅོམ་ལྡན་འདས་རྡོ་རྗེ་སེམས་དཔའ་དགྱེས་པར་གྱུར་ལ། དེ་ནས་བཅོམ་ལྡན་འདས་རྡོ་རྗེ་འཆང་བ་དེ་དགྱིས་པས་སློབ་དཔོན་ལ་ཉིད་ཀྱི་ཡོན་ཏན་བསྐྱེད་པས་བྱིན་གྱིས་བརླབས་
པ་མཛད་དོ། །དེ་ནས་བྱིན་གྱིས་བརླབས་པ་དེས་སྔོན་ཆད་མ་མྱོང་ཞིང་སྔར་མ་བྱུང་བའི་སློབ་དཔོན་དང་གཟུངས་མ་རྡོ་རྗེ་བསྙེམས་མ་གཉི་ག་ལ་ཞུགས་པས་རང་རིག་པའི་བདེ་བ་ཉམས་སུ་མྱོང་ཞིང་སྐྱེ་བར་འགྱུར་རོ། །བདེ་བ་དེས་ཀྱང་ཕྲ་མོ་འབབ་པར་གྱུར་པ་དང་། བྱང་ཆུབ་ཀྱི་
སེམས་རྟོགས་ཤིང་ཐབས་ཤེས་པར་ཡང་འགྱུར་རོ། །དེ་ནས་བདག་ལ་བཅོམ་ལྡན་འདས་གྲུབ་པར་གྱུར་ཏོ་ཞེས་ཤེས་པར་བྱའོ། །བདེ་བ་ཕྲ་མོ་འབབ་ཅིང་སྐྱེད་པ་དེས་བདག་ནི་བཅོམ་ལྡན་འདས་རྡོ་རྗེ་སེམས་དཔར་གྲུབ་པར་གྱུར་ཏེ་ཞེས་དེ་ལྟར་ཤེས་ཤིང་ངེས་པར་བརྟག་པར་
བྱའོ། །དེ་ནས་དེ་བཞིན་དུ་འདུག་ལ་ཅི་འདོད་པར་ནི་བཟླས་བརྗོད་བྱའོ། །ཞེས་བྱ་བ་ནི་ཕྱག་རྒྱ་གང་ཞིག་བཅིངས་པ་ཉིད་དང་། སེམས་དཔའི་སྐྱིལ་མོ་ཀྲུང་གིས་འདུག་ལ། ཇི་སྲིད་མཚན་མ་བྱུང་བར་གྱུར་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དོན་འདི་ཉིད་བསྟན་པ་ནི་དེ་ནས་
དེ་བཞིན་དུ་ཞེས་བྱ་བ་ལ་སོགས་པ་གསུངས་པ་ཡིན་ཏེ་འཇུག་པའི་ཕྱག་རྒྱ་ཇི་ལྟར་བཅིངས་པ་ཉིད་དང་། སེམས་དཔའི་སྐྱིལ་མོ་ཀྲུང་གིས་འདུག་ལ་བཟླས་བརྗོད་དཔག་ཏུ་མེད་པ་བྱེད་ཅིང་འདུག་པ་ནི་དེ་བཞིན་དུ་འཇུག་པ་ཞེས་བྱའོ། །རང་གི་བསོད་ནམས་ཀྱི་བྱིན་གྱི་རླབས་ཀྱིས་ཞེས་བྱ་
བ་ནི་རང་གི་བསོད་ནམས་དང་རྗེས་སུ་མཐུན་པའི་སྟོབས་ཀྱིས་མཁས་པ་རྣམས་ཡིད་ལ་འདོད་པའི་དངོས་གྲུབ་རྣམས་འཐོབ་པར་གྱུར་པའོ། །དེ་ནས་བརྩམས་ཏེ་ཞེས་བྱ་བ་ནི་དེ་ནས་བཟུང་སྟེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་བར་དུ་སྒྲུབ་པར་འགྱུར་ཞིང་

བཟླས་པ་ཙམ་གྱིས་རང་ཉིད་དབང་དུ་འགྱུར་རོ། །རང་དབང་ཉིད་དུ་གྱུར་པའི་སྟོབས་ཉིད་ཀྱིས་དེ་མཐོང་བར་འགྱུར་རོ། །དེ་ནས་དེ་མཐོང་བས་ཇི་ལྟར་མངོན་པར་འདོད་པའི་དངོས་གྲུབ་ཐམས་ཅད་དེ་ལ་སྩོལ་བར་མཛད་དོ། །འདིའི་རིགས་ཐམས་ཅད་ཀྱི་མཚན་མའི་
ཕྱག་རྒྱ་ཡང་བདག་རང་ཉིད་ཀྱིས་བཅིངས་ནས་ལས་ཐམས་ཅད་ལ་མཚན་མའི་ཕྱག་རྒྱ་ཐམས་ཅད་ཀྱིས་ལས་རྣམས་འགྲུབ་པར་འགྱུར་རོ། །དམ་ཚིག་ཐམས་ཅད་ནི་རིགས་ཐམས་ཅད་ཀྱི་དཀྱིལ་འཁོར་རྣམས་བརྟན་པར་འགྱུར་ཞིང་རང་གི་དངོས་གྲུབ་སྩོལ་བའི་ཕྱིར་མི་ཕྱེད་པར་འགྱུར་བ་དང་།
ལས་ཐམས་ཅད་དེ་རིགས་ཀྱི་ལས་ཐམས་ཅད་དཀྱིལ་འཁོར་གྱི་ཚུལ་དུ་བསམས་པ་ཙམ་གྱིས་བྱེད་པ་དང་། ཕྱག་རྒྱ་ཆེན་པོ་ལ་སོགས་པའི་ལས་ཀྱང་བྱེད་པའོ། །བདེ་བ་དང་ཡིད་བདེ་བ་ཐམས་ཅད་ཅེས་བྱ་བ་ལ་སོགས་པ་ནི་གོ་སླའོ། །དེ་ནས་ཞེས་བྱ་བ་ལ་སོགས་པ་ལ་དེ་ནས་ཀྱི་སྒྲ་
ནི་ཕྱོགས་གཞན་སྟོན་པར་བྱེད་པ་ཡིན་ཏེ། དེ་ནས་བཤད་མ་ཐག་པའི་ཆོ་གས་བདག་ཉིད་ཀྱི་དོན་དུ་དཀྱིལ་འཁོར་བརྟག་པར་བྱ་བ་མ་ཡིན་མོད་ཀྱི་འོན་ཀྱང་སེམས་ཅན་ཐམས་ཅད་གཞུག་པའི་དོན་དུ་དཀྱིལ་འཁོར་བྲིས་ལ་དེ་ནས་རྡོ་རྗེ་སེམས་དཔའི་རྣལ་འབྱོར་བྱས་ཏེ་རྡོ་རྗེ་སེམས་དཔའི་རྒྱན་
གྱིས་བརྒྱན་ནས། རབ་ཏུ་བདེ་བའི་རྡོ་རྗེའི་དམ་ཚིག་གི་ཕྱག་རྒྱའི་མཚན་ཉིད་འོག་ནས་བཤད་པ་བཅིངས་ལ་དེ་ནས་མེ་ཏོག་གི་ཕྲེང་བ་བླངས་ལ་སྔར་བཤད་པའི་གླུ་ལེན་ཅིང་འཇུག་པར་བྱའོ། །དེ་ནས་སྔ་མ་བཞིན་དུ་དྲན་པར་བྱའོ། །དགུག་པར་བྱ་སྟེ་ཞེས་བྱ་བ་ནི་ཆོ་ག་ཐམས་ཅད་རྗེས་སུ་
སྤྱད་ལ་བསྡུ་བ་ཇི་ལྟ་བ་བཞིན་དུ་བྱས་ནས། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པ་རང་གི་དམ་ཚིག་གི་ཕྱག་རྒྱ་ལ་སོགས་པ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་ཆོ་ག་ཐམས་ཅད་རྗེས་སུ་སྤྱད་དོ། །རབ་ཏུ་བདེ་བའི་རྡོ་རྗེ་དམ་ཚིག་
གི་ཕྱག་རྒྱ་བཅིངས་ནས་ཇི་ལྟ་བ་བཞིན་དུ་བཞུགས་ལ། དྲན་པར་བྱས་ནས་འདི་སྐད་ཅེས་བརྗོད་དོ། །སྲིད་པའི་བདེ་བ་ཞེས་བྱ་བ་ལ་སོགས་པ་ལ་འབྱུང་བས་ན་སྲིད་པ་སྟེ། མི་གནས་པའི་མྱ་ངན་ལས་འདས་པའོ། །དེ་ལས་བྱུང་བའི་བདེ་བ་ནི་སྲིད་པའི་བདེ་བའོ། །དེའི་རྣམ་

པར་དག་པ་ནི་རྣམ་པར་རྟོག་པ་དང་བྲལ་བ་ཉིད་དོ། །དེའི་དོན་ནི་སྔར་བྱུང་བའི་གནས་ཏེ་སོ་སོ་སྐྱེ་བོའི་གནས་སྐབས་སུ་བཅོམ་ལྡན་འདས་རྡོ་རྗེ་སེམས་དཔའི་གཞལ་ཡས་ཁང་ངོ་། །མི་གནས་པའི་མྱ་ངན་ལས་འདས་པ་འདིས་རང་བཞིན་གྱིས་མི་གནས་པའི་མྱ་ངན་ལས་འདས་
པར་གྱུར་པས་ན་གཞལ་ཡས་ཁང་ངོ་། །དགའ་བ་ནི་ཆགས་པར་འགྱུར་བའོ། །འདོད་པ་ཐམས་ཅད་ནི་རྡོ་རྗེ་སེམས་དཔའ་ལ་སོགས་པ་སྟེ། དེ་རྣམས་ཀྱི་དངོས་གྲུབ་ནི་གདུལ་བྱའི་རྒྱུད་ལ་དེ་བསྐྱེད་པར་གྱུར་པའོ། །དེའི་དོན་གྱི་དངོས་གྲུབ་ནི་འགྲོ་བ་ཐམས་ཅད་ལ་ཡང་བསྐྱེད་པ་སྟེ།
སེམས་ཅན་ཐམས་ཅད་གྲུབ་པར་བྱས་པའོ་ཞེས་བདག་ཀྱང་ཞེས་བྱ་བའི་སྒྲས་སྟོན་ཏོ། །དེ་ལྟར་སློབ་མ་གཞུག་པའི་ཕྱིར་རྗེས་སུ་གནང་བ་བླངས་ནས་དཀྱིལ་འཁོར་གྱི་ལྷ་རྣམས་མེ་ཏོག་ལ་སོགས་པ་ཡང་དག་པར་མཆོད་དེ་སློབ་མ་གཞུག་པར་བྱའོ། །དེ་ཡང་རང་གི་ལྷ་གཞུག་པའི་ཆོ་གས་རང་
གི་ལྷའི་དཀྱིལ་འཁོར་དུ་འཇུག་པའི་ཕྱག་རྒྱ་རྣམས་ཀྱིས་གཞུག་གོ། །དེ་ལྟར་རང་གི་ལྷའི་འཇུག་པའི་ཆོ་གས་བཅུག་པའི་རྗེས་ཐོགས་ཉིད་ལ་འདི་སྐད་བརྗོད་པར་བྱའོ། །འདོད་ཆགས་དང་བྲལ་བ་ཞེས་བྱ་བ་ལ་སོགས་པ་ལ་འདོད་ཆགས་དང་བྲལ་བ་ནི་ཉན་ཐོས་དང་། རང་སངས་རྒྱས་
ཀྱི་མྱ་ངན་ལས་འདས་པའོ། །འདིས་འདུལ་བས་ན་འདུལ་བ་སྟེ། ཉན་ཐོས་དང་རང་སངས་རྒྱས་ཀྱི་མྱ་ངན་ལས་འདས་པ་ལ་རབ་ཏུ་འཇུག་པ་ཞེས་སྟོན་པ་ཡིན་ནོ། །འདོད་ཆགས་དང་བྲལ་བས་འདུལ་བ་གང་ཡིན་པ་དེ་ནི་འདོད་ཆགས་དང་བྲལ་བས་འདུལ་བའི་འཇིག་རྟེན་ནོ། །སེམས་
ཅན་གྱི་ཁམས་འདོད་ཆགས་དང་བྲལ་བས་དག་པ་ཞེས་བྱ་བ་ནི་འདོད་ཆགས་དང་བྲལ་བས་འདུལ་བའི་འཇིག་རྟེན་གང་ཡིན་པ་དེ་ནི་ཇི་སྐད་དུ་བཤད་པའི་ཉན་ཐོས་དང་རང་སངས་རྒྱས་ཀྱི་མྱ་ངན་ལས་འདས་པའི་ཆགས་པ་དང་བྲལ་བས་ཡང་དག་པར་འགྱུར་ཞིང་འཁོར་བའི་དྲི་མ་དང་བྲལ་
བར་འགྱུར་རོ། །རྡོ་རྗེ་སེམས་དཔའ་སྦས་པ་ཡིན། །ཞེས་བྱ་བའི་འདོད་ཆགས་དང་བྲལ་བས་འདུལ་བའི་འཇིག་རྟེན་ལ་ནི་བཅོམ་ལྡན་འདས་རྡོ་རྗེ་སེམས་དཔའ་གསང་ཞིང་སྦ་བར་བྱ་བ་ཡིན་གྱི་བསྟན་པར་ནི་མི་བྱའོ། །ནིའི་སྒྲ་ནི་རྒྱུའི་དོན་ཏེ་གང་གི་ཕྱིར་འདོད་ཆགས་དང་བྲལ་བས་

འདུལ་ཞིང་མོས་པ་དམན་པ་དང་ལྡན་པ་རྣམས་ལ་ཆོས་བདག་མེད་པའི་འདོད་ཆགས་རྡོ་རྗེ་འཆང་ཆེན་པོའི་ཆགས་པ་ཆེན་པོ་ཤིན་ཏུ་ཟབ་མོ་ཐོས་ནས་སྤོང་བར་འགྱུར་ལ། དེ་སྤངས་པས་དམྱལ་བ་ཆེན་པོ་མནར་མེད་པར་ལྟུང་བར་འགྱུར་རོ། །དེ་བས་ན་རྡོ་རྗེ་སེམས་དཔའ་
སྦས་པ་ཡིན་ནོ། །འདོད་ཆགས་ཆེན་པོ་ཇི་ལྟ་བུ་ཞེ་ན། མི་དམིགས་པའི་ཐུགས་རྗེ་ཆེན་པོའི་སྟོབས་ཀྱིས་སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་བདེ་བ་ཆེན་པོའི་ཐར་པ་ཆེན་པོའོ། །ཇི་སྐད་དུ་བཤད་པའི་འདོད་ཆགས་དང་བྲལ་བ་དང་འདྲ་ཞིང་མཚུངས་པའི་སྡུག་བསྔལ་གཞན་དག་
ནི་ཡོད་པ་མ་ཡིན་ཏེ། ལུས་དང་ངག་དང་སེམས་ཤིན་ཏུ་འགགས་པས་བདེ་བ་ཐམས་ཅད་མེད་པའི་ཕྱིར་རང་བཞིན་གྱིས་བདེ་བ་ཐམས་ཅད་མེད་པ་ཡིན་ལ། དེ་བས་ན་འདོད་ཆགས་དང་བྲལ་ཞིང་བྲལ་བར་མ་བྱེད་ཅིག་ཅེས་པའོ། །ཡང་ཞེས་བྱ་བ་ནི་གང་གི་ཕྱིར་འདོད་ཆགས་དང་
བྲལ་བ་ལྟ་བུའི་སྡུག་བསྔལ་གཞན་དག་མེད་པ་དེ་བས་ན་འདོད་ཆགས་ཐམས་ཅད་དང་བྲལ་བ་ཉན་ཐོས་དང་རང་སངས་རྒྱས་ཀྱི་བྱང་ཆུབ་ཐོབ་པའི་གནས་སུ་མྱ་ངན་ལས་འདའ་བར་མ་བྱེད་ཅིག་ཅེས་བཟློག་པའོ། །ཡང་ཞེས་བྱ་བ་ནི་སེམས་དེ་ནམ་ཡང་མ་བྱེད་ཅིག་ཅེས་པའོ། །
དེ་ནས་དེ་ཁོ་ན་ཉིད་ཆེན་པོ་བརྗོད་པར་བྱའོ་ཞེས་བྱ་བ་ནི། དཀྱིལ་འཁོར་གོ་རིམས་ཇི་ལྟ་བུ་བཞིན་དུ་བསྟན་ལ་དེ་བཞིན་གཤེགས་པའི་གསང་བ་བརྗོད་པར་བྱའོ། །དེ་ནི་འདི་ཡིན་ཏེ། སེམས་ཅན་ཀུན་གྱི་ཡིད་ཁྱབ་ཅིང་། །སེམས་ཅན་ཀུན་ལ་བདེ་རབ་སྩོལ། །རྡོ་རྗེ་སེམས་དཔའ་སེམས་དཔའ་
ཆེ། །འདོད་པ་འདི་ནི་དམ་ཚིག་མཆོག །འདི་ནི་ཐོག་མ་ཐ་མ་མེད། །ནམ་མཁའ་ལས་བྱུང་མཚན་ཉིད་ཅན། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བསྙེམས་བདག་བདག་པོའི་གཙོ། །འདི་ཉིད་ཁོ་ན་འགྲོ་བའི་སེམས། །བརྟན་པས་སེམས་དཔའ་ཞེས་བརྗོད་དེ། །མཉམ་
པར་གཞག་པས་ཏིང་འཛིན་ཏེ། །ངེས་པའི་ཕྱིར་ན་རྡོ་རྗེར་གྱུར། །སེམས་དཔའི་བྱིན་རླབས་སྦྱོར་བ་ཡིས། །སླར་ཡང་རྡོ་རྗེ་སེམས་དཔར་འགྱུར། །འདི་ཉིད་ཐོག་མའི་སེམས་དཔའ་སྟེ། །འདོད་དང་འགྲོ་བ་ཀུན་གྱི་བདག །འདི་ཉིད་ཁོ་ན་སངས་རྒྱས་ཉིད། །འདི་ཉིད་དེ་བཞིན་

གཤེགས་པ་ཉིད། །འདི་ནི་ཁམས་གསུམ་ཐམས་ཅད་དེ། །དང་པོའི་སེམས་དཔར་ཡང་དག་བྱུང་། །ཆགས་བྲལ་གྱིས་མཐར་མུ་སྟེགས་རྣམས། །དེ་འདུལ་བ་ཡི་དབང་གིས་འདིས། །བཅོམ་ལྡན་རབ་སྦས་གསང་ཉིད་དུ། །བདེ་བར་གཤེགས་པས་མཛད་པ་ཡིན། །དེ་ནས་
བཅོམ་ལྡན་འདས་བསྟན་པར་བྱ་སྟེ། འདི་ནི་བཅོམ་ལྡན་འདས་ཕྱག་ན་རྡོ་རྗེ་བདེ་བ་ཆེན་པོ་རྡོ་རྗེ་སེམས་དཔའ་སེམས་ཅན་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱེད་པའི་དམ་ཚིག་ནི་འདི་ཡིན་ནོ་ཞེས་དང་པོའི་སེམས་དཔའ་ནས་བརྩམས་ཏེ། དེ་བཞིན་
གཤེགས་པའི་བར་དུ་ཁྱེད་ཀྱིས་ང་ལ་བརྙས་པར་མི་བྱ་ཞིང་ནམ་ཡང་ཡོངས་སུ་སྤང་བར་མི་བྱའོ། །འདི་ལ་བརྙས་པར་གྱུར་ན་འདི་དག་གང་ཡིན་ཁྱོད་ལ་འབྱུང་བར་མི་འགྱུར་རོ། །སྙིང་པོ་ཡང་ཅི་འདོད་པར་བྱིན་ལ་ཞེས་བྱ་བ་ནི་དབང་བསྐུར་བ་ཐམས་ཅད་ཀྱིས་དབང་བསྐུར་ལ་དེ་རྣམས་ཇི་
ལྟ་བ་བཞིན་དུ་ཡང་དག་པར་མཆོད་ནས་དེ་རང་གིས་མཉེས་པར་བྱ་བའི་ཡི་དམ་ལྷའི་སྙིང་པོ་སྦྱིན་པར་བྱའོ། །དེ་བྱིན་ནས་ཀྱང་ཕྱག་རྒྱ་བཞིའི་ཡེ་ཤེས་བསླབ་པར་བྱའོ། །བསྒྲུབས་ནས་ཞེས་བྱ་བ་ནི་སྙིང་པོ་བྱིན་ནས། ཕྱག་རྒྱ་བཞིའི་ཡེ་ཤེས་བསླབས་ལ་རང་གི་ལྷའི་རྣལ་འབྱོར་འདི་
ལྟར་གྱིས་ཤིག་ཅེས་བསླབ་པར་བྱའོ། །དེ་ནས་ཡེ་ཤེས་སེམས་དཔའ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ནས་མདུན་དུ་ཇི་ལྟ་བ་བཞིན་དུ་ཇི་ལྟ་བ་བྱེད་དུ་བཅུག་ལ་དེ་རང་གི་ལུས་ལ་གཞུག་པ་བསྟན་པའི་རྗེས་ཐོགས་ཉིད་ལ། ཡེ་ཤེས་སེམས་དཔའ་དང་
ལྷན་ཅིག་གཅིག་ཏུ་གྱུར་པར་གྱིས་ཤིག་ཅེས་བྱ་བས་བསྒྲུབས་ལ་ཆོ་ག་ཐམས་ཅད་དེ་ལ་བསྟན་པར་བྱའོ། །རང་གི་ལྷག་པའི་ལྷའི་དབང་བསྐུར་བས་དབང་བསྐུར་ཏེ་ཞེས་བྱ་བ་ནི། སྙིང་པོ་བྱིན་པ་གང་ཡིན་པ་འདི་ནས་བརྩམས་ཏེ་ཕྱག་རྒྱ་བཞི་ལ་སོགས་པ་སྦྱིན་པ་སློབ་མ་ལ་བརྗོད་པ་དེ་རང་གི་
ལྷའི་དབང་བསྐུར་བ་ལ་སོགས་པས་དབང་བསྐུར་ནས་སྦྱིན་པར་བྱའོ་ཞེས་བྱ་བའི་དོན་ཏེ། །མཚན་མ་དེ་ལག་པ་གཉིས་སུ་བྱིན་ལ་ཞེས་བྱ་བ་ལ་སོགས་པ་ལ་རང་གི་ལྷའི་ཆུ་ཡིས་དབང་བསྐུར་བ་དང་། ཕྱག་རྒྱ་དང་ཅོད་པན་གྱིས་དབང་བསྐུར་ལ། རྡོ་རྗེ་ལ་སོགས་པ་རང་རང་གི་ལྷའི་མཚན་

མའི་དབང་བསྐུར་བའི་སྔགས་ཀྱིས་སློབ་མའི་ལག་པ་གཉིས་སུ་སྦྱིན་པར་བྱའོ། །བྱིན་ནས་དེ་ལ་ཧཱུཾ་ཞེས་བྱ་བ་ལ་སོགས་པའི་སྙིང་པོ་འདིས། རང་གི་རིགས་ཀྱི་མིང་གི་དབང་བསྐུར་བས། དབང་བསྐུར་བར་བྱའོ། །དེ་ནས་ཕྱག་རྒྱ་བཅིང་བ་ཇི་ལྟ་བ་བཞིན་དུ་བསླབ་པར་བྱའོ། །
དེའི་རྗེས་ལ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏི་སྟྭཾ་ཞེས་དམ་ཚིག་ཆེན་པོའི་དེ་ཁོ་ན་ཉིད་འདོན་དུ་བཅུག་ལ་འདི་བཤད་པར་བྱའོ། །དམ་ཚིག་ཆེན་པོ་ནི་སེམས་དཔའ་ཆེན་པོ་ལ་བྱའོ། །དེ་ཁོ་ན་ཉིད་ནི་རབ་ཏུ་དགའ་བ་ཡིན་པར་བཤད་དེ། བཅོམ་ལྡན་འདས་རབ་ཏུ་དགའ་བ་ལ་བསྐུལ་
ན་འདོད་པ་ཐམས་ཅད་དེ་དངོས་གྲུབ་ཀྱི་དམ་པ་མྱུར་དུ་འགྲུབ་པར་འགྱུར་རོ། །དེ་བས་ན་དམ་ཚིག་ཆེན་པོའི་དེ་ཁོ་ན་ཉིད་བརྗོད་པར་བྱའོ། །བཅོམ་ལྡན་འདས་འདི་ནི་ཁམས་གསུམ་གྱི་དབང་ཕྱུག་སྟེ། ཐོག་མའི་སེམས་དཔའ་ཡིན་པས་འདོད་པ་ཀུན་གྱི་དབང་ཕྱུག་གོ། །མ་དུལ་བ་རྣམས་
ལ་རྡོ་རྗེ་བསྙེམས་མ་འཆང་བའི་མཆོག་ཡིན་ཏེ། དེ་བས་ན་རྡོ་རྗེ་བསྙེམས་མ་དོན་གྱིས་བརྗོད་པར་བྱའོ། །བཅོམ་ལྡན་འདས་ནི་ཐོག་མ་དང་ཐ་མ་མེད་པ་ཀུན་དུ་བཟང་པོའོ། །འདོད་པ་ནི་འགྲོ་བ་ཀུན་གྱི་བདག་པོའོ། །ཕྱག་ན་རྡོ་རྗེ་ནི་རྡོ་རྗེ་བསྙེམས་མའི་བདག་པོའོ། །དེ་རབ་ཏུ་དགའ་བ་འདིའི་
སྦྱོར་བས་རྡོ་རྗེ་འཆང་བས་ན། དེ་བཞིན་གཤེགས་པ་ཐམས་ཅད་ཐུགས་འབྱུང་བར་མི་བྱེད་དོ། །གང་གི་ཚེ་རབ་ཏུ་དགའ་བས་བསྟོད་པར་བྱ་ཞིང་རྡོ་རྗེ་སེམས་དཔའ་འདི་ནི་བདེ་བ་ཆེན་པོ་ཡིན་པ་དེས་ན་ཉོན་མོངས་པ་མི་མངའ་བར། བདེ་བ་ཉིད་ཀྱིས་སངས་རྒྱས་ཀྱི་བྱང་ཆུབ་ལ་སོགས་
པའི་དངོས་གྲུབ་ཐམས་ཅད་མྱུར་དུ་ཐོབ་པར་འགྱུར་ཏེ། དེས་ན་རབ་ཏུ་བདེ་བའི་ཕྱག་རྒྱ་འདི་བསྟོད་དེ་འཇོག་ཅིང་། བཅོམ་ལྡན་འདས་གཡོན་པ་བསྙེམས་པ་དང་བཅས་པ་འདིས་གཡོན་ཕྱོགས་སུ་སྤྱོད་པའི་སེམས་ཅན་རྣམས་དབང་དུ་བྱེད་ཅིང་མགུ་བར་བྱེད་པ་ཡིན་ནོ། །དེ་ཅིའི་ཕྱིར་
ཞེ་ན། འགྲོ་བ་རྣམས་དགའ་བའི་སྦྱོར་བས་མགུ་བར་བྱེད་པར་མ་ཟད་ཀྱི་ཞི་བར་བྱ་བའམ་ཞི་བ་ཉིད་ཀྱིས་འདུལ་བར་མི་ནུས་པ་དག་ལ་འདིར་བསྙེམས་པ་ལ་ཡང་སྦྱོར་རོ། །བསྙེམས་པ་འབའ་ཞིག་གིས་འདི་དག་འདུལ་བར་ནུས་པ་མ་ཡིན་གྱི་དེའི་དོན་དུ་བཅོམ་ལྡན་འདས་རྡོ་རྗེ་

བསྙེམས་མའི་བདག་པོར་གྱུར་ནས་འཇིག་རྟེན་གྱི་ཁམས་ཐམས་ཅད་དུ་གདུལ་མི་ནུས་པ་དག་ཀྱང་འདུལ་བར་སྤྱོད་པ་ཡིན་ནོ། །དེ་ལྟར་ཕྱག་རྒྱ་བཅིངས་པ་འདི། །ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ། ཞེས་བྱ་བ་བརྗོད་པར་བྱའོ། །དེ་ནས་དེ་རྣམས་ཡིད་ལ་འདོད་པའི་དངོས་
གྲུབ་ཐམས་ཅད་བདེ་བ་ཁོ་ནར་འབྱོར་ཅིང་ཐོབ་པར་འགྱུར་རོ། །འདི་དག་ནི་བཅོམ་ལྡན་འདས་རྡོ་རྗེ་སེམས་དཔའི་ཡན་ལག་ཡིན་ནོ། །འདི་ནི་བཅོམ་ལྡན་འདས་ཀྱི་འདོད་ཆགས་ཀྱི་ཡན་ལག་སྟེ། ཐུགས་མྱུར་དུ་འབིགས་པས་ན་སྙིང་པོའོ། །གཡས་སུ་ནི་རབ་ཏུ་བདེ་བའི་སྦྱོར་བ་བདེ་བ་
ཆེན་པོའོ། །རྒྱབ་ཏུ་ནི་རྩེ་བའི་འཆིང་བས་ཆུ་སྲིན་འདྲ་བ་ཡིན་པ་དེས་ན་འདི་ནི་ཆུ་སྲིན་གྱི་རྒྱལ་མཚན་ནོ། །གཡོན་དུ་ནི་བསྙེམས་མ་དབང་དུ་བྱེད་པ་ཡིན་ནོ། །འདི་དག་ནི་རབ་ཏུ་དགའ་བའི་མཆོད་པ་སྟེ་མེ་ཏོག་མ་ལ་སོགས་པའོ། །འདི་དག་ནི་སྒེག་མོ་ལ་སོགས་པའི་རྡོ་རྗེ་སྒེག་མོ་
རྣམས་སོ། །འདི་དག་ནི་མིང་གིས་ཆགས་པར་བྱེད་པ་ལ་སོགས་པས་ཆགས་པའི་ལྕགས་ཀྱུ་ལ་སོགས་པ་སྟེ། འདི་ནི་དེ་བཞིན་གཤེགས་པ་ཐམས་ཅད་ཀྱི་གསང་བར་འཇུག་པ་དངོས་གྲུབ་ཐམས་ཅད་ཀྱི་བདེ་བ་རབ་ཏུ་གསོལ་བ་ཡིན་ཏེ་འདིས་ནི་སངས་རྒྱས་ཉིད་ཀྱང་ཐོབ་པར་གྱུར་
ན། དངོས་གྲུབ་གཞན་ལྟ་སྨོས་ཀྱང་ཅི་དགོས། དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་མཆོག་ཡིན་པའི་ཕྱིར་རོ། །དེ་ནས་སྙིང་པོ་བྱིན་ལ་དེ་ནས་ཕྱག་རྒྱ་བཅིངས་པ་བསླབ་པར་བྱའོ་ཞེས་བྱ་བ་ནི། དེ་ནས་ཕྱག་རྒྱ་ཆེན་པོ་བཅིང་པ་བསླབ་པར་བྱ་སྟེ། བསྙེམས་པ་
དང་བཅས་པས་རྡོ་རྗེ་གསོར་ཞིང་ཊཀྐི་ཧཱུཾ་ཛཿཞེས་བྱ་བས་རྡོ་རྗེ་ཚིག་ཏུ་བརྗོད་པར་བྱའོ། །འདིས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་བསྟན་པ་ལ་འཇུག་པར་འགྱུར་རོ། །དེ་ནས་རྡོ་རྗེ་དེ་རང་གི་སྙིང་གར་བསྟོད་པའི་ཚུལ་གྱིས་འཛིན་ཅིང་ཊཀྐི་ཛཿཧོཿཞེས་བརྗོད་པར་བྱའོ། །དེ་ནས་
རྡོ་རྗེ་སེམས་དཔའི་སྐུ་དང་གསུང་དང་ཐུགས་སུ་རང་ཉིད་འགྱུར་རོ། །དེ་ནས་རྡོ་རྗེ་ཡིད་ལས་བྱུང་བ་ལ་སོགས་པའི་ཕྱག་རྒྱ་ཆེན་པོ་ཇི་ལྟར་བྲིས་པ་དང་རྗེས་སུ་མཐུན་པར་བསླབ་པར་བྱའོ། །ཇི་ལྟར་མངོན་པར་འདོད་པའི་མཆོད་པ་བྱས་ནས་ཞེས་བྱ་བ་ནི་དེ་ལྟར་སློབ་མ་འཇུག་པ་ལ་

སོགས་པའི་ཆོ་ག་རྗེས་སུ་སྤྱད་ནས་སློབ་དཔོན་གྱིས་ཇི་ལྟར་མངོན་པར་འདོད་པས་དཀྱིལ་འཁོར་པ་ཐམས་ཅད་ལ་མཆོད་པར་བྱའོ། །དེ་བྱས་ནས་སློབ་མ་ཡང་བྱེད་དུ་གཞུག་གོ། །དེ་ནས་སློབ་མ་ཐམས་ཅད་ཁ་ཟས་དང་གནས་པ་ཐམས་ཅད་ཀྱིས་ཚིམ་པར་བྱ་བ་དང་།
རང་ཉིད་ཀྱིས་ཕྱག་རྒྱ་དང་། ཕྱག་རྒྱའི་ལན་དང་གར་གྱི་མཆོད་པ་བྱས་ཏེ་སློབ་དཔོན་རང་གིས་རྡོ་རྗེ་ཡིད་ལས་བྱུང་བའི་ལས་ཀྱི་ཕྱག་རྒྱ་གར་བྱ་བའི་ཚུལ་གྱིས་བཅིང་བར་བྱའོ། །དེ་ནས་ནི་རྡོ་རྗེ་བསྙེམས་མའི་ལས་ཀྱི་ཕྱག་རྒྱའོ། །དེ་ནས་ནི་རྡོ་རྗེ་ཀི་ལི་ཀི་ལའི་ཕྱག་རྒྱའོ། །དེ་ནས་ནི་རྡོ་རྗེ་
དྲན་པའི་ཕྱག་རྒྱའོ། །དེ་ནས་ནི་རྡོ་རྗེ་སྦྲང་རྩིའི་ཕྱག་རྒྱའོ། །དེ་ནས་ནི་རྡོ་རྗེ་དགུན་གྱི་ཕྱག་རྒྱའོ། །དེ་ནས་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །དེ་ནས་ནི་རྡོ་རྗེ་སྟོན་གྱི་ཕྱག་རྒྱའོ། །དེ་ནས་ནི་རྡོ་རྗེ་སྒེག་མོའི་ཕྱག་རྒྱའོ། །དེ་ནས་ནི་རྡོ་རྗེ་གར་མའི་ཕྱག་རྒྱའོ། །དེ་ནས་ནི་རྡོ་རྗེ་བཞད་མའི་ཕྱག་
རྒྱའོ། །དེ་ནས་ནི་རྡོ་རྗེ་གླུ་མའི་ཕྱག་རྒྱའོ། །དེ་ནས་ནི་རྡོ་རྗེ་ལྕགས་ཀྱུའི་ཕྱག་རྒྱའོ། །དེ་ནས་ནི་རྡོ་རྗེ་འབེབས་པའི་ཕྱག་རྒྱའོ། །དེ་ནས་ནི་རྡོ་རྗེ་ཞགས་པའི་ཕྱག་རྒྱའོ། །དེ་ནས་ནི་རྡོ་རྗེ་ལྕགས་སྒྲོག་གི་ཕྱག་རྒྱ་བཅིང་བར་བྱའོ། །དེ་ནས་དཔལ་རྡོ་རྗེ་སེམས་དཔའི་ཕྱག་རྒྱ་བཅིངས་ན་
འགྲུབ་པར་འགྱུར་རོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་ཕྱག་རྒྱ་དང་ཕྱག་རྒྱའི་ལན་གྱི་གར་གྱི་མཆོད་པས་བཅོམ་ལྡན་འདས་འཁོར་དང་བཅས་པ་ཡང་དག་པར་མཆོད་ནས་དེའི་རྗེས་ཐོགས་ཉིད་ལ་སློབ་མ་ཐམས་ཅད་སླར་བཏང་ནས་འདི་སྐད་ཅེས་བརྗོད་པར་བྱའོ། །ཇི་སྐད་
བརྗོད་པར་བྱ་ཞེ་ན་རབ་ཏུ་དགའ་བ་ཞེས་བྱ་བ་ལ་སོགས་པ་སྨོས་ཏེ་རབ་ཏུ་དགའ་བ་ནི་བཤད་ཟིན་ཏོ། །དེ་ལ་རག་ལས་པ་ནི་འབྲེལ་ཅིང་རག་ལུས་པ་སྟེ། དེ་ནས་རྡོ་རྗེ་སེམས་དཔའ་ནས་བརྩམས་ཏེ་རྡོ་རྗེ་འབེབས་པའི་མཐར་ཐུག་པའི་ཐོག་མཐའ་དེ་ལའོ། །འགྲོ་བ་འདི་ཀུན་རྒྱུ་བ་སྟེ། །
ཞེས་བྱ་བ་ནི་སྐྱེ་ཞིང་འགྲོ་བས་ན་སྐྱེ་འགྲོའོ། །འདི་ཞེས་བྱ་བ་ནི་མངོན་དུ་གྱུར་པའོ། །ཐམས་ཅད་ནི་མ་ལུས་པའོ། །དཀྱིལ་འཁོར་གྱི་ལྷ་རྣམས་ཀྱི་ངོ་བོ་ཡིན་པར་བསྟན་པའི་ཕྱིར་རྒྱུ་བ་ཞེས་བྱ་བ་གསུངས་ཏེ་སེམས་དང་བཅས་པའོ། །དེ་ཡང་འགྲོ་བ་སེམས་དང་བཅས་པ་འདི་དག་

ཐམས་ཅད་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ངོ་བོ་ཉིད་ནས་རྡོ་རྗེ་འབེབས་པའི་ཕྱག་རྒྱའི་ངོ་བོ་ཉིད་ཀྱི་བར་ཡིན་ཏེ་རབ་ཏུ་དགའ་བ་ལ་རག་ལས་པས་ན་ཞི་བ་བྱང་ཆུབ་ཀྱི་སེམས་ཀྱི་ཁ་ན་ལུས་པ་ཡིན་ནོ་ཞེས་བྱ་བའི་ཐ་ཚིག་གོ། །གང་གི་ཕྱིར་དེ་ལྟར་ཡིན་པ་དེས་ན་རྡོ་རྗེར་མཛོད་ཅེས་བྱ་བ་ནི་མི་
ཕྱེད་པར་མཛོད་ཅིག་པའོ། །སེམས་དཔའ་ཆེན་པོ་ཞེས་བྱ་བ་ནི་བྱང་ཆུབ་ཆེན་པོའི་ངོ་བོ་ཅིའི་ཕྱིར་ཞེ་ན། སླར་ཡང་གཤེགས་པར་མཛད་དུ་གསོལ་ཞེས་བྱ་བ་ཡིན་ནོ། །འདི་ནི་ཇི་སྲིད་ཁྱེད་ལ་བདག་སྤྱན་འདྲེན་པར་བགྱིད་པ་དེ་སྲིད་ཀྱི་བར་དུ་གཤེགས་པར་མཛོད་ལ། སླར་སྤྱན་འདྲེན་པ་དེའི་
ཚེ་ན་མི་ཕྱེད་པའི་ཐུགས་སུ་མཛད་དེ་གཤེགས་པར་མཛོད་ཅིག་ཅེས་པའོ། །འདི་སྐད་སྟོན་ཏེ་གང་གི་ཕྱིར་བྱང་ཆུབ་ཀྱི་སེམས་དང་འབྲེལ་པ་ཡིན་པས་འགྲོ་བ་འདི་དག་ཐམས་ཅད་ནི། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོའི་ངོ་བོ་ཉིད་ཡིན་པའི་ཕྱིར། རྡོ་རྗེ་འབེབས་པའི་མཐར་
ཐུག་པ་ཡིན་ནོ། །དེ་བས་ན་ཁྱེད་ལ་རག་ལུས་པའི་ཕྱིར་བདག་ཅག་རྣམས་ལ་རྗེས་སུ་བརྩེ་བའི་དོན་དུ་ཁྱེད་སླར་ཡང་གཤེགས་པའི་སླད་དུ་མི་ཕྱེད་པའི་ཐུགས་སུ་མཛོད་ཅིག །ཁྱེད་གཤེགས་པས་སེམས་དཔའ་འདི་དག་ཐམས་ཅད་བྱོན་ནས་བདག་གི་བསམ་པ་ཐམས་ཅད་རྫོགས་པར་
མཛད་པར་འགྱུར་རོ་ཞེས་སྟོན་ཏོ། །དེ་ནས་སྙིམ་པའི་མེ་ཏོག་གཏོར་ལ་དབྱུང་བར་བྱའོ། །དེ་ལྟར་བཅོམ་ལྡན་འདས་གཤེགས་པའི་ཕྱིར་སྤྱི་བོར་སྙིམ་པའི་མེ་ཏོག་གཏོར་བས་བསྐུལ་བར་བྱ་ཞིང་། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་མུཿཞེས་བརྗོད་དོ། །དེས་ནི་བཅོམ་
ལྡན་འདས་འཁོར་དང་བཅས་པ་གཤེགས་སུ་གསོལ་བར་འགྱུར་རོ། །དེ་ལྟར་སྙིམ་པའི་མེ་ཏོག་གཏོར་བས་ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་ཟློས་ཤིང་རང་ཉིད་ཀྱིས་དཀྱིལ་འཁོར་འཕྱག་པར་བྱའོ། །གལ་ཏེ་སློང་བ་ཡོད་ན་ཕྱེ་མ་དེ་ལས་རི་ལུ་བྱས་ཏེ་དཀྱིལ་འཁོར་རྣམས་ལ་
ལན་བརྒྱ་རྩ་བརྒྱད་བཟླས་ལ་གཞག་པར་བྱ་སྟེ། དེས་དབང་དུ་བྱ་བ་ལ་སོགས་པའི་ལས་ཐམས་ཅད་འགྲུབ་པར་འགྱུར་རོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །གང་ཞིག་རི་མོའི་ལས་ལ་མཁས་པར་གྱུར་པ་དེས་ནི་རྡོ་རྗེ་ལ་སོགས་པ་མཚན་མའམ་ཕྱག་རྒྱ་

ལ་སོགས་པ་གཞག་པར་བྱའོ། །གང་ཞིག་མཚན་མའི་ཕྱག་རྒྱ་ལ་སོགས་པ་ཡང་དཀྱིལ་འཁོར་དུ་བྲི་བར་མི་ནུས་པ་དེས་ནི་ལྷ་རྣམས་དམ་ཚིག་གི་ཕྱག་རྒྱ་རྣམས་ཀྱིས་རབ་ཏུ་བསྒྲུབས་ལ། དེ་རྣམས་ཀྱི་ཆོས་དང་ལས་དང་ཕྱག་རྒྱ་ཆེན་པོ་བཅིང་བར་བྱའོ། །ཕྱག་
རྒྱའི་ཆོ་ག་རྒྱས་པ་ཞེས་བྱ་བ་ནི་བྲི་བའི་ཕྱག་རྒྱ་རྣམས་ཀྱིས་དཀྱིལ་འཁོར་བརྟག་པའི་ཆོ་ག་གསུངས་པ་གང་ཡིན་པ་འདིའི་མཚན་མའི་ཕྱག་རྒྱ་རྣམས་དང་ལག་པའི་ཕྱག་རྒྱ་རྣམས་ཀྱིས་བྱ་བ་དེ་ནི་ཕྱག་རྒྱའི་ཆོ་ག་རྒྱས་པ་ཞེས་བྱའོ། །དེ་ལྟར་དེ་ནས་བཅོམ་ལྡན་འདས་ཞེས་བྱ་བ་
ནས་བརྩམས་ཏེ། ཕྱག་རྒྱའི་ཆོ་ག་རྒྱས་པའོ་ཞེས་བྱ་བའི་བར་དུ་བསྟན་པས། སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །ཡང་འདིས་བདེ་བླག་ཏུ་རྟོགས་པར་བྱ་བའི་ཕྱིར། བརྗོད་པར་བྱ་སྟེ། རེ་ཞིག་དང་པོར་
ཇི་སྐད་དུ་བཤད་པའི་ཆུའི་ཁྲུས་སམ་སེམས་ཀྱིས་ནང་གི་ཁྲུས་བྱས་ལ་ལྷའི་ཁང་པར་ཇི་ལྟ་བ་བཞིན་དུ་ཞུགས་ནས་འདུག་པར་བྱའོ། །དེ་ནས་སྔར་བཤད་པའི་ཆོ་གས་བདག་བསྲུང་བ་དང་བགེགས་བསལ་བ་ལ་སོགས་པ་བྱའོ། །དེ་ནས་མཆོད་ཡོན་ལ་བཟླས་པའི་བར་གྱི་ཆོ་ག་
རྗེས་སུ་སྤྱད་ལ། རྟག་ཏུ་རྡོ་རྗེ་དྲིལ་འཆང་ཞིང་། །ཐམས་ཅད་འགུགས་པའི་མཆོད་པ་སྟེ། །བདག་བྱིན་བརླབས་སོགས་སྒྲུབ་པ་ཡིས། །དངོས་གྲུབ་མཆོག་ནི་བསྒྲུབ་པར་བྱ། །ལུགས་མ་འམ་འབུར་དུ་བརྐོས་པའམ། །བྱས་པའམ་ཡང་ན་བྲིས་པ་ཡིས། །འཁོར་ལོ་དང་པོར་
རབ་བཞག་ནས། །དེ་ཡི་མདུན་དུ་བསྒྲུབ་པར་བྱ། །སྔར་བཤད་པའི་རྡོ་རྗེ་འཁོར་ལོའི་ཕྱག་རྒྱས་དཀྱིལ་འཁོར་སྤྲུལ་ལ་མེ་ཏོག་ལ་སོགས་པས་ཡང་དག་པར་མཆོད་དེ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་པྲ་ཎ་མེ་ན་བཛྲ་བནྡྷ་ནཱྃ་ཀ་རོ་མི་ཞེས་བྱ་བས་བཅོམ་ལྡན་འདས་ལ་ཕྱོགས་ཐམས་
ཅད་ནས་དཀྱིལ་འཁོར་ལྔ་པས་ཕྱག་བྱས་ལ་ཕྱག་བཞི་ལ་སོགས་པའི་ཆོ་ག་སྤྱད་ལ་སྡོམ་པ་གཟུང་བར་བྱའོ། །དེའི་རྗེས་ལ་ཨ་ནྱོ་ནྱ་ཨ་ནུ་ག་ཏ་སརྦ་དྷརྨཱ་ཞེས་བྱ་བས་ཐལ་མོ་ཁོང་སྟོང་བཅིང་བར་བྱའོ། །དེ་ནས་པ་ར་སྤ་ར་ཨ་ནུ་པྲ་བིཥྚ་སརྦ་དྷརྨཱ་ཨཉྫ་ལི་ཞེས་བརྗོད་ཅིང་རྡོ་རྗེ་ཐལ་མོ་

བཅིང་བར་བྱའོ། །དེ་ནས་ཨ་ཏྱནྟ་ཨ་ནུ་པྲ་བིཥྚ་སརྦ་དྷརྨཱ་བཛྲ་བནྡྷ་ཞེས་བརྗོད་ཅིང་ཐལ་མོ་བསྡམས་པ་བཅིང་བར་བྱའོ། །དེ་ནས་བཛྲ་བནྡྷ་ཏྲཊ་ཅེས་བརྗོད་ཅིང་རྡོ་རྗེ་བསྡམས་པ་སྙིང་གར་ལན་གསུམ་དྲལ་བར་བྱའོ། །རྡོ་རྗེ་དབབ་པའི་དམ་ཚིག་གི་ཕྱག་རྒྱ་བཅིངས་ལ་བཛྲ་ཨཱ་བེ་ཤ་ཨ་ཞེས་བྱ་བས་
བདག་ཉིད་ལ་དབབ་པར་བྱའོ། །དེ་ནས་ཏིཥྛ་བཛྲ་ཞེས་པ་ལ་སོགས་པས་རྡོ་རྗེ་དབབ་པའི་དམ་ཚིག་གི་ཕྱག་རྒྱས་རང་གི་སྙིང་གར་དགྲོལ་བར་བྱའོ། །དེ་ནས་བཛྲ་མུཥྚི་ཞེས་བརྗོད་ཅིང་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ནས་བཛྲ་སནྡྷི་བཾ་ཞེས་ལན་གསུམ་བཟླ་
བར་བྱའོ། །དེ་ནས་ཡི་གེ་ཧཱུྃ་ཟློས་ཤིང་དང་པོའི་རྡོ་རྗེ་བཅིང་བར་བྱ་སྟེ། དེ་ལྟ་བུས་ནི་ཕྱག་རྒྱ་ཐམས་ཅད་བཅིང་བ་འགྲུབ་ཅིང་རང་གི་ལས་རྣམས་བྱེད་པར་འགྱུར་རོ། །དེ་ནས་དཔལ་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་བར་གྱི་རང་གི་དམ་ཚིག་གི་ཕྱག་རྒྱ་རྣམས་ལ་
ས་མ་ཡ་སྟྭཾ་ཞེས་བརྗོད་ཅིང་། བཅིངས་ལ་དེ་རྣམས་ཀྱི་རང་གི་སྙིང་པོ་ལན་གསུམ་བརྗོད་དེ། ཨོཾ་བཛྲ་མུཿཞེས་བྱ་བས་རང་གི་སྙིང་གར་གཞུག་པར་བྱའོ། །དེ་ནས་ཨོཾ་སརྦ་པཱ་པཱ་ཀཪྵ་ཎ་བི་ཤྭ་དྷ་ན་བཛྲ་ས་མ་ཡ་ཧཱུཾ་ཕཊ་ཅེས་བྱ་བས་ཕྱག་རྒྱ་དང་ལྡན་པས་སྡིག་པ་ཐམས་ཅད་དགུག་
པར་བྱའོ། །དེ་ནས་འདིའི་ཕྱག་རྒྱ་ནི། །རྡོ་རྗེའི་ཕྱག་རྒྱ་གཉིས་ནང་དུ། །མཛུབ་མོ་གཉིས་ནི་བཅིངས་ནས་སུ། །ལེགས་པར་གྱེན་དུ་འཕངས་པ་ནི། །ལྟུང་བ་སློང་བའི་དམ་པའོ། །ཞེས་བྱ་བ་ཡིན་ནོ། །དེའི་རྗེས་ལ་ཨོཾ་བཛྲ་པཱ་ཎི་བི་སྥོ་ཊ་ཡ་སརྦ་ཨ་པ་ཡ་བནྡྷ་ནི་པྲ་མོ་ཀྵ་ཡ་སརྦ་
པཱ་པ་སརྦ་ཨ་པ་ཡ་ག་ཏི་བྷྱཿ། སརྦ་ཏྭན་སརྦ་ཏ་ཐཱ་ག་ཏ་བཛྲ་ས་མ་ཡ་ཏྲཊ་ཅེས་བྱ་བ་འདིའི་ཕྱག་རྒྱ་དང་ལྡན་པས་སྡིག་པ་ཐམས་ཅད་དྲལ་བར་བྱའོ། །རྡོ་རྗེ་བཅིངས་པ་བསྡམས་བྱས་ཏེ། །གུང་མོ་གཉི་ག་སྦྱར་ནས་ནི། །ཐ་མ་བཞི་ནི་རྩེ་མོར་སྦྱར། །སྡིག་པ་འཇོམས་པར་གྲགས་
པ་ཡིན། །དེ་ནས་རང་གི་སྙིང་གར་གནས་པའི་དང་པོའི་རྡོ་རྗེའི་དབུས་སུ། ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་ཡིད་ཀྱིས་བྲིས་ལ་དེ་ཉིད་ཡིད་ལ་ཟློས་ཤིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་དེ་ཉིད་ཡིད་ལ་ཟློས་ཤིང་དེ་ཉིད་དབྱངས་ཀྱི་ཡི་གེ་བཅུ་དྲུག་

དང་བཅས་པ་ལས་རང་གི་སེམས་ཀྱི་གཟུགས་བརྙན་ཟླ་བའི་དཀྱིལ་འཁོར་ལྟ་བུར་བསམ་པར་བྱའོ། །དེའི་སྟེང་དུ་སྙིང་པོ་དེ་ཉིད་ཡི་གེ་ཀ་ལ་སོགས་པ་དང་བཅས་པ་ལས་ཟླ་བའི་དཀྱིལ་འཁོར་གཉིས་པ་བསམ་པར་བྱའོ། །དེ་ནས་སྙིང་པོ་དེ་ཉིད་ཟློས་ཤིང་ཟླ་བའི་དཀྱིལ་
འཁོར་དེ་དང་པོའི་རྡོ་རྗེར་བསམ་པར་བྱའོ། །དེ་ནས་དེའི་དབུས་སུ་སྙིང་པོ་དེ་ཡིད་ཀྱིས་བསམས་ལ་དེ་ཉིད་ཟློས་ཤིང་རྡོ་རྗེའི་ང་རྒྱལ་བསྒོམས་ལ་རྡོ་རྗེ་སེམས་དཔའི་དཀྱིལ་འཁོར་གྱི་ལྷ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པར་རྡོ་རྗེ་ལས་ཕྱུང་ལ་དེ་རྣམས་ཀྱིས་ནམ་མཁའི་
ཁམས་ཐམས་ཅད་བཀང་ལ་སེམས་ཅན་ཐམས་ཅད་ཀྱི་དོན་བྱས་ནས་ཡང་རྡོ་རྗེ་དེར་ཡིད་ཀྱིས་བཅུག་སྟེ། སེམས་དཔར་བྱིན་གྱིས་བརླབ་པའི་སྦྱོར་བས་རྡོ་རྗེ་དེ་རྡོ་རྗེ་སེམས་དཔའི་བདག་ཉིད་དུ་བསམ་ཞིང་བཛྲ་སཏྭ་ཧཾ་ཞེས་ཀྱང་བཟླ་བར་བྱའོ། །དེ་ནས་བསྙེམས་པ་དང་བཅས་པས། རྡོ་རྗེ་
གསོར་ལ་ཡང་བཛྲ་སཏྭ་ཧཾ་ཞེས་བརྗོད་པར་བྱ་ཞིང་དེ་ཡང་ཆོས་ཀྱི་དབྱིངས་ཐོག་མ་དང་ཐ་མ་མེད་པའི་རང་བཞིན་གཟུགས་བརྙན་དང་འདྲ་བར་ངེས་པར་བྱས་ལ་མ་ཧཱ་ས་མ་ཡ་སཏྭ་ཧཾ་ཞེས་བརྗོད་པར་བྱའོ། །དེ་ནས་དང་པོའི་རྡོ་རྗེ་བཅིངས་ལ། མ་ཧཱ་ས་མ་ཡ་ཧཾ་ཞེས་བརྗོད་ལ། དེ་ཉིད་ཀྱིས་སྙིང་
ག་དང་། དཔྲལ་བ་དང་། ལྐོག་མ་དང་། སྤྱི་བོར་བྱིན་གྱིས་བརླབ་ཅིང་ས་མ་ཡ་སཏྭ་ཨ་དྷི་ཏིཥྛ་ས་མཱཾ་ཞེས་ཀྱང་བརྗོད་པར་བྱའོ། །དེ་ནས་བསྙེམས་པ་དང་བཅས་པས་ལུས་དྲང་པོར་གཞག་ལ་བསྙེམས་པ་དང་བཅས་པ་ཉིད་ཀྱིས་རྡོ་རྗེ་གསོར་ཞིང་ཊཀྐི་ཧཱུཾ་ཛཿཞེས་བརྗོད་པར་བྱའོ། །དེ་ནས་
རྡོ་རྗེ་སྙིང་གར་བསྟོད་པའི་ཚུལ་གྱིས་འཇོག་ཅིང་ཊཀྐི་ཛཿཧོ་ཞེས་བརྗོད་པར་བྱའོ། །དེ་ནས་རང་གི་སྙིང་པོ་བཟླ་བར་བྱ་སྟེ། འདིར་ཕྱག་རྒྱ་ཆེན་པོ་བཅིང་བ་འདིས་བདག་ལ་བྱིན་གྱིས་བརླབས་པ་ཡིན་ལ་དེ་བས་ན་འདིས་རྣལ་འབྱོར་པ་རྡོ་རྗེ་སེམས་དཔའི་སྐུ་དང་གསུང་དང་ཐུགས་རྡོ་རྗེའི་ངོ་
བོ་ཉིད་དུ་འགྱུར་རོ། །དེ་ནས་ནམ་མཁའ་དང་མཉམ་པའི་སྦྱོར་བས་རང་གི་ལུས་ལ་ཡིད་ཀྱི་ནང་དུ་ཞུགས་ལ། རང་གི་སྙིང་གར་ཟླ་བའི་དཀྱིལ་འཁོར་ལ་རྡོ་རྗེ་འཁོར་ལོའི་ཕྱག་རྒྱས་དཀྱིལ་འཁོར་སྤྲུལ་ལ། འཇུག་པའི་ཆོ་ག་གཉིས་པས་ཇི་ལྟ་བ་བཞིན་དུ་ཞུགས་ནས་རང་གི་སྤྱི་བོར་མེ་ཏོག་

གི་ཕྲེང་བ་དོར་ལ། དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བའི་བར་གྱིས་ཆོ་ག་ཇི་ལྟ་བ་བཞིན་དུ་སྤྱད་ལ་དཀྱིལ་འཁོར་དེ་རང་གི་ཟླ་བར་ཞུ་ནས་དེ་དང་གཅིག་ཏུ་གྱུར་བར་བསམས་ནས། རང་གི་ལུས་ལ་རང་གི་ལྷའི་གནས་རྣམས་སུ་ཡི་གེ་ཧྲཱིཿལས་སྣ་ཚོགས་པདྨ་བསྐྱེད་ལ་གཞིའི་ལུས་ཀྱི་རང་གི་
ལྷའི་གནས་སུ་གཞག་སྟེ། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏེ་སྟྭཾ་ཨ་ཞེས་བརྗོད་ལ། གཞིའི་ལུས་ཀྱི་ཕྱི་རོལ་དུ་སྣ་ཚོགས་པདྨའི་སྟེང་དུ་དང་པོའི་རྡོ་རྗེ་ཁ་དོག་དམར་པོ་བསྐྱེད་པར་བྱའོ། །དེ་ནས་རྡོ་རྗེའི་དབུས་སུ་སྔགས་ཡིད་ཀྱིས་བྲིས་ལ་བཛྲ་ཧཾ་ཞེས་དེའི་ང་རྒྱལ་བསྒོམ་པར་
བྱའོ། །དེ་ནས་སྔགས་དེ་ཡིད་ཀྱིས་བརྗོད་ལ་བཛྲ་སཏྭ་ཧཾ་ཞེས་བྱ་བས་རྡོ་རྗེ་དེ་རྡོ་རྗེ་སེམས་དཔའི་བདག་ཉིད་དུ་བསྒོམ་པར་བྱའོ། །དེ་བཞིན་དུ་རྡོ་རྗེ་འབེབས་པའི་བར་གྱི་ཕྱག་རྒྱ་ཆེན་པོ་བཅིངས་ལ་གཞིའི་ལུས་ལ་ཡིད་ཀྱིས་ཨཱ་བཛྲ་བནྡྷ་ཞེས་བྱ་བས་རང་གི་གནས་ན་གནས་པར་བྱའོ། །
རང་གི་ལུས་ཀྱི་ཕྱི་རོལ་གྱི་མདུན་དུ་སྣ་ཚོགས་པདྨའི་སྟེང་དུ་རྡོ་རྗེ་དྲིལ་བུ་བསྐྱེད་ལ། དེའི་དབུས་སུ་བཛྲ་གྷཎྚ་ཞེས་བྱ་བ་ཡིད་ཀྱིས་བྲིས་ལ། བཛྲ་གྷཎྚོ་ཧཾ་ཞེས་བྱ་བས་དྲིལ་བུའི་ང་རྒྱལ་བསྒོམ་པར་བྱའོ། །ཡང་བཛྲ་གྷཎྚོ་ཞེས་ཡིད་ལ་བརྗོད་ལ་བཛྲ་ཨཱ་བེེ་ཤ་ཧཾ་ཞེས་བྱ་བས་རྡོ་རྗེ་དྲིལ་བུ་
དེ་རྡོ་རྗེ་འབེབས་པའི་བདག་ཉིད་དུ་བསྒོམ་པར་བྱའོ། །དེ་ནས་རྡོ་རྗེ་ལྕགས་ཀྱུ་ལ་སོགས་པའི་ལས་ཀྱི་ཕྱག་རྒྱས་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བས། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་བར་དུ་རང་གི་གཟུགས་བརྙན་ལ་རང་གི་དམ་ཚིག་གི་ཕྱག་
རྒྱས་གོ་རིམས་འདིས་བསྒྲུབ་པར་བྱའོ། །དང་པོ་རྡོ་རྗེ་བཅིངས་ལ། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་དྲྀ་ཤྱ་ཞེས་བྱ་བ་དང་དཔལ་རྡོ་རྗེ་སེམས་དཔའ་བལྟ་བར་བྱའོ། །དེ་བཞིན་དུ་རྡོ་རྗེ་འབེབས་པའི་བར་གྱིས་རང་གི་དམ་ཚིག་གི་ཕྱག་རྒྱ་བཅིངས་ལ། ཨཱ་བཛྲ་གྷཎྚ་དྲྀ་ཤྱ་ཞེས་
བྱ་བས་རྡོ་རྗེ་འབེབས་པ་བལྟ་བར་བྱའོ། །དེ་ནས་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ་གཡས་པའི་མཛུབ་མོའི་ལྕགས་ཀྱུས་དཔལ་རྡོ་རྗེ་སེམས་དཔའ་ལ་སོགས་པ་རང་གི་ལུས་ལ་རང་གི་གནས་སུ་སྙིང་པོ་འདིས་གཞུག་པར་བྱའོ། ཨོཾ་མ་ཧཱ་སུ་ཁ་བཛྲ་སཏྭ་ཨ་ཧཱི་ཤཱི་གྷྲཾ་

མ་ཧཱ་སུ་ཁ་བཛྲ་གུ་ཧྱ་ས་མ་ཡ་མ་ནུ་སྨཱ་ར་པྲ་བུདྡྷ་ས་མ་ཡ་སྟྭཾ་དྲྀ་ཌྷ་སུ་ཏོ་ཥྱོ་ཨ་ནུ་རཀྟོ་སུ་པོ་ཥྱོ་མེ་བྷ་བ་ཨ་དྷི་ཏིཥྛ་བྷ་ག་བཱན་ཨནྡྷི་ན་ཧི་ན་ས་ཏྭ་སིདྡྷི་དྷ་མ་མེ་མནྟྲ་པ་དེ་ཛཿཧཱུཾ་བཾ་ཧོཿ། ཡང་དང་པོའི་རྡོ་རྗེ་བཅིངས་ལ་ས་མ་ཡ་སྟྭཾ་ཞེས་བརྗོད་དེ་འོད་ཟེར་དམར་པོ་འཁྲུག་པ་འབར་བའི་འོད་
ཀྱི་དཀྱིལ་འཁོར་ཅན་བསྐྱེད་ལ་ས་མ་ཡ་སྟྭཾ་ཛཿཧཱུཾ་བཾ་ཧོཿ། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། མ་ཧཱ་སུ་ར་ཏ་སྟྭཾ་ཞེས་ལན་གསུམ་བཟླས་ལ། བཅོམ་ལྡན་འདས་རྡོ་རྗེ་སེམས་དཔའ་དང་བདག་ཉིད་གཅིག་ཏུ་གྱུར་པར་བསྒོམ་པར་བྱའོ། །དེ་བཞིན་དུ་རྡོ་རྗེ་འབེབས་པའི་བར་གྱིས་
དམ་ཚིག་གི་ཕྱག་རྒྱ་བཅིངས་ལ། ས་མ་ཡ་སྟྭཾ་ཞེས་བརྗོད་ཅིང་འོད་ཟེར་དམར་པོ་འབར་བ་འཁྲུག་པའི་འོད་ཀྱི་དཀྱིལ་འཁོར་བསྐྱེད་ལ་ས་མ་ཡ་སྟྭཾ་ཨ་ཧོ་ཛཿཧཱུཾ་བཾ་ཧོཿ། བཛྲ་གྷཎྚ། ཞེས་ལན་གསུམ་བཟླས་ལ། བཅོམ་ལྡན་འདས་རྡོ་རྗེ་འབེབས་པ་དང་བདག་ཉིད་གཅིག་ཏུ་གྱུར་
པར་བསྒོམ་པར་བྱའོ། །དེ་ལྟར་ན་ཐམས་ཅད་བསྒྲུབ་པར་འགྱུར་རོ། །དེ་བཞིན་དུ་བཅོམ་ལྡན་འདས་རྡོ་རྗེ་སེམས་དཔའ་ལ་སོགས་པ་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་སྔ་མ་བཞིན་དུ་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་སངས་རྒྱས་ཐམས་ཅད་དེའི་ལུས་ལ་
བཅུག་ལ་དམ་ཚིག་གི་ཕྱག་རྒྱ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་ཀྱང་རྒྱས་བཏབ་ལ། ཡང་དང་པོའི་རྡོ་རྗེ་བཅིངས་ནས་བཛྲ་སཏྭ་ཨ་དྷི་ཏིཥྛ་སྭ་མཱཾ་ཞེས་བྱ་བས་རང་གི་སྙིང་གའི་ཟླ་བ་ལ་དང་པོའི་རྡོ་རྗེ་རྩེ་ལྔ་པ་བསྐྱེད་པར་བྱའོ། །བཛྲ་རཏྣ་ཨ་དྷི་ཏིཥྛ་སྭ་མཱཾ་ཞེས་
བྱ་བ་དང་དཔྲལ་བར་རྡོ་རྗེ་རིན་པོ་ཆེ། བཛྲ་དྷརྨྨ་ཨ་དྷི་ཏིཥྛ་སྭ་མཱཾ་ཞེས་བྱ་བ་དང་། ལྐོག་མའི་ཕྱོགས་སུ་རྡོ་རྗེ་པདྨ། བཛྲ་ཀརྨྨ་ཨ་དྷི་ཏིཥྛ་སྭ་མཱཾ་ཞེས་བྱ་བ་དང་། སྤྱི་བོར་སྣ་ཚོགས་རྡོ་རྗེ་བསམ་པར་བྱའོ། །དེ་ལྟར་བྱིན་གྱིས་བརླབས་པ་བྱས་ནས་སྔར་བཤད་པའི་དབང་བསྐུར་བའི་ཕྱག་རྒྱ་
རྣམས་ཀྱིས་སངས་རྒྱས་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེའི་ཕྲེང་བའི་དབང་བསྐུར་བའི་ཅོད་པན་བསྐྱེད་ལ་ཡི་གེ་བརྒྱ་པས་བརྟན་པར་བྱའོ། །དེ་ནས་དང་པོའི་རྡོ་རྗེ་བདག་པོ་དང་། མིང་གི་དབང་བསྐུར་བ་བླངས་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བར་བྱའོ། །དེ་

ནས་རྡོ་རྗེ་མཚོན་ཆ་མ་ལ་སོགས་པ་བཅུ་གཉིས་ཀྱི་ལས་ཀྱི་ཕྱག་རྒྱས་བདག་ཉིད་ཡང་དག་པར་མཆོད་ལ། རོལ་པའི་རྡོ་རྗེ་དགའ་བའི་རྡོ་རྗེས་བཅོམ་ལྡན་འདས་ལ་ཕྱག་བྱས་ལ་དེ་ཁོ་ན་ཉིད་ཀྱིས་རྡོ་རྗེ་གཟུང་ཆོས་ཀྱི་དྲིལ་བུ་དཀྲོལ་ལ། དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་པར་བྱའོ། །
དེ་ནས་དམ་ཚིག་གསུམ་གྱི་རྡོ་རྗེའི་གླུའི་མཆོད་པ་བྱས་ལ་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིང་བར་བྱའོ། །དེ་ལྟར་ཕྱག་རྒྱ་ཆེན་པོ་རབ་ཏུ་བསྒྲུབས་ནས་སྙིང་གར་རྡོ་རྗེ་འཁོར་ལོས་དེ་བཞིན་དུ་དཀྱིལ་འཁོར་སྤྲུལ་ལ་ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། ས་མ་ཡ་སྟཾ་ཞེས་བྱ་བ་དང་། དཔལ་རྡོ་
རྗེ་སེམས་དཔའ་རང་གི་སྙིང་གར་གནས་པའི་རྡོ་རྗེ་སེམས་དཔའི་དཀྱིལ་འཁོར་གྱི་དབུས་སུ་གཞག་པར་བྱའོ། །དེ་བཞིན་དུ་བཛྲ་གྷཎྚ་ཞེས་བྱ་བ་དང་རང་གི་སྙིང་གར་གནས་པའི་རྡོ་རྗེ་སེམས་དཔའི་དཀྱིལ་འཁོར་གྱི་གནས་སུ་རྡོ་རྗེ་འབེབས་པའི་བར་དུ་གཞག་པར་བྱའོ། །དེ་ནས་ཨོཾ་
བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་བ་ཤུདྡྷོ྅ཧཾ། ཨོཾ་སརྦ་ས་མོ་ཧཾ། ཞེས་བྱ་བའི་སྙིང་པོ་གསུམ་ཟློས་ཤིང་རྡོ་རྗེའི་བདག་ཉིད་དུ་བསམས་ལ། བདེ་བ་ཆེན་པོ་རྡོ་རྗེ་རབ་མཆོག་དམ་ཚིག་པ་ཞེས་བྱ་བའི་དཀྱིལ་འཁོར་གྱི་རང་བཞིན་ནི་བདག་རང་ཉིད་ཡིན་ནོ་ཞེས་ང་རྒྱལ་བསྐྱེད་ལ། ཨོཾ་མ་
ཧཱ་སུ་ཁ་ཞེས་བྱ་བ་ལ་སོགས་པའི་སྔགས་ལྷ་ཐམས་ཅད་ཀྱི་ཐུགས་ཀར་གནས་པའི་རྡོ་རྗེའི་དབུས་སུ་བསམས་ལ་ཡིད་ཀྱིས་རྡོ་རྗེའི་ཚིག་ཏུ་རབ་ཏུ་དགའ་བའི་རྡོ་རྗེ་ཚིག་ཟློས་ཤིང་ཐམས་ཅད་བདག་ཡིན་ནོ་ཞེས་ཇི་སྲིད་མངོན་དུ་མཐོང་བར་གྱུར་པ་དེ་སྲིད་ཀྱི་བར་དུ་ཉིན་རེ་ཞིང་བསྒོམ་པར་བྱའོ། །དེ་
ནས་དེའི་དཀྱིལ་འཁོར་ཇི་ལྟ་བ་བཞིན་དུ་བྲིས་ལ་བསྒྲུབས་ན་རྡོ་རྗེ་འཆང་བ་ཉིད་འཐོབ་པར་འགྱུར་རོ། །ཡང་ན་སྔ་མ་བཞིན་དུ་རྣལ་འབྱོར་ཆེན་པོ་བྱས་ལ་རང་གི་སྙིང་པོ་ཟློས་པ་ལ་བརྩོན་པ་དང་། གཡོན་པའི་མིག་ཏུ་ཊ་ལས་ཟླ་བ་སྟེ། གཡས་པར་མ་བཀོད་པ་ལས་ཉི་མ་བསམ། ཧྲི་ཡིས་
མིག་འབྲས་བསྐལ་པའི་མེ་ལྟ་བུར་གནས་པ་འདིས་ནི་རྡོ་རྗེ་བལྟ་བར་བྱ། རྣལ་འབྱོར་པས་ཡིད་ཀྱིས་ནམ་མཁའི་ཕྱོགས་སུ་གནས་ལ་སྣོད་ཀྱི་འཇིག་རྟེན་གྱི་འོག་ཏུ་རླུང་གི་དཀྱིལ་འཁོར་ལ། ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་འབར་བར་བསམས་ལ་རྡོ་རྗེ་དེའི་དབུས་སུ་ཡི་གེ་རཾ་བསམས་ཏེ། རྡོ་

རྗེ་དེ་རྡོ་རྗེ་མེ་ལྟ་བུའི་འོད་དང་ལྡན་པས་ཀུན་ནས་ཉོན་མོངས་པ་ཅན་གྱི་སངས་རྒྱས་ཀྱི་ཞིང་ཐམས་ཅད་ཐལ་བར་བྱས་པར་བསམ་པར་བྱའོ། །དེ་ནས་ཡི་གེ་ཁཾ་ལས་བཅོམ་ལྡན་འདས་རྣམ་པར་སྣང་མཛད་དཀར་པོ་ནམ་མཁའི་གཏོས་ཐམས་ཅད་ཁྱབ་པས་རྡོ་རྗེ་བདུད་རྩི་ཆུའི་རྒྱུན་གྱིས་
སངས་རྒྱས་ཀྱི་ཞིང་ཚིག་པར་གྱུར་པར་བཀྲུས་ཏེ། འོ་མ་ཅན་གྱི་རྒྱ་མཚོ་ཆེན་པོ་དབའ་རླབས་ཀུན་དུ་འཁྲུག་པ་ཀུན་དུ་གང་བར་གནས་པར་བསམ་པར་བྱའོ། །དེ་ནས་ཡི་གེ་རའི་མེས་འོ་མ་ཅན་གྱི་རྒྱ་མཚོ་ཆེན་པོ་བསྐོལ་ལ། རའི་མེ་དང་རྒྱ་མཚོ་ཆེན་པོའི་དབུས་སུ་པདྨ་ཆེན་པོ་བསམ་པར་བྱའོ། །
པདྨའི་རྩ་བར་ཡི་གེ་པྲ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་གསེར་གྱི་རུས་སྦལ་ཚད་མཐའ་ཡས་པ་དང་། པདྨོའི་ཟེ་བ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་ཡི་གེ་པྲ་གསེར་གྱི་མདོག་ཅན་དང་། བཅོམ་ལྡན་འདས་རྣམ་པར་སྣང་མཛད་ཡི་གེ་ཁཾ་གི་གཟུགས་སུ་ནམ་
མཁའི་ཕྱོགས་ནས་བྱོན་ནས་བཞུགས་པར་བསམས་ལ། པདྨ་དང་ཡི་གེ་པྲ་དང་ཡི་གེ་ཁཾ་གཅིག་ཏུ་བྱས་ལ་ཧཱུཾ་སུཾ་ཧཱུཾ་ཞེས་བརྗོད་དེ། དེ་ལས་རིའི་རྒྱལ་པོ་རི་རབ་ཟུར་བཞི་པ་རིན་པོ་ཆེ་སྣ་བཞིའི་རང་བཞིན་ཅན་རིན་པོ་ཆེ་སྣ་ཚོགས་ཀྱིས་བརྒྱན་པ་བསྐྱེད་པར་བྱའོ། །དེ་ནས་ཡང་ནམ་མཁའི་
ཕྱོགས་སུ་འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་ལྷའི་གཞལ་ཡས་ཁང་དང་པོའི་རྡོ་རྗེ་བཅིངས་པ་ལ་ཧཱུཾ་ཞེས་བརྗོད་དེ་ས་ལ་བཞག་ནས། ཨ་ནུ་རཱ་ག་ཡ་མི་ཧཱུཾ་ཞེས་བརྗོད་ལ། སྤྲུལ་ནས་ལྷ་ཐམས་ཅད་ཀྱི་གནས་སུ་ཡི་གེ་ཧྲིཿལས་སྣ་ཚོགས་
པདྨའི་གདན་བསམས་ཏེ། ཨོཾ་བཛྲ་དྲྀ་ཌྷོ་མེ་བྷ་བ་རཀྵ་སརྦཾ་སྭཱ་ཧཱ་ཞེས་བརྗོད་དེ་རྡོ་རྗེ་བསྡམས་པ་བརྐྱང་བ་ས་ལ་བཞག་ནས་བྱིན་གྱིས་བརླབ་པར་བྱའོ། །དེ་ནས་དཀྱིལ་འཁོར་གྱི་སའི་དབུས་སུ་ཇི་ལྟ་བ་བཞིན་དུ་འདུག་ལ་སྔ་མ་བཞིན་དུ་མངོན་པར་བྱང་ཆུབ་པ་རྣམ་པར་བསྒོམས་ནས་
འོག་མིན་གྱི་གནས་ནས་བབས་ཏེ། འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན། ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་ཀྱིས་ཡོངས་སུ་བསྐོར་ནས་མདུན་གྱིས་བལྟས་ཏེ་གནས་སོ། །དེ་ནས་འདོད་ཆགས་ཆེན་པོ་ནི་

བྱང་ཆུབ་སེམས་དཔའ་ཆེན་པོའི་དངོས་གྲུབ་ཀྱི་མཆོག་གོ་ཞེས་བྱ་བ་ལ་སོགས་པ། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྟོན་པས་དཀྱིལ་འཁོར་སྤྲུལ་པའི་ཕྱིར། རྡོ་རྗེ་སེམས་དཔའ་ཡང་དག་པར་སྤྲུལ་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ལ་ལྷག་
པར་མོས་པའི་སྟོབས་ཀྱིས་བདེ་བ་ཆེན་པོ་རྡོ་རྗེ་སེམས་དཔའི་བཞུགས་གནས་ཀྱི་གཞལ་ཡས་ཁང་བསྐྱེད་དེ། དེར་རྣལ་འབྱོར་པ་རྣམ་པར་སྣང་མཛད་ཀྱི་ང་རྒྱལ་གྱིས་གནས་པར་བྱའོ། །དེ་ནས་རྡོ་རྗེ་སེམས་དཔའི་ང་རྒྱལ་གྱིས་བཅོམ་ལྡན་འདས་རྣམ་
པར་སྣང་མཛད་ལ་གསོལ་བ་གདབ་པར་བྱ་སྟེ། ཇི་སྲིད་འཁོར་བའི་གནས་སུ་ནི། །དེ་སྲིད་མཚུངས་མེད་སེམས་ཅན་དོན། །སེམས་ཅན་ཁམས་ནི་མཐའ་ཡས་པ། །གཟི་ཅན་སྲིད་པ་ཚོལ་བྱེད་པ། །སྲིད་པའི་ཉེས་པ་གཞིག་པ་ཡིས། །བདེ་བ་ཆེན་པོ་
འཕེལ་བའི་ཕྱིར། །གསང་བའི་རྟོག་པ་མཆོག་བཤད་པ། །བདག་ལ་རྗེས་སུ་གནང་བ་སྩོལ། །དེ་ནས་རྣམ་པར་སྣང་མཛད་ཀྱི་ང་རྒྱལ་གྱིས་རྡོ་རྗེ་འཆང་བ་ལ་དབང་བསྐུར་བར་བྱའོ། །དང་པོའི་རྣལ་འབྱོར་གྱི་ཏིང་ངེ་འཛིན་ཏོ། །དེ་ནས་རྡོ་རྗེ་སེམས་དཔའི་
ཕྱག་རྒྱ་ཆེན་པོ་བཅིངས་ཏེ། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཞེས་བརྗོད་ཅིང་རང་གི་སྐུ་དང་གསུང་དང་ཐུགས་ལས་རང་གི་ལྷ་དང་དཀྱིལ་འཁོར་གྱི་ལྷ་ཕྱུང་ལ། སྙིང་པོ་བརྗོད་ཅིང་རང་རང་གི་གནས་སུ་དཀྱིལ་འཁོར་གྱི་ཚུལ་གྱིས་ཇི་ལྟ་བར་གཞག་པར་
བྱ་སྟེ། འདི་ནི་དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པའོ། །དེ་ནས་སྒོ་དབྱེ་བ་དང་བསྡུ་བ་བྱས་ལ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཚུལ་གྱིས་བཅོམ་ལྡན་འདས་འཁོར་དང་བཅས་པ་བྱོན་ནས། ཇི་ལྟ་བར་
བཞུགས་པར་བསམས་ལ་དབང་བསྐུར་བ་བླང་སྟེ། ལྕགས་ཀྱུ་ལ་སོགས་པས་དགུག་པ་དང་། གཞུག་པ་དང་བཅིང་བ་དང་དབང་དུ་བྱས་ལ། རྡོ་རྗེ་གནོད་སྦྱིན་གྱིས་བགེགས་བསལ་བ་ལ་སོགས་པ་ཡང་བྱ། རྡོ་རྗེ་ཁུ་ཚུར་གྱིས་སྒོ་རྣམས་

བཅད་ལ། རྡོ་རྗེ་བསྲུང་བས་ཡང་དག་པར་བསྲུངས་ཏེ། བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་ལ། རྡོ་རྗེ་སེམས་དཔའི་སྙིང་པོ་བཟླས་པའི་མཆོད་ཡོན་ཕུལ་ལ་བཅོམ་ལྡན་འདས་རྡོ་རྗེ་སེམས་དཔའ་འཁོར་
དང་བཅས་པའི་དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །དེ་ནས་ཆོས་དང་། ལས་དང་། ཕྱག་རྒྱ་ཆེན་པོ་འཁོར་དང་བཅས་པས་རྒྱས་བཏབ་ལ། དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ཏེ། རིམ་པ་འདིས་རང་རང་གི་
ལས་ལ་ངེས་པར་སྦྱར་བར་བྱའོ། །དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ། དཔལ་རྡོ་རྗེ་སེམས་དཔའ་ལ་འདི་སྐད་ཅེས་བརྗོད་པར་བྱ་སྟེ། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་འདོད་ཆགས་ཆེན་
པོ་འདི་དངོས་གྲུབ་ཀྱི་མཆོག་ལ་རབ་ཏུ་གཞག་པར་མཛོད་ཅིག །རྡོ་རྗེ་ཡིད་ལས་བྱུང་བའི་ཕྱག་རྒྱ་ཆེན་པོ་བཅིངས་ལ། རྡོ་རྗེ་ཡིད་ལས་བྱུང་བ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་སེམས་ཅན་གྱི་ཁམས་ཐམས་ཅད་
འདོད་ཆགས་ཆེན་པོ་རབ་ཏུ་རྟོགས་པ་བཤད་པ་ལ་སྦྱོར་བར་མཛོད་ཅིག །ཀཱི་ལི་ཀི་ལའི་ཕྱག་རྒྱ་ཆེན་པོ་བཅིངས་ལ། ཀཱི་ལི་ཀི་ལ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པའི་སེམས་ཅན་གྱི་ཁམས་ཐམས་ཅད་འདོད་ཆགས་
ཆེན་པོ་མངོན་དུ་བྱེད་པའི་དངོས་གྲུབ་ལ་རབ་ཏུ་གཞག་པར་མཛོད་ཅིག །རྡོ་རྗེ་དྲན་པའི་ཕྱག་རྒྱ་ཆེན་པོ་བཅིངས་ལ། རྡོ་རྗེ་དྲན་པ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པའི་སེམས་ཅན་གྱི་ཁམས་ཐམས་ཅད་ཐུགས་རྗེ་ཆེན་པོའི་
ཆགས་པའི་འཆིང་བས་བཅིངས་ལ་མི་གནས་པའི་མྱ་ངན་ལས་འདས་པའི་དབྱིངས་ལ་རབ་ཏུ་གཞག་པར་མཛོད་ཅིག །རྡོ་རྗེ་བསྙེམས་པའི་ཕྱག་རྒྱ་ཆེན་པོ་བཅིངས་ལ། རྡོ་རྗེ་བསྙེམས་པ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་

ལ་སོགས་པ་སེམས་ཅན་གྱི་ཁམས་ཐམས་ཅད་ལ་དབང་བྱེད་པའི་བདག་པོ་དངོས་གྲུབ་ཀྱི་བསྙེམས་པས་དབང་དུ་མཛོད་ཅིག །རྡོ་རྗེ་སྦྲང་རྩིའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་། སེམས་
ཅན་ཐམས་ཅད་རྡོ་རྗེ་སེམས་དཔའི་བསམ་གཏན་གྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །རྡོ་རྗེ་སྤྲིན་གྱི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་སེམས་ཅན་གྱི་ཁམས་ཐམས་
ཅད་རྡོ་རྗེ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །རྡོ་རྗེ་སྟོན་གྱི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་། སེམས་ཅན་ཐམས་ཅད་རྡོ་རྗེ་སེམས་
དཔའི་སྨོན་ལམ་གྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །རྡོ་རྗེ་དགུན་གྱི་ཕྱག་རྒྱ་ཆེན་པོ་བཅིངས་པ་དེ་ལ། འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་རྡོ་རྗེ་
སེམས་དཔའི་ཐབས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །སྒེག་མོའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་རྡོ་རྗེ་སེམས་
དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །བཞད་མའི་ཕྱག་རྒྱ་ཆེན་པོ་བཅིངས་ལ། འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའི་འཛུམ་
པ་རྨད་དུ་བྱུང་བ་ལ་རབ་ཏུ་འཇོག་པར་མཛོད་ཅིག །གླུ་མའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའི་བཟོད་པའི་ཕ་

རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །གར་མའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའི་བརྩོན་འགྲུས་ཀྱི་ཕ་
རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །རྡོ་རྗེ་ལྕགས་ཀྱུ་མའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་བྱང་ཆུབ་ཀྱི་སེམས་ཆེན་པོའི་ལྕགས་ཀྱུས་ཐར་
པ་ཆེན་པོའི་གྲོང་ཁྱེར་དུ་གཞུག་པར་མཛོད་ཅིག །རྡོ་རྗེ་ཞགས་པའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་པར་བྱའོ། །དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ཕ་རོལ་ཏུ་ཕྱིན་པ་བཅུའི་ཞགས་པས་ཐར་པ་ཆེན་པོའི་
གྲོང་ཁྱེར་དུ་གཞུག་པར་མཛོད་ཅིག །རྡོ་རྗེ་ལྕགས་སྒྲོག་གི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་པར་བྱའོ། །དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་བསམ་གཏན་
གྱིས་བཅིངས་པར་མཛོད་ཅིག །རྡོ་རྗེ་འབེབས་པའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་རང་བཞིན་གྱིས་འོད་གསལ་བའི་ཡེ་ཤེས་དབབ་པས་
དབང་དུ་མཛོད་ཅིག འདིར། འདི་ནི་ལས་ཀྱི་རྒྱལ་པོ་མཆོག །ཅེས་བྱ་བའི་ཏིང་ངེ་འཛིན་གསུམ་པའོ། །དེ་ལྟར་ཏིང་ངེ་འཛིན་གསུམ་པོ་རྣམ་པར་བསྒོམས་ལ་ཡང་སྒོ་དབྱེ་བ་དང་། བསྡུ་བ་དང་། མཚན་བརྒྱ་རྩ་བརྒྱད་ཀྱིས་བསྟོད་པ་ཡང་བྱས་ལ། བཅོམ་ལྡན་
འདས་ཀྱི་ཕྱག་རྒྱ་ཆེན་པོ་བཅིངས་ཏེ། གཡས་པའི་མཛུབ་མོའི་ལྕགས་ཀྱུས་བཅོམ་ལྡན་འདས་འཁོར་དང་བཅས་པའི་དཀྱིལ་འཁོར་ཆེན་པོ་ཇི་ལྟ་བ་བཞིན་དུ་བཅུག་སྟེ། རྡོ་རྗེ་གནོད་སྦྱིན་དང་། རྡོ་རྗེ་ཁུ་ཚུར་དང་། རྡོ་རྗེ་སྲུང་བའི་ལས་རྣམས་སྔ་མ་བཞིན་དུ་

བྱས་ལ། མཆོད་ཡོན་དེ་བཞིན་དུ་ཕུལ་ནས་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་དམ་ཚིག་གི་ཕྱག་རྒྱ་བསྒྲུབ་པར་བྱའོ། །དེ་ནས་ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་དབང་བསྐུར་ལ་མཆོད་པ་རྣམ་པ་ལྔ་དང་། རྡོ་རྗེ་
མཚོན་ཆ་ལ་སོགས་པ་མཆོད་པ་རྣམ་པ་བཅུ་གཉིས་ཀྱིས་ཡང་དག་པར་མཆོད་ནས་རྣམ་པར་སྒེག་པའི་དགའ་བའི་རྡོ་རྗེས་ཕྱག་བྱ་བ་དང་། ཕྱག་བཞི་བྱས་ལ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ཏེ། དཀྱིལ་འཁོར་གྱི་ལྷ་ཐམས་ཅད་ཀྱི་སྐུ་
དང་། གསུང་དང་། ཐུགས་རྡོ་རྗེའི་ངོ་བོར་བདག་ཉིད་བསམ་ཞིང་། ཨོཾ་བཛྲ་ཨཱཏྨ་ཀོ྅ཧཾ། ཞེས་བཟླ་བར་བྱའོ། །དེ་ནས་རང་བཞིན་གྱིས་འོད་གསལ་ཞིང་རང་བཞིན་གྱིས་དག་པར་ལྷག་པར་མོས་པ་བྱས་ལ། ཨོཾ་སྭ་བྷཱ་བ་ཤུདྡྷོ྅ཧཾ། ཞེས་བརྗོད་པར་བྱའོ། །
དེ་ནས་ཆོས་ཀྱི་དབྱིངས་ཐོག་མ་དང་ཐ་མ་མེད་པ་ལས་བྱུང་བ་ལྷ་ཐམས་ཅད་ཀྱི་སྐུ་དང་། གསུང་དང་། ཐུགས་ཀྱི་ངོ་བོའི་གཟུགས་བརྙན་དང་མཉམ་པར་བདག་ཉིད་བསམས་ལ། ཨོཾ་སརྦ་ས་མོ྅ཧཾ་ཞེས་བརྗོད་པར་བྱའོ། །དེ་ནས་རྡོ་རྗེ་ཆེན་པོའི་གསང་བའི་
དམ་ཚིག་གི་དཀྱིལ་འཁོར་ཆེན་པོའི་རང་བཞིན་ནི་བདག་ཉིད་ཡིན་ནོ་ཞེས་ང་རྒྱལ་བསྐྱེད་ལ། ལྷ་ཐམས་ཅད་ཀྱི་ཐུགས་ཀར་གནས་པའི་རྡོ་རྗེ་ལ། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ སུ་ར་ཏ་སྟྭཾ་ཞེས་བྱ་བས་ཡིད་ཀྱིས་མངོན་པར་བྲི་ལ་འདི་ཉིད་ཟློས་ཤིང་། རྡོ་རྗེ་སེམས་
དཔའི་དཀྱིལ་འཁོར་ཆེན་པོའི་རང་བཞིན་དུ་བདག་ཉིད་བསྒོམ་ཞིང་། ལྷ་ཐམས་ཅད་ཀྱི་ཞལ་ནས་སྔགས་ཀྱི་སྒྲ་མངོན་པར་བྱུང་བར་བསམ་ཞིང་ངེས་པ་བསྐྱེད་པར་བྱ་སྟེ། དེ་ལྟ་བུས་ནི་ཐམས་ཅད་འགྲུབ་པར་འགྱུར་རོ། །དེ་ལྟར་ཉིན་རེ་ཞིང་ནང་པར་སྒྲུབ་པ་ལན་ཅིག་བྱས་ལ། དེའི་
འོག་ཏུ་ཇི་ལྟར་འདོད་པར་བྱའོ། །ཀུན་བཟང་དེ་བཞིན་ཐམས་ཅད་བྱེད། །སྤྱོད་པ་ཅི་དགར་འདོད་པ་བྱེད། །ལངས་པ་དང་ནི་འདུག་པ་དང་། །འཆག་གམ་དེ་བཞིན་གནས་པ་དང་། །དགོད་དམ་རབ་ཏུ་སྨྲ་ཡང་རུང་། །གང་ནི་ཇི་ལྟར་སྤྱོད་ཀྱང་རུང་། །དབང་པོ་གང་དང་གང་ལམ་འགྱུར། །དེ་དང་

དེ་ཡི་ངོ་བོར་བྱ། །མཉམ་པར་མ་བཞག་སྦྱོར་བ་ཡིས། །རང་གི་ལྷར་ནི་བསྒྲུབ་པར་བྱ། །དེ་ཉིད་སྦྱོར་བ་འདི་ཡིས་ནི། །འདི་དག་ཐམས་ཅད་བསྒྲུབ་བྱས་ནས། །ཐམས་ཅད་རྡོ་རྗེ་སེམས་དཔའ་དངོས། །རྟག་ཏུ་བལྟས་པས་རབ་འགྲུབ་
འགྱུར། །གང་གི་ཚེ་མཉམ་པར་བཞག་པའི་རྣལ་འབྱོར་གྱིས་དུབ་ན་མཉམ་པར་མ་བཞག་པའི་རྣལ་འབྱོར་བསྒོམ་པར་འདོད་པ་དེའི་ཚེ། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོས་རང་གི་གནས་སུ་བཞག་ལ་རང་གི་གནས་སུ་བཞག་པའི་དང་པོའི་
རྡོ་རྗེས་བདག་ཉིད་བྱིན་གྱིས་བརླབས་ཏེ་དེ་བསྒོམ་པར་བྱའོ། །དེ་ནས་བྱ་བ་ཐམས་ཅད་བྱས་ལ་སླར་ཡང་ཞུགས་ཏེ་དང་པོའི་རྡོ་རྗེ་ཉིད་ཀྱིས། ཛཿཧཱུཾ་བཾ་ཧོཿཞེས་བརྗོད་དོ། །བཅོམ་ལྡན་འདས་རང་གི་ལུས་ལ་བཅུག་ལ་ཕྱག་རྒྱ་ཆེན་པོ་བཅིངས་ཏེ་དབུས་སུ་འདུག་ལ་
མཚན་བརྒྱ་རྩ་བརྒྱད་ཀྱིས་བསྟོད་པ་བྱས་ནས་མཆོད་པ་ལྔ་དང་། ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་དེ། རྣམ་པར་སྒེག་པའི་དགའ་བའི་རྡོ་རྗེ་དང་ཕྱག་རྒྱ་བཞི་ཡང་བྱས་ལ་སྔ་མ་བཞིན་དུ་བསྒོམ་པར་བྱའོ། །གང་གི་ཚེ་དང་པོའི་
གནས་སྐབས་སམ། གནས་སྐབས་གཉིས་པར་བཅོམ་ལྡན་འདས་གཤེགས་སུ་གསོལ་བར་འདོད་ན་ཡང་དེའི་ཚེ་མཚན་བརྒྱ་རྩ་བརྒྱད་ཀྱིས་བསྟོད་པ་དང་། མཆོད་པ་དང་ཕྱག་བྱས་ལ་མངོན་པར་འདོད་པའི་དངོས་གྲུབ་ཀྱི་དོན་དུ་དགེ་བའི་རྩ་བ་ཡོངས་སུ་བསྔོས་ལ། ཕྱག་
རྒྱ་གང་དང་གང་ནས་བྱུང་བ་དེ་དང་དེ་ནས་དགྲོལ་བ་ནི། ཇི་སྐད་བཤད་པའི་རྡོ་རྗེ་བསྡམས་པ་དགྲོལ་བ་དང་བཛྲ་མུཿཞེས་བྱ་བའོ། །དེ་ནས་གནས་ཀྱི་ངེས་པ་ནི་འདི་ཡིན་ཏེ། སྔགས་པའི་སྙིང་གའི་ཟླ་བའི་མདུན་དུ་རྡོ་རྗེ་སེམས་དཔའ་དང་། རྡོ་རྗེ་ཡིད་ལས་
བྱུང་བ་དཔྲལ་བར་རྡོ་རྗེ་ཀི་ལི་ཀི་ལ་ལ། ལྐོག་མར་རྡོ་རྗེ་དྲན་པ། སྤྱི་བོར་རྡོ་རྗེ་བསྙེམས་པ། མགོ་ལ་རྡོ་རྗེ་དཔྱིད། གསང་བར་རྡོ་རྗེ་སྤྲིན། མིག་གཉིས་སུ་རྡོ་རྗེ་སྟོན། ནུ་མ་དང་བྲང་དང་སྙིང་གའི་ཕྱོགས་སུ་རྡོ་རྗེ་དགུན་མ། ནང་གིར་གཏོགས་པའི་རྡོ་རྗེ་

སེམས་དཔའི་གཡོན་ལོགས་སུ་རྡོ་རྗེ་སྒེག་མོ། རྣལ་འབྱོར་པའི་སོའི་ཕྲེང་བ་གཉིས་སུ་རྡོ་རྗེ་བཞད་མ། རྡོ་རྗེ་དྲན་པའི་གཡོན་ལོགས་སུ་གླུ་མ། རྡོ་རྗེ་བསྙེམས་མའི་གཡོན་ལོགས་སུ་གར་མ། རྣལ་འབྱོར་པའི་བརླ་གཡས་པར་རྡོ་རྗེ་ལྕགས་ཀྱུ། བརླ་
གཡོན་པར་ཞགས་པ། བྱིན་པ་གཡས་པར་ལྕགས་སྒྲོག བྱིན་པ་གཡོན་པར་འབེབས་པ་ཡང་དག་པར་གནས་སོ། །ལྷའི་རྣལ་འབྱོར་གྱི་དུས་སུ་དེ་བཞིན་གཤེགས་པ་རྣམས་ནི་ཕུང་པོ་ལྔའི་ངོ་བོ་ཉིད་ཀྱིས་ཐམས་ཅད་དུ་ཁྱབ་པའི་ཕྱིར་དེ་རྣམས་
ཀྱི་གནས་ཀྱི་ངེས་པ་མེད་དོ། །ཕྱག་རྒྱ་དགྲོལ་བའི་དུས་སུ་ནི་རྣམ་པར་སྣང་མཛད་ནི་སྤྱི་གཙུག་གི་གནས་སུ་དགྲོལ་ལོ། །མི་བསྐྱོད་པ་ནི་རྡོ་རྗེ་སེམས་དཔའི་གནས་སུའོ། །རིན་ཆེན་འབྱུང་ལྡན་ནི་ཀི་ལི་ཀི་ལའི་གནས་སུའོ། །འོད་དཔག་ཏུ་མེད་
པ་ནི་རྡོ་རྗེ་དྲན་པའི་གནས་སུའོ། །དོན་ཡོད་པར་གྲུབ་པ་ནི་རྡོ་རྗེ་བསྙེམས་མའི་གནས་སུ་དགྲོལ་བར་བྱའོ། །དེ་ལྟར་ཕྱག་རྒྱ་བཀྲོལ་ནས། རང་གི་སྙིང་གར་གནས་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་རང་གི་དབང་བསྐུར་བའི་གནས་སུ་
བཞག་པས་དབང་བསྐུར་ལ། མཛུབ་མོ་གཉིས་ཀྱིས་ཕྲེང་བ་དཀྲིས་པ་བཅིངས་ལ། དེ་བཞིན་དུ་གོ་བགོ་བ་བཅིངས་ཤིང་། ཨོཾ་བཛྲ་རཏྣ་ཨ་བྷི་ཥིཉྩ་སརྦ་མུ་དྲ་མཻ་ཏྲི་དྷྲི་ཀུ་རུ་བར་ཀ་བ་ཙེ་ན་བཾ་ཞེས་བཟླ་བར་བྱའོ། །དེ་ནས་དེ་བཞིན་དུ་མཐར་མཉམ་
པའི་ཐལ་མོས་མཉེས་པར་བྱའོ། །དེ་ནས་རབ་ཏུ་དགའ་བ་ལ་རག་ལས་པ་ཞེས་བྱ་བ་ལ་སོགས་པས་བསྐུལ་ལ། སྙིམ་པའི་མེ་ཏོག་གིས་ལྷ་རྣམས་ཇི་ལྟ་བ་བཞིན་དུ་གཤེགས་སུ་གསོལ་བར་བྱས་ནས། སྤྲུལ་པ་རྣམས་རང་གི་ལུས་ལ་བསྡུས་
ཏེ། རྡོ་རྗེ་བསྲུང་བ་དང་། རྡོ་རྗེ་གནོད་སྦྱིན་དང་། རྡོ་རྗེ་ཁུ་ཚུར་དང་། རྡོ་རྗེ་སེམས་དཔའི་གཙུག་ཏོར་གྱི་ཕྱག་རྒྱ་བྱམས་པའི་གོ་ཆས་བདག་བསྲུང་བར་བྱས་ལ། ལངས་ནས་ཇི་ལྟར་མངོན་པར་འདོད་པའི་དགེ་བའི་བྱ་བས་གནས་པར་བྱའོ། །དེ་ལྟར་ཇི་སྲིད་དཀྱིལ་འཁོར་མངོན་སུམ་དུ་མཐོང་

བར་གྱུར་པ་དེ་སྲིད་ཀྱི་བར་དུ་ཉིན་རེ་ཞིང་བྱའོ། །དེ་ལྟར་བྱས་ན་སྔོན་དུ་བསྙེན་པ་བྱས་པར་འགྱུར་རོ། །གང་ཞིག་དཀྱིལ་འཁོར་བསྒོམ་པར་མི་ནུས་པ་དེས་ནི་རྣལ་འབྱོར་ཆེན་པོ་བྱས་ལ་ལྷ་ཐམས་ཅད་ཀྱི་སྔགས་རེ་རེ་ཞིང་བཟླས་བརྗོད་འབུམ་འབུམ་བྱའོ། །སྔོན་དུ་བསྙེན་པའི་ཆོ་གའོ། །དེ་ལྟར་
རིག་པའི་བརྟུལ་ཞུགས་རྗེས་སུ་སྤྱད་ལ། དངོས་གྲུབ་དོན་དུ་གཉེར་བས་ཇི་སྐད་དུ་བཤད་པའི་ས་སྦྱང་བ་དང་། ས་ཡོངས་སུ་གཟུང་བ་བྱས་ལ་དཀྱིལ་འཁོར་བྲི་བར་བྱའོ། །དེ་ལ་རེ་ཞིག་དང་པོར་ནི་བགེགས་གཞོམ་པར་བྱའོ། །དེ་ནས་རྡོ་རྗེ་འཁོར་ལོས་དཀྱིལ་འཁོར་སྤྲུལ་ལ་ཕྱག་འཚལ་བ་ལ་སོགས་པ་སྔོན་
དུ་འགྲོ་བས་སྡོམ་པ་བཟུང་ལ། རྣལ་འབྱོར་ཆེན་པོ་དང་གཞལ་ཡས་ཁང་དང་གདན་རྣམས་བསྐྱེད་ལ་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་སྟེ། བདག་ཉིད་སྤྲོ་བ་བསྐྱེད་པར་བྱའོ། །དེང་དུ་བདག་ཚེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །ལྷ་
དང་དམ་ཚིག་གིས་མཉམ་པར། །གྱུར་པར་བདག་ནི་སོམ་ཉི་མེད། །བྱང་ཆུབ་སེམས་དང་སེམས་གཅིག་ལ། །མི་ལྡོག་པར་ནི་བདག་གྱུར་ཏེ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་གི་མཆོད་སྦྱིན་བླ་
ན་མེད། །སངས་རྒྱས་ཐམས་ཅད་སྤྱན་འདྲེན་པས། །དེང་བདག་འདུས་པའི་མཆོག་ཡིན་ནོ། །དེ་ནས་ལུས་ཐམས་ཅད་ཀྱིས་ཕྱག་བྱས་ཏེ་ལག་ན་སྤོས་སྣོད་ཐོགས་ཏེ། སངས་རྒྱས་ཐམས་ཅད་སྤྱན་དྲང་བར་བྱ་སྟེ། མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་
གསོལ། །བདག་མིང་འདི་ཞེས་བགྱི་བ་ཡིས། །རྡོ་རྗེ་ཅན་གྱི་དཀྱིལ་འཁོར་བྲི། །སངས་རྒྱས་ཐམས་ཅད་འདིར་གཤེགས་ཏེ། །དངོས་གྲུབ་འདི་ནི་སྩལ་དུ་གསོལ། །ཞེས་བརྗོད་ལ་ལུས་ཐམས་ཅད་ཀྱིས་ཕྱག་བྱས་ལ་དང་པོའི་རྣལ་འབྱོར་དང་། དཀྱིལ་འཁོར་གྱི་རྒྱལ་པོ་མཆོག་དང་།
ལས་ཀྱི་རྒྱལ་པོ་མཆོག་བསྒོམ་པར་བྱའོ། །དེ་ནས་ཕྱག་རྒྱ་ཆེན་པོ་བཅིངས་ལ་ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཞེས་ཟློས་ཤིང་ཕྱག་རྒྱ་ཆེན་པོ་བསྒོམ་པར་བྱའོ། །དེ་ནས་དཀྱིལ་འཁོར་བྲི་བར་བྱ་བའི་ཕྱིར་བདག་ཉིད་ལ་དེ་བཞིན་གཤེགས་པ་ཐམས་ཅད་ཀྱིས་གསོལ་བ་

བཏབ་པར་བསམ་པར་བྱའོ། །སེམས་ཅན་ཀུན་ལ་ཕན་པའི་ཕྱིར། །རྒྱལ་བ་ཆེན་པོར་ཡང་དག་འཁྲུངས། །གང་ཕྱིར་ཆགས་བྲལ་བདག་ཉིད་ཀྱིས། །ཆགས་དང་བཅས་པ་གཟུང་བའི་ཕྱིར། །རྣམ་པར་གྲོལ་བས་གསོལ་བ་འདེབས། །རང་ཉིད་འདུལ་བའི་མཆོག་བཤད་ལ། །
བདེ་བ་ཆེན་པོ་རྡོ་རྗེ་ཆེ། །གསང་རྟོག་དངོས་གྲུབ་རབ་སྩོལ་གསུངས། །དེ་ནས་ལངས་ལ་དེ་བཞིན་གཤེགས་པ་ཐམས་ཅད་ཀྱི་ཞབས་ལ་ཕྱག་བྱས་ལ། དེ་བཞིན་གཤེགས་པ་ཐམས་ཅད་ཀྱིས་ནམ་མཁའ་ཀུན་དུ་གང་བར་བསམས་ལ་འདི་སྐད་བརྗོད་པར་བྱའོ། །བདག་ནི་རང་ཉིད་
རྡོ་རྗེ་ཅན། །རྡོ་རྗེ་སེམས་དཔའ་རང་བདག་ཉིད། །བདག་ནི་སངས་རྒྱས་རྒྱལ་པོ་ཆེ། །སྟོབས་ཆེན་རྡོ་རྗེ་ཅན་བདག་ཡིན། །རྣལ་འབྱོར་དབང་ཕྱུག་རྒྱལ་པོ་བདག །ཕྱག་ན་རྡོ་རྗེ་བསྟན་བདག་སྟེ། །བདག་པོ་རྡོ་རྗེ་ཆེན་པོ་བདག །བྱིན་གྱིས་བརླབས་པ་མི་འདོར་རོ། །ཨོཾ་མ་ཧཱ་སུ་ཁ་
བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏེ་སྟྭཾ་ཞེས་བརྗོད་པར་བྱའོ། །དེ་ལྟར་དམ་ཚིག་གསུམ་ཐོབ་པའི། །སློབ་དཔོན་རང་གི་ཕྱག་རྒྱ་ཡིས། །རྡོ་རྗེ་དྲིལ་བུ་འཆང་བྱ་ཞིང་། །འཁོར་ལོའི་ཆོ་ག་ཐམས་ཅད་བྱ། །རྟོག་པ་ཀུན་ལ་མཉམ་འཇུག་པས། །དཀྱིལ་འཁོར་ཐམས་ཅད་བསྒྲུབ་པར་
བྱ། །དམ་ཚིག་ཆེ་གསུམ་ཞེས་བྱ་བ། །རྒྱ་འདི་གསང་སྔགས་སྒྲུབ་བྱེད་པའོ། །དངོས་གྲུབ་ཆོ་ག་ཐམས་ཅད་ལ། །རྡོ་རྗེ་དྲིལ་བུ་རབ་བསྐུལ་བས། །ཆོ་ག་ལྷག་གམ་མ་ཚང་བ། །འགྲུབ་འགྱུར་སྨད་པར་མི་བྱའོ། །ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །དེ་
ནས་དང་པོའི་རྡོ་རྗེས་ཨོཾ་མ་ཧཱ་སུ་ཁ་བཛྲ་ས་ཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་བཛྲོད་ཏིཥྛ་མ་ཧཱ་མཎྜལ་ལཾ་ཨུ་ངསྠཱ་ནཱ་ཡ་ཞེས་བརྗོད་ལ་དཀྱིལ་འཁོར་དེ་སྟེང་དུ་ནམ་མཁར་བཞག་ལ། བདག་ལ་དེ་ཉིད་ཀྱིས་བྱིན་གྱིས་བརླབས་ལ་ཡང་ཕྱག་རྒྱ་ཆེན་པོ་བཅིངས་ལ་བཛྲ་དྲྀཥྚི་མ་ཊ་ཞེས་བྱ་བ་མིག་
གཉིས་སུ་བཀོད་ལ། དེ་བཞིན་འདུག་ལ་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །སྙིང་པོ་ཀུན་དུ་རྗོད་བྱེད་ཅིང་། །བསྒྱིངས་པའི་ཚུལ་གྱིས་ཡོངས་སུ་བསྐོར། །ཡི་གེ་ཨཿལས་རྐང་པ་གཉིས་ཀྱི་མཐིལ་དུ་སྣ་ཚོགས་རྡོ་རྗེ་བསམས་ལ་རྐང་པའི་མཐིལ་ནས་ཡོངས་སུ་

བཟུང་སྟེ། ནམ་མཁའི་ཁམས་རབ་འབྱམ་མ་ལུས་པའི་ཚད་ཙམ་གྱི་སའི་ཆ་རྡོ་རྗེར་གྱུར་པ་ལྷག་པར་མོས་པར་བྱས་ལ། རྡོ་རྗེ་བལྟ་བས་གཡོན་ནས་བསྐྲད་པར་བྱས་ལ་གཡས་ནས་འོག་བཅིང་བ་དང་ནམ་མཁའ་དང་ཕྱོགས་དང་མཚམས་དང་དཀྱིལ་འཁོར་བཅིང་བ་
དང་རྡོ་རྗེ་དྲ་བ་བྱའོ། །དེ་ནས་སྒོ་དབྱེ་བའི་ཕྱག་རྒྱས་སྒོ་ཕྱེ་ལ་རྡོ་རྗེ་རྒྱུའི་ངོ་བོ་ཞལ་བཞི་དང་ཕྱག་བཞི་པའི་གསང་བའི་དཀྱིལ་འཁོར་སྔགས་དང་ཕྱག་རྒྱ་འདི་དང་ལྡན་པས་དགུག་པར་བྱའོ། །ཨོཾ་བཛྲ་མཎྜལ་ཧཱུཾ་ཛཿ། རྡོ་རྗེ་ཁུ་ཚུར་གཉིས་ཀྱིས་མཛུབ་མོ་དང་མཐེ་བོ་རྡོ་རྗེར་བྱ་བ་ནི། རྡོ་རྗེ་འཁོར་ལོ་ཞེས་
བྱ་བའི་ཕྱག་རྒྱ་སྟེ་དཀྱིལ་འཁོར་ཐམས་ཅད་འགུགས་པར་བྱེད་པའོ། །ཨོཾ་མ་ཧཱ་བཛྲ་ཙཀྲ་ཨ་དྷི་ཏིཥྛ་སིདྡྷི་ཧཱུཾ་ཞེས་བྱ་བ་འདི་ཕྱག་རྒྱ་དང་ལྡན་པས་དཀྱིལ་འཁོར་བྱིན་གྱིས་བརླབ་པར་བྱའོ། །རྡོ་རྗེ་ཁུ་ཚུར་གཉིས་ཀྱིས་མགལ་མེ་འཁོར་བའི་ཚུལ་དུ་འཁོར་ལོ་བསྐོར་བ་ནི་འདིའི་ཕྱག་
རྒྱའོ། །དེ་ནས་སེང་ལྡེང་ལས་བྱས་པའི་རྡོ་རྗེ་ཕུར་བུ་ཡི་གེ་ཧཱུཾ་ལས་སྟོད་ཁྲོ་བོའི་གཟུགས་ལ་སྨད་རྡོ་རྗེ་རྩེ་གཅིག་པ་ལྟ་བུ་མཐའ་ཡས་དང་། རྣམ་པར་རྒྱལ་བ་དང་། སྤྲིན་སྒྲ་དང་། གསུས་པོ་ཆེ་དང་། རྒྱལ་བ་ཞེས་བྱ་བ་དང་རིམ་པ་བཞིན་དུ་བསྐྱེད་ལ་ཙནྡན་དམར་པོས་བྱུགས་ཤིང་མེ་
ཏོག་གི་ཕྲེང་བ་དམར་པོས་བརྒྱན་ལ་སྲད་བུ་དམར་པོས་བཅིང་བ་བྱས་ལ་ཨ་ཀོ་ཊ་ཡ་མ་ཧཱ་ཏྲི་ཏི་མ་ཊ་ཞེས་བྱ་བའི་སྔགས་ལན་བརྒྱ་རྩ་བརྒྱད་བཟླས་ཏེ། གཡོན་པའི་རྡོ་རྗེ་ཁུ་ཚུར་གྱིས་བཟུང་ལ་ཕྱིའི་དཀྱིལ་འཁོར་གྱི་མཚམས་བཞིར་དབང་ལྡན་གྱི་ཕྱོགས་ནས་བརྩམས་ཏེ། གཡས་ནས་བསྐོར་
ཞིང་རྡོ་རྗེའི་ཐོ་བས་བརྡུང་བར་བྱའོ། །དེ་ནས་རྡོ་རྗེ་གནོད་སྦྱིན་གྱིས་བགེགས་བསལ་ལ་བསྲུང་བ་བྱས་ཏེ། རྡོ་རྗེ་ཁུ་ཚུར་གྱིས་སྒོ་རྣམས་བཅད་ལ། རྡོ་རྗེ་སྲུང་བས་བསྲུང་བ་ཐམས་ཅད་ཡང་དག་པར་བསྲུངས་ལ། རྡོ་རྗེ་གནོད་སྦྱིན་གྱི་སྔགས་བཟླས་པའི་བུམ་པས་བསང་གཏོར་གྱི་དོན་དུ་དཀྱིལ་འཁོར་
གྱི་ཁང་པའི་སྒོར་བཞག་ལ་རྡོ་རྗེ་བསྲུང་བ་ཡང་ཡོངས་སུ་བཟླས་པའི་སྤོས་ཆབ་རྡོ་རྗེ་གནོད་སྦྱིན་གྱི་སྔགས་ཟློས་བཞིན་དུ་དབང་ལྡན་གྱི་ཕྱོགས་ནས་བརྩམས་ཏེ། གཡས་ནས་བསྐོར་བའི་རིམ་གྱིས་དཀྱིལ་འཁོར་གྱི་ས་གཞི་བྱུག་པའམ། བྱུག་ཏུ་གཞུག་པར་བྱའོ།