Kinh tạng Tây Tạng (Kangyur Đại Học) — 086_རྒྱུད་འབུམ།_ཐ

ྱེས་བུ་དེ་འགྲུབ་པར་ཤེས་པར་བྱའོ། །འབད་མི་དགོས་པར་འགྲུབ་པར་འགྱུར་རོ། །ལག་ན་རྡོ་རྗེ་དེའི་ཕྱིར་ཙཱུ་ཥ་ན་ལ་སོགས་པ་དང་ལྡན་པའི་མངོན་པར་བྱང་ཆུབ་པ་རྣམ་པ་ལྔའི་རིམ་པས་སྔགས་པས་རྩའི་སྦྱོར་བ་ལ་སྦྱང་བར་བྱའོ། །གང་གི་ཕྱིར་ཨེའི་
ཡི་གེ་རྣམ་པ་སྣ་ཚོགས་པ་སྟེ། ཇི་ལྟར་ཁ་དོག་དམར་པོ་རྡོ་རྗེ་ཧཱུྃ་མཛད་ཀྱི་གཟུགས་སུ་བསྒོམས་ན་དེ་ནས་སེམས་ཅན་ཐམས་ཅད་དབང་དུ་བྱེད་དོ། །དེ་ནས་གསད་པར་འདོད་ན་དེའི་ཚེ་རྩ་ནག་པོའི་རྣམ་པས་རྡོ་རྗེ་ཧཱུྃ་མཛད་ཁ་དོག་ནག་པོར་བདག་ཉིད་བསྒོམས་ལ་དེས་གསད་པར་བྱའོ། །དེ་ནས་
བསྐྲད་པར་འདོད་ན་བདག་ཉིད་རྡོ་རྗེ་ཧཱུྃ་མཛད་ཀྱི་གཟུགས་སུ་སྔར་བཤད་པས་བསྒོམས་ལ་བསྒྲུབ་བྱ་རྔ་མོ་ལ་ཞོན་པར་བལྟས་ན་དེ་ནས་བསྐྲད་དེ་ཡུལ་གཞན་དུ་གཏོང་བར་བྱེད་དོ། །ལག་ན་རྡོ་རྗེ་དེའི་ཕྱིར་ལས་ཐམས་ཅད་གསང་བ་ལ་ཡོངས་སུ་བརྟེན་པ་ཡིན་ནོ། །དེས་ན་འདི་གསང་བ་ལས་ཀྱང་
གསང་བ་ཉིད་དུ་རིག་པར་བྱའོ། །རྩའི་སྦྱོར་བ་འདི་ཉིད་ཀྱིས་སངས་རྒྱས་ཉིད་དམ་རྡོ་རྗེ་འཛིན་པ་ཉིད་བསྒྲུབ་པར་བྱའོ། །གང་ཡང་ཕྱི་རོལ་གྱི་ཚུལ་ལ་གནས་པ་དེ་དག་རྣམས་ནི་བོང་བུ་དང་མཚུངས་པ་སྟེ་ཁུར་ཁུར་བ་ལས་འབྲས་བུ་མེད་པར་ཤེས་པར་བྱའོ། །ལག་ན་རྡོ་རྗེ་དེའི་ཕྱིར་ཁྱོད་ཀྱིས་
འདི་དག་ཤེས་པར་བྱོས་ལ་སེམས་ཅན་གྱི་དོན་གྱིས་ཤིག །ང་ཡང་ཚུལ་འདིས་གནས་པ་ཡིན་ནོ། །ལག་ན་རྡོ་རྗེ་དེའི་ཕྱིར་སེམས་ཅན་ཐམས་ཅད་ཀྱི་བསམ་པ་ཤེས་པར་བྱོས་ལ་ཆོས་སྟོན་པར་གྱིས་ཤིག །གཞན་དུ་ན་ཁྱོད་ཀྱང་མི་མཐུན་པ་སྤྱོད་པར་འགྱུར་ན་སེམས་ཅན་གཞན་ལྟ་སྨོས་ཀྱང་
ཅི་དགོས། རྒྱུད་གཞན་དུ་ན་ཨེའི་ཡི་གེ་འདི་དོན་དུ་བཤད་དོ། །འདིར་ཕྱི་རོལ་གྱི་ཚུལ་ལ་རྩ་བཅུའི་ཚུལ་གྱིས་དེ་ཁོ་ན་ཉིད་བཅུར་ཤེས་པར་བྱའོ། །དོན་དམ་པར་ནི་དེ་ཁོ་ན་ཉིད་བཅུ་ཡང་མ་ཡིན་ལ་ལྔ་ཡང་མ་ཡིན་ཏེ། གཅིག་པོ་ཉིད་དོན་དམ་པ་ཡིན་ནོ། །གང་རྩའི་གཙོ་བོ་མ་ལུས་ཤིང་ལུས་པ་
མེད་པའི་སངས་རྒྱས་ཉིད་སྦྱིན་པ་པོ་སྟེ་གང་ཞེས་ཐོབ་པས་སངས་རྒྱས་ཉིད་དུ་སོང་ཞིང་འགྲོ་བ་འགྲོ་བར་འགྱུར་བ་ཡིན་ནོ། །རྒྱུད་གཞན་དུ་རྒྱས་པར་མ་བཤད་དོ། །ལག་ན་རྡོ་རྗེ་འདི་ནི་རྣལ་འབྱོར་དང་། ཤིན་ཏུ་རྣལ་འབྱོར་དང་། གསང་ཆེན་དང་། གསང་བའི་རྩའི་སྦྱོར་བ་དང་བཅས་པ་བྱ་བ་

ཁྱོད་ལ་གསལ་བར་བྱས་ཀྱིས་ང་ལ་བླ་མའི་ཡོན་བྱིན་ཅིག །ཐེག་པ་ཆེན་པོ་རབ་ཏུ་སྟོན་པ་པོ་འཕགས་པ་མ་ཡིན་པ་གཞན་ལ་ཡང་ཅི་ནས་ཀྱང་བླ་མའི་ཡོན་བདག་ཉིད་ཀྱི་བར་དུའང་དབུལ་བར་བྱ་བ་ཡིན་ན། གཞན་ལྟ་སྨོས་ཀྱང་ཅི་དགོས། ལག་ན་རྡོ་རྗེ་སེམས་གཞན་དུ་མ་བྱེད་ཅིག །རབ་
ཏུ་མྱོས་པར་འགྱུར་རོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་ཞིག་དབུལ་བར་བགྱི། ཁྱོད་ལ་ཡོངས་སུ་མ་རྫོགས་པ་འགའ་ཞིག་མཆིས་ལགས་སམ། བཀའ་སྩལ་པ། ལག་ན་རྡོ་རྗེ་ཐམས་ཅད་ཡོངས་སུ་རྫོགས་མོད་ཀྱང་དབུལ་
བར་བྱ་བ་ཡིན་ནོ། །གསོལ་པ། ཅི་ཞིག་དབུལ་བར་བགྱི། བཀའ་སྩལ་པ། འདི་དག་དབུལ་བར་བྱ་བ་སྟེ། སྐལ་བ་དང་མི་ལྡན་པའི་སེམས་ཅན་རྣམས་ལ་འདིའི་དགོངས་པ་བཤད་པར་མི་བྱའོ། །ཉན་ཐོས་ཀྱི་ཐེག་པ་ཅན་ལ་རྒྱུད་འདིའི་གླེགས་བམ་ཙམ་ཡང་ནམ་ཡང་བསྟན་པར་མི་
བྱ་སྟེ། དེའི་མདུན་དུ་མིང་ཙམ་ཡང་གསལ་བར་མི་བྱའོ། །ལག་ན་རྡོ་རྗེས་གསོལ་པ། བཅོམ་ལྡན་འདས་བདག་གིས་ཉན་ཐོས་ཀྱི་ཐེག་པ་ཅན་རྣམས་ལ་བཤད་པར་མི་བགྱི་ཞིང་དེའི་གནས་སུའང་འདུག་པར་མི་བགྱི་སྟེ། དེའི་གནས་སུ་འཇུག་པ་དང་། བཤད་པར་བགྱི་བས་བདག་
ལ་ཅི་ཞིག་བགྱི། བཅོམ་ལྡན་འདས་ཅིའི་སླད་དུ་དེ་བདག་ལ་གསལ་བར་མི་བགྱིད། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཐེག་པ་ཆེན་པོའི་རང་བཞིན་སྔར་བཤད་པ་ཁྱོད་བརྗེད་དམ། ལག་ན་རྡོ་རྗེ་ཉན་ཐོས་ཀྱི་ཐེག་པ་པ་ཁོ་ནར་མ་ཟད་སེམས་ཅན་གཞན་ཡང་སྔགས་པ་
རྣམས་དང་། ཐ་ན་དེ་བཞིན་གཤེགས་པ་ཐམས་ཅད་ལ་ཡང་གསང་བ་འདི་ཤེས་ན་དེ་དུས་འདི་ཉིད་ལ་རྡོ་རྗེ་སྒེག་མོ་དང་། རྡོ་རྗེ་གར་མ་ལས་སྐྱེས་པ་སྟེ་ང་ཅི་འདྲ་བ་དང་ཁྱོད་ཅི་འདྲ་བ་དེ་འདྲར་ཤེས་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་ཤིན་ཏུ་ཟབ་པའི་ཚུལ་གསང་བ་ཐམས་ཅད་གནས་པ། རྩའི་སྦྱོར་བ་དེ་སེམས་ཅན་རྣམས་ཀྱིས་ཇི་ལྟར་འཚལ་བར་འགྱུར། བདག་གིས་དེ་དག་ལ་བསྟན་པར་བགྱིའམ། འོན་ཏེ་མ་ལགས། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་

ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཁྱོད་ཀྱིས་ཀྱང་སློབ་མ་རྣམས་སམ་སྔགས་པ་རྣམས་ལ་རྒྱུད་འདི་གསལ་བར་མི་བྱའོ། །ཕྱག་ན་རྡོ་རྗེས་གསོལ་པ། བཅོམ་ལྡན་འདས་ཅི་ལགས། གསང་བའི་དབང་བསྐུར་བའི་སྔགས་པ་རྣམས་ལ་ཡང་གསལ་བར་མི་བགྱིའམ།
བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་སེམས་ཅན་གང་ལ་ལ་དད་པའི་བསམ་པ་ཕུན་སུམ་ཚོགས་པ་དང་ལྡན་པ་རྒྱུད་འདི་ཤེས་པར་འདོད་པ་དེ་དག་ལ་བུད་མེད་བསྙེན་པ་ཙཱུ་ཥ་ན་ལ་སོགས་པའི་སྦྱོར་བས་གསང་བ་ཆེན་པོའི་མཆོད་པ་བྱས་ཏེ། རྗེས་སུ་གདམས་པ་དང་བཅས་པ་དེ་
དག་ཐམས་ཅད་ལ་འབད་པས་བཤད་པར་བྱའོ། །གང་ལ་ལ་རྒྱུད་འདི་ལ་སྡང་བར་བྱེད་ན་དེ་དག་ལ་དེ་ལྟར་རྡོ་རྗེ་ཧཱུྃ་མཛད་ཀྱི་སྐུར་གནས་ཏེ། རྡོ་རྗེ་ཧཱུྃ་མཛད་ཀྱི་ཚུལ་གྱིས་ཡོངས་སུ་ཁྲོས་ཏེ་འབར་བ་དང་ལྡན་པར་སྤྲོས་ལ་དེའི་གནས་འབར་བར་བསམ་པར་བྱའོ། །དེ་ནས་དེའི་འཁོར་དང་བཅས་
པ་བརླག་པར་འགྱུར་རོ། །གལ་ཏེ་སྔགས་པ་གསོ་བར་འདོད་ན་དེའི་གནས་ཕྱེད་ཚིག་པ་ལ་བདུད་རྩིའི་རང་བཞིན་གྱི་རྡོ་རྗེའི་རིགས་རྣམས་བསམས་ན་དེ་དག་འཚོ་བར་འགྱུར་རོ། །ལག་ན་རྡོ་རྗེ་དེའི་ཕྱིར་འདི་གང་སུ་ལ་ཡང་བཤད་པར་མི་བྱའོ། །མཆོག་ཏུ་གསང་བ་ཐིག་ལེའི་མཛོད་ཀྱི་རྟོག་
པ་ལས་གསང་བའི་དེ་ཁོ་ན་ཉིད་སྦས་པ་མཐའ་དག་གི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་དེ་བཞིན་གཤེགས་པ་ཐམས་ཅད་བརྟན་པར་མཛད་ནས། ཕྱག་ན་རྡོ་རྗེའི་ལུས་དེ་དག་གཅིག་ཏུ་གྱུར་ནས་རྒྱ་མཚོ་དེའི་འགྲམ་འཛམ་བུའི་
གླིང་གི་བྱང་གི་མཚམས་སུ་རྡོ་རྗེ་སྒེག་མོ་དང་། རྡོ་རྗེ་གར་མ་དང་ཐབས་ཅིག་ཏུ་སྔོན་བཤད་པའི་ཙུམྦ་ན་དང་། ཨཱ་ལིང་ག་ལ་སོགས་པའི་སྦྱོར་བས་རྒྱལ་པོ་ཆེན་པོ་རོལ་པས་རྡོ་རྗེ་སྒེག་མོ་དང་། རྡོ་རྗེ་གར་མའི་གོ་འཕང་ལ་གནས་པའི་ཁྲི་ལྔ་བརྒྱ་ཕྲག་ལྔའི་བཙུན་མོ་སྟོང་ཕྲག་རྒྱན་ཐམས་ཅད་ཀྱིས་རྣམ་
པར་བརྒྱན་ཅིང་ཡིད་དུ་འོང་བ་དང་ཐབས་ཅིག་ཏུ་བཞུགས་སོ། །དེ་ནས་ཕྱག་ན་རྡོ་རྗེས་གསོལ་པ། འདི་དག་གི་མིང་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། འདི་དག་རྣམ་པ་བཞིས་གནས་ཏེ། འདི་ལྟར་གཞོན་ནུ་མ་བཟང་མོ་ཞེས་བྱ་བའི་རྣལ་འབྱོར་མའི་དབང་ཕྱུག་ཁ་དོག་

དཀར་མོ་ལོ་བརྒྱ་ཕྲག་གཉིས་ཀྱི་རྣམ་པའི་གཟུགས་ཅན་རྣལ་འབྱོར་མའི་དབང་ཕྱུག་ཁྲི་ཕྲག་གཅིག་གིས་ཡོངས་སུ་བསྐོར་ནས་ཛ་ལནྡྷ་རའི་ཞིང་ན་རི་བོ་ཞེས་བྱ་བ་ལ་གནས་ནས་ཇི་ལྟར་བཅོམ་ལྡན་འདས་ཕྱག་ན་རྡོ་རྗེ་བཞུགས་པ་དེར་རྟག་ཏུ་འགྲོ་བ་དང་འོང་བར་བྱེད་དོ། །གཞན་ཡང་འདོད་པས་མྱོས་
མ་ཞེས་བྱ་བའི་རྣལ་འབྱོར་མའི་དབང་ཕྱུག་ཁ་དོག་སྔོ་བསངས་མིག་རྣམ་པར་རྒྱས་པ་རྣལ་འབྱོར་མའི་དབང་ཕྱུག་ཁྲི་ཕྲག་ཕྱེད་དང་གསུམ་དང་ཐབས་ཅིག་ཏུ་ལྷོ་ཕྱོགས་ཀྱི་རྒྱུད་རི་བོ་ཀི་ཀིནྡྷ་རི་འཇུག་པའི་སྒོར་གནས་ནས་གང་གི་ཚེ་ཕྱག་ན་རྡོ་རྗེ་གསང་བའི་ཆོས་སྟོན་པ་དེའི་ཚེ་རྟག་ཏུ་འགྲོ་བ་དང་འོང་བར་
བྱེད་དོ། །གཞན་ཡང་གསེར་གྱི་མིག་ཅན་ཞེས་བྱ་བའི་རྣལ་འབྱོར་མའི་དབང་ཕྱུག་དེ་ཡང་ཁ་དོག་དཀར་བ་ཁྲི་ཕྲག་གསུམ་གྱི་འཁོར་དང་ལྷན་ཅིག་ཀཱ་མ་རུ་པའི་སྒོར་གནས་ནས་དེ་བཞིན་དུ་རྒྱུན་དུ་འགྲོ་བ་དང་འོང་བར་བྱེད་དོ། །གཞན་ཡང་བདེ་བ་ཐམས་ཅད་ལ་དགའ་བ་ཞེས་བྱ་བའི་རྣལ་
འབྱོར་མའི་དབང་ཕྱུག་ཐམས་ཅད་དུ་གནས་པ་ཐམས་ཅད་ཀྱི་གཟུགས་ཅན་ཐམས་ཅད་ལ་བྱམས་པའི་ཚུལ་དུ་གནས་པ་ཁྲི་ཕྲག་བརྒྱ་སྟོང་ཕྲག་དུ་མའི་འཁོར་དང་ལྷན་ཅིག་གང་གི་ཚེ་སྔགས་པ་གསང་བ་སྟོན་པ་ན་དེའི་མདུན་དུ་དེ་གནས་སོ། །དེའི་ཕྱིར་བདེ་བ་ཐམས་ཅད་ལ་དགའ་མ་ཞེས་
བྱའོ། །དེ་ནས་གཞོན་ནུ་མ་བཟང་པོ་ཞེས་བྱ་བའི་རྣལ་འབྱོར་མའི་དབང་ཕྱུག་དེ་ཕྱག་ན་རྡོ་རྗེའི་ཚུལ་ཇི་སྲིད་མངོན་སུམ་དུ་སངས་རྒྱས་ཉིད་སྟེར་བར་གྱུར་པ་དེ་སྲིད་དུ་དེ་ཡིས་བསྟེན་པར་བྱའོ། །དེ་ནས་གསད་པར་འདོད་ན་ལྷ་མོ་དེ་ཉིད་འབར་བ་དང་ལྡན་པ་མདོག་ནག་མོ་ལག་ན་མཚོན་ཆ་ཐམས་ཅད་
འཛིན་པ་བསྒོམས་ན་དཔུང་གི་ཚོགས་ཡན་ལག་བཞི་དང་བཅས་པ་ཡང་གསོད་པར་བྱེད་དོ། །གལ་ཏེ་བསྐྲད་པར་འདོད་ན་དེ་ཉིད་ཅུང་ཟད་དམར་ཞིང་སྔོ་བའི་ཁ་དོག་ཅན་རླུང་དང་ལྷན་ཅིག་མ་སྦྱོར་བ་དེ་ཉིད་ཀྱིས་རླུང་གི་དཀྱིལ་འཁོར་ལ་ཀུན་ཏུ་བསྟེན་པར་གྱུར་པས་སྐད་ཅིག་དེ་ཉིད་ལ་སྐྲོད་པར་བྱེད་
དོ། །གལ་ཏེ་དབང་དུ་བྱ་བར་འདོད་ན་དེ་ནས་ཁ་དོག་དམར་པོར་བསམས་ལ་དེས་བཀུག་སྟེ་སྐད་ཅིག་དེ་ལ་རྐང་པའི་དྲུང་དུ་འོང་བར་འགྱུར་རོ། །དེ་ནས་རེངས་པར་བྱ་བར་འདོད་ན་ལྷ་མོ་ཁ་དོག་སེར་མོར་བསམས་ལ་དེ་བསྒྲུབ་བྱ་ལྕགས་ཀྱི་རིས་རྫིས་པར་བསམས་ལ། དཔུང་གི་ཚོགས་ཡན་

ལག་བཞི་ཡང་རེངས་པར་བྱེད་དོ། །འདི་དག་ཐམས་ཅད་ཡིད་ཀྱིས་བསམ་པར་བྱའོ། །ལག་ན་རྡོ་རྗེ་གཞན་ཡང་བཟའ་བ་བཤད་པར་བྱ་སྟེ། གང་ཟོས་པ་ཙམ་གྱིས་སྐྲ་དཀར་དང་གཉེར་མ་སེལ་བར་འགྱུར་ཞིང་ལོ་བརྒྱ་ཕྲག་སྟོང་དུ་འཚོ་བར་འགྱུར་རོ། །འདི་ལྟ་སྟེ་བྱ་རོག་
ཚང་བཟང་པོ་སྣུམ་པ་བཟུང་ལ་པགས་པ་དོར་ཏེ་ཞིབ་ཏུ་བྱས་ལ་དེའི་ཤ་ལྕགས་ཀྱི་སྣོད་དུ་ཏིལ་མར་དང་བཙོ་བར་བྱའོ། །ཀ་ར་སྲང་བཅུ་དང་འོ་མ་སྲང་ཉི་ཤུ་དང་ལྷན་ཅིག་གཅིག་ཏུ་བྱས་ལ་སླར་ཡང་ཇི་སྲིད་བྱ་རོག་མི་གྲག་པ་དེ་སྲིད་དུ་བཙོ་བར་བྱའོ། །དེ་ནས་མར་དང་ཀ་ར་དང་ལྷན་ཅིག་ཞག་
བདུན་དུ་བཟའ་བར་བྱའོ། །ལོ་བརྒྱའི་སྐྲ་དཀར་དང་། ལུས་ཀྱང་བུང་བ་ལྟ་བུ་དང་། སྟོབས་དང་ལྡན་ཞིང་ཤིན་ཏུ་སྲ་བར་འགྱུར་རོ། །ལོ་ལྔ་བརྒྱར་འཚོའོ། །སླར་ཡང་བཅུད་ལེན་གྱི་ཆོ་ག་བཤད་པར་བྱ་སྟེ། སྔགས་པ་མཉམ་པར་བཞག་པར་གྱུར་པས་རྡོ་རྗེ་སྒེག་མོའི་འོ་མ་སྦྱོར་བ་དེ་ཉིད་
ཀྱིས་བསམས་ལ། བདག་ཉིད་ཚིམ་པ་དང་ལྡན་པར་བསམ་པར་བྱའོ། །དེ་ནས་ཉོན་མོངས་པ་ཐམས་ཅད་ཞི་བར་འགྱུར་རོ། །འགའ་ཞིག་ཏུ་རྣལ་འབྱོར་གྱི་དབང་ཕྱུག་ཏུ་བསམས་ལ་དེའི་ཞུ་བ་བཏུང་བར་བྱའོ། །འགའ་ཞིག་ཏུ་མངོན་སུམ་དུ་གྱུར་པས་བུད་མེད་བསྟེན་ཏེ་དེ་ཉིད་ཀྱི་ཏིང་ངེ་འཛིན་
གྱིས་དེ་དང་རང་གི་ཞུ་བ་ལྷན་ཅིག་ཏུ་བཏུང་བར་བྱའོ། །དེ་ནས་རྡོ་རྗེའི་ལུས་དང་མི་ཕྱེད་པར་འགྱུར་རོ། །བཅུད་ལེན་གྱི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་བདག་པོ་དང་། རྣལ་འབྱོར་གྱི་དབང་ཕྱུག་དེ་དག་
ཐམས་ཅད་དང་། ཕྱག་ན་རྡོ་རྗེའི་སྐུ་དང་གཅིག་ཏུ་མཛད་ནས་ཕྱག་ན་རྡོ་རྗེའི་སྐུར་གྱུར་ཏོ། །དེ་ནས་རྒྱལ་པོ་ཆེན་པོ་ཕྱག་ན་རྡོ་རྗེས་ལྷ་མོ་དེ་དག་ཐམས་ཅད་ལ་དགྱེས་པ་དང་བཅས་པའི་སྤྱན་གྱིས་གཟིགས་སོ། །དེ་ནས་རྣལ་འབྱོར་མའི་དབང་ཕྱུག་དེ་དག་ཐམས་ཅད་ཀྱིས་ཕྱག་ན་རྡོ་རྗེ་ལ་བལྟས་
ནས་འདི་སྐད་ཅེས་སྨྲས་སོ། །བཅོམ་ལྡན་འདས་སེམས་ཅན་གང་གསང་བའི་ཚུལ་ལ་ཞུགས་ན་དེ་དག་གིས་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་ལགས། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་དེ་དག་ལ་འདི་སྐད་ཅེས་བཀའ་སྩལ་ཏོ། །

སྔོན་སྤྱད་པའི་གསང་བའི་ཚུལ་གྱིས་སངས་རྒྱས་ཉིད་བསྒྲུབ་པར་བྱའོ། །དེ་ནས་གཞོན་ནུ་མ་བཟང་མོ་ཞེས་བྱ་བའི་རྣལ་འབྱོར་མའི་དབང་ཕྱུག་གིས་ཐོག་མ་དང་ཐ་མ་མེད་པའི་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སེམས་ཅན་དེ་དག་གིས་བྷ་ག་བསྟེན་པ་ཙམ་གྱིས་སངས་རྒྱས་
ཉིད་བགྱིད་དམ། ཡང་ན་དེའི་གསང་བ་བསྒོམས་པས་ལགས། དེ་ནས་རྒྱལ་པོ་ཆེན་པོ་ཕྱག་ན་རྡོ་རྗེས་དེ་དག་ལ་འདི་སྐད་ཅེས་བཀའ་སྩལ་ཏོ། །བསྒོམ་པའི་རིམ་པས་བསྒྲུབས་ཏེ་ཕྱི་ནས་རྣམ་པར་རྟོག་པ་མེད་པའི་སེམས་ཀྱིས་བསྟན་ནས་བདག་ཉིད་ཕྱག་ན་རྡོ་རྗེའི་སྐུའམ། རྣམ་པར་
སྣང་མཛད་ཀྱི་སྐུའམ། འཇིག་རྟེན་དབང་ཕྱུག་གི་སྐུའམ། རྡོ་རྗེ་ཧཱུྃ་མཛད་ཀྱི་སྐུའམ། འདོད་པའི་ལྷའི་སྐུ་བསྒྲུབ་པར་བྱའོ། །རྩ་དེའི་འོ་མ་ལས་ཟླ་བའི་དཀྱིལ་འཁོར་གྱི་རྣམ་པ་བསྒོམས་ལ། ཟླ་བའི་དཀྱིལ་འཁོར་དེ་ལས་བདག་ཉིད་རྡོ་རྗེ་སེམས་དཔའི་སྐུའམ། རང་གི་ལྷའི་སྐུར་
བསྒོམ་པར་བྱའོ། །རྩ་དེ་ཉིད་ཁ་དོག་ནག་པོར་བསམས་ནས་དེ་ལས་བདག་ཉིད་རྡོ་རྗེ་ཧཱུྃ་མཛད་ཀྱི་སྐུར་བསྒོམ་པར་བྱའོ། །རྩ་དེ་ཉིད་དམར་སྐྱའི་རྣམ་པའི་རིམ་པ་དེ་ཉིད་ཀྱིས་བསྒོམས་ནས་བདག་ཉིད་འཇིག་རྟེན་དབང་ཕྱུག་གི་སྐུར་ལས་ཀྱི་དབྱེ་བས་བསྒོམ་པར་བྱའོ། །རྩ་དེ་ཉིད་ཁ་དོག་སྔོ་
བསངས་ནམ་མཁའ་ལྟ་བུར་བསྒོམས་ནས་རྡོ་རྗེ་རྣོན་པོའི་སྐུར་བསྒོམས་ན་དེ་ནས་ལས་ཀྱི་དབྱེ་བས་རྩ་དེ་དག་གི་སྦྱོར་བས་བདག་ཉིད་བསྒོམས་ན་དེ་ནས་གདོན་མི་ཟ་བར་འགྲུབ་པར་འགྱུར་རོ། །དེ་ནས་སྔགས་པ་དེས་ཐུན་མཚམས་བཞིར་སེམས་གཞན་དུ་མ་ཡེངས་པར་བསྒོམས་པ་ཉིད་
ཀྱིས་ཟླ་བ་དྲུག་ཉིད་ན་འགྲུབ་པར་འགྱུར་རོ། །དེ་ནས་གཞོན་ནུ་མ་བཟང་མོ་ཞེས་བྱ་བའི་རྣལ་འབྱོར་མའི་དབང་ཕྱུག་དེས་རྒྱལ་པོ་ཆེན་པོ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་སེམས་ཅན་དེ་རྣམས་ཀྱིས་དགུག་པ་ལ་སོགས་པའི་ལས་བགྱིད་པ་ལགས། དེ་ནས་
བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་དེ་ལ་འདི་སྐད་ཅེས་བཀའ་སྩལ་ཏོ། །གལ་ཏེ་སྔགས་པས་སྐྱེས་བུ་དགུག་པར་འདོད་ན་དེ་ནས་དེའི་བྷ་གའི་དབུས་སུ་བདག་ཉིད་ཅུང་ཟད་དཀར་བའི་རྣམ་པ་ཁྲོ་བ་དང་བཅས་པའི་བཞིན་ཅན་ཕྱག་དྲུག་པ་སྦྱོར་བ་དེ་ཉིད་ཀྱི་ཕྲ་མོའི་སྒྲས་བསྒོམས་ན་རྡོ་རྗེ་དེས་

བསྒྲུབ་བྱའི་སྙིང་གར་བསྣུན་ཅིང་ཞགས་པས་མགྲིན་པ་བཅིངས་ཏེ་ལྕགས་ཀྱུས་བཀུག་ལ་བཅུག་ནས་བསྒོམ་པར་བྱའོ། །དེ་ནས་རྒྱལ་པོ་ཡང་འགུགས་པར་བྱེད་ན་སྐྱེ་དགུ་གྲོང་གི་མི་ལ་སོགས་པ་ལྟ་ཅི་སྨོས། རིག་པ་འཛིན་པ་འགུགས་ན་རྒྱལ་པོ་ལྟ་ཅི་སྨོས། དེ་ནས་བུད་
མེད་དབང་དུ་བྱ་བར་འདོད་ན་དེ་ནས་བྷ་གའི་དབུས་སུ་ཕྲ་མོའི་སྒྲའི་སྦྱོར་མེ་དེ་ཉིད་ཀྱིས་བདག་ཉིད་རྟ་མགྲིན་གྱི་གཟུགས་ཁ་དོག་དམར་པོར་བསྒོམས་ཏེ། རྡོ་རྗེ་དེས་ལྷ་མོ་ཆེན་མོ་དེའི་སྙིང་གར་བསྣུན་ན་དེ་ནས་དེ་རྣམ་པར་མྱོས་པས་དཔག་ཚད་བརྒྱའི་ཕྱེད་ན་གནས་པ་རྣམས་ཀྱང་འོང་བར་འགྱུར་ན་
གྲོང་གི་མཐའ་དང་ཁྱིམ་གྱི་མཐའ་ན་གནས་པ་ལྟ་སྨོས་ཀྱང་ཅི་དགོས། དེ་ཉིད་ཀྱིས་རིག་པ་འཛིན་པའི་ཆུང་མའམ། དྲི་ཟའི་ཆུང་མའམ། གནོད་སྦྱིན་གྱི་ཆུང་མའམ། འཇིག་རྟེན་གསུམ་གྱི་བདག་པོའི་ཆུང་མའམ། བརྒྱ་བྱིན་གྱི་ཆུང་མའང་འགུགས་པར་བྱེད་ན་རྒྱལ་པོ་ཆེའི་ལྷ་མོ་ཆེན་མོའམ།
གྲོང་གི་བུ་མོ་ལྟ་སྨོས་ཀྱང་ཅི་དགོས། མཆོག་གི་སྦྱོར་བས་དམན་པ་ལ་མི་བྱ་ཞིང་དམན་པའི་སྦྱོར་བས་མཆོག་ལ་མི་བྱ་སྟེ་དམ་ཚིག་ཉམས་པར་འགྱུར་རོ། །དམན་པའི་སྦྱོར་བས་མཆོག་བསྒྲུབ་པར་ནུས་པའང་མ་ཡིན་ཏེ་ཡན་ལག་མ་ཡིན་པའི་ཕྱིར་རོ། །དེ་ནས་ཕྱོགས་འགའ་ཞིག་ཏུ་གནས་ཏེ་ཉིན་མཚན་
དུ་གསང་བ་བསྟེན་པར་བྱས་ན་ཟླ་བ་དྲུག་ཁོ་ན་ལ་འགྲུབ་པར་འགྱུར་ཞིང་བསྐལ་པའི་དངོས་པོ་དག་ཀྱང་མཐོང་ཞིང་རིང་དུ་གནས་པའི་ངག་དག་ཀྱང་ཐོས་ལ་ཇི་སྲིད་སངས་རྒྱས་ཉིད་ཀྱང་ཐོབ་པར་འགྱུར་བ་འདི་ལ་ཐེ་ཚོམ་མེད་དོ། །ཇི་ལྟར་རྡོ་རྗེ་སྒེག་མོའི་རིགས་ཀྱི་ལྷ་མོ་ཆེན་མོའི་སྒྲུབ་ཐབས་ལྟར་རྡོ་རྗེ་
སྒེག་མོའང་དེ་བཞིན་དུ་ཐམས་ཅད་སྔོན་གྱི་རིམ་པས་བསྒྲུབ་པར་བྱའོ། །སྦྱོར་བ་འདི་ཉིད་ཀྱིས་རྣལ་འབྱོར་མའི་དབང་ཕྱུག་དེ་རྣམས་ཀྱང་བཀུག་ལ་བསྟེན་པར་བྱའོ། །དེ་ནས་རྣལ་འབྱོར་མའི་དབང་ཕྱུག་འཁོར་དང་བཅས་པ་དེ་དག་ཕྱག་ན་རྡོ་རྗེའི་ཞབས་ལ་གཏུགས་ཏེ་ཕྱག་ན་རྡོ་རྗེ་ལ་འདི་སྐད་ཅེས་གསོལ་
ཏོ། །བཅོམ་ལྡན་འདས་ཚུལ་འདི་ཉིད་ཀྱིས་བདག་ཅག་ཀྱང་འགྲུབ་པར་འགྱུར་ལགས་སོ། །དེ་ནས་འདོད་པས་མྱོས་མ་ཞེས་བྱ་བའི་རྣལ་འབྱོར་མའི་དབང་ཕྱུག་གིས་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གིས་བདག་རྡོ་རྗེའི་ཞུ་བས་རྟག་ཏུ་བསྟེན་པར་བགྱིད་ན། དེའི་སྔོན་

དུ་མཆིས་ཏེ་སྔགས་པ་དེས་བདག་པོ་བགྱིས་ཏེ་བདག་དེའི་རྗེས་སུ་མཆི་བར་བགྱིའོ། །དེ་ནས་གསེར་གྱི་མིག་ཅན་ཞེས་བྱ་བའི་རྣལ་འབྱོར་མའི་དབང་ཕྱུག་གིས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གིས་བདག་བྷ་གའི་དབུས་སུ་བདག་ཉིད་ཞུགས་ནས་རྟག་ཏུ་བསྟེན་པར་བགྱིད་ན་བདག་
དེའི་བྲན་མོར་གྱུར་ཏེ། རྟག་ཏུ་དེར་གནས་པར་བགྱི་ཞིང་ནམ་དུ་ཡང་འོང་བ་དང་འགྲོ་བར་མི་བགྱི་ལགས་སོ། །དེ་ནས་སྐྱེ་བོ་ཐམས་ཅད་ཀྱི་ཡིད་དུ་འོང་བ་ཞེས་བྱ་བའི་རྣལ་འབྱོར་མའི་དབང་ཕྱུག་གིས་བཅོམ་ལྡན་འདས་ཐོག་མ་དང་ཐ་མ་མེད་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་
གིས་བདག་རྟག་ཏུ་གསང་བའི་ཚུལ་གྱིས་སེམས་ཤིང་དྲན་པར་འགྱུར་བའམ། དྲན་པར་བགྱིད་ན་དེ་ལ་བདག་གདོན་མི་ཟ་བར་སངས་རྒྱས་ཉིད་སྟེར་བར་གྱུར་ཅིག །དེ་ནས་ཕྱག་ན་རྡོ་རྗེས་རྣལ་འབྱོར་མའི་དབང་ཕྱུག་དེ་རྣམས་ལ་འདི་སྐད་ཅེས་བཀའ་སྩལ་ཏོ། །སེམས་ཅན་གང་ཐེག་པ་ཆེན་པོའི་
ཚུལ་འདི་ལ་ཞུགས་པར་གྱུར་པ་དེ་ལ་བཅུད་ལེན་གྱི་སྦྱོར་བ་འདིས་སྟོབས་དང་ལྡན་པར་བྱའོ། །ལྕགས་ཀྱི་ཕྱེ་མ་དང་། ཨ་ཏི་བ་ལ་མ་ཧཱ་བ་ལའི་རྩ་བ་འོ་མ་དང་ལྷན་ཅིག་སྦྱར་ལ་ཀ་ར་དང་ལྡན་པར་བྱས་ཏེ་འཚོ་བར་བྱའོ། །དེ་ནས་ཆོ་གས་རྣལ་འབྱོར་པས་བཟའ་བར་བྱའོ། །ཤ་དང་མར་གྱི་
བཟའ་བ་བྱའོ། །དེ་ནས་སྟོབས་ཆེན་པོ་དང་ལྡན་པར་གྱུར་ནས་སྡིག་པས་གོས་པར་མི་འགྱུར་རོ། །ད་ནི་གཞན་ཡང་བཤད་པར་བྱ་སྟེ། ནམ་མཁའི་ཡུལ་ལམ་ཡུལ་གཞན་དུ་རྡོ་རྗེའི་འཁོར་ལོ་རྡོ་རྗེ་བརྒྱད་དང་ལྡན་པ་བདུད་རྩིའི་རང་བཞིན་ཟླ་བའི་དཀྱིལ་འཁོར་ལྟ་བུར་བདག་ཉིད་སྟོབས་དང་ལྡན་
པར་བྱ་བའི་དོན་དུ་བསྒོམ་པར་བྱ་སྟེ། དེས་སྟོབས་ཆེན་པོ་དང་ལྡན་པར་འགྱུར་རོ། །དེ་ནས་གསད་པའི་དོན་དུ་རྡོ་རྗེའི་འཁོར་ལོ་དེ་ཉིད་འབར་ཞིང་གསལ་བའི་རྣམ་པ་མེ་སྟག་འཕྲོ་བ་ཅན་དེའི་ཁང་པའི་ཡུལ་ལམ་གྲོང་ཁྱེར་དུ་བབ་པར་བསྒོམ་པར་བྱའོ། །དེ་ནས་དེའི་སྐད་ཅིག་ལ་རིགས་དང་བཅས་
པ་བརླག་པར་འགྱུར་རོ། །དེ་ནས་དབང་དུ་བྱ་བའི་དོན་དུ་འཁོར་ལོ་དེ་ཉིད་ཁ་དོག་དམར་པོ་བནྡུ་ཀའམ། ཛ་བའི་མེ་ཏོག་གི་ཁ་དོག་ལྟ་བུའི་ཕྱོགས་ཐམས་ཅད་ཁྱབ་པ་པོ་འདིས་བསྒྲུབ་བྱ་བཀུག་པར་བསྒོམས་པས་དབང་དུ་འགྱུར་རོ། །རྡོ་རྗེ་འཁོར་ལོའི་སྦྱོར་བ་འདི་ཉིད་ཀྱིས་རྒྱལ་པོ་དང་། བློན་

པོ་དང་། མདུན་ན་འདོན་པ་ལ་སོགས་པ་རྣམས་ཀྱང་དབང་དུ་འགྱུར་རོ། །དེ་ནས་རྒྱལ་པོའི་ལྷ་མོ་ཆེན་མོ་དགུག་པར་འདོད་ན་རྡོ་རྗེ་འཁོར་ལོ་དེ་ཉིད་དམར་པོར་བལྟ་བར་བྱས་ལ། དེ་འཁོར་ལོ་ལ་གཞག་སྟེ་རླུང་གིས་བསྣུན་པས་རང་གི་རྐང་པའི་དྲུང་དུ་སྔས་སུ་གཏུགས་པར་
བསྒོམ་པར་བྱས་པས་དེ་ནས་ཉིན་མཚན་དེ་ན་དེ་འགུགས་པར་འགྱུར་རོ། །དེ་ནས་བྱང་ཆུབ་སེམས་དཔའ་ཆེན་པོ་རྒྱལ་པོ་ཕྱག་ན་རྡོ་རྗེས་སླར་ཡང་འདུས་པར་གྱུར་ཏེ། རྡོ་རྗེ་སྒེག་མོས་སོགས་པ་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །སྔགས་པ་གང་
ལ་ལ་རྒྱུད་འདིའི་དོན་མི་བསྒོམ་པ་དེ་ལྟ་ན་ཡང་གླེགས་བམ་དུ་གྱུར་པའང་ཁྱིམ་དུ་བཅང་བར་བྱའོ། །གང་ཡང་ཚུལ་འདི་ལ་གནས་པར་ཤེས་པར་བྱའོ། །གང་ཞིག་ཡང་གུས་པ་སྔོན་དུ་འགྲོ་བས་སྒོམ་པར་བྱེད་ན་རྡོ་རྗེ་སེམས་དཔའ་ཇི་ལྟ་བ་བཞིན་དུ་ཤེས་པར་བྱའོ། །འདི་གང་སུ་ལའང་
བཤད་པར་མི་བྱ་སྟེ། ཅིའི་ཕྱིར་ཞེ་ན། གདུག་པ་ཅན་གྱི་སེམས་ཅན་འགའ་ཞིག་ཡོད་པས་དེའི་མདུན་དུ་བཤད་པར་མི་བྱ་བ་ཡིན་ནོ། །སློབ་དཔོན་གྱིས་རྡོ་རྗེ་འཛིན་པ་ལྟ་བུ་ལ་ཡང་གསང་བའི་དབང་བསྐུར་བ་སྔོན་དུ་སོང་བས་སློབ་མར་བྱས་ནས་བཤད་པར་བྱ་སྟེ། གཞན་དུ་ནི་མ་ཡིན་ནོ། །
སློབ་མ་དེས་ཀྱང་ཙནྡན་ལ་ཟླ་བའི་དཀྱིལ་འཁོར་བྱས་ཏེ་དེར་སློབ་དཔོན་བཞུགས་སུ་གསོལ་ལ། རྒྱན་ལ་སོགས་པ་ཐམས་ཅད་ཀྱིས་བརྒྱན་པར་བྱས་ཏེ་བཅོམ་ལྡན་འདས་རྣམ་པར་སྣང་མཛད་ཇི་ལྟ་བུ་དེ་ལྟར་བྱས་ནས་བསྟོད་པ་ལ་སོགས་པ་དག་བྱའོ། །དེས་ན་ཉན་ཐོས་ཀྱི་ཐེག་པ་ཅན་ལ་སོགས་
པ་རྣམས་ལ་ནམ་དུ་ཡང་ལོ་རྒྱུས་ཙམ་ཡང་མི་བྱ་ཞིང་གླེགས་བམ་ཙམ་ཡང་བསྟན་པར་མི་བྱའོ། །ཐེག་པ་འདི་པ་དང་ལྷན་ཅིག་གཅིག་ཏུ་ལོངས་སྤྱོད་པར་བྱ་ཞིང་གཅིག་ཏུ་གནས་པར་བྱ་སྟེ། རྣམ་པར་རྟོག་པ་ཅི་ཡང་མི་བྱའོ། །འདི་ནི་བཅོམ་ལྡན་འདས་ཕྱག་ན་རྡོ་རྗེ་ལ་བཀའ་སྩལ་པ། མཆོག་ཏུ་གསང་བའི་མཛོད་ཅེས་བྱ་བ་
ཐེག་པ་ཆེན་པོའི་མདོ་ལས། གསང་བའི་དེ་ཁོ་ན་ཉིད་སྦས་པའི་མཆོག་གི་ཐིག་ལེ་ཞེས་བྱ་བའི་གསང་བའི་འབྱུང་གནས་རྫོགས་སྷོ།། །།དམ་པའི་རྒྱུད་འདི་གངས་ཅན་འདི་ན་སྔོན། །རྣམ་པ་ཀུན་ཏུ་བསྒྱུར་བ་མ་རྙེད་ནས། །མཁས་པ་བདེ་བར་གཤེགས་པའི་དཔལ་དང་ནི། །སྒྲ་

རིག་ཀུན་དགའ་རྒྱལ་མཚན་བདག་གིས་བསྒྱུར། །དམ་པའི་བཀས་བསྐུལ་ནས་ནི་གུས་པ་ཡིས། །དཔལ་ལྡན་ས་སྐྱའི་གཙུག་ལག་ཁང་དུ་བསྒྱུར། །དགེ་བ་འདི་ཡིས་སེམས་ཅན་ཐམས་ཅད་ཀྱིས། །གསང་དོན་རྟོགས་ནས་སངས་རྒྱས་སར་འགྲོ་ཤོག། །།
༄༅། །རྒྱ་གར་སྐད་དུ། མ་ཧཱ་བཻ་རོ་ཙ་ན་ཨ་བྷི་སཾ་བོ་དྷི་བི་ཀུརྦྦ་ཏི་ཨ་དྷིཥྛཱ་ན་བཻ་པུལྱ་སཱུ་ཏྲ་ཨིནྡྲ་རཱ་ཛཱ་ནཱ་མ་དྷརྨྨ་པརྱཱ་ཡ། བོད་སྐད་དུ། རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ཤིན་ཏུ་རྒྱས་པ་མདོ་སྡེའི་དབང་པོའི་རྒྱལ་པོ་ཞེས་བྱ་
བའི་ཆོས་ཀྱི་རྣམ་གྲངས། བམ་པོ་དང་པོ། བཅོམ་ལྡན་འདས་ངག་གི་དབང་ཕྱུག་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་བྱིན་གྱིས་རློབ་པ། རྡོ་རྗེ་ཆེན་པོ་རྒྱ་ཆེ་བ། ཆོས་ཀྱི་དབྱིངས་ཀྱི་ཕོ་བྲང་། རྡོ་རྗེ་འཛིན་
ཐམས་ཅད་འདུ་བ། དེ་བཞིན་གཤེགས་པའི་མོས་པས་རྣམ་པར་རོལ་པ། མཐའ་དང་དབུས་མེད་ཅིང་རྩེ་མོ་མཐོ་བ། རིན་པོ་ཆེའི་རྒྱལ་པོས་ཤིན་ཏུ་ལེགས་པར་བརྒྱན་པ་འབྱུང་བའི་ཁང་བཟངས་ཆེན་པོ་རིན་པོ་ཆེའི་རྒྱལ་པོའི་ནང་ན། བྱང་ཆུབ་སེམས་དཔའི་ལུས་ཀྱི་སེང་གེའི་ཁྲི་ལ་
བཞུགས་ཏེ། འདི་ལྟ་སྟེ། རྡོ་རྗེ་འཛིན་ནམ་མཁའ་དྲི་མ་མེད་པ་དང་། ནམ་མཁའ་ལ་རྣམ་པར་འགྲོ་བ་དང་། ནམ་མཁའ་འབྱུང་བ་དང་། གོས་སྣ་ཚོགས་གྱོན་པ་དང་། སྣ་ཚོགས་སུ་རྒྱུ་བ་དང་། ཆོས་ཐམས་ཅད་མཉམ་པ་ཉིད་ལ་གནས་པ་དང་། སེམས་ཅན་གྱི་ཁམས་མཐའ་
ཡས་པ་ཡོངས་སུ་སྐྱོབ་པའི་རྡོ་རྗེ་དང་། སྲེད་མེད་ཀྱི་བུའི་སྟོབས་ཅན་དང་། སྲེད་མེད་ཀྱི་བུ་ཆེན་པོའི་སྟོབས་ཅན་དང་། རྡོ་རྗེ་བཟང་དང་། རྡོ་རྗེ་མཆོག་གི་ཤུགས་འཆང་བ་དང་། དྲི་མ་མེད་པའི་རྡོ་རྗེ་དང་། རྡོ་རྗེ་མཆོག་འཆང་བ་དང་། དེ་བཞིན་གཤེགས་པའི་གོ་ཆ་དང་། དེ་བཞིན་
གཤེགས་པའི་གོ་འཕང་དུ་འབྱུང་བ་དང་། སྤྲོས་པ་མེད་པ་ལ་གནས་པ་དང་། དེ་བཞིན་གཤེགས་པའི་སྟོབས་བཅུ་ལས་ངེས་པར་སྐྱེས་པ་དང་། དྲི་མ་མེད་པའི་མིག་དང་། གསང་བ་པའི་བདག་པོ་ཕྱག་ན་རྡོ་རྗེ་དང་། དེ་དག་ལ་སོགས་ཏེ། སངས་རྒྱས་ཀྱི་ཞིང་བཅུའི་རྡུལ་ཕྲ་རབ་

ཀྱི་རྡུལ་སྙེད་ཀྱི་རྡོ་རྗེ་འཛིན་རྣམས་དང་ཐབས་ཅིག་ཏུ་བཞུགས་སོ། །བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་དང་། བྱམས་པ་དང་། འཇམ་དཔལ་དང་། སྒྲིབ་པ་ཐམས་ཅད་རྣམ་པར་སེལ་བ་ལ་སོགས་པ་དག་གིས་ཀྱང་བསྐོར་ཅིང་མདུན་གྱིས་བལྟས་པ་ལ་
འདི་ལྟ་སྟེ། དེ་བཞིན་གཤེགས་པའི་ཉི་མ་དུས་གསུམ་ལས་འདས་པར་བྱིན་གྱིས་བརླབས་ནས། སྐུ་དང་། གསུང་དང་། ཐུགས་མཉམ་པ་ཉིད་ཀྱི་གཞི་ཞེས་བྱ་བའི་ཆོས་ཀྱི་སྒོའི་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོགས་པ་དེ་དག་དང་། གསང་བ་
པའི་བདག་པོ་ལ་སྩོགས་པ་རྡོ་རྗེ་འཛིན་དེ་དག་བཅོམ་ལྡན་འདས་རྣམ་པར་སྣང་མཛད་ཀྱི་བྱིན་གྱིས་བརླབས་ཀྱིས་སྐུ་མཉམ་པ་ཉིད་བཀོད་པ་མི་ཟད་པའི་མཛོད་རྣམ་པར་བསྒྱིངས་པ་ལ་ཞུགས་སོ། །དེ་བཞིན་དུ་གསུང་དང་ཐུགས་མཉམ་པ་ཉིད་བཀོད་པ་མི་ཟད་པའི་མཛོད་རྣམ་པར་བསྒྱིངས་པ་
ལ་ཞུགས་ཏེ། འོན་ཀྱང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའམ་གསུང་ངམ་ཐུགས་ལ་ནི་འཇུག་པའམ་ལྡོག་པ་མི་དམིགས་སོ། །ཐམས་ཅད་དུ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་ཕྲིན་ལས་ཐམས་ཅད་དང་། གསུང་གི་ཕྲིན་ལས་ཐམས་ཅད་དང་། ཐུགས་ཀྱི་ཕྲིན་ལས་
ཐམས་ཅད་སེམས་ཅན་གྱི་ཁམས་ཐམས་ཅད་ལ་ཀུན་ཏུ་གསང་སྔགས་ཀྱི་ཚུལ་གྱི་ཚིག་འདི་དག་གིས་ཆོས་སྟོན་པར་མཐོང་བ་ནི་འདི་ལྟ་སྟེ། སེམས་ཅན་ལས་ཀྱི་ཚེ་རྣམ་པར་བསྐྱེད་པ་རྣམས་སེམས་དང་པོ་བསྐྱེད་པ་ནས་ཉེ་བར་བཟུང་སྟེ། ས་བཅུའི་བར་ལ་གནས་པ་འདི་ཉིད་ལ་ཡོངས་སུ་རྫོགས་
པར་བྱ་བ་དང་། ལས་ཀྱི་ཚེ་བཀག་པ་རྣམས་ཀྱང་སྲིད་པའི་མྱུ་གུ་མངོན་པར་འགྲུབ་པར་བྱ་བའི་ཕྱིར་རྡོ་རྗེ་འཛིན་པའི་ལུས་འདྲ་བ་དང་། བྱང་ཆུབ་སེམས་དཔའ་ཀུན་ཏུ་བཟང་པོ་དང་། ཕྱག་ན་པདྨའི་ལུས་འདྲ་བ་ཕྱོགས་བཅུ་ན་གསང་སྔགས་ཀྱི་ཚུལ་གྱི་ཚིག་རྣམ་པར་དག་པའི་ཚིག་དག་གིས་ཆོས་
སྟོན་པ་དག་ཀྱང་མཐོང་ངོ་། །དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེ་འཁོར་འདུས་པ་དེ་ཉིད་ན་འདུག་པ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཐམས་ཅད་མཁྱེན་

པའི་ཡེ་ཤེས་བརྙེས་ནས་ཐམས་ཅད་མཁྱེན་པའི་ཡེ་ཤེས་དེ་སེམས་ཅན་རྣམས་ལ་རྣམ་པར་ཕྱེ་སྟེ། ཚུལ་སྣ་ཚོགས་དང་། བསམ་པ་སྣ་ཚོགས་དང་། ཐབས་སྣ་ཚོགས་དག་གིས་སྟོན་ཅིང་། ཁ་ཅིག་ལ་ནི་ཉན་ཐོས་ཀྱི་ཐེག་པའི་ཚུལ། ཁ་ཅིག་ལ་ནི་རང་སངས་རྒྱས་ཀྱི་ཐེག་པའི་ཚུལ། ཁ་ཅིག་
ལ་ནི་ཐེག་པ་ཆེན་པོའི་ཚུལ། ཁ་ཅིག་ལ་ནི་མངོན་པར་ཤེས་པ་ལྔའི་ཚུལ། ཁ་ཅིག་ལ་ནི་ལྷར་སྐྱེ་བར་བྱ་བ་དང་། ཁ་ཅིག་ལ་ནི་མིར་སྐྱེ་བར་བྱ་བ་ནས་ལྟོ་འཕྱེ་ཆེན་པོ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅིར་སྐྱེ་བར་བྱ་
བའི་བར་དུ་ཆོས་སྟོན་པ་ལགས། དེ་ལ་སེམས་ཅན་ལ་ལ་སངས་རྒྱས་ཀྱིས་གདུལ་བར་བྱ་བདག་གིས་ནི་སངས་རྒྱས་ཀྱི་གཟུགས་སུ་མཐོང་། ལ་ལས་ནི་ཉན་ཐོས་ཀྱི་གཟུགས་སུ། ལ་ལས་ནི་རང་སངས་རྒྱས་ཀྱི་གཟུགས་སུ། ལ་ལས་ནི་བྱང་ཆུབ་སེམས་དཔའི་གཟུགས་སུ། ལ་
ལས་ནི་དབང་ཕྱུག་ཆེན་པོའི་གཟུགས་སུ། ལ་ལས་ནི་ཚངས་པའི་གཟུགས་སུ། ལ་ལས་ནི་སྲེད་མེད་ཀྱི་བུའི་གཟུགས་སུ། ལ་ལས་ནི་རྣམ་ཐོས་ཀྱི་བུའི་གཟུགས་སུ་ནས། ལ་ལས་ནི་ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་བར་དུ་མཐོང་སྟེ། རང་རང་གི་ཚིག་བརྗོད་པའི་ཚུལ་
དག་དང་། སྤྱོད་ལམ་སྣ་ཚོགས་སུ་མཐོང་ལ། ཐམས་ཅད་མཁྱེན་པའི་ཡེ་ཤེས་དེ་ཡང་འདི་ལྟར་དེ་བཞིན་གཤེགས་པའི་རྣམ་པར་གྲོལ་བའི་རོར་རོ་གཅིག་པ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་བགྱི་ན་ནམ་མཁའི་ཁམས་ནི་རྟོག་པ་དང་། རྣམ་པར་རྟོག་པ་ཐམས་ཅད་
དང་བྲལ་བ་སྟེ། མི་རྟོག་རྣམ་པར་མི་རྟོག་པ་ལགས་སོ། །བཅོམ་ལྡན་འདས་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་རྟོག་པ་ཐམས་ཅད་དང་བྲལ་བ་སྟེ། མི་རྟོག་རྣམ་པར་མི་རྟོག་པ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་ན། ས་ཆེན་པོ་འདི་ནི་སེམས་ཅན་ཐམས་
ཅད་ཀྱི་གསོས་སུ་གྱུར་པ་ལགས་སོ། །བཅོམ་ལྡན་འདས་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་གསོས་སུ་གྱུར་པ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་བགྱི་ན། མེའི་ཁམས་ནི་བུད་ཤིང་ཐམས་ཅད་སྲེག་པས་

ནམ་ཡང་ཡོངས་སུ་བས་པར་མི་འགྱུར་ལགས་སོ། །དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་མི་ཤེས་པའི་བུད་ཤིང་ཐམས་ཅད་སྲེག་པས་ནམ་ཡང་ཡོངས་སུ་བས་པར་མི་འགྱུར་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་བགྱི་ན། རླུང་གི་ཁམས་
ནི་རྡུལ་ཐམས་ཅད་སེལ་བར་བགྱིད་པ་ལགས་སོ། །བཅོམ་ལྡན་འདས་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་མི་ཤེས་པའི་རྡུལ་ཐམས་ཅད་སེལ་བར་མཛད་པ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་བགྱི་ན། ཆུའི་ཁམས་ནི་སེམས་ཅན་ཐམས་ཅད་ཀྱི་ལུས་སིམ་
པར་བགྱིད་པ་ལགས་སོ། །དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་ལྷ་དང་བཅས་པའི་འཇིག་རྟེན་རབ་ཏུ་སིམ་པར་བགྱིད་པ་ལགས་ན། བཅོམ་ལྡན་འདས་ཡེ་ཤེས་འདིའི་རྒྱུ་ནི་གང་ལགས། རྩ་བ་ནི་གང་ལགས། མཐར་ཐུག་པ་ནི་གང་ལགས། དེ་སྐད་ཅེས་གསོལ་པ་
དང་། བཅོམ་ལྡན་འདས་རྣམ་པར་སྣང་མཛད་ཀྱིས་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ལེགས་སོ་ལེགས་སོ། །ལག་ན་རྡོ་རྗེ་གང་ཁྱོད་ང་ལ་དོན་འདི་འདྲི་བ་ནི་ཡང་ལེགས་སོ། །དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་བཤད་
དོ། །རྒྱུ་ནི་བྱང་ཆུབ་ཀྱི་སེམས་སོ། །རྩ་བ་ནི་སྙིང་རྗེ་ཆེན་པོའོ། །མཐར་ཐུག་པ་ནི་ཐབས་སོ། །གསང་བ་པའི་བདག་པོ་དེ་ལ་བྱང་ཆུབ་གང་ཞེ་ན། རང་གི་སེམས་ཡང་དག་པ་ཇི་ལྟ་བ་བཞིན་ཡོངས་སུ་ཤེས་པ་སྟེ། དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ།།
གསང་བ་པའི་བདག་པོ་དེ་ལ་ནི་ཆོས་རྡུལ་ཙམ་ཡང་མེད་ཅིང་མི་དམིགས་སོ། །དེ་ཅིའི་ཕྱིར་ཞེ་ན། བྱང་ཆུབ་དེ་ནི་ནམ་མཁའི་མཚན་ཉིད་དེ། དེ་ལ་བྱང་ཆུབ་པར་བྱེད་པ་ཡང་མེད་ལ། བྱང་ཆུབ་པར་བྱ་བའང་འགའ་ཡང་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་ལ་མཚན་ཉིད་མེད་པའི་ཕྱིར་ཏེ།
གསང་བ་པའི་བདག་པོ་ཆོས་ཐམས་ཅད་ཀྱང་མཚན་ཉིད་མེད་པ་འདི་ལྟ་སྟེ། ནམ་མཁའི་མཚན་ཉིད་དོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐམས་ཅད་མཁྱེན་པ་ཉིད་ནི་གང་ནས་ཡོངས་སུ་བཙལ་བར་བགྱི། གང་གིས་ནི་བྱང་ཆུབ་

མངོན་པར་རྫོགས་པར་འཚང་རྒྱ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་བྱང་ཆུབ་དང་ཐམས་ཅད་མཁྱེན་པ་ཉིད་ནི་རང་གི་སེམས་ལས་ཡོངས་སུ་བཙལ་བར་བྱའོ། །དེ་ཅིའི་ཕྱིར་ཞེ་ན། སེམས་དེ་ནི་རང་བཞིན་གྱིས་ཡོངས་སུ་དག་པ་ཡིན་ཏེ། དེ་ནི་
ནང་ན་མེད། ཕྱི་རོལ་ན་ཡང་མེད། གཉིས་ཀའི་བར་ན་ཡང་མི་དམིགས་སོ། །གསང་བ་པའི་བདག་པོ་སེམས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་མ་གཟིགས། གཟིགས་པར་མི་འགྱུར་ཏེ། སྔོན་པོར་མ་ཡིན། སེར་པོར་མ་ཡིན་
དམར་པོར་མ་ཡིན། དཀར་པོར་མ་ཡིན། ཁ་དོག་ལེ་བརྒན་དུ་མ་ཡིན། ཤེལ་གྱི་ཁ་དོག་ཏུ་མ་ཡིན། ཐུང་ངུར་མ་ཡིན། རིང་པོར་མ་ཡིན། ཟླུམ་པོར་མ་ཡིན། གྲུ་བཞིར་མ་ཡིན། སྣང་བར་མ་ཡིན། མུན་པར་མ་ཡིན། སྐྱེས་པར་མ་ཡིན། བུད་མེད་དུ་མ་ཡིན། མ་ནིང་དུ་མ་
ཡིན་ནོ། །གསང་བ་པའི་བདག་པོ་སེམས་དེ་ནི་འདོད་པའི་ཁམས་ཀྱི་རང་བཞིན་མ་ཡིན། གཟུགས་ཀྱི་ཁམས་ཀྱི་རང་བཞིན་མ་ཡིན། གཟུགས་མེད་པའི་ཁམས་ཀྱི་རང་བཞིན་མ་ཡིན་ནོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་།
མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པའི་འགྲོ་བ་སེམས་ཅན་རིས་མཐུན་པའི་རང་བཞིན་མ་ཡིན་ནོ། །གསང་བ་པའི་བདག་པོ་སེམས་དེ་ནི་མིག་ལ་མི་གནས། རྣ་བ་མ་ཡིན། སྣ་ལ་མ་ཡིན། ལྕེ་ལ་མ་ཡིན། ལུས་ལ་མ་ཡིན། ཡིད་ལ་མི་གནས་སོ། །
དེ་ཅིའི་ཕྱིར་ཞེ་ན། སེམས་དེ་ནི་ནམ་མཁའི་མཚན་ཉིད་དེ། དེའི་ཕྱིར་རྟོག་པ་དང་། རྣམ་པར་རྟོག་པ་ཐམས་ཅད་དང་བྲལ་བའོ། །དེ་ཅིའི་ཕྱིར་ཞེ་ན། ནམ་མཁའི་རང་བཞིན་གང་ཡིན་པ་དེ་ནི་སེམས་ཀྱི་རང་བཞིན་ནོ། །སེམས་ཀྱི་རང་བཞིན་གང་ཡིན་པ་དེ་ནི་བྱང་ཆུབ་ཀྱི་རང་བཞིན་ཏེ།
གསང་བ་པའི་བདག་པོ་དེ་ལྟར་ན་སེམས་དང་། ནམ་མཁའི་དབྱིངས་དང་། བྱང་ཆུབ་འདི་ནི་གཉིས་སུ་མེད་དེ་གཉིས་སུ་བྱར་མེད་དོ། །དེ་ཡང་སྙིང་རྗེའི་རྩ་བ་ཅན། ཐབས་ཀྱི་ཕ་རོལ་ཏུ་ཕྱིན་པས་ཡོངས་སུ་གཟུང་བ་སྟེ། གསང་བ་པའི་བདག་པོ་དེ་བས་ན་རྣམ་གྲངས་འདིས་ཀྱང་འདི་ལྟར་ང་

བྱང་ཆུབ་སེམས་དཔའི་འཁོར་གྱི་ནང་དུ་ཆོས་གང་དང་གང་སྟོན་པ་དེ་ཐམས་ཅད་ནི། བྱང་ཆུབ་ཀྱི་སེམས་ཡོངས་སུ་དག་པར་བྱ་བ་དང་། སེམས་ཡོངས་སུ་ཤེས་པར་བྱ་བའི་ཕྱིར་ཡིན་པར་རིག་པར་བྱའོ། །གསང་བ་པའི་བདག་པོ་དེ་ལྟ་བས་ན་རིགས་ཀྱི་བུའམ་རིགས་ཀྱི་བུ་
མོ་བྱང་ཆུབ་ཡོངས་སུ་ཤེས་པར་འདོད་པས་རང་གི་སེམས་ཉིད་ཡོངས་སུ་ཤེས་པར་བྱའོ། །གསང་བ་པའི་བདག་པོ་ཅི་ལྟར་རང་གི་སེམས་ཡོངས་སུ་ཤེས་པར་བྱ་ཞེ་ན། འདི་ལྟ་སྟེ། རྣམ་པར་རམ། ཁ་དོག་ཏུའམ། དབྱིབས་སུའམ། ཡུལ་དུའམ། གཟུགས་སུའམ། ཚོར་བར་རམ།
འདུ་ཤེས་སུའམ། འདུ་བྱེད་དུའམ། རྣམ་པར་ཤེས་པར་རམ། བདག་ཏུའམ། བདག་གིར་རམ། གཟུང་བར་རམ། འཛིན་པར་རམ། དག་པར་རམ། མ་དག་པར་རམ། ཁམས་སུའམ། སྐྱེ་མཆེད་དུའམ། རྣམ་པ་ཐམས་ཅད་ཀྱི་བར་དུ་ཡོངས་སུ་བཙལ་ཀྱང་མི་
དམིགས་པ་ཡིན་ཏེ། གསང་བ་པའི་བདག་པོ་འདི་ནི་བྱང་ཆུབ་སེམས་དཔའི་བྱང་ཆུབ་ཀྱི་སེམས་རྣམ་པར་དག་པའི་སྒོ་ཞེས་བྱ་བ་ཆོས་སྣང་བའི་སྒོ་ཆོས་སྣང་བའི་ཚུལ་དང་པོ་སྟེ། གང་ལ་གནས་ན་བྱང་ཆུབ་སེམས་དཔའ་རྣམས་ཚེགས་ཆུང་ངུས་སྒྲིབ་པ་ཐམས་ཅད་སྤོང་བའི་ཏིང་ངེ་འཛིན་འཐོབ་
ཅིང་། དེ་ཐོབ་པས་བྱང་ཆུབ་སེམས་དཔའ་རྣམས་སངས་རྒྱས་ཐམས་ཅད་དང་ལྷན་ཅིག་འགྲོགས་པ་ཐོབ་པར་འགྱུར། མངོན་པར་ཤེས་པ་ལྔ་དག་ཀྱང་ཐོབ་པར་འགྱུར། སྐད་དང་སྒྲ་དང་དབྱངས་མཐའ་ཡས་པའི་གཟུངས་ཀྱང་ཐོབ་པར་འགྱུར། སེམས་ཅན་གྱི་བསམ་པ་རྗེས་སུ་ཤེས་
པ་དང་། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཤིང་འཁོར་བ་ན་ཡོངས་སུ་མི་ཉམས་པའི་ཆོས་ཅན་དུ་འགྱུར། སེམས་ཅན་གྱི་དོན་བྱ་བ་དག་ལ་ཡོངས་སུ་མི་སྐྱོ་བར་འགྱུར། འདུས་མ་བྱས་ཀྱི་ཚུལ་ཁྲིམས་ལ་རབ་ཏུ་གནས་པ་དང་། ལོག་པར་ལྟ་བ་རྣམ་པར་སྤངས་པ་
དང་། ཡང་དག་པར་ལྟ་བ་རྟོགས་པར་ཁོང་དུ་ཆུད་པར་འགྱུར་བ་ཡིན་ནོ། །གསང་བ་པའི་བདག་པོ་གཞན་ཡང་སྒྲིབ་པ་ཐམས་ཅད་སྤོང་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི། མོས་པའི་སྟོབས་སྐྱེས་པས་ཚེགས་ཆུང་དུས་སངས་རྒྱས་ཀྱི་ཆོས་ཐམས་ཅད་ཡོངས་སུ་

རྫོགས་པར་བྱེད་དེ། གསང་བ་པའི་བདག་པོ་མདོར་ན་རིགས་ཀྱི་བུའམ། རིགས་ཀྱི་བུ་མོ་དེ་ནི་ཡོན་ཏན་དཔག་ཏུ་མེད་པ་དང་ལྡན་པར་འགྱུར་རོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་ཡོངས་སུ་ཞུས་པ། བཅོམ་ལྡན་འདས་ཇི་ལྟར་བྱང་ཆུབ་ཏུ་སེམས་བསྐྱེད་པ་ཞེས་བགྱི་བ་
ལགས། བྱང་ཆུབ་འབྱུང་བའི་སེམས་སྐྱེས་པའི། །མཚན་ཉིད་ཇི་ལྟར་འཚལ་བར་བགྱི། །སེམས་མཁྱེན་པ་ནི་རྣམས་ཀྱི་མཆོག །དཔའ་ཆེན་ཡེ་ཤེས་ལས་བྱུང་བ། །ཇི་སྙེད་ཅིག་ལས་འདས་ནས་ནི། །སྐྱེ་བར་འགྱུར་བ་བསྟན་དུ་གསོལ། །མགོན་པོ་སེམས་ཀྱི་མཚན་ཉིད་
དང་། །དུས་ཀྱང་རྒྱ་ཆེར་བཤད་དུ་གསོལ། །དེ་དག་བསོད་ནམས་ཅི་འདྲ་དང་། །སྤྱོད་པ་ཅི་འདྲར་འགྱུར་བ་དང་། །སེམས་ལ་སེམས་ཀྱི་ཁྱད་པར་ཡང་། །ཐུབ་པ་ཆེན་པོས་བསྟན་དུ་གསོལ། །དེ་སྐད་གསོལ་ནས་དེ་ཡི་ཚེ། །བཅོམ་ལྡན་རྣམ་པར་སྣང་ཆེན་གྱིས། །ཕྱག་ན་
རྡོ་རྗེ་ཆེར་འབྱུང་ལ། །ལེགས་སོ་བུ་ཞེས་འདི་སྐད་གསུངས། །ཐེག་པ་ཆེན་པོའི་གོ་འཕང་མཆོག །སེམས་ཀྱི་རྒྱུད་ཀྱི་མཚན་ཉིད་ནི། །རྫོགས་སངས་རྒྱས་ཀྱི་གསང་བའི་མཆོག །རྟོག་གེ་ཀུན་གྱིས་མི་ཤེས་པ། །ཐམས་ཅད་ཁྱོད་ལ་བཤད་པར་བྱ། །ཡིད་གཅིག་བསྡུས་ལ་
མཉན་པར་གྱིས། །སེམས་ནི་བརྒྱ་རྩ་དྲུག་ཅུ་ལས། །འདས་ནས་བྱང་ཆུབ་ཉིད་ཀྱི་ཕྱིར། །བསོད་ནམས་ཆེས་འབྱུང་སྙིང་པོ་སྟེ། །བྱང་ཆུབ་འབྱུང་བ་སྐྱེ་བར་འགྱུར། །ནམ་མཁའ་ལྟ་བུར་དཔག་མེད་ཅིང་། །གོས་པ་མེད་དེ་ཅི་བཞིན་གནས། །ཆོས་ཀུན་གྱིས་ནི་མི་སྒུལ་ཏེ། །གཟོད་
ནས་ཞི་ཞིང་མཚན་ཉིད་མེད། །དཔག་མེད་ཡེ་ཤེས་ཀྱིས་བསྒྲུབས་པ། །ཡང་དག་རྫོགས་སངས་རྒྱས་སྟོན་པ། །མཆོད་དང་སྤྱོད་པས་བསྒྲུབས་པའི་ཕྱིར། །བྱང་ཆུབ་ཕྱིར་ནི་དང་པོར་འདོད། །གསང་བ་པའི་བདག་པོ་དེ་ལ་འཁོར་བ་ཐོག་མ་མེད་པ་ན་བྱིས་པ་སོ་སོའི་སྐྱེ་བོ་རྣམས་ངར་འཛིན་
པ་དང་ང་ཡིར་འཛིན་པ་ལ་མངོན་པར་ཞེན་པས་བདག་གི་ཁྱད་པར་གྲངས་མེད་པ་རབ་ཏུ་བརྟགས་ཏེ། གསང་བ་པའི་བདག་པོ་དེ་ལ་བདག་གི་ངོ་བོ་ཉིད་ལ་མ་དཔྱད་པར་བདག་གོ་ཞེས་ངར་འཛིན་པ་ཀུན་ནས་བསླང་ངོ་། །གཞན་དག་ནི་དུས་ལས་བྱུང་བ་དང་། འཛིན་པ་པོས་སྤྲུལ་པ་དང་། ངེས་པར་

འབྱུང་བ་དང་འདི་ལྟ་སྟེ། དབང་ཕྱུག་དང་། འབྱིན་པ་པོ་དང་། དུས་དང་། གཙོ་བོ་དང་། བྱེད་པ་པོ་དང་། བྱེད་པ་པོ་མ་ཡིན་པ་དང་། རྣལ་འབྱོར་དང་། ཚད་མ་དང་། དག་པ་དང་། མ་དག་པ་དང་། ནང་གི་བདག་དང་། སྐྱེས་བུ་དང་། ཁྱབ་བདག་དང་། སྲོག་དང་།
གང་ཟག་དང་། རྣམ་པར་ཤེས་པ་དང་། ཀུན་གཞི་དང་། ཤེས་པ་པོ་དང་། མཐོང་བ་པོ་དང་། གཟུང་བ་དང་། འཛིན་པ་དང་། ཤེས་པ་དང་། ཤེས་བྱ་དང་། ཁོང་དུ་ཆུད་པར་བྱ་བ་དང་། ཤེད་ལས་སྐྱེས་པ་དང་། ཤེད་བུ་དང་། བརྗོད་པར་བྱ་བ་དང་། བརྗོད་པར་བྱ་བ་མ་ཡིན་
པར་རྟོག་སྟེ། གསང་བ་པའི་བདག་པོ་བདག་གི་ཁྱད་པར་དེ་ལྟ་བུ་ལ་སོགས་པ་རྣལ་འབྱོར་འདོད་པའི་རྣལ་འབྱོར་པ་དག་གིས་ཐར་བར་འདོད་པས་སྔོན་བརྟགས་པ་ཡིན་ནོ། །གསང་བ་པའི་བདག་པོ་གཞན་ཡང་བྱིས་པ་སོ་སོའི་སྐྱེ་བོ་ཕྱུགས་དང་མཚུངས་པ་རྣམས་ལས་བརྒྱ་ལམ་ན། རེས་
འགའ་ཞིག་ཆོས་ཀྱི་འདུ་ཤེས་འབྱུང་བ་ནི་འདི་ལྟ་སྟེ། སྨྱུང་བར་གནས་པ་ལ་གནས་པར་བྱའོ། །ཞེས་དེ་ཙམ་ཞིག་སེམས་ལ་བྱས་ཏེ། མགུ་བ་བསྐྱེད་ནས་ཕྱི་ཕྱིར་ཞིང་དེ་ཉིད་ལ་གོམས་པར་བྱེད་དེ། གསང་བ་པའི་བདག་པོ་དེ་ནི་དགེ་བའི་ལས་སྐྱེ་བའི་ས་བོན་ལྟ་བུ་སྟེ་སེམས་དང་པོའོ། །
དེ་རྒྱུ་དེ་ཉིད་ཀྱི་མཚན་མ་དང་བཅས་པའི་ཉི་མ་དེ་དང་དེ་དག་ལ་ཕ་མ་དང་། བུ་དང་། བུ་མོ་དང་། མཛའ་བཤེས་དང་། ཉེ་དུ་དག་ལ་སྦྱིན་པ་སྦྱིན་པར་བྱེད་དེ། འདི་ནི་མྱུ་གུ་ལྟ་བུ་སྟེ་གཉིས་པའོ། །གཞན་ཡང་སྦྱིན་པ་དེ་ཉིད་མི་ཤེས་པ་དག་ལ་ཡང་སྦྱིན་པར་བྱེད་དེ། འདི་ནི་སྡོང་བུ་
ལྟ་བུ་སྟེ་གསུམ་པའོ། །གཞན་ཡང་སྦྱིན་པ་དེ་ཉིད་སྣོད་དུ་རུང་བ་ཡོངས་སུ་ཚོལ་ཞིང་སྦྱིན་པར་བྱེད་དེ། འདི་ནི་ལོ་མ་ལྟ་བུ་སྟེ་བཞི་པའོ། །གཞན་ཡང་སྦྱིན་པ་དེ་ཉིད་བླ་མའམ་རོལ་མོ་མཁན་ལ་དགའ་བཞིན་དུ་སྦྱིན་པར་བྱེད་དེ། འདི་ནི་མེ་ཏོག་ལྟ་བུ་སྟེ་ལྔ་པའོ། །གཞན་ཡང་སྦྱིན་པ་
དེ་ཉིད་ཡིད་དགའ་བ་དག་ལ་སྦྱིན་པར་བྱེད་དེ། འདི་ནི་འབྲས་བུ་ལྟ་བུ་སྟེ་དྲུག་པའོ། །གསང་བ་པའི་བདག་པོ་གཞན་ཡང་མཐོ་རིས་སུ་སྐྱེ་བར་བྱ་བའི་ཕྱིར་ཚུལ་ཁྲིམས་བསྲུང་སྟེ། འདི་ནི་གསོས་སུ་གྱུར་པ་སྟེ་བདུན་པའོ། །གསང་བ་པའི་བདག་པོ་གཞན་ཡང་སེམས་དེ་ལྟ་བུ་ཉིད་ཀྱིས་

འཁོར་བར་རྒྱུ་བ་ན། དགེ་བའི་བཤེས་གཉེན་ལ་ལ་ཞིག་ལས་ཚིག་འདི་སྐད་ཐོས་ཏེ། ལྷ་འདི་དག་ནི་ལྷ་ཆེན་ཏེ། །ཐམས་ཅད་ལ་ནི་བདེ་བ་སྟེར། །དེ་ལ་ཁྱོད་ཀྱིས་གུས་མཆོད་དང་། །ཐམས་ཅད་འབྱོར་པ་ཉིད་དུ་འགྱུར། །དེ་དག་ཀྱང་ནི་འདི་ལྟ་སྟེ། །དབང་ཕྱུག་དང་ནི་ཚངས་པ་
དང་། །དེ་བཞིན་ཁྱབ་འཇུག་བདེ་བྱེད་དང་། །དྲག་པོ་སྐེམ་བྱེད་དེ་བཞིན་དུ། །ཉི་མ་ཟླ་བ་ཆུ་ལྷ་ཉིད། །ལུས་ངན་ནོར་སྦྱིན་བརྒྱ་བྱིན་དང་། །མིག་མི་བཟང་དང་སྣ་ཚོགས་འབྱུང་། །གཤིན་རྗེ་དུས་མཚན་མྱ་ངན་འདས། །འཇིག་རྟེན་གཙོ་ཞེས་བྱ་བ་དང་། །མེ་དང་རྣམ་པར་འདུད་པའི་
བུ། །དེ་བཞིན་ལྷ་མོ་དཀའ་ཐུབ་ཟློག །པདྨ་དང་ནི་འཇོག་པོ་ཀླུ། །ནོར་ལྡན་དང་ནི་དུང་ཞེས་བྱ། །ཀརྐོ་ཊ་ཀ་པདྨ་ཆེ། །རིགས་ཅན་དང་ནི་གདེངས་ཀ་མང་། །རྟག་ཏུ་མཐའ་ཡས་ཐོག་མའི་ལྷ། །དེ་བཞིན་ལྷ་དང་དྲང་སྲོང་མཆོག །རིག་བྱེད་རིག་བྱེད་སྐྱེས་བུ་ཡིན། །མཁས་
པས་མཆོད་པ་གྱིས་ཤིག་ཅེས། །དེ་ལས་དེ་འདྲའི་ཚིག་ཐོས་ནས། །ཡིད་ནི་ཡང་དག་མགུ་གྱུར་ཏེ། །དེ་ཚེ་རབ་ཏུ་གུས་ལྡན་པས། །དེ་དག་ལ་ནི་ནན་ཏན་བྱེད། །གསང་བ་པའི་བདག་པོ་འདི་ནི་བྱིས་པ་སོ་སོའི་སྐྱེ་བོ་འཁོར་བ་ན་ཀུན་ཏུ་འཁྱམ་པ་རྣམས་ཀྱི་དབུགས་འབྱིན་པའི་མཆོག་ཡིན་
ཏེ། འདི་ནི་སྟོབས་སུ་གྱུར་པ་སྟེ། སེམས་བརྒྱད་པར་རྒྱལ་བ་རྣམས་ཀྱིས་བཤད་དོ། །གསང་བ་པའི་བདག་པོ་གཞན་ཡང་ཁྱད་པར་རྟོགས་པ་ཅི་སྐད་དུ་ཡོངས་སུ་བསྒྲགས་པའི་ཁྱད་པར་དེ་དང་དེ་དག་ལ་ཁྱད་པར་དུ་གནས་པ་རྣམས་ལ་འབའ་ཞིག་པ་ཉིད་ཀྱི་དོན་དུ་བློ་སྐྱེ་ཞིང་། དེ་ཡང་ཡོད་དོ་
ཡོད་དོ་ཞེས་སྟོང་པ་ཉིད་ཁོ་ན་ལ་དངོས་པོར་སེམས་ཏེ། གསང་བ་པའི་བདག་པོ་དེ་དག་གིས་ནི་སྟོང་པ་ཉིད་རབ་ཏུ་མི་ཤེས་སོ། །སྟོང་པ་ཉིད་ནི་དངོས་པོ་ཡང་མ་ཡིན། དངོས་པོ་མེད་པ་ཡང་མ་ཡིན། ཡོད་པ་ཡང་མ་ཡིན། མེད་པ་ཡང་མ་ཡིན། གཉི་ག་ཡང་མ་ཡིན་ཏེ། དེ་ལ་རྟོག་པའམ།
མི་རྟོག་པ་ཡང་མེད་ན། དེ་ལ་ཅི་ལྟར་སྟོང་པ་ཞེས་བརྟག་པར་བྱ། གང་དག་སྟོང་ཉིད་མི་ཤེས་པ། །དེ་དག་མྱ་ངན་འདས་མི་ཤེས། །དེ་ཕྱིར་དངོས་དང་དངོས་མེད་པ། །འཇིག་པས་སྟོང་ཉིད་ཤེས་པར་བྱ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་གསོལ་བ་བཏབ་པ། བཅོམ་ལྡན་

འདས་སེམས་ཀྱི་ཁྱད་པར་དེ་དག་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་སེམས་ཀྱི་ཁྱད་པར་གྱི་མཚན་ཉིད་ཉོན་ཅིག །གསང་བ་པའི་བདག་
པོ་དེ་ལ་སེམས་འདི་ནི་འདོད་ཆགས་ཀྱི་སེམས་དང་། འདོད་ཆགས་དང་བྲལ་བའི་སེམས་དང་། ཞེ་སྡང་གི་སེམས་དང་། བྱམས་པའི་སེམས་དང་། གཏི་མུག་གི་སེམས་དང་། ཤེས་རབ་ཀྱི་སེམས་དང་། གཏན་ལ་ཕབ་པའི་སེམས་དང་། ཐེ་ཙོམ་གྱི་སེམས་དང་། མུན་པར་གྱུར་
པའི་སེམས་དང་། སྣང་བར་གྱུར་པའི་སེམས་དང་། སྡུད་པའི་སེམས་དང་། འཐབ་པའི་སེམས་དང་། རྩོད་པའི་སེམས་དང་། མི་རྩོད་པའི་སེམས་དང་། ལྷའི་སེམས་དང་། ལྷ་མ་ཡིན་གྱི་སེམས་དང་། ཀླུའི་སེམས་དང་། མིའི་སེམས་དང་། བུད་མེད་ཀྱི་སེམས་དང་། དབང་
ཕྱུག་གི་སེམས་དང་། ཚོང་པའི་སེམས་དང་། ཞིང་པའི་སེམས་དང་། ཆུ་བོའི་སེམས་དང་། ལྟེང་ཀའི་སེམས་དང་། ཁྲོན་པའི་སེམས་དང་། ཀུན་ཏུ་བསྲུང་བའི་སེམས་དང་། སེར་སྣའི་སེམས་དང་། ཁྱིའི་སེམས་དང་། བྱི་ལའི་སེམས་དང་། ནམ་མཁའ་ལྡིང་གི་སེམས་
དང་། བྱི་བའི་སེམས་དང་། གླུའི་སེམས་དང་། གར་གྱི་སེམས་དང་། སིལ་སྙན་གྱི་སེམས་དང་། ཁྱིམ་གྱི་སེམས་དང་། སེང་གེའི་སེམས་དང་། འུག་པའི་སེམས་དང་། བྱ་རོག་གི་སེམས་དང་། སྲིན་པོའི་སེམས་དང་། ཚེར་མའི་སེམས་དང་། ས་འོག་གི་སེམས་དང་། རླུང་
གི་སེམས་དང་། ཆུའི་སེམས་དང་། མེའི་སེམས་དང་། འདམ་གྱི་སེམས་དང་། རྙོག་པའི་སེམས་དང་། ཚོན་རྩིའི་སེམས་དང་། ཤིང་ལེབ་ཀྱི་སེམས་དང་། འཁྲུལ་པའི་སེམས་དང་། དུག་གི་སེམས་དང་། ཞགས་པའི་སེམས་དང་། ལྕགས་སྒྲོག་གི་སེམས་དང་། སྤྲིན་
གྱི་སེམས་དང་། ཞིང་གི་སེམས་དང་། ལན་ཚྭའི་སེམས་དང་། སྤུ་གྲིའི་སེམས་དང་། རི་རབ་ལྟ་བུའི་སེམས་དང་། རྒྱ་མཚོ་ལྟ་བུའི་སེམས་དང་། ཕུག་ལྟ་བུའི་སེམས་དང་། སྐྱེ་བར་གྱུར་པའི་སེམས་སོ། །གསང་བ་པའི་བདག་པོ་དེ་ལ་འདོད་ཆགས་ཀྱི་སེམས་གང་ཞེ་ན། ཆགས་

པ་ཅན་ཆོས་ཀུན་ཏུ་སྟེན་པའོ། །འདོད་ཆགས་དང་བྲལ་བའི་སེམས་གང་ཞེ་ན། འདོད་ཆགས་དང་བྲལ་བའི་ཆོས་ཀུན་ཏུ་སྟེན་པའོ། །ཞེ་སྡང་གི་སེམས་གང་ཞེ་ན། སྡང་བས་ཆོས་ཀུན་ཏུ་སྟེན་པའོ། །བྱམས་པའི་སེམས་གང་ཞེ་ན། བྱམས་པ་དང་ལྡན་པས་ཆོས་སྟེན་པའོ། །
གཏི་མུག་གི་སེམས་གང་ཞེ་ན། གང་མི་དཔྱོད་པར་ཆོས་སྟེན་པའོ། །ཤེས་རབ་ཀྱི་སེམས་གང་ཞེ་ན། ཁྱད་པར་ལས་ཁྱད་པར་གཞན་རྟོགས་པར་བྱ་སྟེ་ཆོས་སྟེན་པའོ། །གཏན་ལ་ཕབ་པའི་སེམས་གང་ཞེ་ན། བཀའ་དང་བླ་མའི་ཚིག་བཞིན་བྱེད་པ་ཉིད་དོ། །ཐེ་ཚོམ་གྱི་སེམས་
གང་ཞེ་ན། ཅི་ལྟར་ཡོངས་སུ་གཟུང་བ་ངེས་པ་དག་ལ་སོམ་ཉི་སྟེན་པ་ཉིད་དོ། །མུན་པར་གྱུར་པའི་སེམས་གང་ཞེ་ན། སོམ་ཉི་མེད་པ་ལ་སོམ་ཉིར་འདུ་ཤེས་པའོ། །སྣང་བར་གྱུར་པའི་སེམས་གང་ཞེ་ན། སོམ་ཉི་མེད་པ་ལ་སོམ་ཉི་མེད་པར་སྟེན་པའོ། །སྡུད་པའི་སེམས་གང་ཞེ་
ན། དུ་མ་གཅིག་ཏུ་བྱེད་པའོ། །འཐབ་པའི་སེམས་གང་ཞེ་ན། ཕན་ཚུན་རྩོད་པ་ཉིད་དོ། །རྩོད་པའི་སེམས་གང་ཞེ་ན། གང་བདག་ཉིད་དང་བདག་ཉིད་དུ་རྩོད་པའོ། །མི་རྩོད་པའི་སེམས་གང་ཞེ་ན། མཉམ་པས་མཚུངས་པར་ལྟ་བའོ། །ལྷའི་སེམས་གང་ཞེ་ན། ཡིད་ཀྱིས་
བདག་ཉིད་ལ་རློམ་སེམས་སུ་བྱེད་པའོ། །ལྷ་མ་ཡིན་གྱི་སེམས་གང་ཞེ་ན། གང་འཁོར་བ་ཉིད་ལ་སྨོད་པའོ། །ཀླུའི་སེམས་གང་ཞེ་ན། གང་ལོངས་སྤྱོད་ཆེན་པོ་ཉིད་དུ་བྱ་བའི་ཕྱིར་སེམས་པའོ། །མིའི་སེམས་གང་ཞེ་ན། དེ་ཉིད་ཀྱི་དོན་དུ་སེམས་པའོ། །བུད་མེད་ཀྱི་སེམས་གང་
ཞེ་ན། འདོད་པ་ཁོ་ནའི་ཕྱིར་ཆོས་སྟེན་པའོ། །དབང་ཕྱུག་གི་སེམས་གང་ཞེ་ན། གང་བདག་གིས་ཐམས་ཅད་བསམས་སོ་སྙམ་དུ་རློམ་སེམས་སུ་བྱེད་པའོ། །ཚོང་པའི་སེམས་གང་ཞེ་ན། གང་བསྡུ་བ་བྱས་ཏེ་རྣམ་པར་སྤེལ་ནས་ཕྱིས་སྟེན་པའོ། །ཞིང་པའི་སེམས་གང་ཞེ་ན།
གང་ཐོས་པ་རྣམ་པ་དུ་མ་ཚོལ་ཞིང་ཕྱིས་སྟེན་པའོ། །ཆུ་བོའི་སེམས་གང་ཞེ་ན། གང་མཐའ་གཉིས་ལ་ལྟོས་ཤིང་སྟེན་པའོ། །ལྟེང་ཀའི་སེམས་གང་ཞེ་ན། གང་སྲེད་པས་སྟེན་པའོ། །ཁྲོན་པའི་སེམས་གང་ཞེ་ན། གང་མི་ཟབ་པ་ལ་ཟབ་པར་སེམས་པའོ། །ཀུན་ཏུ་བསྲུང་

པའི་སེམས་གང་ཞེ་ན། འདི་ཉིད་བདེན་གྱི་གཞན་ནི་གཏི་མུག་གོ་སྙམ་དུ་སེམས་པའོ། །སེར་སྣའི་སེམས་གང་ཞེ་ན། བདག་ཉིད་བསྟེན་ཅིང་གཞན་ལ་མི་སྟེར་བའོ། །བྱི་ལའི་སེམས་གང་ཞེ་ན། གང་མཆོད་པ་ལ་ལྟོས་ཏེ་སྟེན་པའོ། །ཁྱིའི་སེམས་
གང་ཞེ་ན། གང་ཆུང་དུས་ཀྱང་མགུ་བར་འགྱུར་བའོ། །ནམ་མཁའ་ལྡིང་གི་སེམས་གང་ཞེ་ན། གང་ཕྱོགས་འཛིན་པས་ཆོས་ལ་སྟེན་པའོ། །བྱི་བའི་སེམས་གང་ཞེ་ན། འཆིང་བ་ཐམས་ཅད་གཅད་པའི་ཕྱིར་སེམས་པའོ། །གླུའི་སེམས་གང་ཞེ་ན། བདག་
གིས་དབྱངས་སྒྲ་སྣ་ཚོགས་ཀྱི་གླུས་སེམས་ཅན་རྣམས་གཟུང་བར་བྱའོ་སྙམ་པའོ། །གར་གྱི་སེམས་གང་ཞེ་ན། བདག་གིས་རྫུ་འཕྲུལ་སྣ་ཚོགས་ཀྱིས་གཞན་དག་ཡང་དག་པར་འཛིན་པ་གཞུག་གོ་སྙམ་དུ་སེམས་པའོ། །སིལ་སྙན་གྱི་སེམས་གང་ཞེ་ན། བདག་གིས་ཆོས་ཀྱི་
རྔ་བརྡུང་ངོ་སྙམ་པའོ། །ཁྱིམ་གྱི་སེམས་གང་ཞེ་ན། བདག་གི་ལུས་ཀུན་ཏུ་བསྲུང་བའི་ཕྱིར་སྟེན་པའོ། །སེང་གེའི་སེམས་གང་ཞེ་ན། གང་ཐམས་ཅད་ཟིལ་གྱིས་གནོན་པ་སྟེན་པའོ། །འུག་པའི་སེམས་གང་ཞེ་ན། གང་མཚན་མོ་སེམས་པའོ། །བྱ་རོག་གི་
སེམས་གང་ཞེ་ན། གང་ཐམས་ཅད་དུ་སྐྲག་པས་སེམས་པའོ། །སྲིན་པོའི་སེམས་གང་ཞེ་ན། དགེ་བས་མི་དགེ་བ་རྣམས་སྒྲུབ་པའོ། །ཚེར་མའི་སེམས་གང་ཞེ་ན། གང་ཐམས་ཅད་དུ་འགྱོད་པ་སེམས་པའོ། །ས་འོག་གི་སེམས་གང་ཞེ་ན། སའི་འོག་གི་དོན་དུ་
སེམས་པའོ། །རླུང་གི་སེམས་གང་ཞེ་ན། གང་ཐམས་ཅད་དུ་ཐམས་ཅད་སྒྲུབ་པའོ། །ཆུའི་སེམས་གང་ཞེ་ན། གང་མི་དགེ་བ་ཐམས་ཅད་བཀྲུ་བའི་ཕྱིར་སྟེན་པའོ། །མེའི་སེམས་གང་ཞེ་ན། གང་དཀའ་ཐུབ་ཉིད་ཀྱིས་གདུང་བར་བྱེད་པའོ། །འདམ་གྱི་
སེམས་གང་ཞེ་ན། གང་བདག་གི་ཉེས་པས་གཞན་ལ་སྐུར་བའོ། །རྙོག་པའི་སེམས་གང་ཞེ་ན། གང་ཕ་རོལ་གྱི་ཉེས་པ་འཛིན་པས་སེམས་ལ་རྙོག་པ་སྐྱེད་པའོ། །ཚོན་རྩིའི་སེམས་གང་ཞེ་ན། གང་དེ་ལ་ཆགས་པ་ཉིད་དུ་སྟེན་པའོ། །ཤིང་ལེབ་ཀྱི་སེམས་གང་ཞེ་

ན་གང་དགེ་བའི་གཞན་སྤོང་བས་སྟེན་པའོ། །ནོར་བའི་སེམས་གང་ཞེ་ན། གཞན་བཟུང་ཞིང་གཞན་ཁོ་ནར་སེམས་པའོ། །དུག་གི་སེམས་གང་ཞེ་ན། གང་ཤིན་ཏུ་དངོས་པོ་མེད་པ་ཉིད་སེམས་པའོ། །ཞགས་པའི་སེམས་གང་ཞེ་ན། གང་ཐམས་ཅད་དུ་བདག་ཉིད་བཅིངས་
ཤིང་འདུག་པའོ། །ལྕགས་སྒྲོག་གི་སེམས་གང་ཞེ་ན། གང་རྐང་པ་གཉིས་ལ་འདུག་སྟེ་སེམས་པའོ། །སྤྲིན་གྱི་སེམས་གང་ཞེ་ན། གང་ཆུ་དག་ལ་སེམས་པའོ། །ཞིང་གི་སེམས་གང་ཞེ་ན། རང་གི་ལུས་ཉིད་ཡོངས་སུ་སྦྱོང་བར་བྱེད་པའོ། །ལན་ཚྭའི་སེམས་གང་ཞེ་ན།
གང་ཞིག་གང་གིས་སེམས་པར་བྱེད་པ་དེ་ལ་ཡང་སེམས་པའོ། །སྤུ་གྲིའི་སེམས་གང་ཞེ་ན། གང་རབ་ཏུ་བྱུང་བ་ཙམ་ལ་སྟེན་པའོ། །རི་རབ་ལྟ་བུའི་སེམས་གང་ཞེ་ན། གང་མཐོ་བར་གྱུར་ནས་སེམས་པའོ། །རྒྱ་མཚོ་ལྟ་བུའི་སེམས་གང་ཞེ་ན། གང་རང་གི་ལུས་ཉིད་ལ་
མཆོག་ཏུ་འཛིན་ཅིང་འདུག་པའོ། །ཕུག་ལྟ་བུའི་སེམས་གང་ཞེ་ན། གང་སྔར་ངེས་པར་གྱུར་ལ་ཕྱིས་དེ་ཉིད་ཀྱིས་འགྱུར་བར་སྟེན་པའོ། །དེ་ལ་སྐྱེ་བར་གྱུར་པའི་སེམས་གང་ཞེ་ན། གང་གི་སེམས་འདུ་བྱེད་གང་ཁོ་ན་དང་སྐྱེས་པ་དེ་ཁོ་ན་དང་ལྷན་ཅིག་ཏུ་འགྲོ་བའོ། །གསང་
བ་པའི་བདག་པོ་དེ་ལྟར་ན་གཅིག་གཉིས་གསུམ་བཞི་ལྔ་གཉིས་སུ་བསྒྱུར་བ་བྱས་པས། འཇིག་རྟེན་པའི་སེམས་བརྒྱ་དྲུག་ཅུ་བསྐལ་པ་གསུམ་གྱིས་འདས་ནས། འཇིག་རྟེན་ལས་འདས་པའི་སེམས་སྐྱེ་སྟེ། འདི་ལྟ་སྟེ། འདི་ནི་ཕུང་པོ་ཙམ་ཉིད་དེ། །བདག་ནི་ནམ་ཡང་ཡོད་
མ་ཡིན། །དབང་པོའི་གྲོང་ཁྱེར་ཁམས་རྣམས་ཀྱིས། །འཇིག་རྟེན་དོན་མེད་རྣམ་པར་ཉམས། །ཡན་ལག་བཅུ་གཉིས་རྟེན་འབྲེལ་འདི། །ཉོན་མོངས་ལས་ཀྱིས་ཀུན་ནས་བསླང་། །མ་རིག་ས་བོན་ལས་བྱུང་བ། །བྱེད་པོ་ལ་སོགས་རྣམ་པར་སྤངས། །དེ་ལྟར་ཞི་ཞིང་
ཤིན་ཏུ་ཟབ། །རྟོག་གེ་ཀུན་གྱིས་ཤེས་པར་དཀའ། །ཉེས་པ་ཐམས་ཅད་རྣམ་སྤངས་པ། །སངས་རྒྱས་རྣམས་ཀྱིས་སྔོན་བསྟན་པའོ། །གསང་བ་པའི་བདག་པོ་དེ་ལ་འཇིག་རྟེན་ལས་འདས་པའི་སེམས་ལ་གནས་པ་རྣམས་ལ་ཡང་ཕུང་པོ་ལ་ཡོད་དོ་སྙམ་པའི་བློ་ཉེ་བར་

སྐྱེའོ། །ནམ་ཕུང་པོ་དག་ལ་འདོད་ཆགས་དང་བྲལ་བར་སྐྱེད་པ་དེའི་ཚེ་ལྦུ་བ་དང་། ཆུའི་ཆུ་བུར་དང་། སྒྱུ་མ་དང་། སྨིག་རྒྱུ་དང་མཚུངས་པར་འཇིག་པས་རྣམ་པར་གྲོལ་བར་འགྱུར་ཏེ། འདི་ལྟ་སྟེ། ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་
པར་སྤངས་པ། ཆོས་ཉིད་ཀྱི་རང་གི་ངོ་བོ་ཞི་བའི་དབྱིངས་རྟོགས་པར་འགྱུར་རོ། །གསང་བ་པའི་བདག་པོ་འཇིག་རྟེན་ལས་འདས་པའི་སེམས་ཕྱིན་ཅི་ལོག་དང་། ཕྱིན་ཅི་མ་ལོག་པའི་སེམས་ཀྱི་ཁྱད་པར་བརྒྱད་དང་འབྲེལ་པ། ལས་དང་ཉོན་མོངས་པའི་དྲ་བ་དང་བྲལ་བ་འདི་ནི་རྣལ་
འབྱོར་པ་དག་བསྐལ་པ་གཅིག་གིས་འདའ་བར་བྱེད་དོ། །གསང་བ་པའི་བདག་པོ་གཞན་ཡང་ཐེག་པ་ཆེན་པོས་བགྲོད་པ་གཞན་གྱི་དྲིང་མི་འཇོག་པ་རྣམས་ལ་ཆོས་ལ་བདག་མེད་པའི་སེམས་སྐྱེའོ། །དེ་ཅིའི་ཕྱིར་ཞེ་ན། འདི་ལྟར་དེ་དག་སྔོན་སྤྱད་པ་སྤྱོད་ཅིང་ཕུང་པོའི་གནས་རྣམ་
པར་འཇིག་པ་ན་ངོ་བོ་ཉིད་ཡོངས་སུ་ཤེས་པའི་ཕྱིར་སྒྱུ་མ་དང་། སྨིག་རྒྱུ་དང་། གཟུགས་བརྙན་དང་། བྲག་ཅ་དང་། མགལ་མེའི་འཁོར་ལོ་དང་། དྲི་ཟའི་གྲོང་ཁྱེར་ལྟ་བུའི་འདུ་ཤེས་སྐྱེས་སོ། །གསང་བ་པའི་བདག་པོ་དེའི་ཕྱིར་དེ་དག་གི་སེམས་ཀྱི་དབང་དུ་བྱས་པས་ཆོས་ལ་
བདག་མེད་པ་ཉིད་ཀྱང་སྤང་བར་བྱ་སྟེ། རང་གི་སེམས་ནི་གཟོད་མ་ནས་མ་སྐྱེས་པའོ། །དེ་ཅིའི་ཕྱིར་ཞེ་ན། གསང་བ་པའི་བདག་པོ་ངོ་བོ་ཉིད་ཡོངས་སུ་ཤེས་པའི་ཕྱིར་སེམས་ལ་སྔོན་གྱི་མཐའ་དང་། ཕྱི་མའི་མཐའ་མི་དམིགས་ཏེ། རྣལ་འབྱོར་པ་དག་འདི་ཡང་བསྐལ་པ་
གཉིས་ཀྱིས་འདའ་བར་བྱེད་དོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་བསགས་
པ་རྣམས་ལ་ཤེས་རབ་དང་ཐབས་དཔག་ཏུ་མེད་པས་ཡོངས་སུ་བཟུང་བ། ལྷ་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བྱས་པ། ཉན་ཐོས་དང་། རང་སངས་རྒྱས་ཐམས་ཅད་ཀྱིས་ལས་ཡང་དག་པར་འདས་པ། བརྒྱ་བྱིན་དང་། ཚངས་པའི་དབང་པོ་དང་། ཉེ་

དབང་ལ་སོགས་པས་ཕྱག་བྱས་པ་འདི་ལྟ་སྟེ། སྟོང་པ་ཉིད་ཀྱི་ངོ་བོ་ཉིད་རྫས་མེད་པ། མཚན་ཉིད་མེད་པ། མཚན་མ་མེད་པ། སྤྲོས་པ་ཐམས་ཅད་ལས་འདས་པ། ནམ་མཁའ་ལྟར་དཔག་ཏུ་མེད་པ། ཆོས་ཐམས་ཅད་ཀྱི་གོ་སྐབས་སུ་གྱུར་པ། འདུས་བྱས་དང་འདུས་
མ་བྱས་ཀྱི་ཁམས་དང་བྲལ་བ། ལས་དང་བྱ་བ་མེད་པ། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་བྲལ་བ་ཤིན་ཏུ་ངོ་བོ་ཉིད་མེད་པའི་སེམས་སྐྱེ་སྟེ། གསང་བ་པའི་བདག་པོ་འདི་ནི་བྱང་ཆུབ་ཀྱི་སེམས་དང་པོ་ཞེས་རྒྱལ་བ་རྣམས་ཀྱིས་གསུངས་སོ། །
དེ་དག་ཉོན་མོངས་ལས་ལས་གྲོལ། །ལས་དང་ཉོན་མོངས་ལྡན་པའང་ཡིན། །དེ་དག་འཇིག་རྟེན་སྦྱིན་གནས་ཏེ། །དེ་དག་རྟག་མཆོད་རི་མོར་བྱ། །གསང་བ་པའི་བདག་པོ་གཞན་ཡང་། མོས་པ་ཡིས་ནི་སྤྱོད་པའི་ས། །སེམས་གསུམ་རྣམ་པར་སྒོམ་པ་སྟེ། །ཕ་
རོལ་ཕྱིན་རྣམས་སྤྱོད་པ་དང་། །བསྡུ་བ་དག་ནི་བཞི་པོ་ཡིས། །མོས་པའི་ས་ནི་མཚུངས་པ་མེད། །དཔག་ཏུ་མེད་ཅིང་བསམ་མི་ཁྱབ། །དཔག་མེད་ཡེ་ཤེས་འབྱུང་བ་ནི། །སེམས་བཅུ་དག་གིས་འཐོབ་པར་འགྱུར། །ངས་གང་ཅུང་ཟད་བརྗོད་པ་ནི། །ཐམས་ཅད་འདི་
ཡིས་འཐོབ་པར་འགྱུར། །དེ་ཕྱིར་ཐམས་ཅད་མཁྱེན་པ་ཡིས། །མོས་པ་ཞེས་ནི་བྱ་བར་བཤད། །བློ་ལྡན་བསྐལ་པ་གཅིག་གིས་ནི། །ས་ལས་ཡང་དག་འདའ་བར་འགྱུར། །འདི་ཡི་ཡང་ནི་བཞི་ཆ་ཡིས། །མོས་པ་ལས་ཀྱང་འདའ་བར་འགྱུར། །དེ་ནས་ཡང་བཅོམ་
ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །མགོན་པོ་ཁྱབ་བདག་ཁྱོད་ཀྱིས་ནི། །སེམས་ཀྱི་མཚན་ཉིད་བསྟན་ལགས་ན། །དབུགས་འབྱིན་རྣམ་པ་དུ་ཐོབ་ནས། །མཆོག་སྐྱེས་དེ་དག་དབུགས་ཕྱིན་འགྱུར། །དེ་སྐད་གསོལ་ནས་བཅོམ་ལྡན་འདས། །རྣམ་པར་
སྣང་མཛད་ཆེན་པོ་ཡིས། །དེ་ཚེ་ཕྱག་ན་རྡོ་རྗེ་ལ། །ཡིད་བསྡུས་འདི་ནི་ཉོན་ཅེས་གསུངས། །གསང་བ་པའི་བདག་པོ་དེ་ལ་ནམ་བྱིས་པ་སོ་སོའི་སྐྱེ་བོ་དག་མི་དགེ་བའི་ལས་སྤངས་ཏེ་དགེ་བའི་ལས་བྱེད་པ་དེའི་ཚེ་དགེ་བས་དབུགས་ཕྱིན་པ་ཡིན་ནོ། །ནམ་བདག་གི་དེ་ཁོ་ན་ཉིད་

ཡང་དག་པ་ཅི་ལྟ་བ་བཞིན་དུ་རབ་ཏུ་ཤེས་པ་དེའི་ཚེ་བདག་ལ་བརྟེན་ནས་དབུགས་ཕྱིན་པ་ཡིན་ནོ། །ནམ་ཕུང་པོ་ཡོངས་སུ་གཟུང་བ་བྱས་ཏེ་རང་གི་ངོ་བོ་ཉིད་ལ་རྣམ་པར་དཔྱད་ནས་བདག་ལ་བརྟེན་པ་ཡོངས་སུ་གཏོང་བ་དེའི་ཚེ་བདག་མེད་པས་དབུགས་ཕྱིན་པ་ཡིན་ནོ། །
ནམ་ཕུང་པོ་རྣམས་སྤངས་ནས་ཆོས་ཀྱི་དམིགས་པ་ལ་གནས་པ་དེའི་ཚེ་ཆོས་ཀྱི་དབུགས་ཕྱིན་པ་ཡིན་ནོ། །ནམ་ཆོས་རྣམས་སྤངས་ནས་མི་སྐྱེ་བ་ལ་གནས་པ་དེའི་ཚེ་ཆོས་ལ་བདག་མེད་པས་དབུགས་ཕྱིན་པ་ཡིན་ནོ། །ནམ་ཕུང་པོ་དང་། ཁམས་དང་། སྐྱེ་མཆེད་ཐམས་
ཅད་དང་། གཟུང་བ་དང་། འཛིན་པ་དང་། བདག་དང་སྲོག་ལ་སོགས་པ་དང་། ཆོས་དང་མི་སྐྱེ་བདག་ཀྱང་སྟོང་པ་ཉིད་ཀྱི་ངོ་བོ་ཉིད་དུ་ཡང་ངོ་བོ་ཉིད་མེད་དོ་ཞེས་སྟོང་པའི་ཡེ་ཤེས་སྐྱེས་པ་དེའི་ཚེ་ཆོས་ཐམས་ཅད་ཀྱི་ངོ་བོ་ཉིད་མཉམ་པ་ཉིད་ཀྱིས་དབུགས་ཕྱིན་པ་ཡིན་ནོ། །གསང་
བ་པའི་བདག་པོ་དེའི་ཚེ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་བཞི་བཅུས་རྟེན་ཅིང་འབྲེལ་པར་འབྱུང་བ་རྣམས་བསྒོམས་ཏེ་གསང་སྔགས་ཀྱི་ཚུལ་རྟོགས་པར་ཁོང་དུ་ཆུད་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། སྒྱུ་མ་དང་།
སྨིག་རྒྱུ་དང་། རྨི་ལམ་དང་། གཟུགས་བརྙན་དང་། དྲི་ཟའི་གྲོང་ཁྱེར་དང་། བྲག་ཅ་དང་། ཆུ་ཟླ་དང་། ཆུའི་ཆུ་བུར་དང་། འཁྲུལ་པ་དང་། མགལ་མེའི་འཁོར་ལོ་ལྟ་བུར་རྣམ་པར་བསྒོམ་མོ། །གསང་བ་པའི་བདག་པོ་དེ་ལ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་
དཔའི་སྤྱད་པ་སྤྱོད་པས་འདི་ལྟར་སོ་སོར་བརྟག་པར་བྱ་སྟེ། དེ་ལ་སྒྱུ་མ་གང་ཞེ་ན། འདི་ལྟ་སྟེ། སྨན་དང་སྔགས་ཀྱི་སྦྱོར་བ་བྱེད་པ་དག་གི་སྦྱོར་བ་ལས་དངོས་པོ་རྣམ་པ་ཐ་དད་པ་སྣ་ཚོགས་མིག་དང་ཡིད་འཕྲོག་པ་སྔོན་མ་མཐོང་བ་དག་ཀྱང་སྟོན་ཏེ། དེ་དག་ནི་ཕན་ཚུན་ཕྱོགས་བཅུར་
འགྲོ་བ་དང་འོང་བ་མེད་དོ། །དེ་ཅིའི་ཕྱིར་ཞེ་ན། སྒྱུ་མ་ནི་རང་བཞིན་གྱིས་སྟོང་པའི་ཕྱིར་ཏེ། དེ་བཞིན་དུ་གསང་སྔགས་སྦྱོར་བར་བྱེད་པ་དག་གི་སྦྱོར་བ་ལས་ཐམས་ཅད་འབྱུང་ངོ་། །གསང་བ་པའི་བདག་པོ་གཞན་ཡང་སྨིག་རྒྱུ་ནི་རང་བཞིན་གྱིས་སྟོང་པ་སྟེ། དེ་ཡང་འདུ་ཤེས་ཀྱི་

ཐ་སྙད་དུ་འདོགས་ཤིང་ཐ་སྙད་ཀྱང་སྒྲུབ་པར་བྱེད་དོ། །དེ་བཞིན་དུ་འདུ་ཤེས་འདི་ཡང་གསང་སྔགས་སོ་ཞེས་ཐ་སྙད་དུ་འདོགས་ཤིང་ཐ་སྙད་ཀྱང་སྒྲུབ་པར་བྱེད་དོ། །གསང་བ་པའི་བདག་པོ་གཞན་ཡང་རྨི་ལམ་ན་བདག་ཉིད་ཉིན་གཅིག་དང་། སྐད་ཅིག་དང་། ཡུད་ཙམ་དང་།
ལོ་ལ་སོགས་པར་འདུག་ཅིང་བདེ་བ་དང་སྡུག་བསྔལ་རྣམ་པ་མང་པོ་མྱོང་བར་མཐོང་ལ། སད་ན་ཅི་ཡང་མི་མཐོང་བ་དེ་བཞིན་དུ་གསང་སྔགས་ཀྱི་ཚུལ་འདི་ཡང་རྨི་ལམ་ལྟ་བུར་ཁོང་དུ་ཆུད་པར་བྱའོ། །གསང་བ་པའི་བདག་པོ་གཞན་ཡང་གསང་སྔགས་ཀྱི་དངོས་གྲུབ་འབྱུང་བ་ནི་གཟུགས་
བརྙན་ལྟ་བུར་རིག་པར་བྱ་སྟེ། དཔེར་ན་གདོང་དང་མེ་ལོང་ལ་བརྟེན་ནས་བཞིན་གྱི་གཟུགས་བརྙན་འབྱུང་བ་ལྟར། གསང་སྔགས་ཀྱི་དངོས་གྲུབ་ཀྱང་དེ་དང་འདྲ་བར་རིག་པར་བྱའོ། །གསང་བ་པའི་བདག་པོ་གཞན་ཡང་གྲུབ་པའི་གནས་ནི། དྲི་ཟའི་གྲོང་ཁྱེར་ལྟ་བུར་བལྟའོ། །གསང་
བ་པའི་བདག་པོ་གཞན་ཡང་གསང་སྔགས་ཀྱི་སྒྲ་ནི་བྲག་ཅ་ལྟ་བུར་རིག་པར་བྱ་སྟེ། དཔེར་ན་སྒྲ་ལ་བརྟེན་ནས་བྲག་ཅ་འབྱུང་བ་ལྟར་གསང་སྔགས་ཀྱི་ཚུལ་འདི་ཡང་དེ་དང་འདྲ་བར་རིག་པར་བྱའོ། །གསང་བ་པའི་བདག་པོ་གཞན་ཡང་ཟླ་བ་ཤར་ན་ཆུའི་ནང་དུ་གཟུགས་བརྙན་མཐོང་
ནས་ཆུ་ཟླ་ཞེས་བརྗོད་པ་དེ་བཞིན་དུ་སྔགས་པ་དེ་ཉིད་ཀྱང་ཆུ་ཟླ་བཞིན་དུ་རིག་སྔགས་འཆང་ཞེས་བརྗོད་དོ། །གསང་བ་པའི་བདག་པོ་གཞན་ཡང་། ཅི་ལྟར་ཆར་པ་བབ་པ་ན། ཆུ་ཡི་ཆུ་བུར་རྣམས་འབྱུང་བ། །དེ་བཞིན་གསང་སྔགས་གྲུབ་པ་ཡི། །སྤྲུལ་པ་རྣམ་པ་སྣ་ཚོགས་
འདོད། །གསང་བ་པའི་བདག་པོ་གཞན་ཡང་། །སེམས་ཅན་མེད་ཅིང་སྲོག་དང་ནི། །བྱེད་པ་པོ་ཡང་མེད་པ་སྟེ། །དངོས་པོ་ཐམས་ཅད་སྟོང་པ་ལ། །འཁྲུལ་པ་ཁོ་ན་སྣང་བར་ཟད། །གསང་བ་པའི་བདག་པོ་གཞན་ཡང་། ཅི་ལྟར་འགའ་ཞིག་བདག་ཉིད་ཀྱི། །ལག་
ན་མགལ་མེ་ཐོགས་ནས་ནི། །བསྐོར་ན་འཁོར་ལོ་ལྟར་སྣང་བ། །དེ་བཞིན་སྟོང་པ་དག་ལས་འབྱུང་། །གསང་བ་པའི་བདག་པོ། འདི་ནི་ཐེག་པ་ཆེན་པོའི་གཞི། མི་མཉམ་པ་དང་མཉམ་པའི་གཞི། ངེས་པའི་གཞི། ཡང་དག་པར་རྫོགས་པའི་སངས་རྒྱས་ཀྱི་གཞི།

མཐར་གྱིས་ཐེག་པ་ཆེན་པོ་ལ་འཛེག་པའི་གཞི་སྟེ། ཡེ་ཤེས་སྣ་ཚོགས་ཆེར་འབྱུང་བ། །ནོར་གྱི་དབྱིག་འདི་ཤེས་ན་ནི། །ཀུན་གྱི་སེམས་ཀྱི་བྱེ་བྲག་ཀྱང་། །ཅི་བཞིན་ཡང་དག་རབ་ཏུ་ཤེས། །བཅོམ་ལྡན་འདས་རྣམ་པར་སྣང་མཛད་ཆེན་པོ་མངོན་པར་རྫོགས་པར་
བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། སེམས་ཀྱི་ཁྱད་པར་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཉིད་ཀྱིས་མངོན་པར་རྫོགས་པར་སངས་རྒྱས་པའི་
ཆོས་ཀྱི་དབྱིངས་བསམ་གྱིས་མི་ཁྱབ་པ། སེམས་ཀྱིས་ལས་ཡང་དག་པར་འདས་པ། བཅོམ་ལྡན་འདས་ཀྱིས་ཐབས་དང་ཚུལ་སྣ་ཚོགས་དག་གིས་བསམ་པ་དང་མོས་པ་ཅི་ལྟ་བ་བཞིན་དུ་སེམས་ཅན་རྣམས་ལ་བསྟན་པ་དེ་ནི་ངོ་མཚར་ཆེ་ལགས་སོ། །བཅོམ་ལྡན་འདས་ཡང་གསང་
སྔགས་སྤྱོད་པའི་ཚུལ་སྙིང་རྗེ་ཆེན་པོའི་སྙིང་པོ་འབྱུང་བ་དཀྱིལ་འཁོར་གྱི་རྒྱལ་པོ་ཆེན་པོ་ཡོངས་སུ་རྫོགས་པར་བགྱི་བ་བཤད་དུ་གསོལ། དེ་ནི་མ་འོངས་པའི་དུས་ན་སེམས་ཅན་མང་པོ་དག་གི་དོན་དང་ཕན་པ་དང་བདེ་བར་འགྱུར་ལགས་སོ། །དེ་ནས་བཅོམ་ལྡན་འདས་རྣམ་པར་
སྣང་མཛད་ཀྱིས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས། གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་དཀྱིལ་འཁོར་སྤྱོད་པའི་ཚུལ་བསྟན་པའི་ཆོས་ཀྱི་རྣམ་གྲངས། ཐམས་ཅད་མཁྱེན་པའི་ཡེ་ཤེས་ཡོངས་སུ་
རྫོགས་པར་བྱེད་པ་ཉོན་ཅིག །དེ་ནས་བཅོམ་ལྡན་འདས་རྣམ་པར་སྣང་མཛད་ཆོས་ཀྱི་དབྱིངས་ཀྱི་དགོངས་པ་མ་རྫོགས་ཤིང་། སེམས་ཅན་གྱི་ཁམས་མ་ལུས་པ་བསྒྲལ་བར་དམ་བཅའ་བ་མཛད་པས། དེ་བཞིན་གཤེགས་པས་ཐམས་ཅད་དང་ཐབས་ཅིག་ཡང་དག་པར་མོལ་ནས་
སྙིང་རྗེ་ཆེན་པོའི་སྙིང་པོ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་སྐུའི་ཡན་ལག་ཐམས་ཅད་ནས་དེ་བཞིན་གཤེགས་པའི་སྐུས་སེམས་དང་པོ་བསྐྱེད་པ་ནས་བཟུང་སྟེ། ས་བཅུ་པའི་བར་དུ་སེམས་ཅན་ལ་ཕན་

པའི་དོན་མཛད་པ་རྣམས་བྱུང་ངོ་། །བྱུང་ནས་ཀྱང་ཕྱོགས་བཅུ་ཀུན་ཏུ་བསྐོར་ཏེ་སླར་ལོག་ནས་བཅོམ་ལྡན་འདས་ཀྱི་སྐུའི་ནང་རང་གི་གནས་སུ་ཞུགས་སོ། །དེ་ནས་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་
དཀྱིལ་འཁོར་རྣམ་པར་དགོད་པ་ཉོན་ཅིག །རེ་ཞིག་དང་པོར་སློབ་དཔོན་ཡིད་བྱང་ཆུབ་ཀྱི་སེམས་ལ་ཞུགས་པ། ཤེས་རབ་དང་ལྡན་པ། བརྟན་པ་སྙིང་རྗེ་ཅན། སྒྱུ་རྩལ་དག་ལ་མཁས་པ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལ་རྟག་ཏུ་མཁས་པ། ཐེག་པ་གསུམ་གྱི་ཁྱད་
པར་ཤེས་པ། གསང་སྔགས་ཀྱི་དེ་ཁོ་ན་ཉིད་ཀྱི་དོན་ལ་མཁས་པ། བསམ་པ་ཤེས་པ། སངས་རྒྱས་དང་བྱང་ཆུབ་སེམས་དཔའ་རྣམས་ལ་དད་པ་དཀྱིལ་འཁོར་བྲི་བའི་ལས་བྱེད་པར་གནང་ཞིང་དབང་བསྐུར་བ། རིགས་བཙུན་གསང་སྔགས་སྤྱོད་པ་ལ། །མངོན་པར་བརྩོན་
ཞིང་གཏན་ལ་ཕབ། །སྦྱོར་ལ་མཁས་ཤིང་ཟུང་ཐུབ་ལ། །བྱང་ཆུབ་སེམས་ལ་རྣམ་པར་གནས། །གསང་བ་པའི་བདག་པོ་སློབ་དཔོན་དེ་ལྟ་བུ་ནི་རྒྱལ་བའི་སྲས་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རབ་ཏུ་བསྔགས་སོ། །གསང་བ་པའི་བདག་
པོ་དེ་ལ་སློབ་དཔོན་ལ་གཞན་གྱིས་གསོལ་བ་བཏབ་ཀྱང་རུང་། ཡང་ན་བདག་གིས་སེམས་ཅན་དག །སྣོད་དུ་རུང་ཞིང་ཉེས་བྲལ་བ། །མོས་མང་བརྟན་ལ་དད་པ་ཅན། །གཞན་ལ་ཕན་དགའ་མཐོང་ནས་ནི། །དེ་ལྟ་བུ་ཡི་སློབ་མ་དེ། །ཤེས་ནས་སློབ་དཔོན་བདག་ཉིད་
ཀྱིས། །མ་གསོལ་བར་ནི་དེ་བོས་ཏེ། །ཕན་འདོད་ཕྱིར་ནི་འདི་སྐད་བྱ། །ཁྱོད་ནི་ཚུལ་ཆེན་སྣོད་ཡིན་གྱིས། །བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་
དག་མ་བྱོན་དང་། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཕྱིར་བཞུགས་པ་དག །དེ་དག་ཀུན་གྱིས་གསང་སྔགས་ཀྱི། །ཆོ་ག་མཆོག་བཟང་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་

སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །སྙིང་རྗེ་གྱུར་པའི་ཡིད་ཀྱིས་ནི། །དེ་ལྟར་ལན་མང་གཟེངས་
བསྟོད་དེ། །སློབ་མ་དེ་བརྟན་ཤེས་ནས་ནི། །ས་གཞི་ལེགས་པར་ཡོངས་བརྟག་བྱ། །མེ་ཏོག་འབྲས་བུ་ལྡན་པའི་རི། །གཙང་ཞིང་ཡིད་འོང་ཆུ་ཡི་གནས། །དེ་དག་དཀྱིལ་འཁོར་བྲི་བ་ཡི། །ལས་ལ་སངས་རྒྱས་ཀུན་གྱིས་བསྔགས། །གང་ན་འབབ་ཆུ་མང་པོ་དག །
ངང་པ་བཞད་ཀྱིས་བརྒྱན་ཡོད་པ། །དེར་ནི་སྔགས་པ་བློ་ཅན་གྱིས། །སྙིང་རྗེ་འབྱུང་བའི་དཀྱིལ་འཁོར་བྲི། །སངས་རྒྱས་རྣམས་དང་རང་མགོན་དང་། །དེ་བཞིན་རྒྱལ་བའི་ཉན་ཐོས་ཀྱིས། །ས་ཕྱོགས་གང་དག་བསྙེན་པ་ནི། །དེ་དག་ཐུབ་པས་རྟག་ཏུ་བསྔགས། །ཕྱོགས་
གཞན་རྣམ་པ་སྣ་ཚོགས་པ། །ལྷ་ཁང་ཀུན་དགའ་བཟང་པོ་དང་། །ཁྱིམ་དང་ཡང་ཐོག་ཉམས་དགའ་དང་། །མཚེའུ་དང་སྐྱེད་མོས་ཚལ་མཛེས་དང་། །མཆོད་རྟེན་གྲ་གང་བ་ལང་ལྷས། །འབབ་ཆུ་འདུས་པའི་མདོ་དག་དང་། །ལྷ་ཡི་གནས་རྣམས་ཐམས་ཅད་དང་། །
དེ་བཞིན་ཁང་པ་སྟོང་པར་ཡང་། །སློབ་མ་དག་ལ་ཕན་འདོད་ཕྱིར། །ནན་ཏན་དུ་ནི་དཀྱིལ་འཁོར་བྲི། །ཡང་ན་ཡིད་དུ་འོང་བའི་ས། །གང་ཡང་རུང་བར་བྲི་བར་བྱ། །གསང་བ་པའི་བདག་པོ་དེ་ལ་ས་གཞི་ཡོངས་སུ་སྤྱད་པར་བྱ་བ་ནི། རྡོ་དང་། བོང་པ་དང་། གྱོ་མོ་དང་།
གསེག་མ་མེད་ཅིང་སྐྲ་དང་། ཕུབ་མ་དང་། སོལ་བ་དང་། ཐལ་བ་དང་། ཚེར་མ་དང་། རུས་པ་དང་། སྡོང་དུམ་དང་། ཟུག་རྔུ་བསལ་བ། གྲོག་སྦུར་དང་། སྲིན་བུ་དང་། སྲོག་ཆགས་མེད་ཅིང་ཉེས་པ་ཐམས་ཅད་སྤངས་པའི་གནས་ནི་ལྷ་རྣམས་ལ་རབ་ཏུ་ཤིས་སོ། །
དེ་ལ་ཚེས་གྲངས་དང་། རྒྱུ་སྐར་དང་། གཟའ་དང་། བྱེད་པ་དང་། ཡུད་ཙམ་བཟང་པོའི་མཚན་མ་དང་ལྡན་པའི་ཉི་མ་ལ་སྔ་དྲོའི་དུས་ཀྱི་ཚེ་ལྟས་བཟང་པོས་མཚོན་པ་ལ་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། སའི་ལྷ་མོ་ལ་སྦྲན་པའི་ཚིགས་སུ་བཅད་པ་གཉིས་བསྒྲག་

པར་བྱའོ། །སངས་རྒྱས་སྐྱོབ་པ་ཐམས་ཅད་ཀྱི། །སྤྱོད་པའི་ཚུལ་གྱི་ཁྱད་པར་གྱི། །ས་དང་ཕ་རོལ་ཕྱིན་དག་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ལས་ནི། །རྒྱལ་བར་བྱ་སྟེ་དཀྱིལ་
འཁོར་བྲི། །ས་ལ་ལག་པས་རེག་བྱས་ཤིང་། །དེ་ལྟར་ལན་མང་སྦྲན་ནས་ནི། །པུས་མོ་གཉིས་ནི་སར་བཙུགས་ནས། །མེ་ཏོག་སྤོས་ཀྱིས་མཆོད་པ་བྱ། །མཆོད་ནས་སྔགས་པས་དེ་ནས་ནི། །དེ་བཞིན་གཤེགས་ལ་ཕྱག་འཚལ་ཏེ། །དེ་ནས་ཆོ་ག་འདི་དག་གིས། །
མཁས་པས་ས་གཞི་སྦྱང་བར་བྱ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་ལ་གཏུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་མཚན་མ་མི་མངའ་སྟེ། །ཆོས་ཀྱི་སྐུ་ལ་རྣམ་པར་བཞུགས། །མཚན་མེད་འདུས་མ་བྱས་པ་ཡི། །མཚུངས་
པ་མེད་པའི་ཆོས་སྟོན་ན། །དཔའ་བོ་ཆེན་པོ་ཅི་སླད་དུ། །མཚན་མར་བཅས་པའི་ཆོ་ག་འདི། །གསང་སྔགས་སྤྱད་པ་བསྟན་པར་མཛད། །འདི་ནི་ཆོས་ཉིད་ཚུལ་མ་ལགས། །དེ་སྐད་གསོལ་ནས་བཅོམ་ལྡན་འདས། །རྣམ་པར་སྣང་མཛད་ཆེན་པོ་ཡིས། །དེ་ཚེ་ཕྱག་
ན་རྡོ་རྗེ་ལ། །ཆོས་ཀྱི་མཚན་ཉིད་འདི་ཉོན་གསུངས། །ཆོས་ནི་རྟོག་དང་བྲལ་བ་སྟེ། །ཀུན་རྟོག་ཐམས་ཅད་སྤངས་པ་ཡིན། །དེ་ལ་སེམས་དང་སེམས་བྱུང་གི། །རྟོག་པ་རབ་ཏུ་སྤོང་བར་འགྱུར། །ང་ཡིས་ཆོས་མངོན་སངས་རྒྱས་པ། །དེ་ནི་མཁའ་ལས་བྱུང་བ་སྟེ། །ལོག་
པར་རྟོག་པའི་སྤྱོད་ཡུལ་བ། །བྱིས་པ་རྣམས་ཀྱིས་མི་ཤེས་སོ། །ཡུལ་དུས་མཚན་མ་ལ་སོགས་པ། །མུན་གྱིས་བསྒྲིབས་པ་རྣམས་འདོད་དེ། །དེ་དག་གཟུང་བར་བྱ་བའི་ཕྱིར། །ཆོ་ག་འདི་ཡང་བརྗོད་པ་ཡིན། །ཡུལ་མེད་དུས་ཀྱང་མེད་པ་སྟེ། །བྱ་བ་མེད་ཅིང་བྱེད་པ་ཡང་། །
ཆོས་རྣམས་ཀུན་ལ་ཡོང་མེད་དེ། །ཆོས་རྣམས་ཉི་ཚེ་འབའ་ཞིག་གོ། །གསང་བའི་བདག་པོ་འོན་ཀྱང་ནི། །སེམས་ཅན་དག་ནི་བློ་ཞན་ཅིང་། །བྱ་བ་ཙམ་གྱིས་རྨོངས་པ་དག །དངོས་པོའི་དོན་ལ་ཆགས་པ་རྣམས། །མ་འོངས་དུས་ན་འབྱུང་བར་འགྱུར། །འདི་ལྟའི་ཚུལ་

ནི་མི་ཤེས་པས། །ཡུལ་དང་དུས་དང་བྱ་བ་ལས། །དགེ་དང་མི་དགེའི་མཚན་མ་ཡིས། །རྨོངས་པ་འབྲས་བུ་འདོད་བྱེད་དེ། །སེམས་དཔའ་ཆེན་པོ་དེ་དག་ཕྱིར། །ཆོ་ག་འདི་ནི་བརྗོད་པ་ཡིན། །གསང་བ་པའི་བདག་པོ་དེ་ལ་ཅི་སྐད་བསྟན་པའི་གནས་གང་ཡང་
རུང་བར་ས་གཞི་རབ་ཏུ་འཐས་པར་བཅགས་ཏེ། བའི་ལྕི་བ་ས་ལ་མ་ལྷུང་བ་དང་བའི་གཅིན་དུ་བསྲེས་པས་བྱུག་གོ། །དེ་ནས་སྔགས་འདིས་བསང་གཏོར་བྱས་ཏེ་བསྔགས་སོ། །ན་མཿས་མནྟ་བུདྡྷཱ་ནཱཾ། ཨ་པྲ་ཏི་ས་མེ། ག་ག་ན། ས་མ་ཏཱ་ནུ་ག་ཏེ། པྲ་ཀྲྀ་ཏི། བི་ཤུདྡྷེ། དྷརྨྨ་དྷཱ་
ཏུ་བི་ཤོ་དྷ་ནི་སྭཱཧཱ། དེ་ཡི་འོག་ཏུ་སྔགས་པ་ནི། །ལངས་ནས་དེ་ཡི་དབུས་སུ་ང་། །པདྨ་དཀར་པོའི་གདན་ལ་བཞུགས། །ཐོར་ཚུགས་དང་ནི་དབུ་རྒྱན་འཆང་། །འོད་ཟེར་ཁ་དོག་སྣ་ཚོགས་པས། །ཀུན་ནས་ཡོངས་སུ་བསྐོར་བར་བསམ། །དེ་ནས་རྫོགས་པའི་སངས་རྒྱས་
བཞི། །བློ་དང་ལྡན་པས་ཕྱོགས་སུ་བསམ། །དེ་བཞིན་གཤེགས་པ་རིན་ཆེན་ཏོག །ཉི་མ་འཆར་ཀ་ལྟ་བུར་བསམ། །ལྷོ་རུ་རྒྱལ་བ་དཔའ་བོ་ནི། །མེ་ཏོག་ཀུན་རྒྱས་ཞེས་བྱ་བ། །གསེར་གྱི་ཁ་དོག་འབར་བར་བཅས། །ཉེས་པ་བཅོམ་པ་ཏིང་འཛིན་གནས། །བྱང་ཕྱོགས་
སུ་ནི་མི་འཁྲུགས་པ། །ནད་དང་བྲལ་བ་ཏིང་འཛིན་གནས། །ནུབ་ཕྱོགས་འོད་དཔག་མེད་པ་སྟེ། །རྒྱལ་བ་ལྔ་པོ་འདི་རྣམས་ནི། །བསམས་ཏེ་དེ་ནས་སྔགས་པ་ཡིས། །རྒྱལ་བའི་གནས་དབུས་འདུག་ནས་སུ། །མི་གཡོ་བདག་ཉིད་ཆེན་པོའམ། །ཡང་ན་འཇིག་རྟེན་
གསུམ་རྒྱལ་གྱི། །གསང་སྔགས་དོན་ཀུན་སྒྲུབ་པ་ཡིས། །ས་ནི་ཡོངས་སུ་གཟུང་བར་བྱ། །དབུས་སུ་དཀྱིལ་འཁོར་བཟང་པོ་དག །ཙནྡན་དག་གིས་བྱ་བ་ནི། །དང་པོ་གཅིག་ནི་ང་ཡི་ཡིན། །གཉིས་པ་སྐྱོབ་པ་ཐམས་ཅད་ཀྱིའོ། །གསུམ་པ་དེ་དང་མཉམ་བྱ་བ། །
ཐེ་ཙོམ་མེད་པར་ཡུམ་གྱི་ཡིན། །བཞི་པ་ལག་ན་པདྨའི་སྟེ། །ལྔ་པ་ཕྱག་ན་རྡོ་རྗེའི་ཕྱིར། །དྲུག་པ་མི་གཡོ་མགོན་གྱི་སྟེ། །མ་ཟད་འོག་ཏུ་ལེགས་པར་བྱ། །དེ་བཞིན་གཤེགས་རྣམས་རྗེས་དྲན་ནས། །མེ་ཏོག་སྤོས་ལ་སོགས་ཕུལ་ཏེ། །མཉམ་པར་བཞག་ནས་གུས་

པ་རུ། །ཚིག་ཏུ་འདི་སྐད་སྨྲ་བར་བྱ། །མགོན་པོ་ཐུགས་རྗེའི་བདག་ཉིད་ཅན། །ཐམས་ཅད་བདག་ལ་དགོངས་སུ་གསོལ། །སྲས་བཅས་སང་གི་གདུགས་འདས་ནས། །ས་གཞི་ཡོངས་སུ་གཟུང་བ་མཛོད། །དེ་སྐད་ཀྱི་ནི་ཚིག་སྨྲས་ནས། །གསང་སྔགས་འདི་ནི་
བརྗོད་པར་བྱ། །ན་མཿས་མནྟ་བུདྡྷཱ་ནཱྃ། སརྦྦ་ཏ་ཐཱ་ག་ཏཱ་དྷིཥྛཱ་ནཱ་དྷིཥྛ་ཏེ། ཨ་ཙ་ལེ། བི་མ་ལེ་སྨ་ར་ཎེ། པྲ་ཀྲྀ་ཏི་པ་རི་ཤུདྡྷེ་སྭཱ་ཧཱ། དེ་ནས་སྔགས་པ་ལངས་ནས་སུ། །སྙིང་རྗེར་གྱུར་པའི་ཡིད་ཀྱིས་ནི། །ནུབ་ཀྱི་ཕྱོགས་སུ་གནས་ནས་སུ། །ནང་གི་བདག་ཉིད་རྣམ་དག་པས། །
བྱང་ཆུབ་སེམས་ནི་སེམས་བྱེད་ཅིང་། །དེ་ཉིད་དུ་ནི་ཉལ་བར་བྱ། །དེ་ནས་སྔགས་པས་རྨི་ལམ་བལྟ། །བྱང་ཆུབ་སེམས་དཔའ་གྲགས་ཆེན་ནམ། །ཡང་ན་སངས་རྒྱས་བཅོམ་ལྡན་འདས། །སེམས་ཅན་རྣམས་ལ་ཕན་བྱའི་ཕྱིར། །དཀྱིལ་འཁོར་བྲི་བའི་ལས་
རྣམས་ལ། །བདག་ཉིད་ཀུན་རྩོལ་འབད་པའམ། །བདག་ཉིད་ལ་ནི་འདི་སྐད་དུ། །སེམས་ཅན་ཆེན་པོ་བུ་ཁྱོད་ལེགས། །དཀྱིལ་འཁོར་མྱུར་དུ་བྲིས་ཤིག་ཅེས། །སྤྲོ་བ་བསྐྱེད་པ་མཐོང་ཡང་རུང་། །དེ་ནས་དེ་ཡི་ཕྱི་དེ་ཉིན། །སློབ་མ་དད་ཅིང་རིགས་བཙུན་པ། །
དེ་བཞིན་དཀོན་མཆོག་གསུམ་ལ་དད། །ཟབ་མོ་ཡི་ནི་བློ་དང་ལྡན། །སྤྲོ་བ་ཆེ་ཞིང་ཚུལ་ཁྲིམས་ལྡན། །བཟོད་དང་ལྡན་ཞིང་སེར་སྣ་མེད། །དཔའ་ལ་ཡི་དམ་བརྟན་པ་ནི། །བཅུའམ་བརྒྱད་དམ་བདུན་ནམ་ལྔ། །གཅིག་གཉིས་བཞི་ལས་ལྷག་ཀྱང་རུང་། །
དཔྱད་མི་དགོས་པར་གཟུང་བར་བྱ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་ཞུས་པ། བཅོམ་ལྡན་འདས་དཀྱིལ་འཁོར་འདིའི་མིང་ཅི་ལགས། ཅིའི་སླད་དུ་དཀྱིལ་འཁོར་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་དཀྱིལ་
འཁོར་འདི་ནི་སངས་རྒྱས་འབྱུང་བ་སྟེ། དཀྱིལ་ནི་སྙིང་པོ་ཞེས་བྱའོ། །འཁོར་ནི་རྫོགས་པ་སྟེ། དེའི་གོང་ན་སྙིང་པོར་གྱུར་པ་གཞན་མེད་པས། དེ་བས་ན་དཀྱིལ་འཁོར་ཞེས་བྱའོ། །གསང་བ་པའི་བདག་པོ་འོན་ཀྱང་དཀྱིལ་འཁོར་རྒྱས་པ་འདི་ནི། སེམས་ཅན་གྱི་ཁམས་

མ་ངེས་པ་ཡོངས་སུ་བསྐྱབ་པའི་ཕྱིར་སྙིང་རྗེ་ཆེན་པོའི་སྙིང་པོ་འབྱུང་བ་ཞེས་བྱ་སྟེ། དེ་ནི་དེ་བཞིན་གཤེགས་པ་རྣམས་ཀྱིས་བསྐལ་པ་གྲངས་མེད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པ་བྱིན་གྱིས་བརླབས་སོ། །ག