Kinh tạng Tây Tạng (Kangyur Đại Học) — 077_རྒྱུད་འབུམ།_ཀ

ཱུྃ་ཕཊ། ཨོྃ་བྷྃ་ཧཱུྃ་ཕཊ། ཨོྃ་ལྃ་ཧཱུྃ་ཕཊ། ཨོྃ་བྃ་ཧཱུྃ་ཕཊ། ཨོྃ་ཏྲྃ་ཧཱུྃ་ཕཊ། ཨོྃ་ཨཱེྃ་ཧཱུྃ་ཕཊ། ཨོྃ་མྃ་ཧཱུྃ་ཕཊ། ཨོྃ་མྃ་ཧཱུྃ་ཕཊ། ཨོྃ་བྃ་ཧཱུྃ་ཕཊ། ཨོྃ་ཙྃ་ཧཱུྃ་ཕཊ། ཨོྃ་སུྃ་ཧཱུྃ་ཕཊ། ཨོྃ་ཤྱྃ་ཧཱུྃ་ཕཊ། ཨོྃ་བྃ་ཧཱུྃ་ཕཊ། ཨོྃ་སུྃ་ཧཱུྃ་ཕཊ། ཨོྃ་མྃ་ཧཱུྃ་ཕཊ། ཨོྃ་ཧྃ་ཧཱུྃ་ཕཊ། ཨོྃ་བྃ་
ཧཱུྃ་ཕཊ། ཨོྃ་ཁྃ་ཧཱུྃ་ཕཊ། ཨོྃ་མྃ་ཧཱུྃ་ཕཊ། ཨོྃ་ཙྃ་ཧཱུྃ་ཕཊ། ཨོྃ་རྃ་ཧཱུྃ་ཕཊ། ཨོྃ་ཁྃ་ཧཱུྃ་ཕཊ། ཨོྃ་ཧྃ་ཧཱུྃ་ཕཊ། ཨོྃ་ཤཽཾ་ཧཱུྃ་ཕཊ། ཨོྃ་ཨཾ་ཧཱུྃ་ཕཊ། ཨོྃ་ཙྃ་ཧཱུྃ་ཕཊ། ཨོྃ་ཧེྃ་ཧཱུྃ་ཕཊ། ཨོྃ་སུྃ་ཧཱུྃ་ཕཊ། ཨོྃ་ཕྃ་ཧཱུྃ་ཕཊ། ཨོྃ་མྃ་ཧཱུྃ་ཕཊ། ཨོྃ་བཻྃ་ཧཱུྃ་ཕཊ། ཨོྃ་ཙྃ་ཧཱུྃ་ཕཊ། ཨོྃ་བྷྃ་ཧཱུྃ་ཕཊ། ཨོྃ་མྃ་ཧཱུྃ་

ཕཊ། ཨོྃ་ཊྃ་ཧཱུྃ་ཕཊ། ཨོྃ་ལྃ་ཧཱུྃ་ཕཊ། ཨོྃ་ཁྃ་ཧཱུྃ་ཕཊ། ཨོྃ་རཱུྃ་ཧཱུྃ་ཕཊ། ཨོྃ་ཀྃ་ཧཱུྃ་ཕཊ། ཨོྃ་ཨཱུྃ་ཧཱུྃ་ཕཊ། ཨོྃ་ཤྭྃ་ཧཱུྃ་ཕཊ། ཨོྃ་སུྃ་ཧཱུྃ་ཕཊ། ཨོྃ་ཡྃ་ཧཱུྃ་ཕཊ། ཨོྃ་ཡྃ་ཧཱུྃ་ཕཊ། ཨོྃ་ཡྃ་ཧཱུྃ་ཕཊ། ཨོྃ་ཡྃ་ཧཱུྃ་ཕཊ། འཁོར་ལ་སོགས་པ་ཐམས་ཅད་ཀུན། །བསྒོམ་
ལ་གནས་ནས་བཟླས་པ་བྱ། །འཁོར་ལོས་སྒྱུར་དྲུག་ལྷན་ཅིག་ཏུ། །མཁའ་འགྲོ་མཁའ་འགྲོ་མ་བཟླས་བྱ། །དམ་ཚིག་ཆེན་པོའི་སྦྱོར་བ་ཡིས། །དམ་ཚིག་དམ་ཚིག་མཆོག་གྱུར་པ། །གཉིས་མེད་འཁྱུད་པའི་སྦྱོར་བ་ཡིས། །གསང་སྔགས་བཟླས་ན་དངོས་གྲུབ་འགྱུར། །ཟླ་
དྲུང་ངེས་ཏེ་གཞན་མིན་པར། །འཁོར་ལོས་སྒྱུར་དྲུག་དངོས་གྲུབ་འཐོབ། །ཡང་ན་རྡོ་རྗེ་སེམས་དཔའ་དང་། །རྣམ་སྣང་རྡོ་རྗེ་ཉི་མ་དང་། །པདྨ་གར་དབང་རྒྱལ་བོ་དང་། །དབང་ཕྱུག་རྟ་མཆོག་ཧེ་རུ་ཀ། །གནས་སོགས་པ་ཡི་སྦྱོར་བ་ཡིས། །མཁས་པས་ངེས་པར་བསྒོམས་ནས་
ནི། །རིམ་པར་སྦྱོར་བའི་རིམ་པ་དང་། །བརྒྱུད་པའི་གནས་ཀྱི་རིམ་དང་། །རྣལ་འབྱོར་མ་ཡི་བཀའ་དག་ནི། །བླ་མའི་བརྒྱུད་བས་འཐོབ་པར་འགྱུར། །གཞན་དུ་སྔགས་པ་འཁོར་བྱེད་ཅིང་། །བཀའ་ཡི་ནམ་ཡང་མཐོང་མ་ཡིན། །མངོན་པར་བརྗོད་པའི་རྒྱུད་བླ་མའི་བླ་མ་
ལས་རིགས་དྲུག་གི་འཁོར་ལོས་སྒྱུར་བའི་བཀའི་ལེའུ་སྟེ་ཉི་ཤུ་རྩ་བཞི་པའོ།། །།དེ་ནས་གཞན་ཡང་བཤད་བྱ་བ། །རྣལ་འབྱོར་ལམ་ནི་རྙེད་དཀའ་བ། །རྣལ་འབྱོར་མ་ཡི་སྦྱོར་སྙིང་པོ། །གནས་ཀྱི་རྣལ་འབྱོར་རྗེས་མཐུན་པར། །ཡི་གེ་ལས་བྱུང་ཅིག་ཅར་ཚུལ། །ཅིག་ཅར་མཚན་མ་ཕྱག་མཚན་ཡིན། །
ཅིག་ཅར་རྡོ་རྗེ་སེམས་དཔའ་སྟེ། །བདེ་བ་ཆེན་པོ་བླ་ན་མེད། །དེ་རུ་འཇུག་ཅིང་དེ་ཡི་ཚུལ། །ཅིག་ཅར་ཧེ་རུ་ཀ་དཔལ་མཆོག །སྟོན་ཀའི་ནམ་མཁའ་དྲི་མེད་ལྟར། །ཟར་མའི་མེ་ཏོག་དང་མཚུངས་པ། །ཕྱག་བརྒྱད་པ་ལ་ཞལ་བཞི་པ། །
འཇིགས་ཤིང་རབ་ཏུ་འཇིགས་པར་མཛད། །གཡས་བརྐྱང་བ་ཡི་ཞབས་ཀྱིས་བཞུགས། །སྤྱན་གསུམ་རྣལ་འབྱོར་མ་ཡི་གཙོ། །ཞལ་གདོང་གཡོན་དཀར་གཡས་དམར་ཏེ། །སྟེང་གི་ཞལ་ནི་སེར་ལ་མཛེས། །དཔའ་བོ་ཐོད་པའི་ཕྲེང་བ་ཅན། །སངས་རྒྱས་ལྔ་ཡི་བྱིན་རླབས་ཅན། །

སྟག་གི་པགས་པ་གོས་སུ་མནབས། །མགོ་བོའི་ཕྲེང་བས་རྣམ་པར་བརྒྱན། །འཇིགས་བྱེད་དང་ནི་དུས་མཚན་དག །ཞབས་ཀྱིས་པདྨར་གནོན་པར་བཞུགས། །རྡོ་རྗེ་དྲིལ་བུ་མཉམ་པས་འཁྱུད། །ཕག་མོ་ཡི་ནི་བྱིན་པས་འཁྲིལ། །གཉིས་མེད་སྦྱོར་བ་མཉམ་ལྡན་པས། །
དབུ་སྐྲ་གྲོལ་བ་ཕྱོགས་གོས་ཅན། །སྐུ་མདོག་མཉམ་ཞིང་མཚུངས་པར་ལྡན། །དུམ་བུའི་རྒྱན་གྱི་སྐ་རགས་ཅན། །དེ་ཡི་ཞལ་དང་ཕྱག་མཚན་ཅན། །རྣལ་འབྱོར་དངོས་གྲུབ་རབ་ཏུ་སྩོལ། །ཐོད་པ་དང་ནི་ཁ་ཊྭཱཾ་འཛིན། །རྒྱལ་བའི་པགས་པ་སྟེང་དུ་སྟེ། །ཐོ་བ་མདུང་སྟེ་གཞན་
དུ་ནི། །ཚངས་པའི་མགོ་བོས་བརྒྱན་པ་ལ། །ཟླ་བ་ཕྱེད་པ་ཞི་བ་འཛིན། །སྣ་ཚོགས་རྡོ་རྗེས་དབུ་ལ་བརྒྱན། །ཕྱག་རྒྱ་དྲུག་གིས་སྐུ་ལ་བརྒྱན། །རྡོ་རྗེ་མཚན་མ་དག་གིས་བརྒྱན། །རྡོ་རྗེ་ཕྲེང་བའི་དབུ་རྒྱན་ཅན། །འོག་པག་དག་གིས་སྐུ་རགས་བྱས། །དཔུང་རྒྱན་རྡོ་རྗེས་
མཚན་པ་སྟེ། །སྔགས་པའི་གཙོ་བོས་གསང་སྔགས་ནི། །འདི་ལྟར་ཆོ་གའི་སྙིང་པོ་ཤེས། །ཕག་མོ་བདེ་བར་གནས་པ་ནི། །རྒྱལ་བའི་པགས་པ་རྣམ་པར་སྤངས། །ཕག་མོ་རྒྱལ་བའི་མཚན་སོགས་ལས། །ཅང་ཏེའུ་གྲི་གུག་རྣམས་ཀྱིས་བརྒྱན། །བཅོམ་ལྡན་འདས་ནི་
ལྟེ་བའི་དབུས། །པདྨ་འདབ་བརྒྱད་ཡིད་འོང་བ། །སྣ་ཚོགས་པདྨ་མདོག་མཛེས་ལ། །ཐམས་ཅད་རྣམ་དག་མཆོག་དམ་པ། །ཤར་གྱི་འདབ་སོགས་ཕྱོགས་ཆ་ལ། །མཁའ་འགྲོ་མ་སོགས་བཞི་པོ་དགོད། །ཤར་དུ་མཁའ་འགྲོ་མ་དགོད་ཅིང་། །བྱང་དུ་ལཱ་མ་དེ་བཞིན་ཏེ། །
ནུབ་ཏུ་དུམ་སྐྱེས་མ་ཡིན་ནོ། །ལྷོ་རུ་གཟུགས་ཅན་མ་ཡིན་ཏེ། །སྔོ་དང་སེར་དང་དེ་བཞིན་དམར། །ལྗང་གུ་དག་ནི་བཞི་པའོ། །ཞལ་བཞི་པ་ལ་ཕྱག་བརྒྱད་པ། །སྤྱན་གསུམ་དྲག་པོ་གཟི་བརྗིད་ཅན། །སྐྱིལ་མོ་ཀྲུང་ནི་ཕྱེད་པར་བཞུགས། །སྐྲ་གྲོལ་བ་ནི་ཡིད་འོང་བ། །
ཕྱོགས་ཀྱི་གོས་ཅན་མགོ་ཡི་ཕྲེང་། །ཕྱག་རྒྱ་ལྔ་ཡིས་རྣམ་པར་བརྒྱན། །ཐོད་པ་ཁ་ཊྭཱཾ་ག་འཛིན་ཅིང་། །དྲིལ་བུ་ཅང་ཏེའུ་གྲི་གུག་དང་། །དེ་བཞིན་གཞུ་དང་མདའ་འཛིན་ཅིང་། །རྡོ་རྗེ་མདུང་མཆོག་ཕྱག་ན་འཛིན། །སྙེམས་པའི་ཕྱག་གིས་གར་མཛད་ཅིང་། །ཐུགས་རྗེ་ཆགས་

པས་རྣམ་པར་མྱོས། །སྔོ་བ་དང་ནི་སེར་བ་དང་། །ལྗང་གུ་སྟེང་གི་ཞལ་དཀར་པོ། །སེར་ཞིང་སྔོ་ལ་ལྗང་བ་དང་། །སྟེང་གི་ཞལ་གདོང་དྲག་ལ་དམར། །དམར་དང་སྔོ་དང་ལྗང་བ་དང་། །སྟེང་གི་ཞལ་ནི་དཀར་ལ་ཞི། །ལྗང་དང་དམར་དང་སྔོ་བ་དང་། །སྟེང་
གི་ཞལ་ནི་སེར་པོ་མཆོག །བདུད་བཞི་པོ་ནི་ཞབས་ཀྱིས་གནོན། །བཅོམ་ལྡན་འདས་ལ་གདོང་གིས་ལྟ། །ཟུར་གྱི་ཆར་ནི་བུམ་པ་དག །ཡེ་ཤེས་བདུད་རྩིས་ཡོངས་གང་བ། །དེ་ཡི་སྟེང་དུ་ཐོད་པ་ནི། །བྱང་ཆུབ་འོ་མས་རབ་བཀང་བ། །ཕྱི་རོལ་དམ་ཚིག་གསུམ་འཁོར་ལོ། །ཁང་
པ་བརྩེགས་པ་ལེགས་པར་མཛེས། །ཤར་ཕྱོགས་སུ་ནི་གཽ་རི་སྟེ། །བྱང་དུ་དེ་བཞིན་ཙཽ་རི་མ། །ནུབ་ཏུ་རབ་རྨོངས་མ་ཡིན་ནོ། །ལྷོ་རུ་ཡང་ནི་རོ་ལངས་མ། །མེ་ལ་སྦོས་བྱེད་མ་ཡིན་ཏེ། །བདེན་བྲལ་དུ་ནི་གཏུམ་མོ་ཡིན། །རླུང་ཕྱོགས་སྨེ་མོ་ཉིད་ཡིན་ཏེ། །དབང་ལྡན་ཧེ་རུ་ཀ་མ་སྟེ། །དེ་
བཞིན་རྣལ་འབྱོར་མ་བརྒྱད་ནི། །དཀར་མོ་སེར་ལ་སྔོ་ལྗང་གུའོ། །སྐུལ་བྱེད་དམར་ལ་སྔོ་ལྗང་གུ། །རབ་རྨོངས་མ་ནི་སྔོ་སེར་ལྗང་། །རོ་ལངས་མ་ནི་དཀར་སྔོ་ལྗང་། །སྤོས་བྱེད་མ་ནི་སྣ་ཚོགས་མདོག །དམར་དང་སྔོ་དང་ལྗང་གུའོ། །གཏུམ་མོ་ཡང་ནི་ལྗང་སྔོ་སེར། །སྨེ་མོ་ཡང་ནི་དུད་
སྔོ་ལྗང་། །ཧེ་རུ་ཀ་མ་སྔོ་ལྗང་དམར། །འདི་ལྟར་དེ་དག་ཐམས་ཅད་ཀྱང་། །སྤྱན་གསུམ་པ་ལ་སྐྲ་གྲོལ་བ། །ཕྱོགས་ཀྱི་གོས་འཆང་གར་དང་བཅས། །ཡི་དགས་གདན་ལ་ལེགས་པར་བཞུགས། །ཕྱག་རྒྱ་ལྔ་ཡིས་རྣམ་པར་བརྒྱན། །ཁ་ཊྭཱཾ་ཐོད་པ་དྲིལ་བུ་དང་། །ཅང་ཏེའུ་ཞགས་པ་
ལྕགས་ཀྱུ་ཐོགས། །ཐམས་ཅད་ཐོད་པའི་ཕྲེང་བས་བརྒྱན། །མི་བསྐྱོད་པ་ཡི་ཅོད་པན་བྱས། །འདི་ལྟར་གནས་དང་ཉེ་གནས་ཀྱི། །དངོས་གྲུབ་ཐམས་ཅད་རབ་ཏུ་སྩོལ། །འདི་ལྟར་ཐུགས་ཀྱི་འཁོར་ལོར་ནི། །ལྷ་མོ་དཀར་མོ་ལ་སོགས་པ། །རྣལ་འབྱོར་མ་ནི་རབ་ཏུ་བཤད། །བསྙེན་
པས་བཀའ་དྲིན་སྩོལ་མཛད་དེ། །ཐོགས་པ་མེད་པའི་འབྲས་བུ་འགྲུབ། །ལྷ་མོ་མཁའ་སྤྱོད་གྲུབ་ནས་ནི། །མཁའ་ལ་སྤྱོད་པའི་གོ་འཕང་རྙེད། །དེ་ཡི་ཕྱི་རོལ་གསུང་འཁོར་ལོ། །ཤར་དུ་པི་ཝང་སྟངས་སྟབས་མ། །བྱང་དུ་གླིང་བུའི་སྟངས་སྟབས་མ། །ནུབ་ཏུ་རྫ་རྔ་ཆེ་སྟངས་སྟབས། །

ལྷོ་རུ་རྫ་རྔའི་སྟངས་སྟབས་ཏེ། །སྔོ་དང་སེར་དང་དམར་ལྗང་གུ། །མེ་སོགས་རྡོ་རྗེ་བཞད་མ་སྟེ། །རྡོ་རྗེ་སྒེག་མ་རྡོ་རྗེ་གླུ། །རྡོ་རྗེ་གར་ཏེ་དམར་བ་དང་། །སྔོ་དང་སེར་དང་ལྗང་གུའོ། །དེ་དག་ཞལ་གཅིག་ཕྱག་བཞི་པ། །གཅེར་བུ་དབུ་སྐྲ་གྲོལ་བ་དང་། །ཐོད་པ་ཡི་ནི་ཕྲེང་
བ་ཅན། །སྤྱན་གསུམ་པ་ལ་ཡིད་འོང་བ། །ཐོད་པ་དང་ནི་ཁ་ཊྭཱཾ་འཛིན། །ཚམ་ངམ་ལག་པའི་སྟངས་སྟབས་ཀྱིས། །རྡོ་རྗེ་དྲིལ་བུ་སྟངས་སྟབས་ཅན། །མཁྲིག་མ་མཉམ་པར་བྱས་ནས་ནི། །པདྨ་བསྐོར་བའི་སྟངས་སྟབས་ཅན། །ཞིང་དང་ཉེ་བའི་ཞིང་དང་ནི། །ཚནྡོ་དང་ནི་
ཚནྡོ་ཧ། །དེ་དག་འོད་དཔག་མེད་དབུ་བརྒྱན། །སྐུ་ཡི་འཁོར་ལོའི་ཤར་དུ་ནི། །མེ་ཏོག་མ་བྱང་བདུག་པ་མ། །ནུབ་ཏུ་མར་མེ་ལྷོ་རུ་དྲི། །སེར་དང་དུད་ཁ་དམར་དཀར་པོ། །མེ་ལོང་རོ་དང་རེག་བྱ་ཆོས། །མེ་ཕྱོགས་ལ་སོགས་མཚམས་སུ་སྟེ། །ཟླ་བའི་མདོག་ཅན་དམར་
ལྗང་དཀར། །དེ་དག་སྤྱན་ནི་གསུམ་པ་སྟེ། །གཅེར་བུ་དབུ་སྐྲ་གྲོལ་བ་དང་། །ཞབས་ཀྱིས་ཀུན་ཏུ་གར་བྱེད་ཅིང་། །ཕྱག་ཏུ་མཆོད་པ་ཐོགས་ནས་ནི། །ཐོད་པ་ཁ་ཊྭཱཾ་ག་འཛིན་ཅིང་། །ཅང་ཏེའུ་ནི་ཕྱག་ན་བསྣམས། །ཐོད་པ་ཡི་ནི་ཕྲེང་བ་ཅན། །ལྷ་མོ་དེ་དག་འདུ་ས་དང་། །ཉེ་
བའི་འདུ་ས་དུར་ཁྲོད་དང་། །ཉེ་བའི་དུར་ཁྲོད་དག་ཡིན་ཏེ། །རྣམ་པར་སྣང་མཛད་དབུ་རྒྱན་བྱས། །སྒོ་རྣམས་རྡོ་རྗེ་ལྕགས་ཀྱུ་དང་། །རྡོ་རྗེ་ཞགས་པ་རྡོ་རྗེ་སྒྲོག །རྡོ་རྗེ་དྲིལ་བུ་དེ་བཞིན་ཏེ། །སྔོ་དང་ལྗང་དང་དམར་དང་སེར། །ཤར་དང་བྱང་དང་ནུབ་དང་ནི། །ལྷོ་ཡི་ཕྱོགས་ཀྱང་དེ་བཞིན་ནོ། །
མེ་ལ་སོགས་པའི་མཚམས་སུ་ནི། །གཤིན་རྗེ་སྲེག་ལ་སོགས་པ་དག །དམར་དང་སྔོ་དང་དུད་ཁ་སེར། །ཐོད་པ་དང་ནི་ཁ་ཊྭཱཾ་ག །རང་གི་མཚན་མ་ཅང་ཏེའུ་དང་། །གྲི་གུག་དང་ནི་མགོ་བོ་འཆང་། །སྤྱན་གསུམ་དབུ་སྐྲ་གྲོལ་བ་སྟེ། །གཅེར་བུ་གར་གྱིས་གནས་པས་བཞུགས། །
ཐམས་ཅད་ཕྱག་རྒྱ་ལྔ་ཡིས་བརྒྱན། །ཐོད་པ་ཡི་ནི་ཕྲེང་བ་ཅན། །རང་གི་རིགས་ཀྱི་ཅོད་པན་ཅན། །ཇི་ལྟའི་རིམ་པས་རྗེས་སུ་གནས། །དེ་ཡི་སྙིང་གར་ཡེ་ཤེས་སེམས། །སྐུ་གསུང་ཐུགས་ཀྱི་འཁོར་ལོ་གསུམ། །གཙོ་བོའི་བདག་པོ་བསྒོམ་པར་བྱ། །དཀར་དང་དམར་དང་སྔོ་བ་ཡི། །

དཔའ་བོ་རྣལ་འབྱོར་མ་ལྷན་ཅིག །ཇི་ལྟ་བུ་ཡི་བསྒོམས་པ་ན། །རྗེས་སུ་བསྟན་པའི་བསྒོམས་པ་ལས། །ཡེ་ཤེས་ལྕགས་ཀྱུ་དག་གིས་ནི། །ཡེ་ཤེས་འཁོར་ལོ་བཀུག་ནས་ནི། །ཇི་ལྟར་རིམ་པས་མཆོད་དབང་བསྐུར། །གཅིག་ཏུ་བསྡུས་ཏེ་བསྟིམས་ནས་སུ། །
ཇི་ལྟའི་རིམ་པ་བསྒོམས་ནས་སུ། །ཡེ་ཤེས་བཟླས་པ་དག་ཀྱང་བྱ། །སྤྲོ་བསྡུ་སྲོག་དང་རྩོལ་བ་ཡིས། །འཐོར་འཐུང་རིམ་པས་བྱས་པ་ཡི། །སློབ་དཔོན་གྱིས་ནི་བཟླས་པ་བྱ། །ཨོྃ་ཨཱཿཧཱུྃ་ཧཱུྃ། འདི་ལྟ་བུ་ཡི་རིམ་པ་ཡིས། །གྲངས་མེད་པར་ནི་བྱས་ནས་སུ། །ཇི་སྲིད་སྐྱོ་བར་མ་
གྱུར་པར། །གོང་གི་དམ་ཚིག་འཁོར་ལོ་ནི། །མཉམ་པར་བཞག་སྟེ་བཟླས་པ་བྱ། །དུང་ཆེན་ཕྲེང་བ་བླངས་ནས་ནི། །སྡོམ་པ་མཆོག་གི་བཟླས་པ་བྱ། །ཨོྃ་ཤྲཱི་བཛྲ་ཧེ་ཧེ་རུ་རུ་ཀྵྨཱཾ་ཧཱུྃ་ཧཱུྃ་ཕཊ་ཌཱ་ཀི་ནཱི་ཛཱ་ལ་སམྦ་རཾ་སྭཱ་ཧཱ། ཨོྃ་བཛྲ་བཱ་རཱ་ཧི་ཧུྃ་ཧཱུྃ་ཕཊ། ཨོྃ་ཌཱ་ཀི་ནི་ཧུྃ་ཧཱུྃ་ཕཊ། ཨོྃ་ལཱ་མེ་ཧུྃ་ཧཱུྃ་ཕཊ།
ཨོྃ་ཁཎྜ་རོ་ཧེ་ཧུྃ་ཧཱུྃ་ཕཊ། ཨོྃ་རཱུ་པི་ཎི་ཧུྃ་ཧཱུྃ་ཕཊ། ཨོྃ་ཧུྃ་གཽ་རི་ཧུྃ་ཧཱུྃ་ཕཊ། ཨོྃ་ཙཽ་རི་ཧུྃ་ཧཱུྃ་ཕཊ། ཨོྃ་བེཏྟཱ་ལི་ཧུྃ་ཧུྃ་ཧཱུྃ་ཕཊ། ཨོྃ་པུཀྐ་སི་ཧུྃ་ཧཱུྃ་ཕཊ། ཨོྃ་ཙཎྜཱ་ལི་ཧུྃ་ཧཱུྃ་ཕཊ། ཨོྃ་གྷས་མ་རི་ཧུྃ་ཧཱུྃ་ཕཊ། ཨོྃ་ཧེ་རུ་ཀ་ས་ན་ནི་བྷེ་ཧུྃ་ཧཱུྃ་ཕཊ། ཨོྃ་བཛྲ་བཱི་ནེ་ཧུྃ་ཧཱུྃ་ཕཊ། ཨོྃ་བཛྲ་བཾ་ཤེ་ཧུྃ་ཧཱུྃ་ཕཊ། ཨོྃ་
བཛྲ་མྲྀ་དཾ་ཧེ་ཧུྃ་ཧཱུྃ་ཕཊ། ཨོྃ་བཛྲ་མུརྫེ་ཧུྃ་ཧཱུྃ་ཕཊ། ཨོྃ་བཛྲ་ཧཱ་སྱཻ་ཧུྃ་ཧཱུྃ་ཕཊ། ཨོྃ་བཛྲ་ལཱ་སྱཻ་ཧུྃ་ཧཱུྃ་ཕཊ། ཨོྃ་བཛྲ་བཱི་ཏེ་ཧུྃ་ཧཱུྃ་ཕཊ། ཨོྃ་བཛྲ་ནྲྀ་ཏྱེ་ཧུྃ་ཧཱུྃ་ཕཊ། ཨོྃ་བཛྲ་པུཥྤེ་ཧུྃ་ཧཱུྃ་ཕཊ། ཨོྃ་བཛྲ་དྷཱུ་བེ་ཧུྃ་ཧཱུྃ་ཕཊ། ཨོྃ་བཛྲ་དཱི་པེ་ཧུྃ་ཧཱུྃ་ཕཊ། ཨོྃ་བཛྲ་གནྡྷེ་ཧུྃ་ཧཱུྃ་ཕཊ། ཨོྃ་རཱུ་བ་བཛྲི་ཧུྃ་ཧཱུྃ་ཕཊ། ཨོྃ་ར་ས་
བཛྲི་ཧུྃ་ཧཱུྃ་ཕཊ། ཨོྃ་སྤརྴ་བཛྲི་ཧུྃ་ཧཱུྃ་ཕཊ། ཨོྃ་དྷརྨ་དྷཱུ་ཏུ་བཛྲི་ཧུྃ་ཧཱུྃ་ཕཊ། ཨོྃ་བཛྲ་ཨཾ་ཀུ་ཤ་ཛཿཧུྃ་ཧཱུྃ་ཕཊ། ཨོྃ་བཛྲ་པཱ་ཤ་ཧཱུྃ་ཧུྃ་ཧཱུྃ་ཕཊ། ཨོྃ་བཛྲ་སྤོ་ཊ་བཾ་ཧུྃ་ཧཱུྃ་ཕཊ། ཨོྃ་བཛྲ་ཨཱ་བེ་ཤ་ཧོཿཧུྃ་ཧཱུྃ་ཕཊ། ཨོྃ་ཡ་མ་དཱ་ཌྷི་ཧུྃ་ཧཱུྃ་ཕཊ། ཨོྃ་ཡ་མ་དཱུ་ཏི་ཧུྃ་ཧཱུྃ་ཕཊ། ཨོྃ་ཡ་མ་དཾཥྚི་ཧུྃ་ཧཱུྃ་ཕཊ། ཨོྃ་ཡ་མ་མ་ཐ་ནི་
ཧུྃ་ཧཱུྃ་ཕཊ། དམ་ཚིག་ཅན་གྱིས་ཚིག་དག་པས། །མོས་པའི་ཡིད་ཀྱིས་རྟག་ཏུ་བཟླ། །ནང་གི་བདག་ཉིད་སྦྱོར་ལྡན་པས། །ཤེས་རབ་ཐབས་ཀྱི་བདག་ཉིད་ཅན། །རང་གི་ཐབས་དང་རིགས་པའི་ལུས། །གཉིས་སུ་མེད་པར་མཉམ་པའི་བདག །ཁྲོ་བོ་སྤྲུལ་པའི་ཚོགས་སྤྲོས་པས། །

འགྲོ་བ་གསུམ་པོ་བཅས་པར་ནི། །ཧེ་རུ་ཀར་ནི་བྱས་ནས་ཀྱང་། །ས་རྣམས་གསུམ་པོ་མ་ལུས་པར། །ཐམས་ཅད་དེར་ནི་བསྡུས་ནས་ཀྱང་། །སྐུ་གསུང་ཐུགས་ལ་རྣམ་པར་གནས། །འདི་ནི་རྣལ་འབྱོར་ཆོ་ག་སྟེ། །འཁོར་ལོ་བསྒོམ་པའི་བཟླས་པའོ། །རང་གི་ལྷ་ཡི་སྦྱོར་བ་
ཡིས། །རྒྱུ་དང་མི་རྒྱུ་མཐོང་བ་ན། །དམ་ཚིག་ཅན་ཉིད་ལངས་དུས་སུ། །དེ་བཞིན་གཤེགས་པ་ཐམས་ཅད་དང་། །དཔའ་བོ་དང་ནི་རྣལ་འབྱོར་མ། །མཁའ་འགྲོ་དང་ནི་མཁའ་འགྲོ་མ། །ཀུན་གྱིས་གསོལ་བ་གདབ་པར་བྱ། །ཁྲོ་བོ་བདེ་བའི་དགྱེས་པ་ཡི། །ལོངས་སྤྱོད་ལས་
ནི་བྱུང་བ་ཡི། །རབ་རྨོངས་མ་ཡིས་བསྙེན་བྱས་ནས། །བདེ་བའི་སྦྱོར་བ་ལ་ཞུགས་ཏེ། །ར་མ་ཧེ་ནད་ཊ་ན་སུ་ར་ཨཱ་མ་ཧཱ་སུ་ཧུ་བ་ར་ཛོ་ཨི་ནི་ཀ་མ་ལ་སུ་ཧུ། ཨ་ལ་ལ་ཧོཿ། སུ་ར་ཨ་ཨུཏྟ་མ་མ་ཧཱུྃ། མ་ཧཱ་སིཛྫ། ཨུ་མ་ཛོ་ཨི་ནི་ཛ་ལ་མ་ཧོ། ཨཱ་ཨཱི། ཨ་ཨཱ་ར་ཧོ། ཨ་རུ་ཧེ་བྱི་ནུ་སུ་བ་
ཡ་ནཱ་ཧ། སུ་ར་ཨ་སུ་ཧུ་དེ་ཧི་བར་ཊཱ་ཨི་ནི། ཛཱ་ལ་སུ་ཧུ་བི་ས་ཕ་ན་ཏ་རོ་ཎ་ཎ་པ་དེ་ཧི་མ་ཧཱ་སུ་ཧཱུ་མཛྫ་མུ་ཧཱུ་མོ་ཀྵུ་པ་ལ་ཀྑ་ཨུ། ཏུ་ཏུ་ས་ཧཱུ་ཎ་ཨི་སུ་ཧཱུ། བཛྫི་ཨུ་མོ་ཁུ་སུ་ཧཱུ། ཨི་ན་ཨི་དུ། ཁེ་ལ་ཐ་ཨི་མོ་ཁུ་སུ་ཧཱུ། བ་ས་ཨི་པཾ་ཀ་ཨུ་མཛྫ་ཏ་ནུ་ན་བ་རཱ། ཨ་པ་ད་ཏྲཾ། བྷུ་ཛ་ཏ་ནུ་
མུཉྫ་མ་ཧཱ་སུ་ཧཱུ། ཨི་ལ་ད་ར་པཱ་ཡ། ཨུ་མ་ཧཱུ། ཨ་ར་བཱི་ཨ་གི་ཨ་པཾ་ཨུ་ར་སུ། འདི་ཡིས་མགོན་པོ་བསྐུལ་ནས་ནི། །དཀྱིལ་འཁོར་དངོས་གྲུབ་ངེས་པ་སྟེ། །སྙན་ཅིང་འཇམ་པའི་མགྲིན་པའི་དབྱངས། །དཔྱིད་ཀྱི་རྒྱལ་པོའི་གླུ་བླངས་པས། །མཁའ་འགྲོའི་དྲ་བ་དྲི་མེད་རྣམས། །
གཟིགས་ཤིང་ལས་ཀུན་མཛད་པ་ཡིན། །རྡོ་རྗེ་པདྨ་ཡིད་འོང་བ། །སྦྱོར་བས་དངོས་གྲུབ་ཐམས་ཅད་འགྲུབ། །དགྱེས་པ་འདི་ཡིས་བསྐུལ་ན་ནི། །བདེ་བ་ཆེན་པོ་སྩོལ་བ་ཡིན། །སྦྱོར་བ་ཡི་ནི་དུས་དག་ཏུ། །རྡོ་རྗེ་ཅན་གྱིས་རབ་ཏུ་སྦྱར། །ཐོག་མ་དབུས་དང་མཐར་ཐུག་པར། །
ཡི་གེ་བརྒྱ་པའི་གསང་སྔགས་བཟླ། །འཁོར་ལོ་དག་ནི་བརྟན་བྱས་ཏེ། །དཔའ་བོ་དང་ནི་མཁའ་འགྲོ་མ། །འདི་ནི་ཀུན་གྱི་གསང་སྔགས་ཏེ། །ཁྲོ་བོ་སངས་རྒྱས་དེ་བཞིན་གཤེགས། །ཐམས་ཅད་སྙིང་གར་བརྟན་བྱས་ཏེ། །བསྒོམས་པས་ཐམས་ཅད་བརྟན་པར་འགྱུར། །

གལ་ཏེ་བདག་ཉིད་དངོས་གྲུབ་འདོད། །དངོས་གྲུབ་ཐམས་ཅད་གནས་པ་ཡིན། །ཨོྃ་བཛྲ་ཧེ་རུ་ཀ་ས་མ་ཡ་མ་ནུ་པཱ་ལ་ཡ། བཛྲ་ཧེ་རུ་ཀ་ཏྭེ་ནོ་པ་ཏིཥྛ་དྲཱི་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷིཾ་མེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་
ཤྲི་ཡཿཀུ་རུ་ཧཱུྃ། ཧ་ཧ་ཧ་ཧོཿ། བྷ་ག་བཱ་ན། བཛྲ་ཧེ་རུ་ཀ་མཱ་མེ་མུཉྩ་ཧེ་རུ་ཀ་བྷ་བ། མ་ཧཱ་ས་མ་ཡ་སཏྭ་ཨཿཧཱུྃ་ཕཊ་སྭཱ་ཧཱ། འདིས་ནི་བཅོམ་ལྡན་ཀུན་ཁྱབ་ཅིང་། །ཡི་གེ་བརྒྱ་པ་མཆོག་གྱུར་པ། །ཧེ་རུ་ཀ་མཆོག་རང་ཉིད་ཡིན། །ཕྱིར་བཟློག་པ་ནི་གང་ཡིན་པ། །བཅུ་དྲུག་འདབ་མ་
ལ་བཀོད་ཅིང་། །རྗེས་སུ་བསྟན་པའི་དཀྱིལ་འཁོར་ཀུན། །བདག་གིས་བསྒོམས་ཤིང་བརྟན་པར་བྱ། །རང་གི་ལྷ་ཡི་སྦྱོར་བ་ཡིས། །ཇི་ལྟར་བདེ་བར་གནས་པར་བྱ། །རྣལ་འབྱོར་འདི་འདྲ་བསྒོམས་ན་ནི། །ཁམས་གསུམ་པ་ཡང་མཐོང་འགྱུར་ཏེ། །བདག་ཉིད་དཔའ་བོའི་མཚན་ཉིད་
དེ། །དེ་ལྟར་སྲིད་པའང་སྟོང་པ་ཡིན། །བསྒོམས་པས་བདག་ཉིད་ཡང་དག་གནས། །འདིར་ནི་བཀའ་ཐུབ་བཤད་པ་མེད། །ཕྲེང་བ་མེད་ཅིང་སྔགས་ཀྱང་མེད། །གཟུངས་དང་སྦྱིན་སྲེག་ལས་རྣམས་དང་། །ཆོ་གའི་རིམ་པའི་གཞི་ཡང་མེད། །རྣལ་འབྱོར་ཕྱག་རྒྱ་བྱེད་པའང་མེད། །གཡས་
བརྐྱང་ཞབས་ཀྱི་རིམ་པའང་མེད། །རྡོ་རྗེ་ཆེན་པོ་དངོས་འཛིན་པ། །རང་བྱུང་དངོས་གྲུབ་ཀུན་མཛད་པ། །འགོག་པ་ཉིད་ཀྱང་མཛད་པ་མེད། །བདག་ཉིད་བདག་གིས་མཆོད་པར་བྱ། །ཟླ་བའི་དཀྱིལ་འཁོར་གང་བ་ནི། །ལྟེ་བའི་དབུས་སུ་རྣམ་པར་བསྒོམ། །ཡི་གེ་གནས་ཀྱི་མཆོག་
གྱུར་པ། །ལྷ་ཡི་གཟུགས་སུ་བསྒོམ་པ་ནི། །དེ་ཡི་དབུས་སུ་རྣམ་པར་བསམ། །སྐུ་གསུང་ཐུགས་ནི་འདུས་པ་ཅན། །དེ་ཡི་ལུས་ལས་འདས་གྱུར་ཏེ། །སེམས་ཀྱི་དངོས་ཀྱང་བཙལ་དུ་མེད། །ཆགས་པ་མེད་ཅིང་ཆགས་བྲལ་མེད། །ཆགས་བྲལ་དང་ནི་ལྡན་གྱུར་པ། །སྙིང་གི་
པདྨའི་དབུས་སུ་ནི། །བརྟགས་པས་ལེགས་པར་རྙེད་པ་ནི། །ཡིད་ཀྱིས་ངལ་བསོས་བྱས་པ་སྟེ། །རྣལ་འབྱོར་མ་ཀུན་བུད་མེད་ཡིན། །ཕྱག་རྒྱ་མཆོག་ཏུ་བཤད་པའོ། །ཟླ་བའི་སྟེང་དུ་བརྒྱ་ཕྱེད་བརྒྱན། །ཡེ་ཤེས་སེམས་ནི་བསམ་པ་ནི། །མཆོག་སྟེ་སྤྱད་པར་བྱ་བ་མེད། །བླ་མའི་

མན་ངག་ལམ་དང་ནི། །སེམས་ནི་མཆོག་ཏུ་འབད་པ་ཡིས། །འདི་ལྟར་ཞི་བའི་གནས་དེ་ནི། །འཇིག་རྟེན་དུ་མས་མ་རྟོགས་ཏེ། །སྦྱོར་དང་སྦྱོར་བ་བྲལ་བྱས་ནས། །གོ་འཕང་གཅིག་པུས་ཁྱབ་པ་ཡིན། །འདི་ལྟར་བྱང་ཆུབ་འབྲས་བུ་རྙེད་པར་དཀའ་བ་སྟེ། །དང་པོར་དབྱངས་ཀྱི་
ཡི་གེ་ལས་བྱུང་གཞན་དུ་ཡང་། །སྟེགས་ངན་གཞུང་ལུགས་ལོག་པའི་བློ་གྲོས་དེ་ཉིད་ནི། །མ་ནིང་ཤེས་རབ་ལོང་བ་གཟུགས་བཞིན་འབྲས་བུ་མེད། །མངོན་པར་བརྗོད་པའི་རྒྱུད་བླ་མའི་བླ་མ་ལས་སྐུ་གསུང་ཐུགས་ཀྱི་གནས་ཀྱི་རིམ་པའི་ལེའུ་སྟེ་ཉི་ཤུ་རྩ་ལྔ་པའོ།། །།དེ་ནས་སྦྱོར་བ་
བཤད་བྱ་བ། །ཐོད་པ་སངས་རྒྱས་མཆོག་དམ་པ། །དེ་ཉིད་སྦྱོར་བ་ཀུན་གྱི་མཆོག །དངོས་གྲུབ་ཐམས་ཅད་རབ་སྩོལ་བ། །གསང་བ་ལེགས་པར་སྦ་བྱ་ཞིང་། །གང་གིས་སུ་ལའང་མི་བསྟན་ནོ། །དེ་ཉིད་མཆོག་གི་བསྒོམ་བཟུང་བ། །རྣལ་འབྱོར་མ་ཡི་སྙིང་ལ་གནས། །གསང་
བ་བརྟན་པར་སྦ་བྱ་ཞིང་། །བླ་མའི་ངག་ནི་བསྒོམ་པར་བྱ། །དུར་ཁྲོད་གནས་ནི་ཡིད་འོང་བ། །སྒྲུབ་པ་པོ་ཡིས་ངེས་བརྟན་པ། །བསྐྱེད་པའི་རིམ་པའི་སྦྱོར་བ་ཡིས། །ས་དང་གནས་ཀྱི་རིམ་པ་དག །རྡོ་རྗེ་ལྟེ་བའི་དབུས་སུ་ནི། །ཡི་གེ་ཧཱུྃ་ནི་བསྒོམ་པར་བྱ། །དེ་ཡིས་ཁྱད་པར་བདག་
ཉིད་ནི། །སངས་རྒྱས་ཐོད་པ་ཅན་གྱི་མཆོག །གནས་མེད་ཞི་ཞིང་དག་པ་སྟེ། །རྟོག་པ་ཐམས་ཅད་རྣམ་སྤངས་ཡིན། །ཨཱ་ལི་ཀཱ་ལི་ལས་རང་བྱུང་། །གཉིས་མེད་མཆོག་ཏུ་ཞི་བ་སྟེ། །ཕྱག་གཉིས་པ་ལ་ཞལ་གཅིག་པ། །ཕྱག་རྒྱ་དྲུག་གིས་རྣམ་པར་བརྒྱན། །འཛམ་བུའི་མདོག་
ཅན་མཉམ་པས་ཁྱབ། །འོད་ཟེར་ཕྲེང་བས་ཀུན་ཏུ་འཁྲིགས། །ཐོད་པའི་ཕྲེང་བའི་དབུ་རྒྱན་ཅན། །སྤྱན་གསུམ་པ་ལ་བཞད་པའི་ཞལ། །སེམས་དཔའ་ཀུན་གྱི་བསྒོམ་པ་སྟེ། །གཉིས་མེད་ཆོས་ནི་བླ་ན་མེད། །སྟག་གི་པགས་པ་གོས་སུ་མནབས། །ན་རའི་པགས་པ་སྟེང་དུ་བརྐྱང་། །
ཐོད་པ་དང་ནི་ཁ་ཊྭཱཾ་འཛིན། །གཡས་པ་མི་འཇིགས་ཕྱག་རྒྱ་ཅན། །སངས་རྒྱས་ལྔ་ཡི་དབུ་རྒྱན་ཅན། །མགོ་བོའི་ཕྲེང་བས་རྣམ་པར་བརྒྱན། །དེ་ཡི་ཕྱག་གཡོན་ཐོད་པ་ནི། །རྐང་གིས་རབ་ཏུ་གང་བ་དང་། །སེམས་ཅན་ཀུན་གྱི་དོན་གྱི་ཕྱིར། །ཡེ་ཤེས་འཆི་མེད་ལྔས་བསྲེས་པ། །ཁ་ཊྭཱཾ་ག་ནི་

ལྷའི་རྣལ་འབྱོར། །ཐོད་པ་དཔའ་བོ་རྣལ་འབྱོར་མ། །གཡས་པ་མི་འཇིགས་དག་པ་སྟེ། །འཇིགས་པ་མ་ལུས་མི་འཇིགས་གྲོལ། །གདུག་ཅིང་འཇིགས་པ་མ་ལུས་ཀུན། །འདིར་ནི་ཞབས་ཀྱིས་གནོན་པར་མཛད། །གདུག་པས་འཇིགས་པ་ཐམས་ཅད་སྤོང་། །
ཟླ་བ་ཕྱེད་པ་ཞི་བ་འཛིན། །སྣ་ཚོགས་རྡོ་རྗེས་དབུ་ལ་མཚན། །རྡོ་རྗེ་ཕྲེང་བས་དཔྲལ་བ་མཛེས། །རྐང་རྒྱན་ཡིད་འོང་རྒྱན་ཆ་ཅན། །སྣ་ཚོགས་པདྨ་འདབ་བརྒྱད་ཀྱི། །ལྟེ་བའི་དབུས་ནས་བཞེངས་པ་ནི། །འཇིགས་བྱེད་དང་ནི་དུས་མཚན་དག །ཆགས་པ་ཞེ་སྡང་ཞབས་ཀྱིས་གནོན། །
ཡེ་ཤེས་སེམས་དཔའ་དེ་གཟུགས་ཅན། །ཡི་གེ་ཧཱུྃ་ལས་བྱུང་བར་བསྒོམ། །ཐུགས་ཀྱི་འཁོར་ལོའི་སྙིང་ག་རུ། །ཧེ་རུ་ཀ་ནི་རྣམ་པར་བསྒོམ། །གསུང་གི་འཁོར་ལོ་ཁ་ལ་བསྒོམ། །སྐུ་ཡི་འཁོར་ལོ་སྔ་མ་བཞིན། །སྔོ་དང་དམར་དང་དཀར་བ་དང་། །ཕྱག་དྲུག་པ་ལ་ཞལ་གསུམ་པ།།རྡོ་
རྗེ་དྲིལ་བུ་མཉམ་པར་ལྡན། །སྤྱན་གསུམ་པ་ལ་བཞིན་རྣམ་སྒྱུར། །ཐོད་པ་དང་ནི་ཁ་ཊྭཱཾ་འཛིན། །རྩེ་གསུམ་པ་དང་ཐོད་པ་འཆང་། །རང་རིག་ལུས་དང་ཡང་དག་འདུས། །བདེ་བ་ཆེན་པོའི་གོ་འཕང་གནས། །དཀྱིལ་འཁོར་བཞི་ཡི་དབུས་དག་ཏུ། །ཡི་གེ་གསུམ་སོགས་ལས་བྱུང་
བ། །ཐོད་པའི་ཕྲེང་བའི་དབུ་རྒྱན་ཅན། །རང་གི་མཚན་མའི་མཆོག་དང་ལྡན། །གནས་ལ་སོགས་པའི་རིམ་སྦྱོར་བ། །སྡོམ་པ་གསུམ་གྱི་མཆོག་དམ་པ། །མཁའ་འགྲོ་མ་དང་ལཱ་མ་དང་། །དུམ་སྐྱེས་མ་དང་གཟུགས་ཅན་མ། །པདྨའི་ཕྱོགས་ཀྱི་གནས་ལ་དགོད། །ཐོད་པ་བཞི་པོ་
མཆོག་ཡིན་ཏེ། །མཁའ་འགྲོ་མ་ནི་ཁ་དོག་སེར། །ལཱ་མ་པ་ལ་ཤ་ཡི་མདོག །དུམ་སྐྱེས་མ་ནི་སྔོན་པོ་སྟེ། །གཟུགས་ཅན་མ་ནི་དམར་ལ་འབར། །ཐོད་པ་དང་ནི་ཁ་ཊྭཱཾ་འཛིན། །གཡས་པ་མི་འཇིགས་མཆོག་ཡིན་ཏེ། །སྒོ་རྣམས་སུ་ནི་ལྷ་མོ་བཞི། །ཁྭ་གདོང་ལ་སོགས་མཁའ་
འགྲོ་མ། །སྔོ་དང་སེར་དང་དེ་བཞིན་དམར། །ལྗང་གུ་དྲག་པོའི་གཟུགས་ཅན་ནོ། །མཚམས་སུ་གཤིན་རྗེ་སྲེག་ལ་སོགས། །རབ་འཇིགས་ཤིན་ཏུ་འཇིགས་པ་སྟེ། །ཐོད་པ་དང་ནི་ཁ་ཊྭཱཾ་འཛིན། །མི་འཇིགས་མཆོག་ཀྱང་དེ་བཞིན་ཏེ། །ཅང་ཏེའུ་དང་ནི་གྲི་གུག་ཉིད། །བདུད་ནི་

བཞི་པོའི་སྟེང་ན་བཞུགས། །སྤྱན་གསུམ་པ་ལ་སྐྲ་གྲོལ་བ། །ཕྱོགས་ཀྱི་གོས་མཆོག་འཛིན་པ་སྟེ། །ཐོད་པའི་ཕྲེང་བའི་དབུ་རྒྱན་ཅན། །ཕྱག་རྒྱ་ལྔ་ཡིས་རྣམ་པར་བརྒྱན། །མེ་ལོང་རོ་དང་དྲི་དང་ནི། །རེག་གི་མཆོད་པ་བཞི་པོ་སྟེ། །ས་བཅུ་དག་གི་རིམ་པ་དང་། །སྐུ་གསུང་ཐུགས་
ཀྱི་སྦྱོར་བ་ཡིས། །ཕྱི་དང་ནང་གི་ཆོས་རྣམས་ཀུན། །བྱང་ཆུབ་ཕྱོགས་ཀྱི་རྣམ་པར་དག །ཀ་ལ་སོགས་པ་ཉི་ཤུ་བཞི། །མགོ་ལ་བིན་དུས་མནན་པ་སྟེ། །གསལ་བྱེད་ཧཱུྃ་གཉིས་དང་ཡང་སྦྱར། །མཐར་ནི་ཕཊ་དང་རབ་ཏུ་སྦྱར། །དཔའ་བོ་ཀུན་གྱི་གསང་སྔགས་ནི། །འདོད་པའི་
འབྲས་བུ་ཐམས་ཅད་སྟེར། །གསལ་བྱེད་མཁའ་འགྲོ་མ་ཡི་མིང་། །མཐར་ནི་ཧཱུྃ་ཧཱུྃ་ཕཊ་ཡིན་ཏེ། །འདི་ལྟར་རབ་གཏུམ་མཁའ་འགྲོ་མ། །སྔགས་ཀྱི་དེ་ཉིད་བདེ་བ་སྟེར། །སྐུ་གསུང་ཐུགས་ཀྱི་རྡོ་རྗེ་ནི། །ཧཱུྃ་ཨཱཿཨོྃ། འདི་ནི་རབ་ཏུ་གསང་བ་སྟེ། །པདྨའི་འདབ་ལ་མཁའ་འགྲོ་
མ། །གསལ་བྱེད་མ་ནིང་དང་བཅས་པ། ཧཱུྃ་ནི་གཉིས་པ་ཉིད་ཡིན་ཏེ། །མཁས་པས་མཐར་ནི་ཕཊ་དང་སྦྱར། ཁྭ་གདོང་ལ་སོགས་གསང་སྔགས་ནི། །ཡ་ར་ལ་ཝ། །གསལ་བྱེད་དང་ནི་བཅས་པ་སྟེ། །མཐར་ནི་ཧཱུྃ་དང་ཕཊ་དང་སྦྱར། །གཤིན་རྗེ་སྲེག་མ་ལ་སོགས་པ། །
ཤ་ཥ་ས་ཧ། གསལ་བྱེད་དང་ནི་ཧཱུྃ་གཉིས་དང་། །ཕཊ་ཀྱང་དེ་བཞིན་སྦྱར་བར་བྱ། །དབུས་སུ་སངས་རྒྱས་ཐོད་པ་ཡི། །གསང་སྔགས་དེ་བཞིན་རྗེས་སུ་དྲན། །ཨོཾ་ཨཾ་ཨཱཾ། ཨིཾ་ཨཱིཾ། ཨུཾ་ཨུཾ། ཨེ་ཨཻ། ཨཾ་ཨེཿ། ཥ་སྭཱ་ཧཱ། ཁམས་དང་ཕུང་པོ་སྐྱེ་མཆེད་ལ། །གོ་ཆ་རྣམས་
ནི་སྦྱར་བར་བྱ། །ཡེ་ཤེས་འཁོར་ལོ་དམ་ཚིག་དག །མཉམ་པའི་རོ་ཡིས་མཆོད་པར་བྱ། །མཆོད་པ་བཞི་པོའི་གསང་སྔགས་རྣམས། །རང་མིང་གསལ་བྱེད་ཧཱུྃ་བྱས་ཏེ། །འདི་ལྟར་དཀྱིལ་འཁོར་དག་དང་སྦྱར། །སངས་རྒྱས་ཐོད་པ་ལས་བྱུང་བ། །རྡོ་རྗེ་རྒྱན་ནི་བགོས་པ་སྟེ། །
ཐམས་ཅད་རིམ་པ་བཞིན་དུ་སྦྱར། །འཐོར་འཐུང་དུ་ནི་རབ་སྦྱར་བས། །གསང་བ་བཞི་པོ་བཟླ་བར་བྱ། །སྤྲོ་དང་བསྡུ་བའི་སྦྱོར་བ་ཡིས། །འཁོར་ལོ་གསུམ་གྱི་རིམ་པ་དག །འདིར་ནི་ཆོ་གའི་སྦྱོར་བ་ཡིས། །དུས་བཞི་དག་ཏུ་སྦྱར་ནས་སུ། །དམ་ཚིག་འཁོར་ལོའི་བཟླས་པ་བྱ། །དམ་ཚིག་

མཆོག་ནི་དངོས་གྲུབ་འགྱུར། །དམ་ཚིག་ཅན་གྱི་གསང་སྔགས་ཀུན། །སངས་རྒྱས་ཐོད་པ་མཆོག་ཡིན་ཏེ། །མཉམ་པར་མ་བཞག་སྦྱོར་བ་ཡིས། །འདི་ལྟར་ཐམས་ཅད་རབ་ཏུ་བརྟག །དམ་ཚིག་རྟག་ཏུ་བསྐྱང་བྱ་ཞིང་། །ཡེ་ཤེས་འཆི་མེད་ལྔ་ཡི་མཆོག །
ཡང་ན་རང་མིང་བཟླས་པ་བྱ། །སྔགས་ཀྱི་དེ་ཉིད་བཟླས་པར་བྱ། །ཨོྃ་ཤྲཱི་བུདྡྷ་ཀ་པཱ་ལི་བྲུཾ་ཨཱཿཧཱུྃ་ཌཱ་ཀི་ནཱི་ཛཱ་ལ་སམྦ་རཾ་ཧཱུྃ་ཕཊ་སྭཱ་ཧཱ། འདི་ནི་ཡིད་འོང་སྦྱོར་བའི་མཆོག །རྣལ་འབྱོར་མ་ཡི་ཡེ་ཤེས་མཆོག །གང་དུ་དམ་ཚིག་ཉམས་པ་ལ། །སྦྱོར་བ་འདི་ནི་སྦྱིན་པར་བྱ། །ཞི་བར་
གྱུར་ནས་བླ་མེད་པ། །རྣལ་འབྱོར་མ་ཡི་དབང་ཡང་བསྐུར། །དུས་བཞི་དག་ཏུ་རིམ་པ་ཡིས། །ཕྱི་དང་ནང་གི་ཆུས་ཁྲུས་བྱ། །ཡང་ན་དམ་ཚིག་སྡོམ་པ་བླང་། །བླ་མ་ལ་ནི་གསོལ་བ་གདབ། །བདག་ནི་མི་ཤེས་རྨོངས་པ་སྟེ། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་
སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་སྐྱབས་སུ་མཆི། །དེ་ནི་ཐོ་ཙོམ་མེད་བྱས་ནས། །ངེས་པར་དངོས་གྲུབ་ཅན་དུ་འགྱུར། །མངོན་པར་བརྗོད་པའི་རྒྱུད་བླ་མའི་བླ་མ་ལས་དམ་ཚིག་ལས་ལྡང་བ་སངས་རྒྱས་ཐོད་པ་
བསྐྱེད་པ་སྟེ་ལེའུ་ཉི་ཤུ་རྩ་དྲུག་པའོ།། །།དེ་ནས་གཞན་ཡང་བཤད་བྱ་བ། །གསང་བའི་དེ་ཉིད་རྙེད་དཀའ་བ། །གསང་སྔགས་ཀུན་ནི་བསྐྱེད་པ་དང་། །འགྲོ་བའི་གནས་དང་འགྲོ་བ་དང་། །རྣལ་འབྱོར་མ་དང་དཔའ་བོ་ཀུན། །སངས་རྒྱས་རྣམས་ཀྱི་གནས་མཆོག་ཡིན། །
མི་ཟད་གཉིས་མེད་རྣམ་པར་དག །ཐོག་མར་དབུས་མཐར་དྲི་མ་མེད། །ཨ་ཡི་ཡེ་ཤེས་ལས་བྱུང་བ། །རྡོ་རྗེ་སེམས་དཔའ་བདེ་བ་ཆེ། །ཞལ་གསུམ་ཕྱག་དྲུག་ཞི་བ་སྟེ། །སྤྱན་གསུམ་པ་ལ་ཐུགས་རྗེའི་ཉམས། །ཕྱག་རྒྱ་ཆེ་དང་ཡང་དག་ལྡན། །རང་བཞིན་དག་ཅིང་དྲི་མ་མེད། །རལ་
པ་ཟླ་ཕྱེད་དབུ་ལ་བརྒྱན། །སྣ་ཚོགས་རྡོ་རྗེས་དབུ་ལ་མཚན། །ཐོད་པའི་ཕྲེང་བའི་དབུ་རྒྱན་ཅན། །སངས་རྒྱས་ལྔ་ཡིས་རྣམ་པར་བརྒྱན། །སེམས་དཔའི་སྐྱིལ་མོ་ཀྲུང་གིས་བཞུགས། །ཕྱག་རྒྱ་དྲུག་གིས་རྣམ་པར་བརྒྱན། །རྡོ་རྗེ་དྲིལ་བུ་མཉམ་པར་ལྡན། །རལ་གྲི་ལྕགས་ཀྱུ་ཕྱག་ན་

བསྣམས། །རིན་ཆེན་ཞགས་པ་མཛེས་པ་འཛིན། །དངོས་གྲུབ་ཐམས་ཅད་རབ་ཏུ་སྩོལ། །དཀར་དང་སྔོ་དང་དམར་བའི་ཞལ། །རྣམ་ཐར་གསུམ་གྱི་གནས་ཀྱི་མཆོག །ཡེ་ཤེས་སེམས་དཔའ་སྙིང་ག་རུ། །འཁོར་ལོ་གསུམ་གྱི་མཆོག་ཀྱང་བསྒོམ། །ཧཱུྃ་ལས་ཐུགས་ཀྱི་འཁོར་ལོ་སྟེ། །
དེ་ཡི་ཕྱག་མཚན་སྔོན་པོ་དང་། །ཨཱཿལས་གསུང་གི་འཁོར་ལོ་སྟེ། །དེ་ཡི་ཕྱག་མཚན་དམར་པོའོ། །ཨོཾ་ལས་སྐུ་ཡི་འཁོར་ལོ་སྟེ། །དེ་ཡི་ཕྱག་མཚན་དཀར་པོ་ཡིན། །དཔའ་བོ་རྣལ་འབྱོར་མ་མཉམ་སྦྱོར། །སྐུ་གསུང་ཐུགས་ནི་དྲི་མ་མེད། །རྃ་ལས་ཕྱག་རྒྱ་ཆེན་པོ་སྟེ། །ལྟེ་བའི་དབུས་
སུ་རྣམ་པར་བསམ། །ཨི་ལས་བྷ་ག་པདྨ་སྟེ། །བྱང་ཆུབ་ཟླ་བ་དྲི་མ་མེད། །ཨུ་ནི་སྙིང་གར་བསམ་པ་སྟེ། །ཨེ་ནི་མགོ་ལ་རྣམ་པར་དགོད། །ཨཻ་ནི་སྤྱི་གཙུག་དག་ཏུ་དགོད། །ཨོ་ནི་མིག་ཏུ་དགོད་པ་སྟེ། །ཨཾ་ནི་གོ་ཆར་བྱས་ནས་སུ། །ཨ་ནི་མདུན་གྱི་མཚོན་ཆའོ། །ལྀ་ལས་ལྷ་མོ་
སྤྱན་ཡིན་ཏེ། །རྀ་ལས་དམ་ཚིག་སྒྲོལ་མ་ཡིན། །ལཱྀ་ལས་ལྷ་མོ་གོས་དཀར་མོ། །རཱྀ་ལས་རིན་ཆེན་ཡང་དག་འབྱུང་། །རིན་ཆེན་སྒྲོན་དང་ཡེ་ཤེས་སྒྲོན། །དཀར་ཞིང་པ་ལ་ཤ་ཡི་མདོག །དམར་ཞིང་འཛམ་བུ་ཆུ་བོའི་མདོག །ཞལ་གསུམ་པ་ལ་ཕྱག་དྲུག་པ། །སྤྱན་གསུམ་དགྱེས་
པས་རྣམ་པར་མྱོས། །ཐམས་ཅད་ཕྱོགས་ཀྱི་གོས་ཅན་ཏེ། །རང་གི་ཐབས་དང་མཉམ་པར་ལྡན། །འཁོར་ལོ་སྣ་ཚོགས་རྡོ་རྗེ་དང་། །པདྨ་དམར་པོ་རིན་ཆེན་དང་། །རྡོ་རྗེ་དྲིལ་བུ་ལྷན་ཅིག་སྦྱར། །འདོད་པ་ཐམས་ཅད་རབ་ཏུ་སྩོལ། །རལ་གྲི་མདའ་དང་ལྕགས་ཀྱུ་འཛིན། །གཞུ་ནི་
འགུགས་པར་འཛིན་པ་སྟེ། །མཚན་རྣམས་ཐམས་ཅད་ཡོངས་སུ་རྫོགས། །ཐོད་པ་ཡི་ནི་ཅོད་པན་ཅན། །སྣ་ཚོགས་པདྨའི་དབུས་སུ་ནི། །སེམས་དཔའི་སྐྱིལ་མོ་ཀྲུང་དུ་བཞུགས། །དེ་དག་སྒོ་རུ་དགོད་པ་སྟེ། །དབུས་སུ་གཙོ་བོའི་ཟླ་བའི་གདན། །ཟུར་ལ་མཆོད་པ་རྣམ་པ་བཞི། །
ཕྱོགས་ཀྱི་གོས་ཅན་སྐྲ་གྲོལ་བ། །ཞལ་གསུམ་པ་ལ་ཕྱག་དྲུག་པ། །སྤྱན་གསུམ་ཐོད་པའི་ཕྲེང་བ་ཅན། །མེ་ལོང་དང་ནི་པི་ཝང་དང་། །དྲིལ་བུ་དུང་དང་བཅུད་ཀྱིས་ལེན། །ཆང་གི་བཏུང་བ་ལག་པས་མཆོད། །གཞན་དུ་ཇི་ལྟར་བདག་པོ་བཞིན། །རྒྱན་རྣམས་ཐམས་ཅད་ཡོངས་སུ་རྫོགས། །

སྐྱིལ་ཀྲུང་ཕྱེད་པར་ལེགས་པར་བཞུགས། །ལག་པ་སྙིམ་པའི་ཐལ་མོ་ཡིས། །མཆོད་པ་ལག་ཏུ་ཐོགས་ནས་ནི། །འདི་ལྟའི་ཆོ་གས་ཐམས་ཅད་མཁྱེན། །ཨཱ་ལི་དེ་ཉིད་དྲི་མ་མེད། །གསང་བ་མཆོག་ནི་རྙེད་དཀའ་བ། །རྡོ་རྗེ་སེམས་དཔས་བཤད་པ་ཡིན། །སྔགས་
ཀྱི་དེ་ཉིད་ཆོ་ག་དག །སྐུ་གསུང་ཐུགས་སུ་ཡང་དག་སྦྱར། །ཨོྃ་ཤྲཱི་མ་ཧཱ་སུ་ཁ་བཛྲ་ས་ཏྭ་ཨཱཿ། ཨཱ་ཧཱུྃ་ཌཱ་ཀི་ནཱི་ཛཱ་ལ་སམྦ་རཾ་སྭཱ་ཧཱ། །ཨོཾ་སིདྡྷ་ལོ་ཙ་ནི་ལྀ་ཨཱཿཧཱུྃ་སྭཱ་ཧཱ། །ཨོྃ་ས་མ་ཡ་ཏཱ་ཏེ་ཏུཏྟ་རེ་ཏུ་རེ་རྀ་ཨཱཿཧཱུྃ་སྭཱ་ཧཱ། །ཨོྃ་རཏྣ་ཛཱ་ལི་ནི་རཱྀ་ཨཱཿ
ཧཱུྃ་སྭཱ་ཧཱ། །ཨོྃ་རཱུ་པ་བཛྲི་བྷྲུཾ། ཨོྃ་ཤབྷ་བཛྲི་ཧཱུྃ། ཨོྃ་ར་ས་བཛྲི་ཧྲཱིཿ ཐམས་ཅད་མཁྱེན་པ་དབང་ཕྱུག་མཆོག །བྷ་གའི་དབུས་སུ་གནས་པར་བསྒོམ། །ཨཱ་ལི་རྡོ་རྗེ་གསང་བ་ཆེ། །སེམས་ཅན་ཀུན་གྱི་སྙིང་ལ་གནས། །གང་གིས་དངོས་པོ་ཀུན་གསང་བ། །དེ་
ཡི་གསང་བ་བཤད་པ་ཡིན། །རྣལ་འབྱོར་པ་ཡིས་དུས་བཞི་རུ། །བཟླས་དང་བསྒོམ་པར་ལྡན་པར་བྱ། །སོམ་ཉི་ཐམས་ཅད་སྤངས་ནས་ནི། །སེམས་དཔའ་ཆེན་པོ་བརྩོན་འགྲུས་བརྟན། །ཡེ་ཤེས་འཁོར་ལོ་མཐོང་ནས་ནི། །དམ་ཚིག་ཅན་གྱིས་མཆོད་དབང་བསྐུར། །དེ་དག་གཅིག་
ཏུ་བསྟིམས་ནས་སུ། །སྤྲོ་དང་བསྡུ་བའི་སྦྱོར་བ་ཡིས། །ཁམས་གསུམ་དག་ནི་མ་ལུས་པ། །ཐམས་ཅད་རྡོ་རྗེ་འཛིན་ལྟ་བུ། །འདས་པ་དང་ནི་ད་ལྟར་དང་། །མ་འོངས་པ་ཡི་དུས་གསུམ་པོ། །དེ་ལྟར་སེམས་ཅན་གསུམ་པོ་ལ། །རྡོ་རྗེ་སེམས་དཔའི་གོ་འཕང་གནས། །ལྷན་ཅིག་
སྐྱེས་དགའ་དག་པའི་བདག །ཐོག་མ་མེད་པའི་མཆོག་ཡིན་ནོ། །མངོན་པར་བརྗོད་པའི་རྒྱུ་བླ་མའི་བླ་མ་ལས་རྡོ་རྗེ་སེམས་དཔའ་སྐྱེད་པའི་ལེའུ་སྟེ་ཉི་ཤུ་རྩ་བདུན་པའོ།། །།དེ་ནས་མཆོག་གི་ཆོ་ག་བཤད། །འཇམ་པའི་རྡོ་རྗེའི་སྒྲུབ་པ་ནི། །མྃ་གི་ཡེ་ཤེས་ལས་བྱུང་བའི། །
འཇམ་པའི་རྡོ་རྗེ་བདེ་བ་ཆེ། །ཞལ་དྲུག་ཕྱག་དྲུག་ཞི་བ་སྟེ། །སྐུ་མདོག་དཀར་པོ་དྲི་མ་མེད། །སྤྱན་གསུམ་རྡོ་རྗེ་སྐྱིལ་ཀྲུང་ཅན། །ཕྱག་རྒྱ་དྲུག་ནི་འབར་བས་བརྒྱན། །མི་བསྐྱོད་པ་ཡི་ཅོད་པན་ཅན། །ཐོད་པའི་ཕྲེང་བས་རྣམ་པར་བརྒྱན། །ཟླ་བ་ཕྱེད་པ་ཞི་བ་འཛིན། །རལ་པའི་ཐོར་

ཚུགས་བཅིངས་པ་སྟེ། །དཀར་དང་སྔོ་དང་ངུར་སྨྲིག་ཉིད། །སེར་དང་ལྗང་གུ་དེ་བཞིན་ཏེ། །སྟེང་གི་ཞལ་ནི་ཞི་བ་སྟེ། །ལྷ་ཡི་དངོས་གྲུབ་འབྲས་བུ་སྩོལ། །རྡོ་རྗེ་དྲིལ་བུ་མཉམ་པར་ལྡན། །རལ་གྲི་པོ་ཏི་འཛིན་པ་སྟེ། །ཨུཏྤ་ལ་དང་ལྕགས་ཀྱུ་ཉིད། །ཡེ་ཤེས་ལུས་ཅན་རྣམ་པར་བསྒོམ། །
སྐུ་གསུང་ཐུགས་ཀྱི་སྙིང་པོ་ནི། །འཁོར་ལོའི་དབུས་སུ་རྣམ་པར་བསྒོམ། །སྔར་བཤད་གནས་ཀྱི་སྦྱོར་བ་ཡིས། །ཇི་ལྟར་རྡོ་རྗེ་སེམས་དཔའ་ལྟར། །གསང་སྔགས་འདི་ནི་རྗེས་སུ་དྲན། །འཇམ་པའི་རྡོ་རྗེའི་གསང་བ་ནི། །གསང་གསུམ་ཡེ་ཤེས་དམ་ཚིག་ཅན། །དཔའ་བོ་རྣལ་འབྱོར་མ་སྦྱོར་བའོ། །
ཨོྃ་ཤྲཱི་མ་ཧཱ་སུ་ཁ་མཉྫུ་བཛྲ་ཨ་མཾ་ཧཱུཾ་ཌཱ་ཀི་ནཱི་ཛཱ་ལ་སམྦ་ར་སྭཱ་ཧཱ། རང་གིས་དབང་བསྐུར་བྱས་ནས་ནི། །བརྟུལ་ཞུགས་ཆེན་པོ་གསང་སྔགས་བཟླ། །གསང་གསུམ་འཁོར་ལོ་སྤྲོས་ནས་ནི། །ཁམས་གསུམ་དག་ནི་བསྡུ་བར་བྱ། །འདི་ནི་མཆོག་ཏུ་གསང་བ་སྟེ། །གང་གིས་སུ་ལའང་བསྟན་མི་བྱ། །
མངོན་པར་བརྗོད་པའི་རྒྱུད་བླ་མའི་བླ་མ་ལས་འཇམ་པའི་རྡོ་རྗེ་སྒྲུབ་པའི་ལེའུ་སྟེ་ཉི་ཤུ་རྩ་བརྒྱད་པའོ།། །།དེ་ནས་གཞན་ཡང་བཤད་བྱ་བ། །ཡི་གེ་དགུ་པ་བསྒྲུབ་པ་སྟེ། །ཀྵ་ཡི་ཡེ་ཤེས་ལས་བྱུང་བ། །གདུག་པ་ཐམས་ཅད་ཟ་བྱེད་པ། །ཟ་བྱེད་མཁའ་འགྲོ་ཟ་བྱེད་ཅིང་། །རྣམ་རྟོག་
ཟོས་ཤིང་ཟད་པར་བྱེད། །མཁའ་མཉམ་སྟོང་པ་ལས་བྱུང་བ། །ནམ་མཁའི་ལོངས་སྤྱོད་ཟ་བྱེད་ཅིང་། །ཞལ་དྲུག་ཕྱག་ནི་བཅུ་གཉིས་པ། །སྤྱན་གསུམ་པ་ལ་ཞལ་རྣམ་སྒྱུར། །གཡས་བརྐྱང་པ་ཡི་ཞབས་ཀྱིས་བཞུགས། །གདུག་པའི་བདུད་ནི་ཟ་བྱེད་ཅིང་། །འཇིགས་བྱེད་དང་ནི་
འཇིགས་བྱེད་མོ། །ཁ་སྦུབ་ཞབས་ཀྱིས་མནན་པར་བཞུགས། །སྟག་གི་པགས་པ་གོས་སུ་མནབས། །མགོ་བོའི་ཕྲེང་བས་རྣམ་པར་བརྒྱན། །ཐོད་པའི་ཕྲེང་བའི་དབུ་རྒྱན་ཅན། །ཟླ་བ་ཕྱེད་ལས་ཉེ་བར་མཛེས། །སྣ་ཚོགས་རྡོ་རྗེས་རལ་པ་མནན། །ཕྱག་རྒྱ་དྲུག་གིས་སྐུ་ལུས་
བརྒྱན། །ཞལ་གྱི་མཆེ་བ་རྣམ་པར་གཙིགས། །འཇིགས་བྱེད་རབ་ཏུ་ཆེར་འཇིགས་ཤིང་། །སྔོ་དང་དུད་ཁ་ལྗང་ཁུ་དང་། །དམར་དང་ལྔ་པ་སེར་པོའོ། །དྲུག་པ་དག་ནི་བོང་བུའི་མགོ། །སྟེང་གི་ཞལ་གདོང་རབ་ཏུ་འཇིགས། །ཐལ་བ་སྤྲིན་གྱི་མདོག་ཅན་ལ། །གདུག་པ་ཐམས་ཅད་

རབ་འཇོམས་མ། །རྡོ་རྗེ་དྲིལ་བུ་མཉམ་པར་ལྡན། །དགྱེས་པའི་ལོངས་སྤྱོད་ལོངས་སྤྱོད་ཅིང་། །པང་དུ་རྡོ་རྗེ་ཕག་མོ་ནི། །དེ་མདོག་སྟེང་ཞལ་ཕག་མགོ་སྟེ། །གཉིས་སུ་མེད་པར་མཉམ་པར་ལྡན། །སྐྲ་གྲོལ་བ་དང་ཕྱོགས་གོས་ཅན། །བྱིན་པ་གཉིས་ཀྱིས་མཉམ་
པར་འཁྲིལ། །ཐུགས་རྗེའི་ཆགས་པས་རྣམ་པར་མྱོས། །ཐོད་པ་ཁ་ཊྭཱཾ་ག་འཛིན་ཅིང་། །ཚངས་པའི་པགས་པ་མནབས་པ་སྟེ། །རྡོ་རྗེ་མདུང་དང་ཅང་ཏེའུ་དང་། །གྲི་གུག་ཞགས་པ་མགོ་བོ་དང་། །ཕྱག་ཏུ་རལ་གྲི་འཕྱར་བ་སྟེ། །དྲག་པོ་གདུག་པ་ཀུན་འཇོམས་པ། །སྙིང་གར་
ཡེ་ཤེས་མཁའ་འགྲོ་ནི། །ཁྭ་གདོང་ལ་སོགས་ཡོངས་ཀྱིས་ཁྱབ། །འཁོར་ལོ་འདབ་བརྒྱད་དབུས་དག་ཏུ། །གཡོན་ནས་གཡས་སུ་བསྐོར་ནས་ནི། །དུར་ཁྲོད་དང་ནི་ཉེ་དུར་ཁྲོད། །མཁའ་འགྲོ་མ་མཆོག་དགོད་པར་བྱ། །ཡྃ་རྃ་ལྃ་ཝྃ། ཤྃ་ཥྃ་སྃ་ཧྃ། ཡེ་ཤེས་འཁོར་ལོ་མཁའ་
འགྲོ་དགོད། །ཞག་བདུན་བར་དུ་བསྒོམས་ནས་ནི། །གང་ཡང་ཐུན་ནི་བཞི་ཡི་རིམ། །ཆུ་འགྲམ་དང་ནི་དུར་ཁྲོད་དུ། །བསྒོམས་པས་དངོས་གྲུབ་ངེས་པར་རྙེད། །འཕྲོག་པ་དང་ནི་གསོད་བྱེད་ཅིང་། །གང་དུ་ལས་ནི་ཅི་འདོད་པ། །མཁའ་འགྲོ་མ་ཡི་འཁོར་ལོས་འགྲུབ། །ལས་འདིར་
ཡིད་གཉིས་དཔྱོད་པ་མེད། །སྔོ་དང་པ་ལ་ཤ་ཡི་མདོག །དམར་དང་བཞི་པ་སེར་པོ་སྟེ། །གཤིན་རྗེ་སྲེག་སོགས་བཞི་པོ་ནི། །སྣ་ཚོགས་མདོག་ཅན་མཛེས་པའི་ཞལ། །དམར་དང་སྔོ་དང་དུད་ཁ་སྟེ། །ཞལ་མདོག་དཀར་པོ་མཆོག་ཏུ་མཛེས། །ཐམས་ཅད་སྤྱན་གསུམ་པ་ཡི་ཞལ། །
སྐྲ་གྲོལ་བ་ལ་ཕྱོགས་གོས་ཅན། །ཁྭ་གདོང་གཡོན་དང་གཡས་ཀྱི་ཞལ། །འུག་གདོང་ཞལ་ཡང་དེ་བཞིན་ཏེ། །གསུམ་པ་ཁྱི་ཡི་ཞལ་གདོང་ཡིན། །བཞི་པ་ཕག་གི་ཞལ་གདོང་སྟེ། །གཡོན་དང་གཡས་པའི་ཞལ་གདོང་ནི། །དྲག་མོའི་གཟུགས་ཅན་ཆོ་ག་བཞིན། །གཤིན་
རྗེ་སྲེག་སོགས་ཞལ་གདོང་ནི། །གཡོན་དང་གཡས་པ་གཉིས་དེ་བཞིན། །ཐུག་རི་རྔ་མོ་རྟ་དང་ནི། །སེང་གེ་ར་དང་གླང་མ་ཧེ། །གཞན་ཡང་དོམ་གྱི་ཞལ་ཡིན་ཏེ། །ཐམས་ཅད་ཀྱང་ནི་མཉམ་པར་བྱ། །ཐོད་པ་དང་ནི་ཁ་ཊྭཱཾ་འཛིན། །ཞགས་པ་ལྕགས་ཀྱུ་ཕྱག་ན་བསྣམས། །དྲིལ་

བུ་ཅང་ཏེའུ་གྲི་གུག་དང་། །ཐོད་པའི་ཕྲེང་བའི་དབུ་རྒྱན་ཅན། །ཕྱག་རྒྱ་ལྔ་ཡིས་རྣམ་པར་བརྒྱན། །ཡི་དགས་གདན་ལ་གར་གྱིས་བཞུགས། །མིའུ་ཐུང་ལ་སྐྱེ་གནས་རིང་། །མཆེ་བ་རྣམ་པར་གཙིགས་པའི་ཞལ། །ཐུགས་རྗེའི་རོ་ཡིས་རྣམ་པར་མྱོས། །སྐུ་གསུང་ཐུགས་ཀྱི་གསང་
བ་ནི། །སྒོམ་ཞིང་རབ་ཏུ་བསྒོམ་པར་བྱ། །ཧཱུྃ་ཨཱ་ཨོྃ། འདི་ནི་གསང་བར་བཤད་པ་སྟེ། །རྡོ་རྗེ་པདྨ་འཁོར་ལོ་དབུས། །ཡེ་ཤེས་མཁའ་འགྲོ་སྙིང་ག་རུ། །མཁའ་འགྲོའི་ཡི་གེའི་འཁོར་ལོ་ནི། །ཡེ་ཤེས་འཁོར་ལོ་དེ་མཐོང་ནས། །མཆོད་ཅིང་ཐིམ་པར་རྣམ་པར་བསྒོམ། །མཉམ་
པར་བཞག་ནས་ཡི་གེ་རྣམས། །སྲོག་དང་རྩོལ་བས་གསང་སྔགས་བཟླ། །རང་གི་འཐོར་འཐུང་བྱས་ནས་སུ། །གསང་བ་གསུམ་གྱི་ཡེ་ཤེས་སྤྲོ། །ཨོྃ་ཤྲཱི་ཀྵ་ཌཱ་ཀི་ནཱི་ཛཱ་ལ་སམྦ་ར་ཧུྃ་ཧཱུྃ་ཕཊ་སྭཱ་ཧཱ། །ཐོག་མར་གསལ་བྱེད་མིང་དང་ཧཱུྃ། །མཐར་ནི་ཕཊ་དང་རྣམ་པར་སྦྱར། །མཁའ་
འགྲོ་ཟླ་བས་བཤད་པ་ཡི། །འདོད་པའི་འབྲས་བུ་ཐམས་ཅད་སྩོལ། །མཆོག་འདི་དག་ནི་གསང་བ་སྟེ། །སུ་ལ་ཡང་ནི་སྦྱིན་མི་བྱ། །ཞག་བདུན་གྱིས་ནི་དབང་འགྱུར་ཏེ། །རྩེ་གཅིག་པ་ཡིས་བསྒོམས་ན་ནི། །འཁོར་ལོ་གསུམ་གསང་མཁའ་འགྲོ་མའི། །དངོས་གྲུབ་མྱུར་དུ་ཐོབ་
པར་འགྱུར། །ངེས་པར་བརྗོད་པའི་རྒྱུད་བླ་མའི་བླ་མ་ལས་ཀྵའི་མཁའ་འགྲོ་སྒྲུབ་པའི་ལེའུ་སྟེ་ཉི་ཤུ་རྩ་དགུ་པའོ།། །།དེ་ནས་མཆོག་ཏུ་བཤད་བྱ་བ། །ཨཱ་ལི་མཁའ་འགྲོ་བསྒྲུབ་པ་སྟེ། །ཨཱ་ལི་ཡེ་ཤེས་ལས་བྱུང་བ། །ཨཱ་ལི་མཁའ་འགྲོ་མཆོག་དམ་པ། །ཞལ་བརྒྱད་
པ་ལ་ཕྱག་བཅུ་དྲུག །སྤྱན་གསུམ་འཇིགས་པ་རབ་འཇིགས་པ། །ཞལ་གྱི་མཆེ་བ་རྣམ་པར་གཙིགས། །གཡས་བརྐྱང་པ་ཡི་ཞབས་ཀྱིས་བཞུགས། །ཟླ་བ་ཕྱེད་པ་རལ་པ་འཆིང་། །ཐོད་པའི་ཕྲེང་བས་རྣམ་པར་བརྒྱན། །སྣ་ཚོགས་རྡོ་རྗེས་སྤྱི་གཙུག་མནན། །དཔྲལ་བ་ལ་ནི་རྡོ་
རྗེ་ཕྲེང་། །སྟག་གི་པགས་པ་གོས་སུ་མནབས། །ཕྱག་རྒྱ་དྲུག་གིས་སྐུ་ལ་བརྒྱན། །རྣམ་པར་རྟོག་པ་འཇིགས་བྱེད་ཉིད། །སྲེད་དང་ཕྲག་དོག་དུས་མཚན་ཉིད། །ཞབས་ཀྱི་འོག་ཏུ་གནོན་པར་མཛད། །གདུལ་དཀའ་ཐམས་ཅད་འདུལ་མཛད་ཅིང་། །བགེགས་ཀྱི་མགོ་བོའི་ཕྲེང་བ་

ཅན། །སྣ་ཚོགས་མདོག་ཅན་ལེགས་པར་མཛེས། །དཀར་བའི་མདོག་ཅན་རྐེད་པ་ཕྲ། །ལྷ་ཡི་གཟི་བརྗིད་འབར་བ་ཅན། །སྔོ་ཞིང་སེར་ལ་དུད་ཁ་དང་། །གཡས་པའི་ཞལ་ཡང་དེ་བཞིན་ཏེ། །ལྗང་གུ་དམར་དང་སེར་སྐྱ་སྟེ། །གཡོན་པའི་ཞལ་ཡང་སྣ་ཚོགས་
མཛེས། །སྟེང་གི་ཐལ་ཀ་སྤྲིན་མདོག་ཞི། །ཆགས་ཤིང་རྗེས་སུ་ཆགས་པས་བལྟ། །ཐུགས་རྗེའི་རོ་ནི་ཡང་དག་རྫོགས། །སྐུ་ལུས་ལྡེམ་ཞིང་འཇོ་བག་ཅན། །ཨཱ་ལི་མཁའ་འགྲོ་མ་ཡི་སྐུ། །ཕྱག་གཉིས་པ་ལ་གཅེར་བུའི་ལུས། །ཐོད་པའི་ཕྲེང་བས་དབུ་ལ་བརྒྱན། །སྐྲ་གྲོལ་
བ་ཡིས་རྣམ་པར་མྱོས། །སྤྱན་གསུམ་ནག་པོ་འཇིགས་པ་ཅན། །དེ་ཡི་མདོག་ཅན་སྐུ་རགས་ཅན། །བྱིན་པ་གཉིས་ཀྱིས་ལེགས་པར་འཁྲིལ། །གཉིས་མེད་སྦྱོར་བས་ཡང་དག་གནས། །རྡོ་རྗེ་དྲིལ་བུ་ཡང་དག་ལྡན། །ལྷ་མོའི་ཀུ་ཙ་འཚིར་བའོ། །ཇི་ལྟར་མཁའ་འགྲོའི་
ཕྱག་རྒྱ་ལྟར། །མཁའ་འགྲོ་མ་ཡང་དེ་བཞིན་སྦྱར། །ཕྱག་གཉིས་དག་ནི་བརྐྱང་པ་ལ། །ཁྱབ་འཇུག་པགས་པ་མནབས་པ་ཡིན། །ཐོད་པ་དང་ནི་ཁ་ཊྭཱཾ་འཛིན། །རལ་གྲི་དང་ནི་ཐོད་པ་འཆང་། །མདུང་རྩེ་གསུམ་པ་ཅང་ཏེའུ་ཉིད། །དགྲ་སྟ་ལྕགས་ཀྱུ་དེ་བཞིན་ཏེ། །ཞགས་
པ་ཚངས་པའི་མགོ་བོ་དང་། །གྲི་གུག་དང་ནི་འཁོར་ལོ་ཉིད། །སྙིང་གར་རྩིབས་ནི་བཅུ་གཉིས་པའི། །འཁོར་ལོའི་རྒྱལ་པོ་ལེགས་པར་མཛེས། །དེ་ཡི་ལྟེ་བའི་དབུས་སུ་ནི། །ཡེ་ཤེས་མཁའ་འགྲོ་རྣམ་པར་བསྒོམ། །དེ་མདོག་ཞལ་དང་འདུག་སྟངས་དང་། །ཕྱག་དང་ཕྱག་རྒྱ་དེ་
བཞིན་ཏེ། །ཤར་དུ་དམ་ཚིག་མཆོག་ཅེས་བྱ་བའི་རྡོ་རྗེ་མཁའ་འགྲོ་མ་ཡི་གེ་ཨིའི་རིགས་ལས་བྱུང་བའོ། །བྱང་ཕྱོགས་སུ་སྣ་ཚོགས་མཆོག་ཅེས་བྱ་བའི་མཁའ་འགྲོ་མ་ཡི་གེ་ཨཱི་ལས་བྱུང་སྟེ་བཞུགས་པའོ། །ནུབ་ཕྱོགས་སུ་ནམ་མཁའི་མཆོག་ཅེས་བྱ་བའི་མཁའ་འགྲོ་མ་ཡི་གེ་ཨེ་དང་
སྦྱར་བར་བྱའོ། །ལྷོ་ཕྱོགས་སུ་གནས་ཀྱི་མཆོག་ཅེས་བྱ་བའི་མཁའ་འགྲོ་མ་ཡི་གེ་ཨཻ་ལས་ཡང་དག་པར་བཞུགས་པའོ། །མེའི་ཕྱོགས་ལ་སོགས་པའི་མཚམས་རྣམས་སུ། མཁའ་འགྲོ་མ་བཞི་པོ་དགོད་པར་བྱ་སྟེ། ཐོག་མ་ཆེ་བའི་མཆོག་ཅེས་བྱ་བའི་མཁའ་འགྲོ་མ། ཡི་གེ་

ཨུ་དང་སྦྱར་བར་བྱའོ། །བདེན་བྲལ་དུ་དྲག་པོ་མཆོག་ཅེས་བྱ་བའི་མཁའ་འགྲོ་མ་ཡི་གེ་ཨཱུ་དང་སྦྱར་བར་བྱའོ། །རླུང་གི་ཕྱོགས་སུ་དཔའ་བོའི་མཆོག་ཅེས་བྱ་བའི་མཁའ་འགྲོ་མ་ཡི་གེ་ཨོ་དང་སྦྱར་བར་བྱའོ། །དབང་ལྡན་དུ་ཁྲོ་བོའི་མཆོག་ཅེས་བྱ་བའི་མཁའ་འགྲོ་མ་ཡི་གེ་ཨཽ་དང་སྦྱར་བར་བྱའོ། །
དེ་བཞིན་འདིར་ནི་མཚམས་བཞི་རུ། དབང་ལྡན་ལ་སོགས་ཕྱོགས་དགོད་པ། ཡི་གེ་རཾ་ལས་དངོས་གྲུབ་ཀྱི་མཆོག་ཅེས་བྱ་བའི་མཁའ་འགྲོ་མ་དང་། ཡི་གེ་ལྀ་ལས་དུར་ཁྲོད་ཀྱི་མཆོག་ཅེས་བྱ་བའི་མཁའ་འགྲོ་མ་དང་། །ཡི་གེ་རཱྀ་ལས་རྣལ་འབྱོར་གྱི་མཆོག་ཅེས་བྱ་བའི་མཁའ་འགྲོ་མ་དང་། །ཡི་གེ་
ལཱྀ་ལས་གཏུམ་པའི་མཆོག་ཅེས་བྱ་བའི་མཁའ་འགྲོ་མ་དང་། མཁའ་འགྲོ་མ་ནི་དེ་ཀུན་གྱི། །ཡན་ལག་བཅུ་གཉིས་རྣམ་པར་དག །ཞལ་གསུམ་ཕྱག་ནི་དྲུག་པ་སྟེ། །ཐམས་ཅད་སྤྱན་གསུམ་རྣམ་སྒྱུར་ལ། །སྐུ་ལུས་དཀར་པོ་ཐམས་ཅད་ཞལ། །སྔོ་དང་ལྗང་ཁུ་གཉིས་མེད་བདེ། །
གཡོན་དང་གཡས་པའི་ཞལ་གཉིས་ནི། །མཁས་པས་རྣམ་པར་བསྒོམ་པར་བྱ། །ཕྱོགས་ཀྱི་གོས་ཅན་གར་དང་བཅས། །སྐྲ་གྲོལ་བ་ལ་རབ་ཏུ་འཇིགས། །ཐོད་པ་དང་ནི་ཁ་ཊྭཱཾ་འཛིན། །ཅང་ཏེའུ་དང་ནི་གྲི་གུག་མཆོག །མདུང་དང་མགོ་བོ་ཐམས་ཅད་ཀུན། །སྣ་ཚོགས་མདོག་དང་
ཕྱག་མཚན་བསྣམས། །རོ་ཡི་མགོ་ཡི་སྟེང་བཞུགས་ཤིང་། །ཐུགས་རྗེའི་རོ་ནི་ཡོངས་སུ་རྫོགས། །ཕྱག་རྒྱ་ལྔ་ནི་འཛིན་པ་སྟེ། །ཐམས་ཅད་ཐོད་པའི་ཕྲེང་བས་བརྒྱན། །མགོ་བོའི་ཕྲེང་བ་འཛིན་པ་སྟེ། །ཐམས་ཅད་ཨ་ལ་ལ་ཡི་སྒྲ། །ཨོྃ་ནི་ཐུགས་ཀྱི་རྡོ་རྗེ་སྟེ། །ཨཱཿནི་གསུང་དུ་འགྱུར་བ་
ཡིན། །ཨ་ནི་སྐུ་ཡི་རྡོ་རྗེ་སྟེ། །རྡོ་རྗེ་པདྨ་འཁོར་ལོའི་དབུས། །འདི་ནི་མཆོག་ཏུ་གསང་བ་སྟེ། །རྣལ་འབྱོར་མ་ཡི་སྦྱོར་བ་མཆོག །རྡོ་རྗེ་སེམས་དཔས་གསུངས་པ་སྟེ། །རྡོ་རྗེ་སྙིང་པོས་ཞུས་པ་ཡིན། །དཀྱིལ་འཁོར་འཁོར་ལོའི་མཁའ་འགྲོ་མ། །འཁོར་ལ་སོགས་པ་ཐམས་
ཅད་དགོད། །ཡེ་ཤེས་འཁོར་ལོ་དེ་མཐོང་ནས། །གཅིག་པུ་ཆོས་ཀྱི་རོ་ཡང་བསྒོམ། །ཡེ་ཤེས་བཟླས་པའི་སྦྱོར་བ་ཡིས། །རང་གི་སྔགས་ཀྱི་འཐོར་འཐུང་བྱ། །ནང་གི་བདག་ཉིད་སྦྱོར་ལྡན་པས། །འཁོར་ལོ་མཆོག་གི་ཚོགས་དང་སྤྲོ། །མཆོག་དེ་མཐོང་ན་སླར་ཡང་བསྡུ། །

ཡན་ལག་བཅུ་གཉིས་མཆོག་དམ་པ། །ས་ནི་བཅུ་གཉིས་དག་ཉིད་དེ། །རྡོ་རྗེ་ས་ནི་བཅུ་གསུམ་པ། །རབ་ཏུ་དགའ་དང་དྲི་མ་མེད། །འོད་བྱེད་པ་དང་འོད་འཕྲོ་བ། །སྦྱང་དཀའ་བ་དང་མངོན་དུ་གྱུར། །རིང་དུ་སོང་དང་མི་གཡོ་བ། །ལེགས་པའི་བློ་གྲོས་ཆོས་ཀྱི་སྤྲིན། །
གཟུགས་མེད་པ་དང་ཡེ་ཤེས་ལྡན། །དེ་ལྟར་ས་ནི་བཅུ་གཉིས་པོ། །འཁོར་ལོའི་ལྷ་མོ་རྣམ་པར་དགོད། །དགྱེས་པ་ཆེན་པོ་བདེ་བའི་མཆོག་ཅེས་བྱ་བའི་རྡོ་རྗེ་སེམས་དཔའི་ས་དབུས་སུའོ། །འཁོར་ལ་སོགས་པ་ཀུན་གྱི་སྔགས། །མིང་དང་གསལ་བྱེད་ཧཱུྃ་བྱས་ཏེ། །དེ་དག་མཐར་
ནི་ཕཊ་དང་སྦྱར། །སྔགས་ཀྱི་གཙོ་བོས་གསང་སྔགས་ནི། །རང་སྙིང་རང་གི་ས་བོན་དགོད། །སྐུ་གསུང་ཐུགས་དང་རྣམ་པར་སྦྱར། །ཡེ་ཤེས་འཁོར་ལོ་འདི་མཐོང་ནས། །གཅིག་ཏུ་བསྡུས་ཏེ་མཆོད་པར་བྱ། །བདག་གིས་ཕྱི་དང་ནང་དུ་ཡང་། །མཉམ་པར་བཞག་སྟེ་མི་སྨྲ་བཟླ། །
རང་གི་འཐོར་འཐུང་བྱས་ནས་ནི། །བློ་ལྡན་སྲོག་རྩོལ་བཟླས་པ་བྱ། །ཨོཾ་ཤྲཱི་ཨཱ་ལི་ཌཱ་ཀ་ཨ་ཨ་ཨཾ་ཧཱུྃ་ཌཱ་ཀི་ནཱི་ཛཱ་ལ་སམྦར་ཧཱུྃ་ཕཊ་སྭཱ་ཧཱ། སྲིད་པ་མ་ལུས་ཐམས་ཅད་ཀུན། །དངོས་པོ་མེད་པའི་རང་བཞིན་ཏེ། །སྔགས་དང་དབྱིབས་དང་ཆོས་བདག་ཉིད། །སྦྱོར་བ་ཡི་ནི་བདག་ཉིད་རྣམས། །
སེམས་ཅན་ཁམས་ནི་ཆ་གནས་པས། །རང་གི་ལྷ་ཡི་སྦྱོར་བ་ཡིས། །བདག་ཉིད་སྦྱོར་ཞིང་མཆོད་པར་བྱ། །མཉམ་པར་མ་བཞག་སེམས་ཀྱིས་ནི། །སྒོམ་ཞིང་རབ་ཏུ་བསྒོམས་བྱས་ཏེ། །སྔགས་དང་དབྱིབས་དང་ཆོས་ཉིད་དེ། །ཆོས་གཅིག་རོ་ནི་སྟོང་པ་ཡིན། །ཆོས་རྣམས་
བདག་མེད་ཉིད་ཡིན་ཏེ། །རང་བཞིན་མེད་པའི་ཆོས་ལ་ནི། །རྗེས་སུ་བརྟག་པར་བྱ་བ་ཡིན། །མངོན་པར་བརྗོད་པའི་རྒྱུད་བླ་མའི་བླ་མ་ལས་གསང་བ་ཆེན་པོའི་གསང་བ་ཨཱ་ལིའི་མཁའ་འགྲོ་སྒྲུབ་པ་སྟེ་ལེའུ་སུམ་ཅུ་པའོ།། །།དེ་ནས་སྦྱོར་བ་བཤད་བྱ་བ། །སྣ་ཚོགས་གར་གྱི་
དབང་ཕྱུག་མཆོག །ཐམས་ཅད་མཆོག་སྟེ་རྣལ་འབྱོར་ཆེ། །དངོས་གྲུབ་ཆེན་པོ་ལེགས་སྩོལ་ལ། །སྐྱེད་པའི་རིམ་པའི་སྦྱོར་བ་ཡིས། །སྒོམ་ཞིང་རབ་ཏུ་བསྒོམ་པར་བྱ། །ཉི་མའི་དཀྱིལ་འཁོར་དབུས་སུ་ནི། །སིཾ་ཨོྃ་དྭཾ་ལས་རྡོ་རྗེ་འབྱུང་། །དེ་ཉིད་ཡོངས་གྱུར་བདག་ཉིད་དེ། །གསལ་

བྱེད་མཁའ་འགྲོ་མཆོག་གྱུར་པ། །སྣ་ཚོགས་དབང་ཕྱུག་སྣ་ཚོགས་མདོག །ཐམས་ཅད་རིགས་ཀྱི་མཆོག་དམ་པ། །ཞལ་དྲུག་པ་ལ་ཕྱག་བཅུ་གཉིས། །སྤྱན་གསུམ་པ་ལ་གཡོ་བའི་སྒྲ། །ཟླ་བ་བྱེད་པ་ཞི་བ་འཛིན། །ཐོད་པའི་ཕྲེང་བས་སྤུད་པ་སྟེ། །སྣ་ཚོགས་རྡོ་རྗེ་དབུ་ལ་འཆང་། །སྤྱི་
གཙུག་རལ་པ་འཆིང་བ་སྟེ། །ཕྱག་རྒྱ་དྲུག་གིས་སྐུ་ལ་མཚན། །ལྷ་ཡི་རྒྱན་གྱིས་སྤུད་པ་སྟེ། །སྐལ་ངན་མུ་སྟེགས་ཅན་རྣམས་ནི། །ཞབས་ཀྱི་པདྨའི་འོག་ཏུ་མནན། །ལྟ་བ་ལྔ་ཡི་རིམ་པ་དག །གཡས་བརྐྱང་བ་ཡི་ཞབས་ཀྱིས་མནན། །སྐྱིལ་ཀྲུང་ཕྱེད་པའི་གར་ཞབས་ཅན། །ཞབས་
དྲུག་གིས་ནི་རྣམ་པར་བརྒྱན། །ཁྱབ་འཇུག་གི་ནི་པགས་པ་མནབས། །མགོ་བོའི་ཕྲེང་བས་བརྒྱན་པ་སྟེ། །རྡོ་རྗེ་ལྷ་མོས་རྣམ་པར་འཁྱུད། །གཅེར་བུ་འོག་པག་སྐ་རགས་ཅན། །སྐྲ་གྲོལ་བ་ལ་སྤྱན་གསུམ་ཅན། །མཆུ་དང་མཆུ་ནི་རྣམ་འཚིར་ཞིང་། །རྡོ་རྗེ་དྲིལ་བུ་མཉམ་པར་འཁྲིལ། །
བྱང་ཆུབ་ཡན་ལག་གནས་འཚིར་ཞིང་། །བྱིན་པ་གཉིས་ཀྱིས་མཉམ་པར་འཁྲིལ། །ཐུགས་རྗེ་ཆགས་པའི་རོ་ཡིས་བདེ། །ཚངས་པའི་པགས་པའི་ཡན་ལག་ནི། །ཕྱག་གཉིས་དག་གིས་བརྐྱང་ནས་འཛིན། །ཐོད་པ་དང་ནི་ཁ་ཊྭཱཾ་འཆང་། །དབང་ཕྱུག་ཆེན་པོའི་མགོ་བོ་ཐོགས། །མདུང་
རྩེ་གསུམ་དང་རལ་གྲི་དང་། །ཅང་ཏེའུ་ཞགས་པ་ལྕགས་ཀྱུ་བསྣམས། །དཀར་དང་སྔོ་དང་ལྗང་བ་ཉིད། །སེར་དང་དུད་ཁ་ངུར་སྨྲིག་སྟེ། །གཡོན་དང་གཡས་པའི་ངོས་དག་ཏུ། །པི་ལ་དང་ནི་ཉེ་བི་ལ། །མཁའ་འགྲོ་མ་ནི་གཉིས་པོ་སྦྱར། །ཆོས་ཀྱི་མཆོག་ཅེས་བྱ་བ་ཡི། །རྡོ་རྗེ་
མཁའ་འགྲོ་མ་ཉིད་ནི། །ཡི་གེ་ཎི་ལས་ཡང་དག་འབྱུང་། །གཡོན་གྱི་ཕྱོགས་སུ་དགོད་པར་བྱ། །ཡི་གེ་སི་ལས་ངེས་བྱུང་བ། །རྒྱ་མཚོའི་མཆོག་ཅེས་བྱ་བ་ཡི། །རྡོ་རྗེ་མཁའ་འགྲོ་མ་ཉིད་ནི། །སྣ་ཚོགས་མདོག་ཅན་སྣ་ཚོགས་ཞལ། །སྤྱན་གསུམ་པ་ལ་བཞིན་རྣམ་སྒྱུར། །
སྐྱིལ་ཀྲུང་ཕྱེད་པས་གནས་པ་སྟེ། །ཞབས་ནི་གར་དང་བཅས་པའོ། །ཞལ་ལྔ་པ་ལ་ཕྱག་བཅུ་པ། །སྤྱན་གསུམ་དྲག་པོ་འཇིགས་པ་སྟེ། །འཇིགས་བྱེད་དང་ནི་དུས་མཚན་དག །ཞབས་ཀྱི་འོག་ཏུ་མནན་པར་བཞུགས། །མགྲིན་པ་དག་ནི་དྲུག་དང་བཞི། །ཕྱག་རྒྱ་ལྔ་ཡིས་

རྣམ་པར་བརྒྱན། །ཕྱོགས་ཀྱི་གོས་ཅན་སྐྲ་གྲོལ་བ། །ཐོད་པའི་ཕྲེང་བའི་སྐ་རགས་ཅན། །རྐང་གདུབ་གཡེར་ཀའི་སིལ་སྒྲ་ཅན། །ཐོད་པའི་ཕྲེང་བས་རྣམ་པར་བརྒྱན། །ཟླ་བའི་དཀྱིལ་འཁོར་དབུས་སུ་ནི། །འཁྱུད་པ་ཡི་ནི་མཆོག་དམ་པ། །རྡོ་རྗེ་གསོར་ཞིང་
སྡིགས་མཛུབ་ཀྱིས། །གཉིས་སུ་མེད་པར་རྣམ་པར་བརྒྱན། །ཐོད་པ་གཉིས་མེད་རྣམ་བརྒྱན་ཏེ། །ཞགས་པ་ལྕགས་ཀྱུ་ཕྱག་ན་བསྣམས། །ཐོད་པ་དང་ནི་གྲི་གུག་མཆོག །སྐུ་གསུང་ཐུགས་ཀྱི་དབུ་རྒྱན་ཅན། །དངོས་གྲུབ་ཐམས་ཅད་རབ་སྩོལ་བ། །ཡེ་ཤེས་མཁའ་འགྲོ་
མ་དབུས་སུ། །འཁོར་ལོ་གསུམ་གྱི་ཐབས་ཀྱང་བསྒོམ། །ཨོྃ་གྱི་ཡེ་ཤེས་མཁའ་འགྲོ་ནི། །ཐུགས་ཀྱི་འཁོར་ལོའི་དབུས་སུ་སྟེ། །སྐུ་གསུང་ཐུགས་ཀྱི་མཁའ་འགྲོ་ནི། །རང་གི་སྙིང་གར་དེ་དག་བསྒོམ། །སྔར་བཤད་སྦྱོར་བའི་རིམ་པ་ཡིས། །གནས་ལ་སོགས་པའི་རྗེས་རིམ་
པ། །དེ་རུ་བསམ་ཞིང་རྣམ་བསྒོམས་ཏེ། །གསུམ་པོའི་རིམ་པ་རྗེས་སུ་སྤྲོ། །དེས་ནི་དངོས་གྲུབ་གཉིས་མེད་པ། །མཁའ་འགྲོ་མ་དང་ལྷན་ཅིག་བསྒོམ། །ཡེ་ཤེས་འཁོར་ལོའི་རོ་རྣམས་ནི། །བསྒོམས་ལ་གསང་སྔགས་བཟླས་པར་བྱ། །ཨོྃ་ཤྲཱི་པྲ་ཎ་བོད་ཌཱ་ཀ་ཨཱ་ཨཱ་ཨོྃ་ཧཱུྃ་ཌཱ་ཀི་
ནཱི་ཛཱ་ལ་སམྦ་ར་ཨོྃ་སྭཱ་ཧཱ། ཨོྃ་ཧྲིཾ་དྷརྨ་ཨུཏྟ་མེ། མ་ཧཱ་བཛྲ་ཌཱ་ཀི་ནཱི་ཡེ་དྭཾ་ཧཱུྃ་ཕཊ་སྭཱ་ཧཱ། ཨོྃ་སཱིཾ་སཱ་གར་ཨུཏྟ་མེ་མ་ཧཱ་བཛྲ་ཌཱ་ཀི་ནི་ཡ་སཱིཾ་ཧཱུྃ་ཕཊ་སྭཱ་ཧཱ། གསང་གསུམ་ཡེ་ཤེས་བཟླས་ན་ནི། །དཔའ་བོ་མཁའ་འགྲོ་མ་བཟླ་བྱ། །གསལ་བྱེད་རང་མིང་ཧཱུྃ་གཉིས་དང་། །མཐར་ནི་ཕཊ་དང་
སྦྱར་བར་བྱ། །གསང་གསུམ་འཁོར་ལོ་བསྒོམས་ནས་ནི། །གསུམ་པོ་བསྡུ་ཞིང་བསྒོམས་ནས་སུ། །དམ་ཚིག་གསང་གསུམ་སྦྱོར་བ་ཡིས། །བྷ་གའི་དབུས་སུ་བསྒོམ་པར་བྱ། །བྱང་ཆུབ་ཟླ་བ་དྲི་མ་མེད། །ཐུགས་ཀྱི་འཁོར་ལོ་ནཱ་ད་གསུམ། །གཙོ་བོ་དག་ནི་གསུམ་ཡིན་ཏེ། །
མཁའ་འགྲོ་མ་གསུམ་གསུམ་མཁའ་འགྲོ། །སྡུད་ཅིང་སྐྱེད་པར་མཛད་པ་སྟེ། །བྷ་གར་རྡོ་རྗེ་ཕག་མོ་ནི། །གསང་བ་གསུམ་དུ་རྣམ་པར་བསྒོམ། །དེ་ཉིད་སྒོམ་པའི་སྦྱོར་བ་ཡིས། །དེས་ན་ང་རྒྱལ་རྣམ་སྤངས་ནས། །དུས་བཞི་དག་ཏུ་སྦྱོར་བ་ཡིས། །དེ་བཞིན་བསྒོམ་དང་བཟླས་

པ་བྱ། །རྟག་ཏུ་དམ་ཚིག་བསྐྱང་བྱ་ཞིང་། །འོ་མ་སྣ་ཚོགས་ལས་བྱུང་བ། །བྲམ་ཟེ་ཆེ་དང་སྦྲང་རྩི་མར། །མ་ཧཱ་མཱང་ས་མཉམ་ལྡན་པ། །དེ་ཉིད་གསུམ་གྱིས་མངོན་བསྔགས་ཏེ། །བཟའ་བདག་ནི་བཟའ་བར་བྱ། །འདུ་འཛི་མེད་ཅིང་སྲེད་པ་མེད། །ཡོངས་སུ་གཟུང་བའི་
འཁོར་ཡང་མེད། །ལོངས་སྤྱོད་མིན་པས་ལོངས་སྤྱོད་ལ། །འཆི་བ་མེད་པའི་ཟས་བཟའ་ཞིང་། །འདོད་པའི་ཡོན་ཏན་ལྔ་ཡང་བསྟེན། །ལོངས་སྤྱོད་མེད་པའི་ཟས་བཟའ་ཞིང་། །རྣལ་འབྱོར་སྒོམ་པའི་སྒོམ་ཡང་བཏུང་། །གཞན་དུ་གང་ཡང་བཏུང་བ་མིན། །ནང་གི་
བདག་ཉིད་སྦྱོར་ལྡན་པས། །རང་ཉིད་བྱིན་གྱིས་བརླབས་བྱས་ནས། །བཅོམ་ལྡན་མཁའ་འགྲོ་པི་ལ་བ། །རྣལ་འབྱོར་མ་ནི་ཉེ་པི་ལ། །ཐབས་ནི་པི་ལ་བར་ཞེས་བྱ། །ཤེས་རབ་ཉེ་བའི་པི་ལ་བ། །གྲོང་ཁྱེར་མཐར་ནི་པི་ལ་ཉིད། །གྲོང་གི་མཐའ་ནི་ཉེ་པི་ལ། །ཟླ་བ་ཉི་མ་མཉམ་སྦྱོར་
བ། །པི་ལ་དང་ནི་ཉེ་པི་ཡིན། །སྐད་ཅིག་སྦྱོར་བ་པི་ལ་བ། །དགའ་བ་ཉེ་བའི་པི་ལ་སྟེ། །མཐུ་སྟོབས་དུ་མ་ལྡན་པར་ནི། །སྐྱེ་བ་འདི་ལ་འགྲུབ་པ་ཡིན། །པ་ཤུ་ཐམས་ཅད་བཟའ་བྱ་ཡིན། །ལྷ་བཤོས་དག་ཀྱང་དེ་བཞིན་བསྒྲུབ། །དཔའ་བོ་མཁའ་འགྲོ་མ་འདུས་ནས། །དུས་ལ་
མཐུན་པ་འདུས་བྱས་ནས། །གླུ་དང་གར་དང་བཟའ་བ་དང་། །འདུས་པ་མཆོག་གིས་མཆོད་པར་བྱ། །རྟོག་པ་ཐམས་ཅད་རྣམ་སྤངས་ནས། །དམ་ཚིག་གི་ནི་སྤྱད་པ་སྤྱོད། །མངོན་པར་བརྗོད་པའི་རྒྱུད་བླ་མའི་བླ་མ་ལས་གསལ་བྱེད་མཁའ་འགྲོའི་སྒྲུབ་པའི་མཚན་མ་བསྟན་པ་སྟེ་ལེའུ་
སུམ་ཅུ་རྩ་གཅིག་པའོ།། །།དེ་ནས་གཞན་ཡང་བཤད་བྱ་བ། །དངོས་གྲུབ་སྦྱོར་བའི་རིམ་པ་སྟེ། །མཁའ་འགྲོ་མ་དང་མཁའ་འགྲོ་སྦྱོར། །དམ་ཚིག་མཆོག་གི་སྡོམ་པ་ཡིན། །ཆོས་རྣམས་ཀུན་གྱི་སྡོམ་པ་སྟེ། །མཁའ་འགྲོ་མ་ཡི་བདེ་བ་ཆེ། །མཁའ་དབྱིངས་རྡོ་རྗེའི་དབུས་
གནས་པ། །དཀྱིལ་འཁོར་དམ་ཚིག་མཆོག་དམ་པ། །དེ་ཡི་དབུས་སུ་འཁོར་ལོ་ཆེ། །དཀྱིལ་འཁོར་ལྔ་ཡིས་རྣམ་པར་བརྒྱན། །དབུས་སུ་ཉི་མའི་གདན་ཡང་མཛེས། །ཨཱ་ལི་ཀཱ་ལི་མཉམ་པར་ལྡན། །སུམ་ཅུ་རྩ་གཉིས་མཚན་དང་ལྡན། །དཔེ་བྱད་བཟང་པོ་བརྒྱད་ཅུས་བརྒྱན། །

བྱིན་གྱིས་བརླབས་པ་བྱས་ནས་ནི། །རང་གི་ས་བོན་ལས་བསྐྱེད་དེ། །ཡི་གེ་ཧི་ལས་ཡང་དག་བྱུང་། །དུས་མཐའི་མེ་ལྟར་རབ་ཏུ་འཇིགས། །ཞལ་གྱི་མཆེ་བ་རྣམ་པར་གཙིགས། །སྤྱན་གསུམ་ལྗགས་ནི་བསྐྱོད་པའི་ཞལ། །གདུག་པ་ཐམས་ཅད་ཞབས་འོག་
གནོན། །ཁྲོ་བ་དང་ནི་བཞད་པའི་ཞལ། །བསྐལ་པའི་མཐར་ཡང་འཁྲུག་པ་སྟེ། །རལ་པ་ཡི་ནི་དབུ་རྒྱན་ཅན། །གཡས་བརྐྱང་བ་ཡི་ཞབས་ཀྱིས་བཞུགས། །མགོ་བོའི་ཕྲེང་བས་རྣམ་པར་བརྒྱན། །འཇིགས་བྱེད་ཆེན་པོའི་པགས་པ་ཡིས། །རྐེད་པར་སྐ་རགས་བཅིངས་པ་ཡིན། །
ཐོད་པའི་ཕྲེང་བའི་དབུ་རྒྱན་ཅན། །སྣ་ཚོགས་རྡོ་རྗེ་ཟླ་ཕྱེད་འཆང་། །དཔྲལ་བ་ལ་ནི་རྡོ་རྗེ་ཕྲེང་། །ཁྲོ་བོ་མཐོང་ནས་རྣམ་པར་བརྟག །ལྷ་རྣམས་ཐམས་ཅད་ཚར་ཡང་གཅོད། །ཀེང་རུས་ཅན་གྱི་བརྟུལ་ཞུགས་འཛིན། །འཆི་བ་འཚོ་བར་བྱེད་པའི་མཆོག །གདུག་པ་ཐམས་ཅད་
ངེས་པར་གནོན། །ཕྱག་རྒྱ་དྲུག་གིས་སྐུ་ལུས་བརྒྱན། །སྣ་ཚོགས་རྒྱན་གྱིས་སྤུད་པ་སྟེ། །ཕྱག་དྲུག་པ་ལ་ཞལ་ལྔ་པ། །སྣ་ཚོགས་རོ་ཡི་བཅུད་མཆོག་ཅན། །སྔོ་དང་སེར་དང་དེ་བཞིན་དམར། །ལྗང་ཁུ་དཀར་པོ་ཞི་བ་སྟེ། །རྡོ་རྗེ་དྲིལ་བུ་མཉམ་ལྡན་པས། །ཕག་མོ་ཡི་ནི་སྐུ་ལུས་
ཁྱབ། །ལྷ་ཆེན་པགས་པ་འཛིན་མཛད་ཅིང་། །བླ་རེ་ཚུལ་དུ་བརྐྱང་བར་མཛད། །ཐོད་པ་དང་ནི་ཁ་ཊྭཱཾ་འཛིན། །དྲུག་པ་ན་ནི་ཅང་ཏེའུ་དང་། །ཞབས་གཡོན་དུ་ནི་དུས་མཚན་མནན། །གཡས་པ་ཡིས་ནི་འཇིགས་བྱེད་དེ། །ཞབས་ཀྱིས་འོག་ཏུ་མནན་མཛད་ཅིང་། །རྨོངས་ཤིང་
རབ་ཏུ་མྱོས་པར་མཛད། །རྡོ་རྗེ་ཕག་མོ་དེ་མདོག་ཅན། །སྐྲ་གྲོལ་བ་དང་གཅེར་བུ་སྟེ། །ཐོད་པའི་ཕྲེང་བའི་དབུ་རྒྱན་ཅན། །དུམ་བུའི་རྒྱན་གྱིས་སྐ་རགས་ཅན། །བྱིན་པ་གཉིས་ཀྱིས་ལེགས་པར་འཁྲིལ། །མགུལ་ནས་འཁྱུད་ཅིང་མྱོས་པ་སྟེ། །དེ་ཡི་ཕྱག་མཚན་ཕྱག་རྒྱ་
བསྣམས། །གྲི་གུག་ཅང་ཏེའུ་མཆོག་ཀྱང་འཛིན། །དྲུག་པ་ལ་ནི་ཚངས་པའི་མགོ །འདི་འདྲར་རྡོ་རྗེ་མཁའ་འགྲོ་ནི། །མཁས་པས་རེའུ་མིག་དབུས་སུ་དགོད། །ཤར་དུ་སངས་རྒྱས་མཁའ་འགྲོ་སྟེ། །བྱང་དུ་ལས་ཀྱི་མཁའ་འགྲོ་ཡིན། །ནུབ་ཏུ་པདྨའི་མཁའ་འགྲོ་སྟེ། །ལྷོ་རུ་

རིན་ཆེན་མཁའ་འགྲོ་ཡིན། །དཀར་དང་སྔོ་དང་དམར་བ་དང་། །ལྗང་ཁུ་དང་ནི་སེར་པོའོ། །འཁོར་ལོ་དྲིལ་བུ་མཉམ་པར་ལྡན། །གཡས་བརྐྱང་པ་ཡི་ཞབས་ཀྱིས་བཞུགས། །ལྗང་ཁུ་སེར་པོ་དམར་པོ་སྔོ། །དཀར་པོ་སྟེང་ལྟས་དྲིལ་བུ་དང་། །སྣ་ཚོགས་རྡོ་རྗེ་བདེ་ཆེན་འཁྱུད། །
གཡས་བརྐྱང་བ་ཡི་ཚུལ་གྱིས་བཞུགས། །དམར་སྔོ་སེར་དང་ལྗང་ཁུ་དང་། །དཀར་པོ་ཡང་ནི་དེ་བཞིན་ནོ། །པདྨ་དྲིལ་བུས་སྙོམས་འཇུག་ཅིང་། །ལྷ་མོའི་ནུ་མ་འཚིར་བའོ། །སེར་པོ་སྔོན་པོ་དེ་བཞིན་དམར། །ལྗང་ཁུ་དཀར་པོའི་ཁ་དོག་སྟེ། །རིན་ཆེན་དྲིལ་བུས་སྙོམས་པར་འཇུག །
གཡས་བརྐྱང་བ་ཡི་ཞབས་ཀྱིས་བཞུགས། །དེ་དག་མཁའ་འགྲོ་ལྔ་ཡིན་ཏེ། །སྡོམས་པ་ལྔ་ཡང་དེ་ཉིད་དོ། །མེ་དང་བདེན་བྲལ་རླུང་དང་ནི། །དབང་ལྡན་དེ་ནི་བཞི་པོ་རུ། །སངས་རྒྱས་མཁའ་འགྲོ་ལས་མཁའ་འགྲོ། །པདྨའི་མཁའ་འགྲོ་རིན་ཆེན་མཁའ། །ཞལ་གསུམ་པ་ལ་ཕྱག་
དྲུག་པ། །སྤྱན་གསུམ་པ་ལ་སྐྲ་གྲོལ་བ། །ཐོད་པའི་ཕྲེང་བས་རྣམ་པར་བརྒྱན། །རྒྱན་རྣམས་ཐམས་ཅད་ཡོངས་སུ་རྫོགས། །ཕྱག་རྒྱ་ལྔ་ཡིས་རྣམ་པར་བརྒྱན། །ཕྱོགས་ཀྱི་གོས་ཅན་གར་མཆོག་ཅན། །མགོ་ཡི་ཕྲེང་བས་རྣམ་པར་བརྒྱན། །ཐོད་པ་དང་ནི་ཁ་ཊྭཱཾ་འཛིན། །རྡོ་རྗེ་མདའ་ལ་
སོགས་པས་བརྒྱན། །ཞགས་པ་ལྕགས་ཀྱུ་ཕྱག་ན་མཛེས། །འདོད་པ་ཐམས་ཅད་སྩོལ་མཛད་ཅིང་། །ཐུགས་རྗེའི་རོ་ནི་ཡང་དག་རྫོགས། །ཐུགས་རྗེའི་འདོད་པས་རྣམ་པར་མྱོས། །ཅུང་ཟད་ངོ་ཚའི་མིག་ཟུར་ཅན། །དགྱེས་པ་སྩོལ་བས་བདེ་བ་སྟེ། །དེ་ལྟར་སྣ་ཚོགས་དུ་མ་ཡིས། །
དཀྱིལ་འཁོར་རྣམས་ནི་ཡོངས་སུ་ཁྱབ། །དུ་མའི་གཟུགས་དང་གཟུགས་སྡུག་མ། །རྡོ་རྗེ་མཆུ་དང་འོད་བྱེད་མ། །རྟ་གདོང་དང་ནི་དྲག་པོའི་གདོང་། །རྡོ་རྗེ་དྲག་མོ་སྙན་གྲགས་མ། །རྡོ་རྗེ་ཕོ་ཉ་རྡོ་རྗེ་སེན། །རྡོ་རྗེ་གཞོན་ནུ་མ་དེ་བཞིན། །ཀམ་པོ་ཙི་ཡང་དེ་བཞིན་ཏེ། །རྡོ་རྗེ་རོ་
ལངས་མ་དང་ནི། །རྡོ་རྗེ་མ་མོའང་དེ་བཞིན་ཏེ། །དྲི་ཅན་མ་དང་འཇིགས་བྱེད་ཞལ། །ཟླ་བའི་སྤྱི་གཙུག་དེ་བཞིན་ཏེ། །ཁྲོ་གཉེར་ཅན་དང་སྣ་ཚོགས་གཟུགས། །རྡོ་རྗེ་གྲི་གུག་དེ་བཞིན་ཏེ། །རྡོ་རྗེ་ལུ་གུ་རྒྱུད་དང་ནི། །སྒྱུ་འཕྲུལ་ལྷ་མོ་གྲགས་བྱེད་མ། །ན་ལར་ཀི་དང་སེར་སྐྱ་

མ། །རྡོ་རྗེ་འབར་མ་ཐལ་སྦྱོར་མ། །རྡོ་རྗེ་འཇིགས་བྱེད་མ་ཉིད་དེ། །དཀྱིལ་འཁོར་འགྲུབ་པའི་མཁའ་འགྲོ་མ། །མཁའ་འགྲོ་མ་ནི་དེ་དག་ཀུན། །སྤྱན་གསུམ་པ་ལ་ཞལ་རྣམ་སྒྱུར། །གསུས་པ་འཕྱང་ལ་སྐྲ་གྲོལ་བ། །ཐོད་པའི་ཕྲེང་བས་རྣམ་པར་བརྒྱན། །རྒྱན་
རྣམས་ཐམས་ཅད་ཡང་དག་རྫོགས། །ཕྱག་རྒྱ་ལྔ་ཡིས་རྣམ་པར་བརྒྱན། །ཕྱོགས་ཀྱི་གོས་ཅན་གར་མཆོག་སྟེ། །མགོ་བོའི་ཕྲེང་བས་རྣམ་པར་བརྒྱན། །ཐམས་ཅད་རོ་ཡི་གདན་ལ་བཞུགས། །སྣ་ཚོགས་གཟུགས་ཅན་ཡིད་འཕྲོག་པ། །ཐོད་པ་ཁ་ཊྭཱཾ་ག་འཛིན་ཅིང་། །ཞགས་
པ་ལྕགས་ཀྱུ་ཕྱག་ན་བསྣམས། །རྡོ་རྗེ་མཆོག་ནི་གསོར་མཛད་ཅིང་། །དྲིལ་བུ་དང་ནི་ཅང་ཏེའུ་མཆོག །ཞལ་གསུམ་དཔའ་ཞིང་སྒེག་པ་སྟེ། །ཐུགས་རྗེའི་ཉམས་ནི་ཡོངས་སུ་རྫོགས། །སྤྱན་ནི་ཟུར་གྱིས་གཟིགས་མཛད་ཅིང་། །དགྱེས་པའི་རྩོལ་བས་གཡོ་བ་སྟེ། །དངོས་གྲུབ་
ཐམས་ཅད་སྩོལ་མཛད་ཅིང་། །སྒྲུབ་པ་པོ་ཀུན་རྗེས་སུ་ཆགས། །ཟླ་བ་དྲུག་གིས་སྒྲུབ་པ་པོ། །མཁའ་འགྲོ་མ་ཡི་འཁོར་ལོ་འགྲུབ། །ཡིད་གཉིས་མེད་པར་དངོས་གྲུབ་མཆོག །མཁའ་འགྲོ་ཐོད་པར་བྱེད་པ་ཡིན། །དུས་འདིར་དེ་མ་ཐག་ཏུ་ཡང་། །མཁའ་ལ་སྤྱོད་པར་ཐེ་ཚོམ་མེད། །
ནང་གི་ཕོ་བྲང་དེ་ཉིད་ནི། །རེའུ་མིག་དགུ་སོགས་སྒོ་དང་བཅས། །སྒོ་རུ་ལྷ་མོ་བཞི་བཀོད་ལ། །མཁའ་འགྲོ་མ་ནི་དངོས་གྲུབ་སྟེར། །ཕྱི་རོལ་དཀྱིལ་འཁོར་ལྷ་མོ་བྲི། །སྣམ་བུའི་མཚམས་བཞི་དེ་རུ་ནི། །ལྷ་མོ་ཉི་ཤུ་དགོད་བྱ་ཞིང་། །མཁའ་འགྲོ་མ་སོགས་ཕྱོགས་མཚམས་
སུ། །ཟུར་བཞི་པ་ལ་སྒོ་བཞི་པ། །ཕྱི་རོལ་དཀྱིལ་འཁོར་དག་ཏུ་བརྡག །སྒོ་རྣམས་སུ་ནི་ལྷ་མོ་བཞི། །འདོད་པའི་འབྲས་བུ་ཐམས་ཅད་སྟེར། །རྟ་བབས་བཞིས་ནི་རྣམ་པར་བརྒྱན། །ཟུར་གྱི་ཆ་ནི་ཐམས་ཅད་དང་། །སྒོ་དང་སྒོ་ཁྱུད་མཚམས་རྣམས་སུ། །རྡོ་རྗེ་རིན་ཆེན་གྱིས་
བརྒྱན་ཅིང་། །ཕྱི་རོལ་དཀྱིལ་འཁོར་ཐིག་གདབ་པོ། །དེ་ཡི་ནང་དུ་རེའུ་མིག་དགུ། །སྒོ་རྣམས་ཀྱང་ནི་བྱ་བ་སྟེ། །འདི་ལྟར་མཁའ་འགྲོ་མཁའ་འགྲོ་མ། །དྲ་བའི་སྡོམ་པ་སྟོང་པ་སྟེ། །བྱང་ཆུབ་ཕྱོགས་ནི་སུམ་ཅུ་བདུན། །ཆོས་ཀྱི་རྣམ་པར་དག་པ་ཡིན། །དབུས་སུ་ས་ནི་བཅུ་

གསུམ་སྟེ། །ཕྱི་རོལ་གནས་དང་ཉེ་བའི་གནས། །དུར་ཁྲོད་དང་ནི་ཉེ་དུར་ཁྲོད། །འདི་ལྟར་སྦྱོར་བས་རྣམ་དག་པར། །སྡོམ་པ་མཆོག་ནི་བསྒོམ་པར་བྱ། །དེ་ནི་ཐུགས་ཀྱི་ཡེ་ཤེས་ཏེ། །ཡེ་ཤེས་མཁའ་འགྲོ་མཁའ་འགྲོ་མའོ། །ཕུང་པོ་ཁམས་དང་སྐྱེ་མཆེད་ལ། །ཆོ་ག་
གཉིས་པོ་སྦྱར་བར་བྱ། །ཡེ་ཤེས་མཆོག་གི་སྡོམ་པ་སྟེ། །གསང་བ་གསུམ་གྱི་འཁོར་ལོ་དགོད། །ཕྱེད་དང་ཕྱེད་དུ་རྣམ་པར་དགོད། །མཁའ་འགྲོ་གསུམ་ནི་འཁོར་ལོའི་དབུས། །དམ་ཚིག་རྣལ་འབྱོར་འབྱུང་བ་ཆེ། །ཡེ་ཤེས་འཁོར་ལོ་བཀུག་ནས་ནི། །ཞབས་བསིལ་བྱས་ནས་
གཞུག་པར་བྱ། །ཡེ་ཤེས་ཆུ་ཡིས་དབང་བསྐུར་ནས། །གཙོ་བོ་དག་ནི་རྣམ་པར་བསྒོམ། །བདག་མེད་ཆོས་ཀྱི་རོ་ཀུན་གྱི། །དམ་ཚིག་མཆོག་ནི་དྲི་མ་མེད། །བ་སྤུ་ཁུང་བུ་ཐམས་ཅད་ལས། །དམ་ཚིག་གསང་བ་གསུམ་སྤྲོས་ནས། །སེམས་ཅན་མ་ལུས་དམ་ཚིག་གི། །མཁའ་
འགྲོ་རུ་ནི་རབ་གནས་བྱ། །འབད་པ་ཡིས་ནི་བསྡུས་ནས་ཀྱང་། །གསང་བ་གསུམ་དུ་གཞུག་པར་བྱ། །སྔོན་གྲུབ་པ་ཡི་མཁའ་འགྲོ་ནི། །བྱིན་བརླབས་གནས་སུ་དགོད་པར་བྱ། །འདི་ནི་རྡོ་རྗེ་ཐེག་ཆེན་ཏེ། །མཁའ་འགྲོ་སྤྱོད་པའི་གནས་ལ་བཞུགས། །སྡོམ་པ་མཆོག་ནི་བཟླས་པ་
ཡིས། །བླ་ན་མེད་པའི་གོ་འཕང་སྟེར། །དུས་བཞི་དག་ཏུ་ཅི་འདོད་པར། །སྐྱོ་བ་མེད་པར་རྟག་ཏུ་བསྒོམ། །ལུགས་སུ་འབྱུང་དང་བཟློག་པ་ཡིས། །འཁོར་ལོ་མཆོག་ནི་རྣམ་པར་སྤྲོ། །བ་སྤུའི་ཁུང་བུ་ལས་མདུན་དུ། །བདེ་མཆོག་སྤྲོས་ནས་མཆོད་པར་བྱ། །རྡོ་རྗེ་གསུམ་ནི་དབང་
བསྐུར་ནས། །འགོག་པའི་ཁྲོ་བོ་རྣམ་པར་བསྒོམ། །ཡེ་ཤེས་ཁྲོ་བོ་ལྷན་ཅིག་ཏུ། །སྤྲིན་གྱི་འབྲུག་སྒྲ་ལྟ་བུར་བཟླ། །འགྲོ་ཞིང་འོང་བའི་སྦྱོར་བ་ཡིས། །མི་སྨྲ་རྡོ་རྗེ་བརྟུལ་ཞུགས་ཆེ། །ཞག་བདུན་གྱིས་ནི་ངེས་པར་ཡང་། །མཐུ་དང་སྟོབས་ནི་འགྲུབ་འགྱུར་ཏེ། །གཡོ་ཞིང་ལྡེག་པར་བྱེད་པ་
དང་། །འཁྲུག་ཅིང་གཡེངས་དང་གཞུག་པ་དང་། །ནད་མེད་པ་ནི་ནད་ཡོད་བྱེད། །ནད་ཡོད་པ་ནི་ནད་མེད་བྱེད། །དེ་ལྟར་སྒོམ་པ་བྱས་ནས་ནི། །ལས་འདིར་ཐེ་ཚོམ་མེད་པ་ཡིན། །ནང་གི་བདག་ཉིད་སྦྱོར་ལྡན་པས། །བསྒོམ་དང་བཟླས་ལ་དགའ་བ་དང་། །དམ་ཚིག་ཟས་ལ་དགའ་བ་ནི། །

ཐོགས་པ་མེད་པར་ཚེ་ཡང་བརྟན། །འདི་ལྟར་རང་གི་ཆོ་གས་བཟླས། །སངས་རྒྱས་གནས་སུ་ལེགས་པར་འཇུག །དེར་ནི་དམ་ཚིག་འཁོར་ལོ་ནི། །མཁས་པས་བསྒོམ་མཆོད་བཟླས་པ་བྱ། །གསང་སྔགས་འདི་དག་བཤད་པར་བྱ། །ཨོྃ་ཤྲཱི་བཛྲ་ཌཱ་ཀ་ཨ་དྷི་ཧཱུྃ། ཌཱ་ཀི་ནཱི་ཛཱ་
ལ་སམྦ་ར་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་བུདྡྷ་ཌཱ་ཀ་ཨ་བྷྲུྃ་ཧཱུྃ་ཌཱ་ཀི་ནཱི་ཛཱ་ལ་སམྦ་ར་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་ཀརྨ་ཌཱ་ཀ་ཨ་ཁཾ་ཧཱུྃ་ཌཱ་ཀི་ནཱི་ཛཱ་ལ་སམྦ་ར་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་པདྨ་ཌཱ་ཀ་ཧྲི་ཧཱུྃ་ཌཱ་ཀི་ནཱི་ཛཱ་ལ་སམྦ་ར་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་རཏྣ་ཌཱ་ཀ་ཨཾ་ཧཱུྃ་ཌཱ་ཀི་ནཱི་ལ་སམྦ་ར་ཧུྃ་ཧཱུྃ་ཕཊ་སྭཱ་ཧཱ། མཁའ་འགྲོ་
བཞི་པོ་དེ་དག་དང་། །མཁའ་འགྲོ་མ་དང་ལཱ་མ་དང་། །དུམ་སྐྱེས་མ་དང་གཟུགས་ཅན་མ། །མགྲིན་པ་མཉམ་པར་བསྣོལ་བ་སྟེ། །བྱིན་པ་གཉིས་ཀྱིས་ལེགས་པར་འཁྲིལ། །དེ་ཡི་མདོག་དག་ཕྱག་དང་ཞལ། །ཕྱག་མཚན་རྣམས་ཀྱང་རྣམ་པར་བསྒོམ། །ལྷ་མོ་མངོན་དུ་བྱས་ནས་
ནི། །སྙིང་པོའི་གསང་སྔགས་སོ་སོ་ཡིན། ཨོྃ་ཤྲཱི་བཛྲ་བཱ་རཱ་ཧི་བྃ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་ཌཱ་ཀི་ནི་ཌཱྃ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་ལཱ་མེ་ལཱྃ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་ཁཎྜ་རོ་ཧེ་ཁྃ་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་རཱུ་པི་ཎི་རཱུྃ་ཧུྃ་ཧཱུྃ་ཕཊ་སྭཱ་ཧཱ། འདི་ནི་ལྔ་པོའི་བདག་ཉིད་ཀྱིའོ། །མཚམས་ཀྱི་མཁའ་འགྲོ་མའི་
སྔགས་ནི། ཨོྃ་ཤྲཱི་བུདྡྷ་ཌཱ་ཀི་ནི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་ཀརྨ་ཌཱ་ཀི་ནི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་པདྨ་ཌཱ་ཀི་ནི་ཧུྃ་ཧཱུྃ་ཕཊ་སྭཱ་ཧཱ། ཨོྃ་ཤྲཱི་རཏྣ་ཌཱ་ཀི་ནི་ཧུྃ་ཧཱུྃ་ཕཊ་སྭཱ་ཧཱ། སྒོ་རུ་མཁའ་འགྲོ་མ་ཡི་སྔགས། །འདོད་པའི་འབྲས་བུ་ཐམས་ཅད་སྟེར། །བཞི་པོ་སྣ་ཚོགས་མདོག་ཅན་ཏེ། །ཇི་
བཞིན་རིགས་ཀྱིས་ཀུན་ལ་ཁྱབ། ཨོྃ་ཧཱུྃ་རཱུ་བེ་ཧུྃ་ཧཱུྃ་ཕཊ། ཨོྃ་ཧཱུྃ་སུ་རཱུ་པེ་ཧུྃ་ཧཱུྃ་ཕཊ། ཨོྃ་བཛྲ་དུ་ནྟི་ཧུྃ་ཧཱུྃ་ཕཊ། ཨོྃ་པྲ་བྷཱ་ཀ་རི་ཧུྃ་ཧཱུྃ་ཕཊ། ཤར་ཕྱོགས་ཀྱི་ནི་སྣམ་བུ་ལ། །ལྷ་མོ་བཞི་པོ་དགོད་པ་སྟེ། །སྐུ་ལུས་དཀར་པོའི་མདོག་ཅན་ལ། །དེ་ཡི་གསང་སྔགས་བཤད་པ་ཡིན། །
ཨོྃ་བཛྲ་བ་ཌ་བ་མུ་ཁི་ཧུྃ་ཧཱུྃ་ཕཊ། ཨོྃ་གྷོ་མུ་ཁི་ཧུྃ་ཧཱུྃ་ཕཊ། ཨོྃ་བཛྲ་གྷོ་ཎེ་ཧུྃ་ཧཱུྃ་ཕཊ། ཨོྃ་ཡ་ཤ་སྤི་ནི་ཧུྃ་ཧཱུྃ་ཕཊ། ལྷོ་ཕྱོགས་ནི་སྣམ་བུ་ལ། །ལྷ་པོ་བཞི་པོ་དགོད་པར་བྱ། །སྐུ་མདོག་དག་ནི་སེར་བ་སྟེ། །དེ་ཡི་སྔགས་སུ་བཤད་པ་ཡིན། ཨོྃ་བཛྲ་དཱུ་ཏི་ཧུྃ་ཧཱུྃ་ཕཊ། ཨོྃ་བཛྲ་ན་ཁི་

ཧུྃ་ཧཱུྃ་ཕཊ། ཨོྃ་བཛྲ་ཀཽ་མཱ་རི་ཧུྃ་ཧཱུྃ་ཕཊ། ཨོྃ་བཛྲ་ཀཾ་བོ་ཛི་ཧུྃ་ཧཱུྃ་ཕཊ། ནུབ་ཕྱོགས་ཀྱི་ནི་སྣམ་བུ་ལ་ལྷ་མོ་བཞི་པོ་སྐུ་མདོག་དམར་པོ་ཅན་གྱི་སྔགས་ཡིན་ནོ། ཨོྃ་བཛྲ་བེ་ཏཱ་ལི་ཧུྃ་ཧཱུྃ་ཕཊ། ཨོྃ་བཛྲ་སཱི་ཀ་ཧུྃ་ཧཱུྃ་ཕཊ། ཨོྃ་བཛྲ་གར་ཌ་རི་ཧུྃ་ཧཱུྃ་ཕཊ། ཨོྃ་བཛྲ་བི་མ་བ་དཱ་ནེ་ཧུྃ་ཧཱུྃ་ཕཊ། བྱང་གི་
སྣམ་བུ་ལ་ལྷ་མོ་བཞི་སྐུ་མདོག་ལྗང་གུ་དེའི་གསང་སྔགས་བཞད་པ་ཡིན་ནོ། །ཨོྃ་ཙནྡྲ་ཤེ་ཁ་རེ་ཧུྃ་ཧཱུྃ་ཕཊ། ཨོྃ་བྷྲྀ་ཀུ་ཊི་ཧུྃ་ཧཱུྃ་ཕཊ། ཨོྃ་བི་ཤྭ་རཱུ་པེ་ཧུྃ་ཧཱུྃ་ཕཊ། ཨོྃ་བཛྲ་ཀ་ཏ་ཡ་ནི་ཧུྃ་ཧཱུྃ་ཕཊ། དབང་ལྡན་ལ་སོགས་པའི་མཚམས་བཞི་རུ་ལྷ་མོ་བཞི་པོ་གཟུགས་གཉིས་པའི་མདོག་ཅན་
ཏེ། དེའི་སྔགས་བཤད་པ། ཨོྃ་བཛྲ་ཤྲྀཾ་ཁ་ལེ་ཧུྃ་ཧཱུྃ་ཕཊ། ཨོྃ་བཛྲ་མཱ་ལེ་ཧུྃ་ཧཱུྃ་ཕཊ། ཨོྃ་བཛྲ་ཡ་ཤ་སྐ་རི་ཧུྃ་ཧཱུྃ་ཕཊ། ཨོྃ་བཛྲཱ་ན་ལཱརྐེ་ཧུྃ་ཧཱུྃ་ཕཊ། སྒོ་རྣམས་སུ་ནི་ལྷ་མོ་བཞི་པོ་སྣ་ཚོགས་པའི་མདོག་ཅན་དྲག་པོའི་གཟུགས་དང་ལྡན་པ་སྟེ། དེའི་སྔགས་སུ་བཤད་པ། ཤར་དུ་
ཨོྃ་བཛྲ་པིངྒ་ལེ་ཛཿཧུྃ་ཧཱུྃ་ཕཊ། ལྷོ་རུ་ཨོྃ་བཛྲ་ཛྭ་ལ་ནི་ཧཱུྃ་ཧུྃ་ཧཱུྃ་ཕཊ། ནུབ་ཏུ་ཨོྃ་བཛྲ་ཀུཎྜ་ལི་བཾ་ཧུྃ་ཧཱུྃ་ཕཊ། བྱང་དུ་ཨོྃ་བཛྲ་བྷཻ་ར་བ་ཧོ་ཧུྃ་ཧཱུྃ་ཕཊ། ཐམས་ཅད་གསལ་བྱེད་མཐའ་རུ་ནི། །ཤྲཱི་ནི་སྦྱར་ཞིང་མཆོག་རིམ་བཞིན། །སྔགས་པས་དེ་ལྟར་བཟླས་ན་ནི། །མཁའ་འགྲོ་མ་ནི་དྲ་བ་
ཡི། །སྡོམ་པའི་དངོས་གྲུབ་ཐོབ་པ་སྟེ། །ཟླ་བ་དྲུག་གིས་བདེ་དབང་འགྱུར། །གཅིག་ཏུ་བྱས་ཏེ་བསྡུས་ན་ནི། །རྣལ་འབྱོར་ཆེན་པོ་གཟི་བྱིན་ཅན། །དྲ་བའི་མཆོག་ནི་འགྲུབ་པར་འགྱུར། །གསང་སྔགས་འདི་དག་ཐམས་ཅད་ནི། །ཁྲིའམ་འབུམ་དུ་བཟླས་ན་ནི། །གསང་སྔགས་
རྒྱལ་པོ་འགྲུབ་པ་ཡིན། །སྙིང་པོ་དག་ནི་བཟླས་པ་ཡིས། །དཔའ་བོ་མཁའ་འགྲོ་མ་གྲུབ་ཅིང་། །རང་ཉིད་ཇི་ལྟར་འདོད་པར་གྱུར། །གཞན་གྱི་ལུས་སུ་ཞུགས་འགྲོ་ཞིང་། །མི་སྣང་བ་དག་ཐོབ་ནས་ནི། །རྣལ་འབྱོར་ཆེན་པོ་རྣམ་པར་སྤྱོད། །སྣ་ཚོགས་གཟུགས་ནི་འཛིན་པ་ཡིན། །མངོན་
པར་བརྗོད་པའི་རྒྱུད་བླ་མའི་བླ་མ་ལས་དམ་ཚིག་གི་སྡོམ་པ་འབྱུང་བའི་དཀྱིལ་འཁོར་གྱི་རྒྱལ་པོ་ཞེས་བྱ་བའི་ལེའུ་སྟེ་སུམ་ཅུ་རྩ་གཉིས་པའོ།། །།དེ་ནས་གཞན་ཡང་བཤད་བྱ་བ། །སངས་རྒྱས་མཁའ་འགྲོའི་ཆོ་གའི་རིམ། །སྔར་བཤད་སངས་རྒྱས་མཁའ་འགྲོ་ཡི། །ལུང་ལ་སོགས་

པའི་རིམ་པ་བྱ། །རྣལ་འབྱོར་ལུང་ནི་མི་ཤེས་པ། །སངས་རྒྱས་མུ་སྟེགས་ཅན་ཡིན་ཏེ། །རྟག་ཏུ་ལུང་ནི་སྤང་མི་བྱ། །དཀོན་མཆོག་གསུམ་ནི་མི་སྤང་ཞིང་། །སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་འགྲོ། །ཤེས་རབ་ཕ་རོལ་
ཕྱིན་དམིགས་ན། །རྣལ་འབྱོར་གྱི་ནི་དངོས་གྲུབ་འགྲུབ། །ཅིག་ཅར་འཇུག་པའི་སྦྱོར་བ་ཡིས། །བདག་གི་ལུས་ནི་རྣམ་པར་བསམ། །སྔོ་ཞིང་དྲག་ལ་བཞིན་རྣམ་སྒྱུར། །གཏུམ་ཞིང་འཇིགས་ལ་འཇིགས་པར་མཛད། །ཞལ་གྱི་མཆེ་བ་རྣམ་པར་གཙིགས། །རལ་པ་ཟླ་ཕྱེད་
སྤྱི་གཙུག་འཆིང་། །སྣ་ཚོགས་རྡོ་རྗེས་རལ་པ་གནོན། །ཐོད་པའི་ཕྲེང་བས་རྣམ་པར་བརྒྱན། །རྒྱན་རྣམས་ཐམས་ཅད་ཡོངས་སུ་རྫོགས། །བཾ་ཧཱུྃ་བཛྲ་ལས་བྱུང་སྐུ་ལུས་ཅན། །ཕྱག་རྒྱ་དྲུག་དང་ཡང་དག་ལྡན། །སྟག་གི་པགས་པ་གོས་སུ་མནབས། །སྐྱིལ་ཀྲུང་ཕྱེད་པས་
ལེགས་པར་གནས། །སྤྱན་གསུམ་དྲག་པོའི་སྐུ་ལུས་ཅན། །མགྲིན་པ་བཞི་ལ་ཞལ་བཞི་པ། །བཅུ་གཉིས་ཕྱག་དང་ཡང་དག་ལྡན། །སྟོང་པའི་ཡེ་ཤེས་ཡང་དག་མཆོག །གདུག་པ་ཀུན་གྱི་ཐོད་པའི་ཕྲེང་། །དུས་མཐའ་ལས་བྱུང་དོ་ཤལ་ཅན། །གདུག་པ་ཀུན་ནི་ཞབས་
འོག་གནོན། །ཉོན་མོངས་འཇིགས་བྱེད་མགོ་བོ་དང་། །སྲེད་པ་གཏི་མུག་ཕྲག་དོག་སྟེ། །དུས་མཚན་མོ་ནི་ཁས་བུབ་ལ། །གདུག་པའི་བགེགས་ནི་འཇིགས་པ་ཅན། །ཐམས་ཅད་ཞབས་ཀྱི་འོག་ཏུ་གནོན། །ནམ་མཁའ་དང་ནི་སྐྱེ་བ་དང་། །དཀར་བ་དང་ནི་དམར་བ་དང་། །
ལྗང་གུ་སྟེང་དུ་བལྟས་པའི་ཞལ། །རྡོ་རྗེ་དྲིལ་བུ་མཉམ་ལྡན་པ། །ཕག་མོ་དག་དང་བདེ་བར་འཁྱུད། །ཀུན་ཏུ་གཉིས་མེད་སྦྱོར་བ་ཡིས། །ཆོས་རྣམས་ཀུན་གྱི་རོ་གཅིག་ཏུ། །སྦྱངས་པའི་ཡོན་ཏན་ཞེས་བྱ་བ། །དཔལ་གྱི་བདེ་བ་ཆེན་པོ་ནི། །རྡོ་རྗེ་ཧེ་རུ་ཀ་ཉིད་ཡིན། །ཐོད་པ་དང་
ནི་ཁ་ཊྭཱཾ་འཛིན། །ཆོས་ཀྱི་འཁོར་ལོ་ཁར་གསིལ་དང་། །ལྷུང་བཟེད་མདུང་དང་ཞགས་པ་དང་། །ལྕགས་ཀྱུ་མགོ་བོ་ཅང་ཏེའུ་དང་། །གཡས་དང་གཡོན་པའི་ཕྱག་དག་གིས། །ན་རའི་པགས་པ་བརྐྱང་ནས་མནབས། །ཤར་དུ་མཱ་ཏང་གཱི་དང་ཌོམྦི་ཀཱ། །ར་ཛ་ཀཱི་དང་པུཀྐ་སཱི། །ཁ་ཊ་

ཀཱི་དང་ཤ་བ་རཱི། །ཛི་བཱ་རཱི་དང་ས་མ་རཱི། །ལྷ་མོ་བརྒྱད་པོ་དེ་དག་ནི། །ཇི་བཞིན་རིམ་པས་རྗེས་སུ་དགོད། །སེར་དང་སྔོ་དང་དེ་བཞིན་དམར། །དུད་པ་ཡི་ནི་མདོག་ཅན་ཏེ། །དམར་དང་ལྗང་དང་དུད་ཁའི་མདོག །བརྒྱད་པ་དཀར་པོ་ཉིད་ཡིན་ནོ། །སྒོ་རྣམས་སུ་ནི་དགོད་བྱ་བ། །
ཁྲག་འཐུང་རྡོ་རྗེ་གཏུམ་མོ་དང་། །རྡོ་རྗེ་སྲིང་མཆོག་མ་དང་ནི། །རྡོ་རྗེ་འཇིགས་བྱེད་དྲག་མོ་སྟེ། །གདུལ་དཀའ་ཐམས་ཅད་གསོལ་མཛད་ཅིང་། །ཐལ་བ་སྤྲིན་མདོག་ལྗང་གུ་དང་། །དམར་དང་སྔོ་དང་ལྷག་པར་འཇིགས། །བརྒྱད་པའི་དབུས་སུ་ཆོས་ཁར་གསིལ། །ཐོད་པ་ཅང་ཏེའུ་
གྲི་གུག་སྟེ། །ཕྲག་པའི་སྟེང་དུ་གོས་འཛིན་པའོ། །སྒོ་རྣམས་སུ་ནི་ལྷ་མོ་བཞི། །ཐོད་པ་ཁ་ཊྭཱཾ་མི་འཇིགས་པ། །ཆོས་ཀྱི་ཁར་གསིལ་ཅང་ཏེའུ། །ཞལ་གཅིག་པ་ལ་ཕྱག་བཞི་པ། །ཡི་དགས་གདན་གྱི་སྟེང་དུ་ནི། །སྐྱིལ་ཀྲུང་ཕྱེད་པའི་གར་གྱིས་བཞུགས། །བསོད་སྙོམས་པ་དང་
ཆོས་གོས་གསུམ། །ཕྱིས་མི་ལེན་དང་ཅོག་པུ་པ། །གཞི་ཇི་བཞིན་དང་སྟན་གཅིག་པ། །བླ་གབ་མེད་དང་ཤིང་དྲུང་པ། །དགོན་པ་པ་དང་དུར་ཁྲོད་དང་། །ཁྲོད་པ་དང་ནི་ཕྱིང་པ་པའོ། །འདི་དག་ཇི་ལྟའི་རིམ་པ་ཡིས། །སྦྱངས་པའི་ཡོན་ཏན་རྣམ་དག་བསྒོམ། །ཡེ་ཤེས་མཉམ་
པའི་དམ་ཚིག་མཆོག །རོ་གཅིག་ཏུ་ནི་རྣམ་པར་བསྒོམ། ཨོྃ་ཤྲཱི་མ་ཧཱ་སུ་ཁ་བཛྲ་ཧེ་ཧེ་རུ་རུ་ཀྃ་ཨཱཿཧུྃ་ཧཱུྃ་ཕཊ། ཨོྃ་མྃ་མ་ཏཱྃ་གཱི་ཧུྃ་ཧཱུྃ་ཕཊ། ཨོྃ་ཌྃ་བཛྲ་ཌྃ་བི་ནཱི་ཧུྃ་ཧཱུྃ་ཕཊ། ཨོྃ་རྃ་རཱ་ཛ་ཀཱི་ཧུྃ་ཧཱུྃ་ཕཊ། ཨོྃ་བུྃ་པུཀྐ་སཱི་ཧུྃ་ཧཱུྃ་ཕཊ། ཨོྃ་ཁྃ་ཁ་ཊ་ཀཱི་ཧུྃ་ཧཱུྃ་ཕཊ། ཨོྃ་ཤྃ་ཤ་བ་རཱི་ཧུྃ་ཧཱུྃ་ཕཊ། ཨོྃ་ཛིཾ་ཛི་བ་རཱི་ཧུྃ་
ཧཱུྃ་ཕཊ། ཨོྃ་སྃ་ས་མ་རཱི་ཧུྃ་ཧཱུྃ་ཕཊ། ཨོྃ་ཧེཾ་ཧེ་རུ་ཀཱི་ཧུྃ་ཧཱུྃ་ཕཊ། ཨོྃ་བྃ་བཛྲ་ཙཎ་ཌཱི་ཧུྃ་ཧཱུྃ་ཕཊ། ཨོྃ་ཧཱུྃ་བཛྲ་རཱུཀྵ་སཱི་ཧུྃ་ཧཱུྃ་ཕཊ། ཨོྃ་བྷཻ་བཛྲ་བྷཻ་ར་པཱི་ཧུྃ་ཧཱུྃ་ཕཊ། དེ་ཀུན་གཅེར་པུ་སྐྲ་གྲོལ་བ། །སྤྱན་གསུམ་པ་ལ་ཞི་བ་སྟེ། །མཆེ་བ་རྣམ་གཙིགས་ལྕེ་སྐྱོད་ཅིང་། །ཕྱག་རྒྱ་ལྔ་ཡིས་སྐུ་ལུས་
བརྒྱན། །ཐོད་པའི་ཕྲེང་བའི་དབུ་རྒྱན་ཅན། །བཞད་དང་ཞི་དང་སྙིང་རྗེ་དང་། །སྒེག་པ་དང་ནི་རྔམ་པ་དང་། །དྲག་ཅིང་ཁྲོ་བའི་ཉམས་ཅན་ཏེ། །བཟླས་དང་བསྒོམ་པ་སྤྲོ་ཞིང་བསྡུ། །ལུས་ངག་ཡིད་ལ་བདེ་བར་གནས། །སེམས་ཅན་མོས་པ་སྣ་ཚོགས་པ། །གདུལ་བའི་ཐབས་ཀྱིས་

བདེ་བ་ཡི། །ཡུལ་ལ་ཡོངས་སུ་སྦྱོང་ལན། །བླ་མེད་ཡེ་ཤེས་འབྲས་བུ་འཐེབ། །སེམས་ཅན་ཐམས་ཅད་འདི་ཡིས་བདེ། །འཆི་མེད་བདེ་བའི་ལོངས་སྤྱོད་ཀྱིས། །ཡེ་ཤེས་འབྲས་བུ་རྙེད་པ་ཡིན། །འདུ་ནི་སེམས་ཅན་ཐམས་ཅད་ཀྱི། །མཆོག་གི་གོ་འཕང་ཐོབ་
པ་ལོ། །མངོན་པར་བརྗེད་པའི་རྒྱུད་བླ་མའི་བླ་མ་ལས་སྦྱངས་པའི་ཡོན་ཏན་སྐྱེད་པའི་ལེའུ་སྟེ་སུམ་ཅུ་རྩ་གསུམ་པའོ།། །།དེ་ནས་གཞན་ཡང་བཤད་བྱ་བ། །ཆར་དབབ་ཆོ་གའི་རིམ་པ་ནི། །པདྨ་འདབ་མ་བརྒྱད་མཆོག་གི། །ལྟེ་བ་གེ་སར་བཅས་པ་ལ། །དེ་ཡི་དབུས་སུ་རྡོ་རྗེ་
ཆེ། །མཆེ་བ་རྣམ་གཙིགས་འཇིགས་པ་ཅན། །ཕྱག་བརྒྱད་པ་ལ་ཞལ་བཞི་པ། །སྤྱན་གསུམ་འཇིགས་པའང་རབ་ཏུ་འཇིགས། །རྡོ་རྗེ་མཚོན་ནི་གསོར་མཛད་ཅིང་། །སྡིགས་མཛུབ་ཞགས་པར་ལྡན་པ་དང་། །ཐོད་པ་དང་ནི་ཁ་ཊྭཱཾ་འཛིན། །ལྕགས་ཀྱུ་དང་ནི་མདུང་བསྣམས་
ཤིང་། །དཔའ་བོའི་པགས་པ་མནབས་ཤིང་འཛིན། །ཅང་ཏེའུ་དང་ནི་བརྒྱད་པར་བཤད། །གཡས་བརྐྱང་པ་ཡི་ཞབས་ཀྱིས་ནི། །ཆུ་ལྟ་འཇིགས་པ་མྱོས་པ་གནོན། །ཟླ་བ་ཕྱེད་པར་ལ་པ་འཆིང་། །སྣ་ཚོགས་རྡོ་རྗེས་རྣམ་པར་བརྒྱན། །ཕྱག་རྒྱ་དྲུག་གིས་སྐུ་ལ་བརྒྱན། །
ཐོད་པའི་ཕྲེང་བས་རྣམ་པར་བརྒྱན། །སྟག་གི་པགས་པ་གོས་སུ་མནབས། །ཐོད་པའི་ཕྲེང་བའི་ཅོད་པ་ན་མཆོག །མཆུས་གནོན་ཞལ་གདོང་རྣམ་སྒྱུར་ཞིང་། །ཁྲོ་བར་པ་ལྟ་ཞིང་འཇིགས་པར་གཟིགས། །འདབ་མ་བརྒྱད་ལ་ཀླུ་བརྒྱད་བྲི། །མཐའ་ཡས་དང་ནི་ནོར་རྒྱས་དང་། །
འཇོག་པོ་པདྨ་པདྨ་ཆེ། །དུང་སྐྱོང་དང་ནི་སྟོབས་ཀྱི་རྒྱུ། །དགའ་བོ་དང་ནི་བརྒྱད་ཡིན་ཏེ། །དཀར་དང་སྔོ་དང་དམར་དང་ལྗང་། །སེར་དང་དུད་པའི་མདོག་ཅན་ཏེ། །ལྔ་དགུ་དང་ནི་སེར་པོ་སྟེ། །ཐལ་མོ་སྦྱར་བར་བྱས་ནས་ནི། །བཅོམ་ལྡན་འདས་ལ་མངོན་ཕྱོགས་པ། །འཇིག་
པས་བཀའ་དྲིན་སློང་བར་བྱེད། །སྐྲག་བས་བལྟ་ཞིང་གནས་པའོ། །བཅོམ་ལྡན་སྐུ་ལུས་སྔོན་པོ་ཅན། །འཇིགས་ཤིང་ཤིན་ཏུ་འཇིགས་པར་མཛད། །གཡས་པ་དུད་ཁ་དམར་པོ་སྟེ། །གཡོན་པ་ལྗང་གུ་དུད་ཁའོ། །སྟེང་གི་ཞལ་ནི་མཁའ་ལྡིང་གདོང་། །ཞལ་རྣམ་སྒྱུར་ཞིང་

འཇིགས་པའོ། །ཉི་མ་དམར་པོའི་གཟི་བརྗིད་ཅན། །ཉི་མ་བཅུ་གཉིས་ཉི་མཉམ་འོད། །ཕག་མོ་དག་གིས་མགུལ་འཁྱུད་ཅིང་། །བྱིན་པ་གཉིས་ཀྱིས་ལེགས་པར་འཁྲིལ། །ཡང་ན་ཕྱག་ནི་བཅུ་གཉིས་པ། །བདེ་ཆེན་མཆོག་ནི་བཅུ་གཉིས་པ། །གྲི་གུག་ཚངས་པའི་མགོ་
བོ་དང་།