Kinh tạng Tây Tạng (Kangyur Đại Học) — 091_རྒྱུད་འབུམ།_བ

ཞིང་མདུན་དུ་བདར་ལ་ཆོས་སྟོན་ཏེ། བཀོད་པ་ཆེན་པོའི་རྒྱན་ཡིད་བཞིན་གྱི་ནོར་བུ་ཞེས་བྱ་བ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་
འབྲུ་བཟང་པོ། མ་འདྲེས་པ། ཡོངས་སུ་དག་པ། ཡོངས་སུ་བྱང་བའི་ཆོས་སྟོན་པར་མཛད་དོ། །དེ་ནས་སངས་རྒྱས་ཀྱི་བྱིན་གྱིས་བརླབས་ཀྱིས་ལག་ན་རྡོ་རྗེས་འཁོར་དེ་རྣམས་ལ་བལྟས་ནས་ལངས་ཏེ། བདག་གི་རྫུ་འཕྲུལ་གྱི་བྱིན་གྱིས་བརླབས་ཀྱིས་བཅོམ་ལྡན་
འདས་ལ་ལན་སྟོང་ཕྲག་དུ་མ་བསྐོར་བ་བྱས་ཏེ། ཕྱག་འཚལ་ནས་སྤྱན་སྔར་འདུག་སྟེ། སྙེམས་པ་དང་བཅས་པས་སྐྱིལ་མོ་ཀྲུང་ལེགས་པར་བཅས་པས་འཁོར་དེ་རྣམས་ལ་བལྟས་ཏེ། རྡོ་རྗེ་ཐལ་མོ་རང་གི་སྙིང་གར་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་

ལྡན་འདས་གཟའ་རྣམས་ནི་གཏུམ་ཞིང་གཏུམ་པའི་གཟུགས་ཅན། དྲག་ཅིང་དྲག་པའི་གཟུགས་ཅན། ཁྲོ་ཞིང་ཁྲོ་བའི་སེམས་ཀྱི་སེམས་ཅན་རྣམས་ལ་རྣམ་པར་འཚེ་ཞིང་གནོད་པར་བགྱིད་ལ་མདངས་འཕྲོག་པར་བགྱིད་དེ། ཁ་ཅིག་ནི་ནོར་རྫས་འཕྲོག་པར་བགྱིད། ཁ་ཅིག་ནི་
སྲོག་འཕྲོག་པར་བགྱིད། སེམས་ཅན་ཚེ་རིང་པོ་ཁ་ཅིག་ནི་ཚེ་ཐུང་བར་བགྱིད། དེ་ལྟར་སེམས་ཅན་རྣམས་ལ་གནོད་པས་འཚེ་བར་བགྱིད་པས་ན། དེའི་ཕྱིར་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་གང་གིས་སེམས་ཅན་རྣམས་ལ་བསྲུང་བར་འགྱུར་བ་བཤད་དུ་གསོལ།
བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་གང་ཁྱོད་ཀྱིས་སེམས་ཅན་རྣམས་ལ་ཕན་པར་བྱ་བའི་དོན་དུ་སྙིང་རྗེ་བསྐྱེད་ནས། གསང་བ་ཆེན་པོ་ཤིན་དུ་གསང་བ་དེ་བཞིན་གཤེགས་པ་ལ་ཞུ་བར་བྱེད་པ་ལེགས་སོ་ལེགས་སོ། །དེ་དག་ངས་བཤད་ཀྱིས་ཉོན་ལ་
ལེགས་པར་རབ་ཏུ་ཟུངས་ལ་ཡིད་ལ་གྱིས་ཤིག །གཟའ་རྣམས་གཏུམ་པའི་གཟུགས་ལ་ཤིན་ཏུ་ཁྲོ་ཞིང་འཇིགས་པ་རྣམས་ལ་མཆོད་པ་བཟང་པོ་མཆོད་ཡོན་དང་བཟླས་བརྗོད་བཟང་པོ་གསང་བ་ལས་ཆེས་གསང་བ་ངས་བཤད་པར་བྱའོ། །དེ་དག་མཆོད་པས་
མཆོད་འགྱུར་ཞིང་། །གནོད་པ་བྱས་ན་གནོད་བྱེད་པ། །གཟའ་དེ་ཀུན་གྱི་ཁ་དོག་དང་། །ཇི་ལྟར་དགའ་བར་འགྱུར་བ་དང་། །ལྷ་རྣམས་དང་ནི་ལྷ་མིན་དང་། །མིའམ་ཅི་དང་ཀླུ་དག་དང་། །གནོད་སྦྱིན་རྣམས་དང་སྲིན་པོ་དང་། །སྲུལ་པོ་དང་ནི་མི་རྣམས་དང་། །དྲག་
པོ་གཟི་བརྗིད་ཆེན་པོ་དག །ཁྲོས་པ་ཞི་བར་བྱེད་པ་ཡི། །གསང་སྔགས་རྣམས་དང་མཆོད་པ་དག །རིམ་པ་བཞིན་དུ་བཤད་པར་བྱ། །དེ་ནས་བཅོམ་ལྡན་འདས་ཤཱཀྱ་ཐུབ་པ་ཉིད་ཀྱི་ཐུགས་ཀ་ནས་སྙིང་རྗེ་རྣམ་པར་རོལ་པ་ཞེས་བྱ་བའི་འོད་ཟེར་འབར་བ་ཕྱུང་ནས། གཟའ་
རྣམས་ཀྱི་སྤྱི་བོར་ཞུགས་པར་གྱུར་ཏོ། །དེ་ནས་དེ་ཉིད་ཀྱི་སྐད་ཅིག་ཉིད་ལ་ཉི་མ་ལ་སོགས་པའི་གཟའ་རྣམས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བདག་ཅག་

རྣམས་ལ་སྨན་ཡོན་བཏགས་པར་གྱུར་ཏེ། བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་བསྟན་དུ་གསོལ། བཅོམ་ལྡན་འདས་གང་གིས་བདག་ཅག་རྣམས་འཚོགས་ནས་ཡོ་བྱད་དུ་གྱུར་པར་བྱེད་པའི་ཆོས་སྨྲ་བ་རྣམས་ལ་བསྲུང་བ་དང་། ཡོངས་སུ་བསྐྱབ་པ་
དང་། ཞི་བ་དང་། བདེ་ལེགས་སུ་འགྱུར་བ་དང་རིམ་གྲོ་དང་ཆད་པ་བཟློག་པ་དང་། མཚོན་ཆ་སྤང་བ་དང་། དུག་གཞིལ་བ་དང་། དུག་གསད་པ་དང་། མཚམས་བཅད་པ་དང་། ས་བཅིང་བར་འགྱུར་བ་རྣམས་བཤད་དུ་གསོལ། དེ་ནས་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་གཟའ་རྣམས་ཀྱི་མཆོད་པ་དང་གསང་སྔགས་བཀའ་སྩལ་པ། ཇི་ལྟ་བའི་རིམ་པའི་ཁ་དོག་གི་དབྱེ་བས་ཕྱོགས་རྣམས་སུ་དྲིའི་དཀྱིལ་འཁོར་བྱས་ལ་པདྨ་སོར་བཅུ་གཉིས་ཀྱི་ཚད་དུ་
བྱས་པའི་འདབ་མ་བྲིས་ཏེ། ལྟེ་བ་ཡང་སོར་བཅུ་གཉིས་པ་ལ་སྒོ་བཞིས་མཛེས་པ་རིམ་བཞིན་དུ་བྱས་པ་ལ་པདྨ་རྒྱས་པའི་སྟེང་དུ་ལྷ་ཉི་མ་བསམ་པར་བྱ་བ་ནི་ལུས་གཟི་བརྗིད་ཀྱི་ཕུང་པོ་ལི་ཁྲི་ཉེ་བར་འབར་བ་ལྟ་བུ་ཉི་མ་སྟོང་དང་མཚུངས་པའི་འོད་ཟེར་ཅན་ནོ། །ཨོཾ་མཻ་གྷོ་ལྐཱ་ཡ་
སྭཱ་ཧཱ། ཤར་དུ་ཟླ་བ་དཀར་པོ། ཨོྃ་ཤི་ཏཱྃ་ཤ་བེ་སྭཱ་ཧཱ། མེའི་མཚམས་སུ་མིག་དམར་པོ། ཨོཾ་རཀྟཱྃ་ག་ཀུ་མཱ་རཱ་ཡ་སྭཱ་ཧཱ། གཤིན་རྗེའི་ཕྱོགས་སུ་རྒྱལ་རིགས་གཟའ་ལྷག་མདོག་སེར་པོ། ཨོྃ་བུདྷཱ་ཡ་སྭཱ་ཧཱ། བདེན་བྲལ་དུ་ཕུར་བུ་དམར་སེར། ཨོཾ་པྲྀ་ཧ་སྤ་ཏ་ཡེ་
སྭཱ་ཧཱ། ནུབ་ཀྱི་ཕྱོགས་སུ་པ་བ་སངས་དཀར་པོ། ཨོཾ་ཨ་སུ་རོཏྟ་མཱ་ཡ་སྭཱ་ཧཱ། རླུང་དུ་སྤེན་པ་མིག་སྨན་ལྟར་ཤིན་ཏུ་གནག་པ། ཨོཾ་ཀྲྀཥྞ་ཝརྞྞ་ཡ་སྭཱ་ཧཱ། ལུས་ངན་པོའི་ཕྱོགས་སུ་སྒྲ་གཅན་དམར་ནག །ཨོཾ་ཨ་མྲྀ་ཏ་པྲི་ཡཱ་ཡ་སྭཱ་ཧཱ། དབང་ལྡན་གྱི་མཚམས་སུ་དུད་
སྤྲིན་གྱི་མདོག་ལྟ་བུའི་མཇུག་རེངས། ཨོཾ་ཛྱོ་ཏི་ཀེ་ཏ་བེ་སྭཱ་ཧཱ། ཤར་གྱི་སྒོར་རྗེ་བཙུན་སངས་རྒྱས། ལྷོ་སྒོར་ཕྱག་ན་རྡོ་རྗེ། ནུབ་སྒོར་འཇིག་རྟེན་མགོན་པོ། བྱང་གི་སྒོར་འཇམ་དཔལ་ལོ། །དཀྱིལ་འཁོར་གྱི་ཕྱི་རོལ་གྱི་བྱང་ཤར་དུ་གཟའ་ཐམས་ཅད་དོ། །ཤར་ལྷོའི་

མཚམས་སུ་ཁྱིམ་རྣམས་དང་རྒྱུ་སྐར་རྣམས་སོ། །ལྷོ་ནུབ་དུ་གནོད་པ་ཐམས་ཅད་དོ། །ནུབ་བྱང་དུ་རྗེ་བཙུན་རིགས་པ་ཆེན་མོའོ། །དཀྱིལ་འཁོར་གྱི་སྒོའི་ཕྱི་རོལ་གྱི་ཤར་དུ་ཡུལ་འཁོར་སྲུང་། ལྷོར་འཕགས་སྐྱེས་པོ། ནུབ་ཏུ་མིག་མི་བཟང་། བྱང་དུ་ལུས་ངན་པོའོ།
ཉི་མའི་འོ་ཐུག་དང་། ཟླ་བའི་ཞོ་ཟན་དང་། མིག་དམར་གྱི་སྲན་མ་མ་ཤའི་བཟའ་བ་དང་། ལྷག་པའི་མར་གྱི་ཁུར་བ་དང་། ཕུར་བུའི་འོ་མ་དང་། པ་བ་སངས་ཀྱི་ཁུར་བ་དང་། སྤེན་པའི་སྲན་མ་མ་ཤ་དང་། མུད་ག་བསྲེས་པ་དང་། སྒྲ་གཅན་གྱི་ཏིལ་གྱི་
ཐུག་པ་དང་། མཇུག་རིངས་ཀྱི་ཏིལ་ཀྱི་ཐུག་པ་དང་། བུ་རམ་གྱི་ཚོད་མའོ། །གནོད་སྦྱིན་གྱི་གཏོར་མ་ནི་ཡུལ་འཁོར་སྲུང་གི་ཞོ་ཟན་ནོ། །འཕགས་སྐྱེས་པོའི་ཞོ་དང་སྲན་མ་མ་ཤའི་བཟའ་བའོ། །མིག་མི་བཟང་གི་འོ་ཐུག་གི་བཟའ་བའོ། །ལུས་ངན་པོའི་ཞོ་དང་སྲན་
མ་མ་ཤའི་བཟའ་བ་དང་བུ་རམ་ཆང་དང་སྦྱར་བའོ། །ཇི་ལྟ་བའི་རིམ་པའི་ཁ་དོག་གི་མེ་ཏོག་དབུལ་ལོ། །ཇི་ལྟ་བའི་རིམ་པའི་ཁ་དོག་གི་བདུག་སྤོས་དབུལ་ལོ། །ཇི་ལྟ་བའི་རིམ་པའི་ཁ་དོག་གི་བ་དན་དབུལ་ལོ། །སོ་སོ་ལ་མར་མེ་དབུལ་ལོ། །ཇི་ལྟ་བའི་རིམ་པའི་མཆོད་པ་བྱའོ། །
མར་དང་སྦྲང་རྩིས་དུང་ཕོར་བཀང་སྟེ། རིན་ཆེན་སྣ་ལྔ་བཅུག་ལ་མཆོད་ཡོན་དབུལ་ཞིང་གདོང་ལ་ཡང་དར་བཅིང་བར་བྱའོ། །ལག་ན་རྡོ་རྗེ་གཟའ་འདི་རྣམས་ཀྱི་སྙིང་པོའི་སྔགས་བཀླགས་པས་འགྲུབ་པ་རྣམས་ཡིན་ཏེ། ཇི་ལྟ་བའི་རིམ་པའི་ཁ་དོག་དང་མཐུན་པའི་སྤོས་ཀྱི་དཀྱིལ་
འཁོར་སོར་བཅུ་གཉིས་པ་བྱས་པའི་དབུས་སུ་མཆོད་པར་བྱའོ། །ཁམ་པའམ་ཟངས་ལ་སོགས་པའམ། གསེར་དངུལ་གྱི་སྣོད་དུ་མཆོད་ཡོན་ཕུལ་ནས། རེ་རེ་ལ་ཡང་བཟླས་བརྗོད་ལན་བརྒྱ་རྩ་བརྒྱད་རྩ་བརྒྱད་བྱའོ། །ལག་ན་རྡོ་རྗེ་དེ་ནས་ཡང་དེའི་འོག་ཏུ་གཟའ་རྣམས་ཀྱི་ཡུམ་
ཞེས་བྱ་བའི་གཟུངས་ཀྱི་སྔགས་ཀྱི་ཚིག་རྣམས་ལན་བདུན་བརྗོད་པར་བྱའོ། །དེ་ནས་གཟའ་ཉི་མ་ལ་སོགས་པའི་གཟའ་ཐམས་ཅད་ཀྱིས་སྲུང་བར་བྱེད་པར་འགྱུར་རོ། །དབུལ་བའི་གདོན་ལས་གྲོལ་བར་བྱེད་དོ། །ཚེ་ཟད་པ་རྣམས་ཚེ་རིང་བར་འགྱུར་རོ། །ལག་ན་རྡོ་རྗེ་ཡང་གང་ཞིག་དགེ་

སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་སམ། སེམས་ཅན་གཞན་སེམས་ཅན་གྱི་སྐྱེ་བར་གཏོགས་པ་གང་དག་གི་རྣ་ལམ་དུ་ཐོས་ན། དེ་དག་ཀྱང་དུས་མ་ཡིན་པར་འཆི་བའི་དུས་བྱེད་པར་མི་འགྱུར་རོ། །ལག་ན་རྡོ་རྗེ་ཡང་གང་
ཞིག་གཟའ་རྣམས་ཀྱི་དཀྱིལ་འཁོར་གྱི་དབུས་སུ་མཆོད་ཅིང་། ཉིན་གཅིག་བཞིན་དུ་ཀློག་པར་བྱེད་པའི་ཆོས་སྨྲ་བར་བྱེད་པ་དེ་ལ་གཟའ་རྣམས་ཐམས་ཅད་ཀྱིས་རྣམ་པ་ཐམས་ཅད་དུ་བདག་ཉིད་ཀྱིས་བསམ་པ་ཐམས་ཅད་ཡོངས་སུ་རྫོགས་པར་བྱེད་དོ། །དེའི་རིགས་རྒྱུད་ཀྱི་
དབུལ་བ་ཡང་ཉམས་པར་བྱེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་གཟའ་རྣམས་ཀྱི་ཡུམ་ཞེས་བྱ་བའི་གཟུངས་བཀའ་སྩལ་པ། ན་མོ་བུདྡྷཱ་ཡ། ན་མོ་བཛྲ་དྷ་རཱ་ཡ། ན་མོ་པདྨ་དྷ་རཱ་ཡ། ན་མོ་ཀུ་མཱ་རཱ་ཡ། ན་མོ་གྲ་ཧཱ་ཎཱཾ། སརྦཱ་ཤ་པ་རི་པཱུ་
ར་ཀཱ་ནཱྃ། ན་མོ་ན་ཀྵ་ཏྲཱ་ཎཱྃ། ན་མོ་དྭཱ་ད་ཤ་རཱ་ཤི་ནཱྃ། ཏདྱ་ཐཱ། ཨོྃ་བུདྡྷེ་བུདྡྷེ། བཛྲེ་བཛྲེ། པདྨེ་པདྨེ། ས་ར་ས་ར། པྲ་ས་ར་པྲ་ས་ར། སྨ་ར་སྨ་ར། ཀྲཱི་ཌ་ཡ་ཀྲཱི་ཌ་ཡ། མཱ་ར་ཡ་མཱ་ར་ཡ། མཱརྡྷ་ཡ་མཱརྡྷ་ཡ། གྷཱ་ཊ་ཡ་གྷཱ་ཊ་ཡ། སརྦ་བིགྷྣཱྃ། ཀུ་རུ་ཀུ་རུ། མ་མ་ཀཱརྱཱཾ། ཙྪིནྡྷ་ཙྪིནྡྷ།
སརྦ་དུཥྚཱཾ། ཀྵཱ་པ་ཡ་ཀྵཱ་པ་ཡ། ཤཱནྟེ་ཤཱནྟེ། དཱནྟེ་དཱནྟེ། དཱ་མ་ཡ་དཱ་མ་ཡ་སྭཱ་ཧཱ། དྲུ་ཏཱན་དརྴ་ཡ། ཨཱཏྨ་ནཾ། རཀྵ་རཀྵ་མཱྃ། སརྦ་སཏྭཱཾཤྩ། སརྦ་གྲ་ཧཱ་ན་ཀྵ་ཏྲ། བི་དྷྭཾ་ས་ནི་བརྟྟ་ཡ། བྷ་ག་བ་ཏི་མ་ཧཱ་མཱ་ཡེ། པྲ་སཱ་ད་ཡ། སརྦ་དུཥྚཾ། ཤོ་དྷ་ཡ་སརྦ་པཱ་པྃ་ཙཎྜེ་ཙཎྜེ། ཏུ་རུ་
ཏུ་རུ། ཙཎྜེ་ནི་ཙཎྜེ་ནི། མུ་ཡུ་མུ་ཡུ། མུ་ཙུ་མུ་ཙུ། བ་ཧ་བ་ཧ། ཨུ་གྲེ་ཨུ་གྲ་ཏ་མེ། པཱུ་ར་ཡ་མེ། མ་ནོར་ཐཾ་པ་རི་པཱུ་ར་ཡ། སརྦ་ཏ་ཐཱ་ག་ཏ། ཨ་དྷིཥྛི་ཏེ་ས་མ་ཡེ་སྭཱ་ཧཱ། ཨོཾ་སྭཱ་ཧཱ། ཧཱུྃ་སྭཱ་ཧཱ། ཧྲྀ་སྭཱ་ཧཱ། དྷྲུྃ་སྭཱ་ཧཱ། དྷྲིཾ་སྭཱ་ཧཱ། པདྨ་དྷ་རཱ་ཡ་སྭཱ་ཧཱ། ཨཱ་དི་ཏྱཱ་ཡ་སྭཱ་ཧཱ། སཽ་མཱ་ཡ་སྭཱ་ཧཱ།
དྷཱ་ར་ཎཱི་སུ་ཏཱ་ཡ་སྭཱ་ཧཱ། བུ་དྷཱ་ཡ་སྭཱ་ཧཱ། པྲྀ་ཧསྤ་ཏ་ཡེ་སྭཱ་ཧཱ། ཤུ་ཀྲཱ་ཡ་སྭཱ་ཧཱ། ཀྲྀཥྞ་ཝརྞྞཱ་ཡ་སྭཱ་ཧཱ། རཱ་ཧ་བེ་སྭཱ་ཧཱ། ཀེ་ཏ་བེ་སྭཱ་ཧཱ། བུརྡྷཱཡ་སྭཱ་ཧཱ། བཛྲ་དྷ་རཱ་ཡ་སྭཱ་ཧཱ། པདྨ་དྷ་རཱ་ཡ་སྭཱ་ཧཱ། ཀུ་མཱ་རཱ་ཡ་སྭཱ་ཧཱ། སརྦ་གྲ་ཧེ་བྷྱཿསྭཱ་ཧཱ། སརྦ་ནཀྵ་ཏྲེ་བྷྱཿསྭཱ་ཧཱ། སརྦ་དཱ་ད་ཤ་རཱ་ཤི་ནི་བྷྱཿསྭཱ་ཧཱ། སརྦ་ཨུ་

པ་དྲ་བེ་བྷྱཿསྭཱ་ཧཱ། ཨོཾ་སརྦ་པིདྱེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ལག་ན་རྡོ་རྗེ་གཟའ་རྣམས་ཀྱི་ཡུམ་ཞེས་བྱ་བའི་གཟུངས་ཀྱི་སྔགས་ཀྱི་ཚིག་འདི་དག་སྟོན་ཟླ་ཐ་ཆུངས་སྨིན་དྲུག་གི་ཟླ་བའི་ཡར་ངོའི་ཚེས་བདུན་ནས་བརྩམས་ཏེ། གསོ་སྦྱོང་བླངས་ནས་ཚེས་བཅུ་བཞིའི་བར་དུ་ཉིན་གཅིག་བཞིན་
དུ་མཆོད་ཅིང་བརྗོད་པར་བྱས་ནས་དེ་ནས་ཉ་ལ་ཉིན་མཚན་ཐོག་ཐག་བཀླགས་ན་དེ་ལ་ལོ་དགུ་བཅུ་རྩ་དགུའི་བར་དུ་འཆི་བའི་འཇིགས་པ་འབྱུང་བར་མི་འགྱུར་རོ། །སྐར་མདའ་ལྟུང་བ་དང་། གཟའ་དང་རྒྱུ་སྐར་གྱིས་གདུངས་པའི་འཇིགས་པ་འབྱུང་བར་མི་འགྱུར་རོ། །སྐྱེ་བ་དྲན་
པར་འགྱུར་རོ། །གཟའ་ཐམས་ཅད་ཀྱིས་མཆོད་པར་འགྱུར་རོ། །གཟའ་རྣམས་ཀྱིས་དེ་ལ་ཅི་འདོད་པའི་མཆོག་སྟེར་བར་འགྱུར་རོ། །དེ་ནས་གཟའ་དེ་རྣམས་ཀྱིས་བཅོམ་ལྡན་འདས་ལ་ལེགས་སོ་ཞེས་གསོལ་ནས་མི་སྣང་བར་གྱུར་ཏོ། །འཕགས་མ་གཟའ་རྣམས་ཀྱི་ཡུམ་
ཞེས་བྱ་བའི་གཟུངས་རྫོགས་སོ།། །།རྒྱལ་བློན་བྱང་ཆུབ་སེམས་དཔའ་རྣམས་ཀྱི་སྐུ་རིང་ལ་བསྒྱུར་བ་ལས། དུས་ཕྱིས་དགེ་བསྙེན་གྲགས་པ་རྒྱལ་མཚན་གྱིས་དཔལ་ལྡན་ས་སྐྱའི་དབེན་གནས་སུ་རྒྱ་དཔེ་ལ་གཏུགས་ནས་ཤིན་ཏུ་དག་པར་བྱས་པའོ།། །།
༄༅༅། །རྒྱ་གར་སྐད་དུ། གྲ་ཧ་མཱ་ཏྲྀ་ཀཱ་ནཱ་མ་དྷཱ་ར་ཎཱི། བོད་སྐད་དུ། གཟའ་རྣམས་ཀྱི་ཡུམ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་འབྲོག་
གནས་ཀྱི་གྲོང་ཁྱེར་ཆེན་པོ་ན། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བདུད་དང་། ཉི་མ་དང་། ཟླ་བ་དང་། མིག་དམར་དང་། པ་བ་སངས་དང་། ཕུར་བུ་དང་།
གཟའ་ལྷག་དང་། སྤེན་པ་དང་། སྒྲ་གཅན་འཛིན་དང་། མཇུག་རིངས་རྣམས་དང་། རྒྱུ་སྐར་ཉི་ཤུ་རྩ་བརྒྱད་ལ་སོགས་པ་མང་པོ་རྣམས་ཀྱིས་བསྟོད་པ། རྡོ་རྗེ་ཆེན་པོའི་དམ་ཚིག་གིས་བྱིན་གྱིས་བརླབས་ཀྱིས་རྡོ་རྗེའི་ཁྲི་ལ་བཞུགས་སོ། །བྱང་ཆུབ་སེམས་དཔའ་དུ་མ་དང་ཡང་

ཐབས་ཅིག་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་གཏུམ་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྡེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་
ཕྱག་ན་རྡོ་རྗེ་གཞུ་ཅན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་བདག་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་རྒྱན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་འོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་
གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་གཟིགས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་དཔལ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་པདྨའི་ཏོག་དང་། བྱང་ཆུབ་སེམས་དཔའ་སེམས་
དཔའ་ཆེན་པོ་ཞལ་རས་རྒྱས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་པདྨའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་པདྨའི་སྤྱན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་བྱམས་པ་ལ་སོགས་པ་བྱང་ཆུབ་སེམས་དཔའི་དགེ་འདུན་རྣམས་ཀྱིས་བསྐོར་ཅིང་མདུན་གྱིས་བལྟས་པ་ལ་ཆོས་སྟོན་ཏོ། །བཀོད་པ་ཆེན་པོའི་རྒྱན་གྱི་ནོར་བུ་ཞེས་བྱ་བ་ཐོག་མར་དགེ་བ་དང་། བར་དུ་དགེ་བ་དང་། ཐ་མར་དགེ་བ་དང་། དོན་བཟང་པོ་དང་།
ཚིག་འབྲུ་བཟང་པོ། མ་འདྲེས་པ། ཡོངས་སུ་དག་པ། ཡོངས་སུ་བྱང་བའི་ཆོས་སྟོན་ཏོ། །དེ་ནས་ཕྱག་ན་རྡོ་རྗེས་འཁོར་དེ་དག་ལ་བལྟས་ཏེ། ལངས་ནས་རང་གི་རྫུ་འཕྲུལ་གྱི་བྱིན་གྱིས་བརླབས་ཀྱིས། བཅོམ་ལྡན་འདས་ལ་ལན་བརྒྱ་སྟོང་དུ་མར་བསྐོར་བ་བྱས་ཏེ་ཕྱག་འཚལ་
ནས་སྤྱན་སྔར་འདུག་སྟེ། སྙེམས་པ་དང་བཅས་པས་སྐྱིལ་མོ་ཀྲུང་ལེགས་པར་བཅས་ནས། འཁོར་དེ་དག་ལ་འགྱིང་བག་ཏུ་བལྟས་ཏེ། རྡོ་རྗེའི་ཐལ་མོ་རང་གི་སྙིང་གར་བཞག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཟའ་མི་བཟད་པ།

མི་བཟད་པའི་གཟུགས་ཅན། དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། ཁྲོ་བ་ཁྲོ་བའི་གཟུགས་ཅན་དག་སེམས་ཅན་ཐམས་ཅད་ལ་འཚེ་བར་བགྱིད་པ། ཐོ་འཚམ་པར་བགྱིད་པ། མདངས་ཀྱང་འཕྲོག་པར་བགྱིད་ཅིང་། ཁ་ཅིག་ནོར་ཟས་འཕྲོག་པར་བགྱིད། ཁ་
ཅིག་ནི་སྲོག་འཕྲོག་པར་བགྱིད། སེམས་ཅན་ཚེ་རིང་བ་ཁ་ཅིག་ནི་ཚེ་ཐུང་ངུར་བགྱིད་དོ། །དེ་ལྟར་སེམས་ཅན་ཐམས་ཅད་ལ་གནོད་ཅིང་འཚེ་བར་བགྱིད་པ་དེ་རྣམས་ཀྱི་སླད་དུ་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་གང་གིས་སེམས་ཅན་ཐམས་ཅད་ལ་བསྲུང་བར་འགྱུར་བ་
བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གང་ཡང་ཁྱོད་ཀྱིས་སྙིང་རྗེ་བསྐྱེད་པས་སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་གསང་ཆེན་བས་ཀྱང་ཆེས་གསང་བ་དེ་བཞིན་གཤེགས་པ་ལ་ཞུ་བར་བྱེད་པ་ལེགས་སོ་ལེགས་སོ། །དེའི་ཕྱིར་ལེགས་
པར་རབ་ཏུ་ཉོན་ལ་ཡིད་ལ་ཟུང་ཤིག་དང་། གཟའ་མི་བཟད་པའི་གཟུགས་ཅན་ཤིན་ཏུ་ཁྲོ་བ་དང་། ཤིན་ཏུ་འཇིགས་པར་བྱེད་པ་རྣམས་ཀྱིས་མཆོད་པ་དང་། མཆོད་ཡོན་དང་། བཟླས་བརྗོད་བཟང་པོ་གསང་བ་བས་ཀྱང་ཆེས་གསང་བ་ངས་བཤད་དོ། །དེ་དག་མཆོད་པས་
མཆོད་གྱུར་ཅིང་། །གནོད་པ་བྱས་ན་གནོད་བྱེད་དང་། །གཟའ་དེ་ཀུན་གྱི་ཁ་དོག་དང་། །ཇི་ལྟ་བུར་ནི་འགྱུར་བ་དང་། །ལྷ་རྣམས་དང་ནི་ལྷ་མིན་དང་། །མིའམ་ཅི་དང་ཀླུ་དག་དང་། །གནོད་སྦྱིན་རྣམས་དང་སྲིན་པོ་དང་། །མི་རྣམས་དང་ནི་མི་མ་ཡིན། །དྲག་པོ་གཟི་
བརྗིད་ཆེན་པོ་དང་། །ཁྲོས་པ་ཞི་བར་བྱེད་པ་དེའི། །གསང་སྔགས་རྣམས་དང་མཆོད་པ་དང་། །རིམ་པ་བཞིན་དུ་བཤད་པར་བྱ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཉིད་ཀྱི་ཐུགས་ཀ་ནས་སྙིང་རྗེ་རྣམ་པར་རོལ་པ་ཞེས་བྱ་བའི་འོད་ཟེར་བཀྱེ་
སྟེ། །གཟའ་རྣམས་ཀྱི་སྤྱི་བོར་ཞུགས་སོ། །དེ་ནས་དེའི་མོད་ལ་ཉི་མ་ལ་སོགས་པའི་གཟའ་ཐམས་ཅད་ལངས་ཏེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་ལྷ་རྫས་ཀྱི་མཆོད་པ་བྱས་ཏེ། ཕྱག་འཚལ་ནས་པུས་མོ་བཙུགས་ནས་ཐལ་མོ་སྦྱར་བ་བྱས་ཏེ། བཅོམ་

ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བདག་ཅག་ལ་སྨན་ཡོན་བཏགས་པར་གྱུར་ཏོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་གང་གིས་བདག་ཅག་
རྣམས་ལ་སོགས་པས་ཆོས་སྨྲ་བ་རྣམས་ལ་བསྲུང་བར་འགྱུར་བ་དང་། ཡོངས་སུ་བསྐྱབ་པ་དང་། ཞི་བ་དང་། བདེ་ལེགས་སུ་འགྱུར་བ་དང་། མཚོན་ཆ་སྤང་བ་དང་། ཆད་པ་སྤང་བ་དང་། དུག་གཞིལ་བ་དང་། དུག་གསད་པ་དང་། མཚམས་བཅད་པ་དང་། ས་བཅིང་
བ་རྣམས་བགྱིད་པར་འགྱུར་བ་བཤད་དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་གཟའ་རྣམས་མཆོད་པ་དང་། གསང་སྔགས་བཀའ་སྩལ་ཏོ། །ཨོཾ་མཻ་གྷོ་ལྐཱ་ཡ་སྭཱ་ཧཱ། ཨོྃ་ཤི་ཏཱཾ་ཤ་བེ་སྭཱ་ཧཱ། ཨོཾ་ར་ཀྟཱཾ་ག་ཀུ་མཱ་རཱ་ཡ་སྭཱ་ཧཱ། ཨོཾ་བུ་དྷཱ་
ཡ་སྭཱ་ཧཱ། ཨོཾ་བྲྀ་ཧ་སྤ་ཏ་ཡེ་སྭཱ་ཧཱ། །ཨོཾ་ཨ་སུ་རོཏྟ་མཱ་ཡ་སྭཱ་ཧཱ། ཨོྃ་ཀྲྀཥྞ་བརྞྞཱ་ཡ་སྭཱ་ཧཱ། ཨོཾ་ཨ་མྲྀ་ཏ་པྲི་ཡཱ་ཡ་སྭཱ་ཧཱ། ཨོཾ་ཛྱོ་ཏིཥྐེ་ཏ་པཻ་སྭཱ་ཧཱ། ལག་ན་རྡོ་རྗེ་འདི་དག་ནི་གཟའ་དགུའི་གསང་སྔགས་ཀྱི་སྙིང་པོ་བཀླགས་པས་གྲུབ་པ་ཡིན་ཏེ། ཁ་དོག་དང་མཐུན་པར་སྤོས་ཀྱིས་
དཀྱིལ་འཁོར་སོར་བཅུ་གཉིས་པ་བྱས་པའི་དབུས་སུ་མཆོད་པར་བྱའོ། །ཁམ་པའམ། ཟངས་ལ་སོགས་པའམ། གསེར་དང་དངུལ་གྱི་སྣོད་དུ་མཆོད་ཡོན་ཕུལ་ནས། རེ་རེ་ལ་ཡང་བཟླས་བརྗོད་བརྒྱ་རྩ་བརྒྱད་བྱའོ། །ལག་ན་རྡོ་རྗེ་དེའི་འོག་ཏུ་གཟའ་རྣམས་ཀྱི་ཡུམ་ཞེས་
བྱ་བའི་གཟུངས་ཀྱི་གསང་སྔགས་ཀྱི་ཚིག་ལན་བདུན་བརྗོད་པར་བྱའོ། །དེ་ནས་གཟའ་རྣམས་ཐམས་ཅད་སྲུང་བ་བྱེད་པར་འགྱུར་རོ། །དབུལ་བའི་གདོན་ལས་ཐར་བར་འགྱུར་རོ། །ཚེ་ཟད་པ་ལས་ཚེ་རིང་པོར་བྱེད་པར་འགྱུར་རོ། །ལག་ན་རྡོ་རྗེ་དགེ་སློང་དང་། དགེ་
སློང་མ་དང་། དགེ་བསྙེན་དང་། དགེ་བསྙེན་མ་དང་། གཞན་ཡང་སེམས་ཅན་གྱི་རིགས་གང་ཡིན་པ་དང་། གང་དག་གི་རྣ་ལམ་དུ་གྲགས་པ་དེ་དག་ཀྱང་དུས་མ་ཡིན་པར་འཆི་བའི་དུས་བྱེད་པར་མི་འགྱུར་རོ། །ཕྱག་ན་རྡོ་རྗེ་གཟའ་རྣམས་ཀྱི་དཀྱིལ་འཁོར་གྱི་དབུས་སུ་མཆོད་

པར་བྱ་སྟེ། ཉིན་གཅིག་བཞིན་དུ་ཀློག་པར་བྱེད་པའི་ཆོས་སྨྲ་བ་གང་ཡིན་པ་དེ་ལ་གཟའ་ཐམས་ཅད་བདག་ཉིད་ཀུན་གྱིས་བསམ་པ་ཐམས་ཅད་ཡོངས་སུ་རྫོགས་པར་བྱེད་པར་འགྱུར་རོ། །དེ་དང་རིགས་གཅིག་པ་རྣམས་ཀྱི་དབུལ་བ་ཡང་སེལ་བར་བྱེད་དོ། །དེ་ནས་བཅོམ་
ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་གཟའ་རྣམས་ཀྱི་ཡུམ་ཞེས་བྱ་བ་བཀའ་སྩལ་པ། སངས་རྒྱས་ལ་ཕྱག་འཚལ་ལོ། །རྡོ་རྗེ་འཆང་ལ་ཕྱག་འཚལ་ལོ། །པདྨ་འཆང་ལ་ཕྱག་འཚལ་ལོ། །བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་
གཟའ་རྣམས་ལ་ཕྱག་འཚལ་ལོ། །རྒྱུ་སྐར་རྣམས་ལ་ཕྱག་འཚལ་ལོ། །གཟའ་ཁྱིམ་བཅུ་གཉིས་པོ་རྣམས་ལ་ཕྱག་འཚལ་ལོ། །ཏ་དྱ་ཐཱ། བུདྡྷེ་བུདྡྷེ། བཛྲེ་བཛྲེ། པདྨེ་པདྨེ། ས་ར་ས་ར། པྲ་ས་ར་པྲ་ས་ར། སྨ་ར་སྨ་ར། ཀྲཱི་ཌ་ཡ་ཀྲཱི་ཌ་ཡ། མཱ་ར་ཡ་མཱ་ར་ཡ།
མཱརྡྷ་ཡ་མཱརྡྷ་ཡ། གྷཱ་ཏ་ཡ་གྷཱ་ཏ་ཡ། སརྦ་བིགྷྣཱ་ན། ཀུ་རུ་ཀུ་རུ། ཙྪིནྡྷ་ཙྪིནྡྷ། བྷིནྡ་བྷིནྡ། ཀྵཱ་པ་ཡ་ཀྵཱ་པ་ཡ། ཤཱནྟེ་ཤཱནྟེ། དཱནྟེ་དཱནྟེ། དཱ་མ་ཡ་དཱ་མ་ཡ། བཅོམ་ལྡན་འདས་མ་བདག་ཉིད་མྱུར་དུ་བསྟན་དུ་གསོལ། བདག་འཁོར་དང་བཅས་པ་དང་། སེམས་ཅན་
ཐམས་ཅད་ལ་བསྲུང་དུ་གསོལ། བསྲུང་དུ་གསོལ། གཟའ་ཐམས་ཅད་དང་། རྒྱུ་སྐར་རྣམས་ཀྱི་གནོད་པ་བཟློག་ཏུ་གསོལ། བཅོམ་ལྡན་འདས་མ་རྫུ་འཕྲུལ་ཆེན་པོ་མངའ་བ་སྡང་བའི་སེམས་ཅན་རྣམས་བསལ་དུ་གསོལ། བདག་གི་སྡིག་པ་རྣམས་སྐམ་དུ་
གསོལ། །ཙཎྜེ་ཙཎྜེ། ཏུ་རུ་ཏུ་རུ། ཙཎྜེ་ནི་ཙཎྜེ་ནི། མུ་ཡུ་མུ་ཡུ། མུ་ཙུ་མུ་ཙུ། བ་ཧ་བ་ཧ། ཨུ་གྲེ་ཨུ་གྲ་ཏ་མེ། པཱུ་ར་ཡ་མེ། མ་ནོར་ཐཾ་པ་རི་པཱུ་ར་ཡ། སརྦ་ཏ་ཐཱ་ག་ཏ་ཨ་དྷིཥྛི་ཏེ་ས་མ་ཡེ་སྭཱ་ཧཱ། ཨོྃ་སྭཱ་ཧཱ། ཧཱུྃ་སྭཱ་ཧཱ། ཧྲཱི་སྭཱ་ཧཱ། དྷྲྃ་སྭཱ་ཧཱ། དྷྲྀཾ་སྭཱ་ཧཱ། པདྨ་དྷ་རཱ་སྭཱ་ཧཱ།
ཨཱ་དི་ཏྱཱ་ཡ་སྭཱ་ཧཱ། སཽ་མཱ་ཡ་སྭཱ་ཧཱ། དྷཱ་ར་ཎཱི་སུ་ཏཱ་ཡ་སྭཱ་ཧཱ། བུདྷཱ་ཡ་སྭཱ་ཧཱ། བྲྀ་ཧསྤ་ཏ་ཡེ་སྭཱ་ཧཱ། ཤུ་ཀྲཱ་ཡ་སྭཱ་ཧཱ། ཀྲྀཥྞ་བརྞྞ་ཡ་སྭཱ་ཧཱ། རཱ་ཧ་བེ་སྭཱ་ཧཱ། ཀེ་ཏ་བེ་སྭཱ་ཧཱ། བུདྡྷ་ཡ་སྭཱ་ཧཱ། བཛྲ་དྷ་རཱ་ཡ་སྭཱ་ཧཱ། པདྨ་དྷ་རཱ་ཡ་སྭཱ་ཧཱ། ཀུ་མཱ་རཱ་ཡ་སྭཱ་ཧཱ། སརྦ་གྲ་ཧེ་བྷྱཿསྭཱ་ཧཱ།

སརྦ་ནཀྵ་ཏྲེ་བྷྱཿསྭཱ་ཧཱ། སརྦ་དྭཱ་ད་ཤ་རཱ་ཤི་ནི་བྷྱཿསྭཱ་ཧཱ། སརྦ་ཨུ་པ་དྲ་བེ་བྷྱཿསྭཱ་ཧཱ། ཨོཾ་སརྦ་བིདྱེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཕྱག་ན་རྡོ་རྗེ་འདི་ནི་གཟའ་རྣམས་ཀྱི་ཡུམ་ཞེས་བྱ་བའི་གཟུངས་ཀྱི་གསང་སྔགས་ཀྱི་ཚིག་དངོས་གྲུབ་ཐམས་ཅད་ཀྱི་གཞི་ཡིན་ནོ། །ཕྱག་
ན་རྡོ་རྗེ་གང་ཡང་གཟའ་རྣམས་ཀྱི་གཟུངས་ཀྱི་གསང་སྔགས་ཀྱི་ཚིག་འདི་དག་སྟོན་ཟླ་ཐ་ཆུངས་ཡར་གྱི་ངོའི་ཚེས་བདུན་ནས་བརྩམས་ཏེ་གསོ་སྦྱོང་དང་ལྡན་པར་བྱས་ཏེ། ཚེས་བཅུ་བཞིའི་བར་དུ་གཟའ་རྣམས་ལ་མཆོད་པ་བྱས་ཏེ་གཟུང་བར་བྱའོ། །དེ་ནས་ཟླ་བ་ཉའི་ཉིན་
མཚན་ཐོག་ཐག་བཀླགས་ན་དེ་དག་ལ་ལོ་དགུའི་བར་འཆི་བའི་འཇིགས་པ་མི་འབྱུང་ངོ་། །གཟའི་འཇིགས་པ་དང་། སྐར་མདའ་ལྟུང་བ་དང་། རྒྱུ་སྐར་གྱི་གནོད་པས་འཇིགས་པར་མི་འགྱུར་རོ། །ཚེ་རབས་དྲན་པར་འགྱུར་རོ། །གཟའ་ཐམས་ཅད་ལ་མཆོད་པ་
བྱས་པར་འགྱུར་རོ། །གཟའ་ཐམས་ཅད་ཀྱིས་ཅི་འདོད་པ་སྦྱིན་པར་བྱེད་དོ། །དེ་ནས་བཅོམ་ལྡན་འདས་ལ་གཟའ་རྣམས་ཀྱིས་ཕྱག་འཚལ་ཏེ། ལེགས་སོ་ལེགས་སོ་ཞེས་གསོལ་ཏེ་མི་སྣང་བར་གྱུར་ཏོ། གཟའ་རྣམས་ཀྱི་ཡུམ་ཞེས་བྱ་བའི་གཟུངས་རྫོགས་
སོ།། ༄༅༅། །རྒྱ་གར་སྐད་དུ། ཨཱརྱ་བ་སུ་དྷཱ་རཱ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ནོར་གྱི་རྒྱུན་ཅེས་བྱ་བའི་གཟུངས། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །
འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཀཽ་ཤཱམྦཱི་ན་ཚེར་མ་ཅན་ཞེས་བྱ་བའི་ནགས་མཆོག་ཆེན་པོ་ན། དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཡོན་ཏན་
ཐམས་ཅད་དང་ལྡན་པ་རབ་ཏུ་མང་པོ་དང་ཐབས་ཅིག་ཏུ་བཞུགས་ཏེ། དེའི་ཚེ་ཀཽ་ཤཱམྦཱིའི་གྲོང་ཁྱེར་ཆེན་པོ་ན། ཁྱིམ་བདག་ཟླ་བ་བཟང་པོ་ཞེས་བྱ་བ། དབང་པོ་ཉེ་བར་ཞི་བ། ཡིད་ཉེ་བར་ཞི་བ། བུ་ཕོ་དང་། བུ་མོ་དང་། གཟའ་མི་མང་པོ་དང་ལྡན་པ། དད་ཅིང་

ཆེ་རུ་དད་པ་ཞིག་གནས་པ་དེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་འབུམ་ཕྲག་དུ་མར་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཁྱིམ་བདག་ཟླ་
བ་བཟང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ། བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་
ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཁྱིམ་བདག་ཟླ་བ་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཁྱོད་ཅི་དང་ཅི་འདོད་པ་དྲིས་ཤིག་དང་། ཁྱོད་ཀྱིས་ཇི་སྐད་དྲིས་པའི་དྲི་བ་ལུང་བསྟན་པས་ངས་ཁྱོད་
ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། །ཁྱིམ་བདག་ཟླ་བ་བཟང་པོས་བཅོམ་ལྡན་འདས་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་མཉན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ།
རིགས་ཀྱི་བུ་མོ་དབུལ་པོར་གྱུར་པ་ལས་ཇི་ལྟར་དབུལ་བ་མ་མཆིས་པར་འགྱུར་ཞིང་། བྲོ་ནད་ཀྱིས་ཐེབས་ན་ཡང་བྲོ་ནད་མ་མཆིས་པར་འགྱུར་བ་ལགས། དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་ཁྱིམ་བདག་ཟླ་བ་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཁྱིམ་
བདག་ཁྱོད་ཅིའི་ཕྱིར་དབུལ་པོའི་དོན་དུ་འདྲི། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཁྱིམ་བདག་ཟླ་བ་བཟང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་དབུལ་བ་མང་བ་དང་། གསོ་བ་མང་བ་དང་། བུ་ཕོ་དང་། བུ་མོ་མང་བ་དང་།
གཟའ་མི་མང་པོ་དང་ལྡན་པ་ལགས་ཏེ། དེའི་སླད་དུ་གང་གིས་སེམས་ཅན་དབུལ་པོ་རྣམས་ཀྱི་དབུལ་བ་མ་མཆིས་པར་འགྱུར་བ་དང་། བྲོ་ནད་ཀྱིས་ཐེབས་པ་རྣམས་བྲོ་ནད་མ་མཆིས་པར་འགྱུར་བ་དང་། ནོར་དང་། འབྲུ་དང་། མཛོད་དང་། བང་མཛོད་མང་པོ་དང་ལྡན་

པར་འགྱུར་བ་དང་། སྡུག་པ་དང་། ཡིད་དུ་མཆི་བ་དང་། མཐོང་ན་ཡིད་དུ་འཐད་པ་དང་། དབང་ཕྱུག་ཏུ་འགྱུར་བ་དང་། སྦྱིན་བདག་མཛོད་པས་མི་འཚལ་ཞིང་། དབྱིག་དང་། གསེར་དང་། ནོར་དང་། འབྲུའི་མཛོད་དང་། བང་མཛོད་རྣམས་
དང་། ནོར་བུ་དང་། མུ་ཏིག་དང་། རྡོ་རྗེ་དང་། བཻ་ཌཱུརྱ་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དབུལ་བས་མ་འཚལ་ཅིང་འབྱོར་བར་འགྱུར་བ་དང་། ཁྱིམ་གྱི་བུ་སྨད་དང་། བཟའ་མི་རྣམས་བརྟན་པར་འགྱུར་བའི་ཆོས་ཀྱི་རྣམ་གྲངས་དེ་བཅོམ་ལྡན་
འདས་ཀྱིས་ལེགས་པར་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཁྱིམ་བདག་ཟླ་བ་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་འདས་པའི་དུས་བསྐལ་པ་གྲངས་མེད་པ་འདས་པར་གྱུར་པ་དེའི་ཚེ་དེའི་དུས་ན། བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི། ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་
རྒྱས་བཅོམ་ལྡན་འདས་རྡོ་རྗེ་འཆང་རྒྱ་མཚོའི་དབྱངས་ཞེས་བྱ་བ་འཇིག་རྟེན་དུ་བྱུང་སྟེ། རིགས་ཀྱི་བུ་ངས་དེ་བཞིན་གཤེགས་པ་དེ་ལས་ནོར་གྱི་རྒྱུན་ཅེས་བྱ་བའི་གཟུངས་འདི་ཐོས་ཏེ། བཟུང་ཞིང་བཅངས་བཀླགས། ཀུན་ཆུབ་པར་བྱས། རྗེས་སུ་ཡི་རང་བར་བྱས་
ཤིང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་ཏེ། རིགས་ཀྱི་བུ་ད་ཡང་ངས་དེ་བཤད་པའོ། །རིགས་ཀྱི་བུ་གཟུངས་འདིའི་མཐུས་མི་རྣམས་རྣམ་པར་ཐོ་འཚམ་པར་མི་བྱེད་དོ། །མི་མ་ཡིན་པ་རྣམས་རྣམ་པར་ཐོ་འཚམ་པར་མི་བྱེད་དོ། །
གནོད་སྦྱིན་རྣམས་རྣམ་པར་ཐོ་འཚམ་པར་མི་བྱེད་དོ། །སྲིན་པོ་རྣམས་རྣམ་པར་ཐོ་འཚམ་པར་མི་བྱེད་དོ། །ཡི་དགས་རྣམས་རྣམ་པར་ཐོ་འཚམ་པར་མི་བྱེད་དོ། །ཤ་ཟ་རྣམས་རྣམ་པར་ཐོ་འཚམ་པར་མི་བྱེད་དོ། །འབྱུང་པོ་རྣམས་རྣམ་པར་ཐོ་འཚམ་པར་མི་བྱེད་དོ། །

གྲུལ་བུམ་རྣམས་རྣམ་པར་ཐོ་འཚམ་པར་མི་བྱེད་དོ། །བརྗེད་བྱེད་རྣམས་རྣམ་པར་ཐོ་འཚམ་པར་མི་བྱེད་དོ། །གནོན་པོ་རྣམས་རྣམ་པར་ཐོ་འཚམ་པར་མི་བྱེད་དོ། །ལུས་སྲུལ་པོ་རྣམས་རྣམ་པར་ཐོ་འཚམ་པར་མི་བྱེད་དོ། །ལྷ་རྣམས་རྣམ་པར་ཐོ་འཚམ་པར་
མི་བྱེད་དོ། །ལྷ་མ་ཡིན་རྣམས་རྣམ་པར་ཐོ་འཚམ་པར་མི་བྱེད་དོ། །ཟས་སུ་མི་གཙང་བ་ཟ་བ་རྣམས་དང་། ཟས་སུ་གཅིན་འཐུང་བ་རྣམས་དང་། ཟས་སུ་ཁྲག་འཐུང་བ་རྣམས་དང་། ཟས་སུ་ཤ་ཟ་བ་རྣམས་དང་། ཟས་སུ་རྣག་འཐུང་བ་རྣམས་དང་།
ཟས་སུ་ཞག་ཟ་བ་རྣམས་དང་། ཟས་སུ་རྐང་ཟ་བ་རྣམས་དང་། ཟས་སུ་ངར་སྣབས་ཟ་བ་རྣམས་དང་། ཟས་སུ་སྟོར་ཁུང་ནས་འབབ་པ་འཐུང་བ་རྣམས་དང་། ཟས་སུ་དབུགས་རྔུབ་པ་དང་། འབྱུང་བ་ཟ་བའི་བར་རྣམས་རྣམ་པར་འཚེ་བར་མི་འགྱུར་རོ། །རིགས་
ཀྱི་བུ་ནོར་གྱི་རྒྱུན་གྱི་གཟུངས་འདི་དག་རིགས་ཀྱི་བུའམ། རིགས་ཀྱི་བུ་མོ་གང་གི་ཁྱིམ་ན་ཡོད་དམ། སྙིང་ལ་ཡོད་དམ། ལག་ན་ཡོད་དམ། གླེགས་བམ་དུ་ཆུད་དམ། ཐོས་པར་གྱུར་ཏམ། ཀུན་ཆུབ་པར་བྱས་སམ། བཀླགས་སམ། བཟུང་ངམ། རྗེས་
སུ་ཡི་རང་བར་བྱས་སམ། གཞན་དག་ལ་རྒྱ་ཆེར་རབ་ཏུ་བསྟན་པའི་རིགས་ཀྱི་བུའམ། རིགས་ཀྱི་བུ་མོ་དེ་ལ་ཡུན་རིང་པོའི་དོན་དང་། ཕན་པ་དང་། དགེ་བ་དང་། གྲུབ་པ་དང་། བདེ་བ་དང་། ལོ་ལེགས་པར་འགྱུར་རོ། །སུ་ཞིག་དེ་བཞིན་གཤེགས་པ་
རྣམས་ལ་མཆོད་པ་བྱས་ཏེ། ནོར་གྱི་རྒྱུན་གྱི་གཟུངས་འདི་ནམ་ཕྱེད་ན་ལན་གཉིས་སམ། ལན་གསུམ་མམ། ལན་བཞི་བཏོན་ན་དེའི་ལྷ་ཡི་རངས་ཏེ། དེ་བཞིན་གཤེགས་པའི་བསྟན་པ་ལ་དགའ་བ་དང་། ཆོས་གདགས་པ་བྱས་པས་དགའ་བ་དང་། དགེ་
འདུན་གདགས་པ་བྱས་པས་དགའ་བ་དང་། ཆོས་སྨྲ་བ་ལ་དགའ་བ་དང་། ལྷག་པའི་བསམ་པས་བདག་ཉིད་འོངས་ཏེ། འབྲུའི་ཆར་འབེས་སོ། །ན་མོ་བཛྲ་དྷ་ར་སཱ་ག་ར་ནི་རྒྷོ་ཥཱ་ཡ། ཏ་ཐཱ་ག་ཏཱ་ཡ། ཏདྱ་ཐཱ། ཨོཾ་སུ་རཱུ་པེ། བྷ་དྲེ། བྷ་དྲ་བ་ཏི། ཨངྒ་ལེ།

མངྒ་ལེ། མངྒ་ལ་བ་ཏི། ཨ་ལེ། ཨ་ཙ་ལེ། ཨ་ཙ་ལ་བ་ལེ། ཨུདྒྷ་ཏ་ནི། ཨུད་བྷེ་ད་ནི། པ་སྱ་བ་ཏི། དཱ་ན་པ་ཏི། དྷ་ནྱ་པ་ཏི། ཤྲཱི་མ་ཏི། པྲ་བྷ་བ་ཏི། ཨ་མ་ལེ། བི་མ་ལེ། ནིརྨ་ལེ། རུ་རུ། སུ་རཱུ་བེ། སུ་རཱུ་པ་མ་ལེ། བི་མ་ལེ། ཙ་ལེ། ཨ་ཙ་ན་སྟེ། ཨན་
ན་སྟེ། བིན་ན་སྟེ། བི་ཤྭ་ཀེ་ཤི། བི་ཤྭ་ནི་ཤི། ཨངྐུ་རེ། མངྐུ་རེ། པྲ་བངྐུ་རེ། བཱི་ར་མེ། བི་དྷ་མེ། རི་རི་མེ། དི་དི་མེ། དུ་དུ་མེ། ཁ་ཁ་མེ། ཏ་ཏ་རེ། ཏ་ར་ཏ་ར། ཏཱ་ར་ཏཱ་ར། བཛྲེ་བཛྲེ་བཛྲེ་བ་མེ། ཊ་ཀེ་ཊ་ཀེ། ཋ་ཀེ་ཋ་ཀེ། ཨུགྐེ་བུགྐེ། ཋ་ཀེ་ཋ་ར་ཀེ། ཨ་
བརྟ་ནི་བ་ར་ཤ་ན། ཥ་ད་ནི་བཛྲ་དྷཱ་ར་སཱ་ག་ར་ནིརྒྷ་ཥཱ་ན། ཏ་ཐཱ་ག་ཏ་མ་ནུ་སྨ་ར། སྨ་ར་སྨ་ར། སརྦ་ཏ་ཐཱ་ག་ཏ་སཏྱ་མ་ནུ་སྨ་ར། དྷརྨ་སཏྱ་མ་ནུ་སྨ་ར། སངྒྒྷ་སཏྱ་མ་ནུ་སྨ་ར། ད་ཏ་ད་ཏ། པཱུ་ར་པཱུ་ར། པཱུ་ར་ཡ་པཱུ་ར་ཡ། པཱུ་ར་ཎི། བྷ་ར་བྷ་ར་ཎི། ཨ་མ་ལེ། སུ་
མངྒ་ལ། ཤཱནྟ་མ་ཏི། ཤུ་བྷ་མ་ཏི། མངྒ་ལ་བྷ་ནི། མ་ཧཱ་མ་ཏི། མ་ཧཱ་མ་ཏི། བྷ་དྲ་བ་ཏི། པྲ་བྷ་བ་ཏི། སུ་ཙནྡྲ་མ་ཏི། ཨཱ་གཙྪ། ཨཱ་གཙྪ། ས་མ་ཡ་མ་ནུ་སྨ་ར་སྭཱ་ཧཱ། ཨཱ་བ་ར་ཎི་མ་ནུ་སྨ་ར་སྭཱ་ཧཱ། པྲ་བྷ་བ་མ་ནུ་སྨ་ར་སྭཱ་ཧཱ། དཱི་དཱི་མ་ནུ་སྨར་སྭཱ་ཧཱ། ཏེ་ཛོ་མ་ནུ་སྸ་ར་
སྭཱ་ཧཱ། བི་ཛ་ཡ་མ་ནུ་སྨ་ར་སྭཱ་ཧཱ། ཧྲྀ་ད་ཡ་མ་ནུ་སྨ་ར་སྭཱ་ཧཱ། སརྦ་སཏྭ་བི་ན་ཡ་མ་ནུ་སྨ་ར་སྭཱ་ཧཱ། ཨོཾ་བ་སུ་དྷཱ་རེ་སྭཱ་ཧཱ། ཨོཾ་པ་སུ་ཤྲི་ཡེ་སྭཱ་ཧཱ། ཨོཾ་ཤྲི་བ་སུ་སྭཱ་ཧཱ། ཨོཾ་བ་སུ་སྭཱ་ཧཱ། རིགས་ཀྱི་བུ་འདི་ནི་ནོར་གྱི་རྒྱུན་ཅེས་བྱ་བའི་གཟུངས་ཏེ། གཟུངས་སྔགས་འདིའི་
མཐུས་མུ་གེ་དང་། ནད་དང་། འཆི་ངས་འབྱུང་བར་མི་འགྱུར་རོ། །རིགས་ཀྱི་བུ་སུ་ཞིག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་མཆོད་པ་བྱས་ཏེ། ནོར་གྱི་རྒྱུན་གྱི་གཟུངས་ཀྱི་གསང་སྔགས་ཀྱི་ཚིག་འདི་དག་ནུབ་
གཅིག་བཏོན་ན། དེ་ནས་དངོས་གྲུབ་ཏུ་འགྱུར་རོ། །རྒྱས་པའི་དོན་དུ་བདག་གི་ཁྱིམ་མམ། གཞན་གྱི་ཁྱིམ་མམ། གནས་གཙང་མ་བང་མཛོད་དམ། གནས་གང་དུ་ཡང་རུང་བར་དེ་བཞིན་གཤེགས་པ་སྤྱན་རས་གཟིགས་དབང་ཕྱུག་དང་། སངས་རྒྱས་དང་།

བྱང་ཆུབ་སེམས་དཔའ་ཐམས་ཅད་དང་། གསང་སྔགས་ཀྱི་ལྷའི་ཕྱིར་ཙནྡན་གྱིས་དཀྱིལ་འཁོར་གྲུ་བཞིར་བྱས་ཏེ། ནུབ་གཅིག་བཏོན་ན། རིགས་ཀྱི་བུ་དེའི་ཁྱིམ་ནོར་བུ་དང་། འབྲུ་དང་། གསེར་དངུལ་དང་། ཡོ་བྱད་ཐམས་ཅད་ཀྱི་རྒྱུན་མི་ཆེན་པོའི་ཚང་ཙམ་གྱིས་
གང་བར་འགྱུར་རོ། །འཇིགས་པ་དང་། གནོད་པ་ཐམས་ཅད་ཀྱང་མེད་པར་འགྱུར་རོ། །རིགས་ཀྱི་བུ་དེའི་ཕྱིར་ཁྱོད་རབ་ཏུ་བསྒྲིམས་ལ་ནོར་གྱི་རྒྱུན་གྱི་གཟུངས་འདི་ཟུང་ཞིང་། ཆོངས་ཤིག །ལྷོགས་ཤིག །སྟོན་ཅིག །གཞན་དག་ལ་ཡང་དག་པར་རབ་ཏུ་སྟོན་ཅིག་
དང་། དེ་ཁྱོད་ཀྱི་ཡུན་རིང་པོའི་དོན་དང་། ཕན་པ་དང་། བདེ་བར་འགྱུར་རོ། །བཅོམ་ལྡན་འདས་ལེགས་སོ་ཞེས་གསོལ་ཏེ། ཁྱིམ་བདག་ཟླ་བ་བཟང་པོས་བཅོམ་ལྡན་འདས་ལས་ནོར་གྱི་རྒྱུན་གྱི་གཟུངས་འདི་ཐོས་ནས་ཚིམ་ཞིང་དགའ་ལ་མགུ་ཞིང་ཡི་རངས་ཏེ།
རབ་ཏུ་དགའ་ནས། དགའ་བ་དང་། ཡིད་བདེ་བ་སྐྱེས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ནོར་གྱི་རྒྱུན་ཅེས་བགྱི་བ་བླངས་ལགས། གཟུངས་སུ་ཟིན་ལགས།
བཟུང་ལགས། བཀླགས་ལགས། ཀུན་ཆུབ་པར་བགྱིས་ལགས། རྗེས་སུ་ཡི་རང་བར་བགྱིས་ལགས་ཏེ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བགྱི་ལགས་སོ། །དེའི་སྐད་ཅིག་ཙམ་ལ་ཁྱིམ་བདག་ཟླ་བ་བཟང་པོའི་བང་མཛོ་རྣམས་ཡོངས་
སུ་གང་བར་གྱུར་ཏོ། །དེ་ནས་ཁྱིམ་བདག་ཟླ་བ་བཟང་པོས་བཅོམ་ལྡན་འདས་ལ་ལན་འབུམ་ཕྲག་དུ་མར་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས། བཅོམ་ལྡན་འདས་ཀྱི་ཐད་ནས་སོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་
དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་སོང་ལ་ཁྱིམ་བདག་ཟླ་བ་བཟང་པོའི་ཁྱིམ་ནོར་དང་། འབྲུས་ཡོངས་སུ་གང་བ་ཕུན་སུམ་ཚོགས་པ་དང་། མཛོད་ཆེན་པོ་དང་། བང་མཛོད་ཡོངས་སུ་གང་བ་རྣམས་ལ་ལྟོས། དེ་ནས་ཚེ་དང་ལྡན་པ་ཀུན་དགའ་བོས་བཅོམ་

ལྡན་འདས་ཀྱི་ལྟར་མཉན་ནས་ཀཽ་ཤྭམྦཱིའི་གྲོང་ཁྱེར་ཆེན་པོ་ག་ལ་བ་དང་། ཁྱིམ་བདག་ཟླ་བ་བཟང་པོའི་ཁྱིམ་ག་ལ་བ་དེར་སོང་སྟེ་ཕྱིན་ནས་ནང་དུ་ཞུགས་པ་དང་། ནོར་དང་། འབྲུས་ཡོངས་སུ་གང་བ་ཕུན་སུམ་ཚོགས་པ་དང་། རིན་པོ་ཆེ་ཕུན་སུམ་
ཚོགས་པ་དང་། ཡོ་བྱེད་ཐམས་ཅད་ཀྱི་མཛོད་ཆེན་པོ་དང་། བང་མཛོད་རྣམས་ཀྱང་ཡོངས་སུ་གང་བར་མཐོང་ངོ་། །མཐོང་ནས་ཀྱང་ཚིམ་ཞིང་དགའ་ལ་མགུ་ཞིང་ཡི་རངས་ཏེ་རབ་ཏུ་དགའ་བ་དང་། ཡིད་བདེ་བ་སྐྱེས་ཏེ། བཅོམ་ལྡན་འདས་ག་ལ་བ་དེར་སོང་ངོ་། །དེ་
ནས་ཚེ་དང་ལྡན་པ་ཀུན་དགའ་བོ་ཡ་མཚན་དུ་འཛིན་ཅིང་། དགའ་བ་དང་། ཡིད་བདེ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གིས་ཁྱིམ་བདག་ཟླ་བ་བཟང་པོ་ནོར་མང་བ་མཛོད་ཆེན་པོ་དང་། བང་མཛོད་རྣམས་ཀྱང་ནོར་དང་འབྲུ་
ཕུན་སུམ་ཚོགས་པའི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རིགས་ཀྱི་བུ་ཁྱིམ་བདག་ཟླ་བ་བཟང་པོ་དད་ཅིང་མཆོག་ཏུ་དད་ཅིང་དགེ་བའི་བསམ་པ་ཅན་དེས་ནོར་གྱི་རྒྱུན་གྱི་གཟུངས་འདི་བཟུང་ཞིང་རབ་ཏུ་བཏོན་ཏེ།
བླངས་ཤིང་། བཀླགས། ཀུན་ཆུབ་པར་བྱས། རྗེས་སུ་ཡི་རང་བར་བྱས་ཤིང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པའི་ཕྱིར་རོ། །ཀུན་དགའ་བོ་དེའི་ཕྱིར་ཁྱོད་ཀྱིས་ཀྱང་ནོར་གྱི་གཟུངས་འདི་ལོང་ཞིག །ཆོངས་ཤིག །ལྷོགས་ཤིག །སྟོན་
ཅིག །ཟུང་ཤིག །ཀུན་ཆུབ་པར་གྱིས་ཤིག །གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག་དང་། དེ་ནི་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་། མི་རྣམས་ཀྱི་
དོན་དང་། ཕན་པ་དང་བདེ་བར་འགྱུར་རོ། །ཀུན་དགའ་བོ་སུ་ཞིག་རིག་སྔགས་འདི་ལས་གཞན་དུ་སྨྲ་བ་ནི་ལྷ་དང་བཅས་པ་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེར་བཅས་པ་དང་། ལྷ་དང་། མི་དང་། ལྷ་མ་ཡིན་

དུ་བཅས་པའི་འཇིག་རྟེན་ན་ངས་མ་མཐོང་ངོ་། །ལན་གཉིས་སུ་བཏོན་ཏམ། ལན་གསུམ་དུ་བཏོན་ཀྱང་འགལ་བར་བྱེད་པ་དེ་ནི་གནས་མེད་དོ། །ཀུན་དགའ་བོ་གཟུངས་ཀྱི་གསང་སྔགས་ཀྱི་ཚིག་འདི་དག་ནི་མི་ཕྱེད་པ་ཡིན་ནོ། །ཀུན་དགའ་བོ་འདི་དག་ནི་སེམས་ཅན་དགེ་བའི་རྩ་
བ་ཟད་པ་རྣམས་ཀྱི་རྣ་ལམ་དུ་གྲགས་པར་མི་འགྱུར་ན་གླེགས་བམ་ལ་ཡི་གེར་བྲི་བ་དང་། ཡིད་ལ་གཟུང་བ་ལྟ་ཅི་སྨོས། དེ་ཅིའི་ཕྱིར་ཞེ་ན། འདི་ནི་དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་ཏེ། གཟུངས་སྔགས་འདི་ནི་སེམས་ཅན་དབུལ་པོ་དང་། ནད་སྣ་
ཚོགས་ཀྱིས་གཟིར་བ་དང་། འཇིགས་པ་དང་། སེམས་ཅན་སྡང་བས་གནོད་པར་བྱས་པ་ཐམས་ཅད་ཀྱི་དོན་དུ་དེ་བཞིན་གཤེགས་པ་ཐམས་ཅད་ཀྱིས་གསུངས་པ་དང་། བཤད་པ་དང་། རྗེས་སུ་ཡི་རང་བ་དང་། རབ་ཏུ་ཕྱེ་བ་དང་། བསྔགས་པ་དང་། བཀྲོལ་
བ་དང་། གསལ་བར་མཛད་པ་དང་། བསྐྱེད་པ་དང་། བྱིན་གྱིས་བརླབས་པ་དང་། ཆོས་ཀྱི་ཕྱག་རྒྱས་བཏབ་པ་དང་། བསྟོད་པ་དང་། སྙན་པར་བརྗོད་པ་དང་། གོ་བར་མཛད་པ་དང་། བསྙད་པའི་ཕྱིར་རོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ།
དེའི་ཚེ་ཐལ་མོ་སྦྱར་ནས་ཆེད་དུ་བརྗོད་པ་འདི་ཆེད་དུ་བརྗོད་ཅིང་ཚིགས་སུ་བཅད་པ་འདི་དག་གསོལ་ཏོ། །སངས་རྒྱས་བཅོམ་ལྡན་བསམ་གྱིས་མི་ཁྱབ་སྟེ། །སངས་རྒྱས་ཆོས་ཀྱང་བསམ་གྱིས་མི་ཁྱབ་ལགས། །བསམ་གྱིས་མི་ཁྱབ་པ་ལ་དད་རྣམས་ཀྱིས། །རྣམ་པར་
སྨིན་པ་འང་བསམ་གྱིས་མི་ཁྱབ་ལགས། །ཞི་བ་ཅི་ཡང་མཁྱེན་པ་ཐམས་ཅད་མཁྱེན། །ཆོས་ཀྱི་རྒྱལ་པོ་རྒ་ཤི་མི་མངའ་བ། །ཡེ་ཤེས་ཕ་རོལ་བགྲོད་པར་ཕྱིན་གྱུར་པ། །སངས་རྒྱས་དཔའ་བོ་ཁྱོད་ལ་ཕྱག་འཚལ་ལོ། །དེ་ནས་ཚེ་དང་ལྡན་པ་ཀུན་དགའ་བོ་ཚིམ་
ཞིང་དགའ་ལ་མགུ་ཞིང་ཡི་རངས་ནས་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་

བཀའ་སྩལ་པ། ཀུན་དགའ་བོ་འདི་ནི་ཁྱིམ་བདག་ཟླ་བ་བཟང་པོས་ཞུས་པ་ཞེས་བྱ་བར་ཟུང་ཤིག །ནོར་དང་། འབྲུ་དང་། རིན་པོ་ཆེ་ཐམས་ཅད་ཀྱི་གཏེར་ཞེས་བྱ་བར་ཡང་ཟུང་ཤིག །དེ་བཞིན་གཤེགས་པ་ཐམས་ཅད་ཀྱིས་བསྔགས་པ་ནོར་གྱི་རྒྱུན་གྱི་གཟུངས་
ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། དགེ་སློང་དེ་དག་དང་། བྱང་ཆུབ་སེམས་དཔའ་དེ་དག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་།
དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་ནོར་གྱི་རྒྱུན་ཅེས་བྱ་བའི་གཟུངས་རྫོགས་སོ།། །།དེ་ནས་བཅོམ་ལྡན་འདས་ནོར་རྒྱུན་མའི་རྟོག་པ་བཤད་པར་བྱ་སྟེ། དང་པོ་རེ་
ཞིག་དཔྱིད་ཟླ་ཐ་ཆུངས་ཀྱི་དཀར་པོའི་ཕྱོགས་ཀྱི་ཚེས་གཅིག་ལ་རྒྱ་མཚོར་འབབ་པའི་ཆུ་བོར་སོང་སྟེ། དེ་ནས་ནུ་མའི་བར་ཆུའི་ནང་དུ་ནུབ་པར་བྱས་ཏེ་འདུག་ལ་ཉི་མ་ལ་མངོན་དུ་ཕྱོགས་པར་ཡོངས་སུ་བརྟགས་ལ་ཇི་སྙེད་གནས་ཀྱི་བར་དུ་བཟླས་པ་བྱའོ། །བཟའ་བ་ཐམས་ཅད་
སྤངས་ཏེ། ཉོན་མོངས་ཤིང་སྨྲ་བཅད་བྱས་ཏེ། ནུབ་བདུན་དུ་བཟླས་པ་བྱའོ། །དེ་ནས་བཅོམ་ལྡན་འདས་མའི་ཐང་སྐུ་ཡང་དབུ་སྐྲ་མ་གཏོགས་པ་གུར་གུམ་དང་། ཙནྡན་གྱིས་བྱུག་པར་བྱ་བ་ནི་ནུབ་མོ་སྔ་བར་ལངས་ཏེ། ཆུར་ཁྲུ་བདུན་ཞེང་དུ་ཁྲུ་གསུམ་སྟེ། ཁྲུ་བཅུ་
དང་བཅས་པ་ལ་ཚོན་སྣ་མ་ལུས་པ་གསོ་སྦྱོང་དང་ལྡན་པའི་ལྷ་བཟོས་བཅོམ་ལྡན་འདས་མ་མདོག་ལྗང་སེར་སྣ་ཚོགས་པའི་རྒྱན་གྱིས་བརྒྱན་པ། ཕྱག་གཡས་པ་ན་འབྲས་བུ་ཆེན་པོ་བསྣམས་པ། ཕྱག་གཡོན་པ་ན་སྒྲུབ་པ་པོ་རྣམས་ལ་སྟེར་བའི་རིན་པོ་ཆེའི་ཟ་མ་ཏོག་མུ་ཏིག་
དང་། རྡོ་རྗེ་ཕ་ལམ་དང་། བཻ་ཌཱུརྱའི་འབྲས་བུ་ཅན་བསྣམས་པའི་ཕྱག་དང་ལྡན་པ་བྱའོ། །སྟེང་དུ་ལྷའི་བུ་རིན་པོ་ཆེའི་ཆར་མངོན་དུ་འབེབས་བཞིན་པ་བྱའོ། །གཡས་ལོགས་སུ་དཔལ་ཆེན་མོ་པདྨའི་ཕྱག་ཅན་སྒྲུབ་པ་པོ་ལ་ཉེ་བར་དགོངས་པ་ལ་གནས་བཞིན་པ་བྱའོ། །གཡོན་ལོགས་

སུ་པདྨའི་དཔལ་རིན་པོ་ཆེ་ཡིས་སྙིམ་པ་གང་བ་བྱའོ། །འོག་ཏུ་སྒྲུབ་པ་པོ་པདྨའི་ལག་པ་ཅན་བྱའོ། །དེ་ནས་ཐང་སྐུ་སྐུ་གདུང་དང་བཅས་པའི་མཆོད་རྟེན་གྱི་དྲུང་དུ་ནུབ་ཕྱོགས་སུ་ཁ་བསྟན་ལ་བཀྲམ་སྟེ། དེ་ནས་ཉེ་བར་སྤྱོད་པའི་གཏོར་མ་མ་གཏོགས་པ་མཛོད་ཀྱི་བཞེས་པ་ཡང་དབུལ་
ཞིང་དྲི་ཞིམ་པོའི་མེ་ཏོག་གིས་མཆོད་པ་ཆེན་པོ་བྱས་ལ་ཙནྡན་དང་ཨ་ག་རུའི་བདུག་པས་བསྲེག་པར་བྱའོ། །ཞུན་མར་གྱི་མར་མེ་བརྒྱ་དབུལ་བར་བྱའོ། །དེ་ནས་སྟན་གཅིག་ལ་གནས་ཏེ་བཅོམ་ལྡན་འདས་མའི་ཞལ་ལ་དམིགས་ལ་ནུབ་མོ་མཚན་བཟླས་པ་བྱས་ན། དེ་ནས་སྐྱ་
རེངས་ཤར་བའི་དུས་སུ་སྐྱེས་བུ་ཆེན་པོ་ཙམ་གྱི་ནོར་རིན་པོ་ཆེ་ཐམས་ཅད་ཀྱི་རྒྱུན་འབབ་ཅིང་ཁང་པ་གང་བར་འགྱུར་རོ། །ཡང་ན་མཚན་མོ་ཕྱེད་ན་ཆུའི་ནང་དུ་ཞུ་གསལ་བརྒྱད་བརྒྱ་བཟླས་པར་བྱའོ། །ཟླ་བ་གཅིག་ཏུ་གཅིག་གི་སྦྱོར་བས་ནོར་གྱི་རྒྱུན་འབབ་པར་འགྱུར་ཏེ། མི་ཤེས་
པར་ཁ་ཅིག་འཕེལ་བར་འགྱུར་རོ། །ཡང་ན་རྒྱལ་པོའི་དཀོར་མངོན་པར་འདོད་ན་ཉིན་མོ་ཆུའི་ནང་དུ་བཟླས་པ་བྱ་ཞིང་མཚན་མོའི་ཕྱེད་ན་ཏིལ་གྱི་སྦྱིན་སྲེག་བརྒྱད་བརྒྱ་བྱས་ན་རྒྱལ་རིགས་ལས་རྙེད་པ་ཆེན་པོ་ཐོབ་བོ། །ཡུངས་ཀར་མར་ལས་བསྲེས་ནས་སྦྱིན་སྲེག་བྱས་ན་རྒྱལ་པོ་དབང་དུ་
བྱེད་དོ། །ཀུན་དུ་རའི་སྦྱིན་སྲེག་བྱས་ན་རྒྱལ་པོའི་བློན་པོ་དབང་དུ་བྱེད་དོ། །ཁ་ཅིག་གིས་སྦྱོར་བ་གང་གིས་མཚན་མོ་བཅོམ་ལྡན་འདས་པདྨའི་གདན་ཅན་དྲན་པར་བྱས་ན་སྦྱིན་བདག་ཆེན་པོར་འགྱུར་རོ། །ཡང་ན་སྒྲུབ་ཐབས་ཆེན་པོ་བཤད་པར་བྱ་སྟེ། ཆོ་འཕྲུལ་གྱི་དཀར་པོའི་
ཕྱོགས་ཀྱི་ཚེས་གཅིག་ནས་བརྩམས་ཏེ། ཟས་ཅི་སྲིད་དུ་བཅད་ནས་གདུང་དང་བཅས་པའི་མཆོད་རྟེན་གྱི་དྲུང་དུ་ཐང་ཀ་ནུབ་ཕྱོགས་སུ་བསྟན་ལ་དགྲམ་ཞིང་། ཉིན་མོ་ཤེས་རབ་ཀྱི་ཕ་རོལ་ཏུ་ཕྱིན་པ་བཀླག་ཅིང་མཚན་མོ་སྟན་གཅིག་ལ་གནས་པས་ནུབ་ཡལ་གྱིས་བཟླས་པ་བྱས་ན་ནོར་
གྱི་ཕུང་པོ་ཆེན་པོ་རྙེད་དེ། འཐོར་གནོད་བྱས་ཀྱང་འཛད་པར་མི་འགྱུར་ཏེ། ལྷ་ཁང་ཆེན་པོ་བྱའོ། །ཆོ་ག་འདིའི་ཆོ་འཕྲུལ་གྱི་དཀར་པོའི་ཕྱོགས་ལ་བཟླས་པ་བྱས་ན་འཁོར་ལོས་སྒྱུར་བ་ཐོབ་ཅིང་། བཅོམ་ལྡན་འདས་མ་ནོར་རྒྱུན་མ་དངོས་སུ་མཐོང་ཞིང་ཕྱིར་མི་ལྡོག་པའི་བྱང་ཆུབ་སེམས་

དཔར་འགྱུར་རོ། །ཅི་ལྟར་དེ་ལྟར་ཚངས་སྤྱོད་བྱ་ཞིང་ཁ་ན་མ་ཐོ་བའི་ཟས་ཆང་དང་། ཉ་ཤ་ལ་སོགས་པ་སྤང་ཞིང་མཚན་མོ་བཟླས་པ་བྱས་ན་དབུལ་པོར་མི་འགྱུར་རོ། །དེ་ནས་བཅོམ་ལྡན་འདས་ལ་འཕགས་པ་ཀུན་དགའ་བོ་དང་། ཟླ་བ་བཟང་པོ་ཡོངས་
སུ་དགའ་ནས་ཁྱིམ་བདག་ཟླ་བ་བཟང་པོའི་དོན་དུ་གསུངས་པ་ལ་མངོན་པར་བསྟོད་དོ།། །།བཅོམ་ལྡན་འདས་མ་ནོར་རྒྱུན་མའི་རྟོག་པ་རྫོགས་སོ།། །།ན་མོ་རཏྣ་ཏྲ་ཡཱ་ཡ། ཨོཾ་བ་སུདྷ་རེ་སྭཱ་ཧཱ། སྙིང་པོའོ། །ན་མོ་རཏྣ་ཏྲ་ཡཱ་ཡ། ཨོཾ་བ་སུ་ཤྲཱི་སྭཱ་ཧཱ།
ཉེ་བའི་སྙིང་པོའོ། །ན་མོ་རཏྣ་ཏྲ་ཡཱ་ཡ། ཨོཾ་བ་སུ་སྭཱ་ཧཱ། ཉེ་བའི་སྙིང་པོའི་ཡང་ཉེ་བའི་སྙིང་པོའོ། །ཐལ་མོ་སྦྱར་ཏེ་གུང་མོ་གཉིས་དང་དེ་ནས་སྲིན་ལག་གཉིས་དང་། མཐེའུ་ཆུང་གཉིས་གཤིབས་ཏེ། སྡིགས་མཛུབ་ཕན་ཚུན་གཉིས་སྒྲེལ་ལ། མཐེའུ་ཆུང་གཉིས་ཅུང་ཞིག་
བསྣོལ་ཏེ། རྩེ་མོ་གཉིས་རྒྱབ་སྤྲད་དེ་ཁབ་ལྟ་བུ་བྱས་ལ། གུང་མོ་སྤྲད་པ་ལ་མཐེབ་མོ་ཟུང་ཅིག་དེའི་འོག་ཏུ་སྦྱར་ཏེ། རིག་པ་བཅས་པ་ནི་རབ་ཏུ་བཟུང་བའི་རྟོག་པ་ལས་གསུངས་པ་སྟེ། ལས་ཐམས་ཅད་སྒྲུབ་པའི་བཅོམ་ལྡན་འདས་མ་ནོར་རྒྱུན་མའི་གཟུངས་ནི་ཐུབ་པས་གསུངས་
པའོ། །ན་མོ་རཏྣ་ཏྲ་ཡཱ་ཡ། ཨོཾ་ཤྲཱི་ཡེ་ཤྲཱི་ཡེ་ཀ་རི། དྷ་ན་ཀ་རི། དྷ་ན་ཀ་རི། དྷ་ན་ཀ་རི་སྭཱ་ཧཱ། བསྒྲུབ་པར་བྱ་བའི་སྔགས་སོ། །རིག་པ་འདིའི་དང་པོ་རེ་ཤིག་དམ་ཚིག་གི་ཕྱག་རྒྱ་ནི་སོར་མོ་རྣམས་ཐལ་མོ་སྦྱར་ལ་མཐེབ་ཆེན་དབུས་སུ་བཅུག་པ་ནི་བཅོམ་ལྡན་འདས་མའི་དམ་ཚིག་གི་ཕྱག་
རྒྱའོ། །ཨོཾ་ས་མ་ཡེ། ས་མེ་ས་མ་ཡ་ཀ་རི། མ་ཧཱ་ས་མ་ཡེ་སྭཱ་ཧཱ། དམ་ཚིག་གི་ཕྱག་རྒྱ་དང་སྔགས་སོ། །ཕྱག་རྒྱ་དེ་ཉིད་ལས་གུང་མོ་དང་སྡིགས་མཛུབ་ཀྱི་ཚིགས་གསུམ་པ་བསྐུལ་ཞིང་མཐེབ་ཆུང་གཉིས་ཅུང་ཟད་ཕྱིར་ཕྱུང་བ་ནི། བཅོམ་ལྡན་འདས་མའི་ཕྱག་རྒྱའོ། །འདི་ནི་དབབ་
པ་དང་། བསྡུ་བ་དང་། བསྒྲུབ་བྱའི་སྔགས་ཀྱིས་བྱའོ། །ཕྱག་རྒྱ་དེ་ཉིད་ལ་སྡིགས་མཛུབ་གཉིས་བརྐྱང་བ་ནི་མེ་ཏོག་གི་ཕྱག་རྒྱ་ཡིན་ཏེ། ཨོཾ་བ་སུན་དྷེ་སྭཱ་ཧཱ། མེ་ཏོག་གི་ཕྱག་རྒྱ་དེ་ཉིད་ལས་གུང་མོ་བརྐྱང་བ་ནི་བདུག་སྤོས་ཀྱི་ཕྱག་རྒྱ་ཡིན་ཏེ། སྔགས་ནི། ཨོཾ་བ་སུ་

དྷ་རི་སྭཱ་ཧཱ། ཕྱག་རྒྱ་འདི་ནི་མིང་མེད་བརྐྱང་བའི་ཕྱག་རྒྱ་ཡིན་ཏེ། སྔགས་ནི། ཨོཾ་བ་སུ་དྷ་མ་ཏི་ཤྲཱི་ཡེ་སྭཱ་ཧཱ། ཕྱག་རྒྱ་འདི་ཉིད་ལ་མཐེབ་ཆུང་གི་སེན་མོ་མཐེབ་ཆེན་གྱིས་བཀབ་སྟེ། སོར་མོ་གཞན་རྣམས་ནི་རྡོ་རྗེའི་མཚན་ཉིད་དུ་བྱས་པ་ནི་མར་མེའི་ཕྱག་རྒྱ་སྟེ། སྔགས་ནི།
ཨོཾ་བ་སུ་དྷཱ་རི་ཎི་སྭཱ་ཧཱ། སེན་མོ་གན་རྐྱལ་དུ་བྱས་ལ་མཐེ་བོང་གཉིས་ལོགས་སུ་སྦྱར་བ་ནི་གཏོར་མའི་ཕྱག་རྒྱ་སྟེ། སྔགས་ནི། ཨོཾ་བ་སུདྷཱ་རི་ཎི་སྭཱ་ཧཱ། ལྷག་མ་ཉེ་བར་སྤྱོད་པ་ཉི་ཤུ་རྩ་བའི་སྔགས་ཀྱི་ཐུན་མོང་གི་ཕྱག་རྒྱའམ། སྔགས་ཀྱིས་བསྒྲུབ་པར་བྱའོ། །བཅོམ་ལྡན་འདས་
མའི་ཐང་ཀའི་ཆོ་ག་ནི་ཉམས་པ་མེད་ཅིང་། སྐྲའི་ཉམས་པ་མེད་པ་སྐུད་པ་མ་ཆད་པའི་རས་ཞེང་དུ་མཐོ་གང་གི་ཚད་ཉིད་ལ་རིང་དུ་མཐོ་དོ་བྱས་ཏེ་སྟེང་དུ་བཅོམ་ལྡན་འདས་བྲི། གཡས་སུ་འཕགས་པ་སྤྱན་རས་གཟིགས་བྱ། གཡོན་དུ་རྡོ་རྗེ་འཆང་བྱ། བཅོམ་ལྡན་འདས་ཀྱི་
འོག་ཐང་ཀའི་དབུས་སུ་བཅོམ་ལྡན་འདས་མ་བྲི་སྟེ། གསེར་གྱི་མདོག་ཅན། རྒྱན་ཐམས་ཅད་ཀྱིས་བརྒྱན་པ། གོས་སྲབ་མོའི་ཤམ་ཀག་མནབས་པ། དེ་བཞིན་དུ་གོས་སྲབ་མོའི་སྟོད་གཡོགས་ཅན་ཁ་དོག་སྣ་ཚོགས་ཀྱི་གོས་ཀྱི་ཤམ་ཐབས་དང་ལྡན་པའོ། །དེ་ནས་
འོག་ཕྱོགས་སུ་སྒྲུབ་པ་པོ་ལག་ན་མཆོད་པའི་ཆོ་ག་བྱའོ། །དེ་ནས་སྒྲུབ་པ་པོས་གཙང་སྦྲ་བྱས་གོས་གཙང་མ་གྱོན་ཏེ། གསོ་སྦྱོང་ཡན་ལག་བརྒྱད་བྱའོ། །དེའི་མདུན་དུ་བསྙེན་པ་འབུམ་ཕྲག་གཅིག་བྱས་ལ་ཇི་ལྟར་འབྱོར་པས་མཆོད་པས་ཆོ་ག་བྱའོ། །དེ་ནས་སྒྲུབ་པོ་དང་ལྡན་
པས་སྨྱུང་བ་བྱས་ཏེ། ཞིང་གི་དབུས་སུ་ཐང་སྐུ་བཞུགས་སུ་གསོལ་ཏེ། དྲི་དང་། མེ་ཏོག་དང་། བདུག་པ་དང་། ཉེ་བར་ལོངས་སྤྱོད་པའི་གཏོར་མ་བྱས་ལ་བརྒྱད་བརྒྱ་བཟླས་པར་བྱའོ། །ཐང་ཀའི་འོག་ཏུ་ལན་བརྒྱ་རྩ་གཅིག་གིས་བསྔགས་བྱས་པའི་བུམ་པ་ཆུས་ཡོངས་སུ་གང་བ་
གཞག་པར་བྱའོ། །བུམ་པའི་ཆུས་གཏོར་མ་བཏང་ཞིང་། གླང་བུ་དང་ཐོང་འཛིན་གཉིས་ལ་གཏོར་བར་བྱའོ། །གླང་བུའི་མགུལ་པ་དང་། ཐོང་འཛིན་གྱི་མགུལ་བར་མེ་ཏོག་གི་ཕྲེང་བ་གདགས་པར་བྱའོ། །དེ་རྣམས་ཀྱི་མདུན་དུ་སྔགས་པས་ཆུ་ཡི་རྒྱུན་ཞིང་ལ་ལན་གཡས་

ལོགས་སུ་བསྐོར་བར་བྱ་བ་ནི་སྔགས་པས་མདུན་དུ་འགྲོ་ཞིང་སྔགས་པའི་སྟེང་ནི་ཞིང་རྨོར་འགྲོ་བར་བྱའོ། །ཕྱིས་ས་བོན་འདེབས་པའི་དུས་སུ་ཆོ་ག་འདིས་བརྒྱད་བརྒྱ་སྔགས་ལ་ས་བོན་སྤར་བ་གང་ལ་ལན་བདུན་བཟླས་ཏེ་ཞིང་ལ་གཏོར་བར་བྱའོ། །ས་བོན་གདབས་
པའི་ཆོ་གའོ། །ད་ནི་ཞིང་རྔ་བའི་དུས་སུ་ཡང་ཆོ་ག་འདིས་བྱའོ། །ཆོ་ག་ལྷག་པ་ནི་འདིར་དགེ་སློང་བཞི་ལ་ཞིང་གི་མཚམས་བཞིར་ཅི་འདོད་སྟོན་མོ་བྱས་ཏེ། དེ་ནས་སྔགས་པས་ཆད་པ་བདུན་བཟླས་པ་བྱེད་ཅིང་རྔ་བ་ནི་ལོ་ཏོག་རྩ་བ་བྱས་པའི་ཆོ་གའོ། །ད་ནི་གཡུལ་འཆག་པ་བྱའི་
ཆོ་ག་བཤད་པར་བྱ་སྟེ། གཡུལ་འཆག་པའི་དུས་སུ་སྔགས་པས་རང་ཉིད་གཙང་སྦྲ་བྱས་ལ་གོས་གཙང་མ་གོན་ལ་ཤར་དུ་ཞལ་བསྟན་ཏེ། སྐུ་གཟུགས་བཞུགས་སུ་གསོལ་ལ་དྲི་དང་། མེ་ཏོག་དང་། བདུག་པ་དང་། ཡང་ན་ཉེ་བར་ལོངས་སྤྱོད་པའི་གཏོར་མ་བྱས་ལ་བཟླས་
པ་བྱས་ཏེ། འབྲུའི་ཕུང་པོའི་མཚམས་བཞིར་གཞོན་ནུ་མ་གསར་དུ་བག་མ་བྱས་ཤིང་ཁྱོ་ཡོད་པའི་བུད་མེད་བཞི་ལ་སྟོན་མོ་བྱས་ལ། དེ་སྙེད་ཀྱི་མཐར་ཟད་པ་མེད་པར་གནས་སོ། །དེ་ནས་སྐྱེས་བུས་འབྲུ་འཇལ་ཞིང་གྲངས་བྱེད་པའི་དཔྲལ་བ་ལ་སྔགས་དགོད་པར་བྱའོ། །བཅོམ་
ལྡན་འདས་མའི་སྔགས་དེ་སྙེད་དུ་སྨྲ་བཅད་བྱས་ལ་བཟླས་པ་བྱའོ། །ཇི་སྙེད་དུ་སྔོ་ལ་བལྟས་ན་གཉིས་འགྱུར་དུ་འགྲོ་བར་འགྱུར་རོ། །དེ་སྙེད་བཟླས་པ་བྱའོ། །དེ་ནས་འབྲུའི་ལྷག་མ་དེ་མི་འཇལ་བར་འཆིངས་པའི་མི་ལ་སོགས་པ་བོས་ཤིང་སྦྱིན་པའམ། དགེ་འདུན་ལ་སྦྱིན་པར་
བྱའོ། །གཡུལ་འཆག་པའི་ཆོ་གའོ། །ད་ནི་འབྲུ་བང་མཛོད་དུ་འཇུག་པའི་ཆོ་ག་བཤད་པར་བྱ་སྟེ། དང་པོ་རེ་ཞིག་མཛོད་ཀྱི་སྒོ་གཡས་གཡོན་དུ་འབྱུང་པོ་གཉིས་གཅེར་བུ་གསུས་པ་འཕྱང་བ། དབང་པོ་འཕྱང་བ། གཡོན་པའི་ལག་ན་འབྲུའི་སྣོད་བཟུང་ཞིང་འབྲུ་སྐྱུག་བཞིན་
པ། གསེར་གྱི་མདོག །རྒྱན་ཐམས་ཅད་ཀྱིས་བརྒྱན་པ་གཉིས་བྲི་བར་བྱའོ། །མཛོད་ཀྱི་ཁང་པར་ཡང་དྲི་དང་། བྱུག་པ་དང་། མཆོད་ཡོན་སྦྱིན་ཞིང་གདུགས་དང་། རྒྱལ་མཚན་དང་། བ་དན་ལ་སོགས་པས་བཅོམ་ལྡན་འདས་མའི་ཐང་ཀའི་མཛོད་ཀྱི་ནང་དུ་བཞུགས་པར་བྱའོ།།

དེ་ནས་འོ་མའི་ཆུ་རྒྱུན་གཏོར་བཞིན་པའི་སྔགས་པས་འགྲོ་བར་བྱ་ཞིང་། དེའི་རྒྱབ་ནས་དེ་ནས་བྲི་བར་ཁྱིམ་དུ་གཞུག་པར་བྱའོ། །དེའི་རྗེས་ལ་འབྲུའི་མཛོད་ཁང་དུ་ཕྱག་རྒྱ་གཞག་པར་བྱའོ། །དེ་ནས་མཛོད་ཀྱི་ཁང་པའི་སྒོ་རུ་དགེ་འདུན་གྱི་སྟོན་མོ་བྱས་ལ་དྲི་དང་། མེ་ཏོག་དང་།
བདུག་པ་ལ་སོགས་པས་མཆོད་དོ། །ནོར་རྒྱུན་མའི་གཟུངས་རྫོགས་པར་བཀླག་པར་བྱའོ། །གཏོར་མ་རྒྱ་ཆེན་པོ་བྱས་ལ་ཐང་ཀའི་མདུན་དུ་དེ་ནས་སྐྱེས་བུས་འབྲུ་ཕྱིར་འབྱིན་པར་བྱེད་དེ། བཅོམ་ལྡན་འདས་མ་དང་འདྲ་བར་བསམ་ལ་གུར་གུམ་གྱིས་གྲོ་ག་ལ་སྔགས་བྲིས་
ལ་སྤྱི་བོར་བཅིངས་ལ་ཁ་གོས་ཀྱིས་བཀབ་ལ་ཉི་མ་རེ་རེ་ཞིང་འབྲུ་ཕྱིར་དབྱུང་བར་བྱའོ། །མཛོད་ཁང་གི་སྒོ་རུ་ཉིན་རེ་ནོར་རྒྱུན་མ་ཞེས་བྱ་བའི་གཟུངས་ཀྱི་མདོ་བཀླག་པར་བྱའོ། །སྔགས་པས་བསྒྲུབ་བྱའི་སྔགས་བལྟས་ལ་དུས་གསུམ་དུ་བརྒྱད་བརྒྱ་བཟླས་པར་བྱའོ། །ཇི་ལྟར་རྙེད་
པའི་བཅོམ་ལྡན་འདས་མ་ནོར་རྒྱུན་མའི་གཟུངས་ཀྱི་རྟོག་པ་རྫོགས་སོ།། ༄༅། །རྒྱ་གར་སྐད་དུ། ཨཱརྱ་ག་ཎ་པ་ཏི་ཧྲྀ་ད་ཡ། བོད་སྐད་དུ། འཕགས་པ་ཚོགས་ཀྱི་བདག་པོའི་སྙིང་པོ། སངས་རྒྱས་དང་བྱང་ཆུབ་སེམས་དཔའ་ཐམས་
ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་དང་ཐབས་ཅིག་ཏུ་
བཞུགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གང་ལ་ལ་ཚོགས་ཀྱི་བདག་པོ་ཚོགས་ཀྱི་དབང་ཕྱུག་གི་སྙིང་པོ་འཛིན་ན་དེའི་ལས་ཐམས་ཅད་གྲུབ་པར་འགྱུར་རོ། །དེ་བཟུང་བས་དགོས་པ་འགྲུབ་ཅིང་གསང་སྔགས་ཐམས་
ཅད་ཀྱང་དངོས་གྲུབ་ཏུ་འགྱུར་རོ། །ཏདྱ་ཐཱ། ན་མོ་སྟུ་ཏེ་མ་ཧཱ་ག་ཎ་པ་ཏ་ཡེ་སྭཱ་ཧཱ། ཨོཾ་ཀ་ཊ་ཀ་ཊ། མ་ཊ་མ་ཊ། ད་ར་ད་ར། བི་ད་ར་བི་ད་ར། ཧ་ན་ཧ་ན། གྲྀཧྞ་གྲྀཧྞ། དྷཱ་བ་དྷཱ་བ། བྷཉྫ་བྷཉྫ། སྟྃ་བྷ་སྟྃ་བྷ། ཛྃ་བྷ་ཛཾ་བྷ། མོ་ཧ་མོ་ཧ། དེ་ཧི་དེ་ཧི། དཱ་པ་ཡ་དཱ་པ་ཡ། དྷཱ་ན་དྷཱ་ནྱ་སིདྡྷི་མྨེ་པྲ་ཡཙྪ།

ས་མ་ཡ་མ་ནུ་སྨ་ར་མ་ཧཱ་རུ་དྲ་བ་ཙ་ནཱི་ཡེ་སྭཱ་ཧཱ། ཨོཾ་ཀུ་རུ་ཀུ་རུ་སྭཱ་ཧཱ། ཨོཾ་སུ་རུ་སུ་རུ་སྭཱ་ཧཱ། ཨོཾ་མུ་རུ་མུ་རུ་སྭཱ་ཧཱ། ཨོཾ་པཱ་པ་ཤཱྃ་ཏི་བ་སུ་པུཥྚིཾ་ཀུ་རུ་སྭཱ་ཧཱ། ཨངྒྒུ་ཏ་བིནྡུ་ཀྵུ་བྷི་ཏ་ཙིཏྟ་མ་ཧཱ་བི་དཱ་རཿསམཱ་གཙྪ་ཏི། མ་ཧཱ་བྷ་ཡ། མ་ཧཱ་བ་ལ། མ་ཧཱ་པ་ར་ཀྲ་མ། མ་ཧཱ་ཧ་སྟི། མ་ཧཱ་
དཀྵི་ཎི་ཡ་པྲ་ཙི་ད་ཡ་མི་སྭཱ་ཧཱ། ཏ་དྱ་ཐཱ། ཨོཾ་ཀུ་རུ་ཀུ་རུ། ཙུ་རུ་ཙུ་རུ། མུ་རུ་མུ་རུ། ཨོཾ་གཿགཿགཿགཿགཿགཿགཿགཿ། ཨོཾ་ན་མོ་ན་མཿསྭཱ་ཧཱ། ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་
ཞིག་ཚོགས་ཀྱི་བདག་པོ་ཚོགས་ཀྱི་དབང་ཕྱུག་གི་སྙིང་པོ་འདི་རྩོམ་ཞིང་གསང་སྔགས་སྒྲུབ་པ། དཀོན་མཆོག་གསུམ་མཆོད་དུ་ཡུལ་གཞན་དུ་འགྲོའམ། རྒྱལ་པོའི་ཕོ་བྲང་འཁོར་དུ་འཇུག་ན་སངས་རྒྱས་བཅོམ་ལྡན་འདས་རྣམས་ལ་མེ་ཏོག་དང་། བདུག་པས་མཆོད་པ་བྱས་ཏེ།
ཚོགས་ཀྱི་བདག་པོའི་སྙིང་པོ་འདི་བཀླགས་ན་ལས་ཐམས་ཅད་འགྲུབ་ཀྱིས་འདི་ལ་ཐེ་ཚོམ་མ་ཟ་ཤིག །འཐབ་པ་དང་། རྩོད་པ་དང་། ཁྲག་ཁྲུག་དང་། ཡུལ་འཁྲུགས་པ་ཐམས་ཅད་ཀྱི་ནང་དུ་ཡང་དྲན་པར་བྱས་ན་ཐམས་ཅད་རབ་ཏུ་ཞི་བར་འགྱུར་རོ། །ཉིན་གཅིག་བཞིན་དུ་ནང་
བར་ལངས་ནས་ཚིག་ཏུ་བཏོན་ན་ཐོས་པ་འཛིན་པར་འགྱུར་རོ། །གནོད་སྦྱིན་དང་། སྲིན་པོ་དང་། མཁའ་འགྲོ་མ་ཐམས་ཅད་ཀྱིས་མདངས་འཕྲོག་པར་མི་འགྱུར་ཞིང་ཐག་རིང་པོར་ཡོངས་སུ་སྤོང་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཐམས་
ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་ཚོགས་ཀྱི་བདག་པོའི་སྙིང་པོ་རྫོགས་སོ།། །།
༄༅༅། །རྒྱ་གར་སྐད་དུ། མ་ཧཱ་ག་ན་པ་ཏི་ཏནྟྲ་ནཱ་མ། བོད་སྐད་དུ། ཚོགས་ཀྱི་བདག་པོ་ཆེན་པོའི་རྒྱུད་ཅེས་བྱ་བ། འཇིག་རྟེན་དབང་ཕྱུག་ལ་ཕྱག་འཚལ་ལོ། །དེ་ནས་དཔལ་ལྡན་ཚོགས་བདག་ཆེ། །ཕྱག་འཚལ་དཔལ་ལྡན་ཚོགས་བདག་དགྱེས། །གཟུགས་བརྙན་

མཎྜལ་གྲུ་བཞིར་བཞག །ཟླ་བ་དྲུག་ཏུ་མཆོད་པར་བྱ། །ལྷ་ཡི་འཁོར་ལོས་སྒྱུར་བ་དང་། །ཚེ་འདི་ཉིད་ལ་སྐལ་བ་མཉམ། །བསོད་ནམས་ཆེན་པོ་ཐོབ་པར་འགྱུར། །ལོངས་སྤྱོད་ལྷ་དང་མཉམ་པ་དང་། །ཚེ་ཡང་རིང་བའི་མཆོག་ཏུ་འགྱུར། །མི་ལ་སོགས་པ་དབང་དུ་འགྱུར། །
ལྷ་ཡི་བུ་ཡང་བྲན་བཞིན་འགྱུར། །བདག་གི་བསྒོ་བ་ཉན་པར་འགྱུར། །ཀླུ་ཡང་དེ་ཡི་བསྒོ་བ་ཉན། །བྲན་བཞིན་ལས་རྣམས་བྱེད་པར་འགྱུར། །ལྷ་ཡི་ལོངས་སྤྱོད་མངའ་རིས་ལས། །འདོད་པའི་ལོངས་སྤྱོད་འབྱུང་བར་འགྱུར། །དངོས་གྲུབ་སྒྲུབ་པའི་སྐལ་བ་ཅན། །
གདུལ་བྱའི་དབང་གི་སྐུ་སྤྲུལ་པ། །ལྷ་ཆེན་ཚོགས་བདག་ཆེན་པོས་བྱ། །དངོས་གྲུབ་དམ་པ་མཆོག་སྒྲུབ་ན། །མཐུ་སྟོབས་ཕུན་སུམ་ཚོགས་ལྡན་ཞིང་། །ལོངས་སྤྱོད་ཡིད་བཞིན་འཕེལ་བར་བྱེད། །འཇིག་རྟེན་ཕན་མཛད་ལྷ་ཡི་ལྷ། །གང་གིས་མཆོད་པ་དངོས་གྲུབ་
ཡིན། །ལྷ་ཆེན་ཚོགས་ཀྱི་བདག་པོའི་རྒྱུད་ལས་དངོས་གྲུབ་འབྱུང་བ་ཞེས་བྱ་བའི་ལེའུ་སྟེ་དང་པོའོ།། །།དེ་ནས་དབེན་པའི་གནས་སུ་ནི། །དཀྱིལ་འཁོར་གྲུ་བཞི་དག་བྱ་སྟེ། །བ་ཡི་ལྕི་བས་ལེགས་པར་བྱུག །འཇམ་ཞིང་མཉེན་ལ་དབུས་མཐོ་བའི། །
དབུས་སུ་ཚོགས་བདག་སྐུ་གཟུགས་བཞུགས། །མེ་ཏོག་དཀར་པོས་དེ་ལ་གཏོར། །བདག་ཉིད་གཅེར་བུར་བྱུང་བྱས་ཏེ། །ལོག་འདྲེན་གཟུགས་ཀྱིས་ཡང་དག་མཆོད། །བ་ར་ཏ་ཀ་ཟླ་བ་དྲུག །ཉིན་རེ་བཞིན་དུ་དུས་གསུམ་དུ། །གསང་སྔགས་བརྒྱ་ནི་རྩ་བརྒྱད་བཟླས། །
ཡིད་ལ་རེ་བ་ཐམས་ཅད་རྫོགས། །བསམ་པ་ཐམས་ཅད་འགྲུབ་པར་འགྱུར། །ཨོཾ་ནི་བཀྲ་ཤིས་དཔལ་དང་ལྡན། །གསང་སྔགས་མགོ་ལ་གཞག་པར་བྱ། །ཡིད་བཞིན་ནོར་བུ་ལྟ་བུ་ཡི། །དངོས་གྲུབ་སྟེར་བྱེད་ཡི་གེ་ཡང་། །དེ་འོག་གྲལ་ལ་གཞག་པར་བྱ། །ཉི་མ་
ལྟ་བུའི་ཡི་གེ་ཡང་། །དེ་ཡི་རྗེས་ལ་བཀླག་པར་བྱ། །དེ་བཞིན་གཤེགས་པའི་མཚན་དང་པོ། །ཡི་གེ་མཆོག་ནི་བླང་བར་བྱ། །གསལ་བྱེད་ཡི་གེ་དང་པོ་ཡང་། །དེ་ཡི་མཇུག་ཏུ་བརྗོད་པར་བྱ། །རིན་ཆེན་ཡི་གེ་སྭཱ་ཞེས་བྱ། །ལས་ཀྱི་ཡི་གེ་ཧཱ་ཞེས་བྱ། །དངོས་གྲུབ་འདོད་

པས་གསང་སྔགས་བཟླས། །ལྷ་ཆེན་དངོས་གྲུབ་སྒྲུབ་པའི་རྒྱུད་ལས་ལྷའི་དངོས་གྲུབ་ཀྱི་གསང་སྔགས་བསྟན་པའི་ལེའུ་སྟེ་གཉིས་པོའོ།། །།དེ་ནས་ཚོགས་ཀྱི་བདག་པོ་བཤད། །ཚོགས་ཀྱི་བདག་པོ་སྐུ་མདོག་དཀར། །གླང་པོ་ཆེ་ཡི་མགོ་བོ་ཅན། །
མཆེ་བ་ཡ་གཅིག་ཆག་པ་དང་། །ཕྱག་གཡས་ལ་ཕུག་བསྣམས་པ། བྱི་བའི་གདན་ལ་བཅིབས་པ། རིན་པོ་ཆེས་སྐུ་བརྒྱན་པ། ཟླ་བ་ཚེས་པས་དབུ་བརྒྱན་པ། འོད་གསལ་བ། འོད་ཟེར་འཕྲོ་བ། མདོག་བཟང་བ། ཁ་དོག་བཟང་བ། གསུས་པ་ཆེ་བ། རྒྱན་གྱིས་
སྤུད་པའོ། །དངོས་གྲུབ་སྒྲུབ་པའི་རྒྱུད་ལས་ཚོགས་ཀྱི་བདག་པོ་བསྟན་པའི་ལེའུ་སྟེ་གསུམ་པའོ།། །།དེ་ནས་སྐར་མ་རྒྱལ་གྱི་ཉིན་པར་མེ་ཏོག་དཀར་པོ་བླངས་ཏེ། ཚོགས་ཀྱི་བདག་པོའི་སྐུ་གཟུགས་བྲིས་ཏེ། ཁ་དོག་དཀར་པོ་གླང་པོ་ཆེའི་དབུ་ཅན། ཕྱག་གཡས་
ན་ལ་ཕུག་བསྣམས་པ། གཡོན་ན་རིན་པོ་ཆེའི་ནོར་བུ་བསྣམས་པ། གསུས་པ་ཆེ་བ། རྒྱན་ཐམས་ཅད་ཀྱིས་བརྒྱན་པ། ཟླ་བ་དང་བྱི་བའི་ཁྲི་ལ་བཞུགས་པ་མཁས་པས་བྱའོ། །དེ་ལ་དཀྱིལ་འཁོར་གྱི་དབུས་སུ་བདག་ལ་ཞལ་ཕྱོགས་པར་བཞག་ལ། བདག་ཉིད་ལོག་
འདྲེན་གྱི་གཟུགས་ཀྱིས་ཡང་དག་པར་མཆོད་དོ། །ཚོགས་ཀྱི་བདག་པོ་ཞལ་གཅིག་ཕྱག་བཞི་པ་སྒྲུབ་པའི་ལེའུ་སྟེ་བཞི་པའོ།། །།དེ་ནས་དབང་ལྡན་གྱི་མཚམས་སུ་ཚོགས་ཀྱི་བདག་པོ་དཀར་པོ་གླང་པོ་ཆེའི་མགོ་ཅན། བྱི་བ་ལ་ཞོན་པ། མིག་གསུམ་པ། ཟླ་བ་ཕྱེད་པ་
འཛིན་པ། གཡས་ན་ལ་ཕུག་དང་དགྲ་སྟ་འཛིན་པ། གཡོན་པ་ཏྲི་ཤཱུལ་དང་ཐོད་པ་འཛིན་པའོ། །ལག་པ་གཡོན་པ་ཁུ་ཚུར་བཅངས་པའི་མཛུབ་མོ་དང་གུང་མོ་བརྐྱང་ལ་མཛུབ་མོ་བཀུག་ལ་གུང་མོའི་ཚིགས་སུ་བཟུང་བར་བྱ་བ་ནི་ཚོགས་ཀྱི་བདག་པོའི་ཕྱག་རྒྱའོ། །ཚོགས་
ཀྱི་བདག་པོའི་ཕྱག་རྒྱ་བསྟན་པའི་ལེའུ་སྟེ་ལྔ་པའོ།། །།དེ་ནས་གསང་སྔགས་བསྟན་པ་ནི། །ཨོཾ་ནི་དཔལ་ལྡན་མགོ་ལ་བཞག །དེ་ནས་ཡིད་བཞིན་ནོར་བུ་ནི། །རིན་པོ་ཆེ་ཡི་ཡི་གེ་བྲི། །སྡེ་ཚན་གསལ་བྱེད་དང་པོ་ཡང་། །དེ་ཡི་རྗེས་སུ་བྲི་བར་བྱ། །དེ་བཞིན་གཤེགས་པའི་

མཚན་དང་པོ། །དབྱངས་ཡིག་བརྒྱད་པས་མཛེས་པར་བྱ། །གསལ་བྱེད་དང་པོའི་ཡི་གེ་ཡང་། །བློ་ཡིས་བླངས་ཏེ་ཡིད་ཀྱིས་བྲི། །སྡེ་ཚན་གསུམ་པས་གསུམ་པ་ལ། །དང་པོའི་བཞི་པ་སྦྱར་བར་བྱ། །སྡེ་ཚན་བདུན་པའི་གསུམ་པ་ལ། །གསུམ་པའི་དང་པོས་
འོག་ཏུ་སྦྱར། །ཡིད་བཞིན་ནོར་བུའི་ཡི་གེ་ལ། །བཞི་པའི་ལྔ་པ་ཟླ་ལ་བཞག །དབྱངས་ཡིག་གསུམ་པས་བརྒྱན་པར་བྱ། །བཞི་པའི་གསུམ་པས་དེ་ནས་བརྗོད། །དངོས་གྲུབ་བསྒྲུབ་པའི་ཡི་གེ་ནི། །དེ་ཡི་རྗེས་ལ་བྲི་བར་བྱ། །གསང་སྔགས་དྲག་པོའི་ཡི་གེ་ཡང་། །
ཀུན་གྱི་མཐར་ནི་བརྗོད་པར་བྱ། །གསང་སྔགས་འདི་ཡི་དངོས་གྲུབ་ནི། །འཇིག་རྟེན་དབང་ཕྱུག་ཉིད་ཀྱིས་བྱིན། །དགོས་པ་ཐམས་ཅད་གྲུབ་པར་འགྱུར། །ཚོགས་བདག་ཆེན་པོའི་གསང་སྔགས་བསྟན་པའི་ལེའུ་སྟ་དྲུག་པའོ།། །།དེ་ནས་གཞན་ཡང་གསུངས་
པ་ནི། །དངོས་གྲུབ་ཐམས་ཅད་སྒྲུབ་པ་ཡི། །མཚན་གྱི་གསང་སྔགས་ཞེས་བྱ་བའི། །དངོས་གྲུབ་བསྒྲུབ་པའི་སྙིང་པོ་ནི། །དཔལ་དང་ཡཾ་གི་ཡི་གེ་སྟེ། །ཨོཾ་ཞེས་བྱ་བ་མགོ་ལ་བཞག །ཡིད་བཞིན་ནོར་བུའི་ཡི་གེ་ལས། །ཉི་མའི་ཡི་གེ་འོག་ཏུ་སྤྲས། །དབྱངས་
ཡིག་དྲུག་པའི་འོག་ཏུ་སྦྱར། །ཐིག་ལེ་ནཱ་དས་བརྒྱན་པར་བྱ། །མཚན་གྱི་དང་པོའི་ཡི་གེ་ནི། །དེ་ཡི་རྗེས་ལ་བརྗོད་པར་བྱ། །བཞི་པའི་ལྔ་པ་དེ་ནས་སྦྱར། །ལྔ་པའི་དང་པོ་བྲི་བར་བྱ། །དེ་བཞིན་གཤེགས་པའི་མཚན་དང་པོ། །འབྱུང་བ་རླུང་གི་ཡི་གེ་ཡང་། །དབྱངས་
ཡིག་བརྒྱད་པས་བརྒྱན་པ་ནི། །དེ་ཡི་རྗེས་ལ་བྲི་བར་བྱ། །ཞི་བའི་ཡིག་འབྲུ་གཉིས་པ་ཡང་། །ཀུན་གྱི་མཐར་ནི་བརྗོད་པར་བྱ། །མཚན་གྱི་གསང་སྔགས་ཞེས་བྱ་བ། །འདོད་པ་ཐམས་ཅད་གྲུབ་བྱེད་ཡིན། །མཚན་གྱི་གསང་སྔགས་བསྟན་པའི་ལེའུ་སྟེ་བདུན་
པའོ།། །།དེ་ནས་གཞན་ཡང་བཤད་པར་བྱ། །སྐར་མ་རྒྱལ་གྱི་ཉིན་པར་ནི། །མེ་ཏོག་དཀར་པོའི་རྩ་བ་བླང་། །ཙནྡན་དཀར་པོ་དག་ལས་ནི། །ཚོགས་ཀྱི་བདག་པོའི་སྐུ་གཟུགས་ནི། །མཐེ་བོང་གི་ནི་ཚད་ཙམ་བྱ། །གསུས་པ་ཆེལ་ཕྱག་བཞི་པ། །མཁས་

པས་བྱས་ཏེ་ལེགས་པར་བྱ། །རིན་པོ་ཆེ་ཡི་སྣོད་དུ་གཞུག །དཀར་ཆེན་མངོན་པར་གསལ་བའི་ཚེ། །ནང་གི་ཆ་རིས་སྐུ་ཁྲུས་གསོལ། །གསལ་ཞིང་དང་ས་ལ་ཡིད་དུ་འོང་། །དྲི་དང་ལྡན་པའི་བུམ་པ་ཡི། །མེ་ཏོག་དཀར་པོའི་དྲི་ཡི་ནི། །འདག་
ཆལ་ལྡན་པས་ཁྲུས་བྱའོ། །དེ་ནས་དེ་མ་ཐག་ཏུ་ནི། །དཀྱིལ་འཁོར་དབུས་སུ་སྤྱན་དྲངས་ལ། །མེ་ཏོག་དཀར་པོ་དབུལ་བར་བྱ། །ལ་ཕུག་ལ་དུར་བཅས་པ་ཡི། །གཏོར་མ་ཆེན་པོའང་དེ་ནས་དབུལ། །སྤོས་དང་དྲི་དང་མར་མེ་དང་། །ལྷ་བཤོས་དག་གིས་མཆོད་
པར་བྱ། །གསང་སྔགས་འདི་ལ་ཕུག་དང་། །ལ་དུ་དང་། ཆུ་དང་། དཀར་གསུམ་གྱི་གཏོར་མས་ཚོགས་ཀྱི་བདག་པོ་ལ་ཕུལ་ཏེ། སྤོས་དང་མེ་ཏོག་རྣམས་ཀྱང་དབུལ། དེ་ལྟར་བྱས་ན་ཕྱིས་བགེགས་བྱེད་པར་མི་ནུས་སོ། །ཚོགས་ཀྱི་བདག་པོ་མཆོད་པའི་ལེའུ་སྟེ་བརྒྱད་
པའོ།། །།དེ་ནས་ལ་ཕུག་ཅེས་བྱ་བ། །རོ་བརྒྱད་ལྡན་པའི་ཡུངས་མ་སྟེ། །ཟས་རྣམས་ཀུན་གྱི་མཆོག་ཀྱང་ཡིན། །རོ་མཆོག་བརྒྱད་དང་ལྡན་པ་ཡིན། །ཁ་དང་སྐྱུར་དང་བསྐ་བ་དང་། །མངར་དང་ཚ་དང་ལན་ཚྭའི་རོ། །བཞུན་དང་བྲོ་མཆོག་ཆེ་བ་ཡིན། །ནད་སྣ་
བརྒྱད་ཀྱི་གཉེན་པོ་ཡིན། །མཁྲིས་པ་བད་ཀན་འདུས་པ་དང་། །ཁྲག་དང་ཆུ་སེར་མ་ཞུ་བ། །རླུང་དང་རིམས་ནད་ཀུན་ལ་ཕན། །འདི་འདྲ་བྱུང་བའི་ཁ་ཟས་མེད། །ལྷ་རྣམས་ཀུན་གྱི་མཆུ་ཡང་འགུལ། །དངོས་གྲུབ་འགྲུབ་པའི་ཞལ་ཟས་ཡིན། །ཚོགས་ཀྱི་
བདག་པོ་མཆོད་པར་བྱ། །ལ་དུ་ཞེས་བྱའི་ཞལ་ཟས་ནི། །མངར་གསུམ་འབྲས་བུ་གསུམ་པ་ནི། །དེ་བཞིན་ཞིམ་པའི་སྤོས་ཀྱིས་བྲན། །བག་ཟན་གྱི་ནི་རིལ་བུ་བྱ། །འོ་མ་མར་དུ་བཙོས་བྱས་ལ། །ཚོགས་པའི་གཏོར་མ་ཆེན་པོ་བྱ། །མར་དང་ཁུར་བ་མངར་གསུམ་
དང་། །མཐུན་པའི་ཞལ་ཟས་སྣ་ཚོགས་ཀྱིས། །ཚོགས་བདག་ཆེན་པོ་མཆོད་པར་བྱ། །དེ་ལྟར་ཚོགས་ཀྱི་བདག་པོ་ལའོ། །ཚོགས་ཀྱི་བདག་པོའི་སྐུ་གཟུགས་ལག་པ་གཡས་པའི་མཐིལ་དུ་བཞུགས་ལ། སེམས་གཞན་དུ་མ་ཡེངས་པར་བཟླས་བརྗོད་འབུམ་བྱས་

ལ། ལ་ཕུག་ལ་སྔགས་ཀྱིས་བཏབ་སྟེ་ཚོགས་ཀྱི་བདག་པོ་མཆོད་ན་ཚེ་འདི་ཉིད་ལ་འཁོར་ལོས་སྒྱུར་བའི་རྒྱལ་པོ་དང་བསོད་ནམས་མཉམ་པར་འགྱུར་རོ། །མེ་ཏོག་དཀར་པོས་མཆོད་ན་རྒྱལ་པོ་ལ་སོགས་པས་ཕམ་པར་མི་འགྱུར་རོ། །རྒྱལ་པོ་ལ་སོགས་པ་སྒྲུབ་པར་འགྱུར་རོ། །
རྒྱལ་པོ་དང་བློན་པོ་ལ་སོགས་པ་བདག་གི་དབང་དུ་འདུས་པར་འགྱུར་རོ། །དངོས་གྲུབ་སྒྲུབ་པའི་ཞལ་ཟས་བསྟན་པའི་ལེའུ་སྟེ་དགུ་པའོ།། །།དེ་ནས་ཆོ་ག་བཤད་པར་བྱ། །དངུལ་ཞེས་བྱ་བའི་རིན་ཆེན་ལ། །ཚོགས་བདག་ཆེན་པོའི་གཟུགས་བྱས་ཏེ། །ཡིད་བཞིན་
ནོར་བུ་ལག་ན་ཐོགས། །དཀྱིལ་འཁོར་ཆེན་པོ་ཁྲུ་གང་ཚད། །རིན་ཆེན་མེ་ཏོག་དཀར་པོ་དགྲམ། །གསང་སྔགས་འབུམ་དུ་བཟླས་བྱས་པས། །ནད་དང་སྡུག་བསྔལ་ཞི་བར་འགྱུར། །ཤེལ་དང་དུང་ལས་ཆོགས་བདག་སྐུ། །མཁས་པས་ཇི་ལྟར་འབྱོར་པར་བྱ། །སྡུག་
བསྔལ་ཐམས་ཅད་སེལ་བར་འགྱུར། །རིན་ཆེན་ཤེལ་ལས་ཚོགས་བདག་སྐུ། །མཐེ་བོང་གི་ནི་ཚད་ཙམ་བྱ། །སེ་ན་པྲ་ཞེས་བྱ་བའི་སྔགས། །རིག་པ་འབུམ་དུ་བཟླས་བྱས་ཏེ། །ཤེལ་གྱི་སྐུ་དེ་ཁྲུས་བྱས་ནས། །སྐར་མ་རྒྱལ་གྱི་ཉིན་པར་ནི། །བདག་ཉིད་ཤར་དུ་ཁ་བལྟས་
ནས། །གོས་དཀར་གྱོན་ཏེ་ཁྲུས་བྱས་ལ། །ཐལ་སྦྱར་ཡིད་ཀྱིས་གསོལ་བ་གདབ། །བདག་ལ་གནོད་པའི་བགེགས་གང་ཡིན། །ཤེལ་གྱི་སྐུ་དེ་མེ་ལོང་སྟེང་། །མི་གཡོ་མི་འགུལ་རབ་ཏུ་བཞུགས། །བདག་ཉིད་ཁྲུས་བྱས་ཤར་དུ་བལྟ། །ཛ་ར་པ་དང་རྐུན་མ་ནི། །གང་
ཡིན་མེ་ལོང་ནང་དུ་འབྱུང་། །དེ་ཚེ་དེ་ཡི་ངོས་ཟིན་འགྱུར། །ཚོགས་བདག་ཤེལ་གྱི་སྐུ་དེ་ནི། །མཆོད་པ་རབ་གསལ་ལེགས་བྱས་ལ། །ནཱ་ག་ཀུ་རུ་ཞེས་བྱ་བའི། །རིག་པ་འབུམ་དུ་བཟླས་བྱས་ན། །ནད་དང་སྡུག་བསྔལ་གྱིས་ཉེན་ལ། །སྐུ་དེ་བསྟན་པ་ཙམ་གྱིས་
ནི། །ནད་རྣམས་ཐམས་ཅད་སོས་པར་འགྱུར། །སྡུག་བསྔལ་ལས་ཀྱང་ཐར་བར་འགྱུར། །ཞི་བ་ཆེན་པོའི་ཆོ་ག་ཡིན། །རིན་ཆེན་གསེར་ཞེས་བྱ་བ་ལ། །ཚོགས་བདག་ཆེན་པོའི་སྐུ་བྱས་ཏེ། །རྒྱལ་གྱི་ཉིན་པར་མིག་ཕྱེ་ནས། །མཆོད་པ་རབ་ཏུ་གནས་པ་བྱ། །བ་

ར་ཞེས་བྱའི་གསང་སྔགས་ནི། །འབུམ་ཕྲག་གཅིག་ཏུ་བཟླས་པ་ཡིས། །སྐུ་གཟུགས་བཞུགས་པའི་ཁྱིམ་དེར་ནི། །ནོར་རྣམས་ཐམས་ཅད་འཕེལ་བར་འགྱུར། །གསེར་གྱི་ཚོགས་བདག་མཐོང་བ་ཡིས། །བགེགས་རྣམས་ཐམས་ཅད་ནོར་འབུལ་
འགྱུར། །བགེགས་ཀྱིས་གནོད་པ་མི་ནུས་ཏེ། །རྒྱལ་པོ་བཞིན་དུ་མཆོད་པར་འགྱུར། །གསེར་གྱི་ཚོགས་བདག་གནས་པ་ཡི། །ས་ཕྱོགས་རིན་ཆེན་ཆར་པ་འབེབས། །གསེར་གྱི་ཚོགས་ཀྱི་བདག་པོ་ལ། །བགེགས་ཀྱི་རྒྱལ་པོ་ཐམས་ཅད་ཀྱིས། །ནོར་རྣམས་
ཐམས་ཅད་འབུལ་བ་ཡིན། །བདག་ཉིད་ཕུན་སུམ་ཚོགས་པར་འགྱུར། །ཚོགས་ཀྱི་བདག་པོའི་སྐུ་གཟུགས་མཆོག །བྱས་པའི་ཡོན་ཏན་རྣམས་ལ་ནི། །གནོད་སྦྱིན་རྣམས་ཀྱིས་གཏེར་ཁ་འབྱེད། །སྐྱེ་བ་འདི་དང་ཕྱི་མ་ལ། །རྟག་ཏུ་ཡོ་བྱད་འཕེལ་བར་འགྱུར། །
ནོར་གྱི་བདག་པོ་རྣམ་ཐོས་བུས། །རྒྱལ་པོ་བཞིན་དུ་བསྙེན་བཀུར་བྱེད། །དེ་ནས་དཔལ་ལྡན་ཚོགས་བདག་གི། །སྐུ་གཟུགས་དཀྱིལ་འཁོར་གྲུ་བཞིར་གཞག །བྷ་ག་ཞེས་བྱའི་གསང་སྔགས་ནི། །བཟླས་པ་འབུམ་དུ་བྱས་པ་ཡིས། །ཚེ་དེ་ཉིད་ལ་དངོས་གྲུབ་
ནི། །ཅི་འདོད་པ་ནི་སྦྱིན་པར་མཛད། །ལྷ་ཡི་རྒྱལ་པོའི་མངའ་ཐང་ནི། །སྒྲུབ་པ་པོ་ལ་སྩོལ་བར་མཛད། །ཤིན་ཏུ་ཐུགས་རྗེའི་བདག་ཉིད་པས། །དཔལ་ལྡན་ཚོགས་བདག་ཐུགས་རྗེ་ཅན། །ཐུགས་རྗེའི་ཕུང་པོས་དབུལ་བ་སྐྱོབ། །ནོར་ལྷ་ཆེན་པོའི་བདག་ཉིད་
འདི། །དར་རམ་རས་ལ་ལེགས་བྲིས་ཏེ། །རྒྱལ་གྱི་ཉིན་པར་སྤྱན་ཕྱེ་ནས། །གང་གི་ཁྱིམ་དུ་བཞུགས་པ་དེའི། །ས་ཕྱོགས་དེ་ནི་བཀྲ་ཤིས་འགྱུར། །ཟངས་ལ་ཚོགས་བདག་ཆེན་པོའི་སྐུ། །མཁས་པས་ལེགས་པར་བཟོ་བྱས་ཏེ། །ཙནྡན་དམར་པོས་བྱུགས་
པའི་སར། །མཎྜལ་སྟེང་དུ་ལེགས་པར་བཞག །བནྡུ་ཀ་ཡི་མེ་ཏོག་དང་། །པདྨ་རཱ་ག་རིན་ཆེན་དང་། །མེ་ཏོག་དམར་པོ་ཀུན་གྱིས་མཆོད། །བྲཾ་ཞེས་བྱ་བའི་རིག་སྔགས་བཟླས། །རྒྱལ་པོའི་བུ་མོ་དབང་དུ་འགྱུར། །ལྷ་ཡི་བུ་མོ་ཀླུ་མོ་དང་། །མིའམ་ཅི་ཡི་བུ་མོ་དང་། །

བྲམ་ཟེའི་བུ་མོ་མཚན་ལྡན་མོ། །མཆོག་ཏུ་གཟུགས་བཟང་གུས་པར་འགྱུར། །བྲན་མོ་བཞིན་དུ་བསྒོ་བ་ཉན། །དེ་ལ་སོགས་པ་མཐའ་ཡས་མཆོག །སྐུ་གཟུགས་དག་ལ་བརྟེན་ཏེ་འགྲུབ། །མཆོད་པ་ཙམ་གྱིས་འབྱུང་བ་ཡིན། །གཞན་ཡང་ཚོགས་བདག་ཆེན་པོའི་
སྐུ། །རིན་པོ་ཆེ་ཡི་རྒྱུ་ལས་བྱས། །དཀྱིལ་འཁོར་སྟེང་དུ་བཞུགས་བྱས་ཏེ། །རཏྣ་སིདྡྷི་ཞེས་བྱ་བའི། །རིག་པ་འབུམ་དུ་བཟླས་པར་བྱ། །ས་འོག་གཏེར་རྣམས་སྟོན་པར་འགྱུར། །ཅི་དགའ་བར་ཡང་སྤྱོད་པར་འགྱུར། །ཚོགས་བདག་ཆེན་པོའི་རྒྱུད་ལས་རྒྱལ་པོ་ལ་
སོགས་པ་སྒྲུབ་པའི་ལེའུ་སྟེ་བཅུ་པའོ།། །།དེ་ནས་དཔལ་ལྡན་ཚོགས་བདག་ཆེ། །དྲག་པོ་ཆེན་པོ་དྲག་ཤུལ་ཅན། །སངས་རྒྱས་ཐུགས་ལ་བྱོལ་སོང་དབུ། །གླང་ཆེན་གཞོན་ནུས་ཞལ་བརྒྱན་པ། །སྤྱན་གསུམ་མཆེ་བ་བཞི་དང་ལྡན། །ཕྱག་བཞི་ཞབས་བཞི་
ཀླུ་ཆེན་ལྡན། །དང་པོ་མཆེ་བ་དཀར་པོ་འཛིན། །དེ་འོག་ཞགས་པ་གཡོན་པ་ན། །དགྲ་སྟ་ཁ་ཊྭཱཾ་རྩེ་གསུམ་འཛིན། །མཐིང་ག་གསུས་པ་ཆེ་བའོ། །དེ་ལྟ་བུ་ཡི་ཚོགས་བདག་སྐུ། །ཁར་བ་ཁྲོ་ཆུ་དག་ལ་བྱ། །རྒྱལ་གྱི་ཉིན་པར་རབ་ཏུ་གནས། །དེ་ནས་བསྒོམ་ཞིང་
བསྒྲུབ་པ་ནི། །དཀྱིལ་འཁོར་བྱ་བའི་ས་བརྟག་པ། །ལེའུ་ཚེ་དགུ་པའི་དཀྱིལ་འཁོར་བྲི། །སྒོ་དང་སྒོ་ཁྱུད་ལྡན་པར་བྱ། །དབུས་སུ་པདྨ་འདབ་བརྒྱད་ལ། །ཚོགས་བདག་ཆེན་པོས་བསྒྲུབ་བྱ་མནན། །ཟླ་བའི་གདན་ལ་ཡུམ་དང་ནི། །གཉིས་སུ་མེད་པ་དགོད་པར་བྱ། །
དེའི་མིང་ཨརྩི་ཀ་རི་སྟེ། །རྡོ་རྗེ་ཕག་གདོང་མ་ཞེས་བྱ། །དགྲ་སྟ་བནྡ་ལག་ན་ཐོགས། །ཁྲག་གིས་བཀང་བ་གཙོ་ལ་སྟོབས། །ཤར་གྱི་ལེའུ་ཚེ་སེར་པོ་ལ། ཁམས་གསུམ་གྱི་བདག་པོ་ལ་ཕུག་དང་གྲི་འཛིན་པའོ། །ལྷོ་ཕྱོགས་ཀྱི་ལེའུ་ཚེ་སྔོན་པོ་ལ། གནོད་
སྦྱིན་ཆེན་པོ་རྡོ་རྗེ་མཆུ། མ་ཧེ་དེ་བའི་གདོང་ཅན་དབྱུག་ཏོ་དང་ཐོ་བ་འཛིན་པ་ནག་པོའོ། །ནུབ་ཕྱོགས་ཀྱི་ལེའུ་ཚེ་དམར་པོ་ལ། གནོད་སྦྱིན་གྱི་རྒྱལ་པོ་སྤྲིན་གྱི་བདག་ཅེས་བྱ་བ་དམར་པོ་ཆུས་གང་བའི་སྤྲིན་ཕུང་དང་ཞགས་པ་འཛིན་པའོ། །བྱང་ཕྱོགས་ཀྱི་ལེའུ་ཚེ་ལྗང་

གུ་ལ་གནོད་སྦྱིན་གྱི་བདག་པོ་ནོར་གནས་ཞེས་བྱ་བ་ལྗང་གུ་དབྱུག་ཐོ་དང་རིན་པོ་ཆེའི་ཁ་ཊྭཱྃ་ག་ཐོགས་པའོ། །བྱང་ཤར་གྱི་ལེའུ་ཚེ་དཀར་པོ་ལ་བགེགས་ཀྱི་རྒྱལ་པོ་བྱི་ན་ཡ་ཀ་གླང་པོའི་གདོང་མདུང་རྩེ་གསུམ་པ་དང་ལ་ཕུག་ཐོགས་པ་ནག་པོའོ། །ཤར་ལྷོའི་ལེའུ་
ཚེ་དམར་པོ་ལ་ཡི་དགས་ཀྱི་བདག་པོ་དྲག་པོ་ཞེས་བྱ་བ་དགྲ་སྟ་དང་། ཐོད་པའི་རིལ་པོ་ཐོགས་པ་ནག་པོའོ། །ལྷོ་ནུབ་ཀྱི་ལེའུ་ཚེ་ནག་པོ་ལ་སྤྲིན་གྱི་སྒྲོན་མ་ཞེས་བྱ་བ་སྤྲིན་ཕུང་དང་གློག་གི་འོད་དུ་བཅས་པ་ལག་གཉིས་ཀྱིས་ཐོགས་པའོ། །བྱང་ནུབ་ཀྱི་ལེའུ་ཚེ་ནག་པོ་ལ་བགེགས་
ཀྱི་རྒྱལ་པོ་ལོག་འདྲེན་སྣ་ཡོན་ཞེས་བྱ་བ་གླང་པོ་ཆེའི་སྣ་ཙན་རྩེ་གསུམ་དང་ཐོད་པ་སྐམ་པོའི་ནང་དུ་ལ་ཕུག་དང་ཤས་བཀང་བ་ཐོགས་པའོ། །ལྷ་རྣམས་ལ་ཀླུའི་རྒྱལ་པོ་བརྒྱད་བཀའ་ཉན་པ་ནི་ཀླུའི་རྒྱལ་པོ་ཨ་བ་ལ་དང་། བ་རུ་ཎ་དང་། དུང་སྐྱོང་དང་། འཇོག་པོ་དང་།
རིགས་ལྡན་དང་། མཐའ་ཡས་དང་། པདྨ་དང་། པདྨ་ཆེན་པོ་རྣམས་སོ། །ཤར་གྱི་སྒོར་རྒྱལ་པོ་ཆེན་པོ་ཡུལ་འཁོར་སྲུང་། ལྷོ་སྒོར་འཕགས་སྐྱེས་པོ། །ནུབ་སྒོར་སྤྱན་མི་བཟང་། བྱང་སྒོར་རྣམ་ཐོས་སྲས་རྣམས་སྐུ་མདོག་དཀར་བ་དང་། སྔོ་བ་དང་། དམར་
བ་དང་། ལྗང་གུར་ཤེས་པར་བྱའོ། །ལག་ན་ནོར་བུ་རིན་པོ་ཆེ་རེ་རེ་རལ་གྲི་རེ་རེའོ། །འདི་རྣམས་ཀྱི་ཆུང་མ་ནི་མི་བྲིའོ། །འདི་ལྟར་བྲིས་པའི་བྱང་ཤར་དུ་གསད་པའི་དཀྱིལ་འཁོར་གྲུ་གསུམ་ལ། དེའི་ནང་དུ་དགྲ་བོའི་གཟུགས་སྦྲ་ཚིལ་ལས་བྱས་པ་རིད་པ།
གནག་པ། སྐྲ་ཟེང་བ། ཏིལ་མར་གྱིས་བྱུགས་ཏེ། སྙིང་གར་མིང་རུས་བྲིས་ལ་གཞུག་གོ། །དེའི་སྐེར་རོ་སྐྲ་ལས་བྱས་པའི་ཐག་པ་གདགས་སོ། །དེ་ལྟར་བྱས་ནས་གནོད་སྦྱིན་ཆེན་པོ་བརྒྱད་ལ། ལ་དུ་དང་། ལ་ཕུག་དང་བཅས་པའི་གཏོར་མ་དང་། གནོད་སྦྱིན་ཆེན་པོ་
བརྒྱད་ལ་ཉ་ཤ་དང་སྒོག་བཙོང་དུ་སྦྱར་བའི་དམར་གྱི་གཏོར་མ་རེ་རེ་བཤམ། ཀླུ་ཆེན་པོ་བརྒྱད་ལ་གཏོར་མ་ཆེ་བ་གཅིག་དང་། རྒྱལ་པོ་ཆེན་པོ་བཞི་ལ་རེ་རེ་བྱ། གལ་ཏེ་མ་འབྱོར་ན་ཆེ་བ་གཅིག་བྱ། ལྷ་བཤོས་རེ་རེ་དབུལ་བར་བྱའོ། །གཞན་ཡང་དྲག་པོའི་རྫས་

སྤྱང་ཀིའི་ཐོད་པ་དང་། ཟི་ར་ནག་པོ་དང་། སྐེ་ཚེ་དང་། ཡུངས་ཀར་དང་། ཡུངས་ནག་གཞག་པར་བྱའོ། །ཚོགས་བདག་ཆེན་པོའི་དཀྱིལ་འཁོར་གྱི་ལེའུ་སྟེ་བཅུ་གཅིག་པའོ།། །།དེ་ནས་གཞན་ཡང་བཤད་པར་བྱ། །བསྒོམ་པའི་རིམ་པ་འདི་ལྟ་བུ། །མ་
བྱུང་འབྱུང་བར་མི་འགྱུར་བས། །ཤིན་ཏུ་གསང་སྟེ་བསྒྲུབ་པར་བྱ། །ཡ་ཡི་རང་བཞིན་སྟོང་པ་ལས། །སྣང་བ་རང་བཞིན་ཧཱུྃ་དང་ནི། །ཡ་ཚོགས་བརྒྱད་པའི་ས་བོན་འབྱུང་། །མིང་གི་སྔགས་ལས་རབ་ཏུ་བསྐྱེད། །ཁྲོ་བོའི་སྤྲུལ་པས་སྟོང་གསུམ་བཀང་། །
འོད་བསྡུས་ཐོག་མའི་ཧཱུཾ་ལ་འདུས། །ཚོགས་ཀྱི་བདག་པོ་ཆེན་པོ་དེ། །འགྲོ་བའི་དོན་དུ་བཞེངས་པ་ནི། །ཁྲོ་བོ་ཆེན་པོ་འཇིགས་པའི་གཟུགས། །ཡུམ་དང་འཁོར་ཡང་རྫོགས་པར་བསྐྱེད། །ཕུཿབརྒྱད་ཀླུ་བརྒྱད་སེམས་དཔའི་ཚུལ། །རྒྱལ་པོ་དེ་བཞིན་ཁྲོ་
བོའི་ཚུལ། །ཡི་གེ་བྷཻ་དང་མིང་ལས་བསྐྱེད། །འོད་ཟེར་ཚུལ་གྱིས་སྤྱན་དྲངས་ལ། །ཛཿདང་ཛཿཡི་འཕྲོ་འདུ་དང་། །ཧཱུྃ་དང་ཧཱུཾ་གི་གསང་སྔགས་དང་། །ལྕགས་ཀྱུའི་ཕྱག་རྒྱས་སྤྱན་དྲངས་ལ། །ནུས་པའི་མཐུ་དང་ལྡན་པར་བྱ། །མཆོད་དང་གཏོར་མ་བསྟབ་
པར་བྱ། །བ་ལིཾ་གྲྀཧྞ་ཁ་ཡི་སྔགས། །སྙིང་པོ་དག་དང་སྤེལ་བར་བྱ། །བསྒོམ་པའི་རིམ་པའི་ལེའུ་སྟེ་བཅུ་གཉིས་པའོ།། །།དེ་ནས་གསང་སྔགས་རྒྱལ་པོ་ནི། །དབྱངས་ཡིག་གསལ་བྱེད་དག་ལ་བཏུ། །དང་པོ་བཞི་པ་དེ་རྗེས་བྲི། །བཞི་པའི་ལྔ་པ་གྲལ་ལ་
བཞག །ཡིད་བཞིན་ནོར་བུ་ཡི་གེ་དང་། དེ་ཡི་རྗེས་སུ་བསམ་པར་བྱ། །དེ་བཞིན་གཤེགས་པའི་མཚན་དང་པོ། །དེ་ཡི་རྗེས་སུ་བརྗོད་པར་བྱ། །དེ་ལ་དབྱངས་ཡིག་བརྒྱད་པས་བརྒྱན། །དགུག་པའི་ཡི་གེ་དག་དང་ནི། །འབྱུང་བ་རླུང་གི་ཡི་གེ་ལ། །
དབྱངས་ཡིག་གཉིས་པ་སྦྱར་བ་ཡིས། །རྒྱལ་བའི་རྒྱལ་པོ་ཞེས་བྱའོ། །ཡིད་བཞིན་ནོར་བུའི་ཡི་གེ་ལ། །དབྱངས་ཡིག་གཉིས་པ་སྦྱར་བར་བྱ། །