Kinh tạng Tây Tạng (Kangyur Đại Học) — 052_མདོ་སྡེ།_ཉ

ེམས་བསྐྱེད་པ་བསད་དམ་ཕ་བསད་ན་གང་ཟག་དེ་ནི་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་ངོ་
ཞེས་ཐོས་ན། བདག་ད་ལུས་དང་སེམས་མི་ན་བའི་གཏོལ་ག་ལ་ཡོད། བློན་པོ་ཆེན་པོ་དེས་སྨྲས་པ། རྒྱལ་པོ་ཆེན་པོ་རེ་ཞིག་མྱ་ངན་མ་བྱེད་ཅིག །རྒྱལ་པོ་ཡབ་རྣམ་པར་གྲོལ་བའི་ལམ་ལ་ནན་ཏན་བྱེད་པ་ཞིག་ཡིན་པ་ལས་བསད་ན་སྡིག་པར་འགྱུར་རོ། །གལ་ཏེ་རྒྱལ་
པོའི་སྲིད་ཀྱི་ཕྱིར་བསད་ན་སྡིག་པར་མི་འགྱུར་རོ། །རྒྱལ་པོ་ཆེན་པོ་ཆོས་མ་ཡིན་པ་ནི་ཆོས་མ་ཡིན་པ་ཞེས་བྱའོ། །ཆོས་མེད་པ་ལ་ཡང་ཆོས་མེད་པ་ཞེས་བྱ་སྟེ། དཔེར་ན་བུ་མེད་པ་ལ་བུ་མེད་དོ་ཞེས་བྱ་བ་དང་འདྲ་བར། བུ་ངན་པ་ཡོད་པ་ལ་བུ་མེད་པ་ཞེས་བྱ་སྟེ། དེ་ལྟར་བུ་མེད་
པའོ་ཞེས་བྱ་མོད་ཀྱི་ཡང་དག་པར་ན་བུ་མེད་པ་མ་ཡིན་ནོ། །དཔེར་ན་ཟས་ཀྱི་ནང་ན་ལན་ཚྭ་མེད་ན་ལན་ཚྭ་མེད་དོ་ཞེས་བྱ་བ་དང་འདྲ་བར། ལན་ཚྭ་མི་བྲོ་ན་ཡང་ལན་ཚྭ་མེད་དོ་ཞེས་བྱ་བ་དང་། དཔེར་ན་ཆུ་མེད་པ་ལ་ཆུ་མེད་དོ་ཞེས་བྱ་བ་དང་འདྲ་བར། ཆུ་ཅུང་ཟད་ཡོད་པ་ལ་ཡང་ཆུ་མེད་དོ་
ཞེས་བྱ་བ་དང་། དཔེར་ན་སྐད་ཅིག་སྐད་ཅིག་ཙམ་གྱིས་འགག་པ་ལ་ཡང་མི་རྟག་ཅེས་བྱ་བ་དང་། གལ་ཏེ་བསྐལ་པའི་བར་དུ་གནས་ན་ཡང་མི་རྟག་གོ་ཞེས་བྱ་བ་དང་། དཔེར་ན་མི་ཞིག་སྡུག་བསྔལ་མྱོང་ན་བདེ་བ་མེད་དོ་ཞེས་བྱ་བ་དང་འདྲ་བར་དགའ་བ་ཅུང་ཟད་ཙམ་མྱོང་བ་ཡང་དེ་ལ་
བདེ་བ་མེད་པ་ཞེས་བྱ་བ་དང་། དཔེར་ན་དབང་དུ་མ་གྱུར་པ་ལ་ནི་ང་རྒྱལ་མེད་དོ་ཞེས་བྱ་བ་དང་འདྲ་བར་དབང་ཅུང་ཟད་ཙམ་ཡོད་ཀྱང་ང་རྒྱལ་མེད་པའོ་ཞེས་བྱ་བ་དང་། དཔེར་ན་ནམ་སྲོས་ན་ཉི་མ་མེད་དོ་ཞེས་བྱ་བ་དང་འདྲ་བར། ཉི་མ་སྤྲིན་གྱིས་ཆོད་ན་ཡང་ཉི་མ་མེད་དོ་ཞེས་བྱ་སྟེ། རྒྱལ་
པོ་ཆེན་པོ་ཆོས་ཅུང་ཟད་ཙམ་ཡོད་པ་ལ་ཡང་ཆོས་མེད་པ་ཞེས་བྱ་སྟེ། ཡང་དག་པར་ན་ཆོས་མེད་པ་མ་ཡིན་ནོ། །རྒྱལ་པོ་ཆེན་པོ་བདག་གིས་གསོལ་པའི་ཚིག་འདི་ཉོན་ཅིག །སེམས་ཅན་ཐམས་ཅད་ལ་ལས་ལྷག་མ་ཞེས་བྱ་བ་ཡོད་དེ། ལས་ཀྱི་དབང་གིས་ཡང་དང་ཡང་དུ་འཁོར་

བར་འཁོར་བར་གྱུར་ཏོ། །གལ་ཏེ་རྒྱལ་པོ་ཡབ་ལ་ཡང་ལས་ལྷག་མ་ཞེས་བྱ་བ་ཡོད་ན། ད་རྒྱལ་པོས་བསད་ཀྱང་སྡིག་པར་མི་འགྱུར་རོ། །རྒྱལ་པོ་ཆེན་པོ་རེ་ཞིག་མྱ་ངན་བསད་དུ་གསོལ། དེ་ཅིའི་ཕྱིར་ཞེ་ན། རྟག་ཏུ་མྱ་ངན་གང་བྱེད་པ། །མྱ་ངན་ཕྱིར་ཞིང་སྐྱེ་བར་འགྱུར། །ཇི་ལྟར་
གཉིད་ལ་དགའ་བ་ཡང་། །ཕྱིར་ཞིང་དེ་བཞིན་གཉིད་ཆེར་འགྱུར། །དེ་བཞིན་འདོད་ཆགས་སྲེད་པ་དང་། །ཆང་དད་ཆེ་བའང་རིག་པར་བྱ། །རྒྱལ་པོ་གསུང་བ་ལྟར་འཇིག་རྟེན་ན་ལུས་དང་སེམས་ཀྱི་ནད་གསོ་བའི་སྨན་པ་མཁས་པ་མེད་ཅེས་བྱར་མི་རུང་སྟེ། ད་ལྟར་སྟོན་པ་ཆེན་པོ་
བེ་ར་ཏའི་བུ་ཀུན་རྒྱལ་ཞེས་བྱ་བ་ཐམས་ཅད་མཁྱེན་པ། ཐམས་ཅད་གཟིགས་པ། ཤེས་རབ་རྒྱ་མཚོ་ལྟར་ཤིན་ཏུ་ཟབ་ཅིང་ཡངས་པ། གཟི་བརྗིད་ཆེན་པོ་དང་ལྡན་པ། མངོན་པར་ཤེས་པ་ཆེན་པོ་དང་ལྡན་ཞིང་སེམས་ཅན་ཐམས་ཅད་ཐེ་ཙོམ་གྱི་དྲ་བ་ལས་ཡོངས་སུ་འདོན་པ།
སེམས་ཅན་ཐམས་ཅད་ཀྱིས་མི་ཤེས་མི་མཐོང་མི་རྟོགས་པའི་ཆོས་ཐམས་ཅད་སྟོན་པ་ཆེན་པོ་དེ་གཅིག་པུས་མཁྱེན་ཅིང་གཟིགས་པས་ད་ལྟར་རྒྱལ་པོའི་ཁབ་ན་གནས་ཤིང་ཉེ་གནས་མང་པོ་ལ་འདི་སྐད་དུ་ཆོས་སྟོན་ཏོ། །འཁོར་མང་པོའི་ནང་དུ་གལ་ཏེ་རྒྱལ་པོ་དབང་དུ་གྱུར་པ་དག་
ཡིད་བཞིན་དུ་དགེ་བ་དང་། སྡིག་པའི་ལས་བྱེད་པ་དེ་སྡིག་པ་མང་པོ་བྱས་ཀྱང་ཁ་ན་མ་ཐོ་བའི་སྡིག་པར་མི་འགྱུར་རོ། །དཔེར་ན་མེ་ཆེན་པོས་ཚིག་པ་ན་གཙང་བའམ་མི་གཙང་བ་ཞེས་བྱ་བ་མེད་དེ་རྒྱལ་པོ་ཡང་དེ་དང་འདྲའོ། །དཔེར་ན་ས་ཆེན་པོ་ནི་གཙང་བ་དང་མི་གཙང་བ་
ཐམས་ཅད་ཀྱི་གནས་སུ་གྱུར་ཏེ། དེ་ལྟ་བུའི་ལས་བྱེད་ཀྱང་ཞེ་སྡང་བ་དང་དགའ་བ་མེད་དོ། །རྒྱལ་པོ་ཆེན་པོ་ཡང་ས་ཆེན་པོ་དང་འདྲ་སྟེ་ཞེ་སྡང་བ་དང་དགའ་བ་ཞེས་བྱ་བ་མེད་དོ། །དཔེར་ན་ཆུ་དང་བ་ནི་གཙང་བ་དང་མི་གཙང་བ་ཐམས་ཅད་བཀྲུས་ཀྱང་དེ་ལ་དགའ་བ་དང་མི་དགའ་
བ་མེད་དེ་རྒྱལ་པོ་ཆེན་པོ་ཡང་ཆུ་དང་འདྲའོ། །དཔེར་ན་རླུང་ནི་གཙང་བ་དང་མི་གཙང་བ་ཐམས་ཅད་འཕྱག་གོ། །དེ་ལྟར་དེ་ལྟ་བུའི་ལས་བྱེད་ཀྱང་དེ་ལ་ནི་དགའ་བ་དང་མི་དགའ་བ་མེད་དེ་རྒྱལ་པོ་ཆེན་པོ་ཡང་རླུང་དང་འདྲའོ། །དཔེར་ན་སྟོན་ཤིང་བཅད་ན་དབྱར་ཕྱིར་སྐྱེའོ། །

དེ་ལྟར་ཤིང་བཅད་ཀྱང་ཡང་དག་པར་ན་སྡིག་པར་མི་འགྱུར་བ་དང་འདྲ་བར་སེམས་ཅན་ཐམས་ཅད་ཀྱང་དེ་དང་འདྲ་སྟེ། འདི་ནས་ཚེ་འཕོས་ནས་ཕྱིར་ཡང་འདིར་སྐྱེའོ། །དེ་ལྟར་ཕྱིར་ཡང་འདིར་སྐྱེ་བས་ན་སྡིག་པར་མི་འགྱུར་རོ། །སེམས་ཅན་ཐམས་ཅད་ཀྱི་
སྡུག་བསྔལ་དང་བདེ་བའི་འབྲས་བུ་རྣམ་པར་སྨིན་པ་བདག་ལ་དབང་མེད་དེ། ད་ལྟར་གྱི་དུས་ན་ལས་རྣམ་པར་སྨིན་པ་ཡང་སྔོན་འདས་པའི་དུས་ཀྱི་རྒྱུ་ལ་རག་ལུས་ཏེ། ད་ལྟར་གྱི་དུས་ན་རྣམ་པར་སྨིན་པ་ནི་ད་ལྟར་གྱི་དུས་ན་རྒྱུ་མེད་དེ། མ་འོངས་པའི་དུས་ནའང་འབྲས་བུ་རྣམ་
པར་སྨིན་པ་མེད་དོ། །ད་ལྟར་གྱི་འབྲས་བུ་ཉིད་སྨིན་པས་ན་སོ་སོའི་སྐྱེ་བོ་དག་ཚུལ་ཁྲིམས་སྲུང་བ་དང་བརྩོན་འགྲུས་རྩོམ་པ་ཡང་ད་ལྟར་གྱི་དུས་ཀྱི་སྡིག་པར་འགྱུར་བའི་འབྲས་བུ་བཟློག་པའི་ཕྱིར་རོ། །ཚུལ་ཁྲིམས་བསྲུངས་པས་ཟག་པ་མེད་པར་འགྱུར་རོ། །ཟག་པ་མེད་
པས་ཟག་པ་དང་བཅས་པའི་ལས་མེད་པར་འགྱུར་རོ། །དེ་ལྟར་ལས་ཟད་པས་ན་སྡུག་བསྔལ་མང་པོ་ཡང་ཟད་པར་འགྱུར་རོ། །སྡུག་བསྔལ་མང་པོ་ཟད་པས་ན་རྣམ་པར་གྲོལ་བར་འགྱུར་རོ་ཞེས་སྟོན་པ་དེའི་གན་དུ་མྱུར་དུ་བཞུད་ཅིག །ལུས་དང་སེམས་སྡུག་བསྔལ་
བར་འགྱུར་བའི་ནད་ཀྱང་འཚོ་ལ། དེ་དང་ཕྲད་ན་སྡིག་པ་ཡང་ཡོངས་སུ་འབྱང་བར་འགྱུར་རོ། །རྒྱལ་པོ་ཆེན་པོས་སྨྲས་པ། དེ་ལྟར་བདག་གི་སྡིག་པ་ངེས་པར་འབྱང་བར་འགྱུར་ན་ལྟ་དེ་ལ་སྐྱབས་སུ་འགྲོ་བར་བྱའོ་ཞེས་སྨྲས་སོ། །དེ་ནས་ཡང་བློན་པོ་ཆེན་པོ་དོན་ཐམས་ཅད་
ཤེས་པ་ཞེས་བྱ་བ་ཞིག་རྒྱལ་པོའི་དྲུང་དུ་འོངས་ནས་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཅིའི་ཕྱིར་འདི་ལྟར་ངོ་འཛུམ་གནག་ཅིང་མདོག་མེད་པ་ནི་ཇི་ལྟར་རྒྱལ་པོ་སྲིད་སྟོར་བའམ། ཆུ་མིག་སྐམས་པའམ། མེ་ཏོག་པད་མོ་མེད་པའི་རྫིང་ངམ། མེ་ཏོག་དང་ལོ་མ་མེད་པའི་
ཤིང་ངམ། དགེ་སློང་ཚུལ་ཁྲིམས་ཉམས་པ་དང་འདྲ་བར་གཟི་བརྗིད་མེད་པར་འགྱུར་བ་འདི། འོན་ཏེ་ལུས་སྡུག་བསྔལ་བར་གྱུར་ཏམ། འོན་ཏེ་སེམས་སྡུག་བསྔལ་བར་གྱུར། རྒྱལ་པོས་སྨྲས་པ་ངའི་ལུས་དང་སེམས་ད་ལྟར་སྡུག་བསྔལ་མེད་པའི་གཏོལ་ག་ལ་ཞིག་ཡོད།

བདག་གི་ཡབ་རྒྱལ་པོ་བདག་ལ་བྱམས་བརྩེ་བས། རྟག་ཏུ་རབ་ཏུ་བདེ་བ་ཐམས་ཅད་ཀྱིས་བདག་ལ་བདེ་བར་བྱེད་པ་ལས་བདག་གི་བྱམས་པའི་དྲིན་མ་དྲན་ནས་རྒྱལ་པོ་ཡབ་ཉེས་པ་མེད་པར་བདག་གིས་བསད་དོ། །བདག་གིས་སྔོན་མཁས་པ་ཤེས་རབ་ཅན་དག་ལས་ཐོས་ན། གལ་ཏེ་ཕ་
མ་བསད་པར་གྱུར་ན། གདོན་མི་ཟ་བར་བསྐལ་པ་གྲངས་མེད་པའི་བར་དུ་སྡུག་བསྔལ་ཆེན་པོ་མྱོང་བར་འགྱུར་ཞེས་ཐོས་ན། བདག་ནི་རིང་པོ་མི་ཐོགས་པར་མཚམས་མེད་པའི་སེམས་ཅན་དམྱལ་བར་ལྟུང་དུ་ངེས་ཏེ། བདག་གི་སྡིག་པ་འདི་གསོ་བའི་སྐྱབས་སུ་འགྱུར་བ་མེད་དོ། །བློན་
པོ་དེས་སྨྲས་པ། རྒྱལ་པོ་ཆེན་པོ་རེ་ཞིག་མྱ་ངན་མ་བྱེད་ཅིག །ཅི་རྒྱལ་པོས་མ་ཐོས་སམ། སྔོན་རྒྱལ་པོ་ལམ་པ་ཞེས་བྱ་བས་ཕ་བསད་དེ་རྒྱལ་པོའི་སྲིད་བཟུང་ངོ་། །རྒྱལ་པོ་བདེ་ཞེས་བྱ་བ་དང་། རྒྱལ་པོ་བྱི་ལ་ཙི་ན་དང་། རྒྱལ་པོ་ན་ཧོ་ཤ་དང་། རྒྱལ་པོ་ཀ་ཏེ་ཀ་དང་། རྒྱལ་པོ་བྱི་ཤ་ཀ་དང་།
རྒྱལ་པོ་ཟླ་འོད་དང་། རྒྱལ་པོ་ཉི་འོད་དང་། རྒྱལ་པོ་འོད་ལྡན་དང་། རྒྱལ་པོ་འགྲོ་བ་མང་པོ་འཛིན་ལ་སོགས་པ་རྒྱལ་པོ་དེ་དག་ཀྱང་ཕ་བསད་ནས་རྒྱལ་པོའི་སྲིད་བཟུང་ཡང་། རྒྱལ་པོ་དེ་དག་ལས་གཅིག་ཙམ་ཡང་སེམས་ཅན་དམྱལ་བར་ལྟུང་བ་མེད་དོ། །ད་ལྟར་གྱི་རྒྱལ་པོ་བཻ་དཱུརྱ་དང་།
རྒྱལ་པོ་ཨོ་ཏ་ན་དང་། རྒྱལ་པོ་གཏུམ་པ་དང་། རྒྱལ་པོ་བྱི་བ་དང་། རྒྱལ་པོ་པད་མོ་ལ་སོགས་པ་རྒྱལ་པོ་དེ་དག་ཀྱང་ཕ་བསད་ནས་རྒྱལ་པོའི་སྲིད་བཟུང་སྟེ། གཅིག་ཀྱང་མྱ་ངན་བྱེད་པ་མེད་དོ། །སེམས་ཅན་དམྱལ་བ་དང་། ཡི་དགས་དང་། ལྷར་སྐྱེ་ཞེས་བྱ་བ་ཡང་སུས་མཐོང་།
རྒྱལ་པོ་ཆེན་པོ་སྲིད་པ་གཉིས་སུ་ཟད་པ་ནི་མི་དང་བྱོལ་སོང་ངོ་། །དེ་ལྟར་སྲིད་པ་གཉིས་པོ་ཡང་རྒྱུ་དང་རྐྱེན་གྱིས་སྐྱེ་བ་ཡང་མ་ཡིན་ལ། རྒྱུ་དང་རྐྱེན་གྱིས་འཆི་བ་ཡང་མ་ཡིན་ནོ། །དེ་ལྟར་རྒྱུ་རྐྱེན་མེད་པས་ན་དགེ་བ་དང་སྡིག་པ་ག་ལ་ཞིག་ཡོད། རྒྱལ་པོ་ཆེན་པོ་མྱ་ངན་མ་བྱེད་ཅིག །དེ་
ཅིའི་ཕྱིར་ཞེ་ན། རྟག་ཏུ་མྱ་ངན་གང་བྱེད་པ། །མྱ་ངན་ཕྱིར་ཞིང་སྐྱེ་བར་འགྱུར། །ཇི་ལྟར་གཉིད་ལ་དགའ་བ་ཡང་། །ཕྱིར་ཞིང་དེ་བཞིན་གཉིད་ཆེར་འགྱུར། །དེ་བཞིན་འདོད་ཆགས་སྲེད་པ་དང་། །ཆང་དད་ཆེ་བའང་རིག་པར་བྱ། །རྒྱལ་པོ་གསུང་བ་ལྟར་འཇིག་རྟེན་ན་ལུས་དང་སེམས་

ཀྱི་ནད་གསོ་བའི་སྨན་པ་མཁས་པ་མེད་ཅེས་བྱ་བ་མི་རུང་སྟེ། ད་ལྟར་སྟོན་པ་ཆེན་པོ་ཀཱ་ཏྱཱའི་བུ་ནོག་ཅན་ཞེས་བྱ་བ་ཐམས་ཅད་མཁྱེན་པ། ཐམས་ཅད་གཟིགས་པ། ས་ཆེན་པོ་དང་འདྲ་བ། གསེར་དང་ས་ལ་བྱེ་བྲག་མི་འབྱེད་པ། རྩིབ་ལོགས་གཡས་པ་ནས་ཙན་དན་གྱི་
འདའ་གུ་སྐུད་པ་དང་། རྩིབ་ལོགས་གཡོན་པ་ན་རྡོ་དབྱུག་དང་མཚོན་ཆ་ཐོགས་ཏེ་འཚོག་ཀྱང་དེ་གཉིས་ཀ་ལ་ཁྱད་པར་མེད་པ། བྱམས་པ་དང་སྡང་བ་ལ་སེམས་མཉམ་པ། སྟོན་པ་ཡང་དག་པ་འཇིག་རྟེན་གྱི་སྨན་པ་མཁས་པར་གྱུར་པ། གལ་ཏེ་འགྲོའམ། འདུག་གམ། སྡོད་དམ། ཉལ་
ཡང་རྟག་ཏུ་ཏིང་ངེ་འཛིན་ལ་སེམས་མཉམ་པར་འཇོག་སྟེ། མ་འཁྲུགས་པའི་སྟོན་པ་ཆེན་པོ་དེ་ད་ལྟ་ཉེ་གནས་མང་པོ་ལ་འདི་སྐད་ཅེས་ཆོས་སྟོན་ཏོ། །གལ་ཏེ་བདག་གིས་བྱས་སམ། གཞན་བྱེད་དུ་བཅུག་གམ། གལ་ཏེ་བདག་གིས་བསད་དམ། གཞན་གསོད་དུ་བཅུག་གམ། གལ་ཏེ་བདག་
གིས་བསྲེགས་སམ། གཞན་སྲེག་དུ་བཅུག་གམ། གལ་ཏེ་བདག་གིས་གཙེས་སམ། གཞན་འཚེར་བཅུག་གམ། གལ་ཏེ་བདག་གིས་བརྐུས་སམ། གཞན་རྐུར་བཅུག་གམ། གལ་ཏེ་བདག་གིས་མི་ཚངས་པར་སྤྱད་དམ། གཞན་མི་ཚངས་པར་སྤྱོད་དུ་བཅུག་གམ། གལ་ཏེ་བདག་གིས་
བརྫུན་དུ་སྨྲས་སམ། གཞན་བརྫུན་ཟེར་དུ་བཅུག་གམ། གལ་ཏེ་བདག་གིས་ཆང་འཐུངས་སམ། གཞན་ཆང་འཐུང་དུ་བཅུག་གམ། གལ་ཏེ་བདག་གིས་གྲོང་ཁྱེར་གཅིག་གམ། གྲོང་རྡལ་གཅིག་གམ། ཡུལ་གཅིག་གི་མི་བསད་དམ། གལ་ཏེ་རལ་གྲིའི་འཁོར་ལོས་སེམས་ཅན་ཐམས་ཅད་
བསད་དམ། གལ་ཏེ་ཀླུང་གང་གཱའི་ལྷོ་ཕྱོགས་ཀྱི་སེམས་ཅན་ཐམས་ཅད་ལ་སྦྱིན་པ་བྱིན་པ་དང་། ཀླུང་གང་གཱའི་བྱང་ཕྱོགས་ཀྱི་སེམས་ཅན་ཐམས་ཅད་བསད་ཀྱང་དེ་གཉིས་ལ་སྡིག་པ་དང་བསོད་ནམས་སུ་འགྱུར་བ་མེད་དེ། སྦྱིན་པ་དང་། ཚུལ་ཁྲིམས་དང་། ཏིང་ངེ་འཛིན་མེད་དོ་ཞེས་སྟོན་པ་དེ་ད་
ལྟར་རྒྱལ་པོའི་ཁབ་ན་བཞུགས་ཀྱིས། རྒྱལ་པོ་ཆེན་པོ་མྱུར་དུ་སྟོན་པ་ཆེན་པོ་དེའི་གན་དུ་བཞུད་ཅིག །གལ་ཏེ་དེ་དང་ཕྲད་ན་སྡིག་པ་ཡོངས་སུ་བྱང་བར་འགྱུར་རོ། །རྒྱལ་པོས་སྨྲས་པ། གལ་ཏེ་ཡང་དག་པར་དེ་ལྟར་བདག་གི་སྡིག་པ་འབྱང་བར་འགྱུར་ན་ལྟ་དེ་ལ་སྐྱབས་སུ་འགྲོ་བར་བྱའོ།། །།

འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་དྲུག་པ། དེ་ནས་ཡང་བློན་པོ་བཀྲ་ཤིས་ཞེས་བྱ་བས་རྒྱལ་པོ་ཆེན་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཅིའི་ཕྱིར་འདི་ལྟར་ངོ་འཛུམ་གནག་ཅིང་མདོག་ཀྱང་མེད་པ་ནི་ཇི་ལྟར་ཉི་མ་ལ་མར་མེ་བཞག་པའམ། ཉིན་པར་
གྱི་ཟླ་བའམ། སྲིད་སྟོར་བའི་རྒྱལ་པོའམ། ས་རུབ་པ་དང་འདྲ་བར་གྱུར། རྒྱལ་པོ་ཆེན་པོ་ལ་ནི་ད་ལྟར་ཕྱོགས་བཞི་ནས་ཕས་རྒོལ་བའི་དགྲ་ཡང་མེད་ན། ཅིའི་ཕྱིར་འདི་ལྟར་མྱ་ངན་བྱེད་ཅིང་སྡུག་བསྔལ་གྱིས་ནོན་པར་གྱུར། རྒྱལ་པོ་ཆེན་པོ་འོན་ཏེ་ལུས་སྡུག་བསྔལ་བར་གྱུར་ཏམ། འོན་ཏེ་སེམས་སྡུག་
བསྔལ་བར་གྱུར། རྒྱལ་བུ་དག་རྟག་ཏུ་འདི་སྙམ་དུ་སེམས་ཏེ། བདག་ནམ་ཞིག་གི་དུས་ན་དབང་དུ་གྱུར་པའི་རྒྱལ་པོར་འགྱུར་ཞིང་ཐམས་ཅད་ལ་དབང་སྒྱུར་སྙམ་སེམས་སོ། །རྒྱལ་པོ་ཆེན་པོ་ནི་དེ་ལྟར་བསམས་པ་བཞིན་གྲུབ་སྟེ། དེ་ལྟར་ཡུལ་དབུས་གྱུར་འཆང་གི་རྒྱལ་པོར་ཡང་གྱུར་ལ།
རིན་པོ་ཆེའི་གཏེར་མཛོད་མང་པོ་ཡང་དབང་བར་གྱུར་ཏེ། ཡིད་བཞིན་དུ་བདེ་བ་ལ་ལོངས་སྤྱོད་ན་འདི་ལྟར་མྱ་ངན་གྱིས་ནོན་ཅིང་སྡུག་བསྔལ་བར་མ་བྱེད་ཅིག །རྒྱལ་པོས་སྨྲས་པ། བདག་གིས་མྱ་ངན་མི་བྱ་བའི་གཏོལ་ག་ལ་ཞིག་ཡོད། བློན་པོ་ཆེན་པོ་དཔེར་ན་མི་གླེན་པ་མི་ཤེས་པ་ནི་ཟས་ལ་
ཆགས་པའི་ཕྱིར་མཚོན་རྣོན་པོ་ཡང་མི་མཐོང་ངོ་། །ཟས་ཀྱི་ནང་དུ་དུག་བླུགས་ཀྱང་དུག་ཡོད་པར་མི་ཤེས་པ་དང་འདྲ་བར་བདག་ཀྱང་དེ་དང་འདྲའོ། །དཔེར་ན་ཤ་བ་རྩྭ་མཐོང་ན་རླུབས་མི་མཐོང་ངོ་། །དཔེར་ན་བྱི་བ་ཟས་ལ་ཆགས་ན་བྱི་ལ་མི་མཐོང་བ་དང་འདྲ་བར་བདག་ཀྱང་དེ་དང་འདྲ་སྟེ། ད་
ལྟར་གྱི་བདེ་བ་འབའ་ཞིག་མཐོང་ནས་མ་འོངས་པའི་མི་དགེ་བའི་འབྲས་བུ་རྣམ་པར་སྨིན་པ་ནི་མ་མཐོང་ངོ་། །སྔོན་མཁས་པ་ཤེས་རབ་ཅན་ལས་འདི་སྐད་ཅེས་ཐོས་ཏེ། ཉིན་གཅིག་ཅིང་ལུས་ལ་མཚོན་ཤཀ་ཏི་སུམ་བརྒྱ་བཙུགས་ཀྱང་བླའི། ཕ་དང་མ་ལ་སྐད་ཅིག་ཙམ་ཡང་ངན་སེམས་མི་བསྐྱེད་
དོ། །བདག་ནི་སེམས་ཅན་དམྱལ་བའི་མེ་ཤིན་ཏུ་འབར་བ་དང་རབ་ཏུ་ཉེ་བར་གྱུར་ན། མྱ་ངན་མི་བྱེད་པའི་གཏོལ་ག་ལ་ཞིག་ཡོད། བློན་པོ་དེས་ཡང་གསོལ་པ། སེམས་ཅན་དམྱལ་བ་ཡོད་དོ་ཞེས་རྒྱལ་པོ་ལ་སུ་ཞིག་གིས་འདི་སྐད་ཅེས་བརྫུན་དུ་སྨྲས། དཔེར་ན་ཚེར་མ་རང་བཞིན་གྱིས་རྣོ་བ་

སུས་བཞོགས། བྱའི་འདབ་མ་སེར་པོར་འདུག་པ་སུས་བྱས། ཆུ་རང་བཞིན་གྱིས་གཤེར་བ་དང་། རྡོ་རང་བཞིན་གྱིས་སྲ་བ་དང་། རླུང་རང་བཞིན་གྱིས་གཡོ་བ་དང་། མེ་རང་བཞིན་གྱིས་ཚ་བ་དང་འདྲ་སྟེ། དངོས་པོ་འདི་དག་ཐམས་ཅད་ཀྱང་རང་སྐྱེ་ལ་རང་འཆི་སྟེ་
སུ་ཞིག་གིས་བྱས། སེམས་ཅན་དམྱལ་བ་ཞེས་བྱ་བ་ཡང་། མཁས་པ་ཤེས་རབ་ཅན་ཚིག་ལ་མཁས་པ་དག་གིས་རང་བཟོར་བྱས་སོ། །དམྱལ་བ་ཞེས་བྱ་བ་ལ་དོན་ཅི་ཞིག་ཡོད་བློན་པོ་ཁྱོད་ཀྱིས་ང་ལ་སྨྲོས་ཤིག །དམྱལ་ཞེས་བྱ་བ་ནི་དམྱལ་བའོ། །བ་ཞེས་བྱ་བ་ནི་བཅོམ་པའོ། །དམྱལ་
བ་བཅོམ་ནས་སྡིག་པའི་རྣམ་པར་སྨིན་པ་མེད་པས་ན་སེམས་ཅན་དམྱལ་བ་ཞེས་བྱའོ། །གཞན་ཡང་དམྱལ་ཞེས་བྱ་བ་ནི་མིའོ། །བ་ཞེས་བྱ་བ་ནི་ལྷའོ། །ཕ་བསད་དེ་ལྷ་དང་མིར་སྐྱེ་བར་བྱེད་པ་དེ་བས་ན་དྲང་སྲོང་བ་སུ་ཞེས་བྱ་བ་ཡང་འདི་སྐད་ཅེས་སྟོན་ཏེ། ལུས་བསྲེགས་ན་ལྷ་དང་མིའི་བདེ་བ་
འཐོབ་པས་དམྱལ་བ་ཞེས་བྱའོ། །གཞན་ཡང་དམྱལ་ཞེས་བྱ་བ་ནི་ཚེ། བ་ཞེས་བྱ་བ་ནི་རིང་བའོ། །དེ་ལྟར་སྲོག་བཅད་ན་ཚེ་རིང་བར་འགྱུར་བས་དམྱལ་བ་ཞེས་བྱའོ། །དེ་བས་ན་རྒྱལ་པོ་ཆེན་པོ་ཡང་དག་པར་ན་སེམས་ཅན་དམྱལ་བ་ཞེས་བྱ་བ་མེད་དོ། །རྒྱལ་པོ་ཆེན་པོ་དཔེར་ན་ནས་ཀྱི་ས་བོན་
བཏབ་ན་ནས་སྐྱེ་ལ། འབྲས་ཀྱི་ས་བོན་བཏབ་ན་འབྲས་སྐྱེ་སྟེ། དམྱལ་བ་བསད་ན་ཕྱིར་ཡང་དམྱལ་བ་འཐོབ་ལ། མི་བསད་ན་ཕྱིར་ཡང་མིར་འགྱུར་དུ་ངེས་སོ། །རྒྱལ་པོ་བདག་སྨྲ་བའི་ཚིག་འདི་ཉོན་ཅིག །ཡང་དག་པར་ན་བསད་པ་ཞེས་བྱ་བ་མེད་དོ། །གལ་ཏེ་བདག་ཅེས་བྱ་བ་ཡོད་
པ་ཞིག་ཡིན་ན་བསད་པར་ཡང་མི་འགྱུར་རོ། །གལ་ཏེ་བདག་ཅེས་བྱ་བ་མེད་ན་བསད་པ་ཡང་མེད་དོ། །དེ་ཅིའི་ཕྱིར་ཞེ་ན། ཅི་སྟེ་བདག་ཅེས་བྱ་བ་ཡོད་ན། རྟག་པ་མི་འགྱུར་མི་འཕོ་བ་ཡིན་ནོ། །དེ་ལྟར་རྟག་ཅིང་མི་འགྱུར་མི་འཕོ་བ་ཡིན་པས་བསད་དུ་ཡང་མེད་ལ། མི་འཇིགས་པ།
མི་འཆག་པ་མ་བཅིངས་པ། ཞེ་སྡང་མེད་པ། དགའ་བ་མེད་པ་སྟེ། ནམ་མཁའ་ལྟ་བུ་ཡིན་པ་ལ། བསད་པའི་སྡིག་ཏུ་འགྱུར་བ་ལྟ་ག་ལ་ཞིག་ཡོད། ཅི་སྟེ་བདག་ཅེས་བྱ་བ་མེད་པ་ཞིག་ཡིན་ན། ཆོས་ཐམས་ཅད་ཀྱང་མི་རྟག་པ་སྟེ། དེ་ལྟར་ན་མི་རྟག་པ་ཡིན་པས་སྐད་ཅིག་སྐད་

ཅིག་གིས་འཇིག་ཅིང་འགོག་གོ། །དེ་ལྟར་སྐད་ཅིག་སྐད་ཅིག་གིས་འགོག་པས་གསོད་པ་དང་ཤི་བ་ཡང་སྐད་ཅིག་སྐད་ཅིག་གིས་འགོག་གོ། །དེ་ལྟར་སྐད་ཅིག་སྐད་ཅིག་གིས་འགོག་ན་སྡིག་པ་དེ་སུ་ཞིག་གིས་མྱོང་བར་འགྱུར། རྒྱལ་པོ་ཆེན་པོ་དཔེར་ན་མེས་ཤིང་ཚིག་ན་མེ་ལ་སྡིག་པ་མེད་དོ། །
སྟ་རེས་ཤིང་བཅད་ན་སྟ་རེ་ལ་སྡིག་པ་མེད་དོ། །ཟོར་བས་རྩྭ་བརྔས་ན་ཟོར་བ་ལ་སྡིག་པ་མེད་དོ། །རལ་གྲིས་མི་བསད་ན་རལ་གྲི་མི་མ་ཡིན་ཏེ་རལ་གྲི་ལ་མི་སྡིག་ན་ཅིའི་ཕྱིར་མི་ལ་སྡིག་པར་འགྱུར། དུག་གིས་མི་བསད་ན་དུག་ཀྱང་མི་མ་ཡིན་ཏེ་དུག་ལ་མི་སྡིག་ན་མི་ལ་ཅིའི་ཕྱིར་སྡིག་སྟེ། དངོས་པོ་
ཐམས་ཅད་ཀྱང་དེ་དང་འདྲ་བ་ཡིན་པས་ན་ཡང་དག་པར་བསད་པ་མེད་ན་ཅིའི་ཕྱིར་སྡིག་པར་འགྱུར། རྒྱལ་པོ་ཆེན་པོ་མྱ་ངན་མ་བྱེད་ཅིག །དེ་ཅིའི་ཕྱིར་ཞེ་ན། རྟག་ཏུ་མྱ་ངན་གང་བྱེད་པ། །མྱ་ངན་ཕྱིར་ཞིང་སྐྱེ་བར་འགྱུར། །ཇི་ལྟར་གཉིད་ལ་དགའ་བ་ཡང་། །ཕྱིར་ཞིང་དེ་བཞིན་གཉིད་ཆེར་
འགྱུར། །དེ་བཞིན་འདོད་ཆགས་སྲེད་པ་དང་། །ཆང་དད་ཆེ་བའང་རིག་པར་བྱ། །རྒྱལ་པོ་གསུང་བ་ལྟར་འཇིག་རྟེན་ན་ངའི་ཁ་ན་མ་ཐོ་བའི་ལས་སྦྱོང་བའི་སྨན་པ་མཁས་པ་མེད་དོ་ཞེས་བྱ་བའི་མི་རིགས་སོ། །ད་ལྟར་སྟོན་པ་ཆེན་པོ་མི་ཕམ་སྐྲའི་ལ་བཞེས་བྱ་བ་ཐམས་ཅད་མཁྱེན་པ།
ཐམས་ཅད་གཟིགས་པ། འཇིག་རྟེན་གསུམ་རིག་པ། སྐད་ཅིག་ཡུད་ཙམ་ཐང་ཅིག་གིས་འཇིག་རྟེན་གྱི་ཁམས་མཐའ་ཡས་གྲངས་མེད་པ་མཐོང་བ། ཐོས་པ་ཡང་དེ་དང་འདྲ་སྟེ། སེམས་ཅན་ཐམས་ཅད་ཀྱི་ཁ་ན་མ་ཐོ་བའི་ཉེས་པ་ཐམས་ཅད་ཡོངས་སུ་སྤོང་བར་བྱེད་པ་ནི་གང་གཱའི་
ཀླུང་དང་འདྲ་བར་ཕྱི་ནང་གཉིས་ཀར་ཉེས་པའི་སྐྱོན་མེད་ཅིང་ཡོངས་སུ་དག་པ་དང་འདྲ་བའི་སྟོན་པ་ཆེན་པོ་ཡང་སེམས་ཅན་ཐམས་ཅད་ཀྱི་ཕྱི་ནང་གི་ཁ་ན་མ་ཐོ་བའི་ལས་ཐམས་ཅད་སེལ་བ། ད་ལྟར་ཉེ་གནས་རྣམས་ལ་འདི་སྐད་ཅེས་ཆོས་སྟོན་ཏོ། །དེ་ལ་གང་ཞིག་སེམས་ཅན་ཐམས་
ཅད་བསད་ཀྱང་ཁྲེལ་བ་དང་འཛེམ་པའི་སེམས་མེད་ན། དེ་ནི་ནམ་དུ་ཡང་སེམས་ཅན་དམྱལ་བར་མི་ལྟུང་སྟེ། ཇི་ལྟར་ན་མ་མཁའ་ལ་རྡུལ་དང་ཆུ་མི་ཆགས་པ་བཞིན་ནོ། །གང་ཁྲེལ་ཞིང་འཛེམ་པ་དང་ལྡན་པ་ནི་སེམས་ཅན་དམྱལ་བར་ལྟུང་བར་འགྱུར་ཏེ། དཔེར་ན་ཆུ་ཆེན་པོས་ས་ཐམས་

ཅད་བརླན་པར་བྱེད་པ་དང་འདྲ་བར་སེམས་ཅན་ཐམས་ཅད་ཀྱང་ལྷ་དབང་སྒྱུར་ཞེས་པ་དེས་བྱས་ཏེ། ལྷ་དབང་སྒྱུར་དགའ་ན་སེམས་ཅན་ཐམས་ཅད་ཀྱང་བདེ་བར་འགྱུར་རོ། །གལ་ཏེ་ལྷ་དབང་སྒྱུར་མི་དགའ་ན་སེམས་ཅན་ཐམས་ཅད་ཀྱང་སྡུག་བསྔལ་བར་འགྱུར་རོ། །སེམས་
ཅན་ཐམས་ཅད་ཀྱི་ཁ་ན་མ་ཐོ་བའི་ལས་དང་བསོད་ནམས་ཀྱང་ལྷ་དབང་སྒྱུར་ཞེས་བྱ་བས་བྱས་པ་ཡིན་ན། དེ་ལ་ཅིའི་ཕྱིར་ཁ་ན་མ་ཐོ་བ་དང་བསོད་ནམས་སུ་འགྱུར་བ་ཡོད་ཅེས་སྨྲ། དཔེར་ན་ཤིང་མཁན་གྱིས་ཤིང་གི་འཁྲུལ་འཁོར་གྱིས་མི་བྱས་པ་འགྲོ་བ་དང་། སྡོད་པ་དང་། འདུག་པ་དང་།
ཉལ་བའི་ལས་བྱེད་ཀྱང་སྨྲ་བ་མ་ཡིན་ཏེ། སེམས་ཅན་ཐམས་ཅད་ཀྱང་དེ་དང་འདྲ་བར་ལྷ་དབང་སྒྱུར་ཞེས་བྱ་བས་བྱས་ཏེ། ལྷ་དབང་སྒྱུར་ཞེས་བྱ་བ་དེ་ནི་ཤིང་མཁན་ལྟ་བུའོ། །འཁྲུལ་འཁོར་གྱི་མི་ཞེས་བྱ་བ་དེ་ནི་སེམས་ཅན་ཐམས་ཅད་ཀྱི་ལུས་ལྟ་བུ་ཡིན་ཏེ། དེ་ལ་ཁ་ན་མ་ཐོ་བའི་
ལས་སུ་འགྱུར་བ་ག་ལ་ཞིག་ཡོད་ཅེས་སྟོན་པའི་སྟོན་པ་ཆེན་པོ་དེ་ད་ལྟར་རྒྱལ་པོའི་ཁབ་ན་བཞུགས་སོ། །རྒྱལ་པོ་ཆེན་པོ་དེའི་གན་དུ་མྱུར་དུ་བཞུད་ཅིག་དང་། དེ་དང་ཕྲད་ན་སྡིག་པ་ཡོངས་སུ་འབྱང་བར་འགྱུར་རོ། །རྒྱལ་པོས་སྨྲས་པ། དེ་ལྟར་ཡང་དག་པར་བདག་གི་ཁ་ན་མ་ཐོ་བའི་ལས་
འབྱང་བར་འགྱུར་ན་ལྟ་དེ་ལ་སྐྱབས་སུ་འགྲོ་བར་བྱའོ། །དེ་ནས་ཡང་བློན་པོ་འཇིགས་པ་མེད་པ་ཞེས་བྱ་བ་རྒྱལ་པོ་གང་ན་བར་འོངས་ནས་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་འཇིག་རྟེན་ན་གླེན་པ་གཏི་མུག་ཅན་དག་ནི་ཉིན་གཅིག་ལ་ལན་བརྒྱ་ནི་དགའ། ལན་བརྒྱ་ནི་ཁྲོ། །ལན་བརྒྱ་ནི་
ཉལ། ལན་བརྒྱ་ནི་སད། ལན་བརྒྱ་ནི་དངངས། ལན་བརྒྱ་ནི་ངུའོ། །མཁས་པ་ཤེས་རབ་ཅན་ལ་ནི་དེ་ལྟ་བུའི་བག་མེད་ན། རྒྱལ་པོ་ཆེན་པོ་ཅིའི་ཕྱིར་འདི་ལྟར་ཤིན་ཏུ་མྱ་ངན་བྱེད་དེ། དཔེར་ན་འགྲོན་པོ་གྲོགས་སྟོར་བའམ། འདམ་དུ་ནུབ་པ་ལས་སྐྱབས་མེད་པའམ། སྐོམ་པས་
གདུངས་པ་ལས་སྐོམ་མེད་པ་ལྟ་བུའམ། འབྲོག་བསླད་པ་ལས་ལམ་སྟོར་བ་ལྟ་བུའམ། ནད་ཚབས་པོ་ཆེ་ལ་གསོ་བའི་སྨན་པ་མཁས་པ་མེད་པའམ། རྒྱ་མཚོར་ཞུགས་པ་ལས་གྲུ་ཞིག་པ་ལས་སྐྱབས་མེད་པ་ལྟ་བུར་གྱུར་པ་འདི། རྒྱལ་པོ་ཆེན་པོ་ད་ལྟར་ལུས་མི་བདེའམ་སེམས་

མི་བདེ། རྒྱལ་པོས་སྨྲས་པ། ལུས་དང་སེམས་བདེ་བའི་གཏོལ་ག་ལ་ཞིག་ཡོད། བདག་སྡིག་པའི་བཤེས་གཉེན་ལ་བརྟེན་ནས་ངག་གིས་ཉེས་པ་མ་བརྟགས་པས་རྒྱལ་པོ་ཡབ་ཀྱང་བདག་གིས་བསད་པས་ན། བདག་ནི་གདོན་མི་ཟ་བར་སེམས་ཅན་དམྱལ་བར་ལྟུང་ཡང་བདག་ལ་མགོན་
དང་སྐྱབས་སུ་འགྱུར་བ་མེད་དོ། །བློན་པོ་དེས་སྨྲས་པ། རྒྱལ་པོ་ཆེན་པོ་དེ་ལྟར་མྱ་ངན་མ་བྱེད་ཅིག །རྒྱལ་རིགས་ཞེས་བྱ་བ་ནི་རྒྱལ་པོའི་རིགས་ཡིན་ཏེ། གལ་ཏེ་རྒྱལ་པོའི་སྲིད་ཀྱི་ཕྱིར་རམ། དགེ་སློང་ངམ། བྲམ་ཟེའི་ཕྱིར་རམ། འགྲོ་བ་མང་པོ་ལ་བདེ་བར་བྱ་བའི་ཕྱིར་གསོད་པའི་ལས་བྱས་
ཀྱང་ཁ་ན་མ་ཐོ་བའི་སྡིག་པ་མེད་དོ། །ཡབ་རྒྱལ་པོ་ནི་དགེ་སྦྱོང་ལ་བསྙེན་བཀུར་བྱེད་ཀྱང་། བྲམ་ཟེ་ལ་བསྙེན་བཀུར་མི་བྱེད་པས། སེམས་མ་སྙོམས་ཏེ། དེ་ལྟར་ན་སེམས་མ་སྙོམས་པས་ན་དེ་ནི་རྒྱལ་རིགས་མ་ཡིན་ནོ། །རྒྱལ་པོ་ཆེན་པོ་ནི་བྲམ་ཟེ་ལ་བསྙེན་བཀུར་བྱེད་པའི་ཕྱིར་རྒྱལ་པོ་སྔ་མ་
བསད་ཀྱང་ཁ་ན་མ་ཐོ་བའི་ལས་མེད་དོ། །རྒྱལ་པོ་ཆེན་པོ་བསད་པ་ཞེས་བྱ་བ་ནི་ཡང་དག་པར་ན་མེད་པ་ཡིན་ནོ། །བསད་པ་ཞེས་བྱ་བའི་འཚོ་བའི་སྲོག་གཅོད་པ་ཡིན་ཏེ། དེ་ལ་འཚོ་བའི་སྲོག་ཅེས་བྱ་བ་ནི་དབུགས་ཞེས་བྱ་བ་ཡིན་ནོ། །དབུགས་ཞེས་བྱ་བ་ལ་ནི་གཅད་ཅིང་གསད་དུ་མེད་ན།
ཅིའི་ཕྱིར་འཚོ་བ་བསད་པ་ལ་ཁ་ན་མ་ཐོ་བའི་སྡིག་ལས་སུ་འགྱུར། རྒྱལ་པོ་ཆེན་པོ་མྱ་ངན་མ་བྱེད་ཅིག །དེ་ཅིའི་ཕྱིར་ཞེ་ན། རྟག་ཏུ་མྱ་ངན་གང་བྱེད་པ། །མྱ་ངན་ཕྱིར་ཞིང་སྐྱེ་བར་འགྱུར། །ཇི་ལྟར་གཉིད་ལ་དགའ་བ་ཡང་། །ཕྱིར་ཞིང་དེ་བཞིན་གཉིད་ཆེར་འགྱུར། །དེ་བཞིན་འདོད་
ཆགས་སྲེད་པ་དང་། །ཆང་དད་ཆེ་བའང་རིག་པར་བྱ། །རྒྱལ་པོ་གསུང་བ་ལྟར་འཇིག་རྟེན་ན་སྨན་པ་མཁས་པ་མེད་དོ་ཞེས་བྱར་མི་རུང་ངོ་། །ད་ལྟ་སྟོན་པ་ཆེན་པོ་གཅེར་བུ་པ་གཉེན་གྱི་བུ་ཐམས་ཅད་མཁྱེན་པ། ཐམས་ཅད་གཟིགས་པ། སེམས་ཅན་ཐམས་ཅད་ལ་བྱམས་བརྩེ་
བ། སེམས་ཅན་ཐམས་ཅད་ཀྱི་དབང་པོ་རྣོ་རྟུལ་ལ་མཁས་པ། ཅི་དང་ཅི་རིགས་པའི་ཐབས་ཤིན་ཏུ་རྟོགས་པ། འཇིག་རྟེན་གྱི་ཆོས་བརྒྱད་ཀྱིས་མ་གོས་པ། ཚངས་པར་སྤྱོད་པ་ཤིན་ཏུ་རྣམ་པར་དག་པ། རབ་ཏུ་ཞི་བ་དང་ལྡན་པ་དེ་ད་ལྟར་ཉེ་གནས་རྣམས་ལ་འདི་སྐད་ཅེས་ཆོས་སྟོན་

ཏོ། །སྦྱིན་པ་ཡང་མེད། དགེ་བ་ཡང་མེད། ཕ་ཡང་མེད། མ་ཡང་མེད། ད་ལྟར་ཡང་མེད། འདས་པ་ཡང་མེད། དགྲ་བཅོམ་པ་ཡང་མེད། བསྒོམ་པ་ཡང་མེད། ལམ་ཡང་མེད་དེ། སེམས་ཅན་ཐམས་ཅད་བསྐལ་པ་བརྒྱ་ཁྲི་འདས་ནས་སྐྱེ་ཤིའི་འཁོར་ལོ་ལས་རང་རྣམ་པར་གྲོལ་
བར་འགྱུར་ཏེ། སྡིག་པ་དང་བཅས་པ་དང་སྡིག་པ་མེད་པ་ཡང་ཐམས་ཅད་དེ་དང་འདྲའོ། །དཔེར་ན་ཀླུང་ཆེན་པོ་བཞི་སྟེ། སིནྡུ་དང་། གང་གཱ་དང་། པཀྵུ་དང་། སི་ཏ་ཞེས་བྱ་བ་བཞི་ཅར་ཡང་རྒྱ་མཚོ་ཆེན་པོར་འབབ་སྟེ་ཁྱད་པར་མེད་དོ། །སེམས་ཅན་ཐམས་ཅད་ཀྱང་དེ་དང་འདྲ་སྟེ། རྣམ་པར་
གྲོལ་བའི་དུས་ན་ཐམས་ཅད་ཁྱད་པར་མེད་དོ། །ཞེས་སྟོན་པའི་སྟོན་པ་ཆེན་པོ་དེ་ད་ལྟར་རྒྱལ་པོའི་ཁབ་ན་བཞུགས་ཀྱིས། རྒྱལ་པོ་ཆེན་པོ་དེའི་གན་དུ་མྱུར་དུ་བཞུད་ཅིག་དང་། དེ་དང་ཕྲད་ན་ཁ་ན་མ་ཐོ་བའི་ལས་འབྱང་བར་འགྱུར་རོ། །རྒྱལ་པོས་སྨྲས་པ། དེ་ལྟར་བདག་གི་ཁ་ན་མ་ཐོ་བ་
ཡང་དག་པར་འབྱང་ན་ལྟ་དེ་ལ་སྐྱབས་སུ་འགྲོ་བར་བྱའོ། །དེའི་ཚེ་སྨན་པ་ཆེན་པོ་འཚོ་བྱེད་ཅེས་བྱ་བ་རྒྱལ་པོ་ཆེན་པོའི་དྲུང་དུ་འོངས་ནས་རྒྱལ་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བདེ་བར་ཉལ་ལམ་ཞེས་སྨྲས་ནས། དེ་ལ་རྒྱལ་པོས་ཚིགས་སུ་བཅད་པ་འདི་དག་སྨྲས་སོ། །ཀུན་
ནས་ཉོན་མོངས་པ་ཐམས་ཅད། །གང་གིས་ཡོངས་སུ་གཅོད་ནུས་ལ། །འཇིག་རྟེན་གསུམ་ན་མ་ཆགས་ན། །དེ་དག་བདེ་བར་ཉལ་བར་འགྱུར། །གང་གིས་མྱ་ངན་འདའ་བ་ཡི། །ཤིན་ཏུ་ཟབ་མོའི་དོན་སྟོན་པ། །བྲམ་ཟེ་ཡང་དག་པ་དེ་ནི། །ཤིན་ཏུ་བདེ་བར་ཉལ་བར་འགྱུར། །ལུས་ཀྱི་
ཉེས་པ་གང་ཡང་མེད། །ངག་གི་ཉེས་པ་བཞི་ཡང་སྤངས། །སེམས་ལ་ཐེ་ཚོམ་གང་མེད་པ། །དེ་དག་བདེ་བར་ཉལ་བར་འགྱུར། །ལུས་དང་སེམས་ནི་མ་གདུངས་ཤིང་། །རབ་ཏུ་ཞི་ལ་བདེ་གནས་ན། །བླ་མེད་བདེ་བ་ཐོབ་འགྱུར་ཞིང་། །ཤིན་ཏུ་བདེ་བར་ཉལ་བར་འགྱུར། །སེམས་
ནི་ཅི་ལའང་མ་ཆགས་ཤིང་། །འཁོན་དུ་འགྱུར་བ་ཡོངས་སྤངས་ནས། །རྟག་ཏུ་འདུམ་ལ་མི་རྩོད་པ། །དེ་ནི་བདེ་བར་ཉལ་བར་འགྱུར། །གང་ཞིག་སྡིག་པ་མི་བྱེད་ལ། །ཁྲེལ་ཞིང་འཛེམ་པའི་སེམས་ལྡན་ཏེ། །རྣམ་པར་སྨིན་ལ་ཡིད་ཆེས་ན། །དེ་ནི་བདེ་བར་ཉལ་བར་འགྱུར། །ཕ་དང་

མ་ལ་བཀུར་སྟི་བྱེད། །སེམས་ཅན་གཅིག་གི་སྲོག་མི་གཅོད། །གཞན་གྱི་ནོར་ལ་རྐུ་སེམས་མེད། །དེ་དག་བདེ་བར་ཉལ་བར་འགྱུར། །དབང་པོ་རྣམས་ནི་ཤིན་ཏུ་ཐུལ། །དགེ་བའི་བཤེས་གཉེན་ལ་སྟེན་ཅིང་། །རྣམ་བཞི་བདུད་ཀྱང་རབ་བཅོམ་ན། །དེ་དག་བདེ་བར་ཉལ་བར་འགྱུར། །བཀྲ་ཤིས་
བཀྲ་ཤིས་མ་ཡིན་དང་། །བདེ་དང་སྡུག་བསྔལ་མི་མཐོང་ཞིང་། །སོ་སོའི་སྐྱེ་བོ་མང་པོའི་ཕྱིར། །འཁོར་བའི་འཁོར་བར་འཁོར་བ་ལ། །གང་ཞིག་མི་སྐྱོ་བ་དེ་ནི། །ཤིན་ཏུ་བདེ་བར་ཉལ་བར་འགྱུར། །བདེ་བར་ཉལ་བ་སུ་ཞེ་ན། །སངས་རྒྱས་བཅོམ་ལྡན་འདས་ཡིན་ཏེ། །སྟོང་པའི་ཏིང་འཛིན་རབ་
རྟོགས་ནས། །ལུས་དང་སེམས་ནི་མི་གཡོའོ། །སུ་ཞིག་བདེ་བར་ཉལ་ཞེ་ན། །བྱམས་དང་སྙིང་རྗེར་ལྡན་པ་ཡི། །བདག་མེད་པ་ལ་རབ་བརྩོན་ཞིང་། །ཀུན་ལ་བུ་བཞིན་ལྟ་བའོ། །སེམས་ཅན་མ་རིག་ལྡོངས་པ་རྣམས། །ཉོན་མོངས་འབྲས་བུ་མི་མཐོང་སྟེ། །རྟག་ཏུ་སྡིག་པའི་ལས་བྱེད་པས། །
དེ་ནི་བདེ་བར་ཉལ་མི་འགྱུར། །གལ་ཏེ་བདག་གི་ལུས་ཀྱིས་སམ། །ཕ་རོལ་གཞན་གྱི་ལུས་ངག་གིས། །མི་དགེ་བཅུ་ཡི་ལས་བྱས་ན། །དེ་ནི་བདེ་བར་ཉལ་མི་འགྱུར། །གང་ཞིག་བདེ་བ་འདོད་པའི་ཕྱིར། །ཕ་བསད་ཉེས་པ་མེད་ཅེས་བྱ། །སྡིག་པའི་བཤེས་གཉེན་ལ་ཕྱོགས་ན། །དེ་ནི་བདེ་
བར་ཉལ་མི་འགྱུར། །ཟས་ཀྱི་ཚོད་ནི་མ་ཟིན་ནས། །གྲང་མོ་འཐུངས་པའི་ཚད་འདས་ན། །ནད་ཀྱི་སྡུག་བསྔལ་སྐྱེ་འགྱུར་ཏེ། །དེ་ནི་བདེ་བར་ཉལ་མི་འགྱུར། །གལ་ཏེ་རྒྱལ་པོ་ལ་འཁུས་སམ། །གཞན་གྱི་བུད་མེད་ལ་ཉལ་ལམ། །དགོན་པའི་འབྲོག་ཏུ་འགྲོ་བ་དག །དེ་ནི་བདེ་བར་ཉལ་
མི་འགྱུར། །ཚུལ་ཁྲིམས་བསྲུངས་པའི་མྱུ་གུ་མ་ཐོབ་དང་། །རྒྱལ་འཚབ་རྒྱལ་པོའི་ཐབས་ནི་མ་ཐོབ་དང་། །རྐུ་བ་པོ་དག་ནོར་རྫས་མ་ཐོབ་པ། །འདི་ནི་རྟག་ཏུ་བདེ་བར་ཉལ་མི་འགྱུར། །སྨན་པ་འཚོ་བྱེད་བདག་ནི་ནད་ཀྱིས་གཟིར་ཏེ། རྒྱལ་པོ་ཆོས་བཞིན་དུ་སྲིད་འཚོ་བ་ལ་བདག་
འཁུས་ཏེ་བསད་པས་སྨན་པ་མཁས་པ་ཐམས་ཅད་ཀྱིས་སྨན་དཔྱད་དང་སྔགས་ལ་སོགས་པ་བྱས་ཀྱང་། བདག་གི་ནད་འཚོ་བར་མ་གྱུར་ཏོ། །དེ་ཅིའི་ཕྱིར་ཞེ་ན། བདག་གི་ཡབ་རྒྱལ་པོ་ཆོས་བཞིན་དུ་སྲིད་འཚོ་བ་ལས་ཉེས་པའི་སྐྱོན་མེད་པར་བདག་གིས་བདག་འཁུས་ཏེ་ཕ་བསད་

པས་ཉ་སྐམ་སར་ཕྱུང་ན་དགའ་བ་ལྟ་ག་ལ་ཞིག་ཡོད། །རི་དགས་རྙི་ལ་ཐོགས་ན་དགའ་བའི་སེམས་མེད་པའམ། ཇི་ལྟར་གང་ཟག་གིས་རིང་པོར་མི་ཐོགས་པར་ཤི་བར་ཤེས་པའམ། རྒྱལ་པོ་སྲིད་སྟོར་བ་ཡུལ་གཞན་དུ་བྲོས་པའམ། ནད་ཚབས་པོ་ཆེས་བཏབ་པ་ལས་
གསོར་མི་རུང་ཞེས་ཐོས་པའམ། ཁྲིམས་བཤིག་པ་ཁ་ན་མ་ཐོ་བའི་ལས་ཡོད་པར་ཐོས་པ་དང་འདྲའོ། །བདག་གིས་སྔོན་མཁས་པ་ཤེས་རབ་ཅན་དག་ལས་ཐོས་ན་ལུས་དང་ངག་དང་ཡིད་ཀྱི་ལས་ཡོངས་སུ་མ་དག་ན། གང་ཟག་དེ་ནི་གདོན་མི་ཟ་བར་སེམས་ཅན་དམྱལ་བར་ལྟུང་
ངོ་ཞེས་ཐོས་པས། བདག་ཀྱང་གདོན་མི་ཟ་བར་སེམས་ཅན་དམྱལ་བར་ལྟུང་ན་བདེ་བར་ཉལ་བའི་གཏོལ་ག་ལ་ཞིག་ཡོད། ད་བདག་བླ་ན་མེད་པའི་སྨན་པ་ཆེན་པོ་ཆོས་ཀྱི་སྨན་གཏོང་བ་བདག་གི་ནད་ཀྱི་སྡུག་བསྔལ་གསོ་བ་ཡང་མེད་དོ། །འཚོ་བྱེད་ཀྱིས་སྨྲས་པ། རྒྱལ་པོ་
ཆེན་པོ་ལེགས་སོ་ཤིན་ཏུ་ལེགས་སོ། །རྒྱལ་པོས་འདི་ལྟར་ཁ་ན་མ་ཐོ་བའི་ལས་བྱས་ཀྱང་ཤིན་ཏུ་འགྱོད་པའི་སེམས་སྐྱེས་ཏེ། ཁྲེལ་བ་དང་འཛེམ་པའི་སེམས་དང་ལྡན་པ་ལེགས་སོ། །རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་ནི་རྟག་ཏུ་འདི་སྐད་ཅེས་གསུང་ངོ་། །རྣམ་པར་དཀར་
བའི་ཆོས་འདི་གཉིས་ཀྱིས་སེམས་ཅན་གྱི་མགོན་དང་སྐྱབས་སུ་འགྱུར་རོ། །གཉིས་གང་ཞེ་ན་ཁྲེལ་བ་དང་འཛེམ་པའོ། །འཛེམ་པ་ནི་བདག་ཁ་ན་མ་ཐོ་བའི་ལས་མི་བྱེད་དོ། །ཁྲེལ་བ་ནི་གཞན་བྱེད་དུ་མི་འཛུད་པའོ། །འཛེམ་པ་ནི་བདག་ངོ་ཚ་བར་བྱེད་པའོ། །ཁྲེལ་བ་ནི་ཕ་
རོལ་ལ་འགྱོད་ཅིང་མཐོལ་བའོ། །འཛེམ་པ་ནི་མི་ལ་ངོ་ཚ་བའོ། །ཁྲེལ་བ་ནི་ལྷ་ལ་ངོ་ཚ་བ་སྟེ། དེ་ནི་འཛེམ་པ་དང་ཁྲེལ་བ་ཞེས་བྱའོ། །འཛེམ་པ་དང་ཁྲེལ་བ་མེད་པ་ནི་མི་ཞེས་མི་བྱ་སྟེ་བྱོལ་སོང་ཞེས་བྱའོ། །འཛེམ་པ་དང་ཁྲེལ་བར་ལྡན་པའི་ཕྱིར་ཕ་མ་དང་། སློབ་དཔོན་ལ་
བཀུར་སྟི་བྱེད་དོ། །ཁྲེལ་བ་དང་འཛེམ་པར་ལྡན་པའི་ཕྱིར་ཕ་མ་དང་། ཕུ་ནུ་དང་མིང་སྲིང་ཡོད་པར་སྨྲའོ། །རྒྱལ་པོ་ཆེན་པོ་འཛེམ་པ་དང་ཁྲེལ་བར་ལྡན་པ་ལེགས་སོ། །རྒྱལ་པོ་ཆེན་པོ་རེ་ཞིག་བདག་གིས་སངས་རྒྱས་བཅོམ་ལྡན་འདས་ལས་ཐོས་པ་གསོན་ཅིག །ཤེས་རབ་

དང་ལྡན་པ་ནི་རྣམ་པ་གཉིས་ཏེ། སྡིག་པ་མི་བྱེད་པ་དང་། བྱས་ནས་འགྱོད་ཅིང་མཐོལ་བའོ། །གླེན་པ་གཏི་མུག་ཅན་ལ་ཡང་རྣམ་པ་གཉིས་ཏེ། སྡིག་པ་བྱེད་པ་དང་། བྱས་ནས་ཀྱང་འཆབ་པའོ། །དེ་ལྟར་སྔར་སྡིག་པ་བྱས་ཀྱང་ཕྱིས་འགྱོད་ཅིང་མཐོལ་ཏེ། མཐོལ་ནས་ཀྱང་ཁྲེལ་དང་འཛེམ་
པས་ཕྱིས་མི་བྱེད་པར་དམ་བཅས་ན། དཔེར་ན་ཆུ་རྙོག་པ་ཅན་གྱི་ནང་དུ་ནོར་བུ་རིན་པོ་ཆེ་བཅུག་ན་ཆུ་དང་བར་འགྱུར་བའམ། སྤྲིན་དང་ན་བུན་གྱིས་མ་ཆོད་ན་ཟླ་བ་ཡོངས་སུ་གསལ་བ་དང་འདྲ་བར་སྡིག་པ་བྱས་ནས་འགྱོད་པ་ཡང་དེ་དང་འདྲའོ། །གལ་ཏེ་རྒྱལ་པོས་ཀྱང་འགྱོད་ཅིང་མཐོལ་ལ།
འཛེམ་པ་དང་ཁྲེལ་བར་ལྡན་ན། ཁ་ན་མ་ཐོ་བའི་ཉེས་པ་དག་འབྱང་ཞིང་ཡོངས་སུ་དག་པར་འགྱུར་རོ། །རྒྱལ་པོ་ཆེན་པོ་ཕྱུག་པ་ལ་རྣམ་པ་གཉིས་ཏེ། བ་ལང་དང་རྟ་དང་རྐང་འགྲོས་རྣམ་པ་སྣ་ཚོགས་ཀྱིས་ཕྱུག་པ་དང་། གསེར་དང་དངུལ་དང་། ནོར་དབྱིག་གིས་ཕྱུག་པ་སྟེ།
རྟ་དང་བ་ལང་མང་ཡང་ནོར་བུ་རིན་པོ་ཆེ་གཅིག་ཙམ་གྱི་ཟླར་མི་ཆོག་གོ། །རྒྱལ་པོ་ཆེན་པོ་སེམས་ཅན་ཡང་དེ་དང་འདྲ་སྟེ། སྡིག་པས་ཕྱུག་པ་དང་། དགེ་བས་ཕྱུག་པ་སྟེ། སྡིག་པ་མང་དུ་བྱས་ཀྱང་དགེ་བ་གཅིག་གི་ཟླར་མི་ཕོད་དོ། །བདག་གིས་སངས་རྒྱས་བཅོམ་ལྡན་འདས་
ཀྱིས་གསུངས་པ་ལས་ཐོས་ནས་དགེ་བ་གཅིག་ལ་ནན་ཏན་བྱས་པའི་སེམས་ཀྱིས་སྡིག་པ་མང་པོ་བཅོམ་པར་འགྱུར་རོ། །རྒྱལ་པོ་ཆེན་པོ་དཔེར་ན་རྡོ་རྗེ་ཆུང་ངུ་མ་གཅིག་གིས་རི་རབ་ཀྱང་འབིགས་པའམ། མེ་ཆུང་ངུ་མས་ཐམས་ཅད་ཚིག་པའམ། དུག་ཆུང་ངུ་མས་སེམས་ཅན་
འཆི་བར་འགྱུར་བ་དང་འདྲ་བར་དགེ་བ་ཅུང་ཟད་ཙམ་གྱིས་ཀྱང་སྡིག་པ་ཆེན་པོ་ཆོམས་པར་འགྱུར་ཏེ། དགེ་བ་དེ་ལ་ཆུང་ངུ་ཞེས་བྱ་མོད་ཀྱི་ཡང་དག་པར་ན་ཆེན་པོ་ཡིན་ནོ། །དེ་ཅིའི་ཕྱིར་ཞེ་ན། སྡིག་པ་ཆེན་པོ་ཆོམས་པའི་ཕྱིར་རོ། །རྒྱལ་པོ་ཆེན་པོ་བཅོམ་ལྡན་
འདས་ཀྱིས་གསུངས་པ་ལྟར་ན་འཆབ་པ་ནི་ཟག་པ་དང་བཅས་པའོ། །མི་འཆབ་པ་ནི་ཟག་པ་མེད་པའོ། །དེ་བས་ན་གང་འགྱོད་ཅིང་མཐོལ་བ་ནི་ཟག་པ་མེད་པའོ། །དེ་བས་ན་ཁ་ན་མ་ཐོ་བའི་ལས་བྱས་པ་དག་སྡིག་པ་མི་འཆབ་པར་བྱའོ། །སྡིག་པ་མི་འཆབ་པས་

ཁ་ན་མ་ཐོ་བའི་ལས་སྲབ་པར་འགྱུར་རོ། །འཛེམ་པ་དང་ཁྲེལ་བས་བཤགས་ན་ཁ་ན་མ་ཐོ་བའི་ལས་ཡོངས་སུ་འབྱང་བར་འགྱུར་རོ། །རྒྱལ་པོ་ཆེན་པོ་ཆུའི་ཐིགས་པ་ཉུང་བ་ལྟར་བྱེད་ཀྱང་སྣོད་ཆེན་པོ་གང་བར་འགྱུར་ཏེ། དེ་བཞིན་དུ་དགེ་བའི་སེམས་
ཀྱང་ཁ་ན་མ་ཐོ་བའི་ལས་ཆེན་པོ་བཅོམ་པར་འགྱུར་རོ། །གལ་ཏེ་ཁ་ན་མ་ཐོ་བའི་ལས་བཅབས་ན་ཁ་ན་མ་ཐོ་བའི་ལས་ཕྱིར་ཞིང་སྐྱེའོ། །གལ་ཏེ་འཛེམ་པ་དང་ཁྲེལ་བས་འགྱོད་ཅིང་འཐོལ་ན་ཁ་ན་མ་ཐོ་བའི་ལས་ཡོངས་སུ་འབྱང་བར་འགྱུར་རོ། །དེ་བས་ན་སངས་རྒྱས་བཅོམ་
ལྡན་འདས་ཀྱིས་གསུངས་པ་ལས་མཁས་པ་ཤེས་རབ་ཅན་དག་ནི་ཁ་ན་མ་ཐོ་བའི་ལས་མི་འཆབ་བོ་ཞེས་གསུངས་སོ། །རྒྱལ་པོ་ཆེན་པོ་རྒྱུ་ལ་ཡིད་ཆེས་པ་དང་། འབྲས་བུ་ལ་ཡིད་ཆེས་པས་ལས་ཀྱི་རྣམ་པར་སྨིན་པ་ལ་ཡིད་ཆེས་པ་ཤིན་ཏུ་ལེགས་སོ། །རྒྱལ་པོ་ཆེན་པོ་
མྱ་ངན་མ་བྱེད་ཅིག །གལ་ཏེ་སེམས་ཅན་གང་ཞིག་ཁ་ན་མ་ཐོ་བའི་ལས་བྱས་ན་བཅབས་ཏེ་མི་མཐོལ་བ་དང་། འཛེམ་པ་དང་ཁྲེལ་བའི་སེམས་མེད་པ་དང་། རྒྱུ་དང་འབྲས་བུ་དང་ལས་ཀྱི་རྣམ་པར་སྨིན་པ་མི་མཐོང་བ་དང་། མཁས་པ་ཤེས་རབ་ཅན་ལ་གསོལ་བ་མི་
འདེབས་ཤིང་དགེ་བའི་བཤེས་གཉེན་ལ་མི་སྟེན་པ་དེ་ནི་སྨན་པ་མཁས་པ་ཐམས་ཅད་གང་གིས་ཀྱང་གསོ་མི་ནུས་ཏེ། དཔེར་ན་ནད་ཀམ་པ་ལ་ཞེས་བྱ་བས་བཏབ་ན། འཇིག་རྟེན་གྱི་སྨན་པ་གང་གིས་ཀྱང་གསོ་བར་མི་བྱེད་དོ། །ཁ་ན་མ་ཐོ་བའི་ལས་འཆབ་པ་ཡང་དེ་དང་
འདྲ་སྟེ། ཁ་ན་མ་ཐོ་བའི་ལས་འཆབ་པ་གང་ཞེ་ན། ལོག་སྲེད་ཅན་ཡིན་ནོ། །ལོག་སྲེད་ཅན་ཞེས་བྱ་བ་ནི་རྒྱུ་དང་འབྲས་བུ་ལ་ཡིད་མི་ཆེས་པ། འཛེམ་པ་དང་ཁྲེལ་བ་མེད་པ། ལས་ཀྱི་རྣམ་པར་སྨིན་པ་ལ་ཡིད་མི་ཆེས་པ་ད་ལྟར་དང་། མ་འོངས་པའི་ལས་མི་མཐོང་བ། དགེ་
བའི་བཤེས་གཉེན་ལ་མི་སྟེན་པ། སངས་རྒྱས་བཅོམ་ལྡན་འདས་ཀྱི་བསྟན་པ་ལ་མི་འཇུག་པའི་གང་ཟག་དེ་ནི་ལོག་སྲེད་ཅན་ཞེས་བྱ་སྟེ། སངས་རྒྱས་བཅོམ་ལྡན་འདས་ཀྱིས་ཀྱང་གསོ་མི་ནུས་སོ། །དེ་ཅིའི་ཕྱིར་ཞེ་ན། དཔེར་ན་འཇིག་རྟེན་ན་མི་རོ་ལ་ནི་སྨན་པ་གང་གིས་ཀྱང་

གསོ་མི་ནུས་པ་དང་འདྲ་བར་ལོག་སྲེད་ཅན་ཡང་དེ་དང་འདྲ་སྟེ། སངས་རྒྱས་བཅོམ་ལྡན་འདས་ཀྱིས་ཀྱང་གསོ་མི་ནུས་སོ། །རྒྱལ་པོ་ཆེན་པོ་ནི་ལོག་སྲེད་ཅན་མ་ཡིན་པས་ངའི་ནད་གསོ་ནུས་པ་མེད་དོ་ཞེས་བྱ་བ་མི་རུང་ངོ་། །རྒྱལ་པོ་གསུང་བ་ལྟར་ངའི་ནད་གསོ་མི་ནུས་སོ་ཞེས་བགྱི་
བར་རྒྱལ་པོ་ཆེན་པོ་འདི་ལྟར་ཤེས་པར་གྱིས་ཤིག །ཡུལ་སེར་སྐྱའི་རྒྱལ་པོ་ཟས་གཙང་མའི་སྲས་གཽ་ཏ་མའི་རིགས་མཚན་དོན་གྲུབ་ཅེས་བྱ་བ་སུས་ཀྱང་མ་བསྟན་པར་རང་གིས་རིག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། མཚན་བཟང་
པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་ལུས་ཡོངས་སུ་བརྒྱན་པ། སྟོབས་བཅུ་དང་། མི་འཇིགས་པ་བཞི་དང་ལྡན་ཏེ། ཐམས་ཅད་མཁྱེན་པ། ཐམས་ཅད་གཟིགས་པ། བྱམས་པ་དང་སྙིང་རྗེ་ཆེ་བ། ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་ཐུགས་བརྩེ་
བ། དགེ་བ་དང་ལྡན་པའི་སེམས་ཅན་གྱི་རྗེས་སུ་བེའུ་དང་མ་མོ་མི་གཏོང་བ་དང་འདྲ་བར་དུས་མཁྱེན་པས་གསུང་བ། དུས་མ་ཡིན་པར་མི་སྨྲ་བ། ཡང་དག་པར་སྨྲ་བ། ཡོངས་སུ་དག་པར་སྨྲ་བ། ཡོངས་སུ་དཀར་བར་སྨྲ་བ། དོན་དང་ལྡན་པར་སྨྲ་བ། ཆོས་དང་ལྡན་པར་སྨྲ་བ།
གཅིག་ཏུ་ཆད་པར་སྨྲ་བ། སེམས་ཅན་མང་པོའི་ཉོན་མོངས་པ་ཡོངས་སུ་སྤོང་བར་བྱེད། སོ་སོའི་སྐྱེ་བོའི་དབང་པོ་དང་བསམ་པའི་མཚན་ཉིད་ལ་ཤིན་ཏུ་མཁས་པ། ཅི་དང་ཅི་རིགས་པའི་ཐབས་ལ་ཤིན་ཏུ་མཁས་པ། ཡེ་ཤེས་མཐོ་ཞིང་གཟར་བ་ནི་རི་རབ་ལྷུན་པོ་དང་འདྲ་བ། ཡངས་
ཤིང་ཟབ་པ་ནི་རྒྱ་མཚོ་དང་འདྲ་བ། སངས་རྒྱས་བཅོམ་ལྡན་འདས་དེ་ལ་རྡོ་རྗེ་ལྟ་བུའི་ཡེ་ཤེས་མངའ་བས། སོ་སོའི་སྐྱེ་བོའི་ཁ་ན་མ་ཐོ་བའི་ལས་ཐམས་ཅད་འཇོམས་པས་དེས་མི་ཆོམས་ཞེས་བྱ་བའི་གནས་མེད་དོ། །དེ་ད་ལྟར་འདི་ནས་དཔག་ཚད་བཅུ་གཉིས་ཀྱི་ཕ་རོལ་གྲོང་ཁྱེར་
རྩྭ་མཆོག་ཅེས་བྱ་བར་ཤིང་སཱ་ལ་དྲུང་གཉིས་ཀྱི་བར་ན་བཞུགས་ཏེ། ད་ལྟར་ཚད་མེད་གྲངས་མེད་པའི་བྱང་ཆུབ་སེམས་དཔའི་དགེ་འདུན་ལ་ཆོས་རྣམ་པ་སྣ་ཚོགས་སྟོན་པ་ནི་འདི་ལྟ་སྟེ་ཡོད་པ་དང་མེད་པ་དང་། འདུས་བྱས་དང་འདུས་མ་བྱས་པ་དང་། ཟག་པ་དང་བཅས་པ་

དང་ཟག་པ་མེད་པ་དང་། ཉོན་མོངས་པའི་འབྲས་བུ་དང་། རྣམ་པར་དཀར་བའི་ཆོས་དང་། གཟུགས་ཀྱི་ཆོས་དང་གཟུགས་མ་ཡིན་པའི་ཆོས་དང་། གཟུགས་ཀྱང་མ་ཡིན་གཟུགས་མ་ཡིན་པ་ཡང་མ་ཡིན་པའི་ཆོས་དང་། བདག་དང་བདག་མ་ཡིན་པའི་ཆོས་དང་།
བདག་ཀྱང་མ་ཡིན་བདག་མ་ཡིན་པ་ཡང་མ་ཡིན་པ་དང་། རྟག་པ་དང་། རྟག་པ་མ་ཡིན་པ་དང་། རྟག་པ་ཡང་མ་ཡིན་རྟག་པ་མ་ཡིན་པ་ཡང་མ་ཡིན་པ་དང་། བདེ་བ་དང་བདེ་བ་མ་ཡིན་པ་དང་། བདེ་བ་ཡང་མ་ཡིན་བདེ་བ་མ་ཡིན་པ་ཡང་མ་ཡིན་པ་དང་། མཚན་མ་དང་མཚན་མ་
མ་ཡིན་པ་དང་། མཚན་མ་ཡང་མ་ཡིན་མཚན་མ་མ་ཡིན་པ་ཡང་མ་ཡིན་པ་དང་། ཆད་པ་དང་ཆད་པ་མ་ཡིན་པ་དང་། ཆད་པ་ཡང་མ་ཡིན་ཆད་པ་མ་ཡིན་པ་ཡང་མ་ཡིན་པ་དང་། འཇིག་རྟེན་དང་འཇིག་རྟེན་ལས་འདས་པ་དང་། འཇིག་རྟེན་ཡང་མ་ཡིན་འཇིག་རྟེན་ལས་འདས་པ་ཡང་མ་
ཡིན་པ་དང་། ཐེག་པ་དང་། ཐེག་པ་མ་ཡིན་པ་དང་། ཐེག་པ་ཡང་མ་ཡིན་ཐེག་པ་མ་ཡིན་པ་ཡང་མ་ཡིན་པ་དང་། བདག་གིས་བྱས་པས་བདག་མྱོང་བ་དང་། བདག་གིས་བྱས་པས་གཞན་མྱོང་བ་དང་། བྱས་པ་མེད་པས་མྱོང་བ་མེད་པ་དག་སྟོན་ཏོ། །རྒྱལ་པོ་ཆེན་པོ་གང་
ཞིག་གིས་སངས་རྒྱས་ལ་བྱས་པ་མེད་པ་དང་མྱོང་བ་མེད་པ་ཐོས་ན། ཁ་ན་མ་ཐོ་བའི་ལས་ཐམས་ཅད་ཡོངས་སུ་འབྱང་བར་འགྱུར་རོ། །རྒྱལ་པོ་ཆེན་པོ་རེ་ཞིག་གསོན་ཅིག །བརྒྱ་བྱིན་ལྷའི་དབང་ཕྱུག་ཚེའི་དུས་བྱེད་དུ་ཉེ་བ་ན་ལྟས་རྣམ་པ་ལྔ་སྔར་འབྱུང་སྟེ། གང་ཞེ་ན། གོས་ལ་
དྲི་མ་ཆགས་པ་དང་། མགོའི་མེ་ཏོག་རྙིངས་པ་དང་། ལུས་ལ་དྲི་མི་ཞིམ་པ་དང་། མཆན་ཁུང་ནས་རྔུལ་འབྱུང་བ་དང་། གནས་མི་འདོད་པའོ། །དེའི་ཚེ་བརྒྱ་བྱིན་ལྷའི་དབང་ཕྱུག་གིས་གནས་དབེན་པར་གལ་ཏེ་དགེ་སྦྱོང་ངམ་བྲམ་ཟེ་དག་མཐོང་ན་དེའི་དྲུང་དུ་བསྙེན་ཏེ། སངས་རྒྱས་
སུ་འདུ་ཤེས་བསྐྱེད་དོ། །དེའི་ཚེ་དགེ་སྦྱོང་ངམ། བྲམ་ཟེ་དེས་བརྒྱ་བྱིན་ལྷའི་དབང་ཕྱུག་མཐོང་བས་སྨོན་ལམ་བཏབ་ནས་འདི་སྐད་ཅེས་སྨྲའོ། །ལྷའི་དབང་པོ་བདག་ཅག་ནི་ཁྱོད་ལ་སྐྱབས་སུ་མཆིའོ། །བརྒྱ་བྱིན་གྱིས་དེ་སྐད་ཅེས་ཐོས་ནས་སངས་རྒྱས་མ་ཡིན་པར་ཤེས་ཏེ་འདི་སྙམ་

དུ་སེམས་སོ། །འདི་ནི་སངས་རྒྱས་མ་ཡིན་པས་ན། བདག་གིས་ལྟས་ངན་པ་ལྔ་པོ་འདི་དག་མེད་པར་བྱེད་མི་ནུས་སོ་སྙམ་སེམས་སོ། །དེའི་ཚེ་ན་བློན་པོ་བན་ཙ་ཤྲཱི་ཞེས་བྱ་བས་བརྒྱ་བྱིན་ལ་འདི་སྐད་ཅེས་སྨྲས་སོ། །ལྷའི་བདག་པོ་དྲི་ཟའི་རྒྱལ་པོ་ཀ་པུ་ལོ་ཞེས་བྱ་བ་ལ་བུ་མོ་སུ་བར་ཏ་ཞེས་
བྱ་བ་ཡོད་དེ། བུ་མོ་དེ་བདག་ལ་སྩལ་ན་རྒྱལ་པོའི་ལྟས་ངན་ཞི་བར་བྱེད་པའི་གནས་བདག་གིས་བསྟན་པར་བྱའོ། །བརྒྱ་བྱིན་གྱིས་སྨྲས་པ། ལྷ་མ་ཡིན་གྱི་རྒྱལ་པོ་ཐག་ཟངས་རིས་ཀྱི་བུ་མོ་ཡིད་འོང་མ་ཞེས་བྱ་བ་ཁོ་བོའི་ཆུང་མ་བྱེད་དེ། གལ་ཏེ་ཁྱོད་ཀྱིས་ངའི་ལྟས་ངན་ཞི་བར་བྱེད་པའི་
གནས་སྟོན་ནུས་ན་ལྟ་དེ་ཡང་ཁྱོད་ལ་སྦྱིན་པར་བྱས་ན་སུ་བར་ཏ་ལྟ་སྨོས་ཀྱང་ཅི་དགོས། ལྷའི་བདག་པོ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བ་ད་ལྟར་རྒྱལ་པོའི་ཁབ་ན་བཞུགས་ཀྱིས་དེ་གང་ན་བར་སོང་སྟེ། སྔོན་མ་ཐོས་པ་ཐོས་པར་གྱུར་ན། ཚེའི་དུས་བྱེད་པའི་ལྟས་ངན་གདོན་
མི་ཟ་བར་ཞི་བར་འགྱུར་རོ། །རིགས་ཀྱི་བུ་གལ་ཏེ་སངས་རྒྱས་བཅོམ་ལྡན་འདས་ཀྱིས་ཞི་བར་ནུས་ན་ལྟ་དེ་གང་ན་བར་འགྲོ་བར་བྱའོ་ཞེས་སྨྲས་ནས། ཞོན་པའི་ཐེག་པ་བསྒྱུར་ཏེ། རྒྱལ་པོའི་ཁབ་བྱ་རྒོད་ཕུང་པོའི་རི་ལ་སངས་རྒྱས་བཅོམ་ལྡན་འདས་གང་ན་བར་ཕྱིན་པ་དང་། མགོ་བོས་
སངས་རྒྱས་ཀྱི་ཞབས་ལ་ཕྱག་འཚལ་ནས་ཕྱོགས་གཅིག་ཏུ་འཁོད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་དང་མིའི་ནང་ན་འཆིང་བས་བཅིངས་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ་སེར་སྣ་དང་འདོད་ཆགས་དང་
ཕྲག་དོག་གོ། །ཡང་གསོལ་པ། སེར་སྣ་དང་། འདོད་ཆགས་དང་། ཕྲག་དོག་ཅི་ལས་སྐྱེས། བཀའ་སྩལ་པ། མ་རིག་པ་ལས་སྐྱེའོ། །ཡང་གསོལ་པ། མ་རིག་པ་ཅི་ལས་སྐྱེ། བཀའ་སྩལ་པ། བག་མེད་པ་ལས་སྐྱེའོ། །ཡང་གསོལ་པ། བག་མེད་པ་ཅི་ལས་སྐྱེ། བཀའ་སྩལ་པ།
ཕྱིན་ཅི་ལོག་ལས་སྐྱེའོ། །ཡང་གསོལ་པ། ཕྱིན་ཅི་ལོག་ཅི་ལས་སྐྱེ། བཀའ་སྩལ་པ། ཐེ་ཙོམ་གྱི་སེམས་ལས་སྐྱེའོ། །བཅོམ་ལྡན་འདས་ཕྱིན་ཅི་ལོག་གི་ཆོས་ཐེ་ཙོམ་ལས་སྐྱེས་པ་འཕགས་པའི་བཀའ་བཞིན་ནོ། །དེ་ཅིའི་སླད་དུ་ཞེ་ན། བདག་ལ་ཐེ་ཙོམ་གྱི་སེམས་མཆིས་པས་ཕྱིན་ཅི་

ལོག་སྐྱེས་ཏེ། སངས་རྒྱས་བཅོམ་ལྡན་འདས་མ་ཡིན་པ་ལ་སངས་རྒྱས་བཅོམ་ལྡན་འདས་སུ་འདུ་ཤེས་བསྐྱེད་དེ། ད་སངས་རྒྱས་བཅོམ་ལྡན་འདས་མཐོང་བས་ན་ཐེ་ཙོམ་གྱི་སེམས་བྱང་བར་གྱུར་ཏོ། །ཐེ་ཙོམ་ཡོངས་སུ་བྱང་བས་ཕྱིན་ཅི་ལོག་ཟད་པར་གྱུར་ཏོ། །ཕྱིན་ཅི་ལོག་
ཟད་པས་ན་སེར་སྣའི་སེམས་མེད་པ་ནས། ཕྲག་དོག་གི་སེམས་ཀྱི་བར་དུ་མེད་དོ། །བཅོམ་ལྡན་འདས་ཀྱིས་བཀའ་སྩལ་པ། སེར་སྣ་དང་ཕྲག་དོག་གི་སེམས་མེད་དོ་ཞེས་བྱ་བ་ཁྱོད་ད་ལྟར་ལན་ཅིག་ཕྱིར་ལྡོག་པའི་འབྲས་བུ་ཐོབ་བམ་ལན་ཅིག་ཕྱིར་ལྡོག་པའི་འབྲས་བུ་འཐོབ་པ་ནི་འདོད་པའི་སེམས་
མེད་དོ། །གལ་ཏེ་འདོད་པའི་སེམས་མེད་ན་ཅི་སྟེ་སྲོག་གི་ཕྱིར་ངའི་དྲུང་དུ་འོངས། ལན་ཅིག་ཕྱིར་ལྡོག་པ་ནི་སྲོག་ལ་རེ་བ་མེད་དོ། །བཅོམ་ལྡན་འདས་ཕྱིན་ཅི་ལོག་པ་ནི་སྲོག་ལ་རེ་བ་མཆིས་སོ། །ཕྱིན་ཅི་ལོག་མ་མཆིས་པ་ནི་སྲོག་ལ་མི་རེའོ། །བདག་ཀྱང་ཡང་དག་པར་ན་སྲོག་ལ་རེ་བ་མ་མཆིས་
ཀྱི། སངས་རྒྱས་བཅོམ་ལྡན་འདས་ཀྱི་ཆོས་ཀྱི་སྐུ་དང་། སངས་རྒྱས་ཀྱི་ཡེ་ཤེས་ལ་རེའོ། །ཀཽ་ཤི་ཀ་སངས་རྒྱས་ཀྱི་ཆོས་ཀྱི་སྐུ་དང་སངས་རྒྱས་ཀྱི་ཡེ་ཤེས་ཚོལ་བ་ནི་ཕྱི་མ་མ་འོངས་པའི་དུས་སུ་གདོན་མི་ཟ་བར་ཐོབ་པར་འགྱུར་རོ། །དེའི་ཚེ་བརྒྱ་བྱིན་ལྷའི་དབང་ཕྱུག་གིས་བཅོམ་ལྡན་འདས་
ལས་དེ་སྐད་ཅེས་ཐོས་ནས། ཚེའི་དུས་བྱེད་པའི་ལྟས་ངན་པ་དེ་ཉིད་བྱང་བར་གྱུར་ནས་འདུག་པ་ལས་ལངས་ཏེ་སྤྱི་བོས་ཕྱག་འཚལ་ནས་ལན་གསུམ་བསྐོར་ཏེ་བསྟི་སྟང་དང་བཅས་པས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ནི་ཤི་བ་ལས་སོས་སོ། །སྲོག་
སྟོར་བ་ལས་སྲོག་ཕྱིར་རྙེད་དོ། །ཡང་སངས་རྒྱས་བཅོམ་ལྡན་འདས་ལས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་ཞེས་ལུང་བསྟན་པ་ཐོབ་པས་དེ་ནི་སོས་པ་དང་སྲོག་ཐོབ་པ་ཞེས་བགྱིའོ། །བཅོམ་ལྡན་འདས་ལྷ་དང་མི་དག་ཇི་ལྟར་ན་འཕེལ་ཞིང་སྐྱེ་བར་
འགྱུར། ཇི་ལྟར་ན་འགྲིབས་ཤིང་གོད་པར་འགྱུར། བཀའ་སྩལ་པ། ཀཽ་ཤི་ཀ་འཐབ་ཅིང་རྩོད་པའི་རྐྱེན་གྱིས་ལྷ་དང་མི་འགྲིབས་ཤིང་གོད་པར་འགྱུར་རོ། །ཤིན་ཏུ་དུམ་པའི་རྐྱེན་གྱིས་སྐྱེ་ཞིང་འཕེལ་བར་འགྱུར་རོ། །བཅོམ་ལྡན་འདས་གལ་ཏེ་འཐབ་ཅིང་རྩོད་པས་འགྲིབས་ཤིང་གོད་

པར་གྱུར་ན། བདག་དེང་སླན་ཆད་ལྷ་མ་ཡིན་དང་མི་འཐབ་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཀཽ་ཤི་ཀ་སངས་རྒྱས་བཅོམ་ལྡན་འདས་ནི་བཟོད་པ་ལ་བླ་ན་མེད་པ་ཡང་དག་པར་རྫོགས་པའི་རྒྱུ་ཡིན་ནོ། །ཞེས་གསུངས་སོ། །དེའི་ཚེ་བརྒྱ་བྱིན་ལྷའི་
དབང་ཕྱུག་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་ཕྱིར་གནས་སུ་དོང་ངོ་། །རྒྱལ་པོ་ཆེན་པོ་དེ་བཞིན་གཤེགས་པ་དེ་ལྟར་མི་དགེ་བའི་ལྟས་ངན་པ་ཐམས་ཅད་ཞི་བར་བྱེད་པས་ན། སངས་རྒྱས་ལ་བསམ་གྱིས་མི་ཁྱབ་བོ་ཞེས་བརྗོད་དོ། །དེ་བས་ན་གལ་ཏེ་རྒྱལ་པོ་ཡང་དེའི་གན་དུ་
ཕྱིན་ན་ཁ་ན་མ་ཐོ་བའི་ལས་ཐམས་ཅད་ཡོངས་སུ་འབྱང་ངོ་། །རྒྱལ་པོ་ཆེན་པོ་ཡང་གསོན་ཅིག །བྲམ་ཟེའི་བུ་མི་འཚེ་བ་ཞེས་བྱ་བ་སེམས་ཅན་གྲངས་མེད་པ་བསད་པས་སོར་མོས་བརྒྱན་ཞེས་བཏགས་ཏེ། མ་གསོད་ཏུ་ཆས་ནས་སྡིག་པའི་སེམས་བསྐྱེད་པ་ན། ལུས་ཀྱང་འདར་ཞིང་གཡོའོ། །
ལུས་དང་སེམས་གཡོ་བ་ནི་མཚམས་མེད་པ་བྱས་པའི་རྐྱེན་གྱིས་གདོན་མི་ཟ་བར་སེམས་ཅན་དམྱལ་བར་ལྟུང་བ་ལས་སངས་རྒྱས་དང་ཕྲད་པ་ན་ཡང་ལུས་དང་སེམས་གཡོ་སྟེ། དེ་ལ་ཡང་གསོད་པའི་སེམས་སྐྱེས་སོ། །ལུས་དང་སེམས་གཡོ་བ་ནི་མཚམས་མེད་པ་ལྔ་བྱེད་པའི་
རྐྱེན་གྱིས་གཡོས་ཏེ། མཚམས་མེད་པ་ལྔ་བྱས་ན་གདོན་མི་ཟ་བར་སེམས་ཅན་དམྱལ་བར་ལྟུང་ངོ་། །མི་དེས་དེ་བཞིན་གཤེགས་པ་སྟོན་པ་ཆེན་པོ་དང་ཕྲད་མ་ཐག་ཏུ་སེམས་ཅན་དམྱལ་བར་ལྟུང་བའི་རྒྱུ་ཡོངས་སུ་བྱང་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་དེ། དེ་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པའི་སྨན་པ་ཞེས་བྱ་སྟེ། སྟོན་པ་དྲུག་ལྟ་བུ་མ་ཡིན་ནོ། །རྒྱལ་པོ་ཆེན་པོ་གཞན་ཡང་རྒྱལ་བུ་སི་བྱི་ལ་ཞེས་བྱ་བ་ལ་ཕ་རྒྱལ་པོ་ཁྲོས་ནས་རྐང་ལག་བཅད་དེ་དོང་དུ་བོར་རོ། །རྒྱལ་པོའི་མ་སྙིང་བརྩེ་བས་དོང་ནས་ཕྱུང་སྟེ།
སངས་རྒྱས་གང་ན་བར་ཁྲིད་ནས་སངས་རྒྱས་དང་ཕྲད་མ་ཐག་ཏུ་རྐང་ལག་ཀྱང་ཕྱིར་སྐྱེས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རྒྱལ་པོ་ཆེན་པོ་དེ་ལྟར་སངས་རྒྱས་དང་ཕྲད་པས་འབྲས་བུ་མངོན་སུམ་དུ་ཐོབ་སྟེ། དེ་བས་ན་སངས་རྒྱས་བཅོམ་ལྡན་

འདས་ནི་བླ་ན་མེད་པའི་སྨན་པ་ཞེས་བྱ་སྟེ། སྟོན་པ་དྲུག་ལྟ་བུ་ནི་མ་ཡིན་ནོ། །རྒྱལ་པོ་ཆེན་པོ་ཀླུང་གང་གཱའི་འགྲམ་ན་ཡི་དགས་ལྔ་བརྒྱ་ཡོད་དེ། ལོ་གྲངས་མེད་པའི་བར་དུ་ཆུ་ཡང་མི་མཐོང་ངོ་། །ཅི་སྟེ་ཆུ་འགྲམ་དུ་ཕྱིན་པ་ན་ཡང་མེའི་ཕུང་པོ་ཆེན་པོར་མཐོང་སྟེ། སྐོམ་
པ་དང་བཀྲེས་པས་ཉེན་ཏེ་སྐད་ཆེན་པོ་ཕྱུང་སྟེ་ངུའོ། །དེའི་ཚེ་དེ་བཞིན་གཤེགས་པ་ཀླུང་དེ་དང་ཉེ་བའི་ཕྱོགས་ཨུ་དུམ་བཱ་རའི་ཚལ་ཤིང་དྲུང་ན་བཞུགས་པ་ལས། དེའི་ཚེ་ཡི་དགས་མང་པོ་སངས་རྒྱས་གང་ན་བར་ལྷགས་ནས་སངས་རྒྱས་ལ་འདི་སྐད་ཅེས་གསོལ་ཏོ། །བདག་ཅག་ནི་བཀྲེས་པ་དང་སྐོམ་
པས་ཉེན་ཏེ། འཚོ་བའི་སྲོག་ཀྱང་རིང་པོ་མི་ཐུབ་བོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་གང་གཱའི་ཆུ་འབབ་པ་ལ་ཅིའི་ཕྱིར་མི་འཐུང་། ཡི་དགས་རྣམས་ཀྱིས་གསོལ་པ། དེ་བཞིན་གཤེགས་པས་ནི་ཆབ་ཏུ་གཟིགས་ཀྱང་། བདག་ཅག་གིས་ནི་མེ་འབར་བ་ཞིག་ཏུ་མཐོང་ངོ་། །
བཅོམ་ལྡན་འདས་ཀྱིས་བཀའ་སྩལ་པ། གང་གཱའི་ཀླུང་གི་ཆུ་ནི་ཤིན་ཏུ་ཡང་སྔོ་ལ་དང་བས་ཡང་དག་པར་ན་མེ་མེད་དེ། སྡིག་པའི་ལས་ཀྱིས་སེམས་ཕྱིན་ཅི་ལོག་པས་མེ་ཡིན་སྙམ་སེམས་སོ། །ཁྱོད་ཀྱི་ཕྱིན་ཅི་ལོག་གི་སེམས་ཡོངས་སུ་བསལ་ཏེ་ཆུར་མཐོང་བར་བྱའོ་ཞེས་བཀའ་སྩལ་ནས་དེའི་
ཚེ་བཅོམ་ལྡན་འདས་ཀྱིས་ཡི་དགས་མང་པོ་དེ་དག་ལ་སེར་སྣ་དང་འདོད་ཆགས་ཀྱི་སྐྱོན་མང་པོ་བསྟན་ཏོ། །ཡི་དགས་མང་པོས་འདི་སྐད་ཅེས་གསོལ་ཏོ། །བདག་ཅག་ནི་བཀྲེས་པ་དང་སྐོམ་པས་ཉེན་ཏེ། ཆོས་ཀྱི་གསུང་མང་པོ་ཐོས་ཀྱང་གཟུང་བའི་སེམས་མ་མཆིས་སོ། །བཅོམ་
ལྡན་འདས་ཀྱིས་བཀའ་སྩལ་པ། ཁྱེད་རྣམས་ཀླུང་གང་གཱའི་ནང་དུ་ཞུགས་ལ་དེའི་ཆུ་ཡིད་བཞིན་དུ་འཐུང་ཤིག །ཡི་དགས་དེ་རྣམས་སངས་རྒྱས་ཀྱི་བྱིན་གྱི་རླབས་ཀྱིས་ཆུ་འཐུངས་པར་གྱུར་ཏོ། །དེ་ལྟར་ཆུ་འཐུངས་ནས་དེ་བཞིན་གཤེགས་པས་དེ་དག་ལ་ཆོས་རྣམ་པ་སྣ་ཚོགས་བསྟན་ཏོ། །དེ་
དག་གིས་ཆོས་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། ཡི་དགས་ཀྱི་ལུས་ཡོངས་སུ་སྤངས་ནས་ལྷའི་ལུས་ཐོབ་པར་གྱུར་ཏོ། །རྒྱལ་པོ་ཆེན་པོ་དེ་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པའི་སྨན་པ་ཞེས་བྱ་སྟེ། སྟོན་པ་དྲུག་ལྟ་བུ་ནི་མ་ཡིན་

ནོ། །རྒྱལ་པོ་ཆེན་པོ་ཡུལ་མཉན་དུ་ཡོད་པ་ན་མི་རྒོད་ལྔ་བརྒྱ་ཞིག་རྒྱལ་པོ་སྡེ་རབ་ཏུ་ཕམ་བྱེད་ཀྱིས་མིག་ཕྱུང་ནས་ལྡོངས་པར་གྱུར་ཏེ། དེ་དག་སངས་རྒྱས་གང་ན་བར་ཕྱིན་པའི་དུས་མེད་དོ། །སངས་རྒྱས་བཅོམ་ལྡན་འདས་དེ་དག་ལ་ཐུགས་བརྩེ་བའི་ཕྱིར་མི་རྒོད་མིག་ཕྱུང་བ་རྣམས་ཀྱི་དྲུང་དུ་
གཤེགས་ནས་སྤྲོ་བ་བསྐྱེད་དེ། རིགས་ཀྱི་བུ་དག་ལུས་དང་ངག་ཤིན་ཏུ་སྡོམས་ལ་ཕྱིན་ཆད་སྡིག་པ་མ་བྱེད་ཅིག །མི་རྒོད་མང་པོ་དེ་དག་སངས་རྒྱས་ལས་དེ་བཞིན་གཤེགས་པའི་གསུང་ཤིན་ཏུ་གསལ་བ་ཐོས་མ་ཐག་ཏུ་མིག་ཀྱང་ཕྱིར་མཐོང་བར་གྱུར་ནས། སངས་རྒྱས་ཀྱི་སྤྱན་སྔར་ཐལ་མོ་སྦྱར་
ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ནི་སངས་རྒྱས་བཅོམ་ལྡན་འདས་ཀྱི་བྱམས་པའི་ཐུགས་སེམས་ཅན་ཐམས་ཅད་ལ་ཁྱབ་ཀྱི། ལྷ་དང་མི་འབའ་ཞིག་ལ་མ་ལགས་པར་རྟོགས་སོ། །དེའི་ཚེ་བཅོམ་ལྡན་འདས་ཀྱིས་
དེ་དག་ལ་ཆོས་བསྟན་ཏེ། དེ་དག་གིས་ཆོས་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་བས་ན་དེ་བཞིན་གཤེགས་པ་ནི་འཇིག་རྟེན་གྱི་བླ་ན་མེད་པའི་སྨན་པ་ཡང་དག་པ་སྟེ། སྟོན་པ་དྲུག་ལྟ་བུ་ནི་མ་ཡིན་ནོ། །རྒྱལ་པོ་ཆེན་པོ་
ཡུལ་མཉན་དུ་ཡོད་པ་ན་རིགས་ངན་དབུགས་འཕྲོག་ཅེས་བྱ་བ་ཞིག་ཡོད་དེ། མི་གྲངས་མེད་པ་ཞིག་བསད་དོ། །སངས་རྒྱས་ཀྱི་ཉེ་གནས་མཽད་གལ་གྱི་བུ་མཐོང་ནས་དེ་མ་ཐག་ཏུ་སེམས་ཅན་དམྱལ་བར་ལྟུང་བའི་རྒྱུ་བཅོམ་ནས་སུམ་ཅུ་རྩ་གསུམ་གནམ་གྱི་ལྷར་སྐྱེས་སོ། །དེ་ལྟར་འཕགས་
པའི་ཉེ་གནས་ཡོད་པས་ན་དེ་བཞིན་གཤེགས་པ་ནི་བླ་ན་མེད་པའི་སྨན་པ་ཞེས་བྱ་སྟེ། སྟོན་པ་དྲུག་ལྟ་བུ་ནི་མ་ཡིན་ནོ། །རྒྱལ་པོ་ཆེན་པོ་གྲོང་ཁྱེར་སེར་སྐྱ་ཞེས་བྱ་བ་ན་ཚོང་དཔོན་གྱི་བུ་མ་ཕམ་པ་ཞེས་བྱ་བ་མ་ལ་མི་ཚངས་པར་སྤྱད་དེ། དེའི་རྒྱུ་དེའི་རྐྱེན་གྱིས་ཕ་ཡང་བསད་པར་གྱུར་ཏོ། །
ཕྱིས་དེའི་མ་མི་གཞན་དང་འཁྲིག་པ་ཚོར་ནས་མ་ཡང་བསད་དོ། །དེ་དགྲ་བཅོམ་པ་ཞིག་དང་བཤེས་ཏེ་དགྲ་བཅོམ་པ་ལ་ངོ་ཚ་བའི་ཕྱིར་དགྲ་བཅོམ་པ་ཡང་བསད་དོ། །དེ་ལྟར་དགྲ་བཅོམ་པ་ཡང་བསད་ནས་གཙུག་ལག་ཁང་དུ་སོང་སྟེ། དགེ་སློང་གི་དགེ་འདུན་དག་ལས་ཁྱིམ་ནས་ཁྱིམ་མ་

ཡིན་པར་རབ་ཏུ་འབྱུང་བར་གསོལ་ཏོ། །དགེ་སློང་གི་དགེ་འདུན་རྣམས་ཀྱིས་མཚམས་མེད་པ་གསུམ་གྱི་ལས་བྱས་པར་ཤེས་པས་རབ་ཏུ་འབྱུང་དུ་མ་གནང་ངོ་། །དེ་ལྟར་རབ་ཏུ་འབྱུང་དུ་མ་གནང་བས་ཤིན་ཏུ་ཁྲོས་ནས། དེའི་ནུབ་མོ་མེ་ཐོགས་ཏེ་དགེ་འདུན་གྱི་གནས་
ཁང་ལ་མེ་བཏང་ངོ་། །དེའི་འོག་ཏུ་རྒྱལ་པོའི་ཁབ་ཏུ་སོང་ནས་དེ་བཞིན་གཤེགས་པ་གང་ན་བར་ཕྱིན་པ་དང་། དེ་བཞིན་གཤེགས་པ་ལ་རབ་ཏུ་འབྱུང་བར་གསོལ་ནས། དེ་བཞིན་གཤེགས་པས་རབ་ཏུ་ཕྱུང་སྟེ། དེ་ལ་ཆོས་བསྟན་པས་བགས་ཀྱིས་ཁ་ན་མ་ཐོ་བའི་སྡིག་ལྕི་བ་ཡང་བྱང་ནས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པའི་སྟོན་པ་ཞེས་བྱ་སྟེ། སྟོན་པ་དྲུག་ལྟ་བུ་ནི་མ་ཡིན་ནོ། །རྒྱལ་པོ་ཆེན་པོ་རྒྱལ་པོ་ནི་རང་བཞིན་གྱིས་ཁྲོ་ཞིང་གཏུམ་ལ་སྡིག་པའི་བཤེས་གཉེན་ལ་ཡིད་ཆེས་པས་དེའི་ཚེ་
ལྷ་སྦྱིན་གྱིས་བལ་གླང་སྨྱོས་པ་བཏང་ནས་སངས་རྒྱས་ཀྱི་ཐོག་ཏུ་མཆོངས་པ་ལས། བལ་གླང་དེ་དག་སངས་རྒྱས་མཐོང་མ་ཐག་ཏུ་རང་དུལ་ཏེ། དེ་ལ་སངས་རྒྱས་བཅོམ་ལྡན་འདས་ཀྱིས་ཕྱག་བརྐྱང་ནས་བལ་གླང་གི་སྤྱི་བོ་ལ་བྱུགས་ཏེ། ཆོས་བསྟན་པས་དེ་དག་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རྒྱལ་པོ་ཆེན་པོ་བྱོལ་སོང་གི་སྐྱེ་གནས་སུ་གྱུར་པ་ཡང་སངས་རྒྱས་དང་ཕྲད་མ་ཐག་ཏུ་བྱོལ་སོང་གི་སྐྱེ་གནས་སུ་གྱུར་པའི་རྣམ་པར་སྨིན་པ་ཡང་ཡོངས་སུ་བཅོམ་ན། མིའི་རྒྱུད་དུ་སྐྱེས་པ་ལྟ་ཅི་སྨོས་ཏེ། རྒྱལ་པོ་ཆེན་པོ་འདི་
ལྟར་རིག་པར་གྱིས་ཤིག །གལ་ཏེ་སངས་རྒྱས་དང་ཕྲད་ན་ཁ་ན་མ་ཐོ་བའི་སྡིག་ཡོངས་སུ་འབྱང་བར་འགྱུར་རོ། །རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་མ་རྒྱས་པ་ན། བདུད་ཀྱི་རིས་ཚད་མེད་གྲངས་
མེད་པ་བྱང་ཆུབ་སེམས་དཔའི་དྲུང་དུ་ལྷགས་སོ། །དེའི་ཚེ་བྱང་ཆུབ་སེམས་དཔས་བཟོད་པའི་སྟོབས་ཀྱིས་བདུད་སྡིག་ཏོ་ཅན་གྱི་སེམས་རབ་ཏུ་བཏུལ་ཏེ། བདུད་རྣམས་ལ་ཆོས་བསྟན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སངས་རྒྱས་བཅོམ་ལྡན་འདས་ལ་

དེ་ལྟ་བུའི་ཡོན་ཏན་ཆེན་པོའི་མཐུ་མངའོ། །རྒྱལ་པོ་ཆེན་པོ་འབྲོག་དགོན་པའི་ཡི་དགས་སེམས་ཅན་མང་པོ་གསོད་པ་དག་ཡོད་དོ། །དེའི་ཚེ་དེ་བཞིན་གཤེགས་པས་ཚོང་དཔོན་ནོར་བཟངས་ཀྱི་ཕྱིར་འབྲོག་དགོན་པའི་ཡི་དགས་གང་ན་བ་དེར་གཤེགས་ཏེ་དེ་དག་ལ་ཆོས་བསྟན་ཏོ། །འབྲོག་
དགོན་པའི་ཡི་དགས་དེ་དག་ཆོས་གསུངས་པ་ཐོས་ནས་རབ་ཏུ་དགའ་མགུ་རངས་ཏེ། ཚོང་དཔོན་ནོར་བཟངས་ཀྱིས་སངས་རྒྱས་ལ་ཕུལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །རྒྱལ་པོ་ཆེན་པོ་ཡུལ་སེར་སྐྱ་ན་ཤན་པ་འཕྲལ་བ་ཡངས་ཞེས་
བྱ་བ་ཞིག །ཉིན་གཅིག་ཀྱང་ལུག་གྲངས་མེད་པ་གསོད་དེ། ཤཱ་རིའི་བུ་མཐོང་ནས་ཉིན་ཞག་གཅིག་གི་ཁྲིམས་བརྒྱད་མནོས་སོ། །དེའི་རྒྱུ་དེའི་རྐྱེན་གྱིས་ཚེ་འཕོས་ནས་བྱང་ཕྱོགས་ཀྱི་མགོན་པོ་ངལ་བསོ་པོའི་བུར་སྐྱེས་སོ། །དེ་བཞིན་གཤེགས་པའི་ཉེ་གནས་ལ་ཡང་དེ་ལྟ་བུའི་
ཡོན་ཏན་ཆེན་པོ་ཡོད་ན། སངས་རྒྱས་བཅོམ་ལྡན་འདས་ལྟ་སྨོས་ཀྱང་ཅི་དགོས། རྒྱལ་པོ་ཆེན་པོ་ཡུལ་འཁོར་གྱི་བྱང་ཕྱོགས་ན་གྲོང་ཁྱེར་གསེག་མ་ཞེས་བྱ་བའི་རྒྱལ་པོ་ཀླུའི་ཕྱག་རྒྱ་ཞེས་བྱ་བ་རྒྱལ་པོའི་སྲིད་འདོད་པའི་ཕྱིར་ཕ་བསད་དོ། །དེ་ལྟར་ཕ་བསད་ནས་ཤིན་ཏུ་འགྱོད་པའི་སེམས་
སྐྱེས་ཏེ་ཡུལ་གྱི་སྲིད་བཏང་ནས་དེ་བཞིན་གཤེགས་པ་གང་ན་བར་ལྷགས་ནས་རབ་ཏུ་འབྱུང་བར་གསོལ་ཏོ། །བཅོམ་ལྡན་འདས་ཀྱིས་དེ་ལ་ལེགས་སོ་ཞེས་བཀའ་སྩལ་ནས་དགེ་སློང་དུ་གྱུར་ཏེ། ཁ་ན་མ་ཐོ་བའི་སྡིག་ཀྱང་ཡོངས་སུ་བྱང་ནས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་སེམས་བསྐྱེད་པར་གྱུར་ཏོ། །རྒྱལ་པོ་ཆེན་པོ་དེ་བས་ན་དེ་བཞིན་གཤེགས་པ་ལ་ཡོན་ཏན་ཆེན་པོ་གྲངས་མེད་ཚད་མེད་པ་མངའ་བར་རིག་པར་བྱའོ། །རྒྱལ་པོ་ཆེན་པོ་དེ་བཞིན་གཤེགས་པ་ལ་གཅུང་ལྷ་སྦྱིན་ཞེས་བྱ་བ་ཡོད་དེ། དགེ་འདུན་གྱི་དབྱེན་བྱས་ནས། སངས་
རྒྱས་ཀྱི་སྐུ་ལ་ངན་སེམས་ཀྱིས་ཁྲག་ཕྱུང་སྟེ། དགེ་སློང་མ་པད་མོ་ཞེས་བྱ་བ་ཡང་བསད་པས་མཚམས་མེད་པ་གསུམ་གྱི་ལས་བྱས་སོ། །དེ་ལ་ཡང་དེ་བཞིན་གཤེགས་པས་ཆོས་རྣམ་པ་སྣ་ཚོགས་བསྟན་ནས་ཁ་ན་མ་ཐོ་བའི་སྡིག་ཀྱང་ཁད་ཀྱིས་བྱང་བར་གྱུར་ཏོ། །དེ་བས་ན་

དེ་བཞིན་གཤེགས་པ་ནི་སྨན་པ་ཆེན་པོ་ཞེས་བྱ་སྟེ། སྟོན་པ་དྲུག་ལྟ་བུ་ནི་མ་ཡིན་ནོ། །རྒྱལ་པོ་ཆེན་པོ་གལ་ཏེ་བདག་སྨྲ་བའི་ཚིག་ལ་ཐུགས་ཆེས་ནས་སངས་རྒྱས་བཅོམ་ལྡན་འདས་གང་ན་བཞུགས་པར་མྱུར་དུ་བཞུད་ཅིག་ཅི་སྟེ་ཐུགས་མི་ཆེས་ན་ཡང་ལེགས་པར་
དགོངས་ཤིག །རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་ཀྱི་ཐུགས་རྗེ་ཆེན་པོ་ནི་ཐམས་ཅད་ལ་ཁྱབ་པས་དམ་པའི་ཆོས་གཅིག་ཙམ་མམ་འགའ་ཙམ་ལ་སྟོན་པ་ནི་མ་ཡིན་ནོ། །གཉེན་པ་དང་སྡང་བ་ལ་ཐུགས་མཉམ་པས་ན་གང་ཟག་གཅིག་ཙམ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལ་བཀོད་དེ། གཞན་མི་འགོད་པ་མ་ཡིན། དེ་བཞིན་གཤེགས་པ་ནི་འཁོར་རྣམ་པ་བཞི་པོ་འབའ་ཞིག་གི་སྟོན་པ་མ་ཡིན་གྱི། འཇིག་རྟེན་དུ་བཅས་པ་ལྷ་དང་མི་དང་ཀླུ་དང་ཡི་དགས་དང་། བྱོལ་སོང་དང་། སེམས་ཅན་དམྱལ་བ་ལ་སོགས་ཏེ་ཐམས་ཅད་ཀྱི་སྟོན་པ་
ཡིན་པས། དེ་བས་ན་སེམས་ཅན་ཐམས་ཅད་ཀྱིས་ཀྱང་སངས་རྒྱས་བཅོམ་ལྡན་འདས་ལ་ཕ་མ་དང་འདྲ་བར་འདུ་ཤེས་བསྐྱེད་པའི་རིགས་སོ། །རྒྱལ་པོ་ཆེན་པོ་དེ་བཞིན་གཤེགས་པ་ནི་རིགས་མཐོ་ཞིང་བཙུན་པ་རྒྱལ་པོ་བ་དེ་ཀ་འབའ་ཞིག་ལ་ཆོས་སྟོན་པ་མ་ལགས་ཀྱི། རིགས་དམའ་
ཤིང་ངན་པ་ཨུ་པཱ་ལི་ལ་སོགས་པ་ལ་ཡང་ཆོས་སྟོན་ཏོ། །ཨུ་བར་ཏ་དང་། ཨ་ན་ཡ་ཏེ་འབའ་ཞིག་གིས་ཕུལ་བའི་ཞལ་ཟས་བཞེས་པར་མ་ཟད་ཀྱི། དབུལ་པོ་སུ་ད་ར་ཏིའི་ཞལ་ཟས་ཀྱང་བཞེས་སོ། །དབང་པོ་རྣོན་པོ་ཤཱ་རིའི་བུ་ལ་སོགས་པ་འབའ་ཞིག་ལ་ཆོས་སྟོན་པ་མ་ལགས་
ཀྱི། དབང་པོ་རྟུལ་པོ་ཆིའུ་ལི་བན་ཏ་ལ་སོགས་པ་ལ་ཡང་ཆོས་སྟོན་ཏོ། །འདོད་ཆགས་མེད་པའི་རང་བཞིན་ཅན་འོད་སྲུང་ཆེན་པོ་ལ་སོགས་པ་ལ་རབ་ཏུ་འབྱུང་བར་གནང་བ་མ་ལགས་ཀྱི། འདོད་ཆགས་ཅན་བསྙེན་དགའ་བོ་ལ་སོགས་པ་ལ་ཡང་རབ་ཏུ་འབྱུང་བར་གནང་ངོ་། །ཉོན་
མོངས་པ་སྲབ་པ་ལྟེང་རྒྱས་འོད་སྲུང་ལ་སོགས་པ་རབ་ཏུ་འབྱུང་བར་གནང་བ་མ་ལགས་ཀྱི། ཁ་ན་མ་ཐོ་བའི་ལས་བྱས་པ་རྒྱལ་པོ་སྡེ་རབ་ཏུ་ཕམ་བྱེད་ཀྱི་ནུ་བོ་སུ་ཏ་ལ་ཡང་རབ་ཏུ་འབྱུང་བར་གནང་ངོ་། །འཇག་མ་ཞེས་བྱ་བའི་བསྟི་སྟང་དང་བཅས་པས་བསྙེན་བཀུར་བྱས་ཏེ་

ཞེ་སྡང་རྩ་བ་ནས་བཏོན་པ་མ་ལགས་ཀྱི། སོར་མོས་བརྒྱན་ངན་སེམས་ཀྱིས་གནོད་པར་བྱས་པ་ཡང་མ་བཀོལ་ཏེ་སྐྱབས་མཛད་དོ། །ཤེས་རབ་དང་ལྡན་པ་སྐྱེས་པ་འབའ་ཞིག་ལ་ཆོས་སྟོན་པ་མ་ལགས་ཀྱི། ཤིན་ཏུ་གླེན་པ་བུད་མེད་གཡེམ་པ། གཡེམ་པའི་ཆོས་ལ་མཁས་པ་ལ་ཡང་
ཆོས་སྟོན་ཏོ། །རབ་ཏུ་འབྱུང་བའི་འཁོར་བཞི་པོ་འབའ་ཞིག་གིས་བྱང་ཆུབ་ཀྱི་འབྲས་བུ་ཐོབ་པ་མ་ལགས་ཀྱི། ཁྱིམ་ན་གནས་པས་ཀྱང་འབྲས་བུ་གསུམ་ཐོབ་པར་མཛད་དོ། །སུ་ཏ་ན་ལ་སོགས་པ་འདུ་འཛི་ཡོངས་སུ་སྤངས་པས་མཐར་སེམས་རྩེ་གཅིག་པ་འབའ་ཞིག་
ལ་ཆོས་ཀྱི་དོན་སྟོན་པ་མ་ལགས་ཀྱི། རྒྱལ་པོ་གཟུགས་ཅན་སྙིང་པོ་ལ་སོགས་པ་ཡུལ་གྱི་སྲིད་བྱེད་པ་ལ་ཡང་ཆོས་ཀྱི་དོན་སྟོན་ཏོ། །ཆང་ཡོངས་སུ་བཅད་པ་འབའ་ཞིག་ལ་མ་ལགས་ཀྱི། ཁྱིམ་བདག་དྲག་པོ་ཆང་གིས་ཤིན་ཏུ་མྱོས་པ་ལ་ཡང་ཆོས་སྟོན་ཏོ། །ཏིང་ངེ་འཛིན་ལ་
མཉམ་པར་བཞག་པ་ལི་པ་ཏ་ལ་སོགས་པ་འབའ་ཞིག་ལ་མ་ལགས་ཀྱི། བུ་ཤི་ནས་སེམས་འཁྲུགས་པ་བྲམ་ཟེ་མོ་བ་སི་ཏ་ལ་ཡང་ཆོས་སྟོན་ཏོ། །བདག་གི་ཉེ་གནས་འབའ་ཞིག་ལ་མ་ཡིན་གྱི། མུ་སྟེགས་ཅན་གཅེར་བུ་པ་ལ་ཡང་ཆོས་སྟོན་ཏོ། །ཤིན་ཏུ་ལང་ཚོ་ལ་
བབ་པ་ཉི་ཤུ་ལྔ་ལོན་པ་འབའ་ཞིག་ལ་མ་ལགས་ཀྱི། རྒས་འཁོགས་པ་ལོ་བརྒྱད་ཅུ་ལོན་པ་ལ་ཡང་ཆོས་སྟོན་ཏོ། །དབང་པོ་ཡོངས་སུ་སྨིན་པའི་གང་ཟག་འབའ་ཞིག་ལ་མ་ལགས་ཀྱི། དགེ་བའི་རྩ་བ་མ་སྨིན་པ་ལ་ཡང་ཆོས་སྟོན་ཏོ། །བཙུན་མོ་ཕྲེང་ལྡན་མ་འབའ་ཞིག་
ལ་ཆོས་སྟོན་པ་མ་ལགས་ཀྱི། སྦྲུལ་འཚོང་མ་པད་མོ་ལ་ཡང་ཆོས་སྟོན་ཏོ། །རྒྱལ་པོ་སྡེ་རབ་ཏུ་ཕམ་བྱེད་ཀྱིས་ཕུལ་བའི་ཞལ་ཟས་རོ་མཆོག་བརྒྱད་དང་ལྡན་པའི་འབའ་ཞིག་བཞེས་པ་མ་ལགས་ཀྱི། ཁྱིམ་བདག་ཤྲཱི་གུ་པ་ཏས་ཞལ་ཟས་དུག་དང་བསྲེས་ཏེ་ཕུལ་བ་ཡང་བཞེས་
སོ། །རྒྱལ་པོ་ཆེན་པོ་འདི་ལྟར་རིག་པར་གྱིས་ཤིག །ཤྲཱི་གུ་པ་ཏ་ཞེས་པ་ནི་སྔོན་འདས་པའི་དུས་ན་ཡང་མཚམས་མེད་པ་བྱས་པའི་ལས་ཀྱི་རྒྱུ་ཡོད་དེ། སངས་རྒྱས་དང་ཕྲད་ནས་ཆོས་ཐོས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །

རྒྱལ་པོ་ཆེན་པོ་གལ་ཏེ་ཟླ་བ་གཅིག་གི་བར་དུ་སེམས་ཅན་ཐམས་ཅད་ལ་ཟས་དང་གོས་ཀྱི་སྦྱིན་པ་བྱིན་པ་བས། གང་ཟག་གཅིག་གིས་སྐད་ཅིག་ཙམ་སངས་རྒྱས་རྗེས་སུ་དྲན་ན་བསོད་ནམས་འདིའི་བཅུ་དྲུག་ཆ་གཅིག་ཙམ་ཡང་མི་ཕོད་དོ། །རྒྱལ་པོ་ཆེན་པོ་
གལ་ཏེ་གསེར་ལ་མི་བྱས་ནས་ཤིང་རྟ་བརྒྱ་སྙེད་སྦྱིན་པ་བྱིན་པ་བས། གང་ཞིག་སེམས་བསྐྱེད་དེ་སངས་རྒྱས་ཀྱི་ཕྱོགས་སུ་གོམ་པ་གཅིག་བོར་བའི་བསོད་ནམས་སུ་མི་ཕོད་དོ། །རྒྱལ་པོ་ཆེན་པོ་གལ་ཏེ་ཡུལ་ཆེན་པོ་གཅིག་གི་རིན་པོ་ཆེ་རྣམ་པ་སྣ་ཚོགས་བལ་གླང་གིས་དྲངས་
པའི་ཤིང་རྟ་བརྒྱ་སྙེད་དང་། བུད་མེད་དོ་ཤལ་དང་། ཕྲེང་བས་ཡོངས་སུ་བརྒྱན་པ་ཡང་བརྒྱ་སྙེད་ཀྱི་སྦྱིན་པ་བྱིན་པ་བས། སེམས་བསྐྱེད་དེ་སངས་རྒྱས་བཞུགས་པའི་ཕྱོགས་སུ་གོམ་པ་གཅིག་བོར་བ་བསོད་ནམས་ཆེ་སྟེ། དེ་ཡང་རེ་ཞིག་ཞོག་ལ་གལ་ཏེ་མཆོད་པའི་ཡོ་བྱད་
རྣམ་པ་བཞིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་སྦྱིན་པ་བྱིན་པ་བས། སེམས་བསྐྱེད་དེ་སངས་རྒྱས་ཀྱི་ཕྱོགས་སུ་གོམ་པ་གཅིག་བོར་ན་བསོད་ནམས་ཆེའོ། །དེ་ཡང་རེ་ཞིག་ཞོག་ལ་གལ་ཏེ་རྒྱལ་པོ་ཆེན་པོས་གང་གཱའི་ཀླུང་
གི་བྱེ་མ་སྙེད་ཀྱིས་སེམས་ཅན་གྲངས་མེད་པ་ལ་སྦྱིན་པ་བྱིན་པ་ནི། ཤིང་སཱ་ལ་དྲུང་གཉིས་ཀྱི་བར་དེ་བཞིན་གཤེགས་པའི་སྤྱན་སྔར་སེམས་ཐག་པ་ནས་ཆོས་ཉན་དུ་འགྲོ་བ་ཙམ་མི་ཕོད་དོ། །དེ་ནས་རྒྱལ་པོ་ཆེན་པོས་འཚོ་བྱེད་ལ་འདི་སྐད་ཅེས་སྨྲས་སོ། །སངས་རྒྱས་
བཅོམ་ལྡན་འདས་ཞེས་བྱ་བ་ནི་རང་བཞིན་གྱིས་ཤིན་ཏུ་དུལ་བས་ན། འཁོར་རྣམས་ཀྱང་ཤིན་ཏུ་དུལ་བ་སྟེ། ཇི་ལྟར་ཤིང་ཙན་དན་གྱི་ཚལ་ལ། ཙན་དན་འབའ་ཞིག་གིས་བསྐོར་བ་བཞིན་ནོ། །དེ་བཞིན་གཤེགས་པ་རྣམ་པར་དག་པས་འཁོར་རྣམས་ཀྱང་རྣམ་པར་དག་པ་སྟེ།
ཇི་ལྟར་ཀླུ་ཆེན་པོ་ལ་ཀླུའི་འཁོར་གྱིས་ཡོངས་སུ་བསྐོར་བ་བཞིན་ནོ། །དེ་བཞིན་གཤེགས་པ་ནི་རབ་ཏུ་ཞི་བས་འཁོར་རྣམས་ཀྱང་རབ་ཏུ་ཞི་བའོ། །དེ་བཞིན་གཤེགས་པ་ནི་འདོད་ཆགས་མེད་པས་འཁོར་རྣམས་ཀྱང་འདོད་ཆགས་མེད་པའོ། །སངས་རྒྱས་ལ་ཉོན་མོངས་

པ་མེད་པས་འཁོར་རྣམས་ཀྱང་ཉོན་མོངས་པ་མེད་པ་ཡིན་ན། །ཁོ་བོ་ལྟ་བུ་ཤིན་ཏུ་སྡིག་ཅན་ཁ་ན་མ་ཐོ་བའི་ལས་ཀྱིས་ཤིན་ཏུ་གླགས་པ། ཤིན་ཏུ་མནམ་ཞིང་བཙོག་པ། སེམས་ཅན་དམྱལ་བའི་ཁམས་སུ་གཏོགས་པ་འདི་ཇི་ལྟ་བུར་དེ་བཞིན་གཤེགས་པའི་སྤྱན་སྔར་འགྲོ་བར་བྱ།
ཅི་སྟེ་ཕྱིན་ན་ཡང་ཁོ་བོ་ལ་མི་གཟིགས་ཤིང་བཀའ་སྩལ་པར་ཡང་མི་གནང་དུ་དོགས་ཏེ། ཁྱོད་ཀྱིས་ཁོ་བོ་ལ་སངས་རྒྱས་ཀྱི་སྤྱན་སྔར་འགྲོ་བར་བསྐུལ་ཀྱང་བདག་ནི་ཤིན་ཏུ་བཙོག་པས་འགྲོ་བའི་སེམས་འདི་ཙམ་ཡང་མེད་དོ། །དེའི་ཚེ་སྟེང་གི་ནམ་མཁའ་ལས་ཀྱང་འདི་སྐད་
ཅེས་གྲག་པར་གྱུར་ཏོ། །བླ་ན་མེད་པའི་སངས་རྒྱས་ཀྱི་ཆོས་ཀྱང་ནུབ་ཏུ་ཉེ། ཤིན་ཏུ་ཟབ་པའི་ཆུ་ཀླུང་ཡང་སྐམས་ལ་ཁད། ཆོས་ཀྱི་སྒྲོན་མ་ཆེན་པོ་ཡང་རིང་པོ་མི་ཐོགས་ལ། ཆོས་ཀྱི་རི་བོ་ཡང་འགྱེལ་དུ་ཉེ། ཆོས་ཀྱི་གྲུ་ཡང་ཞིག་ལ་ཁད། ཆོས་ཀྱི་ཟམ་པ་ཡང་ཞིག་
ཏུ་ཉེ། ཆོས་ཀྱི་གཞལ་མེད་ཁང་ཡང་རྡིབ་ཏུ་ཉེ། ཆོས་ཀྱི་རྒྱལ་མཚན་ཡང་འགྱེལ་དུ་ཉེ། ཆོས་ཀྱི་སྡོང་པོ་ཡང་ཆག་ལ་ཁད། དགེ་བའི་བཤེས་གཉེན་ཡང་འགྲོ་ལ་ཁད། འཇིག་པ་ཆེན་པོ་ཡང་འོང་དུ་ཉེ། ཆོས་ཀྱིས་ལྟོགས་པའི་སེམས་ཅན་ནི་རིང་པོ་མི་ཐོགས་པར་
འབྱུང་། ཉོན་མོངས་པའི་རིམས་ནད་ནི་འབྱུང་ལ་ཁད། མུན་ནག་ཆེན་པོས་ནི་ནོན་པའི་དུས་ལ་བབ། ཆོས་ཀྱིས་ཕོངས་པའི་དུས་ནི་བབ་ཏུ་ཉེ་ལ། བདུད་ཀྱི་རྒྱལ་པོ་ནི་ཤིན་ཏུ་དགའ་བས་གོ་ཆ་ཡང་བོར། སངས་རྒྱས་ཀྱི་ཉི་མ་ནི་མྱ་ངན་ལས་འདས་པ་ཆེན་
པོའི་རི་རྩེར་ནུབ་ལ་ཁད་དོ། །རྒྱལ་པོ་ཆེན་པོ་གལ་ཏེ་སངས་རྒྱས་གཤེགས་པར་གྱུར་ན་རྒྱལ་པོ་ཆེན་པོའི་ཁ་ན་མ་ཐོ་བའི་ལས་འདི་དག་ནི་གཞན་སུས་ཀྱང་གསོ་མི་ནུས་སོ། །རྒྱལ་པོ་ཆེན་པོ་ཁྱོད་ནི་མཚམས་མེད་པའི་སེམས་ཅན་དམྱལ་བའི་ཁ་ན་མ་ཐོ་བའི་ལས་
བྱས་པས་ལས་དེའི་རྐྱེན་གྱིས་ཐེ་ཚོམ་མེད་པར་ལྟུང་དུ་ངེས་སོ། །རྒྱལ་པོ་ཆེན་པོ་ཨ་ཞེས་བྱ་བ་ནི་མེད་པའོ། །བྱི་ཞེས་བྱ་བ་ནི་མཚམས་སོ། །བདེ་བའི་མཚམས་ཅུང་ཟད་ཀྱང་མེད་པས་མཚམས་མེད་པ་ཞེས་བྱའོ། །རྒྱལ་པོ་ཆེན་པོ་གལ་ཏེ་མི་གཅིག་པུ་

ཞིག་དམྱལ་བ་དེར་ལྟུང་ན་ཡང་དེའི་ལུས་དཔག་ཚད་བརྒྱད་ཁྲིའི་ནང་ཡོངས་སུ་གང་སྟེ། བར་མཚམས་ཀྱི་སྟོང་པ་མེད་པར་དེའི་ལུས་ལ་ཁོ་ར་ཁོར་ཡུག་ཏུ་ཆུབ་པར་སྡུག་བསྔལ་རྣམ་པ་སྣ་ཚོགས་མྱོང་ངོ་། །ཅི་སྟེ་མི་མང་ཞིག་ལྟུང་ན་ཡང་ལུས་ཀྱིས་ཡོངས་
སུ་གང་སྟེ། གཅིག་ལ་གཅིག་གཟེར་ཞིང་དོགས་པ་མེད་དོ། །རྒྱལ་པོ་ཆེན་པོ་གྲང་བའི་སེམས་ཅན་དམྱལ་བར་ནི་ཚ་བའི་རླུང་ཅུང་ཟད་ཙམ་དང་ཕྲད་པས་དེ་ཡང་བདེ་བ་ཞེས་བྱའོ། །ཚ་བའི་སེམས་ཅན་དམྱལ་བ་ཡང་གྲང་བའི་རླུང་ཅུང་ཟད་ཙམ་དང་ཕྲད་པས་དེ་ཡང་བདེ་བ་ཞེས་བྱའོ། །
འཚོ་བའི་སེམས་ཅན་དམྱལ་བ་ཡང་ཤི་ནས་སོས་ཞེས་བྱ་བའི་སྒྲ་ཐོས་པས་དེ་མ་ཐག་ཏུ་འཚོའོ། །མཚམས་མེད་པའི་སེམས་ཅན་དམྱལ་བ་ནི་དེ་ལྟ་བུའི་བག་མེད་དོ། །རྒྱལ་པོ་ཆེན་པོ་མཚམས་མེད་པའི་སེམས་ཅན་དམྱལ་བ་ལ་ཕྱོགས་བཞིན་སྒོ་རེ་རེ་ཡོད་དོ། །སྒོ་དེ་རེ་རེའི་ཕྱི་
རོལ་ན་མེ་ཆེན་པོ་ཡོད་དེ། ལྷོ་བྱང་ཤར་ནུབ་ཐལ་བྱུང་དུ་འབར་རོ། །དཔག་ཚད་བརྒྱད་ཁྲི་ཁོ་ར་ཁོར་ཡུག་ཏུ་ལྕགས་ཀྱི་རིས་བསྐོར་ཏེ། སྟེང་ཡང་ལྕགས་ཀྱི་དྲ་བས་བླ་རེ་བྲེས་ནས་ས་གཞི་ཡང་ལྕགས་ལས་བྱས་སོ། །སྟེང་གི་མེ་ཡང་འོག་ཏུ་ཐལ། འོག་གི་མེ་ཡང་སྟེང་དུ་
ཐལ་བྱུང་དུ་འབར་རོ། །རྒྱལ་པོ་ཆེན་པོ་སླ་ངའི་ཐོག་ཏུ་ཉ་བཞག་ན་ཚིག་པ་དང་འདྲ་བར་དེ་ན་གནས་པའི་མི་ཡང་དེ་དང་འདྲའོ། །རྒྱལ་པོ་ཆེན་པོ་མཚམས་མེད་པ་གཅིག་བྱས་ན་མཚམས་མེད་པ་གཅིག་མྱོང་ངོ་། །མཚམས་མེད་པ་གཉིས་བྱས་ན་ཉིས་འགྱུར་མྱོང་ངོ་། །
མཚམས་མེད་པ་ལྔར་བྱས་ན་ལྔ་འགྱུར་མྱོང་བར་འགྱུར་རོ། །རྒྱལ་པོ་ཆེན་པོ་བདག་གིས་ནི་རྒྱལ་པོའི་ཁ་ན་མ་ཐོ་བའི་ལས་འདིས་གདོན་མི་ཟ་བར་མི་ཐར་བར་ཤེས་ཀྱིས་རྒྱལ་པོ་ཆེན་པོ་དེ་བཞིན་གཤེགས་པ་གང་ན་བཞུགས་པར་མྱུར་དུ་བཞུད་ཅིག །སངས་རྒྱས་བཅོམ་
ལྡན་འདས་མ་གཏོགས་པར་གཞན་སུས་ཀྱང་སྐྱབས་སུ་འགྱུར་བ་མེད་དེ། ཁོ་བོ་ནི་ཁྱོད་ལ་སྙིང་བརྩེ་བའི་ཕྱིར་འདི་སྐད་ཅེས་བསྐུལ་བ་ཡིན་ནོ། །དེའི་ཚེ་རྒྱལ་པོ་ཆེན་པོས་དེ་སྐད་ཅེས་གྲགས་པའི་ཚིག་ཐོས་ནས་ཤིན་ཏུ་འཇིགས་དངངས་ཏེ་སྐྱི་བུང་ཞེས་བྱེད་ནས་ལུས་ཀྱི་

ཡན་ལག་ལྔ་ཡང་ཆུ་ཤིང་ལྟ་བུར་གཡོས་ནས་ཡར་བལྟས་ཏེ། འདི་སྐད་དུ་སྨྲ་བ། གཟུགས་ནི་མ་མཐོང་གི་སྐད་འབའ་ཞིག་གྲག་པ་འདི་སུ་ཡིན་ཞེས་སྨྲས་སོ། །རྒྱལ་པོ་ཆེན་པོ་ཁོ་བོ་ནི་ཁྱོད་ཀྱི་ཕ་གཟུགས་ཅན་སྙིང་པོ་ཡིན་གྱིས། ཁྱོད་འཚོ་བྱེད་ཀྱི་ཚིག་ཉོན་ཅིག །ངན་
པར་ལྟ་བ་སྟོན་པ་དྲུག་གི་ཚིག་ནི་མ་ཡིན་ནོ། །རྒྱལ་པོས་དེ་སྐད་ཅེས་གྲག་པའི་ཚིག་ཐོས་མ་ཐག་ཏུ་བརྒྱལ་ནས་ས་ལ་འགྱེལ་ཏེ། ལུས་ཀྱི་འབྲུམ་བུ་ཡང་སྐྱེས་ནས་སྔ་མ་ལས་ལྷག་པར་མནམ་ཞིང་བཙོག་པར་གྱུར་ཏེ། བསིལ་སྨན་གྱིས་བསྐུས་ཀྱང་འབྲུམ་བུ་ལྷག་པར་
ཚ་བར་གྱུར་གྱི་འཚོ་བ་ནི་མེད་དོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་བདུན་པ། དེའི་ཚེ་ན་བཅོམ་ལྡན་འདས་སྟོན་པ་ཐུགས་རྗེ་ཆེན་པོ་རྒྱལ་པོ་མ་སྐྱེས་དགྲའི་ཕྱིར་ཟླ་བ་ལྟ་བུའི་ཏིང་ངེ་འཛིན་ལ་ཞུགས་སོ། །ཏིང་
ངེ་འཛིན་ལ་ཞུགས་ནས་འོད་ཟེར་ཆེན་པོ་བཏང་ངོ་། །འོད་ཆེན་པོ་ཤིན་ཏུ་སིམ་པ་དེས་རྒྱལ་པོའི་ལུས་ལ་རེག་ནས་ལུས་ཀྱི་འབྲུམ་བུ་སོས་ཏེ་ཚ་བས་གདུངས་པ་ཡང་ཡེ་ཞི་བར་གྱུར་ཏོ། །རྒྱལ་པོས་འབྲུམ་བུ་སོས་ཤིང་ལུས་ཀྱི་ཡན་ལག་བསིལ་བར་ཚོར་ནས་འཚོ་བྱེད་ལ་འདི་སྐད་
ཅེས་སྨྲས་སོ། །སྔོན་མཁས་པ་དག་འདི་སྐད་ཅེས་ཟེར་རོ། །བསྐལ་པ་ཟད་དུ་ཉེ་བ་ན། ཟླ་བ་གསུམ་ཅིག་ཅར་འབྱུང་སྟེ། དེའི་ཚེ་ན་སེམས་ཅན་ཐམས་ཅད་ཀྱི་ན་བ་དང་སྡུག་བསྔལ་ཀུན་ཞི་བར་འགྱུར་རོ། །དེའི་དུས་ལ་ད་དུང་མ་བབ་པར་འོད་འདི་ག་ལས་བྱུང་ན་ངའི་
ལུས་ལ་རེག་ནས་འབྲུམ་བུའི་སྡུག་བསྔལ་བྱང་ཞིང་ལུས་བདེ་བར་གྱུར། འཚོ་བྱེད་ཀྱིས་སྨྲས་པ། འདི་ནི་བསྐལ་པ་ཟད་དུ་ཉེ་བའི་ཚེ་ཟླ་བ་གསུམ་ཅིག་ཅར་བྱུང་བ་མ་ཡིན། མེ་དང་ཉི་མ་དང་སྐར་མ་དང་སྨན་དང་། ནོར་བུ་རིན་པོ་ཆེ་དང་ལྷའི་འོད་ཀྱང་མ་ཡིན་ནོ། །རྒྱལ་པོས་ཡང་
སྨྲས་པ། ཟླ་བ་གསུམ་དང་ནོར་བུ་རིན་པོ་ཆེ་ལ་སོགས་པའི་འོད་མ་ཡིན་ན། འོ་ན་འདི་སུའི་འོད། སྨྲས་པ། རྒྱལ་པོ་འདི་ནི་ལྷའི་ལྷས་བཏང་བའི་འོད་ཡིན་པར་རིག་པར་བྱའོ། །འོད་འདི་ནི་རྩ་བ་མེད། མཐར་ཐུག་པ་མ་ཡིན། ཚ་བ་མ་ཡིན། གྲང་བ་མ་ཡིན། རྟག་པ་མ་ཡིན།

འགོག་པ་མ་ཡིན། གཟུགས་མ་ཡིན། གཟུགས་མེད་པ་མ་ཡིན། མཚན་ཉིད་མ་ཡིན། མཚན་ཉིད་མེད་པ་མ་ཡིན། སྔོན་པོ་མ་ཡིན། སེར་པོ་མ་ཡིན། དམར་པོ་མ་ཡིན། དཀར་པོ་མ་ཡིན་ཏེ། སེམས་ཅན་སྒྲོལ་བའི་ཕྱིར་མཐོང་བ་དང་། མཚན་
ཉིད་བརྗོད་དུ་ཡོད་པ་དང་། རྩ་བ་ཡོད་པ་དང་། མཐའ་ཡོད་པ་དང་། ཚ་བ་ཡོད་པ་དང་། གྲང་བ་ཡོད་པ་དང་། སྔོན་པོ་དང་། སེར་པོ་དང་དམར་པོ་དང་དཀར་པོ་ཡང་ཡོད་དོ། །རྒྱལ་པོ་ཆེན་པོ་དེ་ལྟར་མོད་ཀྱི། འོད་དེ་ནི་ཡང་དག་པར་ན་བརྗོད་དུ་མེད། མཐོང་བ་མ་ཡིན་པ་
ནས། སྔོན་པོ་དང་། སེར་པོ་དང་དམར་པོ་དང་། དཀར་པོའི་བར་དུ་མེད་དོ། །རྒྱལ་པོས་འཚོ་བྱེད་ལ་སྨྲས་པ། ལྷའི་ལྷ་དེ་ཅིའི་རྒྱུ་ཅིའི་རྐྱེན་གྱིས་འོད་འདི་བཏང་བར་གྱུར། སྨྲས་པ། རྒྱལ་པོ་ཆེན་པོ་དེང་གི་ལྟས་འདི་ནི་རྒྱལ་པོ་ལ་དགོངས་པའི་ཕྱིར་བཏང་བ་འདྲའོ། །རྒྱལ་པོས་
སྔར་འདི་སྐད་དུ་འཇིག་རྟེན་ན་སྨན་པ་མཁས་པ་ལུས་དང་སེམས་ཀྱི་ནད་གསོ་ནུས་པ་མེད་དོ་ཞེས་བྱས་པས་དེའི་ཕྱིར་འོད་འདི་བཏང་ནས་སྔར་རྒྱལ་པོའི་ལུས་གསོས་ཏེ། དེ་ནས་སེམས་ཀྱང་གསོ་བར་མཛད་དོ། །རྒྱལ་པོས་ཡང་འཚོ་བྱེད་ལ་སྨྲས་པ། བཅོམ་ལྡན་འདས་དེ་བཞིན་
གཤེགས་པས་བདག་ལ་དགོངས་སམ། འཚོ་བྱེད་ཀྱིས་སྨྲས་པ། དཔེར་ན་མི་ཞིག་ལ་བུ་བདུན་ཡོད་དེ། བདུན་ལས་གཅིག་ནད་ཀྱིས་བཏབ་ན། ཕ་མས་བུ་དེ་དག་ལ་མི་སྙོམས་པ་མ་ཡིན་ཏེ། འོན་ཀྱང་བུ་ན་བ་དེ་ལ་ཆེར་སེམས་སོ། །རྒྱལ་པོ་ཆེན་པོ་དེ་བཞིན་གཤེགས་པ་ཡང་
དེ་དང་འདྲ་སྟེ། སེམས་ཅན་ཐམས་ཅད་ལ་ཐུགས་མི་སྙོམས་པ་མ་ལགས་མོད་ཀྱི། སྡིག་པ་ཅན་ལ་ལྷག་པར་དགོངས་སོ། །ལེ་ལོ་ཅན་ལ་ནི་སངས་རྒྱས་ཐུགས་བརྩེ་བར་དགོངས་སོ། །ལེ་ལོ་མེད་པ་ལ་ནི་ཐུགས་བཏང་སྙོམས་སུ་འཇོག་གོ། །དེ་ལ་ལེ་ལོ་མེད་པ་གང་ཞེ་ན།
འདི་ལྟ་སྟེ། བྱང་ཆུབ་སེམས་དཔའ་ས་དྲུག་ལ་གནས་པ་དག་གོ། །རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་ནི་སེམས་ཅན་གྱི་རིགས་དང་། རྒན་པ་དང་གཞོན་ནུ་དང་དར་ལ་བབ་པ་དང་། དབུལ་པོ་དང་ཕྱུག་པོ་དང་། དུས་དང་ཉི་མ་དང་ཟླ་བ་དང་། སྐར་

མ་དང་བཟོ་དང་། རིགས་ངན་དང་བྲན་ཕོ་དང་། བྲན་མོར་མི་རྟོག་སྟེ། སེམས་ཅན་གང་དགེ་བའི་སེམས་ཡོད་པ་འབའ་ཞིག་ལ་རྟོག་པས་དགེ་བའི་སེམས་ཡོད་ན་བྱམས་པའི་ཐུགས་ཀྱིས་དགོངས་སོ། །རྒྱལ་པོ་ཆེན་པོ་འོད་ཀྱི་ལྟས་འདི་ནི་དེ་བཞིན་གཤེགས་པ་ཟླ་བ་ལྟ་བུའི་
ཏིང་ངེ་འཛིན་ལ་སྙོམས་པར་ཞུགས་ནས་བཏང་བའི་འོད་ཡིན་པར་རིག་པར་བྱའོ། །རྒྱལ་པོས་དྲིས་པ། ཟླ་བ་ལྟ་བུའི་ཏིང་ངེ་འཛིན་ཅེས་བྱ་བ་ཇི་ལྟ་བུ་ཡིན། འཚོ་བྱེད་ཀྱིས་གསོལ་པ། དཔེར་ན་ཟླ་བའི་འོད་ནི་ཨུད་པ་ལའི་མེ་ཏོག་ཐམས་ཅད་ཁ་འབུས་ཤིང་གསལ་བར་བྱེད་དོ། །
དེ་བཞིན་དུ་ཟླ་བ་ལྟ་བུའི་ཏིང་ངེ་འཛིན་ཡང་སེམས་ཅན་ཐམས་ཅད་ཀྱི་དགེ་བའི་སེམས་ཁ་དབྱེ་ཞིང་འབུ་བར་མཛད་དེ། དེ་བས་ན་ཟླ་བ་ལྟ་བུའི་ཏིང་ངེ་འཛིན་ཅེས་བྱའོ། །རྒྱལ་པོ་ཆེན་པོ་དཔེར་ན་ཟླ་བའི་འོད་ནི་འགྲོན་པོ་ཐམས་ཅད་དགའ་བར་བྱེད་དོ། །དེ་བཞིན་དུ་ཟླ་བ་ལྟ་བུའི་ཏིང་ངེ་
འཛིན་ཡང་དེ་དང་འདྲ་སྟེ། མྱ་ངན་ལས་འདས་པའི་ལམ་བགྲོད་པ་དག་དགའ་བའི་སེམས་སྐྱེ་བར་བྱེད་དེ། དེ་བས་ན་ཟླ་བ་ལྟ་བུའི་ཏིང་ངེ་འཛིན་ཅེས་བྱའོ། །རྒྱལ་པོ་ཆེན་པོ་དཔེར་ན་ཟླ་བའི་འོད་ནི་ཐོག་མ་ཚེས་གཅིག་ནས་བཅོ་ལྔའི་བར་དུ་དབྱིབས་དང་འོད་ཀྱང་བགས་ཀྱིས་རྒྱས་
ཤིང་རྫོགས་པར་འགྱུར་རོ། །དེ་བཞིན་དུ་ཟླ་བ་ལྟ་བུའི་ཏིང་ངེ་འཛིན་ཀྱང་སེམས་དང་པོ་བསྐྱེད་པའི་དགེ་བའི་རྩ་བ་རྣམས་བགས་ཀྱིས་སྐྱེ་ཞིང་རྒྱས་པར་བྱེད་པ་ནས། ཡོངས་སུ་མྱ་ངན་ལས་འདས་པ་ཆེན་པོའི་བར་ཡོངས་སུ་རྫོགས་པར་བྱེད་དེ། དེ་བས་ན་ཟླ་བ་ལྟ་བུའི་ཏིང་ངེ་
འཛིན་ཅེས་བྱའོ། །རྒྱལ་པོ་ཆེན་པོ་དཔེར་ན་ཟླ་བའི་འོད་ཚེས་བཅུ་དྲུག་ནས་སུམ་ཅུ་ལ་ཐུག་ན། དབྱིབས་དང་ཁ་དོག་དང་འོད་དང་སྣང་བ་བགས་ཀྱིས་འབྲི་ཞིང་ཆུང་བར་འགྱུར་རོ། །དེ་བཞིན་དུ་ཟླ་བ་ལྟ་བུའི་ཏིང་ངེ་འཛིན་གྱི་འོད་ཀྱིས་གར་སྣང་བའི་གནས་དེར་ཉོན་མོངས་པ་ཐམས་ཅད་
བགས་ཀྱིས་འབྲི་ཞིང་ཆུང་བར་འགྱུར་ཏེ།