Luận tạng Tây Tạng (Tengyur) — Tập 60

བ་ལ་སོགས་པ་ལ། བདེ་བ་ཆེན་པོ་ནི་འདིར་མཉམ་པ་ཉིད་ཀྱི་ཡེ་ཤེས་ཏེ་དེ་ཉིད་རྡོ་རྗེའོ། །དེའི་གསང་བ་ནི་དེ་དང་རྒྱུ་མཐུན་པའི་དུམ་བུ་གཉིས་པ་ལ་རྩ་བའི་རྒྱུད་དང་། རྒྱུད་ཕྱི་མའི་

རང་བཞིན་ཅན་གྱི་རྟོག་པའི་རྒྱལ་པོའོ། །དང་པོ་ཞེས་བྱ་བ་ནི་བསྐལ་པ་བཟང་པོ་ལས་སྔ་ནས་གནས་པའོ། །མཆོག་ཏུ་གྲུབ་པ་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ལ་ལྟོས་ན་མཆོག་གི་བསྒྲུབ་བྱ་དང་། སྒྲུབ་པའི་ཆོ་ག་རྒྱས་པའི་རང་བཞིན་ཉིད་ཀྱི་ཕྱིར་
མཆོག་ཏུ་གྲུབ་པ་ཡིན་ནོ། །ཡོངས་སུ་རྫོགས་པ་ནི་མཐར་ཐུག་པ་སྟེ། ཉོན་མོངས་པ་ཅན་གྱི་ཡིད་རྣམ་པར་དག་པའི་མཚན་ཉིད་ཀྱི་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་བསྟན་པའི་ངོ་བོ་དང་། རྣམ་པར་སྨིན་པའི་སྐུ་དང་། མཚན་མ་མེད་པ་རྣམ་པར་ཐར་པའི་སྒོ་དང་། སྦྱིན་
པའི་ཕ་རོལ་ཏུ་ཕྱིན་པ་དང་། དམ་ཚིག་གི་ཕྱག་རྒྱ་བསྟན་པའི་ངོ་བོ་ཉིད་ཡིན་པའི་ཕྱིར་རོ། །དཔལ་མཆོག་དང་པོའི་རྒྱ་ཆེར་བཤད་པ། ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པ་རྩ་བའི་རྒྱུད་དང་། རྒྱུད་ཕྱི་མའི་བཤད་པ་རྫོགས་སོ།། །།རྒྱ་གར་
གྱི་མཁན་པོ་པཎྜི་ཏ་མཁས་པ་ཆེན་པོ་མནྟྲ་ཀ་ལ་ཤ་དང་། སྒྲ་བསྒྱུར་གྱི་ལོ་ཙཱ་བ་ཆེན་པོ་བོད་ཀྱི་དཔལ་ལྷ་བཙན་པོ་ལྷ་བླ་མ་དགེ་སློང་ཞི་བའི་འོད་ཀྱི་ཞལ་སྔ་ནས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།དེ་ལྟར་དུམ་བུ་གཉིས་པ་རྩ་བའི་རྒྱུད་དང་། རྒྱུད་ཕྱི་མ་གསུངས་
ནས། ད་ནི་དུམ་བུ་གཉིས་པ་ཉིད་ཀྱི་རྟོག་པ་ཐམས་ཅད་ཀྱི་ཕྱི་མའི་རྒྱུད་ཀྱི་རང་བཞིན་སྒྲུབ་པ་པོའི་རང་བཞིན་མྱུར་དུ་གྲུབ་པ་བཤད་པ་ནི་དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་དང་པོ་གནས་ཉམས་དགར། །བདེ་བ་ཆེན་པོ་རྣམ་པར་བཞུགས། །
ཞེས་བྱ་བར་སྦྱར་ཏེ། དེ་ནས་ཞེས་བྱ་བ་ནི་དེ་མ་ཐག་པ་སྟོན་པའི་ཚིག་ཡིན་ཏེ་དུམ་བུ་དང་པོ་དང་གཉིས་པ་ལས་གསུངས་པའི་དོན་གྱི་བསྒྲུབ་པའི་ཁྱད་པར་གྱིས་དངོས་གྲུབ་མྱུར་དུ་སྒྲུབ་པར་བཅོམ་ལྡན་འདས་རྡོ་རྗེ་སེམས་དཔས་གསུངས་ལ། སྔར་གསུངས་པའི་སྒྲུབ་པ་དེས།
གལ་ཏེ་བདག་ཅག་མ་གྲུབ་པར་གྱུར་ན། ཡང་དོན་དེ་ཉིད་སྒྲུབ་པར་བྱའི། སྲོག་ལ་ཐུག་ཀྱང་དོར་བར་མི་བྱའོ་ཞེས་མངོན་པར་འདོད་པ་སྐྱེས་པའི་གདུལ་བྱ་རྣམས་ཀྱི་བསམ་པ་མཁྱེན་པའི་རྗེས་ཐོགས་ཉིད་ལ། དང་པོར་ཞེས་བྱ་བ་ནི་བསྐལ་པ་བཟང་པོ་ལ་སོགས་པའི་ཐོག་མར་

གནས་པའི་ཕྱིར་དང་པོར་རོ། །གནས་ཞེས་བྱ་བ་ནི་གཞལ་ཡས་ཁང་ཐམས་ཅད་ཀྱི་གཞིར་གྱུར་པས་ན་གནས་ཏེ། དང་པོ་ཡང་ཡིན་ལ་གནས་ཀྱང་ཡིན་པས་ན་དང་པོའི་གནས་སོ། །ཁྱད་པར་ཇི་ལྟ་བུ་ཞིག་ཅེ་ན། ཉམས་དགའ་བ་ཞེས་བྱ་བ་གསུངས་ཏེ། ཤིན་ཏུ་སྦྱོར་བ་
དང་ལྡན་པའི་དཔལ་རྡོ་རྗེ་སེམས་དཔའ་ཞེས་བྱ་བ་ལ་སོགས་པས་ཡིད་དང་རྗེས་སུ་མཐུན་པ་ཡིན་པས་ན་ཡིད་དུ་འོང་བ་ཡིན་པའི་ཕྱིར་ཉམས་དགའ་བའོ། །ནམ་མཁའ་ཡང་ཡིན་ལ་ཀུན་ཀྱང་ཡིན་པས་ན་ནམ་མཁའ་ཀུན་ཏེ། ཕྱོགས་བཅུ་ན་རྫས་དང་བྲལ་བའི་རང་བཞིན་རྣམས་སོ། །
དེ་ན་ཟླ་བ་ལྟ་བུར་རབ་ཏུ་སྣང་བས་ན་གདུལ་བྱ་ཐམས་ཅད་ཀྱི་རྒྱུད་ལ་སོ་སོར་སྣང་བར་གྱུར་པ་དེ་ནི། ནམ་མཁའ་ཀུན་ལ་རབ་ཏུ་གནས། །ཞེས་བྱ་བའོ། །རྡོ་རྗེ་རིན་ཆེན་ཞེས་བྱ་བ་ནི་རྡོ་རྗེ་རྩེ་ལྔ་པས་རྩེ་མོ་མཚན་པའི་ཡིད་བཞིན་གྱི་ནོར་བུ་རིན་པོ་ཆེའོ། །དེ་རྣམས་ཀྱི་འོད་ནི་འོད་ཟེར་རྣམས་ཏེ་
དེ་རྣམས་ཀྱིས་འདི་གསལ་ཞིང་སྣང་བར་བྱས་པས་ན་རྡོ་རྗེ་རིན་ཆེན་འོད་འབར་གསལ་ཞེས་བྱའོ། །བརྒྱན་ཅིང་ཞེས་བྱ་བ་ནི་དར་དང་། གདུགས་དང་། དྲི་དང་། བདུག་སྤོས་དང་། མར་མེ་དང་། སྒོ་ཁྱུད་དང་། རྟ་བབས་རྣམ་པ་སྣ་ཚོགས་དང་། སྐས་དང་། མདའ་ཡབ་
ཀྱི་ཕྲེང་བ་ལ་སོགས་པས་བརྒྱན་ཅིང་སྤུངས་པའོ། །དྲི་མེད་མདངས་ལྡན་ཞེས་བྱ་བ་ནི་རང་གི་འོད་དྲི་མ་མེད་པ་ནམ་མཁའ་དང་མཉམ་པས་སྣང་བར་བྱས་ན་དྲི་མེད་མདངས་ལྡན་པའོ། །དེ་ནི་རྡོ་རྗེ་རིན་པོ་ཆེའི་འོད་ཀྱིས་གསལ་བར་བྱས་པ་ཡང་ཡིན་ལ་བརྒྱན་པ་ཡང་ཡིན་ཞིང་དྲི་མ་
མེད་པའི་མདངས་དང་ལྡན་པ་ཡིན་པས་ན། རྡོ་རྗེ་རིན་ཆེན་འོད་ཀྱིས་གསལ། །བརྒྱན་ཅིང་དྲི་མེད་མདངས་ལྡན་པའོ། །ཞེས་བྱ་བ་སྟེ། བརྒྱན་ཅིང་མདངས་དང་ལྡན་པའི་གནས་དེར་རོ། །ཟུར་བཞི་པ་ཞེས་བྱ་བ་ལ་སོགས་པ་ནི་གོ་བར་ཟད་དོ། །རྡོ་རྗེ་ལྷ་མོའི་ཚོགས་
ཀྱིས་མཆོད། །ཅེས་བྱ་བ་ནི་སངས་རྒྱས་ཐམས་ཅད་ཀྱི་གཟུངས་ཀྱི་ལྷ་མོའི་ཚོགས་ནི་རྡོ་རྗེ་ལྷ་མོའི་ཚོགས་ཏེ་དེ་རྣམས་ཁ་ཁྱེར་ལ་གནས་པ་རྣམས་ནི་མེ་ཏོག་ལ་སོགས་པའི་མཆོད་པས་མཆོད་ཅིང་བསྙེན་བཀུར་བྱེད་པའོ། །གྲྭ་ཡི་ཆ་ནི་ཐམས་ཅད་དང་། །སྒོ་ཁྱུད་ཀྱི་ནི་

མཚམས་རྣམས་སུ། །ཟླ་བ་ཕྱེད་ལ་གནས་པ་ཡིས། །རྡོ་རྗེ་རིན་ཆེན་ཡང་དག་འབར། །ཞེས་བྱ་བ་ནི་གནས་འདི་དག་ཏུ་ཟླ་བ་ཁམ་པ་ལ་གནས་པའི་རྡོ་རྗེ་རིན་པོ་ཆེ་འོད་འབར་བ་ཡོད་པའོ། །རླུང་གིས་བཏེག་པ་ནི་ཞེས་བྱ་བ་ནི་བཏེག་པའོ། །སྣ་ཚོགས་
པ་ནི་ཁ་དོག་ཐ་དད་པ་སྟེ། ཁ་དོག་སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོ་ཞེས་བྱ་བའི་ཐ་ཚིག་གོ། །གནས་གང་དུ་ཞེ་ན། རྩེར་ཞེས་བྱ་བ་སྨོས་ཏེ་རྩེ་ནི་མཐར་ཏེ་ཐམས་ཅད་ཀྱི་འོག་གི་ཆར་རོ། །གང་གི་མཐར་ཞེས་ན་བ་དན་ཞེས་བྱ་བ་སྨོས་ཏེ།
དེ་ལྟ་བུའི་བ་དན་དེའི་རྩེ་མོར་རོ། །དྲིལ་བུ་བཏགས་པ་སྒྲ་སྒྲོགས་པ་ཡིན་པས་ན། རླུང་གིས་བསྐྱོད་པ་སྣ་ཚོགས་པ། །བ་དན་རྩེར་བཏགས་དྲིལ་སྒྲ་སྒྲོགས། །ཞེས་བྱ་བའོ། །དྲ་བ་ནི་མུ་ཏིག་གི་ཆུན་འཕྱང་མཆོག་དབུས་སུ་བཏགས་པའོ། །མེ་ལོང་ནི་མེ་ལོང་གི་དཀྱིལ་འཁོར་
ཉིད་དོ། །མེ་ཏོག་རྟག་ཅེས་བྱ་བ་ནི་མེ་ཏོག་གི་ཤིང་རྟག་ཏུ་མེ་ཏོག་ཐམས་ཅད་ཀྱི་ཆར་འབེབས་པའི་ཚུལ་གྱིས་རྟག་པར་གནས་པའོ། །མེ་ཏོག་གི་ཕྲེང་བ་ནི་མེ་ཏོག་གི་ཆུན་འཕྱང་ངོ་། །རྒྱན་གྱིས་ཞེས་བྱ་བ་ནི་ཇི་སྐད་དུ་བཤད་པ་ལས་གཞན་པ་དག་ཡིན་པར་ཤེས་པར་བྱ་སྟེ། དྲ་
བ་ལ་སོགས་པ་དེ་རྣམས་ཀྱིས་བསྐོར་བ་ནི་ཀུན་ནས་བསྐོར་ཏེ་མཛེས་པར་བྱས་པའོ། །བདེ་བ་ཆེན་པོ་ནི་ཐར་པ་ཆེན་པོ་སྟེ། དེའི་རྒྱུ་མཐུན་པ་ལས་བྱུང་བ་བཅོམ་ལྡན་འདས་རྡོ་རྗེ་སེམས་དཔའི་དང་པོའི་རྡོ་རྗེ་ནི་བདེ་བ་ཆེན་པོའི་རྡོ་རྗེའོ། །རྡོ་རྗེ་དང་། རྡོ་རྗེ་རིན་པོ་ཆེ་དང་། པདྨ་དང་། སྣ་
ཚོགས་རྡོ་རྗེ་ནི་རྡོ་རྗེ་ཀུན་ནོ། །བདེ་བ་ཆེན་པོའི་རྡོ་རྗེ་ཆེན་པོ་དང་། རྡོ་རྗེ་ཀུན་གྱིས་མངོན་པར་འདུ་བྱས་པ་ནི་དེ་ལས་བྱས་ཤིང་བསྐྱེད་པ་ཞེས་བྱ་བའི་ཐ་ཚིག་གོ། །འཇིག་རྟེན་དང་འཇིག་རྟེན་ལས་འདས་པའི་གནས་རྣམས་ཀྱི་གཞིར་གྱུར་པས་ན། རྡོ་རྗེ་སེམས་དཔའི་བཞུགས་
གནས་ཆེ། །ཞེས་བྱ་བ་སྟེ། དེ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་རྣམས་འདུས་པར་མཛད་པས་བཞུགས་གནས་སུ་མཛད་པ་ན། སངས་རྒྱས་ཀུན་གྱིས་རྗེས་བསྟེན་པ། །ཞེས་བྱའོ། །བྱང་ཆུབ་ཀྱི་རང་བཞིན་ཅན་

གྱི་སེམས་དཔའ་ནི་བྱང་ཆུབ་སེམས་དཔའ་སྟེ་རྡོ་རྗེ་སེམས་དཔའོ། །དེའི་གནས་སུ་གྱུར་པ་དེ་ཉིད་ཀྱིས་ན་མཆོག་གོ། །རྡོ་རྗེ་འཆང་བ་ཀུན་ནི་རྡོ་རྗེ་སེམས་དཔའ་དང་། རྡོ་རྗེ་རྒྱལ་པོ་དང་། རྡོ་རྗེ་ཆགས་པ་ལ་སོགས་པ་དང་། རྡོ་རྗེ་ཡིད་ལས་བྱུང་བ་ལ་སོགས་པའོ། །དེ་རྣམས་
ཀྱི་གནས་ནི་བཞུགས་གནས་སོ། །དེ་ནི་བདེ་བ་ཆེན་པོའི་ནོར་བུ་རིན་ཆེན་གྱི་མཆོག་ཅེས་བྱ་བ་ཡིན་པས་ན། དེ་ལྟ་བུ་གང་ཡིན་པ་དེ་ལ་ནི། བདེ་བ་ཆེན་པོ་རྡོ་རྗེ་ཆེ། །ནོར་བུ་རིན་ཆེན་མཆོག་ཅེས་བྱ། །ཞེས་བྱ་བའོ། །རྡོ་རྗེ་ཆེན་པོའི་གཞལ་ཡས་ཁང་། དེ་ནས་བདེ་བ་ཆེན་
པོ་རྡོ་རྗེ་སེམས་དཔའ་བཞུགས་པ་ནི་རྣམ་པར་གནས་པར་མཛད་པའོ། །དེ་ཇི་ལྟ་བུ་ཞེ་ན། ཐོག་མ་ཐ་མ་མེད་སེམས་པ། །ཞེས་བྱ་བ་ལ་སོགས་པ་གསུངས་ཏེ། དེ་ལ་ཐོག་མ་ཐ་མ་མེད་པ་ལ་སོགས་པ་ནི་བཤད་ཟིན་པའོ། །སྣ་ཚོགས་བཙུན་མོའི་ཚོགས་བཅས་པར། །
ཞེས་བྱ་བ་ལ་སྣ་ཚོགས་ཞེས་བྱ་བ་ནི་རྒྱུ་དང་མི་རྒྱུ་བའི་དངོས་པོ་ཐམས་ཅད་ཀྱི་བདག་ཉིད་ཅན་ནོ། །བཙུན་མོའི་ཚོགས་གང་ཞིག་དང་ལྷན་ཅིག་བཞུགས་ཤེ་ན། རྡོ་རྗེ་ལྷ་མོས་ཡོངས་སུ་བསྐོར། །ཞེས་བྱ་བ་གསུངས་ཏེ། རྡོ་རྗེ་མཚོན་ཆ་མ་དང་རྡོ་རྗེ་ཀཱི་ལི་ཀཱི་ལི་དང་། རྡོ་རྗེ་དྲན་
པ་དང་། རྡོ་རྗེ་སྙེམས་པ་ལ་སོགས་པའི་རྡོ་རྗེ་ལྷ་མོ་རྣམས་ཀྱིས་ཡོངས་སུ་བསྐོར་བ་ཡིན་གྱི། འཁོར་བའི་བུད་མེད་རྣམས་ཀྱིས་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལྟར་ན། དེ་ནས་དང་པོའི་གནས་ཉམས་དགའ། །ཞེས་བྱ་བ་ནས་བརྩམས་ཏེ། རྡོ་རྗེ་ལྷ་མོས་ཡོངས་
སུ་བསྐོར། །ཞེས་བྱ་བའི་བར་གྱིས་བཤད་པས་ནི་ཏིང་ངེ་འཛིན་དང་པོ་གསུངས་པ་ཡིན་ནོ། །ད་ནི་བདེ་ཆེན་རབ་སྒྲུབ་ཕྱིར། །ཞེས་བྱ་བ་ལ་སོགས་པས་ཏིང་ངེ་འཛིན་གཉིས་པ་གསུངས་པ་ཡིན་ཏེ་ཐར་པ་ཆེན་པོ་རབ་ཏུ་གྲུབ་པ་ནི་བདེ་བ་ཆེན་པོས་རབ་ཏུ་གྲུབ་པའོ། །གདུལ་
བྱ་རྣམས་ཀྱི་འདོད་ཆགས་ཆེན་པོ་རྣམ་པར་དག་ཅིང་འདོད་ཆགས་ལ་སོགས་པ་དང་བྲལ་བས་སེམས་ཅན་སྨིན་ཅིང་གྲོལ་བའི་ཚུལ་གྱིས་འགྲུབ་བོ། །མ་ལུས་འདུལ་བ་ནི་སེམས་ཅན་གྱི་ཁམས་སྐལ་བ་དང་ལྡན་པ་དང་། མི་ལྡན་པ་རྣམས་ཀྱི་བྱང་ཆུབ་ཆེན་པོར་བསྐྱེད་

པ་ནི་མ་ལུས་འདུལ་བ་སྟེ། དེའི་དོན་དུའོ། །དངོས་གྲུབ་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པའི་ལས་ཀྱི་རྒྱུ་རྣམས་གྲུབ་པ་སྟེ། དེ་རབ་ཏུ་གྲུབ་པའི་ཕྱིར་བཅོམ་ལྡན་འདས་ཀྱིས་ཉེ་བའི་སྙིང་པོ་དང་བཅས་པའི་སྙིང་པོ་བསྐལ་པ་དང་པོར་
གསུངས་སོ་ཞེས་བྱ་བར་སྦྱར་རོ། །བཅོམ་ལྡན་འདས་ཁྱད་པར་ཇི་ལྟ་བུ་ཞེ་ན། དམ་ཚིག་ཅེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ཚུལ་ནི་དམ་ཚིག་གོ། །དམ་ཚིག་མཆོག་ནི་དེ་བཞིན་གཤེགས་པ་རྣམས་ཏེ་དེ་རྣམས་ཀྱི་དམ་
ཚིག་ནི་འདའ་བར་མི་བྱའོ། །རྒྱལ་པོས་ཀྱང་ནི་བསྲུང་བར་བྱ། །ཞེས་བྱ་བ་ནི་རྡོ་རྗེ་སེམས་དཔས་འདུལ་བའི་གདུལ་བྱའི་སེམས་ཅན་གང་ཡིན་པ་ལ་རྡོ་རྗེ་སེམས་དཔའི་ཚུལ་ཅན་གྱིས་དེ་བཞིན་གཤེགས་པ་རྣམས་ཀྱིས་ངེས་པར་སྤྲུལ་པར་བྱ་བ་ཡིན་པས་དེས་ན། རྒྱལ་པོས་ཀྱང་
ནི་བསྲུང་བར་བྱ། །ཞེས་བྱ་བ་སྟེ་བཅོམ་ལྡན་འདས་ཀྱི་ཕྱག་རྒྱ་ཆེན་པོའོ། །རྡོ་རྗེ་སྙེམས་པའི་ཚུལ་འཆང་ཞིང་། །སྙེམས་དང་བཅས་པས་རྡོ་རྗེ་གསོར། །ཞེས་བྱ་བ་ནི་རང་གི་ཕྱག་རྒྱ་ཆེན་པོ་བཅིངས་ནས་དེ་ཉིད་མངོན་སུམ་དུ་བྱེད་པའོ། །ཕྱག་རྒྱ་ཐམས་ཅད་མྱུར་གྲུབ་ཕྱིར། །ཞེས་བྱ་
བ་ནི་འཇིག་རྟེན་དང་འཇིག་རྟེན་ལས་འདས་པའི་ཕྱག་རྒྱ་ཆེན་པོ་ལ་སོགས་པ་ཐམས་ཅད་རིངས་པར་གྲུབ་པར་བྱ་བའི་ཕྱིར་རོ། །རྡོ་རྗེ་སེམས་དཔའ་མཆོག་གྲུབ་ཕྱིར། །ཞེས་བྱ་བ་ནི་རྡོ་རྗེ་འཆང་ཆེན་པོ་རྟོག་པའི་གདུལ་བྱ་རྣམས་ཀྱི་རྡོ་རྗེ་སེམས་དཔའི་དངོས་གྲུབ་ཀྱི་མཆོག་སྒྲུབ་པའི་ཕྱིར་
རོ། །དངོས་གྲུབ་ཀུན་གྱི་ཐབས་ཆེན་པོ། །ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་རྣམས་ཐོབ་པར་བྱ་བའི་ཕྱིར་ཏེ་ཐབས་ཀྱང་ཡིན་ལ་ཆེན་པོ་ཡང་ཡིན་པས་ན་ཐབས་ཆེན་པོའོ། །བསོད་ནམས་ཀུན་གྱི་ཆེར་མཐོ་བ། །ཞེས་བྱ་བ་ནི་འཇིག་རྟེན་
དང་འཇིག་རྟེན་ལས་འདས་པའི་བསོད་ནམས་ཐམས་ཅད་ནི་བསོད་ནམས་ཀུན་ནོ། །དེ་རྣམས་ཀྱི་ཆེན་པོ་ཡང་ཡིན་ལ་མཐོ་བ་ཡང་ཡིན་པས་ན་བསོད་ནམས་ཆེར་མཐོ་བ་སྟེ། སྙིང་པོ་དེ་དེའི་རྒྱུར་གྱུར་པའི་ཕྱིར་རོ། །ཡེ་ཤེས་ཕྱག་རྒྱར་ཡང་དག་ལྡན། །ཞེས་བྱ་བ་ནི་ཨ་ནུ་རཱ་ག་ཡ་མི་

ཞེས་བྱ་བའོ། །བཟླ་བའི་དོན་གྱིས་ཡེ་ཤེས་ནི་ཕྱག་རྒྱ་སྟེ་དེ་དང་བཅས་ཤིང་ཡང་དག་པར་ལྡན་པས་ཡེ་ཤེས་ཀྱི་ཕྱག་རྒྱར་ལྡན་པའོ། །དེ་སུ་ཞིག་ཡིན་ཞེ་ན། སྙིང་པོ་ཆེན་པོ་ཞེས་བྱ་བ་གསུངས་ཏེ་ཡི་གེ་ཧཱུཾ་ཞེས་བྱ་བའི་ཐ་ཚིག་གོ། །དེ་ཉིད་ནི་ཐམས་ཅད་ཀྱི་མཆོག་ཏུ་གྱུར་པ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་སྟོན་པར་བྱེད་པས་ན་དམ་པ་ཡིན་ཞེས་བྱའོ། །གང་གིས་ཞེས་བྱ་བ་ནི་སྙིང་པོ་གང་གིས་སོ། །བསོད་ནམས་མི་ལྡན་པའམ་ཞེས་བྱ་བ་ནི་མཚམས་མེད་པ་ལྔ་ལ་སོགས་པའི་ལས་རྣམས་བྱེད་པ་ཡང་ངོ་། །དེ་བཞིན་དཀྱིལ་འཁོར་མེད་པའང་
ཡིན། །ཞེས་བྱ་བ་ནི་དཀྱིལ་འཁོར་དག་ཏུ་ཇི་ལྟ་བ་བཞིན་དུ་མ་ཞུགས་པའོ། །དོན་ཡོད་པ་ནི་འབྲས་བུ་ཡོད་པའོ། །དེ་ཉིད་ཀྱིས་ན་ཐོགས་པ་མེད་པའོ། །མྱུར་བ་ནི་ཚེ་འདི་ཉིད་ལ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་མྱུར་དུ་ཐོབ་པའོ། །མཆོག་ནི་དམ་པའོ། །དངོས་གྲུབ་
ཐམས་ཅད་རྙེད་མི་དཀའ། །ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་རྙེད་པར་དཀའ་བ་མ་ཡིན་པར་འགྱུར་རོ། །བདེ་བ་ཆེན་པོ་རྡོ་རྗེ་ཆེ། །ཞེས་བྱ་བ་ནི་བླ་ན་མེད་པའི་བྱང་ཆུབ་སྟེ། དེའི་གསང་བ་མཆོག་གི་དམ་ཚིག་ཐོབ་པའི་རྒྱུའོ། །བསྟན་པ་ནི་སྙིང་པོ་
སྟེ། རྡོ་རྗེ་ལྟར་མི་ཕྱེད་པའོ། །དངོས་གྲུབ་ཐམས་ཅད་སྒྲུབ་པ་ནི་རིགས་ཐམས་ཅད་ལ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་གང་དག་བཤད་པ་དེ་རྣམས་དང་པོའི་ཚུལ་ནི་ཡི་གེ་ཧཱུཾ་ཡིན་པས་སྒྲུབ་ཅིང་སྐྱེད་པར་བྱེད་པའི་རྒྱུ་ཡིན་ཏེ་གང་གི་ཕྱིར་ཡི་གེ་ཧཱུཾ་བཟླས་པས་དེ་དག་ཐམས་ཅད་
ཅད་གྲུབ་པར་གྱུར་པ་དེས་ན། རྟོག་པ་ཐམས་ཅད་མྱུར་གྲུབ་བྱེད། །ཅེས་བྱ་སྟེ། དུམ་བུ་དང་པོ་དང་། གཉིས་པར་རྡོ་རྗེ་སེམས་དཔའ་ལ་སོགས་པའི་རྟོག་པ་གང་དག་བཤད་པ་དེ་རྣམས་མྱུར་དུ་སྒྲུབ་པར་བྱེད་པ་ཡིན་ནོ། །ཐོག་མཐའ་མེད་ཅིང་ཞེས་བྱ་བ་ནི། དང་པོ་ཞེས་བྱ་བ་
ནི་ཐོག་མར་སྐྱེས་པའོ། །ཐ་མ་ནི་དུས་མཚམས་མེད་པའི་མྱ་ངན་ལས་འདས་པའོ། །གང་ལ་གཉིས་པོ་དེ་དག་མེད་པ་དེ་ནི་ཐོག་མཐའ་མེད་པ་སྟེ། ད་ལྟར་བྱུང་བའི་ངོ་བོས་རྟག་ཏུ་བཞུགས་པའོ། །དང་པོར་བྱུང་ཞེས་བྱ་བ་ནི་བསྐལ་པ་བཟང་པོ་ལ་སོགས་པའི་དང་པོར་ཡང་ད་ལྟར་

བྱུང་བའི་ངོ་བོ་ཉིད་ཁོ་ན་བྱུང་བའི་ཕྱིར་རོ། །མཆོག་དང་པོ་ཞེས་བྱ་བར་བཤད་ཅེས་བྱ་བ་ལས་མཆོག་ནི་དམ་པའོ། །དང་པོའི་ནི་བསྐལ་པ་བཟང་པོའི་ཐོག་མར་རོ། །བཤད་ཅེས་བྱ་བ་ནི་བསྟན་ཅིང་བསྒྲགས་པའོ། །ཚིག་ཀུན་གྱིས་ནི་ཅི་འདོད་དང་། །ཞེས་བྱ་
བ་ལ་ཚིག་ཀྱང་ཡིན་ལ་ཐམས་ཅད་ཀྱང་ཡིན་པས་ན་ཚིག་ཐམས་ཅད་དེ། གླུའི་ཚུལ་བདུན་ནོ། །དེས་གདུལ་བྱ་ཇི་ལྟར་འདོད་པ་བཞིན་དུ་གསུང་པས་ན། ཚིག་ཀུན་གྱིས་ནི་ཅི་འདོད་པ། །ཞེས་བྱའོ། །ཆགས་པ་ཀུན་གྱིས་ཅི་དགའ་བར། །ཞེས་བྱ་བ་ནི་གླུའི་ལམ་གྱི་ཆགས་པ་
ཞེས་བྱ་བ་གདངས་ཀྱི་བྱེ་བྲག་རྣམས་ཀྱིས་ཅི་དགའ་བར་ཞེས་བྱ་བ་གདུལ་བྱ་རྣམས་རྡོ་རྗེ་སེམས་དཔའ་ལ་སོགས་པ་ཐོབ་པར་བྱ་བའི་ཕྱིར་ཇི་ལྟར་དགའ་ཞིང་སྲེད་པ་དེ་བཞིན་དུ་སྙིང་པོ་དེ་གསུང་བར་མཛད་པའོ། །ཨ་ནུ་རཱ་ག་ཡ་མི་ཞེས་བྱ་བ་ནི་རྗེས་སུ་ཆགས་པར་བྱའོ་ཞེས་པ་སྟེ། རྡོ་
རྗེ་སེམས་དཔའ་ལ་སོགས་པའི་རང་བཞིན་ཐབས་དང་། ཤེས་རབ་ཀྱི་ངོ་བོ་ཇི་ལྟ་བ་བཞིན་དུ་གནས་པ་ཡང་དང་ཡང་དུ་མངོན་དུ་བྱའོ་ཞེས་བྱ་བ་ནི་རྗེས་སུ་ཆགས་པར་བྱ་བའོ་ཞེས་བྱ་བ་ཡིན་ནོ། །ཇི་བཞིན་དབབ་པའི་ཡེ་ཤེས་འཇུག །ཅེས་བྱ་བ་ནི་རྡོ་རྗེ་སེམས་དཔའ་ལ་སོགས་
པ་བསྒོམས་པས་མངོན་སུམ་དུ་བྱ་བ་ནི་ཇི་བཞིན་དབབ་པ་སྟེ། དེར་འབབ་པ་ནི་ཡེ་ཤེས་སོ། །དེ་ལ་འཇུག་པ་ནི་མངོན་སུམ་དུ་བྱ་བའོ། །དེ་བས་ན་ཇི་ལྟ་བ་བཞིན་དུ་འབབ་པའི་ཡེ་ཤེས་ལ་རབ་ཏུ་འཇུག་པས་ན། ཅི་ཞིག་འབབ་པའི་ཡེ་ཤེས་འཇུག་ཅེས་བྱའོ། །ཉེ་བའི་སྙིང་
པོར་བཅས་ཞེས་བྱ་བ་ནི་ཉེ་བའི་སྙིང་པོ་དང་ལྷན་ཅིག་ཏུ་བཅས་པའི་སྙིང་པོའོ། །ཉིད་ཅེས་བྱ་བ་ནི་ངེས་པར་གཟུང་བ་སྟེ་ཉེ་བའི་སྙིང་པོ་དང་བཅས་པ་ཁོ་ནའོ། །བསྐལ་པ་དང་པོ་ཞེས་བྱ་བ་ནི་བསྐལ་པ་བཟང་པོ་ལ་སོགས་པའི་དང་པོ་སྟེ་ཐོག་མར་རོ། །གསུངས་ཞེས་བྱ་བ་ནི་བཀའ་
སྩལ་པའོ། །འདི་སྐད་སྟོན་པ་ཡིན་ཏེ་བསྐལ་པ་བཟང་པོའི་དང་པོར་ཆགས་པའི་བསྐལ་པའི་ཚེ་སངས་རྒྱས་ཀྱི་ཞིང་ནམ་མཁར་གྱུར་པར་བཅོམ་ལྡན་འདས་རྡོ་རྗེ་སེམས་དཔའ་ཇི་སྐད་དུ་བཤད་པའི་གཞལ་ཡས་ཁང་དུ་བཞུགས་ནས་དང་པོ་ཁོ་ནར། །ཨ་ནུ་རཱ་ག་ཡ་མི་ཧཱུཾ་ཞེས་

བྱ་བའི་ཉེ་བའི་སྙིང་པོ་ཧཱུཾ་དང་བཅས་པ་བཅོམ་ལྡན་འདས་ཀྱིས་ཇི་ལྟ་བ་བཞིན་དུ་གསུངས་པ་ཡིན་ནོ། །དེ་ནས་ཞེས་བྱ་བ་ནི་དེ་མ་ཐག་པ་སྟོན་པར་བྱེད་པའི་ཐ་ཚིག་གོ། །འདི་ནི་ཞེས་བྱ་བ་ནི་ཉེ་བའི་སྙིང་པོ་དང་བཅས་པའི་ཡི་གེ་ཧཱུཾ་ངོ་། །གསུངས་པ་ཙམ་གྱིས་ཞེས་བྱ་བ་ནི་ཚིག་
ཐམས་ཅད་ཀྱིས་བཀའ་སྩལ་པ་ཙམ་གྱིས་སོ། །སངས་རྒྱས་ཐམས་ཅད་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པའོ། །སྲས་བཅས་པ་ནི་བྱམས་པ་ལ་སོགས་པ་བྱང་ཆུབ་སེམས་དཔའ་དང་བཅས་པའོ། །རྡོ་རྗེ་
འཛིན་བཅས་ནི་རྡོ་རྗེ་སེམས་དཔའ་དང་། རྒྱལ་པོ་དང་། ཆགས་པ་དང་། ལེགས་པ་ལ་སོགས་པ་རིགས་པའི་ལྷ་ཐམས་ཅད་དང་བཅས་པའོ། །རྡོ་རྗེ་འཛིན་པ་ཆེན་པོ་ནམ་མཁའི་ཁམས་ཐམས་ཅད་ན་རྟག་ཏུ་བཞུགས་པ། སྐུ་དང་གསུང་དང་ཐུགས་རྡོ་རྗེ་དངོས་པོ་
ཐམས་ཅད་ཀྱི་བདག་ཉིད་ཅན་ཡིན་པས་སྣ་ཚོགས་པའོ། །དེ་དང་ལྷན་ཅིག་ཏུ་སྐད་ཅིག་གིས་འདུས་ཤིང་བྱོན་ནས་གཅིག་ཏུ་ཚོགས་པར་མཛད་པས་ནི་དེ་སྐད་ཅེས་བྱའོ། །རྡོ་རྗེ་འཆང་ཆེན་པོ་ཞེས་བྱ་བ་ནི་རྡོ་རྗེ་སེམས་དཔས་རབ་ཏུ་བསྐུལ་བས་སོ། །ཐོག་མར་ཞེས་
བྱ་བ་ནི་ཆགས་པའི་བསྐལ་པའི་ཐོག་མར་ཏེ་བསྐལ་པ་བཟང་པོའི་དང་པོའི་ཚེ་ནའོ། །ཡུད་ཀྱིས་བྱ་བ་ནི་ཡུད་ཙམ་ཁོ་ནས་ཡིན་གྱི་དུས་གཞན་དུ་ནི་མ་ཡིན་ནོ། །འཇིག་རྟེན་གསུམ་ཞེས་བྱ་བ་ནི་འདོད་པ་དང་གཟུགས་དང་གཟུགས་མེད་པའི་ཁམས་ཀྱི་རང་བཞིན་ནོ། །
ཕྱུང་བ་ནི་བསྐྱེད་པའོ། །དེ་གང་གིས་ཕྱུང་ཞེ་ན། འདུས་པར་གྱུར་ནས་གཤེགས་པའི་རྣམ་པར་སྣང་མཛད་ལ་སོགས་པའི་ཇི་སྐད་དུ་བཤད་པའི་བདེ་བར་གཤེགས་པ་རྣམས་ཀྱིས་སོ། །དེ་ལྟར་དེས་སེམས་ཅན་གྱི་ཁམས་བསྐྱེད་པས་ཅི་ཞིག་མཛད་ཅེ་ན། དངོས་གྲུབ་
རིགས་ཞེས་བྱ་བ་ལ་སོགས་པ་གསུངས་ཏེ་སེམས་ཅན་གྱི་ཁམས་ཇི་ལྟར་བསྐྱེད་པ་དེ་སངས་རྒྱས་ཉིད་དམ། རྡོ་རྗེ་འཛིན་པ་ཉིད་དུ་ཇི་ལྟར་འགྱུར་བ་དེ་ལྟར་སྟོན་ཅིག་ཅེས་བཅོམ་ལྡན་འདས་རྡོ་རྗེ་སེམས་དཔའ་ལ་དྲིས་པ་ཡིན་ནོ། །ཇི་ལྟར་དྲིས་པ་ཡིན་ཞེ་ན། །ཇི་ལྟར་འགྲོ་བ་

རང་གྲུབ་ཅེས་བྱ་བ་སྨོས་ཏེ། འཇིག་རྟེན་གསུམ་གྱི་རང་བཞིན་ཅན་གྱི་ཁམས་གསུམ་པའི་སེམས་ཅན་གྱི་ཁམས་རྣམས་སངས་རྒྱས་པ་ཉིད་དམ། རྡོ་རྗེ་འཆང་ཉིད་དུ་ཇི་ལྟར་འགྲུབ་པར་འགྱུར། དེ་བཞིན་གཤེགས་པ་དེ་དག་རང་ཉིད་བཅོམ་ལྡན་འདས་
རྡོ་རྗེ་སེམས་དཔའ་ལ་དྲིས་པར་གྱུར་པའོ། །དེ་རྣམས་ཀྱི་ཞེས་བྱ་བ་ནི་བདེ་བར་གཤེགས་པ་རྣམས་ཀྱིའོ། །བཀའ་གསན་ནས་ཞེས་བྱ་བ་ནི་ཇི་སྐད་དུ་བཤད་པའི་ཐོས་པའི་རང་བཞིན་ཅན་གྱིས་ཞེས་པས་ངེས་པར་བཟུང་ནས་སོ། །རྡོ་རྗེ་འཛིན་ཞེས་བྱ་བ་ནི་རྡོ་རྗེ་སེམས་དཔའོ། །
ཇི་ལྟ་བུ་ཞེ་ན་རང་ཉིད་ཀྱིས་ཞེས་བྱ་བ་ལ་སོགས་པ་སྨོས་ཏེ། རང་ཉིད་ཀྱིས་ཞེས་བྱ་བ་ནི་བདག་ཉིད་ཁོ་ནས་སོ། །འགྲོ་བ་ནི་སེམས་ཅན་གྱི་ཁམས་སོ། །འབྱིན་པ་ནི་འདོད་པ་ན་གཟུགས་དང་གཟུགས་མེད་པའི་ཁམས་བསྐྱེད་པའོ། །སངས་རྒྱས་ཉིད་ལ་སོགས་པ་
སྩོལ་བར་མཛད་པས་ན་སྩལ་བའོ། །སངས་རྒྱས་ཉིད་ལ་སོགས་པ་ཐོབ་པར་བྱེད་པའི་རྒྱུར་གྱུར་པ་སྟོན་པར་མཛད་པས་ན་སྟོན་པའོ། །དེ་ཉིད་སངས་རྒྱས་ཉིད་ལ་སོགས་པ་སྐྱེད་པར་མཛད་པས་ན་བྱེད་པའོ། །ཚིག་ནི་འདི་སྐད་ཅེས་གསུངས་ཞེས་བྱ་བ་ནི་བཀའ་སྩལ་
པར་གྱུར་པའོ། །ཚིག་ཇི་ལྟ་བུ་ཞིག་གསུངས་ཏེ་ཞེ་ན། འཇིག་རྟེན་འདོད་ཆགས་དང་ཞེས་བྱ་བ་ལ་སོགས་པ་སྨོས་ཏེ། ཉན་ཐོས་དང་རང་སངས་རྒྱས་ཀྱི་ས་མྱ་ངན་ལས་འདས་པའི་སེམས་ནི་སངས་རྒྱས་ཀྱི་བྱང་ཆུབ་ལས་ཕྱིར་ཕྱོགས་པ་ཡིན་ན་ཆགས་པ་དང་བྲལ་བའོ། །དེས་
འདུལ་བའི་སེམས་ཅན་ཉན་ཐོས་དང་རང་སངས་རྒྱས་ཀྱི་བྱང་ཆུབ་ལ་རབ་ཏུ་འཇོག་ཅིང་དགོད་པས་ན་འདུལ་བ་སྟེ། དེ་ལྟ་བུས་འདུལ་བའི་འཇིག་རྟེན་གང་ཡིན་པ་དེ་ལ་དེ་སྐད་ཅེས་བྱའོ། །ཆགས་བྲལ་ཉིད་ཀྱིས་དག་པར་འགྱུར། །ཞེས་བྱ་བ་ནི་འདོད་ཆགས་དང་བྲལ་བས་
འདུལ་བའི་འཇིག་རྟེན་ནི་ཇི་སྐད་དུ་བཤད་པའི་ཉན་ཐོས་དང་རང་སངས་རྒྱས་ཀྱི་བྱང་ཆུབ་བསྒོམས་པའི་སེམས་ཉིད་ཀྱིས་དག་པར་འགྱུར་ཞིང་ཉན་ཐོས་དང་རང་སངས་རྒྱས་ཀྱི་བྱང་ཆུབ་མངོན་དུ་བྱེད་པར་འགྱུར་རོ། །འདིར་ཞེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་

ཆུབ་དོན་དུ་གཉེར་བའི་འཇིག་རྟེན་རྡོ་རྗེ་ཐེག་པ་འདི་ལའོ། །འདོད་ཆགས་ཆེན་པོ་ནི་རྡོ་རྗེ་སེམས་དཔའ་སྟེ། ཐབས་ཀྱི་ཕ་རོལ་ཏུ་ཕྱིན་པའི་རང་བཞིན་ནོ། །བདེ་བ་ཆེན་པོ་ཞེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ངོ་བོར་ཐར་པ་ཆེན་པོའོ། །ཇི་ལྟར་ཞེས་
བྱ་བ་ནི་ཐབས་གང་གིས་ན་ཞེས་རྣམ་པར་རྟོག་པའོ། །འགྲུབ་པར་འགྱུར་ཞེས་བྱ་བ་ནི་མངོན་སུམ་དུ་བྱེད་ཅིང་རྫོགས་པར་བྱེད་པའོ། །དེ་ཡི་ཚིག་དེ་གསན་པ་དང་། །ཞེས་བྱ་བ་ནི་དཔལ་རྡོ་རྗེ་སེམས་དཔའི་ཚིག་འཇིག་རྟེན་ཆགས་བྲལ་ཞེས་བྱ་བ་ནས་འགྲུབ་པར་འགྱུར་ཞེས་
བྱ་བའི་བར་གསན་པ་དང་། རྒྱལ་བ་རང་ཉིད་ཀྱིས་ཚིག་འདི་སྐད་གསུངས་ཤིང་བཀའ་སྩལ་ཏོ། །ཚིག་ཇི་ལྟ་བུ་གསུངས་ཤེ་ན། ཁྱོད་ནི་ཐབས་ཆེན་ཉིད་ཡིན་ཏེ། །ཞེས་བྱ་བ་སྨོས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱ་བ་ལ་ཁྱེད་ཉིད་ཐབས་
ཆེན་པོ་ཡིན་ནོ་ཞེས་བྱ་བ་སྟེ་ཉིད་ཅེས་བྱ་བའི་སྒྲ་ནི་ངེས་པར་གཟུང་བའི་དོན་ཏོ། །བྱང་ཆུབ་སེམས་དཔའ་སྟེ་ཐོག་མའི་ལྷ་ཞེས་བྱ་བ་ནི་བྱང་ཆུབ་ཀྱི་མཚན་ཉིད་ཅན་གྱི་སེམས་ནི་བྱང་ཆུབ་ཀྱི་སེམས་ཏེ། དེའི་རྒྱུ་མཐུན་པ་ལས་བྱུང་བའི་ལྷག་པའི་ལྷ་ཡིན་པས་ན་བྱང་ཆུབ་
སེམས་ཏེ་ཐོག་མའི་ལྷ་ཞེས་བྱ་བ་ལ་ལྷག་པའི་ལྷ་ཉིད་ཡིན་པས་ན་ལྷག་པའི་ལྷ་སྟེ། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ཞེས་བྱ་བའི་ཐ་ཚིག་གོ། །དེ་ཡང་བཅོམ་ལྡན་འདས་སེམས་ནི་འདོད་ཆགས་ཆེན་པོ་སྟེ། འདིའི་ལྷ་ཉིད་དོ་ཞེས་འོག་ནས་བཤད་པ་ཡིན་ནོ། །
འདིས་ནི་དོན་འདི་སྐད་སྟོན་ཏེ་གང་གི་ཕྱིར་ཁྱེད་ནི་གདུལ་བྱ་རྣམས་ཀྱི་བྱང་ཆུབ་ཀྱི་སེམས་ལྷག་པའི་ལྷ་ཉིད་ཡིན་ལ་དེ་བས་ན་ཁྱོད་ཉིད་འདོད་ཆགས་ཆེན་པོ་དང་། བདེ་བ་ཆེན་པོ་དགའ་བ་བསྐྱེད་པའི་ཕྱིར་རྒྱུར་གྱུར་པ་ཡིན་གྱི་གཞན་པས་ན། འདོད་ཆགས་ཆེན་པོ་བདེ་བ་ཆེ། །ཇི་
ལྟར་འདིར་ནི་གྲུབ་པར་འགྱུར། །ཞེས་རྟོག་པ་འདིས་ཅི་ཞིག་བྱ་ཞེས་བྱ་བའི་ཐ་ཚིག་གོ། །ཇི་སྲིད་འཁོར་བའི་གནས་སུ་ནི། །ཞེས་བྱ་བ་སོགས་པ་ནི་བཤད་ཟིན་ཏོ། །ཇི་སྲིད་སེམས་ནི་རྣམ་རྟོག་པ། །ཞེས་བྱ་བ་ལ་སོགས་པ་ལ། །འགྲོ་ལ་ཕན་ཕྱིར་སངས་རྒྱས་

འགྲུབ་པར་ཤོག །ཅེས་བྱ་བས་སེམས་ཅན་གཅིག་གི་ཆེད་དུ་ཡང་ཕྱི་མའི་མཐར་ཐུག་པ་མེད་པར་གནས་པར་མཛད་པས་ཇི་སྲིད་སྨོན་ལམ་གྱི་སྟོབས་ཀྱིས་འཕངས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་ཡོད་པར་གྱུར་པ་དེ་ཇི་སྲིད་ཀྱི་
བར་དུ་འཁོར་བ་ཆེན་པོར་མི་གནས་པའི་མྱ་ངན་ལས་འདས་པའི་རང་བཞིན་ཅན་གྱི་སངས་རྒྱས་བཅོམ་ལྡན་འདས་སུ་འགྱུར་བ་ཡིན་ནོ། །བྱང་ཆུབ་སེམས་ཅན་ལ་ཕན་ཕྱིར། །རྡོ་རྗེ་ཅན་གྱིས་ཅི་བདེར་གྱིས། །ཞེས་བྱ་བ་ལ་བྱང་ཆུབ་ནི་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་བོ། །སེམས་ཅན་སྐལ་བ་ཇི་ལྟ་བ་བཞིན་དུ་སངས་རྒྱས་ཉིད་དུ་སྒྲུབ་པ་ནི་ཕན་པའི་ཕྱིར་ཞེས་བྱ་བ་དེའི་དོན་དུ་ཀྱེ་རྡོ་རྗེ་ཅན་རྡོ་རྗེ་འཆང་བ་ཅི་བདེ་བར་གྱིས་ཤིག་ཅེས་དེ་སྐད་རྡོ་རྗེ་སེམས་དཔས་གསུངས་པ་ཡིན་ནོ། །འདི་སྐད་སྟོན་པ་ཡིན་ཏེ་ཐབས་དང་ཤེས་རབ་ཀྱིས་འདུལ་
བའི་གདུལ་བྱ་རྣམས་ཀྱི་ཕྱིར་ཁྱེད་ཀྱི་རང་བཞིན་ཐོས་པ་དང་། བསམ་པ་དང་། བསྒོམ་པའི་རང་བཞིན་ཅན་གྱི་སྟོབས་ཀྱིས་གདུལ་བྱ་གང་ཞིག་གིས་བསྒྲུབས་ཤིང་མངོན་སུམ་དུ་བྱས་པས་སངས་རྒྱས་ཉིད་ཐོབ་པར་འགྱུར་བ་དེ་ལྟར་གྱིས་ཤིག་པའོ། །དེ་ནས་ཞེས་བྱ་
བ་ལ་སོགས་པ་ལ་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེ་སེམས་དཔའ་ལ་དེ་སྐད་ཅེས་གསུངས་པ་དང་། རང་གི་ལྷ་མོའི་དཀྱིལ་འཁོར་བསྐལ་པ་བཟང་པོའི་ཐོག་མ་སྟེ། སྔོན་དུ་གནས་པས་དང་པོར་གྱུར་པ་ཐོག་མ་ཞེས་པ་སྔར་སེམས་ཅན་ཐམས་ཅད་གཞུག་
པར་བྱ་བའི་ཕྱིར་དཀྱིལ་འཁོར་བྱིན་གྱིས་བརླབས་ཤིང་བརྟན་པར་མཛད་ནས། རྡོ་རྗེ་ཀུན་གྱིས་ཞེས་བྱ་བ་དེ་བཞིན་གཤེགས་པའི་རིགས་ཀྱི་གཉིས་སུ་མེད་པའི་སེམས་དང་སེམས་ལས་བྱུང་བ་དེ་རྣམས་ཀྱི་དམ་ཚིག་གི་མཆོག་ནི་དེའི་ལྷ་མོའི་དཀྱིལ་འཁོར་ཏེ་དེ་ལས་སྐྱེས་
པའོ། །ཇི་བཞིན་ཆོ་གས་སྒྲུབ་པ་ཉིད། །ཅེས་བྱ་བ་ནི་ཇི་ལྟར་བྲིས་པའི་དཀྱིལ་འཁོར་དུ་འཇུག་པ་ལ་སོགས་པའི་ཆོ་ག་འབྱུང་བར་འགྱུར་བ་དེ་བཞིན་དུ་བསམ་གཏན་གྱི་དཀྱིལ་འཁོར་དུ་རིང་པོར་མ་ལོན་པར་ནི་དེའི་སྣོད་དུ་གྱུར་པ་རྣམས་ལ་བཅོམ་ལྡན་འདས་རྡོ་རྗེ་སེམས་དཔས་

འཇུག་པ་ལ་སོགས་པའི་ཆོ་ག་མཛད་ལ། ཆོ་ག་དེས་སངས་རྒྱས་ཉིད་དང་རྡོ་རྗེ་འཛིན་པའི་དངོས་གྲུབ་ཉིད་སྒྲུབ་པ་ཡིན་ནོ། །དེ་ལྟར་ན། བདེ་བ་ཆེན་པོར་རབ་གྲུབ་ཕྱིར། །འདོད་ཆགས་ཆེན་པོ་དག་ཕྱིར་དང་། །ཞེས་བྱ་བ་ནས་བརྩམས་ཏེ། ཇི་བཞིན་ཆོ་གས་སྒྲུབ་པ་
ཉིད། །ཅེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་སྔོན་དུ་འགྲོ་བ་ལ་སོགས་པས་ནི་གསུམ་པ་ཡིན་པར་ཤེས་པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པས་བཟླས་བརྗོད་དང་། བསྒོམ་པ་བྱའོ་ཞེས་བྱ་བ་
འདིའི་ཆོ་ག་བསྟན་པའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་རྒྱས་པ་དང་སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །དེ་ནས་བཅོམ་ལྡན་འདས་དེ་ནི་ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་
དཔས་སེམས་ཅན་ཐམས་ཅད་དཀྱིལ་འཁོར་དུ་འཇུག་པས་སངས་རྒྱས་ཉིད་དང་། རྡོ་རྗེ་འཛིན་པ་ཉིད་གྲུབ་ཅིང་བསྐྱེད་པར་གྱུར་ནས། དེའི་རྗེས་ཐོགས་ཉིད་ལ་སྔར། །ཇི་ལྟར་འགྲོ་བ་རང་གྲུབ་འགྱུར། །ཞེས་དངོས་གྲུབ་འདྲི་བར་མཛད་པ་གང་ཡིན་པའི་བཅོམ་ལྡན་
འདས་དེ་རྣམས་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ལ། དཔལ་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་བྲིས་ནས་སེམས་ཅན་རྣམས་ཇི་སྐད་དུ་གྲུབ་པར་བྱ་བའི་ཕྱིར། གསོལ་བ་བཏབ་པ་ཡིན་ནོ། །ཇི་ལྟར་གསོལ་བ་བཏབ་ཅེ་ན། བཅོམ་ལྡན་ཁྱེད་ལ་
གསོལ་བ་ནི། །ཞེས་བྱ་བ་ལ་སོགས་པ་གསུངས་པ་ཡིན་ཏེ། སྙིང་པོ་རྟོག་པ་དམ་པ་འདི། །ཞེས་བྱ་བ་ནི་ཉེ་བའི་སྙིང་པོ་དང་བཅས་པའི་ཡི་གེ་ཧཱུཾ་གི་རྟོག་པ་དམ་པ་སྟེ། མཆོག་ཏུ་གྱུར་པ་བཤད་དུ་གསོལ། །ཞེས་ཤུགས་ཀྱིས་སྦྱར་རོ། །ལས་ཅི་ཞིག་བྱེད་
ཅེ་ན། བདེ་ཆེན་མྱུར་དུ་གྲུབ་བྱེད་པའོ། །ཞེས་བྱ་བ་གསུངས་ཏེ། ཐར་པ་ཆེན་པོ་མྱུར་བ་ཉིད་དུ་སྒྲུབ་པར་བྱེད་པའོ། །དེ་རྣམས་ཀྱི་ནི་བཀའ་གསན་ནས། །ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔས་གསན་ནས། རྡོ་རྗེ་སེམས་དཔའ་བདེ་ཆེན་པོ། །ཞེས་བྱ་བ་

དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ན་ལྷ་མོའི་དཀྱིལ་འཁོར་གང་ཡིན་པ་དེ་བཀའ་སྩལ་པ་ནི་གསུངས་པའོ། །དེ་ནས་ཞེས་བྱ་བ་ནི་འདས་མ་ཐག་པ་སྟོན་པའི་ཚིག་གོ། །གང་གི་ཕྱིར་ཞེས་བྱ་བ་ནི་རྒྱུ་སྟེ་གང་གི་ཕྱིར་དཀྱིལ་
འཁོར་དུ་འཇུག་པ་མེད་པར་གདུལ་བྱ་སྐལ་བ་དང་ལྡན་པ་རྣམས་སངས་རྒྱས་ཉིད་དམ། རྡོ་རྗེ་འཛིན་པ་ཉིད་བསྟན་པའི་སྣོད་དུ་མི་འགྱུར་རོ། །དེ་བས་ན་དེ་རྣམས་སངས་རྒྱས་དང་བྱང་ཆུབ་སེམས་དཔའ་བསྟན་པའི་སྣོད་དུ་གྱུར་པ་རྣམས་ལ། སངས་རྒྱས་དང་བྱང་
ཆུབ་སེམས་དཔའ་རྣམས་བསྟན་ཅིང་སྐལ་བ་དང་ལྡན་པ་ཉིད་དུ་ས་བོན་བསྐྱེད་པར་བྱ་བའི་ཕྱིར་དཔལ་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་ཆེན་པོ་དམ་པ་སྟེ། མཆོག་ཏུ་གྱུར་པ་ཡང་དག་པར་བཤད་པར་བྱའོ་ཞེས་པའོ། །མིང་ཇི་སྐད་ཅེས་བྱ་ཞེ་ན། བདེ་བ་ཆེན་
པོ་རྡོ་རྗེ་མཆོག །གསང་བ་དམ་པ་ཞེས་བཤད་དོ། །ཞེས་གསུངས་པ་ཡིན་ཏེ། བཤད་དོ་ཞེས་བྱ་བ་ནི་བསྟན་པ་ཞེས་པའོ། །དམ་ཚིག་གསུམ་ཞེས་བྱ་བ་ནི་རྡོ་རྗེ་དང་། དྲིལ་བུ་དང་། ཕྱག་རྒྱ་ནི་དམ་ཚིག་གསུམ་མོ། །གང་གིས་འདི་དག་ཐོབ་པ་ནི་དམ་ཚིག་
གསུམ་ཐོབ་པའོ། །སློབ་དཔོན་དུ་རབ་ཏུ་གྱུར་པ་ཞེས་བྱ་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་དུ་དབང་བསྐུར་བར་གྱུར་པ་ནི་སློབ་དཔོན་དུ་རབ་ཏུ་གྱུར་པ་ཡིན་ནོ། །རང་གི་ཕྱག་རྒྱ་ནི་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ་རང་གི་ཕྱག་རྒྱ་དེས་འཁོར་ལོའི་ཆོ་ག་
ཐམས་ཅད་བྱའོ། །ཇི་ལྟ་བུ་ཞེ་ན། རྟག་ཏུ་རྡོ་རྗེ་དྲིལ་འཆང་ཞིང་། །ཞེས་བྱ་བ་སྨོས་ཏེ། རྡོ་རྗེ་སེམས་དཔའི་སྦྱོར་བ་བྱས་ལ་དཀྱིལ་འཁོར་གྱི་ལས་ལ་རྡོ་རྗེ་དང་དྲིལ་བུ་རྟག་ཏུ་འཆང་བས་དཀྱིལ་འཁོར་ཐམས་ཅད་ཀྱི་ལས་རྣམས་རྟག་ཏུ་བྱའོ་ཞེས་བྱ་བའི་ཐ་ཚིག་གོ། །ཅིའི་
ཕྱིར་རྡོ་རྗེ་དང་དྲིལ་བུ་བཅང་བར་བྱ་ཞེ་ན་གང་གི་ཕྱིར། རྡོ་རྗེ་སེམས་དཔའ་ལ་སོགས་པའི་སྐུ་དང་གསུང་དང་ཐུགས་རྡོ་རྗེའི་ངོ་བོའི་རྟོག་པ་ཐམས་ཅད་ནི་རྡོ་རྗེ་དང་དྲིལ་བུ་འཆང་བའི་སྟོབས་ཀྱིས་དཀྱིལ་འཁོར་དུ་ཡང་དག་པར་འཇུག་ཅིང་རབ་ཏུ་འཇུག་པར་འགྱུར་རོ། །དེ་བས་

ན་དཀྱིལ་འཁོར་ཐམས་ཅད་དུ་རབ་ཏུ་འཇུག་ཅིང་འབེབས་པར་བྱེད་པའི་རྡོ་རྗེ་དྲིལ་བུ་ལ་ནི་དམ་ཚིག་གསུམ་ཞེས་བྱའོ། །རྡོ་རྗེ་ཐམས་ཅད་ཡང་དག་པར་འབེབས་པས་དེ་ནི་སྔགས་གྲུབ་པའི་ཕྱག་རྒྱ་ཡིན་ནོ། །གང་གི་ཕྱིར་དེ་ལྟར་ཡིན་པས་དེས་ན་ཕྱག་རྒྱ་ཆེན་པོ་ལ་
སོགས་པའི་དངོས་གྲུབ་ཐམས་ཅད་སྒྲུབ་པ་ནི་རྡོ་རྗེ་དྲིལ་བུ་དཀྲོལ་བར་བྱའོ། །རྡོ་རྗེ་དང་དྲིལ་བུ་བསྒྲགས་པ་དེས། །ཇི་ལྟར་འགྱུར་ཞེ་ན། ཆོ་ག་ལྷག་གམ་མ་ཚང་ཡང་། །འགྲུབ་འགྱུར་སྨད་པར་མི་བྱའོ། །ཞེས་བྱ་བ་གསུངས་ཏེ། རྣལ་འབྱོར་པ་འབད་པས་འཇུག་པར་
གྱུར་ཀྱང་། གལ་ཏེ་བག་མེད་པས་ཆོ་ག་ལྷག་པའམ་མ་ཚང་བར་གྱུར་ན་འདི་ལ་དྲིལ་བུའི་སྒྲས་བསྐང་བར་བྱས་ཏེ་དེས་ཉེས་པ་གཉིས་དང་ལྡན་པར་གྱུར་པའི་རྣལ་འབྱོར་པ་ནི་ཇི་ལྟར་མངོན་པར་འདོད་པའི་དངོས་གྲུབ་ངེས་པར་འགྲུབ་པར་འགྱུར་རོ། །དེ་ནི་ཉེས་པ་གཉིས་པོ་
དེས་སྨད་པར་བྱ་བ་མ་ཡིན་ནོ་ཞེས་གསུངས་པ་ཡིན་ནོ། །ཡང་དཀྱིལ་འཁོར་ཇི་ལྟར་བསྒྲུབ་པར་བྱ་ཞེ་ན། དཀྱིལ་འཁོར་གནས་ནི་ཞེས་བྱ་བ་ལ་སོགས་པ་གསུངས་ཏེ། ས་སྦྱང་བ་དང་ཡོངས་སུ་གཟུང་བ་དང་། བྱིན་གྱིས་བརླབ་པའི་ཆོ་ག་གསང་བ་མཐོན་པོ་ལས་གསུངས་པའི་
སྦྱོར་བས་སམ། གསང་བའི་རྒྱུད་ལས་བཤད་པའི་ཚུལ་གྱིས་དཀྱིལ་འཁོར་བྲི་བར་བྱ་བའི་ཕྱིར་གནས་སྦྱང་བ་ལེགས་པར་བྱས་ལ་དཀྱིལ་འཁོར་གྱི་ས་དེའི་དབུས་སུ་དེར་རིག་པའི་བརྟུལ་ཞུགས་སྔོན་དུ་སྤྱད་པའི་སློབ་དཔོན་གྱིས་དཀྱིལ་འཁོར་བསྒྲུབ་པར་བྱའོ་ཞེས་བྱ་བ་ནི་
ཆོ་ག་བཞིན་ཞེས་བྱ་བའི་དོན་ཡིན་ནོ། །དེ་ཇི་ལྟར་བསྒྲུབ་པར་བྱ་ཞེ་ན། དངོས་གྲུབ་བྱིན་བརླབ་ཆོ་ག་ཡིས། །ཞེས་བྱ་བ་གསུངས་ཏེ། དཀྱིལ་འཁོར་གྱི་དངོས་གྲུབ་བྱིན་གྱིས་བརླབ་པའི་ཆོ་ག་ནི་དངོས་གྲུབ་བྱིན་གྱིས་བརླབ་པའི་ཆོ་གའོ། །དཀྱིལ་འཁོར་གྱི་དངོས་
གྲུབ་ཀྱི་རྗེས་ཐོགས་ཉིད་ལ་འོག་ནས་སྟོན་པའི་གླུ་དང་རོལ་མོའི་མཆོད་པའི་ཆོ་གས་བྱ་བ་ཡིན་ནོ། །དེ་ལ་དཀྱིལ་འཁོར་ཞེས་བྱ་བ་ནི་ལྷ་མོའི་དཀྱིལ་འཁོར་ཏེ་བསྒྲུབ་པར་བྱའོ། །ད་ནི་དངོས་གྲུབ་བྱིན་གྱིས་བརླབ་པའི་ཆོ་ག་བསྟན་པའི་ཕྱིར། གླུ་དང་རོལ་མོ་ཞེས་

བྱ་བ་ལ་སོགས་པ་བསྟན་པ་ཡིན་ཏེ་དེ་ལ་རྡོ་རྗེ་གླུ་ལ་སོགས་པ་ནི་གླུའོ། །རྡོ་རྗེ་རོལ་མོ་ལ་སོགས་པ་ནི་རོལ་མོའོ། དེ་བདག་ཉིད་ཀྱིས་མཆོད་པ་ནི་མཆོད་པ་ཡིན་པས་གླུ་དང་རོལ་མོའི་མཆོད་པའོ། །མེ་ཏོག་སྤོས་སོགས་མཆོད་པ་
ཡིས། །ཞེས་བྱ་བ་ནི་མཆོད་པ་རྣམ་པ་ལྔ་དང་། གདུགས་དང་། རྒྱལ་མཚན་དང་། བ་དན་དང་། མེ་ཏོག་གི་ཕྲེང་བ་དང་། དར་དང་། བླ་བྲེ་དང་། ན་བཟའ་དང་། མེ་ཏོག་གི་ཤིང་ལ་སོགས་པ་ནི། སྤོས་ལ་སོགས་པ་མཆོད་པ་ཡིས། །ཞེས་
བྱའོ། །མཆོག་དང་པོ་ནི་བརྟག་པར་བྱ། །ཞེས་བྱ་བ་ནི་བཅོམ་ལྡན་འདས་ཀྱིས་ལྷ་མོའི་དཀྱིལ་འཁོར་ཁ་དོག་དང་དབྱིབས་ཀྱི་བདག་ཉིད་བསམ་པར་བྱ་བའི་ཚུལ་ཅན་གྱིས་བཅོམ་ལྡན་འདས་ཀྱི་ལྷ་མོའི་དཀྱིལ་འཁོར་བསྐྱེད་པར་བྱའོ། །ཇི་སྙེད་པ་ཞེས་
བྱ་བ་ནི་ཕྱིའི་ཡོ་བྱད་ཇི་སྙེད་པས་སོ། །ཅི་འདོད་པ་ཞེས་བྱ་བ་ནི་ཚད་ཅི་འདོད་པའོ། །ཅིའི་ཕྱིར་ཚད་ཅི་འདོད་པར་བརྟག་པར་བྱ་ཞེ་ན། མཆོག་དང་པོ་ཞེས་བྱ་བ་སྨོས་ཏེ་གང་གི་ཕྱིར་འདི་ནི་མཆོག་དང་པོ་ཡིན་ཞིང་ཆོས་ཀྱི་དབྱིངས་ཀྱི་རྒྱུ་མཐུན་པ་ལས་འབྱུང་བ་
ཡིན་པས་ན་ཐོག་མ་མེད་ཅིང་ཐ་མ་དང་དབུས་ཀྱི་ཆ་ཡང་མེད་པ་ཡིན་ནོ་ཞེས་བྱ་བའི་ཐ་ཚིག་གོ། །རྩེ་མོ་ཞེས་བྱ་བ་ནི་མཐའི་ཆའོ། །གང་ལ་མཐའ་ཡོད་པ་མ་ཡིན་པ་དེ་ནི་མཐའ་ཡས་མཆོག་སྟེ། མཐའ་དང་བྲལ་བའོ། །བླ་ན་མེད་པ་ཞེས་བྱ་བ་ནི་འདིའི་གོང་ན་
གཞན་མེད་པས་བླ་ན་མེད་པའོ། །རྒྱུ་འདི་ཉིད་ཀྱིས་ན་འདི་ལ་འདྲ་བའི་དཔེ་གཞན་མེད་པས་ན་དཔེ་མེད་པའོ། །ནམ་མཁའ་ཀུན་ལ་རབ་ཏུ་གནས། །ཞེས་བྱ་བ་ནི་ཟླ་བ་ལྟར་ཐམས་ཅད་དུ་སྣང་བར་གྱུར་པའི་ཕྱིར་རོ། །གྲོང་ཁྱེར་ཞེས་བྱ་བ་ནི་དཀྱིལ་
འཁོར་རོ། །དེ་ལྟར་བྱུང་བའི་ངོ་བོ་ཉིད་ཀྱིས་རྟག་ཏུ་བཞུགས་པས་ན་མི་འགྱུར་མཆོག་ཅེས་བྱ་སྟེ། རྟག་པ་ཞེས་བྱ་བའི་ཐ་ཚིག་གོ། །ཇི་ལྟར་ན་མི་འགྱུར་བའི་མཆོག་ཡིན་ཞེ་ན། ཐོག་མ་མེད་མཆོག་ཅེས་བྱ་བ་ལ་སོགས་པ་གསུངས་ཏེ། གང་གི་ཕྱིར་

འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་ཐམས་ཅད་བྱུང་ནས་རྟག་ཏུ་འཁོར་བར་བཞུགས་པའོ། །ཡང་ཞེས་བྱ་བའི་སྒྲས་ནི་མ་བྱུང་ན་ཡང་ཞེས་སྟོན་པ་ཡིན་ནོ། །བཞུགས་པ་ནི་ད་ལྟར་བྱུང་བའི་ངོ་བོ་ཉིད་ཀྱིས་
གནས་ཤིང་བཞུགས་པའོ། །དེ་བས་ན། གྲོང་ཁྱེར་དེ་ནི་མི་འགྱུར་མཆོག །ཅེས་བྱའོ། །གལ་ཏེ་བཞུགས་གནས་དེ་ནམ་མཁའ་ཐམས་ཅད་ལ་གནས་པས་ནམ་མཁའ་དང་མཉམ་པ་ཡིན་ནོ། །ཇི་ལྟར་ན་སོ་སོའི་སྐྱེ་བོ་རྣམ་པར་རྟོག་པ་ལྷན་ཅིག་
མ་ཚང་བས་ཀུན་དུ་གང་བ་ཡིན་ཞེ་ན། ཀུན་མཆོག་མཉམ་པ་ཉིད་ཀྱིས་ན། །ཞེས་བྱ་བ་གསུངས་ཏེ། དེ་བཞིན་ཉིད་བསྒོམས་པས་སོ་ཞེས་བྱ་བའི་ཐ་ཚིག་གོ། །ཐ་མ་དབུས་མེད་ནམ་མཁའ་ནི། །ཞེས་བྱ་བ་ནི་ནམ་མཁའ་གང་ལ་མཐའ་འམ་དབུས་མེད་པ་དེ་ནི་གྲོང་ཁྱེར་
འདིའོ། །མཐའ་དང་དབུས་མེད་པ་ན་འདི་ལ་དཀྱིལ་ཡང་མེད་དོ་ཞེ་ན། འདི་ཡི་དབུས་མར་བརྟགས་པ་ན། །ཞེས་བྱ་བ་གསུངས་ཏེ། འདིའི་དབུས་མར་བརྟགས་པས་ན་འདི་དབུས་ཀྱི་ཐ་སྙད་འཇུག་པ་ཡིན་ནོ། །ཐ་མ་བཞིའི་ཆ་མཉམ་པ་ལ་ལྟོས་ནས་ཚད་དུ་བྱ་བ་
ཉིད་འདིའི་དབུས་ཀྱི་ཆར་ཇི་ལྟར་བརྟག་པར་བྱ་ཞེ་ན། དེའི་ཕྱིར་ཕྱག་རྒྱའི་སྦྱོར་བའི་ཏིང་ངེ་འཛིན་གྱིས་རྣམ་པར་བརྟག་པ་འདིའི་དབུས་ཉིད་ཅེས་གསུངས་ཏེ། མི་འགྱུར་བའི་རང་བཞིན་གྱིས་གནས་འདི་ནས་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ཏིང་
ངེ་འཛིན་གྱིས་དབུས་ཀྱི་ཆར་སློབ་དཔོན་གྱིས་བརྟག་པར་བྱའོ། །དེ་ནས་ཅི་ཞིག་བྱ་ཞེ་ན། དེ་ལ་ཞེས་བྱ་བ་ལ་སོགས་པ་གསུངས་ཏེ། དེར་ཞེས་བྱ་བ་བཞུགས་གནས་དེའི་དབུས་སུ་སློབ་དཔོན་གྱིས་ཡུ་བར་བཅས་ཞེས་བྱ་བ་སྡོང་བུ་དང་བཅས་པའི་པདྨ་ཆེན་པོ་
བྱའོ། །དེ་ཁྱད་པར་ཇི་ལྟ་བུ་ཞེ་ན། སྣ་ཚོགས་འདབ་མས་ཡང་དག་ཁེབས། །ཞེས་བྱ་བ་གསུངས་ཏེ། ཁ་དོག་སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོའི་འདབ་མ་དང་ལྡན་པས་ཀུན་དུ་ཁེབས་པའོ། །ཅིའི་ཕྱིར་ཁ་དོག་སྣ་ལྔས་ཀུན་

ཏུ་ཁེབས་པ་ཡིན་ཞེ་ན། ཐམས་ཅད་དག་པ་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་བྱང་ཆུབ་ཀྱི་སེམས་ཆེན་པོ་དང་། མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པའི་ཡེ་ཤེས་ཀྱི་རང་བཞིན་ཅན་དཔལ་རྡོ་རྗེ་
སེམས་དཔའི་ཐམས་ཅད་དག་པའི་གདན་དུ་གྱུར་པ་ནི་པདྨ་དེ་ཡིན་ལ། དེ་བས་ན་ཡེ་ཤེས་སྣ་ཚོགས་པའི་རྣམ་པར་དག་པ་སྟོན་པར་བྱེད་པས་ན་ཁ་དོག་སྣ་ཚོགས་པ་ཡིན་ནོ། །དེ་ནས་ཐིག་ནི་གདབ་བྱས་ཏེ། །ཞེས་བྱ་བ་ནི་ཇི་སྐད་བཤད་པའི་ཚུལ་དང་། སློབ་མ་དཀྱིལ་
འཁོར་གྱི་ལྷ་ཐམས་ཅད་ལྷག་པར་གནས་པར་བྱས་ནས་ཉི་མ་འཆར་བའི་དུས་སུ་སློབ་དཔོན་གྱིས་ཇི་སྐད་བཤད་པའི་ཆོ་གས་སྲད་བུ་དཀྱིལ་འཁོར་གྱི་ཉིས་འགྱུར་དང་དེ་ནས་ཐིག་གདབ་པར་བྱའོ། །ཚད་ཇི་ཙམ་ཞེ་ན། ནམ་མཁའ་ཀུན་གྱི་ཚད་ཀྱིས་ནི། །ཚད་ནི་ཚད་མེད་
པ་ཉིད་ཡིན། །ཞེས་བྱ་བ་གསུངས་ཏེ། གང་གི་ཕྱིར་འདི་ནི་ནམ་མཁའ་དང་མཉམ་པ་ཡིན་པས་དེའི་ཕྱིར། འདི་ལ་ཁྲུ་ལ་སོགས་པའི་ཚད་ཀྱིས་ངེས་པར་མི་བྱ་བའི་ཐ་ཚིག་གོ། །ད་ནི་མི་མཉམ་མེད་པས་ཞེས་བྱ་བ་ལ་སོགས་པས་འདིའི་དབྱིབས་སུ་གསུངས་པ་ཡིན་
ཏེ་ཤར་དང་། ལྷོ་དང་། ནུབ་དང་། བྱང་གི་ངོས་བཞིའི་རི་མོ་དང་བཅས་པའི་ཟུར་བཞིའོ། །ཅིའི་ཕྱིར་ཞེ་ན། མི་མཉམ་མེད་པས་ཞེས་བྱ་བ་ལ་སོགས་པ་གསུངས་ཏེ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་ཚུལ་གྱིས་གནོད་
སེམས་ལ་སོགས་པ་མི་མཉམ་ཞིང་མི་ཟད་པ་དང་བྲལ་བས་མི་མཉམ་པ་མེད་པའོ། །དེ་ལྟར་ན་མི་མཉམ་པ་མེད་པས་ན་དཀྱིལ་འཁོར་འདི་ནི་ཟུར་བཞི་པ་ཡིན་ནོ། །དྲན་དང་དབང་པོ་སྒོ་བཞི་སྟེ། །ཞེས་བྱ་བ་འདི་ལ་ཤར་དང་། ལྷོ་དང་། ནུབ་དང་། བྱང་གི་སྒོ་བཞི་
ཡོད་པས་ན་སྒོ་བཞིའོ། །དྲན་ཞེས་སྨོས་པ་ནི་དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཀྱི་དབང་པོ་སྒོ་བཞིའི་ཚུལ་དུ་གྱུར་པ་འདི་ལས་ཐར་པའི་གྲོང་ཁྱེར་དུ་འཇུག་པར་འགྱུར་རོ་ཞེས་བསྟན་པར་བྱ་བའི་ཕྱིར་འདི་སྐད་སྨོས་པ་ཡིན་ནོ། །བསམ་

གཏན་རྣམས་ཀྱི་རྟ་བབས་བཞི། །ཞེས་བྱ་བ་ནི་འདི་ནི་བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་ལྡན་ནོ་ཞེས་བསྟན་པའི་ཕྱིར་རྟ་བབས་བཞི་དང་བཅས་པ་ཡིན་ནོ། །ཏིང་འཛིན་ཁྱམས་སུ་བཤད་པ་ཡིན། །ཞེས་བྱ་བ་ནི་གཞལ་ཡས་
ཁང་གི་ཕྱི་རོལ་ཀུན་ནས་ཡོངས་སུ་བསྐོར་བར་ཁ་ཁྱེར་གྱིས་བསྐོར་བ་དེ་ནི་ཁྱམས་ཞེས་བྱ་སྟེ། དེ་ནི་འདིའི་ཏིང་ངེ་འཛིན་ནོ་ཞེས་བཤད་ཅིང་བསྟན་ཏོ། །ཁྱམས་ལ་བརྟེན་པ་ཞེས་བྱ་བ་ལ་སོགས་པ་ལ་དཀྱིལ་འཁོར་གྲྭ་བཞིར་ཟླ་བ་ཕྱེད་པ་ལ་གནས་པའི་རྡོ་རྗེ་རིན་པོ་ཆེའི་
ཚུལ་གྱི་གཟུངས་རྣམས་ནི་རྡོ་རྗེའི་བདག་ཉིད་ཅན་གྱི་གཟུངས་རྣམས་སོ། །ཁྱམས་ལ་བརྟེན་པ་ལ་ཡང་ཡིན་ལ། རྡོ་རྗེའི་བདག་ཉིད་ཅན་གྱི་གཟུངས་རྣམས་ཀྱང་ཡིན་པས། ཁྱམས་ལ་བརྟེན་པའི་རྡོ་རྗེ་བདག་ཉིད་ཅན་གྱི་གཟུངས་རྣམས་ཞེས་བྱའོ། །འདི་ཉིད་ལྷ་མོ་
སྟེ། དེ་རྣམས་ཀྱིས་མཆོད་པའོ། །རྒྱན་རྣམས་ཀུན་གྱིས་ཞེས་བྱ་བ་ནི་གོས་དང་གདུགས་ལ་སོགས་པས་བཀྲ་བ་གང་ཡིན་པ་དེ་ནི་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ཡིན་ནོ། །ཐམས་ཅད་དུ་ཁྱབ་པས་ན་ཀུན་དུ་འགྲོ་བ་སྟེ་
ནམ་མཁའ་ཐམས་ཅད་ཁྱབ་པའོ། །འདིས་སེམས་ཅན་ཐམས་ཅད་རྣམས་འདུལ་བས་ན་འདུལ་བ་སྟེ། སངས་རྒྱས་དང་རྡོ་རྗེ་འཆང་ལ་སོགས་པའོ། །བསྐྱོད་པ་ནི་གཡོ་བར་བྱས་པའོ། །འཇིག་རྟེན་དང་འཇིག་རྟེན་ལས་འདས་པའི་བསྟན་པའི་ཆོས་རྣམས་སྣ་
ཚོགས་པའོ། །དམ་པ་སངས་རྒྱས་ལ་སོགས་པའི་ཆོས་ཡིན་པས་ན། འདུལ་བས་བསྐྱོད་པ་སྣ་ཚོགས་མཆོག །དམ་ཆོས་ཞེས་བྱའོ། །དེ་ལ་མཆོག་ཀྱང་ཡིན་ལ། དེ་ཐམས་ཅད་དུ་འགྲོ་བ་ཡང་ཡིན་པས་ན། འདུལ་བས་བསྐྱོད་པ་སྣ་ཚོགས་མཆོག །
དམ་ཆོས་མཆོག་སྟེ་ཀུན་དུ་འགྲོ། །ཞེས་བྱའོ། །ཡོན་ཏན་འདི་གསལ་བར་བསྟན་པར་བྱ་བའི་ཕྱིར་རླུང་གིས་བསྐྱོད་པ་སྣ་ཚོགས་པའོ། །བ་དན་རྩེར་བཏགས་དྲིལ་སྒྲ་སྒྲོགས། །ཞེས་བྱ་བ་འདི་བྲིས་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི། མེ་ལོང་ལྟ་བུའི་ཡེ་

ཤེས་རྟག །ཅེས་བྱ་བ་ཡིན་ནོ། །ཐབས་ཀྱི་ཕ་རོལ་ཏུ་ཕྱིན་པ་ནི་མེ་ཏོག་ཅེས་བྱ་བ་དུས་ཐམས་ཅད་པའི་མེ་ཏོག་ཡིན་ནོ། །བྱང་ཆུབ་ཡན་ལག་མེ་ཏོག་ཕྲེང་། །ཞེས་བྱ་བ་ནི་བྱང་ཆུབ་ཀྱི་ཡན་ལག་བདུན་ནི་མེ་ཏོག་གི་ཕྲེང་བའི་མཚན་ཉིད་ཅན་ཡིན་ནོ། །དེ་དག་
གསལ་བར་བསྟན་པའི་ཕྱིར། །དྲ་བ་མེ་ལོང་མེ་ཏོག་ཆེ། །མེ་ཏོག་ཕྲེང་བ་རྒྱན་གྱིས་བསྐོར། །ཞེས་བྱ་བ་འདི་བྲིས་པ་ཡིན་ནོ། །ཀུན་གྲུབ་མི་འགྱུར་བདེ་བ་ནི། །བདེ་བ་ཆེན་པོ་ཞེས་བཤད་དོ། །ཞེས་བྱ་བ་འདི་ནི་དངོས་གྲུབ་ཐམས་ཅད་ཀྱི་རང་བཞིན་མི་འགྱུར་བའི་
བདེ་བ་དེ་ཉིད་ནི་བདེ་བ་ཆེན་པོ་ཞེས་བཤད་ཅིང་བསྟན་པ་ཡིན་ནོ། །ཚུལ་དེ་ལྟར་བདེ་བ་ཆེན་པོ་རྡོ་རྗེ་སེམས་དཔའི་བཞུགས་གནས་དང་། དང་པོའི་གནས་བྲི་བར་བྱའོ། །དེ་ལྟར་ཐར་པའི་གྲོང་ཁྱེར་དེ་ལེགས་པར་བྲིས་ནས་ཐོག་མ་དང་ཐ་མ་མེད་པ་ཡིན་པའི་ཕྱིར་
ཕྱོགས་ཐམས་ཅད་མཉམ་པ་ཉིད་དུ་བསམ་ཞིང་མངོན་དུ་བྱའོ། །དེ་ལྟར་འདི་ཡན་ཆད་ཀྱི་གཞུང་གིས་ནི་ཕྱིའི་དཀྱིལ་འཁོར་སྟོན་པར་གྱུར་པ་ཡིན་ནོ། །ཕྱིའི་དཀྱིལ་འཁོར་དེའི་ནང་དུ་དབུས་སུ་རྡོ་རྗེ་འཁོར་ལོ་ཞེས་བྱ་བའི་ཐིག་གདབ་པ་ནི་ནང་གི་དཀྱིལ་འཁོར་ཡིན་ནོ། །
ཇི་ལྟ་བུ་ཞེ་ན། དཀྱིལ་འཁོར་བརྒྱད་པ་ལྟ་བུ་ནི། །ཞེས་བྱ་བ་སྨོས་ཏེ། དཀྱིལ་འཁོར་བརྒྱད་པའི་ཐིག་གིས་དཀྱིལ་འཁོར་བརྒྱད་པ་ལྟར་བྱས་པ་གང་ཡིན་པ་དེ་ནི་དཀྱིལ་འཁོར་བརྒྱད་པ་ལྟ་བུ་ཡིན་ཞེས་བྱའོ། །ཅི་ཞིག་གི་རང་བཞིན་ཡིན་ཞེ་ན། འདི་ནི་རྣམ་ཐར་བརྒྱད་པོ་སྟེ། །
དངོས་གྲུབ་ཀུན་གྱི་བདེ་བ་སྟེར། །ཞེས་བྱ་བ་སྨོས་ཏེ། རྣམ་པར་ཐར་པ་བརྒྱད་ནི་བཤད་ཟིན་ཏོ། །དེའི་རང་བཞིན་ཡིན་པ་ཉིད་ཀྱིས་འདི་ནི་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཐམས་ཅད་རབ་ཏུ་སྟེར་བ་ཡིན་ནོ། །ཐེག་པ་ཆེན་པོ་ལ་སོགས་པ་གདུལ་བྱ་རྣམས་
ཀྱི་བྱང་ཆུབ་ཀྱི་སེམས་ཀྱི་རང་བཞིན་ཅན་གྱི་བྱང་ཆུབ་སེམས་དཔའི་ལམ་འབྲས་བུ་དང་བཅས་པའི་མདོ་སྡེའི་འཁོར་ལོ་གདུལ་བྱའི་སྐྱེ་བོའི་རྒྱུད་ལ་བསྐོར་ཞིང་སྐྱེད་པར་མཛད་པས་ན། ཐེག་པ་ཆེན་པོ་བྱང་ཆུབ་ཀྱི་སེམས་མདོ་སྡེའི་འཁོར་ལོ་བསྐོར་བའི་རྒྱུ་དེས་ན། རྡོ་རྗེ་ཐིག་གིས་ཡོངས་

བསྐོར་བར། །ཞེས་བྱ་བ་རྡོ་རྗེའི་ཕྲེང་བས་ཕྱི་རོལ་ཀུན་ནས་ཡོངས་སུ་བསྐོར་བར་ནང་གི་དཀྱིལ་འཁོར་བྲི་བར་བྱའོ། །དེར་ཞེས་བྱ་བ་ནི་ནང་གི་དཀྱིལ་འཁོར་གྱི་ལྟེ་བའི་ཕྱོགས་སུ་སྣ་ཚོགས་པདྨ་ཆེན་པོ་བྲིས་པར་རྡོ་རྗེ་སེམས་དཔའ་དགོད་པར་བྱའོ། །ཇི་ལྟར་ཞེ་ན། ལུགས་མ་
འམ་ཞེས་བྱ་བ་ལ་སོགས་པ་སྨོས་ཏེ། གསེར་དངུལ་ལ་སོགས་པ་བཞུ་ནས་བླུགས་ཏེ་སྐུ་གཟུགས་སུ་བྱས་པ་ནི་ལུགས་མའོ། །ཤེལ་ལ་སོགས་པ་ལ་འབུར་དུ་བརྐོས་ཏེ་བྱས་པ་ནི་བརྐོས་པའོ། །ཤིང་མཁན་གྱི་བཟོ་བོས་བྱས་པ་ནི་བྱས་པའོ། །རས་དཀར་པོ་ལ་སོགས་
པ་ལ་ཚོན་གྱིས་བྲིས་པ་ནི་བྲིས་པའོ། །འཛུམ་བཅས་ཟླ་བའི་མདོག་ཅན་ལ། །ཞེས་བྱ་བ་ནི་གོ་བར་ཟད་དོ། །དམར་ཞིང་སྣ་ཚོགས་འོད་འབར་བ། །ཞེས་བྱ་བ་ནི་དམར་བ་སྟེ་ཁ་དོག་དམར་པོའི་མཐར་དཀར་པོ་དང་། སེར་པོ་དང་། སྔོན་པོ་དང་། ལྗང་གུ་དང་། དམར་པོའི་རི་མོ་
སྣ་ཚོགས་ཤིང་འབར་བ་གང་ཡིན་པ་དེ་ནི་དམར་ཤིང་ཁ་དོག་འབར་བ་ཞེས་བྱའོ། །སངས་རྒྱས་ཀྱང་ཡིན་ལ་ཐམས་ཅད་ཀྱང་ཡིན་པས་ན་སངས་རྒྱས་ཐམས་ཅད་དེ་དེ་བཞིན་གཤེགས་པ་ལྔའོ། །དེ་དང་ལྡན་པའི་ཅོད་པན་ནི་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བའོ། །
དེ་ཉིད་ལ་སོགས་པ་ནི་གདུ་བུ་དང་། སྙན་ཆ་དང་། དཔུང་རྒྱན་ལ་སོགས་པ་དང་། ན་བཟའ་སྣ་ཚོགས་ཤིང་རྣམ་པ་ཐ་དད་པ་མངའ་བ་གང་ཡིན་པ་དེ་ནི། སངས་རྒྱས་ཀུན་གྱི་དབང་བསྐུར་སོགས། །རྒྱན་དང་ན་བཟའ་སྣ་ཚོགས་པ། །ཞེས་བྱའོ། །སེམས་དཔའི་སྐྱིལ་མོ་ཀྲུང་
ནི། རྡོ་རྗེ་སྐྱིལ་ཀྲུང་ཕྱེད་པའོ། །དེས་བཞུགས་པས་ན། སེམས་དཔའི་སྐྱིལ་མོ་ཀྲུང་གིས་བཞུགས། །ཞེས་བྱའོ། །རྡོ་རྗེ་སྙེམས་པ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོའོ། །དེས་འཛིན་པར་མཛད་པས་ན། རྡོ་རྗེ་སྙེམས་ཚུལ་འཆང་བའི་མཆོག །ཅེས་བྱ་སྟེ།
མཆོག་ནི་དང་པོའོ། །སུ་ར་ཏ་སྟྭཾ་ཞེས་བརྗོད་ལ་ཞེས་བྱ་བ་ནི་ཨོཾ་སུ་ར་ཏ་སྟྭཾ་ཧཱུཾ་ཞེས་བརྗོད་ལ་བཞུགས་སུ་གསོལ་བར་བྱའོ། །དེ་ཡི་ཕྱོགས་ནི་ཐམས་ཅད་དུ། །ཞེས་བྱ་བ་ལ་སོགས་པ་ནི་གོ་སླའོ། །དམ་ཚིག་མཆོག་ནི་འདི་རྣམས་ཀྱིས། །ཞེས་བྱ་བ་ནི། ཛཿབཛྲ་དྲྀཥྚི་

ས་མ་ཀེ་མ་ཊ་ཞེས་བྱ་བ་ནས། བཛྲ་གྷཎྚེ་ཧོཿཞེས་བྱ་བའི་བར་གསུང་གི་ཕྱག་རྒྱས་འདའ་བར་མི་བྱ་བའི་རང་བཞིན་ཅན་ནི་མཆོག་སྟེ། དམ་པར་གྱུར་པ་ནི་འདི་རྣམས་ཀྱི་སྐུ་དང་། གསུང་དང་ཐུགས་རྡོ་རྗེ་བཞུགས་པ་བརྟག་པ་ནི་དགོངས་པ་བརྟག་པ་ཞེས་བྱའོ། །
གང་གིས་དེ་རྣམས་དགོངས་པར་འགྱུར་ཞེ་ན། རྡོ་རྗེ་ལྷ་མོ་ལ་སོགས་ཚོགས། །ཞེས་བྱ་བ་སྨོས་ཏེ། འདོད་ཆགས་རྡོ་རྗེ་མ་ལ་སོགས་པའི་སྐུ་གཟུགས་ལ་འདོད་ཆགས་རྡོ་རྗེ་མ་ལ་སོགས་པ་ལྷ་མོའི་ཚོགས་རྣམས་དགོངས་ཤིང་བྱིན་གྱིས་བརླབས་པར་འགྱུར་བའོ། །དངོས་གྲུབ་
ཀུན་ལ་གྲུབ་པར་འགྱུར། །ཞེས་བྱ་བ་ནི་རྡོ་རྗེ་ལྷ་མོ་ལ་སོགས་པ་དགོངས་ཤིང་བྱིན་གྱིས་རློབ་པ་དེ་རྣམས་སློབ་དཔོན་དང་སློབ་མ་དེ་ཇི་ལྟར་མངོན་པར་འདོད་པའི་དངོས་གྲུབ་རྣམས་གྲུབ་པར་མཛད་པའོ། །དེ་ནས་སྐུ་མཆོག་ལ་སོགས་པ། །མངོན་བྲིས་ཡང་དག་བསྒྲུབ་པར་བྱ། །
ཞེས་བྱ་བ་ནི་དེའི་རྗེས་ཐོགས་ལ་བཤད་མ་ཐག་པའི་དགོད་པའི་ཆོ་གས་ཀུན་མཆོག་ལ་སོགས་ཏེ་དཔལ་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་དྲིལ་བུ་མའི་བར་གྱི་ལྷ་རྣམས་བཀོད་པ་ཡང་དག་པར་བསྒྲུབ་པར་བྱའོ། །ཅི་ཞིག་ཟློས་ཤིང་བསྒྲུབ་པར་བྱ་ཞེ་ན། དམ་
ཚིག་མཆོག་ནི་བཅིངས་ནས་སུ། །ཛཿཧཱུཾ་བཾ་ཧོཿཞེས་བརྗོད་བྱ། །ཞེས་བྱ་བ་གསུངས་ཏེ། དང་པོའི་རྡོ་རྗེ་ལ་སོགས་པ་ནི་ཕྱག་རྒྱ་ནི་དམ་ཚིག་མཆོག་སྟེ། དེ་བཅིངས་ལ་ཛཿཧཱུཾ་བཾ་ཧོཿ། ཞེས་བྱ་བ་རྡོ་རྗེ་ཚིག་གིས་ཟློས་བཞིན་པ་བསྒྲུབ་པར་བྱ་ཞིང་རང་དབང་དུ་བྱའོ། །ཅི་ཞིག་ཟློས་
ཤིང་བསྒྲུབ་པར་བྱ་ཞེ་ན། ཅི་ཞིག་བྱས་ནས་ཡང་དག་པར་བྱས་ཤེ་ན། རེ་ཞིག་དང་པོར་བཅོམ་ལྡན་འདས་རྡོ་རྗེ་སེམས་དཔའི་སྤྱན་སྔར་རྣལ་འབྱོར་པ་རྡོ་རྗེ་སེམས་དཔའི་སྦྱོར་བས་འདུག་ལ། བདེ་བ་ཆེན་པོ་རྡོ་རྗེ་མཆོག །གསང་བའི་ལྕགས་ཀྱུའི་ཕྱག་རྒྱ་དྲིལ་བུ་དང་
བཅས་པས་བདག་པོ་སྟེ། གཙོ་བོ་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་ལན་ཅིག་ཡང་དག་པར་དགུག་པར་བྱ་ཞིང་སྤྱན་དྲངས་པར་བྱའོ། །སྔགས་གང་གིས་ཤེ་ན། མ་ཧཱ་སུ་ཁ་ཞེས་བྱ་བ་ནས། ཛཿཧཱུཾ་བཾ་ཧོཿཞེས་བྱ་བའི་བར་གྱིས་སོ། །འདི་

ཡིས་ཞེས་བྱ་བ་ནི་སྤྱན་དྲང་བའི་ཆོ་གས་སོ། །བཅོམ་ལྡན་འདས་རྟག་པར་ནི་ཞེས་བྱ་བ་ནི་བརྟན་པའོ། །རང་ཉིད་ཅེས་བྱ་བ་ནི་བདག་ཉིད་རྡོ་རྗེ་སློབ་དཔོན་གྱིས་བྲིས་པའི་དཀྱིལ་འཁོར་དུ་བྱོན་ཞིང་གཤེགས་པར་འགྱུར་རོ། །དེ་ནས་བཅོམ་ལྡན་འདས་རྡོ་རྗེ་སེམས་དཔའ་
འཁོར་དང་བཅས་པ་གནས་ཇི་ལྟ་བ་བཞིན་དུ་བཞུགས་པར་བྱའོ། །ཅིའི་ཕྱིར་ཞེ་ན། དགུག་ཅིང་ཞེས་བྱ་བ་ལ་སོགས་པ་གསུངས་ཏེ་གང་གི་ཕྱིར་སྤྱན་དྲང་བའི་ཆོ་ག་འདིས་དགུག་པ་དང་། གཞུག་པ་དང་བཅིང་བ་བྱས་ལ། ཞུགས་ནས་ཤིན་ཏུ་བརྟན་པ་སྟེ། ཐུགས་གཞན་
དུ་མི་འགྱུར་བས་དབང་དུ་བྱས་ནས་གྲུབ་པར་འགྱུར་རོ། །འོད་ཟེར་ཀུན་དུ་སྟོན་ལ་སོགས། །ཞེས་བྱ་བ་ནི་གོ་སླའོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་བཅོམ་ལྡན་འདས་འཁོར་དང་བཅས་པ་སྤྱན་དྲངས་ནས་རྗེས་ཐོགས་ཉིད་ལ་བཤད་པའི་རྡོ་རྗེ་མཆོད་ཡོན་གྱིས་བཅོམ་ལྡན་
འདས་འཁོར་དང་བཅས་པ་ལ་མཆོད་ཡོན་དབུལ་བར་བྱའོ། །དེ་ལྟར་མཆོད་ཡོན་ཕུལ་ནས་བུམ་པ་གང་བ་ལ་སོགས་པས་བཅོམ་ལྡན་འདས་འཁོར་དང་བཅས་པ་ལ་ཀུན་དུ་མཆོད་པར་བྱའོ། །གང་གིས་མཆོད་ཡོན་ཕུལ་བར་བྱེད་པའི་མཆོད་ཡོན་གྱི་ཕྱག་རྒྱ་དེ་ཇི་ལྟར་དབུལ་བར་བྱ་
ཞེ་ན། རྡོ་རྗེ་ཐལ་མོ་ཁ་ཕྱེ་བ། །ཞེས་བྱ་བ་གསུངས་ཏེ། གཞི་ཐལ་མོ་སྦྱར་བ་ལས་རྡོ་རྗེ་ཐལ་མོ་ཁ་ཕྱེ་བ་ནི་མེ་ཏོག་གི་རྡོ་རྗེ་ཐལ་མོ་སྟེ་ཁ་ཕྱེ་བའོ། །འདི་སྐད་སྟོན་པ་ཡིན་ཏེ། རྡོ་རྗེ་ཐལ་མོ་བཅིངས་ལ། མཐེ་བོང་གཉིས་བརྐྱང་སྟེ་སོར་མོ་ལྷག་མ་རྣམས་ཀྱི་རྡོ་རྗེ་ཐལ་མོ་ཁ་མ་
ཕྱེ་བར་གཞིའི་ཐལ་མོ་བྱས་ལ་སོར་མོ་ཐམས་ཅད་རྡོ་རྗེའི་ཚུལ་ཉིད་ཀྱིས་སོ་སོར་གཞག་པར་བྱའོ། །བུམ་པ་གང་བ་ཞེས་བྱ་བ་ལ་སོགས་པ་ནི་གོ་སླའོ། །དེ་ནས་འཁོར་ལོར་མ་ཞུགས་ཀྱང་། །ཞེས་བྱ་བ་ནི་དེ་ལྟར་བཤད་མ་ཐག་པའི་ཆོ་གས་ཞུགས་ནས་དེའི་རྗེས་
ལ་བདག་ཉིད་ཐོག་མར་འབྱུང་བར་ཞུགས། །རྡོ་རྗེ་ཀུན་གྱིས་སློབ་དཔོན་ཆེར། །རྡོ་རྗེ་སེམས་དཔར་བྱིན་གྱིས་རློབ། །ཅེས་བྱ་བ་སྟེ། གང་གིས་དཀྱིལ་འཁོར་དུ་འཇུག་པའི་ཆོ་གས་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་དུ་ཞུགས་པ་དེ་ནི་འཁོར་ལོར་མ་

ཞུགས་སུ་ཟིན་ཀྱང་དཀྱིལ་འཁོར་དུ་ཞུགས་པ་ཡིན་ནོ། །ཀྱང་ཞེས་བྱ་བའི་སྒྲས་ནི་འཁོར་ལོར་ཞུགས་པ་དག་ལ་ནི་ཤིན་ཏུ་ཡང་བྱིན་གྱིས་རློབ་པར་འགྱུར་རོ། །བདག་ཉིད་ཅེས་བྱ་བ་ནི་རང་ཉིད་དོ། །ཐོག་མར་འབྱུང་ཞེས་བྱ་བ་ནི་བསྐལ་པ་བཟང་
པོ་ལ་སོགས་པའི་སྔོན་དུ་ཡང་དག་ད་ལྟར་བྱུང་བའི་ཚུལ་གྱིས་བཞུགས་པའི་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་རོ། །ཞུགས་ཏེ་ཞེས་བྱ་བ་ནི་འཇུག་པའི་ཆོ་གས་ཞུགས་པའོ། །རྡོ་རྗེ་ཀུན་གྱི་ནི་སངས་རྒྱས་ཐམས་ཅད་ཀྱི་སློབ་དཔོན་ཆེན་པོ་ཡིན་པས། རྡོ་རྗེ་ཀུན་གྱི་
སློབ་དཔོན་ཆེར། །ཞེས་བྱ་བ་སྟེ། སངས་རྒྱས་ཐམས་ཅད་ཀྱི་རིགས་རྣམ་པ་བརྒྱའི་དཀྱིལ་འཁོར་གྱི་སློབ་དཔོན་ཞེས་བྱ་བའི་ཐ་ཚིག་གོ། །རྡོ་རྗེ་ཅན་གྱིས་རང་བྱིན་རློབ། །ཅེས་བྱ་བ་ནི་རྡོ་རྗེ་འཆང་ཆེན་པོས་རང་ཞེས་བྱ་བ་སློབ་དཔོན་གྱི་རང་བཞིན་རྡོ་རྗེ་འཆང་ཆེན་པོའི་ངོ་བོར་བྱིན་
གྱིས་རློབ་ཅིང་བསྐྱེད་པ་བརྟན་པར་འགྱུར་བའོ། །དེ་ནས་ཞེས་བྱ་བ་ནི་རྒྱུ་སྟེ། གང་གི་ཕྱིར་དཀྱིལ་འཁོར་འདིར་ཞུགས་པའི་སངས་རྒྱས་ཐམས་ཅད་ཀྱི་སློབ་དཔོན་ཆེན་པོ་ལ་བཅོམ་ལྡན་འདས་རྡོ་རྗེ་སེམས་དཔར་བྱིན་གྱིས་རློབ་པར་མཛད་དོ། །དེ་བས་ན་འདིས་རྡོ་རྗེ་སེམས་
དཔའི་རྣལ་འབྱོར་ཆེན་པོ་དང་ལྡན་པའི་རྡོ་རྗེ་འཛིན་པའི་སློབ་དཔོན་འོག་ནས་བཤད་པའི་ཆོ་ག་འདིས་འཇུག་པར་བྱའོ། །ཁྲུས་བྱས་དྲི་ཡིས་རྗེས་བྱུགས་ཤིང་། །ཞེས་བྱ་བ་ལ་སོགས་པ་ནི་གོ་བར་ཟད་དོ། །ཕྱག་རྒྱ་ཀུན་གྱི་སྦྱོར་ཆེན་ལྡན། །ཞེས་བྱ་བ་ནི་རྡོ་རྗེ་སེམས་དཔའ་
ལ་སོགས་པ་ནས་རྡོ་རྗེ་དྲིལ་བུ་མའི་བར་གྱི་དམ་ཚིག་དང་། ཆོས་དང་ལས་དང་། ཕྱག་རྒྱ་ཆེན་པོ་ནི་དམ་ཚིག་ཀུན་ནོ། །དེའི་རྣལ་འབྱོར་ཆེན་པོ་ནི། །སངས་རྒྱས་ཀུན་གྱི་སྦྱོར་ཆེན་ནོ། །དེ་འདི་ལ་ཡོད་པས་ན། ཕྱག་རྒྱ་ཀུན་གྱི་སྦྱོར་ཆེན་ལྡན་ནོ། །མི་ཤེས་པ་ཞེས་བྱ་
བས་ནི་གོ་བར་ཟད་དོ། །མཆོག་དང་པོ་ཞེས་བྱ་བ་ནི་མཆོག་ཀྱང་ཡིན་ལ་དང་པོ་ཡང་ཡིན་པས་ན་མཆོག་དང་པོ་སྟེ་མཆོག་ནི་ཕུལ་དུ་བྱུང་བའོ། །དང་པོ་ནི་བསྐལ་པ་བཟང་པོ་ལ་སོགས་པའི་ཡང་ཐོག་མར་དང་ད་ལྟར་བྱུང་བའི་ངོ་བོ་ཉིད་ཀྱིས་ལྷ་མོའི་དཀྱིལ་འཁོར་གྱི་དབུས་

ན་ཡི་གེ་ཧཱུཾ་ཟློས་པ་ལ་མངོན་པར་བརྩོན་པར་རྟག་པར་རྒྱུན་དུ་ཞུགས་པའོ། །དེ་ཡང་། ཐོག་མཐའ་མེད་ཅིང་མཆོག་གྱུར་པས། །མཆོག་དང་པོར་ཞེས་བྱ་བར་བཤད། །འཁོར་ལོར་ཀུན་བདག་ཉིད་འགྱུར་བས། །མཆོག་སྟེ་མི་འགྱུར་མཆོག་ཡིན་ནོ། །ཞེས་གསུངས་པ་
ཡིན་ནོ། །སེམས་དཔའ་ཆེན་པོ་ཞེས་བྱ་བ་ནི་སེམས་དཔའ་ཡང་ཡིན་ལ་ཆེན་པོ་ཡང་ཡིན་པས་ན་སེམས་དཔའ་ཆེན་པོ་སྟེ། ཆོས་ཐམས་ཅད་བདག་མེད་པར་རྟོག་པའི་ངོ་བོ་ཉིད་ཀྱིས་ཐམས་ཅད་དུ་ཁྱབ་པའི་རྡོ་རྗེ་ཡིད་ལས་བྱུང་བ་དང་། འདོད་ཆགས་རྡོ་རྗེ་མའོ། །དེ་ཡང་
འདི་ནི་བཅོམ་ལྡན་འདས་ཀྱི་ཐུགས་འབིགས་ཤིང་མྱུར་བའི་སྙིང་པོ་ཡིན་པའི་ཕྱིར་ཆགས་པའི་ཡན་ལག་ཡིན་ནོ་ཞེས་བྱ་བ་བཤད་པ་ཡིན་ནོ། །རྡོ་རྗེ་ཡིད་ལས་བྱུང་བའི་དབང་དུ་མཛད་ནས་ཐམས་ཅད་ཀྱི་མཆོག་སོ་སོར་རྟོགས་པར་བྱ་བ་ནི་འདོད་ཆགས་རྡོ་རྗེ་མའི་དབང་དུ་བྱས་
པའོ། །དགའ་བ་ཆེན་པོ་ཞེས་བྱ་བ་ནི་དགའ་བ་ཡང་ཡིན་ལ་ཆེན་པོ་ཡང་ཡིན་པས་ན། དགའ་བ་ཆེན་པོ་སྟེ། ཆེན་པོ་ཉིད་ནི་བྱང་ཆུབ་ཀྱིས་མཚན་ཉིད་ཅན་རྡོ་རྗེ་རལ་པ་མ་དང་། རྡོ་རྗེ་ཀཱི་ལི་ཀི་ལ་གཉིས་ཀྱིས་གཉིས་སུ་མེད་པའི་ཐུགས་མངོན་དུ་བྱས་པས་ཐམས་ཅད་དུ་ཁྱབ་
ཅིང་། གཟུགས་ཐམས་ཅད་ཀུན་དུ་སྟོན་པ་ཉིད་ཀྱིས་ན་ཆེ་བ་ཡིན་ནོ། །དེ་ཡང་། ཉེས་པ་མེད་ཅིང་ཤིན་ཏུ་བརྟག །འདོད་ཆགས་ཀུན་གྱི་རྗེས་སུ་ཆགས། །དེ་ཉིད་གསང་བ་བཅོམ་ལྡན་འདས། །འདོད་ཆགས་ཆེན་པོ་དགའ་བ་ཆེ། །ཞེས་གསུངས་པ་ཡིན་ནོ། །དགའ་
བ་ནི་དགའ་ཞིང་མགུ་བ་མཐའ་ཡས་པ་མི་གནས་པའི་མྱ་ངན་ལས་འདས་པ་དང་། སོ་སོར་རྟོག་པའི་ཡེ་ཤེས་ཀྱི་རྒྱུ་མཐུན་པ་ལས་བྱུང་བ་རྡོ་རྗེ་དྲན་པ་དང་། རྡོ་རྗེ་དྲན་མའི་ངོ་བོ་དགའ་བ་འདི་ལ་མངའ་བས་ན་དགའ་བ་ཆེན་པོའོ། །ཀུན་དུ་བཟང་པོ་ཞེས་བྱ་བ་ནི་འདི་ལ་ཀུན་
ནས་བཟང་བ་མངའ་བས་ཏེ་སངས་རྒྱས་ཉིད་དམ་བྱང་ཆུབ་སེམས་དཔའ་ཉིད་འདི་ལས་འབྱུང་བས་ན་ཀུན་དུ་བཟང་པོའོ། །རྡོ་རྗེ་སྙེམས་པ་ནི་རྡོ་རྗེ་སྙེམས་པའི་ཆ་ལུགས་འཆང་བའི་རྡོ་རྗེ་འཆང་ཆེན་པོའོ། །ཀུན་བདག་ཉིད་ནི་རབ་ཏུ་དགའ་བ་ལ་སོགས་པ་ལྷ་མོ་ཐམས་ཅད་

ཀྱི་ཚུལ་འཛིན་པའི་རྡོ་རྗེ་འཆང་ཆེན་པོའོ། །དོན་འདི་ཉིད་ནི་འདིའི་འོག་ནས། །ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔའ་གོ་ཆ་མཆོག །ཅེས་བྱ་བ་བཤད་པ་ཡིན་
ནོ། །རྡོ་རྗེ་སྙེམས་ཚུལ་བདག་པོ་ནི། །ཞེས་བྱ་བ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་དང་། ལྷ་མོ་རྡོ་རྗེ་སྙེམས་མ་ནི་རྡོ་རྗེ་སྙེམས་ཚུལ་ཞེས་བྱའོ། །དེའི་བདག་པོ་ཡིན་པས་ན་རྡོ་རྗེ་སྙེམས་མ་བདག་པོ་སྟེ། ཆོས་ཀྱི་དབྱིངས་ཐོག་མ་དང་ཐ་མ་མེད་པའི་རང་བཞིན་རྡོ་རྗེ་འཆང་ཆེན་
པོ་ནི་གང་གི་ཕྱིར་གཉིས་སུ་མེད་པའི་ཡེ་ཤེས་ཀྱི་རྒྱུ་མཐུན་པ་ནི་རྡོ་རྗེ་སྙེམས་ཚུལ་ཡིན་པའི་ཕྱིར་རོ། །དེ་ཡང་ཐུགས་ནི་བཅོམ་ལྡན་འདས་འདོད་ཆགས་ཆེན་པོ་དང་འདིའི་ལྷ་མོ་ཞེས་གསུངས་པས། བྱེ་བྲག་གི་ཚིག་གསུངས་པའི་ཕྱིར་དང་། ཡང་། དངོས་གྲུབ་ཆེན་པོ་ཀུན་གྱི་
མཆོག །དབང་ཕྱུག་ཆེན་པོ་ཕྱག་རྒྱའི་མཆོག །རྡོ་རྗེའི་དབང་བསྐུར་ཆེར་བསྟོད་པ། །རྡོ་རྗེ་སྙེམས་ཚུལ་བདག་པོའི་བདག །ཅེས་ཀྱང་གསུངས་པ་ཡིན་ནོ། །བདག་ཅེས་བྱ་བ་ནི་ཡང་དག་པར་རྫོགས་པའི་སངས་རྒྱས་ལ་སོགས་པའི་དངོས་པོ་རྣམས་རྒྱུན་དམིགས་སུ་མེད་པའི་
ཐུགས་རྗེ་ཆེན་པོའི་རང་བཞིན་བཅོམ་ལྡན་འདས་རྡོ་རྗེ་སེམས་དཔའ་ཡིན་པས་བདག་པོ་སྟེ། བསྐྱེད་པའི་རྒྱུ་ཞེས་བྱ་བའི་ཐ་ཚིག་གོ། །སེམས་དང་ཞེས་བྱ་བ་ནི་སེམས་ཅན་ཐམས་ཅད་ཀྱི་རྒྱུད་ལ་ཡོད་པའི་སེམས་དང་སེམས་ལས་བྱུང་བའོ། །རང་བཞིན་གྱིས་འོད་གསལ་
བ་ནི་དགེ་བའི་ཁམས་བསགས་པ་ཡིན་པས་ན་སེམས་ཞེས་བྱའོ། །དེ་ཡང་། བསམ་གྱིས་མི་ཁྱབ་རྒྱ་ཆེར་ཟབ། །དངོས་གྲུབ་ཀུན་གྱི་མི་འགྱུར་བདེ། །ཀུན་དུ་ཁྱབ་ཅིང་དྲི་མ་མེད། །བྱང་ཆུབ་སེམས་སྙོམས་བརྟན་པ་དག །ཅེས་གསུངས་པ་ཡིན་ནོ། །འདི་རྟོགས་
པར་བྱ་བའི་ཕྱིར་མན་ངག་གསུངས་པ་ནི་སེམས་དཔའ་ཞེས་བྱ་བ་ལ་སོགས་པ་ཡིན་ཏེ་སེམས་ཅན་ཐམས་ཅད་ཀྱི་རྒྱུད་ལ་ཡོད་པའི་སེམས་དེ་ཉིད་རང་བཞིན་གྱིས་དག་པར་རྟོག་པས་རྣམ་པར་རྟོག་པ་ཐམས་ཅད་ཀྱིས་བསྐྱོད་པར་མི་ནུས་པ་ལ་ནི་སེམས་དཔའ་ཞེས་བྱ་སྟེ། སེམས་ནི་

བརྟན་པས་སེམས་དཔར་བཤད། །ཅེས་གསུངས་པ་ཡིན་ནོ། །རྣམ་པར་རྟོག་པ་ཐམས་ཅད་ཀྱིས་མི་ཕྱེད་པའི་སེམས་དཔར་གྱུར་པ་དེ་ཉིད་རྣམ་པར་གཡེང་བ་ཐམས་ཅད་དང་བྲལ་བས་ཏིང་ངེ་འཛིན་མཆོག་ཅེས་བྱ་སྟེ་ཏིང་ངེ་འཛིན་གྱི་དམ་པའོ། །དེ་ཡང་དེ་མཉམ་པར་བཞག་པས་
ཏིང་ངེ་འཛིན་ཞེས་གསུངས་པ་ཡིན་ཏེ། དེ་བཞིན་ཉིད་ཀྱི་རྣམ་པར་སེམས་རྩེ་གཅིག་པའི་ཚུལ་གྱིས་ཏིང་ངེ་འཛིན་ཐམས་ཅད་ལས་མཆོག་ཏུ་གྱུར་པའི་ཕྱིར་རོ། །རྡོ་རྗེ་ཞེས་བྱ་བ་ནི་ཆོས་བདག་མེད་པའི་ཏིང་ངེ་འཛིན་གྱི་རང་བཞིན་དེ་ཉིད་ཟླ་བའི་དཀྱིལ་འཁོར་གྱི་རྣམ་པར་ཟླ་བའི་དཀྱིལ་
འཁོར་ལས་རྡོ་རྗེ་རྡོ་རྗེར་ངེས་པ་ལས་སེམས་དཔའི་རྡོ་རྗེར་གྱུར་པའི་སེམས་དེ་ནི་རྣམ་པར་རྟོག་པ་ཐམས་ཅད་དང་བྲལ་བས། ཏིང་ངེ་འཛིན་གྱི་མཆོག་རྡོ་རྗེ་ཞེས་བྱ་སྟེ། ངེས་པ་ལས་ནི་རྡོ་རྗེར་འགྱུར། །ཞེས་གསུངས་པའི་ཕྱིར་དང་། རྡོ་རྗེ་ཞེས་བྱ་བ་ནི་སེམས་དཔར་བྱིན་གྱིས་བརླབ་པ་ལས་
བྱུང་བའི་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་བྱ་སྟེ། ཚིག་གི་ཕྱོགས་གཅིག་སྨོས་པའི་ཚུལ་གྱིས་ཚིག་གི་སྤྱི་སྡུད་དེ་དཔེར་ན་འཇིག་ཅེས་སྨོས་པས་འཇིག་རྟེན་སྟོན་པ་དང་འདྲའོ། །མཆོག་ཆེན་ཞེས་བྱ་བ་ལ། མཆོག་ཀྱང་ཡིན་ལ་ཆེན་པོ་ཡང་ཡིན་པས་མཆོག་ཆེན་
ཏེ་དམ་ཚིག་ཆེན་པོའི་སེམས་དཔའ་ནི་ང་ཡིན་ནོ་ཞེས་ཆོས་ཀྱི་དབྱིངས་ཀྱི་ང་རྒྱལ་བྱེད་པའོ། །ཀུན་དུ་བཟང་པོའི་སྤྱོད་པ་མཆོག །ཅེས་བྱ་བ་ལ་ཀུན་དུ་བཟང་པོ་ནི་བཤད་ཟིན་ཏོ། །དེའི་སྤྱོད་པ་ནི་ལྷ་ཆེན་པོ་ལ་སོགས་པའི་གཟུགས་ཐམས་ཅད་དུ་ཡང་དག་པར་སྟོན་པས་
སེམས་ཅན་གྱི་དོན་མཛད་པའོ། །དེ་མཆོག་ཏུ་གྱུར་པས་ན། ཀུན་དུ་བཟང་པོའི་སྤྱོད་པ་མཆོག །ཅེས་བྱ་སྟེ། དེ་ཡང་གང་གི་ཕྱིར། སྙིང་སྟོབས་རྡུལ་དང་མུན་པས་ཀྱང་། །གང་ཕྱིར་སེམས་ཅན་དོན་མཛད་པས། །དེས་ན་འདི་ནི་ཀུན་དུ་བཟང་། །བྱང་ཆུབ་སྤྱོད་པའི་
རྗེས་བཞིན་འཇུག །ཅེས་གསུངས་པ་ཡིན་ནོ། །བདུད་དང་ཞེས་བྱ་བ་ནི་སངས་རྒྱས་ཀྱི་བྱང་ཆུབ་ལ་འཇུག་པ་རྣམས་ལ་ཤིན་ཏུ་བརྩོན་པས་བསྐྱེད་པར་བྱ་བའི་ཕྱིར་བདུད་ཀྱི་སྡེ་སྤྲུལ་ནས་འཚེ་བས་བདུད་ཅེས་བྱའོ། །བདུད་ནི་རབ་འཇོམས་པ་ཞེས་བྱ་བ་ནི་རྡོ་རྗེ་གནོད་སྦྱིན་

གྱི་ཚུལ་གྱིས་བདུད་ཐམས་ཅད་ཟ་བར་མཛད་པས་ན། བདུད་ཐམས་ཅད་འཇོམས་པར་མཛད་པའོ། །དེ་ཡང་སེམས་ཉིད་ཁོ་ན་བདུད་ཡིན་ཏེ། སེམས་ཉིད་དེ་བཞིན་གཤེགས་པ་ཡིན། །རང་གི་སེམས་ནི་འདུལ་བའི་ཕྱིར། །བདུད་ཉིད་དུ་ནི་རང་གྱུར་
ཏོ། །ཞེས་གསུངས་པ་དང་། ཡང་ཇི་ལྟ་ཇི་ལྟར་བཅོམ་ལྡན་འདས་འདོད་པ་རྡོ་རྗེ་སེམས་དཔའ་བྱང་ཆུབ་ཀྱི་སྙིང་པོར་འགྲོ་བའི་བྱང་ཆུབ་སེམས་དཔའ་ལ་བདུད་ཀྱི་གཟུགས་ཀྱིས་ཉེ་བར་འཚེ་བར་བྱེད་པ་དེ་ལྟ་དེ་ལྟར་བྱང་ཆུབ་སེམས་དཔའི་སེམས་བྱང་ཆུབ་ཆེན་པོར་ཤིན་ཏུ་བརྟན་
པར་ཉེ་བར་སྐྱེ་བར་འགྱུར་རོ། །དེ་ལྟར་ན་མཚན་བཅུ་བདུན་པོ་དེ་དག་ནི་དཔལ་རྡོ་རྗེ་སེམས་དཔའི་རྡོ་རྗེའི་རིགས་ཀྱི་ཡང་དག་པའི་ཡོན་ཏན་སྟོན་པར་བྱེད་པ་ཡིན་ནོ། །ཐམས་ཅད་བྱང་ཆུབ་ཆེ་ཞེས་བྱ་བ་ནི་སངས་རྒྱས་ཐམས་ཅད་གཅིག་ཏུ་བསྡུས་པར་གྱུར་པ་རྣམ་པར་སྣང་མཛད་ནི་བྱང་
ཆུབ་ཐམས་ཅད་དོ། །བྱང་ཆུབ་ཆེ་ཞེས་བྱ་བ་ནི་མི་བསྐྱོད་པ་དང་། མི་བསྐྱོད་པའི་རིགས་ནི་ཉན་ཐོས་དང་རང་སངས་རྒྱས་ཀྱི་བྱང་ཆུབ་ལ་ལྟོས་ན་བྱང་ཆུབ་ཀྱང་ཡིན་ལ་ཆེན་པོ་ཡང་ཡིན་པས་ན་བྱང་ཆུབ་ཆེན་པོ་སྟེ། སངས་རྒྱས་ཞེས་བྱ་བ་ནི་ནམ་མཁའ་ཐམས་ཅད་དང་མཉམ་
པའི་ཡེ་ཤེས་ཐུགས་སུ་ཆུད་པས་ན་སངས་རྒྱས་ཏེ་བཅོམ་ལྡན་འདས་ནི་རིན་ཆེན་འབྱུང་ལྡན་གྱི་རིགས་དང་བཅས་པའོ། །སངས་རྒྱས་ཉིད་སྐྱེས་ཞེས་བྱ་བ་ནི་སངས་རྒྱས་རྣམས་ཀྱི་བྱང་ཆུབ་བདག་ཉིད་ལས་འཁྲུངས་པས་ན་སངས་རྒྱས་ཉིད་སྐྱེས་ཏེ་གཟུགས་ཐམས་ཅད་སྟོན་པའི་ཡེ་
ཤེས་ཀྱི་སེམས་ཅན་ཐམས་ཅད་གདུལ་བྱའི་སྤྱོད་པའི་མཆོག་མངའ་བ་སྟེ། བཅོམ་ལྡན་འདས་འོད་དཔག་ཏུ་མེད་པའི་འཁོར་དང་བཅས་པའོ། །མཆོག་སྐྱེས་པ་ཞེས་བྱ་བ་ནི་མཆོག་ལས་སྐྱེས་པས་ན་མཆོག་ལས་སྐྱེས་པ་སྟེ། རང་བཞིན་གྱིས་འོད་གསལ་བའི་རྣམ་པར་ཐར་པའི་
སྒོ་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་མཆོག་དེ་ལས་འཁྲུངས་པ་དོན་ཡོད་པར་གྲུབ་པའི་རིགས་དང་བཅས་པའི་ངོ་བོའོ། །དེ་ཡང་ཇི་ལྟར་ན་བཅོམ་ལྡན་འདས་མངོན་པར་རྫོགས་པའི་བྱང་ཆུབ་དང་སངས་རྒྱས་ཡིན་ཞེ་ན། རང་སེམས་སོ་སོར་རྟོགས་པ་

ལས། །བྱང་ཆུབ་སེམས་མཆོག་རྡོ་རྗེ་ཉིད། །དེ་ཡིད་དེ་ཉིད་སངས་རྒྱས་ཉིད། །གང་ལ་བྱིན་རླབས་མཆོག་གྲུབ་པ། །ཞེས་གསུངས་པ་ཡིན་ནོ། །དེ་ལྟར་ན་མཚན་ལྔ་པོ་དག་གིས་ནི་དེ་བཞིན་གཤེགས་པའི་རིགས་ཀྱི་ཡོན་ཏན་སྟོན་པར་བྱེད་པ་ཡིན་ནོ། །རྡོ་རྗེ་ཧཱུཾ་མཛད་ཅེས་བྱ་བ་
ནི། ཨུ་ཏིཥྛ་ས་མ་ཡ་ཀྲོ་དྷ། ནི་སུཾ་བྷ་ཛྭ་ལ་བཛྲ་ཧཱུཾ་ཞེས་བྱ་བས་རྡོ་རྗེ་མེ་ལྟར་འབར་བ། རྡོ་རྗེ་ཧཱུཾ་མཛད་དུ་སྤྲུལ་པའི་སྙིང་པོ་ཡིན་ལ། སྤྲུལ་པ་ཡང་ཁྲོ་བོ་ཡིན་པར་བཤད་དོ། །ཡི་གེ་ཧཱུཾ་ཞེས་བྱ་བ་ནི་འཇིག་རྟེན་གསུམ་པོ་ལ་སོགས་པ་འདུལ་བའི་སྙིང་པོ་མཚན་གཉིས་པོ་འདི་
དག་ནི་རྡོ་རྗེ་རིགས་ཀྱི་སྒོ་ནས་བརྗོད་པ་ཡིན་ནོ། །འཇིག་རྟེན་དབང་ཕྱུག་ཅེས་བྱ་བ་ནི། ཇི་ལྟར་པདྨ་དམར་པོ་འདི། །ཞེས་བྱ་བ་ལ་སྔར་གསུངས་པ་ཡིན་ཏེ་མཚན་འདི་ནི་པདྨ་རིགས་ཀྱི་སྒོ་ནས་བརྗོད་པ་ཡིན་ནོ། །ནོར་བུ་རབ་གསོལ་ཞེས་བྱ་བ་ནི་ནོར་བུའི་རིགས་ཀྱི་སྔགས་ཀྱི་སྒོ་
ནས་སོ། །འདོད་ཆགས་ཆེན་པོ་ཞེས་བྱ་བ་ནི་གཟུགས་ཐམས་ཅད་སྟོན་པས་སེམས་ཅན་ཐམས་ཅད་སྦྱིན་པ་ལ་ཆགས་པས་འདོད་ཆགས་ཆེན་པོའོ། །དེ་ཡང་། དངོས་གྲུབ་ཀུན་ལ་རྗེས་ཆགས་པས། །འདོད་ཆགས་ཆེན་པོ་བཅོམ་ལྡན་འདས། །རྡོ་རྗེ་སེམས་དཔའི་དཔལ་
རྒྱལ་འདི། །དམར་ཞིང་སྣ་ཚོགས་འོད་འབར་བ། །ཞེས་གསུངས་པ་ཡིན་ནོ། །བདེ་ཆེན་ཉིད་ཅེས་བྱ་བ་ནི་བདེ་བ་ཡང་ཡིན་ལ་ཆེན་པོ་ཡང་ཡིན་པས་ན་བདེ་བ་ཆེན་པོ་སྟེ། སངས་རྒྱས་རྣམས་ཀྱང་ཟག་པ་མེད་ཅིང་ཐོག་མ་དང་ཐ་མ་མེད་པའི་བདེ་བ་དང་ཡིད་བདེ་བ་ནི་
བདེ་བ་ཆེན་པོ་སྟེ། དེའི་ངོ་བོ་ཉིད་ཡིན་པས་ན་བདེ་ཆེན་ཉིད་དོ། །འདི་ཉིད་ནི། དངོས་གྲུབ་ཀུན་གྱི་མི་འགྱུར་བདེ། །བདེ་བ་ཆེན་པོ་ཞེས་བཤད་དོ། །ཞེས་འོག་ནས་བཤད་པ་ཡིན་ནོ། །འདོད་དང་ཞེས་བྱ་བ་ནི་འདོད་པར་བྱ་བ་ཉིད་ཡིན་པས་ན་འདོད་པ་སྟེ། མངོན་པར་འདོད་
པའི་ཞེས་བྱ་བའི་ཐ་ཚིག་གོ། །དེ་ཡང་བྱང་ཆུབ་ཀྱི་མཚན་ཉིད་ཅན་གྱི་རྡོ་རྗེ་སེམས་དཔའ་དང་། བྱང་ཆུབ་ཀྱི་སེམས་བསྒོམ་པ་ནི་འདོད་པའི་ཡོན་ཏན་ནོ། །ཐར་པ་ཞེས་བྱ་བ་ནི་ཇི་སྐད་དུ་བཤད་པའི་བདེ་བ་ཆེན་པོ་དེའི་ངོ་བོ་ཉིད་གྱུར་པ་དང་མཐར་ཐུག་པའོ། །དེ་ཡང་ཇི་ལྟར་བཅོམ་

ལྡན་འདས་འདོད་པ་དང་ཐར་པ་ཡིན་ཞེ་ན། དངོས་གྲུབ་ཀུན་ལ་རྗེས་ཆགས་པས། །འདོད་ཆགས་ཆེན་པོ་བཅོམ་ལྡན་འདས། །དངོས་གྲུབ་ཀུན་གྱི་མི་འགྱུར་བདེ། །བདེ་བ་ཆེན་པོ་ཞེས་བཤད་དོ། །ཞེས་གསུངས་པ་ཡིན་ནོ། །ནོར་ཆེ་བ་ཞེས་བྱ་བ་ནི་ནམ་མཁའ་
དང་མཉམ་པའི་ཡེ་ཤེས་ཀྱི་འཇིག་རྟེན་དང་འཇིག་རྟེན་ལས་འདས་པའི་རིན་པོ་ཆེ་ཐམས་ཅད་ཀྱི་འབྱུང་གནས་ཡིན་པས་ན་ནོར་ཆེ་བའོ། །དུས་གསུམ་ཞེས་བྱ་བ་ནི་འདས་པ་དང་མ་འོངས་པ་དང་ད་ལྟར་བྱུང་བ་རྣམས་ཀྱི་སེམས་དང་སེམས་ལས་བྱུང་བའི་ངོ་བོ་ཡིན་པས་ན་དུས་
གསུམ་མོ། །སྲིད་གསུམ་ཞེས་བྱ་བ་ནི་འདོད་པའི་སྲིད་པ་དང་། གཟུགས་ཀྱི་སྲིད་པ་དང་། གཟུགས་མེད་པའི་སྲིད་པ་ནི་སྲིད་པ་གསུམ་མོ། །དེ་ཡང་མཐའ་ཡས་པ་ན་འཇིག་རྟེན་གསུམ་འདུལ་བས་སྲིད་གསུམ་ཡིན་ནོ་ཞེས་གསུངས་པ་ཡིན་པས་སྲིད་པ་གསུམ་གྱིས་འདུལ་བ་
རྣམས་ཀྱི་ཕྱིར་བཅོམ་ལྡན་འདས་སྲིད་པ་གསུམ་གྱི་ངོ་བོར་སྟོན་ཅིང་བཞུགས་པས་ན་སྲིད་པ་གསུམ་ཞེས་བཤད་པ་ཡིན་ནོ། །མཚན་གསུམ་པོ་དེ་དག་གིས་ཀྱང་དཔལ་རྡོ་རྗེ་སེམས་དཔའི་རིགས་སུ་སྟོན་པར་ཤེས་པ་ཡིན་ནོ། །མཆོག་གསུམ་ཞེས་བྱ་བ་ནི་རྒྱལ་བར་བྱེད་པ་དང་། སྦྲང་
རྩིར་བྱེད་པ་དང་། དོན་ཐམས་ཅད་གྲུབ་པར་བྱེད་པ་ལ་མཆོག་གསུམ་ཞེས་བྱའོ། །འཇིག་རྟེན་གསུམ་མཆོག་ཅེས་བྱ་བ་ནི་དེ་རྣམས་ཀྱི་མིང་གི་ཁྱད་པར་ལ་འཇིག་རྟེན་གསུམ་ཞེས་བྱ་སྟེ། འཇིག་རྟེན་མཆོག་གསུམ་གྱི་བྱིན་གྱིས་བརླབས་ཞེས་གསུངས་པའི་ཕྱིར་རོ། །ཁམས་
གསུམ་པ་ཞེས་བྱ་བ་ནི་འདོད་པ་དང་གཟུགས་དང་གཟུགས་མེད་པའི་ཁམས་སུ་སྤྲུལ་པས་ན་ཁམས་གསུམ་པ་ཞེས་བྱའོ། །བརྟན་དང་ཞེས་བྱ་བ་ནི་རིའི་རྒྱལ་པོ་རི་རབ་ལ་སོགས་པ་དངོས་པོ་ཐམས་ཅད་འབྱུང་བའི་ཚུལ་གྱིས་གནས་པས་ན་བརྟན་པ་ཞེས་བྱའོ། །དེ་ཡང་། སེམས་
ཅན་བསོད་ནམས་ཆེར་མཐོང་བས། །བརྟན་པ་ཀུན་ཉིད་ང་ཡིན་ནོ། །ཞེས་འོག་ནས་བཤད་པ་ཡིན་ནོ། །རང་འབྱུང་ཞེས་བྱ་བ་ནི་རྫོགས་པའི་སངས་རྒྱས་ལ་སོགས་པ་དངོས་པོ་ཐམས་ཅད་འབྱུང་བའི་རྒྱུར་གྱུར་པས་ན་རང་འབྱུང་བ་སྟེ་ཆོས་ཀྱི་དབྱིངས་ཐོག་མ་དང་ཐ་མ་མེད་པའོ། །

གསལ་ཞེས་བྱ་བ་ནི་ཐམས་ཅད་ཀྱི་སོ་སོ་རང་གིས་རིག་པའི་ངོ་བོ་ཆོས་ཀྱི་དབྱིངས་སོ། །ཕྲ་རབ་ཅེས་བྱ་བ་ནི་ཤིན་ཏུ་ཕྲ་བས་ན་ཤིན་ཏུ་ཕྲ་བ་སྟེ་ཆོས་ཀྱི་དབྱིངས་དེ་ཉིད་དོ། །སྦོམ་པ་དང་ཞེས་བྱ་བ་ནི་སྐུ་ཕྱག་རྒྱ་ཆེན་པོ་ལ་སོགས་པ་ནམ་མཁའ་ཁྱབ་པས་ན་སྦོམ་པའོ། །བསགས་
པ་ཞེས་བྱ་བ་ནི་དེ་བཞིན་གཤེགས་པ་ལ་སོགས་པའི་རིགས་རྣམས་བསགས་ཤིང་བསྡུས་པའི་ངོ་བོ་ཉིད་ཡིན་པས་སོ། །རྒྱུ་བ་ཞེས་བྱ་བ་ནི་མངལ་ནས་སྐྱེས་པ་དང་། སྒོ་ང་ལས་སྐྱེས་པ་དང་། རྫུས་ཏེ་སྐྱེས་པ་དང་། དྲོད་གཤེར་ལས་སྐྱེས་པ་སྟེ་རང་གི་ལས་ཀྱི་སྟོབས་
ལས་སྐྱེས་པ་ནི་རྒྱུ་བ་ཞེས་བྱ་བ་སྟེ་སེམས་ཅན་སེམས་དང་ལྡན་པའོ། །བཅོམ་ལྡན་འདས་ཀྱང་ཆོས་ཉིད་ལ་དགོངས་ནས་དེའི་ངོ་བོ་ཉིད་ཡིན་པས་ན་དེ་སྐད་ཅེས་བྱའོ། །དེ་ཡང་སེམས་ཀྱི་འདུ་བྱེད་པས་རྒྱུ་བ་ཞེས་འོག་ནས་བཤད་པའི་ཕྱིར་རོ། །རབ་མཆོག་ཅེས་བྱ་བ་ནི་ཕུལ་དུ་
བྱུང་བ་སྟེ། འཁོར་ལོས་སྒྱུར་བ་ལ་སོགས་པའི་གཟུགས་རབ་མཆོག་གིས་འདུལ་བ་རྣམས་ལ་དེའི་གཟུགས་སུ་སྟོན་པར་མཛད་པའི་ཕྱིར་དེ་སྐད་ཅེས་བྱའོ། །ཐོབ་མཛད་པ་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་བསྒོམ་པ་དང་ལྡན་པ་རྣམས་ལ་དེ་མངོན་སུམ་དུ་གྱུར་
པར་མཛད་པས་ན་ཐོབ་པའོ། །སྲིད་པ་ཞེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པ་ཐོབ་པར་མཛད་པ་དེས་མི་གནས་པའི་མྱ་ངན་ལས་འདས་པའི་མཚན་ཉིད་དུ་སྲིད་པ་ཤིན་ཏུ་གྲུབ་པར་ནི་སྲིད་པ་ཞེས་བྱའོ། །འཁོར་བ་ཞེས་བྱ་བ་ནི་དེ་འདུལ་བའི་སེམས་ཅན་རྣམས་
རྗེས་སུ་གཟུང་བའི་ཕྱིར་འགྲོ་བ་རིགས་དྲུག་གི་མཚན་གྱིས་བཞུགས་པར་མཛད་པ་དང་ཆོས་ཉིད་ཀྱི་ཚུལ་གྱིས་འཁོར་བ་ཞེས་བྱའོ། །སྦྱོང་མཛད་པ་ཞེས་བྱ་བ་ནི་སངས་རྒྱས་ལ་སོགས་པའི་ཚུལ་གྱིས་སེམས་ཅན་ཐམས་ཅད་སྦྱོང་བར་མཛད་པས་ན་སྦྱོང་མཛད་པའོ། །ཐོག་མཐའ་
མེད་པ་ཞེས་བྱ་བ་དང་པོའི་ཐོག་མ་སྟེ་སྐྱེ་བའོ། །ཐ་མ་ནི་དུས་ཚིགས་ངེས་པ་མེད་པའི་མྱ་ངན་ལས་འདས་པའོ། །གང་ལ་ཐོག་མ་དང་ཐ་མ་མེད་པ་དེ་ནི་ཐོག་མ་དང་ཐ་མ་མེད་པ་སྟེ། ཆོས་ཀྱི་དབྱིངས་ཀྱི་རང་བཞིན་ནོ། །ཐོག་མ་ཐ་མ་ཅན་ཞེས་བྱ་བ་ནི་ཆོས་ཀྱི་དབྱིངས་ཀྱི་

རྒྱུ་མཐུན་པ་ལས་བྱུང་བའི་རྡོ་རྗེ་སེམས་དཔའི་སྐུ་ནས་བརྩམས་ཏེ། དུམ་བུ་བཞི་པ་ལས་བཤད་པའི་འཕགས་པ་ནམ་མཁའི་སྙིང་པོའི་རང་བཞིན་རས་རིས་ཀྱི་དཀྱིལ་འཁོར་ལས་གསུངས་པའི་རིན་པོ་ཆེའི་དྲིལ་བུ་མའི་བར་གྱི་ལྷ་ཐམས་ཅད་ཀྱི་སྐུའི་ངོ་བོར་གྱུར་པས་
ན་ཐོག་མ་ཅན་ནོ། །མདངས་དམར་བ་ཞེས་བྱ་བ་ནི་བལྟས་པས་མི་ངོམས་པའི་སྐུ་མངའ་བས་ཀུན་གྱི་མངོན་པར་འདོད་པར་བྱ་བ་ཡིན་པས་ན་མདངས་ལྡན་ནོ། །དང་པོ་ཞེས་བྱ་བ་ནི་བསྐལ་པ་བཟང་པོ་ཞེས་བྱ་བ་ལ་སོགས་པའི་ཐོག་མར་གནས་པས་ན་དང་པོའི་ཐོག་མར་རོ། །ཐམས་
ཅད་ཡང་དག་གནས་པ་ཞེས་བྱ་བ་ནི་སྡུད་པའི་དཀྱིལ་འཁོར་དུ་རིགས་ཐམས་ཅད་ཀྱི་གནས་པའི་ཚུལ་གྱིས་བཞུགས་པ་ན་ཐམས་ཅད་ཡང་དག་གནས་པའོ། །དེ་ལ་མཆོག་གསུམ་དང་འཇིག་རྟེན་གསུམ་མཆོག་ཅེས་བྱ་བའི་མཚན་གཉིས་པོ་འདི་ནི་འཇིག་རྟེན་པའི་དཀྱིལ་
འཁོར་གྱི་སྒོ་ནས་བསྟན་པ་ཡིན་ནོ། །ཁམས་གསུམ་པ་དང་། བརྟན་པ་དང་། རང་འབྱུང་དང་། གསལ་བ་དང་། ཕྲ་རབ་དང་། སྦོམ་པོ་དང་། བསགས་པ་དང་། རྒྱུ་བ་དང་། རབ་མཆོག་དང་། ཐོབ་མཛད་དང་། སྲིད་པ་དང་། འཁོར་བ་དང་། སྦྱོང་མཛད་དང་། ཐོག་
མཐའ་མེད་པ་དང་། ཐོག་མཐའ་ཅན་དང་། མདངས་ལྡན་དང་། དང་པོ་དང་། ཐམས་ཅད་ཡང་དག་གནས་ཞེས་བྱ་བ་མཚན་བཅོ་བརྒྱད་པོ་འདི་དག་ནི་བསྡུས་པའི་དཀྱིལ་འཁོར་གྱི་སྒོ་ནས་གསུངས་པ་ཡིན་ནོ། །སྙིང་པོ་ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པ་ངེས་པའི་
ཡེ་ཤེས་ཏེ་དེ་ཁོ་ན་ཡིན་ལ། དེ་སྟོན་པར་བྱེད་པའི་ཚིག་ལ་ཉེ་བར་གདགས་པས་སྙིང་པོ་ཞེས་བྱ་སྟེ། དེ་ཉིད་གདགས་པས་གསང་ཆེན་པོ། །སྙིང་པོ་ཞེས་ནི་རབ་ཏུ་བཤད། །ཅེས་བྱ་བ་གསུངས་པའི་ཕྱིར་དང་། ཡང་དེ་ཉིད་ཁོ་ན་ཉིད་དང་། གསང་བའི་སྙིང་པོ་ཞེས་
གསུངས་པའི་ཕྱིར་རོ། །ཕྱག་རྒྱ་ཞེས་བྱ་བ་ནི་དམ་ཚིག་དང་། ཆོས་དང་། ལས་དང་། ཕྱག་རྒྱ་ཆེན་པོ་ལ་བྱ་སྟེ། སེམས་ཅན་གྱི་ཁམས་སྐུར་བསྟན་པར་བྱེད་པའམ། རྒྱས་འདེབས་པའི་ཕྱིར་དེ་ནི་ཕྱག་རྒྱ་ཞེས་བྱའོ། །རྣལ་འབྱོར་ཞེས་བྱ་བ་ནི་རྣལ་འབྱོར་དང་རྗེས་སུ་རྣལ་

འབྱོར་དང་། ཐམས་ཅད་ཀྱི་རྣལ་འབྱོར་དང་། ཤིན་ཏུ་རྣལ་འབྱོར་གྱི་དབྱེ་བས་རྣམ་པ་བཞིའོ། །དེ་ལ་དེ་ཁོ་ན་ཉིད་རྣམ་པ་ལྔ་བསྒོམས་པས་བདག་ཉིད་རང་ལྷའི་ངོ་བོ་ཉིད་དུ་བསྐྱེད་པ་བསྒོམ་པ་ནི་རྣལ་འབྱོར་ཞེས་བྱའོ། །ཡེ་ཤེས་སེམས་དཔའ་བཅུག་ནས་དེ་དང་ལྷན་ཅིག་ཏུ་
གྱུར་པར་ལྷག་པར་མོས་པ་ནི་རྗེས་སུ་རྣལ་འབྱོར་ཞེས་བྱའོ། །རྒྱུ་བ་དང་མི་རྒྱུ་བ་ཐམས་ཅད་ཀྱི་ངོ་བོ་ཉིད་ཀྱི་རང་བཞིན་དུ་བདག་ཉིད་བསྒོམ་པ་ནི་ཐམས་ཅད་ཀྱི་རྣལ་འབྱོར་ཞེས་བྱའོ། །རྣལ་འབྱོར་དང་རྗེས་སུ་རྣལ་འབྱོར་དང་ཐམས་ཅད་ཀྱི་རྣལ་འབྱོར་རྣམ་པར་བསྒོམས་པས་
སེམས་རྩེ་གཅིག་ཏུ་གྱུར་པ་གང་ཡིན་པ་དེ་ནི་ཤིན་ཏུ་རྣལ་འབྱོར་ཞེས་བྱའོ། །དམ་ཚིག་ཅེས་བྱ་བ་ནི་མི་འདའ་བའི་དོན་ལ་ནི་དམ་ཚིག་ཅེས་བྱ་བ་སྟེ་སྐུའི་རང་བཞིན་ནོ། །དེ་ཡང་སྐུའི་གསང་བའི་དབང་དུ་བྱས་ནས། དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་
མཛད་པས། །ཕྱག་རྒྱ་དམ་ཚིག་ཅེས་གྲགས་ཏེ། །ཡིད་ཀྱི་གཟུགས་ནི་བསྟན་ཕྱིར་རོ། །ཞེས་གསུངས་པ་ཡིན་ནོ། །དེ་ཉིད་ཅེས་བྱ་བ་ནི། ཐོག་མ་ཐ་མ་མེད་སེམས་པ། །ཞེས་བྱ་བ་ལ་སོགས་པ་གང་ཡིན་པ་དེ་ནི་དེ་ཁོ་ན་ཉིད་དོ། །བདེན་པ་ཞེས་བྱ་བ་ནི་ཀུན་རྫོབ་ཀྱི་བར་
གྱི་བདེན་པ་དང་དོན་དམ་པའི་བདེན་པ་དང་། འཕགས་པའི་བདེན་པ་བཞི་ནི་བདེན་པའོ། །མཆོད་པ་ཆེ་ཞེས་བྱ་བ་ནི་འདོད་ཆགས་རྡོ་རྗེ་མ་ལ་སོགས་པ་རིགས་ཐམས་ཅད་ཀྱི་མཆོད་པ་ནི་མཆོད་པ་ཆེན་པོའོ། །དེ་ལྟར་མཚན་བདུན་ནི་དཔལ་རྡོ་རྗེ་སེམས་དཔའི་རས་རིས་ཀྱི་
དཀྱིལ་འཁོར་གྱི་སྒོ་ནས་ལྷ་ཐམས་ཅད་ཀྱི་རང་བཞིན་སྟོན་པ་ཡིན་པར་ཤེས་པར་བྱའོ། །དེ་བཞིན་གཤེགས་པ་ཞེས་བྱ་བ་ནི་དེ་བཞིན་གཤེགས་པའི་རས་རིས་ཀྱི་དཀྱིལ་འཁོར་གྱི་རང་བཞིན་ནོ། །དངོས་གྲུབ་ཆེ་ཞེས་བྱ་བ་ནི་དེ་བཞིན་གཤེགས་པའི་རས་རིས་ཀྱི་དཀྱིལ་འཁོར་
གྱི་དངོས་གྲུབ་ཆེན་པོའོ། །ཆོས་ཞེས་བྱ་བ་ནི་ཆོས་ཀྱི་ཕྱག་རྒྱའི་ངོ་བོ་ཉིད་ཡིན་པས་ན་ཆོས་སོ། །ལས་ཞེས་བྱ་བ་ནི། ལས་ཀྱི་ཕྱག་རྒྱའི་ངོ་བོ་ཉིད་ཡིན་པས་ན་ལས་སོ། །མཁས་པ་ཆེན་པོ་ཞེས་བྱ་བ་ནི་དེ་བཞིན་གཤེགས་པ་ཉིད་ལ་སོགས་པ་ཡོངས་སུ་ཤེས་པས་མཁས་

པ་ཆེན་པོའོ། །དམ་པའི་ཆོས་ཞེས་བྱ་བ་ནི་དེ་བཞིན་གཤེགས་པའི་དཀྱིལ་འཁོར་ཆོས་ཀྱི་འཁོར་ལོ་བསྐོར་བའི་ཚུལ་གྱིས་བཞུགས་པའི་འོད་དཔག་ཏུ་མེད་པའི་ཚུལ་གང་ཡིན་པ་དེ་ནི་དམ་པའི་ཆོས་སོ། །ལས་མཆོག་ཅེས་བྱ་བ་ནི་དེ་ཉིད་དུ་དོན་ཡོད་པར་གྲུབ་
པའི་ཚུལ་གྱིས་བཞུགས་པ་གང་ཡིན་པ་དེ་ནི་ལས་མཆོག་གོ། །བདག་ཅེས་བྱ་བ་ནི་དེ་ཉིད་ལས་རིན་ཆེན་འབྱུང་ལྡན་གྱི་ངོ་བོ་བཞུགས་པ་གང་ཡིན་པ་དེ་ནི་བདག་པོའོ། །བྱང་ཆུབ་སེམས་དཔའ་ཞེས་བྱ་བ་ནི་དེ་ཉིད་དུ་མི་བསྐྱོད་པའི་ངོ་བོས་བཞུགས་པ་གང་ཡིན་པ་དེ་ནི་བྱང་ཆུབ་ཀྱི་
སེམས་སོ། །རབ་སྦྱོང་མཛད་ཅེས་བྱ་བ་ནི་དེ་བཞིན་གཤེགས་པའི་