Kinh tạng Tây Tạng (Kangyur Đại Học) — 077_རྒྱུད་འབུམ།_ཀ

།རྡོ་རྗེ་དྲིལ་བུ་ཡང་དག་ལྡན། །ལྷ་མོའི་མཆུ་ནི་རྣམ་པར་འཚིར། །གཅེར་བུ་དབུ་སྐྲ་གྲོལ་བ་དང་། །སྤྱན་གསུམ་པ་ལ་སྐ་རགས་ཅན། །འཛམ་བུའི་ཆུ་བོ་མཆོག་གི་སྐུ། །གཉིས་སུ་མེད་པར་སྦྱོར་བར་གནས། །ཀླུ་ནི་རང་གི་ཆུང་མར་བཅས། །ཆུ་ལྷའང་ཆུང་མར་
བཅས་པ་དག །ཆུ་ལྷའི་ལུས་ནི་དཀར་པོ་ཅན། །བཀའ་དྲིན་དག་ནི་སློང་བར་བྱེད། །སྙིང་གར་ཡེ་ཤེས་འཁོར་ལོ་དག །དེ་མདོག་ཕྱག་དང་ཞལ་ཡང་བསྐྱེད། །དེ་ཡི་སྙིང་ག་ཧཱུྃ་ནཱྃ་ཧཱུྃ་དགོད་ཅིང་། །ལུས་ངག་ཡིད་ཀྱང་དེ་བཞིན་ཏེ། །ཀླུ་ཡི་རང་སྙིང་དེ་ཉིད་ལ། །ཧཱུྃ་ནཱྃ་ཧཱུྃ་ནི་
རྣམ་པར་དགོད། །གསང་སྔགས་རྒྱལ་པོའི་ཆོ་ག་ནི། །ཁྲོ་བོའི་ཚིག་ལྟར་བཟླས་བརྗོད་བྱ། །ཆུ་བོའི་འགྲམ་མམ་རྒྱ་མཚོ་འམ། །ཁྲོན་པའམ་ཀླུ་ཡི་མཚོ་དང་ནི། །རྫིང་བུ་ལྟེང་ཀ་རྣམས་སུ་ནི། །བློ་ཅན་ཁྲོ་བོའི་བཟླས་པ་བྱ། །ཡང་ན་ཀླུ་ཡི་གནས་སུ་ནི། །སྒོམ་པ་བཟླས་
པ་དག་ལ་འཇུག །ཨོྃ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ནཱྃ་ནཱ་ག་བར་ཥཱ་པ་ཡ་ཧཱུྃ་ཌཱ་ཀི་ནཱི་ཛཱལ་སམྦ་ར་ཧཱུྃ་ཕཊ་སྭཱ་ཧཱ། འདི་དག་བསྒོམས་ཏེ་ཁྲི་ཙམ་བཟླ། །དུས་བཞི་དག་ཏུ་སྟོང་དུའོ། །ཞག་བདུན་གྱིས་ནི་ངེས་པར་ཡང་། །ས་རྣམས་ཀུན་ཏུ་ཆར་འབབ་འགྱུར། །དམ་ཚིག་སྦྱིན་སྲེག་མཆོད་
དུས་སུ། །གླུ་དང་གར་ནི་ཉེར་ལྡན་པས། །འོ་མ་དག་ནི་བཟའ་ཞིང་བཏུང་། །རྣལ་འབྱོར་པས་ནི་ཀླུ་བརྒྱད་བཟླ། །འོ་མའི་ཁྲུས་ཀྱི་ཆོ་ག་ཡིས། །འོ་མས་སྦྱིན་སྲེག་བསྲེགས་བླུགས་བྱ། །འོ་མའི་ཤིང་གི་བུད་ཤིང་བྱ། །འོ་མའི་ཤིང་གི་ཡམ་ཤིང་དང་། །འོ་མར་བཅས་པས་སྦྱིན་
སྲེག་བྱ། །བུམ་པ་འོ་མས་ཡོངས་སུ་དགང་། །མེ་སོགས་མཚམས་དང་ཕྱོགས་རྣམས་སུ། །འོ་མར་བཅས་པའི་གཏོར་མ་སྦྱིན། ཨོྃ་ཨྃ་ཨ་ན་ནཱ་ཡ་ཧཱུྃ་ནཱྃ་ཧཱུྃ་སྭཱ་ཧཱ། ཨོྃ་བྃ་བུ་སུ་ཀཻ་ཧཱུྃ་ནཱྃ་ཧཱུྃ་སྭཱ་ཧཱ། ཨོྃ་ཏྃ་ཏཀྵ་ཀ་ཧཱུྃ་ནཱྃ་ཧཱུྃ་སྭཱ་ཧཱ། ཨོྃ་པྃ་པདྨ་ཧཱུྃ་ནཱྃ་ཧཱུྃ་སྭཱ་ཧཱ། ཨོྃ་མྃ་མ་ཧཱ་པདྨ་ཧཱུྃ་ནཱྃ་ཧཱུྃ་སྭཱ་ཧཱ།

ཨོྃ་ཤྃ་ཤྃ་ཁ་པཱ་ལ་ཧཱུྃ་ནཱྃ་ཧཱུྃ་སྭཱ་ཧཱ། ཨོྃ་ཀྃ་ཀརྐོ་ཊ་ཧཱུྃ་ནཱྃ་ཧཱུྃ་སྭཱ་ཧཱ། ཨོྃ་ཨྃ་ཨ་ན་བ་ཏཔྟ་ཧཱུྃ་ནཱྃ་ཧཱུྃ་སྭཱ་ཧཱ། ཨོྃ་ཧཱུྃ་བྃ་བ་རུ་ཎཱ་ཡ་ནཱ་གཱ་དྷི་པ་ཏ་ཡེ་ནཱ་ག་བརྵ་པ་ཏ་ཡེ་ཧཱུྃ་ནཱྃ་ཧཱུྃ་སྭཱ་ཧཱ། འདི་བཟླས་ཁྲོ་བ་དང་བཅས་པས། །ཀུན་གྱི་བཟླས་པ་ཁྲི་ཙམ་བྱ། །འོ་མ་འབྲས་རྙིང་ཟས་སུ་བཟའ། །
དབང་པོ་ཐུལ་ཅིང་ཡོངས་མི་སྨྲ། །བྲི་གཟུགས་སྤངས་པའི་མངོན་སུམ་དུ། །ཁྲི་ཙམ་བཟླས་ན་མངོན་དུ་འགྱུར། །མངོན་སུམ་དུ་ནི་དངོས་གྲུབ་ཅིང་། །སྨྲས་པ་ཙམ་གྱིས་ཆར་འབེབས་ཏེ། །འདི་ལ་ཐེ་ཚོམ་མ་བྱེད་ཅིག །དངུལ་གྱི་སྣོད་ཀྱི་ནང་དུ་ནི། །ཡུངས་ཀར་དང་ནི་ཆུ་བླུགས་ལ། །
དེ་ལ་ཉི་ཤུ་རྩ་གཅིག་གི་བར་དུ་ཡོངས་སུ་བཟླས་ཏེ། །སངས་རྒྱས་ཀྱི་སྐུ་གཟུགས་ལ་དྲི་ཆུ་དང་འོ་མ་བསྲེས་པས་ཁྲུས་བྱས་ཏེ། ཆུ་འགྲམ་གྱི་ས་སྦྲུས་པ་ལས་ཀླུའི་གཟུགས་བྱས་ལ་ནུབ་ཏུ་མགོ་བསྟན་ཏེ། མགོ་བོ་དགུ་ལ་ཆུས་དབང་བསྐུར་ཏེ། །དེ་ནས་ཆུ་བོའི་ནང་དུ་གཞུག་གོ །དེ་མ་ཐག་ཏུ་
ལྷས་ཆར་འབེབས་ཤིང་། འཛམ་བུའི་གླིང་དུ་ཆར་འབེབས་འགྱུར། །ས་རྣམས་འབྲུ་ཡིས་གང་འགྱུར་ཞིང་། །ནགས་ཚལ་རྣམས་ནི་འཕེལ་བར་བྱེད། །སེམས་ཅན་ཐམས་ཅད་བདེ་རེག་གནས། །ཕན་ཚུན་ཁྲོ་བོའི་གཟུགས་ཅན་ནི། །བདག་བསྒོམས་རྒྱུད་ཀྱི་རྗེས་འབྲངས་ནས། །རང་གི་
སྙིང་ག་ཁོ་ནར་ནི། །ཧེ་རུ་རྡོ་རྗེ་བསྒོམས་པ་ཡིས། །ཆར་པ་ཡང་ནི་འབབ་པར་འགྱུར། །རིའི་སྟེང་དུ་འཛེགས་ཏེ་རྩེ་གསུམ་པ་ལ་ཡོངས་སུ་བཟླས་ན་སེར་བ་གཅོད་པར་འགྱུར་རོ། །ཅང་ཏེའུ་ལ་ཡོངས་སུ་བཟླས་ན་མེ་མཆེད་པའི་མེ་རེངས་པར་འགྱུར་རོ། །ཞགས་པ་ལ་ཡོངས་སུ་བཟླས་ན་
འགུགས་པར་བྱེད་དོ། །ཐོད་པ་ལ་ཡོངས་སུ་བཟླས་ན་ཁྲག་འགུགས་པར་བྱེད་དོ། །དགྲ་སྟ་ལ་ཡོངས་སུ་བཟླས་ན་གསོད་པར་བྱེད་དོ། །ཁ་ཊྭཱྃ་ག་ལ་ཡོངས་སུ་བཟླས་ན་ཞི་བར་བྱེད་དོ། །གྲི་གུག་ལ་ཡོངས་སུ་བཟླས་ན་འཇིག་རྟེན་གསུམ་དུ་རྒྱུ་བ་གསོད་པར་བྱེད་དོ། །མགོ་བོ་ལ་ཡོངས་
སུ་བཟླས་ན་འཆི་བ་སློང་བར་བྱེད་དོ། །རྡོ་རྗེ་གསོར་ཞིང་ཡོངས་སུ་བཟླས་ན་ས་འོག་གི་དངོས་གྲུབ་ཏུ་འགྱུར་རོ། །དྲིལ་བུ་ལ་ཡོངས་སུ་བཟླས་ན་མི་དགའ་བ་ཡོངས་སུ་འགུགས་པར་བྱེད་དོ། །གླང་པོ་ཆེའི་པགས་པ་ལ་ཡོངས་སུ་བཟླས་ཏེ་བཏིང་ན་བར་སྣང་ལ་འཕུར་བར་འགྱུར་ཏེ། །དཔག་ཚད་

སྟོང་ཕྲག་བརྒྱར་འགྲོ་ཞིང་སླར་ལྡོག་གོ །ཕྱག་རྒྱ་དྲུག་ལ་ཡོངས་སུ་བཟླས་ན་ཕ་རོལ་གྱི་མདུན་དུ་མི་སྣང་བར་འགྱུར་རོ། །ས་སྟེང་དུ་ནི་ཀུན་སྤྱོད་ཅིང་། །ཅི་བདེ་བར་ནི་གནས་པར་འགྱུར། །མངོན་པར་བརྗོད་པའི་རྒྱུད་བླ་མའི་བླ་མ་ལས་ཆར་དབབ་པའི་ཆོ་གའི་ལེའུ་སྟེ་སུམ་ཅུ་རྩ་བཞི་པའོ།། །།
དེ་ནས་གཞན་ཡང་བཤད་བྱ་བ། །གསང་བ་མཆོག་ནི་མདོར་བསྡུས་ནས། །སྐད་ཅིག་གིས་ནི་བདག་སྒོམ་པ། །ཧེ་རུ་ཀ་དཔལ་གཟུགས་སུ་བྱ། །སྔོ་ཞིང་དྲག་པོ་རྣམ་སྒྱུར་བ། །དྲག་པོ་སྤྱན་གསུམ་ཞལ་དྲུག་མཆོག །ཟླ་བ་ཕྱེད་པ་རལ་པ་འཛིན། །སྣ་ཚོགས་རྡོ་རྗེ་དབུ་མཆོག་ལ། །
ཐོད་པའི་ཕྲེང་བའི་དབུ་རྒྱན་ཅན། །རྡོ་རྗེ་ཕྲེང་བས་རྣམ་པར་བརྒྱན། །སྐུ་ལ་མགོ་བོའི་དོ་ཤལ་ཅན། །ཕྱག་རྒྱ་དྲུག་གིས་རྣམ་པར་བརྒྱན། །སྟག་གི་པགས་པ་གོས་སུ་མནབས། །ཕག་མོ་ཡིས་ནི་སྐུ་ལ་བརྒྱན། །ཞབས་གཅིག་པ་ནི་བཞེངས་པ་སྟེ། །གཡས་པ་སེར་ལ་དུད་པའི་
མདོག །གཡོན་པ་དམར་ལ་ལྗང་གུའོ། །སྟེང་གི་ཞལ་ནི་རྟ་གདོང་སྟེ། །དཀར་ཞིང་སྤྲིན་མདོག་དྲག་ཅིང་འཇིགས། །རྡོ་རྗེ་དྲིལ་བུ་མཉམ་པར་ལྡན། །ལྷ་མོ་མཆུ་ནི་འཚིར་བ་སྟེ། །རྒྱལ་བའི་པགས་པ་གོས་སུ་མནབས། །མཁའ་འགྲོ་མ་ཡི་རིགས་འཛིན་ཅིང་། །ཐོད་པ་དང་ནི་
ཁ་ཊྭཱཾ་འཛིན། །རྡོ་རྗེ་མཚན་གྱིས་བརྒྱན་པ་སྟེ། །ཞགས་པ་ལྕགས་ཀྱུ་ཕྱག་ན་བསྣམས། །ཅང་ཏེའུ་དང་ནི་མགོ་བོ་འཛིན། །གྲི་གུག་ཞགས་པ་དེ་བཞིན་ཏེ། །ཕྱག་ནི་བཅུ་གཉིས་དག་ཏུ་བཤད། །དཀྱིལ་འཁོར་དག་ནི་ཐམས་ཅད་ཀྱང་། །ཞབས་གཅིག་ཏུ་ནི་རྣམ་པར་བསྒོམ། །
གླང་པོའི་གདོང་དང་བྱེའུའི་གདོང་། །སེང་གེའི་གདོང་ཡང་དེ་བཞིན་ཏེ། །དང་པོ་ཁྱི་ཡི་གདོང་ཡིན་ཏེ། །གཉིས་པ་འུག་པའི་གདོང་ཡང་ཡིན། །གསུམ་པ་ཕག་གི་གདོང་ཡིན་ཏེ། །བཞི་པ་ཁྭ་ཡི་གདོང་ཅན་ནོ། །གནས་ཀྱི་དབྱིབས་ཀྱི་ཆོས་བདག་ཉིད། །སྣ་ཚོགས་གཟུགས་ནི་
ཆེན་པོ་འཛིན། །མཐའ་ཡས་རྣམ་རྒྱལ་གྲགས་པ་སྟེ། །ཐམས་ཅད་མཁྱེན་ཅིང་ཐམས་ཅད་པ། །ཇི་ལྟར་འདོད་པའི་སྐུ་ལུས་འཆང་། །དེ་བཞིན་སྒོམ་ཞིང་རྣམ་བསྒོམ་སྟེ། །སྣ་ཚོགས་གཟུགས་ཅན་རིན་ཆེན་བཞིན། །བདག་ཉིད་ཆེན་པོ་རྣམ་པར་རོལ། །མངོན་པར་བརྗོད་

པའི་རྒྱུད་བླ་མའི་བླ་མ་ལས་སྣ་ཚོགས་སྒྲུབ་པའི་ལེའུ་སྟེ་སུམ་ཅུ་རྩ་ལྔ་པའོ།། །།དེ་ནས་གཞན་ཡང་བཤད་བྱ་བ། །ཕག་མོའི་མཆོག་ནི་བསྒྲུབ་པ་སྟེ། །སྐྱེད་པའི་རིམ་པའི་སྦྱོར་བ་ཡིས། །བདག་ཉིད་སྒོམ་ཞིང་རྣམ་པར་བསྒོམ། །སྐུ་ནི་ཉི་མ་བཅུ་གཉིས་
གཟི། །སྐུ་ལུས་སིན་དུར་འདྲ་མི་གཡོ། །མེ་ཏོག་བནྡུ་ཀ་ལྟ་བུ། །ཞལ་གསུམ་པ་ལ་ཕྱག་དྲུག་པ། །རྒྱན་རྣམས་ཐམས་ཅད་ཡོངས་སུ་རྫོགས། །སེམས་དཔའི་སྐྱིལ་མོ་ཀྲུང་གིས་བཞུགས། །ཐོད་པའི་ཕྲེང་བའི་དབུ་རྒྱན་ཅན། །རྡོ་རྗེ་དྲིལ་བུ་མཉམ་པར་ལྡན། །དབུ་སྐྲ་
མཛེས་པས་འཁྲིལ་བ་སྟེ། །ཐབས་ཀྱི་ཞལ་མཆུ་རྣམ་འཚིར་ཞིང་། །མདའ་དང་གཞུ་ནི་འཛིན་པ་སྟེ། །རྣ་བའི་མཐར་ཐུག་འགེངས་པར་བྱེད། །ཐོད་པ་དང་ནི་ཁ་ཊྭཱཾ་འཛིན། །ལྕགས་ཀྱུ་མཆོག་གིས་འགུགས་པ་སྟེ། །པདྨ་དམར་པོའི་དབུས་བཞུགས་ཤིང་། །འདོད་པ་ཐམས་
ཅད་རབ་ཏུ་སྩོལ། །ཡང་ན་ཕྱག་ནི་བཅུ་གཉིས་པ། །ཞལ་དྲུག་ལྷ་མོའི་སྐུ་ལུས་འབྱུང་། །སྟེང་གི་ཞལ་ནི་ཕག་རྒོད་གདོང་། །དྲག་པོ་གཟི་བརྗིད་འཇིགས་པའི་གཟི། །ཤར་གྱི་འདབ་ལ་རྡོ་རྗེ་གསང་བའི་མཆོག །གཡོན་པའི་ཕྱོགས་སུ་རྡོ་རྗེ་དམ་ཚིག་མཆོག །ནུབ་ཀྱི་ཕྱོགས་
སུ་རྡོ་རྗེ་གཟི་བརྗིད་མཆོག །ལྷོ་ཡི་ཕྱོགས་སུ་རྡོ་རྗེ་རིན་ཆེན་མཆོག །མེ་ཡི་ཕྱོགས་སུ་རྡོ་རྗེ་ཡེ་ཤེས་མཆོག །བདེན་བྲལ་ཕྱོགས་སུ་རྡོ་རྗེ་རིག་མཆོག་མ། །རླུང་གི་ཕྱོགས་སུ་རྡོ་རྗེ་གྲུབ་མཆོག་མ། །དབང་ལྡན་ཕྱོགས་སུ་རྡོ་རྗེ་ཐལ་མཆོག་མ། །སྒོ་ལ་རྡོ་རྗེ་འབར་མཆོག་མ། །རྡོ་རྗེ་གཟི་
བརྗིད་མཆོག་མ་སྟེ། །རྡོ་རྗེ་ཁྲོ་བོ་མཆོག་མ་དང་། །རྡོ་རྗེ་མཆེ་བ་མཆོག་མའོ། །ལྷ་མོ་དེ་དག་ཐམས་ཅད་ཀྱང་། །དམར་བའི་མདོག་ཅན་ཞལ་གསུམ་པ། །ཕྱག་དྲུག་པ་ལ་སྤྱན་གསུམ་པ། །སེམས་དཔའི་སྐྱིལ་མོ་ཀྲུང་དུ་བཞུགས། །དབུ་སྐྲ་དག་ནི་གྲོལ་བ་སྟེ། །ཐམས་ཅད་
རྒྱན་གྱིས་རྣམ་བརྒྱན་ཅིང་། །རྡོ་རྗེ་དྲིལ་བུ་མཉམ་ལྡན་པས། །རང་གི་ལུས་ཀྱི་ཐབས་ལ་འཁྲིལ། །ཞགས་པ་དང་ནི་ལྕགས་ཀྱུ་དང་། །ཐོད་པ་དང་ནི་ཁ་ཊྭཱཾ་འཛིན། །གྲྭ་བཞི་དག་ཏུ་མདའ་གཞུ་དག །ཡོངས་སུ་འགེངས་པ་གནས་པར་གཞག །སྒོ་རུ་གཡས་བརྐྱང་ཞབས་ཀྱིས་

བཞུགས། །གཅེར་བུ་རྣམ་པར་འགྱུར་བའི་ཞལ། །ཐམས་ཅད་ཡི་དགས་གདན་ལ་བཞུགས། །རྡོ་རྗེ་གསོར་ཞིང་སྡིགས་མཛུབ་དང་། །ཞགས་པ་དང་ནི་ཡང་དག་ལྡན། །གཞན་ཡང་ཕན་ཚུན་དག་ཏུ་ཡང་། །ཇི་ལྟར་འཁོར་ལ་སོགས་ཕྱག་འཚལ། །དེ་སྙིང་ཡེ་ཤེས་ལྷ་
མོ་ནི། །སྐུ་གསུང་ཐུགས་དང་བཅས་པར་བསྒོམ། །ཡེ་ཤེས་དཀྱིལ་འཁོར་སྦྱོར་བ་ཡིས། །ཆོས་ཀྱི་རོ་ནི་མཉམ་པར་ཐིམ། །ཡེ་ཤེས་བཟླས་པ་སྤྲོས་ནས་ནི། །ཆོ་གའི་རིམ་པས་ཡང་དག་བསྡུ། །དམ་ཚིག་མཆོག་གི་བཟླས་པ་ཡིས། །ཟླ་བའི་དེ་ཉིད་འགྲུབ་པར་འགྱུར། །
ཨོྃ་ཤྲཱི་བཛྲ་བཱ་རཱ་ཧི་ཨཱ་བཾ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བཛྲ་གུ་ཧྱོཏྟ་མེ་ཧུྃ་ཧཱུྃ་ཕཊ། ཨོྃ་ཤྲཱི་བཛྲ་ས་མ་ཡོཏྟ་མེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བཛྲ་ཏེ་ཛ་ཨུཏྟ་མེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བཛྲ་རཏྣོཏྟ་མེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བཛྲ་ཛྙཱ་ན་ཨུཏྟ་མེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བཛྲ་བདྱཱི་ཨུཏྟ་མེ་ཧུྃ་ཧཱུྃ་ཕཊ་
སྭཱ་ཧཱ། ཨོྃ་ཤྲཱི་བཛྲ་སིདྡྷོཏྟ་མེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བཛྲ་བྷ་སྨོཏྟ་མེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བཛྲ་ཛྭ་ལོཏྟ་མེ་ཛཿཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བཛྲ་ཨ་མྲྀ་ཏོཏྟ་མེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བཛྲ་ཀྲོ་དྷོཏྟ་མེ་བྃ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བཛྲ་དཾཥྚྲོཏྟ་མེ་ཧོཿཧུྃ་ཧཱུྃ་ཕཊ་སྭཱ་ཧཱ། འདི་དག་ལྟའི་རིམ་པ་
ཡིས། །བསྒོམ་པ་དང་ནི་བཟླས་པ་བྱ། །བསྡུ་དང་སྤྲོ་བ་བྱས་ནས་ནི། །ཆོས་རྣམས་ཀུན་དང་ཆོས་ཅན་ནི། །རང་གི་ལྷ་ཡི་སྦྱོར་བས་དག །སེམས་ཅན་ཐམས་ཅད་རབ་ཏུ་བརྟག །རྣལ་འབྱོར་གནས་ནི་ཆོས་ཡིན་ཏེ། །གསང་བ་གསུམ་ལ་རབ་ཏུ་གཞུག །གསང་གསུམ་
གནས་ནི་ཆོས་ཡིན་ཏེ། །ཆོས་ཀྱང་དེ་བཞིན་དེ་ལྟ་བུ། །བདག་མེད་ཆོས་ནི་ཆོས་ཡིན་ཏེ། །ཆོས་ལས་ཆོས་ནི་ཡོང་མ་ཡིན། །མངོན་པར་བརྗོད་པའི་རྒྱུད་བླ་མའི་བླ་མ་ལས་གསང་བ་གསུམ་གྱི་དམ་ཚིག་གི་མཆོག་ཅེས་བྱ་བའི་ལེའུ་སྟེ་སུམ་ཅུ་རྩ་དྲུག་པའོ།། །།དེ་ནས་
གཞན་ཡང་བཤད་བྱ་བ། །རྣལ་འབྱོར་མ་དྲུག་ཆོ་གའི་རིམ། །པདྨ་འདབ་ལྔ་བྲིས་ནས་ནི། །ལྟེ་བ་གེ་སར་ཁྱབ་པར་ནི། །དེ་ཡི་དབུས་སུ་ཕག་མོ་ནི། །དམར་ཞིང་སྣ་ཚོགས་འབར་བའི་འོད། །ཞལ་གསུམ་པ་ལ་ཕྱག་དྲུག་མཛེས། །སྤྱན་གསུམ་དབུ་སྐྲ་གྲོལ་བ་སྟེ། །ཐོད་

པའི་ཕྲེང་བའི་དབུ་རྒྱན་ཅན། །ཕྱོགས་ཀྱི་གོས་ནི་འཛིན་པའི་མཆོག །སྐྱིལ་ཀྲུང་ཕྱེད་པ་གང་དང་བཅས། །ཕྱག་རྒྱ་དྲུག་གིས་སྐུ་བརྒྱན་ཅིང་། །མགོ་བོའི་ཕྲེང་བ་འཛིན་པ་སྟེ། །གདུག་པའི་བདུད་ནི་ཐམས་ཅད་དང་། །དུས་མཚན་ཁ་སྦུབ་བྱས་པ་ལ། །ཞབས་
ཀྱིས་ཀྱང་ནི་མནན་པར་བཞུགས། །དམར་དང་སྔོ་དང་ལྗང་བ་སྟེ། །སངས་རྒྱས་ལྔས་ནི་རྣམ་པར་བརྒྱན། །ཐོད་དང་ནི་ཁ་ཊཱཾ་འཛིན། །ཞགས་པ་ལྕགས་ཀྱུ་ཕྱག་ན་བསྣམས། །མགོ་བོ་དང་ནི་གྲི་གུག་འཛིན། །དངོས་གྲུབ་ཐམས་ཅད་རབ་ཏུ་སྩོལ། །སྙིང་གར་ཡེ་
ཤེས་དམ་ཚིག་ནི། །སྐུ་གསུང་ཐུགས་སུ་སྦྱོར་ལས་བྱུང་། །ཤར་ཕྱོགས་ལྷ་མོ་ཡ་མི་ནི། །གཡོན་དུ་བསྐོར་ནས་རྣམ་པར་དགོད། །རྨོངས་བྱེད་མདངས་སྐྱོད་བྱེད་མ། །སྐྲག་བྱེད་མདང་ཙཎྜི་ཀ། །སྤྱན་གསུམ་དབུ་སྐྲ་གྲོལ་བ་སྟེ། །ཞལ་གཅིག་པ་ལ་ཕྱག་བཞི་པ། །སྔོ་དང་
དཀར་དག་སེར་བ་དང་། །ལྗང་ཁུ་དུད་པའི་མདོག་ཅན་ཏེ། །ཐོད་པ་དང་ནི་ཁ་ཊྭཱཾ་འཛིན། །དྲིལ་བུ་ཅང་ཏེའུ་གྲི་གུག་དང་། །ཐོད་པའི་ཕྲེང་བའི་དབུ་རྒྱན་ཅན། །ཕྱག་རྒྱ་ལྔ་ཡིས་རྣམ་པར་བརྒྱན།།ཕྱོགས་ཀྱི་གོས་ཅན་གར་གྱི་མཆོག །མགོ་བོའི་ཕྲེང་བས་རྣམ་པར་བརྒྱན། །མི་
བསྐྱོད་པ་ཡི་ཅོད་པ་ན་འཆང་། །ཐུགས་རྗེའི་ཉམས་ཀྱི་བདེ་བ་སྟེ། །གཉིས་མེད་སྦྱོར་བས་མཉམ་པར་ལྡན། །རྡོ་རྗེ་སེམས་སོགས་མཆོག་དེ་ཉིད། །ཕག་མོ་དང་ནི་རྡོ་རྗེ་སེམས། །ཡ་མི་ནི་དང་རྣམ་སྣང་མཛད། །རྨོངས་བྱེད་མ་དང་པདྨའི་གར། །སྐྱོད་བྱེད་མ་དང་ཁྲག་འཐུང་
སྟེ། །སྐྲག་བྱེད་རྡོ་རྗེ་ཉི་མ་དང་། །ཙཎྜི་ཀ་དང་རྟ་མཆོག་སྟེ། །རྡོ་རྗེ་སེམས་སྐུ་དཀར་པོ་སྟེ། །རྣམ་པར་སྣང་མཛད་སེར་པོ་ཡིན། །པདྨ་གར་དབང་དམར་པོ་སྟེ། ཧེ་རུ་ཀ་དཔལ་སྔོན་པོ་ཡིན། །རྡོ་རྗེ་ཉི་མ་དམར་པོ་སྟེ། །རྟ་མཆོག་དག་ནི་ལྗང་གུའོ། །ཡང་ན་སོ་སོར་བསྒོམ་
པར་བྱ། །རྡོ་རྗེ་སེམས་དཔའ་ཞལ་གསུམ་པ། །ཕྱག་དྲུག་སྤྱན་ནི་གསུམ་པ་སྟེ། །ཕྱག་རྒྱ་དྲུག་གི་མཚན་གྱིས་བརྒྱན། །རྡོ་རྗེ་དྲིལ་བུ་ཐོང་ཁ་ཊྭཱཾ། །རལ་གྲི་ཅང་ཏེའུ་མགོ་བོ་འཆང་། །ན་རའི་པགས་མནབས་གར་དང་བཅས། །རྣམ་སྣང་ལ་སོགས་དཔའ་བོ་ཀུན། །ཞལ་

གཅིག་པ་ལ་ཕྱག་བཞི་པ། །ཐོད་པ་དང་ནི་ཁ་ཊྭཱཾ་དང་། །ཅང་ཏེའུ་དྲིལ་བུས་མཚན་པའི་མཆོག །ཡང་ན་ཐམས་ཅད་ཕྱག་བཅུ་གཉིས། །ཞལ་གདོད་དྲུག་པར་བསྒོམ་པར་བྱ། །དེ་དག་གསང་སྔགས་འདི་ཡིན་ཏེ། །ཨོྃ་ཤྲཱི་ཨོྃ་བྃ་བྃ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་ཧྃ་ཡོཾ་ཡཾ་ཧུྃ་
ཧཱུྃ་ཕཊ་སྭཱ་ཧཱ། ཨོྃ་ཤྲཱི་ཧྲཱིཾ་མོྃ་མཾ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་ཧྲེཾ་ཧྲིཾ་སཾ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་ཧཱུྃ་ཧཱུྃ་སྃ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་ཕཊ་ཕཊ་ཙྃ་ཧུྃ་ཧཱུྃ་ཕཊ་སྭཱ་ཧཱ། དེ་དག་ནི་རྣལ་འབྱོར་མ་དྲུག་གི་གསང་སྔགས་སོ། ཨོྃ་ཧཿབྃ་ཧཱུྃ་ཕཊ་སྭཱ་ཧཱ། ཨོྃ་ན་མཿཧི་བྷྲུྃ་ཧཱུྃ་ཕཊ་སྭཱ་ཧཱ། ཨོྃ་སྭཱ་ཧཱ་ཧུ་ཧྲི་ཧུྃ་ཧཱུྃ་ཕཊ་སྭཱ་
ཧཱ། ཨོྃ་བཽ་ཥེ་ཊ་ཧེ་ཧི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཧཱུྃ་ཧཱུྃ་ཧོ་ཏྲྃ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཕཊ་ཧྃ་ཧུྃ་ཧཱུྃ་ཕཊ་སྭཱ་ཧཱ། འདི་ནི་དཔའ་བོ་དྲུག་གི་སྔགས། །བཟླས་པ་དག་ནི་བསྒོམས་ཙམ་གྱིས། །འཁོར་ལོ་དྲུག་ནི་མཆོག་གྲུབ་ཅིང་། །འཁོར་ལོས་སྒྱུར་བ་ཐོབ་པ་སྟེ། །འཁོར་ལོས་སྒྱུར་དྲུག་རྒྱལ་པོར་
འགྱུར། །མི་ཕམ་རྒྱལ་བ་ཡང་དག་རྫོགས། །སྟོབས་ཆེན་རྩལ་མཆོག་རྙེད་པ་ཡིན། །ཕྱག་མཚན་དྲུག་ལ་རྟག་མཆོད་ཅིང་། །ཆོག་བཞིན་དུ་མངོན་བསྔགས་ན། །དེ་ནི་མྱུར་དུ་གྲུབ་ནས་ནི། །རྣལ་འབྱོར་རྒྱལ་པོའི་མཆོག་ཀྱང་ཐོབ། །མི་སྣང་ལ་སོགས་གྲུབ་ནས་ནི། །
ཁམས་གསུམ་དག་ཏུ་རྣམ་པར་སྤྱོད། །འགྲོ་བ་དྲུག་གི་སེམས་ཅན་གྲོལ། །བསྒོམས་པས་རྡོ་རྗེ་འཛིན་དང་མཚུངས། །ཡང་ན་འཁོར་ལོ་ཟུར་དྲུག་ལ། །བདེ་བ་ཆེན་པོ་རྣམ་སྣང་མཛད། །འཇམ་པའི་རྡོ་རྗེ་འཆག་རྒྱལ་པོ། །འཁོར་ལོས་སྒྱུར་བ་བདག་པོ་ནི། །གུར་གུམ་གྱི་
ནི་མདོག་ལྟ་བུ། །གཟི་མདངས་འབར་བའི་འོད་ཅན་ཏེ། །ཕྱག་རྒྱ་ཆེ་དང་ཡང་དག་ལྡན། །ཆོས་ཀྱི་དབྱིངས་ཀྱི་རང་ངོ་བོ། །རྡོ་རྗེ་དྲིལ་བུ་དང་ལྡན་པའི། །གཡས་དང་གཡོན་པའི་ཕྱག་གིས་འཁྱུད། །རལ་གྲི་པོ་ཏི་ཁ་ཊྭཱཾ་ག། །ཐོད་པ་ལྕགས་ཀྱུ་ཞགས་པ་དང་། ཨུཏྤ་ལ་དང་
ཅང་ཏེའུ། །གུར་གུམ་མདོག་དང་སྔོ་བ་དང་། །དམར་དང་ལྗང་གུ་སྟེང་ཞལ་དཀར། །ཆོས་ཀྱི་དབྱིངས་ནི་དག་པ་ཆེ། །སེམས་ཅན་ཁམས་ནི་རབ་གྲོལ་བྱེད། །ཤར་སོགས་གཡོན་བསྐོར་དགོད་པ་ནི། །རྟ་མཆོག་ཙ་བའི་ཀ་དང་བཅས། །དེ་དག་དེ་རུ་དགོད་བྱས་པས། །

འཇམ་པའི་རྡོ་རྗེ་རང་ཉིད་འགྲུབ། །དཀར་དང་དམར་དང་སེར་བ་དང་། །སྔོ་དང་དམར་དང་དཀར་སྔོ་ལྗང་། །ཡན་ལག་དྲུག་ཏུ་དཔའ་བོ་དག །མཁའ་འགྲོ་མ་དང་ལྷན་ཅིག་བཅས། །རྡོ་རྗེ་སེམས་དང་ཕག་མོ་དང་། །རྣམ་སྣང་མཛད་དང་ཡ་མི་ནི། །པདྨ་གར་
དབང་རྨོངས་བྱེད་བཅས། །ཁྲག་འཐུང་དང་ནི་སྐྱོད་བྱེད་མ། །རྡོ་རྗེ་ཉི་མ་སྐྲག་བྱེད་མ། །ལྗང་དང་དུད་པའི་མདོག་ཅན་ཏེ། །དེ་ལྟའི་སྐུ་མདོག་རྣམ་པར་བསྒོམ། །ཞལ་གཅིག་པ་ལ་ཕྱག་བཞི་པའོ། །ལྷ་མོ་རྣམས་ནི་ཕྱག་གཉིས་པའོ། །ཐོད་པ་དང་ནི་གྲི་གུག་འཛིན། །དཔའ་
བོ་ཐོད་པ་ཁ་ཊྭཱཾ་ག། །རང་གི་ཕྱག་མཚན་གཉིས་མེད་སྦྱོར། །དྲིལ་བུ་ལྷན་ཅིག་ཡང་དག་ལྡན། །ཅང་ཏེའུ་ནི་འཛིན་པའི་མཆོག །སྤྱན་གསུམ་པ་ལ་གཡས་བརྐྱང་བཞུགས། །སྟག་གི་པགས་པའི་ཤམས་ཐབས་ཅན། །ཐོད་པའི་ཕྲེང་བའི་དབུ་རྒྱན་ཅན། །མགོ་བོའི་
དོ་ཤལ་འཛིན་པ་སྟེ། །ཐམས་ཅད་ཡི་དགས་སྟེང་དུ་བཞུགས། །དབུས་སུ་འཇིགས་བྱེད་དུས་མཚན་གནོན། །ལྷ་མོས་བྱིན་པ་གཉིས་ཀྱིས་འཁྲིལ། །སྐྲ་གྲོལ་བ་ལ་ཕྱོགས་གོས་ཅན། །སྙིང་གར་ཡེ་ཤེས་དམ་ཚིག་ནི། །སྐུ་གསུང་ཐུགས་དང་རྣམ་པར་སྦྱར། །གོ་ཆ་
གཉིས་པ་ཡང་དག་སྦྱར། །གནས་ཀྱི་འཁོར་ལོ་བསྒོམས་ནས་ནི།།དཔའ་བོ་མཁའ་འགྲོ་མ་རྣམ་དགོད། །གསང་བ་གསུམ་ནི་སྙིང་གར་གནས། །ཁྭ་གདོང་ལ་སོགས་མཁའ་འགྲོ་མ། །ཕྱི་རོལ་སྒོ་རུ་རྣམ་པར་དགོད།།ཟུར་དུ་གཤིན་རྗེ་སྲེག་ལ་སོགས། །ཐམས་
ཅད་གཅེར་བུ་རྣམ་པར་བསྒོམ། །སྔར་བཤད་མདོག་དང་ཕྱག་མཚན་ཏེ། །ཡི་དགས་གདན་ལ་ཡང་དག་བཞུགས། །གཡས་བརྐྱང་བ་ཡི་ཞབས་ཀྱིས་གནས། །དྲག་པོ་སྐྲ་ནི་གྲོལ་བ་སྟེ། །ཐམས་ཅད་ཐོད་པའི་ཕྲེང་བ་ཅན། །རང་གི་ཕྱི་དག་ནང་དུ་ཡང་། །ཕ་རོལ་ཕྱིན་
དྲུག་རྣམ་པར་དག །སྒོམ་ཞིང་རབ་ཏུ་བསྒོམ་པར་བྱ། །སྤྲོ་ཟིང་བསྡུ་བའི་སྦྱོར་བ་ཡིས། །གསང་བའི་འཁོར་ལོ་བཟླས་པ་བྱ། །དཔའ་བོ་རྣལ་འབྱོར་མ་བཟླས་ན། །སྒོམ་ཞིང་རབ་ཏུ་བསྒོམ་པར་བྱ། །སྤྲུལ་པའི་འཁོར་ལོའི་ཚོགས་སྤྲོས་ནས། །འགྲོ་བ་གསུམ་པོ་རྫོགས་

པར་བྱས། །ནང་གི་བདག་ཉིད་བསྒོམས་པ་ཡིས། །འཁོར་ལོ་གསུམ་གསང་བསྒོམས་ནས་བཟླ། །དེ་ཉིད་གསུམ་དང་སྔགས་ལྷན་ཅིག །དཔའ་བོ་དང་ནི་མཁའ་འགྲོ་མ། །ཧུྃ་ཧཱུྃ་ཕཊ་ནི་མཐའ་རུ་སྟེ། །འཁོར་ལོ་གསུམ་གྱི་བཟླས་པ་བྱ། །རྣལ་འབྱོར་ཆོ་ག་བཞིན་དུ་ནི། །
དམ་ཚིག་ཅན་གྱིས་དེ་བཟླ་བྱ། །ཨོྃ་ཤྲཱི་མཉྫུ་བཛྲ་ཨཱཿཧཱུྃ་མྃ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཧཿབཛྲ་སཏྭ་ཧུྃ་ཧཱུྃ་ཕཊ་སྭཱ་ཧཱ། ཨོྃ་བྃ་བཛྲ་བཱ་རཱ་ཧི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ན་མཿཧི་བཛྲ་བཻ་རོ་ཙན་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཧཾ་ཡོཾ་ཡ་མ་ནི་ཧུྃ་ཧཱུྃ་ཕཊ་སྭཱ་ཧཱ། ཨོྃ་སྭཱ་ཧཱ་ཧུ་པདྨ་ནརྟེ་ཤྭ་རི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཧྲཱིཾ་མོཾ་མོ་ཧ་ནི་
ཧུྃ་ཧཱུྃ་ཕཊ་སྭཱ་ཧཱ། ཨོྃ་བཽ་ཥཊ་ཧེ་ཧེ་རུ་ཀ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཧྲཱི་ཧྲཱིཾ་སཾ་ཙ་ལ་ནི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཧཱུྃ་ཧཱུྃ་ཧོ་བཛྲ་སཱུ་རྱ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཧཱུྃ་ཧཱུྃ་སཾ་ཏྲཱ་ས་ནི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཕཊ་ཧཾ་པར་མཱ་ཤྭ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཕཊ་ཕཊ་ཙཎྜི་ཀ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཀཱ་ཀཱ་སྱེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཨུ་ལཱུ་
ཀཱ་སྱེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྭཱ་ནཱ་སྱེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་སཱུ་ཀ་ར་སྱེ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཡ་མ་དཱ་ཌྷི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཡ་མ་དཱུ་ཏི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཡ་མ་དཾཥྚྲི་ཎི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཡ་མ་མ་ཐ་ནི་ཧུྃ་ཧཱུྃ་ཕཊ་སྭཱ་ཧཱ། གཡོན་དང་གཡས་ཀྱི་ལག་གཉིས་སུ། །གོ་ཆ་གཉིས་པོ་བཀོད་ནས་ནི། །གང་ཞིག་ཇི་ལྟར་
འདོད་པ་རུ། །ལས་རྣམས་ཐམས་ཅད་བྱེད་པ་ཡིན། །ཐེ་ཚོམ་མེད་པར་ལས་བྱས་ན། །ངེས་པར་དངོས་གྲུབ་གཞན་དུ་མིན། །ཡང་ན་མགོན་པོས་བཅུའི་དབང་། །ཕ་རོལ་ཕྱིན་པ་བཅུ་ལ་གནས། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་
དྲུག་པ་སྟེ། །ཐབས་དང་སྟོབས་དང་སྨོན་ལམ་དང་། །ཡེ་ཤེས་སྒོ་སྐྱོང་རྣམ་དག་པའོ། །རབ་ཏུ་དགའ་དང་དྲི་མ་མེད། །འོད་བྱེད་པ་དང་འོད་འཕྲོ་ཅན། །སྦྱང་དཀའ་བ་དང་མངོན་དུ་གྱུར། །རིང་དུ་སོང་དང་མི་གཡོ་བ། །ལེགས་པའི་བློ་གྲོས་ཆོས་ཀྱི་སྤྲིན། །འདི་ཡིས་རྣམ་
པར་དག་པ་བསྒོམ། །གཤིན་རྗེ་སྲེག་སོགས་བཞི་པ་ནི། །འཕགས་པའི་བདེན་པར་རྣམ་པར་བསྒོམ། །སྡུག་བསྔལ་དང་ནི་ཀུན་འབྱུང་དང་། །འགོག་པ་དང་ནི་ལམ་རྣམས་ཏེ། །བཅོམ་ལྡན་འཇམ་པོའི་རྡོ་རྗེ་དཔལ། །ཆོས་ཀྱི་དབྱིངས་ཀྱི་རྣམ་དག་སྟེ། །ཡེ་ཤེས་རང་གི་

ངོ་བོ་ཡིན། །འདི་ལྟར་རྣམ་པར་དག་པ་བསྒོམ། །གཉིས་སུ་མེད་པར་སྦྱོར་བའི་ལམ། །གསང་ཞིང་མཆོག་ཏུ་གསང་བ་སྟེ། །རྣལ་འབྱོར་སྟོབས་ཀྱིས་གསང་བ་མཆོག །སྒྲུབ་པས་རྗེས་སུ་བསྟན་པ་དང་། །ཇི་བཞིན་བདག་པོའི་དབྱེ་བ་དང་། །བླ་མའི་རིམ་པ་
ལེགས་པར་བསླབས། །འདི་ལྟར་ཆོ་ག་གཉིས་མེད་པར། །སྦྱོར་བའི་དམ་ཚིག་མཆོག་ཡིན་ཏེ། །དངོས་གྲུབ་ཀུན་གྱི་ཐབས་ཀྱི་རྒྱུ། །རྣལ་འབྱོར་མ་ཐུགས་གསང་བ་ཆེ། །ལས་རྣམས་ཀུན་གྱི་འབྲས་བུ་སྟེར། །མངོན་པར་བརྗོད་པའི་རྒྱུད་བླ་མའི་བླ་མ་ལས་གཉིས་སུ་མེད་
པའི་གོ་ཆའི་སྦྱོར་བསྐྱེད་པའི་སྒོམ་པའི་ལེའུ་སྟེ་སུམ་ཅུ་རྩ་བདུན་པའོ།། །།དེ་ནས་གཞན་ཡང་བཤད་བྱ་བ། །བརྡ་ནི་མཆོག་ཏུ་གསང་བ་སྟེ། །བརྡ་ནི་ཡོངས་སུ་མི་ཤེས་པར། །སྦྱོར་བའི་དངོས་གྲུབ་མི་འགྲུབ་སྟེ། །འདི་ནི་དེས་པར་ཤེས་པ་ན། །དངོས་གྲུབ་འགྲུབ་
པར་ཐེ་ཚོམ་མེད། །དྭ་ཞེས་བྱ་བ་སྐྱེས་བུར་བཤད། །དི་ཞེས་བྱ་བ་བུད་མེད་ཡིན། །པུ་ཞེས་བྱ་བ་གནོན་པ་ཡིན། །སུ་ཞེས་བྱ་བ་ཟ་བ་ཉིད། །མ་ཞེས་བྱ་བ་མ་རུ་བཤད། །ཡ་ཞེས་བྱ་བ་ཆུང་མ་ཉིད། །བྷ་ཞེས་བྱ་བ་སྲིང་མོ་ཡིན། །བྷི་ཞེས་བྱ་བ་མཛའ་མོར་བཤད། །ལུ་
ཞེས་བྱ་བ་བུ་མོ་ཡིན། །སྲི་ཞེས་བྱ་བ་ཁྲག་ཏུ་བཤད། །སོ་ནི་ཞི་བའི་བཏུང་བ་ཡིན། །པེ་ཞེས་བྱ་བ་ཐུག་པ་སྟེ། །པི་ཞེས་བྱ་བ་དེ་བཞིན་ཤ། །བཞེས་བྱ་བ་ཟ་བ་ཡིན། །བྷུ་ཞེས་བྱ་བ་འདྲེས་པ་ཡིན། །པི་ཞེས་བྱ་བ་དུར་ཁྲོད་ཡིན། །དུ་ཞེས་བྱ་བ་རོ་ཡིན་ནོ། །ཊཱི་ཞེས་
བྱ་བ་རྣལ་འབྱོར་མ། །གཱ་ཞེས་བྱ་བ་ལཱ་མ་ཡིན། །ཏྲི་ཞེས་བྱ་བ་གཟུགས་ཅན་མ། །ཀུ་ཞེས་བྱ་བ་མཁའ་འགྲོ་མ། །ཧ་ནི་ཁཎྜ་རོ་ཉིད་མ། །ཛ་ཞེས་བྱ་བ་བྱིན་པ་གཉིས། །བཞེས་བྱ་བ་གསོང་པོར་སྨྲ། །སྭ་ཞེས་བྱ་བ་ལེགས་འོངས་ཡིན། །མི་ཞེས་བྱ་བ་ཉ་ཡིན་ལ། །
བྱོ་ཞེས་བྱ་བ་བཟའ་བ་མིན། །ཕྱོ་ཞེས་བྱ་བ་བཏུང་བ་མིན། །ག་ནི་བགྲོད་དང་བགྲོད་མིན་ཡིན། །ཀ་ཞེས་བྱ་བ་འདོད་པ་ཡིན། །ས་ཞེས་བྱ་བ་གཞན་མི་འགྲོ། །ར་ཞེས་བྱ་བ་ཁྱོ་མེད་མོ། །དུ་ཞེས་བྱ་བ་སྤྱོད་ངན་མོ། །སུ་ཞེས་བྱ་བ་སྐལ་བཟང་མོ། །ན་ཞེས་བྱ་བསྐལ་ངན་

མ། །ས་ཞེས་བྱ་བ་དམ་ཚིག་ཅན། །ཨ་ཞེས་བྱ་བ་དམ་ཚིག་མེད། །ཨཱི་ཞེས་བྱ་བ་འོངས་པ་ཡིན། །ན་ཞེས་བྱ་བ་མ་འོངས་ཡིན། །སོ་ཞེས་བྱ་བ་ཆགས་པ་ཡིན། །འདི་དག་ཡི་གེའི་བརྔ་ཡིན་ཏེ། །དབང་བསྐུར་དུས་སུ་རྣལ་འབྱོར་པས། །བཟའ་དང་བཟའ་མེད་
སྦྱིན་པར་བྱ། །དབང་བསྐུར་བ་ནི་མཆོག་ཡིན་ཏེ། །དམ་ཚིག་མཆོག་ནི་ཤེས་པ་དང་། །དམ་ཚིག་ཅན་གྱི་དམ་ཚིག་དུས། །དམ་ཚིག་འཁོར་ལོ་འདུས་པ་དང་། །དད་པ་རྣམས་ལ་སྦྱིན་པར་བྱ། །མ་དད་པ་ལ་སྦྱིན་མི་བྱ། །མངོན་པར་བརྗོད་པའི་རྒྱུད་བླ་མའི་བླ་མ་ལས་བརྡའི་
ལེའུ་སྟེ་སུ་བཅུ་རྩ་བརྒྱད་པའོ།། །།དེ་ནས་གཞན་ཡང་བཤད་བྱ་བ། །རྣལ་འབྱོར་མ་ཡི་མཚན་ཉིད་ནི། །གང་གིས་ཤེས་པ་ཙམ་གྱིས་ནི། །སྒྲུབ་པ་པོ་ཡིས་དངོས་གྲུབ་ཐོབ། །བུད་མེད་པད་རྩ་ལྟར་དཀར་ཞིང་། །པདྨའི་འདབ་ལྟར་དཀྱུས་རིང་མིག །རྟག་ཏུ་གོས་
ནི་དཀར་ལ་དགའ། །ཙནྡན་སར་པའི་དྲི་དང་ལྡན། །བདེ་གཤེགས་འདུས་པ་ཉིད་ལ་དགའ། །དེ་རིགས་ལས་བྱུང་ཤེས་པར་བྱ། །བུད་གང་བཙོ་མའི་གསེར་འདྲ་ཞིང་། །དམར་དང་སེར་བའི་གོས་ལ་དགའ། །ཛཱ་ཏི་ཙམ་པའི་དྲི་དང་ལྡན། །དེ་ཡང་བཟང་པོའི་རྗེས་འགྲོར་འགྱུར། །
ཐམས་ཅད་ཨུཏྤལ་ལྟར་སྔོ་བསངས། །དྲི་དང་གོས་ནི་སྔོ་ལ་དགའ། །ཨུཏྤལ་སྔོན་པོའི་དྲི་ཡོད་པ། །དེ་ནི་དཔའ་བོ་བཟང་རྗེས་འགྲོ། །བུད་མེད་པད་དཀར་འདྲ་མདོག་གང་། །རྟག་ཏུ་པདྨའི་རྩ་བ་དྲི། །དེ་ཡང་དེ་བཞིན་དཔའ་མོའི་བློ། །དམར་ཞིང་སེར་སྐྱའི་བུད་མེད་གང་། །གཟུགས་
བཟང་གོས་ནི་དམར་བ་དང་། །མ་ལ་ཀི་དང་ཨུཏྤལ་དྲི། །དེ་ནི་རྡོ་རྗེའི་རིགས་བྱུང་ཡིན། །སེར་ཞིང་ལྗང་བའི་བུད་མེད་གང་། །གོས་ནི་དཀར་ལ་དགའ་བ་དང་། །མགོ་ལ་མེ་ཏོག་དྲི་དང་ལྡན། །དེ་བཞིན་གཤེགས་རིགས་རྫེས་འགྲོ་ཡིན། །བུད་མེད་གང་ཞིག་ཁ་དོག་དམར། །དེའི་
མདོག་ཅན་གྱི་གོས་འཆང་ཞིང་། །རྟག་ཏུ་ག་བུར་དྲི་དང་ལྡན། །རྣམ་སྣང་རིགས་ཀྱི་རྗེས་འགྲོ་ཞིང་། །རྣལ་འབྱོར་མ་ཡི་རིགས་རྣམས་ནི། །དེ་ལྟར་བདུན་པོ་ངས་བཤད་པ། །གཡོན་པའི་ཀུན་སྤྱོད་ལ་རྟག་དགའ། །རང་གི་མདོག་གིས་རིགས་དྲུག་ལྡན། །རིགས་ཀྱི་རིག་པའི་ཡི་གེ་

ཡང་། །ཁ་དོག་དྲུག་ཏུ་འགྱུར་བ་ཡིན། །རང་གི་ཕྱག་རྒྱ་འཆིང་བ་དང་། །རང་རིག་ལས་བྱུང་ཚིག་ཏུ་སྨྲ། །གཡོན་ལས་འགྲོ་བའི་བུད་མེད་གང་། །རྣལ་འབྱོར་པ་ལ་གཡོན་ལ་རྟག །ལག་པ་གཡོན་གྱིས་མཚོན་པ་དང་། །གཡོན་ནས་ལྟབས་རྣམ་པར་
བལྟ། །ལྷ་མོ་རྣམས་དང་གར་སྨྲ་བ། །དེ་ནི་དམ་ཚིག་ལྡན་པར་བཤད། །བུད་མེད་གང་བྱས་དེ་ཉན་ཅིང་། །རིགས་ཀྱིས་བོན་རབ་ཏུ་སྨྲ། །རིགས་ཀྱི་བྱ་བ་མི་སྤོང་སྟེ། །རང་གིས་བསྟན་བཤད་མི་འདོར་ལ། །རང་གི་རིགས་ཀྱི་རིག་པ་ཟློས། །དེ་ནི་དམ་ཚིག་ལྡན་པར་
བཤད། །ཕྱག་འཚལ་བ་ནི་གང་འཆིང་བ། །གཡོན་པའི་ལུས་ཀྱིས་རྟག་ཏུ་འདུད། །ལྷ་མོ་རྣམས་དང་ཀུན་སྨྲ་བ། །དེ་ནི་ངེས་པར་བདེ་བར་འགྲོ། །མཐེ་བོང་གཡོན་པས་ས་ལ་ནི། །རྐང་པས་རི་མོ་འདྲི་བྱེད་ཅིང་། །མགོ་ནི་འཕྲུལ་པར་བྱེད་པ་དང་། །ཟུར་གྱིས་ལྟ་ཞིང་
ལག་པ་སྟོན། །སྒྲུབ་པ་པོ་ལ་ཁྱྡ་པར་དུ། །དེ་ཡིས་རང་རིག་དྲན་པ་དང་། །མཁུར་བའམ་ཀོས་ཀོ་དག་དང་ནི། །སྣ་དག་ཏུ་ནི་ཐལ་མོ་སྟོན། །ཟུར་གྱིས་ལྟ་ཞིང་ལན་ཅིག་བསྔགས། །ཟློས་ཤིང་རིགས་ལ་རྣམ་པར་བལྟ། །བདེན་པར་འགྲོ་བའི་རྣལ་འབྱོར་མ། །ངེས་པར་
དམ་ཚིག་ཅན་ཡིན་ན། །དེ་ནས་རྙེད་དཀའ་རྣལ་འབྱོར་མ། །དེ་བཞིན་མཁའ་འགྲོ་མ་རྣམས་ཀྱི། །བདུད་རྩི་ལྔ་རྣམས་ཡང་དག་འབྱུང་། །ཡ་མི་ནཱི་དང་སྐྲག་བྱེད་མ། །འདོད་ལྡན་ཕག་མོ་འཇིགས་གཟུགས་ཅན། །ཀུན་ཏུ་སྤྱོད་པ་བསུར། །རྣལ་འབྱོར་མ་ནི་རྣམ་པ་བདུན། །མདོར་
བསྡུས་རང་མཚན་བཤད་པ་ཡིན། །གཟུགས་ཅན་མ་དང་ཙུམ་པི་ཀཱ། །ལཱ་མ་ཡོངས་གྱུར་བྱིས་བཅས་མོ། །མི་ལྡོག་ཨེ་ཧི་ཀཱ་ལྷ་མོ། །མཁའ་འགྲོ་མ་ནི་མདུན་དུ་བཤད། །མངོན་པར་བཞེས་པས་བལྟ་བ་དང་། །སྨིན་མ་འདེགས་པར་གར་བྱེད་ཅིང་། །སྔོན་བཞིན་གཟུགས་
ནི་སྡུས་བྱེད་ལ། །ཕྱིས་ནི་འཇིགས་པར་བྱེད་པ་དག །གཟུགས་ཅན་མ་ནི་ཡིན་པར་བཤད། །གཉིས་མེད་དཔའ་བོས་བསྙེན་པར་བྱ། །སྡུག་པའམ་ཡང་ན་མི་སྡུག་པ། །བྱིས་པ་འཁྱུད་ཅིང་ཙུམ་པ་ན། །དེ་ནི་ཙུམ་པ་ཀཱེར་ཤེས་བྱ། །མཁའ་འགྲོ་མཆོག་ཀྱང་དེ་ཉིད་

ཡིན། །ཟས་མི་ལྟ་བར་ཟུར་དུ་བལྟ། །ཁྲོ་གཉེར་དང་ནི་གདོང་དག་དང་། །སྨིན་མ་སྒྱུར་ཞིག་སྡིགས་མཛུབ་དང་། །འདི་ནི་གཞན་ཡང་དབུགས་མི་འབྱིན། །འཇིགས་པར་བྱེད་པ་གང་ཡིན་པ། །དེ་ནི་ལཱ་མ་ཡིན་པར་བསྟན།།ཕག་དང་དྲེད་དང་བྱིལ་དང་། །ཅེ་སྤྱང་རིགས་དང་
སྟག་དག་དང་། །ཐམས་ཅད་དེར་ནི་འཇིགས་བྱེད་པ། །ཡོངས་སུ་གྱུར་པར་དེ་བཤད་དོ། །ཤིན་ཏུ་དགའ་བས་རྒོད་པ་དང་། །སོང་ནས་སླར་ཡང་མི་ལྡོག་ལ། །རྗེས་སུ་ཆགས་པས། །ལ་བར་རྒོད། །དུམ་སྐྱེས་མར་ནི་དེ་བཤད་དོ། །ཡིད་ནི་ཀུན་ཏུ་སྐྱོ་བ་དང་། །རྐང་པ་
ལག་པས་བོང་བ་འམ། །གོས་མཐའ་འམ་ཡང་ན་ཤིང་དག་གིས། །དེས་རེག་པ་ནི་འཚོ་མི་འགྱུར། །མི་ལྡོག་པར་ནི་ཤེས་བྱ་སྟེ། །བསྒྲུབ་མིན་པར་ནི་དེ་བཤད་དོ། །མཁའ་འགྲོ་མ་ཡི་རིགས་ཕྱག་རྒྱ། །དཔའ་བོས་བསྙེན་ཅིང་མཚན་མ་བལྟ། །ཐོད་པ་དགྲ་སྟ་མཆེ་བ་
དང་། །རལ་གྲི་ཀུན་ཏུ་སྐྲག་བྱེད་ཡིན། །རྡོ་རྗེ་དང་ནི་དུང་ཉིད་དང་། །རིགས་ཀྱི་ཕྱག་རྒྱ་ཡིན་པར་བཤད། །མངོན་པར་བརྗོད་པའི་རྒྱུད་བླ་མའི་བླ་མ་ལས་རྣལ་འབྱོར་མའི་མཚན་མའི་ལེའུ་སྟེ་སུམ་ཅུ་རྩ་དགུ་པའོ། །དེ་ནས་གཞན་ཡང་བཤད་བྱ་བ། །མཁའ་འགྲོ་
རྣམས་ཀྱི་མཚན་ཉིད་ནི། །གང་ཞིག་ཡག་དག་ཤེས་པ་ཡིས། །མཁའ་འགྲོའི་དམ་ཚིག་ལ་གནས་པའོ། །དམར་ཞིང་སེར་བའི་བུད་མེད་གང་། །པདྨའི་དྲི་ནི་རྣམ་པར་གཏོང་། །ལྟ་སྟངས་རང་བཞིན་ཞི་བ་དང་། །ཞེས་པས་ལྟ་བའི་རྗེས་འགྲོ་བ། །བུད་མེད་གང་གི་སེན་
མོ་དམར། །མིག་ནི་ཀུན་ཏུ་ཞེན་པ་དང་། །ཁྱིམ་དུ་པདྨ་འདྲི་བ་ནི། །པདྨ་གར་དབང་རིགས་བྱུང་ཡིན། །སྨིན་མའི་དབུས་ན་རྩེ་གསུམ་ཡོད། །ལུས་ནི་སྔོ་བ་སངས་སྐྱ་བ་དང་། །རྟག་ཏུ་རྡོ་རྗེ་རིགས་བསྒོམ་པ། །གང་གི་ཁྱིམ་དུ་རྡོ་རྗེ་འདྲི། །རྟག་ཏུ་མཆོད་པ་བྱེད་པ་ཡི། །མཁའ་
འགྲོ་མ་དེ་དཔལ་ལྡན་ནི། །ཧེ་རུ་ཀ་ཡི་རིགས་བྱུང་ཡིན། །གང་གི་དཔྲལ་བར་རྩེ་གསུམ་ནི། །མདུང་ཐུང་དག་ནི་སྣང་འགྱུར་ཞིང་། །མིག་དམར་མདོག་ནི་དམར་སེར་དང་། །དེ་བཞིན་རྐང་པ་ལག་པ་དམར། །ར་སྐྱེས་ཁྱིམ་བྱ་དག་ལ་ཡང་། །རྟག་ཏུ་ཡིད་ནི་དགར་འགྱུར་ཞིང་། །དེ་

ཡི་ཁྱིམ་དུ་རྡོ་རྗེ་མཚན། །རྟག་ཏུ་གང་ཞིག་མཆོད་བྱེད་པ། །ཤྲཱི་ཧེ་རུ་ཀའི་རིགས་བྱུང་བ། །མཁའ་འགྲོ་ཡིན་པར་གདོན་མི་ཟ། །འཁོར་ལོ་གང་གི་དཔྲལ་བ་འམ། །ལག་པར་ཡང་ནི་སྣང་འགྱུར་བ། །སྤྲིན་སྔོན་དག་དང་འདྲ་བ་ནི། །རྟག་ཏུ་དཔྲལ་བར་འཆང་
བྱེད་པ། །སྐལ་བ་ཆེན་པོ་ཀུན་ཚོགས་ཤིང་། །མཆོག་ཏུ་བདེན་པ་གང་ཡིན་དང་། །ཁྱིམ་དུ་འཁོར་ལོ་འདྲི་བྱེད་ཅིང་། །རྟག་ཏུ་དེ་ལ་མཆོད་བྱེད་པ། །རྡོ་རྗེ་ཕག་མོ་རིགས་བྱུང་བའི། །མཁའ་འགྲོ་མ་ནི་སྟོབས་ཀྱིས་དྲེགས། །གང་ཞིག་མིག་སྨན་གནས་འདྲ་ཞིང་། །སོ་
ནི་དཀར་ཞིང་མཐོ་བ་དང་། །རྟག་ཏུ་གདུག་པར་གྱུར་པ་དང་། །སེམས་སྟོབས་ལྡན་པར་གྱུར་པ་དང་། །རྟག་ཏུ་ཁྲུས་ལ་དགའ་བ་དང་། །མང་དུ་སྨྲ་བར་མི་བྱེད་ཅིང་། །ཁྱིམ་དུ་རྡོ་རྗེ་འདྲི་བ་དང་། །རྟག་ཏུ་དགེ་བས་མཆོད་བྱེད་པ། །རྡོ་རྗེ་ཕག་མོའི་རིགས་འབྱུང་བ། །སྟོང་ཕྲག་
བཅུ་དང་ལྡ་པ་ཡིན། །སེར་ཞིང་གསེར་གྱི་མདོག་འདྲར་སྣང་། །མིག་མི་གཡོ་ཞིང་ཁ་སྤུ་སེར། །རྡོ་རྗེ་གང་གི་དཔྲལ་བ་འམ། །ལག་པར་ཡང་ནི་སྣང་འགྱུར་བ། །རྟག་ཏུ་རྒྱལ་སྲིད་དག་ལ་གནས། །སྙེམས་ཤིང་བདེན་པར་སྨྲ་བ་དང་། །མཱ་ལི་ཀ་ཡི་དྲི་འབྱུང་ཞིང་། །གང་
གི་ཁྱིམ་དུ་རྡོ་རྗེ་ནི། །རྟག་ཏུ་འདྲི་ཞིང་ཆེར་མཆོད་པ། །དུམ་སྐྱེས་མ་ཡི་རིགས་ལས་བྱུང་། །རྣལ་འབྱོར་མ་ཡི་དབང་ཕྱུག་མཆོག །གང་ཞིག་རྟ་པར་ཤ་ལ་དགའ། །སྐེམ་ཞིང་མིག་སྨན་གནག་པའི་མདོག །དཔྲལ་བར་མདུང་རྩེ་ལྟ་བུ་ཡོད། །གང་ཞིག་གདུག་པའི་
ལས་ལ་དགའ། །རྟག་ཏུ་དུར་ཁྲོད་དག་ཏུ་འགྲོ། །འཇིགས་པ་མེད་ཅིང་བརྩེ་མེད་དེ། །གང་གིས་དཔྲལ་བར་ཐིག་ལེ་དང་། །ཁྱིམ་དུ་ཐོད་པ་འདྲི་ཞིང་མཆོད། །དཔལ་ལྡན་ཧེ་རུ་ཀ་དེ་ཡི། །མཁའ་འགྲོའི་རིགས་ལས་བྱུང་བ་ཡིན། །སྤྲིན་གྱི་མདོག་འདྲའི་བུད་མེད་གང་། །སོ་
ནི་མི་མཉམ་པར་གནས་ཤིང་། །རྟག་ཏུ་གཏུག་པའི་ལས་ལ་དགའ། །གཡོན་གྱི་མཆེ་བ་གཙིགས་པ་དང་། །དེ་ཡི་ཁྱིམ་དུ་དགྲ་སྟ་ནི། །འདྲི་ཞིང་རྟག་ཏུ་མཆོད་བྱེད་པ། །རྣམ་པར་འདྲེན་པའི་རིགས་བྱུང་བའི། །མཁའ་འགྲོ་མར་ནི་ཐེ་ཚོམ་མེད། །མཁའ་འགྲོ་མ་ཡི་

ཚོགས་འདི་དག །ཤྲཱི་ཧེ་རུ་ཀའི་རིགས་ལས་བྱུང་། །སྒྲུབ་པ་པོ་ལ་ཕན་པའི་ཕྱིར། །མཚན་ཉིད་ཡང་དག་བཤད་པ་ཡིན། །མགོན་པར་བརྗོད་པའི་རྒྱུད་བླ་མའི་བླ་མ་ལས་མཁའ་འགྲོ་མའི་མཚན་ཉིད་ཀྱི་ལེའུ་སྟེ་བཞི་བཅུ་པའོ།། །།དེ་ནས་གཞན་ཡང་བཤད་བྱ་བ། །
སྒྲུབ་པ་པོ་ཡིས་ལཱ་མ་ཡི། །མཚན་ཉིད་ཀྱི་ནི་ཁྱད་པར་དང་། །ཡང་ལག་ཚོགས་ནི་ཤེས་བྱ་བའོ། །གང་གི་བཞིན་གྱི་དཀྱིལ་འཁོར་ནི། །ཀུན་ཏུ་ཟླུམ་པོར་སྣང་འགྱུར་ཞིང་། །ཁ་ཡི་སྨ་ར་རྟག་ཏུ་ཡོད། །སྦུ་དང་སྨིན་མ་རིང་བ་དང་། །གོས་བཟང་གཙང་ཞིང་ཞི་བ་དང་། །
མི་འཁྲུགས་བདེན་པར་སྨྲ་བ་དང་། །རྟག་ཏུ་དམ་པའི་ཆོས་ལ་དགའ། །དཔའ་བོ་སྲིང་མོར་དེ་ཤེས་བྱ། །པདྨའི་ཕྱག་རྒྱར་སྦྱིན་བྱ་བ། །ཡང་ན་རུ་སྦལ་ཕྱག་རྒྱ་བྱ། །པགས་པ་བུམ་པ་སྤྱི་བླུགས་ཉིད། །ཕྱག་རྒྱའི་ལན་དུ་ཤེས་པར་བྱ། །དེ་ནི་ཚེས་བཅུའི་རེས་དག་ལ། །ཁྱིམ་
དུ་པདྨ་འདྲི་བར་འགྱུར། །ལཱ་མ་ཡི་ནི་བུད་མེད་ཀྱི། །མཚན་ཉིད་གྱུར་པ་འདི་དག་ཡིན། །གསུས་པ་རློ་ཞིང་མིག་དཀྱུས་རིང་། །མིག་ནི་དམར་ཞིང་ཟེར་སྐྱར་གནས། །ཕྱུག་ཅིང་སྐལ་བཟང་དཔལ་ཡོན་ཅན། །སེར་ཞིང་ཙམ་པ་ལྟ་བུར་སྣང་། །ཤིན་ཏུ་རིང་མིན་ཐུང་བ་འང་མིན། །
སྣ་ཚོགས་པ་ཡི་གོས་ལ་དགའ། །དཔྲལ་བར་རི་མོ་གསུམ་ཡོད་ཅིང་། །མཚམས་ཀྱི་གྱེན་དུ་བལྟས་པ་ནས། །དགོད་ཅིང་དགའ་བ་ཉིད་དག་དང་། །ལམ་ནི་རྣམ་པར་གནོན་ཅིང་གནས། །གཡུལ་དུ་འཆི་བ་རྣམས་ཀྱི་ནི། །གཏམ་དག་ལ་ནི་རྟག་ཏུ་དགའ། །དེ་ལྟའི་རབ་
དྲེགས་མཐོང་ན་ནི། །མདུང་གི་ཕྱག་རྒྱ་བསྟན་པར་བྱ། །རྐང་པ་གཡོན་པ་བསྐུམ་པ་ཡིས། །བདག་ཉིད་ཀྱང་ནི་བསྟན་པར་བྱ། །གཡོན་པ་དག་ནི་ཡོངས་བཟློག་པ། །ཕྱག་རྒྱའི་ལན་ནི་ཡིན་པར་བཤད། །བཅུ་བཞི་དང་ནི་ཚེས་བརྒྱད་ན །དེ་ནི་དུས་ཚིགས་ཡིན་པར་
བཤད། །ཁྱིམ་དུ་མདུང་རྩེ་གསུམ་པ་ཡང་། །བྲིས་ནས་དེ་ནི་རྟག་ཏུ་མཆོད། །འཇིག་རྟེན་དབང་ཕྱུག་ལཱ་མ་ཡི། །མཚན་ཉིད་གྱུར་པ་འདི་དག་ཡིན། །གང་གི་མཁུར་ཚོས་དག་ཏུ་ནི། །ཁུང་བར་སྣང་བ་གནས་གྱུར་ཅིང་། །དེ་བཞིན་རྟག་ཏུ་དམར་ཞིང་སེར། །མིག་ནི་ལྗང་

སེར་དག་ཏུ་སྣང་། །སྐྲ་ནི་དེ་བཞིན་འཁྱིལ་བ་དང་། །མགོ་དང་དཔྲལ་བར་དར་བཅིངས་སྣང་། །རི་མོ་གཅིག་པ་རབ་ཏུ་གནས། །དེ་བཞིན་མགྲིན་པ་རིང་པ་དང་། །རྟག་ཏུ་གོས་དམར་ལ་དགའ་ཞིང་། །དགོད་ཅིང་གླུ་ནི་ལེན་པ་ཉིད། །ལན་འགའ་ཞིག་ནི་ཁྲོ་བ་
དང་། །སེམས་ནི་རྣམ་པར་གཡོ་བ་དང་། །རྩོད་པ་ལ་ནི་དགའ་བ་སྟེ། །འདི་འདྲའི་རབ་དྲེགས་མཐོང་ན་ནི། །མདུང་གི་ཕྱག་རྒྱ་བསྟན་པར་བྱ། །གཉིས་པ་ཉིད་ནི་འབད་པ་ཡིས། །དྲིལ་བུའི་ཕྱག་རྒྱ་བསྟན་པར་བྱ། །གཡོན་གྱི་ཕྱོགས་སུ་ལྡོག་པ་ནི། །ཕྱག་རྒྱའི་ལམ་ནི་ཡིན་པར་
བཤད། །ཐུང་ཞིང་བྱིན་པ་སྦོམ་པ་དང་། །རྟག་ཏུ་གོས་སེར་ལ་དགའ་ཞིང་། །ཕྲག་པ་དག་ན་གོས་ཀྱང་འཆང་། །དེ་འདྲའི་བུད་མེད་མཐོང་ན་ནི། །རྡོ་རྗེའི་ཕྱག་རྒྱ་བསྟན་བྱ་ཞིང་། །འབད་པ་ཡིས་ནི་གཉིས་པ་ཡང་། །དུང་གི་ཕྱག་རྒྱ་བསྟན་པར་བྱ། །གཡོན་ནས་ཡོངས་སུ་བཟློག་པ་
ནི། །ཕྱག་རྒྱའི་ལན་ནི་ཡིན་པར་བཤད། །བཅུ་བཞི་དེ་ཡི་དུས་ཡིན་ཏེ། །དེ་ཡི་ཁྱིམ་དུ་རྡོ་རྗེ་འདྲི། །ཤྲཱི་ཧེ་རུ་ཀ་ལཱ་མ་ཡི། །མཚན་ཉིད་གྱུར་པ་འདི་དག་ཡིན། །ལུས་ཀུན་ལ་ནི་བ་སྦུ་ཡོད། །མིག་ནི་གནག་ཅིང་སེར་བ་དང་། །སྦོམ་ཞིང་རྣམ་སྒྱུར་མི་བཟད་པ། །བཞིན་འཕེལ་ཆེ་
ཞིང་ཁ་ཆེ་ལ། །མ་མཆུ་རློ་ཞིང་ཁ་དོག་ནག །མིག་ཟླུམ་སྣ་ནི་ཉམས་པ་དང་། །རྟག་ཏུ་གླུ་ནི་མཁས་པ་དང་། །སྤྲིན་གྱི་མདོག་ཅན་ཡིད་འཕྲོག་པ། །འདི་འདྲའི་རབ་དྲེགས་མཐོང་ན་ནི། །གླུ་ཡི་ཕྱག་རྒྱ་བསྟན་པར་བྱ། །གཉིས་པ་ཡང་ནི་འབད་པ་ཡིས། །མདུང་གི་ཕྱག་རྒྱ་
བསྟན་པར་བྱ། །གཡོན་ནས་ཡོངས་སུ་བཟློག་པ་ནི། །ཕྱག་རྒྱའི་ལན་ནི་ཡིན་པར་བཤད། །ཚེས་གྲངས་བཅུ་གཅིག་དེ་ཡི་དུས། །ཁྱིམ་དུ་མཆེ་བ་འདྲི་བར་བྱེད། །རྡོ་རྗེ་ཕག་མོ་ལཱ་མ་ཡི། །མཚན་ཉིད་གྱུར་པ་འདི་དག་ཡིན། །མངོན་པར་བརྗོད་པའི་རྒྱུད་བླ་མའི་བླ་ལས་ལཱ་མའི་
མཚན་ཉིད་ཀྱི་ལེའུ་སྟེ་བཞི་བཅུ་རྩ་གཅིག་པའོ།། །།དེ་ནས་གཞན་ཡང་བཤད་བྱ་བ། །མཁའ་འགྲོ་རྣམས་ཀྱི་བརྔ་རྣམས་ཏེ། །གང་ཞིག་སྤུན་དག་སྲིང་མོ་རུ། །ཡང་དག་ཤེས་པར་འགྱུར་བའོ། །གང་ཞིག་ལག་གཡོན་སྟོན་པ་ནི། །གསོར་པོར་སྨྲ་བ་སྟོན་པ་ཡིན། །

གང་ཞིག་སྲིན་ལག་སྟོན་པ་ནི། །གསོང་པོར་སྨྲ་བ་ལན་འགྱུར་ཡིན། །གང་ཞིག་ལྟོ་བ་རྡེབས་པ་ནི། །བདག་ནི་བཀྲེས་པར་སྟོན་པ་ཡིན། །གང་ཞིག་དཔྲལ་བ་སྟོན་པ་ནི། །ནམ་མཁའ་ལས་ནི་འོངས་ཞེས་པའོ། །གང་ཞིག་ཁར་ནི་སོར་མོ་འཛུད། །ཟོས་ཟིན་ཞེས་ནི་
སྨྲ་བ་ཡིན། །གང་ཞིག་ལྕེ་ནི་བསྐྱོད་པ་དག །ཟའོ་ཞེས་ནི་སྨྲ་བ་ཡིན། །གང་ཞིག་པུས་མོ་ལ་རེག་པ། །ངལ་ལོ་ཞེས་ནི་སྟོན་པ་ཡིན། །གང་ཞིག་སོར་མོའི་རྩེ་ལ་རེག །ངལ་སོས་ཞེས་ནི་སྨྲ་བ་ཡིན། །གང་ཞིག་སོ་ནི་འཆའ་བྱེད་པ། །ཤ་ཟའོ་ཞེས་ནི་སྨྲ་བ་ཡིན། །
ལག་པ་གཡས་པ་སྟོན་པ་ནི། །འདི་ལྟར་གྱིས་ཞེས་སྟོན་པ་ཡིན། །གང་ཞིག་ཁྲོ་གཉེར་སྟོན་པ་ནི། །བཅིངས་སོ་ཞེས་ནི་སྨྲ་བ་ཡིན། །གང་ཞིག་མཁའ་ལྡིང་སྟོན་པ་ནི། །གྲོལ་ལོ་ཞེས་ནི་སྟོན་པ་ཡིན། །གང་ཞིག་ཁུ་ཚུར་སྟོན་པ་ནི། །དེ་ལ་པ་ཏ་ཏི་བསྟན་བྱ། །གང་
ཞིག་སྐྲ་ནི་སྟོན་པ་ལ། །རྣམ་པར་འགྱུར་བ་བལྟས་ནས་ནི། །ཁ་ཊྭཱཾ་ག་ནི་དེ་ལ་བསྟན། །གང་ཟིག་ཡན་ལག་བསྐྱོད་པ་དང་། །དེ་ལ་མཆེ་བ་བསྟན་པར་བྱ། །གང་ཞིག་ལག་པས་ལག་པ་སྟོན། །གཏོར་མ་ཟ་ཞེས་སྨྲ་བ་ཡིན། །གང་ཞིག་ལག་པ་གཡས་པ་སྟོན། །དེ་
ལྟར་གྱིས་ཤིག་སྨྲ་བ་ཡིན། །གང་ཞིག་རྣ་བ་ལ་རེག་པ། །གནས་པར་བྱ་ཞེས་སྟོན་པ་ཡིན། །གང་ཞིག་སེན་མོས་སེན་མོ་རེག །ཤི་ཡིས་ཁྱེར་ཞེས་བྱ་བ་ཡིན། །གང་ཞིག་ས་འདྲི་དཀྱིལ་འཁོར་དུ། །དེ་རིང་འཇུག་ཅེས་སྨྲ་བ་ཡིན། །གང་ཞིག་ནུ་མ་ལ་རེག་པ། །བདག་
གི་དུ་ནི་སྲུངས་ཞེས་བྱ། །གང་ཞིག་མཐེ་གཡོན་ས་ལ་འདྲི། །གཉེན་དག་སྲུངས་ཤིག་པ་རུ་བཤད། །གང་ཞིག་མིག་ནི་རྣམ་འཛུམས་པ། །དེ་ལྟར་བྱ་ཞེས་སྨྲ་བ་ཡིན། །གང་ཞིག་ཚིགས་ལ་རེག་ཁྱེད་པ། །བདེ་བར་ཉལ་ཞེས་སྨྲ་བ་ཡིན། །ཕོ་ཉ་མ་ནི་གང་ཡང་རུང་། །དེ་
དག་ཀུན་གྱིས་ཡང་དག་སྤྱད། །མངོན་པར་བརྗོད་པའི་རྒྱུད་བླ་མའི་བླ་མ་ལས་བརྔའི་ལེའུ་སྟེ་བཞི་བཅུ་རྩ་གཉིས་པའོ།། །།དེ་ནས་ཡན་ལག་ཕྱག་རྒྱ་ཡི། །མཚན་ཉི་དག་ཡིས་བཤད་པར་བྱ། །བུད་གང་སྤྱི་གཙུག་རེག་བྱེད་པ། །མགོ་བོ་དེ་ལ་བསྟན་པར་བྱ། །གང་

ཞིག་དཔྲལ་བ་སྟོན་པ་ནི། །དེ་ལམ་བུར་ཚོས་བསྟན་པར་བྱ། །གང་ཞིག་སོ་ནི་སྟོན་པ་ལ། །དེ་ལ་ལྕེ་ནི་བསྟན་པར་བྱ། །གང་ཞིག་མཆུ་ནི་སྟོན་བྱེད་པ། །དེ་ལ་དཔུང་པ་བསྟན་པར་བྱ། །གང་ཞིག་རྐེད་རྒྱབ་སྟོན་བྱེད་པ། །དེ་ལ་ས་ནི་བསྟན་པར་བྱ། །
གང་ཞིག་ནུ་མ་སྟོན་བྱེད་པ། །དེ་ལ་ཀོས་ཀོ་བསྟན་པར་བྱ། །གང་ཞིག་ལྟོ་བ་སྟོན་བྱེད་པ། །དེ་ལ་ལྟེ་བ་བསྟན་པར་བྱ། །གང་ཞིག་གསང་བ་སྟོན་བྱེད་པ། །དེ་ལ་ལིང་ག་བསྟན་པར་བྱ། །གང་ཞིག་བརླ་ནི་སྟོན་བྱེད་པ། །དེ་ལ་འོག་ནི་བསྟན་པར་བྱ། །གང་ཞིག་པུས་མོ་
སྟོན་བྱེད་པ། །དེ་ལ་བྱིན་པ་བསྟན་པར་བྱ། །གང་ཞིག་རྐང་པ་སྟོན་བྱེད་པ། །དེ་ལ་རྐང་མཐིལ་བསྟན་པར་བྱ། །གང་ཞིག་སོར་ཚིགས་སྙོན་བྱེད་པ། །དེ་ལ་སེན་མོ་བསྟན་པར་བྱ། །གང་ཞིགས་ནི་སྟོན་བྱེད་པ། །དེ་ལ་ནམ་མཁའ་བསྟན་པར་བྱ། །གང་ཞིག་ནམ་མཁའ་སྟོན་
བྱེད་པ། །དེ་ལ་ཉི་མ་བསྟན་པར་བྱ། །གང་ཞིག་ཆུ་བོ་སྟོན་བྱེད་པ། །དེ་ལ་རྒྱ་མཚོ་བསྟན་པར་བྱ། །མངོན་པར་བརྗོད་པའི་རྒྱུད་བླ་མའི་བླ་མ་ལས་ཡན་ལག་གི་ཕྱག་རྒྱའི་མཚན་ཉིད་ཀྱི་ལེའུ་སྟེ་བཞི་བཅུ་རྩ་གསུམ་པའོ།། །།དེ་ནས་གཞན་ཡང་རབ་བཤད་པ། །ཡན་
ལག་ཇི་བཞིན་ཕྱག་རྒྱའི་མཆོག །གང་ཞིག་ཤེས་པས་སྤུན་ནམ་ནི། །སྲིང་མོར་ཐེ་ཚོམ་མེད་འགྱུར་རོ། །སོར་མོ་གཅིག་ནི་སྟོན་པ་ཡིས། །ལེགས་པར་འོངས་ཞེས་སྨྲ་བ་ཡིན། །སོར་མོ་གཉིས་ནི་བསྟན་པ་ཡིས། །ལེགས་འོངས་ལན་ནི་སྨྲ་བ་ཡིན། །འདི་ནི་རྣལ་འབྱོར་མ་
ཀུན་གྱི། །ཡན་ལག་ཕྱག་རྒྱར་རབ་ཏུ་བཤད། །མཛུབ་མོ་གཉིས་བཀུག་མིག་གི་རྒྱ། །སྔགས་པས་གང་ལ་དེ་བསྟན་ཏེ། །དེ་མོད་ཇི་སྲིད་འཚོ་བའི་བར། །དབང་དུ་འགྱུར་བར་ཐེ་ཚོམ་མེད། །གང་ཞིག་གུང་མོ་སྟོན་བྱེད་པ། །དེ་ལ་མཛུབ་མོ་བསྟན་པར་བྱ། །གང་
ཞིག་སྲིན་ལག་སྟོན་བྱེད་པ། །དེ་ལ་ལྕེ་ནི་བསྟན་པར་བྱ། །གང་ཞིག་པ་ཏི་ས་སྟོན་པ། །དེ་ལ་མདུན་ནི་བསྟན་པར་བྱ། གང་ཞིག་སྤྱི་བོ་སྟོན་བྱེད་པ། །དེ་ལ་མཚམས་ཀྱི་མཐའ་བསྟན་བྱ། །གང་ཞིགས་ནི་སྟོན་བྱེད་པ། །དེ་ལ་མཁའ་ནི་བསྟན་པར་བྱ། །གང་ཞིག་ཁྲོ་

གཉེར་སྟོན་བྱེད་པ། །དེ་ལ་མཚམས་ནི་བསྟན་པར་བྱ། །གང་ཞིག་སོ་ནི་སྟོན་བྱེད་པ། །དེ་ལ་མཆུ་ནི་བསྟན་པར་བྱ། །གང་ཞིག་མགྲིན་པ་སྟོན་བྱེད་པ། །དེ་ལ་ཁ་ནི་བསྟན་པར་བྱ། །གང་ཞིག་དཔྲལ་བ་སྟོན་བྱེད་པ། །དེ་ལ་སྟེ་བ་བསྟན་པར་བྱ། །འདི་ནི་རྣལ་འབྱོར་
མ་ཀུན་གྱི། །རིམ་བཞིན་ཡན་ལག་ཕྱག་རྒྱ་ཡིན། །འདི་དག་རྟག་བསྟན་གསང་བ་པ། །ཡང་དག་ལྟ་བར་འགྲོ་བར་འགྱུར། །མངོན་པར་བརྗོད་པའི་རྒྱུད་བླ་མའི་བླ་མ་ལས་མཁའ་འགྲོ་མའི་ཡན་ལག་གི་ཕྱག་རྒྱའི་ལེའུ་སྟེ་བཞི་བཅུ་རྩ་བཞི་པའོ།། །།དེ་ནས་གཞན་
ཡང་བཤད་བྱ་བ། །མཁའ་འགྲོ་མ་ཡི་མཚན་ཉིད་དོ། །གང་གི་རིང་ནས་དཔའ་བོ་དང་། །དཔའ་མོ་སྲིང་མོར་ཤེས་འགྱུར་བའོ། །དམ་ཚིག་ཅན་གང་རྗེས་ཆགས་པ། །རྣལ་འབོར་ལོངས་སྤྱོད་ས་གཞི་ཡིན། །གཞིར་ནི་ས་གཞི་བྱས་ནས་སུ། །རྣལ་འབྱོར་པ་ཡི་སྡོམ་པ་
མཆོད། །གོ་བཟློག་པ་ཡིས་ལྟ་བ་ནི། །བཞིན་ནི་རྣམ་པར་འགྱུར་བ་ཉིད། །རྟག་ཏུ་བཞིན་གྱི་སྨིན་མ་གཡོ། །སྣ་ཚོགས་མྱུར་དུ་ཤེས་བྱ་བ། །དེ་བཞིན་མཁའ་འགྲོ་ལས་བྱུང་བའི། །རྣམ་སྒྱུར་འཁྱིམ་པར་ཤེས་བྱ་སྟེ། །རི་མོ་གསུམ་པ་ཡོངས་སུ་ཟླུམ། །མཁའ་འགྲོ་མ་
རྣམས་ངེས་འགྲོ་བའི། །དེ་ཡི་མཚན་མ་ཤེས་པར་བྱ། །གལ་ཏེ་ལྡོག་པར་གྱུར་ན་ནི། །སྔར་བཤད་དོན་ནི་བཏང་བར་འགྱུར། །དེ་ཡི་དངོས་ནི་འཇིག་གྱུར་པ། །རྡོ་རྗེ་ལྟ་བུར་གསལ་བ་ཡིན།། སྒྲ་ནི་ཁུ་བྱུག་སྐང་ལྟ་བུར། །གསལ་བདེ་ནི་རྟག་ཏུ་གྱུར། །འདི་ནི་མཚན་མའི་
ཁྱིམ་དུ་ནི། །རྡོ་རྗེ་ལྟ་བུ་མེ་ལོངས་བཅས། །རལ་གྲི་འདྲ་བའི་མེ་ལོང་བཅས། །ཕྱག་མཚན་མདུང་འདྲར་རྟག་ཏུ་འབྱུང་། །དེ་གསལ་མེ་ལོང་ཡིན་ཞེས་བྱ། །མཚན་མར་བྱས་པའི་གཟུགས་དག་ནི། །མཚན་ཉིད་འདི་དག་དང་ལྡན་པ། །འདི་ནི་མཁའ་འགྲོ་མ་རྣམས་ཀྱི། །
མཆོག་ཡིན་པར་ནི་ཤེས་པར་བྱ། །པོ་ཏཾ་གི་ཞེས་བྱ་བ་ནི། །གསོང་པོར་སྨྲ་བའོ། །པྲ་ཏི་པ་ཏཾ་གི་ཞེས་བྱ་བ་ནི། །གསོང་པར་སྨྲ་བའི་ལན་ནོ། །ག་མུ་ཞེས་བྱ་བ་ནི་འགྲོའོ་ཞེས་བྱ་བ་ཡིན་ནོ། །ལུཾ་ཀཾ་ཞས་བྱ་བ་ནི་འོང་ངོ་ཞེས་བྱ་བ་ཡིན་ནོ། །དེ་ཧི་ཞེས་བྱ་བ་ནི་ཟས་ཞེས་བྱ་བ་

ཡིན་ནོ། །གྲི་ཧ་ན་ཞེས་བྱ་བ་ནི་བྲམ་ཟེ་ཞེས་བྱ་བ་ཡིན་ནོ། །པི་ར་ཎཾ་ཞེས་བྱ་བ་ནི་སྙིང་ཉིད་དོ། །མར་ཎ་ཞེས་བྱ་བ་ནི་སྒྲ་ངན་ནོ། །གཱན་དྷ་ཞེས་བྱ་བའི་ཀར་ནི་ཀའོ། །ཤི་རོ་ནི་བརྫུན་ནོ། །ཀ་ར་ནི་ལྟོ་བའོ། །བ་ར་ནི་སྒྲའོ། །ཤྲ་ར་མ་ཎོ་ནི་རྣ་བའོ། །ཨ་
མྲི་ཏ་སྭཱ་ནི་བསྲུབས་པའོ། །ས་མ་ག་མ་ནི་མིའོ། །ཏ་ལི་ཀ་ནི་མཁའ་འགྲོ་མའོ། །ན་ར་ཀ་ནི་དཀྱིལ་འཁོར་རོ། །ཨ་མོ་ཀ་ནི་དུར་ཁྲོད་དོ། །ཀ་ལི་ཀ་ནི་སྒོའོ། །ཤྭ་ས་ནི་བྲམ་ཟེའི་རིགས་སོ། །པ་རི་དྷི་ནི་རྒྱལ་རིགས་སོ། །བི་ར་ཏི་ནི་རྗེའུ་རིགས་སོ། །ཀྲུར་ནི་དམངས་རིགས་སོ། །
ཨ་ན་ཏསྠཱ་ནི་སྨེ་ཤ་ཅན་ནོ། །པ་ཤུ་ལི་ཀ་ནི་ཁྱིམ་མོ། །ཊཱ་ཀ་ནི་སྲིང་མོའོ། །མེ་ལ་པ་ཀ་ནི་ཆུའོ། །གྲི་ཧ་ར་ཎ་ནི་རྡོ་རྗེ་ཆུ་གཏོང་བའོ། །ལྕེ་སོ་ལ་རེག་པ་ནི་ལྟོགས་པར་སྟོན་པའོ།།ཏྲི་ཤྣ་ནི་དྲིས་བསྒོ་བའོ། །ཀུ་ཏ་ནི་གནས་ཆེ་གེ་མོ་ནས་འོངས་སོ་ཞེས་བྱ་བའོ། །ཀི་ར་ན་ནི་མེ་ཏོག་གོ། །
ཏུ་མུ་ལ་ནི་རྒོད་པའོ། །ཏན་ཏ་ནི་ཆར་དབབ་པ་བཟློག་པའོ། ཏྲྀ་པ་ཏ་ནི་ཞུ་བའོ། །དྷུ་རྱོ་ནི་ཤེས་པའོ། །ནྲི་ཧ་ནི་སྤྲིན་ནོ། །དྷུ་པ་ནི་བདུག་པའོ། །ས་ནུ་ནི་རི་བོའོ། །ས་རི་ཏ་ནི་ཆུ་བོའོ། །ཨ་གུ་ལི་ནི་ཡན་ལག་གོ། །བ་ད་ན་ནི་གདོང་ངོ་། །ཛཱ་ཏི་ཀ་ནི་ལྕེའོ། །ཨན་ཏ་ན་ནི་སོའོ། །
པཀྵི་ནི་རྒྱལ་མཚན་ནོ། །ཚནྡོ་ནི་ཕྲེང་བའོ། །ཙ་ལ་ནི་རླུང་ངོ་། །པ་ཤུ་ནི་རི་དགས་སོ། །ཡན་ཏི་ནི་དཀྱིལ་འཁོར་རོ། །ས་ན་མ་ནི་བཞི་མདོའོ། །ཕལ་ཀུ་ཤཾ་ནི་སྐྱེ་བོའོ། །མ་ཧཱ་ཀྵ་ར་བ་ནི་ཕྱུགས་ཆེན་པོའོ། །ག་ནི་ས་སྐྱེས་སོ། །ན་ནི་མིའོ། །གོ་ནི་ཁྱུ་མཆོག་གོ། །མ་ནི་མ་
ཧེའོ། །བྷ་ནི་བཟའ་བའོ། །ཧ་ནི་རྣམ་གྲངས་སོ། །ཨདྷྱ་ནི་རྒྱལ་པོའོ། །ཁ་ལ་རེག་པ་ནི་ཟོས་སོ་ཞེས་པའོ། །ལྕེ་ལ་རེག་པ་ནི་ངོམས་སོ་ཞེས་པའོ། །ན་སྟི་ནི་སྙིང་པོའོ། །ཧྲི་ནི་ངོ་ཚའོ། །མེ་ཐུན་གྱིས་ཤིག་པའོ། །བརླ་ལ་རེག་པ་ནི་སྟོང་པའོ། །སྟེང་དུ་གཅིག་གོ། །
འོག་ཏུ་མེད་པའོ། །ཕྱག་རྒྱ་དང་རྒྱའི་ལན་ནོ། །དཔའ་བོའི་གསུང་གི་གསང་བའི་བརྡའོ། །མངོན་པར་བརྗོད་པའི་རྒྱུད་བླ་མའི་བླ་མ་ལས་མཁའ་འགྲོ་མའི་བརྡའི་ཆོ་གའི་ལེའུ་སྟེ་བཞི་བཅུ་རྩ་ལྔ་པའོ།། །།དེ་ནས་རྣལ་འབྱོར་རྒྱུད་དུ་ནི། །རྙེད་དཀའི་དམ་

ཚིག་ང་ཡིས་བཤད། །སྐྱེས་པའམ་བུད་མེད་གཡོན་ནས་འགྲོ། །འདོད་པའི་དངོས་གྲུབ་སྟེར་བར་བྱེད། །ཁྱིམ་དང་ཞིང་དུ་རྣམ་གནས་པ། །ཤིན་ཏུ་རིང་ཡང་ཤེས་པར་འགྱུར། །ཧེ་རུ་ཀ་ལས་སྦྱོར་གཞན་མེད། །སློབ་དཔོན་རྣལ་འབྱོར་མ་ཉིད་ནི། །རྒྱུད་འདི་རུ་ནི་སྒྲུབ་པ་པོ། །
ལེགས་པར་གྱུར་པ་ཉིད་ཡིན་ཏེ། །བརྙས་མི་བྱ་ཞིང་སྤང་མི་བྱ། །ནུས་པ་ཡིས་ནི་མཆོད་པར་བྱ། །ཕོ་ཉ་མེ་བརྒྱད་འདི་དག་ནི། །མོས་དག་དད་པ་འཕེལ་བྱེད་པ། །རྟག་པར་དངོས་གྲུབ་རྣམས་ཀྱི་རྒྱུ། །དམ་ཚིག་རྣམས་ཀྱང་སྐྱོད་བའོ། །ལྷ་མོ་གཞན་དག་ཀུན་སྦྱོར་བའི། །འདོད་
ལ་རྨོངས་པར་གྱུར་པ་དང་།།གཉིས་སུ་མེད་དང་ཐོགས་མེད་དང་། །དམ་ཚིག་སྤྱད་པར་སྤྱད་པ་དང་། །བུད་མེད་དབང་ཕྱུག་ཤིན་ཏུ་སྤྱོར། །ཚངས་པ་སྤྱོད་པ་དེ་བཞིན་གཞི། །ཁྲོ་མེད་རྒྱུན་གྱི་ཀུན་ཏུ་སྤྱོད། །འདི་བརྒྱད་དམ་ཚིག་ཀུན་སྤྱོད་ཡིན། །སྒྲུབ་པ་ལ་ནི་གནས་པ་ཡི། །
སྒྲུབ་པ་པོ་ཡིས་རྟག་ཤེས་བྱ། །རྒྱུད་ཀུན་གྱི་ནི་ཐུན་མོང་སྟེ། །རྒྱུ་མེད་པ་ནི་གཞོམ་མི་བྱ། །དད་པ་ཉིད་ཀྱིས་བླང་བྱ་ཡི། །མིག་དང་ལག་པས་མ་ཡིན་ནོ། །གསང་བ་འདི་ནི་མི་བསྟན་ཅིང་། །རབ་ཏུ་འབད་དེ་སྦ་བར་བྱ། །བློ་ལྡན་མཐེ་ཆུང་བསྐྱོད་པར་ནི། །ཕོ་ཉ་མོ་རྣམས་ཡང་དག་
གནས། །དག་དང་མ་དག་འདྲེས་པ་སྟེ། །སྒྲུབ་པ་པོ་ནི་གསུམ་དུ་གནས། །མཉེས་བྱེད་རྣམ་པར་དག་པ་དང་། །གསལ་བྱེད་ཡོན་ཏན་ལྡན་པའི་མིའོ། །ཡུལ་ཡུལ་དུ་ནི་དཀའ་ཐུབ་ཅན། །ཕོ་ཉའི་གཟུགས་ཀྱི་མཚན་མ་བརྟག །ཕོ་ཉ་རལ་གྲི་སོ་འདྲ་ཞིང་། །དག་བྱེད་བསོད་
ནམས་འཕེལ་བྱེད་ཡིན། །དེ་བཞིན་ཕོ་ཉ་ལེགས་འདྲེས་པས། །སྒྲུབ་པ་པོ་ཡིས་དངོས་གྲུབ་ཐོབ། །བཟླས་མཆོད་བསམ་གཏན་མེད་པར་ཡང་། །མྱུར་བ་ཉིད་དུ་འགྲུབ་པར་འགྱུར། །སྔགས་དང་ཕྱག་རྒྱ་སྒྲུབ་པ་པོས། །མཆོད་པ་ཉིད་ལ་རབ་ཏུ་འཇུག །འདི་ལས་གཞན་
པའི་མཆོད་མེད་དེ། །དེ་ལྟར་བསྟན་བཅོས་ངེས་པ་ཡིན། །ཕོ་ཉའི་ལམ་ལ་དགའ་བ་དང་། །སྒྲུབ་པ་པོ་ནི་དངོས་གྲུབ་བརྩོན། །རིག་སྔགས་ཕྱག་རྒྱར་ཡང་དག་ལྡན། །ཟས་ལ་རྟག་ཏུ་སྤྱད་པར་བྱ། །སྒྲུབ་པ་པོ་ནི་ལེགས་པ་རུ། །མཉམ་པར་བཞག་པའི་རིགས་རྣམས་ནི། །

ཀུན་ལ་ཉེ་བར་སྤྱད་བྱ་ཞིང་། །བཟའ་མིན་པར་ནི་མི་བརྟག་གོ། །འདི་ཉིད་དུ་ནི་དེ་དབྱེར་མེད། །ཕོ་ཉ་མོ་ཡི་སྒྲུབ་པ་ཉིད། །དངོས་གྲུབ་ཆོ་ག་ལ་སྤྱོད་ཚེ། །ཕོ་ཉ་གཅིག་པུ་ཁོ་ན་ཡིན། །བྱང་ཆུབ་ཕྱོགས་ཀྱི་དངོས་གྲུབ་ནི། །སྒྲུབ་པ་དག་དང་ཉེ་བ་དང་། །བླ་
མ་བརྒྱུད་རིམ་གྱིས་ཐོབ་པའི། །དབང་བསྐུར་བས་ནི་སྔགས་ལེགས་ལྡན། །ཕོ་ཉ་རྣམས་སུ་ཡང་དག་བཤད། །ཕྱག་རྒྱ་ལེགས་སྦྱོར་དང་ཚུལ་དང་། །ཆགས་མེད་གཏོང་དང་ཚུལ་ཁྲིམས་དང་། །ཡེ་ཤེས་རྒྱུ་སྐྱེས་ཡང་དག་རྫོགས། །སེམས་ཀྱི་བདག་ཉིད་ནང་པར་ལངས། །
ལུས་ཀྱི་བྱ་བ་ཀུན་བྱས་ཏེ། །ལུས་ལ་ཤིན་ཏུ་མཚོན་ཆ་ནི། །ལུས་ལ་གནས་པར་ཀུན་ཏུ་སྤྱད། །དག་བྱེད་བྱས་པའི་ལུས་ཀྱིས་ནི། །རྟག་ཏུ་སྔགས་ནི་བརྗོད་པར་བྱ། །རྣལ་འབྱོར་གནས་རྣམས་ངེས་བསྟན་ཅིང་། །མཚོན་ཆ་རྣམས་ནི་འགོམ་མི་བྱ། །དམ་ཚིག་ཅན་ལ་
ཁྲོ་མི་བྱ། །མངོན་པར་བརྩོན་ལས་འདའ་མི་བྱ། །དེ་དང་ལྷན་ཅིག་བདེ་བར་བྱ། །བདག་གི་དོན་དང་གཞན་དོན་དུ། །དམ་ཚིག་སྤྱོད་པ་ཉིད་དུ་བྱ། །འདི་ལ་ལྷན་ཅིག་ལོངས་སྤྱོད་བྱ། །མཚན་མོ་རྟག་པར་ནམ་མཁའི་གོས། །གནག་དང་དམར་བར་རྟག་འགྱུར་བྱ། །
སྲོག་ཆགས་ཡན་ལག་ལས་བྱུང་གྱོན། །བདེ་བ་འདོད་པས་བདེ་ཐོབ་འགྱུར། །མཆོད་ཕྱིར་ཐོགས་ནི་ཡོངས་སྤང་གཙང་། །ཤྲཱི་ཧེ་རུ་ཀས་བྱིན་བརླབས་པས། །ཕྱག་རྒྱ་ལྔ་དང་ཡང་དག་ལྡན། །དུས་ཀུན་ཏུ་ནི་ཡང་དག་ལྡན། །རིགས་དང་རིགས་མིན་ངོར་མི་བལྟ། །སྤྱི་གཙུག་
ལ་སོགས་བཅིང་པ་སྤང་། །ཕོ་ཉ་གཙང་སྦྲ་དང་པོ་ཡིན། །གཉིས་པ་སྦྱོར་བ་ཡིན་པར་འདོད། །ཟས་གཅིག་ཏུ་ནི་ཟ་བ་ཉིད། །གཙང་སྦྲ་གསུམ་པ་ཡིན་པར་བཤད། །གཙང་སྦྲ་འདི་དག་རབ་སྦྱངས་པས། །གཙང་མའི་དག་པའི་རིམ་ཐོབ་ན། །དངོས་གྲུབ་གང་ལས་
འབྱུང་མི་འགྱུར། །དེ་ཉིད་བསྡུས་ལས་གང་གསུངས་དང་། །དེ་བཞིན་བདེ་མཆོག་ལས་གང་གསུངས། །གསང་བའི་རྒྱུད་ལས་ཡང་དག་བཤད། །དེ་བཞིན་དཔལ་མཆོག་དང་པོ་དང་། །རྡོ་རྗེ་འཇིགས་བྱེད་ཉིད་ལས་གསུངས། །བཟླས་དང་བརྟུལ་ཞུགས་སོགས་པ་འགྲུབ། །

དེ་འདིར་བསམ་གཏན་ཙམ་གྱིས་ནི། །སྔགས་པས་སྐད་ཅིག་གིས་འགྲུབ་འགྱུར། །རྣལ་འབྱོར་ལམ་ལ་དགའ་བས་ཀྱང་། །གཙང་སྦྲ་འདི་ནི་ཡང་དག་སྤྱད། །གསོད་ནམས་གཙང་སྦྲ་ལས་བྱུང་གང་། །སྒྲུབ་པའི་ཡོན་ཏན་རྒྱ་ཆེན་པོ། །སྟོང་ཕྲག་གཅིག་པའི་ཞལ་མིན་པར། །
ཁ་གཅིག་གིས་ནི་བརྗོད་མི་ནུས། །དཔལ་ལྡན་ཁྲག་འཐུང་ཡེ་ཤེས་ཆེ། །རྣམ་དག་མཚན་ཉིད་ཀུན་སྒྲུབ་པ། །བདེ་བའི་བསོད་ནམས་ཆུ་འཐུང་པ། །དག་བྱེད་སྡིག་པ་འཇིག་བྱེད་ཡིན། །རེག་པ་དང་ནི་སྨྲས་པས་ཀྱང་། །སྡིག་པ་ཀུན་ལས་རྣམ་གྲོལ་ཞིང་། །ལུས་ངག་སྐྱོན་ནི་
མེད་པ་ཡི། །གང་ཞིག་སྤྱོད་པ་བྱེད་པ་ཡི། །མི་མཚོག་སྡིག་པ་ཐམས་ཅད་ནི། །རྣམ་དག་བདག་ཉིད་བདེ་གཤེགས་ཀྱི། །ས་རྣམས་ཀྱང་ནི་འཐོབ་པར་འགྱུར། །སྐྱེ་ཞིང་སྐྱེ་བར་དེ་བཞིན་གཤེགས། །རིགས་འགྱུར་ཆོས་ལྡན་རྒྱལ་པོར་འགྱུར། །དེ་ལྟར་རྟག་ཏུ་མཆོད་
བྱས་ནས། །དད་པ་ཡིས་ནི་གཏོར་མ་སྦྱིན། །དེ་ནས་མཆོད་པ་རྣམ་དག་པས། །མྱ་ངན་འདས་ལས་བྱུང་དཔའ་བོ། །དེ་བཞིན་བདག་ཉིད་མཆོད་པ་དང་། །སངས་རྒྱས་ཀུན་ཚོགས་སྲས་བཅས་དང་། །དཔའ་བོ་ཀུན་དང་རྣལ་འབྱོར་མ། །བརྟན་པ་དག་དང་གཡོ་བ་དང་། །
སྤུན་གྱི་མཆོད་པའི་དུས་འཛིན་པ། །ཟླ་བའི་དུས་ལ་གནས་པ་ཡི། །སྤུན་དང་བུ་དག་ལྷན་ཅིག་ཏུ། །བདེ་དང་སྡུག་བསྔལ་ཀུན་འབྱུང་བ། །སྔགས་དང་དེ་བཞིན་ཕྱག་རྒྱ་དང་། །ཡེ་ཤེས་དེར་ནི་བསྟན་མི་བྱ། །དག་བྱེད་ཟས་ལ་སྤྱོད་པ་ནི། །རྟག་ཏུ་དམ་ཚིག་སྤྱོད་བྱས་
འགྱུར། །གསང་སྔགས་སུ་ལའང་སྦྱིན་མི་བྱ། །མན་ངག་རྣམ་པར་ཉམས་མི་བྱ། །དམ་ཚིག་གནས་ལ་ཅི་རིགས་པར། །མན་ངག་རྣམས་ཀྱང་སྦྱིན་པར་བྱ། །ཕོ་ཉ་མ་གཏོགས་གཞན་དག་ལ། །འདོད་པ་རྨོངས་པས་འགྲོ་མི་བྱེད། །རྟག་ཏུ་ཕོ་ཉ་ཆགས་བྲལ་བ། །མི་
འདའ་བ་ཡིས་ལོངས་སྤྱོད་བྱ། །སྐྱེ་གནས་དམན་ལ་མི་གནས་པ།།བསྙེན་བཀུར་ཉིད་ནི་བྱ་བ་མིན། །མ་དང་སྲིང་མོ་བུ་མོ་དང་། །ཆུང་མ་ཕོ་ཉ་མོ་ཉིད་གནས། །འཁོར་ལོའམ་དེ་བཞིན་གྲུབ་པ་ལ། །དཀའ་བ་ངེས་པར་ཟད་པར་འགྱུར། །མཆོག་དང་ཐ་མ་ལྷན་ཅིག་འགགས་

ཏེ་ལྟར་རྫས་ནི་རྣམ་ངེས་ཡིན། །རྣལ་འབྱོར་པ་རྟག་གཡོན་ནས་སྤྱོད། །རྐང་པ་གཡོན་པ་སྔོན་དུ་འདོར། །ལག་པ་གཡོན་པ་ཡོངས་སུ་བསྒྱུར། །གཡོན་གྱི་ཕྱེད་ནི་རབ་མཆོད་བྱེད། །ལུས་ནི་གཡོན་ནི་རྣམ་པར་གནོན། །གཡོན་པ་ཡིས་ནི་ཚིམ་དང་ཟ། །བརྟུལ་
ཞུགས་མཉམས་བརྟུལ་ཞུགས་རྫོགས། །སྒྲུབ་པ་པོ་ནི་དམ་ཚིག་བརྩོན། །དམ་ཚིག་རིགས་ལ་སྤྱོད་པ་དང་། །ལྷན་ཅིག་ཟས་ལ་སྤྱོད་པར་བྱེད། །རིགས་ལྔ་ལ་ནི་ཀུན་སྤྱོད་པའི། །རིགས་ནི་རྣམ་པ་བཞི་རུ་བསྒྲགས། །རིགས་གཅིག་ལ་ནི་ཀུན་སྤྱོད་པའི། །རྣལ་འབྱོར་བསྒྲུབ་
ལ་རབ་ཏུ་མཆོད། །བ་ལང་ཤ་དང་རྟ་ཤ་དང་། །ཁྱི་ཤ་དག་དང་སྣ་ཚོགས་པས། །དཀྱིལ་འཁོར་གྲུ་གསུམ་བྱས་ནས་ནི། །སངས་རྒྱས་དག་ཀྱང་ངེས་པར་འཇིག །དེ་བཞིན་དཔའ་བོ་རྣམས་ཀྱི་ཟས། །སྔགས་པས་ཕྱག་རྒྱར་ཡང་དག་ལྡན། །ཤྲཱི་ཧེ་རུ་ཀའི་སྤྲུལ་པ་ཡི། །
ཉེར་སྤྱོད་བསྟན་བཅོས་ཀུན་ལ་བརྟག །རྟག་ཏུ་དེ་དག་གཟུང་ཞིང་བསྲུང་། །ལས་རྣམས་དག་ནི་ཐམས་ཅད་ལ། །བགེགས་མེད་ཇི་བཞིན་འགྲུབ་འགྱུར་བར། །འདིར་ནི་གཞན་དག་འགྱུར་མ་ཡིན། །འདི་ནི་ཕོ་ཉ་མཆོག་བཟང་པོ། །བརྩོན་ཞིང་ལྷན་ཅིག་ལྡན་པར་ཡིན། །མ་
ཆགས་དགའ་བའི་ལོངས་སྤྱོད་རྫོགས། །རྣལ་འབྱོར་རྫས་ཀྱི་རྣམ་དབྱེ་ཉིད། །བླ་མའི་མན་ངག་ལ་དགའ་ཞིང་། །དེ་ཡི་དོན་ནི་མཆོག་མཚུངས་པའོ། །སྤུན་དང་ཡང་ན་ཕ་དང་ནི། །བདག་པོ་ཉིད་དུ་སྐད་ཅིག་མཐོང་། །ལྕེ་སྦོམ་མིག་ནི་དམར་སེར་ལ། །རྩུབ་ཅིང་སྤུ་ནི་དམར་
སེར་ཡིན། །དངོས་གྲུབ་ཀུན་གྱི་ཐུན་མོང་དུ། །བཟླས་དང་བརྟུལ་ཞུགས་ལ་རྟག་དགའ། །དྲན་པ་དང་ནི་ཡང་དག་ལྡན། །ཕོ་ཉ་ལ་སོགས་གནས་དང་བཅས། །མཁའ་འགྲོ་མ་མཆོག་ཉི་ཤུ་བཞི། །སྤྱོད་དང་གྲོལ་བའི་འབྲས་རབ་སྟེར། །འདོད་པའི་དོན་ཀུན་སྒྲུབ་བྱེད་
པའི། །རྩ་བའི་སྔགས་ནི་རྟག་ཏུ་ཟློས། །རྒྱུ་དང་མི་རྒྱུའི་འཇིག་རྟེན་གསུམ། །རྣལ་འབྱོར་འབྲས་བུ་རབ་སྟེར་བ། །གསང་སྔགས་འདི་ལས་བྱུང་བ་ཡིན། །སྔགས་དང་ཕྱག་རྒྱར་ཡང་དག་ལྡན། །ཕྱག་རྒྱ་དང་བྲལ་གསང་སྔགས་ནི། །ལུས་ཅན་རྣམས་ལ་བྱིན་མི་རློབ། །ཇི་

སྲིད་འགྲོ་བའི་བྱ་བ་དག །ཤིན་ཏུ་སྦྱོར་བས་རྟོགས་པར་བྱ། །འདོད་པའི་དོན་ཀུན་སྒྲུབ་བྱེད་པ། །རྣལ་འབྱོར་པ་ལ་གང་ཞིག་སྡང་། །ཁྱི་ཡི་སྐྱེ་གནས་བརྒྱར་སྐྱེ་སྟེ། །སྨེ་ཤ་ཅན་དུ་སྐྱེ་བར་འགྱུར། །དཔེར་ན་ལ་ལ་མར་འདོད་པས། །འབད་པས་ཆུ་ནི་བསྲུབས་གྱུར་ཀྱང་། །
མར་སར་འབྱུང་མར་མི་འགྱུར་གྱི །ལུས་ཉོན་མོངས་པ་ཁོ་ནར་ཟད། །འཛིན་ཅིང་མཆོད་པར་བྱེད་པ་ནི། །འཚོ་བའི་ཐབས་ཀྱི་རྒྱུར་གྱུར་པའི། །རྣལ་འབྱོར་གཞན་ལ་སྟེན་པ་ནི། །གཞན་དུ་དེ་བཞིན་དོན་མེད་འགྱུར། །རྣལ་འབྱོར་ཆེ་མཆོག་དཔའ་བོ་ནི། །ཡུལ་ཕྱོགས་
གང་ན་གནས་གྱུར་པ། །རིགས་ངན་ཀླ་ཀློ་ཡིན་ན་ཡང་། །ཡུལ་དེ་ཡོངས་སུ་བརྟགས་པ་ཡིན། །སེམས་ཅན་རྗེས་སུ་བཟུང་བའི་རྒྱུར། །ད་རུང་རང་ནི་རྟག་ཏུ་གནས། །མངོན་པར་བརྗོད་པའི་རྒྱུད་བླ་མའི་བླ་མ་ལས་ཕོ་ཉའི་གྲངས་ཀྱི་ལེའུ་སྟེ་བཞི་བཅུ་རྩ་དྲུག་པའོ།། །།
དེ་ནས་གཞན་ཡང་བཤད་བྱ་བ། །མཁའ་འགྲོ་མ་ཡི་སྙིང་པོ་མཆོག །དཔའ་བོ་རྣམས་ཀྱི་ཁྱད་པར་ནི། །གང་ཞིག་དྲན་པ་ཙམ་གྱིས་ནི། །འཇིག་རྟེན་གསུམ་པོ་གཡོ་བྱེད་ཅིང་། །རྗེས་སུ་དྲན་པ་ཙམ་གྱིས་ནི། །ཡང་དག་དངོས་གྲུབ་རིམ་གྱིས་སྟེར། ཨོྃ་སརྦ་བུདྡྷ་ཌཱ་ཀི་ནཱི་ཡེ་བཛྲ་
ཝརྞྞ་ནཱི་ཡེ་ཧུྃ་ཧཱུྃ་ཕཊ་སྭཱ་ཧཱ། གསང་སྔགས་འདི་ནི་གསང་སྔགས་ཆེ། །ལས་རྣམས་ཐམས་ཅད་བྱེད་པའི་མཆོག །སྔགས་ཆེན་བཀླགས་པས་འགྲུབ་པ་སྟེ། །འདོད་པ་ཐམས་ཅད་འགྲུབ་པ་ཡིན། །མཁའ་འགྲོ་མ་དང་རྣལ་འབྱོར་མ། །དུམ་སྐྱེས་མ་དང་ལཱ་མའང་དེ། །ཨོྃ་ཧྲཱིཿཧ་ཧ་ཧུྃ་
ཧཱུྃ་ཕཊ། གསང་སྔགས་འདི་ནི་གསང་སྔགས་ཆེ། །ལས་རྣམས་ཐམས་ཅད་བྱེད་པའི་མཆོག །འདི་ནི་བཀླགས་པ་ཙམ་གྱིས་འགྲུབ། །གསང་སྔགས་ཀུན་གྱི་གསང་སྔགས་གཙོ། །ཐོད་པའི་དུམ་བུ་ལ་སོགས་པ། །དཔའ་བོ་ཀུན་གྱི་སྙིང་པོ་མཆོག །གསང་སྔགས་དེ་དག་
མཆོག་དམ་པ། །འདོད་པའི་དོན་ཀུན་གྲུབ་བྱེད་ཡིན། །བླ་མ་ལས་ཀྱང་བླ་མ་སྟེ། །དཔའ་བོའི་སྡོམ་པ་མཆོག་ཡིན་ནོ། །འདི་ནི་ཀུན་གྱི་གསང་སྔགས་ཏེ། །འདི་ནི་སྔགས་སུ་གྲགས་པ་ཡིན། །ས་འོག་དང་ནི་མཐོ་རིས་དང་། །ཇི་ལྟར་མཚམས་ཀྱང་དེ་བཞིན་ཏེ། །གང་ཡང་

ཇི་བཞིན་ལས་རྣམས་ཀྱིས། །འཇིག་རྟེན་གསུམ་པོ་འགྲུབ་པ་ཡིན། །དེ་ཡིས་ཐམས་ཅད་གྲུབ་ནས་ནི། །གསང་སྔགས་མཆོག་ནི་བླ་མེད་པས། །འཇིག་རྟེན་གསུམ་པོ་འགྲུབ་པ་ཡིན། །གང་གིས་བླ་ན་མེད་པ་དག །སྒྲུབ་པ་པོས་ནི་ཐམས་ཅད་འགྲུབ། །མཁའ་
འགྲོ་མ་དང་དཔའ་བོ་ཀུན། །མདོར་བསྡུས་རྒྱས་པར་མ་ཡིན་ནོ། །རི་མོ་མཛེས་པར་བྲིས་ནས་ནི། །སྣ་ཚོགས་མེ་ཏོག་འབྲས་བུར་ལྡན། །དེ་ཡི་སྟེང་དུ་དཀྱིལ་འཁོར་བསྒོམ། །མཁའ་འགྲོ་མ་དང་ལཱ་མ་དང་། །རྣལ་འབྱོར་མ་དང་དུམ་སྐྱེས་མ། །དཔའ་བོ་དང་ནི་དཔའ་མོ་ཉིད། །
ཧ་ཧ་ཧེ་ཧེ་ཞེས་བཞད་པ། །ཉི་ཤུ་རྩ་བཞི་དཔའ་བོའི་རིགས། །མཁའ་འགྲོ་མ་ཡི་དྲ་བའི་སྡོམ། །སྔར་བཤད་དཔའ་བོ་དཔའ་བའི་མཆོག །དཔའ་བོའི་མཆོག་ནི་ཐམས་ཅད་ཉིད། །ཉི་ཤུ་རྩ་བཞི་དཔའ་བོ་རྣམས། །དེ་ཡིས་འགྲོ་བ་གྲངས་མེད་ཁྱབ། །དཔའ་བོ་དང་ནི་
མཁའ་འགྲོ་ཉིད། །རྣལ་འབྱོར་མ་དང་ལཱ་མ་དང་། །དུམ་སྐྱེས་མ་དང་དེ་བཞིན་ཏེ། །འཁོར་ལོའི་གནས་སུ་རྣམ་པར་བལྟ། །ལས་རྣམས་ཐམས་ཅད་འགྲུབ་བྱེད་ཅིང་། །འཁོར་ལོར་བཞུགས་ལ་རྟག་ཏུ་མཆོད། །ལེགས་པར་མཉམ་བཞག་འདོད་པ་འགྲུབ། །སྔར་
བཤད་ཆོ་ག་བཞིན་བཟླས་ཤིང་། །མཁའ་འགྲོ་མ་ཡི་དྲ་བའི་སྡོམ། །བསམས་པས་འཁོར་ལོ་ཆེན་པོ་ཡི། །དངོས་གྲུབ་ཀྱང་ནི་ཐམས་ཅད་འགྲུབ། །སངས་རྒྱས་བྱེ་བས་གསུངས་པ་སྟེ། །མཁའ་འགྲོ་མ་ནི་རེ་རེ་ལ། །འཁོར་གྱི་གྲངས་ཀྱང་བྱེ་བ་སྙེད། །རྣལ་འབྱོར་མ་
དང་ལཱ་མ་དང་། །དུམ་སྐྱེས་མ་ནི་ཁྱད་པར་དུ། །དངོས་གྲུབ་ཐམས་ཅད་བྱེད་པ་དགེ། །མངོན་པར་བརྗོད་པའི་རྒྱུད་བླ་མའི་བླ་མ་ལས་མཁའ་འགྲོ་མ་དང་དཔའ་བོའི་ལས་ཀྱི་རིམ་པ་སྒྲུབ་པ་རྣལ་འབྱོར་མ་དང་དཔའ་བོ་གཉིས་སུ་མེད་པའི་སྙིང་པོའི་ལེའུ་སྟེ་བཞི་བཅུ་རྩ་བདུན་པའོ།། །།
དེ་ནས་གཞན་ཡང་བཤད་བྱ་བ། །སྐུ་གཟུགས་རི་མོའི་མཚན་ཉིད་ནི། །དུང་ཆེན་དག་ནི་ཁོ་ན་ལས། །མཁས་པས་གཟུགས་ནི་བསྒྲུབ་བྱ་སྟེ། །མཚན་ཉིད་ཐམས་ཅད་ཡོངས་སུ་རྫོགས། །ཡན་ལག་དང་ནི་ཉིང་ལག་མཆོག །མོས་པའི་ཡིད་ནི་སྔོན་འགྲོ་བའི། །རྣལ་འབྱོར་

པས་ནི་གཟུང་ཞིང་བསྒྲུབ། །དྲི་ཆེན་ཆུ་དང་རཀྟ་དང་། །ཤུ་ཀྲར་བཅས་པས་མཆོད་པར་བྱ། །ན་ར་དཔལ་ཆེན་བདུག་སྤོས་ནི། །དཔའ་བོའི་ལས་ཀྱི་སྒྲུབ་པ་སྟེ། །བླ་མ་ཡི་ནི་གོ་འཕང་འགྲུབ། །དེ་ནས་བདག་ཉིད་མཆོད་བྱས་ཏེ། །འདོད་པ་ཐམས་ཅད་འཐོབ་འགྱུར་ཞིང་། །
རྒྱལ་པོའི་བུད་མེད་རྙེད་པར་འགྱུར། །ཇི་ལྟའི་ལས་ཀྱི་རྗེས་འབྲངས་ནས། །ལག་པའི་མཆོད་པ་རབ་ཏུ་བྱ། །པགས་ཆེན་རི་མོ་བྲིས་ནས་ནི། །སྒྲུབ་པ་པོ་ཡིས་མཉམ་བཞག་ན། །ཞག་བདུན་གྱིས་ནི་འགྲུབ་འགྱུར་ཏེ། །ཐེ་ཚོམ་མེད་པར་རྣམ་པར་སྤྱོད། །རྣལ་འབྱོར་མ་
དང་བླ་མ་མཆོད། །མཁའ་འགྲོའི་གནས་སུ་དེ་བཞིན་སྐྱེ། །དེས་ནི་བདེ་བ་རྙེད་ནས་ཀྱང་། །ལས་ནི་རྟག་ཏུ་བྱེད་པར་འགྱུར། །རྟག་ཏུ་བླ་མ་མཆོད་ནས་ནི། །དེ་ཡི་དངོས་གྲུབ་མྱུར་དུ་འགྲུབ། །མཁའ་འགྲོ་མ་ནི་སྒྲུབ་པ་ཡིས། །གླང་པོའི་པགས་ལ་སྐུ་གཟུགས་བྲི། །
རྣལ་འབྱོར་མ་ཡི་སྒྲུབ་པ་ཡིས། །བ་ལང་པགས་ལ་རི་མོ་བྲི། །མཁའ་སྤྱོད་དག་ནི་སྒྲུབ་པ་ཡིས། །རྟ་ཡི་པགས་ལ་རི་མོ་བྲི། །ས་ལ་སྤྱོད་པའི་སྒྲུབ་པ་ཡིས། །མ་ཧེའི་པགས་ལ་རི་མོ་བྲི། །ས་འོག་སྤྱོད་པའི་སྒྲུབ་པ་ཡིས། །ཕག་གི་པགས་ལ་རི་མོ་བྲི། །གནོད་སྦྱིན་
མོ་ནི་སྒྲུབ་པ་ཡིས། །ཤིང་སྤང་ལེབ་ལ་སྐུ་གཟུགས་བྲི། །ལྷ་ཡི་བུ་མོ་སྒྲུབ་པ་ཡིས། །ཙམ་པའི་སྤང་ལེབ་སྐུ་གཟུགས་བྲི། །ཀླུ་མོ་སྒྲུབ་པ་དག་གིས་ནི། །ཀླུ་ཤིང་སྤང་ལེབ་རི་མོ་བྲི། །མི་ནི་བསྒྲུབ་པར་འདོད་པ་ཡིས། །དུར་ཁྲོད་གོས་ལ་སྐུ་གཟུགས་བྲི། །ཕ་རོལ་བལྟ་
བའི་སྒྲུབ་པ་དག །བོང་བུའི་པགས་ལ་སྐུ་གཟུགས་བྲི། །ནོར་རྣམས་བསྒྲུབ་པར་འདོད་པ་ཡིས། །བྱི་བའི་པགས་ལ་སྐུ་གཟུགས་བྲི། །ཆང་ནི་འགུགས་པར་འདོད་པ་ཡིས། །སྤྲེའུའི་པགས་ལ་སྐུ་གཟུགས་བྲི། །ཁྲག་ནི་འགུགས་པར་འདོད་པ་ཡིས། །ཐོད་པ་ལ་ནི་སྐུ་གཟུགས་
བྲི། །ས་བོན་འགུགས་པར་འདོད་པ་ཡིས། །ཕུག་རོན་པགས་ལ་སྐུ་གཟུགས་བྲི། །ལྷ་ནི་འགུགས་པར་འདོད་པ་ཡིས། །ཐང་ཤིང་སྤང་ལེབ་སྐུ་གཟུགས་བྲི། །གྲོང་ཁྱེར་འགུགས་པར་འདོད་པ་ཡིས། །ཅེ་སྤྱང་པགས་ལ་སྐུ་གཟུགས་བྲི། །ཞི་བའི་ལས་ལ་བྲམ་ཟེ་མོ། །ཟླ་

མཚན་བྱུང་དུས་གོས་ལ་བྲི། །དེས་ན་ཞི་བར་གྱུར་པ་ཡིན། །རྒྱས་པ་རྒྱལ་རིགས་མོ་ཡི་ནི། །ཟླ་མཚན་བྱུང་དུས་གོས་ལ་བྲི། །དབང་ལ་རྗེའུ་རིགས་མོ་ཡི་ནི། །ཟླ་མཚན་བྱུང་དུས་གོས་ལ་བྲི། །མངོན་སྤྱོད་ལ་ནི་དམངས་རིགས་ཀྱི། །ཟླ་མཚན་བྱུང་དུས་གོས་ལ་
བྲི། །བརྒྱལ་བར་བྱ་བ་དག་ལ་ནི། །རྒྱལ་མཚན་གོས་ལ་རི་མོ་བྲི། །རེངས་པར་བྱ་བ་རྡོ་ལེབ་སྟེ། །དགར་བ་ལ་ནི་རྔ་མོའི་པགས། །དགུག་པ་ལ་ནི་སེང་གེའིའོ། །ལས་ཀུན་ལ་ནི་བྱ་ཡི་པགས། །ཡང་ན་ལྕགས་ནི་ཁོ་ནའོ། །གཞན་དུ་སྣ་ཚོགས་ལས་རྣམས་ནི། །དྲན་
པ་ཙམ་གྱིས་ངེས་པར་འགྲུབ། །བགེགས་རྣམས་མེད་པར་བྱ་བའི་ཕྱིར། །རི་བོང་པགས་པ་དག་ལ་བྲི། །བགེགས་ནི་ལྡང་བར་བྱེད་པ་ལ། །ཤི་བའི་པགས་པ་རྣམས་ལ་བྲི། །གསེར་དང་དངུལ་ལ་སོགས་པ་ལ། །ཟངས་དང་ཤེལ་དང་ཐང་ཤིང་དང་། །རྡོ་རྗེ་ལས་ནི་བྱ་བ་
སྟེ། །དངོས་གྲུབ་མཆོག་ནི་ཁྱད་པར་ཡིན། །ཙནྡན་དང་ནི་ཐང་ཤིང་དང་། །ཙནྡན་དམར་པོ་ཙམ་པ་ཀ །ཨ་ཤོ་ཀ་ནི་གྲུབ་པའོ། །ཤྲཱི་བྲྀ་ཀྵ་ནི་ནོར་སྦྱིན་འགྱུར། །ཨ་ག་རུ་དང་སྟ་རྒ་ཤིང་། །འོ་མ་ཤིང་གི་བྱེ་བྲག་དང་། །སྟག་པའི་ཤིང་ལ་སོགས་པ་རྣམས། །གྲུབ་
པ་ཡི་ནི་དངོས་གྲུབ་འགྱུར། །སྦལ་པའི་རུས་པ་ལས་བྱས་དང་། །ཀླུ་ཤིང་དག་གི་བྱེ་བྲག་དང་། །རུ་སྦལ་རུས་པ་གླང་པོའི་སོ། །ཁྱད་པར་དུ་ནི་ཆར་ཡང་འབེབས། །བྲམ་ཟེའི་རུས་པ་ཞི་བ་སྟེ། །གླང་པོའི་རུས་པ་རྒྱས་པ་ཡིན། །དབང་ལ་རྟ་ཡི་རུས་པ་སྟེ། །གསད་པ་
ལ་ནི་མ་ཧེའི་རུས། །དགར་བ་ལ་ནི་རྔ་མོའི་རུས། །སྡང་ལ་རྟ་དང་མ་ཧེའོ། །རེངས་པར་བྱ་ལ་ཁྱི་ཡི་རུས། །དགུག་པ་ལ་ནི་སེང་གེའི་རུས། །ས་ཡི་འོག་ཏུ་འགྲོ་བ་ལ། །ཕག་གི་རུས་པ་དག་ལ་བྱ། །ས་དཀར་དག་ལས་བྱས་པ་ནི། །རྟག་ཏུ་ཞི་བར་འགྱུར་བ་ཡིན། །རྒྱས་
པ་ལ་ནི་སེར་བའི་ས། །དབང་ལ་དམར་པོའི་ས་ཡིན་ལ། །གསོད་པ་ལ་ནི་ས་ནག་སྟེ། །འདི་ནི་མདོར་བསྡུས་ཆོ་གའོ། །དྲི་ཆེན་ཆུ་དང་ཞག་དང་ཁྲག །མིག་སྨན་ཆེན་པོ་དེ་བཞིན་ཏེ། །མི་ཡི་རུས་པ་བརྡར་བ་ཡིས། །མདོག་ཏུ་ལྷན་ཅིག་སྦྱར་ནས་ཀྱང་། །རང་བྱུང་མེ་ཏོག་ས་

བོན་དང་། །རིགས་ངན་དང་ནི་བྲམ་ཟེ་དང་། །གདོལ་པ་མོ་དང་གཡུང་མོ་དང་། །ཁྲུས་མཁན་མ་དང་གར་མཁན་མ། །མའམ་ཡང་ན་སྲིང་མོ་འམ། །བུ་མོ་ཡི་ནི་བྱེ་བྲག་གི། །འདི་དག་དྲུང་དུ་བླངས་ནས་སུ། །ཤུ་ཀྲ་རཀྟའི་ཁྱད་པར་དག །སྣ་ཚོགས་འདི་དག་བསྲེས་ནས་
ཀྱང་། །ཆོ་ག་བཞིན་དུ་སྐུ་གཟུགས་འདྲི། །གྲོག་མཁར་གྱི་ནི་ས་དག་ལ། །ཤི་བའི་སྐྲ་དང་རུས་པ་ཡིས། །པིར་གྱིས་དམ་པ་བྲི་བར་བྱ། །ཐིག་སྐུད་ཤི་བའི་སྐུད་པ་ཡིས། །སྐུ་གཟུགས་ཐིག་སྐུད་མཆོག་ཡིན་ནོ། །ཡི་དགས་ཕྲེང་སོགས་བསྙེན་ནས་ནི། །བ་སས་ཀྱང་ནི་
མར་མེ་བྱ། །དཔའ་བོ་ཆེན་པོའི་བདུག་སྤོས་དང་། །རྐང་གིས་ལྷ་བཤོས་བྱ་བ་སྟེ། །དྲི་ཆེན་རྡོ་རྗེ་ཆུ་ཡི་དྲི། །ཐོད་པ་དག་གི་བུམ་པ་སྟེ། །ཨརྒྷའི་སྣོད་ནི་ཐོད་པའོ། །ཨརྒྷ་རུས་པའི་ཙཱུརྞྞ་སྟེ། །འབད་པས་སྐྱེས་བུ་དབུལ་འབྱིན་ནོ། །ཇི་ལྟར་ནུས་པ་དག་ཏུ་སྤྱད། །སྣ་
ཚོགས་ཕྱག་རྒྱའི་སྦྱོར་བ་ཡིས། །ཐབས་དང་ཤེས་རབ་ལྡན་པར་ནི། །སྐུ་གཟུགས་ཡང་ནི་རི་མོའམ། །གཞན་ཡང་མཁས་པས་ཆོ་ག་བྱ། །ཇི་ལྟའི་ལས་ཀྱི་རྗེས་མཐུན་པར། །དེ་ལྟའི་གོས་ཀྱི་རྗེས་འཆང་ཞིང་། །གཅེར་བུ་སྐྲ་ནི་གྲོལ་བ་དང་། །གཟུགས་མདོག་དག་ནི་བསྒྱུར་
ནས་ཀྱང་། །གཙོ་བོ་དང་ནི་རྣལ་འབྱོར་པ། །སློབ་དཔོན་ཡང་ནི་དེ་བཞིན་ཏེ། །ཕྱག་རྒྱའི་རིགས་པར་གནས་ནས་སུ། །དྲི་ཆེན་ཆུ་དང་དཔའ་བོ་བཟང་། །མཉམ་པར་བཞག་ནས་བཟླས་པ་བྱ། །རྣམ་པ་དུ་མ་བྱེ་བྲག་གི། །གླུ་དང་གར་ནི་རྣམ་པ་དང་། །བཟའ་བཏུང་
མཆོག་ནི་སྤྱད་པར་བྱ། །དེ་དག་རྫོགས་ཀྱི་བར་བྱ་སྟེ། །དེ་འདི་ཆོ་གའི་རིམ་པའོ། །རབ་ཏུ་གནས་པའི་དུས་དག་ཏུ། །ཉིས་འགྱུར་ཚོགས་ཀྱིས་སྤེལ་བ་སྟེ། །གདུ་བུ་དང་ནི་ཀང་ཀ་དང་། །དཔུང་རྒྱན་གོས་ཀྱི་བྱེ་བྲག་དང་། །སོར་གདུབ་དང་ནི་མཆོད་ཕྱིར་ཐོགས། །རྐང་
རྒྱན་དང་ནི་ཐོད་པ་དང་། །གདུགས་དང་རྔ་ཡབ་དེ་བཞིན་ཏེ། །སྣ་ཚོགས་སྐྱེས་བུ་སྦྱིན་ཞིང་དབུལ། །སྣ་ཚོགས་དཔའ་བོ་མཆོག་དམ་པ། །མྱོས་བྱེད་བཏུང་བའི་བྱེ་བྲག་རྣམས། །དམ་ཚིག་ཆོ་གའི་མཆོག་རྣམས་དང་། །སྣ་ཚོགས་རོ་དང་བཅུད་རྣམས་དང་། །སྣ་ཚོགས་མེ་ཏོག་

མཆོག་རྣམས་དང་། །ལྷ་མོ་མཆོག་གི་ལུས་རྣམས་དང་། །རོལ་མོ་སྣ་ཚོགས་སྒྲ་རྣམས་དང་། །སློབ་དཔོན་ཕྱག་རྒྱར་སྦྱོར་བ་དང་། །སློབ་མའི་ཚོགས་ཀྱི་ཁྱད་པར་རྣམས། །བཟའ་བའི་མཆོད་པ་དག་གིས་མཆོད། །བདུག་པའི་དྲི་མཆོག་རྣམས་དང་ནི། །སྣ་
ཚོགས་རྒྱལ་བའི་བདུག་པ་དང་། །ཁྱད་པར་དུ་ནི་མར་མེའི་ཕྲེང་། །གདུགས་དང་བླ་རེ་དེ་བཞིན་ཏེ། །མེ་ལོང་དང་ནི་རྔ་ཡབ་དང་། །དྲ་བ་དང་ནི་དྲ་ཕྱེད་དང་། །ཆུན་པོ་དག་གིས་རྣམ་པར་བརྒྱན། །བུམ་པ་རས་དང་ལྡན་པ་དག །ཡེ་ཤེས་བདུད་རྩིས་ཡོངས་གང་བ། །རིན་ཆེན་ལྔ་
དང་སྨན་དང་ནི། །དྲི་ཡི་བྱེ་བྲག་དག་གིས་ནི། །ཨརྒྷའི་སྣོད་ནི་ཁྱད་པར་དུ། །ཙུ་ཏ་པ་ལ་བ་ལྔ་དང་། །ཨཾ་བུ་ཛཾ་བུ་ཀ་དམྦ། །བིལ་བ་བཱི་ཛ་པུ་རས་དགང་། །བ་ལ་མོ་ཏ་ཀྲི་ཏཉྫཿ །ཀེ་དྲི་ཀ་རི་ཀར་ལྡན་པ། །ཨེ་ཀ་བཱི་ར་ས་ཧ་དེ། །སྨན་རྣམས་ཀུན་ཤེས་བྱ་བ་ལ། །ལྔ་པོ་དེ་དག་
ཤེས་བྱ་སྟེ། །མཁས་པས་བུམ་པར་གཞུག་པར་བྱ། །གསེར་དང་ཛཱ་ཏི་ཕ་ལ་དང་། །གླ་གོར་ཞོ་ཤ་དེ་བཞིན་ནོ། །གསེར་གྱི་མཆོད་ཕྱིར་ཐོགས་དང་ནི། །ཕྱག་རྒྱ་དྲུག་གིས་རྣམ་པར་བརྒྱན། །སྒྲུབ་པ་པོ་ཀུན་གཅེར་བུ་ཡིས། །བཀྲ་ཤིས་གླུ་ཡིས་གླུ་ལེན་ཞིང་། །རྣམ་པར་དག་
པའི་སེམས་ཀྱིས་ནི། །དད་པའི་བློ་ནི་སྔོན་འགྲོ་བས། །དུས་དང་གནས་སྐབས་ཐམས་ཅད་དུ། །སྣ་ཚོགས་རྒྱ་ཆེའི་མཆོད་པར་བྱ། །མངོན་པར་བརྗོད་པའི་རྒྱུད་བླ་མའི་བླ་མ་ལས་རས་རིས་ལ་སོགས་པ་རབ་ཏུ་གནས་པའི་ཆོ་གའི་ལེའུ་སྟེ་བཞི་བཅུ་རྩ་བརྒྱད་པའོ།། །།དེ་ནས་
གཞན་ཡང་བཤད་བྱ་བ། །དཀྱིལ་འཁོར་དཀྱིལ་འཁོར་དམ་པ་སྟེ། །མངོན་མཐོ་ཧེ་རུ་ཀ་ཞེས་བྱ། །དཀྱིལ་འཁོར་སྙིང་པོ་བསྡུས་པ་ཡིན། །ཤིན་ཏུ་མཉམ་བཞག་སྒྲུབ་པ་པོས། །དམ་ཚིག་རྟག་ཏུ་བསྐྱང་བར་བྱ། །དམ་ཚིག་ཉམས་པས་དཀྱིལ་འཁོར་དུ། །དབང་བསྐུར་
དངོས་གྲུབ་འཐོབ་མི་འགྱུར། །སྦྲང་རྩི་མཚལ་དང་ག་པུར་བཅས། །དམར་དང་ཙནྡན་སྦྱར་བ་ནི། །ཚོགས་ཀྱི་ནང་དུ་ཞུགས་པ་ནི། །ཐམས་ཅད་བཅུད་ཀྱིས་ལེན་དུ་གནས། །ཐམས་ཅད་རྡོ་རྗེའི་མཚན་མ་འཛིན། །སྦོམ་པོ་མཐའ་ལྟག་རྩེ་སྦྱར་བས། །རྣལ་འབྱོར་རིམ་པས་

རྟག་ཏུ་སྤྱད། །ཞི་བའི་བཏུང་བ་བཞིན་མྱངས་ན། །དངོས་གྲུབ་རྟག་ཏུ་འཐོབ་པར་འགྱུར། །འདི་ནི་མི་འཆི་བཅུ་ཕྱེད་འགྱུར། །དངོས་གྲུབ་ཐམས་ཅད་འཇུག་པ་ཡིན། །མཆོད་བཞི་དེ་བཞིན་དཔའ་བོ་ནི། །དབང་གཉིས་སྙོམས་པར་འཇུག་པ་ཡི། །སྙོམས་པར་འཇུག་པའི་
དེ་ཉིད་འཛིན། །སྔོན་དུ་བསྙེན་པ་བྱ་བ་ནི། །ཆོ་ག་བཞིན་དུ་འབུམ་དུ་བཟླ། །འཁོར་ལོའི་གསང་སྔགས་འབུམ་བཟླས་ཤིང་། །རང་གི་ལྷའི་ཡང་འབུམ་དུ་བཟླ། །གཞན་ནི་ཁྲི་རུ་བཟླ་བར་བྱ། །བཀའ་བཞིན་འཁོར་ལོ་བྲི་བྱ་ཞིང་། །མདངས་ལྡན་མི་མཆོག་དག་གིས་ནི། །
དཀྱིལ་འཁོར་བྲི་ཞིང་དགོད་པར་བྱ། །སྔར་བཤད་གནས་ནི་གང་ཡིན་པ། །དེར་ནི་དཀྱིལ་འཁོར་བྲི་བར་བྱ། །ས་ནི་ཡོངས་སུ་སྦྱར་བར་བྱ། །བརྡུང་ཞིང་ལེགས་པར་བརྡུངས་ནས་སུ། །མཉམ་ཞིང་ཟུག་རྔུ་རྣམ་པར་སྤང་། །ས་ལ་མ་ལྷུང་ལྕི་བ་ཡིས། །དཀྱིལ་འཁོར་ས་ནི་ཉེ་
བར་བྱུག །དུར་ཁྲོད་ཐལ་བར་ལྡན་པ་དང་། །མི་འཆི་བཅུ་ཕྱེད་བཅས་པ་ཡིས། །དཀྱིལ་འཁོར་ས་ནི་ཉེར་བྱུགས་ཏེ། །དེར་ནི་དཀྱིལ་འཁོར་ཡང་དག་བརྩམ། །དུར་ཁྲོད་དུ་ནི་ཀུན་སྤྱོད་ཅིང་། །རོ་བསྲེགས་སོལ་བའི་ཕྱེ་མ་དང་། །དུར་ཁྲོད་བརྒྱད་དང་ལྡན་པ་ཡིས། །སློབ་དཔོན་
ལེགས་པར་མཉམ་བཞག་སྟེ། །དཀྱིལ་འཁོར་བཟང་པོ་བྲི་བར་བྱ། །སློབ་དཔོན་མཚན་ཉིད་ཐམས་ཅད་ལྡན། །མཚན་མ་ངན་པ་ཀུན་སྤངས་ཤིང་། །ཡང་དག་ཤེས་ཤིང་རྒྱུད་ཤེས་པ། །དཔལ་ལྡན་ཁྲག་འཐུང་གསང་སྔགས་ཤེས། །ཁྲོ་མེད་གཙང་ཞིང་མཁས་པ་དང་། །
སྦྱོར་ཤེས་ཡེ་ཤེས་ཕ་རོལ་འགྲོ། །ཐོད་པས་སྤྱི་བོར་བརྒྱན་བྱས་ཤིང་། །ཡན་ལག་ཐལ་བས་བྱུགས་པ་དང་། །གུག་སྐྱེད་དག་གིས་ལུས་བརྒྱན་ཅིང་། །རུས་ཕྲེང་རུས་པར་ཡང་དག་གནས། །དུམ་གཅིག་སྤྱི་བོར་བརྒྱན་པ་དང་། །རུས་པའི་ཕྲེང་བས་རྣམ་པར་བརྒྱན། །ཁ་ཊྭཱཾ་
ག་ནི་ལག་ན་གནས། །བདག་ཉིད་ཤྲཱི་ཧེ་རུ་ཀར་ནི། །བྱས་ནས་དེ་ཡི་འོག་ཏུ་ནི། །དཔལ་ལྡན་ཧེ་རུ་ཀ་དྲན་བྱ། །འཁོར་ལོ་འདི་ཡི་སྙིང་གར་དགོད། །དེ་ལྟར་བདག་ཉིད་གོ་བགོས་ནས། །ར་བ་རྣམས་ནི་ཕྱོགས་སུ་དགོད། །འོག་ཏུའང་མཚོན་ཆ་དགོད་པར་བྱ། །འཁོར་

ལོའི་བདག་ཉིད་བཀོད་ནས་ནི། །སྟེང་དུ་མདའ་ཡི་དྲ་བ་དང་། །བདག་ཉིད་མཚོན་ཆའི་དྲ་བ་བྱ། །དེ་ལྟར་གོ་བགོས་སུམ་ཅུ་ནི། །རྩ་གསུམ་པས་ཀྱང་གཞིག་མི་ནུས། །དེ་ལྟར་བདག་ཉིད་རབ་བསྲུངས་ཤིང་། །སྔགས་དང་ཕྱག་རྒྱས་རྣམ་བརྒྱན་ནས། །དངོས་
གྲུབ་ཐམས་ཅད་རབ་སྟེར་བའི། །དཀྱིལ་འཁོར་འཇིགས་པ་བྲི་བར་བྱ། །དེ་ནས་སེམས་མེད་སྲད་བུ་ལ། །རུ་དྷི་ར་ནི་ཆེན་པོས་བརླན། །དཔལ་ལྡན་ཁྲག་འཐུང་གྲོང་མཆོག་གི། །དཀྱིལ་འཁོར་འཇིགས་པ་ཐིག་གདབ་བྱ། །གྲུ་བཞི་པ་ལ་ཁྲུ་བརྒྱད་པ། །སྒོ་བཞི་ཀུན་ནས་
ཟུར་བཞི་པ། །སྔགས་པས་ཉིས་འགྱུར་རྣམ་སྤྱོད་ཅིང་། །མཁའ་འགྲོ་དྲ་བ་བདེ་མཆོག་བཟླས། །དེ་ཡི་དབུས་སུ་བཞག་པ་ནི། །འདབ་ཆགས་ལྟེ་བ་འབར་དང་བཅས། །གེ་སར་ཡང་དག་ལྡན་པ་ཡི། །སྣ་ཚོགས་པདྨ་འདབ་བརྒྱད་པ། །ལྟེ་བར་དགོད་བྱ་དཔའ་བོ་ནི། །འཇིགས་
བྱེད་ཆེན་པོའི་གཟུགས་ཅན་ལ། །མདངས་དང་ལྡན་ཞིང་རབ་ཏུ་འབར། །ཧ་ཧ་ཞེས་བྱར་སྒྲ་ཆེར་བཞད། །ཐོད་པའི་ཕྲེང་བའི་རྒྱན་དང་ལྡན། །བཟང་པོ་སྤྱན་གསུམ་ཞལ་བཞི་མངའ། །གླང་པོའི་པགས་པ་རྣམ་པར་བགོས། །སྨིན་མ་བཟང་པོ་རྡོ་རྗེ་འབྱེས། །ཕྱག་ན་ཁ་ཊྭཱཾ་ག་བསྣམས་
ཤིང་། །བརྒྱ་ཕྱེད་ཕྲེང་བས་རྣམ་པར་བརྒྱན། །དེ་མདུན་གནས་པའི་ལྷ་མོ་ནི། །རྡོ་རྗེ་ཕག་མོ་ཞེས་བྱ་བ། །རབ་འཇིགས་འཇིགས་བྱེད་ཆེ་ལ་ཕྱོགས། །སྤྱན་གསུམ་དྲག་པོའི་གཟུགས་ཅན་བྱ། །ཀ་པཱ་ལ་ནི་ཨནྟྲས་བཀང་། །ཁ་ནས་རུ་དྷི་ར་འཛག་ཅིང་། །ལྷ་དང་ལྷ་མིན་མིར་
བཅས་དང་། །ཕྱོགས་ཀུན་ཏུ་ནི་སྡིགས་མཛུབ་བྱེད། །མཁའ་འགྲོ་མ་ནི་ཉི་ཤུ་བཞི། །ཕག་མོ་ཡི་ནི་རིགས་ལས་བྱུང་། །ཕྱོགས་དང་ཕྱོགས་ཀྱི་མཚམས་རྣམས་ནི། །འཁོར་ལོའི་ལྟེ་བར་མཆོད་པར་བྱ། །དེ་བཞིན་འདིར་ནི་དཔའ་བོ་ཡང་། །འཁོར་ལོར་ཡང་དག་གནས་པ་
མཆོད། །སྒྲུབ་པོ་གལ་ཏེ་དངོས་གྲུབ་འདོད། །གཉིས་མེད་དཔའ་བོ་མཆོད་པར་བྱ། །དེ་ནས་བུམ་པ་བྱ་བ་ནི། །རྩ་བ་ནག་པོ་ལ་སོགས་མེད། །མུ་ཏིག་གསེར་དང་རིན་ཆེན་དང་། །བྱི་རུ་དངུལ་དང་ཟངས་མ་སྟེ། །བཟའ་བ་ཀུན་གྱིས་ལེགས་བཀང་བའི། །སྣོད་ནི་སྟེང་དུ་

གཞག་པར་བྱ། །མགྲིན་པ་སྲད་བུས་དཀྲི་བ་དང་། །ཁ་ནི་འདབ་མས་བརྒྱན་པར་བྱ། །གོས་ཟུང་གིས་ནི་ལེགས་དཀྲིས་པ། །བརྒྱད་ནི་སྒོ་རུ་རྣམ་པར་དགོད། །གོས་ཟུང་གིས་ནི་དཀྲིས་པ་ཡི། །བུམ་པ་དགུ་པ་དབུས་སུ་གཞག །གསེར་རམ་དངུལ་ལམ་རིན་ཆེན་ནམ། །
མུ་ཏིག་རྣམས་ནི་མཛེས་པར་བྱ། །དཀྱིལ་འཁོར་ཀུན་ཏུ་རིན་ཆེན་དང་། །གསེར་རྣམས་ཀྱིས་ནི་མཛེས་པར་སྤྱད། །གྲོང་མཆོག་ཡིད་འོང་མཆོད་ནས་ནི། །གྲུབ་པ་ཉིད་དུ་ཐེ་ཚོམ་མེད། །བདག་ཉིད་ཀྱི་ནི་གདོང་ལུས་ཀུན། །དྲི་ཡི་ཆུ་ཡིས་ལེགས་པར་བསང་། །གལ་ཏེ་
དངོས་གྲུབ་མཆོག་འདོད་ན། །མར་མེ་བརྒྱ་ནི་དབུལ་བར་བྱ། །ནམ་མཁའི་མཁའ་འགྲོ་མ་