Kinh tạng Tây Tạng (Kangyur Đại Học) — 077_རྒྱུད་འབུམ།_ཀ

་ངག་བརྗོད་བྱ་བ་དང་། །རིན་
ཆེན་དུ་ནི་གཞན་ནོར་འཕྲོག་དང་མཆོག་གི་པདྨའི་རིགས་ཉིད་དུ་ཡང་གཞན་གྱི་བུད་མེད་འཕྲོག །འཁོར་ལོར་ཆང་དང་མར་མེ་སངས་རྒྱས་རྣམས་དང་ཡུལ་རྣམས་མཐའ་དག་ཤིན་ཏུ་བསྟེན་པར་བྱའོ། །གྲི་གུག་ཏུ་ནི་གདོལ་བ་མོ་ལ་སོགས་པ་བུད་མེད་མཐའ་
དག་མཁའ་ཡི་པདྨ་སྨད་མི་བྱ། །སེམས་ཅན་རྣམས་ཀྱི་དོན་དུ་ནོར་དང་ལུས་བཅས་སྦྱིན་བྱ་འདི་ནི་ཁྱོད་ཀྱིས་བསྲུང་བར་བྱ་བ་མིན། །རིགས་ཀྱི་བུ་རྣམས་གཞན་དུ་བསྐལ་པ་གྲངས་མེད་པས་ཀྱང་སངས་རྒྱས་མིན་པར་རྒྱལ་བས་གསུངས་པར་ངེས། །ཆུ་ཡིས་
སྒྲོལ་མ་ལ་སོགས་ལྷ་མོ་རྣམས་དང་དབུ་རྒྱན་རྒྱལ་བ་རྣམས་ཏེ་དར་དཔྱངས་ནུས་མ་རྣམས། །རྡོ་རྗེ་དྲིལ་བུས་ཉི་ཟླ་དག་དང་བརྟུལ་ཞུགས་ཡུལ་སོགས་རྣམས་དང་མིང་གིས་བྱམས་པ་སོགས་སུ་སྦྱོང་། །རྗེས་གནང་རྫོགས་པའི་བྱང་ཆུབ་དཔལ་ལྡན་སྲིད་པའི་འཇིགས་
པ་འཇོམས་པ་དུས་ཀྱི་འཁོར་ལོ་རྗེས་ཁྱབ་པ། །དེ་ལྟར་དབང་བདུན་རྣམས་ཀྱིས་སྡིག་པའི་དྲི་མ་འཇོམས་པས་དཀྱིལ་འཁོར་ཉིད་དུ་ཡང་དག་རབ་ཏུ་སྦྱིན། །དབང་བདུན་རྣམས་ཀྱིས་དབང་རྣམས་བསྐུར་ན་དགེ་བའི་དབང་གིས་ས་བདུན་དབང་ཕྱུག་ཉིད་དུ་
འགྱུར་བའོ། །ཕྱིས་ནི་ཕྱིར་མི་ལྡོག་ལ་སོགས་པ་ངེས་པར་རབ་ཏུ་འཇུག་པ་བུམ་པ་དང་ནི་གསང་བའི་དབང་། །ཤེས་རབ་ཡེ་ཤེས་དབང་རྣམས་བསྐུར་བས་སྲིད་པའི་འཇིགས་པ་འཇོམས་པའི་འཇམ་དབྱངས་ཉིད་དུ་འགྱུར་བའོ། །འགྲོ་བ་གཡོ་སྒྱུའི་དབང་

གིས་རྩ་བའི་ལྟུང་བ་བྱུང་ན་འདི་ཉིད་ལ་ཡང་དམྱལ་བའི་སྡུག་བསྔལ་འགྱུར། །རྩ་བའི་ལྟུང་བ་བྱུང་ན་དབང་བདུན་ལ་གནས་ཡོན་ཏན་ཅན་གྱིས་བཟླས་པས་རྣམ་པར་དག་པར་འགྱུར། །གལ་ཏེ་བུམ་པ་དང་ནི་གསང་བར་བརྟུལ་ཞུགས་ངེས་པའི་དབང་སྟེ་གོང་
མར་དག་པ་ཡོད་མ་ཡིན། །གང་ཞིག་ལ་ནི་རྩ་བའི་ལྟུང་བ་བྱུང་ན་དག་པར་བྱ་བའི་དོན་དུ་དཀྱིལ་འཁོར་འདིར་འཇུག་བྱ། །རྗེས་གནང་ཐོབ་པས་ཕྱི་ནས་ཚོགས་ཀྱི་རིགས་སུ་འགྲོ་ན་རྒན་པ་ཞེས་པ་ལས་ནི་གཞོན་པའོ། །རྩ་བའི་ལྟུང་བ་བུ་རྣམས་ཀྱིས་ཏེ་དཔལ་
ལྡན་བླ་མའི་ཐུགས་སུན་ཕྱུང་བ་རི་བོང་འཛིན་པར་འགྱུར། །དེ་ཡི་བཀའ་ལས་འདས་པ་གཞན་ཏེ་དེ་བཞིན་དུ་ནི་སྤུན་ལ་ཁྲོ་བ་གསུམ་པར་ངེས་པར་འགྱུར། །བྱམས་པ་སྤངས་པས་བཞི་པར་འགྱུར་ཏེ་གཞན་ཡང་བྱང་ཆུབ་སེམས་ཉིད་རབ་ཏུ་སྤངས་པ་ལས་ནི་མདའ། །
གྲུབ་མཐའ་སྨོད་པ་དྲུག་པ་ཉིད་དེ་གཞན་ཡང་མ་སྨིན་སྐྱེ་བོ་རྣམས་ལ་གསང་བ་བྱིན་པ་རི། །ཕུང་པོ་ཉོན་མོངས་པ་ལས་ཀླུ་རུ་འགྱུར་ཏེ་གཞན་ཡང་དག་པའི་ཆོས་ལ་མ་དད་དགུ་པའོ། །སྒྱུ་ཡི་བྱམས་པ་ཕྱོགས་ཏེ་མིང་སོགས་བྲལ་བའི་བདེ་བ་སྟེར་ལ་རྟོག་པ་གང་ཡིན་དྲག་
པོའོ། །དག་པའི་སེམས་ཅན་རྣམས་ལ་རབ་ཏུ་སྐྱོན་བརྗོད་ཉི་མར་འགྱུར་ཏེ་དམ་ཚིག་རྙེད་པ་སྤངས་ན་གཞན། །བུད་མེད་ཐམས་ཅད་ལ་སྨོད་ངེས་པར་མ་ནུར་འགྱུར་ཏེ་རྡོ་རྗེ་ཐེག་པ་ལ་གནས་རྣམས་ཀྱིའོ། །ཕྱོགས་ཀྱི་ལོ་ནི་གཅིག་ནས་རྣམ་པ་བཅུ་ཡི་བར་དུ་ལྟ་
དང་རེག་པར་བྱ་བ་ཡིན་པས་ཏེ། །དེ་ནས་འཁྱུད་བྱ་རྣམས་ནི་རྒྱ་མཚོ་རྣམས་དང་རོ་བཅས་བསྟེན་པར་བྱ་བ་གཡོ་བ་ལ་སོགས་པ། །ཉི་ཤུའི་ལོ་ཡི་འོག་མའི་ཕྱག་རྒྱ་རྣམས་ནི་མཆོག་ཏུ་འཇིགས་བྱེད་ཁྲོ་བོའི་འབྱུང་པོ་ལྷ་མིན་རིགས། །དབང་གི་དོན་དུ་དྲུག་དང་གསུམ་
གྱིས་བདེ་མཉམ་འབྲས་སྟེར་བ་དང་གཞན་ནི་བསྒོམ་པའི་དོན་དུའོ། །གང་ཞིག་དང་པོར་ཡང་ནི་དཔལ་ལྡན་ཤེས་རབ་ནུ་མར་རེག་པ་དེ་ཉིད་བུམ་པའི་དབང་དུ་བརྗོད། །རི་བོང་འཛིན་པ་མྱངས་དང་གསང་བ་མཐོང་བར་བྱས་པས་གསང་བའི་དབང་དུ་རབ་ཏུ་འགྱུར་བའོ། །

མཐའ་དག་རྒྱལ་བའི་རིགས་ཀྱིས་ཡན་ལག་ཁ་རྣམས་སྦྱང་བར་བྱ་སྟེ་ཤེས་རབ་ཡེ་ཤེས་དབང་སྦྱིན་བྱ། །རྒྱལ་བ་དཔའ་བོར་བྱས་ཏེ་སློབ་མའི་དོན་དུ་ཕྱག་རྒྱ་སྦྱིན་དང་གཞན་ཡང་བླ་མ་ལ་ཡང་འདིར། །རྒྱན་རྣམས་ཐམས་ཅད་ལྡན་པའི་གསེར་ཞུན་དང་ནི་
མཚུངས་པའི་ལོ་ཉིད་བཅུ་གཉིས་མ་སྟེ་བུ་མོ་མཛེས། །ཐབས་དང་ཤེས་རབ་བདག་ཉིད་ལྡན་པས་རང་གི་རྡོ་རྗེ་ནོར་བུས་སྤྱད་བྱ་ཉིད་ནི་ཆགས་བཅས་ལ། །སློབ་མ་དག་པ་ཤེས་ནས་རྡོ་རྗེ་ས་བོན་བཅས་པ་ཁར་ནི་ཡང་དག་གཞུག་པར་བྱ་བ་ཉིད། །ཕྱིས་ནི་རང་གི་ཕྱག་རྒྱ་བུ་
ལ་བྱིན་ནས་དེ་ནས་གཞན་ཡང་དུ་བའི་ལམ་ལ་སོགས་ལྡན་ཡང་། །སྐྲག་དང་འཁྲུལ་པའི་སེམས་དང་གཡོ་དང་གཞན་གྱི་དབང་དུ་འགྲོ་བ་དང་ནི་ནང་ལྡན་བུ་བཅས་དང་། །ཁྲོ་ལྡན་ཁེངས་ཤིང་འདོད་ལ་ཆགས་དང་བརྫུན་དང་རྩོད་པ་ལ་དགའ་ཡན་ལག་ཉམས་དང་མ་དག་
པ། །དེ་ལྟ་བུ་རྣམས་ཤེས་རབ་ཡེ་ཤེས་དབང་དུ་ཤིན་ཏུ་འབད་དེ་བླ་མས་སྤང་བྱ་མི་དབང་པོ། །སླར་གསུངས་སངས་རྒྱས་བླ་མ་དག་ལ་གུས་ལྡན་དམ་ཚིག་འཛིན་ལ་ཕྱག་འཚལ་བ་དང་མཆོད་པར་བྱ། །འགྲོ་བ་རྣམས་ཀྱི་རང་གི་ཡིད་ཉིད་འདོད་ཆགས་ཀྱིས་ནི་འཁྲུགས་
པར་བྱེད་དང་གང་བར་འགྱུར་བ་ཉིད། །ཡན་ལག་མཆོག་ལ་གང་བ་ལས་ནི་འབར་བས་རི་བོང་འཛིན་པ་ཞུ་ནས་ཡང་དག་འཛག་པ་ཉིད། །ཨོཌྜ་དགུག་པར་རབ་ཏུ་བྱས་པས་མཆོག་གི་བདེ་བ་སྟེར་བ་ཐིག་ལེ་ཐར་པ་གསུམ་གྱི་མཐར། །སྣང་རེག་འདུས་དང་འགྱུར་དང་
བདེ་བ་རྣམས་ཏེ་དགའ་བའི་དབྱེ་བ་ལ་སོགས་པ་ཡིས་དེ་ལྟར་རོ། །དང་པོར་ཡང་ནི་མི་རྣམས་ཀུན་གྱིས་མིག་གིས་བལྟས་པ་འདི་ཡིས་འདོད་ཆགས་འཁྲུགས་པ་དགའ་བ་སྟེ། །ཕྱི་ནས་གང་བ་རང་གིས་ལུས་ལ་རབ་ཏུ་འདུས་པ་མཆོག་ཏུ་དགའ་བ་ཉིད་དུ་འགྱུར་བའོ། །
འབར་བ་ཡང་དག་རོལ་པས་རྡོ་རྗེ་ལས་ནི་པདྨར་ཐིག་ལེ་འཛག་པ་ཁྱད་པར་དགའ་བའོ། །ཨོཌྜ་རྡོ་རྗེ་ལས་ནི་ཐིག་ལེ་གསུམ་གྱི་མཐའ་རུ་བདེ་བ་འགྱུར་བྱེད་ལྷན་ཅིག་སྐྱེས་དགའོ། །འདོད་དང་དགའ་དང་གཡོ་བ་དང་ནི་མི་འགྱུར་བ་སྟེ་བཞི་རྣམས་ཀྱིས་ནི་དེ་ཡི་སྦྱོར་བ་གཅིག །

གང་བ་ནུས་པ་དང་ནི་སྐྱེ་བ་ངེས་པར་ཡིན་ཏེ་མཆོག་ཏུ་དགའ་བ་ཉིད་རྣམས་གཉིས་པའོ། །འབར་བ་དང་ནི་ཐིག་ལེ་དག་དང་ཡུར་བ་དང་སྟེ་ཁྱད་པར་དགའ་བ་ཉིད་རྣམས་གསུམ་པའོ། །ཨོཌྜ་དང་ནི་སྒྲ་ཙམ་ཉིད་དེ་གཉིད་དང་ལྷན་ཅིག་སྐྱེས་པའི་དགའ་བ་ཉིད་རྣམས་བཞི་པའོ། །སེམས་ཀྱིས་
བསམ་པར་བྱ་བ་མ་སྟེ་རེག་པར་བྱ་ཞིང་འཁྱུད་པ་ཡིས་ནི་སྲིང་མོར་འགྱུར་བའོ། །རྡོ་རྗེ་རབ་ཏུ་ཞུགས་པ་བུ་མོར་བརྗོད་དེ་བྱེད་བཅས་ཤིན་ཏུ་བདེ་བ་དེ་བཞིན་ཚ་མོའོ། །ཐིག་ལེ་ལྟུང་བ་ཆུང་མར་འགྱུར་ཏེ་ཆགས་བྲལ་གཞན་གྱི་རིགས་སུ་གྱུར་པའི་རྣལ་འབྱོར་མ་ཉིད་དོ། །དེ་ལྟར་རྣལ་
འབྱོར་ཕྱག་རྒྱ་དྲུག་ནི་ས་དང་ཆུ་དང་མེ་དང་རླུང་དང་ནམ་མཁའ་ཆད་པའི་དངོས། །ཆུ་སྐྱེས་སུ་ནི་རྡོ་རྗེ་རབ་ཞུགས་པ་དང་མེར་ནི་རླུང་དང་ཐིག་ལེ་མ་ལྷུང་རིམ་པ་སྟེ། །དེ་ལྟར་རྣལ་འབྱོར་གསུམ་གྱི་རབ་ཏུ་གསལ་བར་ངེས་པར་སྐུ་དང་གསུང་དང་ཐུགས་ཀྱི་ཕྱག་རྒྱའོ། །ཆགས་དང་ཆགས་
བྲལ་མཐའ་དང་སྔོན་དུ་བདེ་བ་དམ་པའི་གཏེར་ནི་སྦྱོར་བས་གོ་ཆ་བཞི་པའོ། །ཕྱག་རྒྱ་རྣམས་ལ་ཡུམ་གྱི་མཆོག་གྱུར་རྣམ་པ་བཅུ་པོ་དེ་ནི་དཔལ་ལྡན་བླ་མའི་ཞལ་འདིའོ། །རྣམ་པ་བདུན་དང་རྣམ་པ་གསུམ་སྟེ་བཅུ་པོ་འདི་ནི་འཇིག་རྟེན་ཀུན་རྫོབ་ཀྱི་དབང་སྟེ། །དེ་ལྟར་དེ་བཞིན་ཡང་བཞི་པ་
ཞེས་གསུངས་པས་སོ། །བཞི་པ་ནི་གསུམ་པ་ཤེས་རབ་ཡེ་ཤེས་མ་ཡིན་ཏེ། འཇིག་རྟེན་ལས་འདས་པའི་དབང་བཞི་པ་ཞེས་སྨོས་པའི་ཕྱིར་དང་། དེ་བཞིན་ཡང་ཞེས་གསུངས་པས་སོ། །འདིར་བཅོམ་ལྡན་འདས་ཀྱིས་བཀའ་སྩལ་པ། གང་ཞིག་ཤེས་རབ་ཀྱི་ནི་ནུ་མར་རེག་པ་ཉིད་དང་
གཞན་ཡང་བདུད་རྩི་མྱོང་དང་འཁྱུད་པའོ། །ཤེས་རབ་དང་ནི་འདུས་པས་བྱང་ཆུབ་སེམས་ཉིད་ཞུ་བ་སྐད་ཅིག་མ་བཞིར་བདུད་རྩིར་གྱུར་པ་གང་། །དེ་རྣམས་ཐམས་ཅད་འཇིག་རྟེན་པ་ཡི་ལམ་གྱི་རྒྱུ་རུ་སྙིང་རྗེ་མཆོག་གིས་ངེས་པར་བསྟན་པའོ། །གང་ཞིག་འཇིག་རྟེན་ལས་འདས་དབང་ནི་
རྒྱལ་བའི་བདག་པོ་དམ་པའི་ཕྱག་རྒྱ་བཟང་དང་རྗེས་འདུས་པ། །ལས་ཀྱི་ཕྱག་རྒྱ་དྲི་མ་དང་བཅས་སེམས་གཡེང་བྱེད་དེ་ཡེ་ཤེས་ཕྱག་རྒྱ་རྣམ་པར་རྟོག་ཡིན་པས། །ཡང་དག་སྤངས་ཏེ་རྫོགས་པའི་བྱང་ཆུབ་རྒྱུར་ནི་རྒྱལ་མཆོག་སྐྱེད་བྱེད་ཕྱག་རྒྱ་བཟང་པོ་བསྒོམ་པ་ནི། །གོས་པ་མེད་ཅིང་མི་འགྱུར་

མུན་འཇོམས་ཀུན་ལ་ཁྱབ་པ་མཁའ་མཚུངས་རྣལ་འབྱོར་པ་ཡི་གོ་བྱ་བ། །ལུས་ལ་གནས་པའི་ཡེ་ཤེས་གཟི་བརྗིད་སྲིད་པའི་དྲི་མ་འཇོམས་པ་དུས་ཀྱི་འཁོར་ལོས་རྗེས་ཁྱབ་པས། །སེམས་ཀྱི་སྣང་བ་ཙམ་སྟེ་རང་གི་ཡིད་ལས་སྐྱེས་པ་མེ་ལོང་གི་ནི་གཟུགས་བརྙན་ལྟ་བུར་ངེས། །
མ་ལུས་རྒྱལ་སྲས་རྣམས་དང་སངས་རྒྱས་རྣམས་ཀྱིས་བསྟེན་པ་རྣལ་འབྱོར་དབང་པོ་རྣམས་ཀྱིས་བསྟེན་བྱས་ན། །ཡེ་ཤེས་སྣང་བ་དེ་ཉིད་རབ་ཏུ་ཤར་བས་བདུད་དཔུང་ཡུལ་དང་བཅས་པ་མཐའ་དག་བསྲེགས་པ་དང་། །ཆགས་པ་ལ་སོགས་རྣམས་ཀྱིས་རྣལ་འབྱོར་པ་རྣམས་ལུས་ལ་ལོ་གཅིག་
སྦྱོར་བས་བདེ་མཉམ་སྟེར་བར་བྱེད། །ཤེས་རབ་ཡེ་ཤེས་ཞེས་པ་སེམས་ཀྱི་སྣང་བ་ཉིད་དེ་དེ་ཡང་རྣམ་པ་བཅུ་རུ་འགྱུར་བའོ། །དབང་འདིར་ཞུགས་པ་གང་ཞིག་དྲི་མ་མེད་པའི་རི་བོང་ཅན་མཚུངས་མེ་ལོང་གཟུགས་བརྙན་ལྟ་བུར་ངེས། །དེ་ནས་བདེ་བ་འཛག་པ་མེད་པ་ལྷན་ཅིག་སྐྱེས་པ་
འགྱུར་མེད་བཞི་པ་མྱ་ངན་འདས་པར་རེག །དེས་ན་སངས་རྒྱས་ཞལ་ནི་གང་གི་ཐུགས་དང་ཞལ་ལ་གནས་པ་དེ་ཉིད་དཔལ་ལྡན་བླ་མའོ། །ནམ་མཁར་ཆགས་པའི་སེམས་ཀྱི་མིག་མི་འཛུམས་པ་དང་ནི་རྡོ་རྗེའི་ལམ་དུ་རབ་ཏུ་ཞུགས་རྣམས་ཀྱིས། །སྟོང་པ་ལས་ནི་དུ་བ་སྨིག་རྒྱུ་རབ་ཏུ་གསལ་
བ་དྲི་མེད་སྲིན་བུ་མེ་ཁྱེར་མར་མེ་དང་། །འབར་དང་ཉི་མ་ཟླ་བ་རྡོ་རྗེ་རྣམས་ཀྱང་གཞན་ཡང་མཆོག་གི་ཆ་དང་ཐིག་ལེ་ཉིད་རྣམས་སོ། །དེ་ཡི་དབུས་སུ་སངས་རྒྱས་སྐུ་ནི་ཡུལ་དང་རྣམ་པར་བྲལ་བ་ལོངས་སྤྱོད་རྫོགས་སྐུ་དུ་མའོ། །ཆུ་འཛིན་བྲལ་བའི་མཁའ་ལ་སྣང་བ་རྣལ་འབྱོར་རྩེ་གཅིག་གནས་
པའི་ལྟ་བས་ལྟ་བར་བྱ་བ་ནི། །ཇི་སྲིད་ངེས་པར་རི་མོ་ནག་པོ་དྲི་མེད་འོད་ཟེར་འཕྲོ་བ་མཐོང་བ་དུས་ཀྱི་རྩ་ཡིས་སོ། །དེར་ནི་ཐམས་ཅད་མཁྱེན་པའི་སྐུ་ནི་ཆུ་ནང་ཉི་མ་བཞིན་དུ་རྙོག་པ་མེད་པ་སྣ་ཚོགས་མདོག །ཡུལ་དང་རྣམ་པར་བྲལ་བའི་རྣམ་པ་མ་ལུས་རང་གི་སེམས་ཏེ་གཞན་གྱི་སེམས་ཉིད་མ་ཡིན་ནོ། །
སྐུ་མཐོང་གྱུར་ནས་ཉིན་ཞག་སོ་སོའི་དུས་སུ་སྲོག་གི་རླུང་ཉིད་རབ་ཏུ་དགག་པར་བྱས་པ་དང་། །བརྟུལ་ཞུགས་ཅན་རྣམས་ལམ་གྱི་སེམས་ནི་ཟླ་བ་དྲུག་གིས་རེག་བྱ་བྲལ་ནས་བདེ་མཉམ་འགྱུར་བའོ། །ཇི་སྲིད་ངེས་པར་རང་གི་ལུས་ལ་འོད་ཟེར་འཁོར་ལོས་ཡོངས་སུ་འཁོར་བར་བྱེད་པ་མཐོང་བའི་བར། །

ཆགས་དང་ཆགས་བྲལ་མཐའ་དང་དང་པོར་སོང་བའི་སྐད་ཅིག་མ་ནས་ཁྱབ་བདག་དབུགས་ཀྱི་གྲངས་འཕེལ་ལོ། །མཐའ་དང་འབར་བའི་དབུས་དང་ཁྱད་པར་དགའ་དང་ལྷན་ཅིག་སྐྱེས་དང་ཡེ་ཤེས་དང་ནི་རྣམ་ཤེས་དང་། །གཉིད་དང་བརྒྱལ་བའི་དབུས་སུ་གནས་པའི་རྡོ་རྗེ་པདྨ་དག་གིས་གཉིས་
སྦྱོར་བདེ་བ་གང་ཡིན་པ། །དེ་ཡིས་འཕེལ་བར་རབ་ཏུ་བྱ་བ་བླ་མའི་ངེས་པའི་སྟོབས་ཀྱིས་འདི་ཉིད་འཕེལ་བར་ཐེ་ཙོམ་མེད། །བདུད་དང་ཉོན་མོངས་འཇོམས་ཤིང་རྒྱལ་བའི་བདག་པོ་ལ་གནས་རྣལ་འབྱོར་པ་ཡིས་ལོ་གཅིག་སྦྱོར་བ་ཡིས། །ས་ཡི་རྣམ་པར་སྣང་ཡང་སྲ་བ་མིན་དང་ཆུ་ཡི་གཟུགས་
སུ་སྣང་ཡང་ཆུ་མིན་གཤེར་བ་མེད་པའི་ཕྱིར། །མེ་ཡི་རྣམ་པར་སྣང་ཡང་མེ་མིན་རླུང་གི་གཟུགས་སུ་སྣང་ཡང་གཡོ་བ་མེད་པས་རླུང་མ་ཡིན། །སྟོང་པའི་རྣམ་པ་ཡིན་ཡང་མཐོང་སྟེ་དཀར་དང་སྔོ་བ་ལ་སོགས་མཐོང་ཡང་སྣ་ཚོགས་ཁ་དོག་མིན། །རྣམ་པ་ཀུན་ལྡན་ཡིན་ཡང་མི་མཐོང་རང་སེམས་དྲི་
མ་ཉོན་མོངས་དང་ནི་བདུད་ཀྱི་མཐུ་སྟོབས་ཀྱིས། །སྒྲ་ཙམ་ཐིག་ལེ་ཆ་དང་ཡེ་ཤེས་རྣམས་ནི་བདུད་རྩི་གནས་སུ་འགྲོ་དང་ལྕགས་སྒྲོག་བཅིངས་པའི་རྩ། །སྲོག་དང་ཐུར་སེལ་ལམ་གསུམ་རྣམས་ནས་རྡོ་རྗེ་པདྨར་བཅས་དང་པདྨ་རྡོ་རྗེ་ལྡན་པ་ཡིས། །དབུས་སུ་རླུང་དག་འགྲོ་བ་འཇུག་པ་ཡང་དག་
འདུས་པ་ཡུལ་དང་ཡུལ་ཅན་མེད་པར་འགྱུར་བ་དང་། །དུ་བ་ལ་སོགས་མཚན་མ་རྣམས་ནི་གང་ཞིག་གཟུང་དང་འདི་རྣམས་འཛིན་པ་ཐམས་ཅད་གསང་བ་ཆེན་པོའོ། །དབུས་སུ་སྲོག་གཞུག་པ་ནི་ཉི་མ་དང་བཅས་ཟླ་བར་གྱུར་པ་གཡས་དང་གཡོན་པ་བཅིང་བ་དང་། །ཕྱག་རྒྱ་དང་ནི་སྦྱོར་བའི་
སེམས་ཀྱིས་མཆོག་ཏུ་བདེ་གྱུར་པ་དང་རྡོ་རྗེ་ཡང་དག་སད་པ་དང་། །བདེ་བ་དམ་པའི་དོན་དུ་པདྨར་རྡོ་རྗེ་བསྐྱོད་དམ་རང་གི་ལག་པའི་པདྨས་གསོར་བ་ཡིས། །ས་བོན་མ་བཏང་བདེ་བ་དེ་ནི་འཆི་བའི་འཇིགས་པ་འཇོམས་པ་དཔལ་ལྡན་བླ་མའི་ཞལ་ཉིད་དོ། །ས་ནི་ཆུ་ལ་འཇུག་འགྱུར་ཆུ་ཡང་མེ་ལ་དེ་
བཞིན་མེ་ནི་རླུང་ལ་འཇུག་པར་འགྱུར་བའོ། །རླུང་ནི་སྟོང་པ་ལ་སྟེ་སྟོང་པ་མཚན་མ་རྣམ་པ་བཅུར་འགྱུར་མཚན་མ་རྣམ་པ་ཀུན་ལྡན་དུ། །རྣམ་པ་ཀུན་ལྡན་མི་འགྱུར་བདེ་བ་དམ་པ་གཞོམ་དུ་མེད་པ་ཡེ་ཤེས་སྐུ་རུ་འགྱུར་བའོ། །མི་ཡི་བདག་པོ་ཡེ་ཤེས་ལས་ནི་རྫུ་འཕྲུལ་དངོས་གྲུབ་འགྱུར་རོ་

སྐྱེས་བུ་རྣམས་ཀྱི་སྐྱེ་བ་འདིར། །འདོད་པས་སྤྲུལ་པའི་སྐུ་རུ་ངེས་པར་འགྱུར་ཏེ་གང་བ་རྫོགས་པ་གསུང་དུ་རབ་ཏུ་འགྱུར་བའོ། །འབར་བ་སྤྲུལ་པའི་ཐུགས་ཏེ་ཨོཌྜ་ལས་ནི་མཆོག་ཏུ་བདེ་བར་མཛད་པའི་ཡེ་ཤེས་ཞེས་སུ་བརྗོད། །དགའ་བ་ལོངས་སྤྱོད་རྫོགས་པའི་སྐུ་སྟེ་མཆོག་
དགའ་ཁྱད་པར་དགའ་དང་བཅས་པ་དག་གི་རིམ་པ་ཡིས། །གསུང་དང་ཐུགས་ཏེ་ལྷན་ཅིག་སྐྱེས་པའི་དགའ་བ་སོགས་ལས་ཡེ་ཤེས་རྡོ་རྗེ་ལ་སོགས་འབྱུང་བར་བྱེད། །གཡོ་བ་ངེས་པར་ཆོས་ཀྱི་སྐུ་སྟེ་སྲིད་གསུམ་ཕྱག་བྱས་པ་དང་འབྱུང་བར་འགྱུར་བ་དེ་ཡི་གསུང་། །གཉིད་ནི་ངེས་པར་
ཆོས་ཀྱི་ཐུགས་ཏེ་ཏུརྱ་དེ་ཡི་ཡེ་ཤེས་ཉིད་ཡིན་སྲིད་པའི་འཇིགས་པ་འཇོམས། །ཡི་གེ་ངེས་པར་དག་པའི་སྐུ་སྟེ་དབྱངས་དང་བྲལ་བའི་ཆ་དང་ཐིག་ལེ་སྒྲ་ཙམ་རིམ་པ་ཡིས། །གསུང་དང་ཐུགས་དང་ཡེ་ཤེས་རྡོ་རྗེ་སྲིད་པ་རྣམ་གསུམ་ལ་གནས་དག་པའི་སྐུ་རུ་སྐྱེད་པར་བྱེད། །སད་དང་རྨི་ལམ་རང་
བཞིན་དག་དང་གཞན་ཡང་དེ་བཞིན་གཉིད་ལོག་པ་དང་ཏུརྱའི་རང་བཞིན་རྣམས། །ལུས་གནས་པ་དང་དབུགས་ཉིད་ཐིམ་པ་རྣམ་པར་རྒྱུ་དང་ཡུལ་ལས་བསྐྱོད་པ་མེད་པའི་སེམས་ཐིམ་པ། །ཡེ་ཤེས་གནས་ཀྱང་བུད་མེད་དང་ནི་རབ་འདུས་པ་ལས་བྱང་ཆུབ་སེམས་ཞུ་གྱུར་པའི་སྐད་ཅིག་ནི། །
སྤྲུལ་པ་ལ་སོགས་རིམ་པས་ཐུགས་ཀྱི་རྡོ་རྗེ་རྣམ་པ་བཞི་རུ་ངེས་པར་རབ་ཏུ་འགྱུར་བའོ། །དེ་ལྟར་སེམས་ནི་རྣམ་པ་བཞི་རྣམས་སྲིད་པ་རྣམ་གསུམ་གྱུར་པའི་སྲོག་ཆགས་རྣམས་ཀྱི་ཐིག་ལེའི་དབུས། །ཁྱབ་བྱེད་བདེ་མཉམ་འབྲས་སྟེར་ཐར་པའི་རྒྱུ་རུ་རྣལ་འབྱོར་དབང་པོ་རྣམས་ཀྱིས་བསྲུང་
བར་བྱ་བ་ནི། །རྣལ་འབྱོར་རྣམས་ལ་མཆོག་གི་བདེ་བ་བསྐྱེད་པར་ས་བོན་ཐིག་ལེ་བཏང་ན་ཐར་པར་ག་ལ་འགྱུར། །དེ་ཕྱིར་འཁོར་བའི་བདེ་བ་སྐད་ཅིག་མ་འདི་བརྟུལ་ཞུགས་ཅན་རྣམས་ཀྱིས་ནི་རྒྱུན་དུ་སྤང་བར་བྱ། །དཔལ་དུས་ཀྱི་འཁོར་ལོའི་ཚིགས་སུ་བཅད་པ་སུམ་ཅུ་ལྷག་
པའི་སྟོང་ཕྲག་གཅིག་པ་ལས་མདོར་བསྡུས་པ་དབང་རབ་ཏུ་བྱེད་པ་རྫོགས་སོ།། །།རྒྱ་གར་གྱི་པཎྜི་ཏ་མཁས་པ་ཆེན་པོ་ས་མནྟ་ཤྲཱི་དང་། ལོཙྪ་བ་དགེ་སློང་ཆོས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།



རྒྱ་གར་སྐད་དུ། ཤྲཱི་སརྦ་བུདྡྷ་ས་མ་ཡོ་ག་ཌཱ་ཀི་ནཱི་ཛཱ་ལ་སམྦ་ར་ནཱ་མ་ཨུཏྟ་ར་ཏནྟྲ། བོད་སྐད་དུ། དཔལ་སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་མ་སྒྱུ་མ་བདེ་བའི་མཆོག་ཅེས་བྱ་བའི་རྒྱུད་ཕྱི་མ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སེམས་
དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་བདེ་བའི་མཆོག །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །འདི་ནི་རང་བྱུང་བཅོམ་ལྡན་འདས། །གཅིག་པུ་རབ་ཏུ་ཕྱེ་བའི་ལྷ། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་
བའི་མཆོག །ཆགས་མེད་ཆགས་དང་བྲལ་བ་མིན། །དབུ་མར་ཡང་ནི་མི་དམིགས་སོ། །བུད་མེད་ཀུན་གྱི་སྒྱུ་མའི་རྒྱ། །འདི་ནི་གཉིས་མེད་ཐེག་པའི་མཆོག །སྒྱུ་མ་དག་ནི་ཐམས་ཅད་པས། །བུད་མེད་སྒྱུ་མ་ཁྱད་པར་ཆེ། །ངོ་བོ་ཉིད་ཀྱི་མཐུ་དག་གིས། །རང་བཞིན་གྱིས་ནི་དེ་འགྲུབ་པའོ། །
འཇིག་རྟེན་གསུམ་འདིར་བུད་མེད་འདིས། །གུས་པར་བྱེད་པ་དག་ཏུ་འགྱུར། །རྙེད་དང་བདེ་དང་དགའ་ཀུན་གྱིས། །ངན་པར་སྤྱོད་པའང་འགྲུབ་པར་འགྱུར། །རང་གི་ངོ་བོ་ཡོངས་བསྒྱུར་ན། །བུད་མེད་ཀུན་གྱི་སྒྱུ་མས་འགྲུབ། །ངོ་མཚར་སྒྱུ་མའི་ཕྱག་རྒྱ་འདི། །མཁའ་འགྲོ་མ་ཞེས་བརྡར་
བསྟན་ཏོ། །ཌཱ་ནི་ནམ་མཁར་འགྲོ་བ་ཞེས། །ཁམས་ལས་མངོན་དུ་བརྟགས་པ་སྟེ། །ནམ་མཁའ་ཀུན་ཏུ་སྤྱོད་འགྲུབ་པ། །མཁའ་འགྲོ་མ་ཞེས་རབ་ཏུ་གྲགས། །ཐམས་ཅད་མ་ལུས་ཕྱག་རྒྱ་ཡི། །ཐམས་ཅད་མ་ལུས་བདེ་མཆོག་གིས། །སངས་རྒྱས་ཐམས་ཅད་མཉམ་སྦྱོར་བ། །མཁའ་
འགྲོ་མ་ཞེས་རབ་ཏུ་གྲགས། །དེ་ནི་ནམ་མཁའ་འགྲོ་བ་ཞེས། །སངས་རྒྱས་ཁམས་ལས་རྣམ་པར་བརྟགས། །ཀུན་ཏུ་འགྲོ་བར་གྲུབ་པ་ནི། །སངས་རྒྱས་ཀུན་བདག་མཁའ་འགྲོ་མའོ། །ཤཾ་ཞེས་བྱ་བ་བདེ་བར་བཤད། །སངས་རྒྱས་ཀུན་གྱི་བདེ་ཆེན་ཡིན། །སྒྱུ་མ་ཐམས་ཅད་རབ་སྦྱོར་བ། །
མཆོག་ཏུ་བདེ་བས་བདེ་བའི་མཆོག །ཀུན་ཏུ་ཀུན་ནས་ཐམས་ཅད་ནི། །བདག་ཉིད་རྟག་ཏུ་རྣམ་པ་ཀུན། །སངས་རྒྱས་ལ་སོགས་བརྟན་གཡོ་ཀུན། །ཀུན་གྱི་དངོས་པོར་བདག་གྱུར་ཏོ། །སེམས་དང་སེམས་དཔའི་ཏིང་འཛིན་དང་། །བྱང་ཆུབ་སྤྱོད་པ་སྣ་ཚོགས་ཉིད། །དེ་བཞིན་བདུད་དང་བདུད་

ལས་རྒྱལ། །དེ་ནི་བྱང་ཆུབ་སངས་རྒྱས་ཡིན། །རྡོ་རྗེ་རྡོ་རྗེ་འཛིན་ཉིད་དང་། །དེ་བཞིན་པདྨོ་པདྨོ་འཆང་། །ནོར་བུ་ནོར་བུ་འཛིན་ཉིད་དང་། །དེ་དག་གི་ཡང་རིགས་ཡིན་ནོ། །དེ་ཉིད་འདོད་ཆགས་འདོད་ཆགས་བྲལ། །འདོད་པ་དང་ནི་གྲོལ་བའང་ཡིན། །དུས་གསུམ་སྲིད་
གསུམ་མཆོག་གསུམ་དང་། །འཇིག་རྟེན་གསུམ་དང་ཁམས་གསུམ་དང་། །རྣམ་པ་སྣ་ཚོགས་ཐ་དད་པའི། །གནས་པ་ཐམས་ཅད་དེ་ཉིད་དོ། །འགྲོ་བ་དག་ནི་མ་ལུས་ཀུན། །ཐམས་ཅད་དུ་ནི་འདི་འགྱུར་རོ། །དེ་ལ་སོགས་པ་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་
པ། །ནམ་མཁའི་དབྱིངས་ཀྱི་མཐའ་ཀླས་པའི། །དངོས་པོ་ཐམས་ཅད་དེ་ཡིན་ཏེ། །ནམ་མཁའ་ཀུན་གྱི་སྐབས་ན་དཔལ། །རྡོ་རྗེ་སེམས་དཔའ་དེ་བཞིན་གཤེགས། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་མཆོག་གོ། །བསྐལ་པ་བྱེ་བ་གྲངས་མེད་པར། །
སངས་རྒྱས་ཐམས་ཅད་མ་ཐོབ་པ། །ཕྱག་རྒྱའི་ཆོ་ག་གང་དག་གིས། །ཚེ་འདི་ཉིད་ཀྱིས་ཐོབ་འགྱུར་བ། །དེ་ཉིད་བདག་གིས་བརྟག་པར་བྱ། །སངས་རྒྱས་ཀུན་བདག་བདེ་བའི་མཆོག །བདག་ཉིད་ཤིན་ཏུ་བསྒྲུབས་པ་ལས། །སངས་རྒྱས་ཀུན་བདག་བདེ་མཆོག་གོ། །རྣལ་འབྱོར་ཡང་དག་
མ་ཡིན་སེམས། །ལྷ་ལ་དམིགས་པར་བྱེད་པ་དག །རྣལ་འབྱོར་གཟུགས་བརྙན་རང་བཞིན་ཏེ། །ལུགས་མ་ལ་སོགས་རྣལ་འབྱོར་སྐྱེ། །ཡང་དག་མཆོག་སེམས་རྣལ་འབྱོར་པ། །ལྷ་ལ་དམིགས་པར་བྱེད་པ་དག །རང་གི་དམ་ཚིག་བདག་སྦྱོར་བ། །མི་འགྱུར་དམ་པ་འགྲུབ་པར་འགྱུར། །
གཟུགས་བརྙན་ལུགས་ལ་སོགས་པ་ལ། །རྣལ་འབྱོར་སྐྱེ་བར་མི་འགྱུར་གྱི། །བྱང་ཆུབ་སེམས་ལ་རབ་བརྩོན་ན། །དེ་ལས་རྣལ་འབྱོར་ལྷར་འགྱུར་རོ། །བྱང་ཆུབ་སེམས་ནི་རྡོ་རྗེ་སྟེ། །སངས་རྒྱས་ཀུན་གྱི་བདག་ཉིད་ཡིན། །དེ་བས་ཐམས་ཅད་བདག་སྦྱོར་བས། །སངས་རྒྱས་ཐམས་ཅད་ཐོབ་
པར་འགྱུར། །བདག་ཉིད་སངས་རྒྱས་ཐམས་ཅད་དང་། །དཔའ་བོ་ཐམས་ཅད་བདག་ཡིན་ནོ། །དེ་བས་བདག་ཉིད་ལྷར་སྦྱོར་བས། །བདག་ཉིད་རབ་ཏུ་བསྒྲུབ་པར་བྱ། །དེ་ཡིས་སངས་རྒྱས་ཐམས་ཅད་དང་། །དཔའ་བོ་རྣམས་ཀྱང་ཐམས་ཅད་དང་། །རྡོ་རྗེ་འཛིན་པ་ཐམས་ཅད་དུ། །ཚེ་འདི་

ཉིད་ལ་འགྲུབ་པར་འགྱུར། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔའ་ས་དེ་སྐད་གསུངས་སོ། །སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་སྒྱུ་མ་བདེ་བའི་མཆོག་ལས་དེ་ཁོ་ན་ཉིད་སྣང་བ་དམ་པའི་ཡུལ་ལ་འཇུག་པ་ཡེ་ཤེས་ཀྱི་ཕྱག་རྒྱའི་རྟོག་པ་སྟེ་དང་པོའོ།། །།
འདི་ནི་རྣལ་འབྱོར་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །རྡོ་རྗེ་སེམས་དཔའ་བདག་སྦྱོར་བས། །དབབ་པ་ཐམས་ཅད་རབ་ཏུ་འགྲུབ། །སངས་རྒྱས་ཐམས་ཅད་མཉམ་སྦྱོར་བ། །རྣལ་
འབྱོར་དབང་ཕྱུག་བདེ་བ་ཆེ། །དེ་བས་བདེ་བ་ཉིད་ཀྱིས་ནི། །སངས་རྒྱས་བདེ་བ་ཀུན་འཐོབ་བོ། །སངས་རྒྱས་ཐམས་ཅད་མཉམ་སྦྱོར་བ། །རྣལ་འབྱོར་དབང་ཕྱུག་བདེ་ཆེན་པོ། །འདི་ལ་ཁྲུས་དང་སྡོམ་མི་དགོས། །དཀའ་ཐུབ་དཀའ་བ་སྤྱད་མི་དགོས། །དཀའ་ཐུབ་སྡོམ་པ་མེད་པ་དང་། །
བདེ་བ་དང་ནི་དགའ་བས་འགྲུབ། །དེ་བས་ཇི་ལྟར་འདོད་སྤྱོད་ཅིང་། །ཀུན་ཟ་དེ་བཞིན་ཐམས་ཅད་སྤྱོད། །སྤྱད་པ་ཇི་ལྟར་འདོད་པར་བྱེད། །གཡོ་བ་དག་ཀྱང་ཅི་དགར་བྱེད། །ལངས་པ་དང་ནི་འདུག་པའམ། །འཆག་གམ་ཇི་ལྟར་གནས་ཀྱང་རུང་། །དགོད་དམ་རབ་ཏུ་སྨྲ་ཡང་རུང་། །
གང་ན་ཇི་ལྟར་སྤྱོད་ཀྱང་རུང་། །དཀྱིལ་འཁོར་དུ་ཡང་མ་ཞུགས་པའམ། །སྒྲིབ་པ་ཀུན་དང་ལྡན་པའང་རུང་། །རང་གི་ལྷར་ནི་བདག་སྦྱོར་ན། །བསོད་ནམས་ཆུང་ཡང་འགྲུབ་པར་འགྱུར། །དེ་ཉིད་རྣལ་འབྱོར་འདི་ཡིས་ནི། །ཐམས་ཅད་སྒྲུབ་པར་བྱེད་པ་ན། །ངན་ཟོས་ངན་སྤྱོད་ཐམས་ཅད་
ཀྱིས། །ཉེས་པ་དག་ཏུ་ཡོང་མི་འགྱུར། །བསྐལ་པ་བྱེ་བར་མི་ཐོབ་པ། །སངས་རྒྱས་དམ་པ་ཐམས་ཅད་དེ། །ཕྱག་རྒྱའི་ཆོ་ག་དག་གིས་ནི། །བསྒྲུབས་ན་ཀུན་ཏུ་ཐོབ་འགྱུར་བ། །བདག་ཉིད་གྲུབ་པར་བྱེད་པའི་མཆོག །འདི་ནི་བདག་གིས་བརྟག་པར་བྱ། །སངས་རྒྱས་ཐམས་ཅད་
མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །རྡོ་རྗེ་སེམས་དཔར་བདག་སྦྱོར་བ། །ཆ་ལུགས་ཇི་བཞིན་བསྒྱུར་བ་ཡིས། །ཐམས་ཅད་སྣ་ཚོགས་ཕྱག་རྒྱའི་བདག །བསོད་ནམས་ཆུང་ཡང་འགྲུབ་པར་འགྱུར། །རྒྱ་འདི་བསྒྲུབ་པ་ཙམ་གྱིས་ནི། །སངས་རྒྱས་ཐམས་ཅད་བྱིན་

གྱིས་རློབ། །ཤིན་ཏུ་བྱིན་གྱིས་བརླབས་ན་ནི། །སངས་རྒྱས་ཐམས་ཅད་འདུ་བར་འགྱུར། །སངས་རྒྱས་ཀུན་དང་མཉམ་སྦྱོར་བས། །སངས་རྒྱས་ཀུན་དང་མཉམ་པར་འགྱུར། །སངས་རྒྱས་ཀུན་དང་མཉམ་པའི་ཕྱིར། །སངས་རྒྱས་ཐམས་ཅད་འགྲུབ་པར་འགྱུར། །
གང་གིས་ལྡན་པ་འདི་མཐོང་ཞིང་། །རྣམ་པ་ཀུན་ཏུ་མཆོད་བྱེད་ན། །དེ་ཡིས་སངས་རྒྱས་ཐམས་ཅད་ཀྱང་། །མཐོང་ཞིང་མཆོད་པ་བྱས་པར་འགྱུར། །འདི་དང་སངས་རྒྱས་ཐམས་ཅད་ལ། །མཐོང་བ་དང་ནི་རེག་པ་ཡིས། །དཀྱིལ་འཁོར་དག་ཏུ་མ་ཞུགས་པའང་། །བདེན་པ་
དག་ཀྱང་མཐོང་བར་འགྱུར། །མཐོང་བ་དང་ནི་རེག་པ་དང་། །ཐོས་པ་དང་ནི་དྲན་པ་ཡིས། །སྡིག་པ་ཀུན་ལས་རྣམ་གྲོལ་ཞིང་། །སངས་རྒྱས་དངོས་གྲུབ་ཐམས་ཅད་འགྲུབ། །འདི་དང་སངས་རྒྱས་ཐམས་ཅད་ལ། །རྣལ་འབྱོར་ཐམས་ཅད་མཉམ་སྦྱོར་བས། །བུད་མེད་དག་ཀྱང་
རྣམ་གྲོལ་ཞིང་། །སངས་རྒྱས་བྱང་ཆུབ་རེག་པར་འགྱུར། །ཀུན་ཏུ་ཀུན་ནས་ཐམས་ཅད་ནི། །བདག་ཉིད་རྣམ་པ་ཐམས་ཅད་དུ། །སངས་རྒྱས་ཐམས་ཅད་དངོས་གྲུབ་པར། །དེ་ཡི་བདག་ཉིད་མཐོང་བར་འགྱུར། །འདི་ནི་བདག་ཉིད་ཀུན་གནས་པས། །མཆོད་པའི་སྤྲིན་ཆེན་ཐམས་ཅད་
ཀྱི། །བཀོད་པ་རབ་འབྱམ་ཚོགས་དག་གིས། །དེ་བཞིན་གཤེགས་པ་མཆོད་པ་མཛད། །ཐམས་ཅད་བདག་ཉིད་སྦྱོར་མཆོད་དཔལ། །རྡོ་རྗེ་སེམས་དཔའ་མཆོག་གྱུར་པ། །སངས་རྒྱས་ཀུན་གྱི་རང་བཞིན་ཏེ། །བདེ་བའི་མཆོག་ནི་ཐོབ་པར་འགྱུར། །རྣལ་འབྱོར་ཀུན་ལ་ཉེར་སྦྱོར་བས། །
དཔལ་ནི་གཞིར་འགྱུར་འགྲུབ་པར་འགྱུར། །རྣལ་འབྱོར་ཀུན་ནི་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །དེ་ཡི་ཉེ་བར་སྦྱོར་བ་ནི། །ཁམས་གསུམ་མ་ལུས་ཐམས་ཅད་དོ། །རྣལ་འབྱོར་ཀུན་གྱི་ལོངས་སྤྱོད་ཀྱིས། །ཇི་ལྟར་བདེ་བར་སྟེན་བྱེད་ཅིང་།།རང་གི་
ལྷ་ཡི་རྣལ་འབྱོར་གྱིས། །བདག་ཉིད་རབ་ཏུ་མཆོག་པར་བྱ། །རྗེས་སུ་སྦྱོར་བས་མཆོད་བྱེད་ཅིང་། །རྣལ་འབྱོར་ཀུན་གྱི་བདེ་བ་དག །བདག་ཉིད་ཀུན་ཏུ་མྱོང་བྱེད་ན། །ཤིན་ཏུ་སྦྱོར་བས་འགྲུབ་པར་འགྱུར། །སངས་རྒྱས་ཀུན་གྱི་བདག་ཉིད་ཀྱི། །ར་ས་ཡ་ན་བདེ་བ་འདིས། །རྡོ་རྗེ་

སེམས་དཔའི་དཔལ་ཚེ་དང་། །ལང་ཚོ་ནད་མེད་བདེ་མཆོག་འགྲུབ། །ཀུན་ཏུ་ཀུན་ནས་ཐམས་ཅད་དུ། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །རྟག་ཏུ་དེ་ནི་འགྲུབ་པར་འགྱུར། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔས་དེ་སྐད་
གསུངས་སོ། །སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་སྒྱུ་མ་བདེ་བའི་མཆོག་ལས་དཔལ་རྡོ་རྗེ་སེམས་དཔའ་ཀུན་ཏུ་སྦྱོར་བའི་རྟོག་པ་སྟེ་གཉིས་པའོ།། །།འདི་ནི་རྣལ་འབྱོར་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །སངས་རྒྱས་
ཐམས་ཅད་མཉམ་སྦྱོར་བའི། །མཁའ་འགྲོ་སྒྱུ་མ་བདེ་བའི་མཆོག །རྡོ་རྗེ་སེམས་དཔའི་རྣལ་འབྱོར་པ། །དཔལ་ལྡན་རང་གི་དམ་ཚིག་བདེ། །སངས་རྒྱས་ཐམས་ཅད་མཉམ་སྦྱོར་བའི། །རྣལ་འབྱོར་དབང་ཕྱུག་བདེ་བ་ཆེ། །རྡོ་རྗེ་སེམས་དཔའ་དཔལ་སྦྱོར་བས། །མཐུ་ཉིད་ཀྱིས་
ནི་ཐམས་ཅད་དུ། །ཕྱག་རྒྱ་བདེ་བ་ཆེན་པོ་ཀུན། །སོ་སོ་རྗེས་སུ་རང་འགྲུབ་འགྱུར། །རྡོ་རྗེ་སེམས་དཔའ་དཔལ་སྦྱོར་བས། །མཐུ་ཉིད་ཀྱིས་ནི་ཐམས་ཅད་དུ། །རྣལ་འབྱོར་བདེ་བ་མྱོས་པ་ཀུན། །སོ་སོ་རྗེས་སུ་རང་འགྲུབ་འགྱུར། །རྡོ་རྗེ་སེམས་དཔའ་དཔལ་སྦྱོར་བས། །མཐུ་ཉིད་ཀྱིས་
ནི་ཐམས་ཅད་དུ། །བདེ་བའི་མྱོས་པའི་དངོས་གྲུབ་ཀུན། །སོ་སོའི་རྗེས་སུ་རང་འགྲུབ་འགྱུར། །རྡོ་རྗེ་སེམས་དཔའ་དཔལ་སྦྱོར་བས། །མཐུ་ཉིད་ཀྱིས་ནི་ཐམས་ཅད་དུ། །བདེ་བ་མྱོས་པའི་དབང་ཕྱུག་ཀུན། །སོ་སོའི་རྗེས་སུ་རང་འགྲུབ་འགྱུར། །རྡོ་རྗེ་སེམས་དཔའ་དཔལ་སྦྱོར་བས། །
མཐུ་ཉིད་ཀྱིས་ནི་ཐམས་ཅད་དུ། །ནམ་མཁའི་དབྱིངས་ཀྱི་མཐའ་ཡས་པའི། །བུད་མེད་མཆོག་རྣམས་སྐྱེ་བར་འགྱུར། །དེ་ཡི་དམ་ཚིག་དེ་བྱུང་བ། །སྡུག་པའི་དམ་ཚིག་བདག་རྗེས་འབྲང་། །ཤིན་ཏུ་སྦྱོར་དང་སྦྱོར་ཆེན་པོ། །ཐམས་ཅད་བདག་ཉིད་དམ་ཚིག་མཆོག །གཅིག་བཞིན་དུ་ནི་
གཅིག་སྤྱོད་པ། །ལྷན་ཅིག་སྤྱོད་པས་རྗེས་སྤྱོད་སྡུག །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་མཆོག་ཏུ་འབར། །ཐམས་ཅད་དགའ་བ་མ་ལུས་པའི། །ཕྱག་རྒྱ་ཐམས་ཅད་བདེ་བ་ཆེ། །རྟག་པ་དམ་པ་ལྷ་མོ་ཡི། །རྒྱལ་མོས་མཆོད་པ་ཐམས་ཅད་མཆོག །རྡོ་རྗེ་སེམས་

དཔའ་སྦྱོར་བ་དང་། །ཐམས་ཅད་ལྷ་མོ་འདུས་པས་ནི། །མ་ལུས་སྐལ་བ་བཟང་པོ་ཀུན། །བདེ་བས་སོ་སོ་རྗེས་སུ་འགྲུབ། །ཕྱག་རྒྱ་འདི་ཡིས་བཏབ་པ་ལས། །རྡོ་རྗེ་སེམས་དཔའ་ཆེ་བའི་ལྷ། །ནམ་མཁའི་དབྱིངས་ཀྱི་མཐའ་ཀླས་པའི། །ལྷ་མོ་བདེ་བ་ཆེན་མོ་ཀུན། །ཐམས་
ཅད་རྣལ་འབྱོར་བདེ་བས་མྱོས། །སྡིག་མེད་སྟོབས་ཀྱིས་ངོ་འཐོན་དུ། །ཕན་ཚུན་དུ་ནི་རབ་དགའ་བས། །སྐྱེས་བུའི་ཚུལ་གྱིས་དགའ་བར་བྱེད། །དབང་པོ་ཀུན་ནས་བྱུང་བ་ཡིས། །མཆོད་པའི་སྤྲིན་ཆེན་ཐམས་ཅད་ཀྱི། །བཀོད་པ་རབ་འབྱམ་ཚོགས་རྣམས་ཀྱིས། །ཐམས་ཅད་བདག་ཉིད་
མཆོད་པར་བྱེད། །རྣལ་འབྱོར་བདེ་བ་ཐམས་ཅད་ཀྱི། །དབང་བསྐུར་བདེ་ཆེན་ལས་བྱུང་བ། །རིན་ཆེན་ཚོགས་རྣམས་ཐམས་ཅད་ཀྱིས། །རབ་ཏུ་རྨོངས་པས་དབང་བསྐུར་འགྱུར། །ལྷ་མོ་ཀུན་གྱི་ལོངས་སྤྱོད་ལ། །ཅི་བདེ་བར་ནི་བསྟེན་བྱ་བ། །བདག་ནི་ཆེ་བའི་ལྷར་སྦྱོར་བས། །
བདག་ལ་བདག་གིས་རབ་ཏུ་མཆོད། །རྣལ་འབྱོར་ཐམས་ཅད་བདེ་བ་ཡི། །རྗེས་སུ་སྦྱོར་བས་མཆོད་བྱེད་ཅིང་། །རྟག་ཏུ་མྱོང་བར་བྱེད་པ་ན། །ཤིན་ཏུ་སྦྱོར་བས་རབ་འགྲུབ་འགྱུར། །སངས་རྒྱས་ཐམས་ཅད་བདག་ཉིད་ཀྱི། །ར་ས་ཡ་ན་བདེ་བ་དེས། །རྡོ་རྗེ་སེམས་དཔའི་དཔལ་ཚེ་དང་། །
ལང་ཚོ་ནད་མེད་བདེ་མཆོག་འགྲུབ། །སངས་རྒྱས་ཀུན་གྱི་སྐུ་ཆེན་དང་། །སངས་རྒྱས་ཀུན་གྱི་གསུང་སྙན་པ། །སངས་རྒྱས་ཀུན་གྱི་ཐུགས་ཆེན་པོ། །སངས་རྒྱས་ཀུན་གྱི་མཆོད་པ་ཆེ། །སངས་རྒྱས་ཀུན་གྱི་རྒྱལ་ཆེན་པོ། །རྡོ་རྗེ་འཛིན་པ་ཀུན་གྱི་བདག །འཇིག་རྟེན་དབང་ཕྱུག་ཀུན་
གྱི་གཙོ། །རིན་ཆེན་དབང་ཕྱུག་ཀུན་གྱི་བདག །དེ་དག་དང་ནི་དགའ་སྤྱོད་ན། །འདོད་པ་བཞིན་དུ་འགྲོ་འོང་ལྡིང་། །ལྷ་མོ་ཐམས་ཅད་གྲུབ་ཆེན་པོ། །འཁོར་ལོས་སྒྱུར་བ་རབ་ཏུ་འགྲུབ། །ཆོས་དབྱིངས་མཉམ་དང་མི་མཉམ་པ། །ནམ་མཁའི་དབྱིངས་ཀྱི་མཐས་ཀླས་པར། །དངོས་
གྲུབ་ཀུན་གྱི་བདེ་མྱོས་པ། །དེ་ལས་རྒྱ་ཆེན་མཆོག་གཞན་མེད། །སངས་རྒྱས་ཐམས་ཅད་མཉམ་སྦྱོར་བ། །རྣལ་འབྱོར་དབང་ཕྱུག་བདེ་ཆེན་དེས། །འདི་ལ་ཚེ་འདི་ཉིད་ཀྱིས་ནི། །རྣམ་པ་ཀུན་ཏུ་མི་འགྲུབ་པའི། །དངོས་གྲུབ་ཀུན་གྱི་བདེ་མྱོས་པ། །ཆོས་དབྱིངས་མཉམ་དང་མི་

མཉམ་པ། །ནམ་མཁའི་དབྱིངས་ཀྱི་མཐའ་ཀླས་པའི། །དབང་ཕྱུག་ཀུན་གྱི་བདེ་མྱོས་པ། །དམ་པ་རྒྱ་ཆེན་གང་ཡང་མེད། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་མཆོག་དེས། །འདི་ལ་ཚེ་འདི་ཉིད་ཀྱིས་ནི། །རྣམ་པ་ཀུན་ཏུ་མི་འགྲུབ་མེད། །ཅེས་
བཅོམ་ལྡན་འདས་དཔལ་རྡོ་རྗེ་སེམས་དཔས་དེ་སྐད་གསུངས་སོ། །སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་སྒྱུ་མ་བདེ་བའི་མཆོག་ལས། ལྷ་མོ་ཐམས་ཅད་དང་མཉམ་པར་སྦྱོར་བ་སྐལ་བ་མཆོག་བཟང་པོ་དཔལ་རྡོ་རྗེ་དམ་ཚིག་གི་རྟོག་པ་སྟེ་གསུམ་པའོ།། །།
འདི་ནི་རྣལ་འབྱོར་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །ལྷ་མོ་ཀུན་དང་མཉམ་སྦྱོར་བ། །སྐལ་བ་བཟང་མཆོག་འདོད་པ་སྟེ། །ཡང་དག་སྦྱོར་བའི་བདེ་མྱོང་བ། །འདོད་ཆགས་
ཐེར་ཟུག་བརྟན་བའོ། །སངས་རྒྱས་ཀུན་གྱི་གཟུགས་ཆེན་དང་། །དབྱངས་དང་དྲི་དང་རོ་དག་དང་། །སངས་རྒྱས་ཀུན་གྱི་རེག་བདེ་མཆོག །རང་གི་སྤྱོད་པར་རབ་སྤྱོད་དོ། །སངས་རྒྱས་ཕ་རོལ་ཕྱིན་གྲུབ་པ། །གཟུངས་དང་ས་རྣམས་དེ་བཞིན་དུ། །དགའ་བར་སྤྱོད་ན་ལྷ་དང་
མིའི། །སྐལ་བཟང་བུད་མེད་ཅི་ཞིག་སྨོས། །ལྷ་ཡི་དངོས་གྲུབ་དགའ་བ་དང་། །སངས་རྒྱས་བྱང་ཆུབ་བདེ་ཆེན་པོ། །སྐལ་བ་བཟང་པོ་བདེ་མྱོང་བས། །སོ་སོར་རྗེས་སུ་རང་འགྲུབ་འགྱུར། །དངོས་གྲུབ་ཐམས་ཅད་ལས་བྱུང་བ། །དེ་བཞིན་གཤེགས་པ་ཀུན་གྱི་དཔལ། །སྐལ་བ་
བཟང་པོའི་ལོངས་སྤྱོད་ཀུན། །རང་གི་སྤྱོད་པར་དེ་སྤྱོད་དོ། །རྡོ་རྗེ་ཅན་གྱི་གྲུབ་མཆོག་དང་། །འཇིག་རྟེན་དང་པོ་མཆོག་གི་དཔལ། །སངས་རྒྱས་དགའ་བས་བདེ་དམ་པ། །ཕྲོགས་ནས་ཉེ་བར་སྤྱོད་པར་བྱེད། །ཁམས་གསུམ་དག་ན་མ་ལུས་པའི། །སངས་རྒྱས་རྒྱལ་སྲིད་ཆེན་པོ་
ཀུན། །རྩལ་གྱི་སྟོབས་ཀྱིས་ངོ་འཐོན་དུ། །ཕྲོགས་ནས་ཉེ་བར་སྤྱོད་པར་བྱེད། །སངས་རྒྱས་ཀུན་གྱི་གྲུབ་ཆེན་པོ། །མཆོག་གི་དབང་ཕྱུག་དམ་པ་དག །ཀུན་ནས་ཕྲོགས་ནས་དེ་སྤྱོད་ན། །ལོངས་སྤྱོད་གཞན་ལྟ་ཅི་ཞིག་སྨོས། །མཐུ་ཆེན་ལས་ནི་བཀྲ་ཤིས་བརྟན། །ཕྲོགས་ལས་

གྲུབ་དང་དྲན་ལས་དགའ། །ངོ་འཐོན་སྟོབས་ཀྱིས་ཕྲོགས་ནས་ཀྱང་། །དེ་ནི་དད་ལ་སྦྱིན་པར་བྱེད། །མ་ལུས་འཇིག་རྟེན་གསུམ་རྒྱལ་སྲིད། །འཇིག་རྟེན་དབང་ཕྱུག་ཀུན་དང་བཅས། །ངོ་འཐོན་སྟོབས་ཀྱིས་ཕྲོགས་ནས་ཀྱང་། །དེ་ནི་དད་ལ་སྦྱིན་པར་བྱེད། །ཚངས་
པ་འཇུག་སེལ་དབང་ཆེན་གྱི། །མཆོག་གི་དབང་ཕྱུག་དམ་པ་དག །ཀུན་ནས་ཕྲོགས་ཏེ་མྱུར་སྦྱིན་ན། །ལོངས་སྤྱོད་གཞན་ལྟ་ཅི་ཞིག་སྨོས། །དེ་ཡིས་མི་སྦྱིན་ཅི་ཡང་མེད། །སངས་རྒྱས་དོན་དུ་བྱ་བ་ཀུན། །མི་བྱ་བ་ནི་གང་ཡང་མེད། །སྦྱིན་པ་དང་ནི་བྱེད་པའང་ཡིན། །སངས་རྒྱས་
བྱང་ཆུབ་སེམས་དཔའ་ཡང་། །ཕྲོགས་ནས་ཀྱང་ནི་སྦྱིན་བྱེད་ན། །ལས་མཆོག་དང་ནི་རབ་འབྱམ་དང་། །དངོས་གྲུབ་གཞན་ལྟ་ཅི་ཞིག་སྨོས། །དངོས་གྲུབ་མཆོག་ནི་གདོན་མི་ཟ། །སྡེ་རྣམས་ཐམས་ཅད་རབ་འཇོམས་པ། །སངས་རྒྱས་ཀུན་གྱི་གྲུབ་ཆེན་པོ། །འཁོར་ལོས་སྒྱུར་བ་
རབ་གྲུབ་པ། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་མཆོག་གིས། །སངས་རྒྱས་ཀུན་གྱི་རྫུ་འཕྲུལ་ཆེ། །རྣམ་པར་འཕྲུལ་པ་རབ་ཏུ་འཇུག །ལ་ལར་བྱང་ཆུབ་སེམས་ཆེན་པོ། །ལ་ལར་སྤྱོད་པ་མཐུན་པར་འགྲོ། །ལ་ལར་དགའ་ལྡན་ལྷ་དག་ལས། །དམ་པ་
ཤིན་ཏུ་འཕོ་བའོ། །ལ་ལར་སྐྱེ་བ་རྣམ་པར་དག །ལ་ལར་ངེས་པར་འབྱུང་བར་གསལ། །ལ་ལར་བྱང་ཆུབ་ཆེན་པོར་གཤེགས། །ལ་ལར་བདུད་ལས་རབ་ཏུ་རྒྱལ། །ལ་ལར་བྱང་ཆུབ་མངོན་འཚང་རྒྱ། །ལ་ལར་ཆོས་ཀྱི་འཁོར་ལོ་བསྐོར། །ལ་ལར་ཕ་རོལ་མུ་སྟེགས་རྣམས། །
ཆོས་དང་མཐུན་པར་ཚར་གཅད་དོ། །ལ་ལར་འཇིག་རྟེན་གསུམ་རྒྱལ་བ། །གྲུབ་པ་ཀུན་གྱི་དབང་ཕྱུག་ཉིད། །ལ་ལར་རྟོག་པ་ཐམས་ཅད་མཆོག །གྲུབ་པའི་དབང་ཕྱུག་བླ་ན་མེད། །དེ་ལ་སོགས་པ་མཐའ་ཡས་མཆོག །སངས་རྒྱས་ཀུན་བདག་བདེ་མཆོག་གིས། །འདུལ་
བའི་ཐབས་སུ་ངེས་པའི་གར། །རྣམ་པར་སྤྲུལ་བས་དགྱེས་ཤིང་རོལ། །དངོས་གྲུབ་ཆེན་པོ་ཀུན་གྱི་མཆོག །བརྟན་པ་དབང་ཕྱུག་ཆེན་པོའི་བདག །གཟུགས་དང་ཚེ་དང་ཁ་དོག་སྟོབས། །དཔལ་ལྡན་རྡོ་རྗེ་སེམས་དཔའ་བཞིན། །འགྲོ་བ་དག་གིས་བསྙེན་བྱ་ཞིང་། །དེ་བཞིན་

གཤེགས་པ་ཀུན་གྱིས་མཆོད། །ལྷ་མོ་ཀུན་གྱི་དཔལ་ལྡན་མཆོག །རྡོ་རྗེ་སེམས་དཔར་རབ་ཏུ་འགྲུབ། །སེམས་ཅན་ཁམས་ནི་དུ་མ་དག །མ་ལུས་པར་ནི་ཕྱག་རྒྱས་འདེབས། །ལྷ་དང་བྱང་ཆུབ་དཀའ་བ་རྣམས། །བརྟན་པར་སེམས་ཅན་དག་ལ་སྨིན། །སངས་རྒྱས་ཀུན་བདག་བདེ་མཆོག་
གིས། །སེམས་ཅན་ཀུན་གྱི་དོན་བྱེད་ཅིང་། །མ་ལུས་ལུས་པ་མེད་པ་ཡི། །བསྐལ་པ་ཀུན་ཏུ་སྲིད་པར་གནས། །ཞེས་བཅོམ་ལྡན་འདས་རྡོ་རྗེ་སེམས་དཔས་དེ་སྐད་གསུངས་སོ། །སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་སྒྱུ་མ་བདེ་བའི་མཆོག་ལས་སྣ་ཚོགས་ཐམས་
ཅད་ཀྱི་སྐལ་བ་བཟང་པོ་མཆོག་གི་དངོས་གྲུབ་ཅེས་བྱ་སྟེ། དཔལ་དམ་ཚིག་གི་རྟོག་པ་སྟེ་བཞི་པའོ།། །།འདི་ནི་རྣལ་འབྱོར་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །ཡང་དག་
གྲུབ་པ་གཅིག་པུ་ཉིད། །ཇི་ལྟར་འདོད་པ་བཞིན་དུ་སྦྱར། །རྟོག་པའི་ཆོ་ག་ཐམས་ཅད་ལ། །གྲུབ་པ་དམ་པ་མཆོག་གི་མཆོག །སྣ་ཚོགས་ལས་ཀྱི་སྦྱོར་བ་ཡིས། །ཆོ་ག་སྣ་ཚོགས་འདོད་པ་ཡི། །སེམས་ཅན་རྣམས་ནི་འདུལ་བ་དང་། །བདེ་བ་ཐམས་ཅད་འགྲུབ་པའི་ཕྱིར། །
བཅོམ་ལྡན་རྣལ་འབྱོར་དེ་ཉིད་ནི། །སངས་རྒྱས་ཐམས་ཅད་རྣམ་འཕྲུལ་བས། །སེམས་ཅན་ཀུན་དོན་རྣམ་འཕྲུལ་ན། །མྱུར་དུ་ཤིན་ཏུ་འགྲུབ་པར་འགྱུར། །ཉིན་རེའམ་ཡང་ན་ཟླ་རེའམ། །ཡང་ན་དེ་བཞིན་ལོ་རེ་ནི། །ཅི་བཞིན་བྱིན་གྱིས་བརླབས་ནས་ཀྱང་། །སངས་རྒྱས་བདེ་མཆོག་
གར་བྱའོ། །ཁམས་ཀྱི་ངོ་བོ་ཐམས་ཅད་དང་། །དེ་བཞིན་སྲོག་དང་རྩ་ལས་འབྱུང་། །རང་གི་ལྷ་ཡི་ཆ་ལུགས་སུ། །བསྒྲུབ་པའི་ཕྱག་རྒྱ་རབ་ཏུ་བྱ། །དཀྱིལ་འཁོར་གང་དང་གང་བསྟེན་པ། །སྣ་ཚོགས་ཕྱག་རྒྱའི་མཆོད་པ་ཡིས། །སློབ་མའི་ཚོགས་ཀུན་དེ་དང་དེར། །མཆོད་
པ་བྱས་ནས་དེས་བསྒྲུབ་བོ། །དེ་ལས་གཞན་ཡང་རྟོག་ཀུན་གྱི། །སངས་རྒྱས་ཐམས་ཅད་རྣམ་སྤྲུལ་པ། །ཅི་རིགས་པར་ནི་སྤྲུལ་བྱས་པའི། །གཏམ་དག་རབ་ཏུ་བཤད་པར་བྱ། །སེམས་དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་བདེ་བའི་མཆོག །གསང་བ་མཆོག་

གིས་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །འདི་ནི་རྣལ་འབྱོར་བཅོམ་ལྡན་འདས། །རྟག་པ་དམ་པ་བརྟན་པ་སྟེ། །རྟག་ཏུ་ད་ལྟར་འབྱུང་བ་བཞིན། །ངོ་བོ་ཉིད་ནི་འདའ་བར་དཀའ། །ཆོ་ག་སྣ་ཚོགས་འདོད་རྣམས་ལ། །ལས་ཀྱི་སྦྱོར་བ་སྣ་ཚོགས་
ཀྱིས། །སངས་རྒྱས་རྡོ་རྗེ་འཛིན་ལ་སོགས། །འདུལ་བའི་ཕྱིར་ནི་བྱས་པ་ཡིན། །སངས་རྒྱས་ལ་སོགས་བརྟན་གཡོ་ཀུན། །ཀུན་གྱི་དངོས་པོར་འདི་འགྱུར་རོ། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །སྒྱུ་མའི་སྦྱོར་བ་འདི་ཡིས་ནི། །རྣམ་
པ་སྣ་ཚོགས་ཀུན་གྱི་མཆོག །སེམས་ཅན་ཀུན་གྱི་དོན་མཆོག་རྣམས། །སངས་རྒྱས་ལ་སོགས་འདུལ་བས་འགྲུབ། །དཔལ་རྡོ་རྗེ་སེམས་དཔས་དབུགས་ཕྱུང་བའོ།། །།འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་
གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་སྟོང་པ་ཉིད་ལ་བརྩོན། །འགོག་པའི་ཆོས་ཉིད་ལ་སྦྱོར་བས། །འགགས་ཤིང་ཡོངས་སུ་མྱ་ངན་འདས། །རྣལ་འབྱོར་དེ་ཉིད་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །
གྲོལ་བ་ཐམས་ཅད་རྣམ་སྦྱང་ཕྱིར། །སངས་རྒྱས་སྤྲུལ་པ་ཀུན་ཏུ་བསྐྱེད། །སྟོང་པ་མ་ཡིན་མི་སྟོང་མིན། །དབུ་མར་ཡང་ནི་མི་དམིགས་ཏེ། །ཤེས་རབ་ཕ་རོལ་ཕྱིན་སྦྱོར་བ། །ཐབས་དང་སྙིང་རྗེ་བདག་ཉིད་རྣམས། །དེ་བས་དེ་ནི་སྙིང་རྗེའི་ཐབས། །ཤེས་རབ་ཕ་རོལ་ཕྱིན་པར་གསལ། །
རྟོག་པ་མེད་པའི་ཆོས་རྣམས་ལ། །སེམས་ཅན་དོན་དུ་ཡོངས་བརྟགས་པ། །རྣམ་པར་མི་རྟོག་ལ་མོས་པས། །ཐམས་ཅད་རྟོག་པས་བརྟག་པར་བྱ། །བྲག་ཆ་ཡི་ནི་སྒྲ་འདྲ་བ། །ཆོས་ཀྱི་ཚིག་ཏུ་དེ་འགྱུར་ཏེ། །དེ་ལས་ཐེག་པ་ཆེན་པོ་ཡི། །ཡང་དག་ཡོན་ཏན་རྒྱས་པའི་གླུས། །དུས་གསུམ་
པ་ཡི་དམ་ཚིག་གསུམ། །དེ་བཞིན་གཤེགས་པ་ཐམས་ཅད་བསྟོད། །མཉམ་མེད་མི་གཡོ་མཉམ་མེད་མཆོག་གི་ཆོས་ཉིད་ཅན། །ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་

མེད་དམ་པའི་མཆོག་ཆོས་ཅན། །ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དཔེ་ནི་ནམ་མཁའ་དང་ཡང་བསྒྲུན་དུ་ཡོད་པའང་མིན། །དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་མེད་པའི་
ཐུགས་རྗེའི་ཤུགས་ལས་བྱུང་། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་དོན་སྒྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང་། །ཚད་མེད་ཚད་དང་བྲལ་བས་ཤིན་ཏུ་རྫོགས་པ་ཡི། །བདེ་བར་གཤེགས་པའི་གོ་འཕང་དམ་པ་
བརྙེས་གྱུར་ཀྱང་། །ཁམས་གསུམ་ཀུན་ལ་རྟག་ཏུ་དངོས་གྲུབ་མཆོག་སྩོལ་མཛད། །ཐུགས་རྗེ་སྤྱོད་པ་མི་གཡོ་འགག་པར་ཡོང་མི་འགྱུར། །ཨེ་མའོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ན་གོ་འཕང་མཆོག་བརྙེས་པས། །ཁམས་གསུམ་ཀུན་
ལ་རྟག་ཏུ་དངོས་གྲུབ་མཆོག་སྩོལ་མཛད། །མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པ། །དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། །འདི་ནི་སངས་རྒྱས་ཐམས་ཅད་ཀྱི། །ཡང་དག་ཡོན་ཏན་རྒྱ་ཆེན་ཏེ། །ལན་ཅིག་ཙམ་ནི་བརྗོད་པས་ཀྱང་། །སངས་རྒྱས་
ཐམས་ཅད་འགྲུབ་པར་འགྱུར། །སངས་རྒྱས་ཀུན་བདག་ཉིད་སྦྱོར་བས། །བསྟོད་པའི་རྒྱལ་པོ་འདི་ཉིད་ཀྱིས། །དུས་གསུམ་པ་ཡི་རྒྱལ་བ་ཀུན། །དམ་ཚིག་གསུམ་གྱིས་འགྲུབ་པར་འགྱུར། །སྐུ་ནི་ལྟ་བས་མི་ངོམས་པ། །ཐམས་ཅད་བདག་ཉིད་བསྟན་ནས་ཀྱང་། །ལེགས་སོ་ཞེས་ནས་
དངོས་གྲུབ་ནི། །མཆོག་རྣམས་ཀུན་ནི་རབ་སྨིན་མཛད། །ཐམས་ཅད་བདག་ཉིད་འགྲུབ་དགའ་དང་། །བསམ་པ་ཐམས་ཅད་ཡོངས་སུ་རྫོགས། །སངས་རྒྱས་འགྲུབ་པ་མཆོག་ཀུན་དང་། །རྣལ་འབྱོར་དམ་པའང་སྦྱིན་པར་མཛད། །དེ་ནས་དེ་ཡིས་བསྒྲུབ་པ་དང་། །ཤིན་ཏུ་རྟག་པའི་
དངོས་གྲུབ་དག །གང་གིས་སྲིད་པ་འདི་ཉིད་ལ། །དངོས་གྲུབ་ཤིན་ཏུ་རྟག་ཐོབ་བཤད། །རྡོ་རྗེ་སེ་གོལ་གཏོགས་པ་ཡིས། །སངས་རྒྱས་ཐམས་ཅད་བསྡུ་བར་བྱ། །ཐལ་མོ་ལེགས་པར་སྦྱར་བ་ཡིས། །ཐལ་མོ་ལན་གསུམ་རྣམ་པར་བརྡབ། །དབང་པོ་གང་དང་གང་ལམ་གྱུར། །དེ་དང་

དེ་ཡི་ངོ་བོར་བྱ། །ཤིན་ཏུ་མཉམ་གཞག་སྦྱོར་བ་ཡིས། །སངས་རྒྱས་ཀུན་དང་མཉམ་སྦྱོར་ཞིང་། །ཇི་ལྟར་མོས་པའི་ཆགས་པ་དང་། །ཥ་ཌ་པ་ལ་སོགས་པ་ཡིས། །ཅི་ནས་ཡོངས་སུ་མ་སྐྱོ་བར། །རྟག་ཏུ་ཚད་མེད་བཟླས་པར་བྱ། །ཀུན་ཏུ་ཀུན་ནས་ཐམས་ཅད་ནི། །བདག་
ཉིད་རྟག་ཏུ་རྣམ་པ་ཀུན། །སངས་རྒྱས་ཀུན་ཏུ་དངོས་གྲུབ་པ། །རབ་ཏུ་མཐོང་ཞིང་མཆོག་གྲུབ་པའོ། །འདི་ཡིས་སངས་རྒྱས་ཐམས་ཅད་དང་། །དེ་བཞིན་དཔའ་བོ་ཐམས་ཅད་དང་། །རྡོ་རྗེ་འཛིན་པ་ཐམས་ཅད་དུ། །ཚེ་འདི་ཉིད་ཀྱིས་འགྲུབ་པར་འགྱུར། །སངས་རྒྱས་ཀུན་གྱི་ཡོན་ཏན་
བསྔགས་པ་རྒྱ་ཆེ་བ། །བསྟོད་པའི་རྒྱལ་པོ་མཆོག་ནི་ལན་ཅིག་གླུར་བླངས་པས། །ཀུན་ཏུ་འགྲོ་བའི་རྣལ་འབྱོར་དམ་པ་རྟག་པའི་མཆོག །དངོས་གྲུབ་མི་ཟད་བདེ་བའི་མཆོག་ཉིད་ཐོབ་པར་འགྱུར། །བསྟོད་པའི་རྒྱལ་པོ་འདི་ཡིས་ནི། །ཐམས་ཅད་བདག་ཉིད་དབང་ཕྱུག་མཆོག །
སྣ་ཚོགས་ཀུན་གྱིས་རྣམ་འདུལ་བ། །དེ་བཞིན་གཤེགས་པ་ཀུན་གྲུབ་སྟེ། །དེ་བས་དམ་ཚིག་གསུམ་ལ་སོགས། །རྟོག་པ་བླ་མེད་ཐམས་ཅད་ཀྱིས། །ནམ་མཁའ་དབྱིངས་ཀྱི་མཐའ་ཀླས་པའི། །སེམས་ཅན་ཁམས་ནི་རྣམ་པར་གྲོལ། །དཔལ་རྣམ་པར་སྣང་མཛད་ཀྱིས་དབུགས་
ཕྱུང་བའོ།། །།འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་དུ་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་ཁྲོ་གཏུམ་གདུག་པར་འགྱུར། །ཤིན་ཏུ་གདུག་པར་ཁྲོ་བ་ཡིས། །འོ་དོད་འབོད་པར་
ལྷུང་བར་འགྱུར། །དེ་ནས་འཕོས་ནས་སེམས་ཅན་དེ། །བག་ཆགས་ཀྱིས་ནི་མཚམས་སྦྱོར་བས། །ཤིན་ཏུ་གདུག་པ་ཆེན་པོར་གྱུར། །བློ་ནི་བདུད་ཀྱིས་བྱིན་བརླབས་ནས། །རིམས་དང་དུག་དང་དབྱིག་དུག་ནད། །ཕྲ་མེན་མ་དང་གནོད་སྦྱིན་གདོན། །བདུད་དང་རྣམ་པར་ལོག་འདྲེན་ཉིད། །
ཤིན་ཏུ་གདུག་པ་ཆེན་པོར་འགྱུར། །གནས་གསུམ་པོ་ནི་འཇིགས་བྱེད་ཅིང་། །སྒྲུབ་པ་པོ་རྣམས་ལ་ཡང་ཟ། །ལྷ་ལ་སོགས་པའང་འཕོ་བར་བྱེད། །བསྟན་པ་དག་ཀྱང་འཇིག་པར་བྱེད། །དེ་ནས་དབང་པོར་བཅས་པའི་ལྷ། །ཚངས་པའི་དྲུང་དུ་ཉེ་བར་དོང་། །ཚངས་པའང་ལྷ་དང་དབང་

པོར་བཅས། །འཇུག་སེལ་ལ་ཡང་སྐྱབས་སུ་དོང་། །ཚངས་དང་འཇུག་སེལ་ལྷ་རྣམས་ཀྱང་། །ལྷ་ཆེན་དྲུང་དུ་ཉེ་བར་དོང་། །ཚངས་པ་འཇུག་སེལ་དབང་ཆེན་ཡང་། །རྡོ་རྗེ་ཅན་ལ་སྐྱབས་སུ་དོང་། །དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་སེམས་དཔའི་སྦྱོར་བ་ཡིས། །རྡོ་རྗེ་སེ་གོལ་
ཕྱག་རྒྱས་ནི། །སངས་རྒྱས་ཐམས་ཅད་བསྡུ་བར་མཛད། །རྡོ་རྗེ་སེམས་དཔའི་སྦྱོར་བ་ཡིས། །དཔུང་པ་གཉིས་ནི་རྡོ་རྗེར་བཅིངས། །རྡོ་རྗེ་སེ་གོལ་བརྡབས་པ་ཡིས། །སངས་རྒྱས་ཐམས་ཅད་བསྡུ་མཛད་ན། །དེ་ཡི་བཀའ་ཙམ་གྱིས་སྐྲག་ནས། །འཁོར་དང་འཁོར་ལོའི་ཚོགས་བཅིངས་
པ། །སངས་རྒྱས་ཐམས་ཅད་གཤེགས་འགྱུར་ན། །གཞན་ལྟ་སྨོས་ཀྱང་ཅི་ཞིག་དགོས། །རྡོ་རྗེ་སེ་གོལ་གཏོགས་པ་ཡིས། །འཇིག་རྟེན་ཁམས་ནི་མ་ལུས་པར། །སངས་རྒྱས་རྡོ་རྗེ་འཛིན་བཅས་པ། །ཀུན་གྱིས་ཏིལ་འབྲུ་བཞིན་དུ་རྒྱས། །ཤིན་ཏུ་གདུག་པར་གཏུམ་པོ་ལ། །ཞི་བས་
ཕན་པར་མི་འགྱུར་ཏེ། །ཤེས་རབ་ཐབས་ཀྱི་ངོ་བོ་ཡི། །ཁྲོ་བོར་དེ་བཞིན་གཤེགས་ཀུན་མཛད། །ཁྲོ་བོའི་ཚུལ་ཅན་ཁྲོས་པས་ཀྱང་། །འཇིག་རྟེན་གསུམ་དག་སྲེག་བྱེད་ན། །སངས་རྒྱས་ཐམས་ཅད་ཁྲོས་པ་ཡིས། །ཁམས་གསུམ་མ་ལུས་སྨོས་ཅི་དགོས། །དེ་ནས་སྣ་ཡི་རྩེ་མོ་ལ། །
ཡིད་ནི་བརྟན་པར་ཡང་དག་གཟུང་། །སྣ་ཡི་དབུགས་རིང་དྲོ་བ་ལས། །རྒྱལ་བས་ཕྱག་རྒྱའི་སྦྱོར་བ་བྱུང་། །བཅོམ་ལྡན་དེ་ཉིད་རྣལ་འབྱོར་བ། །རྡོ་རྗེ་ཁྲོ་བོར་གྱུར་ནས་བྱུང་། །དཔལ་ཆེན་རྡོ་རྗེ་ཧེ་རུ་ཀ །འབར་བས་ཐལ་བས་རབ་ཏུ་འཇིག །སེམས་དཔའ་སྔོན་པོར་འབར་བའི་ངང་། །
འོད་ཀྱི་དཀྱིལ་འཁོར་དམར་པོར་འབར། །འཇིག་པ་ཆེན་པོའི་དུས་ལྟར་དྲག །དུར་ཁྲོད་ཀྱི་ནི་མེ་དང་འདྲ། །འབར་བ་ཆེན་པོ་སྒྲ་འབར་བ། །ཐོད་པ་མང་པོའི་དབུ་རྒྱན་ཅན། །འཇིག་པ་ཆེན་པོའི་དུས་ལྟར་དྲག །དུར་ཁྲོད་བཞིན་དུ་རབ་ཏུ་འཇིགས། །ཁྲོ་ལ་སོགས་པའི་ཚུལ་ལྡན་པ། །
ཞལ་རྣམས་སྣ་ཚོགས་འགྱུར་བ་དང་། །སྨིན་མ་ཁྲོ་གཉེར་བཅས་པར་འགྱུར། །འབར་བའི་ལྟ་བས་གར་བྱས་པས། །གུ་ལང་དབང་ཆེན་ཉེ་དབང་བཅས། །ཉི་ཟླ་གཤིན་རྗེ་ཚངས་པར་བཅས། །གནས་གསུམ་དག་ནི་འབར་བྱས་ནས། །ཐལ་བ་བཞིན་དུ་རབ་ཏུ་བཤིག །རྡོ་རྗེ་རྡོ་རྗེ་ཁ་ཊྭཱྃ་ག །

དྲིལ་བུའི་སྒྲ་ནི་གསིལ་བ་ཡིས། །ཐམས་ཅད་ཕབ་ནས་སླར་ཡང་ནི། །ཐལ་བར་གྱུར་པའང་འཚོ་བར་བྱེད། །དེ་ཡི་འབར་བ་ཉི་མ་ལས། །བྱུང་བའི་གྲིབ་མ་མི་བཟད་པ། །བསྐྱེད་ནས་མ་ལུས་བདུད་ལ་སོགས། །གདུག་པ་རྣམས་ཀྱི་ཁྲག་ཟ་ནུས། །རྒྱལ་པོ་དེ་ནི་དེ་དག་དང་། །
ལྷན་ཅིག་དུར་ཁྲོད་རྣམ་པར་རོལ། །ཐམས་ཅད་རྡོ་རྗེ་མཉམ་སྦྱོར་བ། །མཁའ་འགྲོ་དཀྱིལ་འཁོར་འབར་བ་ཡིས། །ཤིན་ཏུ་གདུག་ཅིང་ཁྲོ་དྲག་པའི། །སེམས་ཅན་ཁམས་ནི་རྣམ་སྤྱངས་ནས། །དག་པའི་སངས་རྒྱས་ཞིང་རྣམས་སུ། །སངས་རྒྱས་བྱང་ཆུབ་དག་ལ་བཀོད། །རྡོ་རྗེ་འདོད་ཁྲོ་
ལ་སོགས་ཀྱི། །རྟོག་པ་བླ་མེད་ཐམས་ཅད་ཀྱིས། །ནམ་མཁའི་དབྱིངས་ཀྱི་མཐའ་ཀླས་པའི། །སེམས་ཅན་ཁམས་ནི་རྣམ་པར་སྦྱངས། །དཔལ་ཧེ་རུ་ཀས་དབུགས་ཕྱུང་བའོ།། །།འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །
འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ལོག་པར་ལྟ་ལ་གནས་པར་གྱུར། །ཤིན་ཏུ་ལྟ་བ་ངན་པ་ཡིས། །འོ་དོད་འབོད་པ་ཆེན་པོར་ལྷུང་། །རྣལ་འབྱོར་དེ་ཉིད་བཅོམ་ལྡན་འདས། །བྱང་ཆུབ་སེམས་ནི་རྣམ་སྦྱང་ཕྱིར། །པདྨོ་ཆགས་པར་སྦྱོར་བ་ཡིས། །རྡོ་རྗེ་ཆོས་
སུ་གནས་པར་འགྱུར། །ཇི་ལྟར་པདྨ་དམར་པོ་འདི། །ཚོན་གྱི་ཉེས་པས་མི་གོས་པ། །དེ་བཞིན་བག་ཆགས་ཁམས་གསུམ་གྱི། །ཉེས་པ་སྣ་ཚོགས་རྣམ་པར་དག །འདིས་ནི་ཀུན་ཏུ་གཟིགས་པས་ན། །རྒྱལ་བ་དབང་ཕྱུག་ཉིད་དུ་འགྱུར། །དཔལ་ལྡན་སྤྱན་རས་གཟིགས་ཀྱི་དབང་། །རྡོ་རྗེ་
སེམས་དཔའ་དེ་བཞིན་གཤེགས། །འདོད་ཆགས་ཐམས་ཅད་དག་པས་ན། །མཆོག་སྦྱིན་དམ་པ་བཅོམ་ལྡན་འདས། །འདུལ་བའི་ཐབས་ནི་སྣ་ཚོགས་ཀྱིས། །སྣ་ཚོགས་པ་ནི་འདུལ་བར་སྤྲོ། །ཀུན་ཏུ་སྤྱན་རས་གཟིགས་དབང་རྒྱལ། །པདྨ་གར་གྱི་དབང་ཕྱུག་གྱུར། །པདྨོའི་རྒྱལ་
པོ་མཉམ་སྦྱོར་བ། །མཁའ་འགྲོ་སྒྱུ་མ་བདེ་མཆོག་དེས། །པདྨ་གར་དབང་ལ་སོགས་ཀྱི། །རྟོག་པ་བླ་མེད་ཐམས་ཅད་ཀྱིས། །ནམ་མཁའི་དབྱིངས་ཀྱི་མཐའ་ཀླས་པའི། །སེམས་ཅན་ཁམས་ནི་རྣམ་པར་སྦྱངས། །དཔལ་པདྨ་གར་གྱི་དབང་ཕྱུག་གིས་དབུགས་ཕྱུང་བའོ།། །།

འདས་པའི་དུས་ན་སྔོན་བྱུང་པ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་གདུག་ཅིང་བརྐམ་པར་འགྱུར། །ཤིན་དུ་འཇུངས་པར་གྱུར་པ་ཡིས། །ཡི་དགས་རྣམས་དང་དམྱལ་
བར་ལྷུང་། །དེ་ནས་འཕོས་ནས་སླར་ཡང་ནི། །ཤིན་ཏུ་དབུལ་པོར་སྐྱེས་པར་གྱུར། །བཀྲེས་དང་སྐོམ་པའི་སྐྱོན་རྣམས་ཀྱིས། །དེ་དག་ཕན་ཚུན་གསོད་པར་བྱེད། །ཤིན་ཏུ་གདུག་པ་སྦྱང་བའི་ཕྱིར། །རྣལ་འབྱོར་དེ་ནི་བཅོམ་ལྡན་འདས། །དམ་པའི་དོན་ནི་ནོར་ཆེན་པོ། །རྡོ་རྗེ་ཉི་མ་བྱུང་
བར་གྱུར། །ནམ་མཁའི་སྙིང་པོས་ཐམས་ཅད་ཕྱོགས། །ཀུན་གྱི་རེ་བ་ཡོངས་རྫོགས་མཛད། །བུད་མེད་ལ་སོགས་རིན་ཆེན་མཆོག །མཁའ་ལས་རིན་ཆེན་ཐམས་ཅད་འབེབས། །ཤིན་ཏུ་གདུག་ཅིང་ཁྲོ་བ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ཉི་མ་ནི། །
རབ་ཏུ་གདུང་བ་ཀུན་བསྒྲུབས་པས། །བྱ་བ་དང་ནི་བཟློག་པ་དང་། །དབྲོག་པས་ཀྱང་ནི་ཁྱད་པར་དུ། །རྒྱལ་བར་བྱས་ནས་གནས་གསུམ་གྱི། །ནོར་གྱི་ཚོགས་ཀུན་སྡུད་པར་བྱེད། །འཇིག་རྟེན་གསུམ་རྒྱལ་ལ་སོགས་ཀྱི། །རྟོག་པ་བླ་མེད་ཐམས་ཅད་ཀྱིས། །ནམ་མཁའི་དབྱིངས་
ཀྱི་མཐའ་ཀླས་པའི། །སེམས་ཅན་ཁམས་ནི་རབ་ཏུ་དགྲོལ། །དཔལ་རྡོ་རྗེ་ཉི་མས་དབུགས་ཕྱུང་བའོ།། །།འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་
ནི། །བརྩོན་འགྲུས་ཤིན་ཏུ་ཆུང་བར་གྱུར། །ཤིན་ཏུ་བརྩོན་འགྲུས་ཆུང་བ་ཡིས། །མནར་མེད་པ་ཡི་དམྱལ་བར་ལྷུང་། །རྣལ་འབྱོར་དེ་ཉིད་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །དྲག་ཤུལ་སྦྱོར་བའི་ཚུལ་དག་ཏུ། །རྟག་མཆོག་དཔལ་ནི་བྱུང་བར་འགྱུར། །ཐམས་
ཅད་དག་པར་མོས་པ་ཡིས། །སྡིག་མེད་སྟོབས་ཀྱིས་ངོ་འཐོན་དུ། །ཕ་རོལ་གནོན་པའི་རྩལ་དག་གིས། །ཤིན་ཏུ་གདུག་ཅིང་ཁྲོ་གཏུམ་པའི། །སེམས་ཅན་རྣམ་པ་མང་པོའི་ཁམས། །འཇིག་རྟེན་ཐམས་ཅད་རབ་ཏུ་འཇིག །བྱི་བ་རྐུན་པོ་ཆོམ་པོ་ཡིས། །ཐམས་ཅད་རྣམ་པར་སྦྱོང་

བར་བྱེད། །བྲིད་པ་དང་ནི་སྒྱུ་དག་དང་། །ངོ་འཐོན་སྟོབས་ཀྱིས་དེ་བཞིན་དུ། །དགྲ་ཆ་ལྔ་ཡིས་བརྒལ་ནས་ནི། །དེ་ཚེ་འཇིག་རྟེན་གསུམ་ལས་རྒྱལ། །སྐྱེ་འགྲོ་གནས་པ་འགྲོ་བ་རྣམས། །མཐའ་དག་བཏུལ་ནས་འགྲུབ་པར་འགྱུར། །འདུལ་བའི་ཐབས་རྣམས་སྣ་ཚོགས་
ཀྱིས། །རང་གི་རྒྱལ་སྲིད་རྟག་ཏུ་སྐྱོང་། །གཡེམ་པ་རྣམས་ལ་གཡེམ་པར་འགྱུར། །ཁྲོ་བ་རྣམས་ལ་ཁྲོ་བའི་མཆོག །ཞི་བ་རྣམས་ལ་ཞི་བའི་མཆོག །དྲག་ཤུལ་ཅན་ལ་དྲག་པོས་གནོན། །སྡིག་མེད་སྟོབས་ཀྱིས་ངོ་འཐོན་དུ། །དབང་ཕྱུག་དམ་པ་རབ་མནན་ནས། །ལྷ་མོ་བྷི་མོ་
ཕྲོགས་ནས་ནི། །དེ་ཚེ་ལོངས་སྤྱོད་རང་གིར་སྤྱོད། །སྡིག་མེད་སྟོབས་ཀྱིས་ངོ་འཐོན་དུ། །མཐུ་བོ་ཆེ་ཡང་རབ་མནན་ནས། །རུག་མི་ནི་ཡང་ཕྲོགས་ནས་ནི། །དེ་ཚེ་ལོངས་སྤྱོད་རང་གིར་སྤྱོད། །སྡིག་མེད་སྟོབས་ཀྱིས་ངོ་འཐོན་དུ། །སྐྱེ་དགུའི་བདག་པོ་རབ་མནན་ནས། །ལྷ་མོ་རབ་ཏུ་
ཞི་བ་འཕྲོགས། །དེ་ཚེ་ལོངས་སྤྱོད་རང་གིར་སྤྱོད། །སྡིག་མེད་སྟོབས་ཀྱིས་ངོ་འཐོན་དུ། །འདོད་པའི་ལྷ་ནི་རབ་མནན་ནས། །དགའ་སྡུག་མི་ཡི་དབང་ཕྱུག་མ། །ཕྲོགས་ནས་དེ་ཚེ་ཉེ་བར་སྤྱོད། །དེ་ལ་སོགས་པ་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་པ། །ནམ་
མཁའི་དབྱིངས་ཀྱི་མཐའ་ཀླས་པར། །རྡོ་རྗེ་ལས་མཆོག་རྣམ་གནོན་པ། །ནམ་མཁའ་ཀུན་གྱི་སྐབས་ན་དཔལ། །རྡོ་རྗེ་སེམས་དཔའ་རབ་ཏུ་གནས། །ཐབས་དང་རྩལ་གྱི་གྲུབ་པ་ཡིས། །དྲག་ཤུལ་སྦྱོར་བས་བསྒྲུབས་ན་ནི། །ཁམས་གསུམ་རྒྱལ་སྲིད་མ་ལུས་པར། །རྡོ་རྗེ་འཛིན་པ་དེས་
ཐོབ་ནས། །བྱང་ཆུབ་སེམས་དཔའ་མཐའ་ཡས་མཆོག །དྲག་ཤུལ་སྦྱོར་བས་གྲུབ་པར་བྱེད། །ཐམས་ཅད་དག་པར་མོས་པ་ཡིས། །སྡིག་མེད་སྟོབས་ཀྱིས་ངོ་འཐོན་དུ། །རྩལ་གྱིས་ཕ་རོལ་གནོན་པ་ཡིས། །སངས་རྒྱས་བྱང་ཆུབ་རབ་ཏུ་འགྲེལ། །ལྷ་ཡི་དངོས་གྲུབ་དཀའ་བ་
དང་། །སངས་རྒྱས་བྱང་ཆུབ་བདེ་ཆེན་པོ། །གོ་འཕང་མཆོག་གི་རྟག་པ་དག །རང་གིས་རྣལ་འབྱོར་གྱིས་ཐོབ་ནས། །སེམས་ཅན་ཁམས་ནི་དུ་མ་དག །མ་ལུས་པར་ནི་རྒྱས་འདེབས་ཤིང་། །འཆི་མེད་བྱང་ཆུབ་དཀའ་བ་དག །སེམས་ཅན་རྣམས་ལ་བརྟན་པར་སྦྱིན། །རྟ་

མཆོག་རྣམ་པར་སྤྲུལ་བ་ཡིས། །མ་ལུས་ལུས་པ་མེད་པ་ཡི། །བསྐལ་པ་ཀུན་ཏུ་སྲིད་པར་གནས། །སེམས་ཅན་ཀུན་གྱི་དོན་ཀྱང་བྱེད། །དེ་ལྟར་རྟ་མཆོག་དཔལ་ལ་སོགས། །རྟོག་པ་བླ་མེད་ཐམས་ཅད་ཀྱིས། །ནམ་མཁའི་དབྱིངས་ཀྱི་མཐའ་ཀླས་པའི། །སེམས་ཅན་ཁམས་
རྣམས་རབ་ཏུ་བསྒྲུབས། །དཔལ་རྟ་མཆོག་གིས་དབུགས་ཕྱུང་བའོ།། །།དེ་ལ་སོགས་པ་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་པ། །ནམ་མཁའི་དབྱིངས་ཀྱི་མཐའ་ཀླས་པའི། །རང་བྱུང་རྣམས་ཀྱི་གཏམ་གྱི་རྟགས། །ནམ་མཁའ་ཀུན་གྱི་སྐབས་ན་དཔལ། །
རྡོ་རྗེ་སེམས་དཔའ་རབ་ཏུ་གནས། །གྲུབ་པའི་དབང་ཕྱུག་རབ་གྲུབ་པས། །ཐམས་ཅད་བདག་ཉིད་འཇུག་པར་བྱེད། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔས་དེ་སྐད་གསུངས་སོ། །སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་སྒྱུ་མ་བདེ་བའི་མཆོག་ལས་གཏམ་
གྱི་ཕྱག་རྒྱ་ཞེས་པ་རྟོག་པ་སྟེ་ལྔ་པའོ།། །།དེ་ནས་གཞན་ཡང་ཐམས་ཅད་དུ། །རྣམ་པ་སྣ་ཚོགས་མཆོག་འབྱུང་བའི། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མའི་བདེ་མཆོག་བཤད། །དཔལ་ལྡན་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་བདེ་འབྱུང་
བ། །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །སངས་རྒྱས་ཀུན་གྱི་དམ་ཚིག་དཔལ། །རྡོ་རྗེ་སེམས་དཔའ་སྣང་བ་བདེ། །དེ་བཞིན་གཤེགས་པའི་ལྷ་རྫས་མཆོག །རིན་ཆེན་རྒྱན་ལ་སོགས་པས་སྤྲས། །དྲིལ་བུ་རྒྱལ་མཚན་མཆོག་ལྡན་པའི། །
བླ་རེ་དམ་པ་བྲེས་པ་ན། །རྡོ་རྗེ་གླུ་དང་མཆོད་ལ་སོགས། །གླུ་དང་སིལ་སྙན་རྣམ་པར་འཕྲུལ། །མེ་ཏོག་བདུག་པའི་སྦྱོར་བ་དང་། །མར་མེ་དྲི་དང་སོགས་ལྡན་པ། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་མཆོག་བསྒྲུབ། །ཡང་ན་བདག་གི་གནས་
དག་གམ། །སྐྱེད་མོས་ཚལ་ལ་སོགས་པར་བསྒྲུབ། །དེར་ནི་དང་པོར་གདན་བཤམས་ཏེ། །འཇམ་ཞིང་རེག་ན་བདེ་འགྱུར་བ། །སྣ་ཚོགས་པདྨ་རས་ཀྱིས་གཡོགས། །དེ་ནི་ཐམས་ཅད་དག་པའི་གདན། །སངས་རྒྱས་ཐམས་ཅད་མཉམ་སྦྱོར་བ། །སྦྱོར་བའི་དབང་ཕྱུག་རྣམ་འཕྲུལ་

བས། །རྡོ་རྗེ་སེམས་དཔའ་དཔལ་གྱི་ལྷ། །དེ་ན་རྣམ་པར་འཕྲུལ་བ་མཛད། །སྟན་དེ་དག་ནི་ཐམས་ཅད་ལ། །ཅི་ལྟར་གནས་པ་བཞིན་དུ་དགོད། །གྲུ་བཞི་པ་ལ་སྒོ་བཞི་བ། །རྟ་བབས་བཞི་ཡིས་མཛེས་པར་བྱས། །རྡོ་རྗེ་རིན་ཆེན་པདྨ་སོགས། །སྒོ་སྲུང་དང་ནི་ལྡན་པར་
བྱས། །རང་གི་ལྷ་དང་འདྲ་བ་ཡི། །བུད་མེད་དག་ནི་ལེགས་བསྒྲུབས་པ། །སྐལ་བཟང་རང་གི་ཕྱག་རྒྱས་མཚན། །ཚོགས་ཀྱི་དཀྱིལ་འཁོར་བརྟག་པར་བྱ། །མི་ཡི་མཚལ་ནི་གྲུབ་པ་ལ། །དམར་ཆེན་པོ་ཞེས་བྱ་བར་བཤད། །ངོ་བོ་ཉིད་ཀྱི་མཐུ་དག་དང་། །རང་བཞིན་གྱིས་ནི་དེ་གྲུབ་པའོ། །
རྡོ་རྗེའི་ཆུ་དང་རྡོ་རྗེར་བཅས། །མཚལ་ཆེན་པོ་དག་བསྒྲུབ་པ་ནི། །མཐུ་ཡིས་རབ་ཏུ་གྲུབ་པ་སྟེ། །པདྨའི་སྣོད་ཀྱི་ནང་དུ་བཞག །ཆགས་པ་ཆེན་པོ་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །སངས་རྒྱས་ཀུན་གྱི་རྡོ་རྗེའི་ཐུགས། །དམ་ཚིག་འདི་ནི་འདའ་བར་དཀའ། །
དེ་ཡི་མཚལ་དང་ཁུ་བ་དང་། །མཚལ་ཆེན་པོ་ནི་བསྒྲུབ་པ་དག །ཆགས་པ་ཆེན་པོ་ལས་བྱུང་བས། །དམར་ཆེན་པོ་ཞེས་བྱ་བར་བཤད། །དམར་ཆེན་དང་ནི་ག་བུར་བཅས། །ཙནྡན་དམར་པོར་སྦྱར་བ་དག །ཚོགས་ཀྱི་དབུས་སུ་བཞག་པ་ནི། །ར་ས་ཡ་ན་ཀུན་སློང་བ། །རང་གི་
ལྷ་ཡི་སྦྱོར་ལྡན་པས། །སྲིན་ལག་དང་ནི་མཐེ་བོའི་རྩེས། །ཞི་བའི་བཏུང་བ་བཞིན་མྱངས་ན། །རྟག་པ་ཡི་ནི་དངོས་གྲུབ་ཐོབ། །སངས་རྒྱས་ཀུན་གྱི་བདག་ཉིད་ཀྱི། །ར་ས་ཡ་ན་བདེ་བ་འདིས། །རྡོ་རྗེ་སེམས་དཔའི་ཚེ་དང་གཞན། །ནད་མེད་པ་དང་བདེ་མཆོག་འགྲུབ། །སངས་རྒྱས་ཐམས་
ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་མཆོག་གིས། །འདུས་པ་དེར་ནི་ཞུགས་པ་དག །འདོད་པ་བཞིན་དུ་འགྲོ་འོང་ལྡིང་། །ཀུན་ཏུ་ཀུན་ནས་ཐམས་ཅད་ནི། །བདག་ཉིད་རྟག་ཏུ་རྣམ་པ་ཀུན། །སངས་རྒྱས་ལ་སོགས་བརྟན་གཡོ་ཀུན། །ཀུན་གྱི་དངོས་པོར་དེ་འགྱུར་རོ། །འདིས་ནི་
བསྲུང་བ་བྱས་པས་དཔལ། །རྡོ་རྗེ་སེམས་དཔའ་བཞིན་དུ་འགྱུར། །རྣལ་འབྱོར་མཁའ་འགྲོ་བདེ་མཆོག་གིས། །སངས་རྒྱས་ཐམས་ཅད་བདག་ཉིད་འགྲུབ། །དེ་ནས་ཁྲུས་བྱས་དྲི་ཞིམ་ལུས། །ཅི་འབྱོར་པ་ཡི་གོས་དང་རྒྱན། །སྣ་ཚོགས་གོས་བཟང་བགོས་ནས་ནི། །མེ་ཏོག་ཕྲེང་ལྡན་

ཁ་དྲི་ཞིམ། །སྣ་ཚོགས་ཀུན་གྱིས་སྐལ་བཟང་པོས། །སློང་བས་དལ་གྱིས་དལ་གྱིས་སུ། །གོས་དགབ་པ་ཡི་སྦྱོར་བ་ཡིས། །བདག་གི་འབྱུང་བ་བསྐུལ་བར་བྱ། །རྫོགས་པའི་སངས་རྒྱས་ཉི་ཟླ་རྣམས། །ཤར་བ་དག་ནི་མཐོང་བ་ཡིས། །སྡིག་པ་ཀུན་ལས་གྲོལ་འགྱུར་ཞིང་། །བསོད་
ནམས་ཐམས་ཅད་འགྲུབ་པར་འགྱུར། །ངེས་པའི་ལམ་དང་ཀུན་ལྡན་པ། །རྣམ་པར་འདས་པས་རྣམ་པར་བརྒྱན། །བརྟན་ཞིང་གྲུབ་པ་སློང་བྱེད་པ། །ཀུན་ནས་སློང་བའི་བདེ་བ་ནི། །སྟོང་པ་ཤིན་ཏུ་རྣལ་འབྱོར་ཡོད་མེད་མཐུས། །ནམ་མཁའ་ཉིད་དུ་དམ་ཚིག་ཉེ་བར་གནས། །བདེ་གཤེགས་
བདེ་བར་གཤེགས་པ་བཞེངས་སུ་གསོལ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །འདི་དག་ཉིད་ཀྱི་གླུར་བླངས་ན། །ཤིན་ཏུ་མྱ་ངན་ཡོངས་འདས་པའི། །ཤི་བའང་སླར་ནི་སློངས་འགྱུར་ན། །ཡང་སྲིད་པ་ལྟ་ཅི་ཞིག་སྨོས། །ལམ་བཞི་དང་ནི་ལྡན་པ། །རྣམ་པར་
འདས་པས་མཛེས་པར་བྱས། །སྣ་ཚོགས་འབྲང་བར་རབ་ཏུ་འགྲུབ། །འཇིག་རྟེན་གསུམ་ནི་རབ་བསྒྲུབ་པ། །འཇིག་རྟེན་གསུམ་གྱིས་ཕྱག་བྱས་པ། །འཇིག་རྟེན་གསུམ་གྱི་སྟོན་པའོ། །འཇིག་རྟེན་གསུམ་ལ་སྐྱིད་སྦྱིན་པ། །འཇིག་རྟེན་གསུམ་པོ་བདག་ལ་བསྒྲུབས། །རྡོ་རྗེ་སེམས་
དཔའ་དཔལ་སྦྱོར་བ། །ལྷ་མོ་ཀུན་དང་འགྲོགས་པ་ཡིས། །སྣ་ཚོགས་ཀུན་གྱི་སྐལ་བཟང་པོ། །ཨ་ར་ལི་ནི་ཀུན་འགྲུབ་འགྱུར། །ནམ་མཁའི་དབྱིངས་ཀྱི་མཐའ་ཀླས་པའི། །ལྷ་མོ་ཀུན་དང་བདེ་མྱོས་པ། །རྡོ་རྗེ་སེམས་དཔའ་ཡང་དག་རྫོགས། །ཉི་མ་ཟླ་བ་གསལ་བར་འཆར། །
རྡོ་རྗེ་སེམས་དཔའ་ཡང་དག་སྦྱོར། །མཁའ་འགྲོ་སྒྱུ་མ་བདེ་མཆོག་འབྱུང་། །ལན་ཅིག་དམིགས་པ་ཙམ་གྱིས་ཀྱང་། །བདེ་བའི་དངོས་གྲུབ་ཀུན་འབྱུང་བ། །བརྟན་ཞིང་གྲུབ་པ་སློང་བྱེད་པ། །སྣ་ཚོགས་འབྲང་བས་དེ་བཞིན་དུ། །གན་དྷརྦ་དང་ཥ་ཌ་བའི། །གླུ་དབྱངས་སྣ་ཚོགས་
གླུས་བསྒྲུབ་བོ། །དེ་ནས་དེ་ཉིད་དམ་པ་ཡིས། །ཐར་བ་ཐམས་ཅད་རྨོངས་པ་ཡི། །རྡོ་རྗེ་སེམས་དཔའི་བདག་ཉིད་དཔལ། །གླུ་འདི་ཡིས་ནི་བསྐུལ་བར་བྱ། །རྗེས་སུ་ཆགས་པའི་རྣམ་མང་དགའ་བའི་པདྨ་ནི། །རྣམ་དག་མཆོད་པས་གསལ་བར་རྗེས་སུ་མཆོད་བྱས་ནས། །མཆོག་

ཏུ་རྟག་པའི་རྣལ་འབྱོར་བདེ་བས་བདེ་གྲུབ་མཛོད། །ཀྱེ་མའོ་མཆོག་ཏུ་བདེ་བའི་དམ་ཚིག་ངོ་བོ་ཉིད། །མཆོག་ཏུ་བདེ་བ་ཤིན་ཏུ་རྣལ་འབྱོར་སྐལ་བཟང་མཆོག་དགྱེས་པ། །རང་གི་དམ་ཚིག་སྐྱོན་མེད་དག་ལ་རོལ་ཅིག་རོལ་ཅིག་ཧོ། །ཀྱེ་མ་མཆོག་ཏུ་གསང་བའི་བདག་པོ་
རང་གི་དམ་ཚིག་ནི། །ཡིན་པའི་ཕྱིར་ན་རབ་ཏུ་གསང་བའི་ལྷ་མོ་མཆོག་རྣམས་སོ། །འགྲོ་བའི་རྒྱུད་ནི་རྣམ་པ་སྣ་ཚོགས་འདུལ་བའི་ཐབས་ནི་གསལ་བར་མཁྱེན། །དམ་ཚིག་ཐམས་ཅད་དངོས་པོ་བརྟན་དང་གཡོ་བ་ཀུན་གྱི་ངོ་བོར་གྱུར། །རྒྱལ་བ་ཀུན་གྱི་བདག་ཉིད་རྣལ་འབྱོར་བདེ་བ་མཁའ་
འགྲོ་སྒྱུ་མ་ཧོ། །ཀྱེ་མ་དམ་པ་རྟག་པའི་དངོས་གྲུབ་ཆེན་པོ་རབ་ཏུ་སྒྲུབ་པ་སྟོན། །ཛཿཧཱུཾ་བཾ་ཧོཿཨེ་མའོ་བདེ་མཆོག་བདེ་བར་དྲོངས། །རྣམ་པར་སྤྲུལ་ཧཱུཾ་སྣང་བར་མཛོད། །ཨ་ལ་ལ་ཧོ། དེ་བཞིན་གཤེགས་པ་ཐམས་ཅད་ཀྱི། །མཁའ་འགྲོ་སྒྱུ་མ་སྣ་ཚོགས་ཀྱིས། །སློབ་མ་དག་ནི་
གཞུག་ཏུ་གསོལ། །གླུ་ཡི་རྒྱལ་པོ་འདི་དག་ནི། །རྡོ་རྗེ་སེམས་དཔའ་དཔལ་ལ་གནས། །ཀུན་གྱི་སྒྱུ་མ་བདེ་བའི་མཆོག །མ་ལུས་ལུས་པ་མེད་པར་འགྲུབ། །གླུ་འདི་དག་ནི་ལེན་པ་ན། །དཀྱིལ་འཁོར་སྣ་ཚོགས་ཐམས་ཅད་དུ། །སངས་རྒྱས་ཐམས་ཅད་རྣམ་འཕྲུལ་བ། །མ་ལུས་
ལུས་པ་མེད་པར་སྣང་། །རྣམ་པ་མང་པོའི་འདོད་ཆགས་རྒྱུད་ཀྱི་སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་སྒྱུ་མའི་བདེ་མཆོག་སྒྱུ་མས་ཐམས་ཅད་རབ་སྤྲུལ་རྣམ་པར་སྤྲུལ། །ཏེ་ན་ཏེ་ཏེ་ཧཱུྃ། རྣམ་པ་མང་པོ་རབ་ཏུ་དགའ་བའི་རྒྱུད་ཀྱིས་སེམས་ཅན་མ་
ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་སྒྱུ་མ་བདེ་མཆོག་སྒྱུ་མས་ཐམས་ཅད་རབ་སྤྲུལ་རྣམ་རོལ་སྤྲུལ་ཅིག་སྤྲུལ། ཧཱུཾ་ཧཱུཾ་ཧཱུཾ། རྣམ་པ་མང་པོ་ཁྲོ་བོའི་རྒྱུད་ཀྱིས་སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་སྒྱུ་མ་
བདེ་མཆོག་སྒྱུ་མས་ཐམས་ཅད་རབ་སྤྲུལ་རྣམ་པར་སྤྲུལ། །རུ་ལུ་རུ་ལུ་ཧཱུཾ་བྷྱོ་ཧཱུཾ། རྣམ་པ་མང་པོ་སྲོག་གི་རྒྱུད་ཀྱིས་སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་སྒྱུ་མ་བདེ་མཆོག་སྒྱུ་མས་ཐམས་ཅད་རབ་སྤྲུལ་རྣམ་པར་སྤྲུལ། །ཧཱུཾ་ཤི བྷིཥ །

དེ་ལ་སོགས་ཏེ་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་པའི། །ནམ་མཁའི་དབྱིངས་ཀྱི་མཐའ་ཀླས་པའི། །རང་བྱུང་རྣམས་ཀྱི་གླུ་ཡི་རྒྱ། །ནམ་མཁའ་ཀུན་གྱི་སྐབས་ན་དཔལ། །རྡོ་རྗེ་སེམས་དཔའ་ལ་ནི་གནས། །གྲུབ་པའི་དབང་ཕྱུག་རབ་གྲུབ་པས། །ཐམས་
ཅད་བདག་ཉིད་གྲུབ་པར་འགྱུར། །གླུ་འདི་དག་ནི་བླངས་པ་དང་། །ལྷ་མོ་ཀུན་གྱིས་རབ་བསྐུལ་ནས། །མཁའ་འགྲོ་སྒྱུ་མ་བདེ་མཆོག་གིས། །སངས་རྒྱས་ཀུན་གྱི་བདག་ཉིད་འགྲུབ། །དབང་པོ་ཀུན་ལས་བྱུང་བ་ཡི། །མཆོད་པའི་སྤྲིན་ཆེན་རྣམ་བཀོད་པ། །རབ་འབྱམ་ཚོགས་རྣམས་
ཐམས་ཅད་ཀྱིས། །ཀུན་གྱི་བདག་ཉིད་མཆོད་པར་བྱེད། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་མཆོག་གིས། །དངོས་པོ་ཀུན་གྱི་བདག་ཉིད་ལུས། །མ་ལུས་ལུས་པ་མེད་པར་འགྲུབ། །སྟོན་པའི་ཕྱག་རྒྱ་ཕབ་པ་ཡིས། །བུད་མེད་དག་ཀྱང་བསྒྲུབས་ནས་
ནི། །རྡོ་རྗེར་བཅས་པའི་མཚན་མ་འཛིན། །རྣལ་འབྱོར་མར་ནི་རབ་ཏུ་འགྱུར། །དེ་དག་རང་གི་ལྷ་རྣམས་དང་། །འདྲ་བར་བྱིན་གྱིས་བརླབས་བསྒྲུབས་ནས། །སྔོན་མེད་རོལ་མོའི་སིལ་སྙན་གར། །རྣམ་པར་འཕྲུལ་བས་འགྲུབ་པར་འགྱུར། །ལྷ་ཡི་གཟུགས་དང་སྒྲ་དང་དྲི། །རོ་དང་རེག་
བྱ་བདེ་མྱོས་པས། །བདག་ཉིད་རང་གི་ལྷར་མཐོང་ཞིང་། །མཆོད་པ་དག་ཀྱང་བྱེད་པར་འགྱུར། །ལྷ་ཡི་མཆོད་པ་མཉམ་སྦྱོར་བ། །སྐལ་བཟང་མཆོག་གི་འདོད་ཆགས་ཅན། །རྣམ་པ་ཀུན་ཏུ་སྐལ་བཟང་པོའི། །བདེ་བ་ཡང་དག་སྒྲུབ་པར་བྱེད། །སངས་རྒྱས་སྒྱུ་མས་བྱིན་བརླབས་པས། །
རྡོ་རྗེ་སེམས་དཔའ་མཉམ་སྦྱོར་བའི། །དངོས་གྲུབ་ཀུན་གྱི་བདེ་བ་རྣམས། །དཀྱིལ་འཁོར་མཐོང་དཀའ་མྱོང་བར་འགྱུར། །རྡོ་རྗེ་སེམས་དཔའི་མཉམ་སྦྱོར་བའི། །མཐུ་ཉིད་ཀྱིས་ནི་ཐམས་ཅད་དུ། །སྣ་ཚོགས་ཀུན་གྱི་སྐལ་བཟང་པོ། །རང་གི་བདེ་བ་ཉིད་ཀྱིས་འགྲུབ། །སངས་རྒྱས་
ཀུན་གྱི་གཟུགས་ཆེན་དང་། །དབྱངས་དང་དྲི་དང་རོ་བདེ་བས། །རྡོ་རྗེ་སེམས་དཔའི་བདག་ཉིད་དུ། །དེ་ཡིས་རབ་མཐོང་མཆོད་པར་བྱེད། །མཆོད་པ་ཐམས་ཅད་མཉམ་སྦྱོར་བ། །སྐལ་བཟང་མཆོག་གིས་འདོད་ཆགས་ཅན། །སངས་རྒྱས་ཐམས་ཅད་བདག་ཉིད་ཀྱི། །དངོས་

གྲུབ་མ་ལུས་ལུས་མེད་འགྲུབ། །སངས་རྒྱས་ཐམས་ཅད་མཉམ་སྦྱོར་བའི། །མཁའ་འགྲོ་སྒྱུ་མ་བདེ་མཆོག་གིས། །སངས་རྒྱས་ཀུན་གྱི་བདག་ཉིད་གར། །རྣམ་པར་རོལ་པ་མཆོག་ཏུ་སྣང་། །དེ་ནས་ཡང་དག་རབ་གསང་བས། །བུད་མེད་དག་ནི་བཞི་རྣམས་དང་། །གར་
གྱི་ཕྱག་རྒྱ་མཆོད་པ་ཡིས། །མཆོད་པ་ཐམས་ཅད་དབུལ་བར་བྱ། །རབ་ཏུ་དགའ་བའི་ལྷ་ལ་ཕྱག་འཚལ་ལོ། །དེ་བཞིན་གཤེགས་པའི་དམ་པ་གྲུབ་པར་མཛོད། །ཨོཾ་ཧཱུཾ། དམ་ཚིག་དམ་པ་གྲུབ་པར་མཛད་དུ་གསོལ། །ཨོཾ་ཧཱུཾ། མཆོད་པ་ཆེན་པོ་ཐམས་ཅད་དག་པར་མཛོད། །
ཨོཾ་ཧཱུཾ། མཆོད་པ་ཆེན་པོ་ཐམས་ཅད་གྲུབ་པར་མཛོད། །གླུ་ཡི་ཕྱག་རྒྱ་འདི་ནི་དཔལ། །རྡོ་རྗེ་སེམས་དཔའ་ལ་གནས་ཏེ། །མཆོད་པ་མ་ལུས་ལུས་མེད་པའི། །རབ་འབྱམ་ལས་ལའང་སྦྱར་དུ་རུང་། །གང་དག་གྲུབ་པར་མ་གྱུར་དང་། །མཆོད་པ་དག་ནི་མི་འབྱོར་བ། །ཕྱག་རྒྱ་འདི་ཡིས་
མཆོད་བྱས་ན། །མཆོད་པ་ཐམས་ཅད་མྱུར་དུ་འགྲུབ། །མཆོད་པའི་སྦྱོར་བ་འདི་དག་དང་། །ལྷ་མོ་བཞི་པོ་དག་གིས་ནི། །མེ་ཏོག་ལ་སོགས་མཆོད་བྱས་ནས། །སློབ་མ་ཐམས་ཅད་གཟུང་བར་བྱས། །དངོས་གྲུབ་འདོད་པས་ཅི་འདོད་པར། །སྙིམ་པའི་གར་ནི་ཀུན་བསྐྱོད་ནས། །དེ་
དག་གདོང་ནི་མཛེས་པ་ཡི། །རས་ཀྱིས་གཡོགས་ཏེ་གཟུང་པར་བྱ། །དངོས་གྲུབ་ཇི་ལྟར་འཐོབ་འདོད་པར། །སློབ་མ་མེ་ཏོག་འཐོར་དུ་གཞུག །ལྷ་མོ་གང་ལ་ལྷུང་བ་ནི། །ལྷ་དེ་དེ་ལ་འགྲུབ་པར་འགྱུར། །དེ་ནས་གདོང་ནི་བཀྲོལ་ནས་ཀྱང་། །ཡོན་གྱི་མཆོག་ནི་བླང་བར་བྱ། །
སངས་རྒྱས་རིན་ཆེན་དབང་བསྐུར་བས། །ཅི་ལྟ་བར་ནི་དབང་བསྐུར་རོ། །དམར་ཆེན་པོ་དང་ག་པུར་བཅས། །ཙནྡན་དམར་པོ་སྦྱར་བ་རྣམས། །ཚོགས་ཀྱི་དབུས་སུ་བཞག་པ་ལ། །གཡོན་པ་མཚན་འཛིན་རྡོ་རྗེ་བཅས། །རང་གི་ལྷ་ཡི་རྣལ་འབྱོར་ལྡན། །སྲིན་ལག་དང་ནི་མཐེ་
བོང་རྩེས། །ཞི་བའི་བཏུང་བ་བཞིན་མྱངས་ན། །རྟག་པའི་དངོས་གྲུབ་ཐོབ་པར་འགྱུར། །སངས་རྒྱས་ཐམས་ཅད་མཉམ་སྦྱོར་བའི། །མཁའ་འགྲོ་སྒྱུ་མའི་ཚོགས་ཀྱིས་ཀྱང་། །རྒྱས་མི་ཐེབས་ཤིང་མི་རྨོངས་ཏེ། །དེ་ལ་གནོད་པར་མི་འགྱུར་རོ། །དེ་ནས་མནའ་ནི་བསྒགས་བྱས་ནས། །

སངས་རྒྱས་ཐམས་ཅད་མཐུན་པ་ཡིས། །མཆོག་ཏུ་རྟག་པའི་བཀའ་སྩལ་པ། །དམ་ཚིག་སྡོམ་པ་སྦྱིན་པར་བྱ། །སངས་རྒྱས་ཐམས་ཅད་མཉམ་སྦྱོར་བའི། །སྡོམ་པ་ཉམས་པར་ཁྱེད་བྱེད་པ། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་རྡོ་རྗེ་འཛིན། །ལྷ་དག་དང་
ནི་མི་རྣམས་དང་། །དེ་བཞིན་རྣལ་འབྱོར་གྲུབ་པ་པོ། །དེ་དག་ལ་ནི་སྙིང་རིངས་ནས། །སྙིང་ལས་ཁྲག་ཆེན་འཐུངས་པ་བཞིན། །སེམས་ཅན་ཁམས་ནི་མ་ལུས་དོན། །སྲིད་པ་ཤིན་ཏུ་དག་བྱའི་ཕྱིར། །མི་འགོག་ཆོས་ཉིད་སྦྱོར་བ་ཡིས། །རྟག་པ་ཉིད་དུ་བསྒྲུབ་པར་བྱ། །བདག་གི་ངོ་
བོ་ཡོངས་སྤངས་ཤིང་། །དཀའ་ཐུབ་གྱིས་ནི་གཟིར་མི་བྱ། །ཅི་བདེ་བར་ནི་བདེ་བར་སྤྱད། །འདི་ནི་ཕྱི་དུས་སངས་རྒྱས་ཡིན། །རྣལ་འབྱོར་ལོངས་སྤྱོད་ཐམས་ཅད་ལ། །ཅིས་ཀྱང་མི་འཇིགས་དགའ་བར་གྱིས། །སྡིག་པ་མེད་ཀྱིས་ཁྱེད་མ་འཇིགས། །དམ་ཚིག་འདའ་བར་དཀའ་བའོ། །
གྲུབ་པ་གཅིག་པུ་གཅིག་ལ་སྤྱོད། །ལྷན་ཅིག་སྤྱོད་དང་རྗེས་སྤྱོད་སྡུག །སངས་རྒྱས་བྱང་ཆུབ་བླ་མེད་ཡིན། །ཡང་དག་ཉིད་ཀྱིས་རྟག་ཏུ་བསྟེན། །རྡོ་རྗེ་སེམས་དཔའ་དེ་བཞིན་གཤེགས། །དེ་སྐད་བཀའ་སྩལ་དཔལ་ལྡན་གྱིས། །ཡང་དག་རྫོགས་པའི་སངས་རྒྱས་དང་། །རྡོ་རྗེ་
ཅན་གྱིས་བཀའ་སྩལ་ཏོ། །རྣལ་འབྱོར་བཅས་དང་གསང་བཅས་པའི། །བདག་གི་ཡེ་ཤེས་རྒྱ་བསྒྲུབས་ནས། །ཅི་ལྟའི་ཚུལ་བཞིན་གར་བྱེད་པས། །སློབ་མ་རྣམས་ལ་བདེ་བར་སྦྱིན། །སློབ་མ་དམ་པས་དེ་ཕྱིན་ཆད། །ཕྱག་རྒྱའི་ཡེ་ཤེས་རྗེས་བཟུང་ནས། །རྣམ་པར་སྣང་མཛད་མཆོག་
བཞིན་དུ། །སངས་རྒྱས་ཀུན་གྱིས་བདག་ཉིད་གྲུབ། །དེ་ནས་རོ་དང་ཟས་དང་གནས། །གླུ་དང་སིལ་སྙན་ལ་སོགས་པ། །དེ་དག་མགོན་པོ་རྣམས་ལ་དབུལ། །རྡོ་རྗེ་བླ་མ་ཆེན་པོ་དང་། །བདག་དང་གཞན་ལ་འདོད་དགུས་མཆོད། །འདོད་དོན་འབྲས་བུ་ཕུན་ཚོགས་འགྲུབ། །དེ་ནས་
བདག་ཉིད་རབ་བསྒྲུབས་ནས། །ཀུན་གྱི་སློབ་དཔོན་རབ་གནས་པ། །ཅི་ལྟའི་ཚུལ་བཞིན་འཇུག་པ་ཡིས། །བདེན་པའི་ཆོས་ནི་བརྗོད་པར་བྱ། །རྡོ་རྗེ་སེམས་དཔའ་དཔལ་གྱི་ཚུལ། །རྟོག་པ་ཐམས་ཅད་རབ་བསྒྲུབས་ཤིང་། །རྟོག་པ་ཀུན་ལ་རབ་སྦྱོར་བའི། །ངོ་བོ་ཉིད་ཕྱིར་ཆེན་

པོའི་མཆོག །སྣ་ཚོགས་ལས་ཀྱི་སྦྱོར་བ་དང་། །འདུལ་བའི་བདག་ཉིད་སྣ་ཚོགས་པས། །སེམས་ཅན་རྣམས་ནི་འདུལ་བའི་ཕྱིར། །དེ་ལས་གཞན་པའི་ཚུལ་དུ་བསྟན། །རྣལ་འབྱོར་དེ་ཉིད་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །ཐར་པ་ཐམས་
ཅད་རྣམ་སྦྱང་ཕྱིར། །འགྲོ་བའི་མཁའ་འགྲོ་བྱུང་བར་འགྱུར། །རང་གི་ལྷ་དང་འདྲ་བ་ཡིས། །རང་གི་བྱིན་རླབས་བསྒྲུབ་པའི་རྒྱས། །ཕྱག་རྒྱ་ཅི་བཞིན་རྗེས་མཐུན་པའི། །སངས་རྒྱས་སྤྲུལ་པ་བསྒྲུབ་པར་བྱ། །གཞན་ཡང་རྣལ་འབྱོར་བཅོམ་ལྡན་འདས། །དམ་ཚིག་ལ་སྡང་རྣམ་
སྦྱང་ཕྱིར། །ཐམས་ཅད་རྣལ་འབྱོར་དབང་ཕྱུག་མཆོག །རྡོ་རྗེ་མཁའ་འགྲོ་འབྱུང་བར་འགྱུར། །གཞན་ཡང་ཤིན་ཏུ་རྣལ་འབྱོར་པ། །མ་ལུས་པདྨ་རྣམ་སྦྱང་ཕྱིར། །སྐལ་བཟང་དམ་པ་མི་འགྱུར་བ། །པདྨ་སྒྱུ་མ་འབྱུང་བར་འགྱུར། །གཞན་ཡང་རྣལ་འབྱོར་བཅོམ་ལྡན་འདས། །
ནོར་གྱི་མཆོག་གིས་རྣམ་སྦྱང་ཕྱིར། །ནམ་མཁའ་ཀུན་གྱི་བདག་པོ་ཆེ། །རྡོ་རྗེ་ཉི་མ་དཔལ་འབྱུང་འགྱུར། །རྣལ་འབྱོར་དེ་ཉིད་བཅོམ་ལྡན་འདས། །དྲག་ཤུལ་སྦྱོར་བ་སྦྱང་བའི་ཕྱིར། །རྟ་མགྲིན་ཕ་རོལ་རབ་གནོན་པ། །རྟ་མཆོག་རབ་ཏུ་འབྱུང་བར་འགྱུར། །རང་གི་ལྷ་དང་འདྲ་
བ་ཡིས། །རང་གི་བྱིན་རླབས་བསྒྲུབ་པའི་ཕྱིར། །གཟུགས་བརྙན་ངོ་བོར་སྦྱོར་བ་ཡི། །ཕྱག་རྒྱའི་སྦྱོར་བས་གར་བྱའོ། །དམ་ཚིག་རྣམ་པ་སྣ་ཚོགས་ཀྱིས། །དེ་ལྟར་རྣམ་པར་སྤྱོད་ན་ནི། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་མཆོག་འགྲུབ། །ཀུན་
ཏུ་ཀུན་ནས་ཐམས་ཅད་ནི། །སངས་རྒྱས་འཕྲུལ་བ་ཐམས་ཅད་ཀྱིས། །བདག་ཉིད་རྟག་ཏུ་རྣམ་པ་ཀུན། །སངས་རྒྱས་ལ་སོགས་བརྟན་གཡོ་ཀུན། །ཀུན་གྱི་དངོས་པོར་དེ་འགྱུར་རོ། །ཀུན་ཏུ་སངས་རྒྱས་ཐམས་ཅད་ཀྱི། །སངས་རྒྱས་སྤྲུལ་པ་ཐམས་ཅད་ཀྱིས། །བདག་ཉིད་རྣམ་
པར་འཕྲུལ་པ་སྟོན། །ལྷ་མོ་ཀུན་དང་འདུས་པ་ཡིས། །སངས་རྒྱས་ཞིང་ནི་མ་ལུས་པར། །སངས་རྒྱས་སྤྲུལ་པ་གྲུབ་པར་བྱེད། །སངས་རྒྱས་སྤྲུལ་པ་སྒྱུ་མ་ཡིས། །སངས་རྒྱས་རྣམས་ཀྱི་མཛད་པ་སྟོན། །སངས་རྒྱས་ཐམས་ཅད་མཉམ་སྦྱོར་བའི། །མཁའ་འགྲོ་སྒྱུ་མ་གར་བྱེད་པས། །

ཁམས་གསུམ་དག་ནི་མ་ལུས་པར། །དངོས་པོ་ཀུན་ཏུ་དེ་འགྱུར་རོ། །པདྨ་སྒྱུ་མ་རྣམ་འཕྲུལ་པས། །སངས་རྒྱས་རྡོ་རྗེ་འཛིན་ལ་སོགས། །སྣ་ཚོགས་གཟུགས་བྱེད་རིམ་པ་ཡིས། །འགྲོ་བ་ཐམས་ཅད་མགུ་བར་བྱེད། །ཁམས་གསུམ་པ་ཡི་རྒྱལ་སྲིད་ཆེ། །མཇལ་དུམ་གཡུལ་
འགྱེད་གྲུབ་པ་དག །རྒྱལ་སྲིད་སྒྱུ་མ་རྣམ་འཕྲུལ་པས། །བྱ་བ་ཐམས་ཅད་སྟོན་པར་བྱེད། །ཁམས་གསུམ་པ་ཡི་རྒྱལ་སྲིད་ཆེ། །བདག་རྟུལ་ཕོད་པས་མནན་ནས་ནི། །འགྲོ་བ་ཐམས་ཅད་རབ་འཇོམས་པར། །རྟ་ཡི་གར་གྱིས་སྟོན་པར་བྱེད། །དེ་ལ་སོགས་པ་མཐའ་ཡས་མཆོག །
ཆོས་དབྱིངས་མཉམ་དང་མི་མཉམ་པ། །ནམ་མཁའི་དབྱིངས་ཀྱི་མཐའ་ཀླས་པའི། །སྣ་ཚོགས་ཀུན་གྱི་བདེ་མཆོག་གིས། །ནམ་མཁའ་ཀུན་གྱི་སྐབས་ན་དཔལ། །རྡོ་རྗེ་སེམས་དཔའ་དེ་བཞིན་གཤེགས། །དཔལ་དགྱེས་རོལ་པ་རྣམ་འཕྲུལ་བ། །སྣ་ཚོགས་ཀྱིས་ནི་རྣམ་པར་རོལ། །
རྣམ་པ་སྣ་ཚོགས་སྐལ་བཟང་པོ། །རྣམ་པ་སྣ་ཚོགས་བདེ་མཆོག་གིས། །འདུལ་བ་རྣམ་པ་སྣ་ཚོགས་ཀྱིས། །སེམས་ཅན་ཁམས་ནི་རབ་ཏུ་བསྒྲུབ། །དེ་ལ་སོགས་པ་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་པ། །ནམ་མཁའི་དབྱིངས་ཀྱི་མཐའ་ཀླས་པའི། །སངས་
རྒྱས་ཐམས་ཅད་འབྱུང་བའི་མཆོག །ནམ་མཁའ་ཀུན་གྱི་སྐབས་ན་དཔལ། །རྡོ་རྗེ་སེམས་དཔའ་ལ་གནས་ཏེ། །གྲུབ་པའི་དབང་ཕྱུག་རབ་བསྒྲུབས་པས། །ཐམས་ཅད་བདག་ཉིད་གྲུབ་པར་བྱེད། །ཅེས་བཅོམ་ལྡན་འདས་དཔལ་རྡོ་རྗེ་སེམས་དཔས་དེ་སྐད་གསུངས་སོ། །སངས་རྒྱས་
ཐམས་ཅད་དང་མཉམ་པར་སྦྱོར་བ་མཁའ་འགྲོ་སྒྱུ་མ་བདེ་བའི་མཆོག་ལས་སངས་རྒྱས་ཐམས་ཅད་མཉམ་པར་སྦྱོར་བ་མཁའ་འགྲོ་སྒྱུ་མའི་དཀྱིལ་འཁོར་གྱི་རྟོག་པ་སྟེ་དྲུག་པའོ།། །།དེ་ནས་གཞན་ཡང་བཤད་བྱ་བ། །རྡོ་རྗེ་སེམས་དཔའ་དཔལ་གྱི་ལྷ། །རྣམ་པ་སྣ་ཚོགས་ཀུན་གྱི་
མཆོག །འཁོར་ལོ་ཐམས་ཅད་རྣམ་སྤྲུལ་པའོ། །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྗེས་སུ་བསྒྲུབ། །དབེན་པ་ཡི་ནི་གནས་དག་གམ། །རང་གི་སྐྱེད་མོས་ཚལ་སོགས་པར། །ཀུན་ཏུ་སྣ་ཚོགས་སྐལ་བཟང་པོ། །ཀུན་ཏུ་སྣ་ཚོགས་བདེ་མཆོག་གིས། །

ཀུན་ཏུ་སྣ་ཚོགས་དགོས་པའི་རྣམས། །ཅི་བདེ་བར་ནི་བསྒྲུབ་པར་བྱ། །རྟེན་དང་དགོན་པ་གཙུག་ལག་ཁང་། །རི་ཡི་རྩེ་རྣམས་ཐམས་ཅད་དུ། །རྣམ་པ་དུ་མ་སྣ་ཚོགས་པ། །སངས་རྒྱས་དགོས་པ་བསྒྲུབ་པར་བྱ། །དུར་ཁྲོད་དང་ནི་ལྷ་རྟེན་དང་། །མ་མོའི་གནས་ལ་སོགས་
འདུག་ན། །རྡོ་རྗེ་འཛིན་པའི་དགོས་པ་དག །རྣམ་པ་དུ་མར་འགྲུབ་པར་འགྱུར། །པདྨོའི་སྐྱེད་མོས་ཚལ་དགའ་དང་། །ཆུ་བོ་དག་གི་མདོ་དག་ཏུ། །པདྨ་འཛིན་པའི་དགོས་པ་རྣམས། །ཡང་དག་པར་ནི་འགྲུབ་པར་འགྱུར། །རྒྱལ་པོའི་ཕོ་བྲང་དགའ་བ་དང་། །རྒྱལ་པོའི་སྐྱེད་མོས་ཚལ་
དག་ཏུ། །རྣམ་པ་སྣ་ཚོགས་དུ་མ་ཡི། །རྒྱལ་པོའི་དགོས་པ་བསྒྲུབ་པར་བྱ། །མཁར་ནི་རྣམ་པ་སྣ་ཚོགས་དང་། །དེ་བཞིན་ཆུ་བོའི་འགྲམ་དག་གམ། །རྒྱལ་ཁམས་གཞན་ལས་གྲུབ་པ་རུ། །རྡོ་རྗེ་རྟ་ནི་བསྒྲུབ་པར་བྱ། །ཆ་ལུགས་རྣམ་པ་སྣ་ཚོགས་དང་། །སྒྲུབ་པ་རྣམ་པ་སྣ་ཚོགས་
ཀྱིས། །རྡོ་རྗེ་སེམས་དཔའི་དགོས་པ་ལ། །དཀྱིལ་འཁོར་ལ་སོགས་རབ་ཏུ་སྒྲ