Kinh tạng Tây Tạng (Kangyur Đại Học) — 058_མདོ་སྡེ།_ཕ

པར་དག་པའི་ལམ་བསྒོམས་པའི་ཡོན་ཏན་གྱི་ལེའུ་འདི་བཤད་པ་ན་ཡོངས་སུ་སྦྱང་བ་བྱས་པའི་སྲོག་ཆགས་ཁྲི་ཉིས་སྟོང་གིས་བཟོད་པ་རབ་ཏུ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ལ་ཀླུའི་རྒྱལ་པོ་མ་དྲོས་པས་འདི་
སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔས་ཇི་ལྟར་འཕགས་པའི་ལམ་བསྒོམ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀླུའི་བདག་པོ་འདི་ལ་བྱང་ཆུབ་སེམས་དཔའ་འཕགས་པ་རྣམ་པར་དག་པའི་ལམ་བསྒོམ་པར་འདོད་པས་རྣམ་
པར་དག་པའི་སྤྱོད་པ་ལ་མཁས་པར་བྱ་སྟེ། དེས་ལུས་ཡོངས་སུ་དག་པར་བྱ། ངག་དང་སེམས་ཡོངས་སུ་དག་པར་བྱའོ། །དེ་ལ་ལུས་ཡོངས་སུ་དག་པ་གང་ཞེ་ན། གང་རང་གི་ལུས་སྟོང་པ་ཉིད་པས་སེམས་ཅན་ཐམས་ཅད་ཀྱི་ལུས་སྟོང་པ་ཉིད་དུ་རྗེས་སུ་རྟོགས་པ་དང་།
རང་གི་ལུས་དབེན་པས་སེམས་ཅན་ཐམས་ཅད་ཀྱི་ལུས་དབེན་པ་ཉིད་དུ་རྗེས་སུ་རྟོགས་པ་དང་། རང་གི་ལུས་བེམས་པོ་པས་སེམས་ཅན་ཐམས་ཅད་ཀྱི་ལུས་བེམས་པོར་རྗེས་སུ་རྟོགས་པ་དང་། རང་གི་ལུས་གཡོ་བ་མེད་པས་སེམས་ཅན་ཐམས་ཅད་ཀྱི་ལུས་གཡོ་བ་མེད་པར་རྗེས་
སུ་རྟོགས་པ་དང་། རང་གི་ལུས་མིག་ཡོར་དང་འདྲ་བས་སེམས་ཅན་ཐམས་ཅད་ཀྱི་ལུས་མིག་ཡོར་ལྟ་བུར་རྗེས་སུ་རྟོགས་པ་དང་། རང་གི་ལུས་རྣམ་པར་དག་པས་སེམས་ཅན་ཐམས་ཅད་ཀྱི་ལུས་རྣམ་པར་དག་པར་རྗེས་སུ་རྟོགས་པ་སྟེ། འདི་ནི་ལུས་རྣམ་པར་དག་པ་ཞེས་

བྱའོ། །ཀླུའི་བདག་པོ་གཞན་ཡང་ལུས་ཡོངས་སུ་དག་པ་ནི་ལུས་ཀྱི་ལས་ལ་མངོན་པར་འདུ་མི་བྱེད་པར་རྟོགས་པ་སྟེ། དེ་མངོན་པར་འདུ་བྱེད་པ་ལ་ཡང་མངོན་པར་འདུ་བྱེད་པར་རྟོག་ཅིང་མངོན་པར་འདུ་བྱེད་པ་དང་། མངོན་པར་འདུ་མི་བྱེད་པ་ཡང་མཉམ་
པར་བྱེད། མངོན་པར་འདུ་མི་བྱེད་པ་དང་། མངོན་པར་འདུ་བྱེད་པ་ཡང་མཉམ་པར་བྱེད་པའོ། །དེ་ལ་ལུས་ཀྱང་ཡོངས་སུ་ཤེས་ཤིང་ལུས་ཀྱི་ཆོས་ཉིད་ཀྱང་རབ་ཏུ་ཤེས་སོ། །དེ་ལ་ལུས་ཀྱི་ཆོས་ཉིད་གང་ཞེ་ན། སྔོན་གྱི་མཐའ་ནས་མ་སྐྱེས་པ་ནི་ཆོས་ཉིད་དོ། །ཕྱི་མའི་
མཐར་མི་འཕོ་བ་ནི་ཆོས་ཉིད་དོ། །ད་ལྟར་བྱུང་བ་ན་མིག་ཡོར་ལྟ་བུའི་ཆོས་ཉིད་དེ། འདི་ནི་ལུས་ཀྱི་ཆོས་ཉིད་ཅེས་བྱའོ། །གཞན་ཡང་ལུས་ཀྱི་ཆོས་ཉིད་ནི་རྒྱུ་དང་རྐྱེན་ཚོགས་པའི་ཆོས་ཉིད་དེ། རྒྱུ་དང་རྐྱེན་གང་ཡིན་པ་དེ་དག་ཀྱང་སེམས་པ་མེད་པའི་ཕྱིར་སྟོང་པ། གཡོ་བ་མེད་པ།
ངོ་བོ་ཉིད་ཀྱིས་དབེན་པའོ། །ཀླུའི་བདག་པོ་བྱང་ཆུབ་སེམས་དཔའ་ལུས་ཀྱི་ཆོས་ཉིད་འདི་ལྟ་བུ་འདི་དག་ལ་རྟོག་པ་གང་ཡིན་པ་འདི་ཡང་ལུས་ཡོངས་སུ་དག་པའོ། །གཞན་ཡང་ལུས་ཡོངས་སུ་དག་པ་ནི་ཇི་ལྟར་དེ་བཞིན་གཤེགས་པའི་སྐུ་ཟག་པ་མེད་ཅིང་ཁམས་གསུམ་དུ་
གཏོགས་པ་མ་ཡིན་པ་དེ་བཞིན་དུ། རང་གི་ལུས་ཀྱང་ཟག་པ་མེད་ཅིང་ཁམས་གསུམ་དུ་གཏོགས་པ་མ་ཡིན་པར་རྟོགས་པ་སྟེ། དེ་ཟག་པ་མེད་པའི་ལུས་ཀྱི་སྲིད་པར་སྐྱེ་བ་སྒྲུབ་ཀྱང་ཟག་པ་མེད་པ་ཡང་དག་པའི་མཐའ་དེ་ཡང་མི་འདོར་རོ། །དེ་ཟག་པ་མེད་པའི་ལུས་ཀྱིས་
གཟུགས་ཀྱི་ལུས་ཡོངས་སུ་གྲུབ་པ་ཡང་སྟོན་ལ། རང་བཞིན་གྱིས་ལུས་ཀྱི་ཆོས་ཉིད་ཀྱི་རང་བཞིན་འདི་ཡང་མི་འདོར་རོ། །དེ་དེ་བཞིན་གཤེགས་པའི་སྐུ་རྣམ་པར་དག་པས་རང་གི་ལུས་རྣམ་པར་དག་པར་རྟོགས་པ་དང་། རང་གི་ལུས་རྣམ་པར་དག་པས་སེམས་
ཅན་ཐམས་ཅད་ཀྱི་ལུས་རྣམ་པར་དག་པར་རྟོགས་པ་འདི་ཡང་ལུས་ཡོངས་སུ་དག་པའོ། །དེ་ལ་ངག་ཡོངས་སུ་དག་པ་གང་ཞེ་ན། གང་འཕགས་པ་རྣམས་དང་། གང་འཕགས་པ་མ་ཡིན་པ་རྣམས་ཀྱི་ངག་ཐམས་ཅད་ནི་རྣམ་པར་དག་པ་ཡིན་ན། སྒྲོ་བཏགས་པར་ན་ནི་བྱིས་པ་སོ་

སོའི་སྐྱེ་བོ་རྣམས་ནི་ཀུན་ནས་ཉོན་མོངས་པར་འགྱུར། ལེགས་པར་ཐོས་པ་དང་། ཉེས་པར་ཐོས་པ་རྣམས་ལ་རྗེས་སུ་ཆགས་པ་དང་། ཁོང་ཁྲོ་བར་འགྱུར་རོ། །ཡང་དག་པར་ངག་ཐམས་ཅད་ནི་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བ་སྟེ། དེ་
དག་ལ་འདོད་ཆགས་དང་། ཞེ་སྡང་དང་། རྨོངས་པའི་ཡི་གེ་རྣམས་མི་འབྱུང་བས་དེའི་ཕྱིར་ངག་ཐམས་ཅད་རྣམ་པར་དག་པ་ཞེས་བྱའོ། །ངག་ནི་གསོག་སྟེ། གསོག་ལ་ནི་འདོད་ཆགས་དང་། ཞེ་སྡང་དང་། གཏི་མུག་གི་ཉོན་མོངས་པ་རྣམས་ཀྱིས་ཉོན་མོངས་པར་འགྱུར་བ་
མེད་དོ། །ངག་ནི་གཟུང་བ་མ་ཡིན་པ་སྟེ། མིག་གིས་གཟུང་བར་བྱ་བ་མ་ཡིན་པ་ནས་ཡིད་ཀྱི་བར་གྱིས་གཟུང་བར་བྱ་བ་མ་ཡིན་པའོ། །ངག་ནི་རླུང་དང་འདྲ་སྟེ། རླུང་གིས་འགྱུར་བའི་ཚོགས་པ་མེད་པར་མི་འབྱུང་ངོ་། །ངག་ནི་བྲག་ཅ་དང་འདྲ་སྟེ། གང་འཕགས་པ་
རྣམས་དང་། གང་འཕགས་པ་མ་ཡིན་པ་རྣམས་ཀྱི་ངག་ནི་ནང་ན་ཡང་མི་གནས་ཕྱི་རོལ་དུ་ཡང་མ་ཡིན། གཉིག་མེད་པར་ཡང་མི་དམིགས་ཏེ། རྣམ་པར་རྟོག་པ་དང་། རྣམ་པར་དཔྱོད་པ་གང་དག་གིས་ངག་འབྱུང་བའི་རྣམ་པར་རྟོག་པ་དང་། རྣམ་པར་དཔྱོད་པ་དེ་དག་
ཀྱང་མི་གནས་པ། གནས་པ་མེད་པ། རྣམ་པར་རིག་པ་མེད་པའོ། །ཀླུའི་བདག་པོ་དེ་ལྟ་བས་ན། དེ་བཞིན་གཤེགས་པའི་གསུང་འབྱུང་བ་གང་ཡིན་པ་དང་། གཞན་སེམས་ཅན་རྣམས་ཀྱི་ངག་གང་ཡིན་པ་དེ་ཐམས་ཅད་ཀྱང་མེད་པ། གསོག །བརྫུན་པ། སླུ་བའི་
ཆོས་ཅན་ནོ། །གསོལ་པ། བཅོམ་ལྡན་འདས་དེ་བཞིན་གཤེགས་པ་ཡང་དག་པར་གསུང་བ་མ་ལགས་སམ། བཀའ་སྩལ་པ། ཀླུའི་བདག་པོ་དེ་དེ་བཞིན་ཏེ། དེ་བཞིན་གཤེགས་པ་ནི་ཡང་དག་པར་གསུང་བའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་
འདུས་བྱས་ཐམས་ཅད་ནི་མ་བྱུང་བར་མཁྱེན་ཏེ། ཇི་ལྟར་མཁྱེན་པ་དེ་བཞིན་དུ་དེ་སྟོན་ཏོ། །དོན་འདིས་ན་དེ་བཞིན་གཤེགས་པ་ཡང་དག་པ་གསུང་བའོ། །ཀླུའི་བདག་པོ་དེ་བཞིན་གཤེགས་པའི་གསུང་ཡི་གེ་ལ་དཔྱོད་པ་གང་ཡིན་པའི་ཡི་གེ་དེ་དག་ལ་སེམས་ཅན་ཐམས་

ཅད་ཀྱང་དཔྱོད་དེ། དེ་བས་ན་སེམས་ཅན་ཐམས་ཅད་ནི་ཆོས་ཀྱི་འཁོར་ལོ་བསྐོར་ཡང་ཆོས་ཀྱི་ངོ་བོ་ཉིད་མི་ཤེས་སོ། །དེའི་ཕྱིར་དེ་དག་ཡི་གེ་ལ་དཔྱོད་པ་ནི་དེ་བྱེད་པའི་སྡུག་བསྔལ་ཡང་དག་པར་ཟད་པར་བྱ་བའི་ཕྱིར་འབྱུང་བ་མ་ཡིན་ནོ། །ཀླུའི་བདག་པོ་དེ་ལྟར་
ན་བྱིས་པ་སོ་སོའི་སྐྱེ་བོ་ཐམས་ཅད་ནི་སྒྲ་ཐམས་ཅད་ལ་མངོན་པར་ཞེན་ཏོ། །དེ་དག་ནི་ཐ་སྙད་ཐམས་ཅད་ལ་ཡང་ཉོན་མོངས་པ་རྣམས་དང་མ་འདྲེས་པའི་ངག་འབྱུང་ངོ་། །དེ་དག་ཉོན་མོངས་ཀྱང་ཀུན་ནས་ཉོན་མོངས་པས་ཀུན་ནས་ཉོན་མོངས་པར་འགྱུར་བ་ནི་མ་ཡིན་ནོ། །ངག་ལ་
དཔྱོད་ཅིང་རྣམ་པར་བྱང་བར་བྱེད་ཀྱང་ཆོས་ཉིད་ཀྱི་རང་བཞིན་གྱིས་རྣམ་པར་དག་པར་འགྱུར་བ་མ་ཡིན་ཏེ། ཀླུའི་བདག་པོ་འདི་ནི་ངག་ཡོངས་སུ་དག་པ་ཞེས་བྱའོ། །དེ་ལ་སེམས་ཡོངས་སུ་དག་པ་གང་ཞེ་ན། སེམས་ཀྱི་རང་བཞིན་ནི་ཀུན་ནས་ཉོན་མོངས་པར་བྱ་བར་མི་ནུས་སོ། །
དེ་ཅིའི་ཕྱིར་ཞེ་ན། སེམས་ནི་རང་བཞིན་གྱིས་འོད་གསལ་ཡང་དེ་ནི་གློ་བུར་གྱི་ཉོན་མོངས་པ་དང་། ཉེ་བའི་ཉོན་མོངས་པ་རྣམས་ཀྱིས་ཉེ་བར་ཉོན་མོངས་སོ། །དེ་ལ་བྱང་ཆུབ་སེམས་དཔའ་ནི་གློ་བུར་གྱི་ཉེ་བའི་ཉོན་མོངས་པ་རྣམས་ཀྱི་སྐབས་མི་འབྱེད་དེ། དེ་རང་བཞིན་གྱིས་ཤིན་ཏུ་རྣམ་
པར་དག་པའི་སེམས་ཀྱི་ལས་གང་གིས་དགེ་བའི་རྩ་བ་དེ་དག་ལ་སོགས་པའི་སེམས་དེ་ཡང་སེམས་ཀྱི་རང་བཞིན་ཉིད་དུ་རབ་ཏུ་ཤེས་སོ། །སེམས་ཀྱི་ལས་གང་གིས་སེམས་ཅན་ཐམས་ཅད་ལ་བྱམས་པས་ཁྱབ་པར་བྱེད་པའི་སེམས་དེ་ཡང་སེམས་དང་མཉམ་པ་ཉིད་དུ་རབ་ཏུ་ཤེས་སོ། །
སེམས་ཀྱི་ལས་གང་གིས་དགེ་བའི་རྩ་བ་ཐམས་ཅད་བྱང་ཆུབ་ཏུ་ཡོངས་སུ་སྔོ་བའི་སེམས་དེ་ཡང་བྱང་ཆུབ་དང་མཉམ་པ་ཉིད་དུ་རབ་ཏུ་ཤེས་སོ། །དེ་ལྟར་སེམས་ཡོངས་སུ་དག་པ་འདོད་ཆགས་ལ་སྤྱོད་པ་ཐམས་ཅད་དང་ལྷན་ཅིག་གནས་ཀྱང་འདོད་ཆགས་ཀྱི་དྲི་མས་ཀུན་ཏུ་གོས་
པར་མི་འགྱུར་རོ། །དེ་བཞིན་དུ་ཞེ་སྡང་ལ་སྤྱོད་པ་དང་། གཏི་མུག་ལ་སྤྱོད་པ་དང་། ཆ་མཉམ་པ་ལ་སྤྱོད་པའི་སེམས་ཅན་རྣམས་དང་ལྷན་ཅིག་གནས་ཤིང་འདུག་ཀྱང་དེ་དག་གི་དྲི་མས་ཀུན་ཏུ་གོས་པར་མི་འགྱུར་རོ། །དེ་ལྟར་སེམས་ཡོངས་སུ་དག་པ་དེ་འདོད་པའི་ཁམས་སུ་

སྐྱེ་སྟེ། གཟུགས་ན་སྤྱོད་པའི་ཚངས་པ་རབ་ཏུ་ཞི་བའི་སྤྱོད་ལམ་ཅན་རྣམས་དང་ལྷན་ཅིག་གནས་ཤིང་འདུག་ཀྱང་དེ་དག་གི་ཟིལ་གྱིས་གནོན་མི་ནུས་ཀྱི། བྱང་ཆུབ་སེམས་དཔའ་དེ་ཉིད་ཀྱིས་ལྷ་དེ་དག་ཟིལ་གྱིས་གནོན་ཏོ། །དེ་ལྟར་སེམས་ཡོངས་སུ་དག་པ་དེ་གཟུགས་ཀྱི་
ཁམས་སུ་སྐྱེས་ལ་འདོད་པའི་ཁམས་ཀྱི་སེམས་ཅན་རྣམས་དང་ལྷན་ཅིག་ཏུ་གནས་ཤིང་འདུག་ཀྱང་ཡོངས་སུ་སྐྱོ་བ་མི་སྐྱེད་ཅིང་བདག་བརྗོད་པས་སེམས་ཅན་དེ་དག་ལ་བརྙས་པའི་སེམས་མི་སྐྱེད་དོ། །དེ་ལྟར་སེམས་ཡོངས་སུ་དག་པ་དེ་ཏིང་ངེ་འཛིན་དང་སྙོམས་པར་འཇུག་པ་
ཐམས་ཅད་ལ་སྙོམས་པར་ཞུགས་ཀྱང་དེ་ཏིང་ངེ་འཛིན་དང་སྙོམས་པར་འཇུག་པ་དེ་དག་གི་དབང་གིས་མི་སྐྱེའོ། །དེ་ཅིའི་ཕྱིར་ཞེ་ན། ཀླུའི་བདག་པོ་འདི་ལྟར་བྱང་ཆུབ་སེམས་དཔར་དེའི་སེམས་ངེས་པར་སེམས་པ་ཐབས་མཁས་པས་མངོན་པར་སྒྲུབ་པའི་ཕྱིར་རོ། །ཀླུའི་བདག་པོ་དེ་
ལྟར་བྱང་ཆུབ་སེམས་དཔའ་རྣམ་པར་དག་པའི་ལམ་འདི་ལ་སྒོམ་པ་རྣམ་པར་དག་པའི་སྤྱོད་པ་ལ་མཁས་པ་ཡིན་ནོ། །ཀླུའི་བདག་པོ་དངོས་པོ་སྒོམ་པས་ལམ་སྒོམ་པ་མ་ཡིན། དངོས་པོ་རྣམ་པར་འཇིག་པས་ལམ་སྒོམ་པ་མ་ཡིན། དངོས་
པོ་ཁས་ལེན་པ་མ་ཡིན། དངོས་པོ་ཁས་མི་ལེན་པས་ལམ་སྒོམ་པ་མ་ཡིན། དངོས་པོ་སྲིད་པས་མ་ཡིན། དངོས་པོ་མི་སྲིད་པས་ལམ་སྒོམ་པ་མ་ཡིན། དངོས་པོ་སྐྱེ་བས་མ་ཡིན། དངོས་པོ་འགག་པས་ལམ་སྒོམ་པ་མ་ཡིན། དངོས་པོ་འཛིན་པས་མ་ཡིན། དངོས་པོ་འདོར་བས་ལམ་སྒོམ་པ་མ་ཡིན།
བདག་ཏུ་མ་ཡིན། བདག་མེད་པར་མ་ཡིན། སེམས་ཅན་དུ་མ་ཡིན། སྲོག་ཏུ་མ་ཡིན། གསོ་བར་མ་ཡིན། སྐྱེས་བུར་མ་ཡིན། གང་ཟག་ཏུ་མ་ཡིན། ཤེད་ལས་སྐྱེས་སུ་མ་ཡིན། ཤེད་བུ་སྒོམ་པས་ལམ་སྒོམ་པ་མ་ཡིན། ཕུང་པོ་མི་རྟག་པར་སྒོམ་པས་
ལམ་སྒོམ་པ་མ་ཡིན། ཕུང་པོ་སྡུག་བསྔལ་བར་སྒོམ་པས་མ་ཡིན། ཕུང་པོ་བདག་མེད་པར་སྒོམ་པས་མ་ཡིན། ཕུང་པོ་ཞི་བར་སྒོམ་པས་མ་ཡིན། ཕུང་པོ་འདོད་ཆགས་དང་བྲལ་བར་སྒོམ་པས་ལམ་སྒོམ་པ་མ་ཡིན། ཕུང་པོ་སྒྱུ་མ་ལྟ་བུར་སྒོམ་པས་ལམ་སྒོམ་

པ་མ་ཡིན། ཕུང་པོ་རྨི་ལམ་ལྟ་བུར་སྒོམ་པས་མ་ཡིན། ཕུང་པོ་མིག་ཡོར་ལྟ་བུར་སྒོམ་པས་མ་ཡིན། ཕུང་པོ་བྲག་ཅ་ལྟ་བུར་སྒོམ་པས་མ་ཡིན། ཕུང་པོ་སྟོང་པ་ཉིད་དུ་སྒོམ་པས་ལམ་སྒོམ་པ་མ་ཡིན། ཕུང་པོ་མཚན་མ་མེད་
པར་སྒོམ་པས་ལམ་སྒོམ་པ་མ་ཡིན། ཕུང་པོ་སྨོན་པ་མེད་པར་སྒོམ་པས་ལམ་སྒོམ་པ་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་གང་སྟོང་པ་དེ་ནི་དངོས་པོ་མ་ཡིན། དངོས་པོ་མེད་པ་མ་ཡིན་ནོ། །གང་མཚན་མ་མེད་པ་དང་། སྨོན་པ་མེད་པ་དེ་ནི་དངོས་པོ་མ་ཡིན།
དངོས་པོ་མེད་པ་མ་ཡིན་ཏེ། འདི་ནི་ལམ་སྒོམ་པ་ཞེས་བྱའོ། །ཕུང་པོ་དང་། ཁམས་དང་། སྐྱེ་མཆེད་སྒོམ་པས་ལམ་སྒོམ་པ་མ་ཡིན། མ་རིག་པ་ལ་འདོད་ཆགས་དང་བྲལ་བར་སྒོམ་པས་ལམ་སྒོམ་པ་མ་ཡིན་པ་ནས་རྒ་ཤིའི་བར་ལ་འདོད་ཆགས་དང་བྲལ་བར་སྒོམ་པས་
ལམ་སྒོམ་པ་མ་ཡིན་ནོ། །དེ་བཞིན་དུ་འཇིག་རྟེན་པ་དང་། འཇིག་རྟེན་ལས་འདས་པ་དང་། འདུས་བྱས་དང་། འདུས་མ་བྱས་དང་། ཟག་པ་དང་བཅས་པ་དང་། ཟག་པ་མེད་པ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་སྒོམ་པས་ལམ་སྒོམ་
པ་མ་ཡིན་ཏེ། ཀླུའི་བདག་པོ་གང་ཆོས་ཐམས་ཅད་དངོས་པོར་ཡང་མི་བྱེད། དངོས་པོ་མེད་པར་ཡང་མི་བྱེད་པ་འདི་ནི་ལམ་སྒོམ་པ་ཞེས་བྱའོ། །ཆོས་ཐམས་ཅད་ལ་མི་གནས་པར་སྒོམ་པ་དང་། བླང་བ་མེད་པ་དང་དོར་བ་མེད་པར་སྒོམ་པ་འདི་ནི་ལམ་སྒོམ་པ་ཞེས་བྱའོ། །
བཅོམ་ལྡན་འདས་ཀྱིས་རྣམ་པར་དག་པའི་ལམ་སྒོམ་པའི་ཡོན་ཏན་གྱི་ལེའུ་འདི་བཤད་པའི་ཚེ་འཁོར་གྱི་དཀྱིལ་འཁོར་དེ་ལས་སྲོག་ཆགས་དགུ་ཁྲི་ཉིས་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །སྲོག་ཆགས་ཁྲི་ཉིས་སྟོང་ནི་རྗེས་སུ་འཐུན་པའི་
བཟོད་པ་རབ་ཏུ་ཐོབ་པར་གྱུར་ཏོ། །སྲོག་ཆགས་བདུན་སྟོང་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏེ། དེ་དག་ཐམས་ཅད་ཀྱིས་མགྲིན་གཅིག་ཏུ་འདི་སྐད་ཅེས་སྨྲས་སོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་དག་གིས་རྣམ་པར་དག་པའི་ལམ་

སྒོམ་པ་འདི་མཉན་ཏེ་ཐོས་ནས་མི་དངང་ཞིང་ཁོང་དུ་ཆུད་པར་བྱེད་ལ་འཛིན་པ་དེ་དག་ནི་དེ་བཞིན་གཤེགས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཛིན་པར་འགྱུར་རོ། །དེ་དག་ནི་དེ་བཞིན་གཤེགས་པས་བསྐོར་བའི་ཆོས་ཀྱི་འཁོར་ལོ་རྗེས་སུ་སྐོར་བར་འགྱུར་རོ། །
དེ་དག་ནི་དེ་བཞིན་གཤེགས་པའི་དམ་པའི་ཆོས་དཀོན་མཆོག་རྗེས་སུ་སྲུང་བར་འགྱུར་རོ། །དེ་དག་ནི་སེང་གེའི་ཁྲི་ལ་འདུག་ཅིང་ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ད་ལྟར་བསྒྲགས་པ་དེ་བཞིན་དུ་སེང་གེའི་སྒྲ་སྒྲོགས་པར་
འགྱུར་རོ། །དེ་དག་ནི་བདུད་ཀྱི་དཀྱིལ་འཁོར་ཕམ་པར་བྱེད་པར་འགྱུར་རོ། །དེ་དག་ནི་ཕ་རོལ་རྒོལ་བ་ཐམས་ཅད་ཚར་ཆོད་པར་འགྱུར་རོ། །དེ་དག་ནི་ཆོས་ཀྱི་ཏོག་སྒྲེང་བར་འགྱུར་རོ། །དེ་དག་ནི་ཆོས་ཀྱི་སྒྲོན་མེ་འབར་བར་བྱེད་པར་འགྱུར་རོ། །དེ་དག་ནི་ཆོས་ཀྱི་
དུང་རབ་ཏུ་འབུད་པར་འགྱུར་རོ། །དེ་དག་ནི་ཆོས་ཀྱི་རྔ་རྡུང་བར་འགྱུར་རོ། །དེ་དག་ནི་ཆོས་ཀྱི་ཆར་འབེབས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཀླུ་དེ་དག་དང་། འཁོར་བཞི་པོ་དེ་དག་གིས་ལེགས་པར་སྨྲས་པ་ལ་རྗེས་སུ་ཡི་རང་བ་མཛད་ནས། ཀླུའི་རྒྱལ་པོ་
མ་དྲོས་པ་ལ་ཚིགས་སུ་བཅད་དེ་བཀའ་སྩལ་པ། དངོས་པོར་འདུ་ཤེས་གང་གིས་ཀྱང་། །ལམ་བསྒོམ་ནུས་པ་མ་ཡིན་ཏེ། །ལམ་འདི་ལ་ནི་འདི་ལྟ་བུར། །དངོས་པོར་འདུ་ཤེས་ཡོད་མ་ཡིན། །དངོས་པོ་དངོས་པོར་བྱེད་པས་མིན། །དངོས་མེད་དངོས་པོ་མེད་
བྱེད་པས། །ནམ་མཁའ་རྣམ་དག་གང་འདྲ་བའི། །ལམ་བསྒོམ་ནུས་པ་མ་ཡིན་ནོ། །གང་ཞིག་ལམ་ནི་དངོས་བྱེད་མིན། །དངོས་མེད་དངོས་པོ་མེད་བྱེད་མིན། །དངོས་དང་དངོས་མེད་བྲལ་བ་དེ། །མཆོག་གི་ལམ་ནི་སྒོམ་པའོ། །བདག་ཏུ་ལམ་སྒོམ་མ་ཡིན་
ལ། །བདག་མེད་སྒོམ་པས་མ་ཡིན་ཏེ། །འདི་ལྟར་གཉིས་སུ་མེད་པའི་ལམ། །གྲུབ་ཅིང་བདེ་བ་བླ་ན་མེད། །དེ་བཞིན་སྲོག་དང་གསོ་བ་དང་། །གང་ཟག་ཀྱང་ནི་དེ་བཞིན་ཏེ། །གང་ཟག་མེད་པའི་ལམ་འདི་ནི། །སྲོག་མེད་རབ་ཏུ་གནས་པ་མེད། །སྟོང་པ་

ཉིད་ལ་གནས་ནས་སུ། །གང་དག་ལ་ལ་ལམ་སྒོམ་པ། །དེ་དག་འཕགས་པའི་ལམ་ལས་རིང་། །དེ་དག་ལམ་སྒོམ་མ་ཡིན་ནོ། །སྟོང་པ་ཉིད་ལ་ལམ་མེད་དེ། །ལམ་སྒོམ་པ་ཡང་ཡོད་མ་ཡིན། །དེ་ལྟར་མཚན་ཉིད་གཅིག་པ་ནི། །མཐའ་
འདས་སྟོང་པ་སྟོང་པ་ཉིད། །སྐྱེ་བའི་མཚན་ཉིད་ལམ་མ་ཡིན། །མཚན་ཉིད་མེད་པའང་དེ་མ་ཡིན། །གང་ཞིག་མ་སྐྱེས་མི་འགོག་པ། །དེ་ནི་ལམ་སྒོམ་ཡིན་པར་གསུངས། །ཕུང་པོ་ལྔ་ནི་སྒྱུ་མ་ལྟར། །གང་གིས་འདུ་ཤེས་འཇུག་པ་དང་། །དངོས་པོར་འཛིན་པའི་
འདུ་ཤེས་ཅན། །ལམ་ལ་སྒོམ་པ་ག་ལ་ཡིན། །ལམ་འདི་འཇིག་རྟེན་འདས་པ་སྟེ། །འདི་ལ་ཕུང་པོ་དངོས་མེད་ན། །ཕུང་པོ་རྣམ་པར་འཇིག་པའི་ཕྱིར། །སྒོམ་པར་ནུས་པ་མ་ཡིན་ནོ། །ཕུང་པོའི་དེ་བཞིན་ཉིད་དེ་ནི། །དེ་བཞིན་ཉིད་དུ་རབ་ཏུ་བསྟན། །དེ་བཞིན་
ཁོ་ན་དེ་ལ་ནི། །གཞན་དུ་འགྱུར་བ་མི་དམིགས་སོ། །དེ་བཞིན་ཉིད་ནི་ལམ་སྒོམ་མིན། །དེ་ལ་ཡོད་དང་མེད་པ་མཉམ། །དེ་བཞིན་ཉིད་ལ་དེ་བཞིན་ཤེས། །དེ་ནི་ལམ་ལ་སྒོམ་པ་ཡིན། །ཆོས་རྣམས་ཀུན་ནི་དེ་བཞིན་ཉིད། །ངས་ནི་དེ་ལྟར་སངས་རྒྱས་ཏེ། །
དེ་ཉིད་རྟོགས་པར་བྱ་བའི་ཕྱིར། །ལམ་ལ་སྒོམ་པར་བྱེད་པ་ཡིན། །གང་ཞིག་ལམ་ནི་མི་ཤེས་བཞིན། །ལྷག་པར་བྱེད་ལའང་མ་ཞུགས་པ། །སངས་རྒྱས་ཆོས་རྣམས་ཚོལ་བ་ན། །དེ་ལ་ཐོགས་པ་འབྱུང་བར་འགྱུར། །ངས་ནི་ཇི་ལྟར་ལམ་བསྒོམས་ཤིང་། །ཇི་ལྟ་
བུར་ནི་རེག་པ་ལྟར། །དེ་བཞིན་ཉིད་ལ་གནས་ནས་སུ། །དེ་ལྟར་དེ་ནི་བཤད་པར་བྱ། །ཐེག་པ་དམན་པ་འབྱུང་བའི་ཕྱིར། །ལམ་འདི་ཚད་དང་བཅས་པ་ཡིན། །ཐེག་པ་ཆེན་པོ་འབྱུང་བའི་ཕྱིར། །འདི་ནི་ལམ་གྱི་དམ་པ་ཡིན། །གང་དག་ལ་ལ་ལམ་ཐོབ་ལ། །ཐོབ་
ནས་རྒྱུན་འཆད་མི་བྱེད་པ། །དེ་དང་དེ་དག་ལམ་ཐོབ་སྟེ། །ལམ་བསྒོམ་པ་ནི་སྒོམ་པར་བྱེད། །མཉམ་སྟེ་མི་མཉམ་མེད་པའི་ལམ། །རྣལ་དུ་འདུག་ཅིང་དྲང་ཤེས་པ། །ངན་པའི་ལམ་ཀུན་རྣམ་སྤངས་ནས། །བྱང་ཆུབ་རྗེས་སུ་ཐོབ་པར་བྱེད། །ཇི་ལྟར་ཀླུ་ཡི་རྒྱལ་

པོ་ཁྱོད། །རང་གི་གནས་ན་འདུག་བྱེད་ཅིང་། །གནས་ནས་གཡོས་པ་མེད་པར་ཡང་། །རྒྱ་མཚོ་འདི་ནི་གང་བར་བྱེད། །དེ་ལྟར་སེམས་ཅན་ཆེན་པོ་དག །ལམ་བསྒོམ་པ་ནི་བསྒོམས་ནས་སུ། །ཆོས་ཀྱི་དབྱིངས་ལས་མ་གཡོས་པར། །ཡེ་ཤེས་རྒྱ་མཚོ་འགེངས་
པར་བྱེད། །ཇི་ལྟར་ཀླུ་ཡི་རྒྱལ་པོ་ཁྱོད། །ས་རྣམས་འདི་དག་ཐམས་ཅད་ལ། །ཆུ་ཡི་རྒྱུན་གྱིས་ངོམས་བྱེད་ཀྱང་། །དེ་ནི་ནང་ན་གནས་པ་མེད། །དེ་ལྟར་སེམས་ཅན་ཆེན་པོ་དག །བསྒོམ་པ་འདི་ལ་བསྒོམས་ནས་ནི། །སེམས་ཅན་ཆོས་ཀྱིས་ཚིམ་བྱེད་ཀྱང་། །ནང་
ན་གནས་པ་མ་ཡིན་ནོ། །ཇི་ལྟར་ཀླུ་ཡི་རྒྱལ་པོ་ཁྱོད། །ཕ་རོལ་གནོན་པས་གདུང་བ་མེད། །དེ་ལྟར་དཔའ་བོ་ལམ་ཐོབ་པ། །ཉོན་མོངས་པས་ནི་གདུང་བ་མེད། །སེམས་ཅན་གང་དག་ལྟ་གནས་ཤིང་། །ལོག་པའི་ལམ་དུ་ལྟུང་བ་དག །ལམ་འདི་ལ་ནི་རབ་གནས་ན། །དེ་
དག་མྱ་ངན་འདའ་བར་འགྱུར། །ལམ་འདི་ལ་ནི་གནས་ནས་སུ། །བྱང་ཆུབ་སེམས་དཔའ་གྲགས་ཆེན་པོ། །བདུད་སྡིག་ཅན་དང་དེ་བཞིན་དུ། །ཕ་རོལ་མུ་སྟེགས་ཅན་རྣམས་འདུལ། །གང་ཚེ་ལམ་ནི་ཐོབ་གྱུར་པ། །དེ་ཚེ་གཡོ་བ་མེད་པར་འགྱུར། །འཇིག་རྟེན་
ཆོས་རྣམས་ཟིལ་མནན་ནས། །པད་མ་ལྟ་བུར་རབ་ཏུ་སྤྱོད། །བྱང་ཆུབ་སེམས་ལས་མ་ཉམས་ཤིང་། །ལམ་འདི་ལ་ནི་མཉམ་གཞག་པ། །སེམས་ཅན་གཞན་རྣམས་སྟོང་དག་ཀྱང་། །བྱང་ཆུབ་ལ་ནི་རབ་ཏུ་འཛུད། །ལམ་འདི་ལ་ནི་རབ་གནས་པ། །མངོན་
པར་ཤེས་པ་ལྔ་ཐོབ་ནས། །རྫུ་འཕྲུལ་ཐམས་ཅད་རྣམ་སྤྲུལ་ཞིང་། །སྲོག་ཆགས་རྣམས་ལ་ཆོས་སྟོན་ཏོ། །དེ་དག་ལུས་དང་ངག་དང་ཡིད། །ཐམས་ཅད་དུ་ནི་ཡོངས་དག་ཅིང་། །བསམ་གྱིས་མི་ཁྱབ་སེམས་ཅན་ཁམས། །འཕགས་པའི་ལམ་ལ་རབ་ཏུ་འཛུད། །
དམིགས་པ་མེད་པའི་བཟོད་པ་གང་། །རིག་རྟོགས་ཁོང་དུ་ཆུད་རྟོགས་པ། །དེ་བཞིན་གཤེགས་ཀྱི་རྟོགས་ཐོབ་ནས། །སྲོག་ཆགས་རྣམས་ལ་ཆོས་སྟོན་ཏོ། །འཇིག་རྟེན་འདི་འགྲོ་གང་ཡིན་པ། །དེ་བཞིན་གཤེགས་འགྲོ་དེ་ཡིན་ཏེ། །དེ་དག་ཁོང་དུ་ཆུད་

རྟོགས་ན། །དེ་དག་འགྲོ་བ་མེད་པར་འགྱུར། །སེམས་ཅན་ཀུན་གྱི་འགྲོ་གང་ཡིན། །དེ་དག་འགྲོ་བ་ངེས་འགྲོ་ཞིང་། །སངས་རྒྱས་ཆོས་འདིར་བསླབས་ནས་སུ། །སྒྱུ་མའི་ཆོས་ཀྱིས་རྣམ་པར་སྤྲུལ། །ཇི་ལྟར་ལམ་ནི་འདི་སྒོམ་ཞིང་། །གང་
དག་ལམ་ལ་སྒོམ་བྱེད་པ། །དེ་དག་སྔགས་དང་ཡོན་ཏན་རྣམས། །འདྲེན་པ་དག་ནི་ཀུན་གྱིས་གསུངས། །དེ་དག་གི་ནི་ཡོན་ཏན་མཐའ། །བརྒྱ་ལམ་ན་ཡང་རྟོགས་མི་ནུས། །གང་དག་ལམ་ནི་འདི་སྒོམ་པ། །དེ་དག་དངོས་པོ་མེད་ལ་གནས། །གང་དག་
མི་སྐྱེ་མི་འབྱུང་བའི། །ལམ་འདི་ལ་ནི་རབ་ཞུགས་པ། །དེ་ལ་དམིགས་ཅན་ཐམས་ཅད་དང་། །བདུད་ཀྱིས་གཏིང་དཔོགས་མ་ཡིན་ནོ། །དེ་དག་གུས་བཅས་དྲན་པ་དང་། །བློ་གྲོས་རྟོགས་དང་གཟུངས་རྣམས་དང་། །སྤོབས་པ་ཐོབ་ཅིང་ཚུལ་ཁྲིམས་དང་། །
ཐོས་དང་གཏོང་བས་རྣམ་པར་འཕེལ། །གང་དག་ལམ་ནི་འདི་སྒོམ་པ། །ལུས་དག་ཅིང་ནི་ངག་དག་ལ། །སེམས་དག་ཤིན་ཏུ་སྦྱངས་པ་རྣམས། །རབ་དག་ཤིན་ཏུ་རྣམ་པར་དག །གང་དག་ལམ་ནི་འདི་སྒོམ་པ། །འཕགས་པའི་རྟོགས་པ་རྗེས་འཐོབ་ཅིང་། །ཟབ་
མོའི་ཚུལ་ལ་མཁས་པ་སྟེ། །ཆགས་མེད་ཡེ་ཤེས་འཁྲུལ་པ་མེད། །གང་དག་འདས་པའི་སངས་རྒྱས་དང་། །གང་དག་མ་འོངས་ད་ལྟར་བྱུང་། །རྫོགས་པའི་སངས་རྒྱས་གང་ཇི་སྙེད། །ལམ་ཐོབ་པས་ནི་མཆོད་པ་ཡིན། །མདོ་སྡེ་འདི་ལ་གང་དགའ་བ། །
སེམས་ཅན་དེ་སྙེད་ལེགས་པར་རྙེད། །དེ་བཞིན་གཤེགས་པ་ཤིན་ཏུ་མཐོང་། །དེ་དག་དམ་ཆོས་རབ་ཏུ་ཐོས། །དེ་ནས་བཅོམ་ལྡན་འདས་ཀྱིས་ཆོས་བསྟན་པས་ཀླུའི་རྒྱལ་པོ་མ་དྲོས་པ། ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་
བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་། མངོན་པར་འཚལ་བ་མངོན་པར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ཐབས་ཅིག་ཏུ་དགུང་ཟླ་གསུམ་བདག་གི་གནས་མ་དྲོས་པར་བཞུགས་པར་

བཅོམ་ལྡན་འདས་ཀྱིས་གནང་བར་མཛད་དུ་གསོལ། བདག་གིས་རྔོ་ཅི་ཐོགས་སུ་ཀུན་ཏུ་སྤྱོད་པས་བཅོམ་ལྡན་འདས་ལ་བསྙེན་བཀུར་འཚལ་ལོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གང་བདག་གིས་འདི་ལྟ་བུའི་ཆོས་ཐོས་པ་ནི་བདག་གིས་དེ་བཞིན་གཤེགས་པ་ལ་
སླར་བགྱི་བའི་རྔོ་མི་ཐོགས་སོ། །དེ་བཞིན་གཤེགས་པ་ལ་མཆོད་པ་དེས་བདག་སླད་ཀྱིས་ཀྱང་འདི་འདྲ་བའི་ཆོས་ཐོས་པ་དང་འབྲལ་བར་མི་འགྱུར་བར་བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་གནང་བར་མཛད་དུ་གསོལ། དེ་ལ་བཅོམ་ལྡན་འདས་ཀྱིས་མ་གནང་ངོ་། །ཟླ་བ་
གཉིས་གསོལ་ཏེ། ཡང་དེ་བཞིན་དུ་བཅོམ་ལྡན་འདས་ཀྱིས་མ་གནང་ངོ་། །ཟླ་བ་ཕྱེད་གསོལ་པ་དང་། ཐུགས་བརྩེ་བའི་སླད་དུ་བཅོམ་ལྡན་འདས་ཀྱིས་དེ་ལ་ཅང་མི་གསུང་བས་གནང་བ་མཛད་དོ། །དེ་ནས་ཀླུའི་རྒྱལ་པོ་མ་དྲོས་པས་བཅོམ་ལྡན་འདས་ཀྱིས་ཅང་མི་གསུང་
བས་གནང་བར་རིག་ནས་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་གཉེན་དང་འཁོར་དུ་བཅས་པས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས། བཅོམ་ལྡན་འདས་ཀྱི་དྲུང་ནས་སོང་སྟེ་སྤྲིན་བསྡུས་འབྲུག་བསྒྲགས་ནས་འཛམ་བུའི་
གླིང་དུ་ཆར་པའི་རྒྱུན་མངོན་པར་ཕབ་སྟེ་རང་གི་གནས་སུ་ཕྱིན་ཏོ། །དེ་ནས་ཀླུའི་རྒྱལ་པོ་མ་དྲོས་པས་བུ་ཐུ་བོ་ལེགས་སྦྱིན་ཞེས་བྱ་བ་ལ་བོས་ནས། ལེགས་སྦྱིན་དང་། ལེགས་གནས་དང་། ཞི་བ་ལྡན་དང་། དབང་པོ་ཞི་དང་། རྣམ་པར་འཕྲུལ་དང་། གཟི་བརྗིད་ཆེ་
དང་། གཟི་བརྗིད་དཔག་མེད་དང་། དཔག་མེད་འཛིན་དང་། ཡོན་ཏན་དཔག་མེད་འཛིན་དང་། ཀུན་ནས་ཁ་དོག་དང་། གཟི་བརྗིད་མཆོག་དང་། ནོར་མི་ཟད་དང་། བཟོད་ལྡན་ལ་སོགས་པ་བུ་ལྔ་བརྒྱ་ཐེག་པ་ཆེན་པོ་ལ་ཡང་དག་པར་ཞུགས་པ་ཐམས་ཅད་ལ་བསྒོ་བ།
གཞོན་ནུ་ཁྱོད་ཤེས་པར་གྱིས་ཤིག །ཁོ་བོས་དེ་བཞིན་གཤེགས་པ་དགེ་སློང་གི་དགེ་འདུན་དང་། མངོན་པར་ཤེས་པ་མངོན་པར་ཤེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ཐབས་ཅིག་ཏུ་ཟླ་བ་ཕྱེད་སྤྱན་དྲངས་ནས་བཅོམ་ལྡན་འདས་ཀྱིས་ཁོ་བོ་ལ་ཐུགས་བརྩེ་བའི་

ཕྱིར་གནང་ངོ་། །དེ་ལ་ཁྱེད་ཐམས་ཅད་ལྷན་ཅིག་འདུས་ལ་ཀླུའི་རྩེ་བ་དང་། ཀླུའི་དགའ་བ་དང་། ཀླུའི་དབྱིབས་སྤོངས་ཤིག །འདོད་པ་ལ་རྩེ་བ་དང་། གཟུགས་དང་། སྒྲ་དང་། དྲི་དང་། རོ་དང་། རེག་པ་ལ་མངོན་པར་ཆགས་པ་སྤོངས་ལ་དེ་
བཞིན་གཤེགས་པ་མཆོད་པ་ལ་རབ་ཏུ་འདུན་པར་བྱའོ། །དྲན་པ་དང་། ཤེས་བཞིན་དང་། བག་ཡོད་པ་ལ་གནས་པར་གྱིས་ལ་བཅོམ་ལྡན་འདས་ལ་བསྙེན་བཀུར་གྱིས་ཤིག །དེ་ཅིའི་ཕྱིར་ཞེ་ན། བཅོམ་ལྡན་འདས་དེ་ནི་བག་མངའ་བའོ། །འཁོར་ཀྱང་
བག་ཡོད་པའོ། །ཅང་མཁྱེན་པའོ། །འཁོར་ཀྱང་ཅང་ཤེས་པའོ། །ཞི་བའོ། །འཁོར་ཀྱང་ཞི་བའོ། །དུལ་བའོ། །འཁོར་ཀྱང་དུལ་བའོ། །དེ་ལ་ཁྱེད་ཟླ་བ་ཕྱེད་ཀྱི་བར་དུ་ཆུང་མའི་འཁོར་གྱི་ནང་དུ་མ་འཇུག་ཤིག་འདོད་པའི་རྣམ་པར་རྟོག་པ་མི་སྐྱེད་ཅིང་རྣམ་པར་རྟོག་
པར་མི་བྱའོ། །གནོད་སེམས་ཀྱི་རྣམ་པར་རྟོག་པ་མི་སྐྱེད་ཅིང་རྣམ་པར་རྟོག་པར་མི་བྱའོ། །འཚེ་བའི་རྣམ་པར་རྟོག་པ་མི་སྐྱེད་ཅིང་རྣམ་པར་རྟོག་པར་མི་བྱའོ། །གཞན་ཡང་བཅོམ་ལྡན་འདས་ལ་ཆོས་ཉན་པ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་
དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དག་ཀྱང་འོང་གིས། དེ་ལ་ཁྱེད་ཀྱིས་ཇི་ལྟར་ཁོ་བོ་སྨ་བབ་པར་མི་འགྱུར་བ་དེ་ལྟ་བུའི་གནས་དང་བཀོད་པ་སྟོན་ཅིག །དེ་ལྟར་བཅོམ་ལྡན་འདས་ལ་མཆོད་པ་བྱས་ན་འཁོར་ཡི་
རངས་པར་འགྱུར་རོ། །དེ་ནས་ཀླུའི་རྒྱལ་པོ་མ་དྲོས་པས་ནང་མི་རྣམས་ལ་བསྒོ་ནས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་གངས་ཀྱི་རིའི་རྒྱལ་པོ་དང་མཚོ་ཆེན་པོ་མ་དྲོས་པ་གཉིས་ཀྱི་བར་དུ་འཁོར་གྱི་ཁྱམས་མཐའ་དཔག་ཚད་བདུན་བརྒྱ་པ་བཻ་དཱུརྱ་སྔོན་པོ་དག་པ་དང་།
འཛམ་བུ་ཆུ་ཀླུང་གི་གསེར་གྱིས་སྤྲས་པ་རྡོ་རྗེ་སྣ་ཚོགས་རྣམ་པར་བཀྲ་བ་མངོན་པར་སྤྲུལ་ཏོ། །འཁོར་གྱི་ཁྱམས་དེར་རིན་པོ་ཆེའི་ཤིང་ལྗོན་པ་བརྒྱད་ཁྲི་བཞི་སྟོང་རིན་པོ་ཆེ་ཐམས་ཅད་ཀྱིས་ལེགས་པར་བརྒྱན་པ། མེ་ཏོག་དང་། འབྲས་བུ་ཐམས་ཅད་དང་ལྡན་པ་དག་སྤྲུལ་ཏོ། །

རིན་པོ་ཆེའི་ཤིང་ལྗོན་པ་བརྒྱད་ཁྲི་བཞི་སྟོང་རེ་རེ་ལ་ཡང་ལོ་མ་རིན་པོ་ཆེ་ཐམས་ཅད་ཀྱིས་ལེགས་པར་བརྒྱན་པ། མུ་ཏིག་དམར་པོའི་དོ་ཤལ་དཔྱངས་པ་སྟོང་སྟོང་སྤྲུལ་ཏོ། །འཁོར་གྱི་ཁྱམས་དེར་ཁང་བཟངས་རིན་པོ་ཆེ་ཐམས་ཅད་ཀྱིས་ལེགས་པར་བརྒྱན་པ། གདུགས་
དང་། རྒྱལ་མཚན་དང་། བ་དན་བསྒྲེང་བ་སྟོང་སྤྲུལ་ཏེ། ཁང་བཟངས་དེ་དག་ཐམས་ཅད་དུ་ཡང་སེང་གེའི་ཁྲི་ལྷའི་རས་བཅོས་མ་ཟུང་བྱེ་བ་ཕྲག་དུ་མ་བཏིང་བ་རྩ་བ་གསེར་ལ་རིན་པོ་ཆེ་ཐམས་ཅད་ཀྱིས་སྤྲས་པ་བརྒྱད་ཁྲི་བཞི་སྟོང་བཞག་གོ། །ཁང་བཟངས་ཐམས་ཅད་དུ་ཡང་
ཀླུའི་བུ་མོ་སྟོང་སྟོང་བཀོད་དེ། ཐམས་ཅད་ཀྱང་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་ཐོགས་པ་ཤ་སྟག་གོ། །སྟེང་གི་བར་སྣང་ཡང་རིན་པོ་ཆེའི་
དྲ་བའི་གདུགས་ཀྱིས་མངོན་པར་ཁེབས་པར་བྱས་སོ། །རིན་པོ་ཆེའི་དྲ་བའི་གདུགས་ཐམས་ཅད་ལས་ཀྱང་ཁ་དོག་དུ་མ་ཁ་དོག་སྣ་ཚོགས་ཀྱི་གོས་དང་། གདུགས་དང་། རྒྱལ་མཚན་དང་། བ་དན་ཕལ་པོ་ཆེ་བརྒྱད་སྟོང་མངོན་པར་དཔྱངས་སོ། །བ་དན་ཐམས་ཅད་ལ་
ཡང་རིན་པོ་ཆེའི་དྲིལ་བུ་གཡེར་ཀའི་དྲ་བ་བརྒྱུས་ཏེ། དེ་དག་རླུང་གིས་བསྐྱོད་ན་སྙན་པ་ཡིད་དུ་འོང་བའི་སྒྲ་འབྱུང་ངོ་། །ཞལ་ཟས་རོ་བརྒྱ་དང་ལྡན་པ་ཡང་བཤམས་སོ། །དེ་ནས་ཀླུའི་རྒྱལ་པོ་མ་དྲོས་པས་འདི་ལྟ་བུའི་བཀོད་པ་འདི་དག་བྱས་ནས་དེའི་ནུབ་མོ་འདས་པ་དང་། ཉེ་དུ་དང་།
འཁོར་དུ་བཅས་པས་ཐལ་མོ་སྦྱར་ནས་བཅོམ་ལྡན་འདས་ལ་དུས་སྦྲོན་ཅིང་བསྐུལ་བའི་ཕྱིར་ཚིགས་སུ་བཅད་དེ་གསོལ་པ། ཡེ་ཤེས་འབྱུང་གནས་ཡེ་ཤེས་འབྱོར་པའི་མཛོད། །ཡེ་ཤེས་མཐའ་ཡས་མཁྱེན་པ་ཁྱོད་ལ་གསོལ། །ཡེ་ཤེས་ཆེ་བ་གང་དུའང་ཆགས་མི་མངའ། །
ཡེ་ཤེས་སྟོབས་མཆོག་མངའ་བ་གཤེགས་སུ་གསོལ། །ཕྱོགས་བཅུའི་སྲོག་ཆགས་མང་པོ་ཐམས་ཅད་ཀྱི། །སེམས་ཀྱི་སྤྱོད་པ་མཁྱེན་པའི་ཐུབ་ཆེན་པོ། །བདག་གིས་གང་ཟག་མཆོག་ནི་སྤྱན་དྲངས་པ། །དྲང་སྲོང་ཆེན་པོ་ཁྱོད་ལ་བདག་དུས་སྐུལ། །བཞེད་ཉུང་

ཆོག་མཁྱེན་གསོ་སླ་དགང་སླ་བ། །ཤིན་ཏུ་མཁྱེན་ཅིང་སྡུག་བསྔལ་རྣམས་ལས་འགྲོལ། །དོན་མེད་མི་གསུང་སྤྱོད་པའི་ཆོ་ག་མཁྱེན། །བཅོམ་ལྡན་ཕུང་པོ་མི་མངའ་དུས་འདི་ལགས། །ཀུན་དུ་གྲགས་པ་ཡོན་ཏན་ཡེ་ཤེས་འཕགས། །མ་
བསྐུལ་རྟག་ཏུ་བྱམས་ཐུགས་བཤེས་གཉེན་མཛད། །ཐུབ་པ་དག་ཅིང་རྣམ་དག་ནམ་མཁའ་བཞིན། །འདྲེན་པ་བཤོས་སྦྱར་ལགས་ཏེ་དུས་འདི་ལགས། །བསྙེངས་པ་མི་མངའ་སྟོབས་བཅུ་ཤུགས་མངའ་བ། །བཅྭ་བརྒྱད་སངས་རྒྱས་ཆོས་རྣམས་རབ་ཏུ་རྫོགས། །
སྤྱི་གཙུག་བལྟར་མི་གདའ་བ་ཐུགས་རྗེ་འཕགས། །མགོན་པོ་ཚོགས་དང་ཐབས་ཅིག་གཤེགས་སུ་གསོལ། །གཟུགས་ནི་གཟུགས་མཆོག་མཚན་གྱིས་ཤིན་ཏུ་བརྒྱན། །སྐུ་ནི་དཔེ་བྱད་བཟང་པོས་མཛེས་པར་སྤྲས། །ཕན་པའི་ཆོས་སྟོན་མཆོག་ཏུ་དགའ་མཛད་པ། །
བཅོམ་ལྡན་ཐུབ་ཆེན་དུས་དེ་འདི་ལགས་སོ། །ཚངས་པའི་དབྱངས་དང་དབྱངས་སྙན་འཇམ་པའི་དབྱངས། །ཀ་ལ་པིང་ཀ་འཇམ་དབྱངས་སེང་གེ་གནོན། །ཐམས་ཅད་དབྱངས་མཆོག་སྲིད་འཁོད་ཚིམ་མཛད་པ། །བདག་ལ་དགའ་མཛད་གཟིགས་ཤིང་གཤེགས་
སུ་གསོལ། །སངས་རྒྱས་ཞིང་འདིར་དེ་བཞིན་གཤེགས་ཀྱི་ཐུགས། །འཚལ་བ་སེམས་ཅན་གང་ཡང་མ་མཆིས་ཏེ། །བཅོམ་ལྡན་འདས་ནི་ཀུན་གྱི་སྤྱོད་པ་མཁྱེན། །རྟག་ཏུ་དུས་སྤྱོད་དུས་དེ་འདི་ལགས་སོ། །འདི་ན་ལྷ་དང་མི་དང་ཀླུ་དག་མང་སྐོམ་ན། །སྟོབས་
བཅུའི་སྟོབས་མངའ་ཕ་རོལ་དཔུང་རྣམས་འཇོམས་པ་པོ། །ཐུབ་ཆེན་ཐུགས་མཆོག་ལོག་པའི་ལམ་རྣམས་རྣམ་པར་འཇིག །དྲན་རྟོགས་བློ་གྲོས་ལྡན་འདིར་རྟོགས་དང་བློ་གྲོས་མཛོད། །ངན་པའི་ཚོགས་ཅན་ཚོགས་འཇོམས་ཁྲེལ་མངའ་དཔལ་མོས་དགྱེས། །ཕན་
པ་མཛད་ཅིང་བདེ་མཛད་ཡོན་ཏན་བརྒྱས་གཏམས་པ། །ཐུགས་རྗེ་རབ་ཏུ་བསྐྱེད་ནས་ཀླུ་བརྒྱ་རྣམ་འདུལ་ཞིང་། །མཚུངས་པ་མེད་པའི་མི་མཆོག་འདིར་ནི་གཤེགས་སུ་གསོལ། །ཕན་བློ་ཐུགས་བརྩེ་ལྡན་ཞིང་འགྲོ་ལ་ཕན་དགྱེས་པ། །ཇི་ལྟར་འགྲོ་བ་ཕ་རོལ་སྤྱོད་འབྱེད་

བློ་གྲོས་ཅན། །སྟོབས་བཅུའི་སྤྱོད་པ་རྣམ་པར་འབྱེད་པ་རབ་གསུང་བ། །དྲན་རྟོགས་བློ་གྲོས་ལྡན་འདིར་རྟོགས་དང་བློ་གྲོས་མཛོད། །དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་མ་དྲོས་པས་དུས་བསྐུལ་བར་མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཀླུའི་
རྒྱལ་པོ་མ་དྲོས་པས་དུས་བསྐུལ་གྱིས་གནས་དེར་ཟླ་བ་ཕྱེད་གནས་པ་ལྟར་གཙུག་ལག་ཁང་སྐྱོང་སྐོས་ལ་ཆོས་གོས་དང་། ལྷུང་བཟེད་ཐོགས་ཞེས་བསྒོ་ཤིག །དེ་ནས་བཅོམ་ལྡན་འདས་བྱང་ཆུབ་སེམས་དཔའ་བདུན་ཁྲི་ཉིས་སྟོང་དང་། རྫུ་འཕྲུལ་ཆེ་ཞིང་མཐུ་ཆེ་བའི་
ཉན་ཐོས་ཉིས་སྟོང་གིས་བསྐོར་ཅིང་མདུན་དུ་བདར་ནས། བྱ་རྒོད་ཕུང་པོའི་རི་ལས་རྫུ་འཕྲུལ་གྱིས་གཤེགས་སོ། །དེ་ནས་བཅོམ་ལྡན་འདས་ནམ་མཁའི་ངོས་ལ་གཤེགས་ནས། འོད་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གསལ་བར་འགྱུར་བ་དེ་ལྟ་བུའི་
འོད་སྐུ་ལས་ཕྱུང་བས་འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་དག་གིས་བཅོམ་ལྡན་འདས་ཚོགས་ཆེན་པོས་བསྐོར་ཅིང་ནམ་མཁའི་ངོས་ལས་མཚོ་ཆེན་པོ་མ་དྲོས་པར་གཤེགས་པ་མཐོང་ནས་དེ་དག་འདི་སྙམ་དུ། བཅོམ་ལྡན་འདས་འདི་ལྟ་བུའི་ཚོགས་ཀྱིས་
བསྐོར་ཏེ་ཟླ་བ་ཕྱེད་གང་ན་བཞུགས་པ་དེར་ཆོས་སྟོན་དུ་ངེས་སོ་སྙམ་དུ་སེམས་སོ། །དེ་ན་ལྷའི་བུ་བརྒྱ་སྟོང་མང་པོ་ཕྱི་བཞིན་འབྲང་སྟེ། གང་དག་བཅོམ་ལྡན་འདས་ལ་བལྟ་བར་འདོད་པ་དང་། གང་དག་ཆོས་ཉན་པར་འདོད་པ་དང་། གང་དག་ཀླུའི་རྒྱལ་པོ་མ་དྲོས་
པའི་གནས་དང་། བཀོད་པ་བལྟ་བར་འདོད་པ་དེ་དག་བཅོམ་ལྡན་འདས་གཤེགས་པའི་རྗེས་བཞིན་དོང་ངོ་། །དེ་ལ་ལྷའི་བུ་ཁ་ཅིག་ནི་ལྷའི་མེ་ཏོག་གི་ཆར་མངོན་པར་འབེབས་ཤིང་བཅོམ་ལྡན་འདས་གཤེགས་པའི་རྗེས་བཞིན་དོང་ངོ་། །ལྷའི་བུ་ཁ་ཅིག་ནི་ཙན་དན་
སྦྲུལ་གྱི་སྙིང་པོའི་ཕྱེ་མའི་ཆར་མངོན་པར་འབེབས་ཤིང་བཅོམ་ལྡན་འདས་གཤེགས་པའི་རྗེས་བཞིན་དོང་ངོ་། །ལྷའི་བུ་ཁ་ཅིག་ནི་སིལ་སྙན་དང་གླུ་དབྱངས་ལེན་ཅིང་བཅོམ་ལྡན་འདས་ཀྱི་བསྔགས་པ་བརྗོད་དེ། བཅོམ་ལྡན་འདས་གཤེགས་པའི་རྗེས་བཞིན་དོང་

ངོ་། །ལྷའི་བུ་ཁ་ཅིག་ནི་རང་གི་ལུས་ཀྱི་གོས་དང་། གདུགས་དང་། རྒྱལ་མཚན་དང་། བ་དན་སྒྲེང་བའི་ཆར་འབེབས་ཤིང་བཅོམ་ལྡན་འདས་གཤེགས་པའི་རྗེས་བཞིན་དོང་ངོ་། །གནས་གཙང་མའི་རིས་ཀྱི་ལྷའི་བུ་དག་ནི་ཉི་མ་
དང་། ཟླ་བ་དང་། རྒྱུ་སྐར་དང་། སྐར་མ་ཟིལ་དུ་རླག་པར་བྱེད་པའི་ལྷའི་འོད་ཁ་དོག་བཟང་པོ་རབ་ཏུ་ཞི་བ་དང་ལྡན་པའི་ལུས་ཀྱིས་བཅོམ་ལྡན་འདས་གཤེགས་པའི་རྗེས་བཞིན་དོང་ངོ་། །བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་
ཀྱང་རང་རང་གི་བཀོད་པ་རྣམས་ཀྱིས་བཅོམ་ལྡན་འདས་གཤེགས་པའི་རྗེས་བཞིན་དོང་ངོ་། །དེ་ནས་བཅོམ་ལྡན་འདས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་།
བྱང་ཆུབ་སེམས་དཔའ་དང་། ཉན་ཐོས་ཆེན་པོའི་ཚོགས་དུ་མས་བསྐོར་ནས་གངས་རིའི་རྒྱལ་པོའི་ལྷོ་ཕྱོགས་ཀྱི་ངོས་ལ་བཞུགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་ཁྱོད་
སོང་སྟེ། ཀླུའི་རྒྱལ་པོ་མ་དྲོས་པ་ལ་དེ་བཞིན་གཤེགས་པ་བྱོན་ན་ཅི་དུས་ལ་བབ་བམ་ཞེས་སྦྲོན་ཅིག །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་དེའི་ཚེ་ཤིང་ཏ་ལ་བདུན་སྲིད་དུ་ནམ་མཁའ་ལ་མངོན་པར་འཕགས་ནས་བྱའི་རྒྱལ་པོ་ནམ་མཁའ་ལྡིང་གི་གཟུགས་སུ་རང་གི་
ལུས་བྱིན་གྱིས་བརླབས་ནས་ཀླུའི་རྒྱལ་པོ་མ་དྲོས་པའི་གནས་ལ་བལྟས་སོ། །དེ་ནས་མ་དྲོས་པ་ན་གནས་པའི་ཀླུ་དང་ཀླུའི་བུ་མོ་དངངས་སྐྲག་སྟེ་སྤུ་ཟིང་ཞེས་བྱེད་ནས། ཕྱོགས་ཕྱོགས་སུ་རབ་ཏུ་འབྲོས་ཤིང་འདི་སྐད་ཅེས་གང་གནས་འདིར་ནམ་མཁའ་ལྡིང་རྒྱུ་བ་དེ་དག་
ཐམས་ཅད་གང་ནས་འོངས་ཞེས་འཛེར་ཏོ། །དེ་ནས་ཀླུའི་རྒྱལ་པོ་མ་དྲོས་པས་ལག་པ་གཡས་པས་ཀླུ་དང་ཀླུའི་བུ་མོ་དེ་དག་ལ་མ་འཇིགས་མ་འཇིགས། འདི་ནི་བཙུན་པ་མཽད་གལ་གྱི་བུས་རྫུ་འཕྲུལ་རྣམ་པར་སྤྲུལ་པའོ། །ཞེས་དབུགས་འབྱིན་ཅིང་འཇོག །འགོད་

རབ་ཏུ་འགོད་དོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་བསྐུལ་ནས་སོང་ངོ་། །དེ་ནས་ཀླུའི་རྒྱལ་པོ་མ་དྲོས་པ་བུ་དང་བཅས། ཆུང་མ་དང་བཅས། གཉེན་དང་འཁོར་དུ་བཅས་ཏེ་མེ་ཏོག་ཐམས་ཅད་དང་། ཕྱེ་མ་ཐམས་ཅད་དང་། བདུག་པ་ཐམས་ཅད་
དང་། བྱུག་པ་ཐམས་ཅད་དང་། གོས་དང་། གདུགས་དང་། རྒྱལ་མཚན་དང་། བ་དན་དང་། སིལ་སྙན་དང་། ཕེག་རྡོབ་པ་ཐོགས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་ཅི་རིགས་སུ་མཆོད་པ་བྱས་སོ། །
དེ་ནས་བཅོམ་ལྡན་འདས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བྱང་ཆུབ་སེམས་དཔའ་དང་། ཉན་ཐོས་ཆེན་པོ་དུ་མས་བསྐོར་ནས་ཀླུའི་རྒྱལ་པོ་མ་དྲོས་པའི་
འཁོར་གྱི་ཁྱམས་སུ་གཤེགས་སོ། །གཤེགས་ནས་སེང་གེའི་ཁྲི་ཇི་ལྟར་བཤམས་པ་ལ་སྐྱིལ་མོ་ཀྲུང་བཅས་ཏེ་བཞུགས་སོ། །འཁོར་ཐམས་ཅད་ཀྱང་ཁྲི་ལ་སོ་སོར་ཅི་རིགས་པར་འཁོད་དོ། །དེ་ནས་ཀླུའི་རྒྱལ་པོ་མ་དྲོས་པས་བཅོམ་ལྡན་འདས་བཞུགས་པར་
རིག་ནས་རང་གི་ལག་ནས་བཟའ་བ་དང་། བཅའ་བ་དང་། མྱོང་བ་མིའི་ལས་འདས་པ་ལྷའི་རོ་བྲོ་བ་ཅན་རོ་བརྒྱ་དང་ལྡན་པའི་ཞལ་ཟས་བཟང་པོ་མང་པོས་ཚིམ་པར་བསྟབས་སོ། །ཚིམ་པར་བསྟབས་ནས་ལྷུང་བཟེད་བཞག་སྟེ་ཕྱག་བཅབས་པར་རིག་ནས། བཅོམ་
ལྡན་འདས་ལ་ཆོས་བཤད་པར་གསོལ་བ་བཏབ་བོ། །དེ་ནས་བཅོམ་ལྡན་འདས་ཕྱེ་མ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་བཞེངས་ནས་ཆོས་བསྟན་པའི་ཕྱིར་བཞུགས་སོ། །དེ་ནས་སའི་དཀྱིལ་འཁོར་ཀུན་ཏུ་དཔག་ཚད་སྟོང་ནས་བར་སྣང་གི་བར་དུ་ལྷ་དང་།
ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དག་གིས་ཡོངས་སུ་གང་བར་གྱུར་ཏོ། །དེ་ནས་བཅོམ་ལྡན་འདས་ལ་ཀླུའི་རྒྱལ་པོ་མ་དྲོས་པས་འདི་སྐད་ཅེས་

གསོལ་ཏོ། །དེ་བཞིན་གཤེགས་པས་འཁོར་འདི་ལས་བྱང་ཆུབ་ཏུ་སེམས་མ་བསྐྱེད་པའི་སེམས་ཅན་རྣམས་ནི་བྱང་ཆུབ་ཏུ་སེམས་བསྐྱེད་པར་འགྱུར་བ་དང་། བྱང་ཆུབ་ཏུ་སེམས་བསྐྱེད་པ་རྣམས་ནི་ཕྱིར་མི་ལྡོག་པར་འགྱུར་བ་དང་། འཁོར་བས་སྐྲག་པའི་
སེམས་ཅན་རྣམས་ནི་སློབ་པ་ཡང་མ་ལགས་མི་སློབ་པ་ཡང་མ་ལགས་པར་འགྱུར་བ་དང་། སློབ་པ་དང་མི་སློབ་པར་འགྱུར་བ་དང་། འཁོར་བ་ལ་མངོན་དུ་ཕྱོགས་པའི་སེམས་ཅན་རྣམས་ནི་ཡིད་འབྱུང་བར་འགྱུར་བ་དང་། ཀླུ་དང་གནོད་སྦྱིན་གྱི་འཁོར་འདི་ནི་འགྲོ་བ་དམན་པ་
དང་བྲལ་ཞིང་རྒྱ་ཆེན་པོའི་འགྲོ་བར་འགྱུར་བ་དང་། ཟབ་མོ་ལ་མོས་པའི་བྱང་ཆུབ་སེམས་དཔའ་རྣམས་ནི་སེམས་པ་དང་བསམ་པ་རྣམ་པར་དག་པར་འགྱུར་བ་དང་། དེ་བཞིན་གཤེགས་པ་བཞུགས་ཀྱང་རུང་། ཡོངས་སུ་མྱ་ངན་ལས་འདས་ཀྱང་རུང་སྟེ། བདག་དམ་པའི་
ཆོས་ཡོངས་སུ་འཛིན་པར་འགྱུར་བར་བགྱི་བའི་སླད་དུ་ཆོས་བསྟན་དུ་གསོལ། དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་མ་དྲོས་པ་ལ་འདི་སྐད་ཅེས་བཀའ་སྩལ་ཏོ། །ཀླུའི་བདག་པོ་དེའི་ཕྱིར་ལེགས་པར་ཤིན་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །
བཅོམ་ལྡན་འདས་དེ་བཞིན་ནོ་ཞེས་གསོལ་ཏེ། ཀླུའི་རྒྱལ་པོ་མ་དྲོས་པ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཀླུའི་བདག་པོ་བྱང་ཆུབ་སེམས་དཔའ་ཆོས་གཅིག་དང་ལྡན་ན་ལྷ་དང་བཅས་པའི་འཇིག་རྟེན་
མངོན་པར་འདུ་བར་འགྱུར་རོ། །ཆོས་གཅིག་པོ་གང་ཞེ་ན། འདི་ལྟ་སྟེ། ཟབ་མོའི་ཆོས་ལ་རབ་ཏུ་སྦྱོར་བའི་བག་ཡོད་པའོ། །དེ་ལ་ཟབ་མོའི་ཆོས་ལ་རབ་ཏུ་སྦྱོར་བའི་བག་ཡོད་པ་གང་ཞེ་ན། ཀླུའི་བདག་པོ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་
རྟེན་ཅིང་འབྲེལ་པར་འབྱུང་བ་ལ་འཇུག་ཅིང་མཐར་ལྟ་བ་གཉི་ག་དང་བྲལ་ལ། ཡོད་པ་དང་མེད་པར་ཁས་མི་ལེན་པས་ཆོས་ཐམས་ཅད་རྐྱེན་གྱི་ཁ་ན་ལས་པར་ཡང་དག་པར་རྗེས་སུ་མཐོང་སྟེ། གང་རྒྱུ་མེད་པ་ལས་བྱུང་བའི་ཆོས་དེ་ཡང་དག་པར་རྗེས་སུ་མ་མཐོང་ནས་དེ་འདི་

སྙམ་དུ་སེམས་ཏེ། ཆོས་གང་རྒྱུའི་ཁ་ན་ལས་པ་དེ་ནི་རྐྱེན་གྱི་ཁ་ན་ལས་པའོ། །གང་རྐྱེན་གྱི་ཁ་ན་ལས་པ་དེ་ནི་མ་སྐྱེས་པའོ། །གང་མ་སྐྱེས་པ་དེ་ནི་སྟོང་པའོ། །གང་སྟོང་པ་དེ་ནི་མཚན་མ་མེད་པའོ། །གང་མཚན་མ་མེད་པ་དེ་ནི་སྨོན་པ་མེད་པའོ། །
གང་སྨོན་པ་མེད་པ་དེ་ནི་ཞི་བའོ། །གང་ཞི་བ་དེ་ནི་ཉེ་བར་ཞི་བའོ། །གང་ཉེ་བར་ཞི་བ་དེ་ནི་མི་གཡོ་བའོ། །གང་མི་གཡོ་བ་དེ་ནི་རང་བཞིན་གྱིས་བེམས་པོའོ། །རང་བཞིན་གྱིས་བེམས་པོ་གང་ཡིན་པ་དེ་ནི་རྐྱེན་གྱི་ཁ་ན་ལས་པའོ། །གང་རྐྱེན་གྱི་ཁ་ན་
ལས་པ་དེ་ལ་ནི་བདག་མེད། བདག་གི་མེད་དོ། །གང་བདག་མེད་པ་དེ་ནི་ཡོངས་སུ་འཛིན་པ་མེད་པའི་ཚུལ་གྱིས་བརྗོད་དུ་མེད་པའོ། །ཀླུའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་བག་ཡོད་པ་ཅན་ནི་རྟོན་པ་བཞི་ལ་རྟོན་ཏེ། བཞི་གང་
ཞེ་ན། དོན་ལ་རྟོན་གྱི་ཚིག་འབྲུ་ལ་མ་ཡིན་པ་དང་། ཡེ་ཤེས་ལ་རྟོན་གྱི་རྣམ་པར་ཤེས་པ་ལ་མ་ཡིན་པ་དང་། ངེས་པའི་དོན་ལ་རྟོན་གྱི་དྲང་བའི་དོན་ལ་མ་ཡིན་པ་དང་། ཆོས་ཉིད་ལ་རྟོན་གྱི་གང་ཟག་ལ་མ་ཡིན་ཏེ། འདི་ནི་རྟོན་པ་བཞི་ལ་རྟོན་པའོ། །དེ་ལ་དོན་ནི་
གང་། ཡེ་ཤེས་ནི་གང་། ངེས་པའི་དོན་ནི་གང་། ཆོས་ཉིད་ནི་གང་ཞེ་ན། དོན་ཅེས་བྱ་བ་ལ་གང་སྟོང་པ་ཉིད་ནི་དོན་ཏེ། དོན་གང་ཡིན་པ་དེ་ལ་ལྟ་བ་རྗེས་སུ་རྒྱས་པར་མི་བྱེད་དོ། །གང་མཚན་མ་མེད་པ་ནི་དོན་ཏེ། དེ་ལ་རྣམ་པར་རྟོག་པ་རྗེས་སུ་རྒྱས་པར་
མི་བྱེད་དོ། །གང་སྨོན་པ་མེད་པ་ནི་དོན་ཏེ། དེ་ལ་ཁམས་གསུམ་པ་རྗེས་སུ་རྒྱས་པར་མི་བྱེད་དེ། འདི་ནི་དོན་ཅེས་བྱའོ། །ཀླུའི་བདག་པོ་གཞན་ཡང་དོན་ཅེས་བྱ་བ་ནི་གང་ཆོས་དང་ཆོས་མ་ཡིན་པ་གཉིས་སུ་དབྱེར་མེད་པའོ། །གང་ཆོས་རྣམ་པར་གཞག་པ་བརྗོད་དུ་
ཡོད་པ་སྒྲ་དང་ཚིག་གི་ལམ་གྱིས་བརྗོད་དུ་མེད་ཅིང་གནས་པ་མེད་པ་དང་། གང་ཟག་མེད་པའི་དོན་ཏེ། སེམས་ཅན་དང་གང་ཟག་ཏུ་ཐ་སྙད་འདོགས་པ་འདི་ནི་དོན་ཅེས་བྱའོ། །གཞན་ཡང་དོན་ཅེས་བྱ་བ་ནི་གང་ཆོས་དོན་དུ་གཉེར་བ་ཡིན་གྱི་འཐོབ་པ་དོན་དུ་གཉེར་བ་མ་ཡིན་ནོ། །

ཇི་ལྟར་ན་བྱང་ཆུབ་སེམས་དཔའ་ཆོས་དོན་དུ་གཉེར་གྱི་འཐོབ་པ་དོན་དུ་གཉེར་བམ་ཡིན་ཞེ་ན། གང་མིག་དོན་དུ་གཉེར་བ་མ་ཡིན། གཟུགས་དོན་དུ་གཉེར་བ་མ་ཡིན། རྣ་བ་དང་། སྒྲ་དང་། སྣ་དང་། དྲི་དང་། ལྕེ་དང་། རོ་དང་། ལུས་དང་། རེག་
བྱ་དོན་དུ་གཉེར་བ་མ་ཡིན། ཡིད་དོན་དུ་གཉེར་བ་མ་ཡིན། ཆོས་དོན་དུ་གཉེར་བ་མ་ཡིན། གཟུགས་ལ་མངོན་པར་ཞེན་པ་དོན་དུ་གཉེར་བ་མ་ཡིན། ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་ལ་མ་ཡིན། རྣམ་པར་ཤེས་པ་ལ་མངོན་པར་ཞེན་པ་
དོན་དུ་གཉེར་བ་མ་ཡིན། འདོད་པ་དང་། གཟུགས་དང་། གཟུགས་མེད་པ་ལ་མངོན་པར་ཞེན་པ་དོན་དུ་གཉེར་བ་མ་ཡིན། བདག་ལ་མངོན་པར་ཞེན་པ་དོན་དུ་གཉེར་བ་མ་ཡིན། སེམས་ཅན་ལ་མ་ཡིན། སྲོག་ལ་མ་ཡིན། གསོ་བ་ལ་མ་ཡིན། སྐྱེས་བུ་ལ་མ་
ཡིན། གང་ཟག་ལ་མངོན་པར་ཞེན་པ་དོན་དུ་གཉེར་བ་མ་ཡིན། དེ་བཞིན་གཤེགས་པའི་གཟུགས་ཀྱི་སྐུ་ལ་མངོན་པར་ཞེན་པ་དོན་དུ་གཉེར་བ་མ་ཡིན། ཆོས་ཀྱི་ཡི་གེ་ལ་མངོན་པར་ཞེན་པ་དོན་དུ་གཉེར་བ་མ་ཡིན། དགེ་འདུན་གྱི་ཚོགས་ལ་མངོན་པར་ཞེན་པ་དོན་དུ་གཉེར་བ་མ་
ཡིན། སྦྱིན་པ་ལ་མངོན་པར་ཞེན་པ་དོན་དུ་གཉེར་བ་མ་ཡིན། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་ལ་མ་ཡིན། ཤེས་རབ་ལ་མངོན་པར་ཞེན་པ་དོན་དུ་གཉེར་བ་མ་ཡིན་པ་ནས་ཆོས་ཐམས་ཅད་ཀྱི་བར་ལ་མངོན་པར་ཞེན་པ་དོན་དུ་གཉེར་བ་
མ་ཡིན་ཏེ། དེ་ལྟར་ན་བྱང་ཆུབ་སེམས་དཔའ་ཆོས་དོན་དུ་གཉེར་བ་ཞེས་བྱའོ། །གང་དོན་དེ་དག་ལ་དོན་ཅེས་ཚིག་གིས་བརྗོད་དུ་མེད་པ་འདི་ནི་དོན་ཅེས་བྱའོ། །དེ་ལ་ཤེས་པ་གང་ཞེ་ན། སྡུག་བསྔལ་ལ་མི་སྐྱེ་བར་ཤེས་པ་དང་། ཀུན་འབྱུང་བ་ལ་སྒྲོ་བཏགས་པ་མེད་པར་ཤེས་པ་
དང་། འགོག་པ་ལ་ཤིན་ཏུ་ཟད་པར་ཤེས་པ་དང་། ལམ་ལ་འོང་བ་དང་འགྲོ་བ་མེད་པར་ཤེས་པ་དང་། ཕུང་པོ་རྣམས་ལ་སྒྱུ་མ་ལྟ་བུར་ཤེས་པ་དང་། ཁམས་རྣམས་ལ་ཆོས་ཀྱི་དབྱིངས་དབྱེར་མེད་པར་ཤེས་པ་དང་། སྐྱེ་མཆེད་རྣམས་ལ་གྲོང་སྟོང་ལྟ་བུར་ཤེས་པ་དང་། ཆོས་

རྣམས་ལ་རབ་ཏུ་རྣམ་པར་འབྱེད་པ་ཤེས་པ་དང་། སེམས་ཅན་གྱི་དབང་པོ་མཆོག་དང་། མཆོག་མ་ཡིན་པ་ཤེས་པ་དང་། དྲན་པ་ལ་བརྗེད་པ་མེད་པར་ཤེས་པ་དང་། དྲན་པ་ཉེ་བར་གཞག་པ་རྣམས་ལ་དྲན་པ་མེད་ཅིང་ཡིད་ལ་བྱེད་པ་མེད་པར་ཤེས་པ་དང་།
ཡང་དག་པར་སྤོང་བ་རྣམས་ལ་དགེ་བ་དང་མི་དགེ་བ་རྣམས་སུ་ཡང་དག་པར་ཤེས་པ་དང་། རྫུ་འཕྲུལ་གྱི་རྐང་པ་རྣམས་ལ་ལུས་དང་སེམས་ཡང་བར་ཤེས་པ་དང་། དབང་པོ་རྣམས་ཀྱི་རིམ་པ་ཤེས་པ་དང་། སྟོབས་རྣམས་ལ་རྫི་བ་མེད་པར་ཤེས་པ་དང་། བྱང་
ཆུབ་ཀྱི་ཡན་ལག་རྣམས་ལ་ཆོས་ཐམས་ཅད་རྟོགས་པར་ཤེས་པ་དང་། ལམ་ལ་འདུས་མ་བྱས་པར་ཤེས་པ་དང་། ཞི་གནས་ལ་ཞི་བར་ཤེས་པ་དང་། ལྷག་མཐོང་ལ་ཆོས་རབ་ཏུ་རྣམ་པར་འབྱེད་པར་ཤེས་པ་དང་། སྔོན་གྱི་མཐའ་ལ་མ་བྱུང་བར་ཤེས་པ་
དང་། ཕྱི་མའི་མཐའ་མི་འཕོ་བར་ཤེས་པ་དང་། བར་མ་ལ་མི་གནས་པར་ཤེས་པ་དང་། ལུས་ལ་གཟུགས་བརྙན་ལྟ་བུར་ཤེས་པ་དང་། ཚིག་ལ་བྲག་ཅ་ལྟ་བུར་ཤེས་པ་དང་། སེམས་ལ་སྒྱུ་མའི་ཆོས་ལྟ་བུར་ཤེས་པ་འདི་ནི་ཤེས་པ་ཞེས་བྱའོ། །དེ་
ལ་ངེས་པའི་དོན་གྱི་མདོ་སྡེ་གང་ཞེ་ན། གང་རྟེན་ཅིང་འབྲེལ་བར་འབྱུང་བ་འདི་བསྟན་པ་སྟེ། འདི་ལྟར་མ་རིག་པ་འགགས་པ་ནས་རྒ་ཤི་འགགས་པའི་བར་ལ་བདག་མེད་པར་བསྟན་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་།
གང་ཟག་མེད་པར་ཡོངས་སུ་བསྟན་པ་སྟེ། ཇི་ལྟར་གཟིངས་ལྟ་བུའི་མདོ་ལས་ཆོས་ཀྱང་སྤང་བར་བྱ་ན། ཆོས་མ་ཡིན་པ་ལྟ་ཅི་སྨོས་ཞེས་གསུངས་པ་ལྟ་བུའོ། །དེ་ལ་རྣམ་པར་ཐར་པའི་སྒོ་གསུམ་ཡོངས་སུ་སྟོན་པ་དང་། དུས་གསུམ་མཉམ་པ་ཉིད་དང་། བསླབ་པ་
གསུམ་ལ་མི་དམིགས་པར་སློབ་པ་སྟེ། ཇི་ལྟར་འདུ་བྱེད་ཐམས་ཅད་འགྲོ་བ་མེད་པར་མཐོང་ནས་ཡང་དག་པ་ཉིད་མི་འགྱུར་བ་ལ་མི་འཇུག་ཅིང་འཇིག་རྟེན་ལས་འདས་པའི་དབང་པོ་རྣམས་དང་། སྟོབས་རྣམས་དང་། བྱང་ཆུབ་སེམས་དཔའི་ཤེས་རབ་ལ་འདུ་ཤེས་དང་

ཡིད་ལ་བྱེད་པ་ཐམས་ཅད་མི་འབྱུང་བ་འདི་ནི་ངེས་པའི་དོན་གྱི་མདོ་སྡེའོ་ཞེས་གསུངས་པ་ལྟ་བུའོ། །དེ་ལ་ཆོས་ཉིད་གང་ཞེ་ན། དེ་བཞིན་གཤེགས་པ་བྱུང་ཡང་རུང་། མ་བྱུང་ཡང་རུང་། ཆོས་ཉིད་འདི་ནི་འདུག་པ་ཉིད་དེ། ཆོས་ཀྱི་དབྱིངས་དང་།
ཆོས་གནས་པ་དང་། ཆོས་མི་འགྱུར་བ་ཉིད་དང་། ཡང་དག་པའི་མཐའ་ནི་ཆོས་ཉིད་ཅེས་བྱའོ། །གང་དེ་བཞིན་ཉིད་དང་། ཕྱིན་ཅི་མ་ལོག་པ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། གཉིས་སུ་མེད་པ་ཉིད་དང་། ཡང་དག་པ་ཉིད་དང་། དེ་ཁོ་ན་
ཉིད་དང་། ཡང་དག་པའི་མཐའ་སྔོན་གྱི་མཐའ་མ་ཡིན་པ་དང་། སྔོན་གྱི་མཐའ་ཡང་དག་པའི་མཐའ་མ་ཡིན་པ་འདི་ནི་ཆོས་ཉིད་ཅེས་བྱའོ། །ཐེག་པ་ཆེན་པོ་ཕ་རོལ་ཏུ་ཕྱིན་པ་དྲུག་ལས་བྱུང་བ་ནི་ཆོས་ཉིད་ཅེས་བྱའོ། །རང་སངས་རྒྱས་ཀྱི་ཐེག་པ་རྟེན་ཅིང་འབྲེལ་
པར་འབྱུང་བ་ལས་བྱུང་བ་དང་། སྒྲའི་རྗེས་སུ་འགྲོ་བ་ལ་མོས་པ་ལས་བྱུང་བ་ཉན་ཐོས་ཀྱི་ཐེག་པ་འདི་ནི་ཆོས་ཉིད་ཅེས་བྱའོ། །ལོངས་སྤྱོད་ཆེན་པོའི་ཕྱིར་སྦྱིན་པ་ཡང་ཆོས་ཉིད་ཅེས་བྱའོ། །མཐོ་རིས་སུ་སྐྱེ་བའི་ཕྱིར་ཚུལ་ཁྲིམས་དང་། ཤེས་རབ་ཆེན་པོའི་ཕྱིར་
ཐོས་པ་དང་། མ་བྲལ་བའི་ཕྱིར་སྒོམ་པ་ནི་ཆོས་ཉིད་ཅེས་བྱའོ། །ཀླུའི་བདག་པོ་གཞན་ཡང་ཚུལ་བཞིན་མ་ཡིན་པ་ཡིད་ལ་བྱེད་པའི་རྒྱུ་ལས་བྱུང་བ་ནི་འཁོར་བའོ། །ཚུལ་བཞིན་ཡིད་ལ་བྱེད་པའི་རྒྱུ་ལས་བྱུང་བ་ནི་ཆོས་ཉིད་དོ། །ཉོན་མོངས་པའི་སྟོབས་ཅན་ནི་
བྱིས་པའོ། །ཤེས་རབ་ཀྱི་སྟོབས་ཅན་ནི་མཁས་པ་སྟེ། འདི་ནི་ཆོས་ཉིད་ཅེས་བྱའོ། །ཆོས་ཉིད་ཅེས་བྱ་བ་ནི་འདི་ལྟ་སྟེ། ཆོས་ཐམས་ཅད་ཀྱི་དབྱིངས་སུ་ཡང་དག་པར་གཞོལ་བའོ། །ཀླུའི་བདག་པོ་དེ་ལྟར་ན་གང་རྟེན་ཅིང་འབྲེལ་པར་འབྱུང་བ་ལ་རྟོན་པ་དེ་ནི་རྟོན་
པ་བཞི་པོ་དེ་དག་ལ་རྟོན་པའོ། །གང་རྟོན་པ་བཞི་པོ་དག་ལ་རྟོན་པ་དེ་ནི་ཆད་པ་དང་རྟག་པ་ལ་རྟོན་པ་མ་ཡིན་ཏེ། དེའི་ཕྱིར་སུས་རྟེན་ཅིང་འབྲེལ་པར་འབྱུང་བ་མཐོང་བ་དེས་ཆོས་མཐོང་ངོ་། །སུས་ཆོས་མཐོང་བ་དེས་དེ་བཞིན་གཤེགས་པ་མཐོང་ངོ་ཞེས་བྱའོ། །ཀླུའི་

བདག་པོ་རྟེན་ཅིང་འབྲེལ་བར་འབྱུང་བ་ཞེས་བྱ་བ་ནི་འབྲེལ་བར་འབྱུང་བ་མ་ཡིན་པའོ། །འབྲེལ་བར་འབྱུང་བ་མ་ཡིན་པ་ནི་མི་སྐྱེ་བའོ། །མི་སྐྱེ་བ་ནི་ཆོས་སོ། །ཆོས་ནི་འདོད་ཆགས་དང་བྲལ་བའོ། །འདོད་ཆགས་དང་བྲལ་བ་ནི་དེ་བཞིན་གཤེགས་པའོ། །རྟེན་
ཅིང་འབྲེལ་པར་འབྱུང་བ་ཞེས་བྱ་བ་ནི་རྐྱེན་ལས་བྱུང་བ་སྟེ་བརྗོད་དུ་མེད་པའི་ཆོས་ཉིད་དོ། །ཆོས་ཉིད་མངོན་པར་རྫོགས་པར་བྱང་ཆུབ་པའི་ཕྱིར་དེ་བཞིན་གཤེགས་པའོ། །ཀླུའི་བདག་པོ་རྟེན་ཅིང་འབྲེལ་བར་འབྱུང་བ་ཞེས་བྱ་བ་ནི་ཤེས་རབ་ཀྱི་མིག་གིས་ཆོས་མཐོང་བ་
སྟེ། ཆོས་མཐོང་བ་ནི་དེ་བཞིན་གཤེགས་པའོ། །ཀླུའི་བདག་པོ་ཆོས་ཉིད་དེ་ལྟ་བུ་ལ་མོས་པའི་བྱང་ཆུབ་སེམས་དཔའ་ནི་བག་ཡོད་པ་ཞེས་བྱའོ། །ཀླུའི་བདག་པོ་བྱང་ཆུབ་སེམས་དཔའ་བག་ཡོད་པ་ནི་ཉོན་མོངས་པ་རྣམས་ལ་རྒྱུ་བར་མི་བྱེད་པ་དང་། འཕགས་པ་རྣམས་
ལ་དད་པར་བྱེད་པ་དང་། འཕགས་པ་མ་ཡིན་པ་རྣམས་ཡོངས་སུ་མི་གཏོང་བ་དང་། འཕགས་པའི་རིགས་ཀུན་ཏུ་སྲུང་བར་བྱེད་པ་དང་། དམ་པའི་ཆོས་ཡོངས་སུ་སྲུང་བར་བྱེད་པ་དང་། མང་དུ་ཐོས་བརྗེད་པར་མི་བྱེད་པ་དང་། ཚུལ་ཁྲིམས་ཀྱི་ཕུང་པོ་འདོར་
བར་མི་བྱེད་པ་དང་། ཏིང་ངེ་འཛིན་གྱི་ཕུང་པོ་ཤིན་ཏུ་དཀར་བར་བྱེད་པ་དང་། ཤེས་རབ་ཀྱི་ཕུང་པོ་ལས་མི་གཡོ་བ་དང་། རྣམ་པར་གྲོལ་བའི་ཕུང་པོ་ཤིན་ཏུ་གནས་པ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ལ་རབ་ཏུ་གནས་པའོ། །ཀླུའི་བདག་པོ་
བྱང་ཆུབ་སེམས་དཔའ་བག་ཡོད་པ་ནི་སངས་རྒྱས་ཀྱི་ཆོས་ཚད་མེད་པ་ལ་མོས་སོ། །སངས་རྒྱས་ཀྱི་ཡེ་ཤེས་ཚད་མེད་པ་ཡོངས་སུ་ཚོལ་ལོ། །སངས་རྒྱས་ཀྱི་སྤོབས་པ་ཚད་མེད་པ་ལ་འཇུག་གོ། །སངས་རྒྱས་ཀྱི་སོ་སོ་ཡང་དག་པར་རིག་པ་ཚད་མེད་པ་ལ་
འཇུག་གོ། །སངས་རྒྱས་ཀྱི་རྣམ་པར་སྤྲུལ་པ་ཚད་མེད་པའི་རྗེས་སུ་འགྲོའོ། །སེམས་ཅན་གྱི་བསམ་པ་ཚད་མེད་པའི་རྗེས་སུ་འཇུག་གོ། །སངས་རྒྱས་ཀྱི་ཞིང་ཚད་མེད་པར་འགྲོའོ། །དེ་བཞིན་གཤེགས་པ་ཚད་མེད་པ་མཐོང་ངོ་། །ཆོས་ཚད་མེད་པ་ཉན་ཏོ། །དོན་

རྟོགས་པ་ཚད་མེད་པའི་རྗེས་སུ་འགྲོའོ། །སེམས་ཅན་གྱི་ཁམས་ཚད་མེད་པ་ཡོངས་སུ་སྨིན་པར་བྱེད་དོ། །སྤྱོད་པ་ཚད་མེད་པ་ལ་འཇུག་གོ། །བག་ཡོད་པ་དེ་ནི་བདག་གི་ཁ་ན་ལས་པ་ཡིན་གྱི་གཞན་གྱི་ཁ་ན་ལས་པ་མ་ཡིན་ནོ། །དེ་ཅིའི་ཕྱིར་ཞེ་ན།
ཀླུའི་བདག་པོ་བག་ཡོད་པའི་བྱང་ཆུབ་སེམས་དཔའ་ནི་རང་གི་སེམས་ངེས་པར་སེམས་པ་སྟེ། དེས་སེམས་ངེས་པར་སེམས་པ་གསུམ་གྱིས་སེམས་ངེས་པར་བསམ་པར་བྱའོ། །གསུམ་གང་ཞེ་ན། འདི་ལྟ་སྟེ། ཉོན་མོངས་པ་ལ་ངེས་པར་སེམས་པ་དང་། ཡུལ་
ལ་ངེས་པར་སེམས་པ་དང་། ཉེ་བར་ལེན་པ་ལ་ངེས་པར་སེམས་པ་སྟེ། སེམས་ངེས་པར་སེམས་པ་གསུམ་པོ་དེ་དག་གིས་སོ། །གཞན་ཡང་ངེས་པར་སེམས་པ་གསུམ་སྟེ། གསུམ་གང་ཞེ་ན། ཞི་གནས་ལ་རྩེ་གཅིག་པ་དང་། ལྷག་མཐོང་ལ་མཁས་
པ་དང་། ཆོས་ལ་ནན་ཏན་བྱེད་པ་སྟེ་གསུམ་པོ་དེ་དག་གོ། །གཞན་ཡང་སེམས་ངེས་པར་སེམས་པ་གསུམ་སྟེ། གསུམ་གང་ཞེ་ན། སེམས་ཞི་བ་དང་། སེམས་དུལ་བ་དང་། སེམས་ཡིད་དུ་འོང་བ་སྟེ་གསུམ་པོ་དེ་དག་གོ། །གཞན་ཡང་སེམས་ངེས་པར་
སེམས་པ་གསུམ་སྟེ། གསུམ་གང་ཞེ་ན། དྲང་པོ་དང་། སྒྱུ་མེད་པ་དང་། གཉེར་བ་མེད་པ་སྟེ་གསུམ་པོ་དེ་དག་གོ། །གཞན་ཡང་གསུམ་སྟེ། གསུམ་གང་ཞེ་ན། ཚུལ་འཆོས་པ་མེད་པ་དང་། མཉེན་པ་དང་། འགྲོགས་ན་བདེ་བ་སྟེ་གསུམ་པོ་དེ་དག་གོ། །
གཞན་ཡང་གསུམ་སྟེ། གསུམ་གང་ཞེ་ན། སྟོང་པ་ཉིད་ལ་ངེས་པར་སེམས་པ་དང་། མཚན་མ་མེད་པ་ལ་ངེས་པར་སེམས་པ་དང་། སྨོན་པ་མེད་པ་ལ་ངེས་པར་སེམས་པ་སྟེ། སེམས་ངེས་པར་སེམས་པ་གསུམ་པོ་དེ་དག་གོ། །གཞན་ཡང་གསུམ་སྟེ།
འདུ་བྱེད་ཐམས་ཅད་ལ་མི་རྟག་པར་སེམས་ངེས་པར་སེམས་ཤིང་། འདུ་བྱེད་ཐམས་ཅད་ལ་སྡུག་བསྔལ་བར་སེམས་ངེས་པར་སེམས་པ་དང་། ཆོས་ཐམས་ཅད་ལ་བདག་མེད་པར་སེམས་ངེས་པར་སེམས་པ་དང་། མྱ་ངན་ལས་འདས་པ་ནི་ཞི་བར་སེམས་ངེས་

པར་སེམས་པ་སྟེ། སེམས་ངེས་པར་སེམས་པ་གསུམ་པོ་དེ་དག་གོ། །ཀླུའི་བདག་པོ་དེ་ལ་བྱང་ཆུབ་སེམས་དཔའི་སེམས་ངེས་པར་སེམས་པའི་མཆོག་ནི་འདི་ལྟ་སྟེ། ཆོས་ཐམས་ཅད་ཀྱི་དབྱིངས་མཉམ་པ་ཉིད་དུ་ཁོང་དུ་ཆུད་པ་དང་། བྱམས་པ་ཆེན་པོས་སེམས་
ཅན་ཐམས་ཅད་ལ་སེམས་མཉམ་པ་ཉིད་དང་། སྙིང་རྗེ་ཆེན་པོས་སེམས་ཅན་ཐམས་ཅད་ཡོངས་སུ་མི་གཏོང་བ་དང་། དགའ་བ་ཆེན་པོས་འཁོར་བ་ན་ཡོངས་སུ་མི་སྐྱོ་བ་དང་། བཏང་སྙོམས་ཆེན་པོས་རྗེས་སུ་ཆགས་པ་དང་། ཁོང་ཁྲོ་བ་མེད་པ་དང་། བདོག་པ་
ཐམས་ཅད་ཡོངས་སུ་གཏོང་བས་རྣམ་པར་སྨིན་པ་ལ་རེ་བ་མེད་པ་དང་། ཚུལ་ཁྲིམས་དང་། བསླབ་པ་དང་། སྦྱངས་པའི་ཡོན་ཏན་ཐམས་ཅད་ཡང་དག་པར་འཛིན་པས་བདག་ལ་མི་སྟོད་ཅིང་གཞན་ལ་མི་སྨོད་པ་དང་། སེམས་ཅན་ཐམས་ཅད་ཀྱིས་ཉེས་པར་
བྱས་པ་བཟོད་པ་དང་། དེ་དག་དེ་ལྟར་རབ་ཏུ་ཐར་བར་བྱ་བའི་སེམས་ཀྱིས་བརྩོན་འགྲུས་བརྟན་པ་དང་། དགེ་བའི་རྩ་བ་སྒྲུབ་པའི་ཕྱིར་ལུས་དང་སྲོག་ལ་མི་ལྟ་བ་དང་། སངས་རྒྱས་ཀྱི་ཡེ་ཤེས་དང་། ཏིང་ངེ་འཛིན་དང་སྙོམས་པར་འཇུག་པ་སྒྲུབ་པས་སེམས་
ལ་བདག་དབང་བ་སྟེ། ཏིང་ངེ་འཛིན་དང་སྙོམས་པར་འཇུག་པའི་དབང་གིས་སྐྱེ་བ་མ་ཡིན་པ་དང་། ཤེས་རབ་དང་། མངོན་པར་ཤེས་པ་དང་། ཡེ་ཤེས་ལ་མཁས་པས་མངོན་པར་འདུ་མི་བྱེད་པ་ལས་མི་ཉམས་པ་དང་། ཐབས་ལ་མཁས་པས་སེམས་
ཅན་ཐམས་ཅད་དང་འཐུན་པར་འཇུག་པ་དང་། ཡེ་ཤེས་དང་། རྣམ་པར་གྲོལ་བ་ཀུན་དུ་སྲུང་བས་ཉན་ཐོས་དང་རང་སངས་རྒྱས་ཀྱི་ཡེ་ཤེས་དང་། ཐེག་པ་ཆེན་པོ་ཁོང་དུ་ཆུད་པར་བྱ་བའི་ཕྱིར་སངས་རྒྱས་ཀྱི་ཡེ་ཤེས་ཀྱི་རྗེས་སུ་འགྲོ་བ་དང་། དམ་པའི་ཆོས་
ཡོངས་སུ་གཟུང་བའི་ཕྱིར་སྡུག་བསྔལ་ལ་མི་མཇེད་པ་དང་། ཆོས་ཡང་དག་པར་བསྟན་པའི་ཕྱིར་འཐོབ་པ་དང་བཀུར་སྟི་ཐམས་ཅད་ལ་མི་ཆགས་པ་དང་། མཚན་ཡོངས་སུ་རྫོགས་པར་བྱ་བའི་ཕྱིར་བསོད་ནམས་ཀྱིས་མི་ངོམས་པ་དང་། ཤེས་རབ་ཡོངས་སུ་སྐྱོང་

བས་ཐོས་པས་མི་ངོམས་པ་དང་། ཐོས་པ་ཡོངས་སུ་སྐྱོང་བས་དགེ་བའི་བཤེས་གཉེན་ལ་བསྟེན་པ་དང་། དགེ་བའི་ཆོས་ཡོངས་སུ་སྐྱོང་བས་གུས་པ་དང་བཅས་པ་དང་། བླ་མ་རབ་ཏུ་ཐོབ་པར་བྱ་བའི་ཕྱིར་ང་རྒྱལ་བཅོམ་པ་དང་།
ང་རྒྱལ་ཚར་གཅད་པའི་ཕྱིར་བསམ་པ་ཕུན་སུམ་ཚོགས་པ་དང་། ལྷག་པའི་བསམ་པ་ཡོངས་སུ་སྐྱོང་བས་གཡོ་མེད་པ་དང་། གཡོ་དང་བྲལ་བས་ཇི་སྐད་སྨྲས་པ་བཞིན་བྱེད་པ་དང་། དེ་བྱེད་པའི་ཕྱིར་མི་སླུ་བ་དང་། བདེན་པའི་ཚིག་ལ་རབ་ཏུ་གནས་པས་ངག་གི་
སྐྱོན་ཐམས་ཅད་རྣམ་པར་སྤངས་པ་སྟེ་བརྫུན་གྱི་ཚིག་དང་བྲལ་བ་དང་། ཡང་དག་པ་དང་ཡང་དག་པ་ལས་སྐྱེས་པ་དང་། བདེན་པ་དང་བདེན་པ་ལས་སྐྱེས་པ་ནི་སེམས་ངེས་པར་སེམས་པའོ། །ཀླུའི་བདག་པོ་འདི་ལྟར་བྱང་ཆུབ་སེམས་དཔའི་སེམས་ངེས་པར་
སེམས་པ་དེ་ལྟ་བུ་གང་ཡིན་པ་དེ་ནི་བག་ཡོད་པ་ཞེས་བྱའོ། །ཀླུའི་བདག་པོ་བྱང་ཆུབ་སེམས་དཔའ་བག་ཡོད་པ་ལ་ནི་བདུད་ཀྱིས་ཚད་མི་རྙེད་དོ། །དེ་ཅིའི་ཕྱིར་ཞེ་ན། ཀླུའི་བདག་པོ་འདི་ལྟར་བྱང་ཆུབ་སེམས་དཔའ་ནི་ཚད་དུ་བྱ་བ་མ་ཡིན་པའི་ཆོས་ལ་སྤྱོད་དོ། །དེ་ལ་
ཚད་དུ་བྱ་བའི་ཆོས་རྣམས་གང་ཞེ་ན། འདོད་ཆགས་ནི་ཚད་དུ་བྱ་བའོ། །ཞེ་སྡང་དང་། གཏི་མུག་ནི་ཚད་དུ་བྱ་བའོ། །བྱང་ཆུབ་སེམས་དཔའ་ནི་དེ་ལས་འདས་པས་དེའི་ཕྱིར་ཚད་མེད་པ་ཞེས་བྱའོ། །དམིགས་པར་ལྟ་བ་ནི་ཚད་དུ་བྱ་བའོ། །སྟོང་པ་ཉིད་ལ་གནས་
པའི་བྱང་ཆུབ་སེམས་དཔའ་ལ་ནི་བདུད་ཀྱིས་ཚད་མི་རྙེད་དོ། །རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པའི་མཚན་མ་ཐམས་ཅད་ནི་ཚད་དུ་བྱ་བའོ། །མཚན་མ་མེད་པ་ལ་གནས་པའི་བྱང་ཆུབ་སེམས་དཔའ་ལ་ནི་བདུད་ཀྱིས་ཚད་མི་རྙེད་དོ། །ཁམས་
གསུམ་པ་ནི་ཚད་དུ་བྱ་བའོ། །སྨོན་པ་མེད་པ་ལ་གནས་པའི་བྱང་ཆུབ་སེམས་དཔའ་ལ་ནི་བདུད་ཀྱིས་ཚད་མི་རྙེད་དོ། །ཉན་ཐོས་དང་། རང་སངས་རྒྱས་ཀྱི་ཐེག་པ་ནི་ཚད་དུ་བྱ་བའོ། །ཐེག་པ་ཆེན་པོ་ལ་ཞུགས་པའི་བྱང་ཆུབ་སེམས་དཔའ་ལ་ནི་བདུད་ཀྱིས་ཚད་མི་

རྙེད་དོ། །ཀླུའི་བདག་པོ་དེ་ལྟ་བས་ན་བྱང་ཆུབ་སེམས་དཔའི་བདུད་ཀྱི་ལས་ནི་གཉིས་པོ་འདི་དག་སྟེ། གཉིས་གང་ཞེ་ན། བླ་མ་རྣམས་ལ་མི་གུས་པ་དང་། བདག་བརྗོད་པས་མངོན་པའི་ང་རྒྱལ་བྱེད་པའོ། །གཉིས་པོ་དེ་དག་ནི་བདུད་ཀྱི་ལས་ཏེ། དེ་དག་བྱང་ཆུབ་
སེམས་དཔས་ཡོངས་སུ་སྤང་བར་བྱའོ། །གཞན་ཡང་བདུད་ཀྱི་ལས་གཉིས་ཏེ། གཉིས་གང་ཞེ་ན། བྱང་ཆུབ་སེམས་དཔའི་སྡེ་སྣོད་ཕ་རོལ་ཏུ་ཕྱིན་པའི་ལམ་འདོར་བ་དང་། འཇིག་རྟེན་རྒྱང་འཕེན་པའི་གསང་ཚིག་དང་། ཉན་ཐོས་དང་། རང་
སངས་རྒྱས་ཀྱི་ཐེག་པ་དང་རབ་ཏུ་ལྡན་པའི་མདོ་སྡེ་ཀུན་འཛིན་པའོ། །གཉིས་པོ་དེ་དག་ནི་བདུད་ཀྱི་ལས་ཏེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །གཞན་ཡང་གཉིས་ཏེ། གཉིས་གང་ཞེ་ན། ཐབས་དང་བྲལ་བའི་ཤེས་རབ་དང་།
ཤེས་རབ་དང་བྲལ་བའི་ཐབས་ཏེ་གཉིས་པོ་དེ་དག་གོ། །དེ་ལ་ཐབས་དང་བྲལ་བའི་ཤེས་རབ་ནི་འདི་ལྟ་སྟེ། སེམས་ཅན་ཐམས་ཅད་ལ་མི་ལྟ་ཞིང་འདུས་མ་བྱས་པའི་ཆོས་ལ་རྟོག་པའོ། །ཤེས་རབ་དང་བྲལ་བའི་ཐབས་ནི་འདི་ལྟ་སྟེ། དམིགས་པར་
ལྟ་བར་ལྷུང་བའི་བསྡུ་བའི་དངོས་པོ་བཞིའོ། །གཉིས་པོ་དེ་དག་ནི་བདུད་ཀྱི་ལས་ཏེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །གཞན་ཡང་བདུད་ཀྱི་ལས་གཉིས་ཏེ། གཉིས་གང་ཞེ་ན། ཐོས་པ་ཉུང་ངུས་བསམ་གཏན་རྙེད་པ་དང་།
མང་དུ་ཐོས་ཀྱང་བདག་སྟོད་པའོ། །གཉིས་པོ་དེ་དག་ནི་བདུད་ཀྱི་ལས་ཏེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །གཞན་ཡང་བདུད་ཀྱི་ལས་གཉིས་ཏེ། གཉིས་གང་ཞེ་ན། དགེ་བའི་རྩ་བ་དང་བྲལ་བས་སྐྱེ་བ་ཡོངས་སུ་འཛིན་པ་དང་།
དགེ་བའི་རྩ་བ་བསགས་ཀྱང་ཐེག་པ་ཆུང་ངུ་འདོད་པའོ། །གཉིས་པོ་དེ་དག་ནི་བདུད་ཀྱི་ལས་ཏེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །གཞན་ཡང་བདུད་ཀྱི་ལས་གཉིས་ཏེ། གཉིས་གང་ཞེ་ན། དམ་པའི་ཆོས་མི་སྲུང་བ་དང་། སེམས་ཅན་

ཡོངས་སུ་སྨིན་པར་མི་བྱེད་པའོ། །གཉིས་པོ་དེ་དག་ནི་བདུད་ཀྱི་ལས་ཏེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །གཞན་ཡང་བདུད་ཀྱི་ལས་གཉིས་ཏེ། གཉིས་གང་ཞེ་ན། བྱང་ཆུབ་སེམས་དཔའ་ལ་ཞེ་ས་སྤངས་པ་དང་།
ཆོས་སྨྲ་བའི་བསྔགས་པ་མི་བརྗོད་པ་དང་གཉིས་པོ་དེ་དག་སྟེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །གཞན་ཡང་བདུད་ཀྱི་ལས་གཉིས་ཏེ། གཉིས་གང་ཞེ་ན། དགེ་བའི་རྩ་བ་ཡང་དག་པར་བླངས་པ་འདོར་བ་དང་། མི་དགེ་བའི་
སེམས་དང་དུ་ལེན་པ་དང་གཉིས་པོ་དེ་དག་སྟེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །གཞན་ཡང་བདུད་ཀྱི་ལས་གཉིས་ཏེ། གཉིས་གང་ཞེ་ན། དགོན་པ་ལ་གནས་ཀྱང་འདོད་པ་དང་། གནོད་སེམས་དང་། འཚེ་བའི་རྣམ་པར་
རྟོག་པ་དང་། འཁོར་གྱི་ཚོགས་ཀྱི་ནང་དུ་ཞུགས་ཀྱང་འཐོབ་པ་དང་། བཀུར་སྟིས་བསྐོར་བ་དང་གཉིས་པོ་དེ་དག་སྟེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །གཞན་ཡང་བདུད་ཀྱི་ལས་གཉིས་ཏེ། གཉིས་གང་ཞེ་ན། སྣོད་
མ་ཡིན་པ་ལ་སྟོན་པ་དང་། སྣོད་དུ་གྱུར་པ་ཁྱད་དུ་གསོད་པ་དང་གཉིས་པོ་དེ་དག་སྟེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །གཞན་ཡང་བདུད་ཀྱི་ལས་གཉིས་ཏེ། གཉིས་གང་ཞེ་ན། བདུད་ཀྱི་ལས་འདི་ལྟ་བུ་འདི་དག་ཁོང་དུ་མི་ཆུད་པ་
དང་། ཐམས་ཅད་མཁྱེན་པའི་སེམས་ལ་གཡེང་བའོ། །གཉིས་པོ་དེ་དག་ནི་བདུད་ཀྱི་ལས་ཏེ། བྱང་ཆུབ་སེམས་དཔས་ཡོངས་སུ་སྤང་བར་བྱའོ། །ཀླུའི་བདག་པོ་འདི་ལྟར་བག་ཡོད་པ་འདི་ལྟ་བུ་ལ་གནས་པའི་བྱང་ཆུབ་སེམས་དཔའ་བདུད་ཀྱི་ལས་དེ་ལྟ་
བུ་དེ་དག་མི་འབྱུང་ངོ་། །ཀླུའི་བདག་པོ་བག་ཡོད་པའི་བྱང་ཆུབ་སེམས་དཔའ་ནི་སྟོབས་བསྐྱེད་པ་བཅུ་དྲུག་རབ་ཏུ་འཐོབ་བོ། །བཅུ་དྲུག་གང་ཞེ་ན། འདི་ལྟ་སྟེ། དྲན་པའི་སྟོབས་བསྐྱེད་པ་རབ་ཏུ་འཐོབ་པ་དང་། བློ་གྲོས་ཀྱི་སྟོབས་བསྐྱེད་པ་རབ་ཏུ་འཐོབ་པ་དང་།

རྟོགས་པའི་སྟོབས་བསྐྱེད་པ་རབ་ཏུ་འཐོབ་པ་དང་། ངོ་ཚ་ཤེས་པའི་སྟོབས་བསྐྱེད་པ་རབ་ཏུ་འཐོབ་པ་དང་། མོས་པའི་སྟོབས་བསྐྱེད་པ་རབ་ཏུ་འཐོབ་པ་དང་། བསོད་ནམས་ཀྱི་སྟོབས་བསྐྱེད་པ་རབ་ཏུ་འཐོབ་པ་དང་། གཟུངས་ཀྱི་སྟོབས་བསྐྱེད་པ་རབ་ཏུ་འཐོབ་
པ་དང་། སྤོབས་པའི་སྟོབས་བསྐྱེད་པ་རབ་ཏུ་འཐོབ་པ་དང་། གཟུགས་ཀྱི་སྟོབས་བསྐྱེད་པ་རབ་ཏུ་འཐོབ་པ་དང་། ལོངས་སྤྱོད་ཀྱི་སྟོབས་བསྐྱེད་པ་རབ་ཏུ་འཐོབ་པ་དང་། ལུས་ཀྱི་སྟོབས་བསྐྱེད་པ་རབ་ཏུ་འཐོབ་པ་དང་། སེམས་ཀྱི་སྟོབས་བསྐྱེད་པ་རབ་ཏུ་འཐོབ་
པ་དང་། རྫུ་འཕྲུལ་གྱི་སྟོབས་བསྐྱེད་པ་རབ་ཏུ་འཐོབ་པ་དང་། ཆོས་སྟོན་པའི་སྟོབས་བསྐྱེད་པ་རབ་ཏུ་འཐོབ་པ་དང་། བདུད་ཚར་གཅོད་པའི་སྟོབས་བསྐྱེད་པ་རབ་ཏུ་འཐོབ་པ་དང་། ནན་ཏན་གྱི་སྟོབས་བསྐྱེད་པ་རབ་ཏུ་འཐོབ་པ་དང་། དེ་ལ་དྲན་པའི་
སྟོབས་བསྐྱེད་པ་གང་ཞེ་ན། དྲན་པ་གང་གིས་སངས་རྒྱས་ཐམས་ཅད་ཀྱིས་གསུངས་པ། ཀུན་ཏུ་འཛིན་པ་དང་། རབ་ཏུ་འཛིན་པའོ། །བློ་གྲོས་ཀྱི་སྟོབས་བསྐྱེད་པ་ནི། གང་བྱང་ཆུབ་སེམས་དཔའ་དེའི་བློ་གྲོས་དེ་སངས་རྒྱས་ཀྱིས་གནང་བ་དང་། སེམས་
ཅན་ཐམས་ཅད་ཀྱིས་མི་ཕྱེད་པ་ཡིན་ནོ། །རྟོགས་པའི་སྟོབས་བསྐྱེད་པ་ནི་གང་སྒྲས་བསྟན་པའི་དོན་ཐམས་ཅད་རྟོགས་པར་འགྱུར་རོ། །ངོ་ཚ་ཤེས་པའི་སྟོབས་བསྐྱེད་པ་ནི་གང་མི་དགེ་བའི་ཆོས་རྣམ་པར་སྤངས་ནས་དགེ་བའི་ཆོས་ཐམས་ཅད་དང་ལྡན་པའོ། །མོས་
པའི་སྟོབས་བསྐྱེད་པ་ནི་གང་སྡུག་བསྔལ་རྙེད་ཀྱང་བླའི་བྱ་བ་མ་ཡིན་པ་མི་བྱེད་པའོ། །བསོད་ནམས་ཀྱི་སྟོབས་བསྐྱེད་པ་ནི་གང་བདུད་ཀྱི་སྡེ་བྱེ་བ་བརྒྱས་ཀྱང་ཟིལ་གྱིས་གནོན་མི་ནུས་པའོ། །གཟུངས་ཀྱི་སྟོབས་བསྐྱེད་པ་ནི་གང་སངས་རྒྱས་ཐམས་ཅད་ཀྱིས་གསུངས་པ་
ཐོས་ཤིང་དེ་ཐམས་ཅད་ཀུན་ཏུ་འཛིན་པ་དང་། མི་བརྗེད་པ་དང་། དེ་གཞན་དག་ལ་ཡང་སྟོན་པའོ། །སྤོབས་པའི་སྟོབས་བསྐྱེད་པ་ནི་གང་ངེས་པའི་ཚིག་གཞན་དང་གཞན་གྱིས་ཐོགས་པ་མེད་ཅིང་རྒྱུན་ཆད་པ་མེད་ལ་ཆགས་པ་མེད་པར་བསྐལ་པ་བརྒྱ་སྟོང་དུ་

འཆད་པའོ། །གཟུགས་ཀྱི་སྟོབས་བསྐྱེད་པ་ནི་གང་བྱང་ཆུབ་སེམས་དཔའ་དེའི་གན་དུ་བརྒྱ་བྱིན་དང་། ཚངས་པ་ལ་སོགས་པ་ཉེ་བར་འོངས་ན་མོག་མོག་པོར་འགྱུར་བའོ། །ལོངས་སྤྱོད་ཀྱི་སྟོབས་བསྐྱེད་པ་ནི་གང་ལག་ན་རིན་པོ་ཆེ་དང་ལོངས་སྤྱོད་
མི་ཟད་པའོ། །ལུས་ཀྱི་སྟོབས་བསྐྱེད་པ་ནི་གང་ཕ་རོལ་གྱི་གནོད་པ་ཐམས་ཅད་ཀྱིས་མི་རྫི་བའོ། །སེམས་ཀྱི་སྟོབས་བསྐྱེད་པ་ནི་གང་སེམས་གཅིག་གིས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་རབ་ཏུ་ཤེས་པའོ། །རྫུ་འཕྲུལ་གྱི་སྟོབས་བསྐྱེད་པ་ནི་གང་རྫུ་
འཕྲུལ་གྱིས་འདུལ་བའི་སེམས་ཅན་རྣམས་ལ་རྫུ་འཕྲུལ་དང་ཆོ་འཕྲུལ་ཐམས་ཅད་ཀྱིས་ཆོས་སྟོན་པའོ། །ཆོས་སྟོན་པའི་སྟོབས་བསྐྱེད་པ་ནི་འདི་ལྟ་སྟེ། ཅི་རིགས་པར་ཆོས་བསྟན་པས་གང་བྱང་ཆུབ་སེམས་དཔའི་ཆོས་བསྟན་པ་ཤེས་པ་དེ་དག་ཡང་དག་པར་སྡུག་བསྔལ་
ཟད་པར་བྱ་བའི་ཕྱིར་ངེས་པར་འབྱུང་བའོ། །བདུད་ཚར་གཅོད་པའི་སྟོབས་བསྐྱེད་པ་ནི་འདི་ལྟ་སྟེ། སངས་རྒྱས་ཀྱི་ཆོས་ལ་བྱ་བ་མི་འདོར་བས་སྟོབས་མཉམ་པ་མེད་པ་ཡིན་ནོ། །ནན་ཏན་གྱི་སྟོབས་བསྐྱེད་པ་ནི་འདི་ལྟ་སྟེ། ཇི་སྐད་སྨྲས་པ་དེ་བཞིན་དུ་བྱེད་པ་
སྟེ། དེ་དག་ནི་སྟོབས་བསྐྱེད་པ་རབ་ཏུ་འཐོབ་པ་བཅུ་དྲུག་གོ། །ཀླུའི་བདག་པོ་དེ་ལྟར་བྱང་ཆུབ་སེམས་དཔའ་གང་སྟོབས་བསྐྱེད་པ་བཅུ་དྲུག་པོ་དེ་དག་ཐོབ་པར་འདོད་པའི་བྱང་ཆུབ་སེམས་དཔའ་དེས་རྟག་ཏུ་བག་ཡོད་པར་བྱའོ། །ཀླུའི་བདག་པོ་འདི་ལྟ་སྟེ།
དཔེར་ན་རྒྱ་མཚོ་ཆེན་པོར་ཆུ་ཐམས་ཅད་འབབ་པའོ། །ཀླུའི་བདག་པོ་དེ་བཞིན་དུ་བག་ཡོད་པར་སངས་རྒྱས་ཀྱི་ཆོས་ཐམས་ཅད་ཡང་དག་པར་འདུའོ། །ཀླུའི་བདག་པོ་འདི་ལྟ་སྟེ། དཔེར་ན་ས་ལ་ས་བོན་ཐམས་ཅད་སྐྱེའོ། །ཀླུའི་བདག་པོ་དེ་བཞིན་དུ་བག་
ཡོད་པ་ལ་དགེ་བའི་ཆོས་ཐམས་ཅད་སྐྱེའོ། །ཀླུའི་བདག་པོ་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་ལ་སེམས་ཅན་ཐམས་ཅད་དགའོ། །ཀླུའི་བདག་པོ་དེ་བཞིན་དུ་བག་ཡོད་པའི་བྱང་ཆུབ་སེམས་དཔའ་ལ་ལྷར་བཅས་པའི་འཇིག་རྟེན་

དགའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །བྱང་ཆུབ་སེམས་དཔའ་མཁས་པ་གང་དག་ཅིག །སངས་རྒྱས་བྱང་ཆུབ་རྗེས་སུ་ཐོབ་འདོད་པ། །དེས་ནི་བག་མེད་སྤྱོད་པ་རྣམ་སྤངས་ནས། །རྟག་ཏུ་བག་
ཡོད་པ་ལ་བརྩོན་འགྲུས་བྱ། །མཁས་པ་བསྟེན་པའི་ཆོས་ལ་མོས་པ་དག །མཐར་ལྟ་བ་ལ་གནས་པར་མི་བྱེད་དེ། །རྒྱུ་མེད་རྐྱེན་མེད་ཆོས་ནི་ཡོད་མ་ཡིན། །ཆོས་ནི་རྒྱུར་བཅས་རྐྱེན་བཅས་རབ་ཏུ་ཤེས། །རྐྱེན་ལས་སྐྱེས་པ་གང་ཡིན་དེ་མ་སྐྱེས། །
དེ་ལ་སྐྱེ་བ་ངོ་བོ་ཉིད་ཀྱིས་མེད། །རྐྱེན་ལ་རག་ལས་གང་ཡིན་སྟོང་པར་གསུངས། །སྟོང་ཉིད་གང་ཤེས་དེ་ནི་བག་ཡོད་པའོ། །རྐྱེན་ཁར་གང་ལས་དེ་ནི་མཚན་མ་མེད། །སྨོན་ལམ་ལྡན་པ་ཞི་ཞིང་ཉེ་བར་ཞི། །མི་གཡོ་བེམས་པོ་རྩྭ་དང་ཤིང་ལྟ་བུ། །དེ་
ལ་བདུད་ཀྱི་ཡུལ་ནི་ཡོད་མ་ཡིན། །རྐྱེན་གྱི་ཁར་ལས་འདི་ནི་གང་ཤེས་པ། །དེ་འདིར་ང་དང་ང་ཡིར་འབྱུང་མི་འབྱུང་། །དེ་ནི་བདག་མིན་བདག་གི་མ་ཡིན་པར། །དེ་ལྟར་གང་ཤེས་དེ་ནི་བག་ཡོད་པའོ། །རྗེ་ཡོད་མ་ཡིན་ཡོངས་སུ་འཛིན་མེད་པ། །གཟུང་
བ་མེད་ཅིང་གྲོལ་བར་བྱ་བ་མེད། །བཅིངས་མེད་གྲོལ་མེད་རང་བཞིན་འོད་གསལ་བར། །ཆོས་རྣམས་རྟག་ཏུ་ཤེས་པ་བག་ཡོད་པའོ། །དོན་ལ་རྟོན་གྱི་ཚིག་འབྲུར་དགའ་མ་ཡིན། །རྟག་ཏུ་ཡེ་ཤེས་སྤྱོད་ཡུལ་རྣམ་ཤེས་གྲོལ། །ངེས་པའི་དོན་གྱི་མདོ་
སྡེའི་ཚུལ་ཤེས་པ། །དེ་ནི་ཆོས་ལ་རྟོན་གྱི་གང་ཟག་མིན། །སངས་རྒྱས་བསྟན་འདིར་དོན་ནི་སྟོང་ཉིད་དོན། །དེ་བཞིན་མཚན་མ་མེད་དང་སྨོན་ལས་གྲོལ། །སྲིད་པ་གསུམ་དང་རྟོག་དང་ལྟར་མི་གནས། །མདོ་དོན་གང་ཡིན་དེ་ནི་བག་ཡོད་པའོ། །སྒྲ་དང་བརྗོད་
པས་བརྗོད་དུ་མེད་པས་ན། །ཆོས་དང་ཆོས་མིན་གཉིས་སུ་གང་མི་བྱེད། །ཆོས་རྣམས་འཇོག་བྱེད་པ་ཡང་ཡོད་མིན་ཏེ། །གང་ཟག་མེད་པའི་དོན་འདི་བག་ཡོད་པའོ། །ཆོས་དོན་གཉེར་གྱི་ཉོན་མོངས་དོན་གཉེར་མིན། །མིག་གཟུགས་མི་གཉེར་རྣ་དང་

སྒྲ་ལ་མིན། །སྣ་དྲི་མི་གཉེར་ལྕེ་དང་རོ་ལ་མིན། །ལུས་རེག་མ་ཡིན་ཡིད་དང་ཆོས་ལ་མིན། །གཟུགས་ཀྱི་སྐྱེ་དང་གནས་པ་དོན་མི་གཉེར། །ཚོར་མིན་འདུ་ཤེས་མ་ཡིན་འདུ་བྱེད་མིན། །རྣམ་པར་ཤེས་པའི་གནས་པའང་དོན་མི་གཉེར། །
དེ་འདྲ་དེ་ནི་ཆོས་དོན་གཉེར་ཞེས་བྱ། །ཁམས་གསུམ་པ་ཡི་གནས་པའང་དོན་མི་གཉེར། །བདག་དང་སེམས་ཅན་མི་གཉེར་ལྟ་རྨོངས་མིན། །གཟུགས་ལུས་ནམ་ཡང་དོན་དུ་གཉེར་མ་ཡིན། །མིག་བློ་མ་ཡིན་ཡིད་ཀྱང་དོན་མི་གཉེར། །དགེ་འདུན་མི་གཉེར་
ཆོས་ཀྱང་དོན་མི་གཉེར། །སྦྱིན་པ་ནམ་དུའང་དོན་དུ་མི་གཉེར་ཞིང་། །ཚུལ་ཁྲིམས་བཟོད་མིན་བརྩོན་འགྲུས་བསམ་གཏན་མིན། །བདག་གི་བྱེ་བྲག་ཤེས་རབ་དོན་མི་གཉེར། །ཆོས་ཀུན་དོན་དུ་མི་གཉེར་གང་ཡིན་པ། །དེ་ནི་རྟག་ཏུ་ཆོས་གཉེར་རྒྱལ་བས་
གསུངས། །ནམས་ཀྱང་དོན་རྣམས་མི་གཉེར་གང་ཡིན་པ། །དེ་ནི་སངས་རྒྱས་བསྟན་འདིར་བག་ཡོད་ཡིན། །སྐྱེ་བ་མེད་ཤེས་སངས་རྒྱས་ཡེ་ཤེས་ཏེ། །སྐྱེ་མེད་གང་ཡིན་དེ་ནི་འབྱུང་བ་མིན། །འབྱུང་བ་མེད་ལ་ཞི་བའང་ཡོད་མ་ཡིན། །དེ་ལྟར་
གང་ཤེས་དེ་ནི་ལམ་སྒོམ་ཡིན། །ཕུང་པོ་ལྔ་ནི་སྒྱུ་མ་ལྟ་བུར་ཤེས། །ཇི་ལྟར་ཆོས་དབྱིངས་དེ་ལྟར་ཆོས་རྣམས་ཤེས། །ནང་གི་གྲོང་སྟོང་འདྲ་བར་རབ་ཏུ་ཤེས། །དེ་ལྟར་གང་ཤེས་དེ་ནི་བག་ཡོད་པའོ། །ཆོས་ཀྱི་དབྱེར་མེད་པ་དང་དབྱེ་བ་དང་། །དེ་བཞིན་
སེམས་ཅན་དབང་པོ་རྣམས་ཀྱང་ཤེས། །དྲན་པ་ཉེ་བར་གཞག་ལ་དྲན་མི་འཇུག །དེ་འདྲའི་ཡེ་ཤེས་སྟོབས་ཅན་བག་ཡོད་པའོ། །ཡང་དག་སྤོང་ལ་གཉིས་སུ་རབ་ཤེས་དང་། །དེ་ནི་རྫུ་འཕྲུལ་སེམས་སྟོབས་རབ་ཏུ་ཤེས། །སྟོབས་ལ་ཐུལ་བ་
ཡོད་པ་མ་ཡིན་དང་། །དབང་པོ་རྣམས་ཀྱི་རིམ་པ་ཤེས་པ་དང་། །བྱང་ཆུབ་ཡན་ལག་བསམ་གཏན་ཁོང་དུ་ཆུད། །མཁས་པ་འདུས་མ་བྱས་པའི་ཆོས་མངོན་ཤེས། །ཞི་གནས་ལ་ནི་སེམས་རབ་ཞི་བར་ཤེས། །ལྷག་མཐོང་གིས་ནི་ཆོས་རྣམས་

དབྱེ་བ་རྟོགས། །ཆོས་རྣམས་སྔོན་གྱི་མཐའ་ནས་བྱུང་བ་མེད། །ཕྱི་མའི་མཐར་ཡང་འཕོ་བ་གང་ཡང་མེད། །དེ་བཞིན་ཆོས་ཀུན་བར་ལའང་གནས་མིན་པར། །དེ་ལྟར་གང་ཤེས་དེ་ནི་བག་ཡོད་པའོ། །ལུས་ནི་སྙིང་པོ་མེད་དེ་གཟུགས་བརྙན་
འདྲ། །ངག་ཀྱང་སྟོང་པ་བྲག་ཅ་ལྟ་བུ་སྟེ། །སེམས་ཀྱང་སྒྱུ་མ་ལྟ་བུར་རླུང་འདྲ་བར། །དེ་ལྟར་གང་ཤེས་དེ་ནི་བག་ཡོད་པའོ། །ངེས་པའི་མདོ་ཚུལ་ལ་ནི་རབ་ཤེས་ཤིང་། །བརྟེན་ནས་འབྱུང་ཚུལ་ཁོང་དུ་ཆུད་རྟོགས་ལ། །མ་རིག་པ་དང་སྐྱེ་འཆི་འགོག་
པ་དག །ངེས་དོན་གང་ཤེས་དེ་ནི་བག་ཡོད་པའོ། །རྣམ་པར་ཐར་པའི་སྒོ་དང་དུས་གསུམ་དང་། །བསླབ་པ་གསུམ་དང་དམིགས་པ་མེད་པ་དང་། །བདག་མེད་སེམས་ཅན་སྲོག་མེད་གང་ཟག་མེད། །ཆོས་དང་ཆོས་མིན་གཟིངས་དང་འདྲ་བར་བསྟན། །
མ་སྐྱེས་ཐོབ་དང་མི་འགྱུར་འབྱུང་བ་དང་། །འཇིག་རྟེན་འདས་པའི་དབང་པོ་ཤེས་རབ་སྒོམ། །དེ་ལ་སེམས་པ་ཅུང་ཟད་མི་འབྱུང་སྟེ། །དེ་ཡི་ཚུལ་རྟོགས་པ་ནི་བག་ཡོད་པའོ། །སངས་རྒྱས་བྱུང་ངམ་མྱ་ངན་འདས་ཀྱང་རུང་། །ཆོས་དབྱིངས་དེ་ནི་
རྟག་ཏུ་གནས་པ་སྟེ། །ཡང་དག་དོན་ནི་རྟག་ཏུ་མཐོང་བ་མཁས། །ཆོས་ཉིད་འདི་ཤེས་པ་ནི་བག་ཡོད་པའོ། །སྔོན་གྱི་མཐའ་གང་དེ་ནི་ཡང་དག་མཐའ། །དེ་ཡི་མཐའ་ནི་རྒྱ་ཆེན་ཆོས་རྣམས་ཀུན། །ནམ་མཁའི་མཐའ་ནི་རྟག་ཏུ་སེམས་ཅན་མཐའ། །
ཆོས་ཉིད་འདི་ཤེས་པ་ནི་བག་ཡོད་པའོ། །ཆོས་ཉིད་ལས་ཀྱི་རྣམ་སྨིན་མེད་ཤེས་ཀྱང་། །དགེ་དང་མི་དགེའི་ལས་ནི་ཆུད་མི་ཟ། །ཕ་རོལ་ཕྱིན་ལ་གནས་པ་མ་གཏོགས་པར། །ཡེ་ཤེས་ཀྱིས་ནི་སངས་རྒྱས་ཐེག་མི་མཐོང་། །དབེན་པར་གནས་པར་ང་རྒྱལ་
ཐེག་པ་སྟེ། །ཉན་ཐོས་རྣམ་པར་གྲོལ་བའི་སྒྲ་ཕྱིར་འབྲང་། །སྦྱིན་པ་ཡིས་ནི་ལོངས་སྤྱོད་རབ་ཏུ་འཐོབ། །ཚུལ་ཁྲིམས་ཀྱིས་ནི་མཐོ་རིས་ངེས་པར་འཐོབ། །ཐོས་པས་ཤེས་རབ་དེ་བཞིན་སྒོམ་པ་འཐོབ། །འདུས་བྱས་ཀུན་ནི་ཚུལ་བཞིན་མིན་ལས་བྱུང་། །

གང་དག་མྱ་ངན་འདས་ཀུན་ཚུལ་བཞིན་གྱིས། །འདི་འདྲའི་ཆོས་ཉིད་འདི་ནི་བག་ཡོད་པའོ། །བྱིས་པ་དག་ནི་རྟག་ཏུ་ཉོན་མོངས་ཕྱེ། །མཁས་པ་ཡེ་ཤེས་ཀྱིས་ནི་ཆོས་སྟོན་ཏོ། །ཆོས་དབྱིངས་རྟག་ཏུ་སྒྲིབ་པ་མེད་པ་ལ། །ཆོས་འདི་ཐམས་
ཅད་མཚུངས་པར་རབ་ཏུ་འཇུག །བརྟེན་ནས་འབྱུང་བ་རབ་ཏུ་ཤེས་པ་ཡི། །དེ་ཡི་ཡོན་ཏན་བཞི་པོ་འདི་ཡིན་ཏེ། །དོན་དང་ཡེ་ཤེས་དེ་བཞིན་ཆོས་ཉིད་དང་། །ངེས་པའི་དོན་ཤེས་དེ་ནི་བག་ཡོད་པའོ། །ཆོས་ཀུན་བརྟེན་པ་ཡིན་པར་གང་ཤེས་པ། །
དེས་ནི་ཆོས་མཐོང་བདེ་བར་གཤེགས་ཀྱང་མཐོང་། །དེ་ནི་ཆོས་ཉིད་བརྟེན་ནས་འབྱུང་བར་མཉམ། །ཆོས་ཉིད་རྟག་ཏུ་འདོད་ཆགས་བྲལ་བ་ཐོབ། །བརྟེན་ནས་བྱུང་བས་གནས་ཏེ་ཐོབ་འགྱུར་ཏེ། །ཆོས་ནི་སྒྲ་དང་བྲལ་ཞིང་ཡི་གེ་མེད། །ཆོས་འདི་རྗེས་
སུ་རྟོགས་པ་དེ་ཡི་ཕྱིར། །སངས་རྒྱས་ལ་ནི་དེ་བཞིན་གཤེགས་ཞེས་བྱ། །ཤེས་རབ་མིག་གིས་བརྟེན་པ་མཐོང་བ་སྟེ། །མཐོང་བ་མེད་པར་མཐོང་བ་ཆོས་མཐོང་བའོ། །ཤེས་རབ་མིག་གིས་བརྟེན་པ་གང་མཐོང་བ། །དེ་ནི་སངས་རྒྱས་མཐོང་བ་ཡིན་ཞེས་
བྱ། །དེ་ནི་ཕྱིར་ཞིང་ཉོན་མོངས་མི་སྤྱོད་དེ། །རྟག་ཏུ་འཕགས་པ་ལ་ནི་དད་པར་བྱེད། །ཞིག་པའི་ཆོས་ཀྱང་འདོར་བ་མ་ཡིན་ཞིང་། །འཕགས་པའི་རིགས་ནི་ཀུན་དུ་སྲུང་བར་བྱེད། །མཁས་པ་ཐོས་པ་བརྗེད་པར་མི་བྱེད་པ། །དེ་ནི་སངས་རྒྱས་བསྟན་པ་
ཡོངས་སུ་སྲུང་། །འཕགས་པའི་ཚུལ་ཁྲིམས་སྤོང་བར་མི་བྱེད་དེ། །མཁས་པ་ཏིང་ངེ་འཛིན་ལས་རྟག་མི་ཉམས། །ཤེས་རབ་ཕུང་པོ་ལས་ནི་མཁས་མི་གཡོ། །རྣམ་པར་གྲོལ་བའི་ཕུང་། པོར་རྟག་ཏུ་གནས། །རྣམ་གྲོལ་ཡེ་ཤེས་རྣམ་པར་མཐོང་བ་ལ། །
རབ་ཏུ་གནས་པར་གང་གྱུར་བག་ཡོད་པའོ། །སངས་རྒྱས་ཆོས་རྣམས་མཐའ་ཡས་རབ་རྟོགས་པ། །དེ་ནི་ཐུབ་པའི་ཡེ་ཤེས་མཐའ་ཡས་ཚོལ། །སངས་རྒྱས་བྱང་ཆུབ་སྤོབས་པ་ཕུན་སུམ་དང་། །སོ་སོར་རིག་དང་སེམས་ཅན་བསམ་པ་ཤེས། །སེམས་

ཅན་དག་གི་བསམ་པ་ཚད་མེད་ཤེས། །སྐད་ཅིག་གཅིག་གིས་མཐའ་ཡས་ཞིང་དུ་འགྲོ། །ཚད་མེད་པ་ཡི་དེ་བཞིན་གཤེགས་མཐོང་ནས། །དེ་དག་ལས་ཐོས་ཆོས་ནི་འཛིན་པར་བྱེད། །ཐོས་ནས་དེ་ནི་དེ་བཞིན་དོན་ཀྱང་རྟོགས། །སེམས་ཅན་ཚད་མེད་
ཡོངས་སུ་སྨིན་པར་བྱེད། །དེ་དག་གི་ནི་སྤྱོད་པ་ཚད་མེད་ཤེས། །དྲན་དང་ལྡན་པ་གང་ཡིན་བག་ཡོད་པའོ། །རྟག་ཏུ་བདག་གི་ཁར་ལས་བག་ཡོད་པ། །རང་སེམས་ངེས་པར་སེམས་པ་ཡོན་ཏན་འཇུག །སེམས་ལ་ངེས་སེམས་ཉོན་མོངས་ཡོད་མ་ཡིན། །
དེ་ནི་ནམ་དུའང་ཡུལ་གྱིས་ཉམས་པ་མེད། །སྐྱེ་དང་གནས་དང་འཇིག་པ་ཤེས་པ་ནི། །ཉེ་བར་ལེན་པ་ཀུན་ལས་སེམས་དབེན་ཏེ། །ལྷག་མཐོང་དང་ནི་ཞི་གནས་ལ་ཡང་མཁས། །དེ་ཡི་སྒྲུབ་པ་ཉམས་པར་མི་འགྱུར་རོ། །ཤིན་ཏུ་ཞི་ཞིང་དུལ་སེམས་ལས་
སུ་རུང་། །རྟག་ཏུ་དྲང་ཞིང་གཡོ་མེད་ཡོན་པོ་མིན། །ཚུལ་འཆོས་མེད་ཅིང་མཉེན་ལ་དེས་པ་སྟེ། །འདི་ནི་ངེས་པར་སེམས་པའི་ཕན་ཡོན་ནོ། །སྟོང་པ་མཚན་མེད་སྨོན་པ་མེད་ཅིང་དབེན། །འཁོར་བ་སྡུག་བསྔལ་བ་དང་མི་རྟག་ཤེས། །རྟག་ཏུ་ཆོས་
བདག་མེད་ཅིང་མྱ་ངན་འདས། །ངེས་པར་སེམས་པའི་སེམས་སྤྱོད་བག་ཡོད་པའོ། །རྟག་ཏུ་ཐམས་ཅད་མཁྱེན་པའི་སེམས་འཛིན་ཅིང་། །སེམས་ཅན་རྣམས་ལ་བྱམས་པའི་སེམས་མཉམ་པ། །སྙིང་རྗེས་སེམས་ཅན་རྣམས་ནི་མི་གཏོང་ཞིང་། །དགའ་
བས་འཁོར་བ་ན་ནི་སྐྱོ་བ་མེད། །བཏང་སྙོམས་ཆེན་པོ་སྐྱོན་རྣམས་སྤངས་པ་སྟེ། །ཀུན་གཏོང་འདོད་ཆགས་བྲལ་བ་འདོད་པ་མེད། །སྦྱངས་པ་ཐམས་ཅད་དང་ནི་མི་གཡེང་བསྙེན། །བྱས་དང་མ་བྱས་བཟོད་པས་ཇི་མི་སྙམ། །སེམས་ཅན་ཐར་བར་བྱ་ཕྱིར་
ངོམས་མེད་སེམས། །དེ་ནི་རྩོམ་པ་བརྟན་པར་ཞི